Luận tạng Tây Tạng (Tengyur) — Tập 148

་སངས་རྒྱས་ཀྱི་བསྟན་པ་ལའོ། །འདིར་ནི་མཚོན་ཆས་བསྣུན་པ་དང་ནོར་ཕྲོག་པ་ལ་སོགས་པས་འདུལ་བ་ནི་མ་ཡིན་ནོ། །ཡང་ན་ལམ་ཡན་ལག་ལྔ་སྟེ། ཡང་དག་པའི་ལྟ་བ་
དང་། རྟོག་པ་དང་། རྩོལ་བ་དང་། དྲན་པ་དང་། ཏིང་ངེ་འཛིན་ཏོ། །ཡང་ན་འདུལ་བ་ནི་གསུམ་སྟེ། ཡང་དག་པའི་ངག་དང་། ལས་ཀྱི་མཐའ་དང་། འཚོ་བའོ། །དེས་ན་ཡང་ཆོས་འདུལ་བ་ནི་འདིར་འཕགས་པའི་ལམ་ཡིན་ནོ། །བག་དང་ལྡན་པར་སྤྱོད་བྱེད་པ། །ཞེས་བྱ་བ་ནི་བག་མེད་པ་ལ་སོགས་པ་ངན་
པར་སྤྱོད་པ་ཐམས་ཅད་དང་བྲལ་བར་སྤྱོད་པ་ཡིན་ནོ། །འདི་སྐད་སྟོན་པ་ཡིན་ཏེ། འདི་ལྟར་གང་གིས་གཡེང་བ་ཐམས་ཅད་སྤངས་ཤིང་ཟག་པ་མེད་པའི་ལམ་བསྒོམ་པ་ལ་འཇུག་པར་བྱེད་པས་འཁོར་བའི་སྐྱོན་ཐམས་ཅད་ནི་སྤངས་ལ། ཁ་ན་མ་ཐོ་བ་མེད་པའི་བདེ་བའི་ངོ་བོ་ཐར་པའི་ལམ་ནི་སྒྲུབ་པར་བྱེད་པའོ། །
རབ་སྤངས་པ་ཞེས་བྱ་བ་ནི་ཡོངས་སུ་དོར་བའོ། །སྐྱེ་བའི་འཁོར་བ་ཞེས་བྱ་བ་ནི་སྐྱེ་བ་ཉེ་བར་མཚོན་པ་སྟེ། ཁམས་གསུམ་གྱི་བདག་གི་དངོས་པོའོ། །གང་གི་ཕྱིར་སྐྱེ་བ་མེད་པ་ནི་ཁམས་གསུམ་ན་ཡོད་པའི་གྲངས་སུ་མི་འགྲོ་སྟེ། མྱ་ངན་ལས་འདས་པའོ་ཞེས་བྱ་བའི་ཚིག་གིས་སོ། །སྡུག་བསྔལ་ཐ་མར་

ཞེས་བྱ་བ་ནི་ཐ་མ་རྣམ་པ་གསུམ་ལས་ཕུང་པོ་ལྷག་མ་མེད་པར་མྱ་ངན་ལས་འདས་པ་ཞེས་བྱ་བའི་དོན་ཏོ། །བྱེད་པར་འགྱུར་ཞེས་བྱ་བ་ནི་ཐོབ་པ་དང་། དེའི་བདག་ཉིད་དུ་བྱེད་པའོ། །བག་ཡོད་པའི་ཚོམས་ཏེ་བཞི་པའི་རྣམ་པར་འགྲེལ་པ་རྫོགས་སོ།། །།དེའི་འོག་
ཏུ་སྡུག་པའི་ཚོམས་དགོད་པ་ནི་བག་ཡོད་པ་མཆོག་ཏུ་བྱེད་པས་ཀྱང་། བདག་ཉིད་སྡུག་པ་ལ་ཆགས་པའི་བགེགས་ལས་བཟློག་པའི་ཕྱིར་ཏེ་གང་གི་ཕྱིར་སྡུག་པ་ལ་ཆགས་པར་གྱུར་ན་ནི་དགེ་བ་ལ་མངོན་པར་བརྩོན་པ་ཁྱད་དུ་གྱུར་པ་ཐམས་ཅད་ཀྱང་སྤངས་ནས། དེས་ན་སྡུག་པའི་སྐྱེ་བོ་དག་རྗེས་སུ་དྲན་
ཞིང་འཁོར་བའི་ལམ་དག་སྲུང་ལ་ཡང་དག་པར་སྟོན་པར་བྱེད་དོ། །འདི་ཀ་ལིང་ཀ་དང་ཤཱཀྱ་ཙི་ཏྲ་ཞེས་བྱ་བ་ལ་སོགས་པ་ཡང་དཔེར་བརྗོད་པར་བྱའོ། །ད་ནི་སྡེ་ཚོམས་ཀྱི་རྣམ་པར་འགྲེལ་པ་བཤད་དེ་སྡུག་པ་རྣམས་ལས་ཞེས་བྱ་བ་ལ་སོགས་པ་སྨོས་སོ། །མཉན་ཡོད་ན་དགའ་བ་ཅན་ཞེས་བྱ་བའི་ཁྱེའུ་
གཟུགས་ཟླ་མེད་པར་བཟང་བ་ཞིག་གིས་དགའ་མོ་ཞེས་བྱ་བའི་བུ་མོ་དེ་དང་མཉམ་པའི་གཟུགས་ཡོད་པ་ཞིག་བླངས་སོ། །དེའི་ཁྱིམ་ཐབ་ཟླ་བ་དྲུག་ཙམ་ནས་དུས་བྱས་པར་གྱུར་ཏོ། །དེ་དང་བྲལ་བས་དེ་སྨྱོས་པར་གྱུར་ཏེ། གཅེར་བུས་མཉན་ཡོད་ཐམས་ཅད་དུ་ཤི་བའི་ཁྱིམ་ཐབ་ཚོལ་ཞིང་རྒྱུས་སོ། །ཇི་
ཙམ་ན་བཅོམ་ལྡན་འདས་ཀྱིས་དེ་གདུལ་བའི་དུས་ལ་བབ་པར་གཟིགས་ནས། ཚེ་དང་ལྡན་པ་ཀུན་དགའ་བོ་རྗེས་སུ་འབྲེང་བ་དང་དེའི་ཐད་དུ་གཤེགས་སོ། །དེ་ནས་བཅོམ་ལྡན་འདས་མཐོང་མ་ཐག་དྲན་པ་རྙེད་དེ་རང་གི་ལུས་ལ་གོས་མེད་པར་མཐོང་ནས་ཤིན་ཏུ་ངོ་ཚ་བར་གྱུར་ཏོ། །ཚེ་དང་ལྡན་པ་ཀུན་
དགའ་བོས་དེའི་བསམ་པ་ཤེས་ནས་བླ་གོས་དེ་ལ་བྱིན་ཏེ། དེ་ལུས་ལ་གྱོན་ཏེ་བཅོམ་ལྡན་འདས་ཀྱི་སྤྱན་སྔར་འོངས་ཏེ་གུས་པ་དང་བཅས་པར་བྱས་ནས་ཕྱག་འཚལ་ཏེ། ཐུབ་པ་མཆོག་གིས་ཤིས་པར་བརྗོད་པའི་ཚིགས་སུ་བཅད་པ་འདི་གསུངས་སོ། །གང་གིས་ཆོས་གཅིག་མ་སྤངས་པས། །འགྲོ་བ་
འདི་ཀུན་བཅིངས་པར་གྱུར། །ཀུན་རྨོངས་འཇིགས་རུང་འདི་ལྟ་བུ། །རྩ་ནས་ཁྱོད་ཀྱིས་ཟད་གྱུར་ཅིག །ཅེས་སོ། །དེ་ནས་ཀུན་དགའ་བོ་ལ་ལྷུང་བཟེད་གཏད་དེ། སྔོན་སུ་ཡང་མ་ཤི་བའི་ཁྱིམ་ལས་ཆུ་ལོང་ལ་ཤོག་ཤིག་ཅེས་བཀའ་སྩལ་པ་དང་། དེ་བཅོམ་ལྡན་འདས་ཀྱི་མཐུས་བྱེ་བ་ཕྲག་བཅོ་

བརྒྱད་ཀྱི་ཁྱིམ་དག་ཏུ་མྱུར་བ་ཉིད་དུ་སོང་བ་དང་། དེས་ཆུ་མ་རྙེད་ནས་ལྷུང་བཟེད་སྟོང་པ་ཉིད་དུ་སླར་འོངས་སོ་དེ་བསྟན་ནས་ཚིགས་སུ་བཅད་པ་གཉིས་པོ་འདི་གསུངས་སོ། །གཞན་དག་ནི་བུ་དང་ཆུང་མ་དང་མནའ་མ་ཤི་བའི་ཉེ་དུ་ཞིག་རྒྱུན་མི་འཆད་པར་མྱ་ངན་བྱེད་པ་ལས་བརྩམས་པ་ནི་ཚིགས་སུ་བཅད་
པ་དང་པོའོ། །བྱི་ཤ་ཀ་ཞེས་བྱ་བའི་དགེ་བསྙེན་དང་། ཡུལ་ཡངས་པ་ཅན་གྱི་ལིཙྪ་བཱི་ལས་བརྩམས་པ་ནི་གཉིས་པ་ཡིན་ནོ་ཞེས་ཟེར་རོ། །དེ་ནས་དང་པོའི་དབྱེ་བ་བཤད་པ། སྡུག་པ་རྣམས་ལས་ཞེས་བྱ་བ་ལ་སོགས་པ་སྨོས་སོ། །འདི་ལ་བསྡུས་པའི་དོན་ནི་འདོད་ཆགས་དང་བཅས་པ་དང་། འདོད་ཆགས་དང་བྲལ་
བ་དག་གི་ཉེས་དམིགས་དང་ཕན་ཡོན་བསྟན་པའོ། །སྡུག་པ་རྣམས་ལས་ཞེས་བྱ་བ་ནི་སྡུག་པའི་ཡུལ་དག་ལས་ཞེས་བྱ་བ་ཡིན་ཏེ། འདིར་ཉོན་མོངས་པ་དང་བཅས་པའི་སྡུག་པ་བསྟན་པ་སྟེ། མྱ་ངན་ལ་སོགས་པའི་རྒྱུར་གྱུར་པའི་ཕྱིར་རོ། །དོན་ཡང་རྣམ་པ་གཉིས་ཏེ། སེམས་དང་ལྡན་པ་དང་སེམས་དང་མི་ལྡན་
པ་སྟེ། གང་ལ་སྲེད་པ་འཇུག་པའོ། །གང་དང་འབྲེལ་པ་ཟང་ཟིང་ལ་དགའ་ཞིང་རྗེས་སུ་མྱོང་བ་དེ་ལ་སྡུག་པ་ཞེས་བརྗོད་དོ། །འདི་ལྟ་སྟེ། ཕ་དང་། མ་དང་། བུ་དང་། ཆུང་མ་དང་། དབྱིག་དང་། གསེར་དང་། ནོར་བུ་དང་། གོས་དང་། སྐྱེད་མོས་ཚལ་ལ་སོགས་པའོ། །དེ་དང་བྲལ་ཞིང་སྤངས་ཏེ་ཞིག་པ་ལས་ནི་མྱ་
ངན་སྐྱེ་ཞེས་བྱ་བ་སྨོས་ཏེ། ཤིན་ཏུ་སེམས་གདུང་ཞིང་ཡིད་མི་བདེ་བར་གྱུར་ཅེས་བྱ་བའི་དོན་ཏོ། །དཔེར་ན་ཤིང་བཅད་པ་ལྷུང་བ་ལ་ཚ་བའི་དུས་ཀྱི་ཉི་མའི་འོད་ཀྱིས་སྐམ་པ་ལྟ་བུ་ནི་མྱ་ངན་ནོ། །དེ་ཡང་བཤད་པ། ཡིད་ལ་གདུང་བ་འཕེལ་བའི་མིས། །བདུད་རྩི་དག་ལ་ལོངས་སྤྱད་ཀྱང་། །ཉིན་རེ་བཞིན་དུ་སྐམ་
འགྱུར་ཏེ། །ཁོང་སྟོང་ཤིང་གི་མེ་བཞིན་ནོ། །འདས་པ་དག་གི་གནོད་པ་བསྟན་ནས། ད་ལྟར་བྱུང་བའི་རྣམ་པ་དེ་དང་དེ་དག་ལས་ཡང་སྨྲས་པ། སྡུག་པ་དག་ལས་འཇིགས་པ་སྐྱེ། །ཞེས་བྱ་བ་འཇིགས་པ་ཡིན་པས་འཇིགས་པ་སྟེ། མ་འོངས་པ་ན་གནོད་པ་འབྱུང་བར་དོགས་པ་སྐྱེ་བའི་སེམས་གནོད་པ་ཞེས་བྱ་
བའི་དོན་ཏོ། །དགྲ་ལས་འཇིགས་པ་སྐྱེ་ཞེས་མ་བརྗོད་ཅེ་ན། མྱ་ངན་གྱི་འཇིགས་པ་ནི་སྡུག་པ་ཉིད་ཀྱི་དབང་ལས་གྱུར་པ་ཡིན་པའི་ཕྱིར་དེ་ལྟར་ནི་མ་བསྟན་ཏོ། །དེ་དག་ཉིད་ལས་མྱ་ངན་དང་འཇིགས་པ་འབྱུང་བ་ཡིན་ཏེ། ཅིའི་ཕྱིར་ཞེ་ན། དེ་ཉིད་སྨྲས་པ། སྡུག་པ་དག་ནི་རྣམ་སྤངས་ན། །ཞེས་བྱ་བ་

སྨོས་ཏེ། ཇི་སྐད་བསྟན་པའི་མཚན་ཉིད་ཀྱི་སྡུག་པ་རྣམས་ལ་ཆགས་པ་མེད་ཅིང་། དེ་ལ་མ་དམིགས་ན་སྲེད་པ་ཟད་པའི་ཕྱིར་རོ། །ཁམས་གསུམ་གྱི་འདོད་ཆགས་དང་བྲལ་བ་རྣམས་ལ་ནི་འདོད་ཆགས་ཐམས་ཅད་སྤངས་པའི་ཕྱིར་དེ་དང་འབྲེལ་བའི་མྱ་ངན་དང་འཇིགས་
པ་མེད་དོ། །སྡུག་པའི་དངོས་པོ་དང་འབྲེལ་པ་མྱ་ངན་ལ་སོགས་པ་དེ་སྤང་བ་ལ་སྦྱར་བའི་ཕྱིར་འདི་གསུངས་སོ། །སྡུག་པ་དང་འབྲེལ་ན་ནི་ཉེས་དམིགས་འདི་སོགས་པ་ཡིན་ནོ་ཞེས་བསྒྲུབ་པའི་ཕྱིར། སྡུག་གུ་མ་ལས་ཞེས་བྱ་བ་ལ་སོགས་པ་སྨོས་སོ། །ཁ་ཅིག་འདི་སྐད་སྨྲ་སྟེ། མཉན་ཡོད་ན་བྲམ་
ཟེ་ཞིག་གི་བུ་གཉིས་དང་། གླང་བཞི་དང་འབྲས་ཀྱི་ཞིང་དག་ལ་སེར་བ་བབ་སྟེ་ཤི་ཞིང་ཉམས་པར་གྱུར་ཏོ། །ཆུང་མ་ཡང་ཁྱིམ་གྱི་ལས་བྱེད་པ་ལས་དེ་ཞིག་ནས་ལྷུང་སྟེ་དུས་ལས་འདས་སོ། །དེ་དེ་དག་དུས་བྱས་པ་དང་འབྲས་ཀྱི་ཞིང་ཉམས་པར་གྱུར་པ་ལས་སྨྱོས་ཤིང་གཅེར་བུར་བྱུང་སྟེ། སེམས་
འཁྲུགས་པར་གྱུར་ནས་ཀུན་དུ་རྒྱུ་བ་དེའི་དབང་དུ་མཛད་དེ་གསུངས་སོ་ཞེའོ། །སྡུག་པ་ཉིད་དང་བྲལ་བ་ལས་དེ་ལྟར་གྱུར་པ་ཡིན་གྱི། གཞན་དུ་ནི་དེ་ལྟ་མ་ཡིན་ནོ། །སྐྱེས་པ་ནི་འབྱུང་བའོ། །མྱ་ངན་ནི་སྒྱིད་ལུག་པའོ། །སྡུག་བསྔལ་ནི་ཀུན་འབྱུང་སྲེད་པའི་འབྲས་བུར་གྱུར་པའི་ཕུང་པོ་ཞེས་པའི་
ཚིག་གིས་སོ། །འཇིགས་པ་ནི་སེམས་ཀྱི་གནོད་པའོ། །སྡུག་པ་ལས་གསུམ་པོ་དེ་དག་འབྱུང་བ་འབའ་ཞིག་ཏུ་མ་ཟད་དེ། སྡུག་གུ་མ་དག་གཞན་གྱུར་ན། །ཞེས་བྱ་བ་ནི་མེད་པ་དང་བྲལ་བར་གྱུར་པའི་དོན་ཏོ། །ཡི་མུག་འགྱུར་བ་ཞེས་བྱ་བ་ནི་སེམས་འཁྲུགས་པའོ། །ཐོབ་པར་འགྱུར་བ་ཞེས་
བྱ་བ་ནི་རྙེད་པར་འགྱུར་བའོ། །གནོད་པ་ཐམས་ཅད་སྤང་བར་འདོད་པས་སྡུག་པ་ཡོངས་སུ་སྤང་བར་བྱ་བ་ལ་གཟུད་པའི་ཕྱིར་འདི་གསུངས་སོ། །སྡུག་པ་དང་འབྲེལ་ན་དེ་ལས་གཞན་པའི་གནོད་པ་བསྟན་པའི་ཕྱིར། འཇིག་རྟེན་སྡུག་བསྔལ་ཞེས་བྱ་བ་ལ་སོགས་པ་སྨོས་སོ། །བྲམ་ཟེ་ཞིག་བཅོམ་
ལྡན་འདས་ཀྱི་ཐད་དུ་ཕྱིན་ནས། ཀྱེ་གཽ་ཏ་མ་གང་ལ་བརྟེན་ནས་མྱ་ངན་དང་སྨྲེ་སྔགས་འདོན་པ་དང་། སྡུག་བསྔལ་བ་དང་ཡིད་མི་བདེ་བར་འགྱུར་ཞེས་གསོལ་པ་དང་། དེའི་ཕྱིར་བཅོམ་ལྡན་འདས་ཀྱིས་ཚིགས་སུ་བཅད་པ་དྲུག་གསུངས་སོ། །ཇི་རྙེད་པ་ཞེས་བྱ་བ་ནི་གང་དག་འཇིག་རྟེན་ན་མྱ་ངན་

ལ་སོགས་པ་ཡོད་པའོ། །སྨྲེ་སྔགས་འདོན་པ་ཞེས་བྱ་བ་ནི་གང་ཅུང་ཟད་ཡིད་མི་བདེ་བས་བསྐྱེད་པའི་ཚིག་བརྗོད་པའོ། །སྡུག་བསྔལ་ཞེས་བྱ་བ་ནི་ནང་གི་ནད་དོ། །ཇི་ལྟ་བུ་ཞེ་ན། རྣམ་པ་དུ་མ་ཞེས་བྱ་བ་སྨོས་ཏེ། རྣམ་པ་སྣ་ཚོགས་པའོ། །འདིས་ནི་མྱ་ངན་ལ་སོགས་པ་ཐམས་ཅད་ཁྱད་པར་དུ་བྱེད་པ་
ཡིན་ཏེ། དེ་རེ་རེ་ཡང་མཐའ་ཡས་པའི་དབྱེ་བ་ཡོད་པའི་ཕྱིར་རོ། །འདི་ལྟ་བུ་སུ་ལ་འབྱུང་བ་ཡིན་ཞེ་ན། སྨྲས་པ། འཇིག་རྟེན་ཞེས་བྱ་བ་སྟེ་སེམས་ཅན་གྱི་འཇིག་རྟེན་ཡིན་གྱི་སྣོད་ཀྱི་འཇིག་རྟེན་ནི་མ་ཡིན་ཏེ། སེམས་མེད་པའི་ཕྱིར་མྱ་ངན་ལ་སོགས་པ་མེད་པ་ཉིད་དོ། །སྡུག་པ་དག་ལ་བརྟེན་ཏེ་ཞེས་བྱ་བ་ནི་
སྡུག་པའི་དངོས་པོ་ལ་གནས་པའོ། །བྱུང་ཞེས་བྱ་བ་ནི་རབ་ཏུ་སྐྱེ་བའོ། །དེ་དག་ཅེས་བྱ་བ་ནི་མྱ་ངན་ལ་སོགས་པ་སྔར་བཤད་པའོ། །ཅིའི་ཕྱིར་དེ་ལྟ་བུ་ཡིན་ཞེ་ན། སྡུག་ཀྱང་ཞེས་བྱ་བ་སྨོས་པ་ལ། ཡང་གི་སྒྲ་ནི་གང་གི་ཕྱིར་ཞེས་བྱ་བའི་དོན་ཏེ། གང་གི་ཕྱིར་སྡུག་པ་སྤངས་ཤིང་མེད་པར་གྱུར་ན་མྱ་ངན་ལ་
སོགས་པ་དེ་དག་མེད་པར་འགྱུར་ཏེ། དེ་དག་འབྱུང་བར་མི་འགྱུར་རོ། །འདི་གཉིས་ནི་རྒྱུ་དང་རྒྱུ་ཅན་གྱི་མཚན་ཉིད་དུ་བརྗོད་དོ། །གང་རྒྱུ་ཡོད་ན་ནི་འབྱུང་ལ་གང་མེད་ན་ནི་མི་འབྱུང་སྟེ། དེ་ཡང་དཔེར་ན་ས་བོན་དང་མྱུ་གུ་བཞིན་ནོ། །མྱ་ངན་མེད་པའི་བདེ་བའི་ཁྱད་པར་འདོད་པ་སྟེ། བྲམ་ཟེ་དེ་སྡུག་པ་ཡོངས་སུ་
སྤང་བ་ལ་གཟུད་པའི་ཕྱིར་གསུངས་པ། གང་ཕྱིར་ཞེས་བྱ་བ་ལ་སོགས་པ་སྨོས་སོ། །གང་ཡིན་ཞེས་བྱ་བའི་སྒྲ་ནི་ཉིད་ཀྱི་དོན་ཏེ། བདེ་བ་ཉིད་ཡིན་ནོ། །འདི་ལྟར་དེ་དག་ནི་འདོད་ཆགས་དང་བྲལ་བའི་རྣམ་པ་སྟེ། ཁམས་གང་ན་ཡང་ཅུང་ཟད་སྡུག་པ་མེད་དེ་ཁམས་གསུམ་གྱི་འདོད་ཆགས་སྤངས་པའི་
ཕྱིར་རོ། །དེ་བས་གདུང་མེད་ཅེས་བྱ་བ་ནི་གང་གི་ཕྱིར་དེ་ལྟར་བདེ་བ་ཡང་དག་པར་སྐྱེས་པ་དེ་བས་ན་དེ་ལ་མངོན་པར་ཕྱོགས་ཤིང་བདེ་བ་ཐོབ་པར་འདོད་པས་ནི་འགའ་ལ་ཡང་སྡུག་པ་སྐྱེས་པར་མི་བྱ་སྟེ། གདུང་བ་ཐམས་ཅད་དང་སྲེད་པར་བྱེད་པ་ཐམས་ཅད་ནི་དེ་དང་འབྲེལ་པའི་ཕྱིར་རོ། །གདུང་མེད་ཅེས་
བྱ་བ་ནི་གང་ལ་མྱ་ངན་མེད་པ་ཐོབ་པ་དེ་ཉིད་དེ། གདུང་བ་ཐམས་ཅད་བསལ་བ་ཞེས་བྱ་བའི་དོན་ཏོ། །རྡུལ་བྲལ་ཞེས་བྱ་བ་ནི་ཉོན་མོངས་པ་དང་བྲལ་བ་སྟེ་འདིར་འདོད་ཆགས་ཉིད་རྡུལ་ཡིན་གྱི། སའི་རྡུལ་ནི་མ་ཡིན་ནོ་ཞེས་པའི་ལུང་གིས་སོ། །གོ་འཕང་ཞེས་བྱ་བ་ནི་མྱ་ངན་ལས་འདས་པ་སྟེ། དེ་ཉིད་ན་

སྡུག་བསྔལ་དེའི་རྒྱུ་མེད་པའི་ཕྱིར་རོ། །དོན་གཉེར་བ་ཞེས་བྱ་བ་ནི་ཀུན་དུ་འདོད་པའོ། །ཡང་ན་ཐོབ་པར་འདོད་པ་སྟེ་སྒྲུབ་པར་འདོད་པའོ། །སྡུག་པར་བྱ་བ་དེ་མི་བྱ། །ཞེས་བྱ་བ་ནི་ཆགས་པའི་དངོས་པོ་ཡོངས་སུ་གཟུང་བར་མི་བྱ་བའོ། །ནམ་ཡང་ཞེས་བྱ་བ་ནི་རྣམ་པ་གང་
གིས་ཀྱང་སྟེ། ནང་དང་ཕྱི་རོལ་དེས་མཉམ་པར་གཞག་པ་དང་མཉམ་པར་གཞག་པའི་ས་ལ་སོགས་པའོ། །སྡུག་པ་དང་ཕྲད་པར་འདོད་པ་བྲམ་ཟེ་དེའི་དགའ་བ་དང་བཅས་པའི་བློ་ངེས་པར་བྱས་པ་ལས་བཟློག་པའི་ཕྱིར། སྡུག་པ་མ་མཐོང་ཞེས་བྱ་བ་ལ་སོགས་པ་སྨོས་སོ། །ནམ་ཡང་འདོད་ཆགས་
ཀྱིས་ཀུན་ནས་དཀྲིས་པའི་ཡུལ་ལ་ཕྲད་པར་མ་བྱེད་ཅིག་པའོ། །ནམ་ཡང་ཞེས་བྱ་བ་ནི་ནམ་ཞིག་ཀྱང་ངོ་། །གདོལ་བ་ལ་སོགས་པའི་སྡུག་པ་དང་ཕྲད་པ་ཡང་ཕུང་ཁྲོལ་ཆེན་པོར་བསྐྱེད་ན། བྲམ་ཟེ་ལ་སོགས་པའི་ལྟ་ཅི་སྨོས་ཞེས་བྱ་བའི་དོན་ཏོ། །ཅི་སྡུག་པ་དང་ཕྲད་པ་བཞིན་དུ་མི་སྡུག་པ་དང་ཕྲད་པ་ཡང་
འགག་གམ་མ་ཡིན་ཞེ་ན། མི་སྡུག་མཐོང་ནའང་དེ་བཞིན་ནོ། །མི་འདོད་པའི་དངོས་པོ་རྣམས་དང་ཡང་ནམ་ཡང་ཕྲད་པར་མ་བྱེད་ཅིག་པའོ། །འང་ཞེས་བྱ་བའི་སྒྲས་ནི་ཁྱད་པར་དུ་སྡུག་པ་དང་ཕྲད་པ་དགག་པ་ཡིན་ནོ། །ཅིའི་ཕྱིར་ཞེ་ན། འདི་ལྟར། སྡུག་པ་མ་མཐོང་སྡུག་བསྔལ་ལ། །ཞེས་བྱ་བ་སྨྲས་ཏེ། བྲལ་
བ་ལ་སོགས་པས་སྡུག་པ་མཐོང་ན་ནི་གདུང་བ་སྐྱེ་བར་འགྱུར་རོ། །མི་སྡུག་དང་ཡང་ཕྲད་མི་བྱ། །ཞེས་བྱ་བ་ལ། ཡང་གི་སྒྲས་ནི་སྡུག་བསྔལ་རྗེས་སུ་འབྲང་ངོ་། །སྔོན་མ་མཐོང་བའི་དངོས་པོ་དང་ཕྲད་ན་ཡང་རྒྱུན་དུ་སྡུག་བསྔལ་མང་པོ་འབྱུང་ངོ་། །དེས་ན་ཡང་སྡུག་པ་དང་མི་སྡུག་པ་གཉིས་མཐོང་བ་དང་
མ་མཐོང་བ་སྡུག་བསྔལ་གྱི་རྒྱུར་གྱུར་པ་མཉམ་པ་ཡིན་ཏེ། འདི་བྱ་བ་མ་ཡིན་ནོ། །སྡུག་པ་དང་མི་སྡུག་པ་མཐོང་བ་དང་མ་མཐོང་བ་ལས་སྡུག་བསྔལ་ཞེས་བྱ་བ་དེ་གང་ལས་ཤེ་ན། སྡུག་པ་དང་ནི་ཞེས་བྱ་བ་སྨོས་ཏེ། སྡུག་པ་ནི་ཕ་དང་མ་དང་བུ་དང་ཆུང་མ་ལ་སོགས་པ་དང་རྗེས་སུ་ཆགས་པའི་ཡུལ་དང་། བྱེ་
ཞིང་བྲལ་བ་ཞེས་བྱ་བ་སྨོས་ཏེ། བྲལ་བར་སྣང་བ་ན་མྱ་ངན་མི་བཟད་སྐྱེ་བར་འགྱུར་ཞེས་བྱ་བ་འདི་དང་སྦྱར་རོ། །མི་སྡུག་པ་དང་ཕྲད་པ་ཡིས་ཞེས་བྱ་བ་ལ་མི་སྡུག་པ་ཡང་དགྲ་བོ་ལ་སོགས་པ་ཡང་ཕྲད་པའོ། །མྱ་ངན་མི་བཟད་སྐྱེ་བར་འགྱུར། །ཞེས་བྱ་བ་ནི་གདུང་བ་ཆེན་པོ་སྐྱེ་བ་ཡིན་ནོ། །གདུང་བ་

ཆེ་ཉིད་བསྟན་པའི་ཕྱིར། །གང་གིས་མི་དག་རྒས་བྱེད་པའི། །ཞེས་བྱ་བ་སྨོས་ཏེ། གང་མྱ་ངན་སྐྱེས་པ་ནི་འདམ་བུ་བརྔས་པ་ཉི་མས་གདུངས་པ་བཞིན་དུ་འདོད་ཆགས་ཅན་འཇོམས་པར་འགྱུར་ཏེ། བྲམ་ཟེ་བ་ལ་བྱ་ཞེས་བྱ་བའི་བུ་མོ་དང་སློབ་མ་གཉིས་ཡུན་རིང་པོར་བལྟས་པས་རྗེས་སུ་ཆགས་པ་
རྒྱ་ཆེར་གྱུར་ཏོ། །དུས་ཅུང་ཟད་ཅིག་བྲལ་བ་ལས་ཤིན་དུ་ཕྲད་པར་འདོད་དེ། ཕྲད་པར་གྱུར་པ་ལ་ཕན་ཚུན་གཅིག་ལ་གཅིག་ཤས་ཆེར་ཆགས་ཤིང་འཁྱུད་པ་ཙམ་གྱིས་ཤི་ཞིང་ལུས་སྐམས་པར་གྱུར་ཏོ། །ཙཎྜ་གི་རི་ཀ་ཞེས་བྱ་བ་ལ་བལྟས་པ་ཙམ་ཉིད་ཀྱིས་ཙམ་པའི་ཕ་ཤི་བ་ཡང་འདིར་དཔེར་བརྗོད་པར་
བྱའོ། །གསོན་པ་ལ་མི་སྡུག་པ་ཉིད་དེ་དང་འབྲེལ་པའི་མྱ་ངན་ལ་སོགས་པ་བསྟན་ནས། འཆི་བར་འགྱུར་བའི་བསྟན་པར་བྱ་སྟེ། སྡུག་པ་ཤི་བར་གྱུར་པ་ན། །ཞེས་བྱ་བ་སྨོས་ཏེ། ཉེ་དུ་དང་རྩ་ལག་དང་གྲོགས་བཤེས་ལ་སོགས་པ་ནི་སྡུག་པའོ། །ཤི་བར་གྱུར་པ་ནི་དུས་ལས་འདས་པ་སྟེ། སྲོག་
དང་བྲལ་བར་གྱུར་པའོ། །ན་ཞེས་བྱ་བ་ནི་གང་གི་ཕྱིར་སྡུག་པ་དང་བྲལ་ན་ཉེ་དུ་ལ་སོགས་པ་སྡུག་བསྔལ་ཞིང་ཡུན་རིང་དུ་མྱ་ངན་བྱེད་པ་ཡིན་པའི་ཕྱིར། འཚོ་བའི་ཚེ་གཅིག་པུར་མ་ཟད་དེ། སྡུག་བསྔལ་མི་བཟད་པས་གདུངས་པར་གྱུར་པ་ཡིན་ནོ། །དེ་བས་ན་སྡུག་པའི་སྐྱེ་བོ་ཡོངས་སུ་སྤང་བར་བྱའོ་ཞེས་
བསྟན་ཏོ། །སྡུག་བསྔལ་གྱིས་ཉམ་ཐག་པ་ནི་ལུས་དང་སེམས་ཀྱི་སྡུག་བསྔལ་གྱིས་གནོད་པའོ། །གང་ཡིན་ཞེ་ན། གཉེན་འདུན་ཞེས་བྱ་བ་སྨོས་ཏེ། ཕ་དང་མ་དང་གཉེན་དུ་འབྲེལ་པ་ལ་སོགས་པ་སྟེ། རང་བཞིན་གྱིས་གཉེན་དུ་འབྲེལ་པར་སྟོན་པ་ཡིན་ནོ། །བཅོས་མ་ནི་མཛའ་བཤེས་ཞེས་བྱ་བ་སྨོས་
ཏེ། མཛའ་བཤེས་དག་ལ་ཤིན་ཏུ་བརྩེ་བའི་སྙིང་ཡོད་པ་དེ་ནི་མཛའ་བཤེས་སོ། །ཇི་ལྟར་མྱ་ངན་བྱེད་ཅིང་གདུང་བར་བྱེད་ཅེ་ན། སྨྲས་པ། མང་པོ་སྟེ་ལྷག་མའི་རྣམ་པ་དུ་མའོ། །དུས་ཇི་ཙམ་ཞེ་ན། སྨྲས་པ། ཡུན་རིང་དུས་སུ་ཞེས་བྱ་བ་ཡིན་ཏེ། དུས་རིང་པོ་ཞེས་བྱ་བའི་དོན་ཏོ། །དེས་ན་དེའི་ཕྱིར།
སྡུག་དང་བྲལ་བས་སྡུག་བསྔལ་འགྱུར། །ཞེས་བྱ་བ་སྨོས་ཏེ། གདུང་བར་བྱེད་པ་ནི་སྐྱེ་བོ་སྡུག་པ་དང་བྲལ་བ་སྡུག་བསྔལ་གྱི་རྒྱུ་ཡིན་པའི་ཕྱིར་ཤིན་ཏུ་མི་བཟད་པའི་དུག་བཞིན་ནོ། །གང་གི་ཕྱིར་ཇི་སྐད་དུ་གསུངས་པ་སྟེ། དེའི་ཕྱིར། སྡུག་པར་བྱེད་པ་མི་བྱའོ། །ཞེས་བྱ་བ་སྨོས་ཏེ། ཆགས་པའི་དངོས་པོ་

ནི་ཅུང་ཟད་ཀྱང་མི་བྱའོ། །ཅིའི་ཕྱིར་ཞེ་ན། སྡུག་ཉིད་སྡིག་ཅན་ལ་ཞེས་བྱ་བ་སྨོས་ཏེ། གང་ལ་སྡུག་པ་བསྟན་པ་ཡོད་པ་ནི་ཉོན་མོངས་པའི་དགའ་བ་ཞེས་བྱ་བའི་དོན་ཏེ། དེ་ཡང་དཔག་ཏུ་མེད་པའི་སྡིག་པའི་རྒྱུ་ཡིན་པའི་ཕྱིར་སྡིག་པ་དང་བཅས་པ་ཞེས་བྱ་བའི་དོན་ཏོ། །འདི་ལྟར་
གང་ལས་ངན་པར་སྤྱོད་པ་ཐམས་ཅད་ཀྱི་གཞི་ནི་འདི་ལས་བྱུང་བ་ཡིན་པས་དེ་བས་ན་བྱེད་པར་མི་བྱའོ། །ཡང་ན་སྡུག་པ་ཉིད་ཅེས་བྱ་བ་ནི་སྡུག་པའི་དངོས་པོ་སེམས་དང་བཅས་པ་དང་སེམས་མེད་པའི་དངོས་པོ་ལ་ཆགས་པ་སྟེ། སྤྱིར་རབ་ཏུ་གཟུང་ངོ་། །མི་སྡུག་པ་ལ་ཡང་འདི་ལས་བཟློག་པར་བརྗོད་པར་བྱ་སྟེ། མི་
སྡུག་པ་དག་མ་ཤི་བར་གྱུར་ན་གཉེན་འདུན་དང་མཛའ་བཤེས་མང་པོ་དུས་ཡུན་རིང་དུ་མྱ་ངན་བྱེད་དེ། མི་སྡུག་པ་དང་ཕྲད་པའི་སྡུག་བསྔལ་གྱིས་སོ། །དེས་ན་དེ་མི་སྡུག་པར་བྱེད་པར་མི་བྱའོ་ཞེས་བྱ་བ་ཡིན་ཏེ། སྡུག་ཉིད་སྡིག་ཅན་ལ་ཞེས་བྱ་བ་ལྟ་བུའོ། །སྡུག་པ་དང་མི་སྡུག་པ་གཉིས་ཀྱི་སྐབས་ཡིན་པའི་ཕྱིར་དེའི་
འོག་ཏུ་ཡང་འདི་གཉིས་ཀྱི་མཇུག་བསྡུ་བའི་ཚིག་སྣང་བའི་ཕྱིར་རོ། །ཅིའི་ཕྱིར་མངོན་སུམ་དུ་མི་བརྗོད་ཅེ་ན། སྨྲས་པ། ཞེ་སྡང་གི་གཉེན་པོར་སྤྱོད་པ་དང་བཅས་པ་ནི་སྤང་བར་སླ་བ་ཡིན་ནོ་ཞེས་གསལ་བར་བསྟན་པའི་ཕྱིར་དང་། སྲེད་པའི་བཅས་པ་ནི་རབ་ཏུ་སྤང་བར་དཀའ་ཞེས་བསྟན་པའི་ཕྱིར་མངོན་སུམ་དུ་དེ་
ཉིད་གཟུང་བ་ཡིན་ནོ། །དེ་ལ་མདུད་པ་ཡོད་མིན་པས། །ཞེས་བྱ་བ་ནི་མདུད་པ་རྣམ་པ་བཞི་སྟེ། བརྣབ་སེམས་ལུས་ཀྱི་མདུད་པ་དང་། གནོད་སེམས་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དང་། འདི་བདེན་ནོ་སྙམ་དུ་མངོན་པར་ཞེན་ཅིང་མཆོག་ཏུ་འཛིན་པའོ། །དེ་དག་མེད་པ་ནི་ལམ་བསྒོམ་
པས་དེའི་ཐོབ་པ་བཅད་པའོ། །དེ་གང་ཡིན་ཞེ་ན། གང་ལ་མེད་ཅེས་བྱ་བ་སྨོས་ཏེ། སྡུག་པ་དང་སྡུག་པ་མ་ཡིན་པ་ནི་སྡུག་དང་སྡུག་མིན་ནོ། །གང་ལ་རྗེས་སུ་ཆགས་པ་དང་། ཁོང་ཁྲོ་བ་མེད་པའི་ཕྱིར་སྡུག་པ་དང་། མི་སྡུག་པའི་དངོས་པོ་མེད་དེ། དེ་ཁོ་ན་ལ་མདུད་པ་ཐམས་ཅད་མེད་པ་ཡིན་ནོ། །མདུད་པ་
མེད་པས་ནི་གནོད་པ་དང་མྱ་ངན་ལ་སོགས་པ་མེད་དོ། །གང་ཞིག་སྡུག་པ་ཡོངས་སུ་འཛིན་པར་བྱེད་པ་དེ་ནི་དོན་ཡོངས་སུ་བཏང་ནས་གནོད་པ་ཆེན་པོ་ཐོབ་པར་འགྱུར་རོ་ཞེས་བསྟན་པའི་ཕྱིར་སྨྲས་པ། སྡུག་ལ་བལྟས་ཏེ་ཞེས་བྱ་བ་ལ་སོགས་པའོ། །རྒྱལ་བྱེད་ཀྱི་ཚལ་ན་དགེ་སློང་གྲོགས་པོ་གསུམ་ཞིག་

གནས་པ་ལས་དེ་དག་ལ་བོས་ཏེ་བཀའ་སྩལ་པ། དགེ་སློང་ཁྱེད་ཀྱིས་ཐོས་སམ། སྐྱེ་མཆེད་དྲུག་གི་རེག་པ་ཞེས་བྱ་བའི་དམྱལ་བ་གང་དུ་མིག་གིས་མཐོང་བ་ན་ཡིད་དུ་མི་འོང་བ་ཉིད་དུ་མཐོང་སྟེ་ཡིད་དུ་མི་འོང་བར་གྱུར་ཅིང་ཇི་ཙམ་ན་འདི་ལྟར་ཡང་དགེ་བའི་ལས་རྣམས་ངེས་པར་མ་བྱས་པའི་ཕྱིར་དང་། སྡིག་པའི་
ལས་རྣམས་ཉེ་བར་བསགས་པའི་ཕྱིར་རོ། །དགེ་སློང་དག་ཐོས་སམ་སྐྱེ་མཆེད་དྲུག་གི་རེག་པ་ཞེས་བྱ་བ་ལ། གང་དུ་མིག་གིས་གཟུགས་རྣམས་མཐོང་བ་ན་ཡིད་དུ་འོང་བར་མཐོང་བ་ཡིན་ཏེ་ཞེས་བྱ་བ་ནས། རྒྱ་ཆེར་ཚིགས་སུ་བཅད་པ་འདི་གསུངས་སོ། །མི་སྦྱོར་ཞེས་བྱ་བ་སྨོས་པ་ལ། སྦྱོར་ཞིང་ལེགས་པར་
བྱེད་པ་ཡིན་པས་སྦྱོར་བ་སྟེ་ལེགས་པར་སྤྱོད་པའོ། །སྦྱོར་བ་མ་ཡིན་པས་མི་སྦྱོར་བ་སྟེ། ངན་པར་སྤྱོད་པས་དེ་ལ་སྡིག་པ་ཁྱད་དུ་གསོད་ཅེས་བྱ་བའི་དོན་ཏོ། །གཞན་དག་ནི་ཚུལ་བཞིན་མ་ཡིན་པའི་ཡིད་ལ་བྱེད་པའམ་སྤྱོད་ཚུལ་མ་ཡིན་པ་ཞེས་ཟེར་རོ། །སྦྱོར་བ་ཞེས་བྱ་བ་ནི་འཇུག་པར་བྱེད་པའོ། །དེ་ལ་གང་སྦྱོར་བ་ཡིན་
ཞེ་ན། སྨྲས་པ། སེམས་ཏེ་ཡིད་དོ། །སྦྱོར་བ་ཉིད་ལའང་མི་འཇུག་པའོ་ཞེས་བྱ་བ་ནི་སྦྱོར་བ་མེད་པ་ལས་བཟློག་པས་ནམ་ཞིག་ན་སྦྱོར་བ་ལ་ཡང་མི་འཇུག་པའོ། །ཡང་གི་སྒྲ་ནི་བསྡུས་པའི་དོན་ཏོ། །ཉིད་ཅེས་བྱ་བའི་སྒྲ་ནི་ངེས་པར་གཟུང་བ་སྟེ། དེ་ཉིད་དུ་སེམས་མི་སྦྱོར་བའོ། །དེ་དག་བྱས་པའི་ཉེས་དམིགས་
བསྟན་པ་ནི། །དོན་བཏང་ནས་ཞེས་བྱ་བ་སྟེ། བདག་ལ་སོགས་པའི་དོན་ནི་ཕན་འདོགས་པའི་དངོས་པོ་སྤངས་ནས་ངན་པར་སྤྱོད་པ་ལ་མངོན་པར་བརྩོན་པས་བསླབ་པ་གསུམ་སློང་བ་ལ་མངོན་པར་མི་བརྩོན་པའི་ཕྱིར་རོ། །སུ་ཞིག་དེ་ལྟར་བྱེད་པ་ཡིན་ཞེ་ན། སྨྲས་པ། སྡུག་ལ་ལྟ་བ་ཞེས་བྱ་བ་སྨོས་ཏེ། སྡུག་
པ་ཡོངས་སུ་འཛིན་པ་དེ་མཆོག་ཏུ་བྱེད་པའོ། །དེ་ཅི་ཞིག་འཐོབ་ཅིང་གང་ལེན་པ་ཡིན་ཞེ་ན། སྨྲས་པ། རེག་པར་བྱེད་པ་སྟེ་དོན་དུ་གཉེར་བར་བྱེད་པའོ། །དཔེར་ན་མེ་ཏོག་དག་ལ་རེག་པར་བྱེད་པ་ནི་རེག་པར་འདོད་པ་སྟེ། བཞི་པའི་སྦྱོར་བ་བསྟན་ཏོ། །དོན་སྦྱོར་བ་ཞེས་བྱ་བ་ནི་དོན་ལ་སྦྱོར་བ་སྟེ། མངོན་
པར་འདོད་པའི་འབྲས་བུ་དང་ལྡན་པའོ། །དེ་གང་ལ་ཡོད་པ་དེ་ནི་བསླབ་པ་གསུམ་དང་ལྡན་པའི་གང་ཟག་གོ། །འདོད་ཆགས་ཀྱི་དབང་དུ་འགྲོ་བའི་སྐྱེས་བུས་ནི་སྡུག་པ་ལ་ཆགས་པས་གཟུང་སྟེ། དེའི་ཆེད་དུ་བྱེད་ཅིང་དེ་མཆོག་ཏུ་འཛིན་པར་བྱེད་ལ། བག་མེད་པའི་རྗེས་སུ་འགྲོ་ཞིང་བསླབ་པ་གསུམ་གྱི་བསླབ་

པ་ལ་བཏང་སྙོམས་སུ་བྱེད་དེ་འཆི་བའི་དུས་སུ་དེ་མཆོག་ཏུ་ཡོན་ཏན་གྱིས་བརྒྱན་པ་ཡིན་ནོ་ཞེས་རྟོགས་ཏེ། དེ་ལས་ཤིན་ཏུ་མི་བཟད་པའི་ཚོར་བ་དྲག་པོས་མྱ་ངན་ཡང་དག་པར་སྐྱེ་བར་འགྱུར་ཞིང་རེག་པར་འགྱུར་རོ། །དེ་ལྟར་ངན་སོང་ལ་སོགས་པར་སྐྱེ་བར་འགྱུར་ཏེ། ཡིད་ལ་གཅགས་
བཞིན་དུ་འཆི་བའི་དུས་བྱེད་པར་འགྱུར་ཞིང་ལུས་ཞིག་ནས་དམྱལ་བར་སྐྱེ་བར་འགྱུར་རོ་ཞེས་པའི་དོན་ཏོ། །གཞན་དག་ནི་དོན་རིག་སྦྱོར་བར་མི་འགྱུར་བ་ཞེས་བརྗོད་དེ་རེག་པ་ནི་ཐོབ་པའོ། །དོན་ནི་དངོས་པོའོ། །མི་སྦྱོར་བར་ནི་མི་རིགས་པར་འབྲེལ་པ་སྟེ། མི་རིགས་པར་བྱས་ཞེས་བྱ་བའི་དོན་ཏོ། །ངན་པར་སྤྱོད་པ་
ལས་བཟློག་པའི་ཕྱིར་དང་། ལེགས་པར་སྤྱད་པ་ལ་གཟུད་པའི་ཕྱིར་འདི་གསུངས་སོ། །སྡུག་པ་དང་འབྲེལ་པ་ནི་སྡུག་བསྔལ་ཐམས་ཅད་ཡིན་ནོ་ཞེས་བསྟན་པའི་ཕྱིར། གཟུགས་སྡུག་བདེ་བས་ཞེས་བྱ་བ་ལ་སོགས་པ་སྨོས་སོ། །ཡུལ་ཡངས་པ་ཅན་ན་ཚོང་དཔོན་ཞིག་གི་བུ་སྐྱེས་ནས་ལོ་བཅུ་གཉིས་
ལོན་པ་ཞིག་གནས་སོ། །ཇི་ཙམ་ན་ཤིང་སཱ་ལ་བན་ཛི་ཀ་ཞེས་བྱ་བའི་དགའ་སྟོན་གྱི་ཕྱིར་གཉེན་བཤེས་དང་ལྷན་ཅིག་གྲོང་ཁྱེར་ལས་ཕྱི་རོལ་གྱི་སྐྱེད་མོས་ཚལ་དུ་བྱུང་སྟེ་ཤིང་སཱ་ལ་ལ་འཛེགས་ནས། མེ་ཏོག་མང་པོ་བསྡུས་ཏེ་ཉེ་དུ་རྣམས་ལ་མེ་ཏོག་མན་ད་ར་བ་རྣམས་བྱིན་ནོ། །དེའི་ཆུང་མས་འདི་དག་
ལ་ནི་བྱིན་ཏེ། བདག་ལ་ནི་མ་བྱིན་ནོ་ཞེས་མི་བཟོད་པ་སྐྱེས་ཏེ་ཤིང་ཤིན་ཏུ་མཐོ་བ་ཞིག་ལ་འཛེགས་པ་ལས་ཡལ་ག་ཆག་སྟེ་ལྷུང་ངོ་། །དེའི་ཚེ་བཅོམ་ལྡན་འདས་སྤྲེའུའི་མཚོ་བྲན་གྱི་འགྲམ་ན་བཞུགས་ཏེ་ཆོས་སྟོན་ཏོ་ཞེས་དེ་ལྷུང་བཞིན་དུ་ཐོས་ནས་ཡིད་ལ་བྱས་པ་ལས་བར་མ་དོར་མྱ་ངན་ལས་འདས་པར་
གྱུར་ཏོ། །དེའི་ཕྱིར་ཉེ་དུའི་ཚོགས་ཐམས་ཅད་འདུས་ཏེ་མྱ་ངན་ཆེན་པོ་བྱེད་པར་གྱུར་ཏོ། །ལྷའི་འཇིག་རྟེན་དུ་ཡང་མན་ད་རའི་ཤིང་ལས་ལྷའི་བུ་ཞིག་ལྷུང་སྟེ། སྐྱེས་ནས་ཡོངས་སུ་མྱ་ངན་ལས་འདས་པར་གྱུར་ཏོ། །དེའི་ཆེད་དུ་ལྷའི་ཚོགས་རྣམས་ཀྱང་ཡོངས་སུ་མྱ་ངན་བྱེད་ཅིང་འདུག་པ་ལས་འདིར་
བཅོམ་ལྡན་འདས་ཀྱིས་ཚིགས་སུ་བཅད་པ་གཉིས་གསུངས་སོ། །དེ་ལས་དང་པོའི་འགྲེལ་པ་སྨྲས་པ། གཟུགས་སྡུག་ཅེས་བྱ་བ་སྨོས་ཏེ། གཟུགས་ཀྱང་ཡིན་ལ་སྡུག་པའང་ཡིན་པས་གཟུགས་སྡུག་གོ། །ཡང་ན་གཟུགས་སྡུག་པའི་རྒྱུ་ཅན་ནོ། །བདེ་བ་ནི་མྱོང་བའོ། །གཟུགས་སྡུག་པའི་བདེ་བས་བསྡམས་པ་

ཞེས་བྱ་བ་ནི་བཅིངས་པ་སྟེ། དེའི་ཆེད་དུ་སོ་སོའི་སྐྱེ་བོ་འཁོར་བ་ལ་ཆགས་ནས་འདུག་པའོ། །དེ་ཡང་གང་ཡིན་ཞེ་ན། ལྷའི་རིས་དག་ཏུ་ཞེས་བྱ་བ་སྨོས་ཏེ། རྒྱལ་ཆེན་རིགས་བཞི་ལ་སོགས་པའི་ལྷའི་ཚོགས་དག་ཏུའོ། །སོ་སོ་ནི་རྣམ་པ་སྣ་ཚོགས་པ་ཉིད་ཀྱི་ལུས་དང་སེམས་ཡིན་
པའི་ཕྱིར་རོ། །མིང་དང་ཞེས་བྱ་བ་ལ། དང་གི་སྒྲ་ནི་སོ་སོའི་སྐྱེ་བོ་འདྲེན་པ་ཡིན་ཏེ། དེ་ཡང་རྣམ་པ་སྣ་ཚོགས་པའོ། །གཟུགས་སྡུག་པའི་བདེ་བས་བསྡམས་པ་དག་ཡོད་པར་གྱུར་པ་དེས་ཅི་ཞིག་ཏུ་འགྱུར་ཞེ་ན། སྨྲས་པ། སྡིག་པ་བྱེད་ཅིང་ཞེས་བྱ་བ་སྨོས་ཏེ། ཤིན་ཏུ་གནོད་པར་བྱེད་པ་ཡིན་པས་སྡིག་
པ་སྟེ། སྡིག་པའི་ལས་དེའི་རྒྱུས་སེམས་ཅན་ཐམས་ཅད་ལ་གདུང་བར་བྱེད་པ་སྟེ། དེ་དང་འདིར་རྗེས་སུ་མཐུན་པར་བསྒྲུབ་པའི་ཚུལ་གང་ཡིན་པ་དེ་ནི་དེ་ཉིད་དེ་སྡིག་པ་བྱེད་པ་ཞེས་བྱ་བའི་དོན་ཏོ། །བདེ་བ་རྗེས་སུ་མྱོང་བར་བྱེད་པའི་ཕྱིར་སེམས་ཅན་རྣམས་འདོད་པ་ལ་མངོན་པར་ཆགས་པར་བྱེད་དེ། འདོད་
པའི་ཆེད་དུ་ཡང་ངན་པར་སྤྱོད་པ་ཐམས་ཅད་སྤྱོད་དོ། །སྡིག་པའི་འབྲས་བུ་སྨྲས་པ། ཡོངས་ཉམས་ནས་ཞེས་བྱ་བ་ཡོངས་སུ་ཟད་པ་སྟེ། འཇིག་རྟེན་འདིར་ལུས་ཡོངས་སུ་ཉམས་པ་དང་སྨད་པ་ལ་སོགས་པའི་སྡུག་བསྔལ་གྱི་གཞི་ཡིན་པའི་ཕྱིར་བདག་ཉིད་ལ་སྟོབས་མེད་པ་ཡིན་ཏེ། མངོན་པར་མི་འདོད་པ་ཞེས་
བྱ་བའི་དོན་ཏོ། །ཇི་སྐད་དུ་བཤད་པ། གལ་ཏེ་སྲིད་པ་རྩད་བཅད་ནས། །འབྱོར་པ་ཐམས་ཅད་ལག་ཏུ་རྙེད། །དེ་ལ་སྐབས་ནི་ཡོད་བྱས་ན། །བྲན་བཞིན་བཀའ་ནི་སྤྱི་བོས་ནོད། །ཅེས་སོ། །རྒ་དང་འཆི་བའི་དབང་དུ་འགྲོ། །ཞེས་བྱ་བ་ནི། རྒ་བ་དང་འཆི་བའི་རྗེས་སུ་འཇུག་པ་སྟེ། ཡང་དང་ཡང་དུ་སྐྱེ་བ་
བླངས་ནས་འཆི་བ་རྗེས་སུ་མྱོང་བར་འགྱུར་རོ། །དེ་ལ་འདིས་ནི་ཉོན་མོངས་པ་དང་ངན་པར་སྤྱོད་པས་སྐྱེ་བ་ལ་ཕན་པར་བསྟན་ཏོ། །འདིས་སྤང་བར་འདོད་པས་སྡུག་པ་ཡོངས་སུ་སྤང་བར་བྱའོ་ཞེས་བསྒྲུབ་པའི་ཕྱིར་གསུངས་སོ། །སྡུག་པ་ཡོངས་སུ་སྤངས་པའི་ཕན་ཡོན་གང་ཞིག་ཅེས་བྱ་བ་ལ་སོགས་པ་སྨོས་
ཏེ། གང་ཞིག་ནི་གང་དག་གོ། །ཉིན་དང་མཚན་མོ་ཞེས་བྱ་བ་ནི་ཉིན་པར་དང་མཚན་མོའོ། །དང་གི་སྒྲ་ནི་རྒྱུན་མི་འཆད་པའི་སྦྱོར་བ་བསྒྲུབ་པའི་ཕྱིར་རོ། །བག་ཡོད་ཅེས་བྱ་བ་ནི་བག་ཡོད་པར་བྱེད་པ་སྟེ། གཟུགས་སྡུག་པ་སྤང་བའི་ཕྱིར་གཉེན་པོ་བསྒོམ་པ་ཞེས་བྱ་བའི་དོན་ཏོ། །གཟུགས་སྡུག་སྤོང་

བྱེད་པ་ཞེས་བྱ་བ་ནི་སྡུག་པ་ཡོངས་སུ་འདོར་བ་སྟེ་དངོས་པོ་དེ་ལ་དམིགས་པའི་ཉོན་མོངས་པ་སྤང་བའི་ཕྱིར་རོ། །དེས་ཞེས་བྱ་བ་ནི་དེ་ཉིད་ཀྱིས་སོ། །དྲུངས་ནས་ཕྱུང་ཞེས་བྱ་བ་ནི་རྩ་བ་ནས་ཕྱུང་བའོ། །སྡིག་པའི་རྩ་བ་ཞེས་བྱ་བ་ནི་སྡིག་པ་འཕེལ་བའི་ཕྱིར་བག་ལ་ཉལ་ཞེས་བྱ་བའི་དོན་ཏོ། །
བདུད་ཟས་དང་ཞེས་བྱ་བ་ནི་འཆི་བར་བྱེད་པའི་འདྲེན་པ་དང་། ཟས་དང་ཟང་ཟིང་དང་ཕན་འདོགས་པ་ཞེས་བྱ་བ་ནི་རྣམ་གྲངས་སོ། །དེའི་ཕྱིར་ཉོན་མོངས་པ་མ་སྤངས་པ་ལ་ནི་སྐྱེ་བ་དང་འཆི་བ་རྙེད་སླ་བ་ཡིན་ནོ། །སྡིག་པའི་རྩ་བ་ནི་སྡིག་པ་ཐམས་ཅད་སྐྱེད་པར་བྱེད་པ་ཡིན་པའི་ཕྱིར་རོ། །དེ་བས་ན་བདུད་ཀྱི་ཟས་ཏེ་ཇི་སྐད་
དུ་བསྟན་པ། གང་དུ་འདོད་པ་དེ་ན་འཆི་བ་ཡོད། །གང་དུ་ཟས་ཡོད་དེ་ན་བྱ་རྒོད་ལྟུང་། །ཞེས་གཞན་དག་ཟེར་རོ། །སྤང་དཀའ་ཞེས་བྱ་བ་ནི་འདའ་བར་དཀའ་བའོ། །བདག་ཉིད་མ་སྦྱངས་པ་རྣམས་ལ་ནི་ཀུན་དུ་སྦྱོར་བ་རྣམས་སྤང་བར་དཀའ་བ་ཉིད་དུ་བསྟན་པའི་ཕྱིར་འདི་གསུངས་སོ། །བྱིས་པ་རྣམས་ཀྱི་སྡུག་
པའི་དངོས་པོ་ནི་སླུ་བ་ཉིད་དུ་བསྟན་པའི་ཕྱིར། ལེགས་མིན་ལེགས་པའི་ཚུལ་དང་ནི། །ཞེས་བྱ་བ་ལ་སོགས་པ་སྨོས་ཏེ། བཅོམ་ལྡན་འདས་ཨ་མ་ལ་ཀ་ལ་བ་ཞེས་བྱ་བའི་ཤཱཀྱའི་གྲོང་རྡལ་ན་བཞུགས་ཏེ། དེའི་ཚེ་སུ་པྲ་བེ་ཤ་ཀྲོ་ཏ་ཞེས་བྱ་བའི་བུ་མོ་དེ་ལས་ཁྱེའུ་ཞིག་བཙས་སོ། །དེ་ནས་ཡང་ཨ་མ་
ལ་ཀ་ལ་བ་ཞེས་བྱ་བ་ན་གནས་པའི་ལྷ་དེ་བཅོམ་ལྡན་འདས་ཀྱི་སྤྱན་སྔར་ཕྱིན་ཏེ་གསོལ་པ། བཙུན་པ་སུ་པྲ་བེ་ཤ་ཀྲོ་ཏ་ཞེས་བྱ་བའི་བུ་མོ་དེ་ལས་ཁྱེའུ་ཞིག་བཙས་སོ། །བཅོམ་ལྡན་འདས་ཀྱིས་བཀའ་སྩལ་པ། ལྷ་དེ་ནི་མ་ལེགས་ཏེ་ཤིན་ཏུ་ཡང་མ་ལེགས་སོ། །ལྷ་དེས་གསོལ་པ། འཇིག་རྟེན་ན་ནི་བུ་
སྐྱེས་བདེ་ཞེས་བརྗོད། །བུ་སྐྱེས་ན་ནི་ཡིད་ཀྱང་ཤིན་ཏུ་དགའ། །ཕ་མ་རྒས་ན་གསོ་བར་བྱེད་ཡིན་ན། །ཅི་ཕྱིར་ཁྱོད་ནི་ལེགས་པ་མིན་ཞེས་གསུངས། །ཞེས་གསོལ་པ་དང་། བཅོམ་ལྡན་འདས་ཀྱིས། ལེགས་མིན་ལེགས་པའི་ཚུལ་དང་ནི། །ཞེས་བྱ་བ་ལ་སོགས་པ་བཀའ་སྩལ་ཏོ། །སྡུག་པའི་དངོས་པོ་
འདི་དག་ཐམས་ཅད་ནི་ལེགས་པ་མ་ཡིན་ཏེ་གནོད་པ་ཐམས་ཅད་ཀྱི་རྒྱུར་གྱུར་པ་དང་། སྐྱེ་བོ་དམ་པས་སྨད་པའི་ཕྱིར་རོ། །དེ་ཡང་ལེགས་པའི་ཚུལ་གྱིས་ཏེ་ལེགས་པའི་ཐབས་ཀྱིས་བག་མེད་པའི་སེམས་ཅན་མངོན་པར་འཇོམས་པ་ཡིན་ཏེ། སླུ་བར་བྱེད་པའི་ཆུའི་ཤ་ཟ་བཞིན་ནོ། །སྡུག་པའི་ཚུལ་

གྱིས་དང་ཞེས་བྱ་བ་ནི་སྡུག་པ་ལྟ་བུའམ་ཡིད་དུ་འོང་བའི་ཚུལ་གྱིས་སོ། །སྡུག་མིན་ཞེས་བྱ་བ་ནི་ཡིད་དུ་མི་འོང་བའི་ཚུལ་གྱིས་སོ། །སྡུག་ཅེས་བྱ་བ་ནི་ཡིད་མི་རྟག་པས་མ་རུང་བར་བྱས་པ་དེ་ལྟ་མོད་ཀྱི་ཁ་ན་མ་ཐོ་བ་མེད་པས་སླུ་བ་ཡིན་ནོ། །སྡུག་བསྔལ་བདེ་བའི་ཚུལ་གྱིས་སུ། །ཞེས་བྱ་བ་ནི་འཁོར་བའི་སྲིད་
པར་བསྡུས་པ་ཐམས་ཅད་སྡུག་བསྔལ་ཞིང་སྡུག་བསྔལ་རྣམ་པ་གསུམ་དང་ལྡན་པ་ཡིན་ཏེ་ཅི་རིགས་པར་ཡིན་ན་དེ་ལྟ་ཡང་ནན་གྱིས་བདེ་བ་ཉིད་དུ་ཡོངས་སུ་འཛིན་པ་ཡིན་ནོ། །ལེགས་མིན་ལེགས་པ་ཞེས་བྱ་བ་ལ་སོགས་པའི་ཚིག་རྐང་གསུམ་གྱིས་ནི་སྡུག་པ་རྣམས་མི་གཙང་བ་དང་། མི་རྟག་པ་དང་བདག་
མེད་པ་དང་། སྡུག་བསྔལ་བའི་ཚུལ་དུ་ཡོད་པ་ཡིན་ཡང་། དེ་ལྟ་མོད་ཀྱི་གཙང་བ་དང་རྟག་པ་དང་། བདག་དང་བདེ་བ་ཉིད་དུ་ནན་གྱིས་ཕྱིན་ཅི་ལོག་པར་གྱུར་ཏོ་ཞེས་བྱ་བ་ནི་གཞན་དག་ཟེར་རོ། །ཡང་ན་ལྷ་སྦྱིན་གྱིས་བསྟན་པའི་ཚིགས་སུ་བཅད་པ་ལུགས་ལས་བཟློག་པ་ནི་ལན་འདིས་བསྟན་པ་ཡིན་ནོ། །
ཁྱེའུ་དེ་ཆེར་སྐྱེས་པ་དང་ཕ་དང་མ་གསོད་པར་འགྱུར་ཞིང་རིགས་རྒྱུད་ཐམས་ཅད་རླག་པར་བྱེད་པ་དང་། ཉེ་དུའི་རིགས་ཐམས་ཅད་ཀྱང་འཇིག་པར་འགྱུར་ཞིང་ཐམས་ཅད་སྡུག་བསྔལ་ལ་སྦྱོར་བར་བྱེད་པ་ཡིན་ཏེ། དེ་ལྟར་དོན་རྣམ་པ་གསུམ། ལེགས་མིན་ལེགས་པའི་ཚུལ་དང་ནི། །ཞེས་བྱ་བ་ལ་སོགས་པའི་
ཚིག་རྐང་གསུམ་གྱིས་བསྟན་ཏོ། །བག་མེད་རྣམས་ནི་ཞེས་བྱ་བ་ནི་རྨོངས་པ་སྟེ། གང་གི་ཕྱིར་རྨོངས་ན་ནི་བྱ་བ་རྣམས་ལ་བག་མེད་པར་འགྱུར་རོ། །མངོན་དུ་འཇོམས་པ་ནི་ཟིལ་གྱིས་གནོན་པ་སྟེ། ལམ་བཟང་པོ་ཉམས་ཞེས་བྱ་བའི་དོན་ཏོ། །སླུ་བས་འཇིགས་པ་རྣམས་སྡུག་པ་སྤང་བ་ལ་གཟུད་པའི་ཕྱིར་
འདི་གསུངས་སོ། །གཞན་སྡུག་ཅིང་མངོན་པར་འདོད་པ་རྣམས་ནི་ཡལ་བར་དོར་བར་ནུས་ན་བདག་ལ་དགའ་བ་ནི་མི་ནུས་པ་ཡིན་པས་བདག་ལ་ཕན་པར་འདོད་པར་མི་བྱའོ། །ཇི་ལྟར་བདག་ལ་དགའ་བར་བྱ་བ་དེ་ཉིད་བསྟན་པའི་ཕྱིར། གལ་ཏེ་བདག་ལ་དགའ་བྱེད་ན། །ཞེས་བྱ་བ་ལ་སོགས་པ་སྨོས་སོ། །
ཡུལ་ཀོ་ས་ལའི་རྒྱལ་པོ་གསལ་རྒྱལ་གཅིག་པུ་དབེན་པར་སོང་སྟེ་འདི་ལྟ་བུའི་སེམས་ལ་སེམས་ཀྱི་རྟོག་པ་སྐྱེས་སོ། །གང་བདག་ལ་དགའ་བ་འདི་དག་ནི་བདག་ལ་དགའ་བ་མ་ཡིན་ནོ་ཞེས་རྒྱ་ཆེར་སྦྱར་ཏེ། བཅོམ་ལྡན་འདས་དེའི་གན་དུ་གཤེགས་ཏེ། རྒྱལ་པོ་ཆེན་པོ་གང་ལ་ལུས་ཀྱིས་ལེགས་པར་སྤྱད་པ་

སྤྱོད་པ་དང་། ངག་དང་ཡིད་ཀྱིས་ལེགས་པར་སྤྱད་པ་སྤྱོད་པ་དེ་ནི་བདག་ལ་དགའ་བ་ཡིན་ནོ་ཞེས་བྱ་བའི་བར་དུ་སྟེ། དེའི་དབང་དུ་མཛད་ནས་ཚིགས་སུ་བཅད་པ་ལྔ་གསུངས་སོ། །འཇིགས་སུ་རུང་བའི་ནགས་ན་གཞོན་ནུ་བྱང་ཆུབ་རྒྱལ་པོ་བདག་ལ་དགའ་ཞིང་ངན་
པར་སྤྱོད་པ་དེའི་དབང་དུ་མཛད་པ་ཞེས་སྡེ་པ་གཞན་དག་ཟེར་རོ། །གལ་ཏེ་བདག་ལ་དགའ་བྱེད་ན། །ཞེས་བྱ་བ་ནི་རེ་ཞིག་མཁས་པས་ནི་བདག་མི་རྟག་པ་ཡིན་པའི་ཕྱིར་དགའ་བར་མི་བྱའོ། །གལ་ཏེ་གང་ཞིག་བདག་གི་ལ་བདག་གི་དངོས་པོར་དགའ་བར་བྱེད་པར་འདོད་ན་ནི་འདི་ནི་མི་བྱའོ་ཞེས་པ་སྟེ་
བདག་ཉིད་དོ། །སྡིག་ལ་གཞུག་པར་བྱས་པ་ནི་ངན་པར་སྤྱོད་པ་ལ་འཇུག་པའོ། །གང་ཡང་བདག་ཉིད་ཀྱིས་ལུས་ལ་སོགས་པའི་ངན་པར་སྤྱོད་པ་དེ་དག་ལས་བཟློག་པ་དེ་ནི་བདག་ལ་དགའ་བར་གནས་པ་ཡིན་ཏེ། དེ་སྡུག་བསྔལ་གྱི་རྒྱུ་སྤོང་བའི་ཕྱིར་རོ། །ཅིའི་ཕྱིར་དེ་ལྟར་བྱེད་དུ་གཞུག་པ་ཡིན་ཞེ་ན།
བདེ་བླག་ཁོ་ནར་ཞེས་བྱ་བ་སྨོས་ཏེ། གང་གི་ཕྱིར་བདག་ཉིད་ལ་ཕན་པར་འདོད་པས་བདེ་བ་ནི་བདེ་བླག་ཏུ་མི་འཐོབ་ཅིང་ལེགས་པ་མི་རྙེད་དོ། །གང་དག་གིས་ཤེ་ན། ཉེས་པར་བྱེད་པས་ཞེས་བྱ་བ་སྨོས་ཏེ། སྡིག་པ་བྱེད་པའི་སེམས་ཅན་རྣམས་ནི་མེའི་ནང་དུ་འཇུག་པ་ལ་གྲང་ཞིང་སྤུ་ལྡང་བ་ལ་སོགས་པ་
མི་འབྱུང་བ་བཞིན་ནོ། །ནག་པོའི་ཕྱོགས་བསྟན་ནས་དཀར་པོའི་ཕྱོགས་བསྟན་པའི་ཕྱིར། གལ་ཏེ་བདག་ལ་དགའ་བྱེད་ན། །ཞེས་བྱ་བ་ལ་སོགས་པ་སྨོས་ཏེ། བདེ་བ་དག་ནི་གང་གི་ཕྱིར་བདེ་བླག་ཁོ་ནར་ཐོབ་པ་ཡིན་ནོ། །ལེགས་པར་བྱེད་པས་ཞེས་བྱ་བ་ནི་ལེགས་པར་སྤྱོད་པ་སྟེ། གང་དག་རྒྱུན་མི་འཆད་
པར་ལེགས་པར་སྤྱད་པ་སྤྱོད་པ་དེ་དག་གིས་ནི་འཇིག་རྟེན་དང་འཇིག་རྟེན་ལས་འདས་པའི་བདེ་བ་བདེ་བླག་ཏུ་འཐོབ་པ་ཡིན་པས་ལེགས་པར་སྤྱོད་པ་ནི་བདེ་བ་ཐམས་ཅད་ཀྱི་རྒྱུར་གྱུར་པ་ཡིན་ཏེ། ཇི་སྐད་དུ་གསུངས་པ། དགེ་སློང་དག་བསོད་ནམས་དག་ལས་འཇིགས་པར་མ་བྱེད་ཅིག །དེ་ཅིའི་
ཕྱིར་ཞེ་ན། འདི་ནི་བདེ་བ་ཞེས་བྱ་བའི་ཚིག་བླ་དགས་ཡིན་ནོ་ཞེས་བྱ་བ་ལ་སོགས་པས་སོ། །འདི་ནི་སྡིག་ལ་གཞུག་མི་བྱ། །ཞེས་བྱ་བ་ལ། གཞུག་པ་ཞེས་བྱ་བའི་སྒྲའི་དོན་ནི་རྣམ་པ་གཉིས་ཏེ། ལྡོག་པ་དང་འཇུག་པའི་མཚན་ཉིད་ཀྱིས་སོ། །དེ་ལ་རེ་ཞིག་ལྡོག་པའི་མཚན་ཉིད་རྣམ་པར་

དབྱེ་བའི་ཕྱིར། །དཔེར་ན་དགོན་པའི་ཞེས་བྱ་བ་ལ་སོགས་པ་སྨོས་སོ། །འདི་ནི་བསྲུང་བས་ཞེས་བྱ་བ་ནི་བདག་ཉིད་སྡིག་པ་ལས་བཟློག་པས་བསྲུང་བར་བྱ་བ་ཡིན་ཏེ། འདི་ནི་བཟློག་པའི་སྒྲ་ལ་འཇུག་སྟེ། དཔེར་ན་ནས་དག་ལས་གླང་སྲུངས་ཤིག་ཅེས་བྱ་བ་ནི་བཟློག་པའི་དོན་ཏོ། །ཇི་ལྟར་བསྲུངས་
པ་ཡིན་ཞེ་ན། ལེགས་པར་བསྲུང་ཞེས་བྱ་བ་སྨོས་ཏེ། འདི་ནི་བྱ་བའི་བྱེ་བྲག་ཡིན་ཏེ། འདི་བཟང་པོར་བསྲུང་བའི་ལས་སོ། །ཤིན་ཏུ་བསྟན་པར་བྱ་ཞེས་བྱ་བའི་དོན་ཏེ། ཇི་ལྟར་ལེགས་པར་བསྲུང་བར་འགྱུར་བ་དེ་ལྟར་བདག་བསྲུང་བར་བྱའོ། །ཇི་ལྟ་བུར་བསྲུང་བར་བྱ་ཞེ་ན། དགོན་པའི་གྲོང་ཁྱེར་ལྟ་
བུར་ཞེས་བྱ་བ་སྨོས་ཏེ། ཤིན་ཏུ་ཐག་རིང་བའི་ཕྱོགས་གང་ཡིན་པ་དེ་ནི་དགོན་པ་སྟེ། ཡུལ་ཕྱོགས་མི་མཉམ་པ་ཐག་རིང་བའོ། །གྲོང་ཁྱེར་ཞེས་བྱ་བ་ནི་དགྲ་སེང་གེ་ལྟ་བུས་བབ་ཅོལ་དུ་བཟར་མི་འདོད་པའི་ཕྱིར་རོ་ཞེས་བྱ་བ་ནི་ངེས་པའི་ཚིག་གོ། །དགོན་པ་ཡང་ཡིན་ལ་གྲོང་ཁྱེར་ཡང་ཡིན་ཞེས་བྱ་བ་ནི་
ལས་འཛིན་པའི་བསྡུ་བའོ། །རི་ལ་སོགས་པའི་གནས་མི་མཉམ་པའི་ཕྱོགས་ན་གནས་པ་སྟེ། རྫོང་ཞེས་བྱ་བའི་དོན་ཏོ། །དེའི་ཁྱད་པར་ཇི་ལྟ་བུ་ཞེ་ན། འོབས་ཀྱིས་བསྐོར་བ་ལྟར་ཞེས་བྱ་བ་སྨོས་ཏེ། བརྐོས་པའི་འོབས་ཀྱིས་བསྐོར་བའི་གྲོང་ཁྱེར་གང་ཡིན་པ་དེ་ཉིད་དེ། འོབས་ཟབ་པ་ཞེས་བྱ་
བའི་བར་དུའོ། །ཇི་སྐད་དུ་བཤད་པ། རྒྱལ་པོའི་དགོན་པའི་གྲོང་ཁྱེར་དུ་ནི་འོབས་བརྐོ་བར་འགྱུར་བ་ཡིན་ཏེ། ཤིན་ཏུ་ཟབ་པར་བརྐོ་བ་ཡིན་ནོ་ཞེས་བྱ་བ་ལ་སོགས་པ་མདོ་ལས་གསུངས་སོ། །དེར་སོགས་པའི་སྒྲ་ནི་བསྐང་བར་བྱ་བ་ཡིན་ཏེ། དེ་ཡང་མདུང་དང་ཡིད་ཆེས་པའི་མི་དག་དང་། མཚོན་དང་
ཟས་ལ་སོགས་པ་ཡོངས་སུ་གཟུང་ངོ་། །གང་གི་ཚེ་དགོན་པའི་གྲོང་ཁྱེར་ལ་འོབས་རྣམ་པ་བདུན་གྱིས་བསྐོར་ཅིང་ཟས་རྣམ་པ་བཞི་ཅི་འདོད་པ་རྙེད་པ་དེ་ལ་ནི་ཕ་རོལ་གྱི་ཕྱིར་རྒོལ་བ་རྣམས་ཀྱིས་བགྲོད་པར་བྱ་བ་མ་ཡིན་ནོ་ཞེས་བྱ་བའི་ཚིག་གིས་སོ། །བསྟན་པ་ཞེས་བྱ་བ་ནི་དེ་བཞིན་དུ་སྐྱེ་བོ་མཛའ་
བཤེས་དང་ལྡན་པའི་ཕྱིར་ཏེ། གང་གི་ཕྱིར་གྲོང་ཁྱེར་གྱི་སྐྱེ་བོ་ནི་མེད་དེ། དེས་ནི་འཁུ་ཞིང་འབྱེད་པའི་ཕྱིར་རྫོང་བསྲུང་དཀའ་བར་འགྱུར་རོ། །དཔེར་ན་རྒྱལ་པོས་གྲོང་ཁྱེར་དེ་དགྲ་དག་ལས་བསྲུངས་པས་ཅི་ནས་ཀྱང་ཕྱི་རོལ་གྱི་ཕྱིར་རྒོལ་བ་རྣམས་ཀྱིས་བགྲོད་པར་བྱ་བ་མ་ཡིན་པ་དེ་བཞིན་དུ།

བདག་ལ་ཕན་པར་འདོད་པའི་སྐྱེ་བོས་བདག་དང་བདག་གི་བསྲུང་བར་བྱ་སྟེ། དེ་ལྟར་ངན་པར་སྤྱོད་པ་དག་ལ་ཇི་ལྟར་སྡིག་པ་ལས་མ་གོས་ཤིང་ཉམས་པར་མི་འགྱུར་བ་དེ་ལྟར་བྱ་སྟེ། ཇི་སྐད་དུ་གསུངས་པ། དད་པའི་མཚོན་དང་ལྡན་པའི་འཕགས་པའི་ཉན་ཐོས་ཀྱིས་ནི་
མི་དགེ་བ་སྤོང་བར་འགྱུར་ཞེས་རྒྱ་ཆེར་བཤད་དོ། །ཇི་ལྟར་རྟག་ཏུ་འདི་དག་བསྲུང་བར་ནུས་ཤེ་ན། གལ་ཏེ་བདག་ལ་དགའ་བྱེད་ན། །ཞེས་བྱ་བ་ལ་སོགས་པ་སྨོས་ཏེ། ཉིན་པར་རམ་མཚན་མོ་ཆ་གསུམ་དུ་བགོས་པ་ནི་ཐུན་ཏེ། དེའི་གསུམ་ནི་ཐུན་གསུམ་མོ། །དེ་ལས་གང་ཡང་རུང་བ་ཅིག་ནི་ཐུན་གཅིག་
སྟེ། དེ་ཙམ་གྱི་དུས་ལའོ། །མཁས་པ་ནི་རྟོག་པའོ། །མེལ་ཙེ་བྱ་བ་ཡིས་ཞེས་བྱ་བའི་ཁྱད་པར་དུ་དགེ་བ་དག་ལ་བརྩོན་པར་བྱ་བ་སྟེ། ཇི་སྐད་དུ་བཤད་པ། དོན་མེད་པའི་ཉི་མ་མི་བྱ་སྟེ། བསོད་ནམས་ནི་ཆུང་བ་མ་ཡིན་ཡང་ཉུང་ངུ་ཉུང་ངུས་བསྟེན་ན་ནི་དེ་བསགས་པའི་ཕུན་སུམ་ཚོགས་པས། གྲོག་
མཁར་ལྟ་བུར་དེ་བསགས་པར་འགྱུར་ཞིང་དེ་དང་མཐུན་པའི་དངོས་པོ་དེའི་མངོན་པར་དགའ་བའི་ཕུན་སུམ་ཚོགས་པར་འགྱུར་རོ། །འཇུག་པའི་མཚན་ཉིད་ཀྱི་སྦྱོར་བ་སྨྲས་པ། གལ་ཏེ་བདག་ལ་དགའ་བྱེད་ན། །ཞེས་བྱ་བའི་དོན་ནི་བསྟན་ཟིན་ཏོ། །འདི་ནི་སྦ་བས་ཞེས་བྱ་བ་ནི་བདག་ཉིད་སྦ་བ་སྟེ།
གང་གི་ཕྱིར་ལེགས་པར་སྤྱོད་པ་ལ་འཇུག་པས་ནི་བདག་བསྲུང་བར་འགྱུར་ཏེ། ཇི་སྐད་དུ་གླང་པོ་ཆེ་དྲེགས་པ་མུར་འགྲམ་གྱི་ཕྱོགས་སུ་རྡུལ་འབྱུང་བའི་སྟོབས་ཀྱིས་ཨན་ཛ་ནའི་རི་འཇོམས་པར་བྱེད་པ་དང་། འཕངས་གློ་བ་ཉེ་བ་རྣམས་ཀྱིས་ལག་པ་ན་མདུང་དང་མདུང་ཐུང་དང་མཚོན་ཆ་ཐོགས་པ་
རྣམས་ཀྱིས་ཀྱང་གཡུལ་ངོར་འཇུག་པ་ལས་མི་རྣམས་བསྲུང་བར་མི་ནུས་སོ། །གང་གཡུལ་དང་འཐབ་མོ་དང་འཐབ་མོ་མ་ཡིན་པ་དག་ཏུ་ཡང་བསོད་ནམས་ཀྱི་ཚོགས་བསགས་པས་ནི་སྲུང་བར་བྱེད་དོ། །ཇི་ལྟར་སྦ་བ་ཡིན་ཞེ་ན། ལེགས་པར་སྦ་བ་ཞེས་སྨྲས་ཏེ། ལེགས་པར་སྦ་བ་ནི་འདི་ལྟ་བུ་ཡིན་
ཏེ། འདིར་དཔེ་བརྗོད་པ་སྨྲས་པ། དཔེར་ན་ཞེས་བྱ་བ་ལ་སོགས་པའོ། །སྲུང་བར་བྱེད་པ་ལྟར་ཞེས་བྱ་བ་ནི་ལེགས་པར་སྐྱོང་བའོ། །ཕྱི་ནི་ཕྱི་རོལ་གྱི་འོབས་ཀྱི་ཨི་ཤི་ཀ་ལ་སོགས་པའི་ཡོ་བྱད་དོ། །ནང་ཞེས་བྱ་བ་ནི་ནང་རོལ་གྱི་སྒོ་སྲུང་བ་སྟེ། དཔེར་ན་དགོན་པའི་གྲོང་ཁྱེར་ལ་རྒྱལ་པོས་ཕྱི་ནང་གི་ཡོ་

བྱད་ཐམས་ཅད་ཀྱིས་ལེགས་པར་བསྲུངས་ན། ཕྱིར་རྒོལ་བ་རྣམས་ཀྱིས་དེ་འཕྲོགས་པར་མི་འགྱུར་རོ། །དེ་བཞིན་སྐྱེས་བུ་དམ་པ་རྣམས་ཀྱིས་ཀྱང་ཕྱི་རོལ་གྱི་སྲོག་གཅོད་པ་སྤོང་བ་དང་། ནང་གི་བསྒོམ་པ་ལ་སོགས་པས་བདག་ལེགས་པར་བསྲུང་བར་འགྱུར་ཏེ། དེ་ལེགས་པར་བསྲུངས་པས་
ནི། བདུད་ཀྱིས་མི་འཕྲོགས་པར་འགྱུར་རོ། །དེ་ལྟར་ན་བདག་རིམ་གྱིས་བསྲུང་བར་འགྱུར་རོ། །དེ་ལྟར་བསྲུང་བར་བྱ་ཞེས་བྱ་བ་ནི་དེ་ལྟར་མྱུར་དུ་བདག་བསྲུང་བར་བྱ་བའོ། །ཇི་ལྟར་ཡང་། དལ་འབྱོར་ཆུད་ནི་མི་ཟོས་པར། །ཞེས་བྱ་བ་སྨོས་ཏེ། སངས་རྒྱས་འབྱུང་བ་ལ་སོགས་པའི་ཡོན་ཏན་དང་ལྡན་ཞིང་མིར་
སྐྱེ་བ་ནི་དལ་བ་སྟེ། དེ་ཁྱོད་ཀྱིས་ཆུད་མ་ཟོས་ཤིང་མ་འདས་པ་དང་དོན་མེད་པར་མ་བྱེད་ཅིག་པའོ། །དེ་ལས་འདས་པའི་ཉེས་དམིགས་སྨྲས་པ། དལ་འབྱོར་ཐལ་བས་ཞེས་བྱ་བ་ཡིན་ཏེ། ཇི་སྐད་དུ་བཤད་པའི་མཚན་ཉིད་ཅན་གྱི་དལ་བའི་དལ་འབྱོར་ལས་ཐལ་ཞིང་འདས་པ་སྟེ། ཉམས་པའི་མཚན་ཉིད་ཅེས་བྱ་
བའི་དོན་ཏོ། །བས་ཞེས་བྱ་བའི་སྒྲ་ནི་གང་གི་ཕྱིར་ཞེས་པའོ། །འགྱོད་པར་འོང་ཞེས་བྱ་བ་ནི་མྱ་ངན་བྱེད་པར་འགྱུར་བའོ། །གང་དུ་ཞེ་ན། སྨྲས་པ། སེམས་ཅན་དམྱལ་བར་ཞེས་བྱ་བ་སྟེ། ཡང་སོས་ལ་སོགས་པ་དག་ཏུའོ། །སྐྱེ་བ་ནི་འབྱུང་བའོ། །འདི་ལྟར་གང་དལ་བ་ཕུན་སུམ་ཚོགས་པ་དོན་མེད་པར་
བྱས་ཤིང་འདས་པ་དེས་དམྱལ་བར་འགྱུར་རོ་ཞེས་མྱ་ངན་བྱེད་ཅིང་སྡུག་བསྔལ་གྱིས་གདུངས་བཞིན་དུ་བདག་གིས་ནི་ངན་པར་སྤྱད་པ་བྱས་ཤིང་བསགས་པས་འདིར་ལྷུང་ངོ་ཞེས་སོ། །དེ་བས་ན་ཇི་ལྟར་དལ་བ་ལས་ཐལ་བར་མི་འགྱུར་བ་དེ་ལྟར་བྱའོ། །བསྲུང་བ་དང་སྦ་བའི་ཁྱད་པར་བསྟན་པའི་ཕྱིར་སྨྲས་པ།
འདི་གཉིས་ནི་ཐ་དད་པ་མ་ཡིན་ཏེ། གདུལ་བ་ཉེ་བར་འོངས་པ་དག་ལ་དེའི་སྒྲ་བསྒྲུབ་ཅིང་ཕན་གདགས་པའི་ཕྱིར་གཉི་ག་གསུངས་སོ། །ཡང་ན་སྡིག་པ་ལ་འཇུག་པ་དག་བཟློག་པ་ནི་བསྲུང་བའོ། །དགེ་བ་ལ་འཇུག་པ་དག་ནི་སྦ་བའོ། །ཕྱི་རོལ་གྱི་གནོད་པ་དག་ལས་བསྲུང་བ་དང་། ནང་དག་ཏུ་སྦ་བ་ཞེས་
བྱ་བ་ལ་སོགས་པས་སོ། །བདག་ཉིད་སྡུག་པར་བྱེད་པ་མི་ཤེས་པ་དེ་དག་ལ་བདག་ཉིད་སྡུག་པར་བྱེད་པའི་རང་གི་ངོ་བོ་བསྟན་པས་དེ་ལ་གཞུག་པའི་ཕྱིར་འདི་གསུངས་སོ། །བདག་དང་གཞན་བསྲུང་བའམ་སྦ་བར་ནི་སུ་ཞིག་གིས་ནུས་ཞེས་པ་དང་། གང་མི་འཚེ་བ་ཞེས་སྨོས་ཏེ། སུ་ཞིག་མི་འཚེ་བ་

ལ་སྟོད་པར་བྱེད་ཅེས་པ་ལ་བསྟན་པའི་ཕྱིར། ཕྱོགས་རྣམས་ཀུན་ན་ཞེས་བྱ་བ་ལ་སོགས་པ་སྨོས་སོ། །གང་གི་ཚེ་བཙུན་མོ་ཕྲེང་ལྡན་མས་བཅོམ་ལྡན་འདས་སྤྱན་དྲངས་པ་དེའི་ཚེ་བདག་ཉིད་ཀྱི་ལག་བཙུགས་ཤིང་ཚད་མང་དུ་གཡོས་བྱ་བ་ལས་རྒྱལ་པོ་འདིའི་ཆུང་མ་འགྲན་
ཟླ་ཞིག་ཡོད་པས་འདིའི་དོན་བྱེད་ཅིང་འདི་ལ་དགའ་བོ་ཞེས་ཕྲ་མ་བྱས་སོ། །དེ་ནས་རྒྱལ་པོ་དེ་འཁྲུགས་ནས། རལ་གྱི་རྣོན་པོ་ཤུབས་ནས་ཕྱུང་སྟེ་བཙུན་མོ་ཕྲེང་ལྡན་མ་ལ་བསྡིགས་ནས་འཇིག་རྟེན་ན་ཁྱོད་ལ་ཆེས་སྡུག་པ་གང་ཡིན་སྨྲོས་ཤིག་ཅེས་བྱས་སོ། །དེ་བག་ཚ་བ་མེད་པར་བདག་ཉིད་ཡིན་ནོ་ཞེས་སྨྲས་སོ། །
དེ་ལྟ་བུའི་གནས་སྐབས་ལས་བཅོམ་ལྡན་འདས་ཀྱིས་ཚིགས་སུ་བཅད་པ་གཉིས་གསུངས་སོ། །གཞན་དག་ནི་དྲུག་སྡེས་དགེ་སློང་རྣམས་ལ་རྒྱུན་དུ་རྣམ་པར་འཚེ་བ་བྱས་པས་དེའི་དབང་དུ་མཛད་དོ་ཞེས་ཟེར་རོ། །ཕྱོགས་རྣམས་ཀུན་དུ་ཞེས་བྱ་བ་ནི་ཕྱོགས་ཀྱི་དབྱེ་བ་མ་ལུས་པ་སྟེ་ཕྱོགས་མཐའ་དག་གོ། །
ཡོངས་བརྟགས་ཀྱང་ཞེས་བྱ་བ་ནི་བརྟགས་ཤིང་བཙལ་ཀྱང་ངོ་། །སེམས་ཞེས་བྱ་བ་ནི་བློས་སོ། །ཀྱང་གི་སྒྲ་ནི་ངེས་པར་གཟུང་བ་དང་། རིམ་པ་གཞན་དུ་སྦྱར་བའོ། །མ་མཐོང་ན་ཞེས་བྱ་བ་ནི་དེ་ཉིད་མ་དམིགས་པ་ཞེས་བྱ་བའི་དོན་ཏོ། །ཆེས་སྡུག་ཅེས་བྱ་བ་ནི་ཆེས་འདོད་པའོ། །ག་ལས་ཤེ་ན། བདག་
ལས་ཞེས་བྱ་བ་སྨོས་ཏེ། བདག་ཉིད་ལས་ཏེ། བདག་དང་མཉམ་པར་སྡུག་པ་ནི་མེད་དོ་ཞེས་བྱ་བའི་ཚིག་གིས་སོ། །དེ་ལྟར་ཞེས་བྱ་བ་ནི་དེ་བཞིན་ནོ། །ཇི་ལྟར་སེམས་ཅན་གཅིག་བདག་ཉིད་ལ་དགའ་བ་ལྟར་ནི་གཞན་ལ་ཆེས་དགའ་བ་གང་ཡང་ཅུང་ཟད་མེད་དོ། །དེ་བཞིན་དུ་བདག་དང་གཞན་དག་བདག་
ལ་སོ་སོར་སྡུག་པ་ཉིད་དོ། །སོ་སོ་ཞེས་བྱ་བ་ནི་རྣམ་པ་སྣ་ཚོགས་པའི་འགྲོ་བ་སྟེ། སྐྱེ་བ་དང་ཕྱོགས་དང་སྐྱེ་གནས་སོ། །གཞན་ལ་ཞེས་བྱ་བ་སྲོག་ཆགས་གཞན་དག་ཀྱང་བདག་ཉིད་བཞིན་དུ་སྡུག་པ་ཡིན་ནོ་ཞེས་ཤེས་པར་བྱ་སྟེ། ཇི་སྐད་དུ། བདེ་ལ་གནས་ཤིང་སྡུག་བསྔལ་བྲལ་བ་ནི། སེམས་ཅན་
མཉམ་པར་སེམས་པར་རྟོགས་བྱས་ཏེ། །དེ་བས་བདག་ནི་འདོད་པ་གང་ཡིན་པ། །དེ་ནི་གཞན་དག་ལ་ཡང་སྤྱད་མི་བྱ། །ཞེས་གསུངས་སོ། །དེའི་ཕྱིར་གནོད་མི་བྱ་ཞེས་བྱ་བ་ནི་འཚེ་བ་མི་བྱ་བའོ། །གཞན་ལ་ཞེས་བྱ་བ་ནི་སེམས་ཅན་གཞན་ནོ། །གང་གིས་ཤེ་ན། བདག་གིས་ཞེས་བྱ་བ་སྨྲས་ཏེ།

བདག་ལ་ཕན་པར་འདོད་པ་སྟེ། གང་བདག་ལ་སྡུག་པར་བྱེད་པར་འདོད་པ་དེས་ནི་གཞན་ལ་གནོད་པར་མི་བྱའོ་ཞེས་སྟོན་ཏོ། །ཚིགས་སུ་བཅད་པ་སྔ་མའི་དོན་དེ་གསལ་བར་བསྟན་པའི་ཕྱིར་སྨྲས་པ། ཐམས་ཅད་ལ་ཡང་སྲོག་འདི་སྡུག །ཅེས་བྱ་བ་ལ་སོགས་པ་སྨོས་ཏེ། ཐམས་ཅད་ཆད་པས་འཇིགས་པས་
ན། །ཞེས་བྱ་བ་ནི་སེམས་ཅན་ཐམས་ཅད་འཇིགས་ཤིང་བག་ཚ་བར་འགྱུར་བའོ། །གང་ལས་ཤེ་ན། ཆད་པས་ཞེས་བྱ་བའི་དོན་ཏོ། །གང་གི་ཕྱིར་སེམས་དང་ལྡན་པ་སུ་ཞིག་གནོད་པས་མི་འཇིགས་པར་འགྱུར། ཅིའི་ཕྱིར་ཞེ་ན། འདི་ལྟར། ཐམས་ཅད་ལ་ཡང་སྲོག་འདི་སྡུག །ཅེས་བྱ་བ་སྨོས་ཏེ། གང་གི་
ཕྱིར་སྲོག་ཆགས་ཐམས་ཅད་ནི་ཚེ་འདི་འདོད་ཅིང་ཡོངས་སུ་མི་གཏོང་བ་ཡིན་ཏེ། དེ་བས་ན་ཐམས་ཅད་སྲོག་ལ་གནོད་པར་བྱེད་པའི་ཆད་པ་ཉིད་ཀྱིས་འཇིགས་པ་ཡིན་ནོ། །དེས་ན་དེའི་ཕྱིར་སྨྲས་པ། རང་གི་ཉམས་ལས་དཔག་བྱས་ཏེ། །ཞེས་བྱ་བ་བདག་རང་ཉིད་ལས་དཔེར་བྱ་བའོ། །བརྡེག་པར་མི་བྱ་ཞེས་བྱ་བ་ནི་
བདག་དང་གཞན་གྱིས་གནོད་ཅིང་འཚེ་བ་མི་བྱ་བའོ། །གསད་མི་བྱ་ཞེས་བྱ་བ་ནི་གཞན་གྱི་ལག་གིས་ཀྱང་། གཞན་བསད་པ་ལ་ནན་ཏན་མི་བྱའོ། །ཡང་བཤད་པ། ཇི་ལྟར་ཧ་ལ་ཧ་ལའི་དུག །རང་ངམ་ཡང་ན་གཞན་གྱིས་ཀྱང་། །བྱིན་ནས་འཆི་བར་འགྱུར་བ་ནི། །བྱེ་བྲག་དག་ནི་མེད་པར་འགྱུར། །ཞེས་
པའོ། །ཆད་པས་འཇིགས་པས་ནི་གཞན་ལ་གནོད་པར་བྱེད་པ་སྟེ། སྲོག་འགག་པར་བྱེད་ཅིང་གསོད་པར་བྱེད་པ་དང་། བརྡེག་པར་མི་བྱ་བ་ཆད་པ་ལ་སོགས་པས་འཚེ་བར་མི་བྱ་བའོ། །འབྱུང་པོ་རྣམས་ལ་གསད་པར་མི་བྱ་ཞིང་གཙེ་བར་མི་བྱ་ཞེས་གཞན་དག་ཟེར་རོ། །བདག་ལ་དགའ་བ་རྣམས་འཚེ་བ་
ལས་བཟློག་པའི་ཕྱིར་འདི་གསུངས་སོ། །བདག་ལ་དགའ་བ་རྣམས་གཞན་ལ་གང་གིས་ཀྱང་མི་འཚེ་བ་དེ་ལ་བསོད་ནམས་དཔག་ཏུ་མེད་པ་འབྱུང་བར་མཁས་པ་རྣམས་ཀྱིས་བཤད་ཅིང་། འཚེ་བ་མེད་པས་མི་འཚེ་བ་ཉིད་ནི་དོན་དམ་པར་བསོད་ནམས་དེ་ཉིད་ཡིན་ནོ་ཞེས་བསྟན་པའི་ཕྱིར། དགེ་ལ་ལྷ་རྣམས་
ཞེས་བྱ་བ་ལ་སོགས་པའི་ཚིགས་སུ་བཅད་པ་བཞི་སྨོས་སོ། །མཉན་ཡོད་ཀྱི་གནས་ཆེན་པོ་ཞིག་ན་ནོར་ཆེན་པོ་དང་ལྡན་པའི་ཁྱིམ་བདག་ཅིག་ཤི་བའི་དུས་བྱས་པ་ལས། རྒྱལ་པོ་གསལ་རྒྱལ་གྱིས་ཉེ་བར་ཕྱིན་ཏེ། སྐྱེས་བུ་དམ་པ་ཆེན་པོ་རྒྱལ་པོ་ཆེན་པོས་ལོངས་སྤྱོད་རྒྱ་ཆེན་པོ་ཐོབ་པ་ནི། བདག་

ཉིད་ཀྱིས་ཡང་དག་པར་བདེ་བས་དགའ་བ་མེད་དོ་ཞེས་རྒྱ་ཆེར་སྔོན་གྱི་སྦྱོར་བ་ཏ་ག་ར་ཤི་ཁི་ཞེས་བྱ་བའི་རང་སངས་རྒྱས་ལ་གུས་པར་བྱས་ཏེ། བསོད་སྙོམས་ཅིག་སྦྱིན་པ་བྱས་ནས། དམྱལ་བ་ངུ་འབོད་ཆེན་པོའི་སྐྱེ་བའི་ཆོས་བཤད་དེ་ཞེས་རྒྱ་ཆེར་རོ། །ཇི་ཙམ་ན་རྒྱལ་པོ་
གསལ་རྒྱལ་མཆི་མ་ཕྱུང་སྟེ། གོས་ཀྱི་མཐའ་མས་ཕྱི་ཞིང་བཅོམ་ལྡན་འདས་ལ་ནོར་དང་འབྲུ་དང་ས་ལེ་སྦྲམ་ལ་སོགས་པས་ནི་བགྱི་བ་ཅི་ཡང་མ་མཆིས་སོ་ཞེས་ཞུས་སོ། །བཅོམ་ལྡན་འདས་ཀྱིས་བཀའ་སྩལ་པ། གཉི་གར་ཡང་བསོད་ནམས་ཞེས་བྱ་བ་ལ་སོགས་པའོ། །གཞན་དག་ནི་ཀུན་དགའ་
བོས་ཅི་བཙུན་པ་དྲང་སྲོང་སྨྲ་བ་དག་ཏུ་ལྷ་ལ་སོགས་པ་ཅུང་ཟད་འཇིག་རྟེན་གཉི་གར་ཡང་ཕན་པ་བྱེད་པ་ཡིན་ནོ་ཞེས་ཞུས་པ་དེའི་དབང་དུ་མཛད་པ་ཡིན་ནོ་ཞེས་ཟེར་རོ། །དགེ་བ་ནི་ལུས་ལ་སོགས་པའི་ལེགས་པར་སྤྱད་པ་སྤྱོད་པའི་སྐྱེས་བུས་རིགས་པས་འོངས་པའི་ཕུན་སུམ་ཚོགས་པ་རྣམས་ཞེས་བྱ་བ་ནི་དེའི་ངེས་
པའི་ཚིག་གོ། །ལྷ་རྣམས་སྟོད་པར་བྱེད་པ་ནི་འདོད་པ་དང་གཟུགས་ན་སྤྱོད་པའི་ལྷ་རྣམས་དགེ་བ་ཉིད་ལ་བསྔགས་པ་བརྗོད་པ་ཡིན་ཏེ། བ་རི་ཛ་ཏ་ཀའི་མདོ་ལས་དགེ་སློང་དག་ཚེས་བརྒྱད་དང་། ཟླ་བ་ཕྱེད་ཅེས་བྱ་བ་ལ་སོགས་པ་འདིར་དཔེར་བརྗོད་པར་བྱའོ། །གང་ཞིག་ལེགས་སྤྱད་སྤྱོད་བྱེད་པའི། །ཞེས་བྱ་བ་
ལ། གང་ཞིག་ནི་གང་ཟག་གོ། །ལེགས་སྤྱོད་ཅེས་བྱ་བ་ནི་བསོད་ནམས་ཀྱི་ཚུལ་ལྷག་པར་སྤྱོད་པ་སྟེ། དགེ་བ་བྱེད་པ་དེ་ལ་གཞན་ཡང་བསྔགས་པ་སྨྲ་བ་ཡིན་ནོ། །དེ་ལྟར་ན་མི་རྣམས་ཀྱི་ཕར་འཛིན་པ་དང་། མར་འཛིན་པ་དང་། ཇི་སྲིད་དུ་ལྷའི་ལུས་མངོན་པར་བསྐྱེད་པར་བྱའོ་ཞེས་བྱ་བ་ལ་སོགས་པའི་
ཚིག་གིས་སོ། །ཡང་ན་དགེ་བ་ནི་ཁྱིམ་པ་དང་རབ་ཏུ་བྱུང་བ་རྣམས་ཀྱིས་ལེགས་པར་སྤྱད་པ་ནི་ཐུན་མོང་དུ་འགྱུར་བའོ། །འདིར་བསོད་སྙོམས་ཀྱི་འབྲས་བུ་ལེགས་པར་སྤྱོད་པར་བྱེད་པ་ཉི་ཚེ་ཙམ་དུ་མ་ཟད་དེ། ཡང་འདི་ནའང་ཞེས་བྱ་བ་ནི་མཐོང་བའི་ཆོས་ཉིད་ལའོ། །སྨད་པར་མི་འགྱུར་ལ་ཞེས་བྱ་བ་ནི་དགའ་ཞིང་
རངས་པ་རྒྱ་ཆེ་བ་སྐྱེ་བར་འགྱུར་བ་སྟེ། སྐྱེ་བོ་ཐམས་ཅད་དགའ་བར་བྱེད་པའི་ཕྱིར་དང་། སྐྱེ་བོ་དམ་པ་རྣམས་ཀྱིས་བསྔགས་པའི་ཕྱིར་དང་། འཁོར་བར་མི་འཁོར་བ་ལ་སོགས་པའི་ཁྱད་པར་དང་ལྡན་པའོ། །ཡང་ན་སྨད་པར་མི་འགྱུར་བ་ཞེས་བྱ་བ་ནི་མི་རྣམས་སུའོ། །མཐོ་རིས་སུ་ཡང་དགའ་བ་འཐོབ། ཅེས་

བྱ་བ་ནི་ཤི་ནས་འཇིག་རྟེན་ཕ་རོལ་ཏེ། བདེ་འགྲོ་དག་ཏུ་ཡང་དགའ་བར་འགྱུར་རོ། །ཡང་གི་སྒྲ་ནི་བསོད་ནམས་བྱེད་པ་རྣམས་འདི་དང་། ཕ་རོལ་གཉི་གར་ཡང་བདེ་བ་དང་འབྲེལ་པ་ཉིད་དུ་སྟོན་ཏོ། །ཇི་ལྟར་བསོད་ནམས་བྱེད་པ་འཇིག་རྟེན་ཕ་རོལ་དུ་དགའ་བར་འགྱུར་ཞེ་ན། རྒྱང་ཐག་བཅད་
པར་སྤྱུགས་པའི་མི། །ཞེས་བྱ་བ་ལ་སོགས་པ་སྨོས་ཏེ། ཡུན་རིང་པོའི་དུས་སུ་བསྐྲད་པའི་ཚུལ་འདི་ལ་ཡོད་པ་ནི་རྒྱང་ཐག་ཆད་པར་སྤྱུགས་པ་སྟེ་ཡུལ་ཕྱོགས་གཞན་དག་ཏུའོ། །མི་ནི་བུ་ལ་སོགས་པའི་ཚུལ་གྱི་སེམས་ཅན་ནོ། །རིང་ནས་ཞེས་བྱ་བ་ནི་ཡུལ་ཐག་རིང་བ་ནས་སོ། །ཉེ་ཞོ་མེད་འོངས་ན་
ཞེས་བྱ་བ་ནི་བདེ་བར་བསྡོགས་པ་དང་བཅས་པར་དེ་འོངས་པར་མཐོང་བའོ། །གཉེན་ནི་ཕ་དང་མ་ལ་སོགས་པའོ། །བཤེས་ནི་ཆུང་མ་དང་བུ་ལ་སོགས་པའོ། །མཛའ་བོ་ནི་གྲོགས་པོ་ལ་སོགས་པའོ། །མངོན་པར་དགའ་ཞེས་བྱ་བ་ནི་ལྷག་པར་མགུ་བའོ། །ཇི་ལྟར་མངོན་པར་དགའ་བ་ཡིན་ཞེ་ན། ཨ་ལ་ལ་
ཞེས་བྱ་བ་སྨོས་ཏེ། ཨ་ལ་ལ་ནི་དགའ་བའམ་ཡང་ན་ངོ་མཚར་ཏོ། །ཨེ་མའོ་བྱ་བ་ཤིན་ཏུ་བཟང་ཞིང་ཆེ་བ་གྲུབ་པར་གྱུར་ཏོ་ཞེས་བྱ་བའི་དོན་ཏོ། །དཔེ་བསྟན་ནས་དེས་བསྒྲུབ་པར་བྱ་བའི་དོན་སྨྲས་པ། དེ་བཞིན་བསོད་ནམས་བྱས་པའི་མི། །ཞེས་བྱ་བ་སྟེ། གང་ཟག་གང་གིས་བསོད་ནམས་ཀྱི་ཚོགས་ཡང་
དག་པར་བསགས་ཤིང་ལྷག་པར་སྩོགས་པའོ། །དེ་བཞིན་དུ་འཇིག་རྟེན་འདི་ནས་ཞེས་བྱ་བ་འདི་ལྟར་རིས་མཐུན་པ་ལས་སོ། །ཕ་རོལ་ཕྱིན་ཚེ་ཞེས་བྱ་བ་ནི་འཇིག་རྟེན་གཞན་འཐོབ་པའོ། །གང་ཞིག་ཅེ་ན། བསོད་ནམས་བསགས་པ་དེ་དག་སྟེ། སྦྱིན་པ་ལ་སོགས་པའི་ལེགས་པར་སྤྱད་པའོ། །མངོན་
པར་དགའ་བར་བྱེད་ཅེས་བྱ་བ་ནི་མངོན་པར་དགའ་བ་ལ་སྦྱོར་བར་བྱེད་པ་སྟེ། དེ་ལ་ཕན་འདོགས་པའི་ཕྱིར་འཇུག་པར་འགྱུར་རོ་ཞེས་པའི་དོན་ཏོ། །ཇི་ལྟ་བུ་ཞེ་ན། སྨྲས་པ། གཉེན་བཞིན་འོངས་ནས་ཞེས་བྱ་བ་སྟེ། གཉེན་སྡུག་པའི་སྐྱེ་བོ་དག་འོངས་པ་བཞིན་དུ་སྟེ། གཉེན་གཞན་དག་གིས་
མཐོང་ན་མངོན་པར་དགའ་བར་བྱེད་པ་དེ་བཞིན་ནོ། །འདིར་དཔེ་རྒྱ་ཆེར་སྔར་བཤད་མོད་ཀྱི། ཕྱིས་འོངས་པ་དང་མདོར་བསྡུས་པ་ལ་དགའ་བའི་གདུལ་བྱ་དག་རྗེས་སུ་གཟུང་བའི་ཕྱིར་མདོར་བསྡུས་ཏེ་ཡང་བསྟན་པའོ། །ཡང་ན་སྔ་མས་ནི་མངོན་པར་དགའ་བའི་དཔེ་བསྟན་ཏོ། །འདིས་ནི་ཕན་འདོགས་པའི་

བྱ་བ་ཞེས་བྱ་བ་ལ་སོགས་པར་བརྗོད་དོ། །གང་གི་ཕྱིར་དེ་ལྟར་བསོད་ནམས་ནི་ཁྱད་པར་དུ་མཐུ་ཆེ་བ་ཡིན་ཏེ། དེ་བས་ན་འདི་ཉིད་ལ་གཞུག་པའི་ཕྱིར་སྨྲས་པ། དེ་བས་ཞེས་བྱ་བ་ལ་སོགས་པའོ། །དེས་ན་དེའི་ཕྱིར་བསྐྱེད་པ་དང་བསགས་པ་གྱིས་ཤིག་པའོ། །ཅི་ཞིག་ཅེ་ན།
བསོད་ནམས་བསགས་པ་ཞེས་བྱ་བ་སྟེ། ལེགས་པར་སྤྱད་པའི་ཚོགས་སོ། །འཇིག་རྟེན་ཕ་རོལ་གྱི་ཞེས་བྱ་བ་ནི་འཇིག་རྟེན་ཕ་རོལ་ཏེ། སྐྱེ་བ་ཕྱི་མའི་ཆེད་དུའོ། །དེར་འབྱུང་བ་ནི་འཇིག་རྟེན་ཕ་རོལ་གྱི་སྟེ། འཇིག་རྟེན་ཕ་རོལ་ལ་ཕན་འདོགས་པར་བྱེད་པའོ། །ཅིའི་ཕྱིར་འཇིག་རྟེན་ཕ་རོལ་གྱི་ཆེད་དུ་ཞེ་ན།
སྨྲས་པ། འདི་ལྟར་བསོད་ནམས་འཇིག་རྟེན་ཕ་རོལ་གྱི་ཞེས་བྱ་བ་སྟེ། གང་གི་ཕྱིར་སྦྱིན་པ་ལ་སོགས་པའི་ལེགས་པར་སྤྱོད་པ་དག་རྒྱུད་ལ་ཡོངས་སུ་བསགས་པས་འཇིག་རྟེན་ཕ་རོལ་དུ་སེམས་ཅན་སྲོག་ཆགས་རྣམས་ཀྱི་གནས་དང་རྟེན་དུ་འགྱུར་ཏེ། ཇི་སྐད་དུ་བཤད་པ། འཁོར་བ་ཉམ་ང་བ་དག་ཏུ་སྐྱེ་
ཞིང་འཁོར་བ་ན་འཇིག་རྟེན་པ་རྣམས་ཀྱི་གནས་ཀྱི་མཆོག་ནི་བསོད་ནམས་ཡིན་ནོ་ཞེས་བྱ་བ་ལྟ་བུའོ། །བདེ་བ་འདོད་པ་རྣམས་བསོད་ནམས་བྱ་བ་ལ་བག་མེད་པ་དག་ལ་དེ་བསྟན་པའི་ཕྱིར་ཚིགས་སུ་བཅད་པ་འདི་གཉིས་གསུངས་སོ། །གཞན་ཡང་བདག་ཉིད་བསོད་ནམས་མཆོག་ཏུ་བྱེད་པ་ལ་ཡང་སྐྱེ་བོ་
ཐམས་ཅད་དགའ་བར་འགྱུར་ཏེ། དེ་ཉིད་སྨྲས་པ། ཆོས་གནས་ཞེས་བྱ་བ་ལ་སོགས་པའོ། །དེ་ནས་སུན་ད་རི་ཀ་ཞེས་བྱ་བའི་རྒྱལ་པོའི་བུ་བཅོམ་ལྡན་འདས་ཀྱི་སྤྱན་སྔར་ཕྱིན་ཏེ། བཙུན་པ་སྐྱེས་བུ་དམ་པ་རྣམས་ཀྱིས་ཅི་ཞིག་བྱས་ན་སྐྱེ་བོ་ཐམས་ཅད་དགའ་བར་འགྱུར་ཞེས་ཞུས་པ་དང་། རིགས་ཀྱི་
བུ་འདི་ལ་ཆོས་ཀྱིས་འཚོ་བ་བརྟག་པར་བྱའི་ཆོས་མ་ཡིན་པས་ནི་མ་ཡིན་ནོ་ཞེས་རྒྱ་ཆེར་འདི་གསུངས་སོ། །ཆོས་གནས་ཞེས་བྱ་བ་ལ། ཆོས་ནི་སྙིང་རྗེ་སྟེ་འཚེ་བ་མེད་པ་ནི་ཆོས་ཀྱི་མཆོག་ཡིན་ནོ་ཞེས་བྱ་བའི་ཚིག་གིས་སོ། །འཚེ་བ་མེད་པ་ཡང་གཡོ་ལ་སོགས་པ་གཞན་གནོད་པ་བྱེད་པ་ལ་སྙིང་རྗེས་
ལྟ་བར་བྱེད་པའོ། །དེ་ཡང་གསུངས་པ། བདག་ནི་སེམས་ཅན་ལ་བརྩེ་བ། །རྒྱལ་པོ་ཆོས་ནི་མདོར་བསྡུས་ཡིན། །ཞེས་སོ། །དེ་ལ་གནས་པ་ནི་ཆོས་གནས་ཏེ། དེ་སྙིང་རྗེ་དང་ལྡན་པ་ཞེས་བྱ་བའི་དོན་ཏོ། །ཚུལ་ཁྲིམས་ཕུན་སུམ་ཚོགས་པ་ཞེས་བྱ་བ་ནི། ཚུལ་ཁྲིམས་ཀྱི་ལེགས་པར་སྤྱོད་པ་དང་ལྡན་པ་

སྟེ། རྣམ་པ་ཐམས་ཅད་དུ་ཡོངས་སུ་རྫོགས་པའོ། །ཇི་སྐད་དུ་ཚུལ་ཁྲིམས་འཆལ་བའི་དེའི་རྒྱུ་སྤོང་བ་ནི་དེའི་གཉེན་པོ་བསྟེན་པ་ཡིན་ནོ་ཞེས་གསུངས་ཏེ། དེ་དང་ལྡན་པ་ནི་འདིའི་ཕུན་སུམ་ཚོགས་པ་སྟེ། ཚུལ་ཁྲིམས་མ་ཚང་བ་མེད་པ་དང་ལྡན་པ་དེ་ནི་ཚུལ་ཁྲིམས་ཕུན་སུམ་ཚོགས་
པའོ། །ངོ་ཚ་ཤེས་ཤིང་ཞེས་བྱ་བ་ལ། ཡོན་ཏན་དང་ཡོན་ཏན་ཅན་དག་ལ་གུས་པ་ནི་ངོ་ཚའོ། །ཡང་ན་བདག་ཉིད་ལ་མངོན་པར་བརྟགས་ནས་ཉེས་པ་རྣམས་ཀྱིས་འཛེམ་པ་སྟེ། དེ་ནི་ངོ་ཚ་ཞེས་བརྗོད་དེ། དེ་གང་ལ་ཡོད་པ་དེ་ནི་ངོ་ཚ་ཤེས་པའོ། །བདེན་པར་སྨྲ་ཞེས་བྱ་བ་ནི་བདག་དང་གཞན་ལ་གནོད་པ་
སྤངས་པས་དབེན་པར་སྨྲ་བ་སྟེ། བཞི་པོ་འདི་དག་ནི་བདེ་འགྲོར་འགྲོ་བའི་སྐབས་སུ་གྱུར་པ་ཡིན་ནོ། །རང་གི་བྱ་བ་བྱེད་པ་ལ། །ཞེས་བྱ་བ་ནི་བདག་ཉིད་ཀྱི་ཕན་པ་བྱེད་པའོ། །དམ་པ་ནི་དགེ་བ་སྟེ་གང་གི་ཕྱིར་དགེ་བ་རྣམས་ནི་སྔར་བསྟན་པའི་ཡོན་ཏན་དང་ལྡན་པས་རྟག་ཏུ་བདག་ལ་ཕན་པས་ལེགས་པར་སྤྱོད་
པ་སྟེ། དེ་ལ་ནི་དགྲ་བོ་དག་ཀྱང་དགའ་ཞིང་ཡིད་དུ་འོང་བར་བྱེད་ན། ཐ་མལ་པ་དང་གྲོགས་བཤེས་ལྟ་སྨོས་ཀྱང་ཅི་དགོས། དེ་ཉིད་དུ་བཤད་མ་ཐག་པ་བསྟན་པ་དེ་ཁྱད་པར་དུ་འཕགས་པ་ཡང་དག་པར་བསྟན་པའི་ཕྱིར་སྨྲས་པ། དགའ་འགྱུར་ཞིང་ཞེས་བྱ་སྟེ། གང་གི་ཕྱིར་སྙིང་རྗེ་ལ་སོགས་པའི་ཡོན་ཏན་བཞི་
བསྟེན་པ་དེ་ནི་སྡུག་ཅིང་ཕངས་པར་འགྱུར་རོ། །གང་དག་ལ་ཞེ་ན། སྨྲས་པ། གཞན་རྣམས་ཞེས་བྱ་བ་སྟེ། ལྷ་དང་མི་རྣམས་སོ། །ཇི་སྐད་དུ་གཞུང་གི་དབང་དུ་བྱས་པ་སྟེ། དེ་ལ་ལྷ་བདུན་བརྒྱ་རྒྱ་ཆེ་བའི་ཚངས་པའི་གཞལ་མེད་ཁང་ནས་ཉེ་བར་ཕྱིན་ཏོ་ཞེས་གསུངས་པ་ལྟ་བུའོ། །ཡང་ན་གཞན་
རྣམས་ཞེས་བྱ་བ་ནི་གཞན་སྒྲ་རྣམས་ཀྱང་ཞེས་བྱ་བའི་དོན་ཏོ། །རང་གི་དོན་ནི་བྱེད་པ་ལ། །ཞེས་བྱ་བ་ནི་ཐམས་ཅད་དགའ་བར་འགྱུར་བ་དང་། བདག་ལ་ཕན་འདོགས་པ་སྐྱེད་པར་བྱེད་པ་ཡང་ཡིན་ཏེ། འཇིག་རྟེན་ནི་ལས་བདག་གིར་བྱེད་ཅེས་པའི་ཚིག་གིས་སོ། །མཐོང་བའི་ཆོས་ལ་བསྔགས་པ་དང་། །
ཞེས་བྱ་བ་ནི་ཚེ་འདི་ལ་ཐམས་ཅད་དུ་སྟོད་པར་བྱེད་པའང་ཡིན་ནོ། །ཕ་རོལ་དུ་ཡང་ཞེས་བྱ་བ་ནི་འཇིག་རྟེན་ཕ་རོལ་དུ་ཡང་ངོ་། །བདེ་འགྲོར་འགྲོ་འགྱུར་ཞེས་བྱ་བ་ནི་དམ་པར་འགྲོ་བར་སྐྱེ་བ་ཡོངས་སུ་འཛིན་པ་དེ་ནི་དེ་ལྟ་བུའོ། །ཆོས་ལ་གནས་པ་ཞེས་བྱ་བ་ལ་སོགས་པ་རེ་རེས་འདིར་མཐོང་བ་དང་། མ་

མཐོང་བའི་ཕན་ཡོན་བརྗོད་པར་བྱ་སྟེ། གོ་རིམས་བཞིན་ནོ། །གཞན་དག་ནི་ཡོན་ཏན་བཞིའི་ཕན་ཡོན་བཞི་ནི་འདིར་བརྗོད་པར་བྱའོ་ཞེས་ཟེར་རོ། །དགའ་བ་ལ་སོགས་པའི་ཁྱད་པར་འདོད་པ་རྣམས་དེའི་ཐབས་ལ་གཟུད་པའི་ཕྱིར་འདི་གསུངས་སོ། །འོ་ན་བདག་ཉིད་
ལེགས་པར་སྤྱོད་པ་མཆོག་ཏུ་བྱེད་པར་གྱུར་ཀྱང་གཞན་ལ་ཡང་ནས་ཡང་དུ་བྱ་བ་མ་ཡིན་པ་ལས་ཟློག་པར་བྱེད་པ་ལ་དགའ་བར་འགྱུར་རོ་ཞེ་ན། གཏམས་ན་གནང་བའི་ཚིག་སྨྲ་དང་། །ཞེས་བྱ་བ་ལ་སོགས་པ་སྨོས་སོ། །བཅོམ་ལྡན་འདས་བྱ་རྒོད་ཀྱི་ཕུང་པོའི་རི་ལ་བཞུགས་ཏེ། བཅོ་
ལྔ་པའི་གསོ་སྦྱོང་དེ་ཅུང་ཟད་ལུས་པ་དང་། སྡིག་པ་སྤང་བ་དང་ཡོན་ཏན་ལས་བརྩམས་པའི་ཆོས་ཀྱི་གཏམ་སྟོན་ཏོ། །དེ་བཞིན་དུ་གཞན་ཡང་འདི་ལྟ་སྟེ་བརྩོན་འགྲུས་བརྩམས་པ་དང་བག་ཡོད་པ་དང་། བཀའ་བློ་བདེ་བ་དང་། རྒྱ་ཆེར་རོ། །གང་དགེ་སློང་འདི་དག་དེས་ཡོན་ཏན་དང་ལྡན་པ་དང་། དེ་ཡིད་
དགའ་བ་དང་མགུ་བར་གྱུར་ཏོ། །ལྷ་སྦྱིན་འཁོར་དང་བཅས་པ་སྡུག་བསྔལ་ཞིང་ཡིད་མི་བདེ་བས་སྟན་ལས་ལངས་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་གཉིས་པོ་འདི་གསུངས་སོ། །གཏམས་ན་ཞེས་བྱ་བ་ནི་རང་ཉིད་
ཚུལ་ཁྲིམས་ལ་སོགས་པའི་ཁྱད་པར་ལ་གནས་ཤིང་གཞན་དག་ཀྱང་དེ་ཉིད་ལ་འཛུད་པ་ནི་གཏམས་པ་སྟེ། འདི་དག་ནི་བྱ་བའོ། །འདི་དག་ནི་བྱ་བ་མ་ཡིན་པའོ་ཞེས་རྗེས་སུ་མཐུན་པའི་ཚུལ་དུ་སྟོན་པའོ། །གནང་བའི་ཚིག་སྨྲ་དང་ཞེས་བྱ་བ་ནི་ཏིང་ངེ་འཛིན་བསྐྱེད་པའི་རིམ་པའི་ཐབས་སྟོན་
ཅིང་ཡིད་ལ་བྱེད་པ་བསྐྱེད་པའི་ཐབས་སྟོན་པ་ནི་གནང་བའི་ཚིག་སྨྲ་བའོ། །མི་རིགས་སྤྱོད་ལས་ཞེས་བྱ་བ་ནི་ཚོགས་པར་རུང་བའི་ཚིག་ནི་བསྔགས་པའོ། །དེ་ལས་བཟློག་པ་ཚོགས་པར་མི་རུང་བ་སྟེ། མི་རིགས་པས་བྱས་པའི་ལས་སོ། །ཇི་སྐད་དུ་གང་མ་བརྟགས་
པ་བརྟེན་པ་དེ་ནི་བཅོལ་ཀྱང་ནན་ཏན་དུ་མི་བྱའོ། །དེ་བས་ན་དེ་ལས་བཟློག་པར་བྱ་སྟེ་གྲགས་པ་མ་ཡིན་པ་ལ་སོགས་པ་སྐྱེད་པར་བྱེད་པས། འདི་ནི་ཡང་སྐྱེ་བར་མི་འགྱུར་བར་ནམ་ཡང་མི་འབད་པར་མི་བྱའོ་ཞེས་བྱ་བ་ལ་སོགས་པའི་ཚིག་གིས་སོ། །དེ་ལྟར་གྱུར་པ་ནི་སྐྱེས་བུ་དམ་པའོ། །

དམ་པ་མ་ཡིན་དགའ་མི་འགྱུར། །ཞེས་བྱ་བ་ནི་སྡིག་པ་བྱེད་པ་རྣམས་ཞེ་སྡང་བར་འགྱུར་ཏེ། ཉེ་དུ་དག་འཆི་ལྟས་བྱུང་བ་ལྟ་བུ་དང་། ཉི་མའི་འོད་ཟེར་གྱིས་མིག་ལ་གནོད་པ་ལྟ་བུའོ། །དམ་པ་རྣམས་ནི་དགའ་བར་བྱེད། །ཅེས་བྱ་བ་ནི་གང་ཡང་དམ་པ་ནི་མཁས་པ་དག་སྟེ། བདག་ལ་ཕན་
པར་འདོད་པ་དེ་རྣམས་ནི་གཏམས་ན་གནང་བའི་ཚིག་སྨྲ་བའི་ཕ་རོལ་པོ་ལ་བླ་མ་བཞིན་དུ་ཁྱད་པར་དུ་དགའ་བར་འགྱུར་ཏེ། སྟོན་ཀའི་ཟླ་བ་ལྟ་བུའམ། ལུས་ནད་ཀྱིས་གདུང་ཞིང་འདུག་པ་ལ་གློ་བུར་དུ་གྲུབ་པའི་སྨན་པ་ཉེ་བར་འོངས་པ་ལྟ་བུའོ། །འདི་ལྟར་གང་གི་ཕྱིར་དམ་པ་དང་དམ་པ་མ་ཡིན་པ་
ཡང་དག་པར་ཉེ་བར་བསྟན་པས་དགའ་བ་དང་མི་དགའ་བ་ཡིན་ཏེ། དེ་བས་ན་དེའི་ཕན་ཡོན་དང་ཉེས་དམིགས་བསྟན་པའི་ཕྱིར། དེ་བས་མཆོག་དང་མཆོག་མིན་ལ། །ཞེས་བྱ་བ་སྨྲས་ཏེ། གང་གི་ཕྱིར་མཆོག་མ་ཡིན་པ་ནི་ཕན་པ་བསྟན་པ་ལ་རྨོངས་པའི་ཕྱིར་མི་དགའ་བའོ། །མཆོག་ནི་ཁྱད་པར་
ཤེས་པ་དེས་དགའ་བར་འགྱུར་ཏེ། རྒྱུ་དེའི་ཕྱིར་འདི་ལས་གཉི་ག་འཆི་བའི་ཆོས་ལ་ནི་བྱེ་བྲག་མེད་ཀྱང་ཕ་རོལ་ཏུ་ནི་ཁྱད་པར་དང་ལྡན་པར་འགྱུར་བ་ཡིན་ཏེ། ཤི་འཕོས་བྲལ་བར་གྱུར་པ་ན། །ཞེས་བྱ་བ་སྨོས་ཏེ། ཤི་འཕོས་པ་ནི་ཤི་བའོ། །དེ་རྟོགས་པའི་ཚུལ་གང་ལ་ཡོད་པ་དེ་ཉིད་ནི་འཆི་བར་
རྗེས་སུ་འགྲོ་བ་ཞེས་བྱ་བའི་དོན་ཏོ། །གཉི་ག་ཡང་འཆི་བའི་ཆོས་ལ་ཡང་བྱེ་བྲག་མེད་དོ་ཞེས་སྒྲུབ་པའི་ཕྱིར་དང་གི་སྒྲའོ། །ཇི་ལྟར་འདི་དག་འཆི་བ་ལ་བྱེ་བྲག་མེད་པ་དེ་བཞིན་དུ། ཇི་ལྟར་སྐྱེད་པར་གྱུར་པ་ན་ཡང་ཡིན་ནམ་ཞེ་ན། མ་ཡིན་ཏེ་སྨྲས་པ། འདི་ལྟར། དམ་པ་མ་ཡིན་དམྱལ་བར་འགྲོ། །
ཞེས་བྱ་བ་ཡིན་ཏེ། གང་བླ་མ་རྣམས་ཀྱི་གདམས་ངག་ལ་རྗེས་སུ་མི་འཇུག་པ་དེ་ནི་དམྱལ་བ་ལ་སོགས་པར་སྐྱེ་བར་འགྱུར་རོ། །དམ་པ་མཐོ་རིས་འགྲོ་བར་འགྱུར། །ཞེས་བྱ་བ་ལ། མཐོ་རིས་ནི་ལྷའི་གནས་ཏེ། དེར་འགྲོ་ཞིང་རབ་ཏུ་གནས་པ་གང་ཡིན་པ་སྟེ། དམ་པ་ནི་བདེ་འགྲོར་འགྲོ་ཞིང་
འབྱུང་བ་ཞེས་བྱ་བའི་དོན་ཏོ། །སྡུག་པའི་ཚོམས་ཀྱི་རྣམ་པར་འགྲེལ་པ་སྟེ་ལྔ་པ་རྫོགས་སོ།། །།འགྲོ་བ་སྡུག་པ་དང་མི་སྡུག་པ་ཡོངས་སུ་སྤངས་ན་ནི། ཚུལ་ཁྲིམས་ཡོངས་སུ་དག་པར་འགྱུར་རོ་ཞེས་བསྟན་པའི་ཕྱིར། དེའི་རྗེས་ཐོགས་ལ་ཚུལ་ཁྲིམས་ཀྱི་ཚོམས་བསྟན་པ་ཡིན་ཏེ།

སྡུག་པ་དང་མི་སྡུག་པ་དང་ལྷན་ཅིག་གནས་པ་རྣམས་ནི་ནམ་ཡང་ཚུལ་ཁྲིམས་རྣམ་པར་དག་པར་མི་འདོད་དོ། །བཤད་མ་ཐག་པའི་སེམས་ཅན་དམ་པ་ཡང་གང་ཞིག་དང་པོ་དམིགས་ཤིང་གང་ལ་གནས་པས་དམ་པ་རྫོགས་པ་འཐོབ་པར་འགྱུར་ཞེ་ན། དེའི་ཕྱིར་
བསྔགས་པར་འགྱུར་དང་ཞེས་བྱ་བ་ལ་སོགས་པའི་ཚིག་གི་རྩོམ་པ་སྨྲས་ཏེ། ཚུལ་ཁྲིམས་བསྲུང་བར་བྱ་ཞེས་བྱ་བ་ནི་བདེ་བ་གསུམ་འཐོབ་པར་བྱ་བའི་ཕྱིར། མཁས་པས་ཚུལ་ཁྲིམས་བསྲུང་བར་བྱ་སྟེ། བསྔགས་པར་འགྱུར་བ་བསྐྱེད་པར་བྱ་བ་ནི་གཞན་དག་ལས་ཆོས་ཐམས་ཅད་ཀྱིས་དོན་དུ་
གཉེར་བས་མཁས་པས་ཚུལ་ཁྲིམས་བསྲུང་བ་དང་། ལོངས་སྤྱོད་འབྱུང་བ་དང་། ལུས་དང་བྲལ་ནས་བདེ་འགྲོ་མཐོ་རིས་ཀྱི་འཇིག་རྟེན་གྱི་ལྷ་རྣམས་སུ་སྐྱེ་བར་བྱ་བའི་ཕྱིར། ཚིགས་སུ་བཅད་པ་གཅིག་གི་བར་གྱིས་གསུངས་སོ། །ཚུལ་ཁྲིམས་ཞེས་བྱ་བ་ནི་ལེགས་པར་སྤྱོད་པ་སྟེ།
ལུས་དང་སེམས་ཚིམ་པར་བྱེད་པས་ཆུ་བསིལ་བ་དང་། ཙན་དན་ལ་སོགས་པ་དང་འདྲའོ་ཞེས་བཤད་དོ། །དེ་ཡང་འཇུག་པ་དང་ལྡོག་པའི་དབྱེ་བས་རྣམ་པ་གཉིས་ཏེ། དེ་ལ་འཇུག་པའི་ཚུལ་ཁྲིམས་ནི་རྗེས་སུ་བསྒྲུབ་ཅིང་སྤྱད་པར་བྱ་བའི་ཚུལ་ཇི་སྐད་དུ་བཤད་པ་སྟེ། ནང་པར་ལངས་ནས་སོ་ཤིང་
བཅས་ཏེ་བླ་མའི་ཐད་དུ་སོང་ནས་ཡོངས་སུ་དྲི་བ་ལ་སོགས་པ་བྱའོ་ཞེས་བྱ་བ་ལ་སོགས་པའོ། །ལྡོག་པའི་ཚུལ་ཁྲིམས་ནི་གང་བྱ་བ་མ་ཡིན་པ་ལས་ལྡོག་པར་བྱ་བ་ཇི་སྐད་དུ་བཤད་པ་སྟེ། ལྷམ་མཁན་དང་། རིགས་ངན་དང་། གདོལ་བ་དང་། དེ་ལྟ་བུ་ལས་རབ་ཏུ་དབྱུང་བར་མི་བྱ་བ་དང་། རྐུན་
མ་ལ་སོགས་པ་མ་ཡིན་པ་དང་། གཙེས་པ་དང་། ཡ་མཚན་ཅན་ལ་སོགས་པ་ཡང་མ་ཡིན་ནོ་ཞེས་བྱ་བ་ལ་སོགས་པའོ། །བསྲུང་བར་བྱ་ཞེས་བྱ་བ་ནི་ཡོངས་སུ་བསྐྱང་བར་བྱ་བ་སྟེ། བདག་ཉིད་ཀྱིས་བྱས་པའི་འབྲས་བུ་ཉིད་ཕུལ་དུ་བྱུང་བས་བདག་ཉིད་དང་། མངོན་པར་འབྲེལ་ཅིང་བདག་ཉིད་
གང་གིས་འདི་ཉིད་ཆོ་ག་བཞིན་དུ་བསྲུང་བར་བྱ་ཞེ་ན། མཁས་པས་ཞེས་བྱ་བ་སྨྲས་ཏེ། ཡོངས་སུ་རྟོགས་པའི་བློ་ཡོད་པ་སྟེ། རིག་པ་དང་ལྡན་པ་ཞེས་བྱ་བའི་དོན་ཏོ། །ཡོན་ཏན་ཐམས་ཅད་ཉེ་བར་བསྡུ་ཞིང་ཡོངས་སུ་བསྐྱང་བའི་རྩ་བ་ནི། ཡེ་ཤེས་ཡིན་ལ་ཉེས་པ་ཐམས་ཅད་ལ་འཇུག་པའི་རྩ་བ་ནི་

མི་ཤེས་པ་ཡིན་པས་རྟོགས་པ་དང་ལྡན་པ་རྣམས་ནི། དགོས་པ་མེད་པ་ཅི་ཡང་མི་བྱེད་དེ་དེ་བས་ན་འདིར་དགོས་པ་ནི་བསྔགས་པ་ཞེས་བྱ་བ་ལ་སོགས་པ་བསྟན་པ་ཡིན་ཏེ། དེ་ལ་བསྔགས་པར་འགྱུར་བ་ཞེས་བྱ་བ་ནི་བསྟོད་པར་འགྱུར་བའོ། །ནོར་ཐོབ་པ་ནི་དབྱིག་དང་གསེར་ལ་སོགས་པ་དངོས་པོ་
མཆོག་ཏུ་གྱུར་པ་འཐོབ་པའོ། །སེམས་ཅན་དང་སེམས་ཅན་མ་ཡིན་པ་དག་གི་གྲངས་སུ་བྱ་བ་ལས་འདོད་པས་འཐོབ་པར་འགྱུར་བ་བསྟན་པའི་ཕྱིར་དང་གི་སྒྲ་སྨོས་སོ། །ཕ་རོལ་ཞེས་བྱ་བ་ལུས་དང་བྲལ་ནས་འགྲོ་བའི་ཕྱིར་རོ། །བདེ་འགྲོ་ཞེས་བྱ་བ་ནི་ལྷའི་འགྲོ་བའམ། མཐོ་རིས་སུ་འགྲོ་བ་ནི་ལེགས་པར་སྤྱོད་
པའི་འབྲས་བུ་ཡིན་པའི་ཕྱིར་བདེ་འགྲོར་སྐྱེ་བའོ། །བསྔགས་པ་དང་ནོར་ཐོབ་པར་འདོད་པ་འབའ་ཞིག་གི་ཕྱིར། ཚུལ་ཁྲིམས་བསྲུང་བ་མ་ཡིན་གྱི་བདེ་འགྲོར་སྐྱེ་ཞིང་བདེ་བ་རྗེས་སུ་མྱོང་བར་ཡང་འགྱུར་བའི་ཕྱིར་དང་ཞེས་བྱ་བའི་སྒྲ་སྨོས་སོ། །དགའ་བར་འགྱུར་ཞེས་བྱ་བ་ནི་མགུ་བར་འགྱུར་བ་སྟེ། བདེ་བ་གསུམ་པོ་
ནི་བདེ་བ་རྣམ་པ་གསུམ་གྱི་རྒྱུར་གྱུར་པ་ཞེས་བྱ་བའི་དོན་ཏོ། །བསྔགས་པར་འགྱུར་བ་དང་། ནོར་ཐོབ་པ་དག་ནི་བདེ་བའི་རྒྱུར་གྱུར་པའི་ཕྱིར་བདེ་བ་ཞེས་བྱ་བ་སྟེ། སངས་རྒྱས་རྣམས་ནི་འབྱུང་བ་བདེ། །ཞེས་བྱ་བ་ལྟ་བུའོ། །ཅིག་ཤོས་ནི་འདིར་བདེ་བ་ཉིད་དེ། གང་ཡང་བདེ་བ་དང་། གང་ཡིད་བདེ་བ་དེ་ནི་
བདེ་བའོ་ཞེས་བྱ་བའོ། །དོན་གཉེར་བས་ཞེས་བྱ་བ་ནི་ཀུན་དུ་ཚོལ་ཏེ། གང་ཞིག་ཅེ་ན། བདེ་བ་གསུམ་མོ། །སྔར་སྨྲས་པའི་ཚིགས་སུ་བཅད་པ་དོན་ཁྱད་པར་དང་བཅས་པས་གསལ་བར་བྱ་བའི་ཕྱིར་འཕགས་པ་དང་ཞེས་བྱ་བ་ལ་སོགས་པ་སྨོས་ཏེ། གནས་ཞེས་བྱ་བ་ནི་ཡིད་ལ་འདོད་པའི་འབྲས་
བུ་འབྱོར་པར་འགྱུར་བའི་དངོས་པོར་གནས་ཤིང་མངོན་པར་འདོད་པར་བྱའོ། །འདི་དག་མཐོང་བ་ཡིས་ཞེས་བྱ་བ་ནི་སྔར་བཤད་པའི་བསྔགས་པ་ལ་སོགས་པ་གསུམ་པོ་འདི་དག་མཐོང་ཞིང་། ཡང་དག་པར་རྟག་ལ་ངེས་པར་བསམ་པའི་ཕྱིར། ཚུལ་ཁྲིམས་ཡོངས་སུ་བསྲུང་བའི་ཕྱིར་འབྲས་བུ་
ནི་འདི་དག་ཡིན་པར་ཁོང་དུ་ཆུད་པའི་ཕྱིར། ཚུལ་ཁྲིམས་ཡོངས་སུ་བསྲུང་བར་བྱའོ། །མངོན་པར་འདོད་པར་བཤད་པའི་བདེ་བའི་རྒྱུ་ཉིད་དོ། །འདི་ཉིད་ཁོང་དུ་ཆུད་པ་ནི་མཁས་པ་སྟེ། དེ་ཉིད་དུ་གུས་པས་ཡོངས་སུ་སྐྱོང་བར་བྱེད་དོ། །ཚུལ་ཁྲིམས་བསྲུང་བའི་ཕྱིར་མཁས་པས་ཞེས་

བྱ་བ་སྨྲས་ཏེ། ཐོས་པ་དང་བསམ་པ་དང་བསྒོམ་པའི་གནས་ལ་རབ་ཏུ་སྦྱོར་ཞིང་འཇུག་པ་སྟེ། རིམ་པ་འདིས་ངེས་པར་འབྱེད་པའི་ཆ་ཐོས་པས་བློ་གྲོས་བྱང་བར་འགྱུར་བའོ། །ཚུལ་ཁྲིམས་ཡོངས་སུ་བསྲུངས་པའི་ཕན་ཡོན་དམ་པ་འཇིག་རྟེན་ལས་འདས་པ་བསྟན་པའི་
ཕྱིར་འཕགས་པ་དང་ཞེས་བྱ་བ་སྨྲས་ཏེ། མཆོད་པར་བྱ་ཞིང་སྡིག་པའི་སྒྲིབ་པ་མི་སོགས་པས་འཕགས་པའི་གང་ཟག་སྟེ། སྡིག་པ་མི་སྤྱོད་ཅིང་བྱ་བ་མ་ཡིན་པ་སྡོམ་པ་ཐོབ་པའོ། །དེ་ཡང་ཚུལ་ཁྲིམས་འདི་ལ་གནས་ཤིང་ཞི་གནས་དང་ལྷག་མཐོང་ལ་བསྒོམ་པས་མཐོང་བའི་ལམ་ཐོབ་སྟེ། འཕགས་པར་
གྱུར་ཅིང་། འབྲས་བུ་དེ་ལས་དང་ཉོན་མོངས་པའི་ངན་འགྲོའི་དོགས་པ་དང་བྲལ་བའོ། །མཐོང་བ་ཕུན་ཚོགས་དང་ཞེས་བྱ་བ་ནི་འཕགས་པའི་བདེན་པ་ཕུན་སུམ་ཚོགས་ཤིང་། ཡང་དག་པར་རྗེས་སུ་མྱོང་བ་སྟེ། འདིས་ནི་བདེན་པ་མཐོང་བ་ཞེས་བྱ་བའི་དོན་ཏོ། །འདིས་བསྒོམ་པའི་ལམ་འཐོབ་པར་
བསྟན་པའི་ཕྱིར། འཇིག་རྟེན་ཞེས་བྱ་བ་སྨོས་ཏེ། དེ་དེ་ལྟ་བུའི་ལམ་གྱི་ཚོགས་ལ་ལམ་བསྒོམ་པའི་རྗེས་སུ་འཇུག་ཅིང་། མཐོང་བའི་ཆོས་འདི་ཉིད་ལ་གནས་པ་ཞེས་བྱ་བའི་དོན་ཏོ། །ཞི་བ་རྟེན་གྱུར་པའི་ཞེས་བྱ་བ་ནི་ཁམས་གསུམ་གྱི་འདོད་ཆགས་དང་བྲལ་བ་ཐོབ་པར་འགྱུར་བ་སྟེ། མི་སློབ་པའི་ལམ་
ལ་མྱ་ངན་ལས་འདས་པར་འགྱུར་ཞེས་བྱ་བའི་དོན་ཏེ། ལྷག་མ་དང་བཅས་པ་དང་། ལྷག་མ་མེད་པའི་མྱ་ངན་ལས་འདས་པ་དེ་ཐོབ་པས་མི་སློབ་པའི་ལམ་ལ་གནས་པའི་དོན་ཏེ། ཉེ་བར་ཞི་ཞིང་དེས་ཞི་བ་ཉིད་དེ་སྲིད་པ་ཟད་པའི་བདེ་བ་དོན་དུ་གཉེར་བས་ཀྱང་། ཚུལ་ཁྲིམས་འདི་ཉིད་བསྲུང་བར་བྱའོ་
ཞེས་བྱ་བ་སྟེ། སྔར་བཤད་པ་འབའ་ཞིག་ཏུ་མ་ཟད་ཀྱི། འཇིག་རྟེན་དང་འཇིག་རྟེན་ལས་འདས་པའི་བདེ་བ་འཐོབ་པར་འདོད་པས། དེའི་ལས་སྐྱེད་པར་བྱེད་པའི་ལམ་ཚུལ་ཁྲིམས་ཞེས་བྱ་བ་ལ་ངེས་པར་སྦྱར་བའི་ཕྱིར་འདི་གསུངས་པ་ཡིན་ནོ། །ཚུལ་ཁྲིམས་ཀྱི་སྒྲའི་དོན་ཉིད་རྣམ་པར་དབྱེ་བའི་ཕྱིར། །
ལུས་ལ་ཡོངས་སུ་གདུང་མེད་པར། །ཚུལ་ཁྲིམས་ཀྱིས་ནི་བདེ་བ་འཐོབ། །ཅེས་སྨོས་ཏེ། དེ་ནས་བཅོམ་ལྡན་འདས་ཀྱིས་རིགས་ཀྱི་བུ་ཚུལ་ཁྲིམས་འདོད་པ་རྣམས་ལ་བཀའ་སྩལ་པ། རིགས་ཀྱི་བུ་ཚུལ་ཁྲིམས་ནི་བདེ་བའོ། །ཚུལ་ཁྲིམས་ཡང་དག་པར་འཛིན་པ་ནི་བདེ་བའོ། །དེ་ཅིའི་ཕྱིར་ཞེ་ན།

རིགས་ཀྱི་བུ་ཚུལ་ཁྲིམས་དང་ལྡན་པ་རྣམས་བདེ་བར་གཉིད་ཀྱིས་ལོག་ཅིང་བདེ་བར་སད་པ་དང་། ཉལ་བ་ན་འདི་ལ་ལྷ་རྣམས་བསྲུང་བར་འགྱུར་རོ། །འདི་ལྟ་སྟེ་སོ་གའི་དུས་སུ་དགོན་པའི་ནང་དུ་ཆུད་པའི་ལམ་དུ་ཞུགས་པ་རྣམས་ནི་ལུས་ཤིན་ཏུ་ཡོངས་སུ་གདུངས་ཤིང་ངལ་བ་རྣམས་གྲིབ་མ་དང་བཅས་
ཤིང་ཆུ་མིག་བསིལ་བ་དང་བཅས་པའི་ཤིང་དྲུང་དུ་ཕྱིན་པའམ། དབུལ་ཕོངས་གཏེར་ཆེན་པོ་རྙེད་པའམ། ལོང་བས་མིག་གམ། མགོན་མེད་པ་རྣམས་ལ་མགོན་ཆེན་པོའི་ཞེས་བྱ་བ་ལ་སོགས་པ་ནས། བདེ་བ་ཞེས་བྱ་བ་མངོན་པར་འདོད་པའི་བདེ་བ་མ་ལུས་པར་འཐོབ་པར་བྱེད་པ་ནི། ཚུལ་ཁྲིམས་ཡང་
དག་པར་ལེན་པའོ་ཞེས་བྱ་སྟེ། ལེགས་པར་སྤྱོད་པའི་བྱ་བ་སྔོན་དུ་འགྲོ་བར་ཁས་བླངས་པའོ། །བདེ་བ་དེ་ཡང་ཅིའི་ཕྱིར་ཞེ་ན། གང་གི་ཕྱིར་འདི་ན་ཚུལ་ཁྲིམས་དང་ལྡན་པར་གྱུར་པ་ནི། ལུས་ལ་ཡོངས་སུ་གདུང་མེད་པར། །ཞེས་བྱ་བ་སྨོས་ཏེ། ཚུལ་ཁྲིམས་ཀྱིས་བརྒྱན་པ་རྣམས་ལ་ནི་གདུང་བའི་རྒྱུར་
གྱུར་པའི་ཉེས་པར་སྤྱོད་པ་མི་སྲིད་པས་དེ་རྒྱུར་གྱུར་པའི་ལུས་ཀྱི་གདུང་བ་མི་སྲིད་དེ། ཚུལ་ཁྲིམས་འཆལ་པ་རྣམས་ལ་ནི། བདག་དང་གཞན་ལ་གནོད་པ་ལག་པ་གཅོད་པ་ལ་སོགས་པ་ཀུན་དུ་མ་བསྡམས་པས། ལུས་ཀྱིས་ཀུན་ནས་གདུང་བ་རྗེས་སུ་མྱོང་བར་འགྱུར་རོ། །དེ་བས་ན་བསིལ་བར་
གྱུར་པས་ན་ཚུལ་ཁྲིམས་སོ་ཞེས་ངེས་པའི་ཚིག་ཏུ་སྦྱར་བ་སྟེ། ཚིམ་པར་བྱེད་པ་ཞེས་བྱ་བའི་དོན་ཏོ། །ཇི་སྐད་དུ། གང་ཞིག་ཆུན་འཕྱང་ཙན་དན་མཆོག་བརླན་དང་། །ཆུ་ཐིགས་བསིལ་བའི་ཆར་དང་བཅས་པའི་རླུང་། །ཟླ་ཟེར་སྒྲ་མེད་དགོན་པ་ཀུ་མུ་ད། །གདུང་བ་སེལ་བར་གྱུར་པ་མ་ཡིན་ཏེ། །སྲོག་
འཇིག་ཚེ་ན་ཀུན་དུ་འབྱུང་བ་ཡི། །དུས་མཐའི་མེ་ལྟར་སྲེག་ཅིང་འཇིག་པ་དང་། །ཚུལ་ཁྲིམས་དྲན་ནའང་རྗེས་སུ་སེལ་བྱེད་དེ། །གང་ཕྱིར་དེ་ནི་ཚིམ་བྱེད་རྣམས་ཀྱི་མཆོག །ཅེས་གསུངས་པ་ལྟ་བུའོ། །མཚན་མོ་བདེ་བར་ཉལ་དང་ཞེས་བྱ་བ་ནི་མཚན་མོ་ཤིན་ཏུ་བག་ཕབ་སྟེ། གཉིད་ཀྱིས་ལོག་པ་སྟེ་
གཡེང་བ་མེད་པའི་ཕྱིར་རོ། །དེ་བས་ན་ཚུལ་ཁྲིམས་ཡང་དག་པར་བླངས་པའི་ཁམས་ལ་ཡང་དག་པར་བརྟེན་ནས་ཚུལ་ཁྲིམས་ཀྱི་སྒྲའི་དགོད་པར་བསྟན་པ་ཡིན་ནོ། །སད་པ་ན་ཡང་དགའ་བར་འགྱུར། །ཞེས་བྱ་བ་ནི་གཉིད་དང་བྲལ་བར་གྱུར་ཅིང་མ་ཉལ་བའི་གནས་སུ་ཉེ་བར་འཚེ་བ་ཟད་ཅིང་ཆོས་ཀྱི་ལུས་

ལ་སྤྱོད་ལ་བར་ཆད་མེད་པའི་ལམ་ལ་སློབ་པས་ཡང་དག་པར་དགའ་བར་འགྱུར་ཞིང་མགུ་བར་གྱུར་པ་སྟེ། ཟང་ཟིང་མེད་པར་དགའ་བ་ཉམས་སུ་མྱོང་བར་འགྱུར་ཞེས་པའི་དོན་ཏོ། །འདིས་ནི་གོམས་པའི་དོན་གྱིས་ཚུལ་ཁྲིམས་ཀྱི་སྒྲ་རྣམ་པར་འབྱེད་པ་རྟོགས་པར་བྱེད་དེ།
གདུང་བ་མ་ལུས་པར་སེལ་བར་བྱེད་པའི་ཚུལ་ཁྲིམས་ལ་ངེས་པར་སྦྱར་བའི་ཕྱིར་འདི་གསུངས་པ་ཡིན་ནོ། །སྦྱིན་པ་ལ་སོགས་ལམ་གྱི་ཚོགས་གཞན་ཡོངས་སུ་དག་པ་ཡང་ཚུལ་ཁྲིམས་ཕུན་སུམ་ཚོགས་པ་ཉིད་ཡིན་པར་བསྟན་པའི་ཕྱིར། སྦྱིན་པ་ཞེས་བྱ་བ་ལ་སོགས་པ་གསུངས་ཏེ། སྦྱིན་པ་དང་སྦྱིན་པ་
པོ་དང་། སོ་སོར་ལེན་པ་རྣམ་པར་དག་པ་ལ་སོགས་པ་ཡོད་དོ་ཞེས་མདོ་ལས་གསུངས་སོ་ཞེས་པ་ནི་ཚིགས་སུ་བཅད་པ་འདི་ཡིན་ནོ་ཞེས་སྡེ་པ་གཞན་དག་སྨྲ་བའོ། །སྦྱིན་པ་ནི་ཟས་དང་། སྐོམ་དང་། དབྱིག་དང་། རྟ་དང་། གླང་པོ་ཆེ་ལ་སོགས་པ་སོ་སོར་སྟེར་བའོ། །སྦྱིན་པར་བྱ་བ་ཇི་ལྟ་བུ་ཞེ་ན། ཚུལ་
ཁྲིམས་དང་ལྡན་པ་དག་ཅེས་བྱ་བ་སྟེ། གང་ཞིག་ཤིན་ཏུ་ཚུལ་ཁྲིམས་དང་ལྡན་ཞིང་གཞན་དག་ཉེ་བར་འཚེ་བ་མེད་པ་དང་བཅས་པའི་སྦྱིན་པ་རྣམས་སྟེར་ཞིང་སྦྱིན་པར་བྱེད་པའི་སྦྱིན་པ་དག་སྦྱིན་ནོ་ཞེས་བྱ་བའི་དོན་ཏོ། །བྱིན་པ་ཞེས་བྱ་བ་ནི་ཕུན་སུམ་ཚོགས་པའི་ཚུལ་ཁྲིམས་དང་ལྡན་པ་ཉིད་ཀྱིས་ན་
དེ་ལས་གཞན་པའི་ཟག་པ་མེད་པའི་ཕུན་སུམ་ཚོགས་པ་ནི་ཚུལ་ཁྲིམས་དང་ལྡན་པར་གྱུར་པས་ཚུལ་ཁྲིམས་དང་ལྡན་པ་ཉིད་ནི་སྦྱིན་པ་དག་བྱེད་ན། དེ་ནི་ངེས་པར་བདེ་བ་འཐོབ་པར་འགྱུར་རོ། །ལ་ལ་ནི་ཐམས་ཅད་ལ་ཡང་འདི་ལྟར་ཁྱད་པར་མེད་པར་གཟུང་བས་སོ་ཞེས་ཟེར་ཏེ། ཇི་ལྟར་དུང་ལ་བརྟེན་
ནས་རླུང་དེ་ཉིད་རྒྱས་པར་འགྱུར་ཏེ། ཚུལ་ཁྲིམས་ལ་བརྟེན་པའི་སྦྱིན་པ་ཡང་དེ་བཞིན་ནོ། །དེ་བས་ན་སྦྱིན་པ་རྣམས་ཀྱི་ཞེས་བྱ་བ་ཚིག་མང་པོ་པར་རིགས་ཏེ། དམན་པ་དང་། བར་མ་དང་། ཁྱད་པར་ཅན་གྱི་ཞིང་ལ་སོ་སོར་སྦྱིན་པ་དེ་ནི་ཚུལ་ཁྲིམས་ཀྱི་དབང་གིས་འབྲས་བུ་ཆེ་བར་འགྱུར་རོ། །བསོད་
ནམས་ཀྱིས་ཞེས་བྱ་བ་ནི་ཚུལ་ཁྲིམས་ལ་སོགས་པ་ལེགས་པར་སྤྱོད་པ་ཕུན་སུམ་ཚོགས་པའོ། །