Luận tạng Tây Tạng (Tengyur) — Tập 148

གྱི་མཐོང་བས་སྤང་བར་བྱ་བའི་ཕྲ་རྒྱས་དང་། བསྒོམ་པའི་ལམ་གྱི་ཟག་པ་དང་བཅས་པ་ཐམས་ཅད་དང་། ཕུང་པོ་ལྷག་མ་མེད་པའི་མྱ་ངན་ལས་འདས་པའི་
དབྱིངས་སུ་ཕྱིན་པ་ནི་འདུས་བྱས་ཐམས་ཅད་ཡོངས་སུ་གཏོང་བ་ལ་ཡང་ཤིན་ཏུ་བཀྲ་ཤིས་པའོ། །གང་གི་ཕྱིར་སྤང་བས་ནི་སྡུག་བསྔལ་ཐམས་ཅད་འཇོམས་པར་བྱེད་དོ་ཞེས་ཤེས་ཏེ། དེ་ཡང་སྨྲས་པ། གཞན་དབང་ཇི་སྙེད་ཡོད་པ་དག །དེ་ནི་སྡུག་བསྔལ་བཀྲ་མི་ཤིས། །གང་གིས་ཡོངས་སུ་སྤངས་
པ་དེ། །དེ་ནི་རབ་ཏུ་བཀྲ་ཤིས་འདོད། །ཅེས་སོ། །ཇི་ཞིག་བསལ་ཞེ་ན། སྨྲས་པ། གཉིད་དང་རྨུགས་པ་ཞེས་བྱ་བའོ། །གཉིད་དང་རྨུགས་པ་ནི་གཉིད་རྨུགས་སོ། །ཟླས་དབྱེ་བ་ཐམས་ཅད་ལ་པ་རི་བྷཱ་ཥ་ལས་གཅིག་ཏུ་བསྡུས་པས་བྱས་སོ་ཞེས་སྨོས་པས་ཆོ་གས་གཅིག་ཏུ་བྱས་སོ། །གང་
གིས་བསྒོམས་ན་སེམས་དང་སེམས་ལས་བྱུང་བ་རྨུགས་པར་འགྱུར་བ་དང་བླུན་པར་འགྱུར་བ་སྟེ། དགེ་བ་བྱེད་པ་ལ་སྦྱོར་མི་བཟོད་པར་འགྱུར་བ་དེ་ནི་ཤིན་ཏུ་སྦྱངས་པའི་མི་མཐུན་པའི་ཕྱོགས་སེམས་ལས་བྱུང་བ་རྨུགས་པ་སྟེ། སེམས་བླུན་པར་བྱེད་ཅེས་པའི་དོན་ཏོ། །གང་གིས་རྣམ་པར་

ཤེས་པ་ཡང་འགག་པར་བྱེད་པ་དང་། ལུས་ཀྱི་གཟུངས་ཀྱི་རླུང་དེ་ནི་སེམས་ལས་བྱུང་བ་གཉིད་ཅེས་བྱ་བའི་དོན་ཏེ། འདིས་ནི་ཆོས་མཉན་པའི་བགེགས་སུ་གྱུར་པ་གཙོར་བསྟན་ཏེ་མཐོང་བར་བྱ་བ་ལ་མུན་པ་ལྟ་བུའོ། །རྨུགས་པ་ནི་ཉོན་མོངས་པའི་ས་ཆེན་པོ་པ་ཡིན་པའི་
ཕྱིར་གཅིག་ཏུ་ཉོན་མོངས་པ་ཉིད་ཡིན་ཏེ། དེས་ན་འདིར་བགེགས་སུ་རིགས་བཟུང་བའི་ཕྱིར་ཏེ། དེར་འདིར་དེ་ནི་བགེགས་སུ་རིགས་པ་ཡིན་ནོ། །གཉིད་ཀྱང་བགེགས་ཉིད་ཡིན་ནོ། །དེ་ནི་ཡིད་ཀྱི་ས་པ་ཡིན་པའི་ཕྱིར་གཅིག་ཏུ་ཉོན་མོངས་པ་ནི་མ་ཡིན་ཏེ། ལུང་ལས་གཉིད་ནི་དགེ་བ་དང་མི་དགེ་བར་ལུང་
དུ་མ་བསྟན་པས་སོ། །རྣ་བའི་རྣམ་པར་ཤེས་པས་བསྟན་པ་གཟུང་བ་ལའོ། །དང་གི་སྒྲ་ནི་མ་དད་པ་ལ་སོགས་པ་ཡོངས་སུ་གཟུང་བའི་ཕྱིར་ཏེ། དེ་དག་ཀྱང་ཆོས་མཉན་པའི་མི་མཐུན་པའི་ཕྱོགས་སོ། །དེ་ཡང་ཇི་སྐད་དུ། མ་དད་མེད་པའི་སེམས་དང་ནི། །སྡང་བའམ་འཁྲུག་པ་མེད་པ་ཡིས། །དམ་
ཆོས་ཤེས་པར་ནུས་པ་ཡིན། །ཞེས་གསུངས་སོ། །གཞན་དག་ནི་ལྷག་མ་དགག་པ་ཡོངས་སུ་གཟུང་བའི་ཕྱིར་རོ་ཞེས་སྟོན་ཏེ། གང་གི་ཕྱིར་འདོད་པ་ལས་འདུན་པ་ལ་སོགས་པ་དེ་ཡང་བགེགས་ཉིད་ཡིན་ཏེ། ཆོས་མཉན་པ་མཆོག་ཏུ་འཛིན་པས་ཤིན་ཏུ་སྤང་བར་བྱའོ། །སྤང་བར་བྱ་བ་བསྟན་ནས།
བླང་བར་བྱ་བ་བཤད་པ། དགའ་བ་བསྐྱེད་དེ་ཞེས་བྱ་བ་ལ་སོགས་པ་སྨོས་ཏེ་ཚིམ་པ་དང་། ཡིད་བདེ་བ་ཁྱད་པར་དུ་སྦྱར་བར་བྱའོ་ཞེས་པའི་དོན་ཏོ། །དགའ་བར་གྱུར་ན་ནི་མཉན་པ་ལེགས་པར་ཉན་པར་འགྱུར་ཏེ། ནད་པ་ལ་སྨན་པ་ཆེན་པོས་ལུང་ཕོག་པ་བཞིན་ནོ། །ཡང་གི་སྒྲ་ནི་ཆོས་མཉན་པའི་ཡན་
ལག་ལྷག་མ་གཟུང་བའི་ཕྱིར་ཏེ། ཇི་སྐད་དུ་རྣམ་པ་བཅུ་དྲུག་གིས་ཆོས་མཉན་པར་བྱའོ་ཞེས་རྒྱ་ཆེར་མདོ་ལས་གསུངས་པའོ། །གཞན་དུ་ཡང་གསུངས་པ། དོན་དུ་གཉེར་བ་དང་། འཚེ་བ་མེད་པ་དང་། བརྟན་པ་དང་། གཡེང་བ་མེད་པ་དང་། མི་སྨོད་པ་དང་། ཚིག་དང་ངག་གི་ནུས་པས་
མི་བརྙས་པ་དང་། ཤེས་པས་ང་རྒྱལ་མེད་པ་དང་། དྲན་པ་མ་ཉམས་པ་དང་། བདག་ལ་ཕན་པར་འདོད་པས་རྣ་བླགས་ཏེ་ཉན་པ་དང་། དཔྱོད་པར་ནུས་པ་དང་། གུས་པ་དང་། མཆོད་པ་བྱེད་པ་ནི་ཆོས་རྣམ་པར་དབྱེ་བ་ཉན་པར་འོས་པ་ཡིན་ནོ་ཞེས་སོ། །གཞན་དག་ནི་ཡང་གི་སྒྲ་གཉིས་

སྨོས་པ་ཐ་དད་པར་བསྒྲུབ་དགོས་པས་འདིར་གཉིས་བསྟན་པ་ཡིན་ཏེ། འདི་ལྟར་གཉིད་དང་རྨུགས་པ་བསྩལ་ནས་ཡང་ཡིད་དགའ་བ་མི་འབྱུང་བ་ཡོད་དེ་གང་གི་ཕྱིར་ཡིད་སྐྱོ་བར་གྱུར་པས་གཉིད་དང་རྨུགས་པ་མེད་ཀྱང་དགའ་བ་མེད་པ་དང་། ཡིད་དགའ་བར་གྱུར་ན་ཡང་ངེས་པར་རྨུགས་པ་དང་
གཉིད་དང་བྲལ་བ་མ་ཡིན་པ། ཉོན་མོངས་པ་ལ་དགའ་བ་ཡང་འབྱུང་བའི་ཕྱིར་གཉི་གར་ཡང་རང་ལས་ལྟོས་པ་ཉིད་ཀྱིས་བརྗོད་པར་བྱ་སྟེ། ཇི་ལྟར་མེ་ཏོག་དང་འབྲས་བུ་གཉིས་ཁྱེར་ཏེ་ཤོག་ཅེས་བྱས་ན་གཉི་ག་ཁྱེར་ཏེ་འོང་གི་གཅིག་ཁྱེར་ཏེ་ཤོག་ཅེས་བྱས་ན་གཉིས་ཁྱེར་ཏེ་མི་འོང་བ་དེ་བཞིན་ནོ། །ཅི་
ཞིག་དགའ་བ་ཡིན་ཞེ་ན། ཡིད་ཅེས་བྱ་བ་སྟེ། ཡིད་ཉིད་ཡིན་པས་ཡིད་དེ་རང་གི་དོན་ཉིད་ལ་འཕེལ་བར་བྱ་བས་སེམས་ཞེས་བྱ་བའི་དོན་ཏོ། །ཡང་གསུངས་པ། མཉན་བྱའི་ཆོས་ལ་ས་དང་ནི། །ངན་སོང་གསུམ་གྱི་རྒྱུར་གྱུར་པ། །གཉིད་དང་རྨུགས་གང་བསྩལ་ནས་ནི། །ཡིད་ཀྱིས་ལེགས་
པར་ཡིད་ལ་བྱ། །ཡིད་ལ་ཡང་དག་དགའ་བྱས་ཤིང་། །ཆོས་སྨྲ་དག་ལ་གུས་བྱས་ཏེ། །ཚིག་ནི་ལེགས་པར་གོ་བྱས་ནས། །མཆོག་ཏུ་ཞི་བའི་རྣམ་པར་གྱིས། །ཞེས་སོ། །རྣམ་པ་གཉིས་པོ་དེ་བྱས་ནས་ཇི་ཞིག་བསྒྲུབ་ཅེ་ན། སྨྲས་པ། ཉོན་ཞེས་བྱ་བ་ཡིན་ཏེ་རྣ་གཏོད་པར་གྱིས་ཤིག་པ་སྟེ་རྣ་བའི་རྣམ་
པར་ཤེས་པའི་ཡུལ་དུ་གྱིས་ཤིག་པའི་དོན་ཏོ། །སུས་སྨྲས་ཤེ་ན། བདག་གིས་ཞེས་བྱ་བ་འཕགས་པ་ཆོས་སྐྱོབ་བདག་ཉིད་ཉེ་བར་སྟོན་ཏོ། །རབ་ཏུ་བཤད་པར་བྱས་ཞེས་བྱ་བ་ནི་དུས་ཕྱི་མར་བརྗོད་པར་བྱའོ་ཞེས་བྱ་བ་ཡིན་ཏེ། རབ་ཏུ་ཞེས་བྱ་བའི་སྒྲ་ལས་དུས་ཕྱི་ནས་བྱེད་པ་ཡིན་པའི་ཕྱིར་ཚ་བོ་ལྟ་བུ་སྟེ། བུ་
ལས་དུས་ཕྱིས་འབྱུང་བའི་ཕྱིར་རོ། །འདིར་ཡང་བཅོམ་ལྡན་འདས་ཀྱིས་བསྟན་པའི་ཕྱི་ནས་བདག་གིས་བཤད་པར་བྱའོ་ཞེས་པ་སྟེ། འདིས་ནི་སངས་རྒྱས་ཀྱིས་གསུངས་པ་ཉིད་དུ་མཚོན་པ་ཡིན་ནོ། །དེ་གང་ཡིན་ཞེ་ན། སྨྲས་པ། ཆེད་དུ་བརྗོད་པ་ཞེས་བྱ་བ་ཡིན་ཏེ། གཏན་དམ་པ་ཞེས་བྱ་བའི་དོན་ཏོ། །ཇི་
སྐད་དུ་གསུངས་པ། ཆེད་དུ་བརྗོད་པ་མཆོག་ཏུ་རྣམ་པར་འོང་བ་དང་། ཡིད་མགུ་བར་བྱེད་པའི་གཏམ་བསྟན་པར་བྱེད་ཅེས་བྱ་བའི་དོན་ཏོ། །ཡང་ཆེད་དུ་བརྗོད་པ་ཞེས་བྱ་བ་ནི་གཏམ་གྱི་རྣམ་གྲངས་ཡིན་པའི་ཕྱིར་ཏེ། ཇི་སྐད་དུ་བཤད་པ། ཆེད་དུ་བརྗོད་པ་ཡང་ཞེས་བྱ་བ་ནི་གཏམ་དེས་ཀྱང་ཞེས་བྱ་བའི་

དོན་ཏོ། །ཆེད་དུ་བརྗོད་པའམ་ཆེད་དུ་བརྗོད་པ་དག་ཅེས་བྱ་བའི་སྒྲ་ནི་གཉི་ག་ཡང་འགལ་བ་མེད་དེ་རྟགས་གཉི་ག་ལ་བརྟེན་པའི་སྦྱོར་བ་སྣང་བའི་ཕྱིར་རོ། །འདིར་ཡང་ཚིགས་བཅད་ཀྱི་ཁྱད་པར་སྤྱིར་བསྟན་པ་ཡིན་པས་ཆེད་དུ་བརྗོད་པ་དག་ཅེས་བྱའོ། །སངས་རྒྱས་ཀྱིས་
གསུངས་པའི་ཡན་ལག་བཅུ་གཉིས་ལས་འདི་ནི་ཡན་ལག་གཅིག་ཡིན་ཏེ། ཇི་སྐད་དུ་བཤད་པ། དགེ་སློང་དག་འདི་ལ་ཆོས་ཤེས་པར་གྱིས་ཤིག །འདི་ལྟ་སྟེ། མདོའི་སྡེ་ཞེས་བྱ་བ་ནི་ཀུན་རྫོབ་དང་དོན་དམ་པའི་བདེན་པ་རྒྱ་ཆེ་བ་དག་དང་མཐུན་པར་བསྟན་པའི་ཚིག་དག་ལས་ཚིག་རྐྱང་
པས་སྙིང་པོའི་དོན་མདོར་བསྡུས་པ་ནི་མདོའི་སྡེ་ཡིན་ཏེ། འདི་ལྟ་སྟེ་གང་ཟག་གཅིག་འཇིག་རྟེན་དུ་སྐྱེ་བའོ། །འདུ་བྱེད་ཐམས་ཅད་ནི་མི་རྟག་པའོ། །ཆོས་ཐམས་ཅད་ནི་བདག་མེད་པའོ། །མྱ་ངན་ལས་འདས་པ་ནི་ཞི་བའོ་ཞེས་གོ་རིམས་བཞིན་དུ་དཔེར་བརྗོད་པའོ། །དབྱངས་ཀྱིས་བསྙད་པའི་སྡེ་
ནི་མདོའི་དོན་གྱི་རྗེས་སུ་ཡང་དག་པར་བརྗོད་ཅིང་ལྷག་པར་ཚིགས་སུ་བཅད་པ་དང་ལྡན་པ་ཡིན་ཏེ། འདི་ལྟར་ནོར་ནི་བདུན་ཡིན་ནོ་ཞེས་མདོར་བསྟན་ནས་གསུངས་པ། དད་དང་ཚུལ་ཁྲིམས་ནོར་དང་ནི། །ངོ་ཚ་ཁྲེལ་ཡོད་ལས་སྐྱེས་ནོར། །ཐོས་དང་གཏོང་བའི་ནོར་དག་དང་། །ཤེས་རབ་ནོར་ནི་
བདུན་པ་ཡིན། །སྐྱེས་པའམ་ཡང་ན་བུད་མེད་ཀྱང་། །གང་ལ་ནོར་ནི་ཡོད་གྱུར་པ། །དེ་ནི་ཕོངས་པ་མ་ཡིན་ཞིང་། །དེ་ཡི་འཚོ་བ་དོན་ཡོད་ཡིན། །ཞེས་པའོ། །གཞན་གྱིས་དྲིས་པར་གྱུར་ན་ཚིག་ཀྱང་རྗེས་སུ་བསྟན་པ་ལས་བྱུང་བ་དང་འབྱུང་བར་འགྱུར་བ་དང་། དེ་ལྟར་རྗེས་སུ་བསྟན་པ་ནི་
ལུང་དུ་བསྟན་པ་སྟེ། འདི་ལྟ་སྟེ་དཔེར་ན་ལུང་དུ་བསྟན་པ་རྣམ་པ་བཞི་པོ་མགོ་གཅིག་ཏུ་ལུང་དུ་བསྟན་པ་ལ་སོགས་པའོ། །དེ་ཡང་། ཚུལ་ནི་ཇི་སྲིད་རྒལ་ན་བཟང་། །འདས་པའི་དུས་ན་རྣམ་པར་གཟིགས། །ཞེས་བྱ་བའི་དེ་བཞིན་གཤེགས་པ་བྱུང་བ་དང་། མ་འོངས་པ་ན་ནི་བྱམས་པ་ཞེས་
བྱ་བ་དང་། ད་ལྟར་གྱི་ཀུན་དགའ་བོ་སོང་ལ་དགེ་སློང་འདིའི་གནས་མལ་ཆེན་པོ་ཤོམས་ལ་མེ་ཏོག་དང་། བདུག་པ་དང་། ལྡ་ལྡི་ལ་སོགས་པས་བརྒྱན་པར་གྱིས་ཤིག །གང་གི་ཕྱིར་དེ་ནི་འདི་ཉིད་ཀྱི་ནུབ་མོ་ལ་དགྲ་བཅོམ་པ་ཐོབ་པར་འགྱུར་རོ་ཞེས་པའི་རིམ་པས་བསྟན་པ་ཡིན་ནོ། །སྔ་མ་དང་

འབྲེལ་པ་ལས་བསྟོད་པའི་ཚིག་གི་སྦྱོར་བ་དང་ལྡན་པ་ནི་ཚིགས་སུ་བཅད་པ་སྟེ། འདི་ལྟར་གསལ་རྒྱལ་གྱི་ཚིགས་སུ་བཅད་པ་དང་། བྲག་གུའི་ཚིགས་སུ་བཅད་པ་ལ་སོགས་པ་སྟེ། རྐང་པ་གསུམ་དང་། བཞི་དང་། ལྔ་དང་། དྲུག་གི་རྣམ་པས་བསྟན་པའོ། །གང་ཟག་ལ་ལ་དག་བསྟན་པ་ལ་
གནས་པ་ཁོ་ནའི་ཕྱིར་ཀུན་དུ་བསྟན་པ་དང་དགའ་བ་དང་སྤྲོ་བ་ལ་ལྟོས་ནས་རབ་ཏུ་བསྟན་པ་ནི་ཆེད་དུ་བརྗོད་པ་སྟེ། དཔེར་ན་གླང་པོ་འདིའི་གླང་པོ་ཞེས་བྱ་བ་ལ་སོགས་པ་ལྟ་བུའོ། །མངོན་པར་བརྗོད་པའི་གནས་སྐབས་ཀྱི་ཚིག་ནི་གླེང་གཞི་སྟེ་གཞི་འདི་དང་འབྲེལ་པ་ཞེས་བྱ་བའི་དོན་ནོ། །དེ་ཡང་ཕལ་
ཆེར་འདུལ་བ་དང་རྗེས་སུ་འབྲེལ་པ་དང་། དེའི་གླེང་གཞིར་རབ་ཏུ་འབྱུང་བའི་ཕྱིར་རོ། །དོན་གཞན་རྟོགས་པའི་ཕྱིར་གཞན་གྱི་སྤྱོད་པ་བསྟན་ཅིང་དཔེ་རྒྱ་ཆེར་བརྗོད་པ་དག་ནི་རྟོགས་པ་བརྗོད་པ་སྟེ། དཔེར་ན་པྲ་ཡ་ན་དང་། རིང་པོ་ལེན་དང་། མ་ག་དྷཱ་བཟང་མོའི་རྟོགས་པ་བརྗོད་པ་ལྟ་བུ་དག་གོ། །ཕན་ཚུན་
བརྒྱུད་དེ་འོངས་ནས་བཤད་པའི་སྐྱེས་བུའི་གཏམ་ནི་དེ་ལྟ་བུ་འབྱུང་བ་སྟེ། འདི་ལྟར་བུ་མོ་བདུན་གྱི་རྟོགས་པ་བརྗོད་པ་ལ་སོགས་པ་ལྟ་བུའོ། །བྱང་ཆུབ་སེམས་དཔའི་སྔོན་གྱི་སྐྱེས་བུ་ཀུན་དུ་བརྗོད་པ་ནི་སྐྱེས་པའི་རབས་ཏེ། འདི་ལྟ་སྟེ། ཐམས་ཅད་སྒྲོལ་དང་དྲེད་དང་རི་དྭགས་ལ་སོགས་པའི་སྐྱེས་པའི་རབས་
སོ། །ཆོས་ཀྱི་གཏམ་གྱི་དབྱེ་བ་དང་ལྡན་པ་རྒྱ་ཆེར་བསྟན་པ་ནི་ཤིན་ཏུ་རྒྱས་པ་སྟེ། འདི་ལྟར་ལྔ་དང་། གསུམ་དང་། སྒྱུ་མ་དང་། དྲ་བ་དང་། འཁོར་ལོ་དང་། དྲི་བ་དྲུག་དང་། ཁམས་ཀྱི་དབྱེ་བ་དག་གོ། །དཀོན་མཆོག་གསུམ་གྱི་ལྷག་པའི་ཁྱད་པར་གསལ་བར་བྱེད་
པ་ནི་རྨད་དུ་བྱུང་བའི་ཆོས་ཏེ་འཇིག་རྟེན་ན་རབ་ཏུ་མི་སྤྱོད་པ་ཡོངས་སུ་རྫོགས་པ་སྟེ། འདི་ལྟ་སྟེ། རྨད་དུ་བྱུང་བ་འདུས་པ་ལ་སོགས་པའོ། །མདོ་ལ་སོགས་པ་རྣམས་ཀྱི་དོན་རྣམ་པར་འགྲེལ་ཅིང་མིང་གི་ལན་བརྗོད་པ་ཉེ་བར་སྟོན་པ་ནི་གཏན་ལ་བབ་པར་བསྟན་པ་སྟེ། འདི་ལྟ་སྟེ། འཇིག་རྟེན་པའི་ཆོས་ཀྱི་
མཆོག་གང་གིས་འདི་བརྗོད་ཅེས་བྱ་བ་ལ་སོགས་པའོ། །དེས་ན་དེ་ཉིད་ཀྱི་ཕྱིར་འདི་ནི་གསུང་རབ་ཐམས་ཅད་ཀྱི་གནས་སུ་གྱུར་པའི་ཕྱིར་བུའི་མ་ལྟ་བུ་ཡིན་པས་མ་མོ་ཞེས་བརྗོད་དོ། །ཆོས་ཀྱི་མཚན་ཉིད་མངོན་སུམ་དུ་གྱུར་པའི་ཕྱིར་དང་། ཕྱིན་ཅི་མ་ལོག་པའི་ཆོས་གསལ་བར་བྱེད་པའི་ཕྱིར་ན་མངོན་

པའི་ཆོས་སོ། །གསུང་རབ་ཀྱི་ཚིག་བཅུ་གཉིས་མངོན་པར་བསྡུ་ན་ནི་སྡེ་སྣོད་གསུམ་ཞེས་བརྗོད་དོ། །བསྟན་པ་ཤས་ཆེ་བའི་ཕྱིར་དེ་ལས་གཞན་པའི་གསུང་རབ་ཀྱི་ཚིག་གི་ཡན་ལག་དང་འདྲེས་ན་ཡང་ཆེད་དུ་བརྗོད་པ་ཞེས་བྱ་བའི་མིང་དུ་མི་རུང་བ་ཉིད་མ་ཡིན་ཏེ། མོན་སྲན་
གྲེའུ་ལ་སོགས་པ་དང་འབྲུའི་ཚོགས་འདྲེས་ན་ཡང་མིང་བརྗོད་པ་དེ་བཞིན་ནོ། །འདིར་བརྗོད་པར་བྱ་བ་ནི་གང་ཞིག་ཡིན། གང་གིས་ནི་འདི་གསུངས་ཤིང་གང་གིས་མཉན་པར་བྱ་བའི་ཕྱིར། འདི་སྐད་དུ་བཤད་པ་ཡིན་ཞེ་ན། བཤད་པ་རྒྱལ་བས་གསུངས་པ་ཞེས་བྱ་བ་འདི་ལྟ་སྟེ། སངས་རྒྱས་
ཐམས་ཅད་ཀྱིས་གསུངས་པའོ། །བདུད་བཞི་ལས་རྣམ་པར་རྒྱལ་བས་རྒྱལ་བ་སྟེ། བདེ་བར་གཤེགས་པ་རྒྱལ་བས་གསུངས་པ་ནི་གསུམ་པའི་བསྡུ་བའོ། །རྒྱལ་བས་ཆེད་དུ་བརྗོད་པ་དག་ཅེས་ཁ་ཅིག་ཏུ་བརྗོད་དོ། །མང་པོའི་ཚིག་དང་གཅིག་གི་ཚིག་ཏུ་བརྗོད་པ་ཐ་དད་པ་གཉི་ག་ལ་ཡང་
འདིར་ཉེས་པ་མེད་དོ། །འོ་ན་ཉན་ཐོས་ཀྱིས་བཤད་པ་ཡང་འདི་ན་ཡོད་དེ། གང་གི་ཚུལ་གྱིས་བསྡུས་པ་ལ་སོགས་པ་སྟེ། འཕགས་པ་ལན་ཚྭ་བཟང་པོས་བཤད་པ་དང་། སོ་སོའི་སྐྱེ་བོས་བཤད་པ་ཡང་ཡོད་དེ། གསེར་གྱི་རི་བོས་ཞེས་བྱ་བ་ལ་སོགས་པ་ང་ལས་ནུས་བཤད་པའི་ཕྱིར་ཏེ། དེ་ཇི་
ལྟ་བུ་གཅིག་ཏུ་རྒྱལ་བས་གསུངས་ཤེ་ན། སྨྲས་པ། སྔོན་སངས་རྒྱས་ཀྱིས་བཤད་པའི་ཕྱིར་ཏེ། འདི་ལྟར་དྲུག་ཅུ་པའི་བདག་པོ་རྒྱལ་མོའི་ཚིགས་སུ་བཅད་པ་སྔར་སངས་རྒྱས་ཀྱིས་གསུངས་པ་འདི་ཡང་གནོད་སྦྱིན་དབྱིག་གི་མིག་དང་། ཀླུའི་རྒྱལ་པོ་ཨེ་ལའི་འདབ་གཉིས་ཀྱིས་ཕུད་པ་ལྟ་བུའོ། །
ཚིག་དང་ཡི་གེ་ལ་སོགས་པ་ཇི་ལྟ་བུས་འདི་བཀོད་ཅིང་བསྟན་པ་དང་། རྒྱལ་བ་ཡང་ཇི་ལྟ་བུ་ཡིན་པ་དེ་སྨྲས་པ། ཐམས་ཅད་མཁྱེན་པ་སྟོན་པ་པོ། །ཞེས་བྱ་བ་ལ་སོགས་པ་སྟེ། ཆེད་དུ་བརྗོད་པའི་ཚོམས་འདི་ཞེས་བྱ་བ་ནི་ཚིག་གི་ལྷག་མའོ། །རྟགས་གཉི་ག་ཡིན་པའི་ཕྱིར་འདི་ནི་ཆེད་དུ་བརྗོད་
པའམ་ཆེད་དུ་བརྗོད་པ་དག་ཅེས་བྱ་བ་ནི་འགལ་བ་མེད་པར་སྔར་བསྟན་ཏོ། །མི་ལྷག་པར་དང་མི་ཉུང་བའི་ཡི་གེ་ལ་སོགས་པ་བཀོད་པས་ཇི་ལྟར་སྟོན་པས་བསྟན་པ་དེ་བཞིན་དུ་ཕྱིན་ཅི་མ་ལོག་པར་རབ་ཏུ་བཤད་པར་བྱའོ་ཞེས་པའི་དོན་ཏོ། །གསུངས་པ་ནི་བསྟན་པ་དང་བཤད་པའི་བར་དུའོ། །འདིས་ནི་

བཅོམ་ལྡན་འདས་རྟག་ཏུ་མཉམ་པར་གཞག་པའི་ཕྱིར་སྐྱེ་དགུ་དག་ལ་ཉེ་བར་གནས་པ་ཙམ་གྱིས་རེས་འགའ་མི་སྟོན་ཅིང་ཡིད་བཞིན་གྱི་ནོར་བུ་བཞིན་དུ་སྟོན་པ་ཡིན་ཏེ། ཇི་ལྟར་རྩིག་པ་ལ་སོགས་པ་ལས་སྟོན་པ་ཡིན་ནོ་ཞེས་རྒོལ་བ་འདིས་གསལ་ཏེ། ཚིག་ནི་ཕྱིའི་སྡུག་བསྔལ་ཉིད་ས་
བོན་ཡིན་པའི་ཕྱིར་དང་། མཉམ་པར་གཞག་པ་ཡང་སེམས་ནང་དུ་བལྟས་པ་ཡང་ཡིན་ཏེ། རང་གི་ས་བོན་སྤངས་པ་སྟེ། མེད་པའམ་ས་བོན་གཞན་ལས་འབྲས་བུ་སྐྱེ་བར་མི་འདོད་དོ་ཞེ་ན། རྣམ་པར་རིག་བྱེད་ཀྱང་མཉམ་པར་གཞག་པའི་སེམས་ཀྱིས་འབྲས་བུ་མངོན་སུམ་གྱིས་རྗེས་སུ་
མྱོང་བ་ཡིན་པའི་ཕྱིར་མེའི་འབྲས་བུ་དུ་བ་བཞིན་དུ་དེ་ལ་གང་ན་ཡང་འཁྲུལ་པ་མེད་དོ། །ཉེས་པ་རྣམ་པ་དྲུག་གི་དངོས་པོ་དང་ལྡན་ན་ནི་ཕྱིན་ཅི་མ་ལོག་པའི་དོན་བཤད་པར་ནུས་པ་མི་སྲིད་དེ། འདི་ལྟ་སྟེ་ཀུན་ནས་ཉོན་མོངས་པ་དང་ལྡན་པ་དང་། ཅི་ཡང་མི་ཤེས་པ་དང་། ལེ་ལོ་དང་། སྙིང་རྗེ་མེད་
པ་དང་། མི་བརྟན་པ་དང་། དུས་ཀྱི་མཐའ་རིང་བར་འདོད་པ་ཡིན་ཏེ། འདི་ལྟར་ཀུན་ནས་ཉོན་མོངས་པ་དང་ལྡན་པ་ལས་ནི་གང་ལ་རྗེས་སུ་ཆགས་པས་བུ་ལ་སོགས་པ་དེ་ཉིད་ལ་ནི་ཕྱིན་ཅི་མ་ལོག་པར་སྟོན་ལ། གང་དག་ལ་ནི་མི་སྟོན་པའོ། །འདོད་ཆགས་དང་བྲལ་བ་ཡིན་ན་ཡང་གང་ཤེས་པ་དེ་
ཉིད་ཀྱིས་ནི་བསྟན་པར་བྱའི། གང་མི་ཤེས་པ་དེས་ནི་ཇི་ལྟར་བསྟན་པར་བྱ་སྟེ། འཕགས་པ་མཽད་གལ་གྱི་བུ་ཆེན་པོའི་སློབ་མ་གཉིས་ཇི་ལྟར་ཕྱིན་ཅི་ལོག་ཏུ་བསྟན་པའི་དཔེ་འདིར་བརྗོད་དོ། །སྤྲོ་བ་མེད་པས་ནི་གང་དུ་རྗེས་སུ་མ་ཆགས་ཤིང་ཤེས་པར་གྱུར་ན་ཡང་དེས་བསྟན་པར་མི་ནུས་སོ། །
སྙིང་རྗེ་མེད་པའི་ཕྱིར་སྤྲོ་བ་ལ་སོགས་པ་དང་ལྡན་ཡང་ཇི་སྲིད་དུ་འདི་དག་རྨོངས་པ་དེ་སྲིད་དུ་མཆོག་ཡིན་ནོ་ཞེས་འདི་དག་ལ་སྟོན་པར་མི་བྱེད་དོ། །མི་བསྟན་པས་ནི་བསྟན་པ་ལ་ཞུགས་པར་བྱས་པའི་འོག་ཏུ་ཕྱེད་ཙམ་མི་བསྟན་ནས་ལྷག་མ་གཞན་དག་ཏུ་འཇུག་པའོ། །དུས་རིང་བ་ནི་དུས་མང་པོར་
བདག་འདི་ཉིད་དུ་གནས་པས་གཞན་བསྟན་པར་བྱའོ་ཞེས་སྨྲ་ཞིང་དེ་བཞིན་ཉིད་མི་སྟོན་པ་སྟེ། དེ་བཞིན་ཉིད་སྟོན་པའི་བར་ཆད་ནི་དྲུག་པོ་འདི་དག་གོ། །བཅོམ་ལྡན་འདས་ལ་ནི་འདི་དག་མི་མངའ་སྟེ། དེས་ན་གང་དེས་གསུངས་པ་མ་ལུས་ཤིང་ཕྱིན་ཅི་མ་ལོག་པར་ཞེས་བྱ་བ་ཡིན་ནོ། །དེ་ཉིད་ཀྱང་འཇིག་

རྟེན་ན་སྟོན་པའི་གཙོ་བོ་ཡིན་ནོ་ཞེས་ཚིགས་བཅད་འདིའི་དོན་གྱིས་བསྟན་པའོ། །བདག་གིས་ཆེད་དུ་བརྗོད་པའི་རྣམ་པ་འདི་གསུངས་ཤེ་ན། སྨྲས་པ། བཅོམ་ལྡན་འདས་ཀྱིས་ཞེས་བྱ་བ་ལ་སོགས་པ་འདི་ལྟ་སྟེ། སྔར་བསྟན་པའི་ཉེས་པ་དེ་དག་རྒྱལ་བ་ལ་མི་མངའ་བར་སྟོན་ཏོ། །
ཉོན་མོངས་པ་བཅོམ་པ་དང་ལྡན་པས་བཅོམ་ལྡན་འདས་ཏེ། ཇི་སྐད་དུ་གསུངས་པ། འདོད་ཆགས་དེ་བཞིན་ཞེ་སྡང་དང་། །གཏི་མུག་བཅོམ་པའི་འདྲེན་པ་སྟེ། །སྡིག་པ་བཅོམ་པ་གང་ཡིན་པ། །དེ་ནི་བཅོམ་ལྡན་འདི་ཡིན་ནོ། །ཞེས་པ་སྟེ། འདིས་ནི་སྤངས་པ་ཕུན་སུམ་ཚོགས་པ་བསྟན་ཏོ། །དེ་ཡང་བག་
ཆགས་དང་བག་ལ་ཉལ་རྩ་ནས་སྤངས་པ་ཡིན་ཏེ། འདི་ལ་ཉོན་མོངས་པ་ཟད་པ་མེད་པའོ། །བླ་མ་ལ་སོགས་པ་ལ་བརྟན་པས་ཉོན་མོངས་པ་བསྩལ་བ་ཡིན་ཏེ། ཇི་སྲིད་འཚོའི་བར་དུ་རབ་ཏུ་བྱུང་བ་ཡོངས་སུ་བསྲུང་བར་མཐོང་བའི་ཕྱིར་ཏེ། གང་དག་ལ་ཡང་ཐབས་གང་གིས་དུས་ཉུང་ཟད་ལ་ཀུན་དུ་
སྤྱོད་པ་མ་ཡིན་པ་མེད་དེ་གཏན་དུ་ཀུན་དུ་སྤྱོད་པ་ཡང་དེ་རྣམས་ལ་ཡང་དག་པར་འབྱུང་བ་ནི་མར་མེ་ལྟ་བུ་སྟེ། གང་གི་ཕྱིར་མར་མེ་ནི་དུས་ཇི་ལྟར་དུ་རྩིག་པ་དང་སྣམ་བུ་དང་ལོ་མ་ལ་སོགས་པས་དེ་ལྟར་བསྩལ་ན་མི་ནུས་ཏེ། ཇི་ལྟར་བར་ཆད་ཅན་དག་ལ་ནི་མངོན་པར་མི་གསལ་བ་ཡིན་ནོ། །དེ་ཡང་
གཏན་དུ་བྲལ་བར་གྲུབ་སྟེ། འདི་ལྟར་འདོད་ཆགས་ལ་སོགས་པ་དང་གཏན་དུ་བྲལ་བར་གྲུབ་པ་ཡིན་ན། གཞན་ངན་སོང་དུ་སྐྱེ་བ་ལ་སོགས་པ་འདི་དག་ནི་ངེས་པར་མི་འབྱུང་ངོ་། །དེ་ཡང་གཉེན་པོ་དང་བཅས་པའི་ཕྱོགས་ཡིན་པའི་ཕྱིར་ས་བོན་བཞིན་ཏེ། འདི་ལྟར་མྱུ་གུ་སྐྱེ་བར་ནུས་པའི་ས་
བོན་མི་མཐུན་པའི་ཕྱོགས་མེས་ཚིག་པར་གྱུར་ན་ཐལ་བར་འགྱུར་ཞིང་ཉམས་སོ། །དེ་བཞིན་དུ་འཁོར་བའི་མྱུ་གུ་འབྱུང་ཞིང་སྐྱེ་བར་ནུས་པ་འཇིག་ཚོགས་ལ་ལྟ་བ་སྔོན་དུ་འགྲོ་བའི་འདོད་ཆགས་ལ་སོགས་པའི་ཉོན་མོངས་པ་དག་བདག་མེད་པ་མཐོང་བ་དང་འབྲེལ་པར་གྱུར་ན་རྩ་བ་དང་བཅས་པར་
འགྱུར་ཏེ། དེ་ཡང་གསུངས་པ། ཕྱིན་ཅི་ལོག་གིས་འཁོར་བ་ནི། །རླུང་གིས་སྤྲིན་གྱི་ཚོགས་བཞིན་དུ། །འཁོར་བར་འགྱུར་ཏེ་མི་རྟག་བློས། །དེ་ལས་ལོག་ན་དེ་ལས་གྲོལ། །ཞེས་སོ། །སོ་སོའི་སྐྱེ་བོའི་སེམས་དྲི་མ་དང་བཅས་པ་ཡང་གསེར་ལ་སོགས་པ་བཞིན་དུ་དག་པར་འགྱུར་ཏེ། འདི་

ལྟར་གསེར་དང་གོས་དང་ཁར་སྣོད་ལ་སོགས་པ་དྲི་མ་དང་ལྡན་པ་རྣམས་ནི་མེ་དང་ཆུ་དང་ཐལ་བ་ལ་སོགས་པས་ཡོངས་སུ་དག་པར་འགྱུར་རོ། །དེ་བཞིན་དུ་སོ་སོའི་སྐྱེ་བོའི་སེམས་ཀྱང་རྗེས་སུ་མཐུན་པའི་གཉེན་པོས་སེམས་དྲི་མ་མེད་པ་སྟེ། ཉོན་མོངས་པ་ཉིད་ཀྱིའོ། །གལ་ཏེ་དེ་ནི་མི་འགྲུབ་པོ་ཞེ་
ན། ཚད་མས་གྲུབ་པའི་ཕྱིར་རྩོད་པ་མེད་དེ་གང་གི་ཕྱིར་དེ་ལ་རེ་ཞིག་རང་གི་རྒྱུད་ལ་ནི་མངོན་སུམ་གྱིས་གྲུབ་པ་ཡིན་ཏེ། རང་རིག་པའི་ཕྱིར་སེམས་བཞིན་ནོ། །གཞན་གྱི་རྒྱུད་ལ་ཡང་རྗེས་སུ་དཔག་པར་གྲུབ་པ་ཡིན་ནོ། །དེའི་འབྲས་བུ་མཐོང་བའི་ཕྱིར་མེ་བཞིན་ནོ། །གང་གི་ཕྱིར་དེ་རྣམས་ཀྱི་ནང་གི་རབ་ཏུ་གྲུབ་
པ་ནི་ལུས་ལ་སོགས་པའི་ཉེས་པར་སྤྱོད་པའི་མཚན་ཉིད་ཀྱི་འབྲས་བུ་སྣང་བ་ཡིན་ལ། ཉོན་མོངས་པ་མེད་པ་རྣམས་ལ་ནི་དེ་མེད་པའི་ཕྱིར་ཏེ། ཡང་སྨྲས་པ། འདོད་ཆགས་སོགས་འབྲས་མངོན་སུམ་གྱིས། །བདག་དང་གཞན་ལ་བརྟག་པ་ནི། །རྟགས་དང་རྟགས་ཅན་དུ་བ་ལས། །ལྐོག་ཏུ་གྱུར་པ་མེ་
བཞིན་གནས། །ཞེས་སོ། །འདིར་ཐམས་ཅད་དུ་ཡང་ལུང་ཡིན་ཏེ། སེམས་ཅན་རྣམས་ནི་མ་རིག་པས་བསྒྲིབས་པས་སྲིད་པ་ཡང་དག་པར་སྦྱོར་བ་ཡིན་ཏེ། སྲེད་པས་སྐྱེས་བུ་སྐྱེ་བར་འགྱུར་རོ། །འཆིང་བ་ནི་གསུམ་སྟེ། འདོད་ཆགས་ནི་འཆིང་བའོ། །བཅིངས་པ་ཉིད་ཀྱིས་འཆིང་བའོ། །
བཅིངས་པ་ཉིད་ཀྱིས་འཇིག་རྟེན་འདི་ནས་ཕ་རོལ་དུ་འགྲོ་བའོ་ཞེས་བྱ་བ་ལ་སོགས་པའོ། །སེམས་ཀྱི་ཁྱད་པར་འདི་ཉིད་ནི་འདོད་ཆགས་ལ་སོགས་པ་ཉིད་ཡིན་ནོ་ཞེས་ཤེས་པར་མི་རུང་སྟེ། འདོད་ཆགས་དང་བཅས་པའི་སེམས་ལ་འདོད་ཆགས་དང་བཅས་པའི་སེམས་སོ་ཞེས་ཡང་དག་པ་ཇི་ལྟ་བ་
བཞིན་དུ་ཤེས་སོ་ཞེས་མདོ་གཞན་དག་ལས་གསུངས་པའི་ཕྱིར་སེམས་དང་སེམས་ལྷན་ཅིག་སྐྱེ་བ་ནི་མི་རུང་སྟེ། སེམས་ཅན་གྱི་སེམས་ཀྱི་རྒྱུད་རེ་རེས་འཇུག་སྟེ། གཉིས་པ་ནི་དེ་མ་ཐག་པའི་རྐྱེན་མེད་པའི་ཕྱིར་རོ་ཞེས་བྱ་བ་ལ་སོགས་པའི་ལུང་ལས་བསྟན་པའི་ཕྱིར་རོ། །བདག་ཉིད་ཀྱིས་འདི་
རྗེས་སུ་མྱོང་ངོ་ཞེས་དྲན་པ་དང་ངོ་ཞེས་པ་ལ་སོགས་པ་ཉམས་པར་ཐལ་བར་འགྱུར་རོ། །ལྷ་སྦྱིན་གྱིས་རྗེས་སུ་མྱོང་ན་མཆོད་སྦྱིན་གྱིས་ཡང་དག་པར་དྲན་པ་ལ་སོགས་པ་ནི་ཚོགས་པ་དང་མི་ལྡན་པའི་ཕྱིར་རོ། །གཞུང་མངས་ཀྱིས་དོགས་པའི་ཕྱིར་བཅོམ་ལྡན་འདས་ཀྱིས་གསུངས་པ་ཞེས་བྱ་བ་ནི་

ཡང་མི་བཤད་དེ་གཞག་གོ། །ཐམས་ཅད་མཁྱེན་པ་ཞེས་བྱ་བ་ནི་ཐམས་ཅད་ལུས་པ་མེད་པ་མངོན་སུམ་དུ་གནས་པ་བཞིན་དུ་གསལ་བར་མཁྱེན་པའི་ཕྱིར་ཐམས་ཅད་མཁྱེན་པ་སྟེ། དུས་གསུམ་དང་འདུས་མ་བྱས་གསུམ་ཇི་ལྟ་བ་བཞིན་དུ་རིག་ཅེས་བྱ་བའི་དོན་ཏོ། །
དེས་ན་འདིས་ནི་ཡེ་ཤེས་ཕུན་སུམ་ཚོགས་པ་བསྟན་ཏོ། །ཐམས་ཅད་མཁྱེན་པ་ཉིད་ཀྱང་རིགས་པ་དང་ལུང་གིས་གྲུབ་པ་ཡིན་ཏེ། དེ་ལ་ལུང་ནི་དགེ་སློང་དག་ང་ནི་ཐམས་ཅད་མཁྱེན་པའོ། །ཐམས་ཅད་གཟིགས་པ་སྟེ། དེ་བཞིན་གཤེགས་པ་རྣམས་ལ་མི་མཁྱེན་པའམ་མི་གཟིགས་པའམ། མི་
རིག་པའམ་རྣམ་པར་མི་མཁྱེན་པ་མི་མངའོ། །གང་གི་ཕྱིར་སངས་རྒྱས་ཀྱིས་ནི་འདས་པ་ཡང་གཟིགས་སོ། །དེ་བཞིན་དུ་མ་འོངས་པ་དང་ད་ལྟར་བྱུང་བ་ཡང་གཟིགས་སོ། །དེས་ན་འདུས་བྱས་རྣམས་འཇིག་པའི་ཆོས་ཅན་དུ་གཟིགས་སོ་ཞེས་བྱ་བ་ལ་སོགས་པའོ། །རིགས་པའང་རང་
དང་འབྲེལ་པ་མེད་པ་རྣམ་པར་བཟློག་ཅིང་རྒྱས་པ་སྟེ། ཡེ་ཤེས་གཉེན་པོ་དང་བཅས་པ་ཡིན་པའི་ཕྱིར་མེ་བཞིན་ནོ། །དེ་ནི་བུད་ཤིང་མེད་པའི་ཕྱིར་རྣམ་པར་ལོག་པ་ཡིན་ལ། དེ་བཞིན་དུ་ཡེ་ཤེས་ཀྱང་ཤེས་བྱ་མེད་པའི་ཕྱིར་རོ། །འོན་ཀྱང་ཇི་སྲིད་དུ་ཕྱོགས་སྒྲིབ་གཡོགས་དང་བཅས་པ་ནི་མུན་པས་
ཁྱབ་པ་ཡིན་ཏེ། དེ་སྲིད་དུ་སྣང་བས་ཁྱབ་པ་མེད་དོ། །དེ་བཞིན་དུ་སྲོག་ཆགས་མ་ལུས་པའི་དངོས་པོ་གཏི་མུག་གིས་ཁྱབ་པ་ཡིན་ལ་དེ་ཡང་ཡེ་ཤེས་ཀྱི་རྒྱུད་གཅིག་ལ་གནས་པས་ཁྱབ་པར་བྱེད་པ་ཡིན་ཏེ། དངོས་པོ་མ་ལུས་པ་ལ་ཁྱབ་པར་བྱེད་པའི་ཡེ་ཤེས་གང་ལ་ཡོད་པ་དེ་ནི་ཐམས་ཅད་མཁྱེན་
པའོ། །དྲི་མ་མ་ལུས་དང་བྲལ་བའི་མིག་གིས་ལྟ་བར་འདོད་པར་འགྱུར་ལ། ཡུལ་དག་ལ་བར་ཆད་མེད་པའི་ཕྱིར་དངོས་པོ་མ་ལུས་པའི་ཡུལ་དུ་གྱུར་པའི་ཡེ་ཤེས་རང་བཞིན་གྱིས་གྲུབ་པ་ཡིན་ནོ། །ཡེ་ཤེས་ཀྱི་རབ་ཏུ་དང་ལྷག་པར་གྱི་རིམ་པའི་དབྱེ་བས་འཕེལ་བར་སྣང་བའི་ཕྱིར་ཡང་ཐམས་ཅད་མཁྱེན་
པས་རིག་པ་ཡིན་ནོ། །དངོས་པོ་འཕེལ་བ་ཡོད་ན་དེ་དང་རྗེས་སུ་མཐུན་པའི་ཚོགས་འབྱུང་བ་ཡིན་པས་ལས་ཀྱང་ཤིན་ཏུ་མཐར་ཐུག་པ་ཐོབ་པ་ཡིན་ཏེ་མེ་བཞིན་ནོ། །གང་གི་ཕྱིར་དེ་ནི་ལྷག་པར་ཤས་ཆེ་བར་གྱུར་ན་སྲིད་པ་གསུམ་ཟད་པར་བྱེད་པར་འགྱུར་བའི་སྐབས་ཡོད་དེ་འཇིག་པའི་སྐལ་བ་ནའོ། །དེ་བཞིན་

དུ་ཡེ་ཤེས་ཀྱང་དངོས་པོ་མ་ལུས་པའི་དོན་རྟོགས་ནུས་པའི་གནས་སྐབས་ཐོབ་པ་ཡང་རིག་པ་ཉིད་དོ། །ཐམས་ཅད་མཁྱེན་པ་ཉིད་གྲུབ་པ་ཡིན་ན་དེ་ལྟ་ན་ནི་སེར་སྐྱ་དང་རྐང་མིག་ཅན་ལ་སོགས་པ་ཡང་ཐམས་ཅད་མཁྱེན་པར་ཐལ་བར་འགྱུར་རོ་ཞེ་ན། དེ་ནི་ངེས་པར་ཐམས་ཅད་མཁྱེན་པ་མ་ཡིན་ཏེ།
བདག་དང་བདག་གིར་བྱེད་པ་མ་སྤངས་པས་སོ། །དེ་ནི་འདོད་ཆགས་ལ་སོགས་པ་སྐྱེ་བའི་རྩ་བ་ཡིན་ཏེ། གང་གི་ཕྱིར་དངོས་པོ་ཇི་ལྟ་བ་བཞིན་དུ་ཤེས་པར་མ་གྱུར་པའི་ཕྱིར་ཀུན་དུ་རྨོངས་པ་ཡིན་ཏེ། དེ་ལས་ནི་བདག་ཏུ་འཛིན་པ་འབྱུང་ངོ་། །དེ་ལས་ནི་བདག་གིར་འཛིན་པ་འབྱུང་ལ། དེ་ལས་བདག་ལ་
སོགས་པར་སྲེད་པ་འབྱུང་ངོ་། །དེ་དང་རྗེས་སུ་མི་མཐུན་པ་ལས་ནི་ཞེ་སྡང་འབྱུང་ལ། དེ་ལས་ནི་ང་རྒྱལ་ལ་སོགས་པའོ། །བདག་ཏུ་ལྟ་བ་རྣམས་ཀྱིས་ནི་འཇིག་ཚོགས་ལ་ལྟ་བ་ལ་སོགས་པ་སྤངས་པ་མ་ཡིན་ཏེ། ཉོན་མོངས་པས་སེམས་དྲི་མ་ཅན་དུ་བྱས་པ་ལ་ནི་ཐམས་ཅད་དུ་ཐོགས་པ་མེད་པའི་
ཡེ་ཤེས་དེ་ག་ལ་ཞིག་ཡོད་པས་སོ། །ཤེས་པ་ནི་ཡུལ་མཐའ་དག་མེད་པ་ཡིན་ནོ་ཞེས་རྣལ་འབྱོར་སྤྱོད་པ་དག་སྨྲ་སྟེ། དེ་ནི་འདི་ལྟར་བབ་ཅོལ་ཡིན་ཏེ། གང་ལྷག་པར་བསོད་ནམས་དང་ཡེ་ཤེས་ཀྱི་ཚོགས་བསགས་པའི་ཕྱིར་འབྲས་བུ་ཁྱད་པར་ཅན་དེ་ཡང་ཡང་དག་པར་འཐོབ་པ་ཡིན་ཏེ། ཐུབ་པ་
མཆོག་གིས་ནི་ཤིང་དང་བོང་པར་མཉམ་པ་ཉིད་དུ་རྣམ་པར་གནས་པར་བསྟན་ཏོ། །འདིར་ཡང་སྨྲས་པ། བདག་ནི་ཡ་མཚན་ཅན་མི་བསྟེན། །ཐམས་ཅད་མཁྱེན་ལ་སྐྱབས་སུ་འགྲོ། །གང་ཞིག་ཅུང་ཟད་མི་ཤེས་ཉིད། །ཐམས་ཅད་མཁྱེན་པ་ཇི་ལྟར་འཐོབ། །འདོད་ཆགས་ལ་སོགས་པའི་གཉེན་པོའི་
དངོས་པོ་བཏང་སྙོམས་པའི་བབ་ཅོལ་དང་འདྲ་བར་འགྱུར་ཏེ། དེའི་ཡང་བག་ལ་ཉལ་ནི་སྤངས་པར་ངེས་པ་ཡིན་པས་གང་དུ་ཞེས་བྱ་བ་ལ་སོགས་པས་ངེས་པར་བྱ་བ་ཡིན་ཏེ། རྒྱལ་བ་འདིའི་ཐུགས་ཀྱིས་དེ་བཞིན་ཉིད་མ་ལུས་པའི་ཡུལ་དུ་གྱུར་པ་ཐམས་ཅད་ལ་སྟོན་ཞིང་ཁྱད་པར་དུ་བསྟན་པ་ཡིན་ནོ། །གལ་
ཏེ་མ་ཡིན་ན་ནི་སེམས་ཅན་ལ་ཕན་པའི་ཐབས་ངེས་པར་རབ་ཏུ་གསུངས་པ། ཇི་ལྟར་དེ་ལྟ་བུ་ཡིན་ཏེ། ལེགས་པར་སྤྱོད་པ་བསགས་པའི་ཚུལ་ངེས་པར་དོན་མེད་པར་འགྱུར་རོ། །དེ་གྲུབ་ན་ཕྱི་རོལ་གྱི་དོན་ཡང་གྲུབ་པ་ཡིན་ཏེ། དེ་བས་ན་ཁྱོད་ཀྱི་ཕྱོགས་ངེས་པར་ཉམས་པར་འགྱུར་རོ། །སྐྱོབ་པ་པོ་

ཞེས་བྱ་བ་ནི་གདུལ་བའི་རྒྱུད་ཡོངས་སུ་བསྲུང་བས་སེམས་ཅན་ལ་ཕན་འདོགས་པ་མཆོག་ཏུ་བྱེད་ཅེས་བྱ་བའི་དོན་ཏེ། ཇི་སྐད་དུ་གསུངས་པ་ཉིན་ལན་གསུམ་མཚན་ལན་གསུམ་དུ་སངས་རྒྱས་ཀྱི་སྤྱན་གྱིས་འཇིག་རྟེན་ལ་གཟིགས་ཏེ། རྒྱ་མཚོ་ཆུ་སྲིན་རྣམས་ཀྱི་གནས། །དུས་
རླབས་ཡོལ་བར་འགྱུར་ཡང་སྲིད། །ཅེས་བྱ་བ་ལ་སོགས་པའོ། །དམ་པ་དག་ནི་ནམ་ཡང་གཞན་གྱི་དོན་ཡོངས་སུ་མི་གཏོང་བ་ཡིན་ཏེ། ཇི་སྐད་དུ་གསུངས་པ། ཇི་ལྟར་སྣང་བྱེད་ཉི་མ་དུབ་མེད་རྟ་ཡིས་འཁོར། །རྟག་ཏུ་འཇིག་རྟེན་ཁུར་འཛིན་ས་ནི་སྐྱོ་བ་མེད། །བདག་ཉིད་ཆེན་པོ་རང་དོན་ཅུང་ཟད་མེད་ངང་གིས། །
འཇིག་རྟེན་གཞན་ཕན་དག་ལ་འདི་ལྟར་གཅིག་ཏུ་དགའ། །གཞན་ལ་ཕན་ཕྱིར་འབྲེལ་པས་བརྩོན་བྱེད་རལ་གྱི་ཡི། །ནགས་ཚལ་ཉིད་དུའང་དམ་པ་རྣམས་ནི་བདེ་གནས་ཀྱི། །སྐད་ཅིག་ཙམ་ཡང་ལྷ་ཡི་བུ་མོར་འགྲོགས་པ་དང་། །དགའ་བའི་ཚལ་དག་ཏུ་ཡང་དགའ་བ་མ་ཡིན་ནོ། །ཐུགས་བརྩེ་བ་ཞེས་བྱ་བ་ནི་
གཞན་གྱི་སྡུག་བསྔལ་གཟིགས་པའི་དེ་མ་ཐག་ཉིད་ན་རང་གི་བདེ་བ་ལས་གཡོས་པ་དང་། གནོད་པ་དང་ཞིག་པར་འགྱུར་བ་ནི་ཐུགས་བརྩེ་བ་སྟེ། དེ་ཡང་ཐུགས་རྗེ་ཆེན་པོ་རྣམས་ཞེས་བྱ་བའི་དོན་ཏེ། འདིས་ནི་གཞན་གྱི་དོན་མཛད་པ་ལ་མངོན་པར་བརྩོན་པའི་རྒྱུ་བསྟན་ཏེ། གང་གི་ཕྱིར་ཐུགས་རྗེ་ཆེན་
པོས་དྲངས་ན་དེ་བཞིན་གཤེགས་པ་རྣམས་གཞན་གྱི་དོན་ལ་མི་གཡེལ་བར་འགྱུར་ཏེ། ཇི་སྐད་དུ་གསུངས་པ། ཐུགས་རྗེ་འདོད་བཞོས་ཚོལ་བས་མི་སྐྱོ་བ། །ཐམས་ཅད་མཁྱེན་པའི་རྒྱུད་ལ་གནས་པ་ཡིན། །ཞེས་རྒྱ་ཆེར་གསུངས་པ་དང་། ཞི་ཞིང་དབེན་པ་ལས་ནི་གྲོང་ནང་བྱོན། །ཞེས་བྱ་བ་
ལ་སོགས་པའོ། །ཐུབ་པ་ཞེས་བྱ་བ་ནི་ལུས་ལ་སོགས་པའི་ལས་ཉེ་བར་ཞི་ཞིང་གཡོ་སྤངས་པ་ནི་འཇིག་རྟེན་ན་ཐུབ་པ་ཞེས་རབ་ཏུ་གྲགས་སོ། །འདིར་ཡང་ཐུབ་པ་ནི་གཡོ་སྒྱུ་ལས་ལྡོག་པ་དང་། མི་བརྟན་པ་མེད་ཅིང་ཉེ་བར་ཞི་བ་ནི་སངས་རྒྱས་ཡིན་ནོ་ཞེས་བྱ་བའི་བར་དུ་སྟེ། མི་བརྟན་པ་ལ་དགེ་བ་
མེད། །ཡོན་ཏན་བརྟན་ལ་གནས་པའོ། །ཞེས་པའི་ཚིག་གིས་ནི་གཞན་གྱི་དོན་ལ་མཆོག་ཏུ་བརྟན་པས་བསྒོས་པ་ཡིན་ནོ་ཞེས་མཚོན་པ་ཡིན་ནོ། །སྐུ་ཡི་ཐ་མ་འཛིན་པའི་ཚེ། །ཞེས་བྱ་བ་ལ། མི་རྟག་པས་འཇིག་པ་ནི་ལུས་ཏེ། བདག་གི་དངོས་པོ་ཞེས་བྱ་བའི་དོན་ཏོ། །ཐ་མ་ནི་ཕྱི་མ་སྟེ་

གང་གི་འོག་ཏུ་བདག་སྲིད་པ་གཞན་དང་མི་འབྲེལ་པའོ། །སྐུ་ཡང་ཡིན་ལ་ཐ་མ་ཡང་ཡིན་པས་སྐུ་ཐ་མའོ། །དེ་གང་འཆང་བ་དེ་ནི། སྐུ་ཡི་ཐ་མ་འཛིན་པའོ། །དེས་ན་ཐ་མ་ལ་གནས་པ། །ཞེས་བྱ་བའི་དོན་ཏོ། །འདིས་ནི་ཐུབ་པ་མི་སྡོད་པར་གཞན་ལ་ཕན་འདོད་པའི་རྒྱུ་ཉིད་དུ་བསྟན་ཏོ། །ད་འདིར་ནི་དཔྱད་
པར་བྱ་སྟེ། བཅོམ་ལྡན་འདས་སྐུའི་ཐ་མ་སྤངས་ཏེ་ཡོངས་སུ་མྱ་ངན་ལས་འདའ་འམ་ཞེ་ན། འདིར་སྨྲས་པ། ཡོངས་སུ་མྱ་ངན་ལས་འདའོ་ཞེས་ངེས་པར་བྱ་བ་ཡིན་ཏེ། རིགས་པ་དང་ལུང་ལས་ཤེས་པའི་ཕྱིར་རོ། །དེ་ལ་ལུང་ནི་བད་སྱའི་མདོ་ལས་ཇི་སྐད་དུ་གསུངས་པ། ལ་ལ་ཞིག་ངའི་གན་དུ་ལྷགས་
ཏེ། ཀྱེ་གཽ་ཏ་མ་ངེས་པར་མྱ་ངན་ལས་འདའ་འམ་མི་འདའ་ཞེས་འདྲི་བ་ན། དེ་ལ་ངས་དྲི་བ་ཉིད་ཀྱིས་ལུང་བསྟན་ཏེ། གང་ངའི་མདུན་དུ་མེ་འབར་བ་དང་ལྡན་པ་གང་དང་གང་ཉིད་རྩྭ་དང་ཤིང་ལ་སོགས་པ་ལ་བརྟེན་ནས་འབར་བར་གྱུར་པ་དེ་ཐ་མར་གཞན་གྱིས་མ་བསྣན་ན་ཡོངས་སུ་ཟད་པ་ལྟར་ལེན་པ་མེད་
པས་མྱ་ངན་ལས་འདའ་བར་འགྱུར་ཏེ། དེ་སྔོན་གྱི་གནས་སུ་འགྲོ་བར་འགྱུར་ཞིང་ཕྱིར་མི་འོང་བ་ཡིན་པའི་བར་དང་། དེ་བཞིན་དུ་བད་སྱ་ཚུལ་གང་གིས་དེ་བཞིན་གཤེགས་པ་བཙས་པ་དང་བཅས་པར་གྱུར་པའི་ཚུལ་དེས་དེ་བཞིན་གཤེགས་པ་ཟད་པར་འགྱུར་བ་ཡིན་ཏེ། ཇི་སྲིད་རྣམ་པར་ཤེས་པ་
རྒྱུན་དུ་སྐྱེ་བ་མེད་པའི་ཆོས་ལ་དེ་སྔ་མའི་གནས་སུ་འགྲོ་བ་ཡིན་ནོ་ཞེས་རྒྱ་ཆེར་གསུངས་སོ། །རིགས་པ་ནི་གང་གིས་རྒྱུན་འཇུག་པ་དེ་རེ་ཞིག་ན་གཏན་དུ་ཡང་ཆད་པ་ཡིན་ཏེ། ཇི་ལྟར་ས་བོན་ལྟ་བུར་དེ་བཞིན་གཤེགས་པའི་བདག་གི་རྒྱུན་འཇུག་པ་དེ་ཡང་རེ་ཞིག་ན་རྩ་བ་དང་བཅས་པ་ཆད་པར་འགྱུར་རོ། །
སྐུ་ཡི་ཐ་མ་འཛིན་པའི་ཚེ། །ཞེས་བྱ་བ་བཅོམ་ལྡན་འདས་ལ་ནི་དགོངས་པ་ཅུང་ཟད་ཀྱང་ཡོད་པར་མི་སྣང་སྟེ། སངས་རྒྱས་བཅོམ་ལྡན་འདས་རྣམས་ནི་དགོངས་པ་མེད་པར་སྐད་ཅིག་ཙམ་ཡང་གནས་སྐབས་ལ་སོགས་པའི་བྱ་བ་མི་འཛིན་ཏེ། གཞན་ལ་ཕན་པའི་བྱ་བ་འདིའི་དགོངས་པ་ཉིད་ཀྱི་གནས་
སྐབས་ཀྱིས་སེམས་ཅན་གཅིག་གིས་ཕན་པ་ཡོད་པར་གྱུར་ན་ཡང་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པར་མི་འགྱུར་བའི་ཕྱིར་རོ། །གང་གི་ཚེ་འཁོར་བའི་ནགས་ཚང་ཚིང་ན་སངས་རྒྱས་ཀྱི་གདུལ་བྱའི་སེམས་ཅན་གཅིག་ཀྱང་མ་ལུས་པར་གྱུར་པ་དེ་ཉིད་ཀྱི་ཚེ་ན་ཐུབ་པ་མཆོག་ཡོངས་

སུ་མྱ་ངན་ལས་འདའ་བར་འགྱུར་རོ་ཞེས་བྱ་བ་ནི་ཡང་དག་པར་བསྟན་པའོ། །གཞན་གྱི་དོན་བྱས་པའི་ཕྱིར་ཡང་དག་པར་རྫོགས་པའི་བྱང་ཆུབ་ཐོབ་པ་ཡིན་ཏེ། ཇི་སྐད་གསུངས་པ། བདག་ཉིད་རྒལ་ཅིང་འགྲོ་བ་ཐམས་ཅད་བསྲུང་། །གང་ཕྱིར་ལྡོངས་པའི་ལམ་ནི་སྟོན་བྱེད་
ཅིང་། །དེ་ཉིད་མངོན་སུམ་བྱས་པས་ཁྱོད་ཀྱིས་ནི། །ད་ནི་འབྲས་བུས་མགོན་དང་གཞན་ཕན་སྤྱོད། །ཅེས་པའོ། །དེ་བས་ན་སངས་རྒྱས་ཀྱི་མཛད་པ་མ་ལུས་པར་མཛད་པའི་ཕྱིར་མྱ་ངན་ལས་འདས་པ་ཉིད་དུ་བཞུགས་པ་ཡིན་ནོ། །ཡང་སྨྲས་པ། གཞན་ལ་ཕན་པ་སྤྱོད་བྱེད་ཅིང་། །ཡུན་རིངས་དུས་
སུ་མངོན་དགོངས་པ། །ཐུབ་པ་མྱ་ངན་ལས་འདས་ཏེ། །བུད་ཤིང་མེད་པའི་མེ་བཞིན་ནོ། །རྒ་དང་འཆི་བའི་འཇིགས་པ་དག །ཡོངས་སྤངས་ཐར་པའི་འདུ་ཤེས་ཀྱིས། །རིན་ཆེན་གླིང་བཞིན་ཤེས་རབ་ཅན། །བྱ་བ་བྱས་ནས་འདིར་འཇུག་གོ། །བཅོམ་ལྡན་འདས་ཀྱིས་འདི་སྐད་གསུངས་ཞེས་
བསྟན་པ་ལ་དེ་ཇི་སྐད་དུ་གསུངས་པ་ཡིན་ཞེ་ན་སྨྲས་པ། ཀྱེ་མ་འདུ་བྱེད་ཅེས་བྱ་བ་ལ་སོགས་པ་སྨོས་ཏེ། ཚིགས་བཅད་འདིའི་གླེང་གཞི་ནི་བཅོམ་ལྡན་འདས་རྒྱལ་པོའི་ཁབ་ཀྱི་རི་ངོས་ཡངས་ན་བཞུགས་ཏེ། དེར་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་
འདུ་བྱེད་ཐམས་ཅད་ནི་མི་རྟག་པ་སྟེ། ཇི་སྲིད་དུ་རྣམ་པར་གྲོལ་བར་གྱིས་ཤིག་ཅེས་བྱ་བའི་བར་དུའོ། །དགེ་སློང་དག་སྔོན་བྱུང་བ་ན་རི་འདིའི་མིང་པྲ་ཙི་ན་བང་ཤ་ཞེས་བྱ་བར་གྱུར་ཏེ། གང་པྲ་ཙི་ན་བང་ཤའི་ཉེ་འཁོར་ན་མི་རྣམས་ཀྱང་གནས་པར་གྱུར་ཏེ། མི་དེ་དག་གི་མིང་ནི་ཏི་མི་ར་ཞེས་བྱ་བར་
གྱུར་ཏོ། །ཏི་མི་རའི་མི་རྣམས་ཀྱི་ཚེའི་ཚད་ནི་ལོ་སྟོང་ཕྲག་བཞི་བཅུ་ཡིན་ནོ། །དགེ་སློང་དག་ཏི་མི་རའི་མི་རྣམས་ཀྱིས་རི་པྲ་ཙི་ན་བང་ཤ་ལ་འཛེག་པ་དང་བབས་པ་ཡང་ཞག་བཞི་བཞིས་འཛེག་ཅིང་བབས་སོ། །དེའི་ཚེ་ན་སྟོན་པ་ལོག་པར་དད་སེལ་ཞེས་བྱ་བ་འཇིག་རྟེན་དུ་བྱུང་སྟེ། དགེ་སློང་
དག་རྒྱ་ཆེར་བལྟས་ན་ཇི་སྲིད་དུ་རི་དེའི་མིང་ཡང་ནུབ་པར་གྱུར་ཏོ། །མི་དེ་དག་ཀྱང་དུས་ལས་འདས་སོ། །སྟོན་པ་དེ་ཡང་ཡོངས་སུ་མྱ་ངན་ལས་འདས་སོ། །ཚེ་ཡང་ཡོངས་སུ་ཉམས་པར་གྱུར་ཏོ། །དེ་བཞིན་དུ་དགེ་སློང་དག་མི་རྟག་པ་ནི་ཇི་ཙམ་ན་རི་དེའི་མིང་ནི་བང་ཀ་ཞེས་བྱའོ། །མི་རྣམས་ནི་ཨ་བི་

ཀ་ཞེས་བྱའོ། །རི་དེ་ལས་བབས་ཤིང་འཛེག་པ་ཡང་ཉིན་ཞག་གསུམ་གསུམ་གྱིས་སོ། །ཚེའི་ཚད་ཀྱང་ལོ་སྟོང་ཕྲག་སུམ་ཅུ་སྟེ། སྟོན་པ་གསེར་ཐུབ་བྱུང་བར་གྱུར་ཏོ། །ཡང་རི་དེའི་མིང་ནི་ངོས་བཟངས་ཞེས་བྱ་བར་གྱུར་ཏོ། །མི་རྣམས་ཀྱི་མིང་ནི་རོ་ཧི་ཏ་ཨ་ཤྭ་ཞེས་བྱའོ། །འཛེག་པ་དང་བབས་
པ་ཡང་ཉིན་ཞག་གཉིས་གཉིས་སོ། །དེའི་ཚེའི་ཚད་ནི་ལོ་སྟོང་ཕྲག་ཉི་ཤུ་སྟེ། དེ་བཞིན་གཤེགས་པ་འོད་སྲུངས་ཞེས་བྱ་བ་གཤེགས་སོ། །དེ་བཞིན་དུ་ད་ལྟར་རིའི་མིང་ནི་ངོས་ཡངས་ཞེས་བྱའོ། །མིའི་མིང་ནི་མ་ག་དྷཱ་པ་ཞེས་བྱའོ། །རི་འདིའི་འཛེག་པ་དང་བབས་པ་ལ་ནི་ཡུད་ཙམ་རེ་རེའོ། །མི་རྣམས་ཀྱི་
ཚེ་ལོ་ནི་བརྒྱ་སྟེ། སྟོན་པ་ནི་ང་ཉིད་ཡིན་ནོ། །པྲ་ཙི་བང་ཤ་ཏི་མི་ར། །བང་ཀ་དང་ནི་ཨ་བི་ཀ །ངོས་བཟངས་རོ་ཧི་ཏཱ་ཤྭ་དང་། །ངོས་ཡངས་མ་ག་དྷཱ་དག་གི། །དེ་ཡི་མིང་ནི་འདས་པ་སྟེ། །མི་དེ་དག་ཀྱང་དུས་ལས་འདས། །ཚེ་ཡང་ཉམས་ཏེ་སངས་རྒྱས་ཀྱང་། །ཡོངས་སུ་མྱ་ངན་ལས་འདས་གྱུར། །ཀྱེ་མ་འདུ་
བྱེད་རྣམས་མི་རྟག །ཅེས་བྱ་བ་ལ་སོགས་པ་ལ་རྒྱལ་པོ་ཞིག་གི་བུ་མོ་སྐྱེ་བོ་རྣམས་ཀྱི་སྙིང་དུ་རབ་ཏུ་སྡུག་པ་ཞིག་ཡོད་པ་ལས་དེའི་གཟུགས་ཕུན་སུམ་ཚོགས་པ་ལ་སོགས་པ་ཐོས་ནས་རྒྱལ་པོ་ཆེན་པོ་བཞི་དཔུང་དང་བཅས་ཏེ་འབྱོར་པ་ཆེན་པོས་དེའི་ཡུལ་དུ་འོངས་ནས་དེ་བསླངས་པ་དང་ཇི་ཙམ་ན་བུ་མོ་དེ་རང་
ཉིད་ཁྱོ་འདམ་པའི་ཕྱིར་ཚོགས་ཀྱི་ནང་དུ་ཞུགས་སོ། །དེ་དག་གིས་མཐོང་བ་དང་སྔོན་མ་ཐོས་པའི། ཀྱེ་མ་འདུ་བྱེད་རྣམས་མི་རྟག །ཅེས་བྱ་བ་ལ་སོགས་པའི་ཚིག་རྐང་བཞི་མངོན་དུ་གྱུར་ཏེ། དེ་ཡང་ཚིག་རྐང་རེ་རེ། རེ་རེའི་དབང་དུ་བྱས་ནས་སྨྲས་པ་ཡིན་ཏེ། དེ་ཐོས་པ་ལས་རྒྱལ་པོ་དེ་དག་གིས་ཀྱང་
འཕགས་པའི་བདེན་པ་བཞི་རྟོགས་ཏེ་རྒྱུན་དུ་ཞུགས་པའི་འབྲས་བུ་ཐོབ་བོ། །བུ་མོ་དེ་ཡང་འཁོར་ལྔ་དང་བཅས་པར་རབ་ཏུ་བྱུང་སྟེ་དགྲ་བཅོམ་པའི་འབྲས་བུ་ཐོབ་བོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཚིགས་བཅད་འདི་ལེགས་པར་ཟུང་ཤིག །འདི་ནི་སྔོན་གྱི་དེ་བཞིན་
གཤེགས་པ་རྣམས་ཀྱིས་ཀྱང་གསུངས་པ་ཡིན་ནོ་ཞེས་པ་སྟེ། གཞན་དག་ནི་དེའི་གླེང་གཞི་འདི་ལྟར་འཆད་དོ། །དེ་ལ། ཀྱེ་མ་འདུ་བྱེད་རྣམས་མི་རྟག །ཅེས་བྱ་བ་ལ། འདུ་བྱེད་ནི་རྣམ་པ་གསུམ་སྟེ། འདས་པ་དང་མ་འོངས་པ་དང་ད་ལྟར་བྱུང་བའི་དབྱེ་བས་སོ། །དེ་ལ་འདས་པའི་མི་རྟག་

པ་ནི་སྐྱེས་ནས་འཇིག་པ་ཡིན་པའི་ཕྱིར་དེ་ཕྱིས་ཀྱང་སྐྱེ་བ་མེད་པ་དང་ཟད་པ་མེད་པ་སྟེ། དེ་དག་དེས་ན། སྐྱེ་ཞིང་འཇིག་པའི་ཆོས་ཅན་ནོ། །མ་འོངས་པ་ན་ཡང་སྐྱེ་ཞིང་འཇིག་པའི་ཆོས་ཅན་ཏེ། སྐྱེ་བར་འགྱུར་བའི་ཕྱིར། སྐྱེས་པ་ནི་འཇིག་པའི་ཆོས་ཅན་ཡིན་ཏེ། འཇིག་པར་འགྱུར་
བའི་ཕྱིར་ཡང་སྐྱེ་བ་མེད་དེ། དེ་ཉིད་ཀྱི་ཕྱིར་དེ་དག་མཉམ་པ་ཉིད་དུ་བརྗོད་དེ་སྐྱེ་ཞིང་འཇིག་པའི་ཆོས་ཅན་གང་དག་ཡིན་པ་དེ་ནི་མ་འོངས་པའི་སྐྱེ་ཞིང་འཇིག་པའི་ཆོས་ཅན་དུ་བསྟན་ཏེ། ཅི་སྟེ་སྐྱེ་བ་ཉི་ཚེར་ཟད་ཅིང་འགག་པར་མི་འགྱུར་རམ་ཞེ་ན། སྨྲས་པ། སྐྱེས་ནས་འཇིག་པར་འགྱུར་བ་སྟེ། །ཞེས་བྱ་བ་
སྨོས་སོ། །གང་སྐྱེས་པར་གྱུར་པ་དེ་ཉིད་ཀྱི་ཕྱིར་འགག་པར་འགྱུར་བ་སྟེ་གང་ཡང་སྐྱེས་ནས་འགག་པར་མི་འགྱུར་བ་དེ་མེད་དེ། གང་དེ་དག་ཐམས་ཅད་ནི་སྡུག་བསྔལ་བའོ། །ད་བདེ་བ་གང་ཡིན་ཞེ་ན། དེ་སྨྲས་པ། དེ་དག་ཅེས་བྱ་བ་སྨོས་ཏེ་མ་འོངས་པའི་འདུས་བྱས་དེ་དག་གི་རྒྱུ་ཟད་པར་བྱས་
པའི་ཕྱིར་གཞན་དུ་སྐྱེ་བ་ཟད་པར་བྱས་པ་དེ་ནི་བདེ་བ་ཡིན་ཏེ། འདི་ནི་ཚིགས་བཅད་ཀྱིས་བསྡུས་པའི་དོན་ནོ། །ཡན་ལག་གི་དོན་ནི་ངེས་པར་རྒྱུ་དང་འབྲས་བུ་སྤངས་པའི་ངོ་བོ་ནི་རྟག་པའོ། །དེ་ལས་གཞན་པ་ནི་མི་རྟག་པ་སྟེ། སྐད་ཅིག་མ་དང་སྐྱེས་མ་ཐག་པ་དང་། ཡུན་མི་རིངས་པར་གནས་པ་
ཞེས་བྱ་བའི་བར་དུའོ། །ཀྱེ་མ་ཞེས་བྱ་བ་ནི་སྐྱོ་བ་བསྐྱེད་པ་སྟེ། འདི་དག་སྡུག་བསྔལ་ལོ་ཞེས་བྱ་བའི་དོན་ཏོ། །གང་མི་རྟག་པ་དེ་ནི་སྡུག་བསྔལ་ལོ་ཞེས་མདོ་ལས་གསུངས་ཏེ། མི་རྟག་པ་ཉིད་ཐུགས་རྗེ་ཆེན་པོའི་ཡུལ་ཡིན་གྱི། སྡུག་བསྔལ་གྱིས་ཉེ་བར་གདུངས་པ་ཉིད་ཀྱི་དོན་མ་ཡིན་པར་
མཚོན་པའོ། །ཡང་ན་རྣམ་པ་འདི་ལྟར་ཐུགས་བརྩེ་བ་ཡིན་ཏེ། སེམས་ཅན་གྱི་འདུ་བྱེད་དེའི་ཡུལ་ལ་ཕན་འདོགས་པར་མཛད་པའི་ཐུགས་རྗེ་བསྐྱེད་པར་བྱའོ་ཞེས་བྱ་བའི་དོན་ཏོ། །འདུ་བྱེད་ནི་ཚོགས་པ་ལས་སྐྱེས་པའི་ངོ་བོ་ཕུང་པོ་ལྔའོ། །སྐྱེ་བ་ནི་འབྱུང་བའོ། །འཇིག་པ་ནི་ཟད་པའོ། །ཆོས་དེ་
གཉིས་ཀྱིས་ངེས་པར་བསྒོས་པའི་ཚུལ་གང་ལ་ཡོད་པ་དེ་ནི་སྐྱེ་ཞིང་འཇིག་པའི་ཆོས་ཅན་ཏེ། སྐྱེ་བ་དང་འཇིག་པའི་གནས་སྐབས་ཀྱིས་རྗེས་སུ་བསྒོས་པ་ཞེས་བྱ་བའི་དོན་ཏེ། རྒ་བའི་ཆོས་ལ་སོགས་པ་བཞིན་དུ་སྟེ། ཇི་ལྟར་ངེས་པར་རྒ་བ་འབྱུང་བ་གང་ཡིན་པ་དེ་ནི་རྒ་བའི་ཆོས་ཞེས་བྱ་བ་དེ་བཞིན་ནོ། །

སྐྱེ་བ་མེད་པའི་ཆོས་ནི་དེ་དང་འདྲ་བ་ལས་འདུས་བྱས་ཞེས་བྱ་བ་བརྟགས་ཏེ། སྟོན་གྱི་སྤྲིན་ལ་ཆུ་འཛིན་ཞེས་བཏགས་པ་བཞིན་ནོ། །གང་སྐྱེས་པ་ནི་ད་ལྟར་བྱུང་བའི་དུས་སུ་འོངས་ནས་མྱོང་བ་ཞེས་བྱ་བའི་དོན་ཏེ། གང་སྐྱེས་པ་དེ་ནི་ངེས་པར་འགག་པར་འགྱུར་རོ་ཞེས་བསྒྲུབ་པའི་ཕྱིར་རོ། །ནས་ཞེས་བྱ་
བའི་སྒྲ་ནི་གང་གི་ཕྱིར་ཞེས་བྱ་བའི་དོན་ཡང་ཡིན་ཏེ། སྐྱེས་པ་དང་ལྡན་པ་ནི་འགག་པ་ཡིན་ནོ་ཞེས་སྟོན་ཏེ་འགག་པ་དང་ཞིག་པར་འགྱུར་བའོ། །འོན་ཀྱང་དེ་ལྟར་བརྗོད་པར་བྱ་བ་ལ་ཇི་ལྟར་འདི་དག་མི་རྟག་པ་ཡིན་ཞེ་ན། གང་གི་ཕྱིར། སྐྱེ་ཞིང་འཇིག་པའི་ཆོས་ཅན་ཡིན། །ཞེས་བྱ་བ་སྟེ། སྐྱེས་པ་ནི་ངེས་
པར་འཇིག་པའི་ཕྱིར་བུམ་པ་ལ་སོགས་པ་བཞིན་ནོ། །དེ་ལས་བཟློག་པ་ནི་ནམ་མཁའོ། །འདི་གཉིས་ཅིག་ཅར་བྱུང་བ་ཡིན་ཏེ། སྐྱེ་བའི་དུས་ཉིད་འགག་པའི་དུས་ཡིན་པས་དེས་ན་འདས་པ་དང་། ད་ལྟར་བྱུང་བ་གཉིས་གཅིག་པ་ཡིན་ནོ་ཞེས་བསྟན་ཏོ། །སྐྱེས་ནས་འཇིག་པར་འགྱུར་བ་སྟེ། །ཞེས་བྱ་
སྟེ། ད་ལྟར་བྱུང་བར་གྱུར་ནས་འདས་པར་འགྱུར་རོ་ཞེས་བྱ་བའི་དོན་ནོ། །འདི་དག་ནི་སྡུག་བསྔལ་བ་ཡིན་ཏེ། ཐམས་ཅད་ཀྱང་མི་རྟག་པའི་ཕྱིར་རོ། །གཞན་ལ་རག་ལས་པ་ནི་བདེ་བ་མེད་པའི་ཕྱིར་ཡང་ངོ་། །དེ་ལྟ་ན་ནི་ལམ་ཡང་སྡུག་བསྔལ་ཐོབ་པར་འགྱུར་རོ་ཞེ་ན། བདེན་པའི་ལམ་གྱི་གནས་
སྐབས་ཀྱི་སྡུག་བསྔལ་ནི་འཕགས་པ་རྣམས་དང་མི་མཐུན་པ་མེད་པའི་ཕྱིར་རོ། །གཞན་ནི་སྡུག་བསྔལ་མ་ཡིན་ཏེ། གང་མི་རྟག་པ་དེ་ཐམས་ཅད་སྡུག་བསྔལ་བ་ཡིན་ནོ་ཞེས་པའི་ཚིག་གིས་སོ། །ཇི་ལྟར་སྡུག་བསྔལ་བ་ནི་ཁ་བ་ལ་སོགས་པའི་བཏུང་བ་འཐུངས་ན་ནད་ཉེ་བར་ཞི་བ་དང་འབྲེལ་བ་
ཡིན་པའི་ཕྱིར་སྨན་བསྟེན་པ་ནི་བདེ་བ་ཞེས་བརྗོད་དེ། དེ་བཞིན་དུ་ལམ་ལ་སོགས་པ་ལ་ཡང་བརྗོད་དོ། །དེའི་སྡུག་བསྔལ་འདུས་བྱས་རྣམས་ཉེ་བར་ཞི་ན་ཁྱད་པར་གྱི་ཚུལ་གྱིས་གྲུབ་པའི་ཡེ་ཤེས་ཀྱིས་ཐོབ་པའི་ཞི་བ་ནི་ཉེ་བར་ཞི་བ་སྟེ། སོ་སོར་བརྟགས་པས་ཐོབ་པའི་འགོག་པའོ། །དེ་ན་བདེ་བ་
ཡིན་ཏེ་ཕུང་པོ་མེད་པ་ནི་བདེ་བའི་མཆོག་གོ་ཞེས་ལུང་ལས་སྨོས་པའི་ཕྱིར་རོ། །ཡང་སྨྲས་པ། མི་གཙང་ཆེའམ་ཆུང་ཡང་རུང་། །གཙང་མ་འདོད་པ་སྟེན་མི་བྱེད། །དེ་བཞིན་མིང་དང་གཟུགས་སྐད་ཅིག །ཕྲ་རབ་བདེ་བ་འདོད་པ་ཡི། །བདག་ཉིད་ཆེན་པོས་ཐམས་ཅད་དུ། །མ་བསྟེན་

འཁོར་བ་སྤོང་བར་འགྱུར། མི་གཙང་ཅུང་ཟད་མ་བོར་ཡང་། །ཁྱིམ་དེ་གཙང་ཞེས་བརྗོད་པ་མིན། །ཐར་པ་མིག་གིས་གཟུང་མ་ཡིན། །བསྟན་དང་ངག་གི་ལམ་ཡང་མིན། །ལས་དང་ཉོན་མོངས་ཤེས་རབ་ཀྱིས། །ཟད་པས་དེ་ཡང་ཐོབ་པར་འགྱུར། །ཇི་ལྟར་དམུས་
ལོང་གཟུགས་བརྗོད་པ། །སྔོན་གྱི་སེར་པོ་ལ་སོགས་པས། །གང་དུའང་ཡིད་ཆེས་མི་འགྱུར་ཏེ། །བྱིས་པ་མྱ་ངན་དེ་མི་འདའ། །ཞེས་སོ། །གླེང་གཞི་གཉིས་པ་ནི་དེ་ལ་བརྟེན་ནས་ཡང་ཕྱིན་ཅི་ལོག་བཞིའི་གཉེན་པོ་བསྟན་པའི་ཚུལ་དུ་བྱས་པ་མཚོན་པ་ཡིན་ཏེ། འདི་ལྟར་རྒྱལ་པོ་དེ་དག་རྟག་པ་དང་།
གཙང་བ་དང་། བདག་དང་། བདེ་བ་སྟེ་འདུས་བྱས་རྣམས་ལ་ཕྱིན་ཅི་ལོག་ཏུ་གྱུར་པ་དེའི་དོན་དུ་དེས་གོ་རིམས་བཞིན་དུ་ཚིག་རྐང་རེ་རེ་བསྟན་པ་ཡིན་ཏེ། དེ་ལ་མི་རྟག་པ་ཞེས་བྱ་བ་འདིས་ནི་མི་རྟག་པ་ལ་རྟག་པར་ཕྱིན་ཅི་ལོག་པའི་གཉེན་པོ་བསྟན་པའོ། །མི་རྟག་པའི་རྣམ་པས་ངེས་པར་ཡིད་བྱུང་
བར་གྱུར་པ་དང་ལྡན་པ་ཡིན་པས་དེ་མཚོན་པའི་ཕྱིར་ཀྱེ་མ་ཞེས་བྱ་བའི་སྒྲ་སྨྲོས་སོ། །ཚིག་རྐང་གཉིས་པས་ནི་གཙང་བར་ཕྱིན་ཅི་ལོག་པ་སྟེ་མི་རྟག་པས་གཙང་བ་བསལ་བའི་ཕྱིར་འདུ་བྱེད་སྐྱེ་བས་སོ། །ཚིག་རྐང་གསུམ་པས་ནི་བདག་ཏུ་རྨོངས་པ་དག་ལ་སྐྱེ་བ་དང་། འཇིག་པ་དང་ལྡན་པའི་ཕྱིར་
འདུ་བྱེད་ཐམས་ཅད་ནི་བདག་མེད་པ་ཡིན་ནོ་ཞེས་རྟོགས་པར་འགྱུར་རོ། །ཐ་མས་ནི་སྡུག་བསྔལ་ལ་བདེ་བར་ཕྱིན་ཅི་ལོག་པ་ལ་ཐར་བ་ཉིད་ནི་སྡུག་བསྔལ་གསུམ་དང་གཏན་དུ་བྲལ་ཞིང་དོན་དམ་པའི་བདེ་བ་ཡིན་པའི་ཕྱིར་མུན་པ་མ་ལུས་པ་དང་བྲལ་ཞིང་ཤིན་ཏུ་འོད་གསལ་བ་ཤར་བ་བཞིན་ནོ། །འདུས་
བྱས་ཀྱི་དོན་གྱི་དེ་ཉིད་ནི་ཡིད་དུ་མི་འོང་བ་ཡིན་ན་ཇི་ལྟར་འདི་ལ་ཁྱེད་ཅག་བློ་རྨོངས་པར་གྱུར་ཅེས་དེ་དག་ལ་སྨྲས་པར་གྱུར་ཏོ། །གནས་སྐབས་ཀྱི་རིམ་པ་བཞིན་དུ་ཚིགས་བཅད་འདིས་འཕགས་པའི་བདེན་པ་བཞི་ཡོངས་སུ་གསལ་བར་བྱེད་དོ་ཞེས་ཀྱང་གཞན་དག་འདོད་དོ། །དེ་ལ་དང་པོའི་ཚིག་
རྐང་གིས་ནི་ཀུན་འབྱུང་བསྟན་ཏེ། གལ་ཏེ་དེ་རྟག་པར་གྱུར་ན་ནི་འབྲས་བུའི་དུས་ན་ཅིའི་ཕྱིར་མི་སྣང་ཞེས་བྱ་བའོ། །གཉིས་པས་ནི་སྡུག་བསྔལ་ཡིན་ཏེ། འབྲས་བུར་གྱུར་པ་ཉིད་ཀྱིས་སྐྱེ་བ་དང་འགག་པས་སོ། །གསུམ་པས་ནི་ལམ་སྟེ་འདུས་བྱས་ཉིད་ཀྱི་ཕྱིར། ད་ལྟར་བྱུང་བའི་དུས་ན་དེ་

དང་ལྡན་པས་སོ། །བཞི་པས་ནི་འགག་པ་སྟེ་དགེ་བ་རྟག་པའི་ཕྱིར་དེ་ནི་བདེ་བའོ། །འདིར་ཚོང་དཔོན་གྱི་བུ་སྤུན་བཞི་ཞིག་གི་དཔེར་བརྗོད་པ་ཡིན་ནོ། །དེ་ཡང་འདི་སྐད་ཐོས་ཏེ། མཉན་དུ་ཡོད་པ་ན་ཚོང་དཔོན་གྱི་བུ་སྤུན་བཞི་ཞིག་གནས་ཏེ། ཕྱུག་ཅིང་རྒྱ་ཆེ་བའི་ནོར་དང་ལྡན་པ་ལས་དེ་དག་གིས་ཐོས་
པ་འདི་ལྟ་སྟེ། བཅོམ་ལྡན་འདས་བསོད་ནམས་ཀྱི་ཞིང་ཆེན་པོ་དེ་ལས་ཅུང་ཟད་ཙམ་ཕུལ་ཡང་མངོན་པར་འདོད་པའི་འབྲས་བུ་ཡིད་ལ་རེ་བཞིན་དུ་འཐོབ་པ་ཡིན་ནོ་ཞེས་ནས་དེས་བསྟན་པ་མཉན་ཏེ་སྡུག་པ་ཡོངས་སུ་བཏང་ནས་འགྲོ་བར་བྱའོ་ཞེས་བསམས་ཏེ། དེ་དག་གིས་བསོད་སྙོམས་རྒྱ་ཆེ་བ་དག་
བླངས་ཏེ་ཁྱིམ་ནས་བྱུང་ནས་བཅོམ་ལྡན་འདས་སྤྱོད་ཡུལ་དུ་གཤེགས་པ་ལ་ལྷུང་བཟེད་བཀང་སྟེ་ཕུལ་ནས་ཡང་མྱུར་བ་ཉིད་དུ་རང་གི་ཁྱིམ་དུ་ཞུགས་པར་གྱུར་ཏོ། །རིམ་གྱིས་ཉི་མ་བཞི་ལ་རེ་རེའི་དབང་དུ་བྱས་ནས་ཐུབ་པས་ཚིག་རྐང་རེ་རེ་བསྟན་ཏོ། །ཇི་ཙམ་ན་དེ་དག་ཁྱིམ་དུ་ལྷགས་པ་དང་གཏམ་
དུ་བརྗོད་དེ། བདག་ཅག་གིས་ནི་རྙེད་པ་ལེགས་པར་རྙེད་དེ་བདག་ཅག་གིས་བསམ་པ་གྲུབ་བོ་ཞེས་སོ། །དེ་ན་གཅིག་གིས་སྨྲས་པ། བདག་གིས་ནི། ཀྱེ་མ་འདུ་བྱེད་རྣམས་མི་རྟག །ཅེས་བྱ་བ་དེ་ཙམ་ཞིག་ཐོས་སོ་ཞེས་ཟེར་རོ། །གཞན་དག་ཀྱང་ཚིག་རྐང་རེ་རེ་ཐོས་སོ་ཞེས་སྨྲ་སྟེ།
ཚིགས་བཅད་ཀྱི་དོན་ངེས་པར་ཡིད་ལ་བྱས་པ་ལས་བདེན་པ་མངོན་པར་རྟོགས་ཤིང་རྒྱུན་དུ་ཞུགས་པའི་འབྲས་བུ་ཐོབ་སྟེ་རབ་ཏུ་བྱུང་ནས་དགྲ་བཅོམ་པའི་འབྲས་བུ་ཐོབ་པར་གྱུར་ཏོ་ཞེས་པའོ། །འདི་ནི་སྲིད་པ་ལ་མངོན་པར་དགའ་བ་རྣམས་དང་མྱ་ངན་ལས་འདས་པ་ལ་རྒྱབ་ཀྱིས་ཕྱོགས་པའི་ལུས་
ཅན་རྣམས་འཁོར་བ་ལས་སྐྱོབ་པར་བྱ་བའི་ཕྱིར་དང་། ཐར་པ་ལས་འདོད་པ་སྐྱེད་པའི་ཕྱིར་བཤད་དོ། །སྔར་བཤད་པའི་ཚིགས་བཅད་ཀྱིས་ངེས་པར་སྡུག་བསྔལ་དང་བདེ་བ་གཉིས་སྤང་བར་བྱ་བ་དང་བླང་བར་བྱ་བ་གཉིས་ཀྱི་སྤང་བ་དང་བླང་བའི་ཐབས་གཉིས་འཁྲུལ་པ་མེད་པར་བསྟན་པའི་ཕྱིར་
སྨྲས་པ། དེ་ལྟར་རབ་ཏུ་འབར་བ་ཞེས་བྱ་བ་ལ་སོགས་པ་སྨོས་སོ། །འདི་བྱུང་བའི་གླེང་གཞི་མཉན་དུ་ཡོད་པ་ན་དེའི་ཚེ་དགེ་སློང་རབ་ཏུ་མང་པོ་བསྟི་གནས་ཀྱི་ཁང་པ་དག་ཏུ་འདུག་སྟེ་འདུག་ནས་འདི་ཉིད་ཀྱི་ཚུལ་གྱིས་བར་སྐབས་ཀྱི་གཏམ་བརྗོད་པར་གྱུར་ཏེ། བདག་གི་དངོས་པོ་ནི་དགའ་བ་སྐྱེད་

པའོ། །ཡུལ་དག་ཀྱང་མགུ་བ་སྐྱེད་པ་སྟེ། དེ་ཅིའི་ཕྱིར་ཞེ་ན། གང་གི་ཕྱིར་འདི་དག་ཡོངས་སུ་བསྟེན་ཅིང་བསྐྱངས་ན་ནི་དགའ་བ་དང་མགུ་བ་ཡང་སྐྱེ་བར་འགྱུར་རོ་ཞེས་བརྗོད་པ་བཅོམ་ལྡན་འདས་ལྷའི་སྙན་རྣམ་པར་དག་པ་མིའི་ལས་འདས་པས་གསན་པར་གྱུར་ཏོ། །
གསན་ནས་ཀྱང་བོས་ཏེ་བཀའ་སྩལ་པ། དགེ་སློང་དག་ཁྱེད་ཅག་ཅིའི་ཕྱིར་འདུས་ཤིང་འཁོད་ནས་ལུས་ཀྱིས་གཏམ་ངན་པ་དག་བརྗོད་ཅིང་འཁོད་ཅེས་དེ་ལྟར་རྒྱ་ཆེར་འཁོར་བ་སྨད་པར་མཛད་ཅིང་ཚིགས་བཅད་འདི་བཀའ་སྩལ་ཏོ། །དེ་དག་གིས་དེ་ཐོས་ནས་བསྒོམས་ཏེ་དགྲ་བཅོམ་པའི་འབྲས་བུ་ཐོབ་པར་
གྱུར་ཏོ། །གང་གི་ཕྱིར་སྡུག་བསྔལ་སྤངས་པ་ལ་ནི་ཡིད་འབྱུང་བ་ཐབས་ཡིན་ཏེ། ཡིད་བྱུང་བར་གྱུར་ན་འདོད་ཆགས་དང་བྲལ་བར་འགྱུར་རོ་ཞེས་མདོ་ལས་བསྟན་ཏོ། །ཟང་ཟིང་དང་བཅས་པ་ལ་ཆགས་པ་ནི་སྐྱོ་བའི་བགེགས་ཡིན་ཏེ། དོན་དམ་པར་ངེས་པར་བརྟག་པ་མེད་པའོ། །དོན་དམ་པར་ངེས་པར་
བརྟག་པའི་ཟག་པ་མེད་པའི་ཤེས་པ་དེ་ཉིད་ཀྱང་མྱ་ངན་ལས་འདས་པ་འཐོབ་པའི་ཐབས་ཏེ། གཉི་གར་སྦྱར་བའི་ཕྱིར་ཚིགས་བཅད་འདི་གསུངས་པ་ཡིན་ཏེ། འདི་ནི་བསྡུས་པའི་དོན་ཏོ། །ཡན་ལག་གི་དོན་ནི་ཅི་ཞེས་བྱ་བ་ནི་གང་ཞིག་ཅེའམ། དགག་པའི་དོན་ཏེ་མཁས་པ་རྣམས་ཀྱིས་དགག་པ་
མེད་ཅེས་བྱ་བའི་དོན་ཏོ། །ཞིག་ཅེས་བྱ་བ་ནི་དཔྱད་པར་གྱུར་ན་དགའ་བ་ལ་སོགས་པ་ཡང་དག་པར་མེད་དོ་ཞེས་བསྟན་ཏོ། །ཡང་ན་ངེས་པར་གཟུང་བ་ཡིན་ཏེ། ཅི་ཞིག་ཀྱང་མེད་དོ་ཞེས་བྱ་བའི་དོན་ཏེ། ཚིག་གི་ཕྲད་ལ་སོགས་པ་ནི་སྣ་ཚོགས་པའི་དོན་ཡིན་པའི་ཕྱིར་རོ། །བདག་དང་འབྲེལ་པ་དེ་ལ་
ཆགས་པ་དང་འབྲེལ་པའི་བདག་གི་བདེ་བ་ལ་ཡིད་ཚིམ་པ་ནི་དགའ་བའོ། །དེ་སྐྱེ་བ་མ་རིག་པ་དང་ལྷན་ཅིག་པས་དགའ་བའི་ཚུལ་དང་ཁྱིམ་དུ་འཛུག་པ་ནི་མངོན་པའི་ང་རྒྱལ་གྱིས་སོ། །འབྱོར་པས་དྲངས་པས་དེའི་སྲེད་པ་དང་ལྡན་པ་ནི་མགུ་བ་སྟེ། གཞན་ལ་མ་བླངས་བཞིན་དུ་བྱིན་པའི་དངོས་པོ་ལྟ་
བུའོ། །འདི་གཉི་ག་ཡང་འཁོར་བ་འཇུག་ཅིང་རྨོངས་པ་རྣམས་ཕྱིན་ཅི་ལོག་པས་བསླད་པ་ཡིན་པའི་ཕྱིར་རོ། །མཁས་པ་རྣམས་ལ་ནི་དེ་གཉིས་མེད་དེ། ཡོངས་སུ་བརྟག་པས་དེ་བཞིན་ཉིད་ལ་འཇུག་པའི་ཕྱིར་རོ། །དེ་ལྟར་ན་རྨོངས་པ་རྣམས་ལ་གང་ཡིན་ཞེ་ན། དེ་ལྟར་བདག་ཉིད་ཀྱི་དངོས་པོ་

དང་ཡོ་བྱད་ཀྱི་དངོས་པོའི་གནས་སྐབས་ལའོ། །དེ་ལ་ཇི་ལྟ་བུ་ཞེ་ན། སྨྲས་པ། དེ་ལྟར་རབ་ཏུ་འབར་བ་ལ། །ཞེས་བྱ་བ་སྨོས་ཏེ། རྣམ་པ་འདི་དང་སྐབས་འདིར་རབ་ཏུ་གྲུབ་པ་སྟེ། རྒ་བ་དང་ན་བ་དང་འཆི་བ་ལ་སོགས་པ་ནི་མེ་འབར་བ་ལྟ་བུ་ཡིན་ནོ། །གང་དུ་ཤིན་ཏུ་འབར་ཞིང་ཡང་དག་པར་འབྱུང་
བ་དེ་ནི་རབ་ཏུ་འབར་བ་སྟེ། ཇི་ལྟར་མེས་བུད་ཤིང་ཟད་པར་ནུས་པ་དང་། ཀ་རཉྫ་དང་སེང་ལྡེང་ལ་སོགས་པ་འབར་བར་ནུས་པ་དེ་བཞིན་དུ་ཉོན་མོངས་པ་དེ་ལས་སྐྱེས་པའི་སྡུག་བསྔལ་མངོན་པར་མི་དགའ་བ་བསྐྱེད་པ་དང་ཡིད་དུ་འོང་བའི་དངོས་པོ་འཇིག་པར་བྱེད་པ་ལ་རྣོ་བ་ཡིན་པའི་ཕྱིར་རབ་ཏུ་འབར་བས་དཔེར་
བརྗོད་པ་ཡིན་ནོ། །གང་ལ་ལ་འདས་པ་དང་མ་འོངས་པ་ཉིད་ཀྱི་དངོས་པོ་ནི་འདི་ལྟ་བུ་ཡིན་གྱི། ད་ལྟར་བྱུང་བ་ནི་མ་ཡིན་ཏེ། འདི་ལ་མངོན་པར་དགའ་བ་ཡིན་ནོ་ཞེས་སེམས་པ་ལ་སྨྲས་པ། ལ་ཞེས་སྨོས་ཏེ་ཐ་སྙད་ཡང་དག་པ་ལ་ཡོད་པ་ནི་ད་ལྟར་བྱུང་བ་ཉིད་ཡོད་པ་སྟེ། དེ་ལ་ཇི་སྐད་དུ་དགེ་སློང་
དག་འདི་ལ་ཐམས་ཅད་དུ་ཀུན་དུ་འབར་བ་ཡིན་ཏེ། འདོད་ཆགས་ཀྱི་མེ་དང་ཞེ་སྡང་གི་མེ་ཞེས་བྱ་བ་ལ་སོགས་པ་མདོ་ལས་གསུངས་ཏེ། དེ་ཉིད་དུ་འདུས་བྱས་རྣམས་རྟག་ཏུ་གཙེས་པ་ཡིན་ཏེ། ཇི་ལྟར་བྱའི་ཚང་གི་ཤིང་ལ་མེ་སྦར་བ་བཞིན་ནོ། །དེ་ཁོ་ན་ཉིད་མཐོང་བ་ནི་ཇི་ལྟར་ཡང་དགའ་བ་དང་མགུ་བ་
གཉིས་སྐྱེ་བར་མི་འགྱུར་ཏེ་ཡིད་སྐྱོ་བའི་ཕྱིར་རོ་ཞེས་སྟོན་ཏོ། །ད་ལྟར་བྱུང་བ་ཉིད་ནི་མ་བཤད་ཀྱང་གྲུབ་པ་ཡིན་ཏེ། གང་འདས་པ་དང་མ་འོངས་པ་བྱུང་བ་དང་འབྱུང་བར་འགྱུར་བ་གཉིས་ནི་འདི་ལྟར་མངོན་སུམ་དང་རྗེས་སུ་དཔག་པས་བསྒྲུབ་པ་ཡིན་ཏེ། དེས་ན་ཇི་སྐད་དུ་བཤད་པ། མི་རྣམས་ལ་ནི་
བདག་ཏུ་ཆགས་པ་དེས། །མངོན་སུམ་དུ་ནི་སྡུག་བསྔལ་ཤེས་པ་ལྟར། ད་བཞིན་ལྷ་ལའང་སྡུག་བསྔལ་མེད་མི་ཤེས། །གང་ཕྱིར་རྟག་པར་གནས་པ་ཡོད་མ་ཡིན། །ཞེས་སོ། །དེ་ལྟར་ཡོད་ན་ཐམས་ཅད་དུ་ཡང་འདུས་བྱས་རྣམས་འཚོགས་པ་ལས་སྐྱེས་པའི་ཕྱིར་ཡོད་པ་ཉིད་དེ། འདས་པ་དང་མ་
འོངས་པ་གཉིས་ཀྱང་སྐྱེ་བ་ལ་སོགས་པས་མངོན་པར་གཙེས་ཤིང་ཉེ་བར་འཇིག་པ་དེ་ཉིད་དུ་བསྟན་ཏོ། །གལ་ཏེ་དེ་ལྟར་ཉེ་བར་གཙེས་ན་ཇི་ལྟར་བདག་ཅག་གིས་ཁོང་དུ་མ་ཆུད་ཅེ་ན། སྨྲས་པ་ནང་ཞུགས་ཞེས་བྱ་བ་སྨོས་ཏེ། ཆུད་པའོ། །གང་དུ་ཞེ་ན། སྨྲས་པ། མུན་པ་ཞེས་བྱ་བ་ཡིན་ཏེ། མི་ཤེས་པ་

ཞེས་བྱ་བའི་དོན་ཏོ། །ཡང་བཤད་པ། འཇིག་རྟེན་མཐོང་བར་ནུས་པ་ལ། །ཇི་ལྟར་བགེགས་ནི་བྱེད་པ་ཡི། །མུན་པ་དེ་བཞིན་མ་རིག་པ། །དེ་ཉིད་མཐོང་ལ་བཤད་པ་ཡིན། །ཕོངས་པ་ཀུན་གྱི་གཞིར་གྱུར་པ། །དེ་ལས་གཞན་ནི་རང་བྱུང་ཡིན། །བློ་ལྡན་ཕུན་སུམ་ཚོགས་
ཀུན་རྒྱུ། །དཔལ་ལ་ཡིད་བཞིན་ནོར་བུ་བཞིན། །ཞེས་པའོ། །དེ་ཡང་གང་དག་ཡིན་ཞེ་ན། དེ་སྨྲས་པ། གནས་པ་དག་ཅེས་སྨོས་པས་ཁྱེད་ཅག་ཅེས་བྱ་བ་ཉིད་དེ། སོ་སོའི་སྐྱེ་བོ་ཡིན་པའི་ཕྱིར་ཕུང་ཁྲོལ་ཐམས་ཅད་ཀྱི་གནས་སུ་གྱུར་པ་ནི་སོ་སོའི་སྐྱེ་བོ་ཡིན་ནོ་ཞེས་པའི་ཚིག་གིས་སོ། །དེ་ལ་འདིས་
ནི་འདི་ལྟར་སྟོན་ཏེ། མི་ཤེས་པ་དང་ལྡན་པ་དེ་ལས་ནི་ལས་སོ། །དེ་ལས་བྱུང་བ་ནི་སྡུག་བསྔལ་ཡིན་ནོ་ཞེས་བྱ་བས་སོ། །ཕྱིན་ཅི་ལོག་སྡུག་བསྔལ་འགོག་པ་ནི་དེ་བཞིན་ཉིད་ལ་ལྟ་བ་དང་མངོན་པར་དགའ་བ་གཉིས་ཀྱིས་ཏེ། ཡེ་ཤེས་ལ་ཡང་དག་པར་འཇུག་པར་བྱའོ་ཞེས་པའི་དོན་ཏེ། ཐར་པའི་
བདེ་བ་འཐོབ་པའི་ཐབས་ཀྱང་ཡང་དག་པའི་ལྟ་བ་སྔོན་དུ་འགྲོ་བའི་འཕགས་པའི་ལམ་ཡིན་ཏེ། དེ་ཉིད་ལ་གཟུད་པའི་ཕྱིར་སྨྲས་པ། སྒྲོན་མ་ནི་སྣང་བ་སྟེ། གང་གི་ཕྱིར་འཕགས་པའི་ལམ་གྱི་སྣང་བ་དང་། དད་པ་དང་བརྩོན་འགྲུས་ལ་སོགས་པའི་སྒྲའི་མིང་དུ་འདིར་བརྗོད་དེ། ཇི་སྐད་དུ་བཤད་
པ། ཆོས་ལ་ངེས་པར་སེམས་པའི་བཟོད་པ་ནི་སྣང་བ་ཡིན་ནོ་ཞེས་ཚིག་བླ་དགས་སུ་བཏགས་པ་ཡིན་ནོ། །དད་པས་ནི་འཁོར་བའི་རྒྱ་མཚོ་ལས་རྒལ་བར་བྱེད་དོ། །བརྩོན་འགྲུས་ཀྱིས་ནི་སྡུག་བསྔལ་སྤང་བར་འགྱུར་རོ་ཞེས་དཔེར་བརྗོད་པར་བྱའོ། །ཇི་ལྟར་ཕྱི་རོལ་གྱི་མུན་པ་ལ་སྒྲོན་མེ་བྱུང་བར་
གྱུར་ན་དེ་སེལ་བར་ནུས་པ་ཡིན་ཏེ། དེ་བཞིན་དུ་མི་ཤེས་པའི་མུན་པ་དེ་འཕགས་པའི་ལམ་གྱིས་བསལ་བར་ནུས་པ་ཉིད་དེ། དེ་བས་ན་འདྲ་བའི་ཕྱིར་སྒྲོན་མ་བཞིན་པས་སྒྲོན་མ་ཡིན་ནོ། །དེ་ཅིའི་ཕྱིར་ཚོལ་བར་མི་བྱེད་ཅེས་བྱ་བ་སྨོས་ཏེ། དེ་ཚོལ་བར་མི་བྱེད་པ་ནི་དེ་ཇི་ལྟར་རྟོགས་པའི་ཕྱིར་མི་བྱེད་དེ་
འབད་པས་བསྒྲུབ་པར་གྱིས་ཤིག་པའི་དོན་ཏོ། །བཅོམ་ལྡན་འདས་ཀྱིས་འདིར་ཉེས་པ་རྣམ་པ་གསུམ་གྱིས་སེམས་ཅན་རྣམས་ལ་བསྐུལ་བ་ཡིན་ཏེ། བག་མེད་པ་དང་། རང་བཞིན་དང་། སྒྲིབ་པའི་སྐྱོན་ནོ། །སེམས་ཅན་འདི་དག་ནི་བདེ་བ་མངོན་པར་ཚོལ་བ་ལ་བདེ་བར་གནས་པ་སྟེ། བདེ་བར་

མྱོང་བ་ལྟ་བུ་ནི་ཡུལ་དག་ལ་ཀུན་ཏུ་དགའ་ཞིང་མགུ་བ་ཡིན་ཏེ། འདི་དག་ནི་བག་མེད་པའི་སྐྱོན་ནོ། །གང་དུ་ཡང་དེ་མངོན་པར་དགའ་བ་དེ་ཐམས་ཅད་ནི་ཉོན་མོངས་པའི་མེ་དང་སྡུག་བསྔལ་གྱི་མེ་རབ་ཏུ་འབར་བ་ཡིན་ཏེ། འདི་ནི་རང་བཞིན་གྱི་སྐྱོན་ནོ། །དེ་དག་ཀྱང་མ་རིག་པའི་མུན་པར་ཞུགས་པ་ལ་
ཟག་པ་མེད་པའི་ཤེས་པའི་སྒྲོན་མ་མི་ཚོལ་བ་ཡིན་ཏེ། འདི་ནི་སྒྲིབ་པའི་སྐྱོན་ནོ། །དེས་ན་བཅོམ་ལྡན་འདས་ཀྱིས་ཉེས་པ་གསུམ་བཟློག་པའི་ཕྱིར་ཚིགས་བཅད་འདི་བཀའ་སྩལ་པ་ཡིན་ནོ། །ཇི་ལྟར་མི་རྟག་པ་ཉིད་ཀྱི་མེ་རབ་ཏུ་འབར་བས་བདག་ཉིད་ཀྱི་དངོས་པོ་གང་འདི་ཞེས་བྱ་བ་བསྟན་པ་དེ་རྟོགས་པར་བྱ་བ་
ལ་ཀུན་དུ་སྤྱོད་པ་འདིས་ཉེ་བར་གནོད་པར་ཤེས་པ་ལ་འབད་པ་མེད་པ་ཉིད་དུ་འགྲུབ་པའི་ཕྱིར་སྨྲས་པ། རུས་པ་ཐི་བའི་མདོག་འདྲ་བ། །ཞེས་བྱ་བ་ལ་སོགས་པ་སྨོས་སོ། །འདིའི་བྱུང་བ་ནི་མཉན་ཡོད་ན་དགེ་སློང་གསར་བུ་རྣམས་ལྷག་པར་ཁྲུས་དང་གོས་དང་རྒྱན་ལ་སོགས་པ་གཙོར་བྱེད་ཅིང་གནས་པར་
གྱུར་ཏེ། ལུས་ལ་ལྷག་པར་ཞེན་པས་དེ་དག་གིས་ཀློག་པ་དང་ཁ་ཏོན་ལ་སོགས་པ་ཡོངས་སུ་སྤངས་པ་དང་། ཇི་ཙམ་ན་བཅོམ་ལྡན་འདས་ཀྱིས་དེ་དག་ལ་སྐྱོ་བ་བསྐྱེད་པའི་ཕྱིར་དུར་ཁྲོད་དུ་གཤེགས་ཤིང་སྤྱོད་པར་གྱུར་ཏོ། །དེའི་ཚེ་ན་རྐུན་པོ་ལྔ་བརྒྱ་བསད་དེ་ཤི་བའི་རོ་དག་བོར་བ་ཡོད་པས་དེ་དག་ལ་
དེ་ཉེ་བར་བསྟན་ཅིང་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ལྟོས་ཤིག །ཤི་བའི་རོ་འདི་དག་ནི་ཤིན་ཏུ་འཇིགས་སུ་རུང་བ་ཡིན་ཏེ། འཁོར་བས་ཆོག་ཤེས་པར་གྱིས་ཤིག །འཁོར་བའི་ལོངས་སྤྱོད་ཉེ་བར་སྤྱོད་པས་ཀྱང་ཆོག་ཤེས་པར་གྱིས་ཤིག་ཅེས་བཀའ་སྩལ་པ་དང་། ཇི་
ཙམ་ན་དེ་དག་གིས་དགྲ་བཅོམ་པའི་འབྲས་བུ་ཐོབ་པར་གྱུར་ཏོ། །གཞན་དག་ནི་མངོན་པའི་ང་རྒྱལ་ཅན་གྱི་དགེ་སློང་ལྔ་བརྒྱ་ཙམ་གྱི་དབང་དུ་བྱས་ནས་འདི་གསུངས་སོ་ཞེས་ཟེར་རོ། །དེ་ལ་འདིར་ཡང་རྣམ་པ་ལྔས་མི་རྟག་པར་ཡོངས་སུ་སྟོན་པ་ཡིན་ཏེ། རྣམ་པར་ཞིག་པ་དང་། བྲལ་བ་དང་རྣམ་
པར་འཇིག་པ་དང་། ཉེ་བར་གནས་པའི་རྣམ་པ་དང་། ཆོས་ཉིད་ཀྱི་རྣམ་པས་བཤད་པའོ། །དེ་ལ་བོར་བ་གང་ཡིན་འདི་དག་ནི་ཞེས་བྱ་བས་ནི་རྣམ་པར་ཞིག་པས་མི་རྟག་པ་ཉིད་དུ་བསྟན་ཏེ། གང་གི་ཕྱིར་འཚོ་བའི་སྲོག་ཡོད་པ་ཡང་རུས་པ་རྣམ་པར་འཇིག་པས་དེ་ལྟར་བོར་བར་འགྱུར་བའོ། །

ཕྱོགས་དང་ཕྱོགས་སུ་རྣམ་འཐོར་བ། །ཞེས་བྱ་བ་འདིས་ནི་བྲལ་བས་མི་རྟག་པར་བསྟན་ཏེ། ཕྱོགས་སྣ་ཚོགས་པ་ལ་གནས་པས་ཕན་ཚུན་བྲལ་བ་ཉིད་དུ་གྲུབ་པའི་ཕྱིར་རོ། །ཐི་བའི་མདོག་འདྲ་བ་ཞེས་བྱ་བས་ནི་རྣམ་པར་འགྱུར་བས་མི་རྟག་པར་བསྟན་ཏེ། སྔོན་གྱི་ཡིད་དུ་
འོང་བའི་མདོག་ལས་གཞན་དུ་གྱུར་པའི་ཕྱིར་རོ། །དེ་མཐོང་ཞེས་བྱ་བ་ནི་ཉེ་བར་གནས་པའི་མི་རྟག་པ་བསྟན་ཏེ། རྣམ་པ་གསུམ་པོ་འདི་ཉིད་ཀྱིས་མི་རྟག་པ་སྟེ། ད་ལྟར་བྱུང་བའི་དུས་སུ་ཉེ་བ་ཞེས་བརྗོད་དོ། །དེ་མངོན་སུམ་དུ་བྱེད་པ་ནི་རྣམ་པའོ། །འདི་ལ་ཅི་ཞིག་དགའ་ཞེས་བྱ་བ་ནི་ཆོས་ཉིད་ཀྱི་རྣམ་པས་
མི་རྟག་པ་སྟེ། འདིའི་ལུས་ཀྱང་འཚོ་བ་ཉིད་ཀྱི་ཆོས་ལས་འཆི་བའི་ལུས་སུ་གྱུར་ཏེ་རྣམ་པ་གསུམ་གྱིས་མི་རྟག་པ་ཉིད་དུ་ཉེ་བར་གནས་ཤིང་སྣང་སྟེ། འདི་ན་འཆི་བའི་ལུས་ཀྱང་དེ་དང་འདྲ་བའི་ཆོས་སུ་གཅིག་པ་ཉིད་དེ། དེ་ལ་ཅི་ཞིག་དགར་ཅི་ཡོད། །ཅེས་བྱ་བ་ནི་བསྡུས་པའི་དོན་ཏོ། །ཡན་ལག་གི་དོན་
ནི་གང་ཡིན་ཞེས་བྱ་བ་ནི་རུས་པ་ཞེས་བྱ་བ་དང་སྦྱར་རོ། །འདི་དག་ནི་ཞེས་བྱ་བ་ནི་ཕྱོགས་ཉེ་བ་ན་གནས་པའོ། །བོར་བ་ཞེས་བྱ་བ་ནི་ཉེ་བར་འཛིན་པའི་རླུང་དང་བྲལ་བས་བོར་བའོ། །རྣམ་པར་འཐོར་བ་ནི་མི་འདྲ་བར་བཀོད་ཅིང་རིག་པ་མེད་པ་བཞིན་དུ་འཚོལ་བར་གནས་པ་སྟེ། མཇིང་པའི་རུས་པ་རྣམས་ནི་
གཞན། རྐང་པའི་རུས་པ་རྣམས་ཀྱང་གཞན་ཞེས་བྱ་བ་ལ་སོགས་པ་མདོ་ལས་གསུངས་པ་ཡིན་ནོ། །ཅི་ནས་གང་དུ་རྟེན་ནས་བོར་བ་དང་། རྣམ་པར་འཐོར་ནས་འདུག་པ་ཡིན་ཞེ་ན། སྨྲས་པ། ཕྱོགས་དང་ཕྱོགས་སུ་ཞེས་བྱ་བ་སྨོས་ཏེ། འདི་ཟློས་པ་ནི་ཕྱོགས་ཀྱི་རྣམ་པ་མང་པོ་སྣ་ཚོགས་པ་སྟེ། མཐོ་
བ་དང་དམའ་བ་ལ་སོགས་པའི་ཕྱོགས་དག་ཏུ་རྣམ་པར་གཏོར་བ་ཞེས་བྱ་བའི་དོན་ཏོ། །ཇི་ལྟ་བུ་ཡིན་ཞེ་ན། སྨྲས་པ། ཐི་བའི་མདོག་འདྲ་བ་ཞེས་བྱ་བ་ཡིན་ཏེ། ཐི་བ་ཞེས་བྱ་བ་ནི་ཕུག་རོན་ཞེས་བྱ་བའི་བྱ་བཞིན་དུ་མདོག་སྣང་བ་གང་ཡིན་པའི་རུས་པ་དེ་ཉིད་སྔོ་སྐྱ་ཞེས་བྱ་བའི་དོན་ཏོ། །དེ་ལྟ་བུའི་རུས་པ་
གང་ཡིན་པ་དེ་མཐོང་བ་ནི་སྣང་བའོ། །འདིར་ཟིན་པའི་ལུས་ལ་ཅི་ཞིག་དགའ་ཞིང་ལྷག་པར་ཆགས་ཞེས་བྱ་བའི་དོན་ཏེ། ཁ་དོག་དང་དབྱིབས་ཉམས་པ་དང་ལྡན་པའི་ལུས་ལའོ། །ཤེས་རབ་ཅན་ནི་ནམ་ཡང་མངོན་པར་དགའ་བ་སྐྱེ་བར་མི་འགྱུར་ཏེ། མཐར་ཡིད་དུ་མི་འོང་བ་ཉིད་ཡིན་པའི་ཕྱིར་རོ། །དེའི་

ཕྱིར་བོར་བ་ནི་ཚིགས་རྣམས་འབྲེལ་བཞིན་དུ་རུས་པ་བོར་བ་ཉིད་དུ་བསྟན་ཏོ། །རྣམ་པར་འཐོར་བ་ནི་ཚིགས་རྣམས་བྱེ་བ་ཉིད་ཀྱིས་འཐོར་བར་བསྟན་ཏོ། །དབྱིབས་ཉམས་པ་རྣམ་པ་གཉིས་ཀྱིས་བསྒྲུབས་ནས་མདོག་ཉམས་པ་ནི་ཐི་བའི་མདོག་འདྲ་ཞེས་བྱ་བས་བསྟན་ཏོ། །དེ་ལ་འདིས་འདོད་ཆགས་རྣམ་པ་
བཞིའི་གཉེན་པོར་གསུངས་པ་ཡིན་ཏེ། དེ་ལ་འཐོར་བ་ཞེས་བྱ་བ་འདིས་ནི་ཉེ་བར་སྤྱོད་པའི་འདོད་ཆགས་ཀྱི་གཉེན་པོ་བསྟན་ཏེ། དེ་ལ་ཉེ་བར་སྤྱོད་པ་མེད་པའི་ཕྱིར་རོ། །རྣམ་པར་འཐོར་བ་ཞེས་བྱ་བ་འདིས་ནི་དབྱིབས་ཀྱི་འདོད་ཆགས་ཀྱི་གཉེན་པོ་བསྟན་ཏེ། དེ་ན་འདོད་ཆགས་དང་རྗེས་སུ་མཐུན་པའི་
དབྱིབས་མེད་པའི་ཕྱིར་རོ། །ཐི་བའི་མདོག་འདྲ་བ་ཞེས་བྱ་བས་ནི་ཁ་དོག་གི་འདོད་ཆགས་ཀྱི་གཉེན་པོ་བསྟན་ཏེ། མདོག་འདི་ནི་མངོན་པར་མི་འདོད་པའི་ཕྱིར་རོ། །རུས་པ་ཞེས་བྱ་བས་ནི་རེག་པའི་འདོད་ཆགས་ཀྱི་གཉེན་པོ་བསྟན་ཏེ། རེག་པར་མི་བཟོད་པའི་ཕྱིར་རོ། །བྱུང་བ་གཉིས་པའི་དབང་དུ་
བྱས་ན་ཡང་དེ་བཞིན་གཤེགས་པས་འདི་སྐད་དུ་བསྟན་པར་གྱུར་ཏེ། འདི་ལྟ་སྟེ་གང་འདོད་ཆགས་དང་མ་བྲལ་བ་དེ་རྣམས་ཀྱིས་ནི་ལན་དུ་མར་ལུས་ལ་འདི་བཞིན་དུ་བསྒོམ་པར་བྱ་བ་ཡིན་ཏེ། ཁྱེད་ཅག་ཀྱང་འདོད་ཆགས་དང་མ་བྲལ་བ་ལྟ་བུ་ཡིན་ནོ་ཞེས་པ་སྟེ། དེ་ཡང་འདིས་བསྟན་པས་ངེས་པར་
བདག་ཅག་ཀྱང་ནི་འདོད་ཆགས་དང་མ་བྲལ་བ་དག་སྟེ་འདོད་ཆགས་དང་བྲལ་བ་བཞིན་དུ་མངོན་པའི་ང་རྒྱལ་སྐྱེས་པས་དེས་ན་བདག་ཅག་ལ་བཅོམ་ལྡན་འདས་ཀྱིས་འདི་ལྟར་བསྐུལ་བ་ཡིན་ནོ་ཞེས་སྐྱོ་བ་ཡང་དག་པར་སྐྱེས་ཏེ། བཅོམ་ལྡན་འདས་ཀྱིས་ལམ་གཞན་ཡང་དག་པར་བསྟན་པས།
ཁམས་གསུམ་ལས་འདོད་ཆགས་དང་ཡང་དག་པར་བྲལ་བ་ཐོབ་པར་གྱུར་ཏོ། །དེས་ན་ལུས་ལ་མངོན་པར་ཞེན་པ་རྣམས་ལ་དེ་ལས་སྐྱོ་བ་བསྐྱེད་པའི་ཕྱིར་ཚིགས་སུ་བཅད་པ་འདི་གསུངས་སོ། །འདུས་བྱས་རྣམས་ཐ་མར་ཡིད་དུ་མི་འོང་བ་གཅིག་པུར་མ་ཟད་དེ། དང་པོ་ནས་བརྩམས་ཏེ་ཡིད་
དུ་མི་འོང་བ་ཡིན་ནོ་ཞེས་གསལ་བར་བསྟན་པའི་ཕྱིར་སྨྲས་པ། གང་གི་ནུབ་མོ་ཞེས་བྱ་བ་ལ་སོགས་པ་སྨོས་སོ། །འདི་བྱུང་བའི་གླེང་གཞི་ནི་མཉན་དུ་ཡོད་པ་ན་བཅོམ་ལྡན་འདས་ཀྱིས་དགེ་སློང་རྣམས་ལ་ཐམས་ཅད་གཡོ་ཞིང་འཇིག་རྟེན་ཐམས་ཅད་འཆི་བའི་དབང་དུ་འགྲོ་ཞེས་བཀའ་སྩལ་པ་དང་། ཇི་

ཙམ་ན་དགེ་སློང་ཞིག་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་འདི་སྐད་ཅེས་གསོལ་ཏོ། །ཅི་བཙུན་པ་གང་མངལ་ན་གནས་པ་ཡང་རབ་ཏུ་མི་གནས་པ་རབ་ཏུ་མི་བརྟན་པ་ཉིད་དམ། དགེ་སློང་དག་མཚན་མོ་མི་དག་མའི་ལྟོར་འཇུག་པ་དེ་ཉིད་ནས་བརྩམས་ཏེ་
འཆི་བདག་གི་དྲུང་དུ་ཉེ་བར་འགྲོ་སྟེ། དེ་ཅིའི་ཕྱིར་ཞེ་ན། དགེ་སློང་དག་འདི་ལྟར་འདུས་བྱས་ཐམས་ཅད་ནི་མི་རྟག་གོ་ཞེས་བྱ་བའི་བར་དུ་སྟོན་པས་དེ་ལྟར་བཀའ་སྩལ་ཏོ་ཞེས་བྱ་བའོ། །དང་པོའི་ཚིག་རྐང་གསུམ་གྱིས་ནི་སྐད་ཅིག་མས་ཚེ་ཟད་པར་བསྟན་ཏོ། །ཐ་མས་ནི་ཚེ་ཟད་པ་ལས་ཕྱིར་ཡང་མི་འོང་བ་
ཉིད་དེ། འདི་ནི་བསྡུས་པའི་དོན་ཏེ། ལུས་དང་གནས་ཀྱི་ཁྱད་པར་དང་སྡོད་པ་དང་ལྡོག་པ་དང་རེ་བ་དང་བྲལ་བར་འདིས་སྟོན་པ་ཡིན་ནོ། །དུས་དེ་ཉིད་ནི་དང་པོའོ་མཚན་མོར་མངོན་པར་འདོད་པ་ནི་གནས་སོ། །མའི་མངལ་དུ་གནས་པ་ནི་སྡོད་པའོ། །རྩིབ་ལོགས་གཅིག་ཏུ་གནས་པ་ནི་ལྡོག་པའོ། །སོང་ནས་
ཡང་འབྱུང་བ་ཡིན་ནོ་ཞེས་བྱ་བ་སྟེ། རྣམ་པ་བཞིས་ཡང་ཡོད་དོ་ཞེས་རེ་བ་དག་འདི་ལ་མེད་པ་ཡིན་ཏེ། མཁས་པ་རྣམས་ནི་འཚོ་བས་དྲེགས་པར་མི་བྱེད་དོ་ཞེས་བྱ་བ་ནི་འདིའི་བསྡུས་པའི་དོན་ཏོ། །ཡན་ལག་གི་དོན་ནི་གནས་ཞེས་བྱ་བ་ནི་བསྟན་པ་སྟེ། ནུབ་མོ་ཞེས་བྱ་བ་དང་སྦྱར་ཏེ། གང་མ་བསྟན་པའི་
ནུབ་མོ་གཅིག་སྟེ་དགུན་ནམ་དེ་ལས་གཞན་པའོ། །ཁོ་ན་ཞེས་བྱ་བ་ནི་ངེས་པར་གཟུང་བ་སྟེ། གང་དེ་མངལ་དུ་འཇུག་པའི་ནུབ་མོ་དེ་ཉིད་ཅེས་བྱ་བའི་དོན་ཏོ། །ནུབ་མོ་གང་ཡིན་ཞེ་ན། སྨྲས་པ། དང་པོ་སྟེ་མཚམས་སྦྱོར་བའི་སྐད་ཅིག་མ་ཉེ་བར་མཚོན་པ་ཞེས་བྱ་བའི་བར་དུའོ། །མངལ་དུ་ཞུགས་
པ་ནི་མའི་ལྟོར་ཞུགས་ཏེ་ནུར་ནུར་པོ་ལ་སོགས་པའི་གནས་སྐབས་སུ་གྱུར་པ་སྟེ། ཞོའི་སྤྲིས་མ་ལྟ་བུའི་ནུར་ནུར་པོ་ལ་སོགས་པ་སྟེན་པར་བྱེད་པ་དེ་ལྟ་བུ་དག་ཡིན་ནོ། །དེ་ལྟར་བྱེད་པ་སུ་ཡིན་ཞེ་ན་དེས་སྨྲས་པ། མིའི་སེམས་ཅན་ཏེ་ཡིད་གང་ལ་ཡོད་པ་དེ་ནི་མི་སྟེ་སྒྲ་གཅན་བཞིན་ནོ། །
བདག་དང་བདག་གི་ལ་སོགས་པའི་ཉོན་མོངས་པ་མ་སྤངས་པ་ཉིད་མངལ་དུ་འཇུག་པ་ཡིན་ནོ་ཞེས་མཚོན་པའོ། །ནུབ་མོ་ཞེས་སྨོས་པས་ནི་ཉིན་པར་མངལ་དུ་འཇུག་པ་མེད་པའི་ཕྱིར་ཞེས་ཁ་ཅིག་འདོད་དེ། གང་ཕྱིར་མུན་པར་འཇུག་པ་ཡང་། །མངལ་གནས་མཚན་མོ་དེ་བཞིན་ཏེ། །དེ་ཉིད་ལ་

ནི་འབྱུང་འགྱུར་ཞེས། །ཁ་ཅིག་དེ་སྐད་རབ་ཏུ་སྨྲ། །ཇི་ལྟར་ཉེར་སྤྱོད་མི་ཟད་པ། །ཚོང་དུས་ཉིད་དུ་འཕེལ་བ་བཞིན། །གཞན་དག་ཏུ་ནི་དེ་ལྟ་མིན། །དེ་བཞིན་མཚན་མོ་ཉིང་མཚམས་སྦྱོར། །ཞེས་སོ། །ཉིན་པར་ཡང་དེ་འདོད་པ་སྐྱེ་བ་ཡོད་པས་མི་འགལ་ཏེ། དེ་ཚོགས་པ་ལ་རག་
ལུས་པའི་ཕྱིར་རྣམ་པ་ཐམས་ཅད་དུ་དེ་ལ་ཡང་ངེས་པ་མེད་པས་དེའི་ཕྱིར་ཐུབ་པས་དུས་ངེས་པར་མ་གསུངས་ཏེ། གནས་གསུམ་མངོན་དུ་གྱུར་ན་བུ་དང་བུ་མོ་སྐྱེ་བར་འགྱུར་རོ་ཞེས་བྱ་བ་ལ་སོགས་པ་ཡིན་ནོ་ཞེ་ན། འདི་ནི་ཕལ་ཆེ་བའི་དབང་དུ་བྱས་ནས་ནུབ་མོ་ཞེས་བསྟན་པ་ཡིན་ཏེ། དེ་
ལྟར་ལྷག་པར་འཁྲིག་པའི་འདོད་ཆགས་སྤྱོད་པའི་ཕྱིར་བཤད་པ། བྱ་བ་མང་དང་འབྲེལ་པའི་ཕྱིར། །ཉིན་པར་འདོད་ཆགས་སྐྱེ་མི་འགྱུར། །བྱ་བ་མ་ལུས་ཞི་བའི་ཕྱིར། །མཚན་མོ་འདོད་ཆགས་རབ་ཏུ་སྐྱེ། །ཞེས་པས་སོ། །སྡོད་མེད་ཅེས་བྱ་བ་ནི་གགས་མེད་པ་དང་བགེགས་མེད་པར་ཞེས་
བྱ་བའི་དོན་ཏོ། །དེ་ནི་ཞེས་བྱ་བ་ནི་མི་དེའོ། །འགྲོ་འགྱུར་ཞིང་ཞེས་བྱ་བ་ནི་ཟད་པ་དང་རྣམ་པར་གྱུར་པ་དང་འགྲོ་བ་ཞེས་བྱ་བའི་བར་དུའོ། །སོང་བ་ལས་ཞེས་བྱ་བ་ནི་འཆི་བའི་དྲུང་དུ་སོང་བ་ལས་ནི་ཞེས་བྱ་བའི་སྒྲ་ནི་ངེས་པར་གཟུང་བ་དང་རིམ་པ་བཞིན་དུ་ཡང་འདི་སྦྱར་བར་ཤེས་པར་བྱ་བའོ། །ལྡོག་པ་
མེད་ཅེས་བྱ་བ་ནི་ལྡོག་པ་ཉིད་ནི་མ་ཡིན་ཏེ། སླར་ཡང་ལྡོག་པར་མི་འགྱུར་བའི་དོན་ཏོ། །གང་གི་ཕྱིར་འཚོ་བ་ཉིད་གཡོ་བ་སྟེ་དེས་ན་སྲོག་གི་ངེས་པ་ཡིན་ནོ་ཞེས་ངེས་པར་མི་གཟུང་ངོ་། །སྲོག་གིས་བསྙེམས་པ་ལ་དེ་སྤངས་པའི་ཕྱིར་ཚིགས་བཅད་འདིས་ཤེས་པར་བྱ་བ་ཡིན་ནོ། །བར་དུ་ཡང་
བདག་གི་དངོས་པོ་ཡིད་དུ་མི་འོང་བ་ཉིད་དུ་བསྟན་པའི་ཕྱིར་སྨྲས་པ། སྔ་དྲོ་ཞེས་བྱ་བ་ལ་སོགས་པ་སྨོས་སོ། །འདིའི་བྱུང་བ་དང་གླེང་གཞི་ནི་མཉན་ཡོད་ན་རྒྱལ་བུ་གསལ་རྒྱལ་གྱི་ཡུལ་མིའི་ལས་ཀྱི་སྣ་ལ་གཏོགས་པའི་སྐྱེས་བུ་ཞིག་ལང་ཚོའི་དྲེགས་པས་སྙེམས་པ་དེས་གསར་དུ་བླངས་
པའི་ཆུང་མ་ཞིག་གཟུགས་མཛེས་ཤིང་བལྟ་ན་སྡུག་ལ་རབ་ཏུ་མཛེས་པས་དེ་ལ་ཡང་དེ་ཤིན་ཏུ་ལྟ་ཞིང་སེམས་ཆགས་པར་གྱུར་ཏོ། །ཇི་ཙམ་དུས་གཞན་ཞིག་ན་དེ་ཡུལ་མིའི་བྱ་བ་ཞིག་བྱུང་ནས་དེ་དེར་སོང་ངོ་། །དེའི་འོག་ཏུ་དེའི་ཆུང་མ་སྦྲུལ་ནག་པོས་ཟིན་ཏེ་དུས་བྱས་སོ། །དེ་ཕྱི་དྲོ་འོངས་

ནས་བསྲེག་སར་ཤིང་གི་སྟེང་དུ་བསྐྱོན་ནས་བསྲེགས་པ་མཐོང་ནས་དེ་ཉིད་དུ་བདག་ཀྱང་ཞུགས་ཏེ་གཉི་ག་ཤིའོ། །དེ་ནས་བཅོམ་ལྡན་འདས་ཀྱིས་རྒྱལ་པོ་དེ་སྐྱོ་བ་ཡང་དག་པར་བསྐྱེད་པའི་ཕྱིར་དེར་གཤེགས་ཏེ་བཀའ་སྩལ་པ། རྒྱལ་པོ་ཆེན་པོ་མི་རྣམས་ཀྱི་འཚོ་
བ་ནི་མི་རྟག་གོ་ཞེས་བྱ་བ་ལ་སོགས་པ་གསུངས་ནས། སྔ་དྲོ་སྐྱེ་བོ་མང་མཐོང་བ། །ཞེས་བྱ་བ་ལ་སོགས་པའི་ཚིགས་སུ་བཅད་པ་བཞི་བཀའ་སྩལ་པ་ཡིན་ནོ། །སྲོག་ནི་ཡིད་བརྟན་དུ་མི་རུང་སྟེ་དུས་ངེས་པ་མེད་པའི་ཕྱིར་མར་མེ་རླུང་ཁར་མ་བསྲུངས་པར་གཞག་པ་ལ་ཤི་བའི་དུས་ངེས་པ་མེད་པ་བཞིན་དུ་
སྟེ། འདི་ནི་བསྡུས་པའི་དོན་ཏོ། །ཕྱི་དྲོ་ཞེས་བྱ་བའི་སྒྲ་ནི་ཚིག་གི་ཕྲད་ཡིན་ཏེ་བདུན་པའི་དོན་ལ་འཇུག་སྟེ་ཉིན་པར་གྱི་ཐ་མ་ཕྱི་འཕྲེད་ཀྱི་དུས་ཞེས་བྱ་བའི་དོན་ཏོ། །ཁ་ཅིག་ནི་གཅིག་འགའོ། །མཐོང་མི་འགྱུར་ཞེས་བྱ་བ་ནི་མ་དམིགས་པའོ། །དེ་གང་ཡིན་ཞེ་ན། སྨྲས་པ། སྔ་དྲོ་ནི་ཐོག་མ་སྟེ་དེ་ཉིད་ཉི་
མའི་དང་པོའོ། །མཐོང་བ་ནི་ཡང་དག་པར་དམིགས་པ་དང་། ཡུལ་དུ་བྱས་ཞེས་བྱ་བའི་དོན་ཏེ། སེམས་ཅན་ཁ་ཅིག་སྔ་དྲོ་མཐོང་བ་ལས་ཕྱི་དྲོ་བཙལ་ན་ཤི་བར་གྱུར་པའི་ཕྱིར་མ་མཐོང་བ་ཡིན་ནོ། །སྐྱེ་བོ་མང་པོ་ནི་སྐྱེ་བོ་ཆེན་པོ་སྟེ། ཆེན་པོའི་སྒྲ་ནི་འདིར་མང་པོ་སྟོན་པར་བྱེད་པ་སྟེ། སྐྱེ་བོའི་ཚོགས་
ཆེན་པོ་འདུས་སོ་ཞེས་བྱ་བ་བཞིན་ནོ། །སྔ་དྲོ་ཁ་ཅིག་ཅེས་བྱ་བ་ནི་གང་ནུབ་མོ་དེ་ཉིད་ཀྱི་དང་པོར་མཐོང་བ་དེ་ཉིད་ཀྱི་ཐ་མར་མ་མཐོང་བ་ཞེས་བྱ་བའི་དོན་ཏོ། །དེ་ནི་དོན་འདི་ལྟར་སྟོན་པ་ཡིན་ཏེ། སེམས་ཅན་ནི་རྣམ་པ་གཉིས་ཏེ། འདོད་ཆགས་ཅན་དང་། ཚོང་གི་ཐ་སྙད་བྱེད་པ་དག་གོ། །དེ་ལ་འདོད་
ཆགས་ཅན་བུད་མེད་ཀྱི་སྐྱེ་བོ་ཉེ་བར་ལོངས་སྤྱོད་པའི་བདེ་བ་སྤྱད་པའི་དུས་སུ་ཚོལ་བ་ན་ཡང་འདོད་ཆགས་ཅན་གྱིས་མ་མཐོང་བ་དེའི་དབང་དུ་བྱས་ནས་ཚིགས་བཅད་ཀྱི་ཕྱེད་དང་པོའོ། །གང་ཡང་ཚོང་གི་ཐ་སྙད་བྱེད་པའི་བདག་པོ་ལ་སོགས་པ་དེས་སྔ་དྲོའི་དུས་སུ་ཚོང་གི་ཐ་སྙད་དང་བཅས་པ་སྟེ།
དེ་ཚོང་གི་ཐ་སྙད་རྣམས་ཀྱིས་གྲོང་དཔོན་ལ་སོགས་པས་སྔ་དྲོ་མི་མཐོང་བ་ཚིགས་བཅད་ཕྱེད་འོག་མའོ། །དགེ་བའི་ལས་དག་ལ་ཕྱི་ཤོལ་བྱེད་པ་དག་ལ་སྦྱར་བའི་ཕྱིར་ཚིགས་སུ་བཅད་པ་འདི་གསུངས་སོ། །གང་གི་ཕྱིར་དེ་ལྟར་འཚོ་བའི་སྲོག་ངེས་པ་མེད་པ་དེས་ན་བདག་ལ་ཕན་པར་འདོད་པ་

རྣམས་ཀྱིས་འདིར་ཡིད་བརྟན་པར་བྱ་བ་མ་ཡིན་པ་ཉིད་དུ་བསྟན་པའི་ཕྱིར་སྨྲས་པ། སྐྱེས་པ་བུད་མེད་མང་པོ་དང་། །ཞེས་བྱ་བ་ལ་སོགས་པ་སྨོས་སོ། །ཚིགས་བཅད་སྔ་མས་ནི་དུས་ལ་སོགས་པ་ལ་ངེས་པ་མེད་པར་བསྟན་ནས། འདིས་ནི་ན་ཚོད་ཀྱི་གནས་སྐབས་ངེས་པ་མེད་པ་ཉིད་དུ་བསྟན་པ་
ཡིན་ནོ། །ཡང་ན་ཡིད་བརྟན་པ་ལ་ཡིད་མི་ཆེས་པའི་རྒྱུས་འདིར་ཡང་ཡིད་བརྟན་པར་བྱ་བ་གང་ཡང་མེད་དོ་ཞེས་བྱ་བ་ནི་འདིའི་བསྡུས་པའི་དོན་ཏོ། །དེ་ལ་ཞེས་བྱ་བ་ནི་ངེས་པ་དང་བྲལ་བ་སྟེ་ཞེས་བྱ་བ་ཡིན་ཏེ། གསོན་པ་ཞེས་བྱ་བ་འདི་དང་སྦྱར་རོ། །ཅི་ཞིག་ཅེས་བྱ་བ་ནི་གང་ཞིག་ཡོད་དེ་གདེང་དྲོད་
མེད་པའི་ཕྱིར་ཏེ། མི་ཞེས་བྱ་བ་འདི་དང་སྦྱར་རོ། །གདེང་དྲོད་ནི་ཡིད་རྟོན་པར་བྱེད་པ་དང་། འཇིགས་པ་མེད་པར་འདུག་པའོ། །འཆི་བའི་ཆོས་ཅན་ཡིན་པས་མི་སྐྱེ་བ་སྟེ། སྐྱེ་བར་གྱུར་ན་ངེས་པར་འཆི་བ་ཡིན་པའི་ཕྱིར་དང་ཤེས་རབ་ཅེས་བྱ་བ་ནི་ཚིག་གི་ལྷག་མའོ། །ཡང་ན་མི་ཞེས་བྱ་བ་
ནི་ཤེད་ལས་སྐྱེས་སོ། །ཡིད་ཀྱིས་ཉེ་བར་མཚོན་པའི་ཕྱིར་དེ་ལ་བློ་དང་ལྡན་པ་ཉིད་དུ་སྟོན་ཏོ། །གསོན་པ་ཞེས་བྱ་བ་ནི་ཡིད་བརྟན་པ་ཡིན་པའི་ཕྱིར་ཏེ། གང་གི་རྣམ་པས་ཡིད་བརྟན་པ་ཡིན་ཞེ་ན། བདག་ནི་གཞོན་ནོ་ཞེས་བྱ་བ་སྟེ། ན་ཚོད་དང་པོ་ལ་བདག་གནས་པ་ཡིན་ནོ་ཞེས་པ་འདིའི་རྣམ་པས་
སོ། །དེ་ཉིད་དེ་བཞིན་དུ་འཚོ་བ་ལས་ཡིད་བརྟན་དུ་མི་རུང་བ་སྟེ། མིར་གྱུར་ནས་དར་ལ་བབ་པ་སྟེ། རེ་ཞིག་བདག་ནི་གནས་སྐབས་འདི་ལ་འཆི་བར་མི་འགྱུར་རོ་ཞེས་དེ་དེ་ལྟ་བུར་ཡིད་བརྟན་པར་མི་བྱའོ་ཞེས་བྱ་བའི་དོན་ཏོ། །དེ་ཅིའི་ཕྱིར་ཞེ་ན། སྨྲས་པ། དར་ལ་བབ་པའང་ཞེས་པ་སྟེ། གཞོན་
པར་གྱུར་ཀྱང་སྲོག་དང་བྲལ་ཞིང་འཆི་བ་ཡིན་ན། རྒས་པར་གྱུར་ན་ལྟ་སྨོས་ཀྱང་ཅི་དགོས་པའོ། །ན་ཞེས་བྱ་བ་ནི་གང་གི་ཕྱིར་ཞེས་པའི་དོན་ཏོ། །མི་ལ་སོགས་པ་ནི་དེ་ལྟར་འཆི་བ་ཡིན་གྱི། ལྷ་ནི་མ་ཡིན་ཏེ། མི་འཆི་བའི་ཕྱིར་རྒ་བ་དང་ན་བ་དང་འཆི་བ་མེད་པའི་འཆི་བ་ཡིན་ནོ་ཞེས་བྲམ་ཟེ་ཐང་ལ་
འབར་གྱིས་བཤད་པ་ནི་འཇིག་རྟེན་པ་ཡིན་པས་དེ་ནི་མི་རིགས་ཏེ། སེམས་ཅན་ཐམས་ཅད་འཆི་བར་འགྱུར་ཞེས་པའི་ཡུང་གིས་སོ། །རིགས་པ་ཡང་ལུས་ནི་བྱས་པ་ཡིན་པའི་ཕྱིར་ཞེས་བྱ་བ་ལ་སོགས་པས་སོ། །སྐྱེས་པ་བུད་མེད་ཅེས་བྱ་བ་འདིར་ནི་ཐམས་ཅད་འདུས་པ་ཡིན་ཏེ། མ་ནིང་

ནི་ཕྱོགས་གཉི་ག་ལ་བརྟེན་པའི་ཕྱིར་གཉི་གས་གཟུང་ངོ་། །ཡང་ན་གཙོ་བོ་ཡོངས་སུ་གཟུང་བས་གཞན་སྨོས་མི་དགོས་པའི་ཕྱིར་རོ། །མང་པོ་ཞེས་བྱ་བ་ནི་ལན་མང་པོ་སྟེ། ཚེ་རབས་ཚེ་རབས་སུ་ཡང་དང་ཡང་ཞེས་བྱ་བའི་དོན་ཏོ། །གང་ཡང་འཆི་བ་མ་ཡིན་ནོ་ཞེས་
བསྟན་པ་དེ་ནི་ཚིག་ཙམ་དུ་ཟད་དེ། ཡང་སྨྲས་པ། མི་འཆི་བ་ཞེས་བྱ་བ་ནི་མིང་ཉི་ཚེར་ཟད་དེ། སུམ་ཅུ་རྩ་གསུམ་པའི་མིང་མ་བཏགས་པར་བརྗོད་པ་ཡིན་ནོ། །རང་གི་ལས་འབྲས་ཉེ་བར་སྤྱད་ནས་ཀྱང་། །ངེས་པར་ལྟུང་ཞིང་ཉམས་པར་འགྱུར་བ་སྟེ། །གསེར་གྱི་བྱེ་མའི་ཚོགས་ཅན་མཚོ་
བསྟེན་པ། །རྩྭ་འཇམ་བརྒྱན་པའི་ས་ཕྱོགས་ཉམས་དགའ་དང་། །ལྷ་ཡི་བུ་མོའི་བདེ་བ་ཉམས་དགའ་རྣམས་ལྟ་བའང་། །འཆི་བའི་མཚན་མས་འཁྱུད་ཅིང་ཉམ་ཐག་འོ་དོད་འབོད། །ལང་ཚོས་དྲེགས་ཤིང་འཆི་བའི་འཇིགས་པ་དང་བྲལ་བ་དག་ལ་སྲིད་པ་ལས་སྐྱོ་བར་བྱ་བའི་ཚིགས་སུ་བཅད་པ་
འདི་གསུངས་སོ། །ལང་ཚོས་ཐོབ་པ་གཅིག་པུ་འཆི་བར་འགྱུར་བར་མ་ཟད་དེ་ལང་ཚོ་མ་ཐོབ་པ་ཡང་འཆི་བར་འགྱུར་རོ་ཞེས་བསྟན་པའི་ཕྱིར་སྨྲས་པ། ཁ་ཅིག་མངལ་དུ་ཞེས་བྱ་བ་ལ་སོགས་པ་སྨོས་སོ། །གྲོང་ཁྱེར་འཕགས་རྒྱལ་ན་སྤུན་བཞི་ཞིག་ལ་ཆུང་མ་ཡང་བཞི་ཡོད་དེ། དེ་ལས་ཕུ་བོ་
གཉིས་ཀྱི་བུ་སྤ་ཏ་ལ་ཞེས་བྱ་བ་དང་། བདེ་ཐོས་ཞེས་བྱ་བ་གཉིས་ཤིག་ཤིན་ཏུ་ཤ་རྒྱས་ཤིང་གཟུགས་དང་ལྡན་ལ་མཛེས་པས་རྒྱལ་པོའི་བཙུན་མོའི་འཁོར་གྱི་ནང་དུ་སོང་བ་ལས་དེ་གཉིས་ལ་རྒྱལ་པོ་གཏུམ་པོ་རབ་སྣང་ཞེས་བྱ་བ་དེ་རབ་ཏུ་ཁྲོས་ཏེ། དེ་གཉིས་བསད་ནས་དེའི་ཁྱིམ་ལ་མེ་བཏང་སྟེ། དེ་
ནས་སྦྲུམ་པ་དང་བཙས་པའི་བུད་མེད་དང་དེའི་མེས་པོ་རྒན་པོ་ཡང་ཤི་བར་གྱུར་ཏོ་ཞེས་བཅོམ་ལྡན་འདས་ཀྱིས་གསན་ནས་ཚིགས་སུ་བཅད་པ་འདི་གསུངས་སོ། །འདིར་ཡང་གནས་སྐབས་བཞི་སྟོན་པ་ཡིན་ཏེ། མངལ་དང་བྱིས་པ་དང་། གཞོན་ནུ་དང་། དར་ལ་བབ་པའོ། །དེ་ལ་ཚིག་རྐང་དང་
པོས་ནི་མངལ་གྱི་གནས་སྐབས་བསྟན་ཏོ། །གཉིས་པས་ནི་བྱིས་པའི་གནས་སྐབས་སོ། །གསུམ་པས་ནི་གཞོན་ནུའི་གནས་སྐབས་སོ། །བཞི་པས་ནི་ལང་ཚོའི་གནས་སྐབས་ཏེ་འདི་ནི་བསྡུས་པའི་དོན་ཏོ། །མངལ་ཞེས་བྱ་བ་ནི་མའི་ལྟོར་ནུར་ནུར་པོ་ལ་སོགས་པའི་གནས་སྐབས་སོ། །ཁ་ཅིག་

ཅེས་བྱ་བ་ནི་ལ་ལས་སམ་གཅིག་ཅེས་བྱ་བའི་དོན་ཏོ། །ཁ་ཅིག་ལ་དེ་ལྟར་མངལ་ནས་བཙའ་བའི་ལས་མེད་པའི་ཕྱིར་རོ། །འཆི་བར་འགྱུར་བ་ནི་འཇིག་པར་འགྱུར་བའོ། །དེ་བཞིན་ཁ་ཅིག་ཅེས་བྱ་བ་ནི་འཆི་བར་འགྱུར་བའོ། །བཙས་པའི་སར་ཞེས་བྱ་བ་ནི་བུད་མེད་བཙས་པའི་དུས་དེ་
ཉིད་ཀྱི་ཚེ་སྟེ། བཙས་པའི་ཁྱིམ་དུའོ། །གང་དུ་དེ་བཙས་པ་དེ་ཉིད་ཀྱི་ཁྱིམ་དུ་སྟེ། ཁྱིམ་དེར་ད་ལྟར་ཡང་དེ་ལ་གནས་ཤིང་སྐྱེས་པ་ཉིད་དུ་བྱིས་པ་དེ་འཆི་བའོ། །གོག་ཙམ་ན་ཞེས་བྱ་བ་ནི་ཀུན་ཏུ་འགྲེ་ཞིང་ཡོངས་སུ་རྒྱུ་བ་སྟེ། དེ་ལས་ཡོངས་སུ་འཁྱམ་ཞིང་རྩེ་བ་དང་། སྲང་ལ་སོགས་པ་
དག་ཏུ་རྟག་ཏུ་རྩེ་བའི་གནས་སྐབས་ཡིན་ནོ། །ན་ཞེས་བྱ་བའི་སྒྲ་ནི་འཆ