Kinh tạng Tây Tạng (Kangyur Đại Học) — 006_འདུལ་བ།_ཆ

ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་སྤྱན་སྔ་ནས་ཕྱིར་ལོག་སྟེ་རང་གི་ཁྱིམ་ག་ལ་བ་དེར་སོང་ནས་ཕྱིན་པ་དང་། སྟེང་གི་ཁང་བཟངས་
ཀྱི་གཞིར་གཏོགས་པ་ན་གཏོང་བ་རྗེས་སུ་དྲན་པར་སྒོམ་པ་ན་ཆུང་མ་ལ་སྨྲས་པ། བཟང་མོ་བདག་ཅག་གིས་འཇིག་རྟེན་ཕ་རོལ་གྱི་ལམ་རྒྱགས་མང་དུ་ཁྱེར་གྱིས་མཆོག་ཏུ་དགའ་བ་དང་། རྗེས་སུ་ཡི་རང་བར་གྱིས་ཤིག །ཆུང་མས་སྨྲས་པ། རྗེའི་སྲས་ཀྱིས་ནི་འཇིག་རྟེན་ཕ་

རོལ་གྱི་ལམ་རྒྱགས་བསྣམས་ན། བདག་གིས་མ་འཚལ་ཏོ། །བཟང་མོ་བདག་ཅག་གཉིས་ཀྱི་ལོངས་སྤྱོད་དག་ཐུན་མོང་མ་ཡིན་ནམ། རྗེའི་སྲས་འདི་ལྟར་སྐོལ་ཅག་གི་ལོངས་སྤྱོད་དག་ཐུན་མོང་ལགས་མོད་ཀྱི་འོན་ཀྱང་བདག་གིས་ཀྱང་སྐྱེ་དགུའི་བདག་མོ་ཆེན་མོ་གཽ་ཏ་མཱི་
ལ་སོགས་པ་དགེ་སློང་མའི་དགེ་འདུན་བཤོས་གསོལ་ཏེ། ཆེན་པོ་ལ་འོས་པའི་གོས་དག་ཕུལ་ན་དེ་ལྟ་ན་བདག་གིས་ཅང་འཇིག་རྟེན་ཕ་རོལ་གྱི་ལམ་རྒྱགས་འཚལ་བར་འགྱུར་རོ། །ཁྱིམ་བདག་གིས་སྨྲས་པ། བཟང་མོ་ཅི་སྔར་སྦྱིན་པ་བྱིན་པས་ཕྱིས་སྦྱིན་པར་བྱར་མེད་དམ། དེ་བཞིན་
གྱིས་ཤིག །དེ་ནས་ཁྱིམ་བདག་གི་ཆུང་མ་དེ་སྐྱེ་དགུའི་བདག་མོ་ཆེན་མོ་གཽ་ཏ་མཱི་ག་ལ་བ་དེར་སོང་སྟེ་ཕྱིན་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱིའི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་སྐྱེ་དགུའི་བདག་མོ་ཆེན་མོ་གཽ་ཏ་
མཱིས་ཁྱིམ་བདག་གི་ཆུང་མ་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་བྱེད། ཡང་དག་པར་འཛིན་དུ་འཇུད་པར་བྱེད། ཡང་དག་པར་གཟེངས་སྟོད་པར་བྱེད། ཡང་དག་པར་རབ་ཏུ་དགའ་བར་བྱེད་དེ། རྣམ་གྲངས་དུ་མས་ཆོས་དང་ལྡན་པའི་གཏམ་གྱིས་
ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱས་ནས་ཅང་མི་སྨྲའོ། །དེ་ནས་ཁྱིམ་བདག་གི་ཆུང་མ་དེ་སྟན་ལས་ལངས་ཏེ་སྐྱེ་དགུའི་བདག་མོ་ཆེན་མོ་གཽ་ཏ་མཱི་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་
ནས་སྐྱེ་དགུའི་བདག་མོ་ཆེན་མོ་གཽ་ཏ་མཱི་ལ་འདི་སྐད་ཅེས་སྨྲས་སོ། །འཕགས་མ་སང་བདག་གི་སྡུམ་པར་དགེ་སློང་མའི་དགེ་འདུན་དང་ཐབས་ཅིག་གདུགས་ཚོད་གསོལ་བར་ཅི་གནང་། སྐྱེ་དགུའི་བདག་མོ་ཆེན་མོ་གཽ་ཏ་མཱིས་ཁྱིམ་བདག་གི་ཆུང་མ་དེ་ལ་ཅང་མི་སྨྲ་བས་དང་དུ་
བླངས་སོ། །དེ་ནས་ཁྱིམ་བདག་གི་ཆུང་མ་དེས་སྐྱེ་དགུའི་བདག་མོ་ཆེན་མོ་གཽ་ཏ་མཱིས་ཅང་མི་སྨྲ་བས་དང་དུ་བླངས་པར་རིག་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱིས་སྨྲས་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ཏེ། སྐྱེ་དགུའི་བདག་མོ་ཆེན་མོ་གཽ་ཏ་མཱིའི་རྐང་པ་

གཉིས་ལ་མགོ་བོས་ཕྱག་འཚལ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱིའི་དྲུང་ནས་སོང་ངོ་། །དེ་ནས་ཁྱིམ་བདག་གི་ཆུང་མ་དེས་དེ་ཉིད་ཀྱི་མཚན་མོ་བཅའ་བ་དང་བཟའ་བ་གཙང་ཞིང་བསོད་པ་ལེགས་པར་སྦྱར་ནས་ནང་པར་སྔར་ལངས་ཏེ་སྟན་བཤམས་ནས་ཆུར་བཞག་
སྟེ་སྐྱེ་དགུའི་བདག་མོ་ཆེན་མོ་གཽ་ཏ་མཱི་ལ་སྤྱན་འདྲེན་གྱིས་འཕགས་མ་གདུགས་ཚོད་སྦྱར་བའི་དུས་ལགས་ན། ད་འཕགས་མས་དེའི་དུས་ལ་བབ་པར་མཁྱེན་པར་མཛད་དུ་གསོལ་ཞེས་དྲོ་ལ་བོས་སོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱི་སྔ་དྲོ་ཤམ་ཐབས་བགོས། ལྷུང་བཟེད་
དང་ཆོས་གོས་ཐོགས་ཏེ་དགེ་སློང་མའི་ཚོགས་ཀྱིས་ཡོངས་སུ་བསྐོར་ཅིང་། དགེ་སློང་མའི་དགེ་འདུན་གྱིས་མདུན་དུ་བདར་ཏེ་ཁྱིམ་བདག་གི་ཆུང་མ་དེའི་བཀད་ས་ག་ལ་བ་དེར་སོང་སྟེ་ཕྱིན་ནས་དགེ་སློང་མའི་དགེ་འདུན་གྱི་གོང་དུ་སྟན་བཤམས་པ་ཉིད་ལ་འདུག་གོ། །དེ་ནས་ཁྱིམ་བདག་
གི་ཆུང་མ་དེས་སྐྱེ་དགུའི་བདག་མོ་ཆེན་མོ་གཽ་ཏ་མཱི་ལ་སོགས་པ་དགེ་སློང་མའི་དགེ་འདུན་བདེ་བར་འདུག་པར་རིག་ནས། རང་གི་ལག་ནས་བཅའ་བ་དང་བཟའ་བ་གཙང་ཞིང་བསོད་པས་ཚིམ་པར་བྱེད། སྟོབས་པར་བྱེད་དོ། །རྣམ་གྲངས་དུ་མས་བཅའ་བ་དང་བཟའ་བ་གཙང་ཞིང་
བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས། དེས་ཆེན་པོ་ལ་འོས་པའི་གོས་དག་གི་སྤྲོག་མ་ཕྱེ་ནས་ཆེན་པོ་ལ་འོས་པའི་གོས་དག་ཐོགས་ཏེ་རྒན་པའི་མཐའ་ལོགས་སུ་འདུག་གོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱི་འདི་སྙམ་དུ་སེམས་ཏེ། བཅོམ་ལྡན་
འདས་ཀྱིས་དགེ་སློང་མ་རྣམས་ལ་ཆེན་པོ་ལ་འོས་པའི་གོས་དག་དགག་པ་མཛད་པས་གལ་ཏེ་རེ་ཞིག་བླངས་པར་གྱུར་ན་ནི་བསླབ་པའི་གཞི་འཁྲུགས་པར་ཡང་འགྱུར། གལ་ཏེ་མ་བླངས་ན་ནི་ཁྱིམ་བདག་གི་ཆུང་མའི་བསོད་ནམས་ཀྱི་བར་ཆད་དང་། དགེ་སློང་མའི་དགེ་འདུན་གྱི་
རྙེད་པའི་བར་ཆད་དུ་འགྱུར་རོ་སྙམ་མོ། །དགེ་སློང་མ་རྣམས་ཀྱིས་བསམས་པ། ཀྱེ་མ་འཕགས་མ་སྐྱེ་དགུའི་བདག་མོ་ཆེན་མོ་གཽ་ཏ་མཱིས་ཆེན་པོ་ལ་འོས་པའི་གོས་དག་བླངས་པར་གྱུར་ཅིག །བདག་ཅག་གིས་བླངས་པར་གྱུར་ན་བཅོམ་ལྡན་འདས་ཀྱིས་ཀྱང་དུས་ལགས་པའི་སླད་

དུ་གནང་བར་འགྱུར་རོ་སྙམ་མོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱིས་ཆེན་པོ་ལ་འོས་པའི་གོས་དག་བླངས་ནས། ཁྱིམ་བདག་གི་ཆུང་མ་ལ་ཡོན་བཤད་པ་བྱས་ཏེ་སྟན་ལས་ལངས་ཏེ་སོང་སྟེ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་
ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱིས་སྐབས་དེ་བཅོམ་ལྡན་འདས་ལ་རྒྱས་པར་གསོལ་ཏོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་སྐྱེ་དགུའི་བདག་མོ་ཆེན་མོ་གཽ་ཏ་
མཱི་ལ་འདི་སྐད་ཅེས་བཀའ་སྩལ་ཏོ། །གཽ་ཏ་མཱི་ངས་གནང་བ་གང་ཡིན་པ་དེ་ཁྱོད་ཀྱིས་ཤེས་པ་ལེགས་སོ་ལེགས་སོ། །དེ་ལྟ་བས་ན་ངས་དགེ་སློང་མ་རྣམས་ཀྱིས་ཆེན་པོ་ལ་འོས་པའི་གོས་དག་བླངས་ནས་དགེ་སློང་རྣམས་དང་ལྷན་ཅིག་བརྗེ་བར་བྱ་བ་རྗེས་སུ་གནང་ངོ་། །དེ་ནས་
དགེ་སློང་མ་བཅུ་གཉིས་སྡེ་དག་གིས་གོས་དེ་དག་ཁྱེར་ཏེ་དྲུག་སྡེ་དག་གི་གན་དུ་དོང་ནས་སྨྲས་པ། འཕགས་པ་དག་བཅོམ་ལྡན་འདས་ཀྱིས་དགེ་སློང་མ་རྣམས་ལ་ཆེན་པོ་ལ་འོས་པའི་གོས་དག་དགག་པ་མཛད་དེ། བདག་ཅག་གིས་ཆེན་པོ་ལ་འོས་པའི་གོས་རྙེད་པ་འདི་དག་ཁྱེད་བཞེས་
ལ་བདག་ཅག་ལ་ངན་པ་དག་སྩོལ་ཅིག །དྲུག་སྡེ་དག་གིས་སྨྲས་པ། སྲིང་མོ་དག་བདག་ཅག་ལ་དགེ་སློང་མའི་རས་མ་དག་དགོས་པ་མེད་དེ། དེའི་ཚེ་ཡང་བདག་ཅག་བྱིས་པ་རྨོངས་པ་མི་གསལ་བ། མི་མཁས་པ་དག་ལ་ཁུར་དག་བསླང་བར་གྱུར་གྱིས་བདག་ཅག་མི་ལེན་ཏོ། །
དགེ་སློང་མ་གཞན་དག་དགེ་སློང་གནས་བརྟན་གནས་བརྟན་རྣམས་ཀྱི་དྲུང་དུ་དོང་སྟེ་སྨྲས་པ། འཕགས་པ་དག་བཅོམ་ལྡན་འདས་ཀྱིས་དགེ་སློང་མ་རྣམས་ལ་ཆེན་པོ་ལ་འོས་པའི་གོས་དག་དགག་པ་མཛད་དེ། བདག་ཅག་གིས་ཆེན་པོ་ལ་འོས་པའི་གོས་རྙེད་པ་འདི་དག་ཁྱེད་བཞེས་
ལ། བདག་ཅག་ལ་ངན་པ་དམན་པ་དག་སྩོལ་ཅིག །སྲིང་མོ་དག་བཅོམ་ལྡན་འདས་ལ་ཞུའོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་བརྗེས་པ་མ་གཏོགས་ཏེ། དེ་ལ་བརྗེ་བ་

ནི་འདི་ཡིན་ཏེ། དེ་ཙམ་གྱིས་སམ། ཇི་ཙམ་གྱིས་དགེ་སློང་མ་དགའ་བར་འགྱུར་བས་བརྗེ་བར་བྱའོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པའི་བསྔགས་པ་བརྗོད་དེ། བསླབ་པ་ལ་གུས་པ་དང་། བསླབ་པ་ལ་ཡོ་བྱད་བསྙུངས་པ་དང་། སྦྱངས་
པའི་ཡོན་ཏན་དང་། ཕྲི་བ་དང་། དྲོད་རིག་པའི་བསྔགས་པ་བརྗོད་དོ། །དགེ་སློང་རྣམས་ལ་ཡང་དེ་དང་མཐུན་པ་དང་། དེ་དང་འཚམ་པ་དང་། དེའི་ཤས་ཆེ་བ་དང་། དེ་དང་ལྡན་པའི་ཆོས་དང་མཐུན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་
དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་མ་ཉེ་དུ་མ་ཡིན་པ་ལས་གོས་ལེན་ན་བརྗེས་པ་མ་གཏོགས་ཏེ་སྤང་བའི་ལྟུང་བྱེད་དོ། །ཡང་དགེ་སློང་གང་
ཞེས་བྱ་བ་ནི་ཉེ་དགའ་འམ་གཞན་ཡང་དེ་ལྟ་བུ་གང་ཡིན་པའོ། །དགེ་སློང་མ་ཞེས་བྱ་བ་ནི་ཆོས་འདི་པའོ། །ཉེ་དུ་མ་ཡིན་པ་ལས་ཞེས་བྱ་བ་ནི་ཕྱི་མོ་དང་། མེས་པོ་དང་། ཕྲུགས་ཀྱི་བདུན་པ་ཚུན་ཆད་ཉེ་དུ་ཡིན་ལ་དེ་ཕན་ཅད་ནི་ཉེ་དུ་མ་ཡིན་ནོ། །གོས་ཞེས་བྱ་བ་ནི་གོས་བདུན་པོ་
བལ་གོས་དང་། ཤ་ནའི་གོས་དང་། ཟར་མའི་གོས་དང་། དུ་གུ་ལའི་གོས་དང་། རས་བལ་གྱི་གོས་དང་། ཀོ་ཏམ་པའི་གོས་དང་། ཉི་འོག་གི་གོས་ལས་གང་ཡང་རུང་བའོ། །ལེན་ན་ཞེས་བྱ་བ་ནི་བདག་གིར་བྱེད་ནའོ། །བརྗེས་པ་མ་གཏོགས་ཏེ་ཞེས་བྱ་བ་ནི་བརྗེས་
པ་བཞག་སྟེའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་དགེ་སློང་མ་ཉེ་དུ་མ་ཡིན་པ་ལ་ཉེ་དུ་མ་ཡིན་པའི་འདུ་ཤེས་ཀྱིས་
གོས་ལེན་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་མ་ཉེ་དུ་མ་ཡིན་པ་ལ་ཡིད་གཉིས་ཟ་བས་གོས་ལེན་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་མ་ཉེ་དུ་ལ་ཉེ་དུ་མ་ཡིན་པའི་འདུ་ཤེས་ཀྱིས་གོས་ལེན་ན་ཉེས་བྱས་སུ་འགྱུར་རོ། །དགེ་སློང་གིས་

དགེ་སློང་མ་ཉེ་དུ་ལ་ཡིད་གཉིས་ཟ་བས་གོས་ལེན་ན་ཉེས་བྱས་སུ་འགྱུར་རོ། །དགེ་འདུན་ལ་གོས་འབུལ་བ་དང་། ལེགས་པར་སྨྲ་བ་ལ་ལྟུང་བ་མེད་དོ། །རྫོགས་པར་བསྙེན་པ་བྱེད་པ་དང་བོར་རླག་བྱུང་བ་ལ་ལྟུང་བ་མེད་དོ། །རིན་གྱིས་ལེན་པ་དང་། བརྗེས་པ་ལ་ལྟུང་བ་མེད་དོ། །དགེ་
སློང་མ་གྲགས་པ་བསོད་ནམས་ཆེ་བ་ཡིན་ལ། དེས་དགེ་སློང་གི་མདུན་དུ་བཞག་ནས་འདི་སྐད་ཅེས་འཕགས་པ་བདག་ལ་རྫས་འདི་ལྟ་བུ་དག་མཆིས་ཀྱིས། འཕགས་པས་བདག་ལ་ཐུགས་བརྩེ་བའི་སླད་དུ་བཞེས་ཤིག་ཅེས་བརྗོད་དེ་མི་ལྟོས་པར་སོང་བ་ལ་ལྟུང་བ་མེད་དོ། །ལས་དང་པོ་པ་
དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ལེན་པའི་སྤང་བ་སྟེ་ལྔ་པ་རྫོགས་སྷོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་
ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེས་ཆུང་མ་ལ་སྨྲས་པ། བཟང་མོ་ཁོ་བོ་ཟོང་ཐོགས་ཏེ་ཡུལ་གཞན་དུ་འགྲོའོ། །རྗེའི་སྲས་རེ་ཞིག་གཞོན་པའི་གནས་
སྐབས་སུ་རོལ་པ་དང་། དགྱེས་པ་དང་། དགྱེས་མགུར་སྤྱོད་པ་མཛོད་ལ། བགྲེས་པའི་གནས་སྐབས་སུ་ནོར་སྒྲུབ་པར་མཛོད་ཅིག །བཟང་མོ་ཇི་ཙམ་དུ་གཞོན་པའི་འབྱུང་བ་ཆེན་པོ་དག་ནི་གྲང་བ་དང་། དྲོ་བ་བཟོད་པ་ཡིན་པས་ཇེ་ནོར་བསྒྲུབ་པར་བྱ་ཞིང་། རྒས་པའི་གནས་སྐབས་སུ་
བདེ་བ་སྤྱད་ཅིང་འདུག་པར་བྱའོ། །ཆུང་མས་བསམས་པ། བདག་གིས་བསྐུལ་བར་བྱ་བ་གང་ཡིན་པ་དེ་རང་ཉིད་བྱེད་དོ་སྙམ་ནས་སྨྲས་པ། རྗེའི་སྲས་དེ་ལྟར་མཛོད་ཅིག །ཁྱིམ་བདག་དེས་ཆུང་མ་དེ་ལ་ཁ་ཟས་ཙམ་བྱིན་ནས་ཟོང་ཁྱེར་ཏེ་ཡུལ་གཞན་དུ་སོང་ངོ་། །དེའི་ཆུང་
མ་དེས་བསམས་པ། བདག་གི་ཁྱིམ་ཐབ་གྲང་བ་ན་གྲང་བས་སྦྲེབས་བཞིན་པ་དང་། ཚ་བ་ན་ཚ་བས་གདུངས་བཞིན་པ་དང་། བཀྲེས་པ་དང་། སྐོམ་པས་གནོད་བཞིན་པ་དང་། ཤ་སྦྲང་དང་། སྦྲང་བུ་དང་། རླུང་དང་། ཉི་མ་དང་། སྡིག་སྦྲུལ་གྱི་རེག་པ་དག་གིས་ཉེན་

བཞིན་དུ་ལོངས་སྤྱོད་དག་མངོན་པར་བསྒྲུབ་པའི་ཕྱིར་སྤྲོ་བར་བྱེད། འབད་པར་བྱེད། རྩོལ་བར་བྱེད་པ་གང་ཡིན་པ་དེ་དག་ཐམས་ཅད་བདག་གི་ཕྱིར་བྱའོ་སྙམ་པ་ཡིན་པས་བདག་ལས་མེད་པར་འདུག་པ་ནི་བདག་གི་ཚུལ་དང་མཐུན་པ་མ་ཡིན་ནོ་སྙམ་ནས། དེས་ཚོང་
དུས་སུ་སོང་སྟེ་རས་བལ་བཟང་པོ་བླངས་ནས་དོག་པ་བཟང་པོ་བཀལ་ཏེ། ཐ་ག་པ་མཁས་པ་ལ་རས་ཟུང་བཟང་པོ་འཐག་ཏུ་བཅུག་ནས། དེས་རས་དེ་སྤོས་སྣ་ཚོགས་ཀྱིས་བསྒོས་ཏེ་གོས་ཀྱི་ཟ་མ་ཏོག་ཏུ་བཅུག་སྟེ་བཞག་གོ། །ཁྱིམ་བདག་དེས་ཀྱང་དོན་ལེགས་པར་གྲུབ་ནས་ཁེ་
སྤོགས་རྙེད་དེ་ལེགས་པར་འོངས་ནས་ཆུང་མ་དེས་ཁྱིམ་བདག་དེ་ཁྲུས་བྱས་ནས་དེ་ལ་རས་ཟུང་དེ་ཕུལ་ལོ། །ཁྱིམ་བདག་དེས་བསམས་པ། བདག་གིས་འདི་ལ་ཁ་ཟས་ཙམ་བཞག་པ་གང་ཡིན་པ་དེ་དག་ཐམས་ཅད་ཀྱིས་ཀྱང་རས་ཟུང་འདི་མི་རྙེད་དོ་སྙམ་དུ་རིག་ནས་ཆུང་མ་ལ་སྨྲས་པ།
བཟང་མོ་རས་ཟུང་འདི་ག་ལས་རྙེད། རྗེའི་སྲས་ཇེ་གསོལ་ཅིག །ཁྱིམ་བདག་དེས་དེ་གྱོན་ནས་ཡང་སྨྲས་པ། བཟང་མོ་རས་ཟུང་འདི་ག་ལས་རྙེད། རྗེའི་སྲས་ཇེ་བཤོས་མནོབས་ཤིག །དེས་ཟན་ཟོས་ནས་ཡང་དྲིས་པ། བཟང་མོ་རས་ཟུང་འདི་ག་ལས་རྙེད། དེས་སྐབས་
དེ་རྒྱས་པར་བརྗོད་པ་དང་། ཁྱིམ་བདག་གིས་སྨྲས་པ། བཟང་མོ་ལེགས་སོ། །ཁོ་བོ་ནི་སྒྲུབ་པ་ཡིན་ལ། ཁྱོད་ཀྱང་འདི་ལྟར་སྦེད་པ་ཡིན་ན། བདག་ཅག་གི་ལོངས་སྤྱོད་དག་རིང་པོ་མི་ཐོགས་པ་ཁོ་ནར་འཕེལ་ཞིང་རྒྱས་པ་དང་། ཡངས་པར་འགྱུར་རོ། །ཆུང་མས་སྨྲས་པ།
རྗེའི་སྲས་འདི་ནི་བདག་གིས་དཀའ་བས་བསྒྲུབས་པ་ལགས་ཀྱིས། ཁྱོད་ཀྱིས་སུ་ལ་ཡང་མ་སྩོལ་ཅིག །ཁྱིམ་བདག་དེ་དད་པ་དང་ལྡན་པ། བཟང་བ། དགེ་བའི་བསམ་པ་ཅན་ཡིན་པས་དེ་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་རྒྱལ་བྱེད་ཀྱི་ཚལ་དུ་བྱུང་སྟེ་འགྲོ་བ་ན་མི་སྒོ་བས་
མཐོང་ནས་དེས་བསམས་པ། ཁྱིམ་བདག་འདི་རས་ཟུང་འདི་ལྟ་བུ་གྱོན་པ་ལས་ན་འདིས་ནི་རྙེད་པ་མང་པོ་རྙེད་པ་ཡིན་ནོ་སྙམ་མོ། །དྲུག་སྡེ་དག་གི་ཀུན་དུ་སྤྱོད་པ་ནི་དྲུག་སྡེ་དག་ལས་གང་ཡང་རུང་བས་རྒྱལ་བྱེད་ཀྱི་ཚལ་གྱི་སྒོ་སྟོང་པར་མི་འཇོག་པས་ཉེ་དགའ་རྒྱལ་བྱེད་ཀྱི་ཚལ་གྱི་སྒོ་ན་འཆག་

ཅིང་འདུག་པ་དེས་ཁྱིམ་བདག་དེ་མཐོང་ནས་བསམས་པ། ཁྱིམ་བདག་འདི་རས་ཟུང་འདི་ལྟ་བུ་གྱོན་པ་ལས་ན་འདིས་ནི་རྙེད་པ་མང་པོ་རྙེད་པ་ཡིན་གྱིས། གལ་ཏེ་བདག་གིས་འདི་མ་ཕྲོགས་ན་ཉེ་དགའ་ཞེས་བྱ་བའི་མིང་མི་གཟུང་ངོ་སྙམ་ནས་དེས་དེ་ལ་སྨྲས་པ། ཁྱིམ་བདག་འོངས་པ་
ལེགས་སོ། །འོངས་པ་ལེགས་སོ། །ཁྱོད་ཡུན་རིང་མོ་རིང་མོ་ནས་ཟླ་བ་བཞིན་དུ་ག་ལས་འཁོར་འཁོར། འཕགས་པ་བདག་ཟོང་ཐོགས་ཏེ་ཡུལ་གཞན་དུ་མཆིས་པར་གྱུར་ཏོ། །ཁྱིམ་བདག་ཁྱོད་ཀྱིས་རྙེད་པ་མང་པོ་གྲུབ་བམ། འཕགས་པ་ཅུང་ཟད་ཙམ་མོ། །ཁྱིམ་བདག་མཚེའུ་
ནི་རྙོག་མ་ཅན་ནམ། དད་པའི་རྒྱུ་མཐུན་པས་རིག་པར་བྱ་སྟེ། ཁྱོད་རས་ཟུང་འདི་ལྟ་བུ་གྱོན་པ་ལས་ན་ཁྱོད་ཀྱིས་རྙེད་པ་མང་པོ་གྲུབ་པར་མངོན་གྱིས་ཚུར་ཤོག །ཆོས་བསྟན་པར་བྱའོ། །དྲུག་སྡེ་དག་གི་ཀུན་ཏུ་སྤྱོད་པ་ནི་གལ་ཏེ་ཚུལ་ཁྲིམས་ཀྱི་གཏམ་དག་བྱེད་ན་ཉན་པ་པོ་དག་བདག་
ཅག་ལྷ་རྣམས་སུ་སྐྱེས་སོ་སྙམ་དུ་སེམས་ལ། གལ་ཏེ་སྦྱིན་པའི་གཏམ་བྱེད་ན་ཉན་པ་པོ་དག་རང་གི་ཤ་གང་ཡིན་པ་དེ་ཡང་བཅད་ཅིང་བཅད་ཅིང་སྦྱིན་པར་བྱའོ་སྙམ་དུ་སེམས་སོ། །གལ་ཏེ་ངན་སོང་གི་གཏམ་དག་བྱེད་ན་ཉན་པ་པོ་དག་བདག་ཅག་ངན་སོང་རྣམས་སུ་སྐྱེས་སོ་སྙམ་དུ་
སེམས་པར་འགྱུར་བ་ཡིན་ནོ། །ཁྱིམ་བདག་དེས་ཉེ་དགའི་རྐང་པ་གཉིས་ལ་ཕྱག་འཚལ་ཏེ་ཆོས་མཉན་པའི་ཕྱིར་མདུན་དུ་འདུག་པ་དང་། ཉེ་དགའས་དེ་ལ་ཆོས་བསྟན་པར་བརྩམས་ནས། དེས་དེ་ལ་ཅི་ནས་ཀྱང་དེའི་སེམས་དད་པར་འགྱུར་བ་དེ་ལྟར་ཆོས་ཀྱི་གཏམ་བྱས་སོ། །དེ་དད་
པར་གྱུར་ནས་སྨྲས་པ། བདག་གིས་འཕགས་པ་ལ་ལེགས་པར་གསུངས་པའི་ན་བཟའ་ཕྲུགས་གཅིག་འབུལ་ལོ། །བཞིན་བཟངས་ཨ་རོག་གྱ། སྦྱིན་པ་འདིས་ཁྱོད་སེམས་ཀྱི་རྒྱན་དང་། སེམས་ཀྱི་ཡོ་བྱད་དང་། རྣལ་འབྱོར་གྱི་ཚོགས་དང་། དོན་གྱི་མཆོག་དང་། ལྷ་རྣམས་ཀྱི་གོས་
དག་ཐོབ་པར་གྱུར་ཅིག །བཞིན་བཟངས་བཅོམ་ལྡན་འདས་ཀྱིས་ཀྱང་འདི་སྐད་ཅེས། སང་དག་འཆི་ཡང་སུ་ཤེས་ཀྱིས། །དེ་རིང་ཉིད་དུ་བརྟུལ་ཏེ་བྱ། །འཆི་བདག་སྡེ་ཆེན་དེ་དང་ནི། །ཁྱེད་ཅག་བཤེས་པ་མ་ཡིན་ནོ། །ཞེས་གསུངས་ཀྱིས། བཞིན་བཟངས་ཁྱོད་ཀྱིས་རས་ཟུང་

བཟང་པོ་གྱོན་པ་འདི་ཉིད་ཁོ་བོ་ལ་བྱིན་ཅིག་དང་། ཁོ་བོས་འདི་ལས་སྣམ་སྦྱར་ཉི་རིམ་བྱས་ཏེ་སེམས་ལས་ཆུང་དུས་དགེ་བའི་ཕྱོགས་ལ་བདེ་བར་ཏྲོན་བྱའོ། །འཕགས་པ་ཁྱོད་འདི་བཞེད་དམ། ལྷའི་གནས་ཀྱི་ལྷག་མ་ཇི་ལྟ་བ་བཞིན་དུའོ། །འཕགས་པ་
བདག་ཁྱོད་ལ་མི་འབུལ་བ་ནི་མ་ལགས་ན། འདི་ལྟར་འདི་ནི་མཆིས་བྲང་གིས་བདག་ལ་སྩལ་པ་ལགས་སོ། །ཁྱིམ་བདག་ཁོ་བོས་ཁྱོད་གཞན་ལ་དད་པར་བྱས་ན་ཁྱོད་ཀོ་བུད་མེད་ཁོ་ནའི་དབང་ཡིན་ནམ། ཞེས་ཉེ་དགའས་དངན་དུས་ཀྱི་ཕྱེད་ཀྱིས་དེའི་བླ་གོས་བླངས་ནས་དེ་ལག་པ་
གཉིས་འདྲིལ་བར་བྱེད། བཞིན་སྒྱུར་བར་བྱེད་དོ། །ཁྱིམ་བདག་གིས་དེ་ལ་སྨྲས་པ། འཕགས་པ་འདི་ཅིའི་ཐ་ཚིག་ཁྱིམ་བདག་འདི་ནི་ཁྱོད་ལ་ཡོངས་སུ་བཏང་བ་ལས་བྱུང་བའི་བསོད་ནམས་བྱ་བའི་གཞི་ནི་ཡོད་ན་ཡོངས་སུ་ལོངས་སྤྱོད་པ་ལས་བྱུང་བའི་བསོད་ནམས་བྱ་བའི་གཞི་ནི་
མེད་དེ། ནམ་ཞིག་ན་འདི་དང་འདྲ་བ་རྙེད་ན་འདི་ལས་ཆོས་གོས་བྱེད་པར་འགྱུར་བས་འདི་ཆོས་གོས་ཀྱི་གདང་ཁོ་ན་ལ་ཟད་པར་འགྱུར་རོ། །འཕགས་པ་ཅི་བདག་སྒྲེན་མོར་མཆི་བར་བགྱིའམ། ཁྱིམ་བདག་ཁྱོད་ལ་གོས་གྱོན་པས་ཅི་ཞིག་བྱ། ཚུལ་ཁྲིམས་དང་། རིགས་
དང་། སྤྱོད་པ་གྱོན་པས་ཆོག་མོད། གཅེར་བུ་ལ་ངོ་ཚ་ཤེས་པ་དང་། ཁྲེལ་ཡོད་པ་ཉམས་པ་དེ་དག་ནི་སྒྲེན་མོར་འགྲོ་ན་མི་སྡུག་པ་ཡིན་གྱི་ཁྱོད་ལྟ་བུ་ངོ་ཚ་ཤེས་པ་དང་། ཁྲེལ་ཡོད་པ་དང་ལྡན་པ་ལ་སྒྲེན་མོར་འགྲོ་བ་མི་སྡུག་པ་ཅི་ཡོད། ཁྱིམ་བདག་ཁྱོད་དོར་ཐུང་མི་གྱོན་
ནམ། འཕགས་པ་འཚལ་ལོ། །ཁྱིམ་བདག་ཁྱིམ་བདག་རྣམས་ཀྱི་ཀུན་དུ་སྤྱོད་པ་ནི་དོར་ཐུང་གྱོན་ཏེ་ཤིང་ཚལ་ཐོགས་ནས། བ་ལང་གི་ཕྱི་བཞིན་འགྲོ་བ་ཡིན་པས་ཁྱོད་ཀྱང་ཤིང་ཚལ་ཐོགས་ལ། བ་ལང་གི་ཕྱི་བཞིན་སོང་ཤིག་དང་། སྐྱེ་བོ་དག་གིས་བ་ལང་སུར་འགྲོ་
བ་ཕྱིར་བྱུང་བ་ཞིག་ཡིན་པར་ཤེས་པར་འགྱུར་རོ། །ཞེས་ཉེ་དགའས་དངན་དུས་ཀྱི་ཕྱེད་ཀྱིས་དེའི་སྨད་གཡོགས་ཀྱང་བླངས་སོ། །ཁྱིམ་བདག་དེ་ཤིང་ཚལ་པ་ཐོགས་ཏེ་བ་ལང་གི་ཕྱི་བཞིན་ཞུགས་པ་དང་། མི་སྒོ་བས་མཐོང་ནས་སྨྲས་པ། ཁྱིམ་བདག་ཁོ་བོས་ད་ཅི་ཁོ་ན་ཁྱོད་ཆེན་

པོ་ལ་འོས་པའི་རས་ཟུང་གྱོན་པར་མཐོང་ན། ཅི་དེ་དག་ཆོམ་རྐུན་པ་དག་གིས་བཅོམ་མམ། བཞིན་བཟངས་ཁོ་བོ་ཆོམ་རྐུན་པ་དག་གིས་ནི་མ་བཅོམ་མོད་ཀྱི། འདི་ལྟར་བཙུན་པ་ཉེ་དགའས་ཁའི་ཆོས་ཀྱིས་བཅོམ་མོ། །ཁྱིམ་བདག་མགོན་མེད་ཟས་སྦྱིན་གྱི་ཀུན་དུ་སྤྱོད་པ་ནི་ནང་པར་ནང་
པར་སྔར་ལངས་ཏེ་འཁོར་ལྔ་བརྒྱ་དང་ལྷན་ཅིག་བཅོམ་ལྡན་འདས་དང་། དགེ་སློང་གནས་བརྟན་གནས་བརྟན་རྣམས་ཀྱི་ཞབས་ལ་ཕྱག་འཚལ་དུ་འགྲོ་བ་ཡིན་པས་ཁྱིམ་བདག་མགོན་མེད་ཟས་སྦྱིན་ནང་པར་སྔར་ལངས་ཏེ་འཁོར་ལྔ་བརྒྱ་དང་ལྷན་ཅིག་མཉན་ཡོད་ནས་བྱུང་སྟེ་འགྲོ་བ་མི་སྒོ་བས་
མཐོང་ནས་དེས་སྨྲས་པ། ཁྱིམ་བདག་ཁྱོད་ཀྱིས་དོན་མཐུན་མང་དུ་ཁྲིད་དེ་འོངས་ཀྱིས་ཅི་ནས་ཀྱང་མི་ཆོམས་པར་བག་གྱིས་ཤིག །ཀྱེ་ནང་རྗེ་རྒྱལ་བྱེད་ཀྱི་ཚལ་དང་ལམ་གྱི་བར་ན་ཆོམ་རྐུན་པ་དག་འཁོད་དམ་ཅི། ལམ་གྱི་བར་ན་མ་ཡིན་གྱི་རྒྱལ་བྱེད་ཀྱི་ཚལ་ཉིད་ན་འཁོད་དོ། །ཀྱེ་ནང་རྗེ་ཁྱོད་
ནི་བལ་གྱི་རིགས་ནག་པོ་དང་འདྲ་སྟེ། སྒོ་འདི་ནས་བཅོམ་ལྡན་འདས་དང་། དགེ་སློང་གནས་བརྟན་གནས་བརྟན་དག་གཤེགས་པ་གང་གིས་ཀྱང་ཁྱོད་དཀར་པོར་མཛད་མ་སྤྱོད་དོ། །བཅོམ་ལྡན་འདས་དང་དགེ་སློང་གནས་བརྟན་གནས་བརྟན་རྣམས་ཀྱི་ཞབས་ཀྱི་རྡུལ་ནི་བདག་གིས་
མགོས་བླང་བ་ཡིན་ན། ཁར་ཙང་གི་ཉིན་མོ་ཁྱིམ་བདག་ཅིག་ཆེན་པོ་ལ་འོས་པའི་རས་ཟུང་གྱོན་ཏེ་བྱུང་བ་དེའི་རས་དེ་ཉེ་དགའས་ཁའི་ཆོས་ཀྱིས་ཕྲོགས་ནས་ཁྱིམ་བདག་དེ་སྨོད་ཅིང་དོར་ཐུང་གིས་ཞུགས་པར་གྱུར་ཏོ། །དེ་ནས་ཁྱིམ་བདག་མགོན་མེད་ཟས་སྦྱིན་འདི་སྙམ་དུ་སེམས་ཏེ།
དེ་ནི་བདག་གི་བྱ་བ་ཡིན་ནོ་སྙམ་ནས་རྒྱལ་བྱེད་ཀྱི་ཚལ་དུ་སོང་བ་དང་། ཉེ་དགའས་མཐོང་ནས་སྨྲས་པ། ཁྱིམ་བདག་ཨ་རོག་གྱ། ཁྱིམ་བདག་གིས་སྨྲས་པ། ཨ་རོག་མི་གྱ་ཡང་རུང་ངོ་། །ཁྱིམ་བདག་ཁྱོད་ཁོ་བོ་ལ་སྔན་ཆད་དུ་བ་འཐུལ་ན་ད་ཅི་མེ་ཁོ་ནར་འབར་རོ། །ཁོ་བོ་
མེར་མི་འབར་དུ་ཇི་ལྟར་རུང་། གཞན་དག་རབ་ཏུ་བྱུང་བ་ནི་འདོད་པ་སྤངས་པའི་ཕྱིར་ཡིན་ན་བཙུན་པ་ཉེ་དགའ་ནི་འདོད་པ་མངོན་པར་སྤེལ་བའི་ཕྱིར་ཁོ་ནར་ཡིན་ནོ། །ཁོ་བོས་ཅི་བྱས། ཁྱོད་ཀྱིས་ཁྱིམ་བདག་ཅིག་རྒྱལ་བྱེད་ཀྱི་ཚལ་ལྟར་འོངས་པ་དེའི་རས་ཟུང་དངན་དུས་ཀྱིས་ཕྲོགས་

ནས་ཁྱིམ་བདག་དེ་སྨོད་པར་མི་བྱེད་དམ། ཉེ་དགའས་སྨྲས་པ། དེ་ནི་འཇིག་རྟེན་ན་ལྷ་ནི་སྦྱིན་པར་བྱེད་ལ་ཡི་དགས་ནི་ཟློག་པར་བྱེད་དོ་ཞེས་ཟེར་བ་ཡིན་ནོ། །ཅི་དེས་ཁྱོད་ལ་རིལ་བ་བྷྲྀང་གར་ཐོགས་ཏེ་ཕུལ་ལམ། ཁྱིམ་བདག་གལ་ཏེ་མི་བཟོད་ན་བསླབ་པའི་གཞི་
འཆར་ཆུག་ཤིག །ཅི་ཁོ་བོས་དེ་ཡལ་བར་བོར་དུ་རེའམ། དེ་ནས་ཁྱིམ་བདག་མགོན་མེད་ཟས་སྦྱིན་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་གཅིག་ཏུ་འདུག་ནས་བཅོམ་ལྡན་
འདས་ལ་ཁྱིམ་བདག་མགོན་མེད་ཟས་སྦྱིན་གྱིས་འདི་སྐད་ཅེས་གསོལ་ཏོ། །བཙུན་པ་འཕགས་པ་འདི་དག་ཁྱིམ་བདག་གམ་ཁྱིམ་བདག་གི་མཆིས་བྲང་ཉེ་དུ་མ་ལགས་པ་ལས་གོས་སློང་བར་བགྱིད་ན། ཀྱེ་མ་བཅོམ་ལྡན་འདས་ཀྱིས་གང་གིས་འཕགས་པ་དག་ཁྱིམ་བདག་གམ།
ཁྱིམ་བདག་གི་མཆིས་བྲང་ཉེ་དུ་མ་ལགས་པ་ལས་གོས་སློང་བར་མི་འགྱུར་བར་འཕགས་པ་རྣམས་ལ་དྲན་པར་བགྱི་བ་ཅུང་ཞིག་བཅའ་བར་མཛད་པའི་རིགས་སོ། །བཅོམ་ལྡན་འདས་ཀྱིས་ཁྱིམ་བདག་མགོན་མེད་ཟས་སྦྱིན་ལ་ཅང་མི་གསུང་བས་གནང་ངོ་། །དེ་ནས་ཁྱིམ་བདག་མགོན་མེད་
ཟས་སྦྱིན་གྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་།
སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཉེ་དགའ་ལ་རྨས་པ། ཉེ་
དགའ་ཁྱོད་ཀྱིས་ཁྱིམ་བདག་གམ། ཁྱིམ་བདག་གི་ཆུང་མ་ཉེ་དུ་མ་ཡིན་པ་ལས་གོས་བསླངས་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་

པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་
བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཁྱིམ་བདག་གམ་ཁྱིམ་བདག་གི་ཆུང་མ་ཉེ་དུ་མ་ཡིན་པའི་གན་དུ་སོང་སྟེ་གོས་སློང་ན་སྤང་བའི་ལྟུང་བྱེད་
དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བར་མཛད་དོ།། །།འདུལ་བ་རྣམ་པར་འབྱེད་པ། བམ་པོ་སུམ་བཅུ་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་
བཞུགས་སོ། །གྲོང་ཕྲེང་བ་ཅན་པའི་དགེ་སློང་བཞི་བཅུ་དོན་མཐུན་པ་དང་ལྷན་ཅིག་ལྗོངས་རྒྱུ་ཞིང་འདོང་བ་ན་ཆོམ་རྐུན་པ་དག་གིས་བཅོམ་ནས་དེ་དག་འདི་སྙམ་དུ་སེམས་ཏེ། བཅོམ་ལྡན་འདས་ཀྱིས་ཡང་དགེ་སློང་གང་ཁྱིམ་བདག་གམ་ཁྱིམ་བདག་གི་ཆུང་མ་ཉེ་དུ་མ་ཡིན་པའི་གན་དུ་སོང་
སྟེ་གོས་སློང་ན་སྤང་བའི་ལྟུང་བྱེད་དོ། །ཞེས་བསླབ་པའི་གཞི་བཅའ་བར་མཛད་པས་འདི་ན་བདག་ཅག་ལ་ཉེ་དུ་འགའ་ཡང་མེད་ཀྱིས་བདག་ཅག་མཉན་ཡོད་དུ་སོང་ན་དེར་བདག་ཅག་ལ་ཚངས་པ་མཚུངས་པར་སྤྱོད་པ་རྣམས་ཀྱིས་གོས་དག་གིས་བགོ་བཤའ་བྱེད་པར་འགྱུར་རོ་སྙམ་ནས།
དེ་དག་གིས་སྨྲས་པ། ཅི་བདག་ཅག་སྒྲེན་མོར་འདོང་བར་བྱའམ། མཚན་མོ་འགེབས་པས་འདོང་བར་བྱ་ཞིང་ཉིན་མོ་ཚང་ཚིང་གི་ནང་དུ་ཞུགས་ཏེ་འཁོད་ལ་མཚན་མོ་ལམ་དུ་འཇུག་པར་བྱའོ་ཞེས་དེ་དག་མཚན་མོ་འགེབས་པས་རྒྱལ་བྱེད་ཀྱི་ཚལ་དུ་དོང་བ་དང་། དགེ་སློང་ནམ་གྱི་ཆ་སྟོད་
དང་ནམ་གྱི་ཆ་སྨད་ལ་མི་ཉལ་བར་སྦྱོར་བའི་རྗེས་སུ་བརྩོན་པ་དག་གིས་དེ་དག་མཐོང་ནས་སྨྲས་པ། གཅེར་བུ་སྒྲེ་བྱི་དག་འདི་ཁྱེད་ཀྱི་འདུག་གནས་ཀྱང་མ་ཡིན། གཙུག་ལག་ཁང་ཡང་མ་ཡིན་ན་ཁྱེད་ག་ལས་འོངས། ཚེ་དང་ལྡན་པ་དག་བདག་ཅག་ནི་གཅེར་བུ་པ་མ་ཡིན་ནོ། །འོ་ན་

ཁྱེད་ཅག་སུ་ཡིན་དགེ་སློང་དག་གོ་དགེ་སློང་འདི་ལྟ་བུ་ཡོད་དམ། གང་དག་ཆོམ་རྐུན་པ་དག་གིས་བཅོམ་པ་དག་ཅི་འདྲ་བ་ཡིན་ཁྱེད་ཅག་མིང་ཅི་གྲོང་ཕྲེང་བ་ཅན་དེའི་དགེ་སློང་བཞི་བཅུའོ། །ཚེ་དང་ལྡན་པ་དག་འོངས་པ་ལེགས་སོ་འོངས་པ་ལེགས་སོ་ཞེས་དེ་
དག་གིས་དེ་དག་ལ་ལ་ལས་ནི་སྣམ་སྦྱར་བྱིན་ལ་ལས་ནི་བླ་གོས་བྱིན་ལ་ལས་ནི་མཐང་གོས་བྱིན། ལ་ལས་ནི་རྔུལ་གཟན་བྱིན་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དུས་མ་གཏོགས་ཏེ།
དེ་ལ་དུས་ནི་འདི་ཡིན་ཏེ། དགེ་སློང་གོས་ཕྲོགས་སམ། གོས་རླག་གམ། གོས་ཚིག་གམ། གོས་རླུང་གིས་ཁྱེར་རམ། གོས་ཆུས་ཁྱེར་ན་དེ་ལ་དེ་ནི་དུས་ཡིན་ནོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང་། བསླབ་པ་ལ་གུས་པ་དང་། བསླབ་པ་ལ་ཡོ་བྱད་
བསྙུངས་པའི་བསྔགས་པ་བརྗོད་ནས། དགེ་སློང་རྣམས་ལ་ཡང་དེ་དང་མཐུན་པ་དང་། དེའི་ཤས་ཆེ་བ་དང་དེ་དང་ལྡན་པའི་ཆོས་དང་མཐུན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་
བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཁྱིམ་བདག་གམ་ཁྱིམ་བདག་གི་ཆུང་མ་ཉེ་དུ་མ་ཡིན་པའི་གན་དུ་སོང་སྟེ་གོས་སློང་ན་དུས་མ་གཏོགས་ཏེ་སྤང་བའི་ལྟུང་བྱེད་དོ། །དེ་ལ་དུས་ནི་འདི་ཡིན་ཏེ། དགེ་
སློང་གོས་ཕྲོགས་སམ། གོས་རླག་གམ། གོས་ཚིག་གམ། གོས་རླུང་གིས་ཁྱེར་རམ། གོས་ཆུས་ཁྱེར་ན་དེ་ལ་དེ་ནི་དུས་ཡིན་ནོ། །ཡང་དགེ་སློང་གང་ཞེས་བྱ་བ་ནི་ཉེ་དགའ་འམ་གཞན་ཡང་དེ་ལྟ་བུ་གང་ཡིན་པའོ། །ཁྱིམ་བདག་གམ་ཞེས་བྱ་བ་ནི་སྐྱེས་པའོ། །ཁྱིམ་བདག་
གི་ཆུང་མ་ཞེས་བྱ་བ་ནི་བུད་མེད་དོ། །ཉེ་དུ་མ་ཡིན་པའི་ཞེས་བྱ་བ་ནི་ཕྱི་མོ་དང་། མེས་པོ་དང་། ཕྲུགས་ཀྱི་བདུན་པ་ཚུན་ཆད་ནི་ཉེ་དུ་ཡིན་ལ། དེ་ཕན་ཅད་ནི་ཉེ་དུ་མ་ཡིན་ནོ། །གན་དུ་སོང་སྟེ་ཞེས་བྱ་བ་ནི་དྲུང་དུ་སོང་སྟེའོ། །གོས་ཞེས་བྱ་བ་ནི་བདུན་པོ་བལ་གོས་དང་། ཤ་ནའི་

གོས་དང་། ཟར་མའི་གོས་དང་། རས་བལ་གྱི་གོས་དང་། དུ་གུ་ལའི་གོས་དང་། ཀོ་ཏམ་པའི་གོས་དང་། ཉི་འོག་གི་གོས་ལས་གང་ཡང་རུང་བའོ། །སློང་ན་ཞེས་བྱ་བ་ནི་སློང་མོ་བྱེད་ནའོ། །དུས་མ་གཏོགས་ཏེ་ཞེས་བྱ་བ་ནི་དུས་བཞག་སྟེའོ། །སྤང་བའི་ལྟུང་བྱེད་དོ་ཞེས་
བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱའོ། །དེ་ལ་དུས་ནི་འདི་ཡིན་ཏེ། དགེ་སློང་གོས་ཕྲོགས་སམ། ཞེས་བྱ་བ་ནི་འདི་ལྟ་སྟེ། དགེ་སློང་གི་གོས་དག་ཆོམ་རྐུན་པ་དག་གམ། གཡོན་ཅན་དག་གིས་ཕྲོགས་པར་གྱུར་པའོ། །གོས་རླག་གམ་ཞེས་
བྱ་བ་ནི་འདི་ལྟ་སྟེ། དགེ་སློང་གི་གོས་དག་རླག་པར་གྱུར་པའམ། འཁྱམས་པར་གྱུར་པའོ། །གོས་ཚིག་གམ་ཞེས་བྱ་བ་ནི་འདི་ལྟ་སྟེ། དགེ་སློང་གི་གོས་དག་མེས་ཚིག་པར་གྱུར་པའོ། །གོས་རླུང་གིས་ཁྱེར་རམ་ཞེས་བྱ་བ་ནི་འདི་ལྟ་སྟེ། དགེ་སློང་གི་གོས་དག་རླུང་གིས་ཁྱེར་
བར་གྱུར་པའོ། །གོས་ཆུས་ཁྱེར་ན་ཞེས་བྱ་བ་ནི་འདི་ལྟ་སྟེ། དགེ་སློང་གི་གོས་དག་ཆུས་ཁྱེར་བར་གྱུར་པའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། རིན་ཐང་དང་། ཁ་དོག་དང་། ཁྲུ་ཚད་ལས་ཏེ། ཇི་ལྟར་རིན་ཐང་ལས་ཞེ་ན། དགེ་སློང་གི་གོས་ཀཱར་ཥཱ་པ་ཎ་ལྔ་རི་བ་སློང་
བར་བྱེད་ཅིང་། དེས་ཀཱར་ཥཱ་པ་ཎ་ལྔ་རི་བའི་གོས་ཐོབ་ན་དེ་སློང་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །ཀཱར་ཥཱ་པ་ཎ་ལྔ་རི་བ་ཇི་ལྟ་བ་དེ་བཞིན་དུ་ཀཱར་ཥཱ་པ་ཎ་བཅུ་རི་བ་དང་། ཀཱར་ཥཱ་པ་ཎ་བཅྭ་ལྔ་རི་བ་དང་། ཀཱར་ཥཱ་པ་ཎ་ཉི་ཤུ་རི་བ་དང་། ཀཱར་ཥཱ་པ་ཎ་ལྔ་
བཅུ་རི་བའི་བར་གྱི་གོས་སློང་བར་བྱེད་ཅིང་། དེས་ཀཱར་ཥཱ་པ་ཎ་ལྔ་བཅུ་རི་བའི་གོས་ཐོབ་ན་དེ་སློང་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་ཀཱར་ཥཱ་པ་ཎ་ལྔ་རི་བའི་གོས་སློང་བར་བྱེད་ཅིང་ལྷག་པ་ཐོབ་ན་དེ་སློང་བ་ལ་ཉེས་བྱས་སུ་འགྱུར་ལ།
ལྷག་པ་ཐོབ་ན་ལྟུང་བ་མེད་དོ། །ཀཱར་ཥཱ་པ་ཎ་ལྔ་རི་བ་ཇི་ལྟ་བ་དེ་བཞིན་དུ་ཀཱར་ཥཱ་པ་ཎ་བཅུ་རི་བ་དང་། ཀཱར་ཥཱ་པ་ཎ་བཅྭ་ལྔ་རི་བ་དང་། ཀཱར་ཥཱ་པ་ཎ་ཉི་ཤུ་རི་བ་དང་། ཀཱར་ཥཱ་པ་ཎ་ལྔ་བཅུའི་བར་རི་བའི་གོས་སློང་ཞིང་ལྷག་པ་ཐོབ་ན་དེ་སློང་བ་ལ་ཉེས་བྱས་སུ་འགྱུར་ལ། ལྷག་

པ་ཐོབ་ན་ལྟུང་བ་མེད་དོ། །དེ་ལྟར་རིན་ཐང་ལས་སོ། །ཇི་ལྟར་ཁ་དོག་ལས་ཞེ་ན། དགེ་སློང་གིས་གོས་སྔོན་པོ་སློང་བར་བྱེད་ཅིང་དེས་གོས་སྔོན་པོ་ཐོབ་ན་དེ་སློང་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །སྔོན་པོ་ཇི་ལྟ་བ་དེ་
བཞིན་དུ་སེར་པོ་དང་། དམར་པོ་དང་། གོས་སྟུག་པོ་དང་། སྲབ་མོ་སློང་བར་བྱེད་ཅིང་། དེས་སྲབ་མོ་ཐོབ་ན་སློང་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་གོས་སྔོན་པོ་སློང་བར་བྱེད་པ་ན་སེར་པོ་ཐོབ་ན། སྔོན་པོ་སློང་བ་དེ་ལ་ཉེས་བྱས་སུ་
འགྱུར་ལ། སེར་པོ་ཐོབ་པ་ལ་ལྟུང་བ་མེད་དོ། །སྔོན་པོ་སློང་བ་ལ་ཇི་ལྟ་བ་དེ་བཞིན་དུ་སེར་པོ་དང་། དམར་པོ་དང་། སྟུག་པོ་དང་། སྲབ་མོ་སློང་བ་ན་སྟུག་པོ་ཐོབ་ན། སྲབ་མོ་སློང་བ་དེ་ལ་ཉེས་བྱས་སུ་འགྱུར་ལ། གོང་མ་ཐོབ་པ་ལ་ལྟུང་བ་མེད་དེ། དེ་ལྟར་ཁ་དོག་ལས་
སོ། །ཇི་ལྟར་ཁྲུ་ཚད་ལས་ཞེ་ན། དགེ་སློང་གིས་གོས་ཁྲུ་ལྔ་པ་སློང་བར་བྱེད་ཅིང་། དེས་གོས་ཁྲུ་ལྔ་པ་ཐོབ་ན། དེ་སློང་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །ཁྲུ་ལྔ་པ་ཇི་ལྟ་བ་དེ་བཞིན་དུ་ཁྲུ་བཅུ་པ་དང་། ཁྲུ་བཅྭ་ལྔ་པ་དང་། ཁྲུ་
ཉི་ཤུ་པ་དང་། ཁྲུ་ལྔ་བཅུ་པའི་བར་གྱི་གོས་སློང་བར་བྱེད་ཅིང་། གོས་ཁྲུ་ལྔ་བཅུ་པ་ཐོབ་ན། དེ་སློང་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་གོས་ཁྲུ་ལྔ་པ་སློང་བ་ན་ལྷག་པ་ཐོབ་ན། ཁྲུ་ལྔ་པ་སློང་བ་དེ་ལ་ཉེས་བྱས་སུ་
འགྱུར་ལ། ལྷག་པ་ཐོབ་པ་ལ་ལྟུང་བ་མེད་དོ། །ཁྲུ་ལྔ་པ་ཇི་ལྟ་བ་དེ་བཞིན་དུ་ཁྲུ་བཅུ་པ་དང་། ཁྲུ་བཅྭ་ལྔ་པ་དང་། ཁྲུ་ཉི་ཤུ་པ་དང་། ཁྲུ་ལྔ་བཅུ་པའི་བར་གྱི་གོས་སློང་བར་བྱེད་ཅིང་། དེས་གོས་ཁྲུ་ལྔ་བཅུ་པ་སློང་བར་བྱེད་པ་ན་ལྷག་པ་ཐོབ་ན་གོས་ཁྲུ་ལྔ་བཅུ་པ་སློང་བར་བྱེད་པ་
དེ་ལ་ཉེས་བྱས་སུ་འགྱུར་ལ། ལྷག་པ་ཐོབ་པ་ལ་ལྟུང་བ་མེད་དེ། དེ་ལྟར་ཁྲུ་ཚད་ལས་སོ། །རས་མ་སློང་བ་ན་ཁ་ཚར་ཐོབ་པ་དང་། ཁ་ཚར་སློང་བ་ན་རས་མ་ཐོབ་པ་དང་། རས་མ་སློང་བ་ན་རས་ཡུག་ཆེན་དང་། རས་ཡུག་ཕྲན་ཐོབ་པ་ལ་ལྟུང་བ་མེད་དོ། །ལས་དང་པོ་པ་

དང་། སྨྱོས་པ་དང་། སེམས་འཁྲུགས་པ་དང་། ཚོར་བདག་གིས་ཉེན་པ་ལ་ལྟུང་བ་མེད་དོ། །སློང་བའི་སྤང་བ་སྟེ་དྲུག་པ་རྫོགས་སྷོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །
ཉེ་དགའ་ལ་བློ་སྐྱེས་པ། འདི་དག་ཐམས་ཅད་ཁྱིམ་བདག་མགོན་མེད་ཟས་སྦྱིན་གྱིས་བསླབ་པའི་གཞི་དག་གིས་བསྡམས་པས་ཕྱིན་ཅད་གང་ནས་ཀྱང་བཅའ་བའི་རིན་ཙམ་ཡང་བསླང་བར་མི་ནུས་ན། འདི་ལྟར་བཅོམ་ལྡན་འདས་ཀྱིས་གྲོང་ཕྲེང་བ་ཅན་པའི་དགེ་སློང་བཞི་བཅུ་ལ་
བརྟེན་ནས་བསླབ་པའི་གཞི་བག་ཡངས་སུ་མཛད་པ་ཡོད་པས་བདག་གིས་གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་དག་སྔོན་དུ་བཏང་སྟེ་རྙེད་པ་བསྒྲུབ་པར་བྱའོ་སྙམ་ནས། དེ་གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་དག་ག་ལ་བ་དེར་སོང་བ་དང་། ཇི་ཙམ་ན་གྲོང་ཕྲེང་བ་ཅན་པའི་
དགེ་སློང་བཞི་བཅུ་པོ་དག་རྙད་རྙིད་དག་འཚེམ་ཞིང་འཁོད་པ་མཐོང་ནས། དེས་དེ་དག་ལ་སྨྲས་པ། ཚེ་དང་ལྡན་པ་དག་བདག་གིས་གཞན་ཐོས་ལ་གཞན་མཐོང་སྟེ། བདག་ཀོ་གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་དག་བསམ་གཏན་དང་། རྣམ་པར་ཐར་པ་དང་། ཏིང་ངེ་
འཛིན་དང་། སྙོམས་པར་འཇུག་པའི་བདེ་བ་དག་ཉམས་སུ་མྱོང་བར་བྱེད་ཅིང་འདུག་པར་སེམས་ཀྱི། བདག་ཚེ་དང་ལྡན་པ་དག་འདི་ལྟར་རྙང་རྙིང་དག་འཚེམ་ཞིང་འཁོད་པར་ནི་མི་སེམས་སོ། །གནས་བརྟན་བདག་ཅག་ཆོམ་རྐུན་པ་དག་གིས་བཅོམ་མོ། །ཀྱེ་མ་མ་ལེགས་སོ། །
མ་ལེགས་སོ། །གནས་བརྟན་སུའི་མྱ་ངན་བྱེད། ཅི་ཁོ་བོ་ཅག་གི་འམ། མ་ཡིན་ཏེ་གང་དག་གིས་ཁྱེད་ཅག་བཅོམ་པའི་མ་བྱིན་པར་ལེན་པ་དེ་དག་སྒྲེན་མོ་ཁོ་ནར་སྐྱེ་བར་འགྱུར་ཞིང་། སྒྲེན་མོ་ཁོ་ནར་དུས་བྱེད་པར་འགྱུར་བས་དེ་དག་གི་མྱ་ངན་བྱེད་དོ། །ཚེ་དང་ལྡན་པ་དག་ཁྱེད་ཅིའི་
ཕྱིར་གོས་དག་མི་སློང་། གནས་བརྟན་སུ་ཞིག་སངས་རྒྱས་དང་། ཆོས་དང་། དགེ་འདུན་སྤངས་ཏེ་ཁོ་བོ་ཅག་ལ་སྦྱིན་པ་དང་བྱ་བར་སེམས་པར་འགྱུར། ཚེ་དང་ལྡན་པ་དག་ཁྱེད་ཅག་བཅོམ་ལྡན་འདས་ཀྱིས་མདོ་སྡེའི་མཐའ་དེ་དང་དེ་དག་ཏུ་ངེས་པར་བསྟོད་པ་དང་། བཀུར་བ་དང་།

བསྔགས་པ་དང་། རབ་ཏུ་བསྔགས་པ་དག་མ་ཡིན་ནམ། གནས་བརྟན་ཁོ་བོ་ཅག་གིས་སུ་ལ་བསླང་བ་ཡང་མི་ཤེས་སོ། །ཚེ་དང་ལྡན་པ་དག་དགེ་སློང་རབ་ཏུ་ཤེས་པ་གང་གིས་ཁྱེད་ཅག་གིས་གོས་དག་སློང་བར་འགྱུར་བ་འགའ་ཞིག་ལ་ཅིའི་ཕྱིར་མི་བཅོལ། གནས་
བརྟན་དགེ་སློང་རབ་ཏུ་ཤེས་པ་སུ་ཞིག་བདག་ཉིད་ཀྱི་དགེ་བའི་ཕྱོགས་ཡོངས་སུ་ཉམས་པར་བྱས་ཏེ། ཁོ་བོ་ཅག་གི་དོན་དུ་གོས་དག་སློང་བར་འགྱུར། ཚེ་དང་ལྡན་པ་དག་རེ་ཞིག་ཁོ་བོ་བདག་ཉིད་དང་བཅུ་པ་ལ་ཡང་ཐབས་ཡོད་ལ། གཞན་ཡང་ཁོ་བོ་ཅག་མི་དྲུག་རེ་རེ་ཡང་བདག་ཉིད་དང་
བཅུ་པ་ཡིན་པས་ཁོ་བོ་ཅག་མི་དྲུག་བཅུ་ལ་ཡང་ཐབས་ཡོད་དོ། །གཞན་ཡང་གལ་ཏེ་ཁྱེད་ཅག་ལ་མི་གནོད་ན་ཁོ་བོ་ཅག་ཀྱང་གཞོན་ནུ་དག་གི་དོན་དུ་རས་ཡུག་ཕྲན་དང་། རས་ཡུག་ཆེན་སློང་བར་བྱེད་དོ། །གནས་བརྟན་དེ་ལ་ཁོ་བོ་ཅག་ལ་གནོད་པ་ཅི་ཡོད། རེ་ཞིག་རེ་རེས་ཀྱང་
ཆོས་གོས་གསུམ་གསུམ་སློང་ལ་རག་གོ། །ཚེ་དང་ལྡན་པ་དག་ཁོ་བོ་ཅག་གིས་བསོད་སྙོམས་ལ་རྒྱུ་བ་དང་། གོས་དག་བསླང་བ་གཉིས་ཀ་མི་ནུས་ཀྱིས། འདི་ལྟར་གང་གི་ཚེ་ཕྱི་རོལ་དུ་ཟས་ལ་བོས་པ་དེའི་ཚེ་བསླང་བར་བྱའོ་ཞེས་ཉེ་དགའ་དེ་གཙུག་ལག་ཁང་གི་ཕྱི་རོལ་དུ་རྐང་པ་བཀྲུས་ནས་གཙུག་ལག་ཁང་གི་ནང་དུ་
ཞུགས་ཏེ་འདུག་ནས་དེས་བསམས་པ། ཐབས་ཅི་ཞིག་བྱས་ན་དེས་མཉན་ཡོད་ཐམས་ཅད་ཆུབ་པར་འགྱུར་སྙམ་ནས་དེས་ཡང་བསམས་པ། ཇེ་དང་པོ་ཁོ་ནར་དབུལ་པོའི་སྲང་དུ་འགྲོ་བར་བྱ་ཞིང་དེའི་འོག་ཏུ་ཕྱུག་པོའི་སྲང་དུ་འགྲོ་བར་བྱ། དེའི་འོག་ཏུ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་
ཕོ་བྲང་དང་བཙུན་མོ་རྒྱལ་རིགས་དབྱར་ཚུལ་མའི་ཁྱིམ་དང་། བཙུན་མོ་ཕྲེང་ལྡན་མའི་ཁྱིམ་དང་། ཁྱིམ་བདག་མགོན་མེད་ཟས་སྦྱིན་གྱི་ཁྱིམ་དང་། བླ་མཁྱེན་དྲང་སྲོང་བྱིན་དང་། རྙིང་པ་གཉིས་ཀྱི་ཁྱིམ་དང་། དགེ་བསྙེན་མ་རི་དགས་འཛིན་གྱི་མས་གའི་ཁྱིམ་དང་། དགེ་བསྙེན་མ་
ཁྱིམ་བདག་གི་ཆུང་མ་ལེགས་སྐྱེས་ཀྱི་ཁྱིམ་དག་ཏུ་འགྲོ་བར་བྱའོ་སྙམ་མོ། །དེའི་ཚེ་ན་ཁྱིམ་བདག་ཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་ནས་ཉེ་དགའས་གཞོན་ནུ་རྣམས་ལ་སྨྲས་པ། ཚེ་དང་ལྡན་པ་དག་གལ་ཏེ་

ཁྱེད་ཅག་ལ་ལས་སུ་བསྒོ་བ་དག་འོང་བར་གྱུར་ན། ཁྱེད་ཅག་གིས་མི་གནོད་པར་འདི་སྐད་ཅེས་བདག་ཅག་ལ་མཁན་པོ་དང་། སློབ་དཔོན་དག་གི་བྱ་བ་ཅུང་ཞིག་ཡོད་དོ་ཞེས་བརྗོད་པར་བྱའོ། །ཉེ་དགའས་ཕྱི་དེ་ཉིན་པར་གཞོན་ནུ་ཞིག་གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་དག་
གི་གན་དུ་བཏང་སྟེ་ཆོས་གོས་དག་བསླང་གིས་ཚུར་ཤེག་ཤིག་ཅེས་སྤྲིང་ངོ་། །གཞོན་ནུ་དེ་དེར་སོང་བ་དང་། ཇི་ཙམ་ན་དེ་དག་སྙོམས་པར་ཞུགས་པ་མཐོང་ནས་དེས་བསམས་པ། སྙིང་རྗེ་མེད་པའི་སྙིང་དང་ལྡན་པ་འཇིག་རྟེན་ཕ་རོལ་བཏང་བ་སུ་ཞིག་འདི་དག་ཏིང་ངེ་འཛིན་ལས་སློང་བར་
འགྱུར་སྙམ་ནས་དེ་ཉེ་དགའི་གན་དུ་སོང་སྟེ་སྨྲས་པ། སློབ་དཔོན་དེ་དག་སྙོམས་པར་ཞུགས་ཤིང་མཆིས་པས་སུས་ཀྱང་དེ་དག་ཏིང་ངེ་འཛིན་དེ་ལས་སློང་བར་མི་ནུས་སོ། །ཉེ་དགའས་སྨྲས་པ། བཀྲེན་པ་ཁྱོད་བརྩོན་འགྲུས་འདི་ལྟ་བུས་ཟག་པ་ཟད་པ་མངོན་སུམ་དུ་བྱེད་པར་
འགྱུར་རམ། ཉེ་དགའ་རང་ཉིད་འགྲོའོ་ཞེས་དེ་སོང་ནས་དཔོང་སའི་ཁང་པར་སྒོ་གླེགས་ལ་རྟིང་བས་བརྡབས་པ་དང་། དཔོང་སའི་ཁང་པ་ཐམས་ཅད་འགུལ་ནས་དེ་དག་ཏིང་ངེ་འཛིན་དེ་ལས་ལངས་ནས་སྨྲས་པ། ཚེ་དང་ལྡན་པ་དགེ་སློང་བཞི་བཅུ་པོ་དག་ཆོས་གོས་གསུམ་
བསླང་བར་བྱ་ན། ཁྱེད་ཅག་སྙིང་ལས་ཆུང་ངུར་འཁོད་དམ། ཚུར་ཤེག་འདོང་ངོ་། །གནས་བརྟན་ཇེ་སོ་ཤིང་བོར་ནས་འདོང་ངོ་། །ཚུར་ཤེག་ལམ་ཀ་ཉིད་དུ་འོར་ཅིག །དེ་དག་འཕགས་པ་དང་ཉེ་དགའས་སྨྲས་པ། ཚེ་དང་ལྡན་པ་དག་ཁོ་བོ་ཅག་དྲུག་སྡེ་དག་ནི་བྱ་རོག་དཀར་པོ་དང་
འདྲ་བས་ཁོ་བོ་ཅག་གིས་རྒན་རིམས་བཞིན་དུ་འཁོད་པར་མི་བྱ་བར་བར་བར་དུ་རྒན་པ་དག་གིས་འཁོད་པར་བྱའོ། །དེ་དག་དབུལ་པོའི་སྲང་དུ་དོང་ནས་དངར་ཁ་བྱས་ཏེ་བསྡད་པ་དང་། དེ་དག་གིས་དེ་དག་མཐོང་ནས་ཉམ་ང་བར་གྱུར་ཏེ་སྨྲས་པ། འཕགས་པ་དག་ཉེས་དམིགས་
འགའ་ཞིག་མ་བྱུང་ངམ། བཞིན་བཟངས་དག་ཉེས་དམིགས་བྱུང་ངོ་། །ཅི་ནོངས་ཁྱོད་ཀྱིས་གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་གང་དག་བཅོམ་ལྡན་འདས་ཀྱིས་མདོ་སྡེའི་མཐའ་དེ་དང་དེ་དག་ཏུ་བསྟོད་པ། བཀུར་བ། བསྔགས་པ། རབ་ཏུ་བསྔགས་པ་དེ་དག་ཐོས་སམ།

ཐོས་སོ། །དེ་དག་ཆོམ་རྐུན་པ་དག་གིས་བཅོམ་མོ། །དེ་དག་གིས་སྨྲས་པ། ཤེས་ལྡན་དག་མདའ་གཞུ་ལོང་ཤིག །ཕུབ་དང་། དབྱུག་པ་དག་ལོང་ཤིག །ཆོམ་རྐུན་པ་དག་འཛིན་དུ་འདོང་ངོ་། །དྲུག་སྡེ་དག་གིས་སྨྲས་པ། དེ་དག་བཅོམ་ནས་ཡུན་
རིང་དུ་ལོན་ཞིང་ཡུལ་འཁོར་གཞན་དུ་བཅོམ་པར་གྱུར་ཏོ། །འོན་ཇི་ལྟར་བགྱི། དེ་དག་ལ་གོས་དག་བྱིན་ཅིག །དེ་དག་གིས་དེ་དག་ལ་གོས་སར་པ་དང་རྙིང་པ་དག་བྱིན་ནོ། །དེ་དག་གིས་གོས་དེ་དག་ཁུར་དུ་དྲགས་ཏེ་གཞོན་ནུ་དག་ལ་གཏད་ནས་སྨྲས་པ། དེང་ལ་འདི་དག་
གཙུག་ལག་ཁང་དུ་སྐྱོལ་ཅིག །གཞོན་ནུ་དག་གིས་དེ་དག་ཁྱེར་ཏེ་གཙུག་ལག་ཁང་དུ་དོང་བ་དང་། དེ་དག་ཕྱུག་པོའི་སྲང་དུ་དོང་ནས། དངར་ཁ་བྱས་ཏེ་བསྡད་པ་དང་། དེ་དག་ཉམ་ང་བར་གྱུར་ཏེ་སྨྲས་པ། འཕགས་པ་དག་ཉེས་དམིགས་འགའ་ཞིག་མ་བྱུང་ངམ། ཉེས་དམིགས་
བྱུང་ངོ་། །ཅི་ནོངས། ཁྱེད་ཀྱིས་གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་གང་དག་བཅོམ་ལྡན་འདས་ཀྱིས་མདོ་སྡེའི་མཐའ་དེ་དང་དེ་དག་ཏུ་བསྟོད་པ། བཀུར་བ། བསྔགས་པ། རབ་ཏུ་བསྔགས་པ། དེ་དག་ཐོས་སམ། ཐོས་སོ། །དེ་དག་ཆོམ་རྐུན་པ་དག་གིས་བཅོམ་མོ། །
དེ་དག་གིས་སྨྲས་པ། ཤེས་ལྡན་དག་མདའ་གཞུ་ལོང་ཤིག །ཕུབ་དང་། དབྱུག་པ་དག་ལོང་ཤིག །ཆོམ་རྐུན་པ་དག་འཛིན་དུ་འདོང་ངོ་། །དྲུག་སྡེ་དག་གིས་སྨྲས་པ། དེ་དག་བཅོམ་ནས་ཡུན་རིང་དུ་ལོན་ཅིང་ཡུལ་འཁོར་གཞན་དུ་བཅོམ་པར་གྱུར་ཏོ། །འོ་ན་ཇི་ལྟར་བགྱི།
དེ་དག་ལ་གོས་དག་བྱིན་ཅིག །དེ་དག་གིས་དེ་དག་ལ་ཆེན་པོ་ལ་འོས་པའི་གོས་དག་བྱིན་ཏོ། །དྲུག་སྡེ་དག་གིས་གོས་དེ་དག་ཁུར་དུ་དྲགས་ཏེ་གཞོན་ནུ་དག་ལ་གཏད་ནས་སྨྲས་པ། དེང་ལ་འདི་དག་གཙུག་ལག་ཁང་དུ་སྐྱོལ་ཅིག །དེ་དག་གིས་གོས་དེ་དག་ཁྱེར་ཏེ་གཙུག་ལག་ཁང་དུ་
དོང་བ་དང་། དེ་དག་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་ཕོ་བྲང་དུ་དོང་ནས་དངར་ཁ་བྱས་ཏེ་བསྡད་པ་དང་། ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་དེ་དག་མཐོང་ནས། ཉམ་ང་བར་གྱུར་ཏེ་སྨྲས་པ། འཕགས་པ་དག་ཉེས་དམིགས་འགའ་ཞིག་མ་བྱུང་ངམ། ལྷ་

ཉེས་དམིགས་བྱུང་ངོ་། །ཅི་ནོངས། ལྷས་གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་གང་དག་བཅོམ་ལྡན་འདས་ཀྱིས་མདོ་སྡེའི་མཐའ་དེ་དང་དེ་དག་ཏུ་བསྟོད་པ། བཀུར་བ། བསྔགས་པ། རབ་ཏུ་བསྔགས་པ་དེ་དག་གསན་ཏམ། ཐོས་སོ། །དེ་དག་ཆོམ་རྐུན་པ་དག་གིས་
བཅོམ་མོ། །རྒྱལ་པོས་དམག་དཔོན་འཕགས་སྐྱེས་པོ་ལ་བསྒོ་བ། སོང་ལ་མྱུར་དུ་ཆོམ་རྐུན་པ་དག་དང་། རྐུན་རྫས་དག་ཁུག་ཤིག །དྲུག་སྡེ་དག་གིས་སྨྲས་པ། ལྷ་དེ་དག་ནི་བཅོམ་ནས་ཡུན་རིང་དུ་ལོན་ཅིང་ཡུལ་འཁོར་གཞན་དུ་བཅོམ་པར་གྱུར་ཏོ། །འོ་ན་ཇི་ལྟར་བྱ། ལྷ་དེ་དག་
ལ་གོས་དག་སྩོལ་ཅིག །རྒྱལ་པོས་དགེ་སློང་རེ་རེ་ལ་ཡོ་བྱད་བཅུ་གསུམ་བཅུ་གསུམ་བྱིན་ནོ། །དྲུག་སྡེ་དག་གིས་གོས་དེ་དག་ཁུར་དུ་དྲགས་ཏེ་གཞོན་ནུ་རྣམས་ལ་གཏད་ནས་སྨྲས་པ། དེང་ལ་འདི་དག་གཙུག་ལག་ཁང་དུ་སྐྱོལ་ཅིག །དེ་དག་གིས་གོས་དེ་དག་ཁྱེར་ཏེ་གཙུག་ལག་
ཁང་དུ་དོང་བ་དང་། གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་དག་གིས་སྨྲས་པ། གནས་བརྟན་དག་ད་ཆོག་གིས་ཐོང་ཤིག །དྲུག་སྡེ་དག་གིས་སྨྲས་པ། ཚེ་དང་ལྡན་པ་དག་ཧ་ཅང་བརྟབས་མ་ངས་ཤིག །ཁྱེད་ལ་ཁོ་བོ་ཅག་གིས་དང་པོ་ཉིད་ནས་ཚེ་དང་ལྡན་པ་དག་གལ་ཏེ་
ཁྱེད་ལ་མི་གནོད་ན་ཁོ་བོ་ཅག་ཀྱང་གཞོན་ནུ་དག་གི་དོན་དུ་རས་ཡུག་ཕྲན་དང་། རས་ཡུག་ཆེན་དག་སློང་ངོ་ཞེས་མ་སྨྲས་སམ། དེ་དག་དགེ་སློང་དབང་ཆེ་བར་གྲགས་པས་བསྒོ་བས་ཅང་མི་སྨྲ་བར་འཁོད་དོ། །དེ་དག་བཙུན་མོ་རྒྱལ་རིགས་དབྱར་ཚུལ་མའི་ཁྱིམ་དང་། བཙུན་
མོ་ཕྲེང་ལྡན་མའི་ཁྱིམ་དང་། ཁྱིམ་བདག་མགོན་མེད་ཟས་སྦྱིན་གྱི་ཁྱིམ་དང་། བླ་མཁྱེན་དྲང་སྲོང་བྱིན་དང་། རྙིང་པ་གཉིས་ཀྱི་ཁྱིམ་དང་། དགེ་བསྙེན་མ་རི་དགས་འཛིན་གྱི་མ་ས་གའི་ཁྱིམ་དང་། དགེ་བསྙེན་མ་ཁྱིམ་བདག་གི་ཆུང་མ་ལེགས་སྐྱེས་ཀྱི་ཁྱིམ་དུ་མཐར་གྱིས་དོང་
སྟེ་སྔར་བསྟན་པ་སྐད་བརྗོད་པ་དང་། དེ་དག་གིས་ཀྱང་དགེ་སློང་རེ་རེ་ལ་ཡོ་བྱད་བཅུ་གསུམ་བཅུ་གསུམ་བྱིན་ནོ། །དེ་ནས་དྲུག་སྡེ་དག་གིས་སྨྲས་པ། ཚེ་དང་ལྡན་པ་དག་གལ་ཏེ་དགེ་སློང་བརྒྱ་གྲལ་དུ་མ་བཀོད་ན་གྲལ་སྟོངས་པར་འགྱུར་གྱིས་དེང་ལ་གྲལ་དུ་བཀོད་ཅིག །མ་

ཉེས་ཏེ་བདག་ཅག་ཀྱང་བསོད་སྙོམས་བླངས་ཏེ་འོང་ངོ་། །དྲུག་སྡེ་དག་གིས་གཙུག་ལག་ཁང་དུ་དོང་སྟེ་རྙང་རྙིང་དག་ལས་བཞི་བཅུ་ཕུང་པོར་བྱས་ཏེ་བཞག་གོ། །དགེ་སློང་བཞི་བཅུ་པོ་དག་ཟས་ཀྱི་བྱ་བ་བྱས་ཏེ་འོངས་པ་དང་། དྲུག་སྡེ་དག་གིས་ལྷན་ཅིག་གནས་
པ་དང་། ཉེ་གནས་དག་ལ་སྨྲས་པ། ཚེ་དང་ལྡན་པ་དག་ཚུར་ཤེག་དོན་ཉུང་ངུ་དག་བོས་ཤིག །དེ་དག་གིས་དེ་དག་བོས་པ་དང་། དྲུག་སྡེ་དག་གིས་སྨྲས་པ། ཚེ་དང་ལྡན་པ་དག་ཅི་ཁོ་བོ་ཅག་ཁྱེད་ཀྱི་གོས་སྲུང་བ་ཡིན་ནམ། རང་གི་གོས་དག་ལོང་ཤིག །དགེ་སློང་བཞི་
བཅུ་པོ་དག་གིས་ཕན་ཚུན་གདོང་དུ་བལྟ་བར་བརྩམས་པ་དང་། དྲུག་སྡེ་དག་གིས་སྨྲས་པ། ཚེ་དང་ལྡན་པ་དག་ཅིའི་ཕྱིར་ཕན་ཚུན་གདོང་དུ་ལྟ། གནས་བརྟན་དག་ཐམས་ཅད་རྙང་རྙིང་ཤ་སྟག་ཡིན་ནོ། །ཚེ་དང་ལྡན་པ་དག་འདི་དག་མདུད་པ་འོར་ཅིག་དང་སྣམ་སྦྱར་ཡིན་ནོ། །འདི་དག་ནི་དྲུབས་
ཤིག་དང་བླ་གོས་ཡིན་ནོ། །འདི་དག་ནི་དྲུབས་ཤིག་དང་མཐང་གོས་ཡིན་ནོ། །འདི་དག་ནི་དྲུབས་ཤིག་དང་རྔུལ་གཟན་ཡིན་ནོ། །གལ་ཏེ་མི་དགའ་ན་འདོང་དང་ཡང་བསླང་བར་བྱའོ། །ཀྱེ་མའོ་གནས་བརྟན་དག་འདི་དག་ཉིད་ཀྱང་མ་བསླངས་ཀྱང་རུང་ངོ་། །དེ་དག་གིས་རྙང་རྙིང་དེ་དག་ཁྱེར་ཏེ་དགོན་པར་དོང་ནས་
འཚེམ་ཞིང་འཁོད་དོ། །ཐམས་ཅད་དུ་སྒྲ་གྲགས་པ། གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་དག་རེ་རེས་ཀྱང་ཡོ་བྱད་བཅུ་གསུམ་བདུན་བདུན་རྙེད་དོ་ཞེས་གྲགས་སོ། །དེ་དག་དགེ་སློང་རྣམས་ཀྱིས་མཐོང་ནས་སྨྲས་པ། ཚེ་དང་ལྡན་པ་དག་བདག་ཅག་གིས་གཞན་ཐོས་ལ་
གཞན་མཐོང་སྟེ། བདག་ཅག་གིས་གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་དག་རེ་རེས་ཀྱང་ཡོ་བྱད་བཅུ་གསུམ་བདུན་བདུན་རྙེད་དོ་ཞེས་ཐོས་ན། ཚེ་དང་ལྡན་པ་དག་ཀོ་རྙང་རྙིང་དག་འཚེམ་ཞིང་འཁོད་དོ། །དེ་དག་གིས་སྨྲས་པ། ཁྱེད་ཅག་གིས་ལྟ་ཁོ་བོ་ཅག་རང་རང་ཕྲག་པ་དག་
གིས་ཀྱང་ཁྱེར་ཞེས་ཀྱང་ཐོས་སོ་ཞེས་ཟེར་བའི་སྐབས་དེ་དགེ་སློང་རྣམས་ལ་བརྗོད་ནས་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །

སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་གྲོང་ཕྲེང་བ་ཅན་པའི་དགེ་སློང་བཞི་བཅུ་པོ་དག་ལ་རྨས་པ། དགེ་སློང་དག་ཁྱེད་ལེན་པའི་དྲོད་མི་ཤེས་པ་བདེན་ནམ།
བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་མི་བརྩོན་པ་དང་། མི་སྦྱོར་བ་དང་། མ་བརྟགས་པར་སྤྱོད་པ་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་བརྩོན་པ་དང་། སྦྱོར་བ་དང་། བརྟགས་ཏེ་སྤྱོད་པའི་བསྔགས་པ་བརྗོད་ནས། དགེ་སློང་
རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་
ལྟར་གདོན་པར་བྱ་སྟེ། དགེ་སློང་གོས་ཕྲོགས་སམ། གོས་རླག་གམ། གོས་ཚིག་གམ། གོས་རླུང་གིས་ཁྱེར་རམ། གོས་ཆུས་ཁྱེར་ན་ཁྱིམ་བདག་གམ། ཁྱིམ་བདག་གི་ཆུང་མ་ཉེ་དུ་མ་ཡིན་པའི་གན་དུ་སོང་ལ་གོས་བསླང་བར་བྱའོ། །གལ་ཏེ་དེ་ལ་བྲམ་ཟེའམ།
ཁྱིམ་བདག་དད་པ་ཅན་ཞིག་གིས་དུས་ཀྱིས་གོས་མང་པོ་སྟོབས་པར་འདོད་ན་དགེ་སློང་དེས་དེ་ལས་གོས་སྟོད་གཡོགས་སྨད་གཡོགས་དང་བཅས་པའི་མཐར་ཐུག་པར་བླང་བར་བྱའོ། །དེ་ལས་ལྷག་པར་ལེན་ན་སྤང་བའི་ལྟུང་བྱེད་དོ། །དགེ་སློང་ཞེས་བྱ་བ་ནི་ཆོས་འདི་པའོ། །གོས་
ཕྲོགས་སམ་ཞེས་བྱ་བ་ནི་འདི་ལྟ་སྟེ། དགེ་སློང་གི་གོས་དག་ཆོམ་རྐུན་པ་དག་གམ། གཡོན་ཅན་དག་གིས་ཕྲོགས་པར་གྱུར་པའོ། །གོས་རླག་གམ་ཞེས་བྱ་བ་ནི་འདི་ལྟ་སྟེ། དགེ་སློང་གི་གོས་དག་རླག་གམ་འཁྱམས་པར་གྱུར་པའོ། །གོས་ཚིག་གམ་ཞེས་བྱ་བ་ནི་འདི་ལྟ་སྟེ།
དགེ་སློང་གི་གོས་དག་མེས་ཚིག་པར་གྱུར་པའོ། །གོས་རླུང་གིས་ཁྱེར་རམ་ཞེས་བྱ་བ་ནི་འདི་ལྟ་སྟེ། དགེ་སློང་གི་གོས་དག་རླུང་གིས་ཁྱེར་བར་གྱུར་པའོ། །གོས་ཆུས་ཁྱེར་ན་ཞེས་བྱ་བ་ནི་འདི་ལྟ་སྟེ། དགེ་སློང་གི་གོས་དག་ཆུས་ཁྱེར་བར་གྱུར་པའོ། །ཁྱིམ་བདག་ཅེས་བྱ་

བ་ནི་སྐྱེས་པའོ། །ཁྱིམ་བདག་གི་ཆུང་མ་ཞེས་བྱ་བ་ནི་བུད་མེད་དོ། །ཉེ་དུ་མ་ཡིན་པ་ཞེས་བྱ་བ་ནི་ཕྱི་མོ་དང་། མེས་པོ་དང་། ཕྲུགས་ཀྱི་བདུན་པ་ཚུན་ཆད་ཉེ་དུ་ཡིན་ལ། དེ་ཕན་ཆད་ནི་ཉེ་དུ་མ་ཡིན་ནོ། །གན་དུ་སོང་ལ་ཞེས་བྱ་བ་ནི་གན་དུ་སོང་སྟེའོ། །གོས་
ཞེས་བྱ་བ་ནི་བདུན་པོ་བལ་གོས་དང་། ཤ་ནའི་གོས་དང་། ཟར་མའི་གོས་དང་། དུ་གུ་ལའི་གོས་དང་། རས་བལ་གྱི་གོས་དང་། ཀོ་ཏམ་པའི་གོས་དང་། ཉི་འོག་གི་གོས་ལས་གང་ཡང་རུང་བའོ། །བསླང་བར་བྱའོ་ཞེས་བྱ་བ་ནི་སློང་མོ་བྱ་བའོ། །འདོད་ན་ཞེས་བྱ་
བ་ནི་གལ་ཏེ་དོན་དུ་གཉེར་ནའོ། །གོས་སྟོད་གཡོགས་སྨད་གཡོགས་དང་བཅས་པའི་མཐར་ཐུག་པ་བླང་བར་བྱའོ་ཞེས་བྱ་བ་ནི་སྟོད་གཡོགས་སྨད་གཡོགས་དང་བཅས་པ་ནི་གཉིས་ཏེ། དགེ་སློང་གི་སྟོད་གཡོགས་སྨད་གཡོགས་དང་བཅས་པ་དང་། ཁྱིམ་པའི་སྟོད་གཡོགས་སྨད་
གཡོགས་དང་བཅས་པའོ། །དགེ་སློང་གི་སྟོད་གཡོགས་སྨད་གཡོགས་དང་བཅས་པ་ནི་སར་པ་ལས་སྣམ་སྦྱར་ཉི་རིམ་དང་། རས་ཡུག་ཕྲན་ཁྲུ་ལྔ་པ་དང་དོ་པའོ། །ཁྱིམ་པའི་སྟོད་གཡོགས་སྨད་གཡོགས་དང་བཅས་པ་ནི་རས་ཡུག་ཆེན་ཁྲུ་བཅུ་གཉིས་པ་དང་། རས་
ཡུག་ཕྲན་ཁྲུ་བདུན་པ་དང་དོ་པའོ། །དེ་ལས་ལྷག་པ་ལེན་ན་ཞེས་བྱ་བ་ནི་དེ་ལས་གོང་མའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བ་ཇི་ལྟར་འགྱུར་
ཞེ་ན། དགེ་སློང་ཁྱིམ་པའི་སྟོད་གཡོགས་སྨད་གཡོགས་དང་བཅས་པ་སློང་བས་ཁྱིམ་པའི་སྟོད་གཡོགས་སྨད་གཡོགས་དང་བཅས་པ་ཐོབ་པ་ན་ལྷག་པ་སློང་ན་དེ་སློང་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་དགེ་སློང་གི་སྟོད་
གཡོགས་སྨད་གཡོགས་དང་བཅས་པ་སློང་བས་དགེ་སློང་གི་སྟོད་གཡོགས་སྨད་གཡོགས་དང་བཅས་པ་ཐོབ་པ་ན། ལྷག་པ་སློང་ན་དེ་སློང་བ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་ཁྱིམ་པའི་སྟོད་གཡོགས་སྨད་གཡོགས་དང་

བཅས་པ་སློང་བས་ཁྱིམ་པའི་སྟོད་གཡོགས་སྨད་གཡོགས་དང་བཅས་པ་ཐོབ་པ་ན། གལ་ཏེ་ཆུང་ན་ཡང་བསླང་བར་མི་བྱ་ལ། ལྷག་ན་ཡང་སྦྱིན་པར་མི་བྱའོ། །དགེ་སློང་དགེ་སློང་གི་སྟོད་གཡོགས་སྨད་གཡོགས་དང་བཅས་པ་སློང་བས་དགེ་སློང་གི་སྟོད་གཡོགས་སྨད་གཡོགས་
དང་བཅས་པ་ཐོབ་པ་ན། གལ་ཏེ་ཆུང་ན་བསླང་བར་བྱ་ལ། ལྷག་ན་ཡང་སྦྱིན་པར་བྱའོ། །དེ་ལྟར་ན་དགེ་སློང་གིས་ཁྱིམ་པའི་སྟོད་གཡོགས་སྨད་གཡོགས་དང་བཅས་པ་ལས་ལྷག་པ་སློང་བ་དང་། དགེ་སློང་གི་སྟོད་གཡོགས་སྨད་གཡོགས་དང་བཅས་པ་ལས་ལྷག་པར་སྦྱིན་
པར་མི་བྱེད་ན་ཐམས་ཅད་དུ་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་གོས་སྤང་བར་གྱུར་ན་དེ་མ་སྤངས་ཤིང་བྲལ་བར་མ་བྱས་ལ། ལྟུང་བ་མ་བཤགས་པར་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གི་གོས་སྤང་བར་གྱུར་ན་དེ་སྤངས་ཤིང་བྲལ་
བར་མ་བྱས་ལ། ལྟུང་བ་མ་བཤགས་པར་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གི་གོས་སྤང་བར་གྱུར་ན་དེ་སྤངས་ཤིང་བྲལ་བར་བྱས་ལ། ལྟུང་བ་མ་བཤགས་པར་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་
སློང་གི་གོས་སྤང་བར་གྱུར་ན། དེ་སྤངས་ཤིང་བྲལ་བར་བྱས་ལ་ལྟུང་བ་བཤགས་ནས་གཞན་ཞིག་རྙེད་ན་དེ་ལ་ནི་ལྟུང་བ་མེད་དོ། །དེ་བཞིན་དུ་དགེ་སློང་གིས་ཇི་ཙམ་དུ་སྤང་བའི་དངོས་པོ་དེ་ཉིད་ཀྱིས་མ་བཤགས་ཤིང་སོ་སོར་མ་བཤགས་པར་ལྷུང་བཟེད་དམ། ཆོས་གོས་སམ།
དྲ་བའམ། ཕོར་བུའམ། སྐ་རགས་སམ། དགེ་སྦྱོང་གི་འཚོ་བའི་ཡོ་བྱད་གང་ཡང་རུང་བ་ཉེ་བར་འཇོག་པར་བྱེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །
སློང་བར་རིགས་པའི་སྤང་བ་སྟེ་བདུན་པ་རྫོགས་སྷོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་

དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །ཁྱིམ་བདག་དེ་གཞན་གྱི་ཆུང་མ་ལ་ཆགས་པར་གྱུར་ནས་དེ་ལ་ཆུང་མས་རྗེའི་སྲས་དེ་ལྟར་མ་མཛད་ཅིག་ཅེས་ཕྱིར་བཟློག་ན་ཇི་ཙམ་དུ་དེ་ཕྱིར་བཟློག་ཀྱང་ཕྱིར་མ་ལོག་པ་དེ་ཙམ་དུ་དེའི་
ཆུང་མ་དེ་ཡང་སྐྱེས་པ་གཞན་དག་དང་ལྷན་ཅིག་འཁྲུལ་པ་རྩོམ་པར་བྱེད་དོ། །ཁྱིམ་བདག་དེ་ཡང་བུད་མེད་གཞན་དག་ལ་སྦྱིན་པར་བྱེད་ལ། ཆུང་མ་དེ་ཡང་སྐྱེས་པ་གཞན་དག་ལ་སྦྱིན་པར་བྱེད་པས་དེ་ལྟར་ཁྱིམ་དེ་གཉིས་ཀ་ནས་རྒུད་པར་གྱུར་ནས་དེ་གཉིས་ལ་བུ་མོ་མངག་གཞུག་མ་
ཞིག་ཡོད་ནས་ཁྱིམ་བདག་དེས་བུ་མོ་དེ་ལ་འདིས་ཁྱིམ་རྒུད་པར་བྱས་སོ་ཞེས་ཁུ་ཚུར་དང་ཐལ་ལྕག་དག་གིས་རྡེག་པར་བྱེད་དོ། །བུ་མོ་དེས་སྨྲས་པ། བདག་གིས་ཁྱིམ་རྒུད་པར་གྱུར་པ་འདི་ཅི་ལས་གྱུར་པ་འཚལ་མོད་ཀྱི། འོན་ཀྱང་བདག་གིས་ཇི་ལྟར་རྗེ་དག་ལ་བསྔགས་པ་མ་
ལགས་པ་བརྗོད་པར་བགྱིར་རུང་། ཉེ་དགའས་དེ་ཚོར་ནས་ཁྱིམ་བདག་དེ་དང་ཁྱིམ་བདག་གི་ཆུང་མ་དེའི་གན་དུ་སོང་སྟེ། ཅི་ནས་ཀྱང་དེ་གཉིས་སྐྱབས་སུ་འགྲོ་བ་དང་བསླབ་པའི་གཞི་དག་ལ་གནས་པར་འགྱུར་བ་དེ་ལྟ་དེ་ལྟར་ཚུལ་ཁྲིམས་ཀྱི་བསྔགས་པ་བརྗོད་ཅིང་ཚུལ་ཁྲིམས་
འཆལ་པའི་བསྔགས་པ་མ་ཡིན་པ་བརྗོད་ནས། དེས་དེ་གཉིས་སྐྱབས་སུ་འགྲོ་བ་དང་བསླབ་པའི་གཞི་དག་ལ་གནས་པར་བྱས་སོ། །ཁྱིམ་བདག་དེ་གཏུམ་པ། བརྟུན་ངས་པ། དྲག་ཤུལ་ཆེ་བ་ཡིན་པས་ཡང་བུ་མོ་དེ་ལ་བརྡེག་པར་བརྩམས་པ་དང་། ཆུང་མས་དེ་ལ་སྨྲས་པ།
རྗེའི་སྲས་གང་གི་ཚེ་བདག་ཅག་ལས་དང་ལས་ཀྱི་རྣམ་པར་སྨིན་པ་མི་མཁྱེན་པ་དེའི་ཚེ་གོ་རྡེག་པར་མཛད་མོད། ད་བདག་ཅག་དགེ་བའི་བཤེས་གཉེན་འཕགས་པ་ཉེ་དགའ་ལ་བརྟེན་ནས་ལས་དང་ལས་ཀྱི་རྣམ་པར་སྨིན་པ་མཁྱེན་པས་འདི་ལྟར་འཇིག་རྟེན་ནི་རང་གི་ལས་ཀྱི་འབྲས་
བུ་ལ་སྤྱོད་པ་ལགས་པས་སུ་ཞིག་སུའི་བྲན་ལགས། བུ་མོ་འདི་ལ་རྡེག་པར་མ་མཛད་ཅིག །བཟང་མོ་ཁྱོད་ཟེར་བ་མ་ཉེས་སོ། །བུ་མོ་ཚུར་ཤོག །ཁྲུས་གྱིས་ལ་ཤོག་ཤིག །བུ་མོ་དེ་ཁྲུས་བྱས་ཏེ་འོངས་པ་དང་དེས་དེ་ལ་གོས་ཕྲུགས་གཅིག་བསྐོན་ནས་སྨྲས་པ། བུ་མོ་

དགའ་ཞིང་ལས་བྱོས་ཤིག །བུ་མོ་དེས་བསམས་པ། ཁྱིམ་བདག་ཁྱོ་ཤུག་འདི་སྔོན་གཏུམ་པ། བརྟུན་ངས་པ། དྲག་ཤུལ་ཆེ་བ་ཡིན་ཏེ། ཡང་དང་ཡང་དུ་བདག་ལ་ཁུ་ཚུར་དང་། ཐལ་ལྕག་དག་གིས་རྡེག་པར་བྱེད་ཅིང་། ཟས་དང་གོས་ངན་པ་དག་སྦྱིན་པར་བྱེད་
ན། ད་འདི་བདག་གི་ཕ་མ་དང་འདྲ་བར་གྱུར་ཏོ་སྙམ་ནས། ཡང་བསམས་པ། གང་ཚུན་ཆད་ནས་འཕགས་པ་ཉེ་དགའ་ཁྱིམ་དུ་འཇུག་པར་བརྩམས་པ་དེ་ཚུན་ཆད་ནས་ཁྱིམ་བདག་འདི་ཕ་མ་དང་འདྲ་བར་གྱུར་པས་བདག་གིས་འཕགས་པ་ཉེ་དགའ་ལ་ཅི་ཞིག་གི་དགའ་བར་བྱ་སྙམ་
ནས། དེས་བསམས་པ། གལ་ཏེ་བདག་གིས་འདི་ལ་ཅུང་ཞིག་བརྐུས་ཏེ་དབུལ་དུ་ནི་ཁྱིམ་བདག་འདིས་བདག་བརྡེག་བཙོག་མང་པོ་བྱས་ཏེ་སྔོན་གྱི་གནས་སུ་བཞག་པར་འགྱུར་རོ་སྙམ་ནས་དེ་སྡོད་ཅིང་འདུག་གོ། །ཁྱིམ་བདག་གི་ཆུང་མ་དེས་ཁྱིམ་བདག་དེ་ལ་སྨྲས་པ། རྗེའི་
སྲས་མཁྱེན་པར་མཛོད་ཅིག །འཕགས་པ་ཉེ་དགའ་ནི་བདག་ཅག་གི་དགེ་བའི་བཤེས་གཉེན་ལགས་ཏེ། འཕགས་པ་ཉེ་དགའས་བདག་ཅག་ལས་དྲི་མ་ཅན་དང་ཕྲལ་ནས་སྐྱབས་སུ་འགྲོ་བ་དང་བསླབ་པའི་གཞི་དག་ལ་བཀོད་དེ། ཡང་དང་ཡང་དུ་བདག་ཅག་ལ་ཆོས་
ཀྱིས་སྡུད་པར་བྱེད་པས་བདག་ཅག་གིས་ཀྱང་དེ་ལ་ཟང་ཟིང་ཅུང་ཟད་ཀྱིས་བསྡུ་བར་བགྱིའོ། །བཟང་མོ་དེ་བཞིན་བྱའོ། །ཅི་ཞིག་བགྱི། དེ་ལ་རས་ཡུག་ཆེན་ཅིག་དབུལ་བར་བྱའོ། །བུ་མོ་དེས་དེ་ཐོས་ནས་བསམས་པ། བདག་གིས་འཕགས་པ་ཉེ་དགའ་ལ་དགའ་བ་
དེ་སྦྲན་པར་བྱའོ་སྙམ་མོ། །ཉེ་དགའ་ཡང་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ཏེ་མཐར་གྱིས་བསོད་སྙོམས་ལ་རྒྱུ་བ་ན་ཁྱིམ་དེར་ཞུགས་པ་དང་། བུ་མོ་དེས་ཁྱིམ་ལེགས་པར་བྱུགས་ཤིང་ཕྱག་དར་བོར་ནས་དེས་ཉེ་
དགའ་མཐོང་བ་དང་རྐང་པ་གཉིས་ལ་ཕྱག་འཚལ་ཏེ་སྨྲས་པ། བདག་གིས་འཕགས་པ་ཉེ་དགའ་ལ་དགྱེས་པ་སྦྲན་པར་བགྱིའོ། །ཁྱིམ་བདག་འདི་ཁྱོད་ལ་རས་ཡུག་ཆེན་འབུལ་བར་འགྱུར་རོ། །ཉེ་དགའས་བསམས་པ། སའི་སྟེང་ན་འདོད་པའི་བདག་ཉིད་ཅན་གང་ཇི་སྙེད་

པ་དེ་དག་དང་བདག་མཉམ་པར་དེང་བུ་མོ་འདིས་ཀྱང་འཕྲིགས་སོ་སྙམ་ནས་དེས་གཤེ་སྟེ་སྨྲས་པ། བུ་མོ་གལ་ཏེ་བདེན་པར་གྱུར་ན་ནི་ངས་ཁྱོད་ལ་གཤེ་བ་དག་ལ་ཆུགས་མ་བྱའོ། །ཇི་སྟེ་བརྫུན་པར་གྱུར་ན་ནི་བརྡེག་བཙོག་མང་པོ་བྱེད་དུ་བཅུག་སྟེ་སྔོན་གྱི་
གནས་ཇི་ལྟ་བར་གཞག་པར་བྱའོ། །འཕགས་པ་སྤྱོ་བ་མང་དུ་མཛད་ན་བཞུད་ཅིག་དང་ཁྱོད་ཉིད་ཀྱིས་མཁྱེན་པར་འགྱུར་རོ། །དེ་བཞུད་ནས་སྟན་བཤམས་པ་ཉིད་ལ་འདུག་པ་དང་། ཁྱིམ་བདག་དེ་ཆུང་མ་དང་བཅས་པས་རྐང་པ་ལ་ཕྱག་འཚལ་ཏེ་སྟན་ཆེས་དམའ་བ་བླངས་
ནས་ཆོས་མཉན་པའི་ཕྱིར་མདུན་དུ་འདུག་གོ། །ཉེ་དགའས་སྨྲས་པ། ཁྱིམ་བདག་ཁོ་བོ་ལ་བསྐོན་པར་བྱ་བའི་རས་ཡུག་ཆེན་གང་ཡིན་པ་དེ་བལྟའོ། །དེ་གཉིས་ཀྱིས་ཕན་ཚུན་གདོང་དུ་བལྟ་བར་བརྩམས་ཏེ་འདི་སྐད་ཅེས་སྨྲས་སོ། །འཕགས་པ་བདག་ཅག་གིས་གསང་སྟེ་སྨྲས་པ་
དེ་འཕགས་པ་ལ་སུས་བགྱིས། ཅི་འཕགས་པས་གཞན་གྱི་སེམས་ཀྱང་མཁྱེན་ནམ། ཉེ་དགའས་སྨྲས་པ། ཁོ་བོ་ལྷུང་བཟེད་དུ་ཟོས་ཤིང་སོ་ལྷགས་པ་དང་། སྐྲ་དཀར་པོར་གྱུར་པ་ཡིན་ན་ཁོ་བོ་ལ་དེ་ཙམ་ཡང་མི་སྲིད་དམ། ཁྱིམ་བདག་དེས་རས་ཡུག་ཆེན་དེ་
བླངས་ཏེ་ཉེ་དགའ་ལ་ཕུལ་བ་དང་། ཉེ་དགའས་རས་ཡུག་ཆེན་དེ་མཐོང་ནས་ལག་པ་གཉིས་འདྲིལ་བར་བྱེད། བཞིན་སྒྱུར་བར་བྱེད་དོ། །ཁྱིམ་བདག་གིས་སྨྲས་པ། འཕགས་པ་ཅིའི་སླད་དུ་ཕྱག་གཉིས་འདྲིལ་བར་མཛད། ཞལ་སྒྱུར་བར་མཛད། ཉེ་དགའས་སྨྲས་
པ། ཁྱིམ་བདག་འདི་ནི་ཁྱོད་ལ་ཡོངས་སུ་བཏང་བ་ལས་བྱུང་བའི་བསོད་ནམས་ནི་ཡོད་ན་ཡོངས་སུ་ལོངས་སྤྱད་པ་ལས་བྱུང་བའི་བསོད་ནམས་ནི་མེད་དེ། རས་ཡུག་ཆེན་འདི་ནི་མཆིལ་ལྷམ་ཕྱི་བའམ། སྐར་ཁུང་གླན་པར་རུང་སྟེ། འདི་ནི་ཆོས་གོས་ཀྱི་གདོང་ལ་ཡོངས་སུ་
ཟད་པ་དང་མཐར་ཐུག་པར་འགྱུར་རོ། །འོ་ན་ཇི་ལྟར་བགྱི། རས་ཡུག་ཆེན་བཟང་པོ་གཞན་བྱིན་ཅིག །རས་ཡུག་ཆེན་གཞན་མ་མཆིས་སོ། །ཚོང་དུས་ནས་ཉོས་ཏེ་བྱིན་ཅིག་རིན་མ་མཆིས་སོ། །དུས་ཐོབ་ལ་བྱིན་ཅིག །ཁྱིམ་བདག་དེས་ཆུང་མའི་གདོང་དུ་བལྟ་བར་བརྩམས་

པ་དང་། ཆུང་མས་སྨྲས་པ། རྗེའི་སྲས་བདག་ཅག་ལ་འཕགས་པ་ཉེ་དགའས་ཕན་བཏགས་ཀྱིས་རས་ཡུག་ཆེན་འཇོལ་ལ་དེ་ལ་ཕུལ་ཅིག །ཁྱིམ་བདག་དེ་ཉེ་དགའ་དང་ལྷན་ཅིག་སྲང་དུ་སོང་ནས། ཚོང་ཁང་དུ་ཕྱིན་པ་དང་། ཉེ་དགའས་བསམས་པ། ཚོང་པ་འདི་ང་རྒྱལ་བསྐྱེད་
པར་བྱ་སྟེ། དེས་ན་རས་ཡུག་ཆེན་བཟང་པོ་སྟེར་བར་འགྱུར་རོ་སྙམ་ནས་ཉེ་དགའས་ཁྱིམ་བདག་ལ་སྨྲས་པ། ཁྱིམ་བདག་ཚོང་པ་འདི་ནི་གཅམ་བུ་ཞིག་ཡིན་པས་འདི་ལ་རས་ཡུག་ཆེན་བཟང་པོ་མེད་ཀྱིས་གཞན་དུ་འདོང་ངོ་། །ཚོང་པ་དེས་དེ་ཐོས་ནས་དེས་ཆེན་པོ་ལ་འོས་པའི་
རས་ཡུག་ཆེན་བསྟན་ཏེ་སྨྲས་པ། འཕགས་པ་རས་ཡུག་ཆེན་ལ་གཟིགས། རས་ཡུག་ཆེན་འདི་ནི་བཟང་ན་འདི་རིན་ཇི་ཙམ་འདི་དང་འདི་ཙམ་མོ། །ཁྱིམ་བདག་འདི་འཇལ་ལོ། །ཁྱིམ་བདག་འཇལ་ལམ་འཇལ་ལོ། །དུས་ཇི་ཙམ་ན། དུས་འདི་ཙམ་ནའོ། །ཚོང་པ་
དེས་ཁྱིམ་བདག་དེ་ལ་རས་ཡུག་ཆེན་དེ་བྱིན་ནས་ཁྱིམ་བདག་དེས་ཉེ་དགའ་ལ་ཕུལ་བ་དང་། ཉེ་དགའས་ཁྱིམ་བདག་ཨ་རོག་གྱ་ཞེས་སྨྲས་ནས། ཁྱོད་སྦྱིན་པ་འདིས་སེམས་ཀྱི་རྒྱན་དང་། སེམས་ཀྱི་ཡོ་བྱད་དང་། རྣལ་འབྱོར་གྱི་ཚོགས་དང་། དོན་གྱི་མཆོག་ཐོབ་པ་དང་། ལྷ་
དང་མི་རྣམས་ཀྱི་གོས་དག་ཐོབ་པར་གྱུར་ཅིག་ཅེས་སྨྲས་ཏེ་སོང་ངོ་། །ཁྱིམ་བདག་དེ་ལོངས་སྤྱོད་སྲབས་ནས། དེས་རིན་དེ་དུས་དེ་ཙམ་གྱིས་འབུལ་བར་མ་ནུས་ནས། ཚོང་པ་དེས་ཁྱིམ་བདག་དེ་ཉི་མ་ལ་བཏགས་པ་དང་དེ་ཆུང་པོ་གྲོགས་དག་གིས་མཐོང་ནས་སྨྲས་པ། ཅི་ཁྱོད་
ཞུན་མར་འཐུངས་སམ། འོན་ཏེ་རིམས་ཀྱིས་བཏབ། བུ་ལོན་པས་བཟུང་སྟེ་འདུག་གོ། །ཁྱོད་ཀྱི་ཕས་ཀྱང་བུ་ལོན་པ་ཡོད་པར་མ་བྱས། མེས་པོ་དག་གིས་ཀྱང་མ་བྱས་ན་བུ་ལོན་པ་ག་ལས་བྱུང་། དེས་སྨྲས་པ། གང་དག་ཤཱཀྱའི་བུའི་དགེ་སྦྱོང་དག་ལ་དད་པར་བྱེད་པ་དེ་
དག་འདི་ལྟར་འགྱུར་ཏེ། འདི་ལྟར་གང་བྱིན་པ་དེ་མི་ལེན་པར་ལྷག་པར་སློང་བར་བྱེད་དོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་

བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཉེ་དགའ་ལ་རྨས་པ། ཉེ་དགའ་ཁྱོད་
གང་བྱིན་པས་མི་མགུ་ཞིང་ལྷག་པ་སློང་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་
མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་
ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གི་ཕྱིར་ཁྱིམ་བདག་གམ་ཁྱིམ་བདག་གི་ཆུང་མ་ཉེ་དུ་མ་ཡིན་པས་གོས་ཀྱི་རིན་དག་སྤགས་ནས་བདག་གི་གོས་ཀྱི་རིན་འདི་དག་གིས་གོས་འདི་དང་འདི་ལྟ་བུ་ཞིག་ཉོས་ལ་
དགེ་སློང་མིང་འདི་ཞེས་བྱ་བ་འོངས་པ་དང་དེ་ལ་གོས་རུང་བ་དུས་སུ་བསྐོན་ནོ་སྙམ་པ་ལས། དེ་ན་གལ་ཏེ་དགེ་སློང་དེ་ལ་སྔར་མ་བསྟབས་པར་རྣམ་པར་རྟོག་པ་འགའ་ཞིག་བྱུང་སྟེ། བཟང་པོ་འདོད་པའི་ཕྱིར་ཁྱིམ་བདག་གམ། ཁྱིམ་བདག་གི་ཆུང་མ་ཉེ་དུ་མ་ཡིན་པ་དེའི་གན་དུ་
སོང་ནས་འདི་སྐད་ཅེས་ཚེ་དང་ལྡན་པས་བདག་གི་ཕྱིར་གོས་ཀྱི་རིན་གང་དག་སྤགས་པའི་གོས་ཀྱི་རིན་དེ་དག་གིས་ཚེ་དང་ལྡན་པ་གོས་འདི་དང་འདི་ལྟ་བུ་ཞིག་ཉོས་ལ་བདག་ལ་གོས་རུང་བ་དུས་སུ་ལེགས་པར་བསྐོན་ཅིག་ཅེས་སྨྲས་ཏེ་གོས་དྲུབ་ན་སྤང་བའི་ལྟུང་བྱེད་དོ། །དགེ་སློང་
གི་ཕྱིར་ཞེས་བྱ་བ་ནི་ཤཱཀྱའི་བུ་ཉེ་དགའའམ། གཞན་ཡང་དེ་ལྟ་བུ་གང་ཡིན་པའོ། །ཁྱིམ་བདག་གམ་ཞེས་བྱ་བ་ནི་སྐྱེས་པའོ། །ཁྱིམ་བདག་གི་ཆུང་མ་ཞེས་བྱ་བ་ནི་བུད་མེད་དོ། །ཉེ་དུ་མ་ཡིན་པས་ཞེས་བྱ་བ་ནི་ཕྱི་མོ་དང་། མེས་པོ་དང་། ཕྲུགས་ཀྱི་བདུན་པ་ཚུན་ཆད་ནི་

ཉེ་དུ་ཡིན་ལ། དེ་ཕན་ཆད་ནི་ཉེ་དུ་མ་ཡིན་ནོ། །གོས་ཀྱི་རིན་དག་ཅེས་བྱ་བ་ནི་གསེར་རམ་དངུལ་ལོ། །གོས་འདི་དང་འདི་ལྟ་བུ་ཞིག་ཅེས་བྱ་བ་ནི་བདུན་པོ་བལ་གོས་དང་། ཤ་ནའི་གོས་དང་། ཟར་མའི་གོས་དང་། དུ་གུ་ལའི་གོས་དང་། རས་བལ་གྱི་གོས་དང་།
ཀོ་ཏམ་པའི་གོས་དང་། ཉི་འོག་གི་གོས་ལས་གང་ཡང་རུང་བའོ། །ཉོས་ལ་ཞེས་བྱ་བ་ནི་ཉོས་ཏེའོ། །དགེ་སློང་མིང་འདི་ཞེས་བྱ་བ་འོངས་དང་ཞེས་བྱ་བ་ནི་ཤཱཀྱའི་བུ་ཉེ་དགའོ། །དེ་ལ་གོས་རུང་བ་དུས་སུ་བསྐོན་ནོ་སྙམ་པ་ལས་ཞེས་བྱ་བ་ནི་ལོངས་སྤྱད་པར་བཟོད་པའོ། །དེ་
ནི་གལ་ཏེ་དགེ་སློང་དེ་ལ་སྔར་མ་བསྟབས་པར་ཞེས་བྱ་བ་ནི་སྔར་མགྲོན་དུ་མ་བོས་པར་རོ། །རྣམ་པར་རྟོག་པ་འགའ་ཞིག་བྱུང་སྟེ་ཞེས་བྱ་བ་ནི་བསྙེན་བཀུར་བྱེད་པ་ཞིག་བྱུང་སྟེའོ། །བཟང་པོ་འདོད་པའི་ཕྱིར་ཞེས་བྱ་བ་ནི་རབ་དང་མཆོག་གི་ཕྱིར་རོ། །ཁྱིམ་བདག་གམ་ཁྱིམ་བདག་གི་
ཆུང་མ་ཉེ་དུ་མ་ཡིན་པ་དེའི་གན་དུ་སོང་ནས་ཞེས་བྱ་བ་ནི་དྲུང་དུ་སོང་ནས་སོ། །གོས་དྲུབ་ན་ཞེས་བྱ་བ་ནི་གོས་ཐོབ་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་སྟེ། དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །
དེ་ལ་ལྟུང་བར་ཇི་ལྟར་འགྱུར་ཞེ་ན། རིན་ཐང་དང་། ཁ་དོག་དང་། ཁྲུ་ཚད་ལས་ཏེ། ཇི་ལྟར་རིན་ཐང་ལས་ཞེ་ན། དགེ་སློང་གིས་ཀཱར་ཥཱ་པ་ཎ་ལྔ་རི་བའི་གོས་ཐོབ་པ་ན་དེ་དེ་ལས་ལྷག་པར་སློང་ན། ལྷག་པ་སློང་བ་དེ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་
བྱེད་དུ་འགྱུར་རོ། །སྔ་མ་ལ་ནི་ལྟུང་བ་མེད་དོ། །ཀཱར་ཥཱ་པ་ཎ་ལྔ་རི་བ་ཇི་ལྟ་བ་བཞིན་དུ་ཀཱར་ཥཱ་པ་ཎ་བཅུ་རི་བ་དང་། ཀཱར་ཥཱ་པ་ཎ་ཉི་ཤུ་རི་བ་དང་། ཀཱར་ཥཱ་པ་ཎ་ལྔ་བཅུ་རི་བའི་བར་གྱི་གོས་ཐོབ་པ་ན། དེ་དེ་ལས་ལྷག་པ་སློང་ན། ལྷག་པ་སློང་བ་དེ་ལ་ཉེས་བྱས་སུ་
འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །སྔ་མ་ལ་ནི་ལྟུང་བ་མེད་དེ་དེ་ལྟར་རིན་ཐང་ལས་སོ། །ཇི་ལྟར་ཁ་དོག་ལས་ཞེ་ན། དགེ་སློང་གིས་གོས་སྔོན་པོ་ཐོབ་པ་ན། དེ་དེ་ལས་ལྷག་པར་སློང་ན། ལྷག་པ་སློང་བ་དེ་ལ་ཉེས་སུ་འགྱུར་ལ། ཐོབ་ན་སྤང་བའི་ལྟུང་

བྱེད་དུ་འགྱུར་རོ། །སྔ་མ་ལ་ནི་ལྟུང་བ་མེད་དོ། །སྔོན་པོ་ཇི་ལྟ་བ་དེ་བཞིན་དུ་སེར་པོ་དང་། དམར་པོ་དང་། སྟུག་པོ་དང་། སྲབ་མོ་ཐོབ་ན་དེ་དེ་ལས་ལྷག་པ་སློང་བ་ན། ལྷག་པ་སློང་བ་དེ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་
འགྱུར་རོ། །སྔ་མ་ལ་ནི་ལྟུང་བ་མེད་དེ། དེ་ལྟར་ཁ་དོག་ལས་སོ། །ཇི་ལྟར་ཁྲུ་ཚད་ལས་ཞེ་ན། དགེ་སློང་གིས་གོས་ཁྲུ་ལྔ་པ་ཐོབ་པ་ན། དེ་དེ་ལས་ལྷག་པ་སློང་ན། ལྷག་པ་སློང་བ་དེ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །སྔ་མ་ལ་
ནི་ལྟུང་བ་མེད་དོ། །ཁྲུ་ལྔ་པ་ཇི་ལྟ་བ་དེ་བཞིན་དུ་ཁྲུ་བཅུ་པ་དང་། ཁྲུ་ཉི་ཤུ་པ་དང་། ཁྲུ་ལྔ་བཅུ་པའི་བར་གྱི་གོས་ཐོབ་ན་དེ་དེ་ལས་ལྷག་པ་སློང་ན། ལྷག་པ་སློང་བ་དེ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་ཏེ། དེ་ལྟར་ཁྲུ་ཚད་ལས་སོ། །དགེ་
སློང་གི་གོས་སྤང་བར་གྱུར་ན་དེ་མ་སྤངས་ཤིང་བྲལ་བར་མ་བྱས་ལ་ལྟུང་བ་མ་བཤགས་པར་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གི་གོས་སྤང་བར་གྱུར་ན་དེ་སྤངས་ཤིང་བྲལ་བར་མ་བྱས་ལ་ལྟུང་བ་མ་བཤགས་པར་གཞན་ཞིག་རྙེད་ན་
དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གི་གོས་སྤང་བར་གྱུར་ན་དེ་སྤངས་ཤིང་བྲལ་བར་བྱས་ལ་ལྟུང་བ་མ་བཤགས་པར་གཞན་ཞིག་རྙེད་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །དགེ་སློང་གི་གོས་སྤང་བར་གྱུར་ན་དེ་སྤངས་ཤིང་བྲལ་བར་བྱས་ལ་
ལྟུང་བ་བཤགས་ནས་གཞན་ཞིག་རྙེད་ན་དེ་ལ་ལྟུང་བ་མེད་དོ། །དེ་བཞིན་དུ་དགེ་སློང་གི་གོས་སྤང་བར་གྱུར་ན་ཇི་སྲིད་དུ་དངོས་པོ་དེ་མ་བཤགས་ཤིང་སོ་སོར་མ་བཤགས་པར་ལྷུང་བཟེད་དམ། ཆོས་གོས་སམ། དྲ་བའམ། ཕོར་བུའམ། སྐ་རགས་སམ། དགེ་སྦྱོང་
གི་འཚོ་བའི་ཡོ་བྱད་གང་ཡང་རུང་བ་ཉེ་བར་འཇོག་ན་དེ་ཡང་སྔ་མའི་རྒྱུད་ཀྱིས་སྤང་བར་འགྱུར་རོ། །ཁ་ཚར་སློང་བ་ན་ལྷན་པ་ཐོབ་པ་དང་། ལྷན་པ་སློང་བ་ན་རས་ཡུག་ཕྲན་ནམ་རས་ཡུག་ཆེན་ཐོབ་པ་ལ་ལྟུང་བ་མེད་དོ། །ལས་དང་པོ་པ་དང་། སྨྱོས་པ་དང་། སེམས་

འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །སྤགས་པ་ལས་ལྷག་པ་སློང་བའི་སྤང་བ་སྟེ་བརྒྱད་པ་རྫོགས་སྷོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་
ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །ཁྱིམ་བདག་དེ་གཞན་གྱི་ཆུང་མ་ལ་ཆགས་པར་གྱུར་ནས་དེ་ལ་ཆུང་མས་རྗེའི་སྲས་དེ་ལྟར་མ་མཛད་ཅིག་ཅེས་
ཕྱིར་བཟློག་ན། ཇི་ཙམ་དུ་དེ་ཕྱིར་བཟློག་ཀྱང་ཕྱིར་མ་ལོག་པ་དེ་ཙམ་དུ་དེའི་ཆུང་མ་དེ་ཡང་སྐྱེས་པ་གཞན་དག་དང་ལྷན་ཅིག་འཁྲུལ་པ་རྩོམ་པར་བྱེད་དོ། །ཁྱིམ་བདག་དེ་ཡང་བུད་མེད་གཞན་དག་ལ་སྦྱིན་པར་བྱེད་ལ། ཆུང་མ་དེ་ཡང་སྐྱེས་པ་གཞན་དག་ལ་སྦྱིན་པར་བྱེད་པས་
དེ་ལྟར་ཁྱིམ་དེ་གཉིས་ཀ་ནས་རྒུད་པར་གྱུར་ནས། དེ་གཉིས་ལ་བུ་མོ་མངག་གཞུག་མ་ཞིག་ཡོད་ནས་ཁྱིམ་བདག་དེས་བུ་མོ་དེ་ལ་འདིས་ཁྱིམ་རྒུད་པར་བྱས་སོ་ཞེས་ཁུ་ཚུར་དང་ཐལ་ལྕག་དག་གིས་རྡེག་པར་བྱེད་དོ། །བུ་མོས་སྨྲས་པ། བདག་གིས་ཁྱིམ་རྒུད་པར་གྱུར་པ་འདི་
ཅི་ལས་གྱུར་པ་འཚལ་མོད་ཀྱི། འོན་ཀྱང་བདག་གིས་ཇི་ལྟར་རྗེ་དག་ལ་བསྔགས་པ་མ་ལགས་པ་བརྗོད་པར་བགྱིར་རུང་། ཉེ་དགའས་དེ་ཚོར་ནས་ཁྱིམ་བདག་དང་། ཁྱིམ་བདག་གི་ཆུང་མ་དེའི་གན་དུ་སོང་སྟེ། ཅི་ནས་ཀྱང་དེ་གཉིས་སྐྱབས་སུ་འགྲོ་བ་དང་། བསླབ་པའི་
གཞི་དག་ལ་གནས་པར་འགྱུར་བ་དེ་ལྟ་དེ་ལྟར་ཚུལ་ཁྲིམས་ཀྱི་བསྔགས་པ་བརྗོད་ཅིང་། ཚུལ་ཁྲིམས་འཆལ་པའི་བསྔགས་པ་མ་ཡིན་པ་བརྗོད་ནས། དེས་དེ་གཉིས་སྐྱབས་སུ་འགྲོ་བ་དང་། བསླབ་པའི་གཞི་དག་ལ་གནས་པར་བྱས་སོ། །ཁྱིམ་བདག་དེ་གཏུམ་པ།
བརྟུན་ངས་པ། དྲག་ཤུལ་ཆེ་བ་ཡིན་པས་ཡང་བུ་མོ་དེ་ལ་བརྡེག་པར་བརྩམས་པ་དང་། ཆུང་མས་དེ་ལ་སྨྲས་པ། རྗེའི་སྲས་གང་གི་ཚེ་བདག་ཅག་ལས་དང་ལས་ཀྱི་རྣམ་པར་སྨིན་པ་མི་མཁྱེན་པ་དེའི་ཚེ་གོ་རྡེག་པར་མཛད་མོད། ད་བདག་ཅག་དགེ་བའི་བཤེས་གཉེན་འཕགས་པ་

ཉེ་དགའ་ལ་བརྟེན་ནས་ལས་དང་ལས་ཀྱི་རྣམ་པར་སྨིན་པ་མཁྱེན་པས་འདི་ལྟར་འཇིག་རྟེན་ནི་རང་གི་ལས་ཀྱི་འབྲས་བུ་ལ་སྤྱོད་པ་ལགས་པས་སུ་ཞིག་སུའི་བྲན་ལགས། བྲན་མོ་འདི་ལ་རྡེག་པར་མ་མཛད་ཅིག །བཟང་མོ་ཁྱོད་ཟེར་བ་མ་ཉེས་སོ། །བུ་མོ་ཚུར་
ཤོག་ཁྲུས་གྱིས་ལ་ཤོག་ཤིག །བུ་མོ་དེས་ཁྲུས་བྱས་ཏེ་འོངས་པ་དང་། དེས་དེ་ལ་གོས་ཕྲུགས་གཅིག་བསྐོན་ནས་སྨྲས་པ། བུ་མོ་དགའ་ཞིང་ལས་བྱོས་ཤིག །བུ་མོ་དེས་བསམས་པ། ཁྱིམ་བདག་ཁྱོ་ཤུག་འདི་སྔོན་གཏུམ་པ། བརྟུན་ངས་པ། དྲག་ཤུལ་ཅན་
ཡིན་ཏེ། ཡང་དང་ཡང་དུ་བདག་ལ་ཁུ་ཚུར་དང་། ཐལ་ལྕག་དག་གིས་རྡེག་པར་བྱེད་ཅིང་ཟས་དང་གོས་ངན་པ་དག་སྦྱིན་པར་བྱེད་ན། ད་འདི་བདག་གི་ཕ་མ་དང་འདྲ་བར་གྱུར་ཏོ་སྙམ་ནས་ཡང་བསམས་པ། གང་ཚུན་ཆད་ནས་འཕགས་པ་ཉེ་དགའ་ཁྱིམ་འདིར་འཇུག་པར་
བརྩམས་པ་དེ་ཚུན་ཆད་ནས་ཁྱིམ་བདག་འདི་ཕ་མ་དང་འདྲ་བར་གྱུར་པས། བདག་གིས་འཕགས་པ་ཉེ་དགའ་ལ་ཅི་ཞིག་གིས་དགའ་བར་བྱ་སྙམ་ནས་དེས་བསམས་པ། གལ་ཏེ་བདག་གིས་འདི་ལས་ཅུང་ཞིག་བརྐུས་ཏེ་དབུལ་དུ་ནི་ཁྱིམ་བདག་འདིས་བརྡེག་བཙོག་མང་པོ་
བྱས་ཏེ་སྔོན་གྱི་གནས་སུ་བཞག་པར་འགྱུར་རོ་སྙམ་ནས་དེ་སྡོད་ཅིང་འདུག་གོ། །ཁྱིམ་བདག་གི་ཆུང་མ་དེས་ཁྱིམ་བདག་དེ་ལ་སྨྲས་པ། རྗེའི་སྲས་མཁྱེན་པར་མཛོད་ཅིག །འཕགས་པ་ཉེ་དགའ་ནི་བདག་ཅག་གི་དགེ་བའི་བཤེས་གཉེན་ལགས་ཏེ། འཕགས་པ་ཉེ་
དགའས་བདག་ཅག་ལས་དྲི་མ་ཅན་དང་ཕྲལ་ནས་སྐྱབས་སུ་འགྲོ་བ་དང་། བསླབ་པའི་གཞི་དག་ལ་བཀོད་དེ། ཡང་དང་ཡང་དུ་བདག་ཅག་ལ་ཆོས་ཀྱིས་སྡུད་པར་བྱེད་པས་བདག་ཅག་གིས་ཀྱང་དེ་ལ་ཟང་ཟིང་ཅུང་ཟད་ཀྱིས་བསྡུ་བར་བགྱིའོ། །བཟང་མོ་དེ་བཞིན་བྱའོ། །ཅི་ཞིག་
བགྱི། དེ་ལ་བདག་ཅག་སོ་སོ་ནས་རས་ཡུག་ཆེན་དབུལ་བར་བྱའོ། །བུ་མོ་དེས་དེ་ཐོས་ནས་བསམས་པ། བདག་གིས་འཕགས་པ་ཉེ་དགའ་ལ་དགའ་བ་དེ་སྦྲན་པར་བྱའོ་སྙམ་མོ། །ཉེ་དགའ་ཡང་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་

བསོད་སྙོམས་ལ་ཞུགས་ཏེ་མཐར་གྱིས་བསོད་སྙོམས་རྒྱུ་བ་ན་ཁྱིམ་དེར་ཞུགས་པ་དང་། བུ་མོ་དེས་ཁྱིམ་དག་ལེགས་པར་བྱུགས་ཤིང་ཕྱག་དར་བོར་ནས་དེས་ཉེ་དགའ་མཐོང