Luận tạng Tây Tạng (Tengyur) — Tập 137

་པ་དང་ཤེས་བཞིན་མཆོག་དང་ལྡན་པ་

ཉིད་ཡིན་པར་ཡོངས་སུ་བསྟན་པ་ཡིན་ནོ། །དགེ་སློང་དག་རྒྱལ་པོ་ལེགས་མཐོང་ཆེན་པོ་ནི་ཧ་ཅང་མི་གྲང་ཞིང་། ཧ་ཅང་མི་དྲོ་བ་དང་། དུས་ཚིགས་བདེ་བ་དང་། གནོད་པ་མེད་པ་དང་། གང་གིས་ན་དེས་ཟོས་པ་དང་། འཐུངས་པ་དང་། འཆོས་པ་དང་།
མྱངས་པ་རྣམས་ལེགས་པར་བདེ་བར་འཇུ་སྟེ། ཕོ་བའི་དྲོད་སྙོམས་ཤིང་འཇུ་བར་བྱེད་པ་དང་ལྡན་པས་གནོད་པ་ཉུང་བ་དང་། ནད་མེད་པའི་རང་བཞིན་དུ་གྱུར་ཏོ་ཞེས་བྱ་བ་ནི་མདོ་སྡེའི་དུམ་བུ་ཡིན་ནོ། །དེའི་ཕྱིར་ཞེས་བྱ་བ་རྒྱས་པར་འབྱུང་བ་ནི་དེའི་ཕྱིར་གནོད་པ་ཉུང་བ་དང་། ནད་མེད་པའི་རང་བཞིན་དུ་གྱུར་ཏོ་
ཞེས་གཉི་ག་བརྗོད་དོ། །གཅིག་གིས་གཅིག་ཁྱད་པར་དུ་བྱ་བའི་ཕྱིར་ནི་ཕན་ཚུན་དུ་ཁྱད་པར་དུ་བྱ་བའི་ཕྱིར་རོ། །ཇི་ལྟ་ཞེ་ན། གནོད་པ་ཉུང་བ་ནི་ནད་མེད་པའི་རང་བཞིན་ཡིན་ལ། ནད་མེད་པའི་རང་བཞིན་ཡང་གནོད་པ་ཉུང་བའོ། །གནོད་པ་ཉུང་བ་ཉིད་དང་། ནད་མེད་པའི་རང་བཞིན་ཅན་ཉིད་དེ་ལ་ཡང་རྒྱུ་
ནི་ཕོ་བའི་དྲོད་སྙོམས་ཤིང་འཇུ་བར་བྱེད་པ་དང་ལྡན་པ་ཞེས་བྱ་བས་ཡང་དག་པར་སྟོན་ཏེ། ཕོ་བའི་ལས་དང་བཅས་པའི་སྙོམས་པ་ཉིད་དུ་སྟོན་ཏོ། །དེ་ལ་ལས་ནི་འཇུ་བར་བྱེད་པ་ཉིད་ཡིན་ནོ། །ཕོ་བ་ནི་ཁོག་བའི་ནང་ན་མེའི་རྟེན་ལུས་ཀྱི་ཕྱོགས་ཤིག་གི་ཁྱད་པར་རོ། །འདིས་ནི་ཞེས་བྱ་བ་ནི་ཧ་ཅང་མི་གྲང་
ཞིང་ཞེས་བྱ་བ་ལ་སོགས་པས་སོ། །མ་སྙོམས་པ་ཉིད་རྣམ་པ་གསུམ་ནི་མེ་མ་སྙོམས་པ་ཉིད་དང་། ཟས་མ་སྙོམས་པ་ཉིད་དང་། དུས་ཚིགས་མ་སྙོམས་པ་ཉིད་དོ། །མ་སྙོམས་པ་གསུམ་དག་གིས་སྐྱོན་གང་དག་འབྱུང་བ་དེ་དག་གི་མེ་མ་སྙོམས་པ་ཉིད་ཀྱིས་ནི་ཞེས་བྱ་བ་རྒྱས་པར་འབྱུང་བས་བསྟན་ཏོ། །
གང་གིས་ན་འཇུ་བར་བྱེད་པས་སོ། །འདིས་ནི་ཞེས་བྱ་བ་རྒྱས་པར་འབྱུང་བ་ནི་གང་གིས་ན་དེས་ཞེས་བྱ་བ་རྒྱས་པར་གསུངས་པ་གང་ཡིན་པའི་ཚིག་འདིས་སོ། །དེ་ལ་ཞེས་བྱ་བ་རྒྱས་པར་འབྱུང་བ་ནི་དེ་ལ་ཟོས་པ་ནི་བཟའ་བའོ། །འཐུངས་པ་ནི་བཏུང་བའོ། །འཆོས་པ་ནི་བཅའ་བའོ། མྱངས་པ་ནི་
བལྡག་པ་དང་གཞིབས་པའོ། །དགེ་སློང་དག་དགེ་སློང་འདི་ལ་བརྙས་པའི་སེམས་མ་སྐྱེད་ཅིག །དེ་ཅིའི་ཕྱིར་ཞེ་ན། དགེ་སློང་དག་དགེ་སློང་འདི་ནི་ལྷག་པའི་སེམས་མཐོང་བའི་ཆོས་ལ་བདེ་བར་གནས་པ་དང་ལྡན་པ་བཞི་རྣམས་ཅི་འདོད་པ་བཞིན་ཐོབ་པ། ཚེགས་མེད་པར་ཐོབ་པ། ངན་ངོན་མ་

ཡིན་པར་ཐོབ་པ་ཡིན་ནོ་ཞེས་བྱ་བ་ནི་མདོ་སྡེའི་དུམ་བུ་ཡིན་ནོ། །ལྷག་པའི་སེམས་ཞེས་བྱ་བ་ནི་ལྷག་པའི་སེམས་ལ་ཡོད་པས། ལྷག་པའི་སེམས་སོ། །དེ་དག་ཀྱང་གང་ཞེ་ན། མཐོང་བའི་ཆོས་ལ་བདེ་བར་གནས་པ་རྣམས་ཏེ། མཐོང་བའི་ཆོས་ལ་བདེ་བར་གནས་པ་རྣམས་སོ། །མཐོང་བའི་
ཆོས་ལ་བདེ་བར་གནས་པ་རྣམས་ནི་བསམ་གཏན་བཞི་རྣམས་སོ། །མཐོང་བའི་ཆོས་ལ་བདེ་བར་གནས་པ་དེ་རྣམས་ཇི་སྲིད་པ་འདོད་པ་དང་། ནམ་འདོད་པ་དང་། ཇི་ལྟ་བུ་འདོད་པ་མངོན་སུམ་དུ་བྱ་བ་ལ་དབང་བ་ཉིད་ཀྱི་ཕྱིར་ན་ལྷག་པའི་སེམས་མཐོང་བའི་ཆོས་ལ་བདེ་བར་གནས་པ་དང་ལྡན་པ་བཞི་
རྣམས་ཅི་འདོད་པ་བཞིན་ཐོབ་པ་ཚེགས་མེད་པར་ཐོབ་པ་དང་ངན་ངོན་མ་ཡིན་པར་ཐོབ་པ་ཡིན་པར་རིག་པར་བྱའོ། །ཇི་སྲིད་འདོད་པ་ལ་སོགས་པ་རྣམས་ཀྱི་དོན་ནི་ཡུན་རིང་པོར་ཞེས་བྱ་བ་རྒྱས་པར་འབྱུང་བས་སྟོན་ཏེ། ཇི་སྲིད་འདོད་པ་ནི་དེ་རྣམས་ཡུན་རིང་པོར་མངོན་སུམ་དུ་བྱ་བ་ལ་དབང་བ་ཉིད་ཀྱི་ཕྱིར་རོ། །ནམ་འདོད་
པ་ནི་རིང་པོར་མི་ཐོགས་པར་མངོན་སུམ་དུ་བྱ་བ་ལ་དབང་བ་ཉིད་ཀྱི་ཕྱིར་རོ། །ཇི་ལྟ་བུ་འདོད་པ་ནི་དེ་རྣམས་ལས་མཆོག་ཏུ་བྱུང་བ་རྣམས་མངོན་སུམ་དུ་བྱ་བ་ལ་དབང་བ་ཉིད་ཀྱི་ཕྱིར་རོ། །ཐ་ཆད་ནི་ངན་སོང་ཞེས་བྱ་བའི་ཕྱིར་རོ། །དེའི་ཕྱིར་ན་ངན་ངོན་མ་ཡིན་པ་ནི་སྔོན་མཆོག་ཏུ་བྱུང་བ་ཞེས་སོ། །གཞན་
དག་ན་རེ་ནི་ཚེགས་དང་མཉམ་པ་མེད་པ་ཉིད་ངན་ངོན་མ་ཡིན་པ་ཡིན་ནོ་ཞེས་ཟེར་ཏེ། དེ་རྣམས་ཚེགས་མེད་པར་ཐོབ་པ་ཞེས་བྱ་བའི་ཚིག་འདིའི་རྣམ་གྲངས་ནི་ངན་ངོན་མ་ཡིན་པར་ཐོབ་པ་ཞེས་བྱ་བ་ཡིན་ནོ། །དེ་ནི་ཅི་འདོད་བཞིན། སོགས་ཐོབ་ཡིན་པར་བཞེད་ཅེས་བྱ་བ་ནི་གང་ཞིག་དེ་
རྣམས་ལ་རྫོགས་པར་སྙོམས་པར་ཞུགས་པ་དེ་ནི་ཅི་འདོད་པ་བཞིན་ཐོབ་པ་ཡིན་ནོ། །གང་ཞིག་དེ་རྣམས་ལ་མྱུར་བར་སྙོམས་པར་ཞུགས་པ་དེ་ནི་ཚེགས་མེད་པར་ཐོབ་པ་ཡིན་ནོ། །གང་ཞིག་དེ་རྣམས་ལ་བརྟན་པར་སྙོམས་པར་ཞུགས་པ་དེ་ནི་ངན་ངོན་མ་ཡིན་པར་ཐོབ་པ་ཡིན་ནོ། །ཡིད་ཆེས་པའི་
ལུང་འདིར་ནི་ཅུང་ཟད་ཙམ་གྱིས་གཏོང་བར་བྱེད་པས་ན་དེའི་ཕྱིར་ངན་ངོན་ཞེས་བྱ་སྟེ། འདི་སྐད་དུ་སྒྲ་དང་རེག་བྱ་ལ་སོགས་པའི་རྐྱེན་གང་ཅི་ཡང་རུང་བ་ཞིག་གིས་བསམ་གཏན་དེ་གཏོང་བར་བྱེད། འདོར་བར་བྱེད་པས་དེའི་ཕྱིར་ངན་ངོན་ཞེས་བྱ་ལ། བཟློག་པ་ནི་བརྟན་པ་ཡིན་ནོ་ཞེས་བསྟན་པ་

ཡིན་ནོ།། །།རྣམ་པར་བཤད་པ་རིགས་པའི་བཤད་པ། བམ་པོ་དགུ་པ། དགེ་སློང་དག་དཔེར་ན། མེ་ཏོག་ཨུཏྤ་ལའི་ཕྲེང་བའམ། ཙམ་པ་ཀའི་ཕྲེང་བའམ། བར་ཤི་ཀའི་ཕྲེང་བའམ། ཨ་ཏི་མུཀྟ་ཀའི་ཕྲེང་བ་ཕྲག་པ་ལ་ཐོགས་པའམ། སྣོད་དུ་གཞག་
པ་ནི་མཚན་མོ་དང་ཉིན་མོ་དེ་དང་དེ་དག་འདས། སྐད་ཅིག་དང་། ཐང་ཅིག་དང་། ཡུད་ཙམ་ཅིག་དེ་དང་དེ་དག་འདས་པ་དང་ཟེགས་པ་ཉིད་དུ་འགྱུར། རྙིངས་པ་ཉིད་དུ་འགྱུར། སྐམས་པ་ཉིད་དུ་འགྱུར་རོ། །དགེ་སློང་དག་མེ་ཏོག་ཨུཏྤལའི་ཕྲེང་བའམ། ཙམ་པ་ཀའི་ཕྲེང་བའམ། བར་ཤི་ཀའི་ཕྲེང་
བའམ། ཨ་ཏི་མུཀྟ་ཀའི་ཕྲེང་བ་གང་ཡིན་པ་དེ་ཟེགས་པ་དང་། རྙིངས་པ་དང་། སྐམས་པ་དང་། ཕྱག་དར་གྱི་ཕུང་པོ་ལ་ཐུག་པར་འགྱུར་བ་དེ་ནི་དུས་ལ་བབ་པ་ཡིན་ནོ། །དགེ་སློང་དག་དེ་བཞིན་དུ་ལུས་གཟུགས་ཅན་རགས་པ། འབྱུང་བ་ཆེན་པོ་བཞི་ལས་གྱུར་པ། ཕ་དང་མའི་ཁུ་བ་ནུར་ནུར་པོ་ལས་
བྱུང་བ། ཆན་དང་ནོམ་བུས་གསོ་གསོ་བ། རྟག་ཏུ་བསྐུ་བ་དང་། བཀྲུ་བ་དང་། མཉེ་བ་བྱས་པ། འགྱེས་པ་དང་། འཇིག་པའི་ཆོས་ཅན་འདི་ཡང་རྒ་བ་ཉིད་དུ་འགྱུར། འཆི་བ་ཉིད་དུ་འགྱུར་རོ། །དགེ་སློང་དག་ལུས་གཟུགས་ཅན་རགས་པ། འབྱུང་བ་ཆེན་པོ་བཞི་ལས་གྱུར་པ། ཕ་དང་
མའི་ཁུ་བ་ནུར་ནུར་པོ་ལས་བྱུང་བ། ཆན་དང་ནོམ་བུས་གསོ་གསོ་བ། རྟག་ཏུ་བསྐུ་བ་དང་། བཀྲུ་བ་དང་། མཉེ་བ་བྱས་པ། འགྱེས་པ་དང་། འཇིག་པའི་ཆོས་ཅན་གང་ཡིན་པ་འདི་མཚན་མོ་དང་ཉིན་མོ་དེ་དང་དེ་དག་འདས། སྐད་ཅིག་དང་། ཐང་ཅིག་དང་། ཡུད་ཙམ་དེ་དང་དེ་དག་འདས་
ན། རྒས་པ་དང་། ནད་བུ་ཅན་དང་། ཤི་བ་དང་། དུར་ཁྲོད་དུ་ཐུག་པར་འགྱུར་བ་དེ་ནི་དུས་ལ་བབ་པ་ཡིན་ནོ་ཞེས་བྱ་བ་ནི་མདོ་སྡེའི་དུམ་བུ་ཡིན་ནོ། །ཚིག་གཅིག་ནི་བསྟན་པ་ཡིན་ཏེ། ཟེགས་པ་ཉིད་དུ་འགྱུར་ཞེས་བྱ་བ་ཡིན་ནོ། །ཚིག་གཉིས་ནི་བཤད་པ་ཡིན་ཏེ། རྙིངས་པ་ཉིད་དུ་འགྱུར།
སྐམས་པ་ཉིད་དུ་འགྱུར་ཞེས་བྱ་བ་འདི་གཉིས་སོ། །རྣམ་པར་འགྱུར་བའི་དོན་ནི་ཇི་སྲིད་དུ་ཞེས་བྱ་བ་རྒྱས་པར་འབྱུང་བས་སྟོན་ཏོ། །འདོད་པ་ལ་རྣམ་པར་རྟོག་པ་བྱུང་བ་དང་དུ་མི་ལེན་ཅིང་། སྤོང་བར་བྱེད་ལ་སེལ་བར་བྱེད་ཅིང་བྱང་བར་བྱེད་དོ། །གནོད་སེམས་ལ་རྣམ་པར་རྟོག་པ་བྱུང་བ་དང་། རྣམ་པར་འཚེ་བ་

ལ་རྣམ་པར་རྟོག་པ་བྱུང་བ་དང་དུ་མི་ལེན་ཅིང་། སྤོང་པར་བྱེད་ལ་སེལ་བར་བྱེད་ཅིང་བྱང་བར་བྱེད་དོ་ཞེས་བྱ་བ་ནི་མདོ་སྡེའི་དུམ་བུ་ཡིན་ནོ། །དེ་ལ་འདོད་པ་ལ་རྣམ་པར་རྟོག་པ་བྱུང་བ་ཞེས་བྱ་བ་ལ་འདོད་པའི་གཞི་ནི་འདོད་པ་རྣམས་ཏེ། གཟུགས་དང་སྒྲ་དང་དྲི་དང་རོ་དང་རེག་བྱ་རྣམས་སོ། །དེ་ལ་དམིགས་
པར་བྱེད་པའི་སེམས་མངོན་པར་འདུ་བྱེད་པ་ནི་འདོད་པ་ལ་རྣམ་པར་རྟོག་པ་སྟེ། འདོད་པ་ལ་རྣམ་པར་རྟོག་པ་དེ་སྤོང་བར་བྱེད་དོ། །ཇི་ལྟར་ཞེ་ན། དེའི་དམིགས་པའི་མཚན་མ་སེལ་བའི་ཕྱིར་རོ། །འདོད་པ་ལ་རྣམ་པར་རྟོག་པ་དེའི་དམིགས་པ་ནི་དེའི་དམིགས་པའོ། །མཚན་མ་ནི་དོན་གཟུགས་དང་སྒྲ་
ལ་སོགས་པ་འདུ་ཤེས་ཀྱིས་ཡོངས་སུ་གཅད་པར་བྱ་བ་གང་ཡིན་པའོ། །དེའི་དམིགས་པ་ལ་བརྟེན་པའི་མཚན་མ་ནི་དེའི་དམིགས་པའི་མཚན་མ་སྟེ། དེ་སེལ་བ་ནི་ཡིད་ལ་མི་བྱེད་པའོ། །དེའི་གཉེན་པོ་བསྒོམས་པས་དེའི་དམིགས་པའི་མཚན་མ་སེལ་བ་སྟེ། དེ་ཅིའི་ཕྱིར་ན་དེའི་དམིགས་པའི་མཚན་མ་
སེལ་བའི་ཕྱིར་རོ། །བཟློག་ཏུ་ཟིན་ཀྱང་རྒྱུ་བསགས་པ་ལས་བྱུང་བའི་རྣམ་པར་རྟོག་པ་ཞེས་བྱ་བ་ལ། རྒྱུ་ནི་དེའི་བག་ཆགས་ཡིན་པས་སེལ་བར་བྱེད་དོ། །ཇི་ལྟ་ཞེ་ན། སེལ་བར་བྱེད། འདོར་བར་བྱེད་དེ། སོ་སོར་བརྟགས་པའི་སྟོབས་ཀྱིས་རྒྱུན་གཅོད་པའི་ཕྱིར་རོ། །དོན་འདི་ཉིད་འདི་དག་གཞི་
ནི་རྣམ་པར་རྟོག་ལ་ཞེས་བྱ་བ་རྒྱས་པར་འབྱུང་བའི་ཚིགས་སུ་བཅད་པར་སྡེབས་པ་ཡིན་ནོ། །འདི་དག་གཞི་ནི་དང་དུ་མི་ལེན་ཅིང་ཞེས་བྱ་བ་རྒྱས་པར་གསུངས་པ་གང་ཡིན་པ་ནིའོ། །རྣམ་པར་རྟོག་པ་ལ་མི་མཐུན་པར་བྱེད་པས་ན་དང་དུ་ལེན་པ་མ་ཡིན་ནོ། །དེའི་རྒྱུ་རྣམ་པར་སྤོང་བའི་ཕྱིར་ན་སྤོང་བར་བྱེད་པ་
ཡིན་ནོ། །རྒྱུན་གཅོད་པའི་ཕྱིར་ན་སེལ་བར་བྱེད་པ་ཡིན་ནོ། །རྗེས་སུ་འཆིང་བ་གཅོད་པའི་ཕྱིར་ན་བྱུང་བར་བྱེད་པ་ཡིན་ནོ། །སྐྱོན་ཉིད་དུ་འཛིན་པའི་ཕྱིར་ན་དང་དུ་མི་ལེན་པ་ཡིན་ནོ། །ཇི་ལྟར་ན་སྐྱོན་ཉིད་དུ་འཛིན་པ་ཡིན་ཞེ་ན། བདག་འདོད་པ་ལ་རྣམ་པར་རྟོག་པ་འབྱུང་བ་ནི་བདག་ལ་གནོད་
པ་དང་། གཞན་ལ་གནོད་པ་དང་། གཉི་ག་ལ་གནོད་པར་འགྱུར་བ་ཡིན། མཐོང་བའི་ཆོས་ལ་ཁ་ན་མ་ཐོ་བ་འཕེལ་བ་ཡིན་ཞིང་། ཚེ་ཕྱི་མ་ལ་ཁ་ན་མ་ཐོ་བ་འཕེལ་བ་ཡིན་ནོ། །མཐོང་བའི་ཆོས་དང་ཚེ་ཕྱི་མ་ལ་ཁ་ན་མ་ཐོ་བ་འཕེལ་བ་ཡིན་ལ་དེ་ལས་སྐྱེས་པའི་སེམས་ལས་བྱུང་བ་སྡུག་བསྔལ་དང་།

ཡིད་མི་བདེ་བ་ཡང་སོ་སོར་ཉམས་སུ་མྱོང་བར་འགྱུར་རོ་ཞེས་རྒྱས་པར་འབྱུང་བ་ཡིན་ནོ། །བྲམ་ཟེའི་ཁྱེའུ་སེམས་ཅན་རྣམས་ནི་ལས་བདག་གིར་བྱ་བ། ལས་ཀྱི་བགོ་སྐལ་ལ་སྤྱོད་པ། ལས་ཀྱི་སྐྱེ་གནས་པ། ལས་ལ་སྟོན་པ། ལས་ཀྱིས་སེམས་ཅན་རྣམས་ལ་མཐོན་པོ་དང་།
དམའ་བ་དང་། ངན་པ་དང་། གྱ་ནོམ་པ་འགེད་པར་བྱེད་པ་དག་ཡིན་ནོ་ཞེས་བྱ་བ་ནི་མདོ་སྡེའི་དུམ་བུ་ཡིན་ནོ། །བགོ་སྐལ་ཏེ་ལོངས་སྤྱོད་དོན་དུ་གཉེར་བར་བྱེད་ཅེས་བྱ་བ་ལ་བགོ་སྐལ་ནི་ལོངས་སྤྱོད་ཅེས་བྱ་བ་འདིས་སྟོན་བར་བྱེད་དོ། །བདག་གི་སྐྱེ་བའི་ཁྱད་པར་དོན་དུ་གཉེར་བར་བྱེད་པ་ནི་ལྷ་དང་མི་ལ་
སོགས་པ་རྣམས་སུའོ། །དེ་ལྟར་ཞེས་བྱ་བ་རྒྱས་པར་འབྱུང་བ་ལ། དེ་ལྟར་བྱེད་པ་ན་སྟེ། ལྷ་རྣམས་ལ་བགོ་སྐལ་ཏེ་ལོངས་སྤྱོད་དང་བདག་གི་སྐྱེ་བའི་ཁྱད་པར་དོན་དུ་གཉེར་བར་བྱེད་ཅིང་། བདག་རྒུད་པར་གྱུར་ན་ལྷ་རྣམས་ལ་སྟོན་པ་ཡིན་པར་རྟེན་པར་བྱེད་པ་ན་ལྷ་རྒྱུ་མ་ཡིན་པ་ལ་རྒྱུར་ལྟ་བས་བསླུས་པར་
འགྱུར་རོ། །སེམས་ཅན་རྣམས་ཀྱི་ལས་ཁོ་ན་བདག་གིར་བྱ་བ་ཡིན་ཞིང་ཞེས་བྱ་བ་རྒྱས་པར་འབྱུང་བ་ན། ལས་ཁོ་ན་སྟོན་པ་ཡིན་གྱི་ལྷ་རྣམས་ནི་མ་ཡིན་ནོ་ཞེས་བྱ་བའི་བར་དུ་གང་གསུངས་པ་འདི་ལ་རིགས་པ་ཅི་ཡོད་ཅེ་ན། ལས་ནི་ཞེས་བྱ་བ་རྒྱས་པར་འབྱུང་བ་ལ། ལས་ནི་རྒྱལ་པོ་དང་། ཆོམ་རྐུན་དང་།
ལྷ་དང་། མི་ལ་སོགས་པ་རྣམས་དང་། ཐུན་མོང་མ་ཡིན་པའི་ཕྱིར་དང་། ལས་ནི་ཤི་བའི་ཚེ་ཡང་མི་གཏོང་བའི་ཕྱིར་རོ། །སེམས་ཅན་རྣམས་ཀྱི་ལས་ཁོ་ན་བདག་གིར་བྱ་བ་ཡིན་གྱི་ནོར་དང་། ཁྱིམ་དང་། བུ་དང་ཆུང་མ་ལ་སོགས་པ་ནི་མ་ཡིན་ཏེ། དེ་རྣམས་ནི་རྒྱལ་པོ་ལ་སོགས་པ་དང་ཐུན་
མོང་ཡིན་པའི་ཕྱིར་དང་། ཤི་བའི་ཚེ་ཡང་གཏོང་བའི་ཕྱིར་རོ། །ལྷ་ལ་གུས་པ་རྣམས་ལོངས་སྤྱོད་རྒུད་པར་དམིགས་པའི་ཕྱིར་དང་། ལྷ་ལ་མ་གུས་པ་རྣམས་ལ་ལོངས་སྤྱོད་ཕུན་སུམ་ཚོགས་པར་དམིགས་པའི་ཕྱིར་སེམས་ཅན་རྣམས་ནི་སྔོན་གྱི་ལས་ཀྱི་བགོ་སྐལ་ལ་སྤྱོད་ཅིང་ཟ་བ་ཡིན་ནོ། །ལྷ་ལ་གུས་
པ་དང་མ་གུས་པ་རྣམས་ལ་གོ་རིམས་བཞིན་དུ་སྐྱེ་བ་དམན་པ་དང་ཁྱད་པར་དུ་འཕགས་པ་དམིགས་པའི་ཕྱིར་དེ་རྣམས་ནི་ལས་ཁོ་ནའི་སྐྱེ་གནས་ལས་བྱུང་བ་ཡིན་ནོ། །ལྷ་ལ་གུས་པ་དང་མ་གུས་པ་རྣམས་ལ་ཡམས་ཀྱི་ནད་དང་གནོད་པ་ཉེ་བར་མ་ཞི་བ་དང་ཉེ་བར་ཞི་བ་དམིགས་པའི་ཕྱིར་རོ། །ལྷ་ལ་གུས་པ་

རྣམས་ལ་ཡམས་ཀྱི་ནད་དང་། གནོད་པ་ཉེ་བར་མ་ཞི་བ་དམིགས་པའི་ཕྱིར་དང་། ལྷ་ལ་མ་གུས་པ་རྣམས་ལ་ཡམས་ཀྱི་ནད་དང་གནོད་པ་ཉེ་བར་ཞི་བ་དམིགས་པའི་ཕྱིར་རྒུད་པར་གྱུར་པ་རྣམས་ལ་ལས་ཁོ་ན་སྟོན་པ་ཡིན་གྱི་ལྷ་རྣམས་ནི་མ་ཡིན་ནོ། །འདོད་པ་རྣམས་ལ་ཡིད་འབྱུང་བར་བྱ་བའི་ཕྱིར་དང་། འདོད་
ཆགས་དང་བྲལ་བར་བྱ་བའི་ཕྱིར་དང་། འགོག་པར་འགྱུར་བར་བྱ་བའི་ཕྱིར་སྒྲུབ་པ་ཡིན་ནོ་ཞེས་བྱ་བ་ནི་མདོ་སྡེའི་དུམ་བུ་ཡིན་ནོ། །དེ་ལ་འདོད་པ་རྣམས་ཀྱི་ཇི་ལྟ་བ་བཞིན་དུ་གཟུགས་རྣམས་ཀྱི་མདོ་སྡེའི་དུམ་བུ་ཡང་དེ་བཞིན་ནོ། །རྣམ་པ་གཅིག་ཏུ་ན་སྡུག་བསྔལ་གྱི་ཕུང་པོ་ཅན་གྱི་མདོ་སྡེ་དང་པོ་ལས་འདོད་པ་རྣམས་དང་།
གཟུགས་རྣམས་གསུངས་པ་བཞིན་ནོ། །ཇི་སྐད་དུ་ཞེ་ན། རྒྱས་པར་གསུངས་ནས། དགེ་སློང་དག་འདོད་པ་རྣམས་ལ་རོ་མྱང་བ་གང་ཞེ་ན། དགེ་སློང་དག་འདི་དག་ནི་འདོད་པའི་ཡོན་ཏན་ལྔ་དག་གོ། །ལྔ་གང་ཞེ་ན། མིག་གིས་རྣམ་པར་ཤེས་པར་བྱ་བའི་ཕྱིར་གཟུགས་སྡུག་པ་མཛེས་པ་དགའ་བ་ཡིད་དུ་
འོང་བ་འདོད་པ་དང་ལྡན་པ་ཆགས་པར་བྱ་བ་ཞེས་རྒྱས་པར་འབྱུང་བ་ནས། ལུས་ཀྱིས་རྣམ་པར་ཤེས་པར་བྱ་བ་སྡུག་པ་མཛེས་པ་དགའ་བ་ཡིད་དུ་འོང་བ་འདོད་པ་དང་ལྡན་པ་ཆགས་པར་བྱ་བའི་བར་དུ་འབྱུང་བ་སྟེ། འདོད་པའི་ཡོན་ཏན་ལྔ་པོ་འདི་དག་ལ་བརྟེན་ནས་བདེ་བའམ་ཡིད་བདེ་བ་སྐྱེ་བ་གང་ཡིན་པ་
འདི་ནི་འདོད་པ་རྣམས་ལ་རོ་མྱང་བ་ཡིན་ནོ། །འོན་ཀྱང་འདི་ལ་ཉེས་དམིགས་ནི་ཆེས་མང་བ་ཡིན་ནོ་ཞེས་རྒྱས་པར་འབྱུང་བ་དང་། དགེ་སློང་དག་གཟུགས་ལ་རོ་མྱང་བ་གང་ཞེ་ན། དགེ་སློང་དག་འདི་ལྟ་སྟེ། བྲམ་ཟེའི་བུ་མོའམ། རྒྱལ་རིགས་ཀྱི་བུ་མོའམ། ཁྱིམ་བདག་གི་བུ་མོ་ལོ་བཅོ་ལྔ་ལོན་
པའམ། ལོ་བཅུ་དྲུག་ལོན་པ་ཞིག་གང་གི་ཚེ་ལེགས་པར་ཁྲུས་བྱས། ལེགས་པར་བྱུགས། སྐྲ་དང་སེན་མོ་བྱི་དོར་བྱས། གོས་དཀར་པོ་བགོས་པ་དེའི་ཚེ་དེ་ཁ་དོག་བཟང་པོ་རྒྱས་པ་མཆོག་དང་ལྡན་པ་ཡིན་ཏེ། ཁ་དོག་བཟང་པོ་དེ་ལ་བརྟེན་ནས་བདེ་བའམ་ཡིད་བདེ་བ་སྐྱེ་བ་གང་ཡིན་པ་དེ་ནི་
གཟུགས་རྣམས་ལ་རོ་མྱང་བ་ཡིན་ནོ། །འོན་ཀྱང་འདི་ལ་ཉེས་དམིགས་ནི་ཆེས་མང་བ་ཡིན་ནོ་ཞེས་རྒྱས་པར་འབྱུང་བ་ཡིན་ནོ། །ཇི་ལྟར་ན་གོ་རིམས་བཞིན་ཞེ་ན། ཇི་སྐད་དུ་གསུངས་པའི་མཚན་ཉིད་ཀྱི་འདོད་པ་རྣམས་དང་། གཟུགས་དེ་རྣམས་ལ་ཡིད་འབྱུང་བར་བྱ་བའི་ཕྱིར་ནི་སྡུག་བསྔལ་ཉིད་

ཡོངས་སུ་ཤེས་པར་བྱ་བའི་ཕྱིར་སྒྲུབ་པ་ཡིན་ནོ། །དེ་ལྟར་ན་སྡུག་བསྔལ་ཉིད་ཡོངས་སུ་ཤེས་པ་ནི་ཡིད་འབྱུང་བ་ཡིན་ནོ། །འདོད་ཆགས་དང་བྲལ་བར་བྱ་བའི་ཕྱིར་ནི་ཀུན་འབྱུང་བ་སྤང་བར་བྱ་བའི་ཕྱིར་སྒྲུབ་པ་ཡིན་ནོ། །འདོད་ཆགས་ནི་སྡུག་བསྔལ་གྱི་ཀུན་འབྱུང་བ་ཡིན་ཏེ།
དེ་ཟད་པ་ནི་འདོད་ཆགས་དང་བྲལ་བ་ཡིན་ནོ། །འགོག་པར་གྱུར་པར་བྱ་བའི་ཕྱིར་ནི་འགོག་པ་མངོན་སུམ་དུ་བྱ་བའི་ཕྱིར་སྒྲུབ་པ་ཡིན་ནོ། །བསྒྲུབས་པས་ནི་ལམ་བསྒོམ་པ་ཡོངས་སུ་སྟོན་ཏོ། །དེ་ལྟར་ན་བདེན་པ་བཞི་མཐོང་བར་བྱ་བའི་ཕྱིར་སྒྲུབ་པ་ཡིན་ནོ་ཞེས་བྱ་བར་རིག་པར་བྱའོ། །གཞན་ཡང་
ཞེས་བྱ་བ་རྒྱས་པར་འབྱུང་བ་ལ། ཉེ་བར་ལེན་པའི་ཕུང་པོ་ལྔ་རྣམས་ནི་འདོད་པ་དང་གཟུགས་ཀྱི་ཁམས་གཉིས་ན་ཡོད་དེ། ཉེ་བར་ལེན་པའི་ཕུང་པོ་ལྔས་བསྡུས་པ་ཡིན་ནོ། །གཟུགས་མེད་པའི་ཁམས་ན་ནི་ཉེ་བར་ལེན་པའི་ཕུང་པོ་བཞིས་བསྡུས་པ་ཡིན་ནོ། །ཅིའི་ཕྱིར་ཞེ་ན། དེ་ནི་སྲེད་པས་སྤུངས་
པའི་ཕྱིར་དེ་རྣམས་ནི་སྲེད་པས་སྦྱར་བའི་ཕྱིར་རོ་ཞེས་བྱ་བའི་ཐ་ཚིག་སྟེ། དེས་ཉིང་འཚམས་སྦྱོར་བའི་ཚེ་ཉེ་བར་ལེན་པའི་ཕུང་པོ་ལྔ་པོ་གཞན་དག་ཏུ་སྤོང་བར་བྱེད་དོ། །གཞན་ཡང་ཞེས་བྱ་བ་རྒྱས་པར་འབྱུང་བ་ནི། ཡང་རྣམ་གྲངས་གཞན་ཡང་ཆགས་པ་དང་སྲེད་པ་གཉིས་ནི་འདོད་པ་དང་། སྲེད་པའི་
འདོད་ཆགས་གཉིས་ཡིན་ཏེ། གོ་རིམས་བཞིན་ནོ། །ཆགས་པ་ནི་འདོད་པའི་འདོད་ཆགས་ཏེ། འདོད་པ་ན་སྤྱོད་པའི་འདོད་ཆགས་སོ། །སྲེད་པ་ནི་སྲེད་པའི་འདོད་ཆགས་ཏེ། གཟུགས་དང་གཟུགས་མེད་པའི་ཁམས་ལས་སྐྱེས་པའི་འདོད་ཆགས་སོ། །སྡུག་བསྔལ་ནི་འདོད་པའི་ཁམས་ཡིན་
ཏེ། ཅིའི་ཕྱིར་ཞེ་ན། སྡུག་བསྔལ་གསུམ་དག་ལས་སྡུག་བསྔལ་གྱི་སྡུག་བསྔལ་དང་ལྡན་པའི་ཕྱིར་རོ། །སྡུག་བསྔལ་གྱི་སྡུག་བསྔལ་ནི་འདོད་པའི་ཁམས་ནི་འདོད་པའི་ཁམས་ཁོ་ན་ན་ཡོད་ཀྱི་གཞན་ན་མེད་དོ། །ཕུང་པོ་ནི་གཟུགས་དང་གཟུགས་མེད་པའི་ཁམས་གཉིས་ཡིན་ནོ། །དེ་ལྟར་ན་འདིས་
ནི་འདོད་པའི་ཁམས་ཀྱི་སྡུག་བསྔལ་རྒྱུ་དང་བཅས་པ་དང་། གཟུགས་དང་གཟུགས་མེད་པའི་ཁམས་ཀྱི་སྡུག་བསྔལ་རྒྱུ་དང་བཅས་པ་ཟད་པར་བྱ་བའི་ཕྱིར་སྒྲུབ་པ་ཡིན་ནོ་ཞེས་ཡོངས་སུ་བསྟན་པ་ཡིན་ནོ། །རྒྱས་པར་གསུངས་ནས་གྲོ་བཞིན་སྐྱེས་དེ་ལྟར་ན་ཧ་ཅང་བརྩོན་འགྲུས་བརྩམས་དྲགས་ན་ནི་

རྒོད་པ་ཉིད་དུ་འགྱུར་ལ། ཧ་ཅང་ཞུམ་ཆེས་ན་ནི་ལེ་ལོ་ཅན་དུ་འགྱུར་རོ། །གྲོ་བཞིན་སྐྱེས་དེ་བས་ན་མཉམ་པ་ཉིད་དུ་རྟོགས་པར་བྱེད་པ་དེ་ལ་ཡང་མཚན་མར་ཟུང་ཤིག །དེས་རློམ་སེམས་ཀྱང་མ་བྱེད་ལ། དེ་ལ་བག་མེད་པར་ཡང་མ་བྱེད་ཅིག་ཅེས་བྱ་བ་ནི་མདོ་སྡེའི་དུམ་བུ་ཡིན་ནོ། །འདིས་ནི་ཞེས་བྱ་བ་
རྒྱས་པར་འབྱུང་བ་ནི། གདམས་ངག་འདིས་ནི་སེམས་མཉམ་པ་ཉིད་དུ་ཡོངས་སུ་ཤེས་པར་བྱ་བ་ལ་སྦྱོར་བར་མཛད་པ་ཡིན་ཏེ། མཉམ་པ་ཉིད་དུ་རྟོགས་པར་བྱས་ལ་ཞེས་བྱ་བའི་ཚིག་འདིས་སོ། །སེམས་མཉམ་པ་ཉིད་ཀྱང་སེམས་དམིགས་པ་ལ་ཧ་ཅང་རྒོད་པ་ཡང་མ་ཡིན། ཧ་ཅང་ཞུམ་པ་ཡང་མ་
ཡིན་པར་བཏང་སྙོམས་སུ་བྱེད་པའོ། །དེ་ལ་ཡང་མཚན་མར་ཟུང་ཤིག་ཅེས་བྱ་བ་འདིས་ནི་མི་བརྗེད་པའི་རྒྱུ་ལ་སྦྱོར་བར་མཛད་པ་ཡིན་ནོ། །དེས་ཀྱང་རློམ་སེམས་ཀྱང་མ་བྱེད་ལ། དེ་ལ་བག་མེད་པར་ཡང་མ་བྱེད་ཅིག་ཅེས་བྱ་བ་འདི་གཉིས་ཀྱིས་ནི་ཀུན་ནས་ཉོན་མོངས་པ་མེད་པའི་རྒྱུ་ལ་སྦྱོར་བར་མཛད་པ་ཡིན་
ནོ། །མི་བརྗེད་པའི་རྒྱུ་ནི་མཚན་མར་འཛིན་པའོ་ཞེས་བྱ་བ་ནི་སེམས་མཉམ་པ་ཉིད་དེའི་མི་བརྗེད་པའི་རྒྱུ་ནི་མཚན་མར་འཛིན་པའོ། །མཚན་མ་དེ་ཡང་བསམ་གཏན་པ་རྣམས་ཁོ་ནའི་མངོན་སུམ་ཡིན་ནོ། །ཀུན་ནས་ཉོན་མོངས་པ་མེད་པའི་རྒྱུ་ནི་ང་རྒྱལ་མེད་པ་སྟེ། མཉམ་པ་ཉིད་དེས་ཁེངས་པར་མི་འགྱུར་
བའི་ཕྱིར་རོ། །གཞན་ཡང་བག་ཡོད་པ་ཡང་ཡིན་ཏེ། རོ་མྱོང་བར་མི་བྱེད་པའི་ཕྱིར་རོ། །དེས་རློམ་སེམས་ཀྱང་མ་བྱེད་ལ། དེ་ལ་བག་མེད་པར་ཡང་མ་བྱེད་ཅིག་ཅེས་བྱ་བའི་དོན་ཇི་སྐད་གསུངས་པའི་ལུང་ཕོག་པ་འདི་ནི་ང་རྒྱལ་སྲེད་པ་ཤས་ཆེ་བའི་བསམ་གཏན་པའི་གཉེན་པོར་གོ་རིམས་བཞིན་ནོ། །
ཇི་ལྟར་ཞེ་ན། ང་རྒྱལ་ཤས་ཆེ་བའི་བསམ་གཏན་པའི་གཉེན་པོར་དེས་རློམ་སེམས་ཀྱང་མ་བྱེད་ལ་ཞེས་བྱ་བར་ལུང་ཕོག་པ་ཡིན་ནོ། །སྲེད་པའི་ཤས་ཆེ་བའི་བསམ་གཏན་པའི་གཉེན་པོར་ནི་དེ་ལ་བག་མེད་པར་ཡང་མ་བྱེད་ཅིག་ཅེས་བྱ་བར་ལུང་ཕོག་པ་ཡིན་ནོ། །སྨྲས་པ་ཅིའི་ཕྱིར་ལྟ་བ་ཤས་ཆེ་བའི་བསམ་
གཏན་པའི་གཉེན་པོ་དང་ཐེ་ཚོམ་ཤས་ཆེ་བའི་བསམ་གཏན་པའི་གཉེན་པོར་ལུང་ཕོག་པ་མཛད་ཅེ་ན། བདེན་པ་གཟིགས་པའི་ཕྱིར་ཞེས་བྱ་བ་རྒྱས་པར་འབྱུང་བ་ལ། དེ་བཞིན་ཞེས་བྱ་བ་ནི་ལྟ་བ་དང་ཐེ་ཚོམ་གཉིས་ཞེས་བྱ་བའི་ཐ་ཚིག་གོ། །དེ་ལ་ང་རྒྱལ་ཤས་ཆེ་བའི་བསམ་གཏན་པ་ནི་བསམ་གཏན་དེས་ཁེངས་པར་

འགྱུར་བའི་ཕྱིར་རོ། །སྲེད་པ་ཤས་ཆེ་བའི་བསམ་གཏན་པ་ནི་བསམ་གཏན་དག་ལ་རོ་མྱོང་བར་བྱེད་པའི་ཕྱིར་རོ། །ལྟ་བ་ཤས་ཆེ་བའི་བསམ་གཏན་པ་ནི་བསམ་གཏན་ལ་བརྟེན་ནས་རྟག་པ་ལ་སོགས་པར་ལྟ་བ་འབྱུང་བ་གང་ཡིན་པའོ། །ཐེ་ཚོམ་ཤས་ཆེ་བའི་བསམ་
གཏན་པ་ནི་བསམ་གཏན་ལ་བརྟེན་ནས་ཅི་འདི་མྱ་ངན་ལས་འདས་པའི་ལམ་ཡིན་ནམ། འོན་ཏེ་གཞན་ཞིག་ཡིན་སྙམ་པ་དང་། ཅི་བདག་འདས་པའི་དུས་ན་བྱུང་བའམ། འོན་ཏེ་མ་བྱུང་སྙམ་ཞེས་བྱ་བ་དེ་ལྟ་བུ་ལ་སོགས་པ་གང་ཡིན་པའོ། །ཉོན་མོངས་པ་རྒྱུའི་གནས་སྐབས་འདི་དག་ཀྱང་
བསམ་གཏན་ལ་སྙོམས་པར་ཞུགས་པ་འདི་དག་ཁོ་ན་ལ་འབྱུང་ངོ་། །ང་རྒྱལ་ཤས་ཆེ་བའི་བསམ་གཏན་པ་ཞེས་བྱ་བ་ནས། ཐེ་ཚོམ་ཤས་ཆེ་བའི་བསམ་གཏན་ཞེས་བྱ་བའི་བར་གྱི་དོན་ཅི་ཞེ་ན། སྲེད་པ་ཤས་ཆེ་བ་ནི་འདི་ལ་བསམ་གཏན་སྲེད་པ་ལྷག་པ་ཅན་དུ་བསམ་གཏན་བྱེད་པའི་ངང་ཚུལ་ཡོད་པས་
འདི་ནི་སྲེད་པ་ཤས་ཆེ་བའི་བསམ་གཏན་པའོ། །ཡང་ན་དེ་ནི་སྲེད་པ་ཤས་ཆེ་བ་ཡང་ཡིན་ལ་བསམ་གཏན་པ་ཡང་ཡིན་པས་སྲེད་པ་ཤས་ཆེ་བའི་བསམ་གཏན་པའོ། །ཐེ་ཚོམ་ཤས་ཆེ་བའི་བསམ་གཏན་པ་ཞེས་བྱ་བའི་བར་ལ་ཡང་དེ་བཞིན་དུ་སྦྱར་བར་བྱའོ། །བཅོམ་ལྡན་འདས་ཀྱིས་རྒྱང་རིང་པོ་ནས་
ཤིང་གི་སྡོང་པོ་ཆེན་པོ་ཞིག་འབར་ཞིང་རབ་ཏུ་འབར་ལ་ཀུན་དུ་རབ་ཏུ་མཆེད་ཅིང་མེ་ལྕེ་གཅིག་ཏུ་གྱུར་ཏེ། ལམ་མེར་འབར་བ་གཟིགས་སོ་ཞེས་བྱ་བ་ནི་མདོ་སྡེའི་དུམ་བུ་ཡིན་ནོ། །གོ་རིམས་བཞིན་དུ་སྦྱར་བར་བྱ་བ་ནི་ལམ་མེར་འབར་བ་ཞེས་བྱ་བ་ནི་མི་གཡོ་བའོ། །དགེ་སློང་དག་བྱིས་བ་སོ་སོའི་སྐྱེ་བོ་
ཐོས་པ་དང་མི་ལྡན་པ་རྣམས་ནི་ཕུང་པོ་ལྔ་པོ་འདི་དག་ལ་རྟག་པ་ཉིད་དང་བརྟན་པ་ཉིད་དུ་ཡང་དག་པར་རྗེས་སུ་ལྟ། བདེ་བ་ཉིད་དང་། ནད་མེད་པ་ཉིད་དང་། བདག་དང་བདག་གི་ཉིད་དུ་སྦྱར་བར་བྱ་བ་ནི་རྗེས་སུ་ལྟ་བ་ཡིན་ནོ་ཞེས་བྱ་བ་ནི་མདོ་སྡེའི་དུམ་བུ་ཡིན་ནོ། །དེ་ལ་ཀུན་དུ་རྨོངས་པ་ཞེས་བྱ་བ་ནི་ཉེ་
བར་ལེན་པའི་ཕུང་པོ་ལྔ་རྣམས་ལ་འདུས་བྱས་ཀྱི་མཚན་ཉིད་སྐྱེ་བ་དང་འཇིག་པ་གཉིས་དང་མི་ལྡན་པ་ཡིན་ནོ་སྙམ་དུ་དེ་ལྟར་ཀུན་དུ་རྨོངས་པ་ནས། རང་ཡང་བདག་མ་ཡིན་ལ། བདག་གཞན་གྱིས་ཀྱང་སྟོང་པའི་བར་དུ་ཡིན་ནོ་སྙམ་དུ་ཀུན་དུ་རྨོངས་པ་ནི་གོ་རིམས་བཞིན་དུ་རྟག་པ་ལ་སོགས་པ་ཉིད་

དུ་ལྟ་ཞེས་བྱ་བ་ཡིན་པར་རིག་པར་བྱའོ། །ཇི་ལྟར་ན་ཉེ་བར་ལེན་པའི་ཕུང་པོ་ལྔ་རྣམས་ནི་སྐྱེ་བ་དང་འཇིག་པ་གཉིས་དང་ལྡན་པ་ཡིན་ན་དེ་ལྟར་ཀུན་དུ་རྨོངས་པ་ནི་དེ་དག་ལ་རྟག་པ་ཉིད་དུ་ཡང་དག་པར་རྗེས་སུ་ལྟ་ལ། བདག་གཞན་གྱིས་སྟོང་པའི་བར་དུ་ཡིན་ལ། དེ་ལྟར་ཀུན་དུ་རྨོངས་པ་ནི་བདག་གི་ཉིད་
དུ་ཡང་དག་པར་རྗེས་སུ་ལྟ་བ་ཡིན་ནོ། །རྟག་པ་དང་བདེ་བ་དང་། བདག་ཏུ་ཕྱིན་ཅི་ལོག་པ་རྣམས་ཏེ། ལྟ་བ་གཉིས་དང་གཉིས་ཀྱིས་ཡོངས་སུ་བསྟན་པ་ཡིན་པར་རིག་པར་བྱའོ། །ཇི་ལྟར་བྱས་པས་ཤེ་ན། རྟག་པ་ཉིད་དུ་ལྟ་བ་དང་། བརྟེན་པ་ཉིད་དུ་ལྟ་བས་ནི་ཉེ་བར་ལེན་པའི་ཕུང་པོ་ལྔ་རྣམས་ལ་
རྟག་པ་ཕྱིན་ཅི་ལོག་པ་ཡིན་པར་ཡོངས་སུ་བསྟན་པ་ཡིན་པར་རིག་པར་བྱའོ། །བདེ་བ་ཉིད་དུ་ལྟ་བ་དང་། ནད་མེད་པ་ཉིད་དུ་ལྟ་བས་ནི་ཉེ་བར་ལེན་པའི་ཕུང་པོ་ལྔ་རྣམས་ལ་བདེ་བར་ཕྱིན་ཅི་ལོག་པ་ཡིན་པར་བསྟན་པར་རིག་པར་བྱའོ། །བདག་ཏུ་ལྟ་བ་དང་། བདག་གིར་ལྟ་བས་ནི་ཉེ་བར་ལེན་པའི་ཕུང་པོ་
ལྔ་རྣམས་ལ་བདག་ཏུ་ཕྱིན་ཅི་ལོག་ཡིན་པར་ཡོངས་སུ་བསྟན་པར་རིག་པར་བྱའོ། །ཚུལ་འཆོས་པ་དང་། ཁ་གསག་དང་། གཞོགས་སློང་དང་། ཐོབ་ཀྱིས་འཇལ་བ་དང་། རྙེད་པས་རྙེད་པར་བྱེད་འདོད་པ་དང་ཞེས་བྱ་བ་ནི་མདོ་སྡེའི་དུམ་བུ་ཡིན་ནོ། །ཇི་ལྟར་ན་ཡོ་བྱད་བསྙུངས་པ་ཀུན་དུ་སྟོན་ཅེ་ན། རྙེད་པ་
ཁྱད་པར་ཅན་མི་ལེན་པ་ཉིད་ཀྱིས་དང་། ངན་པ་དང་གྱ་ནོམ་པ་བསྟེན་པ་དང་མི་བསྟེན་པ་ཉིད་ཀྱིས་ཏེ། ཁ་ཟས་ལ་སོགས་པ་ངན་པ་བསྟེན་པའི་ཕྱིར་དང་། གྱ་ནོམ་པ་མི་བསྟེན་པའི་ཕྱིར་རོ། །ཆོས་སྨྲ་བ་ནི་མདོ་སྡེ་ལ་སོགས་པའི་ཆོས་རྣམས་སྟོན་པའོ། །གནོད་པའི་གཞི་ཀུན་དུ་སྟོན་ཞེས་བྱ་བ་ལ་གནོད་
པར་བྱེད་པ་ནི་གནོད་པའོ། །དེའི་གཞི་ནི་གནོད་པའི་གཞི་སྟེ་ལུས་ཀྱི་འགྱུར་བའོ། །གནོད་པ་ནི་གཟུགས་ཅན་མ་ཡིན་པའི་ཆོས་ཡིན་པས་གཞན་དུ་བསྟན་པར་མི་ནུས་པས་ན་རླུང་ལ་སོགས་པས་ལུས་འགྱུར་བ་བྱས་པ་ཀུན་དུ་སྟོན་པ་ཡིན་ནོ། །ཕོངས་པའི་གཞི་ཀུན་དུ་སྟོན་པ་ནི་མཆི་ལ་ལྷམ་ལ་སོགས་པ་
རྙིངས་པར་ཀུན་དུ་སྟོན་པ་ཡིན་ནོ། །ཚིག་གིས་བསམ་པའི་གཞི་བསྔགས་པར་བྱེད་པ་ནི་ཚིག་གིས་བསམ་པའི་གཞི་གོས་དང་གླེགས་བམ་ལ་སོགས་པ་ཡོན་ཏན་ལས་བསྔགས་པ་བྱེད་པའོ། །དེ་ལ་སྦྱིན་པར་མི་བྱེད་པ་ལ་སྨོད་པ་ནི་དེ་ལ་སྦྱིན་པར་མི་བྱེད་པ་ལ་སྨོད་པའོ། །གཞན་ལ་སྦྱིན་པར་བྱེད་པ་ལ་

སྨོད་པ་ནི་གཞན་ལ་སྦྱིན་པར་བྱེད་པ་ལ་སྨོད་པའོ། །བྱེད་འདོད་པ་ཞེས་བྱ་བ་ནི་བསྒྲུབ་པར་འདོད་པ་ཞེས་བྱ་བའི་ཐ་ཚིག་གོ། །གཅིག་ནི་ཞེས་བྱ་བ་རྒྱས་པར་འབྱུང་བ་ལ་གཅིག་ནི་ལུས་ཀྱིས་ཡིན་ཏེ་ཚུལ་འཆོས་པའོ། །གཉིས་པ་ནི་ངག་གིས་ཡིན་ཏེ་ཁ་གསག་གོ། །
ལྷག་མ་གཞོགས་སློང་ལ་སོགས་པ་འཚོ་བ་ལོག་པ་རྣམས་ནི་ལུས་དང་ངག་གིས་ཡིན་ནོ། །ཇི་ལྟར་བྱས་པས་ཤེ་ན། རེ་ཞིག་ལུས་ཀྱིས་ནི་གཞོགས་སློང་ཉིད་དེ། རྙེད་པར་བྱ་བའི་བསམ་པས་ལུས་ཀྱིས་གནོད་པའི་གཞི་ཀུན་དུ་སྟོན་པའི་ཕྱིར་དང་། ཕོངས་པའི་གཞི་ཀུན་དུ་སྟོན་པའི་ཕྱིར་རོ། །
ངག་གིས་ནི་བསམ་པའི་གཞི་བསྔགས་པར་བྱེད་པའོ། །ཐོབ་ཀྱིས་འཇལ་བ་ཉིད་ཀྱང་ཡིན་ཏེ། ངག་གིས་རྣམ་པ་གསུམ་བསྟན་པ་ཡིན་ནོ། །ལུས་ཀྱིས་ཀྱང་ཐོག་མ་ཁོ་ནར་བསླང་བ་བྱས་ནས་ཕྱིས་ཡང་དང་ཡང་དུ་མི་སྨྲ་བར་མདུན་དུ་འདུག་པའོ། །འཚོ་བ་ལོག་པར་རྙེད་པས་རྙེད་པར་བྱེད་འདོད་
པ་ཡང་ཡིན་ཏེ། ལུས་ཀྱིས་ནི་གཅིག་པོ་ཇི་སྐད་བསྟན་པ་ཡིན་ལ་ངག་གིས་ནི་གཉིས་ཡིན་ནོ། །སྨྲས་པ། གཞོགས་སློང་ལ་སོགས་པ་འཚོ་བ་ལོག་པ་ལྷག་མ་རྣམས་ལས་ཚིག་གང་ཡིན་པ་ལ་དེ་དག་ཇི་ལྟར་ན་ཁ་གསག་མ་ཡིན་ཏེ། ཁ་གསག་ཀྱང་ངག་གི་ལས་ཡིན་པས་སོ། །བཤད་པ།
གཞན་མགུ་བར་བྱ་བའི་ཕྱིར་སྨྲ་བ་འཚོ་བ་ལག་པ་གཉིས་པ་ནི་འདིར་ཁ་གསག་ཡིན་པར་དགོངས་ཀྱི། བསམ་པའི་གཞི་བསྔགས་པ་བྱེད་པ་ལ་སོགས་པའི་ཚིག་ཐམས་ཅད་ནི་མ་ཡིན་ནོ། །དེ་བས་ན་ཉེས་པ་མེད་དོ། །ཟླ་བ་ཕྱེད་ཅིང་ཚེས་བཅོ་ལྔ་ལ་རྒྱལ་པོ་ཆེན་པོ་བཞི་དག་རང་ཉིད་ཀྱིས་མིའི་འཇིག་རྟེན་
ན་མར་འཛིན་པ་དང་། ཕར་འཛིན་པ་དང་། དགེ་སློང་དུ་འཛིན་པ་དང་། བྲམ་ཟེར་འཛིན་པ་དང་། རིགས་ཀྱི་ནང་ན་རྒན་རབས་ལ་རི་མོ་བྱེད་པ་དང་། དོན་བྱེད་པ་དང་། བྱ་བ་བྱེད་པ་དང་། བསོད་ནམས་བྱེད་པ་དང་། འཇིག་རྟེན་འདི་དང་། འཇིག་རྟེན་ཕ་རོལ་གྱི་ཁ་ན་མ་ཐོ་བ་རྣམས་ལ་འཇིགས་པར་ལྟ་
བ་དང་། སྦྱིན་པ་བྱེད་པ་དང་། བསོད་ནམས་བྱེད་པ་དང་། བསྙེན་གནས་ལ་ཉེ་བར་གནས་པ་དང་། ཚུལ་ཁྲིམས་ཡང་དག་པར་བླངས་ནས་གནས་པའི་མི་དག་མང་ངམ་ཞེས་འཇིག་རྟེན་ལ་རྣམ་པར་ལྟ་བར་བྱེད་དོ་ཞེས་བྱ་བ་ནི་མདོ་སྡེའི་དུམ་བུ་ཡིན་ནོ། །དེ་ལ་ཇི་ལྟར་ཤེས་པར་བྱ་བ་ལྟ་བུས་མར་ཤེས་པ་ནི་མར་

འཛིན་པ་སྟེ། ཇི་ལྟར་དེ་ཤེས་པར་བྱ་ཞེ་ན། དེ་ལ་གུས་པར་བྱ་བ་ཉིད་ཀྱི་ཕྱིར་རོ་ཞེས་བྱ་བ་ནི་དེ་ལ་གུས་པར་བྱ་བ་ཉིད་ཀྱི་རྒྱུས་སོ་ཞེས་བྱ་བའི་ཐ་ཚིག་གོ། །ལྡང་བ་དང་ཐལ་མོ་སྦྱོར་བ་དང་། ཕྱག་བྱ་བ་དང་། ཆོས་གོས་དང་བསོད་སྙོམས་ལ་སོགས་པ་ནི་མལ་སྟན་ལ་སོགས་པའོ། །སྙན་པར་སྨྲ་བ་ལ་
སོགས་པ་ཞེས་བྱ་བ་ལ་སོགས་པའི་སྒྲས་ནི་རི་མོ་བྱ་བ་ལ་སོགས་པའོ། །དེ་དག་དེ་ལྟར་གྱུར་པ་ཞེས་བྱ་བ་ནི་མི་དེ་དག་མར་འཛིན་པ་ནས་བསོད་ནམས་བྱེད་པའི་བར་དུའོ། །རྣམ་པ་དེ་ཞེས་བྱ་བ་ནི་སྦྱིན་པ་ལས་བྱུང་བ་དང་། ཚུལ་ཁྲིམས་ལས་བྱུང་བའི་རྣམ་པའོ། །བསོད་ནམས་ཀྱི་ཁང་པ་ལ་སོགས་པ་ཞེས་
བྱ་བའི་སོགས་པའི་སྒྲས་ནི་ལམ་འཕྱག་པ་ལ་སོགས་པའོ། །ཟས་དང་། སྐོམ་ལ་སོགས་པ་གང་ཡིན་པ་དང་། ཀུན་དགའ་ར་བ་ལ་སོགས་པའོ། །འཇིག་རྟེན་རྗེས་སུ་འཛིན་པའི་ཕྱིར་གང་ཡིན་པ་འདི་གཉི་ག་ཡང་སྦྱིན་པ་ལས་བྱུང་བའི་བསོད་ནམས་བྱ་བའི་གཞི་ཡིན་མོད་ཀྱི། ཐ་དད་པར་སྨོས་པ་ནི་
ཁྱད་པར་དང་ཁྱད་པར་མེད་པར་སྦྱིན་པའི་དབྱེ་བ་ཡང་དག་པར་བསྟན་པའི་ཕྱིར་ཏེ། ཁྱད་པར་གྱི་དབྱེ་བ་ཡང་དག་པར་བསྟན་པའི་ཕྱིར་དང་། ཁྱད་པར་མེད་པའི་དབྱེ་བ་ཡང་དག་པར་བསྟན་པའི་ཕྱིར་རོ། །གོ་རིམས་བཞིན་དུ་ཞེས་བྱ་བ་རྒྱས་པར་འབྱུང་བ་ཇི་ལྟར་བྱས་པས་ཤེ་ན། བླ་མ་དང་ཡོན་གནས་པ་ནི་ཚིག་
གཉིས་དང་གཉིས་ཀྱིས་ཡང་དག་པར་བསྒྲུབ་པ་བསྟན་པ་ཡིན་ཏེ། རེ་ཞིག་བླ་མ་རྣམས་ལ་ནི་མར་འཛིན་པ་དང་། ཕར་འཛིན་པ་ཞེས་བྱ་བ་འདི་གཉིས་ཀྱིས་སོ། །ཡོན་གནས་རྣམས་ལ་ནི་དགེ་སྦྱོང་དུ་འཛིན་པ་དང་། བྲམ་ཟེར་འཛིན་པ་ཞེས་བྱ་བ་འདི་གཉིས་ཀྱིས་སོ། །གཞི་རྣམས་ཀྱི་རེ་རེས་ནི་རྒན་པོ་
རྣམས་དང་། རྒུད་པ་རྣམས་དང་། རང་གི་ལས་དང་། བསོད་ནམས་བྱེད་པ་ལས་ཡང་དག་པར་བསྒྲུབ་པར་བསྟན་པ་ཡིན་ནོ། །ཚིག་རེ་རེས་ནི་རེ་རེས་སོ། །སྨྲས་པ་ཚིག་དུ་དག་གིས་ཤེ་ན། གཞི་རྣམས་ཀྱི་རེ་རེས་ཏེ། ཇི་ལྟར་ཞེ་ན། རེ་ཞིག་རྒན་པོ་རྣམས་ལ་ནི་རིགས་ཀྱི་ནང་ན་རྒན་རབས་ལ་རི་མོ་
བྱེད་པ་ཞེས་བྱ་བའི་ཚིག་གོ། །རྒུད་པ་རྣམས་ལ་ནི་དོན་བྱེད་པ་ཞེས་བྱ་བའི་ཚིག་གཅིག་གིས་སོ། །རང་གི་ལས་ལ་ནི་བྱ་བ་བྱེད་པ་ཞེས་བྱ་བའི་ཚིག་གཅིག་གིས་སོ། །བསོད་ནམས་བྱེད་པ་ལ་ནི་བསོད་ནམས་བྱེད་པ་ཞེས་བྱ་བའི་ཚིག་གཅིག་གིས་ཡང་དག་པར་སྒྲུབ་པར་བསྟན་པ་ཡིན་ནོ། །ཚིག་འཇིག་རྟེན་

འདི་དང་འཇིག་རྟེན་ཕ་རོལ་ཞེས་བྱ་བ་དེ་ལ་སོགས་པ་ལྷག་མ་རྣམས་ཀྱིས་ནི་ཡང་དག་པར་བསྒྲུབ་པ་དེ་ཉིད་ཀྱི་རྒྱུ་དང་བསོད་ནམས་བྱ་བའི་རྣམ་པའི་དབྱེ་བ་ཡང་དག་པར་བསྟན་པ་ཡིན་ནོ། །དེ་ལ་འཇིག་རྟེན་འདི་དང་འཇིག་རྟེན་ཕ་རོལ་གྱི་ཁ་ན་མ་ཐོ་བ་རྣམས་ལ་འཇིགས་པར་ལྟ་བ་
ཞེས་བྱ་བའི་ཚིག་འདི་དག་གིས་ནི་ཡང་དག་པར་བསྒྲུབས་པ་དེ་ཉིད་ཀྱི་རྒྱུ་ཡང་དག་པར་བསྟན་པ་ཡིན་ནོ། །སྦྱིན་པ་བྱེད་པ་ནས། ཚུལ་ཁྲིམས་ཡང་དག་པར་བླངས་ནས་གནས་པ་ཞེས་བྱ་བའི་བར་འདི་རྣམས་ཀྱིས་ནི་བསོད་ནམས་བྱ་བའི་རྣམ་པའི་དབྱེ་བ་ཡང་དག་པར་བསྟན་པ་ཡིན་ནོ། །རྒྱས་པར་གསུངས་
ནས་ཀྱེ་ཤཱ་རིའི་བུ་འཇིག་རྟེན་ན་ཆོས་སྨྲ་བ་ནི་སུ་དག་ཡིན། ལེགས་པར་ཞུགས་པ་ནི་སུ་དག་ཡིན། བདེ་བར་གཤེགས་པ་ནི་སུ་དག་ཡིན། འཛམ་བུའི་གྲིབ་མ་ཅན་གང་སུ་དག་འདོད་ཆགས་གདུལ་བའི་ཕྱིར་དང་། ཞེ་སྡང་གདུལ་བའི་ཕྱིར་དང་། གཏི་མུག་གདུལ་བའི་ཕྱིར་ཆོས་སྟོན་པ་འདི་ནི་འཇིག་
རྟེན་ན་ཆོས་སྨྲ་བ་དག་ཅེས་བྱ་བའོ། །གང་སུ་དག་འདོད་ཆགས་གདུལ་བའི་ཕྱིར་ཞུགས་པ་དང་། ཞེ་སྡང་གདུལ་བའི་ཕྱིར་དང་། གཏི་མུག་གདུལ་བའི་ཕྱིར་ཞུགས་པ་འདི་ནི་ལེགས་པར་ཞུགས་པ་དག་ཅེས་བྱའོ། །གང་སུ་དག་འདོད་ཆགས་མ་ལུས་པར་སྤངས་པ་དང་། ཡོངས་སུ་ཤེས་པ་དང་།
ཞེ་སྡང་དང་། གཏི་མུག་མ་ལུས་པར་སྤངས་པ་དང་། ཡོངས་སུ་ཤེས་པ་འདི་ནི་འཇིག་རྟེན་ན་བདེ་བར་གཤེགས་པ་དག་ཅེས་བྱ་བའོ་ཞེས་བྱ་བ་ནི་མདོ་སྡེའི་དུམ་བུ་ཡིན་ནོ། །འདིར་ནི་ཞེས་བྱ་བ་རྒྱས་པར་འབྱུང་བ་ལ་མདོ་སྡེའི་དུམ་བུ་འདིར་ནི་ངེས་པར་ལེགས་པ་ལས་བརྩམས་ནས་ཏེ་ཆེད་དུ་བྱས་ནས་སེམས་
ཅན་གཉིས་ཏེ་རྣམ་པ་གཉིས་དྲིས་པ་དང་། ལན་བཏབ་པ་ཡིན་ནོ། །དྲིས་པ་ནི་ཀུན་དུ་རྒྱུ་འཛམ་བུའི་གྲིབ་མ་ཅན་གྱིས་སོ། །ལན་གདབ་པ་ནི་གནས་བརྟན་ཤ་ར་དྭ་ཏིའི་བུས་སོ། །དྲིས་པ་ནི་ཡང་དག་པར་སྨྲ་བ་དང་། བྱེད་པ་པོ་ཡིན་ནོ། །བྱེད་པ་པོ་ཡང་རྣམ་པ་གཉིས་ཏེ་ཞེས་བྱ་བ་རྒྱས་པར་འབྱུང་བ་ཡིན་ནོ། །
ལན་བཏབ་པ་གང་དག་ཅེ་ན། ཡང་དག་པར་སྨྲ་བ་དང་། བྱེད་པ་པོ་རྣམ་པ་གཉིས་པོ་ཡང་འདི་དག་ཉིད་ཡིན་ནོ། །ཇི་ལྟར་དྲིས་ཤེ་ན། ཤཱ་རིའི་བུ་འཇིག་རྟེན་ན་ཆོས་སྨྲ་བ་ནི་སུ་དག་ཡིན་ཞེས་བྱ་བ་ནི་ཡང་དག་པར་སྨྲ་བ་ཡིན་ནོ། །ལེགས་པར་ཞུགས་པ་ནི་སུ་དག་ཡིན་བདེ་བར་གཤེགས་པ་ནི་སུ་དག་ཡིན་ཞེས་

བྱ་བ་ནི་བྱེད་པ་པོ་རྣམ་པ་གཉིས་པོ་དག་ཡིན་ནོ། །གནས་བརྟན་གྱིས་ཇི་ལྟར་ལན་བཏབ་ཅེ་ན། འཛམ་བུའི་གྲིབ་མ་ཅན་གང་སུ་དག་འདོད་ཆགས་གདུལ་བའི་ཕྱིར་དང་། ཞེ་སྡང་གདུལ་བའི་ཕྱིར་དང་། གཏི་མུག་གདུལ་བའི་ཕྱིར་ཆོས་སྟོན་པ་འདི་ནི་འཇིག་རྟེན་ན་ཆོས་སྨྲ་བ་དག་ཅེས་བྱའོ་ཞེས་བྱ་བ་དེ་ལྟ་
བུ་ནི་ཡང་དག་པར་སྨྲ་བ་ལན་བཏབ་པ་ཡིན་ནོ། །ཇི་ལྟར་ན་བྱེད་པ་པོ་ཡང་རྣམ་པ་གཉིས་སུ་ལན་བཏབ་ཅེ་ན། གང་སུ་དག་འདོད་ཆགས་གདུལ་བའི་ཕྱིར་ཞུགས་པ་དང་། ཞེ་སྡང་གདུལ་བའི་ཕྱིར་དང་། གཏི་མུག་གདུལ་བའི་ཕྱིར་ཞུགས་པ་འདི་ནི་ལེགས་པར་ཞུགས་པ་དག་ཅེས་བྱའོ་ཞེས་བྱ་
བ་ནི་ཡང་དག་པར་བྱེད་པ་པོ་སྟེ། བརྩོན་པ་རྣམས་ལན་བཏབ་པ་ཡིན་ནོ། །གང་སུ་དག་འདོད་ཆགས་མ་ལུས་པར་སྤངས་པ་དང་། ཡོངས་སུ་ཤེས་པ་དང་། ཞེ་སྡང་དང་གཏི་མུག་མ་ལུས་པར་སྤངས་པ་དང་། ཡོངས་སུ་ཤེས་པ་འདི་ནི་འཇིག་རྟེན་ན་བདེ་བར་གཤེགས་པ་དག་ཅེས་བྱའོ་ཞེས་བྱ་བས་
ཀྱང་བྱེད་པ་པོ་སྟེ། གྲོལ་བ་རྣམས་ཀྱི་ལན་བཏབ་པ་ཡིན་ནོ། །འཛམ་བུའི་གྲིབ་མ་ཅན་གང་སུ་དག་འདོད་ཆགས་གདུལ་བའི་ཕྱིར་དང་ཞེས་བྱ་བ་རྒྱས་པར་འབྱུང་བས། འདོད་ཆགས་དང་། ཞེ་སྡང་དང་། གཏི་མུག་རྣམས་ཁོ་ན་སྨོས་ཀྱི། ལྟ་བ་དང་། ང་རྒྱལ་དང་། ཐེ་ཚོམ་རྣམས་མ་ཡིན་པ་ནི་
དེ་རྣམས་ཀྱིས་གོ་རིམས་བཞིན་དུ་ཚོར་བ་གསུམ་ལ་བཅིངས་པའི་ཕྱིར་ཏེ། །ཇི་ལྟར་འདོད་ཆགས་ཀྱིས་ནི་བདེ་བའི་ཚོར་བ་ལ་བཅིངས་སོ། །འདི་ལྟར་ཞེ་སྡང་གིས་ནི་སྡུག་བསྔལ་གྱི་ཚོར་བ་ལ་བཅིངས་སོ། །འདི་ལྟར་གཏི་མུག་གིས་ནི་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་ལ་བཅིངས་སོ། །སྨྲས་
པ། ཚོར་བ་གསུམ་པོ་དེ་ལ་བཅིངས་པར་ཇི་ལྟར་ཤེས་པར་བྱ་ཞེ་ན། འདི་ལྟར་ཞེས་བྱ་བ་རྒྱས་པར་འབྱུང་བ་ལ། གང་གི་ཕྱིར་བཅོམ་ལྡན་འདས་ཀྱིས་དམིགས་པ་དང་། མཚུངས་པར་ལྡན་པ་དང་། བདེ་བའི་ཚོར་བ་ལ་ནི་འདོད་ཆགས་རྒྱས་པར་འགྱུར། སྡུག་བསྔལ་ལ་ནི་ཁོང་ཁྲོ་བ། བདེ་བ་ཡང་
མ་ཡིན་སྡུག་བསྔལ་བ་ཡང་མ་ཡིན་པ་ལ་ནི་མ་རིག་པའོ་ཞེས་གསུངས་པས་སོ། །ཇི་ལྟར་རིགས་པར་ཞེས་བྱ་བ་ནི་ཇི་ལྟར་འོས་པར་ཏེ། འདོད་པའི་ཁམས་སུ་ནི་འདོད་ཆགས་དང་ཞེ་སྡང་དང་གཏི་མུག་རྣམས་སྤངས་པའི་ཕྱིར་རོ། །དེའི་གོང་མ་རྣམས་སུ་ནི་འདོད་ཆགས་དང་མ་རིག་པ་གཉིས་སྤངས་

པའི་ཕྱིར་རོ། །ཐོབ་པ་བག་ལ་ཉལ་གྱི་མཚན་ཉིད་སྤངས་པའི་ཕྱིར་རོ་ཞེས་བྱ་བ་ནི་ཉོན་མོངས་པའི་ས་བོན་དེ་ཉིད་མ་བཏོན་ཅིང་ཉམས་པར་མ་བྱས་པ་ནི་ཐོབ་པ་ཡིན་ཏེ། བག་ལ་ཉལ་ཡང་དེ་ཉིད་ཡིན་ནོ། །ཉོན་མོངས་པ་རྣམ་པ་དགུ་པོ་ཆུང་ངུའི་ཆུང་ངུ་ལ་སོགས་པའི་རྣམ་པ་སྤངས་
པའི་ཕྱིར་རོ། །འདི་ལྟར་ཆེན་པོའི་ཆེན་པོའི་རྣམ་པ་ནས་བརྩམས་ནས། ཆུང་ངུའི་ཆུང་ངུའི་རྣམ་པའི་བར་དུ་སྤངས་པས་སོ། །གང་སུ་དག་འདོད་ཆགས་མ་ལུས་པར་སྤངས་པ་ཞེས་གང་གསུངས་པའི་སྤངས་པས་ནི་རྣམ་པར་གྲོལ་བ་སྟོན་ཏོ། །དེ་ལ་རྣམ་པར་གྲོལ་བ་ནི་དེ་ཁོ་ན་ཉིད་ལས་འདོད་ཆགས་ལ་སོགས་
པ་བསལ་བའི་སེམས་དྲི་མ་མེད་པ་ཉིད་ཡིན་ནོ། །ཡོངས་སུ་ཤེས་པས་ནི་རྣམ་པར་གྲོལ་བའི་ཡེ་ཤེས་མཐོང་བ་སྟོན་ཏོ་ཞེས་བྱ་བའི་སྐབས་དང་སྦྱར་ཏེ། སྤངས་པ་དང་ཡོངས་སུ་ཤེས་པ་ཞེས་གང་གསུངས་པ་འདིས་སོ། །ཡེ་ཤེས་ཉིད་མཐོང་བ་ཡིན་ཏེ། རྣམ་པར་གྲོལ་བར་ཤེས་ཤིང་མཐོང་བ་ནི་རྣམ་པར་གྲོལ་
བའི་ཡེ་ཤེས་མཐོང་བའོ། །དེ་ལྟར་ན་ཞེས་བྱ་བ་རྒྱས་པར་འབྱུང་བ་ལ། དེ་ལྟར་ན་ཇི་སྐད་གསུངས་པའི་ཡོངས་སུ་ཤེས་པ་ཞེས་བྱ་བའི་ཚིག་འདིས་ནི། མ་ལུས་པར་སྤངས་པ་ནི་སོ་སོ་རང་གིས་རིག་པར་བྱ་བ་ཉིད་དུ་བསྟན་པ་ཉིད་ཡིན་ཏེ། ཅིའི་ཕྱིར་ཞེ་ན། གཞན་ལ་རག་ལས་པ་དང་། སོམ་ཉི་དང་
ལྡན་པ་རྣམས་བསལ་བའི་ཕྱིར་རོ། །གང་དག་ཉོན་མོངས་པ་སྤངས་པ་ལ་གཞན་ལ་རག་ལས་པ་དང་། སོམ་ཉི་དང་ལྡན་པ་དང་། ཐེ་ཚོམ་དང་ལྡན་པ་ནི་གཞན་ལ་རག་ལས་པ་དང་ལྡན་པ་དང་སོམ་ཉི་དང་ལྡན་པ་དེ་རྣམས་ཏེ་བསལ་བའི་ཕྱིར་ནི་དགའ་བའི་ཕྱིར་རོ། །གཅིན་ནད་དང་། འབྱུང་པོའི་
གདོན་སྨོས་པ་ནི་དེ་གཉིས་ནི་བྱང་དུ་ཟིན་ཀྱང་དུས་གཞན་འགའ་ཞིག་ན་ཡང་ལྡང་བས་སོ། །འཇིག་རྟེན་པའི་སྙོམས་པར་འཇུག་པ་དག་ལས་བཟློག་ནས་ཏེ། ཇི་ལྟར་བཟློག་ཅེ་ན། འཇིག་རྟེན་པའི་སྙོམས་པར་འཇུག་པ་དག་ནི་ཇི་སྲིད་དུ་བགྲོད་པར་བྱ་བར་མི་འདོད་དེ། སྲིད་པའི་རྩེ་མོའི་བར་དུ་འགྲོ་བའི་
ཕྱིར་དང་། མྱ་ངན་ལས་འདས་པར་མི་འགྲོ་བའི་ཕྱིར་དང་། འགྲོ་བ་བཟང་པོ་མ་ཡིན་པར་འགྲོ་བའི་ཕྱིར་དང་། སླར་ཡང་ལྡོག་པའི་ཕྱིར་རོ། །མྱ་ངན་ལས་འདས་པར་གཤེགས་པ་དག་ནི་དེ་ལྟར་གཤེགས་པ་དག་ཡིན་ནོ་ཞེས་བྱ་བ་ནི་ཇི་སྲིད་དུ་བགྲོད་པར་བྱ་བར་གཤེགས་པ་དག་ཡིན། འགྲོ་བ་ལ་

བཟང་པོར་གཤེགས་པ་དག་ཡིན། ཕྱིར་མི་ལྡོག་པར་གཤེགས་པ་དག་ཡིན་ནོ་ཞེས་བྱ་བའི་ཐ་ཚིག་གོ། །དེ་ལྟར་ན་ཞེས་བྱ་བ་རྒྱས་པར་འབྱུང་བ་ནི་ཇི་སྐད་དུ་བསྟན་པ་དེ་ལྟར་ན་མྱ་ངན་ལས་འདས་པ་ནི་བླ་ན་མེད་པ་ཉིད་ཡིན་པར་བསྟན་པ་ཡིན་ཏེ། མྱ་ངན་ལས་འདས་པར་གཤེགས་ནས་མྱ་
ངན་ལས་འདས་པ་ལས་ཕ་རོལ་ན་གཤེགས་པར་བྱ་བ་མེད་པས་སོ། །དགེ་བ་ཉིད་ཀྱང་ཡིན་པར་བསྟན་པ་ཡིན་ཏེ། བཟང་པོར་གཤེགས་པའི་ཕྱིར་རོ། །རྟག་པ་ཉིད་དུ་བསྟན་པ་ཡང་ཡིན་ཏེ། མྱ་ངན་ལས་འདས་པ་ལས་ཕྱིར་མི་ལྡོག་པར་གཤེགས་པའི་ཕྱིར་རོ། །དགེ་སློང་དག་འདི་ལྟར་ས་
བོན་ཡང་ཡོད་ལ། མ་གྲུགས་པ་དང་། མ་རུལ་བ་དང་། རླུང་དང་། ཉི་མས་མ་གདུངས་པ་དང་། གསར་པ་དང་། སྙིང་པོ་དང་ལྡན་པ་དང་། ལེགས་པར་གནས་པ་ཡང་ཡིན་ལ། སའི་སྨག་དང་ཆུ་ཡང་ཡོད་ན། དེ་ལྟ་བུའི་ས་བོན་དེ་དག་ནི་འཕེལ་ཞིང་རྒྱས་ལ་ཡངས་པར་འགྱུར་བའོ། །དགེ་
སློང་དག་དེ་བཞིན་དུ་འདི་ལྟར་ལས་ཀྱང་ཡོད་ལ། ཉོན་མོངས་པ་རྣམས་དང་། སྲེད་པ་དང་ལྟ་བ་དང་། ང་རྒྱལ་དང་། མ་རིག་པ་ཡང་ཡོད་ན། དེ་ལྟ་བུ་ནི་ཚེ་ཕྱི་མ་ལ་འདུ་བྱེད་རྣམས་འབྱུང་བར་འགྱུར་རོ་ཞེས་བྱ་བ་ནི་མདོ་སྡེའི་དུམ་བུ་ཡིན་ནོ། །ལས་ལ་ཉོན་མོངས་པ་རྣམས་གྲོགས་སུ་འགྱུར་བས་
སྐྱེ་བ་སྐྱེད་པར་བྱེད་དེ། ཇི་ལྟར་ཤེས་ཤེ་ན། དགྲ་བཅོམ་པ་ཉིད་ལ་ཉོན་མོངས་པ་ཟད་པ་ནི་མི་སྐྱེ་བའི་ཕྱིར་རོ། །ལས་ལ་ཡང་ནུས་པ་ཡོད་དེ། ཉོན་མོངས་པ་མ་ཟད་ན་ལས་ཇི་ལྟ་བ་བཞིན་དུ་སྐྱེ་བའི་ཕྱིར་ཏེ། སེམས་ཅན་དམྱལ་བ་མྱོང་བར་འགྱུར་བ་ལ་སོགས་པའི་ལས་ཀྱིས་སེམས་ཅན་དམྱལ་བ་ལ་
སོགས་པ་དག་ཏུ་སྐྱེ་བའི་ཕྱིར་རོ། །ཉོན་མོངས་པ་དེ་དག་ཀྱང་སྲེད་པ་ལ་སོགས་པའི་ཞེས་བྱ་བ་ནི་སྲེད་པ་དང་ལྟ་བ་དང་། ང་རྒྱལ་དང་། མ་རིག་པ་ཇི་སྐད་གསུངས་པ་རྣམས་སོ། །ལྟ་བ་དང་། ང་རྒྱལ་དང་། མ་རིག་པ་དེ་ནི་འདྲེན་པར་བྱེད་པ་དག་ཡིན་ཏེ་ཞེས་བྱ་བ་ནི་སྲེད་པ་འདྲེན་པར་བྱེད་པ་དག་ཡིན་
ཏེ་ཞེས་བྱ་བའི་ཐ་ཚིག་གོ། །ཇི་ལྟར་བྱས་པས་ཤེ་ན། བདག་ཏུ་ལྟ་བ་ཞེས་བྱ་བ་རྒྱས་པར་འབྱུང་བ་སྟེ། བདག་ཏུ་ལྟ་བའི་སྒོ་ནས་བདག་མེད་པ་ཉིད་ལ་ཀུན་ནས་ཉོན་མོངས་ན་དེ་ཀུན་དུ་རྒྱུ་བ་དང་མི་སྤོང་བའི་ཕྱིར་རོ། །སྲེད་པ་ཀུན་དུ་རྒྱུ་བའི་ཕྱིར་དང་། སྲེད་པ་མི་སྤོང་བའི་ཕྱིར་རོ་ཞེས་བྱ་བའི་ཐ་ཚིག་

གོ། །ངའོ་སྙམ་པའི་ང་རྒྱལ་གྱི་སྒོ་ནས་ཞེས་བྱ་བ་ལ་ཡང་དེ་བཞིན་དུ་སྦྱར་བར་བྱའོ། །དེའི་ཕྱིར་འདི་དག་ཁོ་ནས་སྨོས་ཀྱི་ཁོང་ཁྲོ་བ་དང་། ཐེ་ཚོམ་གཉིས་ནི་མ་ཡིན་ནོ། །ཇི་ལྟར་སྲེད་པ་ཉིད་ནི་མངོན་པར་བསྒྲུབ་པའི་རྒྱུ་ཡིན་པས། ལྟ་བ་དང་། ང་རྒྱལ་དང་། མ་རིག་པ་ནི་དེ་
འདྲེན་པར་བྱེད་པ་དག་ཡིན་པས་དེའི་ཕྱིར་མདོ་ལས་འདི་དག་ཁོ་ན་སྨོས་ཀྱི་ཁོང་ཁྲོ་བ་དང་ཐེ་ཚོམ་གཉིས་ནི་མ་ཡིན་ནོ། །གཞན་ཡང་ཞེས་བྱ་བ་རྒྱས་པར་འབྱུང་བ་ནི་རྣམ་གྲངས་གཞན་ཡང་འདོད་པའི་ཁམས་ཀྱི་ལས་ཀྱི་གྲོགས་ནི་ཉོན་མོངས་པ་ཐམས་ཅད་ཡིན་ཏེ། འདི་ལྟར་ལས་ཀྱང་ཡོད་ལ་ཉོན་མོངས་པ་
རྣམས་དང་ཞེས་བྱ་བ་འདིས་ཡང་དག་པར་སྟོན་ཏོ། །མདོ་སྡེའི་དུམ་བུའི་དོན་ཕྱི་མས་ནི་གཟུགས་དང་གཟུགས་མེད་པའི་ཁམས་གཉིས་ཀྱི་ནི་སྲེད་པ་ལ་སོགས་པའི་གྲོགས་ཡིན་ཏེ། གཟུགས་ཀྱི་ཁམས་ཀྱི་དང་། གཟུགས་མེད་པའི་ཁམས་ཀྱི་ནི་སྲེད་པ་དང་། ལྟ་བ་དང་། ང་རྒྱལ་དང་། མ་རིག་པ་རྣམས་
ལས་ཀྱི་གྲོགས་ཡིན་ནོ་ཞེས་བྱ་བར་ཡང་དག་པར་སྟོན་ཏོ། །ཁམས་གཉིས་ཀྱི་ལས་ཀྱི་གྲོགས་སྲེད་པ་ལ་སོགས་པ་ཡིན་པར་ཇི་ལྟར་ཤེས་ཤེ་ན། སྲེད་པ་དང་ལྟ་བ་དང་། ང་རྒྱལ་དང་། ཐེ་ཚོམ་ཤས་ཆེ་བའི་བསམ་གཏན་གྱི་བག་ལ་ཉལ་ཡོད་པའི་ཕྱིར་རོ། །དེ་ལྟར་དེ་ན་ནི་སྲེད་པ་ཤས་ཆེ་བའི་བསམ་
གཏན་ཉིད་ཡིན་ན་ནི་སྲེད་པ་རྒྱས་པར་འགྱུར་བས་ན། ཐེ་ཚོམ་ཤས་ཆེ་བའི་བསམ་གཏན་གྱི་བར་ཡིན་ན་ནི་ཐེ་ཚོམ་མོ། །དེའི་ཕྱིར་དེའི་ལས་ཀྱི་གྲོགས་ནི་སྲེད་པ་ལ་སོགས་པ་ཡིན་ནོ་ཞེས་བྱ་བར་གྲུབ་བོ། །སྨྲས་པ། མདོ་སྡེའི་དུམ་བུ་འདི་ལས་སྲེད་པ་དང་། ལྟ་བ་དང་། ང་རྒྱལ་དང་། མ་རིག་པ་ཞེས་
མ་རིག་པ་གསུངས་ན། འོ་ན་ཅིའི་ཕྱིར་སྲེད་པ་དང་། ལྟ་བ་དང་། ང་རྒྱལ་དང་ཐེ་ཚོམ་ཤས་ཆེ་བའི་བསམ་གཏན་གྱི་བག་ལ་ཉལ་ཡོད་པའི་ཕྱིར་རོ་ཞེས་ཐེ་ཚོམ་བསྟན་ཅེ་ན། འདིར་བཤད་པ། ཐེ་ཚོམ་ནི་མ་རིག་པས་རབ་ཏུ་ཕྱེ་བ་ཉིད་ཀྱི་ཕྱིར་ཏེ། འདིར་མ་རིག་པ་སྨོས་པས་ཐེ་ཚོམ་བསྟན་པ་ཡིན་ཏེ།
གྲོགས་ཐེ་ཚོམ་ཡང་ཡོད་པ་དང་། ལས་སྐྱེ་བའི་ཕྱིར་རྒྱུར་འགྱུར་བར་ཤེས་པར་བྱའོ། །གཞན་ཡང་གང་དག་བཞི་པ་ཆོས་མ་རིག་པ་ཤས་ཆེ་བའི་བསམ་གཏན་པར་འདོན་གྱི། ཐེ་ཚོམ་ཤས་ཆེ་བའི་བསམ་གཏན་པར་མི་འདོན་པ་དེ་དག་གི་ལྟར་ན་ནི་བརྩད་དུ་ཡང་མེད་ལ། ལན་གདབ་ཏུ་ཡང་མེད་

དོ། །དགེ་སློང་དག་དགེ་སློང་གསར་བུ་འདི་དག་ནི་དགེ་སྦྱོང་གི་གནོད་པས་གཙེས་པ་ཚངས་པར་སྤྱོད་པའི་འདམ་གྱིས་ཟིལ་གྱིས་ནོན་པ། སྡིག་པ་མི་དགེ་བའི་ཆོས་ཀུན་ནས་ཉོན་མོངས་པ་ཅན་ཡང་སྲིད་པ་ལ། རིམས་ནད་དང་བཅས་པ་སྡུག་བསྔལ་གྱི་རྣམ་པར་སྨིན་པ་ཅན། ཚེ་ཕྱི་མ་ལ་སྐྱེ་
བ་དང་། རྒ་བ་དང་། འཆི་བར་འགྱུར་བ་རྣམས་ཟིལ་གྱིས་གནོན་པ་ཞེས་བྱ་བའོ་ཞེས་བྱ་བ་ནི་མདོ་སྡེའི་དུམ་བུ་ཡིན་ནོ། །སྡིག་པ་ཞེས་བྱ་བ་ནི་རྒྱས་པར་འབྱུང་བ་དང་། སྡིག་པ་མི་དགེ་བའི་ཆོས་ནས་ཉོན་མོངས་པ་ཅན་ལ་སོགས་པ་ཀུན་ནས་ཉོན་མོངས་པ་ཅན་དང་། ཡང་སྲིད་བ་བ་ནས་སྐྱེ་བ་དང་།
རྒ་བ་དང་། འཆི་བར་འགྱུར་བའི་བར་རོ། །སྨྲས་པ། སྡིག་པ་མི་དགེ་བའི་ཆོས་ཀུན་ནས་ཉོན་མོངས་པ་ཅན་ལ་སོགས་པའི་རྣམ་གྲངས་ཅན་དེ་དག་གང་ཡང་ཡིན། འདིར་བཤད་པ། རྙེད་པ་དང་བཀུར་སྟིའི་རྒྱུ་རྣམས་ཏེ། རྙེད་པའི་རྒྱུ་དང་བཀུར་སྟིའི་རྒྱུ་གང་དག་ཡིན་པའོ། །དེ་དག་ཀྱང་གང་
དག་ཅེ་ན། བརྣབ་སེམས་ཅན་ཉིད་ལ་སོགས་པ་སྟེ། བརྣབ་སེམས་ཅན་དང་གནོད་སེམས་ཅན་དང་། ཁྲོ་བར་བྱེད་པ་དང་། ཁོན་དུ་འཛིན་པར་བྱེད་པ་དང་། འཆབ་པར་བྱེད་པ་དང་། འཇིག་པ་དང་། ཕྲག་དོག་ཅན་དང་། སེར་སྣ་ཅན་དང་། གཡོན་ཅན་དང་། སྒྱུ་ཅན་དང་། ངོ་ཚ་མི་ཤེས་ཅན་དང་
ཁྲེལ་མེད་པ་ཅན་དང་། སྡིག་པ་འདོད་པ་དང་། ལྟ་བ་ལོག་པ་ཅན་ནོ། །རྙེད་པ་དང་བཀུར་སྟིའི་རྒྱུ་ནི་བརྣབ་སེམས་ལ་སོགས་པ་ཡིན་ནོ་ཞེས་བརྗོད་པར་བྱ་བ་ལས། བརྣབ་སེམས་ཅན་ཉིད་ལ་སོགས་པ་ཞེས་བསྟན་པ་ནི་བརྣབ་སེམས་ཅན་དང་། གནོད་སེམས་ཅན་དང་ཞེས་རྒྱས་པར་འབྱུང་བ་ནས།
ལོག་པར་ལྟ་བ་ཅན་ཞེས་བྱ་བའི་བར་དུ་འབྱུང་བའི་མདོ་སྡེའི་དུམ་བུ་འདི་དགོད་པའི་ཕྱིར་རོ། །སྨྲས་པ། དེ་ལྟ་ན་ཡང་བརྣབ་སེམས་ཅན་ཞེས་བྱ་བ་ནས་ལོག་པར་ལྟ་བ་ཅན་ཞེས་བྱ་བའི་བར་དུ་བརྗོད་ན་ཆོས་རྣམས་སུ་ཇི་ལྟར་སྦྱར་བར་བྱ་ཞེ་ན། བརྣབ་སེམས་ཅན་ཉིད་དང་། གནོད་སེམས་ཅན་ཉིད་དང་
ཞེས་བྱ་བ་དེ་ལྟར་རྒྱས་པར་སྦྱར་བར་བྱ་བ་ནས། ལོག་པར་ལྟ་བ་ཅན་ཉིད་ཅེས་བྱ་བའི་བར་དུ་དེ་ལྟར་དངོས་པོ་བརྗོད་པར་སྦྱར་བར་བྱའོ། །མདོ་སྡེའི་དུམ་བུ་འདིས་ནི་ཉེས་དམིགས་རྣམ་པ་གསུམ་ཡོད་པར་སྟོན་ཏོ། །མཐོང་བའི་ཆོས་ལ་བསླབ་པ་གཏོང་བ་ནི་ཉེས་དམིགས་དང་པོ་ཡིན་པར་སྟོན་ཏོ། །

དགེ་སྦྱོང་གི་གནོད་པས་གཙེས་པ་ཞེས་བྱ་བའི་ཚིག་འདིས་སོ། །མྱ་ངན་ལས་འདས་པར་མི་འགྲོ་བ་ནི་ཉེས་དམིགས་གཉིས་པ་ཡིན་པར་སྟོན་པ་སྟེ། ཚངས་པར་སྤྱོད་པའི་འདམ་གྱིས་ཟིལ་གྱིས་ནོན་པ་ཞེས་བྱ་བའི་ཚིག་འདིས་སོ། །ཚེ་ཕྱི་མ་ལ་ངན་འགྲོར་འགྲོ་བ་
ནི་ཉེས་དམིགས་རྣམ་པ་གསུམ་པ་ཡིན་པར་སྟོན་ཏེ། སྡིག་པ་མི་དགེ་བའི་ཆོས་ཞེས་བྱ་བ་རྒྱས་པར་འབྱུང་བས་སོ། །དེ་ལྟར་ན་ཞེས་བྱ་བ་རྒྱས་པར་འབྱུང་བ་ནི་ཇི་སྐད་བསྟན་པ་དེ་ལྟར་ན་སྟེ། དེ་ལ་སྡིག་པ་ཞེས་བྱ་བ་རྒྱས་པར་འབྱུང་བས་ནི་ཀུན་ནས་ཉོན་མོངས་པ་ཅན་ལ་སོགས་པ་རྣམས་ནི་གཞན་
གྱིས་དང་། རང་ཉིད་ཀྱིས་སྐྱོན་ཡིན་པར་བསྟན་པ་ཡིན་ནོ། །རེ་ཞིག་གཞན་གྱིས་སྐྱོན་ཡིན་པར་བསྟན་པ་ནི་སྡིག་པ་ནི་འཕགས་པའི་སྐྱེ་བོས་སྨད་པའི་དོན་གྱིས་སོ་ཞེས་གསུངས་པའི་ཕྱིར་རོ། །རང་ཉིད་ཀྱིས་ནི་མི་དགེ་བ་ནི་མི་བདེ་བའི་དོན་གྱིས་སོ་ཞེས་བྱ་བ་ཡིན་ནོ། །དེ་ནི་ཀུན་ནས་ཉོན་
མོངས་པ་ཅན་ཡང་སྲིད་པ་པ་ཉིད་ཉེས་དམིགས་དང་བཅས་པས་ཡང་དག་པར་སྟོན་ཏོ་ཞེས་བྱ་བ་ནི་ཀུན་ནས་ཉོན་མོངས་པ་ཅན་ཉིད་ཉེས་དམིགས་དང་བཅས་པ་དང་། ཡང་སྲིད་པ་པ་ཉེས་དམིགས་དང་བཅས་པས་ནི་སྨད་པ་ཉིད་ཡིན་པར་སྟོན་ཏོ། །དེ་བཞིན་དུ་གཉིས་ཀས་མི་བདེ་བ་ཉིད་ཡིན་པར་
ཡང་སྟོན་ཏོ། །ཇི་ལྟ་ཞེ་ན། རིམས་ནད་དང་བཅས་པ་དང་། སྡུག་བསྔལ་གྱི་རྣམ་པར་སྨིན་པ་ཅན་ཡིན་ཏེ། མཐོང་བའི་ཆོས་ཉིད་ལ་ཉོན་མོངས་པའི་ཡོངས་སུ་གདུང་བ་རྣམས་ཀྱི་རིམས་ནད་དང་བཅས་པའོ། །ཇི་ལྟ་ཞེ་ན། ད་ལྟར་བྱུང་བའི་ཚེ་རབས་ལ་ཉོན་མོངས་པས་ཡོངས་སུ་གདུང་བ་
ཡིན་ཏེ། ལུས་དང་སེམས་ཡོངས་སུ་གདུང་བར་བྱེད་པའི་ཕྱིར་རོ། །ལུས་ཡོངས་སུ་གདུང་བར་བྱེད་པའི་ཕྱིར་དང་། སེམས་ཡོངས་སུ་གདུང་བར་བྱེད་པའི་ཕྱིར་རོ། །ཇི་ལྟར་ན་སྡུག་བསྔལ་གྱི་རྣམ་པར་སྨིན་པ་ཅན་ཡིན་ཞེ་ན། ཚེ་ཕྱི་མ་ལ་ངན་འགྲོར་འགྲོ་བའི་ཕྱིར་རོ། །ཇི་ལྟར་ན།
སྐྱེ་བ་དང་། རྒ་བ་དང་། འཆི་བར་འགྱུར་བ་ཡིན་ཞེ་ན། སྐྱེ་བ་དང་། རྒ་བ་དང་། འཆི་བར་འགྱུར་བ་ནི། སྐྱེ་བ་དང་། རྒ་བ་དང་། འཆི་བ་དང་མཐུན་པ་སྟེ། ཡུན་རིང་པོར་སྐྱེ་བ་དང་། རྒ་བ་དང་། འཆི་བ་འདྲེན་པའི་ཕྱིར་རོ། །དགེ་སློང་ངམ། དགེ་སློང་མ་གང་ལ་ལ་ཅུང་ཟད་ཅུང་ཟད་དང་།

ཡུད་ཙམ་ཡུད་ཙམ་དང་། ཐ་ན་སེ་གོལ་གཏོགས་པ་ཙམ་ཡང་སེམས་ཅན་སྲོག་ཆགས་སུ་གྱུར་པ་ཐམས་ཅད་ལ་བྱམས་པའི་སེམས་སྒོམ་པར་བྱེད་པའི་དགེ་སློང་ངམ། དགེ་སློང་མ་འདི་ནི་སྟོན་པའི་བསྟན་པ་བཞིན་བྱེད་པ། མི་གཏོང་བར་སྒོམ་པ། ལྷག་མཐོང་དང་ལྡན་པ། ཁྱིམ་སྟོང་
པ་རྣམས་རྒྱས་པར་བྱེད་པ། རང་གི་དོན་གྱི་སྦྱོར་བ་ལ་རྗེས་སུ་བརྩོན་པ། ཚངས་པ་མཚུངས་པར་སྤྱོད་པ་མཁས་པ་རྣམས་ཀྱིས་མ་སྨད་པ། ཡུལ་འཁོར་གྱི་བསོད་སྙོམས་འབྲས་བུ་ཡོད་པར་ཟ་བ་ཞེས་བྱའོ་ཞེས་བྱ་བ་ནི་མདོ་སྡེའི་དུམ་བུ་ཡིན་ནོ། །སྟོན་པའི་བསྟན་པ་བཞིན་དུ་བསྒྲུབ་པའི་ཕྱིར་
ཞེས་བྱ་བ་ནི་བཅོམ་ལྡན་འདས་ཀྱི་བཀའ་བཞིན་དུ་བསྒྲུབ་པའི་ཕྱིར་རོ། །དེ་ལྟར་བརྩོན་པའི་ཕྱིར་ཏེ། ཇི་ལྟར་དེ་ལྟར་བརྩོན་ཞེ་ན། བརྩོན་འགྲུས་མི་གཏོང་བ་ཉིད་ཀྱིས་སོ། །ཚངས་པ་མཚུངས་པར་སྤྱོད་པ་མཁས་པ་རྣམས་ཀྱིས་ཞེས་བྱ་བ་ནི་ཚངས་པ་མཚུངས་པར་སྤྱོད་པ་དེ་ཁོ་ན་རྟོགས་པ་རྣམས་ཀྱིས་སོ་
ཞེས་བྱ་བའི་ཐ་ཚིག་གོ། །དེའི་འབྲས་བུ་དང་བཅས་པ་ཉིད་དུ་བྱེད་པའི་ཕྱིར་ཞེས་བྱ་བ་ནི་སྦྱིན་པ་པོ་རྣམས་ཀྱི་བསོད་སྙོམས་དང་བཅས་པ་ཉིད་དུ་བྱེད་པའི་ཕྱིར་རོ། །སྟོན་པ་ལ་ཡང་དག་པར་སྒྲུབ་པར་ཡོངས་སུ་བསྟན་པའི་ཕྱིར་དེའི་བསྟན་པ་བཞིན་དུ་བསྒྲུབ་པའི་ཕྱིར་ཏེ། སྟོན་པའི་བསྟན་པ་བཞིན་བྱེད་པ་
ཞེས་བྱ་བའི་ཚིག་འདིས་སོ། །བསྟན་པ་ལས་ཡང་དག་པར་སྒྲུབ་པར་ཡོངས་སུ་བསྟན་པ་ནི་རྟག་ཏུ་ལས་ཁྱད་པར་དུ་འཕགས་པ་ལས་སྦྱོར་བའི་ཕྱིར་དང་སྟེ། མི་གཏོང་བར་བསྒོམ་པ་ཞེས་བྱ་བ་འདིས་སོ། །ཕྱིན་ཅི་མ་ལོག་པར་སྦྱོར་བའི་ཕྱིར་དང་སྟེ། ལྷག་མཐོང་དང་ལྡན་པ་ཞེས་བྱ་བ་འདིས་སོ། །རྣམ་
པར་མ་གཡེངས་པར་སྦྱོར་བའི་ཕྱིར་དང་སྟེ། ཁྱིམ་སྟོང་པ་རྣམས་རྒྱས་པར་བྱེད་པ་ཞེས་བྱ་བ་འདིས་སོ། །ཆོག་མི་ཤེས་པར་སྦྱོར་བའི་ཕྱིར་ཏེ། རང་གི་དོན་གྱི་སྦྱོར་བ་ལ་རྗེས་སུ་བརྩོན་པ་ཞེས་བྱ་བ་འདིས་སོ། །དགེ་སློང་གི་ལས་ཁྱད་པར་དུ་འཕགས་པ་ནི་བསམ་གཏན་ཡིན་པར་རིག་པར་བྱ་བ་ནི་
ལས་ཁྱད་པར་དུ་འཕགས་པ་ལ་སྦྱོར་བའི་ཕྱིར་ཞེས་གང་བསྟན་པ་ཡིན་ནོ། །རྒྱུ་འདི་རྣམས་ཀྱིས་ནི་བསྟན་པ་ལ་ཡང་དག་པར་སྒྲུབ་པར་ཡོངས་སུ་བསྟན་པ་ཡིན་ནོ། །གཞན་ཡང་སྟེ། རྣམ་གྲངས་གཞན་ཡང་བསྟན་པ་ལ་ཡང་དག་པར་སྒྲུབ་པར་ཡོངས་སུ་བསྟན་པ་ཞེས་བྱ་བ་ནི་རྟག་ཏུ་བསྒོམ་

པའི་ཕྱིར་དང་སྟེ། མི་གཏོང་བར་སྒོམ་པ་ཞེས་བྱ་བ་འདིས་སོ། །ཀུན་ནས་ཉོན་མོངས་པ་ཅན་མ་ཡིན་པར་བསྒོམ་པའི་ཕྱིར་དང་སྟེ། ལྷག་མཐོང་དང་ལྡན་པ་ཞེས་བྱ་བའི་ཚིག་འདིས་སོ། །བར་ཆད་མེད་པར་བསྒོམ་པའི་ཕྱིར་དང་སྟེ། ཁྱིམ་སྟོང་པ་རྣམས་རྒྱས་པར་བྱེད་པ་
ཞེས་བྱ་བ་འདིས་སོ། །ཆོག་མི་ཤེས་པར་བསྒོམ་པའི་ཕྱིར་ཏེ། རང་གི་དོན་དང་སྦྱོར་བ་ལ་རྗེས་སུ་བརྩོན་པ་ཞེས་བྱ་བའི་ཚིག་འདིས་སོ། །ཚངས་པ་མཚུངས་པར་སྤྱོད་པ་རྣམས་ལ་ཡང་དག་པར་ཡོངས་སུ་སྒྲུབ་པར་བསྟན་པ་ནི་དོན་མཐུན་པ་ཉིད་དུ་སྦྱོར་བའི་ཕྱིར་ཏེ། ཚངས་པ་མཚུངས་པར་སྤྱོད་པ་
མཁས་པ་རྣམས་ཀྱིས་མ་སྨད་པ་ཞེས་བྱ་བའི་ཚིག་འདིས་སོ། །སྦྱིན་པར་བྱེད་པ་རྣམས་ལ་ཡང་དག་པར་སྒྲུབ་པར་ཡོངས་སུ་བསྟན་པ་ནི་དེའི་སྦྱིན་པ་འབྲས་བུ་ཆེན་པོ་ཉིད་དུ་སྦྱོར་བའི་ཕྱིར་ཏེ། ཡུལ་འཁོར་གྱི་བསོད་སྙོམས་འབྲས་བུ་ཡོད་པར་བཟའ་བ་ཞེས་བྱ་བའི་ཚིག་འདིས་སོ། །ཀྱེ་གཽ་ཏ་མ་
གང་གིས་ན་ད་ལྟར་མི་རྣམས་སྟོབས་ཆུང་བ་དང་། གནོད་པ་མང་བ་དང་། མཐུ་ཆུང་བ་དང་། ཚེ་ཐུང་བའི་རྒྱུ་ནི་གང་ལགས། རྐྱེན་ནི་གང་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྲམ་ཟེ་གྲོ་བཞིན་སྐྱེས་ལ་འདི་སྐད་ཅེས་བཀའ་སྩལ་ཏོ། །བྲམ་ཟེ་ད་ལྟར་མི་རྣམས་
ནི་ཆོས་མ་ཡིན་པར་ཆགས་པས་ཆགས་པ་དང་། མི་རིགས་པར་ཆགས་པས་ཟིལ་གྱིས་ནོན་པ་དང་། ཆོས་ལོག་པས་དཀྲིས་པ་ཡིན་ནོ་ཞེས་བྱ་བ་ནི་མདོ་སྡེའི་དུམ་བུ་ཡིན་ནོ། །ཆོམ་རྐུན་དང་། མཐུ་སྟོབས་དང་། བྲིད་པ་ལ་སོགས་པས་ནི་ཆོམ་རྐུན་གྱིས་དང་། མཐུ་སྟོབས་ཀྱིས་དང་། བྲིད་པས་
སོ། །སོགས་པའི་སྒྲས་ནི་ལོག་པར་ལུང་འབོགས་པ་དང་། འཇིགས་པར་བསྟན་པ་ལ་སོགས་པས་ཕ་རོལ་གྱི་ནོར་དོན་དུ་གཉེར་བ་གང་ཡིན་པའོ། །ཕ་རོལ་ལ་འཚེ་བ་དང་ལྡན་པ་ཞེས་བྱ་བ་ནི་ཕ་རོལ་འཚེ་བ་དང་འབྲེལ་པ་སྟེ། ཕ་རོལ་ལ་འཚེ་བར་བྱེད་པ་ཞེས་བྱ་བའི་ཐ་ཚིག་གོ། །རྒྱལ་པོའི་ཆོས་
སམ། བྲམ་ཟེའི་ཆོས་ནི་རེ་ཞིག་རྒྱལ་པོའི་ཆོས་སུ་བྱས་པ་ནི་རྐང་པའི་ཕྱེད་གཅད་ཅེས་བྱ་བ་དེ་ལྟ་བུ་ལ་སོགས་པའོ། །བྲམ་ཟེའི་ཆོས་ཀྱང་བ་ལང་གི་མཆོད་སྦྱིན་བྱས་ལ་ལོར་བ་ལང་གི་བརྟུལ་ཞུགས་བྱས་ན་ཞེས་བྱ་བ་དེ་ལྟ་བུ་ལ་སོགས་པའོ། །དེས་ནི་ཞེས་བྱ་བ་རྒྱས་པར་འབྱུང་བ་དང་། དེས་ནི་ཡུལ་

ཡོངས་སུ་སྤྱད་པ་ལས་བརྩམས་ནས་མི་རྣམས་ལ་ལོག་པར་སྒྲུབ་པ་ཡོད་པར་བསྟན་པ་ནི་ད་ལྟར་མི་རྣམས་ནི་ཆོས་མ་ཡིན་པར་ཆགས་པས་ཆགས་པ་ཞེས་བྱ་བའི་ཚིག་འདིས་སོ། །ལོངས་སྤྱོད་ཡོངས་སུ་ཚོལ་བ་ལས་བརྩམས་ནས་ནི་མི་རིགས་པར་ཆགས་པས་ཟིལ་གྱིས་ནོན་པ་ཞེས་བྱ་བ་འདིས་སོ། །
བདེ་འགྲོ་ཡོངས་སུ་ཚོལ་བ་ལས་བརྩམས་ནས་ནི་ལོག་པའི་ཆོས་ཀྱིས་དཀྲིས་པ་ཞེས་བྱ་བ་འདིས་སོ། །སངས་རྒྱས་བཅོམ་ལྡན་འདས་རྣམས་ཀྱི་གཏམ་དུས་སྔར་བྱ་བ་གང་ཡིན་པ་དེ་ནི་འདི་ལྟ་སྟེ། སྦྱིན་པའི་གཏམ་དང་། ཚུལ་ཁྲིམས་ཀྱི་གཏམ་དང་། མཐོ་རིས་ཀྱི་གཏམ་དང་། འདོད་པ་རྣམས་ལ་
རོ་མྱོང་བ་དང་། ཉེས་དམིགས་དང་། ཀུན་ནས་ཉོན་མོངས་པ་དང་། རྣམ་པར་བྱང་བ་དང་། ངེས་པར་འབྱུང་བ་དང་། རབ་ཏུ་དབེན་པ་དང་། ཕན་ཡོན་དང་། རྣམ་པར་བྱང་བའི་ཕྱོགས་དང་མཐུན་པའི་ཆོས་རྣམས་རྒྱ་ཆེར་ཡང་དག་པར་རབ་ཏུ་སྟོན་པར་མཛད་པ་ཡིན་ནོ། །གང་གི་ཚེ་དེ་སེམས་རངས་
པ་དང་། སེམས་ཉམས་བདེ་བ་དང་། སེམས་དགའ་བ་དང་། སེམས་སྒྲིབ་པ་མེད་པ་དང་། ཡང་དག་ཕུལ་ཅན་གྱི་ཆོས་བསྟན་པ་ཀུན་ཤེས་པར་བྱ་བ་སྐལ་བ་དང་ལྡན་པ་དང་། ནུས་པར་ཀུན་དུ་མཁྱེན་པར་གྱུར་པ་དེའི་ཚེ་སངས་རྒྱས་བཅོམ་ལྡན་འདས་རྣམས་ཀྱི་ཡང་དག་ཕུལ་ཅན་གྱི་ཆོས་བསྟན་པ་གང་
ཡིན་པ་དེ་ནི་འདི་ལྟ་སྟེ། སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་མོ་ཞེས་བཅོམ་ལྡན་འདས་ཀྱིས་དེ་ལ་འཕགས་པའི་བདེན་པ་བཞི་པོ་དག་ཡང་དག་པར་རབ་ཏུ་སྟོན་པར་མཛད་པ་ཡིན་ནོ་ཞེས་བྱ་བ་ནི་མདོ་སྡེའི་དུམ་བུ་ཡིན་ནོ། །དེ་ནི་ཞེས་བྱ་བ་རྒྱས་པར་འབྱུང་བ་ནི་གཏམ་
སྔར་བྱ་བ་ནི་མདོར་ན་སྟེ། མདོར་བསྡུ་ན་ལོངས་སྤྱོད་ཕུན་སུམ་ཚོགས་པའི་རྒྱུ་ལས་བརྩམས་ནས་རིག་པར་བྱ་བ་ནི་སྦྱིན་པའི་གཏམ་ཞེས་བྱ་བའི་ཚིག་འདིས་སོ། །ལུས་ཕུན་སུམ་ཚོགས་པའི་རྒྱུ་ལས་བརྩམས་ནས་རིག་པར་བྱ་བ་ནི་ཚུལ་ཁྲིམས་ཀྱི་གཏམ་ཞེས་བྱ་བའི་ཚིག་འདིས་སོ། །ཕུན་སུམ་ཚོགས་
པ་དེ་གཉི་གའི་ཁྱད་པར་དང་། ལོངས་སྤྱོད་ཕུན་སུམ་ཚོགས་པའི་ཁྱད་པར་དང་། ལུས་ཕུན་སུམ་ཚོགས་པའི་ཁྱད་པར་ལས་བརྩམས་ནས་རིག་པར་བྱ་བ་ནི་མཐོ་རིས་ཀྱི་གཏམ་ཞེས་བྱ་བའི་ཚིག་འདིས་སོ། །དེ་ལས་ཕྱིར་ཕྱོགས་པར་བྱེད་པའི་གཞི་ལས་བརྩམས་ནས་རིག་པར་བྱ་བ་ནི་འདོད་པ་

རྣམས་ལ་རོ་མྱང་བ་དང་། ཉེས་དམིགས་ཞེས་བྱ་བའི་ཚིག་འདིས་སོ། །དེ་ལས་ངེས་པར་འབྱུང་བའི་ཐབས་ལས་བརྩམས་ནས་རིག་པར་བྱ་བ་ནི་ངེས་པར་འབྱུང་བ་དང་། རབ་ཏུ་དབེན་པ་དང་། ཕན་ཡོན་དང་། རྣམ་པར་བྱང་བའི་ཕྱོགས་དང་། མཐུན་པའི་ཆོས་རྣམས་རྒྱ་ཆེར་
ཡང་དག་པར་རིག་པ་སྟོན་པར་མཛད་པ་ཞེས་བྱ་བའི་ཚིག་འདིས་སོ། །དེ་གཉིས་ཀྱིས་ཀྱང་ཞེས་བྱ་བ་རྒྱས་པར་འབྱུང་བ་ནི་འདོད་པ་རྣམས་ལ་རོ་མྱང་བ་དང་། དེའི་ཉེས་དམིགས་བསྟན་པ་འདི་གཉིས་ཀྱིས་ནི་འདི་ལྟར་ཀུན་ནས་ཉོན་མོངས་པ་དང་། རྣམ་པར་བྱང་བར་བྱེད་དོ། །དེ་ལ་རོ་མྱོང་བར་བྱེད་པས་ནི་
ཀུན་ནས་ཉོན་མོངས་པར་བྱེད་དོ། །དེའི་ཉེས་དམིགས་བསྟན་པས་ནི་རྣམ་པར་བྱང་བར་བྱེད་དོ། །དེ་ལས་ངེས་པར་འབྱུང་བའི་ཐབས་ཀྱང་ཡིན་ཏེ། དེ་ལས་ནི་དེ་ལས་ཕྱིར་ཕྱོགས་པར་བྱེད་པའི་གཞི་ནི་འདོད་པ་རྣམས་ལ་རོ་ཆུང་བ་ཉིད་དང་། ཉེས་དམིགས་མང་བ་ཉིད་ཡིན་པར་རིག་པར་བྱའོ། །འཕགས་
པར་ཏེ་ཁྱད་པར་དུ་ཆེས་ལྷག་པ་དང་། ཆེས་གྱ་ནོམ་པ་ཡིན་ཏེ། དེ་ལ་ལྷ་རྫས་ཀྱི་རང་བཞིན་ཡིན་པ་དེ་ཉིད་ཀྱིས་ཆེས་ལྷག་པ་ཡིན་ལ། ཁ་དོག་ལ་སོགས་པ་ཕུན་སུམ་ཚོགས་པས་ཆེས་གྱ་ནོམ་པ་དག་ཡིན་ནོ། །གཏམ་འདིའི་ཕན་ཡོན་ཡོངས་སུ་བསྟན་པ་ཡིན་ནོ་ཞེས་བྱ་བ་ནི་གཏམ་དུས་སྔར་བྱས་པ་
འདིའི་ཕན་ཡོན་ཡོངས་སུ་བསྟན་པ་ཡིན་ནོ་ཞེས་བྱ་བའི་ཐ་ཚིག་གོ། །གོ་རིམས་བཞིན་དུ་སེམས་དགའ་བ་ཞེས་བྱ་བ་ནི་རངས་པའི་རྣམ་པར་བཤད་པ་ཡིན་ལ། སེམས་སྒྲིབ་པ་མེད་པ་ཞེས་བྱ་བ་ནི་ཉམས་བདེ་བའི་བཤད་པ་ཡིན་ནོ། །དེ་ཅིའི་ཕྱིར་ཞེ་ན། མཆོག་ཏུ་བདེ་བ་ཉིད་དང་ལྡན་པའི་ཕྱིར་དང་། སྒྲིབ་
པ་ལྔ་དང་མི་ལྡན་པའི་ཕྱིར་ཏེ་གོ་རིམས་བཞིན་ནོ། །སྒྲིབ་པ་ལྔ་ནི་འདོད་པ་ལ་འདུན་པ་དང་། གནོད་སེམས་དང་། རྨུགས་པ་དང་། གཉིད་དང་། རྒོད་པ་དང་། འགྱོད་པ་དང་། ཐེ་ཚོམ་མོ། །སེམས་དེའི་ཕན་ཡོན་ཡོངས་སུ་བསྟན་པ་ནི་སེམས་དགའ་བ་དང་། སེམས་སྒྲིབ་པ་མེད་པའི་ཕན་ཡོན་
ཡོངས་སུ་བསྟན་པ་ཡིན་ནོ་ཞེས་བྱ་བའི་ཐ་ཚིག་གོ། །དེ་ལ་སེམས་དགའ་བ་ཉིད་ཀྱིས་ནི་སྐལ་བ་དང་ལྡན་པ་ཡིན་ཏེ། ཇི་ལྟ་ཞེ་ན། དགའ་བ་ལ་སོགས་པའི་རྒྱུའི་རིམ་པས་སོ། །དགའ་བ་ལ་སོགས་པ་ཉིད་ཀྱི་རྒྱུ་སྟེ། རྒྱུ་ཡིན་པས་དགའ་བ་ལ་སོགས་པའི་རྒྱུའོ། །དགའ་བ་ལ་སོགས་པའི་

རྒྱུའི་རིམ་པས་ནི་དགའ་བ་ལ་སོགས་པའི་རྒྱུའི་རིམ་པས་སོ། །ཇི་ལྟ་ཞེ་ན། རབ་ཏུ་དགའ་བས་དགའ་བ་སྐྱེའོ། །ཡིད་དགའ་ནི་ཤིན་ཏུ་སྦྱང་བར་འགྱུར་རོ། །ལུས་ཤིན་ཏུ་སྦྱངས་ན་བདེ་བ་མྱོང་བར་འགྱུར་རོ། །བདེ་ན་སེམས་མཉམ་པར་འཇོག་གོ། །སེམས་མཉམ་པར་གཞག་ན་ཡང་དག་པ་ཇི་ལྟ་
བ་བཞིན་དུ་རབ་ཏུ་ཤེས་སོ་ཞེས་བྱའོ། །སེམས་སྒྲིབ་པ་མེད་པ་ཉིད་ཀྱིས་ནི་ཞེས་བྱ་བ་རྒྱས་པར་འབྱུང་བ་ནི་བཤད་ཟིན་ཏོ། །ཀུན་དུ་མཁྱེན་པར་གྱུར་པ་ཞེས་བྱ་བ་ནི་ཀུན་དུ་མཁྱེན་པ་དང་ལྡན་པའོ། །གཞན་ཡང་ཞེས་བྱ་བ་རྒྱས་པར་འབྱུང་བ་ལ། རྣམ་གྲངས་གཞན་ཡང་སྐལ་བ་དང་ལྡན་པ་ཉིད་ཀྱིས་ནི་
རིགས་ཕུན་སུམ་ཚོགས་པ་ཡོངས་སུ་བསྟན་པར་རིག་པར་བྱའོ། །ནུས་པ་ཉིད་ཀྱིས་ནི་ཡོངས་སུ་སྨིན་པ་ཕུན་སུམ་ཚོགས་པ་ཡོངས་སུ་བསྟན་པར་རིག་པར་བྱ་སྟེ། ཅིའི་ཕྱིར་ཞེ་ན། དེའི་ཚེ་ན་དེ་ལ་གཉི་ག་ཕུན་སུམ་ཚོགས་པ་ཡིན་ནོ། །འདི་ལྟར་གཏམ་དུ་སྔར་བྱ་བས་རྒྱུད་སྣོད་དུ་བྱས་པ་ན་སེམས་རངས་
པ་དང་། ཉམས་བདེ་བར་གྱུར་པ་ལ་རིགས་དང་། ཡོངས་སུ་སྨིན་པ་ཕུན་སུམ་ཚོགས་པ་ཡིན་ནོ། །རིགས་ནི་ཉན་ཐོས་ལ་སོགས་པའི་རིགས་རྣམས་ལས་གང་ཡང་རུང་བའོ། །ཡོངས་སུ་སྨིན་པ་ནི་རྒྱུད་ལ་འབྲས་བུ་ཉེ་བར་གནས་པ་ཡིན་ནོ། །སྔ་ནས་ཡོད་པ་གཏམ་དུ་སྔར་བྱ་བའི་ཚེ་ནས་རིགས་ཁོ་ནར་
ཕུན་སུམ་ཚོགས་པ་ཡིན་ནོ། །རིགས་མ་སྨོས་ན་སྟེ། གལ་ཏེ་ནུས་པ་ཞེས་བྱ་བ་ཙམ་ཞིག་སྨོས་ཀྱི། སྐལ་བ་དང་ལྡན་པ་ཞེས་བྱ་བ་འདི་མ་སྨོས་ན། སངས་རྒྱས་རྣམས་ཀྱིས་ཡང་དག་ཕུལ་ཅན་གྱི་ཆོས་བསྟན་པ་ནི་རིགས་དང་ཡོངས་སུ་སྨིན་པ་ཉིད་ག་ལ་ལྟོས་པའོ་ཞེས་བྱ་བ་བསྟན་པར་མི་འགྱུར་རོ། །ཡང་
དག་ཕུལ་ཅན་གྱི་གཏམ་འདི་གང་ཞིག་ཡིན་ཞེ་ན། འཕགས་པའི་བདེན་པའི་གཏམ་ནི་ཡང་དག་ཕུལ་ཅན་ཏེ། ཅིའི་ཕྱིར་ཞེ་ན། མཐོང་བ་དང་བསྒོམ་པའི་ལམ་གཉིས་ཀྱིས་ངན་འགྲོ་དང་འཁོར་བ་ལས་ཡང་དག་ཕུལ་དུ་བྱེད་པའི་ཕྱིར་རོ། །མཐོང་བའི་ལམ་གྱིས་ནི་ངན་འགྲོ་ལས་ཡང་དག་ཕུལ་དུ་བྱེད་
པའི་ཕྱིར་ཏེ། ངན་འགྲོ་སེལ་བའི་ཕྱིར་རོ། །བསྒོམ་པའི་ལམ་གྱིས་ནི་འཁོར་བ་ལས་ཡང་དག་ཕུལ་དུ་བྱེད་པའི་ཕྱིར་རོ། །འབྲས་བུ་དེ་དང་ལྡན་པའི་ཕྱིར་ཞེས་བྱ་བ་ནི་འབྲས་བུ་མྱ་ངན་ལས་འདས་པ་དང་ལྡན་པའི་ཕྱིར་ཞེས་བྱ་བའི་ཐ་ཚིག་གོ། །ཡང་འབྱུང་བ་པའི་སྲེད་པ་བཞིན་ཏེ། འབྲས་བུ་ཡང་སྲིད་པ་

ཡིན་པའི་ཕྱིར་རོ།། །།རྣམ་པར་བཤད་པ་རིགས་པའི་བཤད་པ། བམ་པོ་བཅུ་པ། དགེ་སློང་དག་གཟུགས་ནི་མི་རྟག་པ་སྟེ། གང་མི་རྟག་པ་དེ་ནི་སྡུག་བསྔལ་བའོ། །གང་སྡུག་བསྔལ་བ་དེ་ནི་བདག་མེད་པའོ། །གང་དག་མེད་པ་དེ་ཐམས་ཅད་ནི་བདག་
གི་མ་ཡིན། དེ་ནི་བདག་མ་ཡིན། དེ་ནི་བདག་གི་བདག་མ་ཡིན་ནོ་ཞེས་དེས་དེ་ལྟར་ཡང་དག་པ་ཇི་ལྟ་བ་བཞིན་གྱི་ལེགས་པའི་ཤེས་རབ་ཀྱིས་བལྟ་བར་བྱའོ། །གཟུགས་ལ་ཇི་ལྟ་བ་བཞིན་དུ་རྣམ་པར་ཤེས་པའི་བར་ལ་ཡང་ལེགས་པའི་ཤེས་རབ་ཀྱིས་བལྟ་བར་བྱའོ། །འཕགས་པ་ཉན་ཐོས་
ཐོས་པ་དང་ལྡན་པས་དེ་ལྟར་མཐོང་ན་གཟུགས་ལ་ཡིད་འབྱུང་བར་འགྱུར་ཞིང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཡིད་འབྱུང་བར་འགྱུར་རོ། །ཡིད་འབྱུང་ན་འདོད་ཆགས་དང་བྲལ་བར་འགྱུར་རོ། །འདོད་ཆགས་དང་བྲལ་ན་རྣམ་པར་གྲོལ་བར་
འགྱུར་རོ་ཞེས་བྱ་བ་ནི་མདོ་སྡེའི་དུམ་བུ་ཡིན་ནོ། །འདིར་ཡིད་བྱུང་བ་དང་། འདོད་ཆགས་དང་བྲལ་བ་དང་རྣམ་པར་གྲོལ་བ་དང་རྣམ་པར་གྲོལ་བ་རྣམས་ཀྱི་རྒྱུར་གྱུར་པ་ནི་གོ་རིམས་བཞིན་དུ་ཡོངས་སུ་བསྟན་པ་ཡིན་ནོ་ཞེས་བྱ་བ་ནི་ཡིད་བྱུང་བ་དང་། འདོད་ཆགས་དང་བྲལ་བ་དང་། རྣམ་པར་གྲོལ་བ་རྣམས་
ཀྱི་རྒྱུར་གྱུར་པ་སྟེ། རྒྱུར་གྱུར་པ་ནི་གོ་རིམས་བཞིན་དུ་ཡོངས་སུ་བསྟན་པ་ཡིན་ནོ། །ཇི་ལྟར་ཞེ་ན། ཡིད་འབྱུང་བ་ནི་འདོད་ཆགས་དང་བྲལ་བའི་རྒྱུ་ཡིན་ལ། འདོད་ཆགས་དང་བྲལ་བ་ནི་རྣམ་པར་གྲོལ་བའི་རྒྱུ་ཡིན་ནོ། །དེའི་ཐོབ་པ་ཆད་པའོ་ཞེས་བྱ་བ་ནི་འདོད་ཆགས་ཀྱི་ཐོབ་པ་ཆད་པའོ། །རྣམ་
གྲངས་གཞན་ཡང་ནི་ཇི་སྐད་བཤད་པའི་དོན་འདི་ཉིད་དོ། །དགའ་བ་སྔོན་དུ་སོང་བའི་འདོད་ཆགས་ཞེས་བྱ་བ་ནི་ཡིད་བདེ་བ་སྔོན་དུ་སོང་བའི་འདོད་ཆགས་སོ་ཞེས་བྱ་བའི་ཐ་ཚིག་གོ། །དེའི་ཕྱིར་ཞེས་བྱ་བ་རྒྱས་པར་འབྱུང་བ་ནི་འདི་ལྟར་དགའ་བ་སྔོན་དུ་སོང་བའི་འདོད་ཆགས་དང་། གཟུགས་ལ་སོགས་
པ་དག་ལ་འདོད་ཆགས་སྔོན་དུ་སོང་བའི་སེམས་རང་དབང་མེད་པར་འཇུག་པ་ཉིད་ཀྱི་འཆིང་བ་ཡོད་པས་དེའི་ཕྱིར་གོ་རིམས་བཞིན་དུ་དེའི་གཉེན་པོ་དགའ་བ་དང་། འདོད་ཆགས་དང་། འཆིང་བ་རྣམས་ཀྱི་གཉེན་པོ་ཡིད་འབྱུང་བ་ལ་སོགས་པ་རྣམས་ནི་ཡིད་འབྱུང་བ་དང་། འདོད་ཆགས་དང་བྲལ་བ་

དང་། རྣམ་པར་གྲོལ་བ་རྣམས་སོ། །ཡིད་འབྱུང་བ་དང་། འདོད་ཆགས་དང་བྲལ་བ་དང་། རྣམ་པར་གྲོལ་བ་རྣམས་དུས་ཐ་དད་པ་ཉིད་མ་ཡིན་པར་མི་མཐུན་པའི་ཕྱོགས་ཀྱི་གོ་རིམས་ཀྱི་བཤད་པ་ཡིན་ཏེ། དེ་ལ་ཡིད་བྱུང་བའི་མི་མཐུན་པའི་ཕྱོགས་ནི་དགའ་བ་ཡིན་ནོ། །འདོད་ཆགས་དང་བྲལ་བའི་
མི་མཐུན་པའི་ཕྱོགས་ནི་འདོད་ཆགས་ཡིན་ནོ། །རྣམ་པར་གྲོལ་བའི་མི་མཐུན་པའི་ཕྱོགས་ནི་འཆིང་བ་ཡིན་ནོ། །དེ་ལྟར་ན་མི་མཐུན་པའི་ཕྱོགས་ཀྱི་གོ་རིམས་ཀྱི་བཤད་པ་ཡིན་ནོ། །དཔེར་ན་མ་རིག་པ་འགགས་པས་འདུ་བྱེད་འགག་ཅེས་བྱ་བ་ལྟ་བུ་སྟེ། མ་རིག་པ་འགག་པ་ལ་སོགས་པ་ཡང་དུས་
ཐ་དད་པ་མ་ཡིན་པ་ཡང་གོ་རིམས་ཀྱི་བཤད་པ་ཡིན་ནོ། །གཞན་ཡང་ཞེས་བྱ་བ་ནི་རྣམ་གྲངས་གཞན་ཡང་བཅོམ་ལྡན་འདས་ཀྱིས་རྒྱས་པར་གསུངས་ནས། འདི་ལ་ཇི་ལྟར་དགེ་སློང་རྣམ་པ་གང་དག་དང་། རྟགས་གང་དག་དང་། མཚན་མ་གང་དག་གིས་སྡིག་པ་མི་དགེ་བའི་ཆོས་རྣམས་ལས་དབེན་
པ་རྟོག་པ་དང་བཅས་པ་དཔྱོད་པ་དང་བཅས་པ་དབེན་པ་ལས་སྐྱེས་པའི་དགའ་བ་དང་བདེ་བ་ཅན་གྱི་བསམ་གཏན་དང་པོ་རྫོགས་པར་བྱས་ཏེ་གནས་ལ། དེ་རྣམ་པ་དེ་དག་དང་། རྟགས་དེ་དག་དང་། མཚན་མ་དེ་དག་ཡིད་ལ་མི་བྱེད་ཅིང་། འོན་ཀྱང་དོན་ཡོད་པའི་གཟུགས་སུ་གཏོགས་པ་ནས། རྣམ་
པར་ཤེས་པར་གཏོགས་པའི་བར་གང་ཡིན་པ་ལ་དམིགས་པ་ཡིན་ཞེས་དེ་ལྟར་རྒྱས་པར་གསུངས་ནས། དེ་ཆོས་དེ་དག་ལ་ནད་ཉིད་དང་ཞེས་བྱ་བ་རྒྱས་པར་གསུངས་སོ། །འདིར་ནི་རྣམ་པར་བཤད་པ་འདི་ཇི་ལྟར་ན་སྟེ་རྣམ་པ་གང་གིས་ན་འཆི་བ་མེད་པའི་དབྱིངས་ལ་སེམས་ཉེ་བར་སྦྱོར་བ་ཞེས་གང་
གསུངས་པ་ཞེས་བྱ་བ་རྒྱ་ཆེར་འབྱུང་བའི་མྱ་ངན་ལས་འདས་པ་ཡིད་ལ་བྱེད་པ་ལས་འདོད་ཆགས་དང་བྲལ་བར་འགྱུར་བ་ལ། ཕྱིས་རྣམ་པར་གྲོལ་བར་འགྱུར་རོ་ཞེས་བྱ་བའི་བསམ་པ་བརྗོད་དགོས་སོ། །གལ་ཏེ་མྱ་ངན་ལས་འདས་པ་ཡིད་ལ་བྱེད་པ་ལས་འདོད་ཆགས་ཀྱི་ཐོབ་པ་ཆད་པ་ཡིན་ཏེ། དེ་ལྟར་
ན་སྔར་འདོད་ཆགས་དང་བྲལ་བར་གྱུར་པ་ཡིན་ལ། དེ་དང་མི་ལྡན་པར་གནས་གྱུར་པ་ནི་ཕྱིས་རྣམ་པར་གྲོལ་བར་འགྱུར་བ་ཡིན་ནོ་ཞེས་བྱ་བ་དེ་ལྟ་ན་ནི་སྔ་མ་དང་འདྲ་བ་ཉིད་ཀྱི་ཕྱིར་ཁྱད་པར་འགའ་ཡང་མེད་དོ། །འོན་ཏེ་མྱ་ངན་ལས་འདས་པ་ཡིད་ལ་བྱེད་པ་ཁོ་ནས་འདོད་ཆགས་དང་བྲལ་བར་འགྱུར་རོ་ཞེ་ན།

དེ་ལྟ་ན་ནི་ཐོབ་པ་ཡོད་བཞིན་དུ་ཇི་ལྟར་ན་འདོད་ཆགས་དང་བྲལ་བར་འགྱུར་ལ། ཇི་ལྟར་ན་ཕྱིས་རྣམ་པར་གྲོལ་བར་འགྱུར་རོ་ཞེས་བྱ་བའི་བསམ་པ་བརྗོད་དགོས་སོ། །རྒྱས་པར་གསུངས་ནས། སེམས་ཞེས་བྱ་བའམ། ཡིད་ཅེས་བྱ་བའམ། རྣམ་པར་ཤེས་པ་
ཞེས་བྱ་བ་ཡང་རུང་སྟེ། གང་འདི་སྐད་ཅེས་བྱ་བ་དེ་ནི་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པས་ཡུན་རིང་པོ་ནས་བྱི་དོར་བྱས་ཤིང་སྦས་ལ་བདག་གིར་བྱས་པ་དང་། འདི་ནི་བདག་གི་ཡིན། འདི་ནི་ང་བདག་ཡིན། འདི་ནི་བདག་གི་བདག་ཡིན་ནོ་ཞེས་བྱ་བ་ཁས་བླངས་ལ་གཟུང་བ་ཡིན་ནོ་ཞེས་
བྱ་བ་ནི་མདོ་སྡེའི་དུམ་བུ་ཡིན་ནོ། །ཅིའི་ཕྱིར་བྱི་དོར་བྱས་ཤིང་སྦས་པ་ཡིན་ཞེ་ན། བཤད་པ། འདི་ལྟར་དེ་བདག་གིར་བྱས་པས་སོ། །ཇི་ལྟར་དེ་བདག་གིར་བྱས་པ་ཡིན་ཞེ་ན། བཤད་པ་འདི་ལྟར་ཁས་བླང་བ་ལ་གཟུང་བས་སོ། །དེའི་རྗེས་སུ་འབྲང་བས་ཞེས་བྱ་བ་ནི་བདག་གི་བ་དང་།
བདག་གིར་རྣམ་པར་ལྟ་བ་གཉིས་ཀྱི་རྗེས་སུ་འབྲང་བ་ཞེས་བྱ་བའི་ཐ་ཚིག་གོ། །རྗེས་སུ་འབྲང་བ་ནི་རྗེས་སུ་འགྲོ་བའོ། །ཁས་བླངས་པ་ནི་ལྟ་བས་ཏེ། རྣམ་པ་གཉིས་ཀྱིས་ཁས་བླངས་པའི་ཕྱིར་རོ་ཞེས་གང་བསྟན་པའི་རྣམ་པ་གཉིས་པོ་དེ་ནི་འདི་ནི་བདག་གི་ཡིན་ཞེས་བྱ་བ་རྒྱས་པར་འབྱུང་
བའི་ཚིག་གསུམ་པོ་དག་གིས་སྦྱོར་བར་བྱེད་དོ། །རྣམ་པ་གཉིས་པོ་ཞེས་བྱ་བ་རྒྱས་པར་འབྱུང་བ་ནི་བདག་ཏུ་ལྟ་བ་རྣམ་པ་གཉིས་པོ་ལྷན་ཅིག་སྐྱེས་པ་དང་། ཀུན་དུ་བརྟགས་པ་དང་། གོ་རིམས་བཞིན་ནོ། །ཇི་ལྟ་ཞེ་ན། བདག་ཏུ་ལྟ་བ་ལྷན་ཅིག་སྐྱེས་པ་དང་ནི་འདི་ནི་ང་བདག་ཡིན་ཞེས་བྱ་བ་སྟེ། རི་དགས་
དང་བྱ་ལ་སོགས་པ་ཡང་ཡོད་པའོ། །ཀུན་དུ་བརྟགས་པ་དང་ནི་འདི་ནི་བདག་གི་བདག་ཡིན་ནོ་ཞེས་བྱ་བ་སྟེ། མུ་སྟེགས་ཅན་རྣམས་ལ་གང་ཡོད་པའོ། །ཁས་བླངས་པ་ནི་ཞེན་པ་ཞེས་བྱ་བའི་ཐ་ཚིག་གོ། །གཞན་ཡང་སྟེ། རྣམ་གྲངས་གཞན་ཡང་བདག་ཏུ་ལྟ་བ་རྣམ་པ་གཉིས་པོ་ཞེས་བྱ་བ་ནི་
གཞི་ཐ་མི་དད་པ་དང་། གཞི་ཐ་དད་པ་དང་། གོ་རིམས་བཞིན་ནོ། །དེ་ལ་བདག་ཏུ་ལྟ་བ་གཞི་ཐ་མི་དད་པ་ནི་གཞི་ཉེ་བར་ལེན་པའི་ཕུང་པོའི་མཚན་ཉིད་ལ་ཐ་མི་དད་པར་བཟུང་ནས་འདི་ནི་བདག་ཡིན་ནོ་སྙམ་པའོ། །འཇིག་ཚོགས་ལ་ལྟ་བ་གཞི་ཐ་དད་པ་དང་ནི་གཟུགས་ལ་སོགས་པ་དེ་རྣམས་ལས་གང་

ཡང་རུང་བ་ཞིག་བཟུང་ནས། འདི་ནི་བདག་གི་བདག་ཡིན་ནོ་སྙམ་པའོ། །དེའི་རྗེས་ལ་མཐུན་པའི་སྲེད་པ་གཉིས་པོ་ཞེས་བྱ་བ་ནི་བདག་གི་བའི་རྣམ་པའི་རྗེས་སུ་མཐུན་པའི་སྲེད་པ་དང་། བདག་ཏུ་ལྟ་བ་རྣམ་པ་གཉིས་ཀྱི་རྣམ་པའི་རྗེས་སུ་མཐུན་པའི་སྲེད་པ་སྟེ་གཟུང་བ་ཡིན་ནོ་ཞེས་བྱ་བའི་ཐ་ཚིག་
གོ། །དེའི་རྗེས་སུ་མཐུན་པའི་སྲེད་པ་ཡང་བདག་དང་། བདག་གི་བའི་རྣམ་པར་ལྟ་བའི་མཇུག་ཐོགས་སུ་དེར་ལྟ་བའི་རྗེས་སུ་འབྲང་བས་ཆགས་པ་གང་ཡིན་པའོ། །རྣམ་གྲངས་གཞན་ཡང་ངའོ་སྙམ་པའི་ང་རྒྱལ་དང་། བདག་ཏུ་ལྟ་བ་གཉིས་ཀྱིས་དང་ཞེས་བྱ་བ་རྒྱས་པར་འབྱུང་བ་ནི་ངའོ་སྙམ་པའི་
ང་རྒྱལ་གྱིས་ནི་འདི་ནི་བདག་ཡིན་ཞེས་བྱ་བའོ། །བདག་ཏུ་ལྟ་བས་ནི་འདི་ནི་བདག་གི་བདག་ཡིན་ནོ་ཞེས་བྱ་བ་དང་། འདི་ནི་བདག་གི་ཡིན་ཞེས་བྱ་བ་བདག་གི་བའི་རྣམ་པའི་རྣམ་གྲངས་དང་པོར་གསུངས་པ་སྟེ། དེ་མངོན་པར་ཁས་བླངས་པའི་ཕྱིར་ཁས་བླངས་པ་ཡིན་ནོ། །དེའི་རྗེས་སུ་མཐུན་
པའི་སྲེད་པ་གཉིས་ཀྱི་ནི་ངའོ་སྙམ་པའི་ང་རྒྱལ་གྱི་རྗེས་སུ་མཐུན་པ་དང་། བདག་ཏུ་ལྟ་བའི་རྗེས་སུ་མཐུན་པ་དང་། རྣམ་གྲངས་དང་པོ་བདག་གི་བའི་རྗེས་སུ་མཐུན་པ་སྟེ། དེ་ལ་ཆགས་པའི་ཕྱིར་གཟུང་བ་ཡིན་ནོ། །འདི་ཐམས་ཅད་ནི་ཞེས་བྱ་བ་རྒྱས་པར་འབྱུང་བ་ནི་འདི་ནི་བདག་གི་ཡིན་ཞེས་བྱ་བ་
ནས། ཁས་བླངས་ལ་བཟུང་བ་ཡིན་ནོ་ཞེས་བྱ་བའི་བར་ནི་བདག་གིར་བྱས་པ་ཞེས་བྱའོ། །ཅིའི་ཕྱིར་ཞེ་ན། དེའི་རྣམ་པ་དང་། དེའི་རྒྱུ་ཉིད་ཀྱིས་སོ། །དེའི་རྣམ་པ་ནི་བདག་གི་བའི་རྣམ་པ་སྟེ། འདི་ནི་བདག་གི་ཡིན་ཞེས་བྱ་བ་འདིས་སོ། །དེའི་རྒྱུ་ཉིད་ཀྱིས་ཀྱང་ཡིན་ཏེ། བདག་གི་བའི་རྣམ་
པའི་རྒྱུས་ཏེ། འདི་ནི་ང་བདག་ཡིན། འདི་ནི་བདག་ཡིན་ནོ་ཞེས་བྱ་བའི་ཚིག་འདི་གཉིས་ཀྱིས་སོ། །སྨྲས་པ། ཇི་ལྟར་ན་དེའི་རྒྱུ་ཉིད་ཀྱིས་ཏེ། འདི་གཉིས་ཀྱིས་དེ་བདག་གིར་བྱས་པ་ཡིན་ཞེ་ན། བདག་གི་རྣམ་པ་ཡོད་ན་བདག་གི་བའི་རྣམ་པ་ཡང་གདོན་མི་ཟ་བར་འབྱུང་བས་སོ། །མདོར་ན་
ཞེས་བྱ་བ་རྒྱས་པར་འབྱུང་བ་ནི་མདོར་ན་མདོ་སྡེའི་དུམ་བུ་འདིས་ནི་བྱིས་པ་རྣམས་ཀྱི་སོ་སོ་རྣམ་པར་ཤེས་པ་ལ་བདག་ཏུ་ལྟ་བ་ལོག་པར་བསྒྲུབ་པ་དང་། སྲེད་པ་ལོག་པར་བསྒྲུབ་པ་ལས་དང་བཅས་པ་ཡིན་པར་ཡོངས་སུ་བསྟན་པ་ཡིན་ནོ། །དེ་ལ་ལས་ནི་བྱི་དོར་བྱས་ཤིང་སྦས་པ་ཞེས་བྱ་བའི་ཚིག་

གཉིས་ཀྱིས་རིག་པར་བྱའོ། །བདག་ཏུ་ལྟ་བ་ལོག་པར་སྒྲུབ་པ་ཉིད་བཟུང་བ་ཞེས་བྱ་བའི་ཚིག་འདི་བོར་ཏེ། བདག་གིར་བྱས་པ་དང་། འདི་ནི་བདག་གི་ཡིན་ཞེས་བྱ་བ་ལ་སོགས་པ་ཚིག་ལྔ་དག་གིས་རིག་པར་བྱའོ། །སྲེད་པ་ལོག་པར་བསྒྲུབ་པ་ཡང་བཟུང་བ་ཞེས་
བྱ་བ་འདིས་རིག་པར་བྱའོ། །བདག་ཏུ་ལྟ་བ་ཉིད་ལོག་པར་བསྒྲུབ་པ་ཡིན་པས་བདག་ཏུ་ལྟ་བ་ལོག་པར་བསྒྲུབ་པ་ཡིན་ནོ། །དེ་བཞིན་དུ་སྲེད་པ་ཉིད་ལོག་པར་བསྒྲུབ་པ་ཡིན་པས་སྲེད་པ་ལོག་པར་བསྒྲུབ་པའོ། །རེ་ཞིག་རྣམ་གྲངས་དང་པོའི་བསྡུས་པའི་དོན་ནི་དེ་ལྟ་བུ་ཡིན་ནོ། །གཉིས་པའི་ནི་
བདག་ཏུ་ལྟ་བ་དང་། ང་རྒྱལ་དང་། སྲེད་པ་ལོག་པར་བསྒྲུབ་པ་ཡིན་པར་ཡོངས་སུ་བསྟན་པ་ཡིན་ནོ། །ཇི་ལྟར་བྱས་པས་ཤེ་ན། རེ་ཞིག་བདག་ཏུ་ལྟ་བ་ལོག་པར་བསྒྲུབ་པ་ལས་དང་བཅས་པར་ཡོངས་སུ་བསྟན་པ་ནི་སྔ་མ་བཞིན་དུ་བཟུང་བ་དང་། འདི་ནི་ང་བདག་ཡིན་ཞེས་བྱ་བའི་ཚིག་
འདི་གཉིས་བོར་ཏེའོ། །ང་རྒྱལ་ལོག་པར་བསྒྲུབ་པ་ལས་དང་བཅས་པ་ཡང་འདི་ནི་ང་བདག་ཡིན་ཞེས་བྱ་བའི་ཚིག་འདིས་སོ། །སྲེད་པ་ལོག་པར་བསྒྲུབ་པ་ལས་དང་བཅས་པ་ཡང་སྔ་མ་བཞིན་ནོ། །བཅོམ་ལྡན་འདས་ཀྱིས་དཔེར་ན་གྲོང་ངམ་གྲོང་རྡལ་དང་ཧ་ཅང་མི་རིང་བ་ཞིག་ན།
མདག་མ་མེ་ལྕེ་མེད་པ་དུ་བ་མེད་པའི་མདག་མས་གང་བའི་ཀླུང་ཞིག་ཡོད་ལ་དེ་ནས་མི་བྱིས་པའི་རང་བཞིན་ཅན་མ་ཡིན་པ། རྨོངས་པའི་རང་བཞིན་ཅན་མ་ཡིན་པ། ཤེས་རབ་ཀྱི་རང་བཞིན་ཅན་བདེ་བ་འདོད་པ། སྡུག་བསྔལ་ལ་མི་དགའ་བ། གསོན་པར་འདོད་པ། འཆི་བར་མི་འདོད་པ། འཆི་
བ་ལ་མི་དགའ་བ་ཞིག་འོངས་པ་དང་། དེ་འདི་སྙམ་དུ་མདག་མ་མེ་ལྕེ་མེད་པ་དུ་བ་མེད་པའི་མདག་མས་གང་བའི་ཀླུང་འདིར་བདག་ལྷུང་ན་བདག་འཆི་བའམ། འཆི་བ་ལ་ཐུག་པ་ཙམ་གྱིས་སྡུག་བསྔལ་བར་འགྱུར་རོ་སྙམ་དུ་བསམས་ནས། དེ་དེ་ལས་བསྲིང་བར་སེམས་པ་དང་། སྲིང་བ་སྔོན་དུ་
གཉེར་བར་བྱེད་ཅིང་། བསྲིང་བ་ལ་སོ་སོར་བརྟགས་ནས་སེམས་འཇོག་པར་བྱེད་དོ། །མདག་མའི་ཀླུང་དང་འདྲ་བར་འདོད་པ་རྣམས་ཀྱང་དེ་བཞིན་དུ་གསུངས་པ་ཞེས་བྱ་བ་ནི་མདོ་སྡེའི་དུམ་བུ་ཡིན་ནོ། །སོ་སོར་བརྟགས་ནས་སེམས་འཇོག་པ་ཞེས་བྱ་བ་ནི་ཤེས་རབ་ཀྱིས་དཔྱད་ནས་

སེམས་གཏོད་པ་ཞེས་བྱ་བའི་ཐ་ཚིག་གོ། །ཇི་ལྟར་དོན་དུ་གཉེར་བ་དང་ཡིད་ལ་བྱེད་པ་སྐྱེ་བ་དེ་ནི་ཡོན་ཏན་ཉིད་དུ་ཞེས་བྱ་བ་རྒྱས་པར་འབྱུང་བས་སྟོན་ཏོ། །དཔེར་ན་སྨན་རོ་ཞིམ་པའམ་ཚ་བ་ལ་བྱེད་པ་བཞིན་ནོ་ཞེས་བྱ་བ་ནི་སྨན་རོ་ཞིམ་པ་ལ་ནི་རང་གི་ངང་གིས་དོན་དུ་གཉེར་བར་བྱེད་ལ། ཚ་བ་ལ་ནི་སོ་སོར་
བརྟགས་ནས་དེ་ལ་སེམས་འཇོག་པར་བྱེད། གཏོད་པར་བྱེད་དོ། །དགེ་སློང་དག་དགེ་སློང་ཆོས་ཤེས་པ་ཡང་ཡིན་ནོ། །ཇི་ལྟ་བུ་ཡིན་ཞེ་ན། འདི་ལ་དགེ་སློང་གིས་ཆོས་ཤེས་པ་ནི་འདི་ལྟ་སྟེ། མདོའི་སྡེ་དང་། དབྱངས་ཀྱིས་བསྙད་པའི་སྡེ་དང་། ལུང་དུ་བསྟན་པའི་སྡེ་དང་། ཚིགས་སུ་བཅད་
པའི་སྡེ་དང་། ཆེད་དུ་བརྗོད་པའི་སྡེ་དང་། གླེང་གཞིའི་སྡེ་དང་། རྟོགས་པ་རྗོད་པའི་སྡེ་དང་། དེ་ལྟ་བུ་བྱུང་བའི་སྡེ་དང་། སྐྱེས་པའི་རབས་ཀྱི་སྡེ་དང་། ཤིན་ཏུ་རྒྱས་པའི་སྡེ་དང་། རྨད་དུ་བྱུང་བའི་ཆོས་ཀྱི་སྡེ་དང་། གཏན་ལ་བབ་པར་བསྟན་པའི་སྡེའོ་ཞེས་བྱ་བ་ནི་མདོ་སྡེའི་དུམ་བུ་ཡིན་ནོ། །དེའི་དོན་
མདོར་གླེང་བའི་དོན་གྱིས་ན་མདོའི་སྡེའོ་ཞེས་བྱ་བ་ནི་སངས་རྒྱས་ཀྱིས་སམ། ཉན་ཐོས་ཀྱིས་བཤད་པ་གང་ཡིན་པ་དེའི་དོན་རྣམ་པར་ཕྱེ་ཡང་རུང་། དོན་རྣམ་པར་མ་ཕྱེ་ཡང་རུང་སྟེ། ཕྱིའི་མཚན་ཉིད་དུ་མདོར་གླེང་བའི་དོན་གྱིས་ན་མདོའི་སྡེའོ། །མདོར་བསྟན་པ་དེ་ཉིད་ཚིགས་སུ་བཅད་པས་ཕྱིས་
དབྱངས་སུ་བསྙད་པ་ནི་དབྱངས་ཀྱིས་བསྙད་པའི་སྡེ་སྟེ་མདོ་སྡེ་དེ་ཉིད་ཚིགས་སུ་བཅད་པ་རྣམས་ཀྱི་དབྱངས་སུ་བསྙད་པ་ནི་དབྱངས་ཀྱིས་བསྙད་པའི་སྡེ་ཡིན་ཏེ། དཔེར་ན་ལེགས་སྐྱེས་ཀྱི་མདོ་ལས་རྒྱས་པར་གསུངས་ནས། ཀྱེ་མ་དགེ་སློང་དག་རིགས་ཀྱི་བུ་འདི་ནི་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་
བགོས་ནས་ཡང་དག་པར་དད་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་གང་ཡིན་པ་དང་། མཐོང་བའི་ཆོས་རྣམས་ལ་ཟག་པ་རྣམས་ཟད་ནས་ཟག་པ་མེད་པར་སེམས་རྣམ་པར་གྲོལ་བ་དང་། ཤེས་རབ་རྣམ་པར་གྲོལ་བ་རང་གི་མངོན་པར་ཤེས་པས་མངོན་དུ་བྱས་ཏ