Luận tạng Tây Tạng (Tengyur) — Tập 188

དཔོན་གྱིས་ཀྱང་ཇི་ལྟར་བརྗོད་པ་དེ་ལྟར་འཆད་པར་འགྱུར་རོ། །རེ་ཞིག་གཅིག་ནི་རྣམ་པར་རྟོག་པ་སྟེ། དེ་ཡང་དངོས་པོ་མི་སྣང་བའི་ཕྱིར་དངོས་པོ་སྣང་བ་དང་བྲལ་བའི་ཕྱིར་མངོན་སུམ་ལྟར་
སྣང་བའོ། །ཉེ་བར་བསླད་པ་ནི་ཕྱིན་ཅི་ལོག་གི་དོན་ཅན་གྱི་ཤེས་པའོ། །སླུ་བའི་ཕྱིར་ཏེ་དོན་མི་འཐོབ་པའི་ཕྱིར་མངོན་སུམ་ལྟར་སྣང་བའོ། །ཚིག་ལེའུར་བྱས་པ་ལས་དོན་གྱིས་ཐོབ་པའི་རྣམ་པ་གཉིས་པོ་འགྲེལ་པར་དངོས་སུ་ཁ་བསྐངས་ནས་རྣམ་པ་གཉིས་ཀྱི་སྒྲས་བསྟན་ཏོ། །འདི་སྐད་
བསྟན་པ་ཡིན་ཏེ། གལ་ཏེ་རྣམ་པར་རྟོག་པ་ཅན་གྱི་ཤེས་པ་ཐམས་ཅད་མི་བདེན་པའི་དོན་ཅན་ཡིན་པ་དེ་ལྟ་ན་ཡང་ཐ་སྙད་ཀྱི་དབང་གིས་འགའ་ཞིག་མི་སླུ་བ་ཉིད་དུ་འདོད་པ་ཡིན་ལ། དེ་ཡང་དངོས་པོའི་རྣམ་པ་དང་བྲལ་བའི་ཕྱིར་མངོན་སུམ་ལྟར་སྣང་བའོ། །ལོག་པར་སྣང་བའི་རྣམ་པར་ཤེས་པ་
ཡང་མངོན་པར་འདོད་པ་གང་ཡིན་པ་དེ་ལ་སླུ་བ་ཉིད་ཀྱིས་དོན་སྣང་བ་དང་བྲལ་བ་དེས་ན་འཁྲུལ་པ་ཡིན་ནོ། །འདི་གཉིས་ཀ་ཡང་མ་འཁྲུལ་པ་སྨོས་པ་ཉིད་ཀྱིས་བསལ་ཏོ། །མ་འཁྲུལ་པ་སྨོས་པས་ནི་བསླད་པ་བསལ་བ་ཡིན་ལ་རྣམ་པར་རྟོག་པ་མེད་པས་ནི་རྣམ་པར་རྟོག་པ་ཞེས་དེ་སྐད་ནི་བརྗོད་པར་མི་

ནུས་ཏེ། འདི་ལྟར་མཚན་ཉིད་བསྟན་པའི་ཕྱིར་འདི་བརྗོད་པ་ནི་མ་ཡིན་ཏེ། གཞན་དུ་ན་ནི་རྟོག་པ་དང་བྲལ་བ་སྨོས་པས་ནི་རྣམ་པར་རྟོག་པ་བསལ་ལ། བསླད་པ་ནི་ལོག་པའི་ཤེས་པ་ཡིན་པ་ན་ཧ་ཅང་ཐལ་བར་མི་འགྱུར་བས་མ་འཁྲུལ་པ་སྨོས་པར་ལྷག་པར་འགྱུར་རོ། །གཞན་ཡང་དེ་མ་
ཐག་ཏུ་བརྗོད་པའི་གང་གི་ཕྱིར་མངོན་སུམ་ནི་དངོས་པོ་སྣང་བ་ཡིན་ཏེ་ཞེས་བྱ་བ་དེ་མཚན་ཉིད་གང་གིས་བསྡུས། གལ་ཏེ་མཚན་ཉིད་ལས་ཕྱི་རོལ་དུ་གྱུར་པར་བརྗོད་ན་ནི། དེའི་ཚེ་མཚན་ཉིད་གཉིས་ཀྱིས་གཉིས་བསལ་བར་བྱ་བ་ལས་སྔ་ན་མེད་པའི་མཚན་ཉིད་ཀྱིས་མ་བསྡུས་པའི་གཞན་གྱིས་བསལ་
བར་རྩོམ་པས་ཅི་ཞིག་བྱ། དེའི་ཕྱིར་མངོན་སུམ་ལྟར་སྣང་བའི་ཤེས་པ་ནི་འདི་དག་ཙམ་ཞིག་སྲིད་དེ། འདི་དག་སྟེ། རྟོག་པ་དང་བཅས་པ་དང་རྟོག་པ་མེད་པའོ་ཞེས་བྱ་བ་འདི་བརྗོད་པར་བཞེད་པ་ཡིན་ལ། དེ་གཉི་ག་ཡང་མ་འཁྲུལ་པ་སྨོས་པ་ཉིད་ཀྱིས་བསྡུས་པ་ཡིན་ནོ། །མ་འཁྲུལ་པ་
སྨོས་པ་མེད་པར་རྣམ་པར་རྟོག་པ་མེད་པ་སྨོས་པས་ནི་རྣམ་པར་རྟོག་པ་ཁོ་ན་བསལ་བར་འགྱུར་ལ། མི་འཁྲུལ་པ་སྨོས་པ་ཡོད་ན་ཡང་གཉི་ག་བསལ་བའི་ཕྱིར་རྣམ་པར་རྟོག་པ་མེད་པ་སྨོས་པ་ནི་ལོག་པར་རྟོགས་པ་བསལ་བའི་དོན་ཉིད་དོ། །ཡང་དག་པའི་ཤེས་པའི་དབང་དུ་བྱས་པའི་ཕྱིར་རྨི་ལམ་གྱི་
ཤེས་པ་གཅོད་པ་གྲུབ་ཀྱང་། མི་སླུ་བར་མངོན་པར་འདོད་པའི་གསལ་བར་སྣང་བ་གཞན་བཅད་པའི་དོན་དུ་མ་འཁྲུལ་པ་སྨོས་པར་བྱ་བ་ཡིན་ནོ་ཞེས་མཚན་ཉིད་གསལ་བར་བརྗོད་ཟིན་ཏོ། །རྨི་ལམ་གྱི་ཤེས་པ་ཞེས་བརྗོད་པ་གང་ཡིན་པ་དེ་ནི་རྨི་ལམ་གྱི་ཤེས་པའི་སྐབས་ཡིན་པའི་ཕྱིར་ཏེ། མ་འཁྲུལ་
པ་སྨོས་པ་ནི་ཇི་ལྟར་ཡང་རུང་བའི་དགོས་པ་དང་ལྡན་པ་ཡིན་ནོ་ཞེས་བསྟན་པའི་དོན་དུའོ། །ཡང་ཇི་ལྟར་ན་དངོས་པོ་མི་སྣང་བའི་ཕྱིར་རྣམ་པར་རྟོག་པ་མངོན་སུམ་ལྟར་སྣང་བ་ཡིན་ཞེ་ན། བཤད་པ། གང་གི་ཕྱིར་མངོན་སུམ་གང་ལ་དངོས་པོ་སྣང་བ་ཡོད་པ་དེ་ནི་དེ་ལྟ་བུ་སྟེ་ཁོ་བོ་དང་སློབ་དཔོན་གྱིས་བརྗོད་
ཟིན་ཏོ། །དེ་ག་ལས་ཤེ་ན། དེ་མེད་ན་ཞེས་གསུངས་ཏེ། དངོས་པོ་དེ་མེད་ན་མངོན་སུམ་དེའི་རྣམ་པ་གཟུང་བའི་རྣམ་པ་དེ་ཉམས་པ་སྟེ་ལྡོག་པའི་ཕྱིར་རོ། །གང་གི་ཕྱིར་འདིས་མངོན་སུམ་གྱི་སྣང་བ་ནི་དོན་གྱི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་ཡིན་ནོ་ཞེས་བྱ་བ་དང་། གང་ཞིག་ཤེས་པའི་སྣང་

བ་ཞེས་བྱ་བ་ལ་སོགས་པ་དང་། ཡང་དེ་བཞིན་དུ་ལྡོག་པ་དང་རྗེས་སུ་འགྲོ་བའི་རྗེས་སུ་མི་བྱེད་པ་ནི་རྒྱུ་མ་ཡིན་ཞིང་། རྣམ་པར་གཏོད་པར་ནུས་པའི་རྒྱུ་ནི་ཡུལ་ཡིན་ནོ་ཞེས་བྱ་བ་འདིས་བརྗོད་ཟིན་ཏོ། །རྣམ་པར་རྟོག་པ་ནི་དེ་ལྟར་དངོས་པོ་སྣང་བ་མ་ཡིན་ཏེ། དེའི་སྟེ་རྣམ་པར་
རྟོག་པའི་སྣང་བ་དངོས་པོ་སྟེ་རང་གི་མཚན་ཉིད་དང་མཐུན་པ་མ་ཡིན་ཏེ། ཡོད་པ་དང་མེད་པའི་རྗེས་སུ་མི་འགྲོ་བའི་ཕྱིར་རོ། །འདི་ག་ལས་ཤེ་ན། དངོས་པོ་མེད་ཀྱང་རྣམ་པར་རྟོག་པའི་རྣམ་པ་མི་ཉམས་པའི་ཕྱིར་རོ། །འདི་ཡང་། འདི་ནི་བརྗོད་མེད་རྟོགས་བྱེད་ཡིན། །ཞེས་བྱ་བ་དེའི་ནང་དུ་རྒྱས་པར་བསྟན་ཟིན་
ཏོ། །དངོས་པོ་དང་མཐུན་པ་མ་ཡིན་པའི་ཕྱིར་རྣམ་པར་རྟོག་པ་མངོན་སུམ་ལྟར་སྣང་བ་ཡིན་པར་མ་ཟད་ཀྱི། ཉེ་བར་བསླད་པ་ཡང་མངོན་སུམ་ལྟར་སྣང་བ་ཡིན་ཏེ། དབང་པོ་ལས་སྐྱེས་པ་ཡིན་དུ་ཟིན་ཀྱང་ངོ་། །དབང་པོ་ལས་སྐྱེས་པའི་གཏན་ཚིགས་བཤད་པ། དབང་པོ་ལས་སྐྱེས་པ་
གཞན་ལས་བསླད་པ་དེ་ཁྱད་པར་མེད་པའི་ཕྱིར་རོ། །བསླད་པ་ནི་ཡིད་འབའ་ཞིག་ཏུ་མ་ཟད་ཀྱི་ཉེ་བར་བསླད་པ་གང་ཡིན་པ་འགའ་ཞིག་ནི་དབང་པོ་ལས་སྐྱེས་པ་ཡང་ཡིན་ནོ་ཞེས་བྱ་བ་ནི་ཡང་གི་སྒྲའི་དོན་ཏོ། །ཅིའི་ཕྱིར་དབང་པོ་ལས་སྐྱེས་པ་ཡིན་ཞེ་ན། བཤད་པ། རྣམ་པར་བསླད་པ་ཞེས་
བརྗོད་པ་དེ་ལས་གཞན་པའི་དབང་པོ་ལས་སྐྱེས་པའི་ཤེས་པ་དེ་དང་ཁྱད་པར་མེད་པའི་ཕྱིར་རོ། །ཁྱད་པར་ཡོད་པ་མ་ཡིན་པའི་ཕྱིར་བསླད་པ་དབང་པོ་ལས་སྐྱེས་པ་འདི་ཡང་མངོན་སུམ་ལྟར་སྣང་བ་སྟེ། གང་གི་ཕྱིར་དངོས་པོ་དང་མཐུན་པ་མ་ཡིན་པའི་ཕྱིར་ཏེ། རྣམ་པར་བསླད་པ་འདི་སྣང་བ་དངོས་
པོ་དང་མཐུན་པ་ཅན་མ་ཡིན་པ་དེའི་ཕྱིར་སྣང་བ་དངོས་པོ་ལ་མི་ལྟོས་པས་མངོན་སུམ་ལྟར་སྣང་བ་ཡིན་ཏེ། རྣམ་པར་རྟོག་པ་བཞིན་ནོ། །སྐྲ་ཤད་དུ་སྣང་བ་དངོས་པོ་དང་མཐུན་པར་སྣང་བ་མ་ཡིན་དུ་ཟིན་ཀྱང་དབང་པོ་ལས་སྐྱེས་པའི་བསླད་པའི་ཤེས་པ་འགའ་ཞིག་ཟླ་བ་ལ་སོགས་པ་འགའ་ཞིག་ཡོད་པ་
ཉིད་ལ་སྐྱེ་བར་འདོད་པ་མ་ཡིན་ནམ། དེའི་ཕྱིར་སྣང་བ་ཐམས་ཅད་དངོས་པོ་དང་མཐུན་པ་མ་ཡིན་པར་བརྗོད་ཅེ་ན། སླུ་བའི་ཕྱིར་ཞེས་བཤད་པ་དེ། དཔེར་ན་ཇི་ལྟར་སྣང་བ་བཞིན་དུ་ཕྱི་རོལ་ན་དངོས་པོ་མེད་པའི་ཕྱིར་སྐྲ་ཤད་དུ་སྣང་བའི་ཤེས་པ་ལ་ཡུལ་འགའ་ཡང་ཡོད་པ་མ་ཡིན་པ་དེ་བཞིན་དུ་ཟླ་བ་

གཉིས་ལ་སོགས་པར་སྣང་བ་ལ་ཡང་ཡུལ་ཡོད་པ་མ་ཡིན་ཏེ། ཇི་ལྟར་སྣང་བ་བཞིན་དུ་ཟླ་བ་གཉིས་དང་འགྲོ་བ་ལྗོན་ཤིང་ཕྱི་རོལ་ན་མེད་པའི་ཕྱིར་རོ། །དེའི་ཕྱིར་རྣམ་པར་བསླད་པའི་སྣང་བ་སླུ་ཞིང་འདྲིད་པ་ཡིན་ལ་དེ་ལས་ཀྱང་དངོས་པོ་དང་མཐུན་པ་མ་ཡིན་པ་དེའི་ཕྱིར་མངོན་སུམ་ལྟར་སྣང་
བའོ། །སླུ་བའི་ཕྱིར་དངོས་པོ་སྣང་བ་མ་ཡིན་པར་བརྗོད་པ་འདིས་ནི་རྨི་ལམ་གྱི་ཤེས་པ་ཞེས་བྱ་བའི་ཡིད་ཀྱི་རྣམ་པར་བསླད་པ་ཡང་སླུ་བའི་ཕྱིར་དངོས་པོ་སྣང་བ་མ་ཡིན་པར་བཤད་པ་ཡིན་ནོ། །དེའི་དོན་ནི་འདི་ཡིན་ཏེ། མ་འཁྲུལ་པ་སྨོས་པས་རྟོག་པ་དང་བཅས་པ་དང་བསླད་པ་བསལ་བ་ན་ཧ་
ཅང་ཐལ་བ་མེད་ཀྱང་། རྟོག་པ་དང་བྲལ་བ་སྨོས་པ་ནི་ལོག་པར་རྟོགས་པ་བསལ་བའི་དོན་དུ་བྱས་པ་ཡིན་ཏེ། དངོས་སུ་རྣམ་པར་རྟོག་པ་བཟློག་པར་འགྱུར་བའི་ཕྱིར་རོ། །ཟླ་བ་གཉིས་ལ་སོགས་པར་འཁྲུལ་པ་ནི་ཇི་ལྟར་ཡང་དབང་པོས་བསྐྱེད་པ་མ་ཡིན་པ་ཉིད་དེ། འོན་ཀྱང་འདི་ནི་ཡིད་
ཡིན་ནོ། །ཟླ་བའི་ཡུལ་ལ་ནི་གྲངས་འཁྲུལ་པ་ཡིན་ཞིང་། མགལ་མེ་ལ་ནི་དབྱིབས་འཁྲུལ་པ་ལྗོན་ཤིང་ལ་ནི་བྱ་བ་འཁྲུལ་པ་ཡིན་ལ། གྲངས་ལ་སོགས་པ་འདི་དག་ཀྱང་སྒྲོ་བཏགས་ཀྱི་སྤྱོད་ཡུལ་ཁོ་ནའོ། །ཡང་འདི་དག་གི་གསལ་བར་སྣང་བ་ཉིད་ནི་དཔེར་ན་སྨིག་རྒྱུ་ལ་ཆུར་འཁྲུལ་པ་
དེ་བཞིན་དུ་བལྟ་བར་བྱའོ་ཞེས་ཁ་ཅིག་གིས་རྟོགས་སོ། །དེ་ནི་དེ་ལྟར་རིགས་པ་མ་ཡིན་ཏེ། དབང་པོ་ལས་བྱུང་བ་དབང་པོ་ལས་སྐྱེས་པ་ལ་ནི་ཡོད་པ་དང་མེད་པའི་རྗེས་སུ་བྱེད་ཅིང་རྗེས་སུ་འགྲོ་བ་གང་ཡིན་པ་སྟེ། དབང་པོའི་ཤེས་པའི་སྐབས་ཡིན་པའི་ཕྱིར་དབང་པོ་ཡོད་པ་དང་མེད་པ་དག་གི་
རྗེས་སུ་འགྲོ་བ་གང་ཡིན་པ་དེ་ནི་དབང་པོ་ལས་བྱུང་བ་ཉིད་དེ་ཉིད་ཀྱི་མཚན་ཉིད་དེ་ངོ་བོ་ཉིད་དུ་གནས་པ་ཡིན་ལ། གང་གི་ཕྱིར་དེ་ནི་ཟླ་བ་གཉིས་པ་ལ་སོགས་པའི་ཤེས་པ་འདི་ལ་ཡང་མཚུངས་པ་ཡིན་པ་དེའི་ཕྱིར་ཡིད་ཉིད་དུ་རིགས་པ་མ་ཡིན་ནོ། །གང་ལ་གང་གི་ཐ་སྙད་ཀྱི་རྒྱུ་མཚན་ཡོད་པ་དེ་ལ་
ནི་དེའི་ཐ་སྙད་དུ་བྱ་བ་ཡིན་ཏེ། དཔེར་ན་དབྱིབས་ཀྱི་ཁྱད་པར་དང་ལྡན་པའི་རྫས་ཆུ་ལ་སོགས་པ་འཛིན་པའི་ནུས་པའི་བུམ་པ་ལ་བུམ་པའི་ཐ་སྙད་དུ་བྱེད་པ་བཞིན་ནོ། །ཟླ་བ་གཉིས་ལ་སོགས་པར་སྣང་བའི་ཤེས་པ་ལ་ཡང་དབང་པོ་ལས་སྐྱེས་པའི་ཐ་སྙད་དུ་བྱ་བའི་རྒྱུ་མཚན་དབང་པོ་ཡོད་པ་དང་མེད་པའི་

རྗེས་སུ་བྱེད་པ་ཡོད་པ་ཡིན་ནོ། །རྒྱུ་མཚན་མེད་པར་མི་འཐད་པའི་ཕྱིར་ཐ་སྙད་འཇུག་པར་བྱ་བ་ཉིད་ལ་ནི་རྒྱུ་མཚན་ཡོད་པ་དང་ལྡན་པས་ཁྱབ་པ་ཡིན་ནོ། །འཇུག་པར་བྱ་བ་མ་ཡིན་ན་ནི་རྒྱུ་མཚན་གཞན་ལ་ལྟོས་པར་འགྱུར་བས་དེ་ཙམ་གྱི་རྒྱུ་མཚན་ཅན་དུ་མཐོང་བར་
མི་འགྱུར་ཏེ། དེའི་ཕྱིར་མི་མཐུན་པའི་ཕྱོགས་ལ་ཁྱབ་པར་བྱེད་པ་ལྟོས་པ་མེད་པ་ཉིད་མི་དམིགས་པས། དེ་ཙམ་གྱི་རྒྱུ་མཚན་ཉིད་དེ་ལས་ལྡོག་པ་ན་ཡོད་ན་འཇུག་པར་བྱ་བ་ཉིད་ཀྱིས་ཁྱབ་པའི་ཕྱིར་རང་བཞིན་གྱི་གཏན་ཚིགས་སོ། །གལ་ཏེ་གཞན་དབང་པོ་ལས་སྐྱེས་པར་མི་འདོད་ན་དབང་པོ་
ཡོད་པ་དང་མེད་པའི་རྗེས་སུ་བྱེད་པར་འདོད་པར་ཇི་ལྟར་འགྱུར། དབང་པོའི་བྱེད་པ་ཡོད་པ་ན་མཐོང་བ་ཇི་ལྟར་ཞེ་ན། རེ་ཞིག་དབང་པོ་ལས་ནི་མ་འཁྲུལ་པ་ཟླ་བ་གཅིག་ཏུ་སྣང་བའི་ཤེས་པ་དངོས་སུ་འབྱུང་ལ། དེ་ལས་ཟླ་བ་གཉིས་སུ་སྣང་བའི་རྣམ་པར་རྟོག་པ་སྐྱེ་བ་ན་དབང་པོ་ཡོད་པ་དང་མེད་
པའི་རྗེས་སུ་བྱེད་པར་ཞེན་པར་འགྱུར་རོ་ཞེ་ན། འོ་ན་ཟླ་བ་གཅིག་ཏུ་སྣང་བའི་ཤེས་པ་དེ་ཅིའི་ཕྱིར་ཉམས་སུ་མ་མྱོང་། ཅི་སྟེ་ཉམས་སུ་མྱོང་ན་ནི་ཇི་ལྟར་མ་ངེས། མ་ངེས་པར་ཁས་ལེན་ན་ནི་དབང་པོའི་ཤེས་པ་ཐམས་ཅད་ལ་ཉམས་སུ་མ་མྱོང་བའི་ཤེས་པ་འགའ་ཞིག་ཀྱང་ཡོད་པར་ཁས་བླང་བར་
བྱ་བ་ཡིན་པ་དེའི་ཕྱིར་ཉམས་སུ་མྱོང་བའི་ཐ་སྙད་ངེས་པར་འཇིག་པར་འགྱུར་བའམ། ཟླ་བ་གཉིས་སུ་སྣང་བའི་ཤེས་པ་དབང་པོའི་བྱེད་པའི་དེ་མ་ཐག་པ་ཉིད་ཡིན་པར་ཉམས་སུ་མྱོང་བས་གྲུབ་པ་གནོད་པར་བྱེད་པ་མེད་པས་བར་དུ་ཆོད་པ་ཡིན་ནོ་ཞེས་བརྗོད་པར་ཇི་ལྟར་ནུས། གང་གི་ཕྱིར་གནོད་
པར་བྱེད་པ་མེད་པར་ནི་མི་སླུ་བ་དང་བཅས་པར་ཉམས་སུ་མྱོང་བས་ངེས་པ་ཚད་མ་མ་ཡིན་ནོ་ཞེས་བྱ་བར་བརྗོད་པ་འཐད་པ་མ་ཡིན་ཏེ། གནོད་པར་བྱེད་པ་མེད་པའི་ཕྱིར་འཁྲུལ་པར་མི་འགྲུབ་བོ་ཞེས་གང་འཆད་པར་འགྱུར་རོ། །རྣམ་འགྲེལ་ལས་ཀྱང་གནོད་པར་བྱེད་པའི་རིགས་པ་དམ་པ་མེད་པར་ནི་
ཤེས་པ་དུས་ཅིག་ཅར་བར་ཉམས་སུ་མྱོང་བས་གྲུབ་པ་སྤང་བར་ནུས་པ་མ་ཡིན་ནོ་ཞེས་བཤད་དོ། །འདི་སྙམ་དུ་ཟླ་བ་གཅིག་ཏུ་སྣང་བའི་ཤེས་པ་ཉིད་ལ་དེའི་དེ་མ་ཐག་ཏུ་བྱུང་བའི་རྣམ་པར་རྟོག་པའི་ཤེས་པས་གཉིས་སུ་སྒྲོ་བཏགས་པ་ཡིན་ཏེ། དེའི་ཕྱིར་ཟླ་བ་གཅིག་ཉིད་གསལ་བར་ཉམས་སུ་མྱོང་

བ་ན་གྲངས་གཞན་དུ་སྒྲོ་བཏགས་པའི་ཕྱིར་ཟླ་བ་གཉིས་སུ་སྣང་བར་ཞེན་པ་ཡིན་ནོ་ཞེ་ན། དེ་ནི་དེ་ལྟར་ཤིན་ཏུ་མ་འབྲེལ་ཏེ། བུམ་པ་གཅིག་མཐོང་བ་ལ་སྐྱེས་བུས་བཅུར་ཡོངས་སུ་བཏགས་པ་ན་ཡུལ་ཐ་དད་པར་བུམ་པ་བཅུའི་རང་བཞིན་དུ་སྣང་བ་ནི་མེད་ཀྱི། འོན་ཀྱང་གཅིག་ཉིད་གསལ་བའི་
རང་བཞིན་དུ་སྣང་བ་ན་བཅུར་ཞེན་པ་ཉིད་དོ། །འདིར་ནི་ཡུལ་གཅིག་པ་སྤངས་ནས་ཡུལ་གཞན་དུ་ཁ་དོག་དང་དབྱིབས་མཚུངས་པའི་ཟླ་བའི་དཀྱིལ་འཁོར་གཞན་ཉིད་དུ་གཟུང་བར་སྣང་བ་ཡིན་པ་དེའི་ཕྱིར་འདི་ནི་གཅིག་སྣང་བ་ན་གྲངས་བཏགས་པ་མ་ཡིན་གྱི། འོན་ཀྱང་རྣམ་པར་ཤེས་པ་འདི་ནི་
ཟླ་བ་གཉིས་སུ་སྣང་བ་ཉིད་ཡིན་ནོ། །དེ་ཡང་དབང་པོ་ལས་སྐྱེས་པ་མ་ཡིན་ལ། དབང་པོ་ལས་སྐྱེས་པ་གང་ཡིན་པ་དེ་ནི་ཉམས་སུ་མ་མྱོང་བའི་ཕྱིར་ཐལ་བ་སྔ་མ་ཉིད་དུ་འགྱུར་རོ། །གཞན་ཡང་ཉམས་སུ་མྱོང་བའི་ཐ་སྙད་ཐམས་ཅད་ལ་ཡིད་བརྟན་དུ་མེད་པར་མ་གྱུར་ཅིག་ཅེས་གཞན་ལ་
གཞན་དུ་ཉམས་སུ་མྱོང་བ་ལ་ནི་རྣམ་པར་རྟོག་པ་གཞན་དུ་སྐྱེ་བ་མ་ཡིན་ནོ། །འདིར་དབང་པོ་འཁྲུལ་པའི་ཕྱིར་རྣམ་པར་རྟོག་པ་གཞན་དུ་འགྱུར་བ་ཡིན་ནོ་ཞེ་ན། དབང་པོའི་རྣམ་པར་འགྱུར་བ་དངོས་སུ་སྐྱེད་པར་བྱེད་པའི་ཤེས་པ་གང་ཡིན་པ་དེའི་རྣམ་པར་འགྱུར་བའི་རྒྱུ་མ་ཡིན་ན། བར་དུ་ཆོད་པ་ཡིན་
པར་ཇི་ལྟར་འགྱུར། རྣམ་པར་འགྱུར་བའི་ཤེས་པ་སྐྱེད་པར་ནུས་ན་ནི་དེའི་དངོས་སུ་སྐྱེད་པར་བྱེད་ལ། མི་ནུས་ན་ཡང་བར་དུ་ཆོད་ནས་ཀྱང་སྐྱེད་པར་མི་བྱེད་དོ། །བར་དུ་ཆོད་པ་འགགས་པ་ནི་འགའ་ཞིག་གི་རྒྱུ་མ་ཡིན་ནོ། །དབང་པོའི་རྣམ་པར་ཤེས་པ་རྣམ་པར་རྟོག་པའི་དངོས་སུ་སྐྱེད་པའི་རྒྱུ་ཡིན་ན་
ཡང་ཉམས་སུ་མྱོང་བའི་དངོས་པོ་ལ་རྣམ་པར་རྟོག་པ་སྐྱེད་པར་བྱེད་པའམ། གསལ་བ་མེད་པའི་ཕྱིར་ཉམས་སུ་མྱོང་བ་དང་འདྲ་བ་ལ་ཡིན་ཏེ། དཔེར་ན་སྨིག་རྒྱུའི་རང་གི་མཚན་ཉིད་གཟུང་བ་ལས་དེ་དང་འདྲ་བའི་ཆུའི་རྣམ་པར་རྟོག་པ་བཞིན་ནོ། །རང་གི་མཚན་ཉིད་འཛིན་པ་འདིས་ནི་ཇི་ལྟར་ཉམས་
སུ་མྱོང་བའམ། ཉམས་སུ་མྱོང་བ་དང་འདྲ་བའི་ངེས་པ་སྐྱེད་པ་མེད་དེ། ཟླ་བ་གཅིག་པ་ཉམས་སུ་མྱོང་བའི་ཕྱིར་དང་། མི་འདྲ་བའི་ཕྱིར་རོ། །དེའི་ཕྱིར་དབང་པོའི་རྣམ་པར་ཤེས་པའི་རྣམ་པར་རྟོག་པ་སྐྱེད་པའི་རྣམ་པ་འདི་ཅི་ཞིག་ཡིན། གཞན་ཡང་སྔར་བཤད་པའི་ཚུལ་གྱིས་རྣམ་པར་རྟོག་པའི་རྣམ་

པར་ཤེས་པ་ནི་གསལ་བར་སྣང་བ་མ་ཡིན་ལ། ཟླ་བ་གཉིས་ཀྱི་ཤེས་པ་གང་ཡིན་པ་དེ་ནི་རྟག་ཏུ་གསལ་བར་སྣང་བས་དེ་ཇི་ལྟར་ན་རྣམ་པར་རྟོག་པ་ཅན་དུ་འགྱུར། འོ་ན་སྨིག་རྒྱུ་ལ་ཆུའི་རྣམ་པར་རྟོག་པ་གསལ་བར་སྣང་བར་ཇི་ལྟར་འགྱུར་ཞེ་ན། གསལ་བར་སྣང་བ་ནི་མ་ཡིན་གྱི་
སྨིག་རྒྱུའི་རང་གི་མཚན་ཉིད་འཛིན་པར་བྱེད་པ་གསལ་བར་སྣང་བའི་ཤེས་པ་དང་དངོས་པོ་འདྲ་བའི་ཡུལ་ཅན་གྱི་རྣམ་པར་རྟོག་པའི་ཤེས་པ་ཅིག་ཅར་འཇུག་པ་ན་སྣང་བ་དང་རྣམ་པར་བརྟགས་པའི་དོན་དག་གཅིག་ཏུ་བྱས་ནས་གསལ་བར་སྣང་བར་འཁྲུལ་པ་ཡིན་ནོ། །འདིས་ནི་ནོར་བུའི་འོད་ལ་ནོར་བུར་
རྣམ་པར་རྟོག་པ་ཡང་བཤད་པ་ཡིན་ནོ། །དེ་ལྟར་འདིར་ནི་ཁྱེད་ལ་དབང་པོ་ལས་སྐྱེས་པ་ཟླ་བ་གཉིས་ཀྱི་ཤེས་པ་གསལ་བར་སྣང་བ་ཡོད་པ་མ་ཡིན་པས་ན་གང་གིས་ན་ལྷན་ཅིག་ཏུ་འཇུག་པའི་རྣམ་པར་རྟོག་པའི་ཤེས་པ་ལ་དོན་ཐ་དད་པ་མེད་པར་སྒྲོ་འདོགས་པ་གསལ་བ་ཉིད་དུ་འཁྲུལ་པར་འགྱུར།
དེའི་ཕྱིར་དབང་པོའི་བྱེད་པའི་དེ་མ་ཐག་པ་ཉིད་དུ་བྱུང་བར་ཉམས་སུ་མྱོང་བ་གསལ་བར་སྣང་བའི་ཟླ་བ་གཉིས་ལ་སོགས་པའི་ཤེས་པ་ནི་དབང་པོ་ལས་སྐྱེས་པ་ཉིད་དོ་ཞེས་བྱ་བ་གནས་སོ། །གཞན་ཡང་ཟླ་བ་གཉིས་པ་ལ་སོགས་པའི་ཤེས་པ་ནི་དབང་པོར་འགྱུར་ན་འགྱུར་བར་མཐོང་སྟེ། དེས་
ན་འགྱུར་བའི་ཕྱིར་དེ་དབང་པོ་ལས་སྐྱེས་པ་མ་ཡིན་པར་མི་འཐད་དོ། །གལ་ཏེ་དབང་པོར་འགྱུར་བའི་རྗེས་སུ་བྱེད་པ་ཡིན་ཡང་དབང་པོ་ལས་སྐྱེས་པ་མ་ཡིན་ནོ་ཞེས་བྱ་བ་ལ་མི་འཐད་པ་ཅི་ཡོད་ཅེ་ན། འགྱུར་བའི་རྗེས་སུ་བྱེད་པ་གང་གི་རྒྱུ་མཚན་ཡིན་པ་སྟེ། གང་གི་ཞེ་ན། རྟེན་ཏེ་བརྟེན་པར་
འཇོག་པ་སྟེ། རྣམ་པར་འཇོག་ཅིང་ཐ་སྙད་དུ་བྱེད་པ་གང་ཡིན་པ་དེའི་རྟེན་དེའི་རྒྱུ་མཚན་ནི་དེ་ཡིན་ནོ། །གང་གི་ཕྱིར་དབང་པོ་ལས་སྐྱེས་པའི་ཤེས་པ་གཞན་ལ་ཡང་བརྟེན་པ་ཉིད་ཀྱི་ཐ་སྙད་ཀྱི་རྒྱུ་ནི་དེ་ཉིད་ཡིན་པ་དེའི་ཕྱིར་འདིར་ཡང་རྒྱུ་ཡོད་པ་ན་ཐ་སྙད་འཇུག་པར་བྱ་བ་ཡིན་ནོ། །དེའི་སྦྱོར་བའི་ཚུལ་
ནི་སྔར་བརྗོད་ཟིན་ཏོ། །སྦྲུལ་ལ་སོགས་པའི་འཁྲུལ་པ་དེ་བཞིན་དུ་དབང་པོའི་རྣམ་པར་འགྱུར་བ་དབང་པོའི་འགྱུར་བ་ཡོད་ཀྱང་ལྡོག་པར་ཐལ་བར་འགྱུར་ཏེ། ཐལ་བར་འགྱུར་བ་དེའི་ཕྱིར་དང་། དེ་བཞིན་དུ་དབང་པོའི་རྣམ་པར་འགྱུར་བ་ལོག་ཀྱང་སྟེ། མེད་ཀྱང་མི་ལྡོག་པར་ཐལ་ཏེ་ཐལ་བ་

འདིས་ཀྱང་ཡིད་ལས་སྐྱེས་པ་ཉིད་དུ་མི་རིགས་སོ། །གང་ཞིག་ཡིད་ལས་སྐྱེས་པ་དེ་ནི་དབང་པོར་འགྱུར་བའི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་མ་ཡིན་ཏེ། དཔེར་ན་སྦྲུལ་དུ་འཁྲུལ་པ་བཞིན་ནོ། །ཟླ་བ་གཉིས་ལ་སོགས་པའི་ཤེས་པ་ཡང་ཡིད་ལས་སྐྱེས་པ་ཡིན་ནོ། །དེ་རྣམ་པར་
འགྱུར་བའི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་ཉིད་ལ་ནི་དབང་པོ་ལས་སྐྱེས་པའི་ཐ་སྙད་དུ་རུང་བས་ཁྱབ་པ་ཡིན་ཏེ། ཐ་སྙད་ཀྱི་རྒྱུ་མཚན་ནི་དེ་ཙམ་དུ་ཟད་པའི་ཕྱིར་རོ། །ཡིད་ལས་སྐྱེས་པ་ཉིད་ཀྱང་དེ་དང་འགལ་བ་ཡིན་པའི་ཕྱིར་ཁྱབ་པར་བྱེད་པ་འགལ་བ་དམིགས་པ་ཐལ་བའི་གཏན་
ཚིགས་སོ། །ཐལ་བ་བཟློག་པ་ནི་གང་ཞིག་དབང་པོའི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པ་དེ་ནི་ཡིད་ལས་སྐྱེས་པ་མ་ཡིན་ཏེ། དཔེར་ན་སྔོན་པོ་ལ་སོགས་པར་སྣང་བ་བཞིན་ནོ། །ཟླ་བ་གཉིས་པ་ལ་སོགས་པའི་ཤེས་པ་ཡང་དེ་བཞིན་ཏེ། སྦྱོར་བ་འདི་ནི་འགལ་བས་ཁྱབ་པ་ཡིན་ནོ། །སྦྱོར་
བ་གཉི་གའི་ཁྱབ་པར་བྱ་བ་དང་ཁྱབ་པར་བྱེད་པའི་དངོས་པོ་ནི་དབང་པོ་ལས་བྱུང་བའི་ཐ་སྙད་སྒྲུབ་པར་གཏན་ལ་ཕབ་མ་ཐག་པ་ཡིན་ནོ། །ཡན་ལག་ཅན་གཅིག་ཉིད་དེ་དང་། ནམ་མཁའ་དམའ་བ་ལ་སོགས་པའི་རྣམ་པར་རྟོག་པ་རྣམ་པར་དཔྱད་པས་ཀྱང་མི་ལྡོག་པ་མ་ཡིན་ནམ་ཞེ་ན། བདེན་མོད་ཀྱི་འོན་
ཀྱང་ཡིད་ཀྱི་ཤེས་པ་འཁྲུལ་པ་ནི་རྣམ་པར་དཔྱད་པས་ལྡོག་པར་འགྱུར་རོ་ཞེས་བྱ་བའི་སློབ་དཔོན་གྱིས་བཞེད་པའི་དོན་འདི་ཡོངས་སུ་བཟུང་ནས་སྐྱོན་འདི་སྤང་ངོ་། །འདི་ལ་ཡིད་ཀྱི་འཁྲུལ་པ་འགའ་ཞིག་ནི་མཐོང་བའི་རྣམ་པའི་རྗེས་སུ་འབྲང་བ་ཡིན་ཏེ། དཔེར་ན་གྲུ་བཞི་ལ་སོགས་པའི་དབྱིབས་ཀྱི་འཁྲུལ་པ་
བཞིན་ནོ། །ཁ་ཅིག་ནི་མཐོང་བ་ལ་མི་ལྟོས་པ་ཡིན་ཏེ། དཔེར་ན་སྦྲུལ་ལ་སོགས་པར་འཁྲུལ་པ་བཞིན་ནོ། །སྦྲུལ་དུ་འཁྲུལ་པ་ནི་ཐག་པ་མཐོང་བའི་རྗེས་སུ་འབྲང་བ་མ་ཡིན་གྱི། འོན་ཀྱང་མཐོང་བའི་རྒྱུ་རྣམས་མི་གསལ་བ་ན་དེ་འབྱུང་བ་ཡིན་ནོ། །དེ་ལས་གང་ཞིག་རྟག་ཏུ་མཐོང་བའི་རྗེས་སུ་འགྲོ་བ་
དེ་ནི་རྣམ་པར་དཔྱད་པས་མི་ལྡོག་ལ། ནམ་མཁའ་དམའ་བ་དང་ཡན་ལག་ཅན་གྱི་རྫས་ལ་སོགས་པའི་རྣམ་པར་རྟོག་པ་ཡང་དེ་ལྟ་བུའི་རང་བཞིན་ཅན་ཡིན་ནོ། །གང་ཡང་བལྟ་བར་བྱ་བའི་དངོས་པོ་སྣང་བ་ནི་མི་གསལ་བ་འགའ་ཞིག་ལས་མ་ངེས་པ་ན་འདྲ་བའི་དངོས་པོར་སྒྲོ་འདོགས་པ་འཇུག་པ་དེ་ནི་མཐོང་

བའི་དངོས་པོ་ལ་ཇི་ཞིག་ལྟར་དཔྱད་པ་ལས་ངེས་པ་ན་ལྡོག་པ་ཡིན་ནོ། །ཟླ་བ་གཉིས་ལ་སོགས་པའི་ཤེས་པ་ཡང་ཟླ་བ་གཉིས་མཐོང་བའི་རྗེས་སུ་རྟག་ཏུ་འབྲང་བ་ནི་མ་ཡིན་གྱི། འོན་ཀྱང་རྣམ་པ་གཞན་དུ་མཐོང་བའི་ཟླ་བ་ལ་རྒྱུ་མཚན་འགའ་ཞིག་ལས་གཞན་དུ་འཇུག་པ་
ཡིན་ལ། དེ་ལ་རྣམ་པར་དཔྱད་པ་ལས་ཟླ་བ་གཅིག་ཏུ་ངེས་པར་གཏན་ལ་ཕེབས་པ་ན་ངེས་པར་ལྡོག་པ་ཡིན་ན། མ་ལོག་པ་དེའི་ཕྱིར་འདི་ནི་ཡིད་ལས་བྱུང་བ་མ་ཡིན་ནོ། །གང་ཞིག་ཟླ་བ་གཉིས་པ་ལ་སོགས་པ་དབང་པོ་ལས་སྐྱེས་པ་མ་ཡིན་ཡང་རྣམ་པར་མི་རྟོག་ཅིང་གསལ་བར་སྣང་བའི་རྨི་
ལམ་གྱི་ཤེས་པ་བཟློག་པའི་དོན་དུ་མ་འཁྲུལ་པ་སྨོས་པར་བྱ་བ་ཉིད་དོ་ཞེས་ཟེར་བ་དེ་ནི་མི་རིགས་ཏེ། རྨི་ལམ་གྱི་ཤེས་པ་ལ་ནི་ཡང་དག་པའི་ཤེས་པ་ཉིད་མེད་པ་དེའི་ཕྱིར་དེའི་དབང་དུ་བྱས་པ་ཉིད་ཀྱིས་དེ་བསལ་བའི་ཕྱིར་རོ། །གང་ཞིག་ཡང་དག་པའི་ཤེས་པར་འདོད་པ་དང་རྟོག་པ་མེད་པ་དེ་ལ་ནི་མ་འཁྲུལ་
པ་སྨོས་པ་མེད་ན་མངོན་སུམ་ཉིད་དུ་དོགས་པ་ཡོད་པའི་ཕྱིར་མ་འཁྲུལ་པ་ནི་དེའི་དོན་དུ་སྨོས་པར་བྱ་བ་ཡིན་ཏེ། དཔེར་ན་དུང་ལ་སེར་པོར་ཤེས་པ་བཟློག་པའི་དོན་ཡིན་པ་ལྟ་བུའོ། །འོ་ན་ཇི་ལྟར་འོ་ན་ནི་རྨི་ལམ་གྱི་ཤེས་པ་ཞེས་བརྗོད་ཅེ་ན། སྨྲས་པ། རྩོད་པ་པོས་རྨི་ལམ་གྱི་ཤེས་པ་རྟོག་པ་མེད་པ་ལོག་
པའི་ཤེས་པ་དང་། ཟླ་བ་གཉིས་ལ་སོགས་པའི་ཤེས་པ་རྣམས་ཡང་དག་པའི་ཤེས་པ་ཉིད་མཐོང་ཞིང་གཉི་ག་ཡང་བཟློག་པའི་དོན་དུ་མ་འཁྲུལ་པ་སྨོས་པར་མི་རིགས་པས་ན་དེ་ཅིའི་དོན་དུ་བྱས་སྙམ་དུ་སེམས་པ་ན། གང་ཞིག་མ་འཁྲུལ་པས་བཟློག་པ་དེ་ཉིད་འདྲི་བ་ཡིན་ལ་སློབ་དཔོན་གྱིས་ནི་ཡང་དག་
པའི་ཤེས་པར་འདོད་པའི་དབང་པོ་ལས་སྐྱེས་པ་འགའ་ཞིག་ལོག་པའི་ཤེས་པ་ཉིད་དང་། དེ་བཟློག་པའི་དོན་དུ་མ་འཁྲུལ་པ་སྨོས་པ་ཡང་གདོན་མི་ཟ་བར་བྱ་དགོས་པར་གཟིགས་ནས་མ་འཁྲུལ་ཞེས་བསྟན་པའི་ཕྱིར་རོ་ཞེས་གསུངས་སོ། །དེའི་ཕྱིར་དེ་ལྟར་དབང་པོ་ལས་སྐྱེས་པར་འཐད་པས་བསྒྲུབས་
པ་མཇུག་སྡུད་དེ། དེའི་ཕྱིར་འཁྲུལ་པ་ཉིད་ཀྱིས་མ་འཁྲུལ་པ་སྨོས་པས་བསལ་བའི་འཁྲུལ་པ་འདི་ལ་ནི་དབང་པོ་ལས་སྐྱེས་ཀྱང་མངོན་སུམ་ལྟར་སྣང་བ་ཡིན་ནོ། །གང་གི་ཕྱིར་འཁྲུལ་པ་ནི་དབང་པོ་ལས་སྐྱེས་ཀྱང་མངོན་སུམ་ལྟར་སྣང་བ་ཡིན་པ་དེ་ཉིད་ཀྱི་ཕྱིར་ཏེ། རྒྱུ་དེས་ན། དྲན་དང་འདོད་པར་བྱེད་པའོ། །

ཞེས་བྱ་བ་ཡོངས་སུ་རྫོགས་པའི་ཚིག་འདིས། འཁྲུལ་དང་ཀུན་རྫོབ་ཤེས་པ་དང་། །ཞེས་བྱ་བ་ལ་སོགས་པ་རྣམ་པར་རྟོག་པ་རྣམས་ཀྱི་སྡེ་ཚན་ཏེ། ཚོམས་ལས་ལོགས་ཤིག་ཏུ་སྟེ། ཐ་དད་པར་རྣམ་པར་གཅད་དེ་སོ་སོར་བྱས་ནས་སོ། །རབ་རིབ་ཀྱི་རྒྱུ་མཚན་གྱིས་མཚོན་པ་རྒྱུ་མཚན་གཞན་ལས་
སྐྱེས་པའི་མངོན་སུམ་ལྟར་སྣང་བ་ཡང་ཡོད་པ་དེའི་ཕྱིར་རབ་རིབ་སྨོས་པ་ནི་ཉེ་བར་མཚོན་པ་ཡིན་ཏེ། རབ་རིབ་བཅས་ཞེས་བྱ་བའི་ཚིག་འདིས་ནི་རབ་རིབ་ཀྱིས་མཚོན་པ་མངོན་སུམ་ལྟར་སྣང་བར་སློབ་དཔོན་ཕྱོགས་ཀྱི་གླང་པོས་གསུངས་སོ། །གཞན་དུ་ན་རབ་རིབ་ལས་བྱུང་བ་ཡང་རྣམ་པར་རྟོག་པ་ཡིན་ན་ནི་
འཁྲུལ་པ་སྨོས་པ་ཁོ་ནས་བསྡུས་པའི་ཕྱིར་ལོགས་ཤིག་ཏུ་བྱས་པ་དོན་མེད་པར་འགྱུར་རོ། །ཇི་ལྟར་ཇི་ལྟར་ཡང་རུང་བར་ལོགས་ཤིག་ཏུ་བྱེད་ན་ནི་སྨྲ་བ་པོ་མི་མཁས་པར་འགྱུར་ལ། དབྱེ་བ་བརྗོད་པར་ཁས་ལེན་ན་ཡང་ཐུག་པ་མེད་པར་ཐལ་ལོ། །དེའི་ཕྱིར་རབ་རིབ་ནི་རྣམ་པར་རྟོག་པ་མེད་པའི་མངོན་
སུམ་ལྟར་སྣང་བ་གཞན་རྣམས་ཀྱིས་ཉེ་བར་མཚོན་བྱེད་ཡིན་ནོ། །མངོན་སུམ་ནི་རྟོག་པ་དང་བྲལ་བའོ་ཞེས་བྱ་བའི་མཚན་ཉིད་འདི་ལ། འདི་ནི་དམིགས་ཀྱིས་བསལ་བ་ཡིན་ཏེ། འདིར་དམིགས་ཀྱིས་བསལ་བ་ཞེས་བྱ་བས་སོ། །རབ་རིབ་ལ་སོགས་པ་ལས་བྱུང་བ་ལ་སོགས་པ་མ་གཏོགས་པའི་རྣམ་
པར་རྟོག་པ་མེད་པ་ནི་མངོན་སུམ་མོ་ཞེས་རབ་རིབ་ལས་སྐྱེས་པ་ལ་སོགས་པ་དམིགས་ཀྱིས་བསལ་བར་བསྟན་པའི་དོན་དུ་སྟེ། དེས་ན་རབ་རིབ་ལས་སྐྱེས་པ་ལྟར་འཁྲུལ་པར་མ་གྱུར་པའི་རྟོག་པ་མེད་པ་གང་ཡིན་པ་དེ་ནི་མངོན་སུམ་མོ་ཞེས་ཡུལ་འདིས་སྤང་བའི་དོན་དུ་མཚན་ཉིད་ཀྱི་ལྷག་མ་དཔག་པར་
བྱའོ། །དེའི་ཕྱིར་ཇི་ལྟ་ཇི་ལྟར་ཡང་རུང་བས་རྣམ་པར་རྟོག་པའི་སྡེ་ཚན་ལས་རབ་རིབ་ལས་བྱུང་བ་ལ་སོགས་པ་ལོགས་སུ་བྱས་པ་ནི་མ་ཡིན་ནོ། །ཚད་མ་ཀུན་ལས་བཏུས་པར་མངོན་སུམ་གྱི་མཚན་ཉིད་བསྒྲུབ་པ་ལས་གཞན་རྩོད་པ་བསྒྲུབ་པར་ཡང་མིག་ལ་སོགས་པའི་རྡུལ་ཕྲ་རབ་དེ་དག་རྣམས་ཟླ་བ་
གཉིས་དང་། སྔོན་པོ་ལ་སོགས་པ་དེ་དག་གང་ལ་སྣང་བའི་ཤེས་པ་དེའི་རྒྱུ་ཡིན་པར་གསུངས་སོ། །དེ་ལས་ནི་གལ་ཏེ་ཇི་ལྟར་ཡོད་པ་རྣམ་པ་གཞན་དུ་སྣང་བའི་ཤེས་པའི་ཡང་རྒྱུ་ཡིན་པ་དེ་ལྟར་དེ་དག་ཡུལ་ཡིན་ན་དེ་ལྟ་ན་ནི་འོ་ན་མིག་ལ་སོགས་པའི་རྡུལ་ཕྲ་རབ་རྣམས་ཀྱང་ཟླ་བ་གཉིས་སུ་སྣང་བ་

དང་། སྔོན་པོ་ལ་སོགས་པར་སྣང་བའི་ཡུལ་ཉིད་དུ་ཐལ་བར་འགྱུར་ཏེ། རྒྱུ་ཡིན་པའི་ཕྱིར་རོ་ཞེས་གསུངས་སོ། །མངོན་སུམ་གྱི་ཡུལ་བརྟག་པ་ནི་མིག་ལ་སོགས་པའི་རྡུལ་ཕྲ་རབ་རྣམས་དེ་ཉིད་ལ་ཡུལ་གྱི་དངོས་པོར་ཧ་ཅང་ཐལ་བར་འཐད་པ་ཡིན་གྱི། ཡིད་ཀྱི་ཤེས་པའི་
ཡུལ་གྱི་དངོས་པོར་ནི་མ་ཡིན་པའི་ཕྱིར་ན་ཡིད་ཀྱི་ཤེས་པ་ལ་ལྟོས་ནས་དེ་སྐད་བརྗོད་དོ་ཞེས་ནི་ནུས་པ་མ་ཡིན་ནོ། །དེས་ན་དེ་ལྟར་མངོན་སུམ་གྱི་དབྱེ་བ་དང་མཚན་ཉིད་དང་། སྤྱོད་ཡུལ་ལ་ལོག་པར་རྟོགས་པ་བསལ་ནས། འབྲས་བུ་ཚད་མ་ལས་ཐ་དད་དོ་ཞེས་འབྲས་བུ་ལས་ལོག་པར་རྟོགས་པ་
བསལ་བར་བཞེད་ནས་གང་ཡིན་ཞེས་འདྲི་བར་རྩོམ་མོ། །འདིའི་ནི་བཤད་མ་ཐག་པའོ། །ཐོབ་པར་བྱེད་པ་ནི་ཚད་མ་ཡིན་ལ། གདོན་མི་ཟ་བར་བྱ་དགོས་པའི་དོན་ཐོབ་པར་བྱེད་པ་ནི་དེའི་འབྲས་བུ་ཡིན་ནོ། །དེ་ཡང་རང་བཞིན་གང་ཡིན་ཞེ་ན། གཞལ་བྱ་ཞེས་བྱ་བ་ལ་སོགས་པ་སྨོས་སོ། །དོན་
རྟོགས་ན་འཇུག་ལ་དེས་ལས་ཀྱང་ཐོབ་པ་དེའི་ཕྱིར་དོན་རྟོགས་པའི་བྱ་བ་ནི་དོན་ཐོབ་པའི་བྱ་བ་ཡིན་པས་གདོན་མི་ཟ་བར་བྱ་དགོས་པའི་ཚད་མའི་འབྲས་བུ་ནི་དེ་ཉིད་ཡིན་གྱི་གཞན་ནི་མ་ཡིན་ནོ། །གཞན་གྱིས་སྨྲས་པ་ནི་བྱེད་པ་པོའི་ངོ་བོར་གྱུར་པའི་དངོས་པོ་ལ་ནི་ཚད་མར་བརྗོད་པ་ཡིན་ལ། བྱེད་པ་ཡང་བྱ་
བའི་སྒྲུབ་པར་བྱེད་པ་དམ་པ་ཡིན་ཏེ། དེའི་ཕྱིར་གང་ལ་ལྟོས་ནས་དེ་དེའི་བྱེད་པར་འགྱུར་བ་འབྲས་བུར་གྱུར་པའི་བྱ་བ་འགའ་ཞིག་གདོན་མི་ཟ་བར་ཡོད་དགོས་སོ་ཞེས་བྱ་བ་ཡིན་ལ། ཅིག་ཤོས་ཀྱིས་ཀྱང་འཇལ་བའི་བྱ་བ་བྱེད་པ་ཚད་མ་ཡིན་པ་དེའི་ཕྱིར། དེ་ཉིད་འབྲས་བུ་ཡིན་ལ་ཚད་མའི་འབྲས་བུ་དེ་
ཡང་ལས་ངེས་པར་གཅོད་པ་ཡིན་ནོ་ཞེས་བསྟན་པའི་ཕྱིར་གཞལ་བྱ་རྟོགས་པའོ་ཞེས་གསུངས་པ་ཡིན་ནོ། །གང་གི་ཕྱིར་གཞལ་བྱ་རྟོགས་པ་དེ་ནི་ཤེས་པ་ཡིན་ལ་དེ་ཡང་འབྲས་བུ་ཡིན་པ་དེས་ན་ཤེས་པ་ཉིད་འབྲས་བུར་འགྱུར་རོ། །གང་གི་ཕྱིར་དེ་ལྟ་ཡིན་པ་དེའི་ཕྱིར་ད་ནི་སྟེ། ད་ལྟར་ཤེས་པ་འབྲས་
བུའི་དངོས་པོར་ཁས་བླངས་ན། ཇི་ལྟར་མངོན་པར་འདོད་པའི་ཚད་མ་ལུས་པ་གང་ཞིག་ཡིན་ཏེ། ཅུང་ཟད་ཀྱང་མ་ཡིན་ནོ། །གང་གི་ཕྱིར་ཁྱེད་ནི་ཤེས་པ་ཚད་མར་འདོད་པ་ཡིན་ན། ད་ལྟ་ན་ནི་ཤེས་པ་ཡང་ཚད་མའི་འབྲས་བུར་བརྗོད་པས། འབྲས་བུ་ལས་ཐ་དད་པས་ཚད་མ་ཤེས་པ་མ་ཡིན་པའི་

བདག་ཉིད་དུ་ངེས་པར་འགྱུར་དགོས་པ་དེས་ན་འབྲས་བུ་ཐ་དད་པར་སྨྲ་བ་ལ་མི་འདོད་པ་ཐོག་ཏུ་བབ་བོ་ཞེ་ན། སློབ་དཔོན་གྱིས་ཤེས་པ་གཅིག་ལ་རྣམ་པར་གཞག་པར་བྱ་བ་དང་། རྣམ་པར་འཇོག་པར་བྱེད་པའི་དངོས་པོས་ཚད་མ་དང་འབྲས་བུའི་དངོས་པོ་མི་འགལ་བར་དགོངས་ནས་བཤད་
པ། གང་ལས་ཏེ་བྱེད་པ་པོ་གང་གཞལ་བྱ་རྟོགས་པ་འདིའི་དེ་ཉིད་དེ། གཞལ་བྱ་རྟོགས་པ་ཉིད་རྣམ་པར་གཞག་པ་གྲུབ་པའོ། །རང་གི་བྱེ་བྲག་གིས་བྱ་བའི་བྱེ་བྲག་ཏུ་བྱེད་པ་པོ་ནི་བྱེད་པ་ཡིན་ཏེ། བྱེད་པ་པོ་ཐམས་ཅད་བྱེ་བྲག་ཏུ་བྱེད་པ་པོ་ཉིད་ཡིན་ཡང་། གང་ཞིག་བྱེད་པ་པོ་གཞན་ལ་
ལྟོས་པ་མེད་པར་བྱ་བ་བྱེ་བྲག་ཏུ་བྱེད་པ་པོ་དེ་ནི་བྱེད་པ་ཡིན་ནོ། །དེ་བཞིན་དུ་འདིར་ཡང་རང་གི་བྱེ་བྲག་གིས་རྣམ་པར་གཞག་པར་བྱ་བ་དོན་རྟོགས་པ་བྱེ་བྲག་ཏུ་སྒྲུབ་པའི་བྱེད་པ་ནི་གང་ཞིག་རྣམ་པར་འཇོག་པའི་རྒྱུ་མཚན་ལྟོས་པར་བྱ་བའི་བྱེད་པ་པོ་གཞན་གྱིས་མ་ཆོད་པ་ཉིད་ཡིན་ནོ། །འདི་ལྟར་
གང་ལ་ལྟོས་ཀྱང་དོན་རྟོགས་པ་རྣམ་པར་མི་གནས་ན་ནི་རྣམ་པར་འཇོག་པའི་རྒྱུ་མཚན་དེ་ལས་གཞན་ལ་ལྟོས་པར་བྱ་བ་ཡིན་ཏེ། དེས་ན་སྔ་མ་དེ་བར་དུ་ཆོད་པ་ན་རང་གི་བྱེ་བྲག་གིས་བྱ་བའི་བྱེ་བྲག་ཏུ་བྱེད་པ་པོར་མི་འགྱུར་གྱི། འོན་ཀྱང་ལྟོས་པར་བྱ་བ་གཞན་གང་ཡིན་པ་དེ་ཉིད་བར་དུ་མ་ཆོད་པར་རང་
གི་བྱེ་བྲག་གིས་བྱེ་བྲག་ཏུ་བྱེད་པ་པོར་འགྱུར་རོ། །དེ་སྟོན་པ་ནི་བར་ཆད་མེད་པར་ཞེས་བྱ་བ་ཡིན་ནོ། །གང་ལས་འདི་ལ་བར་ཆད་བར་དུ་གཅོད་པ་པོ་ལྟོས་པར་བྱ་བ་གཞན་མེད་པ་སྟེ། གཞན་གྱིས་བར་དུ་མཆོད་པར་གྱུར་པ་ན་འདིའི་དེ་ཉིད་འགྲུབ་པར་བྱེད་པ་གང་ཡིན་པ་དེ་ནི་བྱེད་པ་ཡིན་ནོ། །དེ་ལ་
སྟེ་ཚུལ་དེ་ལྟར་གནས་པ་ནའོ། །ལྟོས་པར་བྱ་བ་གཞན་གྱིས་བར་དུ་མ་ཆོད་པར་རང་གི་བྱེ་བྲག་གིས་བྱེ་བྲག་ཏུ་བྱེད་པ་པོ་བྱེད་པ་ཡིན་པ་དང་། དོན་གྱི་ཁྱད་པར་རྟོགས་པ་ནི་ཚད་མའི་འབྲས་བུ་ཡིན་ནོ་ཞེས་ཚུལ་དེ་ལྟ་ཡིན་པ་ནའོ། །དོན་དང་འབྲེལ་པར་བྱས་པ་རྟོགས་པ་འདིའི་དོན་དང་འབྲེལ་པར་
བྱེད་པ་ནི་དོན་ལྟ་བུའི་རང་བཞིན་གང་ཡིན་པ་དེའི་དངོས་པོ་དོན་གྱི་རང་བཞིན་ཉིད་མིན་པ་གཞན་ནི་འགའ་ཡང་མེད་དོ། །འབྲེལ་པར་བྱེད་པ་ཡང་སྒྲུབ་བྱེད་ཡིན་ལ། འབྲེལ་པར་བྱས་པ་རྟོགས་པ་ཡང་འབྲས་བུ་སྟེ། དེའི་ཕྱིར་གཞལ་བྱ་རྟོགས་པ་གཞལ་བྱ་དང་འབྲེལ་པར་བྱས་པ་རྣམ་པར་གཞག་

པར་བྱ་བའི་ཚད་མ་སྟེ། རྣམ་པར་འཇོག་པར་བྱེད་པ་ཉིད་ཀྱིས་སྒྲུབ་བྱེད་དམ་པར་གྱུར་པ་ནི་གཞལ་བྱའི་རང་བཞིན་ཉིད་དེ། དོན་དང་འདྲ་བ་ཉིད་ཡིན་ནོ། །སྐྱེད་པར་བྱེད་པའི་རྒྱུ་དེ་ཉིད་རྣམ་པར་འཇོག་པར་བྱེད་པ་ཡིན་པའི་ཕྱིར་དོན་དང་འདྲ་བ་ཉིད་སྒྲུབ་པར་བྱེད་པར་ཅིའི་ཕྱིར་
བརྗོད། གང་གི་ཕྱིར་དེ་རྟོགས་པའི་བྱ་བ་སྐྱེད་པར་ནུས་ན་རྣམ་པར་འཇོག་པ་ཡང་ཇི་ལྟར་མི་ནུས། རྣམ་པར་འཇོག་པ་པོ་ཡིན་ན་ཡང་ཇི་ལྟར་དེའི་སྐྱེད་པར་བྱེད་པ་པོར་མི་འགྱུར་ཞེ་ན། གང་གི་ཕྱིར་བསྒྲུབ་པར་བྱ་བ་ཡིན་པ་ཉིད་ཀྱི་ཕྱིར་ཐམས་ཅད་ཐམས་ཅད་ཀྱི་བསྒྲུབ་པར་བྱ་བ་མ་ཡིན་ལ། གང་གི་
ཕྱིར་སྒྲུབ་པར་བྱེད་པ་ཡིན་པ་དེའི་ཕྱིར་ཐམས་ཅད་གང་ཅུང་ཟད་བྱ་བ་ཡིན་པ་དེའི་སྒྲུབ་པར་བྱེད་པ་ཡང་མ་ཡིན་ནོ། །འོ་ན་ཇི་ལྟར་ཡིན་ཞེ་ན། བཤད་པ། འོན་ཀྱང་ཞེས་བྱ་བ་ནི་ཁྱད་པར་སྟོན་པའོ། །སྒྲུབ་པར་བྱེད་པ་གང་ལས་བྱ་བ་གང་འགྲུབ་པ་དེ་ནི་དེའི་སྒྲུབ་པར་བྱེད་པ་ཡིན་ནོ། །དེས་ན་འགའ་
ཞིག་ནི་རྣམ་པར་ཤེས་པ་བསྐྱེད་པའི་བྱ་བའི་སྒྲུབ་པར་བྱེད་པ་ཡིན་ཏེ། གང་ཞིག་གི་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པར་རྟོགས་པའོ། །འགའ་ཞིག་གིས་ལས་སོ་སོར་ངེས་པ་རྣམ་པར་འཇོག་པའི་སྒྲུབ་པར་བྱེད་པ་ཡིན་ཏེ། གང་ལས་ཤེས་པ་དེ་སྔོན་པོ་ལ་སོགས་པའི་ལས་ལ་ངེས་པར་
རྣམ་པར་འཇོག་ནུས་པའོ། །དེས་ན་འདི་ནི་དོན་དམ་པ་ཡིན་ཏེ། འགའ་ཞིག་གིས་འགའ་ཞིག་བསྐྱེད་པའི་བྱ་བ་བྱེད་པ་ན། བྱེད་པ་པོ་ཡིན་པའི་ཕྱིར་རྣམ་པར་འཇོག་པ་ཡང་དེ་ཉིད་ཀྱིས་བྱེད་པའམ། རྣམ་པར་འཇོག་པར་བྱེད་པ་ན་ཡང་དེའི་སྐྱེད་པར་བྱེད་པ་ཡིན་ནོ་ཞེས་དེ་ལྟར་རྣམ་པར་གཞག་པར་ནི་
ནུས་པ་མ་ཡིན་ནོ། །གང་གི་ཕྱིར་བསྐྱེད་བྱ་སྐྱེད་བྱེད་ཀྱི་དངོས་པོར་རྣམ་པར་གཞག་པའམ། རྣམ་པར་གཞག་འཇོག་གི་དངོས་པོ་ཕོངས་པས་རྣམ་པར་བརྟགས་པ་ནི་མ་ཡིན་གྱི། འོན་ཀྱང་རེག་པས་ངེས་པར་བརྟགས་པ་ན་གང་ཞིག་ཇི་ལྟར་འབྱོར་པ་སྟེ། དེ་ལྟར་རྣམ་པར་གཞག་པར་བྱ་བ་ཡིན་ནོ། །
འགའ་ཞིག་ནི་སྐྱེ་བའི་སྒྲུབ་པར་བྱེད་པ་ཡིན་ལ། འགའ་ཞིག་ནི་རྣམ་པར་གཞག་པའི་ཡིན་ཏེ། གང་ལས་སྐྱེས་པ་དང་གང་ལས་རྣམ་པར་གཞག་པར་རིག་པའོ། །གང་གི་ཕྱིར་སྐྱེད་པར་བྱེད་པ་དག་ལས་ནི་དོན་རྟོགས་པར་རྣམ་པར་གཞག་པ་མི་འཐད་པ་དེའི་ཕྱིར་སྒྲུབ་པར་བྱེད་པ་གཞན་ཚོལ་བ་

ཡིན་ནོ། །དེ་ལ་ཞེས་བྱ་བ་ནི་གང་གི་སྒྲུབ་པར་བྱེད་པའི་དངོས་པོར་འཐད་པ་དེ་ནི་དེའི་སྒྲུབ་པར་རྣམ་པར་གཞག་པར་བྱ་བ་ཡིན་ནོ་ཞེས་བྱ་བའི་ཚུལ་འདི་རྣམ་པར་གནས་པ་ནའོ། །ཉམས་སུ་མྱོང་བ་ནི་འཛིན་པར་བྱེད་པ་ཉིད་དེ། འཛིན་པའི་རྣམ་པ་དེ་ཁོ་ནའམ། དེ་ཙམ་མོ། །འཛིན་པར་
བྱེད་པའི་རང་བཞིན་དེ་འདྲ་བའི་བདག་ཉིད་དང་འདྲ་བའི་རང་བཞིན་གྱི་རྣམ་པར་ཤེས་པ་ནིའོ། །འདིས་ནི་རྣམ་པར་དབྱེ་བ་མི་ནུས་པ་ཉིད་ཀྱི་རྒྱུ་བསྟན་ཏེ། ཉམས་སུ་མྱོང་བ་རང་བཞིན་ཁྱད་པར་མེད་པ་ལ་ཁྱད་པར་དུ་རྣམ་པར་གཞག་པ་མི་ནུས་པའི་ཕྱིར་རོ། །གང་གི་ཕྱིར་སྔོན་པོའི་དོན་དམིགས་
པ་ནི་ཤེས་པའི་རང་གི་རང་བཞིན་དམིགས་པའི་བདག་ཉིད་ཁོ་ན་སྟེ། གཅིག་ནི་དོན་གྱི་ཡིན་ལ། གཞན་ནི་བདག་ཉིད་ཀྱི་ཡིན་པ་དམིགས་པ་གཉིས་ནི་མེད་པའི་ཕྱིར་རོ། །ཡུལ་དམིགས་པ་བདག་ཉིད་དམིགས་པའི་བདག་ཉིད་ཡིན་ན་ཡང་རྣམ་པར་ཤེས་པའི་བདག་ཉིད་ལ་ཁྱད་པར་མེད་
པའི་ཕྱིར་ཤེས་པ་ཐམས་ཅད་ཀྱི་བདག་ཉིད་དམིགས་པ་ཁྱད་པར་མེད་པ་དང་། དེ་དང་ཐ་དད་པ་མེད་པས་དོན་དམིགས་པ་ཡང་ཁྱད་པར་མེད་པར་འགྱུར་ཏེ། དེའི་ཕྱིར་ན་སྔོན་པོ་དམིགས་ཀྱི་སེར་པོ་ནི་མ་ཡིན་ནོ་ཞེས་ཤེས་པའི་ཡུལ་སོ་སོ་ལ་འབྲེལ་པ་ངེས་པ་འདིར་མི་འགྱུར་ལ། འབྲེལ་པ་ངེས་
པ་མེད་ན་ཡང་དོན་ངེས་པར་མྱོང་བར་རབ་ཏུ་གྲགས་པ་ཉམས་པར་འགྱུར་རོ། །དེས་ན་ཉམས་སུ་མྱོང་བའི་རང་བཞིན་དུ་བྱེ་བྲག་མེད་པ་འདི་ནི་གང་གིས་ལས་སོ་སོ་ལ་སྟེ། ལས་དང་ལས་ལ་རྣམ་པར་འབྱེད་པ་ཞེས་བྱ་བ་གཞན་དང་གཞན་དུ་རྣམ་པར་གནས་པ་ཡུལ་ངེས་པ་དེའི་བདག་ཉིད་དུ་འགྱུར་
བར་བྱ་དགོས་སོ། །གང་གི་ཕྱིར་ལས་ཀྱི་གནས་སུ་གྱུར་པའི་ཡོངས་སུ་གཅད་པའི་ཡུལ་ནི་ལས་སུ་བརྗོད་དོ། །རྣམ་པར་གནས་པའི་རྣམ་པ་སྟོན་པ་ནི་འདི་ནི་སྔོན་པོའི་ཡིན་ལ། འདི་ནི་གཞན་གྱི་ཡིན་ནོ་ཞེས་བྱ་བའོ། །གང་གི་ཕྱིར་བདག་ཉིད་ཀྱི་ཁྱད་པར་རམ་འབྲེལ་པ་ཅན་གྱི་ཁྱད་པར་ལས་
འགྱུར་ཏེ། འབྲེལ་པ་ཅན་གྱི་ཁྱད་པར་གང་གིས་ཁྱད་པར་མེད་པའི་ཤེས་པ་དེ་ཁྱད་པར་ཅན་དུ་རྣམ་པར་འཇོག་པའི་ཕྱིར་དེའི་བདག་ཉིད་དུ་འགྱུར་བར་བྱ་དགོས་སོ་ཞེས་ཅིའི་ཕྱིར་རྗོད་པར་བྱེད། ཤེལ་གྱི་རང་བཞིན་ཁྱད་པར་མེད་ཀྱང་ཉེ་བར་གཞག་པ་དེ་དང་དེ་དག་འབྲེལ་པས་ཁྱད་པར་ཅན་དུ་རྟོགས་

པ་དེ་བཞིན་དུ་ཤེས་པ་ཡང་འབྲེལ་པ་ཅན་གྱི་དབང་གིས་རྣམ་པར་འབྱེད་པ་ཡིན་ནོ་ཞེ་ན་དེའི་ཕྱིར་དེའི་བདག་ཉིད་མ་ཡིན་པ་ཞེས་སྨོས་སོ། །ནིའི་སྒྲ་ནི་གང་གི་ཕྱིར་གྱི་དོན་ཏེ། གང་གི་ཕྱིར་བདག་ཉིད་མ་ཡིན་པ་ངེས་པར་བྱེད་པ་མ་ཡིན་པ་དེའི་ཕྱིར་ཞེས་རྒྱང་རིང་པོར་བརྗོད་པ་དང་
འབྲེལ་པར་བྱའོ། །བདག་ཉིད་དུ་མ་གྱུར་པ་གང་ཡིན་པ་དེ་ཡོད་པ་ནི་དབང་པོ་ལ་སོགས་པ་འབྲེལ་པ་ཅན་རྣམས་ལ་ཡོད་པར་འགྱུར་ཏེ། དེ་དག་ནི་རྒྱུའི་དངོས་པོས་ཉེ་བ་ཡིན་གྱི་གཞན་ནི་མ་ཡིན་པའི་ཕྱིར་རོ། །དབང་པོ་དང་དོན་དང་ཕྲད་པ་ཞེས་བྱ་བ་དབང་པོ་དང་དོན་དག་གི་འབྲེལ་པ་དང་། དེ་
དག་ལ་སོགས་པ་ནི་ཡིད་ལ་སོགས་པ་གང་ཡིན་པ་དེ་དག་སྟེ། ཤེས་པའི་རྒྱུ་དེ་རྣམས་ལ་ཡོད་ཀྱང་སྟེ། རེ་ཞིག་བྱེ་བྲག་ནི་མེད་མོད་ཀྱི་འགའ་ཞིག་ལ་བྱེ་བྲག་ཡོད་ཀྱང་ཡུལ་ཞེས་བྱ་བའི་ལས་ཀྱི་བྱེ་བྲག་ཐ་དད་པར་གྱུར་པ་ལ་བདག་ཉིད་ཐ་དད་པ་མེད་པའི་ཁྱད་པར་མེད་ཅིང་མཚུངས་པའི་རང་བཞིན་
གྱི་བདག་ཉིད་ཀྱི་ཤེས་པ་དེའི་ངེས་པར་བྱེད་པ་པོ་མ་ཡིན་པ་དེའི་ཕྱིར་བྱེད་པ་མ་ཡིན་ནོ། །གང་གི་ཕྱིར་ཤེས་པ་ཡུལ་ཐ་དད་པ་ལ་ངེས་པ་ཉིད་ཡིན་ན་ནི་ཕྱི་རོལ་གྱི་བྱེ་བྲག་ཀྱང་ཤེས་པར་གཏོགས་པའི་བྱེ་བྲག་གི་རྒྱུ་ཉིད་ཀྱིས་ཤེས་པར་གཏོགས་པའི་བྱེ་བྲག་ངེས་པའི་རྒྱུར་འགྱུར་བ་ཡིན་ན་དབང་པོ་ལ་སོགས་
པར་གཏོགས་པའི་ཐ་དད་པ་ནི་ཤེས་པ་བྱེ་བྲག་ཏུ་བྱེད་པ་མ་ཡིན་ཏེ། ཤེས་པའི་བྱེ་བྲག་དེ་ཉིད་བྱེད་པར་ཐལ་བའི་ཕྱིར་དང་། ཕྱི་རོལ་ནི་བརྟག་པར་བྱ་བ་ཡིན་པའི་ཕྱིར་ཏེ། བདག་ཉིད་ཐ་དད་པ་མེད་པ་ཞེས་གང་བརྗོད་པ་ཡིན་ནོ། །དེའི་ཕྱིར་ཤེས་པ་དང་ཤེས་བྱ་དག་མི་འབྲེལ་ལ། ཤེས་པ་དང་དོན་
མ་འབྲེལ་ན་ཡང་བྱེ་བྲག་འདི་གཞལ་བྱ་རྟོགས་པའི་སྒྲུབ་པར་བྱེད་པར་མི་འགྱུར་རོ། །གལ་ཏེ་བྱེད་པར་གྱུར་པའི་བྱེ་བྲག་ནི་རང་གི་ངོ་བོ་ཉིད་ཀྱིས་འདི་ལྟར་གྱུར་པ་ཡིན་ཏེ། གང་གིས་རྣམ་པར་ཤེས་པའི་བྱེ་བྲག་མ་བྱས་ཀྱང་ངེས་པར་བྱེད་པ་པོར་འགྱུར་བ་དེའི་ཕྱིར་དོན་ལ་སོ་སོར་ངེས་པ་ནི་ཤེས་པའི་བྱེ་བྲག་སྔོན་དུ་
འགྲོ་བ་ཅན་མ་ཡིན་ནོ་ཞེ་ན་དེ་ནི་དེ་ལྟར་མི་རིགས་ཏེ། གང་གི་ཕྱིར་གང་ཞིག་གི་མཐུས་རང་བཞིན་ཁྱད་པར་མེད་ཀྱང་རང་གི་ངོ་བོས་བྱ་བ་བྱེ་བྲག་ཏུ་འགྱུར་བ་རང་བཞིན་གྱིས་བྱེད་པ་ཞེས་བྱ་བར་གནས་པ་ནི་འགའ་ཡང་མེད་ཀྱི། འོན་ཀྱང་བྱེད་པའི་དེ་ཉིད་ནི་བྱེད་པ་ཉིད་དེ་བྱེ་བྲག་ཏུ་བྱེད་པ་པོ་ཉིད་ཅེས་བྱ་བའི་

དོན་ནོ། །བསྒྲུབ་པར་བྱ་བའི་རྒྱུ་མཚན་ནི་བྱེ་བྲག་གི་རྒྱུའོ། །རང་གི་བྱེ་བྲག་གིས་བྱ་བའི་བྱེ་བྲག་བྱེད་པ་ན་སྒྲུབ་པར་བྱེད་པ་འགའ་ཞིག་བྱེད་པར་འགྱུར་བ་ཡིན་གྱི། བྱ་བའི་བྱེ་བྲག་བྱེད་པ་མེད་པར་ནི་འགའ་ཡང་བྱེད་པ་ཞེས་བྱ་བ་མ་ཡིན་ནོ། །གང་གི་ཕྱིར་བྱེད་པའི་བྱེད་པ་ཉིད་ནི་བྱེ་བྲག་གི་རྒྱུ་ཉིད་ཡིན་པ་
དེས་ན་དེ་བྱ་བའི་རྒྱུ་ཡིན་པའི་ཕྱིར་དབང་པོ་ལ་སོགས་པ་རྣམས་ལ་བྱེ་བྲག་རྣམ་པར་གནས་ཀྱང་ཤེས་པའི་མཚན་ཉིད་ཀྱི་བྱ་བ་བྱེ་བྲག་ཏུ་མི་བྱེད་ན། ངེས་པར་བྱེད་པ་མ་ཡིན་པ་ནི་བྱེད་པ་མ་ཡིན་ནོ། །འདི་སྙམ་དུ་འོ་ན་ནི་འབྲེལ་པ་ཅན་ཉིད་ཀྱིས་ཤེས་པ་བྱེ་བྲག་ཏུ་བྱེད་པར་འགྱུར་གྱི་གང་ལས་རྣམ་
པ་དང་བཅས་པར་ཐལ་བར་འགྱུར་བ་རང་བཞིན་གྱི་ཁྱད་པར་འཇོག་པས་ནི་མ་ཡིན་ནོ། །འབྲེལ་པ་པ་ཡང་བྱེ་བྲག་ཏུ་བྱེད་པ་པོ་ཡིན་པ་དེས་ན་ངེས་པར་བྱེད་པར་འགྱུར་རོ་སྙམ་ན། བཤད་པ། བྱེད་པར་འདོད་པའི་བྱེ་བྲག་དེ་ཁྱད་པར་མེད་ན། རང་ཉིད་ལ་བྱེ་བྲག་མེད་ན་བྱ་བ་དེའི་ཁྱད་པར་ཡང་མི་
འགྲུབ་བོ། །དེས་ན་དེ་ངེས་པར་བྱེད་པ་མ་ཡིན་ནོ། །གང་གི་ཕྱིར་དབང་པོ་ལ་གནས་པའི་ཁྱད་པར་འབྲེལ་པ་ཅན་གྱིས་ཀྱང་རང་བཞིན་བྱེ་བྲག་མེད་པའི་བྱ་བ་ཡང་ཁྱད་པར་དུ་བྱས་པ་ཡིན་ལ། བྱེད་པར་འདོད་པའི་ཁྱད་པར་འབྲེལ་པ་ཅན་དེ་ཡང་དོན་རྣམས་ལ་ཐུན་མོང་དུ་ཁྱད་པར་མེད་པའི་ཕྱིར་འབྲེལ་པ་
ཅན་དེས་བྱ་བ་ཁྱད་པར་དུ་བྱེད་པར་ག་ལ་འགྱུར། འདི་སྙམ་དུ་དོན་ལ་གནས་པའི་རྣམ་པའི་ཁྱད་པར་ནི་འབྲེལ་པ་ཅན་ཡིན་ལ། འབྲེལ་པ་ཅན་དེས་ནི་ཤེས་པའི་དོན་སོ་སོ་ལ་ངེས་པ་རྣམ་པར་འཇོག་པའི་ཕྱིར་ངེས་པར་བྱེད་པ་ཡིན་ཏེ། དོན་ལ་གནས་པའི་རྣམ་པ་ནི་ཐུན་མོང་མ་ཡིན་ནོ་སྙམ་ན། དོན་
ལ་གནས་པའི་སྔོན་པོ་ལ་སོགས་པའི་རྣམ་པའི་ཁྱད་པར་ཡོད་ཀྱང་བྱ་བའི་ཁྱད་པར་དེའི་ཡན་ལག་མ་ཡིན་པས་བྱེད་པ་མ་ཡིན་པའི་ཕྱིར་རོ། །འདི་སྐད་བརྗོད་པ་ཡིན་ཏེ། གལ་ཏེ་དོན་ལ་གནས་པའི་མཚན་ཉིད་ཀྱི་རྣམ་པའི་བྱེ་བྲག་དོན་སོ་སོ་ལ་ཐ་དད་པ་ཡིན་པ་དེ་ལྟ་ན་ཡང་། འདི་ཤེས་པའི་ཁྱད་པར་
རྣམ་པར་འཇོག་པའི་ཡན་ལག་ནི་མ་ཡིན་ཏེ། གང་གི་ཕྱིར་དེ་ནི་ཉམས་སུ་མ་མྱོང་བ་ཁོ་ན་ཡིན་ལ། རྟོགས་པ་ཉམས་སུ་མྱོང་བ་ན་ཡང་མ་ཤེས་པ་དེ་དང་འབྲེལ་པ་ཉིད་དུ་ཤེས་པར་ནུས་པ་མ་ཡིན་པས་ན་དེ་དང་འབྲེལ་པ་ཉིད་ཀྱིས་ཁྱད་པར་དུ་རྣམ་པར་གཞག་པ་ལྟ་ཅི་སྨོས། འདི་ལྟར་འདི་སྔོན་པོ་དང་

འབྲལ་ལམ་འོན་ཏེ་གཞན་དང་འབྲེལ་པ་ཞེས་རང་བཞིན་ཁྱད་པར་མེད་པའི་ཕྱིར་རྣམ་པར་ཤེས་པ་ལ་ཐེ་ཚོམ་ཟ་བས་ཇི་ལྟར་ན་ཐེ་ཚོམ་ཟ་བའི་རང་བཞིན་གྱི་སྔོན་པོ་དང་འབྲེལ་པ་ཅན་དེས་ཐེ་ཚོམ་ཟ་བའི་རང་བཞིན་དེ་ཉིད་ངེས་པར་བྱེད། གཞན་ལ་གནས་པའི་ཁྱད་པར་
ཡང་མ་ངེས་པ་ཁོ་ན་ཡིན་ནོ། །དེ་ངེས་པ་ནི་ཤེས་པ་ཁོ་ནས་བྱས་པ་ཡིན་ན་ཁྱད་པར་མ་ཤེས་པ་དེ་ཡང་ཇི་ལྟར་ཁྱད་པར་ཅན་འཛིན་པར་བྱེད་པར་འགྱུར་ཞིང་ཁྱད་པར་གང་གིས་དེ་ཁྱད་པར་ཅན་དུ་རྣམ་པར་གཞག །དེའི་ཕྱིར་ཇི་སྲིད་དུ་རྣམ་པར་ཤེས་པ་ལས་ཐ་དད་པའི་ཁྱད་པར་འབྲེལ་པ་ཅན་ཤེས་པའི་
བྱེ་བྲག་རྣམ་པར་གནས་པའི་རྒྱུ་བརྟགས་པ་དེ་ནི་རྣམ་པ་གཉིས་ཀྱིས་འབྲེལ་པ་མ་ཡིན་ཏེ། ཐུན་མོང་བའི་ཕྱིར་དང་ཐུན་མོང་མ་ཡིན་པ་ཉིད་ཀྱང་མ་ཤེས་པའི་ཕྱིར་རོ། །དེ་ཤེས་ན་ནི་དེ་དང་འབྲེལ་པའི་ཁྱད་པར་ཅན་ཡང་ཤེས་པར་འགྱུར་ན། ཤེས་པ་ལས་ཐ་དད་པ་དེ་ནི་རང་གི་ངོ་བོས་ཤེས་པར་བྱ་བ་
མ་ཡིན་ནོ། །ད་ལྟར་ནི་འཛིན་པར་བྱེད་པའི་ཤེས་པ་ཡང་འགའ་ཞིག་འཐད་པ་མ་ཡིན་ཏེ། དེ་ཉིད་དཔྱོད་པ་ཡིན་པའི་ཕྱིར་རོ། །དེའི་ཕྱིར་ཐ་དད་པའི་ཁྱད་པར་ཉམས་སུ་མ་མྱོང་བའི་ཕྱིར་མེད་པ་དང་འདྲ་བ་ནི་ཁྱད་པར་རྣམ་པར་གནས་པའི་ཡན་ལག་མ་ཡིན་ཞིང་། ཡན་ལག་མ་ཡིན་པའི་ཕྱིར་
ཡང་ངེས་པར་བྱེད་པ་མ་ཡིན་ལ། དེས་ན་བྱེད་པ་མ་ཡིན་ནོ། །དེ་ལྟར་ན་གང་གི་ཕྱིར་བདག་ཉིད་ཐ་དད་པ་མེད་པའི་ཤེས་པའི་རྒྱུར་གྱུར་པའི་བྱེ་བྲག་ངེས་པར་བྱེད་པ་མ་ཡིན་པ་དང་། རང་གི་ངོ་བོ་ཁྱད་པར་མེད་པ་དང་། ཁ་ཅིག་མ་ཤེས་པའི་ཕྱིར་འབྲེལ་པ་ཅན་ཉིད་ཀྱི་སྒོ་ནས་བྱེ་བྲག་ཏུ་བྱེད་པ་པོ་
ཉིད་མ་ཡིན་པའི་ཕྱིར་ན་གཞན་བྱེ་བྲག་ཏུ་བྱེད་པ་པོ་མ་ཡིན་པ་དེའི་ཕྱིར། ཤེས་པ་འདིའི་བདག་ཉིད་ཀྱི་བྱེ་བྲག་ནི་རང་བཞིན་གྱི་ཁྱད་པར་རོ། །གང་ལས་ཏེ་བདག་ཉིད་ཀྱི་ཁྱད་པར་གང་གི་ཕྱིར་ཡུལ་ཞེས་བྱ་བའི་ལས་མ་ངེས་པའོ། །ངེས་པ་ཅི་འདྲ་བ་ཞིག་ཅེ་ན། བཤད་པ། སྔོན་པོ་
འདིའི་རྟོག་པ་ནི་འདི་ཡིན་ནོ་ཞེས་འདི་འདྲ་བའི་དོན་གཞན་རྣམ་པར་བཅད་ནས་རྟོགས་པ་འདིའི་དོན་གཅིག་ལ་ངེས་པ་སྟེ། ངེས་པ་འདི་ཉིད་ནི་དོན་དང་འབྲེལ་པར་བརྗོད་པ་ཡིན་ནོ། །དེ་ནི་ཞེས་བྱ་བ་ནི་བདག་ཉིད་ཀྱི་བྱེ་བྲག་གང་ལས་འགྱུར་བའི་བདག་ཉིད་ཀྱི་བྱེ་བྲག་དེ་ནི་སྒྲུབ་པར་བྱེད་པ་ཡིན་

ནོ། །དེ་ནི་ཞེས་བྱ་བ་ནི་སྒྲུབ་པར་བྱེད་པའི་སྒྲ་དང་གཞི་མཐུན་པའི་ཕྱིར་མ་ནིང་ངོ་། །འདི་སྙམ་དུ་བདག་ཉིད་ཀྱི་བྱེ་བྲག་ཁོ་ན་ལས་དོན་དང་འབྲེལ་པ་ཡིན་དུ་ཆུག་ཀྱང་། དོན་དང་འདྲ་བས་བྱས་པ་ཡིན་ནོ་ཞེས་བྱ་བ་འདི་ག་ལས་ཤེ་ན། ཤེས་པའི་ཞེས་གསུངས་ཏེ། གལ་ཏེ་འདྲ་བ་ལས་གཞན་ལས་
ཀྱང་སྲིད་ན་ནི་འདྲ་བས་བྱས་པར་གཟུང་བར་མི་བྱ་བ་ཞིག་ན་ཤེས་པའི་དོན་དང་འབྲེལ་པ་འདི་ལྟ་བུ་ནི་དོན་དང་འདྲ་བ་ལས་གཞན་ལས་ནི་སྲིད་པ་མ་ཡིན་ནོ། །ཤེས་པ་ལས་ཐ་དད་པའི་དབང་པོ་ལ་སོགས་པ་ལ་གནས་པའི་བྱེ་བྲག་ནི་མི་ཤེས་པའི་ཕྱིར་འབྲེལ་པར་བྱེད་པར་མི་འགྱུར་གྱི། དབང་པོ་ལ་སོགས་
པས་བྱས་པ་ཤེས་པ་ལ་གནས་པའི་བྱེ་བྲག་ནི་རྣམ་པར་ཤེས་པའི་སྤྱིར་འབྲེལ་པར་བྱེད་པ་པོར་འགྱུར་བར་དེའི་ཕྱིར་གཞན་ལས་ནི་སྲིད་པ་ནི་མ་ཡིན་ནོ་ཞེས་ཅིའི་ཕྱིར་བརྗོད་ཅེ་ན། དབང་པོ་ལ་སོགས་པ་ཞེས་སྨོས་སོ། །དབང་པོ་དེ་གསལ་བ་དང་མི་གསལ་བ་དེའི་དངོས་པོ་ནི་གསལ་བ་དང་མི་གསལ་བ་ཉིད་
དོ། །དེ་ལ་སོགས་པ་གང་དག་ཡིན་པ་སྟེ། སོགས་པ་སྨོས་པས་ནི་གོམས་པ་བོགས་པ་དང་། མ་བོགས་པ་དང་ཡུལ་ཉེ་བ་དང་མི་ཉེ་བ་ལ་སོགས་པ་གཟུང་ངོ་། །འདི་དག་གི་རང་གི་བྱེ་བྲག་གིས་དབང་པོའི་རྣམ་པར་ཤེས་པ་ལ་སོགས་པ་བྱེ་བྲག་ཏུ་འགྱུར་ཏེ། ཟས་ཟོས་པ་དང་མ་ཟོས་པ་ལ་སོགས་པས་
གནོད་པར་བྱས་པས་མི་གསལ་བ་དང་། ཕན་བཏགས་པས་གསལ་བར་གྱུར་པའི་དབང་པོས་ནི་རྣམ་པར་ཤེས་པ་གསལ་བ་དང་མི་གསལ་བ་འཛིན་པར་བྱེད་པ་དང་། སྔོན་གོམས་པས་འདུས་བྱས་པའི་ཡིད་ལ་བྱེད་པ་ཡང་འདོད་པ་དང་མི་འདོད་པའི་ཤེས་པའི་རྒྱུར་འགྱུར་ཏེ། འདི་ཡང་སྐབས་ཇི་ལྟ་བ་
བཞིན་དུ་སྒྲུབ་པར་འགྱུར་རོ། །ཡུལ་ཉེ་ན་གསལ་ལ་ཉེ་བ་མ་ཡིན་ན་མི་གསལ་བ་ཞེས་བྱ་བ་ལ་སོགས་པའི་རྗེས་སུ་འབྲངས་ནས་རྟོགས་པར་བྱ་བའོ། །དེ་ལྟར་དབང་པོ་དང་ཡིད་ལ་བྱེད་པ་དང་ཡུལ་གྱི་བྱེ་བྲག་རྣམས་རང་གི་བྱེ་བྲག་གིས་བྱེ་བྲག་ཏུ་གྱུར་པ་ན་དེ་ལྟར་ཤེས་པ་དགའ་བ་ལ་སོགས་པའི་བྱེ་བྲག་
རྣམས་དང་སྦྱོར་བར་བྱེད་པ་ཡིན་ཡང་དོན་དང་སྦྱོར་བར་བྱེད་པ་ནི་མ་ཡིན་ནོ། །ཅིའི་ཕྱིར་ཞེ་ན། དེ་ལས་ཞེས་སྨོས་ཏེ། དབང་པོ་ལ་སོགས་པ་བྱེ་བྲག་ཏུ་བྱེད་པར་གྱུར་པ་ལ་ཉེ་བ་སྟེ། འབྲེལ་པའི་རྒྱུ་གང་ཡིན་པ་དེ་མེད་པའི་ཕྱིར་རོ། །དབང་པོ་ལ་སོགས་པའི་བྱེ་བྲག་ཏུ་བྱེད་པའི་དངོས་པོས་འབྲེལ་པའི་

རྒྱུ་མེད་པ་མཚོན་པར་བྱས་པའོ། །དབང་པོ་ལ་སོགས་པའི་བྱེ་བྲག་ལ་ནི་ཤེས་པ་དང་ཉེ་བའི་རྒྱུ་ཡོད་པ་མ་ཡིན་ཏེ། འདི་ལྟར་ཉམས་སུ་མྱོང་བ་ཞེས་བྱ་བ་དབང་པོས་བྱས་པའི་ཤེས་པའི་བྱེ་བྲག་ཡོད་ཀྱང་དོན་ཐམས་ཅད་ལ་ཐུན་མོང་བ་ཡིན་པ་ཉིད་ཀྱིས་ངེས་པ་མ་ཡིན་པའི་དང་ཉེ་
བའི་རྒྱུ་མ་ཡིན་ནོ། །ཇི་ལྟར་དབང་པོས་བྱས་པའི་གསལ་བ་ནི་སྔོན་པོ་ལ་ཇི་ལྟ་བར་སེར་པོ་ལ་ཡང་དེ་བཞིན་ནོ་ཞེས་བྱ་བ་ལ་སོགས་པ་ཐུན་མོང་བར་སྦྱར་བར་བྱའོ། །དོན་གྱིས་བྱས་པའི་བྱེ་བྲག་དོན་དང་འདྲ་བ་ཞེས་གྲགས་པ་ཉིད་ནི་ཉེ་བའི་རྒྱུ་ཡིན་ཏེ། དོན་སོ་སོ་ལ་ཐ་དད་པའི་ཕྱིར་རོ། །དེས་ན་
དབང་པོ་ལ་སོགས་པ་ཞེས་སྨོས་པས་ཡུལ་མ་བཟུང་བ་ཡིན་ནོ། །གང་གི་ཕྱིར་ཡུལ་ཐ་དད་པར་བྱེད་པ་ཡིན་ན་ནི་ཤེས་པ་ལ་ཡུལ་གྱིས་བསྐྱེད་པའི་འདྲ་བ་ཉིད་ཉེ་བའི་རྒྱུར་འགྱུར་རོ། །གལ་ཏེ་དབང་པོ་ལ་སོགས་པས་བྱས་པའི་བྱེ་བྲག་བྱེ་བྲག་ཏུ་བྱེད་པ་པོ་མ་ཡིན་པ་དེ་ལྟ་ན། འོ་ན་ནི་དོན་གྱིས་བྱས་པའི་
ཉམས་སུ་མྱོང་བའི་བྱེ་བྲག་སྟེ། ཉམས་སུ་མྱོང་བའི་ཁྱད་པར་གང་ལས་དོན་ངེས་པར་རྟོགས་པའི་རྟོགས་པར་འགྱུར་བ་ཡིན་གྱི་དོན་དང་འདྲ་བ་ལས་ནི་མ་ཡིན་ནོ་ཞེ་ན། དེ་ལྟར་འདོད་ན་ད་ནི་སྟེ་དེ་ལྟར་ཁས་བླངས་པ་ན་ཡོད་པ་དོན་བྱེད་པའི་རང་བཞིན་གྱི་ཁྱད་པར་དོན་དང་འདྲ་བ་མི་བཟོད་པས་ཁས་བླངས་པ་
དེའི་རང་བཞིན་ཏེ་དེ་ཁོ་ན་ཇི་ལྟར་མི་བརྗོད། ཡོད་པར་ཐ་སྙད་དུ་བྱ་བའི་ཡུལ་ནི་ཚད་མས་རྟོགས་པའི་རང་བཞིན་ཡིན་ལ། ཚད་མས་རྟོགས་པ་ཡང་ངེས་པ་ལ་གནས་པའི་དོན་བསྟན་པར་ནུས་པ་ཁོ་ན་ཡིན་ཏེ། རྣམ་པར་རྟོག་པ་ལ་གནས་པ་ནི་སྒྲའི་དོན་ཡིན་པའི་ཕྱིར་རོ། །ཅིག་ཤོས་ཀྱིས་ཀྱང་ཉམས་
སུ་མྱོང་བ་ཐམས་ཅད་འདིའོ་ཞེས་བྱ་བར་བསྟན་པར་ནུས་པ་མ་ཡིན་ཏེ། དཔེར་ན་ནོར་བུ་དང་ལྕགས་ལ་སོགས་པའི་གཟུགས་རྣམས་མི་མཁས་པས་མཐོང་དུ་ཟིན་ཀྱང་ཁྱད་པར་བརྗོད་པར་མི་ནུས་པ་བཞིན་ནོ། །ཚད་མས་ཡུལ་དུ་བྱས་པ་ཐམས་ཅད་ཀྱང་འདིའོ་ཞེས་བསྟན་པར་ནུས་པ་མ་ཡིན་ཏེ། དཔེར་ན་རྗེས་
སུ་དཔག་པའི་མིག་བཞིན་ནོ། །དེའི་ཕྱིར་བརྒལ་བ་འདི་ཅི་ཞིག་ཡིན་ཞེས་སྨྲས་པ་ནི། དེ་ནི་ཞེས་བྱ་བ་དོན་གྱིས་བྱས་པའི་ཁྱད་པར་གྱི་རང་བཞིན་ནོ། །འདིའི་དངོས་པོ་ནི་འདི་ཉིད་དེ་མངོན་སུམ་ཉིད་དོ། །དེ་བྱེད་པར་གྱུར་པས་མངོན་སུམ་ཉིད་དུ་རྭ་ནས་བཟུང་ནས་བསྟན་པར་མི་ནུས་ཀྱི། དོན་ངེས་པར་

རྟོགས་པའི་རྟོགས་པ་མཐོང་བའི་ཕྱིར། དེའི་རྒྱུ་མཚན་དུ་གྱུར་པ་དོན་གྱིས་བྱས་པའི་ཉམས་སུ་མྱོང་བའི་ཁྱད་པར་ཡོད་དོ་ཞེས་ནི་སྨྲ་བར་ནུས་པ་ཡིན་ནོ་ཞེ་ན། ཅིག་ཤོས་ཀྱིས་སྨྲས་པ། རིགས་པ་སྨྲ་བ་འདི་རྟོགས་པ་མེད་པ་མཚོན་པ་མེད་པ་འདིའོ་ཞེས་ངེས་པ་མེད་པས་དངོས་པོ་སྟེ་ཤེས་པའི་རང་བཞིན་
རྣམ་པར་འཇོག་པར་བྱེད་པ་སྟེ། ངེས་པའི་རང་བཞིན་དུ་རྟོགས་པར་བྱེད་པའོ་ཞེས་བྱ་བའི་དོན་ནི་གཞན་གྱི་འདི་ནི་མི་སྲིད་དོ་ཞེས་བྱ་བའོ། །ཇི་ལྟར་རྣམ་པར་འཇོག་ཅེ་ན། བཤད་པ་མྱོང་བའི་རང་བཞིན་འདི་ནི་སྔོན་པོ་འདི་ཡིན་གྱི་གཞན་སེར་པོའི་ནི་མ་ཡིན་ནོ་ཞེས་བྱ་བར་ཏེ། དེའི་ཕྱིར་ལེགས་པར་རྣམ་པར་
གཞག་པ་ཡིན་ནོ། །འདི་ནི་བསྟིང་ཚིག་སྟེ་གཞན་གྱིས་བཞག་པ་འགོག་པའོ། །འདིའོ་ཞེས་བྱ་བར་ངེས་པར་རྟོགས་པ་མེད་ཀྱི་མིག་ལ་སོགས་པའི་རང་བཞིན་གྱི་བྱེ་བྲག་རྣམ་པར་འཇོག་པ་མ་ཡིན་ནམ་ཞེ་ན། བདེན་ཏེ། དེ་ལས་ནི་ངེས་པར་རྟོགས་པའི་རང་བཞིན་མིག་གི་རྣམ་པར་ཤེས་པ་ཞེས་བྱ་བ་
འབྲས་བུ་རྣམ་པར་འཇོག་པ་ཡོད་པས་འདི་དབང་གིས་མིག་ལ་སོགས་པ་ངེས་པར་རྟོགས་པ་མེད་པའི་རང་བཞིན་ཡང་རྣམ་པར་གཞག་པ་ཡིན་ན། རྣམ་པར་ཤེས་པ་ནི་ངེས་པར་རྟོགས་པའི་རང་བཞིན་གཞན་གྱིས་རྣམ་པར་གཞག་པ་མ་ཡིན་གྱི། འོན་ཀྱང་བདག་ཉིད་ཁོ་ནས་ཡིན་ནོ། །དེའི་ཕྱིར་དེ་ངེས་
པར་མ་རྟོགས་ན་ནི་རྟོགས་པ་ངེས་པར་རྣམ་པར་གཞག་པ་ཡོད་པ་མ་ཡིན་ནོ། །ནོར་བུ་དང་དངུལ་ལ་སོགས་པ་བྱེ་བྲག་ཏུ་རྣམ་པར་གཞག་པའི་རྒྱུ་ངེས་པར་མ་ཟིན་པ་གང་ཡིན་པ་དེ་དག་ཀྱང་བྱེ་བྲག་མེད་པའི་ཐ་སྙད་དུ་བྱའོ། །འདི་སྐད་དུ་འབྲས་བུ་བྱེ་བྲག་ཏུ་རྟོགས་པ་མཐོང་བའི་ཕྱིར་བྱེ་བྲག་ཏུ་རྣམ་པར་
འཇོག་གོ་ཞེས་ནི་བརྗོད་པར་མི་ནུས་ཏེ། སྔོན་པོ་ལ་སོགས་པའི་དོན་གྱིས་བྱས་པའི་མྱོང་བའི་བྱེ་བྲག་ངེས་པ་ཡིན་ན་ནི་སྔོན་པོ་རྟོགས་པའི་ངེས་པར་ཡོངས་སུ་བཅད་པར་འགྱུར་བ་ཡིན་ཏེ། དོན་ངེས་པར་རྟོགས་པར་ཡོངས་སུ་གཅོད་པ་ནི་དོན་གྱིས་བྱས་པའི་ཁྱད་པར་ཡོངས་སུ་གཅོད་པ་ཉིད་ཡིན་གྱི་གཞན་ནི་མ་ཡིན་
པའི་ཕྱིར་རོ། །གང་གི་རང་བཞིན་ངེས་པ་ཉིད་ཤེས་པའི་ལས་ལ་ངེས་པར་འགྱུར་བ་ན་དེ་མ་ངེས་ན་དེའི་བདག་ཉིད་ལས་ལ་ངེས་པའི་རྟོགས་པ་ཇི་ལྟར་འགྱུར། དེའི་ཕྱིར་བྱེ་བྲག་གི་རྟོགས་པ་མཐོང་བའི་ཕྱིར་བྱེ་བྲག་རྣམ་པར་འཇོག་གོ་ཞེས་གང་སྨྲས་པ་དེ་ལ་དོན་འདིར་འགྱུར་ཏེ། བྱེ་བྲག་རྟོགས་པའི་

ཕྱིར་བྱེ་བྲག་རྟོགས་སོ་ཞེས་བྱ་བ་ཡིན་ན་དེ་ལྟར་ནི་རིགས་པ་མ་ཡིན་ནོ། །དེ་ཉིད་ཀྱི་ཕྱིར་བདག་ཉིད་ངེས་པར་རྟོགས་པ་མེད་པ་ཞེས་གསུངས་ཏེ། གང་གི་བདག་ཉིད་དུ་དངོས་པོ་ངེས་པར་རྟོགས་པར་བྱ་བ་དེ་ཉིད་ངེས་པར་རྟོགས་པ་མེད་པ་ཞེས་བྱ་བར་ཇི་ལྟར་འགྱུར། དེ་ངེས་
པར་མ་རྟོགས་ན་ཡང་དངོས་པོ་དེའི་རང་བཞིན་ཅི་འདྲ་བ་ཞིག་ཏུ་རྣམ་པར་འཇོག །རང་བཞིན་གང་ཞིག་མ་རྟོགས་ན་ནི་དངོས་པོ་དེའི་རང་བཞིན་དུ་རྟོགས་པར་མི་འགྱུར་ཏེ། དཔེར་ན་སྐད་ཅིག་མ་ཉིད་ངེས་པར་མ་རྟོགས་པར་སྔོན་པོ་ལ་སོགས་པ་དེའི་རང་བཞིན་དུ་ངེས་པར་མི་རྟོགས་པ་བཞིན་ནོ། །ཤེས་
པའི་དོན་གྱིས་བྱས་པའི་བྱེ་བྲག་ཀྱང་ངེས་པར་རྟོགས་པ་མ་ཡིན་ཏེ། དེས་ན་ཤེས་པ་དེའི་རང་བཞིན་དུ་ངེས་པར་རྟོགས་པར་མི་འགྱུར་བའི་ཕྱིར། དོན་ངེས་པར་རྟོགས་པའི་རྟོག་པར་མི་འགྱུར་རོ། །དངོས་པོ་དེའི་རང་བཞིན་དུ་རྟོགས་པ་ནི་རང་བཞིན་རྟོགས་པའི་སྔོན་དུ་འགྲོ་བ་ཅན་ཡིན་ཏེ། འདི་ལྟར་
འགའ་ཞིག་ལ་ལྟོས་པས་རང་བཞིན་འགའ་ཞིག་བརྟགས་པ་ཡིན་ལ། དངོས་པོ་ཡང་ལྡོག་པ་གཞན་ལས་བརྟགས་པ་ཡིན་ནོ། །དེ་ལ་ལྡོག་པ་གཞན་དང་ལྡན་པའི་ལྡོག་པ་གཞན་གྱི་རྟོགས་པ་ཁྱད་པར་དུ་གྱུར་པའི་རང་བཞིན་རྟོགས་པའི་ཕྱོགས་གཅིག་ཏུ་གྱུར་པ་གང་ཡིན་པ་འདི་ལ་ནི་དེའི་རྟོགས་
པས་ཁྱབ་པ་ཡིན་ཏེ། དཔེར་ན་དབྱིག་པ་རྟོག་པའི་ཕྱོགས་གཅིག་ཏུ་གྱུར་པ་དབྱིག་པ་ཅན་རྟོགས་པ་ནི་དབྱིག་པ་རྟོགས་པས་ཁྱབ་པ་ཡིན་པ་བཞིན་ཡིན་པས་ན་ཁྱབ་པར་བྱེད་པ་མི་དམིགས་པའོ། །འདྲ་བ་ཡང་རྟོགས་པ་མེད་པ་མ་ཡིན་ནམ། གཟུང་བའི་རྣམ་པ་ཉམས་སུ་མྱོང་བའི་ཕྱིར་མ་རྟོགས་
པས་སོ་ཞེས་ཅིའི་ཕྱིར་བརྗོད་ཅེ་ན། བདེན་ཏེ། ཉམས་སུ་མྱོང་ཡང་འདྲ་བའི་བདག་ཉིད་དུ་ནི་མ་ཡིན་ཏེ། གང་གི་ཕྱིར་ཉམས་སུ་མྱོང་བ་ནི་རྟོགས་ཀྱིས་འདི་ནི་འདྲ་བའོ་ཞེས་ཞེན་པ་མེད་ཀྱི་འོན་ཀྱང་དོན་ཡིན་ནོ་ཞེས་སོ། །དེ་ལྟ་ན་འོ་ན་ནི་རྗེས་སུ་དཔག་པས་འདྲ་བའི་བདག་ཉིད་དུ་ངེས་པར་བྱེད་དེ། རང་
བཞིན་ནི་གསལ་བ་ཉིད་དུ་མངོན་སུམ་དུ་གྱུར་པས་མ་རྟོགས་པ་མ་ཡིན་པ་དེའི་ཕྱིར་དེ་ནི་སྒྲུབ་པར་བྱེད་པར་འཐད་པ་ཡིན་ནོ། །གང་གི་ཕྱིར་འདྲ་བ་ལས་གཞན་དོན་དང་འབྲེལ་པར་བྱེད་པ་མ་ཡིན་པ་དེའི་ཕྱིར་གཞལ་བྱ་རྟོགས་པ་སྟེ། གཞལ་བྱ་རྟོགས་པར་རྣམ་པར་གཞལ་བའི་སྒྲུབ་བྱེད་དེ་བྱེད་པ་ནི་གཞལ་

བྱའི་རང་བཞིན་ལྟ་བུ་གང་ཡིན་པ་དེའི་དངོས་པོ་ནི་གཞལ་བྱའི་རང་བཞིན་ཉིད་དེ། རྣམ་པར་ཤེས་པའི་གཞལ་བྱ་དང་འདྲ་བ་ཉིད་དོ། །སྒྲུབ་བྱེད་འདྲ་བ་ལས་གཞན་ཤེས་པ་ལས་ཕྱི་རོལ་དུ་གྱུར་པའམ། རང་བཞིན་དུ་གྱུར་ཀྱང་དབང་པོ་ལ་སོགས་པས་བྱས་པ་ཡིན་ན་ནི་ཤེས་པ་དེའི་ལས་དང་
འབྲེལ་པ་ངེས་པ་འདི་ནི་སྔོན་པོ་མྱོང་བ་ཡིན་གྱི་སེར་པོ་ནི་མ་ཡིན་ནོ་ཞེས་བྱ་བ་དེ་ལྟ་བུར་གྱུར་པ་མི་འགྲུབ་སྟེ། རྟོགས་པ་མ་ཡིན་ནོ། །གལ་ཏེ་སྒྲུབ་པར་བྱེད་པ་དོན་དང་འདྲ་བ་དེ་ཉིད་ཀྱང་འབྲས་བུ་ལས་གཞན་དུ་འགྱུར་རོ་ཞེ་ན། བཤད་པ་གཞལ་བྱའི་རང་བཞིན་དེ་ཡང་ཤེས་པ་དེའི་བདག་ཉིད་དུ་གྱུར་
པ་ཡིན་ནོ། །གང་གི་ཕྱིར་བདག་ཉིད་ཡིན་པ་དེས་ན་འབྲས་བུ་ཚད་མ་ལས་གཞན་ཐ་དད་པ་མ་ཡིན་ནོ། །བྱེད་པ་ཐམས་ཅད་ནི་བྱེད་པ་པོའི་གཞན་གྱི་དབང་དང་རང་གི་བྱ་བ་དང་ལྡན་པ་དང་། གཙོར་གྱུར་པའི་བསྒྲུབ་པར་བྱ་བ་ལ་ཉེ་བར་སྦྱོར་བར་མཐོང་སྟེ། དཔེར་ན་ཤིང་སྐྱེས་བུས་བྱིན་གྱིས་བརླབས་
ཤིང་འབར་བའི་བྱ་བ་དང་ལྡན་པ་ཚོས་པའི་བསྒྲུབ་པར་བྱ་བ་ལ་ཉེ་བར་སྦྱོར་བ་མཐོང་བ་བཞིན་ནོ། །འདྲ་བ་ནི་བྱེད་པ་པོའི་གཞན་གྱི་དབང་དང་བྱ་བ་དང་ལྡན་པ་དང་། གཙོར་གྱུར་པའི་བསྒྲུབ་པར་བྱ་བ་ལ་ཉེ་བར་སྦྱོར་བར་མ་མཐོང་ཞིང་། བྱེད་པ་པོ་འགའ་ཞིག་ཀྱང་མཐོང་བ་མེད་པས་དེ་ཇི་ལྟར་ན་
དོན་དང་འདྲ་བར་བྱེད་པར་འགྱུར་ཞེ་ན། སྨྲས་པ། ཅུང་ཟད་ཀྱང་ཕོངས་པས་བྱེད་པས་རྟོག་པ་ནི་མ་ཡིན་གྱི་འོན་ཀྱང་འདི་ནི་དངོས་པོ་ལ་གནས་པ་ཡིན་ཏེ། བྱེད་པ་འགའ་ཞིག་ལ་མ་བརྟེན་པར་ནི་བསྒྲུབ་པར་བྱ་བ་སྒྲུབ་པར་མི་བྱེད་པའི་ཕྱིར་རོ། །འདི་ཙམ་ཞིག་ནི་ཁྱད་པར་ཡིན་ཏེ། བྱེད་པ་འགའ་ཞིག་ནི་
རང་ལས་ངེས་པ་ཡིན་ཏེ། དཔེར་ན་གཅོད་པ་ལ་སྟེའུ་བཞིན་ནོ། །གཞན་ལ་ནི་བསྒྲུབ་པར་བྱ་བ་དང་ལྡན་པའི་བྱེད་པ་པོ་མཐོང་བ་ལས་བྱེད་པ་པོ་རྣམ་པར་འཇོག་པ་ཡིན་ནོ། །བྱེད་པ་མེད་པར་ནི་བསྒྲུབ་པར་བྱ་བ་འགྲུབ་པ་མི་འཐད་པའི་ཕྱིར་རོ། །འདིར་དོན་དམ་པར་ནི་བྱེད་པ་པོ་འགའ་ཡང་ཡོད་པ་མ་
ཡིན་གྱི་འོན་ཀྱང་ཐ་སྙད་པ་ཁོ་ནའོ། །བྱེད་པ་ཡང་ཐ་སྙད་ཀྱི་རྒྱུ་མཚན་ཡིན་གྱི་འདིར་སྐྱེད་པ་པོར་འདོད་པ་ལ་ནི་མ་ཡིན་ནོ། །དེ་ལ་ཤེས་པའི་འཛིན་པའི་རྣམ་པ་གཟུང་བའི་རྣམ་པ་ལས་ཐ་དད་པར་བདག་ཏུ་འཛིན་པའི་གཞིར་གྱུར་པ་དགའ་བ་ལ་སོགས་པའི་རང་བཞིན་གྱིས་འཛིན་པ་ལ་ནི་ངས་མཐོང་ངོ་ཞེས་

བྱེད་པ་པོར་ཞེན་པ་ཡིན་ཞིང་། དེ་ཡང་དོན་རྟོགས་པའི་རང་བཞིན་དུ་ཞེན་པ་ན་བསྒྲུབ་པར་བྱ་བའི་རང་བཞིན་དུ་ཞེན་པར་འགྱུར་བ་ཡིན་ནོ། །དེས་ན་བསྒྲུབ་པར་བྱ་བ་དང་ལྡན་པའི་བྱེད་པ་པོ་དེའི་བསྒྲུབ་པར་བྱ་བའི་བྱེ་བྲག་འདིའི་རྒྱུ་བྱེད་པ་འགའ་ཞིག་ཏུ་འགྱུར་དགོས་ལ་དེ་ཡང་
ཐ་སྙད་པར་བརྟག་པའི་ནི་མི་འཐད་དོ། །གང་གི་ཕྱིར་ཁྱད་པར་དང་ལྡན་པ་མ་ཡིན་རང་བཞིན་གྱི་ཉམས་སུ་མྱོང་བ་ན་ཁྱད་པར་ཅན་གྱི་དོན་རྟོགས་པར་རྣམ་པར་གཞག་པ་ནི་རིགས་པ་དང་ལྡན་པ་མ་ཡིན་པ་དེའི་ཕྱིར་རྣམ་པར་འཇོག་པའི་རྒྱུ་ཤེས་པའི་རང་བཞིན་གྱི་བྱེ་བྲག་ཉམས་སུ་མྱོང་བར་གྱུར་པ་ནི་
བྱེད་པར་འགྱུར་དགོས་སོ། །འདིར་བྱེད་པ་དེ་ཤེས་པ་ལས་ཐ་དད་པ་མེད་པ་ཉིད་ནི་བྱེད་པ་པོའི་དབང་དུ་གྱུར་པ་ཉིད་ཡིན་ལ། ཉམས་སུ་མྱོང་བར་གྱུར་པ་ཉིད་ཀྱང་བྱ་བ་དང་ལྡན་པ་ཞེས་བྱ་བ་ཡིན་གྱི་གཞན་ནི་མ་ཡིན་ནོ། །གང་ཞིག་བྱེད་པར་འགྱུར་བ་འཛིན་པའི་རྣམ་པའི་ཁྱད་པར་ཅན་གྱི་
རང་བཞིན་ནི་ཉམས་སུ་མྱོང་བ་མེད་པ་དེས་ན། གལ་ཏེ་གཟུང་བའི་རྣམ་པ་ངར་འཛིན་པས་ལས་ཕྱི་རོལ་དང་བདེ་བའི་རྣམ་པ་དང་བྲལ་བ་མི་ཤེས་པའི་བདག་ཉིད་དུ་ཞེན་པ་དེ་ལྟ་ན་ཡང་གཞན་དུ་མི་འཐད་པས་ན་རྗེས་སུ་དཔག་པ་ལས་ཤེས་པའི་ངོ་བོ་དེ་དང་འདྲ་བའི་རང་བཞིན་དུ་བཞག་པ་ཡིན་གྱི་
མངོན་སུམ་ལས་ནི་མ་ཡིན་ནོ། །གཟུང་བའི་རྣམ་པ་འདྲ་བའི་བདག་ཉིད་ཅན་ཤེས་པའི་རང་བཞིན་དུ་མངོན་སུམ་གྱིས་ནི་ངེས་པ་མ་ཡིན་གྱི། འོན་ཀྱང་དོན་གྱི་ཁྱད་པར་རྟོགས་པ་གཞན་དུ་མི་འཐད་པས་རྗེས་སུ་དཔག་པ་ཡིན་ནོ། །རིག་བཞིན་པའི་འདྲ་བ་དེ་ཡང་ཤེས་པ་ལས་ཐ་མི་དད་པ་
ཡིན་ན་ཤེས་པ་དོན་ངེས་པ་འཛིན་པར་འཇོག་པར་བྱེད་པ་ཡིན་ནོ། །དེའི་ཕྱིར་འདིར་རང་གི་ངོ་བོ་ཉིད་ཀྱིས་བྱེད་པ་ཉིད་དུ་ཤེས་པའི་བྱེད་པ་ནི་མེད་ཀྱི་འོན་ཀྱང་བྱེད་པ་པོའི་བྱ་བའི་ཁྱད་པར་ཅན་མཐོང་བ་ལས་རྗེས་སུ་དཔག་པ་ཡིན་ཞིང་དེ་ལས་ཀྱང་གཙོར་གྱུར་པའི་བསྒྲུབ་པར་བྱ་བ་ལ་འདིའི་བྱ་བ་རྗེས་སུ་དཔག་
པ་ཡིན་ནོ། །བྱེད་པ་པོའི་བདག་ཉིད་ཀྱང་ཤེས་པའི་བདག་ཉིད་ཀྱི་ཕྱིར་དང་། ཤེས་པའི་བདག་ཉིད་དུ་ཉམས་སུ་མྱོང་བའི་བྱ་བ་དང་ལྡན་པ་ཞེས་བྱ་བ་ཡང་རྗེས་སུ་དཔག་པར་བྱ་བ་ཡིན་ཏེ། མངོན་སུམ་གྱིས་ནི་གཟུང་བའི་རྣམ་པར་ཤེས་པའི་ངོ་བོར་ངེས་པ་མ་ཡིན་པའི་ཕྱིར་རོ། །བྱེ་བྲག་ཏུ་

རྣམ་པར་འཇོག་པའི་རྒྱུ་ནི་དེའི་བདག་ཉིད་དུ་ཉམས་སུ་མྱོང་བ་ཡིན་གྱི་གཞན་གྱི་རང་བཞིན་དུ་ནི་མ་ཡིན་པས་ན་དེ་ཅིའི་ཕྱིར་གང་གི་ཕྱིར་སྒྲུབ་པར་བྱེད་པ་ཉིད་དུ་མ་མཐོང་བ་འདི་ཇི་ལྟར་སྒྲུབ་པར་བྱེད་པ་ཡིན་ཞེས་བརྗོད། བྱེད་པ་པོའི་བྱ་བ་མཐོང་བའི་ཕྱིར་ན་འདི་ཉིད་གཙོར་གྱུར་པའི་བསྒྲུབ་པར་བྱ་བའི་
ཡན་ལག་ཏུ་རྗེས་སུ་དཔག་པ་ཡིན་ལ། བྱེད་པ་པོའི་རང་བཞིན་ཉིད་ཀྱང་བྱེད་པ་པོའི་གཞན་གྱི་དབང་དང་། དེའི་བདག་ཉིད་དུ་ཉམས་སུ་མྱོང་བ་ཡང་བྱ་བ་དང་ལྡན་པ་ཡིན་པར་བསྟན་པའི་ཕྱིར། དེ་ཡི་བདག་ཉིད་འཛིན་དེ་ནི། །ཞེས་སྨོས་ཏེ། དོན་དང་འདྲ་བ་ཉིད་འཛིན་པའི་ཤེས་པ་བྱེད་པ་པོར་གྱུར་པ་
དེའོ། །འདིས་ནི་བྱ་བ་དང་ལྡན་པ་དང་བྱེད་པ་པོའི་དབང་དུ་གྱུར་པ་བརྗོད་པ་ཡིན་ནོ། །ངེས་པའི་དོན་རྟོགས་པ་དེ་ཉིད་ཀྱི་བདག་ཉིད་ཀྱི་བྱ་བ་གང་ཡིན་པའི་བྱ་བ་དེས་བྱ་བ་དང་བཅས་པར་གཙོར་གྱུར་པའི་བསྒྲུབ་པར་བྱ་བ་དང་ལྡན་པར་སྣང་ངོ་། །དེའི་དོན་ནི་འདི་ཡིན་ཏེ། གང་གི་ཕྱིར་འདྲ་བའི་དབང་
གིས་བྱེད་པ་པོ་ཤེས་པའི་དོན་ངེས་པར་འཛིན་པ་བཞིན་དུ་སྣང་བ་དེའི་ཕྱིར། དེ་བྱེད་པ་པོར་ཤེས་པ་ཡིན་གྱི་མངོན་སུམ་གྱིས་ནི་མ་ཡིན་ནོ། །རང་གི་ལས་ཏེ་ཡུལ་ཞེས་བྱ་བའི་ལས་ལའོ། །དེ་ལྟ་བུའི་སྒྲ་སྦྱར་བ་ནི་ཆོས་ཐམས་ཅད་བྱེད་པ་མེད་པའི་ཕྱིར་རོ། །བསྒྲུབ་པར་བྱ་བ་དང་བྱེད་པ་དག་ཐ་དད་
པ་མེད་ན་འདྲ་བ་བྱེད་པ་ཉིད་ཇི་ལྟར་ཡིན་ཞེ་ན། དེའི་ཞེས་སྨོས་ཏེ་འདྲ་བའི་དབང་གིས་ཏེ་ཉམས་སུ་མྱོང་བས་སོ། །གང་གི་ཕྱིར་ཤེས་པ་ལ་གནས་པའི་འདྲ་བ་མྱོང་བ་དེའི་ཕྱིར་ཤེས་པ་དེ་སྔོན་པོའི་དོན་རྟོགས་པར་ངེས་པ་ཡིན་ན། དེའི་ཕྱིར་འདྲ་བའི་ནི་རྣམ་པར་འཇོག་པར་བྱེད་པ་ནི་བྱེད་པ་ཡིན་ནོ། །
ངེས་པའི་ཤེས་པས་རྣམ་པར་གཞག་པ་ན་ཡང་ཤེས་པ་དེ་ཉིད་འབྲས་བུ་ཡིན་པ་དེའི་ཕྱིར་རྟོགས་པའི་ཆ་ནི་འབྲས་བུ་ཡིན་ལ། འདྲ་བའི་ཆ་ནི་སྒྲུབ་པར་བྱེད་པ་ཡིན་ནོ། །སྔ་ན་མེད་པའི་དོན་བརྗོད་པའི་ཕྱིར་བར་སྐབས་བར་མ་དོར་འཕྲོས་པའི་ཚིགས་སུ་བཅད་པའོ། །འདིས་ནི་ཞེས་བྱ་བ་ནི་འབྲེལ་པའི་
རྒྱུ་མཚན་སྒྲུབ་པར་བྱེད་པ་གཞན་མེད་པར་བརྗོད་པས་སོ། །དབང་པོ་དང་ཕྲད་པ་དང་དོན་ལ་ལྟ་བ་དང་ཁྱད་པར་གྱི་ཤེས་པ་དེ་རྣམས་ཚད་མ་ཡིན་པ་སྤངས་པ་ཡིན་ནོ། །དེ་ལས་ཏེ་དབང་པོ་ལ་སོགས་པ་དེ་དག་ལས་ཤེས་པའི་སྔོན་པོ་དང་སེར་པོ་ལ་སོགས་པའི་ངེས་པའི་ལས་དང་འབྲེལ་པ་མྱོང་བ་

འདི་ནི་སྔོན་པོ་ཉིད་ཀྱི་ཡིན་ནོ་ཞེས་བྱ་བ་དེ་ལྟ་བུའི་རང་བཞིན་དེ་མི་འགྲུབ་སྟེ། རྣམ་པར་མི་གནས་པའི་ཕྱིར་རོ། །དེས་ན་གང་གི་ཕྱིར་དེ་དག་ལས་ངེས་པ་དང་འབྲེལ་པའི་རྒྱུ་མ་ཡིན་པ་དེའི་ཕྱིར་ཚད་མ་མ་ཡིན་ནོ། །དོན་འདིར་སྔར་དེའི་བདག་ཉིད་མ་ཡིན་པ་ཞེས་བྱ་བ་འདིའི་ནང་
དུ་བརྗོད་ཟིན་པ་མ་ཡིན་ནམ། ཡང་ཅིའི་ཕྱིར་འདིས་དབང་པོ་ལ་སོགས་པ་བརྗོད། སྨྲས་པ། སྔར་ནི་དབང་པོ་ལ་སོགས་པ་ཐ་དད་པའི་བྱེ་བྲག་དོན་ཐམས་ཅད་ཀྱི་ཐུན་མོང་བ་ཉིད་ཡིན་ནམ་མ་ཡིན་ཡང་རུང་སྟེ། ཤེས་པའི་བདག་ཉིད་དུ་གྱུར་པ་མ་ཡིན་ན་མི་ཤེས་པ་ཉིད་ཡིན་པ་དེའི་ཕྱིར་བྱེད་པ་མ་ཡིན་
པ་དེས་ན་བདག་ཉིད་དུ་གྱུར་པ་ཁོ་ན་བྱེད་པ་ཡིན་པར་འགྱུར་ཞེས་བརྗོད་ལ། ད་ལྟར་ནི་གལ་ཏེ་དབང་པོ་ཐུན་མོང་བ་ཉིད་དང་། ཁྱད་པར་དང་ཁྱད་པར་ཅན་གྱི་ཤེས་པ་དག་ཀྱང་བྱེ་བྲག་ཏུ་མི་འགྲུབ་པ་དང་འཆད་པར་འགྱུར་བའི་ཉེས་པ་གཞན་དུ་ཡང་མི་འགྱུར་ན་ནི་ཐ་དད་པ་ཡང་ཇི་ཞིག་ལྟར་བྱེད་པར་
འགྱུར་བ་ཡིན་ནོ་ཞེས་བྱ་བ་ཡིན་པའི་ཕྱིར་ཟློས་པ་མ་ཡིན་ནོ། །འདི་དག་སྐྱེད་པར་བྱེད་པ་ཡིན་ན་ཇི་ལྟར་རྣམ་པར་འཇོག་པ་ཉིད་མ་ཡིན་ཏེ། འབྲས་བུར་གྱུར་པ་སྐྱེད་པར་ནུས་ན་རྣམ་པར་འཇོག་པ་མ་ཡིན་ནོ་ཞེས་བྱ་བ་འདི་ག་ལས་ཤེ་ན། བར་དུ་མ་ཆོད་པ་མ་ཡིན་པའི་ཕྱིར་ཞེས་བྱ་བས་གཏན་ཚིགས་
བརྗོད་དོ། །འདིའི་དོན་ནི་འདི་ཡིན་ཏེ། གང་གི་ཕྱིར་དོན་རྟོགས་པ་རྣམ་པར་གཞག་པ་ནི་སྐྱེད་པར་བྱེད་པ་འདི་དག་ལས་རྣམ་པར་འཇོག་པ་པོ་གཞན་ལ་ལྟོས་པ་ཡིན་ནོ། །དེས་ན་ལྟོས་པར་བྱེད་པ་གཞན་དེས་འདི་དག་བར་དུ་གཅོད་པ་དེའི་ཕྱིར། དེའི་ལྟོས་པར་བྱ་བ་གང་ཡིན་པ་དེ་ཉིད་རྣམ་པར་
འཇོག་པ་པོ་ཡིན་གྱི་འདི་དག་ནི་མ་ཡིན་པ་དེས་ན་ཚད་མ་མ་ཡིན་ནོ། །འདི་སྙམ་དུ་བར་དུ་ཆོད་པ་ཡིན་དུ་ཆུག་པ་དེ་ལྟ་ན་ཡང་ཇི་ལྟར་ཚད་མས་མ་ཡིན་ཞེ་ན། བཤད་པ། བྱེད་པ་པོ་ཁྱད་པར་དུ་འཕགས་པ་ཁྱད་པར་ཅན་དེ་མི་འགྲུབ་པའི་ཕྱིར་རོ། །འདི་སྐད་བརྗོད་པ་ཡིན་ཏེ། བྱེད་པ་པོ་
ཐམས་ཅད་ནི་ཚད་མ་མ་ཡིན་གྱི། འོན་ཀྱང་ཁྱད་པར་དུ་འཕགས་པ་ཡིན་ན། འདི་དག་ནི་ལྟོས་པར་བྱ་བ་གཞན་གྱིས་བར་ཆོད་པས་བྱེད་པ་པོ་གཞན་ལས་ཅུང་ཟད་ཀྱང་ཁྱད་པར་དུ་གྱུར་པ་མ་ཡིན་པས་དེ་ཇི་ལྟར་ཚད་མར་འགྱུར། ཚད་མས་ནི་སྒྲུབ་པར་བྱེད་པ་ཡིན་ལ་འདི་དག་ཀྱང་སྒྲུབ་པར་བྱེད་པ་ཉིད་

ཡིན་པ་དེའི་ཕྱིར་ཁྱད་པར་དུ་འཕགས་པས་ཅི་ཞིག་བྱ་ཞེ་ན། བཤད་པ། བྱེད་པ་པོ་རྣམས་ཐམས་ཅད་བསྒྲུབ་པར་བྱ་བ་ལ་ཉེ་བར་སྦྱོར་ཡང་ཐ་མའི་བྱེ་བྲག་ཏུ་བྱེད་པ་པོ་འདི་ཉིད་ཅེས་བྱ་བ་ལ་གང་ཞིག་ཐ་དད་པས་བྱ་བ་ཐ་དད་པར་འགྱུར་བ་དེ་ནི་ཐ་མའི་བྱེ་བྲག་ཏུ་བྱེད་པ་པོར་བརྗོད་པ་ཡིན་ཏེ། བྱེད་
པ་པོ་རྣམས་ཐམས་ཅད་བྱེ་བྲག་ཏུ་བྱེད་པ་པོ་ཡིན་ཡང་ལྟོས་པར་བྱ་བ་བྱེ་བྲག་ཏུ་བྱེད་པ་པོ་གཞན་གྱིས་བྱེ་བྲག་ཏུ་བྱེད་པ་གང་ཞིག་བསྒྲུབ་པར་བྱ་བའི་བར་དུ་མ་ཆོད་པ་དེ་ཐ་དད་པས་བསྒྲུབ་པར་བྱ་བ་ཐ་དད་པར་འགྱུར་བ་ཡིན་ལ། དེ་ཡང་ཐ་མའི་བྱེ་བྲག་ཏུ་བྱེད་པ་པོ་ཉིད་ཡིན་པས་བྱེད་པས་བརྗོད་དོ། །
དེ་ལྟ་བུར་གྱུར་པ་དེ་ཉིད་སྒྲུབ་པར་བྱེད་པ་དེ་དམ་པ་ཡིན་པའི་ཕྱིར་རོ། །དོན་འདི་ཡིན་ཏེ། གལ་ཏེ་བྱེད་པ་པོ་ཐམས་ཅད་བྱེ་བྲག་ཏུ་བྱེད་པ་པོ་ཡིན་ཡང་། དེ་ལྟ་ན་ཡང་ཐ་མའི་བྱེ་བྲག་ཏུ་བྱེད་པ་པོ་གང་ཡིན་པ་དེ་ཉིད་སྒྲུབ་པར་བྱེད་པ་དམ་པ་ཡིན་ལ། སྒྲུབ་པར་བྱེད་པ་དམ་པ་གང་ཡིན་པ་དེ་ནི་བྱེད་པ་ཡིན་
ཞིང་བྱེད་པ་ཡང་ཚད་མ་ཡིན་ནོ། །དེས་ན་དབང་པོ་ལ་སོགས་པ་ཡོད་ཀྱང་ཡུལ་དང་ཡུལ་ལ་ཁྱད་པར་མེད་ན་ཤེས་པ་འདིའི་བྱེ་བྲག་ཏུ་བྱེད་པ་པོ་གཞན་གང་ཡིན་པ་དེ་ཉིད་ནི་བྱེད་པ་པོ་ཡིན་གྱི། བར་དུ་ཆོད་པའི་དབང་པོ་ལ་སོགས་པ་ནི་མ་ཡིན་ནོ། །ཡང་ཇི་ལྟར་ན་ཐ་མའི་བྱེ་བྲག་ཏུ་བྱེད་པ་པོ་
ལ་ལྟོས་ན་དབང་པོ་ལ་སོགས་པ་ཡོད་ཀྱང་ཞེས་སྨྲ་ཞེ་ན། བཤད་པ། གང་གི་ཕྱིར་དབང་པོ་ནི་བྱེ་བྲག་ཏུ་བྱེད་པ་པོ་མ་ཡིན་ཏེ། དེའི་ཕྱིར་ཐ་མ་ལ་ལྟོས་སོ། །སྔོན་པོ་དང་སེར་པོ་ལ་སོགས་པར་སྣང་བའི་རྣམ་པར་ཤེས་པ་ཐམས་ཅད་རྣམ་པར་རྟོག་པའི་རྒྱུ་ཡིན་པའི་གཏན་ཚིགས་ཀྱི་ཕྱིར་དབང་པོ་རྣམས་ནི་
བྱེ་བྲག་ཏུ་བྱེད་པ་པོ་མ་ཡིན་ནོ། །གང་དཔྱོད་པ་པས་ཁས་བླངས་པའི་དོན་ལ་ལྟ་བ་ཡང་ཚད་མ་མ་ཡིན་ཏེ། རྣམ་པར་རྟོག་པའི་ཤེས་པའི་རྒྱུ་རྣམ་པར་རྟོག་པ་མེད་པ་དང་པོར་ལྟ་བའི་ཤེས་པ་ནི་ཚད་མ་ཡིན་ནོ་ཞེའོ། །ལྟ་བའི་ཤེས་པ་ལ་སོགས་པ་ཐོབ་པའི་ཤེས་པ་མཐར་ཐུག་པ་དེ་དག་གི་སྔ་
མ་སྔ་མ་ནི་ཚད་མ་ཡིན་ལ། ཕྱི་མ་ཕྱི་མ་ནི་འབྲས་བུ་ཡིན་ནོ་ཞེ་ན། དེ་ཡང་ཚད་མ་མ་ཡིན་ཏེ། དེའི་རང་བཞིན་ལྟ་བུ་གང་ཡིན་པ་དེ་མ་ཡིན་ན་ཤེས་པ་དེའི་དོན་ལ་ལྟ་བ་དེ་ཉིད་མི་འགྲུབ་པའི་རྒྱུ་དེའི་ཕྱིར་རོ། །གལ་ཏེ་འདི་ནི་དོན་སྔོན་པོའི་ལྟ་བ་ཡིན་ན་ཞེས་གྲུབ་ན་ནི་དེའི་ཚེ་དེ་ཕྱིས་འབྱུང་བའི་ཁྱད་

པར་གྱི་རྣམ་པར་རྟོག་པ་ལ་ལྟོས་ནས་ཚད་མར་གྲུབ་པ་ཡིན། གང་གི་ཕྱིར་འདྲ་བ་མེད་པའི་ཕྱིར། དོན་ལ་ལྟ་བ་ཉིད་མ་གྲུབ་བོ། །དེ་བཞིན་དུ་ཞེས་བྱ་བ་ནི་ཁྱད་པར་གྱི་ཤེས་པ་ཚད་མ་མ་ཡིན་པའོ། །རིགས་པ་པ་དང་བྱེ་བྲག་པས་ཁྱད་པར་གྱི་ཤེས་པ་
ནི་ཚད་མ་ཡིན་ལ། ཁྱད་པར་ཅན་གྱི་ཤེས་པ་ནི་འབྲས་བུ་ཞེས་བྱ་བར་རྟོགས་ཏེ། ཇི་ལྟར་དུ་ཁྱད་པར་མ་བཟུང་བར་ཁྱད་པར་ཅན་གྱི་བློར་མི་འགྱུར་རོ་ཞེས་སྨྲས་པ་ཡིན་ནོ། །ཡུལ་གྱིས་ཁྱད་པར་དུ་མ་བྱས་པའི་ཁྱད་པར་གྱི་ཤེས་པ་རྣམ་པ་མེད་པ་གང་ཡིན་པ་དེའི་ཁྱད་པར་ཅན་
འཛིན་པའི་ཤེས་པ་རྣམ་པ་མེད་པ་ལས་ཁྱད་པར་མེད་པའི་ཕྱིར། འདི་ནི་ཁྱད་པར་ཅན་གྱི་ཤེས་པ་ལ། འདི་ནི་ཁྱད་པར་གྱི་ཤེས་པའོ་ཞེས་རྣམ་པར་གཞག་པ་མི་འགྲུབ་སྟེ། འགྲུབ་པ་མ་ཡིན་པའི་རྒྱུའི་ཕྱིར་རོ། །གལ་ཏེ་ཁྱད་པར་ཅན་དང་ཁྱད་པར་གྱི་ཤེས་པ་དག་རྣམ་
པར་དབྱེ་ནུས་ན་ནི་ཚད་མར་ཡང་འགྱུར་བ་ཡིན་གྱི། གལ་ཏེ་རྣམ་པ་མེད་པ་ཉིད་ཀྱིས་རྣམ་པར་དབྱེ་བར་བྱ་མི་ནུས་པ་དེའི་ཚེ་ནི་ཁྱད་པར་གྱི་ཤེས་པ་ཚད་མར་མི་འགྱུར་རོ། །གཞན་ཡང་བསྒྲུབ་པར་བྱ་བ་དང་སྒྲུབ་པར་བྱེད་པ་ཡུལ་ཐ་དད་པ་དུ་མ་ཉིད་འགལ་བ་ཡང་ཡིན་ནོ། །འདི་
ལྟར་འདེགས་པ་དང་འབབ་པའི་བྱ་བ་དང་ལྡན་པའི་སྟེའུ་དེ་ནི་དྷ་བ་ལ་སོགས་པ་ཡོད་ལ། ཚད་མའི་བསྒྲུབ་པར་བྱ་བ་ནི་དེ་ལས་གཞན་ལ་འགྲུབ་པ་མ་ཡིན་པ་དེ་བཞིན་དུ་འདིར་ཁྱད་པར་གཞན་ཉིད་ནི་དེའི་ཤེས་པས་གཟུང་བ་ཡིན་ལ། ཁྱད་པར་ཅན་གྱི་ཤེས་པས་གཟུང་བ་ཡང་གཞན་
ཉིད་ཡིན་པའི་ཕྱིར་ན་འདི་ནི་ཉམས་པ་ཡིན་ཏེ། རྒྱུ་དེས་ན་ཁྱད་པར་གྱི་ཤེས་པ་ནི་ཚད་མ་མ་ཡིན་ནོ། །ཅི་སྟེ་ཉེས་པ་འདིར་མ་གྱུར་ཅིག་ཅེས་ཁྱད་པར་དང་ཁྱད་པར་ཅན་གྱི་ཤེས་པ་དག་ཡུལ་ཐ་དད་པ་ཉིད་དུ་ཁས་ལེན་ཏེ། དེ་ཡུལ་ཐ་དད་པ་མེད་པ་གང་ཡིན་པ་དེ་ཉིད་དུ་ཁས་ལེན་ན་ནི་
གཉིས་དོན་མེད་དོ། །དོན་དང་བྲལ་བ་ཡིན་ནོ། །ཁྱད་པར་གྱི་ཤེས་པ་ཉིད་ཀྱིས་དོན་རྟོགས་པ་འགྲུབ་པའི་ཕྱིར་ཁྱད་པར་ཅན་གྱི་ཤེས་པ་ནི་ཅུང་ཟད་ཀྱང་བྱེད་པར་འགྱུར་བ་མ་ཡིན་ནོ། །འདིས་ནི་ལྟ་བ་དང་ཁྱད་པར་ཅན་གྱི་རྣམ་པར་རྟོག་པ་དག་ཀྱང་ཡུལ་གཅིག་པ་ཉིད་ཡིན་ན་གཉིས་དོན་མེད་པ་

ཡིན་ནོ་ཞེས་བརྗོད་པ་ཡིན་ནོ། །གཞན་ཡང་རྒྱུ་ཐ་དད་པ་མེད་པ་དག་ནི་རིམ་གྱིས་འབྱུང་བ་དེ་བཀག་པ་ཡིན་ནོ། །ཁྱད་པར་ཅན་དང་ཁྱད་པར་གྱི་ཤེས་པའི་རྒྱུ་ནི་ཡུལ་ཡིན་ན། རྒྱུ་གཅིག་ལས་ནི་རིམ་པ་ཅན་གཉིས་འབྱུང་བར་རིགས་པ་མ་ཡིན་ཏེ། འབྲས་བུ་མེད་པར་ནུས་པ་ནི་སྡོད་པར་མི་
རིགས་པའི་ཕྱིར་དང་། མི་ནུས་ན་ཡང་ལྷན་ཅིག་བྱེད་པ་ལ་མ་ལྟོས་པ་འབྲས་བུ་བྱེད་པར་མི་འཐད་པའི་ཕྱིར་རོ། །འདི་སྙམ་དུ་ཁྱད་པར་ཅན་དང་ཁྱད་པར་ཅན་གྱི་ཤེས་པ་དག་ཅིག་ཅར་འབྱུང་བ་དེས་ན་རྒྱུ་ཐ་དད་པ་མེད་ཀྱང་ཉེས་པ་མེད་དོ་སྙམ་ན། དེ་ལྟར་ན་ནི་འོ་ན་ཅིག་ཅར་འབྱུང་བ་ལ་ནི་བསྒྲུབ་པར་
བྱ་བ་དང་སྒྲུབ་པར་བྱེད་པ་ཉིད་མི་འཐད་དོ། །ཅིག་ཅར་སྐྱེ་བ་དག་ལ་ནི་ཕན་གདགས་བྱ་འདོགས་བྱེད་ཀྱི་དངོས་པོ་མེད་པའི་ཕྱིར་གཡས་ཕྱོགས་དང་ཅིག་ཤོས་ཀྱི་རྭ་བཞིན་དུ་རྒྱུ་དང་འབྲས་བུ་ཡོད་པ་མ་ཡིན་ནོ། །དེའི་ཕྱིར་དེ་ལྟ་བུར་ཡུལ་ཐ་དད་པའི་ཤེས་པ་གཉིས་ལ་ནི་བསྒྲུབ་པར་བྱ་བ་དང་བྱེད་
པ་མེད་ལ་ཡུལ་གཅིག་ཉིད་ཡིན་ན་ནི་གཉིས་པ་དོན་མེད་པ་དང་རིམ་གྱིས་འབྱུང་བར་མི་འཐད་པ་དང་། ཅིག་ཅར་ལ་བསྒྲུབ་བྱ་སྒྲུབ་བྱེད་ཀྱི་དངོས་པོ་མེད་པའི་ཕྱིར་ཇི་ལྟར་རིགས་པར་རིག་པ་ཅན་རྣམས་ཀྱི་ཁྱད་པར་ཅན་དང་ཁྱད་པར་གྱི་ཤེས་པ་དང་དཔྱོད་པ་པོ་རྣམས་ཀྱི་དོན་ལ་ལྟ་བ་དང་། ཁྱད་པར་གྱི་
རྣམ་པར་རྟོག་པ་དག་ལ་ཡང་སྦྱར་བར་བྱའོ། །ཇི་སྟེ་གལ་ཏེ་ཁོ་བོ་ཅག་ལ་དུས་གཅིག་པའི་ཕྱིར་བསྒྲུབ་པར་བྱ་བ་དང་སྒྲུབ་པར་བྱེད་པར་མི་འགྱུར་ན། འོ་ན་ཁྱེད་ཀྱི་ཅིག་ཅར་བ་དང་ཐ་དད་པ་མེད་པ་དེ་ལྟ་ཇི་ལྟར་བསྒྲུབ་བྱ་སྒྲུབ་བྱེད་ཀྱི་དངོས་པོར་འགྱུར་ཞེ་ན། སྨྲས་པ། ཤེས་པའི་ཆ་མི་འདྲ་བ་
ལས་ལོག་པ་དང་བློའི་རང་བཞིན་མ་ཡིན་པ་ལས་ལོག་པས་འདྲ་བ་དང་བློའི་རང་བཞིན་ཉིད་དུ་རྣམ་པར་གཞག་པའི་མཚན་ཉིད་དེ་དག་ནི་བསྒྲུབ་པར་བྱ་བ་དང་སྒྲུབ་པར་བྱེད་པའི་དངོས་པོར་འཐད་པ་ཡིན་ནོ་ཞེས་བྱ་བ་ནི་ལྷག་མའོ། །རྣམ་པར་གཞག་པས་རྣམ་པར་གཞག་པ་སྟེ། རྣམ་པར་འཇོག་པར་
བྱེད་པ་དང་། རྣམ་པར་གཞག་པར་བྱ་བའོ། །རྣམ་པར་གཞག་པ་དེ་གཉིས་ལ་བརྟེན་པ་དེའི་དངོས་པོ་ནི་དེ་ཉིད་དེ་དེའི་ཕྱིར་རོ། །དོན་ནི་འདི་ཡིན་ཏེ། ཁོ་བོ་ཅག་གི་བསྒྲུབ་པར་བྱ་བ་དང་སྒྲུབ་པར་བྱེད་པ་ནི་བསྐྱེད་པར་བྱ་བ་དང་སྐྱེད་པར་བྱེད་པའི་དངོས་པོར་ནི་མ་ཡིན་གྱི་འོན་ཀྱང་རྣམ་པར་གཞག་འཇོག་

གི་དངོས་པོ་ཡིན་ནོ། །དེའི་ཕྱིར་ན་ཆ་འགའ་ཞིག་རྒྱུ་མཚན་དུ་བྱས་ནས་འདི་ནི་སྔོན་པོ་མྱོང་བའོ་ཞེས་ཤེས་པ་ལ་ཐ་སྙད་དུ་བྱེད་པའི་ཐ་སྙད་ཀྱི་རྒྱུ་མཚན་གྱི་ཆ་གཅིག་པོ་དེ་ནི་ཚད་མ་ཡིན་ལ། གཞན་ཐ་སྙད་དུ་བྱ་བའི་ཆ་ནི་འབྲས་བུ་ཡིན་ནོ། །བསྒྲུབ་པར་བྱ་བ་དང་བྱེད་པ་
གང་ཡིན་པ་གཅིག་པས་སོ། །ཅིའི་ཕྱིར་ཞེ་ན། སྨྲས་པ། དངོས་པོ་སྟེ་དོན་དམ་པའི་རང་བཞིན་ཐ་དད་པ་མེད་པ་སྟེ་གཅིག་པའི་ཕྱིར་རོ། །དོན་འདི་ཡིན་ཏེ། ཤེས་པའི་ཆ་དག་ནི་གཅིག་ཡིན་པའི་ཕྱིར་བསྒྲུབ་པར་བྱ་བ་དང་། བྱེད་པ་བདག་ཉིད་གཅིག་པར་ཐལ་བར་དེ་ཡང་འགལ་
བ་ཡིན་ནོ། །བསྒྲུབ་པར་བྱ་བ་གང་ཡིན་པ་དེ་ཉིད་ནི་གྲུབ་པ་ཡང་མ་ཡིན་ན། གང་གིས་སྒྲུབ་པར་བྱེད་པར་འགྱུར་ཞེས་གཞན་དག་དེ་ལྟར་དོགས་པ་ལ། བཤད་པ། དེ་ནི་དེ་ལྟར་མ་ཡིན་ཏེ། དེ་དག་ནི་གཅིག་མ་ཡིན་ནོ་ཞེས་བྱ་བའི་དོན་ཏོ། །གཏན་ཚིགས་བཤད་པ། ཕན་ཚུན་ལྡོག་
པར་བརྟགས་པའི་ངོ་བོ་ཉིད་ཀྱི་ཆོས་ཐ་དད་པ་སྣ་ཚོགས་པ་དེ་ཁས་བླངས་པའི་གཏན་ཚིགས་ཀྱི་ཕྱིར་རོ། །གལ་ཏེ་ཤེས་པའི་ཆ་དེ་དག་དོན་དམ་པའི་ཐ་དད་པ་མེད་པ་དེ་ལྟ་ན་ཡང་འདྲ་བ་དང་དོན་རྟོགས་པའི་རང་བཞིན་ལྡོག་པ་གཞན་ལ་ལྟོས་ནས་བརྟགས་པའི་ཐ་དད་པར་འགྱུར་རོ། །བསྒྲུབ་པར་
བྱ་བ་དང་སྒྲུབ་པར་བྱེད་པའི་ཐ་སྙད་ནི་དོན་དམ་པ་པ་ལ་བརྟེན་པ་མ་ཡིན་གྱི། འོན་ཀྱང་བརྟགས་པའི་རང་བཞིན་ལ་བརྟེན་པ་ཡིན་ནོ། །དེས་ན་གང་ལ་ཐ་དད་པ་མེད་པ་དེ་ལ་ནི་བསྒྲུབ་པར་བྱ་བ་དང་སྒྲུབ་པར་བྱེད་པ་ཡོད་པ་མ་ཡིན་ལ། གང་ལ་བརྟགས་པའི་རང་བཞིན་གྱི་བསྒྲུབ་པར་བྱ་བ་དང་སྒྲུབ་པར་
བྱེད་པ་ཡོད་པ་དེ་ལ་ནི་ཐ་དད་པ་ཉིད་ཡིན་པའི་ཕྱིར་མི་འགལ་ལོ། །འདི་སྙམ་དུ་འོ་ན་ནི་ཁྱེད་ཀྱིས་བསྒྲུབ་པར་བྱ་བ་དང་སྒྲུབ་པར་བྱེད་པའི་དངོས་པོ་བརྟགས་པ་ཡིན་པར་ཐལ་ལ། འཇིག་རྟེན་ན་དོན་དམ་པ་མཐོང་བ་ཡང་ཡིན་ནོ་ཞེས་དོགས་པ་ལ་བཤད་པ། བསྒྲུབ་པར་བྱ་བ་དང་སྒྲུབ་པར་བྱེད་པའི་ཐ་
སྙད་འདི་དངོས་པོ་ལ་གནས་པ་ནི་མ་ཡིན་ཏེ། འདི་ལྟར་ལྷ་སྦྱིན་འཚེད་དོ་ཞེས་བྱ་བ་ལ་ཕྲུ་བ་འཛུགས་པའི་བྱ་བ་འཚེད་པ་ཞེས་བྱ་བ་བྱེད་པ་པོ་ལས་ལྡོག་པ་ནི་ཅུང་ཟད་ཀྱང་ཡོད་པ་མ་ཡིན་གྱི། བྱ་བ་དེ་ལྟ་བུའི་བདག་ཉིད་ཅན་གྱི་ལྷ་སྦྱིན་གྱི་རང་བཞིན་ཉིད་ལ་འཚེད་པ་ཞེས་བྱ་བར་བསྟན་ཏོ། །དེ་བཞིན་

དུ་སྟ་རེས་གཅོད་ཅེས་བྱ་བ་ཡང་ཤིང་ལ་འཇུག་པ་ལྷུར་ལེན་པའི་སྟ་རེའི་རང་བཞིན་ལ་བསྟན་ཏོ། །འདི་སྙམ་དུ་དེ་ལྟ་ན་ཡང་དོན་དམ་པར་བྱ་བ་དང་བྱེད་པ་དག་ཐ་དད་པ་ཡང་མཐོང་བ་ཉིད་ཡིན་ན། ཁྱེད་ཀྱིས་ནི་ཐ་མི་དད་པ་ཁོ་ནའོ་སྙམ་དུ་དོགས་པ་ལ། འཁྲུལ་པར་བསྟན་པའི་ཕྱིར་རྣོན་དུ་དངོས་
པོ་ཐ་དད་པ་མེད་ཀྱང་ཞེས་བྱ་བ་སྨོས་སོ། །ཇི་ལྟར་བུད་ཤིང་དང་འབྲས་ཆན་ཚོས་པ་དོན་དམ་པར་ཐ་དད་པར་དེ་ལྟར་ཐམས་ཅད་དུ་ནི་མ་ཡིན་ཏེ། འདི་ལྟར་དངོས་པོ་ཐ་དད་པ་མེད་དེ་གཅིག་ཀྱང་ནུས་པ་བསྒྲུབ་པར་བྱ་བའི་རྒྱུ་མཚན་གྱི་བྱེ་བྲག་གིས་ཏེ། ཐ་དད་པར་བསྒྲུབ་པར་བྱ་བ་དང་སྒྲུབ་པར་བྱེད་པའི་
ཡུལ་གྱི་རྣམ་པར་གཞག་པ་ཐ་དད་པའི་གཏན་ཚིགས་ཀྱི་ཕྱིར་རོ། །དངོས་པོ་གཅིག་ལ་ཡང་དེ་དང་དེའི་ནུས་པ་དང་ལྡན་པ་ལས་བྱེད་པ་པོ་དང་ལས་དང་བྱེད་པ་པོའི་དངོས་པོ་དང་བསྒྲུབ་པར་བྱ་བའི་རང་བཞིན་རྣམས་རྣམ་པར་འཇོག་ལ། བསྒྲུབ་པར་བྱ་བ་དེ་སྒྲུབ་པར་བྱེད་པ་རྣམས་ལས་སམ། སྒྲུབ་
པ་པོར་བྱེད་པ་པོ་རྣམས་ཕན་ཚུན་ཐ་དད་པ་ནི་ཅུང་ཟད་ཀྱང་མེད་དེ། དཔེར་ན་བདག་གིས་བདག་འཚོག་གོ་ཞེས་བྱ་བ་འདི་ལ་ལས་ལ་སོགས་པའི་ནུས་པ་དང་ལྡན་པའི་ཕྱིར་དང་། བསྒྲུབ་བྱའི་རང་བཞིན་གྱི་རྗེས་སུ་འགྲོ་བའི་ནུས་པ་དང་ལྡན་པའི་ཕྱིར་དེ་ཉིད་ལ་འཚོག་པ་པོ་དང་། བརྩོག་པར་བྱ་བ་དང་
སྒྲུབ་པར་བྱེད་པར་སྨྲས་པ་བཞིན་ནོ། །དེའི་ཕྱིར་བུད་ཤིང་དང་འབྲས་ཆན་ཚོས་པ་བཞིན་དུ་ཐམས་ཅད་དུ་བསྒྲུབ་པར་བྱ་བ་དང་སྒྲུབ་པར་བྱེད་པ་ཐ་དད་པ་ནི་མ་ཡིན་ནོ། །དེ་བཞིན་དུ་རྣམ་པར་ཤེས་པ་གཅིག་ལ་ཡང་རང་བཞིན་གྱི་ཁྱད་པར་གྱིས་བྱེད་པ་དང་བསྒྲུབ་པར་བྱ་བར་འགྱུར་རོ། །འདི་ནི་
སྐབས་དང་རྗེས་སུ་མཐུན་པར་སྨྲས་པ་ཡིན་ཏེ། བྱེད་པ་པོ་ཡང་རྣམ་པར་ཤེས་པ་ཉིད་ཡིན་ནོ། །དེའི་ཕྱིར་དེ་ལྟར་ཐ་སྙད་ལ་བརྟེན་པའི་རྣམ་པར་གཞག་འཇོག་གི་དངོས་པོ་ལ་དོན་དམ་པར་ཐ་དད་མེད་ཀྱང་འགལ་བ་ཡོད་པ་མ་ཡིན་ནོ། །ཕྲད་པ་ནི་དོན་སོ་སོ་ལ་ཐ