Luận tạng Tây Tạng (Tengyur) — Tập 181

ད་ཅེས་བྱ་བ་འདིའིའོ། །བདག་ཉིད་ཀྱི་ཕྱོགས་ལ་སྐྱོན་བསྟན་པ་ནི། གལ་ཏེ་དོན་གྱི་བདག་ཉིད་ཅེས་བྱ་བའོ། །འདི་ཉིད་ལ་དགག་པ་སྦྱོར་བར་
བྱེད་པ་ནི་གཞན་ལ་ནི་དེ་ལྟ་མ་ཡིན་ནོ་ཞེས་བྱ་བའོ། །འདི་ཐམས་ཅད་ནི་བདག་ཁོ་ན་ཡིན་ནོ་ཞེས་བྱ་བ་ནི་བདག་གིའོ། །གཉའ་ཤིང་ལ་ཉི་མ་བཞིན་དུ་བསྟོད་པ་ཡིན་གྱི་དེ་ཁོ་ན་ཉིད་ནི་མ་ཡིན་ནོ་ཞེས་ཟེར་བ་ནི། དེ་ནི་དོན་བརྗོད་པ་ཡིན་ནོ་ཞེས་བྱ་བའོ། །བདག་ནི་སེམས་ཙམ་ཡིན་ལ་རིག་པ་ནི་སྣ་ཚོགས་པ་ཡིན་པས། དེ་དང་འགལ་

བ་ཡིན་པར་བསྟན་པ་ནི་མ་ཡིན་ཏེ། རྣམ་པ་སྣ་ཚོགས་པ་མྱོང་བའི་ཕྱིར་རོ། །སྔོན་པོ་ནི་ཉམས་སུ་མྱོང་བའི་བདག་ཉིད་ཡིན་པའི་ཕྱིར་མངོན་སུམ་མ་ཡིན་ཏེ། འོན་ཀྱང་ཚོགས་པ་གཅིག་ལ་འབྲེལ་པའི་ཕྱིར་རོ། །དེའི་བདག་ཉིད་དང་དེ་ལས་བྱུང་བ་དག་ལ་ཁྱད་པར་མེད་དོ་སྙམ་དུ་སེམས་པ་ལ། དེས་ན་
ཉམས་མྱོང་བྱ་གཞན་མེད། །ཅེས་བྱ་བ་སྟེ། དེ་ལྟར་འབྲེལ་པ་ཡིན་ཀྱང་བདག་ཉིད་མ་ཡིན་པ་ལ་ཞུགས་པའི་ཕྱིར་ལ་རྗེས་སུ་ཞུགས་པ་ནི་ཉམས་སུ་མྱོང་བར་བྱ་བ་ཡིན་གྱི་བདག་ཉིད་རིག་པ་ནི་མ་ཡིན་ཏེ། སྐྱེད་བྱེད་ཉིད་ལས་གཞན་པའི་འགལ་བ་ཅན་དེ་ནི་བདག་ཉིད་མ་ཡིན་ཏེ། རིག་པ་མ་ཡིན་པ་
བརྗོད་པའི་ཕྱིར་རོ། །དེ་མ་ཐག་པ་དེ་ལྟ་ན་ཞེས་བྱ་བའི་ཤེས་པ་གཞན་གྱིས་གཟུང་བ་མ་ཡིན་ནམ་སྙམ་དུ་སེམས་པ་ལ། དེ་ལའང་མྱོང་བ་གཞན་ཡོད་མིན། །ཞེས་བྱ་བ་སྨོས་ཏེ། གཟུང་བ་ལ་སོགས་པའི་ངོ་བོར་འདོད་པ་ལ་འདི་ཐལ་ཆེས་པ་ཡིན་གྱི་སྒྲུབ་པར་བྱེད་པ་ནི་མ་ཡིན་ནོ་ཞེས་བྱ་བའི་དོན་
ཏོ། །མེད་པ་ཅི་ལས་ཤེ་ན་དེར་ཡང་ཞེས་བྱ་བ་སྨོས་ཏེ། ཤེས་པ་གཞན་ལ་བདག་ཉིད་རིག་པ་མ་ཡིན་པ་ནི་དེའི་བདག་ཉིད་མ་ཡིན་པ་དང་འགལ་བ་ཞེས་བྱ་བའི་དོན་ཏོ། །དེ་རྟོགས་པ་ཅི་ལས་ཤེ་ན། དེའི་ཕྱིར་རང་ཉིད་ཅེས་བྱ་བ་ནི་གཞན་མི་ལྟོས་པའི་སྔོན་པོ་ལ་སོགས་པའི་རིག་པ་གསལ་བ་
ཡིན་པ་ནི། མངོན་སུམ་སྟེ་ལྐོག་ཏུ་མ་གྱུར་པ་ཞེས་བྱ་བའི་དོན་ཏོ། །མི་རྟག་པ་དང་བྱས་པ་ཉིད་བཞིན་དུ་སྔོན་པོ་ཉམས་སུ་མྱོང་བ་དེའི་བདག་ཉིད་ཁོ་ན་ཡིན་ནོ་ཞེས་བྱ་བ་ཡང་ཐ་སྙད་འདོགས་པ་ཡིན་ནོ། །འབྲེལ་པ་ཉམས་སུ་མྱོང་བའི་རྗེས་འབྲང་བ་ཡིན་གྱི་གཞན་དུ་མ་ཡིན་པ་བསྟན་པ་ནི། དེ་ཡི་
དངོས་དེ་སྔོ་སོགས་ཀྱི། །ཞེས་བྱ་བ་སྟེ། ཉམས་སུ་མྱོང་བའི་བྱེད་པ་བསྟན་པ་ཡིན་ནོ། །ཐ་དད་པ་ནི་ལྡོག་པས་བརྟགས་པ་ཡིན་ཏེ་མཆི་གུའི་ལུས་སོ་ཞེས་བྱ་བ་བཞིན་དུ། ཐ་མི་དད་པ་འགལ་བ་ཅན་མ་ཡིན་པར་བསྟན་པ་ནི། ལྡོག་པའི་རང་གི་ངོ་བོ་ལའང་། །ཞེས་བྱ་བའོ། །གསལ་བར་བྱ་བ་
ཉིད་ནི་གསལ་བར་བྱེད་པ་ཉིད་ཀྱི་ཁོངས་སུ་གཏོགས་པར་བྱེད་པ་མ་ཡིན་ཏེ། འགལ་བའི་ཕྱིར་རོ་ཞེས་ཟེར་བ་ནི་ཇི་ལྟར་སྔོན་པོ་ཞེས་བྱ་བའོ། །གསལ་བར་བྱེད་པ་ཉིད་ནི་གཞན་ཁོངས་སུ་གཏོགས་པར་བྱེད་པ་མ་ཡིན་པར་བསྟན་པ་ནི། བདག་ཉིད་ལ་ནི་ཞེས་བྱ་བའོ། །གསལ་བར་བྱ་

བའམ་ཅིག་ཤོས་ཀྱང་མ་ཡིན་ཏེ། འོན་ཀྱང་ལྐོག་ཏུ་མ་གྱུར་པ་ཡིན་པར་བསྟན་པ་ནི། ཇི་ལྟར་དེ་ཡི་བདག་ཉིད་ཕྱིར། །ཞེས་བྱ་བ་སྟེ། དེ་ལ་མངོན་སུམ་ལས་གཞན་པའི་བྱེད་པའི་ཡུལ་མ་ཡིན་པ་ཉིད་ཁོ་ནའི་རྗེས་སུ་འབྲངས་པས་རང་ཉིད་གསལ་བར་བྱེད་པ་ཡིན་ནོ་ཞེས་ཟེར་གྱི། དེ་ལ་བྱེད་པ་
འགའ་ཡང་མེད་དོ་ཞེས་བྱ་བའི་དོན་ཏོ། །བརྒལ་ཞིང་བརྟག་པ་ནི་མ་ཡིན་ནོ་ཞེས་བྱ་བ་ནི་དེ་ལྟ་བུར་གྱུར་པ་བྱེད་པ་ཉིད་ཀྱི་ཕྱིར་རོ། །སྒྲོན་མ་ལ་ལྟོས་ནས་མིག་ལ་སོགས་པས་བུམ་པ་གསལ་བ་མ་ཡིན་ནོ་ཞེས་ཟེར་བ་ནི། འོན་ཏེ་བུམ་པ་ཞེས་བྱའོ། །ཇི་ལྟར་སྒྲོན་མ་སྐྱེད་པར་བྱེད་པ་ཉིད་
གསལ་བར་བྱེད་པར་ཐ་སྙད་འདོགས་པ་དེ་བཞིན་དུ་མིག་ལ་སོགས་པའང་ཡིན་པར་བསྟན་པ་ནི། གསལ་བར་བྱེད་པ་ཡིན་མིན་ཡང་། །ཞེས་བྱ་བའོ། །གཞན་དག་ནི་ཤེས་པའི་འོ། །བདག་ཉིད་ཀྱི་ངོ་བོ་བྱེད་པ་ཤེས་པ་དང་འགལ་བ་མ་ཡིན་པར་བསྟན་པ་ནི། གང་ཚེ་དེའི་རང་
བཞིན་ཞེས་བྱ་བའོ། །ཆད་པ་ནི་ཞེས་བྱ་བ་ནི་རལ་གྲིའི་སོ་དེ་ཉིད་ཁོ་ནས་གཅོད་པ་མ་ཡིན་པར་བསྟན་པ་ཡིན་ནོ། །དོན་དེ་ཉིད་ཅེས་བྱ་བ་ནི་དེ་ཉིད་ཀྱིས་ཞེས་བྱ་བ་ལ་སོགས་པའོ། །འོན་ཏེ་ཇི་ལྟར་ཞེན་པས་རིག་པར་བྱ་བ་དང་རིག་པར་བྱེད་པ་དག་ནི་ཐ་དད་པ་ཉིད་ཡིན་ན་སྐྱོན་ཅི་ཡོད་
ཅེས་ཟེར་བ་ལ། དེའི་རིག་བྱ་བ་ཞེས་སྨོས་ཏེ། རྣམ་པ་མེད་པའི་རིག་པ་དང་། རིག་པར་བྱ་བ་ཡང་དེའི་བདག་ཉིད་མ་ཡིན་ན་མི་འཐད་པ་སྟེ། འབྲེལ་པ་ཅན་མ་ཡིན་པར་འགྱུར་རོ་ཞེས་བྱ་བའོ། །གསལ་བར་བྱེད་པ་མ་ཡིན་པའི་དོན་ནི་དེའི་རྣམ་པ་ཅན་གྱི་གསལ་བས་སམ། གཞན་གྱིས་ཀྱང་
རིག་གོ་ཞེས་བྱ་བའི་ཐ་སྙད་རིགས་པ་ཡིན་གྱི། གཉི་ག་ཅིག་ཅར་གསལ་ན་ནི་མ་ཡིན་ཏེ། ནུས་པ་ཡོངས་སུ་མ་གཏོགས་པའི་ཕྱིར་རོ་ཞེས་བསྟན་པ་ནི། དེའི་ཚེ་ནི་ཞེས་བྱ་བའོ། །དེ་ཉིད་ཡིན་ཞེས་བྱ་བ་ནི་གསལ་བར་བྱ་བ་དང་ཅིག་ཤོས་ཉིད་ཡིན་ནོ། །དེ་ནི་ཉེ་བའི་ཁྱད་པར་གྱིས་གཟུགས་
ཀྱི་ཁྱད་པར་བསྐྱེད་པ་ཉིད་ཡིན་གྱི་གཟུང་བ་ཉིད་ནི་མ་ཡིན་ཏེ། ཤེས་པ་རྗེས་སུ་འཇུག་པ་ནི་དེ་ལྟ་ཡིན་ནོ་ཞེས་བསྟན་པ་ནི། དེ་ལྟར་སྐྱེས་པ་ཞེས་བྱ་བའོ། །ཇི་ལྟར་མ་རྟོགས་ཤེ་ན། ཐ་སྙད་དེ་ལྟ་བུར་ཞེས་བྱ་བ་ནི་ངེས་པ་སྟེ། ཕྱི་རོལ་གྱི་ཡུལ་ཉིད་དུ་ངེས་པར་བྱེད་པ་ཞེས་བྱ་བའི་དོན་ཏོ། །

ཕྱི་རོལ་གྱི་ཡུལ་ཉིད་ཀྱི་ངེས་པ་ཉམས་སུ་མྱོང་བ་དང་འགལ་བ་ཡིན་པར་བསྟན་པ་ནི། ཉམས་སུ་མྱོང་བ་མཐུན་པ་ཞེས་བྱ་བའོ། །ཇི་སྟེ་ཞེས་བྱ་བ་ནི་ལྐོག་ཏུ་མ་གྱུར་པ་ཉིད་དོ་ཞེས་བྱ་བའོ། །ཅི་ལས་ཤེ་ན་རིག་པར་བྱ་བའི་ཞེས་བྱ་བ་སྨོས་སོ། །དེ་མེད་པ་སྟེ་རྟོགས་པ་མེད་
པ་ན་ཇི་ལྟར་འགྱུར་ཏེ་རྟོགས་པར་ཇི་ལྟར་འགྱུར་ཞེས་བྱ་བར་སྦྱར་རོ། །དེ་ལས་ཞེས་བྱ་བ་རྗེས་སུ་དཔག་པའི་རྣམ་པ་ལས་དོན་ཡང་ཡོད་ཅེས་བྱ་བ་དོན་གྱི་བྱ་བ་བྱེད་པ་གསལ་བར་སྣང་ངོ་། །གཞན་དུ་ན་ཞེས་བྱ་བ་ནི་སྣང་དུ་རུང་བ་མ་ཡིན་པའོ། །གཞན་གྱིས་རྟོགས་པ་ཡིན་ནོ་ཞེས་བྱ་བར་
རྟོགས་པ་མེད་པར་བསྟན་པ་ནི་མ་ཡིན་ཏེ། རྟོགས་པ་མེད་པའི་ཕྱིར་རོ་ཞེས་བྱ་བའོ། །དངོས་པོ་ཉིད་གསལ་བའི་ངོ་བོ་ཉིད་དུ་རྗེས་སུ་དཔག་པའི་གོ་བྱ་ཡིན་པར་ཟེར་བ་ནི། རྗེས་སུ་དཔག་པ་ཉིད་ཀྱི་ཞེས་བྱ་བའོ། །གསལ་བ་ཉིད་ནི་ཤེས་པའི་ཆོས་ཉིད་ཡིན་ལ་ཁྱད་པར་ལ་མངོན་སུམ་ཡིན་
གྱི། རྗེས་སུ་དཔག་པ་མ་ཡིན་པར་བསྟན་པ་ནི། རྗེས་སུ་དཔག་པ་ཉིད་དུ་ཞེས་བྱ་བའོ། །རྗེས་སུ་དཔག་པ་ཉིད་ཀྱིས་རྟོགས་པ་ཡིན་པས་མངོན་དུ་བྱེད་པ་ཡིན་ཏེ། མངོན་དུ་མི་བྱེད་པ་དང་འགལ་བའི་ཕྱིར་རོ་ཞེས་བསྟན་པ་ནི། དེ་མེད་པ་ཡང་ཞེས་བྱ་བའོ། །རང་བཞིན་གཅིག་པ་ཉིད་ཅེས་
བྱ་བ་ནི་དོན་དམ་པར་རྟོགས་པ་ཐ་དད་པ་དེ་ལ་བརྟགས་པ་ཉིད་ཡིན་པའི་ཕྱིར་རོ། །དེ་དང་འབྲེལ་པས་ཞེས་བྱ་བ་ནི་འོ་མ་དང་ཆུ་བཞིན་དུ་དོན་དང་རྟོགས་པའི་བྱེ་བྲག་འདྲེས་པས་སོ། །ཁྱབ་བྱ་ཞེས་བྱ་བ་ནི་དུ་བའོ། །ཁྱབ་བྱེད་ཀྱིས་ཞེས་བྱ་བ་ལྐོག་ཏུ་གྱུར་པས་སོ། །དེའི་ཚེ་ཞེས་བྱ་
བ་ནི་འབྲེལ་པ་འཛིན་པའི་དུས་ནའོ། །སྔོན་དང་ད་ལྟར་ཞེས་བྱ་བ་ནི་ཁྱབ་པའོ། །རྟོག་པ་ཙམ་ཞེས་བྱ་བ་ནི་ཡུལ་དང་དུས་ལ་ཁྱད་པར་མེད་པས་སོ། །ཁྱད་པར་ཞེས་བྱ་བ་ནི་ཡུལ་དང་དུས་ཀྱི་ཁྱད་པར་ཉིད་ཀྱིས་སོ། །མེད་ན་མི་འབྱུང་བ་ཉིད་ཁྱབ་པ་མ་ཡིན་ནམ། ཡུལ་དང་དུས་དག་ནི་
མ་ཡིན་ཏེ། དེ་ཡང་གཞལ་བྱའི་དུ་བ་རྟོགས་ན་ལྐོག་ཏུ་གྱུར་པའི་མེ་ལ་ཡོད་པ་ཡིན་པ་དེ་ལྟ་ན་མེ་ཡང་རྟོགས་པར་འགྱུར་རོ་སྙམ་དུ་སེམས་པ་ནི། གལ་ཏེ་དུ་བའི་རྣམ་པ་ནི་ཞེས་བྱ་བའོ། །དུ་བ་ཡང་རྟོགས་པ་ཙམ་མ་ཡིན་ནོ་ཞེས་ཟེར་བ་ནི། མེའི་འབྲས་བུ་ཞེས་བྱ་བའོ། །ཕྱི་རོལ་གྱི་

མེའི་འབྲས་བུ་ཉིད་མ་གྲུབ་པོ་ཞེས་བསྟན་པ་ནི། མེའི་འབྲས་བུ་ཉིད་ཡིན་ཞེས་བྱ་བའོ། །མཐོང་བ་དང་སྣང་བཞིན་པ་དག་གི་གཅིག་པ་ཉིད་བར་མ་དང་ལྐོག་ཏུ་གྱུར་པ་ཡོད་པ་མ་གཏོགས་པར་མི་འགྱུར་བར་བསྟན་པ་ནི། ངོ་ཤེས་པའི་སྟོབས་ཉིད་ཀྱིས་ཞེས་བྱ་བའོ། །དེ་ཉིད་
གསལ་བར་བྱེད་པ་ནི། གལ་ཏེ་མྱོང་བའི་ནང་གནས་ན། །ཞེས་བྱ་བའོ། །བར་ན་ཡོད་པ་ལྐོག་ཏུ་གྱུར་པ་ཡིན་ནོ་ཞེས་ཟེར་བ་ནི། གལ་ཏེ་མྱོང་མིན་དོན་བདག་ནི། །ཞེས་བྱ་བའོ། །ལན་ནི་ལྐོག་ཏུ་གྱུར་པར་ཞེས་བྱ་བའོ། །དེ་ཉིད་ནི་ཞེས་བྱ་བ་ནི་སྔ་མ་དང་ཕྱི་མ་རྟོགས་པ་ཙམ་མོ། །
གཅིག་ཉིད་དུ་སྔར་མཐོང་ངོ་ཤེས་པའི་ཡུལ་ཡིན་གྱི་བར་གྱི་ནི་མ་ཡིན་ཏེ། རྗེས་སུ་དཔག་པའི་རྣམ་པ་ཡང་ཕྱི་རོལ་ཉིད་དུ་ཞེན་པས་བག་ཆགས་ཙམ་ལས་ཡིན་པས། གཞན་ཡང་དེའི་རིགས་པ་ཡིན་པས་དེ་ལྟར་འགྱུར་བར་བསྟན་པ་ནི། དེའི་ཕྱི་གསལ་བར་སྣང་བའི་ཞེས་བྱ་བའོ། །
རྣམ་ཤེས་བྱས་པ་ནི་རྣམ་ཤེས་ཀྱིས་བྱས་པ་ཞེས་བྱ་བ་སྟེ། དོན་དང་བག་ཆགས་དག་གི་ངོ་བོ་ཐ་དད་པའོ། །གསལ་བ་སྣང་བ་བག་ཆགས་ཙམ་ལས་བྱུང་བ་ཡིན་ན་འདོད་པ་ཁོ་ན་འགྲུབ་པར་འགྱུར་ཏེ། འདོད་པ་ནི་རང་དབང་ཉིད་ཀྱི་ཕྱིར་རོ་ཞེས་བསྟན་པ་ནི། ཕྱི་རོལ་ཁྱད་པར་
ཡོད་མིན་ཡང་། །ཞེས་བྱ་བའོ། །བག་ཆགས་ཐམས་ཅད་གཅིག་གི་ཚེ་ཉིད་ན་ཉེ་བས་སད་པ་ན་ཐམས་ཅད་སྣང་བའི་ཤེས་པར་འགྱུར་བའི་ཕྱིར་ཉམས་སུ་མྱོང་བ་ནི་འགལ་བའི་འབྲས་བུའི་བྱེ་བྲག་ཡིན་ནོ་སྙམ་དུ་སེམས་པ་ནི་འགལ་ཏེ་བག་ཆགས་ཞེས་བྱ་བའོ། །ཕྱི་རོལ་ཁས་
བླངས་ཀྱང་འགལ་བའི་འབྲས་བུ་ཁོ་ན་ཡིན་པར་བསྟན་པ་ནི་མ་ཡིན་ཏེ། ཉེ་བ་མ་ཡིན་པ་ཡང་ཞེས་བྱ་བའོ། །དྲན་པ་ནི་ཉེ་བའི་ཡུལ་ཅན་མ་ཡིན་པ་ཁོ་ནར་བསྟན་པ་ནི། དྲན་པ་བརྗེད་པར་ཞེས་བྱ་བའོ། །ལོག་པར་རིག་པ་ཞེས་བྱ་བ་ནི་ཡུལ་དང་དུས་གཞན་ལ་གནས་པ་ལ། དེ་ལས་
གཞན་པར་རྟོགས་པ་ཡིན་ནོ། །མེད་པ་ཡང་ཡུལ་ལ་སོགས་པ་ལ་ངེས་པ་མ་ཡིན་པར་བསྟན་པ་ནི། གཞན་དག་མེད་སྣང་ཞེས་བྱ་བའོ། །དུ་མ་མཐོང་བ་དང་དུ་མ་དྲན་པ་ནི་རྣམ་ཤེས་ཉིད་ཡིན་པ་ལ་ཡང་། དྲན་པ་བརྗེད་པའི་ཕྱོགས་དེ་དང་འགལ་བ་ཅན་མ་ཡིན་པར་བསྟན་པ་ནི།

དེ་མཚུངས་པའི་ཞེས་བྱ་བའོ། །བག་ཆགས་ཐམས་ཅད་གཅིག་གི་ཚེ་ཁོ་ན་ཉེ་བ་ནི་མ་ཡིན་ཏེ། བག་ཆགས་ཀྱི་ནུས་པ་ཁས་མི་ལེན་པའི་ཕྱིར་རོ་ཞེས་བསྟན་པ་ནི། དེ་མ་ཐག་པའི་ཞེས་བྱ་བའོ། །སྔ་མ་སྔ་མ་ཆེས་གསལ་བའི་ཤེས་པའི་བདག་ཉིད་རིམ་
གྱིས་འབྱུང་བ་ཡིན་པར་བསྟན་པ་ནི། སྣང་བ་ནི་གསལ་ཞིང་ཞེས་བྱ་བའོ། །ཤེས་པ་ཕྱི་མའི་ནུས་པ་ཡིན་ཞིང་སྔ་མ་སྔའི་རྣམ་ཤེས་ནི་ཕྱི་མ་ལ་མངོན་དུ་ཕྱོགས་པ་སྟེ། མཐོང་བའམ་གཞན་ཡང་རུང་བ་ཅུང་ཟད་མཐོང་བའི་དབྱེ་བ་ལ་ལྟོས་ནས་མེད་ཀྱང་འབྲས་བུ་དེ་བྱེད་པ་ཡིན་ཏེ། དུས་ཐ་
དད་པ་ལ་ཡང་ལྷན་ཅིག་བྱེད་པ་མཐོང་བར་བྱེད་པ་ཡིན་ནོ་ཞེས་བསྟན་པ་ནི་སད་བྱེད་ཅེས་བྱ་བ་སྟེ། ནུས་པའི་བག་ཆགས་ཉིད་ལའམ་སད་པར་བྱེད་པའི་དབྱེ་བས་བྱས་པའི་འབྲས་བུ་ཐ་དད་པའི་རིམ་པ་འདིས་བསྟན་པ་ཞེས་བྱ་བའི་དོན་ཏོ། །ནུས་པའི་ཁྱད་པར་ཞེས་བྱ་བ་ནི་དེ་ལས་ཐ་མི་དད་
པའམ། ཤེས་པ་ཕྱི་མའི་བདག་ཉིད་ཀྱང་ངོ་། །བག་ཆགས་ཡོད་པ་ཉིད་དང་ཞེས་བྱ་བ་ནི་ཤེས་པ་ཕྱི་མའི་བདག་ཉིད་དོ། །ཕྱི་རོལ་གྱི་ཉམས་སུ་མྱོང་བ་མེད་པས་དེའི་བག་ཆགས་ཡིན་ནོ་ཞེས་ཟེར་བ་ནི། བག་ཆགས་ཀྱི་དབྱེ་བ་ལ་རྒྱུ་ཅི་ཡོད་ཅེ་ན་ཞེས་བྱ་བའོ། །སྔོན་པོ་ལ་སོགས་པའི་
ངོ་བོ་ཐ་དད་པར་མི་སྣང་ན་འཁྲུལ་པར་མི་རིགས་པར་བསྟན་པ་ནི། དེའི་རྒྱུ་མཚན་ཡོད་པ་ཞེས་བྱ་བ་སྟེ། བག་ཆགས་ཐ་དད་པ་མེད་པ་ཡིན་ཏེ། ཐ་དད་པའི་རྒྱུ་མེད་པའི་ཕྱིར་ཞེས་བྱ་བ་བསལ་བ་ཡིན་ནོ། །ཤེས་པ་ཐ་དད་རྒྱུ་ཡིན་ན། །དེ་ཡི་ཐ་དད་ཇི་ལྟར་ཡིན། །བག་ཆགས་ཐ་དད་
ལས་ཤེ་ན། །ཕན་ཚུན་རྟེན་པ་འཐོབ་པར་འགྱུར། །ཞེས་ཟེར་བ་ནི། དེ་ལྟར་ཕན་ཚུན་རྟེན་པ་ཡི། །ཞེས་བྱ་བའོ། །དེ་ཉིད་མིན་ཞེས་བྱ་བ་ནི་སྐྱེད་བྱེད་ཅེས་བྱ་བ་དང་སྦྱར་རོ། །དེ་ཉིད་ཅེས་བྱ་བ་ནི་སྐྱེད་བྱེད་ཀྱི་ཤེས་པའི་སྟེ། ས་བོན་དང་མྱུ་གུ་ལྟ་བུར་ཞེས་བྱ་བ་ནི་ལན་ཡིན་ནོ། །རྟོགས་
པའི་ངོ་བོ་ནི་དངོས་སུ་རྣམ་པར་ཤེས་པ་མ་ཡིན་ནམ། དེ་ལྟར་ཡང་དོན་གྱི་རྣམ་པ་ཉིད་དུ་ཐ་མི་དད་པ་ནི་དངོས་སུ་བའི་བག་ཆགས་ཙམ་ལས་བྱུང་བའི་ཕྱིར་ཤེས་པ་རྣམ་པར་འབྱེད་པར་མི་བྱེད་ན་དང་བའི་ཤེས་པའི་ངོ་བོ་ལས་ས་བོན་དང་མྱུ་གུའི་རིགས་པ་ཇི་ལྟར་ཡིན། རང་ལས་ཐ་དད་

པ་དང་། དེས་ཐ་དད་པ་དང་ལྡན་པ་མ་ཡིན་ཞིང་། ཡོད་པ་ཉིད་ལ་ཡང་ཚད་མ་དང་བག་ཆགས་པ་ཉིད་ཀྱི་ཚད་མ་དང་ཐ་དད་པ་ལ་ཡང་ཡོད་པ་ཡིན་ནོ་ཞེས་ཟེར་བ་ནི། གལ་ཏེ་དོན་གྱི་བྱེ་བྲག་གི། །ཞེས་བྱ་བའོ། །རྣམ་པར་ཤེས་པའི་བསྐྱེད་བྱའི་འདུ་བྱེད་པ་ནི་བག་ཆགས་ཡིན་ཏེ།
གང་ཉམས་སུ་མྱོང་བ་ཆེས་གསལ་བ་ནི་དྲན་པའི་ས་བོན་འཇོག་པར་བྱེད་དོ་ཞེས་གསུངས་པས་སོ། །དེ་གལ་ཏེ་འཛིན་པ་དང་དྲན་པའི་ངོ་བོའི་ཤེས་པ་འབྱེད་པར་བྱེད་ན་ཡུལ་གྱིས་ཐ་དད་པ་མ་ཡིན་པར་འགྱུར་རོ། །འཛིན་པའི་དབྱེ་བ་བྱེད་ན་ཡང་། །གཟུང་བའི་དབྱེ་བ་སུ་ཞིག་བྱེད། །བསམས་ནས་
བསྐྱེད་པ་ཡིན་ན་ནི། །དྲན་པ་ཙམ་ལས་བྱེད་པར་འགྱུར། །ཞེས་སྨོས་སོ་ཞེས་ཟེར་བ་ནི། དེ་ལ་བག་ཆགས་ཞེས་བྱ་བའོ། །བག་ཆགས་ནི་དྲན་པའི་ས་བོན་མ་ཡིན་གྱི་ཆེས་གསལ་བའི་རྣམ་ཤེས་ཡིན་པར་བསྟན་པ་ནི། འདིར་ནི་རྣམ་ཤེས་སྔ་མ་ཉིད། །ཅེས་བྱ་བའོ། །དེ་ནི་
དེ་ལྟ་བུའི་རྣམ་པ་ཁྱད་པར་ཅན་སྐྱེད་པར་བྱེད་པ་ནི་བག་ཆགས་ཡིན་ཏེ། སད་པའི་ཤེས་པ་བཞིན་དུ་རྨི་ལམ་ལའོ་ཞེས་བསྟན་པ་ནི། དེ་དང་དེའི་རྣམ་པའི་ཞེས་བྱ་བའོ། །འབྲས་བུའི་དུས་ན་དེ་མེད་ཀྱང་དེ་བྱེད་པ་ནི་བག་ཆགས་ཡིན་པར་བརྗོད་དོ་ཞེས་བསྟན་པ་ནི། དཔེར་ན་ལྕགས་
སྒྲོག་གིས་བཅིངས་པས་ཞེས་བྱ་བའོ། །རྟ་ལ་སོགས་པ་དྲན་པའི་ས་བོན་དང་མི་མཐུན་པའི་བག་ཆགས་ཡོད་པ་ཉིད་ཀྱི་ཚད་མ་ལ་བསྟན་ནས་དབྱེ་བ་ལ་བསྟན་པ་ནི། བག་ཆགས་དབྱེ་བས་ཞེས་བྱ་བ་སྟེ། །ཤེས་པའི་བདག་ཉིད་ཡིན་པས་བཟུང་བའི་རྣམ་པ་ནི་བག་ཆགས་ཀྱིས་
བྱས་པ་ཡིན་ཡང་དངོས་སུ་བ་ཁོ་ན་ཡིན་ནོ་ཞེས་བྱ་བའི་དོན་ཏོ། །འདི་ལ་ཡང་ཕྱི་རོལ་གྱི་ཤེས་བྱ་ནི་བདག་ཅག་གི་ཡིན་གྱི། ཁྱེད་ལ་ནི་མེད་པའི་ཕྱིར་ཇི་ལྟར་ཤེས་པ་ཐ་དད་པ་ཡིན་ཞེས་ཟེར་བ་ནི། ཇི་སྟེ་དེར་ཡང་ཞེས་བྱ་བའོ། །ཡུལ་འདི་དང་འབྲེལ་པ་བཞིན་དུ་འདི་མེད་པ་ཁོ་ན་ཡིན་པར་ཤེས་
པར་བསྟན་པ་ནི། འདིར་དམིགས་པ་ཞེས་བྱ་བའོ། །གཞན་དུ་ཞེས་བྱ་བ་ནི་མ་ཡིན་ནོ་ཞེས་བྱ་བར་སྦྱར་རོ། །འོ་ན་དེ་ལ་ཞེས་བྱ་བ་ནི་ཡུལ་འདི་དང་འབྲེལ་པ་ལའོ། །རྟེན་དང་ཅིག་ཤོས་མ་གཏོགས་པར་འབྲེལ་པ་མེད་ན། ལོག་པ་དང་ཅིག་ཤོས་ལ་ཐ་དད་པ་མེད་པར་བསྟན་པ་ནི་གལ་ཏེ་

འབྲེལ་པ་ལའང་ཞེས་བྱ་བའོ། །བག་ཆགས་ནི་དྲན་པའི་ས་བོན་མ་ཡིན་ལ། ཤེས་པ་དག་གི་འབྲས་བུ་དང་རྒྱུའི་ངོ་བོ་བསྒོ་བྱ་སྒོ་བྱེད་ཀྱི་ངོ་བོར་འགྱུར་ཞིང་རིམ་གྱིས་མ་ཡིན་པར་སྐྱེས་པ་དག་དང་སྐད་ཅིག་པ་རྣམས་དང་། སེམས་དང་རྗེས་སུ་འགྲོ་བ་མེད་པར་
འཇིགས་པ་ལ་ཡང་ངོ་། །བསྒོ་བྱ་སྒོ་བྱེད་དག་ལྷན་ཅིག་པ་མ་ཡིན་པའི་ཕྱིར་འདི་བག་ཆགས་མེད་པ་ཡིན་ནོ་ཞེས་ཟེར་བ་ནི། ཇི་སྟེ་ཤེས་པ་སྐད་ཅིག་པ། །ཞེས་བྱ་བའོ། །ཞིག་པ་ནི་སྔ་མ་བཞིན་དུ་ཆོས་སྔ་མ་བས་ཡང་སྔ་རོལ་དུ་མ་སྐྱེས་པའི་ཕྱིར་སྒོ་བར་བྱེད་པ་མ་ཡིན་ལ། སྐད་ཅིག་
མ་སྔ་མ་རྣམས་ཀྱིས་མ་སྐྱེས་པའི་སྐད་ཅིག་པ་ཕྱི་མ་ནི་བསྒོ་བྱ་མ་ཡིན་ནོ་ཞེས་ཟེར་བ་ནི། མ་སྐྱེས་པ་ནི་བསྒོ་བར་བྱ་བ་མ་ཡིན་ལ་ཞེས་བྱ་བའོ། །སྔ་མ་རྣམས་ནི་ཞིག་པའི་ཕྱིར། །ཕྱི་མ་དག་གིས་བསྒོས་པ་མིན། །ཞེས་ཟེར་བ་ནི། འདས་པའི་དོན་ཡང་ཞེས་བྱ་བ་སྟེ། སྒོ་བར་བྱེད་པ་མ་
ཡིན་ནོ་ཞེས་བྱ་བ་ལ་ཡང་ཡང་གི་སྒྲ་ཡིན་ནོ། །ལྷན་ཅིག་སྐྱེ་བ་དག་ལ་ཡང་དེས་བསྐྱེད་པར་བྱ་བ་མེད་པའི་ཕྱིར་ལྷན་ཅིག་པ་ཡིན་ཀྱང་དེ་དག་ལ་འབྲེལ་པ་ཉིད་ཡོད་པ་མ་ཡིན་པའི་ཕྱིར་བག་ཆགས་མེད་པར་ཞེས་ཟེར་བ་ནི། ལྷན་ཅིག་པ་དག་ཀྱང་ཞེས་བྱ་བའོ། །བསྒོ་བར་བྱ་བ་དང་།
སྒོ་བར་བྱེད་པ་མ་ཡིན་ན་སྐད་ཅིག་པ་ཉིད་ནི་བསྒྲུབ་བྱ་ཕྱིན་ཅི་ལོག་ཏུ་སྒྲུབ་པར་བྱེད་པ་ཡིན་ནོ་ཞེས་བསྟན་པ་ནི་བཟློག་པར་སྒྲུབ་པར་བྱེད་པ་ཡིན་ནོ་ཞེས་བྱ་བའོ། །དྲན་པའི་ས་བོན་གྱི་ངོ་བོའི་བག་ཆགས་ཀྱང་བཟུང་བའི་དབྱེ་བས་ཁྱད་པར་ཅན་མ་ཡིན་པ་ཉིད་ཀྱི་འཛིན་པའི་དབྱེ་བ་སྐྱེད་པར་
བྱེད་པ་ཡིན་གྱི་ཉམས་སུ་མྱོང་བ་འབའ་ཞིག་པ་ནི་མ་ཡིན་ཏེ། ཐ་མི་དད་པར་ཐལ་བར་འགྱུར་རོ་ཞེས་བསྟན་པ་ནི། དྲན་ལ་འཛིན་དབྱེ་ཡོད་ཅེས་བྱ་བའོ། །སྐད་ཅིག་པ་ཉིད་དུ་རིམ་གྱིས་འབྱུང་བ་ཉིད་ཀྱི་ཕྱིར་རྒྱུ་དང་འབྲས་བུའི་ངོ་བོ་དང་། བསྒོ་བྱ་སྒོ་བྱེད་ཀྱི་ངོ་བོ་ཡིན་པར་བསྟན་པ་ནི། སྐད་ཅིག་པའི་
སེམས་དག་ལ་ཞེས་བྱ་བ་སྟེ། བསྐྱེད་བྱའི་ཁྱད་པར་ནི་བསྒོ་བྱའི་མིང་ཅན་མ་ཡིན་པའི་ཕྱིར་ཞེས་བྱ་བའི་དོན་ཏོ། །འདི་རྟག་པ་ལ་མི་སྲིད་པར་བསྟན་པ་ནི། དོན་འཐད་རྟག་པ་ལ་མ་ཡིན། །ཞེས་བྱ་བའོ། །སྐྱེ་བའི་དེ་མ་ཐག་ཏུ་འཇིག་པའི་གཞན་ལ་བྱེད་པ་མེད་པ་ཡིན་ཏེ་སྐད་ཅིག་པ་ཡིན་

པའི་ཕྱིར་རོ། །གཉི་ག་ལ་ཡང་ཕན་ཚུན་བྱེད་པ་མེད་དོ་སྙམ་དུ་སེམས་པ་ལ། བསྒོ་བྱ་སྒོ་བྱེད་དངོས་པོ་འདི། །ཞེས་བྱ་བའོ། །འཇིག་པའི་གནས་སྐབས་ཅན་ནི་ཕྱི་མའི་སྒོ་བྱེད་མ་ཡིན་ཏེ་མེད་པའི་ཕྱིར་རོ། །འཇིག་པར་འགྱུར་བའི་དངོས་པོ་ཡང་འཇིག་པར་འགྱུར་བ་གཞན་གྱིས་
ཇི་ལྟར་བསྒོ་བྱར་འགྱུར་སྙམ་དུ་སེམས་པ་ལ། འཇིག་པ་སྔ་མས་ཞེས་བྱ་བའོ། །རྒྱུ་དང་འབྲས་བུ་མ་གཏོགས་པ་བསྒོ་བྱ་སྒོ་བྱེད་ཀྱི་ངོ་བོ་ནི་བརྟན་པ་རྣམས་ཉིད་དུ་འགྱུར་རོ། །གང་གི་ཕྱིར། བརྟན་པའི་དངོས་ལ་བརྟན་དངོས་ཀྱི། །བག་ཆགས་སྒོ་བར་བྱེད་པ་ཡིན་སྙམ་དུ་སེམས་
པ་ལ། བརྟན་པའི་དངོས་ལ་ཞེས་བྱ་བ་སྨོས་ཏེ། ཕན་པ་བྱེད་པ་མ་ཡིན་པ་ནི་སྒོ་བར་བྱེད་པ་མ་ཡིན་ཞེས་བྱ་བའི་དོན་ཏོ། །ཤེས་པ་ནི་རང་ལས་ཐ་མི་དད་པ་ནི་རྣམ་པར་འགྱུར་བ་བྱེད་ན་འདུ་བྱེད་པ་ནི་བྱེད་པ་པོ་ཉིད་ཡིན་ཏེ། ཐ་དད་པ་སྐྱེད་པ་ལ་ནི་དེའིའོ་ཞེས་འབྲེལ་པ་མེད་པའི་ཕྱིར་རོ། །
གཞན་གྱི་དགོས་པ་ཉིད་རིགས་པ་ཡིན་ནོ་ཞེས་ཟེར་བ་ལ། བརྟན་པར་གནས་པ་སྔ་མ་ལ། །ཞེས་བྱ་བའོ། །ཁྱེད་ཀྱི་བློ་ནི་སྐད་ཅིག་ན། །རྗེས་སུ་མཐུན་ཉིད་དེ་ཡོད་མིན། །ཡིན་ལ་སྔ་མའི་རྗེས་སུ་འཇུག་པ་མ་ཡིན་ན་ཕྱི་མ་འདྲ་བ་མ་ཡིན་ནོ་སྙམ་དུ་སེམས་པ་ལ་དེ་དང་རྗེས་སུ་
མཐུན་ཞེས་བྱ་བ་སྨོས་ཏེ། སྔ་མ་ནི་ཕྱི་མའི་རྗེས་སུ་འཇུག་པ་རིགས་པ་མ་ཡིན་ལ། འདྲ་བ་ཉིད་ནི་ཐ་དད་པ་ཉིད་དུ་རྟོགས་པ་ཡིན་ཏེ། དེ་རྟོགས་པའི་ཡུལ་ཡིན་པར་ངེས་པར་བྱེད་ཅེས་བྱ་བའི་དོན་ཏོ། །དེ་མ་ཐག་ཏུ་བསྐྱེད་པ་ནི་འབྲས་བུ་ཉིད་མིན་ལ། དེ་མ་ཐག་ཏུ་ངེས་པའི་སྔོན་དུ་འགྲོ་བ་ནི་རྒྱུ་
ཉིད་ཡིན་ཏེ། མ་སྐྱེས་པ་དང་སྐྱེས་བཞིན་པ་དང་། མཐོང་བ་རྣམས་མེད་པའི་ཕྱིར་རིགས་པ་མ་ཡིན་ཏེ། སྔར་བྱུང་བ་ཐམས་ཅད་བྱེད་པ་པོ་ཉིད་དུ་ཐལ་བར་འགྱུར་བའི་ཕྱིར་རོ། །སྔ་མའི་ཤེས་པ་མ་སྐྱེས་པའི། །འབྲས་བུར་འགར་ཡང་རྩོམ་མི་བྱེད། །དེ་ལ་འཇིག་པ་ཡོད་མིན་ཞིང་། །
རྫོགས་པའང་སྐད་ཅིག་གནས་པ་ཡིན་སྙམ་དུ་སེམས་པ་ལ། རྣམ་ཤེས་ཚད་མས་དེ་ཚེ་ཞེས་བྱ་བ་སྟེ་རྗེས་སུ་འགྲོ་བ་ལ་སོགས་པ་ལས་བྱུང་བའི་རྟོག་པས་རྟོགས་པའི་རྒྱུན་གྱི་ཁོངས་སུ་གཏོགས་པ་པའི་སྐད་ཅིག་མ་རྒྱུ་ཉིད་དུ་ཁས་ལེན་ན། སྔ་མ་ཙམ་ལ་ནི་ཐལ་ཆེས་པ་མ་ཡིན་ནོ་ཞེས་

བྱ་བའི་དོན་ཏོ། །དེའི་ཕྱིར་སྐྱེས་ནས་འཇིག་པའི་ཕྱིར། །སྐད་ཅིག་མ་ལ་འང་རྩོམ་པ་མེད། །ཅེས་བྱ་བ་མི་རིགས་པར་བསྟན་པ་ནི། དེས་ན་སྐྱེས་ནས་ཞེས་བྱ་བའོ། །རྗེས་སུ་འགྲོ་བ་མེད་པར་འཇིག་པ་པ་ཡིན་ན་སྔ་མའི་ངོ་བོ་རྗེས་སུ་འཇུག་པ་མེད་པའི་ཕྱིར་འདྲ་བ་ཉིད་
མ་ཡིན་ཏེ། རྗེས་སུ་འགྲོ་བ་མེད་པར་ཞིག་པའི་ཕྱིར་རྗེས་སུ་མཐུན་པ་ཉིད་གང་ལས་ཡིན་སྙམ་དུ་སེམས་པ་ལ། རྗེས་འགྲོ་མེད་པར་ཞིག་གྱུར་པར། །ཞེས་བྱ་བའོ། །འདྲ་བ་སྐྱེད་པར་བྱེད་ཉིད་ཀྱིས། །བག་ཆགས་ཉིད་ཡིན་ན་མཚན་ཉིད་མི་མཐུན་པ་དག་ལ་བསྐྱེད་པར་བྱ་བ་དང་། སྐྱེད་པར་
བྱེད་པ་དག་གི་ངོ་བོར་མི་འགྱུར་རོ་སྙམ་དུ་སེམས་པ་ནི་གལ་ཏེ་བ་ལང་ཞེས་བྱ་བའོ། །ལན་ནི་གཞན་གྱིས་བར་དུ་ཆོད་ན་ཡང་ཞེས་བྱ་བའོ། །མཚན་ཉིད་མི་འདྲའི་ཤེས་པ་ཀུན། །མཚན་ཉིད་མི་འདྲ་ཉིད་མིན་ན་སྙམ་དུ་སེམས་པ་ལ། གླང་པོའི་ཤེས་པས་སྔ་མའི་ཞེས་བྱ་བའོ། །གང་གི་ལྟ་བ་ལ་
ཡང་ཀུན་གཞིའི་རྣམ་པར་ཤེས་པ་ནི་འཇིག་པའི་རང་བཞིན་གྱིས་འཇུག་པའི་རྣམ་ཤེས་རྣམས་ཀྱིས་ཀུན་གཞི་ལ་བསྒོས་པ་ཡིན་ལ། དེ་རྣམས་བསྐྱེད་པ་ན་ཅིག་ཅར་བསྐྱེད་པའམ་སྣ་ཚོགས་པ་གཅིག་ཏུ་བསྐྱེད་པ་ཡིན་གྱི་རིམ་གྱིས་ནི་མ་ཡིན་ཏེ། ཕྱི་རོལ་གྱི་དོན་མེད་པས་ལྟོས་པ་མེད་པའི་ཕྱིར་རོ། །
ཕྱི་དོན་ཕན་འདོགས་མིན་པའི་ཕྱིར། །གཞན་དོན་གྱི་དབང་མ་བྱས་པས། །རྗེས་འགྲོ་མེད་པར་འཇིག་འགྱུར་ན། །འབྲས་བུ་རིམ་གྱིས་ཇི་ལྟར་བྱེད། །ཅེས་བྱ་བ་སྟེ། གཞན་གྱི་དོན་གྱི་དབང་མ་བྱས་པ་ནི་བསྐྱེད་པར་རང་བཞིན་གཅིག་པ་རྣམས་སོ། །རྒྱུ་ཞིག་ན་ནི་འདོད་པ་ཡི། །འབྲས་བུ་
རྩོམ་པ་གཞན་དུ་མིན། །ཤེས་པ་འདི་ཉིད་དུ་ཞིག་ན། །བག་ཆགས་ཐམས་ཅད་འཇིག་པར་འགྱུར། །ཞེས་བྱ་བ་སྟེ་བརྩམ་པར་བྱ་བ་ཇི་སྙེད་ཡོད་པ་དུས་གཅིག་ཁོ་ན་བརྩམ་པར་བྱ་བའོ་སྙམ་དུ་སེམས་པ་ལ། ཕྱི་རོལ་མེད་ཀྱང་སྨོན་ལམ་གྱི་སེམས་ཀྱི་ཁྱད་པར་ལ་སོགས་པ་རིམ་གྱིས་འབྱུང་
བ་ནི་ཤེས་པ་རིམ་གྱིས་སྐྱེ་བའི་རྒྱུ་ཡིན་པའི་ཕྱིར་རྒྱུན་ཆད་མེད་པར་བསྟན་པ་ནི། ཤེས་པ་གཅིག་ཉིད་ཞིག་པ་ཡིས། །ཞེས་བྱ་བ་སྟེ། བག་ཆགས་རྣམས་ཀྱིས་རིམ་གྱིས་བྱེད་པའི་ལྷན་ཅིག་བྱེད་པ་གཞན་མ་ཡིན་ཞིང་། མཚན་ཉིད་མི་མཐུན་པའི་རྒྱུ་གཞན་ཡང་མ་ཡིན་ན། གང་གིས་

གཞན་དང་འདྲ་བའི་འབྲས་བུར་འགྱུར་ཞེས་གསལ་བ་ཡིན་ནོ་ཞེས་བྱ་བའི་དོན་ཏོ། །མཐོང་ཡང་གཞན་དང་གཞན་པའི་གནས་སྐབས་གཞན་ནི་ཤིང་ཏོག་པི་ཛ་པུ་རའི་མེ་ཏོག་ལ་རྒྱ་སྐྱེགས་ཀྱིས་བསྒོས་པ་འབྲས་བུའི་དུས་སུ་གསལ་བར་བྱེད་པ་ནི། རྒྱུ་གཅིག་ལ་བྱུང་བ་ཡིན་ལ། གནས་
སྐབས་གཞན་ན་བསྒོས་པ་མི་མངོན་པ་ཁོ་ན་འབྲས་བུའི་དུས་སུ་མངོན་པར་གསལ་བར་བྱེད་པ་ནི་མ་ཡིན་ཏེ། སྣང་དུ་རུང་བ་ལན་བརྒྱ་གཤགས་ན་ཡང་དེའི་གནས་སྐབས་ན་མ་དམིགས་པའི་ཕྱིར་རོ། །དམིགས་པར་བྱ་བ་མ་ཡིན་པ་དམིགས་པས་དམིགས་པ་ནི་བག་ཆགས་དེ་ཉིད་ཡིན་པར་
བསྟན་པ་ནི། མེ་ཏོག་ཞིག་པར་ཞེས་བྱ་བའོ། །དམིགས་པ་མ་དམིགས་པ་ནི་ཞིག་པ་ཡིན་ལ། དེའི་ནུས་པ་ཡང་བག་ཆགས་ཡིན་པའི་ཕྱིར་དེ་ལྟ་བུའི་འབྲས་བུ་མ་ཡིན་ནོ། །དེའི་ཕྱིར་འདི་མི་བདེན་ཏེ། བི་ཛ་པུ་རའི་སོགས་མེ་ཏོག །རྒྱ་སྐྱེགས་ཁུ་བས་བསྒོས་པ་གང་། །དེ་ཡི་དངོས་ལ་
འཕོས་ཉིད་ཡིན། །བག་ཆགས་འབྲས་བུ་ལ་གསལ་འགྱུར། །འོ་མ་དང་ཆུ་བ་ལ་སོགས་པ་བཞིན་དུ་རྒྱུད་གཅིག་པ་ནི་འབྲས་བུ་རིམ་གྱིས་འབྱུང་བའི་རིམ་པ་བྱེད་པའི་སད་བྱེད་ཡོད་པ་ཡིན་ནོ་ཞེས་དེའི་ཕྱིར། འདི་དག་ཐམས་ཅད་ལས་ཞེས་བྱ་བ་ལ་སོགས་པ་གསལ་བ་ཡིན་ནོ་ཞེས་བསྟན་པ་ནི། དེའི་
ཕྱིར་འདི་དག་ཐམས་ཅད་ལས་ཞེས་བྱ་བའོ། །ཀུན་གཞི་ཞིག་ཀྱང་བག་ཆགས་གཞན་ལས་བྱུང་བར་ཁས་བླངས་པས་འཇུག་པའི་རྣམ་ཤེས་སྐྱེ་བར་འགྱུར་རོ། །གལ་ཏེ་རྣམ་ཤེས་རྒྱུ་བཞིན་དུ། །བག་ཆགས་རྣམས་ཀྱི་རྒྱུ་ཡང་ནི། །དེའི་རྗེས་བག་ཆགས་ལས་ཤེས་པ། །དེ་ལས་ཀྱང་
ནི་བག་ཆགས་ཡིན། །ཞེས་བྱ་བ་བསལ་བ་ཡིན་ཏེ། ཤེས་པའི་བསྐྱེད་བྱ་ཤེས་པའི་བདག་ཉིད་ཀྱི་ནུས་པའི་བག་ཆགས་ཁས་བླངས་པའི་ཕྱིར་རོ་ཞེས་བསྟན་པ་ནི། བག་ཆགས་ལྡན་རྣམས་ཞེས་བྱ་བ་སྟེ། ཤེས་པ་ལས་ཐ་མི་དད་པ་ཡིན་ན་བག་ཆགས་དང་ཤེས་པ་དག་ཐ་དད་པའི་སྐྱོན་མེད་དོ། །
རེས་འགའ་དེ་དག་ཕན་ཚུན་ནི། །མཚུངས་པ་ཉིད་ནི་བྱེད་པ་ཡིན། །ཞེས་བྱ་བ་བསྟན་པ་ནི། བག་ཆགས་ལས་ཏེ་ཞེས་བྱ་བའོ། །མཚན་ཉིད་མི་འདྲའི་རྒྱུ་གཞན་མིན། །གང་གིས་གཞན་འདྲའི་འབྲས་བུ་ཡིན། །ཞེས་བྱ་བ་ལ་སོགས་པ་ཡང་བསལ་བ་ཡིན་ནོ་ཞེས་བསྟན་པ་ནི། ནུས་

པའི་བདག་ཉིད་ཅན་གྱི་རྒྱུ་ཞེས་བྱ་བའོ། །དེའི་ཕྱིར་ཀུན་རྫོབ་བདེན་པ་འདི། །བརྟགས་པ་ཡིན་གྱི་དངོས་ཡོད་མིན། །ཞེས་བྱ་བའང་ཡིད་ལྡོག་པ་ལ་གནས་པ་ཡིན་གྱི་ངོ་བོ་ལ་གནས་པ་མ་ཡིན་པར་བསྟན་པ་ནི། དེའི་ཕྱིར་ལྡོག་པ་ཞེས་བྱ་བའོ། །ཐ་དད་པ་མ་ཡིན་པ་
ཡང་བསྟན་པ་ཉིད་ཀྱིས་བྱེད་པ་པོ་ཉིད་ཡིན་ནོ་ཞེས་བྱ་བ་བསལ་བ་ཡིན་ནོ། །འདི་ལྟ་བུ་ཡི་དངོས་པོ་ལས། །ལ་ལས་འབྲས་བུ་སྐྱེ་བ་མིན། །ཞེས་བསྟན་པ་ནི། དེའི་འབྲས་བུའི་ཞེས་བྱ་བའོ། །ཤེས་བྱེད་གང་གི་ལ་གནས་པ། །ཤེས་པ་གོམས་པས་ལྡན་པར་འགྱུར། །དེ་ཡི་དེ་ནི་བག་
ཆགས་བརྟེན། །བག་ཆགས་ཀྱང་ནི་དེ་ཉིད་ཡིན། །ཞེས་བྱ་བ་བསལ་བ་ཡིན་པར་བསྟན་པ་ནི། །གང་དག་ཤེས་བྱེད་བརྟན་པ་དང་། །ཞེས་བྱ་བའོ། །དེའི་འདི་ལྟར་བག་ཆགས་མེད་པ་ལ་རིགས་པ་རྣམས་རྒྱལ་བ་ཅན་ཡོད་པ་ཡིན་ནོ། །རིགས་པ་མེད་ཅིང་ཡོད་མིན་བརྟགས་ཡིན་ལ། །
བག་ཆགས་གང་ཡིན་དོན་གྱིས་སེལ་བ་འདི། །ཞེན་ལྡོག་དོན་དུ་སངས་རྒྱས་རྣམས་ཀྱིས་གསུངས། གཞན་དག་དེ་ལ་རྣམ་འགར་འཛིན་པར་འགྱུར། །ཞེས་བྱ་བ་འདི་ལ་ཡང་ལན་ནི། རིགས་པས་འཐད་པའི་ཞེས་བྱ་བའོ། །ཉོན་མོངས་རྒྱ་མཚོ་ཕྲག་དོག་གི། །རྦ་ཀློང་འཁྱིལ་བར་འཁོར་
བ་ཡི། །འགྲོ་རྨོངས་མཐོང་ལས་རྒྱལ་བ་ཅན། །ལམ་དེས་སུ་ཞིག་གྲོལ་མི་འགྱུར། །རྣམ་པའི་བག་ཆགས་ལས་རྣམས་མ་ཡིན་ནམ། ཤེས་པའི་ཡང་དེ་ཡིན་པའི་ཕྱིར་ལ་དེ་ལྟ་ཡིན་དང་གཉི་ག་ཡང་སོ་སོ་བ་ཉིད་ཡིན་ནོ་ཞེ་ན་དེའི་ཕྱིར། རྣམ་པའི་རྣམ་དབྱེ་བས་ཞེས་བྱ་བ་སྨོས་ཏེ། རྣམ་པའི་
རྣམ་པར་དབྱེ་བ་ཡིན་གྱི་ཤེས་པ་ནི་མ་ཡིན་པ་དེའི་ཕྱིར་དབྱེ་བ་ནི་མེད་དོ་ཞེས་བྱ་བའི་དོན་ཏོ། །ཕྱི་རོལ་གྱི་དོན་ཉིད་དང་བྲལ་ན་རིག་པའི་ཁོངས་སུ་གཏོགས་པ་ཐ་མི་དད་པའི་དམིགས་པ་ཅན་གྱི་ཤེས་པ་དམིགས་པ་མེད་པར་བརྗོད་པ་ཡིན་པར་བསྟན་པ་ནི། དེ་ཉིད་ཀྱི་ཕྱིར་ཞེས་བྱ་བའོ། །རང་
ཉིད་ཅེས་བྱ་བ་ནི་ཚད་མའི་མཚན་ཉིད་ཡིན་པའི་ཕྱིར་རོ། །ཚད་མའི་འབྲས་བུ་ནི་སྒྲུབ་པར་བྱེད་པའི་ནུས་པ་ལས་བྱུང་བའོ། །འདིའི་ཕྱིར་ཡང་འདིའོ་ཞེས་དཔེ་མ་གྲུབ་པ་མ་ཡིན་ནམ་ཞེས་ཟེར་བ་ལ། རྩོད་པའི་གཞི་ཞེས་བྱ་བ་སྟེ། ཕ་རོལ་ལ་ཡང་གྲུབ་པ་ཁོ་ན་ཡིན་ནོ། །རྨི་ལམ་གྱི་གོམས་

པའི་རྗེས་སུ་འགྲོ་བ་ཉིད་ཡིན་ཡང་གཞན་ལ་ཡང་གནོད་པ་མེད་པ་དེ་ཅི་ལས་ཡིན་ཞེས་ཟེར་བ་ནི། ཇི་ལྟར་ཁྱབ་པ་ཞེས་བྱ་བའོ། །གོམས་པའི་རྗེས་སུ་འགྲོ་བ་ཉིད་ལ་གནོད་པའི་དོན་ཅན་གྱི་གནོད་པ་ནི་མྱུར་དུ་ཉམས་པ་ཡིན་གྱི་གཞན་གྱི་མ་ཡིན་པར་བསྟན་པ་ནི། རིགས་གང་ཞེས་བྱ་བའོ། །རིགས་
གང་གང་ལས་གྲུབ་པ་ནི་ཞེས་བྱ་བའི་རིགས་པ་བསྟན་པ་ནི་གུས་པར་གོམས་པ་ཞེས་བྱ་བའོ། །སྐད་ཅིག་གིས་ཉམས་པས་གནོད་པ་ཡིན་ན་གོམས་པའི་རྗེས་སུ་འགྲོ་བ་ཉིད་ཀྱིས་རྨི་ལམ་དུ་དེ་ལ་དམིགས་པ་མ་ཡིན་པ་རང་ལ་དམིགས་པ་མ་ཡིན་གྱི་ཤེས་པ་ཉིད་ལ་མ་ཡིན་ནོ་ཞེས་ཟེར་བ་ནི། གལ་ཏེ་
རྨི་ལམ་གྱི་ཞེས་བྱ་བའོ། །སྐད་ཅིག་གིས་ཉམས་པ་གནོད་པར་གྱུར་པ་ཉིད་ནི་རྨི་ལམ་ཡིན་གྱི། གཞན་ལ་མ་ཡིན་ནོ་ཞེས་ཟེར་བ་ནི། རྨི་ལམ་མཐོང་བ་ནི་ཞེས་བྱ་བའོ། །དེ་ཚེ་དེས་སམ་ཞེས་བྱ་བ་ནི་རྨི་ལམ་དང་ལྡན་པའོ། །གཞན་གྱིས་བྱ་བ་ནི་སད་པ་རྣམས་ཀྱིས་སོ། །གནོད་པར་བྱེད་པ་ནི་
ཉམས་པར་བྱེད་པ་སྟེ། ཡུལ་མེད་པའི་སྒོ་ནས་དམིགས་པ་མེད་པ་ཉིད་རང་ལ་དམིགས་པ་ཉིད་དུ་རྟོགས་པར་བྱེད་ན་གོམས་པའི་རྗེས་སུ་འགྲོ་བ་ཉིད་དུ་གོ་བར་བྱེད་པ་ཡིན་གྱི་མེད་པ་ཉིད་དུ་མ་ཡིན་ནོ་ཞེས་ཟེར་བ་ནི། གནོད་བྱེད་ཤེས་པས་ཞེས་བྱ་བའོ། །གོམས་པའི་རྗེས་སུ་འགྲོ་བ་ཉིད་ནི་རྗེས་སུ་
འགྲོ་བ་ལ་སོགས་པ་ལས་ཡིན་གྱི། གནོད་པར་བྱེད་པ་ལས་མ་ཡིན་པར་བསྟན་པ་ནི། གནོད་བྱེད་ཤེས་པས་ཞེས་བྱ་བ་ལ་སོགས་པའོ། །གཞན་དག་གིས་མ་མཐོང་བ་ཉིད་གནོད་པར་བྱེད་པ་མ་ཡིན་ཞིང་མི་དམིགས་པ་ཉམས་པར་བྱེད་པ་མ་ཡིན་ལ་དེའི་ཕྱིར་སྐྱེས་ནས་འཇིག་པ་ཡིན་པར་མི་རིགས་པར་
བསྟན་པ་ནི། དངོས་པོ་མེད་པར་ཞེས་བྱ་བའོ། །འགལ་བའི་ཤེས་པ་གནོད་པར་བྱེད་པ་ཡིན་ནོ་ཞེས་བྱ་བ་འདི་ཡང་མི་དམིགས་པ་ཉིད་ཀྱིས་བྱས་པ་ཡིན་པར་བསྟན་པ་ནི། འགལ་བ་མེད་པར་ཞེས་བྱ་བའོ། །རིགས་པའི་འབྲས་བུ་ནི་སྟོབས་ལ་ལྟོས་པ་ཡིན་གྱི་རང་དབང་བ་ནི་མ་ཡིན་ནོ། །
དེའི་ཕྱིར་ཁྱད་པར་མེད་དོ་ཞེས་ཟེར་བ་ནི་དེས་ན་ཇི་ལྟར་ཞེས་བྱ་བ་སྟེ། དེ་ལས་ཀྱང་ཞེས་བྱ་བ་ནི་རིག་པ་ལ་སོགས་པ་ཉིད་ལས་ཞེས་བྱ་བའི་དོན་ཏོ། །རང་དབང་ནི་ཚད་མ་མ་ཡིན་པས་ཁྱད་པར་དུ་བྱེད་པ་ཉིད་མ་ཡིན་པར་བསྟན་པ་ནི། འབྲས་བུས་ཞེས་བྱ་བའོ། །རིག་པ་བཞིན་དུ་འབྲས་བུ་ཉིད་ཀྱང་

རང་དབང་ཉིད་ཡིན་ནོ་ཞེས་ཟེར་བ་ནི། རིག་པ་མེད་པར་ཞེས་བྱ་བའོ། །འབྲས་བུ་ཉིད་ནི་རང་དབང་མ་ཡིན་གྱི་རང་རིག་པ་ནི་ཡིན་ནོ་ཞེས་བསྟན་པ་ནི། རང་རིག་པས་ཞེས་བྱ་བའོ། །རིག་པ་ཡང་དེ་ཉིད་ཀྱིས་སྐྱེད་པར་བྱེད་པ་ཉིད་ཀྱིས་སོ་ཞེས་བསྟན་པ་ནི། དེ་ནས་འབྲས་
བུ་བཞིན་དུ་ཞེས་པའོ། །དེ་མ་ཐག་པའི་ཁྱད་པར་གྱི་སྐྱེད་པར་བྱེད་པ་ཉིད་ལ་སོགས་པ་དངོས་སུ་བ་མ་ཡིན་པར་བསྟན་པ་ནི། དོན་རིག་ཅེས་བྱ་བའོ། །གང་ཞིག་གཞན་གྱི་ངོ་བོ་འཛིན་པར་བྱེད་པ་ཉིད་ཀྱི་རང་ཉིད་འཛིན་པར་བྱེད་པ་ཉིད་གང་ཡིན་པ་དེ་ནི་སད་པའི་ཤེས་པ་ལ་ཡང་མཚུངས་པར་བསྟན་པ་ནི།
དེ་ཡང་ཤེས་པ་ཞེས་བྱ་བའོ། །ཉལ་བ་ཞེས་བྱ་བ་ནི་གཉིད་འོངས་པའི་སྔ་རོལ་དུའོ། །ལངས་པ་ཞེས་བྱ་བ་ནི་སད་པ་ན་སྟེ་དེའི་ཚེ་ན་དེ་དང་བྲལ་བའི་སེམས་རང་ཉིད་རིག་པ་ཡིན་ནོ། །དེ་ལྟར་འགྱུར་ཞེས་བྱ་བ་ནི་སད་པ་ལ་སོགས་པའི་རྣམ་པར་དབྱེ་བའོ། །རྨི་ལམ་ནི་སྐད་ཅིག་གིས་ཉམས་པའི་
ཕྱིར་དེ་ལས་གཞན་པའི་ཡིན་ཞིང་། གཞན་ལས་ཁྱད་པར་མ་ཡིན་ནམ་སད་པའི་ཤིན་ཏུ་ངེས་པའི་བློ་ཡིན་པའི་ཕྱིར། གནོད་པར་བྱེད་པའི་ཤེས་མེད་ན། །ཤེས་པ་ངེས་པས་དེ་དག་ལ། །ཚད་མ་ལྟར་སྣང་ཉིད་མེད་པ། །དེའི་ཕྱིར་སྟོབས་ནི་བསྟན་པ་ཡིན་སྙམ་དུ་སེམས་པ་ནི། དེར་
རྣམ་པར་མི་གནས་པ་ཞེས་བྱ་བའོ། །རྣམ་པའི་རྣམ་པར་དབྱེ་བ་ལས་བག་ཆགས་ཀྱི་དབྱེ་བ་རྟོགས་པ་འདི་ནི་ཁྱད་པར་ལས་ཀྱང་སྐད་ཅིག་གིས་ཉམས་པ་ལ་སོགས་པའི་སྐྱེད་བྱེད་ཀྱི་ཁྱད་པར་ནི་བསྟན་པ་ལ་སོགས་པ་ཉིད་དུ་གོ་བ་ཡིན་གྱི་ཕྱི་རོལ་ཡོད་པ་དང་མེད་པ་ནི་མ་ཡིན་པར་བསྟན་པ་ནི། བག་
ཆགས་བསྟན་པ་ཡིན་གྱི་ཞེས་བྱ་བའོ། །ཡིད་དུ་འོང་བ་ལ་སོགས་པ་མཐོང་བ་ནི་ཡིད་དུ་འོང་བ་ལ་སོགས་པ་དམིགས་པའོ། །དེ་འདི་ནི་མངོན་སུམ་ལ་སོགས་པའི་ཡུལ་ཕྱི་རོལ་ཉིད་དུ་གནས་པ་སྟེ། དེ་དགག་བྱས་པ་དེ་ཡི་ཕྱིར། །དེ་ལྟར་ན་ཕྱོགས་ལ་གནོད་འགྱུར། །ཞེས་བྱ་བ་ཕྱིན་ཅི་ལོག་
ཡིན་ཏེ། གང་གི་ཕྱིར་བག་ཆགས་ཀྱི་བསྐྱེད་བྱའི་རྣམ་པ་ལས་རང་ཉིད་ཀྱི་རིག་བྱའི་དམིགས་པ་གཞན་མ་མཐོང་ངོ་། །གལ་ཏེ་དམིགས་པ་མེད་པ་ཉིད་ཀྱི་རྗེས་སུ་དཔག་པ་དང་། དེའི་རྩ་བ་ཕྱོགས་དང་། ཅིག་ཤོས་ཀྱི་ཤེས་པ་རང་གི་ཆ་ལ་དམིགས་པ་མ་ཡིན་ཏེ། འདོད་པ་གྲུབ་པའི་ཕྱིར་

དམིགས་པ་ཡིན་པས་སྣ་ཚོགས་པའི་དམིགས་པ་ཡིན་ནོ་ཞེས་ཟེར་བ་ནི། གལ་ཏེ་རྨི་ལམ་དང་རྨི་ལམ་མ་ཡིན་པ་ཞེས་བྱ་བའོ། །ཐ་དད་པ་གང་གི་སྒྲུབ་བྱེད་ཡིན་པ་དེ་རྗེས་སུ་དཔག་པ་ཡིན་པའམ་ཐ་དད་པའི་སྒྲུབ་བྱེད་ཀྱི་མངོན་སུམ་ཡིན་ཏེ། གཞན་དུ་ན་ཐུག་པ་མེད་པའི་ཕྱིར་རོ། །མངོན་སུམ་
དམིགས་པ་མེད་པ་ཡིན། །ཞེས་ཟེར་བ་ནི། ཇི་སྟེ་ཚད་མ་མ་ཡིན་ན། །ཞེས་བྱ་བའོ། །རྗེས་སུ་དཔག་པའི་ཕྱོགས་ལ་ཞེས་ཟེར་བ་ནི། དམིགས་པ་མེད་པ་ཉིད་ཇི་ལྟར་གྲུབ་ཅེ་ན་ཞེས་བྱ་བའོ། །དོན་རང་གི་ངོ་བོས་སྣང་བའི་ཕྱིར་རྗེས་སུ་དཔག་པ་དམིགས་པ་མེད་ཀྱང་མི་སླུ་བ་ཡིན་པའི་ཕྱིར་རྗེས་
སུ་དཔག་པ་ཚད་མ་ཡིན་པར་བསྟན་པ་ནི། དེ་ཚད་མ་ཉིད་ཡིན་པས་ཞེས་བྱ་བའོ། །ཡང་དག་པ་ཉིད་འདི་ཡིན་ཡང་། །རྣམ་པ་དག་ཁྱོད་མི་འདོད་པ། །ཞེས་བྱ་བ་འདི་བསལ་བ་ཡིན་ནོ། །དེ་དམིགས་པ་དང་བཅས་པ་ཉིད་ཡིན་ན་དེ་བཞིན་དུ་གཞན་ཡང་ཡིན་ནོ་ཞེས་བྱ་བའི་རིགས་པ་མཚུངས་པས་
ཐམས་ཅད་དམིགས་པ་དང་བཅས་པ་ཉིད་དམ་ཡང་ན་འདི་ཡང་མ་ཡིན་ནོ་ཞེས་ཟེར་བ་ལ་གལ་ཏེ་རྨི་ལམ་དང་ཞེས་བྱ་བའོ། །དེ་ལ་དམིགས་པ་ཉིད་ཡིན་ན་ཡང་ཇི་ལྟར་ཐ་དད་པ་འགྲུབ་པ་ཡིན་ཞེས་ཟེར་བ་ལ། དེ་གཉིས་ཐ་དད་ཅེས་བྱ་བ་ལ་སོགས་པ་སྟེ། མི་བསླུ་བ་ཅན་གྱི་ངེས་པ་ཐ་དད་པའི་
སྒྲུབ་བྱེད་ནི་མི་སྣང་ངོ་ཞེས་བྱ་བའི་དོན་ཏོ། །འདི་ཞེས་བྱ་བ་ནི་མཚུངས་པ་ཉིད་དུ་སེམས་པའོ། །དོན་དམ་པར་མི་མཐུན་པ་ཉིད་མེད་པ་ཁོ་ན་དཔེ་ལ་དཔེ་ཅན་གྱིའོ་ཞེས་བསྟན་པ་ནི་དེ་ནས་ཕྱིས་ཞེས་བྱ་བ་སྟེ། སྔར་སྣང་བའི་ཁྱད་པར་ལས་མ་ཡིན་གྱི་འཇིག་རྟེན་ལས་ཡིན་ནོ་ཞེས་བྱ་བའི་དོན་ཏོ། །
འཇིག་རྟེན་ལ་གྲགས་པ་ཐ་དད་པའི་རྗེས་སུ་དཔག་པ་ཡིན་པར་བསྟན་པ་ནི། གལ་ཏེ་ཉེས་པ་ཡོད་ན་ཞེས་བྱ་བའོ། །དོན་དམ་པར་གྲུབ་པ་ནི་རྗེས་སུ་དཔག་པ་འཇུགས་པ་ལ་གནོད་པ་ཡིན་པར་བསྟན་པ་ནི། གལ་ཏེ་ཚད་མ་མེད་པ་ན། །ཞེས་བྱ་བའོ། །དེ་ལྟ་མ་ཡིན་ན་ཞེས་བྱ་བ་ནི་གལ་ཏེ་
ཚད་མ་མ་ཡིན་ན་ཞེས་བྱ་བའམ་རིག་བྱེད་མ་ཡིན་པའོ། །འདི་ཉིད་འཇིག་རྟེན་ལ་གྲགས་པ་ཡིན་པར་བསྟན་པ་ནི། དེ་ལྟ་ན་འོ་ན་ཞེས་བྱ་བའོ། །ཕྱི་མ་དོན་དམ་པས་སྔ་མ་འཇིག་རྟེན་ལ་གྲུབ་པ་ལ་གནོད་ན་ཐམས་ཅད་རྗེས་སུ་དཔག་པ་ཉིད་དུ་མི་འབྱུང་བར་བསྟན་པ་ནི། ཆོས་ཅན་ཐུན་མོང་བ་

ཉིད་དུ། །རྟོགས་པ་གང་ཡིན་ཚད་མ་མིན། །དེ་ལྟར་ཡིན་དང་དེ་ལྟ་བུའི། །སྒོ་ཅན་ཕྱི་རོལ་གཞན་ཡང་མིན། །ཞེས་བྱ་བ་ལ་དེའི་ཕྱིར་གཞན་ཡང་མིན་པ་ནི་རྗེས་སུ་དཔག་པ་ཡིན་ཡང་ངོ་། །དེ་ལྟ་བུའི་སྒོ་ཅན་ཚད་མ་མ་ཡིན་པའི་ཆོས་ཅན་རྟོགས་པའི་སྒོ་ཅན་ནི་ཚད་མ་
མིན་ཞེས་བྱ་བར་སྦྱར་རོ། །ཐ་མི་དད་པ་བསྒྲུབ་པ་ནི། དཔེ་ལ་སོགས་པའི་ཐ་དད་པ་དང་འགལ་བ་ཅན་ཡིན་གྱི་འཕེལ་བ་ལ་ནི་མ་ཡིན་ནོ་ཞེས་ཟེར་བ་ནི། གལ་ཏེ་དེའི་ཞེས་བྱ་བའོ། །འདི་ལ་ཡང་ཚད་མ་དང་ཅིག་ཤོས་ཉིད་ཐུན་མོང་བ་དང་ཐུན་མོང་མ་ཡིན་པའི་ཚད་མ་ཉིད་དང་འགལ་བ་ཉིད་
ཡིན་པར་བསྟན་པ་ནི། རང་བཞིན་ཚད་མ་ཉིད་ཅེས་བྱ་བའོ། །དེ་ལ་ནི་ཆོས་ཅན་ལའོ། །དེ་དང་བྲལ་བ་ནི་ཞེས་བྱ་བ་ནི་བསྒྲུབ་པར་བྱ་བཞིན་པ་ཉིད་ཀྱི་ཁྱད་པར་དང་བྲལ་བ་ནི་སྤྱིས་འཛིན་པ་ཡིན་གྱི་ཚད་མ་ནི་མ་ཡིན་ནོ། །དེ་ལས་བཟློག་པར་འཛིན་པ་ན་ཞེས་བྱ་བ་ནི་ཁྱད་པར་ལས་བཟློག་པར་འཛིན་
པ་ལའོ། །དེ་ལས་བཟློག་པའི་གཞལ་བྱ་དྲུངས་ཕྱུང་ན་ཞེས་བྱ་བ་ནི་ཁྱད་པར་ལས་བཟློག་པའི་གཞལ་བྱ་དྲུངས་ཕྱུང་ན་སྟེ་གནོད་པ་ནའོ། །རང་གི་ངོ་བོ་ཉིད་ཀྱིས་ཏེ་སྔ་མས་མ་བཟུང་བ་ནི་སྔ་ནས་ཡོད་པའོ། །འགའ་ཞིག་ཅེས་བྱ་བ་ནི་སྤྱིའི་ཆའོ། །སྤྱིའི་དང་ཁྱད་པར་དག་གི་དབྱེ་བ་ཡིན་ན་གཞན་
དང་གཅིག་ཏུ་འཛིན་པ་མ་ཡིན་པར་ཟེར་བ་ནི་ཆོས་ཐ་དད་པར་ཞེས་བྱ་བའོ། །གཟུང་བའི་སྤྱི་དང་འགལ་བ་ཅན་མ་ཡིན་པའི་ཁྱད་པར་སྒྲུབ་པར་བྱེད་པ་བཞིན་དུ་སྒྲོ་བཏགས་པའི་ཐ་དད་པའི་འགལ་བ་ཅན་ཡིན་ལ། ཐ་མི་དད་པར་སྒྲུབ་པར་བྱེད་པ་འགལ་བ་ཅན་མ་ཡིན་པར་བསྟན་པ་ནི། ཐ་
དད་པར་ནི་ཞེས་བྱ་བའོ། །རྣམ་པར་དབྱེ་བ་ཞེས་བྱ་བའི་བཤད་པ་ནི། ཆོས་ཅན་དུ་བྱེད་པ་ཞེས་བྱ་བ་སྟེ། ཐ་མི་དད་པར་རིག་པ་རྒྱུ་དང་འགལ་བ་ཡིན་ན་ཇི་ལྟར་འབྲས་བུ་ཐ་དད་པ་སྒྲུབ་པར་བྱེད་པ་ཡིན་ཞེས་བྱ་བའི་དོན་ཏོ། །ཤེས་པ་ཉིད་དམིགས་པ་དང་བཅས་པ་ལས་གནོད་པར་བྱེད་པ་
མི་དམིགས་པས་བཟློག་པ་ནི་དམིགས་པ་མེད་པ་ཉིད་ཀྱིས་ཁྱབ་པ་ཡིན་ནོ་ཞེས་བསྟན་པ་ནི་ཇི་ལྟར་རྨི་ལམ་གྱི་ཤེས་པ་དང་ཁྱད་པར་མེད་པའི་ཕྱིར་ཞེས་བྱ་བ་སྟེ། འབྲེལ་པའི་ཕྱིར་ཞེས་བྱ་བ་དང་གཞི་མཐུན་པའོ། །དེ་ཉིད་དམིགས་པ་མེད་པ་ཉིད་ཡིན་ནོ་ཞེས་བྱ་བ་ནི་ཡོད་པ་དང་མེད་པ་ཉིད་ལས་

རྣམ་པར་གྲོལ་བ་ཉིད་ཅེས་བྱ་བའི་དོན་ཏོ། །འགལ་བ་མི་འཁྲུལ་པ་ཅན་ཉིད་ནི་མ་ཡིན་ཏེ། ནུས་པ་མི་མཚུངས་པའི་ཕྱིར་རོ་ཞེས་བསྟན་པ་ནི་དམིགས་པ་དང་བཅས་པ་ཉིད་ཅེས་བྱ་བའོ། །གཞན་པའི་སྐྱེས་བུ་གཞན་གྱིའོ། །དམིགས་བཞིན་པ་ཉིད་དམིགས་པ་ཡིན་པར་རྨི་ལམ་ལ་ཡང་ཡིན་
པའི་ཕྱིར་འབྲེལ་པ་མཚུངས་པ་ཡིན་ནོ་ཞེས་ཟེར་བ་ནི། དེ་ལ་ཡང་ཞེས་བྱ་བའོ། །ཐམས་ཅད་ཀྱི་ཚེ་མེད་པར་འགྱུར་རོ་ཞེས་བྱ་བ་ནི་དུ་བའོ། །ཀིང་ཤུ་ཀའི་ཕུང་པོ་ནི་དུ་བ་མི་བྱེད་ཀྱང་རང་གི་བྱ་བ་བྱེད་པས་ཡོད་པ་ཁོ་ན་ཡིན་གྱི་རྨི་ལམ་གྱི་མཐའ་ཅན་ནི་མ་ཡིན་ནོ་ཞེས་ཟེར་བ་ནི། ཀིང་ཤུ་ཀའི་ཕུང་པོ་བཞིན་
དུ་ཞེས་བྱ་བའོ། །རྣམ་པ་དེ་ལྟ་བུ་ཞེས་བྱ་བ་ནི་འཇིག་རྟེན་ལས་འདས་པའོ། །རྣམ་པར་ཤེས་པ་ཉིད་དོ་ཞེས་བྱ་བ་ནི་བདེ་བ་ལ་སོགས་པ་བཞིན་དུ་རིག་པ་ཙམ་དོན་ཡིན་པ་ཉིད་ཀྱི་ཕྱིར་རོ། །རིག་པ་ཙམ་གྱི་དོན་ཅན་གྱི་བདེ་བ་ལ་སོགས་པ་ཡང་ཕྱི་རོལ་གྱི་དོན་ཅན་གྱི་དོན་ཡིན་ནོ་ཞེས་ཟེར་བ་ནི། དོན་གྱི་རང་
བཞིན་ཉིད་ཅེས་བྱ་བའོ། །གོམས་པའི་སྟོབས་ཀྱིས་བྱུང་བ་ཉིད་ནི། ཕྱི་རོལ་གྱི་ཉེ་བར་ལེན་པ་ཅན་གྱི་མིག་ལ་སོགས་པ་ལ་ཡང་ཡོད་པས་རང་གི་རྟོགས་པའི་ཁྱད་པར་ཡིན་པའི་ཕྱིར། རང་གི་རྟོགས་པ་ཉིད་དོན་ཉིད་ལ་འགལ་བའི་འབྲས་བུ་ཡིན་པར་བསྟན་པ་ནི། མ་ཡིན་ཏེ་ནང་གི་བྱེད་པ་ལ་
རག་ལས་པར་ཞེས་བྱ་བ་སྟེ། ཤེས་པའི་བྱེད་པ་ལ་རག་ལས་པ་ཉིད་ཀྱིའོ། །སད་པ་ལ་ཡང་ཐམས་ཅད་དེ་ལ་རག་ལས་པ་ཉིད་ཡིན་པར་བསྟན་པ་ནི། དེ་ལྟར་ཡང་བློ་ཙམ་དུ་ཞེས་བྱ་བའོ། །རིག་པ་ལ་ནི་དོན་གཞན་ཉིད་ཁྱད་པར་བྱེད་པ་འགལ་བ་ཡིན་པར་བསྟན་པ་ནི། རང་བཞིན་དེ་ནི་ཞེས་བྱ་བའོ། །
དེ་བཞིན་དུ་གཞན་ཡང་ཞེས་བྱ་བ་ནི་འཁྲུལ་པར་འདོད་པའི་ཤེས་པའི་དོན་ཡང་ངོ་། །དེ་བཞིན་དུ་མིག་ལ་སོགས་པ་ཡོད་ན་གཞན་གྱི་ཤེས་པ་ལ་ཡང་སྲིད་དོ་ཞེས་ཟེར་བ་ནི། འོན་ཏེ་ཕ་རོལ་དག་གིས་ཀྱང་ཞེས་བྱ་བའོ། །གོམས་པའི་ཁྱད་པར་ལས་འཆོལ་བ་དང་ཅིག་ཤོས་ལ་སོགས་པའི་
ཁྱད་པར་ཡིན་གྱི། དོན་ཡོད་པ་དང་ཅིག་ཤོས་ལས་མ་ཡིན་པ་བསྟན་པ་ནི། གོམས་པའི་བྱེ་བྲག་གིས་ཞེས་བྱ་བའོ། །དེས་ན་ཞེས་བྱ་བ་ནི་མངོན་སུམ་གྱིས་སོ། །རང་ཉིད་ལས་ཚད་མ་མ་ཡིན་པ་རྣམ་པར་རྟོག་པ་ལ་འབྲེལ་པ་ལས་ཚད་མ་ཉིད་ནི་རྟོག་པ་གཞན་གྱི་གོ་བྱ་ཡིན་ཏེ། འབྲེལ་པ་

གཞན་ཉིད་ལས་ཡིན་པ་ནི་ཐུག་པ་མེད་པ་ཡིན་པར་བསྟན་པ་ནི། འདི་ལས་ཡང་ཕྱོགས་ཉིད་དོ་ཞེས་བྱ་བའོ། །རྣམ་ཤེས་ཕྱི་རོལ་གྱི་བསྐྱེད་བྱ་ཡིན་པར་ཟེར་ན་བག་ཆགས་ཀྱི་བསྐྱེད་བྱ་ཡིན་པར་གཉི་ག་ལ་གྲུབ་པའི་ཕྱིར་ཁས་བླང་བར་འོས་པ་ཡིན་ནོ་ཞེས་དེ་དག་ཙམ་བརྗོད་བྱ་ཡིན་
གྱི་བསྒྲུབ་བྱ་མ་ཡིན་ནོ་ཞེས་བསྟན་པ་ནི། ཕྱི་དང་རྒྱུ་འབྲས་ཞེས་བྱ་བའོ། །བག་ཆགས་ལས་སྐྱེ་བ་ཉིད་དུ་མ་གྲུབ་ཀྱང་སྔོན་པོ་ལ་སོགས་པ་ནི་ཤེས་པ་ཉིད་ཡིན་ཏེ། བདེ་བ་བཞིན་དུ་རང་རིག་པའི་ཕྱིར་རོ་ཞེས་བསྟན་པ་ནི། བག་ཆགས་ཀྱིས་བསྐྱེད་པ་མེད་ཀྱང་ཞེས་བྱ་བའོ། །སྔོན་པོ་ནི་རིག་པའི་
དུས་ཙམ་ལ་ཡོད་པས་དེ་དག་ཐ་མི་དད་པའི་ཕྱིར་སད་པ་ན་ཡང་རྨི་ལམ་དང་མཚུངས་པ་ཡིན་པར་བསྟན་པ་ནི། དེ་དང་མཚུངས་པའི་ཕྱིར་ཞེས་བྱ་བའོ། །རྗེས་སུ་དཔག་པའི་དུས་ན་འབྲེལ་པ་འཛིན་པ་མ་ཡིན་ཏེ། དེའི་ཕྱིར་འབྲེལ་པ་གཟུང་བ་ཡིན་པར་བསྟན་པ་ནི། རྗེས་སུ་དཔག་པའི་དུས་ན་ཞེས་བྱ་བའོ། །
བར་དུ་ཆོད་པའི་མེའི་བསྐྱེད་བྱ་དུ་བ་བཞིན་དུ་བར་དུ་ཆོད་པའི་གོམས་པའི་སད་པ་ཡིན་པར་བསྟན་པ་ནི། བསྒོམ་པ་ཆོད་པར་གྱུར་ན་ཡང་། །ཞེས་བྱ་བའོ། །སད་པ་ན་མཐོང་བ་ཅུང་ཟད་ཉིད་ནི་དེ་ལྟ་བུ་གོམས་པའི་བསྐྱེད་བྱ་ཡིན་གྱི། སྐྱེ་བའི་དང་པོ་ལ་མཐོང་བ་ཡང་ནི་མ་ཡིན་ནོ་སྙམ་དུ་སེམས་པ་ལ།
དེ་ཡང་སྐྱེ་བ་སྔ་མ་ལ་གོམས་པ་དྲན་པ་ཉིད་ལོག་པའི་དེ་མ་ཐག་ཏུ་རྨི་ལམ་མཐོང་བ་ཡིན་པར་བསྟན་པ་ནི། སྐྱེ་བ་གཞན་སོགས་མཐོང་བ་ཡང་། །ཞེས་བྱ་བའོ། །འཆི་བའི་གཉིད་ནི་གཉིད་ལོག་པའོ། །རྨི་ལམ་ནི་མཐོང་བའོ། །དོན་མཐོང་བ་ཞེས་བྱ་བ་ནི་སྐྱེ་བ་འདི་ལའོ། །ཕྱིས་ཀྱི་ནི་མཚན་
མོ་ནི་མ་རིག་པའི་མཚན་མའོ། །དེས་ཆོད་པ་ནི་བསྒྲིབས་པའོ། །ཉིན་མོ་ནི་འོད་གསལ་བའི་རང་བཞིན་གྱི་སེམས་ཙམ་ཉིད་གང་གི་ཡིན་པ་དེ་ཡང་དེ་ཡིན་ལ། རྨི་ལམ་བཞིན་དུ་དེ་ཁོ་ན་ཉིད་འཇུག་པ་མེད་པས་མཐོང་བའི་ཐ་སྙད་མེད་པས་འཇིག་རྟེན་པ་ཡིན་ནོ། །རྨི་ལམ་དུ་མཐོང་བ་གོམས་པ་ལས་
བྱུང་བ་ཉིད་དུ་བསྒྲུབས་ནས་འདི་ལས་ཁྱད་པར་མེད་པའི་ཕྱིར། གཉིད་ཀྱི་དུས་ན་འབྱུང་བ་ཉིད་བསལ་བ་ནི་མ་ཡིན་ཏེ། གོམས་པའི་ཁྱད་པར་ལས་ཞེས་བྱ་བའོ། །འདི་ཡང་ཞེས་བྱ་བ་ནི་སད་པའིའོ། །དམིགས་པ་དང་བཅས་པ་ཉིད་དུ་དམ་བཅས་པ་ནི་མངོན་སུམ་དང་འགལ་བ་ཡིན་ཏེ། སྒྲ་ནི་མཉན་

པར་བྱ་བ་མ་ཡིན་ནོ་ཞེས་ཟེར་བ་ལ། གནོད་པར་བྱེད་པའི་ཤེས་པ་ནི། །ཞེས་བྱ་བ་སྟེ། མངོན་སུམ་སྔོན་དུ་འགྲོ་བ་ཅན་གྱི་རྗེས་སུ་དཔག་པ་ནི་དེ་དང་འགལ་བས་ཚད་མ་མ་ཡིན་ནོ་ཞེས་ཟེར་ན། དེ་སྔོན་དུ་འགྲོ་བ་ཅན་ནི་མངོན་སུམ་དང་འགལ་བ་ཡིན་ན་ནི་མ་ཡིན་ནོ་ཞེས་བྱ་བ་འདི་ཡང་དམ་བཅའ་
བར་འགྱུར་རོ། །དེའི་ཕྱིར་རྗེས་སུ་དཔག་པ་ནི་མངོན་སུམ་ཙམ་དང་འགལ་བ་ཅན་མ་ཡིན་ནོ་ཞེས་བྱ་བའི་དོན་ཏོ། །ཁྱེད་ལ་ཡང་བསྒྲུབ་བྱ་དང་སྒྲུབ་བྱེད་དག་ཕན་ཚུན་བསྟེན་པ་དག་ཇི་ལྟར་མ་ཡིན་ཏེ། མངོན་སུམ་ཡིན་པའི་ཕྱིར་དང་། གཞན་གྱི་བསྒྲུབ་བྱ་མ་ཡིན་པའི་ཕྱིར་རོ་ཞེས་བསྟན་པ་ནི།
འདི་ནི་བཤད་ཟིན་ཏེ་ཞེས་བྱ་བའོ། །འབྱུང་བར་འགྱུར་བ་མྱོང་བ་ཉིད་ཡིན་ནོ་ཞེས་བསྟན་པས་དེ་ཡང་ཚད་མ་ཉིད་ཡིན་པར་ཚད་མས་གྲུབ་པ་མ་ཡིན་པར་བསྟན་པ་ནི། དེ་ཡང་ཐོག་མ་མེད་པ་ཞེས་བྱ་བའོ། །ལོང་བ་བརྒྱུད་པ་ལས་འོངས་པ་ཇི་ལྟར་ཚད་མ་ཉིད་ཡིན་ཞེ་ན། མི་སླུ་བ་ལས་ཡིན་པར་བསྟན་
པ་ནི། དེ་ཡང་མི་སླུ་བ་ལས་ཞེས་བྱ་བ་སྟེ། ལྷག་པར་ཞེན་པར་བྱ་བ་དང་ཕྲད་པའི་ཚད་མ་ཉིད་ནི་ལྷག་པར་ཞེན་པ་དང་ཕྲད་པ་དག་གི་ཡུལ་གཅིག་ཉིད་ལ་ཐ་སྙད་རྟོགས་པ་ན། ཤེས་པ་ཡིན་ཞེས་བྱ་བའི་དོན་ཏོ། །རང་གི་ངོ་བོའི་ཡུལ་ལ་ཞེས་བྱ་བ་ནི་མི་གསལ་བ་ལའོ། །དེ་ལ་ཞེས་བྱ་བ་ནི་ཤེས་
པའི་རང་གི་ངོ་བོ་ལའོ། །དེའི་ཞེས་བྱ་བ་ནི་རྗེས་སུ་དཔག་པའིའོ། །མངོན་སུམ་ཉིད་ཅེས་བྱ་བ་ནི་རང་གི་རིག་པའི་ངོ་བོའོ། །གནོད་པར་བྱེད་པའི་རྗེས་སུ་དཔག་པ་ཡང་རང་རིག་པའི་མངོན་སུམ་ལ་ནི་མ་ཡིན་ཏེ། ལྐོག་ཏུ་གྱུར་པའི་ཡུལ་ཅན་ཉིད་ཀྱི་ཡུལ་མཚུངས་པ་མ་ཡིན་ནོ་ཞེས་ཟེར་བ་ལ་
དེས་ན། རྗེས་སུ་དཔག་པས་ཞེས་བྱ་བ་སྨོས་སོ། །ལྐོག་ཏུ་གྱུར་པ་ལ་ཡང་ཡུལ་མཚུངས་པ་ཉིད་ཇི་ལྟར་ཡིན་ཏེ། མངོན་སུམ་མི་བྱེད་པའི་ཕྱིར་རོ་སྙམ་དུ་སེམས་པ་ནི། ཇི་ལྟར་ལྐོག་ཏུ་གྱུར་པ་ལ་ཞེས་བྱ་བའོ། །འཇུག་པར་བྱེད་པ་ཉིད་ཀྱིས་ཡིན་གྱི་འཛིན་པར་བྱེད་པས་ནི་མ་ཡིན་ནོ་ཞེས་བྱ་བ་ནི་འཛིན་
པ་དང་ཞེན་པ་དག་མེད་ན་འཇུག་པར་བྱེད་པ་ཉིད་མེད་པའི་ཕྱིར་མི་རིགས་སོ་སྙམ་དུ་སེམས་པ་ལ། འདི་ལྟར་ཐ་དད་པའི་ཞེས་བྱ་བའོ། །རྗེས་སུ་དཔག་པས་གནོད་ན་ཞེས་བྱ་བ་ནི་ངེས་པ་ཙམ་གྱིས་ནི་མ་ཡིན་ཏེ། མི་འཛིན་པའི་ཕྱིར་དང་། འབྲེལ་པ་མེད་པའི་ཕྱིར་རོ་ཞེས་བསྟན་པ་ཡིན་ནོ། །དེའི་ཕྱིར་རྗེས་

སུ་དཔག་པ་ནི་འཛིན་པས་གཙོ་བོ་མ་ཡིན་ཏེ། ངེས་པ་ལས་ཞེས་བརྗོད་པར་བྱའོ། །དེ་ཡང་དེ་མེད་ན་ཡང་མ་ཡིན་ཏེ། གོམས་པ་འཛིན་པ་ཉིད་ཀྱིས་འཇུག་པའི་ཕྱིར་དེ་ཉིད་ངེས་པའི་སོ་སོ་བའི་ཐབས་ཡིན་ལ། རྗེས་སུ་དཔག་པ་ལ་ཡང་སྔར་འཇུག་པའི་ནུས་པ་ལས་
ཡིན་ནོ་ཞེས་བྱ་བའི་དོན་ཏོ། །ལྐོག་ཏུ་གྱུར་པའི་དོན་གྱི་རྗེས་སུ་དཔག་པ་ནི་དེ་མེད་པའི་རྗེས་སུ་དཔག་པ་མངོན་སུམ་ལས་བྱུང་བས་གནོད་པ་ཡིན་ཏེ། རྣམ་པར་རྟོག་པ་ཙམ་ལས་བྱུང་བའི་ཕྱིར་རོ་ཞེས་ཟེར་བ་ལ། དེ་ནི་ལོང་བ་བརྒྱུད་པ་ལས་བྱུང་བའི་ཞེས་བྱ་བའོ། །རང་རིག་པའི་མངོན་སུམ་
ལས་བྱུང་བ་ཕྱི་རོལ་མེད་པའི་རྗེས་སུ་དཔག་པ་མ་དམིགས་པ་གང་ཡིན་པ་ནི་རང་རིག་པ་གཉིས་ལས་བྱུང་བའི་ཐ་སྙད་པ་དེ་ནི་གོམས་པ་ལས་མངོན་སུམ་ཡང་ཡིན་ལ། མངོན་སུམ་རྩ་བ་ཡིན་པའི་ཕྱིར་གནོད་པར་བྱེད་པ་མ་ཡིན་པ་ཉིད་དུ་བསྟན་པ་ནི། མངོན་སུམ་དང་དེས་བསླང་བའི་རྗེས་སུ་
དཔག་པ་དག་ལ་ནི་ཞེས་བྱ་བའོ། །ཕྱི་རོལ་གྱི་རྗེས་སུ་དཔག་པ་འབའ་ཞིག་ནི་དེ་མེད་ན་གནོད་པ་མ་ཡིན་ཏེ། ལོག་པར་འཛིན་པའི་ཕྱིར་རང་རིག་པའི་རྗེས་སུ་དཔག་པ་ཡང་ཞེས་རྒོལ་བ་སྔོན་དུ་འགྲོ་བས་བསྟན་པ་ནི། གལ་ཏེ་མངོན་སུམ་ཡང་ཞེས་བྱ་བའོ། །དེའི་ཕྱིར་མངོན་སུམ་མ་ཡིན་པ་ཉིད་ཀྱིས་
རྗེས་སུ་དཔག་པ་ལ་སོགས་པའི་ཡུལ་མ་ཡིན་པའི་ཕྱིར། མངོན་སུམ་ལ་སོགས་པའི་ཡུལ་ཡང་ཕྱི་རོལ་མ་ཡིན་པ་ཉིད་དུ་གནས་པ་ཡིན་ནོ། །དེ་དགག་བྱས་པ་དེ་ཡི་ཕྱིར། །དེ་དག་ཕྱོགས་ལ་གནོད་པར་འགྱུར། །ཞེས་ཟེར་བ་མི་རིགས་པར་བསྟན་པ་ནི། དེས་ན་ཤེས་པ་ཐམས་ཅད་ཅེས་བྱ་བའོ། །
དེ་ལྟ་ཡིན་ན་དཔེ་དེས་ཞེས་བྱ་བ་ནི་གནོད་པའི་བློའི་དཔེས་སོ། །དེ་རང་གི་ངོ་བོ་མ་ཡིན་པ་ལ་དམིགས་པ་ཡིད་ཀྱིས་ཕྱི་རོལ་མ་ཡིན་པ་ཉིད་རིག་པ་ཡིན་ནོ། །དེའི་ཕྱིར། བསླད་པའི་ཤེས་པས་གཟུང་བའི་དོན། །དགག་པར་ཡང་ནི་རིགས་པ་ཡིན། །བཟུང་བ་ཙམ་ལ་གནོད་བྱེད་ན། །རང་གི་ཕྱོགས་ཀྱང་
འགྲུབ་མི་འགྱུར། །ཞེས་བྱ་བ་ནི་ལེགས་པར་སྨྲས་པ་མ་ཡིན་ཏེ། དམིགས་པ་མེད་པར་དེ་ཉིད་དུ་དམིགས་པའི་བློ་རྣམས་ཀྱི་ཤེས་པ་ཉིད་དམིགས་པ་མེད་པ་ཉིད་དུ་མ་ངེས་པ་ཡིན་ཏེ། དེ་རྣམས་དམིགས་བཅས་ཉིད་ཡིན་ནའང་། །དེ་དག་གིས་ནི་མ་ངེས་འགྱུར། །ཞེས་ཟེར་བ་ནི་གལ་ཏེ་དམིགས་

པ་མེད་པ་ཉིད་ཅེས་བྱ་བའོ། །སད་པའི་བློ་དམིགས་པ་དང་བཅས་པ་ཉིད་ཡིན་ན་ཅིག་ཤོས་དམིགས་པ་དང་བཅས་པ་ཉིད་དུ་ཐལ་བར་འགྱུར་བཞིན་དུ་འདི་ཡང་དེ་ལྟར་འགྱུར་བ་ནི་མ་ཡིན་ནོ། །རང་གི་ཆ་ལ་ངེས་པ་གནོད་པར་བྱེད་པའི་མངོན་སུམ་གྱིས་རྗེས་སུ་གཟུང་བའི་ཤེས་པ་དམིགས་པ་དང་བཅས་པ་ཉིད་
ཡིན་ནོ། །གཞན་ཡང་དེ་ལྟ་ནི་མ་ཡིན་ཏེ། ཐལ་ཆེས་པའི་ཕྱིར་རོ་ཞེས་བསྟན་པ་ནི། གལ་ཏེ་མངོན་སུམ་སྔོན་དུ་འགྲོ་བ་ཅན་ཡིན་པའི་ཕྱིར་ཞེས་བྱ་བ་སྟེ། ཐམས་ཅད་སྒྲུབ་པར་བྱེད་པའི་བློ། །གལ་ཏེ་འཁྲུལ་འདོད་དེ་ཡི་ཕྱིར། །ཇི་ལྟར་འདོད་བཞིན་ཀུན་མེད་པའམ། །མ་ཚང་ལ་སོགས་ཐལ་བར་འགྱུར། །
ཞེས་བྱ་བའི་དོན་ཏོ། །མངོན་སུམ་གྱིས་གྲུབ་པ་ལ་ཡང་འདི་དེ་ཚད་མ་ཡིན་ཏེ། ལྟོས་པ་མེད་པའི་ཕྱིར་ཞེས་སྨྲ་བ་པོས་གཞན་དག་ལ་སྨྲ་བ་ནི་དེ་ལྟ་བུའི་ཐ་སྙད་ཡིན་པས་ཚད་མར་བརྗོད་པ་དེས་དོན་སྒྲུབ་པར་བྱེད་པ་ཡིན་ནོ་ཞེས་ཟེར་བ་ལ། འདི་ཐ་དད་པ་ཞེས་བྱ་བ་སྨོས་ཏེ། ཐ་དད་པ་ནི་རང་ལས་སོ། །དམིགས་
པ་མེད་པ་ཉིད་ཀྱི་ཐ་སྙད་ལ་ཚད་མར་ཐ་སྙད་འདོགས་པའི་རྒྱུ་མཚན་བསྟན་པ་ནི། གཞན་ལས་ཞེས་བྱ་བའོ། །ཐ་སྙད་ཀྱི་ངོ་བོའི་བློ་ཡང་བདག་ཅག་གི་ནི་ཡུལ་ལ་དམིགས་པ་ཉིད་ཡིན་ནོ་ཞེས་ཟེར་བ་ནི། གལ་ཏེ་དེ་ཡི་རང་བཞིན་ཞེས་བྱ་བའོ། །ཁོ་བོ་ཅག་གི་ཡང་མི་བསླུ་བ་ལས་དེ་ལྟ་བུའི་ཐ་སྙད་ཡིན་གྱི་
དམིགས་པ་ཉིད་ལས་མ་ཡིན་པར་བསྟན་པ་ནི། དེ་ལ་མི་བསླུ་བའི་ཕྱིར་རོ་ཞེས་བྱ་བ་སྟེ། ཇི་ལྟར་འདོད་པ་དང་ཕྲད་པ་ནི་མི་བསླུ་བ་ཡིན་གྱི་དམིགས་པ་ནི་མ་ཡིན་ནོ་ཞེས་བྱ་བའི་དོན་ཏོ། །དམིགས་པ་མེད་པར་ཡང་དེ་ལ་དམིགས་པ་ཅན་གྱི་བློ་ཡིན་ལ། དེ་ཉིད་ཀྱི་ཕྱིར་རིག་པར་བྱ་བ་དང་རིག་པར་བྱེད་པའི་
རྣམ་པ་འདི་ལ་མེད་དོ་ཞེས་བྱ་བ་ནི་གནས་སྐབས་ཀྱི་རྗེས་སུ་དཔག་པ་ལ་དགོས་པ་མ་ཡིན་པར་བསྟན་པ་ནི། རིག་བྱ་བའི་དངོས་པོ་མེད་པ་ཁོ་ནར་ཞེས་བྱ་བའོ། །རིག་པར་བྱ་བ་མེད་ཀྱང་རིག་པར་བྱེད་པ་ནི་རིག་པར་བྱེད་པ་ཁོ་ན་ཡིན་པར་བསྟན་པ་ནི་རིག་པར་བྱེད་པ་ལྟ་བུའི་རྣམ་པ་གང་ལ་ཡོད་པ་དེ་ནི་རིག་པར་
བྱེད་པའི་རྣམ་པ་ཡིན་ནོ། །རིག་པར་བྱེད་པ་མེད་ན་དེ་དང་འདྲ་བ་ཇི་ལྟར་ཡིན་ཞེས་ཟེར་བ་ལ། འཁྲུལ་པས་ཞེས་བྱ་བ་སྟེ། ཐོག་མ་མེད་པའི་འཁྲུལ་པ་བག་ཆགས་ཀྱིས་སྒྲོ་བཏགས་པའི་རིག་པར་བྱེད་པ་ཞེས་བྱ་བའི་དོན་ཏོ། །དེས་ན་ཞེས་བྱ་བ་ནི་དེ་ཉིད་ལ་ཚད་མ་ཡིན་པའོ། །དེའི་ཕྱིར་མངོན་སུམ་ལ་

སོགས་པའི་ཡུལ་ཕྱི་རོལ་ཁོ་ནར་གནས་པ་ཡིན། དེ་དགག་བྱས་པ་དེ་ཡི་ཕྱིར། །དེ་དག་ཕྱོགས་ལ་གནོད་པར་འགྱུར། །འོན་ཏེ་འདི་ནི་ཤེས་པའམ། །ལས་དང་ཡོད་པ་སོགས་ཡོད་འགྱུར། །ཞེས་བྱ་བ་ལ་སོགས་པ་བསལ་བ་ཡིན་པར་བསྟན་པ་ནི། དམིགས་པ་དང་བཅས་པ་ཉིད་ནི་
ཞེས་བྱ་བ་སྟེ་དངོས་སུ་བའོ། །བདེ་བའི་དུས་སུ་དཀར་པོ་ལ་སོགས་པ་དམིགས་པ་ཁོ་ན་མ་ཡིན་ནམ་ཞེས་ཟེར་བ་ལ་ཐོབ་པར་བྱ་བའི་རང་བཞིན་ཞེས་བྱ་བ་སྨོས་སོ། །ཐོབ་པར་བྱ་བ་ནི་འཇུག་པའི་ཡུལ་ཏེ་དམིགས་པ་ཡིན་གྱི་ཅིག་ཤོས་ནི་མ་ཡིན་ཏེ། །ཐོབ་པ་ལ་འཇུག་པ་མེད་པའི་ཕྱིར་རོ། །སྣང་བ་ནི་རྟོགས་
པ་སྟེ་ཐོབ་པ་ཉིད་དོ། །དེ་ལྟ་མ་ཡིན་ན་ཞེས་བྱ་བ་ནི་དུས་མཚུངས་ནའོ། །ཡང་དང་ཡང་ཞེས་བྱ་བ་ནི་གླང་པོ་ཆེའི་ཞེས་བྱ་བ་ལ་སོགས་པའི་ཤེས་པ་བཟུང་བའི་དོན་དུའོ། །ཇི་ལྟར་ཞེ་ན་ཐོབ་པའི་ཕྱིར་རོ། །ཡུལ་དུ་མ་བྱས་པ་ལ་ཁྱད་པར་མེད་པའི་ཕྱིར་ཐམས་ཅད་ལ་འགྱུར་རོ་ཞེས་ཟེར་བ་ལ། རྒྱུ་དང་
འབྲས་བུའི་དངོས་པོ་འདི་ཞེས་བྱ་བའོ། །འབྲས་བུའམ་རྒྱུ་ཡང་མཐོང་ནས་ངེས་པ་ནི་མ་གོམས་པ་ན་རང་གི་རྒྱུའི་ནུས་པ་ཉིད་ཀྱིས་དེ་ལྟར་ངེས་པའི་རྒྱུ་དེའི་བག་ཆགས་དང་གོམས་པས་ཀྱང་ངེས་པ་ཁོ་ན་བྱེད་པ་ཡིན་ཏེ། ཤེས་པ་གཞན་ཡིན་པའི་ཕྱིར་རང་གི་ངོ་བོའི་ཤེས་པ་ཙམ་ལས་ཐོབ་པའི་ཤེས་
པ་ཡང་མ་ཡིན་ཏེ། འཇུག་པའི་དོན་ཡོད་པའི་ཕྱིར་རོ་ཞེས་བྱ་བ་ནི་རྒྱལ་བ་ཅན་གྱིའོ། །རིག་པར་བྱ་བ་དང་རིག་པར་བྱེད་པའི་རྣམ་པ་འདི་ལ་མེད་དོ་ཞེས་བྱ་བ་ཡང་སྔ་མ་དང་ཕྱི་མ་དང་དེའི་ཚེ་ཡང་རིག་པར་བྱེད་པ་པོའི་རིག་པ་མེད་པ་ལ་ཐ་དད་པ་ལ་སོགས་པ་མེད་པར་བརྗོད་པ་ཡིན་པར་བསྟན་པ་ནི། ཡང་ན་
ཞེས་བྱ་བའོ། །ཐོབ་པར་བྱ་བའི་དོན་བྱེད་པའི་མཐའི་སྐད་ཅིག་ནི་དོན་བྱེད་པར་རིག་པའི་དུས་སུ་གཏོགས་པའི་ངོ་བོ་ཡང་བྱེད་པ་པོ་ཡོད་པ་ཡིན་པར་ཁྱད་པར་མེད་པའི་ཕྱིར་ཞེས་བསྟན་པ་ནི་དུས་མཉམ་པ་ཡང་ཞེས་བྱ་བའོ། །འདི་ལྟར་བརྗོད་པའི་མཚུངས་པ་ནི་སད་པའི་ཤེས་པ་ལ་ཡང་ངོ་། །རྣམ་པར་
ཕྱེ་བའི་མཚན་ཉིད་ནི་རྨི་ལམ་དང་ཅིག་ཤོས་ཚད་མ་དང་ཅིག་ཤོས་ལ་སོགས་པས་སོ། །དེ་ལྟར་རྣམ་པར་ཕྱེ་བ་ཡང་རིག་བྱ་མ་ཡིན་པ་ལ་སོགས་པའི་རྣམ་པ་ཅི་ལས་ཤེས་ཞེས་ཟེར་བ་ལ། བཟུང་བ་དང་ཞེས་བྱ་བ་སྨོས་སོ། །བསླད་པ་ཁོ་ན་ཡིན་ཏེ་ཞེས་བྱ་བ་ནི་འདིར་གྲུབ་པ་ལ་དེ་རྒྱུ་ཉིད་ཡིན་ནོ། །དེ་

ལྟ་ཡིན་དང་རྨི་ལམ་དང་ཅིག་ཤོས་ལ་སོགས་པའི་གཟུང་བ་ལ་སོགས་པ་བདེ་བ་ཁོ་ན་ཡིན་ནོ་ཞེས་ཟེར་བ་ལ། དེས་ན་ཞེས་བྱ་བ་སྨོས་སོ། །གཟུང་བ་ལ་སོགས་པའི་རྣམ་པར་རྟོག་པ་ཙམ་འབའ་ཞིག་ནི་མ་ཡིན་གྱི་རྨི་ལམ་དང་ཅིག་ཤོས་ལ་སོགས་པ་ཡང་ཡིན་ནོ། །ཅི་ལས་ཤེ་ན་རང་གི་ངོ་བོ་ཙམ་ཞེས་
བྱ་བ་སྨོས་སོ། །གཞན་ཞེས་བྱ་བ་ནི་རྨི་ལམ་ལ་སོགས་པ་ཡང་ངོ་། །སྔོན་གྱི་འཕེན་པ་ནི་དེའི་བག་ཆགས་ཀྱིས་སོ། །དེ་ལས་ནི་རྣམ་པར་རྟོག་པ་ལས་སོ། །དེ་ལྟར་ནི་སད་པ་དང་རྨི་ལམ་ལ་སོགས་པས་སོ། །དེ་ནི་འདི་ལྟར་རང་གི་ས་བོན་ཡོངས་སུ་སྨིན་པ་ལས་བྱུང་བའི་རྣམ་པར་རྟོག་པ་
ལས་ཚད་མ་ལ་སོགས་པ་ཉིད་ཕྱི་རོལ་དང་ཅིག་ཤོས་ལ་སོགས་པ་མེད་ཀྱང་ངོ་། །དེའི་ཕྱིར་དོན་གྱིས་སྟོང་པའི་བློ་རྣམས་ཀྱི་དངོས་པོ་མེད་པ་ཉིད་ལ་ཚད་མ་མ་ཡིན་པ་ཉིད་དང་། བསོད་ནམས་དང་སྡིག་པ་ལ་སོགས་པ་དང་། དེའི་འབྲས་བུ་ལ་སོགས་པ་ཐམས་ཅད་བསྟན་པ་ཡིན་ཏེ། དེ་ལྟ་བུའི་
ངོ་བོ་ལ་རང་རིག་པར་བྱ་བ་དང་ཅིག་ཤོས་ཉིད་དུ་ཉམས་སུ་མྱོང་བ་མེད་པའི་ཕྱིར་ཏེ། ཕྱི་རོལ་ཉིད་དུ་ཞེན་པས་སྣང་བ་མ་ཡིན་པའི་ཕྱིར་དང་མངོན་དུ་སེམས་པ་ཙམ་གྱི་བྱེད་པ་ཡིན་པར་ཐ་མི་དད་པའི་ཕྱིར་ཞེས་བྱ་བའི་དོན་ཏོ། །དེ་ཡང་རང་གིས་ཞེས་བྱ་བ་ནི་ངོ་བོར་མི་རྟོགས་པས་གཞན་ལས་ཁྱད་པར་མེད་
པའི་ཕྱིར་རོ། །དེའི་ཕྱིར་རང་རིག་པ་ལས་དེ་ཉིད་ཅེས་བྱ་བའི་དོན་ཉིད་དོ། །དེ་བཤད་པ་ནི་གལ་ཏེ་ཞེས་བྱ་བའོ། །དེས་མ་རྟོགས་པ་མི་གཞན་གྱིས་རིག་པའི་ཕྱིར་མེད་པར་མི་འགྱུར་བ་ཞེས་ཟེར་བ་ལ། གཞན་ཞེས་བྱ་བ་སྨོས་སོ། །དེས་ནི་གཞན་གྱིས་སོ། །དེ་ལས་ཀྱང་གཞན་གྱིས་རིག་པ་ཡིན་ཞེ་ན་
གཞན་གྱིས་ཞེས་བྱ་བ་སྨོས་སོ། །སྤྱིའི་ཞེས་བྱ་བ་ནི་འདྲ་བ་ཉིད་དེ། འདྲ་བའི་བདག་ཉིད་ཀྱིས་སོ། །དེའི་ཡུལ་རྗེས་སུ་དཔག་པ་མ་ཡིན་ཞིང་འདྲ་བའི་ཡུལ་ཅན་དུ་མཐོང་བར་བསྟན་པ་ནི། ཇི་སྤུ་ལྡང་ཞེས་བྱ་བའོ། །ཡུལ་ནི་ལུས་སོ། །གཅིག་ཉིད་ལ་ཞེས་བྱ་བ་ནི་རྗེས་སུ་དཔག་པས་གྲུབ་པ་
ལའོ། །དེ་གཉིས་ལས་ཞེས་བྱ་བ་ནི་ཡུལ་ཐ་དད་པ་ཉིད་ལས་སོ། །ཅིས་མ་ཡིན་ཞེས་བྱ་བ་ནི་ཐ་དད་པ་ཞེས་བྱ་བ་དང་སྦྱར་རོ། །འབྲས་བུ་ཐ་དད་པ་ལས་འཛིན་བྱེད་ཐ་དད་པ་ཡིན་ལ། དེས་བཟུང་བ་བསྟན་པ་ཡིན་པར་བསྟན་པ་ནི། སྤུ་ལྡང་ལ་སོགས་ཞེས་བྱ་བའོ། །བ་སྤུ་ལྡང་བ་ལ་སོགས་པ་

ཐ་མི་དད་པ་ལས་བཟུང་བ་ཐ་མི་དད་པ་ཡིན་ན་འཛིན་བྱེད་ཀྱང་ཐ་དད་པར་མི་འགྱུར་བར་བསྟན་པ་ནི། གལ་ཏེ་སྤུ་ལྡང་ལ་སོགས་ཀྱང་ཞེས་བྱ་བ་སྟེ། བདེ་བ་ལ་སོགས་པ་བཞིན་དུའམ། བ་སྤུ་ལྡང་བ་ལ་སོགས་པ་ཡང་རྟགས་སུ་དབྱེ་བ་མེད་དོ་ཞེས་བྱ་བའི་དོན་ཏོ། །རང་
རིག་པའི་ཁོངས་སུ་གཏོགས་པ་ལས་ཀྱང་བ་སྤུ་ལྡང་བ་ལ་སོགས་པ་ནི་རང་གི་བདེ་བ་མེད་ཀྱང་ཡོད་པའི་ཕྱིར། གཞན་གྱི་བདེ་བའི་ཁྱད་པར་རྟོགས་པ་བཞིན་དུ་གཞན་གྱི་རིག་བྱའི་ཁྱད་པར་རྟོགས་པ་ཡིན་པར་ཟེར་བ་ལ། གལ་ཏེ་ཁོ་བོའི་ཞེས་བྱ་བ་སྨོས་སོ། །གཉི་ག་དུས་གཅིག་ཏུ་རིག་བྱ་
ཡིན་ལ། དུས་ཐ་དད་པ་ལ་ནི་ཐ་དད་པ་ཡིན་ཏེ། གཅིག་རིག་པ་མ་ཡིན་ཡང་རིག་པ་ཡིན་པར་ཟེར་བ་ནི། གལ་ཏེ་དེར་ཡང་ཞེས་བྱ་བ་སྨོས་སོ། །དུས་ཐ་དད་པ་མ་ཡིན་པ་བཞིན་དུ་ཐ་དད་པ་ལ་ཡང་རྟགས་ཐ་མི་དད་པས་ཐ་མི་དད་པ་ནི་དུས་ཐ་དད་པས་བསྒྲིབས་པ་མ་ཡིན་པར་བསྟན་པ་ནི། ངོ་བོ་
ཉིད་ཀྱིས་དབྱེར་མེད་ལ་ཞེས་བྱ་བའོ། །རྟགས་དང་དུས་དག་ཐ་མི་དད་པ་དང་ཐ་དད་པ་དག་གིས་གཉི་གའི་བདག་གཅིག་ཡིན་ནོ་ཞེས་ཟེར་བ་ནི། དེར་ཡང་ཐ་དད་མེད་པའང་ཡིན། །ཞེས་བྱ་བའོ། །གཅིག་གི་ཚེ་ཉིད་དུས་ཐ་མི་དད་པ་ཉིད་ཡིན་ཡང་མངོན་སུམ་ཉིད་ཡིན་ཏེ། དེ་ཉིད་ཡོད་པའི་ཕྱིར་རོ་
ཞེས་བསྟན་པ་ནི། དེ་ནི་ལྐོག་གྱུར་ཞེས་བྱ་བ་སྟེ། དེའི་ཚེ་ཡང་གཉི་ག་རིག་པར་འགྱུར་རོ་ཞེས་བྱ་བའི་དོན་ཏོ། །རྟགས་ཐ་མི་དད་པ་ནི་སྔ་ན་ཡང་ཐ་མི་དད་པ་ཡིན་ན་མངོན་སུམ་དང་འགལ་བར་བསྟན་པ་ནི། རིག་པ་ཞེས་བྱ་བའོ། །ལྐོག་ཏུ་གྱུར་པ་ཡིན་ཞེས་བྱ་བ་ནི་བཤད་ཟིན་ཏོ། །གལ་ཏེ་ཞེས་བྱ་བ་དང་
རིག་པ་ཞེས་བྱ་བ་ནི་ཕན་ཚུན་དུའོ། །གཉི་ག་ཅིག་ཅར་སྣང་བ་ན་མངོན་སུམ་གྱི་རིག་བྱ་གཅིག་ཡིན་གྱི་ཕན་ཚུན་སྤངས་པ་མ་ཡིན་ནམ་ཞེས་ཟེར་བ་ནི། གལ་ཏེ་ཐུན་མོང་བཞིན་དུ་ཞེས་བྱ་བ་སྟེ། རྟོགས་ནས་ངེས་པ་ལ་སྔོན་པོ་བཞིན་དུ་ཐེ་ཚོམ་མ་ཡིན་ཞེས་བྱ་བའི་དོན་ཏོ། །ཚད་མ་གཞན་གྱིས་ནི་
ཚིག་ལ་སོགས་པས་སོ། །རང་གི་སྣང་བ་ཉིད་ནི་ཉན་པ་པོའི་འོ། །ཐུན་མོང་བ་ཉིད་ཀྱི་ཉན་པ་པོའི་ཚིག་ལ་སོགས་པའི་རྟོགས་པ་ནི་སྨྲ་བ་པོ་ཡིར་ཡང་འགྱུར་ལ། དེ་བཞིན་དུ་ཉན་པ་པོའི་ཤེས་པ་སྔོན་དུ་འགྲོ་བའི་ཚིག་ལས་སྨྲ་བ་པོ་ཤེས་པ་སྔོན་དུ་འགྲོ་བའི་ཚིག་ལ་དེ་ལས་ཀྱང་འདིའི་ཡིན་པར་ཟེར་

བ་ནི། དེས་ཀྱང་ཞེས་བྱ་བ་སྟེ། སྨྲ་བ་པོས་ཀྱང་ངོ་། །ཕན་ཚུན་བསྟེན་པ་ཡིན་པར་བསྟན་པ་ནི་མངོན་སུམ་གྱིས་ཞེས་བྱ་བའོ། །མངོན་སུམ་གྱིས་ངེས་པ་ལ་ཡང་ཚིག་ལ་དགོས་པ་མེད་པར་བསྟན་པ་ནི། མངོན་སུམ་གྱིས་ཞེས་བྱ་བའོ། །མངོན་སུམ་གྱིས་མ་རྟོགས་པ་ལ་ཚིག་ཡིན་པར་བསྟན་ཏེ།
འདིའི་ཚད་མ་ཉིད་ནི་ཚིག་ལ་ངེས་པའི་ཕྱིར་དང་། གཞན་དུ་ངེས་པ་མ་ཡིན་པའི་ཕྱིར་རོ་སྙམ་དུ་སེམས་པ་ལ། གཞན་ཡང་མངོན་སུམ་ཞེས་བྱ་བའོ། །རྒོལ་བ་གཞན་ལ་ཕྱི་མ་དང་ཕྱི་མ་ཐམས་ཅད་དུ་བསྡུས་པ་ནི་མ་ཡིན་ནོ། །རེ་རེ་ཞིང་ཚད་མ་མ་ཡིན་པ་ནི་བསྡོམས་ཀྱང་ཚད་མ་ཉིད་མ་ཡིན་པར་
བསྟན་པ་ནི། རབ་རིབ་ཅན་གཉིས་ཞེས་བྱ་བའོ། །ཤེས་པ་ཉིད་ཡིན་པས་ཞེས་བྱ་བ་ནི་རིག་པར་བྱ་བ་མ་ཡིན་པའི་སྔོན་པོ་ལ་སོགས་པ་རིག་པར་བྱེད་པ་བཞིན་དུ་རྣམ་པ་གང་གི་ཡིན་པ་དེ་བློ་ཡིན་ལ། དེར་ཡང་མངོན་པར་སེམས་པ་ལས་མ་གཏོགས་པར་བློའི་ངོ་བོ་རྟོགས་བྱ་དང་བྲལ་བ་
ཡིན་ནོ། །དེ་ཁོ་ན་ལྟར་ནི་མངོན་པར་སེམས་པ་ཇི་ལྟ་བའོ། །དེ་ཉིད་ལ་ཞེས་བྱ་བ་ནི་རིག་པ་གཞན་དོན་མེད་པའི་ངོ་བོར་བྱེད་པའི་ཕྱིར་རོ། །དོན་མྱོང་བ་ཡོད་པ་མ་ཡིན་པ་ནི་ཕྱི་རོལ་གྱིའོ། །སྨྲས་པ་གང་ཡིན་པ་ཞེས་བྱ་བ་ནི། ཁྱེད་ཀྱིས་གཟུང་དང་འཛིན་པ་དག །གཅིག་པར་འདོད་པ་འདི་
མིན་ཏེ། །དེ་ལྟའི་བདག་ཉིད་གཅིག་ཉིད་ན། །ཁྱོད་ལ་དཔེ་ནི་འགའ་ཡང་མེད། །ཅེས་བྱ་བའོ། །བཟློག་པ་མེད་པ་ནི་བཟུང་བ་དང་འཛིན་པའི་ངོ་བོ་དབྱེ་བ་མེད་པ་ལའོ། །དེའི་ཕྱིར་ཞེས་བྱ་བ་ནི་གལ་ཏེ་རང་གི་ཆ་གཟུང་བ་གསལ་བར་བཟློག་ནུས་པ་དེའི་ཚེ་གཟུང་བ་བཟློག་པའི་ཁྱེད་ཀྱི་ཕྱོགས་
དགག་པ་ཡིན་ནོ་ཞེས་བཤད་པ་ཡིན་ལ་ཕྱོགས་དེ་ནི་ཞེས་བྱ་བ་ནི། མངོན་སུམ་ལ་སོགས་པ་ཡི་ཡུལ། །ཕྱི་རོལ་ཉིད་དུ་གནས་པ་ཡིན། །དེ་དགག་བྱས་པ་དེ་ཡི་ཕྱིར། །དེ་དག་གི་ཕྱོགས་ལ་གནོད་འགྱུར། །ཞེས་བྱ་བའོ། །ཤིན་ཏུ་ངེས་པས་དེ་དག་ལ། །གནོད་པའི་ཤེས་པ་མེད་པ་ན། །
ཚད་མ་ལྟར་སྣང་ཉིད་ཡོད་མིན། །དེ་ཕྱིར་སྟོབས་ནི་བརྗོད་པ་ཡིན། །ཞེས་ཟེར་བ་ནི་ཤིན་དུ་རྣམ་པར་ངེས་པའི་ཕྱིར་ཞེས་བྱ་བའོ། །སད་པའི་བློ་ནི་ཀ་བའོ་ཞེས་བྱ་བའམ། རྩིག་པའོ་ཞེས་བྱ་བར་ཤིན་ཏུ་ངེས་པ་ནི་ཇི་ལྟར་ཕྱིན་ཅི་ལོག་པར་འགྱུར་རོ་ཞེས་ཤིན་ཏུ་རྣམ་པར་ངེས་པ་སྨོས་པས་སོ། །

དམིགས་པ་མེད་པ་ཡིན་ཏེ་ཤེས་པ་ཡིན་པའི་ཕྱིར། རྗེས་སུ་དཔག་པ་འདི་ལས་སྣང་བ་དྲན་པ་དག་གི་དངོས་པོའི་ངེས་པ་རྟོགས་པའི་བདག་ཉིད་ཀྱི་སྔོན་པོ་ལ་ཡིན་གྱི་རྟོགས་པ་མ་ཡིན་པའི་བདག་ཉིད་ལ་ནི་མ་ཡིན་ཏེ། ཡུལ་དུ་མ་བྱས་པ་ལ་མི་རིགས་པའི་ཕྱིར་རོ། །
སྔོན་པོ་བདག་གིས་རིག་གི་ཞེས་བྱ་བ་ཡང་ལས་ལ་སོགས་པའི་རྣམ་པར་དབྱེ་བ་ཅི་ནས་ཀྱང་སྣང་བ་ཁོ་ན་ཡིན་ནོ། །དེ་ལྟ་ཡིན་དང་རིག་པའི་བདག་ཉིད་ཁོ་ན་ཡིན་པར་བསྟན་པ་ནི། ཤིན་ཏུ་རྣམ་པར་ངེས་པ་ཉིད་ཅེས་བྱ་བའོ། །བཟུང་བ་ཙམ་ལ་གནོད་པ་ནི། །རང་གི་ཕྱོགས་ཀྱང་འགྲུབ་མི་
འགྱུར། །ཞེས་བྱ་བ་འདི་ལ་བསྟན་པ་ནི། གཟུང་མེད་ཅེས་བྱ་བ་སྟེ་སྔོན་པོའོ་ཞེས་རང་རིག་པ་ལས་ཉིད་འཛིན་པ་ཁོ་ན་ཡིན་གྱི་དེ་ཉིད་ནི་མ་ཡིན་ནོ་ཞེས་བྱ་བའི་དོན་ཏོ། །བཟུང་བ་ནི་མངོན་སུམ་གྱིས་རྟོགས་པའོ། །མ་བཟུང་བ་ནི་ཞེས་བྱ་བ་ནི་དེའི་འཛིན་པ་ཅན་ཡང་དམིགས་པ་མེད་པ་ཉིད་ཡིན་
ནོ། །ཁྱད་པར་དང་ཁྱད་པར་ཅན་དག་གི་ཆོས་དང་ཆོས་ཅན་ནོ། །གང་ཡང་རུང་བ་ཞེས་བྱ་བ་ནི་མ་གྲུབ་པ་ཉིད་དོ། །ཐ་དད་འཛིན་པ་ལས་ཞེས་བྱ་བ་ནི་ཕྱིས་སྟེ། སྔར་ནི་བདག་མེད་པ་རྟོགས་པ་ལས་ཏེ་ཕྱོགས་སྔ་མ་བཞིན་དུའོ། །སྔར་དེ་ཉིད་ལས་ཐ་དད་པ་ཡིན་ན་ཕྱིས་ཇི་ལྟར་གཞན་དུ་འགྱུར་
ཞེས་ཟེར་བ་ལ། ལྡོག་པ་ཞེས་བྱ་བ་སྨོས་ཏེ་སྔ་ན་ཡང་དེ་ཉིད་མ་ཡིན་ནོ་ཞེས་བྱ་བའི་དོན་ཏོ། །མ་སོན་ཏམ་ཞེས་བྱ་བ་ལ་སོགས་པ་ནི་སོང་བའི་རྗེས་སུ་འབྲེངས་པའོ། །ཡུལ་དེ་སྐྱེ་བའི་གནས་སྤྱི་ལ་སོགས་པ་གང་གི་ཡིན་པ་དེའོ། །དེ་ཉིད་ནི་སྔར་ཡང་སྒྲ་དང་རྟོགས་པ་དག་ལས་ལྡོག་པའི་ཡུལ་
ཅན་ཉིད་ཀྱིས་དམིགས་པ་མེད་པའི་ཕྱིར་གཉི་ག་ལ་ཡང་རང་གི་ཚིག་གིས་གནོད་པ་ཡིན་པར་མི་རིགས་པར་བསྟན་པ་ནི། འཆད་པོ་ཉན་པའི་ཞེས་བྱ་བའོ། །ལྡོག་པའི་ཡུལ་གྱི་རྣམ་པར་རྟོག་པའི་དབྱེ་བས་ཆོས་དང་ཆོས་ཅན་ཐ་དད་པ་ཡིན་ཡང་། དམ་བཅས་དོན་ནི་མཛེས་པ་ལ། །དེ་ཕྱིར་
ངེས་པར་བརྟགས་པ་མེད། །ཅེས་བྱ་བ་མི་རིགས་པར་བསྟན་པ་ནི། ཡོད་ཡིན་པ་ཞེས་བྱ་བའོ། །དམིགས་པ་མེད་པ་ཞེས་བྱ་བའི། །ཞེས་བྱ་བ་ནི་སངས་རྒྱས་པའོ། །གལ་ཏེ་དངོས་མེད་ཅེས་བྱ་བ་ནི་རྒྱལ་དཔོག་པའི་སྟེ། བློའི་ཡུལ་ཉིད་ཀྱི་དངོས་པོ་ཉིད་ཅེས་བྱ་བའོ། །མངོན་སུམ་གྱི་བློའི་

ཡུལ་ཉིད་ནི་རྣམ་པར་རྟོག་པའི་མ་ཡིན་ཏེ། དངོས་པོ་མ་ཡིན་པའི་འདས་པ་ལ་སོགས་པ་ཡང་འབྱུང་བའི་ཕྱིར་རོ་ཞེས་བསྟན་པ་ནི་འདི་ནི་བཤད་ཟིན་ཏོ་ཞེས་བྱ་བའོ། །དེ་ཉིད་ཀྱི་ཕྱིར་ཏེ་ཞེས་བྱ་བ་ནི་རྟོག་པའི་ཡུལ་ཉིད་ཡིན་པའི་ཕྱིར་རམ་ཡོད་པ་ཉིད་ཀྱི་ཕྱིར་རོ། །ཡོད་པའི་ངོ་བོ་སྣང་བའི་ཕྱིར་རྟོགས་
པ་མ་ཡིན་པར་བསྟན་པ་ནི། དངོས་པོ་ལ་ཞེས་བྱ་བའོ། །དེ་ལྟར་ཞེས་བྱ་བ་ནི་རྟོག་པ་ཉིད་ཡིན་ནའོ། །དངོས་པོའི་ངོ་བོ་མ་ཡིན་ན་ནི་མི་སྣང་བ་ཡིན་ཏེ། མེད་པ་བཞིན་དུ་ངོ་བོ་མེད་པའི་ཕྱིར་རོ། །གཞན་དུ་ན་མེད་པ་ཞེས་བྱ་བར་རྗེས་སུ་བརྗོད་པར་མི་རིགས་སོ། །གཞན་སེལ་བའི་རྗེས་སུ་བྱེད་
པ་ལས་དེ་ཉིད་མེད་པར་རྟོགས་པ་མ་ཡིན་ནམ་ཞེས་ཟེར་བ་ལ། མེད་ལ་ཞེས་བྱ་བའོ། །གཞན་སེལ་བ་ཉིད་མེད་པའི་ཕྱིར་དང་། སྒྲའི་སྦྱོར་བ་མི་དམིགས་པའི་ཕྱིར་རྗེས་སུ་དཔག་པ་དམིགས་པ་མ་ཡིན་ནོ་ཞེས་ཟེར་བ་ལ། ཇི་སྟེ་ཤེས་པ་ཞེས་བྱ་བའོ། །དངོས་པོ་ལ་སོགས་པ་རྣམས་ལ་
འགལ་བར་འགྱུར་རོ་ཞེས་ཟེར་བ་ལ། ལན་འདེབས་པ་ནི་གལ་ཏེ་རྟོགས་པས་ཞེས་བྱ་བ་སྟེ། རང་གི་བདག་ཉིད་ལ་གནས་པའི་རང་གི་ངོ་བོ་རིག་པའི་བྱེད་པ་ནི་ཡུལ་གཞན་ལ་མ་ཡིན་ཏེ། བྱེད་པའི་ཡུལ་གཞན་རང་གི་ངོ་བོའི་ཡུལ་ཡིན་པ་ཉིད་ཀྱིས་ཕྱི་རོལ་མེད་ཀྱང་དངོས་པོ་ལ་སོགས་པ་
ཡོད་པ་ལ་འགལ་བ་མེད་དོ་ཞེས་བྱ་བའི་དོན་ཏོ། །ལས་ལ་ཡིན་གྱི་སྒྲོ་བཏགས་པ་དེའི་ངོ་བོས་གཞན་གྱིས་དམིགས་པར་བྱེད་པ་ཞེས་བྱ་བ་ནི་དམིགས་པ་མེད་པ་ཉིད་ཡིན་ན་ཇི་ལྟར་ཡིན། གལ་ཏེ་ལས་ཡིན་ན་ནི་གྲུབ་པ་ལ་སྒྲུབ་པ་ཡིན་ནོ། །དེ་བསྟན་པ་ནི་ལས་ཡིན་ནོ་ཞེས་བྱ་བའོ། །རྟོགས་པ་མེད་
དོ་ཞེས་བྱ་བས་དམིགས་བྱ་འགེགས་པ་བཀག་པ་ཡིན་ནོ། །ཅི་ལས་ཤེ་ན། རང་གི་ངོ་བོས་ཞེས་བྱ་བ་སྟེ། ཐ་དད་པའི་འཛིན་པས་སོ། །ངེས་ཞེས་བྱ་བ་ནི་གོམས་པ་ལས་སོ། །ཕྱི་རོལ་མངོན་པར་འདོད་པ་དང་རང་གི་བདག་ཉིད་ལ་ཡང་མཐོང་ངོ་ཞེས་བསྟན་པ་ནི་ངའོ་སྙམ་པ་ཞེས་བྱ་བའོ། །
བདེ་ཅན་ཞེས་བྱ་བ་ནི་རང་ཉིད་རིག་པ་ལ་དམིགས་པའོ། །དེ་དག་ཙམ་མི་དམིགས་པའི་རྗེས་སུ་འབྲངས་པའི་རྣམ་པར་རྟོག་པ་ནི་འདི་རང་དབང་དུ་འཛིན་པ་མ་ཡིན་པར་བསྟན་པ་ནི། དབང་པོ་ལ་སོགས་པ་ཞེས་བྱ་བའོ། །སེམས་པ་ཅན་མ་ཡིན་པ་རྣམས་ནི་ནུས་པ་མེད་པའི་ཕྱིར་འདི་རྣམས་

ཀྱི་སྐུལ་བྱེད་རྗེས་སུ་དཔོག་པ་ཡིན་ལ། དེ་ནི་བདག་ཉིད་ཡིན་ནོ་ཞེས་ཟེར་བ་ནི། གང་གིས་ཞེས་བྱ་བའོ། །སྐུལ་བྱེད་ཡོད་པ་ལས་ན་དབང་པོ་ལ་སོགས་པ་རྣམས་ལས་གཞན་པ་ནི་རྗེས་སུ་དཔག་པའི་ཤེས་པས་རིག་པ་མ་ཡིན་ནོ་ཞེས་བསྟན་པ་ནི། གཞན་དུ་རིག་
མེད་ཅེས་བྱ་བའོ། །དེ་ཉིད་ཅེས་བསྟན་པ་གསལ་བར་བྱེད་པ་ནི་བློའི་ངོ་བོ་ཞེས་བྱ་བའོ། །དེའི་འདུ་བྱེད་པའམ་ཞེས་བསྟན་པ་ནི། སྔ་མ་སྔ་མར་ཞེས་བྱ་བའོ། །དབང་པོ་ལ་སོགས་པའི་བློའི་སྐྱེད་བྱེད་རིག་བྱ་ཡིན་ནོ་ཞེས་ཟེར་བ་ནི། བདེ་དབང་ཞེས་བྱ་བ་སྟེ། དབང་པོ་ནི་དེའི་རྣམ་པ་ཅན་
གྱི་བློ་ལས་གཞན་མ་ཡིན་ནོ་ཞེས་བྱ་བའི་དོན་ཏོ། །བློ་ཉིད་ལས་བློ་གཞན་རྣམ་པ་དང་ལྡན་པ་ཡིན་པར་བསྟན་ནས། རིམ་མ་ཡིན་པ་ལ་ཡང་རིག་བྱ་རིག་བྱེད་དག་མེད་པ་ཡིན་ཏེ། ཕན་ཚུན་བྱེད་པ་མེད་པའི་ཕྱིར་རོ་ཞེས་བསྟན་པ་ནི། དུས་མཉམ་པར་ནི་ཞེས་བྱ་བའོ། །ཤེས་པའི་བདག་ཉིད་
མ་ཡིན་པའི་དེ་མ་གྲུབ་པ་ཡིན་ཏེ། སྣང་བའི་བདག་ཉིད་ཡིན་པའི་ཕྱིར་རོ་ཞེས་བསྟན་པ་ནི། གཟུགས་ལ་སོགས་པ་ཞེས་བྱ་བ་སྟེ། སྐྱེས་བུ་རེ་རེ་ཞིང་ཤེས་པ་ཐ་དད་པས་དེའི་བདག་ཉིད་ཀྱི་སྔོན་པོ་ནི་ཉེ་བ་དང་ཅིག་ཤོས་དག་ལ་གཅིག་གི་ངོ་བོར་སྣང་བ་མ་ཡིན་ནོ་ཞེས་བྱ་བའི་དོན་ཏོ། །བྱེད་པ་
པོ་ཉིད་ལ་སོགས་པའི་བཤད་པ་ནི། དེ་དག་གིས་ཀྱང་ཞེས་བྱ་བའོ། །སྒྲ་ཤ་ལྷག་ཙམ་ནི་དམིགས་པ་མེད་པའི་ཤེས་པ་ཡང་ངོ་། །དེ་ལྟར་ཤིན་ཏུ་ལེགས་པར་བརྗོད་པ་ཞེས་བྱ་བ་བཤད་པ་ལ་དོན་ནི་ཕྱི་རོལ་ཏེ། དམིགས་པ་མ་ཡིན་པ་ཉིད་དེ་སྒྲ་རྣམས་ནི་དོན་ལ་རེག་པ་མ་ཡིན་པའི་ཕྱིར་
ལྡོག་པའི་དབྱེ་བ་བཀར་ནས་མངོན་པར་འདོད་པ་ལས་རྗོད་པར་བྱེད་པ་ཉིད་མ་ཉམས་པ་ཡིན་པར་བསྟན་པ་ནི། ལྡོག་པའི་སྒྲའི་ཞེས་བྱ་བའོ། །བཀར་བའི་ལྡོག་པ་ཉིད་བསྒྲུབ་བྱར་ཐལ་བར་འགྱུར་བ་མ་ཡིན་ཏེ་ཕྱི་རོལ་ཉིད་མངོན་པར་འདོད་པའི་ཡུལ་ཉིད་ཡིན་པའི་ཕྱིར་རོ་ཞེས་བསྟན་པ་ནི།
སྒྲའི་སྤྱོད་ཡུལ་ཞེས་བྱ་བའོ། །སྒྲུབ་པར་བྱེད་པ་ཡང་མངོན་པར་འདོད་པ་ཉིད་ལས་ཕྱོགས་ཀྱི་ཡུལ་ཉིད་དམིགས་པ་མེད་པ་ཉིད་དུ་འགལ་བ་མེད་དོ། །དེའི་རྒྱུ་ཅན་ཞེས་བྱ་བ་ནི་བྱེད་པ་པོ་ལ་སོགས་པའི་རྒྱུ་མཚན་ལའོ། །རྟོགས་པར་བྱེད་པ་ཞེས་བྱ་བ་ནི་བྱེད་པ་པོའོ། །དེས་ཞེས་བྱ་བ་ནི་

བྱེད་པའོ། །རྟོགས་པར་བྱ་བ་ཞེས་བྱ་བ་ནི་ངོ་བོའོ། །ལས་མེད་ན་བྱེད་པ་པོ་ལ་སོགས་པའི་རྒྱུ་མཚན་མེད་པ་ཡིན་ཏེ། སྒྲུབ་པ་མེད་པའི་ཕྱིར་ཕྱོགས་དེ་ལས་འབྱུང་བའི་སྐྱོན་མེད་དོ་ཞེས་བསྟན་པ་ནི། དེ་རྒྱུ་ཅན་ཡིན་ན་ཞེས་བྱ་བའོ། །དེའི་རྒྱུ་མཚན་ལ་རྗེས་སུ་བརྗོད་པ་མེད་པ་མ་ཡིན་ཏེ།
བརྟགས་པའི་ཡུལ་ཅན་ཡིན་པའི་ཕྱིར་རོ་ཞེས་བསྟན་པ་ནི། གང་ཡིན་པ་དེ་ཉིད་ནི་ཞེས་བྱ་བའོ། །ཁྱེད་ཀྱིས་ཞེས་བྱ་བ་ནི་རྒྱལ་དཔོག་པས་སོ། །བསྒྲུབ་པར་བྱ་བ་ནི་སངས་རྒྱས་པོའིའོ། །འདོད་པ་ཉིད་དོ་ཞེས་བྱ་བ་ནི་ཤེས་པ་འདོད་པའི་བྱེ་བྲག་དང་ལྡན་པའི་ཆོས་ཅན་ཉིད་ཀྱི་ཕྱིར་སྐྱོན་མེད་དོ་
ཞེས་བྱ་བའི་དོན་ཏེ། །གཏན་ཚིགས་སྐྱོན་ཅན་ཉིད་དུ་སྨྲ་བ་ནི། མ་ངེས་པ་ཉིད་དམ་ཞེས་བྱ་བ་སྟེ། ཁྱབ་པ་མ་གྲུབ་པའི་ཕྱིར་རོ། །དེ་ཉིད་ཀྱི་ཕྱིར་ཞེས་བྱ་བ་དང་འབྲེལ་པས་སྔར་དྲིས་པ་ནི། རང་གི་ངོ་བོ་ཉིད་ནི་ཞེས་བྱ་བ་སྟེ། དེ་མ་གྲུབ་པ་ཉིད་ན་ཤེས་པར་འདོད་པའི་བྱེ་བྲག་དང་ལྡན་པ་ཉིད་
དོ་ཞེས་བྱ་བའི་དོན་ཏོ། །གཞན་ལ་ཡང་མ་གྲུབ་ན་དཔེ་མེད་པའི་ཕྱིར་དེ་སྐྱོན་ཉིད་ཡིན་ལ་དེའི་རྗེས་སུ་འབྲངས་པ་སྟེ། བསྒྲུབ་བྱའི་རྗེས་སུ་འབྲངས་པས་དེ་ཉིད་སྔ་ན་ཡོད་པར་བསྟན་པ་ནི། དེའི་ཚེ་ཞེས་བྱ་བའོ། །ལུང་ལ་མ་གྲུབ་ན་ཡང་ཚད་མས་གྲུབ་མ་གྲུབ་པ་མ་ཡིན་པར་བསྟན་པ་ནི། བདག་
གི་ཆོས་ཞེས་བྱ་བའོ། །དེ་ལྟར་མ་གྲུབ་ན་རྒྱལ་དཔོག་པའི་ཡང་སྒྲུབ་པར་བྱེད་པ་ཅུང་ཟད་ཀྱང་མེད་པར་བསྟན་པ་ནི། དེ་ལྟ་མ་ཡིན་ན་ཞེས་བྱ་བའོ། །བརྗོད་བྱའི་དབྱེ་བ་ནི་རྗོད་བྱེད་ལ་ཐ་དད་པའི་བརྗོད་བྱ་ཁས་མི་ལེན་པའི་ཕྱིར་རོ། །སྒྲ་དང་དོན་ཙམ་ལ་འདི་ནི་སྒྲ་འདི་ནི་དོན་ནོ་ཞེས་བརྟག་པར་མི་
ནུས་པའོ། །སྐྱི་ཉིད་ནི་སྒྲ་དང་དོན་དག་གིའོ། །དེས་ནི་ཞེས་བྱ་བ་ནི་གང་ཞིག་ཅེས་བསྟན་པའོ། །ཁྱད་པར་མེད་པ་ནི་ཐ་དད་པ་ཅིག་ཤོས་འཛིན་པར་བྱེད་པ་ཉིད་ལ་སོགས་པའི་ཁྱད་པར་མེད་པའི་ཕྱིར་རོ། །སྒྲ་དོན་ཙམ་ནི་སྒྲའི་སྣང་བ་ལས་དོན་གྱི་སྣང་བ་ཤེས་པ་སྟེ། དེ་ཉིད་ནི་ཤེས་པའམ་
གཞན་ཡང་རུང་བའི་ཕྱིར་ཐམས་ཅད་དུ་ཅུང་ཟད་དམིགས་པ་མ་ཡིན་ནོ། །ཁྱད་པར་མ་གྲུབ་པ་ཞེས་བྱ་བ་ནི་ཤེས་པ་ཐམས་ཅད་ལ་ཇི་ལྟར་ཡང་དམིགས་པ་མེད་པའི་ཕྱིར་རོ། །སད་པའི་ཞེས་བྱ་བ་ནི་བསྒྲུབ་བྱའོ། །དེ་ལྟ་ཡང་ནི་དམིགས་པ་མེད་པ་ཉིད་དེ་དུས་གཞན་གྱི་ཚེ་དམིགས་པ་མེད་པ་ཉིད་

ཡིན་ནའོ། །དུས་དེར་དམིགས་པ་ཅན་གྱི་བློའི་འཛིན་བྱེད་ཀྱི་ཆ་ཡིན་ནོ། །གང་ཞིག་གི་རྣམ་པ་ཅན་ནི་བཟུང་བ་སྔོན་པོའི་རྣམ་པ་ཅན་ནོ། །ཁས་བླང་ཕྱིར་ཞེས་བྱ་བ་ནི་གཟུང་བ་དང་འཛིན་པའི་ཆ་གཉི་ག་ཁས་བླངས་པའི་ཕྱིར་རོ། །འགལ་བ་ཉིད་བསྟན་པ་ནི་འཛིན་པའི་
ཆ་ཞེས་བྱ་བའོ། །བློ་དེ་ནི་ཕྱི་རོལ་གྱི་བློ་སྟེ། ཀ་བའམ་རྩིག་པ་ཞེས་བྱ་བའི་བློ་འབྱུང་བའི་ཕྱིར་རོ། །ཕྱི་རོལ་ཉིད་ནི་ཕྱི་རོལ་གྱི་ཤེས་པའི་ཡུལ་ཡིན་གྱི་ཀ་བ་ལ་སོགས་པའི་ཤེས་པའི་མ་ཡིན་པའི་ཕྱིར་ཀ་བ་ལ་སོགས་པའི་ངོ་བོས་ཀ་བ་ལ་ཀ་བའི་ཤེས་པས་འཛིན་པ་མ་ཡིན་ནོ། །ཟླ་བ་གཉིས་
དང་དབང་པོ་ཕྲད་པ་མེད་པ་ཅི་ལས་ཡིན་ཞེ་ན། ཟླ་བ་གཅིག་ཅེས་བྱ་བའོ། །ཐམས་ཅད་དུ་ཞེས་བྱ་བ་ནི་ཟླ་བ་གཅིག་ཏུ་གཏོགས་པའི་ཚེ་ཡང་ཟླ་བ་གཉིས་ཀྱི་ཤེས་པའི་དམིགས་པ་མེད་པའི་རྒྱུ་ཉིད་མེད་པར་ཐལ་བར་འགྱུར་བའི་ཕྱིར་རོ། །དེའི་ཕྱིར་ཞེས་བྱ་བ་ནི་རིགས་པ་དང་འགལ་བའི་
ཕྱིར་རོ། །སྐབས་ལ་སོགས་པ་ལས་རྟོགས་ཞེས་བྱ་བ་ནི། ཁམས་གསུམ་པ་ནི་སེམས་ཙམ་མོ་ཞེས་བྱ་བ་ལ་སོགས་པ་སྟེ། སེམས་ལས་གཞན་བཀག་པའི་ཕྱིར་རོ། །གནས་སྐབས་ལ་སོགས་པ་ལ་མ་ལྟོས་པ་ཁོ་ནར་འོན་ཏེ་གང་གི་རྣམ་པའི་བློ་ཞེས་བྱ་བ་ལ་སོགས་པས་བརྟགས་
པ་ཡིན་ནོ། །དེ་ལྟ་ན་ཡང་། འཆད་པར་འགྱུར་བ་མ་བཅད་ནས། །ཡོངས་སུ་རྒོལ་བ་སྲིད་པ་ནི། །སངས་རྒྱས་བཀའ་སོགས་འདོན་པ་ལ། །དེ་འདྲའི་རྒོལ་བ་བྱེད་པར་འགྱུར། །ཞེས་བྱ་བ་ལ་སོགས་པ་གནས་སྐབས་མ་བཅད་པ་དང་ཅིག་ཤོས་ཉིད་ཀྱི་ཕྱོགས་སྔ་མ་དང་ཅིག་ཤོས་
ལ་བརྟེན་ནས་འབྲེལ་བ་མེད་པ་ཡིན་པར་བསྟན་པ་ནི། དེ་ལྟ་མ་ཡིན་ན་སྒྲ་ལས་ཞེས་བྱ་བའོ། །འདི་ལྟར་ཁོ་ན་ཞེས་བྱ་བ་ནི་སེམས་ཙམ་དུ་བསྒྲུབ་པའི་གནས་སྐབས་ལས་ཡིན་ལ། དེ་གནས་པ་ནི་དབྱེ་བ་དང་ཅིག་ཤོས་སེམས་པ་ཡིན་ནོ། །མི་རིགས་པ་ཅི་ཡོད་ཅེས་བྱ་བ་ནི་སྒྲོ་འདོགས་པ་
སེལ་བར་བྱེད་པའི་རྗེས་སུ་དཔག་པ་ལ་མངོན་པར་འདོད་པ་ཡིན་པའི་ཕྱིར་རེ་ཞིག་འདི་ཞེས་བྱ་བ་ལ་ཐེ་ཚོམ་ཟ་བ་ལས་འདི་ཁོ་ནའོ་ཞེས་རྣམ་པར་འཇོག་པའི་ཕྱིར་རོ་ཞེས་བྱ་བའི་དོན་ཏོ། །སྒྲོ་འདོགས་པ་ཉིད་བཤད་པ་ནི་གལ་ཏེ་འགའ་ཞིག་ཅེས་བྱ་བའོ། །ནམ་མཁའ་ཞེས་བྱ་བ་ནི་སྐྱོན་གྱི་སྟོབས་

ཀྱིས་སྒྲོ་བཏགས་པའི་རྣམ་པ་གཞན་སྐྲ་ཤད་ཀྱི་ཤེས་པའི་གོ་བྱ་དང་རྒྱུ་ཡང་ཡིན་ནོ། །གོ་བྱའི་དོན་ལ་རྣམ་པར་དཔྱོད་པ་ན་རྒྱུ་གནས་སྐབས་པ་མ་ཡིན་པ་དང་། གོ་བྱ་ཡང་རྣམ་པ་གཞན་ལ་གཞན་མ་ཡིན་ཏེ། ཐལ་ཆེས་པའི་ཕྱིར་རོ་ཞེས་བསྟན་པ་ནི། འོ་ན་ཇི་ལྟར་ཞེས་བྱ་བའོ། །སྐྱོན་ཡོད་ན་
རྣམ་པ་གཞན་ཡིན་ལ་མེད་ན་རང་གིའོ་ཞེས་བྱ་བ་ཡང་འདི་ལ་ཡང་རྣམ་པར་དབྱེ་བའི་རྒྱུ་མེད་པ་ཡིན་ཏེ། ཐམས་ཅད་ཁོ་ནར་བག་ཆགས་ཀྱི་སྐྱོན་ཡོད་པས་ཕྱི་རོལ་ཡོད་པ་མི་འགྲུབ་པའི་ཕྱིར་རོ་ཞེས་བསྟན་པ་ནི། འདི་ལ་ཡང་ཞེས་བྱ་བའོ། །ནམ་མཁའ་ལས་ཕྱིན་ཅི་ལོག་ཏུ་སྣང་བ་ནི་སྐྲ་
ཤད་ཀྱིའོ། །དྲན་པ་ནི་སྐྲ་ཤད་ཀྱིའོ། །ནམ་མཁར་རྟོགས་པ་ཡང་འཁྲུལ་པ་ཐམས་ཅད་ཡིད་ཀྱི་ཡིན་པའི་ཕྱིར་དྲན་པའི་ཆ་ཞིག་པ་དང་ནམ་མཁའ་ཡང་དྲན་བཞིན་པ་ལས་ཐ་དད་པ་མི་འཛིན་པ་ནི་བརྗེད་པ་ཡིན་ནོ། །འཇིག་རྟེན་པ་ནི་རང་གི་དོན་བྱེད་པ་ཡིན་ལ། དེ་མི་བྱེད་པ་དེའི་འདི་ལྟ་བུ་ནི་འཇིག་
རྟེན་ལས་འདས་པ་ཡིན་ནོ། །སོགས་པ་ནི་མིང་དང་རྒྱུ་མཚན་དང་རྨི་ལམ་གྱི་མཐའི་མི་ལྡན་པ་འཛིན་པ་ཙམ་ལ་སྩོགས་པའོ། །དོན་བྱེད་པ་ལ་མི་སླུ་བས་གནོད་པར་བྱེད་པ་མེད་པ་དང་ཅིག་ཤོས་ཀྱི་ཤེས་པ་རྣམས་དེའི་ངོ་བོ་ལས་འདས་པ་ན་རྒྱུ་མེད་པའི་ཕྱིར་རོ་ཞེས་བྱ་བའི་དོན་ཏོ། །དེའི་རང་
བཞིན་ཅན་ཡིན་པའི་ཕྱིར་ཞེས་བྱ་བ་ནི་ཟླ་བ་གཉིས་སུ་སྣང་བ་ལས་ཟླ་བ་གཅིག་ཏུ་སྣང་བ་དང་ཁྱད་པར་མེད་པའི་ཕྱིར་རོ། །དེ་ལ་ཡང་ཞེས་བྱ་བ་ནི་ཟླ་བ་གཅིག་གི་ཤེས་པ་ལ་སྟེ། དེའི་རྣམ་པའི་ཕྱི་རོལ་སྣང་བ་མ་ཡིན་པ་ནི་གནོད་བྱེད་ཡིན་ལ་རྣམ་པ་ཡང་སྣང་བཞིན་པར་གཉི་ག་ལ་ཡང་ཁྱད་པར་མེད་དོ། །
ཤེས་པའི་བདག་ཉིད་ཀྱི་སྔོན་པོ་ཡང་སེར་པོ་ལ་སོགས་པ་ཡོད་པས་མི་འབྱུང་ན་རྗེས་སུ་མཐུན་པའི་ཕྱི་རོལ་གྱི་སྔོན་པོ་ཉིད་རྒྱུ་ཡིན་པར་རྟོགས་པར་བྱེད་དོ་སྙམ་དུ་སེམས་པ་ལ། ཅི་ལྟར་གཟུགས་ཀྱི་ཞེས་སྟེ། གཞན་གྱི་བསྐྱེད་བྱ་ཡང་དེའི་རྣམ་པ་ཅན་དུ་མཐོང་བའི་ཕྱིར་རོ་ཞེས་བྱ་བའི་དོན་ཏོ། །ཇི་ལྟར་
རོའི་ཤེས་པས་གཟུགས་ལ་སོགས་པས་སྟོང་པའི་ཕྱིར་གྲུབ་པ་ལ་སྒྲུབ་པ་ཇི་ལྟར་ཡིན་ཞེས་ཟེར་བ་ནི། ཇི་ལྟར་གཟུགས་ཀྱི་ཞེས་བྱ་བའོ། །གདུངས་པའི་དགོན་དུང་ལ་ཆུའི་ཤེས་པ་ངེས་པར