Luận tạng Tây Tạng (Tengyur) — Tập 145

ཀྱི་ཐོབ་པ་སྐྱེ་ཞེས་བྱ་བའི་ཐ་ཚིག་གོ། །ད་ལྟར་བྱུང་བ་ནི་ཐོབ་པ་དང་
བཅས་ཏེ་རྟེན་པས་ཐོབ་པའི་སྒོ་ནས་མངོན་དུ་གྱུར་པ་ཉིད་དུ་ཐོབ་པོ། །དེ་ཁོ་ན་གཉི་ག་ཡིན་ནོ་ཞེས་བྱ་བ་ནི་ཆོས་དྲན་པ་ཉེ་བར་གཞག་པ་ད་ལྟར་བ་དང་མ་འོངས་པ་དེ་ཁོ་ན་ཐོབ་བོ། །དེ་ལ་ནི་ཚོར་བ་ལ་སོགས་པ་ཡོད་པ་མ་ཡིན་ཏེ། འགོག་པ་ཕུང་པོ་ལྔའི་རང་བཞིན་མ་ཡིན་པའི་ཕྱིར་རོ། །རྣམ་པ་དག་ནི་ཐམས་
ཅད་དུ་འདྲ་བ་ཡིན་ནོ་ཞེས་བྱ་བ་ནི་བདེན་པ་གསུམ་ལ་དམིགས་པ་དང་། འགོག་པ་ལ་དམིགས་པའི་དྲོ་བར་གྱུར་པའི་རྣམ་པ་གཏོད་པ་སྟེ། འདྲ་བ་ནི་མཚུངས་པ་ཡིན་ཞེས་བྱ་བའི་དོན་ཏེ། བདེན་པ་གང་དང་གང་ལ་རྣམ་པ་གང་དང་གང་མངོན་དུ་བྱེད་པ་དེ་དང་རིགས་མཐུན་པ་མ་འོངས་པ་ཁོ་ན་དེས་འཐོབ་ཀྱི། གཞན་
ནི་མ་ཡིན་ཏེ། རིགས་རྣམས་མ་ཐོབ་པའི་ཕྱིར་རོ། །རྣམ་པར་འཕེལ་བ་ལ་ནི་ཞེས་བྱ་བ་ནི་བྱང་བར་བྱ་བ་ལའོ། །བཞི་ལས་གང་ཡང་རུང་བ་ཞིག་ཅེས་བྱ་བ་ནི། ལུས་དྲན་པ་ཉེ་བར་གཞག་པ་ལ་སོགས་པ་རྣམས་ལས་གང་ཡང་རུང་བ་ཞིག་ད་ལྟར་བྱུང་བ་ཡིན་ཏེ། གང་ཞིག་གང་ལ་དམིགས་པ་དེ་ནི་དམིགས་པར་བྱ་
བའི་སྒོ་ནས་ད་ལྟར་བྱུང་བ་ཡིན་ནོ། །མ་འོངས་པ་ནི་བཞི་ཆར་རྙེད་པ་ཐོབ་པ་ཉིད་ཀྱི་སྒོ་ནས་འཐོབ་བོ། །འགོག་པ་ལ་དམིགས་པ་དྲོ་བར་གྱུར་པ་འཕེལ་བ་དེ་ཁོ་ན་ཉིད་ལ་ནི་ཐ་མ་ཆོས་དྲན་པ་ཉེ་བར་གཞག་པ་ད་ལྟར་བྱུང་བ་ཡིན་ཏེ། དེ་ལ་ལུས་ལ་སོགས་པ་མེད་པའི་ཕྱིར་རོ། །མ་འོངས་པ་ནི་བཞི་ཆར་ཐོབ་སྟེ། འདིས་
སྔར་འཐོབ་པ་གང་དག་ཡིན་པའོ། །རྣམ་པ་ནི་ཐམས་ཅད་དེ་ཞེས་བྱ་བ་ནི་བཅུ་དྲུག་གོ། །རིགས་རྣམས་ཐོབ་ཟིན་པའི་ཕྱིར་རོ་ཞེས་བྱ་བ་ནི། སྔར་རྣམ་པ་གཏོད་པའི་གནས་སྐབས་ཀྱི་རིམ་པས་རིགས་རྣམས་ཐོབ་ཟིན་པ་ཡིན་ཏེ། འདིར་རྣམ་པ་རྣམས་ཀྱིས་ནི་སྐལ་བ་མཉམ་པའི་རྒྱུ་ལ་མངོན་པར་འདོད་ལ། དེ་དག་

ཀྱང་རྣམ་པ་གཏོད་པའི་དུས་ཁོ་ནར་ཐོབ་ཟིན་ཏོ། །རྩེ་མོ་བདེན་པ་བཞི་ལ་དམིགས་པ་རྣམ་པར་གཏོད་པ་ལ་ནི་ཆོས་དྲན་པ་ཉེ་བར་གཞག་པ་ད་ལྟར་བྱུང་བ་ཡིན་ལ། མ་འོངས་པ་ནི་བཞི་ཆར་འཐོབ་བོ། །འགོག་པ་ལ་དམིགས་པ་འཕེལ་བ་ལ་ནི་ཐ་མ་ཆོས་དྲན་པ་ཉེ་བར་གཞག་པ་ད་ལྟར་བྱུང་བ་
ཡིན་ལ། མ་འོངས་པ་ལ་ནི་བཞི་ཆར་འཐོབ་སྟེ། དེ་དག་འཐོབ་པ་སྐྱེས་ཟིན་པའི་ཕྱིར་རོ། །རྣམ་པ་ནི་ཐམས་ཅད་དོ་ཞེས་བྱ་བ་ནི་དྲོ་བར་གྱུར་པའི་རྣམ་པ་གཏོད་པའི་ཚེ་དེའི་རིགས་རྣམས་ཐོབ་པའི་ཕྱིར་རོ། །བདེན་པ་གསུམ་ལ་དམིགས་པ་རྣམ་པར་འཕེལ་བ་ལ་ནི། སྡུག་བསྔལ་དང་ཀུན་འབྱུང་བ་དང་ལམ་ལ་དམིགས་
པ་ལ་སྟེ། བཞི་ལས་གང་ཡང་རུང་བ་ཞིག་ད་ལྟར་བྱུང་བ་ཡིན་ལ། མ་འོངས་པ་ནི་བཞི་ཆར་རོ། །རིགས་ཐོབ་ཟིན་པའི་ཕྱིར་རྣམ་པ་ཡང་ཐམས་ཅད་དོ། །བཟོད་པ་རྣམས་ལ་ནི་ཐམས་ཅད་དུ་ཐ་མ་ཡིན་ལ་ཞེས་བྱ་བ་ནི་བཟོད་པ་རྣམས་ལ་ནི་རྣམ་པ་གཏོད་པ་དང་རྣམ་པར་འཕེལ་བ་ལ་ཡང་ཐ་མ་ཆོས་དྲན་པ་ཉེ་བར་གཞག་པ་
ཁོ་ན་ད་ལྟར་བྱུང་བ་ཡིན་ཏེ། འདི་ལྟར་བཟོད་པ་ནི། ཐམས་ཅད་ཆོས་ཀྱིས་འཕེལ་བར་བྱེད། །ཅེས་བྱ་བས་སོ། །ཆོས་ཀྱི་མཆོག་དག་ལ་ནི་ཐ་མ་ཡིན་ལ་ཞེས་བྱ་བ་ནི། ཆོས་ཀྱི་མཆོག་མངོན་དུ་བྱེད་པ་ལ་ནི་ཐ་མ་ཆོས་དྲན་པ་ཉེ་བར་གཞག་པ་ད་ལྟར་བྱུང་བ་ཡིན་ནོ། །མ་འོངས་པ་ནི་བཞི་ཆར་རོ། །རྣམ་པ་
ནི་བཞི་ཁོ་ན་སྟེ་ཞེས་བྱ་བ་འདི་ནི་མི་རྟག་པ་དང་སྡུག་བསྔལ་བ་དང་སྟོང་པ་དང་བདག་མེད་པའི་རྣམ་པ་དག་གོ། །གཞན་མེད་པའི་ཕྱིར་ཞེས་བྱ་བ་ནི་འདི་ལྟར་ཆོས་ཀྱི་མཆོག་ལ་ཀུན་འབྱུང་བ་ལ་སོགས་པའི་རྣམ་པ་གཞན་ནི་མེད་དེ། སྡུག་བསྔལ་ཙམ་ལ་དམིགས་པའི་ཕྱིར་རོ། །མཐོང་བའི་ལམ་དང་འདྲ་བའི་
ཕྱིར་རོ་ཞེས་བྱ་བ་ལ་འདྲ་བ་ནི་མཐོང་བའི་ལམ་དང་ཉེ་བ་ཉིད་དང་། དེ་དང་ས་གཅིག་པ་ཉིད་དོ། །མཐོང་བའི་ལམ་ལ་ནི་བདེན་པ་གང་ཞིག་མཐོང་བར་འགྱུར་བ་དེའི་རྣམ་པ་དག་ཁོ་ན་འཐོབ་ལ། མཐོང་བའི་ལམ་དང་པོར་འདོད་པ་ན་སྤྱོད་པའི་སྡུག་བསྔལ་ལ་དམིགས་པ་ཡིན་ཏེ། ཇི་ལྟར་དེར་བཞི་ཁོ་ན་ཐོབ་
པ་དེ་བཞིན་དུ་ཆོས་མཆོག་དག་ཏུ་ཡང་ཡིན་ནོ། །འབྱེད་པ་ནི་རྣམ་པར་འབྱེད་པ་སྟེ། ངེས་པ་སྔོན་དུ་འགྲོ་བ་དེ་ལ་གནས་པ་དང་། ངེས་པར་འབྱེད་པས་ན་ངེས་པར་འབྱེད་པ་འམ། ཡང་ན་གང་གིས་ངེས་པར་འབྱེད་པ་དེ་ནི་ངེས་པར་འབྱེད་པ་ཡིན་ནོ། །དེ་ཡང་གང་ཞིག་ཅེ་ན། འཕགས་པའི་ལམ་མོ་ཞེས་བྱ་

བ་སྨོས་ཏེ། ཡང་དག་པའི་ལྟ་བ་ལ་སོགས་པའོ། །དེས་ཐེ་ཚོམ་སྤོང་བའི་ཕྱིར་དང་ཞེས་བྱ་བ་འདིས་ནི་དེ་ཉིད་ཁོ་ན་ངེས་པར་འབྱེད་པ་ཡིན་གྱི། གཞན་མ་ཡིན་ནོ་ཞེས་བསྟན་ཏོ། །རྣམ་པར་འབྱེད་པའི་ཕྱིར་རོ་ཞེས་བྱ་བ་ལ་ཅི་ཞེ་ན། འདི་ནི་ངེས་པར་འབྱེད་པ་ཡིན་ནོ་ཞེས་བྱ་བའོ། །ཇི་ལྟར་རྣམ་པར་འབྱེད་པའི་ཕྱིར་
ཡིན་ཞེ་ན། དེའི་ཕྱིར་འདི་ནི་སྡུག་བསྔལ་ལོ་ཞེས་བྱ་བ་རྒྱས་པར་སྨོས་སོ། །དེ་འདྲེན་པར་བྱེད་པ་ཉིད་ཀྱིས་ཕན་འདོགས་པར་བྱེད་པའི་ཕྱིར་ངེས་པར་འབྱེད་པའི་ཆ་དང་མཐུན་པ་རྣམས་སོ་ཞེས་བྱ་བ་ལ་གསུམ་ནི་བརྒྱུད་པའི་སྒོ་ནས་དེ་འདྲེན་པར་བྱེད་པ་ཉིད་ཡིན་ལ། ཆོས་ཀྱི་མཆོག་རྣམས་ནི་དངོས་སུའོ། །བསྒོམ་
བྱུང་ཞེས་བྱ་བ་ནི་དེ་དག་མཉམ་པར་གཞག་པ་ཡིན་པའི་ཕྱིར་རོ། །མི་ལྕོགས་པ་མེད་པ་དང་ཁྱད་པར་བསམ་གཏན་ས་པའོ་ཞེས་བྱ་བ་ལ་མི་ལྕོགས་པ་མེད་པ་དང་། ཁྱད་པར་ཅན་དང་བསམ་གཏན་དག་གི་ས་པ་ཡིན་པས་ན། མི་ལྕོགས་པ་མེད་པ་དང་། ཁྱད་པར་བསམ་གཏན་ས་པའོ། །དེ་དག་
གིས་བསྡུས་པའི་ཕྱིར་རོ་ཞེས་བྱ་བ་ནི་དེ་དག་དང་ལྡན་པའི་ཕྱིར་རོ་ཞེས་བྱ་བའི་ཐ་ཚིག་གོ། །མཐོང་བའི་ལམ་གྱི་འཁོར་ཡིན་པའི་ཕྱིར་གོང་ན་ནི་མེད་དོ་ཞེས་བྱ་བ་ནི་མཐོང་བའི་ལམ་ནི་ས་དྲུག་པ་ཡིན་ལ། ངེས་པར་འབྱེད་པའི་ཆ་དང་མཐུན་པ་དག་ཀྱང་མཐོང་བའི་ལམ་གྱི་འཁོར་དུ་གྱུར་པ་ཡིན་ཏེ། དེའི་ཕྱིར་
གོང་ན་སྟེ། གཟུགས་མེད་པའི་ཁམས་ན་མེད་དོ། །དེ་མེད་པ་ཞེས་བྱ་བ་ནི་མཐོང་བའི་ལམ་མེད་པའོ། །ཡང་ཅིའི་ཕྱིར་གོང་ན་མཐོང་བའི་ལམ་མེད་ཅེ་ན། དེའི་ཕྱིར་དེ་མེད་པ་ནི་འདོད་པའི་ཁམས་ལ་དམིགས་པའི་ཕྱིར་རོ་ཞེས་བྱ་བ་སྨོས་ཏེ། མཐོང་བའི་ལམ་ནི་འདོད་པའི་ཁམས་ལ་དམིགས་པ་
ཡིན་ནོ། །གཟུགས་མེད་པ་དག་ནི་འདོད་པའི་ཁམས་ལ་དམིགས་པ་མ་ཡིན་ཏེ། དེ་དག་ནི་རྟེན་རིང་བ་ལ་སོགས་པ་དག་གིས་རིང་བའི་ཕྱིར་རོ། །མཐོང་བའི་ལམ་འདོད་པའི་ཁམས་ལ་དམིགས་པ་ཡིན་ནོ་ཞེས་བྱ་བར་ཇི་ལྟར་ཤེས་ཤེ་ན། དེའི་ཕྱིར་དེ་ཡང་སྔར་ཡོངས་སུ་ཤེས་པར་བྱ་ཞིང་སྤང་བ་ཡིན་པའི་ཕྱིར་རོ་
ཞེས་བྱ་བ་སྨོས་ཏེ། འདོད་པའི་ཁམས་ནི་རགས་པའི་ཕྱིར་གཟུགས་དང་གཟུགས་མེད་པའི་ཁམས་ཀྱི་སྔར་ཡོངས་སུ་ཤེས་པར་བྱ་ཞིང་སྤང་བར་བྱ་བ་ཡིན་ནོ། །རྣམ་པར་སྨིན་པ་དང་བཅས་པའི་ཕྱིར་དེ་དག་གི་རྣམ་པར་སྨིན་པ་ནི་གཟུགས་ཀྱི་ཁམས་ཀྱི་ཕུང་པོ་ལྔ་ཡིན་ནོ། །ཡོངས་སུ་རྫོགས་པར་བྱེད་པ་དག་ཁོ་ན་

ཡིན་གྱི་ཞེས་བྱ་བ་ལ་ཉམས་པའི་ཆ་དང་མཐུན་པའི་བསམ་གཏན་དག་ནི་འཕེན་པར་བྱེད་པ་ཉིད་ཡིན་ནོ་ཞེས་བཤད་པར་འགྱུར་རོ། །སྲིད་པའི་གཉེན་པོ་ཡིན་པའི་ཕྱིར་ཞེས་བྱ་བ་ནི་འདི་ལྟར་མི་རྟག་པ་ལ་སོགས་པའི་རྣམ་པ་དག་གིས་སྲིད་པ་སུན་འབྱིན་པར་བྱེད་པ་དེའི་ཕྱིར་འཕེན་པར་
བྱེད་པ་མ་ཡིན་ནོ། །གཉིས་ནི་འོག་ནའང་ཡོད་པའམ་ཞེས་བྱ་བ་ལ་བྱེ་བྲག་ཏུ་སྨྲ་བ་རྣམས་ནི་འདི་མི་འདོད་དེ། ཐོས་པ་དང་བསམས་པ་ལས་བྱུང་བ་ནི་ངེས་པར་འབྱེད་པའི་ཆ་དང་མཐུན་པ་ཉིད་དུ་མི་འཐད་པའི་ཕྱིར་རོ། །རྟེན་གྱི་སྒོ་ནས་ནི་བཞི་ཆར་ཡང་འདོད་པའི་རྟེན་ཅན་ཡིན་ཏེ། དེ་ཁོ་ན་ངེས་པ་ལ་འཇུག་
པ་ཡོད་པའི་ཕྱིར་རོ། །གསུམ་ནི་མི་དག་གི་ནང་ཁོ་ན་ཞེས་བྱ་བ་ནི་བཟོད་པ་ཆེན་པོ་དང་ཆོས་མཆོག་མ་གཏོགས་པའོ། །འདི་དག་ནི་དང་པོ་མི་དེ་དག་གི་ནང་ཁོ་ནར་སྐྱེད་པར་བྱེད་དོ། །གླིང་གསུམ་དུ་ཞེས་བྱ་བ་ནི་སྒྲ་མི་སྙན་མ་གཏོགས་པ་སྟེ། དེ་ན་མངོན་པར་རྟོགས་པ་མེད་པའི་ཕྱིར་རོ། །བཞི་པ་ནི་ལྷ་དག་
གི་ནང་དུ་ཡང་སྐྱེ་བར་བྱེད་དོ་ཞེས་བྱ་བ་ནི་འདོད་པ་ན་སྤྱོད་པ་དག་གི་ནང་དུ་སྐྱེད་པར་བྱེད་དོ་ཞེས་སྐབས་དང་སྦྱར་རོ། །བཟོད་པ་ཆེན་པོ་དང་ཆོས་ཀྱི་མཆོག་ནི་དང་པོ་ལྷ་དག་གི་ནང་དུ་ཡང་སྐྱེད་པར་བྱེད་དོ། །གསུམ་ནི་སྐྱེས་པ་དང་བུད་མེད་ཀྱིས་གཉི་གའི་རྟེན་ཅན་དག་འཐོབ་བོ་ཞེས་བྱ་བ་ནི་རེ་རེས་ཀྱང་སྐྱེས་པ་དང་བུད་མེད་
ཀྱི་རྟེན་དེ་དག་འཐོབ་བོ། །ཆོས་ཀྱི་མཆོག་ཐོབ་པས་བུད་མེད་ཀྱི་དངོས་པོར་སོ་སོར་བརྟགས་པ་མ་ཡིན་པས་འགོག་པ་ཐོབ་པ་ནི་ཚེ་གཞན་དུ་མཚན་འགྱུར་བའི་དབང་དུ་བྱས་ནས་བཤད་པའོ། །བུད་མེད་ཀྱིས་གཉི་གའི་རྟེན་ཅན་འཐོབ་པར་འགྱུར་ཞེས་བྱ་བ་ནི་བུད་མེད་ཁོ་ནས་ཆོས་མཆོག་གི་གཉི་གའི་རྟེན་
ཅན་འཐོབ་ཀྱི་སྐྱེས་པས་ནི་མ་ཡིན་ཏེ། སྐྱེས་པས་ནི་སྐྱེས་པའི་རྟེན་ཅན་ཁོ་ན་འཐོབ་བོ། །ཅིའི་ཕྱིར་ཞེ་ན། བུད་མེད་ཉིད་ནི་སོ་སོར་བརྟགས་པ་མ་ཡིན་པས་འགོག་པ་ཐོབ་པའི་ཕྱིར་རོ་ཞེས་བྱ་བ་སྨོས་ཏེ། གང་ཞིག་ཆོས་ཀྱི་མཆོག་སྐྱེད་པར་བྱེད་པ་དེ་ནི་གདོན་མི་ཟ་བར་མཐོང་བའི་ལམ་སྐྱེད་པར་བྱེད་ལ་
བདེན་པ་མཐོང་བ་ནི་ཡང་བུད་མེད་ཉིད་དུ་སྐྱེ་བ་མ་ཡིན་ནོ་ཞེས་བྱ་བ་ནི་གྲུབ་པའི་མཐའ་ཡིན་ནོ། །ས་བོར་ནས་ཞེས་བྱ་བ་རྒྱས་པར་འབྱུང་སྟེ། འཕགས་པ་ནི་ངེས་པར་འབྱེད་པའི་ཆ་དང་མཐུན་པ་བསམ་གཏན་དང་པོའི་ས་པ་ནས་བསམ་གཏན་བཞི་པའི་བར་ས་གང་བ་དག་ཐོབ་པར་འགྱུར་བའི་བསམ་གཏན་དང་པོ་ལ་

སོགས་པའི་ས་དེ་དག་འདོར་བ་ན་བདག་ཉིད་ཇི་ལྟ་བ་བཞིན་བསམ་གཏན་དང་པོའི་ས་པ་ནས་བསམ་གཏན་བཞི་པའི་ས་པའི་བར་དག་གཏོང་གི །གཞན་དུ་ནི་མ་ཡིན་ཏེ། སོ་སོའི་སྐྱེ་བོའི་ས་ལྟར་འཆི་བའམ། ཡོངས་སུ་ཉམས་པས་ནི་མ་ཡིན་ནོ། །ས་འདོར་བ་ནི་ས་འཕོས་པའི་ཕྱིར་རོ་ཞེས་བྱ་བ་ནི་ཤི་སྟེ་གོང་དུ་
འཕོས་པའི་ཕྱིར་ཡིན་གྱི་འདོད་ཆགས་དང་བྲལ་བའི་ཕྱིར་ནི་མ་ཡིན་ནོ། །ཇི་ལྟར་བསམ་གཏན་དང་པོ་ནས་ཤི་འཕོས་ནས་བསམ་གཏན་གཉིས་པ་ལ་སོགས་པ་དག་ཏུ་སྐྱེ་བ་དེའི་ཚེ་ས་འདོར་བ་ཁོ་ནས་ངེས་པར་འབྱེད་པའི་ཆ་དང་མཐུན་པ་དག་གཏོང་ངོ་། །སོ་སོའི་སྐྱེ་བོ་ནི་རིས་མཐུན་པ་བཏང་བ་ཁོ་ནས་གཏོང་གི་
ས་འཕོས་པས་ནི་མ་ཡིན་ནོ། །སོ་སོའི་སྐྱེ་བོ་ས་གང་བའི་ངེས་པར་འབྱེད་པའི་ཆ་དང་མཐུན་པ་ཐོབ་པར་འགྱུར་བ་ཡང་དེའི་འོག་ཏུ་སྐྱེ་བ་ན་ངེས་པར་འབྱེད་པའི་ཆ་དང་མཐུན་པ་དག་གཏོང་བ་མ་ཡིན་ནམ་ཞེ་ན། འདི་ནི་འདོད་པ་མ་ཡིན་ཏེ། རིས་མཐུན་པ་བཏང་བ་ཁོ་ནས་བཏང་བའི་ཕྱིར་རོ། །འཕགས་པའི་
གང་ཟག་ནི་དེའི་དགེ་བའི་རྩ་བའི་རྒྱུན་མཐོང་བའི་ལམ་གྱིས་ཉེ་བར་སྤེལ་བའི་ཕྱིར་འཆི་བ་ཙམ་དང་། ཡོངས་སུ་ཉམས་པས་བཏོང་བ་མ་ཡིན་ནོ། །དངོས་གཞིས་དེ་ཉིད་ལ་བདེན་པ་མཐོང་ཞེས་བྱ་བ་འབྱུང་ངོ་། །དེས་ནི་ཚེ་དེ་ཉིད་ལ་གདོན་མི་ཟ་བར་བདེན་པ་རྣམས་མཐོང་བར་འགྱུར་ཏེ། མི་ལྕོགས་པ་མེད་པ་
དང་། བསམ་གཏན་ཁྱད་པར་ཅན་གྱི་ས་པ་དག་སྐྱེད་པས་ནི་ཚེ་དེ་ཉིད་ལ་གདོན་མི་ཟ་བར་བདེན་པ་རྣམས་མཐོང་བ་མ་ཡིན་ནོ། །ཡིད་བྱུང་བ་ཤས་ཆེ་བའི་ཕྱིར་རོ་ཞེས་བྱ་བ་ནི་ཡིད་བྱུང་བ་མང་བའི་ཕྱིར་རོ། །སོ་སོར་ཐར་པའི་སྡོམ་པ་བཞིན་དུ་ཞེས་བྱ་བ་ནི་དཔེར་ན་སོ་སོར་ཐར་པའི་སྡོམ་པ་བཏང་བ་ཕྱིས་ལེན་པ་ན་སྔོན་གྱི་
མ་ཡིན་པ་ཐོབ་པ་ལྟར་ངེས་པར་འབྱེད་པའི་ཆ་དང་མཐུན་པ་དག་རྣམ་པར་ཉམས་པ་ལས་སྔོན་གྱི་མ་ཡིན་པ་ཐོབ་པ་ཡང་དེ་དང་འདྲའོ། །དེ་ཉིད་ལ་རྒྱུ་སྨོས་པ་ནི། མ་འདྲིས་པ་དང་འབད་དེ་བསྒྲུབ་པར་བྱ་བ་ཡིན་པའི་ཕྱིར་རོ་ཞེས་བྱ་བ་སྟེ། གང་གི་ཕྱིར་ཐོག་མ་མེད་པ་ཅན་གྱི་འཁོར་བ་ན་འདྲིས་པ་མ་ཡིན་པ་དེའི་ཕྱིར་
འདོད་ཆགས་དང་བྲལ་བས་འཐོབ་པ་མ་ཡིན་ཏེ། སྔར་འཕགས་པའི་ལམ་གྱི་སྦྱོར་བ་མ་བསྐྱེད་པའི་ཕྱིར་རོ། །གང་གི་ཕྱིར་འབད་པས་བསྒྲུབ་པར་བྱ་བ་ཡིན་པ་དེའི་ཕྱིར་སྔོན་བཏང་བ་མི་འཐོབ་བོ། །མཚམས་སྟོན་པར་བྱེད་པ་ཞིག་ཡོད་ན་ནི་ཞེས་བྱ་བ་ལ་མཚམས་ནི་བར་མཚམས་སོ། །དེ་སྟོན་པར་བྱེད་པ་ནི་

སྨོན་ནས་ཤེས་པ་ཐོབ་པའོ། །དེ་ན་དེའི་གོང་ནས་སྐྱེད་པར་བྱེད་དེ། ཐོབ་ནས་ཉམས་པ་གང་ན་གནས་པ་དེའི་གོང་ནས་སོ། །མེད་ན་ནི་བཞི་ཁོ་ན་ནས་སྐྱེད་པར་བྱེད་དེ། དྲོ་བར་གྱུར་པ་ལ་སོགས་པ་དག་ཁོ་ན་ནས་སྐྱེད་པར་བྱེད་དོ། །ཉམས་པ་གཉིས་ནི་མི་ལྡན་པ་ཞེས་བྱ་བ་ལ།
རྣམ་པར་ཉམས་པ་ཞེས་བྱ་བ་ཁྱད་པར་དུ་འགྲོ་བས་བཏང་བ་ལ་བྱ་སྟེ། དཔེར་ན་སེམས་བཅུ་དྲུག་སྐྱེས་ནས། འབྲས་བུ་ཐོབ་པས་མཐོང་བའི་ལམ་བཏང་བ་ལྟ་བུའོ། །དེ་ཉིད་ཀྱི་ཕྱིར་རྣམ་པར་ཉམས་པ་ནི་གདོན་མི་ཟ་བར་མ་ཡིན་ནོ་ཞེས་བྱ་བ་སྨོས་སོ། །དེ་ནི་ཉེས་པ་བྱས་པ་འབའ་ཞིག་ཏུ་མ་ཟད་ཀྱི།
ཡོན་ཏན་གྱིས་བྱས་པ་ཡང་ཡིན་ནོ། །དེའི་ཕྱིར་དེ་ལྟར་ན་ཡོངས་སུ་ཉམས་པ་གང་ཡིན་པ་དེ་ནི་རྣམ་པར་ཉམས་པ་ཡང་ཡིན་ལ། རྣམ་པར་ཉམས་པ་གང་ཡིན་པ་དེ་ནི་གདོན་མི་ཟ་བར་ཡོངས་སུ་ཉམས་པ་མ་ཡིན་ཏེ། ཡོན་ཏན་གྱིས་བྱས་པ་གང་ཡིན་པའོ། །ཐར་པའི་ཆ་དང་མཐུན་པ་དང་ཁྱད་པར་ཅི་ཡོད་ཅེ་
ན་ཞེས་བྱ་བ་ནི་དེ་ཐོབ་པ་ཡང་ངེས་པར་མྱ་ངན་ལས་འདས་པའི་ཆོས་ཅན་ཡིན་ནོ་སྙམ་སྟེ་དྲིས་པའོ། །འདིའི་ཕན་ཡོན་ནི་སྐྱོན་མེད་ན་བདེན་པ་མཐོང་བ་ལ་ཆེས་ཉེ་བ་ཉིད་འདི་ཡིན་ནོ། །རྩེ་མོ་ཐོབ་པ་རྩ་མི་ཆད། །ཅེས་བྱ་བ་ནི་དགེ་བའི་རྟེན་ལྷག་པའི་ཕྱིར་ཏེ། དཀོན་མཆོག་གསུམ་གྱི་ཡོན་ཏན་རྣམ་པར་དཔྱད་པའི་
སྒོ་ནས་དེ་དག་ལ་དང་བ་ཐོབ་པའི་ཕྱིར་རོ། །འོ་ན་ཇི་ལྟར་ལྷ་སྦྱིན་ལས་བརྩམས་ནས་ཡོངས་སུ་ཉམས་པ་བཤད་ཅེ་ན། དེ་དག་ལ་དགེ་བའི་རྩ་བ་དེ་སྐྱེ་བ་ཉེ་བར་གྱུར་པས་མ་ཐོབ་པ་ལས་ཡོངས་སུ་ཉམས་པ་ལ་དགོངས་ནས་གསུངས་པའི་ཕྱིར་རོ། །བཟོད་ཐོབ་ངན་སོང་མི་འགྲོའོ། །ཞེས་བྱ་བ་ལ། བཟོད་པ་ལས་ནི་
རྣམ་པར་ཉམས་ཀྱང་ཞེས་བྱ་བ་འདིས་ནི་བཟོད་པ་ལས་ཡོངས་སུ་ཉམས་པ་མེད་དོ་ཞེས་སྟོན་པར་བྱེད་དོ། །དེར་འགྲོ་བའི་ལས་དང་ཉོན་མོངས་པ་ཐག་བསྲིངས་པའི་ཕྱིར་རོ་ཞེས་བྱ་བ་ནི། ངན་སོང་དུ་སྐྱེ་བའི་རྒྱུ་ལས་དང་ཉོན་མོངས་པ་འབྱུང་བ་ལ་གེགས་བྱེད་པའི་ཕྱིར་རོ་ཞེས་བྱ་བའི་དོན་ཏོ། །མི་སྐྱེ་བའི་ཆོས་ཉིད་ཐོབ་
སྟེ་ཞེས་བྱ་བ་ནི་སོ་སོར་བརྟགས་པ་མ་ཡིན་པས་འགོག་པའོ། །དེ་དག་ནི་ཅི་རིགས་པར་ཏེ་ཞེས་བྱ་བ་ནི་མི་སྐྱེ་བའི་ཆོས་ཉིད་དེ་དག་གོ། །ཅི་རིགས་པར་ཞེས་བྱ་བ་ནི་ཆུང་ངུ་དང་འབྲིང་གིས་སོ། །ཇི་ལྟར་ཞེ་ན། བཟོད་པ་ཆུང་ངུའི་ཚེ་ནི་ངན་སོང་གི་འགྲོ་བ་རྣམས་ཀྱིས་མི་སྐྱེ་བའི་ཆོས་ཉིད་ཐོབ་བོ། །ཆེན་པོའི་ཚེ་ནི་

སྒོ་ང་ལས་སྐྱེས་པ་དང་། དྲོད་གཤེར་ལས་སྐྱེས་པའི་སྐྱེ་གནས་དག་གིའོ། །ཆུང་ངུའི་ཚེ་ནི་འདུ་ཤེས་མེད་པའི་སེམས་ཅན་དང་། བྱང་གི་སྒྲ་མི་སྙན་པ་དང་། ཚངས་པ་ཆེན་པོར་སྐྱེ་བ་རྣམས་ཀྱིའོ། །ཆེན་པོའི་ཚེ་ནི་ཟ་མ་དང་མ་ནིང་དང་། མཚན་གཉིས་པའི་ལུས་རྣམས་ཀྱིའོ། །བཟོད་པ་ཆེན་
པོ་ཉིད་ཀྱི་ཚེ་ནི་སྲིད་པ་བརྒྱད་པ་ལ་སོགས་པ་དང་། མཐོང་བས་སྤང་བར་བྱ་བ་རྣམས་ཀྱིས་མི་སྐྱེ་བའི་ཆོས་ཉིད་འཐོབ་བོ། །ཉན་ཐོས་ལ་སོགས་པའི་རིགས་ཐ་དད་པའི་ཕྱིར་ཞེས་བྱ་བ་ནི། ཉན་ཐོས་དང་རང་སངས་རྒྱས་དང་ཡང་དག་པར་རྫོགས་པའི་སངས་རྒྱས་ཀྱི་རིགས་ཐ་དད་པའི་ཕྱིར་རོ། །སྲིད་ཀྱི་ཞེས་
བྱ་བ་ནི་ཐར་པའི་ཆ་དང་མཐུན་པ་སངས་རྒྱས་ཉིད་དུ་བསྐྲུན་པ་ནི་ངེས་པར་འབྱེད་པའི་ཆ་དང་མཐུན་པ་སྔར་སྐྱེད་པ་གཉིས་ཉན་ཐོས་ཀྱི་རིགས་ལས་བཟློག་ནས་སངས་རྒྱས་སུ་འགྱུར་བ་སྟེ། ཡང་སངས་རྒྱས་ཀྱི་རིགས་སྐྱེད་པར་བྱེད་དོ་ཞེས་བྱ་བའི་ཐ་ཚིག་གོ། །ངན་སོང་བཟློག་པའི་ཕྱིར་ཏེ་ཞེས་བྱ་བ་ལ། གྲག་གོ་ཞེས་
བྱ་བའི་སྒྲ་ནི་སྐྱེ་བ་ལ་དབང་བའི་ཕྱིར་དང་། སེམས་ཅན་གྱི་དོན་བྱེད་པར་སྲིད་པའི་ཕྱིར་རྒྱུ་འདི་རྒྱས་པ་མ་ཡིན་ནོ་ཞེས་བྱ་བའོ། །དེ་ཉིད་ཀྱི་ཕྱིར་སློབ་དཔོན་གྱི་རིགས་དེ་ཉིད་ཅེས་བྱ་བ་སྨོས་ཏེ། ཉན་ཐོས་ཀྱི་རིགས་བཟོད་པ་ཐོབ་པ་ཞེས་བྱ་བའོ། །ཉན་ཐོས་ཀྱི་རིགས་བཟོད་པ་ཆོས་ཉིད་ཀྱིས་ཐོབ་པ་ནི་བཟློག་པར་མི་ནུས་
པའི་ཕྱིར་རོ། །གཞན་གསུམ་ཡང་ཞེས་བྱ་བ་ལ་རང་སངས་རྒྱས་ནི་བཟློག་ནས་འགྱུར་ཏེ་ཞེས་བྱ་བར་སྦྱར་ཏེ། དེ་དག་ནི་རང་དོན་གཙོ་བོ་ཅན་ཡིན་པའི་ཕྱིར་གཞན་གྱི་དོན་དུ་ངན་འགྲོ་མི་འཇུག་པས་དེའི་ཕྱིར་བཟོད་པ་ལས་ཀྱང་བཟློག་ནས། རང་སངས་རྒྱས་སུ་འགྱུར་རོ། །སྟོན་དང་བསེ་རུ་བྱང་ཆུབ་བར། །ཞེས་བྱ་བ་ལ།
ཁུངས་ནི་འདི་དང་གཞན། དངོས་གཞིས་དེ་ཉིད་ལ་བདེན་མཐོང་། །ཞེས་བྱ་བ་འདི་ཡིན་ནོ། །ཏིང་ངེ་འཛིན་མི་གཡོ་བ་དང་གསལ་བའི་ཕྱིར་ཞེས་བྱ་བ་འདི་སྐྱོན་བརྒྱད་ལས་འགྲོལ་བའི་ཕྱིར་མི་གཡོ་བའོ། །གསལ་བ་ནི་དབང་པོ་སྦྱངས་པ་དང་རྣོ་བའི་ཕྱིར་རོ། །གང་དག་གི་ལྟར་ན་བསེ་རུ་ལྟ་བུ་ལས་གཞན་པའི་རང་སངས་རྒྱས་
ཡོད་པར་འདོད་པ་ཞེས་བྱ་བ་ནི་ཉན་ཐོས་སྔོན་དུ་འགྲོ་བ་སྔར་ངེས་པར་འབྱེད་པའི་ཆ་དང་མཐུན་པ་སྐྱེད་པའོ། །དེའི་རིགས་རྣམས་བཟློག་པ་བཀག་པ་མེད་དོ་ཞེས་བྱ་བ་ནི། དེ་དག་གི་ལུགས་ལྟར་ན་དྲོ་བར་འགྱུར་བ་དང་རྩེ་མོ་བཟློག་པ་བཀག་པ་མེད་དེ། དེའི་ཕྱིར་རང་སངས་རྒྱས་ཀྱི་རིགས་སུ་སྐྱེས་པ་བཟློག་ནས་རང་སངས་རྒྱས་

སུ་འགྱུར་རོ། །ས་བོན་འདེབས་པ་ལྟ་བུ་ནི་ཐར་པའི་ཆ་དང་མཐུན་པ་སྐྱེ་བ་ཡིན་ནོ། །འབྲུ་སྐྱེ་བ་ལྟ་བུ་ནི་ངེས་པར་འབྱེད་པའི་ཆ་དང་མཐུན་པ་སྐྱེ་བ་ཡིན་ནོ། །འབྲུ་ཆགས་པ་ལྟ་བུ་ནི་འཕགས་པའི་ལམ་ཡིན་ནོ། །འཇུག་པ་དང་ཞེས་བྱ་བ་ལ། འཇུག་པ་ནི་ཐར་པའི་ཆ་དང་མཐུན་པས་སོ། །
ཡོངས་སུ་སྨིན་པ་ནི་ངེས་པར་འབྱེད་པའི་ཆ་དང་མཐུན་པ་རྣམས་ཀྱིས་སོ། །རྣམ་པར་གྲོལ་བ་ནི་འཕགས་པའི་ལམ་གྱིས་སོ། །དེའི་སྨོན་ལམ་གྱིས་ཡོངས་སུ་གཟུང་བའི་ཕྱིར་ཞེས་བྱ་བ་ནི་ཡིད་ཀྱི་སྨོན་ལམ་ཡོངས་སུ་གཟུང་བའི་ཕྱིར་ཏེ། སྨོན་ལམ་ནི་སེམས་པའི་ཁྱད་པར་ཡིན་ནོ། །ལ་ལ་ཞིག་གིས་ཟས་
འགའ་ཙམ་བྱིན་ནས་ཞེས་བྱ་བ་ནི་ལུས་དང་ངག་ཀུན་ནས་སློང་བ་དང་བཅས་པའི་མཚན་ཉིད་ཅན་ཡིན་པའི་ཕྱིར་ཟས་བྱིན་པ་ལས་གསུམ་ཆར་ཡང་སྲིད་པ་ཡིན་ནོ། །བསླབ་པ་འགའ་ཙམ་ཡང་ཞེས་བྱ་བ་ནི་ལུས་དང་ངག་གི་ལས་ཡིན་ནོ། །ཐར་པ་འདོད་པའི་སྟོབས་བསྐྱེད་པས་ཞེས་བྱ་བ་ལ་སྟོབས་བསྐྱེད་པ་ནི་
སྟོབས་དང་ལྡན་པའོ། །ཐར་པ་འདོད་པའི་སྟོབས་བསྐྱེད་པ་ནི་ཐར་པ་འདོད་པའི་སྟོབས་བསྐྱེད་པ་སྟེ། གང་ཞིག་ལ་བསམ་པ་ཐག་པ་ནས་འཁོར་བ་འདོར་བའི་བློ་གནས་པར་འགྱུར་ཞིང་མྱ་ངན་ལས་འདས་པ་ལ་མོས་པར་འཇུག་པ་དེ་ནི་སྦྱིན་པ་དང་ཚུལ་ཁྲིམས་དང་ཐོས་པ་དང་བསམས་པ་ལས་བྱུང་བ་ཉུང་ཟད་ཀྱིས་
ཀྱང་ཐར་པའི་ཆ་དང་མཐུན་པ་འཕེན་གྱི། དེ་ལས་བཟློག་པས་མང་པོ་དག་གིས་ཀྱང་འཕེན་པར་མི་ནུས་སོ། །ཐར་པའི་ཆ་དང་མཐུན་པ་ཞེས་བྱ་བ་ལ་ཐར་པའི་ཆ་ནི་ཐར་པའི་ཆ་སྟེ། ཐར་པའི་ཆ་ནི་ཐོབ་པ་ཡིན་ལ། དེའམ་དེའི་ཕྱིར་ཕན་པ་ནི་ཐར་པའི་ཆ་དང་མཐུན་པའོ། །མིའི་ནང་ནས་འཕེན་པར་བྱེད་དེ། སངས་
རྒྱས་འབྱུང་བ་ཡོད་དམ་མེད་ཀྱང་ངོ་། །ཅི་རིགས་པར་ཤེས་རབ་དང་སྐྱོ་བ་མེད་པའི་ཕྱིར་རོ་ཞེས་བྱ་བ་ལ། རེ་ཞིག་སྒྲ་མི་སྙན་ན་ནི་གཉི་ག་མེད་དོ། །ངན་སོང་དག་ན་ནི་སྐྱོ་བ་ཡོད་ཀྱི་ཤེས་རབ་མེད་དོ། །ལྷའི་ནང་དག་ན་ནི་ཤེས་རབ་ཡོད་ཀྱི་སྐྱོ་བ་མེད་དོ། །མངོན་པར་རྟོགས་པའི་རིམ་པ་བཤད་པར་བརྩམས་པ་ཞེས་བྱ་བ་
ནི། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། །ཞེས་བྱ་བ་ནས་བརྩམས་ཏེ། ངེས་པར་འབྱེད་པའི་ཆ་དང་མཐུན་པའི་གོ་རིམས་ཀྱི་བར་བཤད་ཟིན་ཏོ། །ཆོས་ཀྱི་བཟོད་པ་ཟག་པ་མེད། །ཅེས་བྱ་བ་ནི་ངེས་པར་འབྱེད་པའི་ཆ་དང་མཐུན་པ་དག་གིས་ཀྱང་ཆོས་ལ་བཟོད་པ་ཡིན་པས་

དེའི་ཕྱིར་ཟག་པ་མེད་པ་སྨོས་སོ། །རྒྱུ་མཐུན་པས་བྱེ་བྲག་ཏུ་བྱས་ཏེ་ཞེས་བྱ་བ་ནི་ཆོས་ཤེས་པ་དེའི་རྒྱུ་མཐུན་པ་ཡིན་ཏེ། དེས་ན་ཟག་པ་མེད་པ་ཡིན་པར་ཤེས་པར་བྱ་བའི་ཕྱིར་ངེས་པར་འབྱེད་པའི་ཆ་དང་མཐུན་པའི་བཟོད་པ་ལས་བྱེ་བྲག་ཏུ་བྱས་ཏེ། གོ་བར་བྱེད་པ་ཡིན་པའི་ཕྱིར་བདེ་བླག་ཏུ་རྟོགས་པར་བྱ་བའི་ཕྱིར་
བཤད་དོ། །མེ་ཏོག་དང་འབྲས་བུའི་ཤིང་བཞིན་ནོ་ཞེས་བྱ་བ་ལ། དཔེར་ན་མེ་ཏོག་གི་ཆེད་ཀྱི་ཤིང་ལ་མེ་ཏོག་གི་ཤིང་ཞེས་བྱ་བ་དང་། དེ་བཞིན་དུ་འབྲས་བུའི་ཆེད་ཀྱི་ཤིང་ལ་འབྲས་བུའི་ཤིང་ཞེས་བྱ་བ་ལྟར། ཆོས་ཤེས་པའི་བཟོད་པ་ཡིན་པ་ཡང་དེ་དང་འདྲའོ། །དེ་ཉིད་ཅེས་བྱ་བ་ནི་བཟོད་པའོ། །དེ་ཅིའི་ཕྱིར་ཞེ་ན།
ཡང་དག་པ་ཉིད་དུ་ངེས་པར་ཞུགས་པའི་ཕྱིར་རོ་ཞེས་བྱ་བ་སྨོས་སོ། །དེ་ཉིད་ཇི་ལྟར་ཞེ་ན། ལུང་གིས་སྒྲུབ་པར་བྱེད་པ་ནི་ཡང་དག་པ་ཉིད་ནི་མདོ་ལས་ཞེས་བྱ་བའོ། །ཇི་ལྟར་ཞེ་ན། ཡང་དག་པ་གང་ཞིག །འདོད་ཆགས་ཡོངས་སུ་གཏུགས་ཏེ་སྤངས་པ་དེ་ཡིན་ནོ་ཞེས་བྱ་བ་རྒྱས་པར་འབྱུང་ངོ་། །དེར་ཞེས་བྱ་བ་ནི་ཡང་
དག་པ་ཉིད་དུའོ། །གཅིག་ཏུ་གྱུར་པའོ་ཞེས་བྱ་བ་ནི་སྲིད་པ་བདུན་གོར་མ་ཆག་པར་མྱ་ངན་ལས་འདས་པར་འགྱུར་བའོ། །དེར་འཇུག་པ་ནི་མངོན་པར་འགྲོ་བ་སྟེ་ཞེས་བྱ་བ་ནི་གཅིག་ཏུ་གྱུར་པའི་མཚན་ཉིད་ཅན་ངེས་པར་དེར་ཞེས་བསྟན་ཏོ། །ཡང་དེར་མངོན་པར་འགྲོ་བ་ཅི་ཞིག་ཅེ་ན། གནས་སྐབས་དེ་ཐོབ་པ་སྟེ། དེ་
སྐྱེ་གནས་ཡང་དག་པ་ཉིད་དུ་ངེས་པ་འཐོབ་པས་ངེས་པ་ལ་འཇུག་པ་ཞེས་བྱའོ། །མར་མེ་དང་སྐྱེ་བ་བཞིན་ནོ་ཞེས་བྱ་བ་ལ་མ་འོངས་པ་བྱེད་པ་དང་ལྡན་པ་ནི་གསུམ་སྟེ། སྐྱེ་བ་དང་། མར་མེ་དང་། སྡུག་བསྔལ་ལ་ཆོས་ཤེས་པའི་བཟོད་པའོ། །སྐྱེ་བཞིན་པའི་མར་མེས་མུན་པ་སེལ་ཅིང་འགག་བཞིན་པས་
སྡོང་བུ་དང་མར་བསྲེགས་པ་དེ་བཞིན་དུ་སྡུག་བསྔལ་ལ་ཆོས་ཤེས་པ་སྐྱེ་བཞིན་པས་སོ་སོའི་སྐྱེ་བོ་ཉིད་སྤོང་ལ། འགག་བཞིན་པས་ཕྲ་རྒྱས་བཅུ་སྤོང་ངོ་། །གཞན་དག་ན་རེ་འཇིག་རྟེན་པའི་ཆོས་ཀྱི་མཆོག་རྣམས་ཀྱིས་ཞེས་བྱ་བ་ལ། ཅི་ཞེ་ན། སོ་སོའི་སྐྱེ་བོ་ཉིད་བཟློག་གོ་ཞེས་བྱ་བ་སྐབས་དང་སྦྱར་རོ། །
མ་ཡིན་ཏེ་དེའི་ཆོས་ཡིན་པའི་ཕྱིར་རོ་ཞེས་བྱ་བ་ནི་སོ་སོའི་སྐྱེ་བོའི་ཆོས་ཡིན་པའི་ཕྱིར་ཞེས་བྱ་བའི་ཐ་ཚིག་སྟེ་སོ་སོའི་སྐྱེ་བོའི་ཆོས་དེ་ཉིད་བཟློག་པ་མི་སྲིད་དོ། །དེ་དང་འགལ་བའི་ཕྱིར་ཉེས་པ་མེད་དེ་ཞེས་བྱ་བ་ནི་དེ་དག་སོ་སོའི་ཆོས་ཡིན་མོད་ཀྱི། འོན་ཀྱང་སོ་སོའི་སྐྱེ་བོ་ཉིད་དང་འགལ་བ་ཡིན་ནོ། །དགྲ་བོའི་ཕྲག་པ་ལ་

ཞོན་ནས་དེ་འཚོག་པ་བཞིན་ནོ་ཞེས་བྱ་བ་ནི་དཔེར་ན་འགའ་ཞིག་དགྲ་བོའི་ཕྲག་པ་ལ་ཞོན་ཏེ། དགྲ་འཚོག་པ་དེ་བཞིན་དུ་སོ་སོའི་སྐྱེ་བོ་ཉིད་ཀྱི་དགྲ་ལ་ཞོན་ཏེ། སོ་སོའི་སྐྱེ་བོ་དེ་ཉིད་འཇོམས་པར་བྱེད་པ་ཡིན་ནོ། །གཞན་དག་ན་རེ་གཉི་གས་ཞེས་བྱ་བ་ནི། འཇིག་རྟེན་པའི་ཆོས་ཀྱི་མཆོག་
རྣམས་དང་བཟོད་པས་སོ་སོའི་སྐྱེ་བོ་ཉིད་བཟློག་པའོ། །ཇི་ལྟར་ཞེ་ན། བར་ཆད་མེད་པ་དང་རྣམ་པར་གྲོལ་བའི་ལམ་དང་ཆོས་མཐུན་པའི་ཕྱིར་རོ་ཞེས་བྱ་བ་སྨོས་ཏེ། འཇིག་རྟེན་པའི་ཆོས་ཀྱི་མཆོག་རྣམས་ནི་བར་ཆད་མེད་པའི་ལམ་དང་འདྲ་བ་ཡིན་ཏེ། དེ་ཐོབ་པ་དང་འགལ་བའི་ཕྱིར་རོ། །སྡུག་བསྔལ་ལ་ཆོས་ཤེས་
པའི་བཟོད་པ་ནི་རྣམ་པར་གྲོལ་བའི་ལམ་དང་འདྲ་བ་ཡིན་ཏེ། དེ་མི་ལྡན་པ་དང་ལྷན་ཅིག་སྐྱེ་བའི་ཕྱིར་རོ། །དེ་ནས་ནི་དེ་ཉིད་ལ་ཆོས་ཤེས་ཞེས་བྱ་བ་ལ་ཆོས་ཤེས་པ་ནི་ཆོས་ཙམ་ངེས་པར་འཛིན་པར་བྱེད་པའོ། །དང་པོ་ཉིད་དུ་ཆོས་ཀྱི་དེ་ཁོ་ན་ཉིད་ཤེས་པའི་ཕྱིར་ཞེས་བྱ་བ་ལ་ཟག་པ་དང་བཅས་པའི་ཆོས་རྣམས་ཀྱི་དེ་ཁོ་ན་ཉིད་
ནི་ཕྱིན་ཅི་མ་ལོག་པའི་ཕྱིར་མི་རྟག་པ་དང་སྡུག་བསྔལ་བ་ལ་སོགས་པ་ཡིན་ལ། དེ་རྟོགས་པའི་ཕྱིར་སྡུག་བསྔལ་ལ་ཆོས་ཤེས་པ་ཞེས་བྱ་སྟེ། དེ་ཁོ་ན་ཉིད་ཀྱི་སྒྲ་མི་མངོན་པར་བྱ་བའི་ཕྱིར་རོ། །དེ་བཞིན་དུ་ཀུན་འབྱུང་བ་ལ་སོགས་པ་དག་ལ་ཡང་ཅི་རིགས་པར་བརྗོད་པར་བྱའོ། །རྗེས་སུ་ཤེས་པ་ཡང་ཆོས་ཀྱི་དེ་ཁོ་ན་
ཉིད་ཤེས་པ་ཡིན་མོད་ཀྱི། དང་པོ་ཉིད་དུ་ནི་མ་ཡིན་པས་ཆོས་ཤེས་པ་ཞེས་མི་བྱའོ། །དེའི་རྒྱུ་ལས་བྱུང་བའི་ཕྱིར་ཞེས་བྱ་བ་ནི། དེའི་རྒྱུ་ཅན་ཡིན་པའི་ཕྱིར་ཞེས་བྱ་བའི་ཐ་ཚིག་སྟེ། ཇི་ལྟར་ཆོས་ཤེས་པས་འདོད་པའི་སྡུག་བསྔལ་ལ་སོགས་པའི་བདེན་པ་ལ་སྡུག་བསྔལ་ལ་སོགས་པའི་རྣམ་པ་དག་ཏུ་རྟོགས་ཤིང་
ཡོངས་སུ་ཤེས་པ་དེ་ཁོ་ན་བཞིན་དུ་གཟུགས་དང་གཟུགས་མེད་པ་ན་སྤྱོད་པའི་སྡུག་བསྔལ་རྟོགས་པའི་ཕྱིར་རྗེས་སུ་ཤེས་པ་ཡིན་ནོ། །དེ་བཞིན་དུ་ཞེས་བྱ་བ་རྒྱས་པར་འབྱུང་ངོ་། །མཇུག་ཐོགས་སུ་སྐྱེ་བའི་རིམ་གྱིས་ཞེས་བྱ་བ་ནི་མཇུག་ཐོགས་སུ་སྐྱེ་བའི་རིམ་པ་སྟེ། དེ་ནས་སོ། །ལྷག་མ་ལ་ཞེས་བྱ་བ་ནི་གཟུགས་
དང་གཟུགས་མེད་པ་ན་སྤྱོད་པའི་ཀུན་འབྱུང་བ་ལའོ། །སྡེ་པ་གཞན་དག་ཅེས་བྱ་བ་ནི་འཕགས་པ་ཆོས་སྲུང་བའི་སྡེ་པ་ལ་སོགས་པ་དག་བདེན་པ་རྣམས་མངོན་པར་རྟོགས་པ་གཅིག་ཏུ་བརྗོད་དོ། །ཇི་ལྟར་ཞེ་ན། ཁ་ཅིག་གི་ལྟར་ན་སྡུག་བསྔལ་ཤེས་པ་ཁོ་ནས་འཕགས་པའི་བདེན་པ་བཞི་རྟོགས་པས་མངོན་པར་རྟོགས་

པ་གཅིག་པ་ནི་སྐད་ཅིག་མ་གཅིག་མངོན་པར་རྟོགས་པ་ཡིན་ནོ། །ཁ་ཅིག་གི་ནི་སྐད་ཅིག་མ་བཞི་སྟེ། དེ་དག་ལ་མཉམ་པར་བཞག་པ་དང་། མཉམ་པར་མ་བཞག་པའི་དབྱེ་བ་མ་བྱས་པར་བདེན་པ་བཞི་ལ་ཤེས་པའི་སྐད་ཅིག་མ་བཞིའོ། །ཁ་ཅིག་གི་བརྒྱད་དེ། འདོད་པ་དང་གཟུགས་དང་གཟུགས་མེད་པའི་བདེན་པའི་
དབྱེ་བ་དང་། ཆོས་རྗེས་སུ་ཤེས་པའི་དབྱེ་བས་བརྒྱད་ཡིན་ནོ། །ཁ་ཅིག་གི་ནི་སྐད་ཅིག་མ་བཅུ་གཉིས་ཏེ། སྐད་ཅིག་མ་བརྒྱད་པོ་དེ་དག་ཁོ་ན་ལ་གཞན་འཇིག་རྟེན་པའི་ཤེས་པ་བཞི་འབྱུང་ངོ་། །དེ་ལྟར་སྡེ་པ་གཞན་དག་གི་བློ་ཐ་དད་པར་གྱུར་ཏོ། །བྱེ་བྲག་མེད་པར་མངོན་པར་རྟོགས་པ་ཞེས་བྱ་བའོ། །དེ་ནི་རྣམ་པ་
གསུམ་སྟེ་ཞེས་བྱ་བ་ནི། མཐོང་བའི་མངོན་པར་རྟོགས་པ་དང་། དམིགས་པའི་མངོན་པར་རྟོགས་པ་དང་། བྱ་བའི་མངོན་པར་རྟོགས་པའོ། །མཐོང་བའི་མངོན་པར་རྟོགས་པ་ནི་ཞེས་བྱ་བ་ནི། མཐོང་བ་ཉིད་མངོན་པར་རྟོགས་པ་ཡིན་པ་ནི། བདེན་པ་མངོན་པར་རྟོགས་པ་སྟེ། འདི་ལྟར་ཤེས་རབ་མེད་པར་བདེན་པ་
རྣམས་མཐོང་བ་མེད་པས་དེའི་ཕྱིར་མཐོང་བའི་མངོན་པར་རྟོགས་པ་ཡིན་ནོ། །ཟག་པ་མེད་པའི་ཤེས་རབ་ཀྱིས་བདེན་པ་རྣམས་ཞེས་བྱ་བ་ནི་དགེ་སློང་དག་ཟག་པ་མེད་པའི་ཤེས་རབ་ཀྱིས་མཐོང་བ་གང་ཡིན་པ་དེ་ནི་མཐོང་བའོ་ཞེས་འབྱུང་བའི་ཕྱིར་རོ། །དམིགས་པའི་མངོན་པར་རྟོགས་པ་ནི་དམིགས་པའི་མངོན་པར་རྟོགས་
པ་སྟེ། འདིར་དམིགས་པ་ནི་འཛིན་པ་ལ་འདོད་དོ། །གལ་ཏེ་དམིགས་པ་འཛིན་པ་ཡིན་ན། མཐོང་བ་དང་དམིགས་པ་གཉིས་ལ་ཁྱད་པར་ཅི་ཡོད་ཅེ་ན། ཤེས་རབ་ཁོ་ནས་མཐོང་བ་ཡིན་ལ། ཤེས་རབ་དང་མཚུངས་པར་ལྡན་པ་དག་གིས་དམིགས་པ་ཡིན་ནོ་ཞེས་བྱ་བ་འདི་ནི་ཁྱད་པར་ཡིན་ནོ། །དེ་ལྟར་བྱས་དང་།
དམིགས་པའི་མངོན་པར་རྟོགས་པ་ནི་དེ་དང་མཚུངས་པར་ལྡན་པ་རྣམས་ཀྱིས་ཀྱང་ཞེས་བྱ་བ་སྨོས་ཏེ། ཀྱང་ཞེས་བྱ་བའི་སྒྲས་ནི་ཤེས་རབ་ཀྱང་གཟུང་ངོ་། །དེའི་ཕྱིར་དེ་ལྟར་ན་རེ་ཞིག་མཐོང་བ་གང་ཡིན་པ་དེ་ནི་དམིགས་པ་ཡང་ཡིན་ལ། ཚོར་བ་ལ་སོགས་པའི་དམིགས་པ་ནི་མཐོང་བ་མ་ཡིན་ནོ། །བྱ་བ་ཉིད་མངོན་པར་རྟོགས་
པ་ཡིན་པ་ནི་བྱ་བའི་མངོན་པར་རྟོགས་པ་ཡིན་པའམ། ཡང་ན་བདེན་པ་གསུམ་གྱི་བྱ་བ་གང་ཡིན་པ་བྱ་བ་ཡིན་ཏེ། དེ་ཡང་མཇུག་ཐོགས་སུ་འཆད་པར་འགྱུར་རོ། །ལྡན་པ་མ་ཡིན་པ་ཞེས་བྱ་བ་ལ། ཀྱང་ཞེས་བྱ་བའི་སྒྲ་ནི་མཚུངས་པར་ལྡན་པ་དང་། ཤེས་རབ་ཀྱིས་ཀྱང་ཡིན་པའོ། །ཚུལ་ཁྲིམས་དང་སྐྱེ་

བ་ལ་སོགས་པ་ཞེས་བྱ་བའི་སོགས་པ་ཞེས་བྱ་བའི་སྒྲས་ནི་ཐོབ་པ་དང་གནས་པ་ལ་སོགས་པ་དག་བསྡུའོ། །ལྷན་ཅིག་འབྱུང་བ་ཐམས་ཅད་ཕན་ཚུན་བྱ་བ་ཡིན་པའི་ཕྱིར་ཏེ། ཐོབ་པ་མ་གཏོགས་པའི་ལྷན་ཅིག་འབྱུང་བ་ཚུལ་ཁྲིམས་ལ་སོགས་པ་དག་ནི་ལྷན་ཅིག་འབྱུང་བའི་རྒྱུ་
ཡིན་པའི་ཕྱིར་རོ། །སྡུག་བསྔལ་མཐོང་ན་དེའི་ཞེས་བྱ་བ་ནི་མངོན་པར་རྟོགས་པ་པོ་འམ་སྡུག་བསྔལ་གྱིའོ། །མངོན་པར་རྟོགས་པ་རྣམ་པ་གསུམ་ནི་ཇི་སྐད་དུ་བཤད་པའོ། །དེ་ལ་བྱ་བའི་མངོན་པར་རྟོགས་པ་ནི་སྡུག་བསྔལ་ཡོངས་སུ་ཤེས་པའོ། །ཀུན་འབྱུང་བ་ལ་སོགས་པ་གསུམ་གྱི་མངོན་པར་རྟོགས་པ་ཇི་ལྟར་ཞེ་
ན། དེའི་ཕྱིར་སྤོང་བ་དང་མངོན་སུམ་དུ་བྱེད་པ་དང་། བསྒོམ་པའི་ཕྱིར་རོ་ཞེས་བྱ་བ་སྨོས་ཏེ། སྡུག་བསྔལ་མཐོང་བའི་དུས་ན་ཀུན་འབྱུང་སྤོང་ཞིང་འགོག་པ་ནི་དེ་ཐོབ་པའི་སྒོ་ནས་མངོན་སུམ་དུ་བྱེད་ལ། མངོན་དུ་གྱུར་པའི་སྒོ་ནས་ལམ་བསྒོམ་པ་ཡིན་ནོ། །རྣམ་པ་ཐ་དད་པའི་ཕྱིར་ཞེས་བྱ་བ་ནི་འདི་དག་རེ་རེ་ཞིང་རྣམ་
པ་བཞི་པ་ཡིན་པའི་ཕྱིར་དང་། རྣམ་པ་དག་ཀྱང་ཕན་ཚུན་དོན་ཐ་དད་པའི་ཕྱིར་དང་། ཤེས་པ་གཅིག་ལ་རྣམ་པ་མང་པོ་མི་འཐད་པའི་ཕྱིར་རོ། །འོན་ཏེ་ཐམས་ཅད་བདག་མེད་པའི་རྣམ་པར་ཞེས་བྱ་བ་ནི་བདག་མེད་པའི་རྣམ་པ་ནི་བདེན་པ་བཞི་ཆར་ལ་མཚུངས་པ་ཉིད་ཀྱི་ཕྱིར་དེ་མཐོང་བའི་སྒོ་ནས་མངོན་པར་རྟོགས་
པ་གཅིག་པར་མི་འགལ་ལོ་ཞེ་ན། འོ་ན་ནི་བདེན་པ་རྣམས་སྡུག་བསྔལ་ལ་སོགས་པར་མཐོང་བར་མི་འགྱུར་ཞེས་བྱ་བ་ནི། སྡུག་བསྔལ་བ་དང་། ཀུན་འབྱུང་བ་དང་། འགོག་པ་དང་། ལམ་ཞེས་བྱ་བ་འམ། ཡང་ན་སྡུག་བསྔལ་ལ་སོགས་པ་དག་ཏུ་སྟེ། བདེན་པ་རྣམས་སྡུག་བསྔལ་ལ་སྡུག་བསྔལ་ལ་སོགས་
པ་རྣམ་པ་བཅོ་ལྔར་མཐོང་བར་མི་འགྱུར་རོ། །དེ་ལྟར་ཞེས་བྱ་བ་རྒྱས་པར་འབྱུང་ངོ་། །གལ་ཏེ་སྡུག་བསྔལ་ལ་སོགས་པའི་བདེན་པ་རེ་རེ་ལ་ཟག་པ་མེད་པའི་ཤེས་རབ་ཀྱིས་སྡུག་བསྔལ་ལ་སོགས་པའི་རྣམ་པ་དག་ཏུ་མཐོང་བར་མི་འདོད་ན་ནི་དེའི་ཕྱིར་འདི་ནི་འཕགས་པ་ཉན་ཐོས་སྡུག་བསྔལ་དུ་ཡིད་ལ་བྱེད་པ་འམ་ཞེས་བྱ་བ་
རྒྱས་པར་འབྱུང་བའི་མདོ་དང་འགལ་ལོ། །རྣམ་པ་དེ་ལྟ་བུ་ནི་སྦྱོར་བའི་གནས་སྐབས་ན་ཡང་ཡོད་དོ་ཞེ་ན། དེའི་ཕྱིར་ཟག་པ་མེད་པའི་ཡིད་ལ་བྱེད་པ་དང་ཞེས་བྱ་བ་སྨོས་ཏེ། སྦྱོར་བའི་གནས་སྐབས་ན་ནི་ཟག་པ་མེད་པའི་ཡིད་ལ་བྱེད་པ་མི་སྲིད་དོ། །གལ་ཏེ་དེ་ལྟ་བུ་ནི་བསྒོམ་པའི་ལམ་ལ་ཡིན་ནོ་ཞེས་བྱ་བ་ནི་འཕགས་པ་

ཉན་ཐོས་སྡུག་བསྔལ་ལ་ཞེས་བྱ་བ་ལ་སོགས་པ་གང་ཡིན་པའོ། །བརྗོད་པ་མ་ཡིན་ཏེ། ཇི་ལྟར་མཐོང་བ་བཞིན་བསྒོམ་པའི་ཕྱིར་རོ། །འདི་ལྟར་བདེན་པ་རྣམས་སྔར་ཇི་ལྟར་མཐོང་བ་དེ་ཁོ་ན་ལྟར་ཕྱིས་དེ་དག་བསྒོམ་པའི་ལམ་དུ་འགྱུར་རོ། །ལྷག་མ་རྣམས་ལ་དབང་ཐོབ་པའི་ཕྱིར་ཞེས་བྱ་བ་ལ། དབང་ཐོབ་པ་ནི་སྦྱོར་
བ་མེད་པར་ཀུན་འབྱུང་ལ་སོགས་པ་མཐོང་བ་མངོན་དུ་བྱེད་པའི་ནུས་པ་ཐོབ་པ་ཡིན་ནོ། །བར་སྐབས་སུ་ལྡང་བ་ཡོད་མེད་ཅེས་དཔྱད་པར་བྱ་བ་ཡིན་ནོ་ཞེས་བྱ་བ་ལ། འདི་ལྟར་མདོ་ལས་གང་ཞིག་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་ཅིག་ལ་ཟས་སྟེར་ཞེས་བྱ་བ་ལ་སོགས་པ་གསུངས་ན།
མ་ལངས་པ་དེས་ནི་ཟས་ཟ་བ་སྲིད་པར་ཡིན་ནོ། །ཁ་ཅིག་ན་རེ་རྐྱེན་མ་ཚང་བས་བར་སྐབས་སུ་ལྡང་བ་ཡོད་དོ་ཞེས་ཟེར་རོ། །བྱེ་བྲག་ཏུ་སྨྲ་བ་རྣམས་ན་རེ་མེད་དེ། སྲིད་པའི་དབང་དུ་མཛད་ནས་ཤིང་སཱ་ལ་དང་། གསོ་སྦྱོང་བསྟན་པ་ལྟར་ཡོངས་སུ་བརྟག་པ་ཉེ་བར་བཟུང་སྟེ་གསུངས་སོ་ཞེས་ཟེར་རོ། །གཅིག་མཐོང་ན་ལྷག་
མ་རྣམས་ཀྱི་བྱ་བའི་མངོན་པར་རྟོགས་པ་ཡིན་ནོ་ཞེས་འབྱུང་བའི་ཕྱིར་ཞེས་བྱ་བ་ནི་གང་གི་ཕྱིར་འདི་སྐད་དུ་སྡུག་བསྔལ་མཐོང་ན་དེའི་མངོན་པར་རྟོགས་པ་ནི་གསུམ་མོ་ཞེས་བྱ་བའོ། །ཇི་ལྟར་ཞེ་ན། སྡུག་བསྔལ་མཐོང་བའི་ཉོན་མོངས་པ་ཟད་པ་གང་ཡིན་པ་དེ་ནི་ཀུན་འབྱུང་བ་སྤངས་པའོ། །འགོག་པ་ཐོབ་པ་གང་ཡིན་པ་དེ་ནི་
འགོག་པ་མངོན་སུམ་དུ་བྱས་པའོ། །དེའི་ཚེ་གཉེན་པོ་མངོན་དུ་བྱས་པ་གང་ཡིན་པ་དེ་ནི་ལམ་བསྒོམ་པའོ། །དེ་ལྟར་ཀུན་འབྱུང་བ་ལ་སོགས་པ་རྣམས་བྱ་བའི་མངོན་པར་རྟོགས་པ་ཡིན་ཏེ། སྤངས་པ་དང་མངོན་སུམ་དུ་བྱེད་དང་། སྒོམ་པའི་ཕྱིར་རོ། །དེའི་ཕྱིར་ཁོ་བོ་ཅག་གིས་ཀྱང་དེ་ལྟར་ཁས་བླངས་པའི་ཕྱིར་ཉེས་
པ་མེད་དོ། །མདོ་ལས་རིམ་གྱིས་མངོན་པར་རྟོགས་པ་གསུངས་པའི་ཕྱིར་ཉེས་པ་ཡོད་པ་མ་ཡིན་ནམ་ཞེ་ན། དེའི་ཕྱིར་མདོ་ལས་མཐོང་བའི་མངོན་པར་རྟོགས་པའི་ཕྱིར་ཞེས་བྱ་བ་སྨོས་ཏེ། བདེན་པ་རེ་རེ་ཡང་མཐོང་བར་འདོད་པར་བྱ་སྟེ། དེ་ལྟ་མ་ཡིན་ན་དེ་ལ་ལོག་པར་ཞུགས་པའི་ཉོན་མོངས་པ་རྣམས་སྤངས་པར་མི་
འགྱུར་རོ། །དཔེ་དང་བཅས་པའི་མདོ་གསུམ་ཁུངས་སུ་ཡོད་དོ་ཞེས་བྱ་བ་ནི་ཡང་དག་པར་ལྡན་པའི་ལུང་ལས་འབྱུང་བ་ཡིན་ནོ། །ཇི་སྐད་དུ་ཞེ་ན། ཁྱིམ་བདག་མགོན་མེད་ཟས་སྦྱིན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་ཅི་ལགས་འཕགས་པའི་བདེན་པ་བཞི་པོ་མཐར་གྱིས་མངོན་པར་

རྟོགས་པ་འམ། འོན་ཏེ་མངོན་པར་རྟོགས་པ་གཅིག་ལགས། ཁྱིམ་བདག་འཕགས་པའི་བདེན་པ་བཞི་ནི་མཐར་གྱིས་མངོན་པར་རྟོགས་ཀྱིས། མངོན་པར་རྟོགས་པ་གཅིག་པ་ནི་མེད་དོ། །ཁྱིམ་བདག་གང་ཞིག་འདི་སྐད་དུ། སྡུག་བསྔལ་འཕགས་པའི་བདེན་པ་མངོན་པར་མ་རྟོགས་
པར་ཀུན་འབྱུང་བ་འཕགས་པའི་བདེན་པ་རྟོགས་པར་བྱའོ། །ཀུན་འབྱུང་བ་འཕགས་པའི་བདེན་པ་མངོན་པར་མ་རྟོགས་པར་འགོག་པ་འཕགས་པའི་བདེན་པ་རྟོགས་པར་བྱའོ། །འགོག་པ་འཕགས་པའི་བདེན་པ་མངོན་པར་མ་རྟོགས་པར་ལམ་འཕགས་པའི་བདེན་པ་རྟོགས་པར་བྱའོ་ཞེས་སྨྲ་ན། དེ་སྐད་དུ་ནི་མ་སྨྲ་
ཞིག་ཅེས་བརྗོད་པར་བྱའོ། །ཅིའི་ཕྱིར་ཞེ་ན། སྡུག་བསྔལ་འཕགས་པའི་བདེན་པ་མངོན་པར་མ་རྟོགས་པར་ཀུན་འབྱུང་བ་འཕགས་པའི་བདེན་པ་མངོན་པར་རྟོགས་པ་གང་ཡིན་པ་དེ་ནི་གནས་མེད་ཅིང་གོ་སྐབས་མེད་དོ་ཞེས་བྱ་བ་ནས་འདི་ནི་གནས་མེད་ཅིང་ཞེས་བྱ་བའི་བར་སྔ་མ་བཞིན་ནོ། །འདི་ནི་གནས་ཡོད་དོ་ཞེས་
བྱ་བའི་བར་ཡང་སྔ་མ་བཞིན་ནོ། །ཁྱིམ་བདག་དཔེར་ན་གང་ཞིག་འདི་སྐད་དུ་བདག་གིས་ཁང་པ་རྩེག་མ་འམ་ཁང་པ་རྩེག་མ་ཆེན་པོའི་རྨང་ལ་རྐང་པ་མ་གཞག་པར་རྩིག་པ་ལ་གཞག་པར་བྱའོ། །རྩིག་པ་ལ་མ་གཞག་པར་ཕྱམ་སོ་ལ་གཞག་པར་བྱའོ། །ཕྱམ་སོ་ལ་མ་གཞག་པར་གཡོགས་མ་ལ་གཞག་པར་
བྱའོ་ཞེས་སྨྲ་ན། དེ་སྐད་དུ་མ་སྨྲ་ཞིག་ཅེས་བརྗོད་པར་བྱའོ། །དེ་ཅིའི་ཕྱིར་ཞེ་ན། ཁང་པ་རྩེག་མ་འམ་ཞེས་བྱ་བ་རྒྱས་པར་འབྱུང་ངོ་། །ཁྱིམ་བདག་མགོན་མེད་ཟས་སྦྱིན་གྱིས་ཇི་སྐད་ཞུས་པ་དེ་སྐད་དུ་དགེ་སློང་གཅིག་ཅིག་གིས་ཀྱང་ཞུས་ཏེ། དཔེའི་ཁྱད་པར་ནི་དགེ་སློང་གང་ཞིག་འདི་སྐད་དུ་བདག་གིས་བང་རིམ་
བཞི་ཡོད་པའི་ཐེམ་སྐས་ཐ་མ་ལ་མ་གཟེགས་པར་གཉིས་པ་ལ་གཟེགས་པར་བྱའོ། །གཉིས་པ་ལ་མ་གཟེགས་པར་གསུམ་པ་ནས་བཞི་པ་ལ་གཟེགས་པར་བྱའོ་ཞེས་སྨྲ་ན། དེ་སྐད་དུ་མ་སྨྲ་ཞིག་ཅེས་བརྗོད་པར་བྱའོ་ཞེས་འབྱུང་བའོ། །ཚེ་དང་ལྡན་པ་ཀུན་དགའ་བོས་ཀྱང་དེ་སྐད་དུ་ཞུས་ཏེ། དཔེའི་ཁྱད་
པར་ནི་ཀུན་དགའ་བོ་དཔེར་ན་གང་ཞིག་འདི་སྐད་དུ་བདག་གིས་གདང་བུ་བཞི་པའི་སྐས་ལ། གདང་བུ་ཐ་མ་ལ་རྐང་པས་མ་གཟེགས་པར་གདང་བུ་གཉིས་པ་ལ་གཟག་གོ་ཞེས་བྱ་བ་ནས་ཁང་བཟངས་ཀྱི་ཐོག་ཏུ་གཟེག་གོ་ཞེས་སྨྲ་ན་དེ་སྐད་དུ་མ་སྨྲ་ཞིག་ཅེས་བརྗོད་པར་བྱ་བའི་བར་རྒྱས་པར་འབྱུང་བའོ། །དེ་བཞིན་དུ་ཀུན་

དགའ་བོ་གང་ཞིག་འདི་སྐད་དུ་བདག་གིས་སྡུག་བསྔལ་འཕགས་པའི་བདེན་པ་མངོན་པར་མ་རྟོགས་པར་ཞེས་བྱ་བ་ནས་འདི་ནི་གནས་མེད་ཅིང་ཞེས་བྱ་བའི་བར་དུ་རྒྱས་པར་འབྱུང་ངོ་། །མདོ་གསུམ་ནི་འདི་དག་ཡིན་ནོ། །གང་ཞིག་སྡུག་བསྔལ་ལ་ནེམ་ནུར་མེད་ཅིང་ཞེས་བྱ་བ་རྒྱས་པར་འབྱུང་བ་ནི་གལ་ཏེ་བདེན་པ་མངོན་
པར་རྟོགས་པ་གཅིག་ཏུ་མི་འདོད་ན། མདོ་ཇི་ལྟར་དྲང་ཞེས་བྱ་བའོ། །སངས་རྒྱས་ཞེས་བྱ་བ་ནི་མི་སློབ་པའི་ཆོས་རྣམས་ཡིན་ལ། དེ་དག་ཀྱང་ལམ་ཡིན་ཏེ། ལམ་གྱི་བདེན་པ་མངོན་པར་མ་རྟོགས་པར་ནི་དེ་ལ་ཐེ་ཚོམ་མེད་པར་མི་རིགས་སོ། །རྣམ་པ་གཅིག་ཏུ་ན་སྡུག་བསྔལ་སྨོས་པས་ཀུན་འབྱུང་ཡང་བཟུང་བ་
ལས་སངས་རྒྱས་ཞེས་བྱ་བ་སྨོས་པས་འགོག་པ་དང་ལམ་གཉིས་ཀྱང་བཟུང་སྟེ། སངས་རྒྱས་ནི་སྤངས་པ་དང་ཡེ་ཤེས་ཀྱི་རབ་ཏུ་ཕྱེད་པའི་ཕྱིར་རོ། །དེ་ལ་ཐེ་ཚོམ་དང་ནེམ་ནུར་ནི་རྣམ་གྲངས་ཀྱི་ཚིག་སྟེ། དཔེར་ན་ཚེ་རིང་བ་དང་། ཡུན་རིང་དུ་གནས་པར་འགྱུར་ཞེས་བྱ་བ་ལྟ་བུའོ། །དེའི་ཕྱིར་སྡུག་བསྔལ་གྱི་
བདེན་པ་ངེས་པ་ཁོ་ན་ན་བདེན་པ་གཞན་ཡང་ངེས་པ་ཡིན་ནོ། །མ་ཡིན་ཏེ་ཀུན་ཏུ་མི་འབྱུང་བ་དང་གདོན་མི་ཟ་བར་སྤོང་བ་ལ་དགོངས་ཏེ་གསུངས་པའི་ཕྱིར་ཞེས་བྱ་བ་ནི་ཀུན་དུ་མི་འབྱུང་བ་ལ་དགོངས་ཏེ་གསུངས་པའི་ཕྱིར་དང་། གདོན་མི་ཟ་བར་སྤོང་བ་ལ་དགོངས་ཏེ་གསུངས་པའི་ཕྱིར་ཏེ། སྡུག་བསྔལ་ཡོངས་སུ་ཤེས་
ན་ཐེ་ཚོམ་ཀུན་དུ་འབྱུང་བ་ཡོད་པ་མ་ཡིན་ཏེ། བཟོད་པ་ཆེན་པོའི་གནས་སྐབས་ན་སྟེ་མི་སྐྱེ་བའི་ཆོས་ཉིད་ཐོབ་པའི་ཕྱིར་རོ། །དེའི་ཚེ་གདོན་མི་ཟ་བར་སྤངས་པ་ཡང་ཡིན་ཏེ། དེའི་ཕྱིར་མདོ་དང་འགལ་བ་མེད་དོ། །དེ་དག་ནི་ས་དྲུག་གོ་ཞེས་སྔར་བཤད་ཟིན་ཏོ་ཞེས་བྱ་བ་ནི་མི་ལྕོགས་པ་མེད་པ་དང་། ཁྱད་པར་བསམ་
གཏན་ས་པའོ་ཞེས་བཤད་པའི་ཕྱིར་རོ། །གཉིས་ཀྱི་རྐུན་པོ་འབྱིན་པ་དང་སྒོ་གཅོད་པ་བཞིན་ནོ་ཞེས་བྱ་བ་ནི་བར་ཆད་མེད་པའི་ལམ་གྱིས་ཉོན་མོངས་པའི་ཆོམ་རྐུན་དེའི་ཐོབ་པ་གཅོད་པའི་སྒོ་ནས་འབྱིན་པར་བྱེད་ལ། རྣམ་པར་གྲོལ་བའི་ལམ་གྱིས་ནི་དེ་ལྟར་དུ་བྱེད་པའི་སྒོ་ནས་བྲལ་བའི་ཐོབ་པའི་སྒོ་གཅོད་པར་བྱེད་དོ། །
གལ་ཏེ་བར་ཆད་མེད་པའི་ལམ་གཉིས་པ་ཞེས་བྱ་ལ། སྡུག་བསྔལ་ལ་ཆོས་ཤེས་པའི་བཟོད་པའི་བར་ཆད་མེད་པའི་ལམ་གཉིས་པ་ནི་སྡུག་བསྔལ་ལ་རྗེས་སུ་ཤེས་པའི་བཟོད་པ་ཡིན་ལ་དེ་བཞིན་དུ་སྡུག་བསྔལ་ལ་རྗེས་སུ་ཤེས་པའི་བཟོད་པའི་བར་ཆད་མེད་པའི་ལམ་གཉིས་པ་ནི་ཀུན་འབྱུང་ལ་ཆོས་ཤེས་པའི་བཟོད་པ་

ཡིན་ཏེ། ལྷག་མ་དག་ལ་ཡང་དེ་དང་འདྲ་བར་བརྗོད་པར་བྱའོ། །དམིགས་པ་དེ་ཁོ་ན་ལ་ཐེ་ཚོམ་སྤངས་པའི་ཤེས་པ་སྐྱེ་བར་མི་འགྱུར་རོ་ཞེས་བྱ་བ་ནི་གང་ཞིག་བར་ཆད་མེད་པའི་ལམ་གྱི་ཡུལ་འདོད་པའི་སྡུག་བསྔལ་ལ་སོགས་པ་ལའོ། །དེ་ལས་ཅིར་འགྱུར་ཞེ་ན། ཕྱིས་སྡུག་བསྔལ་ཡོངས་
སུ་ཤེས་སོ་ཞེས་བྱ་བར་ངེས་པར་མི་འགྱུར་ཏེ། དེའི་ཡུལ་ཅན་གྱི་ཤེས་པ་སྔར་མ་སྐྱེས་པའི་ཕྱིར་རོ། །དེ་ཉེ་བར་བསྟན་པ་དོན་མེད་པ་ཡང་ཐལ་བར་འགྱུར་ཏེ། རེ་ཞིག་འདི་ནི་རིགས་པ་ཡིན་ནོ། །བཅོམ་ལྡན་འདས་ཀྱིས་ཀྱང་སྡུག་བསྔལ་ལ་ཆོས་ཤེས་པ་དང་། སྡུག་བསྔལ་ལ་རྗེས་སུ་ཤེས་པ་ཞེས་གསུངས་ཏེ།
དེའི་ཕྱིར་གདོན་མི་ཟ་བར་གཉི་ག་ཡང་ཡོད་དགོས་སོ། །གལ་ཏེ་བཟོད་པ་རྣམས་ཀྱིས་ཉོན་མོངས་སྤོང་བའི་ཕྱིར་ཞེས་བྱ་བ་ནི། གལ་ཏེ་བཟོད་པ་རྣམས་ཀྱིས་ཉོན་མོངས་པ་སྤོང་ལ། ཤེས་པ་རྣམས་ཀྱིས་མ་ཡིན་ཞིང་ཤེས་པ་རྣམས་ཀྱིས་དེའི་བྲལ་བའི་ཐོབ་པ་འཛིན་པ་འབའ་ཞིག་ཡིན་ན། དེ་ལྟ་ན་བསྟན་བཅོས་ལས་ཀུན་དུ་
སྦྱོར་བའི་རིས་དགུ་ཞེས་འབྱུང་བ་དང་འགལ་ཏེ། འདི་སྐད་དུ་བསྟན་བཅོས་ལས་ཀུན་དུ་སྦྱོར་བའི་རིས་དགུ་སྟེ། ཆོས་ཤེས་པ་སྤང་བར་བྱ་བ་བཞི་དང་། རྗེས་སུ་ཤེས་པས་སྤང་བར་བྱ་བ་བཞི་དང་། བསྒོམ་པས་སྤང་བར་བྱ་བའོ་ཞེས་འདོན་ཏོ། །མ་ཡིན་ཏེ་བཟོད་པ་རྣམས་ནི་ཤེས་པའི་འཁོར་ཡིན་པའི་ཕྱིར་ཞེས་བྱ་
བ་ནི་འགལ་བ་ཡོད་པ་མ་ཡིན་པའོ། །བཟོད་པ་རྣམས་ནི་ཤེས་པའི་འཁོར་དུ་གྱུར་པས་དེའི་ཕྱིར་བཟོད་པས་སྤང་བར་བྱ་བའི་ཀུན་དུ་སྦྱོར་བའི་རིས་ལ་ཤེས་པས་སྤང་བར་བྱ་བ་ཞེས་བྱ་བ་སྟེ། བསྒོམ་པས་སྤང་བར་བྱ་བའི་ཀུན་དུ་སྦྱོར་བའི་རིས་ནི་གཙོར་ཤེས་པས་སྤང་བར་བྱ་བ་ཁོ་ན་ཡིན་ནོ། །དེ་ཉིད་ལ་དཔེར་བརྗོད་
པ་ནི། རྒྱལ་པོའི་འཁོར་གྱིས་བྱས་པ་ལས་རྒྱལ་པོས་བྱས་སོ་ཞེས་ཐ་སྙད་འདོགས་པ་བཞིན་ནོ་ཞེས་བྱ་བ་སྨོས་སོ། །བདེན་པ་མ་མཐོང་བ་མཐོང་བའི་ཕྱིར་རོ་ཞེས་བྱ་བ་ནི་འཕགས་པའི་བདེན་པ་བཞི་མ་མཐོང་བ་རྣམས་མཐོང་བའི་ཕྱིར་མཐོང་བའི་ལམ་ཞེས་བྱ་སྟེ། ལམ་ལ་རྗེས་སུ་ཤེས་པ་མ་གཏོགས་པ་
སྐད་ཅིག་མ་ལྷག་མ་བཅོ་ལྔ་ནི་མཐོང་བའི་ལམ་མོ། །ཇི་ལྟར་མཐོང་བ་གོམས་པར་བྱེད་པའི་ཕྱིར་ཞེས་བྱ་བ་ནི་ལམ་ལ་རྗེས་སུ་ཤེས་པའི་བཟོད་པས་མཐོང་བའི་ལམ་ལ་རྗེས་སུ་ཤེས་པས་མཐོང་བས་ཇི་ལྟར་མཐོང་བ་གོམས་པར་བྱེད་པའོ། །མཐོང་བ་མཐོང་བ་མ་ཡིན་ནམ་ཞེས་བྱ་བ་ནི་སྐད་ཅིག་མ་བཅུ་དྲུག་པ་དེས་སོ། །

མ་མཐོང་བ་དེ་གང་ཞིག་ཅེ་ན། ལམ་ལ་རྗེས་སུ་ཤེས་པའི་བཟོད་པ་ཞེས་བྱ་བ་སྨོས་ཏེ། ལམ་ལ་རྗེས་སུ་ཤེས་པའི་བཟོད་པ་ནི་བདག་ཉིད་མ་གཏོགས་པ་ལྷག་མ་རྗེས་སུ་ཤེས་པའི་ཕྱོགས་དང་མཐུན་པའི་ལམ་ལ་དམིགས་པར་བྱེད་དོ། བདག་ཉིད་ལ་བྱེད་པ་ནི་འགལ་བའི་ཕྱིར་རོ། །ཕྱིས་རྗེས་སུ་མཐུན་པའི་
ཤེས་པས་བཟོད་པ་མ་མཐོང་བ་དེ་དག་མཐོང་བ་ཡིན་ནོ་ཞེ་ན། བདེན་པའི་ཕྱིར་ལ་ཞེས་བྱ་བ་རྒྱས་པར་འབྱུང་སྟེ། དེ་ཉིད་ཀྱི་ཕྱིར་བདེན་པ་མ་མཐོང་བའི་ཕྱིར་རོ་ཞེས་བྱ་བ་གསུངས་ཀྱི། མ་མཐོང་བ་མཐོང་བའི་ཕྱིར་རོ་ཞེས་པ་ནི་མ་ཡིན་ནོ། །དེ་ཉིད་ཀྱི་ཕྱིར་སྐད་ཅིག་མ་གཅིག་མ་མཐོང་ནས་ནི་བདེན་པ་མཐོང་བ་མ་
ཡིན་ཏེ་ཞེས་བྱ་བ་སྨོས་སོ། །འཇིག་རྟེན་པའི་དཔེར་བཤད་པ་ནི་དཔེར་ན་ཉག་མ་གཅིག་མ་བརྔས་པས་ཞིང་མ་བརྔས་པ་ཡིན་པ་བཞིན་ནོ་ཞེས་བྱ་བ་སྨོས་སོ། །འབྲས་བུ་ཡིན་པའི་ཕྱིར་ཞེས་བྱ་བ་ནི་ལམ་ལ་རྗེས་སུ་ཤེས་པ་ནི་རྒྱུན་དུ་ཞུགས་པའི་འབྲས་བུས་བསྡུས་པ་ཡིན་ཏེ། དེའི་ཕྱིར་འབྲས་བུ་ཡིན་
པས་ལན་ཅིག་ཕྱིར་འོང་བའི་འབྲས་བུ་ལ་སོགས་པ་བཞིན་དུ་བསྒོམ་པའི་ལམ་ཡིན་ནོ་ཞེས་བྱ་བར་ངེས་སོ། །ཤེས་པ་བརྒྱད་དང་རྣམ་པ་བཅུ་དྲུག་ཐོབ་པའི་ཕྱིར་ཞེས་བྱ་བ་ནི་ལམ་ལ་རྗེས་སུ་ཤེས་པའི་ཚེ་ཤེས་པ་བརྒྱད་དང་རྣམ་པ་བཅུ་དྲུག་འཐོབ་པའི་ཕྱིར་ཏེ། ཆོས་ཤེས་པ་བཞི་དང་རྗེས་སུ་ཤེས་པ་བཞི་དང་། རྣམ་
པ་བཅུ་དྲུག་ཞེས་བྱ་བ། སྡུག་བསྔལ་གྱི་རྣམ་པ་བཞི་ནས་ལམ་གྱི་རྣམ་པ་བཞིའི་བར་ཏེ་དེ་ལས་གཞན་པའི་བསྒོམ་པའི་ལམ་བཞིན་ནོ། །མཐོང་བའི་ལམ་ལ་ནི་ཤེས་པ་དང་རྣམ་པ་སྐལ་བ་མཉམ་པ་ཁོ་ན་འཐོབ་པོ། །དེའི་ཕྱིར་ཡང་ལམ་ལ་རྗེས་སུ་ཤེས་པ་ནི་བསྒོམ་པའི་ལམ་ཁོ་ན་ཡིན་ནོ། །ལམ་སྔ་མ་རྣམ་པར་
ཉམས་པའི་ཕྱིར་ཞེས་བྱ་བ་ནི་ཞུགས་པའི་ལམ་རྣམ་པར་ཉམས་པའི་ཕྱིར་ཞེས་བྱ་བའི་དོན་ཏོ། །ལན་ཅིག་ཕྱིར་འོང་བ་དང་ཕྱིར་མི་འོང་བའི་འབྲས་བུའི་ལམ་ལྟར་བསྒོམ་པའི་ལམ་ཁོ་ནར་ཞུགས་པའི་ལམ་ཡོངས་སུ་གཏོང་གི་མཐོང་བའི་ལམ་དུ་ནི་མ་ཡིན་ལ། ལམ་ལ་རྗེས་སུ་ཤེས་པ་ལ་ནི་ཞུགས་པའི་
ཡོངས་སུ་གཏོང་བ་ཡིན་ཏེ། དེའི་ཕྱིར་ཡང་བསྒོམ་པའི་ལམ་ཁོ་ན་ཡིན་ནོ། །རྒྱུན་ཆགས་པ་ཡིན་པའི་ཕྱིར་ཞེས་བྱ་ནི་ལམ་ལ་རྗེས་སུ་ཤེས་པ་འདི་ནི་དེ་ལས་གཞན་པའི་བསྒོམ་པའི་ལམ་བཞིན་དུ། རྒྱུན་ཆགས་པ་ཡིན་ན་མཐོང་བའི་ལམ་ལ་ནི་བཟོད་པ་འམ་ཤེས་པ་འང་རུང་རྒྱུན་ཆགས་པ་ཡོད་པ་མ་ཡིན་

ཏེ། འདིའི་ཕྱིར་ཡང་ལམ་ལ་རྗེས་སུ་ཤེས་པ་བསྒོམ་པའི་ལམ་ཡིན་ནོ། །གལ་ཏེ་ལམ་ལ་རྗེས་སུ་ཤེས་པ་བསྒོམ་པའི་ལམ་ཡིན་ན། ཇི་ལྟར་དེ་ལས་ཡོངས་སུ་མི་ཉམས་ཤེ་ན། དེའི་ཕྱིར་ཡོངས་སུ་མི་ཉམས་པ་ནི་མཐོང་བས་སྤང་བར་བྱ་བའི་སྤངས་པ་ཡང་དག་པར་འཛིན་པའི་ཕྱིར་
རོ་ཞེས་བྱ་བ་སྨོས་ཏེ། མཐོང་བས་སྤང་བར་བྱ་བའི་སྤངས་པ་ཡང་དག་པར་འཛིན་པར་བྱེད་པ་ཡིན་ནོ་ཞེས་བྱ་བའི་ཐ་ཚིག་སྟེ། གཞིའི་གཉེན་པོ་ནི་རྣམ་པར་གྲོལ་བའི་ལམ་མོ་ཞེས་སྔར་མཛོད་ཀྱི་གནས་ལྔ་པར་བཤད་ཟིན་ཏོ། །ལམ་ལ་རྗེས་སུ་ཤེས་པ་ཁོ་ནས་མཐོང་བས་སྤང་བར་བྱ་བ་རྣམས་ཀྱི་སྤངས་པ་ཡང་
དག་པར་འཛིན་པ་དེའི་དེ་ལས་ཡོངས་སུ་ཉམས་པ་མེད་དོ། །གལ་ཏེ་འབྲས་བུའི་ལམ་དེ་ལས་ཡོངས་སུ་ཉམས་ན་ནི་རྒྱུན་དུ་ཞུགས་པའི་འབྲས་བུ་ལས་ཀྱང་ཡོངས་སུ་ཉམས་པར་འགྱུར་བ་ཞིག་ན་དེ་ལས་ནི་ཡོངས་སུ་ཉམས་པ་མེད་དོ། །དེ་ཉིད་ཀྱི་ཕྱིར་མཐོང་བའི་ལམ་ཡིན་ནོ་ཞེས་བྱ་བ་ནི་གང་གི་ཕྱིར་དེས་
མཐོང་བས་སྤང་བར་བྱ་བའི་སྤངས་པ་ཡང་དག་པར་འཛིན་པའི་ཕྱིར་རོ། །མ་ཡིན་ཏེ་ཧ་ཅང་ཐལ་བར་འགྱུར་བའི་ཕྱིར་རོ་ཞེས་བྱ་བ་ནི་ལམ་ལ་རྗེས་སུ་ཤེས་པ་ཕན་ཆད་ཀྱི་བསྒོམ་པའི་ལམ་ཡང་མཐོང་བའི་ལམ་དུ་འགྱུར་ཏེ། དེས་ཀྱང་མཐོང་བས་སྤང་བར་བྱ་བའི་སྤངས་པ་ཡང་དག་པར་འཛིན་པའི་ཕྱིར་རོ། །དེ་
ལྟར་ཡིན་ན་ནི་ལན་ཅིག་ཕྱིར་འོང་བའི་འབྲས་བུ་ལ་སོགས་པ་ཡང་མཐོང་བའི་ལམ་དུ་འགྱུར་རོ། །ཅིའི་ཕྱིར་ཤེས་པ་བདུན་མཐོང་བའི་ལམ་ཡིན་ཞེ་ན་ཞེས་བྱ་བ་ནི། བརྒྱད་པ་ལམ་ལ་རྗེས་སུ་ཤེས་པ་མ་ཡིན་སྙམ་དུ་བསམས་པ་སྟེ། བདུན་པོ་དེ་དག་ནི་ཆོས་ཤེས་པ་བཞི་དང་། རྗེས་སུ་ཤེས་པ་གསུམ་མོ། །
མཐོང་བ་མ་རྫོགས་པའི་ཕྱིར་ཏེ། བདེན་པ་མ་མཐོང་བ་མཐོང་བའི་ཕྱིར་ཤེས་པ་རྣམས་མཐོང་བའི་ལམ་ཉིད་དོ་ཞེས་མི་བྱའི། འོ་ན་ཅིའི་ཕྱིར་ཞེ་ན། མཐོང་བའི་ལམ་གྱི་བར་མར་གྱུར་པའི་ཕྱིར་ཏེ། བཟོད་པ་གཉིས་གཉིས་ཀྱི་བར་མར་གྱུར་པ་ཡིན་པའི་ཕྱིར་ཤེས་པ་བདུན་པོ་དེ་དག་ཀྱང་མཐོང་བའི་ལམ་ཡིན་
ནོ། །ད་ནི་ཇི་ལྟར་ན་འཕགས་པའི་ལམ་སྐྱེས་པའི་གང་ཟག་རྣམས་ཞེས་བྱ་བ་རྒྱས་པར་འབྱུང་ངོ་། །ལམ་ནི་རྣམ་པ་གསུམ་སྟེ། མཐོང་བའི་ལམ་དང་། བསྒོམ་པའི་ལམ་དང་། མི་སློབ་པའི་ལམ་སྟེ། ད་ནི་གསུམ་པོ་དེ་དག་ཏུ་ཇི་ལྟར་གང་ཟག་རྣམ་པར་གཞག་པར་དེ་ལྟར་རྒྱས་པར་བརྗོད་པར་བྱའོ། །

དེ་ལ་རེ་ཞིག་མཐོང་བའི་ལམ་གྱི་རང་བཞིན་གྱི་ཞེས་བྱ་བ་རྒྱས་པར་འབྱུང་ངོ་། །དབང་པོ་རྟུལ་པོ་ནི་དད་པས་ནུས་པ་ཀུན་དུ་འབྱུང་བའི་ཕྱིར་སྐད་ཅིག་མ་བཅོ་ལྔ་པོ་དེ་དག་ལ་གནས་པ་ན་དད་པའི་རྗེས་སུ་འབྲང་བ་ཞེས་བྱའོ། །དབང་པོ་རྣོན་པོ་ནི་དཔྱོད་པ་དག་གིས་མངོན་པར་དགའ་བ་ཀུན་དུ་འབྱུང་བའི་ཕྱིར་ཆོས་
ཀྱི་རྗེས་སུ་འབྲང་བ་ཞེས་བྱའོ། །རྗེས་སུ་འབྲང་བས་ན། རྗེས་སུ་འབྲང་བ་སྟེ། དངོས་པོའི་བྱེད་པ་པོའོ། །དད་པའི་རྗེས་སུ་འབྲང་བས་ན་དད་པའི་རྗེས་སུ་འབྲང་བའོ། །དེ་ལ་འདི་ཡོད་པས་ན་དད་པའི་རྗེས་སུ་འབྲང་བའོ། །སྔོན་གཞན་ལས་ཡིད་ཆེས་པས་དོན་གྱི་རྗེས་སུ་འབྲང་བའི་ཕྱིར་རོ་ཞེས་བྱ་བ་ནི་བདེན་པ་
མཐོང་བའི་སྔོན་རོལ་དུ་སྟེ། བདེན་པ་མཐོང་ན་ནི་བདག་ཉིད་ཀྱིས་མངོན་སུམ་དུ་བྱེད་པ་ཡིན་ནོ། །ཆོས་ཀྱི་རྗེས་སུ་འབྲང་བ་ཡང་དེ་དང་འདྲའོ་ཞེས་བྱ་བ་ནི་ཆོས་ཀྱི་རྗེས་སུ་འབྲང་བས་ན་ཆོས་ཀྱི་རྗེས་སུ་འབྲང་བའོ། །དེ་འདི་ལ་ཡོད་པས་སམ། ཆོས་ཀྱི་རྗེས་སུ་འབྲང་བའི་ངང་ཚུལ་ཅན་ཡིན་པས་ན་ཆོས་ཀྱི་རྗེས་
སུ་འབྲང་བ་སྟེ། སྔོན་བདག་ཉིད་ཁོ་ནས་མདོ་ལ་སོགས་པའི་ཆོས་གསུང་རབ་ཡན་ལག་བཅུ་གཉིས་ཀྱི་དོན་གྱི་རྗེས་སུ་འབྲང་བའི་ཕྱིར་རོ། །རྣམ་པ་ལྔའི་བར་དུ་སྤངས་པ་ཞིག་ཡིན་ན་ཡང་ཞེས་བྱ་བ་ལ། བར་དུ་ཞེས་བྱ་བའི་སྒྲས་ནི་གཅིག་དང་གཉིས་དང་གསུམ་དང་བཞི་རྣམ་པ་ལྔ་སྤངས་པ་ཞིག་ཡིན་ན།
དེ་བཞིན་དུ་དང་པོའི་འབྲས་བུ་པ་ལ་ཞུགས་པ་དག་ཅེས་བྱ་སྟེ། དཔེར་ན་འཆིང་བ་མཐའ་དག་དང་ལྡན་པ་དག་བཞིན་ནོ། །གཉིས་པ་ལ། དགུ་པ་ཚུན་ཆད་ཟད་པ་ཡིན། གཉིས་པ་ལ་ཞེས་བྱ་བ་ནི་གཉིས་པའི་ཆེད་དུ་སྟེ། དཔེར་ན་པགས་པའི་ཕྱིར་གུང་གསོད་དོ་ཞེས་བྱ་བ་ལྟ་བུའོ། །དགྲ་བཅོམ་པ་ཉིད་ནི་དང་
པོ་ཉིད་དུ་ཐོབ་པར་མི་ནུས་ཏེ་ཞེས་བྱ་བ་ནི་ཕྱིར་མི་འོང་བའི་འབྲས་བུ་ཐོབ་པའི་གོང་རོལ་དུ་དགྲ་བཅོམ་པ་ཉིད་ཐོབ་པར་མི་ནུས་སོ་ཞེས་བྱ་བའོ། །ཅིའི་ཕྱིར་ཞེ་ན། མཐོང་བའི་ལམ་གྱིས་བསྒོམ་པས་སྤང་བར་བྱ་བ་མི་སྤོང་བའི་ཕྱིར་དང་ཞེས་བྱ་བ་སྨོས་ཏེ། སྲིད་པའི་རྩེ་མོའི་བསྒོམ་པས་སྤང་བར་བྱ་བ་སྤངས་པས་དགྲ་
བཅོམ་པ་ཉིད་ཡིན་ན། མཐོང་བའི་ལམ་གྱིས་བསྒོམ་པས་སྤང་བར་བྱ་བ་རྣམས་སྤོང་བ་སྲིད་པ་ཡང་མ་ཡིན་ཏེ། བཟོད་པས་གཞོམ་མིན་སྒོམ་ཁོ་ནས། །ཞེས་འབྱུང་བའི་ཕྱིར་རོ། །སྔར་ཡང་སྲིད་པའི་རྩེ་མོ་ལས་འདོད་ཆགས་དང་བྲལ་བ་མི་སྲིད་པའི་ཕྱིར་རོ་ཞེས་བྱ་བ་ནི་སྔོན་སོ་སོའི་སྐྱེ་བོའི་གནས་སྐབས་ན་

འཇིག་རྟེན་པའི་ལམ་གྱིས་སྲིད་པའི་རྩེ་མོ་ལས་འདོད་ཆགས་དང་བྲལ་བ་མི་སྲིད་པའོ། །སྲིད་པའི་རྩེ་མོའི་གཉེན་པོར་གྱུར་པའི་འཇིག་རྟེན་པའི་ལམ་ནི་ཡོད་པ་མ་ཡིན་ཏེ། འཇིག་རྟེན་པའི་ལམ་ནི་གོང་མའི་ཉེར་བསྡོགས་ཀྱིས་བསྡུས་པའི་ཕྱིར་ལ། དེ་ཡན་ཆད་ནས་གཞན་
མེད་པའི་ཕྱིར་རོ། །དད་པ་དང་ཤེས་རབ་ལྷག་པས་མོས་པ་དང་། མཐོང་བས་རབ་ཏུ་ཕྱེ་བའི་ཕྱིར་རོ་ཞེས་བྱ་བ་ནི། དད་པ་ལྷག་པས་མོས་པས་རབ་ཏུ་ཕྱེ་བའི་ཕྱིར་དད་པས་མོས་པ་ཡིན་གྱི་དེ་ལ་ཤེས་རབ་མེད་པ་ཉིད་ནི་མ་ཡིན་ལ་ཤེས་རབ་ལྷག་པས་མཐོང་བས་རབ་ཏུ་ཕྱེ་བའི་ཕྱིར་མཐོང་བས་ཐོབ་པ་ཡིན་གྱི།
དེ་ལ་དད་པ་མེད་པ་ནི་མ་ཡིན་ནོ། །རྣམ་པ་ལྔའི་བར་བཅོམ་ཞེས་བཤད་པའི་ཕྱིར། ཅིའི་ཕྱིར་རྣམ་པ་ལྔ་སྤངས་ཀྱང་སེམས་བཅུ་དྲུག་པ་ལ་རྒྱུན་དུ་ཞུགས་པ་ཁོ་ན་ཞེས་བྱ་བ་རྒྱས་པར་འབྱུང་ངོ་། །ཇི་སྲིད་དུ་ཁྱད་པར་དུ་བྱ་བའི་ཕྱིར་ཞེས་བྱ་བ་ལ། ཁྱད་པར་དུ་བྱ་བའི་ཕྱིར་བརྩོན་པ་གང་ཞེ་ན། འབྲས་བུ་ཐོབ་
པར་བྱ་བ་ལ་ཞེས་བྱ་བ་སྨོས་སོ། །དེ་བཞིན་དུ་འབྲས་བུ་གཞན་ལ་ཡང་སྦྱར་བར་བྱའོ་ཞེས་བྱ་བ་ནི་ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་ལ་སྟེ། ཅིའི་ཕྱིར་སྔར་འཇིག་རྟེན་པའི་ལམ་གྱིས་རྣམ་པ་བདུན་དང་བརྒྱད་སྤངས་ཀྱང་སེམས་བཅུ་དྲུག་པ་ལ་ལན་ཅིག་ཕྱིར་འོང་བ་ཞེས་བྱ་ལ། ཕྱིར་མི་
འོང་བའི་འབྲས་བུ་ལ་ཞུགས་པ་ཞེས་མི་བྱ་ཞེ་ན། གང་གི་ཕྱིར། འབྲས་ཐོབ་འབྲས་བུ་ཁྱད་པར་གྱི། །ལམ་ཐོབ་མེད་པས་ཞེས་བྱ་བ་དང་། དེ་བཞིན་དུ་འདོད་པའི་ཁམས་ན་འདོད་ཆགས་དང་བྲལ་ཞིང་གོང་མ་ཅི་ཡང་མེད་པའི་སྐྱེ་མཆེད་ཀྱི་བར་ལས་འདོད་ཆགས་དང་བྲལ་ཡང་སེམས་བཅུ་དྲུག་པ་ལ་ཕྱིར་མི་འོང་
བ་ཁོ་ན་ཞེས་བྱ་ལ། དགྲ་བཅོམ་པའི་འབྲས་བུ་ལ་ཞུགས་པ་ཞེས་མི་བྱ་ཞེ་ན། གང་གི་ཕྱིར་འབྲས་བུ་ཐོབ་འབྲས་བུའི་ཁྱད་པར་གྱི་ཞེས་བྱ་བ་རྒྱས་པར་སྦྱར་རོ། །གང་ཞིག་བསམ་གཏན་གསུམ་པ་ལ་འདོད་ཆགས་དང་བྲལ་ལ། ས་འོག་མ་ལ་བརྟེན་ཏེ་ཞེས་བྱ་བ་ནི་མི་ལྕོགས་པ་མེད་པ་ལ་སོགས་པ་རྣམས་
ལས་བསམ་གཏན་གཉིས་པ་ལ་ཐུག་པ་གང་ཡང་རུང་བ་ཞིག་ལ་སྟེ། དེ་དག་ལ་བདེ་བའི་དབང་པོ་མེད་པའི་ཕྱིར་རོ། །དེ་ནི་འདོད་པའི་ཁམས་སུ་སྐྱེས་པ་ཁོ་ན་ཞིག་སྟེ། གོང་ན་མཐོང་བའི་ལམ་མེད་པའི་ཕྱིར་རོ། །དེ་ནི་གདོན་མི་ཟ་བར་འབྲས་བུ་ཁྱད་པར་ཅན་གྱི་ལམ་བསམ་གཏན་གསུམ་པའི་ས་པ་ཟག་

པ་མེད་པ་མངོན་དུ་བྱེད་དོ། །དེ་ལྟ་མ་ཡིན་ན་དེའི་གོང་དུ་སྐྱེས་པ་དེ་ཞེས་བྱ་བ་ནི་བསམ་གཏན་གསུམ་པ་དེའི་གོང་བསམ་གཏན་བཞི་པའམ། གཟུགས་མེད་པ་དག་ཏུ་སྐྱེས་པའི་འཕགས་པ་དེ་བདེ་བའི་དབང་པོ་དང་མི་ལྡན་པར་འགྱུར་རོ། །དེས་ནི་ས་འཕོས་པས་བསམ་གཏན་གསུམ་པ་ཟག་པ་དང་
བཅས་པ་བཏང་ལ། དེས་ཟག་པ་མེད་པ་ཡང་མངོན་དུ་མ་བྱས་པས་བདེ་བའི་དབང་པོ་ཟག་པ་དང་བཅས་པ་དང་། ཟག་པ་མེད་པ་གཉི་ག་དང་ལྡན་པར་འགྱུར་ན། འཕགས་པ་གོང་དུ་སྐྱེས་པ་ནི་གདོན་མི་ཟ་བར་བདེ་བའི་དབང་པོ་དང་ལྡན་པར་གསུངས་ཏེ། བདེ་བའི་དབང་པོ་དང་ནི་བསམ་གཏན་བཞི་པ་དང་།
གཟུགས་མེད་པར་སྐྱེས་པའི་སོ་སོའི་སྐྱེ་བོ་མི་ལྡན་གྱི་འཕགས་པ་ནི་ལྡན་ནོ་ཞེས་འབྱུང་བའི་ཕྱིར་རོ། །གཞན་དག་ན་རེ་འདི་ནི་རྣམ་པར་བཤད་པའི་ནང་དུ་བྲིས་པ་ཡོད་མོད་ཀྱི། དེ་ནི་གཞག་པའི་ཕྱོགས་མ་ཡིན་པར་མངོན་ཏེ། གཞན་དག་ན་རེ་ནི་ཞེས་འབྱུང་བའི་ཕྱིར་རོ། །འཕགས་པ་བདེན་པའི་དབང་
པོ་དང་ལྡན་ནོ་ཞེས་བྱ་བ་ནི་སྲིད་པའི་དབང་དུ་བྱས་ནས་བཤད་པར་ཟད་དོ་ཞེས་ཟེར་རོ། །དེ་ལྟར་རེ་ཞིག་ཕལ་ཆེར་ལས་དང་འདོད་པ་ལས་འདོད་ཆགས་དང་བྲལ་བ་རྣམས་ཀྱིས་ཞེས་བྱ་བ་ལ་ཕལ་ཆེར་ལས་འདོད་ཆགས་དང་བྲལ་བ་རྣམས་དང་འདོད་ཆགས་དང་བྲལ་བ་རྣམས་ཀྱི་ངེས་པ་ལ་འཇུག་པའི་གང་
ཟག་རྣམ་པར་གཞག་པ་ནི་བཤད་ཟིན་ཏོ། །དང་པོ་ཁོ་ནར་ལམ་ཆེན་པོར་མི་སྲིད་པའི་ཕྱིར་ཞེས་བྱ་བ་ནི་ལས་དང་པོ་པའི་རྒྱུད་ཉོན་མོངས་པས་དྲི་མ་ཅན་དུ་བྱས་པའི་ཕྱིར་ཏེ་དེ་ཉིད་ཀྱི་ཕྱིར་ལམ་ཆེན་པོ་སྐྱེས་པ་ལ་ཞེས་བྱ་བ་ལ་སོགས་པ་སྨོས་སོ། །དེ་ནི་དཔེའི་རྣམ་པ་ཡིན་ནོ་ཞེས་བྱ་བ་ནི་འདི་ནི་དཔེའི་རྣམ་པའི་
རབ་ཏུ་དབྱེ་བ་ཡིན་ནོ་ཞེས་བྱ་བའི་དོན་ཏོ། །དེའི་ཕྱིར་དེ་ལྟར་ན། རྣམ་པ་འདིས་དཔེ་གཞན་ཡང་བརྗོད་པར་བྱའོ་ཞེས་སྟོན་པར་བྱེད་དེ། དེ་ལྟ་མ་ཡིན་ན་འདི་ནི་དཔེ་ཡིན་ནོ་ཞེས་དེ་སྐད་དུ་རྗོད་པར་བྱེད་དོ། །འཁོར་བ་ཐོག་མ་མེད་པ་བརྒྱུད་པས་སྤེལ་བ་ཞེས་བྱ་བ་ནི། འཁོར་བ་ཐོག་མ་མེད་པ་བརྒྱུད་པས་སྤེལ་
ཞིང་ཕན་བཏགས་པས་དེས་ན་ཆེན་པོ་རྣམས་ཞེས་བྱ་སྟེ། འདི་དག་ལ་ཚད་དེ་བུངས་གླགས་པ་ཡོད་པའི་ཕྱིར་རོ། །ཉོན་མོངས་པ་དེ་རྣམས་རྩ་ནས་མེད་པར་བྱེད་པའི་ཕྱིར་ཞེས་བྱ་བ་ནི་ཐོབ་པ་གཅོད་པར་བྱེད་པའི་ཕྱིར་ཞེས་བྱ་བའི་དོན་ཏེ། ཉོན་མོངས་པ་རྣམས་དེ་ལ་རག་ལས་པའི་ཕྱིར་ཐོབ་པ་ནི་རྩ་བ་དང་

ཆོས་མཐུན་པ་ཡིན་ནོ། །ཆུང་བའི་དུར་བྱིད་ཐུན་གཅིག་གིས་སྐྱོན་མང་པོ་འབྱིན་པ་དང་འདྲ་ཞིང་མར་མེ་སྐད་ཅིག་མས་མུན་པ་ཆེན་པོ་འཇོམས་པ་དང་འདྲའོ། །དེ་ལ་མཆོག་ཏུ་ཐོགས་ནས་སྐྱེ་བ་བདུན་ཡོད་པས་ན་མཆོག་ཏུ་ཐོགས་ན་ལན་བདུན་པ་སྟེ། མཆོག་ཏུ་ཞེས་བྱ་བའི་སྒྲ་
ནི་རབ་ཏུའོ། །དེ་ལྟར་མ་ཐོགས་ན་ཞེས་འབྱུང་བས་ཐམས་ཅད་ནི་གདོན་མི་ཟ་བར་མ་ཡིན་ནོ་ཞེས་བསྟན་པར་འགྱུར་ཏེ། དེ་ཉིད་ཀྱི་ཕྱིར། ཐམས་ཅད་ཀྱི་ཐ་ཤལ་བའོ་ཞེས་འབྱུང་ངོ་། །དེ་ནས་དེར་གྲོལ་བའི་ཕྱིར་རོ་ཞེས་བྱ་བ་ནི་ལམ་དེ་ནས་མྱ་ངན་ལས་འདས་པར་འགྲོ་ཞེས་བྱ་བའི་ཐ་ཚིག་གོ། །
ལམ་དང་པོ་ཐོབ་པའི་ཕྱིར་རོ་ཞེས་བྱ་བ་ལ། ལམ་དང་པོ་ནི་མཐོང་བའི་ལམ་མོ། །བརྒྱད་པ་ཡང་ཡིན་པར་འགྱུར་རོ་ཞེས་བྱ་བ་ནི་དགྲ་བཅོམ་པ་ནས་བཟུང་སྟེ། ལུགས་ལས་བཟློག་སྟེ་བགྲངས་ན་སྐྱེས་བུ་གང་ཟག་བརྒྱད་ཀྱི་ནང་ན་རྒྱུན་དུ་ཞུགས་པའི་འབྲས་བུ་མངོན་དུ་བྱ་བའི་ཕྱིར་འཇུག་པ་ཐ་དད་པའི་
རྗེས་སུ་འབྲང་བ་དང་། ཆོས་ཀྱི་རྗེས་སུ་འབྲང་བ་ནི་བརྒྱད་པ་ཡིན་ནོ། །གལ་ཏེ་འབྲས་བུ་དང་པོ་ཐོབ་པའི་ཕྱིར་རོ་ཞེ་ན་ནི། ཕལ་ཆེར་ལ་འདོད་ཆགས་དང་བྲལ་བ་ཡང་ཞེས་བྱ་བ་ལ་སོགས་པ་ལ། འཇིག་རྟེན་པའི་ལམ་གྱིས་རྣམ་པ་དྲུག་པ་ཟད་པར་བྱས་པ་ཡང་། གལ་ཏེ་ཕྱིས་འཕགས་
པའི་ལམ་མངོན་དུ་བྱེད་ན་དེའི་ཚེ་དེ་ལན་ཅིག་ཕྱིར་འོང་བ་ཡིན་ན། དེ་ཡང་རྒྱུན་དུ་ཞུགས་པར་འགྱུར་རོ། །དེ་བཞིན་དུ་འཇིག་རྟེན་པའི་ལམ་གྱིས་འདོད་པ་ལས་འདོད་ཆགས་དང་བྲལ་བ་ཡང་སེམས་བཅུ་དྲུག་པ་ལ་ཕྱིར་མི་འོང་བ་ཉིད་ཡིན་གྱི་རྒྱུན་དུ་ཞུགས་པ་མ་ཡིན་ན། དེ་ཡང་འབྲས་བུ་དང་པོ་
ཡིན་པས་དེའི་ཕྱིར་རྒྱུན་དུ་ཞུགས་པར་འགྱུར་བ་ཞིག་ན་འདི་ནི་འདོད་པ་ཡང་མ་ཡིན་ནོ། །འབྲས་བུ་ཐམས་ཅད་ཐོབ་པ་ཞེས་བྱ་བ་ལ་སོགས་པ་སྨོས་ཏེ། དེ་ལ་རྒྱུན་དུ་ཞུགས་པ་ལ་སོགས་པའི་འབྲས་བུ་ཐམས་ཅད་ཐོབ་པའི་ངང་ཚུལ་ཡོད་པས་ན་འབྲས་བུ་ཐམས་ཅད་ཐོབ་པ་སྟེ། དེ་ནས་བཟུང་
སྟེ་འབྲས་བུ་ཐོབ་པས་རྒྱུན་དུ་ཞུགས་པ་ཞེས་བྱའོ། །ཞུགས་པ་དང་འབྲས་བུའི་ལམ་ཐོབ་པའི་ཕྱིར་ཞེས་བྱ་བ་ལ་ཞུགས་པའི་ལམ་ནི་སྐད་ཅིག་མ་བཅོ་ལྔའི་མཚན་ཉིད་ཅན་ནོ། །འབྲས་བུའི་ལམ་ནི་ལམ་ལ་རྗེས་སུ་ཤེས་པའོ། །བརྒྱད་པས་ནི་རྒྱུན་དུ་ཞུགས་པའི་ལམ་ཁོ་ན་ཐོབ་ཀྱི། འབྲས་བུའི་

ལམ་ནི་མ་ཡིན་ནོ། །མཐོང་བ་དང་བསྒོམ་པའི་ལམ་ཐོབ་པའི་ཕྱིར་ཞེས་བྱ་བ་ལ། མཐོང་བའི་ལམ་ནི་སྐད་ཅིག་མ་བཅོ་ལྔའོ། །བསྒོམ་པའི་ལམ་ནི་ལམ་ལ་རྗེས་སུ་ཤེས་པ་སྟེ། དེ་ཡང་རྒྱུན་དུ་ཞུགས་པ་ཁོ་ནས་ཐོབ་ཀྱི། དད་པའི་རྗེས་སུ་འབྲང་བ་འམ། ཆོས་ཀྱི་རྗེས་སུ་འབྲང་བ་བརྒྱད་པས་ནི་
མ་ཡིན་ནོ། །རྒྱུན་དུ་ཞུགས་པ་ཐམས་ཅད་མངོན་པར་རྟོགས་པའི་ཕྱིར་རོ་ཞེས་བྱ་བ་ནི་ལམ་ལ་རྗེས་སུ་ཤེས་པའི་བཟོད་པའི་སྐད་ཅིག་ཀྱང་མཐོང་བའི་ཕྱིར་ཏེ། རྒྱུ་འདིའི་ཕྱིར་ཡང་དེ་ཁོ་ན་རྒྱུན་དུ་ཞུགས་པ་ཡིན་གྱི། བརྒྱད་པ་ནི་མ་ཡིན་ནོ། །གནས་བདུན་ལ་མཁས་པ་ཞེས་བྱ་བ་དང་། འདབ་མ་བདུན་པ་
ཞེས་བྱ་བ་བཞིན་ནོ་ཞེས་བྱ་བ་ནི་དགེ་སློང་གནས་བདུན་ལ་མཁས་པ་ཞེས་བཤད་པ་ལྟ་བུའོ། །ཇི་ལྟར་ཞེ་ན། དགེ་སློང་དག་ཇི་ལྟར་ན་དགེ་སློང་གནས་བདུན་ལ་མཁས་པ་ཡིན་ཞེ་ན། གཟུགས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །གཟུགས་ཀུན་འབྱུང་བ་དང་། གཟུགས་འགོག་པ་
དང་། གཟུགས་འགོག་པར་འགྲོ་བའི་ལམ་དང་། གཟུགས་ཀྱི་རོ་མྱང་བ་དང་། ཉེས་དམིགས་དང་། ངེས་པར་འབྱུང་བ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ་ཞེས་འབྱུང་སྟེ། དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་དག་ལ་ཡང་བརྗོད་
པར་བྱའོ། །ཚུལ་འདིས་ནི་གནས་སུམ་ཅུ་རྩ་ལྔ་ལ་མཁས་པར་འགྱུར་རོ། །འདབ་མ་བརྒྱ་ཕྲག་དུ་མ་ཞིག་ཡོད་ཀྱང་། བདུན་ཚན་དུ་མཐུན་པའི་ཕྱིར་ཤིང་དེ་ལ་ལོ་མ་བདུན་པ་ཞེས་བྱའོ། །དཔེ་དང་པོ་ནི་གསུང་རབ་ལས་གྲུབ་པ་ཡིན་ལ། གཉིས་པ་ནི་འཇིག་རྟེན་པ་ལ་གྲགས་པའོ་ཞེས་བྱ་བ་ནི་ཁྱད་
པར་རོ། །གལ་ཏེ་ལྷ་དང་མི་དག་གི་ནང་རེ་རེ་སྲིད་པ་བདུན་ཉིང་མཚམས་སྦྱོར་ན། འོ་ན་གང་མདོ་ལས་གང་ཟག་ལྟ་བ་ཕུན་སུམ་ཚོགས་པ་ཞེས་བྱ་བ་ལ་སོགས་པ་གསུངས་པ་དེ་དང་ཇི་ལྟར་མི་འགལ། འགྲོ་བ་གཅིག་ཏུ་ཞེས་བྱ་བ་ནི་ལྷའི་འགྲོ་བའམ་མིའི་འགྲོ་བར་སྲིད་པ་བརྒྱད་པ་མངོན་པར་མི་འགྲུབ་
པའོ། །འོན་ཏེ་སྒྲ་ཇི་བཞིན་དུ་བརྟག་ན་ནི་སྲིད་པ་བར་མ་ནི་འདོད་པ་ཡང་ཡིན་ཏེ་དེའི་ཕྱིར་འགྲོ་བ་གཅིག་ཏུ་ཞེས་བྱ་བ་འདི་དགོངས་པ་ཡིན་པར་ངེས་སོ། །དེ་ལྟར་ན་ཡང་སྲིད་པའི་རྩེ་མོའི་བར་དུ་གོང་དུ་འཕོ་བ་ཞེས་བྱ་བ་རྒྱས་པར་འབྱུང་སྟེ། གོང་དུ་འཕོ་བ་གནས་ཐམས་ཅད་དུ་འཆི་འཕོ་བ་ནི་འགྲོ་བ་

གཅིག་ཏུ་བརྒྱུད་པས་ལྷག་པའི་སྐྱེ་བ་གཞན་མངོན་པར་འགྲུབ་སྟེ། དེ་འཕར་ཕྱེད་འཕར་ཐམས་ཅད་དུ། །འཆི་འཕོ་གཞན་སྲིད་རྩེ་མོར་འགྲོ། །ཞེས་འབྱུང་བའི་ཕྱིར་རོ་ཞེ་ན། དེའི་ཕྱིར་འདོད་པའི་ཁམས་ལ་དགོངས་ཏེ་གསུངས་པའི་ཕྱིར་ཞེས་བྱ་བ་སྨོས་ཏེ། འགྲོ་
བ་གཅིག་པོ་འདོད་པའི་ཁམས་ཀྱི་ལྷའི་འགྲོ་བའམ། མིའི་འགྲོ་བ་གང་ཡིན་པ་དེར་སྲིད་པ་བརྒྱད་པ་མངོན་པར་མི་འགྲུབ་ཀྱི། གཟུགས་དང་གཟུགས་མེད་པའི་ཁམས་དག་ཏུ་ནི་མ་ཡིན་ནོ། །འདི་ལ་ཤེས་པར་བྱེད་པ་མདོ་འམ་རིགས་པ་ཅི་ཞིག་ཡོད། གང་ལས་འདོད་པའི་ཁམས་ཀྱི་དབང་དུ་
བྱས་ནས་ཡིན་གྱི་ཞེས་བྱ་བ་རྟོགས་པར་འགྱུར་བ་འདོད་པའི་ཁམས་ཀྱི་དབང་དུ་བྱས་ནས་འདི་གསུངས་སོ་ཞེས་བྱ་བ་ནི་མདོ་ལས་གསུངས་པ་ཡོད་པ་མ་ཡིན་ནོ། །གང་གིས་དེ་མ་ཐག་ཏུ་གླེངས་པ་དེ་ཉིད་ཀྱིས་ལྷ་དང་མི་དག་གི་ནང་དུ་སོ་སོར་ལན་བདུན་ཞེས་བྱ་བ་སྨྲས་སོ། །འདི་སྐད་དུ་ལྷ་རྣམས་དང་
ཞེས་བྱ་བ་རྒྱས་པར་འབྱུང་ངོ་། །དེ་ལྟར་བྱེ་བྲག་ཏུ་སྨྲ་བའི་ཕྱོགས་དང་འགལ་བར་འགྱུར་བ་དང་། སློབ་དཔོན་གྱིས་གཞུང་གཟུགས་པའི་ཕྱིར་འོད་སྲུངས་པ་རྣམས་ཞེས་བྱ་བ་རྒྱས་པར་སྨོས་ཏེ། བྱེ་བྲག་ཏུ་སྨྲ་བའི་ཕྱོགས་ལྟར་ན་ཡང་སོ་སོ་ཡིན་ནོ་ཞེས་བྱ་བ་རྟོགས་ཏེ། དེ་ལྷ་མ་ཡིན་ན་ལྷ་དང་མི་དག་ཏུ་ལན་
བདུན་ཞེས་བྱ་བ་ཁོ་ནར་གསུང་བར་འགྱུར་གྱི། ལྷ་རྣམས་སུ་ལན་བདུན་མི་རྣམས་སུ་ལན་བདུན་ཞེས་གསུང་བར་མི་འགྱུར་རོ། །འདོད་པའི་ལས་དགོངས་ཏེ་གསུངས་པའི་ཕྱིར་ཞེས་བྱ་བ་འདི་ལ་ཤེས་པར་བྱེད་པ་མདོ་འམ་རིགས་པ་ཅི་ཞིག་ཡོད་ཅེས་སྨྲས་པ་གང་ཡིན་པ་ཡང་མདོའི་དོན་ཁོང་དུ་མ་
ཆུད་ནས་དེ་སྐད་དུ་སྨྲ་བ་ཡིན་ཏེ། གང་དུ་འཕགས་པ་ལ་རེ་ལྟར་ཐོགས་ན་ལན་བདུན་པ་ཞེས་གསུངས་པ་དེ་ཁོ་ནར་སྲིད་པ་བརྒྱད་པ་བཀག་པར་འཐད་ན། གཟུགས་དང་གཟུགས་མེད་པ་དག་ཏུ་ནི་རེ་ལྟར་ཐོགས་ན་ལན་བདུན་པ་གསུངས་པ་ཡང་མ་ཡིན་པས་རྒྱུན་དུ་ཞུགས་པའི་དབང་དུ་
མཛད་ནས་གསུངས་པའི་ཕྱིར། དེ་ལས་ཕྱིར་མི་འོང་བ་ལ་སྲིད་པ་བརྒྱད་པ་བཀག་པར་མི་རིགས་སོ། །ལམ་དེ་ནི་དེ་འདྲ་སྟེ་ཞེས་བྱ་བ་ལ་གང་གིས་ན་དུས་དེ་སྲིད་ཀྱིས་གདོན་མི་ཟ་བར་རྒྱུད་ཡོངས་སུ་སྨིན་པ་ལས་སྲིད་པ་བརྒྱད་པ་མངོན་པར་འགྲུབ་པར་མི་འགྱུར་བ་དེ་འདྲ་ཞིང་དེ་ལྟ་བུ་ཡིན་ནོ། །སྦྲུལ་

གོམ་པ་བདུན་པས་ཟིན་པ་ལྟ་བུ་ཞེས་བྱ་བ་ལ། དཔེར་ན་སྦྲུལ་གོམ་པ་བདུན་པས་ཟིན་པ་ནི་གོམ་པ་བདུན་བོར་ནས་གདོན་མི་ཟ་བར་འཆིའི་ཕན་ཆད་དུ་ཡང་མ་ཡིན་ཚུན་ཆད་དུ་ཡང་མ་ཡིན་ཏེ། དུག་གི་རིགས་དེ་ནི་དེ་ལྟ་བུ་ཡིན་ནོ། །རིམས་ཉིན་བཞི་པ་བཞིན་ཞེས་བྱ་བ་ནི་གང་ཞིག་ཉི་མ་བཞི་ཞིག་
རིམས་ཀྱིས་འདེབས་ཀྱི། སྔར་ཡང་མ་ཡིན་ལ་ཕྱིས་ཀྱང་མ་ཡིན་ཏེ། རིམས་ཀྱི་རིགས་དེ་ལྟ་བུ་ཡིན་པ་དེ་བཞིན་དུ། གང་གིས་ན་འཕགས་པའི་ལམ་སྐྱེས་པ་ལ་སྲིད་པ་བརྒྱད་པ་འགྲུབ་པར་མི་བྱེད་པ་ལམ་གྱི་རིགས་དེ་ནི་དེ་ལྟ་བུ་ཡིན་ནོ། །ལུས་པའི་ཕྱིར་རོ་ཞེས་བྱ་བ་ལ། ཅི་ཞེ་ན། སྲིད་པ་བརྒྱད་པ་
མངོན་པ་མི་འགྲུབ་ཅིང་ཚུ་རོལ་དུ་མྱ་ངན་ལས་འདས་པ་ཐོབ་པ་མ་ཡིན་ནོ། །འོག་མའི་ཆ་དང་མཐུན་པ་གཉིས་ཞེས་བྱ་བ་ནི་འདོད་པ་ལ་འདུན་པ་དང་གནོད་སེམས་ཏེ། འདོད་པའི་ཁམས་ལ་འདོད་ཆགས་དང་མ་བྲལ་བའི་ཕྱིར་དེ་ལ་དེ་གཉིས་ཡོད་དོ། །གོང་མའི་ཆ་དང་མཐུན་པ་ལྔ་ནི་འདོད་ཆགས་
གཉིས་པོ་གཟུགས་དང་གཟུགས་མེད་པའི་འདོད་ཆགས་དང་། རྒོད་པ་དང་། ང་རྒྱལ་དང་། གཏི་མུག་གོ། །བར་སྐབས་སུ་འཕགས་པའི་ལམ་མངོན་དུ་བྱེད་ཅིང་ཡོངས་སུ་མྱ་ངན་ལས་མི་འདའ་སྟེ་ཞེས་བྱ་བ་ལ་བར་སྐབས་སུ་ཞེས་བྱ་བ་ནི་བར་དང་ཚུ་རོལ་དུ་ཞེས་བྱ་བའི་ཐ་ཚིག་གོ། །
ཡང་ཅིའི་ཕྱིར་བར་སྐབས་སུ་ལམ་མངོན་དུ་བྱས་ནས་ཡོངས་སུ་མྱ་ངན་ལས་མི་འདའ་ཞེ་ན། དེའི་ཕྱིར་དེ་སྲིད་དུ་སྲིད་པ་མྱོང་བར་འགྱུར་བའི་ལས་ཀྱི་སྟོབས་བསྐྱེད་པའི་ཕྱིར་རོ་ཞེས་བྱ་བ་སྨོས་ཏེ་ལས་འདིས་དེ་སྲིད་དུ་སྲིད་པ་མྱོང་བར་བྱེད་པས་ན་དེ་ནི་དེ་སྲིད་དུ་སྲིད་པ་མྱོང་བར་བྱེད་པའི་ལས་ཏེ། སྲིད་པ་
བདུན་མྱོང་བར་འགྱུར་བའི་ལས་ཞེས་བྱ་བའི་ཐ་ཚིག་གོ། །སངས་རྒྱས་འབྱུང་བ་མེད་པ་ན། །ཞེས་བྱ་བ་ནི་གལ་ཏེ་བསྟན་པ་ནུབ་ནའོ། །དགྲ་བཅོམ་པ་ཉིད་ཐོབ་པ་ནི་ཁྱིམ་ན་གནས་པར་མི་རུང་སྟེ། འོ་ན་འདི་ཅི་ཡིན་ཞེ་ན། དགེ་སློང་ངོ་། །ཇི་ལྟར་ཞེ་ན། ཆོས་ཉིད་ཀྱིས་འཐོབ་པའི་དགེ་སློང་གི་
མཚན་མ་ཡང་འཐོབ་བོ་ཞེས་བྱ་བ་སྨོས་སོ། །ཆོས་ཉིད་ཅེས་བྱ་བ་ནི་མི་སློབ་པའི་ལམ་དེའི་རང་བཞིན་དང་མཐུན་ཏེ། དགེ་སློང་གི་རྟགས་དང་སྦྱོར་བར་བྱེད་པ་གང་ཡིན་པ་དེ་ནི་དེའི་རང་བཞིན་ནོ། །གཞན་དག་ན་རེ་གནས་གཞན་གྱི་མཚན་མས་སོ་ཞེས་ཟེར་རོ་ཞེས་བྱ་བ་ལ་དེ་ནི་མི་འདོད་དེ། དེ་དག་ནི་

ལོག་པར་ལྟ་བའི་དབང་གིས་དམ་པ་མ་ཡིན་པའི་ལས་དག་ལ་འཇུག་པའི་ཕྱིར་རོ། །ལོག་པར་ལྟུང་བའི་ཆོས་ཅན་མ་ཡིན་ཞེས་བྱ་བ་ནི་མདོ་ལས་རྒྱུན་དུ་ཞུགས་པ་ཡིན་ཏེ། ལོག་པར་ལྟུང་བའི་ཆོས་ཅན་མ་ཡིན་པ་དང་། རྫོགས་པའི་བྱང་ཆུབ་ཏུ་ངེས་པར་གཞོལ་བ་ཡིན་ཏེ།
རེ་ལྟར་ཐོགས་ན་སྲིད་པ་ལན་བདུན་པ་ཡིན་ཏེ། ལྷ་རྣམས་དང་མི་རྣམས་ཀྱི་ནང་དུ་ལན་བདུན་འཁོར་ཞིང་སོང་ནས་སྡུག་བསྔལ་གྱི་མཐར་བྱེད་དོ་ཞེས་བྱ་བ་རྒྱས་པར་འབྱུང་ངོ་། །དེར་འགྲོ་བའི་ལས་མི་སོགས་པའི་ཕྱིར་ཞེས་བྱ་བ་ནི། ངན་སོང་དུ་འགྲོ་བའི་ལས་མི་བྱེད་པའི་ཕྱིར་ཞེས་བྱ་བའི་དོན་ཏོ། །
བསགས་པ་རྣམ་པར་སྨིན་པ་འབྱིན་པ་དང་མི་མཐུན་པར་བྱས་པའི་ཕྱིར་རོ། །གང་ཞེ་ན། རྒྱུད་དོ། །བསགས་པ་ནི་སྔོན་བྱས་པ་སྟེ། ཕུང་པོའི་རྒྱུད་དེའི་རྣམ་པར་སྨིན་པ་འགྲུབ་པ་དང་མི་མཐུན་པར་བྱས་པས་དེ་ཡང་མ་སྨིན་ཏེ། དེའི་ཕྱིར་ལོག་པར་ལྟུང་བའི་ཆོས་ཅན་མ་ཡིན་ནོ། །ཡང་ཅིའི་ཕྱིར་རྒྱུད་
ངན་སོང་དུ་འགྲོ་བའི་ལས་བསགས་པའི་རྣམ་པར་སྨིན་པ་འབྱིན་པ་དང་མི་མཐུན་པར་འགྱུར་ཞེ་ན། བཤད་པ་དགེ་བའི་རྩ་བ་སྟོབས་དང་ལྡན་པ་ནི་ཟག་པ་མེད་པ་དག་སྟེ། དེ་དག་གིས་ཕུང་པོའི་རྒྱུད་བསྒོས་པའི་ཕྱིར་མི་མཐུན་པ་ཡིན་ནོ། །དེ་དག་གིས་ཇི་ལྟར་བསྒོས་ཤེ་ན། དེའི་ཕྱིར་སྦྱོར་བ་དང་བསམ་པ་དག་
པའི་སྒོ་ནས་ཞེས་བྱ་བ་སྨོས་སོ། །དེ་ལ་སྦྱོར་བ་དག་པ་ནི་འཕགས་པ་དགྱེས་པའི་ཚུལ་ཁྲིམས་དག་གོ། །བསམ་པ་དག་པ་ནི་སངས་རྒྱས་ལ་སོགས་པ་ལམ་ཤེས་ནས་དད་པའོ། །ངན་འགྲོར་ངེས་ན་ནི་ངེས་པར་འབྱེད་པའི་ཆ་དང་མཐུན་པའི་དགེ་བའི་རྩ་བའི་མཚན་ཉིད་ཅན་བཟོད་པ་ཡང་སྐྱེད་པར་མི་འགྱུར་ན།
ཟག་པ་མེད་པའི་ལམ་ལྟ་སྨོས་ཀྱང་ཅི་དགོས་ཇི་ལྟར་དགེ་བའི་རྩ་བ་སྟོབས་དང་ལྡན་པ་བསྒོས་པ་མི་དགེ་བ་བསགས་པ་རྣམ་པར་སྨིན་པ་དང་མི་མཐུན་པར་འགྱུར་བ་དེ་བསྟན་པའི་ཕྱིར། འདིར་སྨྲས་པ་ཞེས་བྱ་བ་སྨོས་ཏེ། ཕྱེད་འོག་མས་ནི་གོ་རིམས་བཞིན་དུ་ཕྱེད་གོང་མས་དམ་བཅས་པའི་དོན་གཉིས་ཀྱི་དཔེ་
གཉིས་བསྟན་ཏོ། །སྡུག་བསྔལ་གྱི་མཐར་བྱེད་དོ་ཞེས་བྱ་བ་ནི་མདོ་ལས་རྒྱུན་དུ་ཞུགས་པ་ཡིན་ཏེ། ལོག་པར་ལྟུང་བའི་ཆོས་ཅན་མ་ཡིན་པ་དང་། རྫོགས་པའི་བྱང་ཆུབ་ཏུ་གཞོལ་ངེས་པ་ཡིན་ཏེ། རེ་ལྟར་ཐོགས་ན་སྲིད་པ་ལན་བདུན་པ་ཡིན་ཏེ། ལྷ་རྣམས་དང་མི་རྣམས་ཀྱི་ནང་དུ་ལན་

བདུན་འཁོར་ཞིང་སོང་ནས་སྡུག་བསྔལ་གྱི་མཐར་བྱེད་དོ་ཞེས་གསུངས་པ་གང་ཞིག་བྱེད་པར་འགྱུར་བ་སྡུག་བསྔལ་གྱི་མཐའ་གང་ཡིན་པ་ཞེས་བྱ་བའོ། །གང་ཕན་ཆད་སྡུག་བསྔལ་མེད་པ་སྟེ་ཞེས་བྱ་བ་ནི་སྲིད་པ་གཞན་གྱིས་བསྡུས་པའོ། །དེའི་ཕྱིར་དེ་ལྟར་ཕུང་པོ་ལྷག་མ་དང་བཅས་པའི་སྡུག་བསྔལ་
དང་སྦྱར་རོ། །དེ་ཕན་ཆད་སྡུག་བསྔལ་མེད་དེ། ཐ་མའི་སྐད་ཅིག་ལས་སྐྱེ་བའི་སྡུག་བསྔལ་གཞན་ཡོད་པ་མ་ཡིན་ནོ། །དེ་ཉིད་ཀྱི་ཕྱིར་སྡུག་བསྔལ་ཉིང་མཚམས་མི་སྦྱོར་བར་བྱེད་ཅེས་བྱ་བའི་ཐ་ཚིག་གོ་ཞེས་བྱ་བ་སྨོས་ཏེ། གང་གི་ཕྱིར་སྐྱེ་བ་གཞན་མཚམས་མི་སྦྱོར་བའི་ཕྱིར་རོ། །ཡང་ན་སྡུག་བསྔལ་གྱི་
མཐའ་ནི་མྱ་ངན་ལས་འདས་པ་ཡིན་ནོ། །མྱ་ངན་ལས་འདས་པ་རྟག་པ་ཇི་ལྟར་བྱེད་ཅེ་ན། དེའི་ཕྱིར་དེ་ཐོབ་པའི་གགས་བསལ་བའི་ཕྱིར་ཏེ་ཞེས་བྱ་བ་སྨོས་སོ། །མྱ་ངན་ལས་འདས་པ་ཐོབ་པའི་གགས་ནི་ཉོན་མོངས་པའི་ཐོབ་པ་ཡིན་ཏེ། དེ་ཡོད་ན་མྱ་ངན་ལས་འདས་པའི་ཐོབ་པ་མི་སྐྱེ་བའི་ཕྱིར་རོ། །དེ་བསལ་
བ་ནི་གཉེན་པོའི་སྒོ་ནས་དེའི་གགས་རྣམ་པར་གཅོད་པ་སྟེ། སེལ་བའི་རྟོག་པས་མྱ་ངན་ལས་འདས་པ་བྱེད་དོ་ཞེས་བརྗོད་དོ། །དེ་ཉིད་ལ་དཔེ་ནི་དཔེར་ན། མདུན་ཁང་གཏིབས་ལ་ནམ་མཁའ་གྱིས། །ཞེས་བྱ་བ་སྟེ། ནམ་མཁའ་བྱེད་པ་ནི་གགས་སེལ་བ་ཡིན་གྱི་བསྐྱེད་པ་ནི་མ་ཡིན་ཏེ། མདུན་
ཁང་ནམ་མཁའི་གགས་ཡིན་པའི་ཕྱིར་རོ། །འདིར་ཡང་དེ་དང་འདྲའོ། །གཞན་ཡང་ཡོད་མོད་ཀྱི་ཞེས་བྱ་བ་ནི་སོ་སོའི་སྐྱེ་བོ་རྒྱུད་སྨིན་པ་སྟེ། སོ་སོའི་སྐྱེ་བོ་ངེས་པར་འབྱེད་པའི་ཆ་དང་མཐུན་པ་ཐོབ་པའམ། དེ་ལས་གཞན་ཐར་པའི་ཆ་དང་མཐུན་པ་སྐྱེས་པའོ། །མ་ངེས་པས་ཞེས་བྱ་བ་ནི་
དེའི་བྱ་བ་མ་ཤེས་པའི་ཕྱིར་ཏེ། རྐྱེན་ལ་ལྟོས་པའི་ཕྱིར་རེས་འགའ་ནི་འདི་ཁོ་ནར་ཡོངས་སུ་མྱ་ངན་ལས་འདས་པ། རེས་འགའ་ནི་སྲིད་པ་བརྒྱད་པ་དག་ཏུ་ཡིན་པས་མི་བརྗོད་དོ། །རྣམ་གསུམ་རྣམ་བཞི་ལས་གྲོལ་བ། །ཞེས་བྱ་བ་རྒྱས་པར་འབྱུང་སྟེ། རྒྱུན་དུ་ཞུགས་པ་དེ་ཉིད་བསྒོམ་པས་
སྤང་བར་བྱ་བ་རྣམས་ལ་ཉོན་མོངས་པའི་ཆ་གསུམ་སྤངས་པ་ནི་ཚེ་གསུམ་དུ་རིགས་ནས་རིགས་སུ་སྐྱེ་བ་ཡིན་ནོ་ཞེས་བྱ་བ་རྣམ་པར་གཞག་པ་ལ་ཉོན་མོངས་པའི་ཆ་བཞི་སྤངས་པ་ནི་གཉིས་སུ་རིགས་ནས་རིགས་སུ་སྐྱེ་བ་ཡིན་ནོ་ཞེས་བྱ་བ་རྣམ་པར་གཞག་སྟེ། འདི་ནི་འདིར་ཅི་རིགས་པར་སྦྱར་རོ། །

ཚིགས་སུ་བཅད་པའི་ནང་དུ་གཉིས་ཤིག་སྨོས་པ་ཞེས་བྱ་བ་ནི་ཉོན་མོངས་པ་སྤངས་པ་དང་སྐྱེ་བའོ། །ཅིའི་ཕྱིར་ཞེ་ན། རྒྱུན་དུ་ཞུགས་པ་ཕྱིས་ཉོན་མོངས་པ་སྤོང་བར་བྱེད་ན་ཞེས་བྱ་བ་སྨོས་ཏེ། དེའི་གཉེན་པོ་དབང་པོ་ཐོབ་པ་མེད་པར་ནི་དེ་སྤངས་པ་མེད་པའི་ཕྱིར་རོ། །ཉོན་
མོངས་པ་སྤངས་པ་སྨོས་པ་ཁོ་ནས་དེའི་གཉེན་པོ་དབང་པོ་ཐོབ་པར་བཤད་པ་ཡིན་ཏེ། དེའི་ཕྱིར་ཡང་ཚིགས་སུ་བཅད་པའི་ནང་དུ་མ་སྨོས་སོ། །དེ་ལྟ་ན་ནི་འོ་ན་ཚི་གཉིས་དང་གསུམ་སྨོས་པར་ཡང་མི་བྱ་སྟེ། ཉོན་མོངས་པ་སྤངས་པ་ཁོ་ནས་དེ་ཡང་བཤད་པའི་ཕྱིར་རོ། །གང་ཞིག་ཉོན་མོངས་པའི་
ཆ་གསུམ་མམ་བཞི་སྤངས་པ་དེ་ནི་གདོན་མི་ཟ་བར་སྐྱེ་བ་གཉིས་སམ་གསུམ་ལྷག་མ་དང་བཅས་པར་རྟོགས་པ་ཉིད་དོ་ཞེ་ན། དེའི་ཕྱིར་ཆེས་ཉུང་ངུར་ཡང་འགྱུར་བ་ཞེས་བྱ་བ་སྨོས་ཏེ། འདིའམ་བར་མ་དོ་འམ། སྐྱེ་ནས་མྱ་ངན་ལས་འདས་པར་འགྱུར་རོ། །སྐྱེ་བ་ཉུང་བ་ཉིད་ལ་རྒྱུ་སྨྲས་པ་ནི་གོང་མའི་སྐལ་
བ་དང་ལྡན་པའི་ཕྱིར་བྱ་བ་སྟེ། རྒྱུན་དུ་ཞུགས་པའི་གོང་མ་ལན་ཅིག་ཕྱིར་འོང་བའི་འབྲས་བུ་ནས་དགྲ་བཅོམ་པ་ཉིད་ཀྱི་བར་གྱི་སྐལ་བ་དང་ལྡན་པའི་ཕྱིར་རོ། །དེའི་ཕྱིར་དེ་ཚེ་གཉིས་གསུམ་དུ་རིགས་ནས་རིགས་ཞེས་ངེས་པར་བྱ་བའི་ཕྱིར་དེའི་སྐྱེ་བ་སྨོས་ཏེ། དེ་ནི་རྒྱུ་གང་ཡང་རུང་བ་ཞིག་མ་ཚང་བས་
རིགས་ནས་རིགས་སུ་སྐྱེ་བ་ཡིན་པར་མི་འདོད་དོ། །ཅིའི་ཕྱིར་རྣམ་པ་ལྔ་སྤངས་པའི་ཕྱིར་མ་ཡིན་ཞེ་ན་ཞེས་བྱ་བ་ནི་སྐབས་སུ་བབ་པའི་ཕྱིར་རིགས་ནས་རིགས་སྐྱེ་བ་མ་ཡིན་ཞེས་བྱ་བར་སྦྱར་རོ། །དེའི་ཕྱིར་དེ་སྤངས་ནས་ཞེས་བྱ་བ་སྨོས་སོ། །ཅིའི་ཕྱིར་ཞེ་ན། དེ་ཡི་རྣམ་པ་གཅིག་གིས་ནི། །ཞེས་བྱ་བ་སྨོས་
ཏེ། བར་ཆད་གཅིག་པ་བཞིན་དུ་ཁམས་ལས་མི་འདའ་བའི་ཕྱིར་རོ། །བར་ཆད་གཅིག་པ་ནི་འདོད་པའི་ཁམས་ལས་འདའ་སྟེ། དེའི་ཕྱིར་དེའི་ཉོན་མོངས་པ་རྣམ་པ་གཅིག་གིས་ཀྱང་འབྲས་བུ་ལ་གེགས་བྱ་བར་ནུས་ན། ལན་ཅིག་ཕྱིར་འོང་བ་ན་འདོད་པའི་ཁམས་ལས་མི་འདའ་བས་དེའི་
ཉོན་མོངས་པ་རྣམ་པ་དྲུག་པ་གཅིག་པུས་གེགས་བྱ་བར་མི་ནུས་ཏེ། དེའི་ཕྱིར་རྣམ་པ་ལྔ་སྤངས་པས་མཇུག་ཐོགས་སུ་གདོན་མི་ཟ་བར་ལན་ཅིག་ཕྱིར་འོང་བར་འགྱུར་བས་དེ་ལ་རིགས་ནས་རིགས་སུ་སྐྱེས་པ་ཞེས་མི་བྱའོ། །འདོད་ཆགས་དང་ཞེ་སྡང་དང་གཏི་མུག་རྣམས་བསྲབས་པའི་ཕྱིར་ཞེས་འབྱུང་བ་

ཞེས་བྱ་བ་ལ་གང་ལས་ཤེ་ན་མདོ་ལས་སོ། །ཇི་སྐད་དུ་ཞེ་ན། ཀུན་དུ་སྦྱོར་བ་གསུམ་སྤངས་པའི་ཕྱིར་དང་། འདོད་ཆགས་དང་ཞེ་སྡང་དང་གཏི་མུག་རྣམས་བསྲབས་པའི་ཕྱིར་ལན་ཅིག་ཕྱིར་འོང་བ་ཞེས་འབྱུང་ངོ་། །ཆུང་ངུའི་རྣམ་པ་ལུས་པའི་ཕྱིར་རོ་ཞེས་བྱ་བ་ནི་ཆུང་ངུའི་རྣམ་པ་གསུམ་
ལུས་པའོ། །དེའི་ཆེན་པོ་དང་འབྲིང་གི་རྣམ་པ་སྤོངས་ཟིན་པའི་ཕྱིར་ཆུང་ངུའི་རྣམ་པ་ལུས་པ་ཡིན་ཏེ། མ་སྤངས་པའི་ཕྱིར་རོ། །ཉེས་པ་ཆ་བདུན་དང་བརྒྱད་ཟད་པ་ཞེས་བྱ་བ་ལ་ཉེས་ཆ་ནི་ཉེས་པའི་ཆ་ཤས་ཏེ། རྣམ་པ་བདུན་དང་བརྒྱད་ཀྱི་མཚན་ཉིད་ཡིན་ནོ། །ཇི་ལྟར་ན་འདིའི་རྣམ་པ་གཅིག་
གིས་ཞེས་བྱ་བ་རྒྱས་པར་འབྱུང་བ་ནི་ཇི་ལྟར་འདིའི་རྣམ་པ་དགུ་པ་གཅིག་གིས་འབྲས་བུ་ལ་གེགས་བྱ་བར་ནུས་ལ། རིགས་ནས་རིགས་སུ་སྐྱེ་བའི་རྣམ་པ་གཅིག་གིས་ནི་དེ་ལྟར་གེགས་བྱེད་པར་མི་ནུས་ཞེས་བརྗོད་ཅེ་ན། ཁམས་ལས་འདའ་བའི་ཕྱིར་ཏེ། གང་གི་ཕྱིར་དེ་ནི་རྣམ་པ་དགུ་པ་སྤངས་ནས་
འདོད་པའི་ཁམས་ལས་ཡང་དག་པར་འདའ་བར་འགྱུར་གྱི། ཡང་དེར་མི་སྐྱེ་ལ། རྣམ་པ་དགུ་པ་དེ་ཡང་ལས་དང་ལྷན་ཅིག་ཏུ་དེར་སྐྱེས་ནས་མྱོང་བར་འགྱུར་བ་ཡིན་ཏེ། དེའི་ཕྱིར་དེའི་རྣམ་པར་སྨིན་པ་དང་རྒྱུ་མཐུན་པའི་འབྲས་བུའི་ས་ལས་འདའ་བས་འབྲས་བུ་ལ་གེགས་བྱེད་པར་ནུས་པ་ཡིན་ནོ། །
གོང་དུ་ལས་རྣམས་ནི་གནས་སྐབས་གསུམ་དུ་གེགས་བྱ་བའི་ཕྱིར་ཉེ་བར་གནས་སོ་ཞེས་བྱ་བར་བཤད་ཟིན་ཏོ་ཞེས་བྱ་བ་ནི། བཟོད་དང་ཕྱིར་མི་འོང་དགྲ་བཅོམ། །འཐོབ་པ་ལས་གེགས་ཤིན་ཏུ་བྱེད། །ཅེས་བྱ་བ་ཡིན་ནོ། །འདིར་ནི་ཉོན་མོངས་པ་དག་དང་སྦྱར་བ་ཡིན་ཏེ། དེ་ཉིད་ཀྱི་ཕྱིར་ལས་རྣམས་
ཇི་ལྟ་བར་ཞེས་བྱ་བ་ལ་སོགས་པ་སྨོས་སོ། །དེའི་མྱ་ངན་ལས་འདས་པ་ལ། ཚེ་གཅིག་གིས་ཆོད་པའི་ཕྱིར་རམ་ཞེས་བྱ་བ་ནི་རྣམ་པ་བདུན་དང་བརྒྱད་ཟད་པའི་ལན་ཅིག་ཕྱིར་འོང་བའི་མྱ་ངན་ལས་འདས་པ་ལ་ཚེ་གཅིག་གིས་ཆོད་པའི་ཕྱིར་རོ། །ཉོན་མོངས་པའི་རྣམ་པ་གཅིག་གིས་ཆོད་པའི་ཕྱིར་
ཞེས་བྱ་ནི་གལ་ཏེ་རྣམ་པ་བརྒྱད་སྤངས་ན་ཡིན་ཏེ། མ་སྤངས་ན་ནི་མྱ་ངན་ལས་འདས་པ་ལ་ཚེ་གཅིག་གིས་ཆོད་པའི་ཕྱིར་ཞེས་བྱ་བ་ལ་སོགས་པ་ཡིན་ནོ།