Luận tạng Tây Tạng (Tengyur) — Tập 44

། །དེ་བཞིན་ཕྱི་ཡི་དྲི་ལ་སོགས། །སྔགས་དང་ཕྱག་རྒྱ་དང་ལྡན་པས། །རང་གི་ས་བོན་ལས་སྤྲུལ་ཏེ། །འཁོར་ལོ་ཡང་
དག་མཆོད་པའོ། །འདི་ནི་ཡང་དག་བདུག་པ་སྟེ། །རང་བཞིན་དང་ནི་སྦྱར་བའི་དྲི། །བདག་གིས་དབུལ་བ་འདི་བཞེས་ལ། །བདག་ལ་བཀའ་དྲིན་སྩལ་དུ་གསོལ། །བཛྲ་དྷཱུཔྤེ་པཱུ་ཛ་སྥ་ར་ཎ། སྣ་ཚོགས་མེ་ཏོག་ཡིད་འོང་བ། །རབ་ཏུ་ཡིད་འོང་འབར་བ་ཡི། །བྱང་ཆུབ་ཡན་ལག་མེ་ཏོག་འདི། །

བདག་ལ་བརྩེར་དགོངས་བཞེས་སུ་གསོལ། །བཛྲ་པུཥྤེ་པཱུ་ཛ་སྥ་ར་ཎ། ཏིང་འཛིན་མར་མེ་དགེ་བ་འདི། །སྲེག་བྱེད་ངན་འགྲོ་འཇིགས་ལས་སྐྱོབ། །ལྷ་ཡི་སྤྱན་ནི་ཐོབ་བྱེད་པ། །བདག་ལ་བརྩེར་དགོངས་བཞེས་སུ་གསོལ། །བཛྲ་ཨ་ལོ་ཀེ་པཱུ་ཛ་སྤ་ར་ཎ། ག་པུར་ལ་སོགས་བྱུག་པ་
ནི། །དྲི་ཞིམ་ལ་སོགས་མེ་ཏོག་རྒྱན། །ཧཱུྃ་དབྱངས་སྙན་པར་རོལ་འབྱུང་འདི། །བདག་ལ་བརྩེར་དགོངས་བཞེས་སུ་གསོལ། །བཛྲ་གནྡྷེ་པཱུ་ཛ་སྥ་ར་ཎ། སྣ་ཚོགས་བཟའ་བ་ཡིད་འོང་བ། །བཟའ་དང་བཅས་དང་བལྡག་དང་གཞིབ། །ཡིད་འོང་གདུང་བ་སེལ་བ་འདི། །བདག་ལ་བརྩེར་
དགོངས་བཞེས་སུ་གསོལ། །བཛྲ་ནཻ་བི་ཏྱེ་པཱུ་ཛ་སྥ་ར་ཎ། སྣ་ཚོགས་བཏུང་བ་ཡིད་འོང་བ། །འབྲུ་ཡི་ཆང་དང་བཅོས་པའི་ཆང་། །མྱོས་བྱེད་བདུད་རྩི་དཔའ་བོ་འདི། །བདག་ལ་བརྩེར་དགོངས་བཞེས་སུ་གསོལ། །བཛྲ་སུ་ར་པཱུ་ཛ་སྥ་ར་ཎ། རིན་ཆེན་རིའམ་རྒྱ་མཚོ་རིན་ཆེན་རྣམས། །བཞད་
དང་སྒེག་དགའ་རོལ་དང་བདེ་བ་དང་། །དཔག་བསམ་ཤིང་དང་ན་བཟའ་ཤིང་རྣམས་ཀུན། །འཁོར་ལོ་བླ་མར་བཅས་ལ་དབུལ་བར་བྱ། །བོ་དྷི་རཏྣ་ཨ་ལཾ་ཀ་ར། ས་ཧ་ལ་སེ་ར་ཏི་ཀྲི་ཧ་སཽ་ཁྱ་ཨ་ནུཏྟ་ར། ཨ་ནུཏྟ་ར་བོ་དྷྱཾ་ལཾ་ཀ་ར་བསྟྲ་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡེ་ཧཱུྃ་ཞེས་དབུལ་ལོ། །བསྲུངས་
ནས་ཕྱི་རོལ་བྱུང་ནས་ཀྱང་། །ཕྱོགས་སྐྱོང་རང་རང་རྣལ་འབྱོར་གནས། །སྡིག་མེད་ཤ་ཁྲག་ཆུ་ཟན་གྱི། །གཏོར་མ་ཕུལ་ནས་ནང་དུ་འགྲོ། །འདི་ནི་གཞན་དུ་བཤད་པས་དེར་ཤེས་པར་བྱའོ། །གོས་དང་རྒྱན་གྱིས་རབ་བརྒྱན་ཏེ། །རྡོ་རྗེ་ཧཱུྃ་མཛད་བདག་བསྒྱུར་ལ། །དཀྱིལ་འཁོར་བསྐོར་
བ་ཡང་བྱས་ཏེ། །ཕྱག་འཚལ་མེ་ཏོག་སྔོན་པོ་དོར། །བདག་པོས་བཅིང་བསམས་མགོ་རུ་བཅིངས། །དེ་ཡི་གོང་འོག་ཆོ་ག་རྣམས། །རྣམ་པར་དག་པར་འགྱུར་བས་ན། །དག་པའི་དག་པ་རྣམ་དག་པའོ། །དེ་ནས་ལྷ་རྣམས་ཚིམ་བྱའི་ཕྱིར། །ཐབ་ལ་སོགས་པ་དང་ལྡན་པའི། །
སྦྱིན་སྲེག་གནས་སུ་སོང་ནས་ཀྱང་། །སྦྱོར་བ་ལྡན་པས་མཉེས་པར་བྱ། །འདིའི་ཆོ་ག་ཡང་གཞན་དུ་བཤད་པས་དེར་ཤེས་པར་བྱའོ། །དཀྱིལ་འཁོར་མཆོད་པ་ཡང་བྱས་ཏེ། །ཤིས་པའི་ཕྱིར་ན་བཀྲ་ཤིས་གླུ། །འཁོར་ལོ་བསྐོར་ནས་བདག་ཉིད་ཀྱིས། །ཕེག་རྡོབ་པ་ཡི་གར་གྱིས་

ཀྱང་། །ཧཱུྃ་ཧཱུྃ་འཁོར་བ་འདོན་བྱེད་སྐུ་འཛིན་པ། །གཉིས་གཉིས་འཁྱུད་པའི་སྦྱོར་བའི་མཆོག །མི་བསྐྱོད་རྡོ་རྗེ་ཁྱོད་འབའ་ཞིག །ཏེ་ན་ཧཱུྃ་ཏེ་ན་ཧཱུྃ་ཏེ་ན་ཏེ་ཏེ་ཧཱུྃ། ཁྱོད་ཀྱི་ཞབས་ཀྱི་པདྨ་ལ། །ལྷ་དང་མི་ཡིས་འདུད་པའི་མཆོག །སྤྲུལ་པའི་མེ་ཏོག་སྣ་ཚོགས་དང་། །མི་
བསྐྱོད་རྡོ་རྗེ་ཁྱོད་འབའ་ཞིག །ཏེ་ན་ཧཱུྃ་ཏེ་ན་ཧཱུྃ་ཏེ་ན་ཏེ་ཏེ་ཧཱུྃ། དངོས་པོ་རྣམ་གྲོལ་རྣམ་པར་བསྙེན། །གསང་བའི་གསང་བ་འཛིན་པ་ཁྱོད། །བདུད་རྩི་མཐའ་མེད་གསོལ་བ་ཁྱོད། །ཁྱོད་ཀྱི་དགོངས་པ་པད་རྒྱས་ཡིན། །ཏེ་ན་ཧཱུྃ་ཏེ་ན་ཧཱུྃ་ཏེ་ན་ཏེ་ཏེ་ཧཱུྃ། རྩོམ་སྤངས་སེམས་ཅན་དོན་མཛད་པ། །རྒྱུ་མེད་
གཟུགས་ལ་ཕྱག་འཚལ་ལོ། །ཏེ་ན་ཧཱུྃ་ཏེ་ན་ཧཱུྃ་ཏེ་ན་ཏེ་ཏེ་ཧཱུྃ། དུང་དང་ཀུ་མུ་ཏ་ཡི་གཟུགས། །རྒྱ་མཚོ་དངས་མ་ཟླ་གཟུགས་འདྲ། །ཏེ་ན་ཧཱུྃ་ཏེ་ན་ཧཱུྃ་ཏེ་ན་ཏེ་ཏེ་ཧཱུྃ། རོལ་པ་གཉིས་མེད་རྣལ་འབྱོར་མཛད། །རྡོ་རྗེ་དྲིལ་བུ་ཕྱག་རྒྱ་འཛིན། །ཏེ་ན་ཧཱུྃ་ཏེ་ན་ཧཱུྃ་ཏེ་ན་ཏེ་ཏེ་ཧཱུྃ། སྒྱུ་འཕྲུལ་ལས་ཀྱི་འགྲོ་བ་བཟུང་། །རྐྱེན་
གྱིས་མ་བྱས་གཟུགས་ཅན་ཡིན། །ཏེ་ན་ཧཱུྃ་ཏེ་ན་ཧཱུྃ་ཏེ་ན་ཏེ་ཏེ་ཧཱུྃ། དེ་ནས་འོག་ནས་འབྱུང་བའི་རིམ། །བདག་ཉིད་ཞུགས་བྱས་ལྷ་ཡིས་ཀྱང་། །ཆུ་ནས་བཀའ་སྩལ་བར་གྱི་དབང་། །བསྐུར་བསམས་འཁོར་ལོ་དེ་ལ་ནི། །སློབ་མ་རྣམས་ནི་གཞུག་པའི་ཕྱིར། །རྡོ་རྗེ་འཆང་བ་ལས་བྱུང་བའི། །
དཀྱིལ་འཁོར་རྟེན་དང་བཅས་པ་ཡི། །དེ་བཞིན་ཉིད་ནི་ལན་གསུམ་བརྗོད། །ནམ་མཁའ་ལས་བྱུང་མཚན་ལྡན་ཕྱིར། །ཐོག་མ་ཐ་མ་མེད་པའི་སེམས། །རྡོ་རྗེ་སེམས་དཔའ་ཆེ་རང་བཞིན། །མི་བསྐྱོད་རྡོ་རྗེ་དེང་གྲུབ་ཤོག །མཆོག་ཆེན་དངོས་གྲུབ་ཐམས་ཅད་དང་། །དབང་ཕྱུག་རྡོ་རྗེ་འཛིན་
པའི་ལྷ། །ཐམས་ཅད་རྡོ་རྗེ་འཛིན་པའི་གཟུགས། །དམ་པའི་ཡི་གེ་གྲུབ་པར་ཤོག །སྐྱོན་མེད་རྟག་པ་ལ་སོགས་པ། །འདོད་ཆགས་ཀུན་ལ་རྗེས་སུ་ཆགས། །འདོད་ཆགས་ཆེན་པོ་དགའ་བ་ཆེ། །དེ་ཉིད་བཅོམ་ལྡན་བདག་ལ་གྲུབ། །གཏན་དུ་དག་པ་ཀུན་གྱི་མཆོག །གདོད་མ་
ནས་གྲོལ་དེ་བཞིན་གཤེགས། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་སེམས་དཔའ་བདག་གྲུབ་བོ། །དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་ཆེན་པོའི་ཕྱག་རྒྱ་ཡིས། །རྡོ་རྗེ་སྙིང་གཙོ་བདག་ལ་ནི། །རྡོ་རྗེ་སྔགས་ཆེན་གྲུབ་པར་ཤོག །སེམས་ཅན་ཀུན་གྱི་ཡིད་ཁྱབ་པ། །

སེམས་ཅན་ཀུན་གྱི་སྙིང་ལ་གནས། །སེམས་ཅན་ཀུན་གྱི་དེ་བཞིན་ཕ། །དམ་ཚིག་མཆོག་གི་འདོད་པའི་མཆོག །བདེན་པ་གང་གིས་ཡེ་ཤེས་ཀྱི། །ཤེས་རབ་ཐབས་དག་དཀྱིལ་འཁོར་ནི། །མགོན་པོ་ཁྱོད་ཀྱི་བདེན་པ་དེས། །བདག་གིས་འདོད་པ་ཡོངས་སུ་སྐོངས། །གཟུགས་བརྙན་
དང་ནི་མཉམ་པའི་ཆོས། །དག་ཅིང་དང་བ་རྙོག་མེད་པ། །གཟུང་མེད་བརྗོད་དུ་མེད་པ་ཡང་། །རྒྱུ་དང་རྐྱེན་ལ་ཀུན་དུ་བྱུང་། །དེ་ཉིད་དེ་ཉིད་བསྐྱེད་པ་ནི། །དེ་དག་བདེན་པས་དཀྱིལ་འཁོར་ལ། །གཟུགས་བརྙན་གསལ་བར་སློབ་པ་ནི། །སྡིག་མེད་པས་ནི་བལྟ་བར་བགྱི། །ཐུན་མོང་སྡོམ་
པ་དང་ལྡན་པ། །བསྙེན་སྒྲུབ་གསུམ་གྱིས་བསྒྲུབས་ནས་སུ། །ཡོལ་བས་བར་དུ་བཅད་པ་ལ། །འཁྱིལ་བཟླས་ཆུ་ཡིས་གཏོར་བར་བྱ། །དམར་པོ་ཤམ་གྱིས་གདོང་གཡོགས་ནས། །དགའ་བ་ཁྱོད་གང་ཡིན་ཞེས་དྲི། །དགའ་བ་སྐལ་ལྡན་བདག་ཡིན་ཞེས། །འཇུག་པ་པོ་ཡིས་སྨྲ་
བར་བྱ། །དེ་ནས་མེ་ཏོག་སྙིམ་བཀང་ནས། །འཁོར་ལོས་བཞེས་ཞེས་གཏོར་ནས་ནི། །གཏོང་སེམས་བསྐྱེད་ནས་བླ་མ་ལ། །ཡོན་ནི་རབ་ཏུ་དབུལ་བར་བྱ། །ཡུལ་མཁར་ཁྱིམ་དང་གླང་པོ་རྟ། །བྲན་དང་བྲན་མོ་ཆུང་མ་དྲུག །བུ་མོ་ཤིན་ཏུ་ཡིད་འོང་དང་། །གང་གིས་རང་གི་ལུས་འདི་ཡང་། །
དེང་ནས་བརྩམས་ཏེ་དབུལ་པར་བྱ། །ཅི་ཡི་ཕྱིར་ནི་དབུལ་བྱ་ན། །སློབ་དཔོན་དུ་ནི་ཉེར་གནས་ཕྱིར། །སྙིང་རྗེ་ཆེན་པོས་ཉེར་གནས་ཕྱིར། །སེམས་ཅན་ཐམས་ཅད་སྐྱོབ་དོན་དུ། །བདག་གི་ལུས་འདི་དབུལ་བར་བགྱི། །ཧཱུྃ་གིས་སྙིང་ཀར་རྡོ་རྗེ་བསྒོམ། །ཨོཾ་སརྦ་ཡོ་ག་ཙིཏྟ་ཨུཏྤཱ་ད་ཡ་མི།
སུ་ར་ཏ་སྟྭཾ་སིདྡྷི་བཛྲ་ཡ་ཐཱ་སུ་ཁཾ། བརྗོད་པས་བྱང་ཆུབ་སེམས་བསྐྱེད་ལ། །ལུས་ཀྱི་འཁོར་ལོ་བསྐུལ་བར་བྱ། །དེ་རིང་ཁྱོད་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབ་པར་འགྱུར་རོ། །ཁྱོད་ཀྱིས་དེ་བཞིན་གཤེགས་པ་ཐམས་ཅད་ཀྱི་མཆོག་གི་གསང་ཆེན་འདི། །དཀྱིལ་འཁོར་དུ་མ་
ཞུགས་པ་རྣམས་ཀྱི་མདུན་དུ་སྨྲ་བར་མི་བྱའོ། །དད་པར་མི་བྱེད་པ་ཡང་མི་རུང་ངོ་། །ཞེས་བརྗོད་པར་བྱའོ། །གཤིན་རྗེ་གཤེད་ལ་སོགས་པའམ། །ཨ་ཁཾ་བཱི་ར་ཧཱུྃ་བརྗོད་ནས། །དྲངས་ནས་འཇུག་པའི་སྒོར་གནས་ཏེ། །སྔ་མའི་སྡོམ་པ་བརྟན་པར་བྱ། །དེ་རིང་ཁྱོད་དེ་བཞིན་གཤེགས་པ་

ཐམས་ཅད་ཀྱི་རིགས་ལ་རབ་ཏུ་ཆུད་དོ། །དེ་བས་ངས་ཁྱོད་ལ་རྡོ་རྗེ་ཡེ་ཤེས་བསྐྱེད་པར་བྱའོ། །ཡེ་ཤེས་དེ་ཁྱོད་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱང་ཐོབ་ན། དངོས་གྲུབ་གཞན་ལྟ་སྨོས་ཀྱང་ཅི་དགོས། དེའི་ཐབས་འདི་ཁྱོད་ཀྱིས་དཀྱིལ་འཁོར་མ་མཐོང་
བ་རྣམས་ཀྱི་མདུན་དུ་མ་སྨྲ་ཤིག །ཁྱོད་དམ་ཚིག་ལས་འདའ་བར་མི་རུང་བའི་ཕྱིར་རོ། །སྙིང་གར་རྡོ་རྗེ་བཞག་ནས་ནི། །དེ་རིང་རྡོ་རྗེ་སེམས་དཔའ་ཉིད། །ཁྱོད་ཀྱི་སྙིང་ལ་ཡང་དག་གནས། །གལ་ཏེ་ཚུལ་འདི་འདས་ན་ནི། །སྙིང་འགས་སྡུག་བསྔལ་དེ་ལྟར་འབྱུང་། །བཛྲ་ས་ཏྭ་ཧཱུྃ། པདྨའི་བནྡྷར་
བདུད་རྩི་ལྔ། །ཡི་གེ་གསུམ་གྱིས་འབར་བྱས་ལ། །རྡོ་རྗེ་ཡིས་ནི་དེ་ཡི་ཁར། །མི་ལྡོག་ཕྱིར་ནི་བླུད་པར་བྱ། །འདི་ནི་ཁྱོད་ཀྱི་དམྱལ་བའི་ཆུ། །དམ་ལས་འདའ་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་པའི། །བདུད་རྩི་རྡོ་རྗེ་ཆུ་འཐུང་ཤིག །བཛྲོད་ཀ་ཋ། དེ་ནས་དེ་ཡིས་མི་འགྱུར་བྱས། །སེམས་
གཡོ་དོགས་ཕྱིར་བསྟན་པ་ཡི། །དམ་བཅས་འདི་ནི་བླ་མ་ཡིས། །ལན་གསུམ་དུ་ནི་བསྒྲགས་པར་བྱ། །དེ་རིང་ཕྱིན་ཆད་ཁྱོད་ཀྱིས་ཕྱག་ན་རྡོ་རྗེ་ང་ཡིན་གྱི། ངས་ཅི་སྨྲས་པའི་བྱ་བ་ཐམས་ཅད་ཁྱོད་ཀྱིས་བྱ་དགོས་སོ། །ཁྱོད་ཀྱིས་བདག་ལ་བརྙས་པར་མི་རུང་སྟེ། །བརྙས་ན་ཡ་ང་བ་མ་སྤངས་པས་ཤི་
བའི་དུས་བྱས་ནས་དམྱལ་བར་ལྟུང་བས་མ་འགྲོ་ཤིག །དེ་ནས་སློབ་མ་དེ་ཡིས་ཀྱང་། །བརྟན་ནས་རང་ཉིད་དག་བྱའི་ཕྱིར། །གསོལ་བ་གདབ་པ་འདི་ཡི་མཆོག །སྨྲོས་ཤིག་ཅེས་ནི་བླ་མས་སྨྲས། །དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ལ་རྡོ་རྗེ་སེམས་དཔའ་བདག་
ཅག་ལ་དབབ་དུ་གསོལ་ལོ། །དེ་ཡི་སྙིང་ག་རུ་ནི་ཧཱུྃ། །ལཾ་བྱུང་དབང་ཆེན་དབུས་སུ་བསམ། །མགྲིན་པར་ཨ་ནི་པྃ་བྱུང་བའི། །ཆུ་ཡི་དཀྱིལ་འཁོར་དབུས་སུ་བསམ། །སྤྱི་བོར་ཧྃ་ནི་དཀར་པོ་ཆེ། །ཡཾ་བྱུང་རླུང་དབུས་བསམས་ནས་ནི། །སྐུལ་བྱེད་ཛྷཻཾ་ནི་རྐང་མཐིལ་གཉིས། །རླུང་གིས་
བསྐྱོད་པས་འབར་བྱས་དབབ། །ཨོཾ་ཨཱ་བེི་ཤ་ཡ་སྟཾ་བྷ་ཡ་ར་ར་ར་ར་ཙ་ལ་ཡ་ཙ་ལ་ཡ། ཧཱུྃ་ཨ་ཧ་ཛྷཻཾ། རྡོ་རྗེ་དྲིལ་བུ་སྒྲ་དང་བཅས། །འཇིགས་རུང་གར་གྱིས་སྨིན་རིང་བསྐྱོད། །མིག་བགྲད་སོ་གཙིགས་བཞད་བྱེད་པས། །སློབ་མ་དབབ་པ་རབ་ཏུ་བྱ། །ལྕེ་ལ་ཐིག་ལེའི་ཡི་གེ་ཨཱཿ། །བསམས་ནས་

བཟླས་ཤིང་དགེ་མི་དགེ། བྲུ་ཧི་བཛྲ་ཞེས་བརྗོད་ནས། །དབབ་པ་བརྟན་པར་བྱ་བའོ། །པྲ་ཏི་བཛྲ་ཧོ་བརྗོད་ལ། །མེ་ཏོག་དཀྱིལ་འཁོར་དོར་དུ་གཞུག །དེ་ཡིས་བཅིངས་པར་རབ་བསམས་ལ། །བླངས་ནས་མགོ་རུ་བཅིང་བར་བྱ། །འདི་ནི་སྟོབས་ཆེན་སེམས་དཔའ་བས། །འདི་ཡི་མ་
འདྲེས་སོ་སོར་ཟུང་། །ཕྱག་མཚན་ཉེའམ་མི་ཉེ་བ། །རེའུ་ཆའི་གནས་ལས་ཤེས་པར་བྱའོ། །ཡང་ན་རང་གི་སྐལ་བ་ཡིས། །གདོང་ཕྱེ་མེ་ཏོག་དེ་ལ་གཏོར། །མིག་གཉིས་ཨོཾ་འབར་བསམས་ནས་ནི། །གདོང་ཕྱེ་ལས་ཀྱི་ཁ་དོག་བསྟན། །དེ་རིང་རྡོ་རྗེ་སེམས་དཔའ་ཉིད། །ནན་ཏན་བྱས་
ཏེ་ཁྱོད་མིག་ཕྱེ། །བླ་ན་མེད་པའི་རྡོ་རྗེས་མིག །ཐམས་ཅད་ལ་ནི་མིག་ཕྱེ་འགྱུར། །དཀྱིལ་འཁོར་གཙོ་བོ་ནས་བརྩམས་ནས། །བདུད་རྩི་འཁྱིལ་པར་བསྟན་པའམ། །ཡང་ན་བདུད་རྩི་འཁྱིལ་པ་ལས། །གཙོ་བོའི་བར་དུ་བསྟན་བྱའོ། །སློབ་མས་ཐལ་མོ་སྦྱར་བྱས་ལ། །རྡོ་རྗེ་དཀྱིལ་
འཁོར་ཆེན་པོ་ཡི། །དཀྱིལ་འཁོར་ཉིད་དུ་བདག་ཞུགས་སོ། །སྦྱོར་བའི་དཀྱིལ་འཁོར་ཆེན་པོ་ཡི། །དཀྱིལ་འཁོར་དེ་རིང་བདག་གིས་མཐོང་། །གསང་བའི་དཀྱིལ་འཁོར་ཆེན་པོ་ཡི། །དཀྱིལ་འཁོར་དུ་ནི་བདག་དབང་བསྐུར། །དེ་སྐད་ལན་གསུམ་བརྗོད་པར་བྱ། །བུམ་པ་རྣམས་ཆུ་
གཅིག་ཏུ་བྱས། །མི་བསྐྱོད་རྡོ་རྗེ་རབ་བསྐྱེད་ལ། །ཞུགས་ནས་སློབ་མའི་མགོ་བོ་རུ། །འཁོར་ལོས་སྒྱུར་བཞིན་དབང་བསྐུར་བྱ། །རིན་ཆེན་ལ་སོགས་དབུ་རྒྱན་ལ། །རིན་ཆེན་འབྱུང་ལྡན་གྱུར་བྱས་ཏེ། །དབུས་སུ་རང་གི་ལྷ་བཞག་པས། །ཅོད་པན་དང་ལྡན་དབང་བསྐུར་བྱ། །རྡོ་རྗེ་རྩེ་མོ་དགུ་
ལྔ་པ། །འོད་དཔག་མེད་བསྒོམས་ཡོངས་གྱུར་ཏེ། །བྱིན་ནས་སྙིང་གར་དེ་བཟུང་བ། །རྡོ་རྗེའི་དབང་ནི་བསྐུར་བར་བྱ། །དྲིལ་བུ་དོན་ཡོད་གྲུབ་པ་རུ། །བསྒོམས་ནས་ཡོངས་གྱུར་བྱིན་ནས་ནི། །རྡོ་རྗེ་དྲིལ་བུ་ལ་འཁྱུད་ཚུལ། །བདག་པོར་དབང་ནི་བསྐུར་བར་བྱ། །སྤྱི་གཙུག་ལྟག་པ་ལ་
བཅུག་སྟེ། །སྤྱི་བོར་ཕྱག་རེག་མིང་གི་དབང་། །ཆེ་གེ་རྡོ་རྗེ་ཞེས་བོས་ནས། །ཁྱད་པར་གཞན་ཡང་མཐོང་བར་བྱ། །གང་གང་སྣང་བ་ཀུན་བདག་སྟེ། །དེ་ཡི་གཙོ་བོ་མི་བསྐྱོད་མགོན། །ཆོས་རྣམས་རང་བཞིན་གྱིས་དག་པས། །ཆོས་ཀྱི་དབྱིངས་ཀྱི་ཡི་གེ་ཚུལ། །ཀུན་གྱི་གཙོ་བོ་ཡིན་པའི་

ཕྱིར། །མིང་གོང་དཔལ་གྱི་སྒྲ་གཞུག་བྱ། །གོ་བ་ཉིད་དུ་བསྒྲགས་པའི་ཕྱིར། །དང་པོ་ཀྱེ་སྦྱོར་མཐའ་ཡི་བར། །ཧཱུྃ་བསྐྱེད་རྡོ་རྗེ་ལག་བྱིན་ནས། །འཆང་བས་རྡོ་རྗེ་ལན་གསུམ་གསོར། །བརྟུལ་ཞུགས་འདི་ནི་དང་པོ་རུ། །རྣལ་འབྱོར་པ་ཡིས་བླང་བར་བྱ། །
འདི་ནི་སངས་རྒྱས་ཐམས་ཅད་དང་། །རྡོ་རྗེ་སེམས་དཔའི་ཕྱག་ན་གནས། །རྟག་པར་ཁྱོད་ཀྱིས་ཀྱང་བཟུང་སྟེ། །ལག་ན་རྡོ་རྗེ་བརྟུལ་ཞུགས་བརྟན། །ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛ་ཨེ་ཥ་ཏྭཾ་དྷ་ར་ཡ་མི། ཧི་ཧི་ཧི་ཧི་ཧཱུྃ། དེ་ཡི་དེ་ཉིད་བཤད་པར་བྱ། །སྔོན་མཐའ་མེད་པའི་
སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་དུ་བཟང་པོ་ཀུན་གྱི་བདག །རྡོ་རྗེ་སྙིང་པོའི་གཙོ་བོའི་གཙོ། །ཨ་ལས་བྱུང་བའི་དྲིལ་བུ་ནི། །ལག་གཡོན་བྱིན་ནས་ཕྱོགས་བརྒྱད་དཀྲོལ། །བརྟུལ་ཞུགས་འདི་ཡང་དང་པོ་རུ། །དེ་ཡི་གྲོགས་སུ་སྦྱིན་པའོ། །འདི་ནི་
སངས་རྒྱས་ཐམས་ཅད་ཀྱི། །ཤེས་རབ་དབྱངས་ཆེན་འཁྲོལ་བར་འདོད། །རྟག་པར་ཁྱོད་ཀྱིས་ཀྱང་བཟུང་སྟེ། །རྒྱལ་བ་བྱང་ཆུབ་མཆོག་ཏུ་འདོད། །དེ་ཉིད་བཤད་པར་བྱ་བ་ནི། །འདི་ནི་ཁྱོད་ཀྱིས་དཀྲོལ་བྱ་སྟེ། །སྲིད་པ་རང་བཞིན་གྱིས་དག་ཕྱིར། །རང་བཞིན་གྱིས་ནི་འབྱུང་བར་བྱེད། །
རང་བཞིན་དག་པས་སེམས་ཅན་ཀུན། །དམ་པའི་སྲིད་པ་བྱེད་པ་པོ། །སློབ་མ་རྡོ་རྗེ་དབྱིངས་ཕྱུག་དང་། །ལྡན་པར་བསམས་ནས་བཅོམ་ལྡན་འདས། །མངོན་བྱེད་འདས་པ་མཆོག་འདི་ཡིས། །ཕྱག་རྒྱའི་དམ་ཚིག་སྦྱིན་པའོ། །ཕྱག་རྒྱ་ཆེན་པོའི་བྱིན་བརླབས་ཏེ། །སྙིང་པོ་བསྙེན་པ་ལ་སོགས་
གྲགས། །དམ་ཚིག་འདོད་གཟུགས་སོགས་རྣམས་ཀྱིས། །སྔགས་ནི་དབུགས་སུ་རྟོགས་ནས་བཟླ། །རང་གི་རང་བཞིན་དེ་རྣམས་ཀྱིས། །ཕྱོགས་བཅུ་དུས་གསུམ་ཁྱབ་པ་ཡི། །མ་ལུས་གཙོ་བོ་མཆོད་བྱས་ནས། །བདག་དང་གཞན་ཡང་མཉེས་པར་བྱ། །དཀའ་ཐུབ་དམ་བཅས་དེ་དག་
གིས། །བསྟན་པར་བྱས་ཀྱང་འགྲུབ་པ་མེད། །མི་སྣང་མངོན་ཤེས་མཁའ་འགྲོ་མེད། །སྐུ་གསུང་ཐུགས་ལས་གྲུབ་སྐྱེས་སོ། །དེ་བས་སངས་རྒྱས་སེམས་ཅན་རྣམས། །སྔགས་ཀྱི་སྤྱོད་པ་མཆོག་བཟུང་སྟེ། །འདོད་པ་ཀུན་ལ་ལོངས་སྤྱོད་པས། །ཆོས་ཀྱི་ཡི་གེ་མཆོག་ཐོབ་འགྱུར། །

བདེ་སྡུག་གཉིས་མེད་བདག་ཉིད་ཀྱིས། །འདོད་པའི་ཡོན་ཏན་ལྔ་བསྟེན་ཏེ། །ཆགས་ཆེན་ཡེ་ཤེས་དོན་སྦྱོར་ན། །དེ་ཁོ་ན་ཉིད་ཀུན་ཀྱང་འགྲུབ། །སྐུ་གསུང་ཐུགས་གྲུབ་ཡང་དག་སྟེ། །གང་གཞན་དམན་པ་ཡང་སྐྱེ་འདོད། །དེ་ཡང་སྐུ་གསུང་ཐུགས་བསྒོམས་ནས། །སྔགས་བཟླས་
པ་ཡིས་འགྲུབ་པའོ། །ཐུན་མོང་མ་ཡིན་སྡོམ་པར་ལྡན། །སྦྱོར་བ་མ་ཉམས་ཡོན་ཕུལ་ནས། །རྡོ་རྗེ་སློབ་དཔོན་དབང་ནོད་ཕྱིར། །དེ་ཡིས་ལན་གསུམ་གསོལ་བ་གདབ། །བྱང་ཆུབ་རྡོ་རྗེ་སངས་རྒྱས་ལ། །མཆོད་ཆེན་ཇི་ལྟར་བགྱིས་པ་བཞིན། །བདག་ཀྱང་རབ་ཏུ་བསྒྲལ་བའི་ཕྱིར། །
ནམ་མཁའ་རྡོ་རྗེ་བདག་ལ་སྩོལ། །འཇུག་པའི་སྒོ་རུ་ཁྲུ་དོ་བར། །པདྨ་དཀར་པོ་འདབ་བརྒྱད་ལ། །ས་བོན་གྱིས་མཚན་དབང་སྟེགས་བྲི། །སེང་གེ་མཚན་པར་འདུག་ཏུ་གཞུག །དེ་ཉིད་ཏིང་འཛིན་གསུམ་ལྡན་པར། །བྱས་ནས་བླ་མའི་ལུས་དཀྱིལ་འཁོར། །སངས་རྒྱས་སོགས་སྤྲོ་
རྣམ་དགུག་ཅིང་། །ནམ་མཁའི་ཁམས་ཀུན་དགའ་བར་བྱ། །དེ་ཡིས་རྔ་དྲིལ་སིལ་སྙེན་དང་། །རྒྱལ་མཚན་འཕེན་སོགས་ཕེག་རྡོབ་ཅིང་། །བུམ་པ་གཙོ་སོགས་གཟུང་བྱས་ནས། །སྔོན་བཞིན་ཆུ་སོགས་དབང་བསྐུར་བསམ། །དབང་བསྐུར་རྡོ་རྗེ་ཆེན་པོ་ནི། །ཁམས་གསུམ་ཀུན་གྱིས་
ཕྱག་བྱས་པ། །གསང་གསུམ་གནས་ལས་བྱུང་བ་ཡི། །སངས་རྒྱས་ཀུན་གྱིས་སྦྱིན་པ་ཡིན། །དེ་སྐད་ལན་གསུམ་བརྗོད་ནས་སུ། །དགེ་བའི་ཕྱིར་དང་ཤིས་པའི་ཕྱིར། །བུམ་པ་སྤྱི་བོར་རབ་བཟུང་སྟེ། །བཀྲ་ཤིས་དབྱངས་འདི་བརྗོད་པར་བྱ། །དཔལ་ལྡན་གསེར་གྱི་རི་བོ་ལྟར་འབར་བ། །
འཇིག་རྟེན་གསུམ་མགོན་དྲི་མ་གསུམ་དང་བྲལ། །བཅོམ་ལྡན་པད་རྒྱས་ལྟ་བུའི་སྤྱན་མངའ་བ། །བཀྲ་ཤིས་དེས་ནི་དེང་ཁྱོད་ཞི་བྱེད་ཤོག །དེ་ཡིས་བསྟན་པའི་དྲི་མེད་མཆོག་རབ་ནི། །འཇིག་རྟེན་གསུམ་གྲགས་ལྷ་དང་མིས་མཆོད་པ། །ཆོ་ག་སྐྱེ་དགུ་རྣམས་ནི་ཞི་བར་བྱེད། །བཀྲ་ཤིས་གཉིས་
པ་དེང་འདིར་ཁྱེད་ལ་ཤོག །དམ་པའི་ཆོས་ལྡན་ཐོས་གང་བཀྲ་ཤིས་ཤིང་། །དགེ་འདུན་ལྷ་དང་ལྷ་མིའི་མཆོད་འོས་པ། །ངོ་མཚར་དཔལ་རབ་མཆོག་རབ་ཚོགས་རྣམས་ཀྱི། །བཀྲ་ཤིས་གསུམ་པ་དེང་འདིར་ཁྱེད་ལ་ཤོག །དེ་ནས་དེ་དག་ཐམས་ཅད་ཀུན། །ཡེ་ཤེས་ངོ་བོར་ཞུགས་བསམས་

པས། །དབུ་རྒྱན་ཡེ་ཤེས་སེམས་དཔའ་བསྐྱེད། །བསྐོར་བྱས་སློབ་དཔོན་གནས་པར་བྱ། །སྔོན་བཞིན་མཆོད་དང་བསྟོད་པ་དང་། །བདུད་རྩི་མྱང་བ་ཡང་བྱས་ནས། །དཀྱིལ་འཁོར་དེ་བཞིན་ཉིད་བསྟན་བྱ། །སངས་རྒྱས་མ་རྒྱས་མཉམ་པའི་ཕྱིར། །གྲུ་བཞི་
རུ་ནི་རབ་ཏུ་བསྟན། །དྲན་པ་ཉེར་བཞག་ཤར་གྱི་སྒོ། །ཡང་དག་སྤོང་བ་ལྷོ་ཡི་སྒོ། །རྫུ་འཕྲུལ་རྐང་པ་ནུབ་ཀྱི་སྒོ། །དབང་པོ་སྟོབས་ནི་བྱང་གི་སྒོ། །བསམ་གཏན་བཞི་ནི་ཏྭ་ར་ཎ། །ཏིང་འཛིན་རྣམས་ནི་ཁ་ཁྱེར་བརྒྱད། །གཟུངས་རྣམས་དེར་གནས་ལྷ་མོའོ། །བསམ་པ་བསྐང་ཕྱིར་
ལྷ་ཚོགས་རྒྱན། །གསུང་རབ་ཡན་ལག་འཕགས་སོགས་སོ། །བྱང་ཆུབ་ཡན་ལག་དྲ་བ་སོགས། །རྣམ་པར་ཐར་བརྒྱད་ཀ་བ་བརྒྱད། །སྔགས་ཚུལ་རྡོ་རྗེ་ཕྲེང་བ་ཟླུམ། །ཕྱི་ལོགས་རྣམ་དག་ཡོན་ཏན་ལྔ། །དྲི་མེད་སྟོབས་སོགས་མཆོད་པ་ལྔ། །བུམ་པ་ཆུས་གང་ཐུགས་རྗེ་དང་། །
ཚོགས་རྫོགས་སེར་པོ་ཡེ་ཤེས་གཏེར། །འགྲོ་བ་རྣམས་དང་དབྱེར་མེད་ཀྱང་། །དེ་ཡི་ཉེས་པས་མི་གོས་ཕྱིར། །སྣ་ཚོགས་པདྨ་བཅུ་དགུ་ནི། །སྡོང་བུ་དང་ནི་བཅས་པའོ། །མི་དགེ་འདམ་རྫབ་སྐམ་མཛད་ཕྱིར། །དགེ་བའི་མྱུ་གུ་གསོ་མཛད་པ། །ཉི་མའི་གདན་ནི་བདུན་རྣམས་སོ། །ཉོན་
མོངས་ཚ་བ་བསིལ་བྱེད་དང་། །མ་རིག་མུན་ནག་སེལ་བའི་ཕྱིར། །ཟླ་བ་བཅུ་གཉིས་དང་ལྡན་པའོ། །ཚོར་བ་གསོབ་ལ་སོགས་པ་དང་། །འཇུ་བ་ལ་སོགས་དུས་བཅུ་གཉིས། །ཟད་དུས་སྒྲོན་བདུན་རྣམ་དག་པས། །གྲངས་ནི་ངེས་པར་བསྟན་པའོ། །ཉོན་མོངས་ཐམས་ཅད་ལས་གྲོལ་
ཕྱིར། །གཞལ་ཡས་ཁང་དུ་བཏགས་པ་ཡིན། །སྙིང་པོ་ལ་ནི་འདུས་པའི་ཕྱིར། །དཀྱིལ་འཁོར་ཞེས་སུ་བཤད་པ་ཡིན། །རྣམ་པར་ཤེས་པ་ཞེ་སྡང་ཐུགས། །ཆོས་དབྱིངས་རྣམ་དག་མི་བསྐྱོད་པ། །གཟུགས་ཕུང་གཏི་མུག་ཆེ་དང་སྐུ། །མེ་ལོང་རྣམ་དག་རྣམ་སྣང་མཛད། །ཚོར་བའི་
ཕུང་པོ་མཉམ་པ་ཉིད། །ང་རྒྱལ་རྣམ་དག་རིན་ཆེན་འབྱུང་། །འདུ་ཤེས་ཕུང་པོ་འདོད་ཆགས་གསུམ། །སོ་སོར་རྟོག་པ་སྣང་མཐའ་ཡས། །འདུ་བྱེད་ཕུང་པོ་ནན་ཏན་དང་། །ཕྲག་དོག་རྣམ་དག་དོན་ཡོད་གྲུབ། །ས་དང་སྟོང་ཉིད་ཐབས་དང་ནི། །སྙིང་རྗེ་ཞི་བྱེད་སྤྱན་མའོ། །བྱམས་དང་མཚན་མེད་

སྨོན་ལམ་དང་། །ཆུ་ཁམས་སྲུང་བྱེད་མཱ་མ་ཀཱི། །དགའ་དང་སྨོན་མེད་སྟོབས་དང་ནི། །མེ་ཁམས་རྒྱས་བྱེད་ན་བཟའ་དཀར། །བཏང་སྙོམས་ཡེ་ཤེས་རང་བཞིན་གསལ། །རླུང་ཁམས་སྒྲོལ་བྱེད་སྒྲོལ་མའོ། །སྦྱིན་པ་རྣམ་དག་གཟུགས་རྡོ་རྗེ། །ཚུལ་ཁྲིམས་རྣམ་དག་སྒྲ་རྡོ་རྗེ། །བཟོད་
པ་རྣམ་དག་དྲི་རྡོ་རྗེ། །བརྩོན་འགྲུས་རྣམ་དག་རོ་རྡོ་རྗེ། །བསམ་གཏན་རྣམ་དག་རེག་རྡོ་རྗེ། །ཤེས་རབ་རྣམ་དག་ཆོས་རྡོ་རྗེ། །ཕྱི་ཡི་ལོངས་སྤྱོད་ཀྱིས་མཆོད་ཕྱིར། །དབྱུང་སྔགས་ཏིང་འཛིན་གསུངས་པའོ། །མི་ལ་སོགས་པ་རྣམ་དག་ཕྱིར། །དེ་ཉིད་དུ་ནི་བཀོད་པར་གསུངས། །དབྱུང་
སྔགས་ཏིང་འཛིན་མ་གསུངས་པས། །ས་སྙིང་ལ་སོགས་ཕྱིར་མི་དགོད། །འཇིགས་སོགས་ཤེས་བྱ་ཕུང་པོའི་བདུད། །དད་དག་གཤིན་རྗེ་གཤེད་འགུགས་པ། །ཉོན་མོངས་དེ་བདུད་མཐར་འཛིན་ལྷ། །བརྩོན་དག་འཇུག་བྱེད་ཤེས་མཐར་བྱེད། །སྐྱེ་སྒྲིབ་འཆི་བདག་ལོག་པར་ལྟ། །
དྲན་དག་འཆིང་བྱེད་རྟ་མགྲིན་ནོ། །ལས་དང་ལྷ་བདུད་མཆོག་འཛིན་ལྷ། །ཏིང་འཛིན་མགུ་མཛད་བདུད་རྩི་འཁྱིལ། །ཆོས་དང་ལོངས་སྤྱོད་སྤྲུལ་པ་དང་། །ངོ་བོ་ཉིད་དེ་རྣམ་བཞི་ནི། །ཐུགས་སོགས་རྡོ་རྗེ་ཡེ་ཤེས་སེམས། །ཕྱག་རྒྱ་བཞི་ཞེས་བཤད་པ་ཡིན། །རྣམ་པར་རྟོག་པ་དང་བྲལ་
ཕྱིར། །གཏིང་དཔག་དཀའ་བས་ཟབ་མོ་སྟེ། །ཕྱག་རྒྱ་ཆེན་པོར་རབ་སྣང་བ། །རང་གཞན་སྨིན་བྱེད་གསལ་བ་པོ། །ཟབ་མོ་དང་ནི་ཡང་དག་གསལ། །ཤེས་རབ་ཐབས་ཀྱི་བདག་ཉིད་དེ། །མཐའ་གཉིས་སྐྱོན་ནི་རབ་བཀག་པས། །དུས་ཐམས་ཅད་དུ་དབྱེར་མེད་དོ། །དེ་བཞིན་སློབ་
མ་དབང་བསྐུར་དང་། །དངོས་གྲུབ་སྒྲུབ་པའི་དཀྱིལ་འཁོར་གྱི། །སྒྲུབ་པའི་ཐབས་ནི་རབ་བསྟན་པས། །གང་ཟག་གཉིས་སུ་ཤེས་པར་བྱེད། །གཟུགས་བརྙན་གླེགས་བམ་ལ་སོགས་པ། །ཡོད་ན་ཁྱོད་ཀྱིས་རབ་གནས་མཛོད། །དེ་ནི་ཇི་སྲིད་བར་དུ་ནི། །སེམས་ཅན་དོན་དུ་འགྱུར་
བའོ། །དེ་ལྟར་ལུང་བསྟན་དབུགས་དབྱུང་དང་། །བཀའ་སྩལ་པ་ཡིས་དབང་བསྐུར་ནས། །བསྐྱེད་པའི་རིམ་པ་ཀུན་བསྟན་ཏེ། །བཀའ་ལུང་གཡར་གྱི་བླང་བའོ། །བུམ་པའི་དབང་གི་ཆོ་གའོ། །ལོ་འམ་ཡང་ན་ཟླ་བ་རུ། །རིག་དང་སློབ་དཔོན་དབང་ཐོབ་པས། །ལུས་དང་

ཟང་ཟིང་ཐབས་དང་བཅས། །སྤྱོད་པ་མཆོག་གིས་བླ་མ་བཀུར། །རིན་ཆེན་སྣ་བདུན་ལ་སོགས་པ། །རྗེས་སུ་མཐུན་པ་དབུལ་བྱ་སྟེ། །བླ་མ་དགྱེས་པར་བྱེད་པའི་ཆེད། །བུ་མོ་གཞོན་ནུ་གཟུགས་བཟང་བ། །རྒྱན་ལྡན་དམ་སྡོམ་དབང་བཅས་པ། །ལུས་རྒྱས་
མཛེས་པ་དབུལ་བྱས་ནས། །བླ་མའི་གཡོན་དུ་བུ་མོ་བཞག །རྒྱལ་པོ་མུ་སྟེགས་ཆོམ་རྐུན་གྱིས། །གནོད་མེད་དབེན་པའི་ས་ཕྱོགས་སུ། །མཆོག་གི་དྲིས་བྱུགས་པད་སོགས་གདན། །བླ་རེ་རྒྱལ་མཚན་སོགས་ཀྱིས་བཀླུབས། །རོལ་མོ་སིལ་སྙན་སྣ་ཚོགས་སྒྲས། །གོང་གི་
འཁོར་རམ་ཡང་ན་སྐུ། །ཚོགས་ཀྱི་མཆོད་པ་ཆེན་པོ་ཡིས། །དབྱེར་མེད་འཁོར་ལོ་མཆོད་བྱས་ནས། །མེ་ཏོག་སྙིམ་བཀང་གསོལ་བ་གདབ། །ཀུན་མཁྱེན་ཡེ་ཤེས་ཕུང་པོ་སོགས། །པུས་བཙུགས་ཐལ་སྦྱར་མགྲིན་དམའ་བས། །གསང་བ་མཆོག་གི་སྡོམ་པ་ཆེ། །ཡང་དག་
བླངས་ནས་བསྲུང་བར་བྱ། །ཇི་ལྟར་དབང་བསྐུར་སོགས་ཚུལ་གྱིས། །སངས་རྒྱས་ལ་སོགས་ཐོབ་པ་བཞིན། །བྱང་ཆུབ་སྤྱོད་པ་གཞན་གྱིས་ནི། །འདུལ་བའི་དགེ་བ་དེ་བཞིན་མེད། །དེ་བས་དམ་ཚིག་བུས་སྲུངས་ཤིག །རྟག་ཏུ་སྡོམ་པ་ཡང་སྐྱོངས་ཤིག །ཤ་ལྔ་བདུད་རྩི་ལྔ་
བཟའ་སྟེ། །དེ་ལས་གཞན་ཡང་དམ་ཚིག་སྲུངས། །དཀོན་མཆོག་བླ་མ་བརྙས་བྱེད་གཞོམ། །གཞན་གྱི་བུད་མེད་སྤྱད་པ་དང་། །མ་བྱིན་པར་ཡང་བླངས་བྱས་ནས། །བརྫུན་གྱི་ཚིག་ཀྱང་སྨྲ་བར་བྱ། །རྣལ་འབྱོར་རྒྱུད་ལས་གསུངས་པ་བཞིན། །དེ་ནི་ཆོ་ག་བཞིན་དུ་སྲུངས། །དེ་ལྟར་བྱའོ་
ཞེས་གསོལ་ནས། །ཡང་ན་མེ་ཏོག་ཕྲེང་བ་གཏོར། །ཐལ་མོ་སྦྱར་ནས་གསང་བ་ཡི། །དབང་ནོད་ཕྱིར་ནི་གསོལ་བ་གདབ། །རྡོ་རྗེ་སེམས་ཁྱོད་ལ་སོགས་པ། །ཚིགས་བཅད་ལྔ་ཡིས་ལན་གསུམ་དུ། །ཞུགས་ནས་སློབ་མ་དམ་པ་ནི། །མཛེས་པའི་ཆས་ལྡན་གྱིས་བྱའོ། །དེ་ནས་བླ་
མ་ཡོན་ཏན་མཚོ། །མཆོག་གི་མཆོག་གིས་དེ་གསན་ནས། །ཞལ་ནི་མདངས་དང་ལྡན་བྱས་ནས། །སྙིང་རྗེ་དེ་ལ་བསྐྱེད་པར་བྱ། །གཟུགས་སོགས་ཕུན་སུམ་ཚོགས་ལྡན་པའི། །ལྷ་མོ་དེ་ནི་བྱིན་བརླབས་ནས། །ཐུབ་པའི་དབང་པོ་ཞུགས་བྱས་ནས། །རྡོ་རྗེ་ནང་དུ་གནས་པར་བྱ། །མཐེ་

བོ་སྲིན་ལག་གིས་བཀབ་ནས། །སློབ་མ་དཔལ་ལྡན་སྣང་མཛད་ཁར། །སྤྲོ་བའི་སྔགས་ཀྱིས་ཕབ་ནས་སུ། །གཉི་གས་འདི་ནི་བརྗོད་པར་བྱ། །ཨ་ཧོ་ཨ་ཧོ་སུ་ཁ་ཧོ། །གཞན་ཡང་བློ་ཡི་བྱེ་བྲག་གིས། །དབང་བསྐུར་བྱས་ནས་མགྲིན་པ་རུ། །དེ་ཉིད་མྱོང་བར་བྱས་ནས་སུ། །དེ་
ནས་འདི་ཡིས་བསྔགས་པའོ། །དེ་འདི་རྡོ་རྗེ་ཐམས་ཅད་ཀྱི། །དབང་བསྐུར་མཆོག་ཏུ་བསྔགས་པ་སྟེ། །ཐམས་ཅད་སྔགས་ནི་འགྲུབ་འགྱུར་ཏེ། །ལས་མཆོག་ཁྱད་པར་ཅན་ཡང་འགྲུབ། །ཟླ་བ་ཟ་བ་རབ་བྱུང་བ། །ལུང་བསྟན་དབུགས་དབྱུང་བཀའ་སྩལ་པ། །འོག་ནས་འབྱུང་
བཞིན་སྦྱིན་པར་བྱ། །རྡོ་རྗེ་བཟླས་པས་ཕྱི་ནང་ཚོགས། །སྒྱུ་མ་སྨིག་རྒྱུ་ལ་སོགས་པའི། །འདོད་དོན་ཕྱག་མཚན་མདོག་དང་དབྱིབས། །བསམ་མི་ཁྱབ་པའི་རྣམ་སྨིན་སྐུ། །བསྒོམ་པ་ལ་གནས་དེ་བསྒོམ་གཞུག །གསང་བའི་དབང་གི་ཆོ་གའོ། །དེ་བཞིན་གོང་མའི་རིམ་པ་ཡིས། །
མཚན་དང་ལྡན་པའི་རིག་པ་ཆེ། །བཙལ་ཏེ་བླ་མ་དག་ལ་ཡོན། །རྗེས་མཐུན་དང་བཅས་དབུལ་བར་བྱ། །སྔོན་བཞིན་གསོལ་བཏབ་སྡོམ་པ་བླངས། །སངས་རྒྱས་བྱང་ཆུབ་སེམས་དཔའ་དང་། །ཉན་ཐོས་རང་རྒྱལ་དེ་བཞིན་ཏེ། །སྐུ་གསུང་ཐུགས་སུ་སྦྱོར་བ་ན། །ཕྱག་འཚལ་ན་ནི་མ་རུང་
འགྱུར། །ཀུན་དུ་རྡོ་རྗེ་སེམས་དཔའ་ཡི། །ལུས་ངག་ཡིད་ཀྱི་དཀྱིལ་འཁོར་ལ། །བསམ་གཏན་རྡོ་རྗེ་གསུམ་སྦྱོར་བས། །སྔགས་ཟློས་པས་ནི་བསམ་གཏན་བྱ། །མདོར་ན་སེམས་ཅན་ཐམས་ཅད་ནི། །བསམ་གཏན་རྡོ་རྗེ་བསྐུལ་བར་བྱ། །དེ་འདི་རྡོ་རྗེ་ཐམས་ཅད་ཀྱི། །དམ་ཆོས་རབ་ཏུ་
བསྟན་པའོ། །དཀྱིལ་འཁོར་དག་ཀྱང་ཡང་མི་བྲི། །གླེགས་བམ་བཀླག་པར་མི་བྱ་ཞིང་། །མཆོད་རྟེན་དག་གི་ལས་མི་བྱ། །རྡོ་རྗེ་གསུམ་མཆོག་ཕྱག་མི་བྱ། །གལ་ཏེ་བྱང་ཆུབ་མཆོག་འདོད་ན། །ལག་པའི་ཕྱག་རྒྱ་མི་བཅིང་ངོ་། །དེ་ལྟར་བྱ་ཞེས་གསོལ་བར་བྱ། །ཡང་ནི་མེ་ཏོག་གཏོར་
བྱས་ནས། །མཆོད་སྦྱིན་རྡོ་རྗེ་ལ་སོགས་པའི། །ཚིགས་བཅད་ལན་གསུམ་གསོལ་བཏབ་ནས། །ཤེས་རབ་ཡེ་ཤེས་ཡང་དག་བླང་། །དེ་ནས་ལྷ་མོ་བདག་ཉིད་དང་། །དམ་ཚིག་སྡོམ་པའི་མཆོག་སྨྲས་ནས། །བདེ་ཆེན་ཟ་མ་ཏོག་གི་ནི། །ལྷ་མོའི་བསྔགས་པ་རབ་ཏུ་བརྗོད། །དེ་དག་

མདུན་དུ་གནས་པའི་ལག །གཡས་གཡོན་འོག་དང་སྟེང་བཞག་ནས། །བྱིན་གྱིས་བརླབས་པའི་ལྷ་མོ་འདི། །སྔགས་འདི་ཡིས་ནི་སྦྱིན་པར་བྱ། །ཡིད་འོང་གཟུགས་མ་འདི་ཉིད་ནི། །སངས་རྒྱས་ཀུན་གྱི་སྤྱོད་དུ་གནང་། །དཀྱིལ་འཁོར་འཁོར་ལོ་རིམ་པ་ཡིས། །
དམ་པའི་བདེ་བ་ཁྱོད་ཀྱིས་མྱོང་། །དེ་ནས་རབ་མཉམ་བཞག་པ་ཡིས། །དལ་བའི་བྱ་བ་རྣམ་གསུམ་གྱིས། །རྡོ་རྗེ་སྐྱིལ་ཀྲུང་ནང་དུ་སེམས། །རིན་ཆེན་དཀྱིལ་དུ་རྟོགས་པ་བྱ། །རང་གི་ལྷ་ཡི་འཁོར་ལོར་ལྡན། །དབྱིངས་ཀྱི་དབང་ཕྱུག་དང་འབྲེལ་པ། །ཡོལ་བས་བཅད་དེ་བདེ་མྱོང་ལ། །
སྔོན་བཞིན་དབང་བསྐུར་བྱས་ནས་ཐིམ། །ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་བཛྲ་སྭ་བྷཱ་བ་ཨཱཏྨ་ཀོ྅་ཧཾ། གཏི་མུག་རང་བཞིན་གཏི་མུག་སྦྱོར། །གཏི་མུག་དགའ་དང་ཡང་དག་ལྡན། །གཏི་མུག་རྒྱུན་གྱིས་དབང་བསྐུར་ན། །གཏི་མུག་རྡོ་རྗེའི་བདག་ཉིད་འགྱུར། །ཞེ་སྡང་རང་བཞིན་ཞེ་སྡང་སྦྱོར། །
ཞེ་སྡང་དགའ་མ་དང་ལྡན་པར། །ཞེ་སྡང་རྒྱུན་གྱིས་དབང་བསྐུར་ན། །ཞེ་སྡང་རྡོ་རྗེའི་བདག་ཉིད་འགྱུར། །འདོད་ཆགས་རང་བཞིན་འདོད་ཆགས་སྦྱོར། །འདོད་ཆགས་དགའ་དང་ཡང་དག་ལྡན། །འདོད་ཆགས་རྒྱུན་གྱིས་དབང་བསྐུར་ན། །འདོད་ཆགས་རྡོ་རྗེའི་བདག་ཉིད་འགྱུར། །
ཤེས་རབ་ཡེ་ཤེས་བདག་སྦྱར་ན། །རྡོ་རྗེ་དགའ་མ་དང་ལྡན་པར། །ཡེ་ཤེས་རྒྱུན་གྱིས་དབང་བསྐུར་ན། །ཤེས་རབ་ཡེ་ཤེས་བདག་ཉིད་འགྱུར། །ཤེས་རབ་ཡེ་ཤེས་སོ། །དེ་ནས་བླ་མས་གཡོན་པ་ཡི། །ཕྱག་ནི་སློབ་མའི་སྤྱི་བོར་བཞག །དེ་བཞིན་གཤེགས་ཀུན་དཔང་བྱས་ལ། །
རིག་པའི་བརྟུལ་ཞུགས་སྦྱིན་པའོ། །ཐབས་གཞན་གྱིས་ནི་སངས་མི་རྒྱ། །དེ་བས་རིག་མ་འདི་ནི་མཆོག །ཆོས་ཀུན་གཉིས་སུ་མེད་པ་ལ། །གཉིས་ཀྱིས་རྣམ་པར་མཚོན་པ་ཡིན། །དེ་བས་རྟག་ཏུ་འཁོར་བ་རུ། །ཁྱེད་ཀྱིས་འབྲལ་བར་མ་བྱེད་ཅིག །འདི་ནི་སངས་རྒྱས་ཐམས་ཅད་ཀྱི། །
རིག་པའི་བརྟུལ་ཞུགས་བླ་ན་མེད། །བླུན་ཆེན་གང་ཞིག་འདའ་བྱེད་ན། །མཆོག་གི་དངོས་གྲུབ་དེ་ལ་མེད། །དེ་ལྟར་དེ་བཞིན་གཞིར་ཡང་གྲགས། །སྔོན་བཞིན་གཉིས་ནི་རྒྱས་བཏབ་པས། །གསལ་ཞིང་རབ་དགའ་མཁའ་འདྲ་བའི། །མན་ངག་ཏུ་ནི་དེ་ཉིད་བརྟག །བླ་མ་དེ་བཞིན་

གཤེགས་གྱུར་ན། །སྙིང་གར་ཁུ་ཚུར་ཆོས་གོས་གཡོན། །གཡས་པས་མཆོག་སྦྱིན་ཕྱག་རྒྱ་བྱ། །བདག་ཉིད་བཞེངས་ནས་ལུང་སྟོན་བྱ། །ཨོཾ་ཁྱོད་ལ་བདག་གིས་ལུང་འདི་སྟོན། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པའི་ངན་འགྲོ་ཐར་བྱས་ནས། །ཡང་དག་སྲིད་པ་
གྲུབ་པའི་ཕྱིར། །ས་བླ་ས་སྟེང་ས་འོག་ཏུ། །ཀྱེ་རྡོ་རྗེ་སེམས་དཔའ་ཞེས་བྱ་བ། །རང་བྱུང་རང་ཉིད་གྲུབ་གྱུར་ཅིག །སྔགས་པ་གང་ལ་ལུང་འདི་བསྟན། །དེ་ནི་འགྲོ་བ་ཀུན་གྱི་གཙོ། །བླ་ན་མེད་པའི་བྱང་ཆུབ་ལ། །བདེ་གཤེགས་ཀུན་གྱིས་ལུང་བསྟན་ཡིན། །ལུང་བསྟན་པའོ། །ཇི་
ལྟར་དབང་བསྐུར་ཐོབ་པ་ཡིས། །སློབ་མས་ཡོན་ཏན་བརྗོད་པར་མོས། །དམ་ཚིག་གསུམ་གྱིས་དབུགས་ཕྱུང་ནས། །འདི་ཡིས་བསྔགས་པ་བརྗོད་པའོ། །དམ་ཚིག་གསང་ཆེན་དཀྱིལ་འཁོར་ལ། །རབ་ཏུ་ཞུགས་ནས་མཐོང་བས་ན། །ཁྱོད་ནི་སྡིག་པ་ཀུན་ལས་གྲོལ། །དེ་རིང་ཤིན་ཏུ་
ཁོ་ནར་གནས། །བདེ་ཆེན་ཐེག་པ་འདི་ལ་ནི། །ཕྱིན་ཆད་ཤི་བ་ཡོང་མེད་དེ། །མི་ཐུབ་མི་ཤིགས་གཞན་གྱིས་ཀྱང་། །རོལ་ཞིང་འཇིགས་པར་ག་ལ་འགྱུར། །སྡུག་བསྔལ་སྲིད་ལས་མྱ་ངན་འདས། །སྲིད་པ་གཏན་དུ་དག་པའི་ཕྱིར། །ཡང་དག་འབྱུང་བ་སྟོན་པའི་མཆོག །སྲིད་པ་
གཏན་དུ་དངོས་གྲུབ་པོ། །དངོས་གྲུབ་དམ་ཚིག་སྡོམ་པ་འདི། །རིག་མ་རྟག་ཏུ་བསྲུང་བར་བྱ། །དམ་པའི་ཤེས་རབ་བསྟན་པ་ནི། །སངས་རྒྱས་ཀུན་དང་མཉམ་པར་གསུངས། །བྱང་ཆུབ་སེམས་ནི་སྤང་མི་བྱ། །གང་ཞིག་རྡོ་རྗེ་ཕྱག་རྒྱ་ཞེས། །དེ་ནི་བསྐྱེད་པ་ཙམ་གྱིས་ཀྱང་། །སངས་རྒྱས་
ཉིད་དུ་ཐེ་ཚོམ་མེད། །དམ་པའི་ཆོས་ནི་སྨད་མི་བྱ། །མ་རིག་པ་དང་གཏི་མུག་གིས། །དེ་ནི་བོར་བར་མི་བྱའོ། །རང་བདག་ཡོངས་སུ་སྤངས་པ་དང་། །དཀའ་ཐུབ་སྡུག་བསྔལ་གཟིར་མི་བྱ། །ཇི་ལྟར་བདེ་བ་འདི་བཟུང་ནས། །རྫོགས་སངས་རྒྱས་པ་འདི་ལས་འབྱུང་། །རྡོ་རྗེ་དྲིལ་བུའི་ཕྱག་
རྒྱ་རྣམས། །ནམ་ཡང་སྤང་བར་བྱར་མི་རུང་། །བླ་མ་སངས་རྒྱས་དང་མཉམ་ཕྱིར། །རྡོ་རྗེ་སློབ་དཔོན་སྨད་མི་བྱ། །དེ་ནི་སངས་རྒྱས་ཀུན་མཉམ་ཕྱིར། །སློབ་དཔོན་ལ་ནི་སྨོད་བྱེད་ན། །སངས་རྒྱས་ཐམས་ཅད་སྨད་པ་ཡིན། །དེས་ནི་རྟག་ཏུ་སྡུག་བསྔལ་ཐོབ། །རིམས་དང་འོར་དང་དུག་དང་ནད། །མཁའ་

འགྲོས་གཙེས་དང་བཟུང་བ་དང་། །བགེགས་དང་ཚོགས་བདག་དྲག་པོ་ཡིས། །བསད་ནས་དམྱལ་བར་འགྲོ་བར་འགྱུར། །དེ་བས་ནན་ཏན་ཐམས་ཅད་ཀྱིས། །མཆོག་གི་དགེ་བ་མངོན་འགྱུར་བའི། །རྡོ་རྗེ་སློབ་དཔོན་བླ་ཆེན་ལ། །ནམ་ཡང་བརྙས་པར་བྱར་མི་རུང་། །
གུས་པས་བླ་མ་ཡོན་དུ་ནི། །རྗེས་སུ་འཐད་པས་དབུལ་བར་བྱ། །དེས་ནི་རིམས་ནད་ལ་སོགས་པ། །ཕྱི་ནས་འབྱུང་བར་མི་འགྱུར་རོ། །རྟག་ཏུ་རང་གི་དམ་ཚིག་བསྒྲུབ། །རྟག་ཏུ་དེ་བཞིན་གཤེགས་པ་མཆོད། །རྟག་ཏུ་བླ་མ་ལ་ཡང་དབུལ། །སངས་རྒྱས་ཀུན་དང་དེ་མཉམ་ཕྱིར། །དེ་བྱིན་
སངས་རྒྱས་ཐམས་ཅད་ལ། །རྟག་ཏུ་བྱིན་པ་ཉིད་དུ་འགྱུར། །དེ་བྱིན་བསོད་ནམས་ཚོགས་ཡིན་པས། །ཚོགས་ལ་བྱང་ཆུབ་མཆོག་ཏུ་འགྱུར། །ཅི་ཕྱིར་ཤིན་ཏུ་འདིར་གནས་པས། །ཁྱེད་ཀྱི་ཚེ་འདི་འབྲས་བུར་བཅས། །དམ་ཚིག་ལྷ་དང་མཉམ་པ་རུ། །གནས་པར་ཐེ་ཚོམ་མེད་པའོ། །རྡོ་རྗེ་
དང་བཅས་སངས་རྒྱས་ཀྱིས། །དེ་རིང་ཁྱེད་རྣམས་དབང་བསྐུར་བས། །རྒྱལ་པོ་ཆེན་པོ་ཁམས་གསུམ་ན། །རྒྱལ་པོ་གཙོ་བོ་བརྟན་པར་འགྱུར། །དེ་རིང་བདུད་རྣམས་རྣམ་བཅོམ་ནས། །གཞལ་ཡས་ཁང་མཆོག་དུ་ཆུད་ཕྱིར། །སངས་རྒྱས་ཉིད་ཕྱིར་དེ་ཁོ་ནར། །ཁྱབ་བདག་གིས་ནི་
ཐེ་ཚོམ་མེད། །རབ་ཏུ་དང་བའི་ཡིད་ཀྱིས་ནི། །རྡོ་རྗེ་དེ་དག་ཀུན་མཛོད་ཅིག །ཟད་མེད་རང་གི་དམ་ཚིག་བདེ། །བདེ་བར་སེམས་བསྐྱེད་ལ་བསྙེན་ཅིང་། །མྱུར་བར་འགྲོ་བའི་བདེ་ཆུ་རུ། །རྡོ་རྗེ་སེམས་དཔའ་འདྲ་བ་ཡི། །མཉམ་པ་དེ་རུ་གྱུར་ནས་སུ། །ཁྱོད་རྣམས་དེ་ལ་འགྲོ་བར་ཤོག །
དབུགས་དབྱུང་བའོ། །དེ་ནས་སློབ་མས་ཕྱག་འཚལ་ཏེ། །བླ་མའི་ཞབས་ཀྱི་བཀའ་དྲིན་གྱིས། །སོགས་པའི་ཚིག་གིས་ཐམས་ཅད་ཀུན། །གནང་བའི་དབང་ནི་བླང་བར་བྱ། །ཇི་ལྟ་ཇི་ལྟར་འདུལ་འགྱུར་བ། །སེམས་ཅན་རང་བཞིན་དུ་འགྲོ་བགྱིས། །དེ་ལྟ་དེ་ལྟར་སེམས་ཅན་དོན། །འདོད་
ཆགས་ལ་སོགས་དག་པར་བྱ། །ཉིན་རེ་ཡི་ནི་མཚམས་གསུམ་ལ། །ཏིང་འཛིན་གསུམ་གྱི་སྦྱོར་ལྡན་ནི། །བསྒྲུབས་ནས་སྒྲུབ་པ་ཐུན་མོང་དང་། །ཅིག་ཤོས་དངོས་གྲུབ་བསྒྲུབ་པར་བྱ། །མི་སྣང་སྟོང་ནི་ཆུང་ངུ་ལ། །མངོན་ཤེས་ཉི་སྟོང་བར་མ་ལ། །རིག་འཛིན་དག་ནི་སྟོང་གསུམ་

ལ། །རྡོ་རྗེ་འཛིན་པ་འགྲོ་ཀུན་གཙོ། །ཞི་བ་རྒྱས་པ་སོགས་ལས་གང་། །དེ་ལས་གཞན་ནམ་གང་འདོད་ལ། །དཀྱིལ་འཁོར་ཀུན་དུ་ཆགས་སྦྱོར་ན། །བསྒྲུབ་པ་མྱུར་དུ་འགྲུབ་པར་འོང་། །རྡོ་རྗེ་བདག་པོ་ཐམས་ཅད་ཀྱིས། །འདོད་ཆགས་དེ་ཉིད་དོན་བསམས་ཏེ། །སེམས་ཅན་ཐམས་
ཅད་ཕན་བྱེད་པའི། །བྱང་ཆུབ་འདོད་ཆགས་ལས་སྐྱེས་མཛད། །དེ་བས་བྱང་ཆུབ་འདོད་བསྔགས་པས། །སྐུ་གསུང་ཐུགས་ནི་བསྒོམ་བྱས་ཏེ། །ཆོ་ག་བཞིན་དུ་ལས་བྱེད་ན། །དེ་ཀུན་རྟོགས་པར་འགྱུར་བ་ཡིན། །དེ་དག་བྱང་ཆུབ་ཐོབ་འདོད་ཀུན། །དགའ་བའི་སེམས་ཀྱིས་
ཐམས་ཅད་དབུལ། །གང་ཞིག་ཕོངས་པས་ཡིད་མི་བདེ། །དད་པའི་མཆོག་ལྡན་དེ་ཡིན་ནོ། །བཀའ་སྩལ་པའི་དབང་ངོ་། །དད་པ་མཆོག་ཏུ་གུས་ལྡན་པས། །བླ་མའི་ཞབས་ནི་སྤྱི་བོར་བླང་། །ཇི་ལྟར་རྗེ་བཙུན་བཀའ་སྩལ་ལྟར། །དེ་ལྟར་བྱ་ཞེས་སྤྱན་སྔར་གསོལ། །བཀྲ་
ཤིས་སྨོན་ལམ་དང་ལྡན་པར། །ཡང་དག་གནས་པར་གྱུར་ཅིག་བརྗོད། །སྣོད་རུང་བྱས་པའི་སློབ་མ་ལ། །བླ་མ་ཤིན་ཏུ་དགྱེས་པ་ན། །དེ་དག་ཀུན་ལས་གསང་བ་དང་། །རབ་གསང་ཤིན་ཏུ་གསང་བ་ཡི། །བསྒྲགས་མིན་མནའ་ཡིས་བཏབ་བྱས་ནས། །སོམ་ཉི་མེད་པར་བཤད་
པར་བྱ། །འབྱོར་ལྡན་སློབ་མ་ཀུན་ཚོགས་ནས། །སྦྱིན་སྲེག་གནས་སུ་གནས་བྱས་ནས། །བླ་མ་སློབ་མ་སྦྱོར་བར་ལྡན། །མར་ལ་སོགས་པ་རྒྱ་ཆེན་རྣམས། །སློབ་མས་གཡོན་པའི་མཐེ་བོང་ནི། །བླ་མའི་གཡས་པའི་མཐེ་བོང་དང་། །གུང་མོ་ཡིས་ནི་གཟུང་བྱས་ནས། །སྡིག་པ་
རྣམས་ནི་ཞི་བར་བྱ། །དེ་བཞིན་དེ་རུ་ས་བདག་དང་། །ཕྱོགས་སྐྱོང་རྒྱལ་པོ་ལ་སོགས་པ། །ཞི་བར་བྱ་ཕྱིར་བདུན་ནམ་ནི། །ཡང་ན་གསུམ་མམ་གཅིག་ཏུ་བྱའོ། །བདག་ཉིད་བཤད་དང་ཉན་པ་དང་། །བསམ་དང་བསྒོམ་དང་དངོས་གྲུབ་བསྒྲུབ། །ཐ་ན་འཇིག་རྟེན་ལས་གྲུབ་དང་། །ཁྱོད་ཀྱིས་
གྲོགས་ནི་མཛོད་ཅིག་ཅེས། །གསོལ་བ་བཏབ་ནས་གཤེགས་སུ་གསོལ། །སྔོན་བཞིན་མཆོད་པ་ཐམས་ཅད་དང་། །གླུ་གར་སིལ་སྙན་ལ་སོགས་དང་། །བཟའ་དང་བཏུང་བའི་མཆོག་རྣམས་ཀྱིས། །བདག་གཞན་འཁོར་ལོ་མཉེས་པར་བྱ། །དེ་ནས་པོག་སྣོད་ལག་ཐོགས་ཏེ། །

དྲིལ་བུ་གསིལ་ནས་པུས་མོ་བཙུགས། །ཡེ་ཤེས་འཁོར་ལོ་ཐམས་ཅད་ཀུན། །སྔགས་འདིས་གཤེགས་སུ་གསོལ་བའོ། །ཨོཾ་སེམས་ཅན་ཀུན་དོན་མཛད་ནས་སུ། །དངོས་གྲུབ་སྩལ་ཏེ་རིགས་པ་བཞིན། །སངས་རྒྱས་ཡུལ་དུ་གཤེགས་སུ་གསོལ། །
ཡང་ནི་འབྱོན་པར་མཛོད་ཅིག་མུཿ། །དེ་བཞིན་ཨོཾ་དང་ཨཱཿདང་ཧཱུྃ། །བརྗོད་པས་ཏིང་འཛིན་འཁོར་ལོ་རྣམས། །རྡོ་རྗེ་གསུམ་ལ་བསྡུ་བྱས་ནས། །དེ་ཡང་ནམ་མཁའ་ལྟ་བུར་མོས། །ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ། ཨཱདྱ་ནུ་ཏྤ་ནྣ་ཏྭཱཏ་ཨོཾ་ཨཱཿཧཱུྃ་སྭཱ་ཧཱ་ཞེས་བརྗོད་པས། གཟུགས་བརྙན་
སྟོང་པ་ཉིད་དམིགས་ལ། །སྣོད་གཙང་མ་རུ་བསྡུས་ནས་སུ། །འདོད་པ་ལ་ནི་ཉུང་ཤས་སྦྱིན། །ལྷག་མ་ཆུ་ཡི་སྐྱེ་བོ་སོགས། །ཕན་ཕྱིར་གདུགས་དང་རྒྱལ་མཚན་དང་། །འཕན་སོགས་སིལ་སྙན་རབ་ལྡན་པ། །དགེ་འདུན་ཚོགས་ཀྱིས་བཏེག་ནས་སུ། །ཆུ་བོ་ཆེན་པོར་བླུག་པར་བྱ། །
རྡོ་རྗེ་རྩེ་མོས་རི་མོ་དབྱི། །བུམ་པ་བླ་རེ་ལ་སོགས་པ། །སྤྱད་རུང་བླ་མས་བླང་བྱ་སྟེ། །ལྷག་མ་གོང་བཞིན་དོར་བར་བྱ། །དཀྱིལ་འཁོར་འདི་རུ་གཟུགས་བརྙན་དང་། །གླེགས་བམ་ལ་སོགས་རབ་གནས་ཀྱི། །ཆོ་ག་བྱ་བ་གཞན་དུ་བཤད། །མཁས་པ་རྣམས་ཀྱི་དེར་ཤེས་བྱ། །འདི་ནི་
དང་པོ་རྣལ་འབྱོར་པའི། །དཀྱིལ་འཁོར་ཆོ་ག་དང་པོར་གསུངས། །གཞན་དུ་ཁྱད་པར་མ་གཏོགས་པ། །ཆོ་ག་རྒྱས་པར་འདིར་ཤེས་བྱ། །ཅུང་ཟད་ཡེ་ཤེས་དབང་ཐོབ་པས། །འབེབས་པའི་ཆོ་གས་བྲི་བར་གསུངས། །ཁམས་གསུམ་སྐྱེ་བོས་སྨོན་འཛུགས་ཕྱིར། །རྣམ་པ་གཞན་དུ་
མི་བྱའོ། །རི་རྩེ་ཉམས་ནི་དགའ་བ་དང་། །ནགས་ཚལ་རབ་ཏུ་དབེན་པའམ། །མཆོད་རྟེན་ཀུན་དགའ་ར་བ་སོགས། །དགོན་པའི་གནས་སུ་སྤྱད་བྱའོ། །བུ་མོ་ལོ་གྲངས་བཅུ་གཉིས་མ། །དེ་བཞིན་བཅུ་གཉིས་ལོན་པའི་ཁྱེའུ། །ཆོ་རིགས་བཙུན་ཞིང་དྲང་པོར་སྐྱེས། །རྨ་སོགས་སྤངས་
དང་བཞིན་མཛེས་ཤིང་། །སོ་ཡི་ཐགས་བཟང་རབ་གཙང་བ། །སྐྲ་གནག་མིག་དཀྱུས་རིང་བ་དང་། །རང་བཞིན་དུལ་བ་རིག་པ་ཆེ། །བཟུང་ནས་དབབ་པར་རབ་ཏུ་བརྟག །དེ་ལ་གོང་དུ་སྨོས་པ་དང་། །སྣོད་རུང་སོགས་ཀྱིས་ཞུས་ནས་སུ། །དེ་རྣམས་དོན་དུ་ཚོགས་སྐྱེད་ཕྱིར། །རྣམ་པར་

དག་པའི་བཟླས་པ་བྱ། །དེ་བཞིན་ས་བཙལ་ལ་སོགས་ནས། །སྦྲན་པའི་ཆོ་གའི་བར་བྱས་ནས། །ལྷ་དང་བུམ་པ་སེམས་ཅན་རྣམས། །སྟ་གོན་དུ་ནི་གནས་པར་བྱ། །ཐིག་སྐུད་རྡུལ་ཚོན་བྱིན་བརླབས་ན། །གོང་གསུངས་སྣོད་ནི་ཁྲུས་བྱས་ཏེ། །གོས་དང་རྒྱན་གྱིས་རབ་བཀླུབས་ཏེ། །རི་སྐ་
ལ་སོགས་ཀྱིས་བདུག་བྱ། །དེ་ཡི་གནས་གསུམ་སྔ་མ་བཞིན། །དབང་ཆེན་ཆུ་དང་རླུང་དཀྱིལ་འཁོར། །ཡི་གེ་གསུམ་གྱི་བྱིན་བརླབས་ལ། །རྐང་མཐིལ་གཉིས་སུ་སྐུལ་བྱེད་པ། །རླུང་གིས་སྦར་བས་སྡིག་པ་བསྲེག །ཡེ་ཤེས་ཡང་དག་དབབ་པའི་ཕྱིར། །རིགས་གསུམ་བདག་
ཉིད་རྡོ་རྗེ་དྲིལ། །འཇིགས་རུང་གར་དང་བཅས་པ་ཡིས། །དེ་ཡི་སྙིང་ག་ཕྱེ་བྱས་ནས། །ཆུ་དང་མར་བཞིན་རོ་གཅིག་གྱུར། །གཟི་བྱིན་ལ་སོགས་ལྡན་གྱུར་ན། །བབས་པའི་རྟགས་ཀྱིས་ཤེས་པར་བྱ། །སྤྱན་དང་རྣམ་པར་སྣང་མཛད་ཞུགས། །ཁྲུ་གང་ཙམ་མམ་ཁྲུ་དོ་འམ། །ཁྲུ་ལྔ་
ཙམ་མམ་བརྒྱད་ཙམ་དུ། །འཇིགས་ཤིང་སྐྲག་ཚུལ་འབར་བར་འགྱུར། །སྣང་བ་མཐའ་ཡས་གོས་དཀར་ཞུགས། །ཕྲེང་བའི་སྔགས་དང་དབྱུང་བའི་སྔགས། །དེ་བཞིན་སྙིང་པོ་རིག་པ་སོགས། །མ་བསླབས་པར་ཡང་བརྗོད་པར་འགྱུར། །མི་བསྐྱོད་མཱ་མ་ཀཱི་བབས་པས། །འདས་
དང་མ་འོངས་དུས་དག་གི། །ཇི་ལྟར་བྱུང་འབྱུང་དངོས་པོ་རྣམས། །སྐད་ཅིག་གིས་ནི་ཡང་དག་སྟོན། །དེ་ནས་སྔགས་ཀྱིས་བསྟན་པར་བྱ། །དེ་གཉིས་བླ་མ་སློབ་མའི་ཚུལ། །ཐིག་འདེབས་དང་ནི་ཚོན་འགྱེད་དང་། །ཕྱག་རྒྱའམ་སྐུ་སོགས་འགོད་པར་བྱེད། །དེ་ནས་མདུན་དུ་འདུག་བྱས་
ནས། །ཇི་ལྟར་བགྱི་ཞེས་བཀའ་ནོད་བྱེད། །མཆོད་པ་སྣ་ཚོགས་རབ་བྱས་ལ། །ཡེ་ཤེས་ལྷ་ནི་གཤེགས་སུ་གསོལ། །སྣོད་གཉིས་ཟས་དང་སྐོམ་རྣམས་དང་། །ཡོན་གྱིས་མཉེས་པར་བྱས་ནས་སུ། །གྲངས་ལྷག་རུང་བར་བྱ་བ་སྟེ། །རང་གི་གནས་སུ་གཏང་བྱའོ། །དེ་ནས་འཁོར་ལོ་
གནས་བསམ་དང་། །མཆོད་དང་ཞུགས་དང་དབང་བསྐུར་བ། །བསྡུ་བ་དང་པོ་རྣལ་འབྱོར་བཞིན། །ཆོ་ག་རྒྱས་པར་བྱ་བའོ། །འདིའམ་གོང་དུ་སློབ་མའམ། །གཞན་དོན་རབ་ཏུ་བྱ་བའི་ཕྱིར། །བྲི་བའི་གསུང་གི་ཆོ་ག་ནི། །གཞན་དུ་བཤད་པས་དེར་ཤེས་བྱ། །འདི་ནི་ཅུང་ཟད་དབང་གྱུར་

པའི། །བྲི་བའི་ཆོ་ག་གསུངས་པའོ། །སྒྲུབ་པ་ལ་ཡང་རི་མོ་ནི། །ཚུལ་འདི་དང་ནི་མཚུངས་ཞེས་བྱ། །ཡེ་ཤེས་དབང་སྒྱུར་རྣལ་འབྱོར་པས། །སྒྱུ་མ་ལྟ་བུའི་ཏིང་འཛིན་གྱིས། །དཀྱིལ་འཁོར་རྒྱལ་མཆོག་ལས་རྒྱལ་མཆོག །རྫོགས་པའི་བསམ་གཏན་
གྱིས་བསྒྲུབ་བྱ། །བླ་མའི་མན་ངག་རབ་ཐོབ་ཅིང་། །སྦྱོར་ཤེས་དེ་དག་ལྷུར་ལེན་པ། །རྟགས་ཤེས་དང་པོ་ཕ་རོལ་ཕྱིན། །ཡུལ་ལ་ཞེན་པ་དང་བྲལ་བའི། །བདག་ཉིད་ཆེན་པོ་ཉག་གཅིག་དེས། །དེ་འདྲའི་ས་བཅུ་མགོན་པོ་ཆེ། །རང་གི་ནུས་པ་དང་ཕྲད་པ། །མཉེས་བྱ་དེ་ཡིས་ཡང་དག་
བླང་། །མེ་ཏོག་ལ་སོགས་མཆོད་པའི་ཚོགས། །ཕྱི་རོལ་ནང་དུ་བཅས་སྔོན་སོང་། །ཐལ་སྦྱར་པུས་མོ་བཙུགས་ནས་ནི། །བླ་ཆེན་དེ་ལ་གསོལ་བ་བཏབ། །འཇིག་རྟེན་སྒྲོན་མཆོག་རྣལ་འབྱོར་ཀུན་ལ་འཕགས། །ཁྱོད་ནི་སྐྱོན་རྣམས་དག་པའི་ཕ་རོལ་ཕྱིན། །སྲིད་པའི་མཚོ་ལས་
སེམས་ཅན་ཀུན་སྒྲོལ་བ། །དེད་དཔོན་ཆེན་པོ་ཁྱེད་ལ་སྐྱབས་སུ་མཆི། །བདག་ཅག་ཐབས་བྲལ་འཁོར་བར་འཁྱམས་གྱུར་ཏེ། །མ་རིག་མུན་པས་བསྒྲིབས་པས་དམུས་ལོང་གྱུར། །སྡུག་བསྔལ་གྱིས་གཟིར་ཡང་དག་དོན་མ་རྙེད། །བདག་ཉིད་ཆེན་པོ་ཁྱོད་ཀྱིས་བསྐྱབ་ཏུ་གསོལ། །
དེ་སྐད་གསོལ་ནས་དེ་ཡི་ཚེ། །བླ་མ་བདག་ཉིད་ཆེན་པོ་དེས། །སྙིང་རྗེ་ཆེན་པོ་རབ་བསྐྱེད་ནས། །ཚིག་འདིས་གནང་བ་སྦྱིན་པའོ། །བུ་ཚུར་ཤོག་ཅིག་བསམ་གཏན་གྱི། །འཁོར་ལོ་ཆེན་པོ་ང་ཡིས་བསྟན། །ཁྱོད་ཀྱིས་ཀྱང་ནི་མཉམ་ཞོག་ལ། །ང་ཡི་བཀོད་པ་ལྟ་བར་གྱིས། །དེ་སྐད་
གསོལ་ནས་བསམ་གཏན་གྱི། །དཀྱིལ་འཁོར་རིམ་པ་འདི་ཡིས་བསྒོམ། །ལྷུན་གྱིས་གྲུབ་པའི་སྦྱོར་བ་ནི། །སྐད་ཅིག་ཡེ་ཤེས་ཀྱིས་རྫོགས་པའོ། །སངས་རྒྱས་འཁོར་ལོ་སྦྱར་བ་ཡིས། །བསམ་གཏན་འཁོར་ལོ་རབ་རྫོགས་བྱ། །ཡེ་ཤེས་འཁོར་ལོ་བསམ་གཏན་གྱིས། །འཁོར་
ལོ་ཅན་ཀུན་མངོན་སུམ་ཞུགས། །གོང་གསུངས་མཆོད་པའི་ཆོ་ག་ནི། །བསམ་གཏན་ལྡན་པས་མཉེས་པར་བྱ། །དེ་ཉིད་བརྗོད་པས་འཁོར་ལོ་བསྐུལ། །ཞུགས་སོགས་གོང་བཞིན་རབ་བྱས་ཏེ། །ཡེ་ཤེས་དབབ་པ་སྔོན་འགྲོ་བའི། །མཐོང་བའི་ཡུལ་བཞིན་རྣམ་པར་གནས། །

ཡེ་ཤེས་ཀྱི་ནི་འཁོར་ལོ་ལ། །གཉིས་མེད་འཁོར་ལོ་གཞུག་པར་བྱ། །དེ་ནས་བྱིན་གྱིས་བརླབས་བརྗོད་ལ། །ས་བཅུའི་མགོན་པོའི་དཀྱིལ་འཁོར་ལ། །དངོས་གྲུབ་རྟགས་ནི་ཤེས་བྱའི་ཕྱིར། །མེ་ཏོག་འདོད་པར་བྱ་བ་སྟེ། །སྐུའམ་དབུས་སུ་ནུབ་གྱུར་ན། །ཕྱག་རྒྱ་ཆེན་པོ་བསྒྲུབ་
པར་བྱ། །ཞལ་གྱི་དཀྱིལ་འཁོར་ལ་བབས་ན། །སྔགས་ཀྱི་དངོས་གྲུབ་ཐོབ་པར་བཤད། །ལྟེ་བའི་དབུས་སུ་རབ་བབས་ན། །ཐུན་མོང་དངོས་གྲུབ་བརྒྱད་འགྲུབ་བོ། །སྐུ་སྨད་ཆ་ནི་གར་འབབ་ཀྱང་། །ཞི་སོགས་དངོས་གྲུབ་འབྱུང་བའོ། །རིང་ཞིང་ཐལ་བས་དངོས་གྲུབ་ཀྱང་། །ད་དུང་
རྒྱང་རིང་འགྱུར་བའོ། །ཕྱག་རྒྱ་ཆེན་པོ་ཇི་ལྟ་བཞིན། །བསྒྲུབ་པས་ཇི་བཞིན་དུས་ཐོབ་བོ། །ཡེ་ཤེས་བབས་པའི་མཐུ་ཉིད་ཀྱིས། །དམན་མཆོག་གསུམ་དང་རང་གི་ལས། །ཇི་སྐད་བཤད་བཞིན་གྱིས་རབ་ཐོབ། །དེ་ལས་གཞན་པ་ཇི་སྙེད་པ། །བླ་མའི་ཡེ་ཤེས་སྟོབས་ཀྱིས་ནི། །སྦྱར་
བ་ཡིས་ནི་རྙེད་པའོ། །དེ་ནས་མཁའ་དབྱིངས་ཐམས་ཅད་ཀུན། །སངས་རྒྱས་བྱང་ཆུབ་སེམས་དཔའ་དང་། །རིག་པའི་ལྷ་མོ་ཁྲོ་བོ་ཚོགས། །ཆུ་སོགས་རྐྱེན་བཟུང་གང་བར་བསམས། །དེ་དག་ཀུན་གྱིས་བུམ་པ་དང་། །གསང་དང་ཤེས་རབ་ཡེ་ཤེས་དང་། །བརྟུལ་ཞུགས་ལུང་
བསྟན་དབུགས་དབྱུང་དང་། །བཀའ་སྩལ་པ་རྣམས་རིམ་བཞིན་དབང་། །དེ་ཡིས་དེ་ཡི་བྱང་ཆུབ་ནི། །སྐུ་གསུང་ཐུགས་ཀྱི་བྱང་ཆུབ་ཆེ། །སེམས་ཅན་ཐམས་ཅད་ཕན་འདོད་པས། །ངོ་མཚར་ཆེན་པོ་རབ་ཏུ་གྲུབ། །བསམ་གཏན་དཀྱིལ་འཁོར་བསམ་གཏན་གྱིས། །མཆོད་དང་
དབང་བསྐུར་དེ་བཞིན་དུ། །བྱས་ནས་གཞན་ལ་འགའ་ཡི་དོན། །བསྒྲུབ་ཕྱིར་ལུང་འདི་བསྒོ་བའོ། །ང་ཡིས་ཁྱེད་ནི་དཀྱིལ་འཁོར་དུ། །བཅུག་ཟིན་དབང་བསྐུར་ཡང་ཟིན་གྱིས། །ཁྱོད་ཀྱིས་སློབ་དཔོན་སྒྲུབ་པོ་ལས། །འདོད་བཞིན་དུ་ནི་གྱིས་ཤིག་ཅེས། །གནང་ནས་བསྙེན་ལ་
སོགས་པ་ལ། །འཇུག་པར་གང་ཡིན་འགྱུར་བ་སྟེ། །དེ་ཡིས་ཀྱང་ནི་ཁྱོད་ཤེས་བྱ། །བསམ་གཏན་འཁོར་ལོས་སྦྱང་ཕྱིར་རོ། །གཉིས་པ་དེ་རུ་འཇུག་མི་ནུས། །མཐོང་བའི་ཡུལ་ལ་མངོན་ཞེན་ཞིང་། །བློ་གྲོས་ངན་ཞིང་སྦྱོར་བ་སྤངས། །དད་ལྡན་སྣོད་རུང་དེ་མཐོང་ནས། །དོན་རྣམས་

ཡལ་བར་མི་འདོར་ཕྱིར། །སྙིང་རྗེ་ཆེན་པོ་རབ་བསྐྱེད་ནས། །དག་སོགས་ཆོ་ག་སྔོན་འགྲོ་བའི། །ཕྱི་ཡི་བྱ་བ་བསྟེན་བྱ་སྟེ། །ཡེ་ཤེས་ཅུང་ཟད་དབང་གྱུར་ལྟར། །རི་མོའི་དཀྱིལ་འཁོར་བྲིས་ནས་ནི། །དབང་བསྐུར་ཡང་དག་བརྩམ་བྱ་སྟེ། །གཉིས་མེད་མན་
ངག་གིས་སྦྱང་བྱ། །དེ་བཞིན་སྐུ་སོགས་འཁོར་ལོ་ལ། །ཆོ་ག་སྔོན་བཞིན་རྒྱས་བྱ་སྟེ། ཀུན་ཁྱབ་ཆོས་ཀྱི་དབྱིངས་ཡེ་ཤེས། །ཐམས་ཅད་དེ་རུ་རྣམ་དག་པས། །བདེ་གཤེགས་གནས་སུ་མི་བསྐྱོད་དགོད། །གཞན་གྱི་གནས་སུ་གཞན་བཀོད་དེ། །གཉིས་ཤེས་རྡོ་རྗེ་མཚོན་ལ་སོགས། །
ཁྱད་པར་གཞན་ཡང་རྟོགས་པར་བྱ། །རྡོ་རྗེ་སློབ་དཔོན་སློབ་མ་སོགས། །གོང་དང་འོག་གི་ཆོ་ག་རྣམས། །སེམས་ཀྱི་འབའ་ཞིག་གཙོ་བོར་གསུངས། །དམན་པ་ལས་ནི་མཆོག་མི་འགྱུར། །སེམས་ཉིད་གླང་པོ་ཡན་ལྟ་བུ། །གཟུགས་ལ་སོགས་ལ་འཕྱན་བྱེད་པས། །ངན་འགྲོ་གཡང་
སར་ལྟུང་བར་འགྱུར། །དེ་ཉིད་རབ་ཏུ་རྟོགས་བྱས་ལ། །དྲན་པའི་ཐག་པ་དམ་པོ་ཡིས། །དམིགས་པའི་ཀ་བ་ལ་བཏགས་ཏེ། །འདོད་བཞིན་བ་ཡི་ཡུལ་སྤྱོད་པས། །ཇི་ལྟ་བཞིན་དུ་འདུས་པར་བྱ། །ཇི་སྐད་དུ། སེམས་ཅན་ཀུན་གྱི་སེམས་གང་ནི། །བརྟན་པའི་ཕྱིར་ན་སེམས་དཔར་
བརྗོད། །མཉམ་པར་གཞག་ན་ཏིང་འཛིན་ཏེ། །དེ་བསྟན་པ་ལས་རྡོ་རྗེར་འགྱུར། །སེམས་དཔའི་བྱིན་རླབས་སྦྱོར་བ་ལས། །སླར་ཡང་རྡོ་རྗེ་སེམས་དཔར་འགྱུར། །ཞེས་སོ། །བསོད་ནམས་ཚོགས་ཀྱི་ཡན་ལག་ཕྱིར། །བཅོམ་ལྡན་འདས་ཀྱིས་ལུས་ངག་གི། །བྱ་བ་བསྟན་ཏེ་དྲང་སྲོང་ལྟར། །
དང་པོ་རབ་ཏུ་འདྲིད་པའོ། །ཁང་སྐས་ཡན་ལག་དང་པོ་བཞིན། །སྟེང་ཕྱིན་མ་ཡིན་དགོས་མེད་མིན། །དེ་ཡི་རྟེན་གྱིས་དེ་བཟུང་སྟེ། །དེ་ཉིད་འབའ་ཞིག་རྟོགས་པར་བྱ། །དེ་བས་སེམས་ལ་ཁྱད་པར་འབྱུང་། །ལོངས་སྤྱོད་རྫོགས་དང་སྤྲུལ་པའི་སྐུ། །དེ་ཡི་ཞིང་ཁམས་ཡོངས་དག་པ། །སེམས་ཉིད་
འབའ་ཞིག་ལས་འབྱུང་སྟེ། །མཚམས་ཀྱི་རྣམ་ཤེས་ཇི་ལྟ་དང་། །ཀླུ་ཁྲོས་པ་ཡི་སེམས་བཞིན་དུ། །མི་མཐུན་ལྟར་ཡང་སྣང་བ་སྟེ། །དེ་བས་སེམས་ཉིད་རྟོགས་པར་བྱ། །རྣལ་འབྱོར་པ་རྣམ་པ་གསུམ་གྱིས་སློབ་མ་རྣམས་དབང་བསྐུར་བའི་ཆོ་ག་རྒྱས་པར་བཤད་ཟིན་ཏོ།། །།ད་ནི་དངོས་

གྲུབ་སྒྲུབ་པའི་ཐབས་ཀྱི་ཆོ་ག་བཤད་པར་བྱའོ། །དེ་ལ་སྒྲུབ་པ་པོའི་གང་ཟག་ནི། །བརྟུལ་ཞུགས་སྡོམ་པ་སྔགས་ལྡན་པ། །མི་བརྟན་ལྷ་ཡི་ང་རྒྱལ་བྲལ། །ཅུང་ཟད་ཡེ་ཤེས་དབང་གྱུར་པ། །ཐུན་མོང་སྒྲུབ་པ་ཤེས་པར་བྱ། །རྒྱུ་དང་མི་རྒྱུར་བཅས་པ་རྣམས། །སྒྱུ་འདྲར་སེམས་ཅན་
དབྱེར་མེད་རྟོགས། །ཐུན་མོང་ཅིག་ཤོས་དངོས་གྲུབ་ཀྱི། །སྒྲུབ་པར་ཡེ་ཤེས་དབང་གྱུར་པའོ། །དེ་ཡི་ཡིད་དང་མཐུན་པའི་གནས། །ཤིན་ཏུ་དབེན་པའི་རི་དགོན་དང་། །རྣམ་པ་སྣ་ཚོགས་རི་བོ་དང་། །ཀླུང་དང་འབབ་ཆུ་རྣམས་དང་ནི། །དུར་གྱི་ཁྲོད་ལ་སོགས་པར་ཡང་། །བསམ་གཏན་
བསྡུས་པ་འདི་བསྒོམ་མོ། །དགོན་པ་ཆེན་པོའི་ས་ཕྱོགས་ནི། །མེ་ཏོག་འབྲས་བུ་སོགས་ཀྱིས་བརྒྱན། །རི་བོ་དབེན་པ་དག་ཏུ་ནི། །དངོས་གྲུབ་ཐམས་ཅད་བསྡུས་པས་འགྲུབ། །ལམ་གྱི་བཞི་མདོ་ཤིང་གཅིག་དྲུང་། །མཚན་མ་གཅིག་དང་ཞི་གནས་སུ། །རྡོ་རྗེ་དགུག་པའི་ཁྱད་པར་
གྱིས། །སྒྲུབ་པ་པོས་ནི་རྟག་ཏུ་བསྒྲུབ། །དགོན་པ་ཆེན་པོའི་ས་ཕྱོགས་སམ། །རབ་ཏུ་རྣམ་པར་དབེན་པའམ། །རི་བོ་ནགས་འདབ་ཆུ་ངོགས་སུ། །ཏིང་འཛིན་བྱས་ནས་ཏིང་འཛིན་འཐོབ། །རྡོ་རྗེ་འགུག་གནས་མིག་སྨན་དང་། །ཀ་པཱ་ལ་རུ་བསྒོམ་པར་བྱ། །ཡིད་དུ་འོང་དང་ཤིས་པའི་གནས། །
སྒྲུབ་པ་པོ་ཡིས་རབ་ངེས་བྱ། །རྗེས་སུ་མཐུན་པའི་ཤིས་པའི་ཟས། །ཉི་མ་དང་ནི་ཟླ་བ་དང་། །ཆུ་དང་ཤེལ་དང་སྨན་དང་དྲི། །ཕྱག་རྒྱ་ཆེན་པོ་རིག་འཛིན་གྱིས། །ལམ་ལ་མཁས་པ་རྣམས་ཀྱིས་སྔགས། །གླང་ཆེན་ཤ་ཡིས་མངོན་ཤེས་བསྒྲུབ། །རྟ་ཡི་ཤ་ཡིས་མི་སྣང་བསྒྲུབ། །འགུགས་པ་
བ་ལང་ཤ་ཡིས་བསྒྲུབ། །ཁྱི་ཤ་ཡིས་ནི་ཐམས་ཅད་བསྒྲུབ། །ནུས་པ་ཡིས་ནི་དགུག་པར་བྱ། །མེད་ན་བསམ་པས་རྣམ་པར་བརྟག། །ངོ་བོ་ཉིད་དང་མཐུན་དག་དང་། །རང་བཞིན་གྱིས་ནི་དེ་འགྲུབ་པའོ། །དེ་ལྟར་བྱས་ན་སངས་རྒྱས་དང་། །བྱང་ཆུབ་སེམས་དཔའ་གྲགས་ཆེན་མཉེས། འདོད་
ཁམས་འཇིག་རྟེན་དབང་ཕྱུག་གི། །ལས་ཀྱི་གོ་འཕང་ཐོབ་པར་འགྱུར། །གཙོ་བོ་གཟི་ཆེན་སྟོབས་དང་ལྡན། །མདངས་བཟང་མཐོང་ན་ཡིད་དུ་འོང་། །མཐོང་བས་བསྐུལ་བ་མ་བྱས་ཀྱང་། །འཇིག་རྟེན་འདི་དག་དབང་དུ་འགྱུར། །འདི་ནི་སངས་རྒྱས་ཐམས་ཅད་ཀྱི། །གསང་བ་དམ་པ་བྱང་ཆུབ་སྟེ། །

ཡང་དག་སྔགས་ཀྱི་གསང་བ་འདི། །རྨོངས་པའི་མན་ངག་སེམས་འདའོ། །མི་སྣང་སྟོབས་དང་བརྩོན་འགྲུས་དང་། །དམ་ཚིག་ཆེན་པོ་བསྒྲུབ་པ་དང་། །རྡོ་རྗེ་འགུགས་པ་མཆོག་དག་ཀྱང་། །དམ་ཚིག་འདི་ཡིས་རྣམ་པར་གྲུབ། །གྲུབ་པ་ཡི་ནི་མཚན་མ་ནི། །ཤིན་ཏུ་
འབེབས་པ་ཐོབ་པ་ཡིས། །གདོན་མི་ཟ་བར་འགྲུབ་འགྱུར་ཏེ། །བསོད་ནམས་ཚོགས་ཀྱི་ཡན་ལག་རྫོགས། །སྤྱི་ཡི་མཚན་མར་ཤེས་པར་བྱ། །བཟླས་དང་བསྒོམ་དང་རང་ལྷ་ཡི། །ཁྱད་པར་གང་ཡིན་རྟོགས་པར་མཛད། །རྨི་ལམ་བྱེ་བྲག་རབ་བྱེད་པས། །སོ་སོའི་མཚན་མ་ཤེས་པར་བྱ། །
བསམ་གཏན་ངག་གི་བཟླས་པ་ཡིས། །དུས་སམ་བྱིན་རླབས་རབ་སྡུད་དུ། །འདོད་པས་རྙེད་པའི་མཚན་མ་ནི། །རྨི་ལམ་དུ་ནི་ཤེས་པར་བྱ། །རྨི་ལམ་ན་སངས་རྒྱས་དང་བྱང་ཆུབ་སེམས་དཔའི་གཟུགས་ཐ་དད་པར་མཐོང་བ་དང་། རྨི་ལམ་ན་བདག་ཉིད་ཡེ་ཤེས་མཆོག་ཐོབ་ནས་སངས་
རྒྱས་ཐམས་ཅད་དང་མཐུ་མཉམ་པར་མཐོང་བ་དང་། རྨི་ལམ་ན་མཚན་དང་དཔེ་བྱད་དུ་ལྡན་པའི་ལོངས་སྤྱོད་རྫོགས་པའི་སྐུ་རྒྱུད་དག་པ་ལ་སྣང་བར་བདག་ཉིད་མཐོང་བ་དང་། རྨི་ལམ་ན་བརྒྱ་བྱིན་དང་ཚངས་པ་དང་དྲག་པ་སོགས་པས་བདག་ཉིད་ལ་མེ་ཏོག་ལ་སོགས་པས་མཆོད་པར་མཐོང་བ་དང་།
རྨི་ལམ་ན་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་ཕྱི་ནང་གི་འདོད་པའི་ཡོན་ཏན་ལྔས་བདག་ལ་མཆོད་པར་མཐོང་བ་དང་། རྨི་ལམ་ན་བདག་ཉིད་རྡོ་རྗེ་འཆང་བའམ། རྟག་པ་ལ་སོགས་པའི་གཟུགས་སུ་མཐོང་བ་དང་། རྨི་ལམ་ན་རྡོ་རྗེ་གསུམ་མམ་སྤྱན་མ་ལ་སོགས་
པའམ། ཕྱོགས་བཅུའི་སངས་རྒྱས་ཐམས་ཅད་ཀྱིས་བདག་ལ་བཏུད་ཅིང་ཕྱག་འཚལ་བར་མཐོང་བ་དང་། རྨི་ལམ་ན་མངོན་དགའ་ལ་སོགས་པའི་ཞིང་དུ་མི་བསྐྱོད་པ་ལ་སོགས་པ་མཐོང་བ་དང་། དེ་དག་ཀྱང་ཐུགས་རབ་ཏུ་དགྱེས་ནས་ཆོས་ཀྱི་མཛོད་ཆེན་པོ་གཏད་པར་མཐོང་བ་དང་། རྨི་
ལམ་ན་བདག་ཉིད་ཤཱཀྱ་ཐུབ་པ་ལ་སོགས་པའི་གཟུགས་ལྷ་དང་ཀླུ་དང་གནོད་སྦྱིན་ལ་སོགས་པས་བསྐོར་ཞིང་ཆོས་བཤད་པར་མཐོང་བ་དང་། རྨི་ལམ་ན་བདག་ཉིད་ལ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་ནམ་མཁའ་ལ་གདུགས་དཀར་པོ་བཏེག་ཅིང་། སེང་གེའི་ཁྲི་ལ་

བཞག་ནས་ཆོས་ཀྱི་རྒྱལ་པོར་དབང་བསྐུར་བར་མཐོང་བ་དང་། རྨི་ལམ་ན་གདོལ་བའི་བུ་མོའམ། ཁྱིའམ། རྟ་རྒོད་མ་ལ་སོགས་པའམ། སྙོམས་པར་འཇུག་པ་དེ་དག་ཕྱག་རྒྱ་ཆེན་པོ་གྲུབ་པའི་མཚན་མའོ། །གཞན་ཡང་རྨི་ལམ་ན་ཁ་དོག་སྣ་ཚོགས་པའི་ཀུན་དགའ་ར་བ་དང་སྐྱེད་མོས་
ཚལ་ཡིད་དུ་འོང་བ་མཐོང་བ་དང་། རྨི་ལམ་ན་ལྷའི་བུ་མོ་གདུ་བུ་དང་། དཔུང་རྒྱན་དང་། སྙན་ཆ་དང་། མགུར་ཆུ་དང་། ནུ་འབུར་དང་། ཟུར་ཕུད་ལ་སོགས་པས་བརྒྱན་པ་དང་། མིའི་ཁྱེའུ་དང་བུ་མོ་ཡིད་དུ་འོང་བ་བཅུ་དྲུག་པ་རྒྱན་ཐམས་ཅད་ཀྱིས་བརྒྱན་པ་མཐོང་བ་ནི་ཐུན་མོང་གི་འགྲུབ་པའི་
མཚན་མའོ། །རིགས་འཛིན་ལ་སོགས་ཡོངས་སྨིན་ལས། །འཛམ་བུ་གསེར་འདྲའི་སངས་རྒྱས་འགྱུར། །དེ་བས་དེ་དག་ཐམས་ཅད་ཀུན། །ཅིག་ཤོས་མཚན་མར་ཤེས་པར་བྱ། །སྔོན་དུ་བྱ་བའི་ལས་ཀྱི་རྒྱལ་པོ་མཆོག་ནི། སྔགས་པ་རྣམ་པར་དག་པ་ཡིས། །དེ་དག་རབ་ཏུ་རྟོགས་
བྱས་ནས། །སྔོན་གྱི་ཕྱིར་ན་གཉིས་ཀྱིས་ཀྱང་། །ཅི་རིགས་གསང་སྔགས་བཟླས་བརྗོད་བྱ། །དབེན་པར་གཙང་གཏོར་བྱས་ནས་སུ། །བགེགས་བསྐྲད་ས་ལ་གསོལ་བ་བཏབ། །ཅིག་ཤོས་ལ་ཡང་གསོལ་བྱས་ནས། །བཀའ་སྩལ་ས་ནི་བརྐོ་བར་བྱ། །སྔོན་གྱི་རིམ་པ་ཤེས་བྱས་
ལ། །ས་སྟེངས་རྒྱན་དང་ལྡན་པ་དང་། །དག་བྱའི་ཕྱིར་ན་གོང་བཞིན་དུ། །དབང་བསྐུར་བླང་བས་ཡིད་སྦྱང་བྱ། །རྡོ་རྗེས་ཁྱད་པར་བྱས་པ་ཡིས། །ས་འཛིན་ལྟ་བུར་བྱིན་བརླབས་ལ། །བདག་ཉིད་ཏིང་འཛིན་གསུམ་གནས་པས། །དེ་དབུས་ང་རྒྱལ་གསུམ་ལྡན་བྱ། །སྔོན་བཞིན་རྟག་སོགས་
གསོལ་བཏབ་ནས། །བྱིན་བརླབས་སྟངས་ཐབས་བརྩམ་པའོ། །ཕུར་བུས་བཏབ་ནས་ས་སྲུང་སྟེ། །ནུབ་གཅིག་སྟ་གོན་གནས་པར་བྱ། །ལྷ་རྣམས་གནས་པར་བྱས་ནས་སུ། །བྲོད་བསྐྱེད་མཆོད་པ་སྣ་ཚོགས་བརྩམ། །དགོངས་པར་བྱ་ཕྱིར་གོང་མ་བཞིན། །འཁོར་ལོ་གསོལ་
བ་གདབ་པར་བྱ། །ལྷ་མོ་བཞི་དང་མི་བསྐྱོད་པ། །བདུད་རྩི་འཁྱིལ་པའི་བུམ་པ་ནི། །རྫས་དང་ལྡན་པར་སྟ་གོན་བྱ། །ཡོད་ན་བཅུ་དགུ་ངེས་པའོ། །སྐུད་པ་ཚོན་རྩི་འདུས་བྱས་ལ། །སྔོན་བཞིན་འབེབས་པའི་ཆོ་ག་བྱ། །དེ་ཡིས་ཐིག་དང་ཚོན་བཏབ་ནས། །ཞལ་སོགས་ལྡན་པའི་

ཕྱག་རྒྱ་དགོད། །གཞན་ལ་མ་ཐོས་སེམས་ཅན་རྣམས། །གཟུང་བར་བྱ་ཕྱིར་སྔོན་བཞིན་བཤད། །གནས་རྣམས་སྟོང་བ་མི་མཛེས་པས། །དང་ཆུང་སྲིད་པས་དེ་མ་བསྔགས། །མི་རྣམས་ཀྱིས་ནི་ཕྱེ་མ་ཡིས། །ཞལ་ལ་སོགས་པ་རྫོགས་མི་འགྱུ། །ཡན་
ལག་མ་རྫོགས་བྱིན་མི་རློབ། །དེ་བས་ལྷ་ཡི་མཛེས་པ་བསྔགས། །རང་གི་ཕྱག་རྒྱའམ་སེམས་ཀྱིས་སུ། །ལྷ་རྣམས་རབ་ཏུ་གནས་བྱས་ནས། །བྱིན་རླབས་སྔོན་དུ་མཆོད་པ་སོགས། །བརྩམས་ཏེ་འབྱུང་གཏོར་ཁྱད་པར་དུ། །རྣམ་རྒྱལ་སྤྱོར་བས་སྐྱོན་བསལ་ནས། །ཚིམ་པར་
བྱ་ཕྱིར་ལྷ་རྣམས་ལ། །ཇི་སྲིད་རྫས་ཀྱི་ཐབ་རྣམས་སུ། །སྦྱིན་སྲེག་གིས་ནི་མཉེས་བྱའོ། །སློབ་མ་གཞུག་པའི་རིམ་པ་བཞིན། །བདག་ཉིད་འཁོར་ལོར་ཞུགས་པར་བྱ། །སྡིག་བཤགས་མེ་ཏོག་འདོར་བའི་བར། །བྱས་ནས་ལྷ་རྣམས་ཀྱིས་གནང་བའི། །སྔོན་བཞིན་བུམ་པ་གསང་བ་
དང་། །ཤེས་རབ་ཡེ་ཤེས་བརྟུལ་ཞུགས་དང་། །ལུང་བསྟན་དབུགས་དབྱུང་བཀའ་སྩལ་ཐོབ། །དེ་ཡིས་བསྒྲུབ་པ་བརྩམ་པའོ། །སྒྲུབ་པའི་ཐབས་གང་ཞེ་ན། དང་པོ་དེ་བཞིན་གཤེགས་པ་ཡི། །རིག་འཛིན་སྒྲུབ་ཐབས་བཤད་པར་བྱའོ། །ཇི་བཞིན་བྱས་པའི་སྔགས་པ་ཡིས། །ཐུན་
མོང་ཅིག་ཤོས་བགེགས་བསལ་ནས། །སྤྱི་གཟུགས་གྱུར་ནས་རྟག་པ་ལས། །བྱུང་བའི་གཞལ་ཡས་ཁང་པ་བསྒོམ། །ལྔ་དང་བཞི་ལས་མཆོག་དང་པོ། །རབ་བསྐྱེད་སྐྱེ་རིམ་བཞི་སྤངས་ནས། །དྲི་ཟ་རབ་ཏུ་ཞུགས་བྱས་པས། །དེ་ནི་ཆོ་ག་བཞིན་དུ་ཞུ། །རང་གི་ཚངས་པའི་སྤྱོད་པ་བཞི། །
མཱ་མ་ཀཱི་ལ་སོགས་གྱུར་ནས། །བསྐུལ་ཏེ་ཐིམ་གྱུར་ས་བོན་གྱུར། །ཕྱག་མཚན་དེས་མཚན་བཤེས་གཉེན་ཞུགས། །དེ་ལས་རྟག་པ་སྔོན་བཞིན་བསྐྱེད། །དེ་ཡི་ཐུགས་ཀར་ཟླ་བ་ལ། །ཨོཾ་ལས་འཁོར་ལོ་ཨོཾ་གྱིས་མཚན། །བསམས་ནས་སྔགས་ཀྱིས་བྱིན་གྱིས་བརླབ། །ཨོཾ་དྷརྨ་དྷཱ་ཏུ་
སྭ་བྷཱ་ཝ་ཨཱཏྨ་ཀོ྅ཧཾ། གཉིས་སོགས་མ་གཏོགས་དེ་ཕྱག་རྒྱས། །གནས་ནས་སྔགས་འདི་བསྒོམ་པར་བྱ། །ཨོཾ་ཨཱཿཨོཾ་ཛི་ན་ཛི་ག་ཧཱུྃ། བརྗོད་པས་ཨོཾ་ལས་འོད་ཟེར་ཚོགས། །དཀར་བའི་རྒྱུན་གྱིས་ནང་གསལ་ཏེ། །བ་སྤུའི་བུ་ག་ནས་སྤྲོས་པའི། །འོད་རྩེ་རྟག་པའི་ཚོགས་རྣམས་

ཀྱིས། །ནམ་མཁའི་ཁམས་ཀུན་བཀང་བྱས་ནས། །སངས་རྒྱས་རྟག་པ་སྤྱན་དྲངས་ནས། །རང་གི་བ་སྤུའི་བུ་གར་གཟུད། །བརྟན་པའི་ངོ་བོས་ཕྱག་བྱས་ནས། །ཡང་ནས་ཡང་དུ་དུས་བཞིར་བསྒོམ། །དེ་ནས་ཞག་བདུན་ལ་སོགས་ནས། །ཉེ་བའི་མཚན་མ་མཐོང་ནས་ནི། །འབྱུང་
པོ་རྣམས་ལ་གཏོར་བྱིན་ནས། །ཡང་ནི་སྦྱིན་པ་དེར་ཞེན་བྱ། །འདི་ལྟ་བུ་ཡི་སྦྱོར་ལྡན་པས། །རྡོ་རྗེའི་སྐུ་ནི་རྒྱ་མཚོ་དག །ཟླ་བ་ཕྱེད་ན་ངེས་པ་རུ། །ཐེ་ཚོམ་མེད་པར་འགྲུབ་པར་འགྱུར། །ཡེ་ཤེས་ལྔ་ལྡན་བསྟེན་ནས་ནི། །རྣམ་པར་སྣང་མཛད་དང་འདྲ་བའི། །སངས་རྒྱས་སྐུ་ནི་འབར་
བའི་འོད། །རྡོ་རྗེ་བསྐལ་པ་གསུམ་དུ་གནས། །ཐམས་ཅད་སྔོན་བཞིན་རབ་བྱས་ཏེ། །འོད་དཔག་མེད་བསྒོམས་མགྲིན་པ་རུ། །ཨཱཿལས་པདྨ་ཨཱཿཡིས་མཚན། །བསམས་ནས་བཟླས་བརྗོད་ཡང་བྱའོ། །ཨོཾ་ཨཱཿཨཱ་རོ་ལྀཀ་ཧཱུྃ། །དེ་ཡིས་སྔོན་བཞིན་འོད་དཔག་མེད། །སྤྲོས་ཏེ་བཀུག་
ནས་རང་ལ་བཙུད། །བརྟན་བྱས་སྔོན་བཞིན་རབ་བསྒྲུབས་ནས། །ཟླ་བ་ཕྱེད་ན་འགྲུབ་པར་ངེས། །ཡེ་ཤེས་ལྔ་དང་ལྡན་པ་ཡིས། །རྡོ་རྗེ་ཆོས་ནི་བསྟེན་བྱས་ནས། །དེ་དང་འདྲ་བའི་འོད་ཐོབ་སྟེ། །རྡོ་རྗེ་བསྐལ་པ་གསུམ་དུ་གནས། །སྔོན་བཞིན་མི་བསྐྱོད་རབ་བསྐྱེད་དེ། །ཐུགས་ཀར་ཧཱུྃ་
ལས་རྡོ་རྗེ་ལ། །ཧཱུྃ་གིས་མཚན་པ་རབ་བསམས་ལ། །སྔགས་ཀྱི་བཟླས་བརྗོད་བྱ་བའོ། །ཨོཾ་ཨཱཿཧཱུྃ་བཛྲ་དྷྲྀཀ་ཧཱུྃ། སངས་རྒྱས་མི་བསྐྱོད་ཚོགས་རྣམས་ཀྱང་། །བཙུད་ནས་ཆགས་པར་བྱས་ནས་སུ། །སྔོན་བཞིན་ཉེ་མཚན་མཐོང་བསྒྲུབས་ནས། །ཟླ་ཕྱེད་འགྲུབ་པར་ཐེ་ཚོམ་མེད། །ཡེ་
ཤེས་ལྔ་ལྡན་བསྟེན་ན་ནི། །སྟོན་པ་རྡོ་རྗེ་ཐུགས་འདྲ་བ། །ཡེ་ཤེས་ཡོན་ཏན་རྒྱ་མཚོར་འགྱུར། །རྡོ་རྗེ་བསྐལ་པ་གསུམ་དུ་གནས། །ཐམས་ཅད་སྔོན་བཞིན་རབ་གནས་ཏེ། །མི་བསྐྱོད་ཆོ་ག་བཞིན་བསྐྱེད་ནས། །ཐུགས་ཀར་རྡོ་རྗེ་བུམ་པ་རུ། །ཨོཾ་བསམས་བཟླས་བརྗོད་བྱ་བའོ། །ཨོཾ་
དྷརྨ་དྷཱ་ཏུ་ཛྙཱ་ན་རསྟུ་ཧཱུྃ། མི་བསྐྱོད་ཚོགས་བཀུག་སྔོན་བཞིན་དུ། །ཞུགས་ནས་ཆགས་བྱས་ཉེ་བར་མཐོང་། །གཏོར་མ་བཏང་ནས་རབ་བསྒྲུབས་ནས། །ཟླ་ཕྱེད་མི་བསྐྱོད་འདྲ་བ་ཐོབ། །མི་བསྐྱོད་པ་ཡི་སྐུ་དག་དང་། །གསུང་དང་ཐུགས་མཆོག་འདྲ་བ་འཛིན། །འཇིག་རྟེན་ཁམས་རྣམས་

ཐམས་ཅད་དུ། །མི་བསྐྱོད་རྡོ་རྗེ་མཆོད་པར་འགྱུར། །རིན་ཆེན་འབྱུང་ལྡན་སྔོན་བཞིན་བསྐྱེད། །ཐུགས་ཀར་མཚན་མ་ལ་གནས་པའི། །ཨོཾ་བཟླས་པ་ཡིས་འགྲུབ་པའོ། །དེ་དང་འདྲ་བར་བསྒྲུབ་པར་བྱ། །ཨོཾ་ཨཱཿཨོཾ་ས་མནྟ་ཛྙཱ་ན་རསྟུ་ཧཱུྃ། དེ་ཡིས་རིན་ཆེན་འབྱུང་
ལྡན་ཚོགས། །སྤྲོས་པ་བཀུག་ནས་རབ་ཏུ་བཙུད། །བརྟན་བྱས་གོང་བཞིན་རབ་བསྒྲུབས་ནས། །ཟླ་བ་ཕྱེད་ན་རབ་ཏུ་འགྲུབ། །ལུས་དང་ངག་སེམས་རྡོ་རྗེ་ཡི། །རིན་ཆེན་འབྱུང་བའི་འོད་དང་འདྲ། །དེ་ནི་བྱང་ཆུབ་བདག་མེད་དང་། །ཡེ་ཤེས་གསང་བའི་གནས་སུ་འགྱུར། །འོད་དཔག་
མེད་པ་བསྒོམ་བྱས་ལ། །དེ་ཡི་ཐུགས་ཀར་པདྨ་ལ། །གནས་པའི་ཨོཾ་ནི་བཟླས་བྱས་པས། །དཔག་མེད་འདྲ་བ་བསྒྲུབ་པར་བྱ། །ཨོཾ་ཨཱཿཨོཾ་པྲ་ཏྱ་བེཀྵ་ཎ་ཛྙཱ་ན་རསྟུ་ཧཱུྃ། འོད་དཔག་མེད་པའི་ཚོགས་སྤྲོས་པས། །བཀུག་ནས་བརྟན་བྱས་ཆགས་བྱས་ནས། །གོང་མ་བཞིན་དུ་རབ་བསྒྲུབས་ནས། །
ཟླ་བ་ཕྱེད་ན་འགྲུབ་པར་ངེས། །སྐུ་དང་གསུང་ཐུགས་རྡོ་རྗེ་ཡི། །དཔག་མེད་པ་ཡི་འོད་དང་འདྲ། །འདི་ནི་སེམས་ཅན་ཐམས་ཅད་ཀྱི། །ཐེག་ཆེན་ལམ་གྱི་མཆོག་ཏུ་འགྱུར། །སྔོན་བཞིན་དོན་ཡོད་གྲུབ་བསྒོམས་ལ། །ཐུགས་ཀར་རལ་གྲིའི་ཡུ་བ་ལ། །ཟླ་བའི་དབུས་སུ་ཨོཾ་བསམས་ལ། །
སྔགས་ཀྱི་བཟླས་བརྗོད་བརྩམ་པའོ། །ཨོཾ་ཨཱཿཨོཾ་ཀྲི་ཏ་ཨ་ནུཥྛ་ན་ཛྙཱ་ན་རསྟུ་ཧཱུྃ། དེ་ཡིས་དོན་ཡོད་གྲུབ་པའི་ཚོགས། །སྤྲོས་ཏེ་བཀུག་བྱས་ཞུགས་བྱས་ལ། །གནས་བརྟན་ངོ་བོར་ཆགས་བྱས་ན། །ཟླ་བ་ཕྱེད་ན་དེ་དག་འགྲུབ། །སྐུ་དང་གསུང་ཐུགས་རྡོ་རྗེ་ཡི། །རྡོ་རྗེ་ཐོགས་མེད་འདྲ་བ་འོང་། །དེ་ནི་
དཔལ་ལྡན་ཡེ་ཤེས་མཚོ། །སེམས་ཅན་དོན་ཀུན་འབྱུང་བར་འགྱུར། །དེ་བཞིན་སྣང་མཛད་བསྒོམ་བྱས་ཏེ། །སྔགས་ཀྱི་བཟླས་བརྗོད་བྱ་བའོ། །ཨོཾ་ཨཱཿཨོཾ་ཨཱ་དཪྴ་ཛྙཱ་ན་བཛྲ་རསྟུ་ཧཱུྃ། སྔོན་བཞིན་ཞུགས་སོགས་རབ་བྱས་ནས། །ཟླ་ཕྱེད་དེ་དང་འདྲ་བར་འགྲུབ། །ཐམས་ཅད་སྔ་མ་བཞིན་
བྱས་ཏེ། །སྣང་མཛད་མགོ་མགྲིན་ཐུགས་ཀ་རུ། །འཁོར་ལོ་པདྨ་རྡོ་རྗེ་ལ། །ཟླ་བའི་དབུས་ནས་ཨོཾ་གསུམ་གནས། །ཨོཾ་ཨཱཿཨོཾ་ཨོཾ་ཨོཾ་ཏྲི་ག་ཀ་ར་ཡ་རསྟུ་ཧཱུྃ། དེ་ཡིས་རྡོ་རྗེ་གསུམ་གྱི་ཚོགས། །བཀུག་ནས་གནས་གསུམ་དུ་བརྟན་པར། །བྱས་ནས་ཉེ་བའི་མཚན་མ་མཐོང་། །གོང་བཞིན་

བྱས་ན་ཟླ་ཕྱེད་འགྲུབ། །སྐུ་དང་གསུང་ཐུགས་རྡོ་རྗེ་ཡི། །སངས་རྒྱས་སྣང་མཛད་འདྲ་བའི་མདོག །དེ་ནི་བྱང་ཆུབ་ཡེ་ཤེས་དང་། །སྐུ་གསུམ་ཡེ་ཤེས་འགྲུབ་པར་འགྱུར། །དེ་ཡི་རིམ་པས་མི་བསྐྱོད་སོགས། །རང་རང་ངོ་བོས་རབ་བསྒྲུབས་ན། །དཔལ་ལྡན་ཟླ་བ་ཕྱེད་གྲུབ་ནས། །
རྡོ་རྗེ་བསྐལ་པ་གསུམ་དུ་གནས། །དེ་བཞིན་དེ་ལྟར་དེ་གཉིས་སམ། །གཅིག་ལའང་གསུམ་དུ་གོམས་བྱས་ནས། །རྒྱལ་བའི་སྲས་པོ་མོས་པ་ཡིས། །ཉུང་ངམ་ལྷག་པར་གནས་པར་འགྱུར། །སྔོན་བཞིན་ཐམས་ཅད་རབ་བྱས་ལ། །རྣམ་པར་སྣང་མཛད་ཆོ་ག་བཞིན། །བསྐྱེད་
ནས་ཆོས་དབྱིངས་བྱིན་བརླབས་ནས། །ལག་པ་གཡས་པ་འཁོར་ལོ་བསྐྱེད། །འཁོར་ལོ་གསེར་སོགས་དངོས་བྱས་ལ། །ཨོཾ་བསྐྱེད་ལྟེ་བར་རྟག་པ་ཡི། །འཁོར་ལོ་ཆེན་པོ་རབ་བསྒོམས་ཏེ། །སྔགས་ཀྱི་བཟླས་བརྗོད་བརྩམ་པའོ། །ཨོཾ་ཨཱཿཛི་ན་ཛིཀ་ཙཀྲ་ཨརྠ་སིདྡྷི་ཧཱུྃ་སྭཱ་ཧཱ། འོད་
ཟེར་གྱིས་བཀུག་རྟག་དཀྱིལ་འཁོར། །བསྡུས་ཏེ་བཅུག་ནས་བརྟན་བྱས་པས། །དྲོད་དང་དུད་འཐུལ་འབར་བ་དང་། །ནམ་མཁའ་ལ་ནི་འཕར་བར་འགྱུར། །དེ་ཡི་སྟེང་དུ་སུ་བསམས་ནས། །ལག་ཏུ་བབས་ནས་སྤྱན་མས་བཟླ། །འབྱུང་པོ་རྣམས་ལ་གཏོར་སྦྱིན་ལ། །ཆགས་བྱས་ཟླ་
བ་ཕྱེད་ནས་འགྲུབ། །རི་རབ་སུམ་ཅུ་རྩ་དྲུག་གི། །རབ་ཏུ་ཕྲ་བའི་རྡུལ་སྙེད་ཀྱི། །རྡོ་རྗེ་འཛིན་དང་འདྲ་བ་ཀུན། །དེ་ཡི་རྗེས་སུ་འབྲང་བར་འགྱུར། །སྔོན་བཞིན་མི་བསྐྱོད་རབ་བསྒོམས་ལ། །རྡོ་རྗེ་དངོས་བྱས་ཧཱུྃ་བསྐྱེད་དེ། །རྡོ་རྗེ་རིགས་ཀྱི་འཁོར་ལོ་བསྒོམ། །སྔགས་ཀྱི་བཟླས་བརྗོད་བྱ་
བའོ། །ཨོཾ་ཨཱཿབཛྲ་དྷྲྀཀ་བཛྲ་ཨརྠ་སིདྡྷི་ཧཱུྃ་སྭཱ་ཧཱ། རྡོ་རྗེ་རིགས་ཀྱི་སྤྲོ་དང་བསྡུ། །བརྟན་པར་བྱས་ལ་ཆགས་བྱས་ནས། །སྔོན་བཞིན་རབ་ཏུ་བསྒྲུབ་གྱུར་ན། །ཟླ་བ་ཕྱེད་ན་འགྲུབ་པར་ངེས། །རི་རབ་སུམ་ཅུ་རྩ་དྲུག་གི། །རྡུལ་ཕྲན་ཇི་སྙེད་ཡོད་པ་ཡི། །དེ་སྙེད་ཀྱི་ནི་བུད་མེད་རྣམས། །
ཡོན་ཏན་ཅན་གྱི་བདག་གིར་འགྱུར། །དྲག་པོ་དག་གིས་ཕྱག་བྱས་པས། །ཁམས་གསུམ་རྡོ་རྗེ་ཆེན་པོར་འགྱུར། །སྔོན་བཞིན་རྒྱས་པར་རིན་ཆེན་འབྱུང་། །བསྒོམས་ནས་སྭ་བསྐྱེད་རིན་ཆེན་དངོས། །རིན་ཆེན་རིགས་ཀྱི་ལྷ་བསྒོམས་ལ། །སྔགས་ཀྱི་བཟླས་བརྗོད་བྱ་བའོ། །ཨོཾ་

ཨཱཿརཏྣ་དྷྲྀཀ་རཏྣ་ཨརྠ་སིདྡྷི་སྭཱ་ཧཱ། རིན་ཆེན་རིགས་ཀྱི་ལྷ་རྣམས་ཀུན། །སྤྲོ་ཞིང་བསྡུ་བས་བརྟན་བྱས་ནས། །ཉེ་བའི་མཚན་མཐོང་སྔོན་བཞིན་བསྒོམས། །ཟླ་བ་ཕྱེད་འགྲུབ་ཐེ་ཚོམ་མེད། །ཡེ་ཤེས་ལྔ་ལྡན་བསྟེན་ན་ནི། །བསྐལ་བ་གསུམ་གྱི་ཡུན་གནས་ཤིང་། །
ཕྱོགས་བཅུའི་སངས་རྒྱས་ཐམས་ཅད་ཀྱིས། །གསང་བ་གསུམ་ལ་བསྙེན་བཀུར་བྱེད། །དེ་བཞིན་དཔག་མེད་ཚེ་བསྒོམས་ལ། །གསེར་སོགས་པདྨ་ཨཱཿལས་སྐྱེས། །ལྟེ་བར་གསུང་རིགས་ལྷ་བསྒོམས་ལ། །བཟླས་བརྗོད་རབ་ཏུ་བྱ་བའོ། །ཨོ་ཨཱཿཨཱ་རོ་ལྀཀ་ཀ་མ་ལ་ཨརྠ་སིདྡྷི་
སྭཱ་ཧཱ། དེ་སྤྲོས་གསུང་གི་རིགས་བཀུག་ནས། །བཅུག་ནས་བརྟན་བྱ་ཡང་ཡང་བསྒོམ། །མཚན་མ་ཐོབ་ནས་གཏོར་མ་བཏང་། །ཟླ་བ་ཕྱེད་ན་དེ་འགྲུབ་འགྱུར། །རི་རབ་སུམ་ཅུ་རྩ་དྲུག་གི། །རབ་ཏུ་ཕྲ་བའི་རྡུལ་སྙེད་ལ། །སངས་རྒྱས་རྡོ་རྗེའི་དཀྱིལ་འཁོར་ལ། །དག་པའི་བདག་ཉིད་
འཇོག་པར་བྱེད། །དོན་ཡོད་གྲུབ་པ་སྔོན་བཞིན་བསྒོམ། །རལ་གྲི་དངོས་བྱས་ཧ་ལས་བསྐྱེད། །ལས་ཀྱི་ལྷ་རྣམས་ཡུ་བར་བསྒོམ། །སྔགས་ཀྱི་བཟླས་པ་བརྩམ་པའོ། །ཨོཾ་ཨཱཿཔྲཛྙཱ་དྷྲྀཀ་ཁདྒ་ཨརྠ་སིདྡྷི་སྭཱ་ཧཱ། ལས་ཀྱི་རིགས་ཀྱི་ལྷ་རྣམས་སྤྲོ། །བསྡུ་ཞིང་བཅུག་ནས་ཆགས་
བྱས་ན། །དེ་མཚན་མཐོང་ནས་སྔོན་བཞིན་བསྒྲུབ། །ཟླ་ཕྱེད་ཀྱིས་ནི་ངེས་པར་འགྲུབ། །ཁམས་གསུམ་ཀུན་གྱིས་རབ་མཆོད་ཅིང་། །ཚངས་ལ་སོགས་པས་ཕྱག་ཀྱང་བྱས། །སྟོང་གསུམ་ན་ནི་མཆོག་ཏུ་དཔའ། །མི་མཆོག་གསང་བ་འཛིན་པར་འགྱུར། །གང་རྣམས་འདོད་
དང་བསམ་པ་དག །སྐུ་གསུང་ཐུགས་ཀྱི་རྡོ་རྗེ་འཛིན། །རྡོ་རྗེ་ཐུགས་ལས་རབ་བྱུང་བ། །དེ་ལྟ་བུ་ཡི་དངོས་གྲུབ་སྟེར། །འཁོར་ལོ་ལ་སོགས་གྲུབ་པའི་མཆོག །སངས་རྒྱས་སྐུ་དང་འདྲ་བར་འགྱུར། །གང་གཱའི་བྱེ་སྙེད་ཐམས་ཅད་དུ། །གྲུབ་པ་ཀུན་དུ་རྣམ་པར་སྤྱོད། །དམ་ཚིག་
དམ་པ་ཐམས་ཅད་ཀྱི། །རིག་པ་འཛིན་པའི་གཙོ་བོར་འགྱུར། །རྡོ་རྗེ་སྐུ་ནི་རབ་བསྒོམས་པས། །དེ་ནི་དམ་ཚིག་མཆོག་ཏུ་འགྱུར། །ཐམས་ཅད་སྔ་མ་བཞིན་བྱས་ཏེ། །འཇམ་དཔལ་བསྐྱེད་པའི་ཆོ་ག་རྫོགས། །ཐུགས་ཀར་རལ་གྲིའི་ཡུ་བ་ལ། །ཧཾ་གི་འོད་ལྡན་བཟླས་བརྗོད་བྱ།

ཨོཾ་ཨཱཿཧཾ་མཉྫུ་ཤྲཱི་ཧཱུྃ་ཕཊ། དེ་ཡི་འོད་ཀྱིས་ནང་གསལ་ནས། །བ་སྤུ་ལས་བྱུང་འོད་ཟེར་ལྔས། །ཐམས་ཅད་འཇམ་དཔལ་སྐུར་བྱས་ཏེ། །བཀུག་ཅིང་བུ་གར་ཐིམ་པར་བྱ། །ཡང་ནས་ཡང་དུ་བརྟན་བྱས་པས། །བ་སྤུ་དབང་པོ་གཞུ་མཐོང་ནས། །འབྱུང་པོ་གཏོར་བྱིན་ཆགས་བྱས་
ན། །ཟླ་བ་ཕྱེད་ཀྱིས་ངེས་པར་འགྲུབ། །འཇམ་དཔལ་དམ་ཚིག་ལོངས་སྤྱོད་ལ། །སྐུ་གསུང་ཐུགས་ཀྱི་རྡོ་རྗེ་ཅན། །ས་བཅུ་དག་ལ་གནས་པ་ཡི། །བྱང་ཆུབ་སེམས་དཔའ་དེ་འགྱུར་རོ། །ཡང་ནི་འཇམ་དཔལ་དེ་བཞིན་བསྒོམ། །རལ་གྲི་ཡུ་བར་བཅུག་འཕན་གནས། །བཟླས་
བརྗོད་བྱས་ལ་གོང་བཞིན་དཔག །དེ་དང་འདྲ་བར་བསྒྲུབ་པར་བྱ། །ཨོཾ་ཨཱཿཐླིཾ་མཉྫུ་ཧཱུྃ་སྭཱ་ཧཱ། དེ་ནི་ཟླ་བ་ཕྱེད་ན་ཡང་། །འོད་ཟེར་འབར་བར་གྱུར་པ་ཡིན། །རྡུལ་ཕྲན་རྡོ་རྗེ་ལུས་ངག་གི། །རྡོ་རྗེ་སྐུ་དང་འདྲ་བར་འགྱུར། །སྔ་མ་བཞིན་དུ་ཀུན་ཤེས་བྱ། །གཤིན་རྗེ་གཤེད་ལ་སོགས་པ་བཅུ། །
ལོངས་སྤྱོད་དང་པོ་རྫོགས་པ་ལ། །མཚན་མ་ཡིས་ནི་དེ་འདྲ་འགྲུབ། །ཐོ་བ་དབྱུག་པ་པདྨ་དང་། །རྡོ་རྗེ་ལྕགས་ཀྱུ་དབྱུག་གསལ་ཞིང་། །རལ་གྲི་འཁོར་ལོ་རྡོ་རྗེ་རྣམས། །དངོས་བྱས་འཁོར་ལོ་གཅིག་བསྒོམ་བརྗོད། །ཨོཾ་ཨཱཿཡ་མཱནྟ་ཀྲྀཏ་མུདྷ་ར་སིདྡྷི་ཧཱུྃ། ཨོཾ་ཨཱཿཔྲཛྙཱནྟ་ཀྲྀཏ་བཛྲ་དྷ་ན་ད་སིདྡྷི་
ཧཱུྃ། ཨོཾ་ཨཱཿཔདྨཱནྟ་ཀྲྀཏ་པདྨ་སིདྡྷི་ཧཱུྃ། ཨོཾ་ཨཱཿབིགྷྣཱནྟ་ཀྲྀཏ་བཛྲ་སིདྡྷི་ཧཱུྃ། ཨོཾ་ཨཱཿཊཱཀྐི་རཱ་ཛ་ཨཾ་ཀུ་ཤ་སིདྡྷི་ཧཱུྃ། ཨོཾ་ཨཱཿནཱི་ལ་དཎྜཱི་དཎྜ་སིདྡྷི་ཧཱུྃ། ཨོཾ་ཨཱཿམ་ཧཱ་བ་ལ་ཏྲི་ཤཱུ་ལ་སིདྡྷི་ཧཱུྃ། ཨོཾ་ཨཱཿཨ་ཙ་ལ་ཁཏྒ་སིདྡྷི་ཧཱུྃ། ཨོཾ་ཨཱཿཙཀྲ་ཝརྟི་ཙཀྲ་སིདྡྷི་ཧཱུྃ། ཨོཾ་ཨཱཿསུཾ་བྷ་བཛྲོ་སིདྡྷི་ཧཱུྃ། དེ་ཡིས་ཁྲོ་བོའི་
ཚོགས་བཀུག་སྟེ། །བཅུག་ནས་བརྟན་པར་བྱས་ནས་སུ། །སྔོན་བཞིན་གཏོར་སོགས་ཀྱིས་བསྒྲུབ་ན། དེ་འདྲ་ཟླ་བ་ཕྱེད་ན་འགྲུབ། །ཡང་ན་རྟག་པ་འོད་དཔག་མེད། །མི་བསྐྱོད་པ་ཡི་མཚན་མ་རྣམས། །བསྒྲུབས་ཏེ་རང་གི་ལྷ་བཅུག་པས། །ཟླ་ཕྱེད་དེ་དང་འདྲ་བར་འགྱུར། །མི་སྣང་བ་
བསྒྲུབ་པའི་ཆོ་ག་བཤད་པར་བྱའོ། །སྔོན་དུ་སྤྱི་ཡི་ཆོ་ག་སོགས། །རྒྱས་པར་རབ་ཏུ་བཤད་འགྱུར་ཡང་། །བདེ་བླག་ཏུ་ནི་རྟོགས་བྱའི་ཕྱིར། །ཡང་ནི་ཐུགས་རྗེས་བསྡུས་ཏེ་བསྟན། །མཚན་མ་ཐོབ་པའི་རྣལ་འབྱོར་པས། །འཛབ་བཟླས་ཆོ་ག་ལ་སོགས་ནས། །ལྷས་དབང་བསྐུར་བའི་

པར་ཞུགས་ལ། །བདེ་བའི་སྟན་ལ་འདུག་པར་བྱ། །བགེགས་བཟློག་ཆོ་ག་ནས་བརྩམས་ཏེ། །བརྒྱད་ཀྱིས་ནམ་མཁའ་སྙིང་པོ་བསྐྱེད། །ཆོས་དབྱིངས་བྱིན་རླབས་ལུས་ཀུན་ལ། །གནས་བཞི་མ་གཏོགས་ཁཾ་གིས་མཚན། །ཨོཾ་ཨཱཿཁཾ་ག་ན་ཁ་གརྦྷ་ཧཱུྃ།
དེ་ཡི་འོད་ཀྱིས་སངས་རྒྱས་རྣམས། །ནམ་མཁའི་སྙིང་པོའི་སྐུར་བྱས་ལ། །བཀུག་སྟེ་ཁཾ་ཀུན་ལ་བསྟིམས་ལ། །ནམ་མཁའ་བཞིན་དུ་སྟོང་པར་བསམ། །བདག་གི་ཡན་ལག་མི་མཐོང་སོགས། །འབྱུང་པོ་གཏོར་མ་ཡང་བྱིན་ཏེ། །ཆགས་བྱས་<ཡད་.ཡང་>དུ་བསྒྲུབ་འགྱུར་ན། །ཟླ་བ་
ཕྱེད་ན་མི་སྣང་འགྱུར། །སངས་རྒྱས་བྱང་ཆུབ་སེམས་དཔའ་ཡིས། །ཡང་དང་ཡང་དུ་མཆོད་པ་དང་། །བསྐལ་པ་གཅིག་ཏུ་གནས་པ་དང་། །སངས་རྒྱས་ཀྱིས་ཀྱང་མི་གཟིགས་འགྱུར། །གཞི་ཡི་འབྲས་བུ་གཞན་ཡིན་ཕྱིར། །དེ་བཤད་གསང་བའི་ཐིག་ལེ་ལས། །རིམ་པ་འདི་
བཞིན་ཚིག་འགྲུབ་པ། །འཇིག་རྟེན་དབང་པོ་བསྒྲུབ་པ་བཤད། །ཐམས་ཅད་སྔོན་བཞིན་རབ་བྱས་ལ། །སྤྱན་རས་གཟིགས་དབང་བསྒོམ་པར་བྱ། །དེ་ལྕེ་ཧྲཱིཿལས་པདྨ་ནི། །འདབ་བརྒྱད་མདུན་དུ་རྡོ་རྗེ་ནི། །ཨོཾ་ཨཱཿཧྲཱིཿལོ་ཀེ་ཤྭ་ར་བྷ་དྷ་ན་ཨརྠ་སིདྡྷི་ཧཱུྃ་སྭཱ་ཧཱ། བཟླས་པ་ཐོས་པས་སངས་
རྒྱས་རྣམས། །འཇིག་རྟེན་དབང་ནི་བསྐུར་བྱས་ཏེ། །བཀུག་སྟེ་ལྕེ་ལ་བཅུག་ནས་ནི། །གནས་བརྟན་ངོ་བོར་ཆགས་པར་བྱ། །ལྕེ་དེ་རྡོ་རྗེ་མཐོང་གྱུར་ནས། །གཏོར་མ་བྱིན་ཏེ་ཡང་ཡང་བསྒོམ། །ཟླ་བ་ཕྱེད་ན་ངེས་པ་རུ། །ཚིག་གི་དངོས་གྲུབ་ཐམས་ཅད་འགྲུབ། །བདེན་པ་རུ་ནི་སྨྲ་བ་
དང་། །ཤགས་དང་རྒོལ་བ་སུན་འབྱིན་དང་། །ཀུན་ཐོས་རྣམས་ནི་ཡིད་འོང་བར། །འགྱུར་བ་འདི་ལ་ཐེ་ཚོམ་མེད། །དེ་ལས་ཡང་ནི་སྒྲུབ་པའི་མཆོག །མཚོན་ཆ་རྣམས་ནི་འཇིག་འགྱུར་བ། །ཕྱི་མས་གསུངས་པ་འབྱུང་བའི་ཕྱིར། །དེ་ཡི་སྒྲུབ་པའི་ཆོ་ག་བཤད། །སྔོན་
གསུངས་རྒྱས་པར་བཤད་པ་ཡི། །ཆོ་ག་རྣམས་ནི་རྫོགས་བྱས་ལ། །ཀླུ་ཤིང་མེ་ཏོག་མཚན་པ་ཡི། །སྣང་མཛད་འདྲ་བའི་བྱམས་པ་བསྐྱེད། །ཐུགས་ཀར་མཚན་མ་ལ་གནས་པའི། །མེ་ནི་ཆོ་ག་བཞིན་བསྒོམས་ལ། །བཟླས་བརྗོད་བྱས་པས་བྱམས་པ་ཡི། །ཚོགས་ཀྱིས་

ཁམས་གསུམ་དགད་པའོ། །ཨོཾ་ཨཱཿམེ་མ་ཧཱ་མེ་དྷ་ར་ས་ར་ཎ་ཧཱུྃ་སྭཱ་ཧཱ། དེ་ཡིས་སེམས་ཅན་ཐམས་ཅད་ལ། །བྱམས་པས་དམིགས་བྱས་སྙིང་རྗེ་སོགས། །ཁྲོ་དང་བྲལ་བར་རབ་བསམས་ལ། །སེམས་ཅན་དེ་དག་རབ་ཏུ་བསྡུ། །བརྟན་པར་རབ་ཏུ་ཆགས་བྱས་ལ། །རལ་གྲི་སོ་
སོགས་མ་གཏོགས་ཏེ། །འབྱུང་པོ་གཏོར་སྦྱིན་ཡང་བསྒོམས་ན། །ཟླ་ཕྱེད་མཚོན་ཆས་མི་ཚུགས་སོ། །འཕེན་དང་མི་འཕེན་ལ་སོགས་པ། །མཐོང་བ་ཙམ་གྱིས་འཇིག་པར་འགྱུར། །བཏབ་འགྱུར་འཐོར་རམ་མེ་ཏོག་འགྱུར། །གང་མཐོང་བྱམས་སེམས་དང་ལྡན་པའོ། །སྔོན་བཞིན་བྱ་བ་
ཐམས་ཅད་བྱ། །འཇམ་དཔལ་ཆོ་ག་བཞིན་བསྒོམས་ལ། །ཐུགས་ཀར་རལ་གྲིའི་ཡུ་བར་མཾ། །བསམས་ནས་བཟླས་བརྗོད་པར་བྱའོ། །ཨོཾ་ཨཱཿམཾ་མཉྫུ་ཤྲཱི་ཨརྠ་སིདྡྷི་ཧཱུྃ་སྭཱ་ཧཱ། འོད་ཟེར་སྟུག་པོས་ནང་གསལ་ཏེ། །བ་སྤུའི་བུ་ག་ལས་བྱུང་བས། །སངས་རྒྱས་ཐམས་ཅད་འཇམ་
དཔལ་སྐུར། །བྱས་ཏེ་བཀུག་ནས་བ་སྤུ་ཡི། །བུ་གར་བཅུག་ནས་སྟོང་པ་ཉིད། །བསམས་པས་སྔོན་བཞིན་རྟོགས་འགྱུར་ན། །བར་ཆད་ཞི་བར་བྱས་ནས་སུ། །བསྒྲུབས་ན་ཟླ་བ་ཕྱེད་ན་འགྲུབ། །དཔག་ཚད་བརྒྱ་ཡི་ཁྱོན་ཙམ་དུ། །རྡོ་རྗེ་འཇམ་པའི་འོད་དག་གིས། །རྒྱན་རྣམས་ཀུན་
གྱིས་བརྒྱན་པ་ཡི། །གྲུབ་པའི་མཚན་མ་སྣང་བར་འགྱུར། །ཚངས་པ་དྲག་པོ་ལ་སོགས་ལྟས། །ནམ་ཡང་མཐོང་བར་མི་ནུས་སོ། །ཡང་ནི་སྔོན་བཞིན་ཐམས་ཅད་བྱ། །ཕྱག་རྒྱ་ཆེན་པོ་གང་ཡང་རུང་། །ཆོ་ག་བཞིན་དུ་དང་པོས་བསྒྲུབ། །དེ་ཡིས་བསྒྲུབ་པའི་རི་ལུ་གསུངས། །བདུད་རྩི་ལྔ་
ལྔའམ་རྟ་ཤར་སྦྱར། །ཁྱི་ཤའམ་ཤ་ཆེན་དག་དང་སྦྱར། །བ་ལང་ཤའམ་ཤང་སྲིན་བུ། །ག་བུར་ཙནྡན་དང་སྦྱར་བའམ། །གི་ཝཾ་ཨ་ཀ་རུར་སྦྱར་བའམ། །ག་པུར་གུར་ཀུམ་སྦྱར་བ་ཡི། །རིལ་བུ་སྐྲོད་བྱེད་ལྔ་སྦྱོར་ཙམ། །ཉི་མ་ཟླ་བ་སྲེད་བྱེད་ཀྱི། །ཉི་མ་མན་ཆ་བཞི་དང་ནི། །སྲེག་བྱེད་
གཅིག་སྟེ་ཟླ་བ་གཉིས། །བཀྲི་བ་ཙ་ནའི་འབྲུ་ཙམ་དུ། །ཨོཾ་འམ་ཨཱཿའམ་ཧཱུྃ་ལས་བསྐྱེད། །ཁར་བཅུག་ནས་ནི་དེ་དབུས་སུ། །རང་གི་འཁོར་ལོ་རབ་བསྒོམས་ལ། །དེ་ཡིས་དེ་ཡི་སངས་རྒྱས་ཚོགས། །བཀུག་སྟེ་བཅུག་ནས་བཟླས་བརྗོད་བྱ། །ཨོཾ་ཨཱཿཀུ་ལ་ཨརྠ་སིདྡྷི་ཧཱུྃ། །བརྟན་པའི་

ངོ་བོར་ཆགས་བྱས་ནས། །འབར་སོགས་མཚན་མ་མཐོང་བར་འགྱུར། །འབྱུང་པོ་གཏོར་མ་ཡང་བྱིན་ནས། །བསྒོམས་ན་ཟླ་ཕྱེད་མི་སྣང་འགྱུར། །རྡོ་རྗེ་སྐུ་དང་རབ་འདྲ་ཞིང་། །ཉི་མ་ཤར་བའི་འོད་འདྲ་སྟེ། །འཛམ་བུ་ན་དའི་གསེར་འོད་ཀྱི། །བྱང་ཆུབ་ཡེ་
ཤེས་ཐོབ་པར་འགྱུར། །འདི་ནི་དཔལ་དང་ལྡན་པ་ཡི། །སངས་རྒྱས་འོད་དང་འདྲ་བར་འགྱུར། །དཔག་ཚད་བྱེ་བ་གང་གཱ་ཡི། །སྟེང་དུ་རྡོ་རྗེ་འགྲོ་བར་འགྱུར། །འདོད་ཁམས་གནས་པའི་བུ་མོ་ནི། །ལྷ་ཡི་ལོངས་སྤྱོད་བརྟུལ་ཞུགས་མ། །ཡང་ན་གཟུགས་ཁམས་གནས་པ་ལ། །
སྟོབས་ཆེན་གྱིས་ནི་འདོད་པ་སྤྱོད། །ཐམས་ཅད་སྔོན་བཞིན་རབ་བྱས་ཏེ། །རང་གི་ལྷ་ནི་དང་པོ་དམིགས། །དཀྱིལ་འཁོར་དབུས་སུ་མན་འཇིའི་སྟེང་། །ཐོད་པ་ཡིས་ནི་བརྒྱན་པར་བྱ། །བདུད་རྩི་ལྔ་ནི་གོ་རིམས་བཞིན། །གོང་གི་ཆོ་གས་དག་བྱས་ནས། །ཨོཾ་ཨཱཿཧཱུྃ་ཡིག་གསུམ་པོ་
ནི། །བརྒྱ་དང