Luận tạng Tây Tạng (Tengyur) — Tập 148

ཞེས་བསྟན་པའི་ཕྱིར། ཡང་ན་ན་བའམ་ཞེས་སྨོས་ཏེ། ལ་ལ་འདོད་ཆགས་བདོ་བས་ཀྱང་འཇོམས་པར་འགྱུར་རོ། །ཡང་ན་
ཞེས་བྱ་བ་ནི་རྣམ་པ་གཉིས་སུ་བརྟག་པ་སྟེ། རྒ་བ་མ་བྱུང་བར་ཡང་གང་ལ་ལ་དག་ནད་ཀྱིས་བཅོམ་སྟེ་ཤི་བ་ཡིན་ནོ་ཞེས་ཐོས་ཏེ། དཔེར་ན་འཕགས་པ་པི་ལིན་དའི་བུ་ལ་སོགས་པ་ལྟ་བུ་སྟེ་ཤིང་ཏོག་མ་སྨིན་པ་དབྱིག་པས་བསྣུན་པ་ལྟ་བུའོ། །དེ་གཉི་ག་མེད་ཅིང་མི་རྟག་པ་ནི་སྔོན་གྱི་ལས་ཀྱི་

དབང་གིས་འཆི་བས་འཇོམས་པར་འགྱུར་ཏེ། གང་ཚེ་ཐུང་བའི་ལས་འཛིན་པར་འགྱུར་བ་དེ་བསྟན་པའི་ཕྱིར་སྨྲས་པ། འཆི་བས་འཇོམས་ཞེས་བྱ་བ་སྨོས་ཏེ། ཡང་ན་འཆི་བདག་ཉིད་ཀྱིས་འདི་དག་འཇོམས་པར་འགྱུར་རོ་ཞེས་པའི་དོན་ཏེ། མངལ་ལ་སོགས་པ་
ན་ཡང་འཆི་བ་ཡོད་པའི་ཕྱིར་རོ། །ནད་དང་རྒ་བ་ནི་བཅུད་ཀྱིས་ལེན་ལ་སོགས་པས་དེ་བཅོས་སུ་ཡོད་ཀྱི། འཆི་བ་ནི་མ་ཡིན་ནོ་ཞེས་བསྟན་ཏོ། །སྲོག་དང་ནད་མེད་པ་དང་ལང་ཚོའི་དྲེགས་པས་དྲེགས་པ་རྣམས་ལ་དེའི་དྲེགས་པ་སྤང་བའི་ཕྱིར་འདི་གསུངས་སོ། །འདུས་བྱས་རྣམས་ནི་འཇིག་
པའི་རྒྱུ་ལ་མ་བརྟེན་པར་སྐད་ཅིག་མས་འཇིག་པ་ཡིན་ཏེ། རང་བཞིན་གྱིས་འཇིག་པ་ཡིན་ནོ་ཞེས་བསྟན་པའི་ཕྱིར་སྨྲས་པ། རྟག་ཏུ་འགྲོ་ཞེས་བྱ་བ་ལ་སོགས་པ་སྨོས་ཏེ། ཨ་ཡོ་རྒྱ་ཡ་ཞེས་བྱ་བའི་གྲོང་ཁྱེར་ཆུ་བོ་གང་གཱ་དང་ཉེ་བ་ན། ཉ་པ་ཤིན་ཏུ་རྒས་ཤིང་འཁོགས་པ་ཞིག་གནས་ཏེ་ཉ་གསོན་
དག་བྱེ་ཐང་གི་སྟེང་དུ་ཆུ་རབ་ཏུ་ཁོལ་བ་དག་ཡོད་པའི་ནང་དུ་བརྩེ་བ་མེད་པས་བཅུག་སྟེ། དེ་ལྟར་འགུལ་བ་ལ་ལྟ་ཞིང་དགའ་བ་དང་དགོད་པ་གཟིགས་ཏེ། དེའི་དབང་དུ་མཛད་ནས་ཚིགས་སུ་བཅད་པ་འདི་དག་གསུངས་སོ། །སེམས་ཅན་འདི་དག་ནི་རྒྱུན་མི་འཆད་ཅིང་ལྡོག་པ་མེད་པས་འཆི་
བའི་དྲུང་དུ་སྐད་ཅིག་མའི་རྒྱུན་གྱིས་འགྲོ་བ་ཡིན་ནོ་ཞེས་བྱ་བ་ནི་བསྡུས་པའི་དོན་ཏོ། །རྟག་ཏུ་ཞེས་བྱ་བ་ནི་གནས་སྐབས་ཐམས་ཅད་དུ་འཆི་བདག་གི་དྲུང་དུ་འགྲོ་བ་ཡིན་ཏེ། བྱིས་པ་དང་། གཞོན་ནུ་དང་། ལང་ཚོ་དང་། བར་མ་དང་། རྒན་པའི་གནས་སྐབས་གཞན་དུ་འཐོབ་པ་ཡིན་པས་
རྟག་ཏུ་འགྲོ་བ་ཉིད་ཡིན་ཞིང་གནས་སྐབས་གང་དུ་ཡང་མི་སྡོད་པའོ། །ཅི་རེ་ཞིག་ན་ལྡོག་པར་ཡང་འགྱུར་རོ་ཞེ་ན། སྨྲས་པ། ལྡོག་པ་མེད་པ་ཞེས་བྱ་བ་སྨོས་ཏེ། འདིས་ནི་ངེས་པར་གཟུང་བའི་འབྲས་བུ་བསྟན་ཏེ། གནས་སྐབས་ཕྱི་མར་སོང་བས་གནས་སྐབས་སྔ་མར་མི་གནས་པ་
ཡིན་ནོ། །གལ་ཏེ་མཚན་མོ་དང་ཉིན་མོར་ལྡོག་པར་མི་འགྱུར་རམ་ཞེ་ན། སྨྲས་པ། ཉིན་དང་མཚན་དུ་ཞེས་བྱ་བ་སྨོས་ཏེ། ཉིན་ཞེས་བྱ་བ་ནི་ཉིན་པར་ཏེ། མཚན་མོ་ཡང་ཡིན་ནོ། །ཟླ་བ་ཕྱེད་དང་། ཟླ་བ་དང་། ལོ་ལ་སོགས་པ་འདི་ནི་རྣམ་གྲངས་ཡིན་པའི་ཕྱིར་དེ་ཙམ་དུ་བཤད་དོ། །

རབ་ཏུ་འཇིག་པ་ཞེས་བྱ་བ་ནི་སྐད་ཅིག་མ་རེ་རེ་ལ་གཟུགས་དང་ནད་མེད་པ་དང་སྟོབས་ལ་སོགས་པའི་ཁྱད་པར་ཡོངས་སུ་ཟད་པ་ཞེས་བྱ་བའི་དོན་ཏོ། །འདི་དག་གིས་ནི་ན་ཚོད་ཀྱི་གནས་སྐབས་ཉིན་བར་དང་མཚན་མོ་རེ་རེ་ལ་སྐད་ཅིག་མས་མི་རྟག་པ་ཉིད་དུ་བསྟན་ཏོ། །ལྷག་མས་ནི་སྡུག་
བསྔལ་གྱིས་སྡུག་བསྔལ་བ་ཉིད་དུ་བསྟན་པའི་ཕྱིར་སྨྲས་པ། ཆུ་ཚན་ཞེས་བྱ་བ་སྨོས་པ་ནི་ལས་འཛིན་པའི་བསྡུ་བ་སྟེ། ཆུ་ཡང་ཡིན་ལ་ཚ་བ་ཡང་ཡིན་པས་ཆུ་ཚན་ཏེ། ཆུ་དེའི་ནང་དུ་བསྐོལ་བ་ཞེས་བྱ་བའི་དོན་ཏོ། །ཡང་ན་གང་ལ་ཆུ་ཚ་བ་ཡོད་པའི་ཐང་སྟེ། རབ་ཏུ་བསྐོལ་བའི་ཆུའི་
ནང་དུའོ། །ཉ་དང་འདྲ་བ་ཞེས་བྱ་བ་ནི་ཇི་ལྟར་ཉ་ལྟ་བུའོ། །གདུངས་པ་ཞེས་བྱ་བ་ནི་བསྐོལ་བའོ། །ཇི་ལྟར་ཉ་ཆུ་ཚན་གྱི་ནང་དུ་བཅུག་སྟེ་བསྐོལ་བ་དེ་བཞིན་དུ་སེམས་ཅན་འདི་དག་ཀྱང་རབ་ཏུ་སྡུག་བསྔལ་བ་ཡིན་ནོ། །སེམས་ཅན་འདི་དག་ཇི་ལྟར་སྡུག་བསྔལ་བ་ཡིན་ཞེ་ན། སྨྲས་པ། སྐྱེ་དང་
འཆི་བའི་ཞེས་བྱ་བ་སྨོས་ཏེ། སྡུག་བསྔལ་བ་ནི་འདུ་བྱེད་ལ་སོགས་པ་མི་འདོད་པས་སོ། །སྡུག་བསྔལ་གྱི་རང་བཞིན་ཉིད་སྨྲས་པ། སྐྱེ་དང་འཆི་བའི་ཞེས་བྱ་བ་སྟེ། འཁོར་བ་ཡིན་པའི་ཕྱིར་རོ། །འཁོར་བས་ནི་སྐྱེ་བ་དང་འཇིག་པ་མཚོན་པའི་ཕྱིར་ཏེ། གཉིས་པ་འཁྲུལ་འཁོར་དང་
འདྲ་བས་འགྲོ་བ་རྣམས་གཟིར་བ་ཡིན་ཏེ། སྡུག་བསྔལ་གསུམ་དང་ལྡན་པའི་ཕྱིར་རིགས་དང་ལྡན་པ་དང་འབྱོར་པ་དང་ལང་ཚོ་ལ་སོགས་པ་ཡིད་དུ་འོང་བའི་དངོས་པོ་རྣམ་པར་འགྱུར་བ་ཉིད་དུ་བསྟན་པས་འཁོར་བ་ལ་ལྷག་པར་ཆགས་པ་སྤང་བའི་ཕྱིར་ཚིགས་སུ་བཅད་པ་འདི་གསུངས་སོ། །
དུས་ཐམས་ཅད་དང་སྤྱོད་ལམ་ཐམས་ཅད་དུ་སྲོག་འགག་པ་ཉིད་དུ་འགྱུར་བའི་ཕྱིར་སྨྲས་པ། ཚེ་འདི་ཉིན་དང་མཚན་མོ་ཞེས་བྱ་བ་ལ་སོགས་པ་སྨོས་སོ། །རི་གངས་ཅན་གྱི་གནས་ན་དྲང་སྲོང་ལྔ་བརྒྱ་རྒ་བ་དང་འཆི་བ་མེད་པར་བྱ་བའི་ཕྱིར་དཀའ་ཐུབ་སྤྱོད་ཅིང་འདུག་གོ། །དེ་འདུལ་བའི་ཕྱིར་
བཅོམ་ལྡན་འདས་དེར་གཤེགས་ཏེ། འདོད་པ་ལ་རྣམ་པར་རྟོག་པ་ལ་སོགས་པས་ནི་ངན་སོང་དུ་འགྲོའོ་ཞེས་བསྟན་ཅིང་སྐྱོ་བ་སྐྱེད་དེ། རི་ཁ་བ་ཅན་གྱི་ཕྱོགས་རིའི་སྟེང་ནས་འོག་ཏུ་གང་གཱའི་ཆུ་རྒྱུན་འབབ་པ་ལ་གཟིགས་ཤིང་སྲོག་ལ་མི་འཆི་བར་བག་ཕབ་སྟེ་འདུག་པ་དེའི་དབང་དུ་མཛད་དེ་འདི་

གསུངས་སོ། །རྟག་ཏུ་རྒྱུན་མི་འཆད་པར་ཚེ་ཟད་པ་ཡིན་ནོ་ཞེས་བྱ་བ་ནི་བསྡུས་པའི་དོན་དུ་བསྟན་ཏོ། །ཚེ་ནི་སྲོག་གོ། །ཉིན་དང་མཚན་མོ་ནི་ཉི་མ་དང་མུན་པའོ། །འདིས་ནི་དུས་ཐམས་ཅད་དུ་ཚེ་ཟད་པར་བསྟན་ཏོ། །འགྲོ་བ་དང་ནི་ཞེས་བྱ་བ་ནི་གལ་ཏེ་འགྲོ་ན་ཡང་གྲིབ་
མ་བཞིན་ནོ། །འདུག་པ་ན་ཞེས་བྱ་བ་ནི་དབུགས་འབྱུང་བ་དང་རྔུབ་པ་བཞིན་ཏེ། འདུག་པ་ན་ཡང་ལུས་ཀྱི་གནས་སྐབས་ཐམས་ཅད་དུ་སྟེ། གཡོ་བ་དང་མི་གཡོ་བའི་གནས་སྐབས་ལུས་ཀྱི་སྤྱོད་ལམ་ཐམས་ཅད་ཡོངས་སུ་གཟུང་ངོ་། །འདིར་དཔེ་བསྟན་པ། ཆུ་ཀླུང་ཆེན་པོའི་ཞེས་བྱ་བ་ལ་
སོགས་པ་སྨོས་ཏེ། རྒྱུན་ནི་ཆུའི་རྒྱུན་ནོ། །ཆུ་ཀླུང་ཆེན་པོ་ནི་ཆུ་བོ་གང་གཱ་ལ་སོགས་པའོ། །བཞིན་དུ་ཞེས་བྱ་བ་ནི་དཔེའོ། །འགྲོ་བར་འགྱུར་ཞེས་བྱ་བ་ནི་ཐུག་པ་མེད་པར་འགྲོ་བར་བསྟན་པ་ཡིན་ཏེ། ཚེ་ནི་ཆུ་ཀླུང་ཆེན་པོའི་ཆུ་བཞིན་ནོ། །ཕྱིར་མི་ལྡོག་པར་ཞེས་བྱ་བ་ནི་ཚེ་འདས་པར་ཡང་ལྡོག་
པ་མེད་པའི་ཕྱིར་རོ། །ཆུ་ཀླུང་ཆེན་པོ་དང་འདྲ་བར་ནི་སེམས་ཅན་ནོ། །རྒྱུན་ལྟ་བུ་ནི་ཚེའོ། །ཇི་ལྟར་གནས་སྐབས་ཐམས་ཅད་དུ་ཆུ་བོ་ཆེན་པོའི་རྒྱུན་འགྲོ་ཞིང་ལྡོག་པ་མེད་པ་དེ་བཞིན་དུ་ཚེ་ཡང་དེ་ལྟ་བུའོ་ཞེས་བསྟན་པ་ཡིན་ནོ། །ཚེ་རྟག་པ་ཡིན་ནོ་ཞེས་རྟོག་པ་སྤང་བའི་ཕྱིར་འདི་གསུངས་སོ། །ཆོས་
ཀྱི་སྐུ་ནི་རྟག་པ་ཉིད་དེ་མཆོག་ཏུ་འགྱུར་བ་མེད་པ་དང་འདོད་པའི་འབྲས་བུ་ཡིན་པའི་ཕྱིར་ཏེ། གཟུགས་ཀྱི་ལུས་ནི་མ་ཡིན་ནོ་ཞེས་བསྟན་པའི་ཕྱིར་སྨྲས་པ། གསོན་མཐའ་ཞེས་བྱ་བ་ལ་སོགས་པ་སྨོས་སོ། །མཉན་ཡོད་ན་ཨུ་ཏ་ར་ཞེས་བྱ་བའི་གནས་བརྟན་ན་ཚོད་ལོ་བརྒྱད་ཅུ་ཙམ་ལོན་པ་ལས་
རབ་ཏུ་བྱུང་བ་རྒ་བ་དང་ནད་ཀྱིས་ཤིན་ཏུ་གཙེས་ཤིང་ཉམ་ཐག་སྟེ། སྟན་ལས་ལྡང་བ་དང་རྩོལ་བ་ལ་སོགས་པ་མི་ནུས་པ་ཞིག་ཡོད་དེ་ཁྱད་པར་དུ་དེའི་དབང་དུ་མཛད་ནས་འདི་གསུངས་སོ། །ལང་ཚོས་དྲེགས་པ་སྤང་ཕྱིར་དང་། །རྒ་བ་དང་ནད་ཀྱིས་འཇིག་ཅིང་འཆི་བ་དང་། མི་གཙང་བ་ཉིད་དུ་
བསྟན་པ་ནི་འདིར་བསྡུས་པའི་དོན་ཏོ། །ཡོངས་སུ་རྒ་བ་དང་ཞེས་བྱ་བ་ནི་རྒ་བས་ཡོངས་སུ་ཉམས་ཤིང་བཅོམ་པ་ཞེས་བྱ་བའི་དོན་ཏོ། །ལུས་འདི་ཞེས་བྱ་བ་ནི་ཟིན་པའི་ཕུང་པོའོ། །ནད་ཀྱི་ཚང་ཞེས་བྱ་བ་ནི་ནད་ཀྱི་གནས་སོ། །མྱུར་དུ་འཇིག་ཅིང་ཞེས་བྱ་བ་ནི་རང་བཞིན་གྱིས་འཇིག་པ་ཉིད་དུ་

འདིས་བསྟན་ཏོ། །མཆོག་ཏུ་འཇིག་པའི་ངང་ཚུལ་གྱི་གཞི་ཡིན་ཏེ་རྐྱེན་ཚོགས་པ་ཉིད་ཀྱིས་འཇིག་པའི་བདག་ཉིད་དེ་ཇི་ལྟར་ལས་སྤྱོད་པས་ཡན་ལག་དང་ཉིང་ལག་རྣམས་ལ་མཚོན་ལ་སོགས་པས་ལུས་བཅད་པ་ལ་སོགས་པ་ཡོད་པའི་ཕྱིར་རོ། །འཇིག་པར་འགྱུར་ཞེས་བྱ་བ་ནི་བྲལ་བ་སྟེ།
གཟུགས་ཀྱི་ལུས་དང་མིང་གི་ཚོགས་བྲལ་བའི་ཕྱིར་ཏེ། འདིས་ནི་འཆི་བ་ཉིད་སྟོན་ཏོ། །འདིས་དུས་ཇི་སྲིད་གནས་པའི་དུས་དེ་སྲིད་ཀྱི་བར་དུ་གཙང་བ་དང་དྲི་ཞིམ་པའི་རྫས་འདུས་པའི་བདག་ཉིད་ཡིན་ནམ་ཞེ་ན། དེ་ཡང་མེད་པར་བསྟན་པའི་ཕྱིར་སྨྲས་པ། རྣག་གི་ཚོགས་ཀྱང་ཞེས་བྱ་བ་
སྨོས་ཏེ། དྲི་ང་བའི་རྫས་བསགས་པ་ཞེས་བྱ་བའི་དོན་ཏོ། །སྒྲ་བ་དག་ཚོགས་ནི་ལུས་སོ་ཞེས་བརྗོད་པས་རྣག་གི་ཚོགས་མ་ཡིན་པའི་ཞེས་གཞན་དུ་བརྗོད་པར་འགྱུར་ཏེ། དྲི་ང་བའི་རྫས་འདུས་པ་ཡིན་པའི་ཕྱིར་འདི་ནི་ལུས་མ་ཡིན་པ་ཡང་འཇིག་པར་འགྱུར་རོ་ཞེས་བྱ་བའི་དོན་ཏོ། །ཅིའི་
ཕྱིར་འདི་ནི་ངེས་པར་འཇིག་པ་ཡིན་ཞེ་ན། མཐའ་འཆི་བ་ཡིན་པའི་ཕྱིར་ཞེས་བྱ་བ་སྨོས་ཏེ། གང་གི་ཕྱིར་སྲོག་ཐམས་ཅད་ནི་མཐར་འཆི་བ་ཡིན་པའི་ཕྱིར་རོ། །ཆོས་ཉིད་ཀྱི་རིགས་པ་སྨྲས་པ། ཇི་ལྟར་མེ་ནི་ཚ་བའི་བདག་ཉིད་ཅེས་བྱ་བ་ལ་སོགས་པ་ཡིན་ཏེ། གང་གི་ཕྱིར་སྲོག་
ཡོད་ཅིང་ལུས་གནས་པ་ཡིན་པའི་ཕྱིར་འདི་ནི་སྲོག་འཇིག་པ་ཡིན་ཏེ། དེས་ན་གནས་ཉམས་ན་གནས་པ་ཉམས་པའི་ཕྱིར་ངེས་པར་འཇིག་པར་འགྱུར་རོ། །ལང་ཚོ་ལ་སོགས་པས་དྲེགས་པ་དག་ལ་དེ་སྤང་བའི་ཕྱིར་འདི་གསུངས་སོ། །འཇིག་པར་འགྱུར་རོ་ཞེས་བསྟན་པ་ལ་འདི་ཇི་ལྟར་འཇིག་
པར་འགྱུར་ཞེ་ན། སྨྲས་པ། ཀྱེ་མ་ལུས་འདི་མི་ཐོགས་པར། །ཞེས་བྱ་བ་ལ་སོགས་པ་སྨོས་སོ། །མཉན་ཡོད་ན་བཅོམ་ལྡན་འདས་དུར་ཁྲོད་དུ་གཤེགས་ཤིང་རྒྱུ་བ་ན་ཕྱོགས་འགའ་ཞིག་ན་ཤི་བའི་རོ་མྱགས་པ་དག་གཟིགས་ཏེ། རྒྱལ་པོ་ལ་སོགས་པ་རིགས་མཐོ་བ་ལས་རབ་ཏུ་
བྱུང་བ་དག་ཞག་བདུན་གྱི་འོག་ཏུ་ངེས་པར་འཆི་བ་ལས་བརྩམས་ཏེ་འདི་གསུངས་སོ། །ལུས་འདི་མི་རྟག་པ་ཉིད་དང་སྟོང་པ་ཉིད་དུ་ཡོངས་སུ་བསྟན་པ་ཡིན་ནོ་ཞེས་བྱ་བ་ནི་བསྡུས་པའི་དོན་ཏོ། །མི་ཐོགས་པ་ཞེས་བྱ་བ་ནི་ཡུན་རིང་པོར་མི་ཐོགས་པ་སྟེ་ཞག་བདུན་ཙམ་གནས་པ་ཡིན་པའི་ཕྱིར་

སྲོག་ནི་མྱུར་དུ་འཆི་བའི་ཆོས་ཉིད་དུ་བསྟན་པའོ། །ཀྱེ་མ་ཞེས་བྱ་བ་ནི་སྲོག་ཆགས་དང་། དེའི་ལུས་ལ་སྙིང་བརྩེ་བ་དང་རྗེས་སུ་བརྩེ་བ་ཡིན་པའི་ཕྱིར་རོ་ཞེས་བསྟན་པ་ཡིན་ནོ། །ལུས་འདི་ཞེས་བྱ་བ་ནི་ཟིན་པའི་ཕུང་པོའོ། །སའི་སྟེང་དུ་ཞེས་བྱ་བ་ནི་དུར་ཁྲོད་ལ་
སོགས་པའི་ས་ཕྱོགས་སོ། །འགྱེལ་བར་འགྱུར་ཞེས་བྱ་བ་ནི་ལྷགས་པ་སྟེ། སའི་སྟེང་དུ་ལྷུང་ཞིང་གནས་པའི་དོན་ཏོ། །སྟོང་ཞིང་ཞེས་བྱ་བ་ནི་གནས་པ་གསུམ་དང་བྲལ་བ་སྟེ། བདག་མེད་པ་ཞེས་བྱ་བའི་དོན་ཏོ། །འོ་ན་རྣམ་པར་ཤེས་པའི་བདག་དེ་ཡང་མི་གནས་སམ་ཞེ་ན། སྨྲས་པ། རྣམ་
ཤེས་དང་བྲལ་ནས་ཞེས་བྱ་བ་སྨོས་ཏེ། བྲལ་བ་ནི་སོ་སོར་བྲལ་བ་སྟེ། རྣམ་པར་ཤེས་པ་འདི་ལས་བྲལ་ཞིང་སེམས་དང་བྲལ་བའི་དོན་ཏེ། ཇི་སྐད་དུ། ཚེ་དང་དྲོད་དང་རྣམ་ཤེས་ཀྱིས། །གང་ཚེ་ལུས་འདི་སྤངས་པ་ན། །དཔེར་ན་སེམས་མེད་ཤིང་བཞིན་དུ། །ས་ཡི་སྟེང་དུ་ཉལ་བར་འགྱུར། །
ཞེས་སོ། །བདག་མེད་ཅིང་རྣམ་པར་ཤེས་པ་དང་བྲལ་བའི་ཕྱིར་འཆི་བ་ཡིན་ནོ་ཞེས་རྟོགས་པར་བྱའོ། །འདིར་དཔེ་བསྟན་པ། དུར་ཁྲོད་བོར་བ་ཞེས་བྱ་བ་ཡིན་ཏེ། དུར་ཁྲོད་བོར་བའི་མགལ་དུམ་བཞིན། །ཞེས་བྱ་བ་ལ། དགོས་པ་མེད་པའི་ཤིང་ཡིན་ཏེ། །སྐྱེས་བུ་ཤིང་གི་བསགས་པ་
བྱེད་པར་འདོད་པས་ནགས་ཚལ་དུ་ཞུགས་ཏེ། ཤིང་དྲང་པོ་བཅད་ཅིང་བླངས་ནས་ལྷག་མ་ཁོང་སྟོང་དང་རུལ་པ་དགོས་པ་མེད་ཅིང་། སྙིང་པོ་མེད་པའི་ཤིང་ནི་ཡོངས་སུ་འདོར་བ་ཡིན་ནོ། །དཔེར་ན་ནགས་ཚལ་དག་ན་དགོས་པ་མེད་པའི་ཤིང་དག་བོར་ན་སྤྱོད་པ་མེད་ཅིང་གནས་པ་དེ་བཞིན་
དུ་ལུས་འདི་ཡང་རང་བཞིན་གྱིས་བདག་གིས་སྟོང་ལ་རྣམ་པར་ཤེས་པ་དང་བྲལ་ཞིང་འཆི་བའི་གནས་སྐབས་ན་གཡོ་བ་མེད་ཅིང་དུར་ཁྲོད་ཀྱི་ཕྱོགས་ན་འགྱེལ་བར་འགྱུར་བ་ཡིན་ནོ། །གཞན་དག་ནི་མགལ་མེའི་དུམ་བུ་ཡིན་ནོ་ཞེས་འདོད་དེ། སྡུག་པའི་ལག་མཐིལ་གྱིས་གཟུང་དྲི་ཞིམ་ཕྲེང་བ་
ཕྱེ་མའི་དྲིས་མཆོད་ཅིང་། །བདེ་བའི་ལུས་འདི་དུར་ཁྲོད་གནས་སུ་མགལ་དུམ་ལྟར་ནི་ཡོངས་བོར་ནས། །གདུག་པའི་གཅན་གཟན་བརྐམ་པའི་མཐུས་ནི་མིག་དག་ཤ་ལྤགས་སྣག་གུ་དག །འཇིག་པར་བྱེད་དེ་ངན་པའི་རང་བཞིན་མི་བརྟན་འཇིག་རྟེན་སྒྱུ་མ་བཞིན། །ཞེའོ། །གཞན་དག་ནི་སོག་

མར་འདོད་དེ། ཇི་སྐད་དུ། ཇི་ལྟར་བཏབ་ཀྱང་རུང་སྟེ་ས་བོན་ནི། །བསོད་ནམས་ཅན་གྱིས་ལོ་ཏོག་མང་པོ་ཐོབ། །བསོད་ནམས་མེད་ན་སེར་བས་བཅོམ་འགྱུར་ཏེ། །མགལ་དུམ་ཙམ་ཡང་འཐོབ་པ་མ་ཡིན་ནོ། །ཞེས་སོ། །ལུས་འདི་ནི་ཐ་མར་དུར་ཁྲོད་པ་ཡིན་ནོ་ཞེས་བསྟན་པ་སྟེ། དེ་
ལ་ལྷག་པར་ཞེན་པ་རྣམས་སྤངས་པའི་ཕྱིར་འདི་གསུངས་སོ། །དེས་ན་ཡང་ལུས་འདི་ནི་ངེས་པར་དུར་ཁྲོད་ཀྱི་གནས་ཡིན་ཏེ། འདིས་ནི་འཚོ་བར་གྱུར་ན་ཡང་མཁས་པ་རྣམས་ཀྱིས་དགོས་པ་མེད་དོ་ཞེས་བསྟན་པའི་ཕྱིར་སྨྲས་པ། རྒྱུན་དུ་ཞེས་བྱ་བ་ལ་སོགས་པ་སྨོས་ཏེ། རྨའི་སྒོ་ནས་རབ་ཏུ་
འཛག་ཅིང་གཤེར་བ་དང་ཉེ་དུ་དང་སྨན་པ་རྣམས་ཀྱིས་སྤངས་ཤིང་བཞི་མདོར་བོར་བ་མཛེ་ཅན་ཞིག་གཟིགས་ཏེ། དགེ་སློང་རྣམས་ལ་བཀའ་སྩལ་པ། དགེ་སློང་དག་འདི་ནི་ཉེས་པ་མང་པོས་མ་རུང་བ་སྟེ། ལུས་ནི་བྱས་པ་ཆུད་གཟོན་པ་དང་དྲི་ང་བ་ཡིན་ནོ་ཞེས་རྒྱ་ཆེར་གསུངས་སོ། །དགེ་
སློང་ཞིག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་དེ་ལྟར་ལུས་འདི་ནི་ཤིན་ཏུ་མ་རུང་བ་ལགས་ཏེ། ཤིན་ཏུ་སྨད་ཅིང་ཕྱག་དར་གྱི་ཕུང་པོ་ལྟ་བུ་ལགས་སོ། །དགེ་སློང་དག་དེ་དེ་བཞིན་ནོ། །དེ་དེ་བཞིན་ཏེ་ཞེས་བྱ་བ་ལ་སོགས་པ་སྟེ། ཚིགས་སུ་བཅད་པ་གཉིས་གསུངས་
སོ། །གང་གི་ཕྱིར་སེམས་ཅན་འདི་དག་བརྟག་པར་བྱ་ན་འདི་ལྟར་ལུས་འདི་ལ་ཕལ་ཆེར་འདོད་པས་ཆགས་ཤིང་གང་མི་གཙང་བ་དང་། སྡུག་བསྔལ་བ་དང་མི་རྟག་པ་ཉིད་ཡིན་ཏེ། དེ་ལ་རྒྱུ་གང་གིས་འདིར་གཙང་བ་དང་། བདེ་བ་དང་། རྟག་པའི་ཕྱིན་ཅི་ལོག་གི་གཉེན་པོ་འདིར་བསྟན་ཏོ་ཞེས་བྱ་
བ་ནི་བསྡུས་པའི་དོན་ཏོ། །ཡང་ན་བསྟོད་པ་དང་། སྨད་པ་ལ་སོགས་པ་གསལ་བར་བྱེད་པའི་དོན་ཏེ། གང་སྨྲས་པ། དོར་བ་ཅིར་མི་རུང་ཞེས་བྱ་བ་ནི་སྨད་ཅིང་བཤུང་པའི་ཚིག་ཡིན་ནོ། །འདི་ཞེས་བྱ་བ་ནི་ཟིན་པའོ། །སྨད་པར་བྱ་བ་ཉིད་སྨྲས་པ། ལུས་ཞེས་བྱ་བ་སྨོས་ཏེ། དྲི་ང་བའི་རྫས་
བསགས་པར་གྱུར་པའི་ལུས་ཏེ། འདིས་བྱ་བ་ཅིར་ཡང་མི་རུང་ཞིང་འདི་ཅི་ཞིག་ཏུ་དགོས་ཞེས་བྱ་བ་ཡིན་ནོ། །འདིའི་ཁྱད་པར་གྱི་ཚུལ་གྱིས་སྨད་པའི་རྒྱུ་སྨྲས་པ། མི་གཙང་འཛག་པ་ཞེས་བྱ་བ་སྨོས་ཏེ། འབྱུང་ཞིང་འཛག་པ་ཡིན་ཏེ། རྨའི་སྒོ་དགུ་ནས་རྒྱུན་མི་འཆད་པར་མི་གཙང་བ་རྣམ་པ་མང་པོ་

འབྱུང་ཞེས་བྱ་བའི་དོན་ཏོ། །འདི་ལ་མི་གཙང་ཞིང་དྲི་ང་བ་ཡོད་པ་ནི་མི་གཙང་བ་སྟེ། དེས་མི་འདོད་པའི་དྲི་ང་བ་དང་རབ་ཏུ་ཉམས་པའི་དྲིའོ། །ཚིག་རྐང་གཉིས་པ་འདིས་ནི་ཁ་དོག་དང་དྲི་རྣམ་པར་འགྱུར་བ་བསྟན་ཏོ། །དེ་ལས་གཞན་པ་དང་ལྡན་ཞིང་སྐྱེ་བ་ཡིན་པར་སྨྲས་
པ། རྒྱུན་དུ་ནད་ཀྱིས་མངོན་གདུང་ཞིང་། །ཞེས་བྱ་བ་སྨོས་ཏེ། རྟག་ཏུ་ཉམ་ཐག་པར་བྱེད་པ་ཡིན་ཏེ། བཀྲེས་པ་དང་། སྐོམ་པ་དང་། ཆམ་པ་དང་རིམས་ཚད་པར་འཁྲུ་བ་ལ་སོགས་པའི་ནད་ཀྱིས་མངོན་པར་གདུངས་པ་ཡང་ཡིན་ནོ། །རྒ་བ་དང་འཆི་བས་འཚེར་འགྲིབ་པའི་ཞེས་བྱ་བ་ནི་རྒ་བ་དང་འཆི་
བ་གཉིས་ཀྱིས་སྐྲག་པའི་ཕྱིར་འཇིག་པ་ཡིན་ཏེ། རྒ་བ་དང་འཆི་བ་གཉིས་ལ་རྟག་ཏུ་དོགས་པ་ཞེས་བྱ་བའི་དོན་ཏོ། །དེའི་ཕྱིར་རྒ་བ་སྟེ་ནུས་པ་ཐམས་ཅད་མེད་པར་བྱེད་པ་དང་། རིས་མཐུན་པ་ཆད་པའི་འཆི་བས་རྟག་ཏུ་གནོད་པ་ཡིན་ཏེ། ལུས་འདི་ནི་འབྱོར་པ་དང་མི་ལྡན་པ་ཡིན་ནོ། །ཕྱིན་ཅི་ལོག་
སྤང་བའི་ཕྱིར་ཚིགས་སུ་བཅད་པ་འདི་གསུངས་སོ། །ཅི་ལུས་འདི་ནི་གཅིག་ཏུ་དགོས་པ་མེད་པས་ཅི་ཡང་མི་བྱ་བ་ཉིད་ཀྱིས་དོར་བར་བྱའོ་ཞེས་རྟོག་པ་ལ་དེ་སྤང་བའི་ཕྱིར་སྨྲས་པ། མྱུར་དུ་ཞེས་བྱ་བ་ལ་སོགས་པ་སྨོས་སོ། །སྐྱོན་དུ་མ་དང་ལྡན་ཞིང་གཡོ་བའི་གཞི་ཡིན་དུ་ཟིན་ཀྱང་ཐར་པ་ཐོབ་པ་ལ་
ཕན་འདོགས་པའི་ཕྱིར་འདིར་བསྔགས་པར་བྱ་བ་ཡིན་ནོ་ཞེས་བྱ་བ་ནི་བསྡུས་པའི་དོན་ཏོ། །འདི་ཡིས་ཞེས་བྱ་བ་ནི་ཟིན་པས་སོ། །ཡང་ན་འདོད་པ་ན་སྤྱོད་པས་སོ། །རྣག་དང་ལྡན་པ་ཞེས་བྱ་བ་ནི་མི་གཙང་བའི་རྫས་འདུས་པར་གྱུར་པའི་ལུས་ཀྱིས་སོ། །མྱུར་དུ་འཇིག་ཅིང་ཞེས་བྱ་བ་ནི་འཇིག་
པའི་ངང་ཚུལ་ཡོད་པ་སྟེ། འདིས་ནི་མི་རྟག་པ་ཉིད་དུ་བསྟན་ཏོ། །ན་བ་ཞེས་བྱ་བ་ནི་ནད་ཀྱིས་ཉམ་ཐག་པ་སྟེ། དེས་ཟིལ་གྱིས་ནོན་པ་ཞེས་བྱ་བའི་དོན་ཏོ། །འདིས་ནི་སྡུག་བསྔལ་བ་ཉིད་དུ་བསྟན་ཏོ། །འདིར་མི་གཙང་བས་ནི་ལུས་ཀྱི་རང་བཞིན་གྱི་མཚན་ཉིད་ཀྱི་སྐྱོན་བསྟན་ཏོ། །མི་རྟག་
པ་དང་། སྡུག་བསྔལ་བ་ཉིད་ཀྱིས་ནི་སྤྱིའི་མཚན་ཉིད་ཀྱི་སྐྱོན་བསྟན་ཏོ། །དོན་དུ་གཉེར་བར་གྱིས་ཞེས་བྱ་བ་ནི་རྗེས་སུ་ཤེས་པར་གྱིས་ཤིག་པ་སྟེ་བསམ་པ་དང་ཀུན་དུ་ཤེས་པར་གྱིས་ཤིག་ཅེས་བྱ་བའི་དོན་ཏོ། །དེ་ལྟར་སྟོབས་ཀྱིས་དོན་དུ་གཉེར་བར་བྱ་བ་དེ་གང་ཡིན་ཞེ་ན། སྨྲས་པ། ཞི་མཆོག་

ཅེས་བྱ་བ་སྨོས་ཏེ། མི་གཙང་བའི་ལུས་ལ་སོགས་པ་འདི་དེ་ན་མེད་པ་ཉིད་དེ་གཏན་དུ་མྱ་ངན་ལས་འདས་པ་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་གཙོར་སྡུག་བསྔལ་ཉེ་བར་ཞི་བ་ཞེས་བྱ་བའི་དོན་ཏོ། །གྲུབ་དང་བདེ་བ་ཞེས་བྱ་བ་ནི་རྟག་པ་ཉིད་དུ་གྲུབ་པས་འཇོག་པ་མེད་
པའོ། །བླ་ན་མེད་པ་ནི་སྡུག་བསྔལ་མེད་པའི་ཕྱིར་རོ། །ཡང་ན་གྲུབ་པ་དང་བདེ་བ་ནི་གྲུབ་པ་དང་བདེ་བའོ། །མྱ་ངན་ལས་འདས་པ་དེ་ན་འབྲལ་བ་མེད་པས་གྲུབ་པ་ནི་གཏན་དུ་བདེ་བ་ཉིད་ཀྱི་ཕྱིར་རོ། །དགེ་བ་ཡིན་པའི་ཕྱིར་བདེ་བ་སྟེ། སྡུག་བསྔལ་མཐའ་དག་དང་བྲལ་བའི་ཕྱིར་རོ། །བླ་ན་མེད་པ་
ཞེས་བྱ་བ་ནི་དངོས་པོ་ཐམས་ཅད་ནི་བླ་ན་ཡོད་པ་ཡིན་ལ། ཐར་པ་ནི་བླ་ན་མེད་པ་སྟེ། རྟག་ཏུ་དགེ་བ་ཉིད་ཡིན་པའི་ཕྱིར་རོ། །ཡང་བཤད་པ། རྟག་པའི་དགེ་བ་མེད་པ་སྟེ། །ནམ་མཁའ་བློ་ནི་འགོག་བྱེད་པ། །དད་པ་ལ་སོགས་མི་རྟག་དགེ། །གཉིས་ལས་ཐར་པ་བླ་མེད་ཡིན། །ཞེས་སོ། །ཉོན་
མོངས་པ་དང་ཉེ་བའི་ཉོན་མོངས་པ་ཐམས་ཅད་ཡང་དག་པར་གཅད་པས་ནི་ཕུང་པོ་ལྷག་མ་དང་བཅས་པའི་མྱ་ངན་ལས་འདས་པ་སྟེ། མཆོག་ཏུ་ཞི་བའོ། །འདུས་བྱས་ཐམས་ཅད་གཏན་དུ་སྤངས་པ་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་ནི་གྲུབ་པ་དང་བདེ་བ་བླ་ན་མེད་པའོ་ཞེས་གཞན་
དག་ཟེར་རོ། །གཞན་དག་ནི་ཉན་ཐོས་དང་རང་སངས་རྒྱས་ཀྱི་བྱང་ཆུབ་དང་མི་གནས་པའི་མྱ་ངན་ལས་འདས་པ་གསུམ་དུ་བཤད་པ་དང་ཞི་བ་དང་། གྲུབ་པ་དང་། བདེ་བ་བླ་ན་མེད་པ་གསུམ་གོ་རིམས་བཞིན་དུ་སྦྱར་རོ་ཞེས་སོ། །ལུས་ལ་མངོན་པར་དགའ་བ་རྣམས་དང་མྱ་ངན་ལས་འདས་པས་
སྐྲག་པ་རྣམས་ལ་སྐྱོན་དང་ཡོན་ཏན་བསྟན་པའི་ཕྱིར་འདི་གསུངས་སོ། །གང་གི་ཕྱིར་དེ་ལྟ་བུའི་རྣམ་པར་གྲོལ་བ་དེ་ཐོབ་པར་བྱ་བའི་ཕྱིར་འདི་དག་བསྟེན་པ་ལ་འབད་པར་བྱ་བ་ཡིན་ཏེ། གཞན་དག་ལ་ནི་ཡིད་བརྟན་པར་བྱ་བ་མ་ཡིན་ནོ་ཞེས་བསྟན་པའི་ཕྱིར་སྨྲས་པ། དགུན་ཀ་དང་ནི་ཞེས་
བྱ་བ་སྨོས་སོ། །མཉན་ཡོད་ན་མ་ན་སི་ཞེས་བྱ་བའི་ཚོང་དཔོན་གྱི་བུ་ཞིག་ཡོད་དེ་ནོར་རྣམ་པ་སྣ་ཚོགས་ཀྱི་འབྱོར་པ་ཕུན་སུམ་ཚོགས་པ་དང་ལྡན་ཞིང་དེ་ཡང་འདོད་པ་ལ་ཞེན་པ་ཞིག་སྟེ། དེ་དུས་ཇི་ལྟ་བ་བཞིན་དུ་འདོད་པ་ལ་རབ་ཏུ་ལོངས་སྤྱོད་པར་འདོད་པས་ཡོ་བྱད་དང་བཅས་པས་དགུན་

དང་དཔྱིད་དང་དབྱར་གྱི་དུས་སུ་ཉེ་བར་ལོངས་སྤྱོད་པའི་ཁང་པ་ཤིན་ཏུ་ཉམས་དགའ་བ་གསུམ་བྱས་སོ། །དེས་དེར་ཡང་ཡིད་ལ་འདོད་པའི་འབྲས་བུ་མ་སྤྱད་པ་ཉིད་དུ་ཤི་བའི་དུས་བྱས་ཏེ། དེའི་དབང་དུ་མཛད་ནས་འདི་གསུངས་སོ། །འདི་ཐོས་པས་སྲོག་ཆགས་སྟོང་ཕྲག་
དྲུག་ཅུ་བདེན་པ་མངོན་པར་རྟོགས་པར་གྱུར་ཏོ། །གཞན་དག་ནི་ཚོང་དཔོན་ཆེན་པོ་ནོར་མང་པོ་པ་ཞེས་བྱ་བ་རྣམ་པར་རྟོག་པ་ཤིན་ཏུ་མང་བ་ཞིག་ཡོད་པ་དེའི་དབང་དུ་མཛད་པའོ་ཞེས་སོ། །མི་རིགས་པར་སེམས་པར་བྱེད་པ་ནི་དགུན་ཀ་དང་དཔྱིད་ཀ་དང་དབྱར་ཀ་འདི་དག་བྱའོ་ཞེས་སེམས་པར་བྱེད་པའོ། །མི་རིགས་
པར་སེམས་པར་བྱེད་པ་པོ་བྱིས་པ་ཞེས་བྱ་བ་འདིས་སོ། །མི་རིགས་པར་བྱེད་པའི་རྒྱུ་ནི་བར་ཆད་མཐོང་བར་མ་གྱུར་ཏོ་ཞེས་བྱ་བ་སྟེ་འདི་ནི་བསྡུས་པའི་དོན་ཏོ། །འདི་དག་ཅེས་བྱ་བ་ནི་ཁྱིམ་དང་སྐྱེད་མོས་ཚལ་ལ་སོགས་པའོ། །དབྱར་ཀ་ཞེས་བྱ་བ་ནི་དབྱར་གྱི་དུས་སོ། །བྱའོ་ཞེས་བྱ་བ་ནི་བརྩམ་
པར་བྱ་བ་སྟེ། དེའི་དུས་དང་མཐུན་པའི་འདོད་པའི་བདེ་བ་ཉམས་སུ་མྱོང་བར་བྱའོ་ཞེས་པའི་དོན་ཏོ། །དགུན་ཀ་དང་ནི་དཔྱིད་ཀ་དང་། །ཞེས་བྱ་བ་ལ་དང་གི་སྒྲ་ནི་འདི་དག་གོ་ཞེས་བྱ་བར་དྲང་བའི་དོན་ཏོ། །ནི་ཞེས་བྱ་བ་ནི་དབྱེ་བའོ། །ངེས་པ་མེད་པའི་གནས་ལ་རོ་མྱང་བར་བྱ་བ་ནི་རིགས་པས་འདི་ཉིད་
ཡིན་ནོ་ཞེས་བྱ་བ་ནི་འདིར་བལྟ་བར་བྱའོ། །འདི་ལྟར་སུ་ཞིག་སེམས་པར་བྱེད་ཅེ་ན། སྨྲས་པ། བྱིས་པ་ཞེས་བྱ་བ་སྨོས་ཏེ། བློ་མ་བྱེ་ཞིང་མི་ཤེས་པ་སྟེ། ཡོན་ཏན་དང་སྐྱོན་མི་ཤེས་པ་ཞེས་བྱ་བའི་དོན་ཏོ། །རྣམ་པར་སེམས་བྱེད་པས་ཞེས་བྱ་བ་ནི་རྣམ་པར་རྟོག་པར་བྱེད་པའོ། །པས་ཞེས་བྱ་བ་ནི་དེ་
ལྟར་སྔར་བསྟན་པའི་དགུན་ཀ་ཞེས་བྱ་བ་ལ་སོགས་པ་སྟོན་པ་ཡིན་ནོ། །གང་མཁས་པ་དེ་ནི་འཚོ་བ་འདི་ལ་བར་ཆད་མང་པོ་ཡོད་པར་རྟོགས་པ་ཡིན་པའི་ཕྱིར་འདི་ལྟར་སེམས་པར་བྱེད་དེ། གང་དག་ནི་དབུགས་དབྱུང་བ་དང་རྔུབ་པ་ཙམ་དུ་འཚོ་བ་འདི་ཡང་ལེགས་པར་རྙེད་པ་ཡིན་ནོ་ཞེས་སོ། །ཅིའི་ཕྱིར་བྱིས་པ་
དག་དེ་ལྟར་མི་སེམས་ཤེ་ན། སྨྲས་པ། བར་ཆད་མཐོང་བར་མ་གྱུར་ཏོ། །ཞེས་བྱ་བ་ཡིན་ཏེ། གང་ཡང་སྲོག་འདི་ལ་ནི་བར་ཆད་མང་པོ་ཡོད་དེ། དེའི་ཕྱིར་མ་འོངས་པའི་དོན་ཕལ་ཆེ་བ་དག་ལ་བརྟག་པར་མི་བྱའོ། །གང་གི་ཕྱིར་དངོས་པོ་འདི་དག་ཐམས་ཅད་ནི་སྲོག་གི་བར་དུ་གཅོད་པར་བྱེད་པ་སྟེ།

དེ་ཤེས་པར་མི་ནུས་སོ། །ཡང་སྨྲས་པ། འཚོ་བ་གཅོད་བྱེད་མ་ལུས་པའི། །འདུས་བྱས་དུག་དང་འདྲ་བ་ཡིན། །འདི་དག་རྟག་པར་གྱུར་ན་ནི། །དུག་ཏུ་མི་འགྱུར་གང་ཡང་མེད། །བར་དུ་གཅོད་པ་ཞེས་བྱ་བ་ནི་གང་འཚོ་བའི་བར་དུ་གཅོད་པའི་རྐྱེན་ནོ། །ཐུང་བ་ནི་ཤིན་ཏུ་ཡུན་ཐུང་བར་
གནས་པའི་འཚོ་བ་ཡོད་པ་སྟེ། ཚེ་ཡོད་པའོ། །ཚེ་དེ་ཡང་མི་བརྟན་པ་ཡིན་ཏེ། འཇིག་པའི་ཆོས་ཅན་ཡིན་པའི་ཕྱིར། ཇི་སྐད་དུ་གསུངས་པ། རང་བཞིན་གྱིས་ནི་ལུས་ཅན་འཆི་འགྱུར་ཞིང་། །སྐད་ཅིག་ཙམ་ཞིག་སྲོག་ནི་གནས་གྱུར་པ། །སྐྱེ་བོ་དེ་ནི་རྙེད་དང་ལྡན་པ་སྟེ། །སྲོག་ནི་རྣམ་པར་འགྱུར་
ཞེས་མཁས་པས་ཤེས། །ཞེས་སོ། །མི་འཆི་བ་ལ་སོགས་པར་རྣམ་པར་རྟོག་ཅིང་ལས་ཀྱི་མཐའ་རིང་བ་དག་ལ་སྐྱོ་བ་བསྐྱེད་པའི་ཕྱིར་འདི་གསུངས་སོ། །བག་མེད་པའི་གནས་འདོད་པ་ལ་ཆགས་པ་ཉི་ཚེར་ཡང་མ་ཟད་དེ། བུ་ལ་སོགས་པ་ལ་ཆགས་པ་ཡང་བསྟན་པའི་ཕྱིར་སྨྲས་པ། བུ་དང་
ནོར་ཞེས་བྱ་བ་ལ་སོགས་པ་སྨོས་སོ། །གང་གཱའི་ཀླུང་གི་འགྲམ་གྱི་གྲོང་ཁྱེར་ན་གང་གཱའི་ལྷ་ཞེས་བྱ་བའི་ཁྱིམ་བདག་བུ་མང་ཞིང་གཡོག་འཁོར་དང་ནོར་དང་ཕྱུགས་དང་ལས་བྱེད་པ་ལ་སོགས་པ་དང་ལྡན་པ་ཞིག་གནས་སོ། །ཇི་ཙམ་ན་ནུབ་མོ་གཉིད་ཀྱིས་ལོག་ཅིང་བག་ཕབ་སྟེ་འདུག་པ་
ལས་ཆུ་བོ་ཆེན་པོས་གྲོང་ཁྱེར་ཐམས་ཅད་གང་གཱའི་ནང་དུ་བདས་ཏེ། ཁྱེར་བ་དེའི་དབང་དུ་མཛད་དེ་ཚིགས་སུ་བཅད་པ་འདི་གསུངས་སོ། །གཞན་དག་ན་རེ་དགེ་སློང་མ་གཽ་ཏ་མིའི་དབང་དུ་མཛད་ནས་གསུངས་སོ་ཞེས་སོ། །རྨོངས་པས་འཁོར་བའི་ཡོ་བྱད་ལེགས་པར་བསགས་པ་དང་བསྲུངས་
པ་ལ་སོགས་པ་མཆོག་ཏུ་བྱེད་པའི་མི་ནི་འཆི་བདག་གིས་བླངས་ཏེ་ཁྱེར་བར་འགྱུར་ཞེས་བྱ་བ་ནི་འདིའི་བསྡུས་པའི་དོན་ཏོ། །བུ་དང་ནོར་མང་པོ་དེ་དག་མ་འབྱོར་པ་མེད་པ་དེ་ལ་རྣམ་པར་ཆགས་ཤིང་ལྷག་པར་ཞེན་པའི་མིའི་ཡིད་གང་ཡིན་པ་དེ་ནི་དེ་ལྟ་བུའོ། །འདི་ལྟར་འཇིག་རྟེན་འདི་ན་ཕལ་ཆེར་
རིགས་བརྒྱུད་ཀྱི་ཕྱིར་ནི་བུ་འདོད་དོ། །ཡུལ་ལ་ཉེ་བར་ལོངས་སྤྱོད་པའི་ཕྱིར་ནི་ནོར་དང་ཕྱུགས་ཕུན་སུམ་ཚོགས་པ་འདོད་དོ། །དེ་ལ་ནོར་ནི་ནོར་དང་འབྲུ་ལ་སོགས་པའོ། །ཕྱུགས་ནི་བ་ལང་དང་མ་ཧེ་ལ་སོགས་པ་རྐང་པ་བཞིའོ། །དེ་ལ་རྣམ་པར་ཆགས་པས་དུས་དུས་སུ་སྦྱིན་པ་དང་། ཚུལ་

ཁྲིམས་དང་། ཐོས་པ་དང་། བསམ་པ་དག་ལ་སྦྱོར་བ་མེད་པའོ། །མི་ཞེས་བྱ་བ་ནི་སྲོག་ཆགས་སོ། །ཅི་ནས་དེ་ཇི་ལྟར་འཆི་བདག་གིས་བླངས་ནས་འགྲོ་ཞེ་ན། འདིར་དཔེ་བསྟན་པ། ཉལ་གྲོང་ཞེས་བྱ་བ་ནི་གྲོང་ན་གནས་པའི་སྐྱེ་བོ་ནུབ་མོ་གཉིད་ལོག་པར་གྱུར་
པའོ། །བཞིན་དུ་ཞེས་བྱ་བ་ནི་དཔེའི་དོན་ཏེ། ཇི་ལྟར་དབྱར་གྱི་དུས་སུ་ཆུའི་ཚོགས་ཆེན་པོ་གློ་བུར་དུ་བྱུང་ནས་བླངས་ཏེ་ཆུ་བོ་ཆེན་པོའི་ནང་དུ་དེད་པར་བྱེད་པ་དེ་བཞིན་དུ་བུ་ལ་སོགས་པ་ལ་ཡིད་རྣམ་པར་ཆགས་ཤིང་ལོག་པར་སྤྱོད་པ་དག་བྱེད་པ་ན་བག་མེད་པའི་གཉིད་ཀྱིས་ལོག་པ་ནི་འཆི་
བདག་ནམ་མཁའ་ལྡིང་ལྟ་བུས་ཀླུ་བླངས་ཏེ་འགྲོ་བ་བཞིན་ནོ། །ཁྱིམ་གྱི་ཡོངས་སུ་བཟུང་བ་དག་ལ་ཆགས་ཤིང་བསོད་ནམས་བྱེད་པ་ལ་བག་མེད་པ་རྣམས་སྐྱོ་བ་བསྐྱེད་པའི་ཕྱིར་འདི་གསུངས་སོ། །བུ་ལ་སོགས་པས་ནི་འཆི་བ་ལས་ཡོངས་སུ་སྐྱོབ་པར་མི་ནུས་པ་མ་ཡིན་ཏེ། དེའི་མཐུས་
འཆི་བདག་གི་ཆུ་སྲིན་གྱི་ཁའི་དྲུང་ནས་སླར་ལྡོག་པར་སྣང་སྟེ། དེ་བས་ན་དེ་ལ་ལྷག་པར་ཆགས་པ་ནི་དགོས་པ་དང་བཅས་པ་ཡིན་ན་ཅིའི་ཕྱིར་དེ་ལ་སྨད་ཅེས་བྱ་བར་རྟོག་ན། དེ་ནི་མེད་དེ་འདི་ལྟར་ཚེ་ཡོངས་སུ་ཟད་པ་ལས་ནི་བུ་ལ་སོགས་པས་ཡོངས་སུ་སྐྱོབ་པར་མི་བྱེད་དེ། དེ་ཉིད་སྨྲས་པ། འཆི་
བའི་དུས་ལ་བབ་པ་ན། །ཞེས་བྱ་བ་ལ་སོགས་པ་སྨོས་སོ། །རྒྱལ་པོའི་ཁབ་ན་མཆོད་སྦྱིན་འདོད་པ་ཞེས་བྱ་བའི་བྲམ་ཟེ་སཱ་ལ་ཆེན་པོ་ལྟ་བུ་རྒས་ཤིང་འཁོགས་ནས་གཟེར་བ་ལོ་བརྒྱ་ཉི་ཤུ་ལོན་པ་ཞིག་ཡོད་དེ། དེ་ལ་བདག་ཉིད་ལས་སྐྱེས་པའི་བུ་ཉི་ཤུ་དང་། ཚ་བོ་དག་མང་ཞིང་རྒྱ་ཆེ་བ་དང་། ཉེ་དུའི་
ཚོགས་དེ་རྣམས་དང་ལྷན་ཅིག་ཏུ་སྐྱེད་མོས་ཚལ་ཞིག་ཏུ་ཤིན་ཏུ་དགའ་ཞིང་སྤྱོད་པ་ལས་དེ་དུས་བྱས་ནས་དེའི་དབང་དུ་མཛད་ནས་འདི་གསུངས་སོ། །གཞན་དག་ནི་དགེ་སློང་མ་ཞིག་སློང་མོ་སྤྱོད་ཅིང་བུ་ཚ་ལ་སོགས་པ་གསོ་བར་བྱེད་པ་ལས་བརྩམས་ཏེ་འདི་གསུངས་སོ་ཞེས་ཟེར་རོ། །གང་ཅུང་
ཟད་སུས་ཀྱང་འཆི་བ་ལས་ཡོངས་སུ་བསྐྱབ་པར་ནི་མི་ནུས་ཏེ། འཆི་བ་ནི་བཟློག་པར་བྱ་བ་མ་ཡིན་པའི་ཕྱིར་རོ་ཞེས་བྱ་བ་ནི་བསྡུས་པའི་དོན་ཏོ། །མི་འགྱུར་ཞེས་བྱ་བ་ནི་མེད་པའོ། །གང་ཡིན་ཞེ་ན། སྨྲས་པ། བུ་རྣམས་ཞེས་བྱ་བ་སྟེ། ལུས་ལས་སྐྱེས་པའོ། །སྐྱབས་ཞེས་བྱ་བ་ནི་འཆི་བའི་

འཇིགས་པ་ལས་ཡོངས་སུ་ཐར་བར་བྱེད་པའི་ཕྱིར་རོ། །གང་ཡང་འཆི་བ་ལས་ཡོངས་སུ་སྐྱོབ་པར་བྱེད་པའི་བུ་ནི་འགྲོ་བ་དག་ན་མེད་ཅིང་འཆི་བ་ལས་ཡོངས་སུ་སྐྱོབ་པར་བྱེད་པ་ནི་མི་འབྱུང་སྟེ། བདག་ཉིད་ཀྱང་དེ་བས་ཡོངས་སུ་མ་ཐར་བའི་ཕྱིར་རོ། །ཕ་ཡང་མ་ཡིན་ཞེས་བྱ་བ་ནི་སྐྱེད་
པར་བྱེད་པ་སྟེ། ཕ་དང་མ་གཉིས་ཀྱིས་ཀྱང་བུ་རྣམས་འཆི་བདག་ལས་ཡོངས་སུ་སྐྱོབ་པར་མི་ནུས་སོ། །གཉེན་འདུན་མིན་ཞེས་བྱ་བ་ནི་ཉེ་དུ་དག་གིས་ཀྱང་འཆི་བ་ལས་ཅུང་ཟད་སྐྱོབ་པར་མི་ནུས་སོ། །གང་གི་ཕྱིར་སེམས་ཅན་ཁ་ཅིག་ནི་བུའི་དཔུང་ཡོད་དོ་སྙམ་ནས་བག་མེད་པས་གནས་སོ། །
ཁ་ཅིག་ནི་ཕའི་དཔུང་གིས་སོ། །ཁ་ཅིག་ནི་ཉེ་དུའི་དཔུང་གིས་སོ། །ཁ་ཅིག་ནི་གཉིས་ཀྱིས་སོ། །ཁ་ཅིག་ནི་དེ་དག་ཐམས་ཅད་ལ་རེ་བ་དག་ཡོངས་སུ་སྤང་བའི་ཕྱིར་བཅོམ་ལྡན་འདས་ཀྱིས་འདི་གསུངས་སོ། །དཔུང་འདི་དག་གིས་ནི་ཡིད་བརྟན་པར་མི་བྱ་སྟེ། གང་གི་ཕྱིར་དོན་འདི་དག་གང་
གིས་ཇི་ལྟར་ཡང་མི་ནུས་སོ། །སུའི་ཞེ་ན་སྨྲས་པ། འཆི་བའི་དུས་ལ་བབ་པ་ན། །ཞེས་སྨོས་ཏེ། འཆི་བདག་གིས་དབང་དུ་བྱས་པའོ། །གལ་ཏེ་དེ་ལྟར་རེ་རེས་ནི་མི་ནུས་ཀྱང་དེ་དག་ཚོགས་པས་ནི་ནུས་པར་འགྱུར་ཏེ། མི་རོའི་ཕྱོགས་འདེབས་པ་དང་འདྲའོ་ཞེ་ན། དེ་ཡང་མེད་
པར་བསྟན་པའི་ཕྱིར་སྨྲས་པ། ཁྱོད་ལ་སྐྱབས་སུ་འགྱུར་བ་མེད། །ཅེས་བྱ་བ་སྨོས་ཏེ། བུ་ལ་སོགས་པ་དེ་དག་འདུས་པས་ཀྱང་གང་ཞིག་འཆི་བ་ལས་ཡོངས་སུ་སྐྱོབ་པ་མེད་པ་ཉིད་དེ། འཇིག་རྟེན་ནི་རང་གི་ལས་ཀྱི་འབྲས་བུ་ལ་སྤྱོད་དོ་ཞེས་བྱ་བའི་ཚིག་གིས་སོ། །འཕགས་པའི་
ལམ་ཉིད་ནི་འཆི་བ་ལས་ཡོངས་སུ་སྐྱོབ་པ་ཡིན་པས་དེ་ལ་གཟུད་པའི་ཕྱིར་འདི་གསུངས་སོ། །ལས་གང་ཞིག་མཐར་མ་ཕྱིན་པར་དེ་ལས་གཞན་དག་རྩོམ་པ་ནི་འཆི་བ་ལ་སོགས་པའི་འཇིགས་པ་དང་བྲལ་བ་མ་ཡིན་ནོ་ཞེས་བསྟན་པའི་ཕྱིར་སྨྲས་པ། འདི་ནི་བྱ་བ་བྱས་ཟིན་ཞེས་བྱ་བ་
ལ་སོགས་པ་སྨོས་སོ། །རྒྱལ་པོའི་ཁབ་ན་བྷ་བ་ཡབ་དྷ་ཀ་ཞེས་བྱ་བས་རྒྱུན་དུ་ཞུགས་པའི་འབྲས་བུ་ཐོབ་ཀྱང་གོང་མའི་ལམ་བསྒོམ་པ་ལ་བག་མེད་པར་གྱུར་ཏེ། འདི་ལྟར་ཡང་བདག་གིས་ནི་ངན་སོང་གི་སྒོ་ནི་བཀག་པས་ད་ནི་ལྷ་དང་མིའི་འདོད་པ་ལ་རོལ་ཅིང་རྗེས་སུ་མྱོང་བར་བྱས་ཏེ།

ཁྱད་པར་དུ་འཕགས་པའི་བདེན་པས་མྱ་ངན་ལས་འདས་པར་བྱའོ་ཞེས་བསམ་པ་ལས་ཇི་ཙམ་ན་དུས་ལས་འདས་ཏེ། ཁྱིམ་ཐབ་སྤྱུགས་པ་ཞིག་གི་ཆུང་མའི་རུམ་དུ་ཞུགས་ཏེ། བཙས་ནས་དེ་བྲན་མོ་ཞིག་གིས་མཚན་མོ་ལམ་གྱི་བཞི་མདོར་ཚེར་མ་དང་བཅས་པར་སྒྲེན་
མོར་བོར་བ་ལས་ཤིན་ཏུ་སྡུག་བསྔལ་བས་འགྲེ་ལྡོག་ཅིང་འོ་དོད་འབོད་པ་འོད་མའི་ཚལ་ན་གནས་པའི་དགེ་བསྙེན་དག་གིས་ཐོས་ཏེ། དེ་བླངས་ནས་ཡིད་དང་རྗེས་སུ་མཐུན་པ་ཐོབ་པར་གྱུར་ཏེ། ཚུལ་བཞིན་དུ་རོལ་པ་དང་། སྲིད་པའི་ཉེས་དམིགས་མཐོང་བ་རྣམ་པ་མང་པོ་བྱས་ཏེ། དེ་རྣམས་ཀྱིས་ཕན་
བཏགས་པ་བྱས་ནས་ཡོངས་སུ་མྱ་ངན་ལས་འདས་སོ། །དེ་ལྟར་གྱུར་པའི་གཏམ་དགེ་བསྙེན་དག་ལས་བཅོམ་ལྡན་འདས་ཀྱིས་གསན་ཏེ། ཚིགས་སུ་བཅད་པ་གཉིས་པོ་འདི་གསུངས་སོ། །དེ་ལ་རེ་ཞིག་དང་པོ་སྨྲས་པ། འདི་ནི་བྱ་བ་ཞེས་བྱ་བ་ལ་སོགས་པ་སྨོས་ཏེ། འཇིག་རྟེན་པའི་བྱ་བ་དག་ལ་
ཞེན་པ་དག་གིས་ནི་འཆི་བ་ལ་སོགས་པས་མངོན་པར་བཅོམ་པར་འགྱུར་ཏེ། འཇིག་རྟེན་ལས་འདས་པའི་བྱ་བ་ལ་མངོན་དུ་བརྩོན་པ་ནི་མ་ཡིན་ནོ་ཞེས་བྱ་བ་ནི་བསྡུས་པའི་དོན་ཏོ། །འདི་ནི་བྱས་ཞེས་བྱ་བ་ནི་འདི་མཐར་ཕྱིན་པའོ། །བྱ་བ་ཞེས་བྱ་བ་ནི་བྱ་བའི་རྒྱུ་དང་བྱ་བའོ། །བྱ་བ་ནི་རྣམ་པ་གསུམ་སྟེ།
གང་བྱས་པ་དང་། གང་བྱ་བར་བརྩམས་པ་དང་། གང་མ་བརྩམས་པ་བརྩམ་པར་བྱ་བའོ། །དེ་ལ་དང་པོ་མ་གཏོགས་པའི་བརྩམ་པར་བྱ་བ་སྨྲས་པ། དོན་འདི་བྱ་ཞེས་བྱ་བ་སྨོས་ཏེ། ད་ནི་བྱ་བ་འདི་ཉིད་ཀྱི་དུས་ལ་བབ་པའི་བྱ་བའོ། །དེ་དག་བྱས་ནས་ཞེས་བྱ་བ་ནི་བརྩམས་པ་དེ་དག་ཡོངས་སུ་
རྫོགས་པར་བྱ་བའོ། །བདག་ནི་བདག་ཉིད་དོ། །འདི་བྱའོ་ཞེས་བྱ་བ་ནི་འདིའི་འོག་ཏུ་བསྒྲུབ་པར་བྱའོ། །དེ་ལྟར་ཞེས་བྱ་བ་ནི་སྔར་བཤད་པའི་རྣམ་པར་རྟོག་པའི་རྣམ་པ་བསྟན་ཏོ། །ནི་ཞེས་བྱ་བ་ནི་ངེས་པར་གཟུང་བ་སྟེ། འདིར་མངོན་པར་བཅོམ་པ་ཉིད་དུ་ཤེས་པར་བྱའོ། །སུ་ཞིག་མངོན་པར་
བཅོམ་པ་ཡིན་ཞེ་ན། སྨྲས་པ། མི་ཞེས་བྱ་བ་སྨོས་ཏེ་སེམས་ཅན་ནོ། །ཡོངས་སུ་ཤོམ་པ་ན་ཞེས་བྱ་བ་ནི་ཡོངས་སུ་རྩོམ་པ་སྟེ། རྟོག་པ་ངན་པ་དཔག་ཏུ་མེད་པས་སེམས་རྣམ་པར་གཡེན་སྤྱོ་བའོ། །མངོན་དུ་བཅོམ་ཞེས་བྱ་བ་ནི་ཟིལ་གྱིས་གནོན་པ་དང་། འཇིག་པ་དང་ཞིག་པར་བྱེད་པ་ཞེས་བྱ་

བའི་དོན་ཏོ། །དེ་གང་ཡིན་ཞེ་ན་སྨྲས་པ། འཆི་དང་རྒ་བས་ཞེས་བྱ་བ་སྨོས་ཏེ། འཆི་དང་བཅས་པའི་རྒ་བ་སྟེ། འཆི་བ་དང་རྒ་བ་གཉིས་ཀྱིས་འཆི་བར་སྐྱེལ་བར་བྱེད་པ་ཡིན་པས་བར་གྱི་ཚིག་མི་མངོན་པར་བྱས་ཏེ་རྡོ་རྗེའི་བྱེ་མ་བཞིན་ནོ། །ནད་དང་ལྷན་ཅིག་རྗེས་སུ་འབྲང་བ་ཡིན་པའི་ཕྱིར་ནད་དང་བཅས་
སོ། །མཐར་མ་ཕྱིན་པ་ཡོངས་སུ་རྟོག་པའི་བྱ་བ་ལ་ནི་འཇིག་རྟེན་པ་དག་རྒ་བས་ཡོངས་སུ་ཉམས་པར་བྱས་ཤིང་ནད་ཀྱིས་གཟིར་ཏེ། འཆི་བདག་གི་དབང་དུ་འགྱུར་རོ། །དེས་ན་བྱ་བ་གཞན་ཐམས་ཅད་ཡོངས་སུ་བཏང་བས་འཆི་བ་ལ་སོགས་པ་བཟློག་པའི་བྱ་བ་ལ་འབད་པར་བྱའོ། །ཞེས་ཐུབ་པ་
མཆོག་གིས་ཡོངས་སུ་བསྟན་ཏོ། །འཇིག་རྟེན་པའི་ལས་ནི་མཐའ་མེད་པའི་ཕྱིར་ཏེ། ཇི་སྐད་དུ་གསུངས་པ། རྒྱལ་པོ་དུག་ཅན་ལ་སོགས་པས། །བྱ་བ་དག་ནི་མ་བྱས་ཏེ། །དེ་ནས་དེ་ཉིད་བྱ་བ་དང་། །དེ་ཡང་བཅས་ཤིང་འགག་པར་འགྱུར། །དེ་བཞིན་བྱ་བ་འདི་དག་ལ། །དེ་ཉིད་མཐར་ནི་མ་ཕྱིན་པར། །དེ་
ནས་འཇིག་རྟེན་དེ་འདྲའི་དགྲ། །འཆི་བ་དག་ནི་འོང་བར་འགྱུར། །ཞེས་པའོ། །བྱ་བ་མ་ཡིན་པའི་བྱ་བ་མང་པོ་དག་ལ་ཡུན་རིང་དུ་བྱེད་ཅིང་མི་འཆི་བ་ལ་སོགས་པ་རྣམ་པར་རྟོག་པ་མང་པོ་དག་ལ་སྐྱོ་བ་བསྐྱེད་པའི་ཕྱིར་འདི་གསུངས་སོ། །གང་གི་ཕྱིར་དེ་ལྟར་འཇིག་རྟེན་པའི་བྱ་བས་རྣམ་པར་གཡེངས་
པའི་སྐྱེ་བོ་རྒ་བ་དང་འཆི་བ་དང་ནད་དང་བཅས་པས་མངོན་དུ་བཅོམ་པ་ཡིན་ཏེ། དེ་བས་ན་འཇིག་རྟེན་ལས་འདས་པའི་བྱ་བ་བསྒྲུབ་པའི་ཕྱིར་སྨྲས་པ་དེ་ལྟར་ཞེས་བྱ་བ་ལ་སོགས་པ་སྨོས་ཏེ། འདིའི་བསྡུས་པའི་དོན་ནི་ཏིང་ངེ་འཛིན་གྱི་སྦྱོར་བའི་རྒྱུ་དང་། ཏིང་ངེ་འཛིན་གྱི་སྦྱོར་བས་ཡོངས་སུ་སྐྱོ་བ་མེད་པའི་
ཡིད་དང་། ཏིང་ངེ་འཛིན་ཐོབ་ནས་ཏིང་ངེ་འཛིན་ཙམ་གྱིས་ཆོག་མི་ཤེས་པ་དེས་མཐོང་བ་དང་བསྒོམ་པའི་ལམ་ཡོངས་སུ་རྫོགས་པར་བྱ་བ་དང་། ལམ་བསྒོམ་པའི་འབྲས་བུ་དང་། འབྲས་བུ་དེའི་ཕན་ཡོན་འདིར་བསྟན་པ་ཡིན་ཏོ། །དེའི་ཕྱིར་དེ་ལྟར་ཞེས་བྱ་བ་འདིས་ནི་ཏིང་ངེ་འཛིན་གྱི་སྦྱོར་བའི་རྒྱུ་བསྟན་ཏོ། །
དེ་ལྟར་རྟག་ཏུ་ཏིང་འཛིན་ལ་དགའ་མཉམ་པར་ཞོག། །བརྩོན་པ་སྐྱེད་ལ་སྐྱེ་དང་རྒ་བའི་མཐའ་མ་ལྟོས། །བདུད་རྣམས་སྡེ་དང་བཅས་པ་མངོན་པར་ཟིལ་གནོན་ལ། །དགེ་སློང་དག་གིས་སྐྱེ་ཤིའི་ཕ་རོལ་འགྲོ་བར་གྱིས། །ཞེས་བྱ་བ་འདི་དག་གིས་ནི་གོ་རིམས་བཞིན་དུ་ལྷག་མ་རྣམས་བསྟན་ཏོ། །ད་ནི་

ཚིག་སོ་སོའི་དོན་བཤད་པར་བྱ་སྟེ། དེ་ལྟར་ཞེས་བྱ་བ་ནི་སྔར་བཤད་པའི་རྒྱུ་སྟོན་ཏེ། འདི་ལྟར། དེ་ལྟར་མི་ནི་ཡོངས་སུ་ཤོམ་པ་ན། །རྒ་དང་ནད་བཅས་འཆི་བས་མངོན་དུ་བཅོམ། །ཞེས་བྱ་བ་སྟེ། རྒྱུ་དེ་ལྟར་རོ། །འདི་ནི་སྦྱོར་བའི་རྒྱུ་བསྟན་ཏེ། །འཆི་བ་
ལ་སོགས་པས་སྐྱོ་བ་སྐྱེད་དེ་དེ་ལྟར་ཤེས་ཤིང་སྐྱོ་བ་སྐྱེ་བ་ལས་ནི་ཏིང་ངེ་འཛིན་ལ་སྦྱོར་བ་ཡོད་པ་ཉིད་དེ། འདིས་ནི་གུས་པར་བྱེད་པའི་སྦྱོར་བ་བསྟན་ནས། རྟག་ཏུ་བྱེད་པའི་སྦྱོར་བ་སྨྲས་པ་རྟག་ཏུ་ཞེས་བྱ་བ་ནི་དུས་ཐམས་ཅད་དུའོ། །ཏིང་ངེ་འཛིན་ལ་དགའ་ཞེས་བྱ་བ་ནི་ཏིང་ངེ་འཛིན་ལ་དགའ་བ་སྟེ།
བསམ་གཏན་ལ་དགའ་བ་ཞེས་བྱ་བའི་དོན་ཏོ། །ཏིང་ངེ་འཛིན་ལ་དགའ་བ་ཐོབ་པས་ནི་དེའི་སྦྱོར་བ་ལ་ཡོངས་སུ་གདུང་བ་མེད་པའི་ཕྱིར་རོ། །མཉམ་པར་ཞོག་ཅེས་བྱ་བ་ནི་སེམས་རྩེ་གཅིག་པ་སྟེ་བསམ་གཏན་མངོན་དུ་བྱས་པ་ཞེས་བྱ་བའི་དོན་ཏོ། །བརྩོན་པ་སྐྱེད་ལ་ཞེས་བྱ་བ་ནི་བརྟུན་
པས་འབད་པའི་བརྩོན་འགྲུས་གང་ལ་ཡོད་པ་དེ་ནི་བརྩོན་པ་སྐྱེད་པ་སྟེ་བརྩོན་འགྲུས་བརྩམ་པ་ཞེས་བྱ་བའི་དོན་ཏོ། །བརྩོན་འགྲུས་དང་ལྡན་པ་ལ་ནི་ཁྱད་པར་ཐོབ་པར་བྱ་བ་ལ་ཆོག་མི་ཤེས་པ་ཉིད་དུ་སྟོན་ཏེ། ཇི་སྐད་དུ་བཤད་པ། ཁྱད་པར་སྤེལ་ལ་ངེས་པར་ནི། །ཁྱོད་ནི་ནམ་ཡང་ངལ་མ་
གྱུར། །བརྩོན་འགྲུས་དྲག་པོས་དཀའ་བ་ལས། །སྐྱོ་བ་ཡོད་པ་མ་ཡིན་ནོ། །ཞེས་བྱ་བ་ལ་སོགས་པའོ། །འཇིག་རྟེན་ལས་འདས་པའི་ལམ་འདོད་པས་ཏིང་ངེ་འཛིན་ཙམ་གྱིས་ཆོག་པར་མི་བྱ་བ་ཉིད་དུ་འདིས་བསྟན་ཏེ། སྐྱེ་དང་རྒ་བའི་མཐའ་མ་ལྟོས། །ཞེས་བྱ་བ་འདི་སྨོས་སོ། །སྐྱེ་བ་དང་རྒ་བ་ནི་
སྐྱེ་རྒའོ། །དེ་གཉིས་ཀྱི་མཐའ་མ་ནི་ཟད་པ་སྟེ། དེ་ལྟ་བུའི་ཚུལ་གང་དག་ལ་ཡོད་པ་དེ་ཉིད་ནི་འདི་ལྟར་མཐོང་བའི་ལམ་ཡོངས་སུ་རྫོགས་པ་སྟེ། ཕལ་ཆེར་སྐྱེ་བ་ཟད་དེ་ཡུན་རིང་དུ་ཐོགས་ནས་སྲིད་པ་བདུན་ཡིན་པའི་ཕྱིར་སྐྱེ་བ་དང་རྒ་བ་མཐོང་བར་འགྱུར་རོ། །བསྒོམ་པའི་ལམ་ཡོངས་སུ་རྫོགས་པ་ལ་ནི་སྐྱེ་བ་
མཐར་ཐུག་པ་ཡིན་པའི་ཕྱིར་ཡང་འཁོར་བར་སྐྱེ་བ་དང་རྒ་བའི་མཐའ་མ་མཐོང་བར་འགྱུར་རོ། །ཅི་ཞིག་བྱས་ཤིང་ཇི་ལྟར་འགྱུར་ཞེ་ན། སྨྲས་པ། བདུད་རྣམས་ཞེས་བྱ་བ་ལ་སོགས་པ་སྟེ། ཉོན་མོངས་པ་ནི་བདུད་དེ་འཆི་བའི་ཆོས་ཉེ་བར་བསྒྲུབ་པའི་ཕྱིར་རོ། །སྡེ་དང་བཅས་པ་ཞེས་བྱ་བ་ནི་འཁོར་དང་

བཅས་པ་སྟེ། ཉེ་བའི་ཉོན་མོངས་པ་དང་བཅས་པའི་ལས་ཞེས་བྱ་བའི་དོན་ཏོ། །མངོན་པར་ཟིལ་གནོན་ལ་ཞེས་བྱ་བ་ནི་སྤངས་པ་སྟེ། འདིས་ནི་བསྒོམ་པའི་ལམ་གྱི་འབྲས་བུ་བསྟན་ཏོ། །དེ་ཡང་གང་དག་གིས་འདི་ལྟར་ལམ་བསྒོམ་པར་ནུས་ཤེ་ན། སྨྲས་པ། དགེ་སློང་དག་གིས་ཞེས་བྱ་བ་
སྨོས་ཏེ། དགེ་སློང་དག་ཅེས་བྱ་བ་ནི་རབ་ཏུ་བྱུང་ཞིང་ཡོངས་སུ་བཟུང་བ་སྤངས་པ་ཞེས་བྱ་བའི་དོན་ཏེ། དེ་དག་གིས་ལུས་དང་སེམས་རྣམ་པར་དབེན་པ་དང་། དེ་དང་རབ་ཏུ་འབྲེལ་པའི་ཕྱིར་ལམ་བསྒོམ་པ་ཡོད་པར་འགྱུར་རོ། །འགྲོ་བར་འགྱུར་བ་ཞེས་བྱ་བ་ནི་དེ་ཉིད་ལས་སྐྱེ་བར་འགྱུར་གྱི།
གཞན་ལ་མ་ཡིན་ནོ་ཞེས་བྱ་བའི་དོན་ཏོ། །གཞན་དག་ཏུ་ནི་འགྲོ་བར་གྱིས། །ཞེས་བརྗོད་དེ། འདིའི་དོན་ནི་ཁྱེད་ཅག་གིས་འགྲུབ་ཅིང་འདིའི་ཕ་རོལ་དུ་འགྲོ་བར་གྱིས་ཤིག་ཅེས་བྱའོ། །སྐྱེ་ཤིའི་ཕ་རོལ་འགྲོ་བ་ཞེས་བྱ་བ་ནི་འཁོར་བའི་ཕ་རོལ་དུ་ཕུང་པོ་ལྷག་མ་མེད་པའི་མྱ་ངན་ལས་འདས་པའི་
དབྱིངས་དེར་འགྲོ་བ་ཡིན་པས་ཕ་རོལ་འགྲོ་བ་སྟེ། ཉོན་མོངས་པ་དང་ཉེ་བའི་ཉོན་མོངས་པ་རྣམས་སྤངས་པ་ལ་ཕན་ཡོན་འདི་ཡོད་དེ་གང་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་འཇུག་པ་ཡིན་ནོ། །བྱ་བ་ངན་པ་ལ་གནས་ཤིང་འབྲེལ་པ་དག་འཕགས་པའི་ལམ་ལ་སྦྱོར་
བའི་ཕྱིར་བསྲུངས་སོ། །མི་རྟག་པའི་ཚོམས་ཀྱི་རྣམ་པར་འགྲེལ་པ་སྟེ་དང་པོ་རྫོགས་སོ།། །།དེའི་འོག་ཏུ་འདོད་པའི་ཚོམས་དགོད་པའི་སྐབས་བརྗོད་པར་བྱ་སྟེ། མི་རྟག་པ་བསྟན་པས་སྐྱོ་བ་ཡང་དག་པར་བསྐྱེད་ནས་འདོད་ཆགས་དང་བྲལ་བའི་དངོས་པོ་ཐོབ་པར་བྱ་བའི་ཕྱིར་འདི་ཉེ་
བར་འགོད་པ་ཡིན་ནོ། །གང་གི་ཕྱིར་ཐམས་ཅད་ཀྱི་དང་པོར་ནི་འདོད་པ་དག་ལས་ཆགས་པ་མེད་པ་འབྱུང་ངོ་། །དེ་ནས་གཟུགས་དང་གཟུགས་མེད་པ་ལས་ཆགས་པ་མེད་པ་འབྱུང་སྟེ། མ་མའི་གོས་ལས་ཐོག་མ་དྲི་མ་རགས་པ་དང་བྲལ་བར་བྱེད་ལ། དེའི་འོག་ཏུ་ནི་ཕྲ་བ་དག་དང་བྲལ་བར་བྱེད་
པ་དེ་བཞིན་དུ་སྐབས་བརྗོད་པ་ཡིན་ནོ། །ཀུན་རྟོག་ལས་ཞེས་བྱ་བ་ལ་སོགས་པ་སྨོས་ཏེ། འདིའི་གླེང་གཞི་ནི་བུད་མེད་ཅིག་སྐྱེས་པ་གཞན་ཞིག་ལ་ཆགས་ཏེ། དེ་ལ་ལྟ་བ་དང་ཀུན་དུ་སྨྲ་བས་གཡེན་སྤྱོ་སྟེ་ཆུ་བླང་བའི་ཕྱིར་ཁྲོན་པ་ལས་བུམ་པ་དང་ཆུ་བླང་བར་བྱའོ་ཞེས་བསམས་ནས་

རང་གི་བུ་མགྲིན་པ་ལ་ཐག་པས་བཅིངས་ཏེ། ནང་དུ་ཡུད་ཙམ་ཞིག་བཏང་བ་ལས་དེ་ནས་བུ་ཤི་བར་མཐོང་སྟེ། དེ་སྐྱོ་བ་ཡང་དག་པར་སྐྱེས་པ་ལས་ཚིགས་བཅད་འདི་གསུངས་སོ། །འདི་ཡང་ཇི་ལྟར་གནས་པ་ཡིན་ཞེ་ན། དེ་ཡང་བཅོམ་ལྡན་འདས་ཕྱོགས་དེར་གཤེགས་
ཏེ། དེ་ལ་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཡང་དག་པར་རྫོགས་པའི་སངས་རྒྱས་ཀྱིས་ཡང་དག་པར་གསུངས་པའི་ཚིགས་སུ་བཅད་པ་འདི་ཟུང་ཤིག་ཅེས་གསུངས་ཏེ། ཅི་ནས་ཀྱང་འདོད་པའི་འདོད་ཆགས་སྐྱེ་བ་དང་། ཅི་ནས་ཀྱང་སྐྱེ་བ་
མེད་པ་ཡིན་ནོ་ཞེས་བྱ་བ་ནི་བསྡུས་པའི་དོན་ཏོ། །ཚིག་གི་དོན་སོ་སོའི་བཤད་པ། འདོད་པ་ཞེས་བྱ་བ་ནི་འདོད་པར་བྱེད་པས་ན་འདོད་པ་སྟེ། དོན་དུ་གཉེར་བར་བྱེད་ཅེས་པའི་དོན་ཏོ། །དེ་ཡང་འདོད་པའི་ཡོན་ཏན་ལྔ་ལ་འདུན་པའི་འདོད་ཆགས་ལ་དགོངས་སོ། །དེ་ལ་བོད་པ་ཡིན་ཏེ། ཀྱེ་འདོད་པ་
ཞེས་སོ། །ཤེས་ཀྱིས་ཏེ་ཞེས་བྱ་བ་ནི་འདི་ཉིད་ངེས་པར་བྱས་པ་ཡིན་ཏེ། དེ་གང་ཡིན་ཞེ་ན། སྨྲས་པ། ཁྱོད་ནི་རྩ་བར་ཞེས་བྱ་བ་ཡིན་ཏེ། འདོད་པ་སྐྱེད་པར་བྱེད་པའི་རྒྱུ་སྟེ། གང་གི་ཕྱིར་དེ་ནི་འཁྲིག་པ་དང་ལྡན་པ་ཀུན་ཏུ་རྟོག་པའི་རྩ་བ་སྟེ། དེ་དག་ཉིད་ཀྱི་ཡུལ་ལ་མི་འགྲོ་བའི་འདུ་ཤེས་ལས་ནི་འདོད་
ཆགས་མི་སྐྱེ་ལ་མི་དགེ་བའི་འདུ་ཤེས་ཀྱིས་ཀྱང་འདོད་ཆགས་དང་བྲལ་བར་འགྱུར་རོ། །གནས་སྟོང་པ་དག་ལ་ཡང་ལོག་པའི་ཀུན་ཏུ་རྟོག་པའི་འདོད་ཆགས་ཀྱིས་བརླག་པ་ཡིན་ནོ་ཞེས་འདོད་པའི་རྩ་བ་བསྟན་པའི་ཕྱིར་སྨྲས་པ། ཀུན་རྟོག་ལས་ནི་ཞེས་བྱ་བ་སྨོས་ཏེ། ཚུལ་བཞིན་མ་ཡིན་པ་
ཡིད་ལ་བྱེད་པ་དང་ལྡན་པས་རང་བཞིན་མེད་པ་དག་ལ་གནས་རྗེས་སུ་དྲན་ཞིང་གཟུགས་སུ་བརྟག་པ་དེ་ལ་ནི་འདོད་པའི་འདོད་ཆགས་སྐྱེ་བར་འགྱུར་ཏེ། ཀྱེ་འདོད་པ་ཞེས་སོ། །འདོད་པ་ཞེས་བྱ་བ་ཡང་སྨོས་པ་ནི་གཅིག་ཏུ་མ་རུང་བ་ཡིན་པས་སྤང་བར་བྱ་བ་ཉིད་དུ་བསྒྲུབ་པའི་ཕྱིར་རོ། །ཡང་ན་དེའི་
ཡུལ་ལ་མི་བཟོད་པ་བསྒྲུབ་པའི་ཕྱིར་རོ། །སྐྱེས་པས་ཞེས་བྱ་བ་མངོན་དུ་བྱུང་བ་དང་། སེམས་ཀྱི་རྒྱུད་ལས་སྐྱེས་པ་ཞེས་བྱ་བའི་དོན་ཏོ། །སྨན་ལ་སོགས་པའི་གཞིས་ཡོངས་སུ་སྤངས་པ་མ་ཡིན་པའི་ཚུལ་བསྟན་པའི་ཕྱིར་སྨྲས་པ། ཁྱོད་ནི་ཀུན་རྟོག་མ་བྱེད་དང་། །ཞེས་བྱ་བ་སྨོས་ཏེ། འདོད་པ་

དག་ལ་དགེ་བར་མ་སེམས་དང་རྣམ་པར་གྲོལ་བར་འགྱུར་རོ་ཞེས་སོ། །དེས་ན་ཁྱོད་ལ་འབྱུང་མི་འགྱུར། །ཞེས་བྱ་བ་ནི་དེ་བས་ན་དགེ་བར་ཀུན་ཏུ་མ་རྟོགས་པས་ཁྱོད་ཀྱི་རྒྱུད་ལ་སྐྱེ་བར་མི་འགྱུར་ཏེ། རྒྱུ་མེད་པས་འབྲས་བུ་མེད་པ་ཉིད་ཀྱི་ཕྱིར་རོ། །འབྱུང་བར་མི་འགྱུར་བ་ནི་རབ་ཏུ་སྐྱེ་བར་མི་འགྱུར་ཞིང་རབ་ཏུ་སྐྱེ་
བར་མི་ནུས་པ་ཉིད་དུ་སྟོན་ཏོ། །འདོད་པའི་འདོད་ཆགས་སྤོང་བར་འདོད་པ་རྣམས་ལ་གཞི་མེད་པར་བྱ་བ་བསྟན་པའི་ཕྱིར་དང་། ཡུལ་ཡོངས་སུ་སྤངས་པ་ཙམ་གྱིས་འདོད་པའི་འདོད་ཆགས་སྤོང་བ་ཡིན་ནོ་ཞེས་སྨྲ་བ་རྣམས་ཚར་གཅད་པའི་གནས་དང་། བདག་ཏུ་སྨྲ་བ་རྣམས་ཚར་བཅད་པའི་ཕྱིར་
འདི་གསུངས་སོ། །འདོད་པ་ཡུལ་དང་བཅས་པ་འདི་དག་ནི་ཆེས་ཀྱང་སྤང་བར་བྱ་བ་ཡིན་ཏེ། གནོད་པ་ཐམས་ཅད་ཀྱི་རྒྱུར་གྱུར་པའི་ཕྱིར་རོ། །ཅིའི་ཕྱིར་ཞེ་ན། འདི་ལྟར། འདོད་པ་རྣམས་ལས་མྱ་ངན་སྐྱེ། །ཞེས་བྱ་བ་སྨོས་ཏེ། བུད་མེད་དེ་ཉིད་བུ་དང་བྲལ་བ་ཡོད་པའི་དབང་གིས་བྲང་
བརྡུང་ཞིང་མྱ་ངན་གྱིས་གདུངས་ཏེ། སྨྲེ་སྔགས་འདོན་པ་དང་། ཁྱིམ་ཐབ་ལ་འཇིགས་པ་ཡིན་ཏེ། དེས་འདི་ལྟ་བུའི་དོན་ཐོས་པར་གྱུར་ན་བདག་ལ་གནོད་པ་བྱེད་པར་འགྱུར་རོ་ཞེས་པ་དེའི་དབང་དུ་བྱས་ནས་ཚིགས་སུ་བཅད་པ་འདི་དག་གསུངས་སོ། །དེ་ལ་རེ་ཞིག་དང་པོའི་རྣམ་པར་
འགྲེལ་པ་སྨྲས་པ། འདོད་པ་རྣམས་ལས་ཞེས་བྱ་བ་སྨོས་ཏེ། འདོད་པ་རྣམས་ལ་རོ་མྱང་བར་བྱས་པའི་ཉེས་དམིགས་དང་། ངེས་པར་འབྱུང་བ་བྱས་པའི་ཕན་ཡོན་འདིར་བསྟན་པ་ཡིན་ཏེ། དེ་ལ་འདོད་པ་ནི་རྣམ་པ་གཉིས་ཏེ། ཡུལ་གྱི་འདོད་པ་སྟེ་གཟུགས་སྡུག་པ་ལ་སོགས་པ་དང་།
ཉོན་མོངས་པའི་འདོད་པ་དག་སྟེ་ཡུལ་དེ་དག་ཉིད་ལ་ཆགས་པའོ། །འདོད་པ་བྱེད་པའམ། འདོད་པར་བྱེད་པ་དག་ནི་རྒོད་པ་ལ་བརྟེན་པའི་ཕྱིར་རོ། །དེ་གཉི་ག་དག་ལས་སྐྱེ་བ་ནི་འབྱུང་བའོ། །མྱ་ངན་ཞེས་བྱ་བ་ནི་སྡུག་པ་དང་བྲལ་བའི་སེམས་ཀྱི་གདུང་བའོ། །བདག་ཉིད་ཀྱི་གཟི་མདངས་
སྐེམ་པར་བྱེད་པ་ཞེས་བྱ་བ་ནི་ངེས་པའི་ཚིག་གིས་སོ། །འཇིགས་པ་ཞེས་བྱ་བ་ནི་མཚན་མ་དག་ལ་དམིགས་ནས་གནོད་པར་འགྱུར་རོ་ཞེས་དོགས་པ་སྐྱེ་བའི་སེམས་ཀྱི་ལས་ཏེ། ཡང་དག་པར་སྐྲག་པ་ཞེས་བྱ་བའི་དོན་ཏོ། །དེ་གཉི་ག་ཡང་གོ་རིམས་བཞིན་དུ་ཉོན་མོངས་པ་དང་ཡུལ་གྱི་འདོད་

པ་དག་ལས་སྐྱེས་པ་སྟེ། གང་གི་ཕྱིར་ཡུལ་མེད་པ་དག་ལ་ཡོངས་སུ་གཟུང་བ་མེད་པའམ་ཡོད་པར་གྱུར་ན་ཡང་འདོད་ཆགས་དང་བྲལ་བ་རྣམས་ལ་ནི་དེ་དང་བྲལ་བ་ལས་སྐྱེས་པའི་མྱ་ངན་དང་། དེ་དང་བྲལ་དུ་དོགས་པ་ལས་སྐྱེས་པའི་འཇིགས་པ་མེད་པར་འགྱུར་བས་
སོ། །རེ་ཞིག་འདི་དག་གི་ནི་འདོད་པ་དང་། མི་འདོད་པ་དག་གི་ཉེས་དམིགས་བསྟན་ཏོ། །རྒྱུ་མེད་པའི་ཕྱིར་འབྲས་བུ་མེད་པ་ཉིད་དུ་བསྟན་པའི་ཕྱིར་སྨྲས་པ། འདོད་པ་དག་ནི་རྣམ་སྤངས་ན། །ཞེས་བྱ་བ་སྨོས་ཏེ། འདོད་པ་དག་ལ་འདོད་ཆགས་དང་བྲལ་བའི་ཕན་ཡོན་བསྟན་པ་ཡིན་ཏེ། གང་ཡང་
སོ་སོར་བརྟགས་པའི་སྟོབས་སམ་བསྒོམས་པའི་སྟོབས་ཀྱིས་འདོད་པ་རྣམས་ལ་ཆགས་པ་མེད་པས་བཙལ་བ་དང་རྩ་བ་དང་བཅས་པར་སྤངས་ན་གཉིས་ཀྱིས་འདོད་པ་དག་ལས་ཆགས་པ་དང་བྲལ་བ་དག་ལ་ནི་སྡུག་པ་དང་བྲལ་བར་གྱུར་ཀྱང་མྱ་ངན་མེད་ཅིང་གནོད་པ་བྱུང་བར་དོགས་པའི་འཇིགས་པ་ལྟ་
ག་ལ་ཡོད་པར་འགྱུར་བའོ། །མྱ་ངན་གྱིས་ནི་ད་ལྟར་གྱི་ཉེ་བར་གནས་པའི་གནོད་པ་བསྟན་ཏོ། །འཇིགས་པས་ནི་འབྱུང་བར་འགྱུར་བའི་གནོད་པ་བསྟན་ཏོ། །འདོད་པའི་དོན་དུ་གཉེར་བ་དང་། འདོད་པ་ལ་ལྷག་པར་ཆགས་པ་དག་འདོད་པ་དག་ལ་འདུན་པའི་འདོད་ཆགས་སྤང་བའི་ཕྱིར་འདི་གསུངས་
སོ། །ཇི་ལྟར་ཉོན་མོངས་པའི་འདོད་པ་དེ་ལྟ་བུ་ནི་ཡུལ་གྱི་འདོད་པ་དག་གི་ཕན་ཡོན་ལས་བྱུང་བ་མ་ཡིན་ཏེ། དེ་ཡང་ཚོར་བའི་རང་བཞིན་གྱི་དབང་ཡིན་ཏེ། ཚོར་བའི་རྐྱེན་གྱིས་སྲེད་པ་ཞེས་བྱ་བའི་ཚིག་གིས་ཏེ། དེས་ན་རྩ་བའི་རྩ་བ་ཉིད་བསྟན་པའི་ཕྱིར་སྨྲས་པ། དགའ་བ་རྣམས་ལས་མྱ་ངན་
སྐྱེས། །ཞེས་བྱ་བ་སྨོས་ཏེ། ཤིན་ཏུ་ཆགས་པར་བྱེད་པའི་ཕྱིར་དགའ་བ་དག་སྟེ། །ཉོན་མོངས་པ་དང་ལྷན་ཅིག་སྐྱེས་པའི་ཆགས་པ་ཡིད་བདེ་བ་སྟེ། དེ་དག་ལས་ལྷག་མ་ནི་སྔ་མ་བཞིན་དུ་བརྗོད་པར་བྱའོ། །འདིས་ནི་འདི་སྐད་སྟོན་ཏེ། འདོད་པ་དེ་གཉིས་ནི་ཚེ་ལས་མྱ་ངན་ལ་སོགས་པ་
འབྱུང་བར་མ་ཟད་ཀྱི། ཉོན་མོངས་པའི་འདོད་པའི་ཚོགས་འཇུག་པར་གྱུར་པ་ཡང་ཡིན་ཏེ། སེམས་དང་སེམས་ལས་བྱུང་བ་དེ་དག་ཉིད་མ་སྤངས་པ་དག་ལ་མྱ་ངན་ལ་སོགས་པ་འཇུག་ཅིང་འདི་དག་ལས་ནི་དགའ་བ་དང་ཤིན་ཏུ་ཆགས་པ་དང་རྗེས་སུ་མཐུན་པའི་ཕྱིར་རོ། །མངོན་སུམ་དུ་སྨོས་པ་ནི་

གཞན་དག་ཏུ་དེ་དང་མཚུངས་པར་ལྡན་པ་དེ་བཞིན་དུ་བལྟ་བར་བྱ་སྟེ། ཆགས་པ་དང་རྗེས་སུ་མཐུན་པའོ། །འདི་ལ་ཇི་སྐད་དུ་གསུངས་པ་བདེ་བར་ཚོར་བ་དག་ནི་ཆགས་པ་ལ་གནས་པ་ཡིན་ཏེ། གང་བདེ་བ་དང་བདེ་བའི་ཚོར་བ་འདི་ཞེས་བྱ་བ་ལ་སོགས་པའོ། །འདོད་པ་མྱ་ངན་ལ་སོགས་པའི་རྒྱུར་
གྱུར་པ་ཡང་གང་གི་དོན་དུ་ཉེ་བར་སྤྱོད་པ་ཡང་དགའ་བ་ཉེ་བར་སྤྱད་པའི་དོན་ཏེ། དེས་བྱས་པ་ཡིན་པས་འདི་དག་ཐམས་ཅད་ནི་འདོད་པའི་ཉེས་དམིགས་སུ་ཤེས་པར་བྱའོ། །གང་ཡུལ་གྱིས་འདོད་ཆགས་སྤངས་ཀྱང་ཀུན་ཏུ་རྟོག་པའི་འདོད་ཆགས་ཀྱིས་རྣམ་པར་རྟོག་པའི་དགའ་བ་སྤངས་པའི་ཕྱིར་
འདི་གསུངས་སོ། །འདིར་འདི་དག་གིས་མྱ་ངན་དང་འཇིགས་པའི་ཉེས་དམིགས་འབའ་ཞིག་ཏུ་མ་ཟད་དེ། སྡིག་པའི་དྲ་བ་མ་ལུས་པ་འདི་དག་ཀྱང་འབྱུང་བ་ཡིན་ནོ་ཞེས་བསྟན་པའི་ཕྱིར་སྨྲས་པ། འདོད་དགའི་རྣམ་སྨིན་སྡུག་བསྔལ་ཏེ། །ཞེས་བྱ་བ་ལ་སོགས་པ་སྨོས་སོ། །སྐྱེས་བུ་གཏི་མུག་
ཅན་འཕགས་སྐྱེས་པོས་འགྲན་ཟླའི་ཤ་ཁོན་ཅན་མ་ལུས་པར་བསད་ཅིང་ཕྱུང་སྟེ། རྒྱལ་སྲིད་ཀྱི་བདེ་བ་ལ་ལོངས་སྤྱོད་ཅིང་བདེན་པ་མཐོང་བའི་ཤཱཀྱ་དཔག་ཏུ་མེད་པ་རྣམས་བསད་པ་དེའི་འོག་ཏུ་ཞག་བདུན་པའི་ཉི་མ་ལ་བཙུན་མོའི་འཁོར་དང་བློན་པོ་དང་གཡོག་འཁོར་དང་བཅས་པ་ཆུ་ལ་
རྩེ་བའི་ཕྱིར་ཆས་པ་ན་དམྱལ་བའི་མེ་འབར་བས་ཀུན་དུ་བསྐོར་ཏེ། འོ་དོད་འབོད་བཞིན་དུ་མནར་མེད་པའི་དམྱལ་བ་ཆེན་པོར་སྐྱེས་ཏེ། དེའི་དབང་དུ་མཛད་ནས་འདི་གསུངས་སོ། །འདིར་བསྡུས་པའི་དོན་ནི་འདོད་པ་དག་ལ་རོ་མྱོང་བར་བྱེད་པ་ནི་དང་པོ་མངར་བས་བསྟན་ཏོ། །ལྷག་མ་ནི་ཉེས་
དམིགས་ཏེ་འབྲས་བུ་ཚ་བས་ནི་མཐོང་བའི་ཆོས་ཀྱི་ཉེས་དམིགས་བསྟན་ཏེ་མྱ་ངན་གྱི་རྒྱུ་ཡིན་པའི་ཕྱིར་རོ། །རྣམ་པར་སྨིན་པ་སྡུག་བསྔལ་བས་ནི་འཇིག་རྟེན་ཕ་རོལ་གྱི་ཉེས་དམིགས་བསྟན་ཏེ། སྲེག་པར་བྱེད་པ་དང་ཆོས་མཐུན་པ་ཡིན་པས་མེ་སྒྲོན་གྱི་དཔེ་བསྟན་པ་ཡིན་ནོ། །མངར་བ་
ནི་ཡིད་དུ་འོང་བ་དང་དགའ་བ་དང་སྡུག་པའོ། །དང་པོ་ལ་སོགས་པ་གང་ཡིན་པ་དེ་ནི་དེ་ཉིད་དོ། །འདིར་དང་པོའི་སྒྲ་ནི་ཐོག་མའི་ཚིག་སྟེ། སྔར་ཆུ་བཏང་ནས་བསོད་སྙོམས་བྱིན་པ་བཞིན་ཏེ། འདོད་པ་རྣམས་ནི་ཐོག་མར་དགའ་བ་ཞེས་བྱ་བའི་དོན་ཏོ། །འབྲས་བུ་ཚ་བ་ཞེས་བྱ་བ་ནི་ཚ་ཞིང་ཡིད་

དུ་མི་འོང་བ་དང་། མི་འདོད་པའི་འབྲས་བུ་རྣམ་པར་སྨིན་པ་དེ་ནི་འབྲས་བུ་ཚ་བའོ། །ཇི་སྐད་དུ་གསུངས་པ། འདོད་པ་དག་ལས་འཇིག་རྟེན་བསད་དང་བཅིང་བ་བྱུང་། །མྱ་ངན་འཇིག་དང་ངལ་དང་སྣ་ཚོགས་སྡུག་བསྔལ་ཏེ། །འདོད་པ་དེ་ཉིད་ཀྱིས་ཀྱང་རྒྱལ་པོ་ལྟུང་གྱུར་ཏེ། །
ཆོས་ཉམས་བབ་ཅོལ་ཕ་རོལ་ཏུ་ནི་དམྱལ་བར་འགྲོ། །ཞེས་སོ། །དེའི་ཕྱིར་འདིས་ནི་མཐོང་བའི་ཆོས་ཉིད་ལ་མྱ་ངན་དང་སྨྲེ་སྔགས་འདོན་པ་དང་སྡུག་བསྔལ་བ་དང་ཡིད་མི་བདེ་བ་རྣམས་ཐ་མར་འབྱུང་བ་དང་། དེའི་རྒྱུས་ངན་པར་སྤྱོད་པ་བསགས་པས་ངན་སོང་གི་སྡུག་བསྔལ་རྣམ་པར་སྨིན་པ་མྱོང་
བར་འགྱུར་ཏེ། དེས་ན་སྨྲས་པ། རྣམ་སྨིན་སྡུག་བསྔལ་ཏེ་ཞེས་བྱ་བ་སྨོས་ཏེ། རྣམ་པར་སྨིན་པའི་འབྲས་བུ་ནི་མངོན་པར་མི་འདོད་པ་ཡིན་ཏེ་ངན་སོང་གི་འབྲས་བུ་ཡིན་པའི་ཕྱིར་རོ། །ཡང་ཅི་འདི་དག་གནས་སྐབས་ཐམས་ཅད་དུ་དེ་ལྟར་ཡིན་ནམ་ཞེ་ན། ཐམས་ཅད་ལ་ནི་དེ་ལྟ་མ་ཡིན་ཏེ། འོན་ཀྱང་
དགའ་ཞེས་བྱ་བ་སྨོས་ཏེ། མངོན་པར་དོན་དུ་གཉེར་བ་སྟེ་གང་གི་ཕྱིར་སྲེད་པ་དང་བཅས་པའི་འདོད་པ་མངོན་པར་འདོད་པ་དེ་དག་ཉིད་ལ་དང་པོ་མངར་བཞིན་འབྲས་བུ་ཚ་ལ་རྣམ་པར་སྨིན་པ་སྡུག་བསྔལ་བར་འགྱུར་ཏེ། དགའ་བ་མེད་པར་འདོད་ཆགས་དང་བྲལ་བ་རྣམས་ལ་ནི་མ་ཡིན་ནོ། །རྣམ་
པར་སྨིན་པ་སྡུག་བསྔལ་བ་ཡང་ཡིན་ལ་དགའ་བ་ཡང་ཡིན་པས་དགའ་བའི་རྣམ་སྨིན་སྡུག་བསྔལ་བ་སྟེ། ལས་འཛིན་པའོ། །ཚིག་རྐང་འོག་མ་ནི་ཐ་དད་པར་བྱས་ལ་འདི་ནི་བསྡུ་བ་བྱས་པ་ཅིའི་ཕྱིར་ཞེ་ན། སྨྲས་པ། སྤྱི་དང་ཁྱད་པར་བསྒྲུབ་པའི་ཕྱིར་ཏེ། སྤྱི་ནི་འདི་ལྟར་འཕགས་པ་དང་
འཕགས་པ་མ་ཡིན་པ་གཉིས་ཀྱི་འདི་དག་དང་པོ་མངར་བ་དང་འབྲས་བུ་ཚ་བ་ཡིན་ནོ། །སྡིག་པ་སྤྱོད་པར་འཇུག་པ་རྣམས་དགའ་བར་གྱུར་ན་ནི་རྣམ་པར་སྨིན་པ་སྡུག་བསྔལ་བ་སྟེ། དང་པོ་དགའ་བ་ཡིན་ནོ། །འདོད་པ་ཞེས་བྱ་བ་ནི་གཟུགས་སྡུག་གུ་ལ་སོགས་པའོ། །ཇི་ལྟར་དགའ་བ་ཡོད་པ་
ལས་རྣམ་པར་སྨིན་པ་སྡུག་བསྔལ་བར་འགྱུར་ཞེ་ན་སྨྲས་པ། སྲེག་བྱེད་ཅེས་བྱ་བ་སྨོས་ཏེ། རྗེས་སུ་མཆེད་ནས་ཡོངས་སུ་སྲེག་པར་བྱེད་པའོ། །གང་སྲེག་པར་བྱེད་ཅེ་ན། སྨྲས་པ། བྱིས་པ་ཞེས་བྱ་བ་སྨོས་ཏེ། འདོད་པའི་རྗེས་སུ་འགྲོ་བ་སོ་སོའི་སྐྱེ་བོ་སྟེ། དེ་ཡང་བྱ་བ་དང་བྱ་བ་མ་ཡིན་པ་

ལ་ཀུན་ཏུ་རྨོངས་པའོ། །ཇི་ལྟ་བུར་སྲེག་པར་བྱེད་ཅེ་ན། སྨྲས་པ། མེ་སྒྲོན་ཞེས་བྱ་བ་སྨོས་ཏེ། འབར་བ་དང་བཅས་བཞིན་དུ་ཕྱར་བས་བཟུང་བའོ། །མེ་སྒྲོན་གྱིས་གང་སྲེག་པར་བྱེད་ཅེ་ན། སྨྲས་པ། མ་བོར་བ་ཞེས་བྱ་བ་སྨོས་ཏེ། གང་མ་བོར་བ་དེའི་ལག་པ་སྲེག་པར་བྱེད་དོ། །དེ་བཞིན་
དུ་གང་དག་འདོད་པ་དག་ལ་དགའ་བ་དེ་ཉིད་དེས་ཚིག་པར་འགྱུར་ཏེ། མཐོང་བའི་ཆོས་ལ་ནི་མྱ་ངན་གྱི་མེས་སོ། །ཕ་རོལ་དུ་ནི་སྡུག་བསྔལ་གྱི་མེས་སོ། །འདོད་པ་དག་ལ་མནོག་ཏུ་མཐོང་ཞིང་ཉེས་དམིགས་སུ་མ་མཐོང་བ་རྣམས་ལ་འདོད་པ་རྣམས་སྐྱོ་བ་བསྐྱེད་པའི་ཕྱིར་འདི་གསུངས་སོ། །
འདོད་པའི་ཆིང་མ་དག་ནི་དགྲོལ་བར་དཀའ་བ་ཡིན་ནོ་ཞེས་བསྟན་པའི་ཕྱིར་སྨྲས་པ། ནོར་བུའི་རྣ་ཆ་ཞེས་བྱ་བ་ལ་སོགས་པའི་ཚིགས་སུ་བཅད་པ་གཉིས་སྨོས་སོ། །རྒྱལ་པོ་གསལ་རྒྱལ་གྱིས་སྐྱེ་བོའི་ཚོགས་ཆེན་པོ་རྣམ་པར་བཅིངས་ཞེས་གྲག་སྟེ། ཁ་ཅིག་ནི་ལྕགས་ཀྱི་ཆིང་མས་བཅིངས་
སོ། །ཁ་ཅིག་ནི་ཤིང་གི་ཆིང་མས་བཅིངས་སོ། །ཁ་ཅིག་ནི་གྲེས་མའི་ཆིང་མས་བཅིངས་སོ། །དགེ་སློང་རྣམས་མཉན་ཡོད་དུ་བསོད་སྙོམས་སྤྱོད་པ་དག་གིས་དེ་ཐོས་ནས་བཅོམ་ལྡན་འདས་ལ་གསོལ་ཏེ། དེའི་ཚེ་བཅོམ་ལྡན་འདས་ཀྱིས་འདི་གསུངས་སོ། །གཞན་དག་ནི་གཡུལ་ལས་
རྒྱལ་བ་ཞེས་བྱ་བ་སྐྱོ་བ་ཆེན་པོ་སྐྱེས་ཏེ་རབ་ཏུ་བྱུང་ནས་དེའི་སྔར་གྱི་བུ་ཁྱེའུ་གཉིས་ཞིག་ཉེ་བར་གཞག་སྟེ། ཆགས་པ་མེད་པར་བྱུང་བ་ལས་བུ་དེ་ཆགས་པས་ཡང་དང་ཡང་དུ་བཟློག་ནས་ཇི་སྲིད་དུ་བདུན་པ་ཉིད་ལ་དགྲ་བཅོམ་པ་ཐོབ་པར་གྱུར་ཏེ། དེའི་དབང་དུ་མཛད་ནས་འདི་གསུངས་སོ། །
འཕགས་པ་དག་གང་བཅིངས་པ་དམ་པོ་མ་ཡིན་པར་འདོད་པ་དང་། གང་དམ་པོར་འདོད་པ་དང་། ཇི་ལྟར་ཡང་གང་གིས་དེ་དམ་པོར་ཡིན་ཡང་འཕགས་པ་རྣམས་ཀྱིས་མྱུར་དུ་གཅོད་པར་བྱེད་པ་ཡིན་ཏེ། འདི་ནི་ཚིགས་བཅད་འདི་གཉིས་ཀྱི་བསྡུས་པའི་དོན་ཡིན་ནོ། །དེ་དག་དམ་པོ་
མིན་ཞེས་བྱ་བ་དེ་བརྟན་པ་མ་ཡིན་ཞིང་གཅད་པར་མི་ནུས་པ་མ་ཡིན་ཞེས་བྱ་བའི་དོན་ཏོ། །དེ་དག་ཅེས་བྱ་བ་ནི་ཆིང་མའོ། །གང་གཞན་གྱི་དབང་དུ་གྱུར་པ་དེ་ནི་ཆིང་མ་སྟེ། གཞན་དབང་གི་ཡོ་བྱད་ཅེས་བྱ་བའི་དོན་ཏོ། །འཕགས་པ་ནི་ལུང་དང་སངས་རྒྱས་དང་དེའི་ཉན་ཐོས་སོ། །གསུངས་

པ་ནི་ཉེ་བར་བསྟན་པའོ། །དེ་གང་ཞིག་ཡིན་ཞེ་ན་སྨྲས་པ། གང་ལྕགས་ཞེས་བྱ་བ་ནི་ལྕགས་ལས་གྱུར་པ་སྟེ། དེ་ཡང་ལྕགས་ཀྱི་རང་བཞིན་ལྕགས་སྒྲོག་ལ་སོགས་པའོ། །ཤིང་ནི་ཤིང་གི་རང་བཞིན་ལས་གྱུར་པ་སྟེ། ཤིང་གི་རྣམ་པ་ལས་བྱས་པའོ། །གྲེས་མ་
ནི་རྩྭ་ལས་བྱས་པ་སྟེ། ཐག་པ་ལ་སོགས་པའོ། །འདིས་ནི་ཕྱི་རོལ་གྱི་འཆིང་བ་ལ་འཕགས་པ་རྣམས་བརྟན་པོ་མ་ཡིན་པར་འདོད་པ་ཉིད་དུ་རབ་ཏུ་ཤེས་པ་ཡིན་ནོ། །དེ་ལྟ་ན་གང་དམ་པོ་ཡིན་ཞེ་ན། སྨྲས་པ། ཡོངས་སུ་ཆགས་སེམས་ཞེས་བྱ་བ་ལ་སོགས་པ་སྨོས་ཏེ། གང་ལ་ཀུན་
དུ་ཆགས་པའི་སེམས་ཡོད་པ་དེ་ནི་ཡོངས་སུ་ཆགས་སེམས་ཏེ། སེམས་ལ་ཉེ་བའི་ཉོན་མོངས་པས་ཀུན་དུ་ཉོན་མོངས་པ་ཞེས་བྱ་བའི་དོན་ཏོ། །གང་ཡང་ཉོན་མོངས་པ་མ་ཡིན་པའི་ཡིད་ཀྱིས་ཡོངས་སུ་ཆགས་པའི་སེམས་ནི་འདི་ལྟ་སྟེ། བྱང་ཆུབ་སེམས་དཔའ་རྣམས་སེམས་ཅན་ལ་
སྙིང་རྗེ་དང་བཅས་པའི་ངོ་བོ་ཡིན་ཞིང་སྲེད་པའི་ངོ་བོ་ནི་མ་ཡིན་ཏེ། ཡུན་རིང་སྙིང་རྗེས་འབྲེལ་པའི་ཕྱིར། །ཞེས་བྱ་བའི་བསྟོད་པ་ལས་སོ། །དེ་གང་ལ་འཇུག་པ་ཡིན་ཞེ་ན། སྨྲས་པ། ནོར་བུའི་རྣ་ཆ་ཞེས་བྱ་བ་སྨོས་ཏེ། ནོར་བུའི་རྣ་ཆ་ནི་ནོར་བུའི་རྣ་ཆ་སྟེ་ཟླས་དབྱེ་བ་སྟེ། དེ་དག་ལའོ། །ནོར་བུ་
ཞེས་བྱ་བ་ནི་བཟོ་མ་བྱས་པའི་ནོར་གྱི་དཔེའི་དོན་ཏོ། །བཟོ་བྱས་པའི་དཔེའི་དོན་ནི་རྣ་ཆ་སྟེ། རྣ་བའི་རྒྱན་ཞེས་བྱ་བའི་དོན་ཏོ། །འདིས་ནི་སེམས་ཅན་དུ་གཏོགས་པ་མ་ཡིན་པའི་དངོས་པོ་དེ་ལ་ལྟོས་པ་ཉིད་དུ་སྟོན་ཏོ། །བུ་དང་བུ་མོ་ལ་ཞེས་བྱ་བ་ནི་སེམས་ཅན་དུ་གཏོགས་པའི་དངོས་པོ་ལ་ལྟོས་
པ་ཉིད་དུ་སྟོན་ཏོ། །བུ་ལ་ཞེས་བྱ་བ་ནི་བདག་ལས་སྐྱེས་པའོ། །བུ་མོ་ལ་ཞེས་བྱ་བས་ནི་ཆུང་མ་ཡང་བསྡུའོ། །དང་གི་སྒྲ་ནི་ནོར་བུ་ལ་སོགས་པ་ཉི་ཚེ་མ་ཡིན་གྱི། བུ་ལ་སོགས་པ་ལ་ཡང་ཡིན་པའི་ཕྱིར་དང་གི་སྒྲ་སྨོས་སོ། །གང་ཡིན་ལ་ལྟོས་ཞེས་བྱ་བ་ནི་སྲེད་པ་ཡོངས་སུ་མ་སྤངས་པའི་
བསམ་པ་ཅན་ཞེས་བྱ་བའི་དོན་ཏོ། །ཇི་སྐད་དུ་གསུངས་པ་ལྟོས་པ་དང་ལྡན་པ་ནི་སྲེད་པ་དང་ལྡན་པ་ཞེས་བྱ་བའི་དོན་ཏོ། །རབ་ཏུ་དགྲོལ་བར་དཀའ་ཞེས་འཕགས་པས་གསུངས། །ཞེས་བྱ་བ་ནི་ཡོངས་སུ་ཆགས་པའི་སེམས་ལ་ལྟོས་པ་ཞེས་བྱ་བའོ། །འདི་ཉིད་ནི་ཤིན་ཏུ་འཆིང་བ་དམ་པོ་ཡིན་ནོ་

ཞེས་མཁས་པ་རྣམས་སྟོན་ཏེ། ཅིའི་ཕྱིར་ཞེ་ན་སྨྲས་པ། འདོད་པའི་ཆིང་མས་ཞེས་བྱ་བ་ལ་སོགས་པ་སྨོས་ཏེ། གང་ཡིན་ཞེས་བྱ་བའི་སྒྲ་ནི་རྒྱུ་བསྟན་པའི་ཕྱིར་རོ། །འདི་ལྟར་འདི་དག་ལ་ལྟོས་པའི་ཆིང་མ་ནི་སྤང་བར་བྱ་བ་ལ་འགོག་ཅིང་གགས་བྱེད་པས་འདོད་ཆགས་པ་ལ་སོགས་པ་བཅད་
པར་མི་ནུས་པའི་ཕྱིར་ཏེ། བཅིངས་པ་ནི་ཇི་ལྟར་འདོད་པ་བཞིན་དུ་འགྲོ་བ་སྟེ། རྒྱུག་པ་དང་མཆོང་བ་ལ་སོགས་པ་བྱ་བའི་མཐུ་མེད་དོ། །ལག་ན་མཚོན་ཆ་ལ་སོགས་པ་དང་ལྡན་པས་ནི་བདེ་བར་བཅད་དུ་རུང་བའི་ཕྱིར་གྲོལ་བར་ཡང་འགྱུར་རོ། །འདི་ནི་དེ་ལྟ་མ་ཡིན་ཏེ། དེས་ན་དེ་ཉིད་ཀྱི་ཕྱིར་
འདི་ནི་དགྲོལ་བར་དཀའོ་ཞེས་འཕགས་པས་གསུངས་སོ། །གཞན་དག་ན་རེ་འདོད་པའི་ཆིང་མ་ནི་ཆགས་པར་བྱེད་པ་སྟེ། སེམས་འཕྲོག་པར་བྱེད་པའི་ཕྱིར་རོ། །ལྷོད་ཀྱང་ཞེས་བྱ་བ་འགྲོ་བ་ཐམས་ཅད་དུ་བཅིངས་ཀྱང་ཉམ་ང་བ་མེད་དོ། །ལྷོད་པའི་ཕྱིར་དགྲོལ་སླ་བ་ཡིན་ནོ་ཞེས་རྟོག་པ་དག་
བཟློག་པའི་ཕྱིར་སྨྲས་པ། རབ་ཏུ་དགྲོལ་བར་དཀའ་ཞེས་བྱ་བ་སྨོས་ཏེ། དཀའ་བས་ཐར་ཅིང་བཅད་པར་བྱ། །ཞེས་བྱ་བའི་དོན་ཏོ། །མཚོན་དང་མེ་དང་ཆུ་དང་། སྔགས་དང་སྨན་ལ་སོགས་པ་དང་། ཐམས་ཅད་དུ་རབ་ཏུ་སྨྲ་བ་རྣམས་ཀྱིས་ཤིན་ཏུ་དགྲོལ་བར་མི་ནུས་པའི་ཕྱིར་རོ། །འདི་ཉིད་ནི་
ཆིང་མ་དམ་པོ་ཡིན་ཏེ། གང་གི་ཕྱིར་ལྟོས་པའི་ཆིང་མ་དེ་ལ་བཙལ་བར་འདོད་ཅིང་དེ་བཞིན་དུ་གང་བརྗོད་པར་གྱུར་ན་ཡང་གཅོད་པར་མི་ནུས་པའི་ཕྱིར་རོ། །ལྷོད་པས་ཇི་ལྟར་འདོད་པ་བཞིན་དུ་འཇུག་པ་ན་བདག་ནི་བཅིངས་སོ་ཞེས་མི་ཤེས་པ་ཡིན་ནོ། །དེ་རབ་ཏུ་དགྲོལ་བར་དཀའ་བས་དགྲོལ་
བར་འདོད་ཀྱང་དགྲོལ་བར་མི་ནུས་པ་ཡིན་ཏེ། སངས་རྒྱས་ཀྱི་བསྟན་པ་དང་། བརྟན་པས་སོ་སོར་བརྟགས་པ་དང་། བསྒོམས་པའི་སྟོབས་ནི་མ་གཏོགས་སོ། །རྒྱུ་འདི་གསུམ་གྱིས་ནི་ལྟོས་པའི་བཅིངས་པ་ཉིད་དམ་པོ་ཡིན་གྱི། ལྕགས་ལ་སོགས་པ་ནི་མ་ཡིན་ཏེ། འདི་ཉིད་འཆིང་བ་དམ་
པོ་ཡིན་ནོ། །རབ་ཏུ་དགྲོལ་དཀའ་བ་དེ་ཇི་ལྟར་སུ་ཞིག་གིས་གཅད་པར་ནུས་ཤེ་ན། སྨྲས་པ། དེ་དག་གཏུབས་ནས་ཞེས་སྨོས་ཏེ། གཏུབས་པ་ནི་བཅད་པའོ། །མྱུར་དུ་ཞེས་བྱ་བ་ནི་རིང་པོ་མི་ཐོགས་པར་ཏེ། ལམ་མྱུར་དུ་བྱེད་པའི་ཕྱིར་ཏེ་སྦྱོར་བ་གཅིག་གིས་ཀྱང་ཁམས་གསུམ་པོ་ཐམས་

ཅད་ཀྱི་བག་ལ་ཉལ་སྤངས་པར་གྱུར་པའི་ཕྱིར་རོ། །དེ་དག་མྱུར་དུ་གཏུབས་ནས་ཅི་ཞིག་བྱེད་ཅེ་ན། སྨྲས་པ། འགྲོ་བར་བྱེད་ཅེས་བྱ་བ་ཡིན་ཏེ། འཁོར་བ་ཡོངས་སུ་སྤངས་ནས་མྱ་ངན་ལས་འདས་པར་འགྲོ་བའོ། །མྱ་ངན་ལས་འདས་པར་འགྲོ་བ་ནི་དགྲ་བཅོམ་པ་
ཉིད་དུའོ་ཞེས་བྱ་བའི་ཚིག་གིས་སོ། །ཇི་ལྟར་བྱས་ནས་ཤེ་ན། སྨྲས་པ། མི་ལྟ་བར་ཞེས་བྱ་བ་སྨོས་ཏེ། ལྟོས་ཤིང་སྲེད་པ་གང་ལ་ཡོད་པ་དེ་ནི་ལྟ་བ་སྟེ། དེ་དགག་པ་ནི་མི་ལྟ་བ་སྟེ། མ་ཆགས་པའོ། །གང་ལ་ཞེ་ན། སྨྲས་པ། འདོད་པའི་བདེ་ལ་ཞེས་བྱ་བ་ཡིན་ཏེ། འདོད་པའི་ལོངས་སྤྱོད་ལ་
ཞེས་བྱ་བའི་དོན་ཏོ། །ལུས་དང་སེམས་དབེན་པ་ཉིད་རྟོག་པར་སྨྲས་པ། བརྟན་རྣམས་ཞེས་བྱ་བ་སྟེ། བློ་དང་ལྡན་པས་སོ་སོར་བརྟགས་པ་དང་བསྒོམས་པའི་སྟོབས་ཀྱིས་སྐྱོ་བ་མེད་པ་སྟེ། དེ་ཡང་བརྩོན་འགྲུས་དང་ཤེས་རབ་ཀྱི་སྟོབས་ཀྱིས་མི་དགེ་བ་ལ་འཇུག་པའི་སྦྱོར་བ་རྩོམ་པ་དེ་ལ་ལྟོས་པ་
བཅད་པས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་རྟོགས་ཤིང་ཡོངས་སུ་འགྲོ་བར་འགྱུར་ཏེ། ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་ཐོབ་པར་འགྱུར་རོ། །ཕྱི་རོལ་གྱི་འཆིང་བས་སྐྱོ་བར་བྱས་ཏེ། ནང་གི་ལུས་ལ་སྲེད་པས་བཅིངས་པ་ལ་ཡོངས་སུ་སྐྱོ་བ་
སྐྱེད་པའི་ཕྱིར་ཚིགས་སུ་བཅད་པ་འདི་གསུངས་སོ། །འདི་དག་ཡང་དག་པར་བརྟགས་ན་ནི་སྲེད་པ་ཉིད་འདོད་པ་ཡིན་ཏེ། ཡུལ་ནི་མ་ཡིན་ནོ་ཞེས་བསྟན་པའི་ཕྱིར་སྨྲས་པ། འཇིག་རྟེན་སྣ་ཚོགས་ཞེས་བྱ་བ་ལ་སོགས་པ་སྨོས་སོ། །ཡུལ་ཀཽ་ཤཱམྦཱི་ན་དགེ་བསྙེན་རབ་ཏུ་མང་པོ་ལྟད་མོ་ལྟ་བའི་ཁང་
པ་ན་འདུས་ཤིང་འདུག་པ་ལས་བར་སྐབས་སུ་འདི་ལྟ་བུའི་གཏམ་བརྗོད་པར་གྱུར་ཏེ། འདོད་པ་ཞེས་བྱ་བ་གང་ཡིན་ཞེའོ། །དེ་ན་ཁ་ཅིག་གིས་འདི་སྐད་དུ། ཡིད་དུ་འོང་བའི་ཆུང་མའོ་ཞེས་ཟེར་རོ། །གཞན་དག་ན་རེ་ཞེས་ངག་ཉན་པའི་བུ་ཡིན་ནོ་ཞེས་སོ། །གཞན་དག་ནི་མིག་གི་རྣམ་པར་ཤེས་
པའི་ཡུལ་གཟུགས་ཡིན་ནོ་ཞེའོ། །ཇི་ཙམ་ན་བཅོམ་ལྡན་འདས་ཀྱི་སྤྱན་སྔར་སོང་བ་དང་། བཅོམ་ལྡན་འདས་ཀྱིས་བཀའ་སྩལ་པ། འདུན་པའི་འདོད་ཆགས་ཉིད་འདོད་པ་ཡིན་གྱི། ཕྱི་རོལ་གྱི་བེམས་པོ་གཟུགས་སྡུག་པ་ལ་སོགས་པ་འདི་དག་ནི་ཅི་ཞིག་བྱེད་པར་འགྱུར་ཞེས་རྒྱ་ཆེར་

གསུངས་ཏེ་ཚིགས་སུ་བཅད་པ་འདི་བཀའ་སྩལ་ཏོ། །འདིའི་བསྡུས་པའི་དོན་ནི་གང་འདོད་པ་མ་ཡིན་པ་དང་། ཅི་ནས་ཀྱང་དེ་བསྟན་པའོ། །དེ་འདོད་མིན་ཞེས་བྱ་བ་ནི་ཡུལ་རྣམས་རང་བཞིན་གྱིས་འདོད་པ་ཡིན་ནོ་ཞེས་བྱ་བ་དགག་པ་ཡིན་ནོ། །གང་དང་དེ་གཉིས་ནི་རྟག་ཏུ་འབྲེལ་པ་ཡིན་ཏེ། དེ་ཡང་
གང་ཡིན་ཞེ་ན། གང་འདོད་པ་ཞེས་བྱ་བ་དེ་སྨྲས་པ། འཇིག་རྟེན་སྣ་ཚོགས་གང་ཞེས་བྱ་བ་སྨོས་ཏེ། གང་ནི་གང་ཞིག་གོ། །འཇིག་རྟེན་ནི་འགྲོ་བའོ། །སྣ་ཚོགས་པ་ནི་སེམས་སྐྱོ་བར་བྱེད་པ་སྟེ། ཡིད་ཚིམ་པར་བྱེད་པའི་ཕྱིར་རྣམ་པ་སྣ་ཚོགས་པའི་ཡིད་དུ་འོང་བ་འདོད་པའི་འདོད་ཆགས་དང་རྗེས་སུ་
མཐུན་པ་སྟེ། གཟུགས་དང་སྒྲ་དང་དྲི་དང་རོ་དང་རེག་བྱའོ། །དེ་ནི་འདིར་འདོད་པ་མ་ཡིན་ཏེ། སེང་གེའི་ཕུག་སེང་གེར་མི་འགྱུར་བ་དེ་བཞིན་ནོ། །དེ་ལྟར་ན་འདོད་པ་ཞེས་སྨོས་པ་དེ་གང་ཡིན་ཞེ་ན་སྨྲས་པ། ཀུན་རྟོག་འདོད་ཆགས་ཞེས་བྱ་བ་སྨོས་ཏེ། འདོད་པ་ལ་རྣམ་པར་རྟོག་པ་དང་མཚུངས་
པར་ལྡན་པའི་འདོད་ཆགས་སམ། ཚུལ་བཞིན་མ་ཡིན་པ་ཡིད་ལ་བྱེད་པ་ལས་སྐྱེས་པའོ། །འདིར་འདས་པའམ་མ་འོངས་པའི་ཡུལ་རྣམས་ལ་ཚུལ་བཞིན་མ་ཡིན་པ་ཡིད་ལ་བྱེད་པས་བརྟགས་པ་ནི་ཀུན་ཏུ་རྟོག་པའོ། །ད་ལྟར་བྱུང་བ་ལ་ལྷག་པར་ཞེན་པ་ནི་འདོད་ཆགས་སོ། །ཡང་
ན་མ་ཐོབ་པ་ཐོབ་པའི་ཕྱིར་བསྐྱེད་པ་ནི་ཀུན་དུ་རྟོག་པའོ། །ཐོབ་པ་ལ་ཞེན་པ་ནི་འདོད་ཆགས་ཏེ། ཀུན་དུ་རྟོག་པ་དང་ལྷན་ཅིག་པའི་འདོད་ཆགས་ནི་ཀུན་རྟོག་འདོད་ཆགས་སོ། །ཡང་ན་འདུན་པའི་འདོད་ཆགས་ནི་འདུན་པ་ཉིད་འདོད་ཆགས་ཡིན་པས་འདུན་པའི་འདོད་ཆགས་ཏེ། དོན་དུ་གཉེར་
བའི་འདོད་ཆགས་སོ། །འདུན་པ་ཡོད་ལ་འདོད་ཆགས་མེད་པ་ཡང་ཡོད་དེ། དཔེར་ན་འགྲོ་བར་འདོད་པ་ལ་སོགས་པའོ། །འདོད་ཆགས་ཡོད་ལ་འདུན་པ་མེད་པ་ཡང་ཡོད་དེ། དཔེར་ན་གོས་ལ་མངོན་པར་ཞེན་པ་ལྟ་བུ་སྟེ། དེ་བས་ན་འདིར་གཉི་ག་གཟུང་ངོ་། །སྐྱེས་བུ་ཞེས་བྱ་བ་ནི་ཀུན་ནས་
ཉོན་མོངས་པ་སྟེ། ཡང་དང་ཡང་དུ་ལས་དང་ཉོན་མོངས་པ་འཇོམས་པའི་ཕྱིར་རོ། །ཡང་ཅི་འདོད་པའི་རྒྱུ་ནི་ཀུན་རྟོག་ཉིད་ཡིན་གྱི། དངོས་པོ་སྣ་ཚོགས་ནི་མ་ཡིན་པར་བསྟན་པའི་ཕྱིར་སྨྲས་པ། འདི་ལྟར་སྣ་ཚོགས་གནས་ཀྱང་ནི། །ཞེས་བྱ་བ་སྨོས་ཏེ། གཟུགས་ལ་སོགས་པ་རྣམ་པ་སྣ་ཚོགས་

གནས་པ་ཡིན་ནོ། །དེ་བཞིན་དུ་ཞེས་བྱ་བ་ནི་འདོད་པའི་གནས་སྐབས་ཀྱི་གཟུགས་གང་ཡིན་པ་གཟུགས་ལ་སོགས་པ་རྣམ་པ་སྣ་ཚོགས་པ་གནས་པ་བཞིན་དུ་འདོད་ཆགས་དང་བྲལ་བའི་གནས་སྐབས་ན་ཡང་དེ་བཞིན་དུ་གནས་པའོ། །འོན་ཀྱང་ཞེས་བྱ་བ་ནི་དེ་ལྟ་མོད་
ཀྱི་ཞེས་བྱ་བའི་དོན་ཏོ། །འདི་ལ་ཞེས་བྱ་བ་ནི་གཟུགས་རྣམ་པ་སྣ་ཚོགས་པའི་ཡུལ་ལའོ། །བརྟན་པ་རྣམས་ཞེས་བྱ་བ་ནི་བློ་དང་ལྡན་པ་རྣམས་ཏེ། སོ་སོར་བརྟགས་པ་དང་བསྒོམས་པའི་སྟོབས་དང་ལྡན་པའོ། །འདུལ་ཞེས་བྱ་བ་ནི་རྣམ་པར་སེལ་བར་བྱེད་པ་སྟེ། རྣམ་པར་འཇིག་པར་བྱེད་ཅེས་བྱ་བའི་
དོན་ཏོ། །འདུན་པ་ནི་འདོད་ཆགས་ཏེ། དོན་དུ་གཉེར་བའི་སྲེད་པའོ། །གལ་ཏེ་ཡུལ་རྣམས་འདོད་པ་ཡིན་པར་གྱུར་ན་ནི་དེས་ན་རྣམ་པ་ཐམས་ཅད་དུ་ཡང་དག་པར་གཅོད་པར་མི་ནུས་པ་ཉིད་ཡིན་གྱི་བརྟན་རྣམས་འདོད་པ་སྤང་བར་འདོད་པས་འདུན་པ་དེ་ཉིད་འདུལ་བར་བྱེད་དེ་གང་གི་ཕྱིར་གནས་པ་བཞིན་
དུ་ཡང་དེ་ལ་བློ་དང་ལྡན་པ་རྣམས་སྤོང་བར་འདོད་པས་དེས་ན་འདུན་པ་ཉིད་འདུལ་བར་བྱེད་དེ། དེ་བས་ན་འདུན་པའི་འདོད་ཆགས་ཉིད་འདོད་པའི་ཡིན་གྱི། ཡུལ་ནི་མ་ཡིན་ནོ། །གཞན་དུ་ན་སུ་ཡང་འདོད་ཆགས་དང་བྲལ་བར་མི་འགྱུར་ཏེ། ཡུལ་ནི་དེ་བཞིན་དུ་གནས་པའི་ཕྱིར་རོ། །གང་དག་ཡུལ་
སྤངས་པ་ཙམ་གྱིས་འདོད་པ་དག་ལས་ཐར་པར་འགྱུར་རོ་ཞེས་རྟོག་པ་དེ་ཙམ་སྤངས་པས་ཆོག་པར་འཛིན་པ་རྣམས་ཀུན་དུ་རྟོག་པའི་འདོད་ཆགས་སྤང་བ་ལ་གཟུང་བའི་ཕྱིར་འདི་གསུངས་སོ། །རྣམ་པ་གཞན་གྱིས་ཡུལ་དག་ལ་ཡང་འདོད་པ་ཉིད་དུ་བསྟན་པའི་ཕྱིར་སྨྲས་པ། མི་རྣམས་ལ་ནི་ཞེས་
བྱ་བ་ལ་སོགས་པ་སྨོས་སོ། །ཀུན་དུ་རྒྱུ་ཞིང་འདི་ལྟར་ལྟ་ཞིང་འདི་སྐད་སྨྲ་སྟེ། འདོད་པའི་གཟུགས་ལ་སོགས་པ་ནི་མེད་དེ། དེ་ཅིའི་ཕྱིར་ཞེ་ན། གཟུགས་ལ་སོགས་པ་དེ་དག་ཉིད་ལ། ལ་ལ་ལ་ནི་ཡིད་དུ་འོང་། ལ་ལ་ལ་ནི་ཡིད་དུ་མི་འོང་བ་སྟེ་སྐྱེས་བུ་སོ་སོས་དངོས་པོ་དེ་བཞིན་དང་གཞན་དུ་བསྒོམ་
པ་མི་རིགས་སོ། །ཇི་ཙམ་ན་བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་ཀ་ལན་ད་ཀའི་གནས་ན་བཞུགས་པར་དེས་ཐོས་ཏེ། བཅོམ་ལྡན་འདས་ཀྱི་སྤྱན་སྔར་སོང་ནས་དོན་འདི་ཞུས་ཏེ། དེའི་དབང་དུ་མཛད་ནས་འདི་གསུངས་སོ། །འདིའི་བསྡུས་པའི་དོན་ནི་ཚིག་རྐང་དང་པོས་ནི་ཉེས་དམིགས་

ཡོངས་སུ་བསྟན་ཏོ། །གཉིས་པས་ནི་རོ་མྱང་བ་ལ་སྐྱེ་བོ་གང་གིས་ཆགས་པའོ། །ལྷག་མས་ནི་ཉེས་དམིགས་མཐོང་བས་ངེས་པར་འབྱུང་བ་སྟེ། གང་གི་ཕྱིར་རོ་མྱང་བ་ལ་རྒྱབ་ཀྱིས་བལྟས་པ་ཡིན་པའི་ཕྱིར་ངེས་པར་འབྱུང་བ་ཡིན་ནོ། །ད་ནི་ཚིག་གི་དོན་བརྗོད་པར་བྱ་སྟེ། མེད་ཅེས་བྱ་བ་ནི་ཡོད་པ་མ་ཡིན་
པ་སྟེ་འདོད་པའོ། །ཇི་ལྟར་མེད་ཅེ་ན། སྨྲས་པ། རྟག་པ་ཞེས་བྱ་བ་སྨོས་ཏེ། རྣམ་པར་མི་འགྱུར་བའི་ཆོས་ཅན་ནོ། །མི་རྟག་པ་ནི་ཡོད་དོ། །འདིས་ནི་ཇི་ལྟར་འདོད་པ་རྣམས་ཡོངས་སུ་ཤེས་པར་བྱ་བ་མེད་པ་མ་ཡིན་པས་དེ་ལྟར་སྟོན་ཏོ། །གང་ལ་ཞེ་ན་སྨྲས་པ། མི་རྣམས་ལ་ཞེས་བྱ་བ་སྨོས་ཏེ། ཤེད་བུ་
དག་ལའོ། །འདི་ལ་རྣམ་པར་འགྱུར་བའི་ཆོས་ཅན་རྣམས་འདོད་པ་དག་འཇིག་པ་ཉེ་བར་མཐོང་བའི་ཕྱིར་ཡིད་ཆེས་པར་བྱ་བ་རྙེད་སླ་བ་ཡིན་པས་མི་ཞེས་བྱ་བ་ཙམ་སྨོས་ཀྱི། འདོད་པ་ཐམས་ཅད་ཀྱང་ཚུལ་དེ་ལྟ་བུ་ཉིད་དོ། །གལ་ཏེ་འདི་དག་རྟག་པར་མེད་ན་ནི་དེ་ལྟ་ན་དངོས་པོ་ཡོད་པ་ཟླ་བ་གཉིས་ལ་སོགས་
པ་བཞིན་དུ་མེད་པ་ཡིན་ནོ་ཞེ་ན་སྨྲས་པ། དེ་ཡོད་པའང་ཞེས་བྱ་བ་སྨོས་ཏེ། རེ་ཞིག་ཡོད་པའི་རྐྱེན་ལ་ཡོད་པ་ཡིན་ནོ། །ཡང་གི་སྒྲ་ནི་དངོས་པོ་ཡང་དག་པར་ཡོད་པ་སྟེ། འབྲས་བུ་དང་ལྡན་པའི་ས་བོན་བཞིན་ནོ། །འདུས་མ་བྱས་ཀྱང་ཡོད་དམ་ཞེ་ན། དེས་ན་ཁྱད་པར་བསྟན་པའི་ཕྱིར་སྨྲས་པ། མི་
རྟག་པས་ཞེས་བྱ་བ་སྨོས་ཏེ། རྣམ་པར་འཇིག་པའི་ཆོས་ཅན་ཡིན་པས་མི་རྟག་པའོ། །གང་ལ་ཡོད་ཅེ་ན། འདི་ལྟར་འདོད་ཅན་ཞེས་བྱ་བ་སྨོས་ཏེ། འདོད་པ་ལ་འདུན་པའི་འདོད་ཆགས་གང་ལ་ཡོད་པ་དེ་ནི་འདོད་ཅན་ཏེ། འདོད་པ་ལ་འདོད་ཆགས་དང་མ་བྲལ་བའོ། །གང་ལ་ཞེས་བྱ་བ་ནི་ཡུལ་གྱི་
འདོད་པ་དག་ལའོ། །ཆགས་པ་ནི་རང་དབང་དུ་མ་བྱས་པའོ། །གང་གི་ཕྱིར་བཙོན་རའི་ནང་ན་ཡོད་ན་སུ་ཞིག་བསྡམས་པར་མི་འགྱུར་བས་སོ། །དེ་ལྟར་རྟག་པ་ཉིད་དུ་ཡང་དག་པར་བརྟགས་ཏེ་ཡོད་པ་དེ་སྤངས་ཤིང་བོར་ནས་འདོད་པ་རྣམས་ཡོངས་སུ་ཤེས་པར་བྱའོ་ཞེས་སྟོན་ཏོ། །དེ་གང་ཡིན་ཞེ་ན།
བླང་བར་བྱ་བ་དང་། དོར་བར་བྱ་བ་དང་། ལྷག་པར་བཏང་སྙོམས་སུ་བྱ་བ་གསུམ་པོ་འདིའི་དངོས་པོ་ཡོད་ཅིང་གནས་པའི་ཕྱིར་རོ། །སྨྲས་པ། སྤང་བར་བྱ་བ་ནི་ངེས་པར་ཟག་པ་དང་བཅས་པའི་ཕྱིར་དེ་ལ་དམིགས་པའི་ཉོན་མོངས་པ་སྤང་གི་དེ་ཉིད་ནི་སྤང་བར་བྱ་བ་ནི་རྫོགས་པར་མི་འགྱུར་རོ། །གང་

མིག་ལ་འདུན་པའི་འདོད་ཆགས་དེ་སྤང་བར་འདོད་པས་འདུན་པའི་འདོད་ཆགས་སྤངས་པ་ཉིད་ཡིན་གྱི། གང་ལྟ་བ་དེ་ཡང་ཉམས་པར་འགྱུར་རོ་ཞེས་མདོའི་དོན་མ་དམིགས་པའི་ཕྱིར་རོ། །རབ་སྤོངས་ལ་ཞེས་བྱ་བ་ནི་དེ་ལ་དམིགས་པའི་ཉོན་མོངས་པ་ཐོབ་
པ་བཅད་པས་དེ་སྤངས་པའོ། །རྣམ་པ་ཞེས་བྱ་བ་ནི་རྣམ་པའི་དོན་ནམ་རིམ་པ་གཞན་དུ་ཡང་བལྟ་བར་བྱ་སྟེ། མི་འགྱུར་ཞེས་བྱ་བ་འདིའི་དོན་ཏོ། །དེ་ཞེས་བྱ་བ་ནི་འདོད་པའོ། །ཇི་ལྟར་འདི་སྤང་བར་བྱ་བ་ཡིན་ཞེ་ན་སྨྲས་པ། ཡང་སྲིད་མེད་ཕྱིར་ཞེས་བྱ་བ་སྨོས་ཏེ། ཅི་ནས་ཀྱང་ཡང་སྐྱེ་བ་
མེད་པར་འགྱུར་བ་སྟེ། འཕགས་པའི་ལམ་གྱིས་སྤང་བར་བསྟན་པའོ། །དེའི་ཕྱིར་དགེ་སློང་དག་གང་འཕགས་པའི་ཤེས་རབ་ཀྱིས་སྤང་བར་བྱའོ་ཞེས་པའི་ཚིག་གིས་ཏེ། གང་འཕགས་པས་འདི་དག་སྤངས་པ་ནི་ཡང་སྲིད་པར་མི་འགྱུར་རོ། །སོ་སོའི་སྐྱེ་བོ་རྣམས་ཀྱིས་སྤངས་པ་འདི་
དག་ནི་ཡང་སྐྱེ་བར་འགྱུར་བའི་ཕྱིར་རོ། །དེ་ལྟར་སྤང་བར་བྱ་བའི་འདོད་པའི་ཕྲ་རྒྱས་གང་ཡིན་ཞེ་ན་སྨྲས་པ། མི་འགྱུར་བར་ཞེས་བྱ་བ་སྨོས་ཏེ། མི་འོང་བར་ཞེས་བྱ་བ་ཉིད་དེ། འཕགས་པའི་གང་ཟག་དེ་ཞེས་བྱ་བ་ནི་ཚིག་གི་ལྷག་མའོ། །མི་འགྱུར་བར་ཞེས་བྱ་བ་དེ་གང་ཡིན་ཞེ་ན། སྨྲས་པ།
འཆི་བའི་གནས་ཞེས་སྨོས་ཏེ། འཆི་བའི་གནས་ནི་གནས་པ་གང་ལ་ཡོད་པ་དེ་འཆི་བའི་གནས་ཏེ། འཆི་བའི་གནས་ནི་སྐྱེ་བའི་སྒོ་སྟེ། ཡང་སྐྱེ་བ་ཞེས་བྱ་བའི་དོན་ཏོ། །གང་གི་ཕྱིར་མ་སྐྱེས་ན་ནི་འཆི་བར་མི་འགྱུར་ཏེ། གང་ཞིག་སྐྱེས་ནས་མི་འཆི་བ་ནི་མེད་དེ་དེས་ན་སྐྱེ་བ་ལ་བརྟེན་པ་ནི་
འཆི་བའོ། །གཞན་དག་ན་རེ་འཆི་བ་ཉིད་འཆི་བའི་གནས་ཡིན་ཏེ། མིང་ཉིད་མིང་གི་གནས་ལྟ་བུའོ་ཞེས་སོ། །འོ་ན་ཡང་གཏན་དུ་འདོད་ཆགས་དང་བྲལ་བ་ཡང་ཕྱིར་མི་འོང་བར་མི་འགྱུར་ཏེ། འཆི་བའི་གནས་ཉིད་དུ་འོང་བ་ཡོད་དོ་ཞེ་ན། དེ་ནི་དེ་ལྟར་བདེན་པ་ཉིད་དེ་འོན་ཀྱང་ངེས་པར་ནི་འོང་
བ་མེད་དོ། །ཡང་ན་སྲིད་པ་ཐ་མ་པའི་དབང་དུ་བྱས་ཏེ། དེ་ལ་དགོངས་པ་ཡིན་པས་ཉེས་པ་མེད་དོ། །ཡང་ན་ཐམས་ཅད་བསྡུས་ཏེ་སྤང་བའི་དུས་སུ་དེ་དང་བྲལ་བའི་ཐོབ་པ་རྙེད་པའི་ཕྱིར་དེ་སྤང་བ་བསྟན་ཏེ། ཇི་སྐད་དུ་གསུངས་པ། དགྲ་བཅོམ་པའི་གནས་སྐབས་དེ་ལ་འདོད་པའི་ཟག་པ་དང་།

སྲིད་པའི་ཟག་པ་དང་། མ་རིག་པའི་ཟག་པ་ལས་སེམས་རྣམ་པར་གྲོལ་བར་འགྱུར་རོ་ཞེས་སོ། །ཁ་ཅིག་ཏུ་ནི་མི་འགྲོ་བར་ཞེས་བརྗོད་དོ། །མི་འོང་བ་དང་མི་སྐྱེ་བ་ཞེས་བྱ་བའི་དོན་ཞེས་གསུངས་པ་ཞེས་བྱ་བའི་དོན་ནི་བདག་ཉིད་ཀྱིས་དེ་སྐད་བཤད་པ་ཡིན་གྱི། གཞན་དག་གིས་ནི་སྟོན་པར་
མི་ནུས་སོ་ཞེས་སྟོན་ཏོ། །འདི་སྐད་སྟོན་པ་ཡིན་ཏེ། རྒྱུ་གསུམ་གྱིས་ནི་འདོད་པ་རྣམས་སྤང་བར་མི་རུང་བར་འགྱུར་ཏེ། གལ་ཏེ་ཡང་རྟག་པར་གྱུར་ན་ནི་གཏེར་ལྟ་བུའོ། །གལ་ཏེ་མི་རྟག་པར་གྱུར་ན་ནི་རི་བོང་གི་རྭ་ལྟ་བུར་འགྱུར་རོ། །གལ་ཏེ་གནོད་པར་མ་གྱུར་ན་ནི་འཕགས་པའི་ལམ་ལྟ་
བུར་འགྱུར་རོ། །འདི་ལྟར་འདོད་པ་ནི་རྟག་པ་མེད་དེ། མི་རྟག་པ་ནི་ཡོད་དོ། །ཡུལ་འདི་དག་ལ་ཡང་འདོད་པ་ཅན་ཆགས་པ་ཡིན་ཏེ། དེས་ན་གཏན་དུ་འདི་དག་ཡང་སྲིད་པ་མེད་པར་བྱ་བའི་ཕྱིར་སྤང་བར་བྱ་སྟེ། འདི་སྤངས་པས་ནི་འཆི་བའི་གནས་སུ་མི་འགྱུར་བའི་ཚུལ་གྱིས་ཕན་ཡོན་བསྟན་པ་ཡིན་
ནོ། །འདོད་པ་རྣམས་ཡོངས་སུ་ཤེས་པར་བྱ་བ་ནས་ཤེས་ཤིང་གཟུང་བའི་ཕྱིར་འདི་གསུངས་སོ། །འདོད་པ་རྣམས་སྤང་བར་གྱུར་པ་ལ་ནི་དགྲ་བཅོམ་པ་ཉིད་མ་ཐོབ་ཀྱང་འདོད་པ་སྤངས་པའི་ཕན་ཡོན་བཤད་པ། འདུན་པ་སྐྱེས་ཞེས་བྱ་བ་ལ་སོགས་པ་སྨོས་ཏེ། མདོ་ལས་ཕྱིར་མི་འོང་བ་ནི་རྣམ་པ་ལྔ་
ཞེས་གསུངས་སོ། །བར་མ་དོར་ཡོངས་སུ་མྱ་ངན་ལས་འདའ་བ་དང་། སྐྱེས་ནས་ཡོངས་སུ་མྱ་ངན་ལས་འདའ་བ་དང་། མངོན་པར་འདུ་བྱེད་པ་དང་བཅས་པས་ཡོངས་སུ་མྱ་ངན་ལས་འདའ་བ་དང་། མངོན་པར་འདུ་མི་བྱེད་པས་ཡོངས་སུ་མྱ་ངན་ལས་འདའ་བ་དང་། གོང་དུ་འཕོ་བ་ཞེས་བྱ་
བ་བསྟན་པ་ལས་བཅོམ་ལྡན་འདས་ཀྱིས་འདི་གསུངས་སོ། །འདིར་ཡང་མདོར་བསྡུ་ན་ཚུལ་ཁྲིམས་ལ་རབ་ཏུ་གནས་པའི་དགེ་སློང་གིས་ཁྱད་པར་རྟོག་པར་བྱ་བའི་ཕྱིར་གང་གིས་ཡང་དག་པར་སྦྱོར་བ་དང་། གང་ཡང་དག་པར་སྦྱོར་བ་དང་། གང་ཡང་དག་པར་སྦྱོར་བའི་འབྲས་བུ་དང་། གང་ཡང་
དེའི་འབྲས་བུའི་ཕན་ཡོན་དེ་དག་འདིར་བསྟན་པ་ཡིན་ནོ། །དེ་ལ་འདུན་པ་སྐྱེས་པ་ཞེས་པས་ནི་གང་གིས་ཡང་དག་པར་སྦྱོར་བའོ། །ཟད་པར་མི་བྱེད་པ་དང་། སེམས་ལ་སྐྱོན་མེད་པ་དང་དྲན་པས་ནི་གང་ཡང་དག་པར་སྦྱོར་བའོ། །གཅིག་གིས་ནི་གྲོང་དུ་བསོད་སྙོམས་ཀྱི་ཕྱིར་རྒྱུ་བ་ན་དབང་པོའི་སྒོ་

ཡ