Luận tạng Tây Tạng (Tengyur) — Tập 148

ྣམས་ཀྱི་བདུད་རྩི་བཞིན་ནོ། །བདེན་པའི་ཚིག་ནི་བླ་མེད་ཡིན། །ཞེས་བྱ་
བ་ནི་ཐམས་ཅད་ལས་ཁྱད་པར་དུ་གྱུར་པ་ཡིན་ཏེ། དོན་ཐམས་ཅད་ལས་ཁྱད་པར་དུ་གྱུར་པའི་ཕྱིར་རོ། །ཡང་ན་ཚིག་ནི་གཙུག་གི་ནོར་བུར་གྱུར་པའི་ཕྱིར་མེ་ཏོག་གི་ཕྲེང་བ་ཤིན་ཏུ་ཡིད་དུ་འོང་བ་རབ་ཏུ་གནས་པ་ཡིན་ནོ་ཞེས་བྱ་བའི་ཚིག་གིས་ཏེ། ལེགས་པར་ཕ་རོལ་ཏུ་ཕྱིན་པའི་སྐྱེས་པའི་རབས་

ལ་སོགས་པ་བརྗོད་པར་བྱའོ། །ཅིའི་ཕྱིར་བླ་ན་མེད་པ་ཡིན་ཞེ་ན། འདིར་རྒྱུ་སྨྲས་པ། བདེན་པ་ཞེས་བྱ་བ་སྨོས་ཏེ། གང་གི་ཕྱིར་བདེན་པའི་ཚིག་ནི་དོན་ལ་རབ་ཏུ་གནས་པ་ཡིན་ཏེ། དེ་ལས་འབྱུང་བའི་ཕྱིར་རོ་ཞེས་དམ་པ་རྣམས་བརྗོད་དེ། འཇིག་རྟེན་འདིའི་དགོས་པ་བྱེད་པའི་ཕྱིར་རོ། །ཆོས་ལ་
ཡང་རབ་ཏུ་གནས་པ་ཡིན་ཏེ། འཇིག་རྟེན་ཕ་རོལ་གྱི་དགོས་པ་བྱེད་པའི་ཕྱིར་རོ། །ཡང་ན་དོན་ལ་གནས་པ་ནི་འཇིག་རྟེན་པའི་ཕན་ཡོན་ནོ། །ཆོས་ལ་གནས་པ་ནི་འཇིག་རྟེན་ལས་འདས་པའི་ཕན་ཡོན་ནོ་ཞེས་བྱ་བ་ལ་སོགས་པའོ། །དམ་པའི་དངོས་པོའི་དེ་ཁོ་ན་ཉིད་རེག་པ་སྟེ། ཐམས་ཅད་མཁྱེན་པ་
དང་། དེའི་གཞུང་ལ་སྤྱོད་པའི་ཉན་ཐོས་དག་གོ། །གསུངས་པ་ནི་འཆད་པའོ། །ཚིག་རྐང་བཞི་པ་ལས་བརྩམས་ཏེ། སངས་རྒྱས་ཀྱིས་ནི་གསུངས་ཚིག་གང་། །ཞེས་བྱ་བ་ལ་སོགས་པ་སྨོས་ཏེ། ཐམས་ཅད་མཁྱེན་པ་ཉིད་དུ་ཐུགས་རྗེ་ཆེན་པོས་གཞན་གྱི་དོན་ལ་བརྩོན་པ་སྟེ། ཚུལ་ཁྲིམས་
ཀྱིས་མཚོན་པ་སེམས་པ་ཁྱད་པར་ཅན་སངས་རྒྱས་སོ། །གང་ཅུང་ཟད་སངས་རྒྱས་བཅོམ་ལྡན་འདས་ཀྱིས་བཤད་པ་ནི་གསུང་རབ་ཡན་ལག་བཅུ་གཉིས་སོ། །སངས་རྒྱས་བཅོམ་ལྡན་འདས་ཀྱིས་ཇི་ལྟ་བུས་གསུངས་ཤེ་ན། སྨྲས་པ། བདེན་པ་སྟེ་འཇིགས་པ་མེད་པ་མངོན་པར་མཐོ་བའི་རྒྱུར་
གྱུར་པའི་ཕྱིར་རོ། །མྱ་ངན་ལས་འདས་པར་འགྲོ་བ་ནི་ཐར་པ་ཐོབ་པར་བྱེད་པ་སྟེ། ངེས་པར་ལེགས་པ་སྒྲུབ་པའི་ཕྱིར་རོ། །དངོས་པོའི་སྐྱོན་མེད་པས་འདིར་བསམ་པའི་སྐྱོན་ཡང་ནམ་ཡང་མེད་དོ། །བསམ་པའི་སྐྱོན་མེད་པའི་ཕྱིར་གཞན་གྱི་དོན་དུ་གང་བཅོམ་ལྡན་འདས་ཀྱིས་གསུངས་པའི་ཚིག་དེའི་
དོན་ཉིད་སྡུག་བསྔལ་ཐམས་ཅད་སྤངས་པའི་ཕྱིར་ཞེས་བྱ་བ་སྨོས་ཏེ། སེམས་ཅན་ཐམས་ཅད་ཀྱི་སྡུག་བསྔལ་ཐམས་ཅད་ཉེ་བར་ཞི་བའི་ཕྱིར་རོ། །ཚིག་དེ་བླ་ན་མེད་པ་ཡིན། །ཞེས་བྱ་བ་ནི་ཚིག་དེ་ཉིད་ཟླ་མེད་པའོ། །ཚིག་གི་ཚོམས་ཏེ་བརྒྱད་པའི་རྣམ་པར་འགྲེལ་པ་རྫོགས་སོ།། །།ཚུལ་
ཁྲིམས་ལ་སོགས་པའི་ཚོམས་གསུམ་བསྟན་པ་ལས་ཕལ་ཆེར་ལས་ཀྱི་ཚུལ་གསལ་བར་བསྟན་པའི་ཕྱིར། དེའི་འོག་ཏུ་ལས་ཀྱི་ཚོམས་བསྟན་ཏོ། །ཡང་ན་བསྟན་མ་ཐག་པའི་ཚོམས་དེས་ནི་བདེན་པ་ལ་སོགས་པའི་ཚིག་བསྟན་པ་ཡིན་ལ་འདིས་ནི། བརྫུན་དུ་སྨྲ་བ་ལ་སོགས་པའི་ཚིག་བརྗོད་

པ་ཡིན་ནོ། །ཡང་ན་ཚིག་ལས་ཆེས་ཁྱད་པར་དུ་གྱུར་པའི་ལས་ཉིད་བསྟན་པའི་ཕྱིར་ཏེ་གང་གི་ཕྱིར་སངས་རྒྱས་ཀྱི་བསྟན་པའི་སྟོབས་ཀྱིས་སེམས་ཅན་རྣམས་འཁོར་བ་ལས་འདོན་པ་ཡིན་ལ། དེའི་ཕྱིར་འདི་ནི་ལས་ཆེས་ཁྱད་པར་དུ་གྱུར་པ་ཡིན་པས་དེའི་
རྣམ་པར་འགྲེལ་པ་བརྩམ་པར་འདོད་ནས་སྨྲས་པ། ཆོས་གཅིག་ཅེས་བྱ་བ་ལ་སོགས་པའོ། །རྒྱལ་པོའི་ཁབ་ཀྱི་དཀའ་ཐུབ་འབྱིན་པའི་ཀུན་དགའ་ར་བ་ན་ཚེ་དང་ལྡན་པ་སྒྲ་གཅན་འཛིན་གནས་ཏེ། དེ་གདུལ་བའི་དོན་དུ་བཅོམ་ལྡན་འདས་དེར་གཤེགས་སོ། །དེས་ཀྱང་ཐག་རིང་
པོ་ནས་བཅོམ་ལྡན་འདས་དེར་གཤེགས་པ་མཐོང་སྟེ། གདན་བཤམས་ཤིང་ཞབས་བཀྲུ་བ་དང་ཞབས་རྟེན་ཡང་ཕྱོགས་གཅིག་ཏུ་གཞག་སྟེ། མདུན་བསུ་ནས་ཆོས་གོས་དང་ལྷུང་བཟེད་ཁྱེར་རོ། །ཇི་ཙམ་ན་བཅོམ་ལྡན་འདས་ཉིད་ཀྱིས་ཞབས་བསིལ་ཏེ་ཆུ་སྣོད་ཀྱི་ནང་དུ་ཆུ་ཅུང་ཟད་
ལྷག་པ་གཞག་ནས། ཚེ་དང་ལྡན་པ་སྒྲ་གཅན་འཛིན་ལ་ཆུ་ཅུང་ཟད་ཙམ་འདི་མཐོང་ངམ་ཞེས་བཀའ་སྩལ་ཏོ། །བཙུན་པ་དེ་བཞིན་ནོ་ཞེས་གསོལ་ཏོ། །དེ་ལྟར་ཅུང་ཟད་ཙམ་དེ་བཞིན་དུ་ངས་སྒྲ་གཅན་འཛིན་ཁྱོད་ལ་སྐྱེས་བུ་གཏི་མུག་ཅན་གྱི་དགེ་སྦྱོང་གི་ཆོས་སྨྲ་བར་བྱའོ། །གང་ལ་ལ་ཞིག་
ཤེས་བཞིན་དུ་བརྫུན་དུ་སྨྲ་བ་དང་། ངོ་ཚ་མེད་པ་དང་། འཛེམ་པ་མེད་པ་དང་། འགྱོད་པ་མེད་པ་དེ་ཡང་བོར་བ་ནས་དེ་བཞིན་དུ་འདི་ལ་གཡོན་ཅན་དགེ་སྦྱོང་གི་ཆོས་སོ་ཞེས་ང་སྨྲའོ་ཞེས་བྱ་བ་དང་། ཧསྟི་ཤུ་ཎ་ཌ་ཏྱ་གའི་དཔེར་བརྗོད་པས་ཚིགས་སུ་བཅད་པ་གཉིས་གསུངས་སོ། །ཆོས་
གཅིག་ནི་གཙོ་བོར་གྱུར་པའི་དོན་ཏེ། གཅིག་གི་སྒྲ་ནི་མཆོག་གི་ཚིག་ཡིན་པའི་ཕྱིར་རོ། །ཆོས་ཀྱི་སྒྲ་ནི་ཡང་དོན་གྱི་རྣམ་གྲངས་ཡིན་པའི་ཕྱིར་ཏེ། གྲོང་འདི་ན་ནི་རྒྱལ་གྱི་གྲོགས་པོ་གནས་སོ་ཞེས་གཙོ་བོར་ཤེས་པ་བཞིན་ཏེ། དེས་ན་བདེན་པའི་ཚིག་ནི་འདིར་ཆོས་སོ། །འཛིན་པར་བྱེད་
པ་ཡིན་པས་ཆེན་པོའོ། །གཅིག་ཀྱང་ཡིན་ལ་ཆོས་ཀྱང་ཡིན་པས་ཆོས་གཅིག་ཅེས་བསྡུ་བ་བྱས་སོ། །དེ་ལས་འདས་པ་ནི་ཐལ་བ་སྟེ། བདེན་པ་ཞེས་བྱ་བ་བོར་བ་དང་ལྡན་པའི་སྐྱེས་བུའོ། །འདི་ཇི་ལྟ་བུ་ཡིན་ཞེ་ན་སྨྲས་པ། བརྫུན་དུ་སྨྲ་བའི་ཞེས་བྱ་བ་སྟེ། བརྫུན་པ་ནི་ཕྱིན་ཅི་ལོག་སྟེ།

སྨྲ་བ་ནི་ཚིག་གོ། །གང་ཞིག་རྟག་ཏུ་བརྫུན་སྨྲ་བ་དེ་ཉིད་ནི་སྐྱེ་བོ་དམ་པས་མ་བསྔགས་པ་བདེན་པའི་ཆོས་ལས་འདས་པ་སྟེ། དཔེར་ན་དུག་ཧ་ལ་ཧ་ལ་ཉེ་བར་ལོངས་སྤྱོད་པ་དེས་སྲོག་འཕྲོག་པར་བྱེད་པ་དེ་བཞིན་དུའོ། །ལུས་ཅན་ནི་སེམས་ཅན་ནོ། །འཇིག་རྟེན་ཕ་རོལ་བཅོམ་པ་ཞེས་པ་ནི་བདེ་འགྲོ་
ཡོངས་སུ་སྤངས་པ་སྟེ། འདིར་ཕ་རོལ་གྱི་སྒྲ་ནི་བསྔགས་པར་བྱས་པའི་ཕྱིར་ཏེ། སོང་ནས་བདེ་བ་སྦྱིན་པ་ནི་ཆོས་སོ་ཞེས་པའི་ཚིག་གིས་སོ། །དེ་སྤངས་པས་ནི་དེའི་འབྲས་བུ་སྤོང་བའོ། །སྡིག་པ་མི་བྱ་ཅི་ཡང་མེད། །ཅེས་བྱ་བ་ནི་དེས་བདེན་པ་སྤངས་ཤིང་བརྫུན་དུ་སྨྲ་བ་ཡོངས་སུ་གཟུང་
བས་སྡིག་པ་བསགས་ཏེ། རིམ་གྱིས་དགེ་བའི་རྩ་བ་རྣམས་རྒྱུན་གཅོད་པར་བྱེད་པ་དེ་ནི་སྔར་བཤད་པའི་སེམས་ཅན་གྱིས་ནི་མི་བྱ་བ་དང་། ངན་པར་སྤྱོད་པ་མི་བྱེད་པ་ཅི་ཡང་མེད་པའོ། །དེས་ན་ཡང་དེ་ཉིད་ཀྱི་ཕྱིར། ལྕགས་གོང་ཟོས་པ་ཆེས་བླ་ཡི། །ཞེས་བྱ་བ་སྨོས་ཏེ། ལྕགས་ཀྱི་གར་
བུའམ་ལྕགས་ཀྱི་གོང་པོ་མིད་པ་ནི་རུང་ངོ་ཞེས་པའོ། །ཇི་ལྟ་བུ་ཞེ་ན། བསྲེག་པ་སྟེ་མེས་བསྲེགས་པའོ། །མེ་ལྕེ་འབར་འདྲ་བ་ཞེས་བྱ་བ་ནི་མེ་འབར་བ་དང་འདྲ་ཞིང་མཚུངས་པ་གང་ཡིན་པ་སྟེ། མེས་སྲེག་ཅིང་འབར་བ་དང་མཉམ་པའོ། །བཟར་མི་རུང་ཞེས་བྱ་བ་ནི་གང་ཞིག་ཟོས་ཤིང་
མིད་པའོ། །འདི་སྐད་སྟོན་པ་ཡིན་ཏེ། གང་ཡང་ལྕགས་ཀྱི་ཐུ་ལུམ་བསྲེགས་ཤིང་མེ་ལྕེ་འབར་བ་ལྟ་བུ་ཟ་བ་དང་། གང་ཡང་ཚུལ་ཁྲིམས་འཆལ་བ་ཡུལ་འཁོར་གྱི་བསོད་སྙོམས་ཟ་བར་བྱེད་པ་འདི་གཉིས་ལས་ནི་ལྕགས་ཀྱི་ཐུ་ལུམ་ཟ་བ་དེ་ནི་བླའི། ཅིག་ཤོས་ནི་མ་ཡིན་ནོ། །ཇི་སྐད་དུ་རྣམ་
པར་སྨྲ་བར་བྱེད་པ་ལས་དམིགས་པ་ནི་ཆོས་མཆོག་ཡིན་གྱི། གང་ཡང་མི་དམིགས་པ་ནི་མ་ཡིན་ཏེ། ཆོས་ཐམས་ཅད་ལ་བདག་མེད་པའི་རྣམ་པ་ལ་གང་དམིགས་པ་དང་། གང་ཡང་མི་དམིགས་པ་དེ་གཉིས་ལས་དམིགས་པ་ཉིད་ཆེས་མཆོག་ཡིན་ནོ་ཞེས་པའི་དོན་ཏེ། དེ་བཞིན་དུ་བསྟན་
པ་འདི་ཡང་ཤེས་པར་བྱའོ། །ཚུལ་ཁྲིམས་འཆལ་བ་ཞེས་བྱ་བ་ནི་ཚུལ་ཁྲིམས་ཉམས་པ་སྟེ། བརྫུན་སྨྲ་བ་ལ་སོགས་པ་ཞེས་བྱ་བའི་དོན་ཏོ། །ཡུལ་འཁོར་བསོད་སྙོམས་ཞེས་བྱ་བ་ནི་གྲོང་ལ་སོགས་པ་ལས་རྙེད་པའི་བསོད་སྙོམས་ཏེ། གུས་པ་སྔོན་དུ་བཏང་བས་དགེ་སློང་ལ་བྱིན་པའི་

ཟས་ཞེས་བྱ་བའི་དོན་ཏོ། །མི་སྡོམ་པས་ཞེས་བྱ་བ་ནི་དབང་པོ་སྡོམ་པ་དང་མི་ལྡན་པའི་ཕྱིར་ཏེ། གང་ཚུལ་ཁྲིམས་དང་ལྡན་ཡང་དབང་པོ་མ་དུལ་བ་དེས་བསོད་སྙོམས་ཉེ་བར་ལོངས་སྤྱོད་པ་མི་རིགས་སོ། །ཡང་ན་དགེ་བའི་ཕྱོགས་ལ་མངོན་པར་མི་བརྩོན་པ་སྟེ། ལེ་
ལོ་ཅན་གྱིས་ཉེ་བར་བླངས་པའི་འཚོ་བ་ནི་བུ་ལོན་དུ་སྤྱོད་པ་ཡིན་ནོ་ཞེས་ལུང་ལས་འབྱུང་བའི་ཕྱིར་རོ། །འདི་ནི་ཤིན་ཏུ་བསྡམས་པ་ཡིན་ནོ་ཞེས་དེ་ལ་དད་པས་བསོད་སྙོམས་ལ་སོགས་པ་འབུལ་བར་འགྱུར་ཏེ། དེ་ནི་ནང་ན་ཤིན་ཏུ་མ་རུངས་པ་ཡིན་ན་དེ་ཐམས་ཅད་ནི་བུ་ལོན་དུ་འགྱུར་རོ། །བརྫུན་དུ་སྨྲ་
བའི་ཉེས་དམིགས་བསྟོད་པས་དེ་ལས་བཟློག་པའི་ཕྱིར་གསུངས་སོ། །སྡིག་པས་འཇིགས་པ་རྣམས་ལ་འདི་ལྟ་བུའི་སྡིག་པ་མི་བྱའོ་ཞེས་འདིར་བསྟན་པའི་ཕྱིར་ཁྱོད་ནི་སྡུག་བསྔལ་གྱིས་འཇིགས་ཤིང་ཞེས་བྱ་བ་ལ་སོགས་པ་སྨོས་སོ། །བཅོམ་ལྡན་འདས་ཅི་ར་བ་ཏྱ་ཞེས་བྱ་བའི་ཆུ་ཀླུང་རྒྱུ་ཞིང་གཤེགས་པ་
ལས་ཉེ་པ་རྒན་པོ་ཞིག་གིས་ཉ་རྒྱས་ཉ་མང་པོ་བཟུང་ཞིང་ཕྱུང་བ་གཟིགས་ཏེ། ཅི་རིགས་ཀྱི་བུ་ཁྱོད་གང་ལ་ལས་འཇིགས་པ་ཡོད་ཅེས་བཀའ་སྩལ་པ་དང་། ཀྱེ་གཽ་ཏ་མ་སྡུག་བསྔལ་ལས་འཇིགས་པ་མཆིས་སོ་ཞེས་གསོལ་ཏོ། །དེ་ལྟ་ན་གཞན་དག་ལ་སྡུག་བསྔལ་མ་བསྐྱེད་ཅིག །དེ་ཅིའི་
ཕྱིར་ཞེ་ན། གང་གིས་སྡུག་བསྔལ་བྱས་ན་བདེ་བར་འགྱུར་བ་ནི་མེད་དོ་ཞེས་པ་ནས་ཇི་སྲིད་དུ་ཚིགས་སུ་བཅད་པ་གཉིས་གསུངས་སོ། །གཞན་དག་ནི་སྡུག་བསྔལ་གྱི་འཇིགས་པ་ཀུན་དུ་རྒྱུ་ཞིག་གིས་འདི་སྐད་ཅེས། ཀྱེ་གཽ་ཏ་མ་བདག་འདིར་སྡུག་བསྔལ་གྱིས་འཇིགས་པར་གྱུར་ན། དེ་ཐབས་གང་གིས་
བདག་གི་སྡུག་བསྔལ་མེད་པར་འགྱུར་ཞེས་གསོལ་པ་དང་། །དེ་ཉིད་ཀྱི་ཕྱིར་འདི་གསུངས་པ་ཡིན་ནོ་ཞེས་ཟེར་རོ། །ཁྱོད་ནི་ཞེས་བྱ་བ་ནི་གལ་ཏེའོ། །འཇིགས་པ་ནི་སྐྲག་པའོ། །སྡུག་བསྔལ་གྱིས་ཞེས་བྱ་བ་ནི་ངན་སོང་གི་སྡུག་བསྔལ་ལས་ཞེས་བྱ་བའི་ཚིག་གི་ལྷག་མ་སྟེ། གསུམ་པའི་
གནས་སུ་ལྔ་པ་གཞག་པས་ན་སྡུག་བསྔལ་ལས་ཞེས་བྱ་བའི་དོན་ཏོ། །ཁྱོད་ལ་ཞེས་བྱ་བ་ནི་གལ་ཏེ་ཁྱོད་ལ་སྡུག་བསྔལ་མི་སྡུག་པ་སྟེ། བདེ་འགྲོའི་སྡུག་བསྔལ་ལམ་འདུ་བྱེད་ཀྱི་སྡུག་བསྔལ་མི་འདོད་པ་ཡིན་ན་སྟེ། ངན་སོང་གི་སྡུག་བསྔལ་ནི་སྔར་བཤད་པའི་ཕྱིར་རོ། །གང་གི་ཕྱིར་ཡང་

དེས་ཉེ་བར་གདུང་བ་ཡིན་པའི་ཕྱིར་མངོན་པར་མི་འདོད་པ་སྟེ། དེ་བས་ན་དེའི་འོག་ཏུ་སྐྱེ་བ་ལ་མངོན་དུ་ཕྱོགས་པའི་ཕྱིར་སྡུག་བསྔལ་ལས་འཇིགས་པ་ཡིན་ཏེ། བདག་སྡུག་བསྔལ་བར་ནམ་ཡང་མ་གྱུར་ཅིག་པའོ། །དེར་ལྟུང་བ་ཡོངས་སུ་སྤང་བའི་སྨན་བསྟེན་པའི་ཐབས་བསྟན་པའི་ཕྱིར་
སྨྲས་པ། མེ་བྱ་ཞེས་པ་སྟེ་ནམ་ཡང་མ་བྱེད་ཅིག་པའོ། །སྡིག་པ་ཅན་གྱི་ལས་ཞེས་བྱ་བ་ནི་ངན་པར་སྤྱོད་པའོ། །མངོན་སུམ་ནི་སྐྱེ་བོ་ཐམས་ཅད་ཀྱིས་མངོན་སུམ་དུ་གསལ་བར་རོ། །ལྐོག་ཏུའང་རུང་ཞེས་བྱ་བ་ནི་ཡང་ན་སྐྱེ་བོས་དབེན་པའི་ཕྱོགས་ཏེ། ཕག་ཏུ་ཞེས་བྱ་བའི་དོན་ཏོ། །ཇི་སྐད་དུ། མ་
མཐོང་ལྐོག་ཏུའང་མི་བྱ་སྟེ། །ལས་དེ་འཕགས་པས་མི་བྱའོ། །ཞེས་གསུངས་པའོ། །གལ་ཏེ་སྡིག་པའི་ལས་བྱས་སམ། །བྱེད་ཀྱང་རུང་སྟེ་ཞེས་བྱ་བ་ནི་གལ་ཏེ་ཡང་ཁྱོད་མི་ཤེས་པས། ང་ཡོངས་སུ་མྱ་ངན་ལས་འདས་པའི་འོག་ཏུ་སྲོག་གཅོད་པ་ལ་སོགས་པའི་ཉེས་དམིགས་ཉེས་པར་སྤྱོད་དམ་
ང་ཉིད་ད་ལྟར་འདུག་བཞིན་དུ་མདུན་དུ་ཁྱོད་ཀྱིས་བྱས་ན་དེས་ན་ཁྱོད་ནི། སྡུག་བསྔལ་ལས་ཞེས་བྱ་བ་སྨོས་ཏེ། ལུས་དང་སེམས་གདུང་བ་ལས་སོ། །ཐར་མི་འགྱུར་ཞེས་བྱ་བ་ནི་ངེས་པར་འབྱུང་བའོ། །ཅི་ཞིག་བྱས་ན་ཐར་བར་མི་འགྱུར་ཞེ་ན། སྨྲས་པ། ཀོག་ཅེས་ལངས་ཏེ་བྲོས་བྱས་ཀྱང་། །ཞེས་
བྱ་བ་སྟེ། རང་གི་ཡུལ་ལམ་རྒྱ་མཚོ་ལ་སོགས་པ་ལས་རྒལ་ཞིང་འདས་པར་བྱས་པའམ། ཡུལ་ཐག་ཤིན་ཏུ་རིང་པོར་སོང་བར་གྱུར་ཀྱང་སྟེ་ཇི་སྐད་དུ། སྡིག་ཅན་བདག་ཉིད་གར་འགྲོ་བ། །སྡུག་བསྔལ་ཉིད་ནི་དེར་འགྲོ་སྟེ། །གང་དང་གང་དུ་མེ་གནས་པ། །དེ་ཉིད་ན་ནི་བསྲེག་པར་འགྱུར། །ཞེས་
གསུངས་པའི་ཕྱིར་རོ། །བར་སྣང་ལ་སོགས་པར་བྲོས་ན་དེ་ལས་ཐར་བར་འགྱུར་རོ་ཞེས་བདེན་པར་སྨྲ་བ་གཅད་པའི་ཕྱིར་སྨྲས་པ། གང་དུ་གནས་ན་འཆི་བས་མི་ཚུགས་པ། །ཞེས་བྱ་བ་ལ་སོགས་པ་སྟེ། འདིར་གླེང་གཞི་དང་འབྲེལ་པ་ནི་མི་རྟག་པའི་ཚོམས་སུ་བཤད་དེ། འཆི་བའི་གནས་
སུ་ལས་ཉི་ཚེ་བརྗོད་པ་ཡིན་ནོ། །ལས་ཀྱིས་ཟིལ་གྱིས་ནོན་པར་བྱེད་པས་དེ་བྱ་བར་མི་རུང་བའི་ཕྱིར་སྨྲས་པ། ཕ་རོལ་པོ་ལ་བརྟགས་ནས་གང་། །ཞེས་བྱ་བ་ལ་སོགས་པའོ། །རྒྱལ་པོ་མ་སྐྱེས་དགྲས་ཀཱར་ཥཱ་པ་ཎའི་བཞི་ཆ་བརྐུས་པ་ཙམ་དང་། གཞན་གྱིས་བསྒྱུར་བ་ཙམ་གྱིས་ཀྱང་གསོད་པར་

བྱེད་དོ། །དེ་རེ་ཞིག་ཅིག་ན་རྐུན་མ་དང་བྱི་བོ་བྱེད་པ་དང་། ཞལ་ཆེ་ལ་གཡོ་བྱེད་པ་མང་པོ་དག་གསད་པའི་ཕྱིར་གཤེད་མ་པའི་ལག་ཏུ་གཏད་དེ། དེའི་དབང་དུ་མཛད་ནས་འདི་གསུངས་སོ། །གང་ཞེས་བྱ་བ་དང་། སྡིག་པ་ཅན་གྱི་ལས་ཞེས་བྱ་བ་འདིར་སྦྱར་བར་བྱའོ། །
ཕ་རོལ་པོ་ལ་ཞེས་བྱ་བ་ནི་རྐུན་པོ་དང་བྱི་བོ་བྱེད་པ་ལ་སོགས་པ་དག་ལའོ། །བརྟགས་ནས་ཞེས་བྱ་བ་ནི་ཉེ་བར་བརྟགས་པ་དང་། ཡོངས་སུ་བཙལ་བ་སྟེ། སྐྱེས་བུ་གང་གིས་སྡིག་པ་བྱས། །ཞེས་སོ། །སྡིག་པ་ཅན་ཞེས་བྱ་བ་ནི་འོག་ནས་བཤད་དོ། །མཐོང་བ་ནི་འཇིག་རྟེན་ངེས་པར་བྱས་
པའོ། །སྡིག་པ་ཅན་ཞེས་བྱ་བ་ནི་སྐྱེས་བུ་དམ་པ་རྣམས་ཀྱིས་སྨད་པ་དང་མི་འདོད་པའི་འབྲས་བུའོ། །བདག་གིས་ཞེས་བྱ་བ་ནི་རང་ཉིད་ཀྱིས་སོ། །དེ་དག་མི་བྱ་ཞེས་བྱ་བ་ནི་སྡིག་པ་ཅན་གྱི་ལས་མི་བྱ་བའོ། །ཅིའི་ཕྱིར་ཞེ་ན། འདི་ལྟར། སྡིག་བྱས་ལས་ནི་རྗེས་སུ་འབྲང་། །ཞེས་བྱ་བ་ཡིན་ཏེ། སྡིག་
པ་བྱེད་པ་ཡིན་ནོ་ཞེས་སྐྱེ་བོ་རྣམས་སྨོད་ཅིང་སྡིག་པ་ཅན་གྱི་སྐྱེ་བོ་ནི་ཐ་མ་ཡིན་ནོ་ཞེས་བྱ་བའི་ཕྱིར། རང་གིས་བྱས་པའི་སྡིག་པའི་ལས་དེ་ནི་འདི་དང་ཕ་རོལ་ཏུ་རྗེས་སུ་འབྲང་བ་ཡིན་ཏེ། ཇི་ལྟར་བདག་གིས་མིག་གིས་ཐམས་ཅད་མཐོང་བ་བཞིན་ནོ། །སྡིག་པའི་ལས་ཀྱི་སྐྱོན་བསྟན་པས་དེ་
འགག་པའི་ཕྱིར་འདི་གསུངས་སོ། །གང་ཡང་ལས་ཀྱི་ཞགས་པས་བཅིངས་པར་གྱུར་ན་ནི་གཡང་སར་ལྟུང་བར་འགྱུར་རོ་ཞེས་བསྟན་པའི་ཕྱིར་སྨྲས་པ། ལས་གང་ཤིན་ཏུ་མི་བཟད་དང་། །ཞེས་བྱ་བ་ལ་སོགས་པའོ། །དེ་ནས་སྲང་ལ་གཡོ་བྱེད་པའི་ཚོང་དཔོན་ཞིག་དང་། འཐབ་མོས་འཚོ་
བའི་གྲོང་དཔོན་ཞིག་ལ་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །འདི་ལ་ཟོལ་བྱེད་པས་གཞལ་བླུགས་གཅིག་ཏུ་འཚོས་པ་དང་། ལོག་པའི་འཚོ་བས་འཚོ་བར་བྱེད་པ་སྟེ། འདི་ལྟ་སྟེ་ཁར་བའི་སྲང་ལ་ཟོལ་བྱེད་པ་དང་། གཞལ་བླུགས་ལག་ཅིག་ཏུ་ཟོལ་བྱེད་པ་དང་མཆོག་ཏུ་
གཏུམ་ཞིང་མི་བཟད་པ་ལག་པ་ཁྲག་གིས་སྤགས་པ་ནི་ཇི་སྲིད་དུ་དམྱལ་བ་རྣམས་སུ་སྐྱེ་བར་འགྱུར་རོ་ཞེས་བྱ་བ་ནས་ཚིགས་སུ་བཅད་པ་གཉིས་གསུངས་སོ། །གང་ཞེས་བྱ་བ་དང་། མིའི་ཞེས་བྱ་བར་སྦྱར་ཏེ་སེམས་ཅན་ནོ། །ཟོལ་བྱེད་གཞལ་བླུགས་འཆོས་པ་དང་། །ཞེས་བྱ་བ་ནི་སྔ་ན་མེད་པའི་

བྲེ་ལ་སོགས་པ་འཆོས་པའོ། །འདིས་འཇལ་བ་ཡིན་པས་གཞལ་བླུགས་ཏེ། དེ་ཡང་བཅོས་མ་དེའི་སྦྱོར་བ་བྱས་པའོ། །དེ་ལས་གབ་པ་ལས་གཞན་ལ་འཚེ་བའི་ཐབས་བསྟན་ནས་བསལ་བར་སྨྲས་པ། ལས་གང་ཤིན་ཏུ་མི་བཟད་པ། །ཞེས་བྱ་བ་སྨོས་ཏེ། སྲོག་གཅོད་པ་ལ་སོགས་
པ་རྣམ་པར་སྨད་པའི་སྤྱོད་པ་དེའོ། །མི་ལ་འཚེ་བར་བྱེད་པ་དང་། །ཞེས་བྱ་བ་ནི་སེམས་ཅན་གཞན་ལ་ཉེ་བར་གདུང་བར་བྱེད་པ་ཡིན་ནོ། །གཞན་ལ་བྱེད་དུ་འཇུག་པ་ཞེས་བྱ་བ་ནི་གཞན་བྱེད་པར་འཇུད་པའམ། གཞན་གྱི་ལག་གིས་ཞེས་བྱ་བའི་དོན་ཏོ། །དེ་ཡིས་གཡང་སར་ལྟུང་བར་བྱེད། །ཅེས་
བྱ་བ་ནི་རབ་ཏུ་འགྲོ་བ་དང་འཇུག་པ་ཞེས་བྱ་བའི་དོན་ཏོ། །གཡང་ས་ནི་ངན་སོང་ངོ་། །དེ་ཡིས་ཞེས་བྱ་བ་ནི་འཚེ་བ་བྱེད་པ་ལ་སོགས་པས་སོ། །ཅིའི་ཕྱིར་ཞེ་ན། སྨྲས་པ། ལས་དེ་མི་ཡི་རྗེས་འབྲང་བས། །ཞེས་བྱ་བ་ཡིན་ཏེ། གང་གི་ཕྱིར་སེམས་ཅན་དེ་སྡིག་པ་ངན་སོང་གི་འབྲས་བུའི་ལས་ནག་པོའི་
ཞགས་པ་ཉིད་ཀྱིས་བཅིངས་པ་སྟེ། གཞན་གྱིས་དབང་དུ་བྱས་པ་ཡིན་པས་དེ་བས་ན་མི་འདོད་ཀྱང་ངན་སོང་དུ་འགྲོ་བ་ཉིད་དོ། །འོ་ན་ལུས་ཀྱིས་ལས་བྱས་པ་ནི་ལུས་ཉམས་པས་འཇིགས་པར་འགྱུར་ཏེ། གང་གི་ཕྱིར་གནས་ཉམས་ན་གནས་པ་ཉམས་པར་སྣང་ངོ་ཞེ་ན། སྨྲས་པ། མི་ཡིས་
གང་དང་གང་བྱས་པའི། །ཞེས་བྱ་བ་སྟེ། གང་ཅུང་ཟད་ཀུན་ནས་ཉོན་མོངས་པ་སེམས་ཅན་འདི་སྤྱོད་པའོ། །དེ་གང་ཡིན་ཞེ་ན། སྨྲས་པ། དགེ་བ་འམ་ནི་སྡིག་པ་ཡི། །ཞེས་བྱ་བ་སྨོས་ཏེ། མི་དགེ་བའི་ལས་སམ་དགེ་བའི་ལས་སོ། །དེ་ལྟ་དེ་ལྟར་ཞེས་བྱ་བ་ནི་དགེ་བ་དང་མི་དགེ་བ་རང་གིས་
བྱས་པ་ལས་སོ། །འབྲས་བུར་འགྱུར་ཞེས་བྱ་བ་ནི་བགོ་སྐལ་ལ་སྤྱོད་པའོ། །ཅིའི་ཕྱིར་དེ་ལྟར་འགྱུར་ཞེ་ན། ལས་རྣམས་ཆུད་ཟར་མི་འགྱུར་ཏེ། །ཞེས་བྱ་བ་སྟེ་གང་གི་ཕྱིར་ལས་བྱས་ཤིང་བསགས་པ་ནི་འབྲས་བུ་མེད་པར་མི་འགྱུར་ཏེ། དེ་བས་ན། ལས་རྣམས་བསྐལ་པ་བརྒྱར་ཡང་ནི། །ཆུད་མི་
ཟ་བའང་ཚོགས་དང་དུས། །ཞེས་བྱ་བའི་ཚིག་གིས་སོ། །སྡུག་བསྔལ་གྱིས་འཇིགས་པ་རྣམས་ལ་སྡིག་པའི་ལས་སྤོང་བ་ལ་གཟུད་པའི་ཕྱིར་འདི་གསུངས་སོ། །དུས་ཅུང་ཟད་དུ་ཉེས་པར་སྤྱོད་པ་བྱས་ཀྱང་ཇི་སྲིད་མ་ཤིའི་བར་དུ་བདེ་བ་ཡོད་དོ་ཞེས་པ་ལ། དེ་ཉིད་སྨྲས་པ། དེ་ཡི་ཚོགས་པ་དེ་སྲིད་དུ། །

ཞེས་བྱ་བ་ལ་སོགས་པ་ཡིན་ནོ། །རྒྱལ་པོ་གསལ་རྒྱལ་དང་། རྒྱལ་པོ་མ་སྐྱེས་དགྲ་གཉིས་ཕན་ཚུན་མི་མཐུན་པར་གྱུར་ཏེ། ཇི་ཙམ་ན་མ་སྐྱེས་དགྲས་རྒྱལ་པོ་གསལ་རྒྱལ་གྱི་གླང་པོ་ཆེའི་ཚོགས་ལ་སོགས་པ་ཐམས་ཅད་ཕྲོགས་པར་གྱུར་ཏོ་ཞེས་བྱ་བ་ལ་སོགས་པ་
རྒྱ་ཆེར་དགེ་སློང་རབ་ཏུ་མང་པོ་བསོད་སྙོམས་ལ་འོངས་པ་དག་ལས་གསན་ནས་བཅོམ་ལྡན་འདས་ཀྱིས་དགྲ་ལས་རྒྱལ་བར་གྱུར་ཅིག་ཅེས་བྱ་བ་ལ་སོགས་པ་བཀའ་སྩལ་པ་དང་། ཡང་འཐབ་མོ་ལ་ཞུགས་ཏེ་རྒྱལ་པོ་གསལ་རྒྱལ་གྱིས་རྒྱལ་པོ་མ་སྐྱེས་དགྲ་དེ་གསོན་བཞིན་དུ་བཟུང་སྟེ། བཅོམ་
ལྡན་འདས་ཀྱི་སྤྱན་སྔར་ཁྱེར་ཏེ་འོངས་ནས་གསོལ་པ། བཙུན་པ་འདི་ནི་བདག་དང་ཡུན་རིང་པོ་ནས་ཁོན་མེད་པ་ལགས་ན། འདི་ཉིད་ཀྱིས་དགྲ་བགྱིས་པ་ཉི་ཚེར་ཟད་དོ་ཞེས་པ་ནས། གྲོགས་པོའི་བུ་ཡིན་ནོ་ཞེས་བྱ་བའི་བར་དུ་ཇི་སྲིད་དུ་གང་གིས་ཀྱང་མ་བཏང་ངོ་ཞེས་པ་ནས། རྒྱལ་པོ་ཆེན་པོ་འདི་
ཁྱོད་ཀྱིས་མ་བཏང་བ་དེས་ནི་ཡུན་རིང་པོར་གནོད་པར་འགྱུར་ཞིང་མི་ཕན་པར་འགྱུར་རོ་ཞེས་གསུངས་ཏེ། དེས་ན་ཇི་ཙམ་ན་འདི་གསུངས་སོ། །རུང་བར་བྱེད་ཅེས་བྱ་བ་ནི་རྣམ་པར་འཇིག་པ་དང་། རྣམ་པར་འཇོམས་པར་བྱེད་པའོ། །དེ་སྲིད་ཅེས་བྱ་བ་ནི་དེ་སྲིད་ཀྱི་དུས་སོ། །འདི་ནི་ཞེས་བྱ་བ་ནི་མ་སྐྱེས་
དགྲ་ལ་སོགས་པའོ། །དུས་ཇི་སྲིད་ཅིག་ཏུ་འདི་རུང་བར་བྱེད་ཅེ་ན། དེ་ཡི་ཚོགས་པ་ཇི་སྲིད་པར། །ཞེས་བྱ་བ་སྨོས་ཏེ། དུས་ཇི་སྲིད་ཀྱི་བར་དུ་དེའི་དགེ་བའི་ལས་མ་ཟད་ཅིང་ནུས་པ་མངོན་དུ་ཕྱོགས་ཤིང་གནས་པའམ། སྒྲུབ་པའི་འདུ་འཕྲོད་རྗེས་སུ་མཐུན་པར་གྱུར་པ་འཇུག་པ་དེ་སྲིད་དུའོ། །དེ་ནས་
གཞན་ཡང་རུང་བྱེད་དེ། །ཞེས་བྱ་བ་ལ། དེ་ནས་ཞེས་བྱ་བ་ནི་དེའི་ཕྱི་ནས་ཏེ། སྔར་བཤད་པའི་ཚོགས་པ་དང་བྲལ་བར་གྱུར་པ་དང་། ཁྱོད་ལ་སོགས་པ་ཅི་ལ་རག་པ་མེད་པར་ཆས་ནས་རྒྱལ་པོ་མ་སྐྱེས་དགྲ་ལ་སོགས་པ་གང་ཡང་རུང་བ་ཟིལ་གྱིས་གནོན་པར་བྱེད་དོ། །གཞན་དག་ནི་སྔར་
གྱིས་རུང་བར་བྱེད་པ་དེ་འཇིག་པའི་འོག་ཏུ་དེ་ལས་བཟློག་པ་སྟེ། ཚོགས་པ་འདུས་པའི་ཕྱིར་རུང་བར་བྱེད་པ་གཞན་དག་གིས་རུང་བར་བྱེད་དོ། །བཅོམ་ལྡན་འདས་དམྱལ་བའི་གནས་སུ་རྒྱུ་ཞིང་གཤེགས་པའི་ཚེ། དམྱལ་བ་པ་རྣམས་ཀྱིས་གསོལ་བ་བཏབ་པ་ན། ཚེ་རབས་སྔ་མའི་གཤིན་རྗེའི་

སྲུང་མ་དག་བསྟན་ནས། འདི་གསུངས་སོ་ཞེས་ཟེར་ཏེ། གང་གི་ཕྱིར་དེ་ནི་ཇི་སྲིད་འཚོའི་བར་དུ་དམྱལ་བ་དེ་དག་ལ་གནོད་པ་བྱེད་ལ། ཤི་ནས་ནི་དམྱལ་བའི་སྲུང་མ་ཤིན་ཏུ་མི་བཟད་པ་གཞན་དག་ཀྱང་དེར་སྐྱེས་ནས་གནོད་པར་བྱེད་དོ་ཞེས་སོ། །འབྱོར་པ་ཐམས་ཅད་ཀྱི་མཐའ་ནི་
རྒུད་པ་ཡིན་ཏེ། དེའི་ཕྱིར་བག་མེད་པ་མི་བྱའོ་ཞེས་བསྟན་པའི་ཕྱིར་འདི་གསུངས་སོ། །གལ་ཏེ་མི་འདོད་པའི་འབྲས་བུའི་ལས་བྱེད་པའི་དུས་སུ་མི་རྟོགས་ཀྱང་སྨིན་པའི་དུས་སུ་མི་དེ་རྟོགས་པ་ཡིན་ནོ་ཞེས་བསྟན་པའི་ཕྱིར། འདི་ནི་བདག་རྗེས་མི་འབྲང་བས། །ཞེས་བྱ་བ་ལ་སོགས་
པ་སྨོས་སོ། །བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་བྱིས་པ་སོ་སོའི་སྐྱེ་བོ་འདི་དག་ནི་ངེས་པར་དམུས་ལོང་ཡིན་ཏེ། དོན་ཇི་ལྟ་བ་བཞིན་དུ་མི་ཤེས་པས་ལུས་ཀྱིས་ཉེས་བར་སྤྱད་པ་སྤྱོད་ཅིང་ཞེས་རྒྱ་ཆེར་དམྱལ་བར་སྐྱེ་བར་འགྱུར་ཏེ་ཞེས་
པ་ནས་ཇི་སྲིད་དུ་ཚིགས་སུ་བཅད་པ་ལྔ་པོ་འདི་གསུངས་སོ། །བྱས་པ་ནི་འབྱུང་བའོ། །མ་བརྟགས་པ་ནི་མི་ཤེས་པའོ། །བྱིས་པ་ནི་སྐྱེ་བོ་རྨོངས་པ་སྟེ། བྱིས་པའི་སྐྱེ་བོ་དེ་ནི་བྱས་པའི་ལས་ཀྱང་ངག་ལུས་བཞིན་དུ་སྐྱེ་བ་གཞན་དུ་འབྱུང་བར་མི་འགྱུར་རོ་ཞེས་
འདི་ལྟར་ངེས་པར་རྟོག་གོ། །ཇི་ལྟར་མ་བརྟགས་པ་ཡིན་ཞེ་ན། །འདི་ནི་བདག་རྗེས་མི་འབྲང་བས། །ཞེས་བྱ་བ་སྟེ། སྡིག་པའི་ལས་འདི་ནི་བདག་འགྲོ་བའི་རྗེས་སུ་འབྲང་བ་མ་ཡིན་ཏེ། དཔེར་ན་ལུས་བྱེད་པ་པོ་འདི་ནི་འདི་ཉིད་དུ་འཇིག་པར་འགྱུར་ཏེ། དེ་བཞིན་དུ་དེས་བྱས་པས་
ལས་ཀྱང་འཇིག་པར་འགྱུར་རོ་སྙམ་པའོ། །ཇི་ལྟར་གང་དང་གང་དུ་ལུས་འགྲོ་བ་དེ་དང་དེར་གྲིབ་མ་འགྲོ་བར་འགྱུར་ལ། དེ་མེད་ན་ནི་དེ་མེད་པར་འགྱུར་བ་དེ་བཞིན་དུ་ཕ་རོལ་དུ་ནི་ཞེས་བྱ་བ་སྟེ། འཇིག་རྟེན་ཕ་རོལ་ཏུ་རྟོག་པར་འགྱུར་བའོ། །གང་དུ་གནས་ནས་ཤེས་པར་འགྱུར་ཞེ་ན། སྡིག་
པའི་ལས་ཀྱིས་འགྲོ་བ་དག །ཅེས་བྱ་བ་ཡིན་ཏེ། དེ་ན་གནས་པར་གྱུར་པ་ན། །ཞེས་བྱ་བ་ནི་ཚིག་གི་ལྷག་མའོ། །སྡིག་པའི་ལས་གང་ཡིན་པ་དེ་ནི་སྡིག་པའི་ལས་ཉིད་དོ། །སྡིག་པ་བྱེད་པ་གང་ཡིན་པ་དམྱལ་བ་ལ་སོགས་པའི་འགྲོ་བ་དག་ཏུ་གནས་ཤིང་དེ་དང་འབྲེལ་པ་ན་སྡིག་པ་

ཤེས་པར་འགྱུར་རོ། །ནམ་ཞིག་ཅེ་ན་སྨྲས་པ། ནམ་ཞིག་ན་འདི་ཉིད་ཀྱིས་ཚ་བར་འགྱུར་བ་སྟེ། གང་གི་ཚེ་འདི་ཉིད་ཀྱིས་སྡིག་པའི་ལས་བྱས་པའི་བྱིས་པ་དེ་ཉིད་ཀྱི་རྣམ་པར་སྨིན་པའི་འབྲས་བུ་སོ་སོར་བསྟན་པ་ན་སྡུག་བསྔལ་ཆེན་པོ་སྐྱེ་བར་འགྱུར་ཞིང་དེའི་ཚེ་སྡུག་
བསྔལ་གྱི་འབྲས་བུས་ཉེ་བར་གདུངས་པས་དེའི་སྐྱོན་ཤེས་ནས་ཡིད་ལ་གཅགས་པར་འགྱུར་ཏེ། བདག་གིས་ནི་གང་སྡིག་པ་སྤྱོད་པ་ནི་ལེགས་པར་མ་བྱས་པ་སྟེ། ཇི་སྐད་དུ། རིགས་པའམ་ཡང་ན་མི་རིགས་པས། །ལོངས་སྤྱོད་བདག་གིས་གང་བསགས་པ། །གཞན་དག་བདེ་བས་དགའ་བར་འགྱུར། །
བདག་ནི་སྡུག་བསྔལ་སྐལ་བ་ལེན། །ཞེས་བཤད་པའོ། །ཇི་ལྟར་ཡང་སྔོན་སྡིག་པ་བྱས་པ་མི་ཤེས་པ་ནི་ཉོན་མོངས་པ་ལ་འཇུག་ཅིང་ཕྱིས་ཀྱང་ཀུན་ནས་དཀྲིས་པ་དང་མ་བྲལ་བའམ། ཡང་ན་མི་འདོད་པའི་འབྲས་བུ་འབྱུང་བ་ནི་ཡིད་ལ་གཅགས་པར་འགྱུར་བའི་ཕྱིར་སྨྲས་པ། གལ་ཏེ་ཞེས་བྱ་བ་སྨོས་ཏེ།
ཇི་ལྟར་ཡང་བྱིས་པའི་སྐྱེ་བོས་སྡིག་པ་སྟེ། ལུས་ལ་སོགས་པའི་ལས་བྱས་པ་ན་རྨོངས་པས་སྡིག་པ་ཉིད་དུ་མི་ཤེས་པའི་ཕྱིར་རོ། །རང་གི་ལས་ཀྱིས་ཞེས་བྱ་བ་ནི་བདག་ཉིད་ཀྱིས་བྱས་པའི་སྡིག་པའི་ལས་དེ་དག་གིས་སོ། །དེའི་འོག་ཏུ་ནི་ཀུན་ནས་དཀྲིས་པ་དང་མ་བྲལ་བའི་གནས་སྐབས་ན། བྱིས་པ་
དེ་གདུང་བར་འགྱུར་ཏེ། ཡིད་ལ་གཅགས་ཤིང་ཚེ་འདི་དང་ཕ་རོལ་ཏུ་སྡུག་བསྔལ་གྱིས་གཟིར་བར་འགྱུར་རོ། །མེ་ཡིས་བསྲེགས་པ་བཞིན་ཞེས་བྱ་བ་ནི་དཔེར་ན་ལ་ལ་ཞིག་མེས་བསྲེགས་པར་གྱུར་ན་གདུང་ཞིང་ཉམ་ཐག་པ་དེ་བཞིན་ནོ། །མི་ཤེས་པས་བདག་ཉིད་ཀྱི་དོན་དུ་སྡིག་པ་སྤྱོད་པའི་གླེན་པ་དེ་ནི་
དམྱལ་བར་ལྟུང་བར་འགྱུར་རོ་ཞེས་བསྟན་པའི་ཕྱིར་སྨྲས་པ། བྱིས་པ་ཤེས་རབ་ཆུང་ངུ་དག །ཅེས་བྱ་བ་ལ་སོགས་པའོ། །གཞན་དག་ནི་རྒྱལ་བྱེད་ཀྱི་ཚལ་ན་ལེགས་པར་རབ་ཏུ་སད་པ་ཞེས་བྱ་བའི་ཀུན་དུ་རྒྱུ་མཛེ་ཅན་ཞིག་ཡོད་དེ། དེས་དེ་བཞིན་གཤེགས་པ་ལ་ཚིག་ངན་པ་བརྗོད་པ་ལས་
བརྩམས་སོ་ཞེས་ཟེར་རོ། །བྱེད་པ་ནི་སྤྱོད་པའོ། །བྱིས་པའི་མཚན་ཉིད་སྨྲས་པ། ཤེས་རབ་ཆུང་ངུ་ཞེས་བྱ་བ་སྟེ། ལས་དང་འབྲས་བུ་ལ་སོགས་པའི་ཚུལ་མི་ཤེས་པའམ། ཕྱིན་ཅི་ལོག་པའི་བློའོ། །ཇི་ལྟར་བྱེད་པ་ཡིན་ཞེ་ན། སྨྲས་པ། བདག་ལ་དགྲ་བཞིན་ཞེས་བྱ་བ་སྟེ། རྗེས་སུ་གནོད་

པ་བྱེད་ཅིང་མི་མཛའ་བའམ། དགྲ་བོ་དང་ཕྱིར་རྒོལ་བ་སྟེ། བདག་གི་ལུས་ལ་མི་བཟད་པའི་དགྲར་ཞེས་པའི་དོན་ཏོ། །ཅི་ཞིག་གཅོད་པར་བྱེད་པ་ཡིན་ཞེ་ན། སྡིག་ཅན་ལས་ནི་སྤྱོད་པར་བྱེད། །ཅེས་བྱ་བ་ཡིན་ཏེ། སྤྱོད་པ་ནི་ལུས་ལ་སོགས་པའི་ཉེས་པར་སྤྱོད་པའོ། །དེ་གང་ཡིན་ཞེ་ན།
གང་ཞིག་ཚར་འགྱུར་བ་ཞེས་བྱ་བ་སྨོས་ཏེ། གང་ལས་སྨིན་པའི་དུས་སུ་གདུང་བར་བྱེད་པ་ཡིན་ཏེ། སྡིག་པ་དེའི་འབྲས་བུ་ནི་མི་འདོད་པ་ཡིན་པའི་ཕྱིར་རོ། །ལས་དེ་ཡང་དམ་པ་རྣམས་ཀྱིས་སྨད་པ་དང་། མི་འདོད་པའི་འབྲས་བུ་ཡིན་ནོ་ཞེས་བསྟན་པའི་ཕྱིར་སྨྲས་པ། ལས་དེ་དག་ནི་མ་བྱས་
ལེགས། །ཞེས་བྱ་བ་ལ་སོགས་པའོ། །ལས་དེ་དག་ནི་བྱས་ཀྱང་ལེགས་པ་མ་ཡིན་ཞིང་བཟང་པོ་མ་ཡིན་ཏེ། དམ་པ་རྣམས་ཀྱིས་སྨད་པ་ཡང་ཡིན་ལ་གང་དག་བྱས་པས་གདུང་བར་ཡང་འགྱུར་ཞེས་བྱ་བ་ཡིན་ཏེ། ལས་གང་བསྟེན་པའི་འོག་ཏུ་ཡིད་ལ་གཅགས་པ་ལ་སོགས་པའི་མེས་
གདུང་བར་འགྱུར་རོ། །རྒྱུ་དེས་ན་ལེགས་པ་མ་ཡིན་ནོ། །འཇིག་རྟེན་འདིའི་ཉེས་དམིགས་བསྟན་ནས་འཇིག་རྟེན་ཕ་རོལ་གྱི་ཉེས་དམིགས་སྨྲས་པ། ངུ་བཞིན་དུ་ཞེས་བྱ་བ་ཡིན་ཏེ། ཉམ་ཐག་པས་ང་རོ་འདོན་བཞིན་དུའོ། །མཆི་མས་ཁྱབ་པའི་གདོང་གང་ཡིན་པ་དེ་ནི་མཆི་མས་གདོང་ཡོག་
པ་སྟེ། རྟག་ཏུ་མཆི་མའི་རྒྱུན་འབབ་ཅིང་གདོང་གནག་པའོ། །ཡང་ན་ངུ་བ་ནི་མཆི་མའི་རྒྱུན་འཛག་པ་སྟེ། འདིས་ནི་སྡུག་པ་ལ་འཇུག་པར་བྱེད་པའི་གནས་སྐབས་བསྟན་ཏོ། །མཆི་མས་གདོང་ཡོག་ཅེས་བྱ་བ་ནི་མཆི་མ་འབབ་པས་གདོང་གཤེར་བར་བྱས་པ་སྟེ། འདིས་ནི་འགག་པའི་
གནས་སྐབས་བསྟན་ཏོ། །གང་གིས་ལས་བྱས་ཤིང་བསགས་ནས་རྣམ་པར་སྨིན་པ་སོ་སོར་བསྟན་པ་ཞེས་བྱ་བ་སྨོས་ཏེ། འབྲས་བུ་རྗེས་སུ་མྱོང་བར་འགྱུར་བའོ། །ནག་པོའི་ཕྱོགས་བསྟན་ནས་དཀར་པོའི་ཕྱོགས་བསྟན་པའི་ཕྱིར་སྨྲས་པ། ལས་དེ་དག་ནི་བྱས་ན་ལེགས། །ཞེས་བྱ་བ་
སྨོས་ཏེ། དེ་ཡང་ལས་བྱེད་པས་ན་དགེ་བ་དམ་པ་རྣམས་ཀྱིས་བསྔགས་པ་གང་ཞིག་བྱས་ན་འཇིག་རྟེན་འདིར་ཡང་རྗེས་སུ་མི་གདུང་བ་དང་། ཕ་རོལ་དུ་ཡང་། དགའ་ཞིང་ཡིད་ནི་བདེ་བ་ཡིས། །ཞེས་བྱ་བ་སྟེ། གང་གིས་ལས་བྱས་ཤིང་བསགས་པས་དགའ་བ་ཡང་དག་པར་སྐྱེས་ཤིང་ལྡན་

པའོ། །ཕྱི་རོལ་གྱི་ཡོ་བྱད་ཕུན་སུམ་ཚོགས་པ་ཐོབ་པས་ཡིད་བདེ་བའོ། །ནང་གི་གཟུགས་མཛེས་པ་ལ་སོགས་པའི་ཁྱད་པར་གྱིས་ནི་དགའ་ཞིང་ཡིད་བདེ་བའོ། །དགའ་བའི་ཚིག་གིས་བདེ་བའོ། །ཡིད་བདེ་བ་ཞེས་བྱ་བ་ནི་འདོད་པ་ན་སྤྱོད་པའི་ཡིད་བདེ་བ་སྟེ།
བསམ་གཏན་ལས་སྐྱེས་པ་སྟེ་གོ་རིམས་བཞིན་ནོ། །སྡིག་པའི་ལས་ཀྱི་འབྲས་བུ་བསྟན་པས་སྡིག་པ་ལས་བཟློག་པའི་ཕྱིར་དང་། ལེགས་པར་སྤྱོད་པའི་འབྲས་བུ་བསྟན་པས་དེ་ཉིད་ལ་གཟུད་པའི་ཕྱིར་འདི་གསུངས་སོ། །རྨོངས་པས་བདག་ཉིད་ཀྱིས་བདེ་བ་ལ་དགོད་བཞིན་དུ་བརྐམ་པས་ནི་
འབྲས་བུ་མི་འདོད་པ་ལ་སྤྱོད་པ་ཡིན་ནོ་ཞེས་བསྟན་པའི་ཕྱིར་སྨྲས་པ། བདག་ཉིད་བདེ་བ་འདོད་པའི་ཕྱིར། །ཞེས་བྱ་བ་ལ་སོགས་པའོ། །རྒྱལ་པོའི་ཁབ་ན་གནས་བརྟན་ཤཱ་རིའི་བུའི་ཐད་དུ་ཡི་དགས་ཤིག་འོངས་ཏེ་སྨྲས་པ། འཕགས་པ་བདག་ནི་སྔོན་རྒྱལ་པོའི་ཁབ་ཀྱི་ཚོང་པར་གྱུར་ཏེ། སེར་སྣ་
དང་རིགས་ཀྱི་དྲེགས་པའི་དབང་དང་ཡི་དགས་ཀྱི་ཕྱོགས་སྤྱོད་པའི་དབང་གིས་ཡི་དགས་སུ་སྐྱེས་སོ། །བདག་གི་ཉེ་དུ་རྣམས་ལ་སངས་རྒྱས་ལ་སོགས་པའི་དགེ་སློང་གི་དགེ་འདུན་བཤོས་གསོལ་བར་བྱེད་དུ་གཞུག་ན་དེ་ནི་ལེགས་སོ་ཞེས་རྒྱ་ཆེར་སྨྲས་ཏེ། དེའི་དབང་དུ་མཛད་ནས་ཚིགས་སུ་བཅད་པ་
ལྔ་གསུངས་སོ། །གཞན་དག་ནི་ཤཱ་རིའི་བུ་དང་མཽད་གལ་གྱི་བུ་གཉིས་མནར་མེད་པར་སོང་བ་ན་ལྷ་སྦྱིན་གྱི་ལུས་དཔག་ཚད་དུ་མ་ཅན་མཐོང་བ་ན་སྨྲས་པ། བཅོམ་ལྡན་འདས་ཀྱིས་ཁྱོད་ལ་ནད་མེད་དམ་ཞེས་ཀྱང་གསུངས་སོ། །དེས་ཀྱང་མཐོང་ནས་ཤིན་ཏུ་ངུ་བར་གྱུར་ནས་དེའི་ཕྱིར་གསུངས་སོ་ཞེས་ཟེར་
རོ། །དགོད་བཞིན་ཞེས་བྱ་བ་ནི་བཞིན་འཛུམ་པ་དང་ལྡན་པའོ། །སྡིག་པའི་ལས་བྱས་པ་ཞེས་བྱ་བ་ནི་མི་འདོད་པའི་འབྲས་བུའི་བྱ་བ་ཀུན་དུ་སྤྱོད་པའོ། །གང་ཡིན་ཞེ་ན། བདག་ཉིད་བདེ་བ་འདོད་པའི་ཕྱིར། །ཞེས་བྱ་བ་སྨོས་ཏེ། དེ་དང་འབྲེལ་བ་ནི་བདག་ཉིད་ཀྱི་ལུས་ལ་བདེ་བ་ཚོལ་བའི་བྱིས་པ་
ཞེས་བྱ་བའི་དོན་ཏེ། གཞན་དག་ནི་དེ་ལྟར་བདེ་བ་མི་འདོད་དོ། །ངུ་བཞིན་རྣམ་སྨིན་དག་ཅེས་བྱ་བ་སྨོས་ཏེ། བདག་ཉིད་བདེ་བ་འདོད་པའི་ཕྱིར། །བྱས་པའི་སྡིག་པའི་ལས་དེས་ངན་སོང་དུ་སྐྱེས་ཏེ། ངུ་བཞིན་དུ་མི་འདོད་པའི་འབྲས་བུ་ཉམས་སུ་མྱོང་བ་ཡིན་ཏེ། རྣམ་པར་སྨིན་པ་དེ་ནི་གདུང་

བའི་བདག་ཉིད་ཡིན་པའི་ཕྱིར་རོ། །སྡིག་ལས་ཞེས་བྱ་བ་ནི་བསགས་པས་ན་སྡིག་པ་སྟེ། དེའི་འབྲས་བུ་དེ་ཡང་ཉེ་བར་བསགས་པའམ་སྤྱོད་པའི་ཚུལ་གང་ལ་ཡོད་པ་དེ་ནི་དེ་ཉིད་དེ། གང་གི་ཕྱིར་སྡིག་པ་ཉེ་བར་བསགས་པ་དེས་ནི་ངེས་པར་དེའི་འབྲས་བུ་མྱོང་བར་འགྱུར་ཏེ། ཇི་སྐད་དུ་གང་གིས་བསམས་
བཞིན་དུ་ལས་བྱས་ཤིང་བསགས་པས་ནི་རྣམ་པར་སྨིན་པ་ཡང་དག་པར་མྱོང་བར་མི་འགྱུར་རོ་ཞེས་ང་མི་སྨྲའོ་ཞེས་གསུངས་སོ། །བསམས་བཞིན་དུ་སྡིག་པ་བསགས་པ་དང་། མཐར་ཕྱིན་པར་བྱས་པ་གཉིས་དང་འགྱོད་པ་མེད་པའི་ཉེས་དམིགས་ཡིན་ནོ། །ཇི་ལྟར་དེ་སྡིག་པའི་ལས་དགོད་བཞིན་དུ་བྱེད་པ་
ཡིན་ཞེ་ན་སྨྲས་པ། འདི་ལྟར་ངེས་པར་སྡིག་ལས་ཞེས་བྱ་བ་སྟེ། རྒྱལ་བྱེད་ཀྱི་ཚལ་ན་ཡི་དགས་སྐོམ་པས་ཉམ་ཐག་པ་ཞིག་ལས་བརྩམས་པ་ཡིན་ནོ། །ངེས་པར་ཞེས་བྱ་བ་ནི་གཅིག་ཏུ་སྡིག་པ་ཅན་གྱི་ལས་སོ། །འཕྲལ་དུ་ཞེས་བྱ་བ་ནི་དུས་དེ་ཉིད་དུ་མྱུར་དུ་འགྱུར་ཞིང་རྣམ་པར་མི་འགྱུར་ཏེ། བྱས་པའི་
དུས་དེ་ཉིད་དུ་མི་སྨིན་ཏོ་ཞེས་བྱ་བའི་དོན་ཏོ། །ལས་ཐམས་ཅད་ཀྱི་མཐོང་བའི་ཆོས་ཉིད་ལ་མྱོང་བའི་མི་སྣང་བའི་ཕྱིར་རོ། །མཐུན་པའི་ཆོས་ཀྱི་དཔེ་བསྟན་པ། འོ་མ་ལྟ་བུར་ཞེས་བྱ་བ་ཡིན་ཏེ། དཔེར་ན་འོ་མ་ནི་དུས་དེ་ཉིད་དུ་ཞོར་མི་འགྱུར་ཏེ་འོན་ཀྱང་དུས་ཕྱི་མ་ཞིག་ན་ཞོར་འགྱུར་བ་དེ་བཞིན་ནོ། །ཡང་ན་
ཆོས་མི་མཐུན་པའི་དཔེ་ནི་འཕྲལ་དུ་ཞེས་བྱ་བ་ནི་སད་ཏྱ་ཞེས་བྱ་བའི་རྩྭའི་རིགས་ཡོད་དེ་འོ་མ་ལ་དེས་བཏབ་ན་བཅུག་པ་ཙམ་ཉིད་དུ་ཞོར་འགྱུར་ཏེ། སྡིག་པའི་ལས་ནི་དེ་ལྟ་བུ་མ་ཡིན་ནོ། །དེས་ནི་བྱིས་པ་སྲེག་པར་བྱེད། །ཅེས་བྱ་བ་ནི་སྡིག་པའི་ལས་སྨིན་པར་འགྱུར་བའི་དུས་ན་ཤིན་ཏུ་གནོད་པར་བྱེད་
པའི་ཕྱིར་ཏེ། སྡིག་པ་བྱེད་པའི་སྐྱེ་བོའི་རྗེས་སུ་འབྲང་བར་འགྱུར་རོ། །ཐལ་བས་གཡོགས་པའི་མེ་ལྟ་བུར། །ཞེས་བྱ་བ་ནི་ཐལ་བས་གཡོགས་པའི་མེ་ལ་དཔེར་ན་བྱིས་པའི་གོམ་པ་བག་རྐྱོང་སྟེ་འགྲོ་བ་སྲེག་པར་བྱེད་པ་དེ་བཞིན་ནོ། །འདི་ཉིད་ཀྱི་དངོས་པོ་རྣམ་པ་གཞན་གྱིས་སྟོན་པ་ཡིན་ཏེ། སྡིག་
ལས་འཕྲལ་དུ་ངེས་པར་ནི། །ཞེས་བྱ་བ་ལ་སོགས་པས་སོ། །གཅོད་པས་ནི་གཅོད་ཅིང་དུམ་བུར་བྱེད་པ་སྟེ། ཟད་པར་བྱེད་ཅེས་བྱ་བའི་དོན་ཏོ། །ཇི་ལྟ་བུ་ཡིན་ཞེ་ན། ཆོས་མི་མཐུན་པའི་དཔེ་མཚོན་བཞིན་དུ་ཞེས་བྱ་བ་བསྟན་ཏོ། །དཔེར་ན་མཚོན་ཤིན་ཏུ་རྣོན་པོས་ནི་རེག་པ་ཙམ་གྱིས་གཅོད་པར་བྱེད་

དོ། །སྡིག་པའི་ལས་ནི་དེ་ལྟ་བུ་མ་ཡིན་ནོ། །གལ་ཏེ་འཕྲལ་དུ་མི་གཅོད་ན་ཕྱིས་ཀྱང་དེ་བཞིན་དུ་ཡིན་ནམ་ཞེ་ན། ཕ་རོལ་དུ་ནི་མངོན་པར་འགྱུར། །ཞེས་བྱ་བ་སྨོས་ཏེ། འཇིག་རྟེན་ཕ་རོལ་དུ་ནི་གང་གིས་སྡིག་པ་བྱས་པས་སྐྱེ་བ་གང་དུ་སྐྱེ་བ་དེར་སྐྱེས་པ་ན་ཤེས་
པར་འགྱུར་ཏེ། སྡིག་པ་བྱས་པས་སྡུག་བསྔལ་བའོ། །གང་གི་ཕྱིར་འཇིག་རྟེན་ཕ་རོལ་དེར་ནི་འདིར་བྱས་པའི་སྡིག་པའི་འབྲས་བུ་ཤིན་ཏུ་ཚ་བ་ཉམས་སུ་མྱོང་བར་འགྱུར་ཞིང་ཡིད་དུ་མི་འོང་བའི་སྡུག་བསྔལ་འབྱུང་བ་ཞེས་བྱ་བའི་དོན་ཏོ། །བདག་ཉིད་ཀྱི་ལུས་ལས་བསྐྱེད་པའི་སྡིག་པ་ཡིན་ན་
ཡང་མེ་བཞིན་དུ་རང་གི་གནས་འཇིག་པར་བྱེད་པ་ཡིན་ནོ་ཞེས་བསྟན་པའི་ཕྱིར་སྨྲས་པ། ལྕགས་ལས་གཡའ་ནི་ཞེས་བྱ་བ་ལ་སོགས་པའོ། །རྒྱལ་བྱེད་ཀྱི་ཚལ་ན་གནས་བརྟན་རྒྱལ་དང་། ཨ་ཀྲོ་ཤ་ཀ་དང་། རོ་ཤ་ཀ་དང་། པ་རི་བྷ་ཤ་ཀ་ལ་བསྟན་པའི་ཕྱིར་གསུངས་སོ་ཞེས་གཞན་དག་ཟེར་རོ། །
ལྕགས་ནི་ལྕགས་ཉིད་དེ་འདི་ལྟར་གཡའ་ནི་དྲི་མའོ། །ལངས་པར་གྱུར་པ་ནི་ཡང་དག་པར་བྱུང་བའོ། །ཇི་ལྟར་ལྕགས་ལས་དྲི་མ་བྱུང་ཞིང་གནས་པའི་དྲི་མ་དེ་ནི་དེ་ལས་བྱུང་བའི་དང་དེ་ལས་སྐྱེས་པ་ཡིན་ཞིང་དེ་ལས་ལངས་པ་ཡིན་ཡང་རང་གི་གནམ་ལྕགས་སམ་མཚོན་དེ་ཉིད་ཟ་བར་བྱེད་ཅིང་
ཟད་པ་དང་འཇིག་པར་བྱེད་ཅེས་བྱ་བའི་དོན་ཏོ། །དེ་ལྟར་ན། དེ་བཞིན་མ་བརྟགས་བྱས་པ་ཡི། །ཞེས་བྱ་བ་ནི་ཡོངས་སུ་མ་བརྟགས་པར་བྱེད་པའི་བྱིས་པའོ། །རང་གི་ལས་ཀྱི་ཞེས་བྱ་བ་ནི་རང་གིས་བྱས་པའི་ཉེས་པར་སྤྱད་པའོ། །ངན་འགྲོར་འགྲོ་ཞེས་བྱ་བ་ནི་ངན་སོང་དུ་སྐྱེ་བ་ཐོབ་པར་འགྱུར་བའོ། །
དེ་བས་ན་ངན་པར་སྤྱོད་པས་འཇིགས་པར་བྱའོ་ཞེས་བསྟན་པའི་ཕྱིར་འདི་གསུངས་སོ། །ལས་ཀྱི་ཚོམས་ཀྱི་རྣམ་པར་འགྲེལ་པ་སྟེ་དགུ་པ་རྫོགས་སོ།། །།ཇི་སྐད་དུ་བཤད་པའི་སྡིག་པའི་ལས་ཟད་པའི་ཐབས་བསྟན་པའི་ཕྱིར་དེའི་འོག་ཏུ་དད་པའི་ཚོམས་བསྟན་ཏེ། གང་གི་ཕྱིར་དེ་ལ་བརྟེན་
པས་ནི་མ་སྐྱེས་དགྲ་ལ་སོགས་པའི་སྡིག་པ་ཟད་པར་གྱུར་པའི་ཕྱིར་རོ། །འདིའི་འགྲེལ་པ་བརྩམ་པར་བྱ་སྟེ། དད་དང་ངོ་ཚ་ཞེས་བྱ་བ་ལ་སོགས་པ་སྨོས་སོ། །མཉན་ཡོད་ན་ཚོང་དཔོན་གྱི་བུ་གྲོགས་པོ་བཞི་ཞིག་ཡོད་དེ། གཅིག་ནི་དད་པ་མེད་ཅིང་ཅི་ལ་ཡང་ཡིད་ཆེས་པ་མེད་དོ། །གཉིས་པ་

ནི་ངོ་ཚ་མེད་དོ། །གསུམ་པ་ནི་སྡིག་པ་ལ་སྤྱོད་དོ། །བཞི་པ་ནི་སེར་སྣ་ཆེ་བའོ། །དེ་རྣམས་ཀྱང་རྟག་ཏུ་བསམ་པ་འདི་ལྟ་བུ་སྐྱེས་ཏེ། ནམ་ཞིག་ན་བདག་ཅག་མཐོ་རིས་ཀྱི་ལམ་བསྒྲུབས་ཏེ། གང་གིས་མཐོ་རིས་སུ་སོང་ནས་དེའི་ཕུན་སུམ་ཚོགས་པ་ཡང་མྱོང་བར་བྱའོ་ཞེས་
བསམས་སོ། །དེ་དག་ཀྱང་མ་ཚང་བ་མེད་པ་ལ་སོགས་པ་ཐོབ་པས་ཡོངས་སུ་དགའ་ཞིང་དེ་དག་བཅོམ་ལྡན་འདས་ཀྱི་སྤྱན་སྔར་ཕྱིན་པ་དང་། དེའི་དབང་དུ་མཛད་ནས་འདི་གསུངས་སོ། །དད་པ་ནི་སེམས་ཀྱི་རབ་ཏུ་དང་བ་སྟེ། མངོན་པར་ཡིད་ཆེས་པ་དང་། དོན་དུ་གཉེར་བའི་མཚན་ཉིད་ཀྱི་
དབྱེ་བས་རྣམ་པ་གཉིས་སོ། །གང་མངོན་པར་ཡིད་ཆེས་པ་སྐྱེས་པ་དེ་ནི་ཁ་ཅིག་དོན་དུ་གཉེར་བར་འགྱུར་བའི་ཕྱིར་རོ། །གང་ལ་མངོན་པར་ཡིད་ཆེས་པ་ཞེས་བྱ་བ་ནི་ལས་དང་འབྲས་བུ་འབྲེལ་པ་དང་དཀོན་མཆོག་གསུམ་ལ་སོགས་པ་ལའོ། །མངོན་པར་འདོད་པས་སྤྲུལ་པའི་དངོས་པོ་ལ་
དོན་དུ་གཉེར་བ་ཡང་ཡིན་ཏེ། དེས་ན་འདི་ནི་ཡོན་ཏན་ཐམས་ཅད་སྐྱེད་པ་ཡང་ཡིན་པའི་ཕྱིར། ཡང་བཤད་པ། དད་པ་དགེ་བ་སྐྱེད་བྱེད་མ་ལྟ་བུ། །སྐྱེ་བོ་དགེ་ཡིད་དང་པོ་དེ་ལ་འཇུག །དད་བྲལ་བྱང་ཆུབ་ཕྱོགས་དང་དམ་ཆོས་ཀྱི། །རིན་ཆེན་ཚོགས་འཛིན་ནུས་པ་མ་ཡིན་ནོ། །ཞེས་པས་སོ། །
རེ་རེ་ལ་ཡང་མཐོ་རིས་ཀྱི་ལམ་དུ་བསྟན་པའི་ཕྱིར་དང་གི་སྒྲའོ། །ངོ་ཚ་བ་ནི་གང་གིས་སྡིག་པ་ལས་འཛེམ་ཞིང་ཞུམ་པར་བྱེད་ལ། ཡོན་ཏན་དང་ཡོན་ཏན་ཅན་དག་ལ་གུས་པར་བྱེད་པའོ། །ཚུལ་ཁྲིམས་ནི་ཚུལ་ཁྲིམས་འཆལ་པ་སྤངས་པ་སྟེ། ཇི་སྐད་དུ་སྔར་བཤད་པ་ཉིད་དོ། །སྦྱིན་པ་ནི་
ཡོངས་སུ་གཏོང་བ་སྟེ། འདི་ལ་གཅིག་ཏུ་སྦྱིན་པ་ནི་སྦྱིན་པ་པོ་ཡིན་ཏེ། འདིས་སྦྱིན་པས་སྦྱིན་པའོ་ཞེས་གྲུབ་པའི་མཐའ་ལས་བཤད་དེ། ཇི་སྐད་དུ། དགེ་བའི་སེམས་ཀྱིས་ནོར་དག་ནི། །གང་ཚེ་བདག་གིས་ལ་མ་བྱིན། །སྐད་ཅིག་དེ་ལ་དགེ་བའི་ཚོགས། །སྦྱིན་པ་ཞེས་ནི་བརྗོད་པ་
ཡིན། །ཞེས་སོ། །ཆོས་འདི་རྣམས་ནི་ཞེས་བྱ་བ་ནི་དངོས་པོའི་ཁྱད་པར་གྱི་ཡོན་ཏན་འདི་དག་ནི་ཞེས་བྱ་བའི་དོན་ཏེ་ཆེན་པོ་ཉིད་དུ་བྱེད་པའི་ཕྱིར་རོ། །ཆོས་ནི་ཡོན་ཏན་དང་དགེ་བ་བྱེད་པ་པོ་ཡིན་ནོ་ཞེས་པའི་ཚིག་གིས་སོ། །དེས་ན་དེ་ཉིད་སྨྲས་པ། སྐྱེས་བུ་དམ་པས་བསྔགས་ཞེས་བྱ་བ་སྟེ་

སངས་རྒྱས་དང་དེའི་ཉན་ཐོས་ཀྱིས་བསྔགས་པ་ཡིན་གྱི། སྐྱོན་དང་ལྡན་པ་ནི་བསྔགས་པ་མ་ཡིན་ནོ་ཞེས་པའོ། །འདི་དག་ཇི་ལྟར་བསྔགས་པ་ཡིན་ཞེ་ན། བདེ་བའི་ལམ་ཡིན་པའི་ཕྱིར་ཏེ། དེ་ཉིད་སྨྲས་པ། ལམ་འདི་ཉིད་ཀྱིས་ལྷ་ཡུལ་འགྲོ་བར་གསུངས། །
ཞེས་བྱ་བ་འདི་ལྟར་རྣམ་པ་བཞིའི་ཁྱད་པར་གྱིས་ནི་མཐོ་རིས་སུ་འགྲོ་བའི་ཐབས་སུ་མཁས་པར་བསྟན་པ་ཡིན་ཏེ་ཅིའི་ཕྱིར་ཞེ་ན། དེ་ཉིད་སྨྲས་པ། འདི་ཡིས་ཞེས་བྱ་བ་ནི་དེ་བཞི་ལས་མ་འདས་ཏེ། མེ་དང་ཆུར་འཇུག་པ་དང་བྲལ་བའི་ལས་མཆོད་པ་སོགས་བསམ་པ་ཡིན་ནོ། །འགྲོ་བར་
འགྱུར་བ་ནི་འགྲོ་བར་བྱེད་པའོ། །ལྷའི་འཇིག་རྟེན་ནི་ལྷ་དང་སྐལ་བ་མཉམ་པའོ། །དེ་ལ་དད་པ་ནི་དགེ་བའི་བྱ་བ་ཐམས་ཅད་ཀྱི་སྔོན་དུ་འགྲོ་བའི་ཕྱིར་དང་པོར་སྟོན་ཏོ། །དང་པོ་ཡོད་པ་ལ་ནི་ངོ་ཚ་དང་ལྡན་པར་འགྱུར་རོ། །ངོ་ཚ་དང་ལྡན་པ་ལ་ནི་ཚུལ་ཁྲིམས་དག་པར་འགྱུར་རོ། །ཚུལ་ཁྲིམས་
དག་པ་ལ་ནི་སྦྱིན་པ་རྣམ་པར་དག་པར་འགྱུར་ཏེ། གོ་རིམས་དེ་ལྟ་བུར་འགྱུར་ཏེ། ངོ་ཚ་དང་དད་པ་གཉིས་ཀྱིས་ནི་བསམ་པ་ཕུན་སུམ་ཚོགས་པའོ། །ཚུལ་ཁྲིམས་དང་སྦྱིན་པ་གཉིས་ཀྱིས་ནི་སྤྱོད་པ་ཕུན་སུམ་ཚོགས་པའོ། །ལྷག་མས་ནི་དེའི་ཕན་ཡོན་བསྟན་པ་སྟེ། དེ་ཡང་དག་
པར་འཛིན་དུ་གཞུག་པའི་ཕྱིར་འདི་གསུངས་སོ། །འདིར་སྦྱིན་པ་ནི་ཐམས་ཅད་ཀྱི་མཐར་བཀོད་ཅིང་ཆེས་དམན་པ་ཡིན་པའི་ཕྱིར་ཇི་ལྟར་མཐོ་རིས་ཀྱི་ལམ་ཡིན་ཞེ་ན། འཇུངས་རྣམས་ལྷ་ཡི་འཇིག་རྟེན་མི་འགྲོ་ཞིང་། །ཞེས་བྱ་བ་ལ་སོགས་པ་སྨོས་སོ། །སུམ་ཅུ་རྩ་གསུམ་གྱི་གནས་
སྟོང་ཤིང་ཤི་རི་ཀ་ལས་བྱས་པའི་གཞལ་མེད་ཁང་ན་ལྷའི་བུ་ཞིག་གནས་པ། གནས་བརྟན་པ་བ་ལང་བདག་གིས་མཐོང་ནས་གྲོགས་པོ་ཁྱོད་འདི་ནས་སྔོན་ཡུན་རིང་པོར་ཡང་གནས་པ་མཐོང་ཞེས་སྨྲས་པ་དང་དེ་ཅི་འདི་མ་གསན་ཏམ། འཐོན་པར་འབྱུང་ཡང་སྲིད་ཅེས་བྱ་བ་རྒྱལ་རིགས་སུ་
འགྱུར་བ་དེ་ནི་བདག་ཡིན་ཏེ། དེར་ཆད་པར་སྨྲ་བར་འགྱུར་ན། བདག་བཙུན་པ་འཕགས་པ་གཞོན་ནུར་འོད་སྲུངས་ཀྱིས་བཏུལ་བའི་སྐྱེ་བ་ལ་སོགས་པ་ཞེས་སྨྲས་པ་བཅོམ་ལྡན་འདས་ཀྱི་ལྷའི་རྣ་བའི་མངོན་ཤེས་ཀྱིས་གསན་ཏེ། ཅི་ཙམ་ན་ཚིགས་སུ་བཅད་པ་འདི་གསུངས་སོ། །

འཇུངས་རྣམས་ལྷ་ཡི་འཇིག་རྟེན་མི་འགྲོ་ཞིང་། །ཞེས་བྱ་བ་སེར་སྣ་ཅན་ཉིད་ནི་མཐོ་རིས་ཀྱི་འཇིག་རྟེན་དུ་འགྲོ་བའི་ལས་མེད་པ་ཉིད་དོ། །ཅིའི་ཕྱིར་ཞེ་ན། དེ་ཡིས་བྱིས་པ་ཞེས་བྱ་བ་ཡིན་ཏེ་གང་གི་ཕྱིར་གང་དག་འཇུངས་ཤིང་རྨོངས་པ་སྟེ། ལས་དང་འབྲས་བུ་འབྲེལ་བ་ཅི་ལྟ་བ་བཞིན་དུ་
མ་རྟོགས་པའི་ཕྱིར་རོ། །དེས་ན་སྨྲས་པ། སྦྱིན་པའི་བསྔགས་མི་བརྗོད་ཅེས་བྱ་བ་སྨོས་སོ། །སྦྱིན་པའི་བསྔགས་པ་མི་བརྗོད་པར་མ་ཟད་དེ་རྨོངས་པ་རྣམས་ནི་སྨོད་པ་ཡང་ཡིན་པ་ཇི་སྐད་དུ། འཁོར་གསུམ་རྒྱུ་ཡི་ཁྱད་པར་ནོར་ཡིན་པས། །དེ་ཉམས་ཆེས་ན་གང་གིས་མ་ཉམས་
འགྱུར། །ཞེས་འཆད་དོ། །བརྟན་རྣམས་ཞེས་བྱ་བ་ནི་གང་ཡང་མཁས་པ་རྣམས་ཏེ། དེ་ནི་སྦྱིན་ལ་རྗེས་སུ་ཡི་རང་བ། །ཞེས་ནོར་གཏོང་བའི་ཕན་ཡོན་ཡང་དག་པར་བསྔགས་པར་བྱེད་པའོ། །གང་གི་ཕྱིར་སྦྱིན་པའི་སྔ་རོལ་དུ་ནི་ཡིད་བདེ་བ་ཡིན་ལ། སྦྱིན་པ་སྦྱིན་པའི་ཚེ་ན་སེམས་དང་བ་ཡིན་
ཞིང་། བྱིན་ནས་ཀྱང་ཡིད་མགུ་བ་ཡིན་ཏེ་འགྱོད་པ་མེད་པ་ཡིན་ནོ་ཞེས་པའི་ཚིག་གིས་སོ། །དེས་ནི་ཞེས་བྱ་བ་ནི་སྦྱིན་པ་ལ་རྗེས་སུ་ཡི་རང་བའི་རྒྱུས་སོ། །དེ་དག་ཅེས་བྱ་བ་ནི་རྗེས་སུ་ཡི་རང་བར་བྱེད་པ་ཡང་བདེ་བ་མྱོང་བར་འགྱུར་བ་ཡིན་ཏེ། གང་གི་ཕྱིར་པ་ཡ་སི་ཞེས་བྱ་བས་སྦྱིན་
གཏོང་གི་ཁང་པ་བྱས་ནས་ནོར་ལ་སོགས་པ་དང་ལྡན་པར་བྱས་ཏེ། དེར་སྦྱིན་པ་བྱེད་པ་ཡང་གཞག་པས་བདག་ཉིད་ཀྱིས་ནི་མ་བྱིན་མོད་ཀྱི། དེ་མཐོ་རིས་སུ་སྐྱེས་ཏེ་བརྟན་པ་རྣམས་བདེ་འགྲོར་སྐྱེས་ནས། ལྷའི་ལོངས་སྤྱོད་ཅི་འདོད་པ་ཐོབ་ཅིང་བདེ་བ་ཉམས་སུ་མྱོང་ངོ་། །གཞན་དུ་ཞེས་བྱ་བ་
ནི་འཇིག་རྟེན་གཞན་ནོ། །དེས་ནི་དེ་དག་གཞན་དུ་བདེ་བ་འཐོབ། །ཅེས་གཞན་དག་ཏུ་བརྗོད་དོ། །འོ་ན་ཚིགས་སུ་བཅད་པ་འདིར་དད་པའི་སྒྲ་མེད་པའི་ཕྱིར་འདི་ནི་མི་རིགས་སོ་ཞེ་ན། དེའི་དོན་དང་འབྲེལ་པའི་ཕྱིར་ཉེས་པ་མེད་དེ། དེའི་ཕྱིར་མ་དད་པའི་རྟགས་ནི་འཇུངས་པའི་རྟགས་
ཀྱིས་ཏེ། དུ་བའི་རྟགས་ཀྱིས་མེ་ཤེས་པ་ལྟ་བུའོ། །སྦྱིན་པ་ལ་རྗེས་སུ་ཡི་རང་བའི་ཕྱིར་ན་དད་པ་ཉིད་དོ། །དེ་བཞིན་དུ་གཞན་དག་ལ་ཡང་ཅི་རིགས་པར་དྲིས་པའི་ལན་འདི་བརྗོད་པར་བྱའོ། །གང་གི་ཕྱིར་ཡང་དད་པའི་དབང་གིས་བརྟན་པ་རྣམས་སྦྱིན་པས་སེམས་ཡང་དག་པར་ཚིམ་

ཞིང་རྒྱས་པར་གྱུར་ལ། ཕ་རོལ་ཏུ་བདེ་བར་གྱུར་པའི་ཕྱིར་སྨྲས་པ། འདི་ན་སྐྱེས་བུའི་ནོར་མཆོག་དད་པ་སྟེ། །ཞེས་བྱ་བ་ལ་སོགས་པའོ། །ལྷ་ཞིག་གིས། འདི་ན་སྐྱེས་བུའི་ནོར་མཆོག་གང་ཞིག་ལགས། །ལེགས་སྤྱོད་གང་གིས་བདེ་བ་ཐོབ་པར་འགྱུར། །རོ་ཡི་
ནང་ན་རོ་ཡི་མཆོག་ནི་གང་། །ཚོང་པའི་ནང་ན་ཚོང་མཆོག་གང་ལགས་གསུངས། །ཞེས་གསོལ་པ་དང་། དེའི་ཕྱིར་འདི་གསུངས་སོ། །དད་པའི་དོན་ནི་སྔར་བཤད་ཟིན་ཏོ། །འདི་ན་སྐྱེས་བུའི་ནོར་མཆོག་ཅེས་བྱ་བ་ལ། འདིས་བདེ་བ་མྱོང་བས་ན་ནོར་རོ། །སེམས་ཅན་རྣམས་ཀྱི་ནོར་གྱི་
མཆོག་ནི་འཇིག་རྟེན་ན་བློ་དང་ལྡན་པའི་ནོར་ཏེ། ཇི་སྐད་དུ། ནོར་འདི་དག་ནི་ཅུང་ཟད་ཙམ་ཡིན་ཏེ། དཔེར་ན་དབྱིག་ལ་སོགས་པའི་ནོར་རྣམས་ཀྱི་ནང་ན་ནི་འདི་ལྟ་སྟེ། དད་པའི་ནོར་མཆོག་ཡིན་ནོ་ཞེས་བཤད་པ་དང་། ཕྱི་རོལ་གྱི་ནོར་མཆོག་རྣམས་ནི་གདུང་བར་བྱེད་པའི་ཕྱིར་མཆོག་མ་ཡིན་ཏེ།
ཇི་སྐད་དུ། སྩོགས་པས་ཉོན་མོངས་མི་དགའ་ལ། །གང་ཚེ་སྲུང་ལས་འཇིགས་པ་བྱུང་། །འཇིགས་ན་མྱ་ངན་འབའ་ཞིག་སྟེ། །འདི་ལ་སུ་ཞིག་དགའ་བར་བྱེད། །ཅེས་གསུངས་པའི་ཕྱིར་རོ། །ཆོས་ནི་སྦྱིན་པའི་བདག་ཉིད་ཀྱི་ལེགས་པར་སྤྱོད་པ་སྟེ། ཚུལ་ཁྲིམས་ཀྱི་བདག་ཉིད་ལ་
སོགས་པ་ནི་འོག་ནས་བརྗོད་པའི་ཕྱིར་རོ། །ལེགས་སྤྱོད་ཅེས་བྱ་བ་ནི་ཚུལ་བཞིན་དུ་སྤྱོད་པ་སྟེ། ཇི་སྐད་དུ་སྐྱེས་བུ་དམ་པའི་སྦྱིན་པ་ལྔའི་ཞེས་བྱ་བ་ལ་སོགས་པ་གསུངས་སོ། །བདེ་བ་འཐོབ་ཅེས་བྱ་བ་ནི་ཕན་འདོགས་པར་བྱེད་པ་སྟེ། འཁོར་བར་ཡོངས་སུ་འཁྱམས་པ་ན། །སྦྱིན་པ་མ་
གཏོགས་གཉེན་མེད་དོ། །ཞེས་བྱ་བས་ཤེས་པར་བྱའོ། །བདེན་པ་ཁོ་ན་རོ་བྲོ་རྣམས་ཀྱི་ཕུལ་ཞེས་བྱ་བ་ནི་བདེན་པ་མཆོག་ཏུ་གཟུང་བ་ནི་ཚུལ་ཁྲིམས་ཡིན་ཏེ་འདིས་ནི་ཚུལ་ཁྲིམས་བསྟན་ཏོ། །བདེན་པའི་ཚིག་ཉིད་ནི་མངོན་པར་འདོད་པར་བྱ་བ་ཡིན་པས་ལྷ་དང་མི་རྣམས་ཀྱི་ཟས་གྱ་ནོམ་པ་
ཐམས་ཅད་པས་ཀྱང་ཤིན་ཏུ་བསོད་པ་ཡིན་ཏེ། ལྷ་དང་མི་རྣམས་མགུ་བར་བྱེད་པའི་ཕྱིར་རོ། །ཁོ་ན་ནི་ངེས་པར་གཟུང་བ་ཡིན་ནོ། །ཤེས་རབ་ཀྱིས་འཚོ་བ་ཞེས་བྱ་བ་ལ། ཤེས་རབ་ནི་དེ་བཞིན་ཉིད་ཤེས་པ་སྟེ། དེས་འཚོ་བ་ནི་འཚོ་བ་བཞིན་དུ་གང་ལ་ཡོད་པ་དེའོ། །ཡང་ན་ཤེས་རབ་ཀྱིས་

འཚོ་བའི་ཚུལ་འདི་ལ་ཡོད་པ་སྟེ། བརྟགས་ནས་བྱེད་པ་ཞེས་བྱ་བའི་དོན་ཏེ། འདིས་ནི་བསྒོམས་པ་ལས་བྱུང་བའི་བསོད་ནམས་བསྟན་ཏོ། །འཚོ་བའི་ཞེས་བྱ་བ་ལ། འཚོ་བར་བྱེད་པ་དེ་རྣམས་ཀྱི་ནང་ནས་ངེས་པར་གཟུང་བ་སྟེ་དྲུག་པའོ། །མཆོག་ཏུ་ཅེས་གསུངས་ཞེས་བྱ་བ་ནི་དམ་པ་
ཞེས་འདི་ཉིད་ཀྱི་ནང་དུ་འོག་ནས་འཆད་པར་འགྱུར་ཏེ། སྩོགས་དང་ཟད་པ་མ་མཐོང་བ། །ལོ་བརྒྱར་གསོན་པ་གང་ཡིན་པས། །ཞེས་བྱ་བ་དག་ཡིན་ནོ། །དེ་ལ་འདིས་ནི་དད་པ་སྔོན་དུ་འགྲོ་བའི་སྦྱིན་པ་དང་། ཚུལ་ཁྲིམས་དང་བསྒོམས་པ་ལས་བྱུང་བའི་བསོད་ནམས་བྱ་བའི་དངོས་པོ་བསྟན་
ཏོ། །དད་པ་ནི་སྦྱིན་པ་ལ་སོགས་པ་དེ་དག་འབའ་ཞིག་གི་སྔོན་དུ་འགྲོ་བ་མ་ཡིན་གྱི། ཤེས་རབ་ཀྱི་དབང་པོ་ལ་སོགས་པའི་ཡོན་ཏན་གྱི་ཡང་སྔོན་དུ་འགྲོ་བ་ཉིད་དུ་བསྟན་པའི་ཕྱིར། མྱ་ངན་འདས་པར་འགྲོ་བ་ཡི། །ཞེས་བྱ་བ་ལ་སོགས་པ་སྨོས་སོ། །ལྷ་ཞིག་གིས་ཞུས་པ། འཇིག་རྟེན་སྐྱེས་
བུ་ཇི་ལྟ་བུས། །ངེས་པར་བྱེད་པའི་ཤེས་རབ་དག །འཐོབ་འགྱུར་ཡང་དག་ལྟ་བ་ནི། །བཅོམ་ལྡན་འདས་ཀྱིས་བདག་ལ་གསུངས། །ཞེས་པ་དང་། དེས་ན་འདི་གསུངས་པ་ཡིན་ནོ། །དད་པ་བསྐྱེད་དེ་ཞེས་བྱ་བ་ནི་ཡིད་ཆེས་པར་བྱ་བ་སྟེ། གང་འདི་ལ་རིགས་པ་དང་ལུང་དག་གིས་ཡིད་ཆེས་པར་
བྱའོ། །ཅི་ཞིག་ལ་དད་པ་བསྐྱེད་པ་ཡིན་ཞེ་ན། དགྲ་བཅོམ་ཆོས་ལ་ཞེས་བྱ་བ་སྟེ། སངས་རྒྱས་ཀྱིས་བསྟན་པའི་ལམ་མོ། །མྱ་ངན་ལས་འདས་འགྲོ་བ་ཡི། །ཞེས་བྱ་བ་ནི་ཐར་པ་ཐོབ་པར་བྱེད་པ་སྟེ། དེའི་ཕྱིར་བསྟན་པ་དང་སྒྲུབ་པའི་ཆོས་ལ་བརྟེན་པས་འབྲས་བུའི་ཆོས་འཐོབ་པའོ། །དེ་ལ་
དད་པ་བསྐྱེད་དེ་དེའི་དོན་ལ་མངོན་པར་རྩོམ་པ་ཡོད་པར་གྱུར་ན་ནི་ངེས་པར་འཐོབ་པ་ཡིན་ནོ། །འོ་ན་ཡེ་ཤེས་ཉིད་ཐར་པའི་ལམ་ལ་སོགས་པ་ཐོབ་པར་བྱེད་པ་ཡིན་ན། དེ་ཇི་ལྟར་འདིར་བརྗོད་ཅེ་ན། འདིར་སྨྲས་པ་དད་པ་ཡང་ཡེ་ཤེས་ཀྱི་རྒྱུ་ཡིན་པའི་ཕྱིར་ཏེ། གང་འདི་ལྟར་དད་ནོར་ཡོད་པ་དེས་ནི་ཤེས་
རབ་འཐོབ་པར་འགྱུར་ཏེ། གུས་པར་བྱས་ཏེ་དམ་པའི་ཆོས་མཉན་པ་ནི་དད་པས་མངོན་པར་འདོད་པའོ། །གུས་པར་ཉན་པ་ནི་ཉན་པར་འདོད་པ་སྟེ། གང་གི་ཕྱིར་དད་པ་ཡང་ཉན་པར་འདོད་པ་ཉིད་སྐྱེད་པ་ཡིན་ནོ། །ཤེས་རབ་དེ་ག་ལས་འཐོབ་ཅེ་ན། སྨྲས་པ། དེ་དང་དེ་ཡི་ཞེས་བྱ་བ་ཡིན་ཏེ།

བདེན་པ་དང་ཕུང་པོ་དང་ཁམས་དང་སྐྱེ་མཆེད་ལ་སོགས་པ་ལ་ངེས་པར་ཐོབ་པར་འགྱུར་བའོ། །མཁས་པས་ཞེས་བྱ་བ་ནི་རྟོགས་པ་སྟེ། རིགས་པས་ཐོབ་པའི་ཡེ་ཤེས་ཀྱི་སྦྱོར་བ་ལས་སོ། །དེ་ལ་བརྟེན་ནས་ནི་ཐོས་པ་ལས་བྱུང་བ་ལ་སོགས་པའི་ཤེས་པ་འབྱུང་བའི་
ཕྱིར་རོ། །དད་པའི་སྟོབས་ཀྱིས་ནི་ཤེས་རབ་ལ་སོགས་པ་ཐོབ་པ་གཅིག་པུར་མ་ཟད་ཀྱི་ཉེས་པ་རྣམས་ཀྱང་སྤོང་བ་ཡིན་པར་བསྟན་པའི་ཕྱིར་སྨྲས་པ། བག་ཅན་གྱིས་ནི་རྒྱ་མཚོ་དང་། །ཞེས་བྱ་བ་ལ་སོགས་པའོ། །ལྷ་ཞིག་གིས་གསོལ་པ། རང་གི་ཆུ་བོ་གང་གིས་རྒལ། །གང་གིས་
རྒྱ་མཚོ་རྒལ་བར་འགྱུར། །བདག་གི་སྡུག་བསྔལ་གང་གིས་སྤོང་། །གང་གིས་ཡོངས་སུ་དག་པར་འགྱུར། །ཞེས་པ་དང་འདི་གསུངས་སོ། །དད་པ་རྒྱུར་འགྱུར་བས་སྒྲོལ་བ་ནི་འདས་པའོ། །ཆུ་བོ་ནི་རྣམ་པ་བཞི་སྟེ། ཉོན་མོངས་པའི་རང་བཞིན་ནོ། །དད་པའི་གཟིངས་ལ་བརྟེན་ནས་ཆུ་
བོ་ཐམས་ཅད་ལས་བརྒལ་བའི་ཕྱིར་རོ། །པས་ཞེས་བྱ་བ་ནི་དེ་ཉིད་ཀྱི་དོན་ཏེ། དད་པ་ཉིད་ཀྱིས་འཕགས་པའི་ལམ་གྱི་ཉོན་མོངས་པ་ཐམས་ཅད་སྤོང་བའི་ཕྱིར་ཏེ། འདིར་དད་པ་ནི་འཕགས་པའི་ལམ་མོ། །བག་ཡོད་པའི་སྟོབས་ཀྱིས་ངན་སོང་གསུམ་གྱི་རྒྱ་མཚོ་ལས་བརྒལ་བ་ཡིན་ཏེ།
འདིར་བག་ཡོད་པ་ནི་མཐོང་བའི་ལམ་མོ། །བརྩོན་འགྲུས་ཀྱིས་ནི་སྡུག་བསྔལ་སྤོང་། །ཞེས་བྱ་བ་བརྩོན་འགྲུས་ཀྱི་སྦྱོར་བ་རྟུལ་ཕོད་པ་སྟེ། བསྒོམ་པའི་ལམ་གྱིས་ཁམས་གསུམ་གྱི་སྡུག་བསྔལ་སྤོང་བ་ཡིན་ནོ། །ཤེས་རབ་ཀྱིས་ནི་ཡོངས་དག་འགྱུར། །ཞེས་བྱ་བ་ནི་མི་སློབ་པའི་ལམ་
བསྟན་ཏེ། དེ་ཡོད་ན་ནི་རྒྱུད་ལ་དྲི་མ་མེད་པར་འགྱུར་བས་སོ། །ཡང་ན་དད་པས་ནི་ཁྱིམ་གྱི་གནས་ཀྱི་ཆུ་བོ་ལས་བརྒལ་བ་ཡིན་ཏེ། རབ་ཏུ་འབྱུང་བ་ལ་བརྟེན་པའི་ཕྱིར་རོ། །བག་ཡོད་པས་ནི་འདོད་པའི་རྣམ་པར་རྟོག་པ་ལ་སོགས་པའི་རྒྱ་མཚོ་ལས་བརྒལ་བའི་ཕྱིར་རོ། །བརྩོན་འགྲུས་ཀྱིས་སྡུག་
བསྔལ་སྤོང་བ་ནི་འདོད་པའི་ཁམས་ཀྱི་སྡུག་བསྔལ་དང་བཅས་པ་འཆད་པའི་ཕྱིར་རོ། །ཤེས་རབ་ཀྱིས་ནི་ཡོངས་དག་འགྱུར། །ཞེས་བྱ་བ་ནི་ས་གོང་མ་དག་ལས་འདོད་ཆགས་དང་བྲལ་བའི་ཕྱིར་རོ། །དད་པས་ཞེས་བྱ་བ་ནི་ཉན་ཐོས་དང་རང་སངས་རྒྱས་དང་སངས་རྒྱས་ཀྱི་བྱང་ཆུབ་གསུམ་གྱི་

སྤྱིར་བསྟན་ཏོ་ཞེས་གཞན་དག་ཟེར་རོ། །བག་ཡོད་པའི་སྒྲས་ནི་འདིར་འཕགས་པའི་ལམ་གདུལ་བྱ་རྣམས་ལ་མཚོན་ཅིང་བསྟན་པ་ཡིན་ཏེ། དེའི་ཕྱིར་བག་ཡོད་པ་དང་། མ་དད་པ་དང་། ལེ་ལོ་དང་རྨོངས་པས་མ་རུངས་པར་བྱས་པའི་གདུལ་བྱ་མཐའ་དག་ལ་དད་པ་ལ་སོགས་པའི་མན་
ངག་གི་གཉེན་པོ་བསྟན་པ་ཡིན་ནོ། །དད་པ་ལ་བརྟེན་པས་ནི་འཆིང་བ་ཐམས་ཅད་གཅོད་པ་ཡིན་ནོ་ཞེས་བསྟན་པའི་ཕྱིར་སྨྲས་པ། དགེ་སློང་དད་པའི་ཞེས་བྱ་བ་ལ་སོགས་པའོ། །ལྷ་ཞིག་གིས་གསོལ་པ། འདི་ལྟར་གྲོགས་ནི་གང་ཞིག་ལགས། །གདམས་པ་ཡང་ནི་གང་ཞིག་གང་། །
དགེ་སློང་གང་ལ་དགའ་བ་ཡིས། །བཅིངས་པ་ཐམས་ཅད་གཅོད་པར་འགྱུར། །ཞེས་པ་དང་། འདི་གསུངས་སོ། །དད་པའི་གྲོགས་ནི་གཉིས་པ་གང་ལ་ཡོད་པའོ། །དད་པ་ལ་བརྟན་ནས་སོ་སོར་ཐར་པའི་སྡོམ་པ་ལ་སོགས་པའི་ཁྱད་པར་ཐོབ་པར་འགྱུར་ཏེ་དེ་མེད་ན་ནི་དེ་མེད་པའི་ཕྱིར་རོ། །
ཤེས་རབ་ཀྱིས་ནི་གཏམས་པ་དང་། །ཞེས་བྱ་བ་ནི་ཤེས་པའི་རང་བཞིན་གྱི་བློས་དགེ་སློང་འདི་ལ་ཇི་ལྟ་བ་བཞིན་དུ་གཏམས་པ་དང་། སྟོན་པ་སྟེ་འདིས་ནི་རྟག་པ་ཉིད་དུ་བསྟན་ཏོ། །མྱ་ངན་འདས་ལ་མངོན་དགའ་བས། །ཞེས་བྱ་བ་ནི་ཐར་པ་ཉིད་ལ་ཡང་དག་པར་དགའ་བ་སྐྱེས་པར་གྱུར་པའོ། །
འཁོར་བ་ལ་རྒྱབ་ཀྱིས་ཕྱོགས་པར་བྱས་པ་དང་། མྱ་ངན་ལས་འདས་པ་ལ་མཁས་པར་འགྱུར་ཏེ། དེས་ན་དེ་ཐོབ་པར་བྱེད་པའི་ལམ་ལ་གོམས་པར་བྱེད་པའི་དགེ་སློང་གིས་འཆིང་བ་ཐམས་ཅད་དེ་ཉོན་མོངས་པའི་ཞགས་པ་ཐམས་ཅད་གཅོད་པར་བྱེད་དོ། །དེ་ལ་དད་པ་དང་ཤེས་རབ་ཀྱིས་ནི་
སྦྱོར་བ་ཕུན་སུམ་ཚོགས་པ་བསྟན་ཏོ། །མྱ་ངན་འདས་ལ་མངོན་དགའ་བས། །ཞེས་བྱ་བས་ནི་བསམ་པ་ཕུན་སུམ་ཚོགས་པ་བསྟན་ཏོ། །ལྷག་མས་ནི་དེའི་ཕན་ཡོན་བསྟན་ཏོ། །དད་པ་ལ་སོགས་པ་དང་ལྡན་པས་ནི་ལེགས་པ་ཞེས་བརྗོད་པ་འཐོབ་པར་འགྱུར་ཏེ། གང་གིས་དད་དང་ཞེས་བྱ་
བ་ལ་སོགས་པ་སྨོས་སོ། །བཅོམ་ལྡན་འདས་ཀྱིས་དགེ་སློང་ནི་ལེགས་པའི་ངང་ཚུལ་ཅན་ལ་བརྗོད་དེ། ཇི་ཙམ་གྱིས་ལེགས་པའི་ངང་ཚུལ་ཅན་དུ་བརྗོད་ཅེ་ན་ཞེས་བྱ་བ་ནས་འདི་གསུངས་པ་ཡིན་ནོ། །གང་གིས་ཞེས་བྱ་བ་ནི་སེམས་ཅན་གང་ལ་ལ་ཞིག་གིས་སོ། །དད་དང་ཞེས་བྱ་བ་ནི་སྔ་མ་བཞིན་

ནོ། །འདི་དག་ནི་རེ་རེ་དང་མཐའ་དག་ལ་ལེགས་པ་ཞེས་བརྗོད་པའི་རྒྱུ་བསྟན་པའི་ཕྱིར། དང་གི་སྒྲ་གསུམ་སྨོས་སོ། །ཉིད་ཅེས་བྱ་བ་ནི་ངེས་པར་གཟུང་བ་སྟེ། རིམ་པ་གཞན་དུ་སྦྱར་བའི་ཕྱིར་དེ་ཉིད་ལེགས་པའི་ངང་ཚུལ་ཅན་ཞེས་བརྗོད་དོ། །ལེགས་བསྒོམས་ཤིང་
ཞེས་བྱ་བ་ནི་ལེགས་པར་བསྟེན་པའི་ཕྱིར་བསྟན་པར་འགྱུར་ཏེ། ཉོན་མོངས་པ་ཐམས་ཅད་སྤང་བའི་ཕྱིར་སྐྱོན་རྣམས་སྤངས་པ་ཡིན་ཏེ། སྤངས་པ་ནི་བསལ་བ་སྟེ། གང་གིས་བག་ལ་ཉལ་སྤངས་པའོ། །མཁས་པ་ཞེས་བྱ་བ་ནི་འདིར་མཉམ་པར་གཞག་པ་ལ་དགོངས་ཏེ། མཉམ་པར་གཞག་
པའི་སེམས་ལས་ནི་ཡང་དག་པ་ཇི་ལྟ་བ་བཞིན་དུ་ཤེས་པ་ཡིན་ནོ་ཞེས་པའི་ཚིག་གིས་ཏེ་རྒྱུ་ལས་འབྲས་བུ་བཏགས་པའོ། །དེས་ན་ཡང་དད་པ་འཇུག་པ་ཡིན་ཏེ། ཚུལ་ཁྲིམས་དང་ཏིང་ངེ་འཛིན་དང་། ཤེས་རབ་ཀྱི་ཕུང་པོ་ནི་དེ་ལ་རག་ལས་པ་ཡིན་ཏེ། ཉོན་མོངས་པ་སྤངས་པ་གང་ལ་ཡོད་པ་
དེའོ། །ལེགས་པའི་ངང་ཚུལ་ཅན་ཞེས་བྱ་བ་ལ། ལེགས་པའི་ངང་ཚུལ་དང་ངོ་བོ་གང་ལ་ཡོད་པ་སྟེ་སྐྱེ་བོ་དམ་པའི་རང་བཞིན་སྐྱེ་བོ་དམ་པས་བསྔགས་པའོ། །བརྗོད་པ་ནི་བཤད་པའོ། །དད་པ་དང་ལྡན་པ་ནི་ཐམས་ཅད་དུ་ཡང་མཆོད་པ་ཡིན་ནོ་ཞེས་བསྟན་པའི་ཕྱིར་སྨྲས་པ། དད་དང་ཚུལ་
ཁྲིམས་ཞེས་བྱ་བ་ལ་སོགས་པའོ། །ཚེ་དང་ལྡན་པ་ཤཱ་རིའི་བུ་དང་མཽད་གལ་གྱི་བུ་འཁོར་དང་བཅས་པ་གང་དང་གང་དུ་འགྲོ་བ་དེ་དང་དེར་རྒྱལ་པོ་དང་རྒྱལ་པོའི་བློན་པོ་རྣམས་ཀྱིས་བསྙེན་བཀུར་བྱས་ཏེ། སྐབས་འདི་ལྟ་བུ་གསན་ནས་འདི་གསུངས་སོ། །དད་པ་གང་ལ་ཡོད་པ་དེ་ནི་དད་པའོ། །
དད་པ་དང་ལྡན་པ་ཁོ་ནས་ཚུལ་ཁྲིམས་དང་ལྡན་པར་འགྱུར་བའི་ཕྱིར་ཚུལ་ཁྲིམས་ཕུན་སུམ་ཚོགས་ཞེས་སྨོས་ཏེ། སོ་སོར་ཐར་པའི་སྡོམ་པ་དང་ཕྲད་པའོ། །ཚུལ་ཁྲིམས་དང་ལྡན་པ་ལས་ནི་གཏོང་བ་ཕུན་སུམ་ཚོགས་པར་འགྱུར་བའི་ཕྱིར་སྨྲས་པ། གཏོང་ལྡན་ཞེས་བྱ་བ་སྟེ། ཡོངས་སུ་གཟུང་
བ་ཐམས་ཅད་ཡོངས་སུ་བཏང་བའི་ཕྱིར་དང་། རྨོངས་པས་ཡོ་བྱད་གཞན་ཡོངས་སུ་མི་འཛིན་པའོ། །གཏོང་བ་དང་ལྡན་པའི་ཕན་ཡོན་སྨྲས་པ། འཇུངས་པ་རྣམ་སྤངས་པ་ཞེས་བྱ་བ་ཡིན་ཏེ། སེར་སྣ་དང་བྲལ་བའོ། །ཇི་སྐད་དུ་སྦྱིན་པ་སེམས་ཀྱི་སེར་སྣ་དང་ནི་ཆགས་པའི་སྐྱོན་གྱི་རྡུལ་

རྣམས་འཁྲུ་བར་བྱེད་ཅེས་བཤད་པ་ཡིན་ཏེ། དེ་ཉིད་ཀྱིས་བདག་ཉིད་རྣམ་པར་དག་པས་ཡུལ་གང་དང་གང་དུ་འགྲོ་བ་དེ་དང་དེར་ཁྱད་པར་ཤེས་པའི་ལྷ་དང་མི་རྣམས་ཀྱིས་མཆོད་པར་འགྱུར་རོ། །དད་པ་དང་ཚུལ་ཁྲིམས་ཕུན་སུམ་ཚོགས་པ་གཉིས་ཀྱིས་ནི་ལུས་དང་ངག་དག་པས་བདག་གི་དོན་
ཕུན་སུམ་ཚོགས་པའོ། །གཏོང་བ་དང་སེར་སྣ་སྤངས་པ་གཉིས་ཀྱིས་ནི་གཞན་གྱི་དོན་ཕུན་སུམ་ཚོགས་པ་བསྟན་ཏོ། །དད་པ་དང་ཤེས་རབ་ཀྱི་ནོར་ནི་ནོར་གྱི་མཆོག་ཡིན་ནོ་ཞེས་བསྟན་པའི་ཕྱིར་སྨྲས་པ། མཁས་གང་འཚོ་བའི་འཇིག་རྟེན་ན། །ཞེས་བྱ་བ་ལ་སོགས་པའོ། །གཏེར་ལ་
ཆགས་པའི་ཚོང་དཔོན་ཞིག་གིས་ནོར་གྱི་མཆོག་ཇི་སྙེད་པ་དེ་གཏེར་དུ་སྦས་པ་ལས་འདི་སྙམ་དུ་བསམས་ཏེ། གང་བདག་གིས་གཏེར་ཐམས་ཅད་ཕྱུང་ལ་རིན་པོ་ཆེའི་མཆོག་གང་ཡིན་པ་བཙོང་བར་བྱ་ན། བདག་གིས་ནི་མི་ཤེས་ཏེ། གང་དུ་བཅོམ་ལྡན་འདས་བཞུགས་པ་དེར་བདག་སོང་སྟེ་ཞུའོ་
སྙམ་པ་ནས་ཇི་སྲིད་དུ་འདི་གསུངས་སོ། །གང་ནི་གང་ལ་ལའོ། །འཚོ་བའི་འཇིག་རྟེན་ནི་འགྲོ་བའམ། སེམས་ཅན་གྱི་འཇིག་རྟེན་ནའོ། །རྟེན་བྱེད་པ་ཞེས་བྱ་བ་ནི་ཐོབ་པར་བྱེད་པའོ། །དད་དང་ཤེས་རབ་ཅེས་བྱ་བ་ལ། ཁྱད་པར་དུ་འཕགས་པའི་ཤེས་རབ་ནི་འདིར་ཤེས་རབ་བོ། །གང་ཞིག་རྟེན་
པར་བྱེད་ཅེ་ན། །སྨྲས་པ། མཁས་པ་ཞེས་བྱ་བ་སྟེ། མཁས་པ་མ་ཡིན་པ་ནི་དེ་གཉིས་མི་སྒྲུབ་ཅིང་དེ་ལ་བརྩོན་པར་མི་བྱེད་དེ། རིགས་པའི་ཤེས་པའི་སྦྱོར་བ་བསྟན་པ་ཡིན་ནོ། །དེ་དག་དེ་ཡི་ནོར་མཆོག་སྟེ། །ཞེས་བྱ་བ་ནི་གང་གི་ཕྱིར་མཁས་པ་དེའི་ནོར་ནི་འདི་ཉིད་མཆོག་ཏུ་འདོད་པ་ཡིན་ཏེ།
ཕུན་སུམ་ཚོགས་པ་ཐམས་ཅད་ཀྱི་རྒྱུར་གྱུར་པའི་ཕྱིར་རོ། །དེ་ཡི་ནོར་གཞན་ཕལ་བར་ཟད། །ཅེས་བྱ་བ་ནི་ཡོངས་སུ་རྟོགས་པར་བྱེད་པ་དེའི་སྟེ། སྐྱེ་བོ་ཐ་མལ་པས་མངོན་པར་བཀུར་བའི་གསེར་ལ་སོགས་པའི་རིན་པོ་ཆེའི་ནོར་དག་ནི་མངོན་པར་མི་བསྔགས་ཏེ། གདུང་བ་ཐམས་ཅད་ཀྱི་རྒྱུར་
གྱུར་པའི་ཕྱིར་རོ། །ཕལ་པར་ཟད་ཅེས་བྱ་བ་ནི་ངེས་པར་དོར་དགོས་པ་ཡིན་པའི་ཕྱིར་དང་ངན་སོང་གི་འབྲས་བུར་གྱུར་པའི་ཕྱིར་རོ། །གང་ཚོང་དཔོན་ལ་བསྟན་པའི་ཆེད་དུ་འདི་གསུངས་པ་སྟེ། དེ་ནི་དད་པ་མེད་པ་དང་ཤེས་རབ་འཆལ་པ་ཡིན་པས་དེས་ན་གཉི་ག་འདིར་བསྟན་ཏོ། །མེའི་རྟགས་དུ་བ་

ལས་ཤེས་པར་བྱེད་པ་བཞིན་དུ་དད་པ་མི་མངོན་པའི་རྟགས་བསྟན་པའི་ཕྱིར་སྨྲས་པ། འཕགས་པ་ལྟ་བར་འདོད་པ་དང་། །ཞེས་བྱ་བ་ལ་སོགས་པའོ། །དགེ་སློང་དག་དད་པ་གང་གི་དད་པའི་རྟགས་ནི་གསུམ་པོ་འདི་དག་གོ་ཞེས་རྒྱ་ཆེར་ཏེ་འདི་གསུངས་སོ། །
འཕགས་པ་ནི་སྡིག་པ་ལས་རིང་དུ་སོང་བའི་ཕྱིར་རོ། །ཡོན་ཏན་དང་ལྡན་པ་ལ་ལྟ་བར་འདོད་ཅིང་བརྩོན་པ་ནི་ལྟ་བར་འདོད་པ་སྟེ་ཡང་དང་ཡང་དུ་དེ་དང་ཕྲད་པའི་ཕྱིར་ཉེ་བར་འགྲོ་བས་སོ། །གང་གི་ཕྱིར་དད་པ་མེད་པར་ནི་གཞན་གྱིས་བསྐུལ་བར་གྱུར་ཀྱང་མ་དད་པས་འཕགས་པའི་གན་
དུ་མི་འགྲོའོ། །དམ་ཆོས་ཉན་པར་དགའ་བ་དང་། །ཞེས་བྱ་བ་ནི་བདེན་པ་སྟོན་པ་ལ་སོགས་པ་ལེགས་པར་བཤད་པ་མཉན་པ་ལ་ཞེན་པ་སྟེ། སྲོག་གི་ཕྱིར་ཡང་ལེགས་པར་བཤད་པ་མཉན་པར་འདོད་པ་སྐྱེ་བའོ། །སེར་སྣའི་དྲི་མ་རྣམ་སྤངས་པ། །ཞེས་བྱ་བ་ནི་གཏོང་བ་ལ་མཆོག་
ཏུ་འཛིན་པའི་ཕྱིར་སེར་སྣའི་ཚུལ་ཆགས་པའི་དྲི་མ་གང་གིས་སྤངས་པའོ། །ཞེ་སྡང་དང་གཏི་མུག་དང་ཆགས་པ་སྤྱོད་པ་རྣམས་དད་པ་ལ་གོ་རིམས་བཞིན་དུ་དེའི་མཚན་ཉིད་བསྟན་པའི་རྟགས་གསུམ་བསྟན་ཏོ། །ཡང་ན་ཉན་ཐོས་དང་རང་སངས་རྒྱས་དང་། སངས་རྒྱས་ཀྱི་རིགས་
ཅན་རྣམས་ལ་གཅིག་དང་གཉིས་དང་གསུམ་གྱི་རྟགས་དང་ལྡན་པ་ཉིད་དུ་གོ་རིམས་བཞིན་དུ་བསྟན་པའི་ཕྱིར་རོ། །འདུས་པ་དེ་དག་གིས་ནི་དད་པ་རྟོག་པར་བྱེད་པ་ཡིན་ནོ་ཞེས་གཞག་སྟེ། དེ་ཉིད་དད་པ་ཞེས་བརྗོད་ཅིང་དད་པ་དང་ལྡན་པ་ཞེས་ཀྱང་བརྗོད་དེ། དེའི་འབྲས་བུ་མཐོང་
བ་ལས་རྗེས་སུ་དཔག་པས་སོ། །འཇིག་རྟེན་ལ་རབ་ཏུ་གྲགས་པས་དགེ་བའི་མཚམས་སྦྱོར་བའི་དུས་སུ་དད་པ་ཡོད་པ་ཡིན་གྱི། ཐམས་ཅད་ལ་ཉེ་བར་མཚོན་པ་ནི་ངེས་པར་མི་བརྗོད་དོ། །དད་པ་གཅིག་པུ་ནི་འཇིག་རྟེན་ལས་སྙིང་པོ་བླངས་པ་ཡིན་ནོ་ཞེས་བསྟན་པའི་ཕྱིར། དད་པའི་ལམ་
བརྒྱགས་ཞེས་བྱ་བ་ལ་སོགས་པ་སྨོས་སོ། །ལྷ་ཞིག་གིས་གསོལ་པ། ལམ་བརྒྱགས་གང་ཞིག་བསྐུར་བྱ་ཞིང་། །རྐུན་པོས་མི་འཕྲོགས་གང་ཞིག་ལགས། །གང་གིས་འཕྲོགས་ན་བཟློག་བགྱི་ཞིང་། །སྐྱེ་བོ་གང་གིས་འཕྲོགས་ན་དགའ། །གང་ཞིག་འོངས་ནས་རྟག་ཏུ་ནི། །

མཁས་པ་མངོན་པར་དགའ་བར་འགྱུར། །ཞེས་པ་ལ་འདི་གསུངས་སོ། །དད་པ་དེ་ནི་དད་པ་དང་ལྡན་པའོ། །བསྐུར་བ་ནི་ཉེ་བར་བླངས་པའོ། །ལམ་བརྒྱགས་ནི་ལམ་གྱི་འཚོ་བའོ། །སྦྱིན་པ་ལ་སོགས་པའི་བསོད་ནམས་ཀྱི་ཚོགས་ནི་དད་པའི་ལག་པས་བསྐུར་བར་ནུས་པ་ཡིན་ཏེ། འཇིག་
རྟེན་ཕ་རོལ་ཏུ་འགྲོ་བའི་ཡོ་བྱད་དོ། །ཇི་སྐད་དུ། དཔེར་ན་ལམ་བརྒྱགས་མང་པོས་ནི། །བདེ་བས་འདི་ན་འགྲོན་པོ་འགྲོ། །དེ་བཞིན་འདིར་ཡང་དགེ་བྱས་པའི། །སེམས་ཅན་བདེ་འགྲོར་འགྲོ་བ་ཡིན། །ཞེས་བཤད་དོ། །བསོད་ནམས་ཆོམ་པོས་དབྲོག་མི་ནུས། །ཞེས་བྱ་བ་ནི་གྲོང་
འཇོམས་པར་བྱེད་པའི་རྐུན་མས་ཀྱང་གཞན་གྱི་ལེགས་པར་སྤྱད་པ་དབྲོག་པར་མི་ནུས་ཏེ། བསོད་ནམས་རྒྱལ་པོ་ཆོམ་རྐུན་དག །གཡོ་ཞིང་བརྩོན་པར་བྱེད་པས་ཀྱང་། །འཕྲོག་པར་ནུས་པ་མ་ཡིན་ནོ། །ཞེས་པའི་ཚིག་གིས་སོ། །ཆོམ་རྐུན་འཕྲོག་པར་བྱེད་པ་བཟློག །ཅེས་པ་ལ། རྐུན་
མས་གཞན་གྱི་ནོར་འཕྲོག་པར་བྱེད་པ་ནི་རྒྱལ་པོ་ལ་སོགས་པས་གསད་པ་ལ་སོགས་པའི་ཆད་པས་བྱས་པས་བཟློག་པར་བྱ་བ་ཡིན་ནོ། །དགེ་སྦྱོང་རྣམས་ཀྱིས་བླངས་ན་དགའ། །ཞེས་བྱ་བ་ནི་གཞན་གྱི་བཟའ་བ་དང་བཏུང་བ་དང་བགོ་བ་དང་ཁང་པ་ལ་སོགས་པ་འཕྲོག་ཅིང་ལེན་པར་བྱེད་
པའི་སྡོམ་བརྩོན་དགེ་བ་རྣམས་ལ་ནི་སྐྱེ་བོ་དད་པ་དང་ལྡན་པ་དག་ཤིན་ཏུ་དགའ་བར་བྱེད་པ་ཡིན་ཏེ། འཕགས་པས་འཕྲོགས་ཤིང་བླངས་ན་བཟང་བ་བཞིན་ཞེས་བྱ་བའི་ཚིག་གིས་སོ། །དགེ་སྦྱོང་འོངས་པ་ལ་ཞེས་བྱ་བ་ནི་ཉེ་བར་ཞི་བའི་སྤྱོད་པ་ཅན་གྱི་སྡོམ་བརྩོན་འོངས་པ་ལའོ། །རྟག་ཏུ་
ཞེས་པ་ནི་རྒྱུན་དུའོ། །མངོན་པར་དགའ་བ་ནི་མངོན་པར་འདོད་པའོ། །མཁས་པ་ནི་བདག་ལ་ཕན་པར་འདོད་པའོ། །དད་པ་དང་རྗེས་སུ་མཐུན་པའི་ཞིང་ལ་སྦྱིན་བདག་རྣམས་འབུལ་བར་བྱེད་པ་ན། ཕྲག་དོག་གི་དབང་གིས་སྐྱེ་བོ་ངན་པ་རྣམས་ཏིང་ངེ་འཛིན་ཉམས་པར་འགྱུར་བའི་
ཉེས་དམིགས་བསྟན་པའི་ཕྱིར་སྨྲས་པ། སྐྱེ་བོ་རྣམས་ནི་ཅི་རིགས་པར། །ཞེས་བྱ་བ་ལ་སོགས་པའོ། །ཁྱིམ་བདག་མགོན་མེད་ཟས་སྦྱིན་གྱིས་འཕགས་པ་ཤཱ་རིའི་བུ་དང་མཽད་གལ་གྱི་བུ་ལ་ཆོས་གོས་ལ་སོགས་པས་ཤིན་ཏུ་ཡང་བསྙེན་བཀུར་བྱེད་པར་གྱུར་ཏོ། །ཀོ་ཀ་ལི་ཀ་

ལ་སོགས་པས་ནི་ཁྱིམ་བདག་འདི་ནི་གང་ཟག་ལ་མངོན་པར་དད་དོ་ཞེས་འཕྱ་བར་བྱེད་དེ་ཇི་ཙམ་ན་ཚིགས་སུ་བཅད་པ་གཉིས་གསུངས་སོ། །སྦྱིན་བྱེད་ཅེས་བྱ་བ་ནི་ཡོན་ཏན་ཅན་ལ་འབུལ་བར་བྱེད་པའོ། །གཅིག་ནི་གཅིག་ཏུ་སྟེ་དད་པའི་སེམས་ཅན་དག་གོ། །
དད་པ་ཇི་བཞིན་ཞེས་བྱ་བ་ནི་དད་པ་དང་རྗེས་སུ་མཐུན་པ་སྟེ། དེ་ཆུང་ངུ་ལ་སོགས་པའི་དབྱེ་བ་དང་། དེས་བྱས་པའི་སྦྱིན་པ་ལ་སོགས་པའི་དབྱེ་བས་སོ། །ཅི་རིགས་པར་བྱ་ཞེས་བྱ་བ་ནི་འབྱོར་པ་དང་རྗེས་སུ་མཐུན་པ་སྟེ། འབྱོར་པ་ཅི་བསགས་པ་བཞིན་དུ་སྦྱིན་པ་སྟེ། དད་པ་ཇི་ལྟ་བ་
བཞིན་ནོ། །འབྱོར་པ་མ་བསགས་པ་དག་གིས་ཀྱང་ཇི་ལྟར་འཚལ་བར་རོ། །དེ་ལྟ་ཞེས་བྱ་བ་ནི་ཟས་དང་སྐོམ་སྦྱིན་བདག་སྟེར་བ་ལའོ། །གང་ཞིག་ཡིད་ནི་མི་བདེ་བ། །ཞེས་བྱ་བ་ནི་ཕྲག་དོག་ལ་སོགས་པའི་དབང་གིས་མི་དགའ་བའོ། །གཞན་ཞེས་བྱ་བ་ནི་ལེན་པ་པོ་དང་འབྲེལ་པ་ཞེས་བྱ་བའི་
ཚིག་གི་ལྷག་མའོ། །དེས་ནི་ཉིན་དང་མཚན་རྣམས་སུ། །ཞེས་བྱ་བ་ནི་སྐྱེ་བོ་ངན་པ་དེ་ནི་ཉིན་པར་དང་ནུབ་མོ་རྣམས་སུའོ། །ཏིང་འཛིན་འཐོབ་པར་མི་འགྱུར་རོ། །ཞེས་བྱ་བ་ནི་སེམས་རྩེ་གཅིག་པ་མི་རྙེད་པ་སྟེ། ཕྲག་དོག་གིས་བྱས་པའི་གཡེང་བ་དང་ལྡན་པ་ཞེས་བྱ་བ་འོག་ནས་སྨོས་ཏེ། རང་
གི་རྙེད་པ་ལ་བརྙས་པར་མི་བྱའོ་ཞེས་བྱ་བ་ལ་སོགས་པའོ། །ནག་པོའི་ཕྱོགས་བསྟན་ནས། དཀར་པོའི་ཕྱོགས་སྨྲས་པ། གང་གིས་ཞེས་བྱ་བ་ལ་སོགས་པ་སྨོས་ཏེ། གང་ཡང་སྐྱེས་བུ་དམ་པས་སོ། །དེ་འདྲ་ཀུན་དུ་སྤྱོད་བྱེད་པ། །ཞེས་བྱ་བ་ནི་གཞན་གྱི་རྙེད་པའི་རྒྱུར་གྱུར་པའི་ཡིད་མི་
བདེ་བ་དྲུངས་འབྱིན་པའོ། །ཡང་ཕྱིས་མི་སྐྱེ་བར་བྱ་བའི་ཕྱིར་སྨྲས་པ། ཏ་ལའི་མགོ་བཅད་ལྟར་ཞེས་བྱ་བ་ས་བོན་མེད་པར་བྱ་བ་སྟེ། ཏ་ལའི་མགོ་དང་མཉམ་པར་འཇུག་པ་ནི་ཏ་ལའི་རྩེ་མོ་སྟེ། འདི་ལྟར་ཤིང་ཏ་ལའི་རྩེ་མོ་བཅད་པས་ཡང་མི་སྐྱེ་བ་དེ་བཞིན་དུ་སྤང་བའོ། །དེས་ནི་ཉིན་དང་
མཚན་རྣམས་སུ། །ཞེས་བྱ་བ་ལ་སོགས་པ་ནི་རྟག་པར་སླའོ། །དད་པ་མེད་པ་ནི་དམ་པ་རྣམས་ཀྱིས་བསྟེན་པར་བྱ་བ་མ་ཡིན་ནོ་ཞེས་བསྟན་པའི་ཕྱིར་སྨྲས་པ། ཁྲོན་པ་སྐམ་པོ་ཞེས་བྱ་བ་ལ་སོགས་པའོ། །དགེ་སློང་དག་དད་པ་མེད་པའི་གང་ཟག་ནི་སྟེན་པར་མ་བྱེད་ཅིག །དེ་ཅིའི་

ཕྱིར་ཞེ་ན། དད་པ་མེད་པ་བསྟེན་པ་ནི་སྡུག་བསྔལ་བ་སྟེ། གང་གི་ཕྱིར་དད་པ་མེད་པ་བསྟེན་ཅིང་བསྟེན་པ་ལས་ནི་ལུས་ཀྱིས་ཉེས་པར་སྤྱད་པ་སྤྱོད་པ་དང་། ངག་གིས་ཉེས་པར་སྤྱོད་པ་ནས་ཇི་སྲིད་དུ་དམྱལ་བར་སྐྱེ་བར་འགྱུར་རོ་ཞེས་བྱ་བའི་བར་དུའོ། །དཀར་པོའི་ཕྱོགས་ཀྱི་ཚིགས་སུ་བཅད་
པ་ཡང་སྟེ་འདི་གཉིས་གསུངས་སོ། །དད་པ་མེད་པ་ཞེས་བྱ་བ་ནི་སེམས་དད་པ་དང་བྲལ་བའི་སྐྱེ་བོ་ཞེས་བྱ་བའི་དོན་ཏོ། །བསྟེན་མི་བྱ་ཞེས་བྱ་བ་ནི་བསྙེན་པར་མི་བྱ་བ་སྟེ། དེ་དང་ལྷན་ཅིག་འབྲེལ་པར་མི་བྱའོ། །ཁྲོན་པ་སྐམ་པོ་ཇི་ལྟ་བར། །ཞེས་བྱ་བ་ལ། ཆུ་བཏུང་བར་བྱ་བའི་གནས་དེ་ནི་
ཁྲོན་པ་སྟེ་རྫིང་བུ་ལ་སོགས་པའོ། །ཇི་ལྟར་ཆུ་མེད་པའི་སྐམ་པ་དེ་ཆུ་དོན་དུ་གཉེར་བ་དག་གིས་མི་བསྟེན་པ་དེ་བཞིན་ནོ། །འོན་ཀྱང་ཁྲོན་པ་ཆུ་མེད་ཅིང་སྐམ་དུ་ཟིན་ཀྱང་བརྐོས་པར་གྱུར་ན་ཆུ་སྦྱིན་པར་བྱེད་དོ་ཞེ་ན། ཇི་སྟེ་ཞེས་བྱ་བ་ལ་སོགས་པ་ཡིན་ཏེ། གལ་ཏེ་རྫིང་བུ་ལ་སོགས་པ་
ཆུ་མེད་ཅིང་སྐམ་པོ་ལ་ཆུ་དོན་དུ་གཉེར་བས་དེ་ཀུན་དུ་བརྐོས་ཀྱང་དེ་མ་ཐག་མི་འབྱུང་ལ། གལ་ཏེ་བྱུང་བར་གྱུར་ན་ཡང་འདམ་ཆུ་དྲི་ང་བ་འབྱུང་བར་འགྱུར་ཞེས་བྱ་བ་སྨོས་ཏེ། འདམ་རུལ་པ་དེ་ལྟ་བུའི་དྲི་གང་ལ་ཡོད་པ་དེ་ནི་འདམ་ཆུ་དྲི་ང་བ་སྟེ། དེ་ནི་དབྱིག་པ་ཅན་བཞིན་ནོ། །ཤེས་
རབ་ཅན་གྱིས་དད་ལྡན་བསྟེན། །ཞེས་བྱ་བ་ནི་གང་ལ་ཡང་དག་པར་རྟོགས་པ་ཡོད་པ་དེས་ནི་དད་པ་ཅན་དང་ལྷན་ཅིག་བསྟེན་པར་བྱའོ། །འདིར་དཔེ་བསྟན་པ། མཚོ་ལ་ཆུ་འདོད་ཇི་ལྟ་བར། །ཞེས་བྱ་བ་སྨོས་ཏེ། དཔེར་ན་ཆུ་འདོད་པ་སྟེ། ཁྲུས་དང་བཏུང་བ་དང་དེའི་ནང་དུ་ཞུགས་པར་
འདོད་པས་ནི་མཚོ་ཆེན་པོ་ལ་སྟེན་པར་བྱེད་དོ། །མཚོ་ཇི་ལྟ་བུ་ཞེ་ན། སྨྲས་པ། ཆུ་མང་ཞེས་བྱ་བ་སྟེ། ཆུ་མང་པོ་གང་ལ་ཡོད་པ་དེ་ནི་ཆུ་མང་སྟེ། བྱ་རོག་གིས་བཏུང་དུ་རུང་བ་ཞེས་བྱ་བའི་དོན་ཏོ། །རྣམ་པར་དང་བ་ནི་རྙོག་པ་དང་བྲལ་ཞིང་ཤིན་ཏུ་གཙང་བའོ། །བསིལ་བར་གྱུར་ཅིང་
ཞེས་བྱ་བ་ནི་དེ་ཡང་ཤིང་གི་གྲིབ་མས་ཡོངས་སུ་བསྐོར་བའི་ཕྱིར། ཡིད་ཚིམ་པར་བྱེད་དོ། །རྙོག་པ་མེད་པ་ཞེས་བྱ་བ་ནི་རྡུལ་མེད་ཅིང་ན་ཀྲ་ལ་སོགས་པ་སེམས་ཅན་གདུག་པ་ཅན་དང་འདམ་དང་ཆུ་བལ་ལ་སོགས་པས་མ་རྙོག་པའི་ཕྱིར་རོ། །ཇི་ལྟར་ཁྲུས་དང་བཏུང་བ་ལ་སོགས་པ་འདོད་

པས་ནི་མཚོ་འདི་ལྟ་བུ་ཉེ་བར་སྟེན་པར་བྱེད་པ་དེ་བཞིན་དུ་ཁྱད་པར་གྱི་རྣམ་པ་མང་པོ་དོན་དུ་གཉེར་བས་ཀྱང་ལྷག་པར་གཡོ་མེད་པ་དང་བསམ་པ་དག་པས་གཞན་ལ་ཕན་འདོགས་ཤིང་དགའ་བར་བྱེད་པ་དང་། མི་ཤེས་པ་དང་། ཚུལ་འཆོས་པ་ལ་
སོགས་པ་དང་བྲལ་བས་རྙོག་པ་མེད་པའི་དད་པ་ཅན་བསྟེན་ན་དེས་ནི་ཡིད་ལ་མངོན་པར་འདོད་པའི་འབྲས་བུ་འགྲུབ་པར་འགྱུར་རོ། །མཁས་པས་ནི་དད་པ་ཅན་བསྟེན་པར་བྱའི། ཅིག་ཤོས་ནི་མ་ཡིན་ནོ་ཞེས་བསྟན་པའི་ཕྱིར་སྨྲས་པ། ཆགས་སམ་མ་ཆགས་ཞེས་བྱ་བ་ལ་སོགས་པའོ། །
ཚེ་དང་ལྡན་པ་ཤཱ་རིའི་བུ་དང་མཽད་གལ་གྱི་བུ་གཉིས་དགོན་པའི་ཕྱོགས་གཅིག་ནས་སྔ་དྲོ་ཤམ་ཐབས་དང་ཆོས་གོས་བགོས་ཏེ་ལྷུང་བཟེད་བླངས་ནས། བྲམ་ཟེའི་གྲོང་ཁྱེར་ཞིག་ཏུ་བསོད་སྙོམས་ཀྱི་ཕྱིར་ཞུགས་པ་ན། མུ་སྟེགས་ཅན་གཞན་དག་གིས་ཤིན་ཏུ་སྤྱོས་ཤིང་བརྒྱད་དེ་ལྷུང་བཟེད་ཀྱི་
ནང་དུ་ཡང་རྡུལ་གྱིས་བཀང་ངོ་། །བྲམ་ཟེ་དད་པ་དག་གིས་ནི་མཆོད་པར་ཡང་གྱུར་ཏོ། །དེ་གཉིས་དམྱལ་བ་དང་མཐོ་རིས་དག་ཏུ་མི་དགའ་ཞིང་དགའ་བ་ཡིན་ཏེ། དེའི་དབང་དུ་མཛད་ནས་འདི་གསུངས་སོ། །ཆགས་པ་ནི་ཁ་ཅིག་དད་ཅིང་བློ་དང་ལྡན་པའི་བྲམ་ཟེ་དང་ཁྱིམ་བདག་དམ་པ་རྣམས་ལ་རྗེས་
སུ་ཆགས་པར་བསྟན་པ་ཡིན་ནོ། །སམ་ཞེས་བྱ་བའི་སྒྲ་ནི་མ་ཆགས་ཀྱང་རུང་ཞེས་བྱ་བ་ཡིན་ཏེ། སྐྱེ་བོ་ངན་པ་ཁ་ཅིག་དམ་པ་རྣམས་ལ་རྣམ་པར་སྡང་བ་བསྐྱེད་པའོ། །དེ་ཡིས་ཐུབ་སྐུ་མི་ངས་པས། །ཞེས་བྱ་བ་ནི་བདག་ཉིད་ཆེན་པོ་རྣམས་ནི་ཆགས་པའམ་མ་ཆགས་པ་སྟེ། དད་པ་དང་མ་དད་
པའི་སེམས་ཅན་གྱི་རྒྱུར་གྱུར་པ་ཞེས་སྐུ་མི་ངས་པ་སྟེ། འགྱུར་བར་མི་མཛད་དོ། །ཅིའི་ཕྱིར་ཞེ་ན། སྨྲས་པ། འདི་ལྟར་ཐུབ་པ་དེ་ནི་ཁམས་གསུམ་ལས་འདོད་ཆགས་དང་བྲལ་བའི་ཕྱིར་རོ། །གལ་ཏེ་སྐུ་མི་ངས་ན་དེས་ཅི་ཞིག་བྱ་བ་ཡིན་ཞེ་ན། སྨྲས་པ། མ་དད་པ་དག་སྤང་བར་བྱ། །ཞེས་བྱ་བ་
སྟེ། མ་དད་པའི་སེམས་ཅན་དོར་བར་བྱ་སྟེ། ཆུ་དང་བྲལ་བའི་ཕྱིར་ཆུ་འདོད་པས་ཁྲོན་པ་སྐམ་པོ་བཞིན་དུ་སྡིག་པ་བྱེད་པ་དེ་ཡོངས་སུ་སྤང་བར་བྱའོ། །དད་པ་རྣམས་ནི་ཉེ་བར་བསྟེན། །ཞེས་བྱ་བ་ནི་དད་པ་ཅན་དག་དང་བསྙེན་པར་བྱ་བ་ཉིད་དེ། ཆུ་འདོད་པ་དག་གིས་མཚོ་ཆེན་པོ་བཞིན་དུ་སྟེ།

དེའི་བསོད་ནམས་ཀྱི་ཚོགས་ཉེ་བར་སྐྱེད་པའི་ཕྱིར་རོ། །དད་པའི་ཚོམས་ཏེ་བཅུ་པའི་རྣམ་པར་འགྲེལ་པ་རྫོགས་སོ།། །།དད་པའི་ཁྱད་པར་གྱི་འབྲས་བུ་བསྟན་པའི་ཕྱིར། དེའི་འོག་ཏུ་དགེ་སྦྱོང་གི་ཚོམས་བསྟན་པ་ཡིན་ཏེ། དད་པའི་སྟོབས་ཀྱིས་ནི་འཕགས་པའི་ལམ་སྐྱེ་ལ། དེའི་
མཐུས་ནི་དགེ་སྦྱོང་དུ་འགྱུར་རོ། །ཡང་ན་བསྟན་མ་ཐག་པའི་ཚོམས་སུ་ཐུབ་པ་ཞེས་བྱ་བ་དེའི་རྣམ་གྲངས་དགེ་སྦྱོང་ཡིན་ནོ་ཞེས་བསྟན་པའི་ཕྱིར་རོ་འགྲེལ་པ་སྨྲས་པ། བྲམ་ཟེས་འདོད་པ་ཞེས་བྱ་བ་ལ་སོགས་པའོ། །རབ་ཏུ་དང་བ་ཕལ་ཆེ་བ་ཞེས་བྱ་བའི་བྲམ་ཟེ་ཞིག་སེར་སྐྱའི་ཐར་པ་བསྒྲུབ་
པར་འདོད་པ་ལས་དེའི་ཐབས་མི་ཤེས་ཏེ། སངས་རྒྱས་ལ་ཡིད་ཆེས་པ་སྐྱེས་པར་གྱུར་ནས། བཅོམ་ལྡན་འདས་ཀྱི་སྤྱན་སྔར་སོང་སྟེ་ཞུས་པ་ལས། དེའི་ཕྱིར་ཚིགས་སུ་བཅད་པ་གཉིས་གསུངས་ཏེ། དེ་ཐོས་པས་རབ་ཏུ་བྱུང་ཞིང་དགྲ་བཅོམ་པའི་འབྲས་བུ་ཐོབ་བོ། །ཆོད་ཅིག་ཅེས་བྱ་བ་ནི་
སྤང་ཞིང་དོར་བར་གྱིས་ཤིག་ཅེས་བྱ་བའི་དོན་ཏོ། །གང་ཡིན་ཞེ་ན། རྒྱུན་ཞེས་བྱ་བ་སྟེ་སྐྱེ་བའི་རྒྱུན་ནོ། །གང་གི་ཕྱིར་འདི་མ་སྤངས་ན་ནི་གཅིག་ཏུ་ཐོབ་པར་མི་འགྱུར་རོ། །ཅི་ཞིག་བྱས་ནས་རྒྱུན་བཅད་པར་ནུས་ཤེ་ན། བརྩོན་འགྲུས་ཀྱིས་ནི་ཞེས་བྱ་བ་སྨོས་ཏེ། སྦྱོར་བས་བསྐྱེད་པར་བྱ་བའི་ཁྱད་
པར་ནི་བརྩོན་འགྲུས་ཏེ། དད་པས་དམ་པ་བསྟེན་ཅིང་ལེགས་པར་གསུངས་པ་མཉན་པ་དང་། རབ་ཏུ་བྱུང་བ་ཡོངས་སུ་བཟུང་བ་དང་དགེ་བ་ལ་སོགས་པའི་ལམ་གྱི་ཚོགས་ལ་འཇུག་པ་ཞེས་བྱ་བའི་དོན་ཏོ། །ཚོགས་འདི་ལ་བརྟེན་ནས་དེའི་འོག་ཏུ་ཅི་ཞིག་བྱ་ཞེ་ན། སྨྲས་པ། ཉོན་མོངས་པ་
སྤང་བར་བྱ་སྟེ། དེ་སྤང་བའི་རིམ་པ་བསྟན་པའི་ཕྱིར་སྨྲས་པ། འདོད་པ་རབ་སྤང་ཞིང་ཞེས་བྱ་བ་སྟེ། འདོད་པ་ན་སྤྱོད་པའི་མཐོང་བ་དང་། བསྒོམ་པས་སྤང་བར་བྱ་བའི་ཉོན་མོངས་པ་སྤོང་བ་ཡིན་ཏེ། དེ་ནས་གཟུགས་དང་གཟུགས་མེད་པ་ན་སྤྱོད་པ་ཡིན་ནོ་ཞེས་སྟོན་ཏེ། འདོད་པའི་
ཁམས་ཀྱི་ཡོངས་སུ་རྫོགས་པར་སྤངས་ན་བྲམ་ཟེར་འགྱུར་ཏེ། འདོད་པའི་མི་གཙང་བའི་ནང་དུ་འབྱིང་བ་ལས་ནི་བྲམ་ཟེར་སྐྱེ་བར་མི་འགྱུར་རོ་ཞེས་དེ་ཉིད་བསྟན་པའི་ཕྱིར་བྲམ་ཟེ་ཞེས་བྱ་བ་སྨོས་ཏེ། འདིའི་དོན་ནི་འདོད་པ་དག་ལས་ཡིད་རྒྱབ་ཀྱིས་ཕྱོགས་པ་ཡིན་ནོ་ཞེས་རྒྱུ་ཅིའི་ཕྱིར་འདོད་པ་

ལ་སོགས་པ་སྤང་བར་བྱ་བ་ཡིན་ཞེ་ན། རབ་ཏུ་མ་སྤངས་པར་ཞེས་བྱ་བ་སྟེ། ཇི་སྲིད་དུ་འདོད་པ་ལ་སྤྱོད་པ་ལ་སོགས་པའི་ཉོན་མོངས་པ་སྤངས་པར་མ་གྱུར་པ་དེ་སྲིད་དུ་ནི་དེ་ཐུབ་པ་མ་ཡིན་ཏེ། གཅིག་ཏུ་ཡང་ཐོབ་པ་མ་ཡིན་ནོ། །ཐུབ་པ་ཞེས་བྱ་བ་ནི་ཕུང་པོ་ལྷག་མ་
དང་བཅས་པའི་མྱ་ངན་ལས་འདས་པ་ཐོབ་པར་གྱུར་པའོ། །གཅིག་ཏུ་ཞེས་བྱ་བ་ནི་ཕུང་པོ་ལྷག་མ་མེད་པའི་མྱ་ངན་ལས་འདས་པ་སྟེ། དེ་གཉིས་ཀྱང་ཉོན་མོངས་པ་སྤངས་པས་འཐོབ་པ་ནི་རྟོགས་པའོ། །དེ་མ་ཐོབ་པར་ནི་རྒྱུན་ཆོད་པ་མ་ཡིན་ཏེ། དེས་ན་འདོད་པ་ལ་སོགས་པ་ངེས་
པར་སྤང་བར་བྱ་བ་ཉིད་ཡིན་ནོ། །འདིར་དགེ་སྦྱོང་གི་སྒྲ་མེད་ཀྱང་བྲམ་ཟེ་དང་ཐུབ་པའི་སྒྲ་ནི་དེའི་རྣམ་གྲངས་ཡིན་པའི་ཕྱིར་ཚིགས་སུ་བཅད་པ་འདི་དགེ་སྦྱོང་གི་ཚོམས་སུ་དགོད་པར་རིགས་པ་ཉིད་དོ། །ཚིགས་སུ་བཅད་པ་གཉིས་པོར་ཡང་ཀུན་དུ་རྒྱུའི་སྒྲའི་ནི་ཀུན་རྫོབ་ཏུ་དགེ་སྦྱོང་ལ་
བཏགས་པའི་རྒྱུ་ཡིན་པའི་ཕྱིར་རྩོད་པ་མེད་དོ། །རྟག་ཏུ་བྱེད་པ་དང་གུས་པར་བྱེད་པའི་སྦྱོར་བས་སྔར་བསྟན་པའི་བྱ་བ་ནུས་པ་ཡིན་ཏེ། གཞན་དུ་ནི་མ་ཡིན་ནོ་ཞེས་འདིར་བསྟན་པའི་ཕྱིར། ཀུན་དུ་རྒྱུ་ཞེས་བྱ་བ་ལ་སོགས་པའོ། །བྱ་བ་བྱ་བ་ཞེས་བྱ་བ་ལ་བཟླས་པ་ནི་གྱིས་ཤིག་གྱིས་
ཤིག་པའི་དོན་ཏོ། །རྟག་ཏུ་དེ་ཉིད་ཅེས་བྱ་བ་ནི་སྔར་བསྟན་པའི་རྒྱུན་གཅད་པར་བྱ་བ་སྟེ། རང་དང་རྗེས་སུ་མཐུན་པའི་གཉེན་པོའི་ཕྱོགས་བསྒོམས་པས་རྟག་ཏུ་དེ་ཉིད་དུ་བསྒྲུབ་པར་བྱ་སྟེ། འདིར་བག་མེད་པར་ནི་མི་བྱའོ་ཞེས་པའོ། །གུས་པའི་སྦྱོར་བ་ལ་གཟུད་པའི་ཕྱིར། བརྩོན་འགྲུས་
བརྟན་པ་ཁོ་ན་ཡིས། །ཞེས་བྱ་བ་སྨོས་ཏེ། དགེ་བའི་བཤེས་གཉེན་བསྟེན་ཅིང་། དམ་པའི་ཆོས་མཉན་པ་ལ་སོགས་པ་བསྐྱེད་པ་ལ་བར་ཆད་མེད་པ་ཉིད་དུ་བརྩོན་འགྲུས་བརྩམས་པས་འཇུག་པར་གྱིས་ཤིག་པའོ། །དེ་ལྟར་ག་ལས་བྱེད་དུ་འཇུག་པ་ཡིན་ཞེ་ན། ཀུན་དུ་རྒྱུ་བ་ཞན་པ་
དག །ཅེས་བྱ་བ་ནི་སྦྱོར་བ་ལྷོད་པ་སྟེ། འདི་ལྟར་ཀུན་དུ་རྒྱུ་གལ་ཏེ་བརྩོན་པ་མེད་པ་དང་། སྐྱོ་བ་མེད་པར་གྱུར་ཏེ། ང་རྒྱལ་དང་ཕྲག་དོག་ལ་སོགས་པ་དང་ལྡན་པས་ནི་དེའི་ཚེ་སྤྱིར་ཡང་ཤས་ཆེར་སྩོགས་ཤིང་འཕེལ་བ་ཡིན་ནོ། །ཉོན་མོངས་པ་ནི། ལས་དང་ཉོན་མོངས་པ་དང་

སྐྱེ་བའི་ཀུན་ནས་ཉོན་མོངས་པའི་བདག་ཉིད་མ་སྤངས་པའོ། །གང་སྔར་བསྟན་པའི་ཀུན་དུ་རྒྱུ་བ་ཞན་པས་ཉེས་པ་འབྱུང་བར་ཡང་མ་ཟད་དེ། མངོན་པར་འདོད་པའི་འབྲས་བུ་ཡང་སྦྱིན་པར་མི་ནུས་སོ་ཞེས་བསྟན་པའི་ཕྱིར། ཞན་པའི་ལས་ནི་ཞེས་བྱ་བ་ལ་སོགས་པ་སྨོས་སོ། །དགེ་
བསྙེན་མ་ཞིག་གི་བུ་ཡན་ལག་བརྒྱད་པའི་བསྙེན་གནས་ཀྱི་གསོ་སྦྱོང་གི་བསླབ་པ་དང་ལྡན་པ་ལས་ཉམས་པར་གྱུར་ཏེ། དེ་གནོད་སྦྱིན་ཞིག་གིས་བཟུང་བར་གྱུར་ཏོ། །དེ་ནས་དེའི་མས་གནོད་སྦྱིན་དེ་རྗེས་སུ་དྲན་པར་བྱས་ཏེ། ཚིགས་སུ་བཅད་པ་གཉིས་སྨྲས་སོ། །ཇི་སྲིད་བཅུ་བཞི་བཅོ་
ལྔ་ནི། །བསྙེན་གནས་ཡན་ལག་བརྒྱད་པ་ལ། །འདི་ན་ལེགས་པར་མཉམ་གཞག་དང་། །གང་ཞིག་ཚུལ་ཁྲིམས་ལྡན་པ་ལ། །གནོད་སྦྱིན་འཚེ་བར་མི་འགྱུར་ཞེས། །བདག་གིས་ཐོས་ན་རིགས་ཡིན་ནམ། །ཞེས་སོ། །གནོད་སྦྱིན་གྱིས་སྨྲས་པ། ཐོས་པ་ཇི་སྙེད་པ་དེ་དག་ནི་
ལེགས་ཏེ། རིགས་པ་ཡི