Luận tạng Tây Tạng (Tengyur) — Tập 44

༄༅༅། །རྒྱ་གར་སྐད་དུ། ཤྲཱི་གུ་ཧྱ་ས་མཱ་ཛ་སཱ་དྷ་ནཾ་སིདྡྷི་སཾ་བྷ་བ་ནི་དྷི་ནཱ་མ། བོད་སྐད་དུ། དཔལ་གསང་བ་འདུས་པའི་སྒྲུབ་པའི་ཐབས་དངོས་གྲུབ་འབྱུང་བའི་གཏེར་ཞེས་བྱ་བ།
དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཟབ་གསལ་གཉིས་མེད་དག་པའི་བདག་ཉིད་ཀྱིས། །བདག་དང་གཞན་དོན་ཕུན་སུམ་ཚོགས་པའི་སྐུ། །དཔལ་ལྡན་ཆོས་ཀྱི་དབྱིངས་ཀྱི་ཕྱག་རྒྱ་
ལ། །རྒྱལ་སྲས་རྒྱུ་དང་བཅས་པ་རབ་འབྱུང་ཞིང་། །རྟག་སོགས་རྒྱུ་འདྲས་ཁམས་ཀུན་རབ་བཀང་ནས། །ཇི་སྲིད་བར་དུ་དོན་མཛད་རྒྱུན་མི་འཆད། །ཁྱབ་བདག་རྡོ་རྗེ་སེམས་དཔའ་དེ་དང་ནི། །དེ་ཡི་
སྲས་རྣམས་ལ་ཡང་ཕྱག་འཚལ་ལོ། །ཁམས་གསུམ་རྒྱུ་དང་མི་རྒྱུ་ཀུན་ཁྱབ་པ། །སྙིང་གའི་དབུས་བསམ་དེ་ལ་བརྟན་སོགས་སྐྱེ། །ཆོས་བདག་ཁྲོས་པས་ཀྱང་ནི་མི་གནོན་པ། །མི་ཤིགས་ཐིག་ལེ་
གང་ཡིན་རྟོགས་པར་མོས། །བློ་དང་ལྡན་པ་རྣམས་ཀྱིས་པདྨ་ཁ་འབྱེད་པ། །རྨོངས་པ་སྲེག་བྱེད་སྙིང་གི་མུན་པ་སེལ་མཛད་པ། །ཡོན་ཏན་དག་པའི་མཁའ་ལ་རྒྱུ་ཞིང་འཇིགས་བྲལ་མཛད། །བླ་

མ་དམ་པ་རྣམས་ཀྱི་ཞལ་སྔ་རྒྱལ་གྱུར་ཅིག །དཔལ་ལྡན་གསང་འདུས་མཚོ་ཆེན་ལས། །བླ་མའི་བརྒྱུད་རིམ་གྲུ་གཟིངས་ཀྱིས། །ཡིད་བཞིན་ནོར་བུ་རྣམ་པ་གསུམ། །སྨན་པའི་ཞབས་ཀྱིས་རྙེད་པའོ། །
དེ་རྙེད་དཔེ་མཁྱུད་སྤངས་བྱས་ཏེ། །འདི་ནི་ཐུན་མོང་ཅིག་ཤོས་ཀྱི། །དངོས་གྲུབ་འབྱུང་ཕྱིར་གཏེར་འདྲ་བ། །ཕན་ཕྱིར་བདག་གིས་བརྩམ་པར་བྱ། །གཞུང་གཞན་སྤངས་ཏེ་བླ་མའི་བརྒྱུད་རིམ་གྱིས། །དཔལ་དང་ལྡན་པའི་
མཉམ་འདུས་སྒྲུབ་པའི་ཐབས། །དམ་པས་གསོལ་བ་བཏབ་ཕྱིར་རབ་བྲོད་ཅིང་། །དད་པས་ཅི་ནུས་བདག་གིས་བཤད་པར་བྱ། །དེ་ལ་ཁ་ཅིག་ནི་ཡང་དག་པའི་མན་ངག་དང་བྲལ་བ་རྣམས་ནི་དམ་པ་མ་ཡིན་པར་མཁས་
པར་གྲགས་པ་རྣམས་ལ་བླ་མ་ཉིད་དུ་ཁས་བླངས་ནས་དེའི་ལམ་ལ་ཞུགས་ཏེ། དཀའ་ཐུབ་དང་སྨྱུང་བ་དང་། བརྟུལ་ཞུགས་ལ་སོགས་པས་དོན་དམ་པ་གཅིག་པོ་ལ་དཔྱོད་ཅིང་། འདི་སྙམ་དུ་བདག་གི་རྒྱུའི་འཁྲུལ་འཁོར་
ལ་སོགས་པ་དང་ལྷན་ཅིག་ཏུ་སྐྱེས་ཀྱང་། དེ་རྣམས་ཀྱིས་སྟོང་པའི་དངོས་པོ་ནི་ཡོད་དེ། དེ་ཙམ་ཞིག་བརྟགས་པས་མངོན་དུ་བྱེད་ཀྱང་། དངོས་པོ་ལ་དོན་དམ་པར་ཞེན་པས་སྟོང་པ་ཉིད་མི་ཤེས་ཏེ་གྲོལ་བ་དང་རྒྱང་རིང་དུ་

འགྱུར་རོ། །ཇི་སྐད་དུ། སྟོང་པ་ཉིད་ནི་མ་ཤེས་པས། །ཀུན་ལ་འདས་པ་དེས་མི་ཤེས། །དངོས་དང་དངོས་མེད་རྣམ་འཇིགས་པས། །སྟོང་པ་ཉིད་ནི་ཤེས་པར་བྱ། །ཞེས་འབྱུང་བས་སོ། །ཡང་ཁ་ཅིག་དགེ་བའི་བཤེས་གཉེན་དང་ཕྲད་ཟིན་ཀྱང་། དམ་པ་མ་ཡིན་པས་དེའི་ལམ་
ལ་ཞུགས་ཏེ། བདག་ལ་སོགས་པ་དང་བྲལ་བའི་ཕུང་པོ་དང་སྐྱེ་མཆེད་དང་། ཁམས་རྣམས་མི་རྟག་པ་ལ་སོགས་པར་འཇིག་ཅིང་། སྡོམ་པའི་སྣོད་ལ་བརྟེན་ཏེ། ཞུགས་པ་ལ་སོགས་པའི་ལམ་གྱི་ཕུང་པོ་ལ་སོགས་པ་ལ་གྲོལ་ནས་ལྷག་མ་དང་བཅས་པ་དང་། ལྷག་མ་མེད་པའི་མྱ་ངན་
ལས་འདས་པ་མངོན་དུ་བྱེད་དོ། །འདི་ཡང་མ་རིག་པ་དང་འབྲེལ་པའི་ཕྱིར་འབྲས་བུ་ཕྱིར་ལྡོག་པ་ཅན་ཞེས་བྱ་སྟེ། དེ་ཡང་ཇི་སྐད་དུ། རྩ་བའི་རྣམ་ཤེས་ལོག་གྱུར་ནས། །ལྷག་བཅས་ལྷག་མ་མེད་གྱུར་པའི། །རྣམ་གྲོལ་འབྲས་བུ་ཐོབ་འགྱུར་ཡང་། །མངོན་དུ་རྒྱུ་བ་མེད་པ་ཡི། །མ་རིག་
བག་ཆགས་དང་འབྲེལ་ཕྱིར། །རྣམ་པར་སྣང་མཛད་གང་ཆེན་མཚོས། །དེ་ལ་ཐུགས་རྗེས་གཟུང་བའི་ཕྱིར། །དཔལ་ལྡན་གོ་ཆའི་འོད་ཟེར་དང་། །ཕྱག་གིས་དབུ་ལ་རེག་མཛད་ནས། །དེ་ཡི་རོ་མྱོང་ཟློག་མཛད་དེ། །ཡང་དག་ལམ་ལ་འཛུད་པར་མཛད། །ཅེས་གསང་བའི་རིམ་པ་ཕྱེ་
བ་ལས་གསུངས་སོ། །ཡང་ཁ་ཅིག་ནི་དགེ་བའི་བཤེས་གཉེན་དམ་པ་དང་ཕྲད་དུ་ཟིན་ཀྱང་། དེ་རྣམས་ཀྱིས་བརྒྱུད་རིམ་མཁྱུད་པས། སྦྱིན་པ་ལ་སོགས་པ་ཕ་རོལ་ཏུ་ཕྱིན་པ་བཅུ་བསྐལ་པ་མི་ཉུང་བར་བསགས་ནས། སའི་དེ་བཞིན་ཉིད་དུ་མངོན་དུ་བྱེད་ཅིང་རིམ་གྱིས་ས་བཅུ་མངོན་དུ་མཐར་ཐུག་
པར་བྱེད་དོ། །དེའི་སྤྲུལ་པའི་སྦྱོར་བས་དགའ་ལྡན་གྱི་གནས་ཉིད་དུ་སྐྱེ་བ་ལེན་པ་དང་། གླིང་ལ་སོགས་པ་ལ་གཟིགས་པར་མཛད་ནས་ཡུམ་གྱི་ལྷུམས་སུ་འཇུག་པ་དང་། ལྷུམས་ནས་བལྟམ་པ་དང་། གཞོན་ནུ་རོལ་པ་མཛད་པ་དང་། ཁབ་བཞེས་པ་དང་། བཙུན་མོའི་འཁོར་གྱི་ནང་ནས་བྱུང་
བ་དང་། རབ་ཏུ་བྱུང་བ་དང་། དཀའ་བ་སྤྱད་པ་སྟོན་པ་དང་། དེའི་ཚེ་བདེ་བར་གཤེགས་པ་རྣམས་ཀྱིས་སྔོན་རང་ཉིད་མངོན་པར་རྫོགས་པར་སངས་རྒྱས་པའི་མན་ངག་རང་རིག་ཆོས་ཀྱི་སྐུ་མངོན་དུ་བྱེད་པ་བསྟན་པའི་ཕྱིར། ཏིལ་གྱི་གོང་བུ་བཞིན་དུ་ཆེད་དུ་ལོངས་སྤྱོད་རྫོགས་པའི་སྐུར་བསྟན་ཏེ།

ཡེ་ཤེས་ཀྱི་ཕྱག་རྒྱ་གནང་ནས། སྙོམས་པར་འཇུག་པའི་ཆོ་གས་རྩ་བའི་ཡེ་ཤེས་དམིགས་པ་དང་བྲལ་བ། སྦྱོར་བ་གཉིས་ཀྱི་བདག་ཉིད་སྔོན་དང་ཕྱིས་ཀྱི་སྦྱོར་བ་མངོན་དུ་བྱས་ཏེ། བདུད་བཏུལ་ཆོས་ཀྱི་འཁོར་ལོ་བསྐོར་བ་ལ་སོགས་པ་མཛད་དོ། །དོན་
དེ་ལྟ་བུའི་སྣོད་དཀོན་པར་གཟིགས་ནས། སྦ་བར་མཛད་དེ་སངས་རྒྱས་པའི་ཚུལ་སོ་སོར་མཐོང་བར་མཛད་དོ། །བླ་མ་ཆེན་པོའི་ཞལ་ནས་ཇི་སྐད་དུ། ཅིའི་ཕྱིར་ཤཱཀྱ་ཐུབ་པ་ཡིས། །གྲངས་མེད་བར་དུ་ཚོགས་བསགས་ཀྱང་། །འདི་དོན་མ་རྟོགས་ནཻ་རཉྫར། །ཅི་ཡང་མ་ཡིན་
ཏིང་འཛིན་གནས། །དེ་ཚེ་བདེ་གཤེགས་ཀུན་གྱིས་ཀྱང་། །ཐལ་བྱུང་བློ་ཆགས་དེ་བཟློག་སྟེ། །ནམ་མཁའི་དབྱིངས་ལྟར་རྣམ་དག་པའི། །ཟབ་གསལ་གཉིས་མེད་རབ་བསྟན་ཏེ། །ནམ་ཕྱེད་དུས་སུ་རྒྱལ་བ་ལྟར། །དེ་ཉིད་བསྒོམས་པས་ཐོ་རངས་སུ། །སྐད་ཅིག་གིས་ནི་ཡང་
དག་རྟོགས། །བྱང་ཆུབ་སྙིང་པོར་ཞུགས་བྱས་ནས། །དཔུང་ཆེན་བདུད་རྣམས་རབ་བཅོམ་སྟེ། །སེམས་ཅན་གཟུང་བར་བྱ་བའི་ཕྱིར། །ཆོས་ཀྱི་འཁོར་ལོ་བསྐོར་བའོ། །དེ་ནས་བཟུང་སྟེ་དོན་མཆོག་འདི། །སྐལ་བ་ལྡན་པ་འགའ་ཞིག་ལ། །ཞལ་ནས་ཞལ་དང་སྙན་ནས་སྙན། །
བརྒྱུད་དེ་ངེས་པའི་དོན་བསྟན་པའོ། །ཞེས་གསུངས་སོ། །དེ་བས་ན་སངས་རྒྱས་ཐམས་ཅད་སངས་རྒྱས་པའི་ཚུལ་འདིས་ཤེས་པར་བྱའོ། །གལ་ཏེ་ལམ་གཞན་གྱིས་སངས་རྒྱས་པ་སྲིད་ན་ནི། དེའི་བླ་མ་དང་བཅས་པར་འགྱུར་རོ། །དེ་བས་ན་འབྲས་བུ་སྐུ་གསུམ་ནི་གཅིག་ཁོ་ན་སྟེ་
དེའི་ལམ་ནི་སྔགས་ཀྱི་སྤྱོད་པ་འདིའོ། །ཇི་སྐད་དུ་རྣམ་པར་སྣང་མཛད་བྱང་ཆུབ་པའི་རྒྱུད་ལས། སངས་རྒྱས་དུས་གསུམ་ལས་བྱུང་བ། །སྐུ་གསུང་ཐུགས་ཀྱི་རྡོ་རྗེ་ཅན། །གཞལ་མེད་ཡེ་ཤེས་ཐོབ་པ་ནི། །རྡོ་རྗེ་སྔགས་ཀྱི་དོན་སྒོམ་ཡིན། །ཞེས་འབྱུང་བས་སོ། །སྔགས་ཀྱི་སྤྱོད་པ་
ལ་མོས་པ་དེ་དག་ཀྱང་བཞིར་ཤེས་པར་བྱའོ། །ཁ་ཅིག་ནི་ཕྱིའི་གཙང་སྦྲ་ལ་སོགས་པ་དང་། བདག་གི་དེ་ཁོ་ན་ཉིད་ལ་སོགས་པས་ལྷག་པའི་ལྷ་མཉེས་པར་བྱས་པས་མངོན་པར་མཐོ་བའི་དཔལ་ཉམས་སུ་མྱོང་བར་བྱས་ནས། བསོད་ནམས་དང་ཡེ་ཤེས་ཀྱི་ཚོགས་རྫོགས་པར་བྱས་

ནས་སངས་རྒྱས་ཀྱི་གོ་འཕང་ཐོབ་པར་འདོད་དོ། །ཡང་ཁ་ཅིག་ནི་ཕྱིའི་གཙང་སྦྲ་ལ་སོགས་པ་བྱ་བ་དང་བྱ་བ་མ་ཡིན་པ་སྤངས་ནས། མཚན་མ་དང་བཅས་པ་དང་། མཚན་མ་མེད་པའི་ཏིང་ངེ་འཛིན་གྱིས་མངོན་པར་མཐོ་བའི་དཔལ་ཉམས་སུ་མྱོང་ནས། ཚོགས་གཉིས་བསགས་
ནས་སངས་རྒྱས་ཀྱི་གོ་འཕང་ཐོབ་པར་འདོད་དོ། །ཡང་ཁ་ཅིག་ནི་གཙང་སྦྲ་ལ་སོགས་པ་སྨད་ཅིང་ནང་གི་རྣལ་འབྱོར་དམ་ཚིག་སེམས་དཔའ་དང་། ཕྱི་རོལ་གྱི་ཡེ་ཤེས་སེམས་དཔའ་ཕྱག་རྒྱ་བཞི་དང་ལྡན་པ་མཉེས་པར་བྱ་བ་ལ་སོགས་པའི་རིམ་པས་རང་གི་ལྷ་མཉེས་པར་བྱས་པས་
མངོན་པར་མཐོ་བའི་དཔལ་ཉམས་སུ་མྱོང་ནས། བསོད་ནམས་དང་ཡེ་ཤེས་ཀྱི་ཚོགས་རྫོགས་པར་བྱས་ནས་སངས་རྒྱས་ཀྱི་གོ་འཕང་ཐོབ་པར་འདོད་དོ། །དེ་དག་ཀྱང་བཅོམ་ལྡན་འདས་ཀྱིས་དེ་ལྟ་བུ་ལ་མོས་པའི་གདུལ་བྱ་གཟུང་བའི་ཕྱིར་ཐབས་གསུངས་པ་སྟེ། ཕྱག་རྒྱ་ཆེན་པོའི་ལྷན་ཅིག་བྱེད་པ་
ཡིན་པར་ཤེས་པར་བྱའོ། །ཕྱག་རྒྱ་ཆེན་པོའི་ལྷན་ཅིག་བྱེད་པ་ནི་འདི་ལྟ་སྟེ། གང་དག་སེམས་ཇི་ལྟ་བ་བཞིན་དུ་བརྟག་པའི་ཐབས་ལ། བརྩོན་འགྲུས་འབར་བ་དང་ལྡན་པ་རྣམས་ཀྱིས་བསྐྱེད་པ་དང་རྫོགས་པའི་རིམ་པས་སྐད་ཅིག་རེ་རེ་ལ་ཡང་སྣོད་དང་བཅུད་དང་ལམ་དང་འབྲས་
བུར་བཅས་པ་སྦྱོང་བར་བྱེད་ཅིང་། རྣལ་འབྱོར་དང་ཕྱག་རྒྱ་ལ་བརྟེན་ནས་ཚེ་འདི་ཉིད་ལས་རབ་དང་རབ་ཀྱི་མཐར་ཕྱིན་པར་འགྱུར་བ་ལ་སོམ་ཉི་མེད་པས་བླ་ན་མེད་པའོ། །དེ་སྟོན་པར་བྱེད་པའི་གཞུང་ནི་དཔལ་ལྡན་འདུས་པ་སྟེ། ཇི་ལྟ་བུ་ཞེ་ན། ཆོས་ཕུང་བརྒྱད་ཁྲི་བཞི་སྟོང་དག །འདུས་ཕྱིར་
སྣོད་ཡང་དམ་པའོ། །རྨོངས་པའི་མུན་ནག་སལ་བས་ན། །སྒྲོན་མའི་མཆོག་ནི་འདི་ཡིན་ནོ། །རྟ་རྒོད་ལྟ་བུའི་སེམས་འདུལ་བས། །འཐད་པའི་སྲབ་སྐྱོགས་འདི་ཡིན་ནོ། །རྣམ་ཤེས་གླང་ཆེན་ཡན་ལྟ་བུ། །འགུགས་ཕྱིར་ལྕགས་ཀྱུ་དམ་པའོ། །རྣལ་འབྱོར་མཆོག་ཏུ་ངེས་
པ་ཡི། །དམ་སྡོམ་ཅན་གྱི་ཚོང་འདུས་སོ། །འཁོར་བའི་རྒྱ་མཚོ་ཆེན་པོ་ལས། །སྒྲོལ་བྱེད་གྲུ་ནི་ཆེན་པོའོ། །མངོན་མཐོ་ངེས་ལེགས་ཁང་བཟང་གི །སྟེང་དུ་ཕྱིན་བྱེད་ཐེམ་སྐས་སོ། །རྣམ་རྟོག་ལས་བྱུང་ཉོན་མོངས་ཀྱི། །གྲོང་ཁྱེར་འཇོམས་ཤིང་གྲོལ་བ་ཡི། །འཁོར་ལོ་

སྐྱོང་ཕྱིར་རྒྱལ་པོའོ། །བཅོམ་ལྡན་རྡོ་རྗེ་འཆང་ཆེན་པོས། །ཉེ་བར་བསྟན་པའི་མདོ་སྡེ་དང་། །དེ་འདྲའི་ཚུལ་ལེན་རྒྱུད་འདི་ནི། །ཀུན་གྱི་ཕྱི་མ་གསུངས་པ་ནི། །དོན་རྣམས་དེ་རུ་གཏན་ལ་ཕབ། །འདི་དོན་སྒོམ་བྱེད་རྣལ་འབྱོར་པ། །མ་འོངས་རྡོ་རྗེ་འཆང་
བ་བས། །དགའ་དང་རྩོད་པ་མེད་པ་དང་། །སྲུང་བ་དང་ནི་དྲན་པ་དང་། །བག་ཡོད་པ་ཡིས་བརྩོན་བྱའོ། །དེ་ལྟ་བུའི་གཞུང་དེ་ལ་རྟོག་པ་མངོན་དུ་གཏོང་བའི་ཉན་པ་པོ་རྣམས་ཁས་ལེན་པའི་ཡན་ལག་དང་། གླེང་གཞི་ཕུན་སུམ་ཚོགས་པའི་རྣམ་པར་བཤད་པས། གང་ཟག་
གཞན་ཡིད་བརྟན་དུ་རུང་བར་བྱ་བ་ནི་བསྡུས་པའི་དོན་དུ་བཤད་པས་དེར་ཞེས་བྱའོ། །ཡེ་ཤེས་ལས་སྤྲུལ་པའི་འཁོར་དེ་བཞིན་གཤེགས་པ་ལ་སོགས་པ་རྣམས་ལ་རྒྱུད་ཀྱི་དོན་ཇི་ལྟར་བསྟན་པ་ཡང་དེར་ཤེས་པར་བྱ་སྟེ། དེའི་ཕྱིས་འབྱུང་བའི་དོན་རྗེ་བཙུན་རྣམས་ཀྱིས་སྣོད་དུ་རུང་བར་
བྱས་པའི་གང་ཟག་ལ་རྒྱུད་ཀྱི་དོན་ཇི་ལྟར་བསྡུས་ཏེ་བསྟན་པ་དེ་སྒྲུབ་ཐབས་ཀྱི་རིམ་པ་འདིར་རྒྱས་པར་བཤད་པར་བྱའོ། །དེ་ལ་དང་པོ་སྙིང་རྗེའི་སྟོབས་ལས་སྐྱེས། །བྱང་ཆུབ་སེམས་ལྡན་སྦྱིན་པ་ལ་སོགས་བརྒྱན། །དཔལ་ལྡན་འདུས་པའི་འཁོར་ལོར་ཆོ་ག་བཞིན། །དབང་
བསྐུར་གནང་བ་ཐོབ་པས་རིམ་འདི་བྱ། །གང་ཞིག་དགོན་པ་ཆེན་པོའི་ས་ཕྱོགས་སོགས། །གང་རུང་གནས་སུ་སྟེགས་བུ་གྲུ་བཞི་པ། །ཙནྡན་མཆོག་སོགས་བྱུགས་ནས་བདེ་བའི་སྟན། །རྡོ་རྗེ་སྐྱིལ་མོ་ཀྲུང་འདུག་བསམ་གཏན་བྱ། །དང་པོར་ཐོ་རངས་ཉི་དབུས་སུ། །སྟེང་
སོགས་ཀྱིས་དག་མཐིང་གའི་ཧཱུྃ། །འོད་ཟེར་གྱིས་མཐོང་ཡུལ་དམིགས་ཏེ། །སྙིང་རྗེ་ལ་སོགས་བསྒོམ་པར་བྱ། །འོད་ཟེར་གྱིས་གསལ་སངས་རྒྱས་དང་། །བླ་མ་ལ་སོགས་མདུན་དུ་དམིགས། །གཟུགས་རྡོ་རྗེ་ལ་སོགས་པ་ཡི། །མཆོད་པའི་སྤྲིན་སྤྲོ་ཕྱག་ཀྱང་འཚལ། །གང་
ཞིག་ཐོགས་མེད་དུས་ནས་སྲིད་པའི་ཆུ་རྒྱུན་ལ། །རྟོག་པས་རྣམ་པར་བསྒོས་པའི་སྡིག་པ་མ་ལུས་རྣམས། །ཐུགས་རྗེ་ཆེར་ལྡན་ཁྱོད་ཀྱི་མདུན་དུ་ཡང་། །གསུམ་དུ་དམིགས་པ་གསལ་ཏེ་བཤགས་པར་བགྱི། །སངས་རྒྱས་དང་ནི་བྱང་ཆུབ་སེམས་དཔའ་དང་། །འཕགས་པ་གཞན་

རྣམས་ཀྱི་ཡང་དགེ་བ་གང་། །མ་ལུས་བདག་གིས་དེ་དག་ཡི་རངས་ནས། །བླ་མེད་ཡང་དག་བྱང་ཆུབ་ཕྱིར་བསྔོའོ། །སྤྲོས་མེད་ཐུགས་ནི་ཟླ་བ་ལྟ་བུ་སྟེ། །མཐའ་ཡས་དོན་དུ་ཐབས་ཀྱི་སྐུ་ཆེན་པོ། །རྟག་ཏུ་བདག་གི་ཡིད་དང་དབྱེར་མེད་པ། །བདེ་བར་གཤེགས་པ་རྟག་ཏུ་སྐྱབས་
སུ་མཆི། །རྟོག་པ་ཀུན་ལས་ངེས་པར་གྲོལ་བ་ཡི། །དམ་པ་མ་ལུས་ཀུན་གྱི་ཕུན་ཚོགས་རྟེན། །དངོས་པོ་ཀུན་གྱི་ངོ་བོ་གཅིག་པ་པོ། །ཆོས་ལ་བདག་ནི་རྟག་ཏུ་སྐྱབས་སུ་མཆི། །བཅིངས་པ་མ་ལུས་རྣམ་པར་སྤངས་པ་ཡི། །དཔལ་ལྡན་སྙིང་རྗེ་མཆོག་གིས་རབ་དྲངས་
པ། །རབ་ཏུ་དགའ་ལ་སོགས་པ་རབ་གནས་པའི། །འདུལ་བའི་དབང་པོའི་ཚོགས་ལ་ཕྱག་འཚལ་ལོ། །བསམ་པ་དག་པས་རྣམ་སྨིན་དག་པ་ཡིས། །སྒྲིབ་པའི་བག་ཆགས་མ་ལུས་ཀུན་བཅོམ་སྟེ། །མི་འཕྲོག་པ་ཡིས་བརྒྱན་པའི་
སེམས་ཀྱིས་ཀྱང་། །བྱང་ཆུབ་ཏུ་ནི་སེམས་ནི་བསྐྱེད་པར་བགྱི། །སྲས་དང་ལྡན་པའི་བདེ་བར་གཤེགས་པ་ཡི། །ཐུན་མོང་ལམ་སྟེ་ཕ་རོལ་ཕྱིན་པ་བཅུ། །རྫོགས་སངས་རྒྱས་ཀྱི་བདག་ཉིད་ཡིད་ཀྱིས་ནི། །ད་ལྟར་འདིར་ནི་བདག་གིས་བསྟན་པར་བྱ། །སྡུག་བསྔལ་
ལ་གནས་སེམས་ཅན་རྣམས། །སྙིང་རྗེས་ཡང་ནི་དམིགས་བྱས་ཏེ། །བྱང་ཆུབ་སེམས་ནི་དཔག་མེད་པ། །རིན་ཆེན་བདག་གིས་བསམ་པར་བྱ། །རང་བཞིན་མེད་ཕྱིར་སྟོང་པ་ཉིད། །རྒྱུ་མེད་པས་ན་མཚན་མ་མེད། །རྗེས་སུ་དཔག་པ་དང་བྲལ་བས། །སྨོན་མེད་ཉིད་དུ་ངེས་
པའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། སྔགས་དེས་བདག་གཞན་དངོས་པོ་ཀུན། །གཅིག་བྱས་དེ་ཉིད་གསུམ་མཚན་མ། །དགྱེས་མཛད་ཡས་མར་སྦྲེངས་པ་ཡི། །མདུན་གྱི་མཁའ་ལ་བསམ་པར་བྱ། །སྟོང་ལས་ཉི་དཀྱིལ་ཧཱུྃ་ནག་ལས། །རྡོ་རྗེ་ཟེར་འཕྲོས་ཕྱི་
རོལ་བཅད། །འོག་དང་ཕྱོགས་མཚམས་སྟེང་སྤྲོས་པས། །ས་གཞི་ར་བ་བླ་རེར་བསྐྱེད། །བྷྲཱུྃ་འཁོར་རྩིབས་བཅུ་འོད་ཟེར་དྲག །པད་ཉིར་ཁྲོ་བོ་འཁོར་ལོར་བསྒོམ། །དེ་དབུས་ཧཱུྃ་མཛད་རྟག་པ་སོགས། །གནས་འགྱུར་དེ་ལས་ཆོས་འབྱུང་བསྐྱེད། །གྲུ་གསུམ་དཀར་པོ་

གྱེན་ལ་གནས། །སྣ་ཚོགས་འོད་ཟེར་ཕྱོགས་བཅུར་འཕྲོ། །ནམ་མཁའི་དཀྱིལ་དུ་པདྨ་དང་། །སྣ་ཚོགས་རྡོ་རྗེ་བསམ་པར་བྱ། །དེ་དབུས་ཟླ་སྟེང་བྷྲཱུྃ་ལས་སྐྱེས། །འཁོར་ལོ་བྷྲཱུྃ་མཚན་ལས་བྱུང་བ། །རིག་མ་དང་བཅས་སྣང་མཛད་ལས། །གྱུར་
པའི་ཁང་པ་བརྩེགས་པ་བསྒོམ། །གྲུ་བཞི་ལ་སོགས་ཡོན་ཏན་ལྡན། །སྣ་ཚོགས་པདྨ་བཅུ་དགུའི་སྟེང་། །ཉི་མའི་གདན་ནི་བདུན་དག་དང་། །ཟླ་བའི་གདན་ནི་བཅུ་གཉིས་བསྐྱེད། །དེ་ཉིད་གསུམ་གནས་སེམས་པ་བས་པས། །བདེ་གཤེགས་རྣམས་ཀྱིས་དེ་ལ་
གཟིགས། །རང་གི་ཁམས་སུ་ཤེས་རབ་ཐབས། །དབྱངས་ཡིག་བདེ་བའི་ཡི་གེར་འགྱུར། །དབུ་རྩེ་ལས་བྱོན་ཡེ་ཤེས་སེམས། །འདྲེས་གྱུར་རྟེན་བབས་ཟླ་གཉིས་གྱུར། །འདུ་ཞིང་འཕྲོ་བའི་སྦྱོར་བ་ལས། །གཅིག་ཏུ་གྱུར་པ་བསམ་པའོ། །དེ་ལས་ཧཱུྃ་དཀར་
ལས་བྱུང་བ། །རྡོ་རྗེ་རྩེ་ལྔ་མེ་ཤེལ་གཟུགས། །ཕྱོགས་ཀུན་འོད་ཟེར་འཕྲོ་བསམས་ནས། །ཧཱུྃ་བཅས་ལྡན་པས་ང་རྒྱལ་བྱ། །ཨོཾ་བཛྲ་ཨཱཏྨ་ཀོ྅ཧཾ། དེ་ལས་འཕྲོས་པ་བདེ་གཤེགས་ཀྱིས། །འགྲོ་བ་སངས་རྒྱས་ཉིད་དུ་བྱས། །སླར་འདུས་ཐུགས་ཀྱི་རྡོ་རྗེ་ལས། །
བཙུད་ནས་བདག་ལ་ང་རྒྱལ་བྱ། །ཨོཾ་ཡ་ཐཱ་སརྦ་ཏ་ཐཱ་ག་ཏ་སྟ་ཐཱ་ཨ་ཧཾ། ས་བོན་གསང་གསུམ་རྡོ་རྗེར་གྱུར། །གཅིག་གྱུར་རྡོ་རྗེ་སེམས་དཔའ་མཆོག །འགྲོ་ཀུན་རོ་མཉམ་གཅིག་པ་པོ། །ཀུན་དུ་བཟང་པོ་བསྒོམ་པར་བྱ། །སྐུ་དང་དབུས་ཞལ་ཟླ་ནོར་འདྲ། །གཡས་གནག་
གཡོན་ནི་དམར་པོ་ལ། །རིན་ཆེན་སྣ་ཚོགས་རྒྱན་ལྡན་པའི། །ཕྱག་གཉིས་རང་སྣང་ཤེས་རབ་འཁྱུད། །གཡས་གཉིས་རྡོ་རྗེ་རལ་གྲི་སྟེ། །གཡོན་གཉིས་རིན་ཆེན་པདྨའོ། །མཚོན་བྱེད་མཚན་མ་དབུ་རྒྱན་ལ། །མི་བསྐྱོད་པ་ཡིས་བརྒྱན་པར་བསྒོམ། །དེ་ནས་འདོད་
ཆགས་ཆེན་པོ་ཡིས། །འདུས་པའི་འཇིག་རྟེན་གཟིགས་གྱུར་ནས། །སྦྱོར་བའི་སྒྲ་ཡིས་རང་ལུས་ལ། །རྣམ་སྣང་ལ་སོགས་གཞུག་པར་བྱ། །དེ་ནི་སྤྱན་མ་ལ་སོགས་དང་། །གཟུགས་ལ་སོགས་པ་ཡུལ་གྱི་བདག །རྣམ་པ་དགུ་ནི་སྤྲོ་བྱས་ནས། །རང་གི་ཤེས་རབ་

ཉིད་ལ་ཐིམ། །ཤེས་རབ་དེ་ཡི་པད་དཀྱིལ་དུ། །བདེ་ལས་སྤྲུལ་པའི་འཁོར་ལོ་བསྐྱེད། །གཟིགས་གྱུར་འགྲོ་བ་མ་ལུས་པ། །སྣོད་དུ་རུང་ཕྱིར་གཞུག་པར་བྱ། །རང་གི་ས་བོན་འོད་ཟེར་གྱིས། །ནམ་མཁའ་ཁྱབ་པའི་བདེ་གཤེགས་རྣམས། །ཟླ་བ་ལྟ་བུར་ཞུ་བྱས་
པས། །དེ་རྣམས་དག་ཕྱིར་དབང་བསྐུར་བྱ། །དེ་ཡི་སྟོབས་ཀྱིས་དེ་དག་རྣམས། །བདེ་དང་ཡིད་བདེ་ཐོབ་པ་དང་། །ཐ་མལ་ཕུང་སོགས་བཤིགས་པའི་ཕྱིར། །ཟླ་བ་ལྟ་བུར་ཞུ་བའོ། །དེ་ལ་མིག་ལ་སོགས་པ་རྣམས། །ཀྵཾ་ཛཾ་ཁཾ་གཾ་སྐཾ་སཾ་གྱུར། །དེ་བཞིན་གཟུགས་
ལ་སོགས་པ་རྣམས། །ཛཿཧཱུྃ་བཾ་ཧོཿཁཾ་རཾ་གྱུར། །ས་ལ་སོགས་པའི་རང་བཞིན་དག །ལཾ་མཾ་པཾ་ཏཾ་དུ་ནི་གྱུར། །གཟུགས་སོགས་ཕུང་པོའི་བདག་ཉིད་རྣམས། །བུཾ་ཨཱཾ་ཛཾ་ཁཾ་ཧཱུྃ་དུ་གྱུར། །དེ་ལས་མཚན་མ་དེ་ཡིས་མཚན། །དེ་རྣམས་ས་སྙིང་ལ་སོགས་པར། །ཁམས་ཀུན་
འདས་པར་བྱས་ནས་སུ། །དྲིས་ཤིང་རྟོགས་ཕུལ་མི་སྨྲ་འདུག །དེ་ནི་པདྨའི་གཞལ་ཡས་ནས། །ཕྱི་རོལ་ཕྱུང་ནས་བསྟོད་ནས་ནི། །སྣ་ཚོགས་པ་ཡི་གཟུགས་ཀྱིས་སོ། །རང་རང་ཁམས་སུ་འཕྲོས་པར་བསམ། །དེ་ནས་བར་མའི་སེམས་ཅན་རྣམས། །སྐར་མ་ལྷུང་
ཞིང་ཞལ་ཞུགས་ནས། །རྡོ་རྗེར་ཕྱུང་ནས་པདྨར་གནས། །ཤེས་རབ་ཆགས་པས་དེ་ཞུ་བྱེད། །དེ་ཡི་འོད་ཟེར་དམར་འཕྲོས་པས། །ཡབ་ཡུམ་བྱང་ཆུབ་སེམས་སུ་ཞུ། །དེ་ལས་བྱུང་བའི་སྤྱན་ལ་སོགས། །གླུ་ཡིས་བསྐུལ་ནས་ཐིམ་པར་བྱེད། །སེམས་ཅན་ཁམས་ན་གནས་ཀྱི་
དབང་ཕྱུག་ཁྱོད་ནི་རྡོ་རྗེའི་ཐུགས། །དགའ་བའི་ཡིད་འོང་དོན་ཆེན་འདོད་པ་བདག་ལ་བསྐབ་ཏུ་གསོལ། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །སེམས་ཅན་ཡབ་ཆེན་གཉེན་མཆོག་བདག་ལ་དགྱེས་པར་མཛད་དུ་གསོལ། །རྡོ་རྗེ་སྐུ་ཁྱོད་
བཀའ་ཡི་འཁོར་ལོས་སེམས་ཅན་ཀུན་ལ་ཕན། །སངས་རྒྱས་དོན་དུ་བྱང་ཆུབ་མཆོག་ཏུ་རབ་ཏུ་ཕན་པར་གཟིགས། །མགོན་པོ་གལ་ཏེ་བདག་ནི་དེ་རིང་གསོན་པར་མཆིས་བཞེད་ན། །སྤྱོད་པ་དྲི་མེད་ཀུན་དུ་བཟང་པོས་བདག་ལ་དགྱེས་པར་མཛོད། །ཁྱོད་ནི་རྡོ་རྗེ་གསུང་

སྟེ་ཀུན་ལ་ཕན་ཞིང་ཐུགས་བརྩེ་བ། །འཇིག་རྟེན་དག་གི་དགོས་པའི་དོན་མཛད་པ་ལ་རྟག་ཏུ་བརྩོན། །མགོན་པོ་གལ་ཏེ་བདག་ནི་དེ་རིང་གསོན་པར་མཆིས་བཞེད་ན། །སྤྱོད་པ་དྲི་མེད་ཀུན་དུ་བཟང་པོས་བདག་ལ་དགྱེས་པར་མཛོད། །ཁྱོད་ནི་རྡོ་རྗེ་
འདོད་པ་དམ་ཚིག་མཆོག་གི་ཕན་ཡོན་ཆེ། །ཡང་དག་རྫོགས་སངས་རྒྱས་ཀྱི་གདུང་མཆོག་མཉམ་པ་ཉིད་གཟིགས་ལ། །མགོན་པོ་གལ་ཏེ་བདག་ནི་དེ་རིང་གསོན་པར་མཆིས་བཞེད་ན། །ཡོན་ཏན་རིན་ཆེན་མང་པོའི་གཏེར་གྱུར་བདག་ལ་དགྱེས་པར་མཛོད། །ཀླུ་འདི་
ཡིས་ནི་དོན་བྱས་ནས། །ཞུ་བ་ཕུན་སུམ་ཚོགས་བྲལ་བ། །ཟླ་ཉིར་གྱུར་ཏེ་ཡི་གེ་ཧཱུཾ། །རྡོ་རྗེ་སྔོན་པོ་ཅུང་ཟད་གདེངས། །དེས་མཚན་བཤེས་གཉེན་ཞུ་བྱས་པས། །སྐུ་དང་ཞལ་དབུས་མཐིང་ཀའི་མདོག །གཡས་དཀར་གཡོན་ནི་དམར་པོ་ལ། །དམ་པ་དང་
པོའི་མཚན་མར་ལྡན། །དམ་པ་མ་ཡིན་རྣམ་རྟོག་རྣམས། །སྟོང་པ་ཉིད་དུ་བསམ་བྱས་ཏེ། །མྱ་ངན་འདས་པ་ཞེན་སྤང་ཕྱིར། །ཆོས་ཀྱི་དབྱིངས་སུ་བྱིན་གྱིས་བརླབས། །ཨོཾ་དྷརྨ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ། ས་སྙིང་རྡོ་རྗེ་ནམ་མཁའ་དང་། །དབང་ཕྱུག་སྒྲིབ་
སེལ་ཀུན་བཟང་རྣམས། །ཀྵིཾ་ལ་སོགས་པའི་རིམ་པ་ཡིས། །མིག་ལ་སོགས་པར་དགོད་པར་བྱ། །དེ་བཞིན་སྙིང་མགྲིན་མགོ་ཟླ་ལ། །ཧཱུཾ་ཨཱཿཨོཾ་ལས་སྐྱེས་པ་ཡི། །ལྟེ་བར་ཐུགས་རྡོ་རྗེ་སོགས་བསྐྱེད། །དེ་རྣམས་ཐུགས་ཀ་ནས་བྱུང་བའི། །གཟུགས་ཀྱི་
རྡོ་རྗེ་སོགས་འོད་ཀྱིས། །མ་ལུས་རྡོ་རྗེ་བསམ་མཆོད་ནས། །བྱིན་གྱིས་བརླབ་ཕྱིར་གསོལ་བ་བཏབ། །དཔལ་ལྡན་ཐུགས་ནི་རྡོ་རྗེ་འཆང་། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ཐུགས་ཅན་མཛད་དུ་གསོལ། །ཕྱོགས་
བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ཐུགས་ཅན་མཛད་དུ་གསོལ། །ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་བཛྲ་ཨཱཏྨ་ཀོ྅ཧཾ། ཆོས་ཀྱི་གསུང་ལམ་དཔལ་དང་ལྡན། །རྡོ་རྗེ་

མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་གསུང་དང་འདྲ་བར་མཛོད། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་གསུང་ཅན་མཛད་དུ་
གསོལ། །ཨོཾ་སརྦ་ཏ་ཐཱ་ག་ཏ་ཝཱ་ཀ་བཛྲ་སྭ་བྷཱ་ཝ་ཨཱཏྨ་ཀོ་྅ཧཾ། དཔལ་ལྡན་སངས་རྒྱས་སྐུ་འཆང་བ། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་སྐུ་དང་ལྡན་པར་མཛོད། །ཕྱོགས་བཅུར་བཞུགས་པའི་སངས་རྒྱས་རྣམས། །
རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་སྐུ་ཅན་མཛད་དུ་གསོལ། །ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཡེ་ཤེས་སེམས་དཔའི་ས་བོན་གྱི། །འོད་ཀྱིས་ཕྱོགས་བཅུའི་མགོན་པོ་བསྐུལ། །དེ་ཡི་འོད་ཟེར་ལས་
བྱུང་བའི། །སྤྱན་ལ་སོགས་པ་མཆོག་རྣམས་ཀྱི། །བདུད་རྩི་ལྔ་ཡིས་ཆུས་གང་བའི། །བུམ་པས་དབང་བསྐུར་བཀྲ་ཤིས་སྒྲ། །རྔ་དུང་དྲིལ་སོགས་རོལ་མོའི་སྒྲ། །དབུ་རྒྱན་རྡོ་རྗེ་འཆང་ལྡན་བྱ། །དེ་བཞིན་ཟླ་བ་གཉིས་ལ་སོགས། །འགྲོ་བའི་དབང་བསྐུར་མ་
གཏོགས་པ། །ཐམས་ཅད་སྔོན་བཞིན་བཤེས་གཉེན་དང་། །གཟུགས་ཀྱི་ཁྱད་པར་ཤེས་བྱས་ནས། །བྱིན་གྱིས་བརླབ་ཅིང་མིག་ལ་སོགས། །ས་སྙིང་སོགས་བཀོད་རྡོ་རྗེ་གསུམ། །གནས་གསུམ་མཚན་ལས་དབུ་རྒྱན་ལ། །རྡོ་རྗེ་འཛིན་པས་མཚན་པའོ། །མགོ་
སྙིང་ལྟེ་བ་གསང་རྐང་པར། །ཨོཾ་ཧཱུྃ་སྭཱ་ཨ་ཧཱ་རྣམས་སམ། །ཆ་ཤས་ངོ་བོ་ཉིད་ཀྱིས་ནི། །སངས་རྒྱས་ལྔ་ཡིས་དགང་བར་བྱ། །ཧཱུྃ་ལས་རྡོ་རྗེ་ཆུ་སྐྱེས་ནི། །རྩེ་ལྔ་འདབ་བརྒྱད་བསམ་པར་བྱ། །ཨོཾ་ལས་ནོར་བུ་གེ་སར་བསྐྱེད། །ཕཊ་ཀྱིས་གཉིས་ཀྱི་ལམ་འགོགས་པའོ། །
མཚན་ཉིད་ལྔ་དང་ལྡན་བསམས་ནས། །བདེ་མཆོག་མྱོང་བར་བྱ་བའི་ཕྱིར། །རང་གི་ཤེས་རབ་ལ་ཞུགས་ནས། །དབང་པོ་གཉིས་སྦྱར་རྗེས་ཆགས་བྱས། །ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་བཛྲ་སྭ་བྷཱ་བ་ཨཱཏྨ་ཀོ྅ཧཾ། སྦྱོར་བ་དང་པོའི་ཏིང་འཛིན་ནོ། །ཐུགས་ཀའི་ས་བོན་འོད་ལྕགས་

ཀྱུས། །སངས་རྒྱས་འཁོར་ལོ་མཁའ་ཁྱབ་པ། །ཞལ་ཞུགས་ཞུ་གྱུར་རྡོ་རྗེར་ཕྱུང་། །པད་གནས་ཟླ་བ་ལྟ་བུའི་གཟུགས། །དེ་ལས་ས་བོན་ཧཱུྃ་བཅུ་དགུ། །མི་བསྐྱོད་པ་ཡི་འཁོར་ལོ་མཆོག །གསལ་བར་བསམས་ནས་འགྲོ་བ་ཀུན། །ཕན་
ཕྱིར་རིམ་གྱིས་དབྱུང་བར་བྱ། །བཛྲ་དྷྲྀཀ་གིས་རབ་བསྐུལ་ལ། །གོང་མ་ལྟ་བུའི་མི་བསྐྱོད་པ། །སངས་རྒྱས་མཛད་པ་བྱས་ནས་སུ། །འདུས་ནས་བདག་ལ་ཞུགས་པར་བསམ། །ཛི་ནི་ཛིཀ་གིས་རྣམ་སྣང་དབྱུང་། །དཀར་ནག་དམར་པོ་ཕྱག་དྲུག་པ། །འཁོར་ལོ་
རལ་གྲི་རིན་ཆེན་པད། །འདུས་ནས་ཤར་གྱི་ཟླ་བར་བསམ། །རཏྣ་དྷྲྀཀ་གིས་རིན་ཆེན་དབྱུང་། །སེར་ནག་དཀར་པོ་ཕྱག་དྲུག་པ། །རིན་ཆེན་རལ་གྲི་འཁོར་ལོ་པད། །འདུས་ནས་ལྷོ་ཡི་ཉི་མར་བསམ། །ཨཱ་རོ་ལྀཀ་གིས་འོད་དཔག་མེད། །དམར་ནག་དཀར་པོ་
ཕྱག་དྲུག་པ། །པདྨ་རལ་གྲི་རིན་ཆེན་འཁོར། །སླར་འདུས་ནུབ་ཀྱི་ཉི་མར་བསམ། །པྲཛྙཱ་དྷྲྀཀ་གིས་དོན་ཡོད་གྲུབ། །ལྗང་ནག་དཀར་པོ་ཕྱག་དྲུག་པ། །རལ་གྲི་འཁོར་ལོ་རིན་ཆེན་པད། །འདུས་ནས་བྱང་གི་ཉི་མར་བསམ། །དང་པོ་རང་གི་རིག་མ་འཁྱུད། །རྒྱན་
ཀུན་བརྒྱན་པའི་ན་བཟའ་དང་། །རིན་ཆེན་སྣ་ཚོགས་དབུ་རྒྱན་ཅན། །གདན་ལྟར་འོད་ཀྱི་དཀྱིལ་འཁོར་ལོ། །མོ་ཧ་ར་ཏིས་སྤྱན་མ་དབྱུང་། །སྐུ་ཡི་རྡོ་རྗེ་དང་འདྲ་བ། །འཁོར་ལོ་རལ་གྲི་རིན་ཆེན་པད། །སླར་འདུས་ཤར་ལྷོར་ཟླ་བར་བསམ། །དྭེ་ཥ་ར་ཏིས་མཱ་མ་ཀཱི། །
ཐུགས་ཀྱི་རྡོ་རྗེ་དང་འདྲ་བ། །ཨུཏྤལ་རལ་གྲི་རིན་ཆེན་པད། །འདུས་ནས་ལྷོ་ནུབ་ཟླ་བར་བསམ། །རཱ་ག་ར་ཏིས་གོས་དཀར་མོ། །གསུང་གི་རྡོ་རྗེ་དང་འདྲ་བ། །པད་རལ་གྲི་རིན་ཆེན་འཁོར། །འདུས་ནས་ནུབ་བྱང་ཟླ་བར་བསམ། །བཛྲ་ར་ཏིས་སྒྲོལ་མ་དབྱུང་། །རིན་
ཆེན་དབང་ཕྱུག་དང་འདྲ་བ། །ཨུཏྤལ་འཁོར་ལོ་རིན་ཆེན་པད། །སླར་འདུས་བྱང་ཤར་ཟླ་བར་བསམ། །ཨོཾ་ཨཱཿཧཱུཾ་གིས་ལྷ་མོ་དྲུག །གོ་རིམས་བཞིན་དུ་དབྱུང་བར་བྱ། །གཟུགས་ཀྱི་རྡོ་རྗེ་རྣམ་སྣང་འདྲ། །མེ་ལོང་རལ་གྲི་རིན་ཆེན་པད། །སྒྲ་ཡི་རྡོ་རྗེ་མི་བསྐྱོད་འདྲ། །

པི་ཝཾ་རལ་གྲི་རིན་ཆེན་པད། །དྲི་ཡི་རྡོ་རྗེ་རིན་ཆེན་འདྲ། །དུང་དང་རལ་གྲི་རིན་ཆེན་པད། །རོ་ཡི་རྡོ་རྗེ་མཐའ་ཡས་འདྲ། །སྣོད་དང་རལ་གྲི་རིན་ཆེན་འཁོར། །རེག་གི་རྡོ་རྗེ་དོན་ཡོད་འདྲ། །གོས་དང་རིན་ཆེན་འཁོར་ལོ་པད། །ཆོས་དབྱིངས་རྡོ་རྗེ་སེམས་དཔའ་འདྲ། །ཆོས་
འབྱུང་རལ་གྲི་རིན་ཆེན་པད། །མེ་མཚམས་ལ་སོགས་གྲྭ་བཞི་དང་། །ཤར་སྒོ་གཡས་གཡོན་ཟླ་སྟེང་བསམ། །ཡ་མཱནྟ་ཀྲྀཏ་གཤིན་རྗེའི་གཤེད། །མི་བསྐྱོད་ལྟ་བུ་ཕྱག་དྲུག་པ། །ཐོ་བ་རལ་གྲི་རིན་ཆེན་པད། །ཤར་སྒོར་ཁྲོ་དཀྱིལ་ཉི་དབུས་དགོད། །པྲཛྙཱནྟ་ཀྲྀཏ་
ཤེས་མཐར་བྱེད། །སྣང་མཛད་ལྟ་བུ་ཕྱག་དྲུག་པ། །དབྱུག་པ་རལ་གྲི་རིན་ཆེན་པད། །ལྷོ་སྒོར་ཉི་དབུས་ཉི་འོད་འབར། །པདྨནྟ་ཀྲྀཏ་རྟ་མགྲིན་ནི། །མཐའ་ཡས་ལྟ་བུ་ཕྱག་དྲུག་པ། །པདྨ་རིན་ཆེན་རལ་གྲི་འཁོར། །ནུབ་སྒོར་ཉི་དཀྱིལ་ཁྲོ་དཀྱིལ་བསམ། །བིགྷྣནྟ་ཀྲྀཏ་
བདུད་རྩི་འཁྱིལ། །མི་བསྐྱོད་ལྟ་བུ་ཕྱག་དྲུག་པ། །རྡོ་རྗེ་རལ་གྲི་རིན་ཆེན་པད། །བྱང་སྒོར་ཉི་དབུས་ཁྲོ་དཀྱིལ་བསམ། །དེ་རྣམས་རྒོད་དང་གདངས་པ་དང་། །མཆེ་བ་གཙིགས་དང་བཞད་བྱེད་པ། །དབུ་སྐྲ་དམར་སེར་གྱེན་དུ་བརྗེས། །སྟག་ལྤགས་སྨད་གཡོགས་དང་ལྡན་
པ། །གཏུམ་པའི་སྦྲུལ་གྱིས་བརྒྱན་པ་ཡི། །དང་པོས་རིག་མ་འཁྱུད་པ་དང་། །མེ་ཡི་འོད་ཀྱི་འཁོར་ལོ་ནང་། །གཏུམ་པོ་རབ་ཏུ་བསམ་པའོ། །དེ་ལྟར་དངོས་པོ་ཐམས་ཅད་ཀྱིས། །རྫོགས་པའི་དཀྱིལ་འཁོར་མཐོང་ནས་སུ། །ས་བོན་འོད་ཟེར་ལྕགས་ཀྱུ་ཡིས། །གཤིན་རྗེ་
གཤེད་བསྐུལ་འཁོར་ལོ་དགུག །དེ་དང་ལྷན་ཅིག་འོངས་པའི་བགེགས། །བསྐྲད་ནས་བསྲུང་བྱས་ཁྲོ་བོ་ཐིམ། །བདེ་བས་རྒྱས་པའི་དཀྱིལ་འཁོར་ནི། །མདུན་དུ་དམིགས་ལ་མཆོད་པར་བྱ། །དུང་གི་ཆུ་ཡིས་བསང་གཏོར་དང་། །ཀུན་དས་ཁ་བཀང་ཆུས་ཉེ་རེག །མཆོད་
ཡོན་སྣོད་ཀྱིས་མཆོད་ཡོན་དང་། །མཐའ་སོགས་དབྱེ་བས་ཞབས་བསིལ་ལོ། །དེ་བཞིན་ཁྲོ་བོ་གཞན་བསྐུལ་བས། །འོད་ཟེར་གྱིས་ནི་གཞུག་པ་དང་། །བཅིང་དང་རྗེས་སུ་དགྱེས་བསྐྱེད་ང་། །ཆོས་ཀྱི་དབྱིངས་སུ་བྱིན་གྱིས་བརླབ། །མོས་པས་མིག་ལ་སོགས་པ་རྣམས། །

རྡོ་རྗེ་གསུམ་ནི་གནས་གསུམ་བཀོད། །སྔ་མ་བཞིན་དུ་དབང་བསྐུར་བས། །རིགས་ཀྱི་དབང་བསྐུར་གཞག་པའོ། །སངས་རྒྱས་བཞི་པོ་མི་བསྐྱོད་པ། །ལྷ་མོ་རང་རང་བདག་པོས་བརྒྱན། །རྣམ་སྣང་མི་བསྐྱོད་སྣང་མཐའ་ཡས། །མི་བསྐྱོད་སྒོ་སྲུང་
མཚན་མའོ། །ས་བོན་འོད་ཀྱིས་ལྷ་མོ་བཀུག །ཞལ་ཞུགས་ཞུ་གྱུར་རྡོ་རྗེར་ཕྱུང་། །པད་ནང་ལཾ་མཾ་པཾ་ཏཾ་དང་། །ཛཿཧཱུྃ་བཾ་ཧོཿཁཾ་རཾ་གྱུར། །དེ་ཡི་འོད་ཀྱིས་བཅུ་པོ་དགུག །རང་རང་ས་བོན་ལ་ཞུགས་པས། །ནུས་དང་ལྡན་པར་རབ་བྱས་ནས། །ཤེས་རབ་བ་སྤུའི་བུ་གར་སྤྲོ། །
འོད་རྩེ་གཟུགས་རྡོ་རྗེ་སོགས་ནི། །རང་རང་མཚན་མས་རྣམ་མཛེས་པའི། །དྲི་མེད་རྒྱན་གྱིས་བརྒྱན་པའི་སྐུ། །སྒྱུ་མ་ལྟ་བུར་སྤྲོ་བར་བྱ། །དེ་བཞིན་ཕྱི་ཡི་གདུགས་ལ་སོགས། །འོད་རྩེ་ལས་སྤྲོ་ནམ་མཁའི་ཁམས། །བཀང་སྟེ་བདག་དང་འཁོར་ལོ་ལ། །མཆོད་པར་བྱས་ཏེ་
མཆོད་པ་དང་། །མཆོད་པ་པོ་དང་མཆོད་གནས་གསུམ། །རྨི་ལམ་ལྟ་བུར་ཤེས་བྱའི་ཕྱིར། །ཐ་དད་ལས་ནི་གྲོལ་བྱས་ནས། །སྔགས་ཀྱིས་བྱིན་གྱིས་བརླབ་པར་བྱ། །ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་ནས་བྲག་ཅའི་སྒྲ་ལྟ་བུར། །སྒྲ་ཡུལ་ཐམས་ཅད་
རབ་བསམས་ནས། །རྡོ་རྗེ་དྲིལ་བུ་བདེ་དབྱངས་ཀྱིས། །རང་ཉིད་ལྷ་ཡིས་བསྟོད་པར་བསྒོམ། །མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁའ་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །གསང་བའི་དབྱིངས་ལ་ཕྱག་འཚལ་བསྟོད། །རྣམ་པར་སྣང་མཛད་
དགའ་ཆེན་པོ། །རྡོ་རྗེ་ཞི་བ་དགའ་བ་ཆེ། །རང་བཞིན་གྱིས་ནི་འོད་གསལ་མཆོག །སྟོན་པ་རྡོ་རྗེ་ཕྱག་འཚལ་བསྟོད། །རིན་ཆེན་རྒྱལ་པོ་རབ་ཏུ་ཟབ། །རྡོ་རྗེ་ནམ་མཁའ་དྲི་མ་མེད། །དངོས་ཉིད་དག་པས་གོས་པ་མེད། །རྡོ་རྗེ་སྐུ་ལ་ཕྱག་འཚལ་བསྟོད། །རྡོ་རྗེ་དཔག་མེད་རྒྱལ་པོ་ཆེ། །
མི་རྟོགས་ནམ་མཁའ་རྡོ་རྗེ་འཛིན། །འདོད་ཆགས་ཕ་རོལ་ཕྱིན་པ་བརྙེས། །རྡོ་རྗེ་གསུང་ལ་ཕྱག་འཚལ་བསྟོད། །དག་པ་རྡོ་རྗེ་གདོན་མི་ཟ། །བསམ་པ་ཐམས་ཅད་ཡོངས་རྫོགས་པ། །རང་བཞིན་དག་པ་ཉིད་ལས་བྱུང་། །རྡོ་རྗེ་སེམས་དཔའ་ཕྱག་འཚལ་བསྟོད། །རླུང་དང་

མེ་ཡི་དཀྱིལ་འཁོར་ནས། །པདྨ་བྷནྡྷར་བདུད་རྩི་ལྔ། །ཟླ་བ་ཉི་མར་ཡི་གེ་ལྔ། །བསམས་ནས་འོད་ཟེར་སྤྲོ་བྱའོ། །རྟག་སོགས་བཀུག་ནས་ས་བོན་དགུག །བཞུ་ཞིང་བསྐོལ་བས་རླངས་ནས་ཧཱུྃ། །དེ་བྱུང་རྡོ་རྗེ་ཞུ་བྱས་ནས། །ཕྲེང་བའི་རྒྱུན་དུ་དབབ་པར་བྱ། །ཨོཾ་གྱིས་
བསིལ་བར་བྱས་ནས་སུ། །ལྷ་རྣམས་ཕྱག་ཏུ་སྤྲོས་བྱས་ལ། །ལྕེ་ཧཱུྃ་ལས་བྱུང་རྡོ་རྗེ་བཀོད། །སྙིང་ཟླའི་འཁོར་ལོ་ཚིམ་པར་བྱ། །དཀྱིལ་འཁོར་རྒྱལ་བ་མཆོག་ཅེས་བྱ་བའི་ཏིང་ངེ་འཛིན་ཏོ། །ཡེ་ཤེས་སེམས་དཔའི་ཐུགས་འོད་ཀྱིས། །ཐུབ་པའི་དབང་པོས་ཀུན་
རྟོག་སྤངས། །འགྲོ་ཀུན་སངས་རྒྱས་ཉིད་བྱས་ནས། །ས་བོན་ལ་ནི་ཐིམ་པར་བྱ། །ཐུགས་ཀའི་མཚན་མ་ནང་གནས་པ། །ཉི་མའི་དབུས་ཀྱི་ཡི་གེ་ཧཱུྃ། །འོད་ཟེར་རྣམ་པ་ལྔ་ལྡན་པའི། །ཙ་ནའི་འབྲུ་ཙམ་ཐིག་ལེར་བསམ། །དེ་ཡི་འོད་ཀྱིས་གནས་ལ་སོགས། །རྡོ་རྗེ་
མཆོག་གསུམ་གསལ་བྱས་ནས། །བཞག་སྟེ་ཐིག་ལེ་ལྟ་བུ་རུ། །རང་གི་སེམས་ཉིད་ཞུགས་པར་བྱ། །དེ་མ་ཐག་ཏུ་ཏིང་འཛིན་གསུམ། །གྲུབ་པ་རབ་ཏུ་བསམ་བྱས་ནས། །དེ་ཡི་གསུམ་པ་ལས་སྤྲོ་ཞིང་། །ཐིག་ལེ་ཡན་ཆད་གསལ་བར་བྱ། །གཞན་པ་
བ་སྤུ་ལས་སྤྲོ་ཞིང་། །དཀྱིལ་འཁོར་རྟེན་ལ་སོགས་པ་ནས། །ཁམས་ཀུན་བཀང་ནས་མཐའ་ལ་བསྡུ། །དེ་རིམ་ཡང་ནི་སྤྲོ་བསྡུ་བྱ། །ཡང་ནི་ས་བོན་འོད་ཀྱིས་ནི། །བདེ་གཤེགས་དགུག་གཞུག་ཞུ་གྱུར་ནས། །རྡོ་རྗེའི་ལམ་ནས་ཕྱུང་ནས་སུ། །ཟེའུ་འབྲུ་བུམ་
པའི་ནང་དུ་དབབ། །དེ་ལས་རྡོ་རྗེ་མཐིང་ཀ་ཆེ། །ནས་ཚད་ལྟེ་བར་རིན་པོ་ཆེ། །ཡུངས་ཀར་ཚད་ཙམ་དབུས་སུ་ཡང་། །རྟེན་བཅས་ཏིང་འཛིན་གསུམ་པོ་བསྒོམ། །རྡོ་རྗེ་རྩེ་ལྔ་ལྕགས་ཀྱུ་ཡིས། །ཕྱུང་སྟེ་སྣ་རྩེར་གནས་པར་བྱ། །རྡོ་རྗེ་ནང་ནས་ཐུར་སེལ་རླུང་། །ཕྱུང་སྟེ་
གནས་བྱ་རྣམ་པ་གཞན། །འདི་ཡི་ཏིང་འཛིན་གསུམ་པ་ལས། །སྤྲོ་བསྡུ་གོང་མ་བཞིན་དུ་བྱ། །དེ་ལ་བཟུང་བས་སྟོབས་ལྡན་ན། །བརྟན་པའི་མཚན་མ་སྐྱེ་བར་འགྱུར། །དེ་སྐྱེས་སྤྲུལ་པ་འཕྲོ་བ་ནི། །སངས་རྒྱས་བྱང་ཆུབ་སེམས་དཔའ་དང་། །རྣམ་པ་སྣ་ཚོགས་ཕྱག་མཚན་

རྣམས། །ཡང་ནས་ཡང་དུ་སྤྲོ་བསྡུ་བྱ། །སྐུ་གསུང་ཐུགས་ཀྱི་རྡོ་རྗེ་དང་། །ཡེ་ཤེས་སེམས་དཔའི་ས་བོན་ལས། །གསང་སྔགས་བཟླས་བརྗོད་སྤྲོ་བྱེད་པ། །རིམ་པའམ་ནི་ཅིག་ཅར་བྱ། །ཨོཾ་སོགས་རེ་རེ་བརྗོད་སྐད་ཅིག །སྐུ་རྡོ་རྗེ་ལ་སོགས་འཁོར་
ལོ། །སྤྲོས་པས་ནམ་མཁའི་ཁམས་བཀང་ནས། །ཡན་ལག་བཅུ་གཉིས་གསུམ་ལྡན་མོས། །ཨོཾ་སོགས་རེ་རེ་བརྗོད་སྐད་ཅིག །མ་བསྐུལ་གཉིས་དང་གོང་མ་ལྟར། །དང་པོས་ཕྱུང་སྟེ་ནམ་མཁའ་ལ། །བཀོད་ནས་གཉིས་པ་གོང་མ་ལྟར། །མཆོད་པའི་ལྷ་མོ་སྤྲོ་བྱས་ནས། །
འཁྱུད་པའི་བདེ་བས་ཐུབ་དབང་རྣམས། །བདེ་ཆེན་དབང་དུ་གྱུར་བྱས་ལ། །གསུམ་པས་ནང་དུ་ཐིམ་པར་བྱ། །རྡོ་རྗེ་དང་ནི་གསལ་བ་དང་། །ལམ་བྱུང་ཆོས་ཀྱི་འཁོར་ལོ་ལས། །སྟེང་དུ་གཡས་གཡོན་གཉི་ག་ལས། །དྲག་དང་དལ་བར་ཤེས་པར་བྱ། །འབྱུང་བ་ཧཱུྃ་སྟེ་འཇུག་པ་ཨོཾ། །
གནས་པ་ཨཱཿསྟེ་དེ་ཉིད་བཟུང་། །ཡེ་ཤེས་ས་བོན་ངོ་བོ་སྟེ། །གཞི་རྣམས་གཅིག་ཏུ་བརྩི་བར་བྱ། །ཉིས་བརྒྱ་ཉི་ཤུ་རྩ་ལྔ་ལས། །བཞི་བསྡུས་བརྒྱ་ཕྲག་དགུ་ཉིད་དོ། །དེ་ནི་ཉི་ཤུ་རྩ་བཞི་རིམ། །ཉི་ཁྲི་ཆིག་སྟོང་དྲུག་བརྒྱའོ། །ཕྲ་མྱུར་རྣམས་ཀྱིས་ངལ་བ་བསལ། །སྤྱན་སོགས་གླུ་
ཡིས་བསྐུལ་བྱས་ནས། །སྔོན་བཞིན་འཁོར་ལོ་མཆོད་བྱ་སྟེ། །སེམས་ཀྱི་གཟེངས་ནི་བསྟོད་བྱ་སྟེ། །ཉམ་ཆུང་སྤྱི་བོར་མཐོ་གང་ཚད། །ཟླ་སྟེང་ཨོཾ་གྱི་བརླན་པ་ཡི། །བདུད་རྩི་ཆོ་ག་བཞིན་ཕབ་པས། །རྡོ་རྗེ་གསུམ་སོགས་ཚིམ་པར་བྱ། །བཾ་ལས་བྱུང་བའི་བུམ་པ་བཟང་། །ཟླ་
གམ་ཕྱེད་ཀྱིས་ཁ་བཅད་པ། །ཐིགས་པ་ཡིད་བཞིན་རིན་པོ་ཆེས། །བརྒྱན་པ་རྐན་གྱི་དབུས་སུ་བསྒོམ། །འོད་ཟེར་ལྔ་ནི་རབ་འབར་བའི། །ཨོཾ་ནི་ལྕེ་ཡི་རྩེ་ལ་བསམ། །དེ་གཟེར་རིམ་པས་དབབ་བྱས་པས། །ནུས་དང་ལྡན་པས་བཀྲེས་སྐོམ་གཞོམ། །བཀྲེས་སྐོམ་ལ་སོགས་
ཉོན་མོངས་ལ། །རྣལ་འབྱོར་དེ་ནི་ཀུན་བརྩམས་ནས། །རྡོ་རྗེ་ཐུགས་ཀྱི་བཀའ་བཞིན་དུ། །སྡུག་བསྔལ་ཐམས་ཅད་འབྱང་བར་འགྱུར། །ཅུང་ཟད་ངལ་སོས་ཡུལ་གཞན་འགྲོ། །གོང་མིའི་ཆོ་གས་བརྟན་བྱའི་ཕྱིར། །རྡོ་རྗེ་གསུམ་སྔགས་མ་ཞེན་པར། །གསང་སྔགས་བཟླས་

བརྗོད་ཡང་བྱའོ། །ལྡང་བར་འདོད་ན་སྔགས་པ་ཡིས། །མཆོད་བསྟོད་བདུད་རྩི་མྱང་བྱས་ལ། །ཨོཾ་ཨཱཿཧཱུྃ་ཉིད་བརྗོད་བྱས་ལ། །དེ་ཉིད་གསུམ་ལ་འཁོར་ལོ་བསྡུ། །ལས་ཀྱི་རྒྱལ་བ་མཆོག་ཅེས་བྱ་བའི་ཏིང་ངེ་འཛིན་ཏོ། །དཔལ་ལྡན་གསང་བ་འདུས་པ་ཡི། །རིག་པའི་
ལྟ་བ་མ་ཐོབ་པའི། །སེམས་ཅན་ཐུགས་རྗེས་གཟུང་བའི་ཕྱིར། །སྨོན་ལམ་འདི་ནི་སྔོན་དུ་བྱ། །དཔལ་དང་ལྡན་པའི་མི་བསྐྱོད་མགོན། །རྣལ་འབྱོར་གྱིས་ཐོབ་དགེ་བ་གང་། །བདེ་ཆེན་ཡེ་ཤེས་རང་བྱུང་ནས། །སེམས་ཅན་ཀུན་མཁྱེན་སར་འགོད་ཤོག །གང་ཞིག་འདི་
མཐོང་འདོད་པའམ། །གང་ཞིག་ཞུ་བར་འདོད་པ་དེས། །ཐུགས་ཀྱི་དབང་ཕྱུག་གྲངས་མེད་པ། །མགོན་པོ་དེ་ནི་མཐོང་བར་ཤོག །ནམ་མཁའ་མཐའ་ཀླས་ཕྱོགས་བཅུ་རུ། །སེམས་ཅན་ཀུན་གྱི་དོན་སྤྱོད་ལ། །ཇི་ལྟར་ཐུགས་ཀྱི་དབང་ཕྱུག་བཞིན། །བདག་གིས་ཀྱང་
ནི་སྤྱོད་པར་ཤོག །ཇི་སྲིད་ཐོག་མ་མེད་པ་ནས། །འཁོར་བ་ཡི་ནི་མཐར་ཐུག་པར། །དེ་སྲིད་སེམས་ཅན་ཕན་པ་ཉིད། །སངས་རྒྱས་སྤྱོད་པ་བདག་སྤྱོད་ཤོག །ཇི་སྲིད་སངས་རྒྱས་སྣ་ཚོགས་རྣམས། །འཇིག་རྟེན་བཤེས་གཉེན་མྱ་ངན་འདས། །དེ་ཡི་བསྟན་པའི་དོན་དུ་ནི། །
བསྐལ་པའི་བསྐལ་པར་བྱེད་པར་ཤོག །རྡོ་རྗེ་འཆང་སོགས་གཟུགས་ཀྱིས་ནི། །བདག་གིས་ཕྱོགས་བཅུར་སྤྲུལ་གྱུར་ཅིག །སྔགས་ཀྱི་ཚུལ་གྱིས་སེམས་ཅན་རྣམས། །དེ་ཚེ་བདག་གིས་འདུལ་གྱུར་ཅིག །ཏིང་འཛིན་ལས་ནི་ལངས་ནས་ནི། །ལྷ་ཡི་ང་རྒྱལ་དང་
ལྡན་པས། །སྤྱོད་ཡུལ་སེམས་ཙམ་ཤེས་བྱས་ལ། །རང་གི་ལྷ་ཡི་གཟུགས་སུ་དམིགས། །ཡང་ན་སྤྱོད་ཡུལ་དེ་དག་ཉིད། །རང་རང་དག་བས་གནས་པའོ། །སོ་སོ་རང་རིག་ཆོས་ཉིད་པས། །རྣམ་སྣང་མཛད་ལ་སོགས་པར་སྣང་། །ཡང་ན་རྡོ་རྗེ་འཛིན་པ་སྟེ། །རང་
ཡིད་དགའ་བར་བྱེད་པའི་ཕྱིར། །དབུགས་རྟོག་སྤངས་ནས་རབ་བསྒོམས་ནས། །གསང་བ་ཆེན་པོ་མཆོད་པའོ། །རང་གི་ཁ་ཟས་ཟ་དུས་སུ། །སྙིང་ཁར་འཁོར་ལོ་རབ་བསྒོམས་ལ། །བདུད་རྩི་ཤ་ཡི་སྦྱོར་བ་ཡིས། །གོང་མ་ལྟ་བུར་སྦྱང་བྱས་ཏེ། །དེ་ཉིད་གསུམ་ནི་

བཟླས་བྱས་ཏེ། །ལྕེ་དང་དབུ་རྒྱན་མཆོག་བསྒོམ་ལ། །ལྷ་རྣམས་མ་ལུས་ཚིམ་པ་ཡི། །བསམ་པས་ནང་གི་སྦྱིན་སྲེག་བྱ། །ཕྱི་རོལ་སྦྱིན་སྲེག་དཔག་པ་ཙམ། །ཡེ་ཤེས་མེ་ནི་འབར་བྱེད་པས། །ཕུང་སོགས་བླུན་པའི་བུད་ཤིང་བསྲེག །བླ་ན་མེད་པར་
བཤད་པའོ། །ཇི་སྐད་གསུངས་པའི་སྡོམ་པར་ལྡན། །ཇི་ལྟར་མྱོང་བར་མཉམ་པར་སྤྱོད། །བློ་དང་ལྡན་པས་དམ་མེད་ལ། །དུས་རིག་བྱས་ལ་གསང་བར་བྱ། །སྙིང་རྗེར་གནས་པས་ལས་གཉིས་བྱེད། །འགྲོ་བའི་དོན་དང་སངས་རྒྱས་མཉེས། །ལུས་ངག་ཐ་མལ་
ཁྱད་པར་ཅན། །ཕྱག་རྒྱ་སྔགས་ཀྱི་བདག་ཉིད་དོ། །ཆོས་ཅན་གཅིག་ལ་རྟོག་པ་ནི། །སྣ་ཚོགས་རྣམ་པར་སྣང་བ་ཡིན། །སྡུག་བསྔལ་བདེ་བ་གྲོལ་འབྱུང་བ། །ལས་ཀྱི་ཁྱད་པར་མང་གྱུར་ཡིན། །དེ་ཕྱིར་དགེ་དང་མི་དགེའི་ལས། །ལུས་ལ་སོགས་པའི་རྟོག་ལས་
བྱུང་། །ཀུན་རྟོག་ཐམས་ཅད་ལས་གྲོལ་བ། །ནག་པོའི་ལས་སུ་ག་ལ་འགྱུར། །དམ་ཚིག་ཉམས་པ་བསྐང་དོན་དུ། །དོན་ཡོད་རྡོ་རྗེ་སྦྱོར་བསྒོམ་སྟེ། །ཐུགས་ཀའི་ཟླ་བར་ཁཾ་བསྐྱེད་པའི། །སྣ་ཚོགས་རྡོ་རྗེ་བསམ་པར་བྱ། །གཟུགས་སོགས་ནམ་མཁའ་བཞིན་དག་ནས། །
རང་བཞིན་འོད་གསལ་སེམས་བསྐྱེད་དེ། །བསྐུལ་བ་སྔོན་དུ་འགྲོ་བ་ཡིས། །དབང་བསྐུར་བྱས་པས་དག་པར་བྱ། །བླ་མ་བརྙས་པའི་སྐྱོན་བྱུང་ན། །ཡོན་དང་ལྡན་པའི་སྟོན་མོ་དབུལ། །སྡིག་བཤགས་ལ་སོགས་སྔོན་འགྲོ་བའི། །སྡོམ་པ་བཟུང་བས་བསྐང་བར་བྱ། །
ཕྱི་ཡི་ཁྲུས་ཀྱི་ཆོ་ག་ལ། །རང་གི་རྣལ་འབྱོར་དམིགས་བྱས་ནས། །དབང་བསྐུར་གོང་མ་བཞིན་བསྒོམས་ནས། །མཐའ་རུ་བདག་པོ་གཞག་པའོ། །དེ་ལྟར་ཉིན་ཕྱེད་དུས་དང་ནི། །ཕྱི་འབྲེད་དུ་ཡང་བསྒོམ་པར་བྱ། །ནམ་ཕྱེད་དུས་སུ་ས་བོན་ནས། །བཟླས་པའི་དུས་སུ་
བསྐྱེད་པར་བྱ། །གཤེགས་སུ་གསོལ་འདོད་སྔགས་པ་ཡིས། །མཆོད་པ་བསྟོད་པ་བདུད་རྩི་མྱང་། །བྱས་ནས་མཐའ་རུ་མུ་བཞག་པའི། །ཡི་གེ་གསུམ་གྱིས་གཤེགས་སུ་གསོལ། །དེ་བཞིན་ཡི་གེ་གསུམ་བརྗོད་པས། །ཡེ་ཤེས་སེམས་དཔའི་འཁོར་ལོ་ལ། །ཕྱི་

རོལ་འཁོར་ལོ་བཅུག་བྱས་ཏེ། །ཤེས་རབ་སྙིང་རྗེ་ལྡན་པས་ཉལ། །ལྡང་བའི་དུས་ན་ལྷ་མོ་ཡི། །དབྱངས་ཀྱིས་བསྐུལ་བསམ་ལངས་ནས་སུ། །སྔོན་བཞིན་དུས་བཞིར་ཏིང་འཛིན་གསུམ། །རྩེ་གཅིག་པ་ཡིས་ཐམས་ཅད་བསྒོམ། །བྲེལ་བ་བཅད་པའི་རྣལ་འབྱོར་
པས། །དུས་དང་པོར་ནི་ཏིང་འཛིན་གསུམ། །མ་ལུས་པར་ནི་བསྒོམ་བྱས་ལ། །ཡན་ལག་རྣམས་ནི་སྔོན་བཞིན་བསམ། །དེ་ལས་གཞན་པའི་དུས་དག་ཏུ། །གློ་བུར་རང་གི་ལྷ་བཞེངས་ལ། །ཐུགས་ལས་འཁོར་ལོ་སྤྲོ་བྱས་ལ། །དབང་བསྐུར་བ་ནི་སྔོན་བཞིན་བླང་། །
མཆོད་བསྟོད་བདུད་རྩི་མྱང་བྱས་ལ། །ཐིག་ལེ་འམ་ཡང་ན་ཕྲ་མོའམ། །སྔགས་ཀྱི་བཟླས་བརྗོད་ཡང་བྱས་ནས། །འཁོར་ལོ་བསྡུ་བ་སྔོན་བཞིན་བརྩམ། །དེ་ལྟར་ཞུགས་པ་རྣམ་པ་གཉིས། །རང་གི་ལམ་གྱི་མི་མཐུན་ཕྱོགས། །བཟློག་པས་བརྟན་པའི་རྟགས་རྙེད་པས། །
ལས་དང་པོ་ཡི་རྣལ་འབྱོར་རོ། །དེ་ཡིས་སྐུ་ལ་དམིགས་པ་ཡིས། །མན་ངག་ཐོབ་པས་ཡེ་ཤེས་ཆེ། །འབེབས་ཐོབ་རང་དང་གཞན་མཐོང་ན། །ཅུང་ཟད་ཡེ་ཤེས་དབང་གྱུར་པའོ། །དུས་བཞིར་མིག་དང་ལུས་སོགས་རྣམས། །བྱིན་རླབས་དབང་བསྐུར་རབ་བྱས་ནས། །
མཆོད་པ་སོགས་ཀྱིས་མཉེས་བྱས་ལ། །བཟླས་བརྗོད་སྦྱོར་བ་བརྩམ་པའོ། །སྔོན་བཞིན་དུ་ནི་བསྡུ་བྱས་ནས། །སྡོམ་པ་བསྐྱང་སོགས་སྔ་མ་བཞིན། །རྒྱུན་དུ་གོམས་རླབས་བཅུ་དང་གཅིག །མཐུ་ཆེན་སྟོབས་རྟོགས་དེས་དམིགས་སོ། །དེ་ཡི་གསུང་ལ་དམིགས་པ་ཡིས། །
རླུང་གི་རང་བཞིན་རྟོགས་མཛད་ནས། །བདག་དང་གཞན་གྱིས་དཀྱིལ་འཁོར་མཐོང་། །ཡེ་ཤེས་དབང་དུ་གྱུར་པའོ། །དེ་ལ་ཉིན་མཚན་རྒྱུན་དུའམ། །ཡི་གེ་གསུམ་གྱི་ཏིང་ངེ་འཛིན། །ཀུན་དུ་སྤྱོད་ལས་ཆོས་ཐམས་ཅད། །དབྱེར་མེད་གོང་བཞིན་སྙེན་བྱེད་དོ། །འདི་ཡི་ཕྱག་
རྒྱ་ཆེན་པོ་ཡི། །བསྒྲུབ་པའི་མཚན་མ་གསུམ་མཐོང་ནས། །བརྟུལ་ཞུགས་ལ་སོགས་རིམ་འདི་ཡིས། །སེམས་དམིགས་རྡོ་རྗེ་འཆང་བ་ཐོབ། །འདི་ལས་གཞན་པ་བཅུ་བཞི་ཡི། །བསྙེན་པའི་ཆོ་ག་འདི་བཞིན་ཏེ། །རང་རང་ལྷ་ཡི་སྦྱོར་བ་ཡིས། །འོག་ནས་འབྱུང་བའི་

དོན་བརྩོན་བྱ། །དེ་ཡན་ཆད་ནི་སྔོན་དུ་བསྙེན་པ་བྱ་བའི་ཆོ་ག་རྒྱས་པར་བཤད་ཟིན་ཏོ།། །།ད་ནི་སློབ་མ་རྣམས་ལ་དབང་བསྐུར་བའི་ཆོ་ག་བཤད་པར་བྱའོ། །དེ་ལ་གང་གིས་དབང་བསྐུར་ཞེ་ན། དང་པོར་ཞུགས་དང་དང་པོ་པ། །ཐམས་ཅད་
ཀུན་གྱི་སློབ་དཔོན་ནོ། །ཅུང་ཟད་ཡེ་ཤེས་དབང་གྱུར་པ། །ནུས་དང་ལྡན་པའི་སློབ་དཔོན་ནོ། །ཡེ་ཤེས་དབང་དུ་གྱུར་པ་ནི། །སྦྱོར་བ་རྙེད་པའི་སློབ་དཔོན་ནོ། །དེ་རྣམས་ཅི་རིགས་མཉེས་བྱས་ནས། །དེ་ཡིས་དཀྱིལ་འཁོར་བརྩམ་པའོ། །གང་དག་གི་དོན་དུ་ཞེ་ན། །དད་ལྡན་
གཏོང་ཕོད་བརྩོན་འགྲུས་ལྡན། །སྣོད་རུང་སྲོག་ལ་མི་ལྟ་བ། །ཚེ་འདིར་དངོས་གྲུབ་ཐོབ་འདོད་པས། །གཉིས་སམ་གསུམ་གྱི་བར་དུ་ཞུས། །སྐུ་གཟུགས་བྲིས་དང་ལྡེར་སོ་དང་། །གླེགས་བམ་རྡོ་རྗེ་ལ་སོགས་དང་། །མཆོད་རྟེན་ལ་སོགས་གནས་པའི་ཕྱིར། །གཉིས་
སམ་གསུམ་གྱི་བར་དུ་ཞུས། །གང་དག་སྡིག་པའི་ལས་དབང་གིས། །མངོན་དུའམ་རྨི་ལམ་དག་ཏུ་ནི། །ལྷ་འཁྲུག་པ་ཡིས་མཚན་མ་མཐོང་། །གཉིས་སམ་གསུམ་གྱི་བར་དུ་ཞུས། །མོས་དང་བརྟན་ལ་དད་པ་ཅན། །གཞན་ལ་ཕན་དགའ་མཐོང་ནས་ནི། །མ་ཞུས་ཀྱང་ནི་
དེ་བོས་ལ། །ཕན་འདོད་ཕྱིར་ནི་དཀྱིལ་འཁོར་བརྩམ། །དེ་ཅིའི་ཕྱིར་ཞེ་ན། བུམ་པའི་དབང་གིས་རབ་སྦྱོར་བས། །ས་བརྒྱད་པ་རུ་ཡང་དག་གནས། །གང་དག་གསང་བའི་དབང་གིས་ནི། །དགུ་པ་དང་ནི་བཅུ་པར་བྱེད། །ཤེས་རབ་ཡེ་ཤེས་དབང་གིས་ནི། །རྡོ་རྗེ་ལྟ་བུར་
རབ་གནས་པའི། །འབྲས་བུ་འབྱུང་བར་ནུས་མཐུ་ལྡན། །དང་པོ་བཞི་པར་ཤེས་པར་བྱ། །རབ་གནས་མ་བྱས་གཟུགས་བརྙན་ལ། །ཐལ་བར་བརླག་ཀྱང་འབྲས་བུ་མེད། །སྔགས་དང་བྲལ་བའི་སྦྱིན་སྲེག་བཞིན། །ལུས་ཉོན་མོངས་པ་ཁོ་ནར་ཟད། །དེ་བས་ཇི་སྲིད་
གནས་པའི་བར། །མཆོད་པའི་རྟེན་དུ་རུང་བྱ་དང་། །འཁོར་ལོས་སྒྱུར་བ་བཞིན་ཏེ་དག །བྱིན་གྱིས་བརླབ་ཕྱིར་བརྩམ་པའོ། །སྔོན་བསགས་སྡིག་པ་དཔག་མེད་རྣམས། །སྐད་ཅིག་གིས་ནི་ཟད་བྱེད་པ། །དཀྱིལ་འཁོར་ཞུགས་དང་དབང་བསྐུར་བ། །དེ་ཡིས་རབ་ཏུ་བྱེད་པ་

ནས། །ཡེ་ཤེས་ཀྱིས་ཀྱང་འདེབས་པ་ཡི། །ཆོ་ག་ཟབ་མོས་སྡིག་པ་ཟད། །མཚན་མའི་འབྲས་བུ་མི་འབྱུང་ཞིང་། །གོང་གི་ཡོན་ཏན་ལྡན་པར་མཛད། །ཐབས་ཇི་ལྟར་ཞེ་ན། བདག་ཉིད་ཆེན་པོ་དེ་ལ་གོང་དུ་སྨོས་པས་ཞུ་བ་གསོལ་བ་དང་། ཁྱོད་ཀྱིས་སྤྲོ་བྱ་རྣམས་
ཚོགས་སམ་དྲི་བར་བྱའོ། །དེས་ཀྱང་ཁ་ཅིག་ནི་ཚོགས། ཁ་ཅིག་ནི་མ་ཚོགས་ཞེས་གསོལ་ནས། འཛབ་བཟླས་པ་བྱའོ། །འཕྲལ་དུ་དབེན་པར་འདུག་ནས་ནི། །ལྷ་ཡི་འཁོར་ལོ་བསྒོམ་བྱས་ལ། །ཚོགས་འཕེལ་བགེགས་ནི་ཞི་བའི་ཕྱིར། །སྔགས་ཀྱི་བཟླས་
བརྗོད་བྱས་པ་ཡིན། །དེ་ཉིད་གསུམ་པར་ཡི་གེ་གཞུག །ཡང་ན་དབྱུང་བ་བར་དུ་གཞུག །སྒྲུབ་པ་དེའམ་ཕྲེང་སྔགས་སམ། །རིག་པ་དང་བཅས་བཟླ་བར་བྱ། །དུ་མ་རབ་ཏུ་བཟླ་བའམ། །འཁོར་བདག་འབུམ་སྟེ་རང་ལྷའི་འབུམ། །གཞན་དག་ཁྲི་ཕྲག་བཟླ་བྱས་ཏེ། །
བསམ་མམ་དངོས་སུ་བཀའ་ཐོབ་བྲི། །གསུམ་པ་བསྲུངས་ནས་འཛབ་བྱ་བ། །ཆོ་ག་བཞིན་ཏེ་རང་གིས་སམ། །སྦྱོར་བ་དག་གིས་དག་བྱས་ནས། །རི་མོའི་དཀྱིལ་འཁོར་བྲི་བ་བརྩམ། །ལྷ་ཁང་གྲང་ངམ་སྐྱེད་ཚལ་གྱི། །བྱང་ཤར་མཚམས་ནི་ཇི་ལྟ་བར། །ཤར་དང་བྱང་དུ་
དམའ་བ་ཡི། །མཁས་པས་ས་ནི་བཙལ་བར་བྱ། །དེར་ནི་བཅགས་ནས་ས་བརྐོས་ཏེ། །ལྷག་འགྱུར་ཡང་ན་རྫིང་འདྲ་བ། །ཆུས་བཀང་མི་གཡོ་གཡས་སུ་འཁྱིལ། །མ་རུང་འཁྱིལ་བའི་ཕུར་བུས་གཞོམ། །དེར་ནི་ས་བདག་ཕྱོགས་སྐྱོང་བ། །ཕྱོགས་སུ་བསྐྱེད་
ནས་སྔོན་བཞིན་དུ། །གཏོར་མ་བྱིན་བརླབས་དབུལ་བྱས་ནས། །ས་གསོལ་བྱས་ནས་གཤེགས་སུ་གསོལ། །ཏིང་འཛིན་རིམ་པ་གསུམ་པོས་ནི། །དཀྱིལ་འཁོར་ལ་སོགས་སྟ་གོན་ནས། །མཆོད་བསྟོད་བདུད་རྩི་མྱང་བ་དང་། །གཏོར་མ་ཡོན་དང་ཕྱི་མཆོད་འབུལ། །
སྦྱིན་སྲེག་གིས་ནི་ཚིམ་བྱས་ནས། །གསོལ་བ་བཏབ་སྟེ་ནམ་མཁའ་ལ། །ཁུང་བུ་བརྐོ་བའི་ཆེད་དུ་ཡང་། །བྱིན་གྱིས་བརླབ་ཕྱིར་དགོད་པར་བྱ། །ལས་ཀྱི་རྡོ་རྗེ་སློབ་མ་ཡིས། །ལྟོ་འཕྱེ་བརྟགས་ནས་འཇོར་གྱིས་ཀློག །མགྲིན་པ་ལྟེ་བ་པུས་མོ་ཙམ། །དངོས་གྲུབ་

རིམ་པས་བརྐོ་བར་བྱ། །ཐོ་བས་བོང་བ་དག་དཀྲུགས་ནས། །ཞིབ་མོར་བཏགས་ནས་བཙགས་ནས་སུ། །ཤིས་པའི་ཕྱིར་དང་དགེ་བའི་ཕྱིར། །རིན་ཆེན་འབྲུ་སྨན་ནང་དུ་གཞུག །དེ་སྟིང་ས་གཙང་གཞན་ལས་ཀྱང་། །སྟེགས་བུ་ཁྲུ་གང་དཔངས་
བརྩིགས་ནས། །དམ་ཚིག་ལྔ་ཡིས་རབ་བྱུགས་ཏེ། །སྟེང་རྒྱན་སོགས་པས་མཛེས་པར་བྱ། །རང་གི་ལྷ་ཡི་རྣལ་འབྱོར་རམ། །ཡང་ན་བགེགས་དགྲའི་རྣལ་འབྱོར་གྱིས། །དབང་བསྐུར་བླངས་ནས་བགེགས་ཀྱི་ཚོགས། །བསྐྲད་པས་ནང་ཉིད་དག་པར་བསམ། །
ཨོཾ་བྷུ་ཁཾ་གི་སྔགས་ཀྱིས་ནི། །མཁའ་ལ་རི་རབ་བསྐྱེད་པར་བྱ། །ཧཱུྃ་ལཾ་ཧཱུྃ་ཞེས་རྡོ་རྗེའི་བདག །ས་གཞིར་བྱས་ནས་བརྟན་པར་བྱ། །ཨོཾ་མི་དི་ནཱི་བཛྲི་བྷ་བ་བནྡྷ་ཧཱུྃ། སྔོན་བཞིན་སྲུང་བའི་འཁོར་ལོ་ནས། །རྗེས་ཆགས་མཐའ་ཡི་སྦྱོར་དང་པོ། །དཀྱིལ་འཁོར་ཕྱུང་སྟེ་མཉེས་
མཛད་པ། །དཀྱིལ་འཁོར་རྒྱལ་བ་མཆོག་བདག་ཉིད། །འཁོར་ལོ་གོང་དང་འོག་ལས་བྱེད། །ལས་ཀྱི་རྒྱལ་མཆོག་སྦྱོར་བདག་ཉིད། །དེ་ཡི་དབང་ཕྱུག་མགོན་པོ་ནི། །ཏིང་འཛིན་གསུམ་གྱི་མཆོག་གྱུར་ཡིན། །དཔའ་བོ་རྡོ་རྗེ་དྲིལ་འཛིན་པས། །ཐམས་ཅད་དང་ནི་
བདག་མཉམ་མོ། །རང་བཞིན་གྱིས་ནི་བདག་དག་གོ། །རྡོ་རྗེའི་བདག་ཉིད་ང་རྒྱལ་བསྐྱེད། །འཁོར་ལོའི་དབུས་སུ་གནས་པ་ལ། །རྡོ་རྗེ་དྲིལ་བུ་འཛིན་པ་ཡི། །རྟག་སོགས་ལས་ཀྱི་རྡོ་རྗེ་ཡིས། །མཆོད་ནས་དཀྱིལ་འཁོར་གསོལ་བ་གདབ། །དེ་བཞིན་གཤེགས་པ་
ཀུན་ཞི་བའི། །དེ་བཞིན་གཤེགས་པ་ཀུན་གྱི་གནས། །ཆོས་ཀུན་བདག་མེད་པ་ཡི་ཆོས། །དཀྱིལ་འཁོར་དམ་པ་བཤད་དུ་གསོལ། །མཚན་ཉིད་ཐམས་ཅད་ཡང་དག་རྫོགས། །མཚན་ཉིད་མེད་པ་ཐམས་ཅད་སྤངས། །ཀུན་དུ་བཟང་པོ་སྐུ་ཡི་མཆོག །དཀྱིལ་འཁོར་
དམ་པ་བཤད་དུ་གསོལ། །ཞི་བའི་ཆོས་མཆོག་ཡང་དག་བྱུང་། །ཡེ་ཤེས་སྤྱོད་ཡུལ་རྣམ་སྤྱོད་པ། །ཀུན་དུ་བཟང་པོ་གསུང་གི་མཆོག །དཀྱིལ་འཁོར་དམ་པ་བཤད་དུ་གསོལ། །སེམས་ཅན་ཀུན་གྱི་སེམས་ཆེན་པོ། །རང་བཞིན་དག་པས་དྲི་མ་མེད། །ཀུན་དུ་བཟང་

པོ་ཐུགས་ཀྱི་མཆོག །དཀྱིལ་འཁོར་སྙིང་པོ་བཤད་དུ་གསོལ། །མི་བསྐྱོད་རྡོ་རྗེ་ཁྲོས་བྱས་ནས། །མ་དང་ཊ་ལས་རང་གི་མིག །ཉི་ཟླར་བསྐྱེད་ནས་མིག་འབྲས་ཧཱུཾ། །རྡོ་རྗེ་ལས་སྤྲོས་སྤྲུལ་པར་བྱ། །རྐང་མཐིལ་ཧཾ་ལས་རྡོ་རྗེ་བསྐྱེད། །གཡས་པ་རྡོ་རྗེ་གཡོན་པ་དྲིལ། །འགྱིང་
བག་མཆེ་གཙིགས་ཧཱུྃ་བརྗོད་ཅིང་། །ཕྱོགས་ཀུན་འབར་བར་བལྟ་བར་བྱ། །གཡས་བརྐྱང་གཡོན་བརྐྱང་ཟླུམ་པོ་དང་། །ས་ག་བཞི་སྟེ་མི་བསྐྱོད་པའི། །རྣལ་འབྱོར་གྱིས་ནི་ཕྱོགས་བཞི་རུ། །དང་པོར་རབ་ཏུ་བརྩམ་པའོ། །ཁྲོ་བོ་རེ་རེས་དྲུག་དྲུག་ཏུ། །ཕྱོགས་བཅུ་
རྣམས་སུ་བརྩམས་བྱས་པས། །འཁོར་ལོས་བགེགས་ཀྱི་ཚོགས་རྣམས་ནི། །བསྐྲད་པར་གདོན་མི་ཟ་བར་འགྱུར། །རུས་སྦལ་སྟོབས་དང་རྡོ་རྗེ་གར་དང་རྡོ་རྗེ་སྒྲ། །ལྕགས་ཀྱུ་ཐབས་དང་ཏིང་འཛིན་ཐབས་དང་མཐའ་ཡས་ཐབས། །གཤིན་རྗེ་གཤེད་ཀྱི་ང་རྒྱལ་གྱིས་
གནས་ནས། །ཤར་གྱི་ཕྱོགས་སུ་རྣལ་འབྱོར་པས་བྱའོ། །རྡོ་རྗེ་གདེངས་པ་དང་ནི་རྡོ་རྗེ་འཇིགས་སུ་རུང་བ་དང་། །རལ་གྲི་ཐབས་དང་ཕུབ་ཀྱི་ཚུལ་དག་དང་། །རྡོ་རྗེ་སྐྱིལ་ཀྲུང་རྣམ་པར་རྒྱལ་བའི་ཐབས། །ཤེས་རབ་མཐར་བྱེད་ཀྱིས་ནི་ལྷོ་ཕྱོགས་བརྩམ། །རྡོ་རྗེ་འཇོམས་ཚུལ་
དང་ནི་རྡོ་རྗེ་རོ་ལངས་དང་། །རྡོ་རྗེ་ཐབས་དང་མ་དུང་གི་ཐབས་དག་དང་། །པདྨོའི་འདུག་སྟངས་གསུས་པོ་ཆེ་ཡི་ཐབས། །རྟ་མགྲིན་གྱིས་ནི་ནུབ་ཀྱི་ཕྱོགས་སུ་བརྩམ། །རྐང་པ་ཡ་གཅིག་སྟངས་དང་རྡོ་རྗེ་ཐོ་བ་དང་། །འཁོར་ལོའི་ཐབས་དང་སེམས་དབའི་སྐྱིལ་ཀྲུང་དང་། །སྤྲིན་
སྒྲ་དང་ནི་གཞུ་ཡི་ཐབས་དང་ནི། །བདུད་རྩི་འཁྱིལ་པས་བྱང་ཕྱོགས་ནས་བརྩམ་མོ། །སེང་གེ་ཐབས་དང་རྡོ་རྗེ་གདུ་བུ་དང་། །བ་དན་ཐབས་དང་ཐག་མདུང་བསྐོར་བའི་ཐབས། །བཟང་པོའི་འདུག་སྟངས་ཕུར་བུ་བརྡུང་བ་ཡི། །ཤར་ལྷོའི་མཚམས་སུ་འདོད་པའི་རྒྱལ་པོས་
བརྩམ། །སེང་གེ་གླལ་དང་བུད་མེད་སྒྱུ་འཕྲུལ་ཐབས། །ཞགས་པའི་ཐབས་དང་མཆོད་སྦྱིན་པ་ཡི་ཐབས། །ཙོག་བུའི་འདུག་སྟངས་དང་ནི་ར་བའི་ཐབས། །ལྷོ་ནུབ་མཚམས་ནས་དབྱུག་པ་སྔོན་པོས་བརྩམ། །རྡོ་རྗེ་སྒྲོག་དང་སྟོབས་པོ་ཆེ་གདེངས་དང་། །པདྨོའི་སྟབས་དང་

མཚོན་རྩེ་གཅིག་པའི་ཐབས། །རྩེ་བའི་ཐབས་དང་མཚམས་བཅིང་པ་ཡི་ཐབས། །ནུབ་བྱང་མཚམས་དང་སྟོབས་པོ་ཆེས་བརྩམ་མོ། །བུང་བ་འཕུར་སྟབས་ཞལ་བཞིར་བྱིན་བརླབས་དང་། །གཏུན་ཤིང་ཐབས་དང་མདའ་འཕངས་པ་ཡི་ཐབས། །
དཔའ་བོ་འདུག་སྟངས་བཀྲ་ཤིས་རྒྱལ་མཚན་སྟངས། །བྱང་ཤར་མཚམས་ནས་མི་གཡོ་མགོན་པོས་བརྩམ། །རྡོ་རྗེ་གསོར་བ་དང་ནི་རྡོ་རྗེ་མཆེ་བ་དང་། །བེ་ཅོན་ཐབས་དང་ཐག་པའི་འཁོར་ལོའི་ཐབས། །ཕྱིར་འགྱེད་པ་དང་ཕྱོགས་བཅིང་བ་ཡི་ཐབས། །སྟེང་གི་ཕྱོགས་ནས་
འཁོར་ལོས་སྒྱུར་བས་བརྩམ། །རྡོ་རྗེ་སྒེག་པ་དང་ནི་རྡོ་རྗེ་གད་མོ་དང་། །མི་འཇིགས་པ་ཡི་ཐབས་དང་ཕྱག་འཚལ་བ་ཡི་ཐབས། །ཕུར་བུས་གནས་ལྔར་གདབ་དང་མཚོན་ཆ་ལྔ་ཡི་ཐབས། །འོག་གི་ཕྱོགས་ནས་གནོད་མཛེས་ཀྱིས་བརྩམ་མོ། །དེ་རྣམས་ཀྱིས་ནི་བགེགས་ཀྱི་ཚོགས། །
རུ་ཏྲའི་བི་བོ་ཤ་ན་དང་། །ཚངས་པའི་སྲིན་པོ་གཟའ་ཕུར་བུ། །གཙོ་བོ་དྲུག་ཅུ་རྩ་བཞི་སྐྲོད། །སྐུ་གསུང་ཐུགས་ཀྱི་རྡོ་རྗེ་ཅན། །སངས་རྒྱས་ཐམས་ཅད་བདག་ལ་གསོན། །བདག་ནི་དཔལ་ལྡན་རྡོ་རྗེ་འཛིན། །བཀའ་ཡི་འཁོར་ལོ་རབ་སྦྱོར་བས། །གལ་ཏེ་གང་གིས་བདག་
བཀའ་འགོམས། །རྡོ་རྗེ་འབར་བའི་གཟུགས་འདི་ཡིས། །འདོད་གསུམ་བསྐྱེད་ལུས་བཤིག་བྱེད་དེ། །འཇིགས་པར་འགྱུར་གྱི་གཞན་དུ་མིན། །བགེགས་བསལ་བྱ་ཕྱིར་ཕུར་བུ་ཡང་། །སྟོད་ནི་ཁྲོ་བོ་སྨད་ཟུར་གསུམ། །བདུད་རྩི་འཁྱིལ་པར་བསམས་ནས་སུ། །དཀྱིལ་འཁོར་
དབུས་སུ་གདབ་པར་བྱ། །ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ། སརྦ་དུཥྚན་ཕཊ། ཀཱི་ལ་ཡ་ཀཱི་ལ་ཡ། སརྦ་པཱ་པཾ་ཕཊ། ཧཱུྃ་ཧཱུྃ་ཧཱུྃ་བཛྲ་ཀཱི་ལ་ཡ། བཛྲ་དྷ་རོ་ཨཱཛྙཱ་པ་ཡ་ཏི། ཀཱ་ཡ་ཝཱཀ་ཙིཏྟ་བཛྲ་ཀཱི་ལ་ཡ་ཧཱུྃ་ཕཊ། དེ་ལས་འོད་ཟེར་འཁྲུགས་ཤིང་འབར། །ཕྱོགས་བཅུ་བདུད་བཅོམ་སླར་
འདུས་ནས། །མཚམས་དང་ར་བ་གུར་བཅིང་བས། །དཀྱིལ་འཁོར་ས་ནི་སྲུང་བའོ། །ས་གནོན་ཕྱག་རྒྱས་ས་ལ་མནན། །ས་ཡི་ལྷ་མོ་བཏོན་གྱུར་ནས། །མེ་ཏོག་སོགས་པས་མཆོད་ནས་ནི། །སྦྲན་ཕྱིར་གསོལ་བ་གདབ་པར་བྱ། །སྐྱོབ་བ་སངས་རྒྱས་ཐམས་ཅད་ཀྱིས། །སྤྱོད་པའི་ཚུལ་

དང་ཁྱད་པར་གྱི། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་པོར་གསོལ། །སྐྱོབ་པ་ཤཱཀྱ་སེང་གེ་ཡིས། །ཇི་ལྟར་བདུད་ཀྱི་སྟོབས་བཅོམ་པ། །དེ་ལྟར་བདག་གིས་བདུད་བཅོམ་ནས། །དཀྱིལ་འཁོར་ཀུན་དུ་བྲི་བར་བྱ། །དེ་སྐད་གསོལ་ནས་ཞལ་གྱིས་བཞེས། །དེ་ཉིད་
དུ་ནི་ཐིམ་པར་འགྱུར། །བདག་ཉིད་ཀྱིས་ནི་བསང་གཏོར་སོགས། །བྱས་ནས་དེ་རུ་ཉལ་བར་བྱ། །མཚན་མོ་གཉིས་པའི་ཆ་དང་པོར། །དྲི་ཞིམ་སོགས་ཀྱིས་རབ་བསྐུས་ལ། །མེ་ཏོག་སིལ་མ་ལ་སོགས་བཀྲམ། །ཙནྡན་མཆོག་སོགས་མཎྜལ་བྱ། །དེ་རུ་ཏིང་ངེ་འཛིན་གསུམ་
མམ། །ཡང་ན་ལྷག་པར་མོས་པ་ཡིས། །རྟེན་དང་བཅས་པ་དམ་ཚིག་གི། །དཀྱིལ་འཁོར་རབ་ཏུ་དགོད་པར་བྱ། །དེ་ནས་བདག་ཉིད་སྤྲོ་བསྐྱེད་ལ། །ཡེ་ཤེས་འཁོར་ལོ་བཀུག་ནས་ནི། །བྱིན་བརླབས་མཆོད་དང་བསྟོད་པ་དང་། །བདུད་རྩི་མྱང་བས་མཉེས་པར་བྱ། །བུམ་པ་
ནག་ནོག་མེད་པ་ལ། །མཆུ་འཕྱང་ཞབས་ནི་བརྟན་པ་དང་། །རྡོ་རྗེའི་ཆུས་བྱུགས་ཉི་ཤུ་གཅིག །ཡང་ན་དྲུག་ཏུ་སྟ་གོན་བྱ། །མགུལ་པ་དར་གྱི་ཅོད་པན་མཚན། །ཨ་མྲ་ལ་སོགས་ཁ་རྒྱན་ཅན། །སྤོས་བསྲེག་དྲི་ཞིམ་ཆུ་ཡིས་བཀང་། །རང་རང་སྔགས་ཀྱི་བཟླས་པའོ། །འབྲུ་
ལྔ་སྨན་ལྔ་རིན་ཆེན་ལྔ། །འཁོར་ལོ་དྲི་ཆུ་ཡོན་སྣོད་བསྡུ། །མཚན་མ་ལྔ་ཡིས་བརྒྱན་པ་ཡི། །རྣམ་རྒྱལ་བུམ་པ་བདག་པོས་བཟླ། །རྡོ་རྗེ་པདྨས་བཙིར་ནས་སུ། །མེ་ཏོག་དཀར་པོ་དེ་རུ་གཏོར། །བདག་གིས་སློབ་མ་ཐམས་ཅད་ལ། །དབང་བསྐུར་མཛོད་ཅིག་གསོལ་བ་
གདབ། །བདུད་རྩི་འཁྱིལ་བཟླས་བུམ་པ་ལ། །ཀུ་ཤའི་བེམ་པོར་བཅས་བ་ཡིས། །བདག་གིས་སློབ་མ་ཐམས་ཅད་ལ། །བགེགས་བཟློག་གསོལ་ཞེས་སྙན་གསན་དབབ། །དེ་རྣམས་བྱིན་གྱིས་བརླབས་བྱས་ལ། །ཐུན་གསུམ་གཏོར་མ་ཕུལ་ནས་ཀྱང་། །མཆོད་བསྟོད་
བདུད་རྩི་མྱང་བྱས་ལ། །སོ་སོའི་སྔགས་ཀྱིས་མཉེས་པར་བྱ། །འཁོར་ལོ་སྔོན་བཞིན་མཆོད་བྱས་ལ། །ལག་པར་པོག་པོར་ཐོགས་ནས་སུ། །པུས་མོ་བཙུགས་ནས་ཐལ་སྦྱར་བས། །དཀྱིལ་འཁོར་སོགས་ལ་སྙན་གསན་དབབ། །བཅོམ་ལྡན་མི་བསྐྱོད་རྡོ་རྗེ་ཡི། །རིག་

སྔགས་རྒྱལ་ལ་ཕྱག་འཚལ་བསྟོད། །བདག་གིས་སྙིང་རྗེའི་དཀྱིལ་འཁོར་ནི། །མགོན་པོ་བྲི་བར་འདོད་པ་སྟེ། །སློབ་མ་རྣམས་ལ་ཕན་ཕྱིར་དང་། །ཁྱེད་ལ་མཆོད་པའི་དོན་དུ་ནི། །དེ་བས་བཅོམ་ལྡན་གུས་བདག་ལ། །བྱིན་རླབས་གནང་བར་མཛད་
པར་རིགས། །དགོངས་ཤིང་བདག་ལ་སངས་རྒྱས་དང་། །འགྲོ་བའི་འཁོར་ལོ་དོན་བྱེད་རྣམས། །འབྲས་གནས་བྱང་ཆུབ་སེམས་དཔའ་དང་། །གང་ཞིག་གཞན་ཡང་སྔགས་ཀྱི་ལྷ། །ལྷ་དང་འཇིག་རྟེན་སྐྱོང་བ་དང་། །འབྱུང་པོ་བྱང་ཆུབ་སྟོན་པ་རྣམས། །སེམས་ཅན་
བསྟན་ལ་མངོན་དགའ་བའི། །གང་ཞིག་རྡོ་རྗེའི་མིང་ཅན་རྣམས། །ཆེ་གེ་བདག་ནི་རྡོ་རྗེ་ཆེ། །དཀྱིལ་འཁོར་བྱང་ཆུབ་སེམས་འབྱུང་བ། །ཇི་ལྟར་ཉེར་སྤྱོད་ནུས་པ་ཡིས། །འགྲོ་དག་དོན་དུ་བྲི་བར་བྱ། །སློབ་མ་དང་བཅས་བདག་ལ་ནི། །ཐུགས་རྗེས་ཉེ་བར་བཟུང་ནས་ནི། །
ཚོགས་པ་ཐམས་ཅད་དཀྱིལ་འཁོར་དུ། །བྱིན་གྱིས་བརླབ་པར་མཛད་དུ་གསོལ། །སྙན་གསན་ལན་གསུམ་དུ་གསོལ་ནས། །མཆོད་པ་ལ་སོགས་རབ་སྦྱར་ནས། །མཚམས་ལ་སོགས་པ་བཅིངས་ནས་ནི། །ཕྱི་རོལ་བྱུང་ནས་སློབ་མ་གཟུང་། །ཤེས་རབ་ཆེན་པོ་
དགའ་ཆེན་པོ། །ང་རྒྱལ་མེད་ཅིང་དྲིན་ལན་ཤེས། །རིགས་ལྡན་ཡོན་ཏན་དད་པ་ཆེ། །གཟུགས་མདོག་གཞོན་པས་བརྒྱན་པའོ། །གསང་སྔགས་ཀྱི་ནི་གྲུབ་པ་མཆོག །འདོད་པ་རབ་ཏུ་ལྡན་འགྱུར་ན། །དམན་པའི་རིགས་དང་བྱད་ངན་དང་། །ཡོན་ཏན་མེད་ཀྱང་གཟུང་
བར་བྱ། །སློབ་དང་ཡིད་ཆེས་དད་ལྡན་དང་། །ཐེག་ཆེན་དགའ་བའི་བདག་ཉིད་དང་། །དཀྱིལ་འཁོར་མཐོང་དང་སྔགས་འགྲུབ་འདོད། །ཚོགས་འཕེལ་ཕྱིར་ནི་འཁོར་ལོར་གཟུང་། །སྣོད་ལྡན་འཁོར་ནི་བཞི་པོ་དང་། །འདི་དང་ཕ་རོལ་བསོད་ནམས་འདོད། །སྣོད་དང་སྣོད་
མིན་རབ་བསྒྲགས་ལ། །བདག་ཉིད་རང་གི་ནང་དུ་འགྲོ། །ཏིང་འཛིན་རྡོ་རྗེ་ཆུ་སྐྱེས་ཀྱིས། །སྦྱང་བའི་སློབ་མས་ཁང་པའི་སྒོར། །ཐལ་མོ་སྦྱར་བ་བྱས་ནས་ནི། །ཚིག་འདིས་གསོལ་བ་ལན་གསུམ་གདབ། །སྟོན་ཆེན་ཁྱོད་ལ་བདག་དགའ་བོ། །བརྟན་པོ་བྱང་ཆུབ་ཆེན་པོའི་

ལམ། །མགོན་པོ་ཆེན་པོ་བདག་འདོད་དེ། །དེ་ཉིད་དམ་ཚིག་བདག་ལ་སྩོལ། །བདག་ལ་བྱང་ཆུབ་སེམས་ཀྱང་སྩོལ། །སངས་རྒྱས་ཆོས་དང་དགེ་འདུན་དང་། །སྐྱབས་སུ་འགྲོ་བ་བདག་ལ་སྩོལ། །ཐར་ཆེན་ཁང་པ་བརྩེགས་པ་རུ། །མགོན་པོས་བདག་ནི་གཞུག་པར་
མཛོད། །དེ་ལྟར་བརྗོད་པས་བླ་མ་ཡི། །སློབ་མ་གཅིག་ནི་གཙོར་བྱས་ནས། །དེ་སོགས་རྣམས་ལ་ཚིག་འདི་ཡིས། །གཞུག་ཕྱིར་བྲོད་པ་བསྐྱེད་པར་བྱ། །བུ་ཚུར་ཤོག་ཅིག་ཐེག་ཆེན་གྱི། །ཆོ་ག་སྔགས་ཀྱི་སྤྱོད་པའི་ཚུལ། །ཁྱོད་ལ་ཡང་དག་བསྟན་པར་བྱ། །ཚུལ་ཆེན་
ཁྱེད་ཀྱིས་བསྟེན་པར་གྱིས། །སངས་རྒྱས་དུས་གསུམ་ལས་བྱུང་བ། །སྐུ་གསུང་ཐུགས་ཀྱི་རྡོ་རྗེ་ཅན། །གཞལ་མེད་ཡེ་ཤེས་ཐོབ་པ་ནི། །རྡོ་རྗེ་སྔགས་ཀྱི་དོན་བསྒོམ་ཡིན། །ཅི་ཕྱིར་དཔག་མེད་སྔགས་རྣལ་འབྱོར། །ཤཱཀྱ་སེང་གེ་སོགས་རབ་ཀྱིས། །དྲག་པོ་ཆེན་པོ་
བདུད་ཀྱི་ཚོགས། །དཔུང་ཆེན་དེ་དག་གཞོམ་བྱས་ནས། །འཇིག་རྟེན་རྗེས་འཇུག་རྟོགས་ནས་སུ། །འཁོར་ལོ་བསྐོར་ནས་མྱ་ངན་འདས། །དེ་ཕྱིར་བློ་ལྡན་བུ་ཁྱོད་ཀྱིས། །ཐམས་ཅད་མཁྱེན་པ་ཐོབ་པར་གྱིས། །དེ་ལྟར་བགྱི་ཞེས་དེར་འདུག་ནས། །བླ་མས་ཚིག་གིས་
བྱང་ཆུབ་སེམས། །མ་བསྐྱེད་པ་ནི་བསྐྱེད་པར་བྱ། །བསྐྱེད་པ་ཡིན་ན་འཕེལ་བར་བྱ། །སྡིག་པ་བཤགས་པ་རྗེས་ཡི་རང་། །བསྔོ་དང་གསོལ་བ་སྐྱབས་འགྲོ་དང་། །བྱང་ཆུབ་སེམས་བསྐྱེད་ལམ་བསྟན་དང་། །སྨོན་ལམ་གདབ་པ་སྔོན་འགྲོ་བྱ། །འཁྱིལ་བཟླས་བསྲུངས་ནས་
གནས་གསུམ་དུ། །འཁོར་ལོ་རྡོ་རྗེ་པདྨ་ལས། །ཨོཾ་ཧཱུྃ་ཨཱཿནི་བཀབ་བྱས་ལ། །རྡོ་རྗེ་ཁུ་ཚུར་དྲི་ཆུས་བྱུག །སྤྱི་བོར་མེ་ཏོག་མདུན་དུ་སྤོས། །མར་མེ་དྲི་ནི་སྙིང་ག་རུ། །ལས་ཀུན་བྱེད་པའི་སྔགས་བཟླས་ནས། །མཆོད་པའི་དོན་དུ་སྦྱིན་པར་བྱ། །ཨ་ཤྭཏྠ་དང་ཨུ་དུམ་
བཱར། །མེ་ཏོག་རྩེ་མོ་སོར་བཅུ་གཉིས། །དྲང་པོ་དྲི་ཞིམ་གྱིས་བྱུགས་པ། །དངོས་གྲུབ་ལྟས་ཕྱིར་སྦྱིན་པར་བྱ། །ཧ་ཅང་རིང་མིན་ཐུང་བ་མིན། །ཀུ་ཤ་སྔོན་པོ་འབུས་མ་ཟོས། །རྨི་ལམ་མི་འཁྲུག་བཀྲ་ཤིས་ཕྱིར། །ཉག་མ་གཉིས་ནི་སྦྱིན་པར་བྱ། །སུམ་བསྒྲིལ་མདུད་

པ་གསུམ་བྱས་ལ། །འཁྱིལ་པའི་སྔགས་བཟླས་ཕོ་ཡི་གཡོན། །མོ་ཡི་དཔུང་པ་གཡས་པ་རུ། །བསྲུང་བ་བྱ་ཕྱིར་བཅིང་བར་བྱ། །འཁྱིལ་བཟླས་ཆུ་གཙང་སྐྱོར་ཆུ་ཡིས། །ཁ་བཤལ་ལན་གསུམ་འཐུང་བཅུག་སྟེ། །བྱིན་ཆགས་གཙང་བར་
བྱ་བ་དང་། །ངག་གི་ཉེས་པ་སྦྱང་ཕྱིར་སྦྱིན། །ཨོཾ་ཧྲཱིཿབི་ཤུདྡྷ་སརྦ་དྷརྨ་བོ་སོ་ད་ས་བོ་ཀལྤ་ཨ་ན་ཡ་ཧཱུྃ། ཕྱིར་མི་ལྡོག་དབང་དཀྱིལ་འཁོར་ལ། །བྱིན་ནས་མགོན་པོ་བདག་ལ་གསུངས། །དཀྱིལ་འཁོར་ལྷ་ཡི་དེ་ཉིད་དང་། །སློབ་དཔོན་གྱི་ནི་ཕྲིན་ལས་དང་། །སངས་རྒྱས་
ཀུན་གྱི་དམ་ཚིག་དང་། །གསང་བ་མཆོག་གི་སྡོམ་པ་རྣམས། །རྟག་ཏུ་དབང་གི་སློབ་དཔོན་བགྱིད། །སེམས་ཅན་ཀུན་དོན་བྱེད་ཕྱིར་སྩོལ། །དེ་ནས་བླ་མས་ཐུན་མོང་སྡོམ། །བྱིན་ནས་སློབ་མ་དེ་ཡིས་ཀྱང་། །རིག་དབང་ཐོབ་ཕྱིར་ལན་གསུམ་དུ། །བཀའ་སྩལ་དེ་ནི་བླང་
བྱའོ། །ཀུན་མཁྱེན་གང་དུ་འཇིག་རྟེན་དུ། །བདེ་བར་འབྱུང་ངམ་མི་འབྱུང་བ། །ཨུ་དུམ་བཱ་རའི་མེ་ཏོག་བཞིན། །གལ་ཏེ་བརྒྱ་ལམ་བརྒྱ་འགའ་འབྱུང་། །བདེ་བས་ཐོབ་དཀའ་འབྱུང་བ་ནི། །གསང་སྔགས་སྤྱོད་པའི་ཚུལ་འདི་ནི། །ཅི་ཕྱིར་དཔག་མེད་སེམས་ཅན་དོན། །བླ་ན་མེད་པ་
བྱེད་ནུས་པ། །ས་ཡང་བསྐལ་པ་དུ་མ་ཡི། །སྣོད་དུ་བྱས་པའི་སྡིག་པ་གང་། །དེ་ཀུན་ཟད་པར་འགྱུར་བ་ཡིན། །དཀྱིལ་འཁོར་འདི་འདྲ་མཐོང་བས་སོ། །གང་གཞུང་མཐའ་ཡས་གྲགས་པ་ཡི། །སྔགས་ཀྱི་སྤྱོད་པ་ལ་གནས་ནས། །བླ་མེད་གོ་འཕང་ཕྱིན་པ་ནི། །སྔགས་བཟླས་
པ་ལས་སྐྱེ་བའོ། །གང་དག་སྤྱོད་པ་མཆོག་འདི་ལ། །བློ་གྲོས་གཏན་དུ་མི་གཡོ་བ། །སྡུག་བསྔལ་ཐམས་ཅད་འབྱུང་བ་ཡི། །ངན་འགྲོ་དེ་དག་གིས་གཅོད་དོ། །དེ་རིང་དཔག་མེད་རྙེད་པ་ནི། །བདག་ཆེན་ཁྱེད་རྣམས་ཀྱིས་ཐོབ་སྟེ། །སྲས་བཅས་རྒྱལ་བ་ཀུན་གྱིས་ཀྱང་། །
བསྟན་པ་འདི་ལ་ཁྱེད་རྣམས་ཀུན། །ཐམས་ཅད་ཡོངས་སུ་བཟུང་གནས་པའི། །སྐྱེ་བར་གྱུར་པ་བདག་ཆེན་གྱི། །དེ་ཕྱིར་ཁྱེད་ཀྱིས་བདག་ཆེན་ལ། །བདེ་བ་སྐྱེ་བར་འོང་འགྱུར་ཅིག །དཔལ་ལྡན་མཆོག་གི་ཐེག་པ་འདི། །ཆེན་པོར་འབྱུང་བ་ཐེག་ཆེན་པོ། །གང་གིས་

ཁྱེད་ཆག་འགྲོ་འགྱུར་བ། །དེ་བཞིན་གཤེགས་རྣམས་འོང་འགྱུར་ལ། །ཞལ་བཟང་ཁྱེད་ནི་དེ་རིང་འོངས། །སང་ནི་འདུས་པའི་དཀྱིལ་འཁོར་ཆེ། །མཐོང་དཀའ་ང་ཡི་ཐུགས་རྗེ་ཡིས། །ཁྱེད་ཀྱིས་མཐོང་བར་འགྱུར་བའོ། །ཀྱེ་བུ་དག་ཉོན་ཅིག་དོ་ནུབ་ནི། །སེང་གེ་ཉལ་སྟབས་
བཞིན་དུ་ཉོལ། །ཁྱོད་ཀྱིས་རྨི་ལམ་དགེ་མི་དགེ། མཐོང་བ་ཐོ་རངས་བདག་ལ་སྨྲོས། །དེ་ལྟར་བགྱི་ཞེས་རབ་གསོལ་ནས། །དེ་དག་ཉལ་བཅུག་འཁྱིལ་བ་ཡི། །སྔགས་བཟླས་དྲི་ཆུ་བྱུགས་ནས་སུ། །སྲུང་བ་བྱས་ཏེ་གནས་པར་བྱ། །ལྷག་པར་མོས་པས་དཀྱིལ་
འཁོར་དམིགས། །མཆོད་བསྟོད་བདུད་རྩི་མྱང་བྱས་ཏེ། །བསྡུ་ཞིང་ཡེ་ཤེས་འཁོར་ལོ་ནི། །ཁ་སྦྱར་དབུས་སུ་མཁའ་ལ་བཞག །ཐོ་རངས་ལངས་ནས་ཤར་བལྟས་ཏེ། །སོ་ཤིང་འཆོས་ནས་སྟེང་དུ་བསྒྱུར། །བ་ལང་ཀོ་ཙམ་མཎྜལ་ལ། །ཞི་བ་ལ་སོགས་གྲུབ་པར་ལྟ། །
སྦྱིན་དང་སྲུང་བ་ལ་སོགས་ལ། །འཁྱིལ་པའི་སྔགས་ནི་མཆོག་ཉིད་ལས། །མཐོང་བའི་རྨི་ལམ་མི་དགེ་བས། །རང་ངམ་དེས་བཟླས་གཞོམ་པར་བྱ། །མཚན་མོ་གསུམ་པའི་ཆ་དང་པོར། །སྐུད་པ་བརྟག་པ་ལ་སོགས་འདྲ། །དེ་ཡི་ས་བོན་ལས་བྱུང་བ། །ཉི་ཤུ་རྩ་
ལྔར་མོས་པའོ། །མི་བསྐྱོད་རྡོ་རྗེ་མིག་གཉིས་ཀྱང་། །ཛ་ལ་ཉི་ཟླར་བསྐྱེད་དེས་མཚན། །རྫི་མའི་རྦ་རླབས་ལྕགས་ཀྱུ་ཡིས། །མཁའ་ཡི་འཁོར་ལོ་ལས་དགུག་བྱ། །ཨོཾ་ཨཱཿརྣམ་པར་སྣང་མཛད་ཆེ། །རང་གི་འཁོར་ལོ་ལ་མཆོད་ཕྱིར། །ཁྱེད་ཀྱིས་སྐུད་པ་བདག་ལ་སྩོལ། །
དིཔྟ་དྲིཥྚ་བཛྲ་ཨཾ་གུ་ཤ་ཛ་ཧཱུྃ། དེ་ལྟར་མི་བསྐྱོད་པར་བྱས་པས། །རང་རང་སྐུད་པ་རང་ལ་ཐིམ། །སོ་སོ་གནས་པའི་སྐུད་པ་ཀུན། །ཆོས་ཉིད་སྔགས་ཀྱིས་བསྒྲིལ་བར་བྱ། །སརྦ་དྷརྨ་སྤ་ར་ཎ་ཨ་ནུ་པྲ་བིཥྚ་སརྦ་དྷརྨ་ཨཏྱནྟ་ཨ་ནུ་པྲ་བིཥྚ་དྷརྨ། དཀྱིལ་འཁོར་ཉིས་འགྱུར་རིང་ཐུང་
དང་། །སྒོ་ཡི་ཉི་ཤུ་ཆས་སྦོམ་ཕྲ། །ཙནྡན་མཆོག་སོགས་དྲི་ཞིམ་གྱིས། །བྱུགས་ནས་གསེར་དངུལ་སྣོད་དུ་བསྲུང་། །ཡི་གེ་གསུམ་གྱི་བར་བསམས་ལ། །ཁྲུས་བྱས་རང་ལྷའི་ང་རྒྱལ་གྱིས། །དེ་ནས་སྐུད་པ་བསྡོགས་བྱས་ནས། །འཁོར་ལོ་ཐིག་ནི་གདབ་པར་བྱ། །

བདག་ཉིད་མི་བསྐྱོད་ཤར་བལྟས་ནས། །སློབ་མ་སྣང་མཛད་བདུད་རྩི་འཁྱིལ། །ལྟེ་བར་ཁུ་ཚུར་གཡོན་བཟུང་ནས། །ནམ་མཁའི་ཐིག་ནི་མ་ལུས་གདབ། །ནམ་མཁའ་ལ་གནས་དེ་བཞིན་གཤེགས། །སེམས་ཅན་དོན་བྱེད་དུས་བབ་པས། །གནས་འདིར་
བྱོན་པའི་དོན་ཆེད་དུ། །ཐིག་གི་སྒྲ་ཡིས་བསྐུལ་བར་བྱ། །ཨོཾ་བཛྲ་ས་མ་ཡ་སཱུ་ཏྲ་མཱ་ཏི་ཡ་མ་ཧཱུྃ། གནོད་སྦྱིན་གཤིན་རྗེ་བརྒྱ་བྱིན་གླུ། །ཕྱོགས་སུ་ཁ་བལྟས་ཕྱོགས་བཞིར་གདབ། །མེ་མཚམས་བདེན་བྲལ་མཚམས་གནས་ནས། །གྲྭ་ཡི་ཐིག་ནི་རབ་ཏུ་གདབ། །དེ་ནས་ཚངས་
ཐིག་སོགས་གཅིག་ཏུ། །སུམ་ཆར་བྱས་ལ་མཐའ་གཉིས་དོར། །དང་པོ་ཆ་བཞིར་རབ་བྱས་ལ། །དེ་ཡི་དང་པོ་ཆ་གཉིས་སོ། །དེ་ཡི་གཉིས་པ་གཉིས་པ་བྱ། །རེ་རེ་ཡང་ནི་གཉིས་གཉིས་སོ། །གསུམ་པའི་དང་པོས་ཆ་ཆུང་གཉིས། །དེ་ནས་ཡང་ནི་ཆ་ཆུང་གཅིག །དེ་ནས་
ཆ་ཆུང་གཉིས་དོར་ནས། །ཆ་ཆེན་གཅིག་ནི་དོར་བྱས་ནས། །ཆ་ཆུང་གཅིག་ནི་བཅད་པའོ། །ཡང་ནི་གཉིས་དོར་གཅིག་བཅད་དོ། །གཉིས་དོར་གཅིག་བཅད་དེ་སྟེང་དུ། །ཆ་ཆུང་གཉིས་ནི་དོར་བར་བྱ། །དེ་ནས་ཆ་ཆེན་གསུམ་ནི་བཅད། །དེ་སྟེང་ཆ་ཆུང་གསུམ་དོར་ནས། །
ཡང་ནི་ཆ་ཆུང་གསུམ་དོར་བྱ། །ལྷག་མ་ཆ་ཆུང་གཅིག་ལུས་པའོ། །དེ་ནས་ཐིག་སྐུད་གཉིས་འགྱུར་བྱས། །ཙནྡན་ཕུར་བུས་དབུས་སུ་གཟུགས། །ཡང་ནི་རང་གི་ར་བ་དང་། །ཕྱི་རོལ་ར་བ་ཀུན་བསྐོར་བྱ། །ཆ་ཆེན་ལྔ་ནི་རབ་བསྐོར་ན། །ནང་གི་རྡོ་རྗེ་ར་བ་སྟེ། །ལྷ་ཡི་གནས་
ལ་ཆ་ཆུང་ལྔ། །བྱས་པའི་ཕྱེད་གཉིས་ཀ་བར་འགྱུར། །ཕྱི་ཡི་འཁོར་ལོ་ཆ་བརྒྱད་ལ། །ཆ་གཅིག་སྒོ་ཡི་དབུས་བྱའོ། །དེ་ཚད་ལྷ་ཡི་སྣམ་བུ་སྟེ། །དེ་ཕྱེད་འཁོར་ས་ཆུང་ངུའོ། །དེ་ཡི་ཚད་ཀྱི་ཁ་ཁྱེར་ས། །དྲ་བ་དྲ་བ་ཕྱེད་པ་དང་། །ཕྲེང་བཤལ་འཕྱང་བའི་སྣམ་བུ་དང་། །དེ་བཞིན་འགྲམ་པ་
གཤོག་པའོ། །ལོགས་ཀྱི་ཕྱི་རོལ་ཡ་ཕུགས་ཏེ། །དེ་ལྟར་ཀ་བ་ལ་ཡང་ངོ་། །དེ་ཕྱེད་རིན་ཆེན་ཕ་གུ་དང་། །ཚོན་སྣ་ལྔ་ཡི་ས་མཉམ་མོ། །དེ་བཞིན་འཁོར་ལོ་ཀ་སོགས་དང་། །རྡོ་རྗེ་ར་བའང་དེ་བཞིན་ནོ། །ཡ་ཕུགས་སྟེང་དུ་ཆ་ཆེན་གསུམ། །ཏ་ར་ཎ་ཡི་ས་རུ་འགྱུར། །ཆ་ཆུང་དྲུག་ལ་

པདྨ་དང་། །རྡོ་རྗེ་ར་བ་བསྐོར་བར་བྱ། །ཆ་ཆེན་གཅིག་ནི་འོད་དཀྱིལ་འཁོར། །བསྐོར་ནས་གཅིག་ནི་ཉེ་འཁོར་ལས། །ལྟས་ངན་གྱིས་ནི་འགྲུབ་མི་འགྱུར། །ཐིག་སྐུད་ཆད་ན་སློབ་དཔོན་འཆི། །ལྷག་ཆད་བྱུང་ན་འབྲས་སོགས་འབྱུང་། །ཕྱོགས་འཁྲུལ་སློབ་མ་སྨྱོ་བར་འགྱུར། །གྲུ་བཞི་
སྒོ་བཞི་རྟ་བབས་བཞིས། །བརྒྱན་ཅིང་དར་ཤམ་མེ་ཏོག་དང་། །འཕན་དང་རྒྱལ་མཚན་བ་དན་གྱིས། །བརྒྱན་པའི་འཁོར་ལོ་མཐོང་བར་བྱ། །གྲྭ་ཡི་ཆ་ནི་ཐམས་ཅད་དང་། །སྒོ་ཡི་ཟུར་ཀུན་ཆ་ལ་ཡང་། །ཟླ་བ་རིན་ཆེན་རྡོ་རྗེ་དགོད། །གམ་པའི་རི་སོགས་རབ་བརྒྱན་པ། །ཆོས་ཀྱི་འཁོར་ལོ་
རི་དྭགས་གཉིས། །འཕན་སོགས་ཀྱིས་བརྒྱན་ཏྭ་ར་ཎ། །ཇི་ལྟར་མཛེས་ཤིང་བཀླུབས་པར་བྱ། །སེམས་ཅན་རྣམས་ཀྱི་བསམ་དབང་གི། །འདི་ནི་ཐུགས་ཀྱི་དཀྱིལ་འཁོར་བས། །བཅོམ་ལྡན་འདས་ཀྱི་རྒྱུད་འདི་རུ། །ཁྲུ་ནི་བཅུ་གཉིས་ཉིད་དུ་གསུངས། །དེ་ལ་ཁྲུ་བཅུ་གཉིས་ནི་བྱང་ཆུབ་
ཀྱི་སེམས་ལ་དགའ་བའི་རྡོ་རྗེ་སྒེག་མོ་དང་། གཟུགས་དང་ཡོན་ཏན་གྱི་རྡོ་རྗེ་ཕྲེང་བ་མ་དང་། ཆོས་འཆད་པའི་རང་བཞིན་རྡོ་རྗེ་གླུ་མ་དང་། སེམས་ཅན་ཐམས་ཅད་ཀྱི་དོན་བྱེད་པའི་རྡོ་རྗེ་གར་མ་དང་། གྲགས་པ་ཐམས་ཅད་འདུས་པའི་རྡོ་རྗེ་བདུག་པ་མ་དང་། བྱང་ཆུབ་ཀྱི་ཡན་ལག་གི་རྡོ་རྗེ་མེ་ཏོག་མ་
དང་། འགྲོ་བ་གཞན་དགའ་བར་བྱེད་པའི་རྡོ་རྗེ་མར་མེ་མ་དང་། ཚུལ་ཁྲིམས་ལ་སོགས་པའི་རྡོ་རྗེ་དྲི་ཆབ་མ་དང་། སྦྱིན་པའི་རང་བཞིན་རྡོ་རྗེ་ཀྱོ་བ་མ་དང་། སྙན་པར་སྨྲ་བའི་རང་བཞིན་རྡོ་རྗེ་གསོལ་ཀ་མ་དང་། དོན་མཐུན་པའི་རང་བཞིན་རྡོ་རྗེ་ཕོ་ཉ་མ་དང་། དོན་སྤྱོད་པའི་རང་བཞིན་རྡོ་རྗེ་འབེབས་
པ་མ་སྟེ། དེ་རྣམས་རྣམ་པར་དག་པའི་རང་བཞིན་ནོ། །དེ་བཞིན་དུ་སྐུའི་དཀྱིལ་འཁོར་ལ་ཁྲུ་བཅུ་དྲུག་ཏུ་གསུངས་པ་ནི། བྱང་ཆུབ་ཀྱི་སེམས་བརྟན་པར་བྱེད་པའི་རང་བཞིན་རྡོ་རྗེ་སེམས་དཔའ་དང་། ཐམས་ཅད་འགུགས་ནུས་པའི་རང་བཞིན་རྡོ་རྗེ་རྒྱལ་པོ་དང་། དེ་བཞིན་གཤེགས་པ་ཐམས་
ཅད་མཉེས་པར་བྱེད་པའི་ཡོན་ཏན་རྡོ་རྗེ་ཆགས་པ་དང་། གཟི་བརྗིད་བསྟོད་ཅིང་དགའ་བའི་ཡོན་ཏན་རྡོ་རྗེ་ལེགས་པ་དང་། ཆོས་ཀྱི་རྒྱལ་པོར་དབང་བསྐུར་བའི་རྡོ་རྗེ་རིན་ཆེན་དང་། གཟི་བརྗིད་གཞན་ལས་འཕགས་པའི་ཡོན་ཏན་རྡོ་རྗེ་གཟི་བརྗིད་དང་། རེ་བ་ཡོངས་སུ་རྫོགས་པའི་ཡོན་ཏན་རྡོ་རྗེ་

དཔལ་རབ་དང་། མཛུམ་པས་ལུང་སྟོན་པའི་ཡོན་ཏན་རྡོ་རྗེ་བཞད་པ་དང་། ཆོས་ལ་དམིགས་ཤིང་སོ་སོར་རྟོག་པའི་ཡོན་ཏན་རྡོ་རྗེ་ཆོས་རབ་དང་། སྒྲིབ་པ་ཡོངས་སུ་གཅོད་པའི་ཡོན་ཏན་རྡོ་རྗེ་རྣོན་པོ་དང་། སྐུ་གསུང་ཐུགས་ཟད་མི་ཤེས་པར་ཀུན་ལ་ཁྱབ་པའི་ཡོན་
ཏན་རྡོ་རྗེ་རྒྱུ་དང་། གཞུང་གི་ཆོས་རབ་ཏུ་སྒྲོགས་པའི་ཡོན་ཏན་རྡོ་རྗེ་སྨྲ་བ་དང་། སེམས་ཅན་སྨིན་པ་དང་གྲོལ་བར་བྱེད་པའི་ཡོན་ཏན་རྡོ་རྗེ་ལས་རབ་དང་། མི་འཇིགས་པ་སྦྱིན་ཞིང་སྲུང་བའི་རང་བཞིན་རྡོ་རྗེ་སྲུང་བ་དང་། གདུལ་དཀའ་འདུལ་བར་བྱེད་པའི་ཡོན་ཏན་རྡོ་རྗེ་གནོད་སྦྱིན་དང་། རྡོ་རྗེ་གསུམ་
བསྡུས་ཤིང་དབྱེར་མེད་པའི་ཡོན་ཏན་རྡོ་རྗེ་སྡུད་པ་སྟེ། དེ་རྣམས་རྣམ་པར་དག་པའོ། །གསུང་གི་དཀྱིལ་འཁོར་ལ་ཁྲུ་ཉི་ཤུ་གསུངས་པ་ནི། དེ་རྣམས་དང་རྡོ་རྗེའི་རིགས་རྣམས་སྡུད་ཅིང་དམ་ཚིག་གི་ཕྱག་རྒྱ་བྱིན་གྱིས་རློབ་པའི་ཡོན་ཏན་སེམས་མ་རྡོ་རྗེ་མ་དང་། རིན་པོ་ཆེའི་རིགས་སྡུད་ཅིང་དབང་
བསྐུར་བའི་བྱིན་གྱིས་རློབ་པའི་རང་བཞིན་ཡོན་ཏན་རིན་ཆེན་རྡོ་རྗེ་མ་དང་།པདྨའི་རིགས་སྡུད་ཅིང་ཆོས་ཀྱི་ཕྱག་རྒྱ་བྱིན་གྱིས་རློབ་པའི་ཡོན་ཏན་ཆོས་ཀྱི་རྡོ་རྗེ་མ་དང་། ལས་ཀྱི་རིགས་སྡུད་ཅིང་ལས་ཀྱི་ཕྱག་རྒྱ་བྱིན་གྱིས་རློབ་པའི་ཡོན་ཏན་ལས་ཀྱི་རྡོ་རྗེ་མ་སྟེ། དེ་རྣམས་རྣམ་པར་དག་པའོ། །ཅིའི་ཕྱིར་
ཞེ་ན། དེ་རྣམས་ས་བཅུ་རྣམ་པར་དག་པ་སྟེ། ས་བཅུ་ནི་ཡེ་ཤེས་ལྔའི་རྟེན་དུ་གྱུར་པའི་ཕྱིར་རོ། །ཇི་སྐད་དུ་གསང་བའི་ཐིག་ལེ་ནོར་བུའི་རྒྱུད་ཕྱི་མ་ལས། འདི་ནི་སངས་རྒྱས་ཐམས་ཅད་ཀྱི། །ལམ་རྣམས་དག་སྟེ་རིམ་པ་བཞིན། །བཅུ་གཉིས་བཅུ་དྲུག་ཉི་ཤུ་རུ། །ཡེ་ཤེས་ལ་ནི་ཡེ་ཤེས་
གནས། །ཐོས་དང་བསམ་པ་ངོ་བོ་ནི། །ཀྱོ་བ་ལ་སོགས་རང་བཞིན་ནོ། །ཤེས་རབ་བརྩོན་འགྲུས་ཏིང་ངེ་འཛིན། །ཐར་ཆགས་སྡུག་པ་ལ་སོགས་སོ། །དྲོད་ལ་སོགས་པ་དང་པོར་སྦྱོར། །སྒེག་མོ་ལ་སོགས་ངོ་བོའོ། །ལྷག་མ་ཉི་ཤུ་གཉིས་གཉིས་ཀྱང་། །ས་རེ་རུ་ནི་རྣམ་དག་པས། །
ཡེ་ཤེས་རྟེན་དུ་ཡང་དག་མཚམས། །སྟེགས་བུ་འདི་ཡང་འཁོར་ལོ་ཡི། །རྟེན་དུ་ཡང་དག་གྱུར་པས་ན། །རྣམ་པར་དག་པ་མངོན་དུ་བྱའོ། །ཞེས་སོ། །མདོར་ན་ཟབ་གསལ་གཉིས་མེད་ལས། །གྲུབ་པའི་ཁྱད་པར་འབྱུང་བས་ན། །རིགས་དང་ཚད་སོགས་ངེས་མེད་པས། །ཁྲུ་གང་

ནས་བརྩམས་སྟོང་ཕྲག་བརྒྱ། །རིན་ཆེན་ལྔ་ཡི་ཕྱེ་མའམ། །ཡང་ན་འབྱུང་ཁུངས་ནས་འབྱུང་དང་། །སཱ་ལུ་བཏགས་པའི་ཕྱེ་མ་ལ། །སྔ་མའི་རིམ་བཞིན་འཁོར་ལོས་དབབ། །བདེན་པའི་བྱིན་གྱི་རླབས་བརྗོད་དེ། །གསེར་སོགས་སྣོད་དུ་བདུག་པ་བསྲེག །གསལ་བར་བསམས་
ནས་གསང་སྔགས་འདིས། །མངོན་པར་བཟླས་པ་རབ་ཏུ་བྱ། །བཛྲ་ཙི་ཏྲ་ས་མ་ཡ་ཧཱུྃ། རྡོ་རྗེ་ཤུགས་ཀྱིས་ཞུགས་ནས་སུ། །ཆོས་དབྱིངས་ཀྱིས་ནི་འདི་ཉིད་དག །སེམས་ཅན་དབྱིངས་ནི་རབ་སྒྲོལ་མཛད། །རྒྱལ་བའི་མཆོག་ནི་མི་བསྐྱོད་མགོན། །བདེ་བར་གཤེགས་པ་ཀུན་གྱི་གནས། །
སྐྱོན་ཀུན་ལས་ནི་གྲོལ་བར་མོས། །བླ་མས་གཡོན་པའི་ཁུ་ཚུར་གྱིས། །དབང་ལྡན་མཚམས་ནས་ཕྱི་རོལ་ནས། །རི་མོ་ལྔ་ནི་བྲི་བའོ། །དཀར་པོ་སེར་པོ་དམར་པོ་དང་། །ལྗང་ཁུ་ནག་པོ་ནང་དུའོ། །གཡས་སུ་བསྐོར་ཅིང་ཆད་མེད་པས། །རྡུལ་ཚོན་རི་མོ་བྲི་བའོ། །སྦོམ་པོར་བྲིས་ན་
ནད་འབྱུང་སྟེ། །ཕྲ་བས་ནོར་ཟད་འཁྱོག་འཐབ་འབྱུང་། །ཆད་ན་སློབ་མ་བླ་མ་འཆི། །དེ་བས་ཕྱོགས་ཀུན་མཉམ་པར་འགྱུར། །གཡས་སྐོར་ཚུལ་དུ་མི་འདེབས་ན། །ཚོན་ལ་ཕུར་བུས་གདབ་པར་བྱ། །རྡོ་རྗེ་རྩེ་མོ་གཉིས་དཀར་མོ། །གཞན་ནི་སེར་པོར་ཤེས་པར་བྱ། །པདྨ་རཱ་ག་འདྲ་བ་
གཞན། །མ་ར་ག་ཏ་ལྟ་བུ་སྟེ། །དབུས་མ་ནག་པོར་ཤེས་བྱས་ནས། །ཚོམ་གྱི་རིམ་པ་དེ་ལྟར་རོ། །ཤར་གྱི་ཕྱོགས་སུ་དཀར་པོ་ཆེ། །ལྷོ་སེར་ནུབ་དམར་བྱང་ལྗང་ཁུ། །དབུས་མའི་ཆ་ཕྱོགས་ར་བས་བསྐོར། །ཨིནྡྲ་ནཱི་ལའི་ཁ་དོག་གོ། །དེ་དུས་རླུང་དང་སྦྲུལ་སོགས་སྤྲུལ། །བགེགས་
དགྲའི་ཕྱག་རྒྱ་དྲན་བྱས་ནས། །སྡང་བའི་དགྲ་ཡི་སྔགས་རྒྱལ་འདི། །བརྗོད་པས་དེ་དག་སེལ་བར་བྱ། །ན་མཿས་མནྟ་ཀཱ་ཡ་ཝཱ་ཀ་ཙིཏྟ་བཛྲ་ཎཱཾ། ན་མོ་བཛྲ་ཀྲོ་དྷཱ་ཡ། མ་ཧཱ་དཾཥྚྲོཊ་ཀ་ཊ་བྷཻ་ར་བ་ཡ་ཨ་སི་མུ་ས་ལ་པ་ར་ཤུ་པཱ་ཤ་ཧསྟཱ་ཡ། ཨོཾ་ཨ་མྲྀ་ཏ་ཀུཎྜ་ལི་ཁ་ཁ་ཁཱ་ཧི་ཁཱ་ཧི། ཏིཥྛ་ཏིཥྛ། བནྡྷ་བནྡྷ།
ཧ་ན་ཧ་ན། ད་ཧ་ད་ཧ། པ་ཙ་པ་ཙ། གརྫ་གརྫ། བི་སྤོ་ཊ་ཡ་བི་སྥོ་ཊ་ཡ། སརྦ་བིགྷ་ནན་བི་ནཱ་ཡ་ཀ། མ་ཧཱ་ག་ཎ་པ་ཏི། ཛཱི་བནྟི་ཨནྟ་ཀ་ར་ཡ་ཧཱུྃ་ཕཊ། དེ་ལྟར་རྡུལ་ཚོན་བཏབ་གྱུར་ནས། །པདྨའི་གདན་ལ་ཉི་མ་དང་། །ཟླ་བ་རབ་ཏུ་བཀོད་བྱས་ནས། །མཚན་མའི་ཕྱག་རྒྱ་དགོད་པའོ། །དབུས་

སུ་རྡོ་རྗེ་རྩེ་ལྔ་པ། །ཨིནྡྲ་ནཱི་ལའི་ཁ་དོག་འདྲ། །ཤར་དུ་ལྕེ་བརྒྱད་འཁོར་ལོ་ནི། །ཟླ་བ་ལྟ་བུའི་འོད་ཟེར་དང་། །ལྷོ་རུ་རིན་ཆེན་ཟུར་དགུ་པ། །མརྒད་ལྟ་བུའི་འོད་ཟེར་ལྡན། །ནུབ་ཏུ་པདྨ་འདབ་བརྒྱད་པ། །དམར་པོ་འོད་ཟེར་དང་ལྡན་པ། །བྱང་དུ་རལ་གྲི་རིན་ཆེན་ཡུ། །
སྔོན་པོ་འོད་ཟེར་དང་ལྡན་པའོ། །མེ་མཚམས་སྤྱན་ནི་སྔོན་པོའོ། །བདེན་བྲལ་མཚམས་སུ་རྡོ་རྗེ་བྲི། །རླུང་མཚམས་པདྨ་སྡོང་བུར་བཅས། །དབང་ལྡན་ཨུཏྤལ་ལྗང་སེར་ཅན། །ཕྱི་རོལ་མེ་མཚམས་ལ་སོགས་དང་། །ཤར་སྒོ་གཡས་གཡོན་གྲུ་གཉིས་ལ། །མེ་ལོང་པི་ཝང་དུང་དང་སྣོད། །གོས་
དང་ཆོས་ཀྱི་འབྱུང་གནས་བྲི། །ཐོ་བ་འབར་བ་ཤར་སྒོར་བྲི། །རྡོ་རྗེ་དབྱུག་པ་ལྷོ་སྒོར་བྲི། །པདྨ་ནུབ་ཀྱི་སྒོ་རུ་བྲི། །རྡོ་རྗེ་ཁ་བྱེ་བྱང་དུ་བྲི། །ཤེས་རབ་ཐབས་སུ་རབ་ལྡན་པས། །རྟག་ཏུ་མཉམ་པར་གཞག་སྟེ་བྱ། །རང་རང་གི་ནི་ངོ་བོ་རྣམས། །འཕྲོ་བའི་སྔགས་ཀྱིས་གདབ་པར་བྱ། །དེ་ནས་ལྷ་
རྣམས་གནས་བྱའི་ཕྱིར། །སྨེ་ཤ་ཅན་གྱི་བདག་ཉིད་ཆེ། །བུ་མོ་ལོ་གྲངས་བཅུ་གཉིས་པ། །མཱ་མ་ཀཱི་རུ་བྱིན་གྱིས་བརླབས། །གཉིས་སྦྱོར་རྗེས་སུ་ཆགས་བསྐྱེད་ནས། །སངས་རྒྱས་རང་གི་ནང་དུ་གཞུག །ཆོ་ག་གསུམ་གྱིས་བསྒྲུབ་བྱས་ནས། །བཞི་པས་གཉིས་སུ་མེད་པར་བྱ། །རྡོ་རྗེ་པདྨའི་སྒྲ་
ཡིས་ནི། །སངས་རྒྱས་དཀྱིལ་འཁོར་རྣམ་པར་དགུག །བསྐྲད་ནས་སྲུང་བྱ་སྔོན་བཞིན་དུ། །མཆོད་ཡོན་ལ་སོགས་དབུལ་བར་བྱ། །མཆོད་བསྟོད་བདུད་རྩི་མྱང་བྱས་ནས། །ཤེས་རབ་མཐར་བྱེད་ཀྱིས་གཞུག་དང་། །བཅིངས་ཏེ་དགའ་བྱས་ཉེར་སྒྲུབ་དང་། །སྒྲུབ་པ་དབང་བསྐུར་གྱིས་
མཚན་པའོ། །སྔོན་བཞིན་མཆོད་པ་ཡང་བྱས་ཏེ། །དེ་བཞིན་བསྟོད་དང་བདུད་རྩི་མྱང་། །གསལ་བར་བསྒོམས་ནས་བཟླས་བརྗོད་དང་། །རེག་པའི་མཆོད་པས་མཉེས་བྱའོ