Tạng Tây Tạng (Tibetan Canon)Nguyên tác: Tây Tạng
Luận tạng Tây Tạng (Tengyur) — Tập 209
Văn bản gốc(Tây Tạng)
Trang 7 / 28 (50.000 ký tự/trang)
གས་པ་རྣམས་ལ་ཡོད་པ་ཞེས་བྱ་བ་སྟེ། སོགས་པ་སྨོས་པ་ནི་མེ་དང་རླུང་དང་ཤིང་དང་སོ་ཕག་ལ་སོགས་པ་དག་སྡུད་དོ། །འདུ་བྱེད་རྣམས་བདག་མེད་པ་ཡིན་དང་འཛིན་པ་ པོ་མེད་པས་མིག་ལ་སོགས་པ་རྣམས་ལ་ཟིན་པ་ཉིད་མི་སྲིད་དོ་སྙམ་སྟེ་འདྲི་བ་ནི་ཟིན་པ་ཞེས་བྱ་བའི་དོན་ཅི་ཞེ་ན་ཞེས་བྱ་བའོ། །བསྟན་བཅོས་ལས་ནི་བདག་གིས་ལུས་སུ་གཏོགས་པའི་ཞེས་འབྱུང་ངོ་། །དེ་ཡང་ཅི་ཞིག་ཅེ་ན་སེམས་དང་སེམས་ལས་བྱུང་བ་རྣམས་ཀྱི་བདག་གིར་ བྱས་པ་གང་ཡིན་པའོ། །བདག་གིར་བྱས་པ་ཞེས་བྱ་བ་ནི་གང་ཞིག་སེམས་དང་སེམས་ལས་བྱུང་བ་རྣམས་ཀྱིས་རྟེན་གྱི་དངོས་པོར་ཉེ་བར་བཟུང་བའོ། །སེམས་དང་སེམས་ལས་བྱུང་བ་གཟུགས་ཅན་མ་ཡིན་པ་ཡུལ་ན་མི་གནས་པ་རྣམས་ཀྱིས་རྟེན་གྱི་དངོས་པོ་ཉེ་བར་བཟུང་བ་ནི་མོས་ པར་དཀའོ་ཞེ་ན། དེའི་ཕྱིར་ཕན་པ་དང་གནོད་པ་དག་གིས་ཕན་ཚུན་མཐུན་པར་བྱེད་པའི་ཕྱིར་ཉེ་བར་བཟུང་བ་ཡིན་གྱི་དེ་ལ་གནས་པའི་ཕྱིར་ནི་མ་ཡིན་ནོ། །འདི་ལྟར་མིག་ལ་སོགས་པ་རྣམས་ལ་མིག་སྨན་ལ་སོགས་པས་ཕན་བཏགས་ན་རྣམ་པར་ཤེས་ པ་གསལ་ཞིང་མ་འཁྲུགས་པ་སྐྱེ་ལ་རླུང་ལ་སོགས་པས་གནོད་པ་བྱས་ན་མི་གསལ་བ་དང་འཁྲུག་པ་སྐྱེ་བ་ཡིན་ནོ། །དེ་བཞིན་དུ་རྣམ་པར་ཤེས་པ་ཚོར་བ་བདེ་བ་དང་སྡུག་བསྔལ་དང་མཚུངས་པར་ལྡན་པ་རྣམས་སྐྱེས་ན་མིག་ལ་སོགས་པ་རྣམས་འཕེལ་བ་དང་འགྲིབ་པར་འགྱུར་ ཏེ་དེ་ལྟར་ཕན་ཚུན་མཐུན་པར་བྱེད་པ་ཡིན་ནོ། །སེམས་དང་སེམས་ལས་བྱུང་བ་རྣམས་མིག་ལ་སོགས་པ་རྣམས་ཀྱི་ཟིན་པ་ཉིད་དུ་ཐལ་བར་འགྱུར་བ་སྤང་བའི་ཕྱིར། འཇིག་རྟེན་ན་སེམས་པ་དང་བཅས་པའོ་ཞེས་བརྗོད་པ་གང་ཡིན་པའོ་ཞེས་བྱ་བ་གསུངས་ཏེ། གང་ཞིག་ལ་ འཇིག་རྟེན་ན་སེམས་པ་དང་བཅས་པའོ་ཞེས་བརྗོད་ཅེ་ན། རྟེན་གང་ལ་གནོད་པ་བྱས་པ་སྡུག་བསྔལ་འབྱུང་བ་དང་། གང་ཞིག་འདིས་རྩྭ་ཀུ་ཤ་དང་ཚ་རྒོད་དང་མེ་དང་ཚེར་མ་དང་གནམ་ལྕགས་ལ་སོགས་པ་དག་ལས་བསྲུང་བ་དང་། གང་ཞིག་འདོད་པ་དང་ཁྲོ་བ་དང་མྱ་ངན་དང་ འཇིགས་པ་དང་དགའ་བ་ལ་སོགས་པ་དག་གི་རྣམ་པར་འགྱུར་བའོ། །སེམས་དང་སེམས་ལས་བྱུང་བ་རྣམས་ནི་འཛིན་པ་ཡིན་པའི་ཕྱིར་ཟིན་པའོ་ཞེས་མི་བརྗོད་དོ། །བྱེ་བྲག་ཏུ་སྨྲ་བ་རྣམས་ནི་གཟུགས་གང་ཞིག་ལ་གཟིར་བའམ་བཅད་པ་ན་སྡུག་བསྔལ་འབྱུང་ཞིང་བཟློག་པས་བདེ་བ་ འབྱུང་བ་དེ་ནི་ཟིན་པའོ་ཞེས་ཟེར་རོ། །གཞན་དག་ན་རེ་ལུས་སུ་གཏོགས་པ་འདི་ལ་ང་དང་ངའོ་སྙམ་པའི་ང་རྒྱལ་གྱིས་ཡོངས་སུ་ཟིན་པ་ནི་ཟིན་པའོ་ཞེས་ཟེར་རོ། །དེ་ལྟ་ནི་མ་ཡིན་ཏེ་སེམས་དང་སེམས་ལས་བྱུང་བ་རྣམས་ཟིན་པ་ཡིན་པར་འགྱུར་དུ་འོང་ངོ་། །ང་རྒྱལ་ཉིད་ཀྱིས་ ནི་དུས་སུ་མི་འདུད་པའི་ཕྱིར་དང་གཟུགས་ཉིད་ཀྱི་ཕྱིར་ཏེ། ཉེ་བར་ལེན་པར་བྱེད་པ་དང་། ཉེ་བར་ལེན་པའི་བྱེད་པ་པོའི་གཟུགས་ཀྱི་ཕྱིར་ཞེས་བྱ་བའི་ཐ་ཚིག་གོ། །གཞན་དག་ན་རེ་ལུས་ཀྱི་དབང་པོ་དང་ཐ་མི་དད་པ་གང་ཡིན་པ་དེ་ཟིན་པའོ་ཞེས་ཟེར་རོ། །ལུས་ཀྱི་དབང་པོའི་ཟིན་པ་དེ་ལྟ་བུ་ལ་ནི་དཔྱད་ པར་བྱ་སྟེ། དེ་ལྟར་ན་གཟུགས་ལ་སོགས་པ་དང་སེམས་དང་སེམས་ལས་བྱུང་བ་རྣམས་དབང་པོ་མ་ཡིན་པའི་ཕྱིར་དང་རྟེན་མ་ཡིན་པས་མ་ཟིན་པར་ཐལ་བར་འགྱུར་བ་མ་ཡིན་ནམ་ཞེ་ན། དབང་པོ་དང་ཐ་མི་དད་པའི་གཟུགས་ལ་སོགས་པ་དང་སེམས་དང་སེམས་ལས་བྱུང་བ་རྣམས་རྟེན་ཡིན་པས་འདི་ལ་ ཉེས་པ་མེད་དེ། རེག་བྱ་རྣམ་པ་གཉིས་ཡིན་ཏེ་ཞེས་ངེས་པར་གཟུང་སྟེ། ལྷག་མ་གཟུགས་ཅན་དགུ་པོ་ནི། འབྱུང་འགྱུར་ཆོས་ཁམས་ཕྱོགས་གཅིག་ཀྱང་ཞེས་གསུངས་པའི་ཕྱིར་རོ། །འབྱུང་བ་རྣམས་ལ་ཡོད་པའི་ཕྱིར་རོ་ཞེས་བྱ་བ་ནི་བསྐྱེད་པ་ལ་སོགས་པའི་ངོ་བོས་འབྱུང་བ་རྣམས་དེའི་རྒྱུར་ གྱུར་པའི་ཕྱིར་འབྱུང་བ་རྣམས་ལ་ཡོད་པ་ཞེས་བརྗོད་དོ། །ལྷག་མ་ཞེས་སྨོས་པས་གཟུགས་ཅན་མ་ཡིན་པ་ལ་ཡང་ཐལ་བར་འགྱུར་བས་གཟུགས་ཅན་ཞེས་བྱ་བ་སྨོས་སོ། །ཆོས་ཀྱི་ཁམས་ལ་ཡང་རྣམ་པར་རིག་བྱེད་མ་ཡིན་པའི་གཟུགས་ཡོད་པས་གཟུགས་ཅན་ཉིད་ཡིན་པ་དེའི་དགུ་པོ་ ཞེས་བྱ་བ་སྨོས་སོ། །རྣམ་པར་རིག་བྱེད་མ་ཡིན་པའི་གཟུགས་ཀྱང་འབྱུང་བ་ལས་གྱུར་པ་ཡིན་པས་དེ་བསྡུ་བར་བྱ་བའི་ཕྱིར་ཆོས་ཁམས་ཕྱོགས་གཅིག་ཀྱང་ཞེས་བྱ་བ་སྨོས་སོ། །ཀྱང་གི་སྒྲ་ནི་བསྡུ་བའི་དོན་ཏོ། །གཞན་དག་ན་རེ་ཀྱང་གི་སྒྲ་ནི་ཁམས་འབྱུང་བའི་བདག་ཉིད་ཁོ་ན་ཡོད་པ་ མ་ཡིན་པ་ཉིད་དུ་བསྟན་པའི་དོན་ཏོ་ཞེས་ཟེར་རོ། །ལྷག་མ་རྣམས་ནི་མ་བརྩམས་པ་ཁོ་ནས་གཉི་ག་མ་ཡིན་པ་ཞེས་བྱ་བར་གྲུབ་པོ། །སྐྱེ་མཆེད་བཅུ་པོ་དག་ནི་འབྱུང་བ་ཙམ་མོ་ཞེས་ཟེར་ཏེ་ཞེས་བྱ་བ་ལ། ཙམ་གྱི་སྒྲ་ནི་འབྱུང་བ་ལས་གྱུར་པ་ཡིན་པ་རྣམ་པར་བཅད་པའི་དོན་ཏོ། །དེ་ལྟ་ ཡིན་དང་དྲི་བ་དང་ལན་མི་འཐད་དོ་ཞེའོ། །སྐྱེ་མཆེད་བཅུ་པོ་དག་ནི་འབྱུང་བ་ཙམ་མོ་ཞེས་བྱ་བ་དེ་ནི་དེ་ལྟ་མ་ཡིན་ནོ། །ཚིག་ཙམ་གྱིས་དད་པར་མི་འགྱུར་བས་རྒྱུ་སྨྲས་པ། འབྱུང་བ་རྣམས་ནི་བཞི་ཉིད་དང་སྲ་བ་ལ་སོགས་པ་མཚན་ཉིད་དུ་ངེས་པར་གཟུང་བའི་ཕྱིར་ཞེས་བྱ་བ་སྟེ། མདོ་ལས་ བཞི་ཉིད་དུ་ངེས་པར་གཟུང་བའི་ཕྱིར་དང་། སྲ་བ་ལ་སོགས་པ་མཚན་ཉིད་དུ་ངེས་པར་གཟུང་བའི་ཕྱིར་རོ། །དེ་ལ་འདི་དག་ནི་འབྱུང་བ་ཆེན་པོ་བཞི་སྟེ་ཞེས་བཞིར་ངེས་པར་གཟུང་བ་དང་། སའི་ཁམས་གང་ཞེ་ན་སྲ་བ་ཉིད་དོ་ཞེས་རྒྱ་ཆེར་འབྱུང་སྟེ་སྲ་བ་ལ་སོགས་པའི་མཚན་ཉིད་ངེས་པར་གཟུང་ བ་དང་བཞིའི་ངེས་པར་བཟུང་བས་ནི་འབྱུང་བ་ཆེན་པོ་བཅུ་དག་མེད་དོ་ཞེས་སྟོན་ཏོ། །གལ་ཏེ་འབྱུང་བ་ལས་ཐ་དད་པའི་འབྱུང་བ་ལས་གྱུར་པ་མེད་ན། དེ་ལྟ་ཡིན་དང་སྐྱེ་མཆེད་བཞིའམ་གཅིག་གོ་ཞེས་བརྗོད་དགོས་ཀྱི་བཅུ་ཞེས་མ་ཡིན་ནོ། །སྲ་བ་ལ་སོགས་པའི་ མཚན་ཉིད་དུ་ངེས་པར་བཟུང་བས་ནི་མིག་ལ་སོགས་པ་རྣམས་དང་གཟུགས་ལ་སོགས་པ་རྣམས་འབྱུང་བ་དག་གི་ནང་དུ་མ་འདུས་པར་སྟོན་ཏེ། སྲ་བ་ལ་སོགས་པའི་རང་གི་ངོ་བོ་དང་མཚན་ཉིད་མི་མཐུན་པའི་ཕྱིར་ཏེ་ཚོར་བ་ལ་སོགས་པ་བཞིན་ནོ། །ཡང་ཇི་ལྟར་དེ་རྣམས་འབྱུང་བ་དག་དང་མཚན་ཉིད་ མི་མཐུན་པར་ཁོང་དུ་ཆུད་ཅེ་ན། འབྱུང་བ་དེ་དག་རེག་བྱ་ཡིན་པའི་ཕྱིར་དང་རེག་པའི་ཡུལ་ཡིན་པའི་ཕྱིར་རོ། །མིག་ལ་སོགས་པ་རྣམས་ཀྱི་ནི་གཟུགས་ལ་སོགས་པ་རྣམས་ཡིན་གྱི་རེག་བྱ་ནི་མ་ཡིན་པའི་ཕྱིར་རོ། །གཟུགས་ལ་སོགས་པ་རྣམས་བལྟ་བར་བྱ་བ་དང་བསྣམ་པར་བྱ་བ་མྱང་བར་བྱ་ བ་དང་མིག་ལ་སོགས་པ་རྣམས་ཀྱང་ལྟ་བར་བྱེད་པ་དང་སྣོམ་པར་བྱེད་པ་དང་མྱོང་བར་བྱེད་པ་ཡིན་གྱི་རེག་པར་མི་བྱེད་པའི་ཕྱིར་རེག་བྱ་ནི་མ་ཡིན་ནོ། །འབྱུང་བའི་བདག་ཉིད་ཅན་ཁྱད་པར་མེད་པའི་ཕྱིར་གཟུགས་ལ་སོགས་པ་ཐམས་ཅད་དབང་པོ་ཐམས་ཅད་ཀྱི་གཟུང་བར་བྱ་བར་འགྱུར་ན། དེ་ནི་ ཡོད་པ་ཡང་མ་ཡིན་ཏེ། མིག་ལ་སོགས་པས་ཀྱང་སྟེ་མིག་དང་རྣ་བ་དང་སྣ་དང་ལྕེ་རྣམས་ཀྱིས་ནི་སྲ་བ་ལ་སོགས་པ་སྟེ། སྲ་བ་དང་གཤེར་བ་དང་དྲོ་བ་དང་ཡང་ཞིང་གཡོ་བ་ཉིད་དང་མི་འཛིན་ཏེ། དེའི་ཕྱིར་ས་ལ་སོགས་པ་དག་གཟུགས་ལ་སོགས་པའི་བདག་ཉིད་མ་ཡིན་ནོ། །ལུས་ཀྱི་དབང་ པོས་ཀྱང་ཁ་དོག་ལ་སོགས་པ་སྟེ། ཁ་དོག་དང་སྒྲ་དང་དྲི་དང་རོ་དག་འཛིན་པ་མ་ཡིན་ཏེ། དེའི་ཕྱིར་གཟུགས་ལ་སོགས་པ་རྣམས་འབྱུང་བའི་རང་བཞིན་མ་ཡིན་པ་ཞེས་བྱ་བར་གྲུབ་པ་ཡིན་ནོ། །མིག་ལ་སོགས་པ་རྣམས་ནི་ཡུལ་ཅན་ཡིན་པའི་ཕྱིར་དང་། ཡུལ་ངེས་པའི་ཕྱིར་ཡུལ་དག་ དང་ཕན་ཚུན་རང་བཞིན་ཐ་དད་པར་ཁོང་དུ་ཆུད་པར་བྱའོ། །མདོ་ལས་འབྱུང་བ་རྣམ་བཞི་ཉིད་དུ་ངེས་པར་བཟུང་བ་དང་སྲ་བ་ལ་སོགས་པའི་རང་བཞིན་ངེས་པར་བཟུང་བའི་ཕྱིར་ཁ་དོག་ལ་སོགས་པ་རྣམས་ལུས་ཀྱི་དབང་པོའི་གཟུང་བར་བྱ་བ་ལས་བཟློག་པ་ཡིན་པས་སྐྱེ་མཆེད་བཅུ་པོ་རྣམས་ནི་འབྱུང་བ་ ཙམ་མ་ཡིན་པར་གྲུབ་པོ། །གཟུགས་སུ་རུང་བས་ན་གཟུགས་ཏེ་གནོད་པ་བྱར་རུང་བ་ཞེས་བྱ་བའི་ཐ་ཚིག་གོ། །དེ་འདི་ལ་ཡོད་པས་ན་མིག་ལ་སོགས་པའི་སྐྱེ་མཆེད་གཟུགས་ཅན་ཞེས་བྱའོ། །རེག་བྱའི་སྐྱེ་མཆེད་ཁོ་ན་འབྱུང་བ་ཆེན་པོ་བཞི་དག་གོ་ཞེས་བྱ་བར་གསུངས་ཀྱི་མིག་ལ་ སོགས་པའི་སྐྱེ་མཆེད་རྣམས་ནི་མ་ཡིན་ཏེ། འབྱུང་བ་ལས་ཐ་དད་པའི་འཇམ་པ་ཉིད་ལ་སོགས་པ་རེག་བྱའི་སྐྱེ་མཆེད་དུ་གསུངས་པས་འབྱུང་བ་ཆེན་པོ་བཞི་དག་རྒྱུར་བྱས་པ་ཞེས་བྱའོ། །རེག་བྱའི་སྐྱེ་མཆེད་ཀྱི་ཕྱོགས་གཅིག་ཁོ་ནས་འབྱུང་བ་རྣམས་བསྡུས་པའི་ཕྱིར་ལྷག་མ་མིག་ལ་སོགས་ པ་དང་འཇམ་པ་ཉིད་ལ་སོགས་པ་ནི་འབྱུང་བ་དག་མ་ཡིན་ནོ་ཞེས་བྱ་བ་གསལ་བར་ཀུན་ཏུ་བསྟན་པ་ཡིན་ནོ། །ཐམས་ཅད་འབྱུང་བའི་བདག་ཉིད་ཡིན་ཏེ་རེག་བྱའི་སྐྱེ་མཆེད་ཁོ་ན་རྣམ་པ་གཉིས་སུ་བསྟན་གྱི་མིག་ལ་སོགས་པའི་སྐྱེ་མཆེད་རྣམས་མ་ཡིན་པ་དང་མིག་ལ་སོགས་པའི་སྐྱེ་མཆེད་ རྣམས་ཁོ་ན་རྣམ་པ་གཅིག་ཏུ་བསྟན་གྱི་རིག་བྱའི་སྐྱེ་མཆེད་མ་ཡིན་པ་ཞེས་བྱ་བ་འདི་ལ་འབྱུང་བ་དང་འབྱུང་བ་ལས་གྱུར་པ་གཉིས་རང་གི་ངོ་བོ་ཐ་དད་པས་རྒྱུ་གཞན་པ་མ་ཡིན་ཏེ། དེའི་ཕྱིར་མདོ་དང་འགལ་བས་སྐྱེ་མཆེད་བཅུ་པོ་རྣམས་འབྱུང་བ་ཙམ་མ་ཡིན་ནོ། །འོ་ན་མདོ་ལས་ཞེས་རྒྱ་ཆེར་ འབྱུང་བ་ལ། གལ་ཏེ་མིག་འབྱུང་བའི་རང་བཞིན་མ་ཡིན་ན། ཅིའི་ཕྱིར་འདི་སྐད་དུ། མིག་གི་ཤའི་གོང་བུ་ལ་སྲ་བ་དང་མཁྲང་བར་གྱུར་པ་གང་ཡིན་པ་ཞེས་བྱ་བ་ཞེས་གསུངས་ཤེ་ན། མིག་ལ་སོགས་པའི་འབྱུང་བ་ཚོགས་པའི་བདག་ཉིད་གང་ཡིན་པ་དེ་ལ་ནི་འདིར་དབང་པོ་རྣམས་འབྱུང་བའི་ རང་བཞིན་དུ་བསྟན་པ་འཐད་ཅིང་གོང་བུ་སྨོས་པ་ཡང་དོན་དང་བཅས་པའོ། །གང་ཡང་འབྱུང་བ་དང་མཚན་ཉིད་མི་མཐུན་པ་དེ་ལ་ནི་དབང་པོ་རྣམས་འབྱུང་བའི་རང་བཞིན་དུ་བསྟན་པ་མི་འཐད་དེ། ཆ་ཤས་མ་ཡིན་པའི་ཕྱིར་དང་། དེའི་བདག་ཉིད་མ་ཡིན་པའི་ཕྱིར་རོ། །གོང་བུ་སྨོས་པ་ཡང་དོན་མེད་དོ། ། མཁྲང་བར་གྱུར་པ་ཞེས་བྱ་བ་ནི་མཁྲང་བའི་རྣམ་པའོ། །དེ་དང་ཐ་མི་དད་པར་འཇུག་པ་ཞེས་རྒྱ་ཆེར་འབྱུང་བ་ལ། དེ་ལ་མིག་དེ་དང་ཐ་མི་དད་པར་འཇུག་པའི་ངང་ཚུལ་ཡོད་པས་ན་ཐ་མི་དད་པར་འཇུག་པའོ། །འདི་སྐད་དུ་བསྟན་པར་འགྱུར་ཏེ། མིག་གི་དབང་པོ་ཡང་ཡིན་པ་དང་ལྷན་ཅིག་འཇུག་ པའི་ཤའི་གོང་བུ་དེའི་རྟེན་དུ་གྱུར་པ་ལ་མིག་གི་ཤའི་གོང་བུ་གང་ཡིན་པ་ཞེས་པ་འདི་ཉེ་བར་བཏགས་ཏེ་རྟེན་ལ་བརྟེན་པས་བཏགས་པའི་ཕྱིར་རོ། །དེ་ལྟ་བུ་ཡང་ཤའི་གོང་བུ་སྨོས་པའི་ནུས་པ་ལས་ཡིན་ནོ། །མིག་ནི་ཤའི་གོང་བུའི་བདག་ཉིད་མ་ཡིན་ཏེ་དང་པོའི་བདག་ ཉིད་ཡིན་པའི་ཕྱིར་རོ། །གཞན་དག་ན་རེ། འཇིག་རྟེན་གྱི་ཐ་སྙད་དང་མཐུན་པར་གདགས་པའི་ཕྱིར་དེ་སྐད་གསུངས་ཏེ། འཇིག་རྟེན་ན་ནི་དེའི་རྟེན་ཤའི་གོང་བུ་འབྱུང་བ་དང་འབྱུང་བ་ལས་གྱུར་པའི་བདག་ཉིད་ཅན་ལ་མིག་ཏུ་འདུ་ཤེས་ཀྱི་དབང་པོ་ལ་ནི་མ་ཡིན་ནོ་ཞེས་ཟེར་རོ། །གཞན་དུ་ན་ མིག་ལ་ཞེས་བྱ་བ་ཁོ་ན་ཞིག་བཤད་པར་འགྱུར་རོ། །ཡང་རྒྱུ་མཚན་གྱི་བདུན་པ་བརྗོད་པས་རྟོག་པར་འགྱུར་ཏེ། དེ་ལས་དབང་པོ་ཐ་མི་དད་པར་འཇུག་པའི་གོང་བུ་མཐའ་དག་གི་རྟེན་འབྱུང་བ་རྣམས་རྗེས་སུ་བཟུང་བས་ན། དེ་ཉིད་ཀྱི་ཕྱིར་བདུན་པས་བསྟན་པ་ཞེས་བྱ་སྟེ་རྟེན་གྱི་ཤའི་གོང་ བུ་མཐའ་དག་གཟུང་བའི་དོན་ཏོ། །གལ་ཏེ་མིག་ལ་སོགས་པ་རྣམས་དང་གཟུགས་ལ་སོགས་པ་རྣམས་འབྱུང་བའི་བདག་ཉིད་མ་ཡིན་ན། དགེ་སློང་སྐྱེས་བུ་འདི་ནི་ཁམས་དྲུག་པ་ཡིན་ཏེ་ཞེས་བྱ་བའི་སྟོན་པའི་གསུང་དང་འགལ་བར་འགྱུར་ཏེ། ས་ལ་སོགས་པའི་ཁམས་རྣམས་གཟུགས་ ལ་སོགས་པའི་ཁམས་དང་མིག་ལ་སོགས་པའི་ཁམས་རྣམས་ལས་ཐ་དད་པར་ཡོད་ན་སྐྱེས་བུ་འདི་ནི་ཁམས་དྲུག་པ་ཡིན་ནོ་ཞེས་བརྗོད་པར་མི་རིགས་སོ་ཞེ་ན་མངལ་དུ་འཇུག་པའི་རྫས་ཀྱི་གཞི་བསྟན་པར་བྱ་བའི་ཕྱིར་ཏེ། མདོ་ནི་དགོངས་པ་ཅན་ཡིན་པའི་ཕྱིར་འགལ་བ་མེད་དོ། །དེ་ལ་ནུར་ནུར་ པོ་ལ་སོགས་པའི་གནས་སྐབས་ནི་སེམས་ཅན་གྱི་རྫས་ཀྱི་གཞི་སྟེ། དེ་བསྟན་པའི་ཕྱིར་གཟུགས་ལ་སོགས་པ་རྣམས་ཡོད་བཞིན་དུ་ཁམས་དྲུག་ཏུ་གསུངས་ཏེ། དེ་ལ་གཞན་དག་ན་རེ་རེག་པའི་སྐྱེ་མཆེད་རྣམས་དང་མིག་ལ་སོགས་པ་རྣམས་འབྱུང་བ་བཞི་ཚན་གྱི་བདག་ཉིད་དེ་རེག་པའི་སྐྱེ་ མཆེད་རྣམས་ནི་རྣམ་པར་ཤེས་པ་སྐྱེ་བའི་རྩ་བའི་རྫས་ཡིན་པ་དང་། མིག་ལ་སོགས་པ་རྣམས་ཀྱང་འབྱུང་བ་ལ་བརྟེན་པའི་ཕྱིར་འབྱུང་བ་རྣམས་ནི་རྩ་བའོ་ཞེས་ཟེར་རོ། །གཞན་དག་ནི་ཉིང་མཚམས་སྦྱོར་བར་འབྲེལ་བའི་ཚེ། མིག་ལ་སོགས་པ་རྣམས་མེད་པས་དེ་དག་མ་གསུངས་ ལ། དེའི་ཚེ་ལུས་ཀྱི་དབང་པོ་ཡོད་མོད་ཀྱི་དེའི་དེའི་གནས་སྐབས་ན་གྲང་བ་ལ་སོགས་པ་ཡོངས་སུ་གཅོད་པར་མི་ནུས་པས་ཡོད་ཀྱང་རང་གི་དགོས་པ་མི་བྱེད་པ་གང་ཡིན་པ་དེ་ནི་དགོས་པ་དང་མི་ལྡན་པ་ཉིད་ཀྱི་རྒྱུ་དང་བཅས་པར་རྣམ་པར་མི་འཇོག་གོ་སྙམ་དུ་སེམས་སོ། །དེ་ཉིད་ཀྱི་ཕྱིར་ཁམས་དྲུག་པོ་ འདི་དག་སེམས་ཅན་གྱི་རྫས་ཀྱི་གཞི་ཡིན་ཏེ། ཉིང་མཚམས་སྦྱོར་བའི་སེམས་ནས་འཆི་འཕོ་བའི་སེམས་ཀྱི་བར་དུ་དགོས་པ་དང་བཅས་པའི་ཕྱིར་རོ། །འགོག་པའི་སྙོམས་པར་འཇུག་པ་རྣམས་ཀྱི་རྣམ་པར་ཤེས་པ་ལ་སོགས་པ་ཅི་ལྡང་བའི་སེམས་ཀྱི་དེ་མ་ཐག་པའི་རྐྱེན་ཉིད་དོ། ། ལུས་ཀྱི་དབང་པོ་ལ་ཡང་འོ་ན་སྐལ་བ་མཉམ་པའི་རྒྱུ་སྦྱིན་པའི་ཕྱིར་མཚུངས་པར་ལྡན་པའི་རྣམ་པར་ཤེས་པ་སྐྱེས་པའི་རྟེན་གྱི་དངོས་པོ་ནི་ལུས་ཀྱི་དབང་པོའི་དགོས་པའོ། །སྐལ་བ་མཉམ་པའི་རྒྱུ་སྦྱིན་པ་མ་ཡིན་ཏེ། གཞན་དང་མཚུངས་པར་ལྡན་པའི་ཕྱིར་རོ། །རྫས་ཀྱི་གཞི་ བསྟན་པ་ཡང་སྲ་བ་ལ་སོགས་པ་རྣམས་ཉིད་དེ། གཟུགས་ལ་སོགས་པ་རྣམས་ཀྱི་རྟེན་རྫས་གཞན་མ་ཡིན་པའི་གཟུགས་ལ་སོགས་པ་རྣམས་མ་ཡིན་ནོ། །སྲ་བ་ལ་སོགས་པ་རྣམས་ཞེས་བྱ་བ་ལ་སེམས་ཁོ་ན་འཆིང་བ་དང་ཐར་བར་འོས་ཀྱི་གཞན་ནི་མ་ཡིན་ཏེ། ཚོར་བ་ལ་སོགས་ པ་རྣམས་སེམས་ཀྱི་རྟེན་དང་སེམས་ཀྱི་རྗེས་སུ་འཇུག་པའི་ཕྱིར་རོ། །ཁ་ཅིག་ན་རེ་བདག་མེད་པར་བསྟན་པའི་ཕྱིར་རོ་ཞེས་ཟེར་རོ། །འདིར་རྒྱུ་གང་ལས་རྟེན་ནི་སྲ་བ་ཉིད་ལས་གཞན་པ་ཁ་དོག་ལ་སོགས་པ་རྣམས་མ་ཡིན་ཞེ་ན། ཚོགས་པ་ཐམས་ཅད་ལ་ཁྱབ་པ་ས་ལ་སོགས་ པའི་མཚན་ཉིད་ལ་ཡོད་ཀྱི་ཁ་དོག་ལ་སོགས་པ་མ་ཡིན་ཏེ། འདི་དག་རྟེན་ཉིད་དང་ཁ་དོག་ལ་སོགས་པ་སྐྱེད་པ་དང་ཆེན་པོ་ཉིད་དུ་གྲུབ་པ་མ་ཡིན་ནོ། །འདི་སྟོན་པའི་དགོངས་པ་པ་ཡིན་གྱི་ཡང་འབྱུང་བ་ཙམ་ཞིག་བཞེད་པ་མ་ཡིན་ནོ་ཞེས་བྱ་བ་ཇི་ལྟར་ཁོང་དུ་ཆུད་པར་བྱ་ཞེ་ན། ཡང་ རེག་པའི་སྐྱེ་མཆེད་དྲུག་གསུངས་པའི་ཕྱིར་ཏེ། མདོ་འདི་ཉིད་ལས་ཀྱང་རེག་པའི་སྐྱེ་མཆེད་དྲུག་གསུངས་པ་ནི་མིག་གི་འདུས་ཏེ་རེག་པའི་སྐྱེ་མཆེད་ནས་ཡིད་ཀྱི་འདུས་ཏེ་རེག་པའི་སྐྱེ་མཆེད་ཀྱི་བར་དྲུག་གསུངས་ཏེ་དེའི་ཕྱིར་འབྱུང་བ་ཙམ་མ་ཡིན་པའི་ཕྱིར་ཁམས་དྲུག་གསུངས་པ་ ཡིན་ནོ་ཞེས་བྱ་བར་ཤེས་པར་བྱ་སྟེ། དེ་ལྟ་མ་ཡིན་ན་མིག་ལ་སོགས་པ་ལྔ་པོ་རྣམས་སའི་ཁམས་ལ་སོགས་པ་ལས་ཐ་མི་དད་པའི་ཕྱིར་རེག་པའི་སྐྱེ་མཆེད་དྲུག་ཅེས་ཡང་མི་གསུང་བར་འགྱུར་རོ། །དེ་ལ་མིག་ཉིད་རེག་པའི་སྐྱེ་མཆེད་ཡིན་པ་ནི་མིག་གི་རེག་ པའི་སྐྱེ་མཆེད་དེ། ཡིད་ཀྱི་རེག་པའི་སྐྱེ་མཆེད་ཀྱི་བར་ནི་སེམས་ལས་བྱུང་བའི་ཆོས་རེག་པའི་རྟེན་ཡིན་ནོ་ཞེས་བྱ་བའི་དོན་ཏོ། །སེམས་ལས་བྱུང་བ་རྣམས་མེད་པར་ཐལ་བར་འགྱུར་བའི་ཡང་ཕྱིར་རོ། །ཅི་ཡིན་ཞེ་ན་ཁམས་དྲུག་ཙམ་ཡིན་པའི་ཕྱིར་མདོ་ལས་ཁམས་དྲུག་གསུངས་ ཀྱི་འབྱུང་བ་ལས་གྱུར་པ་ནི་ཡོད་པ་ཡིན་ནོ། །འོ་ན་ཅི་ཞེ་ན་རྫས་ཀྱི་གཞི་བསྟན་པའི་ཕྱིར་ཞེས་སྦྱར་རོ། །གལ་ཏེ་མདོ་ལས་སའི་ཁམས་ལ་སོགས་པ་ལྟར་མིག་ལ་སོགས་པ་དང་གཟུགས་ལ་སོགས་པ་རྣམས་མ་གསུངས་པས་དེ་རྣམས་མེད་པར་འདོད་ན། དེ་ལྟར་ན་ཚོར་བ་ལ་ སོགས་པ་སེམས་ལས་བྱུང་བ་རྣམས་ཀྱང་མ་གསུངས་པས་དེ་དག་ཀྱང་མེད་པར་ཐལ་བར་འགྱུར་རོ། །ཅི་སྟེ་ཇི་ལྟར་འབྱུང་བ་རྣམས་ཁོ་ནས་འབྱུང་བ་ལས་བྱུང་བ་ཡིན་པ་དེ་བཞིན་དུ་སེམས་ཉིད་སེམས་ལས་བྱུང་བ་ཡིན་གྱི་སེམས་ལས་དོན་གཞན་དུ་གྱུར་པ་ནི་མ་ཡིན་པས་ཐལ་བ་འདིར་ མི་འགྱུར་རོ་ཞེ་ན། དེའི་ཕྱིར་སེམས་ཉིད་ཅེས་བྱ་བ་ལ་སོགས་པ་རྒྱ་ཞེས་གསུངས་སོ། །ཅིའི་ཕྱིར་ཞེ་ན་མདོ་དང་འགལ་བའི་ཕྱིར་ཏེ། མདོ་ལས་འདུ་ཤེས་དང་ཞེས་བྱ་བ་རྒྱ་ཆེར་འབྱུང་ངོ་། །ཡང་སེམས་འདོད་ཆགས་དང་བཅས་པ་ལ་སོགས་པ་གསུངས་པའི་ཕྱིར་ཏེ་མདོ་ལས་ཞེས་བྱ་ བར་སྦྱར་རོ། །སེམས་ཉིད་སེམས་ལས་བྱུང་བ་རྣམས་ཡིན་ནོ་ཞེས་བྱ་བར་ཁས་བླངས་པ་ནི་མི་རིགས་ཏེ། གང་གི་ཕྱིར་སེམས་འདོད་ཆགས་དང་བཅས། སེམས་ཞེ་སྡང་དང་བཅས། སེམས་གཏི་མུག་དང་བཅས་ཞེས་གསུངས་པའི་ཕྱིར་རོ། །འབྱུང་བ་ཙམ་ནི་འགའ་ཞིག་ ཡོངས་སུ་སྤང་བར་བཤད་དོ། །ལུས་ཀྱི་རྟེན་ལ་སོགས་པའི་འབྱུང་བ་བཞིན་སྲ་བ་ལ་སོགས་པ་སྣ་ཚོགས་པར་འགྱུར་ཏེ་འགའ་ཞིག་ནི་གཟུང་བའོ། །འགའ་ཞིག་ནི་འཛིན་པའོ། །འགའ་ཞིག་མིག་གི་དབང་པོའི་གཟུང་བའོ། །སྲ་བ་ལ་སོགས་པ་སྣ་ཚོགས་པ་དང་སྣ་ཚོགས་པ་ མ་ཡིན་པ་འདི་ལྟར་ཐ་དད་དེ། སྲ་བ་ལ་སོགས་པ་མིག་གིས་གཟུང་བར་བྱ་བ་མ་ཡིན་ཞིང་ཁ་དོག་ལ་སོགས་པ་ཡང་ལུས་ཀྱིས་མ་ཡིན་ནོ། །ཨཻ་ཧྱེ་ཏཾ་ན་གི་ཧྲི་ཏ་མི་བྱེ་ཀེ། ཁ་དོག་ལ་སོགས་པ་རྣམས་ཀྱང་ངོ་། །དེ་ལ་འབྱུང་བ་ཙམ་ཉིད་དེ་རྣམས་ཀྱང་རྣམ་པ་སྣ་ཚོགས་པ་སོ་སོར་ངེས་པའི་ དབང་པོའི་གཟུང་བར་བྱ་བ་རྣམས་སོ། །དེ་ལ་གལ་ཏེ་ལུས་ཀྱི་དབང་པོའི་གཟུང་བར་བྱ་བའི་དབང་དུ་བྱས་ནས་བཤད་པ་ལ་སོགས་པ་རྣམས་ནི་མིག་གིས་གཟུང་བྱ་མ་ཡིན་ཏེ། དབང་པོའི་གཟུང་བྱ་གཞན་མ་ཡིན་ནོ། །ཁ་དོག་ལ་སོགས་པ་རྣམས་ཀྱང་ལུས་ཀྱིས་མ་ཡིན་ནོ། །ཨི་ཏྱེ་ཏཏྤ་རེ་ཎཱ་བྷྻུ་པ་ གམྱ་ཏ་ཨེ་བ་ན་ཏྭེ་ཏཱ་པ་ཏཱ། གཟུགས་ལ་སོགས་པ་འབྱུང་བའི་བདག་ཉིད་དགག་པར་འགྱུར་རོ། །རིགས་གཅིག་ལ་ཡང་སྣ་ཚོགས་པ་མཐོང་སྟེ་ཚོར་བ་ལ་སོགས་པ་བཞིན་ནོ། །དཔེར་ན་ཚོར་བ་ཁ་ཅིག་ནི་ཕན་འདོགས་པ་དང་། ཁ་ཅིག་ནི་གནོད་པ་དང་། ཁ་ཅིག་རྣམ་པ་གཉིས་ཀ་ཡིན་པ་ལྟ་བུའོ། ། གང་བཤད་པའི་དཀར་པོ་པྲ་བི་ར་ལ་སོགས་པ་མཚོན་པའི་དོན་དུ་ཁ་དོག་ལ་སོགས་པ་རྣམས་ལ་ཞེས་བྱ་བ་དེ་ལ་འབྱུང་བ་རྣམས་ཀྱི་མཆོག་དང་ཐ་མའི་དབྱེ་བས་དཀར་པོ་ལ་སོགས་པའི་དབྱེ་བ་བཤད་ཅེས་བྱ་སྟེ། འབྱུང་བ་ཚོགས་པའི་བདག་ཉིད་ཀྱི་གཟུགས་ལ་སོགས་པ་རྣམས་སོ་ཞེས་དགོངས་ པའོ། །དེ་ལ་ནི་ད་མུ་ཏྟ་ར་ས་ཏྱཾ་ཁ་དོག་ལ་སོགས་པ་རྣམས་ལ་ཡོད་པ་འབྱུང་བ་རྣམས་ལ་ནི་བཱཪྻ་སུ་ནར་ཁ་དོག་ལ་སོགས་པའི་འབྱུང་བ་རྣམས་ཉིད་ཅེས་རྒྱུ་མངོན་པར་བརྗོད་པའི་ཕྱིར་རོ། །གང་བཤད་པའི་མདོ་ལ་མི་བརྟེན་པ་དང་བརྟེན་པའི་དབྱེ་བའི་དབང་དུ་བྱས་ནས་ན་བྱ་ཧཱ་ནྱ་ཏེ། གང་གི་ཕྱིར་ རྒྱུར་བྱས་པའི་གཟུགས་ཀྱི་རང་བཞིན་རྣམས་འབྱུང་བ་རྣམས་བརྟེན་པ་དང་། རེག་བྱ་བཅུ་གཅིག་པ་བསྡུས་པ་རྣམས་མ་བརྟེན་པ་རྣམས་སོ་ཞེས་པ་འདི་ལ་ཡང་ལན་དུ་མི་སྦྱར་རོ། །དེ་ནི་འདོད་པ་ཙམ་སྟེ། གཞི་ཉིད་དང་སྲ་བ་ཉིད་དང་སོགས་ངེས་པར་གཟུང་བའི་ཕྱིར་རོ། །དེ་ལྟར་ རྒྱུ་ཅིས་གཞན་ལ་མི་བརྟེན་པ་ཉིད་ཅེ་ན། འབྱུང་བ་ཆེན་པོའི་དབང་དུ་བྱས་ནས་གསུངས་པར་ཁས་བླང་བར་བྱའོ་ཞེས་སོ། །གཟུགས་ཅན་བཅུ་ནི་བསགས་པའོ། །ཞེས་བྱ་བ་ལ་གཟུགས་ཅན་བཅུ་ཁོ་ན་བསགས་པ་ཞེས་བྱ་བར་ངེས་པར་གཟུང་བ་ཉིད་ཀྱིས་གཞན་བརྒྱད་བསགས་པ་མ་ཡིན་ པ་ཞེས་བྱ་བར་རྟོགས་སོ། །ཡང་ཇི་ལྟར་ན་དེ་དག་བསགས་པ་ཡིན་ཞེ་ན། དེའི་ཕྱིར་རྡུལ་ཕྲ་རབ་འདུས་པ་ཡིན་པའི་ཕྱིར་ཞེས་བྱ་བ་གཟུང་ངོ་། །གཅོད་བྱེད་གཅད་པར་བྱ་བ་ཉིད། །ཕྱི་རོལ་མི་མཁས་པ་བཞི་ཡིན། །ཞེས་བྱ་བ་ལ་ཕྱི་རོལ་སྨོས་པ་ནི་ནང་གི་ཁམས་ བསལ་བར་བྱ་བའི་ཕྱིར་རོ། །བཞི་སྨོས་པ་ནི་སྒྲ་དང་ཆོས་ཀྱི་ཁམས་བསལ་བར་བྱ་བའི་ཕྱིར་རོ། །དགྲ་སྟ་དང་ཤིང་ཞེས་བྱ་བ་ལ་སོགས་པའོ་ཞེས་བྱ་བ་ལ། སོགས་པའི་སྒྲ་ནི་རེ་རེ་དང་སྦྱར་བར་བྱའོ། །དགྲ་སྟ་དང་རལ་གྲི་ཞེས་བྱ་བ་ལ་སོགས་པ་ནི་གཅོད་པར་བྱེད་པའོ། །ཤིང་ དང་རྩྭ་དང་ལུས་ཞེས་བྱ་བ་ལ་སོགས་པ་ནི་གཅད་པར་བྱའོ། །འདིར་དང་གི་སྒྲ་ནི་གཉིས་ཆར་ལ་གཉིས་ཀ་བསྟན་པའི་དོན་ཏོ། །འདིར་ནི་གྲགས་པའི་དབང་གིས་ཐ་དད་ཕྱིར་དཔེར་བརྗོད་དོ། །སོ་སོ་བ་གཉིས་སུ་མེད་པར་མངོན་པར་སྦྱར་བ་ལ་སྐྱོན་མེད་དོ། །ཉིད་ཅེས་བྱ་བ་ནི་ངེས་པར་ གཟུང་བའི་དོན་ཏོ། །ཕྱི་རོལ་གྱི་ཁོ་ནའོ་སྙམ་དུ་དགོངས་སོ། །བདག་ཉིད་དུ་རེད་མ་ཐག་ཏུ་འཇིགས་པའི་འདུ་ཤེས་ཐམས་ཅད་ལ་བྱ་བ་མེད་པས་གཅོད་པ་ཞེས་བྱ་བའི་ཆོས་འདི་ཅི་ཞེ་ན་ཞེས་བྱ་བ་ནི། ཡང་ན་སྐད་ཅིག་མ་ཉིད་ཀྱི་ཕྱིར་གཅད་པར་བྱ་བ་དང་གཅོད་པར་བྱེད་པ་མེད་ན་གཅོད་ པ་ཞེས་བྱ་བའི་ཆོས་ཅི་ཞིག་ཅེས་བྱ་བའོ། །འདུས་པའི་རྒྱུན་འབྲེལ་བར་འབྱུང་བ་ཅན་རྣམ་པར་འབྱེད་པ་སྐྱེད་པའོ་ཞེས་བྱ་བ་ལ་འབྲེལ་པ་སྐྱེད་པ་ནི་གཅད་པར་བྱ་བ་ཞེས་བྱའོ། །གཅོད་པ་ཞེས་བྱ་བ་གཅད་པར་བྱ་བའི་རྒྱུན་ལས་དོན་གཞན་དུ་གྱུར་པ་ནི་མ་ཡིན་ནོ། །རྡུལ་ཕྲ་རབ་གཅིག་ ལ་རྣམ་པར་འབྱེད་པ་སྐྱེ་བ་མེད་པའི་ཕྱིར་དང་། འབྲེལ་པ་དང་རྣམ་པར་འབྱེད་པའི་དུས་གཉིས་ཀྱང་རྫས་ཀྱི་སྐད་ཅིག་གཅིག་ལ་མི་སྲིད་པས་འདུས་པའི་རྒྱུན་ལ་ཞེས་བྱ་བ་སྨོས་སོ། །ལུས་ཀྱི་དབང་པོ་ལ་སོགས་པ་ནི་གཅད་པར་བྱ་བ་མ་ཡིན་ཞེས་བྱ་བ་ལ། ལུས་ཀྱི་དབང་པོ་ལ་སོགས་པ་ དག་ལ་ནི་རྣམ་པ་དེ་ལྟ་བུའི་གཅོད་པ་དེ་མི་རིགས་ཏེ། དེ་ཅིའི་ཕྱིར་ཞེ་ན། ཡན་ལག་མ་ལུས་པར་བཅད་ན་དེ་དག་ལ་གཉིས་སུ་བྱར་མེད་པའི་ཕྱིར་རོ། །མ་ལུས་པ་སྨོས་པ་ནི་ཡན་ལག་འཕྲོ་དང་བཅས་པ་བཅད་ན་དབང་པོ་ལ་རྣམ་པར་དབྱེ་བ་མཐོང་བའི་ཕྱིར་རོ། །འདི་ལ་ཡང་ཚིག་ཙམ་གྱིས་དད་པར་ མི་འགྱུར་རོ་ཞེ་ན། དེའི་ཕྱིར་དབང་པོ་རྣམས་ལ་ནི་གཉིས་སུ་འགྱུར་བ་མེད་དོ་ཞེས་བྱ་བ་གསུངས་སོ། །ནིའི་སྒྲ་ནི་དབང་པོ་རྣམས་ནི་གཅོད་པར་བྱེད་པའི་རྐྱེན་གྱིས་རྣམ་པ་གཉིས་སུ་བྱར་མི་ནུས་པ་ཉིད་དོ་ཞེས་ངེས་པར་གཟུང་བའི་དོན་ཏོ། །དེ་ཉིད་ལ་རྒྱུ་སྨྲས་པ། བཅས་པའི་ཡན་ལག་ ལ་དབང་པོ་མེད་པའི་ཕྱིར་རོ། །དེ་ཡང་ཡན་ལག་དེས་ཡུལ་འཛིན་པ་ལ་ཤེས་ཏེ། འདི་ནི་རབ་ཏུ་གྲགས་པས་མ་བཤད་དོ། །དེ་ལྟ་ན་གལ་ཏེ་སྣའི་རྩེ་མོ་བཅད་པ་སླར་སྦྱར་བ་ལུས་ཀྱི་རྣམ་པར་ཤེས་པ་ཇི་ལྟར་བསྐྱེད་ཅེ་ན། རྒྱས་པ་ལས་བྱུང་བའི་དབང་པོ་སྐྱེ་བའི་ཕྱིར་ཉེས་པ་མེད་དེ། འདིས་ ནི་དུད་འགྲོའི་ཁྱད་པར་འགའ་ཞིག་གི་མཇུག་མ་བཅད་པ་སླར་སྐྱེ་བ་ཡང་རྣམ་པར་བཤད་པ་ཡིན་ནོ། །གཅོད་པར་བྱེད་པ་ཡང་མ་ཡིན་ཏེ་ཞེས་བྱ་བ་ལ། དང་བའི་མཚན་ཉིད་ཅན་རྣམས་ནི་ནོར་བུའི་འོད་བཞིན་དུ་དང་བའི་ཕྱིར་རོ། །ནོར་བུའི་འོད་ནི་གཅད་པར་བྱ་བ་མ་ཡིན་ཏེ། ནོར་བུ་མ་ ལུས་པར་བཅད་ན་དེ་གཉིས་སུ་མེད་པའི་ཕྱིར་ཏེ། འདི་ནི་ངེས་པར་གཟུང་བ་ལས་རྙེད་པར་འགྱུར་རོ། །སྒྲ་ཡང་མ་ཡིན་ཏེ་ཆད་པའི་ཕྱིར་རོ་ཞེས་བྱ་བ་ལ། གཟུགས་ལ་སོགས་པ་དང་ལྷན་ཅིག་རྒྱུན་མི་འཇུག་པས་དེའི་ཕྱིར་འདི་ལ་དྲུག་མཚན་འདི་དག་ཡོད་པ་མ་ཡིན་ནོ། །བསྲེག་པ་ ཞེས་བྱ་བའི་ཆོས་འདི་ཅི་ཞེ་ན། རྒྱུའི་རྒྱུན་ལས་མེ་ལ་སོགས་པའི་རྐྱེན་གྱི་རྒྱུ་ཅན་འབྲས་བུ་མི་འདྲ་བ་སྐྱེ་བའོ། །དབང་པོ་རྣམས་ནི་མ་ཡིན་ཏེ་དང་བའི་ཕྱིར་རོ་ཞེས་བྱ་བ་ལ། དང་བའི་ཕྱིར་དེ་ཥཱ་མ་གྣིདྷ་རེ་བ་བྱཱནྣ་བི་ཀཱ་རོ་བི་ཀཱ་རཤྩ་དཱ་ཧ། བསྲེག་དང་གཞལ་ལ་མི་མཐུན་སྨྲ། །ཞེས་བྱ་བ་ལ། ཨ་ཀྵེ་པ་པ་ད་མ་གཅོད་པ་ལ་སོགས་པ་རྣམས་ལ་ཡང་འབྱུང་བ་གཙོ་བོ་ལ་རྣམ་པར་དཔྱད་པར་བྱ་བས་ན་ཁམས་བཞི་པོ་ཁོ་ན་གཅོད་པར་བྱེད་པའོ། །ན་གྭ་ཙི་ཏེ་ཀ་བྱ་ཙི་ཏ་ནུས་པ་མཐོང་བའི་ཕྱིར་རོ། །དེ་ལ་སྲ་བ་ལ་སོགས་པ་རྣམས་ན་རེ་ཞིག་དགྲ་སྟ་དང་རླུང་གི་རྒྱུ་དང་མེ་དང་རླུང་གི་ཕུང་པོ་ རྣམ་པར་ཤེས་པ་ལ་ཚ་བར་འདུག་པ་སྟེ། ཤིང་དང་རི་བོ་དང་བུད་ཤིང་དང་ཡལ་ག་ལ་སོགས་པ་རྣམ་པ་གཉིས་ཀྱི་དངོས་པོར་ནུས་པ་མཐོང་བས་སོ། །རོ་ལ་སོགས་པ་རྣམས་ལ་ཡང་སྟེ། ཕྱེ་དང་རྒྱ་སྲན་ཀུ་ལཏྠ་ལ་སོགས་པ་མཉམ་པར་བསགས་པ་ལས་རྒྱམ་ཚ་དང་རྡོ་བ་ལ་སོགས་ པ་གཅོད་པས་སོ། །དེ་ལ་སྲ་བ་ལ་སོགས་པ་རྣམས་ཀྱིས་བྱས་པ་ཁོ་ན་གཅད་པ་ཞེས་བྱ་བ་རིགས་པ་མ་ཡིན་ཏེ། དེ་ཉིད་ལས་གཞན་པ་སྲ་བ་ལ་སོགས་པ་རྣམས་ཀྱིས་མ་བཅད་པའི་ཕྱིར་རོ། །སྲ་བ་ལ་སོགས་པ་རྣམས་ནི་རང་བཞིན་དང་ཁྱད་པར་འགའ་ཡང་ མེད་དོ། །རོ་ལ་སོགས་པ་རྣམས་ཇི་ལྟ་བ་དེ་ཉིད་ཀྱང་སྲེག་པར་བྱེད་དེ། མེ་དང་ཕྲད་པ་ལས་དུ་བ་ལ་སོགས་པའི་རྣམ་འགྱུར་རྣམས་ཀྱིས་སོ། །དེ་ཡང་ལག་པས་འཇལ་བ་སོགས་བྱེད་པས་ན་གཞལ་བའོ། །བསྲེག་པ་དང་གཞལ་བ་དག་ལ་མི་མཐུན་པར་སྨྲ་བ་ནི་རིགས་ཏེ། ཕྱོགས་ གཉིས་ཀ་རིག་པར་མཐོང་བའི་ཕྱིར་རོ། །ཁ་ཅིག་ན་རེ་མེའི་ཁམས་ཤས་ཆེ་བར་འཇུག་པ་ཁོ་ན་སྲེག་པར་བྱེད་པ་ཉིད་ཡིན་ཏེ། མེའི་ཁམས་ཉིད་སྨིན་པར་བྱེད་པ་ཡིན་པའི་ཕྱིར་དང་། སའི་ཁམས་ལ་སོགས་པའི་བྱེད་པ་གཞན་དང་ལྡན་པའི་ཕྱིར་དང་། སའི་ཕུང་པོ་ལ་སོགས་པ་ རྣམས་ཀྱིས་སྲེག་པ་མི་སྲིད་པའི་ཕྱིར་དང་འབྱུང་བ་གཞན་ཟིལ་གྱིས་མནན་ནས་མེའི་ཁམས་ཀྱི་བྱ་བ་ཐོབ་པའི་ཕྱིར་རོ་ཞེས་ཟེར་རོ། །གཞན་དག་ན་རེ་ཕྱི་རོལ་གྱི་ཁམས་བཞི་པོ་འབྱུང་བ་མེ་ཤས་ཆེ་བ་ཁོ་ན་སྲེག་པར་བྱེད་དེ། གལ་ཏེ་མེའི་ཁམས་ཁོ་ན་སྲེག་པར་བྱེད་ན་ནི་ལྷན་ཅིག་ཏུ་གྱུར་པའི་ འབྱུང་བ་རྣམས་དང་། དེ་དག་ལ་བརྟེན་པ་རྒྱུར་བྱས་པའི་གཟུགས་ཀྱང་སྲེག་པར་བྱེད་པར་འགྱུར་ཞིང་། ཁམས་བཞི་པོ་ཐམས་ཅད་ཉིད་སྲེག་པ་ཞེས་བྱ་བ་རྣམ་པར་འགྱུར་བའི་རྒྱུ་ཡིན་གྱི། མེའི་ཁམས་ཁོ་ན་ནི་སྲེག་པར་བྱེད་པ་མ་ཡིན་ནོ་ཞེས་ཟེར་རོ། །ཕྱི་རོལ་གྱི་ཁམས་བཞི་པོ་ཉིད་ གཞལ་བ་ལ་ནི་མཐའ་དག་སྲང་མགོ་དམའ་བའི་རྒྱུ་ཡིན་པའི་ཕྱིར་ལྕི་བ་ཉིད་ཁོ་ན་གཞལ་བར་བྱ་བ་ཡིན་ཏེ། ཡང་བ་རྣམས་ལ་སྲང་མགོ་དམའ་བའི་རྒྱུ་མི་སྲིད་པའི་ཕྱིར་རོ། །ལྕི་བ་ཉིད་ཀྱི་ལྷན་ཅིག་བྱེད་པ་དང་ལྡན་པའི་རྫས་རྣམས་སྲང་མགོ་དམའ་བའི་རྒྱུ་ཉིད་དུ་སྨྲའི་ཡང་བ་ཉིད་ཀྱི་ལྷན་ཅིག་ བྱེད་པ་དང་ལྡན་པ་རྣམས་ནི་མ་ཡིན་ཏེ། དེ་ལྟ་ན་ཡང་དེར་ལྕི་བ་ཉིད་ནུས་པ་དང་ལྡན་པར་འདོད་དོ་ཞེས་དེ་ལྟར་བསམ་པར་བྱའོ། །རྣམ་པར་སྨིན་ལས་སྐྱེས་པ་དང་། །རྒྱས་ལས་བྱུང་བ་ནང་གི་ལྔ། །ཞེས་བྱ་བ་ལ། ལྔ་ཞེས་བྱ་བ་ནི་རྣམ་པར་ཤེས་པའི་ཁམས་བསལ་བར་བྱ་བའི་ཕྱིར་རོ། །ནང་གི་ ཞེས་བྱ་བ་ནི་ཡུལ་གྱི་ཁམས་བསལ་བར་བྱ་བའི་ཕྱིར་རོ། །འདིར་ཡང་ནང་གི་ལྔ་ནི་རྣམ་པར་སྨིན་པ་ལས་སྐྱེས་པ་དང་རྒྱས་པ་ལས་བྱུང་བའོ་ཞེས་ངེས་པར་གཟུང་བར་བྱའོ། །འདི་གང་ལས་ཤེ་ན་གང་གི་ཕྱིར་རྒྱུ་མཐུན་པ་ནི་མེད་དོ་ཞེས་གསུངས་པས་སོ། །གལ་ཏེ་མིག་ལ་སོགས་ པ་ལྔར་སྐྱེས་པ་རྣམས་ནི་མིག་ལ་སོགས་པ་ཕྱིས་སྐྱེས་པ་རྣམས་དང་མ་སྐྱེས་པ་རྣམས་ཀྱི་སྐལ་བ་མཉམ་པའི་རྒྱུས་རྒྱུ་མ་ཡིན་ནམ། རྒྱུ་མཐུན་པ་ཡང་སྐལ་བ་མཉམ་པའི་རྒྱུའི་འབྲས་བུ་ཡིན་ནོ་ཞེ་ན། ཇི་ལྟར་རྒྱུ་མཐུན་དུ་ཡོད་པ་མ་ཡིན་པ་དེ་ལས་ཐ་དད་པའི་རྒྱུ་མཐུན་མེད་པའི་ཕྱིར་ཡོད་པ་ མ་ཡིན་ཞེས་བཤད་ཀྱིས་མེད་པ་ནི་མ་ཡིན་ཏེ། ཇི་ལྟར་རྣམ་པར་སྨིན་པ་ལས་ཐ་དད་པའི་རྒྱས་པ་ལས་བྱུང་བ་ཡོད་པ་དང་རྒྱས་པ་ལས་བྱུང་བ་ལས་ཐ་དད་པའི་རྣམ་པར་སྨིན་པ་ལས་སྐྱེས་པ་སྟེ། ཇི་ལྟར་ཤི་བ་ལ་རྒྱུ་མཐུན་པ་ལས་བྱུང་བའི་གཟུགས་ལ་སོགས་པ་དམིགས་པ་དེ་བཞིན་ དུ་དེ་དག་ལ་རྣམ་པར་སྨིན་པ་ལས་སྐྱེས་པ་དང་རྒྱུ་མཐུན་པ་ནི་དེ་ལས་ཐ་དད་པར་དམིགས་པ་མེད་དེ། དེའི་ཕྱིར་རྣམ་པར་སྨིན་པ་ལས་སྐྱེས་པ་དང་རྒྱས་པ་ལས་བྱུང་བ་མ་གཏོགས་པའི་རྒྱུ་མཐུན་པ་མེད་པའི་ཕྱིར་མིག་ལ་སོགས་པ་ལ་རྒྱུ་མཐུན་པ་ལས་བྱུང་བ་མེད་པར་བཤད་དོ། །ལས་ ཀྱི་རྣམ་པ་ཞེས་བཤད་པ་དེའི་འབྲས་བུ་མི་འདྲ་བར་སྨིན་པས་ན་རྣམ་པར་སྨིན་པའོ། །གལ་ཏེ་རྣམ་པར་སྨིན་པ་ནི་རྣམ་པར་སྨིན་པ་གཞན་དང་འབྲེལ་བ་མ་ཡིན་ན། ཇི་ལྟར་དེ་དག་རྣམ་པར་སྨིན་པ་ལས་སྐྱེས་པ་ཞེས་བྱ་ཞེ་ན། རྣམ་པར་སྨིན་པ་ལས་སྐྱེས་པ་ནི་རྣམ་པར་སྨིན་པ་མ་ཡིན་ནོ། ། འོ་ན་ཅི་ཞེ་ན། རྣམ་པར་སྨིན་པའི་རྒྱུ་ལས་སྐྱེས་པ་ནི་རྣམ་པར་སྨིན་པ་ལས་སྐྱེས་པ་སྟེ་བར་གྱི་ཚིག་མི་མངོན་པར་བྱས་པའོ། །འབྲས་བུའི་དུས་སུ་ཕྱིན་པའི་ངག་གི་ལས་ནི་ཞེས་བྱ་བ་ལ། དུས་གང་གི་ཚེ་བར་མེད་པར་ལས་ལས་འབྲས་བུ་སྐྱེ་བ་ནི་འབྲས་བུའི་དུས་ཏེ། དེ་ཚེ་ལས་དེ་རྣམ་ པར་སྨིན་པར་འགྱུར་བས་རྣམ་པར་སྨིན་པ་ཞེས་བྱའོ། །འདི་སྐད་བསྟན་པར་འགྱུར་ཏེ་བར་མེད་པར་འབྲས་བུ་བསྐྱེད་པར་རུང་བའི་ལས་ལས་སྐྱེས་པས་ན་རྣམ་པར་སྨིན་པ་ལས་སྐྱེས་པའོ། །གལ་ཏེ་འབྲས་བུ་ལ་མངོན་དུ་ཕྱོགས་པའི་ལས་རྣམ་པར་སྨིན་པར་འགྱུར་བས་རྣམ་ པར་སྨིན་པ་ཡིན་ན། འོ་ན་འབྲས་བུ་ཇི་ལྟར་རྣམ་པར་སྨིན་པ་ཡིན་ཞེ་ན། དེའི་ཕྱིར་འབྲས་བུ་ནི་རྣམ་པར་སྨིན་པ་ཁོ་ན་ཡིན་པས་རྣམ་པར་སྨིན་པའོ་ཞེས་བྱ་བ་གསུངས་སོ། །རྣམ་པར་སྨིན་པ་དང་བྲལ་བའི་རྒྱུ་ལ་སྨིན་པས་རྣམ་པར་སྨིན་པའོ། །གཞན་དག་ན་རེ། རྣམ་པར་སྨིན་པ་ལས་སྐྱེས་པས་རྣམ་པར་སྨིན་པའོ་ཞེས་ཟེར་རོ། །རྒྱས་པ་ལ་ཡོད་པ་ནི་རྒྱས་པ་ལས་བྱུང་བ་དག་སྟེ་སྡེ་ཚན་བཞིན་ནོ། །ཡང་ན་རྒྱས་པ་ཉིད་རྒྱས་པ་ལས་བྱུང་བ་དག་སྟེ་རང་གི་དོན་ལ་འཕེལ་བ་བྱས་པའི་སྒྲ་འདུལ་བ་པ་ཞེས་པ་ལྟ་བུའོ། །ལེགས་པར་བྱ་བ་ནི་ཁྲུས་ དང་བསྐུ་མཉེ་དང་འབད་རྩོལ་དང་བསྐུ་བྱུག་ལ་སོགས་པའོ། །ཁྱད་པར་གྱི་སྒྲ་ནི་རེ་རེ་དང་སྦྱར་རོ། །ཟས་ལ་སོགས་པ་ཡོད་ཀྱང་མི་ཚངས་པར་སྤྱོད་པས་རྒྱས་པ་ལས་བྱུང་བ་ལ་གནོད་པར་མཐོང་བའི་ཕྱིར་རོ། །ཚངས་པར་སྤྱོད་པས་ནི་མི་གནོད་པ་ཙམ་དུ་ཟད་ཀྱི། རྒྱས་པ་ནི་ཟས་ ལ་སོགས་པ་དག་ཁོ་ནས་ཡིན་ནོ། །ཟས་ལ་སོགས་པ་དག་ནི་རྣམ་པར་སྨིན་པ་ལ་ཕན་འདོགས་པར་བྱེད་དེ། དེ་ཉིད་ཀྱི་ཕྱིར་རྒྱས་པའི་རྒྱུད་ནི་རྣམ་པར་སྨིན་པའི་རྒྱུད་ལ་ཕྱིར་བཞིན་དུ་ཀུན་ཏུ་བསྲུང་ངོ་ཞེས་བྱ་བ་གསུངས་སོ། །རྣམ་པར་སྨིན་པའི་རྒྱུད་ནི་འགྲོ་བ་ལ་སོགས་པའི་བྱ་ བ་ལ་ནུས་པ་མེད་པའི་ཕྱིར་སྟོབས་ཆུང་བ་ཡིན་ལ། རྒྱས་པའི་རྒྱུད་ནི་སྟོབས་ཆུང་བ་རི་བོ་དང་འདྲ་བ་དེ་གནས་པར་བྱ་བའི་ཕྱིར་ཕྱིའི་རི་བོ་དང་འདྲ་བར་འགྱུར་རོ། །རྒྱས་པ་ལས་བྱུང་བ་མེད་པར་ནི་རྣམ་པར་སྨིན་པ་ལས་སྐྱེས་པ་མེད་ཀྱི། རྣམ་པར་སྨིན་པ་ལས་སྐྱེས་པ་མེད་པར་རྒྱས་པ་ ལས་བྱུང་བ་ནི་ཡོད་པར་འགྱུར་ཏེ་དཔེར་ན་ལྷའི་མིག་བཞིན་ནོ། །རྣམ་པར་སྨིན་པ་ལས་བྱུང་བ་ཁོ་ན་བཀག་པས། སྒྲ་ནི་རྒྱས་པ་ལས་བྱུང་བ་དང་། རྒྱུ་མཐུན་པ་ལས་བྱུང་བ་ཡོད་དོ་ཞེས་བྱ་བར་ཁོང་དུ་ཆུད་པར་འགྱུར་ཏེ། མགྲིན་པ་ལ་སོགས་པའི་འབྱུང་བ་ཆེན་པོ་རྒྱས་པ་ལས་བྱུང་བ་ དང་ཐ་མི་དད་པར་འདུག་པའི་སྒྲ་ནི་རྒྱས་པ་ལས་བྱུང་བའོ། །རྒྱུ་མཐུན་པ་ལས་བྱུང་བའི་བྱུང་བ་དང་ཐ་མི་དད་པར་འདུག་པ་ནི་རྒྱུ་མཐུན་པ་ལས་བྱུང་བའོ། །སྒྲ་ནི་རྣམ་སྨིན་ལས་སྐྱེད་མིན། །ཞེས་བྱ་བ་ལ་ཚིག་ཙམ་གྱིས་འདོད་པ་མི་འགྲུབ་པས་དེའི་རྒྱུ་དྲིས་པ་དང་། འདོད་དགུར་འབྱུང་བའི་ ཕྱིར་རོ་ཞེས་གསུངས་ཏེ། མིག་ལ་སོགས་པ་རྣམ་པར་སྨིན་པ་ཅན་ནི་འདོད་ཀྱང་མི་འབྱུང་ལ་མི་འདོད་ཀྱང་འབྱུང་གི་སྒྲ་ནི་དེ་ལྟ་བུ་མ་ཡིན་ཏེ། བརྗོད་པར་འདོད་པ་སྔོན་དུ་འགྲོ་བའི་ཕྱིར་རོ། །རྣམ་པར་སྨིན་པ་ལས་སྐྱེས་པའི་གཟུགས་ནི་རྣམ་པར་ཆད་ནས་ཡང་སྐྱེ་བ་ཡང་མ་ཡིན་ན། སྒྲ་ནི་སྐྱེ་བ་ཡང་ཡིན་ཏེ། དེའི་ཕྱིར་རྣམ་པར་སྨིན་པའི་ཆོས་ལས་འདས་པའི་ཕྱིར་སྒྲ་ནི་རྣམ་པར་སྨིན་པ་ལས་སྐྱེས་པ་མ་ཡིན་ནོ། །བསྟན་བཅོས་དང་འགལ་བ་བརྗོད་པའི་ཕྱིར། འོ་ན་གང་བསྟན་བཅོས་བཏགས་པ་ལས་ཞེས་བྱ་བ་རྒྱ་ཆེར་གསུངས་ཏེ། འགྲུབ་པ་བདེན་མོད་ཀྱི་འདི་ ནི་རྣམ་པར་སྨིན་པ་མ་ཡིན་པས་བསྟན་བཅོས་དང་འགལ་བ་མེད་དོ། །འོ་ན་ཅི་ཡིན་ཞེ་ན། ཁ་ཅིག་ན་རེ་བརྒྱུད་པ་འདི་ནི་གསུམ་པ་ཡིན་ཏེ། དེ་ལྟ་ན་ཚིག་རྩུབ་པོ་སྤོང་བ་སྒྲའི་རྒྱུའི་རྒྱུ་ཡིན་གྱི་དངོས་སུ་མ་ཡིན་ལ། སྒྲ་ནི་རྣམ་པར་སྨིན་པ་ལས་སྐྱེས་པ་དེ་ལྟར་ཡང་མ་ཡིན་ནོ་ཞེས་ཟེར་རོ། ། ཁ་ཅིག་ན་རེ་གང་གི་ཕྱིར་རྣམ་པར་སྨིན་པ་ལས་སྐྱེས་པ་ལས་རྣམ་པར་སྨིན་པ་ལས་སྐྱེས་པ་སྐྱེ་བར་མི་རིགས་ཏེ། དེའི་ཕྱིར་བརྒྱུད་པ་འདི་ནི་བཞི་པའམ་ལྔ་པ་ཡིན་ཏེ། ཟས་དང་ལེགས་པར་བྱ་བའི་ཁྱད་པར་དག་གིས་བསྐྱེད་ཀྱང་རྣམ་པར་སྨིན་པ་ལས་སྐྱེས་པའི་འབྱུང་བ་རྣམས་ལ་བརྟེན་ནས་ སྐྱེ་བ་དེ་དག་ལས་རྒྱས་པ་ལས་བྱུང་བ་རྣམས་ཏེ་ཞེས་བརྗོད་དོ། །དེ་དག་ལ་ནི་རྒྱུ་མཐུན་པ་ལས་བྱུང་བ་རྣམས་ཏེ། དེ་རྣམས་ནི་དེ་དག་གི་སྐལ་བ་མཉམ་པའི་རྒྱུ་ཡིན་པའི་ཕྱིར་རོ། །དེ་དག་ལ་ནི་སྒྲའོ་ཞེས་ཟེར་རོ། །རྒྱས་པ་ལས་བྱུང་བ་རྣམས་ལ་རྒྱས་པ་ལས་བྱུང་བ་དང་། རྒྱུ་མཐུན་ པ་ལས་བྱུང་བ་རྣམས་ལ་རྒྱུ་མཐུན་པ་ལས་བྱུང་བ་དང་། གང་གི་ཕྱིར་འབྱུང་བ་ལ་ལྟོས་པར་སྒྲའི་གནས་སྐབས་ཇི་ལྟ་བ་ལས་ལུང་དུ་མ་བསྟན་པ་ལས་དགེ་བ་དང་མི་དགེ་བ་དང་། ཟིན་པ་རྣམས་ལ་མ་ཟིན་པ་དང་། ལུས་ཀྱི་དབང་པོའི་ཡུལ་རྣམས་ལ་རྣ་བའི་དབང་པོའི་ཡུལ་དང་། དེ་བཞིན་ དུ་རྣམ་པར་སྨིན་པ་ལས་སྐྱེས་པ་ལ་རྣམ་པར་སྨིན་པ་ལས་སྐྱེས་པ་མ་ཡིན་པ་རྣམས་སུ་འགྱུར་རོ། །དེ་ལྟ་ན་འོ་ན་ལུས་ཀྱི་ཚོར་བ་ཡང་ཞེས་བྱ་བ་རྒྱ་ཆེར་འབྱུང་བ་ལ། དེ་ལ་གང་ཞིག་དངོས་ཀྱི་ལས་ཀྱི་འབྲས་བུ་ཡིན་པ་དེ་ནི་རྣམ་པར་སྨིན་པར་འགྱུར་གྱི། ལས་ལས་སྐྱེས་པའི་འབྱུང་བ་ལས་སྐྱེས་ པ་ནི་མ་ཡིན་ཏེ། སྒྲ་བཞིན་ནོ་སྙམ་དུ་དགོངས་སོ། །གལ་ཏེ་སྒྲ་བཞིན་དུ་རིགས་པ་དང་འགལ་བར་འགྱུར་ན་ཞེས་བྱ་བ་ལ། རྣམ་པར་སྨིན་པ་མ་ཡིན་པར་འགྱུར་རོ་ཞེས་བྱ་བར་སྦྱར་རོ། །ལས་ལས་སྐྱེས་པའི་འབྱུང་བ་ལས་བྱུང་བ་ཉིད་རྣམ་པར་སྨིན་པའི་མཚན་ ཉིད་མ་ཡིན་ནོ། །འོ་ན་ཅི་ཞེ་ན། ཇི་སྐད་བཤད་པ་འདོད་ཀྱང་མི་འབྱུང་ལ་མི་འདོད་ཀྱང་འབྱུང་བ་འདི་རྣམ་པར་སྨིན་པའི་མཚན་ཉིད་དེ། ལས་ཀྱི་འབྱུང་བ་ལས་བྱུང་བའི་ཚོར་བ་ལ་ནི་མི་འགལ་ཏེ་མིག་ལ་སོགས་པ་བཞིན་ནོ། །སྒྲ་ལ་ནི་མི་སྲིད་དེ་འདི་དེ་དགུར་འབྱུང་བའི་ཕྱིར་རོ། ། དེ་ལ་བདེ་བ་དང་སྡུག་བསྔལ་གྱི་རྐྱེན་ཉེ་བར་འདུས་པ་མེད་ཀྱང་འབྱུང་ཞིང་བདེ་བ་དང་སྡུག་བསྔལ་གྱི་རྐྱེན་ལོག་ཀྱང་མི་ལྡོག་པའི་ཚོར་བ་བདེ་བ་དང་སྡུག་བསྔལ་དེ་ནི་རྣམ་པར་སྨིན་པ་ལས་སྐྱེས་པ་ཡིན་ལ། གང་ཞིག་བདེ་བ་དང་སྡུག་བསྔལ་མྱོང་བར་འགྱུར་བའི་ཡུལ་ཉེ་བར་ཚོགས་པ་ལས་ བྱུང་ཞིང་། དེ་མེད་ན་མི་འབྱུང་བ་དེ་ནི་རྒྱུ་མཐུན་པ་ལས་བྱུང་བའོ། །སློབ་དཔོན་འདུས་བཟང་ན་རེ། ལུས་ཀྱི་ཚོར་བ་ཐམས་ཅད་ལས་ལས་སྐྱེས་པ་དང་འབྱུང་བ་རྒྱུ་མཐུན་པ་མ་ཡིན་ཞིང་རྣམ་པར་སྨིན་པ་ལས་སྐྱེས་པ་ཡང་མ་ཡིན་ལ། འབྱུང་བ་ལས་ཐ་དད་པ་རྣམས་ཀྱང་རྣམ་པར་སྨིན་ པ་ལས་སྐྱེས་པ་མ་ཡིན་ཏེ། དེ་བསྐྱེད་པའི་རྒྱུ་མཚན་གྱི་ཕྱིར་རོ། །ལུས་དང་རེག་བྱ་ལ་བརྟེན་ནས་ལུས་ཀྱི་རྣམ་པར་ཤེས་པ་སྐྱེ་བའི་ལུས་ཀྱི་ཚོར་བ་དེ་ནི་རྣམ་པར་སྨིན་པ་ལས་སྐྱེས་པ་འབྱུང་བའི་རྒྱུ་རྐྱེན་ཁོ་ནའོ། །དེ་གལ་ཏེ་རྣམ་པར་སྨིན་པ་ཡོངས་སུ་རྟོག་ན་རྣམ་པར་སྨིན་པའི་ ཆོས་ལས་འདས་པར་འགལ་ལོ། །རྣམ་པར་སྨིན་པ་མ་ཡིན་པ་ལ་ནི་འགལ་བ་མེད་དོ་ཞེས་ཟེར་རོ། །དེ་ལ་གང་གི་ཕྱིར་རྣམ་པར་སྨིན་པའི་ཆོས་ལས་འདས་པའི་ཕྱིར་རྣམ་པར་སྨིན་པ་མ་ཡིན་པ་ཞེས་བྱ་བ་འདི་ཉིད་སྦྱར་གྱི་ལྷག་མ་ནི་མ་སྦྱར་བའི་ཕྱིར་གཞུང་ཁ་བསྐང་བའི་ཆེད་ཁོ་ནར་ གསུངས་པ་མཚོན་པར་བྱ་སྟེ་གཞན་རྣམ་གསུམ་ཞེས་གསུངས་པའི་ཕྱིར་རོ། །རྒྱུ་མཐུན་ལས་བྱུང་རྣམ་སྨིན་སྐྱེས། །ཐོགས་པ་མེད་བརྒྱད་ཅེས་བྱ་བ་ལ། རྒྱུ་མཐུན་པ་ལས་བྱུང་བ་དང་། རྣམ་པར་སྨིན་པ་ལས་སྐྱེས་པ་ཁོ་ནའོ་ཞེས་ངེས་པར་གཟུང་བར་བྱའོ། །གང་དག་སྐལ་བ་ མཉམ་པ་དང་། ཀུན་ཏུ་འགྲོ་བའི་རྒྱུས་བསྐྱེད་ཅིང་རྣམ་པར་སྨིན་པ་ལས་ཐ་དད་པ་རྣམས་ནི་རྒྱུ་མཐུན་པ་ལས་བྱུང་བ་དག་གོ། །གང་དག་རྣམ་པར་སྨིན་པ་རྒྱུས་བསྐྱེད་པ་དེ་དག་ནི་རྣམ་པར་སྨིན་པ་ལས་སྐྱེས་པ་དག་གོ། །དེ་ལ་ཆོས་ཀུན་ནས་ཉོན་མོངས་པ་ཅན་གང་དག་ཀུན་ཏུ་འགྲོ་བའི་ རྒྱུས་བསྐྱེད་པ་དེ་དག་ནི་སྐལ་བ་མཉམ་པའི་རྒྱུས་བསྐྱེད་པ་ཡང་ཡིན་ནོ། །སྐལ་བ་མཉམ་པའི་རྒྱུས་བསྐྱེད་པ་ཁོ་ན་ཡིན་གྱི། ཀུན་ཏུ་འགྲོ་བའི་རྒྱུས་བསྐྱེད་པ་མ་ཡིན་པ་ཡང་ཡོད་དེ། དགེ་བ་དང་མ་བསྒྲིབས་ལ་ལུང་དུ་མ་བསྟན་པ་རྣམས་སོ། །རྒྱས་པ་ལས་བྱུང་བ་རྣམས་ནི་མེད་དེ། ཅིའི་ཕྱིར་ཞེ་ན། ཐོགས་པ་མེད་པ་རྣམས་ལ་རྒྱས་པ་མེད་པའི་ཕྱིར་རོ། །གཟུགས་ཅན་རྣམས་ཕན་ཚུན་ཐོགས་པས་བར་མཚམས་མེད་པར་གནས་པ་ལ་སོགས་པ་ཞེས་བརྗོད་དེ། འདི་ནི་ཐོགས་པ་མེད་པ་དག་ལ་མི་སྲིད་པས་དེ་དག་ལ་རྒྱས་པ་ལས་བྱུང་བ་མེད་དོ། །ཁ་ཅིག་ན་རེ་རྒྱས་ པ་ལས་བྱུང་བ་ཡོད་པ་ལ་ཡང་སྔོན་གྱི་རྒྱུའི་ནུས་པའི་མཐུ་ལྷག་པ་ལས་ཆེས་རྒྱས་པར་སྐྱེའོ་ཞེས་ཟེར་རོ། །གཟུགས་ཅན་རྣམས་ལ་ཡང་འཕེལ་བ་དང་ཁྱད་པར་དུ་འཕགས་པ་དང་ཡང་བ་ཞེས་བཤད་པ་དེ་ནི་རྒྱུ་མཐུན་པ་བཞིན་དུ་ལྡན་པའོ། །གང་ཞིག་སྔོན་གྱི་རྒྱུའི་ནུས་པའི་མཐུ་ལྷག་པ་ ལས་བྱུང་བ་ནི་རྒྱུ་མཐུན་པ་ཉིད་ལ་ཡང་དེ་ལྟར་བཤད་དོ། །སྐལ་བ་མཉམ་པ་དང་ཀུན་ཏུ་འགྲོ་བའི་རྒྱུའི་སྒོ་ནས་སྐྱེས་པ་རྣམས་ནི་རྒྱས་པ་ལས་བྱུང་བ་དང་རྒྱུ་མཐུན་པ་ལས་བྱུང་བའི་ལྷན་ཅིག་བྱེད་པ་ཡིན་པའི་ཕྱིར་རྒྱས་པ་ལས་བྱུང་བ་ཡོད་ཀྱང་རྡུལ་ཕྲ་རབ་བསགས་པ་མེད་པའི་ཕྱིར་རྒྱས་ པ་ལས་བྱུང་བ་ཞེས་བྱ་བ་ལ་བརྗོད་དོ། །གཞན་རྣམ་གསུམ་ཞེས་བྱ་བ་ནི་རྣམ་པ་གཉིས་དང་རྣམ་པ་གཅིག་ནི་མ་ཡིན་ནོ་ཞེས་ངེས་པར་གཟུང་ངོ་། །དེ་ལ་རྣམ་པར་སྨིན་པའི་དབང་པོ་དང་ཐ་མི་དད་པ་རྣམས་ནི་རྣམ་པར་སྨིན་པ་ལས་སྐྱེས་པ་དག་གོ། །རྒྱས་པ་ལས་བྱུང་བའི་དབང་པོ་དང་ཐ་མི་ དད་པར་འདུག་པ་རྣམས་ནི་རྒྱས་པ་ལས་བྱུང་བ་དག་གོ། །ལྷག་མ་རྣམས་ནི་རྒྱུ་མཐུན་པ་ལས་བྱུང་བ་དག་གོ། །གཟུགས་ལ་སོགས་པ་ཐུན་མོང་གི་ལོངས་སྤྱོད་རྣམས་རྣམ་པར་སྨིན་པ་ཉིད་དུ་མི་རུང་སྟེ། ཨཱཀྵེ་པ་བ་ད་པ་བྱ་ཏཱ་ནི་ཏ་སྱ་རྣམ་པར་སྨིན་པ་དང་བདག་པོའི་འབྲས་བུ་ཡང་སྟེ། འདི་ བདག་པོའི་འབྲས་བུ་ཉིད་ཅེས་བྱའོ། །རྣམ་པར་སྨིན་པ་ལ་ཡང་དེ་ལྟར་ཐུན་མོང་དུ་ལོངས་སྤྱད་པ་ཉིད་མི་འགལ་ལོ་ཞེ་ན། དེ་ལྟ་ན་མིག་ལ་སོགས་པ་རྣམས་ལ་ཡང་ཐལ་བར་འགྱུར་རོ། །འདོད་པ་ཉིད་དོ་ཞེ་ན། ཤ་ཟ་ལ་སོགས་པ་ཞུགས་པའི་མིག་ལ་ སོགས་པས་མཐོང་བ་ལ་སོགས་པ་འདི་ཡང་གཞན་གྱི་རྐྱེན་གྱིས་གྲུབ་པས་རང་གི་གྲུབ་པའི་མཐའ་དང་འགལ་ལོ། །ཅི་ལྟར་གཞན་གྱི་མིག་གིས་གཞན་ལ་མཐོང་བ་བྱེད་པར་འགྱུར། གང་བཤད་པ་གང་ཞིག་དབང་པོའི་རྟེན་དེ་དང་ཐ་མི་དད་པའི་ཚོར་བ་ནི་ལོངས་སྤྱོད་ཅེས་བྱ་སྟེ། འདི་ལ་ཐུན་མོང་བ་མེད་དོ། །ཐུན་མོང་བའི་ལོངས་སྤྱོད་ཉིད་ནི་ཟིན་པའི་གཟུགས་ལ་སོགས་པ་རྣམས་སོ་སྙམ་པ་འདི་ལ་ཡང་ཅི་འདི་ལ་མཐོང་བ་ལ་སོགས་པ་ལ་ལོངས་སྤྱོད་དུ་འདོད་དམ། འོན་ཏེ་ཚོར་བ་ཡིན་ཞེས་པ་སྦྱར་བར་བྱའོ། །འདུས་མ་བྱས་ནི་དགེ་བ་དང་རྟག་པའི་ཕྱིར་རམ། འདུས་ བྱས་ཐམས་ཅད་ཡོངས་སུ་བོར་བས་དོན་དུ་གཉེར་བའི་ཕྱིར་སྙིང་པོ་སྟེ། གཞན་དག་ན་རེ་རྟག་པའི་ཕྱིར་སྙིང་པོ་ཉིད་རྫས་ཞེས་བྱའོ། །གསེར་ལ་སོགས་པ་བཞིན་གྱིས་ཡོད་པ་ཉིད་ཙམ་ནི་མ་ཡིན་པའི་ཕྱིར་གཟུགས་ལ་སོགས་པ་བཞིན་ནོ་ཞེས་ཟེར་རོ། །འདི་དག་གི་སྐད་ཅིག་མ་ལ་ནི་རྒྱུ་ མཐུན་པ་ཡོད་པ་མ་ཡིན་པས་སྐད་ཅིག་མ་སྟེ་གང་གི་ཕྱིར་ལམ་གྱི་སྐད་ཅིག་མ་དང་པོ་ནི་སྐལ་བ་མཉམ་པའི་རྒྱུ་མེད་པར་སྐྱེ་བས་རྒྱུ་མཐུན་ལས་བྱུང་བ་མ་ཡིན་ནོ། །འདུས་བྱས་ཀྱི་ཆོས་གཞན་ནི་རྒྱུ་མཐུན་པ་ལས་མ་བྱུང་བ་འགའ་ཡང་མེད་དོ། །སྡུག་བསྔལ་ལ་ཆོས་ཤེས་པའི་བཟོད་པའི་སྐད་ཅིག་ མ་ནི་སྐལ་བ་མཉམ་པའི་རྒྱུ་ལ་བལྟོས་པ་མེད་པར་སྐྱེ་སྟེ། མཚུངས་པ་དེ་མ་ཐག་པའི་རྐྱེན་ཆེས་སྟོབས་དང་ལྡན་པའི་ཕྱིར་རོ། །དེ་སྟོབས་དང་ལྡན་པ་ཉིད་ནི་འཕགས་པའི་ལམ་དང་རྣམ་པ་མཚུངས་པའི་ཆོས་དུ་མས་གསོས་བཏབ་ཅིང་དེའི་བདག་ཉིད་དུ་གྱུར་པ་ནི་དོན་དེ་ལ་རབ་ཏུ་སྦྱོར་བའི་ ཕྱིར་རོ། །རྒྱུད་གཅིག་ལ་མིག་ལ་སོགས་པ་གཉིས་སུ་ཐལ་བར་འགྱུར་བའི་ཕྱིར་ཏེ། གཉི་གའི་བྱ་བ་མཐོང་བའི་ཕྱིར་རོ། །མིག་ལ་སོགས་པ་ནི་རྣམ་པར་སྨིན་པ་ལས་སྐྱེས་པ་ཁོ་ན་སྟེ་རྒྱས་པ་ལས་བྱུང་བ་མ་ཡིན་ནོ། །སློབ་དཔོན་དཔལ་ལེན་ནི་སྒྲ་ཡང་རྣམ་པར་སྨིན་པ་ལས་སྐྱེས་པ་སྟེ། གང་གི་ཕྱིར་རྒྱུ་གཞན་གྱི་རྣམ་པར་སྨིན་པའི་རང་བཞིན་རྣམས་སོ་ཞེས་ཟེར་རོ། །རྫས་སྤྱིའི་དབྱེ་བ་ལས་མིག་ལ་སོགས་པ་རྣམས་རྟེན་དང་རྒྱུད་གཅིག་ལ་རྣམ་པ་གཉིས་ཏེ་དེའི་རྒྱུའི་དབྱེ་བ་ལས་སོ། །དེ་ཉིད་ཀྱི་ཕྱིར་མིག་ལ་རྒྱུ་མཐུན་པ་ཡོད་པ་མ་ཡིན་ནོ། །དེའི་ཐ་དད་པའི་རྒྱུ་མེད་པའི་ ཕྱིར་ཞེས་བྱ་བས་འདི་ལ་གནོད་པ་མེད་དོ། །ཅི་སྟེ་སྤྱིའི་རྒྱུད་མངོན་པར་བརྗོད་པའོ་ཞེས་བྱ་བ་ནི་སྐྱོན་མེད་དོ། །མིག་གི་རྣམ་པར་ཤེས་པའི་མཚུངས་པར་ལྡན་པ་སྐྱེད་པ་དེའི་བྱ་བ་ལ་རྣམ་པར་སྨིན་པ་ལས་སྐྱེས་པ་མེད་པ་ཉིད་དེ། མིག་དེའི་རྣམ་པར་ཤེས་པ་སྐྱེད་པའི་རྒྱུ་རྒྱས་པ་ལས་ བྱུང་བ་མ་ཡིན་པས་རིགས་པ་མངོན་པར་བརྗོད་པར་འདོད་པ་ནི་ལྷའི་མིག་གོ། །དེའི་རྣམ་པར་ཤེས་པ་སྐྱེད་པའི་རྒྱུ་མེད་པར་ཐལ་བ་ལས། ནུས་པ་མེད་པ་ནི་རྣམ་པར་སྨིན་པ་ལས་སྐྱེས་པའི་མིག་སྟེ། རྒྱས་པ་ལས་བྱུང་བ་མེད་པར་དེའི་རྣམ་པར་ཤེས་པ་སྐྱེ་བར་འདོད་ཅེས་པ་གཉི་ག་དེར་ བསྐྱེད་པ་ལས་ནུས་པ་དང་ལྡན་ནོ། །དབང་པོ་རྣམས་ནི་དེ་ལྟ་མ་ཡིན་ནོ། །གཉིས་ཁས་བླངས་པ་ལ་ཁ་ཅིག་ཆོས་ཉིད་ཀྱིས་ཡོད་དོ། །གང་བཤད་པ། རྣམ་པར་སྨིན་པ་ལས་སྐྱེས་པའི་རྒྱུའི་ཕྱིར་སྒྲ་རྣམ་པར་སྨིན་པ་ལས་སྐྱེས་པ་ཞེས་བྱ་བ་སྔར་ཉིད་དུ་དེ་ལ་སོ་སོར་བྱས་ཏེ། འདོད་པའི་རྗེས་ སུ་བྱེད་པའི་ཕྱིར་ལུས་ཀྱི་རྣམ་པར་རིག་བྱེད་བཞིན་དུ་སྒྲ་ཡང་རྣམ་པར་སྨིན་པ་མ་ཡིན་ཞེས་བྱ་སྟེ། རྒྱུའི་ཆོས་ཐམས་ཅད་འབྲས་བུ་ལ་འགྱུར་བ་མ་ཡིན་ནོ། །གཞན་དུ་ན་སྒྲའི་རྒྱུ་ཉིད་རྣམ་པར་སྨིན་པ་ལས་སྐྱེས་པ་ཉིད་ཀྱིས་དེར་འགྱུར་རོ། །དེའི་ཕྱིར་རྣམ་པར་སྨིན་པ་ལས་སྐྱེས་པ་རྣམས་ ཀྱང་རྣམ་པར་སྨིན་པ་མ་ཡིན་པ་ལས་སྐྱེ་བའི་རྒྱུ་ལ་འགལ་ལོ། །འདོད་པའི་ཁམས་ན་ཞེས་རྒྱ་ཆེར་འབྱུང་བ་ལ། ཆོས་འདས་པ་དང་མ་འོངས་པ་རྣམས་ནི་དགེ་བ་དང་ཉོན་མོངས་པ་ཅན་དང་ལྡན་ལ། ད་ལྟར་བྱུང་བ་ནི་ལུང་དུ་མ་བསྟན་པ་དང་ལྡན་པ་ཉིད་ཡིན་ཏེ། ལུང་བསྟན་མིན་ཐོབ་ལྷན་ཅིག་ སྟེ། །ཞེས་གསུངས་པའི་ཕྱིར་རོ། །འདོད་པའི་ཁམས་སྨོས་པ་ནི་གཟུགས་ཀྱི་ཁམས་རྣམ་པར་གཅད་པར་བྱ་བའི་ཕྱིར་རོ། །རིམ་པ་སྨོས་པ་ནི་རྫུས་ཏེ་སྐྱེ་བ་བསལ་བའི་ཕྱིར་རོ། །གང་གི་ཕྱིར་ནུར་ནུར་པོ་ལ་སོགས་པའི་གནས་སྐབས་ནི་ཉིང་མཚམས་སྦྱོར་བའི་གནས་སྐབས་ནས་བཟུང་ནས་ མིག་གི་རྣམ་པར་ཤེས་པ་དགེ་བ་དང་ཉོན་མོངས་པ་ཅན་དང་ལྡན་པ་ཁོ་ན་ཡིན་གྱི་མིག་གི་ཁམས་དང་ནི་མ་ཡིན་ནོ། །དེའི་ཕྱིར་གང་གི་ཚེ་མིག་གི་ཁམས་ཁོ་ན་དང་མི་ལྡན་པ་ལྡན་པ་འཐོབ་ཀྱི། མིག་གི་རྣམ་པར་ཤེས་པའི་ཁམས་དང་ནི་མ་ཡིན་ནོ། །སྔར་ཁོ་ན་ནས་ལྡན་ ཟིན་པའི་ཕྱིར་རོ། །གཟུགས་མེད་པར་སྐྱེས་པ་རྣམས་གཉི་ག་དང་མི་ལྡན་པའི་ཕྱིར་གཟུགས་མེད་པ་ནས་ཤི་འཕོས་ནས་ཞེས་བཤད་དོ། །བསམ་གཏན་གཉིས་པ་ལ་སོགས་པ་སྨོས་པ་ནི། དེ་ན་མིག་གི་རྣམ་པར་ཤེས་པ་ལ་སོགས་པ་མེད་པའི་ཕྱིར་སྐྱེ་བ་ན་ཞེས་བྱ་བ་སྲིད་པ་བར་མའི་ གནས་སྐབས་སུ་དེ་དབང་པོ་མ་ཚང་བ་མ་ཡིན་པའི་ཕྱིར་བསམ་གཏན་གཉིས་པ་ལ་སོགས་པར་སྐྱེ་བ་ལྟ་བར་བྱེད་དོ། །དེ་དག་མིག་གི་ཁམས་དང་ནི་མི་ལྡན་པ་ཡོད་པ་མ་ཡིན་ཏེ། དེ་དག་དབང་པོ་མ་ཚང་བ་མེད་པའི་ཕྱིར་རོ། །མིག་གི་རྣམ་པར་ཤེས་པ་ནི་དེའི་ས་མེད་པའི་ཕྱིར་བསམ་ གཏན་དང་པོའི་ས་པའི་མིག་གི་རྣམ་པར་ཤེས་པ་ལུང་དུ་མ་བསྟན་པ་མངོན་དུ་བྱེད་དེ། དེའི་ཕྱིར་ལྟ་བའི་ཚེ་ཁོ་ན་མིག་གི་རྣམ་པར་ཤེས་པ་དང་ལྡན་པ་འཐོབ་ཀྱི་མིག་གི་ཁམས་དང་ནི་མ་ཡིན་ནོ། །དེ་དག་ནས་ཤི་འཕོས་ནས་ས་འོག་མར་སྐྱེ་བ་ནའོ་ཞེས་བྱ་བ་ནི། བསམ་གཏན་གཉིས་པ་ ནས་ཤི་འཕོས་ནས་ཚངས་པའི་འཇིག་རྟེན་ནམ་འདོད་པའི་ཁམས་སུ་སྐྱེ་བ་སྟེ། དེ་ནི་མིག་གི་ཁམས་དང་ལྡན་ཟིན་པ་ཁོ་ན་ཡིན་ལ། མིག་གི་རྣམ་པར་ཤེས་པའི་ཁམས་ཁོ་ན་དང་མི་ལྡན་པ་ལས། སྲིད་པ་བར་མ་དོའི་གནས་སྐབས་སུ་ལྡན་པ་འཐོབ་པོ། །གཟུགས་མེད་པའི་ཁམས་ནས་ཤི་ འཕོས་ནས་ཞེས་བྱ་བ་ལ། དེ་ནི་སྔར་ནས་གཉི་ག་དང་མི་ལྡན་པ་ལས་ཚངས་པའི་འཇིག་རྟེན་ནམ་འདོད་པའི་ཁམས་སུ་སྐྱེ་བ་ན་ཅིག་ཅར་ལྡན་པ་འཐོབ་པོ། །གཉི་ག་མ་ཡིན་པ་ནི་རྣམ་པ་དེ་དག་མ་གཏོགས་པའོ་ཞེས་བྱ་བ་ནི། གཟུགས་མེད་པའི་ཁམས་ནས་ཤི་འཕོས་ནས་དེ་ཉིད་དུ་ སྐྱེ་བ་དང་། ཚངས་པའི་འཇིག་རྟེན་ནས་དེ་ཉིད་དུ་སྐྱེ་བ་ནའོ། །འདོད་པའི་ཁམས་སུ་ཡང་མིག་ཐོབ་པ་ཉམས་པའོ། །མུ་དང་པོ་ནི་བསམ་གཏན་གཉིས་པ་ལ་སོགས་པར་སྐྱེ་བ་ཞེས་རྒྱ་ཆེར་འབྱུང་བ་ལ། བསམ་གཏན་གཉིས་པ་ལ་སོགས་པར་སྐྱེས་པ་ནི་མིག་གི་ཁམས་ཁོ་ན་དང་ ལྡན་གྱི་མིག་གི་རྣམ་པར་ཤེས་པ་ནི་མངོན་དུ་མི་བྱེད་དོ། །མིག་གི་རྣམ་པར་ཤེས་པའི་ཁམས་དང་ནི་མ་ཡིན་ཏེ་རང་གི་ས་པ་མེད་པའི་ཕྱིར་དང་བསམ་གཏན་དང་པོའི་ས་པ་ཡང་མངོན་དུ་མ་བྱས་པའི་ཕྱིར་རོ། །མུ་གཉིས་པ་ནི་འདོད་པའི་ཁམས་ན་ཞེས་རྒྱ་ཆེར་འབྱུང་སྟེ། དེ་ནི་མིག་གི་རྣམ་པར་ཤེས་པ་མ་འོངས་ པ་ཁོ་ན་དང་ལྡན་གྱི་མིག་གི་ཁམས་དང་ནི་མ་ཡིན་ནོ། །མ་ཐོབ་པ་ནི་དམུས་ལོང་ངོ་། །ཉམས་པ་ནི་མིག་ལ་གནོད་པ་བྱས་པས་ལོང་བའོ། །བསམ་གཏན་དང་པོར་སྐྱེས་པ་ནི་དེ་ན་དབང་པོ་མ་ཚང་བ་མེད་པའི་ཕྱིར་མིག་མ་ཐོབ་པ་དང་ཉམས་པ་ཞེས་མི་བྱའོ། །བཞི་པ་ནི་རྣམ་པ་དེ་དག་མ་གཏོགས་པའོ་ཞེས་བྱ་བ་ ནི་གཟུགས་མེད་པར་སྐྱེས་པ་སྟེ་དེ་ནི་གཉི་ག་དང་ལྡན་པ་མ་ཡིན་ནོ། །དེ་བཞིན་དུ་མིག་གི་ཁམས་དང་གཟུགས་ཀྱི་ཁམས་དག་དང་ཞེས་རྒྱ་ཆེར་འབྱུང་སྟེ། གང་མིག་གི་ཁམས་དང་མི་ལྡན་པ་འཐོབ་པ་དེ་གཟུགས་ཀྱི་ཁམས་དང་ཡིན་ནམ་ཞེ་ན་འདི་ལ་ནི་མུ་བཞི་མེད་དོ། །འོ་ན་ཅི་ཞེ་ན་ཚིག་ཕྱི་མ་དང་ སྦྱོར་བ་སྟེ། གང་གཟུགས་ཀྱི་ཁམས་དང་མི་ལྡན་པ་ཐོབ་པ་དེ་མིག་གི་ཁམས་དང་ཡིན་ཏེ། གཟུགས་མེད་པའི་ཁམས་ནས་ཤི་འཕོས་ནས་འདོད་པའི་ཁམས་དང་གཟུགས་ཀྱི་ཁམས་སུ་སྐྱེ་བ་ནའོ། །མིག་གི་ཁམས་ཁོ་ན་དང་མི་ལྡན་པ་ལྡན་པ་འཐོབ་པ་ཡིན་གྱི་སྔ་ནས་ལྡན་པའི་ཕྱིར་གཟུགས་ཀྱི་ ཁམས་དང་མ་ཡིན་པ་ཡོད་དེ་རིམ་གྱིས་མིག་གི་དབང་པོ་ཐོབ་པའོ། །གང་མིག་གི་ཁམས་དང་ལྡན་པ་དེ་གཟུགས་ཀྱི་ཁམས་དང་ཡིན་ནམ་ཞེ་ན་འདིར་ཡང་མུ་བཞི་མི་རིགས་ཏེ། འོ་ན་ཅི་ཞེ་ན་ཚིག་སྔ་མ་དང་སྦྱོར་བ་སྟེ། གང་མིག་གི་ཁམས་དང་ལྡན་པ་དེ་གཟུགས་ཀྱི་ཁམས་དང་ཡང་ཡིན་ནོ། །གཟུགས་ ཀྱི་ཁམས་ཁོ་ན་དང་ཡིན་གྱི་མིག་གི་ཁམས་དང་མ་ཡིན་པ་ཡང་ཡོད་དེ་མིག་མ་ཐོབ་པ་དང་ཉམས་པའོ། །གང་མིག་གི་རྣམ་པར་ཤེས་པ་དང་མི་ལྡན་པ་ལྡན་པ་འཐོབ་པ་དེ་གཟུགས་ཀྱི་ཁམས་དང་ཡང་ཡིན་ན། དེར་མུ་བཞི་སྟེ་མུ་དང་པོ་ནི་བསམ་གཏན་གཉིས་པ་ལ་སོགས་པར་སྐྱེས་པ་མིག་གི་རྣམ་པར་ཤེས་པ་མངོན་ དུ་བྱེད་པ་དང་། བསམ་གཏན་གཉིས་པ་ལ་སོགས་པ་ནས་ཤི་འཕོས་ནས་འདོད་པའི་ཁམས་དང་ཚངས་པའི་འཇིག་རྟེན་དུ་སྐྱེ་བ་ནའོ། །གཉིས་པ་ནི་གཟུགས་མེད་པ་ནས་ཤི་འཕོས་ནས་བསམ་གཏན་གཉིས་པ་ལ་སོགས་པ་དག་ཏུ་སྐྱེ་བ་ན་སྟེ། དེ་ནི་གཟུགས་ཀྱི་ཁམས་ཁོ་ན་དང་མི་ལྡན་པ་ལྡན་པ་འཐོབ་ཀྱི། མིག་གི་རྣམ་པར་ཤེས་པའི་ཁམས་དང་ནི་མ་ཡིན་ཏེ། བསམ་གཏན་གཉིས་པ་ལ་སོགས་པ་ས་པའི་མིག་གི་རྣམ་པར་ཤེས་པ་མེད་པའི་ཕྱིར་རོ། །མུ་གསུམ་པ་ནི་གཟུགས་མེད་པའི་ཁམས་ནས་ཤི་འཕོས་ནས་བསམ་གཏན་དང་པོ་དག་ཏུ་སྐྱེ་བ་ན་སྟེ། དེ་ནི་གཟུགས་ཀྱི་ཁམས་དང་མི་ལྡན་པ་འཐོབ་ལ། མིག་གི་རྣམ་པར་ཤེས་པའི་ཁམས་དང་ཡང་ཡིན་ནོ། །མུ་བཞི་པ་ནི་གཟུགས་མེད་པའི་ཁམས་སུ་སྐྱེས་པ་དེ་ནས་ཤི་འཕོས་ནས་དེ་ཉིད་དུ་སྐྱེ་བ་དང་། འདོད་པའི་ཁམས་དང་བསམ་གཏན་དང་པོར་སྐྱེས་པ་དེ་དག་དེ་ནས་ཤི་འཕོས་ནས་ དེ་དག་ཉིད་དུ་སྐྱེ་བའོ། །གང་མིག་གི་རྣམ་པར་ཤེས་པའི་ཁམས་དང་ལྡན་པ་དེ་གཟུགས་ཀྱི་ཁམས་དང་ཡང་ཡིན་ནམ་ཞེ་ན། འདིར་ཡང་ཚིག་སྔ་མ་དང་སྦྱོར་བ་སྟེ། གང་མིག་གི་རྣམ་པར་ཤེས་པའི་ཁམས་དང་ལྡན་པ་དེ་གཟུགས་ཀྱི་ཁམས་དང་ཡང་ཡིན་ཏེ། འདོད་པའི་ཁམས་དང་བསམ་ གཏན་དང་པོར་སྐྱེས་པ་དང་། བསམ་གཏན་གཉིས་པ་ལ་སོགས་པར་སྐྱེས་པ་མིག་གི་རྣམ་པར་ཤེས་པ་མངོན་དུ་བྱེད་པ་ནའོ། །གཟུགས་ཀྱི་ཁམས་ཁོ་ན་དང་ཡིན་གྱི་རྣམ་པར་ཤེས་པའི་ཁམས་དང་མ་ཡིན་པ་ཡང་ཡོད་དེ། བསམ་གཏན་གཉིས་པ་ལ་སོགས་པར་མིག་གི་རྣམ་པར་ ཤེས་པ་མངོན་དུ་མི་བྱེད་པ་ནའོ། །དམུས་ལོང་འདོད་པའི་ཁམས་སུ་སྐྱེ་བ་ན། དེའི་ས་པ་ལས་གཞན་པའི་སྲིད་པའི་མིག་གི་རྣམ་པར་ཤེས་པའི་ཁམས་འཐོབ་པོ། །དེ་ལྟར་སྲིད་པ་འཆོལ་བ་ཡོངས་སུ་སྤང་བའམ། རྣམ་པར་སྨིན་པ་ལ་སོགས་པའི་དབང་གིས་སྲིད་པ་རྣམ་པར་ གཞག་པར་བྱའོ་ཞེས་སོ། །ཨཱ་ཀྵེ་པ་པ་ད་འདི་ལ་ཡང་དགོངས་པ་མི་ཤེས་ཏེ། གལ་ཏེ་དམུས་ལོང་སྐྱེ་བ་ལས་སྔར་གཞན་དུ་མེད་དེ་ཁྱད་པར་ལས་བྱུང་བའི་དོན་མེད་དོ། །སྐྱེ་བ་ན་མིག་གི་རྣམ་པར་ཤེས་པ་འཐོབ་པ་མ་ཡིན་ཏེ་སྔོན་ཉིད་དུ་ལྡན་པའི་ཕྱིར་རོ། །སྲེད་པའི་དབང་གིས་སྲིད་པ་ རྣམ་པར་གཞག་པ་དང་། རྣམ་པར་སྨིན་པའི་དབང་གིས་སྐྱེ་བ་རྣམ་པར་གཞག་པ་འདི་ལ་མི་འཐད་པ་ཅི་ཞིག་ཡོད། ནང་གི་བཅུ་གཉིས་ཞེས་བྱ་བ་ལ། འདི་ཅི་ཞིག་ཏུ་གཟུང་བར་བྱ་ཞེ་ན། གཉི་ག་ལྟར་ཡང་ངེས་པར་གཟུང་བར་བྱ་སྟེ། འདིས་གཞན་དག་ཕྱིའི་ཞེས་བྱ་བ་བཤད་ པར་འགྱུར་རོ། །གྲངས་ཙམ་ཞིག་བསྟན་པས་ཁྱད་པར་རྟོགས་པར་མི་འགྱུར་བས་དེའི་ཕྱིར་བཅུ་གཉིས་གང་དག་ཅེ་ན་ཞེས་དྲིས་སོ། །དེ་དམིགས་ཀྱིས་དགར་བའི་ཕྱིར། གཟུགས་ལ་སོགས་མ་གཏོགས་ཞེས་བྱ་བ་གསུངས་སོ། །བདག་གི་དབང་དུ་བྱས་པས་ན་ནང་གི་སྟེ། ནང་གི་ཉིད་ནི་ནང་གིའོ། །བདག་མེད་ན་ཇི་ལྟར་ནང་གིའམ་ཕྱིར་འགྱུར་ཏེ། ཚུལ་ཁྲིམས་མེད་པར་ནི་ལྷག་པའི་ཚུལ་ཁྲིམས་ཀྱི་ལྷག་པར་མི་འགྱུར་བ་བཞིན་ནོ་ཞེ་ན། སེམས་ནི་ངར་འཛིན་པའི་རྟེན་ཡིན་པའི་ཕྱིར་ཞེས་རྒྱ་ཆེར་འབྱུང་སྟེ། བདག་ཏུ་སྨྲ་བ་རྣམས་ཀྱི་ངར་འཛིན་པའི་ རྟེན་ལ་བདག་ཅེས་བརྗོད་དེ། འདི་ལྟར་བདག་གི་ཡོན་ཏན་ཉིད་དམ། བདག་གི་ཡུལ་ཅན་ཉིད་དུ་རྟོག་པས་ཀྱང་འཛིན་པ་འཇུག་གོ། །ངར་འཛིན་པ་ཡང་སེམས་ལ་བརྟེན་ཏེ་དེ་ལས་མ་གཏོགས་པའི་བདག་མེད་པའི་ཕྱིར་རོ། །འདི་ལ་བདག་ཏུ་ང་རྒྱལ་བཞག་པས་ན་སེམས་ཁོ་ན་ བདག་ཡིན་ལ། སེམས་ལས་བྱུང་བ་རྣམས་དང་སེམས་ལ་བརྟེན་པའི་ཕྱིར་སེམས་ཁོ་ན་ལ་བདག་ཏུ་ཉེ་བར་འདོགས་སོ། །འདིར་སེམས་ལ་བདག་ཏུ་འདོགས་སོ་ཞེས་བྱ་བ་འདི་ཡང་ཇི་ལྟར་རྟོགས་ཤེ་ན་དེའི་ཕྱིར། མཁས་པས་བདག་ཉིད་དུལ་བས་ནི། །ཞེས་རྒྱ་ཆེར་འབྱུང་ངོ་། ། འདི་ཡང་ལུང་གཞན་ལ་བལྟོས་ཏེ་དོན་དེ་ཉིད་ཀྱི་ཤེས་བྱེད་ཡིན་གྱི། ཡན་གར་བ་ནི་མ་ཡིན་ནོ་ཞེས་བསྟན་པའི་ཕྱིར་བཅོམ་ལྡན་འདས་ཀྱིས་གཞན་ལས་ཞེས་རྒྱ་ཆེར་གསུངས་ཏེ། འདི་ལས་ནི། སེམས་དུལ་བས་ནི་བདེ་བ་འདྲེན། །ཞེས་སེམས་དུལ་བ་གསུངས་སོ། །དེའི་ཕྱིར་འདིར་ བདག་གི་སྒྲ་སེམས་ཁོ་ན་ལ་མངོན་པར་བཞེད་དོ་ཞེས་བྱ་བར་ཤེས་པར་བྱའོ། །བདག་ཉིད་ལེགས་པར་དུལ་བ་ཡི། །མཁས་པས་མཐོ་རིས་ཐོབ་པར་འགྱུར། །ཞེས་སོ། །རྟེན་གྱི་དངོས་པོར་ཉེ་བར་གྱུར་པའི་ཕྱིར་ན་ཞེས་བྱ་བ་ལ། མིག་ལ་སོགས་པ་རྣམས་ལ་གང་ཞིག་གཟུགས་ ལ་སོགས་པ་དག་ཡོད་པ་མ་ཡིན་པས། སེམས་ཡུལ་ན་མི་གནས་པའི་རྟེན་གྱི་དངོས་པོ་གང་ཞིག་ཡོད་ཅེ་ན། ཁྱད་པར་གང་ཞིག་ཡོད་ན་སེམས་དེ་དག་འགྱུར་བའི་རྗེས་སུ་བྱེད་པར་འགྱུར་ལ། དེ་དག་འགྱུར་བའི་རྗེས་སུ་བྱེད་པ་ལས་ཀྱང་རྣམ་པར་ཤེས་པ་དེ་ཡུལ་ན་མི་གནས་ཀྱང་མིག་ལ་ སོགས་པ་དག་ཁོ་ན་ལ་མངོན་གྱི། གཟུགས་ལ་སོགས་པ་དག་ལ་ནི་མ་ཡིན་ཏེ། འདི་ལྟར་ཚོར་བ་བདེ་བ་དང་སྡུག་བསྔལ་དང་མཚུངས་པར་ལྡན་པ་དེ་ནི་ལུས་ཀྱི་ཡུལ་ལ་ཡོངས་སུ་གཅོད་ཀྱི། གཟུགས་ལ་སོགས་པའི་ཡུལ་གྱི་ཕྱོགས་ལ་ནི་མ་ཡིན་ནོ། ། དེའི་ཕྱིར་ཁྱད་པར་འདི་ལས་མིག་ལ་སོགས་པ་དང་གཟུགས་ལ་སོགས་པ་རྣམས་རྣམ་པར་ཤེས་པ་བསྐྱེད་པའི་རྒྱུར་ཁྱད་པར་མེད་ཀྱང་རྟེན་ཉིད་དང་ཡུལ་ཉིད་དུ་འགྲུབ་པ་ཡིན་ཏེ། དེའི་ཕྱིར་ནང་གི་དང་ཕྱིའི་ཉིད་ཀྱང་ཡིན་པའོ། །འདི་ལ་སྐྱེད་པ་དང་གནས་པ་གཅིག་དང་འགོག་པ་འབྲས་ བུ་གཅིག་ལ་སོགས་པ་རྣམས་ལ་སེམས་དང་སེམས་ལས་བྱུང་བ་རྣམས་ལ་རྒྱུ་ཅི་ཞེ་ན། གནས་བརྟན་འདུས་བཟང་ནི། སེམས་ལ་ནང་དང་སེམས་ལས་བྱུང་བ་རྣམས་ལ་ཕྱི་ཞེས་ཟེར་རོ། །གཟུགས་ལ་སོགས་པ་ཡུལ་གྱི་ངོ་བོ་ཡིན་པའི་ཕྱིར་རིང་བ་ཉིད་ཕྱིའི་རྒྱུ་དང་། མིག་ལ་སོགས་ པ་སེམས་དང་སེམས་ལས་བྱུང་བའི་རྟེན་གྱི་ངོ་བོ་ཡིན་པའི་ཕྱིར་ཉེ་བ་ཉིད་དང་ནང་ཉིད་དུ་བཤད་པ་མ་ཡིན་ནམ་ཞེ་ན། དེ་ལྟར་བཤད་པའི་རྒྱུད་དུ་ཡོངས་སུ་དྲི་བ་ནི། གཞུང་ཁ་བསྐང་བ་འབའ་ཞིག་ཏུ་མངོན་ཏེ། གང་བཤད་པ་སེམས་ལས་བྱུང་བ་རྣམས་ཁོ་ན་སུ་ཏ་རེ། ནང་ཉིད་དང་ སེམས་ཀྱི་རྟེན་ཉིད་དུ་ཉེ་བར་གྱུར་པའི་ཕྱིར་རོ་ཞེས་བྱ་བ་འདི་ཡང་མ་འབྲེལ་བ་ལྟ་བུར་མངོན་ནོ། །གང་གི་ཕྱིར་ཕན་འདོགས་པ་ཉེ་བ་དང་རིང་བ་ཉིད་ཀྱིས་ནང་དང་ཕྱི་རོལ་དུ་འདོད་ན། མིག་ལ་སོགས་པ་ཐུན་མོང་མ་ཡིན་པའི་རྟེན་གྱི་དངོས་པོས་ཕན་འདོགས་པ་ཉིད་ཀྱིས་ཉེ་བ་དང་ནང་ཞེས་ བརྗོད་པར་བྱ་ཞིང་། གཟུགས་ལ་སོགས་པ་རྣམས་ནི་ཡུལ་གྱི་ངོ་བོས་ཕན་འདོགས་པ་ཉིད་ཀྱི་རིང་བ་དང་ཕྱི་རོལ་ཏེ་དེ་ལྟར་རྒྱ་ཆེར་རྣམ་པར་བཤད་དོ། །གང་ཡང་སེམས་གང་ཅི་ཡང་རུང་བ་ངར་འཛིན་པའི་རྟེན་ཡིན་པའི་ཕྱིར་ཐམས་ཅད་ནང་ཡིན་ནོ་ཞེས་པ་ནི། ངར་འཛིན་པའི་རྟེན་ཡིན་པའི་ ཕྱིར་སེམས་སུ་གདགས་པར་མི་རུང་སྟེ། བདག་གི་ཡུལ་ནི་ངར་འཛིན་པའོ་ཞེས་བདག་ཏུ་སྨྲ་བ་རྣམས་ལ་རབ་ཏུ་གྲགས་པས་དེ་ཉིད་ཀྱི་ཕྱིར་དེ་ལྟར་བཤད་དོ། །བདག་གི་དངོས་པོ་ཡང་བདག་ཏུ་འཛིན་པའི་རྟེན་ཡིན་པའི་ཕྱིར་སེམས་ལ་བདག་ཏུ་ཉེ་བར་བཏགས་ཏེ། དེའི་ཕྱིར་ནང་དང་ཕྱི་རོལ་ ཏུ་རྣམ་པར་གཞག་གོ། །གང་ཡང་འདོད་ཆགས་ལ་སོགས་པའི་རྟེན་ཡིན་པའི་ཕྱིར་ཐམས་ཅད་ཉོན་མོངས་པ་དང་མཚུངས་པར་ལྡན་པའི་ཁྱད་པར་གྱི་རྒྱུ་མེད་པས་ངར་འཛིན་པའི་རྟེན་ཡིན་པའི་ཕྱིར་སེམས་ལ་བདག་ཅེས་བཏགས་པས་བདག་ཏུ་ནི་མི་འགྱུར་ཏེ་དེའི་རང་བཞིན་གཞན་ཡིན་པའི་ ཕྱིར་རོ། །གཞན་ལ་ཡང་བདག་ཏུ་འཛིན་པ་ལ་འགལ་བ་མེད་དོ། །པདྨ་ཅན་བཞིན་འདོད་ཆགས་ལ་སོགས་པའི་རྟེན་ཡིན་པའི་ཕྱིར་དེའི་སེམས་ཉོན་མོངས་པ་ཅན་ཁོ་ནར་འགྱུར་བ་ནོ་པ་ཙཪྻ་<ཉེ་བར་མི་སྲིད་དོ།།> ཏེ། དེ་ལྟར་ཡུལ་ལ་རྣམ་པར་གཞག་གོ། །ས་<དེ་ཉིད་>ཨེ་པཱ་<སྨྲས་>ཧ་ས་<རྟག་ཏུ་>ཏ་ཏ་མ་བདག་དེ་ཡང་ངར་འཛིན་པའི་ རྟེན་ཡིན་པའི་ཕྱིར་སེམས་ནི་རྟག་ཏུ་ཡུལ་ལ་ན་ཏ་ཏི་འདི་འགའ་ཞིག་གི་ཚེ་ཡུལ་མེད་པར་འགྱུར་རོ་ཞེས་བྱ་བ་དེ་ལྟ་བུ་ནི་མ་ཡིན་ཏེ་སེམས་ལས་བྱུང་བ་རྣམས་ལ་ཡང་ཐལ་བར་འགྱུར་རོ་ཞེ་ན། ཡིད་སྔོན་དུ་འགྲོ་བའི་ཕྱིར་དང་། གཅིག་པུར་སྤྱོད་པར་གསུངས་པའི་ ཕྱིར་ཐལ་བ་མེད་དོ། །དེ་ལ་བརྟེན་པ་ཁོ་ན་ཡུལ་དུ་འགྱུར་བའི་ཕྱིར་སེམས་ལས་བྱུང་བ་རྣམས་ཀྱང་སེམས་དུལ་བས་དུལ་བར་བསྟན་པ་ལྟ་བུའོ། །ངེས་པར་བསྟན་པ་འདི་རྣམས་ནི་སེམས་གཙོ་བོ་སྟེ་པྲ་ཏི་རཱུ་པ་ཀཱ་<རྒྱ་དཔེ་ན་ཏི་མེད།> ནི་སེམས་ལས་བྱུང་བ་རྣམས་ཡུལ་རྣམས་ལ་པ་<རྟག་ཏུ་>ཏ་ཏ་མ་<གནས་པ་>པྲ་ཏི་ཥེ་དྷ་ཀཱ་<རྣམ་ཤེས་>ནི་བསྟན་ དུ་བསྟན་པའི་རྒྱུ་མཚན་གཙོ་བོ་མ་ཡིན་ནོ། །འོ་ན་ཅི་ཞེ་ན། ས་<རྟག་ཏུ་>ཏ་ཏ་མ་ཏ་ན་<འདོད་པའམ་བཞེད་པ།> ཙཱརྱཾ་<སྤྱོད་པ་མིན་>བ་ལང་གི་སྒྲ་བཞིན་ཆགས་ཏེ། གང་གི་ཕྱིར་གཞན་ལ་སྒྲའི་རྒྱུ་མཚན་ཡོད་ཀྱང་མི་འཇུག་པ་དེའི་ཕྱིར་སེམས་སེམས་ལས་བྱུང་བ་རྣམས་ལ་ཐལ་བ་འདིར་ཡང་ནི་ བཱརྻཿགང་ཡང་སེམས་ལས་བྱུང་བ་རྣམས་ཀྱང་བདག་དང་འཇིག་ཚོགས་ལ་ལྟ་བ་ཅི་ཡིས་ཤེ་ན། དེ་ལྟར་ཡང་ཉེ་བར་ལེན་པའི་ཕུང་པོའི་ཡུལ་ཡིན་པའི་ཕྱིར་རོ། །འདིར་རྟེན་དང་དམིགས་པའི་ངོ་བོས་ངར་འཛིན་པའི་རྟེན་ཉིད་སེམས་ལ་འདོད་ཀྱི་དམིགས་ པའི་ངོ་བོ་ཁོ་ནས་མ་ཡིན་པ་སེམས་ལས་བྱུང་བ་རྣམས་ལ་ངར་འཛིན་པའི་རྟེན་ཉིད་མེད་དོ། །གལ་ཏེ་ནང་གི་མིག་ལ་སོགས་པ་དག་རྣམ་པར་ཤེས་པའི་རྟེན་གྱི་དངོས་པོ་ཡིན་ན། དེ་ལྟ་འོ་ན་རྣམ་པར་ཤེས་པའི་ཁམས་དྲུག་པོ་དག་ཅེས་བྱ་བ་རྒྱས་པར་འབྱུང་ངོ་། །དེ་དག་ཡིད་ཀྱི་ ཁམས་ཉིད་དུ་མ་གྱུར་པ་ཞེས་བྱ་བ་ནི་དྲུག་པོ་འདས་མ་ཐག་པའི་གནས་སྐབས་མ་ཐོབ་པའོ། །ད་ལྟར་བྱུང་བའམ་མ་འོངས་པ་ནི་སེམས་ཀྱི་རྟེན་མ་ཡིན་ཏེ། མཚུངས་པ་དེ་མ་ཐག་པ་འདས་པའི་གནས་སྐབས་ནི་མིག་ལ་སོགས་པའི་རྣམ་པར་ཤེས་པའི་ ཁམས་ཉིད་དུ་རྣམ་པར་གཞག་པ་མ་ཡིན་ནོ། །དྲུག་པོ་འདས་མ་ཐག་པ་ཡི། །རྣམ་ཤེས་གང་ཡིན་དེ་ཡིད་དོ། །ཞེས་དེའི་ཚེ་ཡིད་ཀྱི་ཁམས་ཉིད་དུ་རྣམ་པར་གཞག་པའི་ཕྱིར་རོ། །གང་གི་ཚེ་ཡིན་པ་དེའི་ཚེ་ན་ཡང་ཞེས་བྱ་བ་ལ་འདས་པའམ་ད་ལྟར་བྱུང་བ་ཡིན་ཡང་རུང་སྟེ། མིག་གི་རྣམ་པར་ཤེས་པའི་ཁམས་ལ་སོགས་པ་དེ་དག་སྟེ་ཡིད་ཀྱི་ཁམས་ནི་མ་ཡིན་ནོ། །རྣམ་པར་ཤེས་པ་འདས་པ་ལ་ནི་སྔར་མ་བྱུང་བའི་ཡིད་ཀྱི་ཁམས་ཉིད་དུ་འགྱུར་བའམ། མིག་ལ་སོགས་པའི་རྣམ་པར་ཤེས་པའི་ཁམས་ཉིད་སྔར་ཡོད་པའམ་ལྡོག་པ་མེད་དེ། རྣམ་ པར་ཤེས་པ་ཉིད་རྣམ་པར་ཤེས་པ་གཞན་གྱི་རྟེན་གྱི་དངོས་པོས་ཡིད་ཀྱི་ཁམས་སུ་འཇོག་པའི་ཕྱིར་རོ། །དེའི་ཕྱིར་ཡིད་ཀྱི་ཁམས་ཀྱི་མཚན་ཉིད་ལས་མི་འདའོ། །དེ་ལྟ་མ་ཡིན་ན་ཞེས་གསུངས་པ་ལ། གལ་ཏེ་རྣམ་པར་ཤེས་པ་ད་ལྟར་བྱུང་བ་དང་མ་འོངས་པ་ཡིད་ཀྱི་ཁམས་སུ་མི་ འགྱུར་ན་ནི་འདས་པ་ཡང་ཡིད་ཀྱི་ཁམས་དང་མིག་ལ་སོགས་པའི་ཤེས་པར་མི་འགྱུར་རོ། །དེ་ལྟ་ཡིན་ན་ཡིད་ཀྱི་ཁམས་འདས་པ་ཁོ་ན་ཡིན་པར་འགྱུར་གྱི་ཞེས་བྱ་བ་རྒྱས་པར་འབྱུང་ངོ་། །གལ་ཏེ་ཡིད་ཀྱི་ཁམས་འདས་པ་ཁོ་ན་ཡིན་པར་གྱུར་ན་ཅིར་འགྱུར་ཞེ་ན། དེའི་ཕྱིར་ཁམས་ བཅོ་བརྒྱད་པོ་དག་ནི་ཞེས་རྒྱ་ཆེར་གསུངས་སོ། །ཡང་ཅིའི་ཕྱིར་དེ་ལྟར་འདོད་ཅེ་ན། དེའི་ཕྱིར་གལ་ཏེ་ཡང་རྣམ་པར་ཤེས་པ་མ་འོངས་པ་དང་ཞེས་བྱ་བ་ལ་སོགས་པ་གསུངས་ཏེ། དེ་ཉིད་ལ་རྒྱུ་བཤད་པ་ནི་མཚན་ཉིད་ནི་དུས་རྣམས་སུ་འཁྲུལ་པ་མེད་དོ་ཞེས་བྱ་བ་སྟེ། འཁྲུལ་པ་རྣམས་ ནི་མ་འོངས་པ་གཞན་དག་ཡིན་པ་ད་ལྟར་བྱུང་བ་གཞན་དག་ཡིན་ལ་འདས་པ་གཞན་ཡིན་པ་སྟེ། ཐམས་ཅད་འབད་པ་དོན་མེད་པར་འགྱུར་རོ། །དངོས་པོ་དང་དངོས་པོ་མེད་པ་དག་ལ་ཡང་སོ་དྷཱ་ཁྱ་ནི་རུ་པཱ་ཁྱ་ཏྭེ་ནཱ་ནཱ་× <དེ་དུས་བཤད་པ་ཉེ་བར་བཤད་པ་མེད་པ་ཉིད་ཀྱི་×།> མཚན་ཉིད་ མི་མཐུན་པའི་ཕྱིར་ཕན་ཚུན་འཇུག་པ་ཡང་མི་རིགས་ཏེ། དེའི་རྣམ་པར་ཤེས་པ་རྣམས་རྣམ་པར་ཤེས་པ་གཞན་གྱི་རྟེན་གྱི་དངོས་པོ་རང་བཞིན་དུ་དུས་ཐམས་ཅད་དུ་ཡོད་པས་དེ་ནི་འདས་པ་རྣམས་ལ་འཁྲུལ་པ་མེད་དོ་ཞེས་བཤད་དོ། །དྲུག་པོ་འདས་མ་ཐག་པ་ཡི། །རྣམ་ཤེས་དང་ ཡིན་དེ་ཡིད་དོ། །ཞེས་སོ། །ཆོས་ཞེས་བྱ་བ་ནི་བརྟེན་པ་དང་བཅས་པ་ཞེས་བྱ་བ་ལ། རྟེན་དང་བཅས་པ་ཁོ་ནའོ་ཞེས་ངེས་པར་གཟུང་བ་སྟེ་ལྷག་མ་ནི། དེ་དང་མཚུངས་པ་དག་ཀྱང་ཡིན། །ཞེས་གསུངས་པའི་ཕྱིར་རོ། །འདི་ནི་རྟེན་དང་བཅས་པའི་ཡུལ་གྱི་མཚན་ཉིད་དེ། ཡུལ་གང་ཞིག་རྣམ་པར་ཤེས་པ་གང་གི་ཡུལ་དུ་ངེས་ལ། དེ་ལྟ་ཡིན་དང་ཇི་ལྟར་ཡིད་ཀྱི་རྣམ་པར་ཤེས་པ་ནི་ཆོས་ཀྱི་ཁམས་ཐུན་མོང་མ་ཡིན་པའི་ཡུལ་དུ་ངེས་པ་ཉིད་ཀྱི་ཕྱིར། གལ་ཏེ་དེ་ལ་རྣམ་པར་ཤེས་པ་དེ་སྐྱེས་པ་ཞེས་བྱ་བ་རྒྱ་ཆེར་འབྱུང་ངོ་། །སྐྱེ་བའི་ཆོས་ཅན་ཞེས་ བྱ་བ་ནི་མི་སྐྱེ་བའི་ཆོས་ཅན་ལས་ཁྱད་པར་དུ་བྱེད་པའོ། །དེ་ལྟར་ན་དེ་ནི་ཡུལ་གཟུང་བ་འཛིན་པར་འགྱུར་བས་རྟེན་པ་དང་བཅས་པ་ཞེས་བྱའོ། །གང་ལ་ཡིད་ཀྱི་རྣམ་པར་ཤེས་པ་ཞེས་བྱ་བ་ལ་སོགས་པ་ལ། ཡིད་ནི་ཤེས་བྱ་མ་ལུས་པའི་ཡུལ་ཅན་ཡིན་པའི་ཕྱིར། གང་ལ་ཡིད་ཀྱི་ རྣམ་པར་ཤེས་པ་མཐའ་ཡས་པ་མ་སྐྱེས་པའམ་སྐྱེ་བར་མི་འགྱུར་བའི་ཆོས་ཀྱི་ཁམས་དུས་གསུམ་པའམ་དུས་མེད་པ་གང་ཡིན་པ་དེ་ནི་འགའ་ཡང་མེད་དོ། །མཐའ་ཡས་པ་ཞེས་བྱ་བ་ནི་ཡོངས་སུ་བགྲང་དུ་མེད་པའི་ཕྱིར་རོ། །རང་གི་བདག་ཉིད་ལ་བྱེད་པ་འགལ་བའི་ཕྱིར་དང་། དམིགས་ པ་མཚུངས་པའི་ཕྱིར་དང་། ཤིན་ཏུ་ཉེ་བའི་ཕྱིར་རང་གི་ངོ་བོ་དང་ལྷན་ཅིག་འབྱུང་བ་ལ་དམིགས་པ་མ་ཡིན་ནོ། །ལྷན་ཅིག་འབྱུང་བ་སྨོས་པས་མཚུངས་པར་ལྡན་པ་ཡང་གཟུང་ངོ་། །འོ་ན་ཁམས་བཅོས་རྒྱད་པ་ཐམས་ཅད་བདག་མེད་པའི་ཤེས་པའི་ཡུལ་ཡིན་པའི་ཕྱིར། ཆོས་ཀྱི་ ཁམས་བཞིན་དུ་རྟེན་པ་དང་བཅས་པར་འགྱུར་རོ་ཞེ་ན་མི་འགྱུར་ཏེ། དེ་དག་ནི་རང་གི་བྱེད་པ་ལ་བལྟོས་ནས་རྟེན་པ་དང་བཅས་པ་དང་། དེ་དང་མཚུངས་པ་ཉིད་དུ་རྣམ་པར་འཇོག་པའི་ཕྱིར་རོ། །རང་གི་ཡུལ་གྱི་བྱེད་པས་ཞེས་ཡུལ་སྨོས་པ་ནི་སྐལ་བ་མཉམ་པའི་རྒྱུའི་རྟེན་ལ་སོགས་ པའི་དངོས་པོའི་བྱེད་པ་གཞན་བཟློག་པའི་དོན་ཏོ། །གཟུགས་རྣམས་མ་མཐོང་བར་འགག་པ་དང་ཞེས་བྱ་བ་ལ། མིག་ད་ལྟར་བ་ནི་འགག་པ་ལ་མངོན་དུ་ཕྱོགས་པའི་ཕྱིར་འགག་པ་ཞེས་བྱ་སྟེ། མི་རྟག་པ་ཉིད་ཀྱི་བྱེད་པ་གནས་པའི་ཕྱིར་རོ། །མ་འོངས་པ་ནི་ སྐྱེ་བའི་ཆོས་ཅན་ཡིན་པའི་ཕྱིར་འགག་པར་འགྱུར་བ་ཞེས་བྱ་སྟེ། དེ་ནི་གདོན་མི་ཟ་བར་ཇི་ལྟར་སྐྱེ་བ་དེ་བཞིན་དུ་འགག་པར་འགྱུར་བ་ཡིན་ནོ། །རྣམ་པར་ཤེས་པ་དང་ལྡན་པ་དང་ལྡན་པ་མ་ཡིན་པ་ཞེས་བྱ་བ་ནི། ཇི་ལྟར་མིག་ད་ལྟར་བ་འགའ་ཞིག་ནི་རྣམ་པར་ཤེས་པ་དང་ལྡན་པ་ཡིན་ལ། འགའ་ཞིག་ནི་མི་ལྡན་པ་ཡིན་པ་དེ་བཞིན་དུ་མི་སྐྱེ་བའི་ཆོས་ཅན་ཡང་ཡིན་ནོ། །ཡིད་ནི་མི་སྐྱེ་བའི་ཆོས་ཅན་ཁོ་ན་དེ་དང་འདྲ་བ་ཡིན་ཏེ། སྐྱེས་པ་གདོན་མི་ཟ་བར་དམིགས་པ་འཛིན་པ་ཡིན་ནོ། །འདི་ལྟར་དམིགས་པ་མེད་པའི་ཤེས་པ་སྐྱེ་བ་ནི་ཡོད་པ་མ་ཡིན་ནོ། །རང་གི་དབང་ པོའི་བྱེད་པས་ཞེས་བྱ་བ་ལ། དབང་པོའི་བྱེད་པ་སྨོས་པ་སྐལ་བ་མཉམ་པའི་རྒྱུ་ལ་སོགས་པའི་བྱེད་པ་བསལ་བར་བྱེད་པའི་ཕྱིར་རོ། །དྲི་ལ་སོགས་པ་ནི་གང་དག་གཅིག་གིས་ཞེས་བྱ་བ་ལ། རེས་འགའ་ཞིག་རྐྱེན་ཉེ་ན་དེ་དག་ཉིད་གཞན་གྱི་སྣ་ལ་སོགས་པའི་ཡུལ་དུ་སྐྱེས་ ནས་དེ་དག་གི་རྣམ་པར་ཤེས་པ་སྐྱེད་པར་འགྱུར་རོ། །གལ་ཏེ་ཆོས་ཀྱི་ཁམས་ཀྱང་ཐུན་མོང་ཡིན་པའི་ཕྱིར་གཟུགས་ལ་སོགས་པ་བཞིན་དུ་རྒྱུད་དུ་མའི་དབང་གིས་རྟེན་པ་དང་བཅས་པ་དང་དེ་དང་མཚུངས་པ་ཉིད་དུ་ཅིའི་ཕྱིར་རྣམ་པར་མི་འཇོག་ཅེ་ན། གཟུགས་ནི་ད་ལྟར་བྱུང་བ་ཁོ་ན་ མཐོང་གི་འདས་པ་དང་མ་འོངས་པ་དང་མི་སྐྱེ་བའི་ཆོས་ཅན་ནི་མ་ཡིན་ཏེ། རེག་བྱའི་བར་དུ་ཡང་དེ་དང་འདྲ་སྟེ། ད་ལྟར་བྱུང་བའི་རེག་བྱ་ཁོ་ན་ལ་རེག་གི་འདས་པ་དང་མ་འོངས་པ་དང་ནི་སྐྱེ་བའི་ཆོས་ཅན་ལ་ནི་མ་ཡིན་ནོ་ཞེས་སོ། །དེའི་ཕྱིར་གཟུགས་རྣམས་ཀྱི་རྟེན་པ་དང་བཅས་པ་དང་དེ་དང་ མཚུངས་པའི་ངོ་བོ་རྒྱུད་ཀྱི་དབང་གི་བྱ་བ་བྱེད་པ་ལས་རྣམ་པར་གཞག་པའོ། །ཆོས་ཞེས་བྱ་བ་རྣམས་ལ་ནི་རྣམ་པར་རྟོག་པ་དེ་ལྟ་བུ་ཡོད་པ་མ་ཡིན་ཏེ། དེ་ནི་དུས་གསུམ་དང་དུས་སུ་མ་གཏོགས་པ་ལ་ཡང་ཡུལ་ཡིན་པའི་ཕྱིར་རོ། །རྒྱུད་ཀྱི་དབང་གིས་མ་ཡིན་པར་ཅིའི་ཕྱིར་རྣམ་ པར་འཇོག་པར་མི་ནུས་ཤེ་ན། ཀརྟུཾ་ཀོ་<རྒྱ་དཔེ་གཅིག་ན་བཀྟུཾ་ཟེར།> འདི་དག་ཇི་ལྟར་བརྟེན་པ་དང་བཅས་པ་ཞེས་ཤེས་པར་མི་འགྱུར་རོ། །དེའི་ཕྱིར་བརྟེན་པ་དང་བཅས་པ་ཞེས་བྱ་བའི་དོན་ཅི་ཞེ་ན་ཞེས་གསུངས་ཏེ། རྟེན་པར་བྱེད་པས་ན་བརྟེན་པའོ། །དེ་འདི་ལ་ཡོད་པས་བརྟེན་པ་དང་བཅས་པའོ། ། དེ་ཡང་དབང་པོ་དང་ཡུལ་དང་རྣམ་པར་ཤེས་པ་རྣམས་ཕན་ཚུན་རྟེན་པར་བྱེད་པ་གང་ཡིན་པ་སྟེ། རྟེན་དང་བརྟེན་པ་དང་ཡུལ་དང་ཡུལ་ཅན་གྱི་དངོས་པོར་ཕན་ཚུན་རྗེས་སུ་མཐུན་པ་ཉིད་ཅེས་བྱ་བའི་ཐ་ཚིག་གོ། །ཡང་བྱེད་པ་ལ་རྟེན་པར་བྱེད་པས་བརྟེན་པ་སྟེ། གང་ཞིག་གང་གི་བྱེད་པ་ཡིན་པ་དེ་དེ་དང་རྗེས་སུ་མཐུན་པ་ཉིད་ཀྱིས་རྟེན་པའོ། །དཔེར་ན་མིག་གི་དབང་པོའི་བྱེད་པ་ལྟ་བ་ཡིན་པ་དང་། རྣམ་པར་ཤེས་པའི་རྣམ་པར་ཤེས་པ་དང་། གཟུགས་ཀྱི་དེ་དག་གི་ཡུལ་གྱི་དངོས་པོར་གནས་པར་བྱེད་པ་ལྟ་བུ་སྟེ་དེ་བཞིན་དུ་གཞན་ཡང་བརྗོད་ པར་བྱའོ། །འདི་ནི་སྔར་རང་གི་ལས་བྱེད་པ་བརྟེན་པ་དང་བཅས་པའོ་ཞེས་བཤད་དོ། །ཡང་ན་འབྲས་བུ་རེག་པ་མཚུངས་པའི་ཕྱིར་ཏེ་བརྟེན་པ་མཚུངས་པ་ཡིན་ནོ་ཞེས་བྱ་བར་སྦྱར་རོ། །འདི་ལྟར་རེག་པའི་ནི་ཡུལ་དང་དབང་པོ་དང་རྣམ་པར་ཤེས་པ་རྟེན་པར་བྱེད་པས་བརྟེན་པ་སྟེ། དེ་ལ་རག་ལས་པའི་ཕྱིར་རོ། །དེའི་ཕྱིར་བརྟེན་པ་མཚུངས་པས་རྟེན་མཚུངས་ཏེ་རེག་པ་མཚུངས་པ་ཞེས་བྱ་བའི་ཐ་ཚིག་གོ། །དེ་དག་གི་རེག་པ་ནི་སེམས་ལས་བྱུང་བའི་ཆོས་འབྲས་བུ་མཚུངས་པ་དེས་ན་རྒྱུའི་དངོས་པོར་མཚུངས་པའི་ཕྱིར་ཏེ་འདྲ་བའི་ཕྱིར་རོ་ཞེས་བྱ་བའི་དོན་ཏོ། ། གང་དག་བརྟེན་པ་དང་བཅས་པ་མ་ཡིན་པ་ཞེས་བྱ་བ་ལ། དེ་དག་ནི་བརྟེན་པ་དང་བཅས་པ་དེ་དག་དང་རིགས་མཐུན་པས་མཚུངས་པའི་ཕྱིར་དེ་དང་མཚུངས་པ་སྟེ་དེ་དང་འདྲ་བ་ཞེས་བྱ་བའི་ཐ་ཚིག་གོ། །དེ་དག་གཉི་ག་ཡང་ལྟ་བ་དང་སྐྱེ་མཆེད་གཅིག་དང་ཁམས་གཅིག་ཡིན་ནའོ། ། ཡང་ཕན་ཚུན་རྒྱུ་ཡིན་པའི་ཕྱིར་རིགས་འདྲ་བ་སྟེ་ཕན་ཚུན་འབྲེལ་བའི་ཕྱིར་དང་། ཕན་ཚུན་འདྲེན་པར་བྱ་བའི་ཕྱིར་དང་། མཐོང་བས་སྤང་བར་བྱ་བའི་ཁམས་རྣམས་ནི་དུ་ཞེས་རྒྱ་ཆེར་འབྱུང་བ་ལ། དེ་ལ་གང་དག་མཐོང་བའི་ལམ་གྱིས་སྤོང་བར་འགྱུར་བ་དེ་དག་ནི་མཐོང་བས་སྤོང་ བར་བྱ་བ་སྟེ། རྣམ་པ་དགུ་ཅར་ཡང་ལམ་རྣམ་པ་གཅིག་གིས་སྤོང་བ་གང་ཡིན་པ་དེ་དག་ནི་མཐོང་བས་སྤོང་བར་བྱ་བ་རྣམས་སོ། །རྣམ་པ་དགུ་ལམ་རྣམ་པ་དགུ་ཉིད་ཀྱིས་སྤོང་བ་གང་ཡིན་པ་དེ་ནི་བསྒོམ་པས་སྤང་བར་བྱ་བ་རྣམས་སོ། །གཟུགས་ཅན་ སྨོས་པ་ནི་གཟུགས་ཅན་མ་ཡིན་པ་རྣམ་པར་གཅད་པར་བྱ་བའི་ཕྱིར་རོ། །བཅུ་ཞེས་བྱ་བ་ནི་ཆོས་ཀྱི་ཁམས་གསལ་བར་བྱ་བའི་ཕྱིར་རོ། །ལྔ་ཡང་ཞེས་བྱ་བ་ནི་ཡིད་ཀྱི་རྣམ་པར་ཤེས་པའི་ཁམས་མ་གཏོགས་པ་མིག་ལ་སོགས་པ་རྣམ་པར་ཤེས་པའི་ཁམས་དག་གོ། །ཐ་མ་ནི་རྣམ་ གསུམ་ཞེས་བྱ་བ་དེ་ཉིད་ཀྱི་ཕྱིར་བསྒོམ་པས་སྤང་བར་བྱ་བ་ཁོ་ནའོ་ཞེས་ངེས་པར་གཟུང་སྟེ། བདེན་པ་དག་ལ་ལོག་པར་རྟོགས་པ་མེད་པའི་ཕྱིར་རོ། །ཟག་པ་དང་བཅས་པའི་ཕྱིར་དང་། དམིགས་པ་མེད་པའི་ཕྱིར་དང་། ཁ་ཕྱི་རོལ་ཏུ་བལྟས་པའི་ཕྱིར་གཞན་རྣམས་ལ་ཡང་ རྟོགས་པར་བྱའོ། །ཡང་གི་སྒྲ་ནི་བསྡུ་བའི་དོན་ཏོ། །འདོན་པའི་གོ་རིམས་མཐའ་ན་ཡོད་པའི་ཕྱིར་ཐ་མའོ། །ཕྲ་རྒྱས་བརྒྱད་ཅུ་རྩ་བརྒྱད་ནི་ཁམས་གསུམ་གྱི་བདེན་པ་མཐོང་བས་སྤང་བར་བྱ་བ་དག་གོ། །དེ་དག་དང་ལྷན་ཅིག་འབྱུང་བ་སྨོས་པ་ནི་དེ་དག་དང་མཚུངས་པར་ལྡན་པ་ སེམས་དང་སེམས་ལས་བྱུང་བ་རྣམས་དང་། དེ་དག་གི་མཚན་ཉིད་དང་། ཕྲ་རྒྱས་རྣམས་ཀྱི་མཐུན་པའི་མཚན་ཉིད་རྣམས་གཟུང་ངོ་། །དེའི་ཐོབ་པ་རྣམས་ནི་མ་ཡིན་ནོ། །དེའི་ཕྱིར་ཐོབ་པ་རྣམས་ནི་སྔར་སྐྱེས་པ་དང་ཕྱིས་སྐྱེ་བ་ཡང་ཡོད་པས་དེ་དག་སོ་སོ་སྨོས་པས་དེའི་ཐོབ་པ་རྣམས་ཀྱང་འཁོར་དང་ བཅས་པ་སྟེ། རྗེས་སུ་འབྲང་བ་རྗེས་ཀྱི་ཐོབ་པ་དང་ཐོབ་པའི་མཚན་ཉིད་རྣམས་སོ། །དེ་ལ་ཕྲ་རྒྱས་བརྒྱད་ཅུ་རྩ་བརྒྱད་དང་མཚུངས་པར་ལྡན་པའི་རྣམ་པར་ཤེས་པ་ནི་ཡིད་ཀྱི་ཁམས་དང་ཡིད་ཀྱི་རྣམ་པར་ཤེས་པའི་ཁམས་སོ། །ལྷག་མ་མཚུངས་པར་ལྡན་པ་ཕྲ་རྒྱས་དག་དང་ལྷན་ཅིག་ པ་རྣམས་དང་ལྡན་པ་མ་ཡིན་པ་རྣམས་ནི་ཆོས་ཀྱི་ཁམས་སོ། །ཧ་ཅང་ཐལ་བར་འགྱུར་བ་ཡོད་པས་ཟག་པ་མེད་པ་རྣམས་ལས་ཁྱད་པར་དུ་བྱ་བའི་ཕྱིར་ཟག་པ་སྨོས་སོ། །ཁ་ཅིག་ན་རེ་གང་གི་ཕྱིར་སོ་སོའི་སྐྱེ་བོ་ཉིད་དང་ངན་སོང་བའི་ལུས་དང་ངག་གི་ལས་ཀྱང་འཕགས་པའི་ལམ་དང་འགལ་ བའི་ཕྱིར་འཇིག་ཚོགས་དང་མཐར་འཛིན་པར་ལྟ་བ་ལ་སོགས་པ་ལྟར་མཐོང་བས་སྤང་བར་བྱ་བ་ཡིན་ཏེ། འདི་ལྟར་ལམ་གྱི་སྐད་ཅིག་དང་པོ་སྐྱེས་པ་ན་སོ་སོའི་སྐྱེ་བོ་ཉིད་དང་མི་ལྡན་པ་འཐོབ་པ་དང་། རྒྱུན་དུ་ཞུགས་པ་ལོག་པར་མི་ལྟུང་བ་ཆོས་ཅན་ནོ་ཞེས་ཀྱང་བཤད་ན། ངན་སོང་ བའི་ལུས་དང་ངག་གི་ལས་མ་སྤངས་པར་ནི་ངན་སོང་ཟད་པར་ཡང་མི་རིགས་སོ། །བདག་གི་དམྱལ་བ་ཟད་དོ་ཞེས་རྒྱ་ཆེར་གསུངས་ཤིང་ཟད་པ་དང་སྤངས་པ་ལས་བདག་གི་སྐྱེ་བ་ཟད་དོ་ཞེས་དགྲ་བཅོམ་པ་ཉིད་བརྡ་སྤྲོད་པས་དེའི་ཕྱིར་ཕྲ་རྒྱས་བརྒྱད་ཅུ་རྩ་བརྒྱད་དང་། དེ་དང་ལྷན་ཅིག་ འབྱུང་བ་དང་ཞེས་བྱ་བ་ལ་སོགས་པ་ནི་ཤིན་ཏུ་ཉུང་བར་བརྗོད་པ་ཡིན་ནོ་ཞེས་ཟེར་རོ། །འདི་ལ་ལན་བརྗོད་པར་བྱ་སྟེ། སོ་སོའི་སྐྱེ་བོ་ཉིད་དང་། ངན་སོང་བའི་ལུས་དང་ངག་གི་ལས་དེ་དག་ནི་མཐོང་བས་སྤང་བར་བྱ་བ་མ་ཡིན་ཏེ། དེ་ཅིའི་ཕྱིར་ཞེ་ན། དེའི་ཕྱིར། མདོར་བསྡུ་བ་ནི་འདི་ཡིན་ ནོ། །ཞེས་གསུངས་ཏེ། ཉོན་མོངས་ཅན་མིན་མཐོང་སྤང་མིན། །ཞེས་བྱ་བ་འདིས་སོ་སོའི་སྐྱེ་བོ་ཉིད་སྤང་བར་བྱ་བ་མ་ཡིན་ནོ་ཞེས་སྟོན་ཏོ། །གཟུགས་མིན་ཞེས་བྱ་བ་འདིས་ནི་ཉོན་མོངས་པ་ཅན་ཡིན་ཡང་ངན་སོང་བའི་ལུས་དང་ངག་གི་ལས་མཐོང་བས་སྤང་བར་བྱ་བ་མ་ཡིན་ནོ་ཞེས་སྟོན་ ཏོ། །དྲུག་པ་མིན་སྐྱེས་མིན་ཞེས་བྱ་བ་འདིས་ནི་ཉོན་མོངས་པ་ཅན་ཡིན་ཡང་མཐོང་བས་སྤང་བར་བྱ་བ་མ་ཡིན་ནོ་ཞེས་སྟོན་པར་བྱེད་དོ། །གལ་ཏེ་བཅུ་ནི་བསྒོམ་པས་སྤང་བྱ་ཡིན། ལྔ་ཡང་ཞེས་བཤད་ན་ཡང་ཅིའི་ཕྱིར། གཟུགས་མིན་དྲུག་པ་མིན་སྐྱེས་མིན། །ཞེས་བརྗོད་ ཅེ་ན། ངེས་པར་བྱ་བའི་ཕྱིར་རོ། །ཐ་མ་གསུམ་ནི་རྣམ་གསུམ་མོ། །ཞེས་བཤད་པ་དེར་ཉོན་མོངས་པ་ཅན་མ་ཡིན་པ་ནི་མཐོང་བས་སྤང་བར་བྱ་བ་མ་ཡིན་ལ། ཉོན་མོངས་པ་ཅན་ཡང་རྣམ་པར་རིག་བྱེད་མ་ཡིན་པའི་གཟུགས་མཐོང་བས་སྤང་བར་བྱ་བ་མ་ཡིན་ཞིང་། ཉོན་ མོངས་པ་ཅན་ཡིན་ཡང་ཚོར་བ་ལ་སོགས་པ་དྲུག་པ་ལས་སྐྱེས་པ་མ་ཡིན་པས་མཐོང་བས་སྤང་བར་བྱ་བ་མ་ཡིན་ནོ་ཞེས་ངེས་པར་བྱེད་པ་མ་ཡིན་ཏེ། ཉོན་མོངས་པ་ཅན་མ་ཡིན་པ་ནི་མཐོང་བས་སྤང་བར་བྱ་བ་ཅུང་ཟད་ཀྱང་མེད་ལ་གཟུགས་ཀྱང་མ་ཡིན་ཏེ་མིག་ལ་སོགས་པ་བཞིན་ཞེས་ རྗེས་སུ་འགྲོ་བ་སྟོན་པར་བྱེད་དོ། །ཉོན་མོངས་པ་ཅན་མ་ཡིན་པ་དང་ལུང་མ་བསྟན་པ་ཡང་ངོ་། །སོ་སོའི་སྐྱེ་བོ་ཉིད་ནི་མ་བསྒྲིབས་ལ་ལུང་དུ་མ་བསྟན་པའོ་ཞེས་བྱ་བའི་ཐ་ཚིག་གོ། །འདིས་ཕྱོགས་ཆོས་དང་གཏན་ཚིགས་སྟོན་པར་བྱེད་དོ། །མི་དགེ་བའི་ ཆོས་ཐམས་ཅད་ཀྱི་གནས་སུ་གྱུར་པ་དེ་ཉོན་མོངས་པ་ཅན་མ་ཡིན་པ་མི་རིགས་སོ། །དེ་ལྟར་ལོག་པར་རྟོག་པ་ལ་དེ་རབ་ཏུ་བསྒྲུབ་པར་བྱ་བའི་ཕྱིར། དགེ་བའི་རྩ་བ་ཀུན་ཏུ་ཆད་པ་དང་ཞེས་རྒྱ་ཆེར་གསུངས་སོ། །གལ་ཏེ་དེ་དགེ་བ་ཡིན་པར་གྱུར་ན་ནི་དགེ་བའི་རྩ་བ་ཆད་པ་རྣམས་ སོ་སོའི་སྐྱེ་བོ་མ་ཡིན་པར་འགྱུར་ཏེ། དགེ་བ་ཡིན་པའི་ཕྱིར་དང་དེ་ཡང་ཆད་པའི་ཕྱིར་རོ། །དེ་ནི་འདོད་པ་ཡང་མ་ཡིན་ཏེ་དེའི་ཕྱིར་དགེ་བ་ཡང་མ་ཡིན་ནོ། །མི་དགེ་བ་ཡང་མ་ཡིན་ཏེ་འདོད་ཆགས་དང་བྲལ་བ་རྣམས་ཀྱང་དེ་དང་ལྡན་པའི་ཕྱིར་རོ། །གཞན་དུ་སོ་སོ་སྐྱེ་བོ་ནི་འདོད་པའི་ འདོད་ཆགས་བྲལ་བའི་སོ་སོ་སྐྱེ་བོར་འགྱུར་རོ། །སྐྱེ་བ་དང་རྟེན་དང་འབྲེལ་བའི་ཕྱིར་དེ་དང་ལྡན་པར་འགྱུར་ཞིང་གཞན་དུ་སྐྱེ་བ་ནི་ཁམས་དང་ས་གཞན་དང་ལྡན་པར་འགྱུར་ཏེ། དེའི་ཕྱིར་ཉོན་མོངས་པ་ཅན་ཡང་མི་རིགས་སོ། །ལུས་དང་ངག་གི་ལས་ནི་གཟུགས་ཡིན་ན། གཟུགས་ནི་ཉོན་མོངས་པ་ཅན་ནམ་ཉོན་མོངས་པ་ཅན་མ་ཡིན་ཡང་རུང་སྟེ། མཐོང་བས་སྤང་བར་བྱ་བ་ཅུང་ཟད་མེད་དོ། །ཅིའི་ཕྱིར་ཞེ་ན། བདེན་པ་རྣམས་ལ་ལོག་པར་རྟོག་པའི་ཕྱིར་དང་། རྩ་བའི་ཆོས་ཉིད་དུ་ཡོད་པ་ལ་མི་དམིགས་པའི་ཕྱིར་རྒྱུ་ཁྱད་པར་མེད་པའོ། །མཐོ