Luận tạng Tây Tạng (Tengyur) — Tập 148

་རྔུབ་དྲན་པའོ། །འཇོག་ཅེས་བྱ་བ་ནི་གང་དེ་ལྟར་བཅོམ་ལྡན་འདས་ཀྱི་ཉན་ཐོས་ལེགས་པར་འཇོག་པ་སྟེ། ལྷག་པར་བསྒོམས་ཤིང་ཡོངས་སུ་ལེན་ནའོ། །ཐོབ་པར་འགྱུར་བ་ནི་རྙེད་
པར་འགྱུར་བའོ། །ཅི་ཞིག་ཅེ་ན། སྔ་ཕྱིའི་ཁྱད་པར་རྣམས་བྱ་བ་སྨོས་ཏེ། སྔ་མའི་དང་ཕྱི་མའི་ཁྱད་པར་ནི་སྔ་ཕྱི་སྟེ། རླུང་འཇུག་པ་ནི་སྔ་མའོ། །འབྱུང་བ་ནི་ཕྱི་མ་སྟེ། དེའི་ཁྱད་པར་ནི་ཕན་ཡོན་ཏེ། སྐྱེ་བ་དང་འཇིག་པ་ཡོངས་སུ་བརྟགས་ན་མི་རྟག་པའི་འདུ་ཤེས་ལ་སོགས་པའི་
ཚལ་འཐོབ་པར་འགྱུར་རོ། །ཁྱད་པར་འདི་ཐོབ་པས་ཅིར་འགྱུར་ཞེ་ན། འཆི་བདག་རྒྱལ་པོས་བལྟར་ཡང་མེད་པར་འགྲོ། །ཞེས་བྱ་བ་སྟེ། འཆི་བདག་གི་མིང་ཅན་དེའི་དབང་དང་ཡུལ་དུ་མི་སྣང་བ་སྟེ། འཆི་བ་མེད་པའི་གོ་འཕང་དུ་འགྲོ་བའོ། །གང་གི་ཚེ་དངོས་པོ་རྣམས་ཀྱི་སྐྱེ་བ་
དང་འཇིག་པའི་ཆོས་འཕགས་པའི་ལམ་གྱིས་རྟོགས་པར་གྱུར་ན་ནི་ཕྲ་རྒྱས་སྤངས་ཤིང་དེར་འགྲོ་སྟེ། གང་དུ་འཆི་བའི་བདུད་ཀྱིས་མཐོང་ཞིང་བགེགས་སུ་འགྱུར་བ་ཐམས་ཅད་དུ་འཇུག་པའི་འཆི་བདག་གི་རྒྱལ་པོས་མཐོང་བ་ལས་གྲོལ་བ་སྟེ་ཐར་པ་ལ་གནས་པ་ཡིན་ནོ་ཞེས་སོ། །ཇི་ལྟར་
ཁྱད་པར་འཐོབ་པ་ཡིན་ཞེ་ན། ལུས་གཏོགས་ཞེས་བྱ་བ་ལ་སོགས་པ་སྟེ། དགོན་པ་ན་གནས་པའི་དགེ་སློང་རབ་ཏུ་མང་པོ་ཞིག་གི་དཔྱོད་པ་སྐྱེས་ཏེ། བཅོམ་ལྡན་འདས་ཀྱི་སྤྱན་སྔར་སོང་ནས་བཙུན་པ་མྱ་ངན་ལས་འདས་པ་ཇི་ལྟ་བུ་ལགས་ཞེས་གསོལ་པ་དང་། བཅོམ་ལྡན་འདས་

ཀྱིས་བཀའ་སྩལ་པ། དེ་ནི་བརྗོད་པར་མི་རུང་སྟེ། དགེ་སློང་དག་དཔེར་ན་འགའ་ཞིག་གིས་དམུས་ལོང་ལ་གཟུགས་རྣམ་པ་སྣ་ཚོགས་པ་ཡིད་དུ་འོང་ཞིང་ཡིད་འཕྲོག་པ་བསྟན་ན་ཅི་དེས་ཤེས་པར་འགྱུར་རམ། བཙུན་པ་དེ་ནི་མ་ལགས་སོ། །དེ་དག་ནི་རང་གིས་རིག་པ་
ཡིན་ཏེ། ཅིའི་ཕྱིར་ཞེ་ན། གཞན་གྱི་ཚིག་གིས་ནི་ཇི་ལྟར་ཡང་རྟོགས་པར་མི་འགྱུར་རོ། །འོན་ཀྱང་དེ་ཇི་ལྟར་རྟོགས་པ་དེ་ལྟར་ལེགས་པར་རབ་ཏུ་ཉོན་ཅིག་དང་ཞེས་བྱ་བའི་བར་དུ་སྟེ། འདི་ན་གཅིག་པུ་ཉམ་ང་བ་ནི་ཁྱིམ་ན་གནས་པ་སྟེ། དྲན་པ་ཉེ་བར་གཞག་པ་བཞི་བསྒོམ་པར་བྱའོ་ཞེས་པ་
ནས་ཇི་ཙམ་དུ་ཚིགས་སུ་བཅད་པ་འདི་གསུངས་སོ། །ལུས་ཀྱི་རྣམ་པ་ཡིན་པས་ལུས་སུ་གཏོགས་པ་སྟེ། ལུས་ལ་དམིགས་པའི་དྲན་པ་ཉེ་བར་གཞག་པ་བཞིའོ། །ལུས་སུ་གཏོགས་པའི་དྲན་པ་གང་ཞེ་ན། དགེ་སློང་དག་འདི་ལ་ནང་གི་ལུས་ལ་ལུས་ཀྱི་རྗེས་སུ་ལྟ་ཞིང་ཞེས་བྱ་བ་ལ་སོགས་
པ་མདོ་ལས་གསུངས་པའོ། །ཉེ་བར་གཞག་པ་ནི་ཉེ་བར་གནས་པ་དང་། ཉེ་བར་སྐྱེས་པ་དང་། མངོན་དུ་གྱུར་པའོ། །འདིའི་མཚན་མ་ནི་ཚུལ་ཁྲིམས་དང་དབང་པོ་སྡོམ་པ་ཡིན་ནོ་ཞེས་བསྟན་པའི་ཕྱིར་སྨྲས་པ། རེག་པའི་སྐྱེ་མཆེད་དྲུག་ཅེས་བྱ་བ་སྨོས་ཏེ། ཡུལ་དང་དབང་པོ་དང་རྣམ་
པ་འདུས་པ་ལ་སྐྱེས་པའི་སེམས་ཡུལ་ལ་རེག་པ་ནི་རེག་པ་ཞེས་བྱའོ། །དེའི་སྐྱེ་མཆེད་ནི་སྐྱེད་པར་བྱེད་པ་དང་རྒྱུ་ཉིད་དེ་མིག་ལ་སོགས་པ་དྲུག་སྟེ། གྲངས་དྲུག་པོ་དེ་དག་ལའོ། །བསྡམས་པ་ནི་དུལ་བ་སྟེ། དགེ་སློང་དག་འདི་ལ་མིག་གི་དབང་པོ་སྡོམ་པས་བསྡམ་པར་བྱའོ་ཞེས་མདོ་ལས་གསུངས་
སོ། །དབང་པོ་སྡོམ་པས་ནི་ཚུལ་ཁྲིམས་ཀྱི་སྡོམ་པ་མ་བསྟན་ཀྱང་རྟོགས་པ་ཡིན་ཏེ། ཚུལ་ཁྲིམས་མ་གཏོགས་པར་ནི་དབང་པོ་སྡོམ་པ་མེད་དོ། །གང་གི་ཕྱིར་དེ་འདི་ཉིད་ལ་འཇུག་པའི་སྤྱོད་པ་དེ་དག་གིས་ནི་ལུས་སུ་གཏོགས་པའི་དྲན་པ་བསྒོམ་པར་ནུས་ཀྱི་གཞན་གྱིས་ནི་མ་ཡིན་ནོ། །
འདིས་ནི་དྲན་པའི་འབྲས་བུ་བསྟན་ཏེ། དེའི་མཐུས་དབང་པོ་དུལ་བའི་ཕྱིར་རོ། །གང་ཞིག་ཅེས་བྱ་བ་ནི་གང་ཟག་ཚུལ་ཁྲིམས་དང་དབང་པོ་སྒོམ་པ་ལ་གནས་པ་ལ་ནི་ལུས་སུ་གཏོགས་པའི་དྲན་པ་བསྒོམ་པ་ཡོད་དེ། །རྟག་ཏུ་མཉམ་གཞག་འཇོག་བྱེད་དེ། །ཞེས་བྱ་བ་སྔར་བསྟན་

པའི་རྣལ་འབྱོར་པའི་ཡོན་ཏན་བསྟན་པ་ཡིན་ཏེ། རྟག་ཏུ་མཉམ་པར་འཇོག་བྱེད་པ། །ཞེས་བྱ་བ་ནི་རྒྱུན་དུ་ཏིང་ངེ་འཛིན་ལ་བསྒོམ་པ་མཆོག་ཏུ་བྱེད་པའོ། །ཡང་ན་རྟག་པའི་སྒྲ་ནི་མྱ་ངན་ལས་འདས་པའི་བྱེ་བྲག་གོ། །མཉམ་པར་གཞག་པ་དེ་ནི་རྟག་ཏུ་མྱ་ངན་ལས་འདས་པ་བདག་ཉིད་ཀྱིས་རྟོགས་
པར་འགྱུར་ཏེ། མཉམ་པར་གཞག་པའི་སེམས་ལས་ནི་ཇི་ལྟ་བ་བཞིན་དུ་ཤེས་པར་འགྱུར་རོ་ཞེས་པའི་ཚིག་གིས་སོ། །གང་གིས་མྱ་ངན་ལས་འདས་པ་རྣམ་པར་གནས་པར་ཐོབ་ཅེ་ན། བདག་ཉིད་ཀྱིས་ཞེས་བྱ་བ་སྟེ། སེམས་ཅན་སོ་སོའི་བདག་ཉིད་ཀྱིས་མྱ་ངན་ལས་འདས་པ་རྟོགས་པར་
འགྱུར་ཏེ། ཕྱི་རོལ་ལ་ཡང་དེ་མེད་པའི་ཕྱིར་རོ། །དྲན་པའི་སྟོབས་ཉིད་ཀྱིས་ནི་སྲིད་པའི་རྒྱ་མཚོ་ལས་རྒལ་བར་འགྱུར་རོ་ཞེས་བསྟན་པའི་ཕྱིར་སྨྲས་པ། གང་ཞིག་ཅེས་བྱ་བ་ལ་སོགས་པའོ། །ཚེ་དང་ལྡན་པ་ཤཱ་རིའི་བུ་སྤྱོད་ལམ་རྣམ་པ་བཞིས་མཛེས་པ་དང་ཤིན་ཏུ་ཆོག་ཤེས་པ་ལགས་སོ་ཞེས་
དགེ་སློང་དག་གིས་བཅོམ་ལྡན་འདས་ཀྱི་སྤྱན་སྔར་བསྔགས་པ་བརྗོད་དོ། །བཅོམ་ལྡན་འདས་ཀྱིས་བཀའ་སྩལ་པ། དེ་ནི་ངོ་མཚར་མི་ཆེ་སྟེ། དེ་ཅིའི་ཕྱིར་ཞེ་ན། གང་ལ་ལ་ཞིག་དྲན་པ་ཉེ་བར་གཞག་པ་བཞི་ལ་གནས་ཤིང་བསྒོམ་པ་ཞེས་བྱ་བ་ལ་སོགས་པ་སྟེ། དགེ་སློང་གང་གིས་ཡོངས་སུ་
འཛིན་པ་སྤངས་པ་ལ་ནི་ཡོད་པ་ཡིན་ནོ་ཞེས་བྱ་བ་འདི་གསུངས་སོ། །རྣམ་པ་ཐམས་ཅད་དུ་ཞེས་བྱ་བ་ནི་རྣམ་པ་ཀུན་ནས་ཏེ་ལུས་ལ་སོགས་པའི་ཡུལ་ལ་དྲན་པར་བྱེད་པ་སྟོན་པ་བཞིན་ནོ། །དྲན་པ་ནི་དྲན་པ་ཉམས་པ་མེད་པའི་ཚུལ་ལོ། །རྟག་ཏུ་ཞེས་བྱ་བ་ནི་རྒྱུན་དུའོ། །ལུས་སུ་གཏོགས་པ་དྲན་
པ་ཉེ་བར་གཞག་པ་ཉི་ཚེར་མ་ཟད་དེ་ཐར་པ་འདོད་པ་ཡང་ཡིན་ནོ་ཞེས་བསྟན་པའི་ཕྱིར་སྨྲས་པ། བདག་ཉིད་མེད་ཅིང་ཞེས་བྱ་བ་སྨོས་ཏེ། དེ་ལྟར་གྱུར་ཀྱང་འདི་ལ་ངར་འཛིན་པའི་དངོས་པོ་སྤངས་པར་གྱུར་པའོ། །འདིས་ནི་ད་ལྟར་བྱུང་བའི་བདག་ནི་དངོས་པོ་སྤོང་བར་འདོད་པ་བསྟན་ཏོ། །བདག་
གིར་འཛིན་པ་མེད་ཅེས་བྱ་བ་ནི་ད་ལྟར་བྱུང་བའི་དངོས་པོ་སྤང་བར་བསྟན་ཏོ། །གཉི་ག་རྣམ་པར་སྤང་བར་བྱ་བའི་ཕྱིར་ཡང་གི་སྒྲ་གཉིས་ཀྱིས་བསྟན་ཏོ། །འདིས་ནི་ཕུང་པོ་ལྷག་མ་དང་བཅས་པའི་མྱ་ངན་ལས་འདས་པ་བསྟན་ནས། ཕུང་པོ་ལྷག་མ་མེད་པའི་མྱ་ངན་ལས་འདས་པ་འདོད་པའི་

ཕྱིར། བདག་ཏུ་མི་འགྱུར་ཞེས་བྱ་བ་སྨོས་ཏེ། མ་འོངས་པའི་བདག་དང་བདག་གིར་བྱ་བའི་དངོས་པོ་སྤང་བར་འདུན་པར་གསལ་བར་བྱེད་པ་ཡིན་ནོ། །དེ་ལྟར་དགེ་སློང་མཉམ་འཇོག་ཅེས་བྱ་བ་ལ། རྣམ་པ་དེས་དེ་བཞིན་གཤེགས་པའི་ཉན་ཐོས་ཀྱིས་དྲན་པ་
ཉེ་བར་གཞག་ཅིང་ཐར་པའི་བསམ་པ་ཁྱད་པར་ཅན་སྐྱེས་པར་གྱུར་ན་ནི་རྩེ་གཅིག་པའི་སེམས་ཀྱིས་བསྒོམ་པ་བསྒྲུབ་པར་འགྱུར་ཏེ། རྩེ་གཅིག་ཏུ་གྱུར་པའི་ཡིད་ཀྱིས་ནི་མྱུར་དུ། ཡུལ་ལ་སྲེད་པ་དག་ལས་རྒལ་བར་འགྱུར། །ཞེས་བྱ་བ་ཡིན་ཏེ། སྲེད་པ་རྣམ་པ་གསུམ་ཡུལ་རྣམ་པ་སྣ་
ཚོགས་ལས་སྐྱེས་པ་སྤང་བ་ཉིད་དོ། །འཁོར་བའི་རྩ་བ་ནི་འདི་ཡིན་པའི་ཕྱིར་འཁོར་བའི་ཟག་པ་ཐམས་ཅད་སྐེམས་པ་ཡིན་ནོ། །དེ་ལྟར་ཡུལ་ལ་སྲེད་པ་དག་ལས་རྒལ་བར་བྱས་ནས་སྐྱེ་བ་དང་རྒ་བ་ལས་ཀྱང་རྒལ་བར་འགྱུར་བ་བསྟན་པའི་ཕྱིར། གང་ཞིག་དྲན་པར་ཞེས་བྱ་བ་ལ་སོགས་པའོ། །
དགེ་སློང་དག་གང་ལ་ལ་ཞིག་དད་པ་ཕུན་སུམ་ཚོགས་པར་འགྱུར་བ་ནས། ཏིང་ངེ་འཛིན་ཕུན་སུམ་ཚོགས་པའི་བར་དུ་ཡིན་ནོ། །དེ་ནི་རིང་པོར་མི་ཐོགས་པར་སྐྱེ་བ་དང་རྒ་བའི་མཐའ་མ་ཐོབ་པར་འགྱུར་རོ་ཞེས་བྱ་བ་ནས་ཚིགས་སུ་བཅད་པ་བཞི་གསུངས་སོ། །གང་ཞིག་ཅེས་བྱ་བ་ནི་འོག་ནས་
སྨོས་པ་ལ་ནན་ཏན་བྱེད་པ་སྟེ། ཡང་དག་པར་རབ་ཏུ་ཞུགས་པ་ཞེས་བྱ་བའི་དོན་ཏོ། །མེལ་ཙེ་བྱེད་པ་ཞེས་བྱ་བ་ནི་འབད་པས་བརྩོན་འགྲུས་བརྩམས་པའོ། །མེལ་ཙེ་བྱེད་པ་ནི་བརྩོན་འགྲུས་ཏེ། ཁྱད་པར་ཐམས་ཅད་ནི་བརྩོན་འགྲུས་ཀྱིས་འདྲེན་པའི་ཕྱིར་རོ། །དྲན་ལྡན་ནི་ལུས་སུ་གཏོགས་པའི་
དྲན་པ་དང་ལྡན་པའི་ཕྱིར་རོ། །ཤེས་བཞིན་ནི་ཕྱིན་ཅི་མ་ལོག་པར་ངེས་པར་རྟོག་པ་སྟེ། ཤེས་པ་ཁྱད་པར་ཅན་དང་ལྡན་པ་ཉིད་དོ། །དགའ་བ་ནི་ཚུལ་ཁྲིམས་ཕུན་སུམ་ཚོགས་པ་དེ་དང་ལྡན་པས་འགྱོད་པ་མེད་ཅིང་རྟག་ཏུ་དགའ་བ་ཡིན་པའི་ཕྱིར་རོ། །རབ་ཏུ་དང་བ་ཞེས་བྱ་བ་ནི་དད་པའི་དབང་
གིས་རྙོག་པ་རྣམས་བསལ་བ་ཡིན་ཏེ། སྟོན་གྱི་དུས་སུ་མཚོ་ཆེན་པོ་རབ་ཏུ་དང་བར་འགྱུར་བ་བཞིན་ནོ། །དེ་བཞིན་དུ་ཀུན་རྫོབ་ཀྱི་ཚོགས་ཏེ་དད་པ་ལ་སོགས་པའི་དབང་པོ་ལ་སོགས་པ་ཕུན་སུམ་ཚོགས་པའི་ཕྱིར་རོ། །དུས་དུས་སུ་ཞེས་བྱ་བ་ནི་མཐར་གྱིས་མངོན་པར་རྟོགས་པར་འབྱུང་

བའི་ཕྱིར་རོ། །ཆོས་ནི་འཕགས་པའི་བདེན་པ་ལ་སོགས་པའོ། །དཔྱོད་པ་ནི་མཐོང་བའི་ལམ་ལ་སོགས་པས་ཡོངས་སུ་བརྟག་པ་སྟེ། དེའི་སྟོབས་ཀྱིས་ཉོན་མོངས་པ་ཐམས་ཅད་སྤོང་ཞིང་། དེ་ལས་མི་སློབ་པའི་ལམ་ལ་གནས་པ་ཡིན་ནོ། །གདུལ་བའི་བྱ་བ་ལ་ནན་ཏན་དུ་གང་བྱེད་པ་
དེ་ཉིད་སྨྲས་པ། རྒལ་བར་འགྱུར་ཞེས་བྱ་བ་སྨོས་ཏེ། རབ་ཏུ་སྤངས་པའི་ཕྱིར་རོ། །སྐྱེ་བ་དང་རྒ་བ་ནི་འཁོར་བའི་ཕུང་པོ་སྟེ། ལྷག་མ་མེད་པའི་མྱ་ངན་ལས་འདས་པ་འཐོབ་པར་འགྱུར་བས་སོ། །གསུངས་པ་ནི་འཇིགས་པ་མེད་པས་ང་ཉིད་སྨྲས་ཏེ། ཕྱིན་ཅི་མ་ལོག་པའི་ཤེས་པ་ཐོབ་པའི་
ཕྱིར་རོ། །གཞན་དག་གི་བཤད་པ་ནི་ཕྱིན་ཅི་ལོག་དང་ལྡན་པའི་ཕྱིར་རོ། །གང་གི་ཕྱིར་ཡང་བརྩོན་འགྲུས་དང་ལྡན་པས་དེ་ཉིད་ལ་གཟུད་པའི་ཕྱིར། དེ་ལྟས་རྟག་ཏུ་མེལ་ཙེ་བྱེད་སྟོན་ཅིང་། །ཞེས་བྱ་བ་སྨོས་ཏེ། དུས་རྟག་ཏུ་བརྩོན་འགྲུས་བརྩམས་པར་གྱིས་ཤིག་པ་སྟེ། གང་གི་ཕྱིར་
མེལ་ཙེ་ནི་བརྩོན་འགྲུས་ཡིན་ལ། ལེ་ལོ་ནི་གཉིད་ཀྱི་རང་བཞིན་ཡིན་པའི་ཕྱིར་རོ། །བརྩོན་པ་ཡིས་ཞེས་བྱ་བ་ནི་བརྟུན་པས་སྤྱོད་ཅིང་གུས་པ་སྟེ། དེ་གང་ལ་ཡོད་པ་དེ་ནི་བརྩོན་པ་ཅན་ཏེ། དབྱུག་པ་ཅན་བཞིན་ནོ། །སྡོད་པ་མེད་པར་རྟག་ཏུ་སྦྱོར་བས་ཉིན་མོ་འཆག་པ་དང་། འདུག་པ་གཉིས་
ཀྱིས་སེམས་སྒྲིབ་པ་དག་ལས་སྦྱང་བར་བྱའོ་ཞེས་བྱ་བ་ལ་སོགས་པ་མདོ་ལས་གསུངས་སོ། །སྔ་མར་རྟག་ཏུ་སྦྱོར་བ་བསྟན་ནས། འདིས་ནི་གུས་པར་སྦྱོར་བ་བསྟན་ཏེ། དགེ་སློང་ཞེས་བྱ་བ་ནི་དད་པ་དང་། ཚུལ་ཁྲིམས་ཕུན་སུམ་ཚོགས་པ་ཙམ་གྱིས་གང་ཟག་སྔ་མའི་གནས་སྐབས་
ཡིན་པའི་ཕྱིར་འདི་བྱས་པ་ཡིན་ཏེ། དེ་དང་ལྡན་པ་ནི་དགེ་སློང་ཞེས་བྱ་བར་བརྗོད་པར་རིགས་སོ། །མཁས་པས་ནི་རྟོགས་པ་སྟེ། ཤེས་བཞིན་དང་ལྡན་པའི་ཕྱིར་རོ། །དྲན་ལྡན་ཞེས་བྱ་བ་ནི་དྲན་པ་ཡོད་པ་སྟེ། དེ་ཉིད་དབང་པོའི་སྟོབས་ཀྱིས་ཉེ་བར་བཀག་པའི་རྣལ་འབྱོར་ཅན་ནོ། །ཀུན་དུ་
སྦྱོར་བ་སྤངས་ནས་སུ། །ཞེས་བྱ་བ་ནི་རྗེས་སུ་ཆགས་པ་དང་ཁོང་ཁྲོ་བ་ལ་སོགས་པ་སྟེ། རྣམ་པ་དགུ་བྱེ་བྲག་མེད་པར་བསྟན་ཏོ། །སྐྱེ་རྒའི་ཞེས་བྱ་བ་འདིས་ནི་སྲིད་པའི་ཀུན་དུ་སྦྱོར་བའི་དངོས་པོ་ཐམས་ཅད་སྤངས་པར་བསྟན་ཏོ། །དེས་ནི་འདི་ལ་མྱ་ངན་འདས་པ་ཐོབ། །ཅེས་བྱ་བ་ནི་

མཐོང་བའི་ཆོས་ཉིད་ལ་དེས་ངེས་པར་ཐར་པ་སྒྲུབ་པ་ཡིན་ཏེ། ལེགས་པར་གསུངས་པ་མཉན་པ་དང་འབྲེལ་པའི་བརྩོན་འགྲུས་ལ་སོགས་པས་སོ། །བསྟན་པས་ཉན་དུ་གཞུག་པའི་ཕྱིར་སྨྲས་པ། གཉིད་ལོག་ཅེས་བྱ་བ་ལ་སོགས་པ་སྨོས་སོ། །མེལ་ཙེ་བདག་
ལས་ཁྱོད་ཉོན་ཅིག །ཅེས་བྱ་བ་ནི་མེལ་ཙེ་བྱེད་པར་གྱུར་པས་ཤིན་ཏུ་གུས་པ་དང་ཞེས་བྱ་བ་ངས་ཁྱེད་ལ་བསྟན་གྱིས་ཉོན་ཅིག་པ་སྟེ། ཚད་མེད་པའི་བདེ་བའི་ཐབས་བསྟན་པའི་ཕྱིར་རོ། །གུས་པར་མི་ཉན་པའི་དབང་དུ་བྱས་ནས། གཉིད་ལོག་དེ་དག་སད་པར་བྱེད་པ་ཡི། །ཞེས་བྱ་བ་
རབ་ཏུ་སད་པར་གྱིས་ཤིག་པ་སྟེ། གང་དེ་དག་བག་མེད་པ་ལ་སོགས་པའི་གཉིད་ཀྱིས་ཟིལ་གྱིས་ནོན་པ་དེ་དག་སད་པར་གྱིས་ཤིག་པའོ། །གཞན་དུ་ན་སངས་རྒྱས་འབྱུང་བ་མེད་པར་ནི་འགྲོ་བ་དག་ཏུ་ཆོས་ཀྱི་ཕུན་སུམ་ཚོགས་པ་མེད་པའི་ཕྱིར་རོ། །གང་དག་བདག་དང་གཞན་གྱི་དོན་
བྱ་བ་ལ་བརྩོན་འགྲུས་འཐོབ་པ་དེ་དག་ནི་གཉིད་མ་ལོག་པ་བཞིན་དུ་འཐོབ་པར་བྱས་པ་སྟེ། དེ་དང་རྗེས་སུ་མཐུན་པར་བསྟན་པས་ཉན་པའི་སྣོད་དུ་འགྱུར་བ་ཉིད་དུ་འདིས་སྦྱོར་བ་ཡིན་ནོ། །ཅིའི་ཕྱིར་དེ་ལྟར་སྦྱོར་བ་ཡིན་ཞེ་ན། འདི་ལྟར། ཉལ་བས་མེལ་ཙེ་བྱེད་བླ་སྟེ། །ཞེས་བྱ་བ་ཡིན་ཏེ། ལེ་
ལོ་ལ་སོགས་པའི་དངོས་པོ་ཉལ་བ་ལས་ནི་བརྩོན་འགྲུས་ལ་སོགས་པའི་ཚུལ་མེལ་ཙེ་བྱེད་པ་མཆོག་ཡིན་ཏེ། མངོན་པར་འདོད་པའི་དོན་སྒྲུབ་པའི་ཕྱིར་རོ། །རྒྱུ་གཞན་ཡང་བསྟན་པའི་ཕྱིར་སྨྲས་པ། མེལ་ཙེ་བྱེད་ལ་འཇིགས་པ་མེད། །ཅེས་བྱ་བ་སྨོས་ཏེ། ལ་ཞེས་བྱ་བ་ནི་རྒྱུ་བསྟན་པའི་
དོན་ཏོ། །གང་གི་ཕྱིར་དགེ་བ་བྱ་བ་དག་ལ་མེལ་ཙེ་བྱེད་པར་གྱུར་ན་ནི་དམྱལ་བ་ལ་སོགས་པའི་འཇིགས་པ་མེད་དེ། དགེ་སློང་བསོད་ནམས་དག་གིས་འཇིགས་པར་མི་འགྱུར་རོ་ཞེས་ལུང་ལས་འབྱུང་ངོ་། །མེལ་ཙེ་བྱེད་པས་འཇིགས་པ་མེད་པ་དེ་ཅིའི་ཕྱིར་ཞེ་ན། འདི་ལྟར། མེལ་ཙེ་བྱེད་པར་
བརྩོན་པ་དང་། །ཞེས་བྱ་བ་སྨོས་ཏེ། གཉིད་མི་ལོག་པ་ཡིན་པས་མེལ་ཙེའོ། །མེལ་ཙེ་བྱེད་པ་ཉིད་ཀྱི་དངོས་པོ་ཡིན་པས་མེལ་ཙེ་བྱེད་པ་ཉིད་དོ། །བརྩོན་འགྲུས་ལ་རྗེས་སུ་འཇུག་པའི་རྣལ་འབྱོར་པ་རྣམས་ཀྱིས་གུས་པའི་སྦྱོར་བ་བསྟན་ནས་རྟག་ཏུ་བྱེད་པའི་སྦྱོར་བ། ཉིན་མཚན་རྗེས་སུ་སློབ་

བྱེད་ཅིང་། །ཞེས་བྱ་བ་སྨོས་ཏེ། མཚན་མོ་ནི་མུན་པ་སྟེ། གང་གི་ཕྱིར་བསླབ་པ་གསུམ་པོ་དག་ལ་རྗེས་སུ་མཐུན་པར་བསླབ་པ་དག་མྱ་ངན་ལས་འདས་པར་ཕྱིན་པའོ། །བརྩོན་འགྲུས་ཀྱིས་ལྷག་པའི་འབྲས་བུ་འདི་བསྟན་པའི་ཕྱིར། འཆི་བ་མེད་ལ་ལྷག་མོས་པའི། །ཞེས་བྱ་བ་མྱ་ངན་
ལས་འདས་པ་ལ་འདོད་པ་སྟེ། ཐར་པའི་བསམ་པ་འཕེལ་བར་འགྱུར་ཞིང་ཟག་པ་མེད་པའི་ལམ་སྐྱེ་བར་འགྱུར་རོ། །འཕགས་པའི་ལམ་སྐྱེས་པས་ཀྱང་གང་དུ་འགྱུར་ཞེ་ན། དེ་སྨྲས་པ། ཟག་པ་རྣམས་ནི་ཟད་པར་འགྱུར། །ཞེས་བྱ་བ་སྟེ། ཉོན་མོངས་པ་ཐམས་ཅད་མི་སྣང་བར་
འགྱུར་དུ་ཐོབ་པ་བཅད་པའི་ཕྱིར་རོ། །འཇིགས་པ་སྤང་བར་བྱ་བའི་རྒྱུ་འདི་དག་སྤྱད་པའི་ཕྱིར། འཇིགས་པ་ཐམས་ཅད་དང་བྲལ་བར་འགྱུར་བ་ཡིན་ནོ། །སངས་རྒྱས་ལ་སོགས་པའི་རྗེས་སུ་དྲན་པའི་ཕན་ཡོན་བསྟན་པའི་ཕྱིར། གང་ཞིག་ཉིན་དང་མཚན་རྣམས་སུ། །ཞེས་བྱ་བ་ལ་
སོགས་པ་སྨོས་སོ། །ཡུལ་བེ་ར་ཏྱ་ན་སྐྱེས་བུ་ཞིག་སངས་རྒྱས་ཀྱི་སྒྲ་ཐོས་ནས་དཀོན་མཆོག་གསུམ་ལ་སྐྱབས་སུ་སོང་ངོ་། །གཞན་ཞིག་ནི་སངས་རྒྱས་རྗེས་སུ་དྲན་པ་བསྒོམས་པར་གྱུར་ཏོ། །གཞན་དག་ནི་ཆོས་རྗེས་སུ་དྲན་པའོ། །གཞན་དག་ནི་དགེ་འདུན་རྗེས་སུ་
དྲན་པའོ། །དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུ་དེ་དག་ལ་དང་བ་སྐྱེས་ཏེ། ནོར་སྦྱིན་པར་བྱེད་དོ། །དེ་དག་གིས་ཀྱང་ཤིན་ཏུ་ཡུན་རིང་པོར་བདེ་བ་ཉམས་སུ་མྱོང་སྟེ་རབ་ཏུ་བྱུང་ནས་དགྲ་བཅོམ་པའི་འབྲས་བུ་འཐོབ་པར་གྱུར་པ་ལས། དེའི་དབང་དུ་མཛད་ནས་ཚིགས་སུ་བཅད་
པ་གསུམ་གསུངས་སོ། །གཞན་དག་ནི་ལྷའི་བུ་ཞིག་རྒྱལ་པོའི་ཁབ་ཏུ་པག་མོའི་མངལ་དུ་སྐྱེ་བ་དེའི་དབང་དུ་མཛད་པའོ་ཞེས་ཟེར་རོ། །རྙེད་པ་ནི་འདིར་མངོན་པར་འདོད་པའི་དངོས་པོ་ཁྱད་པར་ཅན་ཐོབ་པ་ལ་བྱའོ། །དེ་ཡང་རྣམ་པ་བཞི་སྟེ། བསོད་ནམས་དང་། རྒྱ་ཆེར་མཆོག་ཏུ་
དགའ་བ་དང་། ཏིང་ངེ་འཛིན་དང་། རྣམ་པར་དག་པའི་ངོ་བོ་ཉིད་དོ། །དེ་ལ་བསོད་ནམས་རྙེད་པ་ནི་ཕ་རོལ་དུ་བདག་ལ་ཕན་འདོགས་པ་སྟེ། གཡོག་འཁོར་ཕུན་སུམ་ཚོགས་པ་འབྱུང་ངོ་། །རྒྱ་ཆེར་མཆོག་ཏུ་དགའ་བ་དང་། ཏིང་ངེ་འཛིན་རྙེད་པ་གཉིས་ནི་མཐོང་བའི་ཆོས་ཉིད་ལ་

བདེ་བར་གནས་པ་ཕུན་སུམ་ཚོགས་པའོ། །རྣམ་པར་དག་པ་རྙེད་པས་ནི་སྡུག་བསྔལ་ཐམས་ཅད་གཏན་དུ་ཟད་པའོ། །དེ་དག་མི་ཡི་ཞེས་བྱ་བ་ནི་སེམས་ཅན་དེ་རྣམས་ཀྱིའོ། །རྒྱུའི་སྟོབས་དང་རྐྱེན་གྱི་སྟོབས་ཏེ་ཇི་སྐད་དུ་གསུངས་པ། རྒྱུ་གཉིས་དང་རྐྱེན་
གཉིས་ཀྱིས་ནི་ཡང་དག་པའི་ལྟ་བ་སྐྱེ་བར་འགྱུར་ཏེ། དངོས་པོ་མ་ལུས་པར་ཕ་རོལ་གྱིས་བསྟན་པ་དང་། ནང་དུ་ཡང་ཚུལ་བཞིན་ཡིད་ལ་བྱེད་པའོ་ཞེས་སོ། །དེ་གང་ཞེ་ན། གང་དག་སངས་རྒྱས་ཞེས་བྱ་བ་སྨོས་ཏེ། གང་དག་ཅེས་བྱ་བ་ནི་མི་གང་དག་གོ། །སངས་རྒྱས་ནི་སངས་རྒྱས་
བཅོམ་ལྡན་འདས་ཏེ། དངོས་པོ་མ་ལུས་པ་རྟོགས་པའི་ཕྱིར་སངས་རྒྱས་སོ། །སྐྱབས་སུ་སོང་བ་ཞེས་བྱ་བ་ནི་ཡོངས་སུ་སྐྱོབ་པ་ལ་བརྟེན་ན། དེ་དག་མི་ཡི་རྙེད་པ་ཞེས་བྱ་བ་དང་སྦྱར་རོ། །གང་གི་རྒྱུད་ལ་རྣམ་པ་བཞིའི་དངོས་པོ་མངའ་བ་དེ་ནི་སངས་རྒྱས་ཏེ། རྣམ་པ་ཐམས་ཅད་དང་། །
འཇིག་རྟེན་དང་འཇིག་རྟེན་ལས་འདས་པ་མངོན་པར་རྫོགས་པར་སངས་རྒྱས་པ་དང་། བག་ལ་ཉལ་བག་ཆགས་དང་བཅས་པ་སྤངས་པ་དང་། ཐམས་ཅད་ལ་ཐུན་མོང་དུ་ཕན་འདོགས་པར་སྤྱོད་པའོ། །རྒྱུ་རྣམ་པ་བཞིས་སྐྱབས་སུ་འགྲོ་བར་ངེས་པ་ཡིན་ཏེ། ཡོན་ཏན་ཤེས་པ་
ཉིད་དང་། ཁྱད་པར་ཤེས་པ་ཉིད་དང་། ཁས་ལེན་པ་དང་། སྟོན་པ་གཞན་གྱིས་བསྟན་པ་མ་ཡིན་པ་ཉིད་དོ། །རྙེད་པ་ཆེན་པོ་འདི་ཡང་དེ་དག་གི་ཐོབ་པ་ཉིད་དུ་བསྟན་པའི་ཕྱིར། གང་ཞིག་ཉིན་དང་མཚན་རྣམས་སུ། །ཞེས་བྱ་བ་ནི་སེམས་ཏེ། གང་ཞིག་ཅེས་བྱ་བ་ནི་སེམས་ཅན་ནོ། །
ཉིན་མཚན་ནི་ཉིན་དང་མཚན་མོའོ། །རྟག་ཏུ་ཞེས་བྱ་བ་ནི་རྒྱུན་མི་འཆད་པར་རམ། ཇི་སྲིད་འཚོའི་བར་དུ་སངས་རྒྱས་རྗེས་སུ་དྲན་པ་ཡོད་པ་དེ་ལ་དེ་དག་གི་རྙེད་པ་ཡིན་གྱི། སྐྱབས་སུ་འགྲོ་བ་འབའ་ཞིག་ཙམ་གྱིས་ནི་མ་ཡིན་ནོ། །སངས་རྒྱས་རྗེས་སུ་དྲན་པ་ན་སངས་རྒྱས་ལ་
དམིགས་པའི་དྲན་པའོ། །དེ་ཡང་རྣམ་པ་བཞི་སྟེ། དགེ་བའི་རྩ་བའི་ཕྱོགས་ལ་མངོན་པར་བརྩོན་པ་དང་། དེ་ལ་མཆོད་པའི་བྱ་བ་དང་། དེ་ལ་རྗེས་སུ་དྲན་པ་དང་། ཕན་འདོགས་པ་རྗེས་སུ་དྲན་པའོ། །དེ་ལྟར་བསྒོམ་པ་འདི་ལ་ནི་ཡོན་ཏན་རྣམ་པ་བདུན་རེ་བར་བྱ་སྟེ། སྐྱེ་བ་དྲན་པར་

འགྱུར་བ་དང་། དད་པ་ཤས་ཆེར་འགྱུར་བ་དང་། དམན་པའི་ཆོས་ལ་དགའ་བ་མེད་པར་འགྱུར་བ་དང་། གཞན་ལ་རྣམ་པར་འཚེ་བ་བྱེད་པར་མི་འགྱུར་བ་དང་། གཞན་ལས་འཚེ་བ་ཐོབ་པར་མི་འགྱུར་བ་དང་། འགྱོད་པ་མེད་པས་དུས་བྱེད་པར་འགྱུར་བ་དང་། བདེ་འགྲོར་སྐྱེ་
བར་འགྱུར་བའོ། །ཆོས་རྣམས་ཞེས་བྱ་བ་ལ་ནི་ཆོས་ནི་རྣམ་པ་གསུམ་སྟེ། བསྟན་པ་དང་། སྒྲུབ་པ་དང་། འབྲས་བུའི་དབྱེ་བས་སོ། །དེ་བསྟན་པའི་ཆོས་ནི་གསུང་རབ་ཡན་ལག་བཅུ་གཉིས་ཏེ། ཇི་ལྟ་བ་བཞིན་དུ་རིག་པས་བཤད་པའི་བདག་ཉིད་ཡིན་པའི་ཕྱིར་རོ། །སྒྲུབ་
པའི་ཆོས་ནི་བསམ་པ་ཕུན་སུམ་ཚོགས་པ་དང་། སྦྱོར་བ་ཕུན་སུམ་ཚོགས་པ་དང་། དེ་ལ་སྔ་མ་ནི་འབད་པ་མཐར་ཐུག་པས་ལམ་རྣམ་པ་གཉིས་ཏེ། འཇིག་རྟེན་པ་དང་འཇིག་རྟེན་ལས་འདས་པའི་དབྱེ་བས་སོ། །དེ་གལ་ཏེ་སངས་རྒྱས་ཀྱི་རྒྱུད་ཀྱི་རྣམ་པ་ཡིན་ན་ནི། སངས་རྒྱས་ཞེས་བརྗོད་
དོ། །འཕགས་པའི་གང་ཟག་བཞིའི་རྒྱུད་ཀྱིས་ནི་དགེ་འདུན་ནོ། །དེ་ལ་སྦྱོར་བ་ཕུན་སུམ་ཚོགས་པ་ཡང་ཚུལ་ཁྲིམས་ལ་སོགས་པ་དམ་པའི་སྤྱོད་པ་ལ་རྗེས་སུ་འཇུག་པ་སྟེ། དེ་བཞིན་དུ་ཤེས་པར་བྱའོ། །གང་ཡང་ཐར་པའི་ཆ་ལྷག་མ་ལུས་པ་དེ་ཡང་འདིར་སྒྲུབ་པའི་ཆོས་སུ་གནས་པ་
ཡིན་ནོ། །འབྲས་བུའི་ཆོས་ནི་ཐར་པ་སྟེ། འབྲས་བུ་མཐར་ཐུག་པའི་ངོ་བོ་ཡིན་པའི་ཕྱིར་རོ། །གསུམ་པོ་དེ་དག་ཀྱང་རིམ་པ་བཞིན་དུ་ཆུང་ངུ་དང་བར་མ་དང་ཆེན་པོ་ཉིད་ཀྱིས་སྐྱབས་སོ། །བཅོམ་ལྡན་འདས་ཀྱིས་བསྟན་པ་ནི་དགག་པ་ཉིད་ལ་སྟོན་པར་གསུངས་སོ། །ཆོས་ནི་འདོད་
ཆགས་དང་བྲལ་བའི་མཆོག་ཏུ་བཤད་དོ། །གླིང་དང་སྐྱོབ་པ་དང་སྐྱབས་ཞེས་བྱ་བ་ལ་སོགས་པ་བསྟན་པས་སྐྱབས་སོ། །དམ་པའི་ཆོས་ཉིད་མཉན་པ་དང་། དེའི་དོན་ཉིད་བསྒོམ་པ་དང་བསྒྲུབ་པས་དེའི་འབྲས་བུ་ཉིད་སྒྲུབ་པ་ཡིན་ཏེ། འདི་ནི་བདག་གིར་བྱེད་པའོ། །ཆོས་
རྣམས་རྗེས་སུ་དྲན་བྱེད་ཅིང་། །ཞེས་བྱ་བ་ནི་ཆོས་རྣམ་པ་གསུམ་སྟེ། རྣམ་པ་དང་ངོ་བོ་ཉིད་དང་འབྲས་བུའི་ཕན་ཡོན་ལ་སོགས་པ་མཐོང་བས་སོ། །ལྷག་མ་ནི་སྔ་མ་བཞིན་ནོ། །གང་དག་དགེ་འདུན་ཞེས་བྱ་བ་ནི་བཀུར་བའི་ཕྱིར་དགེ་འདུན་ཏེ། སློབ་

པ་དང་མི་སློབ་པའི་ལམ་དེ་ལས་སྐྱེས་པ་ཡིན་གྱི་གཞན་ནི་མ་ཡིན་པའི་ཕྱིར་རོ། །དེ་དང་འབྲེལ་པའི་གང་ཟག་གི་དགེ་འདུན་ཡིན་ཏེ། དེ་ཡང་རྣམ་པ་ལྔ་ལས་ངོ་ཚ་མི་ཤེས་པའི་དགེ་འདུན་ཏེ། ཚུལ་ཉམས་པའི་ཕྱིར་རོ། །ལུག་ལྟར་ལྐུགས་
པའི་དགེ་འདུན་ཏེ། གསུང་རབ་མི་ཤེས་པའི་ཕྱིར་རོ། །སྐྱབས་ཀྱི་དགེ་འདུན་ཏེ་མི་མཐུན་པའི་ལས་བྱེད་པའི་ཕྱིར་རོ། །དེས་ན་འདི་གསུམ་གྱི་རྣམ་པ་ཐོབ་པ་ནི་ཆོས་མ་ཡིན་པའི་ལས་བྱེད་པའོ། །ཉན་ཐོས་དང་ལམ་སྟེ་ཉན་པའི་དོན་སྟོན་པའི་ཕྱིར་དང་། འབྲས་བུ་
མཆོག་ཡིན་པའི་ཕྱིར་དང་། དགེ་བ་ཕྱིན་ཅི་མ་ལོག་པའི་ཐབས་ཀྱི་འབྲས་བུའི་ཕྱིར། དགེ་འདུན་གྱི་རྣམ་པ་འདི་དག་གིས་ཡང་དང་ཡང་དུ་མངོན་དུ་བྱེད་པ་སྟེ། འཁོར་བ་སྤོང་ཞིང་ཐར་པ་ཐོབ་པ་དང་། ཐར་པའི་ལམ་དེའི་ཚུལ་ཡིན་པའི་ཕྱིར་ཏེ། ལམ་འདི་ལྟ་བུ་རྣམ་
པར་དག་པ་ནི་འདི་ལྟ་བ་གཞན་དག་ལ་མེད་པའི་ཕྱིར་རོ། །གང་ཞིག་དེ་ལྟར་སངས་རྒྱས་ལ་སོགས་པ་རྗེས་སུ་དྲན་ཞིང་སྒོམ་པར་བྱེད་པ་དེ་ཉིད་ནི་དོན་དམ་པར་མེལ་ཙེ་བྱེད་པ་ཉིད་ཡིན་གྱི། གཞན་ནི་བག་ཆགས་མེད་པས་གཉིད་ལོག་པ་ཡིན་ནོ་ཞེས་བསྟན་པའི་ཕྱིར། གང་ཞིག་
ཉིན་དང་མཚན་རྣམས་སུ། །ཞེས་བྱ་བ་ལ་སོགས་པ་སྨོས་སོ། །དེ་ནས་བཅོམ་ལྡན་འདས་ཀྱིས་དྲང་སྲོང་དྲུག་ཅུ་རྩ་གསུམ་ལ་ཆོ་འཕྲུལ་གསུམ་གྱིས་བསྟན་ཏོ། །ཇི་ཙམ་ན་རྫུ་འཕྲུལ་གྱིས་རབ་ཏུ་བྱུང་བའི་དགེ་སློང་གཅིག་དང་། ལྷན་ཅིག་ཏུ་སངས་རྒྱས་རྗེས་སུ་དྲན་པ་བསྒོམ་
པར་འགྱུར་རོ་ཞེས་རྒྱ་ཆེར་བསྟན་ཏོ། །དེ་ནས་དེ་ལྟར་བསྒོམས་པས་མྱ་ངན་ལས་འདས་པ་ལ་ཡིད་མངོན་པར་མོས་པས་ནང་པར་ཐོ་རས་ཀྱི་དུས་སུ་དེ་དག་ཐམས་ཅད་ལ་བརྡ་ཕྲད་པར་ལུང་བསྟན་ཏེ། དེའི་དབང་དུ་མཛད་ནས་འདི་གསུངས་སོ། །གཞན་དག་ནི་ཤིང་རྟས་ཤིང་ཐུ་བའི་
བུ་རང་གི་ལས་ལ་མཆོག་ཏུ་བྱེད་པ་ལས་བརྩམས་སོ་ཞེས་ཟེར་རོ། །རབ་ཏུ་སད་པ་ཡིན་པས་སད་པར་གྱུར་པའོ། །ལེགས་པར་རབ་ཏུ་སད་པའི་བྱ་བ་ལ། ལེགས་པར་སད་པ་ནི་བྱ་བའི་ཁྱད་པར་ཡིན་པའི་ཕྱིར་རོ། །སད་པར་གྱུར་པ་ཞེས་བྱ་བ་ནི་ལེགས་པར་རབ་ཏུ་སད་པའི་དོན་ཏེ།

དེ་བཞིན་ཉིད་ཁོང་དུ་ཆུད་པའི་ལེགས་པར་མེལ་ཙེ་བྱེད་པ་ཞེས་བྱ་བའི་དོན་ཏོ། །དེ་ཉིད་གང་ཞེ་ན། སྨྲས་པ། གཽ་ཏ་མའི་ཉན་ཐོས་ཏེ་ཞེས་བྱ་བ་ཡིན་ཏེ། དྲང་སྲོང་ཆེན་པོ་གཽ་ཏ་མའི་རྒྱུད་དུ་འབྱུང་བའི་ཕྱིར་གཽ་ཏ་མ་སྟེ། བཅོམ་ལྡན་འདས་ཤཱཀྱ་ཐུབ་པའོ། །འདིས་ནི་བཅོམ་
ལྡན་འདས་ཆོ་རིགས་ཕུན་སུམ་ཚོགས་པར་བསྟན་ཏེ། རིགས་ཁྱད་པར་ཅན་དུ་སྐྱེ་བར་གྱུར་པ་དག་ནི་རྟ་ཅང་ཤེས་བཞིན་དུ་བག་མེད་པ་ཉིད་མཆོག་ཏུ་བྱེད་པ་མ་ཡིན་ནོ་ཞེས་སྟོན་པ་ཡིན་ནོ། །དེའི་ཉན་ཐོས་དེ་ནི་བཀའི་རྗེས་སུ་འཇུག་པ་སྟེ། གང་གི་ཕྱིར་བཅོམ་ལྡན་འདས་ཀྱི་གསུང་
བདག་མེད་པའི་དེ་བཞིན་ཉིད་བསྟན་པའི་རྗེས་སུ་འགྲོ་བ་སྟེ། དེ་བས་ན་དེའི་ཕྱིར་དེ་དག་ནི་ལེགས་པར་སད་པས་རབ་ཏུ་སད་པ་ཡིན་ཏེ། འཇུག་པའི་སྒོ་དེ་དག་ནི་འཕགས་པའི་ལམ་དང་མི་གཙང་བ་དང་དབུགས་འབྱུང་རྔུབ་དྲན་པ་རྟོག་པར་བྱ་བའོ། །དེ་གང་ཡིན་ཞེ་ན། གང་དག །སངས་
རྒྱས་རྗེས་སུ་དྲན་བྱེད་པ། །ཞེས་བྱ་བ་སྟེ། སངས་རྒྱས་རྗེས་སུ་དྲན་པར་བྱེད་པ་ནི་སངས་རྒྱས་ཀྱི་ཡོན་ཏན་ལ་དམིགས་པ་དང་། ཁོང་དུ་ཆུད་པའོ། །ཡོན་ཏན་ཡང་རྣམ་པ་གཉིས་ཏེ། སྐུ་དང་ཐུགས་ཡིན་པའི་ཕྱིར་རོ། །འབྲས་བུ་ནི་རྣམ་པ་གསུམ་སྟེ། གཞན་ལ་ཕན་པ་ཕན་
ཚུན་ཚོགས་པ་ཡིན་པའི་ཕྱིར་རོ་ཞེས་བྱ་བའོ། །ཆོས་དང་དགེ་འདུན་རྗེས་སུ་དྲན་པ་ཡང་དེ་བཞིན་ནོ། །ཡོན་ཏན་ཐམས་ཅད་ཀྱི་རྩ་བ་ནི་དཀོན་མཆོག་གསུམ་ཡིན་ལ། དེ་ལ་བརྟེན་པས་ནི་སོ་སོར་ཐར་པའི་ཚུལ་ཁྲིམས་ལ་སོགས་པའི་ཁྱད་པར་བྱུང་བ་ཡིན་ཏེ། དེ་ཉིད་བསྟན་པའི་
ཕྱིར། ཚུལ་ཁྲིམས་རྗེས་སུ་དྲན་བྱེད་པ། །ཞེས་བྱ་བ་ཡིན་ཏེ། དེ་ལ་ཚུལ་ཁྲིམས་ནི་དམ་པ་རྣམས་ཀྱི་སྤྱོད་པ་ཡིན་པའི་ཕྱིར་གཅིག་གོ། །འཇུག་པ་དང་ལྡོག་པའི་ཚུལ་གྱིས་ནི་རྣམ་པ་གཉིས་སོ། །ལུས་ལ་སོགས་པའི་ལེགས་པར་སྤྱོད་པའི་བདག་ཉིད་ཀྱི་འབྲེལ་
པས་ནི་རྣམ་པར་དག་པ་གསུམ་མོ། །འདི་ལ་འཚོ་བའི་རྣམ་པར་དག་པས་ནི་རྣམ་པ་བཞིའོ། །འདི་ལ་ཆང་འཐུང་བ་ལས་ལྡོག་པས་ནི་བཅས་པའི་ཁ་ན་མ་ཐོ་བ་དག་པ་ལས་ནི་རྣམ་པ་དྲུག་གོ། །རྣམ་པ་བརྒྱད་དུ་ཡང་མངོན་པར་བརྟག་པར་བྱ་སྟེ། རྒྱུ་དང་འབྲས་བུ་དང་རང་བཞིན་ཞེས་བྱ་བ་ལ་

སོགས་པ་ལས་རྗེས་སུ་དྲན་པའོ། །ཚུལ་ཁྲིམས་དང་ལྡན་ན་ནི་སྦྱིན་པ་དག་པར་འགྱུར་རོ་ཞེས་བསྟན་པའི་ཕྱིར། གཏོང་བ་རྗེས་སུ་དྲན་བྱེད་པ། །ཞེས་བྱ་བ་སྨོས་ཏེ། སྐྱེས་བུ་དམ་པ་རྣམས་ཀྱིས་སྦྱིན་པ་རྣམ་པ་ལྔ་དང་ཡན་ལག་རྣམ་པ་དྲུག་དང་ལྡན་པ་དང་།
སྦྱིན་པ་ཡན་ལག་དགུ་དང་ལྡན་པ་དུས་སུ་སྦྱིན་པའི་རྫས་ལ་སོགས་པ་སྟེ། དེ་ལ་དམིགས་པ་ཞེས་བྱ་བའི་དོན་ཏོ། །སྔར་བཤད་པའི་ཡོན་ཏན་རྣམས་བསྟེན་ན། ལྷའི་འགྲོ་བ་རྙེད་པ་སླའོ་ཞེས་བསྟན་པའི་ཕྱིར། ལྷ་ནི་རྗེས་སུ་དྲན་བྱེད་པ། །ཞེས་བྱ་བ་སྨོས་ཏེ། ལྷ་ནི་འདོད་པ་ན་སྤྱོད་པ་
དང་། དེ་ལས་གཞན་པ་སྟེ་རྣམ་པ་གཉིས་སོ། །དང་པོ་ནི་རྣམ་པ་དྲུག་གོ། །དེ་ལས་གཞན་པ་ནི་རྣམ་པ་གཉིས་ཏེ། གཟུགས་ཅན་དང་གཟུགས་མེད་པའོ། །གཟུགས་ཅན་ནི་གནས་བཅུ་དྲུག་གོ། །གཟུགས་ཅན་མ་ཡིན་པ་ནི་བཞིའོ། །དེར་སྐྱེས་པ་ཡང་སྦྱིན་པ་དང་ཚུལ་ཁྲིམས་དང་
བསྒོམས་པ་དག་གིས་ཅི་རིགས་པར་སྦྱར་རོ། །འདོད་པའི་ཁམས་ལས་འདོད་ཆགས་དང་བྲལ་བའི་ཐབས་བསྟན་པའི་ཕྱིར། ལུས་རྟོགས་དྲན་བྱེད་པ་ཞེས་བྱ་བ་སྨོས་ཏེ། ས་བོན་དང་ཞིང་དང་བསམ་པ་དང་རྒྱུ་མཐུན་པ་དང་། རང་གི་མཚན་ཉིད་དང་འཇིག་པ་སྟེ།
ལུས་ཀྱི་རྣམ་པར་རྟོག་པ་རྣམ་པ་དྲུག་ཏུ་འདོད་དོ་ཞེས་རྒྱ་ཆེར་བཤད་དོ། །འདོད་པ་ན་སྤྱོད་པའི་ལུས་གཅིག་ལས་འདོད་ཆགས་དང་བྲལ་བ་ནི་འདོད་པའི་ཁམས་ཐམས་ཅད་ལས་འདོད་ཆགས་དང་བྲལ་བ་ཡིན་ནོ། །འདིའི་འབྲས་བུ་བསྟན་པའི་ཕྱིར། ཏིང་འཛིན་བཞི་དྲན་པ་
ཞེས་བྱ་བ་སྨོས་ཏེ། དེ་ཡང་རྣམ་པ་གཉིས་ཏེ། བསམ་གཏན་དང་སྙོམས་པར་འཇུག་པར་སྐྱེ་བའི་དབྱེ་བས་སོ། །སྙོམས་པར་འཇུག་པ་ནི་དགེ་བ་ལ་རྩེ་གཅིག་པའོ། །རྣམ་པ་ལྔ་ལ་སོགས་པ་རྟོག་པ་དང་དཔྱོད་པ་ཞེས་བྱ་བ་ལ་སོགས་པར་བརྗོད་པར་བྱའོ། །བསམ་གཏན་གྱི་རོ་
མྱང་བའི་ཕན་ཡོན་བསྟན་པའི་ཕྱིར། བསྒོམ་པ་ལ་ནི་ཡིད་དགའ་བ། །ཞེས་བྱ་བ་སྨོས་ཏེ། ཡང་དང་ཡང་དུ་བསྒོམས་ཤིང་མངོན་སུམ་དུ་བྱས་ཏེ། དེའི་ཁྱད་པར་རྗེས་སུ་མྱོང་བས་མངོན་པར་འདོད་པའི་སེམས་སྐྱེ་བ་ཐོབ་པར་འགྱུར་རོ། །ཡང་ན་བསྒོམས་པ་ལས་བྱུང་བའི་དགེ་བའི་

རྩ་བའོ། །རིགས་པས་ཐོབ་པ་དང་ཐོས་པ་ལས་བྱུང་བ་གཉིས་ནི་མཆོག་ཏུ་ཁྱད་པར་ཅན་ཡིན་པའི་ཕྱིར་འདི་ཉིད་ནི་རྣལ་འབྱོར་པའི་སེམས་ལས་བརྩམས་པ་ཡིན་ནོ། །བསྒོམ་པ་ལ་དགའ་བའི་འབྲས་བུ་བསྟན་པའི་ཕྱིར། འཚེ་བ་མེད་ལ་ཡིད་དགའ་བ། །ཞེས་བྱ་
བ་ཡིན་ཏེ། གཞན་གྱི་གནོད་པ་ལས་ལྡོག་པ་ནི་འཚེ་བ་མེད་པའོ། །དེ་ལ་མངོན་པར་དགའ་བ་ནི་ཁྱད་པར་ཅན་གྱི་དགེ་བའི་ཕྱོགས་ལ་ཡང་དག་པར་བསྟེན་པའི་ཕྱིར་རོ། །ཞི་གནས་ཀྱི་རྒྱུས་མཉེན་པར་བྱས་ནས་དེ་ཇི་ལྟར་གཞན་ལ་གནོད་པར་འགྱུར་རོ། །གནོད་
སེམས་མེད་ལ་ཡིད་དགའ་བ། །ཞེས་བྱ་བ་ནི་བསམ་གཏན་དང་བསྒོམ་པ་ལ་ཡང་དག་པར་བསྟེན་པའི་ཁྱད་པར་ཡང་དག་པར་སྟོན་པ་ཡིན་ཏེ། དེ་སྙོམས་པར་འཇུག་པའི་སྟོབས་ཀྱིས་བྱམས་པ་ལ་སོགས་པ་འཐོབ་པར་འགྱུར་བའི་ཕྱིར། གནོད་སེམས་མེད་པ་ནི་ཞེ་སྡང་མེད་པའི་དགེ་
བའི་རྩ་བའི་ངོ་བོ་སྟེ། བྱམས་པ་དང་སྙིང་རྗེའོ། །ཚད་མེད་པ་རྣམས་དང་། སོ་སོ་ཡང་དག་པར་རིག་པའི་ནོར་ཚང་བར་རྙེད་པའོ་ཞེས་གཞན་དག་ཟེར་རོ། །ཡང་གསུངས་པ་དག་ཀྱང་རིག་པར་བྱ་སྟེ། དེ་ལྟར་ཟིལ་གྱིས་ནོན་པའི་སྐྱེ་མཆེད་ལ་སོགས་པ་བརྗོད་པར་བྱའོ། །
གཟུགས་མེད་པའི་ཁམས་ལས་འདོད་ཆགས་དང་བའི་ལམ་གྱི་ཐབས་བསྟན་པའི་ཕྱིར། སྟོང་པ་ཉིད་ལ་ཡིད་དགའ་བ། །ཞེས་བྱ་བ་སྨོས་ཏེ། སྟོང་པ་ཉིད་ཀྱི་རྣམ་པར་ཐར་པའི་སྒོ་སྟེ། བདག་མེད་པ་དང་སྟོང་པའི་རྣམ་པ་ལ་འཇུག་པའོ། །མཚན་མ་མེད་ལ་ཡིད་དགའ་
བ། །ཞེས་བྱ་བ་ནི་འདུས་བྱས་རྣམ་པ་བཅུའི་རྟགས་སུ་གྱུར་པའི་མཚན་མ་དང་བྲལ་བ་ནི་མྱ་ངན་ལས་འདས་པ་སྟེ། མཚན་མ་མེད་པའོ། །དེ་དག་ཀྱང་གང་ཞེ་ན། སྐྱེས་པ་དང་བུད་མེད་དང་། གཟུགས་དང་། སྒྲ་དང་། དྲི་དང་། རོ་དང་། རེག་བྱ་དང་། སྐྱེ་བ་དང་། རྒ་བ་དང་།
མི་རྟག་པ་ཞེས་བརྗོད་པ་དག་གོ། །ཡང་ན་རྒྱུ་མེད་པའི་ཕྱིར་མཚན་མ་མེད་པ་སྟེ། འདུས་མ་བྱས་ནི་མེད་པའོ་ཞེས་བྱ་བའི་ཚིག་གིས་ཏེ། དེ་ལ་དམིགས་པའི་ཏིང་ངེ་འཛིན་ནི་མཚན་མ་མེད་པ་ཡིན་ཏེ། མཚན་མ་མེད་པ་ནི་ཞི་བའི་རྣམ་པའོ་ཞེས་བྱ་བའི་ཚིག་གིས་སོ། །ཅི་ཡང་མེད་ལ་

ཡིད་དགའ་བ། །ཞེས་བྱ་བ་ནི་ཅི་ཡང་མེད་པར་རབ་ཏུ་རྟོགས་པ་སྟེ། འདུས་བྱས་དག་རྣམ་པར་འགྱུར་བའི་ཕྱིར་རོ། །དེ་ལ་དམིགས་པའི་ཏིང་ངེ་འཛིན་ཅི་ཡང་མེད་ལ་དགོངས་པ་ཡིན་ཏེ། སྨོན་པ་མེད་པ་ཞེས་བྱ་བའི་དོན་ཏོ། །གང་གི་ཕྱིར་འདི་ནི་གང་ལ་ཡང་
སྨོན་པར་མི་བྱེད་ཅིང་གནས་པར་མི་བྱེད་ལ། དེ་མངོན་པར་དགའ་བ་མེད་དེ། ལམ་ཡང་འཇིག་རྟེན་པ་ལྟ་བུར་སྤང་བར་བྱ་བ་ཡིན་པའི་ཕྱིར་རོ་ཞེས་བྱ་བ་ལ་སོགས་པའོ། །དེ་ཡང་རྣམ་པ་བཅུ་པོ་འདི་ལྟ་སྟེ། སྨོན་པ་མེད་པ་དང་། བདེན་པའི་རྣམ་པ་དང་། དེ་ལས་གཞན་གྱིས་ཞེས་
གསུངས་པ། དེ་དག་ཉིད་ཟག་པ་མེད་པའི་རྣམ་པར་ཐར་པའི་སྒོ་ཞེས་བརྗོད་དེ་ཟག་པ་དང་བཅས་པ་ལ་ནི་ཐར་པར་འཇུག་པའི་ཐབས་མེད་པའི་ཕྱིར་རོ། །རྣམ་པར་ཐར་པའི་སྒོ་དེ་དག་ཉིད་ཀྱིས་ཕན་ཡོན་གོ་རིམས་བཞིན་དུ་བསྟན་པའི་ཕྱིར་སྨྲས་པ། ངེས་པར་
འབྱུང་བ་ལ་མངོན་པར་དགའ་བ་དང་། དབེན་པ་ལ་མངོན་པར་དགའ་བ་དང་། དེའི་ཕྱིར་དུས་རྟག་ཏུ་བདག་ཉིད་ལུས་དང་སྲོག་དང་ལྡན་པ་ཡིན་ནོ་ཞེས་ཡིད་ཆེས་པས་ལན་དུ་མར་འདི་འཁོར་བར་འཁྱམས་པ་ཡིན་གྱི། གང་གི་ཚེ་ཡང་སྟོང་པ་ཉིད་རྣམ་པར་ཐར་པའི་སྒོ་
སྟོང་པ་ཉིད་དུ་འགྱུར་བ་དེའི་ཚེ་ནི་འཁོར་བ་ལ་རྒྱབ་ཀྱིས་ཕྱོགས་ཤིང་མྱ་ངན་ལས་འདས་པ་དང་། དོན་དམ་པ་དང་ངེས་པར་འབྱུང་བར་མངོན་པར་དགའ་བ་སྐྱེའོ། །སྔར་ཡང་འདི་མི་ཤེས་པས་ཡུལ་དག་རོ་མྱང་བར་གྱུར་ཏོ། །མཚན་མ་མེད་པས་ཐོབ་
པ་ནི་རྣམ་པ་དེ་བཞིན་ཏེ་དོན་གྱི་ནོམ་པ་དག་གང་མཐོང་ན་དེར་དགའ་བ་སྟེ། དེ་ལྟ་བུ་འགོག་པའི་རྣལ་འབྱོར་པ་ལ་ནི་མེད་པ་ཡིན་ཏེ། རྒྱབ་ཀྱིས་ཕྱོགས་པ་ཡིན་ཞེས་གྲུབ་པའི་མཐའོ། །སྔོན་མེད་པའི་མཐུས་འདུས་བྱས་གང་ལ་ཡང་སྨོན་པར་མི་བྱེད་པ་ཡིན་ཏེ།
ཕུང་པོ་ལྷག་མ་མེད་པའི་མྱ་ངན་ལས་འདས་པ་ལ་གཞོལ་བ་དང་མོས་པའི་ཕྱིར་རོ། །དེའི་བདག་ཉིད་དུ་གྱུར་པ་ལ་ནི་སྤྲོ་བ་ཐམས་ཅད་ཉེ་བར་ཞི་བ་ཡིན་ནོ། །དྲན་པའི་ཚོམས་ཏེ་བཅོ་ལྔ་པའི་རྣམ་པར་འགྲེལ་པ་རྫོགས་སོ།། །།