Luận tạng Tây Tạng (Tengyur) — Tập 209

་དུ་མི་འདོན་པའི་ཕྱིར་རོ། །འོ་ན་ཇི་ལྟར་དེ་དག་འདོན་ཞེ་ན། ཕུང་པོ་ཞིག་པ་ཉེ་བར་གནས་པར་གྱུར་ནའོ་ཞེས་འདོད་དེ། འདིར་ཕུང་པོ་ཞིག་པ་ནི་འཆི་བའི་སྲིད་པའོ། །གལ་ཏེ་དེ་ལྟར་ན་རྟ་ལེན་གྱི་
བུའི་མདོ་ཞེས་བྱ་བ་རྒྱས་པར་འབྱུང་བ་ལ། ཕུང་པོ་ཞིག་པ་ནི་འགྲོ་བ་དང་འོང་བ་དང་བྲམ་ཟེ་ལ་སོགས་པའི་ངོ་བོར་མི་འཐད་དོ། །ཁ་ཅིག་ན་རེ་བར་མ་དོ་ཞེས་བྱ་བའི་ལྷ་དག་ཅིག་ཡོད་དོ། གང་ཞིག་དེ་དག་ཏུ་ཡོངས་སུ་མྱ་ངན་ལས་འདའ་བ་དེ་ནི་བར་མ་དོར་ཡོངས་སུ་མྱ་ངན་ལས་འདའ་
བའོ། །ཞེས་ཟེར་རོ། །དེ་ལྟ་ན་སྐྱེས་པ་ཞེས་བྱ་བ་ལ་སོགས་པ་ལ་ཡང་ཞེས་བྱ་བ་རྒྱས་པར་འབྱུང་བ་སྟེ། དེ་ལ་གང་ཞིག་སྐྱེས་པའི་ལྷ་དག་ཏུ་ཡོངས་སུ་མྱ་ངན་ལས་འདའ་བ་དེ་ནི་སྐྱེས་ནས་ཡོངས་སུ་མྱ་ངན་ལས་འདའ་བར་འགྱུར་རོ། །མངོན་པར་འདུ་བྱེད་པ་མེད་པར་ཡོངས་སུ་མྱ་ངན་

ལས་འདའ་བ་དང་། མངོན་པར་འདུ་བྱེད་པ་དང་བཅས་པར་ཡོངས་སུ་མྱ་ངན་ལས་འདའ་བ་ཡང་དེ་དང་འདྲ་བར་བརྗོད་པར་བྱའོ། །དེ་ལྟ་མ་ཡིན་ཏེ་གལ་ཏེ་སྐྱེ་བ་ལ་སོགས་པའི་ལྷ་དག་ཁས་མི་ལེན་ན་ནི་བར་མ་དོར་ཡོངས་སུ་མྱ་ངན་ལས་འདའ་བར་མི་འགྲུབ་བོ། །དེ་ཡང་བར་མ་དོའི་
ལྷ་དག་ཏུ་སྐྱེས་ཏེ། སྐྱེས་ནས་ཡོངས་སུ་མྱ་ངན་ལས་འདའ་བ་དང་མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བར་ཡང་འགྱུར་རོ། །གཞན་དག་ན་རེ་འདོད་པ་དང་གཟུགས་ཀྱི་ཁམས་དག་གི་བར་དུ་ཡོངས་སུ་མྱ་ངན་ལས་འདའ་བས་བར་མ་དོར་ཡོངས་སུ་མྱ་ངན་
ལས་འདའ་བ་སྟེ། དེས་ན་སྲིད་པ་བར་མ་མེད་པར་ཁམས་གཉིས་སུ་མ་སྐྱེས་པའི་སེམས་ཅན་མེད་པས་སྲིད་པ་བར་མ་གྲུབ་པ་ཉིད་དོ་ཞེས་ཟེར་རོ། །འགྲོ་མདོ་ཞེས་བྱ་བ་ནི་མཉན་དུ་ཡོད་པར་ཏེ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་
དག་ངས་སྐྱེས་བུ་དམ་པའི་འགྲོ་བ་བདུན་དང་ལན་པ་མེད་པའི་ཡོངས་སུ་མྱ་ངན་ལས་འདའ་བ་བསྟན་པར་བྱ་ཡིས་ཞེས་སྐྱེས་བུ་དམ་པའི་འགྲོ་བའི་མདོ་རྒྱས་པར་གསུངས་སོ། །མདོ་དེ་ལས་ནི་ཕྱིར་མི་འོང་བ་ལྔ་ལས་བར་མ་དོར་ཡོངས་སུ་མྱ་ངན་ལས་འདའ་བ། ཞོགས་མ་ལ་
སོགས་པ་དཔེ་གསུམ་གྱི་སྒོ་ནས་རྣམ་པ་གསུམ་དུ་མཛད་ནས་སྐྱེས་བུ་དམ་པའི་འགྲོ་བ་བདུན་དུ་གསུངས་སོ། །དུས་དང་ཡུལ་གྱི་ཁྱད་པར་གྱི་བྱེ་བྲག་གིས་ཞེས་བྱ་བ་ནི་གོ་རིམས་བཞིན་དུ་དུས་ཀྱི་ཁྱད་པར་གྱི་བྱེ་བྲག་དང་ཡུལ་གྱི་ཁྱད་པར་གྱི་བྱེ་བྲག་གིས་སོ། །ཇི་ལྟར་ཞེ་ན་མངོན་
པར་གྲུབ་པ་བཞིན་དུ་ཞེས་བྱ་བ་ནི་དུས་སོ། །གནམ་དུ་ཡར་བ་བཞིན་དུ་ཞེས་བྱ་བ་དང་། ས་ལ་མ་ལྷུང་བ་ཉིད་དུ་ཞེས་བྱ་བ་ནི་ཡུལ་ལོ། །བར་མ་དོ་ཞེས་བྱ་བའི་ལྷ་ནི་ཞེས་བྱ་བ་རྒྱས་པར་འབྱུང་སྟེ། དེ་དག་ཏུ་སྐྱེ་བཞིན་པ་གང་ཡོད་པ་མ་ཡིན་པ་ནི་བདེན་པ་ཉིད་དེ། ཡོངས་སུ་
མྱ་ངན་ལས་འདས་པ་དེའི་དབང་དུ་བྱས་ནས་དང་པོ་བལྟའོ། །དེ་ལས་གང་དུས་ཕྱི་མའི་དབང་དུ་བྱས་ནས་གཉིས་པའོ། །དེ་ལས་ཀྱང་གང་གཞན་པའི་དབང་དུ་བྱས་ནས་གསུམ་པའོ། །དུས་ཀྱི་བྱེ་བྲག་གི་ཁྱད་པར་ཤེས་པར་བྱ་བའི་ཕྱིར་འདི་དཔེར་བརྗོད་པ་ཡིན་ནོ། །ཡུལ་

གྱི་བྱེ་བྲག་གི་ཁྱད་པར་ལས་ཀྱང་ནུས་པར་རུང་སྟེ། ཁ་ཅིག་སྐྱེས་པའི་ཡུལ་ཉིད་དུ་ཡོངས་སུ་མྱ་ངན་ལས་འདའ་བར་བྱེད་དོ། །ཁ་ཅིག་ཡུལ་གཞན་དུ་སོང་ནས་སོ། །ཁ་ཅིག་དེ་ནས་ཀྱང་སོང་ནས་སོ། །དེ་བཞིན་དུ་སྐྱེས་ནས་ཡོངས་སུ་མྱ་ངན་ལས་
འདའ་བ་བར་མ་དོར་ཡོངས་སུ་མྱ་ངན་ལས་འདའ་བ་ལས་ཕུལ་དུ་བྱུང་བ་འགའ་ཡང་ཡོད་པ་མ་ཡིན་པས། དེ་ཐ་དད་དུ་བསྟན་པ་དོན་མེད་པ་ཉིད་དོ། །ཚེའི་ཚད་ཀྱི་བར་དུའམ་ཞེས་བྱ་བ་ལ་ཚེའི་ཚད་ཀྱི་སྔ་རོལ་དུ་སྟེ་ཚེ་ཡོངས་སུ་མ་རྫོགས་པ་ཁོ་ནར་ཞེས་བྱ་བའི་དོན་ཏོ། །ལྷ་དང་
ཉེ་བའི་བར་དུ་ཞེས་བྱ་བ་ལ། ལྷ་རྣམས་ཀྱི་དྲུང་ནི་ལྷ་དང་ཉེ་བ་སྟེ། དེའི་བར་ནི་ལྷ་དང་ཉེ་བའི་བར་རོ། །བཤད་པ་འདི་ལ་ལྕགས་ཀྱི་ཚ་ཚ་ལ་སོགས་པའི་དཔེ་རྣམ་པ་གསུམ་ཇི་ལྟར་རུང་ཞེ་ན། དེའི་ཕྱིར་ཁམས་ཀྱི་གནས་སྐབས་པའམ་ཞེས་བྱ་བ་རྒྱས་པར་སྨྲས་སོ། །སྐྱེས་པ་ཙམ་གྱིས་ཉོན་
མོངས་པའི་ས་བོན་གྱི་གནས་སྐབས་ཁོ་ནར་ལམ་མངོན་དུ་གྱུར་པ་ལས་ཡོངས་སུ་མྱ་ངན་ལས་འདའ་བ་སྟེ། འདི་ནི་དབང་པོ་རྣོན་པོ་ཡིན་ནོ་ཞེས་གྲག་གོ། །འདུ་ཤེས་ཀྱི་གནས་སྐབས་པའམ་ཞེས་བྱ་བ་ནི་ཡུལ་གྱི་འདུ་ཤེས་ཀུན་ཏུ་སྤྱོད་པའི་གནས་སྐབས་སུའོ། །གཞན་དག་ན་རེ་ཉོན་
མོངས་པ་སྐྱེས་པ་ཡོངས་སུ་གཅོད་པར་བྱེད་པ་གང་ཡིན་པ་དེ་འདུ་ཤེས་ཀྱི་གནས་སྐབས་པ་ཡིན་ནོ་ཞེས་ཟེར་ཏེ། འདི་ནི་དབང་པོ་འབྲིང་པོའོ། །རྣམ་པར་རྟོག་པའི་གནས་སྐབས་པ་ཞེས་བྱ་བ་ནི་དེའི་ས་པའི་ཉོན་མོངས་པའི་རྣམ་པར་རྟོག་པ་ཀུན་ཏུ་སྤྱོད་པའི་གནས་སྐབས་སུའོ། །
གཞན་དག་ན་རེ་རྣམ་པར་རྟོག་པ་ནི་དཔྱད་པ་ཡིན་པའི་ཕྱིར་ཤེས་རབ་ཀུན་ཏུ་སྤྱོད་པའི་གནས་སྐབས་སུ་ཡིན་ནོ། །འདིར་རྣམ་པར་རྟོག་པ་ནི་སེམས་རྩིང་བ་ལ་མི་འདོད་དེ། དེ་ནི་བསམ་གཏན་དང་པོའི་ས་པ་ཡིན་པའི་ཕྱིར་གཉིས་པ་ལ་སོགས་པ་དག་ན་བར་དུ་མྱ་ངན་ལས་འདའ་བར་མི་
འགྱུར་རོ། །འདི་ནི་དབང་པོ་རྟུལ་པོ་ཡིན་ནོ། །ཡང་ན་དང་པོ་ནི་གཟུགས་ཀྱི་ཁམས་སུ་ཞེས་བྱ་བ་ལ། འདི་ལ་དཔེ་ནི་དཔེར་ན་ཞོགས་མའི་མེ་ཆུང་ངུ་ཞེས་བྱ་བ་ལ་སོགས་པའོ། །གཉིས་པ་ནི་ལྷ་རྣམས་ཀྱི་འབྱོར་པ་ཞེས་བྱ་བ་ལ། འདི་ལ་ཡང་དཔེ་ནི་དཔེར་ན་ལྕགས་ཀྱི་ཚ་ཚ་གནམ་དུ་

ཡར་བ་བཞིན་དུ་ཞེས་བྱ་བ་རྒྱས་པར་འབྱུང་བའོ། །གསུམ་པ་ནི་ལྷ་རྣམས་ཀྱི་ཆོས་ཡང་དག་པར་འགྲོ་བའི་ཞེས་བྱ་བ་ལ་འདིར་ཡང་དཔེ་ནི་དཔེར་ན་ལྕགས་ཀྱི་ཚ་ཚ་གནམ་དུ་ཡར་ནས་ཞེས་བྱ་བ་ལ་སོགས་པ་སྟེ། དེས་ན་དཔེ་གསུམ་གྱི་སྒོ་ནས་རྣམ་པ་གསུམ་ཡིན་ཏེ། དེ་ལྟ་ན་ཡང་བར་མ་
དོ་དང་སྐྱེས་ནས་ཡོངས་སུ་མྱ་ངན་ལས་འདའ་བ་དག་ལས་ཁྱད་པར་མི་མངོན་པས་ཁྱད་པར་བསྟན་པའི་ཕྱིར་སྐྱེས་ནས་ཡོངས་སུ་མྱ་ངན་ལས་འདའ་བ་ནི་ཞེས་བྱ་བ་རྒྱས་པར་སྨྲས་སོ། །ཚེ་ཕལ་ཆེར་བཅོམ་ནས་ཞེས་བྱ་བ་ནི་ཚེ་ཕལ་ཆེར་ཕྱིད་ནས་སོ། །དེ་དག་ཐམས་ཅད་ཀྱང་ཞོགས་
མ་ལ་སོགས་པའི་དཔེ་དག་དང་མི་འབྱོར་རོ། །ཁམས་སུ་གཏོགས་པ་དང་པོ་ནི་དཔེ་དང་པོ་དང་མ་འབྲེལ་ལ། འདུ་ཤེས་སུ་གཏོགས་པ་དང་། རྣམ་པར་ཤེས་པར་གཏོགས་པ་ཡང་གཉིས་པ་དང་གསུམ་པ་དག་དང་ཞོགས་མ་ལ་སོགས་པའི་དཔེ་དག་དང་མ་འབྲེལ་
ལོ། །གང་དག་གཟུགས་ཀྱི་ཁམས་སུ་རིས་མཐུན་པ་ཡོངས་སུ་བཟུང་ནས་ཡོངས་སུ་མྱ་ངན་འདའ་བ་དེ་ཡང་ཞོགས་མའི་དཔེ་དང་མ་འབྲེལ་ལོ། །ལྷ་གང་དག་འབྱོར་པ་ཉམས་སུ་མྱང་ནས་ལྷ་རྣམས་དང་ཆོས་ཡང་དག་པར་བགྲོ་བས་རྗེས་སུ་ཞུགས་ཏེ། མྱ་ངན་ལས་འདའ་བ་སྟེ་
ལྕགས་ཀྱི་ཚ་ཚ་ལ་སོགས་པའི་དཔེ་དང་འབྲེལ་པ་མེད་དོ། །དེ་ཉིད་ལ་རྒྱུ་སྨོས་པ་ནི་ཡུལ་དུ་འགྲོ་བའི་བྱེ་བྲག་མེད་པའི་ཕྱིར་ཞེས་བྱ་བ་འབྱུང་སྟེ། ཡུལ་དུ་འགྲོ་བའི་བྱེ་བྲག་མེད་པའི་ཕྱིར་རོ། །དེ་ཇི་ལྟར་མེད་ཅེ་ན། ཡུལ་དེ་ཉིད་དུ་ཡོངས་སུ་མྱ་ངན་ལས་འདའ་
བའི་ཕྱིར་རོ། །ཡང་ན་ཡུལ་གྱི་བྱེ་བྲག་མེད་པའི་ཕྱིར་དང་འགྲོ་བའི་བྱེ་བྲག་མེད་པའི་ཕྱིར་ཞེས་རེ་རེ་ལ་བྱེ་བྲག་མེད་པའི་སྒྲ་སྦྱར་རོ། །བསམ་གཏན་དག་གིས་བཅུ་ཚན་བཞི་སྟེ་ཞེས་བྱ་བ་ལ་བསམ་གཏན་རེ་རེ་ལས་གང་ཟག་བཅུ་བཅུ་དབང་དུ་བྱས་པའི་ཕྱིར་རོ། །གཟུགས་
མེད་དག་གིས་བདུན་ཚན་གསུམ་ཞེས་བྱ་བ་ལ། བར་མ་དོར་ཡོངས་སུ་མྱ་ངན་ལས་འདའ་བ་དང་སྐྱེ་བ་གཉིས་མ་གཏོགས་པ་སྟེ། གཟུགས་མེད་པའི་སྲིད་པ་བར་མ་མི་སྲིད་དོ། །འདུ་ཤེས་ཀྱིས་ནི་དྲུག་ཚན་དུ་ཞེས་བྱ་བ་ལ། འདི་ལ་ནི་གོང་དུ་འཕོ་བ་ཡང་མེད་དེ། ས་གཞན་མེད་

པའི་ཕྱིར་རོ། །དེའི་ཕྱིར་འདི་དག་ཐམས་ཅད་རྟོག་པ་ཙམ་དུ་ཟད་དེ། ཡང་གི་སྒྲ་ལས་གཟུགས་བརྙན་འབའ་ཞིག་ཏུ་མ་ཟད་དོ། །གླེང་གཞི་མཉན་དུ་ཡོད་པ་ན་སྟེ། འདི་ན་དགེ་སློང་རྣམ་པ་གང་དག་དང་རྟགས་གང་དག་དང་། མཚན་མ་གང་དག་
གིས་འདོད་པ་དག་ལས་དབེན་པ། སྡིག་ཏོ་མི་དགེ་བའི་ཆོས་རྣམས་ལས་དབེན་པ་རྟོག་པ་དང་བཅས་ཤིང་དཔྱོད་པ་དང་བཅས་པ་དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་ཉེ་བར་བསྒྲུབས་ནས་གནས་སོ། །དེ་རྣམས་དེ་དག་དང་རྟགས་དེ་དག་ཡིད་
ལ་མི་བྱེད་ཀྱི་འོན་ཀྱང་དེ་གཟུགས་ཀྱི་རྣམ་པའམ། ཚོར་བའི་རྣམ་པའམ། འདུ་ཤེས་ཀྱི་རྣམ་པའམ། འདུ་བྱེད་ཀྱི་རྣམ་པའམ། རྣམ་པར་ཤེས་པའི་རྣམ་པ་གང་ཞིག་དེ་ཉེ་བར་དམིགས་པའི་ཆོས་དེ་དག་ནང་དུ་ཡིད་ལ་བྱེད། འབྲས་དང་ཟུག་རྔུ་དང་། སྡིག་པ་དང་། མི་
རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པར་ཡིད་ལ་བྱེད་དེ་ཆོས་དེ་དག་ལ་ཡིད་བྱུང་ཞིང་སྐྲག་སྟེ་ཕྱིར་ཟློག་པར་བྱེད་དེ་ཆོས་དེ་དག་ལ་སྐྱོ་ཞིང་སྐྲག་སྟེ་ཕྱིར་བཟློག་ནས་འདི་ནི་ཞི་བའོ། །འདི་ནི་གྱ་ནོམ་པ་སྟེ། འདི་ལྟ་སྟེ། ཕུང་པོ་ཐམས་ཅད་ངེས་པར་སྤངས་པ། སྲེད་པ་ཟད་པ་
འདོད་ཆགས་དང་བྲལ་བ་འགོག་པ། མྱ་ངན་ལས་འདས་པའོ་ཞེས་འཆི་བ་མེད་པའི་དབྱིངས་ལ་སེམས་གཏོད་པར་བྱེད་དོ། །མདོ་དེ་ཉིད་གསུངས་ནས་ཁྱད་པར་ནི་འདི་ཡིན་ཏེ། དེ་ལྟར་ཤེས་ཤིང་དེ་ལྟར་མཐོང་བ་དེ་འདོད་པའི་ཟག་པ་ལས་སེམས་རྣམ་པར་གྲོལ། སྲིད་པའི་
ཟག་པ་དང་མ་རིག་པའི་ཟག་པ་ལས་སེམས་རྣམ་པར་གྲོལ། གྲོལ་ནས་ཀྱང་བདག་རྣམ་པར་གྲོལ་ལོ། །བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །འདི་ལས་སྲིད་པ་གཞན་མི་ཤེས་སོ་སྙམ་དུ་ཡེ་ཤེས་མཐོང་བ་འབྱུང་ངོ་། །མདོ་དེ་ཉིད་
གསུངས་ནས་ཁྱད་པར་ནི་འདི་ཡིན་ཏེ། དེ་འདིར་རྣམ་པར་མི་གྲོལ་གྱི་ཆོས་ལ་འདུན་པ་དེ་ཉིད་དང་། ཆོས་ལ་ཆགས་པ་དེ་ཉིད་དང་། ཆོས་ལ་དགའ་བ་དེ་ཉིད་དང་། ཆོས་ལ་མངོན་པར་དགའ་བ་དེ་ཉིད་ཀྱིས་བར་མ་དོར་རྣམ་པར་གྲོལ་བར་འགྱུར་རོ། །མདོ་དེ་ཉིད་གསུངས་ནས་དེ་

བར་མ་དོར་ཡོངས་སུ་མྱ་ངན་ལས་འདའ་བར་མི་འགྱུར་གྱི། འོན་ཀྱང་སྐྱེས་ནས་ཡོངས་སུ་མྱ་ངན་ལས་འདའ་བར་འགྱུར་རོ། །དེ་སྐྱེས་ནས་ཡོངས་སུ་མྱ་ངན་ལས་འདའ་བར་མི་འགྱུར་གྱི། འོན་ཀྱང་མངོན་པར་འདུ་བྱེད་པ་དང་བཅས་པར་ཡོངས་སུ་མྱ་ངན་ལས་འདའ་བར་འགྱུར་
རོ། །དེ་མངོན་པར་འདུ་བྱེད་པ་དང་བཅས་པར་ཡོངས་སུ་མྱ་ངན་ལས་འདའ་བར་མི་འགྱུར་གྱི། འོན་ཀྱང་མངོན་པར་འདུ་བྱེད་པ་མེད་པར་ཡོངས་སུ་མྱ་ངན་ལས་འདའ་བར་འགྱུར་རོ། །དེ་མངོན་པར་འདུ་བྱེད་པ་མེད་པས་ཡོངས་སུ་མྱ་ངན་ལས་འདའ་བར་མི་འགྱུར་གྱི། འོན་
ཀྱང་གོང་དུ་འཕོ་བར་འགྱུར། དེ་གོང་དུ་འཕོ་བར་མི་འགྱུར་གྱི། འོན་ཀྱང་ཆོས་ལ་འདུན་པ་དེ་ཉིད་དང་། ཆོས་ལ་ཆགས་པ་དེ་ཉིད་དང་། ཆོས་ལ་དགའ་བ་དེ་ཉིད་དང་། ཆོས་ལ་མངོན་པར་དགའ་བ་དེ་ཉིད་ཀྱིས་ཚངས་ཆེན་གྱི་ལྷ་རྣམས་དང་སྐལ་བ་མཉམ་པར་སྐྱེ་བར་
འགྱུར་རོ། །དེ་ཚངས་ཆེན་གྱི་ལྷ་རྣམས་དང་སྐལ་བ་མཉམ་པར་སྐྱེ་བ་མ་ཡིན་གྱི། ཆོས་ལ་འདུན་པ་དེ་ཉིད་དང་། ཆོས་ལ་ཆགས་པ་དེ་ཉིད་དང་། ཆོས་ལ་དགའ་བ་དེ་ཉིད་དང་། ཆོས་ལ་མངོན་པར་དགའ་བ་དེ་ཉིད་ཀྱིས་ཚངས་པའི་མདུན་ན་འདོན་གྱི་ལྷ་རྣམས་དང་སྐལ་བ་
མཉམ་པར་སྐྱེ་བར་འགྱུར་རོ། །དེ་ཚངས་པའི་མདུན་ན་འདོན་གྱི་ལྷ་རྣམས་སུ་སྐྱེ་བར་མི་འགྱུར་གྱི་ཆོས་ལ་འདུན་པ་དེ་ཉིད་དང་། ཆོས་ལ་ཆགས་པ་དེ་ཉིད་དང་། ཆོས་ལ་དགའ་བ་དེ་ཉིད་དང་། ཆོས་ལ་མངོན་པར་དགའ་བ་དེ་ཉིད་ཀྱིས་ཚངས་རིས་ཀྱི་ལྷ་རྣམས་དང་སྐལ་བ་
མཉམ་པར་སྐྱེ་བར་འགྱུར་རོ། །དེ་ལྟར་ན་རེ་ཞིག་བསམ་གཏན་དང་པོ་ལ་མདོ་བཅུའོ། །འདི་ན་དགེ་སློང་རྣམ་པ་གང་དག་དང་རྟགས་གང་དག་དང་མཚན་མ་གང་དག་གིས་རྟོག་པ་དང་དཔྱོད་པ་དང་བྲལ་ཞིང་ནང་ཡོངས་སུ་དང་སྟེ། སེམས་ཀྱི་རྒྱུད་གཅིག་ཏུ་གྱུར་པས་རྟོག་
པ་མེད་པ་དང་། དཔྱོད་པ་མེད་པ་ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་གཉིས་པ་རྫོགས་པར་བྱས་ཏེ་གནས་པ་ཞེས་བྱ་སྟེ་ལྷག་མ་སྔ་མ་བཞིན་ནོ། །སྐྱེ་བ་ལ་ནི་འོད་གསལ་བ་རྣམས་དང་སྐལ་བ་མཉམ་པར་སྐྱེའོ། །དེ་ནས་ཚད་མེད་འོད་པ་

རྣམས་དང་ངོ་། །དེ་ནས་འོད་ཆུང་རྣམས་དང་ངོ་། །དེ་ལྟར་ན་འདི་དག་ནི་བསམ་གཏན་གཉིས་པའི་མདོ་བཅུའོ། །འདི་ན་དགེ་སློང་རྣམ་པ་གང་དག་དང་ཞེས་བྱ་བ་ཐམས་ཅད་བརྗོད་ནས་དགའ་བའི་འདོད་ཆགས་དང་བྲལ་བས་བཏང་སྙོམས་ལ་གནས་ཤིང་
དྲན་པ་དང་ཤེས་བཞིན་ཅན་ཡིན་ཏེ། བདེ་བ་ལུས་ཀྱིས་མྱོང་བ་ལ་འཕགས་པ་རྣམས་ཀྱིས་གང་དེ་དྲན་པ་ལ་གནས་པ་བདེ་བ་ལ་གནས་པ་བཏང་སྙོམས་པའོ་ཞེས་བརྗོད་པ་སྟེ། །བསམ་གཏན་གསུམ་རྫོགས་པར་བྱས་ཏེ་གནས་སོ། །ལྷག་མ་སྔ་མ་བཞིན་ནོ། །སྐྱེ་བ་ལ་ནི་དགེ་
རྒྱས་པ་རྣམས་དང་སྐལ་བ་མཉམ་པར་རོ། །དེ་ནས་ཚད་མེད་དགེ་རྣམས་དང་། དེ་ནས་དགེ་ཆུང་རྣམས་སུ་སྟེ། དེ་དག་ནི་བསམ་གཏན་གསུམ་པའི་མདོ་བཅུའོ། །འདི་ན་དགེ་སློང་རྣམ་པ་གང་དག་དང་། ཞེས་བྱ་བ་ཐམས་ཅད་བརྗོད་ནས་བདེ་བ་ཡང་སྤངས་ཤིང་སྔ་ནས་སྡུག་
བསྔལ་ཡང་སྤངས་ཤིང་། ཡིད་བདེ་བ་དང་ཡིད་མི་བདེ་བ་ཡང་ནུབ་པས་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་བཏང་སྙོམས་དང་དྲན་པ་ཡོངས་སུ་དག་པས་བསམ་གཏན་བཞི་པ་རྫོགས་པར་བྱས་ཏེ་གནས་སོ། །འདིར་ཡང་ལྷག་མ་སྔ་མ་བཞིན་ཏེ། སྐྱེ་བ་ལ་ནི་
འབྲས་བུ་ཆེ་བ་རྣམས་དང་སྐལ་བ་མཉམ་པར་སྐྱེའོ། །དེ་ནས་བསོད་ནམས་སྐྱེས་རྣམས་དང་། དེ་ནས་སྤྲིན་མེད་རྣམས་དང་ངོ་། །འདི་དག་ནི་བསམ་གཏན་བཞི་པའི་མདོ་བཅུ་སྟེ། དེ་དག་ནི་བསམ་གཏན་དག་གི་བཅུ་ཚན་བཞི་རྣམས་སོ། །འདི་ན་དགེ་སློང་རྣམ་པ་གང་དག་དང་རྟགས་
གང་དག་དང་མཚན་མ་གང་དག་གིས་རྣམ་པ་ཐམས་ཅད་དུ་གཟུགས་ཀྱི་འདུ་ཤེས་ལས་འདས་ཏེ། ཐོགས་པའི་འདུ་ཤེས་རྣམས་ནུབ་པར་གྱུར་ཅིང་སྣ་ཚོགས་ཀྱི་འདུ་ཤེས་ཡིད་ལ་མི་བྱེད་པས་ནམ་མཁའ་མཐའ་ཡས་སོ་སྙམ་ནས་ནམ་མཁའ་མཐའ་ཡས་སྐྱེ་མཆེད་རྫོགས་པར་བྱས་ཏེ་གནས་
སོ། །དེ་རྣམ་པ་དེ་དག་དང་རྟགས་དེ་དག་དང་མཚན་མ་དེ་དག་ཡིད་ལ་མི་བྱེད་ཀྱི། འོན་ཀྱང་དེ་ན་དམིགས་པའི་ཚོར་བའི་རྣམ་པའམ་འདུ་ཤེས་ཀྱི་རྣམ་པའམ། འདུ་བྱེད་ཀྱི་རྣམ་པའམ། རྣམ་པར་ཤེས་པའི་རྣམ་པའི་ཆོས་དེ་དག་ལ་ནང་དུ་ཡིད་ལ་བྱེད་ཅིང་ཞེས་བྱ་བ་ནས་བརྩམས་ཏེ།

ཕུང་པོ་ཐམས་ཅད་ངེས་པར་སྤངས་པ་སྲིད་པ་ཟད་པ་འདོད་ཆགས་དང་བྲལ་བ། འགོག་པ་མྱ་ངན་ལས་འདས་པའོ་ཞེས་བྱ་བ་ནམ་མཁའ་མཐའ་ཡས་སྐྱེ་མཆེད་ཀྱི་བདུན་ཚན་གྱི་མདོ་དང་པོའོ། །མདོ་འདི་ཉིད་བརྗོད་ནས་གཉིས་པ་ལ་ནི་འདི་ཁྱད་པར་རོ། །དེ་ཉིད་ཤེས་པ་ཁོ་ནས་མཐོང་ངོ་
ཞེས་བྱ་བ་ནས་བརྩམས་ཏེ་ཇི་སྲིད་སྲིད་པ་འདི་ལས་གཞན་མི་ཤེས་སོ་ཞེས་པའི་བར་རོ། །གསུམ་པ་ལ་ནི་འདི་ཁྱད་པར་ཏེ། དེ་རྣམ་པར་མི་འགྲོལ་གྱི་ཞེས་རྒྱ་ཆེར་བཤད་ནས། འོན་ཀྱང་སྐྱེས་ནས་ཡོངས་སུ་མྱ་ངན་ལས་འདའ་བར་འགྱུར་རོ། །བཞི་པ་ནི་མངོན་པར་འདུ་བྱེད་པ་དང་
བཅས་པས་ཡོངས་སུ་མྱ་ངན་ལས་འདའ་བར་འགྱུར་རོ། །ལྔ་པ་ནི་མངོན་པར་འདུ་བྱེད་མེད་པར་ཡོངས་སུ་མྱ་ངན་ལས་འདའ་བར་འགྱུར་རོ། །དྲུག་པ་ནི་གོང་དུ་འཕོ་བར་འགྱུར་རོ། །བདུན་པ་ནི་དེ་གོང་དུ་འཕོ་བར་མི་འགྱུར་གྱི་འོན་ཀྱང་ཆོས་ལ་འདུན་པ་དེ་ཉིད་ཀྱིས་བྱ་བ་ལ་སོགས་པ་
ནས་ཇི་སྲིད་ནམ་མཁའ་མཐའ་ཡས་སྐྱེ་མཆེད་དུ་ཉེ་བར་འགྲོ་བའི་ལྷ་རྣམས་དང་སྐལ་བ་མཉམ་པར་སྐྱེའི་ཞེས་པའི་བར་རོ། །འདི་ན་རྣམ་པ་གང་དག་དང་རྟགས་གང་དག་དང་ཞེས་རྒྱ་ཆེར་སྦྱར་ཏེ་རྣམ་པ་ཐམས་ཅད་དུ་ནམ་མཁའ་མཐའ་ཡས་སྐྱེ་མཆེད་ལས་ཡང་དག་པར་འདས་ནས་རྣམ་པར་
ཤེས་པ་མཐའ་ཡས་སོ་སྙམ་ནས་རྣམ་ཤེས་མཐའ་ཡས་སྐྱེ་མཆེད་ཉེ་བར་བསྒྲུབས་ཏེ་གནས་སོ། །དེ་བཞིན་དུ་རྣམ་ཤེས་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ། ཅུང་ཟད་མེད་དེ་སྙམ་ནས་ཅི་ཡང་མེད་པའི་སྐྱེ་མཆེད་རྫོགས་པར་བྱས་ཏེ་གནས་སོ། །འདི་དག་ཀྱང་རྣམ་
ཤེས་དང་ཅི་ཡང་མེད་པའི་སྐྱེ་མཆེད་དག་གི་མདོ་བདུན་བདུན་རྣམས་སུ་ཇི་སྐད་བཤད་པའི་ཚུལ་གྱིས་རིག་པར་བྱའོ། །ལྷག་མ་རྣམས་བརྗོད་དེ་རྣམ་པ་ཐམས་ཅད་དུ་ཅི་ཡང་མེད་པའི་སྐྱེ་མཆེད་ལས་ཡང་དག་པར་འདས་ཏེ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་རྫོགས་པར་
བྱས་ཏེ་གནས་སོ་ཞེས་བྱ་བ་འདིར་ཡང་མདོ་དྲུག་གོ། །གཟུགས་མེད་པ་རྣམས་སུ་དེ་དག་སྐྱོ་བའི་གཡོ་བ་ལས་དང་། དེ་སྲིད་པ་ལས་སྲིད་པའི་རྩེ་མོ་ལས་གོང་དུ་འགྲོ་བ་ལ་བདུན་ཚན་གསུམ་མོ། །འདུ་ཤེས་ཀྱིས་ནི་དྲུག་ཚན་དུ་བྱའོ། །གལ་ཏེ་ཚེའི་ཚད་ཀྱི་བར་དུ་ཡོངས་སུ་མྱ་ངན་

ལས་འདའ་བས་བར་མ་དོར་ཡོངས་སུ་མྱ་ངན་ལས་འདའ་བ་ཡིན་ན་ནི། དེ་ལྟ་ན་འཕགས་པ་ཤཱ་རིའི་བུ་ལ་སོགས་པ་རྣམས་ཀྱང་བར་མ་དོར་ཡོངས་སུ་མྱ་ངན་ལས་འདའ་བ་ཉིད་དུ་ཐལ་བར་འགྱུར་རོ། །སེམས་ཅན་རྣམས་ནི་བྱང་ཆུབ་སེམས་དཔའ་སྲིད་པ་ཐ་མ་པ་དང་
བྱང་གི་སྒྲ་མི་སྙན་པ་མ་གཏོགས་ཕལ་ཆེར་ཚེ་ཡོངས་སུ་མ་ཟད་པར་དུས་བྱེད་དོ། །དེ་ཉིད་ཀྱི་ཕྱིར་དེ་དག་ལ་ནི་ལུང་ལས་ཀྱང་ཞེས་བྱ་བ་སྨོས་ཏེ་ཀྱང་ཞེས་བྱ་བའི་སྒྲས་ནི་རིགས་པ་ལས་ཀྱང་ངོ་། །རང་གི་ལུས་ཁོ་ནས་ཞེས་བྱ་བ་རྒྱས་པར་འབྱུང་སྟེ། གལ་ཏེ་སྲིད་པ་བར་མ་དོ་ཡོད་ན་ནི་དེ་
རང་གི་ལུས་ཁོ་ནས་མནར་མེད་པར་ལྟུང་བ་མི་རིགས་ཏེ། དེའི་རང་གི་ལུས་ནི་སྔར་གྱི་ལུས་ཡིན་པའི་ཕྱིར་རོ། །དེ་ལྟ་མ་ཡིན་ན་ནི། གང་ལས་དེ་ཁོ་ན་རང་གི་ལུས་ཀྱིས་ཡིན་པར་འགྱུར་བ་དེ་ལ་གཞན་དག་པས་ཁྱད་ཅི་ཡོད་ཅེ་ན། ཁྱད་པར་ཡོད་དེ། དེ་ནི་གསོན་པོ་ཁོ་ནར་དམྱལ་
བའི་མེ་དག་གིས་བསྐོར་རོ་ཞེས་ཤེས་པར་བྱ་བའི་ཕྱིར། རང་གི་ལུས་ཁོ་ནས་ཞེས་གསུངས་ཏེ། སྔར་གྱི་ལུས་ཁོ་ནས་དམྱལ་བར་འགྲོ་བ་མི་རིགས་སོ། །ལས་ཤིན་ཏུ་དྲག་པོ་རྫོགས་པ་རྣམས་ནི་ཞེས་བྱ་བ་ལ་སོགས་པ་ལ་འཇུག་པ་རྙེད་པའི་ཕྱིར་ཤིན་ཏུ་དྲག་པོ་རྣམས་སོ། །རྣམ་
པར་སྨིན་པར་ངེས་པའི་ཕྱིར་ཡོངས་སུ་རྫོགས་པ་རྣམས་སོ། །ཆེ་བའི་ཕྱིར་ཤིན་ཏུ་དྲག་པོ་རྣམས་སོ། །བསགས་པའི་ཕྱིར་ཡོངས་སུ་རྫོགས་པ་རྣམས་སོ། །གསོན་པོ་ཁོ་ནར་དམྱལ་བའི་མེ་དག་གིས་བསྐོར་བ་དེའི་ཕྱིར་འདིའི་མཐོང་བའི་ཆོས་ལ་མྱོང་བར་འགྱུར་བའི་ལས་ནི་དང་པོར་སྨིན་
པ་ཡིན་ནོ། །འདི་ད་ནི་ཇི་ལྟར་དྲང་ཞེས་བྱ་བ་ནི་སྲིད་པ་བར་མ་ཡོད་ན་སྙམ་དུ་བསམས་པའོ། །འདི་དེ་མ་ཐག་ཏུ་སྐྱེའོ་ཞེས་བྱ་བ་ནི་ལུས་ཀྱིས་བར་མ་ཆོད་པར་དམྱལ་བར་སྐྱེའོ། །སྲིད་པ་བར་མ་སྐྱེ་བ་ཉིད་ཡིན་པར་ཞེས་བྱ་བ་རྒྱས་པར་འབྱུང་བ་ལ། རིས་མཐུན་པར་ཉེ་བར་འགྲོ་བ་ནི་སྐྱེ་བ་ཡིན་
ལ། དེ་ལ་མངོན་དུ་ཕྱོགས་པ་ནི་སྲིད་པ་བར་མ་ཡིན་པས། འཆི་བའི་མཇུག་ཐོགས་སུ་སྲིད་པ་བར་མ་ཁོ་ནས་དམྱལ་བ་དག་ཏུ་སྐྱེ་བ་ཡིན་གྱི་སྐྱེས་པ་མ་ཡིན་ནོ། །གལ་ཏེ་དེ་མ་ཐག་ཏུ་དམྱལ་བ་དག་ཏུ་སྐྱེས་པ་ཡིན་ནོ་ཞེས་སྨྲས་ན་ནི་སྲིད་པ་བར་མ་མེད་པར་འགྱུར་བ་ཞིག་གོ། །བྲམ་ཟེ་ན་

ཚོད་ཁྱེར་ཟིན་ཞེས་བྱ་བ་ལ་སོགས་པ་འབྱུང་བ་ལ། འཆི་བའི་དྲུང་དུ་འདིའི་ན་ཚོད་ཁྱེར་ཟིན་པས་ན་ན་ཚོད་ཁྱེར་ཟིན་པའོ། །འདི་ནི་འདིར་སྲིད་པ་བར་མ་མེད་པའི་ཁུངས་ཡིན་ནོ། །འདི་ལ་ཁྱོད་ཀྱིས་ཐལ་མ་ཐག་ཏུ་སྲིད་པ་བར་མ་ཡོད་པར་ཇི་སྐད་སྨྲས་པ་འདི་ནི་དགོངས་པ་ཡིན་གྱི། སྲིད་པ་བར་
མ་མེད་དོ་ཞེས་ཁོ་བོ་ཅག་གིས་འདོད་པ་འདི་ནི་དགོངས་པ་མ་ཡིན་ནོ། །ཞེས་བྱ་བ་འདི་ག་ལས་ཤེ་ན། སློབ་དཔོན་གྱིས་བརྟག་པ་འདི་ཁྱོད་ལ་ཡང་མཚུངས་ཏེ། ཞེས་བྱ་བ་སྨོས་ཏེ། དྲི་བ་འདྲི་ཞེས་བྱ་བའི་དོན་ཏོ། །འདི་ལ་ཁྱོད་ཀྱིས་སྲིད་པ་བར་མ་མེད་དོ་ཞེས་དེ་སྐད་དུ་སྨྲས་པ་འདི་ནི་
དགོངས་པ་ཡིན་གྱི་ཁོ་བོ་ཅག་གིས་སྲིད་པ་བར་མ་ཡོད་དོ། །ཞེས་ཇི་སྐད་སྨྲས་པ་འདི་ནི་དགོངས་པ་མ་ཡིན་ནོ་ཞེས་བྱ་བ་འདི་གོ་ག་ལས། དེ་ལྟ་བས་ན་གཉིས་ཀའི་ཕྱོགས་ལ་ཡང་ཞེས་བྱ་བ་རྒྱས་པར་འབྱུང་བ་ལ། སྲིད་པ་བར་མ་ཡོད་དོ་སྲིད་པ་བར་མ་མེད་དོ་ཞེས་བྱ་བ་གཉིས་ཀའི་ཕྱོགས་ལ་
ཡང་ཁྱོད་དང་ཡང་ཇི་སྐད་བཤད་པའི་མདོ་མི་འགལ་བའི་ཕྱིར་རོ། །འདི་ནི་ཞེས་བྱ་བ་རྒྱས་པར་འབྱུང་བ་ལ། ཤེས་པར་བྱེད་པ་གཞན་དུ་ཤེས་པར་མི་བྱེད་པ་ཡིན་ནོ་ཞེས་བྱ་བ་ནི་ཁུངས་ཀྱི་དོན་ཤེས་པར་བྱེད་པ་གང་ལ་གཞན་དུ་ཤེས་པར་བྱེད་པ་མེད་པའོ། །འདི་སྐད་བསྟན་པར་འགྱུར་
ཏེ། ཚིགས་སུ་བཅད་པའམ་མདོ་གང་གི་དོན་རྣམ་པ་གཞན་དུ་བཀྲི་བར་མི་ནུས་པ་དེ་ནི་ཁུངས་ཡིན་ལ། གང་གི་དོན་རྣམ་པ་གཞན་དུ་ཡང་ཡིན་པར་མི་འགལ་བ་དེས་ནི་བརྗོད་མཁན་ཉིད་སེལ་བར་བྱེད་པ་ཡིན་ནོ། །ཡང་བྱེ་བྲག་ཏུ་སྨྲ་བ་རྣམས་ཀྱི་སྲིད་པ་བར་མ་མེད་དོ་ཞེས་བྱ་བ་གང་ཡིན་
པ་འདི་ནི་རྒྱུ་དང་འབྲས་བུ་ལ་ཀུན་ཏུ་རྨོངས་པ་སྔོན་དུ་འགྲོ་བའི་ལོག་པར་ལྟ་བའོ། །འདི་ནི་གང་མདོ་དེ་དང་དེ་ལས་སེམས་ཅན་རྫུས་ཏེ་སྐྱེ་བ་མེད་དོ་ཞེས་གསུངས་པ་བཞིན་ནོ། །ཡང་འགྲོ་བ་གང་དུ་འགྲོ་བར་འགྱུར་བའི་ཞེས་བྱ་བ་རྒྱ་ཆེར་འབྱུང་བ་ལ། སྐྱེ་བའི་སྲིད་པའི་ཐེ་ཚོམ་འདི་ཡང་གང་ལས་
ཡིན། ལས་ཀྱི་འབྲས་བུ་གཅིག་དང་དུ་མ་ཉིད་ལས་ན་མདོ་དང་འགལ་ལོ། །གང་ལ་གང་ཟག་མངོན་པར་གྲུབ་པའི་ཀུན་ཏུ་སྦྱོར་བ་མ་སྤངས་པ་དང་སྐྱེ་བའི་ཀུན་ཏུ་སྦྱོར་བ་སྤངས་པ་དང་སྐྱེ་བའི་ཀུན་ཏུ་སྦྱོར་བ་སྤངས་པ་ཡོད་ཅེས་རྒྱས་པར་ཏེ། ཉོན་མོངས་པའི་ཀུན་སློང་དུ་གྱུར་པའི་

ལས་རྣམས་ཉོན་མོངས་པ་བཞིན་ཏེ་ཐ་དད་པར་འགྱུར་རོ། །ལས་ཐ་དད་པའི་ཕྱིར་འདི་མི་འདོད་དེ། སྔོན་དུས་སྲིད་པའི་ཤ་ཚུགས་ཞེས་ཤེས་པར་བྱའོ། །ཡང་འདི་ལས་གཅིག་གི་འབྲས་བུ་སྔ་མ་དང་ཕྱི་མ་དེའི་འབྲས་བུ་སྐྱེད་པའི་ངེས་པ་ཅི་ཞིག་བྱས། མཐོང་
བའི་ཆོས་ཀྱི་འབྲས་བུ་ལ་སོགས་པའི་ལས་བསྡུས་པའི་ཕྱིར། འདི་མྱོང་བར་ངེས་པ་ཉིད་དུ་ཐལ་བར་འགྱུར་རོ། །ནག་པོའི་ལས་བྱེད་པའི་མི་ལ་སོགས་པ་རྣམས་དབྱིབས་ཐ་དད་པ་ལ་མི་བརྟེན་པར་མཐོང་ངོ་། །དེ་ནས་ལས་ཀྱི་དབྱེ་བ་ལས་འདིར་དཔྱད་པ་འདི་འབྱུང་སྟེ། ཅི་དམྱལ་
བ་ལ་སོགས་པར་འགྲོ་བ་ཐམས་ཅད་ཀྱི་སྲིད་པ་བར་མའི་ཤ་ཚུགས་གཅིག་མངོན་པར་འགྲུབ་བམ་འོན་ཏེ་ཤ་ཚུགས་ཐ་དད་པ་ཞིག་འབྱུང་ཞེས་རྣམ་པར་བཅད་པ་སྟེ། དེའི་ཕྱིར་དེ་ནི་འཕེན་པ་གཅིག་པའི་ཕྱིར་ཞེས་བྱ་བ་རྒྱས་པར་སྨོས་སོ། །ལས་ནི་རྣམ་པ་གཉིས་ཏེ། འཕེན་པར་
བྱེད་པ་དང་ཡོངས་སུ་རྫོགས་པར་བྱེད་པའོ། །དེ་ལ་དེ་དག་གི་ཡོངས་སུ་རྫོགས་པར་བྱེད་པ་ནི་དུ་མ་ཡིན་གྱི། འཕེན་པར་བྱེད་པ་ནི་གཅིག་ཡིན་ཏེ་དེའི་ཕྱིར་དེ་ནི་འཕེན་པ་གཅིག་པའི་ཕྱིར། སྔོན་དུས་སྲིད་འབྱུང་ཤ་ཚུགས་ཅན་ཞེས་བྱ་བ་སྨོས་སོ། །འདི་ལ་དུས་སྔ་མའི་སྲིད་པ་
འབྱུང་བར་འགྱུར་བའི་ཤ་ཚུགས་ལྟ་བུ་ཡོད་པས་ན་སྔོན་དུས་སྲིད་འབྱུང་ཤ་ཚུགས་ཅན་ཏེ། རྒྱའི་འབུར་བཞིན་ནོ། །སྔོན་གྱི་དུས་སྨོས་པ་ནི་འཆི་བའི་སྲིད་པ་དང་སྐྱེ་བའི་སྲིད་པ་ལས་ཀྱང་ཁྱད་པར་དུ་བྱ་བའི་ཕྱིར་རོ། །མངལ་ན་གནས་པ་རྣམས་ཁོ་ན་འཆི་ན་འགྲོ་བ་ལྔ་པའི་སྲིད་པ་བར་མ་མངོན་
པར་འགྲུབ་བོ། །ལྷག་པ་དག་ན་འཕིན་པ་ཞེས་བྱ་བ་ལ། ལྷག་པ་ནི་མེ་མ་མུར་ལ་སོགས་པ་རྣམས་སོ། །གཞན་དག་ནི་དམྱལ་བའི་མེ་ནི་ཉེས་པ་བྱས་པ་དག་ཁོ་ན་ལས་འབྱུང་བའི་ཕྱིར་སྐྱོན་འདི་མེད་དོ། །མ་བསགས་ཤིང་ལས་ཀྱི་འབྲས་བུ་མ་ཐོབ་པ་དམྱལ་བའི་མེས་མི་ཚིག་གོ། །ཞེས་བྱ་བ་
ནི་ངེས་པ་ཡིན་ནོ་ཞེས་ཟེར་རོ། །གང་གི་ཕྱིར་གཞོན་ནུ་ཐོར་བུ་ལྟ་བུ་མཚན་དང་དཔེ་བྱད་དང་བཅས་པ་མའི་མངལ་དུ་འཇུག་པའི་ཕྱིར་དེས་ཛམྦུའི་གླིང་བྱེ་བ་ཕྲག་བརྒྱ་སྣང་བར་མཛད་དེ། ལྷན་ཅིག་སྐྱེས་པའི་འོད་ཡོངས་སུ་རྫོགས་པའི་ཕྱིར་རོ། །བྱེ་བ་ཕྲག་བརྒྱ་ཞེས་བྱ་བ་ནི་སྟོང་གསུམ་གྱི་སྟོང་

ཆེན་པོའི་འཇིག་རྟེན་གྱི་ཁམས་སོ། །གཞན་དག་ན་རེ་སྔོན་དུས་ཀྱི་ཚེ་སྲིད་པ་ཐམས་ཅད་ཀྱང་གཞོན་ནུ་ཐོར་བུའི་དབྱིབས་དང་བོང་ཚོད་དེ་ཉིད་དོ་ཞེས་ཟེར་རོ། །དེ་ནི་མཚན་མ་ཙམ་དུ་ཟད་དེ་ཞེས་བྱ་བ་འབྱུང་སྟེ། མཚན་མཁན་རྣམས་ལུང་སྟོན་པ་དང་རྗེས་སུ་མཐུན་པར་ཟད་སོ། །དུད་འགྲོའི་
སྐྱེ་གནས་བཟློག་ནས་ཡུན་རིང་དུ་ལོན་པའི་ཕྱིར་ཞེས་བྱ་བ་ནི་བསྐལ་པ་བརྒྱ་ལུས་པ་ནས་ལོག་པ་ཡིན་ན། །དཔེར་ན་རྒྱལ་པོ་ཀྲྀ་ཀཱིས་ཞེས་བྱ་བ་ལ། ཇི་ལྟར་རྒྱལ་པོ་ཀྲྀ་ཀཱིས་འབྱུང་བར་འགྱུར་བའི་དོན་གྱི་མཚན་མ་ཙམ་དུ་རྨི་ལམ་བཅུ་མཐོང་བ་ལྟ་བུའོ། །རྒྱལ་པོ་ཀྲྀ་ཀཱིས་ནུབ་གཅིག་ལ་རྨི་
ལམ་བཅུ་རྨིས་པར་གྲག་སྙ་ཏེ། འདི་ལྟ་སྟེ་གླང་པོ་ཆེ་སྐར་ཁུང་ནས་བྱུང་ནས་མཇུག་མ་ལ་འཐོགས་པ་དང་། ཁྲོན་པ་ཆུ་ཤིན་ཏུ་དངས་ཤིང་ཞིམ་ལ་མ་རྙོག་ཅིང་མ་གཡོགས་པ་ཞིག་མ་འཐུངས་པ་ཁོ་ནར་སྐམས་པ་དང་། ཙན་དན་གོ་ཤཱིཪྵ་དང་། ཨེ་རཎྜའི་བུད་ཤིང་བརྗེ་བ་དང་། མུ་ཏིག་
བྲེ་གང་ཕྱེ་བྲེ་གང་དུ་འཚོང་བ་དང་། སྐྱེ་བོའི་ཚོགས་ཆེན་པོས་སྤྲེའུ་དབང་བསྐུར་བ་དང་། སྐྱེས་བུ་མི་གཙང་བས་གོས་པ་ཞིག་གཞན་དག་ལ་ཡང་བསྒོ་བ་དང་། གླང་པོ་ཆེའི་ཕྲུ་གུས་གླང་པོ་ཆེ་ཆེན་པོ་ཟིལ་གྱིས་གནོན་པ་དང་། ལྷའི་ཚལ་ནས་མེ་ཏོག་ལ་སོགས་པ་ཁྱེར་བ་དང་།
དགའ་སྟོན་ཆེན་པོ་དོར་བ་དང་། སྐྱེས་བུ་བཅོ་བརྒྱད་ཀྱིས་རས་ཡུག་གཅིག་དྲངས་ཀྱང་མི་འདྲལ་བར་མཐོང་ལ། མཐོང་ནས་ཀྱང་སྐྲག་སྟེ། ཡང་དག་པར་རྫོགས་པའི་སངས་རྒྱས་འོད་སྲུངས་ལ་གསོལ་པ་དང་། བཅོམ་ལྡན་འདས་དེས་དབུགས་འབྱིན་པར་མཛད་ཅིང་བཀའ་སྩལ་
པ། རྒྱལ་པོ་ཆེན་པོ་མ་འཇིགས་ཤིག་འདི་དག་ཁྱོད་ཀྱི་འཆི་ལྟས་སྟོན་པར་བྱེད་པ་ནི་མ་ཡིན་ཏེ། འོ་ན་ཅི་ཞེ་ན། མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་ཞིག་འབྱུང་སྟེ། དེའི་གསུང་རབ་ཉམས་པར་
འགྱུར་བའི་མཚན་མར་གྱུར་པ་ཞིག་གོ། །དཔེར་ན་ཇི་ལྟར་ཞེ་ན། དེའི་ཉན་ཐོས་ཆེན་པོ་ལོངས་སྤྱོད་སྤངས་ཤིང་རབ་ཏུ་བྱུང་ནས་སློང་མོ་གཟར་བུ་གང་བྱིན་པ་ཙམ་གྱིས་རྙེད་པ་དང་བཀུར་སྟི་ལ་ལྟོས་པ་སྐྱེད་དེ། གླང་པོ་ཆེ་སྐར་ཁུང་ལ་མཇུག་མ་འཐོག་པ་ལྟར་ཚུལ་མ་ཡིན་པས་ཉོན་མོངས་

པར་འགྱུར་ཞིང་ལེགས་པའི་དོན་ལ་མི་རྩོལ་བར་འགྱུར། ཁྲོན་པ་ཆུ་མ་འཐུངས་པར་སྐམས་པ་ལྟར་ཆོས་སྨྲ་བ་ཆོས་སྟོན་པ་ལ་འགའ་ཡང་ཉན་པར་མི་འགྱུར། གོ་ཤཱིཪྵ་དང་འདྲ་བའི་གཙུག་ལག་དང་དམ་པ་མ་ཡིན་པའི་བསྟན་བཅོས་དག་བརྗེ་
བར་འགྱུར། ཟང་ཟིང་གི་ཕྱིར་མུ་ཏིག་བྲེ་གང་ལྟ་བུའི་ཆོས་སྟོན་པར་འགྱུར། སྤྲེའུ་ལྟ་བུའི་ཚུལ་ཁྲིམས་འཆལ་པ་མདུན་གྱིས་བདར་བར་འགྱུར། ཚུལ་ཁྲིམས་འཆལ་པ་ལ་བརྩད་པ་དང་མི་གཙང་བས་གོས་པ་ལྟར་བདག་ཁོ་ནར་མ་ཟད་དོ། །ཞེས་དད་པ་དང་ལྡན་པ་གཞན་
དག་ལ་ཡང་བསྐུར་བར་འགྱུར། གླང་པོ་ཆེའི་ཕྲུ་གུ་འདྲ་བའི་གསར་བུས་གླང་པོ་ཆེ་ཆེན་པོ་དང་འདྲ་བའི་རྒན་པོ་རྣམས་ལ་སྤྱོ་བར་འགྱུར། དགེ་འདུན་ནམ་མཆོད་རྟེན་གྱི་མེ་ཏོག་དང་འབྲས་བུ་ལ་སོགས་པ་བླངས་ཏེ་ཁྱིམ་པ་དག་ལ་སྟེར་བར་འགྱུར། དགའ་སྟོན་ཆེན་པོ་དང་འདྲ་
བའི་སོ་སོ་ཐར་པའི་མདོ་འདོན་པ་ལ་འདུས་ནས་རྩོད་པ་སྨྲ་བར་འགྱུར། བསྟན་པ་རྣམ་པ་བཅོ་བརྒྱད་དུ་འགྱེས་པར་འགྱུར། དེ་དག་ཀྱང་རས་ཡུག་ལྟ་བུའི་རྣམ་པར་གྲོལ་བའི་རས་ཡུག་འདྲེན་ཅིང་། དེ་གཞན་ཉིད་དུ་ཡང་མི་འགྱུར་རོ། །སྲིད་པ་བར་མ་ནི་ལྟོ་བ་རྟོལ་ཏེ་འཇུག་
པ་མ་ཡིན་གྱི་ཞེས་བྱ་བ་ལ་ཅིའི་ཕྱིར་ཞེ་ན། ལས་ཀྱིས་ལྟོ་བར་འཛིན་པའི་ཕྱིར་སྐྱེ་གནས་ཀྱི་སྒོ་ནས་འཇུག་གོ། །གཞན་དག་ན་རེ། ཐོགས་པ་མེད་པའི་ཕྱིར་གང་འདོད་པ་ནས་འཇུག་གོ་ཞེས་ཟེར་རོ། །གཟུགས་ན་སྤྱོད་པ་ཞེས་བྱ་བ་རྒྱས་པར་འབྱུང་ངོ་། །འོག་མིན་ན་ལུས་ཀྱི་ཚད་
དཔག་ཚད་ཁྲི་དྲུག་སྟོང་པ་རྣམས་ཛམྦུའི་གླིང་དུ་མངོན་པར་འགྲུབ་པའི་གོ་སྐབས་ཡོད་པར་མི་འགྱུར་རོ་ཞེ་ན་ནམ་མཁའ་ཡངས་པའི་ཕྱིར་དང་། རྟེན་ནོར་བུའི་འོད་ལ་སོགས་པའི་སྣང་བ་དང་འདྲ་བས་འགར་ཡང་ཐོགས་པ་མེད་པའི་ཕྱིར་རོ། །བྱང་ཆུབ་སེམས་དཔའི་ཡང་ཞེས་བྱ་བ་ལ་
སོགས་པ་ལ། གཞན་དག་ན་རེ་དགེ་སློང་མ་དཀར་མོ་ཁོ་ན་ཡིན་ཏེ། དགེ་འདུན་ལ་ཆོས་གོས་ཕུལ་བའི་སྨོན་ལམ་གྱི་དབང་གིས་ཇི་སྲིད་དེའི་གདུང་ལ་བཀུར་སྟི་བྱ་བའི་ཕྱིར་མཆོད་རྟེན་བཞེངས་པ་ཡང་གོས་ཀྱིས་དཀྲིས་པའི་བར་དུ་གྱུར་ཏོ། །བྱང་ཆུབ་སེམས་དཔའ་ནི་དགེ་བའི་རྩ་བ་བརྩམས་པ་

ཐམས་ཅད་བྱང་ཆུབ་ཁོ་ནར་བསྔོས་པའི་ཕྱིར། དེའི་སྲིད་པ་བར་མ་གོས་དང་བཅས་པ་མ་ཡིན་ནོ་ཞེས་ཟེར་རོ། །བྱེ་བྲག་ཏུ་སྨྲ་བ་རྣམས་བྱང་ཆུབ་སེམས་དཔའི་ཡང་གོས་དང་བཅས་པ་ཡིན་ཏེ། ངོ་ཚ་ཤེས་པ་དང་ཁྲེལ་ཡོད་པ་ཤས་ཆེ་བའི་ཕྱིར་གཟུགས་ཀྱི་ཁམས་ཀྱི་སྲིད་པ་བར་མ་
བཞིན་ནོ་ཞེས་ཟེར་རོ། །ཡང་སྲིད་པ་སྔ་མ་ཞེས་བྱ་བ་ལ་སོགས་པ་འབྱུང་ངོ་། །སྲིད་པ་ཞེས་བྱ་བ་ནི་ཟག་པ་དང་བཅས་པའི་དངོས་པོ་ཐམས་ཅད་ཡིན་པས། སྲིད་པ་ཞེས་བྱ་བ་ནི་བྱེ་བྲག་མེད་པར་ཉེ་བར་ལེན་པའི་ཕུང་པོ་ལྔ་དག་གོ་ཞེས་བྱ་བ་སྨོས་ཏེ། འདིར་ནི་སེམས་ཅན་ཞེས་བྱ་བ་ཁོ་
ན་གཟུང་ངོ་། །དེ་ནི་རྣམ་པ་བཞིར་དབྱེ་སྟེ་ཞེས་བྱ་བ་ལ། དེ་ནི་གཅིག་ཁོ་ན་ཡིན་མོད་ཀྱི་སྐྱེ་བ་དང་གནས་སྐབས་ཀྱི་བྱེ་བྲག་གིས་རྣམ་པ་བཞིར་དབྱེའོ། །གལ་ཏེ་སེམས་ཅན་གཟུགས་ཅན་དག་གི་ནང་དུ་སྐྱེ་ན་ཞེས་བྱ་བ་ལ་གཟུགས་ཅན་སྨོས་པ་ནི། གཟུགས་མེད་པ་རྣམས་སུ་སྲིད་པ་བར་
མ་མེད་པའི་ཕྱིར་རོ། །ནི་ཙི་ཥཱཾ་བྷཱ་བཱ་ནཾ་སྲིད་པ་བར་མ་ཉིད་སྔོན་ཞེས་བྱ་བ་དེ་ཉིད་དུས་སྔ་མའི་སྲིད་པར་འགྱུར་རོ་ཞེ་ན་མི་འགྱུར་ཏེ། སྲིད་པ་བར་མ་མེད་པར་སྐྱེ་བ་ལ་སོགས་པའི་སྲིད་པ་རྣམས་དེའི་འབྲས་བུ་མ་ཡིན་པའི་ཕྱིར་རོ། །དེའི་ཕྱིར་གང་གི་གནས་སྐབས་ལས་སྲིད་པ་བར་མ་རྣམས་
སྲིད་པ་བར་མ་ལ་སོགས་པ་རྣམས་སུ་སྐྱེ་བ་འབྱུང་བ་དེ་འདིར་དུས་སྔ་མའི་སྲིད་པ་སྟེ། གང་གི་ཕྱིར་སྐྱེ་བ་གཞན་ལ་བལྟོས་པ་དེ་འདིའི་གནས་སྐབས་ལ་སྟེ་སྐྱེ་བ་དུ་མའི་གནས་སྐབས་གསུམ་ལ་བལྟོས་པ་མ་ཡིན་ནོ། །སྲིད་པ་བར་མ་དེ་ཡང་ལུང་དང་རིགས་པའི་ཡུལ་ཡིན་པ་འབའ་ཞིག་
ཏུ་མ་ཟད་དེ། འོ་ན་ཅི་ཞེ་ན་རིས་མཐུན་ལྷ་མིག་དག་པས་མཐོང་། རིས་མཐུན་པས་བལྟ་བར་བྱ་བ་ཡིན་ཞིང་། ལྷ་མིག་དག་པས་བལྟ་བར་བྱ་བ་ཡིན་ནོ། །རིས་མཐུན་པའི་སྲིད་པ་བར་མ་དག་གིས་མཐོང་ངོ་ཞེས་བྱ་བ་ལ་དམྱལ་བའི་སྲིད་པ་བར་མ་ནི་དམྱལ་བའི་སྲིད་པ་བར་མ་ཁོ་ནས་
མཐོང་གི །གཞན་གྱི་སྲིད་པ་བར་མ་དག་གིས་ནི་མ་ཡིན་ཏེ་གཞན་དག་ལ་ཡང་དེ་དང་འདྲ་བར་བརྗོད་པར་བྱའོ། །གང་དག་ལ་ལྷའི་མིག་རྣམ་པར་དག་པ་མངོན་པར་ཤེས་པ་ལས་བྱུང་བ་ཡོད་པ་དེ་དག་གིས་ཀྱང་འདི་མཐོང་ངོ་། །ལྷའི་མིག་ཤིན་ཏུ་རྣམ་པར་དག་པ་ནི་སྐྱོན་བཅུ་གཅིག་དང་བྲལ་

བ་སྟེ། སྐྱོན་དེ་དག་ཀྱང་ཐེ་ཚོམ་དང་ཡིད་ལ་མི་བྱེད་པ་དང་། ལུས་ཀྱི་གནས་ངན་ལེན་དང་། རྨུགས་པ་དང་། གཉིད་དང་། རྒོད་པ་དང་། བརྩོན་འགྲུས་བརྩམས་དྲགས་པ་དང་། སེམས་ཡ་ཡོ་པོ་དང་། བག་ཚ་བ་དང་། འདུ་ཤེས་སྣ་ཚོགས་པ་དང་།
སྨྲ་བ་མངས་པ་དང་། ཧ་ཅང་བསྒོམ་དྲགས་པ་རྣམས་སོ། །གཟུགས་རྣམས་སུ་མངོན་པར་ཤེས་པ་ལས་བྱུང་བ་ནི་མངོན་པར་ཤེས་པའི་རང་བཞིན་ཏེ། བསྒོམས་པའི་འབྲས་བུ་ཞེས་བྱ་བའི་དོན་ཏོ། །ལྷའི་མིག་སྐྱེས་ནས་ཐོབ་པས་ནི་མི་མཐོང་སྟེ། ཅིའི་ཕྱིར་ཞེ་ན། ལྷའི་མིག་
ཤིན་ཏུ་རྣམ་པར་དག་པས་མཐོང་ངོ་ཞེས་འབྱུང་བའི་ཕྱིར་རོ། །འདིར་གང་ལྷའི་མིག་སྐྱེས་ནས་ཐོབ་པས་མི་མཐོང་བའི་རྒྱུ་ཅི་ཞེ་ན། ཤིན་ཏུ་དང་བའི་ཕྱིར་ཞེས་བྱ་སྟེ། སྐྱེས་ནས་ཐོབ་པའི་མིག་གི་ཡུལ་མ་ཡིན་པའི་ཕྱིར་ཞེས་བྱ་བའི་དོན་ཏོ། །གཞན་དག་ན་རེ་ལྷའི་སྲིད་པ་བར་མ་
པས་ཐམས་ཅད་མཐོང་ངོ་། །ཞེས་བྱ་བ་ནི་དེའི་མིག་ནི་འགྲོ་བ་དང་འདྲ་བར་ཁྱད་པར་དུ་འཕགས་པའི་ཕྱིར་ཏེ་གཞན་ལ་ཡང་དེ་བཞིན་དུ་བརྗོད་པར་བྱའོ། །དབང་པོ་ཀུན་ཚང་ཞེས་བྱ་བ་ལ། སྔོན་གྱི་དུས་ཀྱི་སྲིད་པའི་ཤ་ཚུགས་ཅན་ཡིན་ཡང་། རྣམ་པར་སྨིན་པའི་སྙིང་པོ་
དང་པོ་ཡིན་པའི་ཕྱིར་དང་། སྲིད་པ་འཚོལ་བ་ཡིན་པའི་ཕྱིར་དབང་པོ་མ་ཚང་བ་མེད་པ་ཡིན་ནོ། །འགྲོ་བ་གང་དང་། ཁམས་དང་གནས་གང་དུ་སྐྱེ་བར་འགྱུར་བ་ནི་དེ་ལས་རྣམ་པ་ཐམས་ཅད་དུ་ཟློག་ཏུ་མེད་དོ། །མིའི་སྲིད་པ་བར་མ་མེད་པར་གྱུར་ནས་ཞེས་བྱ་བ་རྒྱས་
པར་འབྱུང་སྟེ། ཁམས་དང་གནས་དག་ལ་ཡང་དེ་དང་འདྲ་བར་རིག་པར་བྱའོ། །ངེས་པ་འདིས་ཞེས་བྱ་བ་རྒྱ་ཆེར་འབྱུང་བ་ལ། ཅིའི་ཕྱིར་འགྲོ་བའི་སྲིད་པ་བར་མ་ལས་ཀྱི་འཕེན་པར་གཅིག་ཁོ་ན་ཞེ་ན། མྱོང་བར་ངེས་པའི་ལས་ཀྱིས་འཕངས་པ་དེ་འགྲོ་བ་དེ་དང་ཕྲད་པའི་དོན་དུ་
འཇུག་པའི་ཕྱིར་རོ། །རྒྱུན་ཏུ་ཞུགས་པ་ལ་སོགས་པ་རྣམས་གནས་དང་ས་འཕོས་པ་ལས་བར་མ་དོར་འཆི་བ་གང་ཡིན་པ་ནི་བཟློག་པར་འགྱུར་རོ་ཞེས་བྱ་བ་རྩོད་པའི་ཚིག་གོ། །འདོད་ཆགས་དང་མ་བྲལ་བའི་སློབ་པའི་སྲིད་པ་བར་མ་ལ་ནི་ས་འཕོ་བ་མེད་དེ་ལམ་ལས་རྒྱལ་བ་མ་

ཡིན་པའི་ཕྱིར་དང་། འདོད་པའི་ཁམས་ལས་ནི་མངོན་དུ་མ་གྱུར་པའི་སྒོ་ནས་སྡུག་བསྔལ་ལས་འདས་པའི་ཕྱིར་རོ། །གང་དག་མངོན་དུ་གྱུར་པར་འདོད་པ་དེ་དག་ཀྱང་རིགས་ནས་རིགས་སུ་སྐྱེ་བ་དང་། བར་ཆད་གཅིག་པ་དག་ས་འཕོ་བར་མི་འདོད་དོ། །ལྷ་དང་མིའི་རིགས་ནས་
རིགས་སུ་སྐྱེ་བ་སོ་སོར་ངེས་པ་དག་ཀྱང་ལྷ་དང་མི་དག་ཏུ་སྐྱེ་བ་ལ་ཞུགས་པའི་ལས་མངོན་དུ་གྱུར་པའི་ཕྱིར་འགྲོ་བ་གཞན་དུ་སྐྱེ་བ་མ་ཡིན་ཏེ། དེའི་ཕྱིར་མི་བཟློག་ཅེས་བཤད་དོ། །འདོད་པ་ན་སྤྱོད་པ་སྨོད་པ་ནི་གཟུགས་ན་སྤྱོད་པའི་སྲིད་པ་བར་མ་བསལ་བར་བྱ་བའི་ཕྱིར་རོ། །
དེ་ནི་ཁམ་གྱི་ཟས་ཀྱི་འདོད་ཆགས་དང་བྲལ་བ་ཡིན་ཏེ། དེའི་ཟས་ནི་རྣམ་པར་ཤེས་པ་དང་ཡིད་ལ་སེམས་པ་དང་། རེག་པ་ཞེས་བྱ་བ་དང་རྣམ་པ་གསུམ་མོ། །དེ་ཉིད་ཀྱི་ཕྱིར་དྲི་ཟ་ཞེས་བྱའོ། །གང་གི་ཕྱིར་དེ་ལྟར་དྲི་ཟ་ཡིན་པ་དེའི་ཕྱིར་དྲི་ཟའོ། །འགྲོ་བ་མ་ཡིན་ཡང་འདི་དྲི་ཟ་ཞེས་
བྱ་བར་འགྱུར་རོ། །གལ་ཏེ་འདི་འགྲོ་བའི་དོན་ཡིན་ཡང་ཟ་བའི་དོན་དུ་འགྱུར་བ་ཅི་ཞེ་ན། སྒྲའི་བྱིངས་རྣམས་དོན་དུ་མ་ཡིན་པའི་ཕྱིར་ཞེས་བྱ་སྟེ། འགྲོ་བའི་དོན་ཅན་ཡང་ཟ་བའི་དོན་ཅན་དུ་འགྱུར་བས་སྐྱོན་མེད་དེ། དེ་ལྟ་ན་གནྡྷ་དྲི་དང་ཨརྦ་ཟ་བ་ཡིན་པས་གནྡྷཱརྦ་ཞེས་པར་འགྱུར་
རོ་ཞེ་ན། དེའི་ཕྱིར་ཐུང་ངུ་ཉིད་ནི་ཀརྐནྡྷུ་དང་ཤ་ཀནྡྷུ་བཞིན་ནོ་ཞེས་སྨོས་ཏེ། དཔེར་ན་ཤཀཱནྡྷུ་ཞེས་ཐོབ་པ་ལ་ཤ་ཀནྡྷུ་ཞེས་པར་གྱུར་པ་བཞིན་ནོ། །དབང་ཆུང་བར་གྲགས་པ་ཞེས་བྱ་བ་ནི་མི་རིགས་པ་སྟེ། དམན་པའི་རིགས་ཅན་ཞེས་བྱ་བའི་དོན་ཏོ། །དབང་ཆུང་བ་ནི་དབང་
ཐང་ཆུང་བའོ། །དབང་ཆུང་བར་གྲགས་པ་གང་ལ་ཡོད་པ་དེ་ནི་དབང་ཆུང་བར་གྲགས་པ་ཡིན་ནོ། །དབང་ཆེ་བ་ནི་དབང་ཐང་ཆེ་བ་སྟེ། དབང་ཆེ་བ་ཞེས་བྱ་བར་གྲགས་པ་གང་ལ་ཡོད་པ་དེ་ནི་དབང་ཆེ་བར་གྲགས་པ་ཡིན་ནོ། །བཙུན་པ་ན་རེ་ངེས་པ་མེད་དེ་ཞེས་བྱ་བ་ལ་བཙུན་པ་ནི་
དཔེས་སྟོན་པའི་སྡེ་པ་ཆོས་སྐྱོབ་བོ། །ཇི་སྐད་དུ་སྐྱེ་བའི་ཚོགས་པ་མ་རྙེད་པ་དེ་སྲིད་ཀྱི་བར་དུ་གནས་སོ་ཞེས་བྱ་བ་འདི་ལ་རྒྱུ་སྨྲས་པ་ནི་དེའི་ཚེའི་འཕེན་པ་ལོགས་ཤིག་ན་མེད་དེ་ཞེས་བྱ་བའོ། །ཡང་དེ་ཇི་ལྟར་ཤེས་པར་བྱ་ཞེ་ན། དེའི་ཕྱིར་རིས་མཐུན་པ་གཅིག་པའི་ཕྱིར་རོ་ཞེས་བྱ་བ་སྨོས་

སོ། །དུས་སྔ་མའི་སྲིད་པ་གང་ཡིན་པ་དང་། སྲིད་པ་བར་མ་གང་ཡིན་པ་དེ་དག་ཐོབ་པ་བྱེད་པའི་རིས་མཐུན་པ་དེ་ནི་གཅིག་པ་ཉིད་དོ། །ཚེའི་ལས་གང་གིས་དུས་སྔ་མའི་སྲིད་པའི་ཚེ་འཕེན་པ་དེ་ཉིད་ཀྱིས་སྲིད་པ་བར་མའི་ཡང་ཡིན་ཏེ། སྲིད་པ་ཚོལ་བའི་ཕྱིར་རོ། །
དེ་ལྟ་མ་ཡིན་ན་ཞེས་བྱ་བ་ལ། གལ་ཏེ་རིས་མཐུན་པ་ཐ་དད་པའམ་ཚེའི་ལས་ཀྱིས་ཚེ་ལོགས་ཤིག་ཏུ་འཕེན་པར་འགྱུར་ན་ནི་དེ་ལྟ་ཡིན་དང་སྲིད་པ་བར་མ་དོའི་ཚེ་ཟད་པས་འཆི་བའི་སྲིད་པར་ཡང་འགྱུར་ཏེ། དཔེར་ན་དུས་སྔ་མའི་སྲིད་པའི་ཚེ་ཟད་པས་འཆི་བའི་སྲིད་པར་འགྱུར་བ་བཞིན་
ནོ། །དེའི་ཕྱིར་ངེས་པ་མེད་དོ། །གལ་ཏེ་ཤའི་ཕུང་པོ་རི་རབ་ཙམ་དུ་ཞེས་བྱ་བ་ནི་སློབ་དཔོན་ཉིད་འདྲི་བར་མཛད་པའོ། །གཞན་དག་ན་རེ་འདི་ལ་རྒྱུ་མེད་པ་དང་རྒྱུ་དང་བཅས་པར་སྨྲ་བའི་ཚིག་གིས་གླགས་ཡོད་པ་དེའི་ཕྱིར་དེས་སྨྲས་སོ་ཞེའོ། །དེ་དག་དྲི་དེ་ཚོར་ཞིང་དེ་དང་ལྷན་ཅིག་རྒྱུ་བའི་རོ་
མྱོང་བ་དྲན་ནས་དེ་དག་ལ་ཆགས་པ་སྐྱེད་པར་བྱེད་པ་དེའི་ཕྱིར་དྲི་དང་རོ་ལ་མངོན་པར་ཆགས་པ་ཞེས་བྱ་བ་སྨོས་སོ། །སད་པར་བྱས་ནས་སྲིད་པ་དེས་ཞེས་བྱ་བ་ནི་དྲི་དང་རོའི་སྲེད་པས་རྣམ་པར་སྨིན་པ་ལ་མངོན་པར་ཕྱོགས་པར་བྱས་ཏེ་སྲིད་པ་བར་མའི་རྒྱུན་གྱིས་སྲིན་བུའི་ནང་དག་ཏུ་སྐྱེ་བར་
འགྱུར་རོ། །དེའི་རྐྱེན་མང་པོ་ཞེས་བྱ་བ་ནི་སྲིན་བུའི་ངོ་བོའི་རྐྱེན་མང་བའི་ཚེ་སྟེ། དེ་འཆགས་པར་འགྱུར་ཏེ། སྲིན་བུའི་སྲིད་པ་འཆགས་པར་འགྱུར་བའོ། །འཇུག་པ་རྙེད་ཅེས་བྱ་བ་ནི་རྣམ་པར་སྨིན་པ་འབྱིན་པ་ལ་མངོན་དུ་ཕྱོགས་པར་གྱུར་ཅེས་བྱ་བའི་དོན་ཏོ། །སེམས་ཅན་རྣམས་
ཀྱི་ལས་ཀྱི་རྣམ་པར་སྨིན་པ་བསམ་གྱིས་མི་ཁྱབ་པོ་ཞེས་བྱ་བ་ནི་དེ་ཉིད་ལ་ཡུལ་དང་དུས་སུ་རྐྱེན་ངེས་པ་དང་མ་ངེས་པ་ཉིད་ཀྱི་ཕྱིར་རོ། །སྲིད་པ་བར་མ་ནི་སྲིད་པ་ཚོལ་བ་ཡིན་པའི་ཕྱིར་ཞེས་བྱ་བ་ནི་དེ་ནི་སྐྱེ་བའི་དགོས་པ་ཅན་ཡིན་པའི་ཕྱིར་སྲིད་པ་དོན་དུ་གཉེར་བར་བྱེད་དོ། །དེའི་ཕྱིར།
ཚོགས་ཤིང་དུས་ལ་བབ་པ་ན། འབྲས་བུ་ཉིད་དུ་སྨིན་པར་འགྱུར་ཞེས་འབྱུང་བའི་ཕྱིར་རོ། །གཞན་དུ་ནི་མ་ཡིན་ཏེ་ཞེས་བྱ་བ་དེ་མང་པོ་མ་ཡིན་པའི་དུས་སོ། །གཞན་དུ་ནི་མ་ཡིན་པ་ལྟ་བུའོ་ཞེས་བྱ་བ་ནི་ཚེ་ཐུང་བ་མ་ཡིན་པ་སྟེ། འཁོར་ལོས་སྒྱུར་བ་འབྱུང་བ་ནི། སྟོང་ཕྲག་

བརྒྱད་ཅུ་ལས་མི་འཕྱི་ཞེས་འབྱུང་བའི་ཕྱིར་རོ། །དེ་ཉིད་ཀྱི་ཕྱིར་ན་གང་གི་ཕྱིར་འཁོར་ལོས་སྒྱུར་བ་ལ་སོགས་པར་འགྱུར་བའི་ལས་དག་ཡོད་དུ་ཟིན་ཀྱང་། རེས་འགའ་ཞིག་ཁོ་ན་རྣམ་པར་སྨིན་པ་མངོན་པར་འགྲུབ་པར་བྱ་བ་ལ་འཇུག་པ་རྙེད་པར་འགྱུར་བའི་ཕྱིར་རོ། །དེ་ཉིད་དུ་ཞེས་བྱ་བ་
ནི་སྲིད་པ་བར་མ་དོར་རོ། །སྲིད་པ་ཚོལ་བ་ཡིན་པའི་ཕྱིར་ཞེས་བྱ་བ་ལ་དེ་ནི་སྐྱེ་བའི་དགོས་པ་ཅན་ཡིན་པའི་ཕྱིར་སྲིད་པ་དོན་དུ་གཉེར་བར་བྱེད་དོ། །ཡང་ལས་ལས་སྐྱེ་བ་དང་ལས་ཀྱི་འབྲས་བུ་དེ་རྐྱེན་ཚོགས་པ་ལས་ཇི་ལྟར་སྐྱེ་བར་འགྱུར། ཏནྟརྱ་ཀཏྭཱཛྫ་ནྨ་ནཿ <དེའི་སྐྱེ་བ་འཕགས་པའི་མ་ཡིན་པའི་ཕྱིར་རོ། །>སྲིད་པ་བར་མ་ལ་ནི་
དེ་ལྟར་བརྒལ་བར་བྱ་བ་མ་ཡིན་ཏེ་འདི་ནི་ལས་ཀྱི་ནུས་པ་བསམ་གྱིས་མི་ཁྱབ་པ་ཉིད་དོ་ཞེས་བཤད་དོ། །འོན་ཏེ་མ་ངེས་ན་ནི་ཞེས་བྱ་བ་རྒྱས་པར་འབྱུང་བ་ལ། གང་ཞིག་དུས་དང་སྐྱེ་བ་ངེས་པས་ཡུལ་མ་ངེས་པར་འཕེན་པ་དེ་ནི་དེ་ལས་གཞན་པའི་ཡུལ་དང་སྐྱེ་བ་དེར་སྐྱེའོ། །
གཞན་དག་ན་རེ་འདྲ་བར་སྐྱེ་བར་འགྱུར་ཏེ། སྐྱེ་བ་དེ་དང་ཡུལ་དེར་སྐྱེ་བ་མ་ངེས་ན་ནི་དེའི་ཕྱིར་དེ་དང་འདྲ་བའི་སྐྱེ་བར་སྐྱེའོ་ཞེས་ཟེར་རོ། །ཡང་ཅིའི་ཕྱིར་འདིའི་རིགས་ཉིད་ངེས་པ་དང་མ་ངེས་པ་ཉིད་དུ་བཤད་པ་ལ། དུས་སུ་ཡང་རིགས་ངེས་པ་དང་མ་ངེས་པའི་ཕྱིར་མ་ཡིན་ཏེ། དུས་སུ་
ཡང་གཉི་ག་རིག་པར་བྱའོ། །ཇི་ལྟར་བ་ལང་དག་ནི་དབྱར་རྣམས་སུ་འཁྲིག་པ་མང་ལ་ཞེས་བྱ་བ་ལ་སོགས་པས་ངེས་པ་དང་མ་ངེས་པ་སྟེ། ཇི་ལྟར་ཞེ་ན། དུས་གཞན་ལ་བ་ལང་རྣམས་ཀྱི་ནང་དུ་སྐྱེ་བར་འགྱུར་བ་གང་ཡིན་པ་དེ་ནི་བ་མེན་རྣམས་ཀྱི་ནང་དུ་སྐྱེའོ་ཞེས་བྱ་བ་ལ་
སོགས་པ་འབྱུང་ངོ་། །ལས་ཀྱི་འཕེན་པ་གཅིག་པའི་ཕྱིར་ཞེས་བྱ་བ་ལ་ལས་གང་གིས་བ་ལང་ལ་སོགས་པའི་རིས་མཐུན་པ་འཕེན་པའི་ལས་དེ་ཉིད་ཀྱིས་དེའི་སྲིད་པ་བར་མ་འཕེན་པས་ཇི་ལྟར་རིས་མཐུན་པ་གཞན་གྱི་སྲིད་པ་བར་མས་རིས་མཐུན་པ་གཞན་སྐྱེད་པར་ནུས་ཏེ། དེ་ནི་བརྗོད་
པར་བྱ་བ་མ་ཡིན་ནོ། །གཞན་དག་ན་རེ་རིས་མཐུན་པ་གཞན་དུ་སྐྱེས་པ་ཡང་དེའི་རིས་མཐུན་པར་གཏོགས་པའོ། །འོ་ན་སྲིད་པ་བར་མ་དང་ཐ་མི་དད་པའི་རིས་མཐུན་པ་ཉིད་ཅི་ཞེ་ན། ཀ་ལྨཱ་ཥ་པཱ་ད་ལ་སོགས་པ་བཞིན་ཞེས་སོ། །འདི་ལ་བརྗོད་པར་བྱ་བ་མེད་དེ། འདིར་ནི་རིས་

མཐུན་པ་གང་དུ་སྐྱེ་བ་དེའི་རིགས་མཐུན་པར་གཏོགས་པ་ཉིད་དུ་འགྱུར་རོ་ཞེས་གཞན་གྱིས་བསམས་པའོ། །འདི་དེ་འདྲ་བ་ཞེས་གསུངས་པའི་ཕྱིར་ཅི་ལས་ཡིན། རྣམ་པ་གཞན་དུ་ན་ཁྱད་པར་ལས་བྱུང་བའི་དོན་ཅན་དེ་དགག་པའི་ཕྱིར་དེ་སྐད་བཤད་དོ། །སྲིད་པ་
བར་མ་རིས་གཞན་ནི་མ་ཡིན་ནོ་ཞེས་རྒྱས་པར་འབྱུང་སྟེ། དེའི་ཕྱིར་འདི་ལ་ནི་མ་ཡིན་ནོ། །སློབ་དཔོན་འདུས་བཟང་ནི། དེའི་ལས་རིགས་གཅིག་པའི་ཕྱིར་རིས་ཐ་དད་པ་འཕེན་པ་གཅིག་པ་ཉིད་གཏོད་པ་མ་ཡིན་ནོ་ཞེས་ཟེར་རོ། །དེ་ལྟ་ན་ཡང་སྲིད་པ་བར་མའི་ལས་གང་ཡིན་པའི་འབྲས་བུ་
དེ་ཉིད་ལྷག་མའི་སྐྱེ་བ་ཡིན་ནོ་ཞེ་ན། ཅི་ལྟར་ལས་ཀྱི་འཕེན་པ་གཅིག་ཉིད་འདོར་བར་བྱེད། ཅི་སྟེ་དེ་ཉིད་དེ་ཡི་འབྲས་བུའོ་ཞེ་ན། དེ་ལྟ་ན་ཡང་སྐྱེ་བ་གཅིག་འཕེན་པ་ལས་གཅིག་ཡིན་པས་འགལ་ཏེ། ལས་གཅིག་གིས་རིགས་མཐུན་པ་དུ་མ་འཕེན་པ་ཉིད་དུ་ཁས་བླང་བའི་ཕྱིར་རོ། །
གཞན་དག་ན་རེ་རིས་གཞན་གྱིས་སྲིད་པ་བར་མས་ཞེས་བྱ་བ་ལ་སོགས་པས་མི་བཟློགས་ཞེས་བྱ་བ་འདི་དང་འགལ་བར་སྟོན་ཏོ་ཞེས་ཟེར་རོ། །གཞན་དག་ནི་འགྲོ་བ་གཅིག་ལ་དགོངས་ཏེ་གསུངས་པའི་ཕྱིར་སྐྱོན་མེད་དོ་ཞེས་ཟེར་ཏེ། འགྲོ་བ་གཅིག་ཏུ་རིས་མཐུན་པའི་ཕྱིར་གཞན་ཉིད་འཕེན་
པ་དེ་ལ་རིགས་གཅིག་ཏུ་དགོངས་སོ་ཞེས་ཤེས་པར་བྱའོ། །བློ་ནི་ཕྱིན་ཅི་ལོག་གྱུར་པས། ཞེས་བྱ་བ་ལ་སོགས་པ་ལ་འདོད་ཆགས་དང་ཞེ་སྡང་དག་གིས་ཏེ་འདི་ལྟར་མ་ལ་འཁྲིག་པའི་འདོད་ཆགས་ཀུན་ཏུ་སྤྱོད་པའི་ཕྱིར་བློ་ཕྱིན་ཅི་ལོག་པ་ཡིན་ལ། ཕ་ལ་ཞེ་སྡང་ཀུན་ཏུ་སྤྱོད་པའི་
ཕྱིར་རོ། །ཡང་ན་ནི་བཟློག་པའོ། །ཕ་མ་ཞེས་བྱ་བ་ལ། ཕ་དང་མ་ནི་ཕ་མ་སྟེ། ཕ་མ་དེ་གཉིས་སོ། །ཉལ་པོ་བྱེད་པ་ནི་འཁྲིག་པའི་ཆོས་ལྷག་པར་སྤྱོད་པའོ། །ཕོའི་འདོད་ཆགས་ནི་ཕོའི་འོ། །མོའི་ཡང་དེ་དང་འདྲའོ། །དེ་ཉིད་ཀྱི་ཕྱིར། བུ་ནི་ལྷག་པར་མའི་ཕྱོགས་
འཛིན་ལ། བུ་མོ་ནི་ཕའི་འོ། །གནས་སྐབས་དེར་ཞེས་བྱ་བ་ལ། ཕོའི་ཉལ་པོ་ལ་ནི་ཕའི་གནས་སྐབས་སུའོ། །མོའི་ཉལ་པོ་ལ་ནི་མའི་གནས་སྐབས་སུའོ། །མི་གཙང་བ་དེར་ཞེས་བྱ་བ་རྒྱས་པར་འབྱུང་བ་ལ། མི་གཙང་བ་ནི་ཁུ་ཁྲག་གོ །མངལ་གྱི་གནས་ནི་ཕོ་བ་དང་

ལོང་ཀ་དང་གཉིས་ཀྱི་བར་རོ། །ཁུ་ཆུ་དང་ཁྲག་འདི་ནི་བདག་གི་ཡིན་ནོ་སྙམ་སྟེ་དགའ་བ་སྐྱེས་ནས་མའི་མངལ་དུ་ཞུགས་ཏེ་ཁུ་ཆུ་དང་ཁྲག་ཐིགས་པ་གཅིག་གཉིས་ཀྱིས་ནུར་ནུར་པོར་གནས་ཏེ། འདབ་ཆགས་སུ་གནས་ཞེས་བྱ་བའི་དོན་ཏོ། །དེ་ནས་འདབ་ཆགས་སུ་གནས་པ་དེའི་
ཕུང་པོ་འཁྲང་བར་འགྱུར་བ་ཞེས་བྱ་བ་ནི་རགས་པར་འགྱུར་བ་སྟེ། ནུར་ནུར་པོའི་ལུས་ཡིན་པའི་ཕྱིར་རོ། །སྲིད་པ་བར་མ་པའི་ཤིན་ཏུ་དང་བ་དག་ནི་འགག་པར་འགྱུར་ཏེ། འདིར་སྐྱེ་བ་དང་འགག་པ་ན་ས་བོན་དང་མྱུ་གུ་དང་འདྲ་བར་བལྟ་བར་བྱའོ། །རྒྱབ་རོལ་ཏུ་བལྟས་ཏེ་ཙོག་
ཙོག་པོར་ཞེས་བྱ་བ་ནི་བདག་ཉིད་ལ་ཕའི་སྤྱོད་ལམ་ལྷག་པར་མོས་པའི་ཕྱིར་རོ། །དེ་བཞིན་དུ་ལྟོ་རོལ་དུ་ཁ་བལྟའོ་ཞེས་བྱ་བ་ཡང་བདག་ཉིད་ལ་མའི་གནས་སྐབས་སུ་ལྷག་པར་མོས་པའི་ཕྱིར་ཏེ་དེ་ལྟ་སྐྱེ་སྟེ་གཡོན་ཕྱོགས་ཀྱི་ངང་ཚུལ་ཅན་ཡིན་པའི་ཕྱིར་ལྟོའི་གཡོན་ཕྱོགས་སུ་བསྙེས་
ཏེ་གནས་སོ། །ཕྱིས་ལུས་སྐྱེ་ཞིང་ཞེས་བྱ་བ་ནི་རྒྱས་པ་དང་འཕེལ་ཞིང་ཞེས་བྱ་བའི་དོན་ཏོ། །དེ་དག་ཁོ་ན་ཡིན་ཏེ་ཞེས་བྱ་བ་ནི་ཁུ་ཆུ་དང་ཁྲག་གི་འབྱུང་བ་དག་ཁོ་ནའོ། །ཇི་ལྟར་ཞེ་ན་ཁུ་ཆུ་དང་ཁྲག་དབང་པོ་མེད་པ་ནི་ཞེས་བྱ་བ་རྒྱས་པར་འབྱུང་ངོ་། །ས་བོན་དང་མྱུ་གུ་འགག་པ་དང་སྐྱེ་
བའི་ཚུལ་དུ་ཞེས་བྱ་བ་ལ། སྐད་ཅིག་མ་གཅིག་ཁོ་ན་ལས་ས་བོན་འགག་ཅིང་མྱུ་གུ་སྐྱེའོ། །ནུར་ནུར་པོ་ཞེས་བྱ་བ་གང་ཡིན་པ་ན་ཞེས་བྱ་བ་ནི་ཁུ་ཆུ་དང་ཁྲག་གི་མཇུག་ཐོགས་སུ་དང་པོར་ནུར་ནུར་པོ་ཡིན་ནོ་ནུར་ནུར་པོ་ལས་མེར་མེར་གྱི་ཞེས་བྱ་བ་ལ་སོགས་པ་འབྱུང་བའི་ཕྱིར་རོ། །
དུར་ཁྲོད་བསྐྱེད་དོ་ཞེས་བྱ་བ་ལ་སོགས་པ་ལ། དུར་ཁྲོད་ནི་དུར་ཁྲོད་དེ། ཡང་དང་ཡང་དུ་ཤི་བས་འཕེལ་བར་བྱས་པའོ། །སྲིད་པ་བར་མའི་གཟུགས་ཀྱི་རྒྱུན་ལས་སྐྱེ་བའི་ཆར་གཏོགས་པའི་གཟུགས་སྐྱེ་བ་དེ་ལྟར་ནི་མ་ཡིན་ཏེ། ས་བོན་དང་མྱུ་གུའི་ཚུལ་དུ་བལྟ་བར་བྱའོ། །སེམས་
ཅན་དུ་སྟོན་པ་མ་ཡིན་པ་སེམས་ཅན་དུ་སྟོན་པའི་ས་བོན་དུ་འགྱུར་བར་འོས་པ་མ་ཡིན་ཏེ། རྒྱུད་ཀྱི་དབྱེ་བ་ལས་ཅིག་ཅར་ཡང་སེམས་ཅན་དང་སེམས་ཅན་དུ་སྟོན་པ་མ་ཡིན་པའི་གཟུགས་འགག་གོ། །སེམས་ཅན་དུ་སྟོན་པ་དང་སེམས་ཅན་དུ་སྟོན་པ་མ་ཡིན་པ་ལས་སྐྱེས་པ་ཡང་རིས་

ཐ་དད་པ་མ་ཡིན་པའི་སེམས་ཅན་དུ་སྟོན་པ་ལས་མ་ཡིན་ནོ། །གཞན་དག་ན་རེ། འབྱུང་བ་གཞན་དག་ཁོ་ན་ཡིན་ཏེ་ཞེས་བྱ་བ་ལ། སྲིད་པ་བར་མའི་འབྱུང་བ་ནུར་ནུར་པོའི་འབྱུང་བ་དང་འབྲེལ་པ་དག་ནི་ནུར་ནུར་པོ་དང་ལྷན་ཅིག་འགགས་ལ། དེ་དག་
ཀྱང་འགག་པ་ན་ལྷན་ཅིག་བྱེད་པའི་རྐྱེན་གཞན་ནུར་ནུར་པོ་ལ་བརྟེན་ནས་སྔར་གྱི་འབྱུང་བ་དང་མཚན་ཉིད་མི་མཐུན་པའི་འབྱུང་བ་གཞན་དབང་པོ་དང་བཅས་པ་དག་གི་རྒྱུར་འགྱུར་རོ། །དཔེར་ན་ལོ་མའི་སྲིན་བུ་ལྟ་བུ་ཡིན་ལ་ཞེས་བྱ་བ་ལ། ལོ་མའི་འབྱུང་བ་དག་ལ་བརྟེན་ནས་ལས་
རྣམས་ལས་བྱུང་བ་དག་སྐྱེ་བ་དེ་དག་དབང་པོའི་རྟེན་གྱི་ངོ་བོར་འགྱུར་གྱི། །ལོ་མའི་འབྱུང་བ་ཆེན་པོ་དག་ནི་སྲིན་བུའི་རྟེན་མ་ཡིན་ནོ། །ག་ལས་ཤེ་ན། ལོ་མ་དུམ་བུ་རེ་རེ་ནས་མ་དམིགས་པའི་ཕྱིར་རོ། །དེ་ལྟ་ན་འོ་ན་ཕ་དང་མའི་མི་གཙང་བ་ནུར་ནུར་པོ་ལས་བྱུང་བ་ཞེས་བྱ་བའི་
མདོ་དང་འགལ་ལོ་ཞེ་ན། དེའི་ལན་དུ་མི་གཙང་བ་ལ་བརྟེན་ནས་སྐྱེ་བ་ལ་དགོངས་ཏེ་གསུངས་པའི་ཕྱིར་ཞེས་བྱ་བ་རྒྱས་པར་སྨོས་ཏེ། ཁུ་ཆུ་དང་ཁྲག་ལ་བརྟེན་ནས་དེ་དག་གི་དབང་པོའི་འབྱུང་བ་ཆེན་པོ་རྣམས་སྐྱེའོ་ཞེས་བྱ་བ་འདི་ལ་དགོངས་ཤིང་བསམས་ནས་ཕ་དང་མའི་མི་གཙང་བ་
ནུར་ནུར་པོ་ལས་འབྱུང་བ་ཞེས་གསུངས་པའི་ཕྱིར་མདོ་དང་འགལ་བ་མེད་དེ། དཔེར་ན་ལོ་མ་ལ་བརྟེན་ནས་སྐྱེས་པའི་སྲིན་བུ་ནི་མིའི་སྲིན་བུ་ཡིན་པ་དེ་བཞིན་དུ་ཕ་དང་མའི་མི་གཙང་བ་ལ་བརྟེན་ནས་སྐྱེས་པའི་ནུར་ནུར་པོ་ཡང་ཕ་དང་མའི་མི་གཙང་བ་ནུར་ནུར་པོ་ཡིན་ནོ། །རེ་ཞིག་
འདོད་པའི་ཁམས་སུ་སྒོ་ང་ལ་སྐྱེ་བ་དང་། མངལ་ནས་སྐྱེ་བའི་སྐྱེ་གནས་སུ་འཇུག་པ་ནི་དེ་ལྟ་བུའོ། །གཞན་ལ་ཞེས་བྱ་བ་ནི་དྲོད་གཤེར་ལས་སྐྱེ་བ་དང་རྫུས་ཏེ་སྐྱེ་བའི་སྐྱེ་གནས་དག་ལའོ། །ཅི་རིགས་པར་ཞེས་བྱ་བ་ནི་དྲི་དང་གནས་ལ་མངོན་འདོད་གཞན་ཞེས་བྱ་བ་སྟེ། འགྲོ་བའི་
ཡུལ་དུ་འགྲོའོ་ཞེས་བྱ་བར་སྦྱར་རོ། །ཇི་ལྟར་ན་དམྱལ་བ་དག་ཏུ་གནས་འདོད་ཅེ་ན་ཞེས་བྱ་བ་ནི་དམྱལ་བ་དག་འཇིགས་པའི་གནས་ཡིན་པའི་ཕྱིར་འདྲི་བའོ། །གནས་སྐབས་གང་གིས་ཞེས་བྱ་བ་ནི་ཤན་པ་ལ་སོགས་པའམ་ལིངས་པ་ལ་སོགས་པ་དག་གི་ཚེ་སྟེ། ཇི་སྐད་དུ། ཇི་ལྟར་

འགྱུར་བས་དེ་མྱོང་ལས། སྔར་བྱས་པ་ནི་རྨི་ལམ་ལྟར། །སེམས་ཅན་དེ་འདྲ་མཐོང་གྱུར་ནས། །དམྱལ་བར་རབ་ཏུ་རྒྱུག་པར་འགྱུར་ཞེས་རྣལ་འབྱོར་སྤྱོད་པའི་སྔོན་གྱི་སློབ་དཔོན་དག་གིས་བཤད་དོ། །ཡང་སྲིད་པ་བར་མ་གང་ཞིག་སྐྱེ་བའི་ཡུལ་དུ་ཇི་ལྟར་འགྲོ་ཞེ་ན། དེ་
ལ་ལྷའི་སྲིད་པ་བར་མ་ནི་ཞེས་བྱ་བ་རྒྱས་པར་འབྱུང་ངོ་། །སྟན་ལས་ལྡང་བ་བཞིན་དུ་ཞེས་བྱ་བ་ནི་གནས་གོང་མར་སྐྱེ་བའི་ཕྱིར་རོ། །མི་དང་དུད་འགྲོ་དང་ཡི་དགས་རྣམས་ཀྱི་ནི་ཞེས་བྱ་བ་ལ། མིའི་སྲིད་པ་བར་མ་ནི་མི་བཞིན་ནོ། །དུད་འགྲོའི་སྲིད་པ་བར་མ་ནི་དུད་འགྲོ་
བཞིན་ནོ། །ཡི་དགས་ཀྱི་སྲིད་པ་བར་མ་ནི་ཡི་དགས་བཞིན་ཏེ། རྒྱབ་ཀྱི་འགྲོ་བས་ཡི་དགས་ཡིན་པའི་ཕྱིར་རོ། །ཡང་ཅིའི་ཕྱིར་གཟུགས་མེད་པ་རྣམས་སུ་སྲིད་པ་བར་མ་མེད་ཅེ་ན། ལས་དེའི་འཕེན་པ་དེའི་ནུས་པ་ལས་དེའི་ནུས་པ་མངོན་པར་འགྲུབ་པའི་ཀུན་ཏུ་སྦྱོར་བ་
སྤངས་པའི་ཕྱིར་རོ། །ཉོན་མོངས་པས་རྒྱས་པར་བྱས་པའི་ལས་རྣམས་འབྲས་བུ་འཕེན་ནུས་པ་ལས། ཉོན་མོངས་པ་མེད་པར་འོས་པ་མ་ཡིན་ཏེ། ལས་ཡོད་ཀྱང་སྐྱེ་བ་འཕེན་པ་མེད་པའི་ཕྱིར་རོ། །རགས་པ་དང་ཕྲ་བའི་ས་ལ་དེའི་ངོ་བོའི་ལས་དང་འབྲས་བུ་ནི་
ལུས་ཀྱིས་མངོན་སུམ་དུ་བྱེད་པ་དང་གཉིས་ཀའི་ཆ་ལས་རྣམ་པར་གྲོལ་བའི་སེམས་པ་ཅན་མ་ཡིན་ལ་འཇིག་རྟེན་པའི་བསྐལ་པ་མི་མཉམ་པའི་སེམས་ཅན་ཡང་མ་ཡིན་ནོ། །སྲིད་པ་བར་མའི་དབང་པོ་འཆོལ་བ་མེད་དེ། མཐོང་བའི་རྒྱུ་འདོད་པ་ན་སྤྱོད་པའི་དངོས་པོ་རྣམས་ཀྱི་
སྤང་བྱ་ཕྲ་རྒྱས་རྣམས་སྤངས་པ་ཞེས་བྱ་བ་དེ་ལྟ་བུ་ལ་སོགས་པ་རྣམས་སོ། །ཅི་སྲིད་པ་བར་མ་ཐམས་ཅད་བློ་ཕྱིན་ཅི་ལོག་ཏུ་གྱུར་པས་མའི་མངལ་དུ་འཇུག་གམ་ཞེ་ན་སྨྲས་པ་མ་ཡིན་ཏེ། འོན་ཀྱང་མངལ་དུ་འཇུག་པ་ནི་བཞི་ཞེས་བྱ་བར་རྒྱས་པར་འབྱུང་ངོ་། །མངལ་དུ་འཇུག་པ་འདི་
བཞི་ཞེས་བྱ་བ་ནི་མངལ་དུ་འཇུག་པ་དང་། གནས་པ་དང་འབྱུང་བའི་ཁྱད་པར་གཞན་མེད་དོ་སྙམ་དུ་བསམས་པའོ། །སེམས་ཉོན་མོངས་པ་ཅན་ཡིན་ཡང་འདུ་ཤེས་དང་མོས་པ་དག་ཕྱིན་ཅི་མ་ལོག་པའི་ཕྱིར་ཤེས་བཞིན་དུ་འཇུག་གོ་ཞེས་བརྗོད་དོ། །བཟློག་སྟེ་བསྟན་ཏོ་ཞེས་བྱ་བ་

ལ་མདོ་ལས་ནི་ཐམས་ཅད་ཤེས་བཞིན་པར་འགྱུར་བ་གང་ཡིན་པ་འདི་ཐོག་མར་བསྟན་ལ་གསུམ་ནི་ཇི་སྐད་བསྟན་པ་ཁོ་ན་བཞིན་ནོ། །རྨོངས་པ་དང་མ་རྨོངས་པའི་བྱེ་བྲག་འདི་ནི་མངལ་ནས་སྐྱེ་བའི་སྐྱེ་གནས་ལ་ཡིན་ཏེ། སྒོ་ང་ལས་སྐྱེས་པ་ནི་རྟག་ཏུ་
ཐམས་ཅད་རྨོངས་པ་ཁོ་ནར་འགྱུར་རོ། །གང་ཞིག་སྐྱེ་བར་འགྱུར་བ་ཞེས་བྱ་བ་ནི་སྒྲའི་ཚུལ་གྱིས་དུས་གསུམ་ལ་བསྒྲུབ་པའི་ཕྱིར་རོ། །ཡང་ན་འབྱུང་བར་འགྱུར་བའི་མིང་གིས་ཞེས་བྱ་བ་འབྱུང་བར་འགྱུར་བའི་མིང་གིས་ཀྱང་སྟོན་པར་བྱེད་པའོ། །འདུས་བྱས་མངོན་པར་འདུ་བྱེད་
དོ་ཞེས་བྱ་བ་ལ་བསྐྱེད་པའི་གནས་སྐབས་སུ་འདུས་བྱས་སུ་འགྱུར་གྱི་བསྐྱེད་བཞིན་པའི་གནས་སྐབས་སུ་ནི་མ་ཡིན་ལ། གཞན་དག་ན་རེ་རྒྱལ་པོ་ལྔ་ལེན་གྱི་བུ་ལྔ་བརྒྱ་སྒོ་ང་ལས་སྐྱེས་པ་ཡིན་པ་དེ་དག་གིས་ཀྱང་རང་སངས་རྒྱས་ཀྱི་བྱང་ཆུབ་རྟོགས་སོ་ཞེས་བྱ་བར་གྲགས་ཏེ། དེའི་ཕྱིར་སྒོ་
ང་ལས་སྐྱེས་པ་ནི་རྟག་ཏུ་ཐམས་ཅད་རྨོངས་པ་ཁོ་ནར་འགྱུར་རོ་ཞེས་བྱ་བ་འདི་མ་ངེས་སོ་ཞེ་ན་རང་སངས་རྒྱས་བསེ་རུ་ལྟ་བུ་ལ་དགོངས་ནས་གསུངས་པས་ཉེས་པ་མེད་དོ། །ཡང་ཅིའི་ཕྱིར་ཤེས་བཞིན་མ་ཡིན་པར་འཇུག་པ་ཤེས་བཞིན་དུ་གནས་པ་དང་འབྱུང་བ་དག་ཏུ་མི་འགྱུར་ཞེ་ན་མི་སྲིད་
པའི་ཕྱིར་ཏེ། ལུས་དང་དབང་པོ་སྟོབས་དང་ལྡན་པ་དང་། ཚང་བ་དང་། མ་ཉམས་པ་དང་། གསལ་བ་གང་གིས་ཤེས་བཞིན་མ་བཞག་པ་ལུས་དང་དབང་པོ་སྟོབས་དང་མི་ལྡན་པ་དང་། ཉམས་པ་དང་མ་ཚང་བ་དང་། ཞན་པ་དེ་ཤེས་བཞིན་དུ་གནས་པའམ་འབྱུང་བར་
འགྱུར་བ་ནི་སྲིད་པ་མ་ཡིན་ནོ། །ཤེས་བཞིན་དུ་འཇུག་པ་ཡོད་དེ་རྒྱུའི་ཤུགས་ཀྱིས་འཕེན་པའི་དབང་གིས་སོ། །ཤེས་བཞིན་དུ་གནས་པར་ཡང་འགྱུར་ཏེ། གཉིས་ཀ་རྒྱུའི་དབང་ལས་སོ། །འབྱུང་བར་ཡང་ཞེས་བྱ་སྟེ་འདི་ནི་སྲིད་དོ། །ལོག་པའི་འདུ་ཤེས་དང་མོས་པ་དག་ཅེས་བྱ་བ་ལ། འདུ་
ཤེས་ནི་མཚན་མར་འཛིན་པའོ། །མོས་པ་ནི་ལྷག་པར་མོས་པའོ། །ཡང་ཇི་ལྟར་ལོག་པ་དག་ཏུ་འགྱུར་ཞེ་ན། འདི་སྙམ་དུ་རླུང་ལངས་པའམ་ཆར་འབབ་པའམ་ཞེས་བྱ་བ་རྒྱས་པར་འབྱུང་ངོ་། །གལ་ཏེ་རྩེ་དགས་འགྲོ་བའི་ཡུལ་དུ་འགྲོའོ་ཞེས་སྔར་བསྟན་ཟིན་པ་མ་ཡིན་ནམ་རླུང་ལངས་

པའམ་ཆར་འབབ་པའམ་ཞེས་རྒྱས་པར་ཡང་ཅིའི་ཕྱིར་སྨོས་ཤེ་ན། ངེས་པ་མེད་པར་ཤེས་པར་བྱ་བའི་ཕྱིར་ཏེ། འདོད་ཆགས་དང་ཞེ་སྡང་གཉིས་ཁོ་ནས་བློ་ཕྱིན་ཅི་ལོག་ཏུ་གྱུར་པས་སྐྱེ་བའི་ཡུལ་དུ་འགྲོ་བ་མ་ཡིན་གྱི། འོ་ན་ཅི་ཞེ་ན། རྣམ་པ་གཞན་དུ་རྩྭ་ཐིབས་པོའམ་ནགས་ཐིབས་
པོར་འཇུག་པའམ་ཞེས་རྒྱས་པར་འབྱུང་བ་ཡང་ཡིན་ཏེ། དེ་ལྟར་བཤད་ན། སྐྱེ་བའི་སྲིད་པ་ཉོན་མོངས་ཅན། །རང་གི་ས་པའི་ཉོན་མོངས་ཀུན། །ཞེས་བྱ་བ་འདི་ཡང་ཚད་མར་འགྱུར་རོ། །བྱེ་བྲག་ཏུ་སྨྲ་བ་རྣམས་ན་རེ། སྐྱེད་མོས་ཚལ་དུ་འཇུག་གོ་སྙམ་པས་ཀྱང་ངོ་། །
སྐྱེ་བའི་ཡུལ་དུ་བློ་ཕྱིན་ཅི་ལོག་གིས་འཇུག་གི་སྙམ་པ་ནི་ཉེ་བའི་གནས་སྐབས་སུའོ། །འདི་ནི་རིང་བའི་གནས་སྐབས་ཡིན་ཏེ་འདི་དག་གི་ཁྱད་པར་རོ་ཞེས་ཟེར་རོ། །འདི་ཡང་མ་ཡིན་ཏེ་ཉེ་བའི་གནས་སྐབས་སུ་མངོན་པར་འདོད་པ་དེར་ཡང་མངལ་གྱི་གནས་མི་གཙང་བ་དང་སྤྲད་
པ་ལ་དགའ་བས་མངོན་པར་འཇུག་གོ་ཞེས་གསུངས་པའི་ཕྱིར་རོ། །ཅི་ལྟར་ན་སྐྱེ་བའི་དུས་ཀྱི་ཉོན་མོངས་པ་ཅན་གྱི་སེམས་ཤེས་བཞིན་དུ་རུང་ཞེ་ན། ཤེས་རབ་ཐམས་ཅད་དགེ་བར་འདོད་པ་མ་ཡིན་ནོ། །དེས་ན་ཉོན་མོངས་པ་ཅན་གྱི་སེམས་ཀྱང་ཤེས་བཞིན་དུ་འགལ་བ་
མེད་དེ། རྣམ་པ་གཞན་དུ་ན་ཉོན་མོངས་པ་ཅན་གྱི་སེམས་ཀྱིས་རྫུན་དུ་སྨྲ་བར་མི་འགྱུར་རོ། །ཡང་ན་འདིར་རྒྱུན་གྱི་དབང་དུ་བྱས་ཀྱི་མཚམས་སྦྱོར་བའི་སྐད་ཅིག་ནི་མ་ཡིན་ནོ། །དེ་ལ་ཡང་འདི་ཕྱིར་ཞིང་ཉོན་མོངས་པའི་སེམས་ཀུན་ཏུ་སྤྱོད་པས་ཉོན་མོངས་པ་ཅན་ཞེས་བྱ་བ་ཆུང་
བའི་ཕྱིར་གྲངས་སུ་ཉེ་བར་མི་འགྲོའོ། །རྟ་དཀར་པོ་དང་ནས་ཀྱི་ཕུང་པོ་བཞིན་ཞེས་བྱ་སྟེ། འདི་ནི་བདག་གི་ཕའོ་འདི་ནི་བདག་གི་མའོ་སྙམ་པ་ལས་གཞན་དུ་མི་འཁྲུལ་བའི་ཕྱིར་རམ་གུས་པ་བསྐྱེད་པའི་ཕྱིར་ཤེས་བཞིན་ཞེས་བརྗོད་དོ། །ཇི་ལྟ་བ་བཞིན་དུ་ཡང་དག་པར་རབ་ཏུ་
ཤེས་པའི་ཕྱིར་འདི་ཉིད་འདིར་ཤེས་བཞིན་དུ་མངོན་པར་འདོད་དོ། །ཡང་འདིར་ཞེས་བྱ་བ་རྒྱས་པར་འབྱུང་བ་ལ། ཤེས་བཞིན་ལ་སོགས་པ་མངལ་དུ་འཇུག་པ་རྣམ་པ་བཞིར་རོ། །འདིར་ཡང་འབྱུང་བར་འགྱུར་བའི་མིང་གིས་བསྟན་ཏོ་ཞེས་བྱ་བ་ནི་དེའི་ཚེ་དེ་དག་འཁོར་ལོས་སྒྱུར་

བ་ལ་སོགས་པ་མ་ཡིན་པའི་ཕྱིར་རོ། །ཡང་ཅིའི་ཕྱིར་འཁོར་ལོས་སྒྱུར་བ་ལ་སོགས་པ་དེ་དག་དེ་ལྟར་འཇུག་སྙམ་ན། རྣམ་གྲངས་གཉིས་པའི་སྒོ་ནས་དེའི་རྒྱུ་བསྟན་པའི་ཕྱིར། ལས་སམ་ཡེ་ཤེས་སམ་གཉིས་ཀ་ཞེས་བྱ་བ་རྒྱ་ཆེར་སྨོས་སོ། །རྒྱ་ཆེའི་ཕྱིར་
ཞེས་བྱ་བ་ནི་རླབས་ཆེ་བའི་ཕྱིར་ཞེས་བྱ་བའི་དོན་ཏོ། །ཐོས་པ་མང་བ་དང་། རབ་ཏུ་འབྱེད་པ་བྱས་པ་རྣམས་ནི་ཞེས་བྱ་བ་ནི་ཐོས་པ་མང་བ་ཡང་དེ་དག་ཡིན་ལ། རབ་ཏུ་འབྱེད་པ་བྱས་པ་ཡང་ཡིན་ནོ། །འདི་སྐད་བསྟན་པར་འགྱུར་ཏེ། ཐོས་པ་དང་། བསམ་པ་དང་།
བསྒོམ་པའི་ཤེས་པ་རྫོགས་པ་རྣམས་ཞེས་བྱ་བའི་དོན་ཏོ། །གལ་ཏེ་ཤེས་བཞིན་དང་ཤེས་བཞིན་མ་ཡིན་པར་མངལ་དུ་འཇུག་པ་ཞེས་བྱ་བ་རྣམ་པ་གཉིས་ཁོ་ན་མ་ཡིན་ནམ། ཇི་ལྟར་རྣམ་པ་བཞིར་བརྗོད་དེ། གནས་པ་དང་འབྱུང་བ་ནི་མངལ་དུ་འཇུག་པ་མ་ཡིན་པའི་ཕྱིར་རོ་ཞེ་ན་འཇུག་
པ་གཙོ་བོ་ཡིན་པའི་ཕྱིར་ཉེས་པ་མེད་དེ། འདི་ལྟར་འགའ་ཡང་ཤེས་བཞིན་མ་ཡིན་པར་ཞུགས་ནས་ཤེས་བཞིན་དུ་གནས་པའམ་འབྱུང་བ་ནི་མེད་དོ། །དེའི་ཕྱིར་གང་འདི་མངལ་གྱི་གནས་ནས་འབྱུང་བ་བདག་ཉིད་ཀྱིས་རབ་ཏུ་ཤེས་པ་དེ་ནི་འཇུག་པ་ཁྱད་པར་དུ་ཡང་ཤེས་ཏེ། འཇུག་
པའི་སྒྲས་གནས་པ་དང་འབྱུང་བ་ཡང་བརྗོད་དོ། །དེ་ཉིད་ཀྱི་ཕྱིར་གནས་པ་དང་འབྱུང་བ་དག་ཤེས་བཞིན་དང་ཤེས་བཞིན་མ་ཡིན་པའི་དབྱེ་བས་དྲུག་ཉིད་དུ་ཡང་ཐལ་བར་མི་འགྱུར་རོ། །འཇུག་པ་གཙོ་བོ་ཡིན་པས་རིགས་ཐ་དད་པ་དང་ཐ་མི་དད་པ་རྣམས་ལ་ཡང་འཇུག་པ་ཉིད་ངེས་པའི་ཕྱིར་
ཅི་ལས་ཞེས་ཏེ། རེ་ཞིག་མངལ་གྱི་དབང་དུ་བྱས་པ་རྫོགས་སོ།། །།དེ་བཞིན་དུ་རིགས་ཐ་དད་པ་རྣམས་དང་འདི་གཉིས་རིགས་ཐ་མི་དད་པ་རྣམས་ཏེ། གཉིས་ཞེས་བྱ་བ་བཞི་ཉིད་དུ་རུང་ངོ་། །གཞན་དག་ན་རེ། བྱང་ཆུབ་སེམས་དཔའ་ཁོ་ན་སེམས་དཔའ་ཞེས་སོ། །ཐ་མ་ལ་རིགས་
མཐུན་པ་ལ་ནི་གསུམ་པ་དང་གཉིས་པ་དང་གཉིས་པ་ལའོ། །གང་ནས་ཤི་འཕོས་ནས་དགའ་ལྡན་དུ་སྐྱེས་པ་ནི་དང་པོ་དང་གསུམ་པའོ། །གང་ནས་ཤི་འཕོས་ནས་འོད་སྲུངས་ཀྱི་གསུང་རབ་ལ་སྐྱེས་པའོ། །དེ་ལས་གང་དུ་ཐ་མ་ཞེས་བྱ་བ་ནི་གྲངས་མེད་པ་གསུམ་ལས་དང་པོ་དང་གཉིས་པ་དང་

གསུམ་པ་རྣམས་ལའོ། །དེ་ལས་གོང་དུ་བཞི་པ་ཡིན་ནོ། །དེ་ནི་འདིར་ཕྱི་རོལ་ཅན་རྣམས་ཞེས་བྱ་བ་འབྱུང་སྟེ། བདག་ཏུ་སྨྲ་བ་ཡོངས་སུ་འཛིན་པའོ། །དེ་མེད་པའི་ཕྱིར་བདག་ནི་ཡོད་པ་མ་ཡིན་ལ། གལ་ཏེ་བདག་མེད་ན་འདི་སྲིད་པ་བར་མའི་སྒོ་ནས་འཇིག་རྟེན་འདི་ནས་ཕ་
རོལ་དུ་འཕོ་ཞེས་ཅི་སྟེ་བརྗོད། འདི་མའི་མངལ་དུ་འཇུག་པ་དང་གནས་པ་དང་འབྱུང་བ་ཞེས་ཀྱང་ཅི་སྟེ་བརྗོད། དེའི་ཕྱིར་འདིར་གང་ཞིག་འཕོ་བ་དང་ཉེ་བར་འཕོ་བ་ཞེས་བྱ་བར་ཁས་བླང་བར་བྱ་བ་བྱེད་པའི་སྐྱེས་བུ་འགའ་ཞིག་ཡོད་པ་ཡིན་ནོ་ཞེ་ན། དེ་དགག་པར་བྱ་བའི་ཕྱིར་
བདག་མེད་ཅེས་བྱ་བ་འབྱུང་ངོ་། །གསུང་རབ་ལས་ཀྱང་ཕུང་པོ་ཙམ་ལ་བདག་གོ་ཞེས་བསྙད་པ་ཡོད་ལ་དེ་དགག་པའི་ཕྱིར་དང་པོའི་ཕྱོགས་དང་འགལ་ལོ་ཞེས་འདྲི་བ་ནི་བདག་ཇི་ལྟ་བུ་ཞིག་ཅེ་ན་ཞེས་བྱ་བ་སྟེ། ཅི་ཕུང་པོ་ཙམ་གྱི་བདག་ཉིད་ཅན་ཞིག་གམ། འོན་ཏེ་ནང་གི་བྱེད་པའི་སྐྱེས་བུ་ཞིག་
ཅེས་བྱ་བའོ། །དེའི་ཕྱིར་གང་ཕུང་པོ་འདི་དག་འདོར་ཞིང་ཞེས་བྱ་བ་རྒྱས་པར་སྨོས་སོ། །ཡང་རྒྱུ་ལ་དགག་པ་བྱེད་པ་ཅི་ཞེ་ན་དེ་མེད་པའི་ཕྱིར་རོ། །དེ་གལ་ཏེ་མི་འདོར་ན་གནས་སྐབས་སུ་ཉེ་བར་འཇོམས་པས་འདོར་བའི་གནས་སྐབས་བསྐྱེད་པར་བྱེད་དོ། །ཉིང་མཚམས་མི་སྦྱོར་བའི་
གནས་སྐབས་སུ་ཉེ་བར་འཇོམས་པས་ཉིང་མཚམས་སྦྱོར་བའི་གནས་སྐབས་མི་བསྐྱེད་དོ། །དེས་ན་གཞན་ཉིད་འདོར་བར་བྱེད་པས་ཉིང་མཚམས་སྦྱོར་བ་ཞེས་བྱ་བར་ཐལ་བར་མི་འགྱུར་རོ། །གནས་སྐབས་སུ་འགོག་པ་སྐྱེད་པ་དག་གིས་གནས་སྐབས་སུ་འགོག་པ་མི་བསྐྱེད་པ་ཡང་
མི་རུང་སྟེ། གཞན་མ་ཡིན་པ་ཉིད་ལས་གཞན་ཉིད་སྔ་ཕྱི་མེད་པར་ཁྱད་པར་མེད་པའི་ཕྱིར་རོ། །འདིའི་འདོར་བ་ཉིད་ཉིང་མཚམས་སྦྱོར་བའི་བྱེད་པ་པོ་ཉིད་དུ་ཡང་མི་རུང་ངོ་། །ཕུང་པོ་འདི་དག་འདོར་ཞིང་ཞེས་བྱ་བ་ནི་ད་ལྟར་བ་དག་གོ། །གཞན་དག་ཏུ་ཉིང་མཚམས་སྦྱོར་ཞེས་བྱ་བ་
ནི་སྲིད་པ་བར་མ་པ་དག་གམ་སྐྱེ་བའི་ཆར་གཏོགས་པ་དག་གོ། །བཅོམ་ལྡན་འདས་ཀྱིས་འདི་སྐད་དུ་ཞེས་བྱ་བས་ལུང་ལས་ཀྱང་ནང་གི་བྱེད་པའི་སྐྱེས་བུ་མེད་པར་བསྟན་ཏེ། རིགས་པ་ལས་དེ་མེད་པར་ནི་དབང་ཕྱུག་སོགས་མིན་རིམ་སོགས་ཕྱིར་ཞེས་བྱ་བ་དེར་བཤད་ཟིན་ཏོ། །བྱེད་

པ་པོ་མི་དམིགས་སོ་ཞེས་བྱ་བ་ནི་གཟུགས་དང་ཚོར་བ་ལ་སོགས་པ་ལྟར་རང་གི་ངོ་བོས་སམ། མིག་ལ་སོགས་པ་ལྟར་བྱ་བའི་སྒོ་ནས་ཏེ། དེའི་ཕྱིར་རི་བོང་གི་རྭ་དང་འདྲ་བར་མེད་དོ་ཞེས་བྱ་བར་ངེས་སོ། །ཡང་ན་བྱེད་པ་པོ་རྟག་པའམ། མི་རྟག་པ་ཞིག་
ཕུང་པོ་ལས་ཐ་དད་པ་མི་དམིགས་སོ། །འདི་ལྟར་རྟག་པ་སྔ་ཕྱིར་རྣམ་པར་འགྱུར་བས་སྟོང་པ་ནི་ལས་རྣམས་ཀྱི་བྱེད་པ་པོ་དང་འབྲས་བུ་རྣམས་ཀྱི་ཟ་བ་པོར་མི་རུང་ངོ་། །དེའི་ཕྱིར་རྟག་པའི་བྱེད་པ་པོ་ཉིད་མི་འཐད་དེ། འགའ་ཡང་གཟུགས་ཅན་མ་ཡིན་པ་དང་ལུས་ཅན་མ་ཡིན་པ་དང་།
བདེ་བ་ཅན་མ་ཡིན་པ་དང་སྡུག་བསྔལ་ཅན་མ་ཡིན་པ་དང་འདུ་ཤེས་ཅན་མ་ཡིན་པ་དང་སེམས་པ་མེད་པ་དང་རྣམ་པར་ཤེས་པ་རྣམ་པར་རྟོག་པ་མེད་པར་ཡང་ཐལ་བར་འགྱུར་ཏེ། དེ་དག་དང་མ་འབྲེལ་པའི་ཕྱིར་དང་རྣམ་པར་འགྱུར་བ་མེད་པའི་ཕྱིར་རོ། །དེ་བཞིན་དུ་འཁོར་བ་དང་
མྱ་ངན་ལས་འདས་པའི་གནས་སྐབས་དག་ཁྱད་པར་མེད་པའི་ཕྱིར་དང་དེའི་རྒྱུའི་འཇུག་པ་དོན་མེད་པའི་ཕྱིར་བྱེད་པ་པོ་མེད་པ་ཉིད་དོ། །མི་རྟག་པ་ཡང་མེད་དེ་བྱས་པ་ཆུད་ཟོས་པ་དང་མ་བྱས་པ་དང་ཕྲད་པའི་ཉེས་པ་ལས་སོ། །གལ་ཏེ་ཡང་ཕྱི་རོལ་པ་རྣམས་ཕུང་པོ་ལས་ཐ་དད་པའི་
བདག་ཏུ་རྟོག་པར་བྱེད་པ་དེ་ལྟ་ན་ཡང་། དེ་སངས་རྒྱས་རྣམས་ཀྱི་ཕུང་པོ་ཙམ་ཁོ་ནའི་ཡུལ་ལ་དེ་ལྟར་གསུངས་ཏེ། འདི་ན་དགེ་སྦྱོང་དང་བྲམ་ཟེ་ཁ་ཅིག་ཉེ་བར་ལེན་པའི་ཕུང་པོ་ལྔ་པོ་རྣམས་ལ་བདག་དང་བདག་གི་ཞེས་ཡང་དག་པར་རྗེས་སུ་ལྟ་ཞིང་ཡང་དག་པར་རྗེས་སུ་མཐོང་སྟེ་
ཞེས་འབྱུང་ངོ་། །དེ་དག་ནི་རང་བཞིན་ནམ་འབྲས་བུ་ལ་བདག་ཏུ་བསྙད་པ་སྟེ། རང་བཞིན་ནམ་འབྲས་བུའི་ཆོས་གང་ཡིན་པ་དེ་ལ་འདིར་དེ་དག་གིས་བདག་ཅེས་བྱ་བར་མཐོང་ངོ་ཞེས་བྱ་བར་ངེས་སོ། །གལ་ཏེ་ནང་གི་བྱེད་པའི་སྐྱེས་བུ་དགག་ན། འོ་ན་བདག་ཇི་ལྟ་བུ་ཞིག་མི་དགག་ཅེ་
ན་ཕུང་པོ་ཙམ་ཉིད་དོ། །ཉིད་ཀྱི་སྒྲ་ནི་ངེས་པར་གཟུང་བའི་དོན་དུ་སྟེ། གསུང་རབ་ལས་ཕུང་པོ་ཙམ་ཉིད་ལ་ཐ་དད་དུ་བདག་ཅེས་ཉེ་བར་བཏགས་སོ། །ཅིའི་ཕྱིར་ཞེ་ན། དེ་ཁོ་ན་ཀུན་ནས་ཉོན་མོངས་པ་དང་རྣམ་པར་བྱང་བའི་ཕྱིར་རོ། །དེ་ལྟ་ན་འོ་ན་ཕུང་པོ་དག་ཅེས་བྱ་བ་རྒྱས་པར་འབྱུང་

སྟེ། དེ་ལྟ་ཡིན་ན་མཐོང་བ་དང་འགལ་ཞིང་ཁས་བླངས་པ་དང་འགལ་ལོ་ཞེ་ན་དེ་དག་ནི་མི་འཕོ་སྟེ། སྐད་ཅིག་མ་ཡིན་པའི་ཕྱིར་རོ། །འོ་ན་ཇི་ལྟར་ཞེ་ན། ཕུང་པོ་ཙམ་ནི་ཉོན་མོངས་པ་དང་ལས་ཀྱིས་མངོན་པར་འདུ་བྱས་ཞེས་བྱ་བ་རྒྱས་པར་འབྱུང་སྟེ། ཉོན་མོངས་པ་རྣམས་དང་ལས་
རྣམས་ཀྱི་རྣམ་པར་སྨིན་པ་དང་རྒྱུ་དང་མཐུན་པའི་འབྲས་བུ་སྐྱེད་པའི་ནུས་པ་གཞག་པའི་ཕྱིར་ཡོངས་སུ་བསྒོས་པ་ཞེས་བྱ་བའོ། །ཉོན་མོངས་པ་རྣམས་དང་ལས་རྣམས་ཞེས་གཉི་ག་སྨོས་པ་ནི་གང་ཡང་རུང་བ་ཞིག་གིས་ཡོངས་སུ་བསྟོས་པས་མ་ཚང་ན་སྐྱེ་བ་འབྱུང་བ་མི་སྲིད་པའི་ཕྱིར་རོ། །
ཕུང་པོ་ཙམ་ཞེས་ཙམ་གྱི་སྒྲ་ནི་བདག་དང་བདག་གི་རྫས་སྟོང་པ་ཉིད་དུ་ཤེས་པར་བྱ་བའི་ཕྱིར་རོ། །སྲིད་པ་བར་མ་ཞེས་བྱ་བའི་རྒྱུན་གྱིས་ཞེས་བྱ་བ་རྒྱས་པར་འབྱུང་སྟེ། རྒྱུ་དང་འབྲས་བུ་བར་མཚམས་མེད་པར་འབྲེལ་བ་ནི་འགྲོ་བ་དང་སྐྱེ་བ་དང་རྒྱུན་ཏེ། སྔར་གྱི་ལས་དང་ཉོན་མོངས་
པས་འཕངས་པའི་ཚེ་ཉམས་སུ་མྱོང་ནས། དེའི་རྣམ་པར་སྨིན་པའི་འཕེན་པ་ཟད་པས་མཐར་འཆི་བའི་མཐའི་རྣམ་པར་ཤེས་པའི་རྟེན་དང་ལྷན་ཅིག་འགག་ཅིང་སྲིད་པ་བར་མ་པའི་རྣམ་པར་ཤེས་པའི་རྟེན་སྐྱེ་བའི་རྒྱུར་འགྱུར་ལ། སྲིད་པ་བར་མ་དག་ཀྱང་དེ་ཁོ་ན་ལྟར་རྒྱུན་ཆགས་སུ་
སྔར་གྱི་ལས་དང་ཉོན་མོངས་པས་འཕེན་པའི་དབང་གིས་སྐྱེ་བའི་ཡུལ་དུ་ཕྱིན་ནས་མའི་མངལ་དུ་འགག་པ་ན་སྐྱེ་བའི་ཕུང་པོ་རྣམས་བསྐྱེད་པར་བྱ་བ་ལ་རྐྱེན་དུ་འགྱུར་ཏེ། དཔེར་ན་མར་མེ་སྐད་ཅིག་མ་ཡིན་ཡང་སྔ་མ་དང་ཕྱི་མར་རྒྱུ་དང་འབྲས་བུ་འབྲེལ་པ་བར་མེད་པས་རང་གི་རྒྱུན་གྱི་ཡུལ་
གཞན་དུ་འགྲོ་བ་བཞིན་ནོ། །ཇི་ལྟར་འཕངས་བཞིན་ཞེས་བྱ་བ་རྒྱས་པར་འབྱུང་བ་ལ། རྒྱུ་ཐ་དད་པ་ལས་འབྲས་བུ་ཐ་དད་པར་འགྱུར་ལ། སེམས་ཅན་སོ་སོའི་ཚེའི་ལས་ཀྱང་ཐ་དད་དེ། དེ་ཐ་དད་པ་ལས་ཚེའི་འཕེན་པ་ཡང་ཐ་དད་དེ། ཁ་ཅིག་ནི་ཐུང་ལ། གཞན་གྱི་ནི་རིང་
ངོ་། །དེའི་ཕྱིར་གང་ཞིག་ཇི་སྲིད་དུ་འཕངས་པ་ཞེས་བྱ་བ་རྒྱས་པར་འབྱུང་ངོ་། །མཚན་མ་རྣམས་ཞེས་བྱ་བ་ནི་དེ་དག་གིས་དེ་དག་མཚོན་པར་བྱེད་པས་མིག་ལ་སོགས་པའི་རྟེན་རྣམས་སོ། །ལས་ཀྱི་རྣམ་པར་སྨིན་པ་ལས་སྐྱེས་པ་ཞེས་བྱ་བ་ནི་ལས་ཀྱི་དབང་གིས་སྐྱེས་པ་སྟེ། འདིར་

ལས་ཀྱི་རྣམ་པར་སྨིན་པ་ལས་སྐྱེས་པ་ཞེས་བཤད་དོ། །གལ་ཏེ་ན་རེས་འགའ་མའི་ཟས་དང་གནས་པའི་བྱ་བ་མི་མཐུན་པར་སྤྱོད་པའམ་ཞེས་བྱ་བ་ལ། ཟས་ནི་རྣོ་བ་དང་ཚ་བ་ཟོས་པ་དང་། གནས་པའི་བྱ་བ་མི་མཐུན་པ་ནི་མཆོང་བ་དང་རྐྱལ་ལོ། །མངལ་
ཁོ་ནར་འཆི་བ་ནི་འཇིག་པར་འགྱུར་བའོ། །རྐྱག་དོང་ཞེས་བྱ་བ་རྒྱས་པར་འབྱུང་བ་ལ། དྲི་ང་བ་དང་། མུན་ཁུང་དང་། བཙོག་པའི་འདམ་རྫབ་ནི་དྲི་ང་བ་མུན་ཁུང་བཙོག་པའི་འདམ་རྫབ་སྟེ། ལུས་ཀྱི་རྨ་འཁྱིམས་པ་ཆེན་པོ་དེར་ཞེས་ཕྱིས་འཆད་པའོ། །སྲིན་བུའི་རིགས་
ཤིན་ཏུ་མང་པོ་སྟོང་ཕྲག་ནི་སྲིན་བུའི་རིགས་ཤིན་ཏུ་མང་པོ་སྟོང་ཕྲག་གོ། །དེ་དག་གི་གནས་ནི་སྲིན་བུའི་རིགས་ཤིན་ཏུ་མང་པོ་སྟོང་ཕྲག་གི་གནས་ཏེ་དེའོ། །ཁུ་ཆུ་དང་ཁྲག་དང་། ཆུ་སེར་དང་། དྲི་མ་ནི་ཁུ་ཆུ་དང་ཁྲག་དང་ཆུ་སེར་དང་དྲི་མ་སྟེ། ཁུ་ཆུ་དང་ཁྲག་དང་ཆུ་སེར་དང་
དྲི་མ་དེ་དག་གིས་ཀུན་ནས་ཁྱད་པར་དུ་མྱགས་ཤིང་ཀུན་ཏུ་མྱགས་པ། རྣམ་པར་མྱགས་པ། རུལ་པ། རྣག་པ་འདྲེད་པའོ། །དེ་སྐྱེ་བའི་རྒྱུས་དབང་པོ་རྣམས་ཡོངས་སུ་སྨིན་ནས་ཞེས་བྱ་བ་རྒྱས་པར་འབྱུང་བ་ལ། འཕེན་པའི་རྗེས་སུ་འགྲོ་བས་ཞེས་བྱ་བའི་དོན་ཏོ། །ཡང་ཉོན་
མོངས་པ་ཅན་རྣམས་ཀུན་ཏུ་སྤྱོད་ཅིང་ཞེས་བྱ་བ་རྒྱས་པར་འབྱུང་བ་ལ། ནང་དང་ཕྱིའི་སྐྱེ་མཆེད་དང་། ཚུལ་བཞིན་མ་ཡིན་པ་ཡིད་ལ་བྱེད་པ་དེ་དག་གིས་རྐྱེན་ཚོགས་པ་ལ་བལྟོས་པའི་ཉོན་མོངས་པ་ཅན་རྣམས་ཀུན་ཏུ་སྤྱོད་ཅིང་། ལས་སྣ་ཚོགས་རྣམས་ཀྱང་སོག་པར་འགྱུར་རོ། །
དེ་ཉོན་མོངས་པ་དང་ལས་བསགས་པ་དེ་དག་གིས་ལུས་ཞིག་ནས་ཡང་སྔ་མ་བཞིན་དུ་ཡང་སྲིད་པ་བར་མའི་རྒྱུན་གྱིས་ལས་ཇི་ལྟ་བ་བཞིན་དུ་འཇིག་རྟེན་ཕ་རོལ་ཏུ་འགྲོ་བར་འགྱུར་ཏེ། དེ་ལྟ་ན། སྲིད་པའི་འཁོར་ལོ་ཐོག་མ་མེད་དེ་རྒྱུ་མེད་པ་ཉིད་དུ་འགྱུར་རོ་ཞེས་བྱ་བ་ནི་ཐོག་མའི་སྐྱེ་བའོ། །
དེའི་ཕྱིར་དང་པོའི་སྐྱེ་བ་ལྟར་ཐམས་ཅད་རྒྱུ་མེད་པ་ཉིད་དུ་ཐལ་བར་འགྱུར་རོ། །སྐྱེ་བ་དང་པོ་ཁོ་ན་རྒྱུ་མེད་པ་ཡིན་གྱི་ཐམས་ཅད་ནི་མ་ཡིན་ནོ་ཞེས་བྱ་བ་གང་ཡིན་པ་འདི་ལ་རྒྱུ་ཡོད་པ་ཡང་མ་ཡིན་ནོ། །དེའི་ཕྱིར་ཐམས་ཅད་ཐམས་ཅད་ཀྱི་ཚེ་ཐམས་ཅད་དུ་སྐྱེ་བར་ཐལ་བར་འགྱུར་ཏེ་སྐྱེ་བའི་

རྒྱུ་ངེས་པ་མེད་པའི་ཕྱིར་རོ། །མྱུ་གུ་ལ་སོགས་པ་དག་ལ་ས་བོན་ལ་སོགས་པ་རྣམས་ཀྱི་ནུས་པ་མཐོང་བ་ཡང་མ་ཡིན་ཏེ་དེ་ཡོད་ན་ཡོད་པའི་ཕྱིར་ལ་དེ་མེད་ན་མེད་པའི་ཕྱིར་རོ། །ཡང་འདི་ཇི་ལྟར་རྟོགས་པར་བྱ་ཞེ་ན། དེའི་ཕྱིར་ཡུལ་དང་དུས་སོ་སོར་ངེས་པ་ལས་ཞེས་བྱ་བ་སྨོས་སོ། །ཡུལ་སོ་སོར་ངེས་
པ་ནི་ས་བོན་གྱི་ཡུལ་ཁོ་ནར་མྱུ་གུ་སྐྱེའི་གཞན་དུ་མ་ཡིན་པའོ། །དུས་ངེས་པ་ནི་ས་བོན་བངས་པའི་མཇུག་ཐོགས་ཁོ་ནར་མྱུ་གུ་སྐྱེའི་གཞན་གྱི་ཚེ་མ་ཡིན་པའོ། །ཡུལ་དང་དུས་སོ་སོར་ངེས་པ་ལས་ཚོས་པ་ལ་སོགས་པ་ལ་མེ་ལ་སོགས་པའི་ནུས་པ་ཡང་མཐོང་བས་ཞེས་བྱ་བར་སྦྱར་ཏེ། འདི་ལྟར་ཚོས་པ་
ནི་མེ་དང་འབྲེལ་བའི་ཡུལ་ཁོ་ནར་སྐྱེའི་གཞན་དུ་ནི་མ་ཡིན་ལ་མེ་དང་འབྲེལ་པའི་ཕྱིར་མཇུག་ཐོགས་ཁོ་ནར་འབྱུང་གི་ཐམས་ཅད་ཀྱི་ཚེ་ནི་མ་ཡིན་ནོ། །ཡོ་པི་མ་ནྱ་ཏེ། ནི་ཏྱ་ཀ་ཌ་ཎཱ་བྷྻུ་པ་ག་མཱ་དཱ་དི་ས་ཏྭེ་པི་པཾ་སཱ་ར་སྱ་ནཱ་ཡཾ་དོ་ཥཿ། ཏ་སྱཱ་ནུ་ཏྤཾ་ཏྟི་སཏྭཱ་དུ་ཏྤིཏྟི་མ་ཏ་ཤྩ་པཱུརྦ་ཀཱ་ར་ཎཱ་སྟི་ཏྭཱ་བྷྻུ་བ་ག་མཱ་ཏ། <གང་དག་སེམས་པར་བྱེད་པ་རྟག་པའི་བྱེད་པ་ཁས་བླངས་པའི་ཕྱིར་དང་པོར་ཡོད་ཀྱང་འདི་འཁོར་བའི་སྐྱོན་མ་ཡིན་ནོ། །དེའི་མི་སྐྱེད་པ་ཡོད་པ་ལས་སྐྱེད་པ་དེའི་ཕྱིར་སྔོན་གྱི་རྒྱུ་ཡོད་པ་ཉིད་དུ་ཁས་བླངས་པའི་ཕྱིར།> དེ་ཉིད་ཀྱི་ཕྱིར་རྒྱུ་རྟག་
པ་ཡོད་པ་སྨྲ་བ་ནི་སྔར་ཉིད་དུ་བསལ་ཟིན་ཏོ་ཞེས་བྱ་བ་སྨོས་ཏེ། དབང་ཕྱུག་སོགས་མིན་རིམ་སོགས་ཕྱིར་ཞེས་བྱ་བ་དེར་ས་བོན་ཟད་པས་མྱུ་གུ་བཞིན་ནོ་ཞེས་
བྱ་བ་ནི་ས་བོན་ཚོགས་པའམ་རུལ་བར་གྱུར་པའམ་ཕྱེ་མར་གྱུར་པ་ལས་མྱུ་གུ་སྐྱེ་བ་མེད་པ་དེ་བཞིན་དུ་ཉོན་མོངས་པ་ལ་སོགས་པའི་རྐྱེན་མ་ཚང་བ་ལས་སྐྱེ་བ་འབྱུང་བ་མེད་དོ་ཞེས་བྱ་བའོ། །དེ་ལྟར་ན་སྐྱེ་བ་གཅིག་ནས་གཅིག་ཏུ་བརྒྱུད་པའི་ཐ་མ་ནི་མི་འགལ་ཏེ་རྒྱུ་ལ་རག་ལས་པའི་ཕྱིར་རོ། །
དེ་ལྟར་ཕུང་པོའི་རྒྱུན་སྐྱེ་བའི་གནས་སྐབས་གསུམ་བསྟན་པ་ཞེས་བྱ་བ་ནི་འཇིག་རྟེན་ཕ་རོལ་ནས་འཇིག་རྟེན་འདི་དང་ཡང་འཇིག་རྟེན་ཕ་རོལ་ཞེས་བྱ་བ་དེ་ལྟ་བུའོ། །འདི་སྐད་བསྟན་པར་འགྱུར་ཏེ། སྲིད་པའི་ཡན་ལག་གྲངས་དུ་མ་དབྱེ་བ་ཐ་དད་པ་རྟེན་ཅིང་འབྲེལ་པར་འབྱུང་བ་དང་པོ་ལ་སོགས་པ་བར་
མེད་པ་སྐྱེ་བ་གསུམ་དང་འབྲེལ་པའི་གནས་སྐབས་ནི་སེམས་ཅན་གྱི་རྒྱུད་དུ་ཉེ་བར་བསྟན་ཏེ་དེ་རྟེན་ཅིང་འབྲེལ་པར་འབྱུང་བ་ཡན་ལག་བཅུ་གཉིས་ཆ་གསུམ་པ་སྟེ་གཞན་ནི་མ་ཡིན་ནོ། །རྟེན་ཅིང་འབྲེལ་པར་འབྱུང་བ་ཡང་འདིར་སེམས་ཅན་དུ་སྟོན་པ་ལ་མངོན་པར་འདོད་ཀྱི་སེམས་ཅན་དུ་སྟོན་

པ་མ་ཡིན་པ་ནི་མ་ཡིན་ཏེ། དེ་འཇིག་རྟེན་ཕ་རོལ་ནས་འཕོ་བར་མི་འཐད་པའི་ཕྱིར་རོ། །རྟེན་ཅིང་འབྲེལ་པར་འབྱུང་བ་བསྟན་པ་ནི་རྒྱུ་མི་མཐུན་པ་དང་རྒྱུ་མེད་པ་དགག་པའི་ཕྱིར་ཡིན་ལ་རྟེན་ཅིང་འབྲེལ་པར་འབྱུང་བའི་དོན་ནི་འཁོར་བར་འཇུག་པའི་དོན་ཡིན་
ནོ། །ཡང་ཅིའི་ཕྱིར་བསྟན་བཅོས་ལས་སེམས་ཅན་དང་སེམས་ཅན་དུ་མི་སྟོན་པ་ཡང་བསྟན་ལ་མདོ་ལས་སེམས་ཅན་དུ་སྟོན་པ་ཁོ་ན་བསྟན་ཅེ་ན། དེ་ཡང་བཅོམ་ལྡན་འདས་ཀྱིས་གདུལ་བ་དག་ལ་བསྟན་པར་བྱ་བ་ཡིན་ཏེ། སངས་རྒྱས་རྣམས་འབྱུང་བ་ནི་དེའི་དོན་ཁོ་ནར་
ཡིན་པའི་ཕྱིར་རོ། །དེས་ན་དོན་ཆེན་པོ་ཡིན་པའི་ཕྱིར་མདོ་ལས་སེམས་ཅན་དུ་སྟོན་པ་ཁོ་ན་བསྟན་ཏོ། །བསྟན་བཅོས་ལས་ནི་ཆོས་ཉིད་ཀྱི་རྗེས་སུ་འབྲངས་ཏེ། སེམས་ཅན་དང་སེམས་ཅན་དུ་སྟོན་པ་མ་ཡིན་པ་ཡང་བསྟན་ཏོ། །ཡན་ལག་བཅུ་གཉིས་ཞེས་བྱ་བ་རྒྱུ་བཅུ་གཉིས་སོ། །ཆ་གསུམ་
ཞེས་བྱ་བ་ནི་དུམ་བུར་ཡོངས་སུ་བཅད་པ་གསུམ་མོ། །ལྷག་མ་བརྒྱད་ནི་བར་དུའོ་ཞེས་བྱ་བ་ནི་རྣམ་པར་ཤེས་པ་དང་། མིང་དང་གཟུགས་དང་། སྐྱེ་མཆེད་དྲུག་དང་། རེག་པ་དང་། ཚོར་བ་དང་། སྲེད་པ་དང་། ལེན་པ་དང་། སྲིད་པ་དག་གོ། །ཡང་ན་ཅི་ཐམས་
ཅད་ཀྱི་ཞེས་བྱ་བ་ནི་ཁྱད་པར་མེད་པར་མངལ་དུ་འཇུག་པ་ཙམ་ལ་བརྟེན་པ་རྣམས་ཀྱི་འམ། ཁམས་གསུམ་པའི་སེམས་ཅན་རྣམས་ཀྱིའོ། །སྐྱེ་བ་འདི་ལ་ཞེས་བྱ་བ་ནི་མངལ་དུ་འཇུག་པའི་སྐྱེ་བ་ལའོ། །གང་བར་མ་དོར་འཆི་བ་ཡང་མ་ཡིན་ལ་ཞེས་བྱ་བ་ལ་གང་ཞིག་སྲིད་པའི་གནས་
སྐབས་མ་ཐོབ་པར་འཆི་བ་དེ་ལ་ནི་བར་མ་དོར་འཆི་བ་ཞེས་བྱའོ། །གཟུགས་དང་གཟུགས་མེད་པ་ན་སྤྱོད་པ་ཡང་མ་ཡིན་ཏེ་ཞེས་བྱ་བ་ལ། དེ་ན་ནུར་ནུར་པོ་ལ་སོགས་པ་མེད་པའི་ཕྱིར་རོ། །གཟུགས་ན་སྤྱོད་པ་ལ་རྣམ་པར་ཤེས་པ་ལས་ཐ་དད་པའི་མིང་དང་གཟུགས་དང་སྐྱེ་མཆེད་དྲུག་མི་
སྲིད་དོ། །གཟུགས་མེད་པ་ནི་སྤྱོད་པའི་ཕྱིར་དེ་དག་མེད་དོ། །གཟུགས་ན་སྤྱོད་པ་ལ་ནི་རྣམ་པར་ཤེས་པ་དང་སྐྱེ་མཆེད་དྲུག་གི་གནས་སྐབས་ལས་ཐ་དད་པའི་མིང་དང་གཟུགས་ཀྱི་གནས་སྐབས་མེད་དེ། འདི་ལྟར། མིང་དང་གཟུགས་ནི་དེ་ཕན་ཆད། །སྐྱེ་མཆེད་དྲུག་དོད་ཚུན་ཆད་དོ། །ཞེས་

འཆད་པར་འགྱུར་རོ། །དེའི་ཕྱིར་གཟུགས་ཀྱི་ཁམས་ན་ཡན་ལག་བཅུ་གཉིས་མེད་དོ། །གཟུགས་མེད་པ་ན་སྤྱོད་པ་ལ་ནི་མིང་དང་གཟུགས་ཀྱི་གནས་སྐབས་དང་སྐྱེ་མཆེད་དྲུག་གི་གནས་སྐབས་ཡོད་པ་མ་ཡིན་ཏེ། གཟུགས་མེད་པས་དེ་དག་མེད་དེ་དེའི་ཕྱིར་ཡན་ལག་བཅུ་ཡོད་
དོ། །འདི་ལྟར་གླེང་གཞི་ཆེན་པོའི་ཆོས་ཀྱི་རྣམ་གྲངས་ལས་ཞེས་བྱ་བ་རྒྱས་པར་འབྱུང་བ་ལ། ཀུན་དགའ་བོ་གལ་ཏེ་རྣམ་པར་ཤེས་པ་མའི་མངལ་དུ་ཞུགས་པར་མ་གྱུར་ན་རྣམ་པར་ཤེས་པ་དེ་འཕེལ་བ་དང་། རྒྱས་པ་དང་། ཡངས་པར་འགྱུར་རམ་ཞེས་འབྱུང་བའི་ཕྱིར་
འདོད་པའི་ཁམས་ལས་མ་གཏོགས་པར་མའི་མངལ་དུ་འཇུག་པ་ཉིད་མི་སྲིད་དོ། །དེའི་ཕྱིར་གང་ཞིག་འདས་པའི་མ་རིག་པ་དང་འདུ་བྱེད་དག་གིས་རྒྱས་པར་བྱས་ཏེ་ད་ལྟར་བྱུང་བའི་རྣམ་པར་ཤེས་པ་དང་མིང་དང་གཟུགས་དང་སྐྱེ་མཆེད་དྲུག་དང་རེག་པ་དང་ཚོར་བ་རྣམས་འཇུག་གོ། །
ཡང་ད་ལྟར་བྱུང་བའི་སྲེད་པ་དང་ལེན་པ་དང་སྲིད་པས་རྒྱས་པར་བྱས་ཏེ། མ་འོངས་པའི་སྐྱེ་བ་དང་རྒ་ཤི་དག་འཇུག་སྟེ། རྒྱུན་གྱི་དབང་དུ་བྱས་པར་རིག་པར་བྱའོ། །དེ་ལྟར་ན་གང་ཟག་ཐམས་ཅད་ཀྱི་དབང་དུ་བྱས་ན་སྲིད་པའི་ཡན་ལག་གི་རྣམ་པར་གཞག་པ་འཁྲུགས་པར་འགྱུར་
རོ། །སྔོན་དང་ཕྱི་མའི་མཐའ་འབྲས་བུ་དང་རྒྱུ་དང་བཅས་པ་དག་སྨོས་པའི་ཕྱིར་རོ་ཞེས་བྱ་བ་ལ་སྔོན་གྱི་མཐའ་འབྲས་བུ་དང་བཅས་པ་དང་། ཕྱི་མའི་མཐའ་རྒྱུ་དང་བཅས་པ་སྨོས་པའི་ཕྱིར། རྟེན་ཅིང་འབྲེལ་བར་འབྱུང་བ་ཡན་ལག་བཅུ་གཉིས་དང་ཆ་གསུམ་པ་དེ་ཉིད་སྔོན་གྱི་
མཐའ་པ་དང་ཕྱི་མའི་མཐའ་པ་དང་རྣམ་པ་གཉིས་སུ་བརྗོད་དོ། །དེ་ལ་སྔོན་གྱི་མཐའ་པ་ནི་མ་རིག་པ་དང་འདུ་བྱེད་དོ། །དེའི་འབྲས་བུ་ནི་རྣམ་པར་ཤེས་པ་དང་མིང་དང་། གཟུགས་དང་། སྐྱེ་མཆེད་དྲུག་དང་། རེག་པ་དང་། ཚོར་བའི་ཡན་ལག་རྣམས་ཏེ། དེ་ལྟར་
ན་ཡན་ལག་བདུན་ནི་སྔོན་གྱི་མཐའ་པའོ། །ཕྱི་མའི་མཐའ་པ་གང་ཞེ་ན། སྐྱ