Luận tạng Tây Tạng (Tengyur) — Tập 209

་འོང་བ་དང་ཡིད་དུ་མི་འོང་བའི་ངོ་བོས་མི་དམིགས་ཏེ་གཟུགས་ཙམ་དམིགས་པའི་ཕྱིར་རོ། །དེ་བཞིན་དུ་རྣ་བའི་རྣམ་པར་ཤེས་པ་ལ་སོགས་པ་རྣམས་ལ་ཡང་ཇི་སྲིད་སྲིད་པ་བཞིན་དུ་བརྗོད་པར་བྱའོ། །གང་ཞིག་མདོ་ལས། རྣམ་པར་ཤེས་པར་
བྱེད་པས་ན། །ཞེས་བྱེད་པ་པོ་བསྟན་པ་ནི་རང་གི་ངོ་བོ་ཙམ་སྟེ། དེ་ལས་ཐ་དད་པའི་རྣམ་པར་ཤེས་པ་པོར་རྟོག་པ་དགག་པར་བྱ་བའི་ཕྱིར་རོ། །དཔེར་ན་གྲིབ་མ་འགྲོའོ་ཞེས་བྱ་བ་ལྟ་བུ་སྟེ། དེ་ནི་བར་མཚམས་མེད་པར་ཡུལ་གཞན་དག་ཏུ་སྐྱེ་བ་ན་ཅུང་ཟད་ཀྱང་མི་བྱེད་པའི་བྱེད་པ་པོར་བརྟན་པ་
འཐོབ་པ་དེ་བཞིན་དུ་རྣམ་པར་ཤེས་པ་ཡང་ཡུལ་གཞན་དག་ཏུ་རྒྱུན་ཆགས་སུ་སྐྱེ་བ་ན་ཅུང་ཟད་ཀྱང་མི་བྱེད་ཀྱང་ཡུལ་དེ་དང་དེ་ཤེས་པར་བྱེད་དོ་ཞེས་བྱེད་པ་པོའི་བརྟན་པ་འཐོབ་པོ། །གང་ལས་ཤེ་ན། གྲེ་སྐྱེས་རྣམ་པར་ཤེས་པར་བྱེད་དོ་ཞེས་ནི་ང་མི་སྨྲའོ་ཞེས་གཞན་ལས་བྱེད་པ་པོ་བཀག་པའི་ཕྱིར་རོ། །
སྐད་ཅིག་མའི་ངོ་བོར་བསྟན་པ་ལས་ཐ་དད་པའི་རྣམ་པར་ཤེས་པར་རྟོག་པ་དགག་པའི་ཕྱིར་རོ། །གཞན་དག་ན་རེ་དཔེར་ན་གྲིབ་མ་འགྲོའོ་ཞེས་པ་དེ་ཡང་ཡུལ་གཞན་དུ་རྒྱུད་ལ་བྱེད་པ་པོ་བསྟན་ཏོ་ཞེས་ཟེར་རོ། །འདིས་ཀྱང་དུས་མངོན་པར་འཕངས་པའི་ཕྱིར་རྣམ་པར་ཤེས་པའི་ཚོགས་དྲུག་ནི་
རྣམ་པར་ཤེས་པའི་ཕུང་པོའོ་ཞེས་བརྗོད་དོ། །ཡིད་ཀྱི་སྐྱེ་མཆེད་ཀྱང་དེ་ཡིན། ཁམས་བདུན་དག་ཏུའང་འདོད་པ་སྟེ། །ཞེས་བྱ་བ་ལ་གཉི་ག་ལ་འང་གི་སྒྲ་ནི་རྣམ་པར་ཤེས་པའི་རྫས་རེ་རེ་ཞིང་ཡིད་ཀྱི་སྐྱེ་མཆེད་ཡིན་གྱི་འདི་བཏགས་པ་ཚོགས་པ་པ་ནི་མ་ཡིན་པའོ་ཞེས་བསྟན་པར་བྱ་བའི་ཕྱིར་རོ། །

འདིར་ཞེས་བྱ་བ་ནི་འདུས་བྱས་དང་འདུས་མ་བྱས་ཞེས་འཆད་པར་རོ། །གཞན་དག་ན་རེ་ཟག་བཅས་དང་ཟག་པ་མེད་པར་རོ་ཞེས་ཟེར་རོ། །རྣམ་པར་ཤེས་པའི་ཕུང་པོ་ནི་རྣམ་པར་ཤེས་པ་དྲུག་གི་བདག་ཉིད་ཡིན་ལ་དེ་དག་ཀྱང་ཁམས་རྣམ་པར་གཞག་པ་ནི་མིག་གི་རྣམ་པར་ཤེས་པའི་ཁམས་
ནས་ཡིད་ཀྱི་རྣམ་པར་ཤེས་པའི་ཁམས་ཀྱི་བར་རོ་ཞེས་བསྟན་པ་ཉིད་དེ། དེའི་ཕྱིར་ཡིད་ཀྱི་ཁམས་རྣམ་པར་ཤེས་པའི་ཕུང་པོས་མ་བསྡུས་པ་ནི་ཡོད་པ་མ་ཡིན་ནོ་ཞེས་དེ་ལྟར་ཐུགས་ལ་བཞག་ནས་ཡང་དེ་དག་ལས་གཞན་པ་ཡིད་ཀྱི་ཁམས་དེ་དག་གང་ཡིན་ཞེས་འདྲི་སྟེ། དྲུག་པོ་འདས་མ་
ཐག་པ་ཡི། །ཞེས་རྒྱ་ཆེར་འབྱུང་བ་ལ་དེ་མ་ཐག་པ་སྨོས་པ་ནི་བར་དང་བཅས་པ་རྣམ་པར་གཅད་པའི་ཕྱིར་རོ། །འདས་པ་སྨོས་པ་ནི་མ་འོངས་པ་རྣམ་པར་གཅད་པར་བྱ་བའི་ཕྱིར་རོ། །རྣམ་པར་ཤེས་པ་སྨོས་པ་ནི་འདས་མ་ཐག་པའི་ཚོར་བ་ལ་སོགས་པ་རྣམ་པར་གཅད་པར་བྱ་བའི་ཕྱིར་རོ། །
ནིའི་སྒྲ་ནི་རྣམ་པར་ཤེས་པ་དྲུག་ལས་དེ་མ་ཐག་ཏུ་འདས་པ་ཁོ་ན་ཡིན་གྱི་ཡིན་གྱི་དེ་ལས་ཐ་དད་པ་ནི་ཡོད་པ་མ་ཡིན་ནོ་ཞེས་ངེས་པར་གཟུང་བའི་དོན་ཏོ། །འདིར་འདས་མ་ཐག་པ་ནི་རིགས་མཐུན་པའི་སྐད་ཅིག་མས་ཆོད་པ་འདས་པ་ཡིན་གྱི་རིགས་མི་མཐུན་པའི་སྐད་ཅིག་མའི་
དེ་མ་ཐག་པ་ནི་མ་ཡིན་ཏེ། དེ་ལྟར་ན་འགོག་པའི་སྙོམས་པར་འཇུག་པ་ལས་ལྡང་བའི་སེམས་ལ་ཡང་ཡོད་པ་ཉིད་དུ་འགྱུར་རོ། །དཔེར་ན་བུ་དེ་ཉིད་དུས་དང་གནས་སྐབས་ཀྱིས་ཆོད་པ་ན་གཞན་གྱི་བར་འགྱུར་བ་དང་། འབྲས་བུ་དེ་ཉིད་དུས་དང་གནས་སྐབས་ཀྱིས་ཆོད་པ་ན་གཞན་གྱི་ས་བོན་ཡིན་
པ་ལྟ་བུའོ། །དེ་བཞིན་དུ་མིག་ལ་སོགས་པའི་རྣམ་པར་ཤེས་པ་གཞན་ལ་བརྟེན་པ་དེ་ཉིད་དུས་དང་གནས་སྐབས་ཀྱིས་ཆོད་པ་ན་གཞན་གྱི་རྟེན་དུ་འགྱུར་རོ། །དེ་ལྟར་ན་དེ་ཉིད་བརྟེན་པ་ཡིན་པའི་ཕྱིར་རྣམ་པར་ཤེས་པ་ཡིན་ལ་རྟེན་ཡིན་པའི་ཕྱིར་ཡིད་ཡིན་ནོ་ཞེས་བྱ་བར་འགྲུབ་པར་འགྱུར་རོ། །
སློབ་དཔོན་འཕགས་པའི་འབངས་ན་རེ་མིག་གི་རྣམ་པར་ཤེས་པ་ནི་ཡིད་ཀྱི་རྣམ་པར་ཤེས་པ་ལ་ཡིད་དུ་འགྱུར་རོ། །མིག་གི་རྣམ་པར་ཤེས་པ་ལ་སོགས་པ་རྣམས་དེ་མ་ཐག་ཏུ་དེ་མི་སྐྱེ་བ་མ་ཡིན་པས་ལུས་ཀྱི་རྣམ་པར་ཤེས་པའི་བར་ཉིད་ཡིད་དུ་འགྱུར་ལ། དེ་ལས་གཞན་པའི་རྣམ་པར་ཤེས་

པ་ནི་ཡིད་ཀྱི་རྣམ་པར་ཤེས་པ་སྟེ་དྲུག་པོ་རྣམས་ཀྱང་ཡིད་དུ་འགྱུར་རོ་ཞེས་ཟེར་རོ། །འདི་ཡང་ངེས་པའི་རྒྱུ་མེད་པའི་ཕྱིར་སེམས་ཇི་ལྟ་བར་ཐམས་ཅད་ཀྱི་ཕྱི་མ་མི་སྲིད་དོ། །དེའི་ཕྱིར་མ་ལ་ཡང་སོ་སོར་བསྟན་པར་བྱའོ། །གཅིག་གི་ནང་དུ་གཅིག་འདུས་པའི་ཕྱིར་
ཞེས་བྱ་བ་ལ་གྲངས་བསྒྲུབ་པ་ནི་དོན་གྱི་དབང་གིས་འགྱུར་གྱི་རིམ་པའི་དབང་གིས་མ་ཡིན་ནོ། །དེ་ལ་གལ་ཏེ་ཡིད་ཀྱི་ཁམས་དྲུག་གི་ནང་དུ་འདུས་སོ་ཞེས་བྱ་བ་ཡིན་ན་ནི་དེ་ལྟ་ནི་ཡིད་ཀྱི་ཁམས་མ་གཏོགས་པ་གཞན་ཁམས་བཅུ་བདུན་རྫས་སུ་ཡོད་པར་འགྱུར་རོ། །ཅི་སྟེ་རྣམ་པར་ཤེས་
པའི་ཁམས་དྲུག་ཡིད་ཀྱི་ནང་དུ་འདུ་ན་ནི་དེ་ལྟ་ན་གཟུགས་ཅན་བཅུ་དང་ཡིད་ཀྱི་ཁམས་དང་ཆོས་ཀྱི་ཁམས་ཞེས་བྱ་བ་བཅུ་གཉིས་སུ་འགྱུར་རོ། །དེ་ལྟའང་ཡིན་མོད་ཀྱི་ཞེས་བྱ་བ་ལ་དངོས་སུ་ན་དེ་ལྟར་བཅུ་བདུན་ནམ་བཅུ་གཉིས་ཡིན་མོད་ཀྱི་འོན་ཀྱང་རྟེན་དང་བརྟེན་པའི་དབྱེ་བས་ཕྱེ་ན།
དྲུག་པའི་རྟེན་ནི་རབ་བསྒྲུབ་ཕྱིར། །ཁམས་ནི་བཅོ་བརྒྱད་དག་ཏུ་འདོད། །ཅེས་བྱ་སྟེ་གང་གི་ཕྱིར་ཇི་ལྟར་རྣམ་པར་ཤེས་པ་རྣམས་དམིགས་པ་མེད་པ་ན་སྐྱེ་བར་མི་འགྱུར་བ་དེ་བཞིན་དུ་རྟེན་མེད་ན་ཡང་ཡིན་ལ། དྲུག་པ་ཡིད་ཀྱི་རྣམ་པར་ཤེས་པའི་ཁམས་ལ་ནི་ཇི་ལྟར་མིག་ལ་སོགས་པའི་རྣམ་
པར་ཤེས་པ་རྣམས་ལ་མིག་ལ་སོགས་པ་ལྟ་བུར་རྟེན་གཞན་ཡོད་པ་མ་ཡིན་ནོ། །དེའི་ཕྱིར་ཡིད་ཀྱི་རྣམ་པར་ཤེས་པའི་ཁམས་ཀྱི་རྟེན་རབ་ཏུ་བསྒྲུབ་པར་བྱ་བའི་ཕྱིར་ཡིད་ཀྱི་ཁམས་བསྟན་ཏོ། །ཡང་ཇི་ལྟར་འགགས་ཟིན་པ་ད་ལྟར་བའི་རྟེན་དུ་བརྗོད་ཅེ་ན། དེ་སྐྱེ་བ་ལ་ཉེ་བའི་རྒྱུར་གྱུར་པའི་
ཕྱིར་རོ། །ཇི་ལྟར་གཟུགས་ཡོད་ཀྱང་མིག་མེད་པར་དེའི་རྣམ་པར་ཤེས་པ་ཕྱི་མ་མི་སྐྱེ་བ་དེ་བཞིན་དུ་ཡུལ་རྣམས་ཡོད་ཀྱང་རྣམ་པར་ཤེས་པ་སྔ་མ་འགགས་པ་མེད་པར་རྣམ་པར་ཤེས་པ་ཕྱི་མ་མི་འབྱུང་ངོ་། །དེ་ཉིད་ཀྱི་ཕྱིར་འགགས་མ་ཐག་པ་ཞེས་བརྗོད་ཀྱི་ཆེས་སྔ་བར་འགགས་པ་ནི་མ་ཡིན་ནོ། །
དེས་གོ་སྐབས་ཕྱིར་ཡང་མ་སྐྱེ་བའི་ཕྱིར་དེའི་ཕྱིར་འདི་ནི་འདིར་རྟེན་གྱི་དངོས་པོའོ། །ད་ལྟར་བ་ཁོ་ནས་དེའི་རྟེན་གྱི་བྱ་བ་བྱེད་དེ། དེ་མཚུངས་པ་དེ་མ་ཐག་པའི་རྐྱེན་གྱི་འབྲས་བུ་ཉིད་དུ་ཡོངས་སུ་གཟུང་བའི་ཕྱིར་རོ། །འདས་པས་ནི་བྱ་བ་བྱས་ཟིན་པ་ཁོ་ནའོ། །གལ་ཏེ་རྟེན་སེམས་ཡིན་པའི་ཕྱིར་

སེམས་ལས་བྱུང་བ་ཉིད་དུ་ཐལ་ལོ་ཞེ་ན་དེའི་རྗེས་སུ་མི་འཇུག་པའི་ཕྱིར་ཐལ་བ་མེད་དོ། །འོན་ཏེ་ཅིའི་ཕྱིར་རྣམ་པར་ཤེས་པ་ཉིད་དུ་རྣམ་པར་གཞག་ཅེ་ན། ཡིད་ཀྱི་ཁམས་སེམས་ལས་བྱུང་བ་མ་ཡིན་ཡང་མཚུངས་པ་དེ་མ་ཐག་པའི་རྐྱེན་ངེས་པ་ལས་སེམས་སུ་ངེས་པ་དེ་སེམས་བྱུང་དུ་ངེས་པ་
ལས་ཡིད་ཀྱི་ཁམས་མ་ཡིན་ནོ། །འོ་ན་དེ་ལྟར་འབྱུང་བ་ཆེན་པོ་རྣམས་ལ་ཡིད་ཀྱི་ཁམས་ཉིད་ཡོད་པར་འགྱུར་ཏེ་ངེས་པའི་ཕྱིར་རོ། །སྐྱེ་བ་གཅིག་པུ་ལ་ཡིད་ཀྱི་ཁམས་མེད་ཅིང་ཡིད་ཀྱི་ཁམས་ཞེས་ཀྱང་མི་རུང་ངོ་། །རྣམ་པར་ཤེས་པ་རྒྱུ་ཉིད་ཀྱི་ཕྱིར་སེམས་ལས་བྱུང་བ་རྣམས་རྣམ་པར་
ཤེས་པའི་རྟེན་དུ་མི་རུང་ངོ་། །དེ་ལ་རྟེན་དྲུག་ཚན་ནི་མིག་ལ་སོགས་པ་ཡིད་ཀྱི་མཐར་ཐུག་པའོ། །བརྟེན་པ་དྲུག་ཚན་ནི་མིག་གི་རྣམ་པར་ཤེས་པ་ལ་སོགས་པ་ཡིད་ཀྱི་རྣམ་པར་ཤེས་པ་ལ་ཐུག་པའོ། །དམིགས་པ་དྲུག་ཚན་ནི་གཟུགས་ལ་སོགས་པ་ཆོས་ཀྱི་ཁམས་ཀྱི་མཐར་ཐུག་པའོ། །
འོ་ན་ནི་དགྲ་བཅོམ་པ་ཞེས་བྱ་བ་ལ་ཐ་མ་ནི་གང་ནས་མཚམས་མི་སྦྱོར་བ་ཡོངས་སུ་མྱ་ངན་ལས་འདས་པའི་དུས་ཀྱི་ཚེ་ཐམས་ཅད་ཀྱི་ཐ་མ་གང་ཡིན་པའོ། །དེ་ཉིད་ལ་རྒྱུ་སྨྲས་པ་ནི། དེ་གང་གི་ཞེས་རྒྱས་པར་འབྱུང་བ་སྟེ། རྣམ་པར་ཤེས་པ་འདས་མ་ཐག་པ་ལ་ཡིད་ཅེས་བྱ་བ་ལ། དེ་གང་གི་འདས་
མ་ཐག་པར་འགྱུར་བ་དགྲ་བཅོམ་པའི་སེམས་ཐ་མ་ལས་སེམས་གཞན་སྐྱེ་བ་ཡང་མ་ཡིན་ནོ། །དེ་ཡང་ཡིད་ཀྱི་ངོ་བོར་ཞེས་བྱ་བ་ལ་ཕྱི་མའི་རྟེན་གྱི་ངོ་བོར་གནས་པའི་ཕྱིར་ན། དེར་ཡིད་ཉིད་མ་ཉམས་སོ་སྙམ་དུ་དགོངས་སོ། །གལ་ཏེ་དེ་རྟེན་གྱི་ངོ་བོར་རྣམ་པར་མ་བཞག་ན་ཅིའི་ཕྱིར་ཕྱི་མ་
མི་སྐྱེ་ཞེ་ན། དེའི་ཕྱིར་རྒྱུ་གཞན་མ་ཚང་བའི་ཕྱིར་རྣམ་པར་ཤེས་པ་ཕྱི་མ་མི་སྐྱེ་བར་ཟད་དོ་ཞེས་གསུངས་ཏེ། དེ་ལ་ཡིད་ལས་མཇུག་ཐོགས་སུ་རྣམ་པར་ཤེས་པ་སྐྱེ་བའི་རྒྱུ་གཞན་ནི་མཐོང་བའི་ཆོས་ཀྱི་རྣམ་པར་སྨིན་པ་ལྷག་མ་དང་འགྲོ་བར་ཉིང་མཚམས་སྦྱོར་བའི་ཉོན་མོངས་པའི་ཐོབ་པ་ཡིན་ནོ། །
དགྲ་བཅོམ་པའི་རྣམ་པར་ཤེས་པ་ཐ་མ་ལ་ནི་ཡིད་ཀྱི་ངོ་བོར་གནས་ཀྱང་གཉི་ག་མེད་པས་རྣམ་པར་ཤེས་པ་ཕྱི་མ་མི་སྐྱེའོ། །གལ་ཏེ་དྲུག་པོ་འདས་མ་ཐག་པའི་རྣམ་པར་ཤེས་པ་ཡིད་ཉིད་ཡིན་ན་མིག་ལ་སོགས་པའི་རྣམ་པར་ཤེས་པ་རྣམས་ཀྱང་ཡིད་ལ་བརྟེན་ནས་སྐྱེ་བས་ཏེ་ཡིད་ལ་བརྟེན་ནས་ཆོས་

རྣམས་ཀྱང་སྐྱེ་བར་བརྗོད་པར་བྱའི་ཡིད་ཀྱི་རྣམ་པར་ཤེས་པ་ལས་མ་ཡིན་ཏེ། ཡིད་ཀྱི་རྐྱེན་ཉིད་མ་བཀག་པར་མིག་ལ་བརྟེན་ནས་ཞེས་གསུངས་པ་ཡིན་ནོ། །འོ་ན་འདི་རྐྱེན་གྱི་གཙོ་བོར་བསྟན་པ་ཅི་ཞེ་ན། གླན་ཀའི་སྐབས་མེད་དོ། །དེ་ལ་ཕུང་པོ་དག་
གིས་ནི་ཞེས་བྱ་བ་ལ་སོགས་པ་ལ། འདུས་བྱས་ཆོས་རྣམས་དེ་དག་ཀྱང་། །ཞེས་བྱ་བ་དེར་ཟག་པ་དང་བཅས་པ་དང་ཟག་པ་མེད་པ་ཐམས་ཅད་བསྡུས་པའི་ཕྱིར་ཕུང་པོ་དག་གིས་ནི་འདུས་བྱས་ཐམས་ཅད་བསྡུས་སོ། །གང་དག་ཟག་བཅས་ཉེར་ལེན་པའི། །ཕུང་པོའང་ཞེས་
བྱ་བ་དེར་ཟག་པ་དང་བཅས་པ་རྣམས་ཁོ་ན་ཉེ་བར་ལེན་པའི་རྒྱུར་གྱུར་པའི་ཕྱིར་རམ་ཉེ་བར་ལེན་པ་ལས་བྱུང་བའི་ཕྱིར་རམ་ཉེ་བར་ལེན་པ་ལ་རག་ལུས་པའི་ཕྱིར་ཉེ་བར་ལེན་པའི་ཕུང་པོ་དག་གིས་ནི་ཟག་པ་དང་བཅས་པ་ཐམས་ཅད་བསྡུས་སོ། །སྐྱེ་མཆེད་དང་ཁམས་དག་གིས་ནི་ཆོས་ཐམས་ཅད་བསྡུས་
སོ། །ཆོས་ཐམས་ཅད་ཀྱང་ཕུང་པོ་ལྔ་དང་འདུས་མ་བྱས་ཀྱིས་སོ། །འདི་ནི་རེ་ཞིག་རྒྱས་པའི་སྒོ་ནས་ཆོས་ཐམས་ཅད་བསྡུས་པ་ཡིན་ལ། བསྡུས་པ་ནི་ཕུང་པོ་དང་ནི་ཞེས་རྒྱ་ཆེར་འབྱུང་སྟེ། དང་གི་སྒྲ་ནི་ཀུན་སྡུད་པའི་དོན་ཏོ། །འདི་ཅི་ལྟར་ཤེས་པར་བྱ་ཞེ་ན། གཟུགས་ཀྱི་ཕུང་པོ་དང་། ཡིད་ཀྱི་སྐྱེ་མཆེད་
དང་ཆོས་ཀྱི་ཁམས་བསྡོམས་པ་ཉིད་ཀྱིས་དེ་ལྟར་ཤེས་པར་བྱའི་རེ་རེས་ནི་མ་ཡིན་པའོ། །དེ་ལ་གཟུགས་ཀྱི་ཕུང་པོས་ནི་གཟུགས་ཅན་གྱི་ཁམས་བཅུ་དང་རྣམ་པར་རིག་བྱེད་མ་ཡིན་པའོ། །ཡིད་ཀྱི་སྐྱེ་མཆེད་ཀྱིས་ནི་སེམས་ཀྱི་ཁམས་བདུན་ནོ། །ཆོས་ཀྱི་ཁམས་ཀྱིས་ནི་ཚོར་བ་ལ་
སོགས་པ་གསུམ་དང་འདུས་མ་བྱས་དང་རྣམ་པར་རིག་བྱེད་མ་ཡིན་པའོ། །ཡང་ཅིའི་ཕྱིར་གསུམ་པོ་འདི་དག་ཁོ་ནས་ཡིན་གྱི་གཞན་དག་གིས་སམ་གཉིས་སམ་གཅིག་གིས་མ་ཡིན་ཞེ་ན། དེའི་ཕྱིར་བསྡུ་བ་དེ་ནི་ཞེས་རྒྱ་ཆེར་གསུངས་ཏེ། གང་དང་གང་ནས་བྱུང་ཡང་རུང་ཞེས་བྱ་བ་ལ།
ཕུང་པོ་དང་སྐྱེ་མཆེད་དང་ཁམས་དག་གིས་ཡིན་པ་འབའ་ཞིག་ཏུ་མ་ཟད་ཀྱི། འོ་ན་ཅི་ཞེ་ན་གཞན་ཡང་བདེན་པ་དང་འགྲོ་བ་དང་ཁམས་དང་རྟེན་ཅིང་འབྲེལ་པར་འབྱུང་བས་བསྡུ་བ་ཡང་རིག་པར་བྱའོ། །རང་གི་ངོ་བོ་ཉིད་ཀྱིས་ཏེ་གཞན་གྱི་དངོས་པོས་བསྡུས་པ་ནི་མ་ཡིན་ནོ། །འོ་ན་ཕུང་པོ་

གསུམ་གྱིས་འཕགས་པའི་ལམ་ཡན་ལག་བརྒྱད་ཅི་ལྟར་བསྡུས་ཏེ། ཡང་དག་པའི་རྟོག་པ་དང་རྩོལ་བ་དག་གིས་ཤེས་རབ་ཀྱི་ཕུང་པོ་བསྡུས་པར་མི་འགྱུར་ཞིང་ཡང་དག་པའི་དྲན་པས་ཏིང་ངེ་འཛིན་གྱི་ཕུང་པོ་བསྡུས་པ་མ་ཡིན་ཏེ་དེའི་རང་བཞིན་མ་ཡིན་པའི་ཕྱིར་རོ། །དེ་ཡང་ལྟའོ་
ཞེས་པ་གཞན་གྱི་དངོས་པོས་བསྡུས་ཀྱང་ཆོས་རྣམས་ལ་འདོད་པར་བྱའོ་ཞེས་པས་རིགས་མཐུན་པ་གཞན་དག་གཞན་གྱི་དངོས་པོ་ཉིད་ཀྱི་ཁྱད་པར་ལས་ངེས་པ་འདི་ནི་ཅི་ལས་ཡིན་ཞེ་ན། ཡང་དག་པའི་རྟོག་པ་དང་རྩོལ་བ་དག་ཉིད་ཀྱིས་ཤེས་རབ་ཀྱི་ཕུང་པོ་བསྡུས་ཀྱི་ལམ་གྱི་ཡན་ལག་
ལྷག་མ་རྣམས་ནི་མ་ཡིན་ནོ། །ཅི་སྟེ་གསལ་བའི་ཕྱིར་ཡང་དག་པའི་རྟོག་པ་དང་རྩོལ་བ་དག་ཤེས་རབ་ཀྱི་མཚན་ཉིད་བསྟན་ལ་ཏིང་ངེ་འཛིན་ལ་སོགས་པ་མ་ཡིན་ཞིང་། དྲན་པ་དང་ཏིང་ངེ་འཛིན་གྱི་མཚན་ཉིད་ཡང་དག་པའི་རྟོག་པ་ལ་སོགས་པ་མ་ཡིན་པས་ཡོད་པར་ངེས་པའི་རྒྱུ་གྲུབ་
པོ། །འོ་ན་རང་བཞིན་གྱིས་བསྡུས་པའི་མཚན་ཉིད་མེད་པར་བསྡུས་པ་ཁས་བླངས་པའི་ཕྱིར། ཇི་ལྟར་གཞན་གྱི་དངོས་པོ་དང་མཚུངས་པར་ལྡན་པས་ཐམས་ཅད་ཀྱི་ཐམས་ཅད་དུ་མཚུངས་པར་ལྡན་པ་ཉིད་གཞན་གྱི་ཆོས་བསྡུས་པ་ལ་ཡང་ཅིའི་ཕྱིར་འདོད་པར་མི་བྱེད་ཅེ་ན། མཚུངས་པར་
ལྡན་པ་ནི་དམིགས་པ་དང་བཅས་པ་རྣམས་ཉིད་དེ། དེ་ཡང་རྟེན་དང་དམིགས་པ་དང་རྣམ་པ་དང་དུས་དང་རྫས་ཀྱི་རྣམ་པ་སྨོས་པའི་རྒྱུ་མཚན་གྱིས་ཐམས་ཅད་ཀྱི་ཐམས་ཅད་དུ་མི་རུང་ངོ་། །བསྡུ་བའི་དངོས་པོ་ནི་ཆོས་རྣམས་ཐམས་ཅད་ཀྱི་གཞན་གྱི་དངོས་པོའི་ཁྱད་པར་ལ་སྟེ། ངེས་
པའི་རྒྱུ་མེད་པའི་ཕྱིར་ཐམས་ཅད་ཀྱི་ཐམས་ཅད་དུ་མ་ཡིན་ནོ། །འོ་ན་གལ་ཏེ་དེ་ལྟར་ཕུང་པོ་གསུམ་གྱིས་ལམ་བསྡུས་སོ་ཞེས་བརྗོད་པ་མིང་ཙམ་ཞིག་གམ་ཅི་ཞེ་ན། འདི་ནི་བསྡུ་བའི་སྒྲ་དང་རྗེས་སུ་མཐུན་པས་བརྗོད་པའོ། །རང་བཞིན་གྱིས་བསྡུ་བ་འདི་ནི་འདི་ལྟར་དངོས་པོ་རྣམས་ཀྱི་རང་
བཞིན་ཉིད་དོ། །དེ་ཉིད་ཀྱི་ཕྱིར་རང་བཞིན་གྱིས་བསྡུས་པ་ཐམས་ཅད་ནི་དངོས་པོ་ལ་མ་ལྟོས་པའི་ཕྱིར་དང་རྒྱུ་མེད་པའི་ཕྱིར་འདི་ཇི་ལྟར་ཁོང་དུ་ཆུད་པར་བྱ་ཞེ་ན། གཞན་གྱི་དངོས་པོ་དང་མི་ལྡན་པ་ནི་མིག་སྟེ་འདིར་རྣ་བའི་དངོས་པོ་དང་མི་ལྡན་པའོ། །མི་ལྡན་གང་དང་གང་ཡིན་པ་དེ་དང་དེ་

ཉིད་ཀྱིས་བསྡུས་སོ་ཞེས་བྱ་བ་རིགས་མ་ཡིན་པའི་སྨྲ་བར་ཁོང་དུ་ཆུད་པར་བྱའོ། །དངོས་པོ་རྣམས་ཀྱིས་བསྡུས་པའི་རང་བཞིན་ནི་འདིར་རང་བཞིན་གྱི་རང་གི་ངོ་བོ་ནི་མ་ཡིན་ནོ་ཞེས་གཞན་དག་ཟེར་རོ། །རང་བཞིན་ནི་རང་གི་མཚན་ཉིད་དོ། །རང་གི་མཚན་ཉིད་ཀྱང་
དངོས་པོ་རྣམས་ཕན་ཚུན་འབྱེད་པར་བྱེད་པ་ཡིན་ལ་གང་ལ་ཕྱེ་བ་དེ་ཉིད་དུ་བསྡུ་བ་ལ་མི་རིག་པ་མེད་དོ། །དེ་ལྟ་མ་ཡིན་ན་དབྱེ་བ་མེད་པས་བསྡུ་བ་ཉིད་དུ་མི་འགྱུར་ཏེ། བསྡུ་བ་ནི་རྫས་གཞན་པ་རྣམས་གཅིག་ཏུ་བྱེད་པ་ཉིད་ཡིན་པ་དེའི་ཕྱིར་འདིར་དོན་དུ་རུང་ངོ་། །གཅེར་བུ་རྣམས་ཀྱང་རང་བཞིན་
མངོན་པར་འདོད་པ་འདིའི་མིང་གི་དོན་ཡང་ཅི་ཞེ་ན། གང་གི་ཕྱིར་རྣམ་པར་རྟོག་པ་མེད་པའི་ཡེ་ཤེས་ཀྱི་སྤྱོད་ཡུལ་གྱི་དངོས་པོ་གཞན་རྣམ་པར་བཅད་པས་སྟོན་པར་བྱེད་དོ། །དེ་ཉིད་ཀྱི་ཕྱིར་བསྟན་བཅོས་ལས་ཀྱང་མིག་གི་རྣམ་པར་ཤེས་པས་སྔོན་པོ་རྣམ་པར་ཤེས་ཀྱི་སྔོན་པོའོ་སྙམ་དུ་ནི་མ་
ཡིན་ནོ། །ཡིད་ཀྱི་རྣམ་པར་ཤེས་པས་ནི་སྔོན་པོ་རྣམ་པར་ཤེས་ཤིང་སྔོན་པོའོ་སྙམ་དུ་ཡང་ངོ་ཞེས་གསུངས་སོ། །སློབ་དཔོན་འདུས་བཟང་ན་རེ། གཞན་གྱི་དངོས་པོས་བསྡུས་ན་ནི་ཆོས་གཅིག་སྐྱེས་པ་དང་འཇིག་པས་ཆོས་ཐམས་ཅད་སྐྱེ་བ་དང་འཇིག་པ་མི་འདོད་པ་ཉིད་དུ་ཐལ་བར་འགྱུར་ལ།
རིགས་གཅིག་སྤངས་པ་ལས་ཐམས་ཅད་སྤངས་པར་འགྱུར་བས་གོང་མའི་གཉེན་པོ་དོན་མེད་པ་ཉིད་དོ། །རང་གི་ངོ་བོས་བསྡུས་པར་བསྟན་པའི་ཕྱིར་འདི་ལྟར་གཞན་གྱི་ངོ་བོས་བསྡུས་པར་ཡང་མི་འགྱུར་ཏེ་འདི་ལ་སྐྱོན་མེད་དོ། །དཔེར་ན་མིག་གི་དབང་པོ་ནི་གཟུགས་ཀྱི་ཕུང་པོ་དང་ཞེས་རྒྱ་ཆེར་
འབྱུང་སྟེ། གཟུགས་ཀྱི་མཚན་ཉིད་དང་རྗེས་སུ་འབྲེལ་བའི་ཕྱིར་གཟུགས་ཀྱི་ཕུང་པོས་སོ། །མིག་གི་སྐྱེ་མཆེད་དང་ཁམས་དག་ནི་མི་རྟག་པ་ཉིད་ཀྱི་ཕྱིར་སྡུག་བསྔལ་གྱི་བདེན་པ་དང་། དེའི་རྒྱུ་ཡིན་པའི་ཕྱིར་ཀུན་འབྱུང་གི་བདེན་པས་བསྡུས་སོ། །གཞན་དང་གཞན་བསྡུས་པ་ཡང་དེ་ལྟར་
རྒྱ་ཆེར་སྦྱར་རོ། །བསྡུ་བའི་དངོས་པོ་ནི་སྦྱིན་པ་དང་སྙན་པར་སྨྲ་བ་དང་དོན་སྤྱོད་པ་དང་དོན་མཐུན་པ་རྣམས་སོ། །འཁོར་རྣམས་ནི་དགེ་སློང་དང་དགེ་སློང་མ་དང་དགེ་བསྙེན་དང་དགེ་བསྙེན་མ་རྣམས་སོ། །བསྡུ་བའི་དངོས་པོས་འཁོར་བསྡུས་པ་ཡང་རང་བཞིན་གྱིས་ནི་མ་ཡིན་ཏེ། འདི་རེས་འགའ་

བ་ཡིན་པའི་ཕྱིར་དང་བརྡར་བཏགས་པའི་ཡིན་པར་རིག་པར་བྱའོ། །བསྡུ་བའི་དངོས་པོ་རྣམས་ཀྱིས་ནི་འཁོར་རྣམས་བདག་གིར་བྱེད་པ་ཙམ་ལ་འདིར་བསྡུ་བར་གསུངས་སོ། །དེ་ནི་རྟག་ཏུ་མེད་པ་དང་ཕྱིས་ཀྱང་རེས་འགའ་བ་ཡིན་ནོ། །རང་བཞིན་གྱིས་བསྡུས་པ་ནི་རྟག་པ་དང་དོན་དམ་པ་པ་
ཡིན་ནོ་ཞེས་བསྟན་པར་འགྱུར་རོ། །རྟེན་གྱི་དབྱེ་བས་ཁམས་ཀྱི་དབྱེ་བའི་དབང་དུ་བྱས་ནས་འདྲི་བ་ནི། མིག་དང་རྣ་བ་དག་ཅེས་བྱ་བ་རྒྱས་པར་འབྱུང་བའོ། །རིགས་དང་སྤྱོད་ཡུལ་དང་རྣམ་པར་ཤེས་པའི་དབྱེ་བས་ཁམས་དབྱེ་བར་བྱའི་རྟེན་གྱི་དབྱེ་བས་ནི་མ་ཡིན་ནོ་ཞེས་བསྟན་པའི་ཕྱིར། མི་
འགྱུར་ཏེ་འདི་ལྟར་ཞེས་བྱ་བ་ལ་སོགས་པ་གསུངས་ཏེ། དེ་ལ་མིག་ལ་སོགས་པ་ལྔ་པོ་རྣམས་ནི་ཕན་ཚུན་རིགས་དང་སྤྱོད་ཡུལ་དང་རྣམ་པར་ཤེས་པ་ཐ་དད་པ་ལས་ཁམས་ཐ་དད་དོ། །གཟུགས་ལ་སོགས་པ་ཡུལ་གྱི་ཁམས་རྣམས་ནི་རིགས་དང་རྣམ་པར་ཤེས་པ་ཐ་དད་པ་ལས་སོ། །རྣམ་
པར་ཤེས་པའི་ཁམས་དྲུག་ནི་རིགས་དང་སྤྱོད་ཡུལ་ཐ་དད་པ་ལས་སོ། །ཡིད་ཀྱི་རྣམ་པར་ཤེས་པའི་ཐུན་མོང་མ་ཡིན་པའི་ཡུལ་ནི་ཆོས་ཀྱི་ཁམས་སོ། །ཡིད་ཀྱི་ཁམས་སྤྱོད་ཡུལ་ནི་རྣམ་པར་ཤེས་པའི་དབྱེ་བ་ལས་ཆོས་ཀྱི་ཁམས་སྤྱོད་ཡུལ་ཡིན་པའི་ཕྱིར་དང་། ཡིད་ཀྱི་རྣམ་པར་ཤེས་
པའི་རྟེན་ཡིན་པའི་ཕྱིར་རོ། །དེ་ལ་རིགས་ཀྱི་དབྱེ་བ་ཡོད་དེ་རྣམ་པར་ཤེས་པའི་ཁམས་དྲུག་གིས་བསྡུས་པའི་ཕྱིར་རོ། །མིག་དང་རྣ་བ་དང་སྣ་རྣམས་ལས་རིགས་ཐ་དད་པར་ཡོད་པ་མ་ཡིན་ནོ། །རིགས་ཀྱི་དོན་ནི་ཁམས་ཀྱི་དོན་ཏོ་ཞེས་སོ། །འབྲས་བུའི་དབྱེ་བས་རྟེན་རྣམ་པར་བཅད་དེ་ཁམས་ཀྱི་
དབྱེ་བ་རྣམ་པར་གཞག་གོ། །དེའི་ཕྱིར་མིག་ལ་སོགས་པ་རྣམ་པ་གཉིས་ཡིན་མོད་ནའང་ཁམས་གཅིག་ཉིད་དེ། འདིར་ཡང་དཔེ་ནི་སྐད་ཅིག་མའི་རྒྱུན་གཞན་གྱི་མིག་ལ་སོགས་པ་རྣམས་སོ། །དེ་ལྟ་མ་ཡིན་ན་ཁམས་ཉི་ཤུ་རྩ་གཅིག་ཏུ་འགྱུར་བ་མ་ཡིན་ནམ་ཞེས་བརྗོད་པར་མི་བྱའི། འོ་ན་ཅི་ཞེ་ན།
འདི་སྐད་དུ་ཁམས་ཚད་མེད་པ་དག་ཏུ་འགྱུར་བ་མ་ཡིན་ཞེས་བརྗོད་པར་བྱའོ། །དེ་བཞིན་དུ་རྣ་བ་དང་སྣ་དག་ལ་ཡང་སྦྱར་བར་བྱའོ་ཞེས་བྱ་བ་ལ་རིགས་འདྲ་བ་ནི་སོ་སོར་གཉིས་ཀ་ཡང་རྣ་བ་དང་སྣའི་རང་བཞིན་ཡིན་པའི་ཕྱིར་རོ། །སྤྱོད་ཡུལ་འདྲ་བ་ནི་སྒྲ་དང་དྲིའི་ཡུལ་ཅན་ཡིན་པའི་ཕྱིར་རོ། །རྣམ་པར་

ཤེས་པ་འདྲ་བ་ནི་སོ་སོར་གཉིས་ཀ་རྣ་བ་དང་སྣའི་རྣམ་པར་ཤེས་པའི་རྟེན་ཡིན་པའི་ཕྱིར་རོ། །སྤྱོད་ཡུལ་འདྲ་བ་དང་རྣམ་པར་ཤེས་པ་འདྲ་བར་འཁྲུལ་པ་ནི་ཡིད་ཀྱི་ཁམས་དང་ཡུལ་ལ་ཡང་ཡོད་པའི་ཕྱིར་རིགས་གཅིག་ཏུ་ཡོད་པ་ཉིད་དོ་ཞེས་པའི་ཁྱད་པར་འདི་ལ་སྐྱོན་
མེད་དེ། དེ་ལྟར་ན་འོ་ན་སྤྱོད་ཡུལ་དང་རྣམ་པར་ཤེས་པ་འདྲ་བ་ནི་དོན་མེད་པ་ཅན་ཏེ་སྔ་མ་ཉིད་ཀྱིས་གྲུབ་པའི་ཕྱིར་ཞེ་ན། མིག་གི་ཁམས་དང་ཡིད་ཀྱི་ཁམས་ཡུལ་མཚུངས་པ་ནི་མེད་དོ། །རྣམ་པར་ཤེས་པ་འདྲ་བ་ནི་གཉི་ག་མིག་གི་རྣམ་པར་ཤེས་པའི་རྟེན་ཉིད་ཀྱི་ཕྱིར་རོ། །ཡུལ་ནི་
ཡིད་ཀྱི་རྣམ་པར་ཤེས་པའི་ལྷག་པར་དམིགས་པའོ་ཞེས་བྱ་བར་ཐལ་བ་མེད་དོ། །ཁ་ཅིག་རིགས་གཞན་དུ་སེམས་སོ། །ལུས་ཀྱི་དབང་པོས་ཐ་དད་པ་མེད་པར་བསྡུས་པའི་ཕྱིར་ལུས་ཀྱི་ཁམས་མ་ཡིན་པའི་ཕོའི་དབང་པོ་དང་མོའི་དབང་པོ་མེད་པ་ཉིད་དོ། །དེ་ཐམས་ཅད་ལུས་སུ་རིགས་གཅིག་
པས་རིགས་མཚུངས་པ་དང་། ཐམས་ཅད་ཀྱི་ཡུལ་རེག་བྱ་ཡིན་པས་སྤྱོད་ཡུལ་མཚུངས་པའི་ཕྱིར་རོ། །རེག་བྱའི་ཁྱད་པར་ལས་དབང་པོ་གཞན་ནི་མ་ཡིན་ཏེ། མིག་དང་བྲང་ལ་སོགས་པ་བཞིན་ནོ། །མིག་དང་བྲང་དང་མགྲིན་པ་དག་ཀྱང་ཐུན་མོང་མ་ཡིན་པའི་རེག་བྱ་དུ་བ་ལ་སོགས་པ་དང་
ཕྲད་པ་ན་དེ་དག་དབང་པོ་གཞན་མ་ཡིན་ཏེ་ཐམས་ཅད་ལུས་ཀྱི་རྣམ་པར་ཤེས་པའི་རྟེན་ཡིན་པའི་ཕྱིར་རོ། །སྤྱོད་ཡུལ་མཚུངས་ཀྱང་རྣམ་པར་ཤེས་པ་འདྲ་བ་དང་རྣམ་པར་ཤེས་པ་མི་འདྲ་བར་གསལ་བར་འབྱུང་ངོ་། །དབང་པོ་རྣམས་ནི་ལྷག་པར་དབང་བྱེད་པ་ཉིད་ཀྱི་ཕྱིར་ཏེ། ཁ་ཅིག་ཏུ་དེ་
དག་ཉིད་ཀྱང་དབང་བྱེད་པས་སྐྱེ་མཆེད་དང་ཁམས་གཅིག་ཉིད་དང་ཡུལ་རེག་བྱ་ཡིན་པར་རིགས་མཐུན་པ་ལ་ཡང་དབང་པོ་སོ་སོར་བསྟན་པ་དབང་པོ་བཅུ་གཅིག་རྣམས་ཆོས་ཀྱི་སྐྱེ་མཆེད་དང་ཁམས་གཅིག་ཉིད་ལ་ཡང་དབང་པོ་སོ་སོར་བསྟན་པ་བཞིན་ནོ་ཞེས་སོ། །གལ་ཏེ་མིག་ལ་སོགས་
པ་རྣམས་ཁམས་གཅིག་ཉིད་ཡིན་ན། ཅིའི་ཕྱིར་དེ་རྣམས་ཀྱི་རྟེན་གཅིག་ཉིད་དུ་མི་འགྱུར་ཞེ་ན། དེའི་ཕྱིར་མཛེས་བྱའི་ཕྱིར་ན་གཉིས་བྱུང་ངོ་ཞེས་གསུངས་སོ། །གལ་ཏེ་དངོས་པོ་རྣམས་འབྱུང་བ་རྒྱུའི་དབང་གིས་ཡིན་གྱི་དགོངས་པའི་དབང་གིས་མ་ཡིན་པ་མ་ཡིན་ནམ་ཞེ་ན། འདི་ནི་དེ་

ལྟར་ཡིན་ནོ། །ཅིའི་ཕྱིར། མཛེས་པའི་ཕྱིར་ན་གཉིས་བྱུང་ངོ་། །ཞེས་བྱ་བ་སྨྲས་ཤེ་ན། ཇི་ལྟར་ད་ལྟའི་སེམས་ཅན་སོ་སོར་རིགས་མཐུན་པ་རྣམས་མིག་དག་གིས་རྟེན་ཐ་དད་པས་ཡན་ལག་རྣམ་པར་འབྱེད་པའི་རྟེན་ལ་མཛེས་པར་རློམ་པ་དེ་བཞིན་དུ་འདས་པའི་དུས་ན་ཡང་ཡིན་པར་
གདོན་མི་ཟ་སྟེ། དེའི་ཕྱིར་སྲིད་པ་སྔོན་དུ་འགྲོ་བ་ཅན་གྱི་ལས་ཀྱིས་མངོན་པར་བསྒྲུབ་པའི་ལུས་ལ་དགོངས་ནས། མཛེས་བྱའི་ཕྱིར་ན་གཉིས་འབྱུང་ངོ་ཞེས་བཤད་དོ། དེ་སྐྱེས་པའི་ལས་ཀྱི་གཞི་བསྟན་པའི་ཕྱིར་རོ། །དཔེར་ན་རྒྱན་མཛེས་པ་ལ་དམིགས་པའི་འདུན་པའི་འདོད་ཆགས་ཀྱི་
རྒྱུ་ཅན་གྱི་འབྲས་བུ་ཡིན་པས་མཛེས་པར་བྱ་བའི་དོན་དུ་བརྗོད་པ་བཞིན་ནོ། །སློབ་དཔོན་འདུས་བཟང་ན་རེ། དབང་པོའི་རྣམ་པ་འདི་རྣམས་ཉིད་ཀྱི་རྣམ་པ་མངོན་པར་འགྲུབ་པ་དེ་ནི། རྒྱུའི་མི་མཐུན་ཕྱོགས་མེད་པ་གཉིས་ཀྱིས་མངོན་པར་འགྲུབ་སྟེ། ལུས་ཀྱི་དབང་པོའི་ལག་པ་དང་རྐང་
པའི་གནས་ཀྱི་དབྱེ་བ་བཞིན་ནོ། །གང་ཞིག་འདོད་ཆགས་ལ་སོགས་པ་ལུས་ཀྱི་དབང་པོའི་རྟེན་རྣམ་པར་རྟོག་པ་དག་ཏུ་མཐོང་བ་དེའི་རྒྱུ་ནི་དེ་དག་ཉིད་ཀྱི་མཐུན་པའི་ཕྱོགས་འཛིན་པས་དེ་རྟེན་མེད་པ་དང་བཅས་པ་གཉིས་བཞིན་དུ་ཅིའི་ཕྱིར་རྒྱུ་ལ་བལྟོས་པས་དབང་པོ་མངོན་པར་འགྲུབ་ཅེས་སོ། །
གལ་ཏེ་རྒྱུ་ལ་བལྟོས་པས་དབང་པོ་མངོན་པར་འགྲུབ་པ་དེ་ཉིད་བརྗོད་པར་བྱ་བ་དབང་པོ་འདི་རྣམས་ཀྱི་རྒྱུ་ཉིད་རྣམ་པ་གང་གིས་གཉིས་ཉིད་ཀྱིས་འཇུག་པར་བྱེད། དེ་ལ་རིགས་ཁོ་ན་རྣམ་པ་ཞེ་ན། ལས་ཀྱི་རྣམ་པར་ཐལ་བ་ལས། དེ་ཉིད་ལྷག་པར་དབང་བྱེད་པ་ཐོབ་པའི་སྒྲ་ཡིས་བརྗོད་པར་བཤད་
དོ། །གལ་ཏེ་མིག་ལ་སོགས་པ་རྟེན་རེ་རེར་གྱུར་ན་ལྷག་པར་དབང་བྱེད་པ་ཉམས་ཏེ། ཇི་ལྟར་གཉིས་དག་གིས་ཡོངས་སུ་གསལ་བར་མཐོང་བ་དེ་ལྟར་རེ་རེར་མ་ཡིན་ནོ། །དེ་ལྟར་དབང་པོ་རྣམས་ཀྱིས་ལྷག་པར་དབང་བྱེད་པ་འགྲིབ་པ་དང་ཉམས་པར་འགྱུར་བ་ན། མཛེས་བྱའི་ཕྱིར་ཞེས་པ་ལྷག་
པར་དབང་བྱེད་པའོ་ཞེས་བཤད་པར་བྱ་སྟེ། མཛེས་བྱའི་ཕྱིར་ཞེས་པའི་སྒྲ་ཡིས་ལྷག་པར་དབང་བྱེད་པ་བརྗོད་པར་བྱའོ་ཞེས་ཟེར་རོ། །འདི་ནི་རྟོག་པ་ཙམ་སྟེ་ཇི་ལྟར་ལྕེ་ལ་སོགས་པ་རྣམས་རྟེན་གཅིག་དང་རྟེན་དུ་མ་ལ་ཡང་དེ་དང་འདྲ་བས་དབང་བྱེད་པ་ཉམས་པས་འདི་དག་གི་གཅིག་ལའང་མིག་ལ་

སོགས་པར་འགྱུར་རོ་ཞེས་པ་དང་། ལས་ཀྱིས་ལྕེ་ནི་རྟེན་ཉིད་དུ་གསལ་བར་དམིགས་པའི་རྟེན་དུ་གྱུར་པ་རྒྱ་ཆེན་པོ་ཞིག་སྐྱེ་བར་འདོད་དོ་ཞེས་བརྗོད་པར་མི་ནུས་སོ། །རིགས་མཐུན་པར་འདྲ་བ་རྣམས་ལ་ཡང་གཟུགས་མཛེས་པར་རློམ་པ་ངེས་པ་སྟེ། དཔེར་ན་འུག་པ་ལ་
སོགས་པ་རྣམས་ལ་ཡང་རང་གི་ལུས་མཛེས་པའི་སྲིད་པ་ལས་སྐྱེས་པ་ཉིད་ཀྱི་མིག་ལ་སོགས་པའི་རྟེན་གྱི་དབྱེ་བ་ལྟ་བུའོ། །དེ་ལྟ་མ་ཡིན་ཏེ་ཞེས་བྱ་བ་ལ་གལ་ཏེ་མིག་ལ་སོགས་པ་རྟེན་གཉིས་པར་མ་གྱུར་ན་ཤིན་ཏུ་མི་མཛེས་པར་འགྱུར་ཏེ། རྟེན་གཉིས་པའི་མིག་ལ་སོགས་པ་དག་ལ་
མཛེས་པར་མངོན་པར་རློམ་པའི་ཕྱིར་རོ། །ཕུང་པོ་དང་ཁམས་དང་སྐྱེ་མཆེད་ཀྱི་དོན་ཞེས་བྱ་བ་རྒྱ་ཆེར་འབྱུང་བ་ལ། ཕུང་པོ་དང་སྐྱེ་མཆེད་དང་ཁམས་རྣམས་ལ་དངོས་པོའི་སྒོ་ནས་དབྱེ་བ་ཡོད་པ་མ་ཡིན་ཏེ། ཇི་ལྟར་གང་ཕུང་པོ་རྣམས་འདུས་མ་བྱས་ཁྱད་པར་དུ་ཤེས་པར་བྱ་བར་གསུངས་ལ།
སྐྱེ་མཆེད་དང་ཁམས་རྣམས་ལ་ཡང་དེ་ཉིད་དེ་དེའི་ཕྱིར་འདིར་ཕུང་པོ་ལ་སོགས་པའི་དོན་གྱི་ཁྱད་པར་ལས་བྱེད་པ་ཡིན་གྱི། དེ་ཡང་དངོས་པོའི་ཁྱད་པར་ཤེས་པར་བྱ་བ་མ་ཡིན་ནོ། །འདུ་བྱེད་ལ་སོགས་པའི་སྒྲ་རྣམས་སོ་སོར་དོན་དུ་མ་ཡིན་པའི་ཕྱིར་ཕུང་པོ་དང་སྐྱེ་མཆེད་དང་ཁམས་ཀྱི་དོན་རྣམ་
གྲངས་གཞན་གྱིས་ཏེ། དེའི་ཕྱིར་དེ་ལྟར་ཕུང་པོ་ལ་སོགས་པའི་དོན་བསྟན་པའི་ཕྱིར། སྤུངས་དང་སྐྱེ་སྒོ་རིགས་ཀྱི་དོན། །ཕུང་པོ་སྐྱེ་མཆེད་ཁམས་རྣམས་ཡིན། །ཞེས་བྱ་བ་གསུངས་ཏེ། འདི་རྣམས་ལ་སྤུངས་པ་དང་སྐྱེ་བའི་སྒོ་དང་རིགས་དག་ཡོད་པས་ན་ཞེས་བྱ་བར་ཚིག་རྣམ་པར་སྦྱར་རོ། །
དེ་རྣམས་ཀྱང་གང་ཞེ་ན། ཕུང་པོ་སྐྱེ་མཆེད་ཁམས་རྣམས་ཡིན། །ཞེས་བྱ་བ་སྟེ་སྒྲ་རྣམས་ཡིན་ནོ་ཞེས་བྱ་བ་ནི་ཚིག་གི་ལྷག་མའོ། །ཕུང་པོའི་དོན་ནི་སྤུངས་པའི་དོན་ཡིན་ནོ་ཞེས་བྱ་བར་ཇི་ལྟར་རྟོགས་ཤེ་ན། མདོ་ལས་དེ་ཐམས་ཅད་གཅིག་ཏུ་བསྡུས་ཏེ་གཟུགས་ཀྱི་ཕུང་པོ་ཞེས་བྱ་བའི་གྲངས་སུ་
འགྲོའོ་ཞེས་འབྱུང་བའི་ཕྱིར་རོ། །མི་རྟག་པ་ཉིད་ཀྱིས་འགག་པའོ་ཞེས་བྱ་བ་ནི་འགོག་པ་ནི་རྣམ་པ་ལྔར་འགྱུར་བ་ལས་མི་རྟག་པ་ཉིད་ཀྱི་མཚན་ཉིད་ཀྱི་འགོག་པའི་ཁྱད་པར་རོ། །གཞན་དག་ནི་སྙོམས་པར་འཇུག་པའི་འགོག་པ་དང་། སྐྱེ་བའི་འགོག་པ་དང་སོ་སོར་བརྟགས་པའི་འགོག་པ་དང་།

སོ་སོར་བརྟགས་པ་མ་ཡིན་པའི་འགོག་པའོ། །འདིར་མི་རྟག་པ་ཉིད་ཀྱིས་འགགས་པ་ནི་སོ་སོར་བརྟགས་པའི་འགགས་པ་རྣམ་པར་གཅད་པའི་ཕྱིར་རོ། །གཟུགས་ཀྱི་སྐབས་ལས་སྐྱེ་བ་དང་སྙོམས་པར་འཇུག་པའི་འགོག་པ་དག་ནི་སེམས་དང་སེམས་ལས་བྱུང་བ་རྣམས་ཉིད་གཟུགས་
མ་ཡིན་ནོ་ཞེས་ཁ་ཅིག་གོ། །དེ་བཞིན་དུ་ཚོར་བ་ལ་སོགས་པ་ལ་ཡང་རིག་པར་བྱ་ཞིང་། ཤིན་ཏུ་བསྟན་པས་རང་གི་མཚན་ཉིད་ཀྱི་འགོག་པ་ཤེས་པར་བྱའོ། །འགོག་པ་རྣམ་པར་གཅད་པའི་དོན་དུ་མི་རྟག་པ་ཉིད་སྨོས་པར་ཤེས་པར་བྱའོ། །སྙོམས་པར་འཇུག་པ་དང་སྐྱེ་བ་དང་
སོ་སོར་བརྟགས་པས་འགོག་པ་རྣམས་མ་འོངས་པ་ཉིད་དོ། །སོ་སོར་བརྟགས་པས་འགོག་པ་དུས་གསུམ་པ་ཅན་ནོ། །ཟག་པ་དང་བཅས་པ་རྣམས་ཀྱི་རང་གི་མཚན་ཉིད་ཀྱི་འགོག་པ་ནི་ད་ལྟར་བྱུང་བ་ཉིད་དོ། །ད་ལྟར་བྱུང་བ་ནི་བྱུང་ལ་མ་འགགས་པའོ་ཞེས་བྱ་བ་ལ། བྱུང་བ་ཞེས་བྱ་བ་
དེ་ཙམ་ཞིག་ཡིན་ན་ནི་འདས་པ་ལ་ཡང་ཐལ་བར་འགྱུར་རོ། །མ་འགགས་པ་ཞེས་བྱ་བ་དེ་ཙམ་ཞིག་ཡིན་ན་ནི་མ་འོངས་པ་ལ་ཡང་ཐལ་བར་འགྱུར་བས་དགག་པའི་ཕྱིར་གཉིས་ཀ་སྨོས་སོ། །ནང་ནི་རང་གི་རྒྱུད་ལ་ཡོད་པའོ་ཞེས་བྱ་བ་ནི་མིག་ལ་སོགས་པ་དང་གཟུགས་ལ་སོགས་པའོ། །
གཞན་ནི་ཕྱིའི་འོ་ཞེས་བྱ་བ་ནི་གང་ཞིག་གཞན་གྱི་རྒྱུད་ཀྱི་དང་རྒྱུད་མ་གཏོགས་པའོ། །ཡང་ན་སྐྱེ་མཆེད་ཀྱི་སྒོ་ནས་ཞེས་བྱ་བ་ནི་མིག་ལ་སོགས་པ་ནང་གི་སྐྱེ་མཆེད་དྲུག་དང་གཟུགས་ལ་སོགས་པ་ཕྱིའི་སྐྱེ་མཆེད་དྲུག་གོ། །དེའི་ཕྱིར་གཞན་གྱི་རྒྱུད་དུ་གཏོགས་པའི་གཟུགས་ལ་སོགས་པ་རྣམས་
ཕྱིའི་འོ་ཞེས་བྱའོ། །རིགས་པ་ནི་ཐོགས་པ་དང་བཅས་པ་སྟེ་སྐྱེ་མཆེད་བཅུའི་རང་བཞིན་ནོ། །ཕྲ་བ་ནི་ཐོགས་པ་མེད་པ་སྟེ་རྣམ་པར་རིག་བྱེད་མ་ཡིན་པའི་གཟུགས་སོ། །ཡང་ན་བལྟོས་པ་པ་ཡིན་ཏེ་བིལ་བའི་གཟུགས་ནི་རགས་པ་དང་ཡིན་ལ་སྐྱུ་རུ་རའི་གཟུགས་ནི་ཕྲ་བའོ། །གལ་ཏེ་བལྟོས་པ་
པ་མ་ཡིན་པའི་ཕྱིར་མ་གྲུབ་པ་སྟེ་རྣམ་པར་གནས་པ་མེད་དོ་ཞེ་ན། ཇི་ལྟར་སྐྱུ་རུ་རའི་གཟུགས་དེ་ཉིད་བིལ་བ་དང་རྒྱ་ཤུག་ལ་བལྟོས་ནས་ཕྲ་བ་དང་རགས་པ་ཡང་ཡིན་པས་ཅུང་ཟད་ཕྲ་བ་དང་རགས་པར་གནས་པར་མི་འགྱུར་ཏེ། ཕ་རོལ་དང་ཚུ་རོལ་བཞིན་ནོ་ཞེ་ན་མ་ཡིན་ཏེ་བལྟོས་པས་ཐ་དད་པའི་ཕྱིར་རོ་

ཞེས་བྱ་བ་ལ་གང་ལ་བལྟོས་ནས་མངོན་པར་བརྗོད་པ་དེ་ལ་བལྟོས་པ་གནས་སྐབས་ཏེ། དཔེར་ན་ཕ་དང་བུ་བཞིན་ནོ། །ངན་པ་ནི་ཉོན་མོངས་པ་ཅན་ཏེ་བསྒྲིབས་པ་དང་མི་དགེ་བ་གྱ་ནོམ་པ་ནི་ཉོན་མོངས་པ་ཅན་མ་ཡིན་པ་སྟེ་དགེ་བ་དང་མ་བསྒྲིབས་ལ་ལུང་དུ་མ་བསྟན་པའོ། །
རིང་བ་ནི་འདས་པ་དང་མ་འོངས་པ་སྟེ་ཕན་ཚུན་ད་ལྟར་བྱུང་བའི་དངོས་པོས་ཆོད་པའི་ཕྱིར་རོ། །ཉེ་བ་ནི་ད་ལྟར་བྱུང་བ་སྟེ་འདས་པ་དང་མ་འོངས་པ་དག་གིས་མ་ཆོད་པའི་ཕྱིར་རོ། །ཡང་ན་བྱེད་པ་པོ་འདས་པ་དང་མ་འོངས་པ་ནི་རིང་བའོ། །ད་ལྟར་བྱུང་བ་ནི་ཉེ་བའོ། །རྣམ་པར་ཤེས་པའི་བར་དུ་
ཡང་དེ་དང་འདྲའོ་ཞེས་བྱ་བ་ལ། ཚོར་བ་དང་འདུ་ཤེས་དང་འདུ་བྱེད་གང་ཅི་ཡང་རུང་། རྣམ་པར་ཤེས་པ་གང་ཅི་ཡང་རུང་། འདས་པ་དང་མ་འོངས་པ་དང་ད་ལྟར་བྱུང་བའམ། ནང་གིའམ། ཕྱིའི་འམ། རགས་པའམ། ཕྲ་བའམ། ངན་པའམ། གྱ་ནོམ་པའམ། ཐག་རིང་བ་ན་ཡོད་པ་གང་
ཡིན་པའམ། ཉེ་བ་ན་ཡོད་པ་གང་ཡིན་པ་དེ་ཐམས་ཅད་གཅིག་ཏུ་བསྡུས་ཏེ་རྣམ་པར་ཤེས་པའི་ཕུང་པོ་ཞེས་བྱ་བའི་གྲངས་སུ་འགྲོའོ་ཞེས་བྱ་བར་རོ། །དེ་ལ་རགས་པ་དང་ཕྲ་བ་མ་གཏོགས་པ་འདས་པ་ལ་སོགས་པ་རྣམས་ནི་དེ་ཁོ་ན་ལྟར་བསྟན་ཏོ། །དེ་ཉིད་ཀྱི་ཕྱིར་འདི་ནི་ཁྱད་པར་ཡིན་ཏེ།
ཞེས་བྱ་བ་གསུངས་སོ། །རགས་པ་ནི་དབང་པོ་ལྔ་ལ་བརྟེན་པའོ་ཞེས་བྱ་བ་ནི་རྟེན་གྱི་རྗེས་སུ་བྱེད་པའི་ཕྱིར་རོ། །ཕྲ་བ་ནི་ཡིད་ལས་བྱུང་བའོ་ཞེས་བྱ་བ་ནི་མ་བསགས་པ་དང་ཐོགས་པ་མེད་པའི་རྟེན་ཅན་ཡིན་པའི་ཕྱིར་རོ། །ཡང་ན་ས་ལས་ཀྱང་ཞེས་བྱ་བ་ལ་བལྟོས་པ་ཉིད་ཀྱི་ཕྱིར་འདོད་པར་
གཏོགས་པ་ནི་རགས་པ་ཉིད་དང་སྲིད་པའི་རྩེ་མོ་པ་ནི་ཕྲ་བ་ཉིད་དོ། །འདས་པ་དང་མ་འོངས་པ་ནི་རང་གི་སྒྲས་བརྗོད་པ་ཡིན་བཞིན་དུ་རིང་པོར་སྒྲོ་བཏགས་པ་དང་ངན་པ་དང་གྱ་ནོམ་པའི་དོན་ཡོངས་སུ་རྒྱས་པར་མ་རངས་པས་བྱེ་བྲག་ཏུ་སྨྲ་བ་རྣམས་ན་རེ་ཞེས་གསུངས་སོ། །བཙུན་པ་ཞེས་བྱ་བ་
ནི་དཔེ་སྟོན་སྡེ་པའི་གནས་བརྟན་ཆོས་སྐྱོབ་པོ། །དབང་པོ་ལྔས་གཟུང་བར་བྱའོ་ཞེས་བྱ་བ་ནི་ཕྱིའི་སྐྱེ་མཆེད་ལྔའོ། །གཞན་ནི་ཕྲ་བའོ་ཞེས་བྱ་བ་ནི་ཡིད་ཀྱི་དབང་པོའི་གཟུང་བར་བྱ་བ་སྟེ་དེ་ཡང་མིག་ལ་སོགས་པ་སྐྱེ་མཆེད་གཟུགས་ཅན་རྣམས་དང་རྣམ་པར་རིག་བྱེད་མ་ཡིན་པའོ། །ཡིད་

དུ་མི་འོང་བའོ་ཞེས་བྱ་བ་ནི་ཡིད་དང་མི་མཐུན་པ་སྟེ། །དེ་ནི་ཡིད་དུ་འོང་བར་བྱེད་པ་མ་ཡིན་ཞིང་དགའ་བར་བྱེད་པ་མ་ཡིན་པའི་ཕྱིར་རོ། །ཡིད་དུ་འོང་བ་ནི་ཡིད་དང་མཐུན་པ་སྟེ། དེ་ནི་ཡིད་དུ་འཐད་པའི་ཕྱིར་ཡིད་དུ་འོང་བར་བྱེད་པའོ། །དེ་ལྟ་ན་རྡོར་བའི་དོན་གྱིས་ནི་ངན་པ་ཡིན་ལ། ཚིམ་པར་
བྱེད་པའི་དོན་གྱིས་ན་གྱ་ནོམ་པའོ། །རིང་བ་ནི་ཡུལ་མི་སྣང་བ་ཅན་ནོ་ཞེས་བྱ་བའི་རྟེན་གྱི་ཡུལ་གྱི་དབང་དུ་བྱས་ནས་ཡིན་ཏེ། འགའ་ཞིག་ཉེ་ཡང་ཕྲ་བའི་ཕྱིར་མི་སྣང་བས་ཡུལ་སྨོས་སོ། །ཅུང་ཟད་ཅིག་ཉེ་བ་ཡིན་ཡང་ཆད་པའི་ཕྱིར་ཡུལ་མི་སྣང་བ་ཅན་དུ་འགྱུར་མོད་ཀྱི། དེའི་རྟེན་ནི་གནས་དང་ཉིད་
ཀྱིས་ལྟ་བར་ནུས་པས་ཀྲིཏ་ཀྱི་རྐྱེན་ནི་ནུས་པའི་དོན་ལ་རིག་པར་བྱའོ། །ཉེ་བ་ནི་ཡུལ་སྣང་བ་ཅན་ནོ་ཞེས་བྱ་བ་ལ་སྐར་མ་ལ་སོགས་པ་ནི་ཅུང་ཟད་ཅིག་ནི་རིང་ཡང་སྣང་བ་དེའི་ཕྱིར་ཡུལ་སྣང་བ་ཅན་ཞེས་སྨོས་སོ། །ཡང་རྒྱུ་ཅིའི་ཕྱིར་བཙུན་པས་བྱེ་བྲག་ཏུ་སྨྲ་བས་བཤད་པའི་རིང་བ་དང་ཉེ་བ་ལ་རྣམ་པ་
གཞན་དུ་རིང་བ་དང་ཉེ་བ་བསྟན་ཅེ་ན། དེའི་ཕྱིར་འདས་པ་ལ་སོགས་པ་རང་གི་མིང་གིས་བསྟན་པའི་ཕྱིར་ཏེ་ཞེས་བྱ་བ་ལ་གསུངས་ཏེ། འདི་ལྟར་ཅུང་ཟད་ཅིག་རང་གི་སྒྲས་རབ་ཏུ་དབྱེ་བར་སྨྲས་པ་ནི་རབ་ཏུ་དབྱེ་བ་གཞན་གྱི་མཚན་ཉིད་ལ་འཇུག་པ་མ་ཡིན་ཏེ་ཐ་མི་དད་པར་འགྱུར་རོ་ཞེས་དགོངས་སོ། །
དེ་དག་གི་ཉེ་བ་དང་རིང་བ་དག་ནི་ཞེས་བྱ་བ་ལ་ཚོར་བ་ལ་སོགས་པ་ཡུལ་མི་སྣང་བ་ལ་བརྟེན་པ་ནི་རིང་བ་ཡིན་ལ། ཡུལ་སྣང་བ་ལ་བརྟེན་པ་ནི་ཉེ་བའོ། །སྔ་མ་བཞིན་ནོ་ཞེས་བྱ་བ་ནི་དབང་པོ་ལ་བརྟེན་པ་ནི་རགས་པའོ། །ཡིད་ལས་བྱུང་བ་ནི་ཕྲ་བའོ། །ཡང་ན་ས་ལས་ཀྱང་ངོ་ཞེས་བཤད་པ་ལྟར་རོ། །
སེམས་དང་སེམས་ལས་བྱུང་བ་རྣམས་སྐྱེ་བའི་སྒོའི་དོན་ནི་སྐྱེ་མཆེད་ཀྱི་དོན་ཏེ་ཞེས་བྱ་བ་ལ། གང་ལས་རྟོགས་ཤེ་ན་ངེས་པའི་ཚིག་ཏུ་ན་སེམས་དང་སེམས་ལས་བྱུང་བ་རྣམས་ཞེས་རྒྱ་ཆེར་འབྱུང་ངོ་། །སྐྱེ་བ་ནི་འོང་བ་ལ་བརྗོད་དོ། །སེམས་དང་སེམས་ལས་བྱུང་བ་རྣམས་སྐྱེ་ཞིང་བདག་གི་
དངོས་པོར་རེད་པའོ། །དེའི་ཕྱིར་དེ་དག་ནི་སེམས་དང་སེམས་ལས་བྱུང་བ་རྣམས་སྐྱེ་བ་མཆེད་པར་བྱེད་པས་ན་སྐྱེ་མཆེད་དེ། མཆེད་པར་བྱེད། རྒྱས་པར་བྱེད། བདག་གི་དངོས་པོར་རེད་པ་རྒྱུན་དུ་གནས་པར་བྱེད་ཅེས་བྱ་བའི་ཐ་ཚིག་གོ། །ཇི་སྐད་དུ་བྲམ་ཟེ་མིག་གི་སྒོ་ནས་ཇི་སྲིད་གཟུགས་

རྣམས་ལ་བལྟ་བའི་ཕྱིར་ཞེས་བྱ་བ་དེ་ལ། དྲུག་པོ་རྣམས་ཉིད་སྒོའི་དོན་དུ་འཐད་དེ། སེམས་དང་སེམས་ལས་བྱུང་བའི་སྒོའི་དོན་ནི་བཅུ་གཉིས་པོ་རྣམས་ཏེ། མིག་ལ་བརྟེན་ནས་གཟུགས་རྣམས་ལ་མིག་གི་རྣམ་པར་ཤེས་པ་སྐྱེ་ཞིང་གསུམ་འདུས་པ་ལས་རེག་
པ་དང་ལྷན་ཅིག་ཚོར་བ་དང་འདུ་ཤེས་སྐྱེའོ་ཞེས་གསུངས་པའི་ཕྱིར་རོ། །རིགས་ཀྱི་དོན་ནི་ཁམས་ཀྱི་དོན་ཏེ་ཞེས་བྱ་བ་ལ། གང་ལས་ཁོང་དུ་ཆུད་ཅེ་ན་རིགས་སུ་འདྲ་བའི་ཕྱིར་རོ། །དེ་ཉིད་ཀྱི་ཕྱིར་དཔེར་ན་རི་འགའ་ཞིག་ལ་ཞེས་རྒྱ་ཆེར་གསུངས་ཏེ། དཔེར་ན་གསེར་དང་ས་བོན་གྱི་རིགས་ལ་
ཁམས་ཞེས་བརྗོད་པ་ལྟ་བུའོ། །རྟེན་ཏམ་རྒྱུད་ཅེས་རྒྱས་པར་འབྱུང་བ་ལ། ལུས་སམ་སེམས་དང་སེམས་ལས་བྱུང་བའི་རྒྱུད་གཅིག་ལའོ། །གཞན་དག་ན་རེ་སྐད་ཅིག་མའི་རྒྱུན་གཅིག་ལའོ་ཞེས་ཟེར་རོ། །རིགས་བཅོ་བརྒྱད་རྣམས་ནི་ས་བོན་བཅོ་བརྒྱད་ལ་ཁམས་བཅོ་བརྒྱད་དུ་བརྗོད་
པའོ། །སྐལ་བ་མཉམ་པའི་རྒྱུ་ཡིན་པའི་ཕྱིར་རོ་ཞེས་བྱ་བ་ལ་མིག་གི་དབང་པོ་ནི་མིག་གི་དབང་པོ་ཕྱིས་སྐྱེས་པ་དང་མ་སྐྱེས་པའི་སྐལ་བ་མཉམ་པའི་རྒྱུ་ཡིན་ཏེ། དེ་བཞིན་དུ་གཞན་ལ་ཡང་བརྗོད་པར་བྱའོ། །འདུས་མ་བྱས་ཁམས་མ་ཡིན་པར་འགྱུར་རོ་ཞེ་ན་ཞེས་བྱ་བ་ལ་སྔ་མ་དང་ཕྱི་མ་ཉིད་
མེད་པའི་ཕྱིར་ཏེ། དེ་ནི་འགའི་ཡང་སྐལ་བ་མཉམ་པའི་རྒྱུ་མ་ཡིན་པའི་ཕྱིར་རོ། །དེ་ནི་སེམས་དང་སེམས་ལས་བྱུང་བ་རྣམས་ཀྱི་དམིགས་པ་དང་བདག་པོའི་རྐྱེན་དུ་གྱུར་པའི་ཕྱིར་འདུས་མ་བྱས་ཀྱང་འབྱུང་གནས་ཉིད་དུ་གྲུབ་བོ། །དེ་ལྟ་ན་ཡང་དེར་སྐྱེ་མཆེད་དང་ཁམས་ཀྱི་དོན་དག་དབྱེར་མེད་པར་
འགྱུར་ཏེ། གཉི་ག་ཡང་སེམས་དང་སེམས་ལས་བྱུང་བའི་འབྱུང་གནས་སུ་གྱུར་པའི་ཕྱིར་རོ། །དེའི་ཕྱིར་གཞན་དག་ན་རེ་ཁམས་ཞེས་བྱ་བའི་སྒྲ་འདི་ནི་རིགས་ཀྱི་ཚིག་ཡིན་ནོ་ཞེས་ཟེར་རོ། །དཔེར་ན་གསེར་ལ་སོགས་པའི་རིགས་རྣམས་ཕན་ཚུན་རིགས་ཐ་དད་པ་དེ་བཞིན་དུ་མིག་ལ་སོགས་པ་
དག་ཀྱང་ཡིན་ནོ། །དེ་ལྟར་ན་རིགས་སུ་འོང་བས་ཁམས་ཀྱི་སྒྲ་འདི་ནི་རིགས་ཀྱི་ཚིག་ཡིན་ནོ། །རང་བཞིན་ཞེས་བྱ་བ་ལ་རང་བཞིན་ནི་རིགས་གཞན་རྣམ་པར་བཅད་པའི་སྒོ་ནས་རང་གི་ངོ་བོ་སྟེ། མཚན་ཉིད་མཚུངས་པ་ལ་བཤད་ཀྱི་རྫས་ཀྱི་རང་བཞིན་ཉིད་ནི་མ་ཡིན་ནོ། །ཁམས་སོ་སོར་མཚུངས་

པར་ཡང་མི་འགྱུར་རོ། །དྲུག་པ་རྣམས་རིགས་ཐ་དད་པའི་ཕྱིར་བརྟེན་དང་རྟེན་གྱི་རིགས་ཀྱི་དབྱེ་བ་ལས་མ་ཡིན་ཞིང་བཏགས་པའི་དུས་ཀྱི་དབྱེ་བ་ལས་སམ་སྔ་མ་དྲུག་ཉིད་ལས་ཡིད་ཀྱི་ཁམས་དྲུག་རྣམས་ཀྱང་ངོ་། །དེ་སྔོན་དུ་འགྲོ་བ་ལས་ཤིན་ཏུ་གསལ་བར་ཕྱེ་བས་དུས་གསུམ་པ་ཅན་ཉིད་ལ་ཡང་
དེ་དག་ཐམས་ཅད་གང་ལ་གནས་པ་དེ་ལ་བལྟོས་ནས་མིང་དུ་རྣམ་པར་གཞག་གོ། །ཡིད་སྔོན་དུ་འགྲོ་བས་རྣམ་པར་ཤེས་པའི་ཁམས་དྲུག་ཏུ་འགྱུར་རོ། །མ་འོངས་པའི་དུས་ལ་ཇི་ལྟར་དེ་དག་དེའི་སྔོན་དུ་འགྲོ་བ་འཐད་ཅེ་ན། ཡིད་ཇི་ལྟ་བར་ཁམས་ཀྱང་དེ་བཞིན་པས་རྣམ་པར་ཤེས་པའི་
ཁམས་དྲུག་ཅེས་བྱའོ། །བྱེ་བྲག་ཏུ་སྨྲ་བ་རྣམས་ཀྱི་སྐྱེ་མཆེད་དང་ཁམས་ལྟར་ཕུང་པོ་ཡང་རྫས་སུ་འདོད་ལ། སྤུངས་པ་ཡང་རྫས་དུ་མ་འདུས་པའི་བདག་ཉིད་ཅན་ཡིན་པས་རྫས་སུ་ཡོད་པ་ལ་སྤུངས་པ་ཉིད་མི་སྲིད་དོ་སྙམ་སྟེ་འདྲི་བ་ནི། གལ་ཏེ་སྤུངས་པའི་དོན་ཕུང་པོ་ཞེས་བྱའོ། །སྤུངས་པ་
དང་གང་ཟག་བཞིན་ནོ་ཞེས་བྱ་བ་ལ། ཇི་ལྟར་འབྲུ་ལ་སོགས་པ་རྫས་དུ་མ་འདུས་པའི་ཕྱིར་བཏགས་པའི་ཕུང་པོ་ཡིན་གྱི་རྫས་ཀྱི་མ་ཡིན་ཏེ། འབྲུ་ལ་སོགས་པ་གསལ་ན་དེ་འཛིན་པ་མེད་པའི་ཕྱིར་རོ། །དེ་བཞིན་དུ་གང་ཟག་གི་གཟུགས་ཀྱི་ཕུང་པོ་སྟོང་ཕྲག་ཉིད་ཀྱང་རྫས་སུ་མེད་པ་ཡིན་ཏེ། ཇི་
ལྟར་ཡན་ལག་ཚོགས་ལས་ནི། །ཤིང་རྟ་ཞེས་ནི་མི་བཏགས་པ། །དེ་བཞིན་ཕུང་པོ་ལ་བརྟེན་ནས། །ཀུན་རྫོབ་ཏུ་ནི་སེམས་ཅན་བརྗོད། །ཅེས་བྱ་བའི་ལུང་ལས་སོ། །དེ་བཞིན་དུ་འདས་པ་དང་མ་འོངས་པ་ལ་སོགས་པའི་རྫས་ཚོགས་པའི་བདག་ཉིད་ཅན་ཡིན་པའི་ཕྱིར་ཕུང་པོ་རྣམས་ཀྱང་
བཏགས་པའི་ཡོད་པར་འགྱུར་ན། དེ་ཡང་འདོད་པ་མ་ཡིན་པས་ཕུང་པོའི་དོན་གཞན་ཞིག་བརྗོད་པར་བྱ་དགོས་སོ་ཞེ་ན་མ་ཡིན་ཏེ། རྡུལ་ཕྲ་རབ་གཅིག་ཀྱང་ཕུང་པོ་ཡིན་པའི་ཕྱིར་རྡུལ་ཕྲ་རབ་གཅིག་པུ་ཡང་ཕུང་པོར་བརྗོད་དེ། གཞན་དུ་ན་ཕུང་པོ་རྣམས་རང་བཞིན་མེད་པའི་ཕྱིར་ཕུང་པོ་རྣམས་སྐྱེ་
མཆེད་དང་ཁམས་ལྟར་ཆོས་རྣམས་ཀྱི་རང་བཞིན་བསྡུས་པར་མི་འགྱུར་རོ། །ཕུང་པོ་རྣམས་བཏགས་པའི་ཡོད་པ་རང་བཞིན་ཉིད་མ་ཡིན་ན། དེ་ལྟ་འོ་ན་འདི་གཞན་དང་འགལ་ལོ། །འོ་ན་སྤུངས་པའི་དོན་ནི་ཕུང་པོའི་དོན་ཏོ་ཞེས་བྱ་བ་མ་ཡིན་ཏེ། དང་པོར་སྤུངས་པ་ཉེ་བར་ལེན་པ་དག་འདིར་དོན་

གྱི་སྤུངས་པ་ཉིད་དོན་མ་ཡིན་ཏེ་རྫས་དང་རྣམ་གྲངས་ཡིན་པའི་ཕྱིར་རོ་ཞེས་སློབ་དཔོན་འདུས་བཟང་ཟེར་རོ། །རྡུལ་ཕྲ་རབ་གཅིག་པུ་ཡང་དུས་གསུམ་གྱིས་བསྡུས་པའི་ཕྱིར་བློས་མངོན་པར་བསྡུས་པའི་སྒོ་ནས་སྤུངས་པ་ཉིད་འཐད་པས་ཕུང་པོ་རྣམས་བཏགས་པའི་ཡོད་
པ་མ་ཡིན་ནོ་ཞེ་ན། དེ་ཉིད་ལ་སྨྲས་པ། དེ་ལྟ་ན་ཡང་མདོ་དང་འགལ་ཏེ། དེ་དག་ཐམས་ཅད་གཅིག་ཏུ་བསྡུས་ཏེ་གཟུགས་ཀྱི་ཕུང་པོ་ཞེས་བྱ་བའི་གྲངས་སུ་འགྲོའོ་ཞེས་གསུངས་པའི་ཕྱིར་རོ། །སློབ་དཔོན་འཕགས་པའི་འབངས་ན་རེ། ཕན་ཚུན་བལྟོས་པས་རྫས་ནི་རྫས་མ་དྲ། ཕུང་པོ་གང་
ལ་གཅིག་ནི་མེད་དེ་ཕུང་པོ་དེ་ལ་བལྟོས་པ་མེད་པའི་ཕྱིར་རོ། །ཇི་ལྟར་གཞན་དུ་ན་མི་རྟག་པ་དང་སྡུག་བསྔལ་བ་དང་སྟོང་པ་ཞེས་བྱ་བ་ལས་སྤུངས་པར་བྱ་བ་དང་ཡོངས་སུ་ཤེས་པར་བྱ་བ་གང་ཟག་བཏགས་པ་ཉེ་བར་ལེན་པའི་ཕུང་པོར་གྱུར་པ་རྫས་སུ་ཡོད་པ་ཉིད་ཉམས་ཀྱི་ཆོས་ཀྱི་ཁམས་འདི་རྣམས་
ཡིན་ནོ་ཞེ་ན་མ་ཡིན་ཏེ། གང་ཟག་ནི་བཏགས་པར་ཡོད་པ་ཉིད་དེ་མིང་ཙམ་ཉིད་ཀྱི་ཕྱིར་རོ། །དེ་ལྟ་ན་འོ་ན་བུམ་པ་དང་སྣམ་བུ་ལ་སོགས་པ་ཡང་རྫས་སུ་ཡོད་པར་ཐལ་བར་འགྱུར་ཏེ། དེ་དག་ལ་ཡང་རྫས་དང་རྫས་ཕན་ཚུན་ལྟོས་པ་བུམ་པ་དང་སྣམ་བུའི་དོན་དེ་ལྟར་བརྗོད་ནུས་པས་གཟུགས་ཇི་སྙེད་
པའི་རྫས་དེ་སྙེད་ཕུང་པོར་འགྱུར་རོ། །དེ་ལྟར་ཡིན་ན་དེ་དག་ཐམས་ཅད་གཅིག་ཏུ་བསྡུས་ཏེ་གཟུགས་ཀྱི་ཕུང་པོ་ཞེས་བྱ་བའི་གྲངས་སུ་འགྲོའོ་ཞེས་བྱ་བ་དེ་དང་འགལ་བར་འགྱུར་རོ། །དེ་ལ་སྨྲས་པ། མི་འགྱུར་ཏེ་ཕན་ཚུན་བལྟོས་པས་ཕུང་པོ་ཞེས་བྱ་བ་མང་པོ་རྣམས་ཀྱི་མིང་འདི་ལྟ་སྟེ་མང་པོ་རྣམས་
སོ་ཞེས་བྱ་བ་གཞན་མ་ཡིན་པ་དེ་རྣམས་ལ་ཞེས་བགྲང་བར་བྱ་སྟེ་ཡུལ་གཅིག་ལ་ནི་མ་ཡིན་ནོ་ཞེས་བྱ་བ་འདི་དཔེའོ་ཞེས་ཟེར་རོ། །འདི་ནི་མི་མཐུན་པ་ཉེ་བར་བཀོད་པ་སྟེ། དེ་ལ་ཡང་མང་པོ་རྣམས་ཉིད་རེ་རེ་ལ་ནི་མ་ཡིན་ཏེ་འདས་པའི་རྫས་རྣམས་ལ་ཕུང་པོ་ཞེས་བྱ་བ་མེད་པར་མཚུངས་སོ། །ཅི་སྟེ་དེ་རྣམས་
མཐའ་དག་ཉིད་ལ་ཕུང་པོར་བཏགས་པ་ཉིད་ན་སྲན་མ་མཱ་ཥའི་ཕུང་པོ་བཞིན་དུ་སེམས་ཅན་གྱི་ཕུང་པོ་ཞེས་བྱ་བ་བཏགས་པར་གྲུབ་པོ། །ལུས་ཀྱང་མི་རྟག་པ་དང་སྡུག་བསྔལ་བ་དང་སྟོང་པ་ལས་གཞན་མ་ཡིན་ཏེ་སོ་སོར་འགྲོ་བར་བརྗོད་པས་དེ་བཏགས་པ་མ་ཡིན་པ་མེད་དོ། །དེ་ལྟར་སེམས་ཅན་རྣམས་ཀྱང་

མི་རྟག་པར་གསུངས་ཏེ། གང་གི་ནུབ་མོ་ཁོ་ན་ནས། །མངལ་དུ་དང་པོ་འཇུག་པའི་མི། །སྡོད་པ་མེད་པར་འགྲོ་འགྱུར་ཏེ། །སོང་བ་ལས་ཀྱང་ལྡོག་པ་མེད། །ཅེས་སོ། །སེམས་ཅན་ནི་རྫས་སུ་ཡོད་པ་ཡིན་པ་ལ་ཉེ་བར་གནས་པ་ལས་གདུལ་བྱའི་ཁྱད་པར་ལ་བལྟོས་ནས་སངས་རྒྱས་བཅོམ་ལྡན་
འདས་རྣམས་ཀྱིས་ཆོས་བསྟན་ཏེ། དེ་ལྟར་ཕུང་པོ་ཞེས་བྱ་བ་ཡང་མི་རྟག་པར་བསྟན་པ་དང་འགལ་བ་མེད་དོ། །བཏགས་པར་མཐོང་བ་དང་བཏགས་པ་ཉེ་བར་བཟུང་ནས་ནགས་ཚལ་གྱི་ལྗོན་ཤིང་དང་དམག་དཔུང་དང་དམག་དཔུང་གི་ཡན་ལག་རྣམས་ཇི་སྙེད་པ་དེ་རྣམས་ནི་སྐྲག་པ་འཕེལ་བ་ཉིད་ཀྱིས་མ་བྲིས་
ཤིང་དེ་ལྟར་རྣམ་པར་མི་སྤྱོད་དོ། །གཞན་དག་ན་རེ་ཁུར་ཁྱེར་བའི་དོན་ནམ་ཞེས་བྱ་བ་ལ་བྱ་བ་ཉིད་ཁུར་ཡིན་པ་ན་བྱ་བའི་ཁུར་རོ། །ཁྱེར་བ་ནི་དེ་ལ་རག་ལས་པ་ཉིད་དོ། །དེ་ལ་རག་ལུས་ཤིང་བདག་ཉིད་རྙེད་ཅེས་བྱ་བའི་དོན་ཏོ། །འདི་ལྟར་ལུས་ཀྱི་ཕྱོགས་གང་ཞིག་ཁུར་ཁྱེར་བར་ནུས་པ་ནི་ཕྲག་པ་ཡིན་
ལ། འདི་ཡང་བྱ་བའི་ཁུར་ཁྱེར་བའི་དོན་ཕུང་པོའི་དོན་ཡིན་ནོ། །གང་ཞིག་གང་གི་བྱ་བའི་ཁུར་ཡིན་ཞེ་ན། རེ་ཞིག་ཐུན་མོང་དུ་ནི་ཕུང་པོ་ལྔ་རྣམས་ཀྱི་སྐྱེ་མཆེད་དྲུག་ཡིན་ཏེ། ཇི་སྐད་དུ་མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་ཅེས་བཤད་པ་ལྟ་བུའོ། །གཟུགས་དང་རྣམ་པར་ཤེས་པ་གཉིས་
ཀྱི་བྱ་བའི་ཁུར་ནི་རེག་པ་སྟེ་སྐྱེ་མཆེད་དྲུག་གི་རྐྱེན་གྱིས་རེག་པ་ཞེས་འབྱུང་བའི་ཕྱིར་དང་། ཚོར་བའི་ནི་སྲེད་པ་སྟེ་ཚོར་བའི་རྐྱེན་གྱིས་སྲེད་པ་ཞེས་དང་། འདུ་བྱེད་རྣམས་ཀྱི་རྣམ་པར་ཤེས་པ་དང་རྣམ་པར་ཤེས་པའི་མིང་དང་གཟུགས་ཏེ། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་དང་། རྣམ་པར་
ཤེས་པའི་རྐྱེན་གྱིས་མིང་དང་གཟུགས་ཞེས་གསུངས་པའི་ཕྱིར་རོ། །དེ་བཞིན་དུ་གཞན་ལ་ཡང་སྦྱར་བར་བྱའོ། །དེ་ཉིད་རྫས་གཅིག་ཀྱང་ཕུང་པོ་ཉིད་དུ་གྲུབ་ལ་ཚོགས་པ་རྣམས་ཀྱི་རེ་རེས་ཀྱང་བྱ་བའི་ཁུར་ཁྱེར་བར་ནུས་པའི་ཕྱིར་རོ། །ཡོངས་སུ་ཆད་པའི་དོན་ཞེས་རྒྱ་ཆེར་འབྱུང་བ་ལ། ལྷན་ཅིག་སྐྱེ་
བའི་འབྱུང་བ་དང་འབྱུང་བ་ལས་གྱུར་པ་རྣམས་དང་། སེམས་དང་སེམས་ལས་བྱུང་བ་རྣམས་གཅིག་ཀྱང་བློས་དཔྱད་པར་བྱ་བ་ནུས་པས་ཡོངས་སུ་ཆད་པའོ། །བྱ་བར་འདོད་པ་ནི་འདུས་བྱས་སོ། །དེ་ལ་ཡོངས་སུ་ཆད་པ་གང་ཡིན་པ་དང་མ་འོངས་པ་དང་ད་ལྟར་བྱུང་བ་རྣམས་ཏེ། དེ་ལྟར་ཕུང་

པོ་རྣམས་རྫས་སུ་ཡོད་པ་ཡིན་གྱི་བཏགས་པར་ནི་མ་ཡིན་ནོ། །དེ་ནི་མདོ་དང་འགལ་ལོ་ཞེས་རྒྱས་པར་འབྱུང་བ་ལ། སློབ་དཔོན་འདུས་བཟང་ན་རེ། སྐྱེ་མཆེད་དང་ཁམས་ཀྱི་དོན་གྱི་མདོ་གཟུང་བར་བྱའི། ཕུང་པོའི་དོན་གྱི་མདོ་ནི་མི་འདོད་དོ་ཞེས་ཟེར་རོ། །རིགས་
པ་འདི་ནི་ཅི་དེ་ལ་རིགས་ན་སྐྱེ་མཆེད་དང་ཕུང་པོའི་དོན་གྱི་མདོ་ལས་མ་གསུངས་པ་ལ་དེ་ལྟར་མདོ་དང་འགལ་བ་ཡོད་པ་མ་ཡིན་ལ། ཕུང་པོའི་དོན་གྱི་མདོ་ལས་བཅོམ་ལྡན་འདས་ཀྱིས་གསུངས་པས་དེ་དང་མི་འགལ་བ་གཞན་མ་ཡིན་ནོ། །བསྒྲུབ་པར་ནུས་པའི་མདོར་ཡང་ཕུང་པོའི་དོན་ཉིད་
གསུངས་ཏེ་དེ་ཐམས་ཅད་གཅིག་ཏུ་བསྡུས་ཤིང་ཞེས་གསུངས་པའི་ཕྱིར་རོ། །རེ་རེས་ནི་མི་ནུས་པ་ཉིད་དོ། །བྱ་བའི་ཁུར་ཁྱེར་བའི་དོན་ནམ་ཡོངས་སུ་ཆད་པའི་དོན་ནི་ཕུང་པོའི་ཞེས་ཤེས་པར་བྱའོ། །ཐལ་བར་འགྱུར་བའི་སྒོ་ནས་ཕུང་པོ་རྣམས་བཏགས་པའི་ཡོད་པ་ཉིད་བཟློག་པར་འདོད་པས་
ན། དེ་ལྟར་ན་སྐྱེ་མཆེད་གཟུགས་ཅན་རྣམས་ཀྱང་ཞེས་བྱ་བ་རྒྱས་པར་སྨོས་ཏེ། ཐོགས་པ་མེད་པའི་སྐྱེ་མཆེད་བཀག་སྟེ་བཅུ་ཆར་ཡང་གཟུང་ངོ་། །མིག་ལ་སོགས་པའི་རྡུལ་ཕྲ་རབ་མང་པོ་རྣམས་སྐྱེ་བའི་སྒོར་གྱུར་པའི་ཕྱིར་རོ་ཞེས་བྱ་བ་ནི་བཏགས་པའི་ཡོད་པ་ཉིད་ལ་རྒྱུར་སྨྲས་པ་སྟེ། རྣམ་
པར་ཤེས་པའི་ཚོགས་ལྔ་ནི་བསགས་པ་ལ་བརྟེན་པ་དང་དམིགས་པ་ཡིན་པའི་ཕྱིར་རོ། །མིག་གི་དབང་པོའི་རྡུལ་ཕྲ་རབ་དང་ཁ་དོག་གི་རྡུལ་ཕྲ་རབ་མང་པོ་བསགས་པ་ཁོ་ན་རྟེན་དང་དམིགས་པའི་ངོ་བོས་མིག་གི་རྣམ་པར་ཤེས་པ་མཚུངས་པར་ལྡན་པ་དང་བཅས་པ་སྐྱེ་བའི་སྒོར་འགྱུར་ཏེ།
ལུས་ཀྱི་སྐྱེ་མཆེད་དང་རེག་བྱའི་སྐྱེ་མཆེད་ཀྱི་བར་དུ་ཡང་དེ་དང་འདྲའོ། །དེའི་ཕྱིར་རྫས་དུ་མ་འདུས་པའི་ཕྱིར་མིག་གི་སྐྱེ་མཆེད་ལ་སོགས་པ་བཏགས་པར་ཡོད་པ་ཉིད་དོ། །མ་ཡིན་ཏེ་ཚོགས་པ་རྣམས་རེ་རེ་ནས་རྒྱུའི་ངོ་བོར་གྱུར་པའི་ཕྱིར་ཞེས་བྱ་བ་ལ། གང་མང་པོ་རྣམས་སྐྱེ་བའི་སྒོར་གྱུར་པའི་ཕྱིར།
ཞེས་བཤད་པ་དེ་ལྟར་ཁས་མི་ལེན་ཏེ། གང་གི་ཕྱིར་ཚོགས་ཐམས་ཅད་ཀྱང་རེ་རེ་ནས་རྒྱུར་འགྱུར་ཏེ་མིག་ལ་སོགས་པའི་རྣམ་པར་ཤེས་པ་རྣམས་རྡུལ་ཕྲ་རབ་རེ་རེ་ལ་བརྟེན་པའི་ཕྱིར་རྡུལ་ཕྲ་རབ་རེ་རེ་ལ་དམིགས་པའི་ཕྱིར་རོ། །ཅི་སྟེ་ཅིའི་ཕྱིར་བསགས་པ་ཁོ་ན་རྟེན་ཡིན་ཞིང་བསགས་པ་ཁོ་ན་དམིགས་

པ་ཡིན་སྙམ་དུ་སེམས་ན། དེ་ཉིད་ཀྱི་ཕྱིར་རྫས་དུ་མ་འདུས་པ་ཉིད་མི་འདའ་སྟེ་བལྟོས་པ་དང་བཅས་པ་རྣམས་རྒྱུ་ཡིན་པའི་ཕྱིར་རོ། །འདི་ལྟར་གལ་ཏེ་རེ་རེ་ཞིང་སྐྱེ་མཆེད་དུ་འགྱུར་ན་ནི་གཟུགས་ཅན་མ་ཡིན་པའི་སྐྱེ་མཆེད་ལྟར་གཉིས་པ་ལ་མི་བལྟོས་པར་འགྱུར་བ་ཞིག་གོ་སྙམ་ན། འདིའི་
ལེན་དུ་ཡུལ་ལྷན་ཅིག་བྱེད་པ་ཡིན་པའི་ཕྱིར་ཞེས་བྱ་བ་རྒྱས་པར་གསུངས་ཏེ། གལ་ཏེ་ལྷན་ཅིག་བྱེད་པ་ལ་བལྟོས་པ་དང་བཅས་པ་རྣམས་རྒྱུར་གྱུར་པའི་ཕྱིར་དབང་པོའི་རྡུལ་ཕྲ་རབ་རྣམས་རེ་རེ་ནས་སྐྱེ་མཆེད་ཉིད་དུ་མི་འདོད་ན། དེ་ལྟར་མིག་ལ་སོགས་པ་དབང་པོའི་གཟུགས་ལ་སོགས་པ་དག་
ལས་ལོགས་ཤིག་ཏུ་སྐྱེ་མཆེད་དུ་མི་འགྱུར་རོ། །ཅིའི་ཕྱིར་ཞེ་ན་ཡུལ་ལྷན་ཅིག་བྱེད་པའི་ཕྱིར་རོ། །ཡུལ་ལ་བལྟོས་པ་མེད་པར་དབང་པོ་རྣམས་འབའ་ཞིག་སེམས་དང་སེམས་ལས་བྱུང་བ་རྣམས་ཀྱི་སྐྱེ་བའི་སྒོར་མི་འགྱུར་ལ། ཁྱོད་ཀྱི་ལྟར་ན་མིག་གི་དབང་པོ་གཟུགས་ལ་སོགས་པ་དག་ལས་
ལོགས་ཤིག་ཏུ་སྐྱེ་མཆེད་དུ་མི་འགྱུར་བ་ཡང་མ་ཡིན་ཏེ། མདོ་ལས་སྐྱེ་མཆེད་བཅུ་གཉིས་སོ་ཞེས་གསུངས་པའི་ཕྱིར་རོ། །དེ་ལྟར་ན་མིག་ལ་སོགས་པའི་རྡུལ་ཕྲ་རབ་རྣམས་ཀྱང་སོ་སོར་སྐྱེ་མཆེད་ཡིན་ནོ་ཞེས་བྱ་བར་ཤེས་པར་བྱའོ། །ཡང་ཅིའི་ཕྱིར་མིག་ལ་སོགས་པ་རྡུལ་ཕྲ་རབ་རྣམས་ཡུལ་
གྱི་རྡུལ་ཕྲ་རབ་རྣམས་ཀྱི་ལྷན་ཅིག་བྱེད་པ་ཡིན་ཡང་ཐ་དད་དུ་བྱས་ཤེ་ན། དེ་དག་ལྷན་ཅིག་བྱེད་པ་ཡིན་པའི་ཕྱིར་གཅིག་ཏུ་བྱས་པ་མ་ཡིན་གྱི། འོ་ན་ཅི་ཞེ་ན་རིགས་དང་སྤྱོད་ཡུལ་དང་རྣམ་པར་ཤེས་པ་འདྲ་བའི་ཕྱིར་རོ། །ཡུལ་གྱི་རྡུལ་ཕྲ་རབ་རྣམས་ནི་རིགས་ཐ་དད་པས་འདི་དག་གི་སྤྱོད་ཡུལ་དུ་ཡོད་པ་མ་ཡིན་
ཏེ། སྔོན་པོ་ལ་སོགས་པ་ཐམས་ཅད་ཀྱིས་རྣམ་པར་ཤེས་པ་སྐྱེད་པ་ལ་མིག་གི་དབང་པོའི་རྡུལ་ཕྲ་རབ་རྣམས་ཀྱང་ཐུན་མོང་བའི་ཕྱིར་སྔོན་པོ་ལ་སོགས་པའི་རྡུལ་ཕྲ་རབ་རྣམས་ཁོ་ན་ནི་མ་ཡིན་པས་གཅིག་ཏུ་མ་བྱས་ཏེ། དེ་བཞིན་དུ་གཞན་ལ་ཡང་རིག་པར་བྱའོ། །བྱེ་བྲག་ཏུ་བཤད་པ་ལས་ནི་ཞེས་བྱ་
བ་འདིས་ཕུང་པོ་རྣམས་བཏགས་པར་ཡོད་པ་ཡིན་ནོ་ཞེས་སྟོན་པར་བྱེད་དོ། །ཡང་ཅི་ཕུང་པོ་འདི་བཏགས་པའི་ཡོད་པར་ལྟ་བར་བྱེད་ན་འདས་པའི་མིང་ལ་སོགས་པ་གཅིག་ཏུ་བསྡོམས་པ་ལ་བལྟོས་ཏེ་མ་བལྟོས་པའི་མཐའ་འཇུག་པར་བྱེད་པ་དེ་ཡིས་དེ་ལ་བལྟོས་ནས་ཕུང་པོ་ཞེས་བརྗོད་དེ། མ་བལྟོས་

པར་སྤུངས་པ་བཞིན་དུ་གཅིག་གི་ངོ་བོར་མི་རིགས་སོ། །རང་གི་ཚོགས་པ་ཅན་ནི་ཚོགས་པར་བཤད་པས་རྡུལ་ཕྲ་རབ་གཅིག་ཀྱང་ཕུང་པོའི་ཕྱོགས་ཞེས་བྱའོ། །ཡང་ན་ཕུང་པོ་བཏགས་པ་ལ་བལྟོས་པ་ཞེས་པ་སྟེ་ཕུང་པོར་གྱུར་པས་བཏགས་པ་ལ་བལྟོས་པའོ། །གཞན་དག་
ན་རེ་བཏགས་པར་ཡོད་པའི་ཕུང་པོ་ནི་གཞན་ལ་བལྟོས་པའོ་ཞེས་ཟེར་རོ། །རྡུལ་ཕྲ་རབ་ཁམས་གཅིག་ཅེས་བྱ་བ་ནི་གཟུགས་ཅན་བཅུ་ལས་གང་ཡང་རུང་བའོ། །སྐྱེ་མཆེད་གཅིག་ཅེས་བྱ་བ་ནི་གཟུགས་ཅན་རྣམས་ལས་གང་ཡང་རུང་བའོ། །ཕུང་པོ་གཅིག་གི་ཞེས་བྱ་བ་ནི་ཕུང་པོ་ལྔ་ལས་གཟུགས་ཀྱི་
ཕུང་པོའོ། །ཕྱོགས་ཆ་ནི་ཆ་ཤས་ཏེ་རྫས་ཀྱི་རྡུལ་ཕྲ་རབ་ཀྱི་དབང་དུ་བྱས་པའོ། །བཏགས་པ་ལ་བལྟོས་པ་མེད་པར་ཕྱོགས་ལ་མི་འཇུག་པའི་སྒྲ་ཕྱོགས་སུ་བརྗོད་དེ། ཡང་ན་བལྟོས་པས་ཕུང་པོ་བཏགས་པར་བཤད་པ་ཞེས་རྒྱས་པར་ཏེ། ཇི་ལྟར་འདི་འདོད་པ་སྤྱོད་པར་དམིགས་ཞེས་བཤད་པར་འགྱུར་རོ། །
ཕྱོགས་ལ་ཡང་ཕྱོགས་ཅན་བཞིན་དུ་ཉེ་བར་འདོགས་པའི་ཐ་དད་ཡོད་དེ། དེ་ལ་ཕྱོགས་ནི་རྡུལ་ཕྲ་རབ་པོ། །ཕྱོགས་ཅན་ནི་གཟུགས་ཅན་གང་ཡང་རུང་བ་ཁམས་དང་སྐྱེ་མཆེད་དང་ཕུང་པོ་རྣམས་སོ། །དེ་ཉིད་ལ་འཇིག་རྟེན་ལ་གྲགས་པའི་དཔེ་སྨོས་པ་ནི་དཔེར་ན་རས་ཡུག་གི་ཕྱོགས་ཞེས་བྱ་བ་རྒྱས་པར་འབྱུང་
བའོ། །ལ་བ་ལ་སོགས་པ་ཚིག་པ་དགག་པ་བརྗོད་པར་འདོད་པ་དང་མ་ཚིག་པ་དགག་པ་བརྗོད་པར་འདོད་པའི་ཚེ་རས་ཡུག་གི་ཕྱོགས་གཅིག་ཚིག་པ་ལ་རས་ཡུག་ཚིག་གོ་ཞེས་བརྗོད་ཀྱི། རིལ་དང་ཕྱོགས་གཅིག་ཚིག་པ་བརྗོད་པར་འདོད་པའི་ཚེ་ནི་མ་ཡིན་པ་དེ་བཞིན་དུ་འདིར་ཡང་ཕུང་པོ་གཞན་དགག་པ་བརྗོད་
པ་དང་། ཕུང་པོ་མ་ཡིན་པ་དགག་པ་བརྗོད་པར་འདོད་པའི་ཚེ་ཕུང་པོའི་ཕྱོགས་གཅིག་ལ་ཕུང་པོར་འདོགས་ཏེ། ཕྱོགས་དང་ཕྱོགས་ཅན་དག་གཙོ་བོ་མ་ཡིན་པའི་ཕྱིར་རོ། །ཕུང་པོ་དང་སྐྱེ་མཆེད་དང་ཁམས་རྣམས་ཀྱི་ཆོས་ཐ་དད་པ་ལ་ཐ་དད་པར་བསྟན་པའི་དགོས་པ་འདྲི་བ་ནི། ཡང་ཅིའི་ཕྱིར་བཅོམ་
ལྡན་འདས་ཀྱིས་ཞེས་རྒྱ་ཆེར་འབྱུང་བའོ། །བདེ་བར་གཤེགས་པའི་དགོངས་པ་ནི་ཤེས་པར་དཀའ་མོད་ཀྱི། རྟོག་གེ་པ་རྣམས་ལ་ནི་འདི་ལྟར་སྣང་སྟེ་གདུལ་བྱ་རྣམས་ཀྱི། རྨོངས་དབང་འདོད་རྣམ་གསུམ་གྱི་ཕྱིར། །ཞེས་བྱ་བ་རྒྱས་པར་འབྱུང་བའོ། །རྣམ་གསུམ་གྱི་སྒྲ་ནི་རེ་རེ་དང་སྦྱར་བར་བྱ་སྟེ།

རྨོངས་པ་རྣམ་པ་གསུམ་གྱི་ཕྱིར། །ཞེས་བྱ་བ་ནི་ས་འདོད་པ་རྣམ་པ་གསུམ་གྱི་ཕྱིར་གྱི་བར་རོ། །གྲག་གོ་ཞེས་བྱ་བ་གྲག་གོའི་སྒྲ་ནི་འདི་མདོའི་དོན་མ་ཡིན་པའོ། །གང་ལས་ཕུང་པོ་ལྔ་ལ་སོགས་པ་རྣམས་སུ་ཕུང་པོ་ལ་སོགས་པ་བསྟན་པ་ལ་དགོས་པ་གཞན་གསུངས་ཏེ། གོ་རིམས་ཇི་ལྟ་བ་
བཞིན་དུ་གཅིག་པ་ཉིད་དང་བྱེད་པ་པོ་ཉིད་དང་ཟ་བ་པོ་ཉིད་དུ་འཛིན་པ་བསལ་བའི་སྒོ་ནས་ཕུང་པོ་ལ་སོགས་པ་གསུམ་བསྟན་ཏེ། དེ་དག་ལ་བདག་ཏུ་འཛིན་པ་ནི་གཅིག་པ་ཉིད་དུ་འཛིན་པ་ལ་སོགས་པ་སྔོན་དུ་འགྲོ་བ་ཅན་ཡིན་པའི་ཕྱིར་རོ། །ཡང་ན་སྤྱོད་པ་སྟོང་ཕྲག་བརྒྱད་ཅུའི་དབྱེ་བ་ལ་ཀུན་ཏུ་རྨོངས་
པའི་གཉེན་པོར་ཕུང་པོ་ལ་སོགས་པ་བསྟན་ཏོ་ཞེས་གྲག་གོ། །ཁ་ཅིག་ནི་སེམས་ལས་བྱུང་བ་རྣམས་ལ་ཀུན་ཏུ་རྨོངས་ཏེ་ཇི་ལྟར་ཞེ་ན། རིལ་པོའི་བདག་ཏུ་འཛིན་པས་ཞེས་བྱ་སྟེ་རྒྱུ་ལ་རྨོངས་པས་རིལ་པོའི་རིལ་པོ་ལ་བདག་སྙམ་དུ་འཛིན་པས་སོ། །ཡང་ན་སེམས་ལས་བྱུང་བ་རྣམས་ལ་རིལ་པོར་བཟུང་
སྟེ། ཕྱིས་བདག་ཏུ་འཛིན་པས་ཚོར་བ་དང་འདུ་ཤེས་དང་འདུ་བྱེད་ཕན་ཚུན་པ་དང་བདག་ཀྱང་མཚན་ཉིད་གཅིག་པ་ཉིད་དུ་བཟུང་ནས་བདག་ཏུ་མངོན་པར་ཞེན་ཏེ། དེའི་ཕྱིར་དེ་དག་ལ་བདག་ཏུ་འཛིན་པ་སྔོན་དུ་འགྲོ་བ་ཅན་རིལ་པོར་འཛིན་པ་སྟེ། རིལ་པོར་འཛིན་པའི་གཉེན་པོར་ཕུང་པོ་བསྟན་པ་བརྩམས་སོ། །
དེ་ལྟར་ན་ཚོར་བ་ལ་སོགས་པའི་དབྱེ་བ་བསྟན་པས་ཕུང་པོ་ལ་རིལ་པོར་འཛིན་པ་ལོག་པ་དང་བདག་ཏུ་འཛིན་པ་ཡང་ལྡོག་པར་འགྱུར་ཏེ། དེ་སྔོན་དུ་འགྲོ་བ་ཅན་ཡིན་པའི་ཕྱིར་རོ། །ཁ་ཅིག་ནི་གཟུགས་ཁོ་ན་ལའོ་ཞེས་བྱ་བ་ལ་རིལ་པོའི་བདག་ཏུ་འཛིན་པས་ཀུན་ཏུ་རྨོངས་སོ་ཞེས་བྱ་བར་སྦྱར་རོ། །ཀུན་
ཏུ་རྨོངས་པ་དེའི་གཉེན་པོར་གཟུགས་ཉིད་རྣམ་པ་བཅུར་ཕྱེ་བ་དང་སེམས་དང་སེམས་ལས་བྱུང་བ་རྣམས་སྐྱེ་མཆེད་གཅིག་ཉིད་དེ། དེ་ལྟར་རིལ་པོར་ཕྱེ་བ་ལ་རིལ་པོར་འཛིན་པ་སྔོན་དུ་འགྲོ་བ་ཅན་གྱི་བདག་ཏུ་འཛིན་པ་ལྡོག་པར་འགྱུར་རོ། །ཁ་ཅིག་ནི་གཟུགས་དང་སེམས་ལ་སྟེ་རྨོངས་སོ་ཞེས་བྱ་བར་སྙེགས་སོ། །
དེ་དག་གི་རྨོངས་པ་བཟློག་པར་བྱ་བའི་ཕྱིར་ཁམས་བསྟན་པ་ལས་གཟུགས་རྣམ་པ་བཅུ་དང་སེམས་རྣམ་པ་བདུན་དུ་ཕྱེ་ནས་བསྟན་ཏོ། །དེ་ལ་སེམས་དང་སེམས་ལས་བྱུང་བ་དག་ལ་རྨོངས་པ་གང་ཡིན་པ་དེ་ནི་རྨོངས་པའི་རྣམ་པ་ཆུང་བ་ཡིན་ཏེ། དངོས་པོ་ཕྲ་བ་དང་རིགས་མཐུན་པ་ལ་རྨོངས་པའི་ཕྱིར་རོ། །

གང་ཞིག་གཟུགས་ལ་རྨོངས་པ་དེ་ནི་རྨོངས་པའི་རྣམ་པ་འབྲིང་པོ་ཡིན་ཏེ། དངོས་པོ་རགས་ཤིང་རིགས་མཐུན་པ་ལ་རྨོངས་པའི་ཕྱིར་རོ། །གང་ཞིག་གཟུགས་དང་སེམས་དག་ལ་རྨོངས་པ་དེ་ནི་རྨོངས་པའི་རྣམ་པ་ཆེན་པོ་ཡིན་ཏེ། དངོས་པོ་ཕྲ་བ་དང་རགས་པ་དང་རིགས་མཐུན་པ་དང་མི་མཐུན་པ་
རྣམས་ལ་རྨོངས་པའི་ཕྱིར་རོ། །དེ་ལྟར་ན་ཕུང་པོ་བསྟན་པ་འདིས་ཇི་སྐད་བཤད་པའི་ཀུན་ཏུ་རྨོངས་པ་དང་འཇིག་ཚོགས་ལ་ལྟ་བ་རིལ་པོར་འཛིན་པ་སྔོན་དུ་འགྲོ་བ་ཅན་བཟློག་སྟེ། དེ་སྔོན་དུ་འགྲོ་བ་ཅན་གྱི་ཉོན་མོངས་པ་རྣམས་ཀྱང་སྤོང་བ་ཡིན་ནོ། །དབང་པོ་དག་ཀྱང་རྣམ་པ་གསུམ་
སྟེ་ཞེས་བྱ་བ་ལ། འདིར་དབང་པོ་རྣམས་ནི་དད་པ་ལ་སོགས་པའོ། །དབང་པོ་རྟུལ་པོ་དང་འབྲིང་པོ་དག་གིས་ནི་ཁམས་དང་སྐྱེ་མཆེད་རབ་ཏུ་དབྱེ་བ་རྟོགས་ཀྱི་ཕུང་པོ་བསྟན་པ་ནི་མ་ཡིན་ནོ། །དབང་པོ་རྟུལ་པོ་ལ་ནི་ཁམས་ཀྱི་རབ་ཏུ་དབྱེ་བ་ལས་ཕན་བཏགས་པར་འགྱུར་གྱི་སྐྱེ་མཆེད་ཀྱིས་མ་ཡིན་ནོ། །
དབང་པོ་རྣོན་པོ་དང་འབྲིང་པོ་དག་ལ་ནི་ཕུང་པོ་བསྟན་པ་དང་སྐྱེ་མཆེད་བསྟན་པས་སྐྱེ་མཆེད་དང་ཁམས་ཀྱི་དབྱེ་བ་རྟོགས་པར་ནུས་ཏེ། དེའི་ཕྱིར་སྐྱེ་མཆེད་བསྟན་པ་དང་ཁམས་བསྟན་པ་དོན་མེད་པར་འགྱུར་བའམ་གཞན་དུ་ན་དེ་བཞིན་གཤེགས་པ་ལ་ཡིད་མི་ཆེས་པར་འགྱུར་རོ། །དེའི་ཕྱིར་གང་ཟག་དབང་
པོ་རྣོན་པོའི་དབང་དུ་བྱས་ནས་ཕུང་པོ་བསྟན་པ་དང་དབང་པོ་འབྲིང་པོ་ལ་སྐྱེ་མཆེད་བསྟན་པ་དང་དབང་པོ་རྟུལ་པོ་ལ་ཁམས་བསྟན་པ་སྟེ། དེ་ལྟར་ན་ཐམས་ཅད་ལ་ཕན་གདགས་པ་བྱས་པར་འགྱུར་རོ། །འདོད་པ་ཡང་རྣམ་པ་གསུམ་སྟེ་ཞེས་བྱ་བ་ལ། འདོད་པ་ནི་མོས་པ་སྟེ། གཞན་དུ་ན་མོས་
པ་རྣམས་ལ་གཞན་དུ་ཆོས་བསྟན་པ་ནི་ཡིད་མི་ཆེས་པའི་རྒྱུར་འགྱུར་བ་ཁོ་ན་འབའ་ཞིག་ཏུ་ཟད་པས། གདུལ་བྱའི་མོས་པའི་ཁྱད་པར་ལས་ཕུང་པོ་ལ་སོགས་པའི་སྒོ་ནས་རྣམ་པ་གསུམ་སྟེ། འདི་དག་ཐམས་ཅད་ཀྱང་ཆོས་རབ་ཏུ་རྣམ་པར་འབྱེད་པའི་དོན་ཏེ། ཆོས་རབ་ཏུ་རྣམ་པར་འབྱེད་པ་
མེད་པར་ཉོན་མོངས་པ་སྤོང་བ་མེད་པས་ན། ཕུང་པོ་བསྟན་པའི་དགོས་པ་ནི་སྔར་ཉིད་དུ་ཤེས་པར་བྱས་ཟིན་ཏོ། །དེ་ལས་གཞན་པའི་སེམས་ལས་བྱུང་བ་ཕུང་པོ་ཐ་དད་པར་བྱས་པ་མི་འགལ་བ་གང་ཡིན་པ་འདིར་བརྗོད་པར་བྱ་བ་ནི་ཡང་ཅིའི་ཕྱིར་ཞེས་རྒྱས་པར་འབྱུང་བའོ། །འདོད་པར་བྱ་བས་ན་འདོད་པ་

སྟེ་གཟུགས་ལ་སོགས་པའི་ཡུལ་རྣམས་སོ། །དེ་དག་ལ་ལྷག་པར་ཆགས་པ་ནི་འདུན་པའི་འདོད་ཆགས་སོ། །ལྟ་བ་དག་ནི་འཇིག་ཚོགས་ལ་ལྟ་བ་ལ་སོགས་པ་རྣམས་སོ། །དེ་དག་ལ་ལྷག་པར་ཆགས་པ་ནི་འདུན་པའི་འདོད་ཆགས་ཁོ་ནའོ། །སྔ་མ་ནི་ཕལ་ཆེར་ཁྱིམ་པའི་ཕྱོགས་དང་།
ཕྱི་མ་ནི་ཕལ་ཆེར་རབ་ཏུ་འབྱུང་བའི་ཕྱོགས་ཀྱིའོ། །དེ་ལྟར་ཡང་མདོ་ལས་འདོད་པའི་འདོད་ཆགས་ལ་ལྷག་པར་ཞེན་པ་དང་འཆུམས་པ་དང་ཡོངས་སུ་ཞེན་པ་དང་ལྷན་ཅིག་ཏུ་གྱུར་པས་ཁྱིམ་པ་རྣམས་ནི་ཁྱིམ་པ་རྣམས་དང་ལྷན་ཅིག་ཏུ་རྩོད་པར་བྱེད་འགྱེད་པར་བྱེད་དོ་ཞེས་གསུངས་ཏེ། དེ་གཉིས་ཀྱིས་
ཞེན་པ་ནི་ཚོར་བ་དང་འདུ་ཤེས་སོ། །གཙོ་བོ་སྨོས་པ་ནི་མ་རིག་པ་ལ་སོགས་པ་རྣམས་ཀྱང་དེ་གཉིས་ཀྱི་རྒྱུར་འགྱུར་བའི་ཕྱིར་རོ། །ཚོར་བ་རོ་མྱང་བའི་དབང་གིས་ནི་ཞེས་པ་ལ་རོ་མྱང་དམ་པ་ནི་ཚོར་བ་ཉིད་རོ་མྱང་བ་ཡིན་པས་ན་ཚོར་བ་མྱང་བའོ། །དེ་ནི་རོ་མངར་བ་དང་འདྲ་བས་ན་རོ་མྱང་བ་སྟེ་དེའི་དབང་
གིས་འདུན་པའི་འདོད་ཆགས་ཀྱི་སྒོ་ནས་འདོད་པ་ལ་མངོན་པར་ཞེན་པ་ཡིན་ནོ། །ཡང་ན་ཚོར་བ་ལ་རོ་མྱང་བའི་ཕྱིར་ཚོར་བ་རོ་མྱང་བ་སྟེ་དེ་ལ་སྲེད་པའི་དབང་གིས་ཚོར་བ་ལ་ཕན་འདོགས་ཤིང་འདོད་པ་ལ་མངོན་པར་ཞེན་པ་དང་ལྷག་པར་ཆགས་པ་ཡིན་ནོ། །འདུ་ཤེས་ཕྱིན་ཅི་ལོག་གི་དབང་གིས་ཞེས་བྱ་བ་
ནི་ཆོས་མ་ཡིན་པས་ཆོས་སུ་འདུ་ཤེས་པ་དང་བདག་མེད་པ་ལ་སོགས་པ་རྣམས་ལ་བདག་ལ་སོགས་པར་འདུ་ཤེས་པ་སྟེ། དེ་དག་ནི་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དང་འཇིག་ཚོགས་དང་མཐར་འཛིན་པར་ལྟ་བ་ལ་སོགས་པ་སྟེ་ལྟ་བ་དེ་དག་ལ་མངོན་པར་ཞེན་ནོ། །གང་གི་ཚེ་བདེན་
པ་མཐོང་བ་རྣམས་ལ་འདུ་ཤེས་ཡོད་ཀྱང་ཕྱིན་ཅི་ལོག་མེད་པས་ལྟ་བ་ལ་མངོན་པར་ཞེན་པ་ཡོད་པ་མ་ཡིན་ཏེ། དེའི་ཕྱིར་གང་གིས་འདུ་ཤེས་ཕྱིན་ཅི་ལོག་ཏུ་བྱས་པ་དེ་ཉིད་ལྟ་བ་ལ་མངོན་པར་ཞེན་པའི་རྒྱུ་ཡིན་ཏེ། དེ་ཡོད་པ་དང་མེད་པ་དག་གིས་ཡོད་པ་དང་མེད་པའི་ཕྱིར་རོ་ཞེ་ན། དེ་ནི་དེ་ལྟ་མ་ཡིན་
ཏེ་མི་གསལ་བའི་བདག་ཉིད་ཀྱིས་མུན་པ་དང་འདྲ་བའི་ཕྱིར་ན་ཕྱིན་ཅི་ལོག་ཏུ་རྟོག་པའི་རྒྱུ་མ་རིག་པ་ནི་ལྟ་བ་ལ་མངོན་པར་ཞེན་པའི་རྒྱུར་ཤེས་པར་བྱ་བ་མ་ཡིན་གྱི། གང་ཞིག་དེ་དང་འདྲེས་ཤིང་མཚན་མར་འཛིན་པའི་རྣམ་པ་ཅན་གྱི་འདུ་ཤེས་དེ་ནི་རྒྱུ་ཡིན་ནོ། །སྨྲས་པ། འདམ་བྱིང་ཉ་ནི་ཡང་ཡང་འཕར་བ་

ཡིས། །ཆུ་དག་རྙོག་པར་བྱེད་པ་ཇི་བཞིན་དུ། །མ་རིག་པ་དང་རྗེས་འབྲེལ་འདུ་ཤེས་ཀྱིས། །རིག་པ་སུན་འབྱིན་བྱེད་པའང་དེ་དང་འདྲ། །དེའི་ཕྱིར་འདུ་ཤེས་ཕྱིན་ཅི་ལོག་གི་དབང་གིས་ནི་ལྟ་བ་དག་ལ་མངོན་པར་ཞེན་ཏོ་ཞེས་བྱ་བའི་རིགས་སོ། །ཚོར་བ་ལ་ཞེན་པ་ནི་ཚོར་བ་ལ་ཆགས་
པའོ། །འདུ་ཤེས་ཕྱིན་ཅི་ལོག་ཏུ་གྱུར་པ་ནི་ཕྱིན་ཅི་ལོག་ཏུ་མཚན་མར་འཛིན་པའོ། །དེ་ལ་ཚོར་བ་ལ་ཞེན་ཅིང་སྲེད་པ་ལ་སྤྱོད་པ་ནི་འཁོར་བར་འཁོར་རོ། །འདུ་ཤེས་ཕྱིན་ཅི་ལོག་ཏུ་གྱུར་པས་ནི་ལྟ་བར་སྤྱོད་དོ། །ཚོར་བ་ལ་ཞེན་པ་ནི་ཕྱིན་ཅི་ལོག་བཞིས་འདུ་ཤེས་ཕྱིན་ཅི་ལོག་ཏུ་གྱུར་པ་ཁོ་ནས་ཉིང་
མཚམས་སྦྱོར་བའི་ཚེ་འཁོར་ཏེ། ཇི་སྐད་དུ། བློ་ནི་ཕྱིན་ཅི་ལོག་གྱུར་ལས། །རྩེ་དགས་འགྲོ་བའི་ཡུལ་དུ་འགྲོ། །ཞེས་བཤད་པ་ལྟ་བུའོ། །འདིར་འཁོར་བའི་རྒྱུའི་ངོ་བོ་དག་དེ་ལྟར་གསུངས་ཏེ་དངོས་སུ་ནི་ཕྱིན་ཅི་ལོག་ཏུ་ཞེན་པ་ཁོ་ན་རྒྱུ་ཉིད་དེ་སངས་རྒྱས་རྣམས་ལ་དགོངས་པ་སྔོན་དུ་མ་བཏང་
བའི་ཆོས་སྟོན་པ་མི་མངའ་ཞིང་། དགོངས་པ་ཡང་འདིར་གསལ་བར་བྱས་པའི་ཕྱིར་ཞེས་སོ། །འོ་ན་ཅིའི་ཕྱིར་སྐྱེ་མཆེད་དང་ཞེས་བྱ་བ་ལ་སོགས་པ་ནི་དྲི་བའོ། །ཕུང་པོ་དག་ཏུ་འདུས་མ་བྱས། །དོན་དུ་རུང་ཕྱིར་མ་བཤད་དོ། །ཕུང་པོ་དག་འཆད་པ་ན་འདུས་མ་བྱས་ནི་དེ་དག་ཁོ་ནའི་
ཁོངས་སུ་བསྡུས་པར་རམ་དེ་དག་ལས་ཐ་དད་པར་གཞན་ཞིག་ཏུ་རྣམ་པར་འཇོག །དེ་ཡང་ཉེ་བར་ལེན་པའི་ཕུང་པོ་དག་གམ་ཕུང་པོ་དག་གི་ཁོངས་སུ་སྡུད་གྲང་ན་རྣམ་པ་ཐམས་ཅད་དུ་ཡང་མི་རུང་ངོ་། །ཅིའི་ཕྱིར་ཞེ་ན་དོན་དུ་མི་རུང་བའི་ཕྱིར་རོ། །རེ་ཞིག་ཕུང་པོ་དག་གི་ཁོངས་སུ་བསྡུ་བར་
ནི་མི་ནུས་ཏེ། དེ་དག་གི་ཉེ་བར་ལེན་པའི་དོན་མི་རིག་པའི་ཕྱིར་རོ། །དེ་དག་གི་ཉེ་བར་ལེན་པ་ནི་གཟུགས་དང་ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པ་དག་ཡོད་ན་འདུས་མ་བྱས་ནི་གཟུགས་ལ་སོགས་པའི་བདག་ཉིད་ཀྱང་མ་ཡིན་ཏེ། ཇི་ལྟར་དེའི་བདག་ཉིད་མ་ཡིན་པ་དེ་གཟུགས་ལ་
སོགས་པའི་ཕུང་པོ་དག་གིས་བསྡུས་པར་རིགས་སོ། །དེ་ཉིད་ཀྱི་ཕྱིར་དེ་ནི་གཟུགས་མ་ཡིན་ཞིང་རྣམ་པར་ཤེས་པའི་བར་དུ་ཡང་མ་ཡིན་པས་ཞེས་བཤད་དོ། །འདི་སྐད་བཤད་པར་འགྱུར་ཏེ་དེ་ནི་གཟུགས་སུ་རུང་བ་མ་ཡིན་པ་ནས་རྣམ་པར་རིག་པ་མ་ཡིན་པའི་བར་དུ་སྟེ། ཕུང་པོ་དྲུག་པར་བརྗོད་པར་ཡང་མི་རུང་སྟེ་

སྤུངས་པའི་དོན་མི་རུང་བའི་ཕྱིར་རོ། །གལ་ཏེ་ཕུང་པོའི་དོན་ནི་སྤུངས་པ་ཡིན་པས་འདུས་མ་བྱས་ཀྱང་ཚོར་བ་བཞིན་དུ་ཕུང་པོ་དྲུག་པ་ཞིག་ཏུ་ཅིས་མི་འདོད་དེ། ཇི་ལྟར་གཟུགས་ལ་སོགས་པ་འདས་པ་ལ་སོགས་པའི་བྱེ་བྲག་གིས་ཐ་དད་པ་རྣམས་ཕན་ཚུན་འདུས་ཏེ་རེག་པ་ལ་མ་ལྟོས་པར་བློས་
བསྡོམས་ནས་ཕུང་པོར་བརྗོད་པར་འགྱུར་བ་དེ་བཞིན་དུ་འདུས་མ་བྱས་ཀྱང་བློས་བསྡོམས་པ་ལ་བལྟོས་ནས་ཕུང་པོར་བྱས་པ་ལ་འགལ་བ་ཅི་ཞིག་ཡོད་ཅེ་ན། འདི་ལ་འགལ་བ་ཡོད་དེ་ཕུང་པོར་བྱེད་པ་ནི་ཕྱོགས་ནས་འགུགས་པར་རམ་དུས་ལས་འགུགས་པ་ཞིག་ཡིན་གྲང་ན། གཉི་ག་ཡང་འདུས་
མ་བྱས་ཕྱོགས་དང་དུས་སུ་མ་གཏོགས་པ་ལ་སྲིད་པ་མ་ཡིན་ནོ། །དེ་ཉིད་ཀྱི་ཕྱིར་འདུས་མ་བྱས་ནི་འདས་པ་ལ་སོགས་པའི་བྱེ་བྲག་གིས་ཐ་དད་པ་མ་ཡིན་ནོ་ཞེས་གསུངས་སོ། །འདས་པ་ལ་སོགས་པའི་བྱེ་བྲག་གིས་ཐ་དད་པ་ཕུང་པོར་རྣམ་པར་འཇོག་ན་དེ་ལྟ་བུའི་མཚན་ཉིད་འདུས་མ་བྱས་ཕུང་
པོར་བརྗོད་པ་ལ་མི་རུང་ངོ་། །གཉི་ག་ལྟར་ཡང་ཕུང་པོར་བསྟན་པ་ལ་དགོས་པ་མེད་པའི་ཕྱིར་གཉི་ག་ལྟར་ཡང་འདུས་མ་བྱས་ཕུང་པོར་མ་བཤད་དོ། །ཡང་ཀུན་ནས་ཉོན་མོངས་པའི་གཞི་ཤེས་པར་བྱ་བའི་ཕྱིར་ཞེས་བྱ་བ་ལ། གཞིའི་སྒྲ་ནི་འདིར་རྒྱུའི་རྣམ་གྲངས་ཏེ། ཟག་པ་དང་བཅས་
པ་རྣམས་ནི་ཀུན་ནས་ཉོན་མོངས་པའི་རྒྱུ་ཡིན་པའི་ཕྱིར་རོ། །བྱ་བའི་ཕྱིར་གྱི་སྒྲ་ནི་འདིར་དགོས་པའི་ཚིག་གོ། །ཀུན་ནས་ཉོན་མོངས་པ་དང་རྣམ་པར་བྱང་བའི་གཞི་ཤེས་པར་བྱ་བའི་ཕྱིར་ཞེས་བྱ་བ་ནི་ཟག་པ་དང་བཅས་པ་རྣམས་ཀུན་ནས་ཉོན་མོངས་པའི་རྒྱུ་ཡིན་པའི་ཕྱིར་ལ་ཟག་པ་མེད་པ་རྣམས་
རྣམ་པར་བྱང་བའི་རྒྱུའི་ཕྱིར་ཡིན་ན་འདུས་མ་བྱས་ནི་གཉི་ག་ཡང་མ་ཡིན་ནོ། །ཀུན་ནས་ཉོན་མོངས་པ་རྒྱས་པར་མི་འགྱུར་བའི་ཕྱིར་ཀུན་ནས་ཉོན་མོངས་པ་མ་ཡིན་ནོ། །ལམ་མ་ཡིན་པའི་ཕྱིར་རྣམ་པར་བྱང་བའི་དངོས་པོ་མ་ཡིན་ནོ། །གཞན་དག་ན་རེ་འདུས་མ་བྱས་ཡིན་པའི་ཕྱིར་དངོས་པོ་
གཉི་ག་ཡང་མ་ཡིན་པ་ཉིད་དོ་ཞེས་ཟེར་རོ། །གཞན་དག་ན་རེ་རྣམ་པར་བྱང་བའི་རྒྱུ་ཉིད་ཀྱི་ཕྱིར་འདུས་བྱས་ཀྱི་དངོས་པོ་མ་ཡིན་ཞིང་ཀུན་ནས་ཉོན་མོངས་པ་དང་རྣམ་པར་བྱང་བའི་དངོས་པོ་མ་ཡིན་ནོ་ཞེས་ཟེར་རོ། །དེ་ལ་འདིས་རྣམ་པར་བྱང་བ་བྱས་པས་ན་རྣམ་པར་བྱང་བ་སྟེ་ལམ་ལ་མངོན་པར་འདོད་དོ། །

དེ་ལྟར་སོ་སོར་བརྟགས་པའི་འགོག་པ་ཉིད་ནི་གཉི་གའི་དངོས་པོར་བཤད་དེ། འདིས་འདུས་མ་བྱས་ཐམས་ཅད་ཀྱིའོ་ཞེས་བྱ་བ་འདི་བསམ་པར་བྱའོ། །ཇི་ལྟར་བུམ་པ་ཆག་པ་ཞེས་བྱ་བ་ནི་བུམ་པ་འགགས་པ་སྟེ། བུམ་པ་མ་ཡིན་པ་དེ་བཞིན་དུ་ཕུང་པོ་ཞིག་པ་སྟེ་ཕུང་
པོ་འགགས་པ་ཡང་འདུས་མ་བྱས་ཡིན་པས་ཕུང་པོ་མ་ཡིན་ཞིང་། ནམ་མཁའ་ནི་གཅིག་ཁོ་ན་ཡིན་པས་ཕུང་པོ་མ་ཡིན་ནོ་ཞེས་ཟེར་རོ། །དེ་དག་ཇི་ལྟར་ན་ཁམས་དང་སྐྱེ་མཆེད་ཞིག་པ་ཡང་ཁམས་དང་སྐྱེ་མཆེད་མ་ཡིན་པར་ཐལ་བར་འགྱུར་ཏེ། ཁམས་དང་སྐྱེ་མཆེད་ཀྱི་བདག་ཉིད་ཁོ་ན་
ཁམས་དང་སྐྱེ་མཆེད་ཞིག་པར་རུང་བ་མ་ཡིན་པའོ། །དེ་ནི་དེ་ལྟར་མ་ཡིན་ཏེ་ཟག་པ་དང་བཅས་པའི་ཕུང་པོ་བཞིན་ནོ། །ཟག་པ་དང་བཅས་པའི་སྐྱེ་མཆེད་རྣམས་ལ་ཡང་འགོག་པར་འགྱུར་རོ་ཞེས་པའི་གནས་སྐབས་སུ་ཐལ་བར་འགྱུར་རོ། །གཞན་དག་ན་རེ་འདིར་ཕུང་པོ་སྤུངས་པ་ཞིག་པར་
འདོད་པ་མ་ཡིན་ནོ་ཞེས་ཟེར་རོ། །ནམ་མཁའ་དང་སོ་སོར་བརྟགས་པ་མ་ཡིན་པའི་འགོག་པ་དག་མ་སྤངས་པའི་བདག་ཉིད་ཀྱི་ཕྱིར་རོ། །འོ་ན་ཅི་ཞེ་ན་གང་ལ་མཚན་ཉིད་མེད་པ་དེ་ཕུང་པོ་རྣམས་ལས་ཨུ་པ་ར་ཏ་མེ་བ་བཱ། འདུས་མ་བྱས་གསུམ་ཡང་ཕུང་པོ་ཞིག་པར་མི་རུང་ཞེས་པ་ནི་དགའ་
བ་ཚིགས་སུ་བཅད་པའི་དོན་ཏོ། །ཕུང་པོ་རྣམས་ཀྱི་རྣམ་པ་གཞན་བཤད་ཟིན་ཏོ་ཞེས་བྱ་བ་ལ། སྐྱེ་མཆེད་དང་ཁམས་དག་གི་རྣམ་པ་གཞན་མངོན་པར་བརྗོད་པའི་ཕྱིར་ཏེ། ཀུན་ནས་ཉོན་མོངས་པ་ལ་སོགས་པའི་དངོས་པོ་རིམ་པ་གཞན་གྱི་ངོ་བོ་སྐྱེ་མཆེད་དང་ཁམས་སུ་རྣམ་པར་གཞག་
པ་ལ་སོགས་པ་གོ་རིམས་ལྷག་མ་ལུས་པ་དེ་བརྗོད་པར་བྱའོ། །སངས་རྒྱས་རྣམས་ཀྱི་གསུང་ནི་དགོངས་པ་སྔོན་དུ་བཏང་ནས་འཇུག་པ་དེའི་ཕྱིར། འདིར་རིམ་ནི་རགས་དང་ཀུན་ཉོན་མོངས་པ་ཞེས་བྱ་བ་ལ་སོགས་པ་གསུངས་ཏེ། རགས་པ་ཇི་ལྟ་བ་དང་ཀུན་ནས་ཉོན་མོངས་པ་ཇི་ལྟ་བ་དང་
སྣོད་ལ་སོགས་པའི་དོན་གྱི་ཁམས་རྣམས་ཀྱང་ངོ་། །གཟུགས་ནི་ཐོགས་པ་དང་རྣམ་པའི་ཕྱིར་ཐམས་ཅད་ལ་རགས་ཞེས་བྱ་བ་ནི་གཏོགས་ཆེ་བའོ། །གཞན་དག་ན་རེ་རྣམ་པར་ཤེས་པའི་ཚོགས་ལྔའི་རྟེན་ཡིན་པའི་ཕྱིར་རགས་སོ་ཞེས་ཟེར་རོ། །རྒྱུ་བ་རགས་པ་ནི་གསུམ་མོ་ཞེས་ཚིག་རྣམ་

པར་སྦྱར་ཏེ་ལུས་ཀྱང་རྒྱུ་བའི་ས་བཅས་པས་རྟོགས་པར་ཆེས་སླ་བའི་ཕྱིར་རོ། །དེ་ཉིད་ཀྱི་ཕྱིར་འདི་ལྟར་བསྟན་པ་རྒྱ་ཆེར་སྦྱར་ཏེ། འདུ་ཤེས་ནི་འདུ་བྱེད་དང་རྣམ་པར་ཤེས་པ་གཉིས་ལས་ཆེས་རགས་ཏེ་དེའི་བྱ་བ་རྟོགས་པར་ཆེས་སླ་བའི་ཕྱིར་རོ། །འདུ་ཤེས་ནི་སྐྱེས་པ་དང་བུད་མེད་ལ་སོགས་
པའི་མཚན་མར་འཛིན་པའོ། །རྣམ་པར་ཤེས་པ་བས་ནི་འདུ་བྱེད་རགས་ཏེ། འདོད་ཆགས་ལ་སོགས་པའི་ཀུན་ཏུ་སྤྱད་པ་ཤིན་ཏུ་གསལ་བར་རྟོགས་པའི་ཕྱིར་རོ། །གཞན་དག་ན་རེ་མངོན་པར་འདུ་བྱེད་པའི་མཚན་ཉིད་ཀྱི་བདེ་བ་དང་སྡུག་བསྔལ་ལ་སོགས་པའི་འཇུག་པ་ཉེ་བར་མཚོན་
པའི་ཕྱིར་རོ་ཞེས་ཟེར་རོ། །ཐམས་ཅད་པས་ཕྲ་བའི་ཕྱིར་རྣམ་པར་ཤེས་པ་ནི་མཐར་ཏེ། གདུལ་བྱ་རྣམས་གཟུད་པ་དང་རྗེས་སུ་མཐུན་པའི་ཕྱིར་ན་འདི་ནི་རགས་པའི་རིམ་པ་སྟེ། ཀུན་ནས་ཉོན་མོངས་པ་ཇི་ལྟ་བའོ། །ཕན་ཚུན་གཟུགས་ལ་མངོན་པར་དགའ་སྟེ་ཞེས་བྱ་བ་ལ། ཕན་ཚུན་ཁ་
དོག་དང་དབྱིབས་དང་སྒྲ་དང་དྲི་དང་རོ་དང་རེག་བྱ་ལ་མངོན་པར་ཞེན་པར་བྱེད་དོ་ཞེས་བྱ་བའི་ཐ་ཚིག་གོ། །དེ་བཞིན་དུ་གཟུགས་གཅིག་ནི་ཆགས་པར་བྱ་བ་མ་ཡིན་ཏེ། ཇི་ལྟར་མདོ་ལས་སྐྱེས་པ་དང་བུད་མེད་ཕན་ཚུན་གཟུགས་ལ་རེག་པར་བྱེད་དོ་ཞེས་རྒྱ་ཆེར་འབྱུང་ངོ་། །དེ་དག་ཀྱང་ཚོར་བའི་རོ་མྱང་
བ་ལ་ཆགས་པའི་ཕྱིར་ཕན་ཚུན་གཟུགས་ཀྱིས་མངོན་པར་དགའ་ཞིང་ཚོར་བའི་རོ་མྱང་བ་ནས་ཕྲད་པ་དང་བྲལ་བའི་སྲེད་པས་ཞེན་ཅིང་ཚོར་བའི་རོ་མྱང་བ་དང་ཚོར་བ་ལ་ཆགས་པའི་བར་དུའོ། །གཞན་དག་ན་རེ་གལ་ཏེ་ཚོར་བ་ཐོབ་པ་ཉིད་ཀྱི་ཕྱིར་ཆགས་པ་དང་མངོན་པར་ཆགས་པ་ལས་སོ་ཞེས་སོ། །
འདུ་ཤེས་ཕྱིན་ཅི་ལོག་པའི་ཕྱིར་རོ་ཞེས་བྱ་བ་ལ། སྡུག་བསྔལ་ལ་བདེའོ་སྙམ་པ་ནི་འདུ་ཤེས་ཕྱིན་ཅི་ལོག་པ་སྟེ། ཚོར་བ་བདེ་བ་ཉིད་ཀྱང་འདུ་བྱེད་འགྱུར་བའི་སྡུག་བསྔལ་དག་གིས་སྡུག་བསྔལ་བ་ཉིད་དོ། །ཕྱིན་ཅི་ལོག་དེ་ཡང་ཀུན་ནས་ཉོན་མོངས་པ་དག་གིས་སོ་ཞེས་བྱ་བ་ལ། མི་རྟག་པ་
དང་། སྡུག་བསྔལ་བ་དང་མི་གཙང་བ་དང་བདག་མེད་པ་རྣམས་ལ་ཉོན་མོངས་པས་རྣམ་པར་འཕྲུལ་ཏེ་འདུ་ཤེས་ཕྱིན་ཅི་ལོག་ཏུ་འགྱུར་རོ། །སེམས་ཀྱང་དེ་དག་གིས་ཀུན་ནས་ཉོན་མོངས་པ་ཅན་དུ་བྱས་པ་ཞེས་བྱ་བ་ཀུན་ནས་ཉོན་མོངས་པས་ཡང་སྲིད་ཀྱི་རྣམ་པར་ཤེས་པ་མཚམས་སྦྱོར་བའི་ཉོན་མོངས་

པ་ལ་འཇུག་པས་རྣམ་པར་ཤེས་པ་མཐར་གསུངས་སོ་ཞེས་གཞན་དག་ཟེར་རོ། །གང་ནས་ཀུན་ནས་ཉོན་མོངས་པ་དང་། གང་གི་དོན་དང་ཇི་ལྟར་དང་གང་ཞིག་དང་གང་དག་གིས་ཀུན་ནས་ཉོན་མོངས་པ་དེ་བསྟན་པར་བྱ་བའི་ཕྱིར་ཉོན་མོངས་པ་ཇི་ལྟ་བ་བཞིན་གོ་རིམས་
བརྗོད་དོ། །ཡང་ན་སྣོད་ལ་སོགས་པའི་དོན་གྱིས་ཏེ་ཞེས་རྒྱ་ཆེར་འབྱུང་བ་ལ། གཟུགས་ནི་སྣོད་ལྟ་བུ་སྟེ་ཚོར་བ་ཟས་དང་འདྲ་བའི་རྟེན་ཡིན་པའི་ཕྱིར་རོ། །ཚོར་བ་ནི་ཟས་ལྟ་བུ་སྟེ་རོ་མྱང་བར་བྱ་བ་ཡིན་པའི་ཕྱིར་རོ། །གཞན་དག་ན་རེ་སེམས་ཅན་རྣམས་ལ་ཟས་ནི་ཕན་པ་དང་གནོད་པར་འཇུག་
པའི་ཕྱིར་རོ་ཞེས་ཟེར་རོ། །འདིས་གསལ་བར་བྱེད་པས་ན་འདུ་ཤེས་ནི་ཚོད་མ་ལྟ་བུ་སྟེ། དེས་ཡིད་དུ་འོང་བ་དང་ཡིད་དུ་མི་འོང་བའི་མཚན་མ་བཟུང་ནས་ཚོར་བ་གསལ་བར་བྱེད་དོ། །ཡང་ན་འདུ་ཤེས་ནི་ཕྱིན་ཅི་ལོག་གི་དབང་གིས་ཚོར་བའི་རོ་མངོན་པར་འདོད་པའི་ཕྱིར་ན་འདུ་ཤེས་ནི་ཚོད་
མ་ལྟ་བུའོ། །གཞན་དག་ན་རེ་ཀུན་ནས་ཉོན་མོངས་པས་དགྲ་དང་མཛའ་བོ་དང་བྲན་དང་བདེ་བ་ལ་སོགས་པར་མཚན་མར་འཛིན་པས་སོ་ཞེས་ཟེར་རོ། །འདུ་བྱེད་རྣམས་ནི་བྱན་པོ་ལྟ་བུ་སྟེ་དེའི་དབང་གིས་རྣམ་པར་སྨིན་པ་ཡིད་དུ་འོང་བ་དང་མི་འོང་བ་མངོན་པར་འགྲུབ་པའི་ཕྱིར་རོ། །དམིགས་
པའི་ཕྱིར་ན་རྣམ་པར་ཤེས་པ་ནི་ཟ་བ་པོ་ལྟ་བུ་སྟེ། གཞན་དག་ན་རེ་དེ་ལ་བདག་ཏུ་འཛིན་པའི་ཕྱིར་རོ་ཞེས་ཟེར་རོ། །གཞན་དག་ན་རེ་སེམས་ཅན་གྱི་རྫས་གཙོ་བོ་ཡིན་པའི་ཕྱིར་ཏེ་ཏྦུ་དོ་ཛ་བ་ཏྭཱཏ་ཚོར་བ་ལ་སོགས་པ་རྣམས་སོ་ཞེས་ཟེར་རོ། །སེམས་ཅན་གྱི་དབང་པོའི་གཟུགས་གང་ཡུལ་གཟུགས་
སུ་ཡོད་པའི་ཕྱིར་འདོད་པའི་ཡོན་ཏན་གཟུགས་ཀྱིས་རབ་ཏུ་ཕྱེ་བ་ནི་འདོད་པའི་ཁམས་སོ། །ཚོར་བས་རབ་ཏུ་ཕྱེ་བ་ནི་བསམ་གཏན་རྣམས་ཏེ་ཚོར་བ་ཐ་དད་པས་དེ་ཐ་དད་པའི་ཕྱིར་ཏེ། འདི་ལྟར་སྙོམས་པར་འཇུག་པའི་བསམ་གཏན་དང་པོ་གཉིས་ན་ནི་ཡིད་བདེ་བའོ། །གོང་མ་གཉིས་ན་ནི་བཏང་
སྙོམས་དག་གོ། །སྐྱེ་བའི་བསམ་གཏན་དག་ན་ནི། །ཡིད་བདེ་བདེ་དེ་བཏང་སྙོམས་དང་། །བཏང་སྙོམས་ཡིད་བདེ་བདེ་བ་དང་། །བཏང་སྙོམས་བཏང་སྙོམས་ཚོར་བ་ཡོད། །ཅེས་པའོ། །གཞན་དག་ན་རེ་སྐྱེ་བའི་བསམ་གཏན་རྣམས་སུ་འདུ་བྱེད་ཐམས་ཅད་ཀྱི་ཁྱད་པར་སོ་སོར་རིག་ཅིང་དམིགས་པས་

གཟུགས་ཀྱི་ཁམས་ཚོར་བས་རབ་ཏུ་ཕྱེ་བའོ་ཞེས་ཟེར་རོ། །འདུ་ཤེས་ཀྱིས་རབ་ཏུ་ཕྱེ་བ་ནི་གཟུགས་མེད་པ་གསུམ་མོ་ཞེས་བྱ་བ་ལ། དེ་དག་ནི་དེའི་མཚན་མ་གསལ་བའི་ཕྱིར་འདུ་ཤེས་གཙོ་བོ་ཡིན་ནོ། །བཏང་སྙོམས་ཐུན་མོང་བ་རྣམ་པར་བཅད་པ་མེད་པའི་ཕྱིར་དེ་ནི་གཙོ་བོ་མ་ཡིན་ནོ། །
གཞན་དག་ན་རེ་ལུས་མེད་པས་ནམ་མཁའ་ལ་སོགས་པའི་འདུ་ཤེས་ཀྱིས་རྣམ་པར་འབྱེད་པའི་ཕྱིར་འདུ་ཤེས་ཀྱིས་རབ་ཏུ་ཕྱེ་བའོ་ཞེས་ཟེར་རོ། །འདུ་བྱེད་ཙམ་གྱིས་རབ་ཏུ་ཕྱེ་བ་ནི་སྲིད་པའི་རྩེ་མོ་སྟེ་ཞེས་བྱ་བ་ནི་འདི་ཐམས་ཅད་པས་དེའི་སེམས་ལ་འབྲས་བུ་ཆེ་བའི་ཕྱིར་རོ། །ཕྱེ་བ་ནི་
གསལ་བར་བྱས་པ་ཞེས་བྱ་བའི་ཐ་ཚིག་སྟེ་གང་ན་གང་ཞིག་གཙོ་བོ་དེ་ཉིད་ཀྱིས་དེ་ཉེ་བར་མཚོན་པར་བྱས་པ་ཡིན་ནོ། །འདི་དག་ནི་རྣམ་པར་ཤེས་པ་གནས་པ་ཡིན་ལ་ཞེས་བྱ་བ་ནི་གཟུགས་སུ་ཉེ་བར་འགྲོ་བ་འདོད་པའི་ཁམས་དང་ཚོར་བར་ཉེ་བར་འགྲོ་བ་གཟུགས་ཀྱི་ཁམས་དང་འདུ་
ཤེས་སུ་ཉེ་བར་འགྲོ་བ་གཟུགས་མེད་པ་གསུམ་དང་། འདུ་བྱེད་དུ་ཉེ་བར་འགྲོ་བ་སྲིད་པའི་རྩེ་མོའོ། །དེ་དག་ལ་རྣམ་པར་ཤེས་པ་གནས་སོ་ཞེས་བྱ་བ་ནི་དེ་དག་གི་སྲེད་པའི་རླན་གྱི་མཐུས་སོ། །ཞིང་དང་ས་བོན་གྱི་གོ་རིམས་ལྟ་བུར་བསྟན་པའི་ཕྱིར་རོ་ཞེས་བྱ་བ་ལ། ཞིང་ནི་སྔར་ཡིན་ལ།
ས་བོན་ནི་ཕྱི་ནས་ཏེ། སྔར་ཇི་ལྟར་བཤད་པའི་ཕུང་པོ་རྣམས་ཞིང་གོ་རིམས་པས་བསྟན་པའི་དོན་དེ་ཉིད་ཀྱི་ཕྱིར་རགས་པ་ལ་སོགས་པའི་རྒྱུ་རྣམས་ཇི་ལྟ་བར་ཕུང་པོ་རྣམས་ལྔ་ལས་མི་ཉུང་མི་མང་ངོ་། །རིམ་རྒྱུའི་ཕྱིར་ཞེས་གང་སྨྲས་པ་དེ་སྦྱར་བར་བྱ་བའི་ཕྱིར་གོ་རིམས་ཀྱི་རྒྱུ་དེ་ཉིད་ཀྱི་ཕྱིར་ཞེས་
རྒྱ་ཆེར་འབྱུང་ངོ་། །དེའི་དབང་ཉིད་ཀྱིས་ནི་ཞེས་བྱ་བ་ལ་སོགས་པ་ལ། ཇི་ལྟར་ཞེ་ན་ཡུལ་ཅན་གྱི་རྟེན་གྱི་གཙོ་བོ་ཡིན་པའི་ཕྱིར་ཏེ། ཡུལ་རྣམ་པར་གཞག་པ་ནི་ཡུལ་ཅན་གྱི་དབང་ཡིན་པའི་ཕྱིར་རོ། །དབང་ནི་རག་ལས་པའོ། །བརྟེན་པར་རྣམ་པར་གཞག་པ་ཡང་རྟེན་གྱི་དབང་ངོ་། །དབང་
པོ་དྲུག་ལས་དང་པོར་ལྔ་སྟེ་མིག་ལ་སོགས་པ་དག་གོ། །ཅིའི་ཕྱིར་ཞེ་ན་ད་ལྟའི་དོན་ཕྱིར་ཞེས་བྱ་བ་སྟེ། འདི་དག་གི་ཡུལ་ད་ལྟར་བ་ཡིན་པས་ད་ལྟར་བའི་དོན་གྱི་དངོས་པོ་ནི་ད་ལྟར་བའི་དོན་ཉིད་དུ་ལྷག་པར་བཟུང་ནས་ད་ལྟར་བྱུང་བར་སྐྱེས་པས་ན་དེའི་ཡུལ་རྣམས་སྔར་སྨོས་སོ། །ཡིད་ནི་ཁ་

ཅིག་ཡུལ་ད་ལྟར་བྱུང་བ་སྟེ་དཔེར་ན་གཞན་གྱི་སེམས་ཤེས་པ་ལྟ་བུའོ། །ཁ་ཅིག་གིས་དུས་གསུམ་དང་དུས་མེད་པའི་ཡུལ་ཅན་ཏེ། ཤེས་རྒྱུད་འདས་པའི་ཡུལ་ཅན་ནི་སྔོན་གྱི་གནས་རྗེས་སུ་དྲན་པའི་ཤེས་པ་ལྟ་བུའོ། །མ་འོངས་པའི་ཡུལ་ཅན་ནི་མངོན་པར་འདོད་པའི་
ཤེས་པ་ལྟ་བུའོ། །ཁ་ཅིག་ནི་དུས་གསུམ་པའི་ཡུལ་ཅན་ཏེ། དཔེར་ན་འདུ་བྱེད་མི་རྟག་པ་ལྟ་བུའོ། །ཁ་ཅིག་ནི་དུས་མེད་པའི་ཡུལ་ཅན་ཏེ། དཔེར་ན་འགོག་པ་ལ་དམིགས་པ་བཞིན་ནོ། །ཁ་ཅིག་ནི་དུས་གསུམ་དང་དུས་མེད་པའི་ཡུལ་ཅན་ཏེ། དཔེར་ན་ཆོས་ཐམས་ཅད་བདག་
མེད་དོ་སྙམ་པ་ལྟ་བུ་སྟེ། དེའི་ཕྱིར་ཡིད་ནི་མ་ངེས་པས་ཕྱིས་བཤད་དོ། །འ