Luận tạng Tây Tạng (Tengyur) — Tập 166

བྱས་སོ་ཞེས་ཟེར་ལ་དེ་ལ་དགེ་སློང་ཞིག་གིས་གསུམ་པོ་གཞན་དག་གིས་སྐུར་པ་འདེབས་པར་བྱེད་ན་དགེ་འདུན་གྱི་ལྷག་མའོ་
ཞེས་གསུངས་པ་ཡིན་ནོ། །དགེ་སློང་མ་ལ་གདམས་པ་ལས་ཀྱང་ཚུལ་ཁྲིམས་འཆལ་པ་ཞིག་དགེ་སློང་མ་ལ་འདོམས་པར་བྱེད་ན་ལྟུང་བྱེད་དོ་ཞེས་གསུངས་པ་ཡིན་ཏེ། སྡོམ་པ་དང་བྲལ་བ་ལ་ནི་ལྟུང་བར་ཡང་ཇི་ལྟར་འགྱུར་བས་ཕམ་པ་ཁོ་ནས་ཚུལ་ཁྲིམས་འཆལ་པར་འགྱུར་བར་
ངེས་ཏེ། དེ་ལ་ཚུལ་ཁྲིམས་དང་ལྡན་པ་ཞེས་བྱ་བ་ནི་ལྟུང་བ་བཞི་པོ་རྣམས་ལས་ལྟུང་བ་གང་ཡང་རུང་བ་མ་བྱུང་བ་ཡིན་ནོ་ཞེས་གསུངས་པའི་ཕྱིར་རོ། །དེ་ལྟ་བས་ན་མཐར་འགྱུར་བར་བྱུང་བ་ལ་ཡང་སྐུར་པ་འདེབས་ན་དགེ་འདུན་གྱི་ལྷག་མར་གསུངས་པའི་ཕྱིར་དང་། དགེ་སློང་མ་ལ་འདོམས་

པར་བྱེད་ན་ཚུལ་ཁྲིམས་འཆལ་པ་ལ་ལྟུང་བྱེད་དོ་ཞེས་གསུངས་པའི་ཕྱིར་མཐར་འགྱུར་བས་སྡོམ་པ་ཞིག་པ་མེད་དོ། །སྔ་རབས་རྣམས་ནི་དེ་མི་འདོད་དེ། དག་པ་ཞེས་བྱ་བ་དེ་ནི་སྤྱི་ལ་བྱ་བར་གསུངས་པ་ཡིན་ཏེ། འདིར་ཕམ་པ་ཐམས་ཅད་ཀྱིས་དག་པ་ཡིན་པར་རྟོགས་པས་སོ། །གལ་ཏེ་
རྣམ་པར་འབྱེད་པ་ལས། དེའི་གཞི་ཉིད་དོ་ཞེས་གསུངས་ན་ཡང་ཕམ་པའི་གཞི་ཉིད་དོ་ཞེས་བྱ་བར་བཤད་པར་བྱའོ། །ཞུས་པའི་གཞུང་དང་ཡང་མི་འགལ་ཏེ། འདི་ལྟར་གཞུང་གི་དོན་ནི་དེ་མཚན་ཉིད་མི་ཤེས་པས་ཉམས་པ་ལ་སོགས་པ་དག་ཏུ་ལོག་པར་ཞུགས་ནས་བདག་གིས་མི་
ཚངས་པར་སྤྱོད་པ་བྱས་སོ་ཞེས་སྨྲས་ལ། གང་ལ་སྨྲས་པ་དེ་ནི་མཚན་ཉིད་ཤེས་པ་ཞིག་ཡིན་ནས་ཞེ་སྡང་གིས་གསུམ་པོ་གཞན་དག་གིས་སྐུར་བ་འདེབས་པར་བྱེད་ན་དེ་ལ་དགེ་འདུན་གྱི་ལྷག་མའོ་ཞེས་བྱ་བ་ཡིན་པའི་ཕྱིར་རོ། །གང་ཟག་མ་དག་པ་ལ་སྐུར་པ་འདེབས་པར་བྱེད་ན་ལྟུང་བའི་
གཞི་བཅུ་གཅིག་ཏུ་འགྱུར་རོ་ཞེས་གང་གསུངས་པ་དེ་ཡང་ཕྱོགས་འདི་ཉིད་ཀྱིས་ན་དམན་པ་སྦོམ་པོ་ལ་སོགས་པས་ནི་མ་དག་པ་ཡིན་ལ་ཕམ་པ་རྣམས་ཀྱིས་ནི་དག་པ་ཡིན་ནོ་ཞེས་བྱ་བར་ཁོང་དུ་ཆུད་པར་བྱའོ། །ཚུལ་ཁྲིམས་འཆལ་པ་ལ་ལྟུང་བྱེད་དོ་ཞེས་གསུངས་པ་དེ་ནི་ཉེས་བྱས་སུ་བཤད་
པ་ཡིན་ཏེ། འདི་ལྟར་འདི་ནི་ལྟུང་བར་བྱེད་པས་ན་ལྟུང་བྱེད་དོ་ཞེས་བྱ་བའི་སྒྲ་ཡིན་གྱི་མིང་དུ་ཆགས་པའི་སྒྲ་མ་ཡིན་པས་ཉེས་བྱས་ཁོ་ན་ལ་ལྟུང་བྱེད་དོ་ཞེས་གསུངས་པ་ཡིན་ནོ། །མཐར་འགྱུར་བ་བྱུང་བ་ལ་ནི་ཐམས་ཅད་ལས་འདས་ན་ཡང་ཉེས་བྱས་སུ་བསྟན་ཏོ། །དེ་ལྟར་ཡང་འདུལ་
བ་མདོ་ལས། ཉམས་པ་དང་མ་སྐྱེས་པ་དག་ན་ལྟུང་བ་ལ་སྦྱོར་བ་ནི་ཉེས་བྱས་སོ་ཞེས་འབྱུང་ངོ་། །ཇི་སྟེ་འོ་ན་ཞུས་པ་ལས། གཅིག་ལ་མཐར་འགྱུར་བ་བཞི་ཡང་འབྱུང་ངོ་ཞེས་གསུངས་པ་ཇི་ལྟ་བུ་ཡིན་ཞེ་ན། དེ་ནི་ལས་ཀྱི་ལམ་རྣམས་ཅིག་ཅར་རྫོགས་པ་ལ་དགོངས་ནས་ཡིན་ཏེ།
རིམ་གྱིས་ན་ནི་ཉེས་བྱས་ཁོ་ན་ཡིན་པས་ངེས་པ་མེད་དོ། །དེ་ལྟར་ན་འདུལ་བ་ནི་རྟོགས་པར་དཀའ་བ་ཡིན་ནོ། །དེ་ཉིད་ཀྱི་ཕྱིར་གནས་མལ་གྱི་གཞི་ལས་འདུལ་བ་ནི་ཟབ་མོ། །ཟབ་པར་སྣང་བ། མཐོང་བར་དཀའ་བ། ཁོང་དུ་ཆུད་པར་དཀའ་བ། དགོངས་པ་མང་བ། འཇིག་རྟེན་

གྱི་ཚིག་འབྲུ་དང་ལྡན་པ་ཡིན་ནོ་ཞེས་གསུངས་སོ། །འོ་ན་ཅི་དགེ་ཚུལ་ལ་བསླབ་པ་བྱིན་པ་ཡོད་དམ་ཞེ་ན་ཡོད་དོ་ཞེས་བཤད་དོ། །ཕྲན་ཚེགས་ལས། དགེ་སློང་དག་དེ་ལྟ་བུ་གཞན་ལ་ཡང་བསླབ་པ་བྱིན་ཅིག་ཅེས་གསུངས་པའི་ཕྱིར་རོ། །ཞུས་པ་ལས། དགེ་
སློང་ལ་བསླབ་པ་བྱིན་པ་ཞེས་གསུངས་པའི་ཕྱིར་བསམ་གཏན་པ་དགའ་བྱེད་ནི་མཚོན་པ་ཡིན་པར་རྟོགས་སོ། །བཙུན་པ་ཕྱིར་མི་འོང་བ་གློས་མི་འབེབས་པ་ནི་འདི་ལྟར་དེས་འདུལ་བ་ལས་དགེ་ཚུལ་འཁྲུལ་པ་ནི་བསྙིལ་བར་བྱའོ་ཞེས་འབྱུང་བའི་ཚིག་དེ་ལན་ཅིག་མ་ཡིན་པར་འཁྲུལ་པ་
བསྙིལ་བར་བྱ་བ་ཡིན་གྱི་ལན་ཅིག་འཁྲུལ་པར་ནི་མ་ཡིན་ནོ་ཞེས་སྒྲོ་བཏགས་ནས་འཆད་དེ། འཕགས་པའི་ཆོས་འདུལ་བ་ལ་ནི་ཚིག་དོར་གྱི་ཐ་སྙད་གདགས་པ་མེད་དེ། འཕགས་པའི་གང་ཟག་རྣམས་ཀྱང་འཁྲིག་པའི་འདོད་ཆགས་ཀྱིས་གཡོ་ན་སོ་སོའི་སྐྱེ་བོའི་བྱིས་པ་ལྟ་སྨོས་ཀྱང་ཅི་
དགོས། དེ་ཉིད་ཀྱི་ཕྱིར་འཁྲིག་པ་ཁོ་ན་ལས་བསླབ་པ་བྱིན་པ་རྣམ་པར་གཞག་པ་ཡིན་ནོ་ཞེས་བྱ་བ་ལ་སོགས་པས་དགེ་ཚུལ་ལན་ཅིག་འཁྲུལ་པ་བསྙེན་པར་མ་རྫོགས་པ་དག་བསྙེན་པར་རྫོགས་པར་བྱ་བར་ཡང་བཞེད་དོ། །དེ་ནི་མི་འདོད་དེ། སྒྲོ་བཏགས་པ་བྱས་ནས་གང་ལ་ཡང་མི་
འཇུག་པ་མེད་དེ། འདོད་པ་ཙམ་གྱིས་འཇུག་པའི་ཕྱིར་རོ། །ཞར་ལ་འོངས་པ་རྫོགས་སྷོ།། །།འོ་ན་སྤྱད་དུ་བཟོད་པ་ཞེས་བྱ་བ་འདི་བརྗོད་པར་བྱ་སྟེ། རྣམ་པར་འབྱེད་པ་ལས། སྤྱད་མི་བཟོད་པ་ཞིག་ཡིན་ན་སྦོམ་པོ་ཞེས་གསུངས་པའི་ཕྱིར་རོ་ཞེ་ན། བརྗོད་པར་
མི་བྱ་སྟེ། ཡན་ལག་ཆ་ཀུན་གཟུང་བར་བཟོད་པ་ཡི། །ཞེས་བྱ་བ་འདི་ཁོ་ནས་དོན་རྟོགས་པའི་ཕྱིར་རོ། །ང་ནི་མཚན་ཉིད་ལྷག་མ་རྣམས་བཤད་པར་བྱ་སྟེ། རང་གི་རྨར་ཡང་གཞན་གྱི་འམ་རང་ཉིད་ཀྱི། །སྦུ་བུར་ནན་ལ་སོགས་པའི་སྦྱོར་བ་ཡིས། །དྲུད་པ་བདག་གིར་
བྱེད་ནའང་རྣམ་ཀུན་དུ། །དངོས་གཞི་རྡོ་རྗེས་མངོན་པར་བཅོམ་པ་འཐོབ། །བདག་ཉིད་ཀྱི་རྨ་དག་ཏུ་ཡང་བདག་གི་བསམ་པས་སམ། གཞན་གྱི་བསམ་པས་སམ།ནན་ལ་སོགས་པའི་ཐབས་ཀྱིས་རང་གི་ཡན་ལག་གི་སྦུ་བུ་འམ། གཞན་གྱི་ཡན་ལག་གི་སྦུ་བུས་དྲུད་པའི་

རེག་པ་གལ་ཏེ་བརྟུལ་ཞུགས་ཅན་གྱིས་བདག་གིར་བྱེད་ན་དེའི་ཚེ་ཡང་རྣམ་པ་ཐམས་ཅད་དུ་མཐར་འགྱུར་བའི་རྡོ་རྗེས་བཅོམ་པ་འཐོབ་བོ། །དེ་ལ་རང་གི་རྨར་རང་གི་ཡན་ལག་གི་སྦུ་བུ་འདྲུད་པའི་དཔེར་བརྗོད་པ་ནི་རྒྱབ་མཉེན་དང་མཚན་རིངས་གཉིས་ལྟ་བུའོ། །གཞན་གྱི་ཡན་ལག་གི་སྦུ་བུས་དྲུད་
པའི་དཔེར་བརྗོད་པ་ནི་དགོན་པ་སྡིག་པ་ཅན་གྱིས་དགེ་ཚུལ་མནན་པ་ལྟ་བུའོ། །ད་ནི་དངོས་གཞིའི་ཡན་ལག་རྣམས་ཀྱི་སྤྲོས་པ་བཤད་པར་བྱའོ། །བུད་མེད་ལ་སོགས་རྨ་རྣམས་འགྲོ་རིགས་དབྱེ། །ཤི་དང་གཡོགས་དང་རྐེད་ཕྱེད་ཆད་ན་ཡང་། །ཁྱད་པར་མེད་དེ་དུམ་བུར་སྦྱར་བ་ལས། །མཚམས་
མངོན་མིན་པའི་བུ་གའང་དངོས་གཞིར་འགྱུར། །བུད་མེད་དང་སྐྱེས་པ་དང་མ་ནིང་རྣམས་ཀྱི་རྨའི་སྒོ་གང་དག་ཡིན་པ་ནི། ཁ་དང་བཤང་དང་གཅི་བའི་བུ་ག་རྣམས་སོ། །དེ་རྣམས་ནི་མི་དང་དུད་འགྲོའི་འགྲོ་བའི་དབྱེ་བ་འམ། བྲམ་ཟེ་དང་གདོལ་པ་ལ་སོགས་པའི་རིགས་ཀྱི་དབྱེ་བའི་ཁྱད་
པར་མེད་དོ། །དེ་བཞིན་དུ་གསོན་པ་དང་ཤི་བར་གྱུར་པ་དང་། གོས་ཀྱིས་གཡོགས་པ་དང་། མ་གཡོགས་པར་གྱུར་ཀྱང་ཁྱད་པར་མེད་པ་ཁོ་ན་ཡིན་ཏེ། ཐམས་ཅད་ལ་མཐར་འགྱུར་བ་མཚུངས་པ་ཡིན་ནོ་ཞེས་བྱ་བའི་ཐ་ཚིག་གོ། །ཅིའི་ཕྱིར་འདི་སྨོས་ཤེ་ན། བུད་མེད་ཀྱི་རོ་གང་
ཡིན་པ་དེ་ཉིད་ལས་སྐྱེས་པ་ལས་ཕམ་པར་འགྱུར་བ་རིགས་པ་ཡིན་གྱི། དུད་འགྲོ་རྣམས་ཀྱི་ནི་མ་ཡིན་ནོ། །དེ་བཞིན་དུ་བྲམ་ཟེ་མོ་རྣམས་ཁོ་ནའི་བྲམ་ཟེ་ལ་འགྱུར་གྱི་གདོལ་པ་མོ་རྣམས་ཀྱི་ནི་མ་ཡིན་ནོ། །གསོན་པ་རྣམས་ཁོ་ནའི་ཡིན་གྱི་ཤི་བ་རྣམས་ཀྱི་ནི་མ་ཡིན་ནོ་ཞེས་བྱ་བ་ལ་སོགས་པ་
གང་ཞིག་སེམས་པ་དེའི་དོགས་པ་བཟློག་པའི་ཕྱིར་རོ། །གཞན་ཡང་རྐེད་པའི་ཕྱེད་དུ་ཆད་པ་ལ་ཡང་ཁྱད་པར་མེད་པ་ཁོ་ན་ཡིན་ནོ་ཞེས་བྱ་བར་སྦྱར་ཏེ། ལུས་ཀྱི་རྐེད་དུ་ཆད་པར་གྱུར་ཀྱང་མཐར་འགྱུར་བ་ཁོ་ན་ཡིན་ནོ་ཞེས་བྱ་བའི་ཐ་ཚིག་གོ། །དེ་བཞིན་དུ་བུད་མེད་ཆུ་ཤགས་སུ་གཤགས་
པའི་དུམ་བུ་སྦྱར་བ་ལས་བུ་ག་དེ་ལ་མཚམས་མི་མངོན་ན་དེའི་ཚེ་ཡང་དངོས་གཞིར་འགྱུར་རོ། །འོ་ན་བུ་གར་སྦྱར་བའི་མཚམས་མངོན་པ་དེ་ལ་ཇི་ལྟར་འགྱུར་ཞེ་ན། བཤད་པ། སྦྱར་བའི་མཚམས་ནི་མངོན་པར་གྱུར་པ་དང་། །ཕག་ལ་སོགས་པ་བསྲེགས་པ་སྤུ་མེད་རྨ། །དེ་

བཞིན་མགོ་བོ་བཅད་པའི་ཁ་ལ་ཡང་། །ཀུན་དུ་བཤགས་པར་བྱ་བའི་ཆུང་བར་འགྱུར། །གང་ལ་སྦྱར་བའི་མཚམས་མངོན་པའི་བུ་ག་དེ་ལ་ནི་བཤགས་པར་བྱ་བའི་ལྟུང་བ་ཆུང་བར་འགྱུར་རོ། །དེ་བཞིན་དུ་ཕག་ལ་སོགས་པ་བསྲེགས་པ་སྤུ་མེད་པ་དག་གི་ལམ་དང་།
མགོ་བོ་བཅད་པའི་ཁ་དང་། ཡང་ཞེས་བྱ་བས་ལུས་ཀྱི་བུ་ག་གནས་མ་དང་བཅོས་མ་གཞན་ལ་ལོག་པར་ཞུགས་ན་ཡང་ལྟུང་བ་ཆུང་ངུ་ཁོ་ནར་འགྱུར་རོ་ཞེས་སྟོན་ཏོ། །གོས་ཀྱིས་དཀྲིས་དང་དགུག་པ་བྱས་པ་དང་། །ལམ་ལ་མ་རེག་པར་ཡང་ཆུད་པར་འགྱུར། །ཡན་ལག་གི་སྦུ་བུ་
གོས་ཀྱིས་དཀྲིས་པ་དང་། དེ་བཞིན་དུ་བཀུག་པ་དང་། ལམ་ལ་མ་རེག་པར་ཡང་རུང་སྟེ། འཇུག་པས་ལྟུང་བ་ཆུང་བར་འགྱུར་རོ། །འདིར་གཞུང་ནི། གོས་སམ་གྲོ་ག་འམ་པགས་པའི་རིམ་པས་སམ། འོད་མའི་སྦུ་བུར་བཅུག་ནས་སམ་ཡན་ལག་གི་རྣམ་པ་བཀུག་ནས་སམ་
ལམ་ལ་མ་རེག་པར་འཇུག་ན་ཐམས་ཅད་ལ་སྦོམ་པོར་འགྱུར་རོ་ཞེས་འབྱུང་བ་ཡིན་ནོ། །འོ་ན་རྣམ་པར་འབྱེད་པ་ལས། བར་ཆད་དང་བཅས་པས་བར་ཆད་དང་བཅས་པ་ལ་ཞེས་བྱ་བ་དང་། ཕམ་པར་འགྱུར་རོ་ཞེས་གསུངས་པ་ཇི་ལྟ་བུ་ཡིན་ཞེ་ན། བཤད་པ། གོས་སྟུག་དག་གིས་
ཡིན་ན་ཆུང་བར་འདོད། །སྲབ་མོ་དངོས་གཞི་ཡིན་པས་དེ་འགལ་མེད། །འདིར་གཞུང་ནི་ཞུས་པ་ལས། ཆུད་པར་གསུངས་པ་ཡིན་ཏེ། གོས་ལ་སོགས་པ་སྟུག་པོས་བར་དུ་ཆོད་ན་རྣམ་པ་ཐམས་ཅད་དུ་རེག་པའི་བདེ་བ་མེད་པའི་ཕྱིར་རོ། །རྣམ་པར་འབྱེད་པ་ལས་ནི་སྲབ་མོས་
བར་དུ་ཆོད་ན་རེག་པའི་བདེ་བ་འབྱུང་བའི་ཕྱིར་མཐར་འགྱུར་བར་གསུངས་པས་གཞུང་འགལ་བ་མེད་དོ། །ད་ནི་ལྟུང་བའི་རྣམ་པར་དབྱེ་བ་བཤད་པར་བྱ་སྟེ། སེམས་བྱུང་ཡིད་ཀྱིས་བྱ་ཡིན་སོ་ལ་སོགས། །རེག་པའི་གཞི་ཡི་བར་དུ་སྦྱོར་བ་ཡིན། །སོ་སོགས་མཚམས་ལས་ཕར་
ནི་དངོས་གཞི་ཡིན། །འཁྲིག་པ་ལ་ནི་འདུ་ཤེས་གཙོར་བྱ་མེད། །བསྟེན་པའི་ཕྱིར་སེམས་སྐྱེས་ནས་བསྡམ་པར་བྱ་བའི་ཁ་ན་མ་ཐོ་བར་འགྱུར་རོ། །སོ་དང་པགས་པ་དང་སྦུ་བུའི་ཁ་ལ་རེག་པའི་བར་གྱི་བར་མ་དོ་དེར་ནི་སྦྱོར་བའི་ལྟུང་བའི་ཉེས་བྱས་ཁོ་ནར་འགྱུར་རོ། །སོ་ལ་སོགས་

པའི་མཚམས་ལས་ཕར་འདའ་བར་བྱེད་ལ། དངོས་གཞིའི་ཡན་ལག་རྣམས་ཀྱང་ཕྲད་ན་དངོས་གཞིའི་ལས་ཀྱི་ལམ་སྐྱེས་པ་ཡིན་ཏེ། དངོས་གཞིའི་ལྟུང་བར་རིག་པར་བྱའོ། །སོ་དང་པགས་པ་དང་སྦུ་བུའི་བར་ཡིན་པར་ངེས་པའི་ཕྱིར་འདིར་འཁྲིག་པ་ལ་ནི་མེད་པར་རིག་པར་བྱའོ། །དེ་
ལྟར་ཡང་གཞུང་ནི་འདུལ་བྱེད་ལས། དགེ་སློང་གིས་ལམ་དུ་ལམ་མ་ཡིན་པའི་འདུ་ཤེས་ཀྱིས་མི་ཚངས་པར་སྤྱོད་པ་འཁྲིག་པའི་ཆོས་བསྟེན་པ་ན། བཅོམ་ལྡན་འདས་ཀྱིས་བཀའ་སྩལ་པ། ལམ་དུ་ལམ་མ་ཡིན་པའི་འདུ་ཤེས་དང་ལྡན་པ་ལ་ཕམ་པ་ལ་སོགས་པའི་བར་དུ་འབྱུང་བ་ཡིན་
ནོ། །འདུ་ཤེས་གཙོ་བོར་བྱ་བ་རྣམས་ལ་ནི་དེ་ལྟ་བུ་མེད་དེ། འདི་ལྟར་སྲོག་ཆགས་དང་བཅས་པའི་ཆུ་ལ་སྲོག་ཆགས་མེད་པར་འདུ་ཤེས་དང་ལྡན་པ་ལ་ལྟུང་བ་ཡོད་པར་མི་འདོད་པས་སོ། །ད་ནི་ཕྱོགས་དང་མཐུན་པ་བརྗོད་པ་ཡིན་པས། བཤད་པ། མི་ཚངས་སྤྱོད་ཕྱོགས་ངོ་བོ་
བསྟན་པ་ནི། །དཔེར་ན་བསམས་བཞིན་ཁུ་བ་འབྱིན་བྱེད་དང་། །འདོད་ཆགས་ཀྱིས་ནི་འཁྱུད་དང་ཟུར་སྟེག་དང་། །འཁྲིག་པའི་ཚིག་རྣམས་སྒྲོགས་པར་བྱེད་པ་དང་། །མི་ཚངས་པར་སྤྱོད་པ་དང་འདྲ་བ་དག་གི་རང་བཞིན་བསྟན་པ་ནི། འདི་ལྟ་སྟེ། བསམས་བཞིན་དུ་ཁུ་བ་
འབྱིན་པ་དང་། འདོད་ཆགས་ཀྱིས་འཁྱུད་པ་དང་། ཟུར་སྟེག་བྱེད་པ་དང་སྟེ། འཁྲིག་པའི་འདོད་ཆགས་ཀྱིས་བསྐྱོད་པ་དང་། འཁྲིག་པའི་ཚིག་སྟེ་སྒྲ་རྣམས་སྒྲོགས་པ་དང་། །ཉལ་ཤོམ་ཁྱིམ་དུ་ལྟད་མོ་བལྟ་ཕྱིར་དང་། །རྒོད་པས་གནས་པ་ཉིད་དང་སྨྱན་བྱེད་དང་། །
ཁྱིམ་དག་ཏུ་ནི་མཚན་མོ་འཕྱན་ཅིང་རྒྱུ། །མིག་ཟུར་གཡོབ་དང་སྟེག་པར་བྱེད་པ་ཡིན། །ཞེས་བྱ་བ་ནི་རྒོད་པས་སྐྱེས་པ་དང་། བུད་མེད་དག་གི་སྤྱོད་པ་ལྟ་བའི་ཕྱིར་གནས་པའོ། །ཁྱིམ་གང་དུ་བུད་མེད་ལ་ཉལ་པོ་བྱས་པ་དེ་ནི་ཉལ་པོ་ཤོམ་པའི་ཁྱིམ་ཞེས་བྱ་སྟེ། དཔེར་ན་བུད་མེད་ནི་སྐྱེས་
པས་ཉལ་བར་བྱ་བ་ཡིན་ནོ་ཞེས་བསྟན་པ་ལྟ་བུ་ཡིན་ནོ། །སྨྱན་བྱེད་ཅེས་བྱ་བ་ནི་སྐྱེས་པ་དང་བུད་མེད་སྤྲོད་པར་བྱེད་པའོ། །ཁྱིམ་དག་ཏུ་མཚན་མོ་འགྲོ་བ་དང་། དེ་བཞིན་དུ་མིག་ཟུར་དང་གཡོབ་པ་དང་། སྟེག་པ་ཡང་ཡིན་ཏེ། དེ་ལ་མིག་ཟུར་ནི་བཟུར་ཏེ་བལྟ་བའོ། གཡོབ་པ་ནི་

ཡན་ལག་གིས་གཡོབ་པའོ། །འདོད་ཆགས་ཀྱི་གདོན་གྱིས་གཟིར་བར་བྱས་པའི་ངག་གི་འགྱུར་བ་ན་སྟེག་པ་ཡིན་ཏེ། སྟེག་པར་བྱེད་པའོ་ཞེས་བྱ་བའི་ཐ་ཚིག་གོ། །ཡང་དང་ཡང་དུ་བུད་མེད་གདོང་མི་བལྟ། །རེག་པའི་དུག་ལ་ནམ་ཡང་རེག་མི་བྱ། །གལ་
ཏེ་ཆུ་དང་མེས་འཆི་དེ་ཡི་ཚེ། །དེས་པའི་འདུ་ཤེས་བྱས་ཏེ་རེག་པར་བྱ། །ཡང་དང་ཡང་དུ་བུད་མེད་རྣམས་ཀྱི་གདོང་དུ་བལྟ་བར་མི་བྱའོ། །དེ་ལྟར་ཡང་གཞུང་ནི། བཅོམ་ལྡན་འདས་བུད་མེད་དག་ལ་ཇི་ལྟར་བསྒྲུབ་པར་བགྱི། ཀུན་དགའ་བོ་མི་ལྟ་བར་རོ་ཞེས་གསུངས་པ་ཡིན་
ནོ། །དེ་ལྟ་བུའི་དགོས་པ་ཞིག་བྱུང་ན་ཡང་ལན་ཅིག་བལྟ་བར་བྱའོ། །ཡང་དང་ཡང་དུ་བུད་མེད་ཀྱི་གདོང་དུ་བལྟས་ནས་མཚན་མར་འཛིན་པར་འགྱུར་ཞིང་དེ་ལས་ཀྱང་འདོད་ཆགས་ཀྱི་མེ་འབར་བར་འགྱུར་རོ་སྙམ་དུ་དགོངས་པ་ཡིན་ནོ། །ཀུན་དུ་ཆགས་པས་ལྟ་བ་ནི་རྣམ་པ་ཐམས་ཅད་དུ་
བཀག་པ་ཁོ་ནའོ། །ཇི་སྐད་དུ། རབ་ཏུ་བྱུང་བའི་གཞི་ལས། བུད་མེད་ཀྱི་ཡུལ་ལ་མིག་གཏད་དེ་བལྟ་བར་མི་བྱའོ་ཞེས་གསུངས་པ་ཡིན་ནོ། །འཁྲིག་པའི་ཀུན་དུ་སྦྱོར་བ་བདུན་གྱི་མདོ་ལས་ཀྱང་། །བྲམ་ཟེ་འདི་ན་ཁ་ཅིག་བདག་ཉིད་ཚངས་པར་སྤྱོད་པ་ཡིན་པར་ཁས་འཆེ་ཞིང་དེ་བུད་མེད་
དང་ལྷན་ཅིག་གཉིས་ཀྱིས་གཉིས་སྤྲོད་པར་ནི་མི་བྱེད་དོ། །འོན་ཀྱང་བུད་མེད་ལ་མིག་གཏད་ནས་ལྟ་བར་བྱེད་ཅིང་དེས་དེའི་རོ་མྱོང་བར་བྱེད་དོ་ཞེས་བྱ་བ་ལས། ཚངས་པར་སྤྱོད་པ་མ་ཆུབ་པར་སྤྱོད་ཅིང་རལ་བ་དང་། སྐྱོན་ཅན་དང་། འདྲེན་མ་དང་། ཐུན་ཚགས་ཅན་ཡིན་ཏེ། སྐྱེ་བ་དང་། རྒ་བ་
དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུགས་པ་དག་ལས་ཡོངས་སུ་མི་འགྲོལ་ཞིང་སྡུག་བསྔལ་ལས་ཡོངས་སུ་མི་གྲོལ་བ་ཡིན་ནོ་ཞེས་སྨྲའོ། །འདི་ནི་འཁྲིག་པའི་ཆོས་ཀུན་དུ་སྦྱོར་བ་དང་པོ་
ཡིན་ནོ་ཞེས་བྱ་བའི་བར་དང་། དེ་བཞིན་དུ་བུད་མེད་དང་ལྷན་ཅིག་སྟེག་པར་བྱེད། རྩེ་བར་བྱེད། ག་ཞ་འདོན་པར་བྱེད་ཅེས་བྱ་བ་ནི་གཉིས་པ་ཡིན་ནོ། །བུད་མེད་ཀྱིས་བསྐུ་བ་དང་། ཁྲུས་བྱ་བ་དང་། མཉེ་བ་བདག་གིར་བྱེད་པ་ཞེས་བྱ་བ་ནི་གསུམ་པ་ཡིན་ནོ། །བུད་མེད་

རྩིག་པའི་ཕག་ན་འདུག་པའམ། རས་བཅོས་བུའི་ཕག་ན་འདུག་པའི་གོས་དག་གམ་རྒྱན་དག་གི་སྒྲ་ཉན་ཅིང་དེས་དེའི་རོ་མྱོང་བར་བྱེད་པ་ཞེས་བྱ་བ་ནི་བཞི་པ་ཡིན་ནོ། །གཞན་དག་ལ་འདོད་པའི་ཡོན་ཏན་ལྔ་དག་དང་ལྡན་ཞིང་རྩེ་བར་བྱེད་པ་ལ་ལྟ་བར་བྱེད་པ་ནས། དེས་དེའི་རོ་མྱོང་བར་བྱེད་པ་
ཞེས་བྱ་བའི་བར་ནི་ལྔ་པ་ཡིན་ནོ། །བདག་ཚུལ་ཁྲིམས་སམ་བརྟུལ་ཞུགས་སམ་ཚངས་པར་སྤྱོད་པ་འདིས་ལྷའམ་མིའི་གཙོ་བོར་ཤོག་ཤིག་ཅེས་སྨོན་ལམ་བཏབ་ནས་ཚངས་པར་སྤྱད་པ་སྤྱོད་པར་བྱེད་པ་ཞེས་བྱ་བ་ནི་དྲུག་པ་ཡིན་ནོ། །སྔོན་བགད་པ་དང་དགའ་བ་དང་རྩེ་བ་དང་ཀུན་དུ་སྤྱད་པ་
དྲན་པར་བྱེད་ཅིང་དྲན་པར་བྱེད་དུ་འཇུག་པ་ཞེས་བྱ་བ་འདི་ནི་འཁྲིག་པའི་ཀུན་དུ་སྦྱོར་བ་བདུན་པ་ཡིན་ནོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །རེག་པར་མི་བྱའོ་ཞེས་བྱ་བའི་གཞུང་ནི་འདིར་བུད་མེད་ནི་རེག་པའི་དུག་ཡིན་ནོ་ཞེས་འབྱུང་བ་ཡིན་ནོ། །གལ་ཏེ་བུད་མེད་ཆུའམ་མེ་དག་
གིས་འཆི་ན་དེའི་ཚེ་དེ་བསྐྱབ་པའི་ཕྱིར་སའི་འདུ་ཤེས་བསྐྱེད་ནས་རེག་པར་བྱའོ། །མོ་ཡིས་བརྟུལ་ཞུགས་ཅན་ལའམ་སྡོམ་བརྩོན་གྱིས། །དེ་མཐོང་ཆགས་ན་དེར་ནི་གནས་མི་བྱ། །རྡོ་སོགས་ཡན་ལག་འཁྲི་ཤིང་མི་བརྡུང་སྟེ། །འདོད་ཆགས་མེ་ནི་མི་སྡུག་ཆུས་ཞི་འགྱུར། །གང་ན་
བུད་མེད་ཀྱི་བརྟུལ་ཞུགས་ཅན་ལ་མཐོང་ནས་ཆགས་པར་བྱེད་དམ། གང་ན་བརྟུལ་ཞུགས་ཅན་གྱིས་བུད་མེད་ལ་མཐོང་ནས་ཆགས་པར་བྱེད་ན་དེར་ཡང་ཡུན་རིང་དུ་གནས་པར་མི་བྱ་སྟེ། །མྱུར་བ་ཁོ་ནར་དེ་ནས་འགྲོ་བར་བྱའོ། །དེ་བཞིན་དུ་རྡོ་བ་ལ་སོགས་པས་ཡན་ལག་གི་འཁྲི་
ཤིང་བརྡུང་བར་མི་བྱ་སྟེ། འདིར་གཞུང་ནི་དགེ་སློང་འདོད་ཆགས་ཀྱིས་གཟིར་བ་ཞིག་གིས་རྡོ་བས་ཡན་ལག་གི་རྣམ་པ་བཅོམ་པ་དང་། དེ་ནས་བཅོམ་ལྡན་འདས་ཀྱིས་ཇི་ལྟར་ན་བརྡུང་བར་བྱ་བ་གཞན་ཡིན་ན། གཞན་རུང་བར་བྱེད་དེ། འོན་ཀྱང་འདོད་ཆགས་ལ་ནི་མི་སྡུག་
པའོ་རྟ། །ཞེ་སྡང་ལ་ནི་བྱམས་པའོ། །གཏི་མུག་ལ་ནི་རྟེན་ཅིང་འབྲེལ་པར་འབྱུང་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །བུད་མེད་གནམ་བལྟས་འཐུང་ལ་རང་གིས་ནི། །ཆུ་ནི་རྒྱུན་མི་འཆད་པར་སྦྱིན་མི་བྱ། །རང་ལག་གཅེར་བུ་མོ་ལ་ཟས་ལ་སོགས། །མི་སྦྱིན་ཁུར་བ་སྦྱིན་

བཞིན་གྱུར་མི་རུང་། །བུད་མེད་ཁ་གྱེན་དུ་བལྟས་ཏེ་ཆུ་འཐུང་བ་དག་ལ་རྒྱུན་མི་འཆད་པར་སྦྱིན་པར་མི་བྱའོ། །དེ་བཞིན་དུ་རང་གི་ལག་ནས་གཅེར་བུ་མོ་དག་ལ་ཟས་ལ་སོགས་པ་སྦྱིན་པར་མི་བྱ་སྟེ། འདི་ལྟར་འཕགས་པ་ཀུན་དགའ་བོས་ལྷུང་བཟེད་གྱི་ལྷག་མ་སྦྱིན་པར་མཛད་
པ་ན་མ་བརྟགས་པར་གཅེར་བུ་མོ་གཞོན་ནུ་མལ་ཁུར་བ་གཉིས་བྱིན། རྒན་མོ་ལ་ནི་ཁུར་བ་གཅིག་བྱིན་པ་དང་། རྒན་མོས་སྨྲས་བ། ཕུ་ནུ་མོ་ཤཱ་ཀྱའི་བུ་ཀུན་དགའ་བོས་འདོད་པར་འགྱུར་རོ་ཞེས་དེ་ལྟ་བུའི་སྐུར་པ་འདེབས་པར་གྱུར་ན་མི་རུང་བས་སོ། །བུད་མེད་རྣམས་དང་ལྷན་ཅིག་ཏུ་འགྲོགས་པ་དང་སྨྲ་བ་དང་། ལྟ་བ་
བཀག་ནས་དམིགས་ཀྱིས་དབྱེ་བ་བཤད་པར་བྱ་སྟེ། མ་ཆགས་མིག་གིས་བུད་མེད་ཆོས་བསྟན་བྱའི། །མིག་ཚུགས་སུ་ནི་བཞིན་ལ་བལྟ་མི་བྱ། །བུད་མེད་རྣམས་དང་ཉལ་འདུག་འགྲོ་ལ་སོགས། །སྤང་བྱ་སྐྱེས་པ་ཡོད་ན་ཉེས་པ་མེད། །འོན་ཏེ་བུད་མེད་རྣམས་ལ་ཆོས་སྟོན་པ་ཞིག་
བྱུང་ན། དེའི་ཚེ་མ་ཆགས་པའི་མིག་གིས་སྐབས་སྐབས་སུ་ལྟ་བའམ། མིག་གི་རྒྱུ་བ་འཛུམས་པས་ཆོས་བཤད་པར་བྱའི། མིག་ཚུགས་སུ་བཞིན་ལ་བལྟ་བས་ནི་མ་ཡིན་ནོ། །བུད་མེད་ཀྱི་བཞིན་ལ་ཡང་དང་ཡང་དུ་བལྟས་ནས་བྱིས་པ་ལ་མཚན་མར་འཛིན་པའི་རྩ་བ་ཟུག་པར་འགྱུར་
བས་བཟློག་པ་ཡིན་ནོ། །དེ་བཞིན་དུ་བུད་མེད་རྣམས་དང་ལྷན་ཅིག་ཏུ་ཁྱིམ་ན་ཉལ་བ་དང་། ལྷན་ཅིག་ཏུ་འདུག་པ་དང་། ལྷན་ཅིག་ཏུ་ལམ་དུ་འགྲོ་བ་དང་། འབེལ་བའི་གཏམ་བྱ་བ་ལ་སོགས་པ་ཞི་ཐག་རིང་ཞིང་ཤིན་ཏུ་རིང་བར་སྤང་བར་བྱའོ། །དེ་ལྟ་བུའི་རྐྱེན་ཞིག་བྱུང་ལ་གལ་ཏེ་དེ་ན་
སྐྱེས་པ་ཡོད་ན་དེའི་ཚེ་ཉེས་པ་མེད་དོ། །དགེ་ཚུལ་གྱི་ཚིག་ལེའུར་བྱས་པའི་འགྲེལ་པ་ལས། བསླབ་པའི་གཞི་གསུམ་པ་རྫོགས་སྷོ།། །།གང་ཞིག་བླ་མ་བརྗོད་བློས་མི་ཆོས་ལས། །བླ་མ་ཞེས་བྱ་དེ་བདག་ལ་ཡོད་ཅེས། །མི་ལ་བརྫུན་ཟེར་གཞན་གྱིས་གོ་ན་ནི། །
མངོན་པའི་ང་རྒྱལ་མ་གཏོགས་དེ་བསྙིལ་བྱ། །ཞེས་བྱ་བ་ལ། གང་ཞིག་ཅེས་བྱ་བ་ནི་དགེ་ཚུལ་ལོ། །བླ་མ་བརྗོད་བློས་ཞེས་བྱ་བ་ནི་མིའི་ཆོས་ལས་བླ་མ་བསྙད་པར་བྱའོ་སྙམ་པའི་བསམ་པས་སོ། །མིའི་ཆོས་ལས་བླ་མ་ཞེས་བྱ་བ་ནི་མིའི་ཆོས་ལས་བླ་མ་ཞེས་བྱའོ། །དེ་ཞེས་

བྱ་བ་ནི་མིའི་ཆོས་ལས་བླ་མ་དེ་ཉིད་ཅེས་ངེས་པར་གཟུང་བས་འཁྲུལ་པས་ནི་མ་ཡིན་ནོ་ཞེས་བསྟན་ཏོ། །འདི་ལྟར་གལ་ཏེ་རྒྱུན་དུ་ཞུགས་པའི་འབྲས་བུ་ལ་སོགས་པའི་ལུང་བསྟན་པར་བྱའོ་སྙམ་དུ་ཞུགས་པ་ཡིན་པར་དེ་ཁོ་ན་ལུང་སྟོན་པར་བྱེད་ན་དེའི་ཚེ་མཐར་འགྱུར་རོ། །འོན་ཏེ་འཁྲུལ་
པས་གཞན་ལུང་བསྟན་པར་བྱའོ་སྙམ་པ་ལས་གཞན་ཞིག་ལུང་སྟོན་པར་བྱེད་ན་དེའི་ཚེ་ཆུང་བ་ཡིན་ནོ་ཞེས་བྱ་བའི་ཐ་ཚིག་གོ། །འདིར་གཞུང་ནི་ཞུས་པ་ལས། བཙུན་པ་དགེ་སློང་གིས་རྒྱུན་དུ་ཞུགས་པའི་འབྲས་བུར་ལུང་བསྟན་པར་བྱའོ་སྙམ་པ་ལས། ལན་ཅིག་ཕྱིར་འོང་
བའི་འབྲས་བུར་ལུང་བསྟན་པར་བགྱིད། ཕྱིར་མི་འོང་བའི་འབྲས་བུར་ལུང་བསྟན་པར་བྱའོ་སྙམ་པ་ལས། དགྲ་བཅོམ་པའི་འབྲས་བུར་ལུང་སྟོན་པར་བགྱིད་ན་ཅིར་འགྱུར་ལགས། བཀའ་སྩལ་པ། ཉེས་པ་སྦོམ་པོར་འགྱུར་རོ་ཞེས་འབྱུང་བ་ཡིན་ནོ། །ཟེར་ཞེས་
བྱ་བའི་སྨྲ་བ་ལའོ། །འདི་སྐད་ཟེར་ཞེ་ན། བདག་ལ་ཡོད་ཅེས་བྱ་བ་སྨོས་ཏེ། འདིར་གཞུང་ནི་བསམ་གཏན་དང་པོ་ལ་སོགས་པ་མ་ཐོབ་པར་བདག་གིས་ཐོབ་བོ་ཞེས་བྱ་བ་ལ་སོགས་པ་འབྱུང་བ་ཡིན་ནོ། །མི་ལ་ཞེས་བྱ་བ་ནི་མིའི་འགྲོ་བ་ལ་མངོན་སུམ་དུའོ། །འདིར་གཞུང་ནི་
འདུལ་བྱེད་ལས། དགེ་སློང་གིས་མིའི་འགྲོ་བ་ལ་མིར་འདུ་ཤེས་དང་ལྡན་པས་མེད་ཅིང་མི་བདོག་པའི་མིའི་ཆོས་བླ་མ་སྨྲས་ནས་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། མི་ལ་མིའི་འདུ་ཤེས་དང་ལྡན་ན་ཕམ་པར་འགྱུར་རོ། །མི་ལ་ཡིད་གཉིས་
དང་ལྡན་ན་ཕམ་པར་འགྱུར་རོ། །མི་མ་ཡིན་པ་ལ་མིར་འདུ་ཤེས་དང་ལྡན་པ་དང་མི་མ་ཡིན་པ་ལ་ཡིད་གཉིས་དང་ལྡན་ན་དམན་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །བརྫུན་ཞེས་བྱ་བ་ནི་དོན་གྱིས་སྟོང་པ་ཡིན་ནོ་ཞེས་བྱ་བའི་ཐ་ཚིག་གོ། །གཞན་གྱིས་གོ་ན་ནི་ཞེས་
བྱ་བ་ནི་གལ་ཏེ་མི་གཞན་དེས་ཚིག་གི་དོན་ཁོང་དུ་ཆུད་པ་ཡིན་ཏེ། གཞན་དེས་གོ་བར་གྱུར་ན་ཞེས་བྱ་བའི་ཐ་ཚིག་གོ། །འདིར་གཞུང་ནི་འདུལ་བྱེད་ལས། དགེ་སློང་གིས་ཁྱིམ་པ་ལ་མེད་ཅིང་མི་བདོག་པའི་མིའི་ཆོས་བླ་མ་སྨྲས་པ་ལས། དེས་དེ་མ་བསམས་པས་དེ་ཅི་ཟེར་

ཞེས་སྨྲས་པ་དང་། དེ་ཙམ་དུ་ཟད་ཅེས་སྨྲས་ནས་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཕམ་པའི་ལྟུང་བ་ནི་མེད་དེ། དམན་པ་སྦོམ་བོར་འགྱུར་རོ་ཞེས་བྱ་བའི་བར་དུ་འབྱུང་བ་ཡིན་ནོ། །མངོན་པའི་ང་རྒྱལ་མ་གཏོགས་ཞེས་བྱ་
བ་ནི་མ་ཐོབ་པ་ཐོབ་པའི་འདུ་ཤེས་དང་ལྡན་པ་ཉིད་ནི་མངོན་པའི་ང་རྒྱལ་ཡིན་ཏེ། ཐོབ་པའི་འདུ་ཤེས་དང་ལྡན་པ་མ་གཏོགས་པ་ཞེས་བྱ་བའི་ཐ་ཚིག་གོ། །འདིར་གཞུང་ནི་འདུ་ཤེས་སྦས་ནས་ཞེས་འབྱུང་བ་ཡིན་ནོ། །དེ་ཞེས་བྱ་བ་ནི་དགེ་ཚུལ་ལོ། །བསྙིལ་ཞེས་བྱ་བ་ནི་དགར་བར་
བྱ་བ་ཡིན་ནོ་ཞེས་བྱ་བའི་ཐ་ཚིག་གོ། །མིའི་ཆོས་བླ་མ་དེ་ཡང་གང་ཞེ་ན། བཤད་པ། བསམ་གཏན་ལ་སོགས་མངོན་ཤེས་འབྲས་བཅས་པའི། །ཡོན་ཏན་རྣམས་འདིར་མི་ཆོས་བླ་མར་བསྟན། །དེ་ཡི་རྗོད་པར་བྱེད་པ་རྣམ་མང་དག །ད་ནི་བཤད་པར་བྱ་ཡིས་མཉན་པར་
གྱིས། །བསམ་གཏན་རྣམས་དང་། གཟུགས་མེད་པ་རྣམས་དང་། མངོན་པར་ཤེས་པ་ལྷའི་རྣ་བ་ལ་སོགས་པ་རྣམས་དང་། ཡོན་ཏན་འབྲས་བུ་དང་བཅས་པ་རྣམས་ཡིན་ནོ། །དེ་ལ་འབྲས་བུ་ཞེས་བྱ་བ་ནི་དགེ་སྦྱོང་གི་ཚུལ་གྱི་འབྲས་བུ་བཞི་པོ་དག་ཡིན་ནོ། །ཡོན་ཏན་རྣམས་
ནི་སོ་སོ་ཡང་དག་པར་རིག་པ་དང་། ཟིལ་གྱིས་ནོན་པའི་སྐྱེ་མཆེད་དང་། ཟད་པར་གྱི་སྐྱེ་མཆེད་ལ་སོགས་པ་རྣམས་སོ། །མིའི་ཆོས་ལས་བླ་མར་གྱུར་པ་དེ་ཁོ་ན་ཡིན་པར་ཁོང་དུ་ཆུད་པར་བྱའོ། །མིའི་ཆོས་ཀྱང་ཆོས་འདུལ་བ་འདི་ལས་སྒྲིབ་པ་ལྔ་གསུངས་པ་དག་ཡིན་ནོ། །
བསམ་གཏན་ལ་སོགས་པ་དག་ནི་དེ་དག་ལས་བླ་མར་གྱུར་པ་ཡིན་ཏེ་སྒྲིབ་པ་ལྔ་སྤངས་པས་ཐོབ་པའི་ཕྱིར་རོ། །མིའི་ཆོས་བླ་མ་འདི་རྗོད་པར་བྱེད་པ་རྣམ་པ་དུ་མ་སྟེ། འདི་ལྟར་ཁ་ཅིག་ནི་འབྲས་བུ་ལས་སྟོན་པར་བྱེད་དོ། །ཁ་ཅིག་ནི་དངོས་སུའོ། །ཁ་ཅིག་ནི་དེའི་ཆོས་ཀྱིས་
སོ། །ཁ་ཅིག་ནི་ཡོངས་སུ་ཉམས་པ་བརྗོད་པས་སོ། །ཁ་ཅིག་ནི་གཞན་ལ་སྙད་བཏགས་པས་སོ། །ཁ་ཅིག་ནི་དོན་མཐུན་པ་སྟོན་པས་སོ། །ཁ་ཅིག་ནི་ཟུར་གྱིས་གླེང་བས་སོ། །ཁ་ཅིག་ནི་ཕྱི་མ་ཡང་དག་པས་སོ། །ཁ་ཅིག་ནི་ཅང་མི་སྨྲ་བར་དང་དུ་ལེན་པར་བྱེད་

པས་སོ་ཞེས་བྱ་བ་ལ་སོགས་པ་ཡིན་ནོ། །དེ་དག་གི་དཔེར་བརྗོད་པ་ཙམ་ཞིག་རབ་ཏུ་བསྟན་གྱི་ཉོན་ཅིག །དེ་ལ་རེ་ཞིག་འབྲས་བུ་ལས་ནི། ལྷ་ལ་སོགས་མཐོང་བདག་ལ་སོགས་ལྟ་བྱེད། །ཅེས་བྱ་བ་ནི་ལྷ་ལ་སོགས་པ་མཐོང་ངོ་། །ལྷ་ལ་སོགས་པ་ཡང་བདག་ལ་ལྟ་བར་བྱེད་
དོ་ཞེས་བྱ་བ་ཡིན་ཏེ། འདི་ག་ནི་འབྲས་བུ་ལས་བདག་བསམ་གཏན་ལ་སོགས་པ་ཐོབ་པ་ཉིད་དུ་བརྗོད་པ་ཡིན་ཏེ། བསམ་གཏན་ལ་སོགས་པ་མི་སྲིད་པ་ནི་ལྷ་ལ་སོགས་པ་ལྟ་བ་དང་། བསྙེན་བཀུར་བྱེད་པ་མི་སྲིད་པའི་ཕྱིར་རོ། །སྡུག་བསྔལ་ཉིད་ལ་སོགས་ཤེས་སོ། །ཞེས་
བྱ་བ་འདིས་ནི་དངོས་སུ་རྗོད་པར་བྱེད་པ་བསྟན་ཏོ། །འདིར་གཞུང་ནི། སྡུག་བསྔལ་དང་ཀུན་འབྱུང་དང་འགོག་པ་དང་ལམ་ཤེས་སོ་ཞེས་བྱ་བ་ལ་སོགས་པ་འབྱུང་བ་ཡིན་ཏེ། ཚིག་འདི་ནི་རྟོགས་པའི་རང་བཞིན་ཡིན་གྱི། ལུང་ནི་མ་ཡིན་ནོ། །དེའི་ཆོས་ཉིད་ཀྱང་། ཟག་པ་
ཟད་པའི་ཁྱད་པར་ངེས་རྣམས་དང་། །བདག་ཉིད་ལྡན་པར་རྗོད་པར་བྱེད་པ་ཡིན། །ཞེས་བྱ་བས་བསྟན་ཏེ། ཟག་པ་ཟད་པ་རྣམས་ཀྱི་ཁྱད་པར་དེས་པ་དེ་དག་དང་བདག་ཉིད་ལྡན་པ་ཉིད་དུ་རྗོད་པར་བྱེད་པ་ཡིན་ནོ། །དེ་ཡང་དཔེར་བརྗོད་ན། དེར་དགྲ་བཅོམ་གང་ཡིན་སྟན་
བཀྲ་ལ་སོགས་དབང་། །དེར་ནི་ཁོ་བོ་འང་དབང་ངོ་གཞན་མ་ཡིན། །ཞེས་བྱ་བ་ཡིན་ཏེ། འདིར་གཞུང་ནི་དགེ་སློང་རབ་ཏུ་མང་པོ་དག་ཁྱིམ་དག་ཏུ་མགྲོན་དུ་བོས་ནས་ཟས་ཟ་བར་བྱེད་ཅིང་། དེར་སྟན་ཁྲ་བོ་དང་ཆུང་ཟད་བཀྲ་བ་དག་ཀྱང་བཏིང་སྟེ། དེ་ན་དགེ་སློང་གང་ཞེས་བྱ་བ་ནས།
དགྲ་བཅོམ་པ་མ་ཡིན་པ་དེ་སྟན་ཁྲ་བོ་དང་ཅུང་ཟད་བཀྲ་བ་དབང་ངོ་། །ཁོ་བོ་ཡང་དེར་མགྲོན་དུ་བོས་ཏེ་ཟས་ཟའོ། །ཁོ་བོ་ཡང་དེར་སྟན་ཁྲ་བོ་དང་ཅུང་ཟད་བཀྲ་བ་དབང་ངོ་ཞེ་ན། ཕམ་པར་འགྱུར་རོ་ཞེས་བྱ་བའི་བར་དུ་འབྱུང་བ་ཡིན་ནོ། །ཡོངས་སུ་ཉམས་པའི་དབང་དུ་བྱས་ནས། ཁྱད་པར་ཐོབ་ལས་
ཡོངས་སུ་ཉམས་སྨྲ་ཡིན། །ཞེས་བྱ་བས་བསྟན་པ་ཡིན་ནོ། །ཡོངས་སུ་ཉམས་པ་ནི་རྣམ་པ་གཉིས་ཏེ། ཐོབ་པ་ལས་ཡོངས་སུ་ཉམས་པ་དང་། མ་ཐོབ་པ་ལས་ཡོངས་སུ་ཉམས་པའོ། །དེ་ལ་མ་ཐོབ་པ་ལས་ཡོངས་སུ་ཉམས་པ་ལས་ནི་ཆུང་བ་ཉིད་དུ་འོག་ནས་འབྱུང་ངོ་། །དེའི་ཕྱིར་

ཁྱད་པར་ཐོབ་པ་ལས་ཞེས་ཁྱད་པར་དུ་དབྱེའོ། །དེའི་དཔེར་བརྗོད་པ་ནི། བདག་ནི་དགེ་སྦྱོང་ཚུལ་གྱི་ལམ་ཉམས་ཡིན། །ཞེས་བྱ་བ་ཡིན་ཏེ། བདག་ནི་ཟག་པ་མེད་པའི་ལམ་ལས་ཡོངས་སུ་ཉམས་པ་ཡིན་ནོ་ཞེས་བྱ་བ་ལ་སོགས་པ་ཡིན་ནོ། །དེ་ལྟར་བླ་མ་བརྗོད་ཚིག་
སྦྱོར་བ་ལས། །དངོས་གཞིས་བཅོམ་ཞིང་སེམས་ཅན་དམྱལ་མྱོང་འགྱུར། །དེ་ལྟར་ན་མིའི་ཆོས་བླ་མ་སྟོན་པའི་ཚིག་གི་སྦྱོར་བ་ལས་མཐར་འགྱུར་བའི་ལྟུང་བས་ངེས་པར་བཅོམ་ཞིང་སེམས་ཅན་དམྱལ་བ་ཉམས་སུ་མྱོང་བར་འགྱུར་རོ། །ཕྱག་དར་ཁྲོད་ཀྱི་འདྲེ་དང་རྒྱུ་མཚན་ནི། །རང་གི་མཚན་ཉིད་
འཛིན་ལ་ལྟུང་བ་ཆུང་། །འདྲེ་ཕལ་པ་དག་ནི་ལྟུང་བ་ཆུང་བ་ཡིན་ནོ། །ཞི་གནས་ཀྱི་རྒྱུ་མཚན་རང་གི་མཚན་ཉིད་འཛིན་པ་ལ་ཡང་འདིར་སེམས་རྩེ་གཅིག་པ་ལ་ཕྱོགས་པ་ཙམ་ཡིན་གྱི་ཡོངས་སུ་རྫོགས་པ་ནི་མ་ཡིན་ནོ། །གཞན་ལ་སྙད་བཏགས་ནས་བརྗོད་པའི་དབང་དུ་བྱས་ནས། དཔེར་ན་བརྟུལ་ཞུགས་
ཅན་གང་ལྷ་སྒྲ་ཐོས། །ཡོད་ཅེས་གཞན་ལ་སྙད་བཏགས་ཟེར་བའང་ཡིན། །ང་ཡིན་ཚིག་མ་ཚང་བས་དེ་ཆུང་ལ། །ང་ཡིན་ཚིག་འབྱུང་བས་ནི་དངོས་གཞིར་འགྱུར། །རང་ལ་བསམས་ནས་དཔེར་ན་དགེ་སློང་གང་ཞིག་ལྷ་རྣམས་ཀྱི་སྒྲ་ཐོས་པ་དེ་ཡོད་དོ་ཞེས་བྱ་བ་ལ་སོགས་པ་ལྟ་བུར་གཞན་ལ་སྙད་བཏགས་ནས་
ཟེར་བ། དེ་ནི་ང་ཡིན་ནོ་ཞེས་དེ་སྐད་མི་ཟེར་ན་དེའི་ཚེ་ཆུང་བ་ཡིན་ནོ། །ང་ཡིན་ནོ་ཞེས་ཟེར་ན་ནི་ཕམ་པ་ཁོ་ན་ཡིན་ནོ། །གལ་ཏེ་འདིར་གང་ལ་བསམས་པ་ཡོད་དུ་ཟིན་ཀྱང་འོན་ཀྱང་གཞན་ལ་སྙད་བཏགས་པའི་ཕྱིར་ཆུང་བ་ཡིན་ནོ། །ཚིག་གི་རང་བཞིན་གྱིས་རང་དང་གཞན་ལ་སྙད་བཏགས་པ་ལས་ནི་རྣམ་པར་གཞག་
པ་ཡིན་གྱི། བསམས་པ་ལས་ནི་མ་ཡིན་ནོ། །དེ་ལྟར་ཡང་འདིར་གཞུང་ནི་ང་ཡིན་ནོ་ཞེས་དེ་སྐད་མི་ཟེར་ན་ཉེས་པ་སྦོམ་པོར་འགྱུར་རོ་ཞེས་འབྱུང་བ་ཡིན་ནོ། །གཞན་ལ་སྙད་བཏགས་པའི་རྣམ་པ་གཞན་དག་ལ་ཡང་དེ་བཞིན་དུ་ཁོང་དུ་ཆུད་པར་བྱ་སྟེ། དཔེར་ན་ཞུས་པ་ལས་བཙུན་པ་དགེ་སློང་གིས་རང་ཉིད་ཀྱི་ཡི་གེར་
བྲིས་ནས། འདི་སྐད་ཅེས་ཡི་གེར་བྲིས་པ་འདི་ལས་ནི་ཁྱོད་ནི་རྒྱུན་དུ་ཞུགས་པ་ཡིན་ནོ་ཞེས་ཟེར་རོ་ཞེས་མཆི་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ་ཞེས་བྱ་བ་ལ་སོགས་པ་འབྱུང་བ་ལྟ་བུའོ། །དོན་མཐུན་པ་སྟོན་པའི་དབང་དུ་མཛད་ནས། སྒྲ་མཐུན་བརྗོད་པ་ལས་ཀྱང་ཡིན་ཏེ་དཔེར། །ཀུན་དུ་

སྤྱོད་པས་བསམས་ནས་བདག་སློབ་པ་འམ། །ལམ་དུ་འདུག་ནས་བདག་ནི་ལམ་གནས་ཞེས། །ཟེར་བ་ལ་སོགས་དག་ལ་འང་དེ་དང་འདྲའོ། །ཞེས་བྱ་བས་བསྟན་ཏོ། །དོན་གང་དག་ལ་སྒྲ་མཐུན་པ་ཡོད་པའི་དོན་དེ་དག་ནི་སྒྲ་མཐུན་པ་དག་ཡིན་ནོ། །དོན་གྱི་སྒྲ་མཐུན་པ་དེ་དག་གིས་རང་ལས་བསམས་
ནས་ཟེར་ན་སྔ་མ་བཞིན་དུ་ལྟུང་བ་ཆུང་བར་རིག་པར་བྱའོ། །འདིར་དཔེར་བརྗོད་པ་ནི་བདག་ནི་སློབ་པ་ཡིན་ཞེས་བྱ་བ་ལ་སོགས་པ་ཡིན་ཏེ། སོ་སོར་ཐར་པའི་སྡོམ་པ་ལ་སོགས་པ་ལ་སློབ་པར་བྱེད་པའི་བསམ་པས་བདག་ནི་སློབ་པ་ཡིན་ནོ་ཞེས་ཟེར་ན་ལྟུང་བ་ཆུང་བ་ཡིན་ནོ། །ཀུན་དུ་སྤྱོད་པ་ནི་སློབ་པར་
བྱེད་པ་ཡིན་ནོ། །བསམ་པ་ནི་མནོས་པ་ཡིན་ནོ། །དེ་བཞིན་དུ་ལམ་དུ་འདུག་ནས་བདག་ནི་ལམ་ལ་གནས་པ་ཡིན་ནོ་ཞེས་ཟེར་བ་དང་། རྒྱུན་ལ་འདུག་ནས་བདག་ནི་རྒྱུན་དུ་ཞུགས་པ་ཡིན་ནོ་ཞེས་བྱ་བ་ལ་སོགས་ཟེར་ན་དེ་དང་འདྲ་བ་ཡིན་ནོ། །འདིར་གཞུང་ནི་ཞུས་པ་ལས། བདག་ནི་སློབ་པ་ཡིན་ནོ་ཞེས་མཆི་ན་
ཅིར་འགྱུར་ལགས། གལ་ཏེ་སོ་སོར་ཐར་པའི་སྡོམ་པ་ལས་བསམས་ནས་ཟེར་ན་ཉེས་པ་སྦོམ་པོར་འགྱུར་རོ། །འོན་ཏེ་མེད་བཞིན་དུ་སློབ་པའི་ཆོས་ལུང་སྟོན་པར་བྱེད་ན་མཐར་འགྱུར་རོ་ཞེས་བྱ་བ་ལ་སོགས་པ་དང་དེ་བཞིན་དུ་བཙུན་པ་དགེ་སློང་གིས་འདི་སྐད་ཅེས་བདག་ནི་ཀུན་ཏུ་སྦྱོར་བ་དང་། འཆིང་བ་དང་།
ཕྲ་རྒྱས་དང་། ཉེ་བའི་ཉོན་མོངས་པ་རྣམས་ལས་གྲོལ་བ་ཡིན་ནོ་ཞེས་མཆི་ན་ཅིར་འགྱུར་ལགས། །གལ་ཏེ་ཀུན་དུ་སྦྱོར་བ་དང་། འཆིང་བ་དང་། ཕྲ་རྒྱས་དང་། ཉེ་བའི་ཉོན་མོངས་པ་དང་། ཀུན་ནས་དཀྲིས་པ། འདས་པ། ཟད་པ། འགགས་པ། བྲལ་བ་རྣམ་པར་གྱུར་པ་གང་དག་ཡིན་པ་དེ་ལས་
བསམས་ནས་བདག་ནི་དེ་དག་ལས་གྲོལ་བ་ཡིན་ནོ་ཞེས་དེ་སྐད་ཅེས་ཟེར་ན་དམན་པ་སྦོམ་པོར་འགྱུར་རོ། །འོན་ཏེ་ཀུན་དུ་སྦྱོར་བ་ལ་སོགས་པ་མེད་པ་ལས་བསམས་ནས་ལུང་སྟོན་པར་བྱེད་ན་མཐར་འགྱུར་རོ། །ཞེས་གསུངས་པ་ཡིན་ནོ། །ཟུར་གྱིས་གླེང་པའི་དབང་དུ་བྱས་ནས། མ་ལ་ཀྱེ་མ་ཁྱོད་
ཀྱང་ང་འདྲ་ན། །འོ་ན་ཕྱིར་མི་འོང་བའི་འབྲས་ལྡན་ཡིན། །ད་ལྟར་ང་ནི་དེ་ལྟར་འཕགས་མིན་ཞེས། །ཟུར་གྱིས་གླེང་བས་བརྗོད་པ་ལས་ནི་ཆུང་། །ཟུར་གྱིས་གླེང་བ་བརྗོད་པ་ལས་ཀྱང་ཆུང་བ་ཡིན་ནོ། །འདིར་གཞུང་ནི། མ་ལ་ཀྱེ་མ་ཁྱོད་ཀྱང་ཅི་འདྲ་བ་དེ་འདྲ་བར་གྱུར་ན་ང་དང་ཁྱོད་ཀྱང་འདྲ་

བ་ཡིན་པས་དེ་ལྟར་ན་བདག་ཅག་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་ཡིན་པ་ཞིག་ན་ང་ནི་རྒྱུན་དུ་ཞུགས་པ་ནས་དགྲ་བཅོམ་པའི་བར་དུ་ཡང་མ་ཡིན་ན་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་།
དགྲ་བཅོམ་པ་ཡིན་ནོ་ཞེས་དེ་སྐད་ཟེར་བ་སུ་ཡིན་ཞེས་འབྱུང་བ་ཡིན་ནོ། །གཞན་ཡང་། ཁོ་བོས་དེང་འདིར་བསམ་གཏན་སྙོམས་མ་ཞུགས། །དེ་བཞིན་ཁར་སང་མིན་དེ་ལས་ཕར་མིན། །ཞེས་བྱ་བ་ཡང་ཡིན་ཏེ། འདིར་གཞུང་ནི། བཙུན་པ་དགེ་སློང་གིས་འདི་སྐད་ཅེས་བདག་གིས་དེ་རིང་
འཇིག་རྟེན་པའི་བསམ་གཏན་ལ་སྙོམས་པར་མ་ཞུགས་ཤིང་ཁར་སང་ཡང་མ་ཡིན། དེ་ཕན་ཆད་ཀྱང་ནམ་ཡང་མ་ཡིན་ནོ་ཞེས་མཆི་ན་ཅིར་འགྱུར་ལགས། ཉེས་པ་སྦོམ་པོར་འགྱུར་རོ་ཞེས་འབྱུང་བ་ཡིན་ནོ། །ཕྱི་མ་ཡང་དག་པ་ལ་དཔེར་བརྗོད་པ་ནི། ཁྱིམ་འདི་གང་གི་ཡིན་པ་དེ་ཆགས་བྲལ། །དེ་
ཉིད་ངའི་ཡིན་ང་ནི་ཆགས་བྲལ་མིན། །ཞེས་བྱ་བས་བསྟན་ཏེ། འདིར་གཞུང་ནི་ཞུས་པ་ལས། བཙུན་པ་དགེ་སློང་གིས་འདི་སྐད་ཅེས་ཁྱིམ་ག་གེ་མོ་ཞིག་དགེ་སློང་གང་གི་ཡིན་པ་དེ་ནི་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་ཡིན་ནོ། །ཁྱིམ་དེ་ནི་ངའི་
ཡང་ཡིན་ཏེ། ང་ནི་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་ཡང་མ་ཡིན་ནོ་ཞེས་མཆི་ན་ཅིར་འགྱུར་ལགས། བཀའ་སྩལ་པ། ཉེས་པ་སྦོམ་པོར་འགྱུར་རོ་ཞེས་འབྱུང་བ་ཡིན་ནོ། །འདིར་ནི་ཁྱིམ་འདི་གང་གི་ཡིན་པ་དེ་ནི་རྒྱུན་དུ་ཞུགས་པ་ཡིན་ཞེས་
བྱ་བ་ལ་སོགས་པ་ཚིག་སྔར་སྨོས་པ་ལས། ང་ནི་འདོད་ཆགས་དང་བྲལ་བ་ཡང་མ་ཡིན་ནོ་ཞེས་བྱ་བ་ལ་སོགས་པ་ཚིག་ཕྱི་མ་ཡང་དག་པ་བདེན་པ་ཡིན་ན་དེའི་སྔ་མ་སྦྱོར་བ་ལས་ཀྱང་ཆུང་བ་ཁོ་ན་ཡིན་ནོ་ཞེས་བྱ་བའི་ཐ་ཚིག་གོ། །འདི་ལྟར་ཚིག་སྐྱོན་ཅན་དང་སྐྱོན་མེད་པ་འབྲེལ་པ་ལས་ནི་སྐྱོན་ཅན་མ་
ཡིན་པར་མི་འགྱུར་ཏེ། དུག་དང་འདྲེས་པའི་ཆུ་བཞིན་ནོ། །ཅང་མི་སྨྲ་བས་དང་དུ་ལེན་པའི་དབང་དུ་བྱས་ནས། བཙུན་པ་གལ་ཏེ་དགྲ་བཅོམ་བདག་གི་ཟས། །བཞེས་ཤིག་ཟེར་དེས་དེ་བཞིན་མི་སྨྲ་ལེན། །གཞན་གྱི་ཟག་པ་ཟད་དམ་ཞེས་དྲིས་ན། །མི་སྨྲའི་རྣམ་པས་དང་དུ་ལེན་བྱེད་ཡིན། །ཞེས་

བྱ་བས་བསྟན་ཏོ། །འདུལ་བྱེད་ལས། བཙུན་པ་གལ་ཏེ་དགྲ་བཅོམ་པ་ཞིག་ན་བདག་གི་བསོད་སྙོམས་བཞེས་ཤིག་ཅེས་ཟེར་བ་ལས་ཅང་མི་སྨྲ་བས་དང་དུ་ལེན་པར་བྱེད་ན་དམན་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །ཤེས་ལྡན་ཟག་པ་ཟད་དམ་ཞེས་དྲིས་པ་ལས་ཅང་མི་སྨྲ་བས་དང་དུ་ལེན་པར་
བྱེད་པ་ཡང་ཡིན་ནོ། །དང་དུ་ལེན་པ་ཡང་འདིར་ཡིད་ལ་འཇོག་པ་ཡིན་ནོ། །འདིར་གཞུང་ནི། བཙུན་པ་དགྲ་བཅོམ་པ་ནི་གོས་དང་བསོད་སྙོམས་དང་མལ་སྟན་དང་ནད་ཀྱི་གསོས་སྨན་དང་ཡོ་བྱད་ཀྱི་ཕུད་དབང་ངོ་ཞེས་ཟེར་བ་ལ་ཅང་མི་སྨྲ་བས་དང་དུ་ལེན་པར་བྱེད་ན་ཉེས་པ་སྦོམ་པོར་འགྱུར་རོ་ཞེས་བྱ་བ་ལ་སོགས་པ་
འབྱུང་བ་ཡིན་ནོ། །ཅང་མི་སྨྲ་བ་ཞེས་བྱ་བ་ནི་འདིར་རྣམ་པར་རིག་བྱེད་ཀྱི་རྣམ་པ་ཉིད་དུ་གྲུབ་པ་ཡིན་ནོ། །དེ་ལྟ་བས་ན་ལྟུང་བ་ཆུང་བ་ཞེས་བྱའོ། །འདིར་ཐམས་ཅད་དུ་ཡང་ཕ་རོལ་ལ་གོ་ན་ཆུང་བར་བལྟ་བར་བྱའོ། །གཞན་དུ་ན་ཆུང་བ་བས་ཀྱང་ཆུང་བར་འགྱུར་རོ། །དེ་ལྟར་བླ་མ་བརྗོད་བློས་བརྫུན་པ་བསྟན། །ད་ནི་
བརྫུན་དུ་སྨྲ་བ་གཞན་ཉོན་ཅིག །དེ་ལྟར་མིའི་ཆོས་བླ་མ་བརྗོད་པའི་འདུན་པས་བརྫུན་དུ་སྨྲ་བ་སྡོམ་པ་གཅོད་པར་བྱེད་པ་བསྟན་ཏོ། །འདིར་ནི་བཤགས་པར་འགྱུར་བའི་བརྫུན་དུ་སྨྲ་བ་གཞན་ཉོན་ཅིག་དང་བཤད་པར་བྱའོ། །གང་ལས་གཞན་པའི་འདུ་ཤེས་ཉིད་སྒྲའི་དོན། །གོ་བའི་མི་ལ་སྨྲས་པ་དེ་བརྫུན་
ཡིན། །ཞེས་བྱ་བ་ནི་གལ་ཏེ་དོན་གང་ཞིག་སྨྲ་བར་བྱ་བ་དེ་ལས་གཞན་པའི་འདུ་ཤེས་དང་ལྡན་པ་ཡིན་ཞིང་སྐྱེས་བུ་གང་གི་ཆེད་དུ་བྱས་ནས་སྨྲ་བར་བྱ་བ་དེ་ཡང་གལ་ཏེ་དོན་དེ་གོ་བར་ནུས་པ་ཞིག་ཡིན་ལ་དེ་ལ་དེ་སྨྲས་ན་བརྫུན་དུ་སྨྲ་བ་ཡིན་ནོ། །གོ་བར་མི་ནུས་ན་ཅིར་འགྱུར་ཞེ་ན། ལྟུང་བ་ཆུང་ངུར་འགྱུར་རོ། །ཉིད་
ཅེས་བྱ་བ་ངེས་པར་གཟུང་བ་ནི་གལ་ཏེ་དོན་གང་སྨྲ་བར་བྱ་བ་དེ་ལས་གཞན་དུ་འདུ་ཤེས་དང་ལྡན་པས་སྨྲས་པ་ཡིན་ན་དེ་བརྫུན་དུ་སྨྲ་བ་ཡིན་གྱི། འཁྲུལ་པས་གཞན་སྨྲ་བར་བྱའོ་སྙམ་པ་ལས་གཞན་སྨྲས་ན་ནི་མ་ཡིན་ནོ་ཞེས་ཉེ་བར་བསྟན་པའི་ཕྱིར་རོ། །ཇི་སྟེ་འོ་ན་བརྫུན་ཞེས་བྱ་བར་རྣམ་པར་གཞག་པ་དེ་ཚིག་ཡིན་
ན་དེའི་ཕྱིར་ལུས་ཀྱིས་གཞན་དུ་དོན་གོ་བར་བྱེད་ན་ལྟུང་བ་མེད་པར་འགྱུར་རོ་ཞེ་ན་མི་འགྱུར་ཏེ། འདི་ལྟར། བརྫུན་ཞེས་བྱ་བའི་ཚུལ་དེ་ཚིག་ཡིན་ཡང་། །ངག་གི་གོ་འགྱུར་གལ་ཏེ་ལུས་ཀྱིས་ཀྱང་། །གོ་བྱེད་ཉེས་བྱས་ཉིད་དེ་འོན་ཀྱང་ཆུང་། །འདི་ལྟར་འདིར་ནི་ཚིག་འཇུག་མེད་པས་སོ། །གལ་ཏེ་བརྫུན་ཞེས་བྱ་བར་

རྣམ་པར་གཞག་པ་དེ་ཚིག་ཡིན་ཡང་འོན་ཀྱང་ཚིག་གིས་གོ་བར་འགྱུར་བའི་དོན་ལུས་ཀྱིས་གོ་བར་བྱེད་པའི་ཕྱིར་ཉེས་བྱས་ཀྱི་ལྟུང་བ་ཉིད་ཡིན་ནོ། །འོན་ཀྱང་དེ་ནི་ཆུང་བ་ཡིན་ཏེ། འདི་ལྟར་འདིར་ནི་ངག་འཇུག་པ་མེད་པས་སོ། །བརྫུན་གྱི་ལྟུང་བའི་རྟེན་ནི་ཚིག་ཡིན་པར་རྣམ་པར་གཞག་
པ་ཡིན་ནོ། །འདིར་གཞུང་ནི་ཞུས་པ་ལས། དགེ་སློང་གིས་མཐོང་བ་ལས་ཐོས་སོ་ཞེས་ཟེར་ན་ལྟུང་བྱེད་དུ་འགྱུར་རོ། །ལུས་ཀྱིས་དོན་དེ་གོ་བར་བྱེད་ཅིང་ངག་གིས་མི་སྨྲ་ན་ཉེས་བྱས་སོ་ཞེས་འབྱུང་བ་ཡིན་ནོ། །དེ་ལྟ་བས་ན་མཐོང་བ་དང་། ཐོས་པ་དང་། དོགས་པ་དག་ལ་ཡང་དེ་བཞིན་དུ་སྨྲ་བར་བྱའོ། །དེ་དག་
གི་མཚན་ཉིད་ཀྱང་ཅི་ཞིག་ཡིན་ཞེ་ན། །རང་གིས་རིག་པ་གང་ཡིན་མཐོང་བ་ཡིན། །ཡིད་ཆེས་ལས་ཐོས་གང་ཡིན་ཐོས་པ་ཡིན། །རྟགས་མ་ངེས་པར་འཛིན་པ་དོགས་པ་ཡིན། །གཞི་འདི་དག་གིས་སྨྲ་ན་ཉེས་པ་མེད། །དེ་ལ་རང་གི་གཞི་གང་ཞིག་མངོན་སུམ་མམ་རྗེས་སུ་དཔག་པས་ཡོངས་སུ་ཤེས་པ་དེ་ནི་
མཐོང་བ་ཞེས་བྱའོ། །ཡིད་ཆེས་པ་སྟེ་མི་སླུ་བ་ལས་རྟོགས་པ་གང་ཡིན་པ་དེ་ནི་ཐོས་པ་ཡིན་ནོ། །རྟགས་མ་ངེས་པ་མཐོང་བ་ནི་དོགས་པ་ཡིན་ཏེ། འདི་ལྟར་ནགས་ཐིབས་པོ་དེར་བུད་མེད་ཞུགས་པ་ཡིན་པ་འམ་ཆང་ཡང་འགྲིབ་པ་ནས་དགེ་སློང་ཡང་དེ་ལས་བྱུང་བ་ལ་སོགས་པའི་བར་ནི་དོགས་པ་ཡིན་པར་
བསྟན་ཏོ། །དེ་ལྟ་བས་ན་གསུམ་པོ་འདི་དག་ནི་འདུལ་བ་ལས་ཐ་སྙད་གདགས་པའི་གཞི་ཡིན་ནོ། །གཞི་མེད་པར་དངོས་པོ་སྨྲ་བར་བྱེད་ན་བརྫུན་གྱི་ལྟུང་བར་འགྱུར་རོ། །དེ་ལ་ཡང་སྐུར་པ་འདེབས་པའི་ངོ་བོ་ནི་ཁ་ན་མ་ཐོ་བ་ཆེན་པོར་འགྱུར་རོ། །དེ་ལྟར་ཡང་འདུལ་བ་གཅིག་ནས་འཕྲོས་པ་
ལས་གང་ཟག་ལས་ཀུན་དུ་འབྱུང་བའི་ལྟུང་བ་གཅིག་ནི་ཐམས་ཅད་ལས་ཁ་ན་མ་ཐོ་བ་ཆེན་པོ་ཡིན་ཏེ། ཡང་དག་པ་མ་ཡིན་པས་སྐུར་པ་འདེབས་པ་ཞེས་འབྱུང་བ་ཡིན་ནོ། །གཞན་ཡང་། གཞན་གྱིས་གང་དྲིས་དེ་ཉིད་བརྗོད་པར་བྱའི། །གཙེ་བར་འདོད་པས་གཞན་དང་གཞན་མ་ཡིན། །གལ་ཏེ་
གཤེད་མས་གསད་བྱ་བྲོས་པ་ན། །འདྲི་ན་དེ་ཚེ་དེ་ལ་འདི་སྐད་བརྗོད། །གཞན་གྱིས་གང་ཁོ་ན་དྲིས་པ་དེ་ཁོ་ན་བརྗོད་པར་བྱའི། མཐོ་བཙམས་པའི་བསམས་པས་གཞན་དང་གཞན་དུ་འཕྲོས་པར་མི་བྱའོ། །འོན་ཏེ་གཤེད་མ་དག་གིས་གསད་པར་བྱ་བ་བྲོས་པ་ན་མི་ཞིག་ལམ་འདི་ནས་སོང་ངམ་

མ་སོང་ཞེས་འདྲི་ན་དེ་ལ་འདི་སྐད་ཅེས་བརྗོད་བར་བྱའོ། །ཚུར་ཤོག་སེན་མོའམ་གནམ་མཐོང་ཡང་དག་ཏུ། །ཁྱོད་ཀྱི་ལུས་ཅན་དག་ནི་མ་མཐོང་ངོ་། །གནོད་པར་གྱུར་པ་རྣམས་ལ་ཡོངས་སྲུང་ཕྱིར། །དེ་སོགས་བརྣག་པས་སྨྲ་ན་ཉེས་པ་མེད། །དེ་ལྟ་བུ་ལ་སོགས་པའི་ཤན་བསྟན་པ་དག་གིས་
གནོད་པར་འགྱུར་བ་རྣམས་ལས་ཡོངས་སུ་བསྐྱབ་པའི་ཕྱིར་གཞན་དང་གཞན་དུ་འཕྲོས་པར་བྱེད་ན་ཉེས་པ་མེད་དོ། །བརྫུན་སྨྲར་གཏོགས་པའི་རབ་ཏུ་དབྱེ་བ་བསྟེན། །ད་ནི་བརྫུན་སྨྲའི་ཕྱོགས་དང་མཐུན་པ་བརྗོད། །དེ་ལྟར་བརྫུན་དུ་སྨྲ་བར་གཏོགས་པའི་དབྱེ་བ་བསྟན་ཏོ། །ད་ནི་བརྫུན་དུ་སྨྲ་བའི་
ཕྱོགས་དང་མཐུན་པ་བརྗོད་པར་བྱ་སྟེ། དེ་དག་ཀྱང་ལན་མི་འདེབས་པ་ལ་སོགས་པ་ཡིན་པར་བལྟ་བར་བྱའོ། །དེའི་ཕྱིར། དྲིས་ན་ཆོས་དང་ལྡན་པས་ལན་གདབ་བྱའི། །གཙེ་ཕྱིར་མི་སྨྲ་བར་ནི་འདུག་མི་བྱ། །དྲིས་ན་ཆོས་བཞིན་ལན་གདབ་པར་བྱའི། ཐོ་འཚམས་པའི་ཕྱིར་མི་སྨྲ་བར་འདུག་པར་མི་
བྱའོ། །བླ་མ་མཁན་པོ་མི་ཡི་དབང་ཕྱུག་དང་། །སངས་རྒྱས་དགེ་འདུན་གནས་བརྟན་དག་གི་བཀའ། །བརྟགས་ནས་རིག་པ་ཉིད་དོན་ཚིག་བཞིན་བྱ། །གལ་ཏེ་ཆོས་བཞིན་མིན་ན་བརྡ་སྤྲད་བྱ། །བླ་མ་ནི་སློབ་དཔོན་ཡིན་ནོ། །མཁན་པོ་ནི་རང་གི་སྒྲས་བསྟན་པའི་ཕྱིར་ཏེ། རྒྱལ་པོ་དང་། སྟོན་
པ་དང་། དགེ་འདུན་གྱི་གནས་བརྟན་དང་། ལྔ་པོ་དེ་དག་གི་བཀའ་ཆོས་དང་ལྡན་པ་ལ་མི་མཐུན་པར་མི་བྱའོ། །གལ་ཏེ་ཆོས་དང་ལྡན་པ་མ་ཡིན་ན་དེའི་ཚེ་བདག་ལ་མི་རུང་ངོ་ཞེས་བྱ་བ་ལ་སོགས་པ་ཆོས་དང་ལྡན་པའི་བརྡ་སྤྲད་པར་བྱའོ། །རིགས་པ་ཉིད་ན་བྱ་བའི་ཉིད་ཅེས་བྱ་བ་ཅིར་དགོས་ཤེ་ན། གལ་
ཏེ་མཁན་པོ་དང་སློབ་དཔོན་གྱི་བཀའ་བསྒོ་བ་ཆོས་དང་ལྡན་པ་མ་ཡིན་པ་ནོད་པར་མི་བྱེད་ན་དེའི་ཚེ་བཀའ་ལས་འདས་ན་ཡང་ཉེས་པ་མེད་དོ་ཞེས་བསྟན་པའི་ཕྱིར་རོ། །ཇི་སྐད་དུ་འདུལ་བ་གཅིག་ནས་འཕྲོས་པ་ལས་གང་ཞིག་མཁན་པོ་དང་སློབ་དཔོན་གྱིས་ཆོས་ཀྱིས་སྡུད་པར་བྱེད་པ་ལ་ཟང་ཟིང་གིས་མ་ཡིན་ན་
དེ་ལྟ་བུ་དག་ལ་སོ་སོར་བརྟགས་ནས་གནས་པར་བྱའོ། །གང་ཞིག་ཟང་ཟིང་གིས་ནི་སྡུད་པར་བྱེད་ལ་ཆོས་ཀྱིས་ནི་མ་ཡིན་ན་དེ་ལྟ་བུ་ལ་སོ་སོར་བརྟགས་ནས་འགྲོ་བར་བྱའོ། །གང་ཞིག་མཁན་པོ་དང་སློབ་དཔོན་གྱིས་ཆོས་དང་ཟང་ཟིང་གིས་སྡུད་པར་བྱེད་ན་དེ་ལ་ཇི་སྲིད་འཚོའི་བར་དུ་བསྐྲད་ཀྱང་འདུག་པར་

བྱའོ། །གང་ཞིག་ཆོས་ཀྱིས་ཀྱང་མ་ཡིན་ལ་ཟང་ཟིང་གིས་ཀྱང་སྡུད་པར་མི་བྱེད་ན་དེ་ལྟ་བུ་ལ་བཟློག་ཏུ་ཟིན་ཀྱང་ལྟ་ཡང་མི་ལྟ་བར་འགྲོ་བར་བྱའོ་ཞེས་གསུངས་པ་ལྟ་བུ་ཡིན་ནོ། །རང་ངམ་གཞན་ནམ་གཉིས་ཀས་སྐྱེ་བོ་ལ། །འདྲེ་སྐད་མི་སྙན་པ་དག་མི་བྱའོ། །མི་སྡུག་མཆེ་
བ་གཙིགས་པའི་སྐད་དག་གིས། །གལ་ཏེ་ཕན་ཕྱིར་བྱེད་ན་ཉེས་པ་མེད། །བདག་ཉིད་དམ་གཞན་གྱིས་སྲོག་ཆགས་རྣམས་ལ་འདྲེ་ལ་སོགས་པའི་སྐད་མི་སྙན་པ་དག་གིས་འཇིགས་པ་དག་བསྐྱེད་པར་མི་བྱའོ། །གལ་ཏེ་ཕན་པའི་ཕྱིར་བཞིན་མི་སྡུག་པ་མཆེ་བ་གཙིགས་པ་བསྡིགས་པར་བྱེད་པ་ལ་ཟ་
བར་བྱེད་དོ་ཞེས་བྱ་བ་ལ་སོགས་པས་བསྡིགས་པ་དེའི་ཚེ་ཉེས་པ་མེད་དོ། །འདི་བསད་པའི་ཕྱོགས་དང་མཐུན་པ་ཡིན་ཡང་ཚིག་དང་འབྲེལ་པའི་ཕྱིར་འདིར་བཀོད་དོ། །ཡལ་གཟུགས་འཆའ་དང་མནའ་དང་མི་སྨྲར་བཅས། །དེ་བཀག་ཡིན་པས་ལམ་དུ་འགྲོ་བ་ན། །མི་སྨྲ་ཉིད་དམ་ཆོས་ཀྱི་གཏམ་
བྱ་ཡི། །བུད་མེད་སོགས་གཏམ་ཚུལ་མི་མཐུན་མི་བྱ། །ཡལ་གཟུགས་འཆའ་བ་དང་མནའ་དང་ཅང་མི་སྨྲ་བ་མི་བྱའོ། །ལམ་དུ་འགྲོ་བ་ན་ཅང་མི་སྨྲ་བས་ལམ་དུ་འཇུག་པར་བྱ་བ་འམ། འཁོར་བ་ལས་སྐྱོ་བ་དང་མཐུན་པའི་གཏམ་དག་བྱའི། བུད་མེད་ཀྱི་གཏམ་དང་དམག་གི་གཏམ་ལ་སོགས་པ་ནི་མི་བྱའོ། །
བུད་མེད་ཀྱི་གཏམ་འདོད་ཆགས་དང་བྲལ་བ་དང་མཐུན་པའི་ཆོས་ཀྱི་གཏམ་དུ་གཏོགས་པ་ཉིད་ཡིན་པས་དེའི་ཕྱིར་ཚུལ་དང་མི་མཐུན་ཞེས་བྱེ་བྲག་ཏུ་ཕྱེ་བ་ཡིན་ཏེ། འདིར་བྱུང་བ་ནི་གནོད་སྦྱིན་འཕྱ་བ་ཡིན་ནོ། །ངལ་སོས་གུས་པས་སངས་རྒྱས་ཚིགས་བཅད་གདོན། །མཚན་མོ་འདུག་ན་རྒྱུད་གསུམ་པ་ཡིན་ནོ། །
འོན་ཏེ་གཞན་གྱི་ལྷ་ཡི་གནས་དག་མཐོང་། །དེར་ནི་སེ་གོལ་གཏོགས་ཏེ་ཚིགས་བཅད་གདོན། །སྡོམ་བརྩོན་འགྲོན་ལམ་གྱི་ནང་དུ་ངལ་བསོས་ནས་གུས་པས་སངས་རྒྱས་ཀྱི་ཚིགས་བཅད་གདོན་ཏོ། །གང་དུ་མཚན་མོ་གནས་འཆའ་བར་བྱེད་ན་དེར་རྒྱུད་གསུམ་པ་གདོན་ཏོ། །ཕྲན་ཚེགས་ལས་གང་ལ་
རྒྱུད་གསུམ་པ་མེད་པ་དེས་ནི་གཙུག་ལག་ཁང་གི་ཚིགས་སུ་བཅད་པ་བཏོན་ནས་འགྲོ་བར་བྱའོ་ཞེས་འབྱུང་བ་ཡིན་ནོ། །དེ་ནི་ཕོངས་ན་བྱ་བ་ཡིན་པས་མདོར་མ་བྱས་སོ། །འོན་ཏེ་ཡང་ལམ་གྱི་བར་དུ་མུ་སྟེགས་ཅན་གྱི་ལྷའི་གནས་དག་མཐོང་ན་དེར་སེ་གོལ་གཏོགས་ཏེ། བདེ་བར་གཤེགས་པའི་ཚིགས་སུ་

བཅད་པ་གདོན་ཏོ། །གཞན་ཡང་། མཛའ་བོ་དབྱེ་དང་རྩུབ་པའི་ཚིག་དང་ནི། །སྐྱོན་ནས་སྨྲ་བ་ལ་སོགས་སྤང་བར་བྱ། །ཕྲ་མ་དང་ཚིག་རྩུབ་མོ་དང་། མིའི་སྐྱོན་ནས་སྨྲ་བ་ལ་སོགས་པ་ཐམས་ཅད་ཡོངས་སུ་སྤང་བར་བྱའོ། །གལ་ཏེ་མཛའ་བོ་དབྱེ་བར་འགྱུར་བ་ཕྱོགས་དང་མཐུན་པ་ཡིན་ན་འོ་ན་ཇི་ལྟར་དགེ་
ཚུལ་ལ་ཕྲ་མ་བྱེད་ན་ཉེས་བྱས་ཀྱི་ལྟུང་བར་འགྱུར་རོ་ཞེས་གསུངས་ཤེ་ན། །བཤད་པ། འདུལ་བར་དབེན་འདི་ཉེས་བྱས་གང་གསུངས་པ། །དེ་ནི་ཡིད་ཀྱིས་ཉེས་བྱས་ཡིན་གཞན་མིན། །ཉེས་བྱས་དེ་ནི་ཡིད་ཀྱི་བྱ་བ་ཉིད་ལས་དགོངས་པའི་ཕྱིར་ཉེས་པ་མེད་དོ་ཞེས་བྱ་བའི་ཐ་ཚིག་གོ། །ཇི་སྟེ་འདི་ག་ལས་
ཤེ་ན། དགེ་ཚུལ་གྱི་སྡོམ་པ་ནི་སྤོང་བ་བཞིའི་མཚན་ཉིད་ཡིན་པའི་ཕྱིར་རོ། །དེ་ཉིད་དུ་ཕྲ་མ་དང་ཚིག་རྩུབ་པོ་དང་ཚིག་འཁྱལ་པ་གསུམ་བཅུག་ནས་དགེ་སློང་གི་སྡོམ་པ་སྤོང་བ་བདུན་གྱི་མཚན་ཉིད་ཡིན་པས་སོ། །དགེ་ཚུལ་གྱི་ཚིག་ལེའུར་བྱས་པའི་འགྲེལ་པ་ལས་བསླབ་པའི་གཞི་བཞི་པ་རྫོགས་སྷོ།། །།
འབྲས་བུ་ལ་སོགས་ཁུ་བ་བཅོས་པ་ནི། །བཅོས་ཆང་རྒུན་ཆང་བུ་རམ་ཤིང་འདྲར་བསྟན། །ཆན་བཏགས་མནན་པ་བྱས་པ་སྦྱར་བའི་ཆང་། །མྱོས་འགྱུར་རྩྭ་མཆོག་གིས་ཀྱང་མི་བཏུང་ངོ་། །དེ་ལ་བཅོས་ཆང་ཞེས་བྱ་བ་འདི་ལྟ་སྟེ། རྒུན་འབྲུའི་ཁུ་བ་ལས་བྱས་པའི་རྒུན་ཆང་དང་། བུ་རམ་
ཤིང་གི་ཁུ་བ་ལས་བྱས་པ་བུ་རམ་ཆང་ངོ་། །འདྲ་བ་སྨོས་པ་ནི་ན་ལི་ཀེ་ར་དང་མེ་ཏོག་ལ་སོགས་པའི་ཆང་བསྡུ་བའི་ཕྱིར་རོ། །སྦྱར་བའི་ཆང་ནི་འབྲུ་བཏགས་པ་མནན་པ་བྱས་པ་ཡིན་པར་རྟོགས་པར་བྱའོ། །དེ་བས་ན་མྱོས་པར་གྱུར་པ་འདི་གཉིས་ནི་རྩྭ་མཆོག་གིས་ཀྱང་བཏུང་བར་མི་བྱའོ་ཞེས་
བཀའ་སྩལ་ཏོ། །འོ་ན་སྦྱར་བའི་ཆང་དང་བཅོས་པའི་ཆང་མྱོས་པར་འགྱུར་བའི་ཁུ་བ་བག་མེད་པའི་གནས་སྤོང་ངོ་ཞེས་བྱ་བ་འདི་ལ་སྦྱར་བའི་ཆང་དང་བཅོས་པའི་ཆང་སྨོས་པ་ཅི་དགོས་ཤེ་ན། སྦྱར་བའི་ཆང་དང་བཅོས་ཆང་གཉིས་འདིར་བསྟན། །དེ་གོ་ཏྲ་བ་ལ་སོགས་བཟློག་ཕྱིར་རོ། །མྱོས་
འགྱུར་སྨོས་པ་མ་རེད་ཉམས་པ་ཡིན། །བག་མེད་མྱོས་བ་སྤོང་བའི་རྒྱུ་ཡིན་ནོ། །ཞེས་བྱ་བ་ལ་དང་ནི་བསྡུ་བ་ཡིན་ཏེ། སྦྱར་བའི་ཆང་དང་བཅོས་པའི་ཆང་ཞེས་བྱ་བའི་ཐ་ཚིག་གོ། །ཀོ་ཏྲ་བ་ལ་སོགས་པ་བཟློག་ཕྱིར་རོ། །ཞེས་བྱ་བ་ནི་ཇི་སྐད་དུ་ཆོས་མངོན་པ་མཛོད་ལས་གླ་གོར་ཞོ་ཤ་དང་

ཀོ་ཏྲ་བ་ལ་སོགས་པ་ཡང་མྱོས་བར་བྱེད་པ་ཡིན་པས་བཅོས་པའི་ཆང་དང་སྦྱར་བའི་ཆང་ཞེས་བྱ་བ་སྨོས་པ་ཡིན་ནོ་ཞེས་བསྟན་པ་ལྟ་བུའོ། །གལ་ཏེ་དེ་ལྟ་ཡིན་ན་མྱོས་པར་འགྱུར་བ་གླ་གོར་ཞོ་ཤ་དང་ཀོ་ཏྲ་བ་ལ་སོགས་པ་སྤྱད་པར་རུང་མོད་ཅེ་ན། མི་རུང་སྟེ། དེ་དག་ནི་ཁ་
ཟས་མི་འཕྲོད་པ་ཉིད་ཡིན་པས་བླངས་པའི་ཕྱོགས་དང་མཐུན་པ་ཉིད་ཡིན་ནོ་ཞེས་བཀག་པའི་ཕྱིར་རོ། །འདིར་མྱོས་པར་འགྱུར་བ་ལས་ལྡོག་པ་ནི་སེམས་འཁྲུལ་པའི་རྒྱུ་དག་ཁོ་ན་དགག་པར་བྱ་བ་ཡིན་པའི་ཕྱིར་རོ། །འདིས་ནི་མི་འཕྲོད་པ་ཁོ་ན་ནི་མ་བཀག་གོ། །དེ་ལྟར་ཡང་མྱོས་པར་
འགྱུར་བ་ཞེས་བྱ་བ་ནི་གང་ཞིག་སྤྱད་ན་བྱ་བ་དང་། མི་བྱ་བ་མི་ཤེས་པའོ་ཞེས་གསུངས་པ་ཡིན་ནོ། །གླ་གོར་ཞོ་ཤ་དང་གོ་ཏྲ་པ་ནི་དེ་ལྟ་ཡང་མ་ཡིན་ཏེ། སེམས་འཁྲུལ་པར་བྱེད་པ་དང་བྲལ་བའི་ཕྱིར་རོ། །གལ་ཏེ་དེ་ལྟ་ན་མྱོས་པར་འགྱུར་བ་ཚོད་ཟིན་པར་འཐུང་བ་ཡང་སེམས་འཁྲུལ་པ་དང་བྲལ་བའི་
ཕྱིར་ཉེས་པ་མེད་པར་འགྱུར་མོད་ཅེ་ན། དེ་ནི་མ་ཡིན་ཏེ། མྱོས་པར་འགྱུར་བའི་ཚོད་ཡོངས་སུ་མི་ཤེས་པའི་ཕྱིར་དང་། ཧ་ཅང་ཐལ་བར་འགྱུར་བའི་ཕྱིར་དང་། དེའི་རིགས་དང་ལྡན་པ་ཉིད་ཡིན་པས་ཡོངས་སུ་སྤང་བར་བྱ་བ་ཡིན་པའི་ཕྱིར་རོ། །དེའི་ཕྱིར་རྣམ་པ་ཐམས་ཅད་དུ་བཀག་པ་ཡིན་ཏེ།
བཅོམ་ལྡན་འདས་ཀྱིས་དགེ་སློང་དག་སྟོན་པ་ང་ལ་ལུང་ནོད་པ་རྣམས་ཀྱིས་མྱོས་པར་འགྱུར་བའི་ཁུ་བ་ཐ་ན་རྩྭ་མཆོག་གིས་ཀྱང་མི་སྦྱིན་ཞིང་མི་བཏུང་ངོ་ཞེས་གསུངས་པ་ཡིན་ནོ། །མྱོས་པར་འགྱུར་བའི་ཁུ་བ་སྨོས་པ་ཅི་དགོས་ཤེ་ན་མྱོས་འགྱུར་སྨོས་པ་མ་རེད་ཉམས་པ་བཟློག་པའི་ཕྱིར་ཡིན་
ནོ་ཞེས་བྱ་བར་སྦྱར་རོ། །དེ་བས་ན་སྦྱར་བའི་ཆང་དང་བཅོས་པའི་ཆང་ཇི་སྲིད་དུ་མྱོས་པར་འགྱུར་བའི་དངོས་པོར་མ་རེད་པའམ་རེད་ནས་ཀྱང་གང་གི་ཚེ་སྐྱུར་པོར་རེད་པ་དེའི་ཚེ་བཏུང་བར་བྱ་བ་ཉིད་ཡིན་ཏེ། དེ་ཡང་བཏུང་བའི་ཚིག་ལེའུར་བྱས་པ་གཞན་ལས་སྟོན་པར་འགྱུར་རོ། །བག་མེད་
པའི་གནས་སྤོང་བ་ཅི་དགོས་ཤེ་ན། བཤད་པ་བག་མེད་སྨོས་པ་སྤོང་བའི་རྒྱུ་ཡིན་ནོ་ཞེས་བྱ་བ་ནི་གང་གི་ཕྱིར་བག་མེད་པའི་གནས་མྱོས་པར་འགྱུར་བའི་ཁུ་བ་འཐུང་བ་དེའི་ཕྱིར་སྤང་བར་བྱས་ཡིན་ནོ་ཞེས་བསྟན་པའི་ཕྱིར་རོ་ཞེས་བྱ་བའི་ཐ་ཚིག་གོ།། །།བམ་པོ་བདུན་པ། དེ་ནི་

ལྟུང་བའི་རྣམ་པར་དབྱེ་བ་བཤད་པར་བྱ་སྟེ། གང་ཞིག་མྱོས་འདུ་ཤེས་པས་མྱོས་འཐུང་བ། །འཐུངས་ལ་མྱོས་ན་ཉེས་བྱས་ཉིད་ཡིན་ནོ། །ནུར་རྩི་དང་ནི་སྦང་མ་ཟ་བ་ལས། །དེ་དང་འདྲ་བར་ཉེས་བྱས་རྡོ་རྗེས་འཇོམས། །དགེ་ཚུལ་གང་ཞིག་མྱོས་པར་འགྱུར་བའི་འདུ་ཤེས་དང་ལྡན་པས་མྱོས་
པར་འགྱུར་བའི་ཁུ་བ་འཐུངས་ལ་དེ་མྱོས་པར་གྱུར་ན་ཉེས་བྱས་ཀྱི་ཁ་ན་མ་ཐོ་བར་འགྱུར་བ་ཡིན་ནོ་ཞེས་བྱ་བའི་ཐ་ཚིག་གོ། །དེ་བཞིན་དུ་ནུར་རྩི་ཟ་བ་དང་སྦང་མ་ཟ་བ་ལས་ཀྱང་ཉེས་བྱས་ཀྱི་རྡོ་རྗེས་འཇོམས་པ་ཁོ་ནར་འགྱུར་རོ། །བཅོས་པའི་ཆང་གི་སྙིགས་མ་ནི་ནུར་རྩི་ཡིན་ལ་སྦྱར་བའི་ཆང་གི་
སྙིགས་མ་ནི་སྦང་མ་ཡིན་ནོ། །གཞན་དག་ན་རེ་སྙིགས་མ་ནི་ནུར་རྩི་ཡིན་ལ་དེའི་ཁུ་བ་ཕྱུང་བ་ནི་སྦང་མ་ཡིན་ནོ་ཞེས་འཆད་དོ། །དེ་ལྟར་ཡང་། སྦང་མ་ཁུ་བ་ཕྱུང་བའི་ཕྱིར། །རྟུག་སྐམ་འདེབས་དང་སྐྱོན་འཁྲུག་བྱེད། །ཅེས་བསྟན་པ་ཡིན་ནོ། །ཕབས་ཀྱི་རྡོ་གུ་འམ་རྩ་སོགས་མྱོས་བྱེད་གང་། །
གལ་ཏེ་ཟ་ན་ཆུང་བ་ཉིད་དུ་འགྱུར། །གང་ལ་མྱོས་འགྱུར་ཁུ་བའི་རོ་དྲི་ཡོད། །མྱོས་འགྱུར་ཁུ་བ་མིན་ཡང་བཏུང་བྱ་མིན། །ཞེས་བྱ་བ་ལ། ཕབས་ཞེས་བྱ་བ་ནི་མྱོས་པར་འགྱུར་བའི་ཁུ་བའི་དོན་དུ་ས་བོན་གང་ཞིག་སྦྱར་བ་སྟེ། ཕབས་ཀྱི་རྡོ་གུ་འམ་རྩ་བ་ལ་སོགས་པ་མྱོས་པར་འགྱུར་བ་ཟ་ན་
ཉེས་བྱས་ཆུད་ངུར་འགྱུར་རོ། །མྱོས་པར་འགྱུར་བ་མ་ཡིན་དུ་ཟིན་གྱིས་ཀྱང་གང་ཞིག་མྱོས་པར་འགྱུར་བའི་ཁུ་བའི་རོ་དང་། མྱོས་པར་འགྱུར་བའི་དྲི་ཡོད་ན་དེ་བཏུང་བར་མི་བྱ་སྟེ། དེ་ལ་ཡང་ཉེས་བྱས་ཁོ་ནར་འགྱུར་བས་སོ། །ལུས་ལ་སྐུད་དང་མཁུར་བར་བླུགས་པ་ནི། །ན་བ་མ་
གཏོགས་མྱོས་ཁུས་མི་བྱའོ། །ན་བ་མ་གཏོགས་པ་གཞན་གྱི་ཚེ་ལུས་ལ་བསྐུ་བའམ་མཁུར་བར་བླུགས་པ་མྱོས་པར་འགྱུར་བའི་ཁུ་བས་མི་བྱའོ། །ལུས་ལ་བྱུགས་ན་བ་སྤུའི་ཁུང་བུ་ནས་དེར་འཇུག་པའི་ཕྱིར་ཉེས་པ་ཡིན་ནོ། །མཁུར་བར་བླུགས་པ་ནི་མིད་པར་མི་འདོད་པའི་ཕྱིར་ཉེས་
པ་མེད་དོ་སྙམ་དུ་དེ་ལྟར་སེམས་པ་བཟློག་པའི་ཕྱིར་རོ། །གལ་ཏེ་བསྐོལ་དང་དེ་ཡི་ཁ་དོག་ཙམ། །མཐུན་པའམ་མྱོས་པར་འགྱུར་བའི་ཁུ་བ་ཡི། །དངོས་པོར་མ་རེད་ཉམས་འཐུང་ཉེས་མེད་དེ། །འདི་ལྟར་འདིར་ནི་མྱོས་རྒྱུ་སྤང་བྱ་ཡིན། །གལ་ཏེ་མྱོས་པར་འགྱུར་བའི་ཁུ་བ་བསྐོལ་

བ་འཐུངས་ན་ལྟུང་བ་མེད་པ་ཡིན་ནོ། །གལ་ཏེ་མྱོས་པར་འགྱུར་བའི་ཁུ་བ་དང་ཁ་དོག་མཐུན་པའམ། ཡང་ན་མྱོས་པར་འགྱུར་བའི་ཁུ་བའི་དངོས་པོར་མ་རེད་པའམ། ཉམས་པ་འཐུང་ན་དེའི་ཚེ་ཡང་ཉེས་པ་མེད་པ་ཡིན་ཏེ། གང་གི་ཕྱིར་འདིར་མྱོས་པའི་རྒྱུ་ཁོ་ན་སྤད་བར་
བྱ་བ་ཡིན་གྱི་གཞན་ནི་མ་ཡིན་པས་སོ། །མྱོས་པར་འགྱུར་བའི་ཕྱོགས་མཐུན་དཔེར་བྱ་ན། །བྲེག་བཙོང་ཀེའུ་དང་སྒོག་སྐྱ་ཡིན་པར་བཤད། །སྒོག་སྐྱ་ལ་སོགས་པ་ནི་བྱེ་བྲག་ཏུ་བཤད་པ་ལས་དུས་མ་ཡིན་པའི་ཟས་ཀྱི་ཕྱོགས་དང་མཐུན་པར་བསྟན་པ་ཡིན་ཏེ། དེ་ལྟར་ཡང་འཐུང་ན་
ལྟུང་བ་དང་ཆོས་མཐུན་པས་འདིར་བཤད་དོ། །གཞན་ཡང་ཇི་ལྟར་ཆང་འཐུང་བ་བཅས་པའི་ཁ་ན་མ་ཐོ་བ་དང་བཅས་པ་ཡིན་ཡང་ཤིན་ཏུ་སྨད་པར་བྱ་བ་དེ་བཞིན་དུ་སྒོག་སྐྱ་ལ་སོགས་པ་ཡང་ཤིན་ཏུ་སྨད་པར་བྱ་བ་དང་ཆོས་མཐུན་པའི་ཕྱིར་དེ་མྱོས་པར་འགྱུར་བའི་ཕྱོགས་དང་མཐུན་པ་ཉིད་
ཡིན་ནོ། །མྱོས་པར་འགྱུར་བའི་ཁུ་བ་དང་བཅས་པའི་ཁ་ན་མ་ཐོ་བ་དང་བཅས་པ་ཡིན་ཞེས་བྱ་བ་འདིའི་ཁུངས་ནི་ནད་པ་རྣམས་ཀྱི་ལུས་བསྐུ་བ་དང་མཁུར་བར་རྔུབ་པར་གནང་བའི་ཕྱིར་ལ། རང་བཞིན་གྱིས་ཁ་ན་མ་ཐོབ་དང་བཅས་པ་ནི་སྲོག་ལ་བབ་ཀྱང་རུང་མ་གནང་བའི་ཕྱིར་རོ། །
འཕགས་པ་ཉེར་སྦས་ཀྱིས་ནི་མྱོས་པར་འགྱུར་བའི་ཁུ་བ་བཅས་པའི་ཁ་ན་མ་ཐོ་བ་དང་བཅས་པ་ཡིན་ཡང་ཤིན་ཏུ་སྨད་པ་ཡིན་ཏེ། རང་བཞིན་གྱིས་ཁ་ན་མ་ཐོ་བ་དང་བཅས་པའི་རྒྱུ་ཡིན་པའི་ཕྱིར་དང་། མཚམས་མེད་པ་བཞི་པོ་དག་དང་ལྟུང་བ་རིས་ལྔ་དག་ལ་རབ་ཏུ་འཇུག་པར་བྱེད་པ་ཡིན་པའི་
ཕྱིར་དང་། ཉེས་པ་ཐམས་ཅད་ཀྱི་འབྱུང་གནས་ཡིན་པའི་ཕྱིར་རོ་ཞེས་གསུངས་སོ། །དེ་ཡང་ནད་ལ་མཁས་པས་ལུང་ཕོག་པས། །གནང་ངོ་དང་མེད་མི་ཡི་མངོན་སུམ་མིན། །ཞེས་བྱ་བ་ལ། དེ་ཡང་ཞེས་བྱ་བ་ནི་བྲེག་བཙོང་དང་། ཀེའུ་དང་སྒོག་སྐྱ་སྟེ་སྨན་པས་ལུང་ཕོག་པའི་ཕྱིར་བཅོམ་
ལྡན་འདས་ཀྱིས་གནང་བས། གཙུག་ལག་ཁང་གི་ཕྱི་རོལ་དབེན་ཕྱོགས་སུ། །ཁང་པ་བྱས་ནས་བྱ་བའི་ཆེད་དུ་འཇུག །གཙུག་ལག་ཁང་གི་ཕྱི་རོལ་ཕྱོགས་ཤིན་ཏུ་དབེན་པར་ཁང་པ་བྱས་ཏེ་དེར་བྱ་བའི་ཕྱིར་འཇུག་པར་བྱའོ། །དེར་མ་དད་པ་རྣམས་འཇུག་ཏུ་མི་གཞུག་གོ། །གཞན་ཡང་།

དེ་དག་དགེ་འདུན་མལ་སྟན་རྣམས་ལ་ནི། །ནམ་ཡང་ལོངས་མི་སྤྱད་པར་བཀའ་སྩལ་ཏོ། །ལུས་ལ་དྲི་ང་ཉིད་དང་བྲལ་འོག་ཏུ། །རང་བཞིན་གནས་ཕྱིར་གཙུག་ལག་ཁང་འཇུག་བྱ། །བཅོམ་ལྡན་འདས་ཀྱིས་དེ་ནི་དགེ་འདུན་གྱི་མལ་སྟན་དག་གི་སྟེང་དུ་ལོངས་སྤྱད་པར་མི་བྱའོ་ཞེས་
བཀག་སྟེ། བྱ་བ་ཟིན་དུ་ཟིན་ཀྱང་དེ་ལྟར་ཐ་མལ་པར་མ་གྱུར་པར་གཙུག་ལག་ཁང་དུ་འཇུག་པར་མི་བྱའོ། །དྲི་ང་བ་ཉིད་དང་བྲལ་བར་གྱུར་ནས་ཕྱིས་རང་བཞིན་དུ་གནས་ནས་གཙུག་ལག་ཁང་དུ་འཇུག་པར་བྱའི་གཞན་དུ་ནི་མ་ཡིན་ནོ། །དགེ་ཚུལ་གྱི་ཚིག་ལེའུར་བྱས་པའི་འགྲེལ་
པ་ལས་མྱོས་པར་འགྱུར་བ་སྤོང་བ་སྟེ་ལྔ་པ་རྫོགས་སྷོ།། །།བྲོ་གར་གླུ་དང་རོལ་མོའི་སྒྲ་ཡང་རུང་། །བརྟུལ་ཞུགས་ཅན་གྱིས་རང་ངམ་གཞན་བྱ་མིན། །འདི་འདིར་འཁོར་བ་ལ་ཆགས་རྒྱུ་ཡིན་ནོ། །འོན་ཀྱང་གལ་ཏེ་བྱེད་ན་ཉེས་བྱས་འགྱུར། །དགེ་ཚུལ་གྱིས་བྲོ་གར་དང་།
གླུ་དང་རོལ་མོའི་སྒྲ་གང་རང་ངམ་གཞན་གྱིས་ཀྱང་མི་བྱ་སྟེ། གང་གི་ཕྱིར་འདིར་ནི་འཁོར་བ་ལ་ཆགས་པའི་རྒྱུ་ཡིན་པས་སོ། །འོན་ཀྱང་གལ་ཏེ་བྱེད་ན་ཉེས་བྱས་སུ་འགྱུར་རོ། །མཆོད་པའི་ཆེད་དུ་འང་རོལ་མོའི་སྒྲ་དང་ནི། །གླུ་བྱོས་ཞེས་ནི་མི་བརྗོད་འོན་ཀྱང་ནི། །ལྷ་དང་ལྷ་མིན་
དབང་པོས་ཞབས་རྡུལ་གཏུགས། །སངས་རྒྱས་ལ་ནི་མཆོད་པ་བྱོས་ཞེས་བརྗོད། །ཆེར་ན་སྟོན་པ་ལ་མཆོད་པའི་ཕྱིར་ཡང་བརྟུལ་ཞུགས་ཅན་གྱིས་བྲོ་གར་དང་། གླུ་དང་། རོལ་མོའི་སྒྲ་བྱོས་ཤིག་ཅེས་བརྗོད་པར་མི་བྱའོ། །འོ་ན་ཅི་ལྟ་ཞེ་ན། ལྷ་དང་ལྷ་མ་ཡིན་རྣམས་ཀྱིས་ཞབས་
ཀྱི་རྡུལ་ལ་གཏུགས་པའི་བཅོམ་ལྡན་འདས་ལ་མཆོད་པ་བྱོས་ཤིག་ཅེས་བརྗོད་པར་བྱའོ། །འདིར་གཞུང་ནི། བཞིན་བཟངས་དག་བཅོམ་ལྡན་འདས་ལ་རང་གི་བཟོས་མཆོད་པ་བྱོས་ཤིག་ཅེས་འབྱུང་བ་ཡིན་ནོ། །དམིགས་ཀྱིས་བསལ་བ་ནི། ཆོས་སྒྲོགས་བྱེད་པའི་གླུ་ནི་ཉེས་པ་
མེད། །སྟོན་པའི་ཡོན་ཏན་སྒྲོགས་པའང་དེ་བཞིན་ནོ། །དམ་ཆོས་ཆེད་དུ་གླུ་ནི་མི་ཤེས་ན། །དབེན་པར་སོང་སྟེ་རབ་ཏུ་བསླབ་པར་བྱ། །ཞེས་བསྟན་པ་ཡིན་ཏེ། ཆོས་སྒྲོགས་པ་དང་སྟོན་པ་ལ་སྟོད་པར་བྱེད་པ་ན་གླུ་བྱའོ། །གང་ཞིག་གླུ་མི་ཤེས་ན་བརྟུལ་ཞུགས་ཅན་དེས་དབེན་པར་སོང་

སྟེ། དམ་པའི་ཆོས་བརྗོད་པའི་ཆེད་ཁོ་ནར་གླུ་བསླབ་པར་བྱའོ། །ཆུ་འབུད་ལ་སོགས་གར་སོགས་ཕྱོགས་དང་མཐུན། །བྱིའུ་ཟུལ་དང་ནི་རིང་དུ་འགྲོ་བྱེད་དང་། །སྟེང་དུ་འབྱུང་དང་མཆོང་དང་རྒྱུག་ལ་སོགས། །རྩེད་མོའི་རྒྱུ་ཡིན་པས་ན་དེ་བཀག་གོ། །ཆུ་ལ་
འབུད་པ་དང་ཆུ་ལ་རྡོབ་པ་དང་ཆུ་ལ་འཇོལ་བ་ལ་སོགས་པ་ནི་ཆུ་ལ་རྩེ་བའི་རྣམ་པ་དག་ཡིན་ནོ། །དེ་བཞིན་དུ་བྱིའུ་ཟུལ་ཏེ་ཆུའི་གཏིང་དུ་འཇུག་པ་དང་ཐག་རིང་དུ་འགྲོ་བ་དང་དེ་བཞིན་དུ་སྟེང་དུ་འབྱུང་བ་དང་མཆོང་བ་དང་རྒྱུག་པ་ལ་སོགས་པ་ཡང་རྩེད་མོའི་རྒྱུ་ཡིན་པས་མི་བྱའོ། །གཞན་ཡང་།
འཕགས་པ་རྣམས་ཀྱིས་དགོད་ན་སོ་ཕྱུང་སྟེ་འམ། །དེ་བཞིན་སྒྲ་དག་ཆེན་པོར་མི་བྱའོ། །ལག་པ་འམ་ཆོས་གོས་ཀྱི་ནི་ཐ་མ་ཡིས། །ཁ་དག་རབ་ཏུ་བཀབ་སྟེ་གླལ་བར་བྱ། །མཆུ་བགྲད་དེ་སོ་ཕྱུང་ནས་ཧ་ཧ་ཞེས་སྐད་ཆེན་པོ་དང་འབྲེལ་པའི་བགད་པ་མི་བྱའོ། །ཅུང་ཟད་དགོད་པ་ལ་
ནི་ཉེས་པ་མེད་དེ། བཞིན་གྱི་མདོག་གསལ་བ་དང་བཞིན་འཛུམ་པར་བྱའོ་ཞེས་གསུངས་པའི་ཕྱིར་རོ། །ཁ་གདངས་པར་ཡང་མི་བྱའོ། །འོན་ཏེ་གླལ་བྱུང་ན་དེའི་ཚེ་ལག་པའམ་གོས་ཀྱི་ཐ་མས་ཁ་བཀབ་སྟེ་གླལ་བར་བྱའོ། །ཆུ་ལ་འཕྱོ་བའི་དམིགས་ཀྱིས་དབྱེ་བ་བཤད་པར་བྱ་
སྟེ། །སྨན་པས་ལུང་ཕོག་པས་སམ་བསླབ་པའི་ཕྱིར། དབེན་པའི་ཕྱོགས་སུ་རྐྱལ་ན་ཉེས་མེད་དོ། །གལ་ཏེ་སྨན་པས་ལུང་ཕོག་པས་སམ་ཡང་ན་བསླབ་པའི་ཕྱིར་དབེན་པར་འཕྱོ་བར་བྱེད་ན་དེའི་ཚེ་ཉེས་པ་མེད་དོ། །འདིར་ནི་ངེས་པ་ཡིན་ཏེ། གང་ན་བུད་མེད་དམག་མི་ཁྲུས་
བྱེད་པའི། །འཇུག་ངོགས་དེ་ནི་རིང་པོར་སྤང་བར་བྱ། །ཞེས་བྱ་བ་འདི་ནི་ངེས་པ་ཡིན་ནོ། །འཇུག་ངོགས་གང་དུ་བུད་མེད་དང་དམག་མི་དག་ཁྲུས་བྱེད་པའི་འཇུག་ངོགས་དེ་ནི་ཐག་རིང་དུ་སྤང་བར་བྱའོ། །དེར་ནི་སྨན་པས་ལུང་ཕོག་ཀྱང་རུང་། བསླབ་པའི་ཕྱིར་ཡང་རུང་སྟེ། འཇུག་པར་
མི་བྱའོ། །དགེ་ཚུལ་གྱི་ཚིག་ལེའུར་བྱས་པའི་འགྲེལ་པ་ལས་གར་ལ་སོགས་པ་སྤོང་བ་སྟེ་དྲུག་པ་རྫོགས་སོ།། །།གང་ཞིག་སྤོས་བྱུག་མེ་ཏོག་ཕྲེང་བ་འམ། །དེ་བཞིན་ལུས་མདོག་ཁ་དོག་བྱ་བ་དག །མི་གཙང་སྣོད་ཀྱི་ལུས་ལ་འཆང་བྱེད་ན། །རྨོངས་པ་དེ་ནི་ཉེས་བྱས་

ཉིད་ཀྱིས་གཟིར། །བརྟུལ་ཞུགས་ཅན་གང་ཞིག་སྤོས་ཀྱིས་བྱུགས་པ་དང་མེ་ཏོག་གི་ཕྲེང་བ་དང་ལུས་ཀྱི་མདོག་གི་ཁ་དོག་བྱ་བ་དག་མི་གཙང་བའི་འབྱུང་ཁུངས་ལུས་ལ་འཆང་བར་བྱེད་ན་རྨོངས་པ་དེ་ཉེས་བྱས་ཀྱི་ལྟུང་བས་གཟིར་བར་འགྱུར་རོ། །གཞན་ཡང་། འདག་ཆལ་བསྲུང་དང་གོས་ལ་
འདུག་བྱེད་དང་། སེན་མོ་བྱི་དོར་མིག་སྨན་མཆུ་སྒྱུར་དང་། །གཡན་པ་མ་གཏོགས་སོ་ཕག་ལོང་བུ་ལས། །ཡན་ཆད་འདྲུད་ལ་སོགས་པ་ཉེས་བྱས་ཡིན། །འདག་པའི་ཆལ་དྲི་ཞིམ་པོ་དང་། གོས་ལ་འདུག་པར་བྱེད་པ་དང་། སེན་མོ་བྱི་དོར་བྱེད་པ་དང་། མིག་སྨན་དང་།
མཆུ་ཁ་དོག་བསྒྱུར་བ་དང་། གཡན་པ་ལ་སོགས་པའི་ནད་མེད་པར་ལོང་བུ་ཡན་ཆད་དུ་སོ་ཕག་གིས་ལུས་ལ་འདྲུད་པ་ལ་སོགས་པ་ནི་ཉེས་བྱས་ཁོ་ནར་འགྱུར་རོ། །དམིགས་ཀྱིས་བསལ་བ་བཤད་པར་བྱ་སྟེ། ནད་པས་དབེན་པར་འདུག་ནས་བསྐུ་བྱ་སྟེ། །འཇིག་རྟེན་མ་དད་
འགྱུར་བ་བཟློག་ཕྱིར་རོ། །དད་ལྡན་དག་གིས་རྐང་པ་སྤོས་བྱུགས་ན། །སྦྱིན་བདག་གི་ནི་ལྐོག་ཏུ་བཀྲུ་བར་བྱ། །ནད་པ་དག་གིས་ནི་སྨན་པས་ལུང་ཕོག་པས་རིམས་ལ་སོགས་པ་ཞི་བར་བྱ་བའི་ཕྱིར་དབེན་པར་འདུག་ནས་སྤོས་བྱུག་པར་བྱ་སྟེ། འཇིག་རྟེན་མ་དད་པར་གྱུར་ན་མི་རུང་
བས་སོ། །དེ་བཞིན་དུ་དད་པ་ཅན་དག་གིས་རྐང་པ་ལ་སྤོས་ཀྱི་རི་མོ་དག་བྱུགས་ན་བདག་གིར་བྱས་ནས་ཕྱིས་སྦྱིན་བདག་གི་ལྐོག་ཏུ་བཀྲུ་བར་བྱའོ། །གཞན་ཡང་། འཕགས་པས་མེ་ཏོག་དྲི་ནི་ཞིམ་པོ་དག །མིག་ཕན་སྙམ་བསྣམ་འདོད་ཆགས་བློས་མ་ཡིན། །མེ་ཏོག་དག་རྙེད་
ན་དྲི་ཞིམ་པོ་ཐམས་ཅད་མིག་ལ་ཕན་ནོ་སྙམ་དུ་རྣམ་པར་བྱའི་འདོད་ཆགས་ཀྱི་བསམ་པས་ནི་མ་ཡིན་ནོ། །ད་ནི་སྤོས་སོགས་ཕྱོགས་མཐུན་སྐབས་ཡིན་པས། །ཆུ་ལ་སོགས་པར་བཞིན་ལ་བལྟ་མི་བྱ། །ད་ནི་སྤོས་ལ་སོགས་པའི་ཕྱོགས་དང་མཐུན་པའི་སྐབས་ཡིན་པས་
དེ་བཤད་པར་བྱ་སྟེ། མེ་ལོང་ངམ་ཆུ་ལ་སོགས་པར་བཞིན་ལ་བལྟ་བར་མི་བྱའོ། །དམིགས་ཀྱིས་བསལ་བ་བཤད་པར་བྱ་སྟེ། དེ་ནི་ལུས་ཀྱི་སྔ་ཕྱིའི་གནས་སྐབས་དང་། །རྨ་ལ་བལྟ་ན་ལྟུང་བ་མེད་པར་འགྱུར། །གལ་ཏེ་ལུས་ཀྱི་སྔ་ཕྱིའི་གནས་སྐབས་སམ་རྨ་ལ་ལྟ་བར་བྱེད་ན། །

དེའི་ཚེ་ལྟུང་བ་མེད་དོ། །མཆོད་ཕྱིར་ཐོགས་བྱུགས་རིས་ཤིས་སྐུད་ལ་སོགས། །ལྷབ་ལྷུབ་དག་ནི་ཐམས་ཅད་སྤང་བར་བྱ། །མཆོད་ཕྱིར་ཐོགས་པ་ནི་སྐུད་པ་སེ་རལ་ཁའོ། །བྱུགས་རིས་ནི་རི་མོར་བྲིས་པའོ། །ཤིས་སྐུད་ནི་མཁྲིག་མ་ལ་གདགས་པའི་བཀྲ་ཤིས་
ཀྱི་ཚོན་སྐུད་སྣ་ལྔའོ། །དེ་ལྟ་བུ་ལ་སོགས་པའི་ལྷབ་ལྷུབ་རྣམས་ནི་བཅང་བར་མི་བྱའོ། །འདིའི་དམིགས་ཀྱིས་བསལ་བ་ནི། རིམས་སོགས་ཞི་བར་བྱ་ཕྱིར་དཔུང་གཡོན་ལ། །སྔགས་ལ་སོགས་པའི་སྐུད་པ་ལ་སོགས་བཅད། །རིམས་དང་བྲལ་ནས་སྐུད་པ་བཀྲོལ་ནས་ནི། །བུ་ག་
གཙང་མའི་ཕྱོགས་སུ་གཞག་པར་བྱ། །རིམས་ལ་སོགས་པ་ཞི་བར་བྱ་བའི་ཕྱིར་ནི་གསང་སྔགས་ཀྱི་སྐུད་པ་འམ། རིག་སྔགས་ཀྱི་སྐུད་པ་ལ་སོགས་པ་བཅང་བར་བྱའོ། །གང་གི་ཚེ་རིམས་དང་བྲལ་བར་གྱུར་པ་དེའི་ཚེ་གསང་སྔགས་ལ་སོགས་པའི་སྐུད་པ་དེ་ཀ་བའི་བུ་ག་འམ། །རྩིག་པའི་བུ་
ག་གཙང་མའི་ཕྱོགས་སུ་གཞག་པར་བྱའོ། །སྡོམ་བརྩོན་དག་གིས་གདུགས་བཀྲ་བཅང་མི་བྱ། །གྲོང་དུ་དེ་བསྒྲེང་བ་ཡང་བཀག་པ་ཡིན། །ལོ་མ་ལས་ནི་བྱས་པ་འམ་སྨྱིག་མའི་གདུགས། །ཡུ་བའང་གདུགས་ཀྱི་ཚད་དུ་བཤད་པ་ཡིན། །བརྟུལ་ཞུགས་ཅན་གྱིས་གདུགས་ཁྲ་བོ་བཅང་བར་མི་
བྱའོ། །ཁྲ་བོ་མ་ཡིན་ན་ཡང་གྲོང་གི་ནང་དུ་བསྒྲེང་བ་ནི་བཀག་པ་ཡིན་ནོ། །གདུགས་ནི་རྣམ་པ་གཉིས་སྣང་སྟེ། ལོ་མ་ལས་བྱས་པ་དང་། སྨྱིག་མ་ལས་བྱས་པའོ། །ལོ་མ་ཞེས་བྱ་བ་ནི་འདབ་མ་སྟེ། དེ་ལས་བྱས་པ་ནི་ལོ་མ་ལས་བྱས་པའོ། །སྨྱིག་མ་ལས་བྱས་པ་ནི་སྨྱིག་མ་ལས་
བྱས་པའོ། །གདུགས་ཀྱི་ཡུ་བ་ཡང་གདུགས་ཀྱི་ཁོག་པའི་ཚད་དམ་ཁྲུ་དོ་བར་གནང་ངོ་། །དགེ་ཚུལ་གྱི་ཚིག་ལེའུར་བྱས་པའི་འགྲེལ་པ་ལས་སྤོས་ལ་སོགས་པ་སྤོང་བ་སྟེ་བདུན་པ་རྫོགས་སྷོ།། །།མལ་ཆེན་མཐོན་པོ་དག་ལ་ཉལ་བྱེད་པ། །ཉེས་བྱས་བཀྲ་མི་ཤིས་པས་ངེས་
པར་གཟིར། །ཁྲུ་གང་ལས་ལྷག་ཚད་ནི་མཐོན་པོ་ཡིན། །རིན་ཆེན་ལ་སོགས་རྐང་པ་སྤྲས་ཆེན་ཡིན། །དགེ་ཚུལ་མལ་ཆེན་པོ་དང་མལ་མཐོན་པོ་ལ་ཉལ་ན་ཉེས་བྱས་བཀྲ་མི་ཤིས་པས་ངེས་པར་བརླག་པར་འགྱུར་རོ། །ཉེས་བྱས་ཉིད་བཀྲ་མི་ཤིས་པ་ཡིན་ཏེ། ཤིས་པ་མ་ཡིན་པས་ཉེས་བྱས་

བཀྲ་མི་ཤིས་པ་དེས་ངེས་པར་བཅོམ་པར་འགྱུར་རོ། །དེ་ལྟ་བས་ན་མལ་དེ་ལྟ་བུ་ལ་ཉལ་བར་མ་གནང་ངོ་། །དེ་གཉིས་ཀྱི་མཚན་ཉིད་ཀྱང་ཅི་ཞིག་ཅེ་ན། བཤད་པ། ཁྲུ་གང་ལས་ལྷག་ཚད་ནི་མཐོན་པོ་ཡིན། །རིན་ཆེན་ལ་སོགས་རྐང་པ་སྤྲས་ཆེན་ཡིན། །ཁྲུ་གང་ལས་ལྷག་པའི་ཚད་ནི་མལ་མཐོན་པོ་
ཡིན་ལ། གསེར་དང་བ་སོ་ལ་སོགས་པའི་རྐང་པ་དང་རིན་པོ་ཆེས་སྤྲས་པ་ནི་མལ་ཆེན་པོ་ཡིན་པར་ཤེས་པར་བྱའོ། །དམིགས་ཀྱིས་བསལ་བ་བཤད་པར་བྱ་སྟེ། སྟན་མཐོ་རིན་ཆེན་འོད་ཀྱིས་མཛེས་པ་ལ། །འདུ་བྱེད་འཇིག་པའི་ངང་ཅན་འདིར་བསམས་ཏེ། །འཛེགས་ནས་ཆོས་བསྒྲགས་
པ་ནི་སྦྱིན་བྱ་སྟེ། །བདེ་གཤེགས་ཆོས་ནི་མཆོད་བྱ་ཡིན་པས་སོ། །འདུ་བྱེད་རྣམས་འཇིག་པའི་ངང་ཅན་ཡིན་པར་རྗེས་སུ་བསམས་ཏེ། སེང་གེའི་ཁྲི་ནི་ནོར་བུ་སྣ་ཚོགས་ཀྱི་འོད་ཟེར་གྱིས་སྤྲས་པ། ཤིན་ཏུ་མཐོ་བ། བླ་རེ་དང་བཅས་པ། འཕྱང་འཕྲུལ་དང་བཅས་པ། རྐང་རྟེན་དང་བཅས་པ་
ལ་འཛེགས་ནས་ཆོས་བསྒྲགས་པ་སྦྱིན་པར་བྱ་སྟེ། འདི་ལྟར་བཅོམ་ལྡན་འདས་ཀྱི་ཆོས་ནི་མཆོད་པར་བྱ་བ་ཡིན་པས་སོ། །གཞན་ཡང་། ཁྱིམ་པས་རིན་ཆེན་འོད་འབར་བྱས་བྱིན་ནའང་། །མི་རྟག་ཉིད་དུ་བསྒོམ་པས་འདུག་པར་བྱ། །གནོད་སྦྱིན་གནས་དང་ལྷ་ཁྱིམ་ཀླུ་གནས་སུ། །སྡོམ་བརྩོན་
འདུག་ནའང་ཉེས་པ་མེད་པ་ཡིན། །ཁྱིམ་པ་དག་གིས་རིན་པོ་ཆེའི་འོད་ཟེར་དག་གིས་སྤ་བར་བྱས་པའི་སྟན་དག་བྱིན་ན། མི་རྟག་པ་ཉིད་ཀྱི་ཡིད་ལ་བྱེད་པས་ཟིལ་གྱིས་མནན་ནས་འདུག་པར་བྱའོ། །དེ་བཞིན་དུ་ལྷ་དང་ཀླུ་དང་གནོད་སྦྱིན་དག་གི་གནས་སུ་འདུག་ན་ཡང་སྡོམ་བརྩོན་ལ་ཉེས་པ་མེད་དེ། དེ་
ནི་དེ་དག་གི་བསོད་ནམས་ལས་སྐྱེས་པ་ཡིན་པས་སོ། །བསླབ་པའི་གཞི་འདི་ནི་དངོས་པོ་གཙོ་བོར་བྱ་བ་ཡིན་ཏེ། གང་གི་ཕྱིར་གཏམ་གྱི་གཞི་ལས་ལུས་ཀྱི་ལྟུང་བ་འབའ་ཞིག་གོ་ཞེས་གསུངས་པས་དེའི་ཕྱིར་འདིར་འདུ་ཤེས་གཙོ་བོར་བྱ་བ་སྤྱིར་བཏང་བའི་སྐབས་མེད་དོ། །མཐོན་པོ་ལ་
སོགས་ཕྱོགས་མཐུན་ཉིད་ཉལ་ཡིན། །གཉིད་ཀྱི་ནང་དུ་གྱུར་ན་ཡུད་ཙམ་གནང་། །ན་དང་དེ་ཡི་ནད་གཡོག་མ་གཏོགས་པ། །བརྟུལ་ཞུགས་ཅན་ནི་མར་མེ་ཉལ་བ་བཀག །མལ་སྟན་མཐོན་པོའི་ཕྱོགས་དང་མཐུན་པ་ནི་ཉིན་པར་ཉལ་བ་ཡིན་པར་རྟོགས་པར་བྱའོ། །གང་ཞིག་གཉིད་ཀྱི་ནད་

དུ་གྱུར་པ་དེ་དག་ནི་གཉིད་སངས་ནས་དགེ་བའི་ཕྱོགས་ལ་མི་ཉལ་བར་བྱའོ་སྙམ་པའི་བསམ་པས་ཡུད་ཙམ་གྱི་ཚད་ཙམ་ཅིག་ཉིན་པར་ཉལ་བར་གནང་ངོ་། །དེ་བཞིན་དུ་མར་མེ་ལ་ཉལ་བ་ཡང་བཀག་གོ། །འདིར་ཉལ་བ་ནི་གཉིད་ཀྱིས་ནོན་པ་ལ་བྱའི། སྤྱོད་
ལམ་བཞི་པ་བཀག་པ་ནི་མ་ཡིན་ནོ། །དམིགས་ཀྱིས་བསལ་བ་ནི་ནད་པ་དང་ནད་གཡོག་ནི་མ་ཡིན་ནོ། །འདིར་མར་མེ་སྨོས་པ་ནི་ལོངས་འཆོས་པའི་སྣང་བའི་མཚོན་པ་ཡིན་ནོ། །དེའི་ཕྱིར་ཟླ་བ་དང་ཉི་མའི་སྣང་བ་དག་ལ་ཉལ་བ་ནི་ལྟུང་བ་མེད་པར་ཤེས་པར་བྱ་སྟེ། དེ་ཉིད་ནི་སྤང་བར་བྱ་བ་མ་ཡིན་པའི་
ཕྱིར་རོ། །འདིར་ནི་གླེང་གཞི་གཙོ་བོར་བྱ་བ་མ་ཡིན་ཏེ། བསླབ་པ་དེ་ནི་དབང་དུ་བྱ་བ་མ་ཚང་བའི་ཕྱིར་རོ། །གདིང་བ་མེད་པར་ཉལ་བའི་རིགས་མ་ཡིན། །ཡུལ་གྱི་དབུས་སུ་མལ་སྟན་ཀོ་ལྤགས་མིན། །ཁྱིམ་དག་ཏུ་ནི་སྟན་ཙམ་ཁོ་ན་དབང་། །ཡུལ་གྱི་མཐའ་འཁོབ་དག་ཏུ་གཉིས་ཀའང་
གནང་། །གདིང་བ་མེད་པར་མལ་སྟན་ལ་འདུག་པ་ནི་རིགས་པ་མ་ཡིན་ནོ། །དེ་བཞིན་དུ་ཡུལ་གྱི་དབུས་སུ་མལ་སྟན་ཀོ་ལྤགས་མི་གནང་ངོ་། །ཁྱིམ་གྱི་ནང་དུ་ནི་སྟན་ཙམ་ཁོ་ན་ཞིག་དབང་གི་མལ་ནི་མ་ཡིན་ནོ། །ཡུལ་མཐའ་འཁོབ་དག་ཏུ་ནི་མལ་དང་སྟན་གཉི་ག་ཡང་ཀོ་ལྤགས་དག་
ལས་གནང་ངོ་། །ཡུལ་གྱི་དབུས་སམ་མཐའ་འཁོབ་ཅེས་བྱ་བ་ཡང་གང་ཞེ་ན། །ཀོ་ལྤགས་ཀྱི་གཞི་ལས། ཉེ་བ་འཁོར་ཤར་དུ་ན་ལི་ཁ་ར་ཤིང་འཕེལ་ཞེས་བྱ་བའི་གྲོང་ཁྱེར་ཡོད་དོ། །དེའི་ཕ་རོལ་ན་ལི་ཁ་རའི་ཤིང་ཐིབས་པོ་ཞེས་བྱ་བའི་ཚལ་ཡོད་དེ་དེ་ནི་མཐའ་ཡིན་ནོ། །དེའི་ཕ་རོལ་ནི་
མཐའ་འཁོབ་ཡིན་ནོ། །ལྷོར་ནི་འདམ་བུ་མདའ་རྒྱུ་ཞེས་བྱ་བའི་ཆུ་ཀླུང་ཡོད་དེ་དེ་ནི་མཐའ་ཡིན་ནོ། །དེའི་ཕ་རོལ་ནི་མཐའ་འཁོབ་ཡིན་ནོ། །ནུབ་ཏུ་ནི་བྲམ་ཟེའི་གྲོང་ཁྱེར་ཀ་བ་དང་ཉེ་བའི་ཀ་བ་གཉིས་ཡོད་དེ། དེ་ནི་མཐའ་ཡིན་ནོ། །དེའི་ཕ་རོལ་ནི་མཐའ་འཁོབ་ཡིན་ནོ། །བྱང་དུ་ནི་ཨུ་
ཤི་རའི་རི་ཡོད་དེ། དེ་ནི་མཐའ་ཡིན་ནོ། །དེའི་ཕ་རོལ་ནི་མཐའ་འཁོབ་ཡིན་ནོ་ཞེས་གསུངས་པ་ཡིན་ནོ། །གླང་ཆེན་རྟ་དང་སྟག་དང་སེང་གེ་དང་། །སྤྲེའུ་དང་བྱི་ལའི་པགས་པ་རུང་མ་ཡིན། །མཆིལ་ལྷམ་བལ་བ་ཛ་དང་མུན་ཛའི་འཇག །རྩྭ་ལ་སོགས་ལས་བྱས་པའང་བཅང་མི་

བྱ། །གླང་པོ་ཆེ་དང་། རྟ་དང་། སྟག་དང་། སེང་གེ་དང་། སྤྲེའུ་དང་། བྱི་ལ་དག་གི་པགས་པ་ནི་རྣམ་པ་ཐམས་ཅད་དུ་རུང་བ་མ་ཡིན་ནོ། །ནད་པ་རྣམས་ལ་ནི་དོམ་གྱི་པགས་པ་གནང་ངོ་། །གཞན་དག་ལ་ནི་དེ་ལྟ་བུའི་མཆེ་བ་ཅན་དང་སེན་མོ་ཅན་དག་གི་པགས་པ་རུང་བ་མ་ཡིན་པར་རིག་
པར་བྱའོ། །གཞན་ཡང་མཆིལ་ལྷམ་རྩྭ་བལ་བ་ཛ་དང་མུན་ཛའི་དང་འཛག་མ་ལས་བྱས་པ་དང་། རྩྭ་དང་སྟེ་སྨྱིག་མ་དང་བ་ལ་ཤ་དག་དང་སོག་མ་དག་ལས་བྱས་པ་བཅང་བར་མི་བྱའོ། །གཙུག་ལག་ཁང་སྟེ་གནས་ཁང་ཁྱམས་རྣམས་སུ། །ཤིང་ལས་བྱས་ལྷམ་རྟག་ཏུ་མི་གནང་ངོ་། །
བཤང་དང་གཅི་བའི་ཁང་པའི་ཕྱོགས་དང་ནི། །ཁྱིམ་ནང་བཅས་མ་བསྟར་བར་ཉེས་པ་མེད། །ཤིང་ལས་བྱས་པའི་མཆིལ་ལྷམ་ནི། བླ་གབ་མེད་པ་དང་། གནས་ཁང་དང་ཁྱམས་དག་ཏུ་རྣམ་པ་ཐམས་ཅད་དུ་མི་གནང་ངོ་། །བླ་གབ་མེད་པ་ནི་གཙུག་ལག་ཁང་གི་སྟེང་ལ་བྱའོ། །
བཤང་བ་དང་གཅི་བའི་ཁང་པའི་ཕྱོགས་དང་། །ཁྱིམ་གྱི་ནང་དང་བཅས་པར་ནི་ཉེས་པ་མེད་དེ། དེར་ཡང་མ་བསྟར་ནའོ། །བསྟར་བ་དག་ཏུ་ནི་ཉེས་པར་འགྱུར་རོ། །ཁ་ཅིག་ན་རེ་ནི། གཙུག་ལག་ཁང་དུ་ཡང་མ་བསྟར་བ་ན་ཉེས་པ་མེད་དོ་ཞེས་འཆད་དོ། །མཛེ་ཅན་གྱིས་ནི་དགེ་འདུན་ཁྲི་
སོགས་སྤང་། །དགེ་འདུན་རྣམས་དང་འདུ་སོགས་དེ་བཞིན་ནོ། །དགེ་འདུན་སྐྱེ་བོ་མེད་པར་དེ་བཞག་སྟེ། །སྨན་གྱི་སྦྱོར་བ་དག་གིས་བསྐྱང་བར་བྱ། །མཛེ་ཅན་གྱིས་ནི་དགེ་འདུན་གྱི་ཁྲི་དང་ཁྲིའུ་ལ་སོགས་པ་ཐམས་ཅད་ཡོངས་སུ་སྤང་བར་བྱའོ། །དགེ་འདུན་དང་འདུ་བ་ལ་སོགས་པ་ཡང་དེ་
བཞིན་ནོ། །དགེ་འདུན་གྱིས་ཀྱང་མཛེ་ཅན་དེ་ཕྱོགས་དབེན་པར་གཞག་སྟེ། སྨན་དང་ནད་གཡོག་ཉེ་བར་བསྒྲུབས་པས་ཡོངས་སུ་བསྐྱང་བར་བྱའོ། །ནད་གཡོག་གིས་ཀྱང་ནད་པ་ཐམས་ཅད་ལ། །གསོན་པ་རྙེད་པར་དཀའ་བར་རྟོགས་བྱས་ཏེ། །རང་བཞིན་ཁ་ན་མ་ཐོ་མ་གཏོགས་
བསྒྲིམ། །བཅས་པའི་ཁ་ན་མ་ཐོ་བས་ཀྱང་བསྐྱང་། །ནད་གཡོག་གིས་ནད་པ་ཐམས་ཅད་ལ་སངས་རྒྱས་ཀྱི་བསྟན་པ་ལ་གནས་པའི་གང་ཟག་ནི། །ཉི་མ་གཅིག་ཙམ་གསོན་པ་ཡང་རྙེད་པར་དཀའ་བ་ཡིན་ནོ་སྙམ་དུ་རྟོགས་པར་བྱ་སྟེ། རང་བཞིན་གྱི་ཁ་ན་མ་ཐོ་བ་དང་བཅས་པ་མ་གཏོགས་

པ། བཅས་པའི་ཁ་ན་མ་ཐོ་བ་དང་བཅས་པས་ཀྱང་རིམ་གྲོ་བྱའོ། །འདིར་གཞུང་ནི་ཕྲན་ཚེགས་ལས། བཙུན་པ་བཅོམ་ལྡན་འདས་ཀྱིས་ནད་པ་ལ་རིམ་གྲོ་བྱའོ་ཞེས་གསུངས་པ་དེ་ཡོ་བྱད་ཅི་འདྲ་བ་ཞིག་གིས་བགྱི། ཉེ་བ་འཁོར་རང་བཞིན་གྱི་ཁ་ན་མ་ཐོ་བ་དང་བཅས་
པ་མ་གཏོགས་པའི་ཡོ་བྱད་གཞན་རྣམས་ཀྱིས་བྱའོ་ཞེས་གསུངས་པ་ཡིན་ནོ། །དགེ་ཚུལ་གྱི་ཚིག་ལེའུར་བྱས་པའི་འགྲེལ་པ་ལས། མལ་མཐོན་པོ་ལ་སོགས་པ་སྤོང་བ་སྟེ་བསླབ་པའི་གཞི་བརྒྱད་པ་རྫོགས་སོ།། །།རང་གླིང་སྐྱ་རེངས་དང་པོ་སོགས་བཟུང་ནས། །ཉི་མ་ཕྱེད་བར་
འདི་ནི་དུས་ཡིན་ཏེ། །དེ་ཡོལ་གང་ཞིག་དུས་རུང་ཟ་བྱེད་དེ། །ཉེས་བྱས་ལྕགས་ཀྱི་གོང་བུའི་ཟས་རྣམས་ཟ། །རང་གི་གླིང་གི་སྐྱ་རེངས་དང་པོ་ལ་སོགས་པ་ནས་བཟུང་ནས་ཉི་མ་ཕྱེད་ཀྱི་བར་འདི་ནི་དུས་ཡིན་ནོ། །རང་གི་གླིང་གི་སྒྲས་སྐྱ་རེངས་ལ་ཡང་སྦྱར་བར་བྱ་སྟེ། རང་གི་གླིང་གི་
སྐྱ་རེངས་ནས་བཟུང་ནས། རང་གི་གླིང་གི་ཉི་མ་ཕྱེད་ཀྱི་བར་ཞེས་བྱ་བའི་དུས་དེ་ཡོལ་ནས། དགེ་ཚུལ་གང་ཞིག་བཟའ་བ་དུས་སུ་རུང་བ་ཟ་བ་སྟེ། མིད་པ་དེ་ཉེས་བྱས་ཀྱི་ལྕགས་ཀྱི་གོང་བུ་རྣམས་ཟ་བ་ཡིན་ནོ། །ཉེས་བྱས་ཉིད་ལྕགས་ཀྱི་གོང་བུའི་ཟས་རྣམས་ཡིན་ནོ་ཞེས་ཚིག་སྦྱར་
རོ། །རྣམས་ཞེས་མང་པོར་སྨོས་པ་ནི་ཁམ་རེ་རེ་ལ་ཉེས་བྱས་ཡིན་ནོ་ཞེས་བསྟན་པའི་ཕྱིར་རོ། །རྣམ་པར་འབྱེད་པ་ལས། དུས་མ་ཡིན་པ་རྣམ་པ་གཉིས་ཏེ། སྐྱ་རེངས་མ་ཤར་བ་ནས་ཉི་མ་ཕྱེད་ཡོལ་བའོ་ཞེས་གསུངས་པ་ནི་བྱེ་བྲག་མ་ཕྱེད་པར་གསུངས་པའི་ཕྱིར་འདིར་སྐྱ་རེངས་
སྤྱིར་སྨོས་པ་ཡིན་ནོ། །སྒོ་གཏན་གྱི་བསླབ་པའི་གཞི་ལས་ནི། སྐྱ་རེངས་བྱེ་བྲག་ཏུ་དགོངས་པ་ཡིན་པས་དབྱེ་བ་རྣམ་པ་གསུམ་དུ་མཛད་པ་ཡིན་ཏེ། སྐྱ་རེངས་ནི་གསུམ་སྟེ། སྐྱ་རེངས་དང་པོ་ནི་སྔོན་པོར་སྣང་བའོ། །སྐྱ་རེངས་བར་པ་ནི་སེར་པོར་སྣང་བའོ། །སྐྱ་རེངས་ཐ་མ་ནི་དམར་
པོར་སྣང་བའོ་ཞེས་རྒྱ་ཆེར་གསུངས་ནས། དོན་འདི་ལ་ནི་སྐྱ་རེངས་ཐ་མ་ཡིན་པར་དགོངས་སོ་ཞེས་དེ་སྐད་གསུངས་པས་དེའི་ཕྱིར་འདིས་ནི་སྒོ་གཏན་ལས་གཞན་དུ་ནི་སྐྱ་རེངས་དང་པོ་ཁོ་ནར་བཞེད་པ་ཡིན་པས་སྐྱ་རེངས་དང་པོ་སྨོས་པ་ཡིན་ནོ། །འོ་ན་སྐྱ་རེངས་འཆར་བའི་དུས་གང་ཡིན་ཞེ་ན། རེ་ཞིག་

གསོ་སྦྱོང་བཞག་པའི་གཞི་ལས། བཙུན་པ་མཚན་མོའི་ཐུན་ཐ་མ་ལ་བབ་སྟེ། རྔ་བརྡུང་དུ་ཉེ་བའི་མཚན་མོ་སྐྱ་རེངས་འཆར་བའི་དུས་ཀྱི་ཚོད་ལ་བབ་པས་ད་ནི་རིང་པོར་མི་ཐོགས་པར་སྐྱ་རེངས་འཆར་ལགས་ན། བཅོམ་ལྡན་འདས་སོ་སོར་ཐར་པའི་མདོ་གདོན་དུ་གསོལ་ཞེས་གསུངས་པ་
ཡིན་ནོ། །ཐུན་ཐ་མ་ནི་ནམ་གྱི་ཆ་གསུམ་པ་ཡིན་ནོ། །བབ་སྟེ་ནི་ཐུག་སྟེའོ། །ཐ་མ་དེ་ལ་སྐྱ་རེངས་འཆར་བའི་དུས་ཡིན་པར་ཁོང་དུ་ཆུད་པར་བྱའོ། །དུས་དེ་ནི་བཅོམ་ལྡན་འདས་ཀྱིས་མཚན་མོ་དཔེར་བསྟན་པས་ངེས་པར་གསུངས་པ་ཡིན་ཏེ། རྣམ་པར་འབྱེད་པ་ལས། སྐྱ་རེངས་དང་པོ་ཤར་
ན་ནམ་མཁའ་སྔོན་པོར་སྣང་ངོ་། །སྐྱ་རེངས་བར་མ་ཤར་ན་སེར་པོར་སྣང་ངོ་། །སྐྱ་རེངས་ཐ་མ་ཤར་ན་དམར་པོར་སྣང་ངོ་ཞེས་གསུངས་པའི་ཕྱིར་རོ། །ཆུ་ཚོད་ལ་སོགས་པས་མཚོན་པར་མ་མཛད་པ་ནི་ཐམས་ཅད་དུ་ཆུ་ཚོད་ལ་སོགས་པ་རྙེད་པར་དཀའ་བའི་ཕྱིར་རོ། །ཇི་སྟེ་འོ་ན་
ཉི་མ་མ་ཤར་ཀྱང་སྐྱ་རེངས་འཆར་ན། ཉིན་མོར་ཐ་སྙད་གདགས་སམ་ཞེ་ན། བཤད་པ། སྣང་བ་ཡོད་པའི་ཕྱིར་རོ། །འདི་ལྟར་མཚན་མོ་ཟད་པར་གྱུར་པའི་ངོ་བོ་ནི་ཉིན་མོ་ཡིན་ལ། ཉིན་མོའི་ངོ་བོ་ནི་སྣང་བ་ཡིན་ཞིང་སྣང་བ་ཡང་སྐྱ་རེངས་དང་པོ་ལ་སོགས་པ་ཡིན་ནོ། །དེ་ཉིད་ཀྱི་ཕྱིར་
ཞག་བཅུ་གཅིག་པའི་སྐྱ་རེངས་འཆར་བ་ན་ཞེས་གསུངས་པ་ཡིན་ནོ། །གཞན་དུ་ན་ཞག་བཅུ་གཅིག་པའི་སྐྱ་རེངས་ཤར་བའི་དུས་ཞེས་བྱ་བར་ཇི་ལྟར་འགྱུར། དེ་ལྟར་ཡང་བསྟན