Kinh tạng Tây Tạng (Kangyur Đại Học) — 040_དཀོན་བརྩེགས།_ཁ

་བ་དང་། སྣ་དང་། ལྕེ་དང་།
ལུས་དང་། ཡིད་ཀྱི་བར་དུ་ཀུན་ཏུ་འབར་ཏེ། ཅིས་ཀུན་ཏུ་འབར་ཞེ་ན། འདོད་ཆགས་ཀྱི་མེ་དང་། ཞེ་སྡང་གི་མེ་དང་། གཏི་མུག་གི་མེ་དང་། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་
དང་། འཁྲུག་པས་ཀུན་ཏུ་འབར་ཏེ། བདག་གིར་བྱ་བ་སྡུག་བསྔལ་ལོ་ཞེས་བཤད་དོ། །ཁྱིམ་བདག་རྣམས་གཟུགས་ཀུན་ཏུ་འབར་ཏེ། ཅིས་ཀུན་ཏུ་འབར་ཞེ་ན། འདོད་ཆགས་ཀྱི་མེ་དང་། ཞེ་སྡང་གི་མེ་དང་། གཏི་མུག་གི་མེས་ཀུན་ཏུ་འབར་རོ། །དེ་ལྟར་སྒྲ་དང་། དྲི་
དང་། རོ་དང་། རེག་བྱ་དང་། ཆོས་རྣམས་ཀྱང་གོང་མ་བཞིན་དུ་སྦྱར་རོ། །ཁྱིམ་བདག་རྣམས་གཟུགས་ཀྱི་ཕུང་པོ་ཀུན་ཏུ་འབར་ཏེ། ཅིས་ཀུན་ཏུ་འབར་ཞེ་ན། འདོད་ཆགས་ཀྱི་མེ་དང་། ཞེ་སྡང་གི་མེ་དང་། གཏི་མུག་གི་མེས་ཀུན་ཏུ་འབར་རོ། །ཚོར་བའི་ཕུང་པོ་དང་།

འདུ་ཤེས་ཀྱི་ཕུང་པོ་དང་། འདུ་བྱེད་ཀྱི་ཕུང་པོ་དང་། རྣམ་པར་ཤེས་པའི་ཕུང་པོ་ཡང་དེ་བཞིན་ནོ། །ཁྱིམ་བདག་རྣམས་སའི་ཁམས་ཀུན་ཏུ་འབར་ཏེ། ཅིས་ཀུན་ཏུ་འབར་ཞེ་ན། འདོད་ཆགས་ཀྱི་མེ་དང་། ཞེ་སྡང་གི་མེ་དང་། གཏི་མུག་གི་མེས་ཀུན་ཏུ་འབར་རོ། །ཁྱིམ་
བདག་རྣམས་ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་ཀུན་ཏུ་འབར་ཏེ། ཅིས་ཀུན་ཏུ་འབར་ཞེ་ན། འདོད་ཆགས་ཀྱི་མེ་དང་། ཞེ་སྡང་གི་མེ་དང་། གཏི་མུག་གི་མེས་ཀུན་ཏུ་འབར་རོ། །སྐྱེ་བ་དང་། རྒ་བ་དང་། ན་བ་དང་། འཆི་
བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པས་ཀུན་ཏུ་འབར་ཏེ། བདག་གིར་བྱ་བ་སྡུག་བསྔལ་ལོ་ཞེས་བཤད་དོ། །དེ་བས་ན་ཁྱིམ་བདག་རྣམས་མིག་བླང་བར་མི་བྱའོ། །ཞེས་ཁྱིམ་བདག་རྣམས་དེ་ལྟར་བསླབ་
པར་བྱའོ། །དེ་བཞིན་དུ་ཁྱིམ་བདག་རྣམས་རྣ་བ་དང་། སྣ་དང་། ལྕེ་དང་། ལུས་དང་། ཡིད་བླང་བར་མི་བྱའོ་ཞེས་དེ་ལྟར་བསླབ་པར་བྱའོ། །དེ་བས་ན་ཁྱིམ་བདག་རྣམས་གཟུགས་བླང་བར་མི་བྱ། སྒྲ་དང་། དྲི་དང་། རོ་དང་། རེག་བྱ་དང་། ཆོས་བླང་བར་མི་བྱའོ་ཞེས་
དེ་ལྟར་བསླབ་པར་བྱའོ། །ཁྱིམ་བདག་རྣམས་གཟུགས་ཀྱི་ཕུང་པོ་བླང་བར་མི་བྱ། ཚོར་བའི་ཕུང་པོ་དང་། འདུ་ཤེས་ཀྱི་ཕུང་པོ་དང་། འདུ་བྱེད་ཀྱི་ཕུང་པོ་དང་། རྣམ་པར་ཤེས་པའི་ཕུང་པོ་བླང་བར་མི་བྱའོ། །ཞེས་དེ་ལྟར་བསླབ་པར་བྱའོ། །དེ་བས་ན་ཁྱིམ་བདག་རྣམས་
སའི་ཁམས་བླང་བར་མི་བྱ། ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་བླང་བར་མི་བྱའོ་ཞེས་དེ་ལྟར་བསླབ་པར་བྱའོ། །དེ་བས་ན་ཁྱིམ་བདག་རྣམས་རྣམ་པར་ཤེས་པའི་ཁམས་བླང་བར་མི་བྱའོ་ཞེས་དེ་ལྟར་བསླབ་པར་བྱའོ། །དེ་བས་ན་
ཁྱིམ་བདག་རྣམས་འཇིག་རྟེན་འདི་བླང་བར་མི་བྱ། འཇིག་རྟེན་ཕ་རོལ་བླང་བར་མི་བྱའོ་ཞེས་ཁྱིམ་བདག་རྣམས་དེ་ལྟར་བསླབ་པར་བྱའོ། །ཁྱིམ་བདག་ཁྱེད་རྣམས་ནམ་མིག་མི་ལེན་ཅིང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་མི་ལེན་པ་དེ་ན་ཁྱེད་རྣམས་མིག་ནས་ཡིད་ཀྱི་

བར་ལ་མི་གནས་པར་འགྱུར་རོ། །ཁྱིམ་བདག་ཁྱེད་རྣམས་ནམ་གཟུགས་མི་ལེན་ཅིང་། སྒྲ་དང་། དྲི་དང་། རོ་དང་། རེག་བྱ་དང་། ཆོས་རྣམས་མི་ལེན་པ་དེ་ན་ཁྱེད་རྣམས་ཆོས་ཐམས་ཅད་ལ་མི་གནས་པར་འགྱུར་རོ། །ཁྱིམ་བདག་ཁྱེད་རྣམས་ནམ་གཟུགས་ཀྱི་
ཕུང་པོ་མི་ལེན་ཅིང་ཚོར་བའི་ཕུང་པོ་དང་། འདུ་ཤེས་ཀྱི་ཕུང་པོ་དང་། འདུ་བྱེད་ཀྱི་ཕུང་པོ་མི་ལེན་པ་དེ་ན་ཁྱེད་རྣམས་ཕུང་པོ་རྣམས་ལ་མི་གནས་པར་འགྱུར་རོ། །ཁྱིམ་བདག་ཁྱེད་རྣམས་རྣམ་པར་ཤེས་པའི་ཕུང་པོ་མི་ལེན་པ་དེ་ན་ཁྱེད་རྣམས་རྣམ་པར་ཤེས་པའི་ཕུང་པོ་ལ་མི་གནས་
པར་འགྱུར་རོ། །ཁྱིམ་བདག་ཁྱེད་རྣམས་ནམ་སའི་ཁམས་མི་ལེན་ཅིང་ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་མི་ལེན་པ་དེ་ན་ཁྱེད་རྣམས་ཁམས་རྣམས་ལ་མི་གནས་པར་འགྱུར་རོ། །ཁྱིམ་བདག་ཁྱེད་རྣམས་ནམ་རྣམ་པར་ཤེས་པའི་
ཁམས་མི་ལེན་པ་དེ་ན་ཁྱེད་རྣམས་རྣམ་པར་ཤེས་པའི་ཁམས་ལ་མི་གནས་པར་འགྱུར་རོ། །ཁྱིམ་བདག་ཁྱེད་རྣམས་ནམ་འཇིག་རྟེན་འདི་མི་ལེན་ཅིང་འཇིག་རྟེན་ཕ་རོལ་མི་ལེན་པ་དེ་ན་ཁྱེད་རྣམས་འཇིག་རྟེན་ཐམས་ཅད་ལ་མི་གནས་པར་འགྱུར་རོ། །ཁྱིམ་བདག་ཁྱེད་རྣམས་ནམ་ཆོས་
ཐམས་ཅད་མི་ལེན་པ་དེ་ན་ཁྱེད་རྣམས་ཆོས་ཐམས་ཅད་ལ་མི་གནས་པར་འགྱུར་རོ། །ཁྱིམ་བདག་ཁྱེད་རྣམས་ནམ་ཆོས་ཐམས་ཅད་ལ་མི་གནས་པ་དེ་ན་ཁྱེད་རྣམས་མི་འབྱུང་མི་འཇིག་གོ །ཁྱེད་རྣམས་ནམ་མི་འབྱུང་མི་འཇིག་པ་དེ་ན་ཁྱེད་རྣམས་སྐྱེ་བ་དང་། རྒ་བ་དང་། ན་བ་དང་།
འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་ལས་ཡོངས་སུ་ཐར་བར་འགྱུར་ཏེ། སྡུག་བསྔལ་ལས་ཡོངས་སུ་ཐར་བར་འགྱུར་རོ་ཞེས་བཤད་དོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་རྒྱ་ཆེར་བསྟན་པའི་
ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །སྐྱེ་བ་དང་ནི་འཆི་བ་ཡིས། །འཇིག་རྟེན་འདི་ཀུན་ཀུན་ནས་འབར། །བྱིས་པ་སྐྱབས་མེད་གཙེ་བ་སྟེ། །དེ་དག་འཕགས་པའི་ལམ་ལས་ཉམས། །བརྒྱ་ལམ་འཇིག་རྟེན་སྣང་མཛད་པ། །དེ་བཞིན་གཤེགས་པ་འབྱུང་

བར་འགྱུར། །དལ་བ་ཆུད་ཟོས་མ་བྱེད་པར། །བརྩོན་འགྲུས་བརྟན་པ་ཙམ་བྱོས་ཤིག །གང་ལ་གནས་ཏེ་རྣམ་སྒོམ་པ། །ཤེས་རབ་ཀྱིས་ནི་དེ་ཡང་ལྟོས། །ཤེས་རབ་ཀྱིས་ནི་དེ་མཐོང་སྟེ། །རྣམ་པ་གཞན་དུ་མི་འགྱུར་རོ། །གང་ལ་གནས་ཏེ་སེམས་སྒོམ་པ། །ཐམས་ཅད་
སྟོང་པར་ཤེས་པར་བྱ། །ཆོས་རྣམས་སྟོང་པར་རིག་ནས་ནི། །བྱང་ཆུབ་ཉིད་ཀྱང་སྟོང་པ་ཡིན། །འདོད་ཆགས་ཞེ་སྡང་དེ་བཞིན་གཏི་མུག་དང་། །མེ་གསུམ་དེ་དག་ཤིན་ཏུ་མི་བཟད་པ། །དེས་ནི་འཇིག་རྟེན་འདི་ཀུན་རབ་འབར་ཡང་། །བྱིས་པ་རིང་ནས་གཉིད་ལོག་ཁོང་མི་ཆུད། །
སྐྱེ་དང་རྒ་དང་ན་དང་འཆི་བ་དང་། །སྨྲེ་སྔགས་འདོན་དང་སྡུག་བསྔལ་ཡིད་མི་བདེས། །འཇིག་རྟེན་འདི་དག་གཙེས་པར་རིག་ནས་ནི། །ཆོས་རྣམས་ཀུན་ལ་གནས་པར་མ་བྱེད་ཅིག །དེ་ནས་བཅོམ་ལྡན་འདས་ལ་ཁྱིམ་བདག་ལྔ་བརྒྱ་ཙམ་པོ་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་
འདས་བདག་ཅག་རྣམས་ཀྱིས་བཅོམ་ལྡན་འདས་ལས་རབ་ཏུ་བྱུང་བ་རྙེད་པར་གྱུར་ཅིག །བདག་ཅག་རྣམས་ཀྱིས་བདེ་བར་གཤེགས་པ་ལས་བསྙེན་པར་རྫོགས་པ་དགེ་སློང་གི་དངོས་པོ་རྙེད་པར་གྱུར་ཅིག །བཅོམ་ལྡན་འདས་ཀྱིས་དགེ་སློང་དག་ཚུར་ཤོག་ཅེས་གསུངས་པ་དང་། དེ་ཉིད་
ཀྱིས་ཚེ་དང་ལྡན་པ་དེ་དག་རབ་ཏུ་བྱུང་བར་གྱུར་ཏེ། དེ་ཉིད་ཀྱིས་བསྙེན་པར་རྫོགས་པ་དང་། དེ་ཉིད་ཀྱིས་དགེ་སློང་གི་དངོས་པོར་གྱུར་ཏོ། །འདི་ལ་ཆོས་ཉིད་ནི་འདི་ཡིན་ཏེ་དེ་ལ་འདི་སྐད་ཅེས་བྱའོ། །དེ་དག་གིས་ནི་ངུར་སྨྲིག་བགོས། །དེ་དག་གིས་ནི་སྐྲ་ཡང་བྲེགས། །ཀུན་ཀྱང་ལྷུང་བཟེད་
ཐོགས་གྱུར་ནས། །དེ་ཉིད་དུ་ནི་དགྲ་བཅོམ་གྱུར། །སྟོན་པས་དགྲ་བཅོམ་རབ་མཁྱེན་ནས། །དགེ་སློང་གི་ནི་དགེ་འདུན་དང་། །ལྷ་རྣམས་མདུན་དུ་མངོན་སུམ་དུ། །ཆེད་དུ་རྗོད་པ་ཆེད་དུ་རྗོད། །འཇིག་རྟེན་གྱི་ནི་མགོན་པོ་ལ། །སྔོན་ཆད་སྦྱིན་པ་བྱིན་པས་ན། །གང་ན་བདེ་བ་མང་
བ་དེར། །ཤིན་ཏུ་དགའ་ཞིང་འོངས་པར་གྱུར། །དེ་དག་གིས་ནི་ང་མཐོང་ནས། །དད་པས་རབ་ཏུ་སྐྱེད་པར་གྱུར། །དེ་དག་སེམས་ནི་དང་བ་ལ། །ཆོས་རྣམས་ཀྱི་ནི་མཆོག་བསྟན་ཏོ། །དགྲ་བཅོམ་གྱི་ནི་གསུངས་ཐོས་ནས། །བདག་ཏུ་ལྟ་བ་རྣམ་པར་བཤིག །སྟོང་ཉིད་མངོན་དུ་བྱས་

ནས་ནི། །དེ་དག་སྐྱེ་བ་ཀུན་ལས་གྲོལ། །ཁྱིམ་བདག་གི་ལེའུ་ཞེས་བྱ་སྟེ་དང་པོའོ།། །།དེ་ནས་བཅོམ་ལྡན་འདས་ཀྱིས་ལམ་གྱི་བར་དུ་ཁྱིམ་བདག་ལྔ་བརྒྱ་ཙམ་པོ་མི་གཡོ་བའི་གནས་ལ་བཀོད་ནས་ཀུན་ནས་མཛེས་པས་རྒྱལ་པོའི་ཁབ་ཀྱི་གྲོང་ཁྱེར་ཆེན་
པོར་གཤེགས་སོ། །དེ་ནས་རྒྱལ་པོའི་ཁབ་ཀྱི་གྲོང་ཁྱེར་གྱི་ལྷ་རྣམས་དང་། གནོད་སྦྱིན་ཅི་འཇིགས་འདི་སྙམ་དུ་སེམས་ཏེ། བདག་ཅག་གིས་འདི་ལྟ་བུ་སྦྱིན་གནས་འཇིག་རྟེན་ན་ཤིན་ཏུ་དཀོན་པའི་བཅོམ་ལྡན་འདས་ལ་བསོད་སྙོམས་དབུལ་ལོ་སྙམ་མོ། །དེ་ནས་གནོད་སྦྱིན་ཅི་འཇིགས་
ཀྱིས་བསོད་སྙོམས་ཁ་དོག་ཕུན་སུམ་ཚོགས་པ། དྲི་ཕུན་སུམ་ཚོགས་པ། རོ་ཕུན་སུམ་ཚོགས་པ། རེག་པ་ཕུན་སུམ་ཚོགས་པ་བཅོམ་ལྡན་འདས་ལ་ཕུལ་ནས་གནོད་སྦྱིན་ཅི་འཇིགས་ལ་ཐུགས་བརྩེ་བའི་སླད་དུ་བཅོམ་ལྡན་འདས་ཀྱིས་བསོད་སྙོམས་དེ་བཞེས་སོ། །བཅོམ་ལྡན་འདས་
ལ་གནོད་སྦྱིན་ཅི་འཇིགས་ཀྱིས་བསོད་སྙོམས་ཕུལ་མ་ཐག་ཏུ་དེ་ནས་དེའི་ཚེ་སྟེང་གི་བར་སྣང་ལས་ཅི་འཇིགས་ཀྱི་འཁོར་མང་པོ་གནོད་སྦྱིན་དྲུག་ཁྲི་བརྒྱད་སྟོང་གིས་ལེགས་སོ་ཞེས་བྱ་བ་བྱིན་ཏེ། རྗེས་སུ་ཡི་རང་བའི་སྒྲ་ཕྱུང་ངོ་། །དེ་ནས་དེའི་ཕྱིར་གནོད་སྦྱིན་ཅི་འཇིགས་ཀྱིས་རང་གི་འཁོར་
རྣམས་ལ་བོས་ཏེ། བདག་གིས་ནི་ད་གཟོད་དེ་བཞིན་གཤེགས་པ་ལ་བསོད་སྙོམས་ཕུལ་གྱིས། ཁྱེད་ཀྱིས་ནི་དགེ་སློང་གི་དགེ་འདུན་རྣམས་ལ་ཕུལ་ཅིག །དེ་ནི་ཁྱེད་རྣམས་ཀྱི་ཡུན་རིང་པོའི་དོན་དང་། ཕན་པ་དང་བདེ་བར་འགྱུར་རོ། །གནོད་སྦྱིན་རྣམས་ཀྱིས་དགེ་སློང་གི་དགེ་
འདུན་ལ་བསོད་སྙོམས་ཕུལ་ནས་གནོད་སྦྱིན་དེ་དག་ལ་སྙིང་བརྩེ་བའི་ཕྱིར་དགེ་སློང་གི་དགེ་འདུན་གྱིས་ཀྱང་བསོད་སྙོམས་བླངས་སོ། །དེ་ནས་བཅོམ་ལྡན་འདས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་གཤེགས་པ་ལས་དེས་བསོད་སྙོམས་བླངས་པར་མཁྱེན་ནས་ཕྱོགས་དེ་ནས་སླར་
ལོག་གོ །དེ་ལྟར་དེའི་ཚེ་ལྷ་སྟོང་ཕྲག་དུ་མ་དང་། ཀླུ་སྟོང་ཕྲག་དུ་མ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་སྟོང་ཕྲག་དུ་མ་དང་། མི་དང་མི་མ་ཡིན་པ་སྟོང་ཕྲག་དུ་མ་དང་། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་

ཕྲག་དུ་མ་རྣམས་བཅོམ་ལྡན་འདས་གཤེགས་པའི་ཞབས་འབྲིང་དུ་དོང་ངོ་། །དེ་ནས་བཅོམ་ལྡན་འདས་ས་ཕྱོགས་ཡངས་ཤིང་རྒྱ་ཆེ་བ་ཞིག་ཏུ་གཤེགས་ཏེ་བྱོན་ནས་གདན་བཤམས་པ་ལ་བཞུགས་སོ། །དེ་ནས་གནོད་སྦྱིན་ཅི་འཇིགས་འཁོར་དང་བཅས་པས་ལྷའི་མེ་ཏོག་
མན་དཱ་ར་དང་། ཨུད་པ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དང་། ལྷའི་ཙན་དན་གྱི་ཕྱེ་མ་བླངས་ཏེ། བཅོམ་ལྡན་འདས་ལ་མཆོད་པ་བྱ་བའི་ཕྱིར་བཅོམ་ལྡན་འདས་ལ་གཏོར། མངོན་པར་གཏོར། མངོན་པར་རབ་ཏུ་གཏོར་ཏོ། །གཏོར་མངོན་པར་གཏོར།
མངོན་པར་རབ་ཏུ་གཏོར་ནས་ཐལ་མོ་སྦྱར་ཏེ་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔར་འདུག་གོ །དེ་ནས་བཅོམ་ལྡན་འདས་ཀྱིས་གནོད་སྦྱིན་ཅི་འཇིགས་ཀྱི་བསམ་པ་ཡང་མཁྱེན། དེའི་འཁོར་གནོད་སྦྱིན་མང་པོའི་བསམ་པ་ཡང་མཁྱེན་ནས་འཛུམ་པ་མཛད་དོ། །ཆོས་
ཉིད་ནི་འདི་ཡིན་ཏེ། ནམ་སངས་རྒྱས་བཅོམ་ལྡན་འདས་རྣམས་འཛུམ་པ་མཛད་པ་དེ་ན་ཞལ་གྱི་སྒོ་ནས་འོད་ཟེར་ཁ་དོག་དུ་མ་ཁ་དོག་སྣ་ཚོགས་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལེ་བརྒན་དང་། ཤེལ་དང་། དངུལ་གྱི་ཁ་དོག་ལྟ་བུ་བྱུང་སྟེ།
དེས་འཇིག་རྟེན་གྱི་ཁམས་མཐའ་ཡས་མུ་མེད་པ་སྣང་བས་ཁྱབ་པར་བྱས་ནས་ཉི་མ་དང་ཟླ་བའི་གཟི་བརྗིད་མེད་པར་བྱས་ཏེ། སེམས་ཅན་དམྱལ་བ་པའི་སེམས་ཅན་ནས་ཚངས་པའི་འཇིག་རྟེན་གྱི་བར་དུ་མངོན་པར་འཕགས་ཏེ། སླར་ལོག་ནས་བཅོམ་ལྡན་འདས་ལ་ལན་བདུན་བསྐོར་
བ་བྱས་ཏེ། ཁ་ཅིག་ནི་བཅོམ་ལྡན་འདས་ཀྱིས་དབུའི་གཙུག་ཏུ་ནུབ་བོ། །ཁ་ཅིག་ནི་ཕྲག་པར་ནུབ་བོ། །ཁ་ཅིག་ནི་པུས་མོར་ནུབ་བོ། །ཆོས་ཉིད་ནི་འདི་ཡིན་ཏེ། ནམ་སངས་རྒྱས་བཅོམ་ལྡན་འདས་རྣམས་སེམས་ཅན་དམྱལ་བ་པའི་སེམས་ཅན་རྣམས་ལ་ལུང་སྟོན་པ་དེ་ན་འོད་
ཟེར་ཞབས་གཉིས་ཀྱི་འོག་ཏུ་ནུབ་པར་འགྱུར་རོ། །ནམ་དུད་འགྲོའི་སྐྱེ་གནས་པའི་སེམས་ཅན་རྣམས་ལ་ལུང་སྟོན་པ་དེ་ན་འོད་ཟེར་སྣམ་ལོགས་སུ་ནུབ་པར་འགྱུར་རོ། །ནམ་གཤིན་རྗེའི་འཇིག་རྟེན་པའི་སེམས་ཅན་རྣམས་ལ་ལུང་སྟོན་པ་དེ་ན་འོད་ཟེར་མདུན་དུ་ནུབ་པར་འགྱུར་རོ། །

ནམ་མི་རྣམས་ལ་ལུང་སྟོན་པ་དེ་ན་འོད་ཟེར་གཡོན་དུ་ནུབ་པར་འགྱུར་རོ། །ནམ་ལྷ་རྣམས་ལ་ལུང་སྟོན་པ་དེ་ན་འོད་ཟེར་གཡས་སུ་ནུབ་པར་འགྱུར་རོ། །ནམ་ཉན་ཐོས་རྣམས་ལ་ལུང་སྟོན་པ་དེ་ན་འོད་ཟེར་པུས་མོར་ནུབ་པར་འགྱུར་རོ། །ནམ་རང་སངས་རྒྱས་རྣམས་
ལ་ལུང་སྟོན་པ་དེ་ན་འོད་ཟེར་ཕྲག་པར་ནུབ་པར་འགྱུར་རོ། །ནམ་སངས་རྒྱས་བཅོམ་ལྡན་འདས་རྣམས་ཀྱིས་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པ་དེ་ན་འོད་ཟེར་སྟེང་གི་དབུའི་གཙུག་གི་མཚམས་སུ་ནུབ་པར་འགྱུར་རོ། །ཚེ་དང་ལྡན་པ་
ཀུན་དགའ་བོས་བཅོམ་ལྡན་འདས་འཛུམ་པ་མཛད་པ་མཐོང་སྟེ། མཐོང་ནས་ཆོས་གོས་ཕྲག་པ་གཅིག་ཏུ་བགོས་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་ཚིགས་སུ་བཅད་པ་འདི་དག་གསོལ་
ཏོ། །ཅི་རྒྱུས་འཇིག་རྟེན་སྣང་མཛད་པ། །འཇིག་རྟེན་ཀུན་ལ་སྨན་པའི་སླད། །འཇིག་རྟེན་མགོན་པོ་འོད་མཛད་པ། །ཅི་ཞིག་སླད་དུ་འཛུམ་པ་བསྟན། །སངས་རྒྱས་ཀྱི་ནི་བྱང་ཆུབ་ཕྱིར། །དེ་རིང་སུ་ཡིས་ས་བོན་བཏབ། །དེ་རིང་སུ་ལ་ལུང་ཡང་སྟོན། །གང་ཞིག་ཐར་ཕྱིར་རབ་ཏུ་
ཞུགས། །དཔའ་བོ་རྣམ་པར་འདྲེན་པ་རྣམས། །རྒྱུ་མ་མཆིས་པར་འཛུམ་མི་མཛད། །ཐུབ་པ་ཅི་སླད་འཛུམ་པ་བསྟན། །འོད་ཟེར་དོན་ནི་བཤད་དུ་གསོལ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་ཚིགས་སུ་བཅད་པ་འདི་དག་གིས་སླར་གསུངས་པ། །
འཇིག་རྟེན་མགོན་པོ་སྐྱོབ་པ་ལ། །ཅི་འཇིགས་རབ་ཏུ་དད་སེམས་ཀྱིས། །བསོད་སྙོམས་དག་ནི་ཕུལ་བས་ན། །དེ་ལྟར་དེ་ཕྱིར་འཛུམ་པ་མཛད། །གནོད་སྦྱིན་འདི་ནས་ཤི་འཕོས་ནས། །སུམ་ཅུ་རྩ་གསུམ་འགྲོ་བར་འགྱུར། །སུམ་ཅུ་གསུམ་ནས་ཤི་འཕོས་ནས། །འཐབ་བྲལ་
དུ་ཡང་འགྲོ་བར་འགྱུར། །འཐབ་བྲལ་ནས་ནི་དགའ་ལྡན་འགྲོ། །འདོད་ལ་འདོད་པས་དགར་བྱས་ནས། །མི་ཡི་ནང་དུ་སྐྱེ་འགྱུར་ཏེ། །རྒྱལ་པོ་རྫུ་འཕྲུལ་ལྡན་པར་འགྱུར། །འཁོར་ལོས་སྒྱུར་བ་མི་ཡི་དབང་། །གླིང་བཞི་དག་གི་དབང་པོ་སྟེ། །མི་ཡི་འཇིག་རྟེན་ཤི་འཕོས་

ནས། །ཚངས་པའི་འཇིག་རྟེན་འགྲོ་བར་འགྱུར། །བསྐལ་པ་བྱེ་བ་ཉི་ཤུར་ནི། །རྟག་ཏུ་བསྟི་སྟང་བྱས་པར་འགྱུར། །ལྷ་ཡི་ནང་དང་མི་ནང་དུ། །ཡང་དང་ཡང་ནི་ཀུན་ཏུ་འགྲོ། །ཕྱིས་དེ་རྒྱལ་སྲིད་བོར་ནས་ནི། །ཁྱིམ་མེད་པར་ཡང་རབ་ཏུ་འབྱུང་། །རྐྱེན་གྱིས་བྱང་ཆུབ་
ཐོབ་འགྱུར་ཏེ། །དེར་ནི་མཐའ་ཡང་ཐུག་པར་འགྱུར། །གནོད་སྦྱིན་དག་ནི་སུམ་ཁྲི་རྣམས། །གནོད་སྦྱིན་སྐྱེ་གནས་འཕོས་གྱུར་ནས། །སུམ་ཅུ་རྩ་གསུམ་སྐྱེ་བར་འགྱུར། །སངས་རྒྱས་ལ་ནི་གུས་བྱས་ནས། །སངས་རྒྱས་བྱམས་པ་མཐོང་གྱུར་ཅིང་། །དེ་ན་མཐར་
ནི་ཐུག་འགྱུར་ཏེ། །དགྲ་བཅོམ་པ་ཡང་ཐོབ་འགྱུར་ན། །སྟོན་པ་ལ་ནི་སུ་མི་མཆོད། །གནོད་སྦྱིན་སྟོང་དུ་ཚང་བ་རྣམས། །བྱང་ཆུབ་མཆོག་ལ་རབ་ཞུགས་པས། །དེ་དག་དགེ་བའི་རྩ་བ་དེས། །ནམ་དུའང་ངན་འགྲོར་འགྲོ་མི་འགྱུར། །ཁ་ཅིག་སྲོག་ཆགས་ཀུན་ཕན་
ཕྱིར། །བྱང་ཆུབ་དམ་པ་རབ་ཚོལ་ཞིང་། །སངས་རྒྱས་འདྲེན་པ་སྟོང་རྣམས་ལ། །བཀུར་སྟི་དག་ནི་བྱེད་པར་འགྱུར། །ཁ་ཅིག་སངས་རྒྱས་བྱང་ཆུབ་ཕྱིར། །སྟོང་ཕྲག་གཉིས་དང་གསུམ་དག་ཀྱང་། །མེ་ཏོག་ཕྲེང་བ་དྲི་རྣམས་ཀྱིས། །མཆོད་པ་དག་ནི་བྱེད་པར་འགྱུར། །
དག་པ་བསྒོམས་པའི་བདག་ཉིད་ཅན། །འདྲེན་པ་བྱེ་བ་ཕྲག་སྟོང་ལ། །ཁ་ཅིག་བཀུར་སྟི་བྱེད་འགྱུར་ཏེ། །འདི་དག་ཕྱིས་ནི་བྱང་ཆུབ་རེག །དེ་ན་ཅི་འཇིགས་དེ་ཡི་བུ། །རི་བོ་ཞེས་བྱ་རྫུ་འཕྲུལ་ཆེ། །འཇིག་རྟེན་སངས་རྒྱས་བདག་གྱུར་ཅེས། །དེས་ཀྱང་སེམས་ནི་བསྐྱེད་པར་
གྱུར། །དེས་ནི་སངས་རྒྱས་བསྟི་སྟང་བྱས། །ཐམས་ཅད་དུ་ཡང་སྨོན་ལམ་བཏབ། །ང་མཐོང་ནས་ནི་མཆོད་བྱས་ཏེ། །བྱང་ཆུབ་ཕྱིར་ནི་སེམས་བཏུད་དོ། །དེ་ནི་དགེ་བའི་རྩ་བ་དེས། །ངན་འགྲོ་ཐམས་ཅད་སྤངས་གྱུར་ནས། །སངས་རྒྱས་བྱམས་པ་མཐོང་ནས་ནི། །
གདུགས་རྣམས་བྱེ་བ་འབུལ་བར་འགྱུར། །གདུགས་རྣམས་བྱེ་བ་ཕུལ་ནས་ནི། །ན་བཟའ་བྱེ་བ་འབུལ་བར་འགྱུར། །ན་བཟའ་བྱེ་བ་ཕུལ་ནས་ནི། །དེ་ཉིད་དུ་ཡང་རབ་ཏུ་འབྱུང་། །སྲོག་ཆགས་ཀུན་ལ་ཕན་པའི་ཕྱིར། །བྱང་ཆུབ་དམ་པ་རབ་ཚོལ་ཞིང་། །ལོ་ཡང་ལྔ་

བརྒྱ་ཚང་བར་ནི། །ཚངས་པར་སྤྱད་པ་སྤྱོད་པར་འགྱུར། །འདི་ལྟ་བུ་ཡི་རྣམ་གྲངས་ཀྱིས། །སྦྱིན་དང་ཚུལ་ཁྲིམས་ཡང་དག་སྤྱོད། །གང་གཱའི་བྱེ་མ་ཇི་སྙེད་པ། །དེ་སྙེད་བསྐལ་པར་སྤྱོད་པར་འགྱུར། །དཔེར་གསུངས་པ་ནི་དེ་སྙེད་དུ། །དེ་དག་ཁྱེད་ཀྱིས་
ཤེས་པར་གྱིས། །དེ་དག་དཔེར་ཡང་ཤེས་ནས་ནི། །དེ་བས་ལྷག་པར་སྤྱད་པར་གྱིས། །སྔར་ནི་དཔེ་རྣམས་གང་བརྗོད་པ། །གང་གཱ་ཡི་ནི་བྱེ་སྙེད་ཀྱི། །དེ་སྙེད་སངས་རྒྱས་མཐོང་གྱུར་ནས། །དེ་དག་ཀུན་ལ་བསྟི་སྟང་བྱེད། །ཨེ་མའོ་ཡེ་ཤེས་ཨེ་མ་ཤེས། །ཨེ་མའོ་
བླ་ན་མེད་པའི་སེམས། །སེམས་ཅན་ཀུན་གྱི་འདྲེན་པ་ནི། །དེ་ལྟར་ཞུམ་པར་མི་འགྱུར་རོ། །དེ་ཕྱིས་སེམས་ཅན་ཀུན་གྱི་མཆོག །སངས་རྒྱས་སུ་ཡང་དེ་འགྱུར་ཏེ། །དེ་ནི་དེ་ཡི་མཚན་བཏགས་པ། །སྨན་པའི་རྒྱལ་པོར་རྣམ་པར་གྲགས། །ལོ་ནི་བྱེ་བ་བདུན་ཅུར་
ཡང་། །སྲོག་ཆགས་རྣམས་ལ་ཆོས་བསྟན་ཏེ། །ཕྱིས་གདོད་རྐང་གཉིས་གཙོ་བོ་ནི། །དེ་ནས་མྱ་ངན་འདས་པར་འགྱུར། །རབ་ཏུ་དུལ་བའི་སེམས་རྣམས་ཀྱི། །འདུས་པ་དག་ནི་ཉི་ཤུར་འགྱུར། །དེ་ལ་ཐ་མ་གཅིག་པོ་ནི། །དགེ་སློང་བྱེ་བ་ཉི་ཤུར་འགྱུར། །འདུས་པ་
རྣམས་ནི་གང་བརྗོད་པའི། །ཉན་ཐོས་དཔག་ཏུ་མེད་པ་སྟེ། །དེ་ཡི་ཉན་ཐོས་ཇི་སྙེད་པ། །བྱང་ཆུབ་ཞུགས་པའང་དེ་སྙེད་དོ། །སེམས་ཅན་རྣམས་ཀྱི་དོན་མཛད་ནས། །དེ་བཞིན་གཤེགས་པ་མྱ་ངན་འདས། །ལོ་ནི་བརྒྱ་ཕྲག་སྟོང་དག་ཏུ། །དེ་ཡི་དམ་ཆོས་གནས་པར་འགྱུར། །
བསྐལ་པ་ལྔ་བརྒྱ་ཚང་བར་ནི། །སངས་རྒྱས་མང་པོ་འབྱུང་བར་འགྱུར། །བསྐལ་པ་གཅིག་ལའང་འབྱུང་བ་ནི། །དེ་ན་སྟོང་རྣམས་འབྱུང་བར་འགྱུར། །མི་རྣམས་མཁས་པ་གང་དག་ནི། །སངས་རྒྱས་ཆོས་རྣམས་བསྙེན་འདོད་པ། །ཚུལ་བཞིན་མང་དུ་ཐོས་པ་དང་། །རབ་ཏུ་
འདུན་པ་ཉིད་དུ་བྱ། །ཚུལ་བཞིན་མ་ཡིན་རྣམ་པར་སྤོངས། །ཚུལ་བཞིན་ལ་ནི་རྟག་ཏུ་སྒོམས། །མང་དུ་ཐོས་པ་རབ་ཏུ་བྱ། །དེས་ནི་ཤེས་རབ་རྣམ་པར་འཕེལ། །བྱང་ཆུབ་སེམས་དཔའ་སྐྱོབ་པ་ཡི། །རྩ་བའི་དོན་ནི་ཆོས་བཞི་སྟེ། །སྦྱིན་དང་ཚུལ་ཁྲིམས་ཐོས་

དང་གཏོང་། །བྱང་ཆུབ་ཀྱི་ནི་ལམ་ལ་བཟང་། །བླ་ན་མེད་པའི་ཐེག་པ་མཆོག །བྱང་ཆུབ་ཀྱི་ནི་ལམ་ཡང་བསྟན། །ཐེ་ཚོམ་གཅོད་པ་བཟང་པོ་ཡིས། །ཉན་ཐོས་ཀྱི་ནི་ལམ་བསྟན་ཏོ། །སེམས་ཅན་གང་དག་འདི་འདོད་པ། །དེ་ལ་ངས་ནི་སྐབས་དབྱེའོ། །ཆོས་
རྣམས་ཀྱི་ནི་མཆོག་སྟོན་པ། །འཇིག་རྟེན་སྣང་མཛད་རྙེད་པར་དཀའ། །དེ་ནས་གནོད་སྦྱིན་ཅི་འཇིགས་ཀྱི་བུ་རི་བོ་འདི་སྙམ་དུ་སེམས་པར་གྱུར་ཏེ། །བཅོམ་ལྡན་འདས་འདི་ནས་རིའི་རྒྱལ་པོ་བྱ་རྒོད་ཀྱི་ཕུང་པོའི་རི་ལ་གཤེགས་ཞེས་གྲག་གིས། །བདག་གིས་བཅོམ་ལྡན་
འདས་ལ་དགེ་བའི་རྩ་བ་རྒྱ་ཆེན་པོ་ཞིག་སྐྱེད་དོ་སྙམ་མོ། །དེ་ནས་གནོད་སྦྱིན་ཅི་འཇིགས་ཀྱི་བུ་རི་བོས་རང་གི་འཁོར་ལ་སྨྲས་པ། གྲོགས་པོ་དག་ཤེས་པར་གྱིས་ཤིག །བཅོམ་ལྡན་འདས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་རིའི་རྒྱལ་པོ་བྱ་རྒོད་ཀྱི་ཕུང་པོའི་རི་ལ་
གཤེགས་ཀྱིས། དེ་ལ་གྲོགས་པོ་དག་མཐུ་ཅི་ཡོད་པ་དང་། ཅི་ནུས་ཀྱིས་བཅོམ་ལྡན་འདས་ལ་མཆོད་པའི་ལས་ལ་སྤྲོ་བ་སྐྱེད་ཅིག །དེ་ནས་གནོད་སྦྱིན་ཅི་འཇིགས་ཀྱི་བུ་རི་བོ་གཡོག་དང་བཅས་པས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་བཟུང་སྟེ། རིའི་རྒྱལ་པོ་བྱ་རྒོད་
ཀྱི་ཕུང་པོའི་བར་གྱི་ལམ་དེ་ཐམས་ཅད་གསེག་མ་དང་། གྱོ་མོ་དང་། སྡོང་དུམ་དང་། ཚེར་མ་རྣམས་མེད་པར་བྱས་སོ། །མེ་ལོང་གི་དཀྱིལ་འཁོར་ལྟར་དག་པར་བྱས་སོ། །ལམ་དེ་དག་ཐམས་ཅད་བསལ་ནས་སྤོས་ཀྱི་ཆུས་ཀུན་ཏུ་ཆག་ཆག་བཏབ་བོ། །ལམ་དེར་
གོས་ནི་མཚམས་མེད་པར་བཏིང་ངོ་། །ལམ་དེར་མི་གང་ཙམ་དུ་མེ་ཏོག་གིས་ཆལ་པར་བཀྲམ་མོ། །ལམ་དེ་དག་གདུགས་དང་། རྒྱལ་མཚན་དང་། བ་དན་གྱིས་ཤིན་ཏུ་བརྒྱན་ཏོ། །ལམ་དེ་བདུག་སྤོས་དམ་པའི་སྙིང་པོ་རབ་ཀྱི་སྣོད་ནས་བདུགས་སོ། །སྟེང་གི་བར་སྣང་ལས་
དར་གྱི་ལྔ་ལྡིར་སྦྱངས་ཏེ། ཤིན་ཏུ་བརྒྱན་ཏོ། །ལམ་དེར་སིལ་སྙན་སྣ་ཚོགས་ཀྱི་སྒྲ་འཁྲོལ་བར་བྱས་སོ། །ལམ་དེ་ནས་མདའ་རྒྱང་གང་ཚུན་ཆད་ཙམ་མེ་ཏོག་ཨུད་པ་ལ་དང་། ཀུ་མུ་ད་དང་། པད་མ་དཀར་པོས་ཁེབས་ཤིང་ངུར་པ་སྒྲ་འབྱིན་པར་བྱས་སོ། །ལམ་དེར་གསེར་གླེབས་

པས་རབ་ཏུ་གཡོགས་སོ། །ལམ་དེ་གསེར་གྱི་དྲ་བ་དང་། རིན་པོ་ཆེ་སྣ་བདུན་གྱི་དྲ་བས་རབ་ཏུ་གཡོགས་སོ། །དེ་ནས་གནོད་སྦྱིན་ཅི་འཇིགས་ཀྱི་བུ་རི་བོས་ལམ་དུ་དེ་ལྟ་བུའི་བཀོད་པ་བྱས་ནས་ལུས་ཆེན་པོ་མངོན་པར་སྤྲུལ་ཏེ། འཁོར་དང་བཅས་པ་དགའ་མགུ་རངས་
རབ་ཏུ་དགའ་སྟེ། མོས་ཤིང་ཡིད་བདེ་བ་སྐྱེས་ནས། དགའ་བའི་སེམས་དང་། བདེ་བའི་སེམས་དང་། མཉེན་པའི་སེམས་དང་། རྣམ་པར་དང་བའི་སེམས་དང་། སྒྲིབ་པ་མེད་པའི་སེམས་དང་། རབ་ཏུ་སིམ་པའི་སེམས་དང་། སངས་རྒྱས་ལ་གཞོལ་བའི་སེམས་དང་།
ཆོས་ལ་གཞོལ་བའི་སེམས་དང་། དགེ་འདུན་ལ་གཞོལ་བའི་སེམས་དང་། བྱང་ཆུབ་ལས་མི་གཡོ་བའི་སེམས་དང་། མི་བསྐྱོད་པའི་སེམས་དང་། མི་མཉམ་པ་དང་མཉམ་པའི་སེམས་དང་། འཇིག་རྟེན་གསུམ་པོ་ཐམས་ཅད་ལས་ཁྱད་པར་དུ་འཕགས་པའི་སེམས་དང་།
སེམས་ཅན་ཐམས་ཅད་ལ་བྱམས་པའི་སེམས་དང་། སྙིང་རྗེའི་སེམས་དང་། དགའ་བའི་སེམས་དང་། བཏང་སྙོམས་ཀྱི་སེམས་དང་། སངས་རྒྱས་ཀྱི་ཆོས་ཐམས་ཅད་ཀྱི་སྣོད་དུ་གྱུར་པའི་སེམས་དང་། སྙིང་པོའི་སེམས་དང་། བརྟན་པའི་སེམས་དང་། མི་
ཕྱེད་པའི་སེམས་དང་། མ་ཞིགས་པའི་སེམས་དང་། ཉན་ཐོས་དང་། རང་སངས་རྒྱས་ཀྱི་སར་མི་ལྟུང་བའི་སེམས་དང་། བྱང་ཆུབ་སེམས་དཔའི་ས་ཐམས་ཅད་བསྒྲུབ་པའི་སེམས་ཀྱིས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་
འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་གནོད་སྦྱིན་ཅི་འཇིགས་ཀྱི་བུ་རི་བོས་ཐལ་མོ་སྦྱར་ཏེ། བཅོམ་ལྡན་འདས་ལ་ཚིགས་སུ་བཅད་པ་འདི་དག་
གསོལ་ཏོ། །སངས་རྒྱས་འཇིག་རྟེན་རྣམས་ཀྱི་མཆོག །ཆོས་རྣམས་ཀྱི་ནི་དམ་པ་སྟོན། །འཇིག་རྟེན་མགོན་ལ་བདག་གིས་ནི། །བླ་ན་མ་མཆིས་མཆོད་པ་བགྱིས། །འདྲེན་པ་ཇི་ལྟར་མཛད་པ་བཞིན། །སྟོབས་བཅུ་དང་ནི་རབ་ལྡན་ཏེ། །མི་འཇིགས་པ་ལ་རབ་

གནས་ནས། །སེམས་ཅན་དོན་རྣམས་བགྱིད་པར་ཤོག །སུམ་ཅུ་རྩ་གཉིས་མཚན་རྣམས་དང་། །དཔེ་བྱད་བཟང་པོ་བརྒྱད་ཅུར་ལྡན། །འཇིག་རྟེན་མགོན་པོ་འོད་བྱེད་པ། །འཇིག་རྟེན་སྣང་བ་བྱེད་པར་ཤོག །སྲོག་ཆགས་ཀུན་ལ་ཕན་པའི་ཕྱིར། །སྙན་པའི་ཆོས་
ནི་རབ་སྟོན་ཅིང་། །རྣམ་པ་བཅུ་གཉིས་དམ་པ་ཡི། །ཆོས་ཀྱི་འཁོར་ལོ་བསྐོར་བར་ཤོག །རྒྱལ་བ་ཇི་ལྟ་དེ་བཞིན་དུ། །ཆོ་འཕྲུལ་རྣམས་ནི་རབ་སྟོན་ཅིང་། །སྲོག་ཆགས་བྱེ་བ་དུ་མ་ཡི། །སེམས་ཅན་རྣམས་ཀྱི་དོན་བགྱིད་ཤོག །དཔའ་ཆེན་གང་རྣམས་མ་བྱོན་པ། །
འཇིག་རྟེན་མགོན་པོ་འོད་མཛད་ལྟར། །བྱང་ཆུབ་དམ་པ་རབ་རྟོགས་ནས། །ལམ་དེ་རབ་ཏུ་སྟོན་པར་ཤོག །སེམས་ཅན་ལྡོངས་པ་ཀུན་གྱི་ཕྱིར། །མིག་དང་ལྡན་པ་ཉིད་གྱུར་ཏེ། །གནས་དང་རྟེན་དང་སྐྱབས་དག་དང་། །དེ་བཞིན་དཔུང་གཉེན་འགྱུར་བར་ཤོག །
ཇི་ལྟར་འདྲེན་པ་གྲོལ་མཛད་བཞིན། །འགྲོ་བ་ལྔར་ནི་སྐྱེས་པ་ཡི། །སྲོག་ཆགས་རྣམས་ཀྱི་མགོན་དུ་ཤོག །བདག་གིས་སྡུག་བསྔལ་ཀུན་ལས་དགྲོལ། །འཇིག་རྟེན་ན་ནི་མཚུངས་པ་ཡོད་མེད་པ། །ལྷ་དབང་ལྷ་མ་ཡིན་དང་ཀླུས་མཆོད་པ། །གཟི་བརྗིད་དག་ནི་མཐའ་ཡས་
འོད་མཛད་པ། །རྐང་གཉིས་མཆོག་ལ་བདག་གིས་མཆོད་པ་བགྱིས། །བདག་ནི་ལས་མཆོག་དམ་པ་འདི་དག་གིས། །མི་དབང་ས་སྟེང་མཆོག་ཏུ་གྱུར་པ་བཞིན། །བསོད་ནམས་རབ་མཆོག་སུམ་ཅུ་གཉིས་མཚན་ལྡན། །ཆོས་ཀྱི་བདག་པོ་དེ་དང་འདྲ་བར་ཤོག །
དེ་ནས་བཅོམ་ལྡན་འདས་ཀྱིས་གནོད་སྦྱིན་ཅི་འཇིགས་ཀྱི་བུ་རི་བོ་ལ་ཚིགས་སུ་བཅད་པ་དག་གིས་གསུངས་པ། ཆོས་ཀྱི་དམ་པ་རྣམས་ཀྱི་ཕྱིར། །སྟོན་པའི་རིམ་གྲོ་གང་བྱེད་པ། །སེམས་ཅན་རྣམས་ཀྱི་མཆོག་ཡིན་ཏེ། །དེ་དག་བྱང་ཆུབ་རྙེད་མི་དཀའ། །འཇིག་
རྟེན་མགོན་པོ་འོད་མཛད་པ། །འཇིག་རྟེན་སྣང་མཛད་མཆོག་ལ་ནི། །ལྷ་དང་ཀླུ་དང་མི་རྣམས་ཀྱིས། །མཆོད་པ་བྱ་བར་འོས་པར་འགྱུར། །བྱང་ཆུབ་མཆོག་ཏུ་སངས་རྒྱས་ནས། །ཤིང་མཆོག་དྲུང་དུ་རབ་འདུག་སྟེ། །སྡིག་ཅན་བདུད་ལས་རྒྱལ་ནས་སུ། །སྲོག་ཆགས་

རྣམས་ལ་ཆོས་སྟོན་ཏོ། །དེ་ནས་བཅོམ་ལྡན་འདས་ལྷ་སྟོང་ཕྲག་དུ་མ་དང་། གནོད་སྦྱིན་དང་། སྲིན་པོ་སྟོང་ཕྲག་དུ་མ་དང་། དྲི་ཟ་དང་། མི་འམ་ཅི་དང་། ལྟོ་འཕྱེ་ཆེན་པོ་སྟོང་ཕྲག་དུ་མ་དང་། །མི་དང་མི་མ་ཡིན་པ་སྟོང་ཕྲག་དུ་མ་དང་། སྲོག་ཆགས་བྱེ་བ་ཁྲག་
ཁྲིག་བརྒྱ་སྟོང་ཕྲག་དུ་མས་བསྐོར་ཅིང་མདུན་དུ་བདར་ནས་སངས་རྒྱས་ཀྱི་མཐུ་ཆེན་པོ་དང་། སངས་རྒྱས་ཀྱི་རྫུ་འཕྲུལ་ཆེན་པོ་དང་། །སངས་རྒྱས་ཀྱི་ཆོ་འཕྲུལ་ཆེན་པོ་དང་། སངས་རྒྱས་ཀྱི་རྣམ་པར་འཕྲུལ་བ་ཆེན་པོ་དང་། སངས་རྒྱས་ཀྱི་གཟི་བརྗིད་ཆེན་པོས་འོད་ཟེར་ནི་རབ་
ཏུ་འགྱེད། ཞིང་ནི་རབ་ཏུ་གཡོ་བར་བྱས། མེ་ཏོག་གི་ཆར་ནི་རབ་ཏུ་འབེབས། སིལ་སྙན་བྱེ་བ་ཁྲག་ཁྲིག་ནི་རབ་ཏུ་འཁྲོལ་བར་བྱས་ཏེ། གནོད་སྦྱིན་ཅི་འཇིགས་ཀྱི་བུ་རི་བོས་ལམ་དུ་བཀོད་པ་ཇི་ལྟར་མངོན་པར་བྱས་པ་བཞིན་དུ་ཤིང་རྟའི་འཕང་ལོ་ཙམ་གྱི་པད་མ་ལ་ཞབས་བཞག་
སྟེ། རིའི་རྒྱལ་པོ་བྱ་རྒོད་ཀྱི་ཕུང་པོ་ག་ལ་བ་དེར་གཤེགས་ཏེ་བྱོན་ནས། ཚེ་དང་ལྡན་པ་ཀུན་དགའ་བོ་ལ་ཀུན་དགའ་བོ་ཁྱོད་ཀྱིས་དེ་བཞིན་གཤེགས་པའི་གདན་མཆོག་ཆོས་ཀྱི་གདན། གདན་དམ་པ། གདན་བཟང་པོ། འཇིག་རྟེན་གསུམ་པོ་ཀུན་ལས་ཁྱད་པར་དུ་འཕགས་
པའི་གདན། སངས་རྒྱས་ཀྱི་གདན་ཤོམས་ཤིག །དེ་བཞིན་གཤེགས་པ་གདན་དེ་ལ་བཞུགས་ཏེ། སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་རྣམས་ལ་སྙིང་བརྩེ་བ་དང་། ལྷ་དང་མི་རྣམས་ཀྱི་དོན་དང་། ཕན་པའི་ཕྱིར་བྱང་ཆུབ་སེམས་དཔའི་
སྡེ་སྣོད་ཅེས་བྱ་བའི་མདོ་སྡེ་སེམས་ཅན་ཐམས་ཅད་ལ་ཕན་པར་རབ་ཏུ་བསྔགས་པ། བྱང་ཆུབ་སེམས་དཔའི་སྤྱོད་པའི་རྒྱུ་འཐུན་པ་འཆད་པར་འགྱུར་ཏེ། དེ་ཡང་སེམས་ཅན་ཐམས་ཅད་ཐེ་ཚོམ་དུ་གྱུར་པ་ལ་རབ་ཏུ་སྟོན་པ། སེམས་ཅན་ཐམས་ཅད་ཀྱི་ཐེ་ཚོམ་གཅོད་པ། སེམས་
ཅན་ཐམས་ཅད་ཀྱི་ཐེ་ཚོམ་སྐྱེ་བ་གཅོད་པ། དེ་བཞིན་གཤེགས་པའི་མདོ་སྡེ་འདི་འཆད་པར་འགྱུར་རོ། །ཞེས་བཀའ་སྩལ་པ་དང་། ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་གདན་བཤམས་ཏེ། དེ་ན་ལྷ་བྱེ་བ་དྲུག་ཅུ་རྩ་བརྒྱད་ཀྱིས་རས་བཅོས་མ་རེ་རེ་དེ་བཞིན་

གཤེགས་པ་ལ་ཕུལ་ཏེ། དེ་དག་ཀྱང་དེར་གདན་དུ་བཏིང་བར་གྱུར་ནས་བཅོམ་ལྡན་འདས་གདན་བཤམས་པ་དེ་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་ལྷའི་བུ་དེ་རྣམས་ལ་ཚིགས་སུ་བཅད་པ་དག་གིས་གསུངས་པ། །འཇིག་རྟེན་མགོན་གྱི་གདན་དུ་ནི། །ལྷ་
ཡི་གོས་རབ་དམ་པ་མཆོག །ལྷ་ཡིས་རབ་ཏུ་བཏིང་བ་ལ། །དེ་ལ་རྣམ་པར་འདྲེན་པ་བཞུགས། །ཐམས་ཅད་ཆོས་ཀྱི་ཕ་རོལ་ཕྱིན། །སངས་རྒྱས་བཞུགས་པར་གྱུར་མ་ཐག །འཇིག་རྟེན་རྣམ་པ་དྲུག་གཡོས་ཤིང་། །སྐྱེ་བོ་རབ་ཏུ་དགའ་བར་གྱུར། །སངས་རྒྱས་ཞིང་ནི་
རི་དང་བཅས། །དེ་ན་རབ་ཏུ་སྣང་བར་གྱུར། །དེ་ན་ཆོས་འདོད་རྣམས་ལ་ནི། །སྐྱོབ་པ་སངས་རྒྱས་རྫུ་འཕྲུལ་སྟོན། །ལྷ་དང་ཀླུ་དང་མི་རྣམས་དང་། །གྲུལ་བུམ་ཡི་དགས་སྲུལ་པོ་རྣམས། །དེ་དག་གཅིག་གིས་གཅིག་མཐོང་སྟེ། །སྒྲིབ་པ་དག་ནི་མེད་པར་གྱུར། །ལྷ་རྣམས་
བྱེ་བ་ཕྲག་སྟོང་དང་། །ཁྲག་ཁྲིག་ཕྲག་ནི་བརྒྱ་རྣམས་དག །རྙེད་དགའ་ཡི་ནི་ཚིག་གསུང་བ། །སངས་རྒྱས་ལ་ནི་དགའ་བས་ལྟ། །རྒྱལ་པོ་གཟུགས་ཅན་སྙིང་པོ་ཡང་། །དེ་ཚེ་བློན་པོས་ཡོངས་བསྐོར་ཅིང་། །འཇིག་རྟེན་གྱི་ནི་མགོན་པོ་མཆོག །སངས་རྒྱས་དྲུང་དུ་འོངས་
པར་གྱུར། །སྟོན་པས་ལྷ་དང་ཀླུ་རྣམས་དང་། །མི་རྣམས་འདུས་པར་མཁྱེན་པ་དང་། །སྲོག་ཆགས་ཀུན་ལ་ཕན་པའི་ཕྱིར། །ཕྱོགས་བཞི་དག་ཏུ་རབ་གཟིགས་ནས། །འཇིག་རྟེན་ཐེ་ཚོམ་གང་ཡོད་པ། །རྐང་གཉིས་མཆོག་ལ་དྲིས་ཤིག་དང་། །ཐེ་ཚོམ་དག་ནི་དྲིས་པ་
རྣམས། །རྣམ་པར་འདྲེན་པ་ངས་བཤད་དོ། །དེ་ལྟར་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཇི་སྙེད་འདུས་ནས། ཆོས་ཉན་པ་དེ་དག་ཐམས་ཅད་ཀྱིས་དལ་བར་ཤེས་ནས། སེམས་ཅན་ཐམས་ཅད་ཀྱིས་བསམས་ཏེ། ཕྱག་འཚལ་ནས་ཆོས་
མཉན་པའི་ཕྱིར་རྣ་བ་བླགས་ཏེ་འདུག་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་པ། མཽད་གལ་གྱི་བུ་ཆེན་པོ་དགེ་སློང་མ་འདུས་པ་རྣམས་ལ་སོམས་ལ། མ་ལྷགས་པ་རྣམས་ཀྱང་ཚོལ་ཏེ། རྒྱང་རིང་པོ་ན་གནས་པ་རྣམས་ཀྱང་

སྡུས་ཤིག །དེའི་ཚེ་ཚེ་དང་ལྡན་པ་འོད་སྲུང་ཆེན་པོ་རིའི་རྒྱལ་པོ་ཁ་བ་ཅན་གྱི་ལྷོ་ཕྱོགས་ཀྱི་ངོས་ལ་གནས་སོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་བསམས་ཏེ། བསམས་ནས་རྫུ་འཕྲུལ་གྱི་སྟོབས་ཀྱིས་ཚེ་དང་ལྡན་པ་འོད་སྲུང་ཆེན་པོ་ག་ལ་བ་དེར་སོང་སྟེ་
ཕྱིན་ནས། ཚེ་དང་ལྡན་པ་འོད་སྲུང་ཆེན་པོ་ལ་འདི་སྐད་ཅེས་སྨྲས་སོ། །བཙུན་པ་འོད་སྲུང་ཆེན་པོ་ལོངས་ཤིག །བཅོམ་ལྡན་འདས་འདི་ལྟར་ལྷར་བཅས་པའི་འཇིག་རྟེན་དང་། བདུད་དུ་བཅས་པ་དང་། ཚངས་པར་བཅས་པ་དང་། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་
རྣམས་དང་། ལྷ་དང་མི་དང་ལྷ་མ་ཡིན་དུ་བཅས་པའི་འཁོར་གྱི་མདུན་དུ་ཆོས་སྟོན་ཏེ། སྟོན་པས་བཀའ་སྩལ་གྱིས། བཙུན་པ་འོད་སྲུང་བདག་ཅག་གཉིས་ཀྱི་ཆོས་ཀྱི་བར་ཆད་དུ་འགྱུར་དུ་འོང་གིས་འདོང་ངོ་། །དེ་སྐད་ཅེས་སྨྲས་པ་དང་། ཚེ་དང་ལྡན་པ་འོད་སྲུང་ཆེན་པོས་ཚེ་དང་
ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་མཽད་གལ་གྱི་བུ་ཆེན་པོ་ཁྱོད་སོང་ཤིག་དང་། ཁོ་བོ་ཡང་ཁྱོད་སོང་བའི་རྗེས་བཞིན་དུ་འོང་ངོ་། །དེ་ནས་ཚེ་དང་ལྡན་པ་འོད་སྲུང་ཆེན་པོས་སྟན་དེ་ལ་འཕྲུལ་བ་སྤྲུལ་ཏེ། རྫུ་འཕྲུལ་གྱི་སྟོབས་ཀྱིས་རྒྱལ་པོའི་ཁབ་
ཀྱི་གྲོང་ཁྱེར་ཆེན་པོར་ཞུགས་སོ། །དེ་ནས་ཚེ་དང་ལྡན་པ་འོད་སྲུང་ཆེན་པོ་འཁོར་བཞིས་བསྐོར་ཅིང་མདུན་དུ་བདར་ནས་རིའི་རྒྱལ་པོ་བྱ་རྒོད་ཀྱི་ཕུང་པོ་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔར་འཁོར་
གྱི་ནང་དུ་ཧ་ཅང་ཡང་མི་རིང་བ་ཞིག་ཏུ་ཕྱོགས་གཅིག་ཏུ་འདུག་གོ །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་སྤྲུལ་པ་དེ་མཐོང་ནས། རྫུ་འཕྲུལ་གྱི་སྟོབས་ཀྱིས་བཅོམ་ལྡན་འདས་ག་ལ་བ་དེར་སོང་ངོ་། །ཚེ་དང་ལྡན་པ་མཽད་གལ་གྱི་བུ་ཆེན་པོས་ཚེ་དང་ལྡན་པ་འོད་སྲུང་ཆེན་པོ་བཅོམ་
ལྡན་འདས་ཀྱི་སྤྱན་སྔར་ཧ་ཅང་ཡང་མི་རིང་བ་ཞིག་ཏུ་འཁོར་གྱི་ནང་ན་ཕྱོགས་གཅིག་ཏུ་འདུག་པར་མཐོང་སྟེ། མཐོང་ནས་འདི་སྐད་ཅེས་སྨྲས་སོ། །བཙུན་པ་འོད་སྲུང་ཁྱོད་སྟན་ག་ལ་བ་དེ་ནས་སྤྲུལ་ཏེ། སྤྲུལ་ནས་མགྱོགས་པར་བཅོམ་ལྡན་འདས་ཀྱི་དྲུང་དུ་ཕྱིན་ཏེ། སྤྱན་སྔར་ཧ་ཅང་

ཡང་མི་རིང་བ་ཞིག་ཏུ་འཁོར་གྱི་ནང་ན་ཕྱོགས་གཅིག་ཏུ་འདུག་པ་ནི་མྱུར་བ་ལ་སྟེན་པའི་རྫུ་འཕྲུལ་དང་ལྡན་ནོ། །དེ་སྐད་ཅེས་སྨྲས་པ་དང་། ཚེ་དང་ལྡན་པ་འོད་སྲུང་ཆེན་པོས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་མཽད་གལ་གྱི་བུ་ཆེན་པོ་ནི་བཅོམ་
ལྡན་འདས་ཀྱིས་རྫུ་འཕྲུལ་དང་ལྡན་པའི་མཆོག་ཏུ་གསུངས་ན་འདི་ལ་ཁོ་བོའི་རྫུ་འཕྲུལ་རྣམ་པར་སྤྲུལ་པ་ལྟ་ཅི་ཞིག་ཏུ་འགྱུར། གནོད་སྦྱིན་ཅི་འཇིགས་ཀྱི་ལེའུ་སྟེ་གཉིས་པའོ།། །།བམ་པོ་གསུམ་པ། དེ་ནས་ཚེ་དང་ལྡན་པ་ཤཱ་རིའི་བུ་སྟན་ལས་ལངས་ཏེ་
བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་བཅོམ་ལྡན་འདས་
ཀྱིས་བདག་ལ་སྐབས་ཕྱེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ཞུའོ། །དེ་སྐད་ཅེས་གསོལ་བ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །
ཤཱ་རིའི་བུ་ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཅི་དང་ཅི་འདོད་པ་དྲིས་ཤིག་དང་། དྲིས་པ་དེ་དང་དེའི་ལུང་བསྟན་པས་ངས་ཁྱོད་ཀྱི་སེམས་རངས་པར་བྱའོ། །དེ་སྐད་ཅེས་བཀའ་སྩལ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་
བུས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་དུ་དང་ལྡན་ན་བྱང་ཆུབ་སེམས་དཔའ་རྣམས་ལུས་ཀྱི་ལས་ཁ་ན་མ་ཐོ་བ་མ་མཆིས་པ་དག་ལགས། ངག་གི་ལས་ཁོ་ན་མ་ཐོ་བ་མ་མཆིས་པ་དང་། ཡིད་ཀྱི་ལས་ཁ་ན་མ་ཐོ་བ་མ་མཆིས་པ་དང་། ལུས་ཀྱི་ལས་
ཡོངས་སུ་དག་པ་དང་། ངག་གི་ལས་ཡོངས་སུ་དག་པ་དང་། ཡིད་ཀྱི་ལས་ཡོངས་སུ་དག་པ་དང་། ལུས་ཀྱི་ལས་མ་གཡོས་པ་དང་། ངག་གི་ལས་མ་གཡོས་པ་དང་། ཡིད་ཀྱི་ལས་མ་གཡོས་པ་རྣམས་ལགས། ཐམས་ཅད་མཁྱེན་པའི་སེམས་བསྐྱེད་པ་དེ་ལས་

བདུད་དང་། བདུད་ཀྱི་རིས་ཀྱི་ལྷ་རྣམས་ཀྱིས་བསྐྱོད་མི་ནུས་པ་རྣམས་ལགས། ས་ནས་སར་འཕར་བ་ལ་མཁས་པ་རྣམས་ལགས། སེམས་ཅན་ཐམས་ཅད་ཀྱི་འདྲེན་པར་གྱུར་པ་དང་། རྣམ་པར་འདྲེན་པར་གྱུར་པ་དང་། ཡོངས་སུ་འདྲེན་པར་གྱུར་པ་དང་། སྒྲོན་མར་
གྱུར་པ་དང་། སྟེགས་སུ་གྱུར་པ་དང་། ཟམ་པར་གྱུར་པ་དང་། གྲུར་གྱུར་པ་དང་། སྒྲོལ་བ་པོ་དང་། ཕ་རོལ་དུ་འགྲོ་བར་གྱུར་པ་དང་། གནས་དང་མགོན་དང་སྐྱབས་དང་། དཔུང་གཉེན་དུ་གྱུར་པ་དང་། ཐམས་ཅད་མཁྱེན་པའི་སེམས་བསྐྱེད་པ་དེ་ལས་བཟློག་པར་མི་
ནུས་པ་རྣམས་ལགས། དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་ཚིགས་སུ་བཅད་པའི་དབྱངས་ཀྱིས་དོན་དེ་ཉིད་ཀུན་ཞུས་པ། །གང་གིས་བྱང་ཆུབ་རབ་ཞུགས་པ། །དཔའ་བོ་དེ་ཡི་དོན་ཅི་ལགས། །གང་གིས་དམ་པ་འཚང་རྒྱ་བ། །ཡོན་ཏན་ཆོས་རྣམས་བརྗོད་དུ་
གསོལ། །སྲོག་ཆགས་ཀུན་ལ་སྨན་སླད་དུ། །དཔའ་བོ་དེ་དག་ཇི་ལྟར་སྤྱོད། །ཇི་ལྟ་བུ་ཡི་ཆོས་བསྒོམས་པས། །མི་ཡི་དམ་པ་སངས་རྒྱས་འགྱུར། །བྱང་ཆུབ་སྙིང་པོར་རབ་གནས་ནས། །སྡིག་ཅན་དག་ནི་ཇི་ལྟར་འདུལ། །བྱེ་བ་དག་གི་ཞིང་བསྐྱོད་ནས། །ཇི་ལྟར་བྱང་ཆུབ་
མཆོག་འཚང་རྒྱ། །བྱང་ཆུབ་སེམས་དཔའ་གང་གི་དོན། །འདི་འདྲའི་ཚིག་ནི་ཅི་ཞིག་ལགས། །སངས་རྒྱས་ཆོས་ཀྱི་མཆོག་རྣམས་དང་། །བྱང་ཆུབ་དག་ནི་འདིར་བརྗོད་གསོལ། །སྲོག་ཆགས་ཀུན་ལས་སྨན་སླད་དུ། །པད་མ་བཞིན་དུ་མ་ཆགས་ཤིང་། །སེམས་ཅན་
བྱེ་བ་གྲོལ་མཛད་པར། །འཇིག་རྟེན་འདི་ནི་ཇི་ལྟར་སྤྱོད། །མཁས་པ་ལྷ་དང་ཀླུ་དག་དང་། །མི་དང་མི་མ་ལགས་རྣམས་ཀྱིས། །ཇི་ལྟ་བུར་ནི་མཆོད་འགྱུར་བ། །ཞུས་པ་དེ་དག་བཤད་དུ་གསོལ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་
བཀའ་སྩལ་ཏོ། །ཤཱ་རིའི་བུ་བྱང་ཆུབ་སེམས་དཔའ་ཆོས་གཅིག་དང་ལྡན་ན་སངས་རྒྱས་ཀྱི་ཆོས་འདི་དག་དང་གཞན་ཡང་དཔག་ཏུ་མེད་པ་དག་ཡོངས་སུ་འཛིན་ཏོ། །ཆོས་གཅིག་པོ་གང་ཞེ་ན། འདི་ལྟ་སྟེ། བསམ་པ་ཕུན་སུམ་ཚོགས་པའི་བྱང་ཆུབ་ཀྱི་སེམས་ཏེ། ཤཱ་རིའི་བུ་

བྱང་ཆུབ་སེམས་དཔའ་ཆོས་གཅིག་པོ་དེ་དང་ལྡན་ན་སངས་རྒྱས་ཀྱི་ཆོས་འདི་དག་དང་། གཞན་ཡང་དཔག་ཏུ་མེད་པ་དག་ཡོངས་སུ་འཛིན་ཏོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་བསམ་པ་ཇི་ལྟ་བུ། བྱང་ཆུབ་
ཀྱི་སེམས་ཇི་ལྟ་བུ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་བསམ་པ་ཞེས་བྱ་བ་ནི་མི་ཕྱེད་པའི་ཕྱིར་སྙིང་པོའོ། །བརྟེན་པའི་ཕྱིར་མི་ཕྱེད་པའོ། །མི་གཡོ་བའི་ཕྱིར་བརྟན་པའོ། །མ་འཁྲུལ་
བའི་ཕྱིར་མི་གཡོ་བའོ། །ཤིན་ཏུ་གནས་པའི་ཕྱིར་མ་འཁྲུལ་པའོ། །མི་ཟློགས་པའི་ཕྱིར་ཤིན་ཏུ་གནས་པའོ། །སེམས་ཅན་ལ་ལྟ་བའི་ཕྱིར་མི་ཟློགས་པའོ། །སྙིང་རྗེ་ཆེན་པོའི་རྩ་བ་ལས་བྱུང་བའི་ཕྱིར་སེམས་ཅན་ལ་ལྟ་བའོ། །ཡོངས་སུ་མི་སྐྱོ་བའི་ཕྱིར་སྙིང་རྗེ་ཆེན་པོའི་རྩ་
བའོ། །སེམས་ཅན་ཡོངས་སུ་སྨིན་པར་བྱ་བའི་ཆོ་ག་ཤེས་པའི་ཕྱིར་ཡོངས་སུ་མི་སྐྱོ་བའོ། །བདག་ལ་བདེ་བ་མ་ཡིན་པའི་ཕྱིར་སེམས་ཅན་ཡོངས་སུ་སྨིན་པར་བྱ་བའི་ཆོ་ག་ཤེས་པའོ། །ལན་དུ་ཕན་འདོགས་པར་རེ་བ་མེད་པའི་ཕྱིར་བདག་བདེ་བ་མ་ཡིན་པའོ། །ཟང་ཟིང་མེད་པའི་
ཕྱིར་ལན་དུ་ཕན་འདོགས་པར་རེ་བ་མེད་པའོ། །སེམས་ཅན་གྱི་ཕྱིར་འབྲང་བས་ཟང་ཟིང་མེད་པའོ། །མཐུ་ཆུང་བའི་སེམས་ཅན་ལ་ལྟ་བའི་ཕྱིར་སེམས་ཅན་གྱི་ཕྱིར་འབྲང་བའོ། །མགོན་དུ་གྱུར་པའི་ཕྱིར་མཐུ་ཆུང་བའི་སེམས་ཅན་ལ་ལྟ་བའོ། །སྐྱབས་དང་དཔུང་གཉེན་གྱི་ཕྱིར་
མགོན་དུ་གྱུར་པའོ། །མ་འཁྲུགས་པའི་ཕྱིར་སྐྱབས་དང་དཔུང་གཉེན་ནོ། །ཤིན་ཏུ་ཡང་དག་པར་བརྟགས་པའི་ཕྱིར་མ་འཁྲུགས་པའོ། །རྩོད་པ་མེད་པའི་ཕྱིར་ཤིན་ཏུ་ཡང་དག་པར་བརྟག་པའོ། །བསམ་པ་དགེ་བའི་ཕྱིར་རྩོད་པ་མེད་པའོ། །ཅི་ཡང་མེད་པའི་ཕྱིར་བསམ་
པ་དགེ་བའོ། །ཤིན་ཏུ་ཡོངས་སུ་དག་པའི་ཕྱིར་ཅི་ཡང་མེད་པའོ། །རབ་ཏུ་བྱུང་བར་བྱས་པའི་ཕྱིར་ཤིན་ཏུ་ཡོངས་སུ་དག་པའོ། །ནང་དྲི་མ་མེད་པའི་ཕྱིར་རབ་ཏུ་བྱང་བར་བྱས་པའོ། །ཕྱི་ཤིན་ཏུ་ཡོངས་སུ་དག་པའི་ཕྱིར་ནང་དྲི་མ་མེད་པའོ། །དེ་ལྟར་ཤཱ་རིའི་བུ་མི་ཕྱེད་པས་

སྙིང་པོ་ཞེས་བྱ་བ་ནས་ཕྱི་ཤིན་ཏུ་ཡོངས་སུ་དག་པའི་ཕྱིར་ནང་དྲི་མ་མེད་པའི་བར་དུ་སྟེ། བསམ་པ་ནི་དེ་ལྟ་བུའོ། །བྱང་ཆུབ་ཀྱི་སེམས་ཇི་ལྟ་བུ་ཞེ་ན། སེམས་དེ་ནི་ཉོན་མོངས་པ་ཐམས་ཅད་ཀྱིས་མི་རྫི་བའོ། །སེམས་དེ་ནི་ཐེག་པ་གཞན་མི་འདོད་པའི་ཕྱིར་འབྲེལ་བ་
མེད་པའོ། །སེམས་དེ་ནི་ཕ་རོལ་རྒོལ་བ་ཐམས་ཅད་ཀྱིས་མི་འཕྲོགས་པའི་ཕྱིར་བརྟན་པའོ། །སེམས་དེ་ནི་བདུད་ཐམས་ཅད་ཀྱིས་མི་ཕྱེད་པའོ། །སེམས་དེ་ནི་དགེ་བའི་རྩ་བའི་ཚོགས་བསགས་པའི་ཕྱིར་རྟག་པའོ། །སེམས་དེ་ནི་སངས་རྒྱས་ཀྱི་ཆོས་ལ་མོས་པའི་ཕྱིར་མི་གཡོ་བའོ། །
སེམས་དེ་ནི་བྱང་ཆུབ་སེམས་དཔའི་ས་ལ་རབ་ཏུ་གནས་པའོ། །སེམས་དེ་ནི་གཉེན་པོ་མེད་པའི་ཕྱིར་བླ་ན་མེད་པའོ། །སེམས་དེ་ནི་སངས་རྒྱས་ཀྱི་ཆོས་ཐམས་ཅད་ངེས་པར་ཕིགས་པའི་ཕྱིར་རྡོ་རྗེ་ལྟ་བུའོ། །སེམས་དེ་ནི་སེམས་ཅན་ཐམས་ཅད་ཀྱི་བསམ་པ་ལ་མི་མཉམ་པ་
མེད་པའི་ཕྱིར་མཉམ་པའོ། །སེམས་དེ་ནི་རང་བཞིན་གྱིས་ཀུན་ནས་ཉོན་མོངས་པ་མེད་པའི་ཕྱིར་རྣམ་པར་དག་པའོ། །སེམས་དེ་ནི་ཤེས་རབ་ཀྱིས་སྣང་བར་བྱེད་པའི་ཕྱིར་དྲི་མ་མེད་པའོ། །སེམས་དེ་ནི་སེམས་ཅན་ཐམས་ཅད་ལ་སྐབས་འབྱེད་པའི་ཕྱིར་རྒྱ་ཆེ་བའོ། །སེམས་དེ་
ནི་ནམ་མཁའ་དང་མཚུངས་པའི་ཕྱིར་ཡངས་པའོ། །སེམས་དེ་ནི་ཐམས་ཅད་མཁྱེན་པའི་ཡེ་ཤེས་ལ་བཏང་བའི་ཕྱིར་སྒྲིབ་པ་མེད་པའོ། །སེམས་དེ་ནི་སྙིང་རྗེ་ཆེན་པོ་མ་བཅད་པའི་ཕྱིར་ཐམས་ཅད་ཀྱི་རྗེས་སུ་སོང་བའོ། །སེམས་དེ་ནི་མཁས་པས་བསྔགས་པའི་ཕྱིར་མངོན་དུ་འགྲོ་བར་
བྱ་བའོ། །སེམས་དེ་ནི་སངས་རྒྱས་ཀྱི་ཆོས་ཐམས་ཅད་ཀྱི་ས་བོན་དུ་གྱུར་པའོ། །སེམས་དེ་ནི་བདེ་བའི་དངོས་པོ་ཐམས་ཅད་ཀྱི་གནས་སོ། །སེམས་དེ་ནི་ཚུལ་ཁྲིམས་ཀྱིས་སྨོན་ལམ་ལས་བྱུང་བའོ། །སེམས་དེ་ནི་བཟོད་པས་བསྙེན་པར་དགའ་བའོ། །སེམས་དེ་ནི་བརྩོན་འགྲུས་ཀྱིས་
ཐུལ་བར་དཀའ་བའོ། །སེམས་དེ་ནི་བསམ་གཏན་དག་གིས་ཉེ་བར་ཞི་བའོ། །སེམས་དེ་ནི་ཤེས་རབ་ཀྱི་ཚོགས་ཀྱིས་གནོད་པ་མེད་པའོ། །ཡང་སེམས་དེ་ནི་དེ་བཞིན་གཤེགས་པའི་ཚུལ་ཁྲིམས་ཀྱི་ཕུང་པོ་དང་། ཏིང་ངེ་འཛིན་གྱི་ཕུང་པོ་དང་། ཤེས་རབ་ཀྱི་ཕུང་པོ་དང་། རྣམ་

པར་གྲོལ་བའི་ཕུང་པོའི་རྩ་བའོ། །སེམས་དེ་ནི་དེ་བཞིན་གཤེགས་པའི་རྣམ་པར་གྲོལ་བའི་ཡེ་ཤེས་གཟིགས་པའི་ཕུང་པོའི་རྩ་བའོ། །སེམས་དེ་ནི་དེ་བཞིན་གཤེགས་པའི་སྟོབས་བཅུ་དང་། མི་འཇིགས་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་རྣམས་ཀྱི་
རྩ་བའོ། །ཡང་ཤཱ་རིའི་བུ་སེམས་དེ་ནི་བྱང་ཆུབ་ཀྱི་རང་བཞིན་ཏེ། དེའི་ཕྱིར་བྱང་ཆུབ་ཀྱི་སེམས་ཞེས་བྱའོ། །ཤཱ་རིའི་བུ་བྱང་ཆུབ་སེམས་དཔའ་བསམ་པ་དང་། བྱང་ཆུབ་ཀྱི་སེམས་དེ་ལྟ་བུ་དང་ལྡན་པ་ནི་བྱང་ཆུབ་སེམས་དཔའ་ཞེས་བྱའོ། །སེམས་རྒྱ་ཆེན་པོ་སེམས་ཅན་
མཆོག་རབ་ཅེས་བྱའོ། །འཇིག་རྟེན་གསུམ་པོ་ཐམས་ཅད་ལས་ཁྱད་པར་དུ་གྱུར་པའི་སེམས་ཅན་ཞེས་བྱའོ། །ལུས་ཀྱི་ལས་ཁ་ན་མ་ཐོ་བ་མེད་པ་ཡིན། ངག་གི་ལས་ཁ་ན་མ་ཐོ་བ་མེད་པ་ཡིན། ཡིད་ཀྱི་ལས་ཁ་ན་མ་ཐོ་བ་མེད་པ་ཡིན། ལུས་ཀྱི་ལས་ཡོངས་སུ་དག་པ་ཡིན།
ངག་གི་ལས་ཡོངས་སུ་དག་པ་ཡིན། ཡིད་ཀྱི་ལས་ཡོངས་སུ་དག་པ་ཡིན། ལུས་ཀྱི་ལས་མ་གཡོས་པ་ཡིན། ངག་གི་ལས་མ་གཡོས་པ་ཡིན། ཡིད་ཀྱི་ལས་མ་གཡོས་པ་ཡིན་ཏེ། ཐམས་ཅད་མཁྱེན་པའི་སེམས་བསྐྱེད་པ་དེ་ལས་བདུད་དང་བདུད་ཀྱི་རིས་ཀྱི་ལྷ་རྣམས་
ཀྱིས་བསྐྱོད་མི་ནུས་པ་ཡིན། ས་ནས་སར་འཕར་བ་ལ་མཁས་པ་ཡིན། འཇིག་རྟེན་གྱི་ཆོས་ཐམས་ཅད་ཀྱིས་མ་གོས་པ་ཡིན། སེམས་ཅན་ཐམས་ཅད་ཀྱི་འདྲེན་པར་གྱུར་པ་ཡིན། རྣམ་པར་འདྲེན་པར་གྱུར་པ་དང་། ཡོངས་སུ་འདྲེན་པར་གྱུར་པ་དང་། སྒྲོན་མར་གྱུར་
པ་དང་། སྟེགས་སུ་གྱུར་པ་དང་། ཟམ་པར་གྱུར་པ་དང་། གྲུར་གྱུར་པ་དང་། སྒྲོལ་བར་གྱུར་པ་དང་། ཕ་རོལ་ཏུ་འགྲོ་བ་དང་། གནས་དང་། མགོན་དང་། སྐྱབས་དང་། དཔུང་གཉེན་ཡིན་ནོ། །ཐམས་ཅད་མཁྱེན་པའི་སེམས་བསྐྱེད་པ་དེ་ལས་བདུད་དང་
བདུད་ཀྱི་རིས་ཀྱི་ལྷ་རྣམས་ཀྱིས་བསྐྱོད་པར་མི་ནུས་པ་ཡིན་ནོ། །དེ་ལྟར་ན་ཤཱ་རིའི་བུ་བྱང་ཆུབ་སེམས་དཔའ་བསམ་པ་ཐག་པ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་དད་པ་ཡིན་ནོ། །དད་པ་མང་བ་དང་། འཕགས་པ་རྣམས་མཐོང་བར་འདོད་

པ་དང་། ཆོས་ཉན་པར་འདོད་པ་ཡིན། སེར་སྣ་མེད་ཅིང་ལྷུག་པར་གཏོང་བ་དང་། ལག་བརྐྱང་ཞིང་རྣམ་པར་གཏོང་བ་ལ་དགའ་བ་དང་། སྦྱིན་པ་བགེད་པ་ལ་དགའ་བ་ཡིན། སེམས་ཅན་ཐམས་ཅད་ལ་ཁོང་ཁྲོ་བ་མེད་པའི་སེམས་ཡིན། རྙོག་པ་མེད་པའི་སེམས་
དང་། འཁྲུགས་པ་མེད་པའི་སེམས་དང་། མ་འདྲེས་པའི་སེམས་དང་། དེ་ལས་དང་ལས་ཀྱི་རྣམ་པར་སྨིན་པ་ལ་མངོན་པར་དད་པ་དང་། རབ་ཏུ་རྟོག་ཅིང་ཡིད་ཆེས་པ་དང་། ཐེ་ཚོམ་མེད་ཅིང་སོམ་ཉི་མེད་པ་ཡིན་ནོ། །དེ་ནག་པོ་དང་། དཀར་པོའི་ཆོས་རྣམས་ཀྱི་འབྲས་བུ་མི་
སྟོར་བར་ཤེས་པས་སྲོག་གི་ཕྱིར་ཡང་སྡིག་པའི་ལས་མི་བྱེད་པ་ཡིན་ཏེ། དེ་སྲོག་གཅོད་པ་སྤོང་བ་ཡིན། མ་བྱིན་པར་ལེན་པ་དང་། འདོད་པ་ལ་ལོག་པར་གཡེམ་པ་དང་། བརྫུན་དུ་སྨྲ་བ་དང་། ཕྲ་མ་དང་། ངག་རྩུབ་པོ་དང་། ཚིག་ཀྱལ་བ་དང་། བརྣབ་སེམས་དང་།
གནོད་སེམས་དང་། ལོག་པར་ལྟ་བ་སྤོང་བ་ཡིན་ཏེ། མི་དགེ་བ་བཅུའི་ལས་ཀྱི་ལམ་འདི་དག་སྤངས་ནས། དགེ་བ་བཅུའི་ལས་ཀྱི་ལམ་རྣམས་ཡང་དག་པར་ལེན་ཅིང་སྤྱོད་དོ། །དེ་དད་པ་དང་ལྡན་པས་གང་དགེ་སྦྱོང་དང་། བྲམ་ཟེ་དག་ཡང་དག་པར་སོང་བ་དང་། ཡང་དག་པར་ཞུགས་པ་
དང་། ཚུལ་ཁྲིམས་དང་ལྡན་པ་དང་། དགེ་བའི་ཆོས་ཅན་དང་། མང་དུ་ཐོས་པ་དང་། ཐོས་པ་ལ་བརྩོན་པ་དང་། ཚུལ་བཞིན་ཡིད་ལ་བྱེད་པ་དང་ལྡན་པ་དང་། དུལ་བ་དང་། ཞི་བ་དང་། ཉེ་བར་ཞི་བ་དང་། རྩོད་པའི་སྨྲ་བ་མེད་པ་དང་། མི་སྙན་པར་སྨྲ་བ་མེད་པ་དང་། བསམ་
པ་དགེ་ཞིང་མི་དགེ་བའི་བསམ་པ་མེད་པ་དང་། དགེ་བ་ལ་ཡང་དག་པར་སྦྱོར་བ་དང་། མི་དགེ་བའི་ཆོས་ཐམས་ཅད་ཡོངས་སུ་སྤངས་པ་དང་། རྒོད་པ་མེད་པ་དང་། ཁེངས་པ་མ་ཡིན་པ་དང་། ཡབ་ཡབ་པོ་མེད་པ་དང་། མུ་ཅོར་མི་སྨྲ་བ་དང་། ཚིག་མ་འདྲེས་པ་དང་། དྲན་
པ་ཉེ་བར་གནས་པ་དང་། སེམས་ཤིན་ཏུ་མཉམ་པར་གཞག་པ་དེ་དག་དང་། ཇི་ལྟར་སྲིད་པར་འདྲེན་པ་བཅད་པ་དང་། ཟུག་རྔུ་ཕྱུང་བ་དང་། ཁུར་བོར་བ་དང་། ཐེ་ཚོམ་ལས་རྒལ་བ་དང་། སོམ་ཉི་ལས་རྒལ་བ་དང་། ཡང་སྲིད་པ་ཟད་པའི་སངས་རྒྱས་བཅོམ་ལྡན་འདས་

དང་། བྱང་ཆུབ་སེམས་དཔའ་སེམས་དཔའ་ཆེན་པོ་དག་དང་། དེ་ལྟ་བུའི་དགེ་སྦྱོང་དང་། བྲམ་ཟེ་དགེ་བའི་བཤེས་གཉེན་དུ་རིག་ནས་དེ་དག་ལ་བསྙེན་ཅིང་བསྟེན་ཏེ། བསྙེན་བཀུར་བྱེད་ཅིང་མགུ་བར་བྱེད་ཀྱི། ཡིད་བྱུང་བར་མི་བྱེད་དོ། །དགའ་བར་བྱེད་ཀྱི། མི་དགའ་བར་མི་བྱེད་དོ། །
དེས་དགེ་བའི་བཤེས་གཉེན་མགུ་བར་བྱས་པས་དེ་དག་དེ་ལ་ཆོས་ཀྱིས་ཕན་འདོགས་པར་བྱེད་དེ། ཆོས་ཀྱི་གཏམ་གྱིས་ཡང་དག་པར་སྟོན་པར་བྱེད། །ཡང་དག་པར་འཛིན་དུ་འཇུག །ཡང་དག་པར་གཟེངས་སྟོད། ཡང་དག་པར་རབ་ཏུ་དགའ་བར་བྱེད་དེ། སྦྱིན་པས་ལོངས་སྤྱོད་ཆེན་པོ་འགྱུར་བ་
དང་། ཚུལ་ཁྲིམས་ཀྱིས་མཐོ་རིས་སུ་སྐྱེ་བ་དང་། ཐོས་པས་ཤེས་རབ་ཆེན་པོར་འགྱུར་བ་དང་། སྒོམ་པས་འབྲལ་བར་འགྱུར་རོ་ཞེས་ཡང་དག་པར་རབ་ཏུ་སྟོན་ཏོ། །འདི་ནི་སྦྱིན་པ། འདི་ནི་སྦྱིན་པའི་འབྲས་བུ་དང་། འདི་ནི་སེར་སྣ། འདི་ནི་སེར་སྣའི་འབྲས་བུ། འདི་ནི་ཚུལ་
ཁྲིམས། འདི་ནི་ཚུལ་ཁྲིམས་ཀྱི་རྣམ་པར་སྨིན་པ། འདི་ནི་འཆལ་བའི་ཚུལ་ཁྲིམས། འདི་ནི་འཆལ་བའི་ཚུལ་ཁྲིམས་ཀྱི་རྣམ་པར་སྨིན་པ། འདི་ནི་བཟོད་པ། འདི་ནི་བཟོད་པའི་རྣམ་པར་སྨིན་པ། འདི་ནི་གནོད་སེམས། འདི་ནི་གནོད་སེམས་ཀྱི་རྣམ་པར་སྨིན་པ། འདི་ནི་བརྩོན་
འགྲུས། འདི་ནི་བརྩོན་འགྲུས་ཀྱི་རྣམ་པར་སྨིན་པ། འདི་ནི་ལེ་ལོ། འདི་ནི་ལེ་ལོའི་རྣམ་པར་སྨིན་པ། འདི་ནི་བསམ་གཏན། འདི་ནི་བསམ་གཏན་རྣམས་ཀྱི་རྣམ་པར་སྨིན་པ། འདི་ནི་སེམས་གཡེང་བ། འདི་ནི་སེམས་གཡེང་བའི་རྣམ་པར་སྨིན་པ། འདི་ནི་ཤེས་རབ།
འདི་ནི་ཤེས་རབ་ཀྱི་རྣམ་པར་སྨིན་པ། འདི་ནི་འཆལ་བའི་ཤེས་རབ། འདི་ནི་འཆལ་བའི་ཤེས་རབ་ཀྱི་རྣམ་པར་སྨིན་པ། འདི་ནི་ལུས་ཀྱིས་ལེགས་པར་སྤྱོད་པ། འདི་ནི་ལུས་ཀྱིས་ལེགས་པར་སྤྱོད་པའི་རྣམ་པར་སྨིན་པ། འདི་ནི་ལུས་ཀྱིས་ཉེས་པར་སྤྱོད་པ། འདི་ནི་ལུས་
ཀྱིས་ཉེས་པར་སྤྱོད་པའི་རྣམ་པར་སྨིན་པ། འདི་ནི་ངག་གིས་ལེགས་པར་སྤྱོད་པ། འདི་ནི་ངག་གིས་ལེགས་པར་སྤྱོད་པའི་རྣམ་པར་སྨིན་པ། འདི་ནི་ངག་གིས་ཉེས་པར་སྤྱོད་པ། འདི་ནི་ངག་གིས་ཉེས་པར་སྤྱོད་པའི་རྣམ་པར་སྨིན་པ། འདི་ནི་ཡིད་ཀྱིས་ལེགས་པར་སྤྱོད་པ།

འདི་ནི་ཡིད་ཀྱིས་ལེགས་པར་སྤྱོད་པའི་རྣམ་པར་སྨིན་པ། འདི་ནི་ཡིད་ཀྱིས་ཉེས་པར་སྤྱོད་པ། འདི་ནི་ཡིད་ཀྱིས་ཉེས་པར་སྤྱོད་པའི་རྣམ་པར་སྨིན་པ། འདི་ནི་དགེ་བ། འདི་ནི་མི་དགེ་བ། འདི་ནི་བྱ་བ། འདི་ནི་མི་བྱ་བ། འདི་བྱས་ན་ཡུན་རིང་པོའི་དོན་དང་། ཕན་
པ་དང་། བདེ་བར་འགྱུར། འདི་བྱས་ན་ཡུན་རིང་པོར་གནོད་པ་དང་། མི་ཕན་པ་དང་། མི་བདེ་བར་འགྱུར་རོ་ཞེས་དེ་ལྟར་དེ་ལ་དགེ་བའི་བཤེས་གཉེན་དེ་དག་གིས་ཆོས་ཀྱི་གཏམ་གྱིས་ཡང་དག་པར་སྟོན་ཏེ། ཡང་དག་པར་འཛིན་དུ་འཇུག། ཡང་དག་པར་གཟེངས་སྟོད།
ཡང་དག་པར་རབ་ཏུ་དགའ་བར་བྱེད་དེ། སྣོད་དུ་གྱུར་པར་ཡང་ཤེས་ནས་ཟབ་མོའི་གཏམ་ཡང་དག་པར་འཛིན་དུ་འཇུག་སྟེ། འདི་ལྟ་སྟེ། སྟོང་པ་ཉིད་ཀྱི་གཏམ་དང་། མཚན་མ་མེད་པའི་གཏམ་དང་། སྨོན་པ་མེད་པའི་གཏམ་དང་། །མངོན་པར་འདུ་མི་བྱེད་པའི་གཏམ་དང་།
མ་སྐྱེས་པའི་གཏམ་དང་། མ་བྱུང་བའི་གཏམ་དང་། བདག་མེད་པའི་གཏམ་དང་། སེམས་ཅན་མེད་པའི་གཏམ་དང་། སྲོག་མེད་པའི་གཏམ་དང་། གང་ཟག་མེད་པའི་གཏམ་དང་། རྟེན་ཅིང་འབྲེལ་བར་འབྱུང་བ་ཟབ་མོའི་གཏམ་རབ་ཏུ་སྟོན་ཏོ། །འདི་ལྟ་སྟེ། འདི་ཡོད་པས་
འདི་འབྱུང་། འདི་སྐྱེས་པའི་ཕྱིར་འདི་སྐྱེ་བ་སྟེ། འདི་ལྟར་མ་རིག་པའི་རྐྱེན་གྱིས་འདུ་བྱེད་རྣམས། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་གྱིས་རེག་པ།
རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་།
འཁྲུགས་པ་རྣམས་འབྱུང་བར་འགྱུར་ཏེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཤིག་འབྱུང་བར་འགྱུར་རོ། །འདི་ལྟ་སྟེ། འདི་མེད་ན་འདི་མི་འབྱུང་། འདི་འགགས་པས་འདི་འགག་སྟེ། འདི་ལྟ་སྟེ། མ་རིག་པ་འགགས་པས་འདུ་བྱེད་འགག་པ་ནས། དེ་ལྟར་སྡུག་

བསྔལ་གྱི་ཕུང་པོ་ཆེན་པོ་འདི་འབའ་ཤིག་འགག་པར་འགྱུར་རོ་ཞེས་བྱ་བའི་བར་དུ་སྟེ། འདི་ལ་ནི་ཆོས་གང་ཡང་སྐྱེ་བའམ། འགག་པ་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་རྟེན་ཅིང་འབྲེལ་བར་འབྱུང་བ་སྟེ། བདག་པོ་མེད་པ། བྱེད་པ་པོ་མེད་པ། ཚོར་བ་པོ་
མེད་པ། རྒྱུ་དང་རྐྱེན་ལས་བྱུང་བ་སྟེ། འདི་ལ་ཆོས་གང་ཡང་འགྲུབ་པ་མེད། ལྡོག་པ་མེད། རྗེས་སུ་འཇུག་པ་མེད་དེ། ཡང་དག་པ་མ་ཡིན་པའི་རྨོངས་པས་ཁམས་གསུམ་འདོགས་པར་འགྱུར་རོ། །ཉོན་མོངས་པའི་ལམ་དང་། སྡུག་བསྔལ་གྱི་ལམ་འདོགས་པར་འགྱུར་
རོ། །ཡང་དག་པ་མ་ཡིན་པའི་རྨོངས་པ་ཡང་དག་པ་ཇི་ལྟ་བ་བཞིན་དུ་བརྟགས་ནས་ཆོས་གང་ཡང་ཆོས་གང་གི་བྱེད་པ་པོ་མ་ཡིན་ནོ། །གང་ལ་བྱེད་པ་པོ་མེད་པ་དེ་ལ་དོན་དམ་པ་བྱ་བ་ཡང་མི་དམིགས་ཏེ། དེ་ལ་ཆོས་གང་ཡང་འབྱུང་བ་མེད། འཇིག་པ་མེད་དོ་ཞེས་བརྗོད་
དོ། །དེས་དེ་ལྟ་བུའི་ཆོས་ཟབ་མོ་ཐོས་ནས་ཐེ་ཚོམ་མི་ཟ། སོམ་ཉི་མི་བྱེད་ཅིང་ཆོས་ཐམས་ཅད་ལ་ཆགས་པ་མེད་པར་འཇུག་སྟེ། དེ་གཟུགས་ལ་མི་ཆགས། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ལ་མི་ཆགས། མིག་དང་། གཟུགས་དང་།
མིག་གི་རྣམ་པར་ཤེས་པ་ལ་མི་ཆགས། རྣ་བ་དང་སྣ་དང་ལྕེ་དང་ལུས་དང་ཡིད་དང་། ཆོས་དང་ཡིད་ཀྱི་རྣམ་པར་ཤེས་པ་ལ་མི་ཆགས་ཏེ། འདི་ལྟར་ཆོས་ཐམས་ཅད་ནི་རང་བཞིན་གྱིས་སྟོང་པའོ་ཞེས་དད་དོ། །ཤཱ་རིའི་བུ་དེ་ལྟར་དད་པ་ལ་གནས་པའི་བྱང་ཆུབ་སེམས་དཔའ་ནི་སངས་
རྒྱས་ལ་ལྟ་བ་ལས་ཡོངས་སུ་མི་ཉམས། ཆོས་ཉན་པ་ལས་ཡོངས་སུ་མི་ཉམས། དགེ་འདུན་ལ་བསྙེན་བཀུར་བྱེད་པ་ལས་ཡོངས་སུ་མི་ཉམས་སོ། །དེ་གང་དང་གང་དུ་སྐྱེ་བ་དེ་དང་དེ་དག་ཏུ་སངས་རྒྱས་ལ་ལྟ་བ་དང་བྲལ་བར་མི་འགྱུར། ཆོས་ཉན་པ་དང་བྲལ་བར་མི་འགྱུར། དགེ་འདུན་
ལ་བསྙེན་བཀུར་བྱེད་པ་དང་བྲལ་བར་མི་འགྱུར། སངས་རྒྱས་བཅོམ་ལྡན་འདས་རྣམས་ཀྱི་སྤྱན་སྔར་སྐྱེ་བར་འགྱུར་ཏེ། དེ་དང་དེ་དག་ཏུ་སྐྱེས་ནས་ཀྱང་བརྩོན་འགྲུས་རྩོམ་ཞིང་དགེ་བའི་ཆོས་ཡོངས་སུ་ཚོལ་བ་ལ་བརྩོན་པར་འགྱུར་རོ། །དེ་བརྩོན་འགྲུས་བརྩམས་པས་ཁྱིམ་གྱི་

གནས་མི་འདོད་པར་འགྱུར། བུ་ཕོ་དང་། བུ་མོ་འདོད་པར་མི་འགྱུར། བྲན་ཕོ་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་དག་མི་འདོད་པར་འགྱུར། ཡོངས་སུ་གཟུང་བ་ཐམས་ཅད་ཀྱི་དོར་ལྟ་བ་མི་འདོད་པར་འགྱུར་ཏེ། དེ་སྐྱེས་ནས་འདོད་པ་ལ་
མ་རྩེས་པར་ན་ཚོད་གཞོན་ནུར་སངས་རྒྱས་བཅོམ་ལྡན་འདས་རྣམས་ཀྱི་བསྟན་པ་ལ་དད་པས་ཁྱིམ་ནས་ཁྱིམ་མེད་པར་མྱུར་དུ་རབ་ཏུ་འབྱུང་ངོ་། །དེ་དད་པས་རབ་ཏུ་བྱུང་ནས་དགེ་བའི་བཤེས་གཉེན་མཆོག་དང་ལྡན་ཞིང་དགེ་བའི་བཤེས་གཉེན་དང་འགྲོགས་དགེ་བའི་བཤེས་གཉེན་ལ་རྟོག་པས་དགེ་
བའི་བསམ་པ་རྙེད་པར་འགྱུར་རོ། །དེ་དགེ་བའི་བསམ་པ་དང་ལྡན་པས་དགེ་བའི་ཆོས་རྣམས་ཉན་ཅིང་སྒྲུབ་པ་སྙིང་པོར་བྱེད་པར་འགྱུར་ཏེ། ཚིག་ལྷུར་བྱེད་པའི་བློ་དང་ལྡན་པར་མི་འགྱུར། མང་དུ་ཐོས་པ་ཡོངས་སུ་ཚོལ་བས་ངོམས་པར་མི་འགྱུར། ཇི་ལྟར་ཐོས་པའི་ཆོས་རྣམས་གཞན་ལ་ཡང་རྒྱ་ཆེར་ཡང་
དག་པར་རབ་ཏུ་སྟོན་ཏེ། ཟང་ཟིང་མེད་པའི་སེམས་ཀྱིས་རྙེད་པ་དང་། བཀུར་སྟི་དང་། ཚིགས་སུ་བཅད་པ་ལ་མི་རེ་ཞིང་རང་གི་ཚིག་ཡོངས་སུ་མི་སྤོང་བར་གཞན་ལ་ཆོས་སྟོན་ཏེ། ཇི་ལྟར་ཐོས་པ་དང་། ཇི་ལྟར་གནས་པ་དེ་བཞིན་དུ་གཞན་ལ་ཆོས་སྟོན་ཏོ། །ཆོས་ཉན་པ་རྣམས་ལ་
བྱམས་པ་ཆེན་པོ་རྙེད་པར་འགྱུར། སེམས་ཅན་ཐམས་ཅད་ལ་སྙིང་རྗེ་ཆེན་པོ་འཇུག་པར་འགྱུར་རོ། །དེ་མང་དུ་ཐོས་པས་ལུས་དང་སྲོག་ལ་མི་ལྟ་བར་འགྱུར། འདོད་པ་ཉུང་ཞིང་ཆོག་ཤེས་པར་འགྱུར། རབ་ཏུ་དབེན་པ་དང་། ངེས་པར་འགྱུར། གསོ་སླ་བ་དང་། དགང་སླ་བ་དང་།
དགོན་པ་ལ་དགའ་བ་དང་། ཇི་ལྟར་ཐོས་པའི་ཆོས་རྣམས་ཀྱི་དོན་ལ་ཉེ་བར་རྟོག་པ་དང་། དོན་ལ་རྟོན་གྱི་ཡི་གེ་ལ་མི་རྟོན་པ་ཡིན། ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་གྱི་རྟེན་དུ་འགྱུར། བདག་འབའ་ཤིག་གི་ཕྱིར་ཞུགས་པ་མ་ཡིན་གྱི། སེམས་ཅན་ཐམས་ཅད་
ཀྱི་ཕྱིར་འདི་ལྟ་སྟེ། ཐེག་པ་ཆེན་པོ་བླ་ན་མེད་པ་སངས་རྒྱས་ཀྱི་ཡེ་ཤེས་མི་མཉམ་པ་དང་། མཉམ་པའི་ཡེ་ཤེས་འཇིག་རྟེན་གསུམ་པོ་ཐམས་ཅད་ལས་ཁྱད་པར་དུ་འཕགས་པའི་ཡེ་ཤེས་ཡོངས་སུ་ཚོལ་ལོ། །བག་ཡོད་པ་ལྷུར་བྱེད་པར་འགྱུར་ཏེ། དེ་ལ་བག་ཡོད་པ་གང་ཞེ་ན།

འདི་ལྟ་སྟེ། དབང་པོ་ཡང་དག་པར་སྡོམ་པའོ། །དེ་ལ་དབང་པོ་ཡང་དག་པར་སྡོམ་པ་གང་ཞེ་ན། གང་མིག་གིས་གཟུགས་མཐོང་ནས་མཚན་མར་མི་འཛིན། མངོན་རྟགས་སུ་མི་འཛིན། གཟུགས་ལ་ཆགས་པ་དང་། ཉེས་དམིགས་དང་། འབྱུང་བ་ཡང་
ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་བཞིན་དུ་རྣ་བས་སྒྲ་དང་། སྣས་དྲི་དང་། ལྕེས་རོ་དང་། ལུས་ཀྱིས་རེག་བྱ་དང་། ཡིད་ཀྱིས་ཆོས་ཤེས་ནས་མཚན་མར་མི་འཛིན། མངོན་རྟགས་སུ་མི་འཛིན། ཆོས་རྣམས་ལ་ཆགས་པ་དང་། ཉེས་དམིགས་ཀྱང་
ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་འདི་ནི་བག་ཡོད་པ་ཞེས་བྱའོ། །གཞན་ཡང་ཤཱ་རིའི་བུ་བག་ཡོད་པ་ཞེས་བྱ་བ་ནི་གང་བདག་གི་སེམས་འདུལ་བ་དང་། གཞན་གྱི་སེམས་བསྲུང་བ་དང་། ཉོན་མོངས་པ་ལ་དགའ་བ་སྤོང་བ་དང་། ཆོས་ལ་དགའ་བའི་རྗེས་སུ་འགྲོ་བ་དང་།
འདོད་པ་ལ་རྣམ་པར་རྟོག་པ་དང་། གནོད་སེམས་ཀྱི་རྣམ་པར་རྟོག་པ་རྣམས་མི་འབྱུང་བ་དང་། རྣམ་པར་འཚེ་བའི་རྣམ་པར་རྟོག་པ་རྣམས་མི་འབྱུང་བ་དང་། ཆགས་པའི་མི་དགེ་བའི་རྩ་བ་རྣམས་མི་འབྱུང་བ་དང་། ཞེ་སྡང་གི་མི་དགེ་བའི་རྩ་བ་རྣམས་མི་འབྱུང་བ་དང་། གཏི་མུག་
གི་མི་དགེ་བའི་རྩ་བ་རྣམས་མི་འབྱུང་བ་དང་། ལུས་ཀྱིས་ཉེས་པར་སྤྱོད་པ་དང་། ངག་གིས་ཉེས་པར་སྤྱོད་པ་དང་། ཡིད་ཀྱིས་ཉེས་པར་སྤྱོད་པ་མི་འབྱུང་བ་དང་། ཚུལ་བཞིན་མ་ཡིན་པ་ཡིད་ལ་བྱེད་པ་མི་འབྱུང་བ་དང་། སྡིག་པ་མི་དགེ་བའི་ཆོས་ཐམས་ཅད་མི་འབྱུང་བ་དེ་ནི་བག་ཡོད་པ་
ཞེས་བྱའོ། །དེ་ལྟར་ཤཱ་རིའི་བུ་བག་ཡོད་པའི་བྱང་ཆུབ་སེམས་དཔའ་ཚུལ་བཞིན་ཡིད་ལ་བྱེད་པ་ལ་རབ་ཏུ་སྦྱོར་བ་ནི་གང་ཡོད་པ་དེ་ཡང་ཡོད་པར་རབ་ཏུ་ཤེས། གང་མེད་པ་དེ་ཡང་མེད་པར་རབ་ཏུ་ཤེས་སོ། །དེ་ལ་ཅི་ཡོད་ཅི་མེད་ཅེ་ན། ཡང་དག་པ་ལ་རབ་ཏུ་སྦྱོར་བ་ལ་ནི་འཕགས་པའི་
རྣམ་པར་གྲོལ་བ་ཡོད་དོ། །ལོག་པ་ལ་རབ་ཏུ་སྦྱོར་བ་ལ་ནི་འཕགས་པའི་རྣམ་པར་གྲོལ་བ་མེད་དོ། །ལས་ཀྱི་རྣམ་པར་སྨིན་པ་ནི་ཡོད་དོ། །གང་གི་ལས་རྣམ་པར་སྨིན་པ་དེ་ནི་མེད་དོ། །གཞན་ཡང་མིག་ནི་ཡོད་དོ། །གང་གི་མིག་དེ་ནི་མེད་དོ། །རྣ་བ་དང་། སྣ་དང་། ལྕེ་དང་།

ལུས་དང་། ཡིད་ནི་ཡོད་དོ། །གང་གི་ཡིད་དེ་ནི་མེད་དོ། །གཞན་ཡང་གཟུགས་མི་རྟག་པ་དང་། སྡུག་བསྔལ་བ་དང་། འགྱུར་བའི་ཆོས་ཅན་དེ་ནི་ཡོད་དོ། །གཟུགས་རྟག་པ་དང་། བརྟན་པ་དང་། མི་འགྱུར་བའི་ཆོས་ཅན་དང་། ཐེར་ཟུག་པ་
དང་། དེ་བཞིན་དུ་གནས་སོ་ཞེས་བྱ་བ་དེ་ནི་མེད་དོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་མི་རྟག་པ་དང་། སྡུག་བསྔལ་བ་དང་། འགྱུར་བའི་ཆོས་ཅན་དེ་ནི་ཡོད་དོ། །ཚོར་བ་དང་། འདུ་ཤེས་དང་། འདུ་བྱེད་རྣམས་
དང་། རྣམ་པར་ཤེས་པ་རྟག་པ་དང་། བརྟན་པ་དང་། ཐེར་ཟུག་པ་དང་། མི་འགྱུར་བའི་ཆོས་ཅན་དང་། ཡང་དག་པར་དེ་བཞིན་དུ་གནས་སོ་ཞེས་བྱ་བ་དེ་ནི་མེད་དོ། །གཞན་ཡང་མ་རིག་པའི་རྐྱེན་གྱིས་འདུ་བྱེད་རྣམས་ཡོད་ཀྱི། མ་རིག་པ་མེད་ན། འདུ་བྱེད་མེད་
པ་ནས་སྐྱེ་བའི་རྐྱེན་གྱིས་རྒ་ཤིའི་བར་དུ་ཡོད་ཀྱི། སྐྱེ་བ་མེད་ན་རྒ་ཤི་མེད་དོ། །གཞན་ཡང་སྦྱིན་པས་ལོངས་སྤྱོད་ཆེན་པོར་འགྱུར་བ་ནི་ཡོད་དོ། །སྦྱིན་པས་དབུལ་པོར་འགྱུར་བ་ནི་མེད་དོ། །ཚུལ་ཁྲིམས་ཀྱིས་མཐོ་རིས་སུ་སྐྱེ་བ་ནི་ཡོད་དོ། །འཆལ་བའི་ཚུལ་
ཁྲིམས་ཀྱིས་མཐོ་རིས་སུ་སྐྱེ་བ་ནི་མེད་དོ། །ཐོས་པས་ཤེས་རབ་ཆེན་པོར་འགྱུར་བ་ནི་ཡོད་དོ། །འཆལ་བའི་ཤེས་རབ་ཀྱིས་ཤེས་རབ་ཆེན་པོར་འགྱུར་བ་ནི་མེད་དོ། །སྒོམ་པས་འབྲལ་བར་འགྱུར་བ་ནི་ཡོད་དོ། །སྒོམ་པས་འབྲལ་བར་མི་འགྱུར་བ་ནི་མེད་དོ། །ཚུལ་བཞིན་
མ་ཡིན་པ་ཡིད་ལ་བྱེད་པས་ཀུན་ཏུ་སྦྱོར་བ་ནི་ཡོད་དོ། །ཚུལ་བཞིན་མ་ཡིན་པ་ཡིད་ལ་བྱེད་པས་འབྲལ་བ་ནི་མེད་དོ། །བརྩོན་འགྲུས་བརྩམས་པའི་བྱང་ཆུབ་སེམས་དཔའ་ལ་ནི་བྱང་ཆུབ་ཡོད་དོ། །ལེ་ལོ་ཅན་ལ་ནི་བྱང་ཆུབ་མེད་དོ། །ང་རྒྱལ་མེད་པ་ལ་ནི་རབ་ཏུ་བྱུང་བར་ལུང་བསྟན་
པ་ཡོད་དོ། །ང་རྒྱལ་ཅན་ལ་ནི་མྱ་ངན་ལས་འདའ་བ་མེད་དོ། །གཞན་ཡང་ཐམས་ཅད་དུ་སོང་བའི་སྟོང་པ་ཉིད་ནི་ཡོད་དོ། །ལེ་ལོ་ལ་ནི་བདག་དང་། སེམས་ཅན་དང་། སྲོག་དང་། སྐྱེས་བུ་དང་། གང་ཟག་གོ་ཞེས་བྱ་བ་དེ་ནི་མེད་དོ། །དེ་ལྟར་ཤཱ་རིའི་བུ་བག་

ཡོད་པའི་བྱང་ཆུབ་སེམས་དཔའ་ཚུལ་བཞིན་ཡིད་ལ་བྱེད་པ་དང་ལྡན་པ་ནི་གང་ཡོད་པར་འཇིག་རྟེན་གྱི་མཁས་པ་རྣམས་ཀྱིས་ཀུན་ཤེས་པ་དེ་ལ་ནི་ཡོད་དོ་ཞེས་འདོགས་སོ། །གང་མེད་པར་འཇིག་རྟེན་ན་མཁས་པ་རྣམས་ཀྱིས་ཀུན་ཤེས་པ་དེ་ལ་ནི་མེད་དོ་ཞེས་འདོགས་སོ། །དེ་ཡོད་ཅེས་
ཐ་སྙད་དུ་འདོགས་པ་ལ་ཡང་ཡང་དག་པར་ཤེས་པར་མི་བྱེད། མེད་ཅེས་ཐ་སྙད་ཏུ་འདོགས་པ་ལ་ཡང་ཡང་དག་པར་ཤེས་པར་མི་བྱེད་དོ། །སངས་རྒྱས་བཅོམ་ལྡན་འདས་ཐམས་ཅད་ཀྱིས་གསུངས་པའི་ཡང་དག་པའི་དོན་ཀྱང་ཁོང་དུ་ཆུད་དེ། ཆོས་ཐམས་ཅད་ནི་དེ་བཞིན་གཤེགས་
པས་བསྡུས་ཏེ་ཆོས་ཀྱི་མདོ་བཞིར་འདུས་པར་བྱས་སོ། །བཞི་གང་ཞེ་ན། འདི་ལྟ་སྟེ། འདུ་བྱེད་ཐམས་ཅད་མི་རྟག་པ་དང་། འདུ་བྱེད་ཐམས་ཅད་སྡུག་བསྔལ་བ་དང་། ཆོས་ཐམས་ཅད་བདག་མེད་པ་དང་། མྱ་ངན་ལས་འདས་པ་ཞི་བའོ། །འདུ་བྱེད་ཐམས་ཅད་མི་རྟག་པ་ཞེས་བྱ་བ་
ནི་རྟག་པར་འདུ་ཤེས་པའི་སེམས་ཅན་རྣམས་ཀྱི་རྟག་པར་འདུ་ཤེས་པ་སྤང་བའི་ཕྱིར་དེ་བཞིན་གཤེགས་པས་བཤད་དོ། །འདུ་བྱེད་ཐམས་ཅད་སྡུག་བསྔལ་བ་ཞེས་བྱ་བ་ནི་བདེ་བར་འདུ་ཤེས་པའི་སེམས་ཅན་རྣམས་ཀྱི་བདེ་བར་འདུ་ཤེས་པ་སྤང་བའི་ཕྱིར། དེ་བཞིན་གཤེགས་པས་
བཤད་དོ། །ཆོས་ཐམས་ཅད་བདག་མེད་པ་ཞེས་བྱ་བ་ནི་བདག་ཏུ་འདུ་ཤེས་པའི་སེམས་ཅན་རྣམས་ཀྱི་བདག་ཏུ་འདུ་ཤེས་པ་སྤོང་བའི་ཕྱིར་དེ་བཞིན་གཤེགས་པས་བཤད་དོ། །མྱ་ངན་ལས་འདས་པ་ཞི་བ་ཞེས་བྱ་བ་ནི་དམིགས་པས་ཕྱིན་ཅི་ལོག་ཏུ་གྱུར་པའི་སེམས་ཅན་རྣམས་ཀྱི་
དམིགས་པའི་ཕྱིན་ཅི་ལོག་ཏུ་གྱུར་པ་སྤོང་བའི་ཕྱིར་དེ་བཞིན་གཤེགས་པས་བཤད་དོ། །དེ་འདུ་བྱེད་ཐམས་ཅད་མི་རྟག་གོ་ཞེས་ཐོས་ནས་ཤིན་ཏུ་མི་རྟག་པ་ཉིད་ལ་འཇུག་གོ །འདུ་བྱེད་ཐམས་ཅད་སྡུག་བསྔལ་བའོ། །ཞེས་ཐོས་ནས་སྨོན་ལམ་དང་བྲལ་བ་སྐྱེད་དོ། །ཆོས་
ཐམས་ཅད་བདག་མེད་པའོ་ཞེས་ཐོས་ནས་སྟོང་པ་ཉིད་ཀྱི་ཏིང་ངེ་འཛིན་དང་། རྣམ་པར་ཐར་པའི་སྒོ་ལ་སྒོམ་མོ། །མྱ་ངན་ལས་འདས་པ་ཞི་བ་ཞེས་ཐོས་ནས་མཚན་མ་མེད་པ་ཡོངས་སུ་འདྲིས་པར་བྱེད་དེ། དུས་མ་ཡིན་པར་ནི་ཡང་དག་པའི་མཐའ་མངོན་སུམ་དུ་མི་བྱེད་དོ། །

དེ་ལྟར་ཤཱ་རིའི་བུ་དེ་ལྟ་བུའི་ཆོས་ལ་བརྩོན་པའི་བྱང་ཆུབ་སེམས་དཔའ་ནི་དགེ་བའི་ཆོས་ལས་ཡོངས་སུ་མི་ཉམས་ཏེ། མྱུར་དུ་སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱེད་དོ། །བྱང་ཆུབ་སེམས་དཔའ་བརྟག་པ་ཞེས་བྱ་བའི་ལེའུ་སྟེ་གསུམ་པའོ།། །།
གཞན་ཡང་ཤཱ་རིའི་བུ་དེ་ལྟར་དད་པ་ལ་གནས་པའི་བྱང་ཆུབ་སེམས་དཔའ་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་བསམ་གྱིས་མི་ཁྱབ་པའི་ཆོས་བཅུ་ལ་མངོན་པར་དད། ཡིད་ཆེས། རབ་ཏུ་རྟོག །ཐེ་ཚོམ་མི་ཟ། རྒྱ་ཆེར་དགའ་མགུ་སྟེ།
རངས་པ་རྙེད་ནས་ངོ་མཚར་དང་རྨད་དུ་འདུ་ཤེས་སྐྱེད་དོ། །བཅུ་གང་ཞེ་ན། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྐུ་བསམ་གྱིས་མི་ཁྱབ་པ་ལ་མངོན་པར་དད། ཡིད་ཆེས། རབ་ཏུ་རྟོག །ཐེ་ཚོམ་མི་ཟ། རྒྱ་ཆེར་དགའ་མགུ་སྟེ། རངས་
པ་རྙེད་ནས། ངོ་མཚར་དང་རྨད་དུ་འདུ་ཤེས་སྐྱེད་དོ། །འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་དབྱངས་བསམ་གྱིས་མི་ཁྱབ་པ་ལ་མངོན་པར་དད་པ་ནས་ངོ་མཚར་དང་། རྨད་དུ་འདུ་ཤེས་སྐྱེད་པའི་བར་དུའོ། །འདི་ལྟ་སྟེ། དེ་བཞིན་གཤེགས་
པ་རྣམས་ཀྱི་དེ་བཞིན་གཤེགས་པའི་ཡེ་ཤེས་བསམ་གྱིས་མི་ཁྱབ་པ་དང་། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་འོད་བསམ་གྱིས་མི་ཁྱབ་པ་དང་། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཚུལ་ཁྲིམས་དང་། ཏིང་
ངེ་འཛིན་བསམ་གྱིས་མི་ཁྱབ་པ་དང་། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་རྫུ་འཕྲུལ་བསམ་གྱིས་མི་ཁྱབ་པ་དང་། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་བསམ་གྱིས་མི་ཁྱབ་པ་དང་། འདི་
ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་མི་འཇིགས་པ་བསམ་གྱིས་མི་ཁྱབ་པ་དང་། འདི་ལྟ་སྟེ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྙིང་རྗེ་ཆེན་པོ་བསམ་གྱིས་མི་ཁྱབ་པ་དང་། འདི་ལྟ་སྟེ། དེ་བཞིན་གཤེགས་པ་རྣམས་

ཀྱི་དེ་བཞིན་གཤེགས་པའི་སངས་རྒྱས་ཀྱི་ཆོས་མ་འདྲེས་པ་བསམ་གྱིས་མི་ཁྱབ་པ་ལ་མངོན་པར་དད། ཡིད་ཆེས་རབ་ཏུ་རྟོག །ཐེ་ཚོམ་མི་ཟ། རྒྱ་ཆེར་དགའ་མགུ་སྟེ་རངས་པ་རྙེད་ནས་ངོ་མཚར་དང་རྨད་དུ་འདུ་ཤེས་སྐྱེད་པའོ། །དེ་བཞིན་གཤེགས་པའི་ངོ་མཚར་དང་རྨད་ཀྱི་ཆོས་བཅུ་པོ་འདི་རྣམས་ཀྱི་
ཕྱིར་བརྩོན་འགྲུས་ཆེར་རྩོམ་ཞིང་མི་ཞུམ་མི་འགོང་མི་སྐྱོ་སྟེ། དེ་བཞིན་གཤེགས་པའི་བསམ་གྱིས་མི་ཁྱབ་པ་ངོ་མཚར་དང་རྨད་ཀྱི་ཆོས་བཅུ་པོ་མ་ཐོབ་ཀྱི་བར་དུ་ལུས་ཀྱི་པགས་པ་དང་རྒྱུས་པ་དང་པྲི་དང་། དབུགས་དང་རུས་པ་དག་ཞིག་ལ་ལུས་ཀྱི་ཤ་དང་ཁྲག་སྐམས་ཀྱང་སླའི།
བརྩོན་འགྲུས་ཉམས་པར་མི་བྱའོ་སྙམ་དུ་དེ་ལྟར་སེམས་སྐྱེད་དོ། །ཤཱ་རིའི་བུ་དེ་ལྟར་དད་པས་མོས་པའི་བྱང་ཆུབ་སེམས་དཔའ་ནི་དེ་བཞིན་གཤེགས་པའི་བསམ་གྱིས་མི་ཁྱབ་པ་ངོ་མཚར་དང་རྨད་ཀྱི་ཆོས་བཅུ་པོ་འདི་རྣམས་ལ་མངོན་པར་དད། ཡིད་ཆེས་རབ་ཏུ་རྟོག །ཐེ་ཚོམ་མི་ཟ། རྒྱ་ཆེར་དགའ་མགུ་སྟེ་
རངས་པ་རྙེད་དོ། །དེ་ནས་བཅོམ་ལྡན་འདས་ཀྱིས་དོན་འདི་ཉིད་རྒྱ་ཆེར་རབ་ཏུ་བསྟན་པའི་ཕྱིར་དེའི་ཚེ་ཚིགས་སུ་བཅད་པ་འདི་དག་གསུངས་སོ། །སངས་རྒྱས་སྐུ་ནི་བསམ་མི་ཁྱབ། །ཆོས་ཀྱི་སྐུ་ཡིས་རབ་ཏུ་ཕྱེ། །མཚན་མ་མེད་ཅིང་སྣང་མེད་ལ། །རྒྱལ་བའི་ཐུགས་སྲས་དད་པར་བྱེད། །འགྲོ་བ་ཐ་དད་ཇི་སྙེད་
ཀྱི། །སྒྲ་སྐད་བསམ་གྱིས་མི་ཁྱབ་པ། །ཐམས་ཅད་དུ་ནི་ཆོས་སྒྲོགས་ཏེ། །སངས་རྒྱས་ཀྱི་ནི་སྤྱོད་ཡུལ་དང་། །ཇི་ཙམ་སེམས་ཅན་ཐམས་ཅད་ཀྱི། དུས་གསུམ་དག་གི་དབང་པོ་ཀུན། །སངས་རྒྱས་ཀྱིས་ནི་རབ་མཁྱེན་ཏེ། །བསམ་མི་ཁྱབ་ལ་རབ་ཏུ་དད། །སངས་རྒྱས་རྣམས་ཀྱི་འོད་མཐའ་ཡས། །འོད་
ཟེར་དྲ་བ་བསམ་མི་ཁྱབ། །ཞིང་རྣམས་རྒྱ་མཚོ་མཐའ་ཡས་པ། །ཐམས་ཅད་ཀྱི་ནི་ཕྱོགས་སུ་ཁྱབ། །ཐུབ་པའི་ཚུལ་ཁྲིམས་འཇིག་རྟེན་འདས། །འཇིག་རྟེན་ཆོས་ལ་མི་གནས་ཏེ། །རྫུ་འཕྲུལ་རྐང་པ་བསམ་ཡས་ལ། །བྱང་ཆུབ་སེམས་དཔའ་རབ་ཏུ་དད། །སངས་རྒྱས་རྟག་ཏུ་མཉམ་པར་གཞག །
རྣམ་པར་ཐར་པ་བསམ་མི་ཁྱབ། །སངས་རྒྱས་རྣམས་ཀྱི་སྤྱོད་ཡུལ་ནི། །སེམས་ཅན་ཀུན་གྱིས་ཤེས་མི་ནུས། །ཆོས་ཀྱི་དབྱིངས་ནི་དབྱེར་མེད་ལ། །གང་གི་སྟོབས་ཀྱིས་ཤེས་འགྱུར་བ། །དྲང་སྲོང་ཆེན་པོའི་ཡེ་ཤེས་སྟོབས། །ནམ་མཁའ་བཞིན་དུ་མཐའ་ཡས་པ། །སེམས་ཅན་

གཅིག་གི་དོན་ཕྱིར་ཡང་། །བསྐལ་པ་རྒྱ་མཚོ་མཐའ་ཡས་པར། །འདུལ་བའི་དོན་ཕྱིར་བཞུགས་པས་ན། །དེ་དག་སྙིང་རྗེ་དེ་འདྲའོ། །སེམས་ཅན་ཐམས་ཅད་གཞན་དང་གཞན། །དྲི་བ་རྒྱ་མཚོ་འདྲི་བྱེད་ཀྱང་། །དྲིས་ལན་གཅིག་གིས་ཚིམ་བྱེད་དེ། །མི་འཇིགས་པ་ནི་བསམ་མི་ཁྱབ། །
རྣམ་པ་ཐམས་ཅད་མཆོག་ལྡན་པ། །ཆོས་རྣམས་ཐམས་ཅད་ཐུགས་སུ་ཆུད། །སངས་རྒྱས་ཆོས་རྣམས་མ་འདྲེས་པ། །ཐམས་ཅད་དུ་ནི་ཡེ་ཤེས་གཟིགས། །དད་པ་ལ་ནི་རབ་གནས་པས། །སངས་རྒྱས་ཀུན་ཆོས་ཆོས་ཉིད་རྣམས། །བསམ་གྱིས་མི་ཁྱབ་འདི་དག་ལ། །དེ་དག་ཐམས་ཅད་དད་
པར་བྱེད། །ཤཱ་རིའི་བུ་ཇི་ལྟར་བྱང་ཆུབ་སེམས་དཔའ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྐུ་བསམ་གྱིས་མི་ཁྱབ་པ་ལ་མངོན་པར་དད། ཡིད་ཆེས་རབ་ཏུ་རྟོག །ཐེ་ཚོམ་མི་ཟ། རྒྱ་ཆེར་དགའ་མགུ་སྟེ་རངས་པ་རྙེད་ནས་ངོ་མཚར་དང་རྨད་དུ་འདུ་ཤེས་སྐྱེད་ཅེ་ན། འདི་ལྟ་སྟེ།
དེ་བཞིན་གཤེགས་པའི་སྐུ་ནི་མི་དགེ་བའི་ཆོས་ཐམས་ཅད་སྤངས་པ་དགེ་བའི་ཆོས་ཐམས་ཅད་དང་ལྡན་པའོ། །འདི་ལྟ་སྟེ་མི་གཙང་བ་དང་། མཆིལ་མ་དང་། ངར་སྣབས་དང་། སྣབས་དང་། རྣག་དང་། ཁྲག་དང་། བཤང་བ་དང་། གཅི་བ་དང་བྲལ་བ། རུས་པ་དང་། ཤ་དང་། ཁྲག་དང་།
རྒྱུས་པ་ལས་རྣམ་པར་གྲོལ་བའོ། །འདི་ལྟ་སྟེ། དེ་བཞིན་གཤེགས་པའི་སྐུ་ནི་རང་བཞིན་གྱིས་འོད་གསལ་བ། ཡོངས་སུ་དག་པ་ཉོན་མོངས་པ་ཐམས་ཅད་ཀྱི་དྲི་མ་དང་བྲལ་བའོ། །འདི་ལྟ་སྟེ། དེ་བཞིན་གཤེགས་པའི་སྐུ་ནི་འཇིག་རྟེན་ལས་འདས་པ་སྟེ། འཇིག་རྟེན་གྱི་ཆོས་ཐམས་ཅད་ཀྱིས་མ་
གོས་པའོ། །འདི་ལྟ་སྟེ་དེ་བཞིན་གཤེགས་པའི་སྐུ་ནི་ཡོན་ཏན་དཔག་ཏུ་མེད་པ་དང་། བསོད་ནམས་དང་ཡེ་ཤེས་ཀྱི་ཚོགས་བསགས་པས་སེམས་ཅན་ཐམས་ཅད་ཀྱི་འཚོ་བའོ། །འདི་ལྟ་སྟེ་དེ་བཞིན་གཤེགས་པའི་སྐུ་ནི་ཚུལ་ཁྲིམས་དཔག་ཏུ་མེད་པ་ཡོངས་སུ་བསྒོམས་པ་དང་ཏིང་ངེ་འཛིན་
དང་། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་གཟིགས་པ་དཔག་ཏུ་མེད་པ་ཡོངས་སུ་བསྒོམས་པས་ཡོན་ཏན་ཐམས་ཅད་རབ་ཏུ་རྒྱས་པའོ། །འདི་ལྟ་སྟེ། དེ་བཞིན་གཤེགས་པའི་སྐུ་ནི་ཡོངས་སུ་དག་པའི་མེ་ལོང་གི་དཀྱིལ་འཁོར་གྱི་གཟུགས་བརྙན་ལྟ་བུ་དང་། ཆུ་ལ་ཟླ་

བ་སྣང་བ་ལྟ་བུའོ། །འདི་ལྟ་སྟེ་དེ་བཞིན་གཤེགས་པའི་སྐུ་ནི་ནམ་མཁའི་དབྱིངས་སུ་ཡང་དག་པར་འདུ་ཞིང་ཆོས་ཀྱི་དབྱིངས་ཀྱིས་ཀླས་པས་བསམ་གྱིས་མི་ཁྱབ་པའོ། །འདི་ལྟ་སྟེ་དེ་བཞིན་གཤེགས་པའི་སྐུ་ནི་ཟག་པ་ཐམས་ཅད་ལས་ལོག་པས་ཟག་པ་མེད་པའོ། །འདི་ལྟ་སྟེ་དེ་བཞིན་གཤེགས་པའི་
སྐུ་ནི་འདུས་བྱས་ཐམས་ཅད་དང་བྲལ་བས་འདུས་མ་བྱས་པའོ། །ནམ་མཁའི་ལྟ་བུའི་སྐུའོ། །མཉམ་པ་མེད་པའི་སྐུའོ། །འཇིག་རྟེན་གསུམ་པོ་ཐམས་ཅད་ལས་ཁྱད་པར་དུ་འཕགས་པའི་སྐུའོ། །དེ་བཞིན་གཤེགས་པའི་སྐུ་ནི་དཔེ་མེད་པ། ཟླ་མེད་པ། མཚུངས་པ་མེད་པའི་སྐུ་སྟེ་དག་པ་དྲི་མ་མེད་པ།
ཀུན་ནས་ཉོན་མོངས་པ་མེད་པ། རང་བཞིན་གྱིས་འོད་གསལ་བའོ། །དེ་ནི་སྔོན་གྱི་མཐས་རབ་ཏུ་ཕྱེ་བ་མ་ཡིན། ཕྱི་མའི་མཐས་རབ་ཏུ་ཕྱེ་བ་མ་ཡིན། ད་ལྟར་བྱུང་བས་རབ་ཏུ་ཕྱེ་བ་མ་ཡིན། སྐྱེ་བ་དང་། རུས་དང་། རིགས་ཀྱིས་རབ་ཏུ་ཕྱེ་བ་མ་ཡིན། གཟུགས་ཀྱིས་རབ་ཏུ་ཕྱེ་བ་མ་ཡིན། མཚན་གྱིས་རབ་
ཏུ་ཕྱེ་བ་མ་ཡིན། དཔེ་བྱད་བཟང་པོས་རབ་ཏུ་ཕྱེ་བ་མ་ཡིན། སེམས་ཀྱིས་རབ་ཏུ་ཕྱེ་བ་མ་ཡིན། ཡིད་ཀྱིས་རབ་ཏུ་ཕྱེ་བ་མ་ཡིན། རྣམ་པར་ཤེས་པས་རབ་ཏུ་ཕྱེ་བ་མ་ཡིན། ལྟ་བས་རབ་ཏུ་ཕྱེ་བ་མ་ཡིན། ཐོས་པས་རབ་ཏུ་ཕྱེ་བ་མ་ཡིན། དྲན་པས་རབ་ཏུ་ཕྱེ་བ་མ་ཡིན། རྣམ་པར་རིག་པས་རབ་ཏུ་
ཕྱེ་བ་མ་ཡིན། ཕུང་པོས་རབ་ཏུ་ཕྱེ་བ་མ་ཡིན། ཁམས་ཀྱིས་རབ་ཏུ་ཕྱེ་བ་མ་ཡིན། སྐྱེ་མཆེད་ཀྱིས་རབ་ཏུ་ཕྱེ་བ་མ་ཡིན། སྐྱེ་བས་རབ་ཏུ་ཕྱེ་བ་མ་ཡིན། གནས་པས་རབ་ཏུ་ཕྱེ་བ་མ་ཡིན། འཇིག་པས་རབ་ཏུ་ཕྱེ་བ་མ་ཡིན། འཛིན་པས་རབ་ཏུ་ཕྱེ་བ་མ་ཡིན། འདོར་བས་རབ་ཏུ་ཕྱེ་བ་མ་ཡིན། ངེས་པར་
འབྱུང་བས་རབ་ཏུ་ཕྱེ་བ་མ་ཡིན། སྤྱོད་པས་རབ་ཏུ་ཕྱེ་བ་མ་ཡིན། ཁ་དོག་གིས་རབ་ཏུ་ཕྱེ་བ་མ་ཡིན། རྟགས་ཀྱིས་རབ་ཏུ་ཕྱེ་བ་མ་ཡིན། དབྱིབས་ཀྱིས་རབ་ཏུ་ཕྱེ་བ་མ་ཡིན། འོང་བས་རབ་ཏུ་ཕྱེ་བ་མ་ཡིན། འགྲོ་བས་རབ་ཏུ་ཕྱེ་བ་མ་ཡིན། ཚུལ་ཁྲིམས་ཡིད་ལ་བྱེད་པས་རབ་ཏུ་ཕྱེ་བ་མ་ཡིན། ཏིང་ངེ་འཛིན་གྱིས་
རབ་ཏུ་ཕྱེ་བ་མ་ཡིན། ཤེས་རབ་ཀྱིས་རབ་ཏུ་ཕྱེ་བ་མ་ཡིན། རྣམ་པར་གྲོལ་བས་རབ་ཏུ་ཕྱེ་བ་མ་ཡིན། རྣམ་པར་གྲོལ་བའི་ཡེ་ཤེས་མཐོང་བ་ཡིད་ལ་བྱེད་པས་རབ་ཏུ་ཕྱེ་བ་མ་ཡིན། མཚན་ཉིད་ཀྱིས་རབ་ཏུ་ཕྱེ་བ་མ་ཡིན། མཚན་ཉིད་མི་འཐུན་པས་རབ་ཏུ་ཕྱེ་བ་མ་ཡིན། ཆོས་ཀྱི་མཚན་ཉིད་ཀྱིས་རབ་ཏུ་ཕྱེ་བ་

མ་ཡིན། སྟོབས་སུ་སྒྲོ་བཏགས་པས་རབ་ཏུ་ཕྱེ་བ་མ་ཡིན། མི་འཇིགས་པས་རབ་ཏུ་ཕྱེ་བ་མ་ཡིན། སོ་སོ་ཡང་དག་པར་རིག་པས་རབ་ཏུ་ཕྱེ་བ་མ་ཡིན། རྫུ་འཕྲུལ་གྱིས་རབ་ཏུ་ཕྱེ་བ་མ་ཡིན། སྙིང་རྗེ་ཆེན་པོས་རབ་ཏུ་ཕྱེ་བ་མ་ཡིན། སངས་རྒྱས་ཀྱི་ཆོས་མ་འདྲེས་པར་སྒྲོ་བཏགས་པས་རབ་ཏུ་ཕྱེ་བ་མ་ཡིན་ཏེ། སྒྱུ་
མ་དང་། སྨིག་རྒྱུ་དང་། ཆུ་ཟླ་དང་། རྨི་ལམ་གྱི་རང་བཞིན་ལྟ་བུར་སྐྱེ་བའི་སྐུའོ། །སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་ལས་བྱུང་བའི་སྐུའོ། །མི་འགྱུར་བའི་སྐུའོ། །མི་འཁྲུགས་པའི་སྐུའོ། །རྣམ་པར་མི་རྟོག་པའི་སྐུའོ། །མི་གནས་པའི་སྐུའོ། །མི་སྙེམས་པའི་སྐུའོ། །གནས་པ་དང་རབ་ཏུ་གནས་པ་
དང་མི་གཡོ་བ་ཐོབ་པའི་སྐུའོ། །གཟུགས་མེད་པ་གཟུགས་ཀྱི་རང་བཞིན་མ་ཡིན་པའི་སྐུའོ། །ཚོར་བ་མ་ཡིན། འདུ་ཤེས་མ་ཡིན། འདུ་བྱེད་མ་ཡིན། རྣམ་པར་ཤེས་པ་མ་ཡིན། རྣམ་པར་ཤེས་པའི་རང་བཞིན་མ་ཡིན་པའི་སྐུའོ། །བྱུང་བ་མ་ཡིན། ཀུན་ཏུ་བྱུང་བ་མ་ཡིན། མ་བྱུང་བ་མ་ཡིན་པའི་སྐུའོ། །རྨད་དུ་བྱུང་
བ་རྨད་དུ་བྱུང་བའི་ཆོས་ཀྱི་སྐུའོ། །མིག་ལས་བྱུང་བ་མ་ཡིན། གཟུགས་སུ་གཏོགས་པ་མ་ཡིན། ཕྱི་རོལ་མ་ཡིན། རྣ་བ་ལ་གནས་པ་མ་ཡིན། སྒྲར་གཏོགས་པ་མ་ཡིན། ཕྱི་རོལ་མ་ཡིན། སྣས་རྣམ་པར་ཤེས་པར་བྱ་བ་མ་ཡིན། དྲིར་གཏོགས་པ་མ་ཡིན། ཕྱི་རོལ་མ་ཡིན། ལྕེས་བསྐྱེད་པ་མ་ཡིན། རོར་
གཏོགས་པ་མ་ཡིན། ཕྱི་རོལ་མ་ཡིན། ལུས་དང་ལྡན་པ་མ་ཡིན། རེག་བྱར་གཏོགས་པ་མ་ཡིན། ཕྱི་རོལ་མ་ཡིན། སེམས་ལ་འཇུག་པ་མ་ཡིན། ཡིད་ལ་འཇུག་པ་མ་ཡིན། རྣམ་པར་ཤེས་པ་ལ་འཇུག་པ་མ་ཡིན། ལྡོག་པ་མ་ཡིན། རྗེས་སུ་འཇུག་པ་མ་ཡིན། གནས་པ་དང་མི་གཡོ་བ་ཐོབ་པ། ཆོས་ཀྱི་
དབྱིངས་ཀྱིས་ཀླས་པ། ནམ་མཁའི་ཁམས་ཀྱི་མཐས་གཏུགས་པ། ནམ་མཁའ་དང་མཉམ་པའི་སྐུ་སྟེ། ཤཱ་རིའི་བུ་འདི་ནི་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྐུ་བསམ་གྱིས་མི་ཁྱབ་པ་སྟེ། དེ་ལ་བྱང་ཆུབ་སེམས་དཔའ་མངོན་པར་དང་།