Kinh tạng Tây Tạng (Kangyur Đại Học) — 035_ཕལ་ཆེན།_ཀ

ཡང་དག་པར་སྐུལ་བས་དགའ་བ་འབྱུང་བ་ཞེས་བྱའོ། །ལུས་ཀྱི་རིས་སུ་གཏོགས་པའི་ལྷ་རྒྱན་བཟང་པོའི་མེ་ཏོག་གཙུག་ཕུད་ཀྱི་རྣམ་པར་ཐར་པ་ནི། དེ་བཞིན་གཤེགས་པའི་སྐུ་ནམ་མཁའི་
མཚན་ཉིད་ཀྱི་བྱིན་གྱི་རླབས་ཀུན་ནས་རབ་ཏུ་གནས་པ་འབྱུང་བ་ཞེས་བྱའོ། །ལུས་ཀྱི་རིས་སུ་གཏོགས་པའི་ལྷ་སྤྱོད་ཡུལ་མཐའ་ཡས་དཔལ་གྱི་རྣམ་པར་ཐར་པ་ནི། སངས་རྒྱས་ཐམས་ཅད་ཀྱི་ཡུལ་འགྲོ་བ་རྣམས་ལ་ཡང་དག་པར་སྟོན་པའི་མཐུ་ཞེས་བྱའོ། །

ལུས་ཀྱི་རིས་སུ་གཏོགས་པའི་ལྷ་སྣང་བའི་ཕྲེང་བ་འཛིན་པའི་དཔལ་གྱི་རྣམ་པར་ཐར་པ་ནི། སེམས་ཅན་ཐམས་ཅད་གསལ་བ་དང་འདྲེས་པའི་མདངས་ཀྱིས་དགའ་བ་ཞེས་བྱའོ། །ལུས་ཀྱི་རིས་སུ་གཏོགས་པའི་ལྷ་སྤོས་དྲི་མ་མེད་པའི་སྤྲིན་
ལས་ཆར་འབབས་པའི་འོད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ཉོན་མོངས་པའི་དྲི་མ་མངོན་པར་སེལ་བའི་སྦྱོར་བ་ཞེས་བྱའོ། །ལུས་ཀྱི་རིས་སུ་གཏོགས་པའི་ལྷ་སྲུང་འཛིན་ཡོངས་སུ་སྡུད་པའི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་བདུད་
ཀྱི་ལས་དང་རྨོངས་པ་རྣམ་པར་ཟློག་པ་ཞེས་བྱའོ། །ལུས་ཀྱི་རིས་སུ་གཏོགས་པའི་ལྷ་སྒོ་ཀུན་ནས་ཡོངས་སུ་གནོན་པ་ལ་མངོན་དུ་གྱུར་པའི་མིག་གི་རྣམ་པར་ཐར་པ་ནི། འཇིག་རྟེན་གྱི་དབང་པོ་ཐམས་ཅད་ཀྱི་གནས་སུ་རྒྱལ་བ་རྣམ་པར་དམིགས་པར་མངོན་དུ་
སྟོན་པའི་རྒྱན་ཅེས་བྱའོ། །ལུས་ཀྱི་རིས་སུ་གཏོགས་པའི་ལྷ་ཁྲེལ་དང་དཔལ་མི་གཡོ་བའི་འོད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་དགེ་བའི་ཤུགས་ཐམས་ཅད་ཡང་དག་པར་འཛིན་ཅིང་། ཡང་དག་པར་སྦྱོང་བ་ཞེས་བྱའོ། །དེ་ནས་ལུས་
ཀྱི་རིས་སུ་གཏོགས་པའི་ལྷ་ཁྲེལ་དང་དགེ་བས་རྒྱས་པའི་འོད་ཀྱིས་སངས་རྒྱས་ཀྱི་མཐུས། ལུས་ཀྱི་རིས་སུ་གཏོགས་པའི་ལྷའི་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རི་རབ་རྡུལ་
ཕྲན་ཤིན་ཏུ་ཕྲ་སྙེད་ཀྱི། །བསྐལ་པ་དེ་དག་ཕ་སྔའི་བསྐལ་པ་ནི། །རྡུལ་ཅེས་བྱ་བར་འོད་མཛེས་འོད་ཟེར་རྒྱལ། །མཆོད་དེ་སྨོན་ལམ་བཏབ་པ་བདག་གིས་དྲན། །སངས་རྒྱས་སྐུ་ལས་འོད་འཕྲོ་རབ་བཀྱེ་བ། །དེའི་འོད་ཟེར་ཆོས་ཀྱི་དབྱིངས་སུ་རྒྱུ། །རྒྱལ་
བའི་འོད་ཟེར་དྲ་བ་སེམས་ཅན་འདུལ། །འོད་འཕྲོ་འོད་ཟེར་ལྷ་ཡིས་དེ་མཐོང་ངོ་། །དབྱངས་ཀྱི་ཡན་ལག་ཡོན་ཏན་ཀུན་རྒྱས་པའི། །སངས་རྒྱས་གསུང་ནི་ཞིང་རྣམས་ཀུན་ཏུ་སྒྲོགས། །འགྲོ་བ་མ་ལུས་ཐམས་ཅད་ཡང་དག་བསྐུལ། །དབྱངས་ཀྱིས་འདུལ་

བ་དེ་ལ་དགའ་བས་ཉན། །རྒྱལ་བའི་སྐུ་ནི་རབ་ཏུ་ཞི་བ་ལྟོས། །སྐུ་གཟུགས་དུ་མའང་མཚན་ཉིད་མི་མངའ་སྟེ། །འགྲོ་བ་ཀུན་ནའང་བཞུགས་པར་རབ་ཏུ་སྣང་། །མེ་ཏོག་གཙུག་གིས་ཇི་བཞིན་ཉིད་དུ་མཐོང་། །འདྲེན་པའི་ཆོས་ཉིད་བསམ་གྱིས་མི་ཁྱབ་སྟེ། །སེམས་
ཅན་དེ་དག་དད་པ་ཅི་བཞིན་དུ། །ལ་ལ་བཞུགས་དང་བཞེངས་དང་གཤེགས་པར་མཐོང་། །དེ་ཡང་སྤྱོད་ལམ་འབྱུང་བའི་ལྷས་མཐོང་ངོ་། །རྒྱལ་བའི་ཚེམས་ཀྱི་མཚམས་རྣམས་ཐམས་ཅད་ནས། །དྲི་ཞིམ་འོད་འཕྲོ་སྒྲོན་མའི་སྤྲིན་བཀྱེ་བས། །འགྲོ་བ་ཀུན་གྱི་ཉོན་
མོངས་ཞི་བར་འགྱུར། །དྲི་མེད་སྤོས་ཀྱི་སྤྲིན་གྱིས་དེ་མཐོང་ངོ་། །སངས་རྒྱས་མགོན་པོ་འགྲོ་བའི་སྐྱབས་སུ་བྱུང་། །ཉོན་མོངས་ཤིན་ཏུ་སྡུག་བསྔལ་གཟིར་བ་རྣམས། །མགུ་བར་མཛད་ཅིང་ཉོན་མོངས་ཐམས་ཅད་བསལ། །སྣང་བའི་ཕྲེང་བ་འཆང་བས་
འདི་མཐོང་ངོ་། །འདྲེན་པ་བསྐལ་པ་བརྒྱར་ཡང་ཤིན་ཏུ་དཀོན། །རང་བྱུང་འཇིག་རྟེན་དོན་མཛད་སྐྱེས་པ་ནི། །འཇིག་རྟེན་ཀུན་གྱི་དབུལ་བ་རྣམ་པར་སེལ། །ཁྲེལ་ཡོད་དཔལ་གྱི་འོད་སྣང་དེ་སྐད་སྨྲ། །སེམས་ཅན་ཉོན་མོངས་སྒྲིབ་པས་ཉོན་མོངས་ཤིང་། །
བདུད་ཀྱི་ལས་ཀྱིས་དཀྲུགས་ཏེ་འཕྱེན་པའི་རྣམས། །དེ་དག་རྒྱལ་བ་རྣམ་ཐར་ལམ་སྟོན་ཏེ། །སྲུང་ཞིང་སྐྱོང་བའི་དཔལ་གྱིས་དེ་མཐོང་ངོ་། །དེ་བཞིན་གཤེགས་པའི་རྣམ་པར་འཕྲུལ་པ་ལྟོས། །སངས་རྒྱས་སྤྲིན་གྱིས་ཆོས་ཀྱི་དབྱིངས་མནན་ཅིང་། །འཇིག་
རྟེན་དབང་པོ་གནས་སུ་སེམས་ཅན་འདུལ། །ཀུན་སྒོའི་མིག་གི་དཔལ་གྱི་སྤྱོད་ཡུལ་ལོ། །དེ་ལ་ལག་ན་རྡོ་རྗེ་མཐུ་ཆེན་ཁ་དོག་བཟང་པོའི་འོད་ཀྱི་རྣམ་པར་ཐར་པ་ནི། ཡོན་ཏན་མཐའ་ཡས་པ་དང་། གཟུགས་ཀྱི་སྐུ་རྣམ་པར་དཔྱོད་པ་ཡང་དག་པར་སྟོན་པ་ཞེས་བྱའོ། །
ལག་ན་རྡོ་རྗེ་ཉི་མའི་ཤུགས་ཀྱི་རྒྱལ་མཚན་གྱི་རྣམ་པར་ཐར་པ་ནི། སངས་རྒྱས་ཐམས་ཅད་ཀྱི་བ་སྤུ་ལས་ཉི་མའི་དཀྱིལ་འཁོར་གྱི་སྤྲིན་སྣ་ཚོགས་ཀྱི་རྒྱན་འབྱུང་བ་ཞེས་བྱའོ། །ལག་ན་རྡོ་རྗེ་རི་རབ་མེ་ཏོག་འོད་ཀྱི་རྣམ་པར་ཐར་པ་ནི། རྣམ་པར་འཕྲུལ་པ་རྒྱ་ཆེན་པོ་བསྟན་པས།

ཡོན་ཏན་མཐའ་ཡས་པའི་ལུས་སུ་འཕྲུལ་པ་ཞེས་བྱའོ། །ལག་ན་རྡོ་རྗེ་རྣམ་དག་སྤྲིན་གྱི་དབྱངས་ཀྱི་རྣམ་པར་ཐར་པ་ནི། དེ་བཞིན་གཤེགས་པའི་དབྱངས་མཐའ་ཡས་ཚད་མེད་པའི་རྗེས་སུ་སོང་བ་ཞེས་བྱའོ། །ལག་ན་རྡོ་རྗེ་དབང་པོ་ཤིན་ཏུ་མང་བའི་རྣམ་
པར་ཐར་པ་ནི། འཇིག་རྟེན་གྱི་དབང་པོ་ཐམས་ཅད་ཀྱི་རྣམ་པར་འཕྲུལ་པ་སྟོན་ཅིང་། སངས་རྒྱས་ཀྱི་བྱིན་གྱི་རླབས་ཀྱིས་ཡང་དག་པར་སྐུལ་བ་ཞེས་བྱའོ། །ལག་ན་རྡོ་རྗེ་རྡོ་རྗེའི་འོད་ཡིད་དུ་འོང་བའི་རྣམ་པར་ཐར་པ་ནི། སངས་རྒྱས་ཀྱི་ཆོས་ཀྱི་དབྱིངས་རབ་ཏུ་ཕྱེ་བ་ཐམས་ཅད་མ་ལུས་པ་
ལ་ཡང་དག་པར་སྤྱོད་པ་ཞེས་བྱའོ། །ལག་ན་རྡོ་རྗེ་ཤིང་གི་སྒྲ་དབྱངས་ཀྱི་རྣམ་པར་ཐར་པ་ནི། ཤིང་གི་ལྷ་ཐམས་ཅད་འདྲེན་པའི་རྒྱན་ཡིད་དུ་འོང་བས་བརྒྱན་པ་ཞེས་བྱའོ། །ལག་ན་རྡོ་རྗེ་སེང་གེའི་འོད་ཀྱི་རྒྱལ་པོའི་རྣམ་པར་ཐར་པ་ནི། དེ་བཞིན་གཤེགས་པའི་བསོད་ནམས་
ཀྱི་དཀྱིལ་འཁོར་ཡངས་པའི་ཚོགས་ཀྱི་རྗེས་སུ་འབྲང་བའི་འོད་ཅེས་བྱའོ། །ལག་ན་རྡོ་རྗེ་འོད་འཕྲོ་སྟུག་པོའི་དཔལ་གྱི་མིག་གི་རྣམ་པར་ཐར་པ་ནི། སེམས་ཅན་མ་རུངས་པའི་རྒྱུད་ལ་ལུས་འཇིགས་འཇིགས་ལྟར་རབ་ཏུ་སྟོན་ཅིང་ཀུན་ཏུ་རྣམ་པར་ལྟ་བ་ཞེས་བྱའོ། །ལག་ན་
རྡོ་རྗེ་རིན་ཆེན་གཙུག་ཕུད་པདྨོའི་འོད་ཀྱི་རྣམ་པར་ཐར་པ་ནི། བྱང་ཆུབ་སེམས་དཔའི་རྒྱན་ཐམས་ཅད་ཀྱིས་བརྒྱན་པའི་གཙུག་གི་ནོར་བུ་རིན་པོ་ཆེ་ཐམས་ཅད་ཀྱི་ཆར་མངོན་པར་འབེབས་པ་ཞེས་བྱའོ། །དེ་ནས་ལག་ན་རྡོ་རྗེ་མཐུ་ཆེན་ཁ་དོག་བཟང་པོའི་འོད་ཀྱིས་སངས་རྒྱས་ཀྱི་
མཐུས། ལག་ན་རྡོ་རྗེའི་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཆོས་རྒྱལ་ཆོས་ཀྱིས་མཛེས་པ་ཡི། །ཆོས་ཉིད་དེ་ལ་རྣམ་པར་ལྟོས། །ཡོན་ཏན་མཐའ་ཡས་སྐུ་གཟུགས་ཀྱིས། །འཇིག་
རྟེན་ཀུན་ཏུ་རྣམ་པར་མཛེས། །སངས་རྒྱས་བ་སྤུ་ཐམས་ཅད་ནས། །འོད་ཟེར་དྲ་བ་བསམ་མྱི་ཁྱབ། །ཉི་མའི་དཀྱིལ་འཁོར་འདྲ་བ་སྟེ། །ཕྱོགས་བཅུ་ཀུན་ཏུ་རྣམ་པར་མཛེས། །སངས་རྒྱས་རྣམ་འཕྲུལ་དེ་དག་གིས། །ཆོས་ཀྱི་དབྱིངས་སུ་ཁྱབ་བྱས་ཤིང་། །འགྲོ་བ་ཀུན་

ལ་མངོན་སུམ་དུ། །མི་ཟད་སྐུ་ནི་ཤིན་ཏུ་སྟོན། །སངས་རྒྱས་གསུང་གི་དཀྱིལ་འཁོར་ནི། །ཞིང་རྣམས་ཀུན་ཏུ་རབ་ཏུ་སྒྲོག །གསུང་གིས་སེམས་ཅན་ཐམས་ཅད་ཀྱི། །བསམ་པ་ཐམས་ཅད་རབ་ཏུ་འགེངས། །འཇིག་རྟེན་དབང་པོ་ཀུན་གནས་ན། །ཐུབ་པ་རབ་ཏུ་བཞུགས་
པར་སྣང་། །དེ་དག་ཐམས་ཅད་འཁོར་རྣམས་ལ། །འདྲེན་པ་དག་གི་ཆོས་སྟོན་མཛད། །རྒྱ་མཚོ་ཆོས་ཀྱི་སྒོ་བསྐུལ་བས། །གཞན་དང་གཞན་གྱི་ཚུལ་དག་གིས། །ཐམས་ཅད་ཆོས་ཀྱི་བྱེ་བྲག་དོན། །རྒྱལ་བ་ཟད་མེད་རབ་ཏུ་སྟོན། །རྒྱ་ཆེན་མཐའ་མེད་ཚུལ་དག་ལ། །རྒྱ་
མཚོ་འཁོར་རྣམ་རབ་ཏུ་འཇུག །སངས་རྒྱས་འོད་ཟེར་རབ་འདྲེས་པས། །ཀུན་གྱིས་འདྲེན་པ་མཐོང་བར་འགྱུར། །ཞིང་རྣམས་བྱེ་མའི་རྡུལ་སྙེད་དུ། །རྫོགས་པའི་སངས་རྒྱས་ཀུན་མཆོད་པས། །བསོད་ནམས་རྒྱ་ཆེན་ནམ་མཁའ་བཞིན། །ཀུན་གྱིས་འདྲེན་པ་རབ་ཏུ་
མཐོང་། །སངས་རྒྱས་རྫུ་འཕྲུལ་མ་འདྲེས་པ། །ཐམས་ཅད་ཞིང་དུ་སྟོན་པ་མཛད། །འགྲོ་ལ་སངས་རྒྱས་མངོན་སུམ་དུ། །བྱང་ཆུབ་སྙིང་པོར་རྣམ་པར་མཛེས། །འོད་ཟེར་སྣ་ཚོགས་དཀྱིལ་འཁོར་གྱི། །འོད་འཕྲོ་སྤྲིན་ནི་ཀུན་ཏུ་སྣང་། །ཆོས་དབྱིངས་ཀུན་ཏུ་ཁྱབ་བྱས་
ཤིང་། །སངས་རྒྱས་སྤྱོད་ཡུལ་རབ་ཏུ་སྟོན། །དེ་ལ་བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་པར་ཐར་པ་ནི། ཚུལ་རྒྱ་མཚོ་བསམ་གྱིས་མི་ཁྱབ་པས། །དེ་བཞིན་གཤེགས་པའི་ཡོན་ཏན་རྒྱ་མཚོ་ལ་འཇུག་སྟེ། འདི་ལྟར་སངས་རྒྱས་ཀྱི་ཞིང་ཐམས་ཅད་ཡོངས་སུ་
དག་པར་བྱ་བ་དང་། འགྲོ་བ་གདུལ་བ་ལ་མཐར་ཐུག་པར་མངོན་པར་སྒྲུབ་པ་ཞེས་བྱ་བའི་རྣམ་པར་ཐར་པ་དང་། དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་དུ་ཕྱིན་པས། ཡོན་ཏན་གྱི་ཚོགས་ཐམས་ཅད་ཀྱི་ཡུལ་ཞེས་བྱ་བའི་རྣམ་པར་ཐར་པ་དང་། བྱང་ཆུབ་སེམས་དཔའ་
ཐམས་ཅད་ཀྱི་ས་ནས་སར་སྨོན་ལམ་རྒྱ་མཚོས་རབ་ཏུ་གནས་པ་འབྱུང་བ་ཞེས་བྱ་བའི་རྣམ་པར་ཐར་པ་དང་། སྒོ་ཐམས་ཅད་ནས་ཆོས་ཀྱི་དབྱིངས་སུ་བདག་གི་ལུས་ཀྱི་སྤྲིན་རྡུལ་སྙེད་མཐའ་ཡས་པས་རྒྱས་པར་འགེངས་པ་ཞེས་བྱ་བའི་རྣམ་པར་ཐར་པ་དང་། ཞིང་ཐམས་ཅད་དུ་

རང་གི་མིང་བསམ་གྱིས་མི་ཁྱབ་པའི་འཁོར་ལོ་སྒྲོག་པའི་བྱིན་གྱི་རླབས་ཤེས་བྱ་བའི་རྣམ་པར་ཐར་པ་དང་། རྡུལ་ཤིན་ཏུ་ཕྲ་བའི་ཐམས་ཅད་ཀྱི་སྦུབས་སུ་བྱང་ཆུབ་སེམས་དཔའི་ཡུལ་དང་། རྣམ་པར་འཕྲུལ་པ་མཐའ་དང་དབུས་མེད་པ་ཡང་དག་པར་
སྟོན་པ་ཞེས་བྱ་བའི་རྣམ་པར་ཐར་པ་དང་། དུས་གསུམ་གྱི་བསྐལ་པ་སྐད་ཅིག་གཅིག་ཏུ་སྟོན་པས་འབྱུང་བ་དང་། འཇིག་པ་རབ་ཏུ་འབྱུང་བ་ཞེས་བྱ་བའི་རྣམ་པར་ཐར་པ་དང་། བྱང་ཆུབ་སེམས་དཔའ་ཐམས་ཅད་ཀྱི་དབང་པོ་རྒྱ་མཚོའི་ཡུལ་ཕན་ཚུན་དུ་འཇུག་པ་ཡང་དག་པར་སྟོན་
པ་ཞེས་བྱ་བའི་རྣམ་པར་ཐར་པ་དང་། གང་འདི་ཆོས་ཀྱི་དབྱིངས་མཐའ་དང་དབུས་མེད་པ་རང་གི་ལུས་ཀྱི་སྤྲུལ་པས་རྒྱས་པར་རྣམ་པར་འཕྲུལ་པའི་བྱིན་གྱི་རླབས་ཤེས་བྱ་བའི་རྣམ་པར་ཐར་པ་དང་། གང་འདི་བྱང་ཆུབ་སེམས་དཔའི་ཆོས་ཐམས་ཅད་ཀྱི་ཚུལ་ཕན་ཚུན་དུ་སྟོན་པ་
རྒྱ་ཆེན་པོས་ཐམས་ཅད་མཁྱེན་པ་ཉིད་ཀྱི་ཚུལ་ལ་འཇུག་པ་ཞེས་བྱ་བའི་རྣམ་པར་ཐར་པ་དག་གོ །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོ་རྣམ་པར་ཐར་པའི་ཚུལ་རྒྱ་མཚོ་བསམ་གྱིས་མི་ཁྱབ་པ་དག་གིས། དེ་བཞིན་གཤེགས་པའི་ཡོན་ཏན་རྒྱ་མཚོ་ལ་འཇུག་ཅིང་སངས་
རྒྱས་ཀྱི་མཐུས། འཁོར་རྒྱ་མཚོ་ཡོད་པ་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཞིང་རྣམས་རྒྱལ་བས་དྲི་མེད་རྣམ་པར་སྦྱངས། །མཁའ་ཡངས་རྡུལ་བཞིན་ཡོན་ཏན་ཚད་ཀྱང་མྱེད། །སྔོན་གྱི་རྒྱལ་བའི་སྲས་པོ་དྲི་མེད་
ཀྱིས། །དེ་ལ་བསམ་ཡས་ཆོས་སྤྲིན་ཆར་ཡང་ཕབ། །ཇི་ལྟར་རྒྱལ་བ་གདན་ལ་བཞུགས་སྣང་བ། །དེ་བཞིན་རྡུལ་སྦུབས་མ་ལུས་ཀུན་ནང་སྐྱེ། །འོན་ཀྱང་བདེ་གཤེགས་གཤེགས་དང་འཕོ་བ་མེད། །ཞིང་རྣམས་ཀུན་ཏུ་ཡུལ་ཡང་རབ་ཏུ་སྟོན། །ས་ཡི་ཚུལ་ལ་
འཇུག་པ་ཚད་མེད་དེ། །སྤྱོད་པ་ཐུབ་པས་བྱང་ཆུབ་སེམས་དཔའ་བསྟན། །བསམ་གྱིས་མི་ཁྱབ་ཚུལ་ནི་ཀུན་གསུངས་པས། །རྒྱལ་སྲས་རྣམས་ནི་ཆོས་ཀྱི་དབྱིངས་ལ་འཇུག །ཆོས་དབྱིངས་འཇུག་ཚུལ་རྣམ་པ་རྒྱ་ཆེ་སྟེ། །མཐའ་ཡས་ཕྱོགས་སུ་མཐའ་དང་དབུས་

མེད་སྒོ། །རྡུལ་ཕྲན་སྦུབས་སུ་རྒྱལ་བ་འཕྲུལ་བ་སྤྲོས། །འགྲོ་བའི་བསམ་པ་ཀུན་ཀྱང་རབ་ཏུ་མཁྱེན། །ཕྱོགས་རྣམས་ཐམས་ཅད་ཞིང་རྣམས་ཀུན་ཏུ་ཡང་། །འཇིག་རྟེན་གཙོ་མཚན་འགྲོ་དང་མཉམ་པར་བྱུང་། །ཐམས་ཅད་ཚུལ་སྒོར་སངས་རྒྱས་དོན་ཡོད་དེ། །འདུལ་
བས་སེམས་ཅན་ཐམས་ཅད་རྣམ་པར་སྤྱོད། །རྡུལ་སྦུབས་ཀུན་ཏུ་མཐའ་དང་དབུས་མེད་པའི། །རྣམ་འཕྲུལ་ཡངས་པ་རང་བྱུང་ཤིན་ཏུ་སྟོན། །སྔན་ཅད་ཐུབ་པའི་བྱང་ཆུབ་སྤྱོད་པ་རྣམས། །ཅི་བཞིན་ཀུན་ཀྱང་སྙིང་པོ་བྱང་ཆུབ་བརྗོད། །ཡངས་དུས་བསྐལ་པ་ཇི་སྙེད་
ཡོད་པའི་རྣམས། །སྐད་ཅིག་སྐད་ཅིག་སངས་རྒྱས་མ་ལུས་སྟོན། །དེར་ནི་སེམས་ཅན་འབྱུང་ཞིང་འཇིག་པའང་བསྟན། །འཇིག་རྟེན་གཙོ་བོ་ཡེ་ཤེས་མཐའ་ཡས་ལྟོས། །འབྱམ་ཀླས་མི་ཟད་མཐའ་ཡས་ལོ་གྲངས་པས། །རྒྱལ་སྲས་ཐམས་ཅད་སངས་རྒྱས་དེ་ལྟ་
སྟེ། །ཐམས་ཅད་སྒོར་ཡང་སངས་རྒྱས་མཐའ་དབུས་མེད། །རྒྱལ་སྲས་ཀུན་གྱིས་ཤེས་པར་སླ་བ་མིན། །སངས་རྒྱས་མཁའ་འདྲ་རྣམ་པར་མི་རྟོག་སྟེ། །ཆོས་ཉིད་མི་གནས་ཆོས་ཀྱི་སྤྲིན་དག་གིས། །སྤྲུལ་པས་སྤྱོད་ཚེ་ཀུན་ཏུ་རྒྱས་མཛད་ཅིང་། །ཤིང་
མཆོག་ཀུན་དྲུང་བྱང་ཆུབ་འཚང་རྒྱ་བསྟན། །སངས་རྒྱས་གསུང་དེ་རབ་ཏུ་བརྗོད་པས་ན། །ཆོས་གནས་ཐམས་ཅད་མ་ལུས་བརྗོད་པ་ཡིན། །འགྲོ་བ་ཐམས་ཅད་རེ་རེའི་སྒོ་དག་ནས། །སངས་རྒྱས་ཆོས་རྣམས་ཀུན་ལ་རབ་ཏུ་འཇུག །དེ་ལ་བྱང་ཆུབ་སེམས་དཔའ་
དགེ་བ་དྲི་མ་མྱེད་པའི་གཟི་བརྗིད་ཀྱི་འོད་ཡིད་དུ་འོང་བའི་རྣམ་པར་ཐར་པ་ནི། ཆོས་ཀྱི་དབྱིངས་ཐམས་ཅད་དུ་མངོན་པར་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དུ་འགྲོ་བའི་རྒྱན་བྱེད་པ་ཞེས་བྱའོ། །བྱང་ཆུབ་སེམས་དཔའ་ཡོན་ཏན་འོད་མཆོག་ཀུན་ཏུ་སྒྲོན་མའི་རྣམ་
པར་ཐར་པ་ནི། སེམས་སྐད་ཅིག་གིས་མངོན་པར་རྫོགས་པར་བྱང་ཆུབ་པའི་སྒོ་ཟད་མི་ཤེས་པ་སྟོན་ཅིང་། ཆོས་སྟོན་ཀྱི་དབྱིངས་བསམ་གྱིས་མི་ཁྱབ་པས་ཡོངས་སུ་སྨིན་པ་དང་རྣམ་པར་འདུལ་བར་བྱེད་པའི་འོད་ཅེས་བྱའོ། །བྱང་ཆུབ་སེམས་དཔའ་ཀུན་ཏུ་འབར་བ་

སེང་གེའི་རྒྱལ་མཚན་གྱི་རྣམ་པར་ཐར་པ་ནི། བྱང་ཆུབ་སེམས་དཔའ་ཐམས་ཅད་ཀྱི་བསོད་ནམས་ཀྱི་ཚོགས་དང་ཞིང་ཡང་དག་པར་འབྱུང་བ་ལ་རྣམ་པར་ལྟ་བ་ཞེས་བྱའོ། །བྱང་ཆུབ་སེམས་དཔའ་དཔལ་གྱི་འོད་ཟེར་ཀུན་ཏུ་འོད་འཕྲོའི་རྣམ་
པར་ཐར་པ་ནི། རྫུ་འཕྲུལ་གྱི་ཡུལ་གྱི་རྣམ་པར་སྤྱོད་པ་དོན་ཡོད་པ་ཞེས་བྱའོ། །བྱང་ཆུབ་སེམས་དཔའ་ཡོན་ཏན་རྒྱ་མཚོ་ཀུན་ཏུ་སྒྲ་དབྱངས་རྒྱལ་མཚན་གྱི་རྣམ་པར་ཐར་པ་ནི། སངས་རྒྱས་ཀྱི་ཞིང་གི་རྒྱན་ཐམས་ཅད་འཁོར་གྱི་དཀྱིལ་འཁོར་དུ་ཡང་དག་པར་སྟོན་པ་
ཞེས་བྱའོ། །བྱང་ཆུབ་སེམས་དཔའ་དེ་བཞིན་གཤེགས་པའི་སྤྱོད་ཡུལ་ཡེ་ཤེས་ཀུན་ཏུ་སྣང་བའི་འོད་ཀྱི་རྣམ་པར་ཐར་པ་ནི། དེ་བཞིན་གཤེགས་པའི་རྗེས་སུ་ཀུན་ནས་སོང་ཞིང་ཆོས་ཀྱི་དབྱིངས་ལ་རྣམ་པར་སྤྱོད་པའི་སྤྲིན་ཆེན་པོའི་སྙིང་པོ་ཞེས་བྱའོ། །བྱང་ཆུབ་
སེམས་དཔའ་གཙུག་ན་རིན་ཆེན་ཀུན་ཏུ་རྒྱལ་མཚན་གྱི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་སྤྱོད་པ་ལ་རབ་ཏུ་ཞུགས་ཤིང་བྱང་ཆུབ་སེམས་དཔའི་སྤྱོད་པ་མཐའ་ཡས་པ་ཤིན་ཏུ་འབྱུང་བ་ཞེས་བྱའོ། །བྱང་ཆུབ་སེམས་དཔའ་རྒྱལ་བའི་གསུང་ཀུན་ཏུ་འཇམ་དབྱངས་
ཀྱི་རྣམ་པར་ཐར་པ་ནི། སངས་རྒྱས་ཐམས་ཅད་བསྙེན་བཀུར་ཞིང་མཆོད་པར་ཉེ་བར་འགྲོ་བའི་སྙིང་པོ་ཞེས་བྱའོ། །བྱང་ཆུབ་སེམས་དཔའ་བསོད་ནམས་མི་ཟད་དྲི་མེད་ཀུན་ཏུ་གཟི་བརྗིད་ཀྱི་རྣམ་པར་ཐར་པ་ནི། རྫུ་འཕྲུལ་དང་རྣམ་པར་འཕྲུལ་པ་ཐམས་ཅད་ཀྱི་བྱིན་གྱི་རླབས་
རྒྱ་ཆེན་པོ་འབྱུང་བ་ཞེས་བྱའོ། །བྱང་ཆུབ་སེམས་དཔའ་མཚན་གྱི་འོད་ཟེར་ཀུན་ཏུ་སྣང་བའི་རྣམ་པར་ཐར་པ་ནི། དེ་བཞིན་གཤེགས་པའི་སྐུ་མེད་པ་ལས་སངས་རྒྱས་ཀྱི་ཡུལ་ཐམས་ཅད་འབྱུང་བ་ཞེས་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་
དྲི་མ་མེད་པའི་གཟི་བརྗིད་ཀྱི་འོད་ཡིད་དུ་འོང་བས་སངས་རྒྱས་ཀྱི་མཐུས། བྱང་ཆུབ་སེམས་དཔའི་རྣམ་པར་ཐར་པ་རྒྱ་མཚོའི་ཕྱོགས་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཇི་སྙེད་གང་དག་ཕྱོགས་རྣམས་ཀུན་

གྱི་ཞིང་། །རྒྱལ་བས་དེ་ཀུན་སྐད་ཅིག་ཐུགས་ཀྱིས་སྦྱངས། །འགྲོ་བ་ཀུན་ཏུ་ཞི་བ་མེད་པའི་གསུང་། །སངས་རྒྱས་ཆོས་ཀྱི་འཁོར་ལོ་རྒྱ་ཆེན་བསྐོར། །སྐད་ཅིག་ཐུགས་ཀྱི་ཆོས་དབྱིངས་ཀུན་བཀང་སྟེ། །མཐའ་ཡས་སྤྱོད་ཡུལ་དབྱིངས་རྣམས་རྒྱལ་བ་སྟོན། །
འགྲོ་བ་ཀུན་ལམ་སྙིང་པོ་བྱང་ཆུབ་ཏུ། །བྱང་ཆུབ་འཚང་རྒྱ་རྣམ་པར་འཕྲུལ་པ་མཛད། །བསྐལ་པ་བརྒྱ་ཕྲག་སྟོང་རྣམས་ཚད་མེད་དུ། །དེ་བཞིན་གཤེགས་པས་སྔན་ཅད་སྤྱོད་སྤྱད་དེ། །ནམ་མཁའ་འདྲ་བར་བྱས་ནས་རབ་བཀྱེ་ཞིང་། །སངས་རྒྱས་ཞིང་འདི་སྔོན་ཚེ་རབ་
ཏུ་སྦྱངས། །མཐའ་དང་དབུས་མེད་བསྐལ་པར་ལ་ལ་ཡིས། །སྐྱོ་བ་མེད་པར་རྒྱལ་བའི་ཡུལ་བསམས་ཀྱང་། །སངས་རྒྱས་རྫུ་འཕྲུལ་སྟོབས་ལ་དབུས་མེད་པ། །ཕྱི་མའི་མཐའ་ཡི་བསྐལ་པ་ཀུན་ཏུ་འགེངས། །རྒྱལ་བའི་རྫུ་འཕྲུལ་ཡུལ་ལ་རྣམ་པར་ལྟོས། །
ཕྱོགས་བཅུའི་ཞིང་རྒྱན་དེ་དག་རྣམ་དག་པ། །རྒྱལ་བས་འདིར་ནི་ཀུན་ཀྱང་རབ་ཏུ་བསྟན། །སྐད་ཅིག་སྐད་ཅིག་སྣ་ཚོགས་གཟུགས་ཀྱང་སྣང་། །བསྐལ་པ་བརྒྱ་སྟོང་ཚད་མེད་པ་དག་ཏུ། །རྒྱལ་བའི་བ་སྤུ་གཅིག་མཐའ་ཤེས་པར་དཀའ། །ཚུལ་རྣམས་ཀུན་སྒོར་
སངས་རྒྱས་ཆགས་པ་མེད། །འགྲོ་བ་འདི་ན་རྒྱ་ཆེན་བསམ་ཡས་མཛེས། །སྔོན་ཚེ་བསྐལ་པར་རྒྱལ་བས་འགྲོ་ཀུན་ཏུ། །སངས་རྒྱས་རྒྱ་མཚོ་རྒྱ་ཆེན་བསྙེན་བཀུར་བས། །དེ་བས་འཇིག་རྟེན་གཙོ་ལ་ཆོས་དབྱིངས་རྣམས། །ཀུན་ནས་མཆོད་པ་མང་པོ་རྒྱ་
ཆེན་འབྱུང་། །ཕྱོགས་རྣམས་བཀང་སྟེ་སངས་རྒྱས་འབྱུང་བ་དག །རྡུལ་གྱི་སྦུབས་སུ་ཚད་མེད་ཞིང་ཡང་སྟོན། །དེ་དག་ཡུལ་དུ་མི་ཟད་མཐའ་ཡས་པའི། །བསྐལ་པ་རྒྱ་མཚོར་བྱིན་གྱིས་རློབ་པ་མཛད། །སྔོན་ཚེའི་བསྐལ་པར་རྒྱལ་བས་འགྲོ་དོན་སྤྱད། །ཐུགས་
རྗེའི་རྒྱ་མཚོ་ཚད་མེད་རབ་སྐྱེད་ཅིང་། །འགྲོ་བ་རྒྱ་མཚོ་ཀུན་ནས་འཁོར་བ་ཡི། །འཁོར་རྣམས་རྒྱ་མཚོ་མཐའ་ཡས་ཀུན་ཀྱང་སྦྱངས། །སངས་རྒྱས་མཚན་མེད་སྐུ་མེད་རྡུལ་དང་བྲལ། །དེ་བཞིན་ཉིད་གནས་ཆོས་དབྱིངས་སྙིང་པོ་སྟེ། །འགྲོ་བ་ཀུན་ན་མཐའ་ཡས་

གཟུགས་སུ་སྣང་། །འགྲོ་བ་ཀུན་གྱི་སྡུག་བསྔལ་ཀུན་ཞི་མཛད། །དེ་ལ་བྱང་ཆུབ་སེམས་དཔའ་འོད་ཟེར་རྒྱ་མཚོ་འོད་ཆེན་དཔལ་གྱི་ཟླ་བའི་རྣམ་པར་ཐར་པ་ནི། ཕ་རོལ་ཏུ་ཕྱིན་པ་དང་སའི་ཤུགས་ཀྱིས་སེམས་ཅན་གྱི་ཁམས་ཀྱི་ཚུལ་དང་། སངས་
རྒྱས་ཀྱི་ཞིང་རྣམ་པར་དག་པ་ཡང་དག་པར་འབྱུང་བ་ཞེས་བྱའོ། །བྱང་ཆུབ་སེམས་དཔའ་སྤྲིན་གྱི་ང་རོ་རྒྱ་མཚོ་དྲི་མེད་འོད་ཀྱི་སྙིང་པོའི་རྣམ་པར་ཐར་པ་ནི། བྱང་ཆུབ་སེམས་དཔའ་ཐམས་ཅད་ཀྱི་སེམས་སྐད་ཅིག་ལ་ཆོས་ཀྱི་དབྱིངས་ཀྱི་ཚུལ་གྱིས་ཁྱིམ་སྣ་ཚོགས་ལ་རྣམ་པར་
ལྟ་བ་ཞེས་བྱའོ། །བྱང་ཆུབ་སེམས་དཔའ་ཡོན་ཏན་རིན་ཆེན་འབྱུང་བ་ཡེ་ཤེས་དཔལ་གྱི་གཙུག་ཕུད་ཀྱི་རྣམ་པར་ཐར་པ་ནི། བསྐལ་པ་བསམ་གྱིས་མི་ཁྱབ་པར་འགྲོ་བ་རྣམས་ལ་མངོན་སུམ་དུ་ཡོན་ཏན་དྲི་མ་མེད་པས་ཡོངས་སུ་དག་པ་སྒྲུབ་པ་ཞེས་བྱའོ། །བྱང་ཆུབ་སེམས་
དཔའ་རྒྱ་ཆེན་འོད་འབར་བློ་གྲོས་དབང་ཕྱུག་གི་རྣམ་པར་ཐར་པ་ནི། བྱང་ཆུབ་སེམས་དཔའ་ཐམས་ཅད་ཀྱི་སྙིང་པོ་བྱང་ཆུབ་ཏུ་ཐོག་མ་འགྲོ་བའི་ཡེ་ཤེས་ཀྱི་ཕྱོགས་ཡང་དག་པར་འབྱུང་བའི་རྒྱུན་ཅེས་བྱའོ། །བྱང་ཆུབ་སེམས་དཔའ་པདྨོ་རྣམ་པར་གནོན་པ་འོད་ཟེར་གཙུག་ཕུད་ཀྱི་
རྣམ་པར་ཐར་པ་ནི། སངས་རྒྱས་ཀྱི་ཆོས་ཐམས་ཅད་ཐ་མྱི་དད་པར་འགྲོ་བ་ཐམས་ཅད་ཀྱི་དབང་པོ་དང་། མོས་པ་རྒྱ་མཚོའི་འོད་ཅེས་བྱའོ། །བྱང་ཆུབ་སེམས་དཔའ་ཀུན་ཏུ་ཡེ་ཤེས་སྤྲིན་གྱི་ཉི་མའི་རྒྱལ་མཚན་སྣང་བའི་རྣམ་པར་ཐར་པ་ནི། སངས་རྒྱས་ཀྱི་ཡེ་ཤེས་བསྒྲུབ་
པར་བསྐལ་པ་མཐའ་ཡས་པ་དག་ཏུ་བྱིན་གྱིས་རློབ་ཅིང་རྣམ་པར་སྤྱོད་པ་ཞེས་བྱའོ། །བྱང་ཆུབ་སེམས་དཔའ་མཐུ་སྟོབས་བརྩོན་འགྲུས་རྡོ་རྗེ་ཡངས་པའི་སྙིང་པོའི་རྣམ་པར་ཐར་པ་ནི། ཆོས་ཐམས་ཅད་ཀྱི་ཕྱག་རྒྱ་མཐའ་དང་དབུས་མེད་པ་ལ་ཡང་དག་པར་འཇུག་པ་
ཞེས་བྱའོ། །བྱང་ཆུབ་སེམས་དཔའ་སྤོས་ཀྱི་འོད་འཕྲོ་ཤིན་ཏུ་འབར་བའི་འོད་ཀྱི་རྒྱལ་མཚན་གྱི་རྣམ་པར་ཐར་པ་ནི། སངས་རྒྱས་ད་ལྟར་བྱུང་བ་ཐམས་ཅད་ཀྱི་ཐོག་མའི་བྱང་ཆུབ་སེམས་དཔའི་སྤྱོད་པ་ཤེས་པའི་དཀྱིལ་འཁོར་ཡང་དག་པར་སྒྲུབ་པ་ཞེས་བྱའོ། །

བྱང་ཆུབ་སེམས་དཔའ་རྣམ་པར་སྣང་མཛད་ཡོན་ཏན་ཡངས་པའི་རྒྱལ་མཚན་གྱི་རྣམ་པར་ཐར་པ་ནི། རྣམ་པར་སྣང་མཛད་ཀྱི་སྨོན་ལམ་རྒྱ་མཚོ་ཐམས་ཅད་ཀྱི་དབྱིངས་ལ་རབ་ཏུ་གནས་པ་ཞེས་བྱའོ། །བྱང་ཆུབ་སེམས་དཔའ་བསོད་ནམས་ཡངས་པ་ཤིན་ཏུ་འཕགས་
པའི་འོད་མཆོག་ཡོན་ཏན་འབྱུང་བའི་བློ་གྲོས་ཀྱི་རྣམ་པར་ཐར་པ་ནི། སངས་རྒྱས་ཀྱི་ཡུལ་ཟབ་མོ་ཆོས་ཀྱི་དབྱིངས་ཐམས་ཅད་ལ་ཀུན་ནས་རབ་ཏུ་གནས་པ་རྣམ་པར་སྤྱོད་པ་ཞེས་བྱའོ། །དེ་ནས་བྱང་ཆུབ་སེམས་དཔའ་འོད་ཟེར་རྒྱ་མཚོ་འོད་ཆེན་དཔལ་གྱི་ཟླ་བས། སངས་
རྒྱས་ཀྱི་མཐུས་བྱང་ཆུབ་སེམས་དཔའ་རྣམ་པར་ཕྱེ་བ་རྒྱ་མཚོ་མཐའ་ཡས་པ་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཕ་རོལ་ཕྱིན་པ་རྒྱ་མཚོ་བསམ་ཡས་དང་། །ས་ཡི་དཀྱིལ་འཁོར་རྒྱ་ཆེན་ཀུན་ཀྱང་ཡོངས་སུ་རྒྱས། །ཚད་
མེད་སེམས་ཅན་རྣམ་པར་འདུལ་བའི་ཚེ། །སངས་རྒྱས་ཞིང་ཡངས་རྣམས་ཀྱང་རྣམ་པར་སྦྱངས། །ཕྱོགས་བཅུའི་སངས་རྒྱས་ཞིང་ཀུན་རྒྱས་བྱས་ཏེ། །སངས་རྒྱས་སེམས་ཅན་ཁམས་སྦྱིན་འདུལ་མཛད་པ། །སྐད་ཅིག་ཐུགས་ཀྱིས་ཆོས་ཀྱི་འཁོར་ལོ་དག །
མཐའ་ཡས་འགྲོ་མཉམ་བསམ་པ་ཚིམ་པར་སྟོན། །བསྐལ་པ་རྒྱ་ཆེ་མི་ཟད་མུ་མེད་པར། །རྒྱལ་བ་འགྲོ་ལ་མངོན་སུམ་ཀུན་ནས་བཞུགས། །མགོན་པོས་སྔན་ཅད་ཇི་ལྟར་སྦྱངས་ཚུལ་དུ། །རྒྱལ་བས་སྤྱོད་ཡུལ་རྣམ་དག་རབ་ཏུ་བསྟན། །ཆོས་རྒྱལ་དེ་དག་ཇི་ལྟར་
རྣམ་འཕྲུལ་པ། །ཕྱོགས་རྣམས་རྒྱ་མཚོ་མ་ལུས་ཀུན་ན་སྣང་། །སྙིང་པོ་བྱང་ཆུབ་ཀུན་ནའང་རྒྱལ་བ་དག །འཁོར་གྱིས་བསྐོར་ཅིང་ཆོས་རྣམས་གསུང་བ་སྣང་། །འགྲོ་བའི་བསམ་པ་ཐམས་ཅད་ཚིམ་མཛད་ཅིང་། །འཇིག་རྟེན་དག་ན་སངས་རྒྱས་ཚུལ་ཀུན་མཛེས། །
དབང་པོ་ཇི་བཞིན་ཆོས་ཀྱི་ཆར་ཡང་འབེབས། །སངས་རྒྱས་ཆོས་སྐུ་ཡངས་པ་རྣམ་པར་མཛེས། །དེ་བཞིན་ཉིད་ལྟར་མཚན་ཉིད་ལུས་མེད་དེ། །རྒྱལ་བ་དྲི་མེད་འོད་གསལ་ཆོས་ཀྱི་སྐུ། །ཡེ་ཤེས་ཞི་བའི་སྐུ་ནི་ཚད་མེད་དེ། །ཕྱོགས་དབྱིངས་ཀུན་བཀང་ཆོས་ཀྱི་ཆར་

ཡང་འབེབས། །ཆོས་རྗེ་ཐམས་ཅད་སྟོབས་ཀྱིས་རྣམ་པར་དག །བདེ་གཤེགས་ཡེ་ཤེས་མཁའ་འདྲ་མཐའ་ཡས་ཏེ། །རྒྱ་ཆེན་འགྲོ་བ་མཐའ་དབུས་མྱེད་བཀང་ཞིང་། །རྒྱལ་བ་སྟོབས་ལ་འཇུག་པ་རབ་ཏུ་སྟོན། །སངས་རྒྱས་འོད་ཀྱིས་ཆོས་དབྱིངས་
ཀུན་བཀང་ཞིང་། །སངས་རྒྱས་སྤྱོད་པ་ཐམས་ཅད་རྫོགས་པར་བསྟན། །རྒྱལ་བས་སྔོན་ཚེ་ཇི་ལྟར་རྣམ་སྦྱངས་པ། །དེ་བཞིན་ཡེ་ཤེས་ས་རྣམས་རྒྱལ་བས་བསྟན། །ཕྱོགས་རྣམས་ཀུན་ཏུ་རང་བྱུང་རྣམ་པར་མཛེས། །སྨོན་ལམ་རྣམ་པར་འཕྲུལ་པ་མ་ལུས་སྟོན། །
ཇི་ལྟར་སྔོན་ཚེ་རྒྱལ་བས་ཡོངས་སྦྱངས་པ། རྒྱལ་བའི་འོད་ཟེར་དྲ་བ་ཀུན་ནས་སྒྲོག །སངས་རྒྱས་ཡུལ་ནི་ཕྱོགས་སུ་ཟད་པ་མེད། །དབུས་དང་མཐའ་མེད་གཞལ་མེད་མཐའ་ཡས་དབྱིངས། །ཆོས་དབྱིངས་ཀུན་ཏུ་ཆགས་མེད་བརྙེས་པ་ནི། །སངས་རྒྱས་ཞིང་རྣམས་
ཀུན་ན་ཤིན་ཏུ་མཛེས། །དེའི་ཚེ་བཅོམ་ལྡན་འདས་ཀྱི་སེང་གེའི་ཁྲི་དང་། པད་མོའི་ཟེ་བའི་དྲི་ཐམས་ཅད་དང་། ནོར་བུའི་རྒྱལ་པོ་ཐམས་ཅད་ཀྱི་ངོས་དང་། འཁོར་ལོའི་ལྟེ་བ་ཐམས་ཅད་དང་། མེ་ཏོག་གི་ཟེ་བའི་དྲི་ཐམས་ཅད་དང་། སྟེགས་བུའི་ངོས་ཐམས་ཅད་དང་།
རྟ་བབས་ཀྱི་སྒོ་ཐམས་ཅད་དང་། ནོར་བུའི་གཟུགས་ཀྱི་ངོས་ཐམས་ཅད་དང་། རིན་པོ་ཆེ་འོད་འཕྲོ་བའི་སྒོ་ཐམས་ཅད་དང་། འོད་ཟེར་སྒྲོན་མའི་སྒོ་ཐམས་ཅད་དང་། སེང་གེའི་ཁྲིའི་རྒྱན་གྱི་སྒོ་ཐམས་ཅད་ནས། སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་བྱང་ཆུབ་
སེམས་དཔའ་མང་པོ་འཐོན་པར་གྱུར་ཏེ། འདི་ལྟར་བྱང་ཆུབ་སེམས་དཔའ་རྒྱ་མཚོའི་བློ་གྲོས་རྣམ་པར་རོལ་པའི་ཡེ་ཤེས་མངོན་པར་ཤེས་པའི་རྒྱལ་པོ་ཞེས་བྱ་བ་དང་། བྱང་ཆུབ་སེམས་དཔའ་སྒྲ་དབྱངས་ཀུན་ཏུ་སྒྲོག་པ་དང་། བྱང་ཆུབ་སེམས་དཔའ་ནོར་བུ་རིན་པོ་ཆེ་སྣ་
ཚོགས་ཀྱི་འོད་ཀྱི་དཀྱིལ་འཁོར་གཙུག་ཕུད་དང་། བྱང་ཆུབ་སེམས་དཔའ་ཡེ་ཤེས་ཆེན་པོ་ཉི་མས་རབ་ཏུ་གནོན་པའི་བློ་གྲོས་དང་། བྱང་ཆུབ་སེམས་དཔའ་ཡོན་ཏན་རིན་པོ་ཆེ་བསམ་གྱིས་མི་ཁྱབ་པ་ཡེ་ཤེས་རྒྱ་མཚོའི་དཔལ་དང་། བྱང་ཆུབ་སེམས་དཔའ་མིག་

བརྒྱ་པ་པདྨོའི་སྣ་ཚོགས་ཀྱི་གཙུག་ཕུད་དང་། བྱང་ཆུབ་སེམས་དཔའ་ནམ་མཁའི་ཚུལ་པདྨོ་སྣ་ཚོགས་ཀྱི་གཙུག་ཕུད་དང་། བྱང་ཆུབ་སེམས་དཔའ་གསེར་གྱི་འོད་འཕྲོ་གཟི་བརྗིད་དཀྱིལ་འཁོར་གྱི་འོད་དང་། བྱང་ཆུབ་སེམས་དཔའ་ཀུན་ཏུ་སྒྲ་ཆོས་ཀྱི་དབྱིངས་ཀྱི་དབྱངས་དང་། བྱང་ཆུབ་
སེམས་དཔའ་སྤྲིན་ཡིད་དུ་འོང་བ་དྲི་མ་མེད་པའི་ཟླ་བ་དང་། དེ་དག་ལ་སྩོགས་པ་བྱང་ཆུབ་སེམས་དཔའ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་མཆོད་པའི་སྤྲིན་རྣམ་པ་སྣ་ཚོགས་རབ་ཏུ་འགྱེད་ཅིང་། འདི་ལྟར་ནོར་བུ་རིན་པོ་ཆེའི་མེ་ཏོག་གི་སྤྲིན་ཐམས་ཅད་ནི་རབ་ཏུ་འབྱིན། སྤོས་
ཀྱི་སྤྲིན་ཐམས་ཅད་ནི་ཤིན་ཏུ་འགྱེད། །རིན་པོ་ཆེའི་འོད་ཀྱི་དཀྱིལ་འཁོར་གྱི་སྤྲིན་ཐམས་ཅད་ནི་མངོན་པར་འབྱིན། ཡུལ་མཐའ་ཡས་པའི་སྤོས་ཀུན་ཏུ་འཕྲོ་བའི་བདུག་པའི་སྤྲིན་ནི་རྣམ་པར་འགྱེད་ཅིང་། ནོར་བུ་ཉི་མའི་སྙིང་པོ་འཁོར་ལོའི་འོད་ཀྱི་དཀྱིལ་འཁོར་གྱི་སྤྲིན་ནི་རབ་ཏུ་
གཏོང་། སིལ་སྙན་གྱི་སྒྲ་དབྱངས་ཡིད་དུ་འོང་བའི་སྤྲིན་ནི་རབ་ཏུ་སྒྲོག །རིན་པོ་ཆེ་འོད་འཕྲོ་བ་ཁ་དོག་མཐའ་ཡས་པའི་སྒྲོན་མའི་སྤྲིན་གྱིས་ནི་རབ་ཏུ་སྣང་བར་བྱེད། ནོར་བུ་སྣ་ཚོགས་ཀྱི་ཤིང་གི་ཡལ་ག་ལས་མེ་ཏོག་གི་དོག་པ་ནི་རྣམ་པར་སྤྱོད། རིན་པོ་ཆེའི་འོད་དྲི་མ་མེད་པ་
ཟད་མི་ཤེས་པའི་ནོར་བུའི་རྒྱལ་པོའི་ཆར་ནི་རབ་ཏུ་འབེབས། རྒྱན་མཛེས་པ་ཐམས་ཅད་ཡང་དག་པར་སྟོན་པའི་ནོར་བུའི་རྒྱལ་པོའི་སྤྲིན་གྱི་ཆར་ནི་རབ་ཏུ་འབེབས་ཤིང་། དེ་ལྟ་བུ་དག་ལ་སྩོགས་པ་བྱང་ཆུབ་སེམས་དཔའ་རེ་རེ་ཞིང་ཡང་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་
མཆོད་པའི་སྤྲིན་གྱི་ཆར་རབ་ཏུ་འབེབས་པར་བྱེད་ཅིང་ལྷགས་པར་གྱུར་ཏེ། བཅོམ་ལྡན་འདས་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ཏེ། འཁོར་གྱི་དཀྱིལ་འཁོར་རྒྱ་མཚོ་ཡོད་པ་ཐམས་ཅད་དུ་མཆོད་པའི་སྤྲིན་རྒྱུན་མི་འཆད་པའི་ཆར་མངོན་པར་ཕབ་ནས་གང་
ནས་འོངས་པའི་ཕྱོགས་སུ་བརྟེན་ཏེ། དེ་བཞིན་གཤེགས་པ་ལ་མངོན་དུ་བལྟས་ནས་སེང་གེའི་ཁྲི་རིན་པོ་ཆེ་སྣ་ཚོགས་དུ་མའི་པདྨོའི་སྙིང་པོ་ཅན་དག་མངོན་པར་སྤྲུལ་ཏེ། སྐྱིལ་མོ་ཀྲུང་བཅས་ཏེ་འཁོད་པར་གྱུར་ཏོ། །བྱང་ཆུབ་སེམས་དཔའ་དེ་དག་ཐམས་ཅད་ཀྱང་སྤྱོད་ཡུལ་རྒྱ་

མཚོ་རྒྱ་ཆེན་པོ་ཡོངས་སུ་དག་པ་རྣམས་སོ། །སྒོ་ཀུན་ནས་ཆོས་ཀྱི་སྣང་བ་རབ་ཏུ་ཐོབ་པ་རྣམས་སོ། །དེ་བཞིན་གཤེགས་པའི་སྤྱོད་ཡུལ་ཆགས་པ་མེད་པའི་རྗེས་སུ་འབྲང་བ་རྣམས་སོ། །ཐ་དད་པ་ཡང་དག་པར་ཤེས་པ་ཐམས་ཅད་ཀྱིས་ཆོས་རྒྱ་
མཚོ་ལ་ཞུགས་པ་རྣམས་སོ། །རྣམ་པར་ཐར་པ་བསམ་གྱིས་མི་ཁྱབ་པའི་སྣང་བ་རབ་ཏུ་ཐོབ་པ་རྣམས་སོ། །སྒོ་ཀུན་ནས་དེ་བཞིན་གཤེགས་པའི་སའི་དབྱིངས་རབ་ཏུ་ཐོབ་པ་རྣམས་སོ། །གཟུངས་ཀྱི་སྒོ་རྒྱ་མཚོ་ཐམས་ཅད་ཀྱིས་ཆོས་རྒྱ་མཚོ་རབ་ཏུ་འཛིན་པ་རྣམས་སོ། །
དུས་གསུམ་མཉམ་པ་ཉིད་ཀྱི་ཡེ་ཤེས་ཀྱི་ས་ལ་རབ་ཏུ་གནས་པ་རྣམས་སོ། །དགའ་བའི་ཤུགས་རྒྱ་ཆེན་པོ་རབ་ཏུ་ཐོབ་པ་རྣམས་སོ། །བསོད་ནམས་ཀྱི་དཀྱིལ་འཁོར་མུ་མེད་པ་ཡོངས་སུ་དག་པའི་རྣམས་ཏེ། ཆོས་ཀྱི་དབྱིངས་དང་ནམ་མཁའ་ལ་རྣམ་པར་རྒྱུ་ཞིང་
སངས་རྒྱས་ཐམས་ཅད་མཆོད་པ་མངོན་པར་བསྒྲུབ་པ་ལ་རབ་ཏུ་བརྩོན་པ་ཤ་སྟག་གོ །དེ་ནས་བྱང་ཆུབ་སེམས་དཔའ་རྒྱ་མཚོའི་བློ་གྲོས་རྣམ་པར་རོལ་པའི་ཡེ་ཤེས་མངོན་པར་ཤེས་པའི་རྒྱལ་པོས་སངས་རྒྱས་ཀྱི་མཐུས་འཁོར་གྱི་དཀྱིལ་འཁོར་རྒྱ་མཚོ་ཐམས་
ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་རྣམ་པར་སངས་རྒྱས་མཉམ་ཉིད་མཁྱེན། །ཆགས་མེད་རྙེད་པས་ནམ་མཁའ་ལྟ་བུ་སྟེ། །ཕྱོགས་རྣམས་ཞིང་ཀུན་རབ་ཏུ་སྣང་བྱས་ནས། །འབྱམ་ཀླས་འཁོར་
ན་བཞུགས་པ་རྣམ་པར་མཛེས། །བདེ་གཤེགས་རང་བྱུང་མཐའ་དང་དབུས་མེད་དེ། །ཐམས་ཅད་ཕྱོགས་ཀྱི་ཆོས་དབྱིངས་ཀུན་རྒྱས་པར། །དབང་ཕྱུག་ཆེན་པོ་ཀུན་གྱིས་མཆོད་བསྐོར་ཅིང་། །ཤིང་གི་རྒྱལ་པོ་ཀུན་གྱི་དྲུང་ན་བཞུགས། །དེ་བཞིན་གཤེགས་
པའི་རྫུ་འཕྲུལ་སྟོབས་དག་གིས། །སྐད་ཅིག་སེམས་ལ་ཟད་མེད་ཡོན་ཏན་གཟུགས། །རྣམ་ཐར་གཞན་དང་གཞན་དག་ཐོབ་པས་མཐོང་། །དེ་བཞིན་གཤེགས་པའི་ཡུལ་ནི་མཐའ་ཡས་སོ། །བསྐལ་པ་རྒྱ་མཚོར་སྔན་ཅད་སྤྱོད་པའི་ཚེ། །དེ་བཞིན་གཤེགས་

པས་སྲིད་པ་རྒྱ་མཚོ་འདིར། །སྣ་ཚོགས་ཐབས་ཀྱིས་སེམས་ཅན་སྨིན་བྱས་པ། །དེ་དག་རྒྱལ་བ་དེ་ཡི་ཆོས་འཛིན་ཏོ། །ཡོངས་དག་དྲི་མེད་འཁོར་རྣམས་འཁོད་པ་དག །ཐམས་ཅད་སངས་རྒྱས་ལྟ་ཞིང་རྣམ་པར་གནས། །པདྨོའི་སྙིང་པོ་པདྨོ་གདན་བཞུགས་པ། །
ཚོགས་ཀྱི་ནང་ན་རྒྱལ་བ་མངོན་པར་མཛེས། །སངས་རྒྱས་གང་ན་བཞུགས་པའི་སེང་གེའི་ཁྲི། །རིན་ཆེན་ནོར་བུའི་རྒྱལ་པོའི་འོད་འཕྲོ་ཞིང་། །སྤོས་འཕྲོ་སྤྲིན་རྣམས་མཐའ་ཡས་རབ་ཏུ་འབྱུང་། །སྙིང་པོ་དུ་མའི་མེ་ཏོག་ཕྲེང་སྤྱངས་པའོ། །རིན་ཆེན་འོད་འཕྲོའི་སྤྲིན་
ནི་རྟག་ཏུ་འགྱེད། །འོད་ཟེར་སྒྲོན་མ་རྒྱ་ཆེན་རབ་ཏུ་འབར། །རྟ་བབས་རྣམ་པ་སྣ་ཚོགས་རྣམས་ཀྱིས་བརྒྱན། །ཐུབ་པ་དེ་བཞུགས་མངོན་པར་རབ་ཏུ་མཛེས། །སྒྲ་དབྱངས་ཡིད་དུ་འོང་བ་རབ་ཏུ་འགྱེད། །རིན་ཆེན་ཚོན་དུ་སྣ་ཚོགས་པདྨོ་འཕྱང་། །ནོར་བུའི་རྒྱལ་
པོས་སྐར་ཁུང་ཀུན་གནས་བརྒྱན། །སངས་རྒྱས་དེ་བཞུགས་རྣམ་པར་རབ་ཏུ་མཛེས། །ཟླ་གམ་རིན་ཆེན་མང་པོས་ཡོངས་སུ་བཟུང་། །རྡོ་རྗེ་འོད་འཕྲོ་སྣང་བའི་སྙིང་པོས་བརྒྱན། །གཙུག་ན་ནོར་བུའི་བྱང་ཆུབ་སེམས་དཔས་བཟུང་། །སངས་རྒྱས་དེ་བཞུགས་རྣམ་
པར་ཤིན་ཏུ་མཛེས། །ཕྱོགས་བཅུར་སྤྲུལ་པའི་དྲ་བ་རབ་བཀྱེ་ཞིང་། །དེ་བཞིན་གཤེགས་པའི་སྨོན་ལམ་སྒྲ་ཡང་སྒྲོག །གཟུགས་བརྙན་བཞིན་དུ་ཞིང་རྣམས་ཀུན་ན་སྣང་། །ཐུབ་པ་དེ་འདྲའི་སེང་གེའི་གདན་ལ་བཞུགས། །དེ་ནས་བྱང་ཆུབ་སེམས་དཔའ་སྒྲ་དབྱངས་
ཀུན་ཏུ་སྒྲོག་པས། སངས་རྒྱས་ཀྱི་མཐུས་འཁོར་གྱི་དཀྱིལ་འཁོར་དུ་ཡོད་པ་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འདི་ནི་བདེ་གཤེགས་སངས་རྒྱས་བྱིན་རླབས་ཏེ། །བྱང་ཆུབ་སྤྱོད་པ་སྔན་ཆད་སྤྱད་པ་དང་། །སངས་
རྒྱས་མཆོད་པའི་མཆོད་པ་དུ་མ་དག །རྒྱལ་བའི་གདན་ལས་དེ་དག་ཐམས་ཅད་སྣང་། །སྤོས་འོད་སྣང་བ་ནོར་བུའི་རྒྱལ་པོ་ཅན། །མེ་ཏོག་སྙིང་པོ་སེང་གེའི་གདན་གྱི་འཁོར། །རྒྱན་རྣམས་ཐམས་ཅད་གཟུགས་བརྙན་གྱུར་པ་དང་། །འཁོར་རྣམས་དེ་དག་ཐམས་

ཅད་ཀུན་བཀང་སྟེ། །སྐད་ཅིག་སྐད་ཅིག་རྒྱན་གྱི་ཁ་དོག་ཀུན། །རྣམ་པ་དུ་མར་སངས་རྒྱས་གདན་ལས་སྣང་། །སེམས་ཅན་ཇི་ལྟར་མོས་པ་དེ་དག་ཀྱང་། །འཁོད་ཅིང་སངས་རྒྱས་ཚད་མེད་གདན་ལ་ལྟ། །རིན་ཆེན་ལྡ་ལྡི་པདྨོ་
མང་བཏགས་པ། །ཕྱི་ཞིང་བྱང་ཆུབ་སེམས་དཔའ་མང་པོ་རྣམས། །སྒྲ་དབྱངས་ཡིད་དུ་འོང་བ་རབ་འབྱིན་ཅིང་། །སངས་རྒྱས་གདན་ལ་བཞུགས་ལ་སྟོད་པ་བྱེད། །སངས་རྒྱས་བསོད་ནམས་ཚད་མེད་ནམ་མཁའ་བཞིན། །འདི་དག་རྒྱན་ཀུན་དེ་ལས་རབ་ཏུ་བྱུང་། །
ས་རྣམས་རེ་རེའི་རྒྱན་རྣམས་གང་ཡོད་པ། །འགྲོ་བ་ཀུན་གྱིས་དེ་དག་བསམ་མི་ནུས། །མི་ཕྱེད་མཚམས་ཀྱི་རྡོ་རྗེ་སྣ་ཚོགས་པ། །འཁོར་ཡངས་རྣམ་དག་ཤིན་ཏུ་མཉམ་པ་སྟེ། །ནོར་བུའི་དྲ་བ་སྣ་ཚོགས་ཀུན་ཏུ་བཀྲམ། །བྱང་ཆུབ་ཤིང་གི་ས་ཡི་འཁོར་
ཀུན་ཏོ། །ས་ཕྱོགས་གང་ན་རྒྱལ་བའི་གདན་ཡོད་པ། །ཁ་དོག་མཐའ་ཡས་རྒྱ་ཆེན་སྣ་ཚོགས་ཏེ། །མེ་ཏོག་མངོན་གཏོར་རིན་ཆེན་རྣམ་པར་བཀྲམ། །གསེར་ཚོན་མཛེས་པས་དེ་ནི་རབ་ཏུ་བརྒྱན། །ས་ཡི་ལྷ་མོ་དེ་དག་རབ་དགའ་ཞིང་། །སྐད་ཅིག་སེམས་
ཀྱིས་མི་ཟད་ས་ཡང་སྟོན། །ཀུན་ཀྱང་རྒྱལ་བའི་ཞལ་དུ་མངོན་ལྟ་ཞིང་། །ཁ་དོག་ཐམས་ཅད་རྒྱན་གྱི་སྤྲིན་གཏོང་ངོ་། །རིན་ཆེན་སྒྲོན་མ་མང་པོ་གསལ་བར་འབར། །སྤོས་མང་དྲི་ཞིམ་མང་པོ་རྟག་ཏུ་འབྱུང་། །དུས་དང་ཚོད་ཀྱི་རྣམ་པ་མང་སྟོན་ཅིང་། །ལྷ་
རྣམས་ཀུན་ཀྱང་སངས་རྒྱས་མཆོད་པ་བྱེད། །ཕྱོགས་རྣམས་བཅུ་ན་ཞིང་རྣམས་ཇི་སྙེད་པ། །དེ་དག་ས་རྒྱན་ཕུན་སུམ་ཚོགས་ཡོད་པ། །དེ་དག་ཀུན་ཀྱང་ས་དཀྱིལ་འདི་ན་སྣང་། །སངས་རྒྱས་བྱིན་རླབས་མཉམ་པ་མེད་པས་བྱུང་། །དེ་ནས་བྱང་ཆུབ་
སེམས་དཔའ་ནོར་བུ་རིན་པོ་ཆེ་སྣ་ཚོགས་ཀྱི་འོད་ཀྱི་དཀྱིལ་འཁོར་གཙུག་ཕུད་ཀྱིས་སངས་རྒྱས་ཀྱི་མཐུས་འོད་ཀྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སྔན་ཅད་སྤྱད་པ་སྤྱོད་པའི་ཚེ་དེ་དག །

ཞིང་ཀུན་ཕུན་སུམ་ཚོགས་པ་མཐོང་བ་རྣམས། །སྙིང་པོ་བྱང་ཆུབ་འཁོར་གྱི་ས་འདི་ལ། །མྱི་ཟད་ས་དང་དེ་དག་རབ་ཏུ་སྣང་། །རྣམ་པར་ཡངས་པ་གང་ན་སྣང་བ་ཡི། །ས་ལ་རིན་ཆེན་མཛེས་ཀུན་རྣམ་པར་བཀྲམ། །རིན་ཆེན་མང་པོས་དཀྱིལ་འཁོར་ཀུན་ཏུ་གཏོར། །
སངས་རྒྱས་འོད་ཀྱི་སྤྲིན་ཀྱང་རབ་ཏུ་སྣང་། །ས་རྣམས་ཀུན་བརྒྱན་ཤིང་གི་དམ་པའི་དྲུང་། །ཀུན་ནས་ནོར་བུའི་རྒྱལ་པོས་རྒྱན་བྱས་ལས། །བསོད་ནམས་འོད་ཀྱི་དབྱངས་ཀྱི་འབྲུག་སྒྲ་འབྱུང་། །སངས་རྒྱས་རྫུ་འཕྲུལ་ཚུལ་ཡང་རབ་ཏུ་བརྗོད། །རིན་ཆེན་མང་པོ་
སྒྲོན་མའི་ཆར་ཕབ་ཅིང་། །རིན་ཆེན་མཛེས་པར་བཀོད་པ་རྣམ་པར་མཛེས། །སྒྲ་དབྱངས་ཀུན་གྱི་འབྲུག་སྒྲ་ཤིན་ཏུ་སྒྲོག །ས་ཡི་ལྷ་རྣམས་ས་ཡང་ཡང་དག་སྟོན། །རིན་ཆེན་འོད་འཕྲོ་སྒྲོན་མ་རྣམ་པར་སྣང་། །འོད་ཟེར་སྤྲིན་ནི་ས་ལས་རབ་ཏུ་འབྱུང་། །ནོར་བུ་
དྲ་བ་སིལ་མ་ཀུན་ནས་བཀྲམ། །རིན་ཆེན་སྣ་ཚོགས་རིགས་ཀྱི་ཡན་ལག་བརྒྱན། །ས་རྣམས་ཀུན་ནས་མཛེས་པ་འདི་དག་ལྟོས། །རིན་ཆེན་མང་པོ་ཚོན་བཟང་རྒྱན་དུ་བཀྱེ། །འགྲོ་བ་དག་ལ་ཆོས་ཀྱི་རྒྱ་མཚོ་སྒྲོག །དེ་དག་ཆོས་ཉིད་རྣམ་པར་དག་པ་མཐོང་། །
མ་ལུས་ཕྱོགས་ན་སངས་རྒྱས་ཐམས་ཅད་ཀྱི། །བྱང་ཆུབ་ཤིང་གི་ཕུན་སུམ་ཚོགས་པ་དག །ས་ཡི་དཀྱིལ་འཁོར་འདི་ན་ཀུན་སྣང་སྟེ། །དེ་དག་ཆོས་ཉིད་རྣམ་པར་དག་པ་བརྗོད། །སངས་རྒྱས་གདན་ལས་ཆོས་རྣམས་རྒྱ་མཚོ་ཡི། །ཆོས་སྒོ་བདེ་བར་
གཤེགས་པས་གང་གསུངས་པ། །སེམས་ཅན་ཀུན་ཀྱི་བསམ་པ་ཇི་བཞིན་དུ། །ས་འཁོར་རྣམས་ཀྱང་ཀུན་ནས་རབ་ཏུ་འབྱུང་། །དྲི་ཞིམ་འོད་རྣམས་རྟག་ཏུ་འབྱུང་བས་ན། །དེ་དག་ཇི་བཞིན་སྣོད་ཀྱི་འགྲོ་བ་འགེངས། །སྲོག་ཆགས་རྣམས་ཀྱི་ཉོན་མོངས་
ཞི་བར་བྱེད། །ས་འཁོར་དེ་ནས་དེ་འདྲ་རབ་ཏུ་སྒྲོག །སངས་རྒྱས་རྫུ་འཕྲུལ་ཕུན་སུམ་གང་དག་དང་། །དྲི་མེད་ས་ནི་གང་གིས་མཛེས་གྱུར་པའི། །ཕུན་སུམ་ཚོགས་པའི་རྒྱན་རྣམས་རེ་རེ་ཞིང་། །བསྐལ་པ་བྱེ་བ་དག་ཏུ་འང་བརྗོད་མྱི་ནུས། །དེ་ནས་བྱང་ཆུབ་

སེམས་དཔའ་ཡེ་ཤེས་ཆེན་པོའི་ཉི་མས་རབ་ཏུ་གནོན་པའི་བློ་གྲོས་ཀྱིས། སངས་རྒྱས་ཀྱི་མཐུས་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ།། །།
སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་ལྔ་པ། འཇིག་རྟེན་ཀུན་གྱི་བསམ་པ་ཚིམ་མཛད་ཅིང་། །སངས་རྒྱས་ཆོས་ཀྱི་གཞལ་མེད་ཁང་ན་མཛེས། །འབྱམ་ཀླས་ཕྱོགས་རྣམས་ཀུན་ཏུ་མངོན་སུམ་དུ། །སངས་རྒྱས་
འགྲོ་གཙོ་གཞལ་མེད་ཁང་ན་སྣང་། །རིན་ཆེན་ཀུན་གྱི་སྙིང་པོ་རབ་ཏུ་བརྒྱན། །རྒྱན་རྣམས་ཀུན་གྱིས་དེ་བཞིན་མཛེས་ཤིང་འབར། །སངས་རྒྱས་ཕོ་བྲང་འོད་ནི་བསམ་མྱི་ཁྱབ། །དེ་ན་བཞུགས་ཤིང་སངས་རྒྱས་རབ་ཏུ་མཛེས། །ཀ་བའི་རྒྱན་ནི་ནོར་བུ་སྣ་ཚོགས་ཏེ། །
ཕྱོགས་རྣམས་ཀུན་སྒོར་རྟ་བབས་སྤྲིན་ཀྱང་བྲིས། །སྟེགས་བུའི་ཕྲེང་བ་ཀུན་ནས་རྒྱན་དུ་བཀོད། །གསེར་གྱི་དྲིལ་བུའི་སྤྲིན་ཀྱང་རྣམ་པར་བརྒྱུས། །མེ་ཏོག་བླ་རེ་རྣམ་པ་སྣ་ཚོགས་ལྟོས། །རིན་ཆེན་ཤིང་སྡོང་དར་གྱི་བླ་རེ་བྲེས། །ནོར་བུ་ཐམས་ཅད་སྒོ་ནས་ཕྲེང་བ་
འབྲུལ། །དེ་ནས་ཡེ་ཤེས་རྒྱ་མཚོར་རབ་ཏུ་མཛེས། །སྤོས་དྲི་རྒྱལ་མཚན་རིན་ཆེན་དྲ་བ་སྟེ། །འོད་ཟེར་སྒྲོན་མའི་སྤྲིན་གྱིས་ཀུན་ཏུ་གཡོགས། །རྒྱན་རྣམས་སྣ་ཚོགས་ཀུན་ནས་ཤིན་ཏུ་བྲེས། །དེ་ན་སངས་རྒྱས་རབ་ཏུ་འཕགས་པ་བཞུགས། །ཕྱོགས་རྣམས་
ཀུན་སྒོ་སྤྲུལ་པའི་སྤྲིན་གྱི་རྣམས། །དབྱངས་ཀྱིས་འཇིག་རྟེན་ཁྱབ་པར་གྲག་བྱེད་ཅིང་། །འབྱམ་ཀླས་ཕྱོགས་ཀྱི་སེམས་ཅན་རྣམ་འདུལ་བ། །སངས་རྒྱས་ཕོ་བྲང་འདི་ན་དེ་དག་གྲག །མེ་ཏོག་ཤིང་དང་རིན་ཆེན་སྤུངས་སྤེལ་བ། །འཕགས་པ་ཕྱོགས་རྣམས་
ཀུན་ཏུ་མངོན་པར་མཛེས། །དེ་ལས་དུས་གསུམ་ཞིང་རྣམས་ཐམས་ཅད་ཀྱང་། །གཟུགས་བརྙན་གྱུར་པར་དེ་དག་རབ་ཏུ་སྣང་། །ཕྱོགས་རྣམས་ཀུན་ཏུ་རིན་ཆེན་མང་བཀྱེ་བ། །དེ་དག་སྣ་ཚོགས་མཛེས་པར་རྣམ་པར་འབར། །ཕྱོགས་རྣམས་ཀུན་ཏུ་སྐར་ཁུང་

མཛེས་པར་བརྒྱན། །རྟ་བབས་མདའ་ཡབ་སྣ་ཚོགས་མང་པོས་བརྒྱན། །དྲི་མེད་འོད་ཟེར་ཀུན་ནས་སྣང་བ་ཡི། །སངས་རྒྱས་ཕོ་བྲང་རྣམ་པ་བསམ་ཡས་ཏེ། །གཞལ་མེད་ཁང་མང་ཐམས་ཅད་དེ་ལ་སྣང་། །དེ་དག་ཀུན་ནའང་རྒྱལ་བ་བཞུགས་ཤིང་མཛེས། །ཕྱོགས་
རྣམས་ཀུན་ན་འཁོར་རྣམས་ཇི་སྙེད་པ། །རྒྱལ་བའི་ཕོ་བྲང་འདིར་ནི་ཀུན་བཞུགས་ཀྱང་། །མཐའ་མེད་དབུས་མྱེད་མུ་ཡང་དེ་བཞིན་དུ། །རང་བྱུང་སངས་རྒྱས་ཕོ་བྲང་དེ་ན་བཞུགས། །དེ་ནས་བྱང་ཆུབ་སེམས་དཔའ་ཡོན་ཏན་རིན་པོ་ཆེ་བསམ་གྱིས་མི་ཁྱབ་པ་ཡེ་ཤེས་རྒྱ་མཚོ་
དཔལ་གྱིས། སངས་རྒྱས་ཀྱི་མཐུས། འཁོར་གྱི་དཀྱིལ་འཁོར་རྒྱ་མཚོ་ཡོད་པ་དེ་དག་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་ཞིང་རྡུལ་ཤིན་ཏུ་ཕྲ་སྙེད་ཀྱི། །བསོད་ནམས་རྒྱ་མཚོ་རྣམ་པར་རབ་སྦྱངས་ཏེ། །
སངས་རྒྱས་རྫུ་འཕྲུལ་སྨོན་ལམ་ཡང་དག་བྱུང་། །སྙིང་པོ་བྱང་ཆུབ་དྲི་མེད་རྣམ་པར་མཛེས། །སྤོས་ཞིམ་ཐམས་ཅད་རྩ་བ་ཡང་དག་རྒྱུ། །ཡིད་བཞིན་ནོར་མཆོག་རྒྱལ་པོས་ཀུན་ནས་བརྒྱན། །རྡོ་རྗེ་ཕྱེ་མའི་ནོར་བུའི་རྒྱལ་པོ་བྲིས། །ཤིང་སྡོང་རྩ་བ་རིན་ཆེན་ཀུན་
ལས་བྱས། །རྡོ་རྗེ་ཕྱེ་མའི་ནོར་བུ་འཁོར་ལོ་འབྱུང་། །ལྷུན་རྣམས་ཐམས་ཅད་རིན་ཆེན་རྒྱན་གྱིས་བརྒྱན། །ཡལ་ག་སྟུག་པོ་སྤྲིན་ལྟར་ཀུན་ནས་འཁྱིལ། །སྙིང་པོ་བྱང་ཆུབ་དེ་ན་རྒྱལ་བ་མཛེས། །ཡལ་ག་དོག་པ་ཀུན་ནས་མངོན་པ་སྟེ། །འཁོར་རྣམས་སྣུམ་
འཇམ་ཕྱོགས་རྣམས་ཀུན་ཏུ་འཕགས། །མེ་ཏོག་འབྲས་བུ་རྒྱུན་རྣམས་ཀུན་ཀྱང་འགྱེད། །སྙིང་པོ་བྱང་ཆུབ་རྒྱ་ཆེན་བསམ་མྱི་ཁྱབ། །འོད་རྣམས་བཀྱེ་བ་ཕྱོགས་སུ་རྣམ་པར་མཛེས། །དྲི་མ་མེད་པའི་འོད་འབར་ཟད་མི་ཤེས། །ཡལ་གའི་སྒོ་ནས་སྤྲིན་ཀུན་ཆར་
ཡང་འབེབས། །སྙིང་པོ་བྱང་ཆུབ་སྨོན་ལམ་ཡངས་པ་བྱུང་། །མེ་ཏོག་ནོར་དང་རིན་ཆེན་མི་ཟད་ནོར། །མུ་ཏིག་ནོར་བུ་ཕྱོགས་རྣམས་ཀུན་ནས་བརྒྱུས། །ཕྱེ་མ་ནོར་གྱི་གནས་ཀྱི་སྤྲིན་འགྱེད་དེ། །སྙིང་པོ་བྱང་ཆུབ་ཕྱོགས་རྣམས་ཀུན་ཏུ་འབྱིན། །བདེ་གཤེགས་

སྙིང་པོ་བྱང་ཆུབ་འདི་ལ་ལྟོས། །པདྨོའི་དྲ་བ་ནོར་བུ་དྲི་མེད་མང་། །རིན་ཆེན་འོད་ཟེར་དཀྱིལ་འཁོར་ཀུན་ནས་འཕྲོ། །དྲིལ་བུའི་དྲ་བ་སྤྲིན་གྱི་སྒྲ་དབྱངས་འབྱིན། །ཕྱོགས་བཅུའི་ཤིང་བཟང་གཟུགས་རྣམས་གང་ཡོད་པ། །འབྱམ་ཀླས་
ཞིང་གི་མ་ལུས་ཐམས་ཅད་དག །བྱང་ཆུབ་ཤིང་ལ་དེ་དག་ཀུན་ནས་སྣང་། །དེ་དྲུང་སངས་རྒྱས་དྲི་མེད་རྣམ་པར་མཛེས། །ཡལ་ག་ཀུན་ནས་རིན་ཆེན་མི་ཟད་ནོར། །བྱང་ཆུབ་སེམས་དཔའ་དག་ཀྱང་རྟག་འབྱུང་ཞིང་། །བསོད་ནམས་རྒྱ་ཆེན་དཀྱིལ་འཁོར་ཆར་
ཕབ་སྟེ། །ཕྱོགས་བཅུར་རྒྱལ་བ་མཆོད་ཕྱིར་དེ་དག་འདོང་། །དེ་བཞིན་གཤེགས་པ་སྔན་ཅད་ཅིར་གྱུར་དང་། །བྱང་ཆུབ་སྤྱོད་ལས་བྱུང་བ་འདི་དག་ལྟོས། །ཡལ་ག་ཀུན་ནས་རིན་ཆེན་ནོར་མི་ཟད། །སངས་རྒྱས་ཡུལ་ཀུན་བསམ་གྱིས་མྱི་ཁྱབ་པོ། །དེ་ནས་
བྱང་ཆུབ་སེམས་དཔའ་མྱིག་བརྒྱ་པ་པད་མོ་སྣ་ཚོགས་ཀྱི་གཙུག་ཕུད་ཀྱིས། །སངས་རྒྱས་ཀྱི་མཐུས་འཁོར་རྒྱ་མཚོ་ཡོད་པ་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དུས་གསུམ་གཤེགས་པའི་རྒྱལ་བའི་རྣམ་འཕྲུལ་
བ། །དེ་དག་རིན་ཆེན་སྒོ་ནས་ཀུན་ཀྱང་གྲགས། །དེ་ནི་མཐའ་དང་དབུས་ཡང་མྱེད་པ་སྟེ། །སྙིང་པོ་བྱང་ཆུབ་འདི་ལ་ཀུན་སྣང་ངོ་། །མེ་ཏོག་མང་པོའི་ཕྲེང་བ་སྦྱངས་བཀྱེ་ཞིང་། །འོད་ཟེར་སྤྲིན་གྱིས་ཕྱོགས་རྣམས་ཀུན་བཀང་སྟེ། །བྱང་ཆུབ་ཤིང་ལ་གནས་
པའི་ལྷ་ཡི་རྣམས། །སངས་རྒྱས་བལྟ་ཞིང་རྟག་ཏུ་མཆོད་པ་བྱེད། །སྤོས་ཀྱི་རྒྱལ་མཚན་ནོར་བུ་སྣ་ཚོགས་འབར། །སྤོས་ཀྱི་འོད་འཕྲོ་བདུག་སྤོས་རྟག་ཏུ་འབྱུང་། །འཁོར་གྱི་རྒྱ་མཚོ་ཀུན་ལ་ཁྱབ་པར་ཞིམ། །ཤིང་གི་རྒྱལ་པོ་དེ་ཕྱིར་ཕྱོགས་སུ་མཛེས། །
པདྨོ་འབྲུལ་བ་སྟུག་ཅིང་གསེར་མདོག་འདྲ། །རྒྱལ་བའི་སྤྲིན་སྒྲ་རྟག་པར་རབ་ཏུ་འགྱེད། །ཕྱོགས་བཅུའི་ཞིང་རྣམས་མ་ལུས་ཁྱབ་བྱས་ཤིང་། །སེམས་ཅན་རྣམས་ཀྱི་ཉོན་མོངས་གདུང་བ་སེལ། །རྒྱལ་བའི་འཁོར་ནི་ཚད་མེད་རྒྱ་ཆེ་སྟེ། །ཕྱོགས་རྣམས་ཀུན་

ནས་སྙིང་པོ་བྱང་ཆུབ་ལ། །གཟུགས་བརྙན་སྣང་ཞིང་དྲི་མེད་འོད་མཆོག་འགྱེད། །བྱང་ཆུབ་ཤིང་གི་རྣམ་འཕྲུལ་འདི་དག་ལྟོས། །སྨོན་ལམ་སྒྲ་དང་དབྱངས་ཀྱི་མར་མེ་རྣམས། །རིན་ཆེན་སྣ་ཚོགས་ཡལ་ག་ཀུན་ནས་འབར། །སྲིད་པ་རྒྱ་མཚོ་ཀུན་ན་སྔན་ཅད་
དུ། །རྒྱལ་བའི་སྤྱོད་པ་ཇི་ལྟར་བྱུང་བ་སྟོན། །བྱང་ཆུབ་ལྷ་རྣམས་ཞིང་གི་རྡུལ་སྙེད་དོ། །དེ་དག་ཐམས་ཅད་སྙིང་པོ་བྱང་ཆུབ་གནས། །ཐུབ་པའི་བྱང་ཆུབ་ཤིང་ལ་སྐད་ཅིག་ཅིང་། །རྣམ་ཐར་གཞན་དང་གཞན་མང་དེ་དག་སྟོན། །རང་བྱུང་སྤྱད་པ་ཐམས་ཅད་སྤྱོད་
པའི་ཚེ། །སྔོན་ཆད་དེ་བཞིན་གཤེགས་པ་གང་མཆོད་པ། །དེ་དག་མཚན་བཅས་སྔོན་གྱི་སྦྱོར་བཅས་པ། །ཐམས་ཅད་རིན་ཆེན་སྒོ་ནས་རབ་ཏུ་འབྱུང་། །ཕྱོགས་བཅུའི་སེམས་ཅན་ཇི་སྙེད་སྣོད་གྱུར་པ། །དེ་དག་ཐམས་ཅད་འདི་ལས་སྒྲ་འབྱུང་སྟེ། །དེ་དག་
ཅིས་འདུལ་རྣམ་དག་ཅི་འདྲ་བའང་། །སྙིང་པོ་བྱང་ཆུབ་འདི་ལས་ཀུན་བརྗོད་དོ། །བྱང་ཆུབ་ཤིང་རྣམས་མཐའ་ཡས་ཕྱོགས་ཀུན་ན། །བསམ་གྱིས་མྱི་ཁྱབ་རྒྱན་གྱི་སྤྲིན་ཅན་དག །མཐའ་ཡས་སྣ་ཚོགས་རྒྱན་པ་ཐམས་ཅད་ཀྱང་། །སྔན་ཅད་དེ་བཞིན་
གཤེགས་པས་ཡོངས་སྦྱངས་པའོ། །དེ་ནས་བྱང་ཆུབ་སེམས་དཔའ་གསེར་གྱི་འོད་འཕྲོ་གཟི་བརྗིད་དཀྱིལ་འཁོར་གྱི་འོད་ཀྱིས་སངས་རྒྱས་ཀྱི་མཐུས། འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །
སྲིད་པའི་རྒྱ་མཚོར་བྱང་ཆུབ་སྤྱོད་མཛད་ཚེ། །མོས་པའི་དཀྱིལ་འཁོར་ཡོངས་སུ་སྨོན་དག་ཅིང་། །གནས་དང་གནས་མིན་སྟོབས་རྣམས་ཐུགས་ཆུད་པའི། །བདེ་གཤེགས་སྟོབས་རྣམས་རྣམ་པར་དག་པ་མཐོང་། །བསྐལ་པ་ཀུན་ཏུ་རྒྱ་མཚོའི་ལས་སྦྱངས་ཏེ། །
མཉམ་ཉིད་ཆོས་བསྒོམས་ཇི་ལྟར་བསྒྲུབས་པ་རྣམས། །སངས་རྒྱས་འོད་ལས་དེ་བཞིན་ཕྱོགས་བཀང་ཞིང་། །ལས་རྣམས་རྒྱ་མཚོ་དེ་བཞིན་རབ་ཏུ་བརྗོད། །སྣ་ཚོགས་ཐབས་ཀྱིས་འབྱམ་ཀླས་སྟོབས་སྤྱོད་ཚེ། །བསྐལ་པ་སྔ་མར་འགྲོ་བའི་དབང་པོ་བཞིན། །

ཡོངས་སུ་སྨིན་བྱས་དེ་བས་འཁོར་ཀུན་ཀྱང་། །སེམས་དག་སངས་རྒྱས་དབང་པོའི་སྟོབས་ལ་འཇུག །འཇིག་རྟེན་ཀུན་གྱི་མོས་པ་སྣ་ཚོགས་དང་། །བསམ་པ་ཇི་བཞིན་སྦྱོར་བ་རྣམ་སྤྱོད་པ། །དེ་དག་ཇི་བཞིན་རྒྱལ་བ་ཆོས་སྟོན་ཏེ། །རང་བྱུང་
མོས་པ་མཁྱེན་པའི་སྟོབས་སྟོན་ཏོ། །ཕྱོགས་རྣམས་མ་ལུས་ཞིང་རྣམས་རྒྱ་མཚོ་དང་། །འབྱམ་ཀླས་སེམས་ཅན་ཁམས་དང་ཆོས་ཀྱི་ཁམས། །ནམ་མཁའི་ཁམས་རྣམས་མཉམ་ཉིད་མཁྱེན་མི་རྟོག །རང་བྱུང་སྤུ་རྩེར་ཁམས་མཁྱེན་སྟོབས་ཀྱང་བསྟོན། །བདེ་
གཤེགས་ཡེ་ཤེས་རྒྱ་ཆེན་ཀུན་ཏུ་འགྲོ། །སྐད་ཅིག་གཅིག་གིས་དུས་གསུམ་མ་ལུས་འགེངས། །ཕྱོགས་དང་ཞིང་དང་བསྐལ་པ་འགྲོ་བཀང་ཞིང་། །སེམས་ཅན་ཀུན་ལ་སྟོབས་འཇུག་མངོན་པར་བསྟན། །བསམ་གཏན་རྣམ་ཐར་སྟོབས་མཐའ་དབུས་མེད་པ། །
ཏིང་འཛིན་རྒྱ་མཚོའི་ཚུལ་ནི་འགྲོ་ཀུན་སྙེད། །ཐམས་ཅད་རྒྱལ་བའི་སྐུ་ལ་བསྟན་པས་ན། །སེམས་ཅན་བསམ་པའི་ཆོས་ཀྱི་ཉོན་མོངས་སེལ། །སངས་རྒྱས་ཡེ་ཤེས་དུས་གསུམ་སྒྲིབ་པ་མེད། །སྐད་ཅིག་ཀུན་ལ་དུས་གསུམ་སྤུ་རྩེར་བསྟན། །ཞིང་དང་
སེམས་ཅན་སངས་རྒྱས་དེ་བཞིན་ཆོས། །དེ་ལྟར་རྒྱལ་བས་རྗེས་སུ་དྲན་སྟོབས་བསྟན། །ཐུབ་པའི་སྤྱན་ནི་ནམ་མཁའ་མཉམ་པ་སྟེ། །དེ་ནས་ཆོས་དབྱིངས་མ་ལུས་གསལ་བར་གཟིགས། །ཐམས་ཅད་ཚུལ་གྱིས་ཆགས་མེད་གཞལ་ཡས་ཁང་། །
བརྙེས་པས་ཡེ་ཤེས་སྤྱན་ནི་རྣམ་མང་བསྟན། །འཇིག་རྟེན་ཀུན་གྱི་སྦྱོར་མང་ཇི་སྙེད་དང་། །འགྲོ་བའི་བག་ཆགས་བག་ཉལ་མ་ལུས་པར། །ཐབས་སྒོ་ཀུན་ནས་ཉོན་མོངས་ཞི་མཛད་ཅིང་། །རྒྱལ་བ་འཇིག་རྟེན་གང་བར་ཀུན་ནས་བྱུང་། །དེ་ནས་བྱང་
ཆུབ་སེམས་དཔའ་ཆོས་ཀྱི་དབྱིངས་ཀྱི་དབྱངས་ཀུན་ནས་སྒྲོག་པས། སངས་རྒྱས་ཀྱི་མཐུས་འཁོར་རྒྱ་མཚོ་ཡོད་པ་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྒྱ་ཆེན་སངས་རྒྱས་བྱིན་རླབས་ཕྱོགས་ཀུན་

ཏུ། །སངས་རྒྱས་སྟོན་ཀྱང་རྟོག་པ་མི་མངའ་སྟེ། །ཕ་རོལ་ཕྱིན་པ་རྒྱ་ཆེན་ཡོངས་བཀང་བ། །བྱང་ཆུབ་སྤྱོད་པ་རྒྱ་ཆེན་དེ་དག་སྣང་། །འགྲོ་བ་རྣམས་ལ་ཐུགས་རྗེ་ཆེ་བསྐྱེད་ཅིང་། །སྦྱིན་པའི་མཐར་ཕྱིན་སྔོན་ཆད་སྦྱངས་པས་ན། །དེ་ཕྱིར་ཐུབ་པའི་སྐུ་ནི་མཚན་གྱིས་
རྒྱས། །འགྲོ་བ་ཀུན་གྱིས་བལྟ་ཞིང་དགའ་བ་བསྐྱེད། །བསྐལ་པ་རྒྱ་མཚོ་མང་པོ་མཐའ་ཡས་སྟོན། །ཚུལ་ཁྲིམས་ཕ་རོལ་ཕྱིན་པ་ཡོངས་སྦྱངས་པས། །དེ་ཕྱིར་བསྐལ་པ་ཕྱོགས་སུ་དྲི་མེད་ཅིང་། །ཤིན་ཏུ་འཕགས་པར་འཇིག་རྟེན་སྡུག་བསྔལ་སེལ། །མ་
ལོག་མཉམ་པ་ཉིད་ལ་དད་བསྐྱེད་དེ། །སྔོན་ཆད་བཟོད་པའི་དཀྱིལ་འཁོར་རྣམ་སྦྱངས་པས། །འགྲོ་དང་མཚུངས་མཉམ་ཡོན་ཏན་ཀུན་སྟོན་ཏོ། །དེ་བས་ཕྱོགས་སུ་འོད་རྣམས་ཤིན་ཏུ་འཕྲོ། །བསྐལ་པ་རྒྱ་མཚོ་མང་པོར་སྔོན་སྤྱོད་ཚེ། །འགྲོ་བ་རྣམས་ཀྱི་སྒྲིབ་
པ་འཐིབས་པོ་བསལ། །དེ་ཕྱིར་ཕྱོགས་བཅུའི་འགྲོ་བ་ཀུན་བཀང་སྟེ། །ཞིང་རབ་དྲུང་ན་རྒྱལ་བ་མངོན་པར་མཛེས། །བསམ་གཏན་ཡན་ལག་རྒྱ་མཚོ་སྤྱོད་པའི་ཚེ། །བསྐལ་པ་ཡངས་པར་རྒྱལ་བ་རབ་ཏུ་སྤྱད། །དེ་བས་འགྲོ་བའི་གཞལ་མེད་དགའ་བ་བསྐྱེད།
ཉོན་མོངས་དྲི་མས་བསྒྲིབས་པ་ཀུན་ཀྱང་སེལ། །སངས་རྒྱས་རྒྱ་མཚོའི་དྲུང་དུ་སྔོན་སྤྱད་ཅིང་། །ཤེས་རབ་མཐར་ཕྱིན་རྒྱལ་བས་སྔོན་བཀང་སྟེ། །འགྲོ་བའི་གཏི་མུག་མུན་པ་ཡོངས་སུ་བསལ། །དེ་བས་རྒྱལ་བ་ཀུན་ཏུ་རྣམ་པར་མཛེས། །འགྲོ་བ་ཀུན་
མཉམ་ཐབས་སྒོ་ཐམས་ཅད་ཀྱིས། །ཡང་དག་བྱུང་ཞིང་འགྲོ་བ་རྣམ་སྦྱངས་པས། །ཕྱོགས་རྣམས་ཀུན་ན་ཀུན་ལ་མངོན་པར་བཞུགས། །ཕྱི་མའི་བསྐལ་པར་འགྲོ་བ་མངོན་དུ་ལྟ། །སྨོན་ལམ་ཕ་རོལ་ཕྱིན་པ་རབ་སྤྱོད་ཚེ། །བསྐལ་པ་རྒྱ་མཚོ་ཤིན་ཏུ་
རྒྱ་ཆེ་ཞིང་། །ཕྱི་མའི་བསྐལ་པ་འགྲོ་བའི་སྤྲིན་མཉམ་པར། །སྤྱད་པས་དེ་ཕྱིར་འགྲོ་བ་ཀུན་ན་མཛེས། །རྒྱལ་བས་ཆོས་ཀུན་སྟོབས་ཀྱི་མཐར་ཕྱིན་པ། །བསྐལ་པ་གཞལ་ཡས་མང་པོར་ཡོངས་སུ་སྦྱངས། །དེ་ཕྱིར་རང་བྱུང་སྟོབས་ཀྱི་ཕ་རོལ་ཕྱིན། །

ཕྱོགས་ཀྱི་ཞིང་རྣམས་ཀུན་ན་དེ་ཕྱིར་འཕགས། །ཐམས་ཅད་མཁྱེན་ཉིད་ནམ་མཁའ་མཚུངས་མཉམ་པའི། །ཡེ་ཤེས་ཀུན་གྱི་སྒོ་ནས་སྔོན་སྦྱངས་པས། །དེ་ཕྱིར་ཆགས་མེད་ཡེ་ཤེས་ཕ་རོལ་ཕྱིན། །ཕྱོགས་བཅུ་ཀུན་ན་རྒྱལ་བ་མངོན་པར་
མཛེས། །དེ་ནས་བྱང་ཆུབ་སེམས་དཔའ་སྤྲིན་ཡིད་དུ་འོང་བ་དྲི་མ་མེད་པའི་ཟླ་བས་སངས་རྒྱས་ཀྱི་མཐུས། འཁོར་རྒྱ་མཚོ་ཡོད་པ་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་རྫུ་འཕྲུལ་ཡུལ་ནི་ཕྱོགས་རྣམས་ཀྱི། །
འགྲོ་བའི་རྒྱུད་དབྱིངས་ནམ་མཁའ་མཉམ་པར་སྣང་། །ས་རྣམས་ཡངས་པ་ཇི་ལྟར་སྔོན་བསྐྱེད་པ། །དེ་བཞིན་ཀུན་ཀྱང་རིན་ཆེན་སྒོ་ནས་བརྗོད། །དང་པོའི་ས་ནི་དགའ་བའི་ཤུགས་ཀྱི་ཡུལ། །ཆོས་དབྱིངས་ཀུན་གྱི་བདེ་གཤེགས་རྣམས་མཐོང་ཞིང་། །གཞལ་མེད་
བསྐལ་པར་དྲི་མེད་ཡོངས་གསུངས་པས། །ཆོས་དབྱིངས་ཡངས་ལ་ཡེ་ཤེས་རབ་ཏུ་བྱུང་། །ཐམས་ཅད་ཆོས་ལ་དྲི་མྱེད་ས་གཉིས་ཏེ། །བསྐལ་པ་རྒྱ་མཚོ་མང་པོར་རྣམ་སྤྱད་ཅིང་། །རྒྱལ་བ་ཚད་མེད་རྒྱ་མཚོ་མཆོད་བྱས་ནས། །འགྲོ་བ་ཚད་མེད་དྲི་མེད་སྦྱངས་
པས་བྱུང་། །བསོད་ནམས་དཀྱིལ་འཁོར་འོད་ནི་ས་གསུམ་སྟེ། །སྙིང་པོ་བཟོད་པའི་དཀྱིལ་འཁོར་ལྷག་མཐོང་བརྟེན། །གང་དུ་དེ་སྐྱེས་རིན་ཆེན་སྒོ་དག་ནས། །ཆོས་ཀྱི་སྤྲིན་ནི་རྒྱ་ཆེན་རབ་ཏུ་ཐོས། །འོད་འཕྲོ་རྒྱ་མཚོ་ལྡན་པ་གཞལ་མེད་ས། །མཐུ་ཡི་འཁོར་འོད་
སྙིང་པོ་སྙིང་རྗེ་སྟེ། །ཞིང་རྣམས་ཀུན་ཏུ་སྒྲིབ་དང་མཉམ་པའི་ལུས། །འགྲོ་བའི་ཉོན་མོངས་ཀུན་ནས་རྣམ་སྦྱངས་པའོ། །དགའ་རྒྱལ་སྙིང་པོ་མཉམ་དབྱིངས་མཉམ་ཉིད་དེ། །ཞིང་རྣམས་ཀུན་ཏུ་འགྲོ་ཞིང་ཞི་ལ་གཞོལ། །ས་རྣམས་ཆོས་ཡུལ་ཀུན་ནས་རབ་ཏུ་
སྐྱེས། །དེ་ཡང་རྣམ་དག་ཇི་བཞིན་རྒྱལ་བས་བསྟན། །ཤེས་རབ་རྒྱ་མཚོ་ཡངས་པའི་སྤྲིན་ལ་སྤྱོད། །འབྱམ་ཀླས་ཆོས་ཀྱི་མཐར་ཐུག་རྣམ་པ་ཀུན། །ཞིང་རྣམས་ཀུན་ལ་མངོན་སུམ་ནམ་མཁའ་འདྲ། །དེ་འབྱུང་བྱང་ཆུབ་ཤིང་ཆེན་འདི་ལས་གྲག །ཆོས་དབྱིངས་

མཐའ་དང་མཉམ་པའི་ལུས་ཅན་ཏེ། །འགྲོ་བ་ཀུན་འགེངས་འགྲོ་བ་ཀུན་སྣང་བྱེད། །འབྱམ་ཀླས་ཐབས་ཀྱི་སྒོ་ནས་རྣམ་པར་དག །རིང་དུ་སོང་མཆོག་དེ་ནི་རྒྱལ་བས་བསྟན། །ཐམས་ཅད་ཆོས་དང་སྨོན་ལམ་སྤྱོད་མང་དང་། །ཞིང་རྣམས་རྒྱ་མཚོའི་དབྱིངས་ཀྱང་མཉམ་
རྟོགས་པས། །བསྐལ་པ་ཀུན་ཏུ་འགྲོ་མཆོག་མི་གཡོ་སྟེ། །གཞལ་མེད་ས་དེའི་སྤྲིན་ཀྱང་རབ་ཏུ་སྒྲོག །ཚད་མེད་ཡུལ་ཅན་སྟོབས་ཀྱིས་རབ་ཏུ་སྣང་། །རྫུ་འཕྲུལ་ཆོས་ཀྱིས་འགྲོ་ཞིང་སྟོབས་ལ་འཇུག །འདི་ནི་རྡུལ་མེད་དགེ་བའི་བློ་གྲོས་ས། །བསྐལ་པ་རྒྱ་
མཚོར་བྱང་ཆུབ་ཤིང་ལས་བརྗོད། །ཆོས་ཀྱི་སྤྲིན་ནི་རྒྱ་ཆེན་ས་བཅུ་སྟེ། །དུས་རྣམས་ཀུན་འགེངས་ནམ་མཁའི་རང་བཞིན་འདྲ། །སངས་རྒྱས་ཡུལ་གྱི་སྒྲ་དང་དབྱངས་ཀུན་ཏུ། །རྒྱལ་བའི་བྱིན་གྱིས་འདི་ལས་རབ་ཏུ་གྲག །དེ་ནས་བྱང་ཆུབ་སེམས་དཔའ་རྣམ་
པར་གནོན་པ་གཏི་མུག་མེད་པའི་འོད་ཟེར་གྱི་རྒྱལ་མཚན་གྱིས་སངས་རྒྱས་ཀྱི་མཐུས་ཕྱོགས་བཅུར་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྣམ་པ་དུ་མར་འཁོར་རྣམས་གནས་པ་ནི། །དད་པ་སྣ་ཚོགས་ཡོངས་སུ་དག་པའི་སེམས། །
རྒྱན་དང་ཡུལ་རྣམས་ཀུན་ལ་རབ་ཏུ་ཞུགས། །དེ་དག་སངས་རྒྱས་ཡེ་ཤེས་འཇུག་པར་འགྱུར། །ཕན་ཚུན་སྨོན་ལམ་རྣམ་དག་སྤྱོད་ཡུལ་ཏེ། །དག་པ་མཐའ་ཡས་བྱ་བ་རབ་ཏུ་བྱས། །དེ་བཞིན་གཤེགས་པའི་རྣམ་འཕྲུལ་ཐམས་ཅད་ཀྱང་། །གཞན་དང་གཞན་
གྱི་སྒོ་ནས་རབ་ཏུ་མཐོང་། །བདེ་གཤེགས་ཆོས་ཀྱི་སྐུ་ལ་ཞུགས་པ་དག །ལ་ལས་རྒྱལ་བའི་ཆོས་སྐུ་དེ་ཉིད་ལ། །ཀུན་ཏུ་སྤྲིན་འདྲ་གཞལ་དུ་མེད་པ་ཡི། །མཐའ་ཡས་ཆོས་ཀྱི་རང་བཞིན་ཆོས་ཉིད་མཐོང་། །ལ་ལས་རྒྱལ་བའི་གཟུགས་སྐུ་དེ་ཉིད་ལ། །
ཕྱོགས་བཅུ་ཀུན་ཏུ་རྣམ་པར་འཕྲུལ་མཛད་ཅིང་། །ཡོན་ཏན་མཐའ་ཡས་འོད་སྤྲིན་རབ་འབར་བ། །འགྲོ་བ་ངང་ཚུལ་སྤྲིན་དུ་གྱུར་པར་མཐོང་། །ལ་ལ་རྒྱལ་བའི་ཡེ་ཤེས་ཆགས་མེད་འཇུག །དུས་གསུམ་མཉམ་ཉིད་མཁའ་དང་འདྲ་བའི་སྐུ། །འགྲོ་བ་ཀུན་

གྱི་བསམ་པའི་ཚུལ་འབྱུང་བའི། །སངས་རྒྱས་སྟོབས་ལ་རབ་ཏུ་འཇུག་པ་མཐོང་། །སངས་རྒྱས་གསུང་ནི་ཐོགས་པ་མེད་འབྱུང་སྟེ། །ཕྱོགས་ཀུན་ཞིང་རྣམས་མ་ལུས་རྒྱས་འགྱུར་ཞིང་། །འགྲོ་བ་སྣོད་བཞིན་བསྐུལ་བར་བྱེད་པ་ཡི། །དེ་བཞིན་
གཤེགས་པའི་གསུང་ལ་ལ་ལ་འཇུག །ལ་ལ་སངས་རྒྱས་སྣང་བ་སྣ་ཚོགས་འཇུག །སྣ་ཚོགས་སྣང་བས་འགྲོ་བ་ཀུན་བཀང་ཞིང་། །རྒྱལ་བའི་རྫུ་འཕྲུལ་ཀུན་ཏུ་སྣང་མཛད་པའི། །སངས་རྒྱས་འོད་ནི་ལ་ལས་དེར་ཡང་མཐོང་། །བ་སྤུའི་སྒོ་ནས་འོད་ཟེར་རབ་བཀྱེ་བའི། །
འོད་ཟེར་རྒྱ་མཚོའི་སྤྲིན་ལ་ལ་ལ་འཇུག །སྔན་ཅད་རྒྱལ་བའི་སྤྱོད་པ་བསྟན་པ་ལ། །ལ་ལ་དགའ་ཞིང་རྒྱལ་བ་ཤེས་པར་བྱེད། །ལ་ལས་བསོད་ནམས་སྣ་ཚོགས་མཚན་གྱི་རྣམས། །བདེ་གཤེགས་བསོད་ནམས་འབྱུང་བ་ཇི་བཞིན་མཐོང་། །ཕ་རོལ་ཕྱིན་པ་རྒྱ་
མཚོ་སྦྱོང་བའི་ཚེ། །ཇི་ལྟར་དག་གྱུར་མཚན་ཀྱང་ལ་ལས་མཐོང་། །སྒོ་རྣམས་ཀུན་ནས་རྒྱལ་བ་ཚད་མྱེད་དེ། །མཐའ་དང་དབུས་མེད་ཆོས་ཀྱི་དབྱིངས་བཀང་ཞིང་། །སངས་རྒྱས་བྱིན་རླབས་ཀུན་རབ་བརྗོད་པ་ཀུན། །རྣམ་འཕྲུལ་སངས་རྒྱས་ཡུལ་ནི་ལ་ལས་
མཐོང་། །དེ་ནས་སངས་རྒྱས་ཀྱི་བྱིན་གྱི་རླབས་ཀྱིས། འཇིག་རྟེན་གྱི་ཁམས་མེ་ཏོག་གི་རྒྱན་གྱིས་བརྒྱན་པའི་གཞི་དང་སྙིང་པོ་རྒྱ་མཚོ་ཐམས་ཅད་རྣམ་པ་དྲུག་ཏུ་གཡོས་སོ། །རབ་ཏུ་གཡོས་སོ། །ཀུན་ཏུ་གཡོས་སོ། །འགུལ་ཏོ་རབ་ཏུ་འགུལ་ཏོ། །
ཀུན་ཏུ་འགུལ་ཏོ། །ལྡེག་གོ་རབ་ཏུ་ལྡེག་གོ །ཀུན་ཏུ་ལྡེག་གོ །ཆེམ་ཆེམ་རབ་ཏུ་ཆེམ་ཆེམ། ཀུན་ཏུ་ཆེམ་ཆེམ་མོ། །འུར་འུར་རབ་ཏུ་འུར་འུར། ཀུན་ཏུ་འུར་འུར་རོ། །ཤིག་ཤིག་རབ་ཏུ་ཤིག་ཤིག །ཀུན་ཏུ་ཤིག་ཤིག་གོ །འཇིག་རྟེན་གྱི་དབང་པོ་དེ་དག་ཐམས་
ཅད་རེ་རེས་ཀྱང་མཆོད་པ་མངོན་པར་བསྒྲུབ་པའི་སྤྲིན་བསམ་གྱིས་མི་ཁྱབ་པའི་ཆར་དེ་བཞིན་གཤེགས་པའི་འཁོར་གྱི་དཀྱིལ་འཁོར་དུ་མངོན་པར་རབ་ཏུ་ཕབ་པོ། །འདི་ལྟར་སྤོས་ཀྱི་མེ་ཏོག་སྣ་ཚོགས་ཀྱི་སྤྲིན་གྱི་ཆར་ཐམས་ཅད་རབ་ཏུ་ཕབ་པོ། །རིན་པོ་ཆེ་སྣ་ཚོགས་

ཐམས་ཅད་ཀྱི་སྤྲིན་དང་། རིན་པོ་ཆེའི་འོད་འཕྲོ་བའི་པདྨོའི་དྲ་བ་ཐམས་ཅད་ཀྱི་སྤྲིན་དང་། ནོར་བུ་རིན་པོ་ཆེའི་འོད་ཀྱི་དཀྱིལ་འཁོར་ཁ་དོག་མཐའ་ཡས་པའི་སྤྲིན་དང་། རིན་པོ་ཆེ་ཁ་དོག་སྣ་ཚོགས་དང་། མུ་ཏིག་ཐམས་ཅད་ཀྱི་སྤྲིན་དང་། སྤོས་དང་ཙནྡན་དང་། རིན་པོ་ཆེ་
ཐམས་ཅད་ཀྱི་སྤྲིན་དང་། རིན་པོ་ཆེའི་གདུགས་ཐམས་ཅད་ཀྱི་སྤྲིན་དང་། ནོར་བུའི་རྒྱལ་པོའི་སྒྲ་དབྱངས་བཟང་པོ་ཡིད་དུ་འོང་བའི་སྤྲིན་དང་། ནོར་བུའི་ཉི་མའི་འོད་ཟེར་གྱི་ཕྲེང་བ་མང་པོའི་སྤྲིན་དང་། རིན་པོ་ཆེའི་འོད་ཟེར་གྱི་མཛོད་ཐམས་ཅད་ཀྱི་སྤྲིན་དང་། རང་རང་གི་
ལུས་ལས་རྒྱན་ཐམས་ཅད་འཕྱང་བའི་སྤྲིན་དང་། དེ་ལྟ་བུ་དག་ལ་སྩོགས་པ་འཇིག་རྟེན་གྱི་དབང་པོ་རེ་རེས་ཀྱང་མཆོད་པ་མངོན་པར་བསྒྲུབ་པའི་སྤྲིན་བསམ་གྱིས་མི་ཁྱབ་པའི་ཆར་དེ་བཞིན་གཤེགས་པའི་འཁོར་གྱི་དཀྱིལ་འཁོར་རྒྱ་མཚོ་ཐམས་ཅད་དུ་མངོན་པར་ཕབ་པོ། །
ཇི་ལྟར་འཇིག་རྟེན་གྱི་ཁམས་འདིར་འཇིག་རྟེན་གྱི་དབང་པོ་རྣམས་རབ་ཏུ་དགའ་བར་གྱུར་པ་དེ་བཞིན་དུ། གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པའི་འཇིག་རྟེན་གྱི་ཁམས་རྒྱ་མཚོའི་འཇིག་རྟེན་གྱི་དབང་པོ་རྣམས་རེ་རེས་ཀྱང་མཆོད་པ་མངོན་པར་བསྒྲུབ་པའི་སྤྲིན་གྱི་ཆར་
དེ་བཞིན་གཤེགས་པའི་འཁོར་གྱི་དཀྱིལ་འཁོར་རྒྱ་མཚོ་དག་ཏུ་རབ་ཏུ་ཕབ་པར་གྱུར་ཏོ། །འཇིག་རྟེན་གྱི་ཁམས་ཐམས་ཅད་ན་ཡང་འཇིག་རྟེན་གྱི་དབང་པོ་རྣམས་མོས་པ་གཞན་དང་གཞན་དང་། དམིགས་པ་གཞན་དང་གཞན་དང་། །ཏིང་ངེ་འཛིན་གྱི་ཚུལ་གྱི་སྒོ་རྒྱ་མཚོ་
གཞན་དང་གཞན་དང་། ཚོགས་གཞན་དང་གཞན་དང་། ཡང་དག་པར་སྒྲུབ་པ་གཞན་དང་གཞན་དང་། དགའ་བའི་ཤུགས་ཀྱིས་སྤྱོད་པ་གཞན་དང་གཞན་དང་། ཕྱོགས་ཀྱི་ཚུལ་གཞན་དང་གཞན་དང་། ཆོས་ཀྱི་ཚུལ་ལ་འཇུག་པ་གཞན་དང་གཞན་དང་། དེ་བཞིན་
གཤེགས་པའི་ཡུལ་དང་། བྱིན་གྱི་རླབས་ལ་འཇུག་པ་གཞན་དང་གཞན་དང་། ཡུལ་དང་སྟོབས་ལ་འཇུག་པ་གཞན་དང་གཞན་དང་། རྣམ་པར་ཐར་པའི་ཚུལ་རྒྱ་མཚོའི་སྒོ་གཞན་དང་གཞན་གྱིས། དེ་བཞིན་གཤེགས་པའི་སྙིང་པོ་བྱང་ཆུབ་ལ་བཞུགས་པ་ལ་ཁོང་

དུ་ཆུད་པར་བྱེད་དོ། །འདི་ན་ཇི་ལྟ་བ་བཞིན་ཕྱོགས་བཅུའི་ཆོས་ཀྱི་དབྱིངས་རྒྱ་མཚོའི་ནམ་མཁའི་དབྱིངས་ཀྱི་མཐའ་ཀླས་པའི་འཇིག་རྟེན་གྱི་ཁམས་རྒྱ་མཚོ་ཐམས་ཅད་ན་ཡང་དེ་བཞིན་ནོ། །འཇིག་རྟེན་གྱི་དབང་པོ་ཐམས་ཅད་ཀྱི་རྒྱན་གྱི་ཚུལ་
རབ་ཏུ་བྱུང་བ་ཞེས་བྱ་བའི་སྟེ་ལེའུ་དང་པོའོ།། །།དེ་ནས་བྱང་ཆུབ་སེམས་དཔའ་དེ་དག་དང་། འཇིག་རྟེན་གྱི་དབང་པོ་དེ་དག་འདི་སྙམ་དུ་སེམས་པར་གྱུར་ཏེ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་ས་ནི་ཇི་ལྟ་བུ་ཞིག་
མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་ཡུལ་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་བྱིན་གྱི་རླབས་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་སྤྱོད་ཡུལ་ནི་
ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་སྟོབས་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་མྱི་བསྙེངས་པ་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་རྣམས་ལ་སངས་རྒྱས་ཀྱི་
ཏིང་ངེ་འཛིན་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་རྣམ་པར་འཕྲུལ་པ་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་མངའ་ཆེན་པོ་ནི་ཇི་ལྟ་བུ་ཞིག་མངའ། སངས་རྒྱས་བཅོམ་
ལྡན་འདས་རྣམས་ལ་སངས་རྒྱས་ཀྱི་མི་འཕྲོགས་པ་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་སྤྱན་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་སྙན་ནི་ཇི་ལྟ་བུ་ཞིག་མངའ། །སངས་རྒྱས་
བཅོམ་ལྡན་འདས་རྣམས་ལ་སངས་རྒྱས་ཀྱི་ཤངས་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་ལྗགས་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་སྐུ་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་

རྣམས་ལ་སངས་རྒྱས་ཀྱི་ཐུགས་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་འོད་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་འོད་ཟེར་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་གསུང་ནི་ཇི་ལྟ་བུ་
ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་ཡེ་ཤེས་ནི་ཇི་ལྟ་བུ་ཞིག་མངའ། ཕྱོགས་བཅུའི་འཇིག་རྟེན་གྱི་ཁམས་རྒྱ་མཚོ་དག་ཏུ་སངས་རྒྱས་བཅོམ་ལྡན་འདས་ཐམས་ཅད་བྱང་ཆུབ་སེམས་དཔའ་ཐམས་ཅད་ལ་སྨོན་ལམ་རྒྱ་མཚོ་ཐམས་ཅད་ནི་ཇི་ལྟ་བུ་ཞིག་ཏུ་
ཡོངས་སུ་སྟོན། བྱང་ཆུབ་སེམས་དཔའ་ཐམས་ཅད་ལ་རབ་ཏུ་འཇུག་པ་རྒྱ་མཚོ་ཐམས་ཅད་ནི་ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་ཐམས་ཅད་ལ་ཚོགས་རྒྱ་མཚོ་ཐམས་ཅད་ནི་ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་
ཐམས་ཅད་ལ་ཐེག་པ་རྒྱ་མཚོ་རྣམས་ནི་ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་ཐམས་ཅད་ལ་རབ་ཏུ་གནས་པ་རྒྱ་མཚོ་ཐམས་ཅད་ནི་ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་ཐམས་ཅད་ལ་སྤྱོད་པ་རྒྱ་མཚོ་རྣམས་ནི་ཇི་ལྟ་བུ་
ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་ཐམས་ཅད་ལ་འབྱུང་བ་རྒྱ་མཚོ་རྣམས་ནི་ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་ཐམས་ཅད་ལ་མངོན་པར་ཤེས་པ་རྒྱ་མཚོ་རྣམས་ནི་ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་
ཐམས་ཅད་ལ་ཕ་རོལ་ཏུ་ཕྱིན་པ་རྒྱ་མཚོ་རྣམས་ནི་ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་ཐམས་ཅད་ལ་ས་རྒྱ་མཚོ་རྣམས་ནི་ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་ཐམས་ཅད་ལ་སྨོན་ལམ་རྒྱ་མཚོ་རྣམས་ནི་ཇི་ལྟ་བུ་ཞིག་
ཏུ་ཡོངས་སུ་སྟོན། བྱང་ཆུབ་སེམས་དཔའ་རྣམས་ལ་ཡེ་ཤེས་རྒྱ་མཚོ་རྣམས་ནི་ཇི་ལྟ་བུ་ཞིག་ཏུ་ཡོངས་སུ་སྟོན། བཅོམ་ལྡན་འདས་ཀྱིས་བདག་ཅག་ལ་ཡང་ཐུགས་བརྩེ་བ་ཉེ་བར་བཟུང་སྟེ། བྱང་ཆུབ་སེམས་དཔའ་རྣམས་ཀྱི་བསམ་པ་ཇི་ལྟ་བ་བཞིན་དུ་

འཇིག་རྟེན་གྱི་ཁམས་རྒྱ་མཚོ་རྣམས་ཀྱང་བསྟན་པ་མཛད་གྲང་། སེམས་ཅན་རྒྱ་མཚོ་རྣམས་ཀྱང་བསྟན་པ་མཛད་གྲང་། སངས་རྒྱས་རྒྱ་མཚོ་རྣམས་ཀྱང་བསྟན་པ་མཛད་གྲང་། སངས་རྒྱས་ཀྱི་ཕ་རོལ་ཏུ་ཕྱིན་པ་རྒྱ་མཚོ་རྣམས་ཀྱང་བསྟན་པ་
མཛད་གྲང་། སངས་རྒྱས་ཀྱི་རྣམ་པར་ཐར་པ་རྒྱ་མཚོ་རྣམས་ཀྱང་བསྟན་པ་མཛད་གྲང་། སངས་རྒྱས་ཀྱི་རྣམ་པར་འཕྲུལ་པ་རྒྱ་མཚོ་རྣམས་ཀྱང་བསྟན་པ་མཛད་གྲང་། སངས་རྒྱས་ཀྱི་སྤྲུལ་པ་རྒྱ་མཚོ་རྣམས་ཀྱང་བསྟན་པ་མཛད་གྲང་། སངས་རྒྱས་ཀྱི་ཤིན་ཏུ་བསྟན་པ་རྒྱ་མཚོ་
རྣམས་ཀྱང་བསྟན་པ་མཛད་གྲང་། སངས་རྒྱས་ཀྱི་མཚན་རྒྱ་མཚོ་རྣམས་ཀྱང་བསྟན་པ་མཛད་གྲང་། སངས་རྒྱས་ཀྱི་སྐུ་ཚེའི་ཚད་རྒྱ་མཚོ་རྣམས་ཀྱང་བསྟན་པ་མཛད་གྲང་། དེ་ནས་བྱང་ཆུབ་སེམས་དཔའ་དེ་དག་གི་བྱིན་རླབས་ཀྱིས། མཆོད་པའི་དཀྱིལ་འཁོར་གྱི་སྤྲིན་དེ་
དག་ལས་ཚིགས་སུ་བཅད་པ་འདི་དག་བྱུང་ངོ་། །མཐའ་ཡས་རྒྱ་ཆེན་བསྐལ་པར་རབ་སྤྱད་དེ། །བྱང་ཆུབ་ཤིང་དྲུང་རང་བྱུང་ཡང་དག་སྐྱེས། །ཕྱི་མཐའི་བསྐལ་པར་འགྲོ་བའི་སྤྲིན་གྱུར་པ། །དེ་བཞིན་གཤེགས་པས་སྐུ་ནི་བྱིན་གྱིས་བརླབས། །འགྲོ་བ་མ་
ལུས་ཀུན་གྱི་ཐེ་ཙོམ་གཅོད། །མོས་པའི་སྟོབས་ནི་ཡངས་པ་རབ་ཏུ་བསྐྱེད། །སེམས་ཅན་སྡུག་བསྔལ་མཐའ་ཡས་ཞི་བར་མཛད། །སངས་རྒྱས་བདེ་ལ་འགྲོ་བ་ཐམས་ཅད་འགོད། །བྱང་ཆུབ་སེམས་དཔའ་མཐའ་ཡས་ཞིང་རྡུལ་སྙེད། །དེ་བཞིན་
གཤེགས་པ་བལྟ་ཞིང་ཀུན་ནས་གནས། །དེ་དག་བསམ་པ་སྤྱོད་ཡུལ་ཇི་བཞིན་དུ། །ཐེ་ཙོམ་བསལ་བར་ཆོས་རྣམས་རབ་བསྟན་གསོལ། །རྒྱལ་བ་ཀུན་གྱི་ས་ནི་ཇི་ལྟ་བུ། །དེ་བཞིན་གཤེགས་པའི་ཡུལ་གྱི་རྒྱུད་རྣམས་དང་། །སངས་རྒྱས་བྱིན་རླབས་
མཐའ་དང་དབུས་མེད་པ། །དེ་དག་ཚུལ་ནི་རྣམ་དག་བསྟན་དུ་གསོལ། །དེ་བཞིན་གཤེགས་པའི་སྤྱོད་ཡུལ་ཅི་ཡིས་འཇུག །རྒྱལ་བའི་མཁྱེན་ལ་ཇི་ལྟར་འཇུག་པ་དང་། །ཡེ་ཤེས་རྒྱ་ཆེན་མཐུ་སྟོབས་རྣམ་པར་སྦྱངས། །རྒྱལ་སྲས་ཀུན་ལ་ཡང་དག་

བསྟན་དུ་གསོལ། །སངས་རྒྱས་ཏིང་འཛིན་ཇི་ལྟར་མཐའ་ཡས་དང་། །མི་སྙེམས་ཆོས་ཉིད་ཇི་ལྟར་ནམ་སྦྱངས་དང་། །རྫུ་འཕྲུལ་མཐུ་ཡང་མཐའ་དང་དབུས་མེད་པ། །འགྲོ་བའི་བསམ་པ་རྣམས་ལ་བསྒྲག་ཏུ་གསོལ། །ཇི་ལྟར་ཆོས་རྒྱལ་ཕོ་བྲང་མངའ་
མཛད་ཅིང་། །རྒྱལ་བའི་སྤྱོད་ཡུལ་ཇི་ལྟར་མི་འཕྲོགས་དང་། །སངས་རྒྱས་ཆོས་གཞན་རྒྱ་ཆེན་དེ་དག་ཀྱང་། །ཐུགས་བརྩེའི་སླད་དུ་ཡང་དག་བསྟན་དུ་གསོལ། །རྒྱལ་བའི་སྤྱན་ནི་ཇི་ལྟར་ཚད་མྱེད་ཅིང་། །སྙན་དང་ཤངས་དང་དེ་བཞིན་ལྗགས་དང་སྐུ། །སངས་
རྒྱས་ཐུགས་ཀྱང་ཇི་ལྟར་མཐའ་ཡས་པ། །འདི་དག་ཚུལ་ལ་འཇུག་པ་བསྟན་དུ་གསོལ། །ཞིང་རྣམས་རྒྱ་མཚོ་ཇི་ལྟར་སེམས་ཅན་ཁམས། །ཆོས་དབྱིངས་ཚུལ་རྣམས་རྒྱ་མཚོ་དེ་དག་དང་། །སངས་རྒྱས་རྒྱ་མཚོ་མཐའ་དང་དབུས་མེད་པ། །འདི་དག་
རྒྱལ་བའི་སྲས་ལ་བསྟན་དུ་གསོལ། །ཕ་རོལ་ཕྱིན་པ་རྒྱ་མཚོ་བསམ་ཡས་དང་། །རྣམ་པར་ཐར་ལ་འཇུག་ཚུལ་རྒྱ་མཚོ་དང་། །ཆོས་རྣམས་ཀུན་གྱི་ཚུལ་རྣམས་རྒྱ་མཚོ་དག །བྱང་ཆུབ་སྙིང་པོར་ཐམས་ཅད་བསྟན་དུ་གསོལ། །དེ་ནས་བཅོམ་ལྡན་འདས་
ཀྱིས་དེའི་ཚེ་བྱང་ཆུབ་སེམས་དཔའ་དེ་དག་གི་སེམས་ཀྱི་ཡོངས་སུ་རྣམ་པར་རྟོག་པ་ཐུགས་ཀྱིས་ཐུགས་སུ་ཆུད་ནས། ཞལ་གྱི་སྒོ་ཚེམས་ཀྱི་མཚམས་ཀྱི་གསེབ་ནས་འོད་ཟེར། སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་རབ་ཏུ་བཀྱེ་བ་འདི་ལྟ་སྟེ། རིན་པོ་ཆེའི་ཟེ་བ་
རྣམ་པར་སྣང་བ་ཞེས་བྱ་བའི་འོད་ཟེར་དང་། འདི་ལྟ་སྟེ་ཆོས་ཀྱི་དབྱིངས་སུ་དབྱངས་སྣ་ཚོགས་ཀྱིས་རྒྱན་བྱེད་པ་ཞེས་བྱ་བའི་འོད་ཟེར་དང་། འདི་ལྟ་སྟེ་འོད་ཤིན་ཏུ་ཕྲ་བའི་སྤྲིན་ཀུན་ནས་ལྡིང་བ་ཞེས་བྱ་བའི་འོད་ཟེར་དང་། འདི་ལྟ་སྟེ་ཕྱོགས་བཅུའི་སངས་རྒྱས་ཀྱི་རྫུ་འཕྲུལ་དང་
སྙིང་པོ་བྱང་ཆུབ་ཀྱི་འོད་ཅེས་བྱ་བའི་འོད་ཟེར་དང་། འདི་ལྟ་སྟེ་རིན་པོ་ཆེ་ཐམས་ཅད་འོད་འཕྲོ་བའི་གདུགས་ཀྱི་སྤྲིན་ཅེས་བྱ་བའི་འོད་ཟེར་དང་། འདི་ལྟ་སྟེ་རྣམ་པར་སྣང་བས་ཆོས་ཀྱི་དབྱིངས་རབ་ཏུ་སྣང་བའི་འོད་ཅེས་བྱ་བའི་འོད་ཟེར་དང་། འདི་ལྟ་སྟེ་སངས་རྒྱས་ཀྱི་ཞིང་ཐམས་

ཅད་དུ་འབྱུང་ཞིང་འཁྱིལ་བའི་རྒྱན་ཅེས་བྱ་བའི་འོད་ཟེར་དང་། འདི་ལྟ་སྟེ་རིན་པོ་ཆེ་རྡོ་རྗེ་དྲི་མ་མེད་པ་མང་པོའི་རྒྱལ་མཚན་ཞེས་བྱ་བའི་འོད་ཟེར་དང་། འདི་ལྟ་སྟེ་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དུ་ཉེ་བར་འགྲོ་བའི་རྒྱན་ཅེས་བྱ་བའི་འོད་ཟེར་དང་།
འདི་ལྟ་སྟེ་སངས་རྒྱས་ཐམས་ཅད་ཀྱི་མཚན་གྱི་འཁོར་ལོའི་སྒྲ་རབ་ཏུ་སྒྲོག་པ་ཞེས་བྱ་བའི་འོད་ཟེར་དང་། དེ་དག་ལ་སྩོགས་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་འོད་ཟེར་རབ་ཏུ་བཀྱེ་སྟེ། འོད་ཟེར་དེ་དག་རེ་རེ་ཞིང་འཁོར་གྱི་འོད་ཟེར་སངས་རྒྱས་ཀྱི་ཞིང་གི་རྡུལ་ཤིན་ཏུ་
ཕྲ་བ་སྙེད་དོ། །འོད་ཟེར་དེ་དག་རེ་རེ་ཞིང་ཡང་རིན་པོ་ཆེ་ཐམས་ཅད་ཀྱི་ཁ་དོག་ཤིན་ཏུ་སྟོན་པ་དག་སྟེ། དེ་དག་རབ་ཏུ་འཕྲོས་ནས་ཕྱོགས་བཅུར་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་རྒྱ་མཚོ་རབ་ཏུ་སྣང་བར་བྱས་ཏེ། བྱང་ཆུབ་སེམས་དཔའ་
དེ་དག་གིས་ཀྱང་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་རྒྱ་མཚོ་ནས། འོད་ཟེར་གྱི་སྒོ་དེ་དག་ཐམས་ཅད་ཀྱི་མཐུས་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པའི་འཇིག་རྟེན་གྱི་ཁམས་རྒྱ་མཚོ་དང་། བྱང་ཆུབ་སེམས་དཔའི་འཁོར་
གྱི་དཀྱིལ་འཁོར་ཐམས་ཅད་མཐོང་བར་གྱུར་ཏོ། །འོད་ཟེར་དེ་དག་ཐམས་ཅད་ཀྱི་སྒོ་ནས་ཀྱང་སངས་རྒྱས་ཀྱི་བྱིན་གྱི་རླབས་ཀྱིས་ཚིགས་སུ་བཅད་པ་འདི་དག་བྱུང་བར་གྱུར་ཏོ། །བསྐལ་པ་རྒྱ་མཚོ་མཐའ་ཡས་སྤྱོད་སྤྱད་དེ། །ཕྱོགས་རྣམས་རྒྱ་མཚོར་སངས་རྒྱས་
ཀུན་ཀྱང་མཆོད། །སེམས་ཅན་རྒྱ་མཚོ་རྣམ་པར་དག་བྱས་ནས། །རྣམ་པར་སྣང་མཛད་བྱང་ཆུབ་མངོན་སངས་རྒྱས། །ཕྱོགས་རྣམས་ཀུན་ཏུ་སྣང་ཞིང་མངོན་པར་མཛེས། །སྤུ་རྣམས་ཀུན་ནས་སྤྲུལ་པའི་སྤྲིན་ཀྱང་འགྱེད། །དེས་ནི་སེམས་ཅན་སྣོད་བཞིན་
བསྐུལ་བྱས་ནས། །བྱང་ཆུབ་སྦྱོར་བ་ཆགས་མེད་རྣམ་པར་དག །སྲིད་པའི་རྒྱུད་ན་སྔན་ཅད་འཁོར་བའི་ཚེ། །རྒྱལ་བས་སེམས་ཅན་ཡོངས་སུ་སྨིན་མཛད་པ། །དེ་དག་སྐད་ཅིག་གཅིག་གིས་རབ་ཏུ་བགྲོལ། །སངས་རྒྱས་རྣམ་འཕྲུལ་འདི་དག་མཐའ་ཡས་

སོ། །རྒྱན་རྣམས་སྣ་ཚོགས་ཀུན་ཏུ་འོད་ཀྱང་སྣང་། །བྱང་ཆུབ་ཤིང་ནི་ཡལ་ག་རིན་ཆེན་འཕྱང་། །འོད་རྣམས་བཀྱེ་བ་ཀུན་ཏུ་རྣམ་པར་བརྒྱན། །བྱང་ཆུབ་བསམ་གྱིས་མྱི་ཁྱབ་དེ་སངས་རྒྱས། །ཕྱོགས་རྣམས་ཀུན་ཏུ་སྒྲ་ནི་རབ་ཏུ་སྒྲོག །སེམས་ཅན་ཀུན་
གྱི་སེམས་བཞིན་ཚིམ་བྱས་ཏེ། །སྣ་ཚོགས་ཐབས་ཀྱི་སྒོ་ནས་རྣམ་པར་འདུལ། །དེ་ལས་ཆོས་ཉིད་ཞི་སྒྲ་རབ་ཏུ་འབྱུང་། །ཞིང་རྣམས་སྟོང་གི་རྡུལ་སྙེད་སྔན་ཅད་དུ། །སྤྱོད་ཚེ་ཕ་རོལ་ཕྱིན་ཀུན་རྒྱས་པར་མཛད། །སྟོབས་རྣམས་ཀུན་ལ་སངས་རྒྱས་རབ་བཞུགས་
ཀྱང་། །རྒྱལ་བ་དེའི་ཞལ་ལྟར་ཀུན་ཀྱང་དེང་། །ཞིང་གི་རྡུལ་སྙེད་ཕྱོགས་རྣམས་ཐམས་ཅད་ནས། །རྒྱལ་སྲས་མང་པོ་རབ་ཏུ་དགའ་སྟེ་ལྷགས། །མཆོད་པ་སྣ་ཚོགས་ཆར་པ་རབ་འབེབས་ཤིང་། །ཐམས་ཅད་འཁོད་དེ་རྒྱལ་བ་མངོན་སུམ་ལྟ། །གསུང་
དབྱངས་གཅིག་ལས་མཐའ་ཡས་མདོ་ཡི་རྣམས། །རྒྱ་མཚོ་དག་ཀྱང་སངས་རྒྱས་ཤིན་ཏུ་སྟོན། །འགྲོ་ཀུན་ཡིད་བཞིན་ཆོས་ཀྱི་ཆར་འབེབས་ཀྱིས། །རྐང་གཉིས་གཙོ་བོ་དེ་ལ་བལྟར་ཡང་འདོང་། །དུས་གསུམ་རྒྱལ་བའི་སྨོན་ལམ་གང་ཡོད་པ། །སྐད་
ཅིག་ཐུགས་ལ་དེ་དག་མངོན་སུམ་སྟེ། །རྒྱལ་བ་བྱང་ཆུབ་ཤིང་དྲུང་སྟོན་མཛད་ཀྱིས། །རྒྱལ་བའི་དྲུང་དུ་མྱུར་དུ་འདོང་བར་གྱིས། །སངས་རྒྱས་རྣམ་པར་སྣང་མཛད་ཡེ་ཤེས་མཚོ། །འོད་ཟེར་ཀུན་གྱི་སྒོ་ནས་རབ་ཏུ་སྣང་། །ཆོས་ཉིད་ཇི་ལྟ་ཅི་འདྲ་དེ་དག་
ལྟོས། །སངས་རྒྱས་འགྲོ་ཀུན་མངོན་སུམ་ཆོས་སྟོན་ཏོ། །དེའི་ཚེ་འཇིག་རྟེན་གྱི་ཁམས་རྒྱ་མཚོ་དེ་དག་ནས། དེ་བཞིན་གཤེགས་པའི་འོད་ཟེར་གྱིས་ཡང་དག་པར་བསྐུལ་བའི་རྣམས། བྱང་ཆུབ་སེམས་དཔའ་རང་རང་གི་འཁོར་གྱི་དཀྱིལ་འཁོར་རྒྱ་མཚོ་
དང་ལྷན་ཅིག་ཏུ་འཕགས་ཏེ། བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་གང་ན་བ་དེར་འོང་བར་གྱུར་ཏེ། འདི་ལྟར་འཇིག་རྟེན་གྱི་ཁམས་རྒྱ་མཚོ་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པ་འདི་དང་འདབ་ཆགས་སུ། ཤར་ཕྱོགས་ལོགས་

ན་འཇིག་རྟེན་གྱི་ཁམས་རྒྱ་མཚོ་པདྨོའི་དཔལ་དྲི་མ་མྱེད་པར་སྣང་བའི་རྒྱན་ཅེས་བྱ་བ་ཡོད་དེ། འཇིག་རྟེན་གྱི་ཁམས་བར་མའི་རྒྱུད་དེ་དག་ལས་འཇིག་རྟེན་གྱི་ཁམས་རིན་པོ་ཆེའི་ཕྲེང་བ་རྡོ་རྗེའི་སྙིང་པོ་ཞེས་བྱ་བ་ན། དེ་བཞིན་གཤེགས་པ་ཆོས་ཀྱི་
ཆུ་བོ་རྣམ་པར་སངས་རྒྱས་པ། ནམ་མཁའ་མཐའ་ཡས་པའི་རྒྱལ་པོ་བཞུགས་པའི་འཁོར་གྱི་དཀྱིལ་འཁོར་རྒྱ་མཚོ་ནས། བྱང་ཆུབ་སེམས་དཔའ་ཆོས་ཀྱི་དཔལ་པདྨོ་རྣམ་པར་བལྟ་བའི་རྒྱལ་མཚན་ཞེས་བྱ་བ། བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོའི་
རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་འཁོར་གྱི་དཀྱིལ་འཁོར་རྒྱ་མཚོ་དེ་ནས་འཕགས་ཏེ། བཅོམ་ལྡན་འདས་གང་ན་བ་དེར་འོང་བར་གྱུར་ཏེ། བྱང་ཆུབ་སེམས་དཔའི་ལུས་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་རློབ་ཅིང་རིན་པོ་ཆེའི་ཆར་གྱི་འོད་ཟེར་པདྨོའི་སྤྲིན་
བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། རིན་པོ་ཆེ་རི་བོའི་ཟོམ་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། ཉི་མའི་འཁོར་ལོའི་ལུས་ཀྱི་དཀྱིལ་འཁོར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་།
རིན་པོ་ཆེའི་མེ་ཏོག་གི་ཕྲེང་བའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། སིལ་སྙན་སྒྲ་ཐམས་ཅད་འབྱིན་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། ཕྱེ་མའི་ཤིང་གི་མཛོད་ཀྱི་སྤྲིན་བཅུས་ནམ་མཁའ་ཀུན་ནས་
ཡོག་པར་བྱིན་གྱིས་བརླབ་པ་དང་། སྤོས་དང་བདུག་སྤོས་གཟུགས་ཐམས་ཅད་ཡོངས་སུ་སྟོན་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། སྤོས་ཐམས་ཅད་ཀྱི་ཤིང་གི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་།
དེ་དག་ལ་སྩོགས་པ་མཆོད་པའི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་བྱེད་ཅིང་། བཅོམ་ལྡན་འདས་གང་ན་བ་དེར་ཕྱིན་ཏེ། བཅོམ་ལྡན་འདས་ལ་ཕྱག་འཚལ་ནས་ཤར་ཕྱོགས་སུ་བརྟེན་ཏེ།

མེ་ཏོག་སྣང་བ་སྣ་ཚོགས་ཀྱི་སྙིང་པོ་ཅན་གྱི་སེང་གེའི་ཁྲི་མངོན་པར་སྤྲུལ་ནས་སྐྱིལ་མོ་ཀྲུང་བཅས་ཏེ་འཁོད་པར་གྱུར་ཏོ། །དེ་ནས་ཡང་འཇིག་རྟེན་གྱི་ཁམས་རྒྱ་མཚོ་འདི་དང་འདབ་ཆགས་སུ་ལྷོ་ཕྱོགས་ན། འཇིག་རྟེན་གྱི་ཁམས་རྒྱ་མཚོ་རིན་པོ་ཆེ་ཐམས་ཅད་སྣང་བས་རྣམ་པར་བརྒྱན་
པའི་སྙིང་པོ་ཞེས་བྱ་བ་ཡོད་དེ། འཇིག་རྟེན་གྱི་ཁམས་བར་མའི་རྒྱུད་དེ་དག་ལས་འཇིག་རྟེན་གྱི་ཁམས་འོད་མཐའ་ཡས་པའི་དཀྱིལ་འཁོར་གྱི་རྒྱན་ན། དེ་བཞིན་གཤེགས་པ་ཀུན་ནས་མཁྱེན་པའི་འོད་དཔལ་གྱི་རི་བོའི་རྒྱལ་པོ་བཞུགས་པའི་འཁོར་གྱི་དཀྱིལ་འཁོར་རྒྱ་མཚོ་ནས་
བྱང་ཆུབ་སེམས་དཔའ་ཆོས་རྣམ་པར་སྣང་བའི་བློ་གྲོས་ཤེས་བྱ་བ་བྱང་ཆུབ་སེམས་དཔའི་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་འཁོར་གྱི་དཀྱིལ་འཁོར་དེ་ནས་འཕགས་ཏེ། བཅོམ་ལྡན་འདས་གང་ན་བ་དེར་འོང་བར་གྱུར་ཏེ། ནོར་བུའི་
རྒྱལ་པོ་རྒྱན་གྱི་ཡུལ་ཐམས་ཅད་ཀྱིས་རྣམ་པར་གསལ་བར་བྱས་པའི་སྙིང་པོའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་རློབ་ཅིང་། ནོར་བུའི་རྒྱལ་པོ་ཀུན་ནས་སྣང་བ་རིན་པོ་ཆེའི་རྒྱན་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། ནོར་
བུའི་རྒྱལ་པོ་རིན་པོ་ཆེ་འོད་འཕྲོ་བ་རབ་ཏུ་འབར་ཞིང་སངས་རྒྱས་ཀྱི་མཚན་ཤིན་ཏུ་སྒྲོག་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་