Luận tạng Tây Tạng (Tengyur) — Tập 166

མཁན་པོ་དང་འབྲེལ་བའི་ཚིག་ལས་ནི་གལ་ཏེ་གང་ཟག་གིས་མི་ཤེས་ན་ཞེས་བྱ་བའི་ཁྱད་པར་འདི་ཙམ་ཞིག་ལས་བྱེད་པའི་ཚིག་ལ་རྗེས་སུ་སྦྱར་བར་བྱའོ། །དབང་དུ་བྱ་བའི་རྗེས་སུ་འཇུག་པ་ནི་བཞེད་པ་ཉིད་ཡིན་ཏེ། དགེ་སློང་
རྣམས་དང་བསླབ་པ་མཐུན་པར་འགྱུར་བ་ཞེས་བྱ་བ་ལ་སོགས་པ་ནི་ཕྱི་མ་དག་གི་རྗེས་སུ་འཇུག་པར་མཐོང་བའི་ཕྱིར་རོ། །ཡང་གལ་ཏེ་དཔྱད་པ་དངོས་སུ་བ་ཡིན་པར་གྱུར་ན་ཅིར་འགྱུར་ཞེ་ན། བསྒྲུབ་པར་མི་ནུས་པ་ཉིད་ཀྱི་ཕྱིར་བཅོམ་ལྡན་འདས་ཀྱིས་བསྟན་པ་དོན་མེད་པར་འགྱུར་ཏེ།
འདི་ལྟར་ལྷའི་མིག་དང་རྣ་བས་དཔྱད་པ་ནི་མ་ཡིན་ཏེ་བཀག་པའི་ཕྱིར་རོ། །ཐ་སྙད་པས་ནི་གཞན་གྱི་སེམས་ཀྱིས་འཇུག་པ་སྤྱོད་ཡུལ་མ་ཡིན་པའི་ཕྱིར་རོ། །མདོ་ལས་ཚེ་ལ་དབང་བ་བཅོམ་ལྡན་འདས་ཀྱིས་ཆོས་བསྟན་པ་ནི་ངེས་པར་འབྱུང་བ་དང་བཅས་པ་དང་བསྒྲུབ་པར་ནུས་པ་ཡིན་ནོ་ཞེས་བྱ་
བ་ལ་སོགས་པ་དང་ཡང་འགལ་བར་འགྱུར་ཏེ། གལ་ཏེ་དཔྱད་པ་ཐ་སྙད་པ་མ་ཡིན་ན་བསྟན་པ་བསྒྲུབ་པར་ནུས་པར་མི་འགྱུར་རོ། །དེ་ལྟ་བས་ན་མཐོང་བ་དང་དོགས་པ་དག་ཁོ་ན་འདིར་ཐ་སྙད་ཀྱི་རྒྱུ་ཡིན་ནོ་ཞར་ལ་འོངས་པ་རྫོགས་སོ།། །།ཉེས་རྩོམ་བྱེད་དང་ཁྱིམ་སུན་འབྱིན་པ་

དང་། །འདིར་ནི་གསུམ་པ་ཚུལ་ཁྲིམས་ཉམས་པ་དག །ཐབ་མོས་སྤངས་ཏེ་གཎྜཱི་བརྡུང་བྱས་ནས། །ཤི་ཞིང་རུལ་པ་བཞིན་དུ་ངེས་བསྐྲད་བྱ། །འཐབ་ཀྲོལ་བྱེད་པ་ནི་ཉེས་རྩོམ་བྱེད་པ་ཡིན་ནོ། །ཁྱིམ་སུན་འབྱིན་པ་ནི་གང་ཞིག་བསླབ་པ་ལས་འདས་ནས་
ཁྱིམ་པ་མ་དད་པར་བྱེད་པའོ། །གསུམ་པ་ཚུལ་ཁྲིམས་འཆལ་བ་གང་ཡིན་པ་དེ་ནི་ཕམ་པ་བྱུང་བ་ཡིན་ནོ། །འདི་གསུམ་ཆར་ཡང་གཎྜཱི་བརྡུངས་ནས་བསྐྲད་པར་བྱ་སྟེ་འདི་དག་ནི་ཤི་ཞིང་རུལ་པ་དང་འདྲ་བར་འགྲོགས་པར་བྱ་བ་མ་ཡིན་པས་སོ། །ཐབ་མོ་སྤངས་ཏེ་ཞེས་བྱ་བ་ནི་གལ་ཏེ་དེ་དག་
བསྐྲད་པ་ན་དགེ་འདུན་དག་ལ་ཀུ་ཅོ་དག་བྱེད་ན། དེའི་ཚེ་རེ་ཞིག་མི་དབྱུང་བར་བྱའོ་ཞེས་བྱ་བའི་ཐ་ཚིག་གོ། །སྐྲོད་པ་ན་ལས་ཀྱི་གཎྜཱི་བརྡུང་བར་བྱའོ་ཞེས་འཆད་དོ། །གསོ་སྦྱོང་གི་གཞི་ལས་གཎྜཱི་དེ་ནི་ལྔ་དག་སྟེ། དགེ་འདུན་ཐམས་ཅད་ཀྱི་གཎྜཱི་དང་། ལས་ཀྱི་གཎྜཱི་དང་། ཤི་བའི་
གཎྜཱི་དང་། སྤོང་བའི་གཎྜཱི་དང་། གནོད་པ་འབྱུང་བའི་གཎྜཱིའོ་ཞེས་གསུངས་པ་དེ་ལ། དགེ་འདུན་ཐམས་ཅད་ཀྱི་གཎྜཱི་ཞེས་བྱ་བ་ནི་རྒྱུད་གསུམ་དང་ཏོག་གསུམ་མོ། །ལས་ཀྱི་གཎྜཱི་ཞེས་བྱ་བ་ནི་རྒྱུད་གསུམ་དང་ཏོག་གཉིས་སོ། །ཤི་བའི་གཎྜཱི་ཞེས་བྱ་བ་ནི་གཎྜཱི་ཡུ་བོ་ཡིན་ནོ། །སྤོང་བའི་
གཎྜཱི་ཞེས་བྱ་བ་ནི་ཁར་གསིལ་དཀྲོལ་བར་བྱ་བ་ཡིན་ནོ། །གནོད་པ་བྱུང་བའི་གཎྜཱི་ཞེས་བྱ་བ་ནི་ཡིད་ཆེས་པར་གྱུར་གྱི་བར་དུའོ། །འདིར་ཡང་དགེ་འདུན་ཐམས་ཅད་ཅེས་བྱ་བ་ནི་འདུ་བ་ཞེས་བྱའོ། །ཤི་བའི་གཎྜཱི་ཞེས་བྱ་བ་ནི་རོ་དབྱུང་བའི་གཎྜཱིའོ། །ཡུ་བོ་ཞེས་བྱ་བ་ནི་གང་ལ་རྒྱུད་
གཅིག་དང་ཏོག་གཅིག་ཡོད་པ་དེ་ལྟ་བུ་དེ་ལ་བྱའོ། །ཀ་བར་གྱུར་པ་མདོ་སྡེ་འཛིན་གང་དང་། །དེ་བཞིན་གཞན་ཡང་ཆོ་ག་བཞིན་དཔྱད་བསྐྲད། །དཔུང་བྱེད་བཏང་ན་སླར་ཡང་གཞུག་བྱ་སྟེ། །གལ་ཏེ་མིན་ན་དེ་སྐལ་རིན་གྱིས་ལྟུང་། །འཕགས་པའི་ཆོས་འདུལ་བ་འདི་ལ་མདོ་སྡེ་དང་
འདུལ་བ་དང་མ་མོ་འཛིན་པ་དག་ནི་ཀ་བ་དང་འདྲ་བའི་ཕྱིར། ཀ་བར་གྱུར་པ་ཞེས་བྱ་སྟེ། གལ་ཏེ་དེ་དག་འཐབ་ཀྲོལ་བྱེད་པ་ལ་སོགས་པ་བསྐྲད་པར་བྱ་བ་རྣམས་ཀྱི་དཔུང་བྱེད་ན། དེ་དག་ཀྱང་ཆོ་ག་ཇི་ལྟ་བ་བཞིན་དུ་ཡང་དག་པར་དཔྱད་ནས་བསྐྲད་པར་བྱའོ། །གང་གི་ཚེ་ཀ་བ་དང་འདྲ་

བ་དེ་དག་གིས་འཐབ་ཀྲོལ་བྱེད་པ་ལ་སོགས་པ་དེ་དག་བཏང་ན་དེའི་ཚེ་སླར་གཞུག་པར་བྱའོ། །འོན་ཏེ་དགེ་འདུན་གྱིས་འཇུག་པར་མི་བྱེད་ན། དེའི་ཚེ་དེའི་གཙུག་ལག་ཁང་གི་རྙེད་པའི་སྐལ་བའི་རིན་ཐང་གིས་དགེ་འདུན་ལ་ལྟུང་བར་འགྱུར་རོ། །འདིར་གཞུང་ནི་ཞུས་པ་བྲམ་ཟེའི་བུ་མོ་ལྟ་བུ་
ལས། བཅོམ་ལྡན་འདས་གལ་ཏེ་དགེ་འདུན་གྱིས་ཀ་བ་དང་འདྲ་བ་འམ་སྒོ་སྐྱེས་དང་འདྲ་བ་སྐྲོད་པར་བགྱིད་ལ་དེ་ཡང་སླར་འཆོས་པར་བགྱིད་ན། དགེ་འདུན་ལ་བསོད་ནམས་མ་ལགས་པ་ཇི་སྙེད་ཅིག་སྐྱེ་བར་འགྱུར་ལགས། གང་ནས་བཟུང་སྟེ་གང་ཟག་དེ་སླར་བཅོས་པར་འོས་པ་དེ་ནས་བཟུང་
སྟེ། གཙུག་ལག་ཁང་གི་རྙེད་པའི་རིན་ཐང་བརྩི་བར་བྱའོ། །གལ་ཏེ་དངོས་པོ་མ་ཚང་ན་དགེ་འདུན་ལ་སྦོམ་པོར་འགྱུར་རོ། །དངོས་པོ་ཚང་ན་དགེ་འདུན་ལ་ཕམ་པར་འགྱུར་རོ་ཞེས་འབྱུང་བ་ཡིན་ནོ། །གང་དག་གྲངས་ཅན་ལ་སོགས་བདེན་བློས་འདོན། །དེ་དག་ལ་ནི་ཁ་ཟས་དུག་ཏུ་འགྱུར།
སངས་རྒྱས་གསུང་ནི་ཇི་སྐད་བསྟན་བཏོན་ནས། །ངེས་པ་དཔྱད་པར་བྱ་ཕྱིར་གཞན་དག་ཀླག །དགེ་ཚུལ་གང་དག་གྲངས་ཅན་དང་སེར་སྐྱ་ལ་སོགས་པའི་བསྟན་བཅོས་ལ། དེ་ཁོ་ན་ཉིད་ཡིན་པའི་བློས་འདོན་པར་བྱེད་པ་དེ་དག་ལ་ནི་ཡུལ་འཁོར་གྱི་བསོད་སྙོམས་དུག་ཉིད་དུ་འགྱུར་བས།
སངས་རྒྱས་ཀྱི་གསུང་རབ་ཇི་སྐད་བསྟན་པ་བཏོན་ནས། ཕྱིས་རིགས་པ་དང་རིགས་པ་མ་ཡིན་པར་དཔྱད་པའི་ཕྱིར་མུ་སྟེགས་ཅན་གྱི་བསྟན་བཅོས་དག་ཀླག་པར་བྱའོ། །སངས་རྒྱས་དེ་ཡི་ཡོན་ཏན་སྨོས་པས་བརྗོད། །སློབ་དཔོན་སློབ་དཔོན་ཚིག་དང་ལྡན་པས་སོ། །དོན་སོགས་
སྨོས་པས་ཉེ་བའི་ཚིག་བྱས་ཏེ། །བདུད་བཅས་མཁན་པོར་གྱུར་པའི་མིང་དག་བརྗོད། །སངས་རྒྱས་བཅོམ་ལྡན་འདས་དག་ནི་ཡོན་ཏན་སྨོས་པ་དག་གིས་བརྗོད་པར་བྱ་སྟེ། དཔེར་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ཞེས་
བྱ་བ་ལ་སོགས་པ་ལྟ་བུ་དག་གིས་སོ། །སློབ་དཔོན་ནི་སློབ་དཔོན་གྱི་ཉེ་བའི་ཚིག་དང་ལྡན་པ་དག་གིས་བརྗོད་པར་བྱ་སྟེ། དཔེར་ན་སློབ་དཔོན་སངས་རྒྱས་འཚོ་ཞེས་བྱ་བ་ལ་སོགས་པ་ལྟ་བུ་དག་གིས་སོ། །དོན་སོགས་སྨོས་པས་ཉེ་བའི་ཚིག་བྱས་ཏེ། །ཞེས་བྱ་བ་ནི་དོན་གྱི་སླད་དུ་མཁན་

པོའི་མཚན་ནས་སྨོས་ཏེ་ཞེས་བྱ་བ་དེ་དག་སྨོས་པའི་ཉེ་བའི་ཚིག་བྱས་ཏེ། འདུད་པ་དང་བཅས་བཞིན་དུ་མཁན་པོའི་མིང་བརྗོད་པར་བྱའི། གཞན་དུ་ནི་མ་ཡིན་ནོ། །རྒན་ལ་བཙུན་པའི་ཉེ་བའི་ཚིག་གིས་བརྗོད། །གཞོན་ལའང་ཚེ་དང་ལྡན་པའི་ཉེ་ཚིག་གིས། །
དེ་བཞིན་གནས་བརྟན་ཞེས་བྱའི་ཉེ་ཚིག་བརྗོད། །དེ་ལྟར་འདི་ནི་མིང་སྨོས་རིམ་པ་ཡིན། །རྒན་པ་ལ་ནི་བཙུན་པའི་ཉེ་བའི་ཚིག་གིས་བརྗོད་པར་བྱའོ། །གཞོན་པ་ལ་ཡང་ཚེ་དང་ལྡན་པ་ཞེས་ཉེ་བའི་ཚིག་གིས་བརྗོད་པར་བྱའོ། །ཡང་གི་སྒྲས་ནི་རྒན་པ་ལ་ཡང་བྱའོ། །དེ་བཞིན་དུ་རྒན་
པ་ལ་ཡང་རུང་གཞོན་པ་ལ་ཡང་རུང་སྟེ། གནས་བརྟན་ཞེས་བྱ་བའི་ཉེ་བའི་ཚིག་གིས་བརྗོད་པར་བྱའོ། །འདི་སྐད་དུ་རྒན་པ་ལ་ནི་བཙུན་པ་ཞེས་ཉེ་བའི་ཚིག་གིས་བརྗོད་པར་བྱའོ། །རྒན་པ་ལ་ཡང་རུང་བ་གཞོན་པ་ལ་ཡང་རུང་བ་ནི་གནས་བརྟན་དང་ཚེ་དང་ལྡན་པ་ཞེས་ཉེ་བའི་ཚིག་གཉིས་
ཀྱིས་བརྗོད་པར་བྱའོ་ཞེས་བསྟན་པ་ཡིན་ནོ། །དེ་ལྟར་ན་བཅོམ་ལྡན་འདས་ཀྱིས་མིང་སྨོས་པའི་རིམ་པ་བཀའ་སྩལ་པ་ཡིན་ནོ། །དགེ་ཚུལ་གྱི་ཚིག་ལེའུར་བྱས་པའི་འགྲེལ་པ་ལས་སྡོམ་པ་མཐའ་དག་ཉམས་པའི་ཕྱོགས་དང་མཐུན་པ་སྟེ་བཅུ་བཞི་པ་རྫོགས་སོ།། །།དེ་ལྟར་
ཡོངས་སུ་རྫོགས་པར་བྱས་ནས་འདུལ་བ་མདོར་བསྡུས་པ་བཤད་པ། གང་ཞིག་གནང་མེད་དེ་བཞིན་བཀག་མེད་པ། །དེ་ནི་གསུངས་པའི་རྗེས་མཐུན་བརྟགས་ཏེ་གཟུང་། །འདུལ་བ་མདོར་བསྡུས་ཞེས་བྱ་སྒྲོན་མ་དང་། །འདྲ་བ་གཞན་འདི་བདེ་བར་གཤེགས་པས་གསུངས། །གང་
ཞིག་གནང་བ་ཡང་མེད་ལ་བཀག་པ་ཡང་མེད་པ་དེ་ནི་གཞུང་བླ་མའི་རྗེས་སུ་འབྲངས་ནས། གལ་ཏེ་རུང་བ་དང་ཉེ་བ་ཡིན་ན་ནི་དེའི་ཚེ་གཟུང་བར་བྱ། འོན་ཏེ་མི་རུང་བ་དང་ཉེ་བ་ཡིན་ན་ནི་དེའི་ཚེ་གཟུང་བར་མི་བྱ་སྟེ། དཔེར་ན་ཏམ་བུ་ལ་བཟའ་བ་གལ་ཏེ་སྨན་ནམ་ཁ་བཤལ་བར་བྱ་བའི་ཕྱིར་
ཡིན་ན་ནི་རུང་བ་ཡིན་ནོ། །གལ་ཏེ་སྒེག་པའི་ཕྱིར་ཡིན་ན་ནི་མི་རུང་བ་ཡིན་ནོ། །འདུལ་བ་མདོར་བསྡུས་པ་ཞེས་བྱ་བ་སྒྲོན་མ་དང་འདྲ་བ་འདུལ་བ་གཞན་གཉིས་པ་འདི་ཡང་བཅོམ་ལྡན་འདས་ཀྱིས་གསུངས་པ་ཡིན་ནོ། །འདིར་གཞུང་ནི་ཕྲན་ཚེགས་ལས། དེ་ནས་བཅོམ་ལྡན་འདས་

ཀྱིས་ཡོངས་སུ་མྱ་ངན་ལས་འདའ་བའི་དུས་དེའི་ཚེ་ཉིད་ན། དགེ་སློང་རྣམས་ལ་བཀའ་སྩལ་པ། དགེ་སློང་དག་ངས་ཁྱེད་ལ་འདུལ་བ་རྒྱ་ཆེར་ནི་བསྟན་ན་མདོར་བསྡུས་ཏེ་མ་ཡིན་ནོ། །འོན་ཏེ་མདོར་བསྡུས་པ་ཡང་ཉོན་ཅིག །དགེ་སློང་དག་ངས་ཁྱེད་ལ་གང་ཞིག་ཐོག་མ་ཉིད་ནས་གནང་བ་ཡང་
མེད་བཀག་པ་ཡང་མེད་ལ། གལ་ཏེ་རུང་བ་དང་ཉེ་བ་ཡིན་ཞིང་མི་རུང་བ་ཟློག་པར་བྱེད་པ་ཡིན་ན་ནི་རུང་བ་ཡིན་པས་གཟུང་བར་བྱའོ། །གལ་ཏེ་མི་རུང་བ་དང་ཉེ་བ་ཡིན་ཞིང་རུང་བ་ཟློག་པར་བྱེད་པ་ཡིན་ན་མི་རུང་བ་ཡིན་པས་ཀུན་དུ་སྦྱར་བར་མི་བྱའོ་ཞེས་འབྱུང་བ་ཡིན་ནོ། །དགེ་ཚུལ་རྣམས་
ཀྱི་ཆོས་ལུགས་བསྡུས་བྱུང་བའི། །བསོད་ནམས་བདག་ལས་སྐྱེས་དེས་འཇིག་རྟེན་འདི། །ཤཱཀྱའི་འོད་བསྟན་ལམ་ནས་རྫོགས་པ་ཡིས། །བྱང་ཆུབ་དཔལ་ལྡན་གནས་སུ་འགྲོ་བར་ཤོག །དགེ་ཚུལ་རྣམས་ཀྱི་ཆོས་ལུགས་ཞེས་བྱ་བའི་ཆོ་ག་དེ་བསྡུས་ཞེས་བྱ་བ་ཀུན་ནས་བཏུས་པ་
འདི་ལས་སྐྱེས་པས་ན་བྱུང་བ་སྟེ་རྒྱུ་ཞེས་བྱའོ། །དགེ་ཚུལ་གྱི་ཆོ་ག་བསྡུས་པ་ལས་བྱུང་བ་སྟེ། དེའི་རྒྱུས་བསོད་ནམས་སྐྱེས་པ་གང་ལ་ཡོད་པ་དེ་ནི། དགེ་ཚུལ་རྣམས་ཀྱི་ཆོས་ལུགས་བསྡུས་བྱུང་བའི། །བསོད་ནམས་སྐྱེས་པ་ཞེས་བྱ་སྟེ། དེ་ལྟ་བུའི་བསོད་ནམས་བདག་ལ་
སྐྱེས་པ་གང་ཡིན་པ་དེས། འཇིག་རྟེན་འདི་རྫོགས་པའི་བྱང་ཆུབ་དཔལ་དང་ལྡན་པའི་གནས་སངས་རྒྱས་ཀྱི་སར་འགྲོ་བར་ཤོག་ཤིག།ཤཱཀྱའི་འོད་བསྟན་ལམ་ནས་ཞེས་བྱ་བ་ནི་ཤཱཀྱའི་རིགས་སུ་འཁྲུངས་པའི་ཕྱིར་ཤཱཀྱ་ནི་སངས་རྒྱས་བཅོམ་ལྡན་འདས་སོ། །དེའི་གསུང་རབ་ནི་འོད་
དང་འདྲ་བས་འོད་ཡིན་ཏེ། མཉམ་པ་དང་མི་མཉམ་པ་གསལ་བར་སྟོན་པའི་ཕྱིར་རོ། །གསུང་རབ་དེས་བསྟན་པའི་ལམ་གང་ཡིན་པའི་ལམ་དེ་ནས་སོ། །ཡང་ན་དགེ་སློང་ཤཱཀྱའི་འོད་ཀྱིས་བསྟན་པའི་ལམ་ནས་འཇིག་རྟེན་འདི་སངས་རྒྱས་ཀྱི་སར་འགྲོ་བར་ཤོག་ཤིག་ཅེས་སྡུད་པ་པོས་
བསོད་ནམས་ཡོངས་སུ་སྔོ་བར་བྱེད་པ་ཡིན་ནོ། །ཤཱཀྱའི་བཤེས་གཉེན་དོར་ནི་བདེ་བར་གཤེགས་པས་གསུངས་པའི་བསླབ་པ་ཡི། །རིན་ཆེན་འབར་བ་དག་ནི་འདུལ་བའི་རྒྱ་མཚོའི་ནང་ནས་རབ་བཏུས་ཏེ། །དབང་པོའི་རྡོ་རྗེས་ཕུག་ནས་དེ་གཞི་ཐམས་ཅད་ཡོད་པར་སྨྲ་བ་ཡི། །སོ་

སོར་ངེས་པའི་དབྱེ་བ་དག་གིས་ཕྲེང་བ་མཐུན་པར་བསྡེབས་པ་ཡིན། །ཞེས་བྱ་བ་ལ། ཤཱཀྱའི་བཤེས་གཉེན་ངོར་ནི་ཞེས་བྱ་བའི་ཤཱཀྱ་ནི་སངས་རྒྱས་བཅོམ་ལྡན་འདས་སོ། །དེའི་བཤེས་གཉེན་ནི་གྲོགས་ཡིན་ཏེ། དེ་ཟག་པ་མེད་པའི་ལམ་ཡིན་ཏེ།
དེའི་སྟོབས་ཀྱིས་སངས་རྒྱས་ཉིད་དུ་འགྲུབ་པའི་ཕྱིར་རོ། །དེའི་ངོར་ནི་ཞེས་བྱ་བ་ནི་དེ་ལ་ལྟོས་ནས་ཞེས་བྱ་བའི་ཐ་ཚིག་གོ། །ཡང་ན་གནས་བརྟན་ཤཱཀྱའི་བཤེས་གཉེན་གྱིས་བཅོལ་བས་ཞེས་བྱ་བའི་ཐ་ཚིག་གོ། །བདེ་བར་གཤེགས་པས་གསུངས་པའི་བསླབ་པ་དེ་ཉིད་རིན་པོ་ཆེ་ཡིན་པས་
བདེ་བར་གཤེགས་པས་གསུངས་པའི་བསླབ་པའི་རིན་ཆེན་ཡིན་ནོ། །འབར་བ་ཞེས་བྱ་བ་ནི་འོད་གསལ་བ་ཡིན་ཏེ། བསླབ་པ་རིན་པོ་ཆེ་གཅེས་གང་ཡིན་པ། །ཞེས་བྱ་བའི་ཐ་ཚིག་གོ། །འདུལ་བ་ཉིད་རྒྱ་མཚོ་ཡིན་ཏེ་གཞུང་ལུགས་ཀྱི་རྒྱ་མཚོ་འཛིན་ཁྲི་དུ་མའི་གནས་སུ་གྱུར་པ་ཉིད་
ཀྱིས་རྟོགས་པར་དཀའ་བའི་ཕྱིར་རོ། །དེ་ནས་ཡང་དག་པར་རབ་ཏུ་བསྡུས་ཏེ་དབང་པོའི་རྡོ་རྗེས་ཕུག་ནས་ཞེས་བྱ་བ་ནི་ཇི་ལྟར་དབང་པོའི་རྡོ་རྗེ་འོད་ཅེས་བྱ་བས་རིན་པོ་ཆེ་ཕུག་ནས་ཕྲེང་བར་བྱེད་པ་དེ་བཞིན་དུ། འདུལ་བ་ལས་བསླབ་པའི་གཞི་བཏུས་ནས་ཚིགས་བཅད་སྡེབ་སྦྱོར་
དབང་པོའི་རྡོ་རྗེ་ཞེས་བྱ་བས་ངེས་པར་ཕྱེ་ཞིང་ཕུག་ནས་བསླབ་པའི་གཞི་རིན་པོ་ཆེའི་ཕྲེང་བར་བསྡེབས་སོ་ཞེས་བྱ་བའི་ཐ་ཚིག་གོ། །ཇི་ལྟར་བསྡེབས་ཤེ་ན། བཤད་པ་གཞི་ཐམས་ཅད་ཡོད་པར་སྨྲ་བའི་སོ་སོར་ངེས་པའི་དབྱེ་བ་དག་གིས་སོ། །བཅོམ་ལྡན་འདས་ཀྱིས་ཉན་ཐོས་གང་དག་
ལས་དང་འབྲས་བུ་ལ་སོགས་པ་ཐམས་ཅད་ཡོད་པར་སྨྲ་བ་དེ་དག་ནི། ཐམས་ཅད་ཡོད་པར་སྨྲ་བ་དག་ཡིན་ཏེ། དེ་དག་གི་བསླབ་པ་སོ་སོར་ངེས་པ་གང་ཡིན་པ་དག་དབྱེ་བ་སྟེ། དགོད་པ་དེ་དག་གི་ཕྲེང་བར་བསྡེབས་པ་ཡིན་ནོ་ཞེས་བྱ་བར་སྦྱར་རོ། །ཐམས་ཅད་ཡོད་པར་སྨྲ་བ་དེ་
དག་ནི་གཞི་དང་འདྲ་བ་ཡིན་ཏེ། ལེགས་པར་སྦྱར་བའི་སྐད་དུ་ཐ་སྙད་བརྗོད་པའི་ཕྱིར་རོ། །འདི་ལྟར་ཡ་རབས་དག་ནི་ལེགས་པར་སྦྱར་བའི་སྐད་དུ་ཐ་སྙད་བརྗོད་པ་ཡིན་ནོ་ཞེས་ཟེར་བར་སྒྲའི་མཚན་ཉིད་ལ་བརྩོན་པར་བྱེད་པ་འདི་ཡང་ཡ་རབས་སུ་ཤེས་པར་བྱ་བའི་ཕྱིར་རོ། །ཡ་རབས་ནི་

འཇིག་རྟེན་ན་གཞི་དང་འདྲ་བ་ཡིན་ཏེ། དེ་ལས་འཇིག་རྟེན་གྱི་ཆོས་ལུགས་འབྱུང་བའི་ཕྱིར་རོ། །དེ་ལྟ་བས་ན་ཐམས་ཅད་ཡོད་པར་སྨྲ་བ་ནི་གཞི་ཞེས་བྱའི། སྡེ་པ་གཞན་དག་ནི་མ་ཡིན་ཏེ། ཐ་མལ་པ་དང་། ཟུར་ཆག་པ་དང་། འབྲིང་དུ་འདོན་པའི་ཚིག་གི་ཐ་སྙད་བརྗོད་པའི་
ཕྱིར་རོ། །འདི་སྐད་དུ་སྔོན་ནི་ཐམས་ཅད་ཡོད་པར་སྨྲ་བ་འདི་གཅིག་པུ་ཡོད་པ་ལས། བཅོམ་ལྡན་འདས་ཡོངས་སུ་མྱ་ངན་ལས་འདས་པ་དང་དེ་ལ་བརྟེན་ནས་སྡེ་པ་གཞན་དག་བྱུང་བས་དེ་དག་གི་གཞིར་གྱུར་པའི་ཕྱིར་གཞི་ཐམས་ཅད་ཡོད་པར་སྨྲ་བ་ཞེས་བྱའོ་ཞེས་བྱ་བར་
བསྟན་པ་ཡིན་ནོ། །བཅོམ་ལྡན་འདས་ཡོངས་སུ་མྱ་ངན་ལས་འདས་ནས་རིང་པོ་མ་ལོན་པར། དགྲ་བཅོམ་པ་ལྔ་བརྒྱ་རྒྱལ་པོའི་ཁབ་ཏུ་འདུས་ནས་སྡེ་སྣོད་གསུམ་བསྡུས་སོ། །དེ་ནས་ཡོངས་སུ་མྱ་ངན་ལས་འདས་ནས་ལོ་བརྒྱ་རྩ་བཅུ་ལོན་པ་དང་། འཕགས་པ་ཐམས་ཅད་འདོད་
ལ་སོགས་པ་ནས་སྒུར་པོ་དང་ཞི་ལྡན་ལ་ཐུག་པ་དགྲ་བཅོམ་པ་བདུན་བརྒྱས་ཡངས་པ་ཅན་དུ་འདུས་ནས་བསྡུ་བ་གཉིས་པ་མཛད་དེ། ཧུ་ལུ་ཧུ་ལུ་ཀའི་ཆོ་ག་ལ་སོགས་པ་བཅུ་བསལ་ཏེ། རྒྱ་ཆེར་ནི་ཕྲན་ཚེགས་ལས་འབྱུང་ངོ་། །དེ་ནས་རྒྱལ་པོ་དྷརྨ་ཨ་ཤོ་ཀ་ཤི་བ་དང་། དགྲ་
བཅོམ་པ་རྣམས་ཀྱིས་ཐ་མལ་པ་དང་། ཟུར་ཆག་པ་དང་། བར་མར་འདོན་པའི་ཚིག་ལ་མངོན་པར་ཞེན་པའི་འདུལ་བའི་དབང་གི་ཕྱིར་རིམ་གྱིས་གཞུང་གཞན་དང་གཞན་དུ་སྦྱར་ཏེ། རྒྱ་ཆེན་པོའི་སྐད་དུ་སྦྱར་བའི་མདོ་སྡེ་ལ་སོགས་པ་ལྟ་བུ་སྟེ། བསྟན་པ་རྣམ་པ་བཅོ་བརྒྱད་ཀྱི་བར་
དུ་གྱུར་པ་ཡིན་ནོ། །དེའི་ཕྱིར་གཞི་ཞེས་བྱའོ་ཞེས་འཆད་དོ། །གཞན་དག་ན་རེ་བསྟན་པ་ནི་ཡན་ལག་བརྒྱད་དང་ལྡན་པ་ལེགས་པར་སྦྱར་བ་གཅིག་ཁོ་ན་ཡིན་ལ། དེ་ཉིད་བཅོམ་ལྡན་འདས་ཀྱི་བྱིན་གྱི་རླབས་ལས་གདུལ་བའི་དབང་གིས་ཐ་དད་དུ་སྣང་བར་གྱུར་པ་ཡིན་ཏེ། ཅིག་
ཅར་དུ་རྒྱལ་པོ་ཆེན་པོ་བཞི་ལ་བདེན་པ་བསྟན་པ་དང་འདྲའོ། །དེ་ལྟར་ཡང་། གསུང་ནི་གཅིག་ཅིག་གསུང་མཛད་ལ། །དུ་མ་ཉིད་དུ་རིག་འགྱུར་ཏེ། །དེ་ནི་བདག་གི་ཆེད་དུའོ་ཞེས། །ཐམས་ཅད་ཀྱིས་ནི་རྟོགས་ཕྱིར་རོ། །ཞེས་བསྟན་པ་ལྟ་བུའོ་ཞེས་འཆད་དོ། །འོ་ན་ནག་པོ་

བསྟན་པ་དང་། ཆེན་པོ་བསྟན་པ་ཇི་ལྟར་དྲང་། དེ་ལས་ནི་འདི་ན་དགེ་སློང་ཁ་ཅིག་འོངས་ནས་ཆོས་འདི་ནི་བདག་གིས་བཅོམ་ལྡན་འདས་ལས་ཡང་དག་པར་གཟུང་བ་ཡིན་ནོ་ཞེས་བྱ་བ་ནས། རྒྱ་ཆེར་མདོ་སྡེ་ལ་ནི་མི་འཇུག །འདུལ་བ་ལ་མི་སྣང་། ཆོས་ཉིད་
དང་མི་མཐུན་པ་དེ་ནི་སངས་རྒྱས་ཀྱི་གསུང་མ་ཡིན་པའི་ཕྱིར་ཐག་རིང་དུ་དོར་བར་བྱའོ་ཞེས་བྱ་བ་འདི་ནི་ནག་པོ་བསྟན་པ་ཡིན་ནོ། །མདོ་སྡེ་ལ་འཇུག །འདུལ་བ་ལ་སྣང་། ཆོས་ཉིད་དང་མི་མཐུན་པ་མེད་པ་དེ་ནི་སངས་རྒྱས་ཀྱི་གསུང་ཡིན་པའི་ཕྱིར་བླང་བར་བྱའོ་ཞེས་བྱ་བ་འདི་ནི་ཆེན་པོ་
བསྟན་པ་ཡིན་ནོ་ཞེས་བྱ་བའི་བར་དུ་གསུངས་པ་ཡིན་ནོ། །ནག་པོ་བསྟན་པ་དང་ཆེན་པོ་བསྟན་པའི་དོན་ཡང་ཇི་ལྟ་བུ་ཞིག་ཡིན་ཞེ་ན། འདུལ་བ་མ་མོ་ལས་ཆེན་པོ་བསྟན་པ་བཤད་པ། འདི་དག་ནི་ཆོས་མ་ཡིན་པ་ཚར་གཅོད་པའི་ཕྱིར་དང་། ཆོས་ལྟར་བཅོས་པ་ལ་གནོད་པ་བྱེད་པའི་
ཕྱིར་དང་། ངའི་ཉན་ཐོས་རྣམས་ཆོས་མ་ཡིན་པ་ཚར་བཅད་པ་ལ་མི་འཇུག་པར་འགྱུར་བས། དེའི་ཕྱིར་ཆེན་པོ་བསྟན་པ་ཞེས་བྱའོ། །ནག་པོ་ཉིད་དུ་བསྟན་པ་དག་ནི་ནག་པོ་བསྟན་པ་སྟེ། དམ་པའི་ཆོས་ལྟར་བཅོས་པ་ལ་གནོད་པ་བྱེད་པའི་ཕྱིར་དང་། ངའི་ཉན་ཐོས་རྣམས་བཤད་པ་ལ་
འདི་ནི་སངས་རྒྱས་ཀྱི་གསུང་ཡིན། འདི་ནི་སངས་རྒྱས་ཀྱི་གསུང་མ་ཡིན་ནོ་ཞེས་མི་འཇིགས་པར་འགྱུར་བས། དེས་ན་ནག་པོ་བསྟན་པ་ཞེས་བྱའོ་ཞེས་གསུངས་པ་ཡིན་ནོ། །གྱེས་པ་རྣམ་པ་བཅུ་བདུན་ནི་སྡེ་སྣོད་གསུམ་པོ་དེ་ལ་མི་སྣང་བ་ཡིན་ཏེ། སྡོམ་གྱིས་མ་བསྡུས་པའི་ཕྱིར་རོ། །
མི་འཇུག་པ་ཡིན་ཏེ། དོན་ཕན་ཚུན་འགལ་བར་བཤད་པའི་ཕྱིར་རོ། །ཚིག་གི་དོན་གཞན་དུ་བསྟན་པའི་ཕྱིར་ཆོས་ཉིད་དང་ཡང་མི་མཐུན་པ་ཡིན་ན་དེ་དག་ཀྱང་སངས་རྒྱས་ཀྱི་གསུང་དུ་ཇི་ལྟར་བརྗོད་པར་བྱ་ཞེ་ན། དེའི་ཕྱིར་བཤད་པ། བསླབ་པ་ནི་གསུམ་དག་སྟེ། ལྷག་པའི་ཚུལ་
ཁྲིམས་དང་། ལྷག་པའི་སེམས་དང་། ལྷག་པའི་ཤེས་རབ་བོ། །དེ་ལ་ལྷག་པའི་ཚུལ་ཁྲིམས་ནི་འདུལ་བ་ཡིན་ནོ། །ལྷག་པའི་ཤེས་རབ་ནི་ཟག་པ་མེད་པའི་ཤེས་རབ་ཀྱི་རང་བཞིན་ཆོས་མངོན་པ་ཡིན་ནོ། །ལྷག་པའི་སེམས་ནི་བསམ་གཏན་དང་གཟུགས་མེད་པ་ཡིན་ནོ། །དེ་སྟོན་

པར་བྱེད་པའི་གཞུང་ལ་ཡང་བཏགས་ནས་དེ་སྐད་ཅེས་བྱའོ། །གྱེས་པ་རྣམ་པ་བཅུ་བདུན་པོ་དེ་དག་ཀྱང་བསླབ་པ་གསུམ་པོ་དེ་དག་ཉིད་སྟོན་པར་བྱེད་པ་ཡིན་པས། མདོ་སྡེ་ལ་འཇུག་པ་ཡང་ཡིན། འདུལ་བ་ལ་སྣང་བ་ཡང་ཡིན། ཆོས་ཉིད་དང་མཐུན་པ་ཡང་ཡིན་ཏེ། མྱ་ངན་ལས་འདས་པ་
དང་མཐུན་པའི་ཕྱིར་རོ། །ཆོས་ཉིད་ཅེས་བྱ་བ་འདི་ཅི་ཡིན་ཞེ་ན། ཆོས་རྣམས་ཀྱི་ངང་ཚུལ་ཅན་ཡིན་ཏེ། དཔེར་ན་གཟུགས་སུ་རུང་བའི་མཚན་ཉིད་ནི་གཟུགས་ཡིན་ནོ་ཞེས་བྱ་བ་ལ་སོགས་པ་ལྟ་བུ་ཡིན་ནོ། །དེ་བཞིན་དུ་ཆོས་ཀྱི་ཕྱག་རྒྱ་ཡང་ཡིན་ཏེ། དེ་ཡང་ཆོས་ཐམས་ཅད་ནི་བདག་
མེད་པ་ཡིན། འདུས་བྱས་ཐམས་ཅད་ནི་སྐད་ཅིག་མ་ཡིན། མྱ་ངན་ལས་འདས་པ་ནི་ཞི་བ་ཡིན་པས། ཆོས་རྣམས་ཐམས་ཅད་བདག་མེད་དེ། །འདུས་བྱས་ཐམས་ཅད་སྐད་ཅིག་མ། །མྱ་ངན་འདས་ཞི་དེ་དག་ནི། །ཆོས་ཀྱི་ཕྱག་རྒྱ་མཚན་ཉིད་གསུམ། །ཞེས་གསུངས་པ་
ཡིན་ཏེ། དེ་ནི་ཆོས་ཀྱི་ཕྱག་རྒྱའི་མཚན་ཉིད་གསུམ་ཡིན་ནོ། །མང་དུ་སྨོས་ཀྱང་ཅི་དགོས་པས། མདོ་སྡེ་ལ་སོགས་པ་གང་ཞིག་ཕྱག་རྒྱ་གསུམ་གྱི་ཕྱག་རྒྱས་བཏབ་པ་ཡིན་ལ། བསླབ་པ་གསུམ་སྟོན་པར་བྱེད་པ་དེ་ནི་སངས་རྒྱས་ཀྱི་གསུང་ཡིན་པར་ཤེས་པར་བྱའོ། །ཡང་
བཤད་པ། ཕྱག་རྒྱ་གསུམ་དང་ཡང་དག་ལྡན། །བསླབ་པ་གསུམ་ནི་རབ་སྟོན་ཅིང་། །ཐོག་མ་བར་དང་མཐར་དགེ་བ། །སངས་རྒྱས་གསུང་དུ་མཁས་པས་རྟོགས། །དེ་ལས་གཞན་པ་ནི་སངས་རྒྱས་ཀྱི་གསུང་མ་ཡིན་པར་ཤེས་པར་བྱ་སྟེ། དཔེར་ན་བཅོམ་ལྡན་འདས་
ཡོངས་སུ་མྱ་ངན་ལས་འདས་ནས་ལོ་བརྒྱ་རྩ་བཅུ་ལོན་པ་ན་རུང་བ་མ་ཡིན་པའི་གཞི་བཅུ་བྱུང་བ་ལྟ་བུ་སྟེ། དེ་དག་ནི་ལྷག་པའི་ཚུལ་ཁྲིམས་སྟོན་པར་བྱེད་པ་མ་ཡིན་པས་འདུལ་བ་ལ་མི་འཇུག་པ་ཡིན། ལྷག་པའི་སེམས་སྟོན་པར་བྱེད་པ་མ་ཡིན་པས་མདོ་སྡེ་ལ་མི་སྣང་བ་ཡིན། ལྷག་
པའི་ཤེས་རབ་སྟོན་པར་བྱེད་པ་མ་ཡིན་ལ། དེ་དང་རྗེས་སུ་མཐུན་པ་ཡང་མ་ཡིན་པས་ཆོས་ཉིད་དང་མི་མཐུན་པ་ཡིན་ནོ། །དེའི་ཕྱིར་སྡུད་པ་པོ་གཉིས་པས་བོར་བ་ཡིན་ནོ། །དེ་ལྟ་བས་ན་སྡེ་པ་གཞན་འདོན་པ་དག་ཀྱང་སངས་རྒྱས་ཉིད་ཀྱི་གསུང་ཉིད་ཡིན་པར་ཐེ་ཚོམ་མེད་པ་ཡིན་ནོ། །

གཞན་ཡང་གཙོར་ན་དོན་ཁོ་ན་སངས་རྒྱས་ཀྱི་གསུང་ཉིད་དུ་བཞེད་པའི་ཕྱིར་དང་། དགྲ་བཅོམ་པ་རྣམས་ཀྱིས་རྣམ་པར་དབྱེ་བར་མཛད་པའི་ཕྱིར་དང་། སངས་རྒྱས་ཀྱི་བྱིན་གྱི་རླབས་ལས་བྱུང་བའི་ཕྱིར་དང་། རྒྱལ་པོ་ཀྲྀ་ཀཱིའི་རྨི་ལམ་སད་པའི་མདོ་ལས། ཡང་
དག་པར་རྫོགས་པའི་སངས་རྒྱས་འོད་སྲུངས་ཀྱིས་རྒྱལ་པོ་ཀྲྀ་ཀཱི་ལ་བཀའ་སྩལ་པ། རྒྱལ་པོ་ཆེན་པོ་ཁྱོད་ཀྱི་རྨི་ལམ་དུ་མི་བཅོ་བརྒྱད་ཀྱིས་རས་ཡུག་གཅིག་འདྲེན་པར་མཐོང་བ་དེ་ནི་ཤཱཀྱ་ཐུབ་པའི་བསྟན་པ་རྣམ་པ་བཅོ་བརྒྱད་དུ་གྱེས་པར་འགྱུར་ལ། དེའི་རྣམ་པར་གྲོལ་བའི་རས་ནི་གྱེས་པར་མི་
འགྱུར་རོ། །ཞེས་འབྱུང་བ་ཡིན་པའི་ཕྱིར་དེ་དག་ཀྱང་སངས་རྒྱས་ཉིད་ཀྱི་གསུང་ཉིད་དུ་མི་འགལ་ལོ། །ཞར་ལ་འོངས་པ་རྫོགས་སོ།། །།གང་གི་མན་ངག་དབང་གིས་འདི་ལྟར་ཕྱེ། །བསོད་ནམས་བདག་ལས་སྐྱེས་དེས་འགྲོ་བ་རྣམས། །མྱུར་དུ་བལྟ་བའི་རྣམ་བསལ་ཤཱཀྱ་ཡི། །
འོད་བསྟན་དངོས་པོའི་དེ་ཉིད་མཐོང་གྱུར་ཅིག །གཞན་ཡང་། འདིར་བཤད་པ་ནི། སྔོན་ཆད་མ་བྱུང་བ་དག་འགའ་ཡང་མ་བྲིས་འོན་ཀྱང་ནི། །བདག་གི་མཁན་པོ་ས་མ་ཏ་ཏར་གནས་པའི་རྒྱན་དུ་གྱུར་པ་གྲགས་པ་ཐོབ། །བསོད་ནམས་གྲགས་པ་ལས་ནི་བདག་གིས་མཉན་ནས་རང་གི་འདུལ་
བའི་ཆོ་ག་ཡི། །རྣམ་པར་བཤད་པ་འདི་ནི་གསུམ་རིག་རྣམས་ཀྱི་བཞེད་པའི་ཕྱོགས་ཀྱི་གཞི་ཙམ་བསྟན་པ་ཡིན། །དེ་ཉིད་མ་མཐོང་རང་གི་བློ་ཡིས་དགོངས་པ་དག །ཐ་དད་པ་ཡི་འདུལ་བ་རྣམ་པར་དབྱེ་མི་རུང་། །སུ་ཞིག་བདག་ཉིད་སྡིག་པའི་སྔགས་ཀྱིས་དྲེགས་པ་ཡིན། །ལག་པ་འཇིགས་
པའི་སྦྲུལ་གྱི་བུ་གར་འཇུག་པར་བྱེད། །དེ་ཕྱིར་ཆོས་འདུལ་ཟབ་མོ་གཏན་ལ་དབབ་པ་འདི། །བྱེ་བྲག་བཤད་པ་དག་ལ་བརྟེན་ནས་བྱས་ཡིན་ཏེ། །མིག་དང་ལྡན་པ་ཟེར་བའི་གོམ་རྗེས་འབྲངས་ན་ནི། །བགྲོད་དཀའ་དག་ཏུའང་ལོང་བ་བདེ་བར་འགྲོ་བར་བྱེད། །གཞན་ཡང་བླ་མ་དག་ནི་རིང་
ན་བཞུགས་པ་གྲགས་པས་རྣམ་པར་ཁྱབ་པ་ཞི་བའི་འོད་ཀྱིས་བདག །དྲན་པས་དགོངས་པ་མཛད་པར་གྱུར་ཅིག་སྙམ་ནས་བདག་གིས་འགྲེལ་པ་དོན་གསལ་བྱས་པ་ཡིན། །བསྟན་བཅོས་སྣ་ཚོགས་མཁས་པའི་བློ་འབྱོར་གྱུར་པ་གྲགས་པ་དག་གི་རྒྱལ་མཚན་མཐོ་ལྡན་པ། །དེ་ཉིད་དོན་ནི་གཏན་

ལ་འབེབས་པ་རྣམས་ཀྱིས་ན་ལེནྡྲ་ཡི་བདར་ལ་བདར་བ་ཡིན། །དགེ་ཚུལ་གང་དག་འདུལ་བ་དག་ལ་མངོན་བརྩོན་ཞིང་། །བསླབ་པ་དག་ལ་ལྷོད་པ་མེད་པའི་བློ་རྒྱུ་བ། །དེ་དག་རྟག་ཏུ་ནད་མེད་པ་ཡི་འོད་ལྡན་འདི། །སྟོན་པར་བྱེད་པས་གཞན་དག་ལ་ནི་གྲགས་གྱུར་ཅིག །འཕགས་པ་གཞི་ཐམས་
ཅད་ཡོད་པར་སྨྲ་བའི་དགེ་ཚུལ་གྱི་ཚིག་ལེའུར་བྱས་པའི་འགྲེལ་པ་འོད་ལྡན་ཞེས་བྱ་བ་མང་དུ་ཐོས་པའི་སློབ་དཔོན་ཆེན་པོ་ཤཱཀྱ་འོད་ཀྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་སརྦ་ཛྙཱ་དེ་བ་དང་། ཞུ་ཆེན་གྱི་ལོ་ཙཱ་བ་བནྡེ་གཙང་དེ་བེནྡྲ་རཀྵི་ཏས་བསྒྱུར་ཅིང་ཞུས་ཏེ་གཏན་ལ་ཕབ་པ། །
༄༅། །རྒྱ་གར་སྐད་དུ། ཏྲིང་ཤ་ཏ་ཀཱ་རི་ཀཱ་བྱཱ་ཁྱཱན། བོད་སྐད་དུ། ཚིག་ལེའུར་བྱས་པ་སུམ་བརྒྱ་པའི་རྣམ་པར་བཤད་པ། བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །བདེ་གཤེགས་བསླབ་པ་ཚད་མེད་ཡོན་ཏན་དཔག་ཏུ་མེད་ལྡན་པ་དག་བླངས་
ནས་སྐྱོང་བྱེད་ཅིང་། །བསྟན་བཅོས་རྣམ་པ་སྣ་ཚོགས་པ་ལ་མངོན་པར་སྦྱོར་བས་བློ་གྲོས་ངན་པ་རབ་སྤངས་པ། །སྒྲ་རྣམས་ཉེས་པ་མ་ལུས་བསལ་ཞིང་དགའ་བའི་ཚིག་མཆོག་ལེགས་པར་སྦྱར་བ་དོན་མཆོག་དང་། །མདོ་སྡེ་ཆོས་མངོན་བསྟན་བཅོས་རིགས་མང་འདུལ་བས་ཐམས་ཅད་ཡོད་
སྨྲ་རྩ་བར་གྱུར་པ་རྒྱལ་གྱུར་ཅིག །འགྲོ་གཞན་མ་ལུས་པ་ཡི་དོན་མཛད་ནས། །ཐམས་ཅད་མཁྱེན་པའི་གྲུབ་མཆོག་བརྙེས་གྱུར་པའི། །བདེ་གཤེགས་དེ་ལ་སྤྱི་བོས་ཕྱག་འཚལ་ལོ། །དགེ་ཚུལ་ཚིག་ལེའུར་བྱས་པ་རྣམ་དབྱེ་བྱ། །ཇི་སྟེ་ཚིག་ལེའུར་བྱས་བཤད་གཞག་མཛད་ཀྱང་། །
དེ་ནི་དགེ་ཚུལ་དག་ལ་མཆོག་མིན་པས། །དོན་འདི་རྣམ་པར་དཔྱད་ནས་བདག་གིས་ནི། །སློབ་མ་ལ་ཕན་རྒྱས་བཤད་བྱས་པ་ཡིན། །དེ་ལ་གཞི་ཐམས་ཅད་ཡོད་པར་སྨྲ་བའི་སློབ་དཔོན་གྱིས་མངོན་པར་འདོད་པའི་རྒྱུ་མཚན་བཅོམ་ལྡན་འདས་ལ་ཕྱག་འཚལ་བ་སྔོན་དུ་འགྲོ་བ་ཅན་གྱི་སྤྱོད་པ་ཡང་
དག་པར་བསྡུ་བར་བཞེད་ནས། དཔལ་འབྱོར་གནས་དང་ཞེས་བྱ་བ་ལ་སོགས་པས་ཚིག་ལེའུར་བྱས་པ་བརྩམས་པ་ཡིན་ཏེ། དེ་ལ་ངེས་པར་འབྱུང་བའི་ཚུལ་ཁྲིམས་བཤད་པར་བྱ་ཞེས་བྱ་བའི་བཤད་པ་འདི་སྦྱར་བར་བྱའོ། །དེ་ལ་འགྲོ་བས་བྱུང་བ་སྟེ་བྱུང་བ་ཞེས་བྱ་བ་དངོས་པོ་སྒྲུབ་པར་བྱེད་

པ་གཟུང་གི་འདིས་འགྲོ་བར་བྱེད་པས་ན་ཞེས་བྱ་བར་ནི་མ་ཡིན་ཏེ། བྱུང་བ་ནི་འདིར་ཐོབ་པ་ལ་བྱའི་འགྲོ་བར་བྱེད་པ་ལ་ནི་མ་ཡིན་ནོ། །ཅིའི་ཕྱིར་ཞེ་ན། ལམ་དང་འགྲོ་བར་བྱེད་པ་དེ་དག་ནི་གཙོ་བོ་མ་ཡིན་པ་ཉིད་ཀྱི་ཕྱིར་རོ། །ལྷག་མ་མ་ལུས་པར་བྱུང་བ་ནི་ངེས་པར་འབྱུང་བ་སྟེ།
ཡང་ཕྱིར་མི་ལྡོག་པ་དང་ཁམས་གསུམ་པ་ལས་ཤིན་ཏུ་འདས་པའི་མཚན་ཉིད་ཡིན་པས་ཞེས་བྱ་བའི་བར་དུའོ། །དེ་བས་ན་འདིས་ནི་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་ཡང་དག་པར་ཐོབ་པར་བསྟན་པ་ཡིན་ནོ། །དེའི་དོན་ནམ་དེའི་རྒྱུ་མཚན་ནམ་དེ་ཐོབ་པར་བྱེད་པའི་ཚུལ་ཁྲིམས་ནི་
ངེས་འབྱུང་ཚུལ་ཏེ། ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་ཐོབ་པར་བྱེད་པ་ཞེས་བྱ་བའི་བར་དུ་སྟེ། །དེ་ནི་དོན་བཤད་པ་ཡིན་ནོ། །བསྡུ་བ་ཉིད་ནི་ངེས་པར་འབྱུང་བ་འམ། ངེས་པར་འབྱུང་བའི་ཚུལ་ཁྲིམས་ནི་ངེས་པར་འབྱུང་བའི་ཚུལ་ཏེ། ཚུལ་ཁྲིམས་དེས་བྱ་བ་དེ་ནི་དེའི་དོན་
ཁོ་ན་ཡིན་པའི་ཕྱིར་རོ། །ཚུལ་ཁྲིམས་ཀྱང་འདིར་དགེ་སྦྱོང་གི་བསླབ་པའི་གཞི་ལ་བྱའོ། །ཅི་ཞིག་བྱས་ནས་བཤད་པར་བྱ་ཞེ་ན། སངས་རྒྱས་ལ་ནི་མགོས་གཏུགས་ཞེས་བྱ་བ་སྨོས་ཏེ། །དངོས་པོ་མ་ལུས་པ་ཐུགས་སུ་ཆུད་པའི་ཕྱིར་སངས་རྒྱས་སམ་མི་ཤེས་པའི་གཉིད་ལས་སད་པའི་ཕྱིར་
སངས་རྒྱས་ཏེ། །སྐྱེས་བུ་གཉིད་སད་པ་བཞིན་ནོ། །དེ་བས་ན་སངས་རྒྱས་བཅོམ་ལྡན་འདས་དེ་ལ་ཕྱག་བཙལ་ནས་སོ། །ཅིས་ཤེ་ན། མགོས་ཞེས་སྨོས་ཏེ་སྤྱི་བོས་སོ། །འདི་སྐད་དུ་དེ་བཞིན་གཤེགས་པ་ལ་ཡན་ལག་གི་མཆོག་མགོ་བོས་མངོན་པར་གཏུགས་ཏེ་ངེས་པར་འབྱུང་བའི་ཚུལ་ཁྲིམས་
བཤད་པར་བྱའོ་ཞེས་བསྟན་པ་ཡིན་ནོ། །ཁྱད་པར་ཇི་ལྟ་བུ་དང་ལྡན་པའི་ངེས་པར་འབྱུང་བའི་ཚུལ་ཁྲིམས་ཞེ་ན་དཔལ་འབྱོར་གནས་དང་ཞེས་བྱ་བ་སྨོས་ཏེ་དཔལ་གྱི་འབྱོར་པ་ནི་དཔལ་འབྱོར་ཏེ། འབྱོར་པ་ནི་ཕུན་སུམ་ཚོགས་པ་སྟོན་པར་བྱེད་པ་ཡིན་ནོ། །དེའི་གཞི་དང་རྟེན་དང་རྒྱུ་དང་གནས་ཡིན་
པས་ས་དང་འདྲ་བར་གནས་ཡིན་ནོ་ཞེས་བྱ་བ་དེའི་ཕྱིར་དེ་བཤད་པར་བྱའོ་ཞེས་བྱ་བར་སྦྱར་རོ། །འདིས་ནི་འདིར་ཚངས་པ་ལ་སོགས་པ་མངོན་པར་མཐོ་བའི་མཚན་ཉིད་ཀྱི་ཆོས་ཀྱི་རྒྱུ་ཡིན་ནོ་ཞེས་བསྟན་པར་འགྱུར་རོ། །ཚུལ་ཁྲིམས་ཀྱིས་དེ་དག་ཐོབ་པ་ཡིན་ནོ་ཞེས་བྱས་ནས་ཡང་ཚུལ་ཁྲིམས་དེ་ཁྱད་པར་དུ་

བྱེད་དོ། །ཚུལ་ཁྲིམས་གང་གིས་ཕུང་པོ་ལྔའི་བདག་ཉིད་ཀྱི་སྡུག་བསྔལ་སྤངས་ཤིང་བསལ་ཏེ་བོར་བ་དེ་ནི་སྡུག་བསྔལ་སྤོང་འགྱུར་རོ། །ཕུང་པོ་ལྔ་ཡང་འདིར་གཟུགས་ཀྱི་ཕུང་པོ་དང་། །ཚོར་བའི་ཕུང་པོ་དང་། འདུ་ཤེས་ཀྱི་ཕུང་པོ་དང་། འདུ་བྱེད་ཀྱི་ཕུང་པོ་དང་། རྣམ་པར་ཤེས་པའི་ཕུང་པོ་
ཞེས་བྱའོ། །དེ་དག་ཉིད་སྡུག་བསྔལ་ཡིན་ཏེ། སྡུག་བསྔལ་གསུམ་ཉིད་དང་འབྲེལ་པའི་ཕྱིར་རོ། །ཅི་འདིས་ནི་ཕུང་པོ་ལྷག་མ་མེད་པའི་མྱ་ངན་ལས་འདས་པའི་རྒྱུ་ཡིན་ནོ་ཞེས་བཤད་པ་ཡིན་ནོ། །ཚུལ་ཁྲིམས་དེ་ཁྱད་པར་ཅི་ལྟ་བུ་ཞེ་ན། འཇིག་ཚོགས་ལྟ་བ་ཞེས་བྱ་བ་སྨོས་ཏེ། འཇིག་པར་
བྱེད། ཉམས་པར་བྱེད། ཟད་པར་བྱེད་པས་ན་འཇིག་པའོ། །ཚོགས་ནི་ཕུང་པོ་ཡིན་ནོ། །འཇིག་པ་ཡང་དེ་ཡིན་ལ་ཚོགས་ཀྱང་དེ་ཡིན་པས་འཇིག་ཚོགས་ཏེ། དོན་གཅིག་གི་སྒོ་ནས་ཁྱད་པར་དུ་བྱེད་པ་ཞེས་བྱ་བའི་བསྡུ་བ་ཡིན་ནོ། །འཇིག་ཚོགས་སུ་ལྟ་བ་ནི་འཇིག་ཚོགས་ལྟ་བའོ། །ལྟ་
བ་ནི་ཕྱོགས་ཏེ་ཤེས་རབ་ཀྱི་ཁྱད་པར་ཡིན། །ཇི་ལྟར་ཡང་སྤྱི་ཉིད་ཀྱི་སྒོ་ནས་དེ་སྐད་དུ་བཤད་པ་དེ་ལྟ་ན་ཡང་བདག་དང་བདག་གི་རྣམ་པར་རབ་ཏུ་འཇུག་པའི་ཤེས་རབ་ཁོ་ན་འཇིག་ཚོགས་སུ་ལྟ་བར་བཤད་པ་ཡིན་ཏེ། བཀའ་ལས་ཀྱང་གསུངས་པའི་ཕྱིར་རོ། །གདོན་ནི་ཤ་ཟ་ལ་སོགས་པ་སྟེ་གདོན་
དང་འདྲ་བས་གདོན་ཏེ། གསོ་དཀའ་བ་ཉིད་ཡིན་པའི་ཕྱིར་རོ། །འཇིག་ཚོགས་ལ་ལྟ་བ་ཡང་དེ་ཡིན་ལ་གདོན་ཡང་དེ་ཡིན་པས་ན་འཇིག་ཚོགས་ལྟ་ལ་ཞེན་པའི་གདོན་ནོ། །རྩ་བ་ནི་རྒྱུ་ལ་བྱ་སྟེ་འཇིག་ཚོགས་ལྟ་ལ་ཞེན་པའི་གདོན་ཡང་ཡིན་ལ་རྩ་བ་ཡང་ཡིན་པའི་ཕྱིར་འཁོར་བའི་འཇིག་ཚོགས་
ལྟ་ལ་ཞེན་པའི་གདོན་གྱི་རྩ་བའོ། །དེ་བས་ན་ཚུལ་ཁྲིམས་དེ་ནི་དེ་འཇོམས་པར་བྱེད་པའི་ཕྱིར་འཇིག་ཚོགས་ལྟ་ལ་ཞེན་པའི་གདོན་གྱི་རྩ་བ་འཇོམས་པའོ། །འདིས་ཀྱང་འདི་སྐད་དུ་ཚུལ་ཁྲིམས་དེ་ནི་ཕུང་པོ་ལྷག་མ་དང་བཅས་པའི་མྱ་ངན་ལས་འདས་པའི་དབྱིངས་ཀྱི་རྒྱུ་ཡིན་ནོ་ཞེས་བསྟན་པ་ཡིན་ཏེ།
གང་གི་ཕྱིར་འཇིག་ཚོགས་སུ་ལྟ་བ་ལས་ཉོན་མོངས་པ་རབ་ཏུ་སྐྱེ་བ་དེའི་ཕྱིར་དེ་སྤངས་པས་ཉོན་མོངས་པ་ཐམས་ཅད་སྤང་བར་འགྱུར་རོ། །ཡང་ན་དེ་སྤངས་མ་ཐག་ཏུ་གཞན་འདོད་ཆགས་ལ་སོགས་པ་འགའ་ཞིག་ནི་དུས་མཉམ་དུ་འགའ་ཞིག་ནི་རིམ་གྱིས་ཕྱིས་སྤོང་བར་འགྱུར་བ་དེ་བས་ན་

གདོན་མི་ཟ་བར་མྱ་ངན་ལས་འདས་པའི་རྒྱུ་ཡིན་ནོ། །གང་གི་ཕྱིར་བདག་མེད་པར་བསྟན་པས་ནི་ཐོབ་པ་ཡིན་ན་དགེ་སྦྱོང་གི་ཚུལ་ཁྲིམས་ཀྱིས་ཇི་ལྟར་ཐར་པ་ཐོབ་པར་འགྱུར་ཞེ་ན། དེ་ལ་ཉེས་པ་མེད་དེ། གང་གི་ཕྱིར་ཚུལ་ཁྲིམས་ལ་གནས་ནས་ཐོས་པ་དང་བསམ་པ་དང་ལྡན་པ་
བསྒོམ་པ་ལ་རབ་ཏུ་སྦྱོར་བ་དེ་ལས་རིམ་གྱིས་ཡེ་ཤེས་སྐྱེ་བར་འགྱུར་བའི་ཕྱིར་བརྒྱུད་པས་མྱ་ངན་ལས་འདས་པ་གཉིས་ཀྱི་རྒྱུར་འགྱུར་ཏེ། ཕུང་པོའི་བདུད་ལས་རྒྱལ་བ་དང་། གཉིས་པས་ཉོན་མོངས་པའི་བདུད་ལས་རྒྱལ་བ་བསྟན་པ་ཡིན་ནོ། །གཞན་ཡང་མེ་ཏོག་མདའ་འཇོམས་ཞེས་བྱ་བ་ལ་སོགས་
པས་ངེས་པར་འབྱུང་བའི་ཚུལ་ཁྲིམས་ཁྱད་པར་དུ་བྱེད་དེ། །མེ་ཏོག་དང་འདྲ་བའི་མདའ་གང་ལ་ཡོད་པ་དེ་ནི་མེ་ཏོག་མདའ་ཅན་ཏེ་འདོད་པའི་ལྷ་ཡིན་ལ། དེ་བཅོམ་པ་ནི་ཕམ་པ་ཡིན་ནོ། །དེའི་རྒྱུ་ཉིད་ཡིན་པའི་ཕྱིར་ཚུལ་ཁྲིམས་དེ་ནི་མེ་ཏོག་མདའ་འཇོམས་སོ། །གང་གི་ཕྱིར་དེ་ལ་གནས་ནས་ལྷའི་
བུའི་བདུད་ཀྱི་ཡུལ་ཡོངས་སུ་སྤངས་པའི་ཕྱིར་དེ་ཕམ་པར་བྱེད་པར་འགྱུར་ཏེ། འདིས་ཀྱང་ལྷའི་བུའི་བདུད་ལས་རྒྱལ་བའི་རྒྱུ་ཉིད་ཡིན་པར་བསྟན་ཏོ། །ཡང་ན་ཁྱད་པར་དེ་དག་བཅོམ་ལྡན་འདས་ཉིད་ཀྱི་ཡིན་གྱི་ངེས་པར་འབྱུང་བའི་ཚུལ་ཁྲིམས་ཀྱི་ནི་མ་ཡིན་ཏེ། དེ་ལ་སངས་རྒྱས་ལ་ནི་མགོས་
གཏུགས་ནས། ངེས་པར་འབྱུང་བའི་ཚུལ་ཁྲིམས་བཤད་པར་བྱའོ་ཞེས་བྱ་བར་སྦྱར་རོ། །ཁྱད་པར་ཇི་ལྟ་བུ་དང་ལྡན་པའི་སངས་རྒྱས་བཅོམ་ལྡན་འདས་ཤེ་ན། དཔལ་འབྱོར་གནས་དང་ཞེས་བྱ་བ་སྨོས་ཏེ། དཔལ་གྱིས་འབྱོར་བ་ནི་དཔལ་འབྱོར་ཡིན་ལ། དེ་ཡང་རྣམ་པ་གཉིས་ཏེ། བསོད་ནམས་
ཀྱི་ཚོགས་ཀྱི་མཚན་ཉིད་དང་། ཡེ་ཤེས་ཀྱི་ཚོགས་ཀྱི་མཚན་ཉིད་དོ། །དེའི་གནས་ནི་གཞི་སྟེ། སངས་རྒྱས་བཅོམ་ལྡན་འདས་བསོད་ནམས་དང་ཡེ་ཤེས་ཀྱི་ཚོགས་དང་ཡང་དག་པར་ལྡན་པ་ཉིད་ཀྱི་ཕྱིར་རོ། །ཡང་ན་བཅོམ་ལྡན་འདས་ནི་འཇིག་རྟེན་པ་དང་འཇིག་རྟེན་ལས་འདས་པའི་དཔལ་འབྱོར་པའི་
གནས་ཏེ། འབྱུང་བའི་གནས་ཡིན་ནོ། །གང་གི་ཕྱིར་བཅོམ་ལྡན་འདས་བསོད་ནམས་ཀྱི་ཞིང་བླ་ན་མེད་པ་ལ་བརྩམས་ནས་སྦྱིན་པ་དང་མཆོད་པ་ལ་སོགས་པས་དེ་དག་ཐོབ་པར་འགྱུར་བ་དེ་ཉིད་ཀྱི་ཕྱིར་བཅོམ་ལྡན་འདས་རྐང་གཉིས་ཀྱི་མཆོག་བསོད་ནམས་ཀྱི་ཞིང་ཞེས་བྱའོ། །གཞན་ཡང་སྡུག་བསྔལ་

སྤོང་འགྱུར་ཞེས་བྱ་བས་ཁྱད་པར་དུ་བྱེད་དེ། བཅོམ་ལྡན་འདས་གང་གིས་འཁོར་བའི་སྡུག་བསྔལ་སྤངས་ཤིང་བསལ་བ་དེ་ནི་སྡུག་བསྔལ་སྤོང་འགྱུར་ཏེ། གང་གི་ཕྱིར་བཅོམ་ལྡན་འདས་ནི་བསོད་ནམས་ཀྱི་ཚོགས་དང་ལྡན་པ་ཉིད་ཀྱི་ཕྱིར་སྐུའི་བདེ་བ་མངའ་ལ། ཡེ་ཤེས་ཀྱི་ཚོགས་དང་ཡང་དག་པར་ལྡན་
པ་ཉིད་ཀྱི་ཕྱིར་ཐུགས་ཀྱི་བདེ་བ་མངའ་བ་དེའི་ཕྱིར་སྡུག་བསྔལ་སྤངས་པར་གྱུར་པ་ཡིན་ནོ། །ཡང་ན་བཅོམ་ལྡན་འདས་གང་གིས་ཕུང་པོ་ལྔའི་བདག་ཉིད་ཀྱི་སྡུག་བསྔལ་སྤངས་པ་དེ་ནི་སྡུག་བསྔལ་སྤོང་འགྱུར་རོ། །འདིས་ཀྱང་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་ཐོབ་པར་བསྟན་
པས་བཅོམ་ལྡན་འདས་ལ་བསྟོད་པར་འགྱུར་ལ། སྔ་མས་ནི་བསོད་ནམས་དང་ཡེ་ཤེས་ཀྱི་ཚོགས་དང་ཡང་དག་པར་ལྡན་པའི་སྒོ་ནས་བསྟོད་པ་ཡིན་ནོ། །གཞན་ཡང་འཇིག་ཚོགས་ལྟ་ལ་ཞེས་བྱ་བ་ལ་སོགས་པས་བཅོམ་ལྡན་འདས་ཁྱད་པར་དུ་བྱེད་དེ། སེམས་ཅན་རྣམས་ཀྱི་འཇིག་ཚོགས་སུ་
ལྟ་བའི་གདོན་གྱི་རྩ་བ་འཇོམས་པར་མཛད་པའི་ཕྱིར་འཇིག་ཚོགས་ལྟ་ལ་ཞེན་པའི་གདོན་གྱི་རྩ་བ་འཇོམས་པ་སྟེ། བདག་ཉིད་ཀྱི་འཇིག་ཚོགས་སུ་ལྟ་བ་སྤངས་པ་མེད་པར་འཇིག་རྟེན་གྱིས་མི་ནུས་པའི་ཕྱིར་ཤུགས་ཀྱིས་བཅོམ་ལྡན་འདས་ནི་འཇིག་ཚོགས་སུ་ལྟ་བ་སྤངས་པར་བསྟན་པར་འགྱུར་རོ་ཞེས་དེ་
དག་མ་ལུས་པ་ནི་ཚིག་གཅིག་པོ་འདིས་བཤད་པ་ཡིན་ནོ། །གཞན་ཡང་མེ་ཏོག་མདའ་འཇོམས་ཞེས་བྱ་བས་ཁྱད་པར་དུ་བྱེད་དེ། ལྷའི་བུ་གང་ལ་མེ་ཏོག་གི་མདའ་ཡོད་པ་དེ་འཇོམས་པའི་རྒྱུ་ཉིད་ཡིན་པའི་ཕྱིར་ན། བཅོམ་ལྡན་འདས་ནི་མེ་ཏོག་མདའ་འཇོམས་ཏེ། བཅོམ་ལྡན་འདས་ཀྱིས་
ལྷའི་བུའི་བདུད་འཁོར་དུ་མ་ཅན་བྱམས་པས་ཕམ་པར་མཛད་པའི་ཕྱིར་རོ། །ལྷག་མ་ནི་སྔ་མ་བཞིན་ནོ། །ད་ནི་གང་ཞིག་སྲོག་གཅོད་ཅེས་བྱ་བ་ལ་སོགས་པས་བཤད་མ་ཐག་པའི་ངེས་པར་འབྱུང་བའི་ཚུལ་ཁྲིམས་ཀྱི་རང་གི་ངོ་བོ་འཆད་པར་བྱེད་དེ། ལྡོག་པར་བྱེད་པས་ན་ལྡོག་པ་སྟེ་སོ་སོར་ལྡོག་
པ་ཞེས་བྱ་བའི་བར་དུའོ། །སོ་སོར་འཇུག་པས་ན་ངེས་པར་འབྱུང་བའི་ཚུལ་ཁྲིམས་ཏེ་སྲོག་གཅོད་པ་ལ་སོགས་པ་ལས་ལྡོག་པ་གང་ཡིན་པ་དེ་ནི་ཚུལ་ཁྲིམས་ཡིན་ནོ་ཞེས་བྱ་བར་སྦྱར་རོ། །ད་ནི་གང་དག་ལས་ལྡོག་པ་དེ་བཤད་པར་བྱ་སྟེ། སྲོག་ཅེས་བྱ་བ་ནི་འཚོ་བའི་མཚན་ཉིད་ཅན་གྱི་ཆོས་ཡིན་ལ།

དེ་གང་ལ་ཡོད་པ་དེ་ནི་སྲོག་ཆགས་སོ། །དེ་གཅོད་པ་ནི་འགོག་པར་བྱེད་པ་ཡིན་ཏེ། རྟེན་ཉམས་པར་བྱེད་པ་དེ་ནི་སྲོག་གཅོད་པ་ཡིན་པས་དེ་ལས་སོ། །གཞན་གྱི་ནོར་ནི་གཞན་གྱི་གཏེར་ཏེ་གཞན་གྱི་རྫས་ཞེས་བྱའོ། །དེ་འཕྲོག་པར་བྱེད་པས་ན་འཕྲོག་པ་སྟེ་དེ་ལས་
སོ། །ཚངས་པའི་སྒྲ་ནི་མྱ་ངན་ལས་འདས་པ་ཡིན་ལ། དེའི་ཆེད་དུ་སྤྱོད་པ་ནི་ཚངས་པར་སྤྱོད་པ་སྟེ་བསྡུ་བ་ནི་ངེས་པར་འབྱུང་བའི་ཚུལ་ཁྲིམས་དང་འདྲའོ། །ཚངས་པར་སྤྱོད་པ་མ་ཡིན་པ་ནི་མི་ཚངས་པར་སྤྱོད་པ་སྟེ། དེ་ལས་བཟློག་པའོ། །ཇི་ལྟར་ཡང་སྲོག་གཅོད་པ་ལ་སོགས་པ་སྤྱིར་གཟུང་བར་བྱ་
བ་ཡིན་པ་དེ་ལྟ་ན་ཡང་གྲགས་པས་འཁྲིག་པའི་ཆོས་ཁོ་ན་ལ་གཟུང་བར་བྱའི་གཞན་ལ་ནི་མ་ཡིན་ནོ། །དེ་ཉིད་ཀྱི་ཕྱིར་བཅོམ་ལྡན་འདས་ཀྱིས་སོ་སོར་ཐར་པ་ལས་མི་ཚངས་པར་སྤྱོད་པ་ཞེས་གསུངས་པ་དེ་བས་ན་དེ་ལས་སོ། །བརྫུན་མ་ཡིན་པ་ནི་བདེན་པ་ཡིན་ལ་བདེན་པ་མ་ཡིན་པ་ནི་བརྫུན་པ་
སྟེ་དེ་ལས་སོ། །བཅོས་ཆང་ནི་མྱོས་པར་བྱེད་པའི་ཁྱད་པར་ཡིན་ཏེ། དེ་དང་པོར་བྱས་པའི་སྦྱར་བའི་ཆང་ལ་སོགས་པ་གང་ཡིན་པ་དེ་ནི་བཅོས་ཆང་ལ་སོགས་པ་སྟེ་དེ་ལས་སོ། །གང་དང་པོར་བྱས་པའི་གླུ་ལ་སོགས་པ་གང་ཡིན་པ་དེ་ནི་གར་སོགས་སོ། །ཕྲེང་བ་དང་པོར་བྱས་པའི་ཁ་དོག་འཆང་
བ་ལ་སོགས་པ་གང་ཡིན་པ་དེ་ནི་ཕྲེང་སོགས་སོ། །ཆེན་པོ་ཡང་དེ་ཉིད་ཡིན་ལ་མཐོན་པོ་ཡང་དེ་ཉིད་ཡིན་པས་ན་ཆེ་མཐོའོ། །ཆེ་མཐོ་ཡང་ཡིན་ལ་མལ་སྟན་ཡང་ཡིན་པས་ན་མལ་སྟན་ཆེ་མཐོའོ། །མལ་སྟན་གྱི་སྒྲ་ནི་ཁྱད་པར་གྱི་གཞི་ཡིན་ལ་ཆེ་མཐོའི་སྒྲ་ནི་ཁྱད་པར་ཡིན་ཏེ། ཁྱད་པར་གྱི་གཞི་
དེ་ཡང་སྤྱིར་མལ་སྟན་དང་ཆེན་པོ་དང་། མཐོན་པོ་ལ་ཡང་འཇུག་པ་དེ་བས་ན་ཁྱད་པར་དང་ཁྱད་པར་གྱི་གཞི་གཞི་གཅིག་པ་ཡིན་ནོ། །དེའི་ཕྱིར་ཡང་མལ་སྟན་ཆེན་པོ་དང་། མལ་སྟན་མཐོན་པོ་ཞེས་བྱ་བའི་དོན་དུ་འགྱུར་རོ། །དུས་མ་ཡིན་པའི་ཟས་ནི་ཕྱི་དྲོའི་ཟས་སོ། །དེ་ལ་འདི་ལྟར་གར་ལ་
སོགས་པ་དང་། ཕྲེང་བ་ལ་སོགས་པ་དང་། མལ་སྟན་ཆེ་མཐོ་དང་། ཕྱི་དྲོའི་ཟས་ཞེས་གང་དུ་བྱ་སྟེ་ཟླས་དབྱེ་བའི་དོན་ལ་ཚོགས་པ་གཙོ་བོར་གྱུར་པ་ལ་གཅིག་བཞིན་དུ་འགྱུར་བ་དང་མ་ནིང་གི་རྟགས་སུ་འགྱུར་རོ། །དངུལ་ལས་བྱུང་བས་ན་དངུལ་ནི་རིན་པོ་ཆེ་གཞན་གྱིས་ཉེ་བར་མཚོན་པ་ཡིན་ནོ། །

དེ་བས་ན་བསླབ་པའི་གཞི་བཅུ་པོ་དེ་དག་ལས་ལྡོག་པ་གང་ཡིན་པ་དེ་ནི་ངེས་པར་འབྱུང་བའི་ཚུལ་ཁྲིམས་ཡིན་ནོ་ཞེས་བྱ་བའི་དོན་འདིར་འགྱུར་རོ། །ད་ནི། དེ་ནི་དགེ་ཚུལ་བརྟུལ་ཞུགས་ཆུ་ལོན་བརྩིགས། །ཞེས་བྱ་བ་ལ་སོགས་པས་ལྡོག་པའི་ཁྱད་པར་དུ་བྱེད་དེ། དགེ་ཚུལ་གྱི་བརྟུལ་ཞུགས་ནི་དགེ་ཚུལ་
གྱི་བརྟུལ་ཞུགས་སོ། །དེ་གང་ཞེ་ན་ཁྱིམ་པའི་རྟགས་ཡོངས་སུ་སྤོང་བ་སྔོན་དུ་འགྲོ་བ་ཅན་གྱི་རབ་ཏུ་བྱུང་བའི་རྟགས་ཡང་དག་པར་ལེན་པའོ། །ཆུ་ལོན་བརྩིགས་པ་དང་འདྲ་བས་ན་དེའི་ཆུ་ལོན་བརྩིགས་པའོ། །དེ་གང་ཞེ་ན་ལྡོག་པ་ཡིན་ཏེ། ཇི་ལྟར་ཆུ་ལ་མི་འགྲོ་བར་བྱ་བའི་ཕྱིར་ཆུ་ལོན་བརྩིགས་པ་དེ་ལྟར་
བརྟུལ་ཞུགས་རྗེས་སུ་བསྲུང་བར་བྱ་བའི་ཕྱིར་སྡོམ་པ་ཡིན་ནོ། །དེ་ཁྱད་པར་ཇི་ལྟ་བུ་དང་ལྡན་ཞེ་ན། སྨྲས་པ། མཐར་བྱེད་པ་ནི་སྲོག་གཏོང་བའི་མཚན་ཉིད་ཀྱི་འཆི་བ་ཡིན་པའི་ཕྱིར་མཐར་བྱེད་པའོ། །དེའི་འཆི་བ་ནི་སོ་སོའི་ཁྱད་པར་ཡིན་ནོ། །དེ་དབྱུང་བར་བྱ་བའི་ཆེད་ཀྱི་ཐབས་ནི་དབྱུང་བའི་
ཐབས་ཏེ། དེ་ཉིད་ལྡོག་པ་ཡིན་ཏེ། འདིས་ཀྱང་འཆི་བདག་གི་བདུད་ཕམ་པར་བྱེད་པའི་ཐབས་སུ་འགྱུར་བ་ཡིན་ནོ་ཞེས་བསྟན་པར་འགྱུར་རོ། །གང་གི་ཕྱིར་སྡོམ་པ་ལ་གནས་ན་རིམ་གྱིས་ཐར་པ་ཐོབ་པས་འཆི་བདག་གི་བདུད་ཕམ་པར་འགྱུར་རོ། །གཞན་ཡང་རྫོགས་པའི་བྱང་ཆུབ་ཅེས་
བྱ་བ་ལ་སོགས་པས་དེ་ཉིད་ཁྱད་པར་དུ་བྱེད་པ་ཡིན་ཏེ། རྫོགས་པའི་བྱང་ཆུབ་ནི་ཡང་དག་པར་རྫོགས་པའི་བྱང་ཆུབ་སྟེ། དེ་ཉིད་དཔལ་ཡིན་ལ་དེ་མནོད་པ་སྟེ། ཐོབ་པའི་ཕྱིར་དབང་བསྐུར་བ་དང་། དབང་གཏོད་པར་བྱེད་ཅེས་བྱ་བའི་བར་དུའོ། །གང་གི་ཕྱིར་དགེ་ཚུལ་ལ་སྡོམ་པ་སྦྱིན་པས་
སངས་རྒྱས་ཉིད་ཀྱི་ཆེད་དུ་དབང་བསྐུར་བ་ཡིན་ནོ། །བྱང་ཆུབ་རྣམ་པ་གསུམ་གྱི་ཕྱིར་དབང་བསྐུར་བ་མ་ཡིན་ནམ། དེ་ཅི་ལྟར་ན་རྫོགས་པའི་བྱང་ཆུབ་དཔལ་ཞེས་བྱ་བ་ལ་སོགས་པ་སྨོས་ཤེ་ན། དེ་ལ་ཉེས་པ་མེད་དེ། གང་གི་ཕྱིར་གཙོ་བོའི་རྒྱུ་ཉིད་དུ་བསྟན་པས་བྱང་ཆུབ་གཞན་དག་གི་རྒྱུ་ཉིད་
དུ་ཡང་བཤད་པར་འགྱུར་རོ། །དེ་ལྟ་བུར་གྱུར་པའི་ལྡོག་པ་དེ་ཅིའི་ཕྱིར་བཅོམ་ལྡན་འདས་སྟོན་པར་མཛད་ཅེ་ན། ཉོན་མོངས་དགྲའི་གཡུལ་ལས་ཞེས་བྱ་བ་ལ་སོགས་པ་སྨོས་ཏེ། ཉོན་མོངས་པ་ནི་འདོད་ཆགས་ལ་སོགས་པའོ། །དགྲ་ནི་དགྲ་བོ་སྟེ། དེ་ཉོན་མོངས་པའི་དགྲའོ། །དེའི་

གཡུལ་ནི་གཡུལ་འགྱེད་པ་སྟེ་དེ་ལས་རྒྱལ་བར་བྱེད་པ་ཡིན་ནོ། །དེའི་ཕྱིར་བཅོམ་ལྡན་འདས་ཀྱིས་ཉོན་མོངས་པའི་དགྲའི་གཡུལ་ལས་རྒྱལ་བར་བྱེད་པར་བསྟན་པ་ཡིན་ནོ་ཞེས་བྱ་བ་ནི་ཚིག་གི་ལྷག་མའོ། །གང་གི་ཕྱིར་སྡོམ་པ་ལ་གནས་ན་རིམ་གྱིས་ཉོན་མོངས་པ་
སྤང་བར་འགྱུར་བའི་ཕྱིར་ཉོན་མོངས་པའི་དགྲའི་གཡུལ་ལས་རྒྱལ་བྱེད་དེ། འདིས་ནི་སྡོམ་པའི་དགོས་པ་བསྟན་པ་ཡིན་ནོ། །ད་ནི་ངེས་པར་འབྱུང་བའི་ཚུལ་ཁྲིམས་བཤད་པར་བཞེད་ནས་དང་པོར་སྤྱིར་བཏང་བ། འདུ་ཤེས་གཙོ་ལ་ཇི་བཞིན་དོན་གྱུར་ན། །ཞེས་བྱ་བ་ལ་སོགས་པས་སྟོན་པར་
བྱེད་དོ། །བསླབ་པའི་གཞི་ནི་རྣམ་པ་གཉིས་ཏེ། འདུ་ཤེས་གཙོ་བོར་གྱུར་པ་དང་། དངོས་པོ་གཙོ་བོར་གྱུར་པའོ། །དེ་ལ་དངོས་པོ་གཙོ་བོར་གྱུར་པ་གང་ཡིན་པ་དེ་ནི་དངོས་པོ་གཙོ་བོར་གྱུར་པ་སྟེ། དངོས་པོའི་སྒྲས་ནན་ཏན་དུ་བྱ་བ་ལ་སོགས་པ་ཡོད་པ་ཙམ་ལ་བྱ་སྟེ། དཔེར་ན་མི་ཚངས་
པར་སྤྱོད་པ་ལྟ་བུའོ། །གང་གི་ཕྱིར་འདུ་ཤེས་མ་གཏོགས་པ་དེ་དངོས་པོ་ཙམ་ལ་ཀུན་དུ་སྤྱོད་པ་ཡིན་པའི་ཕྱིར་རོ། །ཅིག་ཤོས་ཀྱང་བསླབ་པའི་གཞི་གང་དག་འདུ་ཤེས་གཙོ་བོར་གྱུར་པ་དེ་ནི་འདུ་ཤེས་གཙོ་བོར་གྱུར་པ་སྟེ། དེ་ཡང་སྲོག་གཅོད་པ་ལ་སོགས་པ་ཡིན་ནོ། །བསླབ་པའི་གཞི་དེ་དག་
ལས་འདས་ན་ཅིར་འགྱུར་ཞེ་ན། ཇི་བཞིན་དོན་འགྱུར་ན་ཞེས་བྱ་བ་ལ་སོགས་པ་སྨོས་པ་ཡིན་ཏེ། འདུ་ཤེས་ཇི་ལྟ་བ་བཞིན་དུ་དོན་དེ་བཞིན་དུ་ཡོད་པར་གྱུར་པའི་ཕྱིར། ཇི་བཞིན་དོན་འགྱུར་ཏེ་དེའི་དངོས་པོ་ནི་དོན་ཇི་ལྟ་བ་བཞིན་དུ་གྱུར་པ་ཉིད་དོ། །དེའི་ཕྱིར་འདུ་ཤེས་ཇི་ལྟ་བ་བཞིན་དུ་གྱུར་ན་ཉེས་པ་རྫོགས་
པར་འགྱུར་རོ། །ཉེས་པའི་སྒྲས་ཉེས་བྱས་རྗོད་པར་བྱེད་དེ། དཔེར་ན་སྲོག་ཆགས་དང་བཅས་པའི་ཆུ་ལ་སྲོག་ཆགས་དང་བཅས་པར་འདུ་ཤེས་པས་སྲོག་ཆགས་བསད་པར་གྱུར་ན་ཉེས་བྱས་སྦོམ་པོར་འགྱུར་བ་ལྟ་བུའོ། །ཇི་བཞིན་དོན་མིན་ཆུང་བར་འགྱུར། །ཞེས་བྱ་བ་ནི་ཉེས་པ་ཆུང་བ་སྟེ། །
དམན་པར་འགྱུར་རོ། །གང་གི་ཚེ་ཞེ་ན་སྨྲས་པ། དོན་ཇི་ལྟ་བ་བཞིན་མ་ཡིན་པ་ནི་ཇི་བཞིན་མིན་ཏེ། འདུ་ཤེས་ལས་དོན་གཞན་དུ་གྱུར་པའོ། །དེའི་དངོས་པོ་ནི་དོན་ཇི་ལྟ་བ་བཞིན་མ་ཡིན་པ་ཉིད་དོ། །དོན་ཇི་ལྟ་བ་བཞིན་མ་ཡིན་པ་ཉིད་དེ་ལ་ཆུང་བར་འགྱུར་རོ། །དཔེར་ན་སྲོག་ཆགས་མེད་པ་

ལ་སྲོག་ཆགས་དང་བཅས་པར་འདུ་ཤེས་པས་དེ་ཉེ་བར་ལོངས་སྤྱོད་པ་ལ་སོགས་པ་བྱས་ན་ཉེས་བྱས་ཀྱི་ལྟུང་བ་ཆུང་བར་འགྱུར་བ་ལྟ་བུའོ། །དེས་ནི་ངེས་པར་ཉེས་པར་འགྱུར་བ་བསྟན་པ་ཡིན་ནོ། །ད་ནི། ཡིད་གཉིས་དང་ནི་འདུ་ཤེས་འདྲ་བར་གཞག །ཅེས་བྱ་བས་ཡིད་གཉིས་ཀྱི་ཉེས་པ་
སྟོན་པར་བྱེད་པ་ཡིན་ཏེ། ཡིད་གཉིས་ནི་ཐེ་ཚོམ་དུ་གྱུར་པའོ། །འདུ་ཤེས་པར་བྱེད་པས་ན་འདུ་ཤེས་ཏེ་དེ་དང་འདྲ་བར་གཞག་པ་ནི་ཉེས་པར་རྣམ་པར་གཞག་པའོ། །དེ་ལ་འདིར་སྲོག་ཆགས་དང་བཅས་པའི་ཚུལ་ངེས་པས་དེ་ཉེ་བར་སྤྱོད་པ་ལ་སོགས་པ་བྱས་པ་ལས་ཉེས་པར་འགྱུར་བ་དེ་
བཞིན་དུ་ཡིད་གཉིས་ལ་ཡང་འགྱུར་རོ། །འདི་ལྟར་སྲོག་ཆགས་མེད་པའི་ཆུ་ལ་ངེས་པས་ཉེས་པ་ཆུང་ངུར་འགྱུར་བ་ཇི་ལྟ་བ་དེ་བཞིན་དུ་ཡིད་གཉིས་ལ་ཡང་འགྱུར་རོ་ཞེས་བྱ་བའི་ཐ་ཚིག་གོ། །ད་ནི་བསླབ་པའི་གཞི་ཐམས་ཅད་ཀྱི་ཕྱོགས་སུ་གཏོགས་པའི་སྤྱིའི་ཡིད་ཀྱི་ཉེས་པར་འགྱུར་བ་
བཤད་པར་བྱ་སྟེ། བླངས་པ་ནི་ཡང་དག་པར་བཟུང་བའོ། །དེ་དག་གང་ཞེ་ན། སྲོག་གཅོད་པ་ལ་སོགས་པ་བསླབ་པའི་གཞི་བཅུ་པོ་དག་ཡིན་ནོ། །གང་གི་ཕྱིར་དེ་དག་ནི་དེས་རབ་ཏུ་བྱུང་བའི་དུས་སུ་བླངས་པ་དག་གོ། །དེ་དག་གི་ཕྱོགས་སུ་གཏོགས་པ་ནི་དེ་དང་ཆ་འདྲ་བ་ཡིན་ཏེ་
འབྲུམ་བུ་མ་སྨིན་པ་ལ་སོགས་པའི་རང་བཞིན་དེ་ལས་བྱུང་བའི་ཉེས་པ་འདས་པའི་མཚན་ཉིད་དེ་ནི་བླངས་པར་གཏོགས་པ་ཡིན་ནོ། །གང་གི་གང་ཕྱོགས་དང་མཐུན་པ་ཡིན་པ་དེ་ནི་དེ་ཉིད་དུ་སྟོན་པར་འགྱུར་རོ། །དེ་བས་ན་དེ་དག་ཡིད་ཀྱི་ཉེས་པར་འགྱུར་བ་ཡིན་པས་ཡིད་ཀྱིར་འགྱུར་བ་སྟེ།
སེམས་ཁོ་ནས་ཕྱིར་བསླང་བར་བྱ་བ་གང་ཡིན་པ་དེ་ཉིད་ཀྱི་ཉེས་པར་འགྱུར་བ་ཡིན་ནོ་ཞེས་བྱ་བའི་དོན་ཏོ། །འདི་མན་ཆད་བསླབ་པའི་གཞི་འཆད་པ་ཡིན་ཏེ། དེ་ལ་ཉེས་པ་ཡང་རྣམ་པ་གསུམ་སྟེ་མཐར་འགྱུར་བ་དང་། ཉེས་བྱས་དང་། ཡིད་ཀྱིར་འགྱུར་བའོ། །དེ་ལ་མཐར་འགྱུར་བ་ནི་གང་
གིས་རྣམ་པ་ཐམས་ཅད་དུ་རབ་ཏུ་བྱུང་བ་ལས་ཉམས་པར་བྱེད་ཅིང་སླར་ཡང་གསོ་བའི་སྐལ་བ་མེད་པར་འགྱུར་བའོ། །ཉེས་བྱས་ནི་བཤགས་པས་འདག་པར་འགྱུར་བའོ། །ཡིད་ཀྱིར་འགྱུར་བ་ནི་བསྟན་པ་ཡིན་ནོ། །དེ་ལ་མཐར་འགྱུར་བ་ནི་མི་གཞན་ཞེས་བྱ་བ་ལ་སོགས་པས་འཆད་

པར་བྱེད་དེ། གང་གིས་ཞེས་བྱ་བས་ནི་དགེ་ཚུལ་གྱི་སྐབས་ཉིད་ཡིན་པའི་ཕྱིར་དེ་དང་སྦྱར་རོ། །དེ་བས་ན་འདི་ལྟར་དགེ་ཚུལ་གང་གིས་མི་གཞན་ལ་བརྒྱབ་སྟེ་ཤི་བར་གྱུར་ན་བརླག་པར་འགྱུར་རོ་ཞེས་བཤད་པ་ཡིན་ནོ། །བརླག་པ་ནི་ཉམས་པར་གྱུར་པ་སྟེ། རྩ་བའི་ཉེས་བྱས་
འཐོབ་པར་འགྱུར་རོ་ཞེས་བྱ་བའི་དོན་ཏོ། །མི་ཞེས་སྨོས་པ་ནི་དུད་འགྲོ་ལ་སོགས་པ་རྣམ་པར་བཅད་པའི་ཕྱིར་རོ། །གཞན་ཞེས་སྨོས་པ་ནི་བདག་ཉིད་རྣམ་པར་གཅད་པའི་ཕྱིར་རོ། །ཅི་ཇི་ལྟར་ཡང་རུང་བས་སམ་ཞེ་ན། འདུ་ཤེས་ཞེས་བྱ་བ་སྨོས་པ་ཡིན་ཏེ་མི་ཉིད་དུ་འདུ་ཤེས་པ་ནི་མིར་འདུ་ཤེས་པ་སྟེ།
དེ་ཁོ་ནས་ཡིན་གྱི་གཞན་དུ་མ་ཡིན་ནོ་ཞེས་བྱ་བའི་ཐ་ཚིག་གོ། །དེ་འདིར་སྨྲས་པ། གང་གི་ཚེ་མི་དུད་འགྲོའི་གཟུགས་སུ་རྣམ་པར་གནས་པ་ལ་དུད་འགྲོའི་འདུ་ཤེས་ཀྱིས་བསད་པར་གྱུར་ན་ཉེས་པ་ཆུང་ངུར་འགྱུར་ཏེ་མིར་འདུ་ཤེས་པ་མེད་པའི་ཕྱིར་རོ། །དེ་བཞིན་དུ་དུད་འགྲོ་མིའི་གཟུགས་སུ་རྣམ་པར་གནས་
པ་ལ་མིར་འདུ་ཤེས་པས་བསད་པར་གྱུར་ན་ཡང་ཉེས་པ་ཆུང་བ་ཁོ་ནར་འགྱུར་ཏེ། དངོས་སུ་མི་མ་ཡིན་པའི་ཕྱིར་རོ། །དེ་ཉིད་ཀྱི་ཕྱིར་སློབ་དཔོན་ཡོན་ཏན་འོད་ཀྱིས་དོན་དེ་ཉིད་གཟིགས་ནས་རྒྱུད་གཞན་གྱི་རྣམ་པ་བསྟེན་པ་བསད་ན་ཞེས་བཤད་པ་མཛད་པ་ཡིན་ནོ། །དེ་འདིར་གཞན་དུ་གྱུར་པས་རང་གི་
རྒྱུད་མ་ཡིན་པ་མ་ཡིན་ནོ་ཞེས་བྱ་བས་རང་གི་རྒྱུད་མ་ཡིན་པ་མ་ཡིན་པ་ཉིད་ཅེས་བྱ་བ་རྗེས་སུ་འཇུག་པར་འགྱུར་བས་རྒྱུ་གཅིག་ལ་གཞན་པའི་རྒྱུད་ནི་རྒྱུད་གཞན་ཡིན་ལ། དེའི་རྣམ་པ་ནི་གཟུགས་ཡིན་ནོ། །དེ་བསྟན་པ་ནི་ཉམས་སུ་མྱོང་བ་སྟེ་རང་གི་རྒྱུད་མ་ཡིན་པ་ཉིད་ཡིན་ནོ་ཞེས་བཤད་པ་ཡིན་ནོ། །
དེས་ཅིར་འགྱུར་ཞེ་ན། རང་གི་རྒྱུད་ཁོ་ན་ཡིན་ཏེ། གང་ཞིག་རྒྱུད་གང་གི་ཡིན་པའི་རྒྱུད་དེ་ཉིད་ཡིན་ནོ་ཞེས་བྱ་བའི་དོན་ཏོ། །གང་དུ་ཞེ་ན། བསད་ན་ཞེས་སྨོས་པ་ཡིན་ཏེ། སྲོག་གཅོད་པ་ལའོ། །དེ་བས་ན་མི་ལས་ཅིག་ཤོས་ཀྱི་གཟུགས་སུ་རྣམ་པར་གནས་པ་དེ་ལ་དེར་འདུ་ཤེས་པས་
སམ་གཞན་དུ་འདུ་ཤེས་པས་བསད་པར་གྱུར་ན་རྩ་བར་འགྱུར་ལ་དུད་འགྲོ་མིའི་གཟུགས་སུ་གནས་པ་དེ་ལ་དེར་འདུ་ཤེས་པའམ། གཞན་དུ་འདུ་ཤེས་པས་བསད་པར་གྱུར་ན་ཆུང་བར་འགྱུར་རོ། །གལ་ཏེ་དེ་ལྟ་ཡིན་ན་དེ་ལ་ཇི་ལྟར་འདུ་ཤེས་གཙོ་ཆེར་བྱད་པ་ཞེས་བྱ་ཞེ་ན། སྦྱོར་བའི་ཉེས་པ་

འདུ་ཤེས་ཀྱི་དབང་གིས་རྣམ་པར་གཞག་པ་ཡིན་པས་འདུ་ཤེས་བསླབ་པའི་གཞིར་བརྗོད་པ་དེ་ཉིད་ཀྱི་ཕྱིར། སློབ་དཔོན་གྱིས་འདུ་ཤེས་སྦྱོར་བའི་ཡན་ལག་ཡིན་ནོ་ཞེས་མདོར་མཛད་དོ། །སྦྱོར་བའི་གནས་སྐབས་ལ་འདུ་ཤེས་ཡན་ལག་ཡིན་ཏེ། འདུ་ཤེས་ཀྱི་དབང་གིས་སྦྱོར་བའི་ཉེས་བྱས་སུ་
འགྱུར་བ་དེ་ལྟ་ན་འདུ་ཤེས་གཙོ་ཆེར་བྱེད་པ་བསླབ་པའི་གཞིར་བཤད་པ་ཡིན་ནོ། །གཞན་དག་ཉེས་པ་དེ་སྤང་བའི་ཕྱིར་མི་གཞན་ཡིན་པའམ། མེར་མེར་པོ་ལ་སོགས་པ་ཞེས་ཚིག་ལེའུར་བྱས་པ་རྣམ་པ་གཞན་དུ་འདོན་པར་བྱེད་དོ། །འདིར་ཡང་མི་སྨོས་པ་ཁོ་ནས་མེར་མེར་པོ་ལ་སོགས་
པ་གཟུང་བ་མ་ཡིན་ནམ། དེ་ཡང་སྨོས་པ་དོན་མེད་དོ་ཞེ་ན། མ་ཡིན་ཏེ་མི་སྨོས་པས་ནི་སྐྱེས་པ་དང་བུད་མེད་དང་མ་ནིང་དང་མངལ་དུ་ཞུགས་པ་སྐྱེ་མཆེད་དྲུག་དོད་པ་གཟུང་བ་ཡིན་ལ། མེར་མེར་པོ་སྨོས་པས་སྐྱེ་མཆེད་དྲུག་མ་དོད་པ་ཡིན་ནོ། །དེ་ཉིད་ཀྱི་ཕྱིར་བཅོམ་ལྡན་འདས་ཀྱིས་སོ་སོར་ཐར་
པ་ལས་མི་འམ་མིར་ཆགས་པ་ཞེས་གསུངས་ཏེ། མིར་ཆགས་པའི་སྒྲས་མེར་མེར་པོ་ལ་སོགས་པ་བསྟན་ཏོ། །དགེ་ཚུལ་ཁྱད་པར་ཇི་ལྟ་བུ་ཞེ་ན། ཐ་མལ་པ་དང་ཞེས་བྱ་བ་ལ་སོགས་པ་སྨོས་པ་ཡིན་ཏེ། ཐ་མལ་པ་ནི་རང་བཞིན་དུ་གནས་པ་སྟེ། སྨྱོས་པ་དང་སེམས་འཁྲུགས་པ་དང་།
ཚོར་བས་གཟིར་བར་མ་གྱུར་པའོ། །གཞན་ཡང་དེ་ཉིད་ཁྱད་པར་དུ་བྱེད་དེ། སྡོམ་པའི་ངོ་བོའི་བསླབ་པ་དང་བཅས་པའི་ཕྱིར་བསླབ་བཅས་ཏེ་གང་གིས་གཞན་རིག་པའི་སྐྱེས་པ་ལ་བདག་ལ་བསླབ་པ་མི་དགོས་སོ་ཞེས་བྱ་བ་ལ་སོགས་པས་བསླབ་པ་ཕུལ་བ་ཡིན་ནོ། །བསམ་པ་ཇི་ལྟ་
བུས་ཤེ་ན། གསོད་སེམས་ཞེས་བྱ་བ་སྨོས་ཏེ། གསོད་སེམས་ནི་སྲོག་གཅོད་པའི་བསམ་པ་སྟེ་བརྡེག་པའི་བསམ་པས་ནི་མ་ཡིན་པ་དེའི་ཕྱིར་ངེས་སོ། །ཅི་འཁྲུལ་པས་ཀྱང་འགྱུར་རམ་ཞེ་ན་སྨྲས་པ། འཁྲུལ་པ་ནི་དེ་ཁོ་ན་མ་ཡིན་པ་ལ་དེ་ཁོ་ན་ཉིད་དུ་རྟོགས་པ་སྟེ། དེ་དང་བྲལ་བ་ཡིན་ཏེ་དཔེར་
ན་ལྷས་བྱིན་གསད་པར་བྱའོ་སྙམ་པས་མཆོད་སྦྱིན་མ་བསམས་པ་འཁྲུལ་པའི་དབང་གིས་བསད་པར་གྱུར་ན་རྩ་བ་ཉིད་དུ་མི་འགྱུར་བ་ལྟ་བུའོ། །ཅི་དེ་ཙམ་གྱིས་བསླབ་པ་མེད་པར་འགྱུར་རམ་ཞེ་ན། བརྒྱབ་སྟེ་མི་ཤི་ན་ཞེས་བྱ་བ་སྨོས་པ་ཡིན་ཏེ། རྒྱུ་དེས་དེའི་ཚེ་འམ་གཞན་གྱི་ཚེ་ཤི་བར་གྱུར་ན་ཞེས་བྱ་

བའི་ཐ་ཚིག་གོ། །ཤི་ན་ཞེས་བཤད་པ་འདིར་ཡང་བཤད་མ་ཐག་པའི་མི་ཞེས་བྱ་བ་ཁོང་དུ་ཆུད་མོད་ཀྱི། དེ་ལྟ་ན་ཡང་མི་སྨོས་པ་གསལ་པོར་བྱ་བའི་ཕྱིར་རོ། །ཅི་རྨི་ལམ་དུ་ཡང་འགྱུར་རམ་ཞེ་ན། རྨི་ལམ་མ་གཏོགས་པ་ཞེས་བྱ་བ་སྨོས་པ་ཡིན་ཏེ། རྨི་ལམ་མ་
གཏོགས་པ་ནི་རྨི་ལམ་སྤངས་པ་སྟེ་གཞན་དུའོ། །དེ་ལྟར་ཡང་རྨི་ལམ་གྱིས་འཁྲུལ་པ་ལངས་ནས་གཞན་བསད་པར་གྱུར་པ་དེ་ཡང་དགག་པའི་ཕྱིར་སྨྲས་པ་ཡིན་ཏེ། བདག་ཉིད་ཀྱིས་རྨི་ལམ་ཉིད་ཀྱི་ནང་དུ་གཞན་བསད་པར་གྱུར་པ་མཐོང་ཡང་མཐར་འགྱུར་བའི་ཉེས་བྱས་མེད་པ་ཡིན་ནོ། །ཐ་
མལ་པ་ཞེས་སྨོས་པས་དེ་ཡང་ཁོང་དུ་ཆུད་པ་མ་ཡིན་ནམ་དེ་ཅིའི་ཕྱིར་གཟུང་ཞེ་ན། འདིར་སྨྲས་པ། འགའ་ཞིག་གི་རྨི་ལམ་གྱིས་བསླད་པའི་ལུས་དང་ངག་གི་ཀུན་དུ་སྤྱོད་པ་ལ་འཇིག་རྟེན་སྨོས་པ་ཞེས་མི་སྨྲ་སྟེ། དེའི་ཕྱིར་ལོགས་ཤིག་ཏུ་སྨོས་པ་ཡིན་ནོ། །ད་ནི། སྔགས་སོགས་ཐབས་
རྣམས་ཀྱིས་ཀྱང་བསད་གྱུར་ཏམ། །ཞེས་བྱ་བ་ལ་སོགས་པས་གཞན་ཐབས་ཀྱིས་གསོད་པར་བྱེད་ན་མཐར་འགྱུར་བ་སྟོན་ཏེ། གསང་སྔགས་དང་པོར་བྱས་པའི་ཐབས་གང་ཡིན་པ་དེ་ནི་སྔགས་སོགས་ཐབས་སོ། །སོགས་པ་སྨོས་པས་འཇིགས་པ་དང་བཅས་པའི་ཕྱོགས་སུ་གཏོང་བ་ལ་སོགས་
པ་བསྡུའོ། །དེ་བས་ན་དགེ་ཚུལ་གང་དེ་དག་གིས་ཀྱང་མི་གཞན་བསད་པར་གྱུར་ན་དེ་ལ་ཡང་ཐ་མ་སྟེ། རྩ་བའི་ཉེས་བྱས་ཐོབ་པར་འགྱུར་རོ་ཞེས་བྱ་བའི་དོན་ཏོ། །ཐབས་རྣམས་ཞེས་མང་པོའི་ཚིག་ཏུ་བྱས་པ་ནི་ཐབས་མང་བ་ཉིད་ཀྱི་ཕྱིར་རོ། །ཀྱང་གི་སྒྲ་ནི་རང་གི་ལག་འབའ་ཞིག་ཁོ་ན་མ་ཡིན་ནོ་
ཞེས་བསྡུ་བའི་དོན་ཏོ། །ཡང་གི་སྒྲ་གཉིས་པ་ནི་སྔར་རང་གི་ལག་གིས་བསད་ན་རྩ་བར་འགྱུར་རོ་ཞེས་བྱ་བ་འབའ་ཞིག་མ་ཡིན་གྱི། གཞན་གསོད་པར་སྦྱོར་བ་ལ་རྗེས་སུ་ཡི་རང་བ་འདི་ཡང་འགྱུར་རོ། །གསོད་པ་སྟེ་སྲོག་གཅོད་པ་ལ་སྦྱོར་བ་གང་ཡིན་པ་དེ་ལ་ངག་གམ་ལུས་ཀྱི་གཡོ་འགུལ་ལ་སོགས་
པས་རྗེས་སུ་ཡི་རང་བ་སྟེ། རྗེས་སུ་ཡི་རང་བ་དེས་གཞན་གསོད་པར་འགྱུར་ན་དེ་ཡང་མཐར་འགྱུར་ཏེ། དཔེར་ན་ཕན་ཚུན་གསོད་པར་བྱེད་པ་ལ་ཁྱོད་ཀྱི་རྩོམ་པ་ནི་དགེའོ་ཞེས་ངག་གིས་རྗེས་སུ་ཡི་རང་བ་དང་། ལུས་ཀྱིས་མཚོན་ཆ་བསྟབས་པ་དང་། ཐ་ན་སེ་གོལ་བརྡབས་པ་ལྟ་བུའོ། །གལ་ཏེ་

ཡིད་ཀྱིས་ཀྱང་གསོད་པར་སྦྱོར་བ་ལེགས་སོ་སྙམ་པས་རྗེས་སུ་ཡི་རང་བར་བྱས་ན་ཡིད་ཀྱི་ཉེས་བྱས་སུ་འགྱུར་བ་ཡིན་ནོ། །ཅི་དགེ་ཚུལ་གཞན་གྱི་གཟུགས་སུ་གནས་ནས་གསོད་པར་བྱེད་ན་དེ་ལ་ཡང་རྩ་བར་འགྱུར་བར་འདི་ལ་ངེས་པ་མེད་དོ་ཞེས་བསྟན་པའི་ཕྱིར། དེ་ལྟར་སེམས་ཅན་གསད་ཕྱིར་བྱོལ་
སོང་རྒྱུད། །ཅེས་བྱ་བ་ལ་སོགས་པ་སྨོས་པ་ཡིན་ཏེ། སྡོམ་ཅན་གྱི་དངོས་པོ་ནི་སྡོམ་ཅན་ཉིད་དེ། དེར་འདུ་ཤེས་པ་ཡིན་ལ་ཅི་སྟེ་ཞེས་བྱ་བ་ནི་གལ་ཏེའི་དོན་ཏོ། །སྡོམ་ཅན་ནི་དགེ་ཚུལ་ཡིན་ནོ། །གལ་ཏེ་བདག་ནི་དགེ་ཚུལ་ཡིན་ནོ་ཞེས་སྡོམ་ཅན་ཉིད་དུ་འདུ་ཤེས་པར་གྱུར་པ་དེའི་ཚེ་རྩ་བའི་ཉེས་
པར་འགྱུར་རོ། །དེ་ལྟར་ཞེས་བྱ་བ་ནི་ཇི་ལྟར་གོང་དུ་མིའི་གཟུགས་སུ་གནས་པས་གསོད་པར་བྱེད་ན་རྩ་བར་འགྱུར་བ་དེ་བཞིན་དུ་འདི་ལ་ཡང་འགྱུར་བའོ། །ཉིད་ནི་རྣམ་པ་གཞན་དུ་མི་འགྱུར་རོ་ཞེས་ངེས་པར་གཟུང་བའོ། །རྩ་བ་ནི་དངོས་གཞིའི་མཚན་ཉིད་དེ་སྲོག་གཅོད་པ་རྗེས་སུ་སྒྲུབ་པར་བྱེད་པ་
ཞེས་བྱ་བའི་དབང་དུ་བྱས་ནས་རྩ་བའི་ལྟུང་བ་ཞེས་བྱའོ། །གང་གི་ཚེ་ཞེ་ན། སེམས་ཅན་གསོད་ཕྱིར་ཞེས་བྱ་བ་སྨོས་པ་ཡིན་ཏེ། སེམས་ཅན་གསོད་པ་ལ་སྟེ་སེམས་ཅན་སྲོག་དང་འབྲལ་བར་བྱེད་པའི་དུས་སུའོ། །ཇི་སྟེ་སྡོམ་ཅན་ཉིད་དུ་འདུ་ཤེས་པ་མེད་ན་ཞེས་བྱ་བར་སྦྱར་རོ། །སྡོམ་ཅན་
དུ་འདུ་ཤེས་པ་མེད་ན་དེའི་ཚེ་ཉེས་པ་ཆུང་ངུ་བཤགས་པར་བྱ་བ་ཞེས་བྱ་བའི་ཉེས་བྱས་དང་ལྡན་པ་སྟེ། འཕེལ་བར་འགྱུར་རོ། །འདི་སྐད་དུ་དེས་ཉེས་པ་དང་བཅས་པར་འགྱུར་རོ་ཞེས་བསྟན་པ་ཡིན་ནོ། །ཅི་ཞིག་བྱས་ནས་ཤེ་ན། སྨྲས་པ། ཡོ་བར་འགྲོ་བས་ན་བྱོལ་སོང་ངོ་། །དེའི་འགྲོ་བ་ནི་
བྱོལ་སོང་རྒྱུད་དོ། །དེའི་རྗེས་སུ་མཐུན་པ་ནི་རྣམ་པ་འདྲ་བའོ། །དེའི་བདག་ཉིད་ཇི་ལྟ་བུ་ཞེ་ན། གཟུགས་བསྒྱུར་བ་སྟེ་བྱས་པའོ། །གང་གིས་ཤེ་ན་བདག་གིས་ཞེས་སྨོས་པ་ཡིན་ནོ། །འདི་སྐད་དུ་བྱོལ་སོང་གི་གཟུགས་སུ་གནས་པ་ཉིད་ལ་བདག་ཉིད་རབ་ཏུ་བྱུང་བའི་གཟུགས་སུ་དྲན་པས་གཞན་
གསོད་པར་བྱེད་ན་དེའི་ཚེ་རྩ་བར་འགྱུར་ལ། མེད་ན་ཆུང་བ་ཉིད་དོ་ཞེས་བསྟན་པར་འགྱུར་རོ། །ད་ནི་རྨི་ལམ་ཞེས་བྱ་བ་ལ་སོག་པས་ཡན་ལག་མ་ཚང་བ་ལས་ཉེས་པར་མི་འགྱུར་བ་སྟོན་པར་བྱེད་དེ་རྨི་ལམ་གྱི་དོན་ནི་སྔར་བཤད་པ་ཡིན་ནོ། །དེ་ལ་གལ་ཏེ་རྨི་ལམ་དུ་བསད་པར་གྱུར་ན་ཉེས་པ་

མེད་དེ་ཉེས་པར་མི་འགྱུར་རོ། །དེ་བཞིན་དུ་བསླབ་པ་མེད་པར་གྱུར་པ་གང་ཡིན་པ་དེ་ནི་བསླབ་པ་མེད་དེ་བསླབ་པ་བཏང་བ་ཞེས་བྱ་བའི་ཐ་ཚིག་གོ། །དེས་ཀྱང་གཞན་བསད་པར་གྱུར་ན་ཉེས་པ་མེད་དོ། །དེ་བཞིན་དུ་གསོད་པའི་བསམ་པ་ནི་སྲོག་གཅོད་པའི་བསམ་པ་སྟེ། དེ་
གང་ལ་ཡོད་པ་དེ་ནི་གསོད་སེམས་སོ། །གསོད་པའི་བསམ་པ་མེད་པ་ནི་གསོད་པའི་སེམས་མེད་པ་སྟེ། དེ་འམ་སྨྱོས་པས་གལ་ཏེ་གཞན་བསད་པར་གྱུར་ན་ཉེས་པ་མེད་དོ། །སྨྱོས་པ་སྨོས་པས་སེམས་འཁྲུགས་པ་དང་ཚོར་བས་གཟིར་བ་ཡང་གཟུང་བ་ཡིན་ནོ། །གང་གི་ཕྱིར་སྨོས་པ་ཞེས་བྱ་བས་
རང་བཞིན་དུ་གནས་པ་མ་ཡིན་པ་བསྟན་པ་ཡིན་ཏེ། དེ་ཡང་གནས་སྐབས་གཞན་ཡིན་པའི་ཕྱིར་རོ། །ཅི་བཞི་པོ་དེ་དག་ལ་ཅིར་ཡང་མི་འགྱུར་རམ་ཞེ་ན། སྨྲས་པ། དེ་དག་རྗེས་སུ་བརྟེན་ན་བསྡམ་པར་བྱ་བའི་ཁ་ན་མ་ཐོ་བར་འགྱུར་གྱི་གཞན་ནི་མེད་དོ་ཞེས་བྱ་བའི་དོན་ཏོ། །དེ་དག་ལ་སྲོག་གཅོད་
པར་གཏོགས་པའི་ཁ་ན་མ་ཐོ་བ་ནི་མེད་ཀྱི། འོན་ཀྱང་སེམས་ཀྱི་འགྱོད་པ་བསལ་བའི་ཕྱིར་དེ་སྐད་དུ་བསྟན་པ་ཡིན་ནོ། །དེ་བས་ན་འདི་སྐད་དུ་བཞི་པོ་དེ་དག་ལས་ཡན་ལག་གང་ཡང་རུང་བ་མ་ཚང་ན་ཡང་ཉེས་པར་ནི་མི་འགྱུར་བ་ཁོ་ནའོ་ཞེས་བསྟན་ཏོ། །ཡན་ལག་ལྷག་མ་མ་ཚང་ན་ཅིར་འགྱུར་
ཞེ་ན། གསོད་པའི་ཡན་ལག་མ་ཚང་ཞེས་བྱ་བ་ལ་སོགས་པ་སྨོས་པ་ཡིན་ཏེ། བཤད་མ་ཐག་པ་མ་གཏོགས་པ་གཞན་གསོད་པའི་ཡན་ལག་ལྷག་མ་དེ་དག་གི་གང་ཡང་རུང་བ་མ་ཚང་བ་ནི་བྲལ་བ་སྟེ། ཉེས་པ་ཆུང་ངུར་འགྱུར་རོ། །འདི་ལྟར་གོང་དུ་མི་གཞན་ཡིན་ལ་ཞེས་བྱ་བ་འདིས་
ཡན་ལག་བརྒྱད་དུ་བསྟན་པ་དེ་དག་གི་ནང་ནས་རང་བཞིན་དུ་གནས་པ་དང་། རྨི་ལམ་མ་ཡིན་པ་དང་། བསླབ་པ་བཅས་པ་དང་། གསོད་སེམས་ཞེས་བྱ་བ་ཡན་ལག་བཞི་པོ་ལས་གང་ཡང་རུང་བ་ནི་མ་ཚང་ལ་ལྷག་མ་བདུན་པོ་དག་ཡོད་ན་ཉེས་བྱས་སུ་འགྱུར་ལ། ཅིག་ཤོས་མིང་དང་། གཞན་
དང་འཁྲུལ་པ་མེད་པ་དང་། ཤི་བ་ཞེས་སྨོས་པ་དེ་དག་ལས་གང་ཡང་རུང་བ་གཅིག་མ་ཚང་ན་གཞན་བདུན་པོ་ཡོད་ན་ཉེས་པ་ཆུང་ངུར་འགྱུར་རོ་ཞེས་བྱ་བའི་དོན་ཏོ། །ད་ནི། འཁྲུལ་པ་མེད་ཅིང་གསོད་པའི་སེམས་ཡོད་པས། །རིགས་གཞན་གསད་པར་གྱུར་ན་ཉེས་བྱས་འགྱུར། །མ་

བརྟགས་པ་ཡི་ཆུ་ཡི་བུམ་པ་ཡང་། །ཞེས་བྱ་བ་ལ་སོགས་པས་རིགས་གཞན་བསད་པ་ལ་ཉེས་པར་འགྱུར་བ་སྟོན་པར་བྱེད་དེ། མིའི་འགྲོ་བ་ལས་གཞན་པའི་རིགས་གང་ཡིན་པ་དེ་ནི་རིགས་གཞན་ཏེ། དེ་བསད་པར་གྱུར་ན་ཉེས་བྱས་ཀྱི་ཉེས་པར་འགྱུར་རོ་ཞེས་བྱ་བའི་དོན་ཏོ། །ཅི་འཁྲུལ་
པས་སམ་ཞེ་ན། འཁྲུལ་པ་མེད་པས་ཞེས་བྱ་བ་སྨོས་པ་ཡིན་ཏེ། འཁྲུལ་པ་ནི་སྔར་བཤད་པ་ཡིན་ཏེ་དེ་དང་བྲལ་བའོ། །ཅི་རྡེག་པའི་བསམ་པས་ཀྱང་འགྱུར་རམ་ཞེ་ན། སྨྲས་པ་སྲོག་ཆགས་གསད་པའི་སེམས་ཡོད་པས། །ཞེས་བྱ་བས་འདིའི་རང་གི་ངོ་བོ་བཤད་པ་ཡིན་ནོ། །དེ་ལ་མི་
གཞན་ཡིན་ལ་ཞེས་བྱ་བ་ལ་སོགས་པས་མཐར་འགྱུར་བའི་ཉེས་བྱས་ཀྱི་ཡན་ལག་བརྒྱད་བསྟན་པ་དེ་ལས་མི་ཞེས་བྱ་བའི་ཡན་ལག་གཅིག་མ་གཏོགས་པ་གཞན་ཉིད་དང་། རྨི་ལམ་མ་ཡིན་པ་ཉིད་དང་། བསླབ་པ་དང་བཅས་པ་ཉིད་དང་། འཁྲུལ་པ་མེད་པ་ཉིད་དང་། གསོད་སེམས་དང་།
གསད་པ་ཞེས་བྱ་བའི་ཡན་ལག་བདུན་དུ་འགྱུར་རོ། །དེ་ལ་རིགས་གཞན་ཞེས་བྱ་བ་ནི་གཞན་ཉིད་ཡིན་ལ་འཁྲུལ་པ་མེད་པ་ཞེས་བྱ་བ་ནི་འཁྲུལ་པ་མེད་པ་ཉིད་དོ། །གསོད་སེམས་ནི་རང་གི་ངོ་བོ་ཉིད་ཀྱིས་བསྟན་པ་ཡིན་ཏེ། གསུམ་པོ་དེ་དག་ནི་ཡན་ལག་ལྷག་མ་བཞི་པོ་ཉེ་བར་མཚོན་
པར་བྱེད་པ་ཡིན་ནོ། །ནའི་སྒྲ་ནི་གང་གི་ཕྱིར་གྱི་དོན་ཡིན་ཏེ། གང་གི་ཕྱིར་གསོད་པའི་ཡན་ལག་མེད་པ་དེའི་ཕྱིར་མ་བརྟགས་པ་སྟེ། མངོན་སུམ་དུ་མ་བྱས་པའི་ཆུའི་བུམ་པ་བརྙ་བ་དག་ལ་བྱིན་ན་ཉེས་པ་མེད་པ་སྟེ། ཉེས་བྱས་ཉིད་དུ་མི་འགྱུར་རོ་ཞེས་བྱ་བའི་ཐ་ཚིག་གོ། །ཡང་གི་སྒྲ་ནི་
བརྟགས་པའི་ཆུའི་བུམ་པ་བྱིན་པ་ལ་ཉེས་པ་མེད་པར་མ་ཟད་ཀྱི་འོན་ཀྱང་མ་བརྟགས་པ་ལ་ཡང་ངོ་ཞེས་བསྟན་པའི་ཕྱིར་རོ། །གསོད་པའི་ཡན་ལག་ཡོད་ན་ནི་འགྱུར་བ་ཁོ་ན་ཡིན་ནོ། །ད་ནི། སྲོག་ཆགས་བཅས་པའི་ཆུ་ལ་སོགས་པ་འཐུངས་སམ་ཞེས་བྱ་བ་ལ་སོགས་པས་དེ་ཉིད་ཀྱི་སྤྲོས་
པ་སྟོན་པ་ཡིན་ཏེ། སྲོག་ཆགས་དང་བཅས་པར་འཇུག་པའི་ཕྱིར་སྲོག་ཆགས་དང་བཅས་པའོ། །དེ་གང་ཞེ་ན་ཆུའོ། །དེ་ལ་སོགས་པ་གང་ཡིན་པ་དེ་ནི་ཆུ་ལ་སོགས་པ་ཡིན་ནོ། །སོགས་པ་སྨོས་པས་ཕྱི་དང་ནང་གི་ལོངས་སྤྱད་པར་བྱ་བ་ལ་སོགས་པ་སྟེ། རང་སྐྱུར་ལ་སོགས་པ་དང་

ཤིང་ལ་སོགས་པ་བསྡུའོ། །དེ་དང་དེ་དགེ་ཚུལ་གྱི་ལོངས་སྤྱོད་པ་གང་ཡིན་པ་དེ་ལ་སྲོག་ཆགས་རེ་རེའི་ཉེས་པར་འགྱུར་རོ་ཞེས་བྱ་བར་སྦྱར་རོ། །འཐུངས་པ་ཞེས་བྱ་བ་ནི་ཕྱི་དང་ནང་དུ་ལོངས་སྤྱོད་པས་སོ། །བོར་བར་གྱུར་པ་ནི་བོར་བའོ། །གང་དུ་ཞེ་ན་ཆུ་དྲོན་ལ་སོགས་པ་
ཞེས་སྨོས་པ་ཡིན་ཏེ། །ཆུ་དྲོན་ལ་སོགས་པ་གང་ཡིན་པ་དེ་ནི་ཆུ་དྲོན་ལ་སོགས་པ་སྟེ། སོགས་པའི་སྒྲས་ས་དང་ཚྭ་ཆུ་ལ་སོགས་པ་གཟུང་ངོ་། །དེ་ལས་ཅིར་འགྱུར་ཞེ་ན། སྲོག་ཆགས་རེ་རེ་ཞེས་བྱ་བ་སྨོས་པ་ཡིན་ཏེ། སྲོག་ཆགས་རེ་རེའི་ཉེས་པར་འགྱུར་བ་སྟེ་ཉེས་བྱས་སུ་འགྱུར་རོ་ཞེས་བྱ་
བའི་ཐ་ཚིག་གོ། །ཅི་ལྟར་མི་སྣང་བ་བསད་པས་ཀྱང་འགྱུར་རམ་ཞེ་ན། སྐྱེ་བོ་བལྟར་སྣང་ཞེས་བྱ་བ་སྨོས་ཏེ། བལྟར་སྣང་བ་ནི་མཐོང་བའི་ཡུལ་དུ་གྱུར་པའི་སྐྱེ་བོ་སྟེ་སྲོག་ཆགས་བསད་པས་འགྱུར་རོ། །ཉེས་པའི་ཁྱད་པར་ཇི་ལྟ་བུ་ཞེ་ན། སྨྲས་པ། ལྕི་བ་སྟེ་ཤིན་ཏུ་ལྕི་བར་འགྱུར་རོ་ཞེས་བྱ་བའི་
དོན་ཏོ། །འདི་སྐད་དུ་ཇི་ཙམ་དུ་མིག་གིས་གྲངས་ཡོངས་སུ་ཆོད་པའི་སྐྱེ་བོ་བསད་པའི་གྲངས་ཆོད་པ་དེ་ཙམ་གྱིས་བཤགས་པར་བྱ་བའི་ཉེས་བྱས་ལྕི་བར་འགྱུར་རོ་ཞེས་བསྟན་པ་ཡིན་ནོ། །ད་ནི། ཆུ་མི་གཡོ་ཞིང་རྙོག་པ་མེད་ལ་བརྟག །ནད་མེད་ཐ་མལ་པ་ཡི་མིག་གཉིས་ཀྱིས། །བུམ་པ་གང་བ་ལ་
ནི་བརྟག་པར་བྱ། །ཞེས་བྱ་བ་ལ་སོགས་པས་ཆུའི་ནང་ན་ཡོད་པའི་སྲོག་ཆགས་གནོད་པ་ལས་བསྲུང་བའི་དོན་གྱི་ཐབས་བརྗོད་པར་བྱ་སྟེ། ཆུ་གང་ལ་གཡོ་བ་དང་འགུལ་བསྐྱོད་མེད་པ་དེ་ནི་ཆུ་མིག་གཡོ་བའོ། །ཁྱད་པར་ཇི་ལྟ་བུ་ཞེ་ན། རྙོག་པ་མེད་པ་ཞེས་བྱ་བ་ནི་དགག་པའི་བསྡུ་བ་ཡིན་ནོ། །དེ་
བས་ན་དེ་ལྟར་གྱུར་པ་ལ་བརྟགས་པ་སྟེ་སོ་སོར་བརྟག་པར་བྱའོ། །གང་གིས་ཤེ་ན། ནད་མེད་ཐ་མལ་པའི་མིག་ཅེས་བྱ་བ་སྨོས་པ་ཡིན་ཏེ། ཐ་མལ་པ་ཡང་ཡིན་ལ་མིག་ཀྱང་ཡིན་པས་ན་ཐ་མལ་པའི་མིག་གོ། །ཉིད་ནི་དེའི་ཕྱིར་ཐ་མལ་པའི་མིག་དེའི་ཉིད་ཀྱིས་ཡིན་གྱི་ལྷའི་ནི་མ་ཡིན་ནོ་ཞེས་
ངེས་པར་གཟུང་བའོ། །གཞན་ཡང་ཁྱད་པར་ཇི་ལྟ་བུ་ཞེ་ན། འདི་ནད་མེད་པའི་ཕྱིར་ནད་མེད་པའོ། །དེས་ན་འདི་སྐད་དུ་རབ་རིབ་ལ་སོགས་པས་ཉམས་པར་མ་གྱུར་པ་ཐ་མལ་པའི་མིག་གིས་ཆུ་བརྟག་པར་བྱའོ་ཞེས་བསྟན་པར་འགྱུར་རོ། །འདིར་ཆུ་བརྟག་པའི་སྣོད་ལ་ནི་ཉེས་པ་མེད་དེ། ཐམས་ཅད་

དུ་སྣོད་གང་ལ་ཇི་ཙམ་དུ་ཆུས་ངེས་པར་གྱུར་པ་དེ་འདིར་མ་བསྟན་དུ་ཟིན་ཀྱང་ཤུགས་ཀྱིས་ཁོང་དུ་ཆུད་པར་བྱའོ། །གང་གི་ཚེ་བུམ་པ་ལ་རྟོག་པར་བྱེད་པ་དེའི་ཚེ་བུམ་པ་གང་བ་ཁོ་ན་ལ་བརྟག་པར་བྱ་བ་སྟེ། སོ་སོར་བརྟག་པར་བྱ་བ་ཡིན་གྱི་མ་གང་བ་ལ་ནི་མ་ཡིན་ནོ། །བུམ་པ་སྨོས་པ་ནི་ཆུ་ཟངས་
ལ་སོགས་པ་ཡོངས་སུ་གཟུང་བའི་ཕྱིར་རོ། །ནིའི་སྒྲ་ནི་ངེས་པར་གཟུང་བའོ། །གང་གི་ཚེ་འདམ་གྱི་མཚན་ཉིད་ཀྱི་རྡུལ་དང་བཅས་པར་གྱུར་པ་ནི་ལྡན་པ་སྟེ། ཆུ་རྡུལ་ཅན་དུ་འགྱུར་བའོ། །དེའི་ཚེ་ཇི་ལྟར་བྱ་ཞེ་ན། ཀ་ཏ་ཀ་ཞེས་བྱ་བ་སྨོས་ཏེ། ཀ་ཏ་ཀ་དག་གིས་དང་བར་བྱ་བ་ནི་རྙོག་པ་མེད་པར་བྱ་བ་སྟེ། ཆུ་དང་བར་
བྱའོ་ཞེས་བྱ་བའི་དོན་ཏོ། །གཞན་དུ་ན་སྲོག་ཆགས་རྣམས་མཐོང་བར་མི་འགྱུར་རོ། །ཀ་ཏ་ཀའི་སྒྲས་ཀ་ཏ་ཀའི་འབྲས་བུ་བརྗོད་པ་ཡིན་ནོ། །མང་པོའི་ཚིག་ཏུ་བྱས་པ་ནི་ལན་ཚྭ་དང་ཟན་གྱི་རི་ལུ་དག་ཡོངས་སུ་གཟུང་བའི་ཕྱིར་རོ། །དུས་ཇི་སྲིད་དུ་ཆུ་བརྟག་པར་བྱ་བ་ཡིན་ཞེ་ན། ཇི་སྲིད་ཡིད་
ཀྱིས་ཡང་དག་པར་ཞེས་བྱ་བ་ལ་སོགས་པ་སྨོས་པ་ཡིན་ཏེ། ཡིད་དེ་སེམས་ཀྱི་དག་པ་ནི་རྣམ་པར་དག་པའོ། །དག་པ་ཡང་སྲོག་ཆགས་མེད་དོ་ཞེས་བྱ་བར་ངེས་པ་ཡིན་ནོ། །ཇི་སྲིད་ཅེས་བྱ་བ་ནི་དུས་ཇི་སྲིད་དུ་སེམས་དེ་དག་པར་འགྱུར་བ་དུས་དེ་སྲིད་དུ་འདིར་ཆུ་བརྟག་པར་བྱའོ། །འདིས་དུས་
རིང་པོར་རྟོག་པར་བྱེད་པ་ཐོབ་པ་དེའི་ཚེ་མི་རིང་བར་བརྟག་པར་བྱའོ་ཞེས་བསྟན་པ་ཡིན་ནོ། །གཞན་ཡང་ཐུང་བ་ཐོབ་པར་འགྱུར་བས་དེ་ཡང་མི་ཐུང་བ་སྟེ། ཤིན་ཏུ་མྱུར་བ་མ་ཡིན་པ་ཞེས་བྱ་བ་ལས་གསལ་བ་ཡིན་ཏེ། བ་ལང་དྲུག་གིས་དྲངས་པ་ཡི། །ཤིང་རྟ་ཇི་སྲིད་ལྡོག་གྱུར་པའམ། །ཡང་
ན་གླང་པོ་དྲུག་ཅུ་པ། །དུས་དེ་ཆུ་ལ་ངེས་པ་ཡིན། །དུས་དེ་ཙམ་དུ་བདག་ཉིད་ཀྱིས་མི་ནུས་ན་གཞན་གྱིས་བརྟག་པར་བྱ་བ་ཡིན་གྱི། རང་ཉིད་ཀྱིས་ཡུན་རིང་པོར་ནི་བྱ་བ་མ་ཡིན་ནོ། །བརྟགས་ཟིན་པའི་ཆུ་ལ་ཡང་རྟོག་པར་བྱེད་པ་མི་རིགས་སོ་ཞེས་བསྟན་པར་བྱ་བའི་ཕྱིར་བླ་འོག་ཅེས་བྱ་བ་སྨོས་པ་
ཡིན་ཏེ། ཆུ་བརྟགས་པའི་དུས་ཕྱིས་སོ། །ཡང་དང་ཡང་དུ་ཞེས་བྱ་བ་ནི་ཇི་ལྟར་རིང་བའམ་ཐུང་བར་བརྟག་པར་མི་བྱ་བ་དེ་ལྟར་མ་ངེས་པའི་ཆུ་ཉིད་ལ་ཡང་དང་ཡང་དུ་གདོང་གཞན་གྱིས་ལྟ་བ་ལ་སོགས་པས་བརྟག་པར་མི་བྱའོ། །ཇི་སྐད་དུ་ཇི་ལྟར་རིང་བ་དང་ཐུང་བ་ལ་སོགས་པའི་བྱེ་བྲག་

གིས་ཆུ་བརྟག་པར་བྱ་བ་མ་ཡིན་པ་དེ་ལྟར་བླ་འོག་ཏུ་ཡང་དང་ཡང་དུ་མི་བྱའོ་ཞེས་བསྟན་པ་ཡིན་ནོ། །དང་གི་སྒྲ་ནི་བླ་འོག་དང་ཡང་དང་ཡང་དུ་ཞེས་བྱ་བའི་སྒྲ་སྡུད་པ་ཡིན་ནོ། །ཅི་སྲོག་ཆགས་ཐམས་ཅད་ཀྱིས་ཀྱང་སྲོག་ཆགས་དང་བཅས་པ་ཉིད་དུ་འགྱུར་རམ་ཞེ་
ན། གློ་བུར་བ་ཞེས་སྨོས་པ་ཡིན་ཏེ། གྲོག་མོ་ལ་སོགས་པ་ཆུ་ལས་སྐྱེས་པ་མ་ཡིན་ཡང་ཆུ་ནང་དུ་ལྟུང་བར་འགྱུར་བའི་སྦྲང་བུ་མཆུ་རིངས་ལ་སོགས་པ་ཆུ་ཚགས་མེད་པར་ཐ་དད་པར་བསལ་ནུས་པ་ཡིན་ཏེ། དེ་ལྟར་གྱུར་པ་དེས་ན་སྐྱེ་བོ་དང་བཅས་པར་འཇུག་པ་ཞེས་བྱ་བ་ནི་སྲོག་ཆགས་
དང་བཅས་པ་ཡིན་ལ། དེའི་དངོས་པོ་ནི་སྲོག་ཆགས་དང་བཅས་པ་ཉིད་དེ་གློ་བུར་བ་དེས་ཆུ་སྲོག་ཆགས་དང་བཅས་པ་ཉིད་དུ་མི་འགྱུར་ཏེ། དེ་ཡང་ལག་པས་བསལ་ནས་ཡོངས་སུ་ལོངས་སྤྱད་པར་བྱའོ། །དེ་ལྟར་བླ་འོག་ཅེས་བྱ་བས་རྣམ་པ་ཐམས་ཅད་དུ་དགག་པ་ཐོབ་པས། ད་ནི།
དེ་ལན་ཅིག་བརྟགས་ནས་ཞེས་བྱ་བ་ལ་སོགས་པས་སྟོན་པར་བྱེད་དེ། ལྟེང་ཀ་སྣོད་ཀྱི་ཆུ་ལན་ཅིག་སྟེ་འོར་གཅིག་བརྟགས་ཤིང་མངོན་སུམ་དུ་བྱས་པ་སྤྱད་པར་རུང་སྟེ། །ཡོངས་སུ་ལོངས་སྤྱད་པར་རུང་བའོ་ཞེས་བྱ་བའི་ཐ་ཚིག་གོ། །ཅི་ཐེ་ཚོམ་གྱིས་སམ་ཞེ་ན། ཐེ་ཚོམ་མེད་པར་ཞེས་བྱ་བར་
སྨོས་པ་ཡིན་ཏེ་ཐེ་ཚོམ་དང་མི་ལྡན་པ་གང་ཡིན་པ་དེ་ནི་ཐེ་ཚོམ་མེད་པ་སྟེ། བར་ཆད་མེད་པར་ཐེ་ཚོམ་སྤངས་པའི་སེམས་ཀྱིས་སོ་ཞེས་བྱ་བ་ནི་ལྷག་མའོ། །དུས་ཇི་སྲིད་ཀྱི་བར་དུ་ཞེ་ན། ཉི་མ་ཤར་བར་དུ་ཞེས་སྨོས་པ་ཡིན་ཏེ། ཉི་མ་སྟེ་ཉིན་ཞག་གཞན་གྱི་ཉི་མ་འཆར་བར་དེ་སྲིད་དུ་ཞེས་བྱ་བའི་དོན་ཏོ། །
དེ་ལས་འོག་ཏུ་ནི་མ་ཡིན་ཏེ་ཤར་ནས་ཀྱང་ཡང་བརྟག་པར་བྱའོ་ཞེས་བྱ་བ་ནི། དགག་པ་སྔ་མའི་ཁྱད་པར་ཡིན་ནོ། །ལྟེང་ཀ་ཞེས་བྱ་བ་མང་པོའི་ཚིག་ནི་རྫིང་བུ་ལ་སོགས་པ་ཡོངས་སུ་བསྡུ་བའི་ཕྱིར་རོ། །འདིར་དང་ནི་ཕྱིས་པ་ཡིན་པར་རིག་པར་བྱའོ། །ཅི་གཞན་དག་ཀྱང་ཞེ་ན། སྣོད་ཆེན་ཞེས་
བྱ་བ་སྨོས་པ་ཡིན་ཏེ། སྣོད་ཆེན་ལ་སོགས་པའི་ཆུ་བརྟག་པར་བྱ་བ་དེ་ལ་ཕྱོགས་བཞི་ཀུན་དུ་ཉེ་འཁོར་གྱི་ཆ་འདོམ་གང་ཁོར་ཡུག་སྟེ། ཉེ་འཁོར་ནི་གནས་པར་བྱེད་སྟེན་པར་བྱེད་པ་ཞེས་བྱ་བའི་དབང་དུ་བྱས་པའོ། །འདོམ་གང་ཞེས་བྱ་བ་ནི་ཁྲུ་བཞི་ཡིན་ནོ། །ད་ནི་ལོངས་སྤྱད་

དུ་རུང་བ་སྟོན་པར་བྱེད་པ་ཡིན་ཏེ། ཁྲོན་པ་དང་པོར་བྱས་པའི་ཆུའི་རྟེན་གང་ཡིན་པ་དེ་ནི་ཁྲོན་པ་ལ་སོགས་པ་སྟེ། དེའི་དག་པ་ནི་བརྟགས་པས་སྲོག་ཆགས་མེད་པ་ཉིད་དེ། དེས་ན་ཁྲོན་པ་དག་སོགས་སོ། །གྲུ་གསུམ་ཡང་དེ་ཡིན་ལ་བཟང་པོ་ཡང་ཡིན་པ་གྲུ་གསུམ་བཟང་པོ་སྟེ། གང་
སྲོག་ཆགས་ཕྲ་མོ་ཡང་འཛིན་པར་བྱེད་པ་ཡིན་ནོ། །དེ་དང་པོར་བྱས་པའི་ཆུ་ཚགས་གཞན་གང་ཡིན་པ་དེ་ནི་གྲུ་གསུམ་བཟང་པོ་ལ་སོགས་པའོ། །དགེ་སློང་ཞེས་བྱ་བ་འདི་ཡང་དགེ་སློང་སྟེ་བསླབ་པ་འདོད་པའི་ཕྱིར་ཡིད་ཆས་པའི་ཡུལ་ཡིན་ནོ། །དགེ་སློང་སྨོས་པ་ནི་རབ་ཏུ་བྱུང་བ་རྣམས་ཀྱི་ཉེ་
བར་མཚོན་པ་ཡིན་ནོ། །དགེ་འདུན་ཞེས་བྱ་བ་འདི་ཡང་དགེ་འདུན་ཏེ་རྣམ་པ་ཐམས་ཅད་དུ་མ་བཙགས་ཤིང་མ་བརྟགས་པའི་ཆུ་ལོངས་སྤྱོད་པར་མི་མཛད་པའི་ཕྱིར་ཏེ། བསླབ་པ་ལ་གུས་པར་བྱེད་པ་ཉིད་དུ་མཚོན་པར་བྱེད་པ་ཡིན་ནོ། །དང་པོ་གཅིག་ནི་སྡུད་པར་བྱེད་པ་ཡིན་ལ་
གཉིས་པ་ནི་ཚིག་གི་ཁ་བསྐང་བའི་ཕྱིར་རོ། །ཇི་ལྟར་དེ་དག་ཁ་ན་མ་ཐོ་བ་མེད་པ་དེ་བཞིན་དུ་ཡིད་ཆེས་པ་ཡང་ཡིན་ཏེ། སྲོག་ཆགས་མེད་པར་ལྷག་པར་ཡིད་ཆེས་པའི་ཕྱིར་ཡིད་ཆེས་པ་སྟེ་བཀོད་མའོ། །དེ་ཉིད་འདུལ་བ་ལས་བཀོད་མས་རུང་བ་ཞེས་གསུངས་པ་ཡིན་ནོ། །ཉིན་ཞག་གིས་
རུང་བ་ཡང་ཡིད་ཆེས་པ་ཁོ་ན་ཡིན་ཏེ། དེ་ནི་ལན་ཅིག་བརྟགས་པས་ཉི་མ་ཤར་བར་དུ་ཞེས་བྱ་བས་བསྡུས་པ་ཡིན་ནོ། །ཉེས་པ་བྱུང་བའི་སྐབས་མི་འབྱེད་པས་ན་རུང་བ་ཞེས་བྱ་སྟེ། ལོངས་སྤྱད་དུ་རུང་བའི་ཆུ་ལྔ་པོ་དེ་དག་ཀྱང་ཆུ་སྤྱད་དུ་རུང་བ་ལ་སོགས་པར་བདག་གིར་བྱས་པ་དེར་
འགྱུར་གྱི་འདི་ལ་འགྱོད་པར་བྱ་བ་ནི་མ་ཡིན་ནོ། །རྣམ་པ་གཞན་དུ་ན་ཆུ་ཡོངས་སུ་ལོངས་སྤྱད་པར་བྱ་བ་མ་ཡིན་པར་འགྱུར་རོ། །ཡང་གི་སྒྲ་ནི་ལྔ་པོ་དག་མཚུངས་པ་ཉིད་དུ་བསྟན་པའི་ཕྱིར་རོ། །ལྔ་པོ་དེ་དག་ལས་ཆུ་ཚགས་ལ་སོགས་པ་གཅིག་མེད་ལ་གཞན་དག་ཀྱང་མེད་པའི་ཕྱིར་ཆུ་ཚགས་
ཀྱིས་བྱ་བ་ཅི་ཡང་མེད་དོ་སྙམ་དུ་དོགས་པ་ལ་སྨྲས་པ། འདི་ལྟར་ཡང་འདི་ལ་ཆུ་ཚགས་དང་མི་ལྡན་པའི་ཕྱིར་ཆུ་ཚགས་མེད་པ་སྟེ། དེ་ལྟར་གྱུར་པས་གནས་པའི་སྐལ་བ་མེད་དོ་ཞེས་བྱ་བའི་བར་དུའོ། །དང་ནི་ངེས་པར་གཟུང་བའི་ཕྱིར་རོ། །གང་དེ་ལ་རུང་བའི་ཆུ་ཡོད་ཀྱང་ཆུ་ཚགས་

ཉེ་བར་འཇག་པར་མི་བྱེད་ན་དེ་ལ་ཉེས་བྱས་ཀྱི་ཉེས་པར་འགྱུར་བར་བསྟན་པས་གང་ཡང་ཆུ་ཚགས་ཡོད་དུ་ཟིན་ཀྱང་བོར་ནས་འགྲོ་ན་ཅིར་འགྱུར་ཞེ་ན། གང་ཞིག་རིལ་བ་གྲུ་གསུམ་དཔྱངས་ཚགས་དང་ཞེས་བྱ་བ་ལ་སོགས་པ་སྨོས་པ་ཡིན་ཏེ། དགེ་ཚུལ་གང་ཞིག་ཆུ་
ཚགས་མེད་པར་འགྲོ་བ་སྟེ། རྒྱུ་བར་གྱུར་ན་དགེ་ཚུལ་དེ་ལ་ཡིད་ཀྱི་ཉེས་བྱས་ཉིད་དུ་འགྱུར་གྱི། གཞན་བཤགས་པར་བྱ་བའི་ཉེས་བྱས་སུ་མི་འགྱུར་རོ། །ཉིད་ནི་ངེས་པར་གཟུང་བའི་དོན་ཏོ། །ཀུན་ནས་ཡོངས་སུ་ཆུ་འཚག་པར་བྱེད་པས་ན་ཆུ་ཚགས་ཏེ། སྤྱིའི་ཚིག་ཡིན་ནོ། །ད་ནི་ཆུ་ཚགས་
ཀྱི་དབྱེ་བ་བསྟན་པར་བྱ་སྟེ། རིལ་བ་དང་། གྲུ་གསུམ་དང་། དཔྱངས་ཚགས་ཞེས་བྱ་བ་ནི་བསྡུ་བའོ། །རིལ་བའི་སྒྲས་ནི་ཟླུམ་པོ་སྐྱིབས་ཅན་ཁ་གཉིས་པ་དེ་བརྗོད་པ་ཡིན་གྱི་འདི་ཡང་སྤྱི་བླུགས་བཞིན་དུ་ཉེ་བར་སྤྱོད་པ་ནི་མ་ཡིན་ནོ། །གྲུ་གསུམ་ཞེས་བྱ་བ་ནི་ཆུ་ཚགས་གྲུ་གསུམ་ཡོད་པའོ། །
དཔྱངས་ཚགས་ཞེས་གྲགས་པའི་མིང་གང་ལ་ཡོད་པ་དེ་ནི་དཔྱངས་ཚགས་ཏེ། ཆུ་ཚགས་ཡུ་བ་ཅན་དེའི་མིང་ཡིན་ནོ། །ཆོས་ཞེས་བྱ་བའི་མིང་གང་ལ་ཡོད་པ་དེ་ནི་ཆོས་ཞེས་བྱ་བ་སྟེ། རིལ་བ་ཞབས་ཚགས་ཅན་ཡིན་ནོ། །གྲོལ་བར་བྱེད་པའི་རས་ཞེས་བྱ་བ་ནི་རས་ཀྱི་དུམ་བུ་ཟུར་བཞི་པ་དེའི་ལྷག་པའི་
ཚིག་གོ། །དང་གི་སྒྲ་ནི་དེ་ལྟ་བུར་གྱུར་པ་གཞན་དང་གཞན་དག་ཀྱང་མེད་པར་འགྲོ་ན་ཡིད་ཀྱི་ཉེས་བྱས་སུ་འགྱུར་རོ་ཞེས་བསྟན་པའི་ཕྱིར་རོ། །གལ་ཏེ་དེར་སོང་ན་རྙེད་པར་ཡང་འགྱུར་ན་འགྲོ་བར་བྱའམ་ཞེ་ན། སོང་ཡང་གྲོལ་བར་བྱེད་པའི་རས་སོགས་ཡོད། །དེ་ཚེ་ཆུ་ཚགས་མེད་ན་རྒྱང་གྲགས་དག །
ལྔ་ཉིད་སོང་བླ་ཞེས་བྱ་བ་སྨོས་པ་ཡིན་ཏེ། དེ་གང་དུ་འགྲོ་བར་འགྱུར་བ་དེར་སོང་བ་ན་བཤད་མ་ཐག་པའི་གྲོལ་བར་བྱེད་པའི་རས་ལ་སོགས་པ་ཡོད་པ་སྟེ་རྙེད་པར་འགྱུར་ན་ཞེས་བྱ་བའི་དོན་ཏོ། །དེའི་ཚེ་ཆུ་ཚགས་མེད་པ་ནི་ཆུ་ཚགས་མེད་པར་གྱུར་པ་སྟེ་སོང་བ་དང་འགྲོ་བར་བྱའོ་ཞེས་བྱ་བའི་བར་
དུའོ། །ཆུ་ཚགས་ཡོད་པར་གྱུར་པ་འབའ་ཞིག་ནི་མ་ཡིན་ནོ་ཞེས་བྱ་བ་ནི་ཡང་གི་སྒྲའི་དོན་ཡིན་ནོ། །རིང་ཐུང་ཇི་ཙམ་དུ་ཞེ་ན། དེ་རྒྱང་གྲགས་ལྔར་འགྲོ་བར་བྱའོ། །ཉིད་ཀྱི་སྒྲ་ནི་དེ་ལས་འདས་པར་ནི་མ་ཡིན་ནོ་ཞེས་ངེས་པར་གཟུང་བའི་དོན་ཏོ། །གལ་ཏེ་དེར་སོང་ན་རྙེད་པར་མི་འགྱུར་བ་དེ་ལྟ་ན་

ཡང་འགྲོ་བར་བྱ་འམ་ཞེ་ན། ཇི་སྟེ་མེད་ན་ནི། ཕྱིར་འོང་འདོད་ན་དཔག་ཚད་ཕྱེད་དུ་སོང་། །ཞེས་བྱ་བ་སྨོས་པ་ཡིན་ཏེ། གལ་ཏེ་དེར་སོང་ལ་ཆུ་ཚགས་སམ་ཆུ་ཁ་ན་མ་ཐོ་བ་མེད་པ་རྙེད་པར་མི་འགྱུར་བ་དེའི་ཚེ་རྐྱེན་དེ་ལྟ་བུ་ཞིག་ཡོད་ན་འཕྲལ་ཁོ་ན་ལ་ལྡོག་པའི་བསམ་པས་དཔག་ཚད་ཕྱེད་དུ་འགྲོ་བར་
བྱའོ། །དེ་ལྟར་ན་ནིའི་སྒྲ་སྔ་མ་ལས་ཁྱད་པར་དུ་བྱེད་པའི་དོན་ཏོ། །ཅི་ཡིད་བརྟན་པའི་ཚིག་གིས་ཀྱང་འགྲོ་བར་བྱའམ་ཞེ་ན། ཡིད་བརྟན་ཚིག་གིས་ལམ་དུ་ཞུགས་ན་ནི། །ཞེས་བྱ་བ་ལ་སོགས་པ་སྨོས་པ་ཡིན་ཏེ། ཡིད་བརྟན་རབ་ཏུ་བྱུང་བའི་ཚིག་གིས་གལ་ཏེ་འདི་སྐད་དུ་ཁྱོད་ཉིད་ཤོག་
ཤིག་དང་ཆུ་ལོངས་སྤྱོད་པའི་དུས་སུ་ཁོ་བོས་ཆུ་ཚགས་སྦྱིན་པར་བྱའོ་ཞེས་སྨྲས་པའོ། །དེ་དག་གི་ཚིག་གིས་རིང་དུ་སོང་ཡང་ཞེས་བྱ་བའི་རྒྱང་གྲགས་ལྔ་འམ་གཉིས་འབའ་ཞིག་ཏུ་མ་ཟད་ཀྱི་ཆུ་ཚགས་མེད་པར་འགྲོ་བ་ལ་ཡང་ཉེས་པ་མེད་པ་ཡིན་ཏེ། རིང་དུ་སོང་བ་ལ་ནམ་ཡང་ཉེས་པར་མི་འགྱུར་
རོ་ཞེས་བྱ་བའི་དོན་ཏོ། །ཡིད་བརྟན་པ་ཞེས་བྱ་བ་ནི་ལམ་དུ་ཆུ་ཚགས་སྦྱིན་པར་ཁས་བླངས་པ་ལ་སླུ་བར་མི་བྱེད་པ་གང་ཡིན་པ་དེ་ལ་བྱའོ། །ཆུ་ཚགས་མེད་པར་ཀླུང་གི་འགྲམ་ནས་མར་འགྲོ་བ་ན་བརྟགས་པའི་ཆུ་ལོངས་སྤྱོད་པ་ལ་ཉེས་པར་འགྱུར་རོ་སྙམ་དུ་དོགས་པ་ལ། ཀླུང་གི་འགྲམ་ནས་
མར་ནི་ཞེས་བྱ་བ་ལ་སོགས་པ་སྨོས་པ་ཡིན་ཏེ། དགེ་ཚུལ་ཆུ་ཚགས་མེད་པར་ཡང་ཀླུང་གི་འགྲམ་ནས་མར་འགྲོ་བ་ནའོ། །མིག་གིས་བལྟས་པས་དག་པ་སྟེ་སོ་སོར་བརྟགས་ཤིང་དག་པར་བྱས་པའོ། །བལྟས་པས་དག་པ་ཡང་དེ་ཡིན་ལ་ཆུ་ཡང་ཡིན་པས་ན་ཞེས་བྱ་བ་ནི་ཁྱད་པར་གྱི་བསྡུ་བའོ། །
དེ་ལྟར་གྱུར་པའི་ཆུ་འཐུངས་པ་ལ་ཉེས་པ་མེད་པ་སྟེ་ཉེས་བྱས་སུ་མི་འགྱུར་རོ་ཞེས་བྱ་བའི་དོན་ཏོ། །ཡང་གི་སྒྲ་ནི་སྔར་ཆུ་ཚགས་མེད་པར་འགྲོ་བ་ལ་ཉེས་པར་བཤད་པ་ཡིན་པས། ཀླུང་གི་འགྲམ་ནས་མར་འགྲོ་བར་བྱེད་པ་ན་ཆུ་ཚགས་མེད་ཀྱང་བརྟགས་ནས་ལོངས་སྤྱོད་པ་གང་ལ་ཡང་ཉེས་པ་
མེད་དོ་ཞེས་བྱ་བ་བསྟན་པའི་ཕྱིར་རོ། །དེ་ལ་ཅི་འཇུག་ངོགས་རེ་རེ་བརྟག་པར་བྱ་འམ་ཞེ་ན། རྒྱུན་བཞིན་འགྲོ་ལ་ཞེས་བྱ་བ་ལ་སོགས་པ་སྨོས་པ་ཡིན་ཏེ། དེ་ལ་ཞེས་བྱ་བ་ནི་ཀླུང་ལའོ། །རྒྱང་གྲགས་དང་རྒྱང་གྲགས་ནི་རྒྱང་གྲགས་རེ་རེའོ། །བརྟག་པ་ནི་བརྟག་པར་བྱ་བ་སྟེ་མཐར་ཐུག་

པར་སོ་སོར་བརྟག་པར་བྱའོ་ཞེས་བྱ་བའི་དོན་ཏོ། །ཁྱད་པར་ཇི་ལྟ་བུར་ཞེ་ན། རྒྱུན་བཞིན་འགྲ