Luận tạng Tây Tạng (Tengyur) — Tập 181

་མ་དང་པོའི་ཡུལ་ཅན་གྱི་དྲན་པ་ནི་སྐད་ཅིག་མ་གཉིས་པ་ལ་འཛིན་པར་བྱེད་པའི་མངོན་སུམ་ལ་དོན་མེད་པ་

སྟེ། དགོས་པ་མེད་པ་ནི་རྒྱུ་མ་ཡིན་ནོ་ཞེས་བྱ་བའི་དོན་ཏོ། །དོན་མེད་པར་འགྱུར་ཞེས་བྱ་བ་བཤད་པ་ནི། བརྡ་དྲན་ཇི་ལྟར་ཞེས་བྱ་བ་སྟེ། བརྡའི་ཡུལ་ནི་དྲན་པའི་ཡུལ་ཡིན་ལ། དེ་ལས་གཞན་པ་ནི་མངོན་སུམ་གྱི་ཡུལ་ཡིན་པ་དེའི་ཕྱིར་འདི་གཉིས་ལ་འབྲེལ་པ་མེད་དོ་ཞེས་བྱ་བའི་
དོན་ཏོ། །འགྲེལ་པར་བཤད་པ་ནི་ཐམས་ཅད་དུ་གསལ་བ་ཁོ་ན་ཡིན་ནོ། །དེས་ནི་ཞེས་བྱ་བ་ནི་དཔྱོད་པས་སོ། །འདི་ནི་ཞེས་བྱ་བ་ནི་རྣམ་པར་རྟོག་པའོ། །དེས་ཞེས་བྱ་བས་ནི་བརྡ་དྲན་པས་སོ། །བརྡ་ནི་སྤྱིའི་ཡུལ་ཅན་ཡིན་པའི་ཕྱིར་དེའི་ཡུལ་གྱི་དྲན་པ་ལས་བྱུང་བ་ཡང་སྤྱིའི་ཡུལ་ཅན་ཉིད་མ་
ཡིན་ནམ་སྙམ་དུ་སེམས་པ་ལ་སྤྱིའི་ཙམ་འཛིན་པ་ཡིན་ན་ནི་ཞེས་བྱ་བ་སྟེ། མངོན་སུམ་དང་རྣམ་པར་རྟོག་པ་དག་ནི་འཛིན་པ་དང་ཞེན་པ་དག་གིས་ཁྱད་པར་ཁོ་ན་ཡུལ་དུ་བྱེད་པ་ཡིན་ནོ་ཞེས་བྱ་བའི་དོན་ཏོ། །ཁྱད་པར་ལ་ལྟོས་པ་ནི་ཁྱད་པར་ལ་ཞེན་པའོ། །དེའི་ཕྱིར་མིག་དང་ཞེས་བྱ་བའི་དང་
གི་སྒྲ་ནི་ངེས་པར་གཟུང་བ་ལ་ཡིན་ཏེ་དེས་ནི་དྲན་པ་མ་ཡིན་ནོ་ཞེས་བྱ་བའི་དོན་ཏོ། །གལ་ཏེ་ཅིའི་ཕྱིར་ཞེས་བྱ་བ་ལ་སོགས་པ་ནི། གལ་ཏེ་དངོས་སུ་ཞེས་བྱ་བ་ལ་སོགས་པའི་ཚིགས་སུ་བཅད་པ་གནད་ཀྱི་དོན་ཟེར་བ་ལ། དབང་པོའི་སྒོ་ནས་མ་ཡིན་ཞེས་བྱ་བས་དབང་པོའི་ཁྱབ་ཆེས་པ་ཉིད་དུ་བསྟན་པའོ། །
ཡུལ་གྱི་རང་གི་ངོ་བོ་ཞེས་བྱ་བས་ཁྱབ་པར་བྱེད་པ་མ་ཡིན་པ་ཉིད་དོ། །ཡུལ་གྱིས་བསྐྱེད་པ་ཡང་ཞེས་བྱ་བ་འདི་ནི་དཔྱོད་པར་བྱ་བ་མ་ཡིན་ནམ། དྲན་པས་བྱས་པའི་ཁྱད་པར་མ་མཐོང་བ་ལས་མངོན་སུམ་དོན་གྱི་བསྐྱེད་བྱ་ཡིན་ཡང་། དེའི་བསྐྱེད་བྱར་ནི་མི་འགྱུར་ཏེ། དེར་
ཐ་སྙད་འདོགས་པ་མ་མཐོང་བའི་ཕྱིར་རོ་སྙམ་དུ་སེམས་པ་ནི་གལ་ཏེ་དངོས་སུ་ཞེས་བྱ་བ་འདིས་བརྒྱུད་པས་བསྐྱེད་པར་བྱ་བ་རྗེས་སུ་དཔག་པར་བྱ་བས་གཅོད་པ་ཡིན་ནོ། །མངོན་སུམ་དུ་ཐ་སྙད་གདགས་པའི་ཡུལ་གྱི་ཤེས་པའི་ཁྱད་པར་གྱི་དབང་དུ་བྱས་ནས་འདྲི་བ་འདི་དང་ལན་ཡང་བཏབ་པ་ཡིན་ཏེ། དེས་
ན་དོན་གྱི་ནུས་པས་ཕན་འདོགས་པ་ཉིད་ཀྱི་སྒོ་ནས་ཟླ་བ་གཉིས་པ་ལ་སོགས་པའི་ཤེས་པ་རྟོགས་པ་མེད་པ་སྒྲུབ་པར་བྱེད་པ་ནི་མ་ཡིན་པའི་ཕྱིར་སྐྱོན་མེད་དོ། །འོན་ཏེ་འདིས་དབང་པོའི་བསྐྱེད་པ་ཉིད་ཉེ་བར་མཚོན་པའི་ཕྱིར་ཟླ་བ་གཉིས་ཀྱི་ཤེས་པ་ལ་སོགས་པ་བསྡུས་པ་དེ་ལྟ་ན་མངོན་སུམ་ཉིད་དུ་

ཡང་འགྱུར་རོ། །རྟོགས་པར་བྱེད་པ་ཉིད་ཡོད་པ་དང་མེད་པའི་རྒྱུ་མཚན་ཅན་དུ་ཐ་སྙད་པའི་མེད་པ་དང་། ཡོད་པ་དག་ཡིན་གྱི། རྒྱུ་ཉིད་ཙམ་ནི་ཡོད་པ་དང་མེད་པའི་རྒྱུ་མཚན་ཅན་དག་མ་ཡིན་ནོ་ཞེས་བྱ་བའི་དོན་བསྟན་པ་ནི། གོ་བར་བྱེད་པ་ཉིད་མཐོང་ནས་ཞེས་
བྱ་བ་སྟེ། གང་གི་ཕྱིར་རྒྱུ་མཚན་གཞན་གྱི་ཐ་སྙད་འདོགས་པ་མེད་པ་ནི་རྒྱུ་ཉིད་མེད་པ་རྟོགས་པར་བྱེད་པ་མ་ཡིན་ནོ་ཞེས་བྱ་བའི་དོན་ཏོ། །གོ་བར་བྱེད་པ་ཉིད་དུ་མ་འཁྲུལ་པ་ཅན་ཉིད་ནི་ཐུན་མོང་མ་ཡིན་པ་ཉིད་དུ་ཐ་སྙད་གདགས་པའི་ངེས་པར་སྦྱོར་བའི་ཡུལ་ཡིན་ལ། དེ་སྐྱེད་པར་བྱེད་པ་ནི་ལྐོག་
ཤལ་ལ་སོགས་པ་ལ་བ་ལང་གི་ཐ་སྙད་འདོགས་པ་བཞིན་དུའོ། །དེ་ཙམ་ལས་བྱུང་བ་ཉིད་དུ་རྟོགས་པའི་ཡུལ་དེས་ཀྱང་ཡུལ་ཅན་དེའི་ངེས་པར་སྦྱོར་བ་རྟོགས་པ་ཡིན་ནོ་ཞེས་བསྟན་པ་ནི་དེ་ཡོད་ཅེས་བྱ་བ་སྟེ། གོ་བྱེད་ཉིད་ཀྱི་ཡུལ་དབང་པོའི་ཐ་སྙད་ལ་ཡོད་པ་ཡིན་གྱི་ཡུལ་གྱི་ཐ་སྙད་ལ་ནི་མ་ཡིན་
ནོ། །དེའི་ཡུལ་གྱི་ཆོས་ཏེ་ཡུལ་ཅན་སྦྱར་བ་ཉིད་ནི་ངེས་པར་སྦྱར་བ་སྟེ། མཚོན་པའི་རྒྱུ་ལ་ནི་ཡུལ་གོ་བྱེད་ཡིན་ལ། ཡུལ་ཅན་གོ་བྱ་ཡིན་ནོ། །དེ་ནི་ཡུལ་མ་ཡིན་པའི་ཕྱིར་ཞེས་བྱ་བ་ནི་ཟླ་བ་གཉིས་ཀྱི་ཤེས་པ་གོ་བྱའིའོ། །གལ་ཏེ་དེ་ནི་ཞེས་བྱ་བ་སྟེ་ཟླ་བ་གཉིས་ཤེས་པ་མངོན་སུམ་ཡིན་ཡང་
ཡུལ་མ་ཡིན་ན་གཞན་གྱི་སྟེ། རྗེས་སུ་དཔག་པའི་ཡུལ་ཡིན་པར་ཇི་ལྟར་འགྱུར་ཞེས་བྱ་བ་དང་སྦྱར་རོ། །དབང་པོ་ཉིད་དེ་བཞིན་དུ་མ་ཡིན་ཏེ་ཤེས་པ་གཅིག་ཉིད་ལ་ལྟོས་ན་དེའི་རྒྱུ་ཡིན་ཞིང་རྒྱུ་མ་ཡིན་པ་ཡང་ཡིན་ཞེས་ཡོད་པ་དང་མེད་པའི་ཁྱད་པར་ཅན་མ་ཡིན་ནོ་ཞེས་བསྟན་པ་ནི་དབང་པོ་ཉིད་ནི་
ཞེས་བྱ་བའོ། །འདིས་ནི་ཤེས་པ་གཅིག་ཉིད་ལ་ཡུལ་ནི་མ་ངེས་པ་ཡིན་པར་བསྟན་ཏོ། །ཡུལ་ལ་བརྟེན་པ་ཞེས་པར་ཐ་སྙད་གདགས་པ་ལ་དངོས་སུ་འམ། བརྒྱུད་པས་ཀྱང་ཁྱད་པར་རྟོགས་པ་མ་ཡིན་ནོ་ཞེས་བསྟན་པ་ནི། འོན་ཏེ་ཡུལ་ལ་བརྟེན་པ་ཞེས་བྱ་བ་ལ་སོགས་པ་ནས། དེའི་ཕྱིར་
དབང་པོའི་ཐ་སྙད་ཉིད་འཐད་དོ་ཞེས་བྱ་བའི་བར་གྱིས་སོ། །གང་གི་ཚེ་ཡང་དོན་གྱི་མཐུ་ལས་ནི། ཡང་དག་སྐྱེ་བ་ཡིན་ཕྱིར་རོ། །ཞེས་བྱ་བས་ཉེ་བ་དང་ཉེ་བ་མ་ཡིན་པ་དག་ལས་ཤེས་པའི་སྣང་བ་ཐ་དད་པར་བྱེད་པ་ཉིད་དུ་བསྟན་པ་ནི་དེའི་ཚེ། ཟླ་བ་གཉིས་ལ་སོགས་པའི་ཤེས་པར་

འཁྲུལ་པ་མ་ཡིན་ཏེ། ཁྱད་པར་གྱི་གནས་སྐབས་ཡིན་པའི་ཕྱིར་འདིའི་རྟོག་པ་མེད་པ་ཉིད་ཀྱང་དེའི་མཚན་ཉིད་ཁོ་ན་ལས་ཡིན་ཏེ། དེས་ན་རྣམ་པ་འགས་ཀྱང་གསལ་བར་སྣང་བ་ཉིད་ཀྱིས་གཞན་དུ་འདྲི་བ་ཁོ་ན་ཡིན་ནོ། །ཡུལ་གྱིས་ཀྱང་མཚོན་པར་ནུས་པ་མ་ཡིན་ནམ་ཞེས་བྱ་བ་ལ་སོགས་པ་ནི་
གཞན་གྱི་འདོད་པ་ཁོ་ནའོ། །དེ་ལྟར་ན་ཡང་ཡུལ་གྱི་གོ་བྱེད་ཉིད་མེད་ན་ཡུལ་ཅན་གྱི་ངེས་པར་སྦྱར་བ་ཡང་ལྡོག་པ་ཡིན་པར་བསྟན་པ་ནི་དེའི་ཕྱིར་ཐ་སྙད་ཅེས་བྱ་བ་སྟེ། རྟགས་ཞེས་བྱ་བ་ནི་ཡུལ་ཅན་གྱི་ངེས་པར་སྦྱར་བའོ། །ཁྱད་པར་བྱེད་པ་ཞེས་བྱ་བ་ནི་ཡུལ་གྱི་གོ་བྱེད་ཉིད་ཀྱིས་སོ། །འགྲེལ་
པ་བྱེད་པས་ནི་གོ་བྱེད་ཉིད་དུ་མ་མཐོང་བའི་ངེས་པར་སྦྱོར་བ་ནི་དེས་ཁྱབ་པ་ཡིན་པ་དེའི་རྟགས་ནི་རང་བཞིན་གྱི་གཏན་ཚིགས་ཡིན་པར་བསྟན་པ་ནི། རྟོག་པ་སྔོན་དུ་གཏོང་བ་ཞེས་བྱ་བའོ། །མཚན་ཉིད་པའི་གཏན་ཚིགས་ཉིད་ཀྱང་སྟོན་པ་ནི། དོན་དམ་པར་ནི་ཞེས་བྱ་བའོ། །རྣམ་པར་རྟོག་
པ་མེད་པ་ཅན་ཉིད་བསྟན་ནས་སྤྱིའི་ཡུལ་ཅན་ཉིད་ཀྱི་ཚིག་འགལ་བ་ཡིན་པར་བསྟན་པ་ནི། སྤྱིའི་ཡུལ་ཅན་ནི་ཞེས་བྱ་བའོ། །འགལ་བ་ཅན་ཉིད་དུ་བསྟན་པ་ནི། བསགས་པ་དག་ནི་ཞེས་བྱ་སྟེ། གསུམ་ཆར་ཡང་དོན་མཚུངས་སོ་ཞེས་བྱ་བའི་དོན་ཏོ། །གལ་ཏེ་ཚོགས་པ་དོན་དམ་
པ་མ་ཡིན་ན་དེའི་ཤེས་པ་རྟོག་པ་མེད་པ་ཁོ་ནར་འགྱུར་ལ། དོན་དམ་པ་ཉིད་མ་ཡིན་པར་དེར་སྒྲོ་འདོགས་པ་རྣམ་པར་རྟོག་པ་ཅན་ཁོ་ན་ཡིན་པར་བསྟན་པ་ནི། མང་པོའི་རང་བཞིན་ཞེས་བྱ་བའོ། །དེ་ལྟ་ཡིན་པ་ཉིད་ན་ཡང་ཞེས་བྱ་བ་ནི་དེ་རྣམས་ལས་གཞན་ཉིད་ཡིན་ནོ། །དོན་གཞན་ཞེས་བྱ་བ་ནི་
ཉེ་བར་འགྲོ་བའི་རྒྱུ་རྣམས་ཡིན་ལ། མ་མཐོང་བ་ལ་སོགས་པ་སྟེ་ཉེ་བར་འགྲོ་བའི་རྒྱུ་དེ་རྣམས་ཀྱིས་མ་འབྲེལ་པ་རྣམས་ཀྱི་འབྲེལ་པ་སྐྱེས་པ་ནི་བསགས་པ་ཡིན་པར་བཤད་པ་བསྟན་པ་ནི། དོན་གཞན་དང་ནི་ཞེས་བྱ་བའོ་སྤྱིའི་སྒྲའི་དོན་བསྟན་པ་ནི། རྡུལ་ཕྲན་རྣམས་ཞེས་བྱ་བ་སྟེ་ཤེས་པ་གཅིག་ལ་
སྣང་བའི་དུ་མ་རྣམས་ནི་སྤྱིའི་ཡིན་ནོ་ཞེས་བྱ་བའི་དོན་ཏོ། །ཉེ་བ་ལ་སྐྲ་ཤད་རྣམས་སྣང་བ་ཇི་སྐད་དེ་བཞིན་དུ་ཐག་རིང་བ་ལ་ཐ་དད་པ་མ་ཡིན་ནམ་ཐ་མི་དད་པར་སྣང་བ་ནི་རྡུལ་ཕྲ་རབ་རྣམས་ལ་ཡང་དགག་བྱ་མ་ཡིན་ཏེ། གང་གི་ཕྱིར་འདིའི་གནོད་བྱེད་ཐ་དད་པ་སྣང་བ་ནི་རྡུལ་ཕྲ་རབ་རྣམས་ལ་མི་སྲིད་དེ།

སྟེང་དང་འོག་གི་ཆའི་དབྱེ་བས་སྣང་བཞིན་པ་ནི་གཅིག་ལ་ཡང་འགལ་བ་མེད་དེ། ཐག་རིང་པོ་ནས་སྐྲ་ཤད་སྣང་བ་ལྟ་བུའོ། །ཐག་རིང་པོ་ན་སྐྲ་ཤད་སྣང་བ་ནི་ཉེ་བ་ཉིད་བཞིན་དུ་ཐ་དད་པ་ཡིན་ཞེས་བྱ་བ་ཡང་རྨོངས་པས་སྨྲ་བ་ཡིན་ཏེ། སྣང་བའི་དབྱེ་བ་མེད་
པར་ཐལ་བར་འགྱུར་རོ་ཞེས་བསྟན་པ་ནི། འོག་མ་མངོན་སུམ་ལ་ཞེས་བྱ་བའོ། །འཁྲུལ་པ་ཉིད་ཅེས་བྱ་བ་ནི་ཐག་རིང་པོ་ན་སྐྲ་ཤད་སྣང་བ་ལྟ་བུའོ། །འཁྲུལ་པ་ཅན་གྱི་རྣམ་པར་རྟོག་པ་རྗེས་སུ་དཔག་པ་བཞིན་དུ་འགྱུར་བ་མ་ཡིན་ནམ་སྙམ་དུ་སེམས་པ་ལ། འཁྲུལ་པ་ཡིན་ཡང་རབ་རིབ་
ལས་སྐྱེས་པ་བཞིན་དུ་རྟོག་པ་མེད་པ་ཉིད་ཀྱི་སྔོན་པོ་ལ་སོགས་པའི་ཤེས་པ་ཡིན་ཏེ། མི་སྦྱོར་བའི་བདག་ཉིད་ཡིན་པའི་ཕྱིར་རོ་ཞེས་བསྟན་པ་ནི་དེ་སྐད་དུ་རྣམ་པར་རྟོག་བཅས་པ་ཞེས་བྱའོ། །རྣམ་པར་རྟོག་པ་དང་བཅས་པ་ནི། འཛིན་པ་ལ་ནི་མངོན་ཕྱོགས་པ། །ཞེས་བྱ་བ་དང་སྦྱར་རོ། །
དེ་ལས་བཟློག་པ་ལ་ནི་ཞེན་པ་ལས་བཟློག་པ་ལའོ། །དེ་ལྟ་ན་དེ་ཉིད་རང་གི་མཚན་ཉིད་དུ་ཐ་མི་དད་པའི་ངོ་བོ་མངོན་སུམ་གྱི་ཡུལ་ཡིན་དུ་ཟིན་ཀྱང་། རྡུལ་ཕྲ་རབ་ཀྱི་རྟོག་པ་ཅི་ཞིག་བྱ་ཞེས་བསྟན་པ་ནི་འོ་ན་དེ་ལྟ་ན་ནི་ཞེས་བྱ་བའོ། །རྣམ་དབྱེ་འདི་ཞེས་བྱ་བ་ནི་གཅིག་ཏུ་སྟུག་པའི་རགས་པར་སྣང་
བའི་རྡུལ་ཕྲ་རབ་རྣམས་ལ་འཁྲུལ་པ་ཡིན་ནོ། །འཇིག་རྟེན་གྱི་བསམ་པས་ནི་དེ་དག་ཁོ་ན་ཕྲ་མོ་ཉིད་ཀྱི་རྣམ་པར་དབྱེ་བ་ནི་སྣང་བས་སྣང་བཞིན་པ་རྣམས་ལ་སྤྱི་ཞེས་བརྗོད་པ་ཡིན་པར་བསྟན་པ་ནི། དེའི་ཕྱིར་ཞེས་བྱ་བའོ། །འདི་ནི་འདོད་པ་ཉིད་ཅེས་བྱ་བ་ནི་རང་རིག་པ་ལ་ཐ་དད་པ་རྟོགས་པ་མེད་པ་
ཡིན་ནོ་ཞེས་བྱ་བའོ། །དུ་མ་ཤེས་པ་གཅིག་ལ་སྣང་བ་ནི་སྤྱི་ཡིན་ན། ཕྲ་མོའི་ཡིད་ཀྱིས་ཡུལ་དུ་མ་ལ་ཤེས་པ་གཅིག་གམ་དུ་མ་ཡང་ཅིག་ཅར་སྐྱེད་པར་བྱེད་པར་མི་ནུས་སོ་སྙམ་དུ་སེམས་པ་ནི། གལ་ཏེ་སྐྱེ་མཆེད་གཅིག་ཡིན་ཡང་། །ཞེས་བྱ་བའོ། །དེའི་ཕྱིར་ན་ཞེས་བྱ་བ་ལ་སོགས་
པ་ནི་འགྲེལ་པའོ། །དེ་གཅིག་པ་ཡང་ཞེས་བྱ་བ་ནི་དུ་མ་འཛིན་པ་འགལ་བ་ཅན་གཅིག་ཉིད་ཅི་ལས་ཡིན་ཞེས་བྱ་བར་སྦྱར་རོ། །ཏིལ་སོགས་ཐ་དད་ལ་ཇི་ལྟར། །ཞེས་བྱ་བ་སོགས་པ་ནི་རྣམ་འགྲེལ་ཡིན་ཏེ་ཡུལ་ཉེ་བ་ལའོ། །བཤད་ཟིན་ཏོ་ཞེས་བྱ་བ་ནི་ལྔ་པོ་རྣམས་ཀྱི་ཆོད་པ་ཡང་ཞེས་བྱ་

བས་སོ། །མགྱོགས་པ་ཡིན་ཡང་ཅིག་ཅར་མ་ཡིན་པར་བསྟན་པ་ནི་དེ་རྣམས་ཉིད་ལ་ཞེས་བྱ་བའོ། །བློ་ཐམས་ཅད་ཀྱང་སྐད་ཅིག་པ་ཉིད་ཀྱིས་མྱུར་བར་ཁྱད་པར་མེད་པའི་ཕྱིར་རོ། །རིམ་དང་ཅིག་ཤོས་ཀྱི་རྣམ་པ་ཉིད་འཐད་པ་མ་ཡིན་པར་བསྟན་པ་ནི། དུས་མཚུངས་ཞེས་བྱ་བ་ལ་སོགས་
པ་སྟེ། དེ་ཙམ་རྒྱུ་མཚན་ཉིད་ཡིན་ན་རིམ་པ་མིན་པ་ཡིན་ལ། གཞན་དུ་ན་གཞན་ལ་ལར་ཡང་དེ་བཞིན་དུ་འགྱུར་ཞེས་བྱ་བའི་དོན་ཏོ། །དེར་ནི་བཟློག་པ་ནི་རིམ་པའོ། །རིམ་གྱིས་འཛིན་པར་ཁས་ལེན་ན་ཡང་རྣམ་པར་རྟོག་པ་ཉིད་ལ་ཅུང་ཟད་ཀྱང་ཉམས་པ་མེད་པར་བསྟན་པ་ནི་རིམ་
གྱིས་འཛིན་ཞེས་བྱ་བའོ། །སྔོན་གྱི་མཐོང་བ་ཞེས་བྱ་བ་ནི་དྲི་བའོ། །ཤིན་ཏུ་གོམས་པར་ཞེས་བྱ་བ་ལ་སོགས་པ་ནི་ལན་ནོ། །ཕྱེ་མ་ལེབ་ཁྲ་བོ་ལ་སོགས་པ་དུ་མ་ཤེས་པ་གཅིག་ལ་སྣང་བར་འགྱུར་བར་བསྟན་པ་ལ་དུ་མ་ནི་གཅིག་མ་ཡིན་པའོ། །ཁྲ་བོ་ཞེས་བྱ་བ་གཅིག་གི་ཚིག་ཏུ་
གོ་བའི་ཕྱིར་དེའི་ངོ་བོ་ཡང་གཅིག་ཡིན་ན་ནི་སྣང་བ་དང་འགལ་བ་ཡིན་པར་བསྟན་པ་ནི། གལ་ཏེ་སྣ་ཚོགས་དེ་གཅིག་ན་ཞེས་བྱ་བའོ། །རིགས་མི་མཐུན་པ་སྣལ་མ་རྣམས་མ་བཏགས་པ་མ་ཡིན་པའི་བཏགས་པ་ཙམ་གྱི་སྣམ་བུ་ལ་སོགས་པའི་སྣང་བ་ཐ་དད་པ་ཙམ་རྒྱུ་མཚན་གྱིས་དུ་མ་
ཉིད་དུ་འདོད་པ་ཡིན་པར་བསྟན་པ་ནི་སྔོ་སྩོགས་རྣམ་པར་དབྱེ་བ་ནི་ཞེས་བྱ་བའོ། །བཅོས་མ་མ་ཡིན་པའི་ཕྱེ་མ་ལེབ་ལ་སོགས་པ་ལ་སྣ་ཚོགས་པའི་རྣམ་པ་ལ་ལྷག་པ་གཅིག་ནི་ཚིག་ཙམ་ཡིན་གྱི། གཞན་མ་ཡིན་པར་བསྟན་པ་ནི། གལ་ཏེ་སྔོན་པོ་ལ་སོགས་པ་སྤངས་པའི་ཞེས་བྱ་བའོ། །སྣང་
བ་ཐ་དད་པས་ནི་དུ་མ་ཡིན་ལ་གཅིག་ཚིག་གིས་ནི་གཅིག་ཉིད་ཡིན་ཞེས་དེ་གཉི་གའི་ངོ་བོ་ཡིན་ནོ་སྙམ་དུ་སེམས་པ་ལ། ནགས་སོ་ཞེས་བྱ་བ་བཞིན་དུ་གཅིག་གི་ཚིག་དང་ཚིག་གོ་ཞེས་བྱ་བ་བཞིན་དུ་ཡང་སྣང་བའི་ཕྱིར་སྒྲུབ་པར་བྱེད་པ་མ་ཡིན་པ་ཁོ་ནར་བསྟན་པ་ནི། སྣ་ཚོགས་ངོ་བོའི་ཕྱིར་བློ་དང་
སྦྱར་རོ། །ཚིག་ཐ་དད་པ་དང་ཐ་དད་པ་མ་ཡིན་པ་དག་ནི་དངོས་པོའི་ཐ་དད་པ་དང་ཐ་དད་པ་མ་ཡིན་པ་དག་སྒྲུབ་པར་བྱེད་པ་ནི་མ་ཡིན་ཏེ། བཙུན་མོ་རྣམས་གྲོང་དྲུག་ལ་སོགས་པ་ལ་ཕྱིན་ཅི་ལོག་ལ་སོགས་པའི་ཕྱིར་རོ་ཞེས་བྱ་བའི་དོན་ཏོ། །རྣམ་པར་འཇོག་པ་ལ་གེགས་མེད་པ་ནི་རབ་ཏུ་འཕེལ་བ་

རྩོམ་པ་གང་དག་གི་ཡིན་པ་དེ་དག་གོ། །ཆོས་མཐུན་པ་ནི་རིགས་མཐུན་པ་རྣམས་ཏེ་རྩོམ་པར་བྱེད་པ་ཡིན་པའི་ཕྱིར་རོ། །རིགས་མི་མཐུན་པ་ནི་རྩོམ་བྱེད་མ་ཡིན་པའི་ཕྱིར་རོ་ཞེས་བསྟན་པའོ། །དེ་ལྟ་ན་གང་གི་ཚེ་དེ་དག་ཐ་མི་དད་པ་སྒྲུབ་པར་བྱེད་པ་ཡིན་ཞེ་ན།
སྣང་བའི་གཞན་ལ་ནི་ཞེས་བྱ་བ་སྨོས་ཏེ་གནོད་བྱེད་ལས་སོ། །འབྲེལ་པ་གྲུབ་པ་ནི་ཡུལ་རྣམ་པར་འཇོག་པའི་རྒྱུ་མཚན་གང་དག་གི་ཡིན་པ་དེ་དག་གོ། །སྣང་བ་ནི་རང་ཉིད་ཀྱིས་སོ། །འོན་ཏེ་སྣང་བ་ནི་ཅི་ཞིག་ལྟར་ཞེས་བྱ་བ་ནི། འོག་བཞིན་ནམ་མཁའ་སྣང་བ་ཡིན། །ཞེས་བྱ་བའི་རིགས་
པས་སོ། །གཅིག་ལ་ཞེས་བྱ་བ་ནི་རིམ་པ་དང་ལྡན་པའིའོ། །དུ་མ་ནི་རིམ་པ་མ་ཡིན་པའོ། །གཅིག་ནི་སྣང་བ་ཞེས་བྱ་བ་ནི་རིམ་པའོ། །ཅིག་ཤོས་ནི་འཁྲུལ་པ་ཙམ་དུ་ཟད་དོ་ཞེས་བྱ་བ་ནི་རིམ་པ་མ་ཡིན་པའོ། །དེ་ལྟར་དེ་ཉིད་ཅེས་བྱ་བ་ནི་རིམ་པ་ཉིད་དོ། །གལ་ཏེ་གཞན་ཞེས་བྱ་བ་
ནི་རིམ་པ་མ་ཡིན་པ་སྣང་ནའོ། །རང་དངོས་སྣང་བ་ཞེས་བྱ་བ་ནི་རིམ་པ་ཉིད་སྣང་བས་སོ། །དེ་ཞེས་བྱ་བ་ནི་རིམ་པའོ། །བརྗོད་པ་འདོད་པ་ཞེས་བྱ་བ་ལས་ནི་རིམ་པ་ལས་སོ། །བློ་དེ་ནི་རིམ་པའི་བློའོ། །དེའི་ཞེས་བྱ་བ་ནི་རིམ་པ་མ་ཡིན་པའོ། །རང་གི་ངོ་བོ་ལ་ཞེས་བྱ་བ་ནི་བློའིའོ། །རིམ་
གྱིས་འཛིན་པའི་ངོ་བོ་ནི་ཞེས་བྱ་བ་ནི་རིམ་གྱིས་འཛིན་པའི་ངོ་བོའིའོ། །རིམ་མིན་སྣང་བ་ནི་གཞལ་བྱ་ལ་རིམ་པ་མ་ཡིན་པའི་བྱ་བའོ། །ནོར་བུ་དང་མུ་ཏིག་ལ་སོགས་པ་ནི་གཞལ་བྱ་བའི་ཞེས་བྱ་བ་དང་སྦྱར་རོ། །བློ་འཛིན་པར་བྱེད་པ་ཞེས་བྱ་བ་ནི་རིམ་པ་མ་ཡིན་པའོ། །རིམ་པ་མ་ཡིན་པར་སྣང་བ་
མེད་དོ་ཞེས་བྱ་བ་ནི་གཞལ་བྱ་བའི་བློ་ལ་གནས་པའོ། །འཁྲུལ་པ་སྟེ་སྣང་བ་ཞེས་བྱ་བ་ནི་གཞལ་བྱའི་བློའི་རིམ་པ་མ་ཡིན་པར་སྣང་བའོ། །དེ་ཉིད་ཅེས་བྱ་བ་ནི་བློ་འཛིན་པར་བྱེད་པའི་བློའི་རིམ་པ་མ་ཡིན་པའོ། །བློ་འཛིན་པ་བཞིན་དུ་རིམ་པ་མ་ཡིན་པའི་གཞལ་བྱ་འཛིན་པར་འགྱུར་ཞེས་
ཟེར་བ་ལ། གཞལ་བྱ་འཛིན་པ་ནི་ཞེས་བྱ་བའོ། །འཛིན་པའི་དུས་ནི་ཞེས་བྱ་བ་ནི་བྱ་བའི་དུས་སོ། །སྣམ་བུ་ཁྲ་བོ་ལ་སོགས་པ་ལ་ཡང་གཅིག་ཉིད་དུ་རྟོགས་པས་གཅིག་ཡིན་ནོ་ཞེས་ཁས་ལེན་པའི་སྔར་ཁས་བླངས་པ་དང་འགལ་བ་མ་ཡིན་ནམ་ཞེས་ཟེར་བ་ལ། རིགས་མི་མཐུན་པ་རྣམས་ཞེས་བྱ་བའོ། །

ཡན་ལག་གི་ངོ་བོ་ནི་ཐ་དད་པ་ཡིན་གྱི་སྣ་ཚོགས་པ་གཅིག་མ་ཡིན་པ་དེའི་ཕྱིར་བཏགས་ནས། དོན་གཅིག་ལ་འདུ་བས་ཕྲད་པ་ནི་བཏགས་པ་བ་མ་ཡིན་ནོ་ཞེས་བསྟན་པ་ནི་ཉེ་བར་བཏགས་པ་ཞེས་བྱ་བའོ། །བདེན་མིན་རང་བཞིན་འཛིན་ན་ནི། །ཞེས་བྱ་བ་ནི་གཞལ་བྱ་ལ་གནས་པའི་རིམ་པ་
མ་ཡིན་པའོ། །བདེན་དངོས་ཞེས་བྱ་བ་ནི་བློ་ལ་གནས་པའི་རིམ་པ་མ་ཡིན་པའོ། །རང་བཞིན་དེ་ནི་ཞེས་བྱ་བ་ནི་མདུན་ན་གནས་པ་ཉིད་ཀྱི་སྣང་བཞིན་པའོ། །དེའི་ངོ་བོར་ཞེས་བྱ་བ་ནི་སེར་པོ་ལ་སོགས་པའི་སྣང་བས་སོ། །དེའི་ཞེས་བྱ་བ་ནི་བློའི་བདག་ཉིད་ཀྱིའོ། །མིན་ན་ཞེས་བྱ་བ་
ནི་སེར་པོ་ལ་སོགས་པའི་སྣང་བའོ། །དེ་ལ་དེ་ལྟར་ཞེས་བྱ་བ་ནི་ཅིག་ཅར་བའོ། །དུས་མཚུངས་པར་འཛིན་པ་མི་སྲིད་དོ་ཞེས་བྱ་བ་ནི་རིགས་པ་མ་ཡིན་ནམ། མིག་གི་འོད་ཟེར་ཕྱི་རོལ་གྱི་འོད་ཟེར་དང་ལྷན་ཅིག་ཏུ་གྱུར་པ་དབང་པོ་ཡིན་ན་ཅིག་ཅར་ཁོ་ན་འཛིན་པར་བྱེད་དེ། དེ་ལྟར་ན་མཐའ་མེད་པ་མ་ལུས་
པའི་དངོས་པོ་འཛིན་པ་ཅིག་ཅར་ཁོ་ནར་འགྱུར་ཏེ། ཕྱི་རོལ་གྱི་འོད་ཟེར་དངོས་པོ་ཐམས་ཅད་ཀྱི་རྗེས་སུ་འགྲོ་བའི་ཕྱིར་རོ་ཞེས་བྱ་བའི་བསམ་པས་སྐྱོན་མེད་དོ། །མ་བསྒྲིབས་པ་ལ་ཡང་ཕྲད་ནས་འཛིན་ན། གཟུགས་བཞིན་རེག་བྱ་ལ་སོགས་པ་མིག་གིས་འཛིན་པར་འགྱུར་རོ། །འོན་ཏེ་ཕྲད་
ནས་ཀྱང་རུང་བ་ཉིད་དུ་རུང་བའི་ཡུལ་ཅན་ཉིད་འཛིན་པ་ཡིན་ན། དེ་འདི་ནི་མ་ཕྲད་པ་ལ་ཡང་མཚུངས་པར་བསྟན་པ་ནི། མ་ཕྲད་པར་བྱེད་པ་ཡིན་ཡང་ཞེས་བྱ་བའོ། །སྟ་རེ་ལ་སོགས་པའི་བྱེད་པ་ཕྲད་ནས་བྱེད་པ་མཐོང་བའི་ཕྱིར། ཁབ་ལོང་ལ་སོགས་པ་ཡང་དེ་བཞིན་དུ་འགྱུར་བར་རྗེས་སུ་དཔག་
པར་འགྱུར་རོ་སྙམ་དུ་སེམས་པ་ནི། འོན་ཏེ་ཕྲད་པ་ཞེས་བྱ་བའོ། །མགྱོགས་པར་འགྱུར་བ་ཞེས་བྱ་བ་ནི་ཡལ་ག་དང་ཟླ་བ་དག་དུས་གཅིག་ཏུ་ཤེས་པས་མངོན་པར་རློམ་པ་འཛིན་པ་ཡིན་ནོ་ཞེས་བྱ་བའི་དོན་ཏོ། །དེ་ལྟ་བུར་གྱུར་པའི་ཞེས་བྱ་བ་ནི་རིམ་པའི་ཤེས་པ་ལ་ངེས་པར་བྱེད་པ་ཡིན་ནོ། །དེའི་
ཕྱིར་ཞེས་བྱ་བ་ནི་ཤེས་པ་ཅིག་ཅར་མི་སྐྱེ་བའི་ཕྱིར་རོ། །གཟུགས་མེད་ཕྱིར་ལྡན་ཞེས་བྱ་བ་ལ་སོགས་པ་བཤད་པ་ནི། ཕྲད་པ་ནི་ཞེས་བྱ་བའོ། །སྣ་ཚོགས་པའི་བློས་རིམ་གྱིས་གཟུང་བ་རྣམས་ལ་ཅིག་ཅར་བར་སྒྲོ་འདོགས་པར་བྱེད་པས་བསྲེས་པ་སྟེ། ཅིག་ཅར་སྣང་བ་ནི་སྣ་ཚོགས་བློ་ཡིས་

བསྲེས་པ་ཞེས་བྱ་བར་སྦྱར་རོ། །གཅིག་གིས་དུ་མ་འཛིན་པ་གྲུབ་མཐའ་དང་འགལ་བར་བསྟན་པ་ནི། དུ་མ་མི་འཛིན་ཕྱིར་ཞེས་བྱ་བའོ། །ཇི་ལྟར་སྒྲོ་འདོགས་ཞེས་བྱ་བ་ནི། འདྲ་བ་ཉིད་མེད་པའི་ཕྱིར་རོ། །འོན་ཏེ་ཉེ་བས་སོ་ཞེས་བྱ་བ་ནི་འདྲ་བ་ཉིད་དོ། །ཅིག་ཅར་
འཛིན་པ་ཞེས་བྱ་བ་ནི་མེ་ཉིད་དུ་སྒྲོ་བཏགས་པ་ལའོ། །རིམ་གྱིས་འཛིན་ན་ནི་ཞེས་བྱ་བ་ནི་གཟུགས་ལ་སོགས་པ་རྣམས་ལའོ། །ཉེ་བར་འཛིན་པ་ནི་ཞེས་བྱ་བ་ནི་འདྲ་བ་ཉིད་དུའོ། །ཡུལ་གྱི་དབྱེ་བ་མེད་དོ་ཞེས་ཟེར་བ་ནི། ཡུལ་དེར་ཞེས་བྱ་བ་སྟེ། ཡུལ་གཞན་དུ་གཟུང་བའི་མེ་ཉིད་ནི།
ཡུལ་གཞན་དུ་བར་སྒྲོ་འདོགས་ན་འདྲ་བ་ལ་ལྟོས་པའི་ཕྱིར་རོ་ཞེས་བྱ་བའི་དོན་ཏོ། །རྟོག་པ་མེད་པ་ཅི་ལས་ཡིན། །ཞེས་ཟེར་བ་ལ་རྟོག་པ་ནའང་ཞེས་ཟེར་བ་ནི་འགལ་བ་རྟོག་པ་ཡོད་པ་ན་རྣམ་པར་རྟོག་པ་གཞན་མི་འབྱུང་བའི་ཕྱིར་རོ་ཞེས་བྱ་བའི་དོན་ཏོ། །དེ་ལ་གང་གིས་རྣམ་འབྱེད་
ཅེས་བྱ་བ་ནི་དབྱེ་བ་སྟེ་དེ་ལ་ཕྱི་རོལ་ལའོ། །གང་གིས་བྱེད་པ་ནི་ཚད་མ་གང་གིས་བྱེད་ཅེས་པའོ། །དོན་རྣམས་ཞེས་བྱ་བ་ནི་ཕྱི་རོལ་རྣམས་སོ། །ཕྱི་རོལ་བཞིན་དུ་སྣང་བའི་དབྱེ་བས་ནི་བློའི་རྣམ་པ་ལ་མཚུངས་པ་ཡིན་པར་བསྟན་པ་ནི། སྣ་ཚོགས་སྣང་ཅན་དོན་རྣམས་ལ། །ཞེས་བྱ་བའོ། །
བློའི་རྣམ་པ་ལ་ཡང་སྣང་བའི་དབྱེ་བ་ཡོད་པས་ཐ་དད་པ་ཁོ་ན་ཡིན་པར་བསྟན་པ་ནི། དེ་ནི་དངོས་སྟོབས་ལས་འོངས་ཡིན། །ཞེས་བྱ་བའོ། །དཔྲལ་བའི་དོན་ཅི་ཞིག་ཡིན་སྙམ་དུ་སེམས་པ་ནི། ཅིག་འགྱུར་ཞེ་ན་ཞེས་བྱ་བའོ། །ལན་ནི་སྣ་ཚོགས་དེ་ཞེས་བྱ་བའོ། །གལ་ཏེ་བློའི་རྣམ་པ་
མེད་ན་བློ་ཡང་དེ་དང་ཐ་མི་དད་པས་མེད་དོ། །དེའི་ཕྱིར་ཐམས་ཅད་མེད་པ་དེ་ཁོ་ན་ཉིད་ཡིན་པར་བསྟན་པ་ནི། གལ་ཏེ་དོན་བདག་འདི་ཞེས་བྱ་བའོ། །རྡུལ་ཕྲ་རབ་སོ་སོ་ལ་ཞེས་བྱ་བ་སྟེ། རབ་ཏུ་དབྱེ་བའི་རྣམ་པ་ནི་ཆེས་ཤིན་ཏུ་ཉིད་ཀྱི་སྟེ། གང་ལས་ཆུང་བ་མེད་པ་དེ་ལ་གནས་པའི་ཕྱིར་རོ། །
གཞན་ཡང་ཞེས་བྱ་བ་ནི་གཉི་གའི་ཐུན་མོང་བའིའོ། །མེད་པའི་ཕྱིར་ཐམས་ཅད་མི་རྟོགས་པ་ཁོ་ན་ཡིན་ནོ་ཞེས་བྱ་བའི་དོན་ཏོ། །མཐོང་བ་ཉིད་ཀྱི་ཕྱིར་ཞེས་བྱ་བ་ནི་སྣ་ཚོགས་པ་ཉིད་དུ་རྟོགས་པའི་ཕྱིར་རོ། །བརྐྱང་བ་དམིགས་པའི་ཕྱིར་གཅིག་དང་དུ་མའི་ངོ་བོ་དང་བྲལ་བ་ཡིན་ཡང་

དམིགས་པའི་བདག་ཉིད་ཀྱིས་དམིགས་པ་ཡོད་པ་ཡིན་ནོ་ཞེས་བྱ་བའི་རིགས་པས། ཡོད་པ་ཁོ་ན་ཡིན་ནོ་ཞེས་ཟེར་བ་ནི་ཇི་སྟེ་གཅིག་དང་དུ་མའི་ཞེས་བྱ་བའོ། །དོན་བྱེད་པ་ནི་རྣམ་པ་གཉིས་ཏེ། བདེ་བ་ལ་སོགས་པའི་སྣང་བ་དང་ཕྱི་རོལ་གྱི་སྔོན་པོ་ལ་སོགས་པར་ཁ་བསྒྱུར་བ་ལ་སོགས་
པ་ཡིན་པར་བསྟན་པ་ནི། །སྣང་བ་ཙམ་གྱིས་ཞེས་བྱ་བའོ། །སྔོན་པོ་ལ་སོགས་པ་ན་དེ་དག་ཙམ་གྱིས་འཇིག་རྟེན་པ་མགུ་བ་མ་ཡིན་པས། གང་ལ་མགུ་བར་བྱེད་པ་ཉིད་ཀྱིས་དོན་བྱེད་པ་ཉིད་དུ་སྣང་བ་དེ་དོན་བྱེད་པ་ཡིན་པའི་ཕྱིར་ཐུག་པ་མེད་པ་མ་ཡིན་པར་བསྟན་པ་ནི་གང་ཞིག་ཅེས་བྱ་
བའོ། །སྔོན་པོ་བཞིན་དུ་བཙོས་པ་ཡང་རང་གི་ངོ་བོ་སྣང་བ་ཇི་ལྟ་བུའི་དོན་གྱིས་བྱ་བ་བྱེད་པ་ཉིད་ཀྱིས་དེ་ཉིད་ཡིན་ནོ་སྔོན་པོ་ལ་ཡང་འགྱུར་ཏེ། དེའི་ཡང་དེ་ཉིད་ཡིན་པའི་ཕྱིར་རོ་ཞེས་ཟེར་བ་ལ། སྔོན་པོ་ལ་སོགས་པའི་རང་བཞིན་ལས་ཞེས་བྱ་བའོ། །མགུ་བ་དང་མི་མགུ་བ་དག་ནི་ལ་ལར་
གོམས་པ་ལ་རག་ལས་པ་ཡིན་གྱི་དངོས་པོ་ལ་རག་ལས་པ་མ་ཡིན་པར་བསྟན་པ་ནི། དེ་ཉིད་གནས་པ་མེད་པ་ཁོ་ན་ཞེས་བྱ་བའོ། །སྣ་ཚོགས་པར་སྣང་བའི་ཤེས་པ་ཡང་གོམས་པ་ཁོ་ན་ལས་བྱུང་བ་ཉིད་དོ་ཞེས་བསྟན་པ་ནི། གོམས་པ་མེད་ན་ནི་ཞེས་བྱ་བའོ། །སྔ་མ་སྔ་མའི་མི་བདེན་
པའི་ཤེས་པ་དག་ཉིད་ཅན་གྱི་མ་རིག་པ་ཡང་ཤེས་པ་བཞིན་དུ་མི་བདེན་པ་ཁོ་ན་ཡིན་པར་བསྟན་པ་ནི། སྣང་བ་ཙམ་ཞེས་བྱ་བའོ། །དེའི་བདག་ཉིད་ཅེས་བྱ་བ་ནི་རགས་པའི་ངོ་བོའོ། །གཅིག་ལ་ཞེས་བྱ་བ་ནི་ཡན་ལག་ཅན་ལའོ། །མང་པོ་རྣམས་ཉིད་ཤེས་པ་གཅིག་ལ་སྣང་བ་རགས་པའི་
ཐ་སྙད་ཀྱི་ཡུལ་མ་ཡིན་ནམ་སྙམ་དུ་སེམས་པ་ལ། ལིངས་པོ་གཅིག་ཅེས་བྱ་བ་སྟེ། ཉེ་བ་དང་ཅིག་ཤོས་ཀྱི་སྐྲ་ཤད་ཀྱི་སྣང་བའི་དབྱེ་བ་བཞིན་དུ། འདི་ལ་ཡང་དབྱེ་བ་ཡིན་ནོ་ཞེས་བྱ་བའི་དོན་ཏོ། །དེ་ལྟ་ན་ཡང་ཡན་ལག་དེ་རགས་པའི་སྣང་བ་ཅན་རིལ་པོ་གཅིག་ཏུ་འགྱུར་རོ་ཞེས་བསྟན་པ་ནི།
ཇི་སྟེ་རྡུལ་ཕྲ་རབ་དེངས་པ་ཞེས་བྱ་བའོ། །ཚུ་རོལ་དང་ཕ་རོལ་གྱི་ཆ་བཞིན་དུ་གཅིག་ཡིན་པའི་ཕྱིར་དེའི་ཡང་ཕ་རོལ་གྱི་ཆ་འཛིན་པས་གནས་པའི་གཞལ་བྱ་མཐོང་བར་འགྱུར་རོ་ཞེས་བསྟན་པ་ནི། ཕ་རོལ་གྱི་ཆ་ཞེས་བྱ་བའོ། །ཡོངས་གཅོད་ན་ཡིན་ཞེས་བྱ་བ་ནི་སྔོན་པོའི་འོ། །ཕྱི་རོལ་ལྟར་

ཞེས་བྱ་བ་ནི་སེར་པོའི་བདག་ཉིད་དོ། །ཐ་དད་སྣང་བ་ཞེས་བྱ་བ་ནི་སྔོན་པོ་དང་སེར་པོའི་བདག་ཉིད་དང་། སྟེང་དང་འོག་གི་ཆའི་བདག་ཉིད་ཀྱིས་ཀྱང་བརྐྱང་བའི་སྣང་བ་ལའོ། །སོ་སོར་ཞེས་བྱ་བ་ནི་ཕན་ཚུན་དུའོ། །རང་དང་གཞན་རིག་པ་ཞེས་བྱ་བ་ནི། རང་རིག་པ་
དང་གཞན་རིག་པ་ཡང་ཕན་ཚུན་རྗེས་སུ་མི་འཇུག་པ་ཡིན་ནོ་ཞེས་བྱ་བའི་དོན་ཏོ། །དེ་དག་ལས་གཅིག་དོར་ནས་གཅིག་ཉིད་རྣམ་པར་འཇོག་པར་བྱེད་ན། དེ་ལ་ཡང་མཐོང་བ་ལ་སོགས་པ་གཅིག་བོར་བས་རང་བཞིན་མེད་པ་ཉིད་དུ་ཐལ་བར་འགྱུར་བ་བསྟན་པ་ནི། དེ་ལ་གཅིག་ནི་མེད་པས་
ཀྱང་ཞེས་བྱའོ། །དེ་ཐ་དད་ལ་བརྟེན་པ་ཡིན་ཞེས་བྱ་བ་ནི་ཤེས་པ་ཐ་དད་པ་ལ་བརྟེན་པའོ། །དེ་ནི་བསླད་པ་ཉིད་ཡིན་ན་ཞེས་བྱ་བ་ནི་ཤེས་པ་བསླད་པ་ཉིད་ཡིན་ནའོ། །གཟུང་བ་དང་འཛིན་པའི་ཤེས་བྱ་དང་ཤེས་པ་དག་གི་ངོ་བོ་ལ་དེ་ལས་ཕྱི་རོལ་ནི་ཐ་དད་པ་ཡིན་ནོ། །གཟུགས་སུ་
རུང་བ་དང་ཐོགས་པར་བྱེད་པ་དེའི་ཕྱིར་གཟུགས་དང་ཚོར་བར་བྱེད་ཉམས་སུ་མྱོང་བར་བྱེད་པས་ཚོར་བ་དང་། མཚན་མ་ཀུན་ཏུ་ཤེས་པས་འདུ་ཤེས་དང་། རྣམ་པར་ཤེས་པར་བྱེད་པས་རྣམ་པར་ཤེས་པ་ལ་སོགས་པ་བྱེད་པའི་མཚན་ཉིད་ཀྱི་ཕུང་པོ་ལ་སོགས་པ་མ་ཡིན་ཞེས་ཟེར་བ་ལ། ཕུང་
པོ་ལ་སོགས་བྱེ་བྲག་གི། །ཞེས་པ་སྟེ། མཚན་ཉིད་བྲལ་ནི་མཚན་ཉིད་སྤངས་པའོ། །འདིས་ཕྱི་རོལ་གྱི་དོན་གྱི་ཚུལ་གྱི་སྟོང་པ་ཉིད་དང་། བར་མས་རྣམ་པར་རིག་པར་སྨྲ་བའི་ཚུལ་གྱིས་དང་། དང་པོས་ནི་དབུ་མའི་ཚུལ་གྱིས་བསྟན་པ་ཡིན་ནོ་ཞེས་བྱ་བའི་དོན་ཏོ། །སོ་སོའི་སྐྱེ་བོ་རྣམས་ཕྱི་དང་
ནང་ལ་སོགས་པར་མངོན་པར་ཞེན་པ་ཅན་གྱི་ཤེས་པ་བསྐྱེད་ལ། མ་རིག་པ་ནི་དེ་ལྟ་བུའི་ཤེས་པ་གཞན་གྱི་བག་ཆགས་ཀྱི་རྒྱུ་ཡིན་པར་བསྟན་པ་ནི། ཇི་ལྟའི་རང་རྐྱེན་ལ་ཞེས་བྱ་བ་སྟེ་ཕྱི་རོལ་ལམ་ནང་གི་རྐྱེན་སད་པར་བྱེད་པའོ། །ལྟོས་ནས་ནི་དེ་ལ་ལྟོས་ནས་སོ། །དེ་ལས་ནི་མ་རིག་པ་
སྟེ་དེའི་བག་ཆགས་སད་པ་ཡིན་ལ་དེས་ཉེ་བར་བསླད་པའི་བདག་ཉིད་གང་དག་གི་ཡིན་པ་དེ་དག་གི་མ་རིག་པ་དེ་ཚུ་རོལ་མཐོང་བ་རྣམས་ཏེ། དེ་ཁོ་ན་ཉིད་མ་མཐོང་བ་རྣམས་ཀྱིས་སོ། །དེ་དག་གི། དེ་ཉིད་དེ་ནི་རིགས་མ་ཡིན། །ཞེས་བྱ་བ་ཅི་ལས་ཤེ་ན། དེ་དག་ཅེས་བྱ་བ་སྟེ། ཚུ་

རོལ་མཐོང་བ་རྣམས་ལ་མི་སྲིད་པའི་ཕྱིར་བསླད་པ་མེད་ན་ཞེས་བྱ་བ་དང་སྦྱར་རོ། །འདིས་ནི་དེ་ཁོ་ན་ཉིད་བསྟན་པ་ལ་སྣོད་མ་ཡིན་པ་ཉིད་བསྟན་ཏོ། །དེའི་ཕྱིར་ཞེས་བྱ་བ་ནི་སྣོད་མ་ཡིན་པའི་ཕྱིར་དེ་ཁོ་ན་ཉིད་ཀྱི་དོན་བཞག་ནས། གླང་ཆེན་གཟིགས་སྟངས་ཉིད་མཛད་ནས། །ཞེས་བྱ་བ་ནི་
བདག་ཉིད་ཀྱིས་མཁྱེན་ཀྱང་མི་མཁྱེན་པར་བསྟན་ནས་སོ། །ཕྱི་རོལ་དཔྱོད་ལ་ཞེས་བྱ་བ་ནི་ཕུང་པོ་ལ་སོགས་པ་ལ་དཔྱོད་པ་སྟེ། བདག་མེད་པ་རྟོགས་པར་བྱ་བའི་དོན་དུ་མཛད་པ་སྟེ། འཇིག་རྟེན་འཇུག་པར་བྱ་བའི་ཕྱིར་རོ་ཞེས་བྱ་བར་སྦྱར་རོ། །སྣ་ཚོགས་པར་ཁས་བླངས་པ་ཞེས་བྱ་
བ་ནི་ཤེས་པའི་རྣམ་པ་རྣམ་པར་དབྱེ་བར་མི་ནུས་པའི་ཕྱིར་ཏེ། རྣམ་པར་དབྱེ་བར་ནུས་པ་ཉིད་ཡིན་ན་སྣ་ཚོགས་པ་ཉིད་ལ་དུ་མ་ཉིད་ཀྱིས་ཁྱབ་པ་ཡིན་ནོ་ཞེས་བྱ་བའི་དོན་ཏོ། །ཤེས་པའི་ཁྱད་པར་ཞེས་བྱ་བས་ཤེས་པ་གཅིག་གི་བྱེད་པའི་རྗེས་སུ་འགྲོ་བ་བསྟན་པ་ཡིན་ནོ། །སྔོན་པོ་ལ་སོགས་པ་དེ་ལས་
ཐ་དད་པ་མ་ཡིན་པ་དེའི་ཕྱིར་བྱེད་པ་བཞིན་དུ་གཅིག་ཡིན་པར་བསྟན་པ་ནི། གཞན་བརྟེན་མེད་ཅེས་བྱ་བའོ། །གལ་ཏེ་གཞན་ལ་བརྟེན་པ་བཞིན་དུ་ཅིས་མི་འགྱུར་ཞེ་ན། མཐོང་ནུས་མ་ཡིན་ཞེས་བྱ་བ་སྨོས་ཏེ། གཞན་གྱིས་མཐོང་བར་མི་ནུས་པ་གང་གི་ཡིན་པ་དེ་ནི་སྐྱེས་བུ་
གཞན་གྱིས་ཀྱང་རང་གི་ཤེས་པའི་རྣམ་པ་ཉིད་ཀྱིས་དེ་དང་འདྲ་བ་གོ་བར་བྱེད་པ་ཡིན་གྱི་རྣམ་པ་གཞན་ནི་མ་ཡིན་ནོ་ཞེས་བྱ་བའི་དོན་ཏོ། །དེ་ལྟར་མཐོང་བ་པོ་དེ་ཉིད་ཀྱི་ཕྱིས་འདིའོ་ཞེས་བྱ་བའི་ཤེས་པ་གཞན་བདག་གིར་འཛིན་པའི་གནས་མ་ཡིན་པ་ཉིད་དུ་ཞེན་ནས་བློ་ལ་ཐ་དད་པར་བྱེད་པ་
ཡིན་ནོ་སྙམ་དུ་སེམས་ལ། དེ་ལ་ནི་ཞེས་བྱ་བ་ནི། རྣམ་པར་རྟོག་པས་འབྱེད་པ་ནི་བློ་ལས་གཞན་པ་ཡིན་ལ་གཞན་ཐ་དད་པ་ནི་ཕྱི་རོལ་ཉིད་དུ་ཡིན་གྱི་རང་རིག་པ་ནི་མ་ཡིན་ནོ་ཞེས་བྱ་བའི་དོན་ཏོ། །ཡན་འགར་དུ་ཞེས་བྱ་བ་ནི་ཤེས་པ་རྗེས་སུ་འཇུག་པ་དང་བྲལ་བའོ། །དེས་ན་ཞེས་བྱ་
བ་ནི་བློ་ནི་ཞེས་བྱ་དང་སྦྱར་རོ། །གཅིག་ཉིད་ཅེས་བྱ་བ་ནི་བློའི་རྗེས་སུ་འགྲོ་བས་སོ། །རྣམ་པར་དབྱེ་བ་ཞེས་བྱ་བ་ནི་གཟུགས་ཀྱི་བློ་ལས་སོ། །ཡན་འགར་དུ་འཛིན་པ་ཞེས་བྱ་བ་ནི་སྒྲ་དང་བྲལ་བའི་འཛིན་པས་སོ། །དེའི་ཚེ་ཞེས་བྱ་བ་ནི་སྒྲ་དང་བྲལ་བའི་གཟུགས་ལ་སོགས་པ་སྣང་

བའི་དུས་སུའོ། །སྔར་གྱི་སྣང་བ་ཞེས་བྱ་བ་ནི་དེ་དང་ལྷན་ཅིག་པའི་སྣང་བའོ། །ཐ་མི་དད་པ་ཞེས་པ་ནི་སྒྲ་དང་ཅིག་ཤོས་ཀྱི་སྣང་བ་དག་གོ། །སྒྲ་འདི་དེའི་ཚེ་ཡོད་ཀྱང་ལྐོག་ཏུ་གྱུར་པའི་ཕྱིར་ཤེས་པ་མ་ཡིན་ནོ་ཞེས་བྱ་བར་སྦྱར་རོ། །དོན་ཉིད་ལ་ཞེས་བྱ་བ་ནི་ཕྱི་རོལ་ཉིད་ལ་
སྟེ་སྒྲའི་བདག་ཉིད་ལའོ། །ཤེས་པ་མ་གཏོགས་པ་ཞེས་བྱ་བ་ནི་ཕྱི་རོལ་ཉིད་དུའོ། །གཟུང་བ་དང་འཛིན་པ་ནི་སྔོན་པོ་ལ་སོགས་པ་དང་དེའི་ཤེས་པ་ཡང་ངོ་། །སྔོན་པོ་ལ་སོགས་པ་ནི་སྔོན་པོ་དང་སེར་པོ་ལ་སོགས་པ་སྟེ། སྔོན་པོ་ལ་སོགས་པ་དང་དེའི་ཤེས་པ་དག་ཐ་མི་དད་པ་ལྷན་ཅིག་
དམིགས་པའི་ངེས་པས་ཇི་ལྟ་བ་ཉིད་ཡིན་ན་དེ་བཞིན་དུ་སྔོན་པོ་ལ་སོགས་པ་ཡང་ཕན་ཚུན་ཡིན་ནོ་ཞེས་བྱ་བའི་དོན་ཏོ། །ཐ་མི་དད་པ་ནི་རང་བཞིན་ལས་ཐ་དད་པ་ཡིན་པ་ལ་དབྱེ་བ་མེད་དོ། །དེ་མེད་པས་ཀྱང་ཁྱད་པར་དུ་བྱེད་པ་ཁྱད་པར་དུ་བྱ་བ་ཡང་ངོ་། །ཐ་དད་པ་ཡིན་ན་ཇི་ལྟར་གཉིས་སུ་མེད་པ་
ཡིན་ཞེ་ན་ཐ་དད་མེད་ན་ཞེས་བྱ་བའོ། །དབྱེ་བའི་ཞེས་བྱ་བ་ནི་ཁྱད་པར་དུ་བྱ་བའིའོ། །གཞན་གྱིས་སྒྲོ་བཏགས་པའི་དབྱེ་བ་ནི་མཐོང་བ་ལ་མ་དམིགས་པས་ཐ་སྙད་ཀྱིས་དགག་པར་བྱེད་པ་ཡིན་ཏེ། སྒྲོ་བཏགས་པ་མེད་ན་དགག་པ་མེད་པའི་ཕྱིར་རོ་ཞེས་བསྟན་པ་ནི། ཐ་དད་ཅེས་བྱ་ཞེས་
བྱ་བའོ། །རྣལ་འབྱོར་པས་ཀྱང་འདས་པ་ལ་སོགས་པ་མངོན་དུ་བྱེད་པ་ན་ད་ལྟར་བ་ཉིད་དུ་འགྱུར་རོ་ཞེས་བསྟན་པ་ནི། སྐྱེ་བ་འདི་ལས་ཞེས་བྱ་བའོ། །སྣང་བཞིན་པར་འདོད་པ་ནི་སྔ་མ་དང་ཕྱི་མ་མངོན་པར་འདོད་པའིའོ། །སད་པ་རྣམས་ཞེས་བྱ་བས་རྨི་ལམ་བདེན་པ་མཐོང་བའི་དུས་སུ་
སྣང་བའི་གཏན་ཚིགས་བསྟན་པ་ཡིན་ནོ། །དེ་ལྟར་ཞེས་བྱ་བ་ནི་མི་དམིགས་པའི་བདག་ཉིད་ཀྱིས་སོ། །བརྟན་པ་ལ་སོགས་པ་རྟོགས་པའི་ཕྱིར་ཞེས་བྱ་བ་ནི་ཚེ་རིང་བ་ཉིད་དང་འབྲེལ་པ་ཅན་གྱི་རི་མོ་ལ་སོགས་པའི་རྟགས་མཐོང་བའི་ཕྱིར། མ་འོངས་པའི་ཚེ་རིང་བ་ཉིད་རྟོག་པ་ཡིན་ནོ། །རྒྱུ་
ཡང་ཞེས་བྱ་བ་ནི་རྟོགས་པའི་རྒྱུ་མཐོང་བའི་ཕྱིར་རོ། །དེས་ན་ཞེས་བྱ་བ་ནི་འབྱུང་བར་འགྱུར་བའི་ངོ་བོ་ལས་སམ་འབྲས་བུ་ལས་རི་མོ་ལ་སོགས་པའི་རྒྱུ་ལས་ནི་ཐ་དད་པར་རོ། །བརྟན་པ་ཉིད་ཅེས་བྱ་བ་ནི་རི་མོ་ལ་སོགས་པའི་རྟགས་སུ་བརྗོད་པའོ། །བརྟན་པ་ཉིད་ཅེས་བྱ་བ་ནི་འབྱུང་བར་འགྱུར་

བའི་ངོ་བོ་ལས་འཁྲུལ་པ་མེད་པའོ། །མི་འགྱུར་རོ་ཞེས་བྱ་བ་ནི་ཐལ་ཆེས་པའོ། །ཐམས་ཅད་ཅེས་བྱ་བ་ནི་གཉིས་སུ་མེད་པ་ཉིད་ལ་རྨོངས་པའིའོ། །ཐ་དད་པར་མངོན་པར་ཞེན་པ་ཞེས་བྱ་བ་ནི་འདི་ཐ་དད་པ་ཡིན་ལ་མངོན་པར་ཞེན་པར་བྱ་བ་ཡང་དེ་ཡིན་ནོ། །འདིས་ནི་ངེས་པའི་
དམིགས་པ་གཞན་དགག་པ་མེད་ན་མི་འབྱུང་བ་ཉིད་ཀྱི་ཕྱིར་འགལ་བ་དམིགས་པར་བཤད་དོ། །སྣང་བས་ཐ་མི་དད་པ་བསྒྲུབས་ནས་འཇིགས་པའི་གྲུབ་པ་དང་། བདེ་བ་གཅིག་པར་བསྟན་པ་ནི་ལོགས་སུ་བཅད་པར་མི་ནུས་ཤིང་ཞེས་བྱ་བའོ། །དེ་ཉིད་ཅེས་བྱ་བ་འདིས་ནི་
འདི་ཡིན་ནོ་ཞེས་བྱ་བ་ལ་ཡང་རྟོགས་པ་ཡིན་ལ་འདི་ཡིན་ནོ་ཞེས་བྱ་བ་འདིས་ཀྱང་དེ་ཉིད་ཅེས་རྟོགས་པ་ཡིན་ནོ། །གཞན་དུ་ན་གཞི་མཐུན་པར་རྟོགས་པར་རྟོགས་པ་མ་ཡིན་ནོ་ཞེས་ཟེར་བ་ནི་འོ་ན་ཇི་ལྟར་བྱ་བའོ། །ཐ་སྙད་མཐོང་བའི་ཕྱིར་ཞེས་བྱ་བ་ནི་རྣམ་པར་རྟོག་པ་མཐོང་བའི་ཕྱིར་
རོ། །འོ་ན་ཇི་ལྟར་ཐ་སྙད་དུ་འགྱུར་ཞེས་བྱ་བ་ནི་འཇུག་པ་ལ་སོགས་པའོ། །གལ་ཏེ་དེ་ཞེས་བྱ་བ་ནི་ཐོབ་པར་བྱ་བའོ། །འོ་ན་ཅིའི་ཕྱིར་ཞེས་བྱ་བ་ནི་རྗེས་སུ་དཔག་པ་ཁོ་ནས་ཐོབ་པར་བྱ་བའི་རང་གི་ངོ་བོ་རྟོགས་པ་ཡིན་པར་ཞེས་བྱ་བའི་དོན་ཏོ། །གཏོར་མ་ཡང་ཡིན་ཕྱིར་ཞེས་བྱ་
བ་ནི་ཕྲད་བྱར་བརྟགས་པ་ཞེས་དགོངས་པའོ། །གནོད་སྦྱིན་ཇི་བཞིན་ཞེས་བྱ་བ་ནི་འཇུག་པར་ཡང་བཏགས་པ་ཡིན་ཞེས་བྱ་བའི་དོན་ཏོ། །རང་དང་གཞན་གྱི་དབྱེ་བར་སྣང་བའི་ཤེས་པ་ཡང་རྨི་ལམ་གྱི་ཤེས་པ་བཞིན་དུ་རང་རིག་པ་ཡིན་པར་བསྟན་པ་ནི། འདི་རང་དང་གཞན་དུ་
ཞེས་བྱ་བ་སྟེ། བདག་མ་ཡིན་པ་དང་། བདག་གིས་མ་མཐོང་བ་དང་། ནམ་མཁའ་དང་སེན་མོ་ལ་སོགས་པ་བཞིན་དུ། བསམ་པ་གཞན་ཡང་གཞན་དུ་སྟོན་པ་གཉིས་སུ་མེད་པར་ཤེས་པ་པོའི་སྔར་གོམས་པ་ལས་མ་ཉམས་པ་ཁོ་ན་ཡིན་ནོ་ཞེས་བྱ་བའི་དོན་ཏོ། །རྗེས་སུ་
དཔག་པ་ལས་གཉིས་སུ་མེད་པར་གཟུང་བྱ་ཡིན་པར་རྟོགས་སོ་ཞེས་བྱ་བ་ནི་གཏན་ཚིགས་དང་དམ་བཅའ་བ་ཉིད་འགལ་བ་ཡིན་པར་བསྟན་པ་ནི་འོ་ན་ནི་སྨྱོན་པར་འགྱུར་ཞེས་བྱ་བ་སྟེ། དེ་མ་རྟོགས་ན་སྒྲུབ་པར་བྱེད་པའི་འབྲས་བུ་ཅུང་ཟད་ཀྱང་མེད་དོ་ཞེས་བྱ་བའི་དོན་ཏོ། །འདི་ལ་

རྟོགས་པ་ཞེས་བྱ་བ་ནི་ཕྱིར་རྒོལ་བའི་རྒྱུད་ལས་བྱུང་བའི་གཉིས་སུ་མེད་པ་འཛིན་པའི་སྐྱེ་བ་མེད་པ་ཡིན་ཏེ། རྟོགས་པ་ཐམས་ཅད་དམིགས་པ་ལ་འཁྲུལ་པའི་ཕྱིར་རོ་ཞེས་བྱ་བའི་དོན་ཏོ། །སྣ་ཚོགས་པའི་ཤེས་པ་ལ་གཅིག་གོ་ཞེས་ཁས་ལེན་ན་ཡན་ལག་ཅན་
ཡང་ཤེས་པ་ཉིད་བཞིན་དུ་སྐད་ཅིག་མར་འགྱུར་ཏེ། གང་གི་ཕྱིར་ཡན་ལག་ཅན་དུ་སྨྲ་བ་པོ་རྣམས་ཀྱི་རུས་ཀྱི་ངེས་པའམ་གྲུབ་མཐའི་ངེས་པ་ཡང་མ་ཡིན་ན། གང་གིས་ཡན་ལག་ཅན་སྐད་ཅིག་མ་ཡིན་པ་ཡིན་གྱི། གཞན་མ་ཡིན་སྙམ་དུ་སེམས་པ་ནི། ཇི་སྟེ་བཀབ་པ་ནི་ཞེས་བྱ་བའོ། །
ཡུལ་རུང་ཅན་གྱིས་མི་ཤེས་པ། །རང་གིས་ཤེས་ཕྱིར་དེ་ཤེས་ཡིན། །ཞེས་བསྟན་པ་ནི། ཇི་ལྟ་ཇི་ལྟར་ཞེས་བྱ་བའོ། །རྒྱུ་གཞན་ནི་ཤེས་པའི་རྒྱུ་དབང་པོ་ལ་སོགས་པ་ལས་གཞན་པའོ། །ཕྱི་རོལ་གྱི་དེའི་བསྐྱེད་བྱ་དམིགས་པར་བྱ་བ་ཉིད་ཙམ་ནི་རང་རིག་པ་ལ་རྒྱུ་མ་ཡིན་ཏེ། གཞན་
དུ་ཡང་འཐད་པའི་ཕྱིར་རོ་ཞེས་བསྟན་པ་ནི། དམིགས་པ་ཉིད་དུ་དཔྱད་བྱའི་ཕྱིར། །ཞེས་བྱ་བའོ། །གཞན་གྱི་ཁྱད་པར་དུ་བྱས་པའི་དམིགས་བྱ་ཉིད་ནི་གཞན་དམིགས་པ་རྟོགས་པར་མི་འགྱུར་རོ་ཞེས་བསྟན་པ་ནི། གལ་ཏེ་གཞན་གྱིས་དམིགས་བྱ་བ། །ཞེས་བྱ་བའོ། །འོན་ཏེ་གཞན་
གྱིས་ཁྱད་པར་དུ་བྱས་པའི་དམིགས་བྱ་ཉིད་དམིགས་བཞིན་པ་ལ་གཞན་དུ་རྟོག་པར་བྱེད་དེ། གཞན་དུ་མི་འཐད་པའི་ཕྱིར་རོ་ཞེས་བྱ་བའི་ཕྱོགས་འདི་ལ། རང་ཉིད་དམིགས་པ་ཉིད་ལ་ནི་གཞན་དུ་ཡང་འཐད་པ་ཡིན་ནོ་ཞེས་བྱ་བ་ནི་ལྷག་མ་ཡིན་ལ། གཞན་གྱི་དམིགས་བྱ་ཉིད་གཏན་ཚིགས་
ཡིན་པར་ཁས་ལེན་ན་ནི་གཏན་ཚིགས་ཀྱི་ཁྱད་པར་དམིགས་བྱ་ཡིན་པའི་ཕྱིར་ཐུག་པ་མེད་པས་གཏན་ཚིགས་ཉིད་མི་འགྲུབ་པར་བསྟན་པ་ནི། གལ་ཏེ་དེ་ཡང་གཞན་འདོད་ན། ཞེས་བྱ་བའོ། །ལྐོག་ཏུ་གྱུར་པ་མ་ཡིན་པ་ཉིད་ཀྱིས་ཀྱང་རང་རིག་པར་བརྗོད་པ་ནི། བདག་བཞིན་དུ་
བདག་ལ་ཡང་འགལ་བའི་བྱ་བ་ཡིན་པའི་སྐྱོན་བརྗོད་པའི་གཞི་ཉིད་ཡིན་པར་བསྟན་པ་ནི། བདག་བཞིན་བཟུང་བའི་ཞེས་བྱ་བའོ། །ཐེ་ཚོམ་ཟ་ན་ཞེས་བྱ་བ་ནི་གཞན་ལའོ། །གལ་ཏེ་གཞི་མཐུན་དབང་གིས་ན། །ཞེས་བྱ་བ་ནི་རྟོག་པ་མེད་པའི་མངོན་སུམ་ལས་མི་འགྲུབ་ན། བག་

ཆགས་ཙམ་ལས་བྱུང་བའི་རྣམ་པར་རྟོག་པ་ལས་མི་འགྲུབ་པོ་ཞེས་བྱ་བའི་དོན་ཏོ། །དེ་ལྟ་མིན་ན་ཞེས་བྱ་བ་ནི་དེ་མེད་ན་དུ་མ་ཉིད་མེད་ལ་བསྒྲུབ་བྱ་གཅིག་ཉིད་མེད་ཅིང་དེ་ལས་བཟློག་པ་སྟེ་དུ་མ་ཉིད་མེད་པ་སྟེ་ལྐོག་ཏུ་མ་གྱུར་པ་ཡང་དག་པར་རིག་པ་ལས་སྐྱེད་པར་གྱུར་པ་ཞེས་བྱ་བ་དང་
སྦྱར་རོ། །རྗེས་སུ་འགྲོ་བ་དང་ལྡོག་པ་བསྟན་པ་ནི་གཟུགས་ལ་སོགས་པ་ནི། དེ་མེད་ཀྱང་ཞེས་བྱ་བ་ལ་སོགས་པའོ། །འབྲེལ་པ་ལས་ནི་དེ་དང་འབྲེལ་པ་ལས་སོ། །འདི་ནི་ངས་བྱས་ཞེས་བྱ་བ་ནི་མ་བྱས་པ་ལ་ཡང་ངོ་། །དམན་པར་ཉམས་སུ་མྱོང་བ་ནི་འགྲོ་བ་ན་རྩ་ལ་རེག་
པ་བཞིན་དུ་འདུ་བྱེད་པ་ཉིད་སྐྱེ་བ་མ་ཡིན་ཞིང་། སྐྱེས་པ་ཉམས་པ་ཡང་མ་ཡིན་ནོ་ཞེས་ཟེར་བ་ལ་མ་ཡིན་ཏེ། འདུ་བྱེད་མེད་པའི་ཕྱིར་རོ་ཞེས་བྱ་བའོ། །གང་ལ་སྐྱེད་པ་ཡོད་པ་དེ་ལ་ཡང་རང་གི་དུས་ན་དངོས་པོ་ཉམས་པ་མ་ཡིན་ཞིང་དུས་གཞན་ན་ཡང་དངོས་པོ་ནི་རང་ཉིད་ཀྱིས་མེད་
པར་འགྱུར་བའི་ཕྱིར་སྔ་ན་མེད་པ་ཉིད་ཡིན་པར་བསྟན་པ་ནི། འདུ་བྱེད་པ་ཞེས་བྱ་བའོ། །དེའི་ཕྱིར་རྒོལ་བ་དང་ཕྱིར་རྒོལ་བའི་སྒྲུབ་པར་བྱེད་པ་དང་། དེའི་སྣང་བ་བསྒྲུབ་བྱ་དང་ཅིག་ཤོས་རྟོགས་པ་ལ་སོགས་པ་ལ་ཐམས་ཅད་དེ་ལྟ་བུའི་བག་ཆགས་ལས་བྱུང་བ་ནི་རང་རིག་པ་ཙམ་
གྱིས་མཐར་ཐུག་པ་ཡིན་པའི་ཕྱིར། འགལ་བ་ཅུང་ཟད་ཀྱང་མེད་པར་བསྟན་པ་ནི། མངོན་པར་རློམ་པ་ཙམ་ཞེས་བྱ་བའོ། །སྔོན་པོ་དང་སེར་པོའི་བདག་ཉིད་ཀྱི་ད་ལྟ་བར་ཐ་དད་པ་མེད་ཀྱང་སྔོན་པོ་འདི་ཞེས་བྱ་བ་སྔར་མཐོང་བ་དང་གཅིག་ཡིན་པ་དེ་བཞིན་དུ། སེར་པོ་ཡང་ཡིན་ནོ་ཞེས་
མཐོང་བ་དང་སྣང་བཞིན་པ་གཅིག་ཉིད་དུ་འཛིན་པ་ན། ཕྱི་རོལ་ཉིད་ཡིན་པ་དེ་ལྟ་ན་ཡང་ཐ་དད་པས་སྣ་ཚོགས་པ་གཅིག་ཏུ་འགྱུར་བར་བསྟན་པ་ནི། ཐ་དད་ཅན་ནི་ཞེས་བྱ་བའོ། །དེ་མེད་པར་ཞེས་བྱ་བ་ནི་ཐ་དད་པ་ཅན་མེད་པ་ལའོ། །ཐ་དད་པ་ཅན་གྱི་ཡན་ལག་རྣམས་ཐ་དད་པ་མེད་
པའི་ཞེས་བྱ་བར་སྦྱར་རོ། །ཅིག་ཅར་ཉིད་དུ་འཛིན་པ་ཞེས་བྱ་བ་ནི་ཡན་ལག་ཅན་གྱི་ཤེས་པའི་རྣམ་པ་སྐད་ཅིག་པར་ཁས་བླངས་པར་བྱ་བ་མ་ཡིན་ནོ་ཞེས་བྱ་བའི་དོན་ཏོ། །ཁྱེད་ཅག་ལ་ཡན་ལག་ཅན་གཅིག་པོ་མེད་པ་མ་ཡིན་ནམ། རྡུལ་ཕྲ་རབ་མང་པོ་རྣམས་ཀྱང་ཤེས་པ་གཅིག་ལ་

ཅིག་ཅར་སྣང་བ་ཇི་ལྟར་འགྱུར། དེ་ལྟར་སྣང་བས་ཀྱང་གཅིག་ཉིད་ཡིན་ནོ་སྙམ་དུ་སེམས་པ་ནི། གལ་ཏེ་དུ་མ་གཅིག་གིས་ཞེས་བྱ་བའོ། །ཕྱི་རོལ་གྱི་དོན་ཡོད་པ་ཡང་ཤེས་པའི་དམིགས་པ་མ་ཡིན་གྱི་འོན་ཀྱང་སྐྱེད་པར་བྱེད་པ་ཡིན་ལ། དུ་མས་ཀྱང་གཅིག་
སྐྱེད་པར་བྱེད་པ་ལ་འགལ་བ་མེད་པར་བསྟན་པ་ནི། འགལ་བ་དག་ནི་ཅི་ཞིག་ཡོད། །ཅེས་བྱ་བའོ། །རེ་རེ་ཞིང་སྐྱེད་པར་བྱེད་པ་མ་ཡིན་ཡང་ཕན་ཚུན་བསྐྱེད་པར་བྱ་བའི་ཁྱད་པར་ཡོད་པར་བསྟན་པ་ནི། ཁྱད་པར་སྐྱེས་གྱུར་ཅེས་བྱ་བའོ། །དབང་པོ་ལ་སོགས་བཞིན་ཞེས་བྱ་བ་ནི་
དབང་པོ་དང་སྣང་བ་དང་། ཡིད་ལ་བྱེད་པ་ལ་སོགས་པ་བཞིན་ཏེ། དུ་མ་གཅིག་གི་སྐྱེད་བྱེད་མ་ཡིན་པ་ཡང་རེ་རེ་ཞིང་སྐྱེས་པར་གྱུར་པ་ནི་སྐྱེད་བྱེད་དུ་མཐོང་བ་ཡིན་ཞེས་བྱ་བའི་དོན་ཏོ། །ཉེ་བའི་ཡུལ་ན་གནས་པ་ཤེས་པ་གསལ་བའི་སྐྱེད་བྱེད་ཇི་ལྟར་ཡིན་པ་ཡུལ་རིང་བ་ལ་ནི་དེ་ལྟ་མ་ཡིན་
ཏེ། ཡུལ་ཐག་རིང་བ་ནི་མི་གསལ་བའི་སྐྱེད་བྱེད་ཡིན་གྱི་ཡུལ་ཉེ་བར་ནི་མ་ཡིན་པར་བསྟན་པ་ནི། ཚོགས་གཞན་རྗེས་སུ་ཞུགས་པའི་ཕྱིར་རོ་ཞེས་བྱ་བ་སྟེ། ཕྱི་རོལ་གྱི་ཁྱད་པར་སྐྱེས་པ་ཡང་ཚོགས་པའི་ཁྱད་པར་ཉིད་ཀྱིས་གཟུང་བ་ཡིན་གྱི། དོན་མེད་པ་ལ་ལྟོས་ནས་སྐྱེས་པ་མ་
ཡིན་ཞིང་། གཟུང་བ་ཡང་མ་ཡིན་ནོ་ཞེས་བྱ་བའི་དོན་ཏོ། །རང་གི་སྣང་བའི་རྒྱུ་ཉིད་ཀྱིས་གཟུང་བ་ཡིན་གྱི་ཐམས་ཅད་མ་ཡིན་པར་བསྟན་པ་ནི། རྒྱུའི་དངོས་པོ་མ་གཏོགས་པར་ཞེས་བྱ་བའོ། །སྔོན་པོ་ཉིད་ནི་རྡུལ་ཕྲ་རབ་རེ་རེ་ལྡོག་པ་རྟོགས་པ་ཡིན་ཞིང་། རྗེས་སུ་འཇུག་པ་མ་
ཡིན་པ་མ་ཡིན་ནམ། དེའི་ཕྱིར་སྤྱིར་འགྱུར་རོ་ཞེས་ཟེར་བ་ནི། འདི་རྡུལ་ཕྲ་རབ་རྣམས་ཀྱི་ཞེས་བྱ་བའོ། །རྡུལ་ཕྲ་རབ་མ་གྲུབ་ན་དེའི་སྤྱི་མ་ཡིན་པ་ཉིད་དོ་ཞེས་བསྟན་པ་ནི་གཞན་དུ་མི་འཐད་པའི་ཕྱིར་ཏེ། ལུ་གུ་རྒྱུད་དང་བོང་བ་ཡང་རྡུལ་ཕྲ་རབ་ཏུ་རྣམ་པར་ཕྱེ་བ་མཐོང་བའི་ཕྱིར། རྡུལ་
ཕྲ་རབ་རྣམས་སུ་དེ་དག་ད་ལྟར་གནས་པ་ཡིན་ནོ་ཞེས་བྱ་བའི་དོན་ཏོ། །ཡན་ལག་ཅན་དང་ལྷན་ཅིག་པའི་ཡན་ལག་མི་འཛིན་ན་བ་ལང་ལ་སོགས་པ་ཡན་ལག་ཅན་ཉིད་ཁྱད་པར་ཅན་དུ་འཛིན་པར་བསྟན་པ་ནི། ཇི་ལྟར་རང་གི་ཡན་ལག་བཅས། །ཞེས་བྱ་བའོ། །ཡན་ལག་གི་

ཁྱད་པར་མེད་ཀྱང་ཡན་ལག་ཅན་ནི་རང་གི་ངོ་བོ་ཁོ་ནས་ཡན་ལག་ཅན་གཞན་ལས་ཁྱད་པར་ཅན་ཡིན་ནོ་ཞེས་ཟེར་བ་ལ། ལྐོག་ཤལ་སོགས་མཐོང་མེད་པར་ནི། །ཞེས་བྱ་བའོ། །ལྐོག་ཤལ་ལ་སོགས་པའི་ཁྱད་པ་ནི་ཁྱད་པར་དུ་བྱ་བ་ཡན་ལག་ཅན་རྟོགས་པ་ཡིན་ནོ། །ཁྱད་
པར་ཅན་རྟོགས་པ་གཞན་དུ་མི་འཐད་པ་མེད་པའི་ཕྱིར་རོ་སྙམ་དུ་སེམས་པ་ནི། གལ་ཏེ་ཡོན་ཏན་གཙོ་བོ་དག །ཅེས་བྱ་བའོ། །དེ་ལྟར་ན་ཁྱད་པར་དུ་བྱེད་པ་ཉིད་ཀྱི་ཡན་ལག་གཟུང་བ་ཡིན་གྱི། ཅིག་ཤོས་ནི་མ་ཡིན་ནོ། །དེའི་ཕྱིར་དེ་དག་ཙམ་གྱི་ཁྱད་པར་ཅན་འཛིན་པར་
འགྱུར་གྱི། ཡན་ལག་གཞན་ལ་ཁྱབ་པ་མ་ཡིན་པའི་ཕྱིར་རྟོགས་པ་དང་མ་རྟོགས་པ་དག་ཐ་དད་པར་འགྱུར་བར་བསྟན་པ་ནི་ཅིག་ཅར་ཡན་ལག་ཅེས་བྱ་བའོ། །ཡོན་ཏན་དང་ཡོན་ཏན་ཅན་དག་རིམ་གྱིས་འཛིན་པ་ལ་རང་དབང་ཡིན་པའི་ཕྱིར་ཡོན་ཏན་མ་ཡིན་ཞིང་ཡོན་ཏན་ཅན་
ཡང་མ་ཡིན་པར་བསྟན་པ་ནི། ཡོན་ཏན་ལ་སོགས་ལྡན་པའང་མིན། །ཞེས་བྱ་བའོ། །གཟུང་བའི་ཡུལ་ཙམ་ཁྱད་པར་མ་ཡིན་ཞིང་། ཁྱད་པར་དུ་བྱ་བ་ཡང་ངོ་། །འོན་ཀྱང་དེ་ཉིད་ཀྱིས་འཛིན་པ་ཡང་རྣམ་པར་རྟོག་པས་ཡིན་ལ། རྣམ་པར་རྟོག་པ་ཡང་བདག་ཉིད་ཐམས་
ཅད་འཛིན་པར་མི་ནུས་ཀྱི། ཆ་ཙམ་ལ་མཆོག་ཏུ་འཛིན་པ་ཡིན་པར་བསྟན་པ་ནི། བརྗོད་པར་འདོད་པ་གཞན་དབང་ཕྱིར། །ཞེས་བྱ་བ་སྟེ། དེ་ནི་དེ་ཉིད་ཀྱིས་འཛིན་འགྱུར། །ཞེས་བྱ་བར་སྦྱར་རོ། །ཕྱེ་མ་ལེབ་ཁྲ་ལ་སོགས་གཟུགས། །དུ་མའང་ཞེས་བྱ་བ་ལ་སོགས་པ་
ལ་ཡང་། དེ་མ་ཡིན་པ་ལས་ལོག་པའི་བདག་ཉིད་ཀྱིས་དངོས་པོ་ལ་རེག་པ་ཡིན་གྱི། བདག་ཉིད་ཐམས་ཅད་ཀྱིས་འཛིན་པར་བྱེད་པ་ནི་མ་ཡིན་ནོ་ཞེས་བྱ་བའི་དོན་ཏོ། །དོན་དམ་པ་མ་ཡིན་ཏེ་ཞེས་བྱ་བ་ནི་བཏགས་པ་ཡིན་པའོ། །ཅི་ལས་ཤེ་ན་ཁྱད་པར་ཉིད་ཅེས་བྱ་བ་སྟེ།
བརྗོད་པར་འདོད་པའི་དབང་གིས་ངེས་པ་ཉིད་མ་ཡིན་པའི་ཕྱིར་ཐམས་ཅད་དངོས་སུ་མ་ཡིན་ཞེས་བྱ་བའི་དོན་ཏོ། །གྲུ་བཞི་མ་ཡིན་ནོ་ཞེས་བྱ་བའི་ཁྱད་པར་ཉིད་ལ་སོགས་པ་ངེས་པ་ཅན་མ་ཡིན་པ་ཉིད་དུ་བསྟན་པ་ནི་སྣ་ཚོགས་པ་ཉིད་ནི་མ་ངེས་པ་ཉིད་དོ། །ལྐོག་ཤལ་ལ་

སོགས་པ་དང་ཉེ་བར་ལྡན་པའི་རྫས་ནི་བ་ལང་གི་ཤེས་པ་ཡུལ་ཡིན་གྱི་གཞན་ནི་མ་ཡིན་ནོ། །བ་ལང་ཤེས་པ་མཐོང་བ་མེད། །ཅེས་བྱ་བ་ལ་སོགས་པ་བསྟན་ཟིན་ཏོ། །ཉེ་བར་ལྡན་པ་མ་ཡིན་པའི་རྫས་ཀྱང་རང་གི་ངོ་བོས་ཡོད་པ་མ་ཡིན་ནམ།
དེ་དང་ལྡན་པ་མ་ཡིན་པ་བ་ལང་དང་རྟ་ལ་སོགས་པའི་དབྱེ་བ་མ་རྙེད་པའི་རྫས་ཙམ་ནི་དོར་བྱ་མ་ཡིན་ཞིང་བླང་བྱ་མ་ཡིན་པར་བསྟན་པ་ནི། རང་གི་དངོས་པོ་གཞན་དག་ལས་ཞེས་བྱ་བའོ། །རང་གི་ངོ་བོ་ཉིད་ཀྱིས་རྣམ་པར་དབྱེ་བ་ཡིན་ན། བ་ལང་ཉིད་ལ་སོགས་པ་དབྱེ་བ་བྱེད་པར་
མི་འགྱུར་བར་བསྟན་པ་ནི་བ་ལང་རང་ཉིད་ཀྱིས་ཞེས་བྱ་བའོ། །ཁྱད་པར་ཉིད་དམ་ཁྱད་པར་དུ་བྱ་བ་ཉིད་དངོས་སུ་ཡིན་དུ་ཟིན་ཀྱང་། རིམ་གྱིས་འཛིན་པ་ལ་ནི་ཁྱད་པར་ཙམ་གང་གི་ཡིན་པ་ལ་མཚོན་པའི་ཁྱད་པར་དུ་བྱ་བ་ཙམ་དུ་འགྱུར་རོ་ཞེས་བསྟན་པ་ནི། ཡོན་ཏན་ལ་སོགས་ཁྱད་
པར་ནི། གཟུང་ཕྱིར་ཞེས་བྱ་བའོ། །དེ་བསྟན་པ་ནི་གང་གི་ཡིན་པ་མི་ཤེས་པར་འགྱུར་རོ་ཞེས་བྱ་བའོ། །ཡན་ལག་ཅན་གྱི་ཕྱོགས་ལ་རེ་ཞིག་ཅིག་རྐྱང་པ་བཟུང་བ་མ་ཡིན་ནམ། དེ་ནི་གཞན་ལས་ཐ་དད་དམ་ཐ་མི་དད་ཅེས་རྣམ་པར་དཔྱོད་པ་མེད་དོ། །དུ་མའི་ཕྱོགས་ལ་ནི་ཡིད་ནི་
གཅིག་ལ་བྱ་བ་བྱེད་པས་གཞན་ལ་བྱེད་པ་མེད་པའི་ཕྱིར་ཡན་ལག་རྫོགས་འཛིན་མིན་ཞེས་བྱ་བ་ལ་སོགས་པའི་ཐལ་འགྱུར་གྱི་ལན་དཀའ་བ་ཁོ་ན་ཡིན་ནོ་སྙམ་དུ་སེམས་པ་ལ་སྒྲ་སོགས་ཞེས་བྱ་བའོ། །དུ་མ་ཅིག་ཅར་འཛིན་པ་ལ་ནི་འདི་སྐྱོན་མ་ཡིན་ནོ། །ཡན་ལག་རྫོགས་པ་
འཛིན་པ་ནི་གཞན་དུ་མི་འཐད་པའི་ཡིད་ཀྱིས་དེ་རྙེད་པ་འཛིན་པར་ནུས་པའི་ཕྱིར་ཡན་ལག་ཅན་གྱི་ཕྱོགས་ལ་ཡང་འདི་ལྟ་བུའི་ནུས་པ་ཅན་གྱི་ཡིད་ནི་ཡན་ལག་རྫོགས་པ་འཛིན་པ་ལས་གཞན་དུ་མི་འཐད་པའི་ཕྱིར་རོ་ཞེས་ཟེར་བ་ལ་བཀོད་པ་སྟེ་ཡན་ལག་ཅན་གྱིའོ། །འཛིན་པར་མི་རུང་བ་ནི་
བཀོད་པ་ཅན་ཏེ། ཡན་ལག་ཅན་རྣམས་རིག་པར་མི་རུང་བའོ། །འགྲེལ་པར་ནི་དགོད་པར་བྱ་བའི་བདག་ཉིད་ཀྱི་བཀོད་པར་འཛིན་པ་ཡིན་ན། གྲངས་ཅན་གྱི་ཅིག་ཅར་དུ་མི་འཛིན་པར་འགྱུར་བར་བསྟན་པ་ནི། དེ་ཙམ་ལྔའི་ཞེས་བྱ་བའོ། །འདི་ཉིད་རྣམ་པར་དབྱེ་བ་ནི། དེ་ལ་སྒྲའི་

ཡོངས་སུ་གྱུར་པའི་ཞེས་བྱ་བའོ། །ལན་ལྷག་མ་ནི་ཞེས་བྱ་བ་ནི་མགྱོགས་པར་ཞེས་བྱ་བ་ལ་སོགས་པས་སོ། །རྡུལ་ཕྲ་རབ་གཅིག་ཅིག་ཅར་འཛིན་པ་བཞིན་དུ་མི་རྟག་པ་དང་། བྱས་པ་ཉིད་ལ་སོགས་པའི་ཆོས་དང་ལྡན་པའི་དུ་མའི་ཆོས་ཅན་འཛིན་པ་ཡང་ཅིག་ཅར་ཁོ་ན་མ་ཡིན་ནམ།
དེ་བཞིན་དུ་མིག་ཕྱེ་བ་ཁོ་ནས་ཡོད་པ་དང་བུམ་པ་དང་། རྫས་དང་མི་རྟག་པ་དང་བྱས་པ་དང་ཟླུམ་པོ་ཞེས་བྱ་བའི་བདག་ཉིད་ཀྱིས་མཐོང་བ་ཡིན་ཏེ། ཐུན་མོང་མ་ཡིན་པ་བཞིན་དུ་ཡིན་ལ་དབང་པོའི་རྗེས་སུ་བྱེད་པ་ནི་མངོན་སུམ་མ་ཡིན་པ་མ་ཡིན་ཏེ། ཐལ་ཆེས་པར་འགྱུར་བའི་ཕྱིར་རོ་སྙམ་
དུ་སེམས་པ་ལ། རྫས་ལ་སོགས་པའི་ཤེས་པ་རྣམས་དབང་པོའི་རྗེས་སུ་བྱེད་པ་ནི། གཞན་ལས་དངོས་པོའི་དབྱེ་བ་འཛིན་པ་སྔོན་དུ་འགྲོ་བ་ཅན་ཡིན་པའི་ཕྱིར་གཞན་དུ་གྲུབ་པ་ཡིན་པར་བསྟན་པ་ནི། ཆོས་ཅན་ཐམས་ཅད་ལས་ལྡོག་པ་ཞེས་བྱ་བའོ། །དེའི་ཐ་དད་པ་ནི་དེ་ཐ་དད་པ་
སྟེ། འཛིན་པ་དེས་བརྟགས་པའི་ཐ་དད་པ་ཅན་ཏེ། ཉེ་བར་བརྟགས་པའི་སྣ་ཚོགས་པ་ཉིད་ཡིན་གྱི་བརྟགས་པ་གཞན་གྱིས་ནི་མ་ཡིན་ནོ། །དུ་མའི་ངོ་བོ་གང་ཡིན་པ་དེ་ནི་དེའི་ཐ་དད་པར་འཛིན་པའི་བརྟགས་པའི་ཐ་དད་པའོ། །དེའི་ཕྱིར་མིག་ལ་སོགས་པ་ལ་ལྟོས་པའོ། །འདི་
ལྟར་མ་ཧེ་ལ་སོགས་པའི་ཚོགས་བོར་ནས། བ་ལང་གི་ཚོགས་ཀྱི་རྗེས་སུ་འགྲོ་བ་ནི་དེ་བོར་ནས་འདི་རྣམ་ཤེས་སོ་ཞེས་རྟོགས་པའོ། །འདི་རྣམས་ཀྱི་མཚུངས་པའི་ངོ་བོ་ཤེས་སོ་ཞེ་ན། ཉེ་བ་རྟོགས་པ་མ་ཡིན་ཏེ། རིང་བ་ན་གནས་པ་ཡང་དངོས་པོ་དེ་རྣམས་ཉིད་ཉེ་བ་མ་ཡིན་
པ་སྐྲ་ཤད་བཞིན་དུ་ཉེ་བར་རྟོགས་པ་ཡིན་ལ། ཐ་དད་པའི་སྣང་བ་དེ་དག་ལ་ཐ་མི་དད་པའི་སྒྲོ་འདོགས་པ་ནི་འཁྲུལ་པ་ཡིན་ནོ་ཞེས་བྱ་བ་འདི་དག་ཙམ་ནི་རིག་པའི་ཡུལ་ཡིན་གྱི་སྤྱི་ལ་སོགས་པ་ནི་མ་ཡིན་ན། གང་གིས་དེ་འཛིན་པ་ལས་མངོན་སུམ་རྟོགས་པ་ཅན་དུ་འགྱུར་བ་ཡིན།
དོན་འདི་ཉིད་ནི་གལ་ཏེ་རྣམ་པར་རྟོག་པ་མེད་པ་ཞེས་བྱ་བ་ལ་སོགས་པའི་དོགས་པས་ཆོས་ཅན་དུ་མའི་ངོ་བོ་ནི་ཞེས་བྱ་བ་ལ་སོགས་པས་ཐམས་ཅད་ལས་ལོག་པའི་དངོས་པོ་མངོན་སུམ་གྱིས་འཛིན་པ་ཡིན་ལ། དེའི་རྗེས་སུ་འབྲངས་པའི་རྣམ་པར་རྟོག་པ་ནི་ཆོས་ཅན་དང་ཆོས་ལ་

སོགས་པའི་རྣམ་པར་དབྱེ་བ་ལ་དཔྱོད་པར་བྱེད་པ་ཡིན་པར་བརྡའི་རྗེས་སུ་འབྲངས་ནས་ཞེས་བསྟན་པ་ནི། དུ་མའི་ངོ་བོ་ཞེས་བྱ་བའོ། །ཁྱད་པར་དུ་བྱ་བ་དང་ཁྱད་པར་གྱི་ངོ་བོར་རྣམ་པར་དབྱེ་བ་ཇི་ལྟར་རྟོགས་ཞེས་ཟེར་བ་ལ། རང་ཉིད་རིག་བྱ་སྟེ། རང་
གི་ངོ་བོས་རིག་པར་བྱ་བའོ། །ལྡོག་པར་བརྟགས་པ་ཡང་དེ་ཉིད་ཀྱིས་ཡིན་ནོ་སྙམ་དུ་སེམས་པ་ལ། བསྟན་མིན་པའི་ཞེས་བྱ་བ་སྟེ། བསྟན་པའི་ཡུལ་མ་ཡིན་པ་ཉིད་ཀྱིས་རྟོགས་པའི་ཡུལ་ཉིད་མ་ཡིན་པར་མཚོན་པའོ། །དབང་པོ་ལྔའི་ཡུལ་གཟུགས་ལ་སོགས་པ་བཞིན་དུ་
དེའི་ཆོས་ཀྱང་མ་ཡིན་ནམ། དེ་ཇི་ལྟར་དེ་འཛིན་པའི་ཤེས་པ་རྟོགས་པ་མེད་པ་ཡིན་ཞེས་ཟེར་བ་ལ་ཕན་ཚུན་དབེན་པར་ནི་ཞེས་བྱ་བ་སྨོས་ཏེ། གཟུགས་དང་རོ་ལ་སོགས་པ་ཕན་ཚུན་མི་ལྡན་པ་རྟོགས་པ་ཡིན་གྱི་གཞི་གཅིག་མ་ཡིན་པ་སྟེ། གཅིག་མ་ཡིན་ཞེས་བྱ་བའི་དོན་ཏོ། །
མཐོང་བ་ལ་བདག་གིས་རེག་གོ་ཞེས་ངེས་པ་རྗེས་སུ་འཇུག་པའི་བྱེད་པ་ཅན་གྱི་མཐོང་བ་དང་། རེག་པའི་མངོན་སུམ་ནི་གཟུགས་དང་རེག་པ་དག་གི་གཅིག་ཉིད་དམ། དེའི་གཞི་གཅིག་ཉིད་ཡུལ་དུ་བྱེད་པ་མ་ཡིན་ནམ་སྙམ་དུ་སེམས་པ་ལ། གལ་ཏེ་བདག་གིས་མཐོང་བ་ཞེས་
བྱ་བའོ། །རྣམ་པར་རྟོག་པ་ཇི་ལྟ་བ་བཞིན་དུ་མཐོང་བ་མ་ཡིན་ཏེ། ཐལ་ཆེས་པའི་ཕྱིར་རོ། །འོ་ན་ཅི་ཞེ་ན། ཇི་ལྟ་བ་ཉིད་དེ་ཡིན་ནོ་ཞེས་བསྟན་པ་ནི། མ་ཡིན་ཏེ་ངོ་ཤེས་པ་ཞེས་བྱ་བའོ། །དེ་ལ་བག་ཆགས་ཇི་ལྟ་བ་བཞིན་དུ་འབྱུང་ཞིང་མཐོང་བ་ལ་བརྟེན་པ་མ་ཡིན་པར་བསྟན་པ་
ནི། གདུགས་དང་རེག་པ་ཞེས་བྱ་བའོ། །འདིའི་མཐོང་བ་ཉིད་ཀྱི་རྗེས་སུ་འབྲང་བ་ཉིད་བསྟན་པ་ནི་མིག་གི་རིགས་པ་ནི་གཟུགས་ཙམ་རིག་པ་ཡིན་ནོ་ཞེས་བྱ་བར་སྦྱར་རོ། །རེག་པ་ཡང་ཡིན་ལ་འཇུག་པ་ཡང་ཡིན་པས་རེག་པ་འཇུག་པ་སྟེ་དེ་མེད་པའི་ཕྱིར་རོ་ཞེས་བྱ་བའོ། །གང་གི་ཞེས་
བྱ་བའིའོ། །རེག་པར་བྱེད་པའི་ཕྱིར་རེག་པ་སྟེ། རེག་པ་ཡང་ཡིན་པ་ཡུལ་ཡང་དེ་ཡིན་པའོ། །གང་གི་ཚེ་དེ་རེག་པ་ཞེས་བྱ་བ་འདི་ལ་ཡང་བར་དུ་གསལ་བར་བྱེད་པས་གང་གི་ཡིན་ཞེས་བྱ་བ་འབྲེལ་བཞིན་པའི་ཤུགས་ཀྱི་གང་གི་ཞེས་བྱ་བར་འགྱུར་ཏེ། མཐོང་བ་དང་རེག་པའི་

ཤེས་པ་ཕན་ཚུན་ཡུལ་ཐ་དད་པས་ནང་གི་ཡུལ་ཉིད་རྗེས་སུ་དཔག་པ་ལས་རྟོགས་པར་བྱེད་ཅིང་། ཐ་དད་པ་ཉམས་པར་བྱེད་དོ་ཞེས་བྱ་བའི་དོན་ཏོ། །གལ་ཏེ་མཐོང་བ་དང་རེག་གོ་ཞེས་བྱ་བ་དེ་ལྟ་བུའི་བྱེད་པ་རྟོགས་པར་བྱེད་པ་ནི། མཐོང་བ་མ་ཡིན་གྱི་འོ་ན་ཅི་ཞེ་ན། ཡིད་ཀྱི་མངོན་སུམ་
ཡིན་ཏེ། ཡིད་ནི་དབང་པོ་ཡིན་པའི་ཕྱིར་དེའི་གཅིག་ཉིད་དམ་རྟེན་གྱི་གཅིག་ཉིད་རྣམ་པར་འཇོག་པར་བྱེད་དོ་སྙམ་དུ་སེམས་པ་ནི། འོན་ཏེ་དེ་ཉིད་ཅེས་བྱ་བའོ། །མ་འཁྲུལ་པ་ཉིད་དེ་མི་སླུ་བ་ཉིད་ནི་མངོན་སུམ་གྱིས་རྟོགས་པ་མ་ཡིན་ཏེ། མཐོང་བ་དང་རེག་པའི་མངོན་སུམ་ནི་ངེས་པའི་
ཡུལ་ཅན་ཡིན་པའི་ཕྱིར་རོ་ཞེས་བསྟན་པ་ནི། གང་ཉིད་མཐོང་བ་ཞེས་བྱ་བའོ། །མཐོང་བ་ལ་སོགས་པས་མ་ཕྱེ་བའི་གཟུགས་ཀྱི་གཟུགས་ཉིད་གསེར་གྱི་བུམ་པ་བཞིན་དུ་ཡན་ལག་ཅན་གཅིག་མ་ཡིན་ནམ་སྙམ་དུ་སེམས་པ་ལ་གཟུགས་ལ་སོགས་པ་ཐ་དད་པ་ཞེས་བྱ་བ་སྟེ། གཟུགས་
ཀྱང་ཐ་དད་པར་མཐོང་བར་ནུས་པ་ནི་དུ་མ་ཉིད་ཡིན་ནོ་ཞེས་བྱ་བའི་དོན་ཏོ། །དབྱེ་བར་མི་ནུས་པའི་གཟུགས་ནི་ཤེས་པ་གཅིག་གི་ཁོངས་སུ་གཏོགས་པ་ཡིན་གྱི་ཕྱི་རོལ་གྱི་མ་ཡིན་པར་བསྟན་པ་ནི། དེ་བཞིན་དུ་གཟུགས་ནི་རང་གིས་རིག་པར་བྱ་བ་ཞེས་བྱ་བའོ། །རྣམ་པར་རྟོག་པ་ནི་དབང་
པོའི་ཡུལ་ལ་ཞེན་པར་བྱེད་ཅིང་དེ་མ་ཡིན་པའི་ཤེས་པ་བཞིན་དུ་རྟོགས་པར་བྱེད་པ་མ་ཡིན་པར་བསྟན་པ་ནི། ངོ་ཤེས་པ་ནི་ཚད་མ་ཉིད་མ་ཡིན་ཞེས་བྱ་བའོ། །འདིར་ཡང་ཞེས་བྱ་བ་ནི་རྣམ་པར་རྟོག་པ་ལའོ། །མངོན་སུམ་དང་མི་མཐུན་པའི་ཕྱིར་ཞེས་བྱ་བ་ནི། མངོན་སུམ་གྱི་
ཁྱད་པར་ཏེ། རྣམ་པར་རྟོག་པའི་ནི་མ་ཡིན་ནོ་ཞེས་བྱ་བའི་དོན་ཏོ། །རང་གི་ངོ་བོ་སྟེ་མངོན་སུམ་གྱི་རྟོགས་པར་བྱ་བའི་ཁྱད་པར་ཡིན་པ་ནི་དེའི་རྟོགས་པ་ཡིན་ནོ། །སྒྲ་ལས་བྱུང་བ་ལ་སྣང་བ་ནི་ཚིག་ལས་བྱུང་བའི་ཤེས་པ་གནོད་པ་མེད་པ་ཡིན་ཏེ། ཡུལ་གང་དང་གང་དུ་འབྱུང་བའི་ཕྱིར་དེ་
ནི་ཚད་མ་མ་ཡིན་ཏེ། ཚད་མ་མེད་པའི་ཕྱིར་རོ། །ངག་ལས་བྱུང་བ་དེ་ནི་ཐེ་ཚོམ་ལས་ཁྱད་པར་མེད་པར་བསྟན་པ་ནི་མ་ཡིན་ཏེ། དེ་ལ་ཡང་ཞེས་བྱ་བའོ། །ཁྱེར་ལ་ཤོག་ཅེས་བྱ་བས་གདོན་མི་ཟ་བར་བྱ་བ་ཉིད་དུ་རྟོགས་པ་ཡིན་གྱི། ཕྱོགས་ཅན་ནི་མ་ཡིན་པ་མ་ཡིན་ནམ། དེའི་

ཕྱིར་འཁྲུལ་པ་མེད་པ་ཡིན་ཏེ་གཟུགས་གཞན་བཀག་པ་ཡིན་ནོ་སྙམ་དུ་སེམས་པ་ནི། འོ་ན་ཇི་ལྟར་ཁྱེར་ནས་འོངས་པ་ལ་སོགས་པ་ཞེས་བྱ་བའོ། །ཚིག་གི་ཤེས་པ་ནི་རང་བཞིན་པའི་འབྲེལ་པ་མེད་པའི་ཕྱིར་དོན་ལ་ངེས་པ་ཅན་མ་ཡིན་ན། དེ་སྔོན་དུ་འགྲོ་བ་
ཅན་གྱི་ངག་གི་ཤེས་པ་ཡང་དེ་ཁོ་ན་བཞིན་དུའོ་ཞེས་བསྟན་པ་ནི་མི་འཁྲུལ་པ་ཡོད་པ་ནི་མ་ཡིན་ཏེ་ཞེས་བྱ་བའོ། །བྱ་བ་ལ་ཞེས་བྱ་བ་ནི་བསྐུལ་བ་ལའོ། །དེ་ནི་འདི་ལྟར་རྣམ་པར་རྟོག་པ་ལས་མངོན་སུམ་གྱི་ཡུལ་ཐ་དད་པ་ཡིན་ན། ཇི་ལྟར་འདི་མངོན་སུམ་ལས་བྱུང་བ་དང་། ཇི་ལྟར་
དབང་པོའི་རྗེས་སུ་བྱེད་པ་ནི་གཞན་དུ་གྲུབ་པ་ཡིན་ནོ་ཞེས་ཟེར་བ་ནི། འོ་ན་ཇི་ལྟར་ཆོས་ཅན་གྱི་ཆོས་ཞེས་བྱ་བའོ། །ཚིགས་སུ་བཅད་པའི་དབང་དུ་བྱས་ནས་བསྟན་པ་ནི། ཆོས་ལ་སོགས་པའི་ཞེས་བྱ་བའོ། །ལྡོག་པ་འཛིན་པའི་ཁྱད་པར་གྱིས་བརྟགས་པ་དེས་སྐྱེད་པ་སྟེ། རྣམ་པར་
རྟོག་པས་སྤྲུལ་པ་ཡིན་ལ་དེའི་ཕྱིར་དབང་པོའི་རྗེས་སུ་འདི་གཞན་དུ་གྲུབ་པ་ཡིན་ནོ་ཞེས་བྱ་བའི་དོན་ཏོ། །ལྡོག་པའི་ཚིག་གིས་དོན་འཛིན་པ་ལ་རྣམ་པར་རྟོག་པའི་རྒྱུ་ཉིད་ཡིན་པར་བསྟན་པ་ནི། དེ་ལ་ད་ལྟར་ནི་ཞེས་བྱ་བའོ། །དམིགས་ཀྱིས་བསལ་བའི་རྟོག་པ་ཉིད་བསྟན་པ་ནི།
གལ་ཏེ་ཁ་དོག་དང་ཞེས་བྱ་བ་སྟེ། སྔོན་པོ་ཞེས་དབྱིབས་ཀྱིས་ཕྱེ་བ་ཡིན་ནོ་ཞེས་བྱ་བའི་དོན་ཏོ། །སྔོན་པོ་མ་ཡིན་པ་ལས་ཐ་དད་པའི་དབྱིབས་ནི་སྔོན་པོ་ལ་སོགས་ཡིན་ན། དེས་ན་སྔོན་པོ་མ་ཡིན་པར་འགྱུར་བར་བསྟན་པ་ནི། དེ་ཚེ་བུམ་པ་ཞེས་བྱ་བ་ལ་སོགས་པའོ། །སྔོན་པོ་
ལས་ཐ་མི་དད་པ་ཡང་སྔོན་པོ་མ་ཡིན་པ་ལ་ཡིན་ན། དེས་ན་དེ་སྔོན་པོར་འགྱུར་རོ་ཞེས་བསྟན་པ་ནི། སྔོན་པོ་མ་ཡིན་པ་ཞེས་བྱ་བ་ནས་དབྱིབས་ལ་སོགས་པ་ཞེས་བྱ་བའི་བར་དུའོ། །གང་གི་ཕྱིར་སྔོན་པོ་མ་ཡིན་པ་ཡང་སྔོན་པོའི་ཁོངས་སུ་གཏོགས་པ་མ་ཡིན་པ་དང་། གང་གི་
ཕྱིར་ཡང་སྔོན་པོའི་དབྱིབས་སྔོན་པོ་མ་ཡིན་པའི་ཁོངས་སུ་གཏོགས་པ་མ་ཡིན་པ་དེའི་ཕྱིར་ཞེས་ཉེ་བར་སྡུད་པ་ཡིན་ནོ། །ཐ་དད་པ་ལ་ཐ་མི་དད་པ་སྣང་བ་ནི་རྒྱུ་མཚན་གཞན་ཅན་གྱི་འཁྲུལ་པ་ཁོ་ན་ཡིན་ལ་ཤེལ་ལ་དམར་པོ་ཉིད་བཞིན་དུ་ཞེས་ཟེར་བ་ནི། དོན་གཅིག་ལ་འདུ་བ་ན་

ཞེས་བྱ་བའོ། །ཐ་དད་པར་དགའ་བ་ཉིད་ནི་དོར་བྱ་ཉིད་ཡིན་ཏེ། དེ་དང་འདུ་བས་སོ་སོར་སྣང་དུ་རུང་བ་ལ་གཟུགས་སུ་སྣང་བ་ཡིན་ན། གང་ལ་ཤེས་པ་གཅིག་ཏུ་སྣང་བ་ཡིན་ཞིང་། ཇི་ལྟར་དབང་པོ་ཐ་དད་པའི་གཟུང་བ་ཡིན་ཏེ། འཛིན་པའི་འབྲས་བུ་ཐ་མི་དད་པའི་
ཕྱིར་རོ་ཞེས་བྱ་བའི་དོན་ཏོ། །བུམ་པ་རྟོགས་པར་མི་འགྱུར་རོ་ཞེས་བྱ་བ་ནི། སྣམ་བུ་རྟོགས་པ་དང་མཚན་ཉིད་མི་མཐུན་པ་ཙམ་ནི། གཟུགས་ལ་སོགས་པ་ཙམ་ནི་ཐམས་ཅད་ལ་མཚུངས་པའི་ཕྱིར་རོ། །དེའི་ཕྱིར་བ་ལང་ཉིད་ལ་སོགས་པ་ཐ་དད་པ་རྣམས་ཀྱི་ཞེས་བྱ་བ་ནི་དེ་དང་ཐ་མི་
དད་པ་རྣམས་ཀྱིའོ། །རྗེས་སུ་དཔག་པ་དང་ལྡན་པའི་ཞེས་བྱ་བ་ནི་རྗེས་སུ་འགྲོ་བ་དང་ལྡོག་པ་ཉམས་པའོ། །མངོན་སུམ་གྱི་གོ་བྱ་ཉིད་ཡིན་ན་ཡང་རྗེས་སུ་དཔག་པ་དོན་མེད་པ་མ་ཡིན་པ་དེའི་ཚོགས་པ་ཅན་འདི་ཡིན་པའི་ཕྱིར་རོ་ཞེས་བསྟན་པ་ནི། འདི་ནི་མེ་ལ་ཡང་ཞེས་བྱ་བའོ། །
དབང་པོ་ལ་སོགས་པ་ཡང་མིག་འབྲས་ལ་སོགས་པ་ལས་གཞན་གཞན་པ་མི་འདོད་པ་ཁོ་ན་ཡིན་ནོ་ཞེས་ཟེར་བ་ནི་རྟག་ཏུ་རྗེས་སུ་དཔག་པར་བྱ་བ་ཞེས་བྱ་བའོ། །རྗེས་སུ་འགྲོ་བ་དང་ལྡོག་པ་ཅན་ཉིད་ལ་ཐ་དད་པས་ཁྱབ་པ་ནི་དབྱིབས་དང་ཁ་དོག་ལ་ཡོད་དོ་སྙམ་དུ་སེམས་པ་ནི། གང་དང་
ཞེས་བྱ་བའོ། །མ་ཡིན་ཏེ་རྗེས་སུ་འགྲོ་བ་ནི་ཞེས་བྱ་བ་ནི་ཁྱབ་པའི་སྟེ་སྣམ་བུ་དང་ཤིང་རྟ་དག་ནི་ཐ་དད་པ་ལ་རྗེས་སུ་འགྲོ་བ་དང་ལྡོག་པ་ཉིད་དགོངས་པ་ཅན་མ་ཡིན་ཏེ། མངོན་སུམ་གྱིས་བྱས་པའི་ཕྱིར་རོ་ཞེས་བྱ་བའི་དོན་ཏོ། །ཐ་དད་པར་མ་ཡིན་ནོ་ཞེས་བྱ་བ་ནི་སྣམ་བུ་དང་ཤིང་
རྟ་དག་ལའོ། །མ་འདྲེས་པར་ཞེས་བྱ་བ་གྱི་སོ་སོར་བྱས་ནས་སོ། །ཐ་དད་པར་སྣང་བ་ནི་ཐ་དད་པར་རྟོགས་པའོ། །རྗེས་སུ་འགྲོ་བ་མེད་པའི་ཕྱིར་རོ་ཞེས་བྱ་བ་ནི་ཁྲ་བོ་ལ་སོགས་པའི་ཁྱད་པར་ལས་སོ། །དེ་ལ་ནི་མ་ཡིན་པ་ལས་ལོག་པའི་རྒྱུ་མཚན་ཅན་ནི་རྟོགས་པ་གཅིག་གི་
རྗེས་སུ་འགྲོ་བ་ཡིན་པར་བསྟན་པ་ནི། གཅིག་ཏུ་རྟོགས་པ་དང་ལྡན་པས་ནི་ཞེས་བྱ་བའོ་ཞེས་གཅིག་ཏུ་རྗེས་སུ་འགྲོ་བ་ཅན་དེ་དང་གཅིག་པར་རྟོགས་པས་རྣམ་པར་གཞག་པ་ཡིན་ནོ་སྙམ་དུ་སེམས་པ་ནི། གཅིག་ཏུ་རྟོགས་པ་ཉིད་ཅེས་བྱ་བའོ། །ཁྱད་པར་རྣམས་ཁོ་ན་གཅིག་ཏུ་རྟོགས་

པ་ལ་རྣམ་པར་གཞག་པར་བྱེད་པ་ཡིན་ཏེ། དེ་མ་ཡིན་པའི་རྟོགས་པ་ནི་དེ་ལ་འཇུག་པའི་ཕྱིར་རོ་ཞེས་བསྟན་པ་ནི། མཐོང་བ་ཞེས་བྱ་བའོ། །དེས་སྤྱིའི་རྟོགས་པ་མ་ཡིན་པར་བསྟན་པ་ནི། མ་མཐོང་བའི་ཞེས་བྱ་བའོ། །ཁྱད་པར་རྣམས་གཅིག་ཉིད་
དུ་རྣམ་པར་འཇོག་པར་བྱེད་ཀྱི། དེ་ལས་ཐ་དད་པ་ནི་མ་ཡིན་ནོ་སྙམ་དུ་སེམས་པ་ལ། དེ་ནི་ཐ་དད་པ་དག་ལ་ཞེས་བྱ་བ་སྟེ། ཐ་དད་པ་རྣམས་རྟོགས་པས་རང་གི་ངོ་བོ་ཐ་མི་དད་པར་རྟོགས་པའི་ཡུལ་ཡིན་ཏེ། འདི་ཐ་མི་དད་པའི་ཡུལ་ཅན་ཡིན་ཏེ་ཞེས་བྱ་བའི་དོན་ཏོ། །དེ་བསྟན་པ་ནི་རང་གི་
ངོ་བོ་ཙམ་ཞེས་བྱ་བ་སྟེ། ཐ་དད་པ་རྣམས་རྟོག་པ་ནི་མངོན་སུམ་པ་བཞིན་དུ་དེ་ལ་སྣང་བ་མ་ཡིན་པའི་ཕྱིར་ཁྱེད་ཀྱི་སྤྱི་འཁྲུལ་པ་ཡིན་ནོ། །འོན་ཏེ་སྤྱིར་ངེས་པ་ཅན་འཇུག་པར་འོས་པ་ཡིན་ནོ་ཞེས་བྱ་བའི་དོན་ཏོ། །གཅིག་ཏུ་རྟོགས་པ་ནི་གཅིག་ཉིད་མ་རྟོགས་པར་མི་འཐད་པ་མ་ཡིན་ནམ་སྙམ་
དུ་སེམས་པ་ལ། འདི་ནི་གང་དུ་ཡང་ཞེས་བྱ་བ་སྟེ། འདི་ནི་རྟོགས་པ་མ་ཡིན་ཏེ། འདི་དང་མཐོང་བ་མེད་པ་ལ་ཁྱབ་པ་ཉམས་སུ་མྱོང་བ་མེད་པའི་ཕྱིར་རོ་ཞེས་བྱ་བའི་དོན་ཏོ། །དོན་གྱིས་གོ་བ་ཡང་མ་ཡིན་ཏེ། མཐོང་བ་ཙམ་ཡོད་པས་གཞན་དུ་ཡང་འཐད་པའི་ཕྱིར་རོ་ཞེས་བསྟན་པ་ནི།
དམིགས་པ་ལ་ཞེས་བྱ་བའོ། །དེ་ལྟ་ན་ཡང་གཅིག་ཉིད་དེ་དམིགས་པ་ཁོ་ན་ཡིན་ཏེ། གཞན་དུ་ན་འདི་ཉིད་འཛིན་པར་མི་འགྱུར་རོ་སྙམ་དུ་སེམས་པ་ལ་དེ་ཡང་ཞེས་བྱ་བ་སྟེ་མཐོང་བའི་གཅིག་པ་ཉིད་དོ། །དེ་ནི་སྐད་ཅིག་རེ་རེ་ཞིག་གཞན་ཡིན་པས་འཛིན་པའི་ཡུལ་མ་ཡིན་ཏེ། འདི་
ཐམས་ཅད་ལ་རྗེས་སུ་མཐུན་པ་ཡིན་ནོ་ཞེས་བསྟན་པ་ནི། རེ་རེ་ནི་ཞེས་བྱ་བའོ། །སོ་སོ་སོ་སོར་རིག་པ་མེད་པའི་ཕྱིར་ནི་འཛིན་པའི་བྱ་བ་སྟེ། ངེས་པའི་ཡུལ་མེད་པའི་ཕྱིར་རོ་ཞེས་བྱ་བའི་དོན་ཏོ། །ཐམས་ཅད་ལས་ལོག་པའི་ངོ་བོ་འཛིན་བྱེད་དུ་མཐོང་བ་ནི་རང་གི་སྣང་བའི་རྟོག་པས་བླངས་པའི་
ངོ་བོའི་དབྱེ་བ་ནི་སྣང་བཞིན་པའི་དངོས་པོ་དང་འབྲེལ་པར་རུང་བ་ཉིད་ཀྱི་ཕྱིར་འཛིན་པར་འགྱུར་རོ་སྙམ་དུ་སེམས་པ་ལ་བརྟགས་པའི་རང་བཞིན་ཐ་དད་པ་ཞེས་བྱ་བ་སྟེ་བརྟགས་པ་ལ་རུང་བ་ཉིད་དོ། །རྟོགས་པ་མེད་པའི་ཞེས་བྱ་བ་ནི་དེ་རྣམས་སུ་མཐོང་དུ་རུང་བ་ཉིད་ལ་ཁྱབ་པར་བྱེད་པ་འགལ་བ་ནི་

རྟོག་པ་མེད་པ་ཡིན་ནོ་ཞེས་བྱ་བའི་དོན་ཏོ། །བརྟགས་པའི་ངོ་བོ་རྣམས་ཀྱིས་འདྲེས་པའི་ངོ་བོ་མངོན་སུམ་གྱིས་མཐོང་བ་ནི་དཔྱོད་པ་དང་བྲལ་བ་ཡང་མནའ་བསྐྱལ་བས་རྟོགས་པར་བྱ་བ་ཡིན་ནོ། །ཁྲ་བོ་ནི་དེ་ལྟ་བུའི་སྣང་བས་ཁྱབ་པ་ཡིན་ལ། ཁྲ་བོ་མ་ཡིན་པའི་སྣང་བའི་ཡུལ་མ་ཡིན་ཏེ། ཁྱབ་
པར་བྱེད་པ་དང་འགལ་བའི་ཕྱིར་རོ་ཞེས་བསྟན་པ་ནི་སྣ་ཚོགས་མིན་ཞེས་བྱ་བའོ། །མཐོང་བ་ནི་དོན་ཉེ་བ་ཁོ་ན་ལས་འབྱུང་ན་རེས་འགའ་བ་ཡིན་ལ། རྟོག་པ་ལས་བྱུང་བའི་བརྟགས་པ་ནི་རྟོག་པ་ལས་བྱུང་བའི་ཕྱིར་རེས་འགའ་བ་མ་ཡིན་ལ་ཁྱབ་པར་བྱེད་པ་དང་འགལ་བ་ཅན་དེས་ཡུལ་
ཅན་དུ་བྱེད་པ་མ་ཡིན་ཞིང་། ཉམས་སུ་མྱོང་བ་ལ་ཡང་འབྱུང་བ་སྟེ། དེ་ལས་གཞན་པ་ལས་དབང་པོ་ལས་སྐྱེས་པ་མ་ཡིན་པ་ཉིད་དུ་ཁྱད་པར་མེད་དོ། །དེ་དབང་པོ་རྣམས་ཀྱི་ཡང་ཉམས་སུ་མྱོང་བའི་དོན་ཉིད་ཀྱིས་གཞན་དུ་གྲུབ་པའི་ཕྱིར་རོ་ཞེས་བསྟན་པ་ནི། རེས་འགའ་བའི་ཞེས་བྱ་
བའོ། །སྔ་མས་ནི་རྟོག་པ་དང་རྟོག་པ་མེད་པ་དག་གི་ངོ་བོའི་དབྱེ་བ་དང་། བར་མས་ནི་ཡུལ་གྱི་དབྱེ་བ་དང་། ཐ་མས་ནི་རྒྱུའི་དབྱེ་བ་བསྟན་པ་ཡིན་ནོ། །རྣམ་པ་ཐ་དད་པས་ཞེས་བྱ་བ་ནི་རང་གི་རྣམ་པའི་ཡུལ་གྱི་རྣམ་པ་ཐ་དད་པས་སོ། །བརྐྱང་པའི་སྔོན་པོ་དམིགས་ན་ཆ་བཞིན་
དུ་ཆ་མེད་པ་ཡང་མཐོང་བའི་ཡུལ་མ་ཡིན་ནམ། གང་གི་ཕྱིར་སྐྲ་ཤད་རྣམས་ཉེ་བ་བཞིན་དུ། ཐག་རིང་བ་ལ་ཡང་སྣང་བའི་ཡུལ་མ་ཡིན་ནོ་སྙམ་དུ་སེམས་པ་ནི། གལ་ཏེ་དཀར་སོགས་ཡོད་གྱུར་ཀྱང་། །ཞེས་བྱ་བའོ། །གཅིག་པོ་དེ་ནི་ཕྱི་རོལ་མ་ཡིན་ཏེ་དབྱེ་བར་མི་ནུས་པའི་ཕྱིར་དང་།
ཤེས་པ་གཅིག་ནི་ནང་དུ་འདུས་པའི་ཕྱིར་རོ། །ཕྱི་རོལ་ནི་དབྱེ་བར་ནུས་པ་ཉིད་ཀྱི་ཆ་ཤས་ཅན་ཡིན་པའི་ཕྱིར་རོ། །ཕྱི་རོལ་དེ་གཅིག་ཏུ་ཁས་བླངས་ཀྱང་མཐོང་བའི་ཡུལ་ཡིན་གྱི་རྣམ་པར་རྟོག་པའི་མ་ཡིན་ཏེ། དེའི་ངོ་བོ་ལ་རེག་པ་མ་རྟོགས་པའི་ཕྱིར་རོ་ཞེས་བྱ་བའི་དོན་ཏོ། །བློ་
རྣམས་དོན་གཅིག་ཉིད་ཡིན་ཞེས་བྱ་བ་ནི་རྟོག་པ་དང་རྟོག་པ་མེད་པ་དག་གི་ཡུལ་གཅིག་ཡིན་པ་ལའོ། །འདིས་ནི་སྒྲ་དང་དབང་པོའི་རྗེས་སུ་དཔག་པ་ལས་རང་གི་ནུས་པ་རྗེས་སུ་འབྲང་བ་གང་དག་གིས་རེས་འགའ་འགའ་ཞིག་ཁོ་ནར་དངོས་པོའི་ཆ་གཅིག་རྟོགས་པ་ཡིན་ནོ་ཞེས་བྱ་བ་དེ་ཡང་

བསལ་བ་ཡིན་ནོ། །སྒྲ་དང་རྗེས་སུ་དཔག་པ་ལ་སོགས་པས་ཀྱང་དངོས་པོའི་ཆ་ཉིད་རྟོགས་པ་མ་ཡིན་ཏེ་ཐ་དད་པའི་ཕྱིར་རོ། །ཐ་མི་དད་ན་ཡང་སྒྲ་ལས་བཞིན་དུ་དབང་པོས་ཀྱང་རྟོགས་པར་འགྱུར་ཏེ་དངོས་པོ་ཉིད་བཞིན་དུ་རུང་བ་ཉིད་ཡིན་པའི་ཕྱིར་རོ་ཞེས་བྱ་བའི་དོན་
ཏོ། །འོན་ཏེ་དངོས་པོ་གཅིག་ཉིད་ཚོགས་པའི་དབྱེ་བ་དེ་དང་དེས་དེ་ལྟ་དེ་ལྟར་རྟོགས་པ་ཡིན་ཏེ། ཐག་རིང་བ་དང་ཅིག་ཤོས་ལ་སོགས་པ་བཞིན་དུའོ། །སྔོན་པོ་ལ་སོགས་པའི་ཚད་མའི་དབྱེ་བ་ཚོགས་པའི་དབྱེ་བ་ཉིད་ཀྱིས་ཡིན་གྱི་ཡུལ་གྱི་དབྱེ་བས་ནི་མ་ཡིན་ནོ་སྙམ་དུ་སེམས་པ་ལ། བློ་རྣམས་དོན་གཅིག་
ཡིན་ཡང་ཞེས་བྱ་བའོ། །རྟེན་སྣ་ཚོགས་པ་ཞེས་བྱ་བ་ནི་ཚོགས་པའི་དབྱེ་བའོ། །དེར་འགྱུར་བ་ན་ཞེས་བྱ་བ་རྟོགས་པའི་ངོ་བོའི་དབྱེ་བའོ། །གཟུང་བྱའི་ངོ་བོ་ཐ་མི་དད་པ་ཡིན་ན། རྟེན་ཐ་དད་པ་ནི་མིག་དང་རྣ་བ་བཞིན་དུ་རྟོགས་པའི་ངོ་བོར་ཐ་དད་པར་བྱེད་པ་མ་ཡིན་པར་བསྟན་པ་ནི།
རྣ་བ་ལ་སོགས་སེམས་ཞེས་བྱ་བའོ། །ཐ་དད་དོན་ཅན་ནི་ཁྱད་པར་གྱི་དོན་གཅིག་ཉིད་ཀྱིས་ཏེ་ཐ་མི་དད་པའི་ངོ་བོ་རྣམས་སོ་སོར་སྣང་བའི་རང་བཞིན་གཅིག་པར་གྲགས་པ་ཡོད་པ་རྣམས་འཐོབ་པར་མི་འགྱུར་གྱི་སྒྲ་ལ་སོགས་པ་བཞིན་དུ་ཐ་མི་དད་པའི་ངོ་བོ་འཐོབ་པར་འགྱུར་རོ་ཞེས་བྱ་བའི་
དོན་ཏོ། །རྟེན་ཐ་དད་པ་ལས་འབྲས་བུ་རྣམས་ཉིད་སྣ་ཚོགས་པའི་ངོ་བོ་ཅན་དོན་སྣ་ཚོགས་པར་འགྱུར་རོ་ཞེས་བྱ་བའི་དོན་བཤད་པ་ནི། གལ་ཏེ་རྟེན་ཐ་དད་པས་ཞེས་བྱ་བའོ། །རྟེན་རྣམས་ཀྱི་རྣམ་པ་ལྔའི་དབྱེ་བས་ངོ་བོའི་དབྱེ་བ་ལྔ་ཉིད་ཡིན་གྱི་གཞན་སྔོན་པོ་དང་སེར་པོ་ལ་སོགས་པ་
མ་ཡིན་པར་བསྟན་པ་ནི། སེར་པོ་ལ་སོགས་པར་ཞེས་བྱ་བའོ། །འོན་ཏེ་སྒྲ་རྣམས་ཉིད་སྔོན་པོ་དང་སེར་པོ་ལ་སོགས་པའི་ངོ་བོ་རྣམས་ཀྱི་དབྱེ་བ་དག་ནི་དེའི་དབྱེ་བ་ཡིན་པ་དེས་ན་སྐྱོན་འདི་མེད་དོ་སྙམ་དུ་སེམས་པ་ལ། ནུས་པའི་ཁྱད་པར་ཞེས་བྱ་བའོ། །རྣམ་པ་གཞན་དུ་ཞེས་
བཤད་པ་ནི། ཐ་དད་པར་རམ་ཞེས་བྱ་བ་སྟེ། གསལ་བ་ཐ་དད་པར་རོ། །གཞན་ཡང་རུང་བ་ཞེས་བྱ་བ་ནི་ཐ་མི་དད་པར་ཡང་ངོ་། །སྤྱིའི་སྒོ་ནས་ལན་བཏབ་པ་ནི། རྣམ་པ་གཞན་དུ་རྟོགས་པ་ནས་ཞེས་བྱ་བ་སྟེ། དབང་པོར་རྟོགས་པ་ལས་སོ། །འདིའི་ཞེས་བྱ་བ་ནི་སྒྲའི་

རྟོགས་བྱའི་འོ། །དོན་དམ་པ་ཉིད་ཅེས་བྱ་བ་ནི་ཁ་ཆུ་ལ་སོགས་པའོ། །དེ་ཉིད་ཅེས་བྱ་བ་ནི་ཁ་ཆུས་བསྒྲུབ་པར་བྱ་བ་ལའོ། །དོན་གཅིག་ཡིན་ན་ཞེས་བྱ་བ་ནི་གཟུང་བ་གཅིག་ཉིད་ཡིན་ནའོ། །ཡུལ་སོ་སོར་ངེས་པ་ཡིན་ན། རྒྱུ་ཤེས་པའི་རྟེན་ཡིན་གྱི་རྣམ་པ་ཐ་དད་པ་ཡིན་ན་
མ་ཡིན་པར་བསྟན་པ་ནི། །སེམས་ཀྱི་རྟེན་ནི་གཞན་དང་གཞན། །ཞེས་བྱ་བ་སྟེ། གཞན་དང་གཞན་ནི་རྟེན་ཏེ་མིག་གཅིག་ཡིན་ཡང་རྣམ་ཤེས་ནི་སྔོན་པོ་དང་ལྗང་གུ་ལ་སོགས་པའི་ཡུལ་གྱི་དབྱེ་བའི་རྗེས་སུ་འབྲང་བ་ཅན་རྣམ་པ་སྣ་ཚོགས་པ་ཡིན་གྱི། རྟེན་གཅིག་ཉིད་ཀྱིས་རྣམ་པ་
གཅིག་ཉིད་མ་ཡིན་ནོ་ཞེས་བྱ་བའི་དོན་ཏོ། །དོན་ནི་མ་ཡིན་ནོ་ཞེས་བྱ་བ་ནི་ཡུལ་གྱི་རྣམ་པའིའོ། །སྒྲ་དང་དབང་པོ་ལ་སོགས་པ་རྟེན་ཐ་དད་པ་ཡིན་ཡང་དོན་ཐ་དད་པར་འདོད་པ་མ་ཡིན་པར་བསྟན་པ་ནི། དོན་ནི་སྔོན་པོ་ལ་སོགས་པ་ཞེས་བྱ་བའོ། །ཤེས་པ་དེ་ལ་ཞེས་བྱ་བ་ནི་
སྒྲ་དང་དབང་པོ་ལ་སོགས་པའི་བསྐྱེད་བྱའོ། །དེའི་ཕྱིར་དེའི་སྣང་བ་ཡང་ངོ་བོ་གཅིག་ཏུ་འགྱུར་རོ་ཞེས་བསྟན་པ་ནི། རང་བཞིན་གཅིག་ཉིད་ཅེས་བྱ་བའོ། །དབང་པོའི་ཡུལ་གྱི་ངོ་བོ་མེད་པ་ཉིད་སྒྲ་ལས་བྱུང་བ་ལ་སྣང་བར་མི་རིགས་པ་མ་ཡིན་ནམ། སྒྲ་དང་དབང་པོ་དག་ཡུལ་
གཅིག་པ་ཉིད་དུ་ཁས་བླངས་པའི་ཕྱིར་རོ་ཞེས་བསྟན་པ་ནི་མེད་པ་ནི་སྣང་བ་མ་ཡིན་ནོ་ཞེས་བྱ་བའོ། །འབྲེལ་པ་ཞེས་བྱ་བ་ནི་འཐད་པའོ། །དེའི་ཞེས་བྱ་བ་ནི་དབང་པོའི་ཡུལ་གྱིའོ། །དེའི་ནི་སྒྲའི་འབྲེལ་པ་ཅན་གྱི་སྒྲ་ལས་བྱུང་བའིའོ། །སྒྲ་ཡང་མིག་ལས་བྱུང་བའིའོ། །མིག་ཀྱང་
ཡུལ་ཐ་དད་པ་ལ་དེ་དང་གཅིག་ཉིད་དུ་འགལ་བར་བསྟན་པ་ནི། གཅིག་ཉིད་འགལ་བ་ཞེས་བྱ་བ་སྟེ་ཤུགས་ཀྱི་ཡུལ་གྱིའོ། །ཉམས་པར་འགྱུར་རོ་ཞེས་བྱ་བ་ནི་རྟེན་དང་ཡུལ་དག་ཐ་དད་པར་ཁས་བླངས་པའི་ཕྱིར་རོ་ཞེས་བྱ་བའི་དོན་ཏོ། །དེའི་ཕྱིར་རང་གི་ངོ་བོ་ཞེས་བྱ་བ་ནི།
སྒྲ་ལས་འབྱུང་བ་ལ་མེད་དོ་ཞེས་བྱ་བའི་དོན་ཏོ། །འོན་ཏེ་སྒྲ་ལས་བྱུང་བ་ལ་ཡང་དོན་གཅིག་རང་གི་ཁོ་ནས་སྒྲའི་རྟེན་གྱི་ངོ་བོར་སྣང་བ་ཡིན་གྱི་དབང་པོའི་རྟེན་གྱི་ངོ་བོར་ནི་མ་ཡིན་ནོ་སྙམ་དུ་སེམས་པ་ནི། འོན་ཏེ་སྒྲས་རྟེན་ཡིན་པའི་ཕྱིར་རོ་ཞེས་བྱ་བ་སྟེ། དམིགས་པ་ཡིན་པའི་ཕྱིར་

རོ། །རྣ་བས་རྟོགས་པའི་སྒྲ་ནི་དོན་རྟོགས་པར་བྱེད་པ་ན། རང་ཉིད་ནི་དེ་ལས་སྡང་བར་བྱེད་པ་མ་ཡིན་པར་བསྟན་པ་ནི། རྟོགས་པའི་ཞེས་བྱ་བ་སྟེ་རང་གི་ཞེས་བྱ་བ་ནི་ངོ་བོ་གཞན་འདིས་བླངས་པ་མ་ཡིན་ནོ་ཞེས་བྱ་བའི་དོན་ཏོ། །འདི་ནི་ཞེས་བྱ་བ་
ནི་སྒྲ་སྟེ། རྣ་བས་རྟོགས་པའོ། །ལན་ནི་དེ་ལྟ་ན་ནི་ཞེས་བྱ་བའོ། །མ་རྟོགས་པའི་ཕྱིར་ཞེས་བྱ་བ་ནི་སྒྲ་བཞིན་ནོ། །གཞན་ལས་ཞེས་བྱ་བ་ནི་རང་གི་ངོ་བོ་མ་ཡིན་པའི་སྣང་བའི་སྒྲ་ལས་སོ། །དེ་ལས་ཞེས་བྱ་བ་ནི་མི་གསལ་བའི་རྣམ་པ་ལས་ཡིན་གྱི་དོན་དམ་པ་ནི་
མ་ཡིན་ཏེ། རྟོག་པ་ཉིད་ཀྱི་དབང་པོའི་ཡུལ་སྣང་བ་མ་ཡིན་པའི་ཕྱིར་རོ། །འདི་ཉིད་གསལ་བར་བྱེད་པ་ནི་མ་རྟོགས་ཀྱང་ཞེས་བྱ་བའོ། །རྟེན་སྣ་ཚོགས་ཉིད་ཡིན་ཡང་ཞེས་བྱ་བ་ནི་སྒྲ་དང་དབང་པོ་དང་རྟགས་ལ་སོགས་པའི་རྟེན་ཉིད་ཡིན་ན་ཡང་ངོ་། །འགའ་ཞིག་ཅེས་བྱ་བ་ནི་མི་གསལ་
བའོ། །གཞན་གྱིས་ཀྱང་ཞེས་བྱ་བ་ནི་དབང་པོ་ལས་སྐྱེས་པའོ། །རྗེས་སུ་ཞུགས་ཞེས་བྱ་བ་ནི་ཐ་མི་དད་པའོ། །དེ་འདི་ལྟར་སྒྲ་ལས་བྱུང་བ་ནི་སྣང་དུ་རུང་བའི་དབང་པོའི་ཡུལ་ལ་རྟོག་པ་མེད་པར་ནི་སྟེ། འཛིན་པའི་བྱེད་པ་མེད་པས་འཇུག་པའི་ཕྱིར་འདས་མ་ཐག་ཏུ་བསྟན་པའི་
གཏན་ཚིགས་མཐོང་བ་ལས་ཏེ། འཛིན་པའི་བྱེད་པ་པོ་ལས་བ་ལང་བ་ལང་ངོ་ཤེས་པ་ནི་བ་ལང་ལ་སོགས་པ་རྣམས་ཀྱི་བ་ལང་ཉིད་ལ་སོགས་པའི་རྟེན་ཉིད་ཀྱིས་ཁྲ་མོ་ལ་སོགས་པའི་ངོ་ཤེས་པ་བཟློག་པ་ཡིན་ཞེས་བྱ་བ་ནི་མཐོང་བ་ལ་སོགས་པའི་ཚིགས་སུ་བཅད་པའི་དོན་ཏོ། །ཞེན་པས་ནི་
བཟློག་པ་མ་བྱས་པ་ཁོ་ནའོ། །མཐོང་བ་རྟོགས་པ་ཡིན་ན་ཞེས་བྱ་བ་ནི་སྣང་བ་འཛིན་པ་ཉིད་ཡིན་ནའོ། །རྟོགས་པ་མེད་པའི་ངོ་ཤེས་པ་ནི་མཐོང་བ་ཁོ་ན་ལས་བྱུང་བ་མ་ཡིན་ནམ། གང་གི་ཕྱིར་སྣང་བཞིན་པ་ལས་སྔ་མ་ཉིད་ནི་མི་སྣང་བ་མ་ཡིན་ཏེ། བརྡ་ཇི་ལྟ་བར་འདིའི་སྒྲ་དྲན་པར་
བྱེད་པའམ། མཚམས་སྦྱོར་བར་བྱེད་པ་མ་ཡིན་ཏེ། ཇི་སྐད་དུ། གང་ཞིག་ཡོད་པ་གང་མཐོང་བ། །དེ་མཐོང་བ་དེའི་སྒྲ་དྲན་པར། །ཞེས་གསུངས་པ་རིག་པ་རིགས་པ་མ་ཡིན་སྙམ་དུ་སེམས་པ་ལ། བ་ལང་ལ་སོགས་མཐོང་བ་ལ། །ཞེས་བྱ་བ་སྟེ། རྣམ་པར་རྟོག་པའི་སྔར་

མཐོང་བ་ངོ་ཤེས་པ་མཐོང་བའི་ཕྱིར་མཐོང་བ་ནི་སྣང་དུ་རུང་བའི་སྔ་མ་ཉིད་མཐོང་བའོ་ཞེས་རྗེས་སུ་དཔག་པ་ཡིན་ལ། དྲན་པ་དང་རྣམ་པར་རྟོག་པ་དག་དྲན་པ་མཐོང་བ་ཙམ་གྱིས་མ་གྲུབ་པ་མ་ཡིན་ནོ། །མཐོང་བའི་བྱེད་པ་རྗེས་སུ་དཔག་པར་བྱ་བ་ནི་མ་ཡིན་ནོ། །
ལ་ལར་མ་ངེས་པ་ནི་ངེས་པར་བྱ་བ་སྣང་བ་སྟེ། སྔར་གྱི་དངོས་པོའི་བྱེད་པ་དེ་ལྟ་བུ་མ་ཡིན་ཞེས་བྱ་བའི་དོན་ཏོ། །བ་ལང་ལ་སོགས་པ་མཐོང་བ་ཙམ་ཞེས་བྱ་བ་ལ་ཁྲ་བོ་ལ་སོགས་པ་ལའོ། །རྗེས་སུ་འགྲོ་ལས་རྗེས་དཔོག་གང་། །ཞེས་བྱ་བ་ནི་རིགས་ལ་སོགས་པའི་སྟེ་སྔར་གྱི་
དངོས་པོའི་གནས་སྐབས་ཀྱིས་མཐོང་བའི་ཡུལ་ཡིན་ནོ། །དངོས་པོ་ལ་རེག་པ་ཞེས་བྱ་བ་ནི་ཀུན་དུ་རེག་པའོ། །འཛིན་པ་ནི་བརྗོད་པ་དང་རྟོག་པ་དག་གིས་ཞེས་བྱ་བ་དང་སྦྱར་རོ། །མངོན་པའི་ང་རྒྱལ་ཙམ་ཉིད་དེ་ཞེས་བྱ་བ་ནི་དེ་ལྟ་བུའི་ཐོག་མ་མེད་པའི་བག་ཆགས་ལས་བྱུང་
བའོ། །མཐོང་བ་ཇི་ལྟ་བ་བཞིན་དུ་ཞེས་བྱ་བ་ནི་བག་ཆགས་སྐྱེད་པར་བྱེད་པའི་རྣམ་པར་རྟོག་པ་མཐོང་བའོ། །བརྗོད་དང་རྣམ་རྟོག་དག་ཅེས་བྱ་བ་ནི་རྗེས་སུ་འགྲོ་བ་ཙམ་བྱས་པའི་འབྲེལ་པས་བྱེད་པ་པོའི་དྲུག་པ་ཡིན་ལ། དེ་བྱེད་པ་པོའི་རྗེས་སུ་འགྲོ་བ་ནི་རིགས་ལ་སོགས་པ་འཛིན་པ་ཡིན་
ཏེ། སྣང་དུ་རུང་བའི་བ་ལང་ལ་སོགས་པ་ལ་དེ་བྱེད་པ་པོ་དང་འབྲེལ་པ་ཅན་གྱི་ངོ་བོ་འཛིན་པ་སུན་ཕྱུང་བ་ཡིན་ནོ། །འགྲེལ་པར་བྱེད་པ་པོའི་བཤད་པ་ནི་མཐོང་བ་རྟོགས་པ་མེད་པར་ནི་ཞེས་བྱ་བ་འདིས་བསྟན་པ་ཁོ་ན་ཡིན་པར་ཤེས་པར་བྱའོ། །གཞན་དག་ན་རེ་སྣང་
དུ་རུང་བའི་ཁྲ་བོ་ལ་སོགས་པ་ལ་བ་ལང་བ་ལང་ཞེས་བརྗོད་པ་དང་། རྣམ་པར་རྟོག་པ་དག་གིས་ལྡན་པའི་ངོ་བོ་མ་གཏོགས་པར་མི་འགྱུར་ཞེས་རྗེས་སུ་དཔག་པ་སུན་ཕྱུང་བ་ཡིན་ནོ་ཞེས་ཟེར་རོ། །གལ་ཏེ་འདྲ་བ་མཐོང་བ་ལས་དེའི་རྗོད་བྱེད་དྲན་པ་ཡིན་ན་དེ་དང་འདྲ་བ་ཡིན་
ནོ་ཞེས་བྱ་བར་འགྱུར་གྱི་དེ་ཉིད་ཡིན་ནོ་ཞེས་བྱ་བར་ཇི་ལྟར་འགྱུར། སྔ་མ་དང་ཕྱི་མ་མཐོང་བའི་ཡུལ་མ་ཡིན་པའི་སྔ་མ་དང་ཕྱི་མ་གཅིག་པ་ཉིད་དུ་ཞན་པ་ལས་སོ། །སྔ་མའི་དོན་ཤེས་པ་ཚད་མ་ཡིན་ནོ་སྙམ་དུ་སེམས་པ་ལ། མཐོང་བ་ཐ་དད་ཉིད་ཡིན་ན། །ཞེས་བྱ་

བ་སྟེ། མཐོང་བ་ཐ་དད་རྣམས་ཏེ། ཡུལ་ཐ་དད་པ་ཅན་རྣམས་ཡུལ་ལ་གོམས་པའི་བག་ཆགས་ཀྱི་སྙིང་པོ་ཅན་རང་གི་ཡུལ་གྱི་ཁྱད་པར་ངེས་པར་བྱེད་ཅིང་། དྲན་པའི་ཡུལ་ཅན་རྣམས་ཀྱང་དེ་ལྟར་མ་ངེས་པ་རྣམས་ནི་དེ་ཉིད་འདི་ཡིན་ནོ། །ངེས་པ་སྐྱེས་
པའི་དོན་ཏོ། །རྩོད་པའི་རྙོག་ལས་རྒྱལ་བ་ཅན། །དྲན་པ་གསལ་པོ་ཐོབ་པ་དང་། །དམ་པའི་ལམ་བདག་ཉིད་དུ་གྱུར། །སྲིད་པའི་རྒྱ་མཚོའི་ཕ་རོལ་འགྲོ། །འདི་ལྟར་ཡང་གཟུགས་ནི་མངོན་སུམ་གཉིས་པོ་དག་གིས་འཛིན་པ་ཡིན་ཏེ། དབང་པོའི་ཤེས་པ་དང་
དེས་དྲངས་པའི་ཡིད་ཀྱི་རྣམ་ཤེས་ཀྱིས་ཀྱང་ངོ་ཞེས་གསུངས་ཤིང་། སྔོན་གྱི་སློབ་དཔོན་རྣམས་ཀྱིས་ཀྱང་ཡིད་ཀྱིའང་ཞེས་བྱ་བ་ལ་སོགས་པ་བཤད་པ་དེ་ནི་འཐད་པ་ཡིན་པའི་ཕྱིར་དྲི་བ་སྔོན་དུ་འགྲོ་བ་ནི་སྔར་མྱོང་བ་ནི་འཛིན་པར་ན་ཞེས་བྱ་བ་ནི། སྔ་མའི་དབང་པོའི་རྣམ་ཤེས་ཀྱི་སྐད་ཅིག་
སྔ་མས་བཟུང་བ་ཉིད་ནི་དབང་པོའི་ཤེས་པའི་སྐད་ཅིག་མ་གཉིས་པ་བཞིན་དུའམ། དབང་པོའི་རྣམ་ཤེས་ཀྱི་དུས་ཉིད་དུ་དེའི་ཡུལ་འཛིན་པ་ནི་དེ་བསྒྲུབ་པར་བྱ་བའི་དོན་བྱེད་པ་ལ་ཡོད་པ་མ་ཡིན་ན་དེ་ཉིད་ཀྱིས་ནུས་པའི་ཕྱིར་གཉིས་པ་ལ་སོགས་པ་བཞིན་དུའམ། རྣམ་པར་རྟོག་པ་བཞིན་དུ་
ཡིན་པ་དེ་དང་གྲུབ་པ་གཅིག་པ་མ་ཡིན་པ་ནི་ཚད་མ་ཡིན་ནོ། །སྔར་མྱོང་བ་ཞེས་བྱ་བ་ནི་དུས་མཚུངས་པར་འདོད་པའི་བསམས་པས་ཡིན་གྱི་བསྐྱེད་པའི་བསམས་པས་ནི་མ་ཡིན་ཏེ། འབྲེལ་པ་ནི་སྐྱེད་པའི་བསམ་པ་ཁོ་ན་ཡིན་ཏེ། དེ་བསྟན་པ་ནི་སྔར་མྱོང་བ་དྲན་པ་ཞེས་བྱ་བའོ། །དབང་
པོའི་བྱེད་པ་འདས་ན་ཡིད་ཀྱིས་ནི་ཕྱི་རོལ་གྱི་ཉེ་བ་སྟོན་པར་མི་བྱེད་དེ་ལོང་བ་ལ་སོགས་པ་མེད་པར་ཐལ་བར་འགྱུར་རོ་ཞེས་བསྟན་པ་ནི། མ་མཐོང་འཛིན་ན་ཞེས་བྱ་བ་སྟེ་དབང་པོའི་ཡུལ་མ་ཡིན་པ་འཛིན་ནའོ། །ཡིད་ཀྱི་ནི་ཡིད་ཁོ་ནའོ། །གཞན་གྱི་ཞེས་བྱ་བ་ནི་ལོང་བ་མ་ཡིན་པའིའོ། །
སྔ་མའི་དབང་པོའི་ཤེས་པའི་དུས་སུ་ཡིད་ཀྱི་ནི་མ་ཡིན་ཏེ། དོན་མེད་པའི་ཕྱིར་ལ་གཉིས་པ་ལ་ཡང་མ་ཡིན་ཏེ། དབང་པོའི་རྣམ་ཤེས་ཀྱི་སྐད་ཅིག་བཞིན་དུ་སྐད་ཅིག་ཕྱི་མའི་ཡུལ་ལ་དབང་པོའི་བྱ་བ་ཡོད་ན་དོན་མེད་པའི་ཕྱིར་རོ། །མེད་ན་ཡང་ལོང་བ་ལ་སོགས་པ་མེད་པར་ཐལ་བར་

འགྱུར་རོ། །འོན་ཀྱང་སྔ་མའི་དབང་པོའི་ཤེས་པའི་སྐད་ཅིག་མའི་ཡུལ་ཉིད་ད་ལྟར་མཐོང་བར་བྱེད་པ་ཡིན་གྱི། ད་ལྟར་ཡང་དེ་ཉིད་མཐོང་བར་བྱེད་པ་ནི་མ་ཡིན་ནོ་ཞེས་བསྟན་པ་ནི། སྐད་ཅིག་མའི་ཕྱིར་འདས་པའི་ཞེས་བྱ་བ་སྟེ། ཤེས་པ་བཞིན་དུ་དེའི་ཡུལ་ཡང་འདས་
པ་ནི་མཐོང་བར་མི་ནུས་པ་ཉིད་དོ་ཞེས་བྱ་བའི་དོན་ཏོ། །འོན་ཏེ་སྐད་ཅིག་མ་མ་ཡིན་པའི་ཕྱོགས་ལ་མཐོང་བར་ནུས་པ་ཡིན་པ་དེ་ལྟ་ན་ཡང་ཡིད་ཀྱི་མངོན་སུམ་སྐད་ཅིག་པ་མ་ཡིན་ནོ་ཞེས་ཁྱད་པར་གྱི་མཚན་ཉིད་བརྗོད་བྱར་འགྱུར་བར་བསྟན་པ་ནི། སྐད་ཅིག་མིན་ན་ཞེས་བྱ་བའོ། །
མཐོང་བ་སྔ་མས་སྔ་མའི་དུས་བཟུང་བ་ཡིན་ལ་ད་ལྟར་བས་ནི་ད་ལྟར་བའོ་ཞེས་བྱ་བའི་ཕྱོགས་ལ་དྲན་པ་ཉིད་བཞིན་དུ་ཇི་ལྟར་ཚད་མ་མ་ཡིན་ཞེས་བསམ་དགོས་སོ། །ཉམས་སུ་མྱོང་བཞིན་པ་ནི་ཉམས་སུ་མྱོང་བ་ཉིད་ཀྱང་དྲན་པ་ཡིན་གྱི། ཉམས་སུ་མྱོང་བར་གྱུར་པ་ལ་ནི་དབང་པོ་
ལས་སྐྱེས་པ་སྔ་མ་ཉིད་ཀྱིས་ཐོབ་པའི་བར་དུ་འཇུག་པའི་ཡུལ་སྟོན་པ་ནི། དེ་ལས་ལྷག་པའི་བྱེད་པ་གཞན་མེད་པའི་ཕྱིར། ཡིད་ཀྱི་ནི་ཚད་མ་གཞན་མ་ཡིན་ནོ་ཞེས་བསྟན་པ་ནི། བྱ་བ་བསྒྲུབས་ཅན་ཞེས་བྱ་བ་སྟེ་འཇུག་པའི་ཡུལ་གྱི་ལས་གང་གིས་རྣམ་པར་གཅོད་པའི་བྱ་བ་
དབང་པོ་ལས་སྐྱེས་པ་བསྒྲུབས་པ་དེ་ལ་ཁྱད་པར་ནི་ལྷག་པའི་བྱེད་པ་པོའོ། །དབང་པོ་ཅན་ཞེས་བྱ་བ་ནི་ལན་ཡིན་ཏེ་གཞན་དག་ནི་ཞེས་བྱ་བ་ནི་ཡིད་ཀྱིའོ། །རང་བཞིན་ཡོངས་སུ་བཅད་པ་ཞེས་བྱ་བ་ནི་འཐོབ་པའི་བར་དུ་ངེས་པའོ། །རྟོགས་པའི་དོན་ལན་དུ་བསྟན་པ་ནི། སྔ་མ་གང་
ཡིན་དེ་ཉིད་དོ། །ཞེས་བྱ་བའོ། །རང་གི་ངོ་བོ་སྣང་བ་ཉིད་དོ་ཞེས་བྱ་བ་ནི་ལན་ཡིན་ནོ། །གཞན་ལ་ཡང་སྟེ་རྣམ་པར་གཅོད་པ་ལ་ཡང་ཞེས་བྱ་བ་ནི་རྒོལ་བའོ། །དེ་ལྟ་ན་ཞེས་བྱ་བ་ལ་སོགས་པ་ནི་ལན་ཡིན་ནོ། །རྟག་པ་ནི་སྐད་ཅིག་པ་མ་ཡིན་པའོ། །ར