Kinh tạng Tây Tạng (Kangyur Đại Học) — 006_འདུལ་བ།_ཆ

་ས་ལར་བྱུང་བའི་རྒྱལ་པོ་གསལ་རྒྱལ་ལ་ཕོ་ཉ་དང་། དཀོར་
སྒྲོམ་དག་བཀའ་སྩལ་ཅིང་བསྐུར་ནས་དེ་ལྟ་དེ་ལྟར་རྐྱེན་པར་གྱུར་པ་ལས་ད་ཡལ་བར་བོར་ན་སླད་ཀྱིས་གནོད་པ་ཆེན་པོར་འགྱུར་བ་དེ་སྐོལ་དང་མཚམས་འབྲེལ་པར་མཆིས་པས་དེ་དང་ལྷན་ཅིག་རྐྱེན་པར་མཛད་པའི་རིགས་སོ། །འཆར་ཀ་གལ་ཏེ་དེ་ལྟ་ན་ཁྱོད་ཉིད་ཕོ་ཉར་སོང་
ཤིག །ལྷ་བཀའ་བཞིན་འཚལ་ཞེས་དེ་ནས་འཆར་ཀས་དཀོར་སྒྲོམ་དག་ཁྱེར་ཏེ་མཉན་ཡོད་ག་ལ་བ་དེར་འཕགས་ནས་མཐར་གྱིས་མཉན་ཡོད་དུ་ཕྱིན་ཏོ། །དེ་ནས་འཆར་ཀ་འདི་སྙམ་དུ་སེམས་ཏེ། སྟེན་པ་ལ་བསྟེན་པར་མི་བྱ་བར་བསྟེན་པ་ལ་བསྟེན་པ་བསྟེན་པར་བྱ་བ་ཡིན་
པས་ཇེ་དང་པོར་བློན་པོ་རྣམས་བལྟ་བར་བྱ་ཞིང་དེའི་འོག་ཏུ་རྒྱལ་པོ་བལྟ་སྟེ། སྦེད་མའི་ཕྱིར་རྒྱལ་པོ་ལ་གསོལ་བ་བྱའོ་སྙམ་ནས། དེས་བློན་པོ་རྣམས་ལ་བལྟ་བར་བརྩམས་ཏེ་སྨྲས་པ། ཤེས་ལྡན་དག་ཁྱེད་ཀྱིས་ཁོ་བོ་ཇི་ལྟར་སྦེད་མ་དང་ལྷན་ཅིག་བཤེས་པ་དེ་མི་ཤེས་སམ།
དེ་ཁྱིམ་ཐབ་དུས་ལ་བབ་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་བུ་མེད་པའི་ཕྱིར་དེའི་ནོར་ཐམས་ཅད་རང་གི་མཛོད་དང་། བང་བར་བཅུག་པས་དེའི་ཕྱིར་ཁོ་བོ་རྒྱལ་པོ་ལ་གསོལ་བ་བྱེད་ཀྱིས་ཁྱེད་ཀྱིས་གྲོགས་གྱིས་ཤིག །དེ་དག་གིས་དེ་བཞིན་དུ་ཁས་བླངས་
སོ། །དེ་ནས་འཆར་ཀ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ག་ལ་བ་དེར་སོང་སྟེ་ཕྱིན་ནས། ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་རྒྱལ་བ་དང་། ཚེ་སྤེལ་བ་བྱས་ཏེ་མཐའ་གཅིག་ཏུ་འདུག་ནས་ལན་གཉིས་ལན་གསུམ་དུ་རྒྱལ་པོའི་བྱ་བ་དག་དང་། རྒྱལ་པོའི་བྱེད་
པ་དག་བྱས་ཏེ། ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་འདི་སྐད་ཅེས་སྨྲས་སོ། །ལྷ་བདག་གི་གནས་སྩོལ་ཅིག །འཆར་ཀ་ཁྱོད་སྔོན་གང་དུ་ཞུགས། ལྷ་བློན་པོའི་མཆོག་སྦེད་པའི་སྡུམ་པར་མཆིས་སོ། །འཆར་ཀ་སོང་ལ་དེ་ཉིད་དུ་ཞུགས་ཤིག །ལྷ་བློན་པོའི་

མཆོག་སྦེད་པ་དུས་ལ་བབ་པོ། །གལ་ཏེ་དེ་དུས་ལ་བབ་ན་ཅི་དེའི་ཁྱིམ་ཡང་དུས་ལ་བབ་བམ། ལྷ་དེའི་སྡུམ་པ་ནི་དུས་ལ་མ་བབ་མོད་ཀྱི་འོན་ཀྱང་དེ་ན་སྟན་ཙམ་ཡང་མ་མཆིས་སོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་ཁྱེད་ཀྱིས་འཆར་ཀའི་གནས་བྱིན་
ཅིག །འཆར་ཀའི་ཕྱིར་བྱུང་བ་དང་། བློན་པོ་རྣམས་ཀྱིས་སྨྲས་པ། ལྷ་ཅི་ལགས་འཆར་ཀ་ལ་གནས་མ་མཆིས་སྙམ་མམ། འདི་ལྟར་འཆར་ཀ་སྦེད་མ་དང་ལྷན་ཅིག་མཆིད་མཇལ་བས་དོན་གྱིས་ན་འཆར་ཀས་སྦེད་མའི་སླད་དུ་ལྷ་ལ་གསོལ་བ་ལགས་ཀྱིས། ལྷ་འཆར་
ཀ་ནི་བྲམ་ཟེ་མདུན་ན་འདོན་གྱི་བུ་ལགས་པས་བྲམ་ཟེ་ནི་མི་འདོད་བཞིན་དུ་གཟུང་བར་བགྱི་བ་ལགས་ཏེ། འདི་ལེགས་པར་བཟུང་ན་རྒྱལ་པོ་ཟས་གཙང་ལེགས་པར་བཟུང་བར་འགྱུར་རོ། །དེ་ནས་རྒྱལ་པོས་འཆར་ཀ་བོས་ཏེ་སྨྲས་པ། འཆར་ཀ་ངས་ཁྱོད་ཇི་ལྟར་སྦེད་མ་
དང་ལྷན་ཅིག་བཤེས་པར་སྔར་མ་ཤེས་ཀྱིས་ད་སོང་ལ་སྦེད་མ་དང་། དེའི་ཁྱིམ་དང་། ནོར་ཐམས་ཅད་ཁྱོད་ཁྱེར་ཅིག །ལྷ་བཀའ་སྩལ་པ་བཞིན་འཚལ་ལོ་ཞེས་སྨྲས་ནས། འཆར་ཀ་སྦེད་མའི་ཁྱིམ་ག་ལ་བ་དེར་སོང་བ་དང་། སྦེད་མས་འཆར་ཀ་འོངས་སོ་ཞེས་ཐོས་
ནས་སྒོ་ཁང་དུ་འདུག་སྟེ་ངུ་བར་བརྩམས་སོ། །འཆར་ཀས་མཐོང་ནས་སྨྲས་པ། སྦེད་མ་ཁྱོད་ཅིའི་ཕྱིར་ངུ་། དེས་སྨྲས་པ། བདག་འཚལ་བའི་ཁྱིམ་ཐབ་དུས་ལ་བབ་ན་ཅི་ཁྱོད་ཀྱིས་ཀྱང་ཡོངས་སུ་བཏང་ངམ། དེ་ནས་འཆར་ཀ་འདི་སྙམ་དུ་སེམས་ཏེ། གལ་ཏེ་
བདག་གིས་མཐུན་པར་སྨྲས་ན་འདི་ཤིན་ཏུ་ངུ་བར་འགྱུར་བས་བདག་གིས་འདི་ཚར་གཅད་པར་བྱའོ་སྙམ་དུ་རིག་ནས་འཆར་ཀས་སྦེད་མ་ལ་སྨྲས་པ། སྦེད་མ་བྱང་ཆུབ་སེམས་དཔའ་དཀའ་བ་བྱེད་པ་གང་གིས་བཙུན་མོ་གྲགས་འཛིན་དང་། ས་འཚོ་མ་དང་། རི་དགས་སྐྱེས་
ལ་སོགས་པ་བུད་མེད་དྲུག་ཁྲི་སྤངས་ཏེ་རབ་ཏུ་བྱུང་བ་དེ་དག་གི་རྐང་པའི་རྡུལ་ཙམ་དུ་ཡང་ཁྱོད་ཀྱིས་མི་ཕོད་དོ། །དེ་ནས་དེ་ཅང་མི་སྨྲ་བར་འདུག་པ་དང་། འཆར་ཀས་སྨྲས་པ། ཁོ་བོས་ཁྱོད་མ་བཏང་བས་ཁྱོད་ཉིད་ཀྱི་ཕྱིར་འདིར་འོངས་པ་ཡིན་ནོ། །ཁོ་བོས་རྒྱལ་པོ་ལས་

ཁྱོད་དང་ཁྱིམ་དང་། ནོར་ཐམས་ཅད་ཐོབ་ན་ཅི་ཁྱོད་འདི་ཉིད་དུ་འདུག་གམ། སེར་སྐྱའི་གནས་སུ་འགྲོ། །དེས་བསམས་པ། གལ་ཏེ་སེར་སྐྱའི་གནས་སུ་སོང་ནས་བྲམ་ཟེ་མོ་ལས་སྲོག་ཀྱང་མི་ཐོབ་བོ་སྙམ་དུ་རིག་ནས་འདི་ཉིད་དུ་མཆིས་སོ་ཞེས་སྨྲས་ཏེ་དེ་དེ་ཉིད་དུ་
འདུག་གོ། །དེའི་ཚེ་ན་འཆར་ཀ་ལ་ཁྱིམ་གཉིས་ཡོད་དེ། གཅིག་ནི་མཉན་ཡོད་ནའོ། །གཅིག་ནི་སེར་སྐྱའི་གནས་ནའོ། །གང་གི་ཚེ་བཅོམ་ལྡན་འདས་བྱང་ཆུབ་སེམས་དཔས་ལོ་དྲུག་ཏུ་དཀའ་བ་སྤྱད་དེ་དཀའ་བ་བྱེད་པ་ཅི་ཡང་མེད་པར་རིག་ནས། ཅི་བདེར་དབུགས་རྔུབ་པར་
མཛད་ཅི་བདེར་དབུགས་འབྱིན་པར་མཛད་ཅིང་། འབྲས་ཆན་དང་། ཟན་དྲོན་ལ་སོགས་པ་ཞལ་ཟས་རྒྱ་ཆེན་པོ་དག་ཀྱང་གསོལ་བར་མཛད། ཞུན་མར་དང་། འབྲུ་མར་དག་གིས་སྐུ་དག་ཀྱང་སྐུད་པར་མཛད། ཆུ་དྲོན་པོས་ཀྱང་སྐུ་བསིལ་བར་མཛད་ཅིང་། གྲོང་སྡེ་འདོང་དུ་
གཤེགས་ནས་གྲོང་པའི་བུ་མོ་དགའ་མོ་དང་། དགའ་སྟོབས་མ་གཉིས་ལས་ལན་བཅུ་དྲུག་བཟླས་པའི་འོ་མ་སྦྲང་རྩི་དང་བསྲེས་པ་གསོལ་ཏེ། ཀླུའི་རྒྱལ་པོ་ནག་པོས་མངོན་པར་བསྟོད་པ་ན་རྩྭ་བཀྲ་ཤིས་འཚོང་པ་ལས་རྩྭ་གསེར་གྱི་མདོག་ལྟ་བུ་དག་བཞེས་ནས། བྱང་ཆུབ་
ཀྱི་གཞི་ག་ལ་བ་དེར་གཤེགས་ཏེ་བྱོན་ནས། ཉིད་ཀྱིས་རྩྭ་མ་འཁྲུགས་པའི་གདན་བཤམས་ནས་སྐྱིལ་མོ་ཀྲུང་བཅས་ཏེ་སྐུ་དྲང་པོར་བསྲང་ནས་དྲན་པ་ཕྱོགས་པར་བཞག་སྟེ་བཞུགས་ནས་ཐུགས་བསྐྱེད་ཅིང་གསུང་བརྗོད་པ། ཇི་སྲིད་ཟག་མེད་མ་ཐོབ་པར། །དེ་སྲིད་སྐྱིལ་
ཀྲུང་གཞིག་མི་བྱ། །དེ་ཡིས་ཇི་སྲིད་ཟག་མེད་པ། །མ་བརྙེས་སྐྱིལ་ཀྲུང་འཇིག་མི་མཛད། །གང་གི་ཚེ་བཅོམ་ལྡན་འདས་ཀྱིས་མཚན་མོའི་གུང་ཐུན་ལ་བདུད་འབྱུང་པོ་དུང་ཕྱུར་ཕྲག་གསུམ་དང་། བྱེ་བ་ཕྲག་དྲུག་གི་འཁོར་དང་ལྡན་པ་བྱམས་པའི་སྟོབས་ཀྱིས་མངོན་
པར་བཏུལ་ཏེ་བླ་ན་མེད་པའི་མཁྱེན་པ་ཐུགས་སུ་ཆུད་ནས་ཚངས་པས་གསོལ་ཏེ། བཱ་རཱ་ཎ་སཱིར་གཤེགས་ནས་ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་ཆོས་དང་ལྡན་པའི་ཆོས་ཀྱི་འཁོར་ལོ་བསྐོར་བ་དེའི་ཚེ་ལྔ་པ་དང་། ཉེ་ལྔ་དག་དང་། གྲོང་བའི་ཁྱེའུ་མཐོ་བ་མཐོ་བ་

ལྔ་བཅུ་བཏུལ་ཏོ། །ཀར་པ་སིའི་ཚལ་གསེབ་ཏུ་གཤེགས་ནས་བཟང་སྡེའི་ཚོགས་དྲུག་བཅུ་བདེན་པ་དག་ལ་བཀོད་དོ། །གྲོང་སྡེ་འདོང་དུ་གཤེགས་ནས་གྲོང་པའི་བུ་མོ་དགའ་མོ་དང་། དགའ་སྟོབས་མ་གཉིས་བདེན་པ་དག་ལ་བཀོད་དོ། །སྟེང་རྒྱས་སུ་གཤེགས་ནས་
རལ་པ་ཅན་སྟོང་རབ་ཏུ་ཕྱུང་ཞིང་རྫོགས་པར་བསྙེན་པར་མཛད་དོ། །ག་ཡཱ་མགོའི་མཆོད་རྟེན་དུ་གཤེགས་ནས་དགེ་སློང་སྟོང་པོ་དེ་དག་ཆོ་འཕྲུལ་གསུམ་གྱིས་གདམས་པ་མཛད་ནས་འཁོར་བའི་དགོན་པ་ལས་བསྒྲལ་ཏེ་ཤིན་ཏུ་མཐར་ཐུག་པ་གྲུབ་པ་དང་བདེ་བ་བླ་ན་མེད་པའི་མྱ་
ངན་ལས་འདས་པ་ལ་བཀོད་དོ། །ཤར་པའི་ཚལ་གསེབ་ཏུ་གཤེགས་ནས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལྷ་བརྒྱད་ཁྲི་དང་། མ་ག་དྷཱར་བྱུང་བའི་བྲམ་ཟེ་དང་། ཁྱིམ་བདག་འབུམ་ཕྲག་དུ་མ་དང་ལྷན་ཅིག་བདེན་པ་དག་ལ་བཞག་གོ། །རྒྱལ་
པོའི་ཁབ་ཏུ་གཤེགས་ནས་འོད་མའི་ཚལ་བཞེས་ཏེ་ཤཱ་རིའི་བུ་དང་། མཽད་གལ་གྱི་བུ་འཁོར་ཉིས་བརྒྱ་ལྔ་བཅུ་དང་ལྡན་པ་རབ་ཏུ་ཕྱུང་ཞིང་རྫོགས་པར་བསྙེན་པར་མཛད་དོ། །མཉན་ཡོད་དུ་གཤེགས་ནས་རྒྱལ་བྱེད་ཀྱི་ཚལ་བཞེས་ཏེ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་
གཞོན་ནུའི་དཔེའི་མདོས་བཏུལ་ནས། དེ་ནས་སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་རྒྱལ་པོ་ཟས་གཙང་གི་གན་དུ་ཕོ་ཉ་བཏང་སྟེ། ལྷ་
དགྱེས་པ་སྐྱེད་ཅིག །ཁྱོད་ཀྱི་སྲས་ཀྱིས་བདུད་རྩི་ཐུགས་སུ་ཆུད་དེ། བདུད་རྩིས་འགྲོ་བ་ཚིམ་པར་མཛད་ཅིང་། མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ་ཞེས་སྤྲིང་ངོ་། །རྒྱལ་པོ་ཟས་གཙང་གིས་ཐོས་ནས་བཅོམ་ལྡན་
འདས་ཀྱི་སྤྱན་སྔར་ཕོ་ཉ་བཏང་སྟེ། གཞོན་ནུ་བདག་གིས་རིང་དུ་མ་མཐོང་སྟེ། བདག་གཞོན་ནུ་མཐོང་བས་ཡོངས་སུ་སྐོམ་མོ་ཞེས་གསོལ་པ་དང་། ཕོ་ཉ་དེ་དེ་ཉིད་དུ་རབ་ཏུ་ཕྱུང་ངོ་། །ཕོ་ཉ་གཉིས་པ་བཏང་བ་དང་དེ་ཡང་དེ་ཉིད་དུ་རབ་ཏུ་ཕྱུང་ངོ་། །བཅོམ་ལྡན་འདས་ཀྱིས་

ཆོས་འདུལ་བ་ནི་ལེགས་པར་གསུངས་པ་ཡིན་པའི་ཕྱིར་གང་དང་གང་ཕོ་ཉར་བཏང་བ་དེ་དང་དེ་དེ་ཉིད་དུ་རབ་ཏུ་བྱུང་ངོ་། །དེ་ནས་དུས་གཞན་ཞིག་ན་རྒྱལ་པོ་ཟས་གཙང་གིས་དེ་ཐོས་ནས་ལག་པ་ལ་འགྲམ་པ་གཏད་དེ་སེམས་ཁོང་དུ་ཆུད་ཅིང་འདུག་པ། འཆར་ཀས་མཐོང་
ནས་སྨྲས་པ། ལྷ་ཅིའི་སླད་དུ་ཕྱག་ལ་ཞལ་གཏད་དེ་ཐུགས་ཁོང་དུ་ཆུད་ཅིང་བཞུགས། འཆར་ཀ་གང་གི་ཚེ་གཞོན་ནུ་དོན་ཐམས་ཅད་གྲུབ་པ་དཀའ་བ་དག་སྤྱོད་པའི་ཚེ་ངས་གཏམ་རྨེད་པའི་མི་དག་བཏང་ན་དེ་དག་ཉི་མ་རེ་རེ་ཞིང་གཏམ་ཁྱེར་ཏེ་འོངས་ནས་གཞོན་ནུ་དོན་ཐམས་ཅད་
གྲུབ་པ་གནས་པ་འདིས་གནས་སོ་ཞེས་གཏམ་སྙོད་པར་བྱེད་ན། ད་གཞོན་ནུ་དོན་ཐམས་ཅད་གྲུབ་པས་བདུད་རྩི་ཐུགས་སུ་ཆུད་དེ་བདུད་རྩིས་འགྲོ་བ་ཚིམ་པར་མཛད་ཅིང་། མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཞེས་ཐོས་ནས་ངས་
གཏམ་རྨེད་པའི་མི་དག་བཏང་ན། འགས་ཀྱང་གཞོན་ནུ་དོན་ཐམས་ཅད་གྲུབ་པའི་གཏམ་ཁྱེར་ཏེ་མི་འོང་བར་གང་དང་གང་ཕོ་ཉར་བཏང་བ་དེ་དང་དེ་དེ་ཉིད་དུ་འདུག་པར་གྱུར་ན་ང་ཇི་ལྟར་ལག་པ་ལ་འགྲམ་པ་གཏད་དེ་སེམས་ཁོང་དུ་ཆུད་ཅིང་མི་འདུག་ཏུ་རུང་། འཆར་ཀས་སྨྲས་
པ། ལྷ་བདག་ལ་བཀའ་སྩལ་དུ་གསོལ། ཁྱོད་ཀྱང་དེར་འདུག་པར་འགྱུར་རོ། །ལྷ་བདག་གིས་ལྷའི་སྤྱན་སྔར་བཀའ་མཆིད་འཚལ་ཏེ་མཆིའོ། །རྒྱལ་པོ་ཟས་གཙང་གིས་རང་ཉིད་ཀྱིས་ཕྲིན་ཡིག་འདི་སྐད་ཅེས། མ་རུམ་བཞུགས་པ་ཚུན་ཆད་ནས། །བདག་
གིས་ལེགས་པར་ཁྱོད་བསྲུངས་ཏེ། །ཉོན་མོངས་གདུགས་ཀྱིས་རབ་གདུངས་པས། །རྒྱལ་བའི་ལྗོན་ཤིང་སྡོད་ཅིང་མཆིས། །སློབ་མའི་ཡལ་ག་རྩ་ལག་གིས། །ད་ལྟར་ཁྱོད་ནི་རྒྱས་གྱུར་པས། །གཞན་དག་བདེ་བས་དགའ་མཛད་ན། །བདག་ནི་སྡུག་བསྔལ་སྟེན་
པར་གྱུར། །གང་ཚེ་དང་པོ་ཁྱོད་འཁྲུངས་ཚེ། །ཤིན་ཏུ་དོན་ཆེན་མཛད་ནས་ནི། །ཉེ་དུ་རྗེས་སུ་གཟུང་མཛད་ཅེས། །དེ་ཚེ་ཁྱོད་ཀྱིས་ཐུགས་དམ་བཅས། །དེ་སླད་གོ་འཕང་ཞི་བརྙེས་ཁྱོད། །བདག་དང་ཉེ་དུའི་ཚོགས་རྣམས་ལ། །རྗེས་སུ་ཐུགས་བརྩེ་ཉེར་བཟུང་སྟེ། །

བྱོན་པའི་བློ་གྲོས་མཛད་དུ་གསོལ། །ཞེས་བྲིས་སོ། །དེ་ནས་འཆར་ཀ་ཕྲིན་ཡིག་དེ་བླངས་ཏེ་མཉན་ཡོད་དུ་འཕགས་ནས་དེ་མཐར་གྱིས་མཉན་ཡོད་དུ་ཕྱིན་ནས་ཇི་ཙམ་ན་འཆར་ཀས་བཅོམ་ལྡན་འདས་ལ་ཕྲིན་ཡིག་ཕུལ་བ་དང་། བཅོམ་ལྡན་འདས་ཉིད་ཀྱིས་ཕྲིན་ཡིག་
བཀླག་པ་མཛད་ནས། འཆར་ཀས་གསོལ་པ། བཅོམ་ལྡན་འདས་སེར་སྐྱའི་གནས་སུ་གཤེགས་སམ། འཆར་ཀ་འོང་ངོ་། །འཆར་ཀས་སྔོན་གྱི་གཅུགས་པ་དེ་ཉིད་ཀྱིས་འདི་སྐད་ཅེས་གསོལ་ཏོ། །གལ་ཏེ་བཅོམ་ལྡན་འདས་མི་གཤེགས་ན་བདག་གིས་མཐུས་བཀྲི་
བར་བགྱིའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་བཀའ་སྩལ་པ། གང་ལ་ཁྲིད་བྱེད་སྲེད་པ་ཡི། །དྲ་བཀྲམ་གང་ནའང་ཡོད་མིན་པ། །སྤྱོད་ཡས་གཞི་མེད་སངས་རྒྱས་དེ། །གང་གི་གཞིས་ནི་ཁྲིད་པར་བྱེད། །གང་ལ་ཁྲིད་བྱེད་སྲེད་པ་ཡི། །
དྲ་བཀྲམ་གང་ནའང་ཡོད་མིན་པ། །རྩལ་ཡས་གཞི་མེད་སངས་རྒྱས་དེ། །གང་གི་གཞིས་ནི་ཁྲིད་པར་བྱེད། །གང་རྒྱལ་མི་ཉམས་གང་ལ་ནི། །འཇིག་རྟེན་མ་རྒྱལ་ཡོང་མེད་པ། །སྤྱོད་ཡས་གཞི་མེད་སངས་རྒྱས་དེ། །གང་གི་གཞིས་ནི་ཁྲིད་པར་བྱེད། །གང་
རྒྱལ་མི་ཉམས་གང་ལ་ནི། །འཇིག་རྟེན་མ་རྒྱལ་ཡོང་མེད་པ། །རྩལ་ཡས་གཞི་མེད་སངས་རྒྱས་དེ། །གང་གི་གཞིས་ནི་ཁྲིད་པར་བྱེད། །འཆར་ཀས་གསོལ་པ། བཅོམ་ལྡན་འདས་བདག་རྒྱལ་པོ་ཟས་གཙང་ལ་བརྗོད་དུ་མཆིའོ། །བཅོམ་ལྡན་འདས་ཀྱིས་བཀའ་སྩལ་
པ། འཆར་ཀ་རྒྱལ་བའི་ཕོ་ཉ་དག་ནི་དེ་ལྟ་བུ་མ་ཡིན་ནོ། །བཅོམ་ལྡན་འདས་འོ་ན་རྒྱལ་བའི་ཕོ་ཉ་དག་ཇི་ལྟ་བུ་ལགས། སྐྲ་བྲེགས་ཤིང་གོས་ངུར་སྨྲིག་གོན་པ་རབ་ཏུ་བྱུང་བ་དག་ཡིན་ནོ། །བཅོམ་ལྡན་འདས་བདག་གིས་རྒྱལ་པོ་ཟས་གཙང་ལ་སླར་མཆིས་པར་མཆིད་
ཀྱིས་འཚལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། རབ་ཏུ་བྱུང་སྟེ་སོང་ཤིག །འདི་ལྟར་བཅོམ་ལྡན་འདས་བྱང་ཆུབ་སེམས་དཔར་གྱུར་པས་སྔོན་ཚེ་རབས་རྗེས་པ་དེ་དང་དེ་དག་ཏུ་ཡབ་དང་། ཡུམ་དང་། མཁན་པོ་དང་། སློབ་དཔོན་དང་། བླ་མ་དང་། བླ་

མའི་གནས་ལྟ་བུ་དག་གི་ཆོས་དང་ལྡན་པའི་ཚིག་འགའ་ཡང་མ་བཅག་པས་བཀའ་སྩལ་མ་ཐག་ཏུ་འཆར་ཀས་གསོལ་པ། བཅོམ་ལྡན་འདས་བདག་རབ་ཏུ་འབྱུང་ངོ་། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་
བུ་འཆར་ཀ་རབ་ཏུ་ཕྱུང་ཤིག་དང་། དེ་ནི་འདི་ལ་ཡུན་རིང་པོའི་དོན་དང་། ཕན་པ་དང་། བདེ་བར་འགྱུར་རོ། །ཚེ་དང་ལྡན་པ་ཤཱ་རིའི་བུས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་འཆར་ཀ་རབ་ཏུ་ཕྱུང་བསྙེན་པར་རྫོགས་པར་བྱས་ཏེ། དེ་ལ་
འདི་ནི་ཁྱོད་ཀྱི་བྱ་བ་ཡིན་ནོ། །འདི་ནི་ཁྱོད་ཀྱིས་བྱ་བ་མ་ཡིན་ནོ། །འཆར་ཀ་ཁྱོད་ཀྱིས་དེང་ཕྱིན་ཅད་བུད་མེད་ཀྱི་ཡུལ་དང་ལྷན་ཅིག་ཁྱིམ་གཅིག་ཏུ་ཉལ་བར་མི་བྱའོ་ཞེས་བྱ་བ་ལ་སོགས་པ་ཀུན་ཏུ་སྤྱད་པའི་ཆོས་ཐམས་ཅད་བརྗོད་དོ། །འཆར་ཀས་མཁན་པོ་བཀའ་བཞིན་འཚལ་ཞེས་
ཚེ་དང་ལྡན་པ་ཤཱ་རིའི་བུའི་རྐང་པ་གཉིས་ལ་མགོ་བོས་ཕྱག་འཚལ་ཏེ་སོང་ནས། བཅོམ་ལྡན་འདས་ག་ལ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སེར་སྐྱའི་
གནས་སུ་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། འཆར་ཀ་ཁྱོད་ཀྱིས་ཚམ་ཚོམ་མེད་པར་རྒྱལ་པོའི་ཕོ་བྲང་དུ་འཇུག་པར་མི་བྱ་བར་སྒོར་འགྲེང་སྟེ་ཤཱཀྱའི་དགེ་སློང་འོངས་སོ་ཞེས་བརྗོད་པར་བྱའོ། །གལ་ཏེ་ཤཱཀྱའི་དགེ་སློང་གཞན་དག་ཀྱང་ཡོད་དམ་ཞེས་འདྲི་
ན་ཤཱཀྱའི་དགེ་སློང་གཞན་དག་ཀྱང་ཡོད་དོ་ཞེས་བརྗོད་པར་བྱའོ། །གལ་ཏེ་ཞུགས་ཤིག་ཅེས་ཟེར་ན་འཇུག་པར་བྱའོ། །གལ་ཏེ་གཞོན་ནུ་དོན་ཐམས་ཅད་གྲུབ་པ་ཡང་ཆ་ལུགས་འདི་འདྲ་བ་ཉིད་ཡིན་ནམ་ཞེས་འདྲི་ན། ཆ་ལུགས་འདི་འདྲ་བ་ཉིད་ཡིན་ནོ་ཞེས་བརྗོད་པར་བྱའོ། །
ཁྱོད་ཀྱིས་རྒྱལ་པོའི་ཕོ་བྲང་དུ་གནས་པར་མི་བྱའོ། །གལ་ཏེ་གཞོན་ནུ་དོན་ཐམས་ཅད་གྲུབ་པ་ཡང་རྒྱལ་པོའི་ཕོ་བྲང་དུ་གནས་འཆའ་བར་མི་བྱེད་དམ་ཞེས་འདྲི་ན། གནས་འཆའ་བར་མི་བྱེད་དོ་ཞེས་བརྗོད་པར་བྱའོ། །གལ་ཏེ་གང་དུ་གནས་འཆའ་བར་བྱེད་ཅེས་འདྲི་ན། དགོན་

པའམ། གཙུག་ལག་ཁང་དུའོ་ཞེས་བརྗོད་པར་བྱའོ། །གལ་ཏེ་གཞོན་ནུ་དོན་ཐམས་ཅད་གྲུབ་པ་འོང་ངམ་ཞེས་འདྲི་ན་འོང་ངོ་ཞེས་བརྗོད་པར་བྱའོ། །གལ་ཏེ་ཡུན་ཇི་ཙམ་ན་འོང་ཞེས་འདྲི་ན་ཞག་བདུན་འདས་ནས་སོ་ཞེས་བརྗོད་པར་བྱའོ། །ཚེ་དང་ལྡན་པ་འཆར་ཀས་བཅོམ་ལྡན་
འདས་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །འཆར་ཀ་འོང་བའི་ཚེ་མཉན་ཡོད་དུ་ཉི་མ་མང་པོ་དག་གིས་ཕྱིན་ན་ཕྱིར་འགྲོ་བའི་ཚེ་འདི་ལྟ་
སྟེ། སངས་རྒྱས་རྣམས་ཀྱི་སངས་རྒྱས་ཀྱི་མཐུ་དང་། ལྷ་རྣམས་ཀྱི་ལྷའི་མཐུས་ཉི་མ་གཅིག་གིས་སེར་སྐྱའི་གནས་སུ་ཕྱིན་ཏོ། །དེ་ནས་ཚེ་དང་ལྡན་པ་འཆར་ཀ་རྒྱལ་པོ་ཟས་གཙང་གི་ཕོ་བྲང་ག་ལ་བ་དེར་སོང་སྟེ་ཕྱིན་ནས་མི་སྒོ་བ་བོས་ཏེ་སྨྲས་པ། ཀྱེ་ནང་རྗེ་ཁྱོད་སོང་ལ་རྒྱལ་པོ་ལ་
ཤཱཀྱའི་དགེ་སློང་འོངས་སོ་ཞེས་སྦྲོན་ཅིག །དེས་སྨྲས་པ། ཤཱཀྱའི་དགེ་སློང་གཞན་དག་ཀྱང་མཆིས་སམ། འཆར་ཀས་སྨྲས་པ། ཤཱཀྱའི་དགེ་སློང་གཞན་དག་ཀྱང་ཡོད་དོ། །སྒོ་བས་རྒྱལ་པོ་ལ་སྦྲན་པ་དང་། རྒྱལ་པོས་སྨྲས་པ། ཤཱཀྱ་འཇུག་ཏུ་ཆུག་ཤིག །སུ་ཞིག་
ཤཱཀྱ་ཟློག་པར་བྱེད། དེ་ནས་ཚེ་དང་ལྡན་པ་འཆར་ཀ་སྒོ་བས་ངོ་ཤེས་ནས་རྒྱལ་པོ་ཟས་གཙང་ག་ལ་བ་དེར་སོང་སྟེ་ཕྱིན་ནས་རྒྱལ་པོ་ཟས་གཙང་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་ཁྱོད་ལ་བཅོམ་ལྡན་འདས་ཨ་རོག་གྱ་ཞེས་གསུང་ངོ་། །རྒྱལ་པོ་ཟས་གཙང་གིས་
འཆར་ཀ་སྐད་ལས་ངོ་ཤེས་ནས་སྨྲས་པ། ཁྱོད་འཆར་ཀ་ཡིན་ནམ། ལྷ་བདག་སྐྱེ་བོས་དེ་ལྟར་འཚལ་ཏོ། །རྒྱལ་པོས་སྨྲས་པ། གཞོན་ནུ་དོན་ཐམས་ཅད་གྲུབ་པ་ཡང་ཆ་ལུགས་འདི་འདྲ་བ་ཉིད་ཡིན་ནམ། ལྷ་ཆ་ལུགས་འདི་འདྲ་བ་ཉིད་ལགས་སོ། །རྒྱལ་པོ་སེང་གེའི་
ཁྲི་ལས་བརྒྱལ་ཏེ་ས་ལ་ལྷུང་ནས་ཆུས་དབང་བསྐུར་བས་སྲོག་ཕྱིར་འོངས་ནས་དྲིས་པ། གཞོན་ནུ་དོན་ཐམས་ཅད་གྲུབ་པ་འོང་ངམ། ལྷ་མཆིའོ། །ཡུན་ཇི་ཙམ་ན་འོང་། དགུང་བདུན་འདས་ནས་སོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་དེང་ལ་རྒྱལ་

པོའི་ཕོ་བྲང་དང་། བཙུན་མོའི་འཁོར་དག་བྱི་དོར་གྱིས་ཤིག །ལྷ་གཞོན་ནུ་དོན་ཐམས་ཅད་གྲུབ་པ་དེ་རྒྱལ་པོའི་ཕོ་བྲང་ངམ། བཙུན་མོའི་འཁོར་གྱི་ནང་དུ་གནས་འཆའ་བར་མི་བགྱིད་དོ། །འོ་ན་གང་དུ་གནས་འཆའ་བར་བྱེད། དགོན་པའམ། གཙུག་ལག་ཁང་
དུའོ། །གཙུག་ལག་ཁང་ཅི་འདྲ་བར། འཆར་ཀས་མཉན་ཡོད་ན་གཙུག་ལག་ཁང་ཅི་འདྲ་བ་དག་མཐོང་བ་དེ་འདྲ་བ་བརྗོད་དོ། །དེའི་ཚེ་ན་རྒྱལ་པོ་ཟས་གཙང་ལ་སྐྱེད་མོས་ཚལ་སྐྱེ་ཡོད་དང་། ནྱ་གྲོ་དྷའི་ཀུན་དགའ་ར་བ་དང་། ཚངས་པའི་གནས་ལ་སོགས་པ་སྐྱེད་མོས་
ཚལ་ལྔ་བརྒྱ་ཡོད་པས་རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་ཁྱེད་དེང་ལ། སྐྱེད་མོས་ཚལ་གསུམ་པོ་སྐྱེ་ཡོད་དང་། ནྱ་གྲོ་དྷའི་ཀུན་དགའ་ར་བ་དང་། ཚངས་པའི་གནས་དག་ཏུ་སྐྱེད་མོས་ཚལ་རེ་རེར་ཡང་རྒྱལ་བྱེད་ཀྱི་ཚལ་འདྲ་བའི་གཙུག་ལག་ཁང་ཁང་
ཆེན་བཅུ་དྲུག་དང་། ཁང་པའི་གཞི་དྲུག་བཅུ་ཡོད་པ་དག་མྱུར་དུ་བྱེད་དུ་ཆུག་ལ། གྲོང་ཁྱེར་སེར་སྐྱའི་གནས་ཐམས་ཅད་ཀྱང་རྡོ་བ་དང་། གསེག་མ་དང་། གྱོ་མོ་མེད་པར་གནས་པར་གྱིས་ཤིག །རྒྱལ་པོ་རྣམས་ནི་ཚིག་གིས་འགྲུབ་པ་ཡིན་ལ། ལྷ་རྣམས་ནི་སེམས་ཀྱིས་
འགྲུབ་པ་ཡིན། རྣལ་འབྱོར་པ་རྣམས་ནི་སེམས་བསྐྱེད་པ་ཙམ་གྱིས་ཐམས་ཅད་འགྲུབ་པ་ཡིན་པས་བློན་པོ་རྣམས་ཀྱིས་ལྷ་བཀའ་བཞིན་འཚལ་ཞེས་རྒྱལ་པོ་ཟས་གཙང་ལས་མཉན་ནས་སྐྱེད་མོས་ཚལ་གསུམ་པོ་སྐྱེ་ཡོད་དང་། ནྱ་གྲོ་དྷའི་ཀུན་དགའ་ར་བ་དང་། ཚངས་པའི་
གནས་དག་ཏུ་སྐྱེད་མོས་ཚལ་རེ་རེར་ཡང་རྒྱལ་བྱེད་ཀྱི་ཚལ་འདྲ་བའི་གཙུག་ལག་ཁང་ཁང་ཆེན་བཅུ་དྲུག་དང་། ཁང་པའི་གཞི་དྲུག་བཅུ་ཡོད་པ་དག་བྱེད་དུ་བཅུག་ཅིང་གྲོང་ཁྱེར་སེར་སྐྱའི་གནས་ཐམས་ཅད་ཀྱང་རྡོ་བ་དང་། གསེག་མ་དང་། གྱོ་མོ་མེད་པར་གནས་པར་བྱས་སོ། །སངས་རྒྱས་
བཅོམ་ལྡན་འདས་གསོན་ཞིང་བཞུགས་ཏེ་འཚོ་ཞིང་གཞེས་པ་རྣམས་ལ་ཆོས་ཉིད་ཀྱིས་གདོན་མི་ཟ་བར་བགྱི་བ་བཅུ་མངའ་སྟེ། སངས་རྒྱས་བཅོམ་ལྡན་འདས་ཀྱིས་ཇི་སྲིད་དུ་སངས་རྒྱས་སུ་ལུང་མ་བསྟན་པ་དང་། ཇི་སྲིད་དུ་སེམས་ཅན་གཞན་གྱིས་བླ་ན་མེད་པའི་བྱང་ཆུབ་ཏུ་ཕྱིར་

མི་ལྡོག་པའི་སེམས་མ་བསྐྱེད་པ་དང་། སངས་རྒྱས་ཀྱིས་གདུལ་བར་བྱ་བ་ཐམས་ཅད་མ་བཏུལ་བ་དང་། ཇི་སྲིད་དུ་སྐུ་ཚེའི་ཆ་ལྔ་པ་མ་ལུས་པ་དང་། ཇི་སྲིད་དུ་མཚམས་བཅད་པ་མ་མཛད་པ་དང་། ཇི་སྲིད་དུ་ཉན་ཐོས་ཟུང་གཅིག་མཆོག་ཏུ་མ་བསྟན་པ་དང་། ཇི་
སྲིད་དུ་གྲོང་ཁྱེར་ཀུན་འོད་དུ་ལྷ་ལས་བབས་པ་མ་བསྟན་པ་དང་། ཇི་སྲིད་དུ་མཉན་ཡོད་དུ་ཆོ་འཕྲུལ་ཆེན་པོ་རྣམ་པར་མ་བསྟན་པ་དང་། ཇི་སྲིད་དུ་མཚོ་ཆེན་པོ་མ་དྲོས་པར་ཉན་ཐོས་རྣམས་དང་ཐབས་ཅིག་སྔོན་གྱི་ལས་ཀྱི་རྒྱུ་བ་ལུང་མ་བསྟན་པ་དང་། ཇི་སྲིད་དུ་ཡབ་ཡུམ་གཉིས་
བདེན་པ་དག་ལ་མ་བཀོད་པ་དེ་སྲིད་དུ་ཡོངས་སུ་མྱ་ངན་ལས་མི་འདའ་བ་ཡིན་ནོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། རྒྱལ་པོ་ཆེན་པོ་ཟས་གཙང་དང་། ཤཱཀྱ་འབུམ་ཕྲག་དུ་མ་དག་གདུལ་བའི་དུས་ཉེ་བར་གནས་པར་གྱུར་ཅིང་། འདི་ལྟ་སྟེ། ཡབ་
ཡུམ་གཉིས་བདེན་པ་དག་ལ་གཞག་པ་དེ་ནི་དེ་བཞིན་གཤེགས་པས་གདོན་མི་ཟ་བར་མཛད་པ་ཡིན་ནོ་སྙམ་དུ་དགོངས་ནས། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་པ། མཽད་གལ་གྱི་བུ་ཁྱོད་སོང་ལ་དགེ་སློང་རྣམས་ལ་དེ་བཞིན་
གཤེགས་པ་སེར་སྐྱའི་གནས་སུ་གཤེགས་ཀྱིས། ཁྱེད་ཅག་ལས་གང་དེ་བཞིན་གཤེགས་པ་དང་ཐབས་ཅིག་སེར་སྐྱའི་གནས་སུ་འགྲོ་བ་དང་། ཡབ་དང་སྲས་མཇལ་བ་ལྟ་བར་སྤྲོ་བ་དེས་ཆོས་གོས་དག་ལོང་ཤིག་ཅེས་བསྒོ་ཤིག །ཚེ་དང་ལྡན་པ་མཽད་གལ་གྱི་བུ་ཆེན་པོས་
བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས། དགེ་སློང་རྣམས་ལ་ཚེ་དང་ལྡན་པ་དག་བཅོམ་ལྡན་འདས་སེར་སྐྱའི་གནས་སུ་གཤེགས་ཀྱིས་ཁྱེད་ཅག་ལས་གང་དེ་བཞིན་གཤེགས་པ་དང་ཐབས་ཅིག་སེར་སྐྱའི་གནས་སུ་འགྲོ་བ་དང་། ཡབ་དང་སྲས་མཇལ་
བ་ལྟ་བར་སྤྲོ་བ་དེས་ཆོས་གོས་དག་ལོང་ཤིག་ཅེས་བསྒོའོ། །དགེ་སློང་དག་གིས་ཚེ་དང་ལྡན་པ་དེ་བཞིན་བགྱིའོ་ཞེས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལས་མཉན་ཏོ། །དེ་ནས་བཅོམ་ལྡན་འདས་དུལ་བ་འཁོར་དུལ་བ་དང་ལྡན་པ། ཞི་བ་འཁོར་ཞི་བ་དང་ལྡན་པ། གྲོལ་

བ་འཁོར་གྲོལ་བ་དང་ལྡན་པ། དབུགས་ཕྱིན་པ་འཁོར་དབུགས་ཕྱིན་པ་དང་ལྡན་པ། ཐུལ་བ་འཁོར་ཐུལ་བ་དང་ལྡན་པ། དགྲ་བཅོམ་པ་འཁོར་དགྲ་བཅོམ་པ་དང་ལྡན་པ། འདོད་ཆགས་དང་བྲལ་བ་འཁོར་འདོད་ཆགས་དང་བྲལ་བ་དང་ལྡན་པ། མཛེས་
པ་འཁོར་མཛེས་པ་དང་ལྡན་པ། ཁྱུ་མཆོག་ལྟར་བ་ལང་གི་ཚོགས་ཀྱིས་ཡོངས་སུ་བསྐོར་བ། གླང་པོ་ཆེ་ལྟར་གླང་པོ་ཆེའི་ཕྲུ་གུའི་ཚོགས་ཀྱིས་ཡོངས་སུ་བསྐོར་བ། སེང་གེ་ལྟར་མཆེ་བ་ཅན་གྱི་ཚོགས་ཀྱིས་ཡོངས་སུ་བསྐོར་བ། ངང་པའི་རྒྱལ་པོ་ལྟར་ངང་པའི་ཚོགས་
ཀྱིས་ཡོངས་སུ་བསྐོར་བ། ནམ་མཁའ་ལྡིང་ལྟར་བྱའི་ཚོགས་ཀྱིས་ཡོངས་སུ་བསྐོར་བ། བྲམ་ཟེ་ལྟར་སློབ་མའི་ཚོགས་ཀྱིས་ཡོངས་སུ་བསྐོར་བ། སྨན་པ་མཁས་པ་ལྟར་ནད་པའི་ཚོགས་ཀྱིས་ཡོངས་སུ་བསྐོར་བ། དཔའ་བོ་ལྟར་རུ་པའི་ཚོགས་ཀྱིས་ཡོངས་སུ་
བསྐོར་བ། ས་མཁན་ལྟར་ལམ་དུ་ཞུགས་པའི་ཚོགས་ཀྱིས་ཡོངས་སུ་བསྐོར་བ། དེད་དཔོན་ལྟར་ཚོང་པའི་ཚོགས་ཀྱིས་ཡོངས་སུ་བསྐོར་བ། ཚོང་དཔོན་ལྟར་འཁོར་གྱི་ཚོགས་ཀྱིས་ཡོངས་སུ་བསྐོར་བ། མཁར་གྱི་རྒྱལ་པོ་ལྟར་བློན་པོའི་ཚོགས་ཀྱིས་ཡོངས་སུ་བསྐོར་
བ། འཁོར་ལོས་སྒྱུར་བ་ལྟར་བུ་སྟོང་གི་ཚོགས་ཀྱིས་ཡོངས་སུ་བསྐོར་བ། ཟླ་བ་ལྟར་རྒྱུ་སྐར་གྱི་ཚོགས་ཀྱིས་ཡོངས་སུ་བསྐོར་བ། ཉི་མ་ལྟར་འོད་ཟེར་སྟོང་གི་ཚོགས་ཀྱིས་ཡོངས་སུ་བསྐོར་བ། ཡུལ་འཁོར་སྲུང་ལྟར་དྲི་ཟའི་ཚོགས་ཀྱིས་ཡོངས་སུ་བསྐོར་བ། འཕགས་
སྐྱེས་པོ་ལྟར་གྲུལ་བུམ་གྱི་ཚོགས་ཀྱིས་ཡོངས་སུ་བསྐོར་བ། མིག་མི་བཟང་ལྟར་ཀླུའི་ཚོགས་ཀྱིས་ཡོངས་སུ་བསྐོར་བ། ནོར་སྦྱིན་ལྟར་གནོད་སྦྱིན་གྱི་ཚོགས་ཀྱིས་ཡོངས་སུ་བསྐོར་བ། ཐགས་ཟངས་རིས་ལྟར་ལྷ་མ་ཡིན་གྱི་ཚོགས་ཀྱིས་ཡོངས་སུ་བསྐོར་བ། བརྒྱ་བྱིན་
ལྟར་སུམ་བཅུ་རྩ་གསུམ་པའི་ཚོགས་ཀྱིས་ཡོངས་སུ་བསྐོར་བ། ཚངས་པ་ལྟར་ཚངས་རིས་ཀྱི་ཚོགས་ཀྱིས་ཡོངས་སུ་བསྐོར་བ། དབང་པོ་རྣམས་ཤིན་ཏུ་དུལ་བ། སྤྱོད་ལམ་དང་། སྤྱོད་པ་མ་འཁྲུགས་པ། ཆུ་གཏེར་ལྟར་ཏིང་ངེ་བ། སྤྲིན་ལྟར་ཆུ་དང་བཅས་པ། གླང་པོ་

ཆེའི་རྒྱལ་པོ་ལྟར་དྲེགས་པ་དང་བྲལ་བ། སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ལེགས་པར་བརྒྱན་པ། དཔེ་བྱད་བཟང་པོ་བརྒྱད་བཅུས་སྐུ་རྣམ་པར་མཛེས་པ། འོད་འདོམ་གང་གིས་གཟུགས་ཅན་བརྒྱན་པ། ཉི་མ་སྟོང་བས་ལྷག་པའི་འོད་དང་ལྡན་པ། རིན་པོ་ཆེའི་
རི་བོ་འགྲོ་བ་ལྟར་ཀུན་ཏུ་བཟང་བ། སྟོབས་བཅུ་དང་། མི་འཇིགས་པ་བཞི་དང་། མ་འདྲེས་པའི་དྲན་པ་ཉེ་བར་གཞག་པ་གསུམ་དང་། ཐུགས་རྗེ་ཆེན་པོ་དང་ལྡན་པ། འཇིག་རྟེན་ལ་ཕན་པར་ཞུགས་པ། སྲུང་བ་གཅིག་པུ་པ། ཉག་གཅིག་དཔའ་བ། གཉིས་པ་མེད་པ།
གཉིས་སུ་མི་གསུང་བ། ཞི་གནས་དང་ལྷག་མཐོང་གིས་བཞུགས་པ། རིག་པ་གསུམ་གསལ་བར་མཛད་པ། བསླབ་པ་གསུམ་ལ་ལེགས་པར་བསླབས་པ། དུལ་བའི་གནས་གསུམ་གྱི་གཞི་ལ་མཁས་པ། ཆུ་བོ་བཞི་ལས་རྒལ་བ། རྫུ་འཕྲུལ་གྱི་རྐང་པ་བཞིས་སྤྱོད་པའི་
གཞི་ལ་ལེགས་པར་གནས་པ། བསྡུ་བའི་དངོས་པོ་བཞི་ལ་ཡུན་རིང་པོ་ནས་ཡོངས་སུ་སྦྱང་བ་མཛད་པ། མི་འཇིགས་པ་བཞིས་བསྙེངས་པ་མི་མངའ་བ། ཡན་ལག་ལྔ་སྤངས་པ། འགྲོ་བ་ལྔ་ལས་ཡང་དག་པར་འདས་པ། ཡན་ལག་དྲུག་དང་ལྡན་པ། ཕ་
རོལ་ཏུ་ཕྱིན་པ་དྲུག་ཡོངས་སུ་རྫོགས་པ། རྟག་ཏུ་གནས་པ་དྲུག་གིས་གནས་པ། བྱང་ཆུབ་ཀྱི་ཡན་ལག་བདུན་གྱི་མེ་ཏོག་གིས་ཕྱུག་པ། ལམ་གྱི་ཡན་ལག་བརྒྱད་སྟོན་པ། མཐར་གྱིས་གནས་པའི་སྙོམས་པར་འཇུག་པ་དགུ་ལ་མཁས་པ། སྟོབས་བཅུའི་
སྟོབས་དང་ལྡན་པ། ཕྱོགས་བཅུར་སྙན་པས་ཡང་དག་པར་རྒྱས་པ། བརྒྱ་ཕྲག་བཅུར་དབང་བསྒྱུར་བ་ལས་ཁྱད་པར་དུ་འཕགས་པ། འཁོར་ཉན་ཐོས་ཆེན་པོ་ཚེ་དང་ལྡན་པ་ལྟེང་རྒྱས་འོད་སྲུང་དང་། ག་ཡ་འོད་སྲུང་དང་། ཆུ་ཀླུང་འོད་སྲུང་ལ་སོགས་པ་སྔོན་གྱི་རལ་པ་
ཅན་སྟོང་དང་། ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་ཆེན་པོ་ལ་སོགས་པ་དགེ་སློང་གི་དགེ་འདུན་མང་པོས་མདུན་དུ་བདར་ཏེ་སེར་སྐྱའི་གནས་ག་ལ་བ་དེར་རྒྱུ་ཞིང་གཤེགས་སོ། །དེའི་ཚེ་ན་རྒྱལ་པོ་ཟས་གཙང་གིས་ཉི་མ་བདུན་པ་ལ་གྲོང་ཁྱེར་སེར་སྐྱའི་གནས་

ཐམས་ཅད་རྡོ་བ་དང་། གསེག་མ་དང་། གྱོ་མོ་མེད་པར་བཞག་ཅིང་བདུག་པ་དང་། ཕྱེ་མ་འཁྲིགས་པ་དང་། མེ་ཏོག་སྣ་ཚོགས་བཀྲམ་པ་དང་། རྒྱལ་མཚན་དང་། བ་དན་བསྒྲེང་བ་ལ་སོགས་པ་མཆོད་པའི་ཡོ་བྱད་རྒྱ་ཆེན་པོ་དག་བཤམས་
ཤིང་། ནྱ་གྲོ་དྷའི་ཀུན་དགའ་ར་བར་ས་ཕྱོགས་གོ་སྐབས་ཡངས་པར་གདན་ཐབས་ཟླ་གམ་ལྟ་བུར་བཤམས་ཏེ། ནྱ་གྲོ་དྷའི་ཀུན་དགའ་ར་བ་ནས་གྲོང་ཁྱེར་སེར་སྐྱའི་གནས་ཀྱི་བར་གྱི་ལམ་ཐམས་ཅད་མཛེས་ཤིང་རྡོ་བ་དང་། གསེག་མ་དང་། གྱོ་མོ་མེད་པར་བཞག་
སྟེ། སྤོས་ཆུའི་ཆག་ཆག་བཏབ་ཅིང་བར་བར་དུ་དར་གྱི་ཆུན་པོ་མང་པོ་དབྱངས་ཤིང་། མེ་ཏོག་གི་ཚོམས་དག་ཀྱང་བཤམས། བདུག་སྤོས་དྲི་ཞིམ་པོའི་དུ་བ་འཁྲིགས་པ་དང་། མེ་ཏོག་སྣ་ཚོགས་བཀྲམ་པ་དང་། རྒྱལ་མཚན་དང་། བ་དན་བསྒྲེང་བ་དག་རྣམ་པར་
བཞག་གོ། །རྒྱལ་པོ་ཟས་གཙང་ཉིད་ཀྱིས་རྒྱལ་པོའི་འབྱོར་པ་ཆེན་པོ་དང་། རྒྱལ་པོའི་མཐུ་ཆེན་པོས་ནྱ་གྲོ་དྷའི་ཀུན་དགའ་ར་བ་ན་འདི་ལྟ་སྟེ། བཅོམ་ལྡན་འདས་ལ་སྡོད་ཅིང་འདུག་གོ། །དེ་ནས་བཅོམ་ལྡན་འདས་མཐར་གྱིས་རྒྱུ་ཞིང་གཤེགས་པ་ན་ཆུ་རླུང་རོ་ཧ་
ཀའི་འགྲམ་དུ་གཤེགས་སོ། །དེ་ན་དགེ་སློང་ཁ་ཅིག་ནི་ལག་པ་དང་རྐང་པ་དག་འཁྲུ་བར་བྱེད། ཁ་ཅིག་ནི་སོ་ཤིང་འདོར་བར་བྱེད། ཁ་ཅིག་ནི་ཆུ་འཚག་པར་བྱེད། ཁ་ཅིག་ནི་ཁྲུས་བྱེད་དོ། །གྲོང་ཁྱེར་སེར་སྐྱའི་གནས་ན་འཁོད་པའི་ཤཱཀྱ་རྣམས་ཀྱིས་གཞོན་ནུ་དོན་
ཐམས་ཅད་གྲུབ་པ་འོངས་ཤིང་། རྒྱལ་པོ་ཟས་གཙང་གིས་ནྱ་གྲོ་དྷའི་ཀུན་དགའ་ར་བར་ས་ཕྱོགས་གོ་སྐབས་ཡངས་པར་གནས་མལ་བཤམས་ཞེས་ཐོས་སོ། །ཐོས་ནས་ཀྱང་ཤཱཀྱ་འབུམ་ཕྲག་དུ་མ་དག་ནྱ་གྲོ་དྷཱའི་ཀུན་དགའ་ར་བར་འདུས་པར་གྱུར་ཅིང་། དེ་ན་ཁ་ཅིག་
ནི་སྔོན་གྱི་དགེ་བའི་རྩ་བ་དག་གིས་བསྐུལ་ཞིང་ལྷགས་སོ། །ཁ་ཅིག་ནི་ཡ་མཚན་སྐྱེས་ཏེ་ཇེ་དང་པོར་ཡབ་ཀྱིས་སྲས་ཀྱི་ཞབས་ལ་ཕྱག་འཚལ་བར་མཛད་དམ། འོན་ཏེ་སྲས་ཀྱིས་ཡབ་ཀྱི་ཞབས་ལ་ཕྱག་འཚལ་བར་མཛད་པ་བལྟའོ་སྙམ་པས་ལྷགས་སོ། །དེ་

ནས་བཅོམ་ལྡན་འདས་འདི་སྙམ་དུ་དགོངས་ཏེ། གལ་ཏེ་དེ་བཞིན་གཤེགས་པ་ཞབས་ཀྱིས་སེར་སྐྱའི་གནས་སུ་གཤེགས་ན་ཤཱཀྱ་ང་རྒྱལ་ཅན་དག་གཞོན་ནུ་དོན་ཐམས་ཅད་གྲུབ་པས་ཆེན་པོ་མ་རྙེད་དེ། འདི་ལྟར་འདི་སྔོན་བྱང་ཆུབ་སེམས་དཔར་གྱུར་པ་ན་གྲོང་ཁྱེར་
སེར་སྐྱའི་གནས་ནས་ལྷ་འབུམ་ཕྲག་དུ་མས་བསུ་སྟེ་སྟེང་གི་ནམ་མཁའ་ལས་བྱུང་སྟེ་སོང་ན། ད་འདིས་བླ་ན་མེད་པའི་ཡེ་ཤེས་རྟོགས་ཀྱང་རྐང་པས་འོངས་སོ་ཞེས་མ་དད་པ་སྐྱེ་བར་འགྱུར་བས་བདག་རྫུ་འཕྲུལ་གྱིས་སེར་སྐྱའི་གནས་སུ་འཇུག་པར་བྱའོ་སྙམ་དུ་དགོངས་ཤིང་
རིག་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་ནི་རྐང་པ་དག་གིས་ཆུ་ཀླུང་རོ་ཧ་ཀ་རྒོལ་ཅིག །དེ་བཞིན་གཤེགས་པ་ནི་རྫུ་འཕྲུལ་གྱིས་གཤེགས་སོ། །དགེ་སློང་རྣམས་ཀྱིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་
ནས། རྐང་པ་དག་གིས་ཆུ་ཀླུང་རོ་ཧ་ཀ་རྒལ་ཏེ་ནྱ་གྲོ་དྷའི་ཀུན་དགའ་ར་བ་ག་ལ་བ་དེར་དོང་ངོ་། །དེ་ནས་བཅོམ་ལྡན་འདས་ཀྱིས་དགེ་སློང་གི་དགེ་འདུན་སོང་ནས་རིང་པོ་མ་ལོན་པར་ཐུགས་སུ་ཆུད་ནས་ཏིང་ངེ་འཛིན་འདི་ལྟ་བུ་ལ་སྙོམས་པར་ཞུགས་ཏེ། ཇི་ལྟར་ཐུགས་མཉམ་
པར་བཞག་ན་རྫུ་འཕྲུལ་གྱིས་ཆུ་ཀླུང་རོ་ཧ་ཀའི་ཕ་རོལ་གྱི་འགྲམ་ནས་མི་སྣང་བར་གྱུར་ཅིང་སྟེང་གི་ནམ་མཁའ་ལ་ངང་པའི་རྒྱལ་པོ་འདབ་མ་བརྐྱང་པ་ལྟར་མངོན་པར་འཕགས་ནས། སེར་སྐྱའི་གནས་ཀྱི་སྟེང་ནས་ནྱ་གྲོ་དྷའི་ཀུན་དགའ་ར་བ་ག་ལ་བ་དེར་གཤེགས་ཏེ་བྱོན་ནས་
ནྱ་གྲོ་དྷའི་ཀུན་དགའ་ར་བའི་སྟེང་གི་ནམ་མཁའ་ལ་སྐྱིལ་མོ་ཀྲུང་བཅས་ཏེ་བཞུགས་སོ། །དེ་ན་བཅོམ་ལྡན་འདས་ཤར་ཕྱོགས་ལོགས་སུ་སྤྱོད་ལམ་བཞི་པོ་འདི་ལྟ་སྟེ། འཆག་པ་དང་། བཞེངས་པ་དང་། བཞུགས་པ་དང་། མནལ་བ་དག་མཛད་དོ། །མེའི་
ཁམས་ལ་ཡང་སྙོམས་པར་འཇུག་པ་མཛད་དེ། སངས་རྒྱས་བཅོམ་ལྡན་འདས་མེའི་ཁམས་ལ་སྙོམས་པར་ཞུགས་པའི་སྐུ་ལས་འོད་ཟེར་སྣ་ཚོགས་འདི་ལྟ་སྟེ། སྔོན་པོ་དག་དང་། སེར་པོ་དག་དང་། དམར་པོ་དག་དང་། དཀར་པོ་དག་དང་། བཙོད་ཀ་དག་དང་།

ཤེལ་དང་། དངུལ་གྱི་ཁ་དོག་ལྟ་བུ་དག་བྱུང་ངོ་། །ཆོ་འཕྲུལ་ཟུང་དག་ཀྱང་རྣམ་པར་སྟོན་པ་མཛད་དེ། སྐུའི་སྨད་ནས་མེ་འབར་ཞིང་སྐུའི་སྟོད་ནས་ཆུ་གྲང་མོའི་རྒྱུན་འབབ་པར་མཛད་དོ། །སྐུའི་སྟོད་ནས་མེ་འབར་ཞིང་སྐུའི་སྨད་ནས་ཆུ་གྲང་མོའི་རྒྱུན་འབབ་པར་
མཛད་དོ། །ཤར་ཕྱོགས་སུ་ཇི་ལྟ་བ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་སུ་ཡང་དེ་བཞིན་དུ་མཛད་དོ། །དེ་ལྟར་ཕྱོགས་བཞིར་རྫུ་འཕྲུལ་གྱི་ཆོ་འཕྲུལ་རྣམ་པ་བཞི་བཞི་སྟོན་པར་མཛད་དོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། གལ་ཏེ་དེ་
བཞིན་གཤེགས་པས་རྒྱལ་པོ་ཟས་གཙང་གི་རྐང་པ་གཉིས་ལ་གཏུགས་པར་གྱུར་ན་ནི་དེའི་སྤྱི་བོ་ཚལ་པ་བདུན་དུ་འགས་པར་འགྱུར་ལ། གལ་ཏེ་རྒྱལ་པོ་ཟས་གཙང་གིས་དེ་བཞིན་གཤེགས་པའི་ཞབས་གཉིས་ལ་གཏུགས་པར་གྱུར་ན་ནི་ཤཱཀྱ་ང་རྒྱལ་ཅན་དག་ཅིའི་ཕྱིར་ཡབ་
ཏུ་གྱུར་པས་སྲས་ཀྱི་རྐང་པ་གཉིས་ལ་གཏུགས་པར་བྱེད་ཅེས་མ་དད་པ་སྐྱེ་བར་འགྱུར་བས་བདག་གིས་ཅི་ནས་ཀྱང་རྒྱལ་པོ་ཟས་གཙང་གིས་ལུས་མ་བཏུད་བཞིན་དུ་དེ་བཞིན་གཤེགས་པའི་ཞབས་གཉིས་ལ་ཕྱག་འཚལ་བར་འགྱུར་བ་དེ་ལྟ་བུའི་རྫུ་འཕྲུལ་མངོན་པར་འདུ་བྱའོ་
སྙམ་དུ་དགོངས་ཤིང་རིག་ནས་ཏ་ལ་བདུན་སྲིད་ཙམ་གྱི་སྟེང་གི་ནམ་མཁའ་ལ་གཞེས་ཤིང་། ཏ་ལ་དྲུག་དང་། ལྔ་དང་། བཞི་དང་། གསུམ་དང་། གཉིས་དང་། གཅིག་སྲིད་ཙམ་ན་བཞུགས་སོ། །དེ་ནས་སྐྱེས་བུ་བདུན་སྲིད་ཙམ་ན་གཞེས་ཤིང་སྐྱེས་བུ་དྲུག་དང་། ལྔ་
དང་། བཞི་དང་། གསུམ་དང་། གཉིས་དང་། གཅིག་སྲིད་ཙམ་ན་གཞེས་སོ། །དེ་ནས་རྒྱལ་པོ་ཟས་གཙང་གིས་མ་བཏུད་བཞིན་དུ་དེ་བཞིན་གཤེགས་པའི་ཞབས་གཉིས་ལ་མགོ་བོས་ཕྱག་འཚལ་ནས་ཤཱཀྱ་རྣམས་ལ་གོ་བར་བྱ་བའི་ཕྱིར་དེའི་ཚེ་ཚིགས་སུ་བཅད་པ་སྨྲས་པ།
གང་ཚེ་ཁྱོད་བལྟམས་དོག་ས་རབ་གཡོས་དང་། འཛམ་བུའི་གྲིབ་མས་ཁྱོད་སྐུ་མ་བཏང་དང་། །འདི་དང་ལན་གསུམ་ཀུན་གཟིགས་མཁྱེན་ལྡན་པ། །སངས་རྒྱས་ཁྱོད་ཀྱི་ཞབས་ལ་བདག་ཕྱག་འཚལ། །དེ་ནས་བཅོམ་ལྡན་འདས་ཀྱིས་རྫུ་འཕྲུལ་མངོན་པར་འདུ་མཛད་

པ་དེ་སླར་བསྡུ་བ་མཛད་ནས་ནྱ་གྲོ་དྷའི་ཀུན་དགའ་ར་བར་གཤེགས་ཏེ། དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །དེ་ནས་རྒྱལ་པོ་ཟས་གཙང་དང་། བྲེ་བོ་ཟས་དང་། ཟས་དཀར་དང་། བདུད་རྩི་ཟས་དང་། ཤཱཀྱ་འབུམ་ཕྲག་དུ་མ་དག་
གིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །ཤཱཀྱ་ཁ་ཅིག་ནི་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ཏེ་མཐའ་གཅིག་ཏུ་འཁོད་དོ། །ཤཱཀྱ་ཁ་ཅིག་ནི་ཐག་རིང་པོ་ཁོ་ན་ནས་བཅོམ་ལྡན་འདས་མཐོང་ནས་ཅང་མི་
སྨྲ་བར་མཐའ་གཅིག་ཏུ་འཁོད་དོ། །དེ་ནས་རྒྱལ་པོ་ཟས་གཙང་གིས་བཅོམ་ལྡན་འདས་ལ་ཚིགས་སུ་བཅད་པའི་སྐད་ཀྱིས་ཞུ་བ་ཞུས་པ། དཔའ་བོ་བཅིབས་པ་གླང་པོ་དང་། །ཆིབས་དང་ཤིང་རྟས་ཁབ་གཤེགས་ན། །ཚེར་བཅས་དོག་སའི་གཞི་དག་ལ། །ཇི་ལྟར་
ཞབས་ཀྱིས་གཤེགས་པ་མཛད། །བཅོམ་ལྡན་འདས་ཀྱིས་བཀའ་སྩལ་པ། བདག་ནི་རྫུ་འཕྲུལ་རྐང་པ་དང་། །ཡང་དག་སྩོལ་བའི་བཞོན་པ་ཡིས། །ཉོན་མོངས་ཚེར་མས་མ་སྨས་པར། །ས་གཞི་ཀུན་ཏུ་རྣམ་པར་རྒྱུ། །རྒྱལ་པོས་གསོལ་པ། དཔའ་བོ་སྔན་
ཆད་ཀ་ཤི་ཀའི། །ན་བཟའ་གསོལ་བས་རྣམ་མཛེས་ན། །ངུར་སྨྲིག་ན་བཟའ་རྩུབ་པོ་དག །ཇི་ལྟར་ཁྱོད་སྐུས་བཟོད་པར་མཛད། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་བདག་ནི་ཁྲེལ་འཛེམ་པའི། །སྣམ་སྦྱར་གོས་གྱོན་མཛེས་པ་ཡིན། །གང་གིས་
ཐུབ་པའི་གོས་གྱོན་པ། །ཞི་བའི་ནགས་ན་མཛེས་པར་འགྱུར། །རྒྱལ་པོས་གསོལ་པ། བརྟན་པ་སྔན་ཆད་གསེར་སྣོད་ནས། །ཞལ་ཟས་རོ་མང་ལྡན་གསོལ་ནས། །ད་ལྟར་བསོད་སྙོམས་ངན་པ་དག །ཇི་ལྟར་ཁྱོད་ཀྱི་མགུར་དུ་བྱོན། །བཅོམ་ལྡན་འདས་ཀྱིས་བཀའ་
སྩལ་པ། ཆོས་ལྡན་དགའ་བ་དག་གི་ཟས། །ངེས་འབྱུང་ལྡན་ཞིང་མཉམ་བཞག་ཡིན། །ཟས་སྲེད་སྤངས་ཀྱང་འཇིག་རྟེན་ཀུན། །རྗེས་སུ་གཟུང་ཕྱིར་བདག་སྤྱོད་བྱེད། །རྒྱལ་པོས་གསོལ་པ། བློ་བཟང་ཁྱོད་སྔོན་ཡང་ཐོག་གི། །གཞལ་མེད་ཁང་སྟེང་དུས་མཐུན་

བཞུགས། །ཉག་གཅིག་ནགས་ན་ཁྱོད་བཞུགས་ན། །ཇི་ལྟར་བསྙེངས་དང་བྲལ་བར་འགྱུར། །བཅོམ་ལྡན་འདས་ཀྱིས་བཀའ་སྩལ་པ། གཽ་ཏམ་འཇིགས་ཀུན་རྩ་དང་སྲིད། །དེ་དག་བག་ཉལ་བཅས་སྤངས་པས། །མྱ་ངན་འཇིགས་བྲལ་ནགས་
གནས་ཏེ། །དེ་ན་བདག་འཇིགས་ཅི་ཡང་མེད། །རྒྱལ་པོས་གསོལ་པ། ཐུབ་དབང་ཁྱོད་སྔོན་རབ་དགྱེས་པའི། །ཁབ་ན་རྟག་ཏུ་ཁྲུས་མཆོག་མཛད། །ནགས་ན་ཉག་གཅིག་ཁྱོད་བཞུགས་ན། །དེ་ན་འབྱོར་ཁྲུས་སུ་དག་བགྱིད། །བཅོམ་ལྡན་འདས་ཀྱིས་བཀའ་སྩལ་
པ། གཽ་ཏམ་ཆོས་རྫིང་བསོད་ནམས་འགྲམ། །རྙོག་མེད་དམ་པས་བསྔགས་པ་སྟེ། །མི་ལུས་མི་གཤེར་དེར་བཀྲུས་པ། །རིག་བྱེད་ཡོན་ཏན་ཕ་རོལ་འགྲོ། །རྒྱལ་པོས་གསོལ་པ། དཔའ་བོ་རང་གི་ཕོ་བྲང་ན། །གསེར་དངུལ་བུམ་པས་ཁྲུས་མཛད་ན། །ཆབ་
ཚན་རྙོག་དང་བཅས་པ་ཡིས། །ཇི་ལྟར་ཁྱོད་ཀྱི་སྐུ་ཁྲུས་མཛད། །བཅོམ་ལྡན་འདས་ཀྱིས་བཀའ་སྩལ་པ། གཽ་ཏམ་དང་ཀླུང་ཚུལ་ཁྲིམས་འགྲམ། །དང་བ་བསིལ་བ་མཁས་པས་བསྔགས། །མི་ལུས་མི་གཤེར་དེར་བཀྲུས་པ། །རིག་བྱེད་ཡོན་ཏན་ཕ་རོལ་འགྲོ། །རྒྱལ་
པོ་ཟས་གཙང་གིས་གསོལ་པ། ཟིལ་གནོན་གང་ནས་སྐྱེ་འགྱུར་ཞིང་། །འཇིགས་སྐྲག་གང་ནས་འབྱུང་བར་འགྱུར། །ཡིད་འབྱུང་གང་ནས་སྐྱེ་བར་འགྱུར། །ཞུས་པ་དེ་ནི་བདག་ལ་གསུངས། །བཅོམ་ལྡན་འདས་ཀྱིས་བཀའ་སྩལ་པ། ཟིལ་གནོན་གང་ནས་སྐྱེ་འགྱུར་
ཞིང་། །འཇིགས་སྐྲག་གང་ནས་འབྱུང་འགྱུར་དང་། །ཡིད་འབྱུང་གང་ནས་སྐྱེ་འགྱུར་བ། །གསོན་ཅིག་བདག་གིས་ཁྱོད་ལ་བཤད། །རྒ་དང་ན་དང་འཆི་འགྱུར་བ། །གལ་ཏེ་དེ་གསུམ་ཡོད་མིན་ན། །བདག་ཀྱང་ཤིན་ཏུ་ཡིད་འོང་བའི། །ཡུལ་རྣམས་ལ་ནི་དགའ་བར་
འགྱུར། །རྒྱལ་པོས་གསོལ་པ། ཤཱཀྱའི་རིགས་རྣམས་དགའ་མཛད་པ། །དཔའ་བོ་འཇིག་རྟེན་ཆོས་བརྒྱད་ཀྱིས། །ཁྱོད་ལ་གོས་པ་མི་མངའ་བ། །ལེགས་པར་འཁྲུངས་པ་ལེགས་པ་ལགས། །དེ་ནས་རབ་དགའ་དང་རྒྱས་པས། །དྲང་སྲོང་དགེ་འདུན་བསྐོར་བྱས་

ཏེ། །ཐུབ་དབང་ཞབས་ལ་མགོས་གཏུགས་ནས། །བདེ་གཤེགས་ཀུན་ནས་རྟོག་ཅིང་སྡོད། །དེ་ནས་རྒྱལ་པོ་ཟས་གཙང་འདི་སྙམ་དུ་སེམས་ཏེ། བདག་གི་བུས་ཡོན་ཏན་གྱི་ཚོགས་འདི་ལྟ་བུ་རྟོགས་པ་ནི་བདག་གིས་རྙེད་པ་ལེགས་པར་རྙེད་དོ་སྙམ་མོ། །དེ་ནས་བཅོམ་
ལྡན་འདས་ཀྱིས་སྐྱེ་བོ་ཕལ་པོ་ཆེའི་ཚོགས་དེའི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཐུགས་སུ་ཆུད་ནས། འདི་ལྟར་རྒྱལ་པོ་ཟས་གཙང་དང་། ལྷས་སྦྱིན་སྡིག་པ་འདོད་པ་ང་རྒྱལ་ལས་ཀྱང་ང་རྒྱལ་ཅན་མ་གཏོགས་པ་ཟས་དཀར་ལ་
སོགས་པ་ཤཱཀྱ་བདུན་ཁྲི་བདུན་སྟོང་གིས་བདེན་པ་དག་མཐོང་བར་གྱུར་པ་དེ་ལྟར་ཆོས་བསྟན་པ་མཛད་དོ། །དེ་ནས་སྲོག་ཆགས་སྟོང་ཕྲག་མང་པོ་ཁ་ཅིག་གིས་ནི་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ལན་གཅིག་ཕྱིར་འོང་བའི་འབྲས་བུ། ཁ་
ཅིག་གིས་ནི་ཕྱིར་མི་འོང་བའི་འབྲས་བུ། ཁ་ཅིག་གིས་ནི་རབ་ཏུ་བྱུང་སྟེ་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱས་ཏེ། འཁོར་དེ་ལས་ཕལ་ཆེར་སངས་རྒྱས་ལ་གཞོལ་བ་དང་། ཆོས་ལ་འབབ་པ་དང་། དགེ་འདུན་ལ་བབ་པར་རྣམ་པར་
གཞག་པར་མཛད་དོ། །རྒྱལ་པོ་ཟས་གཙང་ནི་བདག་གི་བུ་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ་ཡིན་ནོ་སྙམ་དུ་ཧ་ཅང་དགའ་བས་བདེན་པ་མ་མཐོང་ངོ་། །ལྷས་བྱིན་ནི་སྡིག་པ་འདོད་པ་དང་། ང་རྒྱལ་ལས་ཀྱང་ང་རྒྱལ་གྱིས་བདེན་པ་མ་མཐོང་ངོ་། །ལྷས་བྱིན་
བདེན་པ་མ་མཐོང་ཞིང་ཁྲོ་བས་ཟིལ་གྱིས་ནོན་པས་སྨྲས་པ། གལ་ཏེ་བདག་གིས་ཀྱང་འདི་ལྟར་རྗེས་སུ་འཇུག་པར་བྱེད་པའི་སྒྱུ་མ་ཤེས་པར་གྱུར་ན། བདག་གིས་ཀྱང་འཇིག་རྟེན་ཐམས་ཅད་རྗེས་སུ་འཇུག་པར་བྱ་བ་ལ་རག་གོ། །ཤཱཀྱ་གཅུགས་པར་གྱུར་པ་དགའ་བ་སྟོན་པ་དག་གིས་
དེ་ལ་སྨྲས་པ། ལྷས་བྱིན་ཐོང་ཤིག་བཅོམ་ལྡན་འདས་ནི་རྫུ་འཕྲུལ་ཆེ་བ། མཐུ་ཆེ་བ་ཡིན་གྱིས་དེ་སྐད་མ་ཟེར་ཅིག །དེ་ནས་དེ་ཅང་མི་སྨྲ་བར་འདུག་གོ། །ཉི་མ་གཉིས་པ་ལ་སྐྱེད་མོས་ཚལ་སྐྱེ་ཡོད་དུས་ཕྱོགས་གོ་སྐབས་ཡངས་པར་གདན་ཐབས་ཟླ་གམ་ལྟ་བུ་བཤམས་པ་

བྱས་ནས། དེར་ཡང་བཅོམ་ལྡན་འདས་ཀྱིས་སྐྱེ་བོ་ཕལ་པོ་ཆེའི་ཚོགས་དེའི་བསམ་པ་དང་བག་ལ་ཉལ་དང་། ཁམས་དང་། རང་བཞིན་ཐུགས་སུ་ཆུད་ནས་འདི་ལྟར་རྒྱལ་པོ་ཟས་གཙང་དང་། ལྷས་བྱིན་སྡིག་པ་འདོད་པ་ང་རྒྱལ་ལས་ཀྱང་ང་རྒྱལ་ཅན་མ་གཏོགས་
པ། བྲེ་བོ་ཟས་ལ་སོགས་པ་ཤཱཀྱ་བདུན་ཁྲི་དྲུག་སྟོང་གིས་བདེན་པ་དག་མཐོང་བར་གྱུར་པ་དེ་ལྟར་ཆོས་བསྟན་པ་མཛད་དོ། །དེ་ན་སྲོག་ཆགས་སྟོང་ཕྲག་མང་པོ་ཁ་ཅིག་གིས་ནི་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ལན་གཅིག་ཕྱིར་འོང་བའི་འབྲས་བུ།
ཁ་ཅིག་གིས་ནི་ཕྱིར་མི་འོང་བའི་འབྲས་བུ། ཁ་ཅིག་གིས་ནི་རབ་ཏུ་བྱུང་སྟེ་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱས་ཏེ། འཁོར་དེ་ལས་ཕལ་ཆེར་སངས་རྒྱས་ལ་གཞོལ་བ་དང་། ཆོས་ལ་འབབ་པ་དང་། དགེ་འདུན་ལ་བབ་པར་རྣམ་པར་གཞག་
པར་མཛད་དོ། །རྒྱལ་པོ་ཟས་གཙང་ནི་བདག་གི་བུ་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ་ཡིན་ནོ་སྙམ་དུ་ཧ་ཅང་དགའ་བས་བདེན་པ་མ་མཐོང་ངོ་། །ལྷས་བྱིན་ནི་སྡིག་པ་འདོད་པ་དང་། ང་རྒྱལ་ལས་ཀྱང་ང་རྒྱལ་གྱིས་བདེན་པ་མ་མཐོང་ངོ་། །ལྷས་བྱིན་བདེན་པ་མ་
མཐོང་ཞིང་ཁྲོ་བའི་ཟིལ་གྱིས་ནོན་པས་སྨྲས་པ། གལ་ཏེ་བདག་གིས་ཀྱང་འདི་ལྟར་རྗེས་སུ་འཇུག་པར་བྱེད་པའི་སྒྱུ་མ་ཤེས་པར་གྱུར་ན། བདག་གིས་ཀྱང་འཇིག་རྟེན་ཐམས་ཅད་རྗེས་སུ་འཇུག་པར་བྱ་བ་ལ་རག་གོ། །ཤཱཀྱ་གཅུགས་པར་གྱུར་པ་དགའ་བ་སྟོན་པ་དག་གིས་དེ་
ལ་སྨྲས་པ། ལྷས་བྱིན་ཐོང་ཤིག །བཅོམ་ལྡན་འདས་ནི་རྫུ་འཕྲུལ་ཆེ་བ། མཐུ་ཆེ་བ་ཡིན་གྱིས་དེ་སྐད་མ་ཟེར་ཅིག །དེ་ནས་དེ་ཅང་མི་སྨྲ་བར་འདུག་གོ། །ཉི་མ་གསུམ་པ་ལ་སྐྱེད་མོས་ཚལ་ཚངས་པའི་གནས་སུ་ས་ཕྱོགས་གོ་སྐབས་ཡངས་པར་གདན་ཐབས་ཟླ་གམ་ལྟ་
བུ་བཤམས་པ་བྱས་ནས། དེར་ཡང་བཅོམ་ལྡན་འདས་ཀྱིས་སྐྱེ་བོ་ཕལ་པོ་ཆེའི་ཚོགས་དེའི་བསམ་པ་དང་། བག་ལ་ཉལ་དང་། ཁམས་དང་རང་བཞིན་ཐུགས་སུ་ཆུད་ནས་འདི་ལྟར་རྒྱལ་པོ་ཟས་གཙང་དང་། ལྷས་བྱིན་སྡིག་པ་འདོད་པ་ང་རྒྱལ་ལས་ཀྱང་ང་རྒྱལ་ཅན་མ་

གཏོགས་པ་བདུད་རྩི་ཟས་ལ་སོགས་པ་ཤཱཀྱ་བདུན་ཁྲི་ལྔ་སྟོང་གིས་བདེན་པ་དག་མཐོང་བར་གྱུར་པ་དེ་ལྟར་ཆོས་བསྟན་པ་མཛད་དོ། །དེ་ན་སྲོག་ཆགས་སྟོང་ཕྲག་མང་པོ་ཁ་ཅིག་གིས་ནི་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ལན་གཅིག་ཕྱིར་འོང་བའི་འབྲས་
བུ། ཁ་ཅིག་གིས་ནི་ཕྱིར་མི་འོང་བའི་འབྲས་བུ། ཁ་ཅིག་གིས་ནི་རབ་ཏུ་བྱུང་སྟེ་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱས་ཏེ་འཁོར་དེ་ལས་ཕལ་ཆེར་སངས་རྒྱས་ལ་གཞོལ་བ་དང་། ཆོས་ལ་འབབ་པ་དང་། དགེ་འདུན་ལ་བབ་པར་རྣམ་པར་
གཞག་པར་མཛད་དོ། །རྒྱལ་པོ་ཟས་གཙང་ནི་བདག་གི་བུ་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ་ཡིན་ནོ་སྙམ་དུ་ཧ་ཅང་དགའ་བས་བདེན་པ་མ་མཐོང་ངོ་། །ལྷས་བྱིན་ནི་སྡིག་པ་འདོད་པ་དང་། ང་རྒྱལ་ལས་ཀྱང་ང་རྒྱལ་གྱིས་བདེན་པ་མ་མཐོང་ངོ་། །དེ་ནས་བཅོམ་
ལྡན་འདས་འདི་སྙམ་དུ་དགོངས་ཏེ། ཅིའི་ཕྱིར་རྒྱལ་པོ་ཟས་གཙང་བདེན་པ་མཐོང་བར་མི་བྱེད་སྙམ་དུ་དགོངས་ན། རྒྱུ་གཉིས་ཀྱིས་བདེན་པ་མི་མཐོང་སྟེ། སེམས་ཧ་ཅང་མཐོ་བ་དང་། ཧ་ཅང་ཞུམ་པས་སོ། །དེ་ལྟར་རྒྱལ་པོ་ཟས་གཙང་གི་སེམས་གཞོན་ནུ་དོན་ཐམས་ཅད་
གྲུབ་པ་སྔོན་ཅད་ལྷ་དང་མིས་མཆོད་པར་གྱུར་ན། ད་ནི་མིས་མཆོད་ཅིང་ལྷས་མཆོད་པར་མ་གྱུར་ཏོ་སྙམ་དུ་ཧ་ཅང་ཞུམ་པར་གྱུར་པར་ཐུགས་སུ་ཆུད་དོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། བདག་གིས་རྒྱལ་པོ་ཟས་གཙང་གདུལ་བའི་ཕྱིར་ལྷའི་འཁོར་འབའ་ཞིག་
ལ་ཆོས་བསྟན་པར་བྱའོ་སྙམ་དུ་དགོངས་ཤིང་རིག་ནས་འཇིག་རྟེན་པའི་ཐུགས་བསྐྱེད་པ་མཛད་དོ། །སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་ནི་གལ་ཏེ་འཇིག་རྟེན་པའི་ཐུགས་བསྐྱེད་པར་མཛད་ན་ནི་ཐ་ན་སྲོག་ཆགས་གྲོག་སྦུར་གྱིས་ཀྱང་བཅོམ་ལྡན་འདས་ཀྱི་ཐུགས་སེམས་
ཀྱིས་ཤེས་ལ། ཇི་སྟེ་འཇིག་རྟེན་ལས་འདས་པའི་ཐུགས་བསྐྱེད་པར་མཛད་ན་ནི་རང་སངས་རྒྱས་རྣམས་ཀྱིས་ཀྱང་བཅོམ་ལྡན་འདས་ཀྱི་ཐུགས་སེམས་ཀྱིས་མི་ཤེས་ན་ཉན་ཐོས་ལ་སོགས་པས་ལྟ་སྨོས་ཀྱང་ཅི་དགོས། དེ་ནས་ཚངས་པ་དང་། བརྒྱ་བྱིན་ལ་སོགས་པ་ལྷ་རྣམས་

འདི་སྙམ་དུ་སེམས་ཏེ། ཅིའི་སླད་དུ་བཅོམ་ལྡན་འདས་ཀྱིས་འཇིག་རྟེན་པའི་ཐུགས་བསྐྱེད་པ་མཛད་སྙམ་པ་དང་། བཅོམ་ལྡན་འདས་རྒྱལ་པོ་ཟས་གཙང་གདུལ་བའི་སླད་དུ་ལྷའི་འཁོར་འབའ་ཞིག་ལ་ཆོས་སྟོན་པ་བཞེད་པར་མཐོང་ངོ་། །དེ་ནས་འདོད་པ་ན་སྤྱོད་པ་
དང་། གཟུགས་ན་སྤྱོད་པའི་ལྷ་རྣམས་ཀྱིས་བཅོམ་ལྡན་འདས་ཀྱི་ཐུགས་སེམས་ཀྱིས་ཤེས་ནས། འདི་ལྟ་སྟེ། དཔེར་ན་སྐྱེས་བུའི་ལག་པ་བསྐུམས་པ་ལས་རྐྱོང་བར་བྱེད་པའམ། བརྐྱང་བ་ལས་སྐུམ་པར་བྱེད་པ་དེ་བཞིན་དུ། འདོད་པ་ན་སྤྱོད་པ་དང་། གཟུགས་ན་སྤྱོད་
པའི་ལྷ་རྣམས་ལྷའི་འཇིག་རྟེན་ནས་མི་སྣང་བར་གྱུར་ཏེ་སྐྱེད་མོས་ཚལ་ཚངས་པའི་གནས་སུ་བཅོམ་ལྡན་འདས་ཀྱི་སྤྱན་སྔར་ལྷགས་སོ། །བཅོམ་ལྡན་འདས་ཀྱིས་ཀྱང་རྫུ་འཕྲུལ་གྱིས་རིན་པོ་ཆེ་སྣ་བཞི་ལས་བྱས་པའི་ཁང་བཟངས་སྒོ་བཞི་པ་སྤྲུལ་པ་མཛད་དེ། སྒོ་བཞི་པོ་དག་ཏུ་
འཇིག་རྟེན་སྐྱོང་བ་བཞི་པོ་དག་སྒོ་སྲུངས་སུ་རྣམ་པར་གཞག་པར་མཛད་དོ། །དེ་ནས་གཟུགས་ན་སྤྱོད་པའི་ལྷ་རྣམས་ཀྱིས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་གཡས་ཕྱོགས་སུ་ཉེ་བར་བརྟེན་ཏེ་
འཁོད་དོ། །འདོད་པ་ན་སྤྱོད་པའི་ལྷ་རྣམས་ཀྱིས་ཀྱང་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་གཡོན་ཕྱོགས་སུ་ཉེ་བར་བརྟེན་ཏེ་འཁོད་དོ། །རྒྱལ་པོ་ཟས་གཙང་གི་ཀུན་དུ་སྤྱོད་པ་ནི་ཉིན་མོ་ལན་
གསུམ་བཅོམ་ལྡན་འདས་ལ་བལྟ་བ་དང་། བསྙེན་བཀུར་བྱ་བའི་ཕྱིར་འགྲོའོ། །དེ་ནས་རྒྱལ་པོ་ཟས་གཙང་ནང་པར་སྔར་ལངས་ཏེ་ཁང་བཟངས་ཀྱི་ཤར་སྒོ་ག་ལ་བ་དེར་སོང་བ་དང་། ཡུལ་འཁོར་སྲུང་གིས་སྨྲས་པ། རྒྱལ་པོ་ཆེན་པོ་མ་འཇུག་པར་སྡོད་ཅིག །ཅིའི་
ཕྱིར་བཅོམ་ལྡན་འདས་ལྷའི་འཁོར་འབའ་ཞིག་ལ་ཆོས་སྟོན་པར་མཛད་པས་འདིར་མི་ཙམ་གྱིས་ཚོད་ཀྱིས་མི་ཆུད་དོ། །བཞིན་བཟངས་ཁྱོད་སུ་ཞིག་ཡིན། རྒྱལ་པོ་ཆེན་པོ་ཁོ་བོ་ནི་རྒྱལ་པོ་ཆེན་པོ་ཡུལ་འཁོར་སྲུང་ཡིན་ནོ། །དེ་ནས་རྒྱལ་པོ་ཟས་གཙང་ཁང་བཟངས་ཀྱི་

ལྷོ་སྒོ་ག་ལ་བ་དེར་སོང་བ་དང་། འཕགས་སྐྱེས་པོས་སྨྲས་པ། རྒྱལ་པོ་ཆེན་པོ་མ་འཇུག་པར་སྡོད་ཅིག །ཅིའི་ཕྱིར། བཅོམ་ལྡན་འདས་ལྷའི་འཁོར་འབའ་ཞིག་ལ་ཆོས་སྟོན་པར་མཛད་པས་འདིར་མི་ཙམ་གྱིས་ཚོད་ཀྱིས་མི་ཆུད་དོ། །བཞིན་བཟངས་ཁྱོད་སུ་ཞིག་ཡིན། རྒྱལ་
པོ་ཆེན་པོ་ཁོ་བོ་ནི་རྒྱལ་པོ་ཆེན་པོ་འཕགས་སྐྱེས་པོ་ཡིན་ནོ། །དེ་ནས་རྒྱལ་པོ་ཟས་གཙང་ཁང་བཟངས་ཀྱི་ནུབ་སྒོ་ག་ལ་བ་དེར་སོང་བ་དང་། མིག་མི་བཟང་གིས་སྨྲས་པ། རྒྱལ་པོ་ཆེན་པོ་མ་འཇུག་པར་སྡོད་ཅིག །ཅིའི་ཕྱིར། བཅོམ་ལྡན་འདས་ལྷའི་འཁོར་འབའ་ཞིག་ལ་ཆོས་
སྟོན་པར་མཛད་པས་འདིར་མི་ཙམ་གྱིས་ཚོད་ཀྱིས་མི་ཆུད་དོ། །བཞིན་བཟངས་ཁྱོད་སུ་ཞིག་ཡིན། རྒྱལ་པོ་ཆེན་པོ་ཁོ་བོ་ནི་རྒྱལ་པོ་ཆེན་པོ་མིག་མི་བཟང་ཡིན་ནོ། །དེ་ནས་རྒྱལ་པོ་ཟས་གཙང་ཁང་བཟངས་ཀྱི་བྱང་སྒོ་ག་ལ་བ་དེར་སོང་བ་དང་། རྣམ་ཐོས་ཀྱི་བུས་སྨྲས་པ། རྒྱལ་
པོ་ཆེན་པོ་མ་འཇུག་པར་སྡོད་ཅིག །ཅིའི་ཕྱིར། བཅོམ་ལྡན་འདས་ལྷའི་འཁོར་འབའ་ཞིག་ལ་ཆོས་སྟོན་པར་མཛད་པས་འདིར་མི་ཙམ་གྱིས་ཚོད་ཀྱིས་མི་ཆུད་དོ། །བཞིན་བཟངས་ཁྱོད་སུ་ཞིག་ཡིན། རྒྱལ་པོ་ཆེན་པོ་ཁོ་བོ་ནི་རྒྱལ་པོ་ཆེན་པོ་རྣམ་ཐོས་ཀྱི་བུ་ཡིན་ནོ། །དེ་
ནས་རྒྱལ་པོ་ཟས་གཙང་ཀྱེ་མ་བདག་གིས་བཅོམ་ལྡན་འདས་ལྷའི་འཁོར་འབའ་ཞིག་ལ་ཆོས་སྟོན་པར་མཛད་པ་མཐོང་ན་ཅི་མ་རུང་སྙམ་དུ་འདོད་པ་སྐྱེས་སོ། །བཅོམ་ལྡན་འདས་ཀྱིས་རྒྱལ་པོ་ཟས་གཙང་གི་སེམས་ཐུགས་ཀྱིས་མཁྱེན་ནས་ཁང་བཟངས་ཤེལ་གྱི་རང་བཞིན་དུ་སྤྲུལ་པ་
མཛད་པ་དང་། འདི་ལྟར་རྒྱལ་པོ་ཟས་གཙང་གིས་བཅོམ་ལྡན་འདས་ལྷའི་འཁོར་འབའ་ཞིག་ལ་ཆོས་སྟོན་པ་མེ་ལོང་གི་གཟུགས་ཀྱི་ནང་ན་འདུག་པ་ལྟར་མཐོང་ངོ་། །མཐོང་ནས་ཀྱང་འདི་སྙམ་དུ་སེམས་ཏེ། སུ་ལ་ཡང་འདི་ལྟ་སྟེ། ད་ལྟར་བདག་གི་དོན་ཐམས་ཅད་
གྲུབ་པ་ལྟ་བུའི་བུ་མེད་དོ་སྙམ་མོ། །དེ་ནས་རྒྱལ་པོ་ཟས་གཙང་གི་སེམས་ཀྱི་རྒྱུད་ཧ་ཅང་མཐོ་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་རྫུ་འཕྲུལ་མངོན་པར་འདུ་མཛད་པ་དེ་སླར་བསྡུ་བ་མཛད་ནས་རྒྱལ་པོ་ཟས་གཙང་ལ་ཆོས་བསྟན་པར་བརྩམ་པ་མཛད་དོ། །དེ་ནས་

བཅོམ་ལྡན་འདས་འདི་སྙམ་དུ་དགོངས་ཏེ། ཅིའི་ཕྱིར་རྒྱལ་པོ་ཟས་གཙང་བདེན་པ་མཐོང་བར་མི་བྱེད་སྙམ་དུ་དགོངས་པ་དང་། ད་ལྟར་རྒྱལ་པོ་ཟས་གཙང་སུ་ལ་ཡང་འདི་ལྟ་སྟེ། ད་ལྟར་བདག་གི་དོན་ཐམས་ཅད་གྲུབ་པ་ལྟ་བུའི་བུ་མེད་དོ་སྙམ་དུ་ཧ་ཅང་དགའ་
བས་སེམས་ཀྱི་རྒྱུད་ཧ་ཅང་མཐོ་བར་གྱུར་པར་ཐུགས་སུ་ཆུད་དོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་པ། མཽད་གལ་གྱི་བུ་ཁྱོད་ཀྱིས་རྒྱལ་པོ་ཟས་གཙང་ལ་སོམས་ཤིག །ཚེ་དང་ལྡན་པ་མཽད་གལ་གྱི་བུ་ཆེན་པོས་བཙུན་པ་བཀའ་
བཞིན་འཚལ་ཞེས་བཅོམ་ལྡན་འདས་ལས་མཉན་ནས་རྒྱལ་པོ་ཟས་གཙང་ག་ལ་བ་དེར་སོང་ངོ་། །རྒྱལ་པོ་ཟས་གཙང་གིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ཐག་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་འདི་སྐད་ཅེས་སྨྲས་སོ། །བཙུན་པ་མཽད་གལ་གྱི་བུ་ཚུར་གཤེགས།
བཙུན་པ་མཽད་གལ་གྱི་བུ་བྱོན་པ་ལེགས་སོ། །བཙུན་པ་མཽད་གལ་གྱི་བུ་གདན་བཤམས་པ་ཉིད་ལ་བཞུགས་ཤིག །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་བཅོམ་ལྡན་འདས་ཀྱིས་སྐབས་དབྱེ་བ་མཛད་པས་ཏིང་ངེ་འཛིན་འདི་ལྟ་བུ་ལ་སྙོམས་པར་ཞུགས་ཏེ། ཇི་ལྟར་
སེམས་མཉམ་པར་བཞག་ན་རང་གི་སྟན་ལས་མི་སྣང་བར་གྱུར་ཅིང་ཤར་ཕྱོགས་ཀྱི་སྟེང་གི་ནམ་མཁའ་ལ་མངོན་པར་འཕགས་ཏེ། སྤྱོད་ལམ་བཞི་པོ་འདི་ལྟ་སྟེ། འགྲོ་བ་དང་། འགྲེང་བ་དང་། འདུག་པ་དང་། ཉལ་བ་དག་བྱེད་དོ། །མེའི་ཁམས་ལ་ཡང་སྙོམས་པར་འཇུག་སྟེ།
ཚེ་དང་ལྡན་པ་མཽད་གལ་གྱི་བུ་ཆེན་པོ་མེའི་ཁམས་ལ་སྙོམས་པར་ཞུགས་པའི་ལུས་ལས་འོད་ཟེར་སྣ་ཚོགས་འདི་ལྟ་སྟེ། སྔོན་པོ་དག་དང་། སེར་པོ་དག་དང་། དམར་པོ་དག་དང་། དཀར་པོ་དག་དང་། བཙོད་ཀ་དག་དང་། ཤེལ་དང་། དངུལ་གྱི་ཁ་དོག་ལྟ་བུ་དག་བྱུང་ངོ་། །ཆོ་འཕྲུལ་
ཟུང་དག་ཀྱང་རྣམ་པར་སྟོན་ཏེ། ལུས་ཀྱི་སྨད་ནས་མེ་འབར་ཞིང་ལུས་ཀྱི་སྟོད་ནས་ཆུ་གྲང་མོའི་རྒྱུན་འབབ་པར་བྱེད་དོ། །ལུས་ཀྱི་སྟོད་ནས་མེ་འབར་ཞིང་ལུས་ཀྱི་སྨད་ནས་ཆུ་གྲང་མོའི་རྒྱུན་འབབ་པར་བྱེད་དོ། །ཤར་ཕྱོགས་སུ་ཇི་ལྟ་བ་བཞིན་དུ་ལྷོ་དང་ནུབ་དང་། བྱང་ཕྱོགས་སུའང་

དེ་བཞིན་ཏེ། ཕྱོགས་བཞིར་རྫུ་འཕྲུལ་གྱི་ཆོ་འཕྲུལ་རྣམ་པ་བཞི་བཞི་བསྟན་ནས་རྫུ་འཕྲུལ་མངོན་པར་འདུ་བྱ་བ་དེ་ཕྱིར་བསྡུས་ཏེ་སྟན་བཤམས་པ་ཉིད་ལ་འདུག་གོ། །དེ་ནས་རྒྱལ་པོ་ཟས་གཙང་གིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །བཙུན་པ་
མཽད་གལ་གྱི་བུ་ཆེན་པོ་བཅོམ་ལྡན་འདས་ཀྱི་ཉན་ཐོས་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ། གཞན་དག་ཀྱང་མཆིས་སམ། དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་དེའི་ཚེ་ཚིགས་སུ་བཅད་པ་སྨྲས་པ། ཐུབ་པའི་ཉན་ཐོས་མཐུ་ཆེ་བ། །གསུམ་རིག་སེམས་ཀྱི་
རྣམ་གྲངས་ཤེས། །ཟག་པ་ཟད་པར་གྱུར་པ་དང་། །དགྲ་རྣམས་བཅོམ་པ་མང་དུ་ཡོད། །དེ་ནས་རྒྱལ་པོ་ཟས་གཙང་འདི་སྙམ་དུ་སེམས་ཏེ། བཅོམ་ལྡན་འདས་ཉག་གཅིག་རྫུ་འཕྲུལ་ཆེ་བ། མཐུ་ཆེ་བར་མ་ཟད་ཀྱི། འདི་ལྟར་ཉན་ཐོས་རྣམས་ལ་ཡང་རྫུ་འཕྲུལ་ཆེ་བ་མཐུ་
ཆེ་བ་དག་ཡོད་དོ་སྙམ་ནས། དེ་ན་རྒྱལ་པོ་ཟས་གཙང་གི་སེམས་ཀྱི་རྒྱུད་སྙོམས་པར་གྱུར་ཏོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་རྒྱལ་པོ་ཟས་གཙང་ཁྲིད་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་
འཚལ་ཏེ་མཐའ་གཅིག་ཏུ་འདུག་གོ། །དེ་ནས་བཅོམ་ལྡན་འདས་ཀྱིས་རྒྱལ་པོ་ཟས་གཙང་གི་སེམས་ཐུགས་ཀྱིས་མཁྱེན་ཅིང་། བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཐུགས་སུ་ཆུད་ནས། འདི་ལྟར་རྒྱལ་པོ་ཟས་གཙང་གིས་སྟན་དེ་ཉིད་ལ་འདུག་
བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟར་ཆོས་བསྟན་པ་མཛད་དོ། །དེས་བདེན་པ་མཐོང་ནས་གསོལ་པ། བཙུན་པ་བདག་གིས་དགེ་བའི་བཤེས་གཉེན་བཅོམ་ལྡན་འདས་ལ་
བརྟེན་ནས། བཅོམ་ལྡན་འདས་ཀྱིས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་། བྲམ་ཟེ་དག་

གིས་ཀྱང་མ་བགྱིས། བྱམས་པ་དང་། མཛའ་བཤེས་དང་། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་
ནི་ཕྱེ། སེམས་ཅན་དམྱལ་བ་དང་། དུད་འགྲོ་དང་། ཡི་དགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག །འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་
ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང་། ཆོས་དང་དགེ་སློང་གི་དགེ་འདུན་ལ་སྐྱབས་སུ་མཆིས།
བདག་དགེ་བསྙེན་དུ་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །ཚིགས་སུ་བཅད་པ་ཡང་གསོལ་པ། བུ་ཕོ་བཟང་པོས་ཕ་ལ་ནི། །ལན་དུ་ཕན་གདགས་གང་བགྱི་བ། །དེ་ནི་ཁྱོད་ཀྱིས་བདག་ལ་བགྱིས། །
སེམས་ནི་མཐོ་རིས་གཞོལ་བར་གྱུར། །བུ་ཕོ་བཟང་པོས་ཕ་ལ་ནི། །ལན་དུ་ཕན་གདགས་གང་བགྱི་བ། །དེ་ནི་ཁྱོད་ཀྱིས་བདག་ལ་བགྱིས། །སེམས་ནི་ཐར་ལ་གཞོལ་བར་གྱུར། །ངན་སོང་དག་ལས་ལེགས་ཕྱུང་ཞིང་། །ཁྱོད་ཀྱིས་མཐོ་རིས་ཐར་པ་ལ། །རབ་ཏུ་འབད་
པས་བདག་བཞག་སྟེ། །ཁྱོད་ཀྱིས་དཀའ་བ་ལེགས་པར་མཛད། །ཚོང་པས་ཁེ་སྤོགས་རྙེད་པ་ལྟར། །མཐོ་རིས་རྙེད་པ་བདག་གིས་རྙེད། །དགེ་བའི་བཤེས་གཉེན་རྣམས་ལ་ནི། །ཉེ་བར་རྟེན་པ་བཟང་བ་ལགས། །དེ་ནས་རྒྱལ་པོ་ཟས་གཙང་གིས་བདེན་པ་མཐོང་ནས་
ཟས་དཀར་ལ་སྨྲས་པ། གཞོན་ནུ་ཁྱོད་ཀྱིས་རྒྱལ་སྲིད་བྱེད་དུ་ཆུག་ཤིག །ང་ནི་རྒྱལ་པོའི་དྲང་སྲོང་གིས་ཚངས་པར་སྤྱད་པ་སྤྱོད་དོ། །ལྷ་ཅིའི་སླད་དུ་རྒྱལ་སྲིད་བགྱིད་དུ་མི་སྩོལ། ངས་བདེན་པ་དག་མཐོང་ངོ་། །ལྷས་ནམ་གཟིགས། དེང་ཉིད་དོ། །ལྷས་དེང་ཉིད་གཟིགས་

ཀྱི་བདག་གིས་གང་གི་གདུགས་ལ་བཅོམ་ལྡན་འདས་འདིར་གཤེགས་པ་དེ་ཉིད་ཀྱི་གདུགས་ལ་བདེན་པ་དག་མཐོང་ལགས་སོ། །དེ་ནས་རྒྱལ་པོ་ཟས་གཙང་གིས་བྲེ་བོ་ཟས་དང་བདུད་རྩི་ཟས་ལ་སྨྲས་པ། གཞོན་ནུ་གཉིས་ཁྱེད་ཀྱིས་རྒྱལ་སྲིད་བྱེད་དུ་ཆུག་ཤིག །ང་ནི་
རྒྱལ་པོའི་དྲང་སྲོང་གིས་ཚངས་པར་སྤྱད་པ་སྤྱོད་དོ། །ཅིའི་སླད་དུ་རྒྱལ་སྲིད་བགྱིད་དུ་མི་སྩོལ། ངས་བདེན་པ་མཐོང་ངོ་། །ལྷས་ནམ་གཟིགས། དེང་ཉིད་དོ། །ལྷས་དེང་ཉིད་གཟིགས་ཀྱི་བདག་ཅག་གིས་ཆེས་སྔར་མཐོང་ལགས་སོ། །རྒྱལ་པོས་སྨྲས་པ། གཞོན་ནུ་
རྣམས་ཀྱི་བུ་ཐུ་བོ་གང་ཡིན། གཞོན་ནུ་བཟང་ལྡན་ལགས་སོ། །རྒྱལ་པོ་ཟས་གཙང་གིས་གཞོན་ནུ་བཟང་ལྡན་ཤཱཀྱའི་རྒྱལ་པོར་དབང་བསྐུར་རོ། །དེའི་ཚེ་ན་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ། ཉིན་གཅིག་མི་ཆད་པར་རྒྱལ་པོའི་ཕོ་བྲང་དུ་གདུགས་
ཚོད་གསོལ་བ་དང་། རྒྱལ་པོ་ཟས་གཙང་གིས་རལ་པ་ཅན་ལས་རབ་ཏུ་བྱུང་བ་དཀའ་ཐུབ་ཀྱིས་ལུས་མི་སྡུག་པར་སྣང་བ་དག་མཐོང་ངོ་། །མཐོང་ནས་ཀྱང་དེ་འདི་སྙམ་དུ་སེམས་ཏེ། བདག་ཉིད་ཆེན་པོ་འདི་དག་སེམས་ནི་བཟང་བ་ཡིན་ན་ལུས་མི་བཟང་སྟེ། དཀའ་ཐུབ་
དྲག་པོ་དག་གིས་ལུས་མི་སྡུག་པར་སྣང་བ་དག་ཡིན་ནོ། །བཅོམ་ལྡན་འདས་ཀྱི་འཁོར་ནི་བཅོམ་ལྡན་འདས་ཉིད་ཅི་འདྲ་བར་འཁོར་ཡང་དེ་འདྲ་བ་ཉིད་དུ་གྱུར་ན་དེ་ལྟ་ན་བཅོམ་ལྡན་འདས་མཛེས་པར་འགྱུར་རོ་སྙམ་མོ། །དེ་ནས་རྒྱལ་པོ་ཟས་གཙང་གིས་ཤཱཀྱ་རྣམས་བསྡུས་ཏེ་
སྨྲས་པ། ཤེས་ལྡན་དག་གལ་ཏེ་གཞོན་ནུ་དོན་ཐམས་ཅད་གྲུབ་པ་རབ་ཏུ་མ་བྱུང་བར་གྱུར་ན་ཅིར་འགྱུར། ལྷ་འཁོར་ལོས་སྒྱུར་བའི་རྒྱལ་པོར་འགྱུར་རོ། །ཁྱེད་ཀྱི་བུ་དག་ཅིར་འགྱུར། ལྷ་ཞབས་འབྲིང་བར་འགྱུར་རོ། །འོ་ན་ད་གཞོན་ནུ་དོན་ཐམས་ཅད་གྲུབ་པས་བདུད་རྩི་ཐུགས་
སུ་ཆུད་དེ། བདུད་རྩིས་འགྲོ་བ་ཚིམ་པར་མཛད་ན་ཁྱེད་ཀྱི་བུ་དག་ཅིའི་ཕྱིར་ཞབས་འབྲིང་མི་བྱེད། ལྷ་ཅི་ལགས་དེ་དག་རབ་ཏུ་དབྱུང་ངམ། རབ་ཏུ་ཕྱུང་ཤིག །ལྷ་ཤཱཀྱའི་རིགས་རྒྱུན་ཆད་པར་འགྱུར་རོ། །རྒྱལ་པོས་སྨྲས་པ། ཁྱིམ་རེ་རེ་ནས་རེ་རེ་རབ་ཏུ་ཕྱུང་ཤིག །ལྷས་བཀའ་

སྩལ་པ་བཞིན་འཚལ་ལོ། །རྒྱལ་པོ་ཟས་གཙང་གིས་ཤཱཀྱ་གཞོན་ནུ་རྣམས་ཀྱིས་ཁྱིམ་རེ་རེ་ནས་རེ་རེ་རབ་ཏུ་དབྱུང་བར་བྱའོ་ཞེས་དྲིལ་བསྒྲགས་པ་བྱས་སོ། །གང་གི་ཚེ་རྒྱལ་པོ་ཟས་གཙང་གིས་དྲིལ་བསྒྲགས་པ་དེའི་ཚེ་ན་བཟང་ལྡན་དང་མ་འགགས་
པ་དང་། ནམ་གྲུ་ལ་སོགས་པ་ཤཱཀྱའི་གཞོན་ནུ་ལྔ་བརྒྱ་རབ་ཏུ་བྱུང་ངོ་། །གང་གི་ཚེ་བཅོམ་ལྡན་འདས་ཀྱིས་ཤཱཀྱ་གཞོན་ནུ་ལྔ་བརྒྱ་རབ་ཏུ་ཕྱུང་བ་དེའི་ཚེ་ན་བཅོམ་ལྡན་འདས་ཀྱིས་འདི་ལྟ་སྟེ། རིགས་མཐོན་པོ་ལས་རབ་ཏུ་བྱུང་བ་ནི་རྙེད་པའི་ཕྱིར་དང་ཉེ་བ་ཡིན་ནོ། །ཞེས་
གསུངས་པས་དེ་དག་ལས་རྙེད་པ་དང་བཀུར་སྟི་ཆེན་པོ་བྱུང་བར་གྱུར་ཏོ། །བཅོམ་ལྡན་འདས་ཀྱིས་དགོངས་པ། རིགས་ཀྱི་བུ་འདི་དག་གཞན་གྱི་ཕྱིར་ཁོ་ནར་རབ་ཏུ་བྱུང་བ་ཡིན་ན། གཞན་ཁོ་ན་ལ་ཆགས་སོ་སྙམ་དུ་དགོངས་ནས། དེ་ནས་བཅོམ་ལྡན་འདས་དེ་དག་ལས་
རྙེད་པ་དང་བཀུར་སྟི་བྱུང་བ་གཅད་པར་བཞེད་ནས་སེར་སྐྱའི་གནས་སུ་ཅི་དགྱེས་པར་བཞུགས་ནས་མཉན་ཡོད་ག་ལ་བ་དེར་གཤེགས་ཏེ། མཐར་གྱིས་རྒྱུ་ཞིང་གཤེགས་པ་ན་མཉན་ཡོད་དུ་བྱོན་ནས། མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་
བ་ན་བཞུགས་སོ།། །།འདུལ་བ་རྣམ་པར་འབྱེད་པ། བམ་པོ་ཉི་ཤུ་བརྒྱད་པ། དེ་ནས་ཚེ་དང་ལྡན་པ་འཆར་ཀ་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས། མཐར་གྱིས་མཉན་ཡོད་ན་
བསོད་སྙོམས་ལ་རྒྱུ་བ་ན། ཁྱིམ་བདག་གི་ཆུང་མ་སྦེད་མའི་ཁྱིམ་ག་ལ་བ་དེར་སོང་ངོ་། །ཁྱིམ་བདག་གི་ཆུང་མ་སྦེད་མས་ཚེ་དང་ལྡན་པ་འཆར་ཀ་ཐག་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་བྲང་བརྡུངས་ཏེ་སྨྲས་པ། འཆར་ཀ་ཅིའི་སླད་དུ་ཁྱོད་ཀྱིས་བདག་སྤངས་
ཏེ་རབ་ཏུ་བྱུང་། འཆར་ཀས་སྨྲས་པ། བྱང་ཆུབ་སེམས་དཔས་བཙུན་མོ་གྲགས་འཛིན་མ་དང་། ས་འཚོ་མ་དང་། རི་དགས་སྐྱེས་ལ་སོགས་པ་བུད་མེད་དྲུག་ཁྲི་སྤངས་ཏེ་རབ་ཏུ་བྱུང་བ་ནི་ཤིན་ཏུ་དཀའ་བ་ཡིན་གྱི་རྡུལ་གྱི་རྫབ་འདྲ་བ་ཁྱོད་ལ་མི་བྲ་བ་ཅི་ཡོད། འཆར་ཀ་བདག་

ཀྱང་རབ་ཏུ་འབྱུང་ངོ་། །དེ་ལྟར་གྱིས་ཤིག །ཁྱིམ་གྱི་བྱ་བ་ལེགས་པར་བསྡུ་བར་བགྱིའོ། །འཆར་ཀ་དེ་དེར་དུས་དང་མཐུན་པའི་དུས་སུ་འོང་ཞིང་སྨྲས་པ། སྦེད་མ་རབ་ཏུ་མི་འབྱུང་ངམ། སྦེད་མས་སྨྲས་པ། ད་དུང་ཁྱིམ་གྱི་བྱ་བ་ལེགས་པར་མ་བསྡུས་སོ། །སྦེད་མ་དུས་
དེ་ཙམ་གྱིས་ཀོ་ས་ལར་བྱུང་བའི་ཁྱིམ་གྱི་བྱ་བ་ཡང་ལེགས་པར་བསྡུས་པར་འགྱུར་རོ། །འཆར་ཀ་དེང་ལེགས་པར་བསྡུས་ཏེ་སང་རབ་ཏུ་འབྱུང་ངོ་། །འཆར་ཀ་འདི་སྙམ་དུ་སྔོན་ཡང་བདག་ལྷུང་བཟེད་ནག་པོ་ཅན་རྣམས་ཀྱིས་ཟིལ་གྱིས་མནན་པར་གྱུར་པས་གལ་ཏེ་བདག་
གིས་དགེ་སློང་མ་རབ་ཏུ་ཕྱུང་བར་གྱུར་ན་དྲུག་སྡེ་དག་གིས་དགེ་སློང་མ་རབ་ཏུ་ཕྱུང་ངོ་ཞེས་རྒྱ་ཆེར་ཟིལ་གྱིས་གནོན་པར་འགྱུར་རོ་སྙམ་དུ་འགྱོད་པ་སྐྱེས་ནས། དེ་ལྷུང་བཟེད་དང་ཆོས་གོས་ཐོགས་ཏེ་རྒྱལ་པོའི་ཁབ་ག་ལ་བ་དེར་རྒྱུ་ཞིང་སོང་ནས་མཐར་གྱིས་རྒྱུ་ཞིང་འགྲོ་བ་ན་རྒྱལ་པོའི་ཁབ་
ཏུ་ཕྱིན་ནས་དེ་རྒྱལ་པོའི་ཁབ་ཏུ་དབྱར་གནས་པར་ཁས་བླངས་ཏེ་འདུག་གོ། །སྦེད་མ་ཡང་ཕྱི་དེ་ཉིན་པར་ཁྱིམ་གྱི་བྱ་བ་ལེགས་པར་བསྡུས་ཏེ་རྒྱལ་བྱེད་ཀྱི་ཚལ་དུ་འོངས་ནས་དེ་དགེ་སློང་རྣམས་ཀྱི་གན་དུ་སོང་སྟེ་དྲིས་པ། འཕགས་པ་དག་དེ་གར་མཆིས། དེ་སུ་ཡིན། འཕགས་
པ་འཆར་ཀའོ། །དེ་རྒྱལ་པོའི་ཁབ་ཏུ་སོང་ངོ་། །སྦེད་མས་ངུ་བར་བརྩམས་པ་དང་། དགེ་སློང་རྣམས་ཀྱིས་སྨྲས་པ། སྦེད་མ་ཅིའི་ཕྱིར་ངུ་། འཕགས་པ་འཆར་ཀའི་མཆིད་ནས་ཁྱིམ་གྱི་བྱ་བ་ལེགས་པར་བསྡུས་ལ་མཆི་ཤིག་དང་། བདག་གིས་རབ་ཏུ་དབྱུང་ངོ་ཞེས་
མཆི་ནས་བདག་གིས་ཁྱིམ་གྱི་བྱ་བ་ལེགས་པར་བསྡུས་ཏེ་མཆིས་ན་དེ་རྒྱལ་པོའི་ཁབ་ཏུ་མཆིས་པས་ད་ནི་བདག་ཁྱིམ་ན་གནས་པ་ཡང་མ་ལགས་ལ། རབ་ཏུ་བྱུང་བ་ཡང་མ་ལགས་སོ། །དགེ་སློང་རྣམས་ཀྱིས་དེ་ལ་སྨྲས་པ། སྦེད་མ་འཆར་ཀ་སྤུ་གྲིའི་ཕྱིར་རྒྱལ་པོའི་ཁབ་
ཏུ་སོང་བས་སྤུ་གྲི་སར་པས་ཁྱོད་ཀྱི་སྐྲ་འདྲེག་པར་འགྱུར་རོ། །དགེ་སློང་མ་གསོ་སྦྱོང་འབུལ་བ་དག་རྒྱལ་བྱེད་ཀྱི་ཚལ་དུ་ལྷགས་ནས་དེ་དག་གིས་སྦེད་མ་ངུ་བ་མཐོང་ནས་སྨྲས་པ། སྦེད་མ་ཅིའི་ཕྱིར་ངུ་། འཕགས་པ་འཆར་ཀའི་མཆིད་ནས་ཁྱིམ་གྱི་བྱ་བ་ལེགས་པར་

བསྡུས་ལ་མཆི་ཤིག་དང་། བདག་གིས་རབ་ཏུ་དབྱུང་ངོ་ཞེས་མཆི་ནས་བདག་གིས་ཁྱིམ་གྱི་བྱ་བ་ལེགས་པར་བསྡུས་ཏེ་མཆིས་ན། དེ་རྒྱལ་པོའི་ཁབ་ཏུ་མཆིས་པས་ད་ནི་བདག་ཁྱིམ་ན་གནས་པ་ཡང་མ་ལགས་ལ་རབ་ཏུ་བྱུང་བ་ཡང་མ་ལགས་སོ། །གཡེངས་
མ་དགེ་སློང་དག་སུ་ཞིག་དགེ་སློང་མ་རབ་ཏུ་འབྱིན་པར་བྱེད། འདི་ལྟར་དགེ་སློང་མ་རྣམས་ཀྱིས་དགེ་སློང་མ་རབ་ཏུ་འབྱིན་པར་བྱེད་ཀྱིས་ཚུར་ཤོག །འཕགས་མ་སྐྱེ་དགུའི་བདག་མོ་ཆེན་མོ་གཽ་ཏ་མཱིས་ཁྱོད་རབ་ཏུ་འབྱིན་པར་འགྱུར་རོ། །དེ་དག་གིས་དེ་སྐྱེ་དགུའི་བདག་མོ་ཆེན་
མོ་གཽ་ཏ་མཱིའི་གན་དུ་ཁྲིད་ནས་སྨྲས་པ། འཕགས་མ་ཁྱིམ་བདག་གི་མཆིས་འབྲང་སྦེད་མ་འདི་རབ་ཏུ་འབྱུང་བར་འཚལ་ལོ། །སྐྱེ་དགུའི་བདག་མོ་ཆེན་མོ་གཽ་ཏ་མཱིས་དེ་རབ་ཏུ་ཕྱུང་རྫོགས་པར་བསྙེན་པར་བྱས་སོ། །འཆར་ཀ་འདི་སྙམ་དུ་བདག་གིས་ལྷུང་བཟེད་ནག་པོ་ཅན་རྣམས་
རྗེས་སུ་སྲུང་བས་ཁྱིམ་བདག་གི་ཆུང་མ་སྦེད་མ་རབ་ཏུ་མ་ཕྱུང་བས་རྒྱ་ཅང་དང་། ལྕག་པོད་དང་། ཤུར་བུ་དང་། ཤུར་བུ་ཕྲེའུ་དག་གི་བར་ཆད་ཀྱང་བྱས་ལ། དེ་ཡང་ལྷུང་བཟེད་ནག་པོ་ཅན་འགའ་ཞིག་གིས་རབ་ཏུ་ཕྱུང་བར་གྱུར་ན་དེ་དང་ཕྲད་དུ་ཡང་མི་སྟེར་རོ་སྙམ་དུ་འགྱོད་པ་སྐྱེས་
ནས་དེ་མི་དགའ་བཞིན་དུ་དབྱར་གནས་པར་ཁས་བླངས་སོ། །མཉན་ཡོད་ན་རྒན་ཞུགས་ཤིག་མི་དགའ་བཞིན་དུ་དབྱར་གནས་པར་ཁས་བླངས་པ་དེས་ལྷུང་བཟེད་དང་ཆོས་གོས་མཆན་ཁུང་དུ་བཅུག་སྟེ་དགག་དབྱེ་བྱས་པ་ན་དགག་དབྱེ་ལེགས་པར་བྱས་སོ། །དགག་དབྱེ་ཤིན་
ཏུ་བྱས་སོ་ཞེས་དེ་རྒྱལ་པོའི་ཁབ་ག་ལ་བ་དེར་སོང་སྟེ། མཐར་གྱིས་རྒྱུ་ཞིང་འགྲོ་བ་ན་རྒྱལ་པོའི་ཁབ་ཏུ་ཕྱིན་པ་དང་། ཚེ་དང་ལྡན་པ་འཆར་ཀ་གཙུག་ལག་ཁང་གི་སྒོ་ན་ལམ་ལ་རྣམ་པར་ལྟ་ཞིང་འདུག་པ་དེས་ཐག་རིང་པོ་ཁོ་ན་ནས་རྒན་ཞུགས་མགོ་སྤྲ་བའི་མེ་ཏོག་ལྟར་སྐྱ་བ།
སྨིན་མ་འཕྱང་བ་ཞིག་འོང་བ་དེ་མཐོང་ནས་འཆར་ཀས་བསམས་པ། དགེ་སློང་འོང་བ་འདི་གནས་བརྟན་གང་ཡིན་པ་སུའོ་སྙམ་ནས། དེས་སྨྲས་པ། གནས་བརྟན་བྱོན་པ་ལེགས་སོ། །བྱོན་པ་ལེགས་སོ་ཕྱག་འཚལ་ལོ། །དེས་སྨྲས་པ། སློབ་དཔོན་ཕྱག་འཚལ་ལོ། །

འཆར་ཀས་འདི་ནི་རྒན་ཞུགས་ཤིག་སྟེ། སློབ་དཔོན་ཡང་མི་ཤེས། མཁན་པོ་ཡང་མི་ཤེས་པ་ཞིག་གོ་སྙམ་དུ་ཤེས་ནས་འཆར་ཀས་དེ་གཙུག་ལག་ཁང་དུ་འཇུག་ཏུ་བཅུག་སྟེ་སྨྲས་པ། རྒན་ཞུགས་ཁྱོད་ག་ལས་འོངས། དེས་སྨྲས་པ། མཉན་ཡོད་ནས་སོ། །འཆར་
ཀས་བསམས་པ། གལ་ཏེ་དང་པོ་ཁོ་ནར་སྦེད་མའི་གཏམ་དྲིས་ན་འཕྱ་བར་འགྱུར་བས་འདི་ལྟར་སྔ་ཕྱིར་བྱས་ཏེ་དྲི་བར་བྱའོ་སྙམ་ནས་སྨྲས་པ། ཚེ་དང་ལྡན་པ་ཇི་ལྟ་བཅོམ་ལྡན་འདས་གནོད་པ་ཆུང་བ་དང་། ཉམ་ང་བ་ཆུང་བ་དང་། བདེ་བ་དང་། སྙུན་མི་མངའ་བ་དང་།
སྟོབས་དང་ལྡན་པར་མཉན་ཡོད་དུ་དབྱར་གནས་པར་ཞལ་གྱིས་བཞེས་སམ། བཙུན་པ་འཆར་ཀ་དེ་བཞིན་ཏེ། བཅོམ་ལྡན་འདས་གནོད་པ་ཆུང་བ་དང་། ཉམ་ང་བ་ཆུང་བ་དང་། བདེ་བ་དང་། སྙུན་མི་མངའ་བ་དང་། སྟོབས་དང་ལྡན་པར་མཉན་ཡོད་དུ་དབྱར་གནས་
པར་ཞལ་གྱིས་བཞེས་སོ། །ཚེ་དང་ལྡན་པ་ཇི་ལྟ་དགེ་སློང་གི་དགེ་འདུན་དང་། དགེ་སློང་མའི་དགེ་འདུན་དང་། དགེ་བསྙེན་གྱི་འཁོར་དང་། དགེ་བསྙེན་མའི་འཁོར་གནོད་པ་ཆུང་བ་དང་། ཉམ་ང་བ་ཆུང་བ་དང་། བདེ་བ་དང་། ནད་མེད་པ་དང་། སྟོབས་དང་ལྡན་པར་
མཉན་ཡོད་ན་གནས་སམ། སྟོན་པ་ལ་ལྟ་བར་འདོད་དམ། དམ་པའི་ཆོས་ཉན་པར་འདོད་དམ། བཙུན་པ་འཆར་ཀ་དེ་བཞིན་ཏེ། དགེ་སློང་གི་དགེ་འདུན་དང་། དགེ་སློང་མའི་དགེ་འདུན་དང་། དགེ་བསྙེན་གྱི་འཁོར་དང་། དགེ་བསྙེན་མའི་འཁོར་གནོད་པ་ཆུང་བ་དང་།
ཉམ་ང་བ་ཆུང་བ་དང་། བདེ་བ་དང་། ནད་མེད་པ་དང་། སྟོབས་དང་ལྡན་པར་མཉན་ཡོད་ན་གནས་ཤིང་། སྟོན་པ་ལ་བལྟ་བར་འདོད་པ་དང་། དམ་པའི་ཆོས་ཉན་པར་འདོད་དོ། །ཚེ་དང་ལྡན་པ་ཇི་ལྟ་གནས་བརྟན་ཀུན་ཤེས་ཀཽ་ཎྜི་ནྱ་དང་། གནས་བརྟན་འོད་སྲུང་ཆེན་
པོ་དང་། གནས་བརྟན་ཤཱ་རིའི་བུ་དང་། གནས་བརྟན་མཽད་གལ་གྱི་བུ་ཆེན་པོ་དང་། གཞན་ཡང་དགེ་སློང་གནས་བརྟན་གནས་བརྟན་དག་གནོད་པ་ཆུང་བ་དང་། ཉམ་ང་བ་ཆུང་བ་དང་། བདེ་བ་དང་། ནད་མེད་པ་དང་། སྟོབས་དང་ལྡན་པར་མཉན་ཡོད་ན་གནས་

སམ། བཙུན་པ་འཆར་ཀ་དེ་བཞིན་ཏེ། གནོད་པ་ཆུང་བ་དང་། ཉམ་ང་བ་ཆུང་བ་དང་། བདེ་བ་དང་། ནད་མེད་པ་དང་། སྟོབས་དང་ལྡན་པར་མཉན་ཡོད་ན་གནས་སོ། །ཚེ་དང་ལྡན་པ་ཇི་ལྟ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་དང་། བླ་མཁྱེན་དྲང་
སྲོང་བྱིན་དང་། རྙིང་པ་དང་། ཁྱིམ་བདག་གི་ཆུང་མ་རི་དགས་འཛིན་གྱི་མ་ས་ག་དང་། ལེགས་སྐྱེས་དག་ཤེས་སམ། བཙུན་པ་འཆར་ཀ་དེ་བཞིན་ཏེ་ཤེས་སོ། །ཚེ་དང་ལྡན་པ་འོ་ན་ཁྱོད་ཀྱིས་ཁྱིམ་བདག་གི་ཆུང་མ་སྦེད་མ་ཤེས་སམ། བཙུན་པ་འཆར་ཀ་ཤེས་ཏེ་དེ་ནི་
བཙུན་པ་འཆར་ཀའི་སྔོན་གྱི་ཆུང་མ་ཡིན་ནོ། །རྒན་ཞུགས་གཏམ་ཤེས་སོ། །དེ་ད་དུང་ཡང་ཁྱོད་ཀྱི་ཁྱིམ་བདག་གི་ཆུང་མ་ཡིན་སྙམ་མམ། དེ་ནི་རབ་ཏུ་བྱུང་ངོ་། །སུས་རབ་ཏུ་ཕྱུང་། སྐྱེ་དགུའི་བདག་མོ་ཆེན་མོ་གཽ་ཏ་མཱིས་སོ། །འཆར་ཀས་བསམས་པ། ད་དུང་
སྤྱོད་ཡུལ་ལྷག་མ་དང་བཅས་པ་ཡིན་ནོ་སྙམ་ནས་སྨྲས་པ། རྒན་ཞུགས་ཚུར་ཤོག །རྐང་པ་དག་ཁྲུས་ཤིག་ཅེས་དེས་དེ་ལ་རྐང་པ་བསྐུ་བ་དང་། ལག་པ་བསྐུ་བ་མང་པོ་བྱིན་ནས་དེས་དེའི་ལྷུང་བཟེད་དང་ཆོས་གོས་ཡ་གད་བཙུགས་ཏེ་ཟུང་མཐོན་པོ་ལ་བཞག་ནས་སྨྲས་པ།
རྒན་ཞུགས་གཙུག་ལག་ཁང་འདི་ནི་ཟས་དང་བཅས་པ། རྙེད་པ་དང་བཅས་པ་ཡིན་གྱིས་གཙུག་ལག་ཁང་འདིར་མངོན་པར་དགའ་བར་གྱིས་ཤིག །དེས་སྨྲས་པ། བཙུན་པ་འཆར་ཀ་བདག་ནི་མཆོད་རྟེན་ལ་ཕྱག་འཚལ་དུ་འོངས་ཏེ་འགྲོ་བ་ཡིན་པས་བདག་གནས་འདི་མི་
འདོད་དོ། །འཆར་ཀས་དེའི་མདུན་དུ་སྒོ་ལྕགས་དང་ལྡེ་མིག་ཀྱོག་པོ་དག་བཞག་སྟེ་འདི་སྐད་ཅེས་ཚེ་དང་ལྡན་པ་བཅོམ་ལྡན་འདས་ཀྱིས་དགེ་སློང་གིས་གཙུག་ལག་ཁང་གནས་པ་དང་བཅས་པར་བྱའི་མི་གནས་པར་མི་བྱའོ་ཞེས་བཀའ་སྩལ་ཏོ་ཞེས་སྨྲས་ནས་མིག་ལམ་དུ་མི་སྣང་
བར་སོང་སྟེ། དེ་མཐར་གྱིས་རྒྱུ་ཞིང་འགྲོ་བ་ན་མཉན་ཡོད་དུ་ཕྱིན་ནས་འཆར་ཀས་རང་གི་གཙུག་ལག་ཁང་ཆག་ཆག་བཏབ། ལེགས་པར་བྱུགས། ལྕི་བ་སར་པའི་བྱུག་པས་བྱུགས་ཏེ་སྒོ་བཅད་ནས་ཁྲིའི་སྟེང་ན་ཕྱི་གན་དུ་ཉལ་ཞིང་སྐད་ཀྱི་གདངས་ཀྱིས་ཁ་ཏོན་བྱེད་ཅིང་འདུག་གོ། །

དགེ་སློང་མ་འདུན་པ་འབུལ་བ་དག་ལྷགས་ནས་དེ་དག་གིས་དེའི་སྐད་ཀྱི་གདངས་ཐོས་ནས་དེ་དག་གིས་དེ་ལ་ཕྱག་འཚལ་ཏེ་སྨྲས་པ། འཕགས་པ་འཆར་ཀ་ཁྱོད་གར་བཞུད་བཞུད། འཆར་ཀས་སྨྲས་པ། རྒྱལ་པོའི་ཁབ་ཏུའོ། །དེ་དག་དབྱར་ཁང་དུ་དོང་ནས་སྦེད་མ་ལ་སྨྲས་པ། སྦེད་
མ་དགའ་བ་སྐྱེད་ཅིག །ཁྱོད་ཀྱི་སློབ་དཔོན་འོངས་སོ། །ཁོ་མོའི་སློབ་དཔོན་གང་། འཆར་ཀའོ། །དེ་ཇི་ལྟར་ཁོ་མོའི་སློབ་དཔོན། ཅི་ཁོ་མོས་དེའི་གན་ནས་བཀླགས་སམ། གཡེངས་མ་ཁྱོད་ཀྱིས་མི་ཤེས་ཀྱིས་དགེ་སློང་མ་རྣམས་ནི་དགེ་སློང་ལ་རག་མང་དུ་ལས་ཀྱིས་ཁྱོད་སོང་
ལ་ལྟོས་ཤིག །སྦེད་མས་ནས་ཀྱི་ངར་ཕྱེ་དང་ཁྲུས་ཀྱི་ཆལ་དང་། འབྲུ་མར་ཐོགས་ཏེ་འཆར་ཀའི་གཙུག་ལག་ཁང་དུ་སོང་ནས་སྦེད་མས་འཆར་ཀའི་གཙུག་ལག་ཁང་གི་སྒོ་བརྡུངས་པ་དང་། འཆར་ཀས་སྨྲས་པ། དེ་སུ་ཡིན། སྦེད་མས་སྨྲས་པ། བདག་སྦེད་མའོ། །ཁྱིམ་
བདག་གི་ཆུང་མ་སྦེད་མ་འོངས་པ་ལེགས་སོ། །བདག་ད་དུང་ཡང་ཁྱོད་ཀྱི་ཁྱིམ་བདག་གི་ཆུང་མ་ལགས་སམ། འོ་ན་ཅི་ཡིན། བདག་རབ་ཏུ་བྱུང་ངོ་། །ཁྱོད་སུས་རབ་ཏུ་ཕྱུང་། འཕགས་མ་སྐྱེ་དགུའི་བདག་མོ་ཆེན་མོ་གཽ་ཏ་མཱིས་སོ། །ཁོ་བོ་རེ་ཞིག་བྱ་བ་དེ་ལྟ་བུ་ཞིག་བྱུང་ནས་
དེའི་ཕྱིར་ཁོ་བོ་རྒྱལ་པོའི་ཁབ་ཏུ་སོང་ན་ཁྱོད་ལ་བརྟད་པ་ཅི་བྱུང་ན་དེའི་ཕྱིར་ཁྱོད་རབ་ཏུ་བྱུང་། ཁྱོད་ཀྱི་ཞལ་ནས་ཁྱིམ་གྱི་བྱ་བ་ལེགས་པར་བསྡུས་ལ་ཤོག་ཤིག་དང་། ཁོ་བོས་ཁྱོད་རབ་ཏུ་དབྱུང་ངོ་ཞེས་གསུངས་ནས། བདག་གིས་ཁྱིམ་གྱི་བྱ་བ་ལེགས་པར་བསྡུས་ཏེ་མཆིས་ན་
ཁྱོད་རྒྱལ་པོའི་ཁབ་ཏུ་བཞུད་དེ། གལ་ཏེ་བདག་འཕགས་མས་རབ་ཏུ་མ་ཕྱུང་དུ་ལགས་ན་བདག་ཁྱིམ་ན་གནས་པ་ཡང་མ་ལགས་ལ་རབ་ཏུ་བྱུང་བ་ཡང་མ་ལགས་པར་འགྱུར་རོ། །འཆར་ཀས་སྨྲས་པ། སྦེད་མས་ཅི་ཁོ་བོ་བདག་ཉིད་ཀྱི་ལག་ངར་ལ་སོས་འདེབས་པར་
བྱེད་དམ། སྐྱེ་དགུའི་བདག་མོ་ཆེན་མོ་གཽ་ཏ་མཱིས་རབ་ཏུ་ཕྱུང་ཡང་རུང་། ཁོ་བོས་རབ་ཏུ་ཕྱུང་ཡང་རུང་སྟེ་ལེགས་ཀྱིས་ནང་དུ་ཞུགས་ཤིག་དང་ཆོས་བསྟན་པར་བྱའོ། །སྦེད་མས་འཆར་ཀའི་རྐང་པ་གཉིས་ལ་ཕྱག་འཚལ་ཏེ་ཆོས་མཉན་པའི་ཕྱིར་མདུན་དུ་འདུག་གོ། །དེས་དེ་

ལ་ཆོས་བསྟན་པར་བརྩམས་ཏེ། དེས་དེ་ལ་ཇི་ཙམ་པ་དེ་ཙམ་དུ་ཆོས་བསྟན་ནས་སྔོན་གྱི་བགད་པ་དང་། དགའ་བར་བྱས་པ་དང་། རྩེས་པ་དང་། དགའ་མགུར་སྤྱད་པ་དྲན་པར་བྱ་བར་བརྩམས་ཏེ། སྦེད་མ་བདག་ཅག་གཉིས་ཀྱིས་སྐྱེད་མོས་ཚལ་དང་།
འདུན་ས་དང་། ལྷའི་གནས་ག་གེ་མོ་ཞིག་ཏུ་ཟས་འདི་དང་འདི་ལྟ་བུ་ཟོས་པ་དང་། བཅའ་བ་འདི་དང་འདི་ལྟ་བུ་འཆོས་པ་དང་། བཏུང་བ་འདི་དང་འདི་ལྟ་བུ་འཐུངས་པ་གང་ཡིན་པ་དེ་དྲན་ནམ་ཞེས་སྨྲས་པ་དང་འཆར་ཀ་ཀུན་དུ་ཆགས་པར་གྱུར་ཏོ། །ཇི་ལྟ་ཇི་ལྟར་
ཆགས་པར་གྱུར་པ་དེ་ལྟ་དེ་ལྟར་དྲལ་ཏོ། །བུད་མེད་ཀྱི་ཡུལ་མཁས་པའི་རང་བཞིན་ཅན་ལ་ལ་ལ་མ་འདྲེས་པའི་ཆོས་ལྔ་ཡོད་དེ། ལྔ་གང་ཞེ་ན། སྐྱེས་པ་ཆགས་པར་གྱུར་པ་ཤེས་ཤིང་ཆགས་པ་དང་བྲལ་བ་ཤེས་པ་དང་། དུས་ཤེས་ཤིང་ཟླ་མཚན་ཤེས་པ་དང་།
མངལ་ན་གནས་པ་ཞུགས་པ་ཤེས་པ་དང་། གང་ལས་མངལ་ན་གནས་པ་ཞུགས་པ་དེ་ཤེས་པ་དང་། ཁྱེའུ་ཤེས་ཤིང་བུ་མོ་ཤེས་པ་སྟེ། གལ་ཏེ་ཁྱེའུ་ཡིན་ན་དཀུ་གཡས་པར་བརྟེན་ཅིང་འདུག་ལ། གལ་ཏེ་བུ་མོ་ཡིན་ན་དཀུ་གཡོན་པར་བརྟེན་ཅིང་འདུག་པའོ། །སྦེད་
མ་དེས་འཆར་ཀ་དེ་ཆགས་སོ་སྙམ་དུ་ཤེས་ནས་སྦེད་མས་སྨྲས་པ། སླད་རོལ་དུ་མཆིས་ཏེ་སླར་མཆིའོ། །འཆར་ཀས་བསམས་པ། འདི་བཤང་བ་བྱེད་འདོད་དམ། གཅི་བ་བྱེད་འདོད་གོར་མ་ཆག་སྙམ་ནས་དེས་སྨྲས་པ། སོང་ཤིག །སྦེད་མ་ཕྱིར་བྱུང་ནས་ཤིང་
དཔུང་བཅད་བརྫེས་ཏེ་རྒྱུག་པར་བརྩམས་པ་དང་། འཆར་ཀ་དེ་སྒྲ་ལ་མཁས་པ་ཡིན་པས་དེས་དེའི་སྒྲ་ཐོས་ནས་དེས་དེའི་ཕྱི་བཞིན་དུ་བྱུང་སྟེ། དགེ་སྦྱོང་མ་མགོ་རེག་མོ་གར་འབྲོས་ཞེས་དེ་དེའི་ཕྱི་བཞིན་རྒྱུག་པར་བརྩམས་པ་དང་། དེ་ལ་བརླའི་རེག་པས་ཁུ་བ་བྱུང་ནས་དེ་ཀུན་
ནས་དཀྲིས་པ་དང་བྲལ་ཏེ་གླང་པོ་ཆེ་ཆགས་པ་དང་བྲལ་བ་བཞིན་དུ་གཞི་དེ་དག་ཉིད་ན་འདུག་གོ། །སྦེད་མས་དེ་ཀུན་ནས་དཀྲིས་པ་དང་བྲལ་ཞིང་ཕྱིར་ལོག་པ་མཐོང་ནས་འདི་ཀུན་ནས་དཀྲིས་པ་དང་བྲལ་ལོ་སྙམ་དུ་རིག་ནས་དྲུང་དུ་སོང་སྟེ་ཚེ་དང་ལྡན་པ་འཆར་ཀ་ལ་འདི་སྐད་ཅེས་

སྨྲས་སོ། །འཕགས་པ་གལ་ཏེ་བདག་གིས་དང་དུ་བླངས་པར་གྱུར་ན་བདག་ཀྱང་དགེ་སློང་མར་མི་རུང་བ་ཉིད་དུ་འགྱུར་ལ། ཁྱོད་ཀྱང་དགེ་སློང་དུ་མི་རུང་བ་ཉིད་དུ་འགྱུར་རོ། །སྲིང་མོ་བཅོམ་ལྡན་འདས་ཀྱིས་ཀྱང་བདག་ཉིད་སྲུང་ན་གཞན་སྲུང་བར་བྱེད་ལ། གཞན་སྲུང་ན་
བདག་ཉིད་སྲུང་བར་བྱེད་དོ་ཞེས་ལེགས་པར་གསུངས་སོ། །ཇི་ལྟར་བདག་ཉིད་སྲུང་ན་གཞན་སྲུང་བར་བྱེད་ཅེ་ན། སྟེན་པར་བྱེད་པ་དང་། གོམས་པར་བྱེད་པ་དང་། ལན་མང་དུ་བྱེད་པ་དང་། རྗེས་སུ་སྲུང་བར་བྱེད་པ་དང་། རེག་པར་བྱེད་པ་དང་། མངོན་སུམ་དུ་བྱེད་
པ་སྟེ། དེ་ལྟར་བདག་ཉིད་སྲུང་ན་གཞན་སྲུང་བར་བྱེད་དོ། །ཇི་ལྟར་གཞན་སྲུང་ན་བདག་ཉིད་སྲུང་བར་བྱེད་ཅེ་ན། ཐོ་མི་འཚམས་པ་དང་། མི་གཤེ་བ་དང་། མི་འཚེ་བ་དང་། རྗེས་སུ་བརྩེ་བ་དང་། རྗེས་སུ་སྙིང་བརྩེ་བ་དང་། བྱམས་པའི་སེམས་ཀྱིས་ཏེ། དེ་ལྟར་
གཞན་སྲུང་ན་བདག་ཉིད་སྲུང་བར་བྱེད་དོ། །འཕགས་པ་ཤམ་ཐབས་འདི་ཚུར་སྩོལ་བཀྲུ་བར་བགྱིའོ། །འཆར་ཀས་ཤམ་ཐབས་དེ་སྦེད་མ་ལ་བྱིན་ནོ། །སྦེད་མས་ཁུ་བ་དེ