Luận tạng Tây Tạng (Tengyur) — Tập 69

་གང་རྙེད་པའོ། །ཞེས་པའི་བར་དུའོ། །དེ་ལ་ཨེ་མའོ་ཞེས་པ་ནི་ངོ་མཚར་དུ་གྱུར་པའོ། །སངས་རྒྱས་ཀུན་གྱི་ནི་ཤེས་
རབ་དང་ཐབས་རྣམས་བསམ་གྱིས་མི་ཁྱབ་པ་ཞེས་པ་དང་སྦྱར་ཏེ་ཤེས་རབ་ནི་ཆོས་ཐམས་ཅད་བདག་མེད་པར་ཆུད་པའི་རང་བཞིན་ནོ། །ཐབས་དེ་ནི་དེ་ལྟར་ཆོས་ཐམས་ཅད་སྟོང་པར་ཆུད་ཀྱང་སེམས་ཅན་གྱི་དོན་དུ་དངོས་པོ་རྣམ་པ་སྣ་ཚོགས་ཡོད་པར་སྟོན་ཏེ། དེ་དག་ངོ་མཚར་ཆེ་སྟེ་བསམ་གྱིས་
མི་ཁྱབ་ཅེས་པའོ། །ཚིག་དེ་དག་གྲོལ་བར་གསུངས་པ། གནས་མེད་པ་རུ་ཤེས་ནས་སུ། །གནས་དང་བཅས་པའི་ཆོས་རྣམས་འཆད། །ཅེས་པ་སྟེ་གནས་མེད་པར་ནི་ཤེས་ནས་ཞེས་པ་ནི་ཤེས་རབ་ཀྱིས་ཆོས་ཐམས་ཅད་གཟུང་བ་དང་འཛིན་པའི་གནས་མེད་དེ་སྟོང་པ་ཉིད་དུ་ཤེས་ཞེས་
པའོ། །གནས་དང་བཅས་པའི་ཆོས་རྣམས་འཆད། །ཅེས་པ་ནི་དེ་ལྟར་ཤེས་རབ་ཀྱིས་ཆོས་ཐམས་ཅད་དངོས་པོ་མེད་པར་ཆུད་ཀྱང་ཐབས་ཀྱིས་སེམས་ཅན་རྣམས་ལ་ཕན་གདགས་པའི་ཕྱིར་གཟུང་བ་དང་འཛིན་པའི་གནས་ལ་སོགས་པའི་ཆོས་རྣམས་དངོས་པོ་ཡོད་པར་སྣང་བ་དངོས་སུ་སྟོན་
ཞེས་པའོ། །མི་ཤེས་པ་ནི་གང་ཤེས་པ། །ཆོས་རྣམས་ཆོས་ཀྱི་མཚན་ཉིད་དེ། །ཞེས་པ་ནི་ཕུང་པོ་དང་ཁམས་དང་སྐྱེ་མཆེད་ལ་སོགས་པའི་ཆོས་ཀྱི་མཚན་ཉིད་གང་གིས་མི་དམིགས་པར་ཤེས་ཞེས་པའོ། །དེས་ནི་རྙེད་པ་འཐོབ་འགྱུར་བ། །མགོན་པོ་ཀུན་གྱིས་གང་རྙེད་པ། །ཞེས་
པའོ། །དེ་ལྟར་ཆོས་རྣམས་དམིགས་སུ་མེད་པར་གང་གིས་ཆུད་པ་དེ་མགོན་པོ་སངས་རྒྱས་བཅོམ་ལྡན་འདས་ཀྱིས་འཐོབ་པ་སངས་རྒྱས་ཀྱི་འབྲས་བུ་ཐོབ་པར་འགྱུར་ཞེས་པ་སྟེ། མདོར་ན་ཆོས་རྣམས་སྟོང་པ་ཉིད་དུ་ཆུད་པ་དེ་སངས་རྒྱས་པར་འགྱུར་རོ་ཞེས་བསྟན་པའོ། །གླེང་བའི་ཚིག་
དེ་སྐད་ཅེས་སྨྲས་ནས། སྐུ་དེ་དག་སླར་དེ་བཞིན་གཤེགས་པའི་ཆོས་ཀྱི་སྐུ་བསམ་གྱིས་མི་ཁྱབ་པ་ལ་བཞུགས་སོ་ཞེས་པ་ནི་དེ་དག་ཆོས་ཀྱི་དབྱིངས་སྟོང་པ་ཉིད་ཀྱི་རང་བཞིན་དུ་འགྱུར་ཏེ་མི་སྣང་བར་འགྱུར་བའོ། །དེ་ལྟར་གསང་བའི་དཀྱིལ་འཁོར་བྲི་བའི་ཐབས་བཅོམ་ལྡན་འདས་ཀྱིས་

སྔར་བསྟན་ནས། ད་ནི་གསང་བའི་དཀྱིལ་འཁོར་ཉིད་བྲི་བའི་ཐབས་བཤད་དེ། དེ་ཡང་དེ་ནས་བཅོམ་ལྡན་འདས་ཀྱིས་ཕྱག་ན་རྡོ་རྗེ་བྱང་ཆུབ་སེམས་དཔའ་ལ་བཀའ་སྩལ་པ། རིགས་ཀྱི་བུ་ནང་གི་དཀྱིལ་འཁོར་དེ་ཉོན་ཅིག་ཅེས་པ་ལ་སོགས་ཏེ་འདིར་ཡང་སློབ་མ་ལྷག་པར་གནས་པ་
དེ་ཉིད་ཀྱི་ནུབ་མོ་བྱ་བ་ཤེས་པར་བྱའོ། །དེའི་རིམ་པ་ཡང་དེ་ལ་ཐོག་མར་སློབ་དཔོན་གྱིས་མཆོད་པའི་ཡོ་བྱད་འདི་དག་ལ་སོགས་པ་ཉིད་གཞུང་ལས་འབྱུང་བ་བཞིན་དུ་སྟ་གོན་བྱས་ནས་སློབ་མ་རྣམས་ཀྱང་བསོགས་ཏེ། ཕྱི་རོལ་དུ་བཀོད་ལ་དེ་ནས་སློབ་དཔོན་དེ་དཀྱིལ་འཁོར་གྱི་གནས་སུ་ཞུགས་ཏེ།
སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ནས་དམ་ཚིག་གི་ཕྱག་རྒྱ་བཅིངས་ཏེ། མདུན་དུ་རང་བཞིན་གྱི་དཀྱིལ་འཁོར་སྙིང་རྗེ་ཆེན་པོའི་དཀྱིལ་འཁོར་དུ་བསྟན་པ་རང་བཞིན་དུ་སོ་སོའི་སྔགས་འབྲུ་རེའམ་སྤྱིའི་སྙིང་པོ་དེར་བསམས་ཏེ། དེ་ནས་བདག་ཉིད་ཆོས་
དབྱིངས་ཀྱི་ཕྱག་རྒྱ་དང་སྔགས་ཀྱིས་བྱིན་གྱིས་བརླབ་པ་དང་ཆོས་ཀྱི་འཁོར་ལོ་བསྐོར་བའི་སྔགས་དང་ཕྱག་རྒྱས་རྡོ་རྗེ་སེམས་དཔར་བྱིན་གྱིས་བརླབ་པ་དང་། རྡོ་རྗེ་གོ་ཆའི་ཕྱག་རྒྱ་དང་སྔགས་ཀྱིས་བསྲུང་བར་བྱ་སྟེ། དེ་ནས་ལས་ཀྱི་རྡོ་རྗེར་བསྒྱུར་ཏེ་དེ་རྣམས་ལ་དམ་ཚིག་གི་ཕྱག་རྒྱ་བསྟན་ཏོ། །
ཡོན་ཆབ་དབུལ་བ་དང་དྲི་དང་མེ་ཏོག་ལ་སོགས་པའི་མཆོད་པ་རྣམས་སོ་སོའི་སྔགས་ཀྱིས་བཏབ་སྟེ་དབུལ་བ་དང་ཡིད་ཀྱི་མཆོད་པ་ཡང་བྱའོ། །དེ་ལྟར་ཕྱི་ནང་གི་མཆོད་པ་ལ་སོགས་པ་བྱས་ནས་སློབ་དཔོན་དེའི་ཕྱིར་བྱུང་ལ་སློབ་མ་རྣམས་ལ་དྲི་དང་མེ་ཏོག་བྱིན་ཏེ། ལས་ཐམས་ཅད་པའི་
སྔགས་ཀྱིས་བསྲུང་བར་བྱ་བ་དང་ལས་ཐམས་ཅད་པའི་སྔགས་ཀྱིས་བཏབ་པའི་སྐུད་པ་དཔུང་པར་བཅིང་བ་དང་སོ་ཤིང་སྦྱིན་པ་རྣམས་བྱས་ཏེ། དེ་ནས་སྡིག་པ་བཤགས་པ་དང་། ལུས་དབུལ་བ་དང་། སྡོམ་པ་འཛིན་དུ་གཞུག་སྟེ། དེ་དག་ནི་ལྷག་པར་གནས་པའི་ཆོ་གའོ། །དཀྱིལ་
འཁོར་དུ་གཞུག་པའི་ཆོ་ག་ཡང་གྲོགས་པོ་བསྒྲུབ་པའི་ཕྱི་མ་ཡོད་ན་ཡང་དེས་རིམ་བཞིན་དུ་བྱ་སྟེ། མེད་ན་སློབ་དཔོན་གྱིས་དེ་ཉིད་དུ་སློབ་མ་དམ་ཚིག་གི་ཕྱག་རྒྱ་འཆིང་དུ་གཞུག་པ་དང་ཆོས་ཀྱི་དབྱིངས་ཀྱི་ཕྱག་རྒྱ་དང་སྔགས་ཀྱིས་བྱིན་གྱིས་བརླབ་པ་དང་། ཆོས་ཀྱི་འཁོར་ལོའི་ཕྱག་

རྒྱ་དང་སྔགས་ཀྱིས་བྱིན་གྱིས་བརླབ་པ་དང་། བྱང་ཆུབ་ཏུ་སེམས་བསྐྱེད་པ་ལ་སོགས་པ་རིམ་བཞིན་དུ་བྱ་སྟེ། དེ་ནས་སློབ་དཔོན་དེས་སླར་མཆོད་པའི་གནས་སུ་ཞུགས་ཏེ། སེམས་མཉམ་པར་གཞག་ལ་སྙིང་གར་ཟླ་བའི་དཀྱིལ་འཁོར་གྱི་སྟེང་དུ། ཡི་གེ་ར་ཁ་དོག་
དཀར་པོ་ཡིད་ཙམ་དམར་བ་བསམས་ཏེ། ཡི་གེ་དེའི་སྒྲའི་ཁ་དེ་ཁོ་ན་ཉིད་ཆོས་ཐམས་ཅད་རྡུལ་དང་བྲལ་བ་བསྒོམ་པ་ནི། བདག་གི་ལུས་ཉིད་རྡུལ་ལ་སོགས་པའི་ཚུལ་དུ་བཤིགས་ཏེ། རྡུལ་ཕྲན་དེ་ཡང་ཕྱོགས་དང་ཆ་ཕྲལ་ན་དམིགས་སུ་མེད། དེ་བཞིན་དུ་རྣམ་པར་ཤེས་པ་ལ་སོགས་པ་
དངོས་པོ་མེད་པར་བསྒོམས་ཏེ། ཟླ་བའི་དཀྱིལ་འཁོར་དང་ཡི་གེ་ར་ཡང་སྟོང་པར་བསམས་ཏེ་ཐ་མར་སྒྲའི་དེ་ཁོ་ན་ཉིད་དེ་ཡང་དམིགས་སུ་མེད་པར་བསྒོམས་ཏེ་སྟོང་པ་ཉིད་དུ་ཇི་སྲིད་འདོད་པར་གནས་ཏེ། དེའི་འོག་ཏུ་ཐོག་མར་རླུང་གི་དཀྱིལ་འཁོར་དེ་ནས་ཆུའི་དཀྱིལ་འཁོར་དེ་ནས་གསེར་གྱི་
དཀྱིལ་འཁོར་བསམས་ཏེ། གསེར་གྱི་དཀྱིལ་འཁོར་དེའི་སྟེང་དུ་བདག་གི་ལུས་ལྟེ་བ་མན་ཆད་ཀྱང་གསེར་གྱི་དཀྱིལ་འཁོར་གྲུ་བཞི་པར་བསམས་ཏེ། དེའི་སྟེང་དུ་པདྨོ་རྩ་བ་དང་བཅས་པ་སྙིང་གའི་བར་དུ་ཕྱིན་པར་བསམས་ཏེ། དེའི་དབུས་ན་བཅོམ་ལྡན་འདས་རྣམ་པར་སྣང་མཛད་བཞུགས་
ཏེ། དེའི་ཤར་ཕྱོགས་ཀྱི་པདྨོའི་འདབ་མ་ལ་རིན་པོ་ཆེ་དཔལ་དེ་བཞིན་གཤེགས་པ། ལྷོ་ཕྱོགས་ཀྱི་འདབ་མ་ལ་ཀུན་དུ་རྒྱས་པའི་དབང་པོ་ཞེས་བྱ་བ་དེ་བཞིན་གཤེགས་པ། ནུབ་ཕྱོགས་ཀྱི་འདབ་མ་ལ་སྣང་བ་མཐའ་ཡས་དེ་བཞིན་གཤེགས་པ། བྱང་ཕྱོགས་ཀྱི་འདབ་མ་ལ་རྔ་དབྱངས་དེ་བཞིན་གཤེགས་པ་
བསམ་མོ། །ཤར་ལྷོའི་འདབ་མ་ལ་ཀུན་དུ་བཟང་པོ་བྱང་ཆུབ་སེམས་དཔའ། བྱང་ཤར་གྱི་འདབ་མ་ལ་སྤྱན་རས་གཟིགས་ཀྱི་དབང་པོ། ལྷོ་ནུབ་ཀྱི་འདབ་མ་ལ་འཇམ་དཔལ་གཞོན་ནུར་གྱུར་པ། ནུབ་བྱང་གི་འདབ་མ་ལ་བྱམས་པ་བྱང་ཆུབ་སེམས་དཔའ་བསམས་ཏེ། བཅོམ་ལྡན་
འདས་རྣམ་པར་སྣང་མཛད་ལ་སོགས་པ་བྱང་ཆུབ་སེམས་དཔའ་དེ་རྣམས་ཀྱང་མེ་ཏོག་དོར་བ་ལ་བདེ་བའི་ཕྱིར། དེ་རྣམས་ཀུན་གྱི་སྐུ་བདག་གི། །ཀླད་པའི་བར་དུ་ཕྱིན་པར་བསམ། །པདྨོའི་གེ་སར་ཀུན་ལ་ནི་བྱང་ཆུབ་སེམས་དཔའ་རྣམས་ཀྱི་ཡུམ་རྣམས་དང་། ས་བཅུ་དང་ཕ་རོལ་ཏུ་ཕྱིན་པ་དྲུག་

དང་ཏིང་ངེ་འཛིན་རྣམས་ལྷ་མོའི་གཟུགས་སུ་བསམ་མོ། །པདྨོའི་རྩ་བ་ལ་ཕྱག་ན་རྡོ་རྗེ་བྱང་ཆུབ་སེམས་དཔའ་བསམ་མོ། །དེའི་དྲུང་གཡས་གཡོན་དུ་སྤྱན་རས་གཟིགས་ཀྱི་དབང་པོ་འཁོར་རྣམས་དང་། ཕྱག་ན་རྡོ་རྗེའི་རིག་པ་ཁྲོ་བོ་རྣམས་དང་། སྐྱོང་བ་དང་ཁྲོ་གཉེར་ལ་སོགས་པ་རིམ་བཞིན་
དུ་བསམ་མོ། །དེའི་ཕྱི་རིམ་དུ་ལྷ་དང་ཀླུ་ལ་སོགས་པ་མང་པོ་བསམས་ཏེ། དེ་ལྟར་བརྟན་པར་བྱས་ནས་ཡིད་ཀྱིས་མཆོད་པ་ཚུལ་བཞིན་དུ་བྱའོ། །དེ་ནས་དེ་དག་ཀུན་ཟིན་པ་དང་སེ་གོལ་བརྡབ་པར་བྱ་སྟེ། སློབ་མ་རྣམས་མགོན་པོ་ལ་མེ་ཏོག་འདོར་དུ་གཞུག་གོ། །མེ་ཏོག་དེ་དག་ཀྱང་ཡིད་ལ་
བསམས་པའི་ལྷ་གང་གི་སྟེང་དུ་བབ་པ་དེ་སློབ་མ་དེ་ལ་སྦྱིན་པར་བྱའོ། །དེ་དག་ནི་བསྡུ་བའི་དོན་དུ་ཚིག་གི་དོན་ལ་གསང་བའི་བདག་པོ་དེ་ནི་རང་བཞིན་གྱིས་རྣམ་པར་དག་པའི་ཕྱིར་ལུས་ཀྱིས་གང་བ་དེ་ཆོས་ཀྱི་དབྱིངས་ཀྱི་ངོ་བོ་ཉིད་ཀྱི་སྔགས་དང་ཕྱག་རྒྱའི་བྱིན་གྱི་རླབས་ཀྱིས་བྱིན་གྱིས་རློབས་ཤིག་
ཅེས་པ་ནི་མཆོད་པ་ལ་སོགས་པ་སྔར་སྨོས་པའི་རིམ་བཞིན་དུ་བྱས་ནས། བདག་གི་ལུས་ལ་ཆོས་ཀྱི་དབྱིངས་ཀྱི་ཕྱག་རྒྱ་དང་སྔགས་ཀྱིས་བྱིན་གྱིས་བརླབས་པ་སྟོང་པ་ཉིད་དུ་བྱོས་ཤིག་ཅེས་པའོ། །དེ་ནས་བདག་ལས་ཀྱི་ལྷ་རྡོ་རྗེ་སེམས་དཔར་བྱིན་གྱིས་བརླབས་ལ་ཞེས་པ་ནི། སྔ་མའི་རིམ་བཞིན་
དུ་ཆོས་ཀྱི་འཁོར་ལོའི་ཕྱག་རྒྱས་བྱིན་གྱིས་བརླབ་པ་དག་བྱས་ནས་ལས་ཀྱི་རྡོ་རྗེ་སེམས་དཔར་བསྒྱུར་ཏེ། མཆོད་པ་དང་སློབ་མའི་ཆོ་ག་བྱ་བ་ལ་སོགས་པ་ཐམས་ཅད་གོང་དུ་སྨོས་པའི་རིམ་བཞིན་དུ་བྱའོ། །རྡུལ་དང་ཞེས་པ་ནི་དེ་ནས་སླར་བདག་ནང་དུ་ཞུགས་ནས་ཡི་གེ་ར་སྙིང་གར་བསམས་ཏེ།
ཆོས་ཐམས་ཅད་རྡུལ་དང་བྲལ་བའི་བར་བསྒོམ་པའི་རིམ་པ་སྔ་མ་བཞིན་དུ་བྱའོ། །བདག་དང་སེམས་ཅན་དང་སྲོག་དང་འགྲོ་བ་དང་ཤེད་ལས་སྐྱེས་དང་ཤེད་ཅན་དང་། བྱེད་པ་པོ་ལ་སོགས་པའི་ཉེས་པ་དང་། ཟུག་རྔུར་བྲལ་ཞེས་པ་ནི་མུ་སྟེགས་གཞན་རྣམས་ཀྱི་བདག་ལ་སོགས་པའི་
དངོས་པོ་དེ་རྣམས་ཀྱང་དམིགས་སུ་མེད་པར་སྒོམ་ཞེས་པ་སྟེ། དེ་དག་ནི་ཇི་ལྟར་ཕྱི་རོལ་གྱི་དཀྱིལ་འཁོར་གྱིས་སྦྱང་བ་རྡོ་ཤིང་ལ་སོགས་པའི་ཟུག་རྔུ་དང་ཉེས་པ་བསལ་བ་བཞིན་དུ་གང་གིས་སྦྱང་བ་ཡང་ཐབས་ཇི་ལྟར་སྦྱང་ངོ་ཞེས་བཤད་པའོ། །གྲུ་བཞི་སྒོ་བཞི་ལས་ནུབ་ཕྱོགས་ཀྱི་སྒོ་རྟག་

པར་ཕྱེ་བ་སྒོ་ཁྱུད་དང་སྟེགས་བུ་རབ་ཏུ་བརྒྱན་པ་ཞེས་པ་དེ་ནི་དེ་ལྟར་སྟོང་པ་ཉིད་ལ་སོགས་པའི་ཏིང་ངེ་འཛིན་བྱས་ལ། དེ་ནས་རླུང་དང་ཆུའི་དཀྱིལ་འཁོར་ལ་སོགས་པ་སྔ་མ་བཞིན་དུ་བསམས་ཏེ། དེའི་སྟེང་དུ་དབང་ཆེན་གྱི་དཀྱིལ་འཁོར་གྱི་སྟེང་དུ་བདག་གི་རྐེད་པ་མན་ཆད་འགྱུར་
བར་བསམས་ཏེ། སྟེགས་བུ་ཞེས་པ་ནི་དབུས་ཀྱི་གཞིའི་གདན་དེ་ཉིད་ལ་བྱ་སྟེ་དེ་ཡང་གསེར་གྱི་ཁ་དོག་ཏུ་བསམ་མོ། །དབུས་ན་ཡིད་བཞིན་གྱི་པདྨོའི་རྒྱལ་པོ་ཆེན་པོ་དང་། གེ་སར་རྒྱས་པ་དང་བཅས་ཤིང་ཤིན་ཏུ་རྣམ་པར་བརྒྱན་པ་ཡིད་ཀྱིས་ཞེས་པ་ནི་ཡིད་ལས་བྱུང་བའི་པདྨོ་ཞེས་པ་སྟེ་
སྔར་བཤད་ཟིན་ཏོ། །ཤིན་ཏུ་རྣམ་པར་བརྒྱན་པའི་ཡིད་ལ་ཞེས་པ་ནི། འདབ་མ་བརྒྱད་ལ་སངས་རྒྱས་བཞི་དང་བྱང་ཆུབ་སེམས་དཔའ་བཞི་རྣམས་ཀྱི་ཁ་དོག་ཅི་འདྲ་བ་དང་མཐུན་པར་ཁ་དོག་སྣ་ཚོགས་སུ་བྱ་བ་སྟེ། རིན་ཆེན་རྒྱལ་མཚན་གྱི་ཁ་དོག་དཀར་པོ། ཀུན་དུ་རྒྱས་པའི་རྒྱལ་
པོའི་ཁ་དོག་སེར་པོ། རྔ་དབྱངས་ཀྱི་ཁ་དོག་སྨུག་ནག །སྣང་བ་མཐའ་ཡས་ཀྱི་ཁ་དོག་དམར་པོ། དེ་བཞིན་དུ་ཀུན་དུ་བཟང་པོ་ནི་སེར་པོ། སྤྱན་རས་གཟིགས་ཀྱི་དབང་པོ་ནི་དཀར་པོ། འཇམ་དཔལ་གཞོན་ནུར་གྱུར་པ་ནི་སེར་པོ། བྱམས་པ་ནི་དམར་པོ་བྱའོ། །ཡང་ན་ཐམས་ཅད་ཀྱང་ཁ་
དོག་ཐམས་ཅད་དོ་ཞེས་པ་དང་སྦྱར་ཏེ་ཆད་པ་མེད་པར་ཤེས་པར་བྱའོ། །དེའི་དབུས་སུ་ཡང་ལུས་དང་ངག་ཡིད་འཇིག་རྟེན་ཐམས་ཅད་ལས་འདས་པའི་དེ་བཞིན་གཤེགས་པའི་སྐུ་ཞེས་པ་ནི། བཅོམ་ལྡན་འདས་རྣམ་པར་སྣང་མཛད་ཀྱི་སྐུ་པདྨོའི་དབུས་སུ་བསམ་པ་སྟེ་མཆོག་ཏུ་བཟང་བ་འཇིག་
རྟེན་ཐམས་ཅད་ལས་འདས་པ་ཞེས་པའོ། །སེམས་ཀྱི་ས་ལས་འདས་ཞེས་པ་ནི་གཟུང་བ་དང་འཛིན་པའི་ཆ་སེམས་ཀྱི་ཡུལ་སྤངས་པ་ཞེས་པའོ། །སེམས་ཀྱིས་ཤིན་ཏུ་ཐོབ་ཅེས་པ་ནི་སྟོང་པ་ཉིད་ཀྱི་མཚན་ཉིད་དེ་སོ་སོར་རང་གིས་རིག་པ་ཐོབ་པ་ཞེས་པ་སྟེ། དེས་ནི་རང་གི་དོན་ཕུན་སུམ་ཚོགས་
པ་བསྟན་པའོ། །འབྲས་བུ་དམ་པ་ཡིད་དུ་འོང་བ་སྦྱིན་པ་ཞེས་པ་ནི་ཕ་རོལ་གྱི་དོན་ཕུན་སུམ་ཚོགས་པ་བསྟན་པ་སྟེ་སེམས་ཅན་རྣམས་ལ་མཐོ་རིས་དང་མྱ་ངན་ལས་འདས་པའི་འབྲས་བུ་རྣམས་སྦྱིན་ཞེས་པའོ། །དེའི་ཤར་དུ་ཞེས་པ་ནི་དེའི་དྲུང་དུ་རིག་པ་དང་། ཁྲོ་བོ་རྣམས་ཞེས་པའི་བར་དུ་

སངས་རྒྱས་དང་བྱང་ཆུབ་སེམས་དཔའ་རྣམས་པདྨོའི་འདབ་མ་དང་གེ་སར་དག་ལ་བསམ་པ་སྔར་སྨོས་པའི་རིམ་བཞིན་དུ་བྱའོ། །གཞན་ནི་མཚོ་ཆེན་པོར་ཞེས་པའི་བར་དུ་དཀྱིལ་འཁོར་དེའི་འོག་ཏུ་ཆུའི་དཀྱིལ་འཁོར་རྒྱ་མཚོ་བསམ་ཞེས་པའོ། །མར་མེ་དང་། དྲི་དང་། མེ་ཏོག་
དང་། བཤོས་དང་བདུག་པ་ཡིད་དུ་འོང་བ་རྣམས་སྔགས་པས་ཀུན་བསམ་ཞེས་པ་ནི། ཡིད་ཀྱིས་དྲི་དང་མེ་ཏོག་ལ་སོགས་པ་དེ་དག་ཐམས་ཅད་སྔགས་པས་བསམ་ཞེས་པའོ། །སེམས་ཅན་ཀུན་གྱི་དམ་ཚིག་ཕྱིར། །ཞེས་པ་ནི་དཀྱིལ་འཁོར་དེ་སེམས་ཅན་རྣམས་དམ་ཚིག་ལ་
ཞུགས་པའི་ཕྱིར། གཟུགས་བརྙན་གྱི་དཀྱིལ་འཁོར་རྣམས་རྫོགས་པ་རྒྱས་པར་བྲི་མི་ནུས་ཤིང་ཟབ་ཅིང་རྒྱ་ཆེ་བ་ལ་མོས་པས་དཀྱིལ་འཁོར་འདི་བྱ་ཞེས་པའོ། །དྲུང་གི་ས་གཞི་ཀུན་དུ་ནི། །ལྷ་རྣམས་གྲངས་མེད་པ་ཡང་ནི། །སྔགས་མཁན་གྱིས་ནི་ནན་ཏན་བྲི། །དཀྱིལ་འཁོར་མཐུ་
ཆེན་འདི་རུ་སྟེ། །ཞེས་པ་ནི་བཅོམ་ལྡན་འདས་མཐུ་ཆེན་པོ་དཀྱིལ་འཁོར་འདིའི་དབུས་ཀྱི་སྟེགས་བུའི་འོག་ཕྱི་རིམ་གྱི་ས་གཞི་ཐམས་ཅད་དུ་ལྷ་དང་ཀླུ་ལ་སོགས་པ་གྲངས་མེད་པ་བྲི་ཞེས་པའོ། །རང་ལུས་རང་གིས་བྱ་བ་ནི། །རས་ཀྱི་རྣམ་པ་སྦྱངས་ནས་སུ། །སྔགས་པ་སྦྱར་སྟན་དེར་འདུག་
ནས། །དེ་བཞིན་གཤེགས་རྣམས་རྗེས་མོས་པས། །ཞེས་པ་ནི་སྦྱོར་བ་དེ་རྣམས་བྱ་བ་ཡང་བདག་ཉིད་ཡི་གེ་རྃ་སྙིང་པོ་ཉིད་དུ་སྦྱང་བ་ལ་སོགས་པ་གོང་དུ་སྨོས་པའི་ཚུལ་བཞིན་དུ་བྱས་ནས་གདོད་ལས་ནི་འདི་རྣམས་བྱ་ཞེས་པའོ། །སློབ་མ་རྣམས་ཀྱི་སྤྱི་བོ་རུ། །ཨ་ནི་འཁོར་དང་བཅས་ཏེ་
གཞག །ཅེས་པ་ནི་སློབ་མ་དཀྱིལ་འཁོར་དུ་འཇུག་པའི་ཚེ་ཆོས་ཀྱི་དབྱིངས་སུ་བྱིན་གྱིས་བརླབ་པ་ལ་སོགས་པ་བྱས་ནས་དེ་དག་བརྟན་པར་བྱ་བའི་ཕྱིར། ཀུན་དུ་སངས་རྒྱས་པའི་སྙིང་པོ་ཨྃ་སྤྱི་བོར་བསམ་ཞེས་པའོ། །དེ་ནས་མེ་ཏོག་འདོར་དུ་གཞུག །ཅེས་པ་ནས། རིག་པ་ཡང་ནི་
དེ་ལ་བྱིན། །ཞེས་པའི་བར་དུ་སློབ་མ་རྣམས་བདག་གི་ལུས་ལ་མེ་ཏོག་བོར་ནས་གང་ལ་བབ་པའི་རིག་པ་དེ་སྦྱིན་པའོ། །དེ་ལ་བསྒོམ་པར་ཞེས་པའི་དཀྱིལ་འཁོར་བར་ཞེས་པ་ནི་དཀྱིལ་འཁོར་གྱི་ཚུལ་རྣམས་སློབ་མ་ལ་བསྟན་པའོ། །འདི་ནི་དཀྱིལ་འཁོར་དམ་པ་སྟེ། །ཞེས་པ་ནི་

སྟོང་པ་ཉིད་ཀྱི་ཏིང་ངེ་འཛིན་བསྒོམས་པ་ལས་བྱུང་བའི་ཕ་རོལ་གྱི་མཚན་མ་རྣམས་ལ་མི་རྟོག་པས་དམ་པ་ཞེས་པའོ། །ལུས་ཅན་རྣམས་ཀྱི་དམ་ཚིག་ཕྱི་རུ་གསུངས། །ཞེས་པ་ནི་དཀྱིལ་འཁོར་འདི་དམ་ཚིག་ཅན་དུ་བྱ་བའི་ཕྱིར་རོ་ཞེས་པ་སྔར་བཤད་པ་བཞིན་ནོ། །གསང་བའི་
དཀྱིལ་འཁོར་དུ་འཇུག་པའི་ཐབས་ཞེས་པ་ནི་མགོ་ནན་གོང་མའི་ནང་དུ་བཤད་ཟིན་ཏོ།། །།ད་ནི་རིག་པའི་དཀའ་ཐུབ་ཀྱི་ལེའུ་འཆད་དེ། རིག་པ་ཞེས་བྱ་བ་ནི་ཡང་དག་པ་ཉིད་དོན་ཇི་ལྟ་བ་བཞིན་པ་ཉིད་རིག་པས་ན་དེ་བཞིན་ཉིད་ཀྱི་ཡེ་ཤེས་དང་། དེ་ལས་བྱུང་བའི་སྔགས་དང་ཕྱག་
རྒྱ་ལ་ཡང་བྱ་སྟེ། དེའི་དཀའ་ཐུབ་ནི་དེ་དང་རྗེས་སུ་མཐུན་པར་སྤྱོད་པ་སྟེ། ཇི་ལྟར་བཅོམ་ལྡན་འདས་ཤཱཀྱ་ཐུབ་པ་དང་རྗེས་སུ་མཐུན་པའི་སྤྱོད་པ་སྐྲ་དང་ཁ་སྤུ་བྲེགས་པ་དང་ཆོས་གོས་བགོ་བ་ལ་སོགས་པ་དགེ་སློང་གི་གཟུགས་སུ་སྤྱོད་པ་དང་། འཇིག་རྟེན་པ་རྣམས་ཀྱི་ཡང་ལྷ་ཆེན་པོ་ལ་
དད་པ་ལ་སོགས་པ་ཉིད་ཀྱི་སྤྱོད་པ་དང་། ཚུལ་འཇིག་རྟེན་དུ་རིག་པའི་བརྟུལ་ཞུགས་འདི་ཡང་བདག་ཉིད་ཀྱི་ལྷའི་གཟུགས་ཅི་འདྲ་བ་དང་། རྗེས་སུ་མཐུན་པར་སྤྱོད་པ་དང་ཏིང་ངེ་འཛིན་སྟོང་པ་ཉིད་ཀྱི་རང་བཞིན་དང་རྗེས་སུ་མཐུན་པར་སྤྱོད་པ་དང་། ཏིང་ངེ་འཛིན་ལས་ལངས་ནས་ཀྱང་ཆོས་
ཐམས་ཅད་སྒྱུ་མ་ལྟ་བུའི་རང་བཞིན་རྟོགས་པ་དང་། རྗེས་སུ་སྤྱོད་པར་མཐུན་པར་སྤྱོད་པ་དང་། དེའི་སྔགས་སློབ་པར་བྱེད་པ་རྣམས་ཏེ་ཡན་ལག་དེ་བཞི་དང་ལྡན་པ་ནི་རིག་པའི་བརྟུལ་ཞུགས་ཞེས་པའོ། །དེ་ལ་ཁ་ཅིག་ནི་བརྟུལ་ཞུགས་འདི་སྤྱོད་ཅིང་སྔོན་དུ་བསྙེན་པའི་གྲངས་སུམ་འབུམ་ལ་སོགས་པ་
ཇི་སྐད་དུ་གཞུང་ལས་འབྱུང་བ་བཞིན་དུ་བྱས་ནས་སྒྲུབ་པ་ལ་འཇུག་པར་བྱའོ། །དེ་སྟེ་དེ་བས་ཀྱང་ལྷག་པར་བསྟན་པར་འདོད་པས། དབང་ཆེན་ལ་སོགས་པའི་དཀྱིལ་འཁོར་ལ་གནས་ཤིང་། ཟླ་བ་དྲུག་ཏུ་རིག་པའི་བརྟུལ་ཞུགས་སྤྱོད་པར་ཤེས་པར་བྱ་སྟེ། དེ་བས་ན་བརྟུལ་ཞུགས་འདི་ནི་
དབང་ཆེན་ལ་སོགས་པ་ལ་གནས། བརྟུལ་ཞུགས་ཀྱི་རྒྱུ་ལྟ་བུར་བལྟས་ཏེ་རིག་པའི་བརྟུལ་ཞུགས་འདི་ལས་བྱུང་བའི་དབང་ཆེན་ལ་སོགས་པའི་དཀྱིལ་འཁོར་ལ་གནས་པའི་བརྟུལ་ཞུགས་ནི་བརྟུལ་ཞུགས་གོང་མ་འདི་ལས་བྱུང་བར་བལྟ་སྟེ། དེ་བས་ན་བརྟུལ་ཞུགས་འདིས་སྔར་སེམས་

ཡོངས་སུ་སྦྱངས་ནས་ཕྱིས་བརྟུལ་ཞུགས་འོག་མ་ལ་འཇུག་སྟེ་བརྟུལ་ཞུགས་འོག་མ་སྤྱོད་པ་དང་། ལྷའི་གཟུགས་སུ་བསྐྱེད་པ་སྟོང་པ་ཉིད་ཀྱི་ཏིང་ངེ་འཛིན་ལ་གནས་པ་དང་། ཏིང་ངེ་འཛིན་ལས་ལངས་ནས་སྤྱོད་པའི་ཚེ་ཡང་ཆོས་རྣམས་སྒྱུ་མ་ལྟ་བུར་རྟོགས་ཤིང་ཆགས་པར་སྤྱོད་པ་དང་།
སྔགས་སློབ་པར་བྱེད་པའི་རིམ་བཞིན་དུ་སྤྱད་པར་བྱ་སྟེ། ལྷག་པ་ནི་དབང་ཆེན་ལ་སོགས་པའི་དཀྱིལ་འཁོར་ལ་གནས་ཤིང་དེའི་རང་བཞིན་ལ་བྱ་བ་དང་། དབང་ཆེན་ལ་སོགས་པ་སོ་སོའི་ཕྱག་རྒྱ་འཆིང་བའོ། །རིག་པའི་བརྟུལ་ཞུགས་དེ་དྲིས་པ་ཡང་། དེ་ནས་བཅོམ་ལྡན་འདས་རྣམ་པར་
སྣང་མཛད་ལ་ཕྱག་ན་རྡོ་རྗེས་ཚིགས་སུ་བཅད་པའི་དབྱངས་ཀྱིས་སྔགས་ཀྱི་སྒོར་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཀྱི་དོན་གྱི་ཕྱིར་རིག་པའི་དཀའ་ཐུབ་ཀུན་དྲིས་པ་ཞེས་པ་ལ་སོགས་པ་སྟེ། ཕྱག་ན་རྡོ་རྗེ་རིག་པའི་དཀའ་ཐུབ་དྲིས་པ་ཡང་དབང་ཆེན་ལ་སོགས་པའི་དཀྱིལ་འཁོར་ལ་
གནས་ཤིང་། རིག་པའི་དཀའ་ཐུབ་སྤྱོད་པ་དེ་གཙོར་དྲིས་པར་ཤེས་པར་བྱའོ། །ཚིགས་སུ་བཅད་པའི་དབྱངས་ཀྱིས་དྲིས་པ་ནི་དོན་དཀའ་ཞིང་ཞེས་པས་དོན་གྱི་ཚིག་དང་འབྲུ་རྣམས་མི་ཉམས་པར་བྱ་བའི་ཕྱིར་རོ། །སྔགས་ཀྱི་སྒོར་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཀྱི་སྤྱིར་ཞེས་པ་ནི་
ཕྱག་ན་རྡོ་རྗེ་ཉིད་དམིགས་མི་མཁྱེན་ཏེ། འདྲི་བ་མ་ཡིན་གྱི་མ་འོངས་པའི་འགྲོ་བ་སྔགས་ཀྱི་སྒོར་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ལ་ཕན་གདགས་པའི་ཕྱིར་ཞེས་པའོ། །འདི་ལྟར་དཀའ་ཐུབ་སྤྱད་པ་ལགས། །ཞེས་པ་ནས་རྒྱལ་པོ་གཙོ་ཉིད་དབང་དུ་ཞེས་པའི་བར་དུ་ཕྱག་ན་རྡོ་
རྗེས་དྲིས་པའི་ཚིག་སྟེ། དེ་ལ་སྔོན་གྱི་སངས་རྒྱས་ཀྱིས་གསུངས་ཞེས་པ་ལས་འདི་ལྟར་སྔོན་གྱི་སངས་རྒྱས་ཀྱིས་ཟིན་ན་ད་དྲི་ཅི་དགོས་ཤེ་ན། བདག་ཉིད་སྔོན་གྱི་སངས་རྒྱས་ཀྱིས་བཤད་པས་དེའི་དོན་འཚལ་མོད་ཀྱིས། མ་འོངས་པའི་འགྲོ་བ་རྣམས་ཀྱི་དོན་དུ་བཤད་ན། བཅོམ་ལྡན་འདས་
ཀྱིས་མངོན་སུམ་དུ་བསྟན་ན། དེ་རྣམས་ཡིད་ཆེས་པར་འགྱུར་བ་དང་། བཅོམ་ལྡན་འདས་ཉིད་དུ་དབང་དུ་བགྱིས་པའི་ཕྱིར་ཞེས་པ་སྟེ་དེ་བས་ན་གསུངས་པ། མ་འོངས་པའི་འགྲོ་བ་རྣམས་ཀྱི་དོན་དུ་བཤད་དེ། རྒྱལ་བ་གཙོ་ཉིད་དབང་དུ་བྱ། །ཞེས་པའོ། །དྲིས་པའི་ཚིག་གཞན་རྣམས་ནི་

འོག་ནས་ལན་ལྡོན་པ་དང་སྦྱར་རོ། །རིག་པའི་དཀའ་ཐུབ་ལས་བྱུང་བའི། །དཀའ་ཐུབ་གནས་པ་སངས་རྒྱས་བཞིན། །ཞེས་པ་ནི། རིག་པའི་དཀའ་ཐུབ་ལས་བྱུང་བ། །ཞེས་པ་ནི་སེམས་སུ་སྦྱོར་བའི་མཚན་མ་ཉིད་ཡན་ལག་བཞི་དང་ལྡན་པའི་རིག་པའི་དཀའ་ཐུབ་དེ་ལས་
བྱུང་བ་དབང་ཆེན་ལ་སོགས་པའི་དཀྱིལ་འཁོར་ལ་གནས་ཏེ་སྤྱོད་པ་དེ་བཤད་དོ་ཞེས་པ་དང་སྦྱར་རོ། །དཀའ་ཐུབ་གནས་པ་སངས་རྒྱས་བཞིན། །ཞེས་པ་ནི་ཇི་ལྟར་སངས་རྒྱས་བཅོམ་ལྡན་འདས་ཀུན་དུ་སངས་རྒྱས་པ་དོན་དམ་པར་ཡང་ཏིང་ངེ་འཛིན་ལ་ཞུགས་པའི་ཚེ་ཡང་ཆོས་ཐམས་ཅད་
སྟོང་པ་ཉིད་དེ་མཚན་ཉིད་གཅིག་ཏུ་ཆུད། ཀུན་རྫོབ་ཏུ་སྤྱོད་པའི་ཚེ་ཡང་ཆོས་རྣམས་སྒྱུ་མ་ལྟ་བུར་མཁྱེན་པས་ཇི་ལྟར་ཡང་མི་ཆགས་པར་སྤྱོད་པ་དེ་བཞིན་དུ་རིག་པའི་བརྟུལ་ཞུགས་ལ་གནས་པ་དེ་ཡང་ཏིང་ངེ་འཛིན་ལ་ཞུགས་པའི་ཚེ་ཆོས་ཐམས་ཅད་སྟོང་པ་ཉིད་ཀྱི་རང་བཞིན་དུ་གནས། ཏིང་
ངེ་འཛིན་ལས་ལངས་ཏེ་སྤྱོད་པའི་ཚེ་ཡང་ཆོས་རྣམས་སྒྱུ་མ་ལྟ་བུར་རྟོགས་ཤིང་གང་ལ་ཡང་མི་ཆགས་པས་སྤྱོད་པས་ན། ཀུན་དུ་སངས་རྒྱས་པ་དང་འདྲ། །ཞེས་པའོ། །ཡང་དག་འདི་བྱས་ནས་ཞེས་པ་ནས། ནམ་ཞིག་རྟག་ཏུ་སེམས་ཐུབ་ན། །ཞེས་པའི་བར་དུ་ཇི་ལྟར་དཀའ་ཐུབ་སྤྱད་པ་ལ་
གནས་ཞེས་ཞུས་ཏེ་བཤད་པ་སྟེ། ཡང་དག་ཉིད་དུ་བདག་བྱས་ནས། །ཞེས་པ་ནི་བདག་གི་དེ་ཁོ་ན་ཉིད་ཇི་སྐད་བཤད་པ་བཞིན་དུ་བྱས་ནས་ཞེས་པའོ། །རྟག་ཏུ་ཐེ་ཚོམ་མེད་ན་ནི། །ཞེས་པ་ནི་དེ་ལྟར་བདག་གི་དེ་ཁོ་ན་ཉིད་བདག་ནི་ལྷ་གང་ཡིན་པའི་གཟུགས་སུ་བསྒྱུར་བ་ཏིང་ངེ་འཛིན་འཁྲུགས་པ་
དང་ལྷ་ཇི་བཞིན་པའི་བར་སྣང་བ་རྣམ་པར་རྟོག་པ་གཞན་མེད་པར་ལྷའི་གཟུགས་ཉིད་ཡིད་ལ་ཐེ་ཚོམ་མེད་པར་སྣང་ན་དེ། དཀའ་ཐུབ་སྤྱད་པ་སྤྱོད་པ་ཡིན། །ཞེས་པ་དང་སྦྱར་རོ། །དེ་བས་ན་གསུངས་པ། ནམ་ཞིག་རྟག་ཏུ་སེམས་ཐུབ་ན། །ཞེས་པ་སྟེ་མདོར་ན་རྟག་ཏུ་སེམས་ཐུབ་པར་བྱ་སྟེ།
ལྷའི་གཟུགས་དེ་ཉིད་ལ་བརྟན་པ་སྣང་བར་མ་བྱས་ན། སྔགས་དང་ཕྱག་རྒྱ་སྦྱར་བ་ཙམ་དང་། གང་ལྟ་བ་དེ་དག་བདག་གོ་ཙམ་དུ་བསམ་པ་ཙམ་གྱིས་རིག་པའི་བརྟུལ་ཞུགས་མི་ཆུད་ཅེས་པའོ། །དེ་ནི་རིག་པ་དང་མཐུན་པའི་གཟུགས་སུ་སྤྱོད་པའོ། །བྱང་ཆུབ་སེམས་དཔའ་དང་ཆོས་རྣམས་

དང་། གཞན་གྱི་ཚུལ་ཁྲིམས་ཅན་མ་ཡིན་ཞེས་པའི་བར་དུ། ཇི་ལྟར་ཚུལ་ཁྲིམས་ལ་ཡང་གནས། །ཞེས་ཞུས་པ་དེ་བཤད་པ་སྟེ་འཇུག་པའི་བྱང་ཆུབ་ཀྱི་སེམས་ཆོས་སུན་འབྱིན་པའི་མཚན་ཉིད་རྣམ་པར་རྟོག་པ་དང་བཅས་པ་དང་། ཕུང་པོ་དང་ཁམས་དང་སྐྱེ་མཆེད་ལ་སོགས་
པའི་རྣམ་པ་དང་། དགེ་བ་བཅུའི་རང་བཞིན་ལ་བསླབ་པ་དང་། འདུས་བྱས་ཀྱི་ལས་དང་འབྲས་བུ་རྣམས་སྟོང་པ་ཉིད་ཀྱི་མཚན་ཉིད་གཅིག་ཏུ་ལྡན་པར་ཆུད་ན། ཚུལ་ཁྲིམས་དེ་ལས་དང་བྲལ་བ་ཟག་པ་མེད་པའི་ཚུལ་ཁྲིམས་སྟོང་པ་ཉིད་ཀྱི་མཚན་ཉིད་དེ་དེ་བས་ན་གསུངས་པ། ཚུལ་
ཁྲིམས་སངས་རྒྱས་བཞིན་རིག་བྱ། །ཞེས་པ་སྟེ་ཇི་ལྟར་སངས་རྒྱས་བཅོམ་ལྡན་འདས་ཆོས་ཐམས་ཅད་སྟོང་པ་ཉིད་ཀྱི་རང་བཞིན་དུ་མཚན་ཉིད་གཅིག་ཏུ་ཆུད་པ་བཞིན་དུ་ཞེས་པ་སྟེ། དེ་ནི་རིག་པ་དང་རྗེས་སུ་མཐུན་པའི་སྟོང་པ་ཉིད་ཀྱི་ཏིང་ངེ་འཛིན་སྤྱོད་པ་དེ་སྔར་བདག་གིས་ལྷའི་
གཟུགས་སུ་བསྒྱུར་ནས། དེའི་འོག་ཏུ་རང་གི་སེམས་ཡོངས་སུ་སྦྱང་བའི་ཕྱིར་ལྷའི་གཟུགས་སུ་བསྒྱུར་བ་དེ་སོ་སོ་ནས་མི་ཞིག་པར་ཡིད་ལ་མི་བྱ་བའི་ཚུལ་གྱིས་སྟོང་པ་ཉིད་ཀྱི་ཏིང་ངེ་འཛིན་ལ་གནས་པར་བྱའོ། །ཆོས་ཀུན་དབང་ཐོབ་ཅེས་པ་ནས་གསེར་དང་རྡོ་བར་བསྙམས་ནས་ཞེས་པའི་
བར་དུ། མི་ཆགས་པ་ནི་ཇི་ལྟར་སྤྱོད། །གང་ན་ཇི་ལྟར་གནས་ནས་སོ། །ཞེས་བཤད་པ་སྟེ། ཆོས་ཀུན་ལ་ཡང་དབང་ཐོབ་ཅིང་། །ཞེས་པ་ནི་ཆོས་ཐམས་ཅད་སྟོང་པའི་རང་བཞིན་དུ་ཆུད་དེ། འདོད་ཆགས་ལ་སོགས་པ་ཉོན་མོངས་པ་རྣམས་ཀྱི་དབང་དུ་མི་འགྲོ་ཞེས་པའོ། །སེམས་ཅན་
དོན་ཕྱིར་དེར་ཞུགས་པ། །མི་ཆགས་བཞིན་དུ་སྤྱོད་པ་ནི། །གསེར་དང་རྡོ་བར་སྙོམས་ནའོ། །ཞེས་པ་ནི་སྟོང་པ་ཉིད་ཀྱི་ཏིང་ངེ་འཛིན་ལས་ལངས་ནས། སྦྱིན་པ་ལ་སོགས་པ་སེམས་ཅན་གྱི་དོན་དུ་ཀུན་རྫོབ་སྤྱོད་ན། འདུས་བྱས་ཀྱི་ཆོས་རྣམས་སྒྱུ་མ་ལྟ་བུར་རྟོགས་ཤིང་དེ་རྣམས་ལ་ཆགས་པ་མི་
འབྱུང་བ་ནི་ཇི་ལྟར་རྡོ་བ་དང་བོང་བ་ལ་ཆགས་པའི་སེམས་མི་སྐྱེ་བཞིན་དུ་གསེར་ལ་ཡང་ཆགས་པའི་སེམས་མི་སྐྱེ་ན་གང་ན་གནས་ཀྱང་མི་ཆགས་པ་སྤྱོད་པ་ཞེས་པ་སྟེ་དེ་ནི་ཀུན་རྫོབ་ཏུ་ཡང་སྤྱོད་ན་རིག་པ་དང་རྗེས་སུ་མཐུན་པར་སྤྱོད་པའོ། །ཇི་སྲིད་མཚན་མར་བཤད་པ་ནི་སྔགས་ཀྱི་གྲངས་

སུ་བྱ་བ་རྣམས་དེ་སྲིད་དུ་སྒྲུབ་པ་དང་། དཀའ་ཐུབ་ཡོངས་སུ་རྫོགས་པར་འགྱུར། །ཞེས་པ་ནི་ཇི་སྲིད་དུ་བསྒྲུབས་ན། དཀའ་ཐུབ་ཡོངས་སུ་རྫོགས་པར་འགྱུར། །ཞེས་དེ་བཤད་པ་སྟེ། སྔགས་བཟླས་པའི་གྲངས་སུམ་འབུམ་ལ་སོགས་པ་ཇི་སྲིད་དུ་གཞུང་ལས་བཤད་པ། ཇི་
སྲིད་ཀྱི་བར་དུ་དཀའ་ཐུབ་དེ་གོང་དུ་བཤད་པའི་ཚུལ་བཞིན་དུ་སྤྱད་ན་ཡོངས་སུ་རྫོགས་པར་འགྱུར་ཞེས་པ་སྟེ། དེ་ཡང་དབང་ཆེན་ལ་སོགས་པའི་དཀྱིལ་འཁོར་ལ་གནས་པའི་དཀའ་ཐུབ་ཀྱི་སྔོན་རོལ་དུ་སེམས་ཡོངས་སུ་སྦྱོང་བའི་མཚན་ཉིད་ཡན་ལག་བཞི་དང་ལྡན་པའི་དཀའ་ཐུབ་དེ་ལ་བྱའོ། །
དབང་ཆེན་གྱི་ནི་ལྷ་ལྟ་བུར། །ཞེས་པ་ནས། རྙེད་དང་མི་རྙེད་རྣམ་པར་སྤངས། །ཞེས་པའི་བར་དུ་དེའི་གནས་གང་དུ་བགྱི་ཞེས་པའི་ལན་ཏེ། དབང་ཆེན་ལ་སོགས་པའི་དཀྱིལ་འཁོར་ལ་གནས་ནས་རིག་པའི་དཀའ་ཐུབ་སྤྱད་པ་བཤད་པ་དེ་ལ། དབང་ཆེན་གྱི་ནི་ལྷ་ལྟ་བུར། །ཞེས་པ་ནས། སྲོག་
དང་རྩོལ་བ་ནན་ཏན་དུ། །ཞེས་པའི་བར་དུ་དབང་ཆེན་ལ་སོགས་པའི་དཀྱིལ་འཁོར་ལ་གནས་ནས་བདག་ཉིད་རང་གི་ལྷའི་གཟུགས་སུ་བསྒྱུར་ཏེ། ཇི་ལྟར་སའི་རང་བཞིན་སྲ་ཞིང་མཁྲང་བ་ལྟར་བདག་གི་ལུས་ཀྱང་དེ་ལྟ་བུར་སེམས་ལ་ཞར་ལ་བསྒོམ་ཞིང་ཟླ་བ་གཅིག་ཏུ་བཟླས་ཤིང་གནས་པར་བྱ་
བ་བཤད་དེ། དབང་ཆེན་གྱི་ནི་ལྷ་ལྟ་བུར། །དབང་ཆེན་དཀྱིལ་འཁོར་ལ་འདུག་ནས། །ཞེས་པ་ནི་དབང་ཆེན་གྱི་སྙིང་པོ་ཡི་གེ་ཨ་ཆོས་ཐམས་ཅད་ཐོག་མ་ནས་མ་སྐྱེས་པར་སྟོན་པའི་སྒྲའི་དེ་ཁོ་ན་ཉིད་བསྒོམས་ནས་ཡི་གེ་དེ་ཉིད་ལས་དབང་ཆེན་གྱི་དཀྱིལ་འཁོར་དུ་གྱུར་པ་སྔ་མ་བཞིན་དུ་བསམས་ཏེ།
དེའི་སྟེང་དུ་བདག་རང་གི་ལྷའི་གཟུགས་སུ་བསྒྱུར་ནས་རྡོ་རྗེའི་ཕྱག་རྒྱ་བཅིངས་ཏེ་དབང་ཆེན་གྱི་རང་བཞིན་ལྟ་བུ་སྲ་ཞིང་བརྟན་པར་བསྒོམ་ཞེས་པའོ། །རྡོ་རྗེའི་ཕྱག་རྒྱ་བཅིངས་ནས་སུ། །ཞེས་པ་ནི་སྲ་ཞིང་བརྟན་པའི་རྗེས་སུ་མཐུན་པའི་ཕྱིར་རྡོ་རྗེའི་ཕྱག་རྒྱ་བཅིང་བའོ། །ཟས་སུ་རྟག་པར་འོ་མ་བཏུང་། །
ཞེས་པ་ནི་ཟས་ཀྱང་རྗེས་སུ་མཐུན་པར་ཞེས་པ་སྟེ། འོ་མ་འཐུངས་ནས་ལུས་བརྟས་ཤིང་མཁྲང་བར་འགྱུར་བའི་ཕྱིར་རོ། །འཇིག་རྟེན་ན་ཡང་སེམས་དང་ཁ་ཟས་གཉིས་ཀྱིས་ལུས་འཛིན་པར་འགྱུར་བ་དེ་བཞིན་དུ། འདིར་ཡང་སེམས་མཁྲང་བར་འགྱུར་བའི་ཁ་ཟས་ཟོས་ན་དབང་ཆེན་གྱི་ཏིང་ངེ་

འཛིན་དང་མཐུན་པར་འགྱུར་བའི་ཕྱིར་རོ། །སྔགས་མཁན་གྱིས་ནི་ཟླ་གཅིག་བཟླས། །སྲོག་དང་རྩོལ་བས་ནན་ཏན་དུའོ། །ཞེས་པ་ནི་སྔར་བཤད་པའི་ཚུལ་བཞིན་དུ་སྲོག་དང་རྩོལ་བ་བསྡམས་ནས། རང་གི་སྙིང་པོ་ཟླ་གཅིག་བཟླས། །ཞེས་པའོ། །དེ་ནས་ཟླ་བ་གཉིས་པའི་
ཚེ། །ཞེས་པ་ནས། དེའི་ཚེ་ཟས་སུ་ཆུ་བཏུང་ངོ་། །ཞེས་པའི་བར་དུ་ཆུའི་དཀྱིལ་འཁོར་ལ་གནས་པར་བཤད་པ་སྟེ། ཆུའི་དཀྱིལ་འཁོར་གྱི་ས་བོན་གྱི་སྒྲའི་དེ་ཁོ་ན་ཉིད་བསྒོམ་པ་དང་། ས་བོན་དེ་ལས་ཆུའི་དཀྱིལ་འཁོར་དུ་བསྒོམས་པས་རིམ་པ་བཞིན་དུ་བྱ་སྟེ། བདག་གི་ལུས་ཀྱང་
ཆུའི་རང་བཞིན་ལྟར་སྔོ་བར་བསྒོམ་ཞིང་པདྨོའི་ཕྱག་རྒྱ་བཅིངས་ལ་ཟླ་བ་གཅིག་ཏུ་བཟླས་པ་བྱ་སྟེ། པདྨོའི་ཕྱག་རྒྱ་བཅིངས་པ་དང་ཟས་སུ་ཆུ་བཏུང་བ་ཡང་དེ་དང་རྗེས་སུ་མཐུན་པར་བྱ་བའི་ཕྱིར་རོ། །དེ་ནས་ཟླ་བ་གསུམ་པའི་ཚེ། །ཞེས་པ་ནས། ལུས་ངག་ཡིད་ལས་བྱུང་བའོ། །ཞེས་
པའི་བར་དུ། མེ་ཡི་དཀྱིལ་འཁོར་ལ་གནས་པའི། །བཤད་པའི་ཟས་བཟའ་སྟེ་ཞེས་པ་ནི་མེ་དང་རྗེས་སུ་མཐུན་པར་བྱ་བའི་ཕྱིར། ཇི་ལྟར་མེ་སྐམ་གཤེར་དང་བཟང་ངན་ལ་སོགས་པ་མི་རྟོག་པར་སྲེག་པ་བཞིན་དུ་ཞིམ་པོ་ལ་སོགས་པའམ། འདོད་པའི་དངོས་པོ་རྣམས་ལ་མི་རྟོག་
ཅིང་སློང་བར་བཟའ་ཞེས་པའོ། །རལ་གྲིའི་ཕྱག་རྒྱ་དང་ལྡན་པ། །ཞེས་པ་ཡང་མེ་དང་རྗེས་སུ་མཐུན་པ་སྟེ། ཇི་ལྟར་མེས་ཐམས་ཅད་འཚིག་ཅིང་གཅོད་པ་བཞིན་དུ་རལ་གྲིས་ཀྱང་དངོས་པོ་ཐམས་ཅད་གཅོད་ཅིང་མེད་པར་བྱེད་པའོ། །སྡིག་པ་ཀུན་དུ་བསྲེག་པ་ནི། །ལུས་པོ་ཉིད་ལས་
བྱུང་བའོ། །ཞེས་པ་ནི་དེ་ལྟ་བུའི་ཏིང་ངེ་འཛིན་ལ་གནས་ཤིང་སྔགས་བཟླས་ན། ལུས་དང་ངག་ཡིད་གསུམ་གྱི་སྒོ་ནས་སྡིག་པ་སྦྱང་བའི་ལས་ཀྱི་བག་ཆགས་ལས་བསམས་ཏེ་འབྱུང་བར་འགྱུར་ཞེས་པའོ། །བཞི་ལ་རླུང་གི་ལྡན་པར་ཏེ། །ཞེས་པ་ནས། སེམས་ཐུབ་པར་ནི་སྔགས་ཟློས་
ཤིག །ཅེས་པའི་བར་དུ་ཟླ་བ་གཅིག་རླུང་གི་དཀྱིལ་འཁོར་ལ་གནས་པ་སྟེ། རླུང་གི་དཀྱིལ་འཁོར་ཏིང་ངེ་འཛིན་དུ་སྦྱར་བ་ནི་སྔར་བཤད་པ་བཞིན་ཏེ། ཁྱད་པར་དུ་བདག་གི་ལུས་རླུང་གིས་རེག་པར་ལྡན་པར་ཡིད་ལ་བསྒོམ་མོ། །ཟས་སུ་རྟག་པར་རླུང་བཟའོ། །ཞེས་ཁ་ཟས་ཀྱང་དེའི་རྗེས་

སུ་མཐུན་པར་སྦྱར་བ་སྟེ། རླུང་ནི་ནང་དུ་རྒྱུ་བ་ལྐོག་མར་བགས་ཀྱིས་བགགས་པར་བསམས་ན་བྲུ་བ་ཚ་བ་དང་སྐོམ་པ་མེད་པར་འགྱུར་ཏེ་རླུང་ཟ་བ་ཞེས་བྱའོ། །དེ་ལ་འཁོར་ལོའི་ཕྱག་རྒྱ་བཅིངས། །ཞེས་པ་ནི་འཁོར་ལོས་འཁོར་ཞིང་གཡོ་བའི་མཚན་ཉིད་པས་རླུང་དང་རྗེས་
སུ་མཐུན་པར་བྱ་བའི་ཕྱིར་རོ། །སེམས་ཐུབ་པར་ནི་སྔགས་ཟློས་ཤིག་པ་ནི་སྲོག་དང་རྩོལ་བ་བསྡམས་པ་ལ་སོགས་པ་སྔར་བཤད་པའི་རིམ་པ་བཞིན་དུ་བཟླས་པའོ། །དབང་ཆེན་གྱི་དང་ཆུ་དངོས་ལས། །ཞེས་པ་ནས། རྫོགས་པའི་སངས་རྒྱས་རྫོགས་འགྱུར་རོ། །ཞེས་པའི་བར་དུ་དབང་
ཆེན་གྱི་དཀྱིལ་འཁོར་དང་ཆུའི་དཀྱིལ་འཁོར་གཉིས་ལ་གནས་ཏེ། རིག་པའི་བརྟུལ་ཞུགས་སྤྱད་པ་སྟེ། དབང་ཆེན་དང་ཆུའི་དཀྱིལ་འཁོར་སོ་སོའི་སྙིང་པོ་ལས་སྔ་མ་བཞིན་དུ་བསམས་ཏེ། རོ་སྨད་ནི་དབང་ཆེན་གྱི་རང་བཞིན་དུ་སྔ་མ་བཞིན་དུ་བསམ་མོ། །རོ་སྟོད་ནི་ཆུའི་རང་བཞིན་དུ་
བསམས་ཏེ། ཟས་སུ་ཡང་འོ་མ་དང་ཆུ་གཉིས་བཏུང་ཞིང་ཟླ་བ་གཅིག་ཏུ་བཟླས་པར་བྱའོ། །རྙེད་དང་མི་རྙེད་རྣམ་པར་སྤངས། །ཞེས་པ་ནི་རྙེད་ན་ཡང་དགའ་བ་མེད་མ་རྙེད་ན་ཡང་མི་དགའ་བ་མེད་པའོ། །རླུང་དང་མེ་ཡི་ལྡན་པ་སྟེ། །ཞེས་པ་ནས་རྙེད་པ་དང་མི་རྙེད་པ་རྣམ་པར་སྤངས་སོ་
ཞེས་པར་རླུང་དང་མེ་གཉིས་ཀའི་དཀྱིལ་འཁོར་ལ་གནས་ནས་རིག་པའི་དཀའ་ཐུབ་སྤྱོད་པ་སྟེ། རླུང་གི་དཀྱིལ་འཁོར་གྱི་སྟེང་དུ་མེའི་དཀྱིལ་འཁོར་དང་། རཾ་གྱི་ས་བོན་ལས་བསམས་ཏེ། བདག་གི་ལུས་རོ་སྟོད་མེའི་རང་བཞིན་དུ་འབར་བ་བཞིན་དུ་བསམ། རོ་སྨད་ཀྱང་སྔ་མ་བཞིན་དུ་རླུང་གི་
རང་བཞིན་དུ་བསམས་ཏེ། ཟས་སུ་ཡང་རླུང་གི་ཟས་ཀྱི་སྦྱོར་བ་སྔར་སྨོས་པ་བཞིན་དུ་ཅུང་ཟད་བྱ། མེའི་ཟས་མ་བླངས་པར་ཡང་ཅུང་ཟད་བྱ་སྟེ། ཟླ་བ་གཅིག་ཏུ་བཟླས་པར་བྱ། །ཞེས་པ་དེ་དག་ཐམས་ཅད་ཀྱང་རང་གི་ལྷའི་གཟུགས་སུ་སྦྱོར་བ་ནི་སོ་སོའི་དཀྱིལ་འཁོར་ཁ་དོག་ཅི་འདྲ་བ་བཞིན་
དུ་ལྷའི་གཟུགས་ཀྱི་ཁ་དོག་ཀྱང་དེ་བཞིན་དུ་ཤེས་པར་བྱའོ། །ཟླ་བ་གཅིག་ཏུ་སྲོག་དང་རྩོལ་བ་བསྡམས་ཏེ་བཟླས་པ་ཡང་དབང་ཆེན་གྱི་དཀྱིལ་འཁོར་གྱི་སྐབས་སུ་བཤད་པའི་རིམ་བཞིན་དུ་བཤད་པར་བྱའོ། །བརྒྱ་བྱིན་ཚངས་པ་ལ་སོགས་པའི། །ལྷ་རྣམས་ཞེས་པ་ནས་སེམས་ཅན་

ཀུན་ལ་ཕན་བྱེད་པའི་བར་དུ་དེའི་མཐའ་ཇི་ལྟར་རིག་པར་བགྱི་ཞེས་ཞུས་པའི་ལན་ཏེ་མཐུ་བཤད་པ་སྟེ། བརྒྱ་བྱིན་དང་ཚངས་པ་ལ་སོགས་པའི་ལྷ་རྣམས་དང་། ཤ་ཟ་དང་ལྟོ་འཕྱེ་ལ་སོགས་པའི་རིག་པའི་དཀའ་ཐུབ་དེ་ལྟ་བུ་དང་ལྡན་པའི་སྔགས་པ་དེ་ལྟ་བུ་མཐོང་ན། རྒྱང་རིང་པོ་ནས་ཕྱག་
འཚལ་ཞིང་སྔགས་པ་དེ་ལ་སྲུང་བར་བྱེད། སྔགས་པ་དེས་ནི་ཅི་དགོས་པ་རྣམས་ཀྱང་བྱེད་པར་འགྱུར་བ་དང་། ལྷའི་སྨན་རྣམས་ཀྱང་སྔགས་པ་དེའི་དྲུང་ན་འཁོད་ཅིང་བཀའ་མཉན་ཞིང་སྨན་བཙལ་གྱིས་མི་རྙེད་པ་དག་ཀྱང་དེའི་དྲུང་ན་འདུག་པ་མཐོང་ངོ་། །བགེགས་དང་མ་བདུན་པོ་ལ་
སོགས་པའི་འཇིགས་པར་བྱེད་པ་རྣམས་ཀྱང་རྒྱང་རིང་པོ་ནས་ཕྱག་འཚལ་བར་བྱེད་པ་དང་། སྔགས་པའི་གནས་ཀྱང་མེ་འབར་བ་ལྟར་སྣང་བ་སངས་རྒྱས་བཅོམ་ལྡན་འདས་ལྟར་འཇིག་རྟེན་དང་འཇིག་རྟེན་ལས་འདས་པ་རྣམས་ལ་དབང་ཐོབ་པ་དང་། དབང་བར་འགྱུར་བ་དང་མི་མཐུན་པ་
འདུམ་པ་ནི་ཕྱག་ན་རྡོ་རྗེ་ལྟ་བུ། སྙིང་རྗེ་ཆེན་པོ་སྤྱན་རས་གཟིགས་ཀྱི་དབང་པོ་ལྟ་བུར་གྱུར་ཞེས་པའོ། །དེ་ནི་ཟླ་དྲུག་བཟླས་རྣམས་ལ། །དངོས་གྲུབ་འདོད་བཞིན་འབྲས་བུ་སྨིན། །བདག་རང་དང་ནི་གཞན་རྣམས་ལའང་། །རྟག་ཏུ་སྐྱོང་བར་བྱེད་པའོ། །ཞེས་པ་ནི། དུས་དང་ཡུལ་དང་བྱ་
བ་ལས་ཆོས་དང་། །ཆོས་མིན་རྣམ་པར་སྤོང་བར་བྱེད་པ་འདིས། །ཇི་ལྟར་མྱུར་དུ་འགྱུར་བའི་ཚད་ཀྱང་མགོན་པོས་བཀའ་སྩོལ་ཅིག །ཅེས་པ་དེ་བཤད་པ་སྟེ་དབང་ཆེན་ལ་སོགས་པའི་དཀྱིལ་འཁོར་ལ་བསྒོམ་པའི་རིམ་གྱིས་ཟླ་བ་དྲུག་ན་དུས་ལ་སོགས་པ་ལ་མི་ལྟོས་ཤིང་བདག་དང་གཞན་ལ་
ཕན་པའི་གྲུབ་པ་ཐོབ་པར་འགྱུར་ཏེ། དེ་ལྟ་བུ་ཐོབ་པའི་ཚད་ནི་ཟླ་བ་དྲུག་གོ་ཞེས་པའོ། །དེ་ནས་ཡང་བཅོམ་ལྡན་འདས་ལ་ཕྱག་ན་རྡོ་རྗེས་སྔགས་རྣམས་དང་དཀྱིལ་འཁོར་ཡང་དྲིས་པ་ཞེས་པ་ལ་སོགས་པ་ནི། སློབ་དཔོན་གྱི་དེ་ཁོ་ན་ཉིད་བཤད་པ་སྟེ། སློབ་དཔོན་གྱིས་དྲི་བ་དེ་ཁོ་ན་ཡང་སྔགས་
རྣམས་དང་དཀྱིལ་འཁོར་གྱི་སྙིང་པོ་གང་ཡིན་པ་ལ་སོགས་པ་ཇི་ལྟ་བུ་ཉིད་དུ་ཤེས་ན་སློབ་དཔོན་དུ་འགྱུར་ཏེ། དེ་བས་ན་སྔགས་རྣམས་འབྱུང་བའི་གནས་སྙིང་པོ་དེ་བཤད་པ། སྔོན་དུ་སློབ་དཔོན་གྱི་དེ་ཁོ་ན་ཉིད་བསྟན་ཏེ། དེ་བས་ན་ཕྱག་ན་རྡོ་རྗེས་ཀྱང་། སྔགས་ཀུན་གྱི་ནི་སྙིང་པོ་གང་། །སློབ་

དཔོན་ཞེས་བགྱི་ཅི་ཞེ་ན། །ཞེས་པ་ཞུས་སོ། །དེ་ལ། སྔགས་ཀུན་གྱི་ནི་སྙིང་པོ་གང་། །ཞེས་པ་ནི་ཨ་ཨ་ཞེས་པ་ནི་སྔགས་རྣམས། སྙིང་པོ་རུ་ནི་གསུངས་པ་ཡིན། །ཞེས་པ་ལ་སོགས་པ་དང་སྦྱར་རོ། །སློབ་དཔོན་ཞེས་པ་ནི། སྙིང་ག་རུ་ནི་སྙིང་པོ་གཞག །ཡན་ལག་ཏུ་ནི་
ཡན་ལག་གཞག །ཅེས་པ་དང་སྦྱར་ཏེ། དེ་རྣམས་ཀྱང་བཀོད་པ་ཙམ་གྱིས་ཆོག་པ་མ་ཡིན་གྱི། དེ་དག་སྒྲའི་དེ་ཁོ་ན་ཉིད་ལ་སོགས་པ་ཤེས་ན་སློབ་དཔོན་ཞེས་བྱའོ། །གསང་བའི་ཡེ་ཤེས་དེ་ཞེས་པ་ནི་སྔགས་སྤྱད་པའི་ཚུལ་རང་བཞིན་གྱིས་གསང་བའི་སྟེང་དུ་སྔགས་ཀྱི་སྙིང་པོ་ཡི་གེ་ཨ་
ཞེས་ཐམས་ཅད་ཐོག་མ་མ་སྐྱེས་པར་ཆུད་པའི་ཡེ་ཤེས་འབྱུང་བའི་སྒོ་སྟེ། ཤིན་ཏུ་ཟབ་སྟེ་སྣོད་མ་ཡིན་ཞིང་དམ་ཚིག་མེད་པ་ལ་མི་བསྟན་པས་ན་གསང་བའི་གསང་བ་ཞེས་བྱའོ། །སྔགས་ཀྱི་ཡི་གེས་འབྱུང་ཆེན་པོ། །ཞེས་པ་ནི་སྙིང་པོའི་སྒོ་ནས་ཆོས་ཐམས་ཅད་སྟོང་པ་ཉིད་དུ་ཆུད་པར་འགྱུར་
བས་དེ་ཉིད་ཡི་གེ་ཞེས་བྱ་སྟེ། ཡེ་ཤེས་དེ་ལས་བླ་ན་མེད་པའི་འབྲས་བུ་ཐོབ་པ་ཆེན་པོ་འབྱུང་བས་ན་འབྱུང་ཆེན་པོ་ཞེས་བྱའོ། །ཕ་རོལ་ཏུ་ཕྱིན་པ་ལ་སོགས་པའི་སྒོ་ནས་ཡེ་ཤེས་འབྱུང་བ་ཡང་འབྲས་བུ་ཆེན་པོ་འབྱུང་བ་ཡིན་མོད་ཀྱི། དེ་ལས་ཁྱད་པར་དུ་གསུངས་པ། སྔགས་ཀྱི་ཡེ་ཤེས་
འབྱུང་ཆེན་པོ། །ཞེས་པ་སྟེ་དེ་ལྟ་བུར་དྲིས་པ་དགེ་བའི་ཚིག་དང་སྦྱར་རོ། །ཨ་ཞེས་བྱ་བ་སྔགས་ཀུན་གྱི། །སྙིང་པོ་རུ་ནི་གསུངས་པ་ཡིན། །དེ་ལས་བྱུང་བ་སྔགས་རྣམས་ནི། །གྲངས་མེད་པ་རུ་སྐྱེས་པ་སྟེ། །ཞེས་པ་ནི། སྔགས་ཀུན་གྱི་ནི་སྙིང་པོ་གང་། །ཞེས་ཞུས་པའི་ལན་ཏེ། དེ་ལ་
ཡི་གེ་ཨ་ཞེས་པ་ནི་སྔགས་ཐམས་ཅད་ཀྱི་སྙིང་པོ། སྙིང་པོ་ཞེས་པ་ནི་འབྱུང་བའི་གནས་སོ། །དེ་བས་ན་ཀུན་རྫོབ་དང་དོན་དམ་པ་གཉིས་ཀ་འབྱུང་བའི་གནས་ཏེ། དེ་ལ་ཀ་ལ་སོགས་པ་ཡི་གེ་འབྲུ་ཐམས་ཅད་ཀྱང་ཨ་དང་མི་ལྡན་ན་མི་སྨྲ་སྟེ། དེ་བས་ན་ཡི་གེ་ཀ་ལ་སོགས་པ་ཐམས་ཅད་ཀྱང་ཨ་ལས་
བྱུང་བར་ཤེས་པར་བྱ་སྟེ། དེ་ནི་ཀུན་རྫོབ་ཏུ་འབྱུང་བའི་གནས་སོ། །དོན་དམ་པ་ནི་ཡི་གེ་ཨ་དེ་ལས་ཆོས་ཐམས་ཅད་ཐོག་མ་ནས་མ་བྱུང་མ་སྐྱེས་པར་ཆུད་པའི་ཡེ་ཤེས་འབྱུང་སྟེ་འདི་ནི་དོན་དམ་པའི་གནས་སོ། །དེ་ལ། དེ་ལས་འབྱུང་བའི་སྔགས་རྣམས་ནི། །གྲངས་མེད་བར་དུ་སྐྱེས་པ་སྟེ། །

ཞེས་པ་ནི་འཇིག་རྟེན་དང་འཇིག་རྟེན་ལས་འདས་པའི་སྔགས་ཇི་སྙེད་དུ་གསུངས་པ་དེ་ཐམས་ཅད་ཡི་གེ་འབྲུའི་ངོ་བོ་སྟེ། འབྲུ་དེ་རྣམས་ཀྱང་ཨ་ལས་གྱུར་པས་སྔགས་གྲངས་མེད་དེ། དེ་དག་ཐམས་ཅད་ཨ་ལས་བྱུང་། །ཞེས་པ་སྟེ་དེས་ནི་ཀུན་རྫོབ་ཏུ་ཐམས་ཅད་འབྱུང་བའི་གནས་སུ་སྟོན་པའོ། །
འཕྲོ་བ་ཐམས་ཅད་ཞི་བར་བྱེད། །མ་ལུས་ཡེ་ཤེས་ཀྱང་འབྱུང་ཞེས་པ་སྟེ། ཨ་དེ་ཏིང་ངེ་འཛིན་གྱི་སྒོ་ནས་ཆོས་ཐམས་ཅད་ཐོག་མ་ནས་མ་བྱུང་བ་སྟོང་པ་ཉིད་ཀྱི་རང་བཞིན་དུ་ཆུད་པས་གཟུང་བ་དང་འཛིན་པ་ལ་སོགས་པ་རྣམ་པར་མི་རྟོག་པའི་འཕྲོ་བ་དང་བྲལ་བའི་ཡེ་ཤེས་ཀྱང་ཨ་དེ་ལས་འབྱུང་ངོ་ཞེས་
བསྟན་པ་སྟེ་དེས་ནི་དོན་དམ་པར་འབྱུང་བའི་གནས་སུ་བསྟན་པའོ། །དེ་ལྟ་བུར་ན་གསང་བའི་བདག་པོ་ཞེས་པ་ནས། སྣ་ཚོགས་པའི་ལུས་ལས་བྱུང་བའོ། །ཞེས་པའི་བར་དུ་གོང་མའི་ཚིགས་སུ་བཅད་པ་མདོར་གསུངས་པ་དེ་ཉིད་ནི་འབྲེལ་པ་སྟེ། དེ་ལ་སྤྱིར་རྣམ་པ་ལྔ་སྟེ། ཨ་དང་ཨཾ་དང་ཨི་
དང་ཨུ་རྣམས་སོ། །དེ་དག་ཡི་གེ་ཐམས་ཅད་སྤྱིའི་རང་བཞིན་ནོ། །ཨོཾ་ཀླད་ཀོར་གྱི་ང་དང་ཉ་དང་ན་དང་ཎ་དང་མ་རྣམས་ཀྱི་རང་བཞིན་ཏེ། ངའི་ནང་དུ་ཀའི་འཁོར་རྣམས་འདུས། ཉའི་ནང་དུ་ཙའི་འཁོར་རྣམས་འདུས། ཎའི་ནང་དུ་ཊའི་འཁོར་རྣམས་འདུས། ནའི་ནང་དུ་ཏའི་འཁོར་རྣམས་འདུས།
མའི་ནང་དུ་པའི་འཁོར་རྣམས་འདུས་པར་བལྟའོ། །ཨ་དང་ཨིའི་ནང་དུ་ཡ་འདུས་པར་བལྟའོ། །ར་དང་ལ་ནི་རྀ་རཱྀ་དང་ལྀ་ལཱྀའི་ནང་དུ་འདུས། ཤ་ཥ་དང་ས་ཧ་རྣམས་ནི་ཡི་གེ་ཞེས་པའི་ཚིག་གཉིས་པོའི་ནང་དུ་འདུས་ཏེ། ཨ་དེ་རྣམས་ལས་ཀ་ལ་སོགས་པའི་ཡན་ལག་ཐམས་ཅད་འབྱུང་བར་ཤེས་
པར་བྱའོ། །དེ་ལ་ཨ་དེ་ནི་སྲོག་ཏུ་གསུངས་པ་སྟེ། སངས་རྒྱས་རྐང་གཉིས་མཆོག་གིས་ཞེས་པ་ནི། ཡི་གེ་ཨ་དེ་ཀུན་རྫོབ་དང་དོན་དམ་པ་གཉིས་ཀ་རུ་ཐམས་ཅད་ཀྱི་སྲོག་སྟེ། ཀུན་རྫོབ་ཏུ་ཡང་གོང་དུ་བཤད་པའི་ཚུལ་གྱིས་ཨ་དེ་མེད་ན་ཀ་ལ་སོགས་པ་སྨྲས་པ་ཐམས་ཅད་ཀྱི་སྲོག་ཅེས་
བྱའོ། །ཆོས་ཐམས་ཅད་ཐོག་མ་ནས་མ་སྐྱེས་པར་ཆུད་པའི་ཡེ་ཤེས་འབྱུང་བས་སྲོག་ཅེས་བྱ་སྟེ། དེ་ལྟ་བུར་སྲོག་ཡིན་པར་འགའ་ཞིག་གིས་བཤད་པ་མ་ཡིན་གྱི། སྔོན་གྱི་སངས་རྒྱས་རྣམས་ཀྱིས་བཤད་པའོ། །དེ་བས་འདི་ཀུན་ཐམས་ཅད་དེ། །ཞེས་པ་ནི་ཨ་དེ་ལྟར་དེ་སྲོག་ཡིན་པས་

ཀ་ལ་སོགས་པའི་དངོས་པོ་ཐམས་ཅད་འདི་ཇི་ལྟར་ཡིན་ཞེས་གསུངས་པ། ཡན་ལག་ཀུན་རྣམ་པར་ཞེས་པ་སྟེ། ཨ་དེ་རྣམས་ཀ་ལ་སོགས་པའི་འབྲུ་རྣམས་ལ་གནས་ཞེས་པའོ། །ཡན་ལག་རྣམས་ཀྱང་ཅི་རིགས་པར། །རྟག་པར་ཀུན་ལའང་ཤེས་པར་བྱོས། །ཞེས་
པ་ནི་ཀ་ལ་སོགས་པའི་ཡན་ལག་ཇི་ལྟར་རིགས་པར་སྔགས་ཀུན་ལ་རྟག་ཏུ་གནས་པར་ཤེས་པར་བྱའོ་ཞེས་པའོ། །ཡི་གེ་རྣམས་ཀྱིས་ཐམས་ཅད་ཁྱབ། །ཅེས་པ་དང་དེ་ཉིད་ཀྱི་དོན་དུ་གསུངས་པ་སྟེ། ཀ་ལ་སོགས་པའི་ཡི་གེ་རྣམས་ཀྱིས་སྔགས་ཀྱི་ཚིག་ཐམས་ཅད་དུ་ཁྱབ་ཅེས་པའོ། །ཡི་གེ་
རྣམས་ཀྱང་དེ་ཡིས་སོ། །ཞེས་པ་ནི་ཀ་ལ་སོགས་པའི་ཡི་གེ་རྣམས་ལ་ཨ་དེས་ཁྱབ་ཅེས་པའོ། །ཡི་གེ་ལས་ནི་སྒྲ་འབྱུང་བ་དང་། ཆ་རུ་ཀུན་དུ་འབྱུང་ངོ་ཞེས་པ་ནི་ཀ་ལ་སོགས་པའི་ཡི་གེའི་སྒྲ་རྣམས་ལས་ཆོས་ཐམས་ཅད་དགོས་པ་དང་བྲལ་བའོ་ཞེས་པ་ལ་སོགས་པའི་སྒྲའི་ཕྱོགས་གཅིག་པ་
རྣམས་འབྱུང་ཞེས་པའོ། །དེ་བས་ན་དེ་ཀུན་ཐམས་ཅད་དེ་སྣ་ཚོགས་པའི་ལུས་འབྱུང་བའོ་ཞེས་པ་ནི། དེ་བས་ན་ཨ་དེ་ནི་ཀ་ལ་སོགས་པའི་དངོས་པོ་ཐམས་ཅད་དེ། ཀ་ལ་སོགས་པ་དེ་རྣམས་ཀྱང་ལྷ་རྣམས་ཐམས་ཅད་ཀྱི་ས་བོན་བས་ལྷ་རྣམས་ཀྱི་གཟུགས་རྣམས་ཚོགས་པའི་ཡི་གེ་དེ་རྣམས་ལས་ཇི་
ལྟར་རིགས་པར་སྦྱར་ན་འབྱུང་ཞེས་པའོ། །དེ་ཡིས་གཞན་པ་བཤད་པ་ཡིན། །ཞེས་པ་ནས། སློབ་དཔོན་གྱིས་སུ་དེ་བསྒྲགས་པ། །མཐུ་ཆེན་སངས་རྒྱས་རྣམས་ཀྱིས་སོ། །ཞེས་པའི་བར་དུ་ཡི་གེ་སུམ་ཅུ་རྩ་གཉིས་སོ། །དེ་དག་ཐམས་ཅད་འོག་ནས་འབྱུང་བའི་ཚུལ་གྱིས་སློབ་དཔོན་གྱི་ལུས་
ལ་དགོད་པ་བཤད་དེ། དེའི་གཞག་པ་ཡིན་ཞེས་པ་ནི་ཡི་གེ་དེ་སྙིང་གར་གཞག་གོ། །སྔར་བཤད་ཟིན་ཏོ་ཞེས་པའོ། །དཔའ་བོ་སྙིང་པོ་དེ་ཉིད་ཚིག །ཅེས་པ་སྙིང་པོ་ཞེས་པའི་ཚིག་ནི་ཨ་འབའ་ཞིག་ལ་མི་བྱའི། སེམས་མགུ་བ་ནི་སྙིང་ཡིན་ཏེ། །རིགས་ནས་སྔགས་རྣམས་གྲུབ་སྡེར་ཞེས་
བཤད་པའི་ཚུལ་དུ་རིག་པར་བྱ་སྟེ། ཡི་གེ་འདི་རྣམས་ལུས་ལ་བཀོད་པ་ཙམ་གྱིས་ཆོག་པ་མ་ཡིན་གྱི། སོ་སོའི་སྒྲ་དེ་ཁོ་ན་ཉིད་སེམས་ཚིམ་ཞིང་མགུ་བའི་བར་དུ་བསྒོམ་པར་བྱ་བ་ཉོན་ཅིག་ཅེས་པའོ། །སྙིང་ག་རུ་ནི་སྙིང་པོ་གཞག །ཡན་ལག་རྣམས་སུ་ཡན་ལག་གཞག །ཅེས་པ་སྙིང་

གར་ཡི་གེ་ཨ། ལུས་ཀྱི་ཡན་ལག་རྣམས་སུ་ཀ་ལ་སོགས་པའི་འབྲུ་རྣམས་ཀ་དེ་ལྷག་མར་རིག་པར་བྱའོ་ཞེས་པ་ལ་སོགས་པ་འོག་ནས་འབྱུང་བའི་རིམ་བཞིན་དུ་བཀོད་ཅེས་པའོ། །དེ་ལྟར་འདི་ཀུན་བྱ་བ་ནི། །བདག་གི་ལུས་ནི་ཀུན་དུ་སངས་རྒྱས་སུ། །ཞེས་སློབ་དཔོན་བདག་གི་ལུས་ཀུན་སངས་
རྒྱས་པའི་སྐུར་བསྒྱུར་ཏེ་ཡི་གེ་འདི་ཐམས་ཅད་དགོད་པར་བྱའོ་ཞེས་པའོ། །སྦྱོར་བའི་སྟན་གནས་བློ་ཅན་གྱིས། །དེ་བཞིན་གཤེགས་པ་རྗེས་དྲན་ནས། །ཞེས་པ་ནི་དེ་བཞིན་གཤེགས་པ་བསམས་ཏེ། ཕྱག་བྱས་ལ་སྦྱོར་བའི་སྐྱིལ་མོ་ཀྲུང་དུ་བཅས་ཏེ་སེམས་དང་ལུས་མཉམ་པར་བཞག་
ནས་གོང་དུ་སྨོས་པ་རྣམས་ཞེས་པའོ། །རྒྱལ་ཆེན་ཡེ་ཤེས་སྲས་འདི་ལ། །ཆོ་ག་བཞིན་དུ་ཤེས་ནས་དགོད། །སློབ་དཔོན་ཞེས་སུ་དེ་བསྒྲགས་པ། །མཐུ་ཆེན་སངས་རྒྱས་རྣམས་ཀྱིས་སོ། །ཞེས་པ་སྟེ། དེ་ལྟར་ཡི་གེ་རྣམས་བཀོད་ཅིང་དེ་རྣམས་ཀྱི་སྒྲའི་དེ་ཁོ་ན་ཉིད་སྟོང་པ་ཉིད་དུ་ཆུད་
པའི་ཡེ་ཤེས་རྒྱ་ཆེན་པོ་དེ་དག་ཆོ་ག་བཞིན་དུ་བགྱིས་ནས་ཤེ་ན་ཀུན་དུ་སངས་རྒྱས་པ་རྣམས་ཀྱིས་སློབ་དཔོན་ཞེས་གསུངས་སོ། །དེ་བས་ན་དེ་བཞིན་གཤེགས་པ་ཞེས་པ་ནས། ཡི་གེ་འཁོར་ལོ་མ་ལུས་པར། །རང་གི་ལུས་ལ་གནས་པའོ། །ཞེས་པའི་བར་དུ་དེའི་རྗེས་སུ་བསྔགས་པ་བཤད་པ་སྟེ།
དེ་ལ་སངས་རྒྱས་ལ་སོགས་པ་གྲུབ་པ་ཡང་རྒྱུ་རྣམ་པ་གཉིས་ཏེ་བསོད་ནམས་དང་ཡེ་ཤེས་ཀྱིས་སོ། །དེ་ལ་སྦྱིན་པ་ལ་སོགས་པའི་བསོད་ནམས་ནི་དེ་བཞིན་གཤེགས་པའི་རྒྱུའོ། །ཡེ་ཤེས་ནི་མངོན་སུམ་པའི་རྒྱུ་སྟེ། དེ་ལ་འདིར་སྔགས་ཀྱི་ཡི་གེ་རྣམས་ཀྱི་སྒྲ་དེ་ཁོ་ན་ཉིད་སྟོང་པ་ཉིད་ཆུད་པར་
བྱེད་པའི་ཡེ་ཤེས་མངོན་དུ་བྱས་ནས། འདི་ནི་མངོན་སུམ་པའི་རྒྱུ་སྟེ། དེ་བཞིན་གཤེགས་པའོ་ཞེས་པ་ལ་སོགས་པས་བསྟོད་པ་ནི། སློབ་དཔོན་དེ་མོས་པ་སྤྱོད་པའི་ས་ལ་གནས་ཏེ་དེ་བཞིན་གཤེགས་པ་མ་ཡིན། དེ་བཞིན་གཤེགས་པ་ལ་སོགས་པར་འགྱུར་བའི་རྒྱུ་བྱེད་པས་རྒྱུ་ལས་
འབྲས་བུ་བསྟན་པར་ཤེས་པར་བྱའོ། །དེ་བཞིན་དུ་འཇིག་རྟེན་ན་སྣང་བ་ཆར་ཆུ་མོད་ཅིང་། མྱུ་གུ་བཟང་ན་འབྲས་བུ་མ་གྱུར་ཀྱང་ལོ་ལེགས་སོ་ཞེས་པ་ལ་སོགས་པའོ། །རྗེས་སུ་བསྔགས་པ་ཡང་རྣམ་པ་བཞིའི་སྒོ་ནས་ཏེ། འཇིག་རྟེན་ལས་འདས་པའི་ལྷ་རྣམས་དང་། འཇིག་རྟེན་གྱི་ལྷ་

དང་། འཇིག་རྟེན་ལས་འདས་པའི་མི་ནི་འཇིག་རྟེན་གྱི་མི་རྣམས་ཏེ། འཇིག་རྟེན་ལས་འདས་པའི་ལྷ་ནི་དེ་བས་དེ་ནི། དེ་བཞིན་གཤེགས་པ་དེ་ནི་སངས་རྒྱས་རྫོགས། །ཞེས་བྱ་བ་ལ་སོགས་པའོ། །འཇིག་རྟེན་གྱི་ལྷ་རྣམས་ནི། ཚངས་པ་གཏོགས་འདོད་དབང་ཆེན་དང་། །ཞེས་
པ་ལ་སོགས་པའོ། །འཇིག་རྟེན་གྱི་མི་ནི་བྲམ་ཟེ་ཁྲུ་གང་། ཚངས་པར་སྤྱོད་པ་ཞེས་ཀྱང་བྱ། །ཞེས་པའོ། །འཇིག་རྟེན་ལས་འདས་པའི་མི་ནི། དགེ་སློང་ཟག་ཟད་དཔལ་ཆེན་དང་། །ཞེས་པའོ། །གསང་བ་ཐམས་ཅད་འཆང་ཞེས་པ་ནི་བདག་ལུས་ལྷའི་གཟུགས་སུ་བསྒྱུར་བ་དང་། ངག་
གི་རང་བཞིན་གྱི་ཡི་གེ་རྣམས་བདག་གི་ལུས་ལ་ཚང་བ་དང་། ཡི་གེ་དེ་རྣམས་ཀྱི་སྒྲའི་དེ་ཁོ་ན་ཉིད་ལ་དམིགས་པའི་ཡེ་ཤེས་དང་ལྡན་པས་ལུས་དང་ངག་ཡིད་གསུམ་གྱི་གསང་བ་འཆང་བ་ཞེས་པའི་ཆོས་ཀུན་གྱི་དབང་ཕྱུག་གཙོ་བོ་སྟེ་ཞེས་པ་ནི། ཆུད་པའི་ཆོས་གཞུང་གི་ཆོས་གཉིས་ཀ་ལ་
དབང་དུ་གྱུར་པ་ཞེས་པའོ། །གང་གིས་བྱང་ཆུབ་བརྟན་པ་ལ། །སྒྲ་ཡི་ཡེ་ཤེས་ལ་ཡང་བསྟུན། །ཞེས་པ་དེ་སངས་རྒྱས་དང་བྱང་ཆུབ་སེམས་དཔའ་ལ་སོགས་པ་དང་འདྲ་བར་འགྱུར་བ་ཡང་། ཡི་གེ་ལུས་ལ་བཀོད་པ་ཙམ་གྱིས་འགྱུར་བ་ནི་མ་ཡིན་གྱི། བྱང་ཆུབ་ཀྱི་སེམས་བརྟན་ཞིང་ཡི་གེ་
རྣམས་ཀྱི་སྒྲའི་དེ་ཁོ་ན་ཉིད་ཀྱི་ཡེ་ཤེས་བསྒོམ་པ་ལ་བརྩོན་ན་འདི་སྐད་སྨོས་པ་དེ་རྣམས་སུ་འགྱུར་ཞེས་པའོ། །དེ་ནི་སློབ་དཔོན་གྱི་ཏིང་ངེ་འཛིན་གྱི་སྟེ་དང་པོའོ། །སྨིན་མ་གཉིས་ཀྱི་མཚམས་སུ་ཞེས་པ་ནི་འགྲོ་བ་དང་མི་འགྲོ་བ་མ་ལུས་པའོ་ཞེས་པའི་བར་དུ་སློབ་དཔོན་གྱི་ཏིང་ངེ་འཛིན་གཉིས་པ་སྟེ། རིགས་
གསུམ་གྱི་སྟེང་དུ་དགོད་པའོ། །སྨིན་མ་གཉིས་ཀྱི་མཚམས་སུ་ནི་ཧཱུཾ་ཞེས་པ་སྟེ། སྙིང་རྗེའི་གནས་ཞེས་པ་ནི་སློབ་དཔོན་ཡང་སྔ་མ་བཞིན་དུ་བཅོམ་ལྡན་འདས་རྣམ་པར་སྣང་མཛད་ཀྱི་སྐུར་བསྒྱུར་ཏེ། སྨིན་མཚམས་སུ་ཕྱག་ན་རྡོ་རྗེའི་སྙིང་པོའི་ཡི་གེ་ཧཱུཾ་རང་གི་དཀྱིལ་འཁོར་ལ་བཞག་པར་བསམས་
ཏེ་བྲང་ཁར་ཤེས་པར་བྱ། ཕྱག་ན་པདྨོའི་གནས་ཞེས་བྱ། །ཞེས་པ་ནི་སྤྱན་རས་གཟིགས་ཀྱི་དབང་པོའི་སྙིང་པོ་སྟེ་ཟླ་བའི་དཀྱིལ་འཁོར་དང་བཅས་ཏེ། བྲང་ཁར་བསམ་ཞེས་པའོ། །ད་ནི་སྙིང་གར་གནས་པ་ནི། །ཞེས་པ་ནི་བཅོམ་ལྡན་འདས་ཉིད་ཀྱི་སྙིང་པོ་ཨ་དེ་རང་གི་སྙིང་གར་དཀྱིལ་འཁོར་

བསམ་ཞེས་པའོ། །ཀུན་གྱི་གཙོ་བོ་དབང་པོ་ཡིན། །ང་ཡིས་སུ་ནི་ཀུན་ཁྱབ་པ། །འགྲོ་དང་མི་འགྲོ་མ་ལུས་པའོ། །ཞེས་པ་ནི་སྙིང་པོ་དེའི་ཡོན་ཏན་བསྔགས་པ་སྟེ། འགྲོ་བ་ནི་མི་ལ་སོགས་པའི་སེམས་ཅན་ནོ། །མི་འགྲོ་བ་ནི་ས་དང་ཤིང་ལ་སོགས་པ་སྟེ་དེ་དག་ཀུན་ཁྱབ་ཅེས་པའོ། །ཨ་ཞེས་
པ་ནི་སྲོག་གི་མཆོག །ཅེས་པ་ནས། འཆི་བ་མེད་པའི་གནས་མཆོག་ཐོབ། །ཅེས་པའོ། །བར་དུ་སློབ་དཔོན་གྱི་ཏིང་ངེ་འཛིན་གསུམ་པ་སྟེ། དཔའ་པོ་ཆེན་པོའི་སྙིང་པོ་རྣམས་ལས། ཡི་གེ་ཨ་སྲོག་གི་མཆོག་པས་བདག་གི་ཁོང་དུ་དབུགས་ཡན་མན་དུ་ལྷན་ཅིག་ཏུ་སྔར་བཤད་པ་བཞིན་དུ་
བསམ་མོ་ཞེས་པ་ཚིག་ཅེས་བྱ་ཞེས་པ་ནི་ཡི་གེའི་ཚིག་རང་བཞིན་པས་ཁར་བསམ་མོ་ཞེས་པའོ། །ར་ཞེས་པ་ནི་མེ་རུ་བསྒྲགས། །ཞེས་པ་ནི་ཡི་གེར་དེ་རང་བཞིན་གྱིས་དཀྱིལ་འཁོར་དང་བཅས་པར་བསམས་ལ་འོད་ཀྱི་དཀྱིལ་འཁོར་བསམ་མོ། །ཧཱུཾ་ནི་ཁྲོ་བོ་ཞེས་སུ་བྱ། །ཞེས་པ་ནི་སྨིན་
མཚམས་སུ་ཡི་གེ་ཧཱུཾ་གི་དཀྱིལ་འཁོར་དང་བཅས་པར་བསམ་མོ། །ཁ་ནི་ནམ་མཁའ་རིག་པར་བྱ། །འཁོར་ནི་སྟོང་པ་མཆོག་ཅེས་པ་ནི། ཡི་གེ་ཁ་ཀླད་ཀོར་དང་བཅས་པ་ཀླད་པའི་སྟེང་དུ་བསམས་ཏེ། ཁ་ནི་ཆོས་ཐམས་ཅད་ནམ་མཁའ་ལྟ་བུའི་མཚན་ཉིད་པར་སྟོན་པའོ། །འཁོར་ནི་
སྟོང་པ་ཡང་སྟོང་པའི་རང་བཞིན་ཞེས་པའོ། །ཡང་དག་པའི་མཆོག་དེ་རྣམས་སློབ་དཔོན་ཞེས་བྱ། བསྡུས་ཤེ་ནའོ་ཞེས་པ་ནི་གོང་དུ་སྨོས་པའི་ཡི་གེ་རྣམས་ཀྱི་སྒྲའི་དེ་ཁོ་ན་ཉིད་དང་། དགོས་པ་རྣམས་ཀྱིས་ཞེས་པ་ནི་དེ་སློབ་དཔོན་ཞེས་བྱ་ཞེས་པའོ། །དེ་བས་རྣམ་པ་ཐམས་ཅད་དུའང་། །
སངས་རྒྱས་རྣམས་ཀྱིས་གསུངས་ཡེ་ཤེས། །རྟག་ཏུ་ནན་ཏན་མངོན་བྱས་ནས། །འཆི་འཕོ་མེད་པའི་གནས་ཐོབ་བོ། །ཞེས་པ་ནི་དེ་དག་གི་རྗེས་སུ་བསམ་པ་སྟེ། སྙིང་པོ་དེ་རྣམས་ང་འབའ་ཞིག་གིས་བཤད་པ་མ་ཡིན་གྱི། སྔོན་གྱི་སངས་རྒྱས་རྣམས་ཀྱིས་ཀྱང་གསུངས་པ་སྟེ། དེ་བས་ན་རྣམ་
པ་ཐམས་ཅད་དུ་དེ་དག་གི་སྒྲ་དེ་ཁོ་ན་ཉིད་དུ་སྟོང་པ་ལ་བསྒོམ་པ་ལ་སོགས་པ་རྟག་ཏུ་ནན་ཏན་བྱས་ན་སངས་རྒྱས་པའི་གནས་ཐོབ་པ་ཞེས་པའོ། །ཀ་དེ་ལྐོག་མར་རིག་པར་བྱ། །ཞེས་པ་ལ་སོགས་པ་ནས། དཔའ་བོ་ཐམས་ཅད་མཁྱེན་བཞིན་ནོ། །ཞེས་པའི་བར་དུ་ཡི་གེ་དགོད་པའི་ལེའུ་གསུངས་

པ་ནི་གོང་དུ། ཡན་ལག་རྣམས་སུ་ཡན་ལག་བཞག །ཅེས་སྨོས་པ་དེ་ཀ་ལ་སོགས་པའི་ཡན་ལག་གང་རྣམས་ལུས་ཀྱི་ཡན་ལག་གཞག་པའི་གནས་འཆད་པར་གསུངས་པ་སྟེ། ཡི་གེ་སུམ་ཅུ་རྩ་གཉིས་པོ་འདི་རྣམས་བཀོད་པའི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་སུ་
སྦྱར་བའོ། །དེ་ལ་སློབ་དཔོན་གྱི་ཏིང་ངེ་འཛིན་དང་པོ་སྙིང་རྗེ་ཆེན་པོ་འབྱུང་བའི་དཀྱིལ་འཁོར་གྱི་ཚེ་སྦྱར། གཉིས་པ་ནི་ཡི་གེ་འཁོར་ལོ་བསྐོར་བའི་ཚེ་སྦྱར། གསུམ་པ་ནི་གསང་བའི་དཀྱིལ་འཁོར་གྱི་ཚེ་སྦྱར་བར་ཤེས་པར་བྱེད་པའོ། །དེ་ནས་བཅོམ་ལྡན་འདས་ལ་ཕྱག་ན་རྡོ་རྗེ་གསང་བའི་བདག་པོས་
འདི་སྐད་ཅེས་གསོལ་ཏོ་ཞེས་བྱ་བ་ལ་སོགས་པ་ནི་དགེ་བ་བཅུའི་ལས་ཀྱི་ལམ་བྱང་ཆུབ་སེམས་དཔའི་བསླབ་པ་ཐམས་ཅད་དང་ལྡན་པ་བཤད་དོ། །དེ་ལ་སྔགས་ཀྱི་སྒོར་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཀྱི་བསླབ་པ་ཐུན་མོང་མ་ཡིན་པ་དམ་ཚིག་གི་མཚན་ཉིད་ནི་སྔར་བཤད་ཟིན་ཏེ། འདི་
ནི་ཕ་རོལ་ཏུ་ཕྱིན་པ་སྤྱོད་པའི་ས་བྱང་ཆུབ་སེམས་དཔའ་དང་སྔགས་པའི་བྱང་ཆུབ་སེམས་དཔའ་གཉིས་ཀ་སྤྱིའི་བསླབ་པ་ཐམས་ཅད་དང་ལྡན་པར་ཤེས་པར་བྱ་སྟེ། དེ་ལ་བྱང་ཆུབ་སེམས་དཔའ་རྣམས་ཞེས་པ་བྱང་ཆུབ་ནི་དེ་བཞིན་ཉིད་ཀྱི་མཚན་ཉིད་དེ་ཆུད་པར་འདོད་པའོ། །བསམ་པ་དང་ལྡན་པ་
ལ་ནི་བྱང་ཆུབ་སེམས་དཔའ་ཞེས་བྱ། སེམས་དཔའ་ཆེན་པོ་ནི་ཆོས་ཐམས་ཅད་སྒྱུ་མ་ལྟ་བུར་ཤེས་ཏེ། གང་ཡང་དངོས་པོ་ཡོད་པ་མ་ཡིན་གྱི། འོན་ཀྱང་ཀུན་རྫོབ་ཏུ་རྒྱུ་དང་འབྲས་བུ་ངེས་པའི་ཚུལ་གྱིས་ཀུན་རྫོབ་ཉིད་དུ་དོན་བྱེད་པ་སྒྱུ་མའི་ཚུལ་དུ་རྟོགས། སེམས་ཅན་ཡོངས་སུ་བསྒྲུབ་པའི་
ཕྱིར་བདག་དང་བཅས་པའི་བསླབ་པ་སློབ་པ་ནི་སེམས་དཔའ་ཆེན་པོ་ཞེས་བྱ། སྐབས་འདིར་ཡང་བསླབ་པ་དེ་ལྟ་བུ་ལ་སོགས་པ་བཤད་པ་ལ་དགོངས་ནས་བྱང་ཆུབ་སེམས་དཔའ་ཆེན་པོ་ཁྱད་པར་དུ་སྨོས་སོ། །བསླབ་པའི་གནས་ཞེས་པ་ནི་འོག་ནས་འབྱུང་བ་དགེ་བ་བཅུའི་ཚུལ་ལ་འཇུག་
པ་དང་། མི་དགེ་བ་བཅུ་ལས་ལྡོག་པའི་མཚན་ཉིད་ལ་བྱའོ། །ཐབས་དང་ཤེས་རབ་ཀྱིས་ཡོངས་སུ་ཟིན་པ་ཞེས་པ་ནི་ཤེས་རབ་ནི་ཆོས་ཐམས་ཅད་ཐོག་མ་ནས་མ་སྐྱེས་པར་ཆུད་པའི་མཚན་ཉིད་དོ། །ཐབས་ནི་ཆོས་ཐམས་ཅད་ཐོག་མ་ནས་མ་སྐྱེས་ཏེ། དངོས་པོ་མེད་པར་ཆུད་ཀྱང་སྒྱུ་མ་ལྟ་

བུའི་ཚུལ་དུ་ཐབས་ཀྱི་སྒོ་ནས་ཀུན་རྫོབ་ཏུ་སློབ་པ་འདི་ལྟ་བུ་དང་། འཁོར་གསུམ་ཡོངས་སུ་དག་པའི་སྦྱིན་པ་ལ་སོགས་པ་ཀུན་དུ་སྤྱོད་པ་ལ་བྱའོ། །ཡང་ན་ཐབས་དང་ཤེས་རབ་ཀྱིས་ཡོངས་སུ་ཟིན་པ་ཞེས་པ་ནི་མི་དགེ་བ་བཅུའི་དངོས་པོ་མི་སྤྱོད་པར་བྱ་བ་ལ་འཕགས་པ་ཉན་ཐོས་རྣམས་ལྟར་
ཐབས་མེད་པ་མ་ཡིན་གྱི་ཤེས་རབ་ཀྱི་དོན་ཆེན་པོ་མཐོང་ན། སེམས་ལ་སྒྱུ་མེད་པར་བདག་ཉིད་སེམས་ཅན་ལྟ་བུར་སྦྱིན་པར་ངན་སོང་དུ་འགྱུར་བའི་ལས་ཁས་བླངས་ཏེ། མི་སྤྱད་པར་བྱ་བའི་དངོས་པོ་སྤྱད་པ་ལ་ཡང་ཐབས་དང་ཤེས་རབ་ཀྱིས་ཡོངས་སུ་ཟིན་པའི་བསླབ་པ་ཞེས་བྱའོ། །བྱང་ཆུབ་སེམས་
དཔའ་སེམས་དཔའ་ཆེན་པོ་ཡིད་མི་ཆེས་པ་དང་བྲལ་ཞིང་ཐེ་ཚོམ་མེད་པ་རྣམས་འཁོར་བ་ན་འཁོར་ཀྱང་ཉམས་པར་མི་འགྱུར་བར་བཤད་དུ་གསོལ་ཞེས་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སྔ་མ་བཞིན་ཡིད་མི་ཆེས་པ་དང་བྲལ་ཞིང་། ཐེ་ཚོམ་མེད་པ་ཞེས་པའི་བཅོམ་ལྡན་འདས་ཀྱིས་ཇི་
སྐད་དུ་བཤད་པའི་གཞུང་ལས་མ་ཡིན་ནོ་སྙམ་པའི་ཡིད་མི་ཆེས་པ་མེད་པ་དང་། ཡིན་ནམ་གཏོལ་མེད་པའི་ཐེ་ཚོམ་སྐྱེ་བའི་བྱང་ཆུབ་སེམས་དཔའ་དེ་ལ་ཡང་བསླབ་པ་དེ་དང་ལྡན་པའི་འཁོར་བ་ན་འཁོར་ཀྱང་། ངན་སོང་ལ་སོགས་པར་ལྟུང་ཞིང་ཉོན་མོངས་པར་མི་འགྱུར་བ་དེ་བཤད་དུ་གསོལ་ཞེས་
པའོ། །དེ་བཞིན་གཤེགས་པའི་སྤྱན་གྱིས་ཆོས་ཀྱི་དབྱིངས་ཐམས་ཅད་དུ་གཟིགས་ནས་ཞེས་པ་ནི། དེ་བཞིན་གཤེགས་པའི་སྤྱན་ནི་སངས་རྒྱས་ཀྱི་ཡེ་ཤེས་ལ་བྱའོ། །ཆོས་དབྱིངས་ནི་སེམས་ཅན་གྱི་ཁམས་ལ་བྱ་སྟེ། སངས་རྒྱས་ཀྱི་ཡེ་ཤེས་དེས་སེམས་ཅན་གྱི་ཁམས་ཐམས་ཅད་དུ་སེམས་ཅན་
འདི་རྣམས་གང་སྡུག་བསྔལ་བ་གང་། བདེ་བ་དང་ལྡན་ཞེས་གཟིགས་པའམ་སེམས་ཅན་འདི་རྣམས་ལས་ལེགས་ཉེས་དང་གང་གང་གི་རྒྱུས་བདེ་བ་དང་སྡུག་བསྔལ་འདི་དང་འདི་ལྟ་བུར་འགྱུར་ཞེས་གཟིགས་པའོ། །ཕྱག་ན་རྡོ་རྗེས་བྱང་ཆུབ་སེམས་དཔའ་རྣམས་ཀྱི་སྤྱོད་པའི་ཚུལ་དེ་བསྟན་པ་མཁས་
པ་ཞེས། བྱང་ཆུབ་སེམས་དཔའ་རྣམས་ཀྱི་སྤྱད་པ་ནི། སྐབས་འདིར་ཐབས་དང་བཅས་པའི་བསླབ་པ་ལ་བྱའོ། །ཚུལ་ཞེས་པ་ནི་ཐོབ་པ་ལ་བྱ་སྟེ། བསླབ་པ་འདིས་ཇི་ལྟར་འདོད་པའི་དོན་ཐོབ་པར་བྱེད་པའི་ཕྱིར་རོ། །མཁས་པ་ཞེས་པ་ནི་ཐབས་དང་ཤེས་རབ་ཀྱིས་ཡོངས་སུ་ཟིན་པ་ཉན་ཐོས་ལྟར་མ་ཡིན་

པ་གོང་དུ་བཤད་པའི་ཚུལ་ལྟ་བུ་བསླབ་པས་སོ། །དེ་ལ་རབ་ཏུ་གནས་ན་ཐེག་པ་ཆེན་པོའི་རྒྱུད་དུ་ཞུགས་པར་འགྱུར་ཞེས་པ་ནི། བྱང་ཆུབ་སེམས་དཔའ་རྣམས་ཀྱི་སྤྱོད་པའི་ཚུལ་མཁས་པའི་ཐབས་དང་ཤེས་རབ་ཀྱིས་ཡོངས་སུ་ཟིན་པའི་བསླབ་པ་དེ་ལ་རབ་ཏུ་གནས་པ་ནི་དེ་བསླབ་
པར་ཞུགས་པ་ཞེས་བྱ་སྟེ། དེ་སློབ་པར་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཐེག་པ་ཆེན་པོ་ལ་རབ་ཏུ་ཞུགས་པར་འགྱུར་བ་དེ་ཉོན་ཅིག་ཅེས་པའོ། །གསང་བའི་བདག་པོ་བྱང་ཆུབ་སེམས་དཔའ་དེ་སྲོག་གཅོད་པ་སྤང་བར་བྱའོ་ཞེས་པ་ནས་ལོག་པར་ལྟ་བ་རབ་ཏུ་སྤང་
བར་བྱའོ་ཞེས་པའི་བར་དུ་མི་དགེ་བ་བཅུ་ལས་ལྡོག་པར་བྱ་བའི་མིང་རྣམས་སྨོས་པ་དེ་བཤད་པ་ནི་འོག་ནས་འབྱུང་ངོ་། །གསང་བའི་བདག་པོ་བྱང་ཆུབ་སེམས་དཔའི་བསླབ་པའི་གནས་དེ་རྣམས་བསླབས་ན་སངས་རྒྱས་བཅོམ་ལྡན་འདས་རྣམས་དང་། བྱང་ཆུབ་སེམས་དཔའ་རྣམས་དང་མཚུངས་
པར་སྤྱད་པ་དེ་རྣམས་བསླབས་པ་ཡིན་ནོ་ཞེས་པ་ནི་གོང་དུ་སྨོས་པའི་བསླབ་པ་དེ་རྣམས་ལ་བསླབས་ན་སངས་རྒྱས་དང་བྱང་ཆུབ་སེམས་དཔའི་སྤྱད་པ་བསླབས་ནས་སངས་རྒྱས་དང་བྱང་ཆུབ་སེམས་དཔའི་གནས་ཐོབ་སྟེ། དེ་བས་ན་བསླབ་པ་འདི་ལ་བསླབས་ན། སངས་རྒྱས་དང་བྱང་ཆུབ་སེམས་
དཔའ་རྣམས་ཀྱང་སྤྱད་པ་གཅིག་ལ་མཚུངས་པར་བསླབས་ཞེས་པའོ། །དེ་བས་ན་བཅོམ་ལྡན་འདས་ལ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ་ཞེས་པ་ནས། ཇི་ལྟར་ཐ་དད་པ་ལགས་ཞེས་པའི་བར་ཕྱག་ན་རྡོ་རྗེས་བྱང་ཆུབ་སེམས་དཔའ་རྣམས་དང་། ཉན་ཐོས་དང་འཇིག་རྟེན་པ་རྣམ་པ་ཐམས་
ཅད་ཡང་བསླབ་པ་འདི་བཤད་ན། དེ་ལ་ཁྱད་པར་ཅི་མཆིས་ཞེས་ཞུས་པ་སྟེ། འཇིག་རྟེན་པ་མུར་འདུག་བྱེད་པ་ཞེས་པ་ནི། འཇིག་རྟེན་པ་ཕལ་ལ་མི་བྱའི། དངོས་པོ་ལ་སོགས་པ་བསྟན་པ་འདི་ལ་འཇུག་པའི་སྒོ་བྱེད་པ་རྣམས་ལ་བྱའོ། །ཁྱད་པར་ཅི་མཆིས་ཞེས་པ་ནི་བསླབ་པ་དེའི་རང་བཞིན་
གྱི་ཁྱད་པར་དྲིས་པའོ། །ཇི་ལྟར་ན་ཐ་དད་པ་ལགས་ཞེས་པ་ནི་རྒྱུ་དྲིས་པ་སྟེ་འོག་ནས་འཆད་པ་དང་སྦྱར་རོ། །གསང་བའི་བདག་པོ་ཐ་དད་པ་ཚུལ་དང་ཚུལ་དུ་བཤད་པའི་ཆོས་ཀྱི་གཞུང་བཤད་ཀྱིས་ཉོན་ཅིག་ཅེས་པ་ཐ་དད་པ་ནི་འཇིག་རྟེན་ཞེས་པ་དང་ཉན་ཐོས་དང་བྱང་ཆུབ་སེམས་དཔའ་རྣམས་ཀྱི་

བསམ་པའི་ཚུལ་གྱི་བྱེ་བྲག་འོག་ནས་བསྟན་པའི་ཚུལ་གྱིས་ཐ་དད་པའོ། །ཚུལ་གཅིག་པ་ནི་དགེ་བ་བཅུའི་རང་བཞིན་དུ་མཚུངས་པར་བསྟན་པའི་ཕྱིར་རོ། །གསང་བའི་བདག་པོ་འདི་ལྟར་ཉན་ཐོས་རྣམས་བསླབ་པ་གང་བསྟན་པ་དེ་ནི་ཤེས་རབ་དང་ཐབས་སུ་འབྲེལ་པ་སྟེ། བཀའ་ལུང་གྲུབ་
པའི་ཞེས་པ་ཕྱོགས་གཅིག་ཏུ་རིག་པ་མ་ཡིན་ཏེ། དེ་བས་ན་དེ་དག་གི་དགེ་བའི་ལས་བཅུ་དང་མཉམ་པར་མི་འགྱུར་རོ་ཞེས་པ་ནི། འཕགས་པ་ཉན་ཐོས་རྣམས་སྟོན་པས་ཇི་སྐད་བསྟན་པའི་བཀའ་ལུང་བཞིན་དུ་གྲུབ་པ་སྟེ། བྱང་ཆུབ་སེམས་དཔའ་ལྟར་རང་གི་ཤེས་རབ་ཀྱིས་རིག་པའི་
གཞུང་དང་སྦྱར་ཞིང་འཕྲལ་ལ་ཅི་རིགས་པར་མི་བྱེད་པས། ཐབས་དང་ཤེས་རབ་མེད་ཅིང་གང་ཟག་བདག་མེད་པར་ཆུད་པའི་ཤེས་པ་དེས་ཕྱོགས་གཅིག་ལ་གནས་པས་མཚུངས་པར་མི་འགྱུར་རོ། །འཇིག་རྟེན་པ་རྣམས་བདག་གི་དངོས་པོ་ལ་ཆགས་ཤིང་གཞན་གྱི་རྐྱེན་གྱིས་འགྱུར་རོ་ཞེས་
པ་ནི་འཇིག་རྟེན་པ་རྣམས་སྐྱེ་བ་དང་འཇིག་པ་དང་བདེ་བ་དང་སྡུག་བསྔལ་བ་དང་བསླབ་པའི་དངོས་པོ་ལ་སོགས་པ་ཐམས་ཅད་བདག་ཅེས་པའི་དངོས་པོ་དེས་བྱའོ་ཞེས་པ་ནས། བདག་ཅེས་དེ་བཞིན་གྱི་རྐྱེན་གྱིས་བསླབ་པ་ལ་འཇུག་པ་སྟེ། བདག་ཅེས་པའི་དངོས་པོ་ལ་བརྟེན་པས་མཉམ་པར་
མི་འགྱུར་ཞེས་དང་། བྱང་ཆུབ་སེམས་དཔའ་ཐེག་པ་ཆེན་པོ་དག་ལ་འགྲོ་བ་རྣམས་ཆོས་ཐམས་ཅད་ལ་སྙོམས་པར་ཞུགས་ཤིང་། ཤེས་པ་ནི་དོན་དམ་པར་སེམས་ཅན་ཐམས་ཅད་སྟོང་པ་ཉིད་ཀྱི་རང་བཞིན་དུ་མཉམ་པ་ཉིད་དུ་ཞུགས་པའོ། །ཀུན་རྫོབ་ཏུ་ཆོས་ཐམས་ཅད་སྒྱུ་མ་ལྟ་བུའི་
རང་བཞིན་དུ་མཉམ་པ་ཉིད་དུ་ཞུགས་པའོ། །གཞན་གྱི་རྐྱེན་གྱིས་མི་འཇུག་པ་ཞེས་པ་ནི། འཇིག་རྟེན་པ་ལྟར་བདག་ཏུ་རྟོག་པའི་གཞན་གྱི་རྐྱེན་གྱིས་མི་འཇུག་པ་ཞེས་བྱའོ། །ཐབས་དང་ཤེས་རབ་ཡོངས་སུ་ཟིན་པ་ཞེས་པ་ནི་གོང་དུ་བཤད་ཟིན་ཏོ། །བདག་དང་ཕ་རོལ་གཉིས་ཀའི་
དོན་དུ་བྱེད་པ་ལ་འཇུག་གོ་ཞེས་པ་ནི་ཐབས་དང་ཤེས་རབ་ཀྱིས་ཡོངས་སུ་ཟིན་པ་ནི་བསླབ་པ་དེ་ལྟ་བུལ་བདག་ཀྱང་སྤྱོད་ལ། གཞན་ལ་ཡང་བསྡུ་བ་རྣམ་བཞིའི་སྒོ་ནས་བསྡུ་ཞིང་སྤྱོད་དུ་གཞུག་པ་ཞེས་པ་སྟེ། དེ་བས་ན་འཇིག་རྟེན་པ་དང་ཉན་ཐོས་དང་བྱང་ཆུབ་སེམས་དཔའ་རྣམས་

ཀྱི་བསླབ་པ་དང་མཉམ་པར་མི་འགྱུར་རོ་ཞེས་པ་དང་སྦྱར་རོ། །དེ་ལྟ་བས་ན་གསང་བའི་བདག་པོ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཤེས་རབ་དང་ཐབས་ཡོངས་སུ་ཟིན་པ་བཞིན་དུ་ཆོས་ཐམས་ཅད་ལ་ནན་ཏན་བྱའོ་ཞེས་པ་ནི། གོང་དུ་བཤད་པ་རྣམས་
བསྡུས་པའི་ཚིག་སྟེ། འཇིག་རྟེན་དང་ཉན་ཐོས་པ་རྣམས་ཀྱི་བསླབ་པ་ཐབས་དང་ཤེས་རབ་མེད་པ་མ་ཡིན་ལ། ཤེས་རབ་དང་ཐབས་སུ་ལྡན་པའི་ཚུལ་ཇི་སྐད་བཤད་པ་སྟེ། དེ་ལྟ་བུར་ཆོས་ཐམས་ཅད་ལ་སྦྱར་བར་བྱའོ་ཞེས་པའོ། །དེ་ནས་བཅོམ་ལྡན་འདས་ཀྱིས་བྱམས་པ་དང་སྙིང་
རྗེ་ཆེན་པོའི་སྤྱན་གཉིས་ཀྱིས་སེམས་ཅན་གྱི་ཁམས་ལ་གཟིགས་ནས། ཕྱག་ན་རྡོ་རྗེ་བྱང་ཆུབ་སེམས་དཔའ་ལ་བཀའ་སྩལ་པ་ཞེས་པ་ནི། གོང་དུ་བྱང་ཆུབ་སེམས་དཔའི་བསླབ་པ་མིང་ཙམ་དུ་སྨོས་པ་རྣམས་རེ་རེ་ནས་ཞིབ་ཏུ་བཤད་པའི་ཕྱིར་བཀའ་སྩལ་པ་སྟེ། བྱམས་པ་ནི་སེམས་
ཅན་ཐམས་ཅད་བདེ་བར་འཇོག་པ་སྙིང་རྗེའི་སྡུག་བསྔལ་བ་ལས་བྲལ་བའི་མཚན་ཉིད་དེ། བྱམས་པ་དང་སྙིང་རྗེ་དེ་ཉིད་བཅོམ་ལྡན་འདས་ཀྱི་སྤྱན་ཏེ་བྱམས་པ་ནི་སེམས་ཅན་གྱི་ཁམས་རྣམས་ལ་ཡང་བདེ་བ་ལ་གཞག་པར་འོས། སྙིང་རྗེ་ནི་གང་སྡུག་བསྔལ་བ་ལས་གཞོལ་བར་འོས་པ་
གཟིགས་པའི་ཕྱིར། སྐབས་གཞན་དུ་ཕྱག་ན་རྡོ་རྗེ་གསང་བའི་བདག་པོ་ཞེས་སྨོས་པས། ཕྱག་ན་རྡོ་རྗེ་བྱང་ཆུབ་སེམས་དཔའ་ཞེས་སྨོས་པ་ཡང་བསླབ་པ་འདི་བྱང་ཆུབ་སེམས་དཔའ་རྣམས་སྤྱིའི་ཡིན་པའི་ཕྱིར། འདི་ལྟར་བྱང་ཆུབ་སེམས་དཔའ་རྣམས་བསམས་བཞིན་དུ་སྲོག་
གཅོད་པ་རབ་ཏུ་སྤང་བར་བྱའོ་ཞེས་པ་ནི། འདུལ་བ་ལ་སོགས་པའི་གཞུང་ལས་ཇི་སྐད་དུ་གྲགས་པ་རྣམ་པ་ལྔ་དང་ལྡན་པའི་མཚན་ཉིད་སྤང་བར་བྱའོ། །དབྱུག་པ་སྤང་བར་བྱའོ་ཞེས་པའོ། །ཇི་ལྟར་བདག་རང་ལ་ཇི་ལྟ་བ་བཞིན་དུ་ཕ་རོལ་པོའི་སྲོག་བཙའ་བར་བྱའོ་ཞེས་པ་ནི། མཚོན་ཆ་
འཆང་བ་དང་ཁོན་དུ་འཛིན་ཏེ་དགྲར་བྱེད་པ་ནི་སྲོག་གཅོད་པའི་ཡན་ལག་པས་དེ་དག་སྤང་བ་ནི་ཡན་ལག་ཡོངས་སུ་རྫོགས་པར་བྱ་བའི་ཕྱིར་རོ། །དེ་བཞིན་དུ་མ་བྱིན་པར་ལེན་པ་སོགས་ལྷག་མ་རྣམས་ཀྱང་གསལ་བས་ཇི་སྐད་དུ་འབྱུང་བ་ལས་ཟད་དེ། སྐབས་སྐབས་ནས་མི་སྤྱད་པར་བྱ་བ་

རྣམས་ལ་བཀྲོལ་ཡང་ཁྱིམ་པའི་ཕྱོགས་སུ་གཏོགས་པའི་བྱང་ཆུབ་སེམས་དཔའ་རྣམས་ལ་བྱའི། རབ་ཏུ་བྱུང་བ་རྣམས་ནི་འདུལ་བའི་གཞུང་དང་འགལ་བས་མ་ཡིན་ནོ་ཞེས་བྱང་ཆུབ་སེམས་དཔའི་ཚུལ་ཁྲིམས་ཀྱི་ལེའུ་ལས་བྱུང་ངོ་། །དེ་ནས་བཅོམ་ལྡན་འདས་ལ་ཕྱག་ན་རྡོ་རྗེ་གསང་བའི་
བདག་པོས་འདི་སྐད་ཅེས་གསོལ་ཏོ་ཞེས་པ་ནས་འཕྲལ་གྱི་བདེ་བ་ལ་སྤྱོད་ཅིང་། འཕྲལ་གྱི་རྒྱལ་པོ་བྱེད་ཀྱང་ལྟུང་བར་མི་འགྱུར་བ་བཤད་དུ་གསོལ་ཞེས་པའི་བར་དུ། གོང་དུ་དགེ་བ་བཅུའི་དངོས་པོ་རྣམས་བཤད་པ་སྟེ། རྩ་བ་ཉམས་པ་དང་མི་ཉམས་པར་འགྱུར་བའི་བྱེ་བྲག་དྲིས་པ་སྟེ། དེ་ལ་
རབ་ཏུ་བྱུང་བ་རྣམས་ཀྱི་སྡོམ་པ་ནི་སོ་སོར་ཐར་པའི་སྐབས་སུ་བཤད་པས་འདིར་མི་གླེང་། སྐབས་འདིར་ཁྱིམ་ལ་གནས་པའི་བྱང་ཆུབ་སེམས་དཔའ་ལ་བྱ་སྟེ། དེ་ཡང་རྣམ་པ་གཉིས་ཏེ་ཁྲིམས་ལྔའི་སྡོམ་པ་བླངས་པ་དང་། སྡོམ་པ་མནོས་པ་ཡི་དམ་དུ་བསྲུང་བའོ། །དེ་ལ་དགེ་བ་བཅུའི་ལས་ཀྱི་
ལམ་འདི་རྣམས་ཀྱི་སྡོམ་པ་ཉམས་པ་དང་ཞེས་པ་ནི། ཁྲིམས་ལྔའི་སྡོམ་པ་མནོས་པའི་བྱང་ཆུབ་སེམས་དཔའ་དགེ་བ་བཅུའི་ལས་ཀྱི་ལམ་རྣམས་ཀྱི་སྡོམ་པ་ཇི་ཙམ་གྱིས་མེད་པར་འགྱུར་ཞེས་པ་དེ་བཤད་དུ་གསོལ་ཞེས་པའོ། །ཤིན་ཏུ་རྩ་བ་ནས་འཆད་ཅེས་པ་ནི་ཁྲིམས་ལྔ་མ་མནོས་པར་བདག་
ཉིད་ཀྱི་ཡི་དམ་དུ་བསྲུང་བ་དེ་ཇི་ཙམ་མེད་པར་འགྱུར་ཞེས་པ་དེ་བཤད་དུ་གསོལ་ཞེས་པའོ། །ཇི་ལྟར་བཅོམ་ལྡན་འདས་བྱང་ཆུབ་སེམས་དཔའ་ཁྱིམ་ན་བུད་མེད་དང་བུ་མོ་དང་ཕྱུགས་འཁོར་རྣམས་ཀྱིས་བསྐོར་ཅིང་འཕྲལ་གྱི་བདེ་བ་ལ་སྤྱོད་ཅིང་ཕྱུག་ལ། རྒྱལ་པོ་བྱེད་ཀྱང་ལྟུང་བར་མི་འགྱུར་ཞེས་པ་ནི་
གོང་མའི་ཚིག་གཉིས་དཀྱུས་ནས་བཀྲོལ་ཏེ། བྱང་ཆུབ་སེམས་དཔའ་ཁྱིམ་ན་གནས་པ་ལ་བྱེ་བྲག་ཏུ་ཞུས་པ་སྟེ། ཁྱིམ་ན་གནས་པའི་བྱང་ཆུབ་སེམས་དཔའ་བུ་སྨད་དང་འཁོར་གྱིས་བསྐོར་ཞིང་ལྷ་དང་མིའི་ལོངས་སྤྱོད་ལ་སྤྱོད་ཅིང་དབང་བྱེད་ཀྱང་དེ་རྣམས་ཀྱི་དབང་དུ་མི་འགྱུར་བས། ཐབས་མཁས་
པས་དགེ་བ་བཅུའི་སྡོམ་པ་ལས་མི་ཉམས་ཤིང་ལྟུང་བར་མི་འགྱུར་བ་བཤད་དུ་གསོལ་ཞེས་ཞུས་པ་སྟེ། འོག་ནས་བཅོམ་ལྡན་འདས་ཀྱིས་སླར་བཤད་པ་དང་སྦྱར་རོ། །དེ་ལ་ཁྱིམ་ན་གནས་པའི་བྱང་ཆུབ་སེམས་དཔའ་རྣམས་ལ་བྱེ་བྲག་ཏུ་ཕྱེ་སྟེ་བཤད་པ་སྟེ། རྣམ་པ་མང་པོ་ལ་རྒྱལ་པོའི་དབང་བྱེད་

ཅེས་པ་ནི་ཐབས་ཀྱིས་ཡོངས་སུ་ཟིན་པས་རྩེད་མོ་དང་གར་དང་མིག་འཕྲུལ་དང་བཟོ་སྣ་མང་པོ་ལ་སོགས་པ་རབ་ཏུ་སྟོན་ཏོ་ཞེས་ཡུལ་དང་དུས་ཀྱི་དབང་གིས་ཐམས་ཅད་མཁྱེན་པ་རྩོལ་ལོ་ཞེས་པ་ནི། རབ་ཏུ་འབྱུང་བ་ནི་འདི་ཉིད་ཀྱིས་འབད་ཅིང་རྩོལ་གྱིས་ཁྱིམ་པའི་བྱང་ཆུབ་སེམས་
དཔའི་ནི་དུས་དང་ཡུལ་ཆད་པ་མེད་དེ། ཚེ་འདི་འབའ་ཞིག་མ་ཡིན་གྱི་ཚེ་རབས་དུ་མར་རྟོག་ཅིང་རྩོལ་བ་དང་། ཐབས་སྣ་དུ་མའི་སྒོ་ནས་སངས་རྒྱས་ཀྱི་ཞིང་ལ་སོགས་པའི་ཡུལ་གང་དུ་སྐྱེས་ཀྱང་རུང་བར་རྩོལ་བའོ། །དེ་བས་ན་གསུངས་པ། འདི་ལྟར་ཐབས་ཀྱིས་ཡོངས་སུ་ཟིན་པས་ཞེས་པ་ལ་སོགས་
པ་སྟེ། རོལ་མོ་ལ་སོགས་པ་བཟོ་རྣམ་པ་མང་པོ་སྟོན་པ་ཡང་། སེམས་ཅན་རྣམས་སོ་སོའི་རྗེས་སུ་མཐུན་པར་སྦྱར་ནས་བསྡུ་བ་རྣམ་བཞིའི་སྒོ་ནས་བསྡུས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་གདོན་པའི་ཕྱིར་རོ། །དེ་ནི་སྲོག་གཅོད་པ་རབ་ཏུ་སྤངས་པ་ཡིན་ཞེས་པ་ན་ལོག་པར་ལྟ་
བ་རབ་ཏུ་ཡང་སྤངས་ཤེས་པ་ཡིན་ཞེས་པའི་བར་བྱང་ཆུབ་སེམས་དཔའི་ཁྲིམས་ལྔ་པོའི་དངོས་པོ་སྨོས་པའོ། །བསླབ་པའི་གནས་འདི་ལྔ་བཟུང་ནས་ཞེས་པ་ནས། ཐབས་དང་ཤེས་རབ་ཀྱིས་ཟིན་པས་བསླབ་པའི་བར་དུ་བསླབ་པ་དེ་རྣམས་ཀྱིས་རྗེས་སུ་བསྔགས་པ་དང་། དེ་ལྟ་བུར་སློབ་པས་ལྟུང་
བའི་རྩ་བ་འདི་བཞི་སྲོག་གི་ཕྱིར་ཡང་ཉམས་པར་མི་བྱའོ་ཞེས་པ་དང་སྦྱར་ཏེ། ཁྱིམ་པའི་བྱང་ཆུབ་སེམས་དཔའ་འདི་སྐད་སྨོས་པའི་བསླབ་པ་འདི་ལྔ་ལ་དད་པས་བསླབས་ནས་སྔོན་གྱི་དེ་བཞིན་གཤེགས་པའི་བསླབ་པ་བླ་ན་མེད་པ་དེ་བཞིན་གཤེགས་པས་བསྔགས་པས་བསྔགས་པ་བསླབ་པ་དང་
རྗེས་སུ་མཐུན་པར་བསླབ་པ་ཡིན་ནོ་ཞེས་སོ། །དེ་ཅིའི་ཕྱིར་ཞེ་ན། སྔོན་གྱི་དེ་བཞིན་གཤེགས་པས་ཀྱང་འདུས་མ་བྱས་པའི་ཚུལ་ཁྲིམས་ཀྱི་ཕུང་པོ་ལ་གནས་ནས། འདུས་བྱས་པའི་ཚུལ་ཁྲིམས་ཐབས་དང་ཤེས་རབ་ཡོངས་སུ་ཟིན་པས་བསླབས་ནས་བླ་ན་མེད་པ་བརྙེས་ཏེ། དེ་ལྟ་བས་ན་འདི་
ལྟར་བསླབ་པ་ནི། དེ་དག་གི་རྗེས་སུ་སློབ་པ་ཞེས་བྱའོ། །འདུས་མ་བྱས་པའི་ཚུལ་ཁྲིམས་ཀྱི་ཕུང་པོ་ལ་གནས་ནས་ཞེས་པ་ནི་ཆོས་ཐམས་ཅད་ཐོག་མ་ནས་མ་བྱུང་མ་སྐྱེས་པ་སྟོང་པ་ཉིད་ཀྱི་རང་བཞིན་ལ་ཆུད་པར་གནས་ནས་ཞེས་པའོ། །འདུས་བྱས་པའི་ཚུལ་ཁྲིམས་ཀྱི་ཞེས་པ་ནི་སྲོག་གཅོད་པ་

རབ་ཏུ་སྤང་བ་ཡིན་ཞེས་པ་ལ་སོགས་པ་མིང་གིས་སྨོས་པ་རྣམས་ཏེ། དེ་བས་ན་ཐབས་དང་ཤེས་རབ་ཀྱིས་ཡོངས་སུ་ཟིན་པ་ཞེས་པ་ནི་སྔ་མ་བཞིན་ནོ། །དེ་ལྟར་སློབ་མ་དེས་འོག་ནས་མིང་གིས་འབྱུང་བའི་རྩ་བ་འདི་བཞི་སྲོག་གི་ཕྱིར་ཡང་ཉམས་པར་མི་བྱ་སྟེ། འདི་བཞི་བཤད་པ་ཡང་དམ་ཚིག་གི་
སྐབས་སུ་སྔར་བཤད་ཟིན་ཏོ། །དེ་ཅིའི་ཕྱིར་ཞེ་ན། དེ་ནི་སླར་འབྱུང་དུ་མེད་པ་ཞེས་པ་ནི་འདི་བཞི་དང་མི་ལྡན་ན་བྱང་ཆུབ་སེམས་དཔའ་ཞེས་ཀྱང་མི་བྱ་སྟེ་སླར་གསོར་མི་རུང་ངོ་ཞེས་པའོ། །ཐབས་དང་ཤེས་རབ་ཏུ་བྲལ་བ། །ཞེས་པ་ནི་དེ་བཞི་ནི་འཇིགས་པར་བྱེད་པའི་ཐབས་དང་ཤེས་རབ་ཏུ་སྦྱར་བར་རང་
བཞིན་གྱིས་ཉོན་མོངས་པ་ཡིན་ཏེ་སླར་དབྱུང་དུ་མེད་པ་ཞེས་པ་དང་སྦྱར་རོ། །དེ་བས་ན་གསུངས་པ་དེ་ཅིའི་ཕྱིར་ཞེ་ན། འདས་པའི་སངས་རྒྱས་རྣམས་དང་། གང་མ་བྱོན་པའི་སངས་རྒྱས་རྣམས་དང་། ད་ལྟར་བཞུགས་པའི་མགོན་པོ་ཡང་ཤེས་རབ་དང་ཐབས་ཡོངས་སུ་ཟིན་པར་བསླབས་ནས་བླ་ན་
མེད་པའི་བྱང་ཆུབ་འཐོབ་བོ་ཞེས་པ་སྟེ། དེ་བས་ན་འདི་བཞི་དང་མི་ལྡན་ཞིང་ཐབས་དང་ཤེས་རབ་མེད་ན་བླ་ན་མེད་པའི་བྱང་ཆུབ་འདུས་མ་བྱས་པ་ཐོབ་པར་མི་འགྱུར་བས་སླར་དབྱུང་དུ་མེད་དོ་ཞེས་པའོ། །དེ་ལྟར་ཐབས་དང་ཤེས་རབ་ཏུ་མི་ལྡན་པས་ན་སླར་དབྱུང་དུ་མེད་ན། ཉན་ཐོས་པ་རྣམས་ལ་ངས་
ཐབས་དང་ཤེས་རབ་ཏུ་མི་ལྡན་པའི་བསླབ་པ་བཤད་ཅེ་ན། ཐབས་དང་མི་ལྡན་པའི་ཡེ་ཤེས་ཉན་ཐོས་རྣམས་ལ་བསླབ་པ་བཤད་པ་ནི། དཔའ་བོ་ཆེན་པོ་དེ་དག་གཟུང་བའི་ཕྱིར་རོ་ཞེས་པ་སྟེ། ཉན་ཐོས་རྣམས་ལ་ངས་ཐབས་དང་ཤེས་རབ་ཏུ་མི་ལྡན་པའི་བསླབ་པ་བསྟན་པ་ཡང་ངེས་པའི་དོན་དུ་བསྟན་
པ་མ་ཡིན་གྱི། དེ་དག་སྣོད་དང་སྦྱར་ཞིང་བཀྲི་བའི་ཕྱིར་རོ་ཞེས་པའོ། །བཅོམ་ལྡན་འདས་རྣམ་པར་སྣང་མཛད་ཀྱི་སྐུ་མི་ཟད་པ་ལ་སོགས་པའི་རྡོ་རྗེའི་རྒྱན་གྱི་འཁོར་ལོ་འདིར་བྱིན་གྱིས་བརླབས་པ་ལས་སྔགས་བཟླས་པའི་སྐབས་ལ་ཐོག་མར་སྤྱིར་ཕྱི་ནང་གི་བཟླས་པ་ཡན་ལག་བཞི་བསྟན་ཏེ། དེའི་
འོག་ཏུ་དེ་བཞིན་གཤེགས་པའི་སྙིང་པོ་བཞིའི་སྐབས་སུ་ནང་གི་བཟླས་པའི་ཡན་ལག་བཞི་བསྟན། དེའི་འོག་ཏུ་དཔའ་བོ་ཆེན་པོ་སྙིང་པོའི་སྐབས་སུ་ནང་གི་བཟླས་པའི་ཡན་ལག་གསུམ་བསྟན་ཏེ་དེ་རྣམས་ཀྱང་བཟླས་པའི་གྲངས་སུ་དུས་ངེས་པའི་བསྙེན་པར་བྱས་པ་གསུངས་སོ། །ད་ནི་ཡི་གེ་བརྒྱ་

པའི་སྐབས་སུ་འདིར་ཡང་བཟླས་པའི་ཡན་ལག་གཅིག་དང་གྲངས་དང་དུས་ངེས་པའི་བསྙེན་པ་མ་ཡིན། ཀུན་དུ་སངས་རྒྱས་ཀྱི་སྐུར་བསྒྲུབ་པའི་གནས་ཡོངས་སུ་གྱུར་པའི་བར་དུ་བཟླས་པའི་མཚན་མ་འཆད་དེ། དེ་བས་ན་བཟླས་པ་དེ་རྣམས་ཀྱང་སྒོམ་རིམ་ཙམ་ཡང་བཤད་པར་ཤེས་
པར་བྱ་སྟེ། དང་པོ་ཉིད་དུ་ཕྱི་ནང་གི་བཟླས་པའི་ཡན་ལག་བཞི་ཕྱི་དང་ནང་གཉིས་ཀ་ལ་དམིགས་པས་སྤོམ་མོ། །དེའི་འོག་ཏུ་ནང་གི་བཟླས་པའི་ཡན་ལག་བཞི་ཕྱི་རོལ་དུ་སངས་རྒྱས་ཀྱི་སྐུ་ལ་མི་དམིགས་པར་ནང་དུ་རང་གི་སྙིང་གར་དེ་བཞིན་གཤེགས་པའི་སྐུ་བསམས་ནས་སློབ་པ་དེ་བས་
ཕྲའོ། །དེའི་འོག་ཏུ་དཔའ་བོ་ཆེན་པོའི་སྐབས་སུ་སྙིང་གར་དེ་བཞིན་གཤེགས་པའི་སྐུར་བསམས་པ་ཡང་བཏང་སྟེ། དབང་ཆེན་ལ་སོགས་པའི་དཀྱིལ་འཁོར་གང་རུང་བ་བསམས་ནས་ཡན་ལག་གསུམ་དུ་བྱ་སྟེ་ཟློས་པས་དེ་བས་ཀྱང་ཕྲའོ། །ཡི་གེ་བརྒྱ་པའི་སྐབས་འདིར་ནི་བདག་སྟོང་པ་ཉིད་ཀྱི་ཏིང་ངེ་
འཛིན་ལ་གནས་ནས་སྙིང་པོའི་སྒྲ་ཙམ་ལ་ཡན་ལག་གཅིག་པུར་བྱ་སྟེ། ཟློས་པས་གོང་མ་ཀུན་ཕྲ་བར་རིག་པར་བྱའོ། །དེ་ལ་ཡི་གེ་བརྒྱ་པ་ཡང་ཀུན་དུ་སངས་རྒྱས་པ་ཡིན་ཡང་། ཡི་གེ་ཨཾ་གིས་བྱིན་གྱིས་བརླབ་པ་སྟེ། དེ་ཡང་ལེའུ་ལྔས་ཡི་གེ་བརྒྱ་པའི་བཤད་པའི་ཡན་ལག་རྫོགས་པར་ཤེས་
པར་བྱ་བ་ནི། ཡི་གེ་བརྒྱ་པ་འབྱུང་བའི་ལེའུ་དང་། སྒྲའི་འབྲས་བུའི་སྦྱོར་བ་བསྟན་པའི་ལེའུ་དང་། ཡི་གེ་བརྒྱ་པའི་ལེའུ་བསྒྲགས་པའི་ལེའུ་དང་། བདག་བསྒྲུབ་པའི་ལེའུ་དང་ཀུན་དུ་བྱང་ཆུབ་པའི་རང་བཞིན་བསྟན་པའི་ལེའུ་རྣམས་ཏེ། དེ་ལ་འདིར་དང་པོར་ཡི་གེ་བརྒྱ་པ་འབྱུང་བའི་ལེའུ་བཤད་དེ།
དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་འཁོར་འདུས་པ་ཐམས་ཅད་ལ་གཟིགས་ནས་ཞེས་པ་ལ་སོགས་པ་སྟེ། དེ་ལ་ཡི་གེ་བརྒྱ་པ་ནི་ཨཾ་ཞེས་པ་ཉིད་ཀྱི་ནང་དུ་འདུས་པར་ཤེས་པར་བྱ་སྟེ། དེ་ནི་ཀླད་ཀོར་ནི་ང་དང་། ཉ་དང་། ཎ་དང་། ན་དང་མ་རྣམས་ཀྱི་རང་བཞིན་ཏེ། ངའི་ནང་དུ་
ཀའི་རིས་འདུས། ཉའི་ནང་དུ་ཚའི་རིས་འདུས། ཎའི་ནང་དུ་ཊའི་རིས་འདུས། ནའི་ནང་དུ་ཏའི་རིས་འདུས། མའི་ནང་དུ་པའི་རིས་འདུས་ཏེ། ཡི་གེ་དེ་ཉི་ཤུ་དང་རྣམ་པར་ཤེས་པའི་ལེའུ་ལས་བཤད་པ་དང་སྦྱར་ནས། ཨ་དང་ཨོཾ་ནང་དུ་ཡང་འདུས། རྀ་རཱྀ་དང་ལྀ་ལཱྀ་ནི་ར་དང་ལ་དངོས་སོ། །ཨི་

ཨཱིའི་ནང་དུ་བྷ་འདུས་ཏེ། དེ་ལྟར་ས་ར་ལ་བ་རྣམས་ཀྱང་དེར་འདུས་ཏེ། ཨཾ་ལ་སོགས་པ་གང་དང་ལྡན་པ་དང་། ཡི་གེ་ཉི་ཤུ་ལྔ་རྣམས་བྱང་ཆུབ་པ་དང་། སྤྱོད་པ་དང་ཀུན་དུ་སངས་རྒྱས་པ་དང་མྱ་ངན་ལས་འདས་པ་བཞི་རེ་རེ་ལ་ཡི་གེ་ཉི་ཤུ་ལྔ་ལྔར་སྦྱར་ནས་བརྒྱ་པར་འགྱུར་ཏེ། ཡི་གེ་དེ་རྣམས་
གཅིག་ཏུ་བསྡུས་པ་ནི་ཨ་ཞེས་པ་སྟེ། ཨ་ནི་ཤེས་བྱ་དང་ཡེ་ཤེས་གཉིས་ཀ་སྟོང་པའི་མཚན་ཉིད་དེ། ཀླད་ཀོར་ནི་སྟོང་པའི་མཚན་ཉིད་དོ། །ཡི་གེ་ཨ་བཞི་ཆར་ཡང་དེའི་ནང་དུ་འདུས་པས། ཨཾ་དེ་ཉིད་བཅོམ་ལྡན་འདས་ཀུན་དུ་སངས་རྒྱས་པའི་རང་བཞིན་ཡི་གེ་བརྒྱ་པ་ཞེས་བྱའོ། །ད་དང་།
ཉ་དང་། ཎ་དང་། ན་དང་མ་རྣམས། ཤ་དང་། པ་དང་། ཨཾ་དང་ཨ་རྣམས་ནི་ཏིང་ངེ་འཛིན་ཐམས་ཅད་ཀྱི་དབང་པོ་པས་འདིར་ཡི་གེ་མི་བགྲང་། འཁོར་འདུས་པ་ཐམས་ཅད་ལ་གཟིགས་ནས་ཞེས་པ་ནི་སྔར་བཤད་པ་བཞིན་ནོ། །བསྟན་པ་གདོན་མི་ཟ་བར་དངོས་གྲུབ་པར་བཞེད་ནས།
བསྟན་པ་ཞེས་པའི་ཚིག་ནི་འདུལ་བའི་འགྲོ་བ་རྣམས་ལ་བསླབ་པའི་ཕྱིར་བསྟན་པ་ཞེས་བྱ་སྟེ། མདོ་སྡེ་ལ་སོགས་པ་ཐམས་ཅད་ལ་ཡང་བྱ་མོད་ཀྱི། སྐབས་འདིར་ནི་སྔགས་བསྟན་པ་ལ་བྱ་སྟེ་དེ་ཡང་བཟླས་པའི་གྲངས་དང་། དུས་ཏེ་ངེས་པ་སྔོན་དུ་བསྟན་པ་བྱས་ནས་བསྒྲུབ་པར་བྱ་བ་གོང་དུ་
བཤད་པ་རྣམས་བཟླས་པའི་གྲངས་སུམ་འབུམ་ལ་སོགས་པ་བྱས་ནས་བསྒྲུབ་བོ་ཞེས། ཡང་བཤད་པ་རྒྱུད་ཡོངས་སུ་དག་པའི་སེམས་ཅན་རྣམས་ལ་ཡང་གསུངས་ཀྱི། ཐམས་ཅད་ལ་མ་ཡིན་ནོ་ཞེས་འབྱུང་བས་གྲངས་དང་དུས་ངེས་པའི་སྔོན་དུ་བསྙེན་པ་བྱས་ཀྱང་རྒྱུད་མ་དག་པའི་སེམས་
ཅན་རྣམས་ཀྱིས་མི་འགྲུབ་ཀྱང་སྲིད་དེ་དེ་དག་ནི་གདོན་མི་ཟ་བའོ། །འདིར་ནི་གནས་ཡོངས་སུ་འགྱུར་བའི་མཚན་མ་བྱུང་གི་བར་དུ་བཟླས་པ་གསུངས་པས་མཚན་མ་བྱུང་བ་དེ་ཉིད་འགྲུབ་པ་སྟེ། མཚན་མ་དེ་བྱུང་ནས་མི་འགྲུབ་པར་མི་སྲིད་པས་གདོན་མི་ཟ་བ་ཞེས་བྱ་སྟེ། བཅོམ་ལྡན་འདས་བསྟན་
པ་དེ་གྲུབ་པར་བཞེད་ནས་སྔགས་ཀྱི་མགོན་པོ་ཤིན་ཏུ་འབར་བ་གསུངས་སོ་ཞེས་པ་དང་སྦྱར་རོ། །སྔགས་ཐམས་ཅད་ཀྱི་དབང་པོ་སྔགས་ཀྱི་རྒྱལ་པོ་མགོན་པོ་ཤིན་ཏུ་འབར་བ་ཞེས་པ་ནི་ཀུན་དུ་སངས་རྒྱས་པའི་རང་བཞིན་ཨཾ་ཞེས་པ་དེ་ཉིད་བྱེ་བྲག་ལ་བྱ། དེའི་རང་བཞིན་ཀྱང་རྣམ་པ་གསུམ་

དུ་རིག་པར་ཤེས་པར་བྱ་སྟེ། ཆུད་པའི་མཚན་ཉིད་དང་གཞུང་གི་མཚན་ཉིད་དེ། གཞུང་གི་མཚན་ཉིད་ལ་ཡང་དོན་དམ་པ་དང་ཀུན་རྫོབ་ཀྱི་མཚན་ཉིད་དེ་དེ་ལྟར་རྣམ་པ་གསུམ་མོ། །དེ་ལ་ཆུད་པའི་དོན་དམ་པའི་རང་བཞིན་ནི་ཡི་གེ་ཨ་དང་ཞེས་པ་དང་། དེ་ལ་སོགས་པའི་
སྔགས་ཀྱི་ཡི་གེ་རྣམས་སོ། །དེ་ལ་སྔགས་ཐམས་ཅད་ཀྱི་དངོས་པོ་ཞེས་པ་སྔགས་ཐམས་ཅད་ཅེས་པ་ནི་འཇམ་དཔལ་གཞོན་ནུར་གྱུར་པ་ལ་སོགས་པའི་ཏིང་ངེ་འཛིན་གྱི་རང་བཞིན་རྣམ་པར་ཐར་པའི་ཡེ་ཤེས་ཕྱོགས་གཅིག་པ། ཆོས་ཐམས་ཅད་པ་དང་ཞེས་བྲལ་ལོ་ཞེས་པ་ལ་སོགས་པ་དང་།
ཀུན་རྫོབ་ཏུ་དེ་དག་ཉིད་ཀྱི་སྐུར་སྣང་བ་དང་། གཞུང་གི་ཆོས་སུ་ཡི་གེ་ཨཾ་ལ་སོགས་པ་ནི་སྔགས་ཐམས་ཅད་དེ། དེ་དག་གི་དབང་པོས་ནི་བཅོམ་ལྡན་འདས་ཀུན་དུ་སངས་རྒྱས་པའི་ཡི་གེ་བརྒྱ་པ་སྟེ་ཕྱོགས་གཅིག་པ་རྣམས་ཀུན་དུ་འདུས། ཀུན་རྫོབ་ཏུ་ཡང་བཅོམ་ལྡན་འདས་ཀྱི་སྐུ་ལས་སྔགས་
ཕལ་གྱི་གཟུགས་རྣམས་འབྱུང་། གཞུང་གི་ཆོས་ཀྱང་ཡི་གེ་ཨཾ་ལ་སོགས་པ་ནི་ཡི་གེ་ཐམས་ཅད་འབྱུང་སྟེ། ཀུན་རྫོབ་དང་དོན་དམ་པ་ཀུན་དུ་ཡང་སྔགས་ཐམས་ཅད་དེར་གཏོགས་ཤིང་དེའི་དབང་གིས་གྱུར་པས་ན་ཨཾ་དེ་སྔགས་ཐམས་ཅད་ཀྱི་དབང་པོ་ཞེས་བྱའོ། །སྔགས་ཀྱི་རྒྱལ་པོ་ཞེས་
པ་ནི་ཀུན་རྫོབ་དང་དོན་དམ་པ་གཉིས་ཀར་ཡང་སྔགས་ཕལ་ལས་ཡོན་ཏན་ཐམས་ཅད་ཀྱིས་འཕགས་པའི་ཕྱིར་རོ། །སྔགས་ཀྱི་མགོན་པོ་ཞེས་པ་ནི་སྐྱབས་ཞེས་པའི་དོན་ཏེ། སྔགས་ཐམས་ཅད་ཀྱི་གོང་དུ་བཤད་པའི་ཚུལ་གྱིས་དེ་ལས་བྱུང་ཞིང་དེར་འདུ་བའི་ཕྱིར་ཤིན་ཏུ་འབར་བ་ཞེས་པ་
ནི་མཐུ་ཕུན་སུམ་ཚོགས་པ་བསྟན་པ་སྟེ། མཐུ་ཆེན་དང་ལྡན་ཞེས་པ་སྟེ་དེ་ལྟ་བུའི་སྙིང་པོ་འཇམ་པའི་ཚིག་གི་ཕྱག་ན་རྡོ་རྗེས་གསུངས་