Luận tạng Tây Tạng (Tengyur) — Tập 69

མས་ཅད་པས་ཁ་དོག་ཐམས་ཅད་དུ་རིག་པར་བྱའོ། །འཇིག་རྟེན་དབང་པོའི་སྔགས་རྣམས་ནི། །དཀར་
ཏེ་ལས་ཀྱི་རིམ་པའོ། །ཞེས་པ་ནི་སྤྱན་རས་གཟིགས་ཀྱི་དབང་པོ་སོ་སོར་རྟོག་པའི་ཡེ་ཤེས་ཀྱི་རང་བཞིན་ཆོས་ཐམས་ཅད་འཁྲུ་བར་བྱེད་པའི་བདག་ཉིད་པས་ཁ་དོག་དཀར་པོར་ཤེས་པར་བྱའོ། །གྲུ་བཞི་ལྡན་པར་གདོན་མི་ཟ། །ཟླུམ་པོར་ཡང་ནི་རིམ་བཞིན་ཏེ། །ཟླ་བ་ཁམ་འདྲ་ཁྲུ་གསུམ་དུ། །དེ་འདྲ་དབྱིབས་
ཞེས་སྒྲོགས་པ་ཡིན། །ཞེས་པ་ནི་ལྷ་དེ་རྣམས་ཀྱི་དཀྱིལ་འཁོར་དབང་ཆེན་ལ་སོགས་པའི་དབྱིབས་བཤད་པ་སྟེ་རིམ་བཞིན་དུ་ཤེས་པར་བྱའོ། །གཟུགས་ནི་གཉིས་སུ་རིག་པར་བྱ། །བུད་མེད་དང་ནི་སྐྱེས་པར་རོ། །ཞེས་པ་ནི་ལྷ་རྣམས་ཀྱི་གཟུགས་བཤད་པ་སྟེ། དེ་ལ་ལྷ་རྣམས་ཀྱང་རྣམ་པ་གསུམ་སྟེ།
རྣམ་པར་སྨིན་པའི་གཟུགས་དང་གནས་ཡོངས་སུ་གྱུར་པ་དང་སྤྲུལ་པ་སྟེ། དེ་ལ་རྣམ་པར་སྨིན་པའི་གཟུགས་ནི་རང་གི་ལས་དང་བསོད་ནམས་ལས་སྐྱེས་པའོ། །གནས་ཡོངས་སུ་གྱུར་པ་ནི་བསྒྲུབས་པ་ལས་གྲུབ་པའི་གཟུགས་སོ། །སྤྲུལ་པ་ནི་ཏིང་ངེ་འཛིན་ལ་སོགས་པའི་དབང་གིས་ཡིད་ལ་

བསམས་པར་གྱུར་པ་སྟེ་དེ་དག་ལ་ལ་ནི་སྐྱེས་པར་སྣང་། ལ་ལ་ནི་བུད་མེད་དུ་སྣང་བའོ། །ཡང་ན་ཀུན་དུ་ཐམས་ཅད་ཀྱང་། །ཁ་དོག་གཟུགས་དང་དབྱིབས་རྣམས་ནི། །ཞེས་པ་ཡང་ན་གོང་དུ་ཁ་དོག་དཀར་གནག་ལ་སོགས་པ་སྨོས་པ་དང་དབྱིབས་གྲུ་བཞི་ལ་སོགས་པ་སྨོས་སོ། །
གཟུགས་བུད་མེད་དང་སྐྱེས་པར་སྨོས་པ་དེ་དག་ཆད་པ་མེད་དེ། དེ་དག་ཀུན་ཀྱང་ཁ་དོག་ཐམས་ཅད་དང་དབྱིབས་ཐམས་ཅད་དང་གཟུགས་ཐམས་ཅད་དུ་ཤེས་པར་བྱའོ་ཞེས་པ་སྟེ། ཅིའི་ཕྱིར་ཞེ་ན་གསུངས་པ། བསམ་ཡས་ཡེ་ཤེས་ལས་བྱུང་བས། །དེ་བས་དེ་ཡང་བསམ་ཡས་ཏེ། །ཞེས་
པ་སྟེ་དེ་ཐམས་ཅད་ཀྱང་དེ་བཞིན་ཉིད་ཀྱི་ཡེ་ཤེས་བསམ་དུ་མེད་པར་འབྱུང་བ་ཤ་སྟག་གི་ཁ་དོག་དང་དབྱིབས་ལ་སོགས་པ་ཆད་པ་མེད་པས་བསམ་དུ་མེད་དོ། །དེ་ཡང་ཅིའི་ཕྱིར་ཞེ་ན། སེམས་ཅན་དོན་བྱེད་ཐ་དད་པས། །ཡེ་ཤེས་མཁས་པས་རྟག་ཏུ་མཁྱེན། །ཞེས་པ་སྟེ་དེ་དག་ཁ་དོག་དང་
དབྱིབས་ལ་སོགས་པ་སྤྱད་པ་མེད་པ་ཡང་སེམས་ཅན་གྱི་དོན་སྣ་ཚོགས་ལ་མཁས་པའི་ཡེ་ཤེས་དེས་གདུལ་བའི་འགྲོ་བ་དང་རྗེས་སུ་མཐུན་པ་གཟུགས་ལ་སོགས་པ་སྟོན་པའི་ཕྱིར་རོ། །ཇི་ཙམ་རྒྱ་ཆེར་ཡིད་གྱུར་པ། །དེ་ཡི་ཚད་དུ་ཤེས་པར་བྱའོ། །སྟན་རྣམས་དང་ནི་ཕྱག་རྒྱ་དང་། །ལྷ་
རྣམས་གོ་རིམས་ཀྱང་དེ་བཞིན། །ཞེས་པ་ནི་ལྷ་ལ་སོགས་པའི་ཚད་བཤད་པ་སྟེ་ནང་དུ་ཡིད་ལ་བསམ་པའམ་ཕྱི་རོལ་དུ་བྲི་བ་ལ་སོགས་པ་ཀུན་ཀྱང་ཡིད་ལ་ཇི་ཙམ་དུ་འདོད་པ་དེ་ཙམ་དུ་བསམ་པའམ་བྲི་བར་བྱ་ཞེས་པའོ། །ལྷ་རྣམས་རིམ་ཀྱང་དེ་བཞིན་ཏེ། །ཞེས་པ་ནི་དཀྱིལ་འཁོར་དུ་བྲི་བའི་
ལྷ་རྣམས་ཀྱང་སྙིང་པོའི་དཀྱིལ་འཁོར་དུ་བྲི་བ་རྣམས་ནི་དཀྱིལ་འཁོར་སའི་ཞེང་ཆེ་བས་ལྷའི་གཟུགས་ཀྱང་ཆེ་བར་བྱ། དེའི་གོ་རིམས་ཀྱང་དེ་བཞིན་དུ་རིམ་གྱིས་ཆུད་པར་བྱ་ཞེས་པའོ། །སངས་རྒྱས་གང་ལས་བྱུང་བ་ནས། །ཕྱག་རྒྱའང་དེ་ནས་བྱུང་ཞེས་བྱ་བ་ནི་ཕྱག་རྒྱ་གང་ནས་བྱུང་བའི་ཁུངས་བཤད་
པ་སྟེ། སངས་རྒྱས་རྣམས་ཀྱི་ཆོས་ཀྱི་དབྱིངས་ལས་བྱུང་བའི་ཕྱག་རྒྱ་དེས་བདག་དང་སློབ་མ་ལ་སོགས་པ་ལྷའི་ལུས་བྱིན་གྱིས་བརླབ་པ་དང་། ཕྱག་རྒྱ་དེས་སློབ་མ་ལ་སོགས་པ་བསྲུང་བ་སྟེ། དེ་བསྲུངས་ན་ཆོས་ཀྱི་དབྱིངས་ཀྱི་མཚན་ཉིད་ཀྱིས་བཏབ་པས་ཅིས་ཀྱང་མི་ཚུགས་པར་འགྱུར་བ་ནི་འཇིག་

རྟེན་རྒྱལ་པོའི་རྒྱ་དང་ལྡན་པའི་སྐྱེས་བུ་ལ་སུས་ཀྱང་གཙེ་བར་མི་འགྱུར་བ་དང་འདྲའོ་ཞེས་སྔར་ཡང་ཞིབ་ཏུ་བཤད་དོ། །དེ་བས་ཆོས་དབྱིངས་མདོ་རུ་ནི། །ཕྱག་རྒྱའི་མཚན་མ་ཞེས་ཀྱང་བྱ། །ཞེས་པ་ནི་མདོར་ན་ཕྱག་རྒྱ་རྣམས་ཆོས་ཀྱི་དབྱིངས་ཀྱི་མཚན་མ་ཡིན་པར་ཤེས་པར་བྱའོ་ཞེས་པའོ། །
དབང་སྦྱིན་རྣམ་གསུམ་རིག་པར་བྱ། །ཞེས་པ་ནས། དེའི་སྔགས་བསྒྲགས་པ་ཡིན་ཞེས་པའི་བར་དུ་དབང་བསྐུར་བ་རྣམ་པ་གསུམ་བཤད་པ་སྟེ་ཕྱག་རྒྱས་དབང་བསྐུར་བ། དེ་ནི་ལས་དང་བྱ་བ་སྟེ། །ཞེས་པ་ནི་སྙིང་རྗེ་ཆེན་པོ་ལས་འབྱུང་བ་དང་། ཡི་གེ་འཁོར་ལོ་བསྐོར་བའི་དཀྱིལ་འཁོར་
དུ་ནམ་སློབ་དཔོན་དང་སློབ་མ་རྒྱ་ཆེ་བ་ལ་མོས་པ་དག །ཕྱག་རྒྱས་དབང་བསྐུར་བར་བྱ་བར་བཤད་པ་སྟེ། དཀྱིལ་འཁོར་དེ་གཉིས་གང་ཡང་རུང་བའི་མདུན་དུ་དབང་བསྐུར་བའི་དཀྱིལ་འཁོར་དང་། བུམ་པ་ལ་སོགས་པ་ལ་མི་ལྟོས་པར་ཀུན་དུ་བཟང་པོ་ལ་སོགས་པ་བྱང་ཆུབ་སེམས་
དཔའི་ཕྱག་རྒྱ་དང་འོག་ནས་འབྱུང་བའི་ཕྱག་རྒྱས་དབང་བསྐུར་བའོ། །ལས་དང་བྱ་བར་བྲལ་ཞེས་པ་ནི་དབང་བསྐུར་བའི་བུམ་པ་དང་དཀྱིལ་འཁོར་དང་དུང་དང་འཁོར་ལོ་ལ་སོགས་པའི་ཆོ་ག་རྣམས་དང་བྲལ་བ་ཞེས་པའོ། །གཉིས་པོ་ཀུན་གྱི་གསུངས་པ་ནི། །ལས་དང་བྱ་བ་ལས་བྱུང་
ཞེས་པ་ནི་སྙིང་རྗེ་ཆེན་པོ་འབྱུང་བ་དང་། ཡི་གེ་འཁོར་ལོ་བསྐོར་བའི་དཀྱིལ་འཁོར་གྱི་མདུན་དུ་དབང་བསྐུར་བའི་དཀྱིལ་འཁོར་བྲིས་ནས། ཇི་སྐད་དུ་སྔར་གསུངས་པའི་ཆོ་ག་བཞིན་དུ་དབང་བསྐུར་གསུངས་པའོ། །གསུམ་པོ་ཡིད་ཀྱིས་རིག་པར་བྱ། །དུས་དང་དུས་ཡུལ་སྤངས་པའོ། །
ཞེས་པ་ནི་གསང་བའི་དཀྱིལ་འཁོར་དུ་ཡིད་ཀྱིས་དབང་བསྐུར་བ་སྟེ་དངོས་ཀྱི་འོག་ནས་འབྱུང་བའོ། །བླ་མ་ཚུལ་བཞིན་རིམ་གྲོ་བྱས། །ཇི་ལྟར་ཕན་པར་བསྟན་པ་ནི། །དབང་བསྐུར་བའོ་ཞེས་སངས་རྒྱས་པ། །དེ་ནི་བསྔགས་ཤིང་བསྒྲགས་པ་ཡིན། །ཞེས་པ་ནི་དཀྱིལ་འཁོར་གོང་མ་གཉིས་
སུ་ཕྱག་རྒྱས་དབང་བསྐུར་ནས་རྗེས་སུ་གནང་བའི་ཚིག་སྨྲས་པ་ལ་བྱ་སྟེ། ཕྱག་རྒྱས་དབང་བསྐུར་བའི་འོག་ཏུ་སློབ་དཔོན་སློབ་མའི་ནན་ཏན་དང་རིམ་གྲོ་ལ་སོགས་པས་མགུ་ནས། ཁྱོད་ཀྱིས་དེང་ཕན་ཆད་ཆོས་ཀྱི་འཁོར་ལོ་བསྐོར་ཅིག་ཅེས་པ་ལ་སོགས་པའི་ཚིག་ཏུ་ཤེས་པར་བྱའོ། །ཕྱག་རྒྱས་

དབང་བསྐུར་བ་དང་པོ་དང་དབང་བསྐུར་བ་གཉིས་པ་ནི་སྙིང་རྗེ་ཆེན་པོ་འབྱུང་བ་དང་ཡི་གེ་འཁོར་ལོ་བསྐོར་བའི་དཀྱིལ་འཁོར་དུ་བྱའོ། །གསང་བའི་དཀྱིལ་འཁོར་དུ་ནི་ཡིད་ཀྱིས་དབང་བསྐུར་བ་དངོས་སུ་གསུངས་པས། གོང་མ་གཉིས་མི་བྱ་བར་ཤེས་པར་བྱའོ། །འདི་རྣམས་ཀྱང་
འདིར་ཚིག་ཙམ་བཤད་ཀྱི་དོན་གཏན་ལ་དབབ་པར་བསྡུས་པའི་དོན་ཉིད་དུ་བཤད་ཟིན་ཏོ། །དམ་ཚིག་རྣམ་པ་ལྔ་རུ་ནི། །ཞེས་པ་ནས། དམ་ཚིག་ཅེས་སུ་གཞན་མི་བྱའོ། །ཞེས་པའི་བར་དུ་དམ་ཚིག་ཅན་གྱི་རིམ་པ་བཤད་པ་སྟེ། དེ་ལ་སྤྱིར་སློབ་མ་རྣམས་དཀྱིལ་འཁོར་དུ་འཇུག་པ་ཡང་
ཁ་ཅིག་ནི་དམ་ཚིག་ཅན་དུ་འདོད་པའི་ཕྱིར་འཇུག །ཁ་ཅིག་ནི་སྒྲུབ་པར་བྱེད་པའི་ཕྱིར་འཇུག །ཁ་ཅིག་ནི་སློབ་དཔོན་དུ་འདོད་པའི་ཕྱིར་འཇུག་སྟེ། དེ་ལ་དམ་ཚིག་ཅན་དུ་འདོད་པའི་ཕྱིར་འཇུག་པ་ནི་དཀྱིལ་འཁོར་དུ་འདི་གསུམ་གང་ཡང་རུང་བ་ལ་ཞུགས་ཏེ། དམ་ཚིག་ཅན་དུ་གྱུར་ན་དཀྱིལ་
འཁོར་ལྷག་མ་གཉིས་མི་ལྟོས། སྒྲུབ་པ་དང་སློབ་དཔོན་དུ་འདོད་པ་ནི་དཀྱིལ་འཁོར་གསུམ་ཆར་ལྟོས་པར་ཤེས་པར་བྱའོ། །དཀྱིལ་འཁོར་དེ་ཉིད་མཐོང་བ་ནི། །དམ་ཚིག་ཤེས་པ་ཅིག་ཅེས་བྱ། །ཞེས་པ་ནི་དམ་ཚིག་གི་དོན་ནི་འདིར་ཚུལ་ལས་མི་འགལ་བའི་དོན་ཏེ། དཀྱིལ་འཁོར་གསུམ་
ལས་གང་ཡང་རུང་བ་ཅིག་མཐོང་ན་དམ་ཚིག་ཅན་ཅིག་ཅེས་བྱ་བ་སྟེ། དེས་སྔར་བྱང་ཆུབ་ཀྱི་སེམས་བསྒོམས་པ་ན་ནི་དེ་ལ་ཕྱག་རྒྱ་དང་སྔགས་སྦྱིན་པར་བྱ་སྟེ། སྔར་བྱང་ཆུབ་ཀྱི་སེམས་མ་བསྒོམས་ན་དེ་ལ་ཕྱག་རྒྱ་དང་སྔགས་སྦྱིན་དུ་མི་རུང་སྟེ་དེ་བས་ན་གསུངས་པ། དེ་ལ་ཕྱག་རྒྱས་བཏབ་
པའང་མེད། །དེ་བཞིན་སྔགས་ཀྱང་གཟུང་དུ་མེད། །ཅེས་པའོ། །དེ་ལྟར་དཀྱིལ་འཁོར་དེར་ཞུགས་ན་ཕྱག་རྒྱ་དང་སྔགས་མི་སྦྱིན་པར་བྱང་ཆུབ་ཀྱི་སེམས་བསྒོམ་དུ་བཅུག་སྟེ། གོམས་པར་གྱུར་ན་གདོད་ཕྱག་རྒྱ་དང་སྔགས་སྦྱིན་པར་གསུངས་པ། བྱང་ཆུབ་ཀྱི་སེམས་ཀྱི་ཁྱད་པར་ནི་ཕྱག་
རྒྱ་དང་སྔགས་གཟུང་ངོ་ཞེས་པའོ། །དཀྱིལ་འཁོར་ཀྱང་མཐོང་བ་དེ་དམ་ཚིག་གཉིས་ཞེས་བྱའོ་ཞེས་པ་ནི་དེ་ལྟར་བྱང་ཆུབ་ཀྱི་སེམས་གོམས་ནས་ཡང་དཀྱིལ་འཁོར་དུ་བཅུག་སྟེ། ཕྱག་རྒྱ་དང་སྔགས་སྦྱིན་པ་དེ་ནི་དམ་ཚིག་ཅན་གཉིས་ཞེས་བྱའོ། །དཀྱིལ་འཁོར་ཕྱག་རྒྱ་མཐོང་བ་ནི། །

ལས་སུ་བྱ་བ་ལ་ཡང་འཇུག །བླ་མས་ལུང་ནི་མ་བྱིན་པ། །དེ་ཡང་དམ་ཚིག་ཤེས་ཞེས་བྱ། །ཞེས་བྱ་བ་ནི་དཀྱིལ་འཁོར་ཡང་མཐོང་ལ་རྒྱུད་དང་རྟོག་པ་ལ་སོགས་པ་ཡང་ཉན་དུ་བཅུག་ལ། སློབ་དཔོན་དུ་ལུང་མ་བསྟན་པ་དེ་ནི་དམ་ཚིག་ཤེས་པ་གསུམ་ཞེས་བྱའོ། །ཕྱག་རྒྱ་དཀྱིལ་
འཁོར་བྲི་བ་རྣམས། །དེ་ཚེ་ཆོ་ག་བཞིན་དུ་བསྟན། །སྔགས་པ་དབང་ནི་མ་ཐོབ་པ། །གསང་བའི་ཡེ་ཤེས་འབྱུང་བའོ། །ཞེས་པ་ནི་སྙིང་རྗེ་ཆེན་པོ་འབྱུང་བ་དང་། ཡི་གེ་འཁོར་ལོ་བསྐོར་བ་དཀྱིལ་འཁོར་པའི་དཀྱིལ་འཁོར་གཉིས་ཀར་དབང་བསྐུར་བའམ་གང་ཡང་རུང་བ་ཅིག་ཏུ་དབང་
བསྐུར་ཏེ། ཕྱག་རྒྱ་དང་དཀྱིལ་འཁོར་ལ་སོགས་པ་བྲི་བ་དང་བཤད་པ་དེ་དག་ཆོ་ག་བཞིན་དུ་དེས་གཞན་ལ་ཡང་བསྟན་པ་གསུངས་པའི་དཀྱིལ་འཁོར་འབའ་ཞིག་ཏུ་དབང་བསྐུར་བ་དེ་ནི་དམ་ཚིག་ཤེས་པ་ཞེས་བྱའོ། །སྔགས་པ་ཚུལ་བཞིན་དབང་བསྐུར་བ། །གསང་བའི་དཀྱིལ་
འཁོར་དབུས་སུ་སྟེ། །དམ་ཚིག་ཤེས་པ་ལྔར་རིག་བྱ། །ཞེས་པ་ནི་དཀྱིལ་འཁོར་གོང་མ་གཉིས་སུ་ཡང་དབང་བསྐུར་བ་ལ་གསང་བའི་དཀྱིལ་འཁོར་དུ་དབང་བསྐུར་བ་དེ་ནི་དམ་ཚིག་ཤེས་པ་ལྔ་ཞེས་བྱའོ། །དམ་ཚིག་ཅན་ཞེས་གཞན་མི་བྱ། །ཞེས་པ་ནི་དེ་ལྟར་གོང་དུ་སྨོས་པ་ལས་གཞན་
དུ་ཆོ་ག་ལས་འགལ་བར་བྱས་ན་དམ་ཚིག་ཅན་ཞེས་མི་བྱའོ་ཞེས་པའོ། །གང་གིས་རྟག་ཏུ་བསྒོམས་པ་ཞེས་པ་ནས། བདེན་པ་མཐོང་ཞེས་བྱ་བ་ཡིན། །ཞེས་པའི་བར་དུ་སྔར་ཇི་ལྟར། བྱང་ཆུབ་སེམས་དཔའ་ཞེས་བགྱི་ཞེས། །ཇི་ལྟར་ཐམས་ཅད་མཁྱེན་པ་ལགས། །ཇི་ལྟར་བདེན་པ་མཐོང་
བ་ལགས། །ཞེས་དྲིས་པ་དེ་དག་བཤད་པ་སྟེ། གང་གིས་རྟག་ཏུ་བསྒོམས་པ་ནི། །དཀའ་ཐུབ་བྱང་ཆུབ་སེམས་ལ་སྟེ། །གནས་གསུམ་དུ་ནི་མི་དམིགས་པ། །བྱང་ཆུབ་སེམས་དཔའ་ཞེས་ཀྱང་བྱ། །ཞེས་པ་ནི་གང་བྱང་ཆུབ་ཀྱི་སེམས་རྟག་ཏུ་བསྒོམས་ཏེ་ལུས་དང་ངག་དང་ཡིད་ཀྱི་གནས་
གསུམ་མམ། འདོད་པའི་ཁམས་དང་། གཟུགས་ཡོད་པའི་ཁམས་དང་། གཟུགས་མེད་པའི་ཁམས་ཀྱི་གནས་གསུམ་འཇུག་པའི་བྱང་ཆུབ་ཀྱི་སེམས་ཀྱིས་བཤིག་སྟེ་དམིགས་སུ་མེད་པར་བྱེད་པ་དེ་ནི་བྱང་ཆུབ་སེམས་དཔའ་ཞེས་བྱའོ། །སེམས་ཅན་ལ་ནི་ཐབས་བསྐྱེད་ནས། །སེམས་

ཅན་དོན་ལ་རབ་འཇུག་པ། །དམིགས་པ་མེད་པའི་སྤྱོད་པ་ཡི། །རྒྱལ་བའི་མཆོག་ཏུ་རིག་པར་བྱའོ། །ཞེས་པ་ནི་དམིགས་པ་མེད་པའི་སྤྱོད་པ་ཐོབ་ནས་དེ་ལས་ལངས་ཏེ་ཆོས་རྣམས་སྒྱུ་མ་ལྟ་བུར་ཤེས་བཞིན་དུ་ཐབས་ཀྱིས་སེམས་ཅན་གྱི་དོན་དུ་སྤྱོད་པ་དེ་ནི་ཐམས་ཅད་
མཁྱེན་པ་ཞེས་བྱ་སྟེ། དམིགས་པ་མེད་པའི་སྤྱོད་པ་ཐོབ། །ཅེས་པའི་མོས་པ་སྤྱོད་པའི་ཚེ་ན། འཇུག་པའི་བྱང་ཆུབ་ཀྱི་སེམས་ཀྱི་ཆོས་རྣམས་བཤིགས་ནས་གནས་པའི་བྱང་ཆུབ་ཀྱི་སེམས་ཀྱི་མཚན་ཉིད་སྟོང་པ་ཉིད་ལ་གནས་པ་ན་དོན་དམ་པར་ཡང་ཆོས་རྣམས་དམིགས་སུ་མེད་དེ།
ཀུན་རྫོབ་ཏུ་ཡང་ཆོས་རྣམས་འཁྲུལ་པའམ་སྒྱུ་མ་ལྟ་བུར་ཆུད་པས་ནི་མི་དམིགས་པའི་སྤྱོད་པ་ཐོབ་ཅེས་པའོ། །རྒྱལ་བའི་མཆོག་ཅེས་པ་ནི་དེ་ལྟར་ཀུན་རྫོབ་དང་དོན་དམ་པར་ཆོས་རྣམས་དམིགས་སུ་མེད་པར་ཆུད་པ་ནི་བདུད་བཞི་དངོས་སུ་མ་བཅོམ་ཡང་བདུད་བཞི་ལས་རྒྱལ་བའི་ངང་ཚུལ་ཅན་
པས་རྒྱལ་བའི་མཆོག་ཅེས་བྱའོ། །ཐོག་མ་ནས་སུ་ཞི་བའི་ཆོས། །རང་བཞིན་མེད་ལ་གང་གིས་ནི། །སེམས་ནི་རི་རབ་བཞིན་འདུག་ན། །དེ་ནི་བདེན་པ་མཐོང་ཞེས་བྱ། །ཞེས་པ་ནི་བདེན་པ་མཐོང་བ་བཤད་པ་སྟེ། དེ་རྣམས་ཆོས་རྣམས་ཐོག་མ་ནས་ཞི་ཞིང་རང་བཞིན་མེད་པར་གང་གིས་ཆུད་
དེ། དེ་ཉིད་ལ་སེམས་ནི་རི་རབ་བཞིན་དུ་མི་གཡོ་བར་གྱུར་ན་དེ་ནི་བདེན་པ་མཐོང་ཞེས་བྱ་སྟེ། དེ་ལ་མདོར་ན་ཐོག་མ་ནི་འཇུག་པའི་བྱང་ཆུབ་ཀྱི་སེམས་དང་ལྡན་པའོ། །བདེན་པ་མཐོང་བ་ཞེས་པ་ནི་གནས་པའི་བྱང་ཆུབ་ཀྱི་སེམས་བཤད་པའོ། །རྒྱལ་བའི་མཆོག་ཅེས་པ་ནི་ལྡང་བའི་བྱང་
ཆུབ་ཀྱི་སེམས་སུ་བསྟན་པ་སྟེ། དེ་དག་ཀྱང་མོས་པ་སྤྱོད་པའི་ས་ཉིད་ལ་གནས་པའི་ཡོན་ཏན་དུ་ཤེས་པར་བྱའོ། །འདི་བདེན་པ་ཡང་བདག་ཉིད་ཅེས་པ་ནས། སངས་རྒྱས་འགྲུབ་དང་འོག་རྣམས་སོ། །ཞེས་པའི་བར་དུ་གྲུབ་པའི་རིགས་རྣམས་བཤད་པ་སྟེ་འདི་བདེན་པ་ཡང་བདག་ཉིད་མི་
འགྲུབ་པ་ཡང་དེ་བཞིན་དུ་ཡང་དག་མཐོང་བ་དེ་བཞིན་སངས་རྒྱས་ཀྱང་དེ་བཞིན་ངས་ཀྱང་མངོན་པའོ་ཞེས་པ་ནི། གང་གིས་བྱང་ཆུབ་སེམས་དཔའ་ཐོབ། །ཞེས་པ་དེ་ཉིད་ཀྱི་རྗེས་སུ་བསྔགས་པའི་ཁྱད་པར་ཏེ། གང་ཡང་བྱང་ཆུབ་ཀྱི་སེམས་ཐོབ་པ་དེ་བདེན་པ་ཡང་དག་པ་ཉིད་ཀྱི་མི་སླུ་བ་སྟེ། སྔོན་

གྱི་སངས་རྒྱས་དང་ངས་ཀྱང་ཡང་དག་པ་ཉིད་ཀྱི་སླུ་བ་ཡིན་ཞེས་པར་མཐོང་ཞེས་པའོ། །གང་གིས་བྱང་ཆུབ་སེམས་ཐོབ་པ་ཡང་བསྒྲུབས་ནས་ཀུན་དུ་བཟང་པོའམ་འཕགས་པ་འཇམ་དཔལ་ཅིག་གིས་ཀླད་པ་ལ་བྱུགས་ན་བྱང་ཆུབ་ཀྱི་སེམས་མི་བརྗེད་པ་ཞེས་བྱ་བ་འཐོབ་བོ་ཞེས་གོང་དུ་
བཤད་པ་དེ་ལྟ་བུའི་གྲུབ་པ་ཐོབ་པ་ནི་བྱང་ཆུབ་ཀྱི་སེམས་ཐོབ་པ་ཞེས་བྱ་བ་སྟེ། དེ་ལྟ་བུ་གྲུབ་ན་དེ་ཉིད་གྲུབ་པ་ཡིན་གྱི་གཞན་ཅི་དགོས་པ་ཞེས་པ་ནི་བྱང་ཆུབ་ཀྱི་སེམས་དེ་གྲུབ་པ་ལ་སོགས་པ་གཞན་གྱི་རྒྱུ་ཡིན་པའི་ཕྱིར་རོ། །དེ་བས་གཞན་ཡང་གྲུབ་པ་ནི། །གྲུབ་པ་རྣམ་པ་ལྔ་ཞེས་བསྒྲགས། །
ཞེས་པ་ནི་བྱང་ཆུབ་ཀྱི་སེམས་གྲུབ་པ་དེ་ལས་གཞན་པའོ། །གཞན་མིང་གིས་འབྱུང་བ་ལྔ་ལ་བྱས་ཏེ་དེ་རྣམས་ཀྱང་སྤྱོད་པའི་རྗེས་སུ་འཇུག་པ་ལ་སོགས་པའོ། །དེ་ལ་སྤྱོད་པའི་རྗེས་སུ་ཞུགས། །ཞེས་པ་ནི་མོས་པ་སྤྱོད་པའི་ས་ལས་འཕར་ཏེ་ཡེ་ཤེས་ཀྱི་ས་ལ་འཇུག་པའི་སྐབས་སུ་སྣང་བ་ཐོབ་
པ་དང་། སྣང་བ་མཆེད་པ་ཞེས་བྱ་བ་ལ་སོགས་པའི་ཏིང་ངེ་འཛིན་གྱི་ཁྱད་པར་གྲུབ་པའོ། །ས་ལས་འཕར་བའང་དེ་བཞིན་ཏེ། །ཞེས་པ་ནི་ས་རབ་ཏུ་དགའ་བ་ཐོབ་པར་གྲུབ་པའོ། །འཇིག་རྟེན་མངོན་ཤེས་ལྔ་རྣམས་དང་། །ཞེས་པ་ནི་འཇིག་རྟེན་གྱི་ལྔ་མངོན་པར་ཤེས་པ་གྲུབ་པའོ། །སངས་
རྒྱས་གྲུབ་དང་ཞེས་པ་ནི་སངས་རྒྱས་ཀྱི་གཟུགས་སུ་གྱུར་པའི་རིག་འཛིན་དུ་གྲུབ་པའོ། །ཕལ་རྣམས་ཞེས་པ་ནི་རིག་འཛིན་ཕལ་རྣམས་གྲུབ་པ་སྟེ་དེ་གཉིས་ནི་གཟུགས་ཀྱིས་གྲུབ་པའོ། །གོང་མ་གསུམ་ནི་སེམས་ཀྱིས་གྲུབ་པ་ཤེས་པར་བྱའོ། །རྒྱུད་ནས་རྒྱུད་དུ་བ་རྣམས་ཀྱིས། །ཞེས་པ་ནས། སྔགས་པ་
ཡིད་ལས་བྱུང་བའོ། །ཞེས་པའི་བར་དུ་གྲུབ་པའི་དུས་བཤད་པ་སྟེ། དེ་ལས་གྲུབ་པའི་དུས་ཀྱང་ཚེ་འདི་ལ་གྲུབ་པ་དང་ཚེ་ཕྱི་མ་ལ་གྲུབ་པ་རྣམ་པ་གཉིས་ཏེ། རྒྱུད་ནས་རྒྱུད་དུ་བ་རྣམས་ཀྱི། །ལས་རྣམས་ཇི་སྲིད་མ་ཟད་ཅིང་། །སྨིན་པ་རྣམ་པར་དེ་སྨིན་པ། །དེ་ནི་གྲུབ་པ་ཡིན་ཞེས་བསྒྲགས། །ཞེས་པ་
ནི་ཚེ་འདི་ལས་གྲུབ་པ་སྟེ། རྒྱུད་ནས་རྒྱུད་དུ་བ་རྣམས་ཀྱི་ལས་རྣམས་རྒྱུད་མ་ཟད་ཅེས་པ་ནི། ཚེ་སྔ་མའི་རྒྱུད་སྒོ་དྲུག་ལ་སོགས་པ་ནས་ལས་བསགས་པའི་ཚེ་འདིའི་རྒྱུད་ལ་ཟད་པར་མ་གྱུར་ཏེ། བདག་གི་ཕུང་པོ་གསོན་ན་ཞེས་པའོ། །སྨིན་པ་རྣམ་པར་དེ་སྨིན་ན། །ཞེས་པ་ནི་ད་ལྟ་ཡང་གསོན་ལ་ཚེ་དང་

བསོད་ནམས་ལ་སོགས་པའི་རྒྱུ་བཏབ་པའི་འབྲས་བུ་ཡང་འདིར་སྨིན་པར་གྱུར་ན་སྔ་མའི་ལས་རྣམས་མ་ཟད་པས་བདག་ཚེ་རིང་སྨིན་པ་རྣམ་པར་སྨིན་པས་བདག་གི་བསོད་ནམས་ཀྱི་རྒྱུ་མཐུས་རྟག་པར་གྱུར་ཏེ། སྒྲུབ་པའི་ཚེ་དེ་ལྟར་ཚེ་དང་བསོད་ནམས་གཉིས་ཀས་བསྲུངས་ན་དེ་ཉིད་
ཚེ་འདི་ཉིད་ལ་འགྲུབ་པར་བཤད་དོ། །མདོ་རུ་དུས་གཅིག་ཏུ་ཡང་ན་ནམ་ཞིག་དང་། ཚེ་ཟད་ན་ཚེ་དེ་གྲུབ་པ་ཐོབ་པ་ནི་སྔགས་པ་ཡིད་ལས་བྱུང་བའོ་ཞེས་པ་ནི་སྒྲུབ་པ་བསྒྲུབས་པས་ལས་དང་ཚེས་མ་བསྟངས་ཏེ། དུས་གཅིག་ཏུ་ནི་ལས་དང་ཚེ་ཟད་པར་གྱུར་ན། སྒྲུབ་པ་བསྒྲུབས་པའི་འབྲས་བུ་སྔགས་
པ་དེས་ཚེ་ཕྱི་མ་ལ་བསྒྲུབ་མི་དགོས་པར་རྡོ་རྗེ་ལ་སོགས་པའི་རིགས་སུ་སྐྱེ་བ་དང་། རིག་འཛིན་ལ་སོགས་པར་སྐྱེ་བ་འཐོབ་པར་འགྱུར་རོ་ཞེས་པའོ། །སྔགས་པ་ཡིད་ལས་བྱུང་བའོ། །ཞེས་པ་ནི་རྫས་ལ་སོགས་པ་བསྒྲུབ་མི་དགོས་པར་ཚེ་འཕོས་མ་ཐག་ཏུ་ཡིད་ཉིད་ཀྱིས་གྲུབ་པ་དེ་དག་ཐོབ་པར་འགྱུར་
རོ། །གྲུབ་ནས་ནམ་མཁའ་ལ་འགྲོ་བ། །ཞེས་པ་ནས། སངས་རྒྱས་གཅིག་བརྗོད་པར་མི་འགྱུར། །ཞེས་པའི་བར་དུ་གྲུབ་པའི་འབྲས་བུ་རྣམས་དྲིས་པ་བཤད་པ་སྟེ། གྲུབ་ནས་ནམ་མཁའ་ལ་འགྲོ་བ། །ཇི་ལྟར་སྒྱུ་མ་མཁས་པ་བཞིན། །སྔགས་ཀྱི་དྲ་བས་བསླུས་པ་ནི། །ཇི་ལྟར་མིག་འཕྲུལ་
ཆེན་པོ་བཞིན། །ཞེས་པ་ནི་གྲུབ་ནས་ནམ་མཁའ་ལ་འགྲོ་བ་བཤད་པ་སྟེ། ཇི་ལྟར་མིག་འཕྲུལ་མཁན་དེ་ནམ་མཁའ་ལ་འགྲོ་བ་དང་། རྫུ་འཕྲུལ་སྣ་ཚོགས་བྱེད་པ་བཞིན་དུ་སྔགས་པ་དེ་ཡང་རིག་འཛིན་ལ་སོགས་པར་གྲུབ་ནས་ནམ་མཁའ་ལ་འགྲོ་བ་དང་། སྔགས་ཀྱི་མཐུས་རྣམ་པ་སྣ་ཚོགས་
པའི་སྤྲུལ་པ་ལ་སོགས་པ་སྟོན་པར་བྱེད་དོ་ཞེས་པའོ། །གང་ན་ལུས་དང་ངག་མེད་པར་དྲི་ཟའི་གྲོང་ཁྱེར་བཞིན་དུ་དེ་བཞིན་མི་སྣང་བར་འགྱུར་ཞེས་བྱ། དེའི་གནས་ནི་དེ་ཡིན་ནོ་ཞེས་པ་ནི་རིག་འཛིན་ལ་སོགས་པ་གྲུབ་ནས་མི་སྣང་བར་འགྱུར་བའི་དཔེ་དྲི་ཟའི་གྲོང་ཁྱེར་ལས་བླངས་ཏེ་བཤད་པ་སྟེ། ཇི་ལྟར་
དྲི་ཟའི་གྲོང་ཁྱེར་ལུས་ལ་སོགས་པ་དངོས་སུ་མི་སྣང་ཞིང་། བར་སྣང་ལ་གནས་པར་བྱེད་པ་དེ་བཞིན་དུ་སྔགས་པ་དེ་ཡང་གྲུབ་ནས་ལུས་ཀྱང་མི་སྣང་ལ་ཚིག་ཏུ་བརྗོད་པ་ཡང་མི་ཐོས་པར་ནམ་མཁའ་ལ་མི་སྣང་བར་གྱུར་ཅིང་བར་སྣང་ལ་གནས་པར་བྱེད་པའོ་ཞེས་བཤད་དོ། །ཇི་ལྟར་ཉལ་བའི་རྨི་ལམ་ན་

སུམ་ཅུ་རྩ་གསུམ་གནས་སུ་ཕྱིན་ཏེ། དེའི་ལུས་དང་བྲལ་བ་ཡང་མེད། དེ་ལ་ནི་དེར་ཕྱིན་པ་ཡང་མེད། དེ་བཞིན་སྦྱོར་བ་གཉིས་ཀྱིས་ཀྱང་སྔགས་པ་སྔགས་ཀྱི་རྒྱུད་ནས། ལུས་ནི་འཇའ་ཟུག་པ་དང་འདྲ། །ལས་དང་བསོད་ནམས་ལས་རྙེད་པ། །ཞེས་པ་ནི་སྔགས་པ་དེ་རིག་འཛིན་ལ་སོགས་པ་གྲུབ་ནས།
ལུས་འདི་ཡང་མི་འདོར་བར་ནམ་མཁའ་ལ་སོགས་པ་ལ་འགྲོ་བའི་དཔེ་རྨི་ལམ་ལས་བླངས་ཏེ་བཤད་པ་སྟེ། ཇི་ལྟར་སྐྱེས་བུ་ཉལ་བའི་རྨི་ལམ་ན། སུམ་ཅུ་རྩ་གསུམ་ལ་སོགས་པའི་གནས་མཐོང་བར་འགྱུར་བ་དེ་བཞིན་དུ་སྔགས་པ་དེ་ཡང་སྦྱོར་བའི་དབང་གིས་ལུས་འདི་ཉིད་མ་བོར་བར་ནམ་
མཁའ་ལ་སོགས་པར་འགྲོ་བ་ཡང་རང་གིས་མཐོང་ངོ་། །གཟུགས་རྣམ་པ་སྣ་ཚོགས་ཀྱང་སྟོན་ནུས་པར་འགྱུར་ཞེས་པའོ། །ལུས་ནི་འཇའ་ཟུག་པ་དང་འདྲ། །ཞེས་པ་ནི་གཟུགས་སྣ་ཚོགས་སྟོན་པའོ། །སྔགས་ནི་ཡིད་བཞིན་ནོར་བུ་འདྲ། །ལུས་དང་ངག་དང་ཡིད་ལས་བྱུང་། །དེ་ལས་དོན་དུ་བརྩམས་
པ་ནི། །མ་བརྟགས་བཞིན་དུ་གྲུབ་པ་ཡིན། །ཞེས་པ་ནི་སྔགས་ཀྱི་གྲུབ་པ་ཡིད་བཞིན་ནོར་བུ་ལས་དཔེ་བླངས་ཏེ་བཤད་པ་སྟེ། ཇི་ལྟར་ཡིད་བཞིན་ནོར་བུ་གང་བསམས་པའི་དོན་རྣམས་མ་བརྟགས་པར་དགོས་པ་ལྷུན་གྱིས་གྲུབ་པ་ཉིད་དུ་འབྱོར་བར་འགྱུར་བ་དེ་བཞིན་དུ་སྔགས་འགྲུབ་པའི་འབྲས་བུ་
ཡང་གང་འདོད་པ་རྣམས་བརྟག་མི་དགོས་པར་ལྷུན་གྱིས་གྲུབ་པ་ཉིད་དུ་འབྱོར་བར་འགྱུར་ཞེས་པའོ། །ཇི་ལྟར་ནམ་མཁའ་ཕྱོགས་རྣམས་ལ་འདུས་བྱས་སྤྱོད་ཡུལ་ཐམས་ཅད་ཀྱིས་མི་གོས་པ་དེ་བཞིན་སྔགས་པ་ཡང་རྟོག་པའི་སྤྱོད་ཡུལ་ཀུན་གྱིས་སོ། །གྲུབ་པ་ཐོབ་པ་དེ་ཡང་གཟའ་དང་སྐར་མ་དང་
ལྟས་ངན་ལ་སོགས་པས་མི་ཚུགས་པར་བཤད་པ་སྟེ། ཇི་ལྟར་ནམ་མཁའ་འདུས་བྱས་ལ་སོགས་པའི་དྲི་མས་མི་གོས་པ་བཞིན་དུ་གྲུབ་པའི་སྔགས་དེ་ཡང་གཟའ་དང་སྐར་མ་ལ་སོགས་པ་བཟང་ངན་གྱི་ལས་སུ་མི་རྟོག་སྟེ། དེ་དག་གིས་ལྟས་ངན་པ་ལ་སོགས་པས་ཀྱང་མི་ཚུགས་ཞེས་པའོ། །འདི་
དག་ཐམས་ཅད་འདུ་ཤེས་ཙམ། །དེ་ལྟར་རྣམ་པར་སྒོམ་པར་བྱེད། །སྔགས་པ་དེ་ལྟར་བསྒོམས་ན་ནི། །སངས་རྒྱས་ལྷན་ཅིག་བརྗོད་འགྱུར་རོ། །ཞེས་པ་ནི་སྔགས་གྲུབ་པ་ཐོབ་ནས་སངས་རྒྱས་དང་ལྷན་ཅིག་ཏུ་འགྲོགས་པ་ཐོབ་པར་བཤད་པ་སྟེ། དེ་དག་ཐམས་ཅད་འདུ་ཤེས་ཙམ། །ཞེས་པ་ནི་

འདུས་བྱས་ལ་སོགས་པའི་ཆོས་འདི་དག་ཐམས་ཅད་དངོས་སུ་ཡོད་པ་མ་ཡིན་གྱི། འདུ་ཤེས་ཙམ་དུ་བྱང་ཆུབ་ཀྱི་སེམས་སྒོམ་པའི་ཚེ་བསྒོམས་པས་ཀུན་དུ་སངས་རྒྱས་པ་དང་ལྷན་ཅིག་ཏུ་འགྲོགས་ཤིང་། དེ་ལ་ཆོས་ཉན་པ་ལ་སོགས་པས་དགའ་བར་འགྱུར་ཞེས་པའོ། །སྦྱིན་
སྲེག་གཉིས་སུ་གསུངས་པ་ནི། །སངས་རྒྱས་རྐང་གཉིས་གཙོ་བོ་སྟེ། །ཕྱི་རོལ་གྱི་དང་ནང་གི་སྟེ། །དེ་ཡང་ཚིམ་བྱེད་བཅས་པའོ། །ཞེས་པ་ནི་སྦྱིན་སྲེག་གི་ལས་མེ་རྣམས་སུ་ཞེས་སྔར་དྲིས་པ་ལ་རྣམ་པ་གཉིས་ནི་སྔར་བཤད་ཟིན་ཏོ། །འདིར་ནི་སྦྱིན་སྲེག་རྣམ་པ་གཉིས་བཤད་པའི་ཕྱིའི་མེ་དང་
ནང་གི་མེ་རྣམ་པ་གཉིས་བཤད་དེ། དེ་ཡང་མཉེས་པར་བྱ་བ་དང་བཅས་པར་བྱ་བ་དང་ཞེས་གསུངས་པའོ། །དེ་ལ་ནང་གི་སེམས་ཀྱིས་མཉེས་པར་བྱ་བ་ནི། རང་གི་ས་བོན་ལས་སླར་ལྷའི་གཟུགས་སུ་བསྒྱུར་བར་སྔར་བཤད་དོ། །ཕྱི་རོལ་གྱིས་མཉེས་པར་བྱ་བའི་བསྲེག་པའི་རྫས་གཉིས་ཀྱིས་མཉེས་
བར་བྱའོ། །ལྷ་རྣམས་ཀྱི་སོ་སོའི་ཞེས་པ་ནས། ཡང་དག་སངས་རྒྱས་རྫོགས་པར་གསུངས། །ཞེས་པའི་བར་དུ་ལྷ་རྣམས་ཀྱི་རང་བཞིན་དང་གྲུབ་པའི་ཚད་རྣམས་བཤད་པ་སྟེ། ལྷ་རྣམས་ཀྱི། སོ་སོའི་ངོ་བོ་ཉིད་ཀྱང་ཤེས་ནས་སུ། །ཞེས་པ་ནི་ལྷ་རྣམས་ཀྱི་རང་བཞིན་ཤེས་པར་བྱས་ནས་དེ་དག་གི་
གྲུབ་པའི་འབྲས་བུ་ཡང་ཤེས་པར་འགྱུར་ཞེས་པ་སྟེ། དེ་ལ་འཇིག་རྟེན་ལས་འདས་པའི་ལྷ་རྣམས་ཀྱི་རང་བཞིན་ནི་སྔར་བཤད་ཟིན་ཏོ། །འདིར་ནི་འཇིག་རྟེན་གྱི་ལྷ་རྣམས་ཀྱི་རང་བཞིན་བཤད་ནས། དེའི་རང་བཞིན་ནི་མཐུ་ལས་འབྲས་བུའི་ཚད་ཤེས་པ་སྟེ། དེ་བས་ན་གསུངས་པ། འཇིག་རྟེན་གྱི་
སྔགས་ཀྱི་ཚད་ནི་ཀུན་དུ་གསུངས་པ་ཡང་ཞེས་པ་ལ་སོགས་པ་སྟེ། དབང་པོ་ལ་སོགས་པའི་ལྷ་མཐུ་ཆེན་པོ་དེ་དག་གིས་སྨྲས་པའི་སྔགས་དང་ཕྱག་རྒྱ་རྣམས་ནི་འབྲས་བུ་འཕྲལ་དུ་སྟེར་བ་སྟེ། དེ་དག་གི་ཚད་དུ་གསུངས་པ་སྟེ། ཚད་ཅེས་པ་ནི་དེ་དག་གི་མཐུ་ལ་བྱའོ། །དེ་རྣམས་ལ་རྟག་པ་མེད་དེ། སྐྱེ་
ཞིང་འཇིག་པའི་ཆོས་ཅན་ནོ། །ཞེས་པ་ནི་དེ་དག་གི་ཁྱད་པར་གསུངས་པ་སྟེ། འཇིག་རྟེན་པའི་ལྷ་རྣམས་འབྲས་བུ་ཚེ་འདི་ལ་འཕྲལ་དུ་སྟེར་མོད་ཀྱི། དེ་རྣམས་སྐྱེ་ཞིང་འཇིག་པའི་ཆོས་ཅན་པས་མི་རྟག་པའོ། །འཇིག་རྟེན་ལས་འདས་པའི་སྔགས་རྣམས་ནི་ཞེས་པ་ནས། བྱེ་བྲག་ཀུན་ཀྱང་བཤད་པ་ཡིན། །

ཞེས་པའི་བར་འཇིག་རྟེན་ལས་འདས་པའི་སྔགས་བྱང་ཆུབ་སེམས་དཔའ་དང་ཉན་ཐོས་དང་། རང་སངས་རྒྱས་ལ་སོགས་པས་གསུངས་པའི་སྔགས་རྣམས་ཐོག་མའི་བྱེད་པ་མེད་ཅིང་ལས་དང་ཚེ་དང་འཆད་པ་སྟེ། འདོད་ཆགས་དང་ཞེ་སྡང་དང་གཏི་མུག་གི་ཉེས་པ་གསུམ་དང་བྲལ་བས་
སྐྱེ་ཞིང་འཇིག་པ་ལ་སོགས་པ་མེད་པས་སྔར་ཚད་རྣམས་བཤད་ཟིན་ཏོ་ཞེས་པའོ། །དུས་གསུམ་ལས་ནི་ཤིན་ཏུ་འདས། །རྐྱེན་ལས་སྐྱེས་པར་བྱུང་བ་སྟེ། །འབྲས་བུ་མཐོང་དང་མི་མཐོང་ལ། །ངག་ཡིད་གསུམ་ལས་བྱུང་བའོ། །ཞེས་པ་ནི་དེ་ལྟ་བས་ན་འཇིག་རྟེན་ལས་འདས་པའི་སྔགས་
རྣམས་འཇིག་རྟེན་པ་ལྟར་མཐོང་བའི་ཆོས་འབའ་ཞིག་ལ། འབྲས་བུ་འཕྲལ་དུ་སྟེར་བ་འབའ་ཞིག་མ་ཡིན་གྱི་མཐོང་བའི་ཆོས་དང་མི་མཐོང་བ་གཉིས་ཀ་ལ་འབྲས་བུ་སྟེར་ཞེས་པ་སྟེ། མཐོང་བའི་ལྷ་དང་མི་ལ་སོགས་པ་འགྲུབ་པའོ། །མི་མཐོང་བ་ནི་མྱ་ངན་ལས་འདས་པའོ། །འབྲས་བུའི་
ཚད་ནི་བསྐལ་པ་གཅིག་འཇིག་རྟེན་གྱི་ཞེས་གསུངས་པ་ནི། འཇིག་རྟེན་པའི་ལྷ་རྣམས་ཀྱི་གྲུབ་པའི་འབྲས་བུ་ཇི་སྲིད་ཐུབ་པ་གསུངས་པ་སྟེ། འཇིག་རྟེན་གྱི་འབྲས་བུ་ནི་བསྐལ་པ་གཅིག་གི་བར་དུ་ཐུབ་ཅེས་པའོ། །བསྐལ་པ་གཅིག་ལས་སྔགས་འབྲས་བུ། །ཡང་དག་སངས་རྒྱས་རྫོགས་
པས་གསུངས། །ཞེས་པ་ནི་འཇིག་རྟེན་ལས་འདས་པའི་སྔགས་རྣམས་ཀྱི་འབྲས་བུ་བསྐལ་པ་ལས་འདས་པར་ཐུབ་ཅེས་པའོ། །ཏིང་འཛིན་རྒྱལ་བའི་སྲས་རྣམས་དང་། །དྲང་སྲོང་ཆེན་པོ་སངས་རྒྱས་ཀྱི། །མཚན་དང་བྲལ་ཏེ་དག་པ་ཡིན། །འཇིག་རྟེན་མཚན་མར་བཅས་ཞེས་པ་ནི་སྔགས་པ་
རྣམས་ཀྱི་ཏིང་ངེ་འཛིན་བཤད་པ་སྟེ། དེ་ལ་སྤྱིར་ཏིང་ངེ་འཛིན་ལ་ཡང་རྣམ་པ་གཉིས་ཏེ། དོན་དམ་པ་དང་ཀུན་རྫོབ་ཀྱིའོ། །དེ་ལ་དོན་དམ་པ་ནི་ཡི་གེ་ཨ་ལ་སོགས་པ་འབྲུ་རེའི་སྒོ་ནས་བསྟན་པའོ། །ཀུན་རྫོབ་ཀྱི་ནི་སྔགས་ཀྱི་ཕྲེང་བའི་ཚིག་ལས་སྟོབས་དང་མི་འཇིགས་པ་ལ་སོགས་པའི་ཡོན་ཏན་
རྣམས་ཏེ། དེ་དག་གི་ཚིག་ཏུ་གྱུར་པའི་ཏིང་ངེ་འཛིན་གྱི་ཡི་གེ་རྣམས་ནི་སྔར་བཤད་ཟིན་ཏོ། །འདིར་ནི་ཏིང་ངེ་འཛིན་གྱི་དོན་རྣམས་བཤད་པ་སྟེ། རྒྱལ་བའི་སྲས་རྣམས་ཞེས་པ་ནི་བྱང་ཆུབ་སེམས་དཔའ་ལ་སོགས་པའོ། །དྲང་སྲོང་ཆེན་པོ་སངས་རྒྱས་ཀྱི། །ཞེས་པ་ནི་ལུས་དང་ངག་དང་ཡིད་

གསུམ་ཐུབ་པའི་མཚན་ཉིད་དྲང་སྲོང་སྟེ་མི་གནས་པའི་མྱ་ངན་ལས་འདས་པ་ཀུན་དུ་སངས་རྒྱས་པ་ལ་སོགས་པ་ལ་བྱ་སྟེ། དེ་དག་གི་ཏིང་ངེ་འཛིན་གྱི་དོན་ཆོས་ཐམས་ཅད་ཐོག་མ་ནས་མ་སྐྱེས་པ་རྣམ་པར་མི་རྟོག་པའི་མཚན་ཉིད་པས་མཚན་མ་དང་བྲལ་བ་སྟེ་དགའ་བའོ། །
འཇིག་རྟེན་གྱི་མཚན་མར་བཅས་པ་ཞེས་པ་ནི་ནམ་བྱང་ཆུབ་སེམས་དཔའི་ཏིང་ངེ་འཛིན་ལས་བཞེངས་པ་ནི། སངས་རྒྱས་ཀྱི་རྣམ་པར་བརྒྱན་པ་ལ་སོགས་པ་ཇི་བཞིན་པ་དང་བཅས་པའི་སྤྱོད་པ་དང་འཇུག་པ་དང་སངས་རྒྱས་དང་མངོན་པར་བྱང་ཆུབ་ནས་སྔོན་གྱི་སྨོན་ལམ་གྱི་ཤུགས་ཀྱིས་སྐུ་མི་
ཟད་པའི་འཁོར་ལོ་ལ་སོགས་པ་འབྱུང་བ་ཡང་སྦྱིན་པ་དང་བཅས་པའི་སྤྱོད་པ་སྟེ། དེ་དག་ལ་ཡང་འཇིག་རྟེན་གྱི་མཚན་མ་དང་བཅས་ཞེས་པའོ། །གཉིས་སུ་ན་མུ་སྟེགས་འཇིག་རྟེན་པའི་ལྷ་རྣམས་ཀྱི་ཏིང་ངེ་འཛིན་དངོས་པོ་ཡོད་པར་བལྟ་བས་ན་མཚན་མ་དང་བཅས་ཞེས་བྱའོ། །རྣམ་པར་
སྨིན་པའང་རྣམ་སྨིན་འདིར། །ལས་ཀྱི་འབྲས་བུ་རྙེད་འགྱུར་བ། །ནམ་ཞིག་གྲུབ་པ་རྙེད་ན་ནི། །དེ་ལ་ལས་ཀྱང་ལྡོག་པར་ཤེས། །ཞེས་པ་ནི་སྔོན་གྱི་ལས་ཀྱི་རྣམ་པར་སྨིན་པ་ལྷའི་རྣམ་པར་སྨིན་པའི་གཟུགས་ཕུང་པོ་ལྔ་འདི་ལས་ལས་ཀྱི་འབྲས་བུ་སྨིན་པར་གྱུར་པ་སྟེ་ནམ་བདག་གིས་ཏིང་
ངེ་འཛིན་ལ་སོགས་པའི་གྲུབ་པ་ཐོབ་ན། དེ་ན་ལས་ཀྱི་རྣམ་པར་སྨིན་པ་དེ་གྲུབ་པ་དེས་ཟིལ་གྱིས་ནོན་ནས་འབྲས་བུ་མི་སྨིན་པར་དེ་ལྡོག་པར་འགྱུར་རོ་ཞེས་པའོ། །སེམས་ནི་ངོ་བོ་ཉིད་མེད་པས། །འབྲས་བུ་རྒྱུ་ཡང་རྣམ་སྤངས་ལ། །ལས་དང་ཚེ་ལས་རྣམ་གྲོལ་བ། །ནམ་མཁའ་འདྲ་བར་
སྐྱེ་བར་འགྱུར། །ཞེས་པ་ནི་གྲུབ་པའི་མཐའ་སངས་རྒྱས་སུ་འགྱུར་བ་བསྟན་པ་སྟེ། སྒྲུབ་པ་པོས་བྱང་ཆུབ་ཀྱི་སེམས་དག་པར་བསྒོམས་པས་སེམས་ཀྱི་རང་བཞིན་མེད་པར་ཆུད་དེ། །ཆོས་ཀྱི་རྒྱུ་དང་འབྲས་བུ་དམིགས་སུ་མེད་པས་ལས་ཀྱི་རྒྱུ་ཚེ་ནི་འབྲས་བུ་སྟེ། ལས་དང་ཚེ་ལས་ཀྱང་རྣམ་པར་
གྲོལ་བར་གྱུར་ཏེ། དེ་ལྟར་ལས་དང་ཚེ་རྣམ་པར་གྲོལ་ན་ནམ་མཁའ་འདྲ་བར་གཟུང་བ་དང་འཛིན་པ་སྤངས་པ་དག་པའི་མཚན་ཉིད་དུ་འགྱུར་ཞེས་པའོ། །དེ་ལྟར་གསང་བའི་བདག་པོ་ཞེས་པ་ནས་འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་གྲངས་མེད་པར་འབྱུང་བ་དེ་བྲི་བའི་ཚུལ་

ཉོན་ཅིག་ཅེས་པའི་བར་དུ་གསང་བའི་དཀྱིལ་འཁོར་རང་བཞིན་དང་ཡོན་ཏན་སྨོས་ནས་ཉོན་ཅིག་ཅེས་པ་སྟེ། དེ་ལ་ཕྱག་རྒྱའི་གཟུགས་སུ་དགོད་པའི་ལེའུ་ཞེས་པ་ནི་སྙིང་རྗེ་ཆེན་པོ་འབྱུང་བའི་དཀྱིལ་འཁོར་དང་ཡི་གེ་འཁོར་ལོ་བསྐོར་བའི་དཀྱིལ་འཁོར་དུ་ལུང་བསྟན་པ་དང་། ཚིག་གིས་
གཟུགས་སུ་བཀོད་ཀྱི་འདིར་ནི་སེམས་རང་བཞིན་དངོས་སུ་གཞུག་ཏུ་མི་རུང་བའི་ཕྱག་རྒྱའི་གཟུགས་སུ་བཀོད་པ་སྟེ། དེ་ནི་ལེའུ་ཕྱག་རྒྱའི་གཟུགས་སུ་བཀོད་པའི་དཀྱིལ་འཁོར་ལ་བྱའོ། །ལྷ་རྣམས་གནས་སུ་བྱིན་གྱིས་རློབ་པ་ཞེས་པ་ནི་དཀྱིལ་འཁོར་དེར་ཕྱག་རྒྱའི་གཟུགས་སུ་ལྷ་རྣམས་
དགོད་པར་བྱིན་གྱིས་རློབ་པར་འགྱུར་རོ་ཞེས་པའོ། །ཏིང་ངེ་འཛིན་གྱི་རྒྱུད་ལྔ་ཞེས་པ་ནི་དབང་ཆེན་ལ་སོགས་པའི་དཀྱིལ་འཁོར་ལྔ་པོ་དེ་དག་ཉིད་ཡེ་ཤེས་ཀྱི་བྱེ་བྲག་ལས་བྱིན་གྱིས་བརླབས་ཏེ། དཀྱིལ་འཁོར་དེ་ལྔ་ལས་ཡེ་ཤེས་ཀྱི་ཏིང་ངེ་འཛིན་གྱི་ཁྱད་པར་ལ་ཆུད་པར་འགྱུར་བའོ་ཞེས་པའོ། །
སྔོན་གྱི་སངས་རྒྱས་རྣམས་ཀྱིས་མངོན་པར་སངས་རྒྱས་པ་ཞེས་པ་ནི་སངས་རྒྱས་ཐམས་ཅད་བྱ་བ་གཅིག་ཏུ་བསྟན་པ་སྟེ། སྔོན་གྱི་སངས་རྒྱས་ཀྱིས་ཀྱང་མཁྱེན་ནས་བཤད་ཀྱིས་དེ་ཉོན་ཅིག་ཅེས་པ་དང་སྦྱར་རོ། །ཆོས་ཀྱི་དབྱིངས་ནམ་མཁའི་སྤྱོད་ཡུལ་ཞེས་པ་ནས་ཕན་པ་དང་བདེ་བའི་ཕྱིར་ཞེས་
པའི་བར་དུ་དཀྱིལ་འཁོར་དེ་བཤད་པ་ཡང་ཕྱག་ན་རྡོ་རྗེས་མི་མཁྱེན་པའི་ཕྱིར་བཤད་པ་ནི་མ་ཡིན་གྱི། མོས་པ་སྤྱོད་པའི་ས་ལ་གནས་པ་སྔགས་ཀྱི་སྒོར་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ལ་ཕན་པ་དང་བདེ་བའི་ཕྱིར་བཤད་དོ་ཞེས་པ་སྟེ། ཆོས་ཀྱི་དབྱིངས་ནམ་མཁའི་སྤྱོད་ཡུལ་ཞེས་པ་ནི།
མོས་པ་སྤྱོད་པའི་ས་ལ་གནས་པ་སྟེ། དེ་རྣམས་ཀྱི་ཤེས་རབ་ཀྱི་ཡོན་ཏན་བཤད་པ་སྟེ། དེ་དག་གི་ཤེས་རབ་ཀྱི་དབྱིངས་ནམ་མཁའ་དང་འདྲ་བ་ལ་དམིགས་པའི་སྤྱོད་ཡུལ་དུ་གྱུར་ཞེས་པའོ། །དེ་དག་ཆོས་ཀྱི་དབྱིངས་ནམ་མཁའ་དང་འདྲ་བའི་སྤྱོད་ཡུལ་དུ་གྱུར་ན་སྔགས་ཀྱི་ཚུལ་བཤད་
ཅི་དགོས་ཤེ་ན། དེ་དག་དེ་ལྟར་སྟོང་པ་ཉིད་ཀྱི་སྤྱོད་ཡུལ་དུ་གྱུར་ཀྱང་ཐབས་ཀྱིས་སེམས་ཅན་སྒྲོལ་བར་བྱེད་དོ། །དེ་བས་ན་གསུངས་པ། སེམས་ཅན་གྱི་ཁམས་མ་ལུས་པ་བསྒྲལ་བར་ཡིད་མ་ཆེས་པ་ཞེས་པ་སྟེ། དེ་ལྟར་ཐབས་དང་ཤེས་རབ་ཏུ་འབྲེལ་པའི་སྔགས་ཀྱི་སྒོར་བྱང་ཆུབ་

སེམས་དཔའི་སྤྱད་པ་སྤྱོད་པ་རྣམས་ལ་ཕན་པ་དང་བདེ་བའི་ཕྱིར་དཀྱིལ་འཁོར་དེ་ཉོན་ཅིག་ཅེས་པའོ། །དེ་ལ་དོན་གྱི་ཕྱིར་ཞེས་པ་ནི་བྱང་ཆུབ་སེམས་དཔའ་རྣམས་ཀྱི་དོན་མྱ་ངན་ལས་འདས་པའམ་མ་ལུས་པའི་བདེ་བའི་ཕྱིར་རོ། །ཕན་པའི་ཕྱིར་ཞེས་པ་ནི་ཚེ་འདི་དང་ཕྱི་མ་
གཉིས་ལ་ཕན་པའི་ཕྱིར་རོ། །བདེ་བའི་ཕྱིར་ཞེས་པ་ནི། ཚེ་འདི་ལ་བདེ་བའི་ཕྱིར་རོ་ཞེས་པའོ། །གསང་བའི་བདག་པོ་ཐོག་མར་ཡང་དག་པར་ཀུན་དུ་སངས་རྒྱས་པའི་དཀྱིལ་འཁོར་བྲི་བའི་ཞེས་པ་ནི་དཀྱིལ་འཁོར་སྔ་མ་དག་དང་འདྲ་བ་སྟེ། དང་པོ་སྙིང་པོའི་དཀྱིལ་འཁོར་དུ་བཅོམ་ལྡན་
འདས་རྣམ་པར་སྣང་མཛད་བྲི་བའི་ཞེས་པ་སྟེ་བྲི་ཚུལ་ཉོན་ཅིག་ཅེས་པའོ། །འོག་ནས་འབྱུང་བ་དང་སྦྱར་རོ། །གསང་བའི་ཡང་གསང་བ་ཞེས་པ་ནི། གསང་བ་ནི་སེམས་ཅན་གྱི་རང་བཞིན་ཕྲ་ཞིང་དམིགས་སུ་མེད་པས་ན་གསང་བའོ། །དེའི་ཡང་གསང་བ་ནི་དམ་ཚིག་མེད་པའི་སེམས་
ཅན་རྣམས་ལ་མི་བསྟན་པའི་ཕྱིར་རོ། །སྙིང་རྗེ་ཆེན་པོའི་སྙིང་པོ་འབྱུང་བ་ཞེས་པ་ནི་སྔ་མ་བཞིན་ནོ། །གང་ལས་འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་གྲངས་མེད་པ་འབྱུང་བ་ཞེས་པ་ནི་འཇིག་རྟེན་གྱི་དཀྱིལ་འཁོར་ནི་གཟུགས་བརྙན་གྱི་དཀྱིལ་འཁོར་ཚོན་གྱིས་བྲི་བ་
རྣམས་སོ། །འཇིག་རྟེན་ལས་འདས་པ་ནི་རང་བཞིན་གྱི་དཀྱིལ་འཁོར་ཏེ་གཟུགས་བརྙན་གྱི་དཀྱིལ་འཁོར་རྣམས་ཀྱང་འདི་ལས་འཕྲོ་བ་དང་། རང་བཞིན་གྱི་དཀྱིལ་འཁོར་ཀྱང་འདི་མཐོང་བ་ལས་ཤེས་པར་གྱུར་པས་ན། འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་འབྱུང་བ་
ཞེས་བྱའོ། །ཡང་ན་འཇིག་རྟེན་གྱི་ལྷ་རྣམས་ཀྱི་དཀྱིལ་འཁོར་དང་། འཇིག་རྟེན་ལས་འདས་པའི་ལྷ་རྣམས་ཀྱི་དཀྱིལ་འཁོར་གྲངས་མེད་པ་རྣམས་ཀྱང་འདི་ལས་འབྱུང་བ་ཞེས་པ་སྟེ་དེ་བྲི་བའི་ཚུལ་ཉོན་ཅིག་ཅེས་པའོ། །ཀུན་དུ་གྲུ་བཞི་ལྷམ་པར་ཏེ། །ཞེས་པ་ནས། བྲི་བ་ཡང་ནི་
དཔའ་བོས་སོ། །ཞེས་པའི་བར་དུ་བཅོམ་ལྡན་འདས་རྣམ་པར་སྣང་མཛད་བཞུགས་པའི་སྙིང་པོའི་དཀྱིལ་འཁོར་བྲི་བ་སྟེ། དཀྱིལ་འཁོར་གྱིས་བཅད་པ་དང་སྣམ་བུའི་རིམ་པ་དང་ཚོན་དགྱེ་བ་ལ་སོགས་པའི་ཆོ་ག་རྣམས་ཀྱི་དཀྱིལ་འཁོར་གོང་མ་རྣམས་སུ་ཇི་སྐད་གསུངས་པ་བཞིན་ནོ། །

ཀུན་དུ་གྲུ་བཞི་ལྷམ་པ་ཞེས་པ་ནི་ཚད་མེད་པ་བཞི་དང་ལྡན་པར་སྟོན་པའོ། །སྒོ་གཅིག་ཅེས་པ་ནི་སྒོ་མང་པོ་ནས་ཆོས་ཀྱི་དབྱིངས་ཀྱི་སྒོ་གཅིག་ཏུ་འདུ་བར་བསྟན་པའོ། །སྟེགས་བུར་བཅས་པ་ཞེས་པ་ནི་མཐའ་ཚོན་གྱིས་བྲི་བའི་དབུས་ཚོན་སེར་པོས་བཀང་སྟེ། བཅོམ་ལྡན་འདས་བཞུགས་
པའི་གཞིར་བཅས་ཞེས་པའོ། །རྡོ་རྗེའི་མཚན་མས་བཏབ་པ་ཞེས་པ་ནི་དེའི་ནང་དུ་ནུབ་ཕྱོགས་ཀྱི་ལོགས་སུ་རྡོ་རྗེ་རྩེ་ལྔ་པ་གཅིག་པའོ། །དབུས་སུ་རྡོ་རྗེ་རྩེ་བརྒྱ་པ། །ཞེས་པ་ནི་རྒྱུའི་ཚེ་རྣམ་པར་གྲོལ་བའི་གཟུངས་ཞེས་བརྒྱ་པ་དང་བཅས་པ་བསྟན་པ་སྟེ། རྣམ་པར་གྲོལ་བའི་སྒོར་ཡེ་ཤེས་
བརྒྱར་ཡང་ཡི་གེ་འཁོར་ལོ་བསྐོར་བའི་ལེའུ་ལས་ཡི་གེ་ཨས་མགོ་བཙུགས་ན། ཀའི་རིས་ནས་ཡ་དང་ར་དང་བ་དང་ལ་ཡན་ཆད་ཀྱི་བར་དུ་ཡི་གེ་ཉི་ཤུ་རྩ་བཞི་སྨོས་པ་དང་། དང་པོ་ཨ་དང་ཉི་ཤུ་ལྔ་སྟེ། དེ་ལྟར་ཨ་དང་བཅས་པ་དེ་ཡང་ཉི་ཤུ་ལྔ། ཨ་དང་བཅས་པ་ཉི་ཤུ་ལྔ། ཨ་དང་
བཅས་པ་ཉི་ཤུ་ལྔ་སྟེ། དེ་ལྟར་རྣམ་པར་ཐར་པའི་སྒོ་བརྒྱ་ལས་ཡེ་ཤེས་བརྒྱར་སྦྱར་བའི་རང་བཞིན་རྡོ་རྗེ་རྩེ་བརྒྱ་པ་དེའི་དབུས་སུ་བྲིའོ་ཞེས་པའོ། །ཤ་དང་ཥ་ཊ་ར་ས་དང་། ཧ་རྣམས་ནི་ཆ་གཉིས་པའི་ནང་དུ་འདུས་པར་ཤེས་པའོ། །དེའི་སྟེང་དུ་པདྨོ་བྲི་བར་བྱ་བ་ནི་ས་བོན་དང་བཅས་
པ་རྒྱས་པར་ཏེ་ཞེས་པ་ནི་རྡོ་རྗེ་དེའི་སྟེང་དུ་པདྨོ་འདབ་མ་བཞི་པ་རང་གི་ས་བོན་དང་བཅས་པ་བྲི་བའོ། །དེ་སྟེང་དུ་ཡང་པདྨོ་ཆེན། །ཕྱག་རྒྱ་ཀླད་ཀྱི་འཁོར་གྱིས་བརྒྱན། །འདབ་མ་བརྒྱད་ཀྱང་རྫོགས་པར་ཏེ། །གེ་སར་བཅས་པ་ཤིན་ཏུ་བཟང་། །ཞེས་པ་ནི་པདྨོའི་སྟེང་དུ་ཡང་པདྨོ་ཆེན་
པོ་འདབ་མ་བརྒྱད་པ་བྲིས་པ་སྟེ། ཕྱག་རྒྱ་ཀླད་ཀོར་གྱིས་བརྒྱན་ཞེས་པ་ནི་ཀླད་ཀོར་ནི་སྟོང་པ་ཉིད་དུ་སྟོན་པའི་ཚིག་ཡིན་པས་ཡན་ལག་བཅུ་གཉིས་ཀྱི་རིག་པའི་རྒྱལ་པོ་ལ་བྱ་སྟེ། ཡན་ལག་བཅུ་གཉིས་ཚིག་བྲི་བར། །ཞེས་པ་དང་སྦྱར་རོ། །ཕྱག་རྒྱ་ནི་གསང་བའི་ཕྱག་རྒྱ་བརྒྱད་པ་
སྟེ་བརྒྱད་པ་དཀྱིལ་འཁོར་གྱི་ཞེས་པ་དང་སྦྱར་རོ། །པདྨོ་སྟེང་མཆེ་བ་དང་འདབ་མ་བརྒྱད་ཀྱི་བྱེ་བྲག་ཆེ་བས་དེའི་འོག་མ་དེ་བས་ཆུང་བར་བྱ་བར་མངོན་པ་སྟེ་འདབ་མ་བཞི་པར་ཤེས་པར་བྱའོ། །གཉིས་སུ་ན་རྒྱུའི་ཚེ་པདྨོ་བས་ཆུང་ངུ་ཤེས་པར་བྱའོ། །པདྨོ་ཆེན་པོ་འདབ་མ་བརྒྱད་པ་ནི་

ཡེ་ཤེས་བརྒྱད་ཀྱི་རང་བཞིན་དུ་སྔར་བཤད་པ་བཞིན་ནོ། །ཡན་ལག་བཅུ་གཉིས་ཚིག་བྲི་བ། །འདབ་མ་ཀུན་ལ་རྒྱས་པར་ཏེ། །ཞེས་པ་ནི་ཡན་ལག་བཅུ་གཉིས་པའི་རིག་པའི་རྒྱལ་མོའི་སྙིང་པོ་དང་ཉེ་བའི་སྙིང་པོར་བཅས་པའི་ཡི་གེ་ཟུང་བརྒྱད་པ་རྣམས་འདབ་
མ་བརྒྱད་ལ་བྲི་བར་བྱའོ། །དེ་ཡི་དབུས་སུ་མགོན་པོ་བཞུགས། །ཀུན་དུ་སངས་རྒྱས་རྐང་གཉིས་གཙོ། །བརྒྱད་པ་དཀྱིལ་འཁོར་བརྒྱད་འཁོར་གྱིས། །ཀུན་དུ་ཡང་ནི་བསྐོར་བཞིན་དུ། །ཞེས་པ་ནི་པདྨོའི་དབུས་ཀྱི་སྙིང་པོ་ལ་བཅོམ་ལྡན་འདས་བཞུགས་ཏེ། ཕྱག་རྒྱ་བརྒྱད་
པོ་རྣམས་ཀྱང་བཅོམ་ལྡན་འདས་ཀྱི་ཁོ་ར་ཁོར་ཡུག་ཏུ་རང་གི་དཀྱིལ་འཁོར་དང་ས་བོན་དུ་བཅས་པར་པདྨོའི་སྙིང་པོ་དེ་ཉིད་ལ་བྲི་བར་བྱའོ། །འདི་ནི་མཆོག་ཏུ་ཤེས་པར་བྱ། །སྙིང་རྗེ་འབྱུང་བའི་དཀྱིལ་འཁོར་ཏེ། །ཞེས་པ་ནི་མཆོག་ཅེས་པ་ནི་སྟོན་པའི་མཆོག་གོ། །སྙིང་རྗེ་
འབྱུང་ཞེས་པ་ནི་སྔ་མ་བཞིན་ནོ། །དེ་ལས་འབྱུང་བར་ཤེས་པར་བྱ། །དཀྱིལ་འཁོར་རྣམས་ནི་གཞུང་བཞིན་དུའོ། །ལས་དང་ལུས་ནི་ཀུན་གྲུབ་པ། །གྲུབ་པ་ཡང་ནི་དཔའ་བོས་སོ། །ཞེས་པ་ནི་ཞི་བ་དང་རྒྱས་པ་ལ་སོགས་པའི་ལས་རྣམས་ཀྱི་དཀྱིལ་འཁོར་གཟུགས་སུ་བྲིའོ། །
དཀྱིལ་འཁོར་གྱི་སྔགས་ཀྱི་གཞུང་གཞན་དག་ལས་བཤད་པ་རྣམས་ཀྱང་དཀྱིལ་འཁོར་འདི་ལས་འབྱུང་བར་ཤེས་པར་བྱ་ཞེས་ཏེ་དེ་ནི་དབང་ཆེན་གྱི་དཀྱིལ་འཁོར་ཏེ། བཅོམ་ལྡན་འདས་རྣམ་པར་སྣང་མཛད་ཀྱི་གནས་སུ་ཤེས་པར་བྱའོ། །གསང་བའི་བདག་པོ་གཞན་ཡང་དེ་བཞིན་
གཤེགས་པའི་དཀྱིལ་འཁོར་དུ་གྱུར་པ་ནི་ཞེས་པ་ནས། དེ་ནི་ཕྱོགས་བཅུ་ཀུན་དུ་སོང་། །ཞེས་པའི་བར་དུ་བཅོམ་ལྡན་འདས་ཀྱི་ཤར་ཕྱོགས་སུ་མ་འདས་པའི་དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་བྲི་སྟེ། ཟླ་བའི་དཀྱིལ་འཁོར་འདྲ་བ་སྟེ། །ཞེས་པ་ནི་བཅོམ་ལྡན་འདས་
ཀྱི་གདན་པདྨོའི་ཁ་དོག་ཟླ་བའི་དཀྱིལ་འཁོར་ལྟར་དཀར་པོ་ཞེས་པའོ། །དབུས་ན་འོད་དཀར་དུང་འདྲ་ཞེས་པ་ནི་ཆུའི་དཀྱིལ་འཁོར་ཁ་དོག་དུང་དང་འདྲ་བར་བྱའོ། །སངས་རྒྱས་ཀུན་གྱི་གྲུ་གསུམ་པོ། །པདྨོ་དཀར་པོའི་སྟེང་ན་གནས། །ཞེས་པ་ནི་ཆུའི་དཀྱིལ་འཁོར་གྱི་སྟེང་ན་

ཕྱག་རྒྱ་གྲུ་གསུམ་པོ་པདྨ་དཀར་པོའི་སྟེང་ན་གནས་པ་བྲི་ཞེས་པའོ། །འཁོར་བཅས་བྱས་པ་རྒྱ་ཆེན་པོ། །ཞེས་པ་ནི་དེར་ཡི་གེ་ཨ་ཀླད་ཀོར་དང་བཅས་པར་བཞག་ཅེས་པའོ། །རྡོ་རྗེའི་རྒྱན་གྱིས་བརྒྱན་པ་སྟེ། །ཞེས་པ་ནི་དེར་རྡོ་རྗེ་རྩེ་ལྔ་པ་བྲི་ཞེས་པའོ། །འོད་ཀྱང་གཉིས་
སུ་བྱ་བ་ནི། །ཀུན་དུ་ཐེ་ཚོམ་མེད་བཞིན་དུ། །སྔགས་ཀྱི་མགོན་ལས་བྱུང་བ་ནི། །དེ་ནི་ཕྱོགས་བཅུ་ཀུན་དུ་སོང་། །ཞེས་པ་ནི་ཕྱག་རྒྱ་གྲུ་གསུམ་པོ་དེ་གྲུ་གཉིས་ནས་འོད་གཉིས་འབྱུང་བར་བྲིས་ཏེ། དེ་ཡང་ཆོས་ཀྱི་སྐུ་ལས་ལོངས་སྤྱོད་དང་སྤྲུལ་པའི་སྐུ་འབྱུང་བར་ཤེས་པར་བྱའོ། །
དེ་ནས་གསང་བའི་བདག་པོ་འཇིག་རྟེན་གྱི་དབང་པོའི་དཀྱིལ་འཁོར་ནི་ཞེས་པ་ནས། རིག་པའི་རྒྱལ་པོར་བཅས་པ་རུ། །མཁས་པས་སུ་ནི་བྲི་བར་བྱ། །ཞེས་པའི་བར་དུ་སྤྱན་རས་གཟིགས་ཀྱི་དབང་པོའི་དཀྱིལ་འཁོར་བཤད་པ་སྟེ། ཀུན་དུ་གྲུ་བཞི་ལྷམ་པར་ཏེ། །ཞེས་པ་དབང་
ཆེན་གྱི་དཀྱིལ་འཁོར་དུ་བྲི་ཞེས་པའོ། །དབུས་སུ་དུང་ནི་གཞག་པར་བྱ། །ཞེས་པ་ནི་དེའི་དབུས་སུ་ཆུའི་དཀྱིལ་འཁོར་བྲི་ཞེས་པའོ། །དེ་སྟེང་པདྨོ་བྲི་བ་ནི། །ས་བོན་དུ་བཅས་རྒྱས་པ་སྟེ། །ཞེས་པ་ནི་ཆུའི་དཀྱིལ་འཁོར་དེའི་སྟེང་དུ་པདྨོ་དཀར་པོ་ས་བོན་ཨ་དང་བཅས་པ་བྲི་ཞེས་པའོ། །
དེ་སྟེང་རྡོ་རྗེ་ཆེན་པོ་སྟེ། །ཞེས་པ་ནི་པདྨོའི་སྟེང་དུ་རྡོ་རྗེ་རྩེ་ལྔ་པ་བཞག་ཅེས་པའོ། །རྡོ་རྗེ་ལས་ནི་པདྨོ་རྒྱ་ཆེན་པོ། །ས་བོན་གྱིས་ནི་ཀུན་གདབ་པ། །རང་གི་ས་བོན་གྱིས་ཀྱང་གདབ། །ཅེས་པ་ནི་རྡོ་རྗེ་དེའི་སྟེང་དུ་པདྨོ་ཆེན་པོ་འདབ་མ་བརྒྱད་པ་བྲིས་ཏེ། རང་གི་ས་བོན་དང་བཅས་པ་བྲི་
ཞེས་པའོ། །སྐྱོང་བ་དང་ནི་ཁྲོ་གཉེར་དང་། །ཞེས་པ་ནི་ལེགས་པར་བྱེ་བྲག་ཏུ་ཞེས་པའི་བར་དུ་སྐྱོང་བ་ལ་སོགས་པའི་འཁོར་རྣམས་ཕྱག་རྒྱའི་གཟུགས་སུ་དཀྱིལ་འཁོར་དེར་བྲི་ཞེས་པའོ། །རྟ་མགྲིན་ཅན་གྱི་བྱ་བ་ནི། །ཞེས་པ་ནས། མཁས་པས་སུ་ནི་བྲི་ཞེས་པའོ། །ཞེས་པའི་
དཀྱིལ་འཁོར་དེའི་ནུབ་ཕྱོགས་ཀྱི་མཐའ་མར་རྟ་མགྲིན་ཅན་གྱི་དཀྱིལ་འཁོར་གྲུ་གསུམ་པ་བྲིས་ཏེ། དཀྱིལ་འཁོར་འཕྲུལ་གྱི་མཚན་གྱིས་བཏབ། །ཅེས་པ་ནི་གྲུ་གསུམ་པོ་དཀྱིལ་འཁོར་གྱི་མཚན་མ་ཞེས་བྱའོ། །ཉི་མ་ཤར་བ་དང་འདྲ་སྟེ། །ཞེས་པ་ནི་དཀྱིལ་འཁོར་དེའི་ཁ་དོག་

ཉི་མ་དང་འདྲ་ཞེས་པའོ། །རིག་པའི་རྒྱལ་པོ་བཅས་པ་རུ། །མཁས་པས་སུ་ནི་བྲི་བར་བྱ། །ཞེས་པའི་དཀྱིལ་འཁོར་གྲུ་གསུམ་པོ་དེར་རིག་པའི་རྒྱལ་པོ་རྟ་མགྲིན་དང་བཅས་པ་བྲི་ཞེས་པ་སྟེ། དེའི་ཕྱག་རྒྱའི་གཟུགས་སུ་བྲི་བར་ཤེས་པར་བྱའོ། །གསང་བའི་བདག་
པོ་གཞན་ཡང་ཁྱོད་ཉིད་ཀྱིས་དཀྱིལ་འཁོར་འདིར་བཤད་དོ་ཞེས་པ་ནས། རྒྱལ་བ་གཙོ་བོ་རྣམས་ཀྱིས་གསུངས་པ་ཞེས་པའི་བར་དུ་ཕྱག་ན་རྡོ་རྗེའི་དཀྱིལ་འཁོར་བཤད་པ་སྟེ། ཕྱག་ན་རྡོ་རྗེ་ནི་བྱ་བ་ནན་ཏན་གྱི་རང་བཞིན་ཏེ། ལས་ཐམས་ཅད་པས་དཀྱིལ་འཁོར་བཞི་པར་ཚད་དང་
ལྡན་པར་ཤེས་པར་བྱའོ། །ཀུན་དུ་གྲུ་བཞི་ལྷམ་པར་ཏེ། །རྡོ་རྗེའི་མཚན་གྱིས་ཤིན་ཏུ་བཏབ། །ཀུན་ཀྱང་རབ་ཏུ་སེར་ལ་བཟང་། །ཞེས་པ་ནི་དབང་ཆེན་གྱི་དཀྱིལ་འཁོར་དང་པོར་བྲིས་ཏེ་སྔ་མ་བཞིན་ནོ། །པདྨའི་དབུས་སུ་རབ་ཏུ་གནས། །དེ་ཡི་དབུས་སུ་ཡང་བྲི་བ། །བུམ་པ་ཟླ་
བ་དང་འདྲ་བ། །ཞེས་པ་ནི་དབང་ཆེན་གྱི་དཀྱིལ་འཁོར་གྱི་དབུས་སུ་པདྨོ་བྲིས་ཏེ། པདྨོའི་སྟེང་དུ་ཆུའི་དཀྱིལ་འཁོར་བྲི་བ་སྟེ་བུམ་པ་ནི་ཆུའི་དཀྱིལ་འཁོར་དུ་ཤེས་པར་བྱའོ། །དེ་ནི་མཚན་གྱིས་སུ་ཡང་བཏབ། །འཁོར་གྱིས་ཀྱང་ནི་རྣམ་པར་བརྒྱན། །ཞེས་པ་ནི་དཀྱིལ་འཁོར་དེ་རང་
གི་ས་བོན་ཡི་གེ་པ་ཀླད་ཀོར་དང་བཅས་པའི་མཚན་མས་བཏབ་ཅེས་པའོ། །དེ་ཡི་སྟེང་དུ་ཆུ་ཆེན་པོ། །གསལ་བར་དབྱར་གྱི་སྤྲིན་འདྲ་བར། །དཔལ་དང་གཡོ་བ་སྔགས་མཁན་གྱིས། །འཁོར་གྱིས་རྣམ་པར་བརྒྱན་པར་བྱ། །ཞེས་པ་ནི་ཆུའི་དཀྱིལ་འཁོར་དེའི་སྟེང་དུ་རླུང་གི་དཀྱིལ་
འཁོར་ཁ་དོག་སྨུག་ནག་དབྱར་གྱི་སྤྲིན་དང་འདྲ་བར་བ་དན་དང་བཅས་པ་གཡོ་བཞིན་དུ་བྲིས་ཏེ། འཁོར་གྱིས་རྣམ་པར་བརྒྱན་པར་བྱ། །ཞེས་པ་ནི་རང་གི་ས་བོན་ཡི་གེ་ཧ་དང་བཅས་པར་ཤེས་པར་བྱ་ཞེས་པའོ། །དེའི་སྟེང་ན་འཇིགས་པ་ཆེན་པོ་འཇིགས་པའི་མེའི་གཟུགས་འདྲ་བ་གྲུ་
གསུམ་པོ་དང་འདྲ་བར་བྱ་ཞེས་པ་ནི། རླུང་གི་དཀྱིལ་འཁོར་དེའི་སྟེང་དུ་མེའི་དཀྱིལ་འཁོར་གྲུ་གསུམ་འཕགས་པའི་བསྐལ་པའི་མེའི་ཁ་དོག་འདྲ་བ་འཇིགས་འཇིགས་ལྟར་འདུག་པ་འདྲ་བ་ཞེས་པའོ། །འབར་བས་ཀྱང་བརྒྱན་བཞིན་དུ་ཞེས་པ་ནི་དཀྱིལ་འཁོར་དེའི་མཚན་མ་གྲུ་གསུམ་

པོས་ཀྱང་གདབ་ཅེས་པའོ། །འབར་བའི་ཕྲེང་བས་འཇིགས་བཞིན་དུ། །འཁོར་ནི་ཉི་མ་ཤར་དང་འདྲ། །ཞེས་པ་ནི་འབར་བའི་ཕྲེང་བ་ཁ་དོག་ཉི་མ་ཤར་བ་དང་འདྲ་བ་འཇིགས་པས་འཁོར་བར་བྱ་ཞེས་པའོ། །དེ་ཡི་དབུས་སུ་པདྨོ་བྱ། །དུས་མཐའི་མེ་ཡི་དཀྱིལ་དང་འདྲ། །ཞེས་
པ་ནི་མེའི་དཀྱིལ་འཁོར་དེའི་དབུས་སུ་པདྨོའི་ཁ་དོག་འདྲ་བ་དམར་པོ་གཉིས་བྲི་ཞེས་པའོ། །པདྨའི་སྟེང་དུ་རྡོ་རྗེ་སྟེ། །འབར་བའི་ཕྲེང་བ་གོང་བཞིན་བྱ། །ཞེས་པ་ནི་པདྨའི་སྟེང་དུ་རྡོ་རྗེ་དམར་སྨུག་གི་ཁ་དོག་ཏུ་བྲིས་ཏེ། འབར་བ་ཞེས་པ་ནི་མེའི་ཁ་དོག་གཡོ་བ་ནི་རླུང་གི་ཤས་ཏེ།
མེ་དང་རླུང་གཉིས་ཀའི་ཤས་ཡོད་པས་རྡོ་རྗེ་དམར་སྨུག་ཏུ་བྱའོ། །ཧཱུྃ་ཞེས་པ་ཡི་སྒྲས་ནོན་པའི། །ས་བོན་དམ་པས་སུ་ནི་བརྒྱན། །ཞེས་པ་ནི་རྡོ་རྗེའི་སྔོན་དུ་ཕྱག་ན་རྡོ་རྗེའི་ས་བོན་གྱི་ཡི་གེ་ཧཱུྃ་གཞག་པར་བྱ་ཞེས་པའོ། །དཔའ་བོ་ཁྱོད་ཀྱི་དཀྱིལ་འཁོར་འདི། །རྒྱལ་བ་གཙོ་བོ་
རྣམས་ཀྱིས་གསུངས། །ཞེས་པ་ནི་སྔོན་གྱི་རྒྱལ་བ་རྣམས་ཀྱིས་ཀྱང་གསུངས་ཞེས་པའོ། །དཔའ་བོ་ཞེས་པ་ནི་ཕྱག་ན་རྡོ་རྗེ་ལ་བོས་པའི་ཚིག་གོ། །མཱ་མ་ཀཱི་དང་ལུ་གུ་རྒྱུད། །ཅེས་པ་ནི་དེ་ལས་ཀུན་ཤིན་ཏུ་གྲུབ་པའི་ཕྱིར་རོ་ཞེས་པའི་བར་དུ། མཱ་མ་ཀཱི་ལ་སོགས་པའི་འཁོར་
རྣམས་དང་། དབང་ཆེན་གྱི་དཀྱིལ་འཁོར་གྱི་ནང་དུ་བྲི་བར་བཤད་པ་སྟེ། ཕྱག་རྒྱའི་དཀྱིལ་འཁོར་ས་བོན་གྱི། །ཁ་དོག་རིམ་པར་ཕྱེད་པ་སྟེ། །ཇི་ལྟར་རིམ་པ་བཞིན་དུ་ཤེས། །ཞེས་པ་ནི་སོ་སོའི་ཕྱག་རྒྱ་དང་ས་བོན་རྣམས་སོ་སོའི་ཁ་དོག་ཅི་འདྲ་བ་ལས་དཀྱིལ་འཁོར་ཀྱང་དེ་བཞིན་
དུ་ཤེས་པར་བྱ་སྟེ། སྔར་བཤད་པའི་རིམ་པ་བཞིན་དུ་ཇི་ལྟར་རིམ་བཞིན་དུ་བྲི་ཞེས་པའོ། །དེ་ནས་གཞན་གྱིས་ཡང་བཤད་པ། །ཞེས་པ་ནས་མཐུ་ཆེན་དང་ལྡན་པའོ་ཞེས་པའི་བར་དུ་ཕྱག་ན་རྡོ་རྗེའི་དཀྱིལ་འཁོར་འོག་ལོགས་སུ་ནམ་མཁའ་དྲི་མ་མེད་པ་ལ་སོགས་པའི་རྡོ་རྗེ་འཛིན་
བཅུ་གཉིས་མིང་གིས་སྨོས་པ་རྣམས་བྲིས་ཏེ། དེ་རྣམས་ཀྱི་དཀྱིལ་འཁོར་ཀྱང་དབང་ཆེན་ལ་སོགས་པ་བཞི་པོ་བྲི་བར་གསུངས་པ། དཀར་པོ་དམར་པོ་སེར་པོ་དང་། །ནག་པོ་ཞེས་ཀྱང་གསུངས་པ་ཡིན། །ཞེས་པ་སྟེ་དཀྱིལ་འཁོར་འདི་བཞི་རྡོ་རྗེ་འཛིན་པ་བཅུ་གཉིས་ལ་ལན་གསུམ་

དུ་རིམ་བཞིན་དུ་བསྒྲེས་ཏེ་སྦྱར་རོ། །ཕྱག་རྒྱའི་གཟུགས་ཀྱང་བཤད་པ་ནི། །རྩེ་གསུམ་དང་ནི་རྩེ་གཅིག་སྟེ། །ཁ་ཅིག་གཉི་ག་ཡང་མ་ཡིན། །དེ་ལ་ཁ་ཅིག་ཕྲེང་ཅན་ནི། །དེ་རྣམས་ཀྱི་ཕྱག་རྒྱ་སྟེ་རྡོ་རྗེ་རྩེ་གསུམ་ལ་ཡང་རྣམ་པ་གཉིས་ཏེ། ཕྱོགས་གཅིག་རྩེ་
གསུམ་པ་དང་། ཕྱོགས་གཉིས་ཀ་རྩེ་གསུམ་པའོ། །དེ་བཞིན་རྩེ་གཅིག་པ་ཡང་ཤེས་པར་བྱ་སྟེ། དེ་བས་ན་ཁ་དོག་གཉི་ག་གཟུང་བའོ། །གཉི་ག་ཡང་མ་ཡིན་ཞེས་པ་ནི་རྡོ་རྗེ་ཐུ་ལུམ་དུ་ཤེས་པར་བྱའོ། །དེ་ལ་ཁ་ཅིག་ཕྲེང་བ་ཅན། །ཞེས་པ་ནི་རྡོ་རྗེ་ཕྲེང་བའི་ཕྱག་རྒྱ་སྟེ།
ཕྱག་རྒྱ་དེ་ལན་དྲུག་ཏུ་བསྒྲེས་པ་བཅུ་གཉིས་སུ་ཁྱབ་པར་བྱའོ། །ཁ་དོག་རྣམ་པའང་ཤེས་པར་བྱ། །ཞེས་པ་ནི་ཕྱག་རྒྱ་དེ་རྣམས་ཀྱི་ཁ་དོག་ཤ་སྟག་ཀྱང་རྡོ་རྗེ་འཛིན་དེ་དག་ཉིད་ཀྱི་ཁ་དོག་ཇི་ལྟ་བ་བཞིན་དུའོ་ཞེས་པའོ། །ཀུན་ཀྱང་རྣམ་པར་འདུལ་བ་སྟེ། །མཐུ་ཆེན་དང་ནི་ལྡན་པའོ། །
ཞེས་པ་ནི་རྡོ་རྗེ་འཛིན་པ་དེ་དག་གི་རྗེས་སུ་བསྔགས་པ་སྟེ་གདུལ་དཀའ་བ་རྣམས་འདུལ་ནས་ཞེས་པའོ། །མགོན་པོ་མི་གཡོའི་དཀྱིལ་འཁོར་ནི། །ཞེས་པ་ནས། མཁས་པས་དེར་ནི་བྲི་བར་བྱ། །ཞེས་པའི་བར་དུ་འཕགས་པའི་དཀྱིལ་འཁོར་བཤད་པ་སྟེ། རླུང་དང་མེ་ཞེས་
བསྒྲགས་པ་ཡིན། །ཞེས་པ་ནི་རླུང་གི་དཀྱིལ་འཁོར་གྱི་སྟེང་དུ་མེའི་དཀྱིལ་འཁོར་བྲི། དེའི་སྟེང་དུ་འཕགས་པ་མི་གཡོ་བའི་ཕྱག་རྒྱ་རལ་གྲིའམ་ཞགས་པ་གང་ཡང་རུང་བ་ཅིག་རང་གི་ས་བོན་དང་བཅས་པར་བྲི་ཞེས་པའོ། །ཁམས་གསུམ་རྣམ་པར་འདུལ་བ་ཡང་། །ཤིན་ཏུ་
རླུང་གི་དབུས་སུ་སྟེ། །ཞེས་པ་ཡང་ཞེས་པའི་ཚིག་གིས་འཕགས་པ་མི་གཡོ་བའི་དཀྱིལ་འཁོར་ལྟར་རླུང་གི་དཀྱིལ་འཁོར་གྱི་སྟེང་དུ་མེའི་དཀྱིལ་འཁོར་བྲི་ཞེས་པའོ། །རླུང་གི་དབུས་སུ་ཞེས་པ་ནི་མེའི་དཀྱིལ་འཁོར་གྱི་སྟེང་དུ་རླུང་གི་དཀྱིལ་འཁོར་བྲིས་ཏེ། དེའི་དབུས་སུ་རྡོ་རྗེའི་ཕྱག་
རྒྱ་རང་གི་མཚན་མ་དང་བཅས་པར་ཞེས་སོ། །གནས་གསུམ་ལ་ནི་འདུག་པའོ། །ཞེས་པ་ནི་རླུང་གི་དཀྱིལ་འཁོར་གཉིས་དང་མེའི་དཀྱིལ་འཁོར་གསུམ་ལ་འཇུག་ཅེས་པའོ། །གསང་བའི་བདག་པོ་གཞན་ཡང་ཞེས་པ་ནས་ས་བོན་གྱིས་གདབ་མདོ་རུ་ཞེས་པའི་བར་དུ་ནམ་མཁའ་ཅན་གྱི་

དཀྱིལ་འཁོར་བཤད་པ་སྟེ། དབང་ཆེན་གྱི་དཀྱིལ་འཁོར་ནི་སྔ་མ་བཞིན་ནོ། །ལྷ་མོ་དེའི་ཁ་དོག་ཀྱང་སེར་པོར་བྱ་སྟེ། པདྨོའི་སྟེང་དུ་བཞུགས་པར་རོ། །དེ་རུ་བྲི་བ་གཙུག་ཏོར་ཏེ། །དུམ་བུ་གསུམ་དུ་གནས་པར་ཞེས་པ་ནི་དབང་ཆེན་གྱི་དཀྱིལ་འཁོར་གྱི་སྟེང་དུ་པདྨོ་བྲིས་ཏེ། པདྨོའི་སྟེང་
དུ་ཕྱག་རྒྱ་གཙུག་ཏོར་ཆ་གསུམ་དང་བཅས་པ་བྲི་ཞེས་པའོ། །དེ་ལས་དབུ་མའི་ཆ་བོར་དེ་རུའང་སྤྱན་བྲིས་ཤིག །ཅེས་པ་ནི་གཙུག་ཏོར་གྱི་ཕྱག་རྒྱ་དེ་སྨད་སུམ་གཉིས་བོར་ལ་སྟོད་ཀྱི་སུམ་ཆ་ནི་ནང་དུ་སྤྱན་གྱི་ཕྱག་རྒྱ་བྲིའོ། །འོད་འབར་དབུས་སུ་གནས་པ་སྟེ། །ཞེས་པ་ནི་གཙུག་ཏོར་གྱི་
ཕྱག་རྒྱ་དེ་འོད་འབར་བའི་ནང་དུ་འདུག་པར་བྱ་ཞེས་པའོ། །ས་བོན་གྱིས་གདབ་མདོ་རུ་ཞེས་པ་ནི་ཡུམ་དེའི་ས་བོན་དང་ཡི་གེ་དང་བཅས་པར་བྱ་ཞེས་པའོ། །བྱང་ཆུབ་སེམས་དཔའ་ཀུན་གྱི་ཞེས་པ་ནས། ཀུན་གྱི་བསམ་པ་རྫོགས་བྱེད་པའོ། །ཞེས་པའི་བར་དུ་བྱང་ཆུབ་སེམས་དཔའ་རྣམས་
ཀྱི་ཕྱག་རྒྱ་ཡིད་བཞིན་གྱི་ནོར་བུ་ཆུའི་དཀྱིལ་འཁོར་གྱི་སྟེང་དུ་བྲི་ཞེས་པའོ། །དེ་ནས་ཤཱཀྱ་སེང་གེའི་ཞེས་པ་ནས། རིམ་བཞིན་དུ་ནི་གཞག་པར་བྱ། །ཞེས་པའི་བར་དུ་དཀྱིལ་འཁོར་སྣམ་བུ་གཉིས་པོ་ཤཱཀྱ་ཐུབ་པ་དབང་ཆེན་གྱི་དཀྱིལ་འཁོར་བཞུགས་པར་བྲི་སྟེ་གཞན་ནི་སྔ་མ་བཞིན་ནོ། །
དབང་ཆེན་གྱི་དཀྱིལ་འཁོར་གྱི་སྟེང་དུ་པདྨོ་སེར་པོ་བཞག་སྟེ། པདྨོའི་སྟེང་དུ་ལྷུང་བཟེད་དམ་ཆོས་གོས་སམ་འཁར་གསིལ་གསུམ་ལས་གང་ཡང་རུང་བ་ཅིག་བཞག་སྟེ། དེ་ཡང་འབར་བ་དང་བཅས་པ་ལ་རྡོ་རྗེའི་མཚན་གྱིས་བཏབ་པར་བྱ་ཞེས་པའོ། །གཙུག་ཏོར་ལྔ་གསུངས་པ་ཞེས་
པ་ནས། ཁ་དོག་རིམ་པ་རྟོགས་པར་བྱ། །ཞེས་པའི་བར་དུ་གཙུག་ཏོར་ལྔ་པོ་རྣམས་ཀྱི་ཕྱག་རྒྱ་བྲི་བར་བཤད་པ་སྟེ། དེ་དག་གི་དཀྱིལ་འཁོར་ནི་སོ་སོའི་ཁ་དོག་ཅི་འདྲ་བ་དང་སྦྱར་བར་བྱ་སྟེ། ཁ་དོག་ཀྱང་དཀྱིལ་འཁོར་སྔ་མར་བཤད་ཟིན་ཏོ། །ཡིད་བཞིན་ནོར་བུ་སྤུ་མཛོད་ཀྱི། །ཞེས་
པ་ནི་སྤུ་མཛོད་ཀྱི་ཕྱག་རྒྱ་ཡིད་བཞིན་གྱི་ནོར་བུ་བྲི་ཞེས་པ་སྟེ། དཀྱིལ་འཁོར་ཡང་དེ་ཉིད་ཀྱི་ཁ་དོག་ཅི་འདྲ་བ་དང་སྦྱར་རོ། །སྤྱན་རྣམས་ཀྱིས་ནི་འདི་ཉོན་ཅིག །གཙུག་ཏོར་དེ་ནི་ཀུན་སེར་པོ། །རྡོ་རྗེ་མཚན་གྱིས་གདབ་པར་བྱ། །ཞེས་པ་ནི་སངས་རྒྱས་ཀྱི་སྤྱན་ཕྱག་རྒྱ་གཙུག་ཏོར་སེར་པོ་བྲིས་

ཏེ་རྡོ་རྗེ་མཚན་མ་དང་བཅས་པ་བྲི་ཞེས་པའོ། །དེའི་ཁ་དོག་སེར་པོ་བས་དབང་ཆེན་གྱི་དཀྱིལ་འཁོར་དུ་བྲི་བར་ཤེས་པར་བྱའོ། །གཞན་གྱིས་མི་ཚུགས་ལག་པ་པདྨོར་བཅས་ཏེ་ངོ་མཚར་ཆེའོ་ཞེས་པ་ནི་ལྷ་མོ་གཞན་གྱིས་མི་ཐུབ་པའི་ཕྱག་རྒྱ་ལག་པ་ཁུ་ཚུར་བཅས་པ་
འདྲ་བ་པདྨོ་ཐོགས་པ་བྲིའོ། །གཞན་གྱིས་མི་ཚུགས་དེ་ཡི་ནི། །དབང་ཆེན་པདྨ་གནག་གནས་པའོ། །ཞེས་པ་ནི་གཞན་གྱིས་མི་ཐུབ་ཅེས་བྱ་བའི་རིག་པའི་རྒྱལ་མོ་ཕྱག་རྒྱར་བྲི་སྟེ་པདྨོ་ནག་པོའི་སྟེང་ན་གནས་པར་བྱའོ། །གཙང་མ་གནས་པ་རྣམས་ཀྱི་བཤད་པ་ནི་ཞེས་པ་ནས།
རྒྱས་པ་བྲིས་ཤིག་ཆོ་ག་བཞིན་དུ་ཞེས་པའི་བར་དུ་གནས་གཙང་མ་རྣམས་ཀྱི་ཕྱག་རྒྱ་བྲི་བར་བཤད་པ་སྟེ། བསམ་པའི་ལག་པ་ནི་ཐལ་མོ་འགྲམ་པ་ལ་བརྟེན་པ་སྟེ་དཀྱིལ་འཁོར་དུ་བྲི་བར་བྱ་ན། འགྲམ་པ་མི་བྲི་བར་ཐལ་མོ་འབའ་ཞིག་གྱེན་ཤོར་འདུག་པར་བྲིའོ། །ལག་བཟང་
ཞེས་པ་ནི་མི་འཇིགས་པ་སྦྱིན་པའི་ལག་པ་བྲིའོ། །དགོད་པའི་ལག་པ་ནི་ཁ་འགྲམ་ནས་འདྲེན་པ་ལྟ་བུར་བྲིའོ། །ལག་ན་མེ་ཏོག་ནི་སྲིན་ལག་དང་མཐེ་བོང་གཉིས་སྤྲད་པ་བྲིའོ། །ནམ་མཁའི་ལག་པ་ནི་ལག་པ་བསྒྲེང་བ་བྲིའོ། །བུམ་པར་ཤེས་པར་བྱ་བ་བདག་གི་ཆུས་གང་རྡོ་རྗེས་
བརྒྱན་བཞིན་ནོ་ཞེས་པ་ནི་ས་བདག་གི་ཕྱག་རྒྱ་བུམ་པ་ཆུས་གང་བ་རྡོ་རྗེས་བརྒྱན་པར་བྲི་ཞེས་པའོ། །མེའམ་འབུད་པའི་ཐབ་བཞིན་གྱི། །ལག་པ་བྲི་སྟེ་དྲང་སྲོང་བཅས། །ཞེས་པ་ནི་བསོད་སྐྱབས་ཞེས་པ་ལ་སོགས་པའི་དྲང་སྲོང་མིང་གིས་སྨོས་པ་རྣམས་དང་ལྷན་ཅིག་ཏུ་བྲི་ཞེས་ཏེ་ལག་པ་སྨྲང་འདོན་
པ་བཞིན་དུ་བྱ་ཞེས་པ་ནི། དྲང་སྲོང་རྣམས་ཀྱི་ཕྱག་རྒྱ་སྨྲང་འདོན་པའི་ལག་པ་ལྟར་མཐེ་བོ་སོར་མོའི་ཚིགས་སུ་འཇོག་པར་བྱའོ། །གཤིན་རྗེ་ཡི་ནི་དབྱིག་པ་བྲི། །རླུང་གི་ནང་ན་རྟག་འདུ་བར། །ཞེས་པ་ནི་གཤིན་རྗེའི་ཕྱག་རྒྱ་དབྱུག་པ་རླུང་གི་དཀྱིལ་འཁོར་དུ་བྲི་ཞེས་པའོ། །འཆི་
བདག་གི་དྲིལ་བུར་ཏེ་ཞེས་པ་ནས་གྲུབ་པར་འདོད་པ་རྣམས་ཀྱིས་སོ། །ཞེས་པའི་བར་དུ་གཤིན་རྗེའི་འཁོར་འཆི་བདག་དང་དུས་མཚན་མོ་ལ་སོགས་པའི་ཕྱག་རྒྱ་མིང་གིས་སྨོས་པ་རྣམས་ཀྱི་དཀྱིལ་འཁོར་གྱི་ནང་དུ་ཐ་མར་ཁྭ་དང་བྱ་རྒོད་ལ་སོགས་པས་བསྐོར་བར་བྲིའོ། །ནི་རི་ཏི་ཡི་

རལ་གྲི་བྲི། །ཞེས་པ་ནས་ཤེས་བྱ་དཀྱིལ་འཁོར་དུ་ཞེས་པའི་བར་དུ་གཏོགས་འདོད་ལ་སོགས་པ་མིང་གིས་སྨོས་པ་རྣམས་ཀྱི་ཕྱག་རྒྱ་ཡང་ཇི་སྐད་དུ་སྨོས་པ་བཞིན་དུ་བྲི་བར་བཤད་དོ། །དེ་དག་ལ་སོགས་པའི་དཀྱིལ་འཁོར་དངོས་སུ་མ་སྨོས་པ་རྣམས་ཀྱང་ལྷ་རྣམས་སོ་སོའི་ཁ་དོག་དང་
གཟུགས་དཀྱིལ་འཁོར་སྡེ་མ་བཤད་པ་དང་སྦྱར་བར་བྱའོ། །དེ་ནས་རྡོ་རྗེ་ཡོན་སྦྱིན་ཞེས་པ་ནས། ཨུཏྤལ་རྣམས་ཉིད་ཀྱིས་བྱའོ་ཞེས་པའི་བར་དུ་དཀྱིལ་འཁོར་སྣམ་བུ་གསུམ་པོ་འཕགས་པ་འཇམ་དཔལ་གྱི་དཀྱིལ་འཁོར་བྲི་བར་བཤད་པ་སྟེ། ཀུན་ཀྱང་གྲུ་བཞི་ལྷམ་པར་བྱ། །རྡོ་
རྗེའི་མཚན་གྱིས་བཏབ་ཅེས་པ་ནི་དབང་ཆེན་གྱི་དཀྱིལ་འཁོར་དེ་སྔ་མ་བཞིན་ནོ། །དེ་ཡི་དབུས་སུ་ཡང་བྱ་བ། །མེ་འབྱུང་བ་ཡི་དཀྱིལ་འཁོར་ཏེ། །ཞེས་པ་ནི་དབང་ཆེན་གྱི་དཀྱིལ་འཁོར་ཏེ་དེའི་དབུས་སུ་མེའི་དཀྱིལ་འཁོར་བྲིའོ། །དེའི་དབུས་སུ་ཕྱག་རྒྱ་བྲི་བ་ནི་ཨུཏྤ་ལ་སྟེ་ལེགས་པའོ་
ཞེས་པ་ནི་མེའི་དཀྱིལ་འཁོར་དབུས་སུ་ཕྱག་རྒྱ་ཨུཏྤལ་མཛེས་པ་ཨུཏྤལའི་ཁ་དོག་ཉིད་དུ་བྲི། རང་སྔགས་ཀྱིས་ནི་འབར་བྱས་པ། །འཇམ་དབྱངས་ཏེ་བློ་ཅན་གྱིས་ཞེས་པ་ནི་ཨུཏྤལ་དེའི་སྟེང་དུ་འཇམ་དབྱངས་ཉིད་ཀྱི་སྔགས་ཀྱི་ས་བོན་བཞག་སྟེ་གཟེངས་བསྟོད་པར་བྱ་ཞེས་པའོ། །དེའི་ས་བོན་
གྱིས་གདབ་པ་ཡང་། རང་གི་ས་བོན་ཚུལ་བཞིན་ནོ། །ཞེས་པ་ནི་དབང་ཆེན་དང་མེའི་དཀྱིལ་འཁོར་ལ་སོ་སོའི་ས་བོན་ཨ་དང་ར་ཆོ་ག་བཞིན་དུ་གཞག་ཅེས་པའོ། །མཐའ་ཡང་ཀུན་དུ་བསྐོར་བ་ནི། །ཨུཏྤ་ལ་ནི་ཉིད་ཀྱིས་བྱའོ། །ཞེས་པ་ནི་དཀྱིལ་འཁོར་དེའི་མཐའ་ཨུཏྤ་ལས་བསྐོར་བར་བྱའོ། །
དེ་ཡི་དབུས་སུ་བྲི་བ་ཞེས་པ་ནས། ཨུཏྤ་ལ་ཁ་མ་བྱེ་བ་བྱའོ་ཞེས་པའི་བར་དུ་དྲ་བའི་འོད་ལ་སོགས་པའི་ཕྱག་རྒྱ་ཇི་སྐད་སྨོས་པ་བཞིན་དུ་བྲི་ཞེས་པའོ། །ཕོ་ཉ་དག་གིས་གསུངས་པ་ནི། །ཞེས་པ་ནས། ཨུཏྤ་ལས་ནི་བརྒྱན་པར་རོ། །ཞེས་པའི་བར་དུ་སྒྲ་གཅན་ལ་སོགས་པའི་མངག་གཞུག་
པ་རྣམས་ཀྱི་ཕྱག་རྒྱ་ཇི་སྐད་དུ་སྨོས་པ་རྣམས་ཨུཏྤ་ལའི་མཚན་གྱིས་བཏབ་སྟེ་བྲི་བའོ། །ཅི་བགྱི་ཇི་སྐད་གསུངས་རྣམས་ཀྱི། །དེ་དག་ཕྱག་རྒྱ་ཁང་ག་རི། །ཞེས་པ་ནི་འཕགས་པ་འཇམ་དཔལ་གྱི་ཅི་བགྱི་བ་ཞེས་པ་ནི་སྔར་ཇི་སྐད་དུ་བཤད་པ་རྣམས་ཀྱི་ཕྱག་རྒྱ་ཁང་ག་རི་བྱ་བ་གྲི་གུག་འདྲ་བ་

རྣམས་བྲིས་ཏེ་དེའི་ཕྱོགས་སུ་ནི་སྒྲིབ་པ་ཐམས་ཅད་རྣམ་པར་སེལ་བའི་ཕྱག་རྒྱ་བྲིས་ཏེ་ཞེས་པ་ནས། དེ་དག་ཀུན་ཀྱང་དཀྱིལ་འཁོར་གྱི་ནང་ན་པདྨོ་ལ་གནས་པར་བྱའོ་ཞེས་པའི་བར་དུ་སྒྲིབ་པ་ཐམས་ཅད་རྣམ་པར་སེལ་བ་འཁོར་དང་བཅས་པའི་ཕྱག་རྒྱ་ཇི་སྐད་དུ་སྨོས་པ་
རྣམས་བྲི་བར་གསུངས་པ་སྟེ། ལག་པ་སྙིང་གར་བཞག་པ་སྟེ་ལག་པ་འབའ་ཞིག་སྙིང་གར་འཇོག་པ་འདྲ་བ་བྲིའོ། །དེ་དག་ཀྱང་དཀྱིལ་འཁོར་གྱི་ནང་ན་པདྨོ་ལ་གནས་པར་བྱའོ་ཞེས་པ་ནི་འཕགས་པ་འཇམ་དཔལ་གྱི་དྲ་བའི་འོད་མན་ཆད་དཀྱིལ་འཁོར་དངོས་སུ་མ་སྨོས་པ་རྣམས་ཐམས་
ཅད་བླ་མའི་དཀྱིལ་འཁོར་གྱི་ནང་དུ་པདྨོའི་སྟེང་དུ་བྲིའོ་ཞེས་པའོ། །དེའི་བྱང་ཕྱོགས་སུ་སའི་སྙིང་པོའི་ཕྱག་རྒྱ་ཡིན་ཞེས་པ་ནས། ཕྱག་རྒྱའི་གཟུགས་སུ་དེ་བཤད་དོ། །ཞེས་པའི་བར་དུ་ས་ལྔའི་དཀྱིལ་འཁོར་བཤད་པ་སྟེ། དབང་ཆེན་གྱི་དཀྱིལ་འཁོར་གྱི་དབུས་སུ་ཞེས་པ་ནི་དབང་
ཆེན་གྱི་དཀྱིལ་འཁོར་ནི་སྔ་མ་བཞིན་ཏེ། གཞན་རྣམས་སྔ་མ་བཞིན་བྲི་ཞེས་པ་ནི་དབང་ཆེན་གྱི་དཀྱིལ་འཁོར་དེའི་དབུས་སུ་སའི་སྙིང་པོའི་སྟེང་ན་སྙིང་རྗེ་ཆེན་པོ་འབྱུང་བའི་དཀྱིལ་འཁོར་དུ་བཤད་པ་བཞིན་དུ་བྲི་ཞེས་པའོ། །དེའི་སྟེང་དུ་པདྨོ་ཆེན་པོ་འབར་བ་བཅས། ཁ་དོག་ཀུན་ཀྱང་ལྡན་ཞེས་
པ་ནི་གདན་དེའི་སྟེང་དུ་པདྨོ་འདབ་མ་བརྒྱད་པར་བྲི་སྟེ། ཁ་དོག་ཀུན་དང་ལྡན་པ་ནི། དཀར་པོ་སེར་པོ་དམར་པོ་སྔོན་པོ་ཁ་དོག་དེ་རྣམས་ལས་གཞན་དུ་སྦྱར་བ་ལྗང་གུ་ལ་སོགས་པ་གསུམ་དང་བརྒྱད་དེ་པདྨོ་འདབ་མ་བརྒྱད་པ་ཁ་དོག་དེ་རྣམས་སུ་བྱའོ་ཞེས་པའོ། །དེའི་སྟེང་བ་དན་ཆེན་པོ་སྟེ། །རིན་
ཆེན་རྩེ་ལ་གནས་པའོ། །ཞེས་པ་ནི་པདྨོའི་སྟེང་དུ་བ་དན་རྩེ་ལ་རིན་ཆེན་བཞག་པ་བྲི་ཞེས་པའོ། །དེའི་གཟུགས་ནི་མཆོག་སྦྱིན་ཡིན་ཏེ། ཕྱག་རྒྱའི་གཟུགས་སུ་དེ་བཤད་དོ། །ཞེས་པ་ནི་སའི་སྙིང་པོ་དེའི་གཟུགས་སུ་བཤད་པ་ཞེས་པའོ། །དེ་མཐའ་ཡས་མང་པོའི་གཙོ་འཁོར་རྣམས་གྲངས་མེད་
པ་སྟེ་ཞེས་པ་ནས་ཕྱག་རྒྱ་ཐམས་ཅད་ཀྱང་དཀྱིལ་འཁོར་གྱི་ནང་དུ་ཆུད་པར་བྱའོ་ཞེས་པའི་བར་དུ། སྙིང་པོ་འཁོར་མཐའ་ཡས་པ་གྲངས་མེད་པ་རྣམས་ཀྱི་ནང་ནས་གཙོ་བོ་རྣམས་ཀྱི་ཕྱག་རྒྱ་བྲི་བར་བཤད་པ་སྟེ། ས་འཛིན་གྱི་ནི་རིན་པོ་ཆེའི་སྟེང་ན་རྡོ་རྗེ་གཉིས་པ་འཇུག་པའོ་ཞེས་པ་ནི་རྡོ་རྗེ་ཡ་ཐོག་

མ་ཐོག་གཉི་ག་རྩེ་ཅན་ཞེས་པ་སྟེ། རྡོ་རྗེ་དེ་ལྟར་བྱེ་བྲག་ཆེ་བས་རྡོ་རྗེ་གོང་མ་གཉིས་ཕྱོགས་རེ་རེ་ནས་རྩེ་གསུམ་པ་དང་རྩེ་གཅིག་པར་ཤེས་པར་བྱའོ། །ཕྱག་རྒྱ་ཐམས་ཅད་ཀྱང་དཀྱིལ་འཁོར་འདིའི་ནང་དུ་ཆུད་པར་བྱའོ་ཞེས་པ་ནི། དཀྱིལ་འཁོར་ཕྱག་རྒྱ་དེ་དག་ཐམས་ཅད་ཀྱང་དབང་
ཆེན་གྱི་དཀྱིལ་འཁོར་གྱི་ནང་དུ་ཆུད་པར་བྱའོ་ཞེས་པའོ། །ནུབ་ཕྱོགས་སུ་ནི་ནམ་མཁའི་སྙིང་པོ་བྲིས་ཏེ་ཞེས་པ་ནས། ལེའུ་རྫོགས་པའི་བར་དུ་ནུབ་ཕྱོགས་སུ་ནམ་མཁའི་སྙིང་པོ་དང་འཁོར་དང་བཅས་པའི་ཕྱག་རྒྱ་ཇི་སྐད་སྨོས་པའི་རྣམ་པ་བྲི་བར་བཤད་པའོ། །དེ་ལ་དཀྱིལ་འཁོར་འདིར་ལྷ་
རྣམས་ཁ་དོག་དང་དབྱིབས་གསལ་བར་མ་གསུངས་པ་རྣམས་ནི་དཀྱིལ་འཁོར་གོང་མ་གཉིས་སུ་ཁ་དོག་དང་དབྱིབས་བཤད་པར་བལྟའོ། །དཀྱིལ་འཁོར་གོང་མ་དག་ཏུ་ཁ་དོག་ལ་སོགས་པ་ཞིབ་ཏུ་བཤད་པ་ཡང་། དཀྱིལ་འཁོར་འོག་མ་འདིར་ལྷ་སོ་སོའི་དཀྱིལ་འཁོར་ཇི་སྐད་དུ་བཤད་པ་
ལས་དེ་རྣམས་ཀྱི་ཁ་དོག་ཀྱང་དེ་བཞིན་དུ་ཤེས་པར་བྱའོ། །དེ་ནས་ཡང་བཅོམ་ལྡན་འདས་ཀྱིས་གསང་བའི་དཀྱིལ་འཁོར་དུ་འཇུག་པའི་ཆོ་ག་གསུངས་པ་ཞེས་པ་ནས། དམ་ཚིག་ཅེས་སུ་གཞན་མི་བྱ། །ཞེས་པའི་བར་དུ་གསང་བའི་དཀྱིལ་འཁོར་དུ་བཅུག་ནས་དབང་བསྐུར་བའི་ཆོ་ག་
བཤད་པ་སྟེ། དཀྱིལ་འཁོར་དུ་འཇུག་པའི་རིམ་པ་ལྔ་སྟེ་ནུབ་མོ་ལྷག་པར་གནས་ཤིང་སྡོམ་པ་གཟུང་བ་ལ་སོགས་པ་དང་། དཀྱིལ་འཁོར་དུ་འཇུག་པའི་ཚེ་བསྲུང་ཞིང་ཆུས་གདབ་པ་དང་། བྱང་ཆུབ་ཏུ་སེམས་བསྐྱེད་པ་ལ་སོགས་པ་ནི་དཀྱིལ་འཁོར་སྔ་མར་བཤད་པ་བཞིན་ནོ། །ཁྱད་པར་དུ་ནི་
དཀྱིལ་འཁོར་གྱི་སྒོ་ཁྱུད་ཀྱི་ནང་དུ་སློབ་མ་སྔ་མ་བཞིན་དུ་བཞག་སྟེ། སློབ་དཔོན་ཡང་སྔ་མ་བཞིན་དུ་རང་རང་གི་ཏིང་ངེ་འཛིན་ལ་གནས་ནས། སློབ་མའི་སྙིང་གར་ཡི་གེ་ར་བསམས་ཏེ། ཡི་གེ་སྒྲ་དེ་ཁོ་ན་ཉིད་ཆོས་ཐམས་ཅད་རྡུལ་དང་བྲལ་བ་ལ་དམིགས་ནས། སློབ་མ་དེའི་ལུས་རྡུལ་ཕྲན་
ལ་སོགས་པར་གཤེགས་ཏེ་རྡུལ་ཕྲན་དེ་དག་ཀྱང་མི་དམིགས་པར་བྱ་སྟེ། ཡི་གེ་རའི་སྒྲ་ལས་དོན་དམ་པར་སློབ་མའི་ལུས་སྟོང་པར་བྱའོ། །དེ་ལྟར་བསམས་ནས་ཡི་གེ་རའི་མེ་དེས་སློབ་མའི་ལུས་བསྲེགས་ཏེ་ཐལ་བར་གྱུར་པར་བསམས་ཏེ། དེ་ལྟར་སྟོང་པར་གྱུར་པ་དང་དེའི་གནས་

སུ་ཡང་ཡི་གེ་ཨ་བསམས་ཏེ། ཨ་ལས་བཅོམ་ལྡན་འདས་ཀྱི་སྐུར་གྱུར་པར་བསམ་མོ། །དེ་ནི་བསྡུས་དོན་ཏེ་ཡན་ལག་གི་དོན་དུ་གསུངས་པ་སྔགས་པ་ཀུན་དུ་བཟླས་ཏེ་ཞེས་པ་ནི་སློབ་དཔོན་སྙིང་རྗེ་ཆེན་པོ་དང་འབྱུང་བའི་ཡི་གེ་འཁོར་ལོ་བསྐོར་བའི་དཀྱིལ་འཁོར་གཉིས་ཀྱི་
དཀྱིལ་འཁོར་བྲི་བ་དང་། དབང་བསྐུར་བ་དང་། བཟླས་པ་དང་སྒྲུབ་པ་ལ་སོགས་པའི་ཆོ་ག་བཟླས་ཏེ་ལོབས་པར་གྱུར་ཅིང་མཁས་པ་ཞེས་པའོ། །དཀྱིལ་འཁོར་མཁས་པས་ཞེས་པ་ནི་དཀྱིལ་འཁོར་གོང་མ་གཉིས་ལ་མཁས་པ་འབའ་ཞིག་མ་ཡིན་གྱི། གསང་བའི་དཀྱིལ་འཁོར་ལ་
ཡང་བྲི་བ་དང་དབང་བསྐུར་བ་ལ་སོགས་པའི་ཆོ་ག་རྣམས་མཁས་པ་ཞེས་པ་སྟེ། མདོར་ན་དཀྱིལ་འཁོར་གོང་མ་གཉིས་སུ་ཡང་དབང་བསྐུར་བའི་སློབ་དཔོན་གྱི་ལས་འདི་རྣམས་བྱའོ་ཞེས་པའོ། །སྡིག་པ་མ་ལུས་ཀུན་བསྲེགས་པ། །ཆོ་ག་དེ་སློབ་མའི་ཞེས་པ་ནི་དང་པོ་གླེང་བའི་ཚིག་སྟེ་
སྡིག་པ་རྣམས་ཞེས་པ་ནི་སེམས་ཀྱི་རྒྱུད་ལ་མི་དགེ་བའི་བག་ཆགས་བསགས་པ་མི་འདོད་པའི་རྣམ་པར་སྨིན་པ་ལྟ་བར་བྱེད་པ་ལ་བྱ་སྟེ། སློབ་མའི་སྡིག་པ་དེ་འོག་ནས་འབྱུང་བའི་ཆོ་གས་བསྲེག་ཅེས་པའོ། །དེའི་འཚོ་བ་བསྲེག་པ་ནི་ཕྱིན་ཆད་སླར་མི་འཁྲུངས་པར་དེ་ཤིན་ཏུ་ཚིག་ནས་ཐལ་བར་
གྱུར་ཞེས་པ་ནི་གོང་དུ་སྡིག་པ་བསྲེག་ཅེས་སྨོས་པ་དེ་ཇི་ལྟར་བསྲེག་པར་གསལ་བར་གསུངས་པ་སྟེ། དེའི་འཚོ་བ་ཞེས་པ་དེ་ནི་སློབ་མ་དེའི་ལྔ་ཕུང་ལ་བྱའོ། །ཕྱིན་ཆད་སླར་མི་འཁྲུངས་པ་དེ་ཞེས་པ་ནི་ལྔ་ཕུང་དེ་ལྟར་བསྲེགས་ཏེ། སྟོང་པར་བྱས་ནས་དེ་ཉིད་ཀྱི་ཚེ་ན། སློབ་མ་དེའི་ལྔ་ཕུང་ཡོད་
པར་འདུ་ཤེས་མི་སྐྱེ་བར་བྱ་ཞེས་པའོ། །ཤིན་ཏུ་ཚིག་ནས་ཐལ་བར་འགྱུར། །ཞེས་པ་ནི་བསྲེག་པ་ཡང་ལྷག་མ་ཡོད་པ་མ་ཡིན་པར་ཤིན་ཏུ་ཚིག་ནས་སྟོང་པ་ཉིད་དུ་འགྱུར་བར་བྱའོ་ཞེས་པའོ། །སླད་དུ་ཡང་ནི་དེ་གསོའོ། །ཞེས་པ་ནི་དེ་ལྟར་སྟོང་པ་ཉིད་དུ་བརྟན་པར་གྱུར་ནས། སློབ་མ་དེ་
སླར་རྣམ་པར་སྣང་མཛད་ཀྱི་གཟུགས་སུ་འོག་ནས་འབྱུང་བའི་ཚིག་གིས་སྦྱར་རོ་ཞེས་པའོ། །དེ་ལྟར་སློབ་མ་དེའི་ཚེ་འཚོ་བ་བསྲེག་གོ་ཞེས་སྨོས་པ་ཙམ་དུ་ཟད་ཀྱི་ཅིས་བསྲེག །ཇི་ལྟར་བསྲེག་ཅེས་གསུངས་པ་ཡི་གེ་སུ་ནི་ཡི་གེ་བསྲེག་ཅེས་པ་སྟེ། ཡི་གེ་སུ་ནི་ཞེས་པ་ནི་ཡི་གེ་ར་དེར་སྔར་སྨོས་

པའི་ཚུལ་དུ་སློབ་མའི་ལྔ་ཕུང་དེ་བསྲེག་ཅེས་པའོ། །ཡི་གེ་ཞེས་པའི་ཚིག་གཉིས་པོ་དེ་ནི་མི་འགྱུར་བ་ཞེས་པ་སྟེ། དེ་ལྟར་བསྲེགས་ཏེ་སྟོང་པར་གྱུར་ནས་ཀྱང་སླར་ལྔ་ཕུང་མི་སྐྱེ་བར་སྟོང་པར་འགྱུར་བ་ལས་གཞན་དུ་མི་འགྱུར་བར་ཏིང་ངེ་འཛིན་གྱིས་བརྟན་པར་བྱའོ་ཞེས་པའོ། །འཚོ་བ་
ཡང་ནི་ཕྱིར་གསོ་བ། །འཚོ་བ་ཡིས་ནི་འཚོ་བ་སྟེ། །ཞེས་པ་ནི་སླད་དུ་ཡང་ནི་གསོའོ་ཞེས་པའི་ཚིག་སྔ་མ་དེའི་འགྲེལ་པ་སྟེ་སློབ་མའི་འཚོ་བ་ལ་ལྔ་ཕུང་སྟེ། སྟོང་པར་གྱུར་པ་ལས་ཡི་གེ་ཨ་འཚོ་བར་གྱུར་པ་དེས་སླར་སངས་རྒྱས་ཀྱི་སྐུར་གོང་དུ་སྨོས་པའི་ཚུལ་དུ་བསྒྱུར་ཞེས་པའོ། །ཀུན་དུ་
དག་པ་ཞེས་པ་ནི་དཀར་པོའོ། །དྲི་མ་མེད་པ་ཞེས་པ་ནི་གསལ་བ་ཞེས་པ་སྟེ་སངས་རྒྱས་ཀྱི་སྐུར་བསྒྱུར་བ་དཀར་ཞིང་གསལ་བར་བྱ་ཞེས་པའོ། །ཡན་ལག་བཅུ་གཉིས་ཚིག་གིས་བཏབ། །དེ་ཡི་སྣོད་དུ་གྱུར་པར་བྱ། །ཞེས་པ་ནི་དེའི་གདན་པདྨོ་ལ་ཡན་ལག་བཅུ་གཉིས་ཀྱི་ཚིག་རྣམས་
དགོད་པར་བྱ་ཞེས་པའོ། །ས་མ་ཡ་འདིས་སངས་རྒྱས་ཀུན། །ཞེས་པ་ནས། འཇིག་རྟེན་རྣམས་ཀྱང་ཐར་པར་རོ། །ཞེས་པའི་བར་དུ་སངས་རྒྱས་དང་བྱང་ཆུབ་སེམས་དཔའ་དང་ཉན་ཐོས་དང་རང་སངས་རྒྱས་དང་འཇིག་རྟེན་པ་རྣམས་ཀྱང་དམ་ཚིག་འདི་ལ་མོས་ཤིང་འཐད་ཅེས་པའོ། །དམ་
ཚིག་འདི་ནི་སུས་རིག་པ། །གསང་བའི་དཀྱིལ་འཁོར་དབུས་སུ་སྟེ། །རྒྱུད་ཀུན་དུ་ཡང་བཞུགས་པ་ཡིན། །དཀྱིལ་འཁོར་ཐམས་ཅད་ལ་ཡང་དབང་། །ཞེས་པ་ནི་གསང་བའི་དཀྱིལ་འཁོར་གྱི་དབུས་སུ་འདི་ལྟ་བུའི་ཏིང་ངེ་འཛིན་གྱི་ཚུལ་བསྟན་པ་ནི། རྒྱུད་ཐམས་ཅད་ཀྱི་དཀྱིལ་འཁོར་དུ་
ཞུགས་པ་དང་འདྲ་བ་སྟེ། ཐམས་ཅད་ཀྱི་དམ་ཚིག་ཅན་དུ་གྱུར་པ་དང་། དཀྱིལ་འཁོར་ཐམས་ཅད་ཀྱང་འདིར་དབང་ཞེས་པའོ། །སྔགས་པ་དེ་ནི་ང་དང་འདྲའོ། །ཞེས་པ་ནི་གོང་དུ་སླར་གསོས་ནས་དཀར་ཞིང་གསལ་བར་བྱ་ཞེས་པ་ནི་སྤྱིར་སྨོས་པ་ཙམ་དུ་ཟད་ཀྱི་ཚིག་འདིས་ནི་བཅོམ་ལྡན་
འདས་རྣམ་པར་སྣང་མཛད་ཀྱི་གཟུགས་ཉིད་དུ་བྱ་ཞེས་པའོ། །དམ་ཚིག་ཅེས་སུ་གཞན་མི་བྱ། །ཞེས་པ་ནི་ཏིང་ངེ་འཛིན་དེ་ལྟ་བུར་མ་བྱས་ཏེ་ལོག་པར་གཞན་དུ་བྱས་ན་དམ་ཚིག་ཏུ་མི་བྱ་ཞེས་པའོ། །དམ་ཚིག་ཅེས་པ་ནི་སྐབས་འདིར་སྟོང་པ་ཉིད་ཀྱི་ཏིང་ངེ་འཛིན་པས་ཆུད་པ་ལ་བྱའོ། །ཏིང་

ངེ་འཛིན་དེ་ཡང་དང་པོ་སྲེག་པ་ནི་འཇུག་པའི་སེམས་སོ། །བསྲེགས་ནས་སྟོང་པའི་རང་བཞིན་དུ་གནས་ཏེ་མི་འགྱུར་བ་ནི་གནས་པའི་སེམས་སོ། །དེ་ནས་སླར་གསོས་ཏེ་བཅོམ་ལྡན་འདས་ཀྱི་སྐུར་བསྒྱུར་བ་ནི་ལྡང་བའི་སེམས་སུ་ཤེས་པར་བྱའོ། །བཅོམ་ལྡན་འདས་ཀྱི་སྐུར་
བསྒྱུར་བའི་ཚེ་ཡང་གསང་བའི་ཕྱག་རྒྱ་འོག་ནས་འབྱུང་བ་རྣམས་ཀྱི་གདན་དང་། ཡན་ལག་འོང་ལ་སོགས་པ་འོག་ནས་ཇི་སྐད་དུ་བྱུང་བའི་རིམ་བཞིན་དུ་བྱའོ། །བྱང་ཆུབ་སེམས་དཔའ་ལ་སོགས་པ་གཞན་གྱི་གཟུགས་སུ་བསྒྱུར་ན་ཕྱག་རྒྱ་དེ་རྣམས་ཀྱིས་བྱིན་གྱིས་བརླབས་ན་བརྟན་པར་
འགྱུར་རོ། །ད་ནི་ནང་གི་ཡིད་ཀྱི་དཀྱིལ་འཁོར་བྲི་བའི་སྐབས་འཆད་དེ། ཡིད་ཀྱི་དཀྱིལ་འཁོར་བྲི་བ་ཡང་སྤྱིར་དཀྱིལ་འཁོར་གཉིས་ཏེ། རང་གི་གཟུགས་ཀྱི་དཀྱིལ་འཁོར་དང་གཟུགས་བརྙན་གྱི་དཀྱིལ་འཁོར་རོ། །དེ་ལ་རང་གི་གཟུགས་ཀྱི་དཀྱིལ་འཁོར་ནི་རྒྱ་ཆེ་ཞིང་བསམ་གྱིས་མི་
ཁྱབ་སྟེ་མདོར་བསྡུས་པ་བསྟན་པ་ནི་ཡིད་ཀྱི་དཀྱིལ་འཁོར་དུ་ཤེས་པར་བྱའོ། །གཟུགས་བརྙན་གྱི་དཀྱིལ་འཁོར་ཀྱང་ཇི་སྐད་དུ་གསུངས་པ་བཞིན་དུ་རྫོགས་པར་དཀའ་སྟེ། དེ་ནི་མདོར་བསྡུས་པ་ནི་ཕྱི་མའི་རྒྱུད་ལས་དཀྱིལ་འཁོར་བཤད་པའོ། །དེ་བས་ན་ཡིད་ཀྱི་དཀྱིལ་འཁོར་འདིའི་སྒོ་
ནས་སེམས་ཀྱི་རང་བཞིན་གྱི་གསང་བའི་དཀྱིལ་འཁོར་ཇི་འདྲ་བའི་ཚུལ་ཤེས་པར་འགྱུར་ཏེ་འདི་ནི་འཇུག་པ་ལྟ་བུར་བལྟའོ། །ཡིད་ཀྱི་དཀྱིལ་འཁོར་དེ་བྲི་བའི་ཐབས་བསྟན་པའི་ཕྱིར་བཅོམ་ལྡན་འདས་ཏིང་ངེ་འཛིན་དུ་ཞུགས་ནས། སངས་རྒྱས་ཀྱི་ཞིང་དེ་ཐམས་ཅད་ལག་མཐིལ་དང་མཉམ་
པར་གྱུར་པ་དང་རིན་པོ་ཆེ་སྣ་ལྔའི་རྟ་བབས་དང་སྒོ་ཁྱུད་ལ་སོགས་པ་རྣམ་པ་མང་པོས་བརྒྱན་པར་བསྟན་པ་སྟེ། དེ་དག་ཐམས་ཅད་ཀྱང་དངོས་པོ་ཡོད་པ་མ་ཡིན་པ་ལས། སེམས་ཀྱི་དབང་ཙམ་ལས་ཇི་ལྟར་བསམས་པ་བཞིན་དུ་འབྱུང་བར་བསྟན་པའོ། །དེ་བས་ན་ཡིད་ཀྱི་དཀྱིལ་འཁོར་ལ་སོགས་
པའི་ཡིད་ཀྱིས་བསྐྱེད་པ་ཐམས་ཅད་སྦྱོར་བས་ཐོག་མར་སེམས་མཉམ་པར་གཞག་པ་ལ་དགོད་པའི་མགོན་ཇི་ལྟར་གྱུར་ཅིག་ཅེས་བསམས་ཤིང་། སྨོན་ལམ་བཏབ་ལ་ཏིང་ངེ་འཛིན་ལ་ཞུགས་ན་ཇི་ལྟར་སྨོན་པ་དེ་ལྟར་འགྱུར་བར་ཤེས་པར་བྱའོ། །དེ་ལྟར་ཡིད་ཀྱི་དཀྱིལ་འཁོར་བྲི་བའི་ཐབས་བསྟན་

པ་ཡང་། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་དེའི་ཚེ་མ་འོངས་པའི་འགྲོ་བ་ལ་གཟིགས་ནས་ཀུན་རྗེས་སུ་ཆུད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་པ་ལ་སོགས་པ་སྟེ། བཅོམ་ལྡན་འདས་སྔོན་གྱི་སྨོན་ལམ་གྱི་ཤུགས་ཀྱིས་སེམས་ཅན་གྱི་དོན་བྱ་བ་ལ་
སོགས་པ་ལྷུན་གྱིས་གྲུབ་པ་ཉིད་དུ་འབྱུང་བས་ཏིང་ངེ་འཛིན་དུ་འཇུག་མི་དགོས་མོད་ཀྱི། འོན་ཀྱང་དངོས་པོ་གང་བསྟན་པར་བྱ་བའི་ཏིང་ངེ་འཛིན་དུ་ཞུགས་ནས་བྱང་ཆུབ་སེམས་དཔའ་ཀུན་དུ་བཟང་པོ་ལ་སོགས་པ་འདུལ་བའི་འགྲོ་བ་རྣམས་ཀྱིས་བཅོམ་ལྡན་འདས་ཅིའི་ཕྱིར་ཏིང་ངེ་འཛིན་དུ་ཞུགས་
པ་དང་ཞུགས་ནས་ཇི་ལྟར་སྟོན་པར་འགྱུར་བ་ལ་སོགས་པ་ཤེས་པར་འགྱུར་ཏེ། དེ་ཅིའི་ཕྱིར་བཅོམ་ལྡན་འདས་ཏིང་ངེ་འཛིན་དུ་འཇུག་གོ། །ཀུན་དུ་རྗེས་སུ་ཆུད་པ་ཞེས་པ་ནི། བཅོམ་ལྡན་འདས་ཏིང་ངེ་འཛིན་དེ་ལ་ཞུགས་ནས་དོན་དམ་པར་ཆོས་ཀྱི་དབྱིངས་ཀུན་དུ་ཁྱབ་པར་ཆུད་པ་དང་། ཀུན་རྫོབ་
ཏུ་ཡང་སངས་རྒྱས་ཀྱི་ཞིང་ཐམས་ཅད་ལག་མཐིལ་བཞིན་དུ་མཉམ་པར་འགྱུར་བ་ལ་སོགས་པའོ། །གནས་བརྟན་པ་རྣམས་ཀྱིས་ཁྱད་པར་དུ་ཆུད་པ་སྟེ་བཅོམ་ལྡན་འདས་ཏིང་ངེ་འཛིན་ལ་ཞུགས་ན་དོན་དམ་པ་དང་ཀུན་རྫོབ་ཏུ་ཆུད་པ་དེ་དག་འབྱུང་བའི་ཕྱིར་ཏིང་ངེ་འཛིན་དེའི་མིང་ཀུན་དུ་ཆུད་
པ་ཞེས་པའོ། །མ་འོངས་པའི་འགྲོ་བ་ལ་གཟིགས་ནས་ཞེས་པ་ནི་ཀུན་དུ་བཟང་པོ་དང་ཕྱག་ན་རྡོ་རྗེ་ལ་སོགས་པ་བྱང་ཆུབ་སེམས་དཔའ་ཡོངས་སུ་དག་པ་རྣམས་ཀྱིས་ནི། དེ་དག་ཇི་ལྟ་བ་ཉིད་དུ་མཁྱེན་གྱི་མ་འོངས་པའི་འགྲོ་བ་རྣམས་ཀྱི་དོན་དུ་དངོས་པོ་ཡོད་པ་མ་ཡིན་པ་ལས། སེམས་ཀྱི་
དབང་ཙམ་གྱིས་རྣམ་པ་སྣ་ཚོགས་འབྱུང་བ་བསྟན་པ་ཞེས་པའོ། །བཅོམ་ལྡན་འདས་སྙོམས་པར་ཞུགས་མ་ཐག་ཏུ། དེ་ནས་དེའི་ཚེ་ཉིད་ན་སངས་རྒྱས་ཀྱི་ཞིང་འདི་ལག་མཐིལ་བཞིན་དུ་མཉམ་པར་འདུག་པར་གྱུར་ཏེ་ཞེས་པ་ནི། དཀྱིལ་འཁོར་བྲི་བ་ན་སྔར་ས་མཐོན་དམན་ལ་སོགས་
པ་བསྙམས་ཤིང་སྦྱང་དགོས་ཏེ། དེའི་ཐབས་བསྟན་པ་སངས་རྒྱས་ཀྱི་ཞིང་འདི་ཞེས་པ་ནི་མི་མཇེད་ཀྱི་སྟོང་གསུམ་གྱི་སྟོང་ཆེན་པོའི་ཁམས་སོ། །ལག་མཐིལ་བཞིན་དུ་མཉམ་པར་འགྱུར། །ཞེས་པ་ནི་སངས་རྒྱས་ཀྱི་ཞིང་དེ་རི་དང་གཅོང་རོང་ལ་སོགས་པ་མེད་པར་མཉམ་པར་གྱུར་

ཅེས་པ་སྟེ། ཚིག་དེས་མ་འོངས་པའི་དུས་ཀྱི་འགྲོ་བ་རྣམས་ནམ་དཀྱིལ་འཁོར་བྲི་ན་དཀྱིལ་འཁོར་གྱིས་དེ་ལྟར་ལག་མཐིལ་བཞིན་དུ་མཉམ་པར་སྦྱང་བར་བྱ་བ་བསྟན་པའོ། །སྒོ་ཁྱུད་དང་རྟ་བབས་རིན་པོ་ཆེ་སྣ་ལྔས་སོ་སོར་བརྒྱན་པ་ཞེས་པ་ནས་སིལ་སྙན་དུ་མའི་སྒྲ་འཇམ་པོ་
ཡིད་དུ་འོང་བ་ནི་རབ་ཏུ་གྲག་པའོ་ཞེས་པ་ནི་སངས་རྒྱས་ཀྱི་ཞིང་དེ་མཉམ་པར་གྱུར་ནས་ཀྱང་རྒྱན་དེ་དག་གིས་བརྒྱན་པ་བསྟན་པ་སྟེ། དེས་ནི་དཀྱིལ་འཁོར་གྱི་ས་དེ་དག་བརྟན་ནས་རྟ་བབས་དང་སྒོ་ཁྱུད་དང་གདུགས་དང་བ་དན་ལ་སོགས་པས་བརྒྱན་པ་དང་། རི་མོ་རྣམས་ཀྱིས་བརྒྱན་པར་བྱ་བའི་ཐབས་
བསྟན་པའོ། །དྲི་ཞིམ་པོ་ཡན་ལག་བརྒྱད་དང་ལྡན་པའི་རྫིང་བུ་སྨོས་པ་ནི་རྫིང་བུ་ལ་སོགས་པ་ཆུ་དང་ཉེ་གནས་སུ་དཀྱིལ་འཁོར་བྲི་བ་བསྟན་པའོ། །ཡན་ལག་བརྒྱད་ཀྱི་རྫིང་བུ་དེ་ནི་ཆུ་བསིལ་བ་དང་། དང་བ་དང་མངར་བ་ལ་སོགས་པའི་བྱང་ཆུབ་སེམས་དཔའི་བསོད་ནམས་ཀྱི་ཇི་ལྟར་བསགས་
པའི་ཡིད་ཀྱིས་བསྟེན་པ་དང་། ཁང་པ་དང་གཞལ་མེད་ཁང་དུ་མ་དང་ལྡན་ཞེས་པ་ནི་སངས་རྒྱས་ཀྱི་ཞིང་ཕ་རོལ་ཏུ་ཕྱིན་པ་ལས་བྱུང་བའི་བྱང་ཆུབ་སེམས་དཔའ་རྣམས་ཀྱི་སོ་སོའི་བསོད་ནམས་ཇི་ཙམ་ལས་སོ་སོ་ནས་སྟན་དང་ཁང་པ་དང་ལྡིང་ཁང་ལ་སོགས་པ་དང་ལྡན་པ་ཞེས་པ་སྟེ། དེས་ཀྱང་
དཀྱིལ་འཁོར་གྱི་ས་དེར་བྱང་ཆུབ་སེམས་དཔའ་ལ་སོགས་པ་ལྷ་རྣམས་སོ་སོའི་གནས་དང་བཅས་པར་བྱ་བ་བསྟན་པའོ། །དེ་བཞིན་གཤེགས་པའི་མོས་པ་ལས་བྱུང་བ་ཞེས་པ་ནས་བསོད་ནམས་རྣམ་པར་བསྐྱེད་པའི་སྐུ་རྣམས་འབྱུང་ཞེས་པའི་བར་དུ་སངས་རྒྱས་ཀྱི་ཞིང་དེའི་དབུས་ན་པདྨོའི་རྒྱལ་པོ་
ལ་དེ་བཞིན་གཤེགས་པ་བཞུགས་ཏེ། དེ་བཞིན་གཤེགས་པའི་སྐུ་ལ་ཡེ་ཤེས་ཀྱིས་སེམས་ཅན་ཆོས་ཀྱི་ཚིག་སྟོན་པ་ཤ་སྟག་འབྱུང་ངོ་ཞེས་པ་སྟེ། དེ་ཡང་དཀྱིལ་འཁོར་གྱི་དབུས་སུ་བཅོམ་ལྡན་འདས་རྣམ་པར་སྣང་མཛད་བཞུགས་པ་དེ་བཞིན་གཤེགས་པའི་སྐུ་ལས་གྱུར་པའི་ལྷ་རྣམས་
ཀྱིས་བསྐོར་ཞིང་བཞུགས་པར་བྱ་བ་བསྟན་པའོ། །དེས་ན་དེ་བཞིན་གཤེགས་པའི་མོས་པ་ལས་བྱུང་བ་ཆོས་ཀྱི་དབྱིངས་རྟོགས་པའི་མཚན་མས་བཏབ་ཅེས་པ་ནི། པདྨོའི་རྒྱལ་པོ་དེའི་བྱེ་བྲག་སྟེ་དེ་བཞིན་གཤེགས་པའི་མོས་པ་ལས་འབྱུང་བ་ནི་སྔར་བཤད་པ་བཞིན་ནོ། །ཆོས་ཀྱི་དབྱིངས་

རྟོགས་པ་ཞེས་པ་ནི་དེ་བཞིན་ཉིད་ཀྱི་ཡེ་ཤེས་དག་པ་ལ་བྱ་སྟེ་དེའི་མཚན་མས་བཏབ་པ་ནི། ཡེ་ཤེས་དག་པ་དེའི་མཚན་མས་དཀར་བར་ཤེས་པར་བྱ་སྟེ། མདོར་ན་དེ་བཞིན་གཤེགས་པ་ཉིད་ཡེ་ཤེས་དག་པ་དེ་པདྨོ་ཆེན་པོའི་རྒྱལ་པོར་སྣང་བར་བྱིན་གྱིས་བརླབ་ཅེས་པའོ། །དེའི་དབུས་ན་དེ་བཞིན་
གཤེགས་པའི་སྐུ་བཞུགས་པ་ཞེས་པ་ནི་དེ་བཞིན་ཉིད་ཀྱི་ཡེ་ཤེས་ཆོས་ཀྱི་དབྱིངས་ཀྱི་མཚན་ཉིད་དེ་ལས་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་འབྱུང་བར་བསྟན་པའོ། །ཆོས་ཀྱི་དབྱིངས་ལ་སྟོན་པ་ཞེས་པ་ནི་སྟོང་པ་ཉིད་ཀྱི་རང་བཞིན་དུ་གྱུར་པ་ཞེས་པའོ། །དེ་ལྟར་བཅོམ་ལྡན་འདས་སྟོང་
པ་ཉིད་ཀྱི་རང་བཞིན་དུ་གྱུར་ཀྱང་ཕུང་པོ་ལྷག་མ་མ་ལུས་པའི་མྱ་ངན་ལས་འདས་བཞིན་པ་ནི་མ་ཡིན་གྱི། སྔོན་གྱི་སྨོན་ལམ་གྱི་ཤུགས་ཀྱིས་རྣམ་པར་མི་རྟོག་བཞིན་དུ་ཀུན་རྫོབ་ཀྱི་བྱ་བ་ཐམས་ཅད་འབྱུང་བར་བསྟན་པའོ། །སེམས་ཅན་རྣམས་ཀྱི་བསམ་པ་དང་དད་པ་ཇི་ལྟ་བ་བཞིན་དུ་མགུ་བར་བྱེད་
པ་ཞེས་པའོ། །མི་ཚུགས་པའི་སྟོབས་དང་སྟོབས་བཅུའི་མོས་པ་ལས་འབྱུང་ཞེས་པ་ནི་བཅོམ་ལྡན་འདས་ཀྱི་སྐུ་ལས་འབྱུང་བའི་སྐུ་དེ་རྣམས་ཀྱི་མཐུས་ཅིས་ཀྱང་མི་ཚུགས་པ་ཤ་སྟག་སྟེ། དེ་ཡང་བཅོམ་ལྡན་འདས་ཉིད་ཀྱི་རྒྱུ་དེའི་ཚེ་ཀུན་དུ་སངས་རྒྱས་པའི་མཚན་ཉིད་སྟོབས་བཅུ་ལ་མོས་པ་
བསྐྱེད་པ་དེ་ནི་འབྲས་བུ་སྟོབས་བཅུ་རྫོགས་པར་འགྱུར་བ་ལས་བྱུང་བ་ཞེས་པའོ། །ཁ་དོག་དང་དབྱིབས་སུ་སྣ་ཚོགས་དུ་མར་ལྡན་པའི་བདག་ཉིད་ཀྱི་ངོ་བོ་ཞེས་པ་ནི་སྐུ་མང་པོ་འབྱུང་བ་དག་གི་ཁྱད་པར་ཏེ། དེ་དག་གི་ཁ་དོག་དང་གཟུགས་སྣ་ཚོགས་སུ་བཅས་པ་ཞེས་པའོ། །སྐུ་མང་པོ་དེ་རྣམས་
ཀྱང་བཅོམ་ལྡན་འདས་ཉིད་བྱང་ཆུབ་སེམས་དཔའི་སྤྱད་པ་སྤྱོད་ཚེ་བསྐལ་པ་གྲངས་མེད་པར་སྦྱིན་པ་ལ་སོགས་པ་ཕ་རོལ་ཏུ་ཕྱིན་པ་ལ་སོགས་པའི་བསོད་ནམས་ཀྱི་ཚོགས་བསགས་པའི་རྒྱུ་ལས་བྱུང་བ་བསྟན་པ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་མར་ཞེས་པ་ལ་སོགས་པའོ། །དེ་བྱུང་
ནས་འཇིག་རྟེན་པའི་ཁམས་ཐམས་ཅད་དུ་གླེང་བའི་ཚིག་འདི་སྐད་དུ་དབྱངས་གཅིག་གིས་ཀུན་དུ་བསྒོའོ་ཞེས་པ་དེ་ལྟར་གོང་དུ་བཅོམ་ལྡན་འདས་ཀྱིས་སངས་རྒྱས་ཀྱི་ཞིང་ལག་མཐིལ་ལྟ་བུ་མཉམ་པ་ལ་སོགས་པ་དངོས་སུ་སྣང་བར་ཆུད་པའི་ཆོས་རྣམས་བསྟན་པ་དེ་ཉིད་གཞུང་གི་ཆོས་སུ་

འོག་ནས་འབྱུང་བའི་ཚིགས་སུ་བཅད་པ་རྣམས་ཀྱི་ཚིག་གིས་བསྟན་པ་སྟེ་དེ་ཡང་། ཨེ་མའོ་སངས་རྒྱས་ཀུན་གྱི་ནི། །ཞེས་པ་ནས། མགོན་པོ་ཀུན་གྱིས