Kinh tạng Tây Tạng (Kangyur Đại Học) — 035_ཕལ་ཆེན།_ཀ

ྱོད་པར་འགྱུར་བ་མེད་དེ། སེམས་ཅན་གང་ལ་ཡང་། རིམ་གྲོ་མེད་པར་མི་བྱེད་པ་འདི་ནི་
བྱང་ཆུབ་སེམས་དཔའ་ཐམས་ཅད་གཏོང་བའོ།། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། །བམ་པོ་ཉི་ཤུ་བརྒྱད་པ། དེ་ལ་བྱང་ཆུབ་སེམས་དཔའ་འདས་པ་གཏོང་བ་གང་ཞེ་ན།
འདི་ལ་བྱང་ཆུབ་སེམས་དཔའ་སངས་རྒྱས་བཅོམ་ལྡན་འདས། འདས་པ་རྣམས་ཀྱི་བྱང་ཆུབ་སེམས་དཔའི་སྤྱོད་པ་ཐོས་པ་དང་། འདས་པའི་སངས་རྒྱས་བཅོམ་ལྡན་འདས་རྣམས་ཀྱི་ཕུན་སུམ་ཚོགས་པ་ཐམས་ཅད་ཉན་ཅིང་ཐོས་ནས། དེ་དག་ཐམས་
ཅད་ལ་ཆགས་པར་མི་བྱེད། འབྲལ་བར་མི་བྱེད། དམིགས་སུ་མེད་པས་རབ་ཏུ་འཇུག་སྟེ། རྟོག་པར་མི་བྱེད་དེ། རྣམ་པར་རྟོག་པར་མི་བྱེད། ཡོངས་སུ་རྟོག་པར་མི་བྱེད། སྨོན་པར་མི་བྱེད། ཆགས་པར་མི་བྱེད། ཞེན་པར་མི་བྱེད། རྟེན་
པའི་སེམས་ཀྱིས་གནས་པར་མི་བྱེད། རྨི་ལམ་གྱི་ཆོས་དེ་ལྟ་བུ་ཐོབ་པར་བྱེད་ཀྱང་། དགེ་བའི་རྩ་བ་དེ་དག་ལ་སྙིང་པོ་མེད་པའི་འདུ་ཤེས་མི་བསྐྱེད་དོ། །དགེ་བའི་རྩ་བ་དེ་དག་ལ་རྟེན་པའི་འདུ་ཤེས་སུ་མི་བྱེད་དོ། །འོན་ཀྱང་རྟེན་པའི་སེམས་ཅན་
རྣམས་གཟུད་པ་དང་། སངས་རྒྱས་ཀྱི་ཆོས་ཀྱང་ཡོངས་སུ་སྨིན་པར་བྱ་བའི་ཕྱིར་བརྗོད་དོ། །འཆད་དོ། །སྟོན་ཏོ། །འདས་པའི་ཆོས་ཉིད་ལ་བརྟགས་ན་ཤར་ཕྱོགས་སུ་རྗེས་སུ་མི་མཐོང་ངོ་། །ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་

སུ་རྗེས་སུ་མི་མཐོང་ངོ་། །བྱང་ཤར་གྱི་ཕྱོགས་མཚམས་དང་། ཤར་ལྷོའི་ཕྱོགས་མཚམས་དང་། ལྷོ་ནུབ་ཀྱི་ཕྱོགས་མཚམས་དང་། ནུབ་བྱང་གི་ཕྱོགས་མཚམས་དང་། འོག་དང་སྟེང་གི་ཕྱོགས་སུ་རྗེས་སུ་མི་མཐོང་སྟེ།
དེ་འདི་སྙམ་དུ་གང་ཅི་ཡང་རུང་མ་བཏང་བ་དེ་ནི་བཏང་བའོ་སྙམ་དུ་སེམས་ཏེ། ཀྱེ་རྒྱལ་བའི་སྲས་དག །འདི་ནི་བྱང་ཆུབ་སེམས་དཔའི་འདས་པ་གཏོང་བའོ། །དེ་ལ་བྱང་ཆུབ་སེམས་དཔའི་མ་འོངས་པ་གཏོང་བ་གང་ཞེ་ན། འདི་ལ་བྱང་ཆུབ་སེམས་དཔའ་
སངས་རྒྱས་བཅོམ་ལྡན་འདས་མ་བྱོན་པ་རྣམས་ཀྱི་སྤྱོད་པ་ཉན་ན། མཚན་མའི་ཚུལ་དང་། དངོས་པོར་འཛིན་པས་མི་འཛིན་ཏེ། འཇིག་རྟེན་གྱི་ཁམས་གཞན་ལ་བརྩོན་པར་མི་བྱེད་པ་ཡིན། ཚོལ་བ་མི་མངའ་བ་ཡིན། འདོད་ཆགས་པའི་སེམས་ཀྱིས་མི་
སྨོན་པ་ཡིན། དེ་ལ་སེམས་མི་སྡུད་པ་ཡིན་ཏེ། མྱོང་བར་མི་བྱེད་དོ། །སྨོན་པར་མི་བྱེད་དོ། །དེ་དག་ཏུ་དགེ་བའི་རྩ་བ་རྣམས་མི་གཏོང་ངོ་། །དེ་དག་ཏུ་དགེ་བའི་རྩ་བ་རྣམས་འཇུག་པར་མི་བྱེད་དེ། སྤྱོད་པ་ཡང་རྒྱུན་གཅོད་པར་མི་བྱེད་དོ། །
འོན་ཀྱང་དམིགས་པ་དེས་སངས་རྒྱས་ཀྱི་ཆོས་སུ་འགྲུབ་པར་བྱ་བའི་ཕྱིར། སེམས་ཅན་རྣམས་ཀྱི་བསམ་པ་དང་། ཚོགས་སྡུད་པ་བྱེད་ཅིང་ཆོས་ཉིད་ཀྱང་རབ་ཏུ་སྡུད་དོ། །ཆོས་དེ་ནི་ཡུལ་ན་ཡང་མི་གནས། ཕྱོགས་ན་ཡང་མི་གནས། ནང་ན་ཡང་
མ་ཡིན། ཕྱི་རོལ་ན་ཡང་མ་ཡིན། རྒྱང་རིང་པོ་ནའང་མ་ཡིན་ནོ། །དྲུང་ན་འང་མ་ཡིན་ནོ་ཞེས་དེ་འདི་སྙམ་དུ་སེམས་ཏེ། གང་དུ་ཡང་ནམ་ཡང་སྤྱད་པ་མེད་པར་བྱའོ། །སྙམ་པ་འདི་ནི་མ་འོངས་པ་གཏོང་བའོ། །ཀྱེ་རྒྱལ་བའི་སྲས་དག །དེ་ལ་
བྱང་ཆུབ་སེམས་དཔའི་ད་ལྟར་བྱུང་བའི་གཏོང་བ་གང་ཞེ་ན། ཀྱེ་རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་རྒྱལ་པོ་ཆེན་པོ་བཞིའི་རིས་ཀྱི་ལྷ་རྣམས་དང་། སུམ་བཅུ་རྩ་གསུམ་པ་དང་། མཚེ་མ་དང་། དགའ་ལྡན་དང་། འཕྲུལ་དགའ་

དང་། གཞན་འཕྲུལ་དབང་བྱེད་དང་། ཚངས་པ་དང་། ཚངས་རིས་དང་། ཚངས་ལྷ་ཉེ་ཕན་དང་། ཚངས་པ་ཀུན་འཁོར་དང་། ཚངས་ཆེན་དང་། སྣང་བ་དང་། འོད་ཆུང་དང་། ཚད་མེད་སྣང་བ་དང་། ཤིན་ཏུ་སྣང་བ་དང་། དགེ་བ་དང་། ཆུང་
དགེ་དང་། ཚད་མེད་དགེ་བ་དང་། དགེ་རྒྱས་དང་། ཆེ་བ་དང་། ཆུང་ཆེ་དང་། ཚད་མེད་ཆེ་བ་དང་། འབྲས་བུ་ཆེ་བ་དང་། མི་ཆེ་བ་དང་། མི་གདུང་བ་དང་། ཤིན་ཏུ་མཐོང་བ་དང་། གྱ་ནོམ་སྣང་བ་དང་། འོག་མིན་གྱི་ལྷ་རྣམས་ནས། ཉན་ཐོས་ཀྱི་
ཕུན་སུམ་ཚོགས་པ་དང་། རང་སངས་རྒྱས་ཀྱི་ཕུན་སུམ་ཚོགས་པ་དག་ཀྱང་ཉན་ཏེ། དེས་དེ་དག་ཐོས་ནས་ཀྱང་རྨོངས་པར་མི་འགྱུར། ཤིན་ཏུ་རྨོངས་པར་མི་འགྱུར། རབ་ཏུ་རྨོངས་པར་མྱི་འགྱུར། ཞུམ་པར་མི་འགྱུར། ཀུན་ནས་ཞུམ་པར་མི་འགྱུར།
རྣམ་པར་ཞུམ་པར་མི་འགྱུར། ཤིན་ཏུ་ཞུམ་པར་མི་འགྱུར། དམའ་བར་མི་འགྱུར་ཏེ། འདི་ལྟར་དེ་ནི་ཤེས་པས་འདུ་བྱེད་དུ་གཏོགས་པ་ཐམས་ཅད་རྨི་ལམ་ལྟ་བུར་མངོན་དུ་བྱེད་དོ། །དེ་འདི་སྙམ་དུ་གང་སྦྱིན་པར་བྱ་བ་འདི་ནི་སུའི་ཡང་མ་ཡིན་ནོ་སྙམ་
སྟེ། ངན་སོང་གི་ལམ་ཉེ་བར་གནས་པ་བཟློག་པར་བྱ་བ་དང་། སངས་རྒྱས་ཀྱི་ཆོས་ཐམས་ཅད་བསྒྲུབ་པའི་ཕྱིར་ཆོས་སྟོན་ཀྱང་། བྱང་ཆུབ་སེམས་དཔའི་ལམ་མངོན་དུ་གྱུར་པའི་ཕྱིར་དེ་ལ་སེམས་རྒྱུ་བ་མེད་དེ། འདི་ནི་ད་ལྟར་བྱུང་བའི་གཏོང་བ་ཞེས་
བྱའོ། །དེ་ལ་བྱང་ཆུབ་སེམས་དཔའ་ཤིན་ཏུ་གཏོང་བ་གང་ཞེ་ན། འདི་ལ་བྱང་ཆུབ་སེམས་དཔའ་སེམས་ཅན་མིག་དང་མི་ལྡན་པ་དང་། རྣ་བ་དང་མི་ལྡན་པ་དང་། སྣ་དང་མི་ལྡན་པ་དང་། ལྕེ་དང་མི་ལྡན་པ་དང་། ལུས་དང་མི་ལྡན་པ་གྲངས་མེད་པ་ཞིག་
གིས་འདི་སྐད་དུ་བདག་ཅག་ལ་ཅི་མེད་པ་དེ་ཁྱོད་ཀྱིས་བྱིན་ལ། ངེད་མི་ལྡན་པ་མེད་པར་གྱིས་ཤིག །ཁྱོད་ནི་བསྐལ་པ་གྲངས་མེད་པར་མི་ལྡན་པར་འདུག་ཅིག་ཅེས་ཟེར་ན། བྱང་ཆུབ་སེམས་དཔའ་ནི་དེ་ཐོས་མ་ཐག་ཏུ་སེམས་ཅན་དེ་དག་མི་ལྡན་པ་མེད་

པར་བསྒྲུབ་སྟེ། བསྐལ་པ་གྲངས་མེད་པར་དབང་པོ་དང་མི་ལྡན་པ་དེ་ཡང་ཉམས་སུ་ལེན་ཏོ། །དེ་མའི་ལྟོ་ན་འདུག་པའི་ཚེ་ཇི་ལྟ་བུར་སྤྱོད་པ་དང་། མེར་མེར་པོར་འདུག་པ་ཇི་ལྟ་བུ་ཡིན་པ་དང་རྡོས་པར་གྱུར་པ་ཇི་ལྟ་བུ་ཡིན་པ་
དང་། འཁྲེགས་པར་གྱུར་པ་ཇི་ལྟ་བུ་ཡིན་པ་དང་། དབང་པོ་གྲུབ་པ་ཇི་ལྟ་བུ་ཡིན་པ་དང་། སྐྱེས་པ་ཇི་ལྟ་བུ་ཡིན་པ་དང་། རྒས་པ་ཇི་ལྟ་བུ་ཡིན་པ་དང་། ན་བ་ཇི་ལྟ་བུ་ཡིན་པ་དང་། ཤི་བ་ཇི་ལྟ་བུ་ཡིན་པ་དང་། ལུས་ཀྱི་རང་བཞིན་ཐོག་མ་དང་།
བར་མ་དང་། ཐ་མ་ཇི་ལྟ་བ་བཞིན་དུ་ཡང་དག་པར་རབ་ཏུ་ཤེས་སོ། ངོམ་དུ་མི་རུང་བ་དང་། ངོ་ཚ་སྐྱེ་བ་འཕགས་པ་མ་ཡིན་པ། དྲི་མི་ཞིམ་པ། རྗེན་པའི་དྲི་ཅན་རོར་འགྱུར་བ། རུས་པ་སྩོགས་པ་ཤ་དང་ཁྲག་གིས་གཡོགས་པ། རྨ་དགུ་ནས་རྟག་
ཏུ་ཟག་པའོ། །ཞེས་དེ་ནི་སེམས་བསྐྱེད་པ་གཅིག་ཙམ་གྱིས་ཀྱང་། དེ་དོན་དུ་གཉེར་བར་མི་སེམས་ཏེ། སེམས་བསྐྱེད་པ་གཅིག་གིས་ཀྱང་ཆགས་པ་མི་བསྐྱེད་དོ། །དེ་ཤིན་ཏུ་གཏོང་བ་དེས་འཛིན་པ་མེད་པའི་ཡིད་དང་ལྡན་པ་ཡིན་ཏེ། ལུས་འདི་ནི་དེ་
ལྟར་སྙིང་པོ་མེད་པ་ཡིན་ན། བདག་གིས་ལུས་འདི་སྙིང་པོ་མེད་པར་མཐོང་བ་བཞིན་དུ་ལུས་ལ་ཆགས་པ་ཇི་ལྟར་བྱ། སེམས་ཅན་འདི་དག་གི་བསམ་པ་དེ་བཞིན་དུ་ཡོངས་སུ་ཚིམ་པར་བྱའོ། །ལུས་སྙིང་པོ་མེད་པ་འདིས་འགྲོ་བ་ཐམས་ཅད་ཀྱི་བསམ་
པ་ཡོངས་སུ་རྫོགས་པར་བྱའོ། །འགྲོ་བ་ཐམས་ཅད་ཀྱིས་ཀྱང་ཤེས་པར་བྱའོ། །ཡེ་ཤེས་ཀྱི་ཚོགས་གང་ཡང་རུང་བ་ལ་ཡང་མི་གནས་པའི་ཚུལ་གྱིས་གཞག་པར་བྱའོ་ཞེས་ནས་ལུས་ཀྱི་འདུ་ཤེས་ཀྱང་མེད། སེམས་ཀྱི་འདུ་ཤེས་ཀྱང་མེད་དེ།
ཀྱེ་རྒྱལ་བའི་སྲས་དག །འདི་ནི་བྱང་ཆུབ་སེམས་དཔའི་གཏོང་བའི་གཏེར་ཏེ་དྲུག་པའོ། །ཀྱེ་རྒྱལ་བའི་སྲས་དག །དེ་ལ་བྱང་ཆུབ་སེམས་དཔའི་ཡེ་ཤེས་ཀྱི་གཏེར་གང་ཞེ་ན། འདི་ལ་བྱང་ཆུབ་སེམས་དཔའ་གཟུགས་རབ་ཏུ་ཤེས་སོ། །

གཟུགས་ཀུན་འབྱུང་བ་རབ་ཏུ་ཤེས་སོ། །གཟུགས་ཀྱི་འགོག་པ་རབ་ཏུ་ཤེས་སོ། །གཟུགས་འགོག་པར་འགྲོ་བའི་ལམ་ཡང་དག་པར་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་
ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །རྣམ་པར་ཤེས་པའི་ཀུན་འབྱུང་བ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །རྣམ་པར་ཤེས་པ་འགོག་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །རྣམ་པར་ཤེས་པ་འགོག་པར་འགྲོ་བའི་ལམ་ཡང་དག་པ་ཇི་
ལྟ་བ་བཞིན་དུ་རབ་ཏུ་ཤེས་སོ། །མ་རིག་པ་རབ་ཏུ་ཤེས་སོ། །མ་རིག་པ་ཀུན་འབྱུང་བ་རབ་ཏུ་ཤེས་སོ། །མ་རིག་པ་འགོག་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །མ་རིག་པ་འགོག་པར་འགྲོ་བའི་ལམ་ཡང་དག་པ་ཇི་
ལྟ་བ་བཞིན་དུ་རབ་ཏུ་ཤེས་སོ། །སྲེད་པ་རབ་ཏུ་ཤེས་སོ། །སྲེད་པ་ཀུན་འབྱུང་བ་རབ་ཏུ་ཤེས་སོ། །སྲེད་པ་འགོག་པ་རབ་ཏུ་ཤེས་སོ། །སྲེད་པ་འགོག་པར་འགྲོ་བའི་ལམ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཉན་ཐོས་རབ་ཏུ་ཤེས་སོ། །
ཉན་ཐོས་ཀྱི་ཆོས་རབ་ཏུ་ཤེས་སོ། །ཉན་ཐོས་ཀྱི་ཀུན་འབྱུང་བ་རབ་ཏུ་ཤེས་སོ། །ཉན་ཐོས་ཀྱི་མྱ་ངན་ལས་འདའ་བ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །རང་སངས་རྒྱས་རབ་ཏུ་ཤེས་སོ། །རང་སངས་རྒྱས་ཀྱི་ཆོས་རབ་ཏུ་ཤེས་སོ། །
རང་སངས་རྒྱས་ཀྱི་ཀུན་འབྱུང་བ་རབ་ཏུ་ཤེས་སོ། །རང་སངས་རྒྱས་ཀྱི་ཡོངས་སུ་མྱ་ངན་ལས་འདའ་བ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །བྱང་ཆུབ་སེམས་དཔའ་རབ་ཏུ་ཤེས་སོ། །བྱང་ཆུབ་སེམས་དཔའི་ཀུན་
འབྱུང་བ་རབ་ཏུ་ཤེས་སོ། །བྱང་ཆུབ་སེམས་དཔའ་ཡོངས་སུ་མྱ་ངན་ལས་འདའ་བ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཇི་ལྟར་ཤེས་ཤེ་ན་ལས་དང་ལས་ཀྱི་རྣམ་པར་སྨིན་པ་དང་། བྱ་བ་དང་། མངོན་པར་འདུ་བྱེད་པ་དང་།

གསོ་བ་དང་། གསོག་དང་། སྙིང་པོ་མེད་པ་དང་། བདག་མེད་པར་རབ་ཏུ་ཤེས་ཏེ། ཆོས་གང་ཡང་སྙིང་པོ་ཅན་དུ་ཤེས་པ་མེད་དོ། །ཆོས་གང་ལ་ཡང་རང་བཞིན་དུ་འདོགས་པ་མེད་དེ། ངོ་བོ་ཉིད་མཐས་གཏུགས་
པ་ཐམས་ཅད་རབ་ཏུ་ཤེས་སོ། །སེམས་ཅན་རྣམས་ལ་ཡང་དེ་བཞིན་ཉིད་ཀྱི་དོན་དུ་ཆོས་སྟོན་ཏེ་དེ་ཅི་སྟོན་ཅེ་ན། འཇིག་པ་མེད་པའི་ཕྱིར་ཆོས་སྟོན་ཏེ། གང་འཇིག་པ་མེད་པའི་ཕྱིར་ཞེ་ན། གཟུགས་འཇིག་པ་མེད་པའི་ཕྱིར། ཚོར་བ་འཇིག་པ་
མེད་པའི་ཕྱིར། འདུ་ཤེས་འཇིག་པ་མེད་པའི་ཕྱིར། འདུ་བྱེད་འཇིག་པ་མེད་པའི་ཕྱིར། རྣམ་པར་ཤེས་པ་འཇིག་པ་མེད་པའི་ཕྱིར་ཆོས་སྟོན་ཏོ། །མ་རིག་པ་འཇིག་པ་མེད་པའི་ཕྱིར། ཉན་ཐོས་ཀྱི་ཆོས་དང་། རང་སངས་རྒྱས་ཀྱི་ཆོས་
དང་། བྱང་ཆུབ་སེམས་དཔའི་ཆོས་འཇིག་པ་མེད་པའི་ཕྱིར་ཆོས་སྟོན་ཏོ། །དེ་ཅིའི་ཕྱིར་ཞེ་ན། ཆོས་ནི་མ་སྐྱེས་པ། འདུ་མ་བྱས་པ། བྱེད་པ་པོ་མེད་པ། རྩོད་པ་མེད་པ། གནས་མེད་པ། མ་སྐྱེས་པ། མི་འབྱུང་བ། མ་བླངས་པ་
ཉེ་བར་མ་བླངས་པ། བྱེད་པ་མེད་པ་སྟེ། དེ་ཤེས་རབ་ཀྱི་གཏེར་དེ་ལྟ་བུ་དང་ལྡན་པས་ལས་གྲོན་ཆུང་ངུས་ཆོས་ཐམས་ཅད་ལ་མཁས་པ། གཞན་གྱི་དྲིང་མི་འཇོག་པ། ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཤེས་རབ་ཀྱི་གཏེར་དེ་ཡང་མི་ཟད་
པ་ཡིན་ཏེ། དེ་ཡང་ཤིན་ཏུ་བསྟན་པ་བཅུས་མི་ཟད་པ་ཡིན་ནོ། །བཅུ་གང་ཞེ་ན། ཐོས་པ་ལ་མཁས་པས་མི་ཟད་དོ། །དགེ་བའི་བཤེས་གཉེན་ལ་བསྙེན་པས་མི་ཟད་དོ། །ཚིག་རབ་ཏུ་དབྱེ་བ་ལ་མཁས་པས་མི་ཟད་དོ། །ཆོས་ཀྱི་དབྱིངས་ལ་
འཇུག་པ་མངོན་པར་བསྒྲུབས་པས་མི་ཟད་དོ། །རྒྱན་གཅིག་པའི་ཡེ་ཤེས་ཀྱི་རྗེས་སུ་ཞུགས་པས་མི་ཟད་དོ། །བསོད་ནམས་ཐམས་ཅད་ཤིན་ཏུ་བསྩགས་པས་མི་ཟད་དོ། །སྐྱོ་བ་མེད་པར་མངོན་པར་བསྒྲུབས་པས་མི་ཟད་དོ། །གཟུངས་ཐམས་ཅད་ཀྱི་

སྒོར་ཞུགས་པས་མི་ཟད་དོ། །སེམས་ཅན་ཐམས་ཅད་ཀྱི་སྐད་དང་སྒྲ་དང་བརྗོད་པ་སྣ་ཚོགས་ཀྱི་ཕྱིར་མི་ཟད་དོ། །འགྲོ་བ་ཐམས་ཅད་ཀྱི་ཡིད་གཉིས་དང་། ནེམ་ནུར་དང་ཐེ་ཙོམ་ཡང་དག་པར་གཅོད་པའི་ཕྱིར་མི་ཟད་དོ། །སངས་རྒྱས་ཀྱི་རྣམ་པར་འཕྲུལ་
པ་ཐམས་ཅད་ཡོངས་སུ་བསྟན་པས། སེམས་ཅན་ཐམས་ཅད་ཉེ་བར་འཚོ་བ་དང་། ཡོངས་སུ་སྨྱིན་པར་བྱ་བ་དང་། གདུལ་བའི་སྤྱོད་པ་ཤིན་ཏུ་རྟོགས་པའི་ཕྱིར་མི་ཟད་དེ། མི་ཟད་པ་ཤིན་ཏུ་བསྟན་པ་བཅུ་པོ་དེ་དག་གིས་ཤེས་རབ་ཀྱི་གཏེར་ཏེ་
མི་ཟད་པ་ཡིན་ནོ། །ཀྱེ་རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་རྣམས་ཀྱི་ཤེས་རབ་ཀྱི་གཏེར་ཡིན་ཏེ། དེ་ལ་གནས་པའི་བྱང་ཆུབ་སེམས་དཔའ་རྣམས་ཤེས་རབ་དང་ཡེ་ཤེས་བླ་ན་མེད་པ་རྣམ་པར་འཚང་རྒྱའོ། །ཀྱེ་རྒྱལ་བའི་སྲས་དག །
དེ་ལ་བྱང་ཆུབ་སེམས་དཔའ་རྣམས་ཀྱི་དྲན་པའི་གཏེར་གང་ཞེ་ན། ཀྱེ་རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་དྲན་པ་དང་ལྡན་པ་ཡིན་ཏེ། དེ་ཡང་རྒྱུད་རྨོངས་པ་མེད་པའི་དྲན་པས་སྔོན་གྱི་གནས་རྗེས་སུ་དྲན་ཏེ། འདི་ལྟར་ཚེ་གཅིག་
ཀྱང་རྗེས་སུ་དྲན་ནོ། །ཚེ་གཉིས་དང་། གསུམ་དང་། བཞི་དང་། ལྔ་དང་། ཚེ་བརྒྱ་དང་སྟོང་དང་། ཆེ་བརྒྱ་ཕྲག་དུ་མ་དང་། ཚེ་སྟོང་ཕྲག་དུ་མ་དང་། ཚེ་བརྒྱ་སྟོང་ཕྲག་དུ་མ་དང་། འཇིག་པའི་བསྐལ་པའམ། འདུ་བའི་བསྐལ་པའམ།
འཇིག་པ་དང་འདུ་བའི་བསྐལ་པའམ། འཇིག་པའི་བསྐལ་པ་དུ་མ་དང་། འདུ་བའི་བསྐལ་པ་དུ་མ་དང་། འདུ་བ་དང་། འཇིག་པའི་བསྐལ་པ་དུ་མ་དང་། བསྐལ་པ་བརྒྱ་དང་། བསྐལ་པ་སྟོང་དང་། བསྐལ་པ་བརྒྱ་སྟོང་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དང་། བསྐལ་པ་
བྱེ་བ་ཁྲག་ཁྲིག་བརྒྱ་སྟོང་ཚད་མྱེད་པ་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་བསམ་གྱིས་མི་ཁྱབ་པ། མཚུངས་པ་མེད་པ། ཀུན་ཏུ་མཐའ་ཡས་པ། མུ་མེད་པ། ས་མཚམས་མེད་པ། གཞལ་དུ་མེད་པ། བརྗོད་དུ་མེད་པ། གཉིས་

དང་། གསུམ་དང་། བཞི་དང་། ལྔ་དང་། གཞུང་དེ་བཞིན་དུ་བརྗོད་དུ་མེད་པའི་ཡང་བརྗོད་དུ་མེད་པ་དང་། སངས་རྒྱས་སྐྱེ་བར་ལུང་བསྟན་པ་ཤིན་ཏུ་བརྗོད་པ་གཅིག་དང་། གཉིས་དང་། གསུམ་དང་། བཞི་དང་།
ལྔ་ནས། སངས་རྒྱས་སྐྱེ་བར་ལུང་བསྟན་པ་ཤིན་ཏུ་བརྗོད་དུ་མེད་པ་བརྗོད་དུ་མེད་པའི་ཡང་བརྗོད་དུ་མེད་པ་དང་། སངས་རྒྱས་སྐྱེ་བ་གཅིག་བསྟན་ཏེ། དེ་དང་མཚམས་སྦྱོར་བའི་ལུང་བསྟན་པ་གཅིག་དང་། གཉིས་དང་། གསུམ་དང་། བཞི་དང་། ལྔ་ནས།
སངས་རྒྱས་སྐྱེ་བ་ཤིན་ཏུ་བསྟན་ཏེ། དེ་དང་མཚམས་སྦྱོར་བ་ལུང་བསྟན་པ་བརྗོད་དུ་མེད་པའི་ཡང་བརྗོད་དུ་མེད་པ་དང་། མདོ་སྡེ་གཅིག་དང་། གཉིས་དང་། གསུམ་དང་། བཞི་དང་། ལྔ་ནས། བརྗོད་དུ་མེད་པའི་ཡང་བརྗོད་དུ་མེད་པའི་བར་དང་
དབྱངས་ཀྱིས་བསྙད་པའི་སྡེ་དང་། ལུང་བསྟན་པའི་སྡེ་དང་། ཚིགས་སུ་བཅད་པའི་སྡེ་དང་། གླེང་གཞིའི་སྡེ་དང་། ཆེད་དུ་བརྗོད་པའི་སྡེ་དང་། འདི་ལྟར་འདས་པའི་སྡེ་དང་། སྐྱེས་བ་རབས་ཀྱི་སྡེ་དང་། ཤིན་ཏུ་རྒྱས་པའི་སྡེ་དང་། ཆོས་རྨད་
དུ་བྱུང་བ་བསྟན་པའི་སྡེ་དང་། མན་ངག་བསྟན་པའི་སྡེ་གཅིག་དང་། གཉིས་དང་། གསུམ་དང་། བཞི་དང་། ལྔ་ནས། བརྗོད་དུ་མེད་པའི་ཡང་བརྗོད་དུ་མེད་པའི་བར་དང་། འཁོར་འདུས་པ་གཅིག་དང་། ཆོས་ཀྱི་མཚམས་སྦྱར་བ་གཅིག་
ནས། ཆོས་ཀྱི་མཚམས་སྦྱར་བ་བརྗོད་དུ་མེད་པའི་ཡང་བརྗོད་དུ་མེད་པའི་བར་དང་། དབང་པོ་སྣ་ཚོགས་གཅིག་ནས་དབང་པོ་སྣ་ཚོགས་བརྗོད་དུ་མེད་པའི་ཡང་བརྗོད་དུ་མེད་པའི་བར་དང་། དབང་པོ་རྣམ་པ་ཐ་དད་པ་སྣ་ཚོགས་གཅིག་ནས། དབང་པོ་རྣམ་པ་
ཐ་དད་པ་སྣ་ཚོགས་བརྗོད་དུ་མེད་པའི་ཡང་བརྗོད་དུ་མེད་པའི་བར་དང་། ཉོན་མོངས་པ་སྣ་ཚོགས་གཅིག་ནས་ཉོན་མོངས་པ་སྣ་ཚོགས་བརྗོད་དུ་མེད་པའི་ཡང་བརྗོད་དུ་མེད་པའི་བར་དང་། ཏིང་ངེ་འཛིན་སྣ་ཚོགས་གཅིག་ནས། ཏིང་ངེ་འཛིན་སྣ་ཚོགས་བརྗོད་དུ་མེད་

པའི་ཡང་བརྗོད་དུ་མེད་པའི་བར་དག་ཀྱང་དྲན་པ་དག་པ། དང་བ་རྙོག་པ་མེད་པ་དང་། རྣམ་པར་གསལ་བ་རྡུལ་མེད་པ། རྡུལ་དང་བྲལ་བ། དྲི་མ་མེད་པ། འོད་གསལ་བ། སང་སང་པོ། བསྒྲིབས་པ་མེད་པས་རྗེས་སུ་དྲན་ནོ། །བྱང་ཆུབ་སེམས་
དཔའི་དྲན་པ་དེ་ནི་འཇིག་རྟེན་གྱི་འཁྲུག་པས་མི་འཕྲོགས་པ་ཡིན། ཕས་ཀྱི་རྒོལ་བ་ཐམས་ཅད་ཀྱིས་ཉེ་བར་ཉོན་མོངས་པར་མི་ནུས་པ་ཡིན། སྔོན་གྱི་དགེ་བའི་རྩ་བས་ཤིན་ཏུ་སྦྱངས་པ་ཡིན། འཇིག་རྟེན་གྱི་ཆོས་ཐམས་ཅད་ཀྱིས་མ་གོས་པ་ཡིན། བདུད་
དང་མུ་སྟེགས་ཅན་དམིགས་པ་ལ་གནས་པ་གཞན་གྱིས་མི་ཆོད་པ་ཡིན། ཚེ་རབས་ཀུན་ཏུ་འཕོ་བའི་ལུས་ཤིན་ཏུ་བསྟན་པ་ཐམས་ཅད་ཀྱིས་བརྗོད་པར་མི་ནུས་པ་ཡིན། སྔོན་གྱི་མཐའ་དང་། ཕྱི་མའི་མཐའ་དང་། ད་ལྟར་བྱུང་བའི་མཐས་རྣམ་
པར་མི་ཆོད་པ་ཡིན། འཇིག་རྟེན་གྱི་ཁམས་སུ་སྐྱེ་བ་དང་། གནས་པ་ཐམས་ཅད་ཀྱིས་སྐྱོན་དུ་མ་གྱུར་པ་ཡིན། སངས་རྒྱས་སྐྱེས་པའི་འཁོར་གྱི་དཀྱིལ་འཁོར་དུ་འཇུག་པ་ཤིན་ཏུ་བསྟན་པ་ཐམས་ཅད་ཀྱིས་ཐོགས་པ་མེད་པ་ཡིན། སངས་རྒྱས་
ཀྱི་ཆོས་ཐམས་ཅད་ཀྱི་རྗེས་སུ་སོང་བ་ཡིན་ཏེ། ཀྱེ་རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་རྣམས་ཀྱི་དྲན་པའི་གཏེར་ཏེ་བརྒྱད་པའོ། །ཀྱེ་རྒྱལ་བའི་སྲས་དག །དེ་ལ་བྱང་ཆུབ་སེམས་དཔའ་རྣམས་ཀྱི་རྟོགས་པའི་གཏེར་གང་ཞེ་ན།
ཀྱེ་རྒྱལ་བའི་སྲས་དག །འདི་ལ་བྱང་ཆུབ་སེམས་དཔའ་རྟོགས་པ་དང་ལྡན་པ་ཡིན་ཏེ། དེ་ཡང་ཡི་གེ་དེ་བཞིན་གཞན་མ་ཡིན་པས། མདོའི་ཚུལ་གྱི་ཆོས་སྟོན་ཏོ། །དེ་ནི་ཚེའི་རྒྱུད་གཅིག་པ་ཡང་ཡོངས་སུ་འཛིན་ཏོ། །ཚེའི་རྒྱུད་བརྗོད་དུ་མེད་
པའི་ཡང་བརྗོད་དུ་མེད་པའི་བར་དུ་ཡོངས་སུ་འཛིན་ཏོ། །སངས་རྒྱས་ཀྱི་མཚན་གཅིག་ཀྱང་ཡོངས་སུ་འཛིན་ཏོ། །སངས་རྒྱས་ཀྱི་མཚན་བརྗོད་དུ་མེད་པའི་ཡང་བརྗོད་དུ་མེད་པའི་བར་དུ་ཡང་ཡོངས་སུ་འཛིན་ཏོ། །བསྐལ་པ་གྲངས་མེད་

པ་བསྟན་པ་གཅིག་ཀྱང་ཡོངས་སུ་འཛིན་ཏོ། །བསྐལ་པ་གྲངས་མེད་པ་བསྟན་པ་བརྗོད་དུ་མེད་པའི་ཡང་བརྗོད་དུ་མེད་པའི་བར་དུ་ཡང་ཡོངས་སུ་འཛིན་ཏོ། །དེ་བཞིན་གཤེགས་པར་ལུང་བསྟན་པ་བརྗོད་པ་གཅིག་ཀྱང་ཡོངས་
སུ་འཛིན་ནོ། །དེ་བཞིན་གཤེགས་པར་ལུང་བསྟན་པར་བརྗོད་པ་བརྗོད་དུ་མེད་པའི་ཡང་བརྗོད་དུ་མེད་པའི་བར་དུ་ཡང་ཡོངས་སུ་འཛིན་ཏོ། །མདོ་གཅིག་ཀྱང་ཡོངས་སུ་འཛིན་ཏོ། །མདོ་བརྗོད་དུ་མེད་པའི་ཡང་བརྗོད་དུ་མེད་པའི་བར་དུ་ཡང་ཡོངས་སུ་
འཛིན་ཏོ། །འདུས་པ་གཅིག་ཀྱང་ཡོངས་སུ་འཛིན་ཏོ། །འདུས་པ་བརྗོད་དུ་མེད་པའི་ཡང་བརྗོད་དུ་མེད་པའི་བར་དུ་ཡང་ཡོངས་སུ་འཛིན་ཏོ། །ཆོས་ཀྱི་མཚམས་སྦྱར་བ་གཅིག་ཀྱང་ཡོངས་སུ་འཛིན་ཏོ། །ཆོས་ཀྱི་མཚམས་སྦྱར་བ་བརྗོད་དུ་མེད་པའི་
ཡང་བརྗོད་དུ་མེད་པའི་བར་དུ་ཡང་ཡོངས་སུ་འཛིན་ཏོ། །དབང་པོ་རྣམ་པ་ཐ་དད་པ་སྣ་ཚོགས་གཅིག་ཀྱང་ཡོངས་སུ་འཛིན་ཏོ། །དབང་པོ་རྣམ་པ་ཐ་དད་པ་སྣ་ཚོགས་བརྗོད་དུ་མེད་པའི་ཡང་བརྗོད་དུ་མེད་པའི་བར་དུ་ཡང་ཡོངས་སུ་འཛིན་ཏོ། །ཉོན་
མོངས་པ་སྣ་ཚོགས་གཅིག་ཀྱང་ཡོངས་སུ་འཛིན་ཏོ། །ཉོན་མོངས་པ་སྣ་ཚོགས་བརྗོད་དུ་མེད་པའི་ཡང་བརྗོད་དུ་མེད་པའི་བར་དུ་ཡང་ཡོངས་སུ་འཛིན་ཏོ། །ཏིང་ངེ་འཛིན་སྣ་ཚོགས་གཅིག་ཀྱང་ཡོངས་སུ་འཛིན་ཏོ། །ཏིང་ངེ་འཛིན་སྣ་ཚོགས་བརྗོད་དུ་
མེད་པའི་ཡང་བརྗོད་དུ་མེད་པའི་བར་དུ་ཡང་ཡོངས་སུ་འཛིན་ཏོ། །ཀྱེ་རྒྱལ་བའི་སྲས་དག །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་རྟོགས་པའི་གཏེར་ཏེ་མི་ཟད་པ། ཀུན་ཏུ་མཐའ་ཡས་པ་དགང་དཀའ་བ། གཏིང་རྙེད་པར་དཀའ་བ། བསྒྲུབ་
པར་དཀའ་བ། མི་འཕྲོག་པ། ཐུབ་པ་མེད་པ། བདག་ཉིད་ཆེ་བའི་སངས་རྒྱས་ཀྱི་ཡུལ་གྱི་རྗེས་སུ་སོང་བ་སྟེ། འདི་ནི་གཏེར་དགུ་པའོ། །ཀྱེ་རྒྱལ་བའི་སྲས་དག །དེ་ལ་བྱང་ཆུབ་སེམས་དཔའ་རྣམས་ཀྱི་བློ་གྲོས་ཀྱི་གཏེར་གང་ཞེ་ན། ཀྱེ་རྒྱལ་བའི་སྲས་དག །

འདི་ལ་བྱང་ཆུབ་སེམས་དཔའ་ཡང་དག་པར་རྟོགས་པར་བྱེད་པའི་རྟོགས་པ་དང་ལྡན་ཞིང་བློ་གྲོས་དང་ལྡན་པ་ཡིན་ཏེ། མདོ་སྡེ་ཐམས་ཅད་དང་མི་འགལ་བས་དེ་ཆོས་སྟོན་པའི་ཚེ། དངོས་པོ་ཡོངས་སུ་ལྡོག་པ་གཅིག་ཀྱང་བརྩམས་ཏེ། ཆོས་སྟོན་པ་ནས་དངོས་
པོ་ཡོངས་སུ་ལྡོག་པ་བརྗོད་དུ་མེད་པའི་ཡང་བརྗོད་དུ་མེད་པའི་བར་དུ་ཆོས་སྟོན་ཏོ། །སངས་རྒྱས་ཀྱི་མཚན་གཅིག་ནས་ཚུལ་དེ་བཞིན་དུ་བརྗོད་དུ་མེད་པའི་ཡང་བརྗོད་དུ་མེད་པའི་བར་དང་། འཇིག་རྟེན་གྱི་ཁམས་གཅིག་དང་། སངས་རྒྱས་སུ་ལུང་བསྟན་པ་
གཅིག་དང་། མདོ་གཅིག་དང་། འཁོར་འདུས་པ་གཅིག་དང་། ཆོས་ཀྱི་མཚམས་སྦྱར་བ་གཅིག་དང་། དབང་པོ་རྣམ་པ་ཐ་དད་པ་སྣ་ཚོགས་གཅིག་དང་། ཉོན་མོངས་པ་སྣ་ཚོགས་གཅིག་དང་། ཏིང་ངེ་འཛིན་སྣ་ཚོགས་གཅིག་ཀྱང་བརྩམས་ཏེ།
ཆོས་སྟོན་པ་ནས་ཏིང་ངེ་འཛིན་སྣ་ཚོགས་བརྗོད་དུ་མེད་པའི་ཡང་བརྗོད་དུ་མེད་པའི་བར་དུ་བརྩམས་ཏེ་ཆོས་སྟོན་ཏོ། །ཉི་མ་གཅིག་ཀྱང་ཟད་པར་བྱེད་ཅིང་ཆོས་སྟོན་པ་ནས། ཟླ་བ་ཕྱེད་དང་། ཟླ་བ་གཅིག་དང་། ལོ་གཅིག་དང་། ལོ་བརྒྱ་དང་། ལོ་སྟོང་
དང་། ལོ་བརྒྱ་ཕྲག་སྟོང་དང་། བསྐལ་པ་དང་། བསྐལ་པ་བརྒྱ་དང་། བསྐལ་པ་སྟོང་དང་། བསྐལ་པ་བརྒྱ་ཕྲག་སྟོང་དང་། བསྐལ་པ་བྱེ་བ་ཁྲག་ཁྲིག་བརྒྱ་ཕྲག་སྟོང་དང་། བསྐལ་པ་ཚད་མེད་པ་དང་། བསམ་གྱིས་མི་ཁྱབ་པ་དང་། བསྐལ་
པ་དཔག་ཏུ་མེད་པ་དང་། གྲངས་མེད་པ་དང་། མཚུངས་པ་མེད་པ་དང་། ཀུན་ཏུ་མཐའ་ཡས་པ་དང་། མུ་མེད་པ་དང་། ས་མཚམས་མེད་པ་དང་། གཞལ་དུ་མེད་པ་དང་། བརྗོད་དུ་མེད་པ་དག་ཀྱང་ཟད་པར་བྱེད་ཅིང་ཆོས་སྟོན་ན།
ཚིག་དང་ཡི་གེ་གཅིག་བརྩམས་ཀྱང་དོན་དང་ཚིག་དང་ཡི་གེའི་མཐར་ཐུག་པ་མེད་དེ། དེ་ཅིའི་ཕྱིར་ཞེ་ན། དེ་ནི་འདི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་གཏེར་བཅུ་རབ་ཏུ་ཐོབ་པའི་ཕྱིར་ཏེ། གཏེར་དེ་དག་ཐོབ་པས་གཟུངས་ཀྱི་སྙིང་པོའི་སྒོ་ཆོས་

ཐམས་ཅད་ལ་ཡང་དག་པར་གཞོལ་བ་ཞེས་བྱ་བ། གཟུངས་བརྒྱ་སྟོང་གྲངས་མེད་པའི་འཁོར་ཅན་མངོན་དུ་གྱུར་ཏེ། དེ་གཟུངས་ཀྱི་འཁོར་བརྒྱ་སྟོང་གྲངས་མེད་པ་སྟོན་པར་བྱེད་དོ། །ཆོས་སྣང་བ་ཤིན་ཏུ་བསྟན་པ་ཐོབ་
པས་སེམས་ཅན་ཐམས་ཅད་ལ་ཆོས་སྟོན་ཏོ། །ཆོས་ཀྱི་སྒོ་སྣང་བའི་ཆོས་ཅན་ལྕེ་ཡངས་པས་འཇིག་རྟེན་གྱི་ཁམས་ཐམས་ཅད་དུ་མངོན་པར་གོ་བར་བྱེད་པ་དང་། དབྱངས་ཀྱི་ཡན་ལག་ལ་མཁས་པས་འགྲོ་བ་ཐམས་ཅད་ཚིམ་པར་བྱེད་པ་དང་། དབང་
པོ་ཇི་ལྟ་བ་བཞིན་དུ་མགུ་བར་བྱེད་པ་དང་། ཉོན་མོངས་པ་དང་ཀུན་ནས་འཁོར་བ་ཐམས་ཅད་རྣམ་པར་བཟློག་པ་དང་། སྒྲ་དང་ཚིག་རྣམ་པ་ཐ་དད་པ་ཐམས་ཅད་ལ་རབ་ཏུ་ཞུགས་པ་དང་། ཡི་གེ་ཐམས་ཅད་ཀྱི་སྤོབས་པས་སྟོན་པའི་རྗེས་སུ་སོང་བ་དང་།
སེམས་ཅན་ཐམས་ཅད་ཀྱི་ས་བོན་གང་པོ་ཡོངས་སུ་ཤེས་པའི་བསམ་པ་ཅན་དུ་བྱེད་པས་ཆོས་སྟོན་ཏེ་ཐོགས་པར་མི་བྱེད་དོ། །སྐྱོ་བར་མི་འགྱུར་རོ། །དེ་ཅིའི་ཕྱིར་ཞེ་ན། དེ་ནི་འདི་ལྟར་བྱང་ཆུབ་སེམས་དཔས་ནམ་མཁའི་ཁམས་དང་། ཆོས་ཀྱི་
དབྱིངས་མཐའ་དང་དབུས་མེད་པར་རྒྱས་པར་བྱེད་པའི་ལུས་རབ་ཏུ་ཐོབ་པའི་ཕྱིར་ཏེ། ཀྱེ་རྒྱལ་བའི་སྲས་དག །འདི་ནི་བྱང་ཆུབ་སེམས་དཔའི་གཏེར་བཅུས་བློ་གྲོས་མི་ཟད་པ། ཐུབ་པ་མེད་པ་འདྲེས་པ་མེད་པ་རྣམ་པར་མི་ཆོད་པ། རྒྱུན་གཅད་པར་མི་ནུས་པ་ཕྱིར་མི་
ལྡོག་པ། གཏིང་རྙེད་པར་དཀའ་བ། རིང་དུ་གྱུར་པ། སྒོ་ཀུན་དང་ལྡན་པ། སངས་རྒྱས་ཐམས་ཅད་ཀྱི་ཆོས་ལ་ཞུགས་པའོ། །ཀྱེ་རྒྱལ་བའི་སྲས་དག །བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་གཏེར་ཏེ། མི་ཟད་པའི་རྣམ་
པ་བཅུས་མི་ཟད་པ་ཡིན་ནོ། །བླ་ན་མེད་པ་ཡིན་ནོ། །མཐར་རྫོགས་པའི་སངས་རྒྱས་སུ་འགྱུར་བ་ཡིན་ནོ། །བཅུ་གང་ཞེ་ན། སེམས་ཅན་ཐམས་ཅད་ཉེ་བར་འཚོ་བ་དང་། སྔོན་གྱི་སྨོན་ལམ་ལེགས་པར་ཡོངས་སུ་བསྔོས་པ་དང་། བསྐལ་པ་

ཐམས་ཅད་ཀྱི་གྲངས་གཅད་དུ་མེད་པ་དང་། ནམ་མཁའི་དབྱིངས་དང་མཉམ་པ་ཉིད་དུ་ཁོང་དུ་ཆུད་པའི་ཕྱིར། སེམས་ཚད་མེད་པ་དང་། འདུས་བྱས་ཀྱིས་མ་གོས་པའི་ཕྱིར། འདུས་མ་བྱས་ལ་ཡོངས་སུ་བསྔོས་པ་དང་། དེ་མ་ཐག་པའི་ཡུལ་དུ་གྱུར་
པས་ཆོས་ཐམས་ཅད་ཟད་མི་ཤེས་པ་དང་། སྨོན་ལམ་ཆེན་པོ་ཐ་དད་པ་མེད་པ་དང་། སྤྱོད་པ་ལ་གནས་པའི་སྟོབས་ཤིན་ཏུ་འཛིན་པ་དང་། སངས་རྒྱས་ཐམས་ཅད་ཀྱིས་ཡོངས་སུ་བཟུང་བ་དང་། ཆོས་ཐམས་ཅད་སྒྱུ་མ་ལྟ་བུར་འཇུག་པ་མཐའ་དང་
དབུས་མེད་པ་ལ་ཞུགས་པ་སྟེ། མི་ཟད་པའི་རྣམ་པ་བཅུ་པོ་འདི་དག་གིས། འཇིག་རྟེན་གྱི་བྱ་བ་ཐམས་ཅད་ཀྱི་མཐར་ཕྱིན་པ་ཟད་མི་ཤེས་པའི་གཏེར་ཆེན་པོར་འགྱུར་རོ། །གཏེར་མི་ཟད་པ་བཅུ་བསྟན་པའི་ལེའུ་སྟེ།
ཉི་ཤུ་བདུན་པའོ།། །།དེ་ནས་སངས་རྒྱས་ཀྱི་མཐུས་ཤར་ཕྱོགས་ཀྱི་འཇིག་རྟེན་གྱི་ཁམས་ཐམས་ཅད་དང་། དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། བྱང་ཤར་གྱི་ཕྱོགས་མཚམས་དང་། ཤར་ལྷོའི་ཕྱོགས་
མཚམས་དང་། ལྷོ་ནུབ་ཀྱི་ཕྱོགས་མཚམས་དང་། ནུབ་བྱང་གི་ཕྱོགས་མཚམས་དང་། འོག་དང་སྟེང་གི་ཕྱོགས་ཀྱི་འཇིག་རྟེན་གྱི་ཁམས་ཐམས་ཅད་ན་ཡང་གླིང་བཞི་པ་འདི་ལ་སྩོགས་པ་གླིང་རེ་རེ་ན་ཡང་། དེ་བཞིན་གཤེགས་པ་རྣམས་བཞུགས་
པར་སྣང་ངོ་། །བྱང་ཆུབ་སེམས་དཔའ་དེ་དག་ཀྱང་དེ་བཞིན་གཤེགས་པའི་བྱིན་གྱི་རླབས་ཀྱིས་ཆོས་སྟོན་ཏོ། །དེ་བཞིན་གཤེགས་པའི་ཞབས་ཀྱི་དྲུང་ནའང་འཁོད་པར་ཤེས་སོ། །བཅོམ་ལྡན་འདས་ཀྱིས་ཀྱང་རྫུ་འཕྲུལ་མངོན་པར་འདུ་མཛད་པ་
དེའི་ཕྱིར་མ་བརྟུལ། བྱང་ཆུབ་ཀྱི་ཤིང་དྲུང་ཡང་ཕྱིར་མ་བརྟུལ། རི་རབ་ཀྱི་རྩེ་མོ་ཡང་ཕྱིར་མ་བརྟུལ་བར་རབ་མཚེ་མའི་གནས་ནས་དགའ་ལྡན་གྱི་གནས་ཀྱི་ལྷའི་རྒྱལ་པོ་རབ་དགའ་ལྡན་གྱི་ཁང་པ་རིན་པོ་ཆེའི་རྒྱན་ཅེས་བྱ་བ་གང་ན་བ་དེར་གཤེགས་པར་སྣང་

ངོ་། །ཇི་ལྟར་གླིང་བཞི་པ་འདི་ན་བཅོམ་ལྡན་འདས་དགའ་ལྡན་གྱི་གནས་སུ་གཤེགས་པར་སྣང་བ། དེ་བཞིན་དུ་འཇིག་རྟེན་གྱི་ཁམས་ཐམས་ཅད་ཀྱི་གླིང་བཞི་པ་དག་ན་ཡང་བཅོམ་ལྡན་འདས་དགའ་ལྡན་གྱི་གནས་སུ་གཤེགས་པར་སྣང་སྟེ་
བྱིན་གྱི་རླབས་སྔ་མ་དེ་དག་ཀྱང་མ་འཁྲུགས་པར་སྣང་ངོ་། །དེ་ནས་ལྷའི་རྒྱལ་པོ་རབ་དགའ་ལྡན་གྱིས། རྒྱང་མ་ནས་བཅོམ་ལྡན་འདས་ཁང་པ་རིན་པོ་ཆེ་ཐམས་ཅད་ཀྱི་བརྒྱན་པར་གཤེགས་པ་མཐོང་ནས། རིངས་པའི་གཟུགས་སུ་ཁང་པ་རིན་པོ་ཆེ་ཐམས་ཅད་ཀྱིས་
བརྒྱན་པའི་ནང་དུ་དེ་བཞིན་གཤེགས་པའི་སེང་གེའི་གདན་ནོར་བུ་རིན་པོ་ཆེ་ལས་བྱས་པ། ལྷ་རྫས་ཀྱི་རིན་པོ་ཆེའི་རྒྱུ་ལས་གྲུབ་པ། དགེ་བའི་རྩ་བ་ཐམས་ཅད་ཀྱི་རྒྱུ་ལས་ཡོངས་སུ་གྲུབ་པ། དེ་བཞིན་གཤེགས་པའི་བྱིན་གྱི་རླབས་ཀྱིས་བྱུང་བ། དགེ་
བའི་རྩ་བ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་མང་པོས་བྱུང་བ། སངས་རྒྱས་ཐམས་ཅད་ལས་བྱུང་བའི་ཆོས་དཀར་པོ་ལས་བྱུང་བ། བསོད་ནམས་ཀྱི་སྟོབས་མཐའ་ཡས་པ་སྣ་ཚོགས་ཐམས་ཅད་དང་ལྡན་པ། ཁ་ན་མ་ཐོ་བ་མེད་པའི་རྣམ་པར་སྨྱིན་
པ་ཐམས་ཅད་ཀྱིས་རྣམ་པར་དག་པ། མི་མཐུན་པ་མེད་པའི་འཇིག་རྟེན་ལས་འདས་པའི་ཆོས་ཀྱིས་བྱུང་བ། །གོས་པ་མེད་པ། འགྲོ་བ་ཐམས་ཅད་དུ་བྱུང་བ། ཐུབ་པ་མེད་པ། འགྲོ་བ་ཐམས་ཅད་ཀྱིས་བལྟ་ན་སྡུག་པ། པོག་རེ་བྱེ་བ་བརྒྱ་སྟོང་
ཕྲག་བཅུས་བརྒྱན་པ། གསེར་གྱི་དྲ་བ་བྱེ་བ་བརྒྱ་སྟོང་ཕྲག་བཅུས་ཀུན་ཏུ་བྲེས་པ། མེ་ཏོག་གི་བླ་རེ་བྱེ་བ་བརྒྱ་སྟོང་ཕྲག་བཅུས་ཀུན་ནས་བྲེས་པ། ཕྲེང་བའི་བླ་རེ་བྱེ་བ་བརྒྱ་སྟོང་ཕྲག་བཅུས་ཀུན་ནས་ལྡིང་བ། སྤོས་ཀྱི་བླ་རེ་བྱེ་བ་བརྒྱ་སྟོང་ཕྲག་བཅུས་སྤོས་
ཀུན་ཏུ་འཐུལ་བར་སྦྱར་བ། རིན་པོ་ཆེའི་བླ་རེ་བྱེ་བ་བརྒྱ་སྟོང་ཕྲག་བཅུས་སྟེང་ནས་བཀབ་པ། མེ་ཏོག་གི་གདུགས་བྱེ་བ་བརྒྱ་སྟོང་ཕྲག་བཅུས་ཀུན་ནས་བསྒྲེང་བ། རིན་པོ་ཆེའི་གདུགས་བྱེ་བ་བརྒྱ་སྟོང་ཕྲག་བཅུས་ཀུན་ནས་བཀབ་པ། གདན་བྱེ་བ་

ཁྲག་ཁྲིག་བརྒྱ་སྟོང་མངོན་པར་བཏིང་བ། རིན་པོ་ཆེའི་པུ་ཤུ་བྱེ་བ་བརྒྱ་སྟོང་ཕྲག་བཅུས་རྒྱན་དུ་བསྒྲུབས་པ། ནོར་བུའི་དྲ་བ་བྱེ་བ་བརྒྱ་སྟོང་ཕྲག་བཅུས་ཤིན་ཏུ་རྣམ་པར་ཕྱེ་བས་ཡོག་པར་བྱས་པ། རིན་པོ་ཆེའི་དྲ་བ་བྱེ་བ་བརྒྱ་སྟོང་ཕྲག་བཅུས་
འཁོར་ཀུན་ཏུ་ཡོག་པ། རིན་པོ་ཆེའི་ཕྲེང་བ་འཕྱང་བའི་དྲ་བ་བྱེ་བ་བརྒྱ་སྟོང་ཕྲག་བཅུ་ཤིན་ཏུ་སྤྱངས་པས་བཀབ་པ། ལྷབ་ལྷུབ་ཀྱི་དྲ་བ་བྱེ་བ་བརྒྱ་སྟོང་ཕྲག་བཅུས་ཤིན་ཏུ་ཀླུབས་ཤིང་བརྒྱན་པ། གདུགས་ཀྱི་དྲ་བ་བྱེ་བ་བརྒྱ་སྟོང་ཕྲག་བཅུས་ཀུན་ནས་ཁེབས་
པར་བཀབ་པ། གོས་སྣ་ཚོགས་ཀྱི་དྲ་བ་བྱེ་བ་བརྒྱ་སྟོང་ཕྲག་བཅུས་སྣ་ཚོགས་སུ་ཡོག་པ། རིན་པོ་ཆེའི་པད་མོའི་དྲ་བ་བྱེ་བ་བརྒྱ་སྟོང་ཕྲག་བཅུས་ཤིན་ཏུ་རྒྱས་པར་བཀྲམ་པ། སྤོས་རིན་པོ་ཆེའི་དྲ་བ་བྱེ་བ་བརྒྱ་སྟོང་ཕྲག་བཅུ་འཐུལ་ཞིང་ཡིད་དུ་འོང་བར་དྲི་ཞིམ་པ།
རིན་པོ་ཆེའི་བླ་རེ་ཆེན་པོའི་དྲ་བ་བྱེ་བ་བརྒྱ་སྟོང་ཕྲག་བཅུའི་རྒྱན་ཆེན་པོ་བརྒྱན་པར་བྲེས་པ། རིན་པོ་ཆེའི་དྲིལ་བུའི་རྒྱན་གྱི་བླ་རེ་བྱེ་བ་བརྒྱ་སྟོང་ཕྲག་བཅུས་ཡིད་དུ་འོང་བའི་སྒྲ་ཕྱུང་བ། ཙན་དན་རིན་པོ་ཆེའི་མདོག་ལྟ་བུའི་བླ་རེ་བྱེ་བ་བརྒྱ་སྟོང་ཕྲག་བཅུས་ཡིད་དུ་འོང་བར་
བཀབ་པ། རིན་པོ་ཆེའི་མེ་ཏོག་སྣ་ཚོགས་ཀྱི་བླ་རེ་བྱེ་བ་བརྒྱ་སྟོང་ཕྲག་བཅུ་མེ་ཏོག་ཤིན་ཏུ་རྒྱས་པ། གོས་ཁ་དོག་མཐའ་ཡས་པའི་བླ་རེ་བྱེ་བ་བརྒྱ་སྟོང་ཕྲག་བཅུས་སྣ་ཚོགས་སུ་སྣང་བར་བཀབ་པ། བྱང་ཆུབ་སེམས་དཔའི་བླ་རེ་བྱེ་བ་བརྒྱ་སྟོང་ཕྲག་བཅུས་སྣ་ཚོགས་
སུ་ཀུན་ནས་བཀབ་པ། གདུགས་ཀྱི་བླ་རེ་ཁ་དོག་རྣམ་པ་སྣ་ཚོགས་བྱེ་བ་བརྒྱ་སྟོང་ཕྲག་བཅུས་རབ་ཏུ་གཡོགས་ཤིང་རྣམ་པ་སྣ་ཚོགས་སུ་སྣང་བ། གསེར་གྱི་བླ་རེ་བྱེ་བ་བརྒྱ་སྟོང་ཕྲག་བཅུས་ཡིད་དུ་འོང་བར་བཀབ་ཅིང་རྣམ་པར་དག་པར་བྱས་པ། བཻ་ཌཱུརྱའི་
བླ་རེ་བྱེ་བ་བརྒྱ་སྟོང་ཕྲག་བཅུས་ལྷ་རྫས་དྲི་མ་མེད་ཅིང་ཤིན་ཏུ་དག་པར་བྱས་པ། སྙིང་པོ་སྣ་ཚོགས་ཅན་གྱི་བླ་རེ་བྱེ་བ་བརྒྱ་སྟོང་ཕྲག་བཅུས་རྣམ་པ་སྣ་ཚོགས་ཀྱི་བླ་རེ་བཀབ་པ། རིན་པོ་ཆེ་ཐམས་ཅད་ཀྱི་བླ་རེ་བྱེ་བ་བརྒྱ་སྟོང་ཕྲག་བཅུའི་ནོར་བུ་རིན་པོ་ཆེ་བཟང་པོས་ཤིན་ཏུ་

མཛེས་ཤིང་ཁེབས་པར་བཀབ་པ། རིན་པོ་ཆེའི་རྒྱན་བྱེ་བ་བརྒྱ་སྟོང་ཕྲག་བཅུས་ཕྱོགས་ཐམས་ཅད་བཀང་བ། རིན་པོ་ཆེའི་གཟུགས་བརྙན་གྱི་བླ་རེ་བྱེ་བ་བརྒྱ་སྟོང་ཕྲག་བཅུས་ཤིན་ཏུ་རྣམ་པར་ཕྱེ་ཞིང་མཛེས་པར་བརྒྱན་པ། རིན་
པོ་ཆེའི་ཕྲེང་བ་བྱེ་བ་བརྒྱ་སྟོང་ཕྲག་བཅུས་ཕྲེང་བ་ཀུན་ཏུ་འབྲེལ་པར་བརྒྱན་པ། སྤོས་ཀྱི་ཕྲེང་བ་བྱེ་བ་བརྒྱ་སྟོང་ཕྲག་བཅུས་མཆོད་པ་ལ་ཚུལ་དང་མཐུན་པའི་སྤོས་ཀྱི་དྲི་ཞིམ་པར་བྱས་པ། ལྷ་ལ་མཆོག་ཏུ་བྱ་བའི་སྤོས་དང་། བདུག་སྤོས་བྱེ་བ་ཁྲག་ཁྲིག་
བརྒྱ་སྟོང་ཕྲག་བཅུས་ཁ་དོག་མཐའ་ཡས་པ་དང་། དྲི་ཞིམ་པོར་གཏུལ་བའི་མཆོད་པ་ཅན། ལྷ་ལ་མཆོག་ཏུ་བྱ་བའི་ལྷབ་ལྷུབ་ཀྱི་རྒྱུད་བྱེ་བ་བརྒྱ་སྟོང་ཕྲག་བཅུས་མངོན་པར་ཀླུབས་ཤིང་དག་པར་བྱས་པ། རིན་པོ་ཆེའི་མེ་ཏོག་གི་ཕྲེང་བ་བྱེ་བ་བརྒྱ་སྟོང་
ཕྲག་བཅུས་རིན་པོ་ཆེ་ཐམས་ཅད་ཀྱི་རྒྱུད་དུ་མཛེས་པར་བྱས་པ། དཔལ་གྱི་སྙིང་པོའི་ཕྲེང་བ་བྱེ་བ་བརྒྱ་སྟོང་ཕྲག་བཅུས་རིན་པོ་ཆེ་སྣ་ཚོགས་སུ་བརྒྱན་པ། ནོར་བུ་རིན་པོ་ཆེ་སྣ་ཚོགས་ཀྱི་ཕྲེང་བ་བྱེ་བ་བརྒྱ་སྟོང་ཕྲག་བཅུས་རིན་པོ་ཆེ་ཐམས་ཅད་ཀྱི་རྒྱན་དུ་རྣམ་པར་
དག་པ། ནོར་བུ་རིན་པོ་ཆེ་རྒྱ་མཚོའི་རྒྱན་གྱི་ཕྲེང་བ་བྱེ་བ་བརྒྱ་སྟོང་ཕྲག་བཅུས་གདན་གྱི་སྙིང་པོ་ཤིན་ཏུ་བརྒྱན་པ། དབང་པོའི་རྡོ་རྗེ་བྱེ་བ་བརྒྱ་སྟོང་ཕྲག་བཅུས་ཤིན་ཏུ་སྤྲས་པ། རིན་པོ་ཆེའི་སྣམ་བུ་བྱེ་བ་བརྒྱ་སྟོང་ཕྲག་བཅུ་ཀུན་ཏུ་སྤྱངས་པ། འཇིག་རྟེན་
མཐའ་ཡས་པའི་དབང་པོའི་ནོར་བུ་རིན་པོ་ཆེ་བྱེ་བ་བརྒྱ་སྟོང་ཕྲག་བཅུས་ཤིན་ཏུ་བཟང་བར་བརྒྱན་པ། གསེར་གྱི་སྙིང་པོ་བྱེ་བ་བརྒྱ་སྟོང་ཕྲག་བཅུས་ཤིན་ཏུ་བསྒྲུབས་ཤིང་དག་པར་བྱས་པ། ནོར་བུ་རིན་པོ་ཆེ་རྣམ་པར་སྣང་བ་བྱེ་བ་བརྒྱ་སྟོང་ཕྲག་བཅུས་
རྡུལ་མེད་པར་སྣང་བར་བྱས་པ། ནོར་བུ་རིན་པོ་ཆེ་བརྒྱ་བྱིན་མངོན་པར་ཆགས་པ་བྱེ་བ་བརྒྱ་སྟོང་ཕྲག་བཅུས་སྙིང་པོ་མཐའ་ཡས་པ་སྣང་བར་བརྒྱན་པ། ནོར་བུ་རིན་པོ་ཆེ་དཔའ་བའི་རྒྱལ་མཚན་བྱེ་བ་བརྒྱ་སྟོང་ཕྲག་བཅུས་ཤིན་ཏུ་འབར་བར་བསྒྲུབས་པ།

ནོར་བུ་རིན་པོ་ཆེ་སྣང་བའི་འོད་ཟེར་བྱེ་བ་བརྒྱ་སྟོང་ཕྲག་བཅུས་འོད་ཟེར་སྣང་བར་བྱས་པ། ནོར་བུ་རིན་པོ་ཆེ་ལྷ་ལ་མཆོག་ཏུ་བྱ་བ་བྱེ་བ་བརྒྱ་སྟོང་ཕྲག་བཅུས་སྐར་ཁུང་གི་ཤར་བུ་མཛེས་པར་བྲེས་པ། ནོར་བུ་རིན་པོ་ཆེ་བསོད་ནམས་ཀྱིས་དག་པ་བྱེ་བ་བརྒྱ་སྟོང་ཕྲག་
བཅུས་ཁ་དོག་གསལ་བར་གྱུར་པ། དངུལ་གྱི་རྟ་བབས་བྱེ་བ་བརྒྱ་སྟོང་ཕྲག་བཅུས་བྲེས་པས་སྙིང་པོ་དཀར་པོ་རབ་ཏུ་རྣམ་པར་ཕྱེ་བ། འགྲོ་བ་རྒྱ་མཚོའི་ཟླ་གམ་བྱེ་བ་བརྒྱ་སྟོང་ཕྲག་བཅུས་སྦུབས་ཤིན་ཏུ་བསྒྲུབས་པ། ནོར་བུ་རིན་པོ་ཆེ་དྲི་མ་མེད་པ་བྱེ་བ་
བརྒྱ་སྟོང་ཕྲག་བཅུས་བལྟ་ན་མཛེས་པར་ཤིན་ཏུ་བརྒྱན་པ། ནོར་བུ་རིན་པོ་ཆེ་སེམས་ཀྱི་རྒྱལ་པོ་བྱེ་བ་བརྒྱ་སྟོང་ཕྲག་བཅུས་འདབ་ཆགས་ཡིད་དུ་འོང་ཞིང་དགའ་བར་ཀུན་ཏུ་བརྒྱན་པ། ནོར་བུ་རིན་པོ་ཆེ་སེང་གེའི་གདོང་བྱེ་བ་བརྒྱ་སྟོང་
ཕྲག་བཅུས་ཤིན་ཏུ་སྤྲས་པའི་མཆོད་པ་དང་ལྡན་པ། ནོར་བུ་རིན་པོ་ཆེ་འཛམ་བུའི་རྒྱལ་མཚན་བྱེ་བ་བརྒྱ་སྟོང་ཕྲག་བཅུས་མཐུ་བརྟན་པར་ཤིན་ཏུ་བརྟན་པ། ནོར་བུ་རིན་པོ་ཆེ་སྙིང་པོ་དག་པ་བྱེ་བ་བརྒྱ་སྟོང་ཕྲག་བཅུས་རྣམ་པར་སྣང་ཞིང་མཛེས་པར་
བྱས་པ། ནོར་བུ་རིན་པོ་ཆེ་དབང་པོའི་རྒྱལ་མཚན་བྱེ་བ་བརྒྱ་སྟོང་ཕྲག་བཅུས་སྣང་བའི་གདུགས་སུ་བྲིས་པ། ནོར་བུ་རིན་པོ་ཆེ་དངུལ་གྱི་སྙིང་པོ་བྱེ་བ་བརྒྱ་སྟོང་ཕྲག་བཅུས་ནང་རྣམ་པ་སྣ་ཚོགས་སུ་བཀྲམ་པ། ནོར་བུ་རིན་པོ་ཆེ་རི་རབ་ཀྱི་རྒྱལ་མཚན་བྱེ་བ་
བརྒྱ་སྟོང་ཕྲག་བཅུས་སྙིང་པོ་ཤིན་ཏུ་བརྒྱན་པ། མུ་ཏིག་གི་ཕྲེང་བ་བྱེ་བ་བརྒྱ་སྟོང་ཕྲག་བཅུས་ཁ་དོག་མཛེས་པར་བྲེས་པ། བཻ་ཌཱུརྱའི་ཕྲེང་བ་བྱེ་བ་བརྒྱ་སྟོང་ཕྲག་བཅུས་དྲ་བར་བྲེས་པ། མུ་ཏིག་དམར་པོའི་ཕྲེང་བ་བྱེ་བ་བརྒྱ་སྟོང་ཕྲག་བཅུས་རྣམ་པ་སྣ་
ཚོགས་སུ་རྣམ་པར་ཕྱེ་བ། ནོར་བུ་ཡིད་དུ་འོང་བའི་ཕྲེང་བ་བྱེ་བ་བརྒྱ་སྟོང་ཕྲག་བཅུས་རྣམ་པ་སྣ་ཚོགས་སུ་བཀོད་པ། རིན་པོ་ཆེ་ཤིན་ཏུ་སྣང་བའི་ཕྲེང་བ་བྱེ་བ་བརྒྱ་སྟོང་ཕྲག་བཅུས་ཤིན་ཏུ་རྣམ་པར་ཕྱེ་ཞིང་རབ་ཏུ་བཟུང་བ། རིན་པོ་ཆེའི་འབྲུ་

སྣ་ཚོགས་ཀྱི་ཕྲེང་བ་བྱེ་བ་བརྒྱ་སྟོང་ཕྲག་བཅུས་ལུས་ཤིན་ཏུ་བརྒྱན་པ། མུ་ཏིག་དམར་པོའི་ཕྲེང་བ་བྱེ་བ་བརྒྱ་སྟོང་ཕྲག་བཅུས་ཡིད་དུ་འོང་བར་སྣང་བ། ནོར་བུ་རིན་པོ་ཆེའི་ཁ་དོག་དུ་མའི་ཕྲེང་བ་བྱེ་བ་བརྒྱ་སྟོང་ཕྲག་བཅུས་སྙིང་
པོ་ཁ་དོག་སྣ་ཚོགས་ཤིང་ཁ་དོག་མཐའ་ཡས་པའི་མཐར་ཕྱིན་པ། དགའ་བར་བྱེད་པའི་ཕྲེང་བ་བྱེ་བ་བརྒྱ་སྟོང་ཕྲག་བཅུས་དག་པར་སྦྱངས་པ། ནོར་བུ་རིན་པོ་ཆེ་དཔལ་གྱི་འོད་ཟེར་གྱི་ཕྲེང་བ་བྱེ་བ་བརྒྱ་སྟོང་ཕྲག་བཅུས་དཔལ་ཆེན་པོ་རབ་ཏུ་འཐོབ་
པ་ཐོབ་པར་གྱུར་པ། ནོར་བུའི་གཟུགས་བྱེ་བ་བརྒྱ་སྟོང་ཕྲག་བཅུས་ཕྱོགས་ཤིན་ཏུ་སྤ་བར་བརྒྱན་པ། རིན་པོ་ཆེ་དབང་པོའི་ཁ་དོག་བྱེ་བ་བརྒྱ་སྟོང་ཕྲག་བཅུ་ལ་གནས་ཡོངས་སུ་འཛིན་པ། དུས་དང་མཐུན་པའི་ཙན་དན་བྱེ་བ་བརྒྱ་སྟོང་ཕྲག་བཅུས་
འཇིག་རྟེན་གྱི་ཁམས་ཐམས་ཅད་དུ་དྲི་ཞིམ་པོས་རྒྱས་པར་བྱས་པ། རིམ་གྲོ་བྱེད་པའི་མིའི་ཚོགས་བྱེ་བ་བརྒྱ་སྟོང་ཕྲག་བཅུས་སངས་རྒྱས་ཀྱི་ཞིང་ཐམས་ཅད་དུ་རྗེས་སུ་སོང་བ། སྤོས་ཀྱི་ཐུམ་པོ་ཤིན་ཏུ་ཆེ་བ་བྱེ་བ་བརྒྱ་སྟོང་ཕྲག་བཅུས་ཀུན་ཏུ་རྒྱས་པ། གཞན་གྱིས་ཕམ་པ་མེད་
པའི་སྤོས་བྱེ་བ་བརྒྱ་སྟོང་ཕྲག་བཅུའི་དྲི་ཀུན་ཏུ་རྒྱས་པ། སྤོས་ཀྱི་གཟུགས་བྱེ་བ་བརྒྱ་སྟོང་ཕྲག་བཅུའི་དྲི་ཀུན་ཏུ་འབྱུང་བ། ཡིད་དུ་འོང་བའི་སྤོས་བྱེ་བ་བརྒྱ་སྟོང་ཕྲག་བཅུའི་དྲི་རབ་ཏུ་འབྱུང་བ། སྣང་བ་སྟོན་པའི་སྤོས་བྱེ་བ་བརྒྱ་སྟོང་ཕྲག་བཅུའི་དྲིས་འགྲོ་བ་
ཀུན་ཏུ་གང་བ། དྲི་སྣ་ཚོགས་ཁ་དོག་མཐའ་ཡས་པ་བྱེ་བ་བརྒྱ་སྟོང་ཕྲག་བཅུས་སངས་རྒྱས་ཀྱི་ཞིང་ཐམས་ཅད་དུ་ཕྱིར་མི་ལྡོག་པར་ཞིམ་པ་བྱུག་པ་བྱེ་བ་བརྒྱ་སྟོང་ཕྲག་བཅུས་ཤིན་ཏུ་བྱུགས་པ། ཙན་དན་རྣམ་པ་ཐ་དད་པའི་སྤོས་བྱེ་བ་བརྒྱ་སྟོང་ཕྲག་
བཅུས་ཚོན་དུ་བསྐུས་ཤིང་མཛེས་པ། སྤོས་རྣམ་པ་ཐ་དད་པ་བྱེ་བ་བརྒྱ་སྟོང་ཕྲག་བཅུས་དྲི་ཞིམ་པོར་ཤིན་ཏུ་བསྒོས་པ། ཨ་ག་རུ་ནག་པོ་པད་མོའི་སྙིང་པོ་བྱེ་བ་བརྒྱ་སྟོང་ཕྲག་བཅུའི་སྤྲིན་གྱི་སྙིང་པོར་བྱས་པ། བདུག་སྤོས་བྱེ་བ་བརྒྱ་སྟོང་

ཕྲག་བཅུས་ཤིན་ཏུ་བདུགས་ཤིང་ཡོག་པ། བདུག་སྤོས་ཀྱི་འོད་ཟེར་བྱེ་བ་བརྒྱ་སྟོང་ཕྲག་བཅུ་དབང་པོ་ཞི་བར་ཞིམ་པ། སྤོས་ཀུན་ཏུ་རྒྱུ་བ་བྱེ་བ་བརྒྱ་སྟོང་ཕྲག་བཅུ་ཡིད་དུ་འོང་བར་ཞིམ་པ། སྤོས་ཀྱི་འོད་ཟེར་བྱེ་བ་བརྒྱ་སྟོང་ཕྲག་བཅུས་རོ་ཐམས་ཅད་དུ་བདུགས།
ཤིང་དྲི་ཞིམ་པ། སྤོས་རྣམ་པར་ཚོར་བར་བྱེད་པའི་དམ་པ་བྱེ་བ་བརྒྱ་སྟོང་ཕྲག་བཅུས་དབང་པོ་མི་འཁྲུགས་པར་སྤོས་ཐམས་ཅད་ཀྱིས་མཆོད་པར་བྱས་པ། སྤོས་ཀྱི་རྒྱལ་པོ་གཞལ་དུ་མེད་པ་བྱེ་བ་བརྒྱ་སྟོང་ཕྲག་བཅུས་སྤོས་ཀྱི་གཟུགས་རྣམ་པ་སྣ་ཚོགས་སུ་ཤིན་ཏུ་བརྒྱན་
པ། ལྷ་རྫས་ཀྱི་མེ་ཏོག་གི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུ་མངོན་པར་འབབ་པ། ལྷ་རྫས་ཀྱི་སྤོས་ཀྱི་སྤྲིན་བྱེ་བ་བརྒྱ་སྟོང་ཕྲག་བཅུ་མངོན་པར་འབབ་པ། ལྷ་རྫས་ཀྱི་ཕྱེ་མའི་སྤྲིན་བྱེ་བ་བརྒྱ་སྟོང་ཕྲག་བཅུ་མངོན་པར་འབབ་པ། ལྷ་རྫས་ཀྱི་པད་
མོའི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུ་མངོན་པར་འབབ་པ། ལྷ་རྫས་ཀྱི་རིན་པོ་ཆེའི་མེ་ཏོག་གི་སྤྲིན་བྱེ་བ་བརྒྱ་སྟོང་ཕྲག་བཅུའི་ཆར་མངོན་པར་འབབ་པ། ལྷ་རྫས་ཀྱི་ཨུཏ་པ་ལའི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུ་ཀུན་ཏུ་ཡོག་པར་འབབ་པ། ལྷ་རྫས་
ཀྱི་རིན་པོ་ཆེའི་མེ་ཏོག་གི་ཆར་བྱེ་བ་བརྒྱ་སྟོང་ཕྲག་བཅུ་རབ་ཏུ་འབབ་པ། ལྷ་རྫས་ཀྱི་མེ་ཏོག་པུན་ད་རི་ཀའི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུ་ཤིན་ཏུ་འབབ་པ། ལྷ་རྫས་ཀྱི་མེ་ཏོག་མནྡཱ་ར་བའི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུའི་ཚོགས་ཆེན་པོ་རབ་ཏུ་འབབ་པ།
ལྷ་རྫས་ཀྱི་མེ་ཏོག་ཐམས་ཅད་ཀྱི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུའི་རྒྱུན་ཏུ་འབབ་པ། ན་བཟའི་སྤྲིན་བྱེ་བ་བརྒྱ་སྟོང་ཕྲག་བཅུས་བར་སྣང་ཁ་དོག་སྣ་ཚོགས་སུ་གྱུར་པ། ནོར་བུ་རིན་པོ་ཆེའི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུ་ཀུན་ཏུ་སྣང་བར་འབབ་པ།
གདུགས་ཀྱི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུ་ཀུན་ནས་ཡོག་པར་འབབ་པ། བ་དན་གྱི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུ་ཁ་དོག་སྣ་ཚོགས་དུ་མར་འབབ་པ། ལྷ་རྫས་ཀྱི་ཅོད་པན་གྱི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུ་སྣ་ཚོགས་སུ་འབབ་པ། ལྷབ་ལྷུབ་

ཀྱི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུ་ཤིན་ཏུ་ཀླུབ་པར་འབབ་པ། ལྷ་རྫས་ཀྱི་རིན་པོ་ཆེའི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུ་ཁ་དོག་སྣ་ཚོགས་སུ་འབབ་པ། ལྷ་རྫས་ཀྱི་རིན་པོ་ཆེའི་སེ་མོ་དོའི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུ་རྒྱན་ཆེན་པོར་འབབ་
པ། ལྷ་རྫས་ཀྱི་ཙན་དན་གྱི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུ་ཙན་དན་རྣམ་པ་སྣ་ཚོགས་ཀྱི་ཁ་དོག་དུ་མར་འབབ་པ། ལྷ་རྫས་ཀྱི་ཨ་ཀ་རུ་དང་། ཙན་དན་གྱི་སྤྲིན་གྱི་ཆར་བྱེ་བ་བརྒྱ་སྟོང་ཕྲག་བཅུ་ཤིན་ཏུ་ཡོག་པར་འཐུལ་ཞིང་འབབ་པ། རིན་པོ་ཆེའི་
རྒྱལ་མཚན་བྱེ་བ་བརྒྱ་སྟོང་ཕྲག་བཅུ་ཤིན་ཏུ་བསྒྲེང་བ། རིན་པོ་ཆེའི་བ་དན་བྱེ་བ་བརྒྱ་སྟོང་ཕྲག་བཅུ་ཤིན་ཏུ་སྤྱངས་པ། སྣམ་བུ་རིན་པོ་ཆེའི་ལྡ་ལྡི་བྱེ་བ་བརྒྱ་སྟོང་ཕྲག་བཅུ་ཤིན་ཏུ་བྲེས་པ། སྤོས་ཀྱི་སྣོད་བྱེ་བ་བརྒྱ་སྟོང་ཕྲག་བཅུ་ནས་ཤིན་ཏུ་འཐུལ་བ།
རིན་པོ་ཆེའི་ཕྲེང་བའི་ཆུན་པོ་བྱེ་བ་བརྒྱ་སྟོང་ཕྲག་བཅུ་ཀུན་ཏུ་སྤྱངས་པ། རིན་པོ་ཆེའི་སིལ་སྙན་བྱེ་བ་བརྒྱ་སྟོང་ཕྲག་བཅུ་ཤིན་ཏུ་འཁྲོལ་ཞིང་འཛིན་པ། ལྷ་རྫས་ཀྱི་རྡུལ་ཡབ་བྱེ་བ་བརྒྱ་སྟོང་ཕྲག་བཅུ་རྣམ་པར་རློབ་ཅིང་འཛིན་པ། རིན་པོ་ཆེའི་དྲིལ་
བུའི་དྲ་བ་བྱེ་བ་བརྒྱ་སྟོང་ཕྲག་བཅུ་ཤིན་ཏུ་འཁྲོལ་བ། །རིན་པོ་ཆེའི་སྟེགས་བུ་བྱེ་བ་བརྒྱ་སྟོང་ཕྲག་བཅུས་ཀུན་ནས་བསྐོར་བ། རིན་པོ་ཆེའི་ཤིང་ཏ་ལའི་ཕྲེང་བ་བྱེ་བ་བརྒྱ་སྟོང་ཕྲག་བཅུ་ཀུན་ནས་འགྲེང་བ། རིན་པོ་ཆེའི་ཕྲེང་བ་བྱེ་བ་བརྒྱ་སྟོང་
ཕྲག་བཅུས་ལྡ་ལྡིར་བརྒྱན་པ། རིན་པོ་ཆེའི་ཤིང་བྱེ་བ་བརྒྱ་སྟོང་ཕྲག་བཅུས་ཀུན་ནས་ཡོག་ཅིང་འཁོར་བ། ཁང་པ་བརྩེགས་པ་རིན་པོ་ཆེའི་རྒྱན་ཅན་བྱེ་བ་བརྒྱ་སྟོང་ཕྲག་བཅུས་ནང་གི་རྒྱན་དུ་དཀྲིགས་པ། རིན་པོ་ཆེའི་ཁང་བུ་བྱེ་བ་བརྒྱ་སྟོང་གི་སྒོ་ལ་
རིན་པོ་ཆེ་ཐམས་ཅད་ཀྱི་ཕྲེང་བ་བཀྱེ་བ། གསེར་གྱི་དྲིལ་བུ་བྱེ་བ་བརྒྱ་སྟོང་ཕྲག་བཅུ་འཁྲོལ་བའི་སྒྲ་ཡིད་དུ་འོང་བར་འབྱུང་བ། དཔལ་གྱི་བེའུ་བྱེ་བ་བརྒྱ་སྟོང་ཕྲག་བཅུའི་ཕྲེང་བ་རབ་ཏུ་སྤྱངས་པས་ཡོངས་སུ་དག་པ། རིན་པོ་ཆེའི་བཀྲ་ཤིས་བྱེ་བ་བརྒྱ་སྟོང་ཕྲག་

བཅུའི་མཚན་བཟང་པོ་བྱུང་བ། གསེར་གྱི་དམ་པ་བྱེ་བ་བརྒྱ་སྟོང་ཕྲག་བཅུའི་གསེར་གྱི་ལྕག་ཕོད་ཀྱིས་ཀུན་ཏུ་བལྟས་པ། རིན་པོ་ཆེའི་གདུགས་གཅིག་ནས་གཅིག་ཏུ་བརྒྱུད་པ་བྱེ་བ་བརྒྱ་སྟོང་ཕྲག་བཅུ་རིན་པོ་ཆེ་ཐམས་ཅད་ཀྱི་ཡུ་བས་བཟུང་བ། རིན་པོ་ཆེའི་རྒྱན་བྱེ་བ་
བརྒྱ་སྟོང་ཕྲག་བཅུས་རིན་པོ་ཆེའི་རྒྱན་གྱི་དྲ་བ་ཐམས་ཅད་དུ་རྣམ་པར་བྲེས་པ། རིན་པོ་ཆེའི་འོད་ཟེར་བྱེ་བ་བརྒྱ་སྟོང་ཕྲག་བཅུ་འོད་ཟེར་སྣ་ཚོགས་སུ་རབ་ཏུ་འཕྲོ་བ་སྣང་བ་བྱེ་བ་བརྒྱ་སྟོང་ཕྲག་བཅུས་ཀུན་ཏུ་སྣང་བར་བྱེད་པ། འོད་བྱེ་བ་བརྒྱ་སྟོང་ཕྲག་བཅུ་རབ་
ཏུ་འཚེར་བ། ཉི་མའི་དཀྱིལ་འཁོར་གྱི་སྙིང་པོ་བྱེ་བ་བརྒྱ་སྟོང་ཕྲག་བཅུས་གཟུགས་རབ་ཏུ་མཛེས་ཤིང་ལུས་ཤིན་ཏུ་འཕགས་པ། ཟླ་བའི་དཀྱིལ་འཁོར་བྱེ་བ་བརྒྱ་སྟོང་ཕྲག་བཅུས་ཁ་དོག་དུ་མར་བསྒྲུབས་པ། སྤོས་ཀྱི་འོད་གཟེར་བྱེ་བ་བརྒྱ་སྟོང་ཕྲག་བཅུ་རབ་རིབ་
མེད་པར་སྣང་བ། ལྷ་རྫས་ཀྱི་པད་མོའི་དམ་པ་བྱེ་བ་བརྒྱ་སྟོང་ཕྲག་བཅུས་རབ་ཏུ་བསྒྲུབས་ཤིང་སྙིང་པོ་ཤིན་ཏུ་འཕགས་པ། རིན་པོ་ཆེའི་དྲ་བ་བྱེ་བ་བརྒྱ་སྟོང་ཕྲག་བཅུས་སྙིང་པོ་ཀུན་ནས་ཡོག་པར་བྱས་པ། མེ་ཏོག་གི་དྲ་བ་བྱེ་བ་བརྒྱ་སྟོང་ཕྲག་བཅུ་ཀུན་ནས་
རྒྱས་པར་བཀྲམ་པ། སྤོས་ཀྱི་དྲ་བ་བྱེ་བ་བརྒྱ་སྟོང་ཕྲག་བཅུའི་དྲི་སྣ་ཚོགས་ཀྱིས་ཀུན་ནས་ཡོག་པ། ལྷ་རྫས་ཀྱི་གདན་རིན་པོ་ཆེ་བྱེ་བ་བརྒྱ་སྟོང་ཕྲག་བཅུ་མཛེས་པར་བཏིང་བ། ལྷ་རྫས་ཀྱི་གོས་རིན་པོ་ཆེ་བྱེ་བ་བརྒྱ་སྟོང་ཕྲག་བཅུས་མཛེས་པར་
བཀྲམ་པ། ལྷ་རྫས་ཀྱི་གོས་ཁ་དོག་སྔོན་པོ་བྱེ་བ་བརྒྱ་སྟོང་ཕྲག་བཅུ་ཤིན་ཏུ་བརྒྱན་པར་བཏིང་བ། ལྷ་རྫས་ཀྱི་གོས་ཁ་དོག་སེར་པོ་བྱེ་བ་བརྒྱ་སྟོང་ཕྲག་བཅུ་རྒྱན་ཆེན་པོར་བཏིང་བ། ལྷ་རྫས་ཀྱི་གོས་ཁ་དོག་དམར་པོ་བྱེ་བ་བརྒྱ་སྟོང་ཕྲག་བཅུ་ལྷའི་དགའ་བར་
བཏིང་བ། ལྷ་རྫས་ཀྱི་གོས་ཁ་དོག་སྣ་ཚོགས་བྱེ་བ་བརྒྱ་སྟོང་ཕྲག་བཅུ་གོས་ཀྱི་རྒྱན་དུ་བཏིང་བ། ལྷ་རྫས་ཀྱི་རིན་པོ་ཆེ་སྣ་ཚོགས་ཀྱི་གོས་རྣམ་པ་སྣ་ཚོགས་བྱེ་བ་བརྒྱ་སྟོང་ཕྲག་བཅུ་ཁ་དོག་ལེགས་པར་བཏིང་བ། སྤོས་སྣ་ཚོགས་ཀྱིས་ཡོངས་སུ་

བསྒོས་པའི་གོས་བྱེ་བ་བརྒྱ་སྟོང་ཕྲག་བཅུ་གོས་བཟང་པོར་བཏིང་བ། རིན་པོ་ཆེ་རྨད་དུ་བྱུང་བ་ཐམས་ཅད་ཀྱི་གོས་བྱེ་བ་བརྒྱ་སྟོང་ཕྲག་བཅུས་ཡིད་དུ་འོང་བའི་རྒྱན་དུ་བཏིང་བ། གོས་དཀར་པོ་སྣ་ཚོགས་བྱེ་བ་བརྒྱ་སྟོང་ཕྲག་
བཅུས་བླ་གབ་ཏུ་བཀབ་པ། ལྷ་རྫས་ཀྱི་དྲིལ་བུའི་རྒྱལ་མཚན་བྱེ་བ་བརྒྱ་སྟོང་ཕྲག་བཅུས་ཡིད་དུ་འོང་བའི་སྒྲ་ཕྱུང་བ། གསེར་གྱི་དྲ་བའི་རྒྱལ་མཚན་བྱེ་བ་བརྒྱ་སྟོང་ཕྲག་བཅུ་སྒྲ་ཤིན་ཏུ་འབྱིན་ཅིང་ཡོངས་སུ་བཟུང་བ། ལྷ་རྫས་ཀྱི་སྣམ་བུ་རིན་པོ་ཆེའི་
རྒྱལ་མཚན་བྱེ་བ་བརྒྱ་སྟོང་ཕྲག་བཅུས་རྒྱལ་མཚན་གྱི་དྲ་བའི་རྒྱན་དུ་བརྒྱན་པ། སྤོས་ཀྱི་རྒྱལ་མཚན་བྱེ་བ་བརྒྱ་སྟོང་ཕྲག་བཅུས་སྤོས་ཀྱི་དྲ་བ་ཐམས་ཅད་ཀྱི་རྒྱན་རྣམ་པར་དག་པ། ལྷ་རྫས་ཀྱི་མེ་ཏོག་གི་རྒྱལ་མཚན་བྱེ་བ་བརྒྱ་སྟོང་ཕྲག་བཅུ་མེ་ཏོག་ཐམས་
ཅད་ཀྱི་ཆར་དུ་འབབ་པ། ལྷ་རྫས་ཀྱི་གོས་ཀྱི་རྒྱལ་མཚན་བྱེ་བ་བརྒྱ་སྟོང་ཕྲག་བཅུས་གོས་ཐམས་ཅད་དུ་བསྐྱོད་པ། ལྷ་རྫས་ཀྱི་ནོར་བུ་རིན་པོ་ཆེའི་རྒྱལ་མཚན་བྱེ་བ་བརྒྱ་སྟོང་ཕྲག་བཅུས་མཛེས་པ་ཐམས་ཅད་ཀྱི་རྒྱལ་མཚན་དང་ལྡན་པར་བྱས་པ། ལྷ་
རྫས་ཀྱི་ལྷབ་ལྷུབ་ཀྱི་རྒྱལ་མཚན་བྱེ་བ་བརྒྱ་སྟོང་ཕྲག་བཅུས་ལྷབ་ལྷུབ་ཐམས་ཅད་ཀྱི་རྒྱལ་མཚན་རྣམ་པ་སྣ་ཚོགས་སུ་གྱུར་པ། ལྷ་རྫས་ཀྱི་ཕྲེང་བའི་རྒྱལ་མཚན་བྱེ་བ་བརྒྱ་སྟོང་ཕྲག་བཅུ་ཕྱོགས་ཀུན་ནས་འགྲེང་བ། ལྷ་རྫས་ཀྱི་
གདུགས་ཀྱི་རྒྱལ་མཚན་བྱེ་བ་བརྒྱ་སྟོང་ཕྲག་བཅུ་དྲིལ་བུ་ཐམས་ཅད་འཁྲོལ་བས་ཡིད་དུ་འོང་ཞིང་དགའ་བའི་སྒྲ་ཕྱུང་བ། ལྷ་རྫས་ཀྱི་དུང་བྱེ་བ་བརྒྱ་སྟོང་ཕྲག་བཅུས་སྒྲ་སྙན་པ་ཕྱུང་བ། ལྷ་རྫས་ཀྱི་རྔ་བྱེ་བ་བརྒྱ་སྟོང་ཕྲག་བཅུས་རྔ་ཆེན་པོའི་སྒྲ་ཤིན་
ཏུ་ཕྱུང་བ། ལྷ་རྫས་ཀྱི་པི་ཝང་བྱེ་བ་བརྒྱ་སྟོང་ཕྲག་བཅུས་ཡིད་དུ་འོང་ཞིང་འབྲེལ་པའི་སྒྲ་ཕྱུང་བ། ལྷ་རྫས་ཀྱི་ཁ་སྦྱར་བྱེ་བ་བརྒྱ་སྟོང་ཕྲག་བཅུས་དབྱངས་ཆེན་པོར་སྒྲ་བསྒྲགས་པ། ལྷ་རྫས་ཀྱི་སིལ་སྙན་བྱེ་བ་བརྒྱ་སྟོང་ཕྲག་བཅུ་གླུ་དང་རོལ་

མོར་སྦྱར་བ་དང་ལྡན་པ། ལྷ་རྫས་ཀྱི་རོལ་མོ་དབྱངས་ཀྱི་དམ་པ་བྱེ་བ་བརྒྱ་སྟོང་ཕྲག་བཅུའི་སྒྲ་ཡིད་དུ་འོང་བས་སངས་རྒྱས་ཀྱི་ཞིང་ཐམས་ཅད་དུ་མངོན་པར་གྲགས་པར་བྱས་པ། སྤྲུལ་པའི་རོལ་མོ་བྱེ་བ་བརྒྱ་སྟོང་ཕྲག་བཅུས་འཇིག་རྟེན་གྱི་ཁམས་
ཐམས་ཅད་སྒྲ་བརྙན་གྱི་ཚོགས་ལྟ་བུར་ཤེས་པར་བྱས་པ། ལྷ་རྫས་ཀྱི་རྔ་བོ་ཆེ་བྱེ་བ་བརྒྱ་སྟོང་ཕྲག་བཅུ་ཤིན་ཏུ་བརྡུངས་པའི་སྒྲ་ཕྱུང་བ། ཡིད་ཀྱི་རང་བཞིན་གྱི་ལྷ་རྫས་ཀྱི་རོལ་མོ་བྱེ་བ་བརྒྱ་སྟོང་ཕྲག་བཅུས་རོལ་མོའི་སྒྲ་ཡིད་དུ་འོང་བ་དང་། གླུའི་
དབྱངས་སྙན་པ་ཕྱུང་བ། ལྷ་རྫས་ཀྱི་རོལ་མོར་གཏོགས་པ་སྣ་ཚོགས་བྱེ་བ་བརྒྱ་སྟོང་ཕྲག་བཅུས་ཡིད་དགའ་བ་དང་ཞི་བའི་སྒྲ་ཕྱུང་བ། ཚིག་གི་རིམ་པ་ཡིད་དུ་འོང་བ་བྱེ་བ་བརྒྱ་སྟོང་ཕྲག་བཅུས་བསྟོད་ཅིང་མཆོད་པ། བསྟོད་པ་རྒྱ་ཆེན་པོ་བྱེ་བ་བརྒྱ་
སྟོང་ཕྲག་བཅུས་དགའ་བར་བསྟོད་ཅིང་མཆོད་པ། ཟབ་མོར་བསྟོད་པ་བྱེ་བ་བརྒྱ་སྟོང་ཕྲག་བཅུས་ཤིན་ཏུ་བསྒོམས་ཤིང་བསྟོད་པ། བསྟོད་པ་སྣ་ཚོགས་བྱེ་བ་བརྒྱ་སྟོང་ཕྲག་བཅུས་ལས་ཐམས་ཅད་ཀྱི་རྣམ་པར་སྨིན་པ་ལས་ཡོངས་སུ་བྱུང་བར་བསྟོད་པ།
ཕྲ་བར་བསྟོད་པ་བྱེ་བ་བརྒྱ་སྟོང་ཕྲག་བཅུས་ཡང་དག་པར་ཇི་ལྟ་བ་བཞིན་དུ་བསྟོད་པ། སྔོན་གྱི་སྤྱོད་པས་བསྟོད་པ་བྱེ་བ་བརྒྱ་སྟོང་ཕྲག་བཅུ་མངོན་པར་བརྗོད་དེ་འདས་པས་བསྟོད་པ། དགེ་བའི་བསྟོད་པ་བྱེ་བ་བརྒྱ་སྟོང་ཕྲག་བཅུས་བསྟན་ཅིང་བསྟོད་པ། སྔོན་
གྱི་སངས་རྒྱས་བསྙེན་བཀུར་བའི་བསྟོད་པ་བྱེ་བ་བརྒྱ་སྟོང་ཕྲག་བཅུས་རྣམ་པར་དག་པར་བསྟོད་པ། ཆོས་ཀྱི་སྒོའི་བསྟོད་པ་བྱེ་བ་བརྒྱ་སྟོང་ཕྲག་བཅུས་མངོན་པར་འབྱུང་བར་བསྟོད་ཅིང་འཇིགས་པ་མེད་པར་བསྟོད་པ། བསྟོད་པ་རྣམ་པ་ཐ་དད་
པ་བྱེ་བ་བརྒྱ་སྟོང་ཕྲག་བཅུས་བྱང་ཆུབ་སེམས་དཔའ་ཐམས་ཅད་ཀྱིས་མི་ཟད་པར་བརྗོད་ཅིང་བསྔགས་ཏེ་བསྟོད་པ། བྱང་ཆུབ་སེམས་དཔའི་སའི་གླུ་བྱེ་བ་བརྒྱ་སྟོང་ཕྲག་བཅུས་བྱང་ཆུབ་སེམས་དཔའི་ས་ཐམས་ཅད་གླུར་བརྗོད་ཅིང་སྦྱར་བ་

སངས་རྒྱས་ཀྱི་ཡོན་ཏན་བྱེ་བ་བརྒྱ་སྟོང་ཕྲག་བཅུས་ཐོགས་པ་མེད་པར་བསྟོད་པ། སངས་རྒྱས་མཐོང་བའི་གླུ་བྱེ་བ་བརྒྱ་སྟོང་ཕྲག་བཅུའི་གླུའི་དབྱངས་སུ་བླངས་པ། ཆོས་ཟབ་མོའི་གླུ་བྱེ་བ་བརྒྱ་སྟོང་ཕྲག་བཅུས་ཐོགས་པ་མེད་
པར་ཆོས་ཀྱི་སྣང་བ་ཐམས་ཅད་གླུར་བླངས་ཏེ་སྦྱར་བ། དབྱངས་རྒྱ་ཆེན་པོའི་གླུ་བྱེ་བ་བརྒྱ་སྟོང་ཕྲག་བཅུས་ཡིད་དུ་འོང་བའི་སྒྲར་སངས་རྒྱས་ཀྱི་ཞིང་ཐམས་ཅད་དུ་བསྒྲགས་པ། སེམས་དང་བསམ་པ་བྱེ་བ་བརྒྱ་སྟོང་ཕྲག་བཅུ་ཐོགས་པ་མེད་པར་གླུར་བླངས་ཤིང་
རྣ་བ་དང་བར་བྱས་པ། ཁམས་གསུམ་དུ་གཏོགས་པའི་གླུ་བྱེ་བ་བརྒྱ་སྟོང་ཕྲག་བཅུས་ཆོས་ཐམས་ཅད་ཀྱི་རང་བཞིན་རྣམ་པར་བསྟན་པ། དགའ་བར་བྱེད་པའི་གླུ་བྱེ་བ་བརྒྱ་སྟོང་ཕྲག་བཅུ་ཐོགས་པ་མེད་པས་དད་པ་དང་། རིམ་གྲོ་རབ་ཏུ་བསྐྱེད་པ།
སངས་རྒྱས་ཀྱི་སྤྱོད་ཡུལ་གྱི་གླུ་བྱེ་བ་བརྒྱ་སྟོང་ཕྲག་བཅུས་ཆོས་ཀྱི་དོན་ཐམས་ཅད་གསལ་བར་བརྗོད་ཅིང་སྒྲ་ཕྱུང་བ། གཟུངས་ཀྱི་གླུ་བྱེ་བ་བརྒྱ་སྟོང་ཕྲག་བཅུས་ཆོས་ཐམས་ཅད་ཀྱི་ཚིག་རབ་ཏུ་དབྱེ་བ་ལ་མཁས་པ་དང་། དེ་བཞིན་གཤེགས་པ་ཐམས་ཅད་ཀྱི་གསུང་གི་
ལྡེམ་པོ་དག་རབ་ཏུ་རྟོགས་པར་རྣམ་པར་བསྟོད་པ། ཆོས་ཐམས་ཅད་ཀྱི་གླུ་བྱེ་བ་བརྒྱ་སྟོང་ཕྲག་བཅུས་ཆོས་ཐམས་ཅད་ཀྱི་གླུ་དང་། རོལ་མོ་དང་སིལ་སྙན་གྱི་སྒྲ་ཕྱུང་བ་དང་ལྡན་པ། བྱང་ཆུབ་སེམས་དཔའ་སེམས་དང་པོ་བསྐྱེད་པ་བྱེ་བ་བརྒྱ་སྟོང་ཕྲག་བཅུ་ལ་
ཐམས་ཅད་མཁྱེན་པའི་སེམས་ཀྱི་སྟོབས་དང་ཤུགས་མཐོང་མ་ཐག་ཏུ་སྐྱེ་བར་བྱེད་པ། བྱང་ཆུབ་སེམས་དཔའ་ལས་དང་པོ་པ་བྱེ་བ་བརྒྱ་སྟོང་ཕྲག་བཅུའི་སེམས་དགའ་ཞིང་མོས་པར་བྱེད་པ། བྱང་ཆུབ་སེམས་དཔའ་རྣལ་འབྱོར་ལ་སྤྱོད་པ་བྱེ་བ་བརྒྱ་
སྟོང་ཕྲག་བཅུའི་མོས་པ་རྣམ་པར་སྦྱོང་བ། བྱང་ཆུབ་སེམས་དཔའ་ཆེར་སྐྱེས་པའི་བྱེ་བ་བརྒྱ་སྟོང་ཕྲག་བཅུའི་ཐེག་པ་ཆེན་པོ་བརྩམས་པ་རྒྱ་ཆེར་བྱེད་པ། བྱང་ཆུབ་སེམས་དཔའ་སྦྱོར་བ་དང་ལྡན་པ་བྱེ་བ་བརྒྱ་སྟོང་ཕྲག་བཅུའི་ཐེག་པ་ཆེན་པོ་བརྩམས་

པ་ཡོངས་སུ་རྒྱས་པར་བྱེད་པ། བྱང་ཆུབ་སེམས་དཔའ་བསམ་པ་དང་ལྡན་པ་བྱེ་བ་བརྒྱ་སྟོང་ཕྲག་བཅུའི་བྱང་ཆུབ་སེམས་དཔའི་སྤྱོད་པ་ཐམས་ཅད་ཤིན་ཏུ་སྦྱོང་བ། བྱང་ཆུབ་སེམས་དཔའ་ཕྱིར་མྱི་ལྡོག་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་བྱང་ཆུབ་
སེམས་དཔའི་ས་ཐམས་ཅད་རྣམ་པར་སྦྱོང་བ། བྱང་ཆུབ་སེམས་དཔའ་གཞོན་ནུར་གྱུར་པ་བྱེ་བ་བརྒྱ་སྟོང་ཕྲག་བཅུའི་བྱང་ཆུབ་སེམས་དཔའི་ཏིང་ངེ་འཛིན་ཐམས་ཅད་སྣང་བར་བྱེད་པ། བྱང་ཆུབ་སེམས་དཔའ་རྒྱལ་ཚབ་བྱེ་བ་ཁྲག་ཁྲིག་བརྒྱ་སྟོང་ཕྲག་
བཅུ་སངས་རྒྱས་ཀྱི་ཡུལ་བསམ་གྱིས་མྱི་ཁྱབ་པ་ལ་འཇུག་པར་བྱེད་པ། བྱང་ཆུབ་སེམས་དཔའ་དབང་བསྐུར་བ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུ་དེ་བཞིན་གཤེགས་པའི་སྟོབས་གཞལ་དུ་མེད་པ་སྟོན་པ་བྱང་ཆུབ་སེམས་དཔའི་རྫུ་འཕྲུལ་བྱེ་བ་ཁྲག་ཁྲིག་
བརྒྱ་སྟོང་ཕྲག་བཅུ་འཐོབ་པར་རྣམ་པར་འཕྲུལ་པ། བྱང་ཆུབ་སེམས་དཔའི་མོས་པ་བྱེ་བ་བརྒྱ་སྟོང་ཕྲག་བཅུ་སྒྲུབ་ཅིང་སྦྱོང་བ། བྱང་ཆུབ་སེམས་དཔའི་དགའ་བ་བྱེ་བ་བརྒྱ་སྟོང་ཕྲག་བཅུ་ཤིན་ཏུ་བསྐྱེད་པ། བྱང་ཆུབ་སེམས་དཔའི་དད་པ་བྱེ་བ་བརྒྱ་སྟོང་
ཕྲག་བཅུ་མི་ཤིགས་པར་རབ་ཏུ་གཞོག་པ། བྱང་ཆུབ་སེམས་དཔའི་ཤུགས་བྱེ་བ་བརྒྱ་སྟོང་ཕྲག་བཅུ་རྣམ་པར་འཕེལ་བར་བྱེད་པ། བྱང་ཆུབ་སེམས་དཔའི་རབ་ཏུ་དགའ་བ་བྱེ་བ་བརྒྱ་སྟོང་ཕྲག་བཅུའི་ཆོས་ཀྱི་གྲགས་པ་རྣམ་པར་འཕེལ་བར་
བྱེད་པ། བྱང་ཆུབ་སེམས་དཔའི་ཆོས་ཀྱི་དོན་བྱེ་བ་བརྒྱ་སྟོང་ཕྲག་བཅུའི་ཡེ་ཤེས་གདོན་མི་ཟ་བར་ངེས་པར་སྟོན་པ། བྱང་ཆུབ་སེམས་དཔའི་དྲན་པ་བྱེ་བ་བརྒྱ་སྟོང་ཕྲག་བཅུ་འཁྲུག་པ་མེད་པར་སྦྱོང་བ། བྱང་ཆུབ་སེམས་དཔའི་བློ་གྲོས་བྱེ་བ་བརྒྱ་སྟོང་
ཕྲག་བཅུའི་ཡེ་ཤེས་གདོན་མི་ཟ་བ་བསྐྱེད་པ། བྱང་ཆུབ་སེམས་དཔའི་རིགས་བྱེ་བ་བརྒྱ་སྟོང་ཕྲག་བཅུ་ལ་སངས་རྒྱས་ཀྱི་ཆོས་ཐམས་ཅད་འཛིན་པར་བྱིན་གྱིས་རློབས་པ། བྱང་ཆུབ་སེམས་དཔའི་བློ་བྱེ་བ་བརྒྱ་སྟོང་ཕྲག་བཅུ་ཡངས་པའི་བློ་ཚད་

མྱེད་པར་སྟོན་པ། བྱང་ཆུབ་སེམས་དཔའི་དད་པ་བྱེ་བ་བརྒྱ་སྟོང་ཕྲག་བཅུ་རྩ་བ་བརྟན་པར་བྱེད་པ། བྱང་ཆུབ་སེམས་དཔའི་གཏོང་བ་བྱེ་བ་བརྒྱ་སྟོང་ཕྲག་བཅུ་གཏོང་བ་ཐམས་ཅད་སྦྱིན་པས་རྣམ་པར་སྦྱོང་བ། བྱང་
ཆུབ་སེམས་དཔའི་ཚུལ་ཁྲིམས་བྱེ་བ་བརྒྱ་སྟོང་ཕྲག་བཅུ་ཚད་མྱེད་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པར་སྒྲུབ་པ། བྱང་ཆུབ་སེམས་དཔའི་བཟོད་པ་བྱེ་བ་བརྒྱ་སྟོང་ཕྲག་བཅུ་སེམས་འཁྲུག་པ་མེད་པས་སངས་རྒྱས་ཀྱི་ཆོས་ཐམས་ཅད་ལ་བཟོད་པར་འཇུག་པ།
བྱང་ཆུབ་སེམས་དཔའི་བརྩོན་འགྲུས་བྱེ་བ་བརྒྱ་སྟོང་ཕྲག་བཅུ་མཐའ་ཡས་པའི་བརྩོན་འགྲུས་སུ་འབྱུང་བར་བྱེད་པ། བྱང་ཆུབ་སེམས་དཔའི་བསམ་གཏན་བྱེ་བ་བརྒྱ་སྟོང་ཕྲག་བཅུ་ཚད་མེད་པའི་བསམ་གཏན་རྟོགས་པའི་སྣང་བར་བྱེད་པ། བྱང་ཆུབ་
སེམས་དཔའི་ཤེས་རབ་ཀྱི་ཕ་རོལ་ཏུ་ཕྱིན་པ་མངོན་པར་བསྒྲུབ་པ་བྱེ་བ་བརྒྱ་སྟོང་ཕྲག་བཅུ་ཤིན་ཏུ་སྣང་ཞིང་ཤེས་པར་བྱེད་པ། བྱང་ཆུབ་སེམས་དཔའི་སྨོན་ལམ་བྱེ་བ་བརྒྱ་སྟོང་ཕྲག་བཅུའི་འབྱུང་བ་རྣམ་པར་སྦྱོང་བ། བྱང་ཆུབ་སེམས་དཔའི་
ཆོས་ཀྱི་སྒོ་བྱེ་བ་བརྒྱ་སྟོང་ཕྲག་བཅུའི་ཡེ་ཤེས་སྣང་བ་གསལ་བར་བྱེད་པ། ཕྱོགས་བཅུའི་སངས་རྒྱས་འབྱམ་ཀླས་པ་བྱེ་བ་བརྒྱ་སྟོང་ཕྲག་བཅུའི་ཆོས་ཀྱི་སྒོ་སྣང་བར་བྱིན་གྱིས་རློབ་པ། ཕྱོགས་བཅུའི་འབྱམ་ཀླས་པ་བྱེ་བ་བརྒྱ་སྟོང་ཕྲག་བཅུའི་ཆོས་
ཀྱི་ཚུལ་རྨོངས་པ་མྱེད་ཅིང་གཏི་མུག་མྱེད་པར་སྟོན་པ། ཆོས་ཀྱི་འབྱུང་གནས་བྱེ་བ་བརྒྱ་སྟོང་ཕྲག་བཅུ་རབ་ཏུ་འཐོབ་པར་བྱེད་པ། སངས་རྒྱས་ཀྱི་ཞིང་བྱེ་བ་བརྒྱ་སྟོང་ཕྲག་བཅུ་འབྱམ་ཀླས་པ་ལ་འཇུག་པར་བྱེད་པ། ཆོས་ཀྱི་ལུས་བྱེ་བ་བརྒྱ་སྟོང་ཕྲག་
བཅུ་སངས་རྒྱས་ཀྱི་ཞིང་ཐམས་ཅད་དུ་འགྲོ་བར་བྱེད་པ། དེ་བཞིན་གཤེགས་པའི་གསུང་བྱེ་བ་བརྒྱ་སྟོང་ཕྲག་བཅུ་མངོན་པར་བསྒྲུབས་པ་རབ་ཏུ་ཤེས་པར་བྱེད་པ། ཐམས་ཅད་མཁྱེན་པ་ཉིད་ཀྱི་ཚུལ་བྱེ་བ་བརྒྱ་སྟོང་ཕྲག་བཅུ་མངོན་པར་བསྒྲུབ་པའི་

འབྱུང་གནས་སུ་གྱུར་པ། ཆོས་འབྱམ་ཀླས་པ་བྱེ་བ་བརྒྱ་སྟོང་ཕྲག་བཅུའི་ཚོགས་རབ་ཏུ་བསྒྲུབ་པ། ཆོས་ཀྱི་ཡེ་ཤེས་བྱེ་བ་བརྒྱ་སྟོང་ཕྲག་བཅུའི་སངས་རྒྱས་ཀྱི་ཆོས་ཐམས་ཅད་མཐོང་བ་ལ་རྒྱལ་ཚབ་དུ་གྱུར་པ། དེ་བཞིན་གཤེགས་པའི་ཡུལ་བྱེ་
བ་བརྒྱ་སྟོང་ཕྲག་བཅུའི་ཡང་དག་པར་སྟོན་པའི་སྤྱོད་ཡུལ་ཅན། ལྷའི་དབང་པོ་བྱེ་བ་བརྒྱ་སྟོང་ཕྲག་བཅུ་མངོན་པར་དགའ་བའི་ལུས་ཅན། ཀླུའི་དབང་པོ་བྱེ་བ་བརྒྱ་སྟོང་ཕྲག་བཅུ་མི་སྐྱོ་བར་ལྟ་བ། གནོད་སྦྱིན་གྱི་དབང་པོ་བྱེ་བ་བརྒྱ་སྟོང་ཕྲག་
བཅུ་ཐལ་མོ་སྦྱར་ཞིང་སྤྱི་བོ་ལ་གཞོག་པ། དྲི་ཟའི་དབང་པོ་བྱེ་བ་བརྒྱ་སྟོང་ཕྲག་བཅུ་མི་ངོམས་པར་མོས་པས་ལྡང་བ། ལྷ་མ་ཡིན་གྱི་དབང་པོ་བྱེ་བ་བརྒྱ་སྟོང་ཕྲག་བཅུ་ང་རྒྱལ་གྱི་ཡིད་ཡོངས་སུ་ཆད་པ། ནམ་མཁའ་ལྡིང་གི་དབང་པོ་བྱེ་བ་
བརྒྱ་སྟོང་ཕྲག་བཅུའི་ཁ་ནས་དར་ཤིན་ཏུ་སྤྱངས་པ། མི་འམ་ཅིའི་དབང་པོ་བྱེ་བ་བརྒྱ་སྟོང་ཕྲག་བཅུ་སེམས་རབ་ཏུ་དགའ་བ། ལྟོ་འཕྱེ་ཆེན་པོའི་དབང་པོ་བྱེ་བ་བརྒྱ་སྟོང་ཕྲག་བཅུ་དགའ་བའི་ཡིད་དུ་བལྟ་བ། ཚངས་པའི་དབང་པོ་བྱེ་བ་བརྒྱ་སྟོང་ཕྲག་
བཅུ་ཞེ་སས་ཕུ་དུད་དུ་གནས་པ། འཇིག་རྟེན་གྱི་དབང་པོ་བྱེ་བ་བརྒྱ་སྟོང་ཕྲག་བཅུའི་སྤྱི་བོ་དང་། ལུས་ཀྱིས་བཏུད་པ། ལྷའི་དབང་པོ་བརྒྱ་བྱིན་ལས་སྩོགས་པ་བྱེ་བ་བརྒྱ་སྟོང་ཕྲག་བཅུས་ཤིན་ཏུ་བལྟ་བ། རབ་མཚེ་མའི་ལྷའི་རྒྱལ་
པོ་ལས་སྩོགས་པ་བྱེ་བ་བརྒྱ་སྟོང་ཕྲག་བཅུས་དགའ་བ་ཆེན་པོའི་སྒྲ་ཕྱུང་བ། རབ་དགའ་ལྡན་གྱི་ལྷའི་རྒྱལ་པོ་ལས་སྩོགས་པ་བྱེ་བ་བརྒྱ་སྟོང་ཕྲག་བཅུས་རབ་ཏུ་བཏུད་པ། རབ་འཕྲུལ་དགའི་ལྷའི་རྒྱལ་པོ་ལས་སྩོགས་པ་བྱེ་བ་བརྒྱ་སྟོང་
ཕྲག་བཅུས་ཕྱག་བྱ་བ། དབང་བྱེད་ཀྱི་ལྷའི་རྒྱལ་པོ་ལས་སྩོགས་པ་བྱེ་བ་བརྒྱ་སྟོང་ཕྲག་བཅུས་ཐལ་མོ་སྦྱར་བ། ཚངས་པ་བྱེ་བ་བརྒྱ་སྟོང་ཕྲག་བཅུས་བལྟ་བ། དབང་ཕྱུག་ཆེན་པོ་བྱེ་བ་བརྒྱ་སྟོང་ཕྲག་བཅུས་མངོན་པར་བརྗོད་པ། །

བྱང་ཆུབ་སེམས་དཔའ་བྱེ་བ་བརྒྱ་སྟོང་ཕྲག་བཅུས་མངོན་པར་བསྟོད་པ། ལྷའི་བུ་མོ་བྱེ་བ་བརྒྱ་སྟོང་ཕྲག་བཅུས་ཤིན་ཏུ་མཆོད་པ། སྨོན་ལམ་གྱི་ལྷའི་བུ་བྱེ་བ་བརྒྱ་སྟོང་ཕྲག་བཅུ་མངོན་པར་དགའ་བ། སྔོན་
འགྲོགས་པའི་ལྷ་བྱེ་བ་བརྒྱ་སྟོང་ཕྲག་བཅུས་སྒྲ་ཕྱུང་བ། ཚངས་རིས་ཀྱི་ལྷའི་བུ་བྱེ་བ་བརྒྱ་སྟོང་ཕྲག་བཅུས་ལུས་ཐམས་ཅད་ཀྱིས་ཕྱག་བྱ་བ། ཚངས་ལྷ་ཉེ་ཕན་གྱི་ལྷ་བྱེ་བ་བརྒྱ་སྟོང་ཕྲག་བཅུས་སྤྱི་བོས་བཏུད་པ། ཚངས་པ་ཀུན་རིས་ཀྱི་ལྷ་
བྱེ་བ་བརྒྱ་སྟོང་ཕྲག་བཅུས་བསྐོར་བ་བྱས་པ། ཚངས་པ་ཆེན་པོ་བྱེ་བ་བརྒྱ་སྟོང་ཕྲག་བཅུས་ཡོན་ཏན་མཐའ་ཡས་པའི་མཐར་ཕྱིན་པ་བརྒྱ་ཕྲག་སྟོང་གིས་ཤིན་ཏུ་བསྟོད་པའི་སྒྲ་ཕྱུང་བ། ཀུན་སྣང་དང་བའི་ལྷ་བྱེ་བ་བརྒྱ་སྟོང་ཕྲག་
བཅུས་འཁོར་ལྔས་ཕྱག་བྱ་བ། འོད་ཆུང་གི་ལྷ་བྱེ་བ་བརྒྱ་སྟོང་ཕྲག་བཅུས་སངས་རྒྱས་སྐྱེ་བ་ཤིན་ཏུ་དཀོན་པའི་སྒྲ་བསྒྲགས་པ། ཚད་མེད་འོད་ཀྱི་ལྷ་བྱེ་བ་བརྒྱ་སྟོང་ཕྲག་བཅུས་སངས་རྒྱས་ལེགས་པར་གཤེགས་སོ་ཞེས་ཕྱག་བྱ་བ།
ཀུན་སྣང་དང་བའི་ལྷ་བྱེ་བ་བརྒྱ་སྟོང་ཕྲག་བཅུས་ཤིན་ཏུ་བསྟོད་ཅིང་མཐོང་བར་དཀའ་བའི་སྒྲ་ཕྱུང་བ། དགེ་བའི་ལྷ་བྱེ་བ་བརྒྱ་སྟོང་ཕྲག་བཅུ་གཞལ་མྱེད་ཁང་དང་བ་ཅན་དུ་འཕགས་པ། འོད་ཆུང་གི་ལྷ་བྱེ་བ་བརྒྱ་སྟོང་ཕྲག་བཅུས་སེམས་དང་བའི་ལུས་
ཀྱིས་མངོན་པར་བཏུད་པ། ཚད་མྱེད་དགེ་བའི་ལྷ་བྱེ་བ་བརྒྱ་སྟོང་ཕྲག་བཅུས་སངས་རྒྱས་མཐོང་བར་མོས་ཤིང་རང་གི་ལུས་ཀྱིས་བཏུད་པ། དགེ་རྒྱས་ཀྱི་ལྷ་བྱེ་བ་བརྒྱ་སྟོང་ཕྲག་བཅུས་མཆོད་པ་དང་རིམ་གྲོར་བྱ་བ། ཆེ་བའི་ལྷ་བྱེ་བ་བརྒྱ་
སྟོང་ཕྲག་བཅུས་དགེ་བའི་རྩ་བ་རྗེས་སུ་དྲན་པར་བྱ་བ། ཆུང་ཆེའི་ལྷ་བྱེ་བ་བརྒྱ་སྟོང་ཕྲག་བཅུས་དེ་བཞིན་གཤེགས་པ་ཆེ་བའི་འདུ་ཤེས་རབ་ཏུ་སྐྱེས་ཤིང་ལྟ་བ། ཚད་མེད་ཆེ་བའི་ལྷ་བྱེ་བ་བརྒྱ་སྟོང་ཕྲག་བཅུས་དགེ་བའི་ཆོས་རྟོགས་ཤིང་

རིམ་གྲོ་ཆེར་བྱ་བ། འབྲས་བུ་ཆེ་བའི་ལྷ་བྱེ་བ་བརྒྱ་སྟོང་ཕྲག་བཅུས་ལུས་ཤིན་ཏུ་བཏུད་པ། མི་ཆེ་བའི་ལྷ་བྱེ་བ་བརྒྱ་སྟོང་ཕྲག་བཅུས་དད་པའི་རྩ་བ་བརྟན་པར་བྱས་ཏེ། མངོན་པར་བརྗོད་ཅིང་ལུས་བཏུད་པ། མི་གདུང་བའི་ལྷ་བྱེ་བ་བརྒྱ་སྟོང་
ཕྲག་བཅུས་སངས་རྒྱས་ཀྱི་སྤྱན་སྔ་ནས་ཐལ་མོ་སྦྱར་ཞིང་ངོམས་མི་ཤེས་པར་བལྟ་བ། གྱ་ནོམ་སྣང་བའི་ལྷ་བྱེ་བ་བརྒྱ་སྟོང་ཕྲག་བཅུས་མངོན་པར་བལྟས་ཏེ་ལུས་བཏུད་པ། ཤིན་ཏུ་མཐོང་བའི་ལྷ་བྱེ་བ་བརྒྱ་སྟོང་ཕྲག་བཅུས་སངས་རྒྱས་
ཀྱིས་བསྟན་པ་ངོམས་མི་ཤེས་པར་ལུས་དབུལ་བ། འོག་མིན་གྱི་ལྷ་བྱེ་བ་བརྒྱ་སྟོང་ཕྲག་བཅུས་སྤྱི་བོས་བཏུད་ཅིང་མཆོད་པ། ལྷ་སྣ་ཚོགས་བྱེ་བ་བརྒྱ་སྟོང་ཕྲག་བཅུས་དགའ་བ་ཆེན་པོས་སྣང་བའི་སྒྲ་ཕྱུང་བ། ལྷ་བྱེ་བ་བརྒྱ་སྟོང་ཕྲག་
བཅུས་ཤིན་ཏུ་བསམས་ཤིང་བསྒྲུབས་ཏེ་བརྒྱན་པ། ལྷའི་བྱང་ཆུབ་སེམས་དཔའ་བྱེ་བ་བརྒྱ་སྟོང་ཕྲག་བཅུས་སངས་རྒྱས་ཀྱི་གདན་བསྒྲུབ་པ་ལ་བྱིན་གྱིས་བརླབ་རྒྱུན་མི་གཅད་པ། ལྷའི་བྱང་ཆུབ་སེམས་དཔའ་ཆེན་པོ་བྱེ་བ་བརྒྱ་སྟོང་
ཕྲག་བཅུ་མེ་ཏོག་ཐོགས་པ་དང་། སྤོས་ཐོགས་པ་དང་། ཕྲེང་བ་ཐོགས་པ་དང་། ཕྱེ་མ་ཐོགས་པ་དང་། བྱུག་པ་ཐོགས་པ་དང་། ན་བཟའ་ཐོགས་པ་དང་། གདུགས་ཐོགས་པ་དང་། རྒྱལ་མཚན་ཐོགས་པ་དང་། བ་དན་
ཐོགས་པ་དང་། རིན་པོ་ཆེ་ཐོགས་པ་དང་། ཕྱང་འཕྲུལ་ཐོགས་པ་དང་། ལྷབ་ལྷུབ་ཐོགས་པས་མངོན་པར་གཏོར་ཞིང་ཆར་དུ་ཕབ་སྟེ་རབ་ཏུ་དགྱེ་བ། ལྷ་བྱེ་བ་བརྒྱ་སྟོང་ཕྲག་བཅུས་ལྷའི་ཁྱིམ་མངོན་པར་འཕགས་པ་གཅིག་ནས་
གཅིག་ཏུ་བརྒྱུད་པའི་ཕ་རོལ་ཏུ་ཕྱིན་པར་བྱ་བ། ལྷའི་གཞལ་མེད་ཁང་བྱེ་བ་བརྒྱ་སྟོང་ཕྲག་བཅུའི་ལྷའི་བུས་དད་པར་བསུ་བ། ལྷའི་བུ་བཙུན་པ་བྱེ་བ་བརྒྱ་སྟོང་ཕྲག་བཅུས་ལྷུན་ཤིན་ཏུ་བཟུང་བ། དབང་བསྐུར་བའི་ལྷའི་བུ་བྱེ་བ་བརྒྱ་སྟོང་

ཕྲག་བཅུས་ལྷུན་ཀུན་ནས་བཟུང་བ། བྱང་ཆུབ་སེམས་དཔའི་སེམས་བྱེ་བ་བརྒྱ་སྟོང་ཕྲག་བཅུ་ལེགས་པར་སེམས་ཤིང་སྤྱོད་པ། བྱང་ཆུབ་སེམས་དཔའི་བཙུན་པའི་སེམས་བསྐྱེད་པ་བྱེ་བ་བརྒྱ་སྟོང་ཕྲག་བཅུའི་ཡིད་
དགའ་བར་བྱེད་པ། བྱང་ཆུབ་སེམས་དཔའི་དབང་པོ་བྱེ་བ་བརྒྱ་སྟོང་ཕྲག་བཅུ་རབ་ཏུ་སིམ་པར་བྱེད་པ། བྱང་ཆུབ་སེམས་དཔའི་ལྷག་པའི་བསམ་པ་བྱེ་བ་བརྒྱ་སྟོང་ཕྲག་བཅུ་ཡོངས་སུ་དག་པར་བྱེད་པ། བྱང་ཆུབ་སེམས་དཔའི་མོས་པ་བྱེ་
བ་བརྒྱ་སྟོང་ཕྲག་བཅུ་རྣམ་པར་དག་པར་བྱེད་པ། བྱང་ཆུབ་སེམས་དཔའི་ལས་བྱེ་བ་བརྒྱ་སྟོང་ཕྲག་བཅུ་ཡང་དག་པར་སྦྱོང་བ། བྱང་ཆུབ་སེམས་དཔའི་སྐྱེས་པའི་རབས་བྱེ་བ་བརྒྱ་སྟོང་ཕྲག་བཅུ་རབ་ཏུ་སྟོན་པར་བྱེད་པ། བྱང་ཆུབ་སེམས་
དཔའི་ཆོས་ཀྱི་སྒོ་བྱེ་བ་བརྒྱ་སྟོང་ཕྲག་བཅུ་རབ་ཏུ་སྣང་བར་བྱེད་པ། བྱང་ཆུབ་སེམས་དཔའི་ས་བྱེ་བ་བརྒྱ་སྟོང་ཕྲག་བཅུ་རབ་ཏུ་སྒྲུབ་པ། བྱང་ཆུབ་སེམས་དཔའི་རིས་བྱེ་བ་བརྒྱ་སྟོང་ཕྲག་བཅུ་ཡོངས་སུ་སྨིན་པར་འདུལ་བ། དགེ་བའི་རྩ་བ་བྱེ་
བ་བརྒྱ་སྟོང་ཕྲག་བཅུས་ཡང་དག་པར་བྱུང་བ། སངས་རྒྱས་བྱེ་བ་བརྒྱ་སྟོང་ཕྲག་བཅུས་བྱིན་གྱིས་བརླབས་པ། བསོད་ནམས་བྱེ་བ་བརྒྱ་སྟོང་ཕྲག་བཅུས་ཡོངས་སུ་གྲུབ་པ། ལྷག་པའི་བསམ་པ་བྱེ་བ་བརྒྱ་སྟོང་ཕྲག་བཅུས་ཡོངས་སུ་སྦྱངས་
པ། སྨོན་ལམ་བྱེ་བ་བརྒྱ་སྟོང་ཕྲག་བཅུས་ཤིན་ཏུ་དག་པར་བྱས་པ། སྤྱོད་པ་བྱེ་བ་བརྒྱ་སྟོང་ཕྲག་བཅུས་ཡང་དག་པར་སྐྱེས་པ། ཆོས་བྱེ་བ་བརྒྱ་སྟོང་ཕྲག་བཅུས་ཉེ་བར་བསྟན་པ། རྣམ་པར་འཕྲུལ་པ་བྱེ་བ་བརྒྱ་སྟོང་ཕྲག་བཅུས་རྗེས་སུ་
སོང་བ། ཡོན་ཏན་བྱེ་བ་བརྒྱ་སྟོང་ཕྲག་བཅུས་ཤིན་ཏུ་འཕགས་པ་བཤམས་སོ།། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། །བམ་པོ་ཉི་ཤུ་དགུ་པ། ཇི་ལྟར་གླིང་བཞི་པ་ཆེན་པོ་

འདིའི་དགའ་ལྡན་གྱི་གནས་སུ་ལྷའི་དབང་པོ་རབ་དགའ་ལྡན་གྱི་ཁང་པ་ནོར་བུ་རིན་པོ་ཆེ་ཐམས་ཅད་ཀྱི་རྒྱན་ཅན་དུ་དེ་བཞིན་གཤེགས་པའི་གདན་བཏིང་བར་གྱུར་པ་དེ་བཞིན་དུ། འཇིག་རྟེན་གྱི་ཁམས་ཐམས་ཅད་ཀྱི་གླིང་བཞི་པ་ཆེན་པོ་དག་ན་ཡང་དགའ་
ལྡན་གྱི་གནས་དག་ཏུ་ལྷའི་རྒྱལ་པོ་རབ་དགའ་ལྡན་གྱི་ཁང་པ་རིན་པོ་ཆེ་ཐམས་ཅད་ཀྱི་རྒྱན་ཅན་དག་ཏུ་རྒྱན་འདི་ལྟ་བུ་དང་། ཚུལ་འདི་ལྟ་བུ་དང་། དད་པ་འདི་ལྟ་བུ་དང་། མོས་པ་འདི་ལྟ་བུ་དང་། དགའ་བ་འདི་ལྟ་བུ་དང་། རབ་ཏུ་དགའ་བ་འདི་ལྟ་
བུ་དང་། ཞེ་ས་འདི་ལྟ་བུ་དང་། རིམ་གྲོ་འདི་ལྟ་བུ་དང་། སྤྲོ་བ་འདི་ལྟ་བུ་དང་། ཉེ་བར་སེམས་པ་འདི་ལྟ་བུས་དེ་བཞིན་གཤེགས་པའི་གདན་བཏིང་བར་གྱུར་ཏོ། །དེ་ནས་ལྷའི་རྒྱལ་པོ་རབ་དགའ་ལྡན་གྱིས་སྟན་བཏིང་ནས། ཞེ་ས་
ཅན་གྱི་རིམ་གྲོ་དང་བཅས་པར་དགའ་ལྡན་གྱི་རིས་སུ་གཏོགས་པའི་ལྷའི་བུ་བྱེ་བ་བརྒྱ་སྟོང་ཕྲག་བཅུ་དང་ལྷན་ཅིག་དུ་དོང་སྟེ། བཅོམ་ལྡན་འདས་བསུ་ནས་མེ་ཏོག་ཡོན་ཏན་གྲངས་མྱེད་པའི་སྤྲིན་གྱི་ཆར་ནི་རབ་ཏུ་ཕབ། སྤོས་ཡོན་ཏན་བསམ་གྱིས་
མྱི་ཁྱབ་པའི་ཆར་ནི་རབ་ཏུ་ཕབ། ཕྲེང་བ་ཡོན་ཏན་སྣ་ཚོགས་དང་ལྡན་པའི་སྤྲིན་ནི་རབ་ཏུ་བཀྱེ། གདུགས་རྣམ་པ་སྣ་ཚོགས་ཀྱི་སྤྲིན་གྱི་ཆར་ནི་རབ་ཏུ་ཕབ། ལྷ་རྫས་ཀྱི་གོས་རབ་ཏུ་ཕྲ་བའི་སྤྲིན་རབ་ཏུ་བཀྱེ། རིན་པོ་ཆེ་ཡིད་དུ་འོང་
བ་མཐའ་ཡས་པ་ཐམས་ཅད་ཀྱི་སྤྲིན་གྱི་ཆར་ནི་རབ་ཏུ་ཕབ། སེམས་ཤིན་ཏུ་དང་བས་ལྷ་རྫས་ཀྱི་ལྷབ་ལྷུབ་དང་། ཕྱང་འཕྲུལ་གྱི་སྤྲིན་གྱི་ཆར་ནི་ཀུན་ཏུ་ཕབ། བདུག་སྤོས་རྣམ་པ་དུ་མའི་སྤྲིན་གྱིས་ནི་ཀུན་ཏུ་བདུག །ལྷ་རྫས་ཀྱི་ཙན་དན་གྱི་
ཕྱེ་མ་དང་། ཨ་ཀ་རུའི་ཕྱེ་མ་དང་། སྤོས་དམ་པ་ཐམས་ཅད་ཀྱི་ཕྱེ་མའི་སྤྲིན་གྱི་ཆར་ནི་རབ་ཏུ་ཕབ། ལྷའི་བུ་མཐའ་ཡས་པས་ཀྱང་རང་རང་གི་ལུས་ཀྱི་སྤྲིན་ནི་ཤིན་ཏུ་བཀྱེ། དགའ་ལྡན་གྱི་རིས་སུ་གཏོགས་པའི་ལྷའི་བུ་བྱེ་བ་བརྒྱ་སྟོང་

ཕྲག་བཅུ་དང་། དེ་མ་ཡིན་པའི་ལྷའི་རིས་ནས་འདུས་པའི་ལྷའི་བུ་རྣམས་ཀྱིས་ཀྱང་སེམས་ཤིན་ཏུ་དང་བས་ཞེ་ས་རབ་ཏུ་བསྐྱེད་ནས། ཤིན་ཏུ་བཏུད་དེ་ཕྱག་འཚལ་ཏོ། །ལྷའི་བུ་མོ་གྲངས་མེད་པ་དག་
ཀྱང་དགའ་ཞིང་མོས་པའི་སེམས་ཀྱིས་བཅོམ་ལྡན་འདས་ལ་རབ་ཏུ་སེམས་སོ། །བྱང་ཆུབ་སེམས་དཔའ་དགའ་ལྡན་གྱི་གནས་ན་སྤྱོད་པ་གྲངས་མྱེད་པ་རྣམས་ཀྱང་བར་སྣང་ལ་གནས་ཏེ། སངས་རྒྱས་ལ་མཆོད་པར་བརྩོན་པའི་སེམས་
ཀྱིས་ལྷ་རྫས་ལས་འདས་པའི་མཆོད་པས་བཅོམ་ལྡན་འདས་ལ་མཆོད་པ་བྱེད་དོ། །རིམ་གྲོ་བྱེད་དོ་ཕྱག་འཚལ་ལོ། །དེའི་ཚེ་སངས་རྒྱས་ཀྱི་བྱིན་གྱི་རླབས་དང་། སངས་རྒྱས་ཀྱི་སྔོན་གྱི་དགེ་བའི་རྩ་བ་རྒྱུ་མཐུན་པ་དང་། དེ་བཞིན་གཤེགས་
པའི་ཆོ་འཕྲུལ་བསམ་གྱིས་མི་ཁྱབ་པས་རོལ་མོ་བཀྲོལ་བ་དང་། བརྡུང་བའི་ཚོགས་གྲངས་མེད་པ་ཡང་སྒྲ་འབྱིན་པར་གྱུར་ཏོ། །ལྷའི་བུ་དགའ་ལྡན་གྱི་གནས་ན་འཁོད་པ་རྣམས་དང་། ལྷའི་བུ་མོ་རྣམས་ཀྱང་བཅོམ་ལྡན་འདས་ལ་ནི་ལྟ།
དེ་བཞིན་གཤེགས་པ་འབྱུང་བ། ཤིན་ཏུ་དཀོན་པར་ནི་རྗེས་སུ་སེམས་ཤིང་། ཡང་དག་པར་རྫོགས་པའི་སངས་རྒྱས་ནི་རྣམ་པའི་མཆོག་ཐམས་ཅད་དང་ལྡན་པ་བསྒྲིབས་པ་མེད་པའི་ཆོས་ཅན་ནོ། །ཞེས་ཡང་དག་པར་ལྟ་ཞིང་དེ་ལོགས་སུ་
མངོན་པར་ལྟ་བར་གྱུར་ཏོ། །དགའ་ལྡན་གྱི་གནས་ན་འཁོད་པའི་འཁོར་ཐམས་ཅད་དང་། ལྷ་བྱེ་བ་བརྒྱ་སྟོང་གྲངས་མེད་པ་བཅོམ་ལྡན་འདས་བསུ་བའི་ཕྱིར་རིན་པོ་ཆེ་ཐམས་ཅད་ཀྱི་མྱེ་ཏོག་གི་ཕུར་མ་ཐོགས་ཐོགས་པ་དང་། སྤོས་ཐམས་ཅད་ཀྱི་
ཕུར་མ་ཐོགས་ཐོགས་པ་དང་། རིན་པོ་ཆེ་ཐམས་ཅད་ཀྱི་ཕུར་མ་ཐོགས་ཐོགས་པ་དང་། རྒྱན་ཐམས་ཅད་ཀྱི་ཕུར་མ་ཐོགས་ཐོགས་པ་དང་། ལྷ་རྫས་ཀྱི་ཙན་དན་ཐམས་ཅད་ཀྱི་ཕྱེ་མའི་ཕུར་མ་ཐོགས་ཐོགས་པ་དང་། ལྷ་རྫས་ཀྱི་ཨ་ཀ་རུ་

ཐམས་ཅད་ཀྱི་ཕྱེ་མའི་ཕུར་མ་ཐོགས་ཐོགས་པ་དང་། ལྷ་རྫས་ཀྱི་རིན་པོ་ཆེ་ཐམས་ཅད་ཀྱི་ཕྱེ་མའི་ཕུར་མ་ཐོགས་ཐོགས་པ་དང་། ལྷ་རྫས་ཀྱི་སྤོས་ཀྱི་མེ་ཏོག་ཐམས་ཅད་ཀྱི་ཕྱེ་མའི་ཕུར་མ་ཐོགས་ཐོགས་པ་དང་། ལྷ་རྫས་ཀྱི་མེ་ཏོག་མན་དཱ་
ར་བའི་ཕུར་མ་ཐོགས་ཐོགས་པ་རྣམས་ཀྱང་དོང་སྟེ། བཅོམ་ལྡན་འདས་ལ་གཏོར་ཏོ། །མངོན་པར་གཏོར་ཏོ། །རབ་ཏུ་གཏོར་ཏོ། །ལྷའི་བུ་དགའ་ལྡན་གྱི་གནས་སུ་གཏོགས་པ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་རྣམས་ཀྱང་བར་སྣང་
ལ་འཁོད་དེ། ཡེ་ཤེས་ཀྱི་སྤྱོད་ཡུལ་ལ་གཞོལ་བའི་སེམས་ཀྱིས་སྤོས་དང་བདུག་པའི་སྤྲིན་གྱིས་བདུག་པས་བར་སྣང་བརྒྱན་པར་བྱས་སོ། །སངས་རྒྱས་ལ་དགའ་ཞིང་གཞོལ་བའི་སེམས་ཀྱིས་ལྷ་རྫས་ཀྱི་མེ་ཏོག་ཐམས་ཅད་ཀྱི་སྤྲིན་གྱི་ཆར་
གྱིས་རབ་ཏུ་བརྒྱན་པས་བར་སྣང་བརྒྱན་པར་བྱས་སོ། །དེ་བཞིན་གཤེགས་པ་ལ་ཞེ་ས་ཆེར་བྱ་བའི་སེམས་ཀྱིས་ལྷ་རྫས་ཀྱི་གདུགས་སྣ་ཚོགས་ཀྱི་སྤྲིན་གྱིས་བར་སྣང་ཡོག་པར་བྱས་ཏེ་བརྒྱན་པར་བྱས་སོ། །སངས་རྒྱས་ལ་མཆོད་པར་གཞོལ་བའི་སེམས་
ཀྱིས་ལྷ་རྫས་ཀྱི་ཕྲེང་བ་སྣ་ཚོགས་ཀྱི་སྤྲིན་རབ་ཏུ་དགྱེ་བས་བར་སྣང་བརྒྱན་པར་བྱས་སོ། །སངས་རྒྱས་ལས་ཐོས་པར་མོས་པའི་སེམས་ཀྱིས་གསེར་གྱི་དྲ་བ་གྲངས་མེད་པ་ལས་དྲིལ་བུ་སྣ་ཚོགས་ཀྱི་དྲ་བ་འཁྲོལ་ཞིང་སྒྲ་འབྱིན་པས་གཡོག་པར་བྱས་ཏེ་
བར་སྣང་བརྒྱན་པར་བྱས་སོ། །དེ་བཞིན་གཤེགས་པ་ལ་ཡོན་གྱི་གནས་དམ་པ་ཡིན་པར་འཛིན་པའི་སེམས་ཀྱིས་བླ་རེ་གྲངས་མེད་པ་ལས་རིན་པོ་ཆེ་ཐམས་ཅད་ཀྱི་སེ་མོ་དོའི་སྤྲིན་ལྡིང་ཞིང་། འབྲུལ་བའི་རྒྱན་གྱིས་བར་སྣང་བརྒྱན་པར་བྱས་སོ། །
སངས་རྒྱས་ལ་དགེ་བར་འདུན་པའི་སེམས་ཀྱིས་ལྷ་རྫས་ཀྱི་གཞལ་མེད་ཁང་གྲངས་མེད་པར་ལྷ་རྫས་ཀྱི་རོལ་མོ་བརྡུང་བ་དང་། དཀྲོལ་བ་ཐམས་ཅད་ཀྱི་སྒྲ་ཡིད་དུ་འོང་བ་ཕྱུང་བས་བར་སྣང་བརྒྱན་པར་བྱས་སོ། །སངས་རྒྱས་སྐྱེ་བ་ཤིན་ཏུ་

དཀོན་པར་དོགས་པའི་སེམས་ཀྱིས་ལྷ་རྫས་ཀྱི་ན་བཟའ་ཁ་དོག་སྣ་ཚོགས་པའི་སྤྲིན་དང་། ན་བཟའ་མཚུངས་པ་མེད་པའི་སྤྲིན་གྱི་ཆར་འབབ་པའི་རྒྱན་གྱིས་བར་སྣང་བརྒྱན་པར་བྱས་སོ། །སངས་རྒྱས་ལ་མོས་པ་མཐའ་
ཡས་པའི་སེམས་ཀྱིས་ལྷ་རྫས་ཀྱི་ཅོད་པན་གྲངས་མེད་པའི་སྤྲིན་ལས་ཅོད་པན་གྱི་ཆར་ཆེན་པོ་འཁོར་ཞིང་འབབ་པའི་རྒྱན་གྱིས་བར་སྣང་བརྒྱན་པར་བྱས་སོ། སངས་རྒྱས་ཡིད་ལ་བདེ་བ་སྐྱེས་པའི་སེམས་ཀྱིས་ལྷ་རྫས་ཀྱི་རིན་པོ་ཆེ་ཁ་དོག་སྣ་ཚོགས་
གྲངས་མེད་པའི་སྤྲིན་ལས་ཕྲེང་བ་སྣ་ཚོགས་ཀྱི་ཆར་རྒྱུན་མི་འཆད་པར་འབབ་པའི་རྒྱན་གྱིས་བར་སྣང་བརྒྱན་པར་བྱས་སོ། །ལྷའི་བུ་བྱེ་བ་བརྒྱ་སྟོང་གྲངས་མེད་པ་ཡང་ལྷ་རྫས་ཀྱི་མེ་ཏོག་ཁ་དོག་ཐ་དད་པ་གྲངས་མེད་པ་ལག་ན་ཐོགས་ཏེ། མེ་ཏོག་ཟད་མི་ཤེས་པའི་
མཛོད་རབ་ཏུ་བཀྱེ་ནས། བཅོམ་ལྡན་འདས་ལ་མངོན་པར་གཏོར་ཏོ། །མོས་པའི་སྤོས་ཞིམ་པོ་རྙེད་ཅིང་སངས་རྒྱས་ལ་དད་པར་གནས་པས་ལྷ་རྫས་ཀྱི་སྤོས་དང་། བདུག་པ་ཁ་དོག་སྣ་ཚོགས་གྲངས་མེད་པ་ལག་ན་ཐོགས་ཏེ་བཅོམ་ལྡན་འདས་ལ་
ཕུལ་ལོ། །རྒྱན་ཆེན་པོ་སྤྲུལ་པའི་སེམས་ཀྱིས་ལྷ་རྫས་ཀྱི་ཙན་དན་གྱི་ཕྱེ་མ་ཁ་དོག་སྣ་ཚོགས་གྲངས་མེད་པ་ལག་ན་ཐོགས་ཏེ། བཅོམ་ལྡན་འདས་ལ་མངོན་པར་གཏོར་ཏོ། །དགའ་བའི་སེམས་ཀྱིས་བཅོམ་ལྡན་འདས་ཀྱི་ཞམ་རིང་དུ་འབྲང་
ཞིང་རིན་པོ་ཆེའི་གདུགས་ཁ་དོག་སྣ་ཚོགས་གྲངས་མེད་པ་ལག་ན་ཐོགས་ཏེ། བཅོམ་ལྡན་འདས་ལ་མངོན་པར་འགེབས་སོ། །སངས་རྒྱས་མཐའ་ཡས་པ་ལ་མོས་པའི་སེམས་རྣམ་པར་འཕེལ་བས། གོས་རིན་པོ་ཆེ་ཁ་དོག་སྣ་ཚོགས་གྲངས་
མེད་པ་ལག་ན་ཐོགས་ཏེ། བཅོམ་ལྡན་འདས་གཤེགས་པའི་ལམ་གོས་ཀྱིས་ཡོག་པར་བྱས་སོ། །དེ་བཞིན་གཤེགས་པ་ལ་རིམ་གྲོ་བྱ་བར་མོས་པའི་སེམས་ཀྱིས་ལྷ་རྫས་ཀྱི་རྒྱལ་མཚན་རིན་པོ་ཆེ་སྣ་ཚོགས་ཀྱི་ཁ་དོག་ཅན་ལག་ན་ཐོགས་ཤིང་། བཅོམ་

ལྡན་འདས་ཀྱི་ཞམ་རིང་དུ་འདོང་ངོ་། །སངས་རྒྱས་ལ་དགའ་བ་མཐའ་ཡས་པ་རྣམ་པར་འཕེལ་བའི་སེམས་ཀྱིས་ལྷ་རྫས་ཀྱི་ལྷབ་ལྷུབ་དང་། ཕྱང་འཕྲུལ་ཁ་དོག་སྣ་ཚོགས་གྲངས་མེད་པའི་ཡང་གྲངས་མེད་པ་ལག་ན་ཐོགས་ཏེ། དེ་བཞིན་
གཤེགས་པ་ལ་ཕུལ་ལོ། །དད་པ་མི་འཕྲོགས་པའི་སེམས་ཀྱིས་ལྷ་རྫས་ཀྱི་ཕྲེང་བ་གྲངས་མེད་པ་ལག་ན་ཐོགས་ཏེ། བཅོམ་ལྡན་འདས་ལ་མངོན་པར་གསོལ་ཏོ། །མཚུངས་པ་མེད་པའི་དགའ་བ་རྣམ་པར་འཕེལ་བས། ལྷ་རྫས་
གྱི་བ་དན་རིན་པོ་ཆེ་ཁ་དོག་སྣ་ཚོགས་གྲངས་མེད་པའི་ཡང་གྲངས་མེད་པ་ལག་ན་ཐོགས་ཏེ། བཅོམ་ལྡན་འདས་ཀྱི་དྲུང་ན་འཛིན་ཏོ། །ལྷའི་བུ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་ཡང་ཞི་བ་ལ རབ་ཏུ་གཞོལ་ཞིང་བག་ཡོད་པ་ཚད་མེད་
པའི་སེམས་ཀྱིས་ལྷ་རྫས་ཀྱི་རོལ་མོ་བརྡུང་བ་དང་། དཀྲོལ་བ་ཁ་དོག་སྣ་ཚོགས་གྲངས་མེད་པ་ལག་ན་ཐོགས་ཏེ། ཡིད་དུ་འོང་བའི་སྒྲ་དབྱངས་ཕྱུང་ནས། བཅོམ་ལྡན་འདས་དགྱེས་པར་བྱེད་དོ། །བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་
པ། དགའ་ལྡན་གྱི་གནས་ནས་འོངས་པའི་རྣམས་ཀྱང་ལྷ་རྫས་ལས་འདས་པའི་མཆོད་པ་ཁམས་གསུམ་ལས་རྣམ་པར་འདས་པ། དམྱིགས་པའི་ཆོས་ལས་བྱུང་བ། རྗེན་པའི་དྲི་མེད་པ། ཆགས་པ་མེད་པའི་
སེམས་ཚིམ་པར་བྱེད་པ། ཆོས་ཀྱི་ཚུལ་ཟབ་མོས་མངོན་པར་གྲུབ་པ། བློ་ཚད་མེད་པའི་ཡངས་པ་ལས་བྱུང་བ། དད་པའི་རྩ་བ་བརྟན་པས་རྣམ་པར་སྤེལ་བ། དགེ་བའི་རྩ་བ་བསམ་གྱིས་མི་ཁྱབ་པ་ལས་བྱུང་བ། དགེ་བའི་རྩ་བ་དང་
འཕྲུལ་བ་གྲངས་མེད་པས་མངོན་པར་བསྒྲུབས་པ། སངས་རྒྱས་ཀྱི་མཆོད་པ་ཡིད་ཀྱི་རང་བཞིན་ལས་བྱུང་བ། མངོན་པར་འདུ་བྱ་བ་མེད་པའི་ཆོས་ཀྱི་སྒོའི་རྒྱས་བཏབ་པས། ཆོས་ཀྱི་དབྱིངས་ཐམས་ཅད་ཀུན་ནས་ཡོག་པར་བྱས་སོ། །

ལྷ་རྫས་ལས་འདས་པའི་ཕ་རོལ་ཏུ་ཕྱིན་པ་ལས་བྱུང་བའི་མེ་ཏོག་གི་བླ་རེ་སྣ་ཚོགས་ཀྱིས་ཆོས་ཀྱི་དབྱིངས་ཀུན་ནས་ཁེབས་པར་བྱས་སོ། །ལྷ་རྫས་ལས་འདས་པ་མོས་པ་རྣམ་པར་དག་པ། སངས་རྒྱས་ཐམས་ཅད་ཀྱི་
ཡུལ་རྒྱས་པར་འགེངས་པའི་ན་བཟའ་སྣ་ཚོགས་མངོན་པར་དགབ་པས་ཆོས་ཀྱི་དབྱིངས་བརྒྱན་པར་བྱས་སོ། །ཆགས་པ་མེད་པའི་ཆོས་ཀྱི་རང་བཞིན་རྡོ་རྗེ་ལ་ཡང་དག་པར་ཞུགས་པའི་སེམས་ཀྱིས་ལྷ་རྫས་ལས་འདས་པའི་མི་སྐྱེ་བའི་ཆོས་
ལས་བྱུང་བའི་དྲིལ་བུ་ཚོམ་བུར་བཅད་པའི་དྲ་བས་ཆོས་ཀྱི་དབྱིངས་བརྒྱན་པར་བྱས་སོ། །ཆོས་ཐམས་ཅད་སྒྱུ་མ་ལྟ་བུར་རྟོགས་པའི་སེམས་ཀྱིས་ལྷ་རྫས་ལས་འདས་པའི་སྤོས་ཐམས་ཅད་ཀྱི་མཆོག་གིས་བདུག་པའི་རྒྱན་གྱིས་ཆོས་ཀྱི་དབྱིངས་
བརྒྱན་པར་བྱས་སོ། །དེ་བཞིན་གཤེགས་པ་བཞུགས་པས་ཆོས་ཀྱི་དབྱིངས་རྒྱས་པར་བྱ་བའི་སེམས་ཀྱིས་ལྷ་རྫས་ལས་འདས་པའི་རིན་པོ་ཆེ་ཐམས་ཅད་ཀྱི་ཁྲི་སངས་རྒྱས་ཀྱི་གདན་དུ་བཏིང་བའི་རྒྱན་གྱིས་ཆོས་ཀྱི་དབྱིངས་བརྒྱན་པར་བྱས་སོ། །
སངས་རྒྱས་ཀྱི་མཆོད་པ་རང་བཞིན་འགག་པ་མེད་པའི་སེམས་ཀ