Kinh tạng Tây Tạng (Kangyur Đại Học) — 006_འདུལ་བ།_ཆ

་མཐོང་ནས་འགྱོད་པ་སྐྱེས་ཏེ། བདག་གི་ལུས་ཀྱི་ཕྱོགས་བཙུན་པ་འཆར་ཀས་སྔོན་མ་མཐོང་བའམ་
སྔོན་མ་མནམས་པའམ། སྔོན་མ་བྱུགས་པ་ཅི་ཞིག་ཡོད་ན་བདག་གིས་དང་དུ་མ་བླངས་པ་ནི་མ་ལེགས་པ་ཞིག་བྱས་སོ་སྙམ་དུ་འགྱོད་པ་སྐྱེས་སོ། །སྦེད་མ་དེ་ལྟར་རྣམ་པར་རྟོག་པ་ན་དེ་ཀུན་དུ་ཆགས་ཤིང་དྲལ་བར་གྱུར་པའི་སེམས་ཀྱིས་ཁུ་བ་དེ་རང་གི་མངལ་གྱི་སྒོར་
བླུགས་སོ། །སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པ་བསམ་གྱིས་མི་ཁྱབ་པས་དེ་ལ་སེམས་ཅན་ཞུགས་པར་གྱུར་ཏོ། །དེ་དགེ་སློང་མ་རྣམས་ཀྱིས་མཐོང་ནས་སྨྲས་པ། སྦེད་མ་ཁོ་མོ་ཅག་གོ་ཁྱོད་ཆོས་བཟང་པོའི་ཆོས་ཀྱིས་འཕགས་པ་འཆར་ཀའི་གན་དུ་
འགྲོ་བར་སེམས་ཀྱི་ཁོ་མོ་ཅག་གིས་དེས་ཁྱོད་གནས་སྐབས་འདི་ལྟ་བུར་བྱས་པར་མི་སེམས་སོ། །སྦེད་མས་སྨྲས་པ། ཕུ་ནུ་མོ་དག་དགེ་སློང་དེ་ནི་ཚུལ་ཁྲིམས་དང་ལྡན་པ་ཡིན་ཏེ། གང་ཚུན་ཆད་རབ་ཏུ་བྱུང་ནས་དེས་ཁོ་མོ་ལ་སྔན་ཆད་ལན་འགའ་ཡང་ལག་གིས་ཀྱང་

མ་བྱུགས་སོ། །དེ་དག་གིས་སྨྲས་པ། མ་བྱུགས་ན་ཡང་དེས་ཁྱོད་གནས་སྐབས་འདི་འདྲ་བར་བྱས་ན། གལ་ཏེ་བྱུགས་ན་དེས་ཁྱོད་གནས་སྐབས་ཇི་ལྟ་བུར་བྱས་པར་འགྱུར་ཞེས་ཟེར་བའི་སྐབས་དེ་དགེ་སློང་མ་རྣམས་ཀྱིས་དགེ་སློང་རྣམས་ལ་བརྗོད་
དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་མ་དེ་ནི་ཕམ་པར་མ་གྱུར་གྱིས་འདི་ལྟར་ཕྱོགས་དབེན་པར་བཞག་སྟེ་བསོད་སྙོམས་ཀྱིས་བྲེལ་བ་མེད་པ་གྱིས་ཤིག་དང་། བུ་གཞོན་ནུ་
འོད་སྲུང་ཞེས་བྱ་བ་བཙའ་བར་འགྱུར་ཞིང་ངའི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱེད་པར་འགྱུར་ཏེ་འདི་ལྟ་སྟེ། དགེ་སློང་གཞོན་ནུ་འོད་སྲུང་དེ་ནི་ངའི་གཏམ་སྣ་ཚོགས་དང་། གཏམ་སྙན་པ་དང་། སྤོབས་པ་དགེ་
བ་ཅན་རྣམས་ཀྱི་མཆོག་ཏུ་འགྱུར་རོ། །བཅོམ་ལྡན་འདས་ཀྱིས་དགོངས་པ། དགེ་སློང་རྣམས་ཀྱི་ཉེས་དམིགས་བྱུང་བ་གང་ཡིན་པ་དེ་ནི་དགེ་སློང་མ་ཉེ་དུ་མ་ཡིན་པ་ལ་གོས་རྙིང་པ་འཁྲུར་འཇུད་པ་ལས་གྱུར་པ་ཡིན་ནོ་སྙམ་དུ་དགོངས་ནས། དེ་ནས་བཅོམ་ལྡན་འདས་
ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་མ་ཉེ་དུ་མ་ཡིན་པ་ལ་
གོས་རྙིང་པ་འཁྲུར་འཇུད་དམ། འཚེད་དུ་འཇུད་དམ། འཆག་ཏུ་འཇུད་ན་སྤང་བའི་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་འཆར་ཀའམ་གཞན་ཡང་དེ་ལྟ་བུ་གང་ཡིན་པའོ། །དགེ་སློང་མ་ཞེས་བྱ་བ་ནི་ཆོས་འདི་པའོ། །ཉེ་དུ་མ་ཡིན་པ་ལ་ཞེས་བྱ་བ་ནི་ཕྱི་མོ་དང་།
མེས་པོ་དང་། ཕྲུགས་ལས་བརྟེན་པའི་བདུན་པ་ཚུན་ཆད་ནི་ཉེ་དུ་ཡིན་ལ་དེ་ཕན་ཅད་ནི་ཉེ་དུ་མ་ཡིན་ནོ། །གོས་ཞེས་བྱ་བ་ནི་བདུན་པོ་བལ་གོས་དང་། ཤ་ནའི་གོས་དང་། ཟར་མའི་གོས་དང་། དུ་གུ་ལའི་གོས་དང་། རས་བལ་གྱི་གོས་དང་། ཀོ་ཏམ་པའི་གོས་དང་།

ཉི་འོག་གི་གོས་དག་ལས་གང་ཡང་རུང་བའོ། །རྙིང་པ་ཞེས་བྱ་བ་ནི་དུས་ཚིགས་གསུམ་པོ་དག་ལས་དུས་ཚིགས་གང་ཡང་རུང་བར་སྤྱད་པ་གང་ཡིན་པའོ། །འཁྲུར་འཇུད་དམ་ཞེས་བྱ་བ་ནི་ཐན་ཆུར་སྙུག་པ་བྱེད་དུ་འཇུད་ནའོ། །འཚེད་དུ་འཇུད་དམ་ཞེས་བྱ་བ་ནི་ཐ་ན་ཚོན་དུ་
སྙུག་པ་བྱེད་དུ་འཇུད་ནའོ། །འཆག་ཏུ་འཇུད་དམ་ཞེས་བྱ་བ་ནི་ཐ་ན་ཐལ་མོས་རྡེབས་པར་བྱེད་དུ་འཇུད་ནའོ། །སྤང་བའི་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བ་སྟེ་དེས་ན་སྤང་བའི་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་
འགྱུར་ཞེ་ན། དགེ་སློང་གིས་དགེ་སློང་མ་ཉེ་དུ་མ་ཡིན་པ་ལ་ཉེ་དུ་མ་ཡིན་པར་འདུ་ཤེས་པས་གོས་རྙིང་པ་འཁྲུར་འཇུད་ན་སྤང་བའི་ལྟུང་བྱེད་དུ་འགྱུར་རོ། །འཚེད་དུ་འཇུད་ན་སྤང་བའི་ལྟུང་བྱེད་དུ་འགྱུར་རོ། །འཆག་ཏུ་འཇུད་ན་སྤང་བའི་ལྟུང་བྱེད་དུ་འགྱུར་རོ། །འཁྲུར་འཇུད་པ་དང་
འཚེད་དུ་འཇུད་དམ། འཁྲུར་འཇུད་པ་དང་འཆག་ཏུ་འཇུད་དམ། འཚེད་དུ་འཇུད་པ་དང་འཁྲུར་འཇུད་དམ། འཚེད་དུ་འཇུད་པ་དང་འཆག་ཏུ་འཇུད་དམ། འཆག་ཏུ་འཇུད་པ་དང་འཁྲུར་འཇུད་དམ། འཆག་ཏུ་འཇུད་པ་དང་འཚེད་དུ་འཇུད་དམ། འཁྲུར་འཇུད་པ་དང་འཚེད་
དུ་འཇུད་པ་དང་། འཆག་ཏུ་འཇུད་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་མ་ཉེ་དུ་མ་ཡིན་པ་ལ་ཡིད་གཉིས་ཟ་བས་གོས་རྙིང་པ་འཁྲུར་འཇུད་ན་སྤང་བའི་ལྟུང་བྱེད་དུ་འགྱུར་རོ། །འཚེད་དུ་འཇུད་ན་སྤང་བའི་ལྟུང་བྱེད་དུ་འགྱུར་རོ། །འཆག་ཏུ་འཇུད་ན་
སྤང་བའི་ལྟུང་བྱེད་དུ་འགྱུར་རོ། །འཁྲུར་འཇུད་པ་དང་འཚེད་དུ་འཇུད་དམ། འཁྲུར་འཇུད་པ་དང་འཆག་ཏུ་འཇུད་དམ། འཚེད་དུ་འཇུད་པ་དང་འཁྲུར་འཇུད་དམ། འཚེད་དུ་འཇུད་པ་དང་འཆག་ཏུ་འཇུད་དམ། འཆག་ཏུ་འཇུད་པ་དང་འཁྲུར་འཇུད་དམ། འཆག་ཏུ་འཇུད་པ་དང་
འཚེད་དུ་འཇུད་དམ། འཁྲུར་འཇུད་པ་དང་འཚེད་དུ་འཇུད་པ་དང་། འཆག་ཏུ་འཇུད་ན་སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་མ་ཉེ་དུ་ལ་ཉེ་དུ་མ་ཡིན་པར་འདུ་ཤེས་པས་གོས་རྙིང་པ་འཁྲུར་འཇུད་ན་ཉེས་བྱས་སུ་འགྱུར་རོ། །འཚེད་དུ་འཇུད་ན་ཉེས་བྱས་སུ་

འགྱུར་རོ། །འཆག་ཏུ་འཇུད་ན་ཡང་ཉེས་བྱས་སུ་འགྱུར་རོ། །འཁྲུར་འཇུད་པ་དང་འཚེད་དུ་འཇུད་དམ། འཁྲུར་འཇུད་པ་དང་འཆག་ཏུ་འཇུད་དམ། འཚེད་དུ་འཇུད་པ་དང་འཁྲུར་འཇུད་དམ། འཚེད་དུ་འཇུད་པ་དང་འཆག་ཏུ་འཇུད་དམ། འཆག་ཏུ་འཇུད་
པ་དང་འཁྲུར་འཇུད་དམ། འཆག་ཏུ་འཇུད་པ་དང་འཚེད་དུ་འཇུད་དམ། འཁྲུར་འཇུད་པ་དང་འཚེད་དུ་འཇུད་པ་དང་། འཆག་ཏུ་འཇུད་ན་ཉེས་བྱས་སུ་འགྱུར་རོ། །དགེ་སློང་གིས་དགེ་སློང་མ་ཉེ་དུ་ལ་ཡིད་གཉིས་ཟ་བས་གོས་རྙིང་པ་འཁྲུར་འཇུད་ན་ཉེས་བྱས་སུ་འགྱུར་རོ། །འཚེད་
དུ་འཇུད་ན་ཉེས་བྱས་སུ་འགྱུར་རོ། །འཆག་ཏུ་འཇུད་ན་ཉེས་བྱས་སུ་འགྱུར་རོ། །འཁྲུར་འཇུད་པ་དང་འཚེད་དུ་འཇུད་དམ། འཁྲུར་འཇུད་པ་དང་འཆག་ཏུ་འཇུད་དམ། འཚེད་དུ་འཇུད་པ་དང་འཁྲུར་འཇུད་དམ། འཚེད་དུ་འཇུད་པ་དང་འཆག་ཏུ་འཇུད་དམ། འཆག་ཏུ་
འཇུད་པ་དང་འཁྲུར་འཇུད་དམ། འཆག་ཏུ་འཇུད་པ་དང་འཚེད་དུ་འཇུད་དམ། འཁྲུར་འཇུད་པ་དང་འཚེད་དུ་འཇུད་པ་དང་། འཆག་ཏུ་འཇུད་ན་ཉེས་བྱས་སུ་འགྱུར་རོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་
མེད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བཅོམ་ལྡན་འདས་ཀྱིས་དགེ་སློང་དག་འདི་ལྟ་སྟེ། རིགས་མཐོན་པོ་ལས་རབ་ཏུ་བྱུང་བ་འདི་ནི་རྙེད་པ་རྣམས་ཀྱི་ཕྱེད་དང་ཉེ་བ་ཡིན་ནོ། །ཞེས་
བཀའ་སྩལ་པས་དེ་ན་ཡང་ཤཱཀྱའི་ཁྱིམ་ནས་རབ་ཏུ་བྱུང་བ་དེ་དག་ལ་རྙེད་པ་དང་བཀུར་སྟི་ཆེན་པོ་བྱུང་ནས་དེ་དག་ཤིན་ཏུ་གོས་ཀྱིས་ཆབ་ལ་སྦྱོར་བའི་རྗེས་སུ་བརྩོན་པར་གནས་ཤིང་། ལྷུང་བཟེད་དང་། ཆོས་གོས་དང་། དྲ་བ་དང་། ཕོར་བུ་དང་། སྐ་རགས་ལྷག་པ་དག་
ཀྱང་འཆང་བར་བྱེད་པས་བཅོམ་ལྡན་འདས་ཀྱིས་དེ་དག་ལ་དུས་དང་དུས་སུ་ཆོས་བསྟན་ཀྱང་དེ་དག་གིས་བདེན་པ་དག་མ་མཐོང་ངོ་། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ཅིའི་ཕྱིར་ཤཱཀྱ་རབ་ཏུ་བྱུང་བ་དག་བདེན་པ་དག་མཐོང་བར་མི་བྱེད་སྙམ་དུ་དགོངས་ནས་དེ་དག་

ཤིན་ཏུ་གོས་ཀྱིས་ཆབ་ལ་སྦྱོར་བའི་རྗེས་སུ་བརྩོན་པར་གནས་ཤིང་དེ་དག་ལྷུང་བཟེད་དང་། ཆོས་གོས་དང་། དྲ་བ་དང་། ཕོར་བུ་དང་། སྐ་རགས་ལྷག་པ་དག་འཆང་བའི་ཕྱིར་ཏེ། གལ་ཏེ་ངས་ཤཱཀྱ་རབ་ཏུ་བྱུང་བ་རྣམས་ལ་སྨད་ན་དབྲལ་དཀའ་བར་འགྱུར་རོ་སྙམ་དུ་དགོངས་
ནས། སངས་རྒྱས་བཅོམ་ལྡན་འདས་རྣམས་ནི་གདུལ་བ་ལ་མཁས་པ་བླ་ན་མེད་པ་ཡིན་པས་དེ་ན་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ད་ཟླ་བ་གསུམ་པོ་འདི་ལ་ནང་དུ་ཡང་དག་འཇོག་བཞེད་ཀྱིས། ངའི་སྤྱན་སྔར་དགེ་སློང་བསོད་
སྙོམས་སྟོབས་པ་གཅིག་དང་། འདི་ཉིད་ཀྱི་གསོ་སྦྱོང་བཅྭ་ལྔ་པའི་ཚེ་མ་གཏོགས་པར་དགེ་སློང་གང་གིས་ཀྱང་ཉེ་བར་འོང་བར་མི་བྱའོ། །དགེ་སློང་གི་དགེ་འདུན་གྱིས་ཀྱང་ཚེ་དང་ལྡན་པ་དག་དབྱར་གྱི་ནང་དག་ཏུ་དགེ་སློང་བསོད་སྙོམས་སྟོབས་པ་གཅིག་དང་། འདི་ཉིད་ཀྱི་གསོ་
སྦྱོང་བཅྭ་ལྔ་པའི་ཚེ་མ་གཏོགས་པར་བདག་ཅག་ལས་གང་གིས་ཀྱང་བཅོམ་ལྡན་འདས་ལ་ལྟར་འགྲོ་བར་མི་བྱ་སྟེ། དབྱར་གྱི་ནང་དག་ཏུ་དགེ་སློང་བསོད་སྙོམས་སྟོབས་པ་གཅིག་དང་། འདི་ཉིད་ཀྱི་གསོ་སྦྱོང་བཅྭ་ལྔ་པའི་ཚེ་མ་གཏོགས་པར་བདག་ཅག་ལས་གང་བཅོམ་
ལྡན་འདས་ལ་ལྟར་འགྲོ་བ་དེ་བདག་ཅག་གིས་ལྟུང་བྱེད་ཀྱི་ལྟུང་བ་བྱེད་དུ་གཞུག་གོ་ཞེས་ཁྲིམས་སུ་བྱ་བ་བཅས་སོ། །བཅོམ་ལྡན་འདས་ཟླ་བ་གསུམ་ནང་དུ་ཡང་དག་འཇོག་ལ་ཞུགས་པ་ན་དགེ་སློང་བསོད་སྙོམས་སྟོབས་པ་གཅིག་དང་། དེ་ཉིད་ཀྱི་གསོ་སྦྱོང་བཅྭ་ལྔ་པའི་
ཚེ་མ་གཏོགས་པར་དེར་དགེ་སློང་འགའ་ཡང་མི་འགྲོའོ། །དེའི་ཚེ་ན་ཚེ་དང་ལྡན་པ་ཉེ་སྡེ་ཟླ་བ་ཤོལ་མ་བོར་བས་དབྱར་ལྗོངས་སུ་གནས་པར་ཁས་བླངས་ལ། བཅོམ་ལྡན་འདས་ནི་ཟླ་བ་ཤོལ་བོར་བས་དབྱར་ལྗོངས་སུ་གནས་པར་ཞལ་གྱིས་བཞེས་སོ། །དེ་ནས་ཚེ་དང་ལྡན་པ་
ཉེ་སྡེ་དབྱར་གྱི་ཟླ་བ་གསུམ་པོ་དག་འདས་ནས་ཆོས་གོས་བྱས་པ་དང་ལྡན། ཆོས་གོས་ཟིན་པ་དང་ལྡན་ཞིང་མཛེས་པ་འཁོར་མཛེས་པ་དང་ལྡན་པས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་ག་ལ་བ་དེར་རྒྱུ་ཞིང་སོང་ནས་མཐར་གྱིས་རྒྱུ་ཞིང་འགྲོ་བ་ན་མཉན་ཡོད་དུ་ཕྱིན་ཏོ། །

དེ་ནས་ཚེ་དང་ལྡན་པ་ཉེ་སྡེ་ལྷུང་བཟེད་དང་ཆོས་གོས་མཁོས་སུ་ཕབ་སྟེ་རྐང་པ་གཉིས་བཀྲུས་ནས་བཅོམ་ལྡན་འདས་ཀྱི་གཙུག་ལག་ཁང་ག་ལ་བ་དེར་སོང་བ་དང་། དགེ་སློང་དྲུག་སྡེ་དག་གིས་ཚེ་དང་ལྡན་པ་ཉེ་སྡེ་ཐག་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་
འདི་སྐད་ཅེས་ཚེ་དང་ལྡན་པ་དག་ད་ལྟར་ཁོན་ན་དོན་ཉུང་ངུས་དགེ་འདུན་གྱི་ཁྲིམས་སུ་བྱ་བ་འདྲལ་བར་འགྱུར་རོ། །ཞེས་སྨྲས་སོ། །གཞན་དག་གིས་སྨྲས་པ། དེས་དེ་ལྟུང་བྱེད་ཀྱི་ལྟུང་བ་བྱེད་དུ་གཞུག་གོ། །གཞན་དག་གིས་སྨྲས་པ། ད་ལྟར་སྦྱོར་བ་ལ་འཇུག་གིས་གང་གི་
ཚེ་དྲལ་བར་གྱུར་པ་དེའི་ཚེ་ན་དེས་དེ་བྱེད་དུ་གཞུག་གོ། །དེ་ནས་ཚེ་དང་ལྡན་པ་ཉེ་སྡེས་བཅོམ་ལྡན་འདས་ཀྱི་གཙུག་ལག་ཁང་དུ་དལ་བུས་ཁད་ཀྱིས་སྒོ་གཏན་བརྡུངས་པ་དང་། བཅོམ་ལྡན་འདས་ཀྱིས་དེ་ལ་ཆབ་སྒོ་དབྱེ་བ་མཛད་དོ། །དེ་ནས་ཚེ་དང་ལྡན་པ་ཉེ་སྡེས་བཅོམ་ལྡན་འདས་ཀྱི་
ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་ནི་དགེ་སློང་གློ་བུར་དུ་འོངས་པ་ལ་དགེ་སློང་ཁྱོད་ད་ལྟ་ག་ལས་འོངས། གང་དུ་དབྱར་གནས་པར་ཁས་བླངས་ཞེས་བྱ་བའི་སོ་སོར་ཀུན་དགའ་བར་མཛད་པ་
འདིས་སོ་སོར་ཀུན་དགའ་བར་མཛད་པ་ཡིན་པས་བཅོམ་ལྡན་འདས་ཀྱིས་ཚེ་དང་ལྡན་པ་ཉེ་སྡེ་ལ་ཉེ་སྡེ་ཁྱོད་ད་ལྟར་ག་ལས་འོངས། གང་དུ་དབྱར་གནས་པར་ཁས་བླངས་ཞེས་སོ་སོར་ཀུན་དགའ་བར་མཛད་པ་དང་། ཚེ་དང་ལྡན་པ་ཉེ་སྡེས་གསོལ་པ། བཙུན་པ་བདག་ད་ལྟར་
ལྗོངས་ནས་མཆིས་སོ། །བདག་ལྗོངས་སུ་དབྱར་གནས་པར་མཆིད་ཀྱིས་འཚལ་ཏོ། །ཉེ་སྡེ་ལྗོངས་སུ་དགེ་སློང་རྣམས་ཀྱིས་དགག་དབྱེ་བྱས་སམ། བཙུན་པ་བགྱིས་སོ། །ཉེ་སྡེ་གང་གིས་ཁྱོད་མཛེས་པ་འཁོར་མཛེས་པ་དང་ལྡན་པར་གྱུར་པའི་རྒྱུ་ནི་གང་ཡིན། རྐྱེན་ནི་
གང་ཡིན། བཙུན་པ་འདི་ན་གལ་ཏེ་བདག་གི་གཡར་སྔར་རབ་ཏུ་འབྱུང་བ་ལ་ལྟོས་པ་ཞིག་མཆིས་ན། བདག་དེ་ལ་འདི་སྐད་ཅེས་བཞིན་བཟངས་ཁྱོད་ཚུར་མཆི། དགོན་པ་པ་འཚོལ་ཅིག་ཅེས་མཆི་ཞིང་དགོན་པ་པ་ཉིད་ཀྱི་བསྔགས་པ་ཡང་རྗོད་པར་བགྱིད། བསོད་སྙོམས་

པ་དང་། ཆོས་གོས་གསུམ་པ་དང་། ཕྱག་དར་ཁྲོད་པ་དང་། ཤིང་དྲུང་པ་འཚོལ་ཅིག་ཅེས་མཆི་ཞིང་ཤིང་དྲུང་པ་ཉིད་ཀྱི་བསྔགས་པ་ཡང་བརྗོད་པར་བགྱིད་དོ། །གལ་ཏེ་དེ་ལྟར་བགྱིའོ་ཞེས་མཆི་ན། དེ་རབ་ཏུ་འབྱིན་པར་བགྱིད་དོ། །གལ་ཏེ་རྫོགས་པར་བསྙེན་པར་འཚལ་བ་
དང་། གནས་ལ་ཞུགས་པ་དང་། བཀླག་པ་ལ་ཞུགས་པ་དང་། མཆིད་དོན་ལ་ཞུགས་པ་དང་། ཡིད་ལ་བགྱི་བ་ལ་ཞུགས་པ་ཞེས་མཆིས་ན། བདག་དེ་ལ་ཡང་འདི་སྐད་ཅེས་བཞིན་བཟངས་ཁྱོད་ཚུར་མཆི། དགོན་པ་པ་འཚོལ་ཅིག་ཅེས་མཆི་ཞིང་དགོན་པ་པ་ཉིད་ཀྱི་
བསྔགས་པ་ཡང་རྗོད་པར་བགྱིད། བསོད་སྙོམས་པ་དང་། ཆོས་གོས་གསུམ་པ་དང་། ཕྱག་དར་ཁྲོད་པ་དང་། ཤིང་དྲུང་པ་འཚོལ་ཅིག་ཅེས་མཆི་ཞིང་ཤིང་དྲུང་པ་ཉིད་ཀྱི་བསྔགས་པ་ཡང་རྗོད་པར་བགྱིད་དོ། །གལ་ཏེ་དེ་ལྟར་བགྱིའོ་ཞེས་མཆི་ན་དེ་ལ་ཡིད་ལ་བགྱི་
བ་སྩོལ་བར་བགྱིད་དེ། བཙུན་པ་གང་གིས་བདག་མཛེས་པ་འཁོར་མཛེས་པ་དང་ལྡན་པར་གྱུར་པའི་རྒྱུ་ནི་དེ་ལགས། རྐྱེན་ནི་དེ་ལགས་སོ། །ཉེ་སྡེ་ཁྱོད་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བ་དང་། ལྷ་དང་མི་རྣམས་
ཀྱི་དོན་དང་། ཕན་པ་དང་། བདེ་བའི་ཕྱིར་ཞུགས་པ་ལེགས་སོ་ལེགས་སོ། །ཉེ་སྡེ་གང་ལ་ལ་ཞིག་སྦྱངས་པའི་ཡོན་ཏན་དེ་དག་གི་བསྔགས་བརྗོད་པར་མི་བྱེད་པ་དེ་ནི། ངའི་བསྔགས་བརྗོད་པར་མི་བྱེད་པ་ཡིན་ནོ། །གང་ལ་ལ་སྦྱངས་པའི་ཡོན་ཏན་དེ་དག་གི་བསྔགས་
བརྗོད་པར་བྱེད་པ་དེ་ནི་ངའི་བསྔགས་པ་རྗོད་པར་བྱེད་པ་ཡིན་ནོ། །དེ་ཅིའི་ཕྱིར་ཞེ་ན། ངས་སྦྱངས་པའི་ཡོན་ཏན་དེ་དག་ཡུན་རིང་པོ་ནས་བསྟོད་པ་དང་། བཀུར་བ་དང་། བསྔགས་པ་དང་རབ་ཏུ་བསྔགས་པའི་ཕྱིར་རོ། །ཉེ་སྡེ་ཁྱོད་དགེ་འདུན་གྱི་ཁྲིམས་སུ་བྱ་བ་མི་སྲུང་ངམ།
བཙུན་པ་བདག་གིས་དགེ་འདུན་གྱི་ཁྲིམས་ནི་གང་ལགས། ཁྲིམས་སུ་བགྱི་བ་ནི་གང་ལགས་མ་འཚལ་ཏོ། །ཉེ་སྡེ་འདི་ན་ངས་དགེ་སློང་རྣམས་ལ་འདི་སྐད་ཅེས་དགེ་སློང་དག་ང་ཟླ་བ་གསུམ་པོ་འདི་ལ་ནང་དུ་ཡང་དག་འཇོག་བཞེད་ཀྱིས། ངའི་སྤྱན་སྔར་དགེ་སློང་བསོད་

སྙོམས་སྟོབས་པ་གཅིག་དང་། འདི་ཉིད་ཀྱི་གསོ་སྦྱོང་བཅྭ་ལྔ་པའི་ཚེ་མ་གཏོགས་པར་དགེ་སློང་གང་གིས་ཀྱང་འོང་བར་མི་བྱའོ་ཞེས་བཀའ་སྩལ་པ་དང་། དགེ་སློང་གི་དགེ་འདུན་གྱིས་ཀྱང་ཚེ་དང་ལྡན་པ་དག་དབྱར་གྱི་ནང་དག་ཏུ་དགེ་སློང་བསོད་སྙོམས་
སྟོབས་པ་གཅིག་དང་། འདི་ཉིད་ཀྱི་གསོ་སྦྱོང་བཅྭ་ལྔ་པའི་ཚེ་མ་གཏོགས་པར་བདག་ཅག་ལས་གང་གིས་ཀྱང་བཅོམ་ལྡན་འདས་ལ་ལྟར་འགྲོ་བར་མི་བྱ་སྟེ། དབྱར་གྱི་ནང་དག་ཏུ་དགེ་སློང་བསོད་སྙོམས་སྟོབས་པ་གཅིག་དང་། འདི་ཉིད་ཀྱི་གསོ་སྦྱོང་བཅྭ་ལྔ་པའི་ཚེ་མ་གཏོགས་པར་
བདག་ཅག་ལས་གང་བཅོམ་ལྡན་འདས་ལ་ལྟར་འགྲོ་བ་དེ་བདག་ཅག་གིས་ལྟུང་བྱེད་ཀྱི་ལྟུང་བ་བྱེད་དུ་གཞུག་གོ་ཞེས་ཁྲིམས་སུ་བྱ་བ་བཅས་སོ། །བཙུན་པ་བདག་ནི་གློ་བུར་དུ་མཆིས་པ་ལགས་ཏེ། དོན་དེ་ནི་དགེ་སློང་གཉུག་མར་གནས་པ་རྣམས་ཀྱིས་བསྲུང་བར་བགྱི་
བ་ལགས་སོ། །ཉེ་སྡེ་དགེ་སློང་གློ་བུར་དུ་འོངས་པ་དང་། གཉུག་མར་གནས་པས་ཀྱང་དགེ་འདུན་གྱི་ཁྲིམས་སུ་བྱ་བ་བསྲུང་བར་བྱ་བ་ཁོ་ན་ཡིན་ནོ། །ཉེ་སྡེ་འདི་ལྟར་ངས་དགེ་སློང་གློ་བུར་དུ་ལྷགས་པ་རྣམས་ཀྱི་ཀུན་དུ་སྤྱོད་པའི་ཆོས་དག་བཅའ་བར་བྱ་སྟེ། དགེ་སློང་
གློ་བུར་དུ་འོངས་པས་གཙུག་ལག་ཁང་དུ་ཞུགས་ནས་དགེ་སློང་དག་ལ་གནས་འདི་ན་ཁྲིམས་སུ་བྱ་བ་ཇི་ལྟ་བུ་ཡོད་ཅེས་དྲི་བར་བྱའོ། །གལ་ཏེ་འདྲི་ན་དེ་ལྟ་ན་ལེགས། གལ་ཏེ་མི་འདྲི་ན་འགལ་ཚབས་ཅན་དུ་འགྱུར་རོ། །ཉེ་སྡེ་དེ་ལྟ་མོད་ཀྱི་ངས་དགེ་སློང་དགོན་པ་པ་ལ་
དགོན་པའི་ཡོངས་སུ་སྤང་བ་སྦྱིན་པར་བྱ་སྟེ། དགེ་སློང་དགོན་པ་པ་དེ་བཞིན་གཤེགས་པ་ལ་བསྙེན་བཀུར་བྱ་བའི་ཕྱིར་ལྟར་འགྲོ་བའི་དུས་མ་ཡིན་པ་མེད་དོ། །དགེ་སློང་བསོད་སྙོམས་པ་དང་། རྙེད་པས་ཆོག་པའི་བསོད་སྙོམས་པ་དང་། ཟས་ཕྱིས་མི་ལེན་པ་
དང་། སྟན་གཅིག་པ་དང་། ཆོས་གོས་གསུམ་པ་དང་། ཕྱིང་བ་པ་དང་། ཕྱག་དར་ཁྲོད་པ་དང་། ཤིང་དྲུང་པ་དང་། དུར་ཁྲོད་པ་དང་། ཅོག་པུ་པ་དང་། བླ་གབ་མེད་པ་དང་། གཞི་ཇི་བཞིན་པ་ལ་གཞི་ཇི་བཞིན་པའི་ཡོངས་སུ་སྤང་བ་སྦྱིན་པར་བྱ་སྟེ། དགེ་སློང་

གཞི་ཇི་བཞིན་པ་ལ་དེ་བཞིན་གཤེགས་པ་ལ་བསྙེན་བཀུར་བྱ་བའི་ཕྱིར་འགྲོ་བའི་དུས་མ་ཡིན་པ་མེད་དོ། །དེ་ནས་ཚེ་དང་ལྡན་པ་ཉེ་སྡེས་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་པ་དང་རྗེས་སུ་ཡི་རང་བར་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་
མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་དྲུག་སྡེ་དག་ཚེ་དང་ལྡན་པ་ཉེ་སྡེ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་ཉེ་སྡེ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཉེ་སྡེ་ཇེ་སྐབས་ཕྱེ་ཤིག །ལྟུང་བ་སྡེ་ལྔ་པོ་དག་ལ་སྐབས་ཕྱེའོ། །ཁྱོད་ལ་
ལྟུང་བ་བྱུང་བ་དེ་ཆོས་བཞིན་དུ་སླར་གྱིས་ཤིག །ལྟུང་བ་མ་མཐོང་ངོ་། །ཁྱོད་ཀྱིས་དགེ་འདུན་གྱི་ཁྲིམས་སུ་བྱ་བ་མ་དྲལ་ཏམ། དགེ་འདུན་གྱི་ཁྲིམས་སུ་བྱ་བ་ཇི་ལྟ་བུ་ཡིན། དྲུག་སྡེ་དག་གིས་སྐབས་དེ་རྒྱས་པར་བརྗོད་པ་དང་། ཚེ་དང་ལྡན་པ་ཉེ་སྡེས་དྲུག་སྡེ་དག་ལ་འདི་
སྐད་ཅེས་སྨྲས་སོ། །ཚེ་དང་ལྡན་པ་དག་བཅོམ་ལྡན་འདས་ཀྱིས་ཉེ་སྡེ་དེ་ལྟ་མོད་ཀྱི་ངས་དགེ་སློང་དགོན་པ་པ་ལ་དགོན་པ་པའི་ཡོངས་སུ་སྤང་བ་སྦྱིན་པར་བྱ་སྟེ། དགེ་སློང་དགོན་པ་པ་ལ་དེ་བཞིན་གཤེགས་པ་ལ་བསྙེན་བཀུར་བྱ་བའི་ཕྱིར་ལྟར་འགྲོ་བའི་དུས་མ་ཡིན་པ་མེད་དོ། །
དགེ་སློང་བསོད་སྙོམས་པ་དང་། རྙེད་པས་ཆོག་པའི་བསོད་སྙོམས་པ་དང་། ཟས་ཕྱིས་མི་ལེན་པ་དང་། སྟན་གཅིག་པ་དང་། ཆོས་གོས་གསུམ་པ་དང་། ཕྱིང་བ་པ་དང་། ཕྱག་དར་ཁྲོད་པ་དང་། ཤིང་དྲུང་པ་དང་། དུར་ཁྲོད་པ་དང་། ཅོག་པུ་པ་དང་། བླ་གབ་
མེད་པ་དང་། གཞི་ཇི་བཞིན་པ་ལ་གཞི་ཇི་བཞིན་པའི་ཡོངས་སུ་སྤང་བ་སྦྱིན་པར་བྱ་སྟེ། དགེ་སློང་གཞི་ཇི་བཞིན་པ་ལ་དེ་བཞིན་གཤེགས་པ་ལ་བསྙེན་བཀུར་བྱ་བའི་ཕྱིར་འགྲོ་བའི་དུས་མ་ཡིན་པ་མེད་དོ་ཞེས་གསུངས་སོ། །དེ་ནས་ཤཱཀྱ་རབ་ཏུ་བྱུང་བ་དེ་དག་འདི་སྙམ་དུ་
སེམས་ཏེ། དེ་ལྟར་བཅོམ་ལྡན་འདས་ཀྱིས་འདོད་པ་ཆེ་བ་རྣམ་པར་སྨད་ཅིང་། འདོད་པ་ཆུང་བ་ལ་བསྟོད་པ་ནི་དོན་གྱིས་ན་བཅོམ་ལྡན་འདས་ཀྱིས་བདག་ཅག་སྨད་པ་མཛད་པ་ཡིན་གྱིས་བདག་ཅག་གིས་ལྷུང་བཟེད་དང་། ཆོས་གོས་དང་། དྲ་བ་དང་། ཕོར་བུ་དང་། སྐ་

རགས་ལྷག་པ་དག་ཚེ་དང་ལྡན་པ་ཀུན་དགའ་བོ་ལ་བཏང་སྟེ་རྒྱུད་དག་པས་བཅོམ་ལྡན་འདས་ག་ལ་བ་དེར་འདོང་ངོ་སྙམ་མོ། །དེ་ནས་དགེ་སློང་དེ་དག་ལྷུང་བཟེད་དང་། ཆོས་གོས་དང་། དྲ་བ་དང་། ཕོར་བུ་དང་། སྐ་རགས་ལྷག་པ་དག་ཁྱེར་ཏེ་ཚེ་དང་ལྡན་པ་ཀུན་དགའ་
བོ་ག་ལ་བ་དེར་དོང་ནས་ཕྱིན་པ་དང་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཀུན་དགའ་བོ་ཐུགས་བརྩེ་བའི་སླད་དུ་བདག་ཅག་ལས་ལྷུང་བཟེད་དང་། ཆོས་གོས་དང་། དྲ་བ་དང་། ཕོར་བུ་དང་། སྐ་རགས་ལྷག་པ་འདི་དག་བཞེས་ཤིག །ཚེ་
དང་ལྡན་པ་དག་དེའི་ཕྱིར་བདག་གིས་བཅོམ་ལྡན་འདས་ལ་ཞུས་དེའི་བར་དུ་སྡོད་ཅིག །དེ་ནས་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་
གཅིག་ཏུ་འདུག་ནས་ཚེ་དང་ལྡན་པ་ཀུན་དགའ་བོས་སྐབས་དེ་བཅོམ་ལྡན་འདས་ལ་རྒྱས་པར་གསོལ་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་དེའི་ཕྱིར་ལོང་ལ་བླངས་ནས་ཀྱང་གཙུག་ལག་ཁང་ཆེན་པོ་ཞིག་ཏུ་
སྤུངས་ཏེ་ཞོག་ལ་དགེ་སློང་གང་དེས་བྲེལ་བའི་དགེ་སློང་དེ་ལ་དེ་སྦྱིན་པར་བྱའོ། །ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ཤཱཀྱ་རབ་ཏུ་བྱུང་བ་རྣམས་ལས་ལྷུང་བཟེད་དང་། ཆོས་གོས་དང་། དྲ་བ་དང་། ཕོར་
བུ་དང་། སྐ་རགས་ལྷག་པ་དག་བླངས་ནས་གཙུག་ལག་ཁང་ཆེན་པོ་ཞིག་ཏུ་སྤུངས་ཏེ་བཞག་གོ། །དེ་ནས་ཤཱཀྱ་རབ་ཏུ་བྱུང་བ་དེ་དག་ལྷུང་བཟེད་དང་། ཆོས་གོས་དང་། དྲ་བ་དང་། ཕོར་བུ་དང་། སྐ་རགས་ལྷག་པ་དག་ནད་ཇི་ལྟ་བ་དང་། འབྲས་ཇི་ལྟ་བ་དང་།
ཟུག་རྔུ་ཇི་ལྟ་བ་བཞིན་དུ་སྤངས་ནས་ཆོས་གོས་གསུམ་པ་ལྷུར་ལེན་ཅིང་རྒྱུད་དག་པ་དང་། ཡོ་བྱད་བསྙུངས་པའི་ཚུལ་དག་གིས་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །

བཅོམ་ལྡན་འདས་ཀྱིས་ཤཱཀྱ་རབ་ཏུ་བྱུང་བ་དེ་དག་གི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཐུགས་སུ་ཆུད་ནས་འདི་ལྟར་ཤཱཀྱ་གཞོན་ནུ་ལྔ་བརྒྱ་པོ་དེ་དག་གིས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་
རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟར་ཆོས་བསྟན་པ་མཛད་དོ། །དེ་དག་གིས་བདེན་པ་མཐོང་ནས་གསོལ་པ། བཙུན་པ་བདག་ཅག་གིས་དགེ་བའི་བཤེས་གཉེན་བཅོམ་ལྡན་འདས་ལ་བརྟེན་ནས་བཅོམ་ལྡན་འདས་ཀྱིས་བདག་ཅག་ལ་གང་
མཛད་པ་འདི་ལྟ་བུ་ནི་བདག་ཅག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་། བྲམ་ཟེ་དག་གིས་ཀྱང་མ་བགྱིས། བྱམས་པ་དང་། མཛའ་
བཤེས་དང་། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་། དུད་འགྲོ་དང་། ཡི་དགས་དག་ནས་
ནི་རྐང་པ་ཕྱུང་། ལྷ་དང་། མི་རྣམས་ཀྱི་ནང་དུ་ནི་བཞག །འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་མངོན་སུམ་དུ་བགྱིས་སོ། །
དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཇི་ཙམ་དུ་བཅོམ་ལྡན་འདས་ཀྱིས་ཤཱཀྱ་གཞོན་ནུ་ལྔ་བརྒྱ་པོ་དག་ཚེ་དང་ལྡན་པ་ཉེ་སྡེ་ལ་བརྟེན་ཏེ་འདོད་པ་ཆེ་བ་དང་ཕྲལ་ཞིང་འདོད་པ་ཆུང་བ་ཉིད་ལ་བཀོད་དེ་
ཤིན་ཏུ་མཐར་ཐུག་པའི་གྲུབ་པ་དང་བདེ་བ་མྱ་ངན་ལས་འདས་པ་ལ་བཞག་པ་མཛད་པ་ནི་ངོ་མཚར་ཏོ། །དགེ་སློང་དག་ད་ལྟར་ང་འདོད་ཆགས་དང་བྲལ་བ། སྲེད་པ་མེད་པ། ལེན་པ་མེད་པ། ཐམས་ཅད་མཁྱེན་པ་མཁྱེན་པ་དང་ཤེས་བྱ་ཐམས་ཅད་ལ་མངའ་བརྙེས་

པས་ཤཱཀྱ་གཞོན་ནུ་ལྔ་བརྒྱ་པོ་དག་རིགས་ཀྱི་བུ་ཉེ་སྡེ་ལ་བརྟེན་ཏེ་འདོད་པ་ཆེ་བ་དང་ཕྲལ་ཞིང་འདོད་པ་ཆུང་བ་ཉིད་ལ་བཀོད་དེ་ཤིན་ཏུ་མཐར་ཐུག་པའི་གྲུབ་པ་དང་བདེ་བ་མྱ་ངན་ལས་འདས་པ་ལ་གཞག་པ་མཛད་པ་ངོ་མཚར་ཅི་ཆེ། འདི་ལྟར་འདས་པའི་དུས་ན་ང་འདོད་
ཆགས་དང་བཅས་པ། ཞེ་སྡང་དང་བཅས་པ། གཏི་མུག་དང་བཅས་པ། སྲེད་པ་དང་བཅས་པ། ལེན་པ་དང་བཅས་པ། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་།
འཁྲུག་པ་དག་ལས་རྣམ་པར་མ་གྲོལ་བས་ཀྱང་ཤཱཀྱ་གཞོན་ནུ་ལྔ་བརྒྱ་པོ་འདི་དག་རིགས་ཀྱི་བུ་ཉེ་སྡེ་ལ་བརྟེན་ཏེ་འདོད་པ་ཆེ་བ་དང་། ཕྲལ་ཞིང་འདོད་པ་ཆུང་བ་ཉིད་ལ་བཀོད་དེ་མངོན་པར་ཤེས་པ་ལྔ་པོ་དག་ལ་གཞག་པར་མཛད་པ་དེ་ཉོན་ཅིག །དགེ་སློང་དག་སྔོན་བྱུང་བ་
འདས་པའི་དུས་ན་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཚངས་བྱིན་ཞེས་བྱ་བས་རྒྱལ་སྲིད་འབྱོར་པ། རྒྱས་པ། བདེ་བ་ལོ་ལེགས་པ། སྐྱེ་བོ་དང་། མི་མང་པོས་གང་བ། ཐབ་མོ་དང་། འཐབ་པ་དང་། རྩོད་པ་དང་། འགྱེད་པ་དང་། འཁྲུག་ལོང་དང་། ནང་འཁྲུག་
དང་། ཆོམ་རྐུན་དང་། མུ་གེ་དང་། ནད་རབ་ཏུ་ཞི་བ་བྱེད་དུ་བཅུག་སྟེ། དེས་བུ་གཅིག་པ་སྙིང་དུ་སྡུག་པ་དང་འདྲ་བར་རྒྱལ་སྲིད་སྐྱོང་དུ་བཅུག་གོ། །རྒྱལ་པོ་ཚངས་བྱིན་ལ་བཙུན་མོ་ཚངས་ལྡན་ཞེས་བྱ་བ་དང་། རྫིང་བུ་ཚངས་ལྡན་ཞེས་བྱ་བ་ཡོད་དེ། རྒྱལ་པོ་ཚངས་
བྱིན་དེ་ལ་བུ་མེད་ནས་དེས་བུ་འདོད་པས་ཞི་བ་དང་། ཆུ་ལྷ་དང་། ལུས་ངན་དང་། བརྒྱ་བྱིན་དང་། ཚངས་པ་དང་། གཞན་ཡང་ལྷའི་བྱེ་བྲག་འདི་ལྟ་སྟེ། ཀུན་དགའ་ར་བའི་ལྷ་དག་དང་། ཚལ་གྱི་ལྷ་དག་དང་། བཞི་མདོའི་ལྷ་དག་དང་། སུམ་མདོའི་ལྷ་དག་
དང་། གཏོར་མ་ལེན་པའི་ལྷ་དག་དང་། ལྷན་ཅིག་སྐྱེས་པའི་ལྷ་དག་དང་། ཆོས་མཐུན་པ་དག་དང་། རྟག་ཏུ་རྗེས་སུ་འབྲང་བའི་ལྷ་དག་ལ་ཡང་གསོལ་བ་འདེབས་སོ། །འཇིག་རྟེན་ན་གང་གསོལ་བ་འདེབས་པའི་རྒྱུ་ལས་བུ་དག་དང་བུ་མོ་དག་སྐྱེའོ་ཞེས་བྱ་

བའི་གཏམ་དེ་ལྟ་བུ་ཡོད་དེ། དེ་ནི་དེ་ལྟ་མ་ཡིན་ཏེ། གལ་ཏེ་དེ་ལྟར་འགྱུར་དུ་ཟིན་ན། རེ་རེ་ལ་ཡང་འདི་ལྟ་སྟེ། དཔེར་ན་འཁོར་ལོས་སྒྱུར་བའི་རྒྱལ་པོ་བཞིན་དུ་བུ་སྟོང་ཡོད་པར་འགྱུར་རོ། །འདི་ལྟར་གནས་གསུམ་པོ་དག་མངོན་དུ་གྱུར་པ་ལས་མའི་མངལ་དུ་མངལ་
ན་གནས་པ་འཇུག་པར་འགྱུར་ཏེ། གསུམ་པོ་དེ་དག་གང་ཞེ་ན། ཕ་མ་གཉིས་ཆགས་པར་གྱུར་ཅིང་ཕྲད་པ་དང་། མ་དུས་ལ་བབ་ཅིང་ཟླ་མཚན་དང་ལྡན་པ་དང་། དྲི་ཟ་ཉེ་བར་གནས་ཤིང་འཇུག་འདོད་པ་སྟེ། གནས་གསུམ་པོ་དེ་དག་མངོན་དུ་གྱུར་པ་ལས་བུ་དང་བུ་མོ་
སྐྱེ་བར་འགྱུར་རོ། །དེ་དེ་ལྟར་གསོལ་བ་འདེབས་པ་ལྷུར་ལེན་པ་ལ་ཞུགས་པ་ན་སེམས་ཅན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་པ། ཡི་དམ་བརྟན་པ་ཞིག་སེམས་ཅན་དམྱལ་བ་ནས་ཤི་འཕོས་ནས་བཙུན་མོ་ཚངས་ལྡན་གྱི་མངལ་དུ་
ཞུགས་སོ། །བུད་མེད་ཀྱི་ཡུལ་མཁས་པའི་རང་བཞིན་ཅན་ལ་ལ་ལ་མ་འདྲེས་པའི་ཆོས་ལྔ་ཡོད་དེ། ལྔ་གང་ཞེ་ན། སྐྱེས་པ་ཆགས་པར་གྱུར་བཤེས་ཤིང་ཆགས་པ་དང་བྲལ་བ་ཤེས་པ་དང་། དུས་ཤེས་ཤིང་ཟླ་མཚན་ཤེས་པ་དང་། མངལ་ན་གནས་བཞུགས་
པ་ཤེས་པ་དང་། གང་ལས་མངལ་ན་གནས་པ་ཞུགས་པ་དེ་ཤེས་པ་དང་། ཁྱེའུ་ཤེས་ཤིང་བུ་མོ་ཤེས་པ་སྟེ། གལ་ཏེ་ཁྱེའུ་ཡིན་ན་དཀུ་གཡས་པར་རྟེན་ཅིང་འདུག་ལ། གལ་ཏེ་བུ་མོ་ཡིན་ན་དཀུ་གཡོན་པར་རྟེན་ཅིང་འདུག་པའོ། །དེ་ཡིད་དགའ་ཞིང་
ཡིད་དགའ་ནས་རྒྱལ་པོ་ཚངས་བྱིན་ལ་སྨྲས་པ། ལྷ་དགྱེས་པ་བསྐྱེད་དུ་གསོལ། བདག་ལ་སེམས་ཅན་ཞུགས་པར་གྱུར་པ་ནི་འདི་ལྟར་བདག་གི་དཀུ་གཡས་པར་རྟེན་ཅིང་མཆིས་པས་ངེས་པར་ཁྱེའུར་འགྱུར་རོ། །རྒྱལ་པོ་ཚངས་བྱིན་ཡང་ཡིད་དགའ་ཞིང་ཡིད་དགའ་
ནས་འདི་སྐད་ཅེས་ཀྱེ་མ་ཁོ་བོ་ཡུན་རིང་པོ་ནས་མངོན་པར་འདོད་པའི་བུའི་ངོ་མཐོང་བ་དང་། ཁོ་བོ་དང་མཐུན་པར་སྐྱེ་ཞིང་མི་མཐུན་པར་མི་སྐྱེ་བ་དང་། ཁོ་བོའི་བྱ་བ་དག་བྱེད་པ་དང་། གསོས་པས་ཕྱིར་གསོ་བ་དང་། བགོ་སྐལ་ལ་སྤྱོད་པ་དང་། ཁོ་བོའི་རིགས་རྒྱུད་

ཡུན་རིང་དུ་གནས་པར་འགྱུར་བ་དང་། བདག་ཅག་ཤི་ཞིང་དུས་ལས་འདས་པ་དག་ལ་ཉུང་ངུའམ་མང་པོ་ཡང་རུང་བའི་སྦྱིན་པ་དག་སྦྱིན་ཞིང་བསོད་ནམས་དག་བྱས་ནས། འདི་དེ་གཉིས་གང་དུ་སྐྱེས་པ་དེར་འགྲོ་ཞིང་རྗེས་སུ་འགྲོ་བར་གྱུར་ཅིག་ཅེས་
མིང་གིས་ཡོན་བཤད་པ་བྱེད་པར་གྱུར་ཅིག་ཅེས་ཆེད་དུ་བརྗོད་པ་ཆེད་དུ་བརྗོད་པར་བྱེད་དོ། །དེ་ལ་སེམས་ཅན་ཞུགས་པར་རིག་ནས་འདི་ལྟ་སྟེ་མངལ་ན་གནས་པ་ཡོངས་སུ་སྨིན་པར་བྱ་བའི་ཕྱིར་སྟེང་གི་ཁང་བཟངས་ཀྱི་གཞིར་གཏོགས་པ་ན་གྲང་བ་ན་གྲང་བའི་ཡོ་བྱད་དག་དང་།
དྲོ་བ་ན་དྲོ་བའི་ཡོ་བྱད་དག་དང་། སྨན་པས་བཅས་པའི་ཁ་ཟས་ཧ་ཅང་མི་ཁ་བ་དང་། ཧ་ཅང་མི་སྐྱུར་བ་དང་། ཧ་ཅང་ལན་ཚྭ་མི་ཆེ་བ་དང་། ཧ་ཅང་མི་མངར་བ་དང་། ཧ་ཅང་མི་ཚ་བ་དང་། ཧ་ཅང་མི་བསྐ་བ་དང་། ཁ་བ་དང་། སྐྱུར་བ་དང་། ལན་ཚྭ་དང་།
མངར་བ་དང་། ཚ་བ་དང་། བསྐ་བ་རྣམ་པར་སྤངས་པའི་ཟས་དག་དང་། དོ་ཤལ་དང་། སེ་མོ་དོ་དང་། རྒྱན་གྱིས་བཀླུབས་པའི་ལུས་ལྷའི་བུ་མོ་དགའ་བའི་ཚལ་ན་རྣམ་པར་སྤྱོད་པ་ལྟ་བུ་དང་། ཁྲི་ནས་ཁྲིར་དང་། ཁྲིའུ་ནས་ཁྲིའུར་དང་། ཤོད་ཀྱི་ས་གཞིར་
མི་འབབ་པ་དང་། དེས་སྒྲ་ཡིད་དུ་མི་འོང་བ་ཅུང་ཟད་ཀྱང་མི་ཐོས་པར་གནོད་པ་མེད་པ་ཉིད་དུ་རིམ་གྲོ་བྱེད་དུ་འཛུད་དོ། །དེ་ནས་དུས་གཞན་ཞིག་ན་བཙུན་མོ་ཚངས་ལྡན་ལ་འདོད་པ་འདི་ལྟ་བུ་འདི་སྐྱེས་ཏེ། ཀྱེ་མ་ལྷས་གྲོང་ཁྱེར་གྱི་ཤར་སྒོར་སྦྱིན་པ་དག་བྱིན་པར་
གྱུར་ཅིང་། བསོད་ནམས་དག་བྱེད་པར་གྱུར་ཅིག །ལྷོ་སྒོ་དང་། ནུབ་སྒོ་དང་། བྱང་སྒོ་དང་། དབུས་ཀྱི་བཞི་མདོར་ཀྱང་སྦྱིན་པ་དག་སྦྱིན། བསོད་ནམས་དག་བྱེད་ཅིང་བཙོན་ཐམས་ཅད་ཐར་བར་བྱེད་པར་གྱུར་ཅིག་སྙམ་མོ། །དེ་ནས་རྒྱལ་པོ་ཚངས་བྱིན་གྱིས་
བཙུན་མོ་ཚངས་ལྡན་ལ་འདོད་པ་དེ་ལྟ་བུ་དེ་སྐྱེས་པར་ཐོས་ནས་གྲོང་ཁྱེར་གྱི་ཤར་སྒོར་སྦྱིན་པ་དག་སྦྱིན་ཞིང་བསོད་ནམས་དག་བྱེད་དོ། །དེ་བཞིན་དུ་ལྷོ་སྒོ་དང་། ནུབ་སྒོ་དང་། བྱང་སྒོ་དང་། དབུས་ཀྱི་བཞིར་མདོར་ཡང་སྦྱིན་པ་དག་སྦྱིན། བསོད་ནམས་དག་

བྱེད་ཅིང་། བཙོན་ཐམས་ཅད་ཐར་བར་བྱས་སོ། །ཡང་བཙུན་མོ་ཚངས་ལྡན་ལ་འདོད་པ་འདི་ལྟ་བུ་འདི་སྐྱེས་ཏེ་ཀྱེ་མ་བདག་ལྷ་དང་ལྷན་ཅིག་སྐྱེད་མོས་ཚལ་དང་། དཀའ་ཐུབ་ཀྱི་ནགས་སུ་རྩེ་བ་དང་། དགའ་བ་དང་། དགའ་མགུར་སྤྱོད་པར་གྱུར་ཅིག་སྙམ་མོ། །
དེ་ནས་རྒྱལ་པོ་ཚངས་བྱིན་གྱི་བཙུན་མོ་ཚངས་ལྡན་ལ་འདོད་པ་རྣམ་པ་དེ་ལྟ་བུ་དེ་སྐྱེས་པར་ཐོས་ནས། བཙུན་མོ་ཚངས་ལྡན་དང་ལྷན་ཅིག་སྐྱེད་མོས་ཚལ་དང་། དཀའ་ཐུབ་ཀྱི་ནགས་སུ་ཞུགས་ཏེ། རྩེ་བ་དང་། དགའ་བ་དང་། དགའ་མགུར་སྤྱོད་པ་དག་བྱས་
སོ། །ཡང་བཙུན་མོ་ཚངས་ལྡན་ལ་འདོད་པའི་རྣམ་པ་འདི་ལྟ་བུ་འདི་སྐྱེས་ཏེ། ཀྱེ་མ་བདག་ལྷ་དང་ཐབས་ཅིག་ཆུར་འཇུག་པའི་གྲུར་ཞུགས་ཏེ། རྫིང་བུ་ཚངས་ལྡན་དུ་རྩེ་བ་དང་། དགའ་བ་དང་། དགའ་མགུར་སྤྱོད་པར་གྱུར་ཅིག་སྙམ་མོ། །དེ་ནས་རྒྱལ་
པོ་ཚངས་བྱིན་གྱིས་བཙུན་མོ་ཚངས་ལྡན་ལ་འདོད་པའི་རྣམ་པ་དེ་ལྟ་བུ་དེ་བྱུང་བར་ཐོས་ནས། བཙུན་མོ་ཚངས་ལྡན་དང་ལྷན་ཅིག་ཆུར་འཇུག་པའི་གྲུ་མེ་ཏོག་ཨུཏྤ་ལ་དང་། པད་མ་དང་། ཀུ་མུ་ཏ་དང་། པད་མ་དཀར་པོས་བཀང་བར་ཞུགས་ཏེ་རྫིང་བུ་ཚངས་
ལྡན་དུ་རྩེ་བ་དང་། དགའ་བ་དང་། དགའ་མགུར་སྤྱོད་པ་བྱས་སོ། །དེ་གྲུ་དེ་ཉིད་དུ་བཙས་པ་ལས་ཁྱེའུ་ཚེ་རབས་དྲན་པ། གཟུགས་བཟང་བ། བལྟ་ན་སྡུག་པ། མཛེས་པ། གསལ་བ། གསེར་གྱི་མདོག་འདྲ་བ། མགོ་གདུགས་ལྟ་བུ་དང་ལྡན་པ།
ལག་པ་རིང་བ། འཕྲལ་བའི་དབྱེས་ཆེ་བ། སྨིན་མ་འཇར་བ་སྣའི་གཟངས་མཐོ་བ་ཞིག་བྱུང་ངོ་། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུའི་མིང་ཅིར་གདགས་ཞེས་མིང་འདོགས་
པར་བྱེད་དོ། །དེ་དག་འདི་སྙམ་དུ་སེམས་ཏེ། གང་གི་ཕྱིར་ཁྱེའུ་འདི་ཆུའི་ནང་དུ་བཙས་པ་དེའི་ཕྱིར་ཁྱེའུའི་མིང་ཆུ་སྐྱེས་ཞེས་བྱའོ་ཞེས་དེའི་མིང་ཆུ་སྐྱེས་ཞེས་བྱ་བར་བཏགས་སོ། །གཞོན་ནུ་ཆུ་སྐྱེས་མ་མ་བརྒྱད་པོ་པང་ན་འཚོ་བའི་མ་མ་གཉིས་དང་། ནུ་མ་སྣུན་

པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེན་གྲོགས་ཀྱི་མ་མ་གཉིས་ལ་རྗེས་སུ་གཏད་དོ། །དེ་མ་མ་བརྒྱད་པོ་དག་གིས་འོ་མ་དང་། ཞོ་དང་ཞུན་མར་དང་། མར་གྱི་སྙིང་ཁུ་དང་། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་
དག་གིས་སྲིང་བར་བྱེད། སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་དུ་མྱུར་དུ་སྐྱེད་པར་བྱེད་དོ། །དེ་ནས་གཞོན་ནུ་ཆུ་སྐྱེས་འདི་སྙམ་དུ་སེམས་ཏེ། བདག་གང་ནས་ཤི་འཕོས་ཏེ་འདིར་སྐྱེས་སྙམ་ན། སེམས་ཅན་དམྱལ་བ་དག་ནས་ཤི་འཕོས་ཏེ་འདིར་སྐྱེས་
པར་ཤེས་སོ། །ལས་ཅི་བྱས་ན་དེས་སེམས་ཅན་དམྱལ་བ་རྣམས་སུ་སྐྱེས་སྙམ་ན། ལོ་དྲུག་བཅུར་རྒྱལ་ཚབ་ཀྱི་རྒྱལ་སྲིད་དུ་བཅུག་པས་དེ་དག་ཏུ་སྐྱེས་པར་ཤེས་སོ། །ད་ལྟར་གང་དུ་སྐྱེས་སྙམ་ན་མི་རྣམས་ཀྱི་ནང་དུ་རྒྱལ་པོའི་རིགས་སུ་སྐྱེས་པར་ཤེས་ནས། དེ་
འདི་སྙམ་དུ་སེམས་ཏེ། བདག་ཡང་རྒྱལ་སྲིད་བྱེད་དུ་བཅུག་ན་ཡང་སེམས་ཅན་དམྱལ་བ་རྣམས་སུ་འགྲོ་བར་འགྱུར་ན་མ་ལེགས་ཀྱིས། བདག་གིས་སྒྱུ་ཐབས་ཅུང་ཞིག་བྱའོ་སྙམ་ནས། དེས་བདག་ཉིད་འཕྱེ་བོ་ཉིད་དུ་བསྟན་ཏེ་འདུག་གོ། །གང་གི་ཉིན་མོ་གཞོན་
ནུ་ཆུ་སྐྱེས་བཙས་པ་དེ་ཉིད་ཀྱི་ཉིན་མོ་བློན་པོ་ལྔ་བརྒྱ་དག་གི་བུ་དག་ཀྱང་བཙས་ཏེ་དེ་དག་ཀྱང་རང་རང་གི་རིགས་དང་མཐུན་པའི་མིང་དག་བཏགས་པར་གྱུར་ཏོ། །བློན་པོ་དེ་དག་གིས་ཀུན་དུ་སྤྱོད་པ་ནི་ཉི་མ་རེ་རེ་ཞིང་རྒྱལ་པོ་ཚངས་བྱིན་དང་། གཞོན་ནུ་ཆུ་སྐྱེས་ལྟར་འོང་ངོ་། །
དེ་ནས་དུས་གཞན་ཞིག་ན་གཞོན་ནུ་ལྔ་བརྒྱ་པོ་དེ་དག་མཆོངས་པ་དང་། དཀྱུས་མོ་བྱེད་ནུས་པར་གྱུར་ཏོ། །དེ་ནས་རྒྱལ་པོ་ཚངས་བྱིན་འདི་སྙམ་དུ་སེམས་ཏེ། གལ་ཏེ་ངའི་བུ་གཞོན་ནུ་ཆུ་སྐྱེས་ཀྱང་འཕྱེ་བོར་མ་གྱུར་དུ་ཟིན་ན། དེ་ཡང་དེ་ཙམ་མཆོངས་པ་དང་།
དཀྱུས་མོ་བྱེད་ནུས་པར་འགྱུར་གྱིས། འདི་ལྟར་བདག་གི་དེ་འཕྱེ་བོ་ཡིན་ཡང་བླས་རྒྱལ་སྲིད་ཀྱི་དབང་ཕྱུག་ལ་གཞག་པར་བྱའོ་སྙམ་མོ། །དེ་ནས་གཞོན་ནུ་ཆུ་སྐྱེས་ཀྱིས་དེ་ཐོས་ནས་འདི་སྙམ་དུ་སེམས་ཏེ། རྒྱལ་པོ་འདི་ནི་གཅུགས་མེད་པར་གནོད་པ་བྱེད་པ་ཡིན་གྱིས་

བདག་གིས་ལྐུགས་པ་ཉིད་དུ་བསྟན་ཏེ་འདུག་པར་བྱའོ་སྙམ་ནས། དེས་ཆེད་དུ་བསམས་ཏེ་ལྐུགས་པ་ཉིད་དུ་བསྟན་ཏེ་འདུག་གོ། །དེ་ནས་དུས་གཞན་ཞིག་ན་གཞོན་ནུ་ལྔ་བརྒྱ་པོ་དེ་དག་སྨྲ་ནུས་པར་གྱུར་ཏོ། །དེ་ནས་རྒྱལ་པོ་ཚངས་བྱིན་འདི་སྙམ་དུ་སེམས་ཏེ། གལ་
ཏེ་བདག་གི་གཞོན་ནུ་ཆུ་སྐྱེས་ཀྱང་ལྐུགས་པར་མ་གྱུར་དུ་ཟིན་ན་དེ་ཡང་དེ་ཙམ་སྨྲ་ནུས་པར་འགྱུར་རོ་སྙམ་མོ། །དེའི་ཚེ་ན་གཞོན་ནུ་ཆུ་སྐྱེས་ཀྱི་མིང་གཞོན་ནུ་ཆུ་སྐྱེས་གཞོན་ནུ་ཆུ་སྐྱེས་ཞེས་བྱ་བ་གང་ཡིན་པ་དེ་ནུབ་པར་གྱུར་ཅིང་། གཞོན་ནུ་ལྐུགས་འཕྱེ་གཞོན་ནུ་ལྐུགས་འཕྱེ་ཞེས་
བྱ་བའི་མིང་ཆགས་པར་གྱུར་ཏོ། །དེ་ནས་དུས་གཞན་ཞིག་ན་རྒྱལ་པོ་ཚངས་བྱིན་ལག་པ་ལ་འགྲམ་པ་གཏད་དེ་སེམས་ཁོང་དུ་ཆུད་ཅིང་འདུག་ནས། བློན་པོ་རྣམས་ཀྱིས་སྨྲས་པ། ལྷ་ཅིའི་སླད་དུ་ཕྱག་ལ་ཞལ་གཏད་དེ་ཐུགས་ཁོང་དུ་ཆུད་ཅིང་བཞུགས། རྒྱལ་པོས་སྨྲས་པ།
འདི་ལྟར་ངའི་རྒྱལ་སྲིད་ཀྱི་དབང་ཕྱུག་འདི་འདྲ་བ་ལ་བུ་ཡང་མེད་བུ་མོ་ཡང་མེད་པས་ང་འདས་ནས་གདུང་ཆད་པར་ཡང་འགྱུར་ལ། བུ་གཅིག་བདོག་པ་དེ་ཡང་ལྐུགས་འཕྱེར་གྱུར་ན། ང་ཇི་ལྟར་སེམས་ཁོང་དུ་ཆུད་ཅིང་མི་འདུག་ཏུ་རུང་། བློན་པོ་རྣམས་ཀྱིས་སྨན་པ་གཉེར་
ཏེ་སྨན་པ་ལ་རྨས་ནས་སྨྲས་པ། ལྷ་གཞོན་ནུ་འདིའི་དབང་པོ་གསལ་བར་གདའ་སྟེ། འདི་ལ་བྲོ་ནད་ཀྱིས་རྣམ་པ་ནི་ཅུང་ཟད་ཀྱང་མ་མཆིས་པས་བསྡིགས་པར་བགྱི་བའི་རིགས་སོ། །རྒྱལ་པོ་ཚངས་བྱིན་གྱིས་གཤེད་མ་དག་བཀུག་ནས་གསང་སྟེ་བསྒོ་བ། ངས་གཞོན་ནུ་
ལྐུགས་འཕྱེ་འདི་སྐྱེ་བོ་ཕལ་པོ་ཆེའི་མངོན་སུམ་དུ་ཡོངས་སུ་གཏང་བར་བྱས། ཁྱེད་ཀྱིས་གསད་པར་མི་བྱའོ། །ལྷ་བཀའ་བཞིན་འཚལ། རྒྱལ་པོ་ཚངས་བྱིན་གྱིས་འཁོར་གྱི་ནང་དུ་སོང་སྟེ་གཤེད་མ་རྣམས་ལ་བསྒོ་བ། ངས་གཞོན་ནུ་འདི་ཡོངས་སུ་བཏང་གིས་ཁྱོད་
ཀྱིས་འོར་ཅིག །ལྷ་བཀའ་བཞིན་འཚལ་ཞེས་དེ་ནས་གཤེད་མའི་མི་དེ་དག་གིས་རྒྱལ་པོ་ཚངས་བྱིན་ལས་མཉན་ནས་གཞོན་ནུ་ལྐུགས་འཕྱེ་ཤིང་རྟར་བཅུག་སྟེ། གྲོང་ཁྱེར་བཱ་རཱ་ཎ་སཱིའི་ནང་ནས་ཕྱིར་ཁྲིད་དེ། དེ་ནས་གཞོན་ནུ་ལྐུགས་འཕྱེས་གྲོང་ཁྱེར་བཱ་རཱ་ཎ་སཱིའི་

འབྱོར་པ་དང་རྒྱས་པ་མཐོང་ནས་འདི་སྐད་ཅེས་སྨྲས་སོ། །ཅི་བཱ་རཱ་ཎ་སཱི་འདི་སྟོང་པ་ཡིན་ནམ། འོན་ཏེ་གནས་པ་ཡིན། གཤེད་མའི་མི་རྣམས་ཀྱི་གཞོན་ནུ་ལྐུགས་འཕྱེ་རྒྱལ་པོ་ལ་ཕུལ་ནས་ལྷ་གཞོན་ནུ་ལྐུགས་འཕྱེས་ཚིག་འདི་ལྟ་བུ་བརྗོད་དོ་ཞེས་
སྨྲས་སོ། །དེ་ནས་རྒྱལ་པོ་ཚངས་བྱིན་གྱིས་གཞོན་ནུ་ལྐུགས་འཕྱེ་པང་དུ་བཞག་སྟེ་འདི་སྐད་ཅེས་སྨྲས་སོ། །གཞོན་ནུ་གང་གསད་པར་བྱ། གང་གསོད་དུ་གཞུག་པར་བྱ། གང་སྲོག་དང་དབྲལ་བར་བྱ། གང་ལ་ཅི་ཞིག་སྦྱིན་པར་བྱ། དེ་སྐད་སྨྲས་ཀྱང་གཞོན་ནུ་ལྐུགས་འཕྱེ་ཅང་མི་སྨྲའོ། །རྒྱལ་པོ་ཚངས་
བྱིན་གྱིས་ཡང་གཤེད་མ་རྣམས་ལ་སྨྲས་པ། ངས་གཞོན་ནུ་འདི་ཡོངས་སུ་བཏང་གིས་ཁྱེད་ཀྱིས་འོར་ཅིག །གཤེད་མའི་མི་རྣམས་ཀྱིས་ལྷ་བཀའ་བཞིན་འཚལ་ཞེས་ཡང་གཞོན་ནུ་ལྐུགས་འཕྱེ་ཤིང་རྟར་བཅུག་སྟེ། གྲོང་ཁྱེར་བཱ་རཱ་ཎ་སཱིའི་ནང་ནས་ཕྱིར་ཁྲིད་པ་དང་། གཞོན་
ནུ་ལྐུགས་འཕྱེས་མིའི་རོ་མི་བཞིས་ཁྱེར་བ་ཞིག་མཐོང་ནས་སྨྲས་པ། ཅི་རོ་འདི་ཤི་བ་ཉིད་ཀྱི་རོ་ཡིན་ནམ། འོན་ཏེ་གསོན་པོའི་རོ་ཡིན། ཡང་གཤེད་མའི་མི་རྣམས་ཀྱིས་གཞོན་ནུ་ལྐུགས་འཕྱེ་རྒྱལ་པོ་ལ་ཕུལ་ནས་ལྷ་གཞོན་ནུ་ཚིག་འདི་ལྟ་བུ་འདི་བརྗོད་དོ་ཞེས་སྨྲས་སོ། །རྒྱལ་
པོ་ཚངས་བྱིན་གྱིས་ཡང་གཞོན་ནུ་ལྐུགས་འཕྱེ་པང་དུ་བཞག་སྟེ་འདི་སྐད་ཅེས་སྨྲས་སོ། །གཞོན་ནུ་གང་གསད་པར་བྱ། གང་གསོད་དུ་གཞུག་པར་བྱ། གང་སྲོག་དང་དབྲལ་བར་བྱ། གང་ལ་ཅི་ཞིག་སྦྱིན་པར་བྱ། དེ་སྐད་སྨྲས་ཀྱང་གཞོན་ནུ་ལྐུགས་འཕྱེ་ཅང་མི་སྨྲའོ། །
ཡང་རྒྱལ་པོ་ཚངས་བྱིན་གྱིས་གཤེད་མ་རྣམས་ལ་སྨྲས་པ། ངས་གཞོན་ནུ་ཡོངས་སུ་བཏང་གིས་ཁྱེད་ཀྱིས་འོར་ཅིག །གཤེད་མའི་མི་རྣམས་ཀྱིས་ལྷ་བཀའ་བཞིན་འཚལ་ཞེས་ཡང་གཞོན་ནུ་ལྐུགས་འཕྱེ་ཤིང་རྟར་བཅུག་སྟེ། གྲོང་ཁྱེར་བཱ་རཱ་ཎ་སཱིའི་ནང་ནས་ཕྱིར་ཁྲིད་པ་དང་།
གཞོན་ནུ་ལྐུགས་འཕྱེས་འབྲུའི་ཕུང་པོ་ཆེན་པོ་ཞིག་མཐོང་ནས་སྨྲས་པ། གལ་ཏེ་འབྲུའི་ཕུང་པོ་འདི་དང་པོ་ཉིད་ནས་དྲུང་མ་ཟོས་ན་ཆེན་པོར་འགྱུར་རོ། །གཤེད་མའི་མི་རྣམས་ཀྱིས་ཡང་གཞོན་ནུ་ལྐུགས་འཕྱེ་རྒྱལ་པོ་ལ་ཕུལ་ནས། ལྷ་གཞོན་ནུ་ཚིག་འདི་ལྟ་བུ་འདི་བརྗོད་

དོ་ཞེས་སྨྲས་སོ། །རྒྱལ་པོ་ཚངས་བྱིན་གྱིས་ཡང་གཞོན་ནུ་ལྐུགས་འཕྱེ་པང་དུ་བཞག་སྟེ་འདི་སྐད་ཅེས་སྨྲས་སོ། །གཞོན་ནུ་གང་གསད་པར་བྱ། གང་གསོད་དུ་གཞུག་པར་བྱ། གང་སྲོག་དང་དབྲལ་བར་བྱ། གང་ལ་ཅི་ཞིག་སྦྱིན་པར་བྱ། དེ་སྐད་སྨྲས་ཀྱང་གཞོན་
ནུ་ལྐུགས་འཕྱེ་ཅང་མི་སྨྲའོ། །རྒྱལ་པོ་ཚངས་བྱིན་གྱིས་ཡང་གཤེད་མ་རྣམས་ལ་སྨྲས་པ། ངས་གཞོན་ནུ་ཡོངས་སུ་བཏང་གིས་ཤེས་ལྡན་དག་སོང་ལ་གཞོན་ནུ་ནགས་ཁྲོད་དུ་མྱུར་དུ་ས་ཐམས་སུ་ཆུག་ཤིག །ལྷ་བཀའ་བཞིན་འཚལ་ཞེས་གཤེད་མའི་མི་རྣམས་ཀྱིས་
ཡང་གཞོན་ནུ་ལྐུགས་འཕྱེ་ཤིང་རྟར་བཅུག་སྟེ་ནགས་ཁྲོད་ག་ལ་བ་དེར་སོང་ནས་ཕྱིན་པ་དང་། དོང་བརྐོ་བར་བརྩམས་སོ། །དེ་ནས་ལྐུགས་འཕྱེས་དེའི་ཚེ་ཚིགས་སུ་བཅད་པ་སྨྲས་པ། ཁ་ལོ་སྒྱུར་བ་ཅི་ཕྱིར་ཁྱོད། །བརྟད་དང་བཅས་པས་དོང་བརྐོ་བྱེད། །ཅི་ཕྱིར་
ཁྱེད་ཅག་དོང་བརྐོ་བ། །དྲིས་པ་ང་ལ་མྱུར་དུ་སྨྲོས། །ཁ་ལོ་སྒྱུར་བས་སྨྲས་པ། རྒྱལ་པོའི་སྲས་བུ་མི་སྨྲ་བ། །ལྐུགས་འཕྱེ་བཙས་ནས་དེ་ཡིས་ནི། །མྱུར་བར་འདི་ནི་ནགས་ཁྲོད་དུ། །དོང་དུ་ཆུག་ཅེས་བཀའ་སྩལ་ཏོ། །དེ་ནས་གཞོན་ནུ་ལྐུགས་འཕྱེ་འདི་སྙམ་
དུ་སེམས་ཏེ། འདི་དག་ནི་དྲག་ཤུལ་ཅན། ལག་པ་དམར་བ། སྣུན་པ་དང་། རབ་ཏུ་སྣུན་པ་ལ་ཞུགས་པ། གཞན་གྱི་སྲོག་གཅོད་པ། གཞན་གྱི་སྲོག་གཅོད་པས་འཚོ་བར་བྱེད་པ་དག་ཡིན་པས། གལ་ཏེ་ན་འདི་དག་གིས་བདག་གསད་པར་འགྱུར་དུ་འོང་ངོ་སྙམ་
དུ་རིག་ནས་དེ་སྐྲག་སྟེ་གཤེད་མ་རྣམས་ལ་སྨྲས་པ། གལ་ཏེ་ལྷས་བདག་ལ་དམ་པ་ཅིག་སྩོལ་ན། བདག་རྐང་པས་གྲོང་ཁྱེར་དུ་འཇུག་ཅིང་ཚིག་ཀྱང་སྨྲའོ། །གཤེད་མ་པ་རྣམས་ཀྱིས་རྒྱལ་པོའི་གན་དུ་སོང་སྟེ་རྒྱས་པར་བརྗོད་པ་དང་། རྒྱལ་པོས་སྨྲས་པ། གཞོན་ནུ་
གལ་ཏེ་རྒྱལ་སྲིད་འདོད་ན་ངས་དེ་ཡང་གཞོན་ནུ་ལ་སྦྱིན་ནོ། །དེ་ནས་རྒྱལ་པོ་ཚངས་བྱིན་གྱིས་ཡིད་དགའ་ཞིང་ཡིད་དགའ་ནས་བློན་པོ་རྣམས་ལ་སྨྲས་པ། ཤེས་ལྡན་དག་དེང་ལ་གྲོང་ཁྱེར་ཐམས་ཅད་མྱུར་དུ་རྡོ་བ་དང་། གསེག་མ་དང་། གྱོ་མོ་མེད་པར་ཞོག་ལ། བདུག་

སྤོས་དང་། ཕྱེ་མ་འཁྲིགས་པ་དང་། རྒྱལ་མཚན་དང་། བ་དན་བསྒྲེང་བ་དང་། མེ་ཏོག་སྣ་ཚོགས་བཀྲམ་པ་གྱིས་ཤིག །རྒྱལ་པོ་རྣམས་ནི་ཚིག་གིས་འགྲུབ་ལ། ལྷ་རྣམས་ནི་སེམས་ཀྱིས་འགྲུབ། རྣལ་འབྱོར་པ་རྣམས་ནི་སེམས་བསྐྱེད་པ་ཙམ་
གྱིས་ཐམས་ཅད་འགྲུབ་པས་བློན་པོ་རྣམས་ཀྱིས་ལྷ་བཀའ་བཞིན་འཚལ་ཞེས་རྒྱལ་པོ་ལས་མཉན་ནས། གྲོང་ཁྱེར་ཐམས་ཅད་རྡོ་བ་དང་། གྱོ་མོ་དང་། གསེག་མ་མེད་པར་བཞག་ཅིང་། བདུག་སྤོས་དང་། ཕྱེ་མ་འཁྲིགས་པ་དང་། རྒྱལ་མཚན་དང་། བ་དན་བསྒྲེང་
བ་དང་། མེ་ཏོག་སྣ་ཚོགས་བཀྲམ་པ་བྱས་སོ། །ལྗོངས་ཀྱི་མི་འབུམ་ཕྲག་དུ་མ་དག་ཀྱང་གཞོན་ནུ་ལྐུགས་འཕྱེ་རྐང་པས་གྲོང་ཁྱེར་དུ་འཇུག་ཅིང་ཚིག་ཀྱང་སྨྲ་བར་འགྱུར་རོ། །ཞེས་ཡ་མཚན་སྐྱེས་ནས་འདུས་པར་གྱུར་ཏོ།། །།འདུལ་བ་རྣམ་པར་འབྱེད་པ། བམ་
པོ་ཉི་ཤུ་དགུ་པ། དེ་ནས་གཞོན་ནུ་ལྐུགས་འཕྱེ་རྐང་པས་གྲོང་ཁྱེར་དུ་ཞུགས་ནས་རྒྱལ་པོ་ཚངས་བྱིན་ག་ལ་བ་དེར་སོང་སྟེ་ཕྱིན་ནས། རྒྱལ་པོ་ཚངས་བྱིན་གྱི་རྐང་པ་གཉིས་ལ་གཏུགས་ཏེ། དེའི་ཚེ་ཚིགས་སུ་བཅད་པ་སྨྲས་པ། བདག་ལྐུགས་མ་ལགས་འཕྱེ་མ་
ལགས། །གླེན་པ་མ་ལགས་བློ་མེད་མིན། །གསལ་བར་བགྱིད་པའི་ཚིག་རྣམས་ཀྱིས། །སྨྲ་བ་བདག་ལགས་མི་དབང་པོ། །བདག་ལྐུགས་མ་ལགས་འཕྱེ་མ་ལགས། །གླེན་པ་མ་ལགས་བློ་མེད་མིན། །དབང་པོ་ཚང་བ་གསལ་བ་དང་། །ལྡན་པ་བདག་ལགས་
མི་དབང་པོ། །རྒྱལ་པོས་སྨྲས་པ། བུ་ཁྱེད་ཅིའི་ཕྱིར་ཚིག་སྨྲ་བར་མི་བྱེད་ཅིང་རྐང་པས་འགྲོ་བར་མི་བྱེད། ལྷ་དེའི་སླད་དུ་གསོན་ཅིག །བདག་གིས་སྔོན་གྱི་ཚེ་རབས་སུ། །དགུང་ལོ་དྲུག་བཅུར་བདག་གིས་ནི། །མི་རྣམས་ནང་དུ་རྒྱལ་ཚབ་ཀྱི། །རྒྱལ་སྲིད་རིགས་
མཐུན་བགྱིད་སྩལ་བས། །དགུང་ལོ་སྟོང་ཕྲག་དྲུག་བཅུ་རུ། །སེམས་ཅན་དམྱལ་བར་རབ་ཏུ་བསྲེགས། །སེམས་དམྱལ་སྡུག་བསྔལ་མི་བཟད་པ། །དྲག་པོ་འཇིགས་རུང་དྲན་གྱུར་ནས། །རྒྱལ་སྲིད་མངོན་པར་མི་འཚལ་ཞིང་། །སླན་ཅད་སེམས་དམྱལ་མཆི་མི་

བགྱི། །ཡབ་ཀྱིས་བདག་ནི་རབ་འབྱུང་བར། །རྗེས་སུ་གནང་བ་མཛད་དུ་གསོལ། །རྒྱལ་པོས་སྨྲས་པ། བུ་དྲང་སྲོང་དག་གང་གི་ཕྱིར་དཀའ་ཐུབ་ཀྱིས་གདུང་བ་དང་། སྦྱིན་སྲེག་དང་། མཆོད་སྦྱིན་བྱེད་པ་ནི་རྒྱལ་སྲིད་ཀྱི་ཕྱིར་ཡིན་ན། ཁྱོད་ཅིའི་ཕྱིར་ལག་མཐིལ་ན་
འདུག་པ་སྤངས་ཏེ་རབ་ཏུ་འབྱུང་བར་བྱེད། དེ་ནས་གཞོན་ནུ་ལྐུགས་འཕྱེས་དེའི་ཚེ་ཚིགས་སུ་བཅད་པ་སྨྲས་པ། ཁོན་གཅུགས་འཐབ་རྩོད་བགྱིད་པ་ཡིས། །འདོད་ལ་སྤྱོད་པ་བདག་མི་འཚལ། །ཁོན་གཅུགས་འཐབ་རྩོད་འཇིགས་བགྱིད་པའི། །ཚངས་སྤྱོད་བདག་གིས་སྤྱད་
པར་བགྱི། །ཀིམ་པའི་འབྲས་བུ་འདྲ་བ་ཡི། །འདོད་པ་སྤྱོད་པར་བདག་མི་འཚལ། །འབྲས་བུ་བདུད་རྩིའི་རོ་བདའ་བའི། །ཚངས་སྤྱོད་བདག་གིས་སྤྱད་པར་བགྱི། །རྒྱལ་པོས་སྨྲས་པ། བདེ་བ་གང་དང་གང་དག་ཉམས་སུ་མྱོང་བར་འགྱུར་བ་དེ་དག་ཐམས་ཅད་ནི་རྒྱལ་པོ་
ཉིད་ཡིན་ན། ཁྱོད་ཅིའི་ཕྱིར་རྒྱལ་སྲིད་སྤངས་ཏེ་རབ་ཏུ་འབྱུང་བར་བྱེད། དེ་ནས་གཞོན་ནུ་ལྐུགས་འཕྱེས་དེའི་ཚེ་ཚིགས་སུ་བཅད་པ་སྨྲས་པ། གང་ལས་སྡུག་བསྔལ་སྐྱེ་འགྱུར་བའི། །བདེ་བ་དེ་ལ་བདེར་མི་སེམས། །གང་ལས་བདེ་བ་སྐྱེ་འགྱུར་བའི། །སྡུག་བསྔལ་དེ་ལ་བདེ་
བར་སེམས། །ཡབ་ཀྱིས་བདག་ནི་དཀའ་ཐུབ་ཀྱི། །ནགས་སུ་མཆི་བ་གནང་བར་མཛོད། །རྒྱལ་པོས་སྨྲས་པ། བུ་འདི་ནི་ཡང་ཏོག་གི་སྟེང་བདུག་སྤོས་དང་། ཕྱེ་མ་འཁྲིགས་པར་མེ་ཏོག་སྣ་ཚོགས་བཀྲམ་ཞིང་གནས་མལ་འཇམ་པོ་ལེགས་པར་བཤམས་པ་དག་ཏུ་
གང་ནས་ཀྱང་འཇིགས་པ་མེད་པར་ཉལ་བར་བྱ་ཞིང་། སིལ་སྙན་གྱི་སྒྲ་སྙན་པ་དག་གིས་སད་པར་བྱ་བ་དང་། གོས་འཇམ་པོ་བགོ་བར་བྱ་བ་དང་། ཞིམ་པོ་བཟའ་བར་བྱ་བ་དང་། ཞིམ་པོ་བཏུང་བར་བྱ་བ་ཡིན་ན་དགོན་པར་རབ་ཏུ་བྱུང་བས་རྟག་ཏུ་ཤིང་དྲུང་དུ་རྩྭ་བཏིང་
བའམ། ལོ་མ་བཏིང་བ་ལ་བྲེད་ངས་ཀྱིས་འཇིགས་པ་དང་བཅས་པའི་སེམས་ཀྱིས་རི་དགས་གདུག་པ་དག་དང་ལྷན་ཅིག་ཉལ་བར་བྱ་བ་དང་། ཝའི་སྐད་ཀྱིས་སད་པར་བྱ་བ་དང་། གཡང་གཞི་དང་ཤིང་ཤུན་བགོ་བར་བྱ་བ་དང་། རྩ་བ་དང་འབྲས་བུ་དག་བཟའ་བར་

བྱ་བ་དང་། ཆུ་དྲོན་པོ་རྙོག་པ་ཅན་དག་བཏུང་བར་བྱ་དགོས་ན། ཅིའི་ཕྱིར་ཁྱོད་རྒྱལ་སྲིད་སྤངས་ཏེ་རབ་ཏུ་འབྱུང་བར་བྱེད། དེ་ནས་གཞོན་ནུ་ལྐུགས་འཕྱེས་དེའི་ཚེ་ཚིགས་སུ་བཅད་པ་སྨྲས་པ། ནགས་ན་ཤིང་ཤུན་རྩྭ་གྱོན་ཞིང་། །རྩ་བ་འབྲས་བུ་འཆའ་བ་
དང་། །རི་དགས་གདུག་པ་རྣམས་དང་ནི། །ལྷན་ཅིག་གནས་པ་མཆོག་ལགས་ཀྱི། །འཇིག་རྟེན་ཕ་རོལ་འཇིགས་བགྱིད་པའི། །མཁས་པས་རྒྱལ་སྲིད་སླད་དུ་ནི། །གསོད་དང་འཆིང་དང་བརྡེག་པ་དག །བགྱིད་པ་དེ་ལྟ་མ་ལགས་ཀྱིས། །ཡབ་ཀྱིས་བདག་ནི་
དཀའ་ཐུབ་ཀྱི། །ནགས་སུ་མཆི་བ་གནང་བར་མཛོད། །རྒྱལ་པོས་སྨྲས་པ། བུ་ཇེ་ཁོ་བོའི་ཐེ་ཚོམ་གསུམ་པོ་འདི་དག་ཆོད་ཅིག་དང་། དེའི་འོག་ཏུ་ཁྱོད་རབ་ཏུ་འབྱུང་བ་མི་དཀའོ། །ཁྱོད་ཀྱིས་གྲོང་ཁྱེར་བཱ་རཱ་ཎ་སཱིའི་འབྱོར་པ་དང་རྒྱས་པ་མཐོང་ནས་འདི་སྐད་ཅེས་བཱ་རཱ་ཎ་སཱི་
འདི་སྟོང་པ་ཡིན་ནམ། འོན་ཏེ་གནས་པ་ཡིན་ཞེས་སྨྲས་པ་དེ་ཁྱོད་ཀྱིས་ཅི་ལས་བསམས་ཏེ་སྨྲས། ལྷ་དེའི་སླད་དུ་གསོན་ཅིག །ལྷས་བདག་རྒྱུ་མ་མཆིས་པར་ཁུམ་ཤིག་ཅེས་བཀའ་སྩལ་ན། འགའ་ཡང་ཅིའི་སླད་དུ་གཞོན་ནུ་འདི་དགུམ་པར་བགྱི་ཞེས་ཆོས་དང་ལྡན་པའི་
ཚིག་མི་སྨྲས་པས་བདག་གིས་དེ་ལས་བསམས་ཏེ་སྨྲས་སོ། །བུ་མ་ཉེས་སོ། །ཁྱོད་ཀྱིས་མིའི་རོ་མི་བཞིས་ཁྱེར་བ་ཞིག་མཐོང་ནས་འདི་སྐད་ཅེས་ཅི་རོ་འདི་ཤི་བ་ཉིད་ཀྱི་རོ་ཡིན་ནམ། འོན་ཏེ་གསོན་པོའི་རོ་ཡིན་ཞེས་སྨྲས་པ། དེ་ཁྱོད་ཀྱིས་ཅི་ལས་བསམས་ཏེ་སྨྲས། ལྷ་དེའི་
སླད་དུ་གསོན་ཅིག །གང་ནོངས་པ་བགྱིད་པའི་ལས་བགྱིས་པའི་རོ་དེ་ནི་གུམ་པ་ཉིད་ཀྱི་རོ་ལགས་ལ། གང་ལེགས་པ་བགྱིད་པའི་ལས་བགྱིས་པའི་རོ་དེ་ནི་གསོན་པོའི་རོ་ལགས་པས་བདག་གིས་དེ་ལས་བསམས་ཏེ་སྨྲས་སོ། །བུ་མ་ཉེས་སོ། །ཁྱོད་ཀྱིས་འབྲུའི་ཕུང་པོ་ཆེན་
པོ་ཞིག་མཐོང་བ་ན། འདི་སྐད་ཅེས་གལ་ཏེ་འབྲུའི་ཕུང་པོ་འདི་དང་པོ་ཉིད་ནས་དྲུང་མ་ཟོས་ན་ཆེན་པོར་འགྱུར་རོ་ཞེས་སྨྲས་པ་དེ་ཁྱོད་ཀྱིས་ཅི་ལས་བསམས་ཏེ་སྨྲས། ལྷ་དེའི་སླད་དུ་གསོན་ཅིག །ལྷ་ཞིང་པ་གང་དག་འབྲུ་སྐྱིན་པོ་བགྱིས་ཏེ་འཚལ་ནས། ལས་བགྱིད་པ་དེ་དག་ནི་

འབྲུ་སྨིན་པ་ན་འབྲུའི་ཕུང་པོ་ཆེན་པོ་བུ་ལོན་པ་དག་ལ་འབུལ་བར་བགྱིས་པས་དེ་དག་གིས་ནི་དང་པོ་ཉིད་ནས་དྲུང་འཚལ་བ་ལགས་སོ། །དེ་བཞིན་དུ་དགེ་བ་བཅུའི་ལས་ཀྱི་ལམ་དག་གིས་མི་ཉིད་རྙེད་པ་ན། གལ་ཏེ་དེ་རྙེད་ནས་དགེ་བའི་ལས་ཀྱི་ལམ་སོགས་པར་མི་བགྱིད་པ་དེའི་
སྔོན་གྱི་དགེ་བའི་རྩ་བ་དེ་ཡང་རྒྱུན་ཆད་པར་འགྱུར་ཞིང་། དགེ་བའི་རྩ་བ་རྒྱུན་ཆད་ན་བདེ་འགྲོ་ལས་ཡོངས་སུ་ཉམས་ཤིང་ངན་འགྲོ་ལ་རྟེན་པར་འགྱུར་བས་བདག་གིས་དེ་ལས་བསམས་ཏེ་སྨྲས་སོ། །དེ་ནས་རྒྱལ་པོས་བུའི་ཚིག་དེ་ཐོས་ནས། མཆི་མས་བརྣངས་པས་བུ་
བླངས་ཏེ་ཚིག་སྨྲས་པ། བརྟུལ་ཞུགས་དེས་འཆང་རང་གི་ཆོས་སྤྱོད་ཅིག །བདག་ཀྱང་ཁྱོད་ཀྱི་སློབ་མར་ཁས་ལེན་ནོ། །དེ་ནས་རྒྱལ་པོ་ཚངས་བྱིན་གྱིས་བློན་པོ་རྣམས་ལ་སྨྲས་པ། ཤེས་ལྡན་དག་གལ་ཏེ་གཞོན་ནུ་ལྐུགས་འཕྱེ་རབ་ཏུ་མ་བྱུང་ན་ཅིར་འགྱུར། ལྷ་རྒྱལ་
པོར་འགྱུར་རོ། །ཁྱོད་ཀྱི་བུ་དག་ཅིར་འགྱུར། ལྷ་ཞབས་འབྲིང་བར་འགྱུར་རོ། །འོ་ན་ད་དེ་རབ་ཏུ་འབྱུང་ན་ཁྱེད་ཀྱི་བུ་དེ་དག་ཅིའི་ཕྱིར་རབ་ཏུ་མི་འབྱུང་། ལྷ་བཀའ་སྩལ་པ་བཞིན་འཚལ་ལོ། །དེའི་ཚེ་ན་གྲོང་ཁྱེར་བཱ་རཱ་ཎ་སཱི་དང་ཧ་ཅང་མི་རིང་བ་ན་བསྟི་གནས་ཤིག་ཡོད་པ་
དེ་ན་དྲང་སྲོང་བྱམས་པའི་བདག་ཉིད་ཅན། སྙིང་རྗེ་དང་ལྡན་པ། བརྩེ་བ་དང་ལྡན་པ། སེམས་ཅན་ལ་བྱམས་པ་ཞིག་འདུག་ནས་གཞོན་ནུ་ལྐུགས་འཕྱེ་འཁོར་ལྔ་བརྒྱ་དང་ལྡན་པ་འབྱོར་པ་ཆེན་པོས་དྲང་སྲོང་དེའི་དྲུང་དུ་རབ་ཏུ་བྱུང་ངོ་། །དྲང་སྲོང་དེས་ལྐུགས་འཕྱེ་ལ་གདམས་
ངག་བྱིན་ནས་ལྐུགས་འཕྱེས་བརྩལ་བ་དང་། འབད་པ་དང་། བསྒྲིམ་པ་བྱས་ནས་མངོན་པར་ཤེས་པ་ལྔ་མངོན་སུམ་དུ་བྱས་སོ། །དེ་ནས་དུས་གཞན་ཞིག་ན་དྲང་སྲོང་དེ་དུས་ཀྱི་ཆོས་དང་ལྡན་པར་གྱུར་ནས་གཞོན་ནུ་ལྐུགས་འཕྱེས་དྲང་སྲོང་དེའི་ལུས་སྤོས་ཀྱི་ཤིང་སྣ་ཚོགས་
ཀྱི་ཕུང་པོར་བཅེར་ཏེ་བསྲེགས་ནས་མཆོད་པ་དང་བསྙེན་བཀུར་ཆེན་པོ་བྱས་སོ། །གཞོན་ནུ་ལྐུགས་འཕྱེས་བྲམ་ཟེའི་ཁྱེའུ་ལྔ་བརྒྱ་པོ་དེ་དག་ཡོངས་སུ་བསྐྱང་བར་བརྩམས་ནས། དེའི་མིང་གཞོན་ནུ་ལྐུགས་འཕྱེ་ཞེས་བྱ་བ་གང་ཡིན་པ་དེ་ནུབ་པར་གྱུར་ཅིང་། སྟོན་པ་ལྐུགས་

འཕྱེ་སྟོན་པ་ལྐུགས་འཕྱེ་ཞེས་བྱ་བའི་མིང་ཆགས་པར་གྱུར་ཏོ། །དེ་ནས་དུས་གཞན་ཞིག་ན་སྟོན་པ་ལྐུགས་འཕྱེ་འདི་སྙམ་དུ་སེམས་ཏེ། ཅིའི་ཕྱིར་བྲམ་ཟེའི་ཁྱེའུ་ལྔ་བརྒྱ་པོ་འདི་དག་མངོན་པར་ཤེས་པ་ལྔ་མངོན་སུམ་དུ་མི་བྱེད་སྙམ་ནས་དེ་འདི་སྙམ་དུ་སེམས་
ཏེ། འདི་དག་གཡང་གཞི་དང་། ཤིང་ཤུན་དང་། དབྱུག་གུ་དང་། རིལ་བ་དང་། བླུགས་གཟར་དང་། དགང་གཟར་ལྷག་པ་འཆང་ཞིང་། ཤིན་ཏུ་ལོ་མ་དང་། ཁྲེ་རྒོད་དང་། ཨུཏྤ་ལའི་རྩ་བ་ལ་སྦྱོར་བའི་རྗེས་སུ་བརྩོན་པར་གནས་པའི་ཕྱིར་རོ་སྙམ་མོ། །དེ་ནས་
སྟོན་པ་ལྐུགས་འཕྱེ་འདི་སྙམ་དུ་སེམས་ཏེ། གལ་ཏེ་བདག་གིས་བྲམ་ཟེའི་ཁྱེའུ་འདི་དག་སྨད་ན་དབྲལ་དཀའ་བར་འགྱུར་རོ་སྙམ་ནས། བྱང་ཆུབ་སེམས་དཔའ་རྣམས་ནི་གདུལ་བ་ལ་མཁས་པ་བླ་ན་མེད་པ་ཡིན་པས་དེ་ནས་སྟོན་པ་ལྐུགས་འཕྱེས་བྲམ་ཟེའི་ཁྱེའུ་རྣམས་ལ་
སྨྲས་པ། བྲམ་ཟེའི་ཁྱེའུ། དགུང་ཟླ་བ་གསུམ་པོ་འདི་ལ་ནང་དུ་ཡང་དག་འཇོག་འདོད་ཀྱིས་ངའི་གན་དུ་བྲམ་ཟེའི་ཁྱེའུ་རྩ་བ་དང་། འབྲས་བུ་སྟོབས་པ་གཅིག་དང་འདི་ཉིད་ཀྱི་གསོ་སྦྱོང་བཅྭ་ལྔ་པའི་ཚེ་མ་གཏོགས་པར་གང་གིས་ཀྱང་ཉེ་བར་འོང་བར་མི་བྱའོ། །བྲམ་ཟེའི་ཁྱེའུ་
རྣམས་ཀྱིས་ཀྱང་དབྱར་གྱི་ནང་དག་ཏུ་བྲམ་ཟེའི་ཁྱེའུ་རྩ་བ་དང་། འབྲས་བུ་སྟོབས་པ་གཅིག་དང་། འདི་ཉིད་ཀྱི་གསོ་སྦྱོང་བཅྭ་ལྔ་པའི་ཚེ་མ་གཏོགས་པར་བདག་ཅག་ལས་བྲམ་ཟེའི་ཁྱེའུ་གང་གིས་ཀྱང་མཁན་པོ་ལ་ལྟར་འགྲོ་བར་མི་བྱའོ། །དབྱར་གྱི་ནང་དག་ཏུ་བྲམ་ཟེའི་ཁྱེའུ་
རྩ་བ་དང་། འབྲས་བུ་སྟོབས་པ་གཅིག་དང་འདི་ཉིད་ཀྱི་གསོ་སྦྱོང་བཅྭ་ལྔ་པའི་ཚེ་མ་གཏོགས་པར་བདག་ཅག་ལས་བྲམ་ཟེའི་ཁྱེའུ་གང་མཁན་པོ་ལ་ལྟར་འགྲོ་བ་དེ་བདག་ཅག་གིས་ལྟུང་བྱེད་ཀྱི་ལྟུང་བ་བྱེད་དུ་གཞུག་གོ་ཞེས་ཁྲིམས་སུ་བྱ་བ་བཅས་སོ། །སྟོན་པ་ལྐུགས་འཕྱེས་
ཟླ་བ་གསུམ་ནང་དུ་ཡང་དག་འཇོག་ལ་ཞུགས་པ་ན། དེའི་གན་དུ་བྲམ་ཟེའི་ཁྱེའུ་རྩ་བ་དང་། འབྲས་བུ་སྟོབས་པ་གཅིག་དང་། དེ་ཉིད་ཀྱི་གསོ་སྦྱོང་བཅྭ་ལྔ་པའི་ཚེ་མ་གཏོགས་པར་བྲམ་ཟེའི་ཁྱེའུ་གང་ཡང་ཉེ་བར་མི་འགྲོའོ། །སྟོན་པ་ལྐུགས་འཕྱེས་ཐག་རིང་པོ་ཁོ་ན་

ནས་རི་དགས་མཐོང་ངོ་། །མཐོང་ནས་ཀྱང་འདི་སྐད་ཅེས་སྨྲས་སོ། །རི་དགས་ཚུར་ཤོག །རི་དགས་ཁྱོད་འོངས་པ་ལེགས་སོ། །ཁྱོད་དང་ཁོ་བོ་མཚུངས་ཏེ། ཁྱོད་ཀྱང་ལྟོ་ཁེངས་པའི་ཟས་ཀྱིས་ཆོག་ཤེས་པ་དང་། ཀུན་ཏུ་ཆོག་ཤེས་པ་ཡིན་ལ། ཁོ་བོ་ཡང་ལྟོ་ཁེངས་པའི་བསོད་
སྙོམས་ཀྱིས་ཆོག་ཤེས་པ་དང་། ཀུན་ཏུ་ཆོག་ཤེས་པ་ཡིན་ནོ། །འདི་ན་ཁ་ཅིག་ཤིན་ཏུ་ལོ་མ་དང་། ཁྲེ་རྒོད་དང་། ཨུཏྤལའི་རྩ་བ་ལ་སྦྱོར་བའི་རྗེས་སུ་བརྩོན་པར་གནས་པ་དག་ནི་མ་ཡིན་ནོ། །དེ་ནས་བྲམ་ཟེའི་ཁྱེའུ་དེ་དག་འདི་སྙམ་དུ་སེམས་ཏེ། གོར་མ་ཆག་པར་མཁན་པོའི་
བརྟུལ་ཞུགས་རྫོགས་པར་གྱུར་ཏེ། འདི་ལྟར་མཁན་པོ་རི་དགས་དང་ལྷན་ཅིག་ཕེབས་པར་སྨྲ་བར་བྱེད་དོ་སྙམ་དུ་རིག་ནས་སྟོན་པ་ལྐུགས་འཕྱེ་ག་ལ་བ་དེར་དོང་སྟེ་ཕྱིན་ནས། སྟོན་པ་ལྐུགས་འཕྱེའི་རྐང་པ་གཉིས་ལ་ཕྱག་འཚལ་ཏེ་མཐའ་གཅིག་ཏུ་འཁོད་དོ། །དེ་ནས་སྟོན་པ་
ལྐུགས་འཕྱེ་ཅང་མི་སྨྲ་བར་འདུག་གོ། །དེ་ནས་བྲམ་ཟེའི་ཁྱེའུ་དེ་དག་འདི་སྙམ་དུ་སེམས་ཏེ། མཁན་པོ་དུད་འགྲོ་རྣམས་དང་ལྷན་ཅིག་ཕེབས་པར་སྨྲ་བར་བྱེད་ཀྱི། མི་རྣམས་དང་མི་བྱེད་གོར་མ་ཆག་སྙམ་ནས་སྟན་ལས་ལངས་ཏེ་དོང་ངོ་། །དེ་ནས་རི་དགས་ཀྱི་བརྟུལ་ཞུགས་
ཅན་ཞིག་སྟོན་པ་ལྐུགས་འཕྱེ་ག་ལ་བ་དེར་དོང་བ་དང་། སྟོན་པ་ལྐུགས་འཕྱེས་རི་དགས་ཀྱི་བརྟུལ་ཞུགས་ཅན་དེ་ཐག་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་འདི་སྐད་ཅེས་སྨྲས་སོ། །རི་དགས་ཀྱི་བརྟུལ་ཞུགས་ཅན་ཚུར་ཤོག །རི་དགས་ཀྱི་བརྟུལ་ཞུགས་ཅན་ཁྱོད་
འོངས་པ་ལེགས་སོ། །ཁྱོད་དང་ཁོ་བོ་མཚུངས་ཏེ། ཁྱོད་ཀྱང་གཡང་གཞི་གཅིག་འཆང་ལ། ཁོ་བོ་ཡང་གཡང་གཞི་གཅིག་འཆང་ངོ་། །ཁྱོད་ཀྱང་ཤིང་ཤུན་གཅིག་དང་། དབྱུག་གུ་གཅིག་དང་། རིལ་བ་གཅིག་དང་། བླུགས་གཟར་དང་། དགང་གཟར་གཅིག་འཆང་
ལ། ཁོ་བོ་ཡང་ཤིང་ཤུན་གཅིག་དང་། དབྱུག་གུ་གཅིག་དང་། རིལ་བ་གཅིག་དང་། བླུགས་གཟར་དང་། དགང་གཟར་གཅིག་འཆང་ངོ་། །ཁྱོད་ཀྱང་ལྟོ་ཁེངས་པའི་བསོད་སྙོམས་ཀྱིས་ཆོག་ཤེས་པ་དང་། ཀུན་དུ་ཆོག་ཤེས་པ་ཡིན་ལ། ཁོ་བོ་ཡང་ལྟོ་ཁེངས་

པའི་བསོད་སྙོམས་ཀྱིས་ཆོག་ཤེས་པ་དང་། ཀུན་དུ་ཆོག་ཤེས་པ་ཡིན་ནོ། །འདི་ན་ཁ་ཅིག་གཡང་གཞི་དང་། ཤིང་ཤུན་དང་། དབྱུག་གུ་དང་། རིལ་བ་དང་། བླུགས་གཟར་དང་། དགང་གཟར་ལྷག་པར་འཆང་བ་དག་ནི་མ་ཡིན་ནོ། །དེ་ནས་
བྲམ་ཟེའི་ཁྱེའུ་དེ་དག་འདི་སྙམ་དུ་སེམས་ཏེ། འདི་ལྟར་མཁན་པོས་འདོད་པ་ཆེ་བ་སྨད་ཅིང་། འདོད་པ་ཆུང་བ་ཉིད་བསྟོད་པ་ནི་དོན་གྱིས་ན་མཁན་པོས་བདག་ཅག་སྨད་པ་ཡིན་གྱིས། བདག་ཅག་གིས་གཡང་གཞི་དང་། ཤིང་ཤུན་དང་། དབྱུག་གུ་དང་། རིལ་བ་
དང་། བླུགས་གཟར་དང་། དགང་གཟར་ལྷག་པ་དག་ཆུ་ཀླུང་ཟློག་བྱེད་ཀྱི་ནང་དུ་བོར་ཏེ། མཁན་པོ་ག་ལ་བ་དེར་འདོང་ངོ་སྙམ་ནས། དེ་དག་གི་གཡང་གཞི་དང་། ཤིང་ཤུན་དང་། དབྱུག་གུ་དང་། རིལ་བ་དང་། བླུགས་གཟར་དང་། དགང་གཟར་ལྷག་པ་དག་ཆུ་ཀླུང་
ཟློག་བྱེད་དུ་བོར་ནས་རྒྱུད་དག་པ་དང་། ཡོ་བྱད་བསྙུངས་པའི་ཚུལ་དག་གིས་སྟོན་པ་ལྐུགས་འཕྱེ་ག་ལ་བ་དེར་དོང་སྟེ་ཕྱིན་ནས། སྟོན་པ་ལྐུགས་འཕྱེའི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །དེ་ནས་སྟོན་པ་ལྐུགས་འཕྱེས་བྲམ་ཟེའི་ཁྱེའུ་དེ་དག་
གི་བསམ་པ་དང་། བག་ལ་ཉལ་དང་། ཁམས་དང་རང་བཞིན་ཁོང་དུ་ཆུད་ནས། འདི་ལྟར་བྲམ་ཟེའི་ཁྱེའུ་ལྔ་བརྒྱ་པོ་དེ་དག་གིས་མངོན་པར་ཤེས་པ་ལྔ་མངོན་སུམ་དུ་བྱས་པར་གྱུར་པ་དེ་ལྟར་ཆོས་བསྟན་པ་བྱས་སོ། །དགེ་སློང་དག་དེའི་ཚེ་དེའི་དུས་ན་སྟོན་པ་ལྐུགས་འཕྱེ་
གང་ཡིན་པ་དེ་ནི་ང་བྱང་ཆུབ་སེམས་དཔའི་སྤྱོད་པ་ལ་འཇུག་པ་ཡིན་ནོ། །དེའི་ཚེ་དེའི་དུས་ན་བྲམ་ཟེའི་ཁྱེའུ་ལྔ་བརྒྱ་པོ་གང་དག་ཡིན་པ་དེ་དག་ནི་ཤཱཀྱ་གཞོན་ནུ་ལྔ་བརྒྱ་པོ་འདི་དག་ཡིན་ནོ། །དེའི་ཚེ་དེའི་དུས་ན་རི་དགས་ཀྱི་བརྟུལ་ཞུགས་ཅན་གང་ཡིན་པ་དེ་ནི་དགེ་སློང་ཉེ་སྡེ་ཡིན་
ཏེ། དེའི་ཚེ་ཡང་ངས་ཤཱཀྱ་གཞོན་ནུ་ལྔ་བརྒྱ་པོ་འདི་དག་རིགས་ཀྱི་བུ་ཉེ་སྡེ་ལ་བརྟེན་ནས་འདོད་པ་ཆེ་བ་དང་ཕྲལ་ཞིང་འདོད་པ་ཆུང་བ་ཉིད་ལ་བཀོད་དེ། མངོན་པར་ཤེས་པ་ལྔ་པོ་དག་ལ་གཞག་པར་བྱས་ལ་ད་ལྟར་ཡང་ངས་ཤཱཀྱ་གཞོན་ནུ་ལྔ་བརྒྱ་པོ་འདི་དག་རིགས་ཀྱི་བུ་ཉེ་

སྡེ་ལ་བརྟེན་ནས་འདོད་པ་ཆེ་བ་དང་ཕྲལ་ཞིང་འདོད་པ་ཆུང་བ་ཉིད་ལ་བཀོད་དེ། ཤིན་ཏུ་མཐར་ཐུག་པའི་གྲུབ་པ་དང་བདེ་བ་མྱ་ངན་ལས་འདས་པ་ལ་གཞག་པ་མཛད་དོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་
ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་དང་། འདྲེན་མ་སྤངས་ནས་ལས་གཅིག་ཏུ་དཀར་བ་དག་ལ་
བརྩལ་བར་བྱ་སྟེ། དགེ་སློང་དག་དེ་ལྟར་ཁྱོད་ཀྱིས་བསླབ་པར་བྱའོ། །འཁྲུར་འཇུག་པའི་སྤང་བ་སྟེ་བཞི་པ་རྫོགས་སྷོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་
གི་ཚེ་བཅོམ་ལྡན་འདས་ཀྱིས་དགེ་སློང་མ་རྣམས་ཀྱིས་དགོན་པར་གནས་པ་མ་བཀག་པ་དེའི་ཚེ་ན་དགེ་སློང་མ་རྣམས་ཀྱང་དགོན་པའི་གནས་སུ་དོང་སྟེ། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པའི་བདེ་བ་དག་ཉམས་སུ་མྱོང་
བར་བྱེད་དོ། །དེ་ནས་དགེ་སློང་མ་ཨུཏྤ་ལའི་མདོག་འཁོར་ལྔ་བརྒྱ་དང་ནགས་མུན་པ་ཅན་ག་ལ་བ་དེར་སོང་སྟེ་ཕྱིན་ནས་ཤིང་ལྗོན་པའི་དྲུང་ཞིག་ཏུ་བརྟེན་ཏེ་སྐྱིལ་མོ་ཀྲུང་ཕྱེད་ཀྱིས་འདུག་ནས་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་
འཇུག་པའི་བདེ་བ་དག་ཉམས་སུ་མྱོང་བར་བྱེད་དོ། །དགེ་སློང་མ་དེ་དག་ཕྱེ་མ་རེད་མཉན་ཡོད་དུ་འཇུག་འདོད་ནས་སྨྲས་པ། འཕགས་མ་ཨུཏྤ་ལའི་མདོག་བསླང་བར་བྱའོ། །ཁ་ཅིག་གིས་སྨྲས་པ། འཕགས་མ་ཨུཏྤ་ལའི་མདོག་ནི་མཐུ་ཆེ་བ་རྫུ་འཕྲུལ་ཆེ་བ་ཡིན་
པས་དང་པོ་ཁོ་ནར་དབྱར་ཁང་དུ་འགྲོ་བར་འགྱུར་བའི་གནས་ཀྱང་ཡོད་དོ་ཞེས་ཟེར་ནས་དེ་དག་གིས་དེ་མ་བསླང་བ་ཁོ་ནར་དོང་ངོ་། །ཨུཏྤ་ལའི་མདོག་ཀྱང་ཕྱེ་མ་རེད་ལངས་ནས་དགེ་སློང་མ་དེ་དག་ཐམས་ཅད་དོང་བར་མཐོང་བ་དང་། དེས་བསམས་པ། ཅི་ད་འགྲོའམ། འོན་

ཏེ་འདི་ཉིད་དུ་འདུག་སྙམ་ནས་དེ་དེ་ཉིད་དུ་འགོག་པ་ལ་སྙོམས་པར་ཞུགས་སོ། །གཡོན་ཅན་ལྔ་བརྒྱ་ཙམ་གྱིས་ལས་དག་བྱས་ནས་ནགས་མུན་པ་ཅན་དུ་ལྷགས་ཏེ། དེ་དག་གིས་སྨྲས་པ། བདག་ཅག་ལས་ཉིས་བརྒྱ་ལྔ་བཅུས་ནི་སྐལ་བ་
དག་བགོ་བར་བྱའོ། །ཉིས་བརྒྱ་ལྔ་བཅུས་ནི་ནགས་བྱུལ་བར་བྱའོ་ཞེས་དེ་དག་ལས་ཉིས་བརྒྱ་ལྔ་བཅུས་ནི་སྐལ་བ་དག་བགོ་བར་བརྩམས། ཉིས་བརྒྱ་ལྔ་བཅུས་ནི་ནགས་བྱུལ་བར་བརྩམས་པ་དང་། དེ་དག་གིས་ཨུཏྤ་ལའི་མདོག་འདུག་པ་མཐོང་ངོ་། །དེ་
ན་ཁ་ཅིག་ན་རེ་ཤེས་ལྡན་དག་འདི་ནི་ཐོ་ཡོར་ཞིག་ཡིན་ནོ་ཞེས་ཟེར། ཁ་ཅིག་ན་རེ་འདི་ནི་མི་ཞིག་ཡིན་ནོ་ཞེས་ཟེར། ཁ་ཅིག་ན་རེ་འདི་ནི་དགེ་སློང་ཞིག་ཡིན་ནོ་ཞེས་ཟེར་རོ། །དེ་ན་དགེ་སློང་གི་རྒྱུས་ཤེས་པ་ཞིག་འདུག་པ་དེས་སྨྲས་པ། འདི་ནི་དགེ་སློང་མ་ཞིག་
ཡིན་གྱི་དགེ་སློང་ནི་མ་ཡིན་ནོ། །ཇི་ལྟར་ཤེས། དགེ་སློང་དག་ནི་སྐྱིལ་མོ་ཀྲུང་གིས་འདུག་ལ། དགེ་སློང་མ་རྣམས་ནི་སྐྱིལ་མོ་ཀྲུང་ཕྱེད་ཀྱིས་འདུག་གོ། །དེ་དག་ངོ་མཚར་སྐྱེས་ནས་ཤེས་ལྡན་དག་འདི་ལྟ་བུའི་ནགས་འཇིགས་སུ་རུང་བའི་ནང་ན་དགེ་སློང་མ་གཅིག་
པུ་མཚན་མོ་གནས་པར་ཁས་བླངས་པ་ལྟོས་ཞེས་ཟེར་རོ། །དེ་དག་དམག་དཔོན་གྱི་གན་དུ་སོང་བ་དང་། དམག་དཔོན་གྱིས་དེ་དག་ལ་དྲིས་པ། ཤེས་ལྡན་དག་ཁྱེད་ཀྱི་ནགས་མུན་པ་ཅན་འདི་ན་ངོ་མཚར་ཅུང་ཟད་མཐོང་བ་ཡོད་དམ་མཆིས་ཏེ། འདི་ལྟ་བུའི་ནགས་
འཇིགས་སུ་རུང་བའི་ནང་ན། དགེ་སློང་མ་གཅིག་པུ་མཚན་མོ་གནས་པར་ཁས་བླངས་པ་མཆིས་སོ། །དེ་བལྟས་འདོང་ངོ་ཞེས་དེ་དག་དེའི་དྲུང་དུ་དོང་བ་དང་། དམག་དཔོན་གྱིས་དགེ་སློང་མ་ཨུཏྤ་ལའི་མདོག་གཟུགས་བཟང་བ། བལྟ་ན་སྡུག་པ། མཛེས་པ་མཐོང་
ངོ་། །མཐོང་ནས་ཀྱང་མངོན་པར་དད་པར་གྱུར་ནས་དེ་མངོན་པར་དད་པ་སྐྱེས་པས་སྨྲས་པ། ཀྱེ་མ་དགེ་སློང་མ་འདི་ནི་གཉིག་ནས་བཟང་བ་ཡིན་ཏེ། མཚན་མོ་ཟླ་ཉི་མོ་ལྟར་འདུག་པ་གང་ཡིན་པ་དང་། གཟུགས་བཟང་བ། བལྟ་ན་སྡུག་པ། མཛེས་པ་གང་ཡིན་པས་སོ་

ཞེས་དེ་བསླང་བར་བརྩམས་པ་དང་། དེ་དག་གིས་སྨྲས་པ། ཅིའི་ཕྱིར་འདི་སློང་བར་བྱེད། ཟས་སྦྱིན་པར་བྱའོ། །དགེ་སློང་གི་རྒྱུས་ཤེས་པ་གཅིག་གིས་སྨྲས་པ། འདི་ནི་དུས་མ་ཡིན་པར་མི་ཟའོ། །དམག་དཔོན་གྱིས་སྨྲས་པ། ཅིའི་ཕྱིར། དེས་སྨྲས་
པ། འདི་ནི་དུས་མ་ཡིན་པའི་ཟས་སྤངས་པ་ཡིན་ནོ། །དམག་དཔོན་གྱིས་སྨྲས་པ། ཀྱེ་མ་དགེ་སློང་མ་འདི་ནི་གཉིས་ཀ་ནས་བཟང་བ་ཡིན་ཏེ། གཟུགས་བཟང་བ། བལྟ་ན་སྡུག་པ། མཛེས་པ་གང་ཡིན་པ་དང་། དུས་མ་ཡིན་པའི་ཟས་སྤངས་པ་གང་
ཡིན་པས་སོ། །ཡང་སྨྲས་པ། འདི་ལ་ཆང་བླུད་པར་བྱའོ། །དགེ་སློང་གི་རྒྱུས་ཤེས་པ་དེས་སྨྲས་པ། འདི་ནི་མྱོས་པར་འགྱུར་བའི་བཏུང་བ་སྤངས་པ་ཡིན་ནོ། །དམག་དཔོན་གྱིས་སྨྲས་པ། ཀྱེ་མ་དགེ་སློང་མ་འདི་ནི་གཉིག་ནས་བཟང་བ་ཡིན་ཏེ། གཟུགས་
བཟང་བ། བལྟ་ན་སྡུག་པ། མཛེས་པ་གང་ཡིན་པ་དང་། མྱོས་པར་འགྱུར་བའི་བཏུང་བ་སྤངས་པ་གང་ཡིན་པས་སོ། །ཡང་སྨྲས་པ། ཁོ་བོས་ཡོན་གནས་ཀྱི་ཞིང་འདི་ལྟ་བུ་ལ་བསོད་སྙོམས་ཀྱིས་བསྒྲུབ་པར་མ་ནུས་སོ་ཞེས་དེས་རས་ཡུག་ཆེན་པོ་ལ་འོས་པ་
གཅིག་དང་། བསོད་སྙོམས་ཀྱི་ཕུད་ཅིག་ཕུལ་ནས་ཤིང་ལྗོན་པའི་ཡལ་ག་ལ་བཏགས་ཏེ་བཞག་ནས་སྨྲས་པ། འཕགས་མ་འདི་ལྟར་ཁྱོད་ལ་མི་མཁྱེན་པ་དང་། མི་གཟིགས་པ་དང་། མི་རིག་པ་དང་། རྣམ་པར་མི་མཁྱེན་པ་ཅི་ཡང་མི་མངའ་བས་བདག་གིས་
ཁྱོད་ལ་བསོད་སྙོམས་དང་ན་བཟའ་འདི་འབུལ་ལོ་ཞེས་སྨྲས་ཏེ་སོང་ངོ་། །ཨུཏྤ་ལའི་མདོག་ནང་པར་སྔར་ལངས་པས་སྐྱེ་བོ་ཕལ་པོ་ཆེའི་རྗེས་ཤུལ་མཐོང་ནས་དེས་བསམས་པ་དང་། གཡོན་ཅན་ལྔ་བརྒྱ་ཉེ་བར་འོངས་པར་མཐོང་ནས་མི་མཛེས་པ་འགའ་ཞིག་རིག་པར་མ་
བྱས་སམ་སྙམ་ན་འགའ་ཡང་མ་བྱས་པར་མཐོང་ངོ་། །ཤིང་ལྗོན་པའི་ཡལ་ག་ལ་རས་ཡུག་ཆེན་དང་། བསོད་སྙོམས་བཏགས་ཏེ་བཞག་པ་མཐོང་ནས་དེས་བསམས་པ། འདི་ནི་དད་པར་གྱུར་པ་རྣམས་ཀྱིས་དད་པའི་དབང་དུ་བྱས་པ་ཡིན་ནོ་སྙམ་ནས་དེས་བསམས་པ།

གལ་ཏེ་བྱིན་ལེན་སྟོབས་པ་ལ་བསྡད་ན་བྱའམ། སྤྲེའུས་ཆུད་གཟན་པར་འགྱུར་བས་བདག་ནི་དགེ་འདུན་ལ་བསོད་སྙོམས་ཀྱི་ཕུད་འབུལ་བ་ཡིན་ལ་འདི་ལྟར་དགེ་སློང་རྣམས་ལ་མི་རུང་བ་གང་ཡིན་པ་དེ་ནི་དགེ་སློང་མ་རྣམས་ལ་རུང་བ་ཡིན་ལ། དགེ་
སློང་མ་རྣམས་ལ་མི་རུང་བ་གང་ཡིན་པ་དེ་ནི་དགེ་སློང་རྣམས་ལ་རུང་བ་ཡིན་པས་བདག་རང་ཉིད་ཀྱིས་འདི་ཁྱེར་ཏེ། དགེ་འདུན་ལ་བསོད་སྙོམས་ཀྱི་ཕུད་འབུལ་དུ་འགྲོའོ་སྙམ་ནས་དེས་དེ་ཁྱེར་ཏེ་རྒྱལ་བྱེད་ཀྱི་ཚལ་དུ་སོང་ངོ་། །དྲུག་སྡེ་རྣམས་ཀྱི་ཀུན་དུ་སྤྱོད་པ་ནི་དྲུག་སྡེ་ལས་
གང་ཡང་རུང་བས་རྒྱལ་བྱེད་ཀྱི་ཚལ་གྱི་སྒོ་སྟོང་པར་མི་འཇོག་པས་ཉེ་དགའ་རྒྱལ་བྱེད་ཀྱི་ཚལ་གྱི་སྒོ་ན་འཆག་ཅིང་འདུག་པ་དེས་ཨུཏྤ་ལའི་མདོག་མཐོང་ནས་སྨྲས་པ། སྲིང་མོ་ཅིའི་ཕྱིར་ནང་པར་སྔར་མཉན་ཡོད་ཀྱི་སྒོ་དག་ཕྱེ་སྟེ་འོངས། དེས་སྨྲས་པ། བདག་མཉན་ཡོད་དུ་
མ་མཆིས་ཀྱི། བདག་མདང་སུམ་ནགས་མུན་པ་ཅན་དུ་མཆིས་པར་ཁས་བླངས་སོ། །ཉེ་དགའས་སྨྲས་པ། ཉེ་དགའ་ནི་ཉིན་མོ་ཉིད་ནགས་མུན་པ་ཅན་དུ་ཞུགས་ན་ཡང་སྤུ་དག་གྱེན་དུ་འགྲེང་བར་འགྱུར་རོ། །སྲིང་མོ་ཁྱེར་བ་འདི་ཅི་ཡིན། དེས་སྨྲས་པ། ཆོམ་རྐུན་པ་
ལྔ་བརྒྱ་ཙམ་དེར་མཆིས་ནས་དེ་དག་དད་པར་གྱུར་པས་བདག་ལ་དད་པའི་དབང་དུ་བགྱིས་པ་སྩལ་ཏོ། །སྲིང་མོ་ཁྱོད་ནི་ཆོམ་རྐུན་པས་ཀྱང་དད་པར་བྱ་བ་ཡིན་གྱི། གལ་ཏེ་ཉེ་དགའ་དེ་དག་གིས་མཐོང་དུ་ཟིན་ན་ལྕག་རྒོད་མང་པོས་བརྡབས་ཏེ་ཁུར་ཙ་བར་ཁྲིད་པར་འགྱུར་རོ། །འདི་
ལྟར་གང་ལ་རས་ཡུག་ཆེན་འདི་ལྟ་བུ་ཡོད་པ་དེ་ནི་གོས་སར་པ་ལས་སྣམ་སྦྱར་ཉི་རིམ་བྱས་ཏེ་སེམས་ལས་ཆུང་ངུས་དགེ་བའི་ཕྱོགས་ལ་ཏྲོན་བྱེད་པར་འགྱུར་རོ། །འཕགས་པ་ཁྱོད་རས་ཡུག་ཆེན་འདི་བཞེད་དམ། ལྷའི་གནས་ཀྱི་ལྷག་མ་བཞིན་དུའོ། །འཕགས་པ་བདག་
གིས་དགེ་འདུན་ལ་བསོད་སྙོམས་ཀྱི་ཕུད་ཕུལ་ཏེ་སླར་མཆིས་པའི་བར་དུ་གཞེས་ཤིག་དང་། དེའི་འོག་ཏུ་ཁྱོད་ལ་རས་ཡུག་ཆེན་གསོལ་ལོ། །ཉེ་དགའས་བསམས་པ། ལྷུང་བཟེད་ནག་པོ་ཅན་འགའ་ཞིག་གིས་འདི་ལ་བསླངས་པ་དང་དེ་ལ་བྱིན་པར་འགྱུར་རོ་སྙམ་ནས།

སྲིང་མོ་བདག་གིས་བསོད་སྙོམས་ཀྱི་ཕུད་ལེན་པ་དག་ཁྲིད་དེ་འོང་གིས་དེའི་བར་དུ་འདི་ཉིད་དུ་སྡོད་ཅིག །ཉེ་དགའ་རྒྱལ་བྱེད་ཀྱི་ཚལ་དུ་ཞུགས་པ་དང་། དེས་དགེ་སློང་བསོད་སྙོམས་ཀྱི་ཕུད་ལེན་པ་དག་སྙིང་ལས་ཆུང་ངུར་འཁོད་པ་མཐོང་ནས་དེས་སྨྲས་པ། ཚེ་དང་ལྡན་པ་དག་
སྦྱིན་བདག་དག་ནི་ཁུར་གྱིས་ངལ་ཞིང་སྡོད་ལ། ཁྱེད་ཅག་ནི་འདི་ན་སྙིང་ལས་ཆུང་ངུར་འཁོད་ན་ཚུར་ཤོག་བསོད་སྙོམས་ཀྱི་ཕུད་ལོང་ཤིག །དེ་དག་གིས་གཞོང་བུ་ཐོགས་ཏེ་དོང་བ་དང་། ཨུཏྤ་ལའི་མདོག་གིས་དེ་དག་ལ་བསོད་སྙོམས་ཀྱི་ཕུད་ཕུལ་ནས་རས་ཡུག་ཆེན་སྤྲུགས་
ནས་ཉེ་དགའ་ལ་ཕུལ་ལོ། །ཉེ་དགའས་ཁྱོད་སྦྱིན་པ་འདིས་སེམས་ཀྱི་རྒྱན་དང་། སེམས་ཀྱི་ཡོ་བྱད་དང་། རྣལ་འབྱོར་གྱི་ཚོགས་དང་། དོན་གྱི་མཆོག་དང་། ལྷ་དང་མི་རྣམས་ཀྱི་གོས་དག་ཐོབ་པར་གྱུར་ཅིག་ཅེས་སྨྲས་སོ། །ཨུཏྤ་ལའི་མདོག་གིས་བསམས་པ། ང་
དབྱར་ཁང་དུ་སོང་སྟེ་ཅི་རུང་། བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་འགྲོ་བར་བྱའོ་སྙམ་ནས། དེ་ནས་ཨུཏྤ་ལའི་མདོག་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །
དེའི་ཚེ་ན་ཨུཏྤ་ལའི་མདོག་གིས་ཆོས་གོས་ལྔ་ངན་ཅིང་སྣམ་སྦྱར་ཡང་རྙིངས་པར་གྱུར་ནས། དེ་ན་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་དགེ་སློང་མ་རྣམས་ཀྱིས་དབྱར་གྱི་གོས་ཀྱི་རྙེད་པ་མ་གྲུབ་བམ། བཙུན་པ་གྲུབ་
བོ། །འོ་ན་ཅིའི་ཕྱིར་དགེ་སློང་མ་ཨུཏྤ་ལའི་མདོག་གི་ཆོས་གོས་ལྔ་ངན་ཅིང་སྣམ་སྦྱར་ཡང་རྙིངས་པར་གྱུར། བཙུན་པ་སྲིང་མོ་འདི་ནི་དད་པ་དང་ལྡན་ཞིང་བཟང་ལ་དགེ་བའི་བསམ་པ་ཅན་ལགས་ཏེ། འདིས་སངས་རྒྱས་སམ། ཆོས་སམ། དགེ་འདུན་ནམ། དགེ་
སློང་ཡིད་དུ་འཐད་པ་དག་ལ་མ་ཕུལ་བའམ། ཡོངས་སུ་མ་བཏང་བ་ཅི་ཡང་མ་མཆིས་ཏེ། འདིས་དེང་ཡང་རས་ཡུག་ཆེན་རྙེད་ནས་དེ་ཡང་འདིས་བཙུན་པ་ཉེ་དགའ་ལ་སྩོལ་ཏོ། །ཀུན་དགའ་བོ་དགེ་སློང་དག་དགེ་སློང་མ་ཉེ་དུ་མ་ཡིན་པ་ལ་གོས་ལྷག་པ་ལེན་ཏམ། བཙུན་

པ་ལེན་ཏོ། །ཀུན་དགའ་བོ་དགེ་སློང་དག་དགེ་སློང་མ་ཉེ་དུ་མ་ཡིན་པ་ལ་འདི་སྙམ་དུ་འདིའི་ཆོས་གོས་ལྔ་ཚང་ངམ། འོན་ཏེ་མ་ཚང་སྙམ་དུ་མི་སེམས་པར་འདི་ལྟར་ཐོབ་བོ་ཅོག་ལེན་པར་བྱེད་ཀྱི། ཉེ་དུ་ལ་ནི་བྱིན་ཡང་ལེན་པར་མི་བྱེད་དོ། །དེ་ནས་བཅོམ་
ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་དགེ་སློང་མ་ཨུཏྤ་ལའི་མདོག་ལ་གཙུག་ལག་ཁང་ཆེན་པོ་ནས་ཆོས་གོས་ལྔ་བྱིན་ཅིག །ཚེ་དང་ལྡན་པ་ཀུན་དགའ་བོས་དགེ་སློང་མ་ཨུཏྤ་ལའི་མདོག་ལ་གཙུག་ལག་ཁང་ཆེན་པོ་ནས་ཆོས་
གོས་ལྔ་བྱིན་ནོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་
བྱ་སྟེ། ཡང་དགེ་སློང་གང་དགེ་སློང་མ་ཉེ་དུ་མ་ཡིན་པ་ལས་གོས་ལེན་ན་སྤང་བའི་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་
མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་བདག་གི་ཁྱིམ་ནོར་དུ་མ་དང་ལྡན་
ན་བདག་གིས་འཇིག་རྟེན་ཕ་རོལ་གྱི་ལམ་རྒྱགས་ཅུང་ཟད་ཀྱང་མ་ཁྱེར་རོ་སྙམ་ནས་ལག་པ་ལ་འགྲམ་པ་གཏད་དེ་སེམས་ཁོང་དུ་ཆུད་ཅིང་འདུག་པ་ཆུང་མས་མཐོང་ནས་སྨྲས་པ། རྗེའི་སྲས་ཁྱོད་ཅིའི་སླད་དུ་ཕྱག་ལ་འགྲམ་པ་གཏད་དེ་སེམས་ཁོང་དུ་ཆུད་ཅིང་བཞུགས། བཟང་
མོ་ཁོ་བོའི་ཁྱིམ་ནོར་དུ་མ་དང་ལྡན་ན་བདག་གིས་འཇིག་རྟེན་ཕ་རོལ་གྱི་ལམ་རྒྱགས་ཅུང་ཟད་ཀྱང་མ་ཁྱེར་ཏེ། གལ་ཏེ་བདག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་བཤོས་གསོལ་ཏེ་རེ་རེ་ལ་རས་བཅོས་བུ་སར་པ་ཕྲུགས་རེ་བསྐོན་ན་དེས་བདག་གི་འཇིག་རྟེན་ཕ་རོལ་

གྱི་ལམ་རྒྱགས་ཁྱེར་བར་འགྱུར་རོ། །ཆུང་མས་སྨྲས་པ། རྗེའི་སྲས་དེ་བཞིན་མཛོད་ཅིག །དེ་ནས་ཁྱིམ་བདག་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་
གཅིག་ཏུ་འདུག་ནས་བཅོམ་ལྡན་འདས་ཀྱིས་ཁྱིམ་བདག་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་
དུ་མས་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་ཁྱིམ་བདག་དེ་སྟན་ལས་ལངས་ནས་བླ་གོས་ཕྲག་པ་གཅིག་ཏུ་བྱས་
ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སང་བདག་གི་སྡུམ་པར་དགེ་སློང་གི་དགེ་འདུན་དང་ཐབས་ཅིག་ཏུ་གདུགས་ཚོད་གསོལ་བར་ཅི་གནང་། བཅོམ་ལྡན་འདས་ཀྱིས་
ཁྱིམ་བདག་དེ་ལ་ཅང་མི་གསུང་བས་གནང་ངོ་། །དེ་ནས་ཁྱིམ་བདག་དེས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱིས་བཀའ་སྩལ་བ་ལ་མངོན་པར་དགའ་བ་དང་རྗེས་སུ་ཡི་རང་བར་བྱས་ཏེ། བཅོམ་ལྡན་འདས་ཀྱི་ཞབས་
གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་ཁྱིམ་བདག་དེས་དེ་ཉིད་ཀྱི་མཚན་མོ་བཅའ་བ་དང་བཟའ་བ་གཙང་ཞིང་བསོད་པ་ལེགས་པར་སྦྱར་ནས་ནང་པར་སྔར་ལངས་ཏེ་གདན་བཤམས་ནས་ཆུ་ར་བཞག་སྟེ། བཅོམ་ལྡན་
འདས་ལ་སྤྱན་འདྲེན་གྱིས། བཙུན་པ་གདུགས་ཚོད་སྦྱར་བའི་དུས་ལགས་ན། ད་བཅོམ་ལྡན་འདས་ཀྱིས་དེའི་དུས་ལ་བབ་པར་མཁྱེན་པར་མཛད་དུ་གསོལ་ཞེས་གདུགས་ཚོད་ལ་སྤྱན་དྲངས་སོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་གསོལ། ལྷུང་བཟེད་དང་

ཆོས་གོས་བསྣམས་ཏེ་དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ཏེ། ཁྱིམ་བདག་དེའི་བཀད་ས་ག་ལ་བ་དེར་གཤེགས་ཏེ་བྱོན་ནས། དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་
སོ། །དེ་ནས་ཁྱིམ་བདག་དེས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས། རང་གི་ལག་གིས་བཅའ་བ་དང་བཟའ་བ་གཙང་ཞིང་བསོད་པས་ཚིམ་པར་བྱེད། སྟོབས་པར་བྱེད་དོ། །རྣམ་གྲངས་དུ་མས་བཅའ་བ་དང་བཟའ་བ་གཙང་ཞིང་
བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས། སངས་རྒྱས་ལ་སོགས་པ་དགེ་སློང་གི་དགེ་འདུན་རེ་རེ་ལ་རས་བཅོས་བུ་སར་པ་ཕྲུགས་རེ་རེ་གསོལ་ཏོ། །དེ་ནས་ཁྱིམ་བདག་དེས་སྟན་དམའ་བ་ཞིག་བླངས་ནས་བཅོམ་ལྡན་འདས་ཀྱི་སྤྱན་སྔར་ཆོས་མཉན་
པའི་ཕྱིར་འདུག་གོ། །དེ་ནས་བཅོམ་ལྡན་འདས་ཀྱིས་ཁྱིམ་བདག་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་
གྲངས་དུ་མས་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་སོ། །དེ་ནས་ཁྱིམ་བདག་དེས་བཅོམ་ལྡན་འདས་ཀྱི་སླད་
བཞིན་ཕ་ཟད་ཙམ་དུ་སོང་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་