Luận tạng Tây Tạng (Tengyur) — Tập 42

དང་སྡིག་པོའི་ངོ་བོ་བརྟགས་པ་མ་ཡིན་པས་ན་དུས་གསུམ་དུ་རྒྱུ་བ་མ་ཡིན་པ་དང་། དམན་མིན་ནི་རྡུལ་ཕྲ་རབ་སྟེ་གྲུབ་པའི་གཞི་ཡིན་པའི་ཕྱིར་རོ། །དེ་ཉིད་ཐོགས་པ་དང་བྲལ་ཡང་སེམས་ཅན་གྱི་ལས་ཀྱིས་འདུས་པའི་གཟུགས་ཡིན་པར་ཉན་ཐོས་མདོ་སྡེ་པས་རྟོགས་སོ། །ཡན་ལག་ཅན་
ཡང་དོན་དམ་མིན། །ཞེས་པ་ནི་མུ་སྟེགས་ཀྱིས་བརྟགས་པ་རྣམས་སོ། །རྡུལ་ཕྲན་དག་ཀྱང་དེ་བཞིན་ནོ། །ཞེས་པ་ནི་ཉན་ཐོས་བྱེ་བྲག་ཏུ་སྨྲ་བས་བརྟགས་པའོ། །སོ་སོར་སྣང་བའི་གཟུགས་ཕྲ་རབ་སོ་སོར་སྣང་བ་མི་དམིགས་པ་སྟེ་འདུས་པ་མི་དམིགས་པ་སྟེ། ཉན་ཐོས་མདོ་སྡེ་པས་བརྟགས་
པའོ། །དེ་ཐམས་ཅད་རྨི་ལམ་ལྟ་བུར་མི་སྣང་བ་སྟེ། འོ་ན་གང་སྣང་ཞེ་ན། གཟུང་འཛིན་སྤངས་པའི་རྣམ་ཤེས་ཆེ། །ཞེས་སོ། །ཇི་ལྟར་སྣང་ཞེ་ན། དོན་དམ་ཤེལ་ལྟར་དག་པ་རུ། །ཞེས་ཏེ། གཉིས་པོས་སྟོང་པའི་རྣམ་པར་ཤེས་པ་ཤེལ་དག་པ་ལྟ་བུ་དོན་དམ་པར་རྫས་ཉིད་དུ་སེམས་པ་
ཉིད་དུ་རྣལ་འབྱོར་སྤྱོད་པས་རབ་ཏུ་རྟོགས་སོ་ཞེས་སོ། །སོ་སོར་སྣང་བའི་གཞུང་ཐམས་ཅད་ཅེས་པ་ནི་བརྡ་དང་གཟུང་འཛིན་དང་དངོས་པོའི་ཀུན་དུ་བརྟགས་པའོ། །དེ་དག་ཀྱང་དོན་དམ་པ་མིན་ཏེ། ཅིའི་ཕྱིར་ཞེ་ན། གཅིག་དང་དུ་མའི་རང་བཞིན་དང་བྲལ་བའི་ཕྱིར་དཔེ་ནམ་མཁའི་ཆུ་སྐྱེས་བཞིན་
དུ་གཞུང་དེ་ཐམས་ཅད་སྤངས་པ་སྟེ། གཉིས་མེད་དེ་དོན་དམ་པའི་བདེན་པའོ། །གཉིས་སུ་མེད་མིན་ཞེས་ཏེ་ཀུན་རྫོབ་ཀྱི་བདེན་པའོ། །དེ་ཉིད་སྤྲོས་པ་མེད་པས་ན་ཞི་བའོ། །དེ་ཡང་མཐའ་གསུམ་གྱིས་མ་རེག་པའི་རྣམ་པར་ཤེས་པ་ཀུན་རྫོབ་ཏུ་སྒྱུ་མའི་མཚན་ཉིད་ཙམ་དུ་དག་པ་དང་མ་དག་
པར་སྣང་བ། དོན་དམ་པར་ན་ཤིན་ཏུ་དྲི་མེད་ནམ་མཁའ་ལྟར་སྣང་བ་བློ་གྲོས་དང་ལྡན་པའི་དབུ་མ་པས་རྟོགས་སོ་ཞེས་སོ། །དེ་དག་ནི་རྟོག་པ་དང་བཅས་པའི་གཙོ་བོ་སྟེ། དེ་དག་ལ་སོགས་པ་མཐའ་ཡས་པ་ཞེས་པ་ནི་ལྟ་བ་ལྔ་བརྒྱ་བདུན་ཅུ་པ་རྣམས་བསྡུ་བར་བྱའོ། །དེ་ཀུན་གྱིས་ཀྱང་

གཉིས་སུ་མེད་པའི་དོན་དེ་ཁོ་ན་ལ་གནས་ནས་བློ་ཐ་དད་པས་སོ་སོར་བརྟགས་པའོ། །དེ་ལྟར་བརྟགས་ཀྱང་དེ་ཐམས་ཅད་ཡང་དག་པར་བརྟགས་པ་མིན་པ་བླ་ན་མེད་པའི་སངས་རྒྱས་མ་ཐོབ་པས་བླ་དང་བཅས་ཞེས་སོ། །ཅིའི་ཕྱིར་ཞེ་ན། འོག་མ་འོག་མའི་རྣལ་འབྱོར་བློ་ལས་གོང་མ་གོང་
མའི་ཁྱད་པར་དུ་འཕགས་སོ། །དེ་ཡང་མུ་སྟེགས་པ་ལས་བྱེ་བྲག་ཏུ་སྨྲ་བ་སྟེ་མི་རྟག་པའོ། །དེ་ལས་མདོ་སྡེ་པ་སྟེ་བརྟགས་པའོ། །དེ་ལས་རྣལ་འབྱོར་སྤྱོད་པ་སྟེ་སེམས་ཙམ་གྱིས་སོ། །དེ་ལས་རྣལ་འབྱོར་སྤྱོད་པའི་དབུ་མ་པ་སྟེ་ཀུན་རྫོབ་ཙམ་ཉིད་ཀྱིས་སོ། །དེ་ལས་བླ་ན་མེད་པའི་
གཞུང་པ་སྟེ་ཡེ་ཤེས་ཁོ་ནས་སོ། །དེ་བས་ན། འོག་མའི་བློ་ནི་གོང་མ་ཡི། །ཤེས་རབ་ཀྱིས་ནི་སུན་འབྱིན་ནོ། །ཞེས་པ་ཡང་དེ་ཁོ་ནས་གསལ་ལོ། །དེ་བས་ཞེས་པ་ནི་ཤེས་རབ་ཀྱི་མཐར་ཐུག་པ་ནི་ཕུལ་དུ་བྱུང་བའི་ཕྱིར་རོ། །གོང་མའི་རིམ་པ་ནི་དབང་བསྐུར་བའིའོ། །ལྷན་ཅིག་པའི་
སློབ་དཔོན་ནི་རང་གི་ཤེས་རབ་བོ། །དེས་བྱིན་གྱིས་བརླབ་པ་ནི་དེ་དང་སྙོམས་པར་ཞུགས་པའོ། །དེས་གསལ་ཞིང་ཞེས་པ་ལ་སོགས་པ་གོང་དུ་བཤད་པ་རྟོགས་པའོ། །གང་ལས་ཤེ་ན། ལྷན་ཅིག་སྐྱེས་པའི་ཡེ་ཤེས་ལས་ཏེ་བར་མའི་ཡེ་ཤེས་སོ། །གང་གིས་ཤེ་ན། བླ་མའི་ཁ་
ལས་ཞེས་ཏེ། དེའི་རྒྱུད་སློབ་དཔོན་ཆེན་པོའི་ཁ་ལས་རྣམ་པར་འཕོ་བ་ལས་མངོན་སུམ་དུ་བདེ་བ་རང་ལ་འབྱུང་བ་རྟོགས་པར་བྱའོ་ཞེས་སོ། །དེའི་སྔོན་དུ་སོང་བ་ཡང་ཐུན་མོང་དང་ཐུན་མོང་མ་ཡིན་པའི་དམ་ཚིག་དང་སྡོམ་པར་ལྡན་པའི་སྣོད་གཙང་མ་རུ་ཏིང་ངེ་འཛིན་རྩེ་གཅིག་པ་ཆུ་དང་འདྲ་
བ་ལས་ལྷན་ཅིག་སྐྱེས་པའི་ཡེ་ཤེས་གཟུགས་བརྙན་ལྟ་བུ་སྐལ་བ་དང་ལྡན་པའི་རྣལ་འབྱོར་པས་རབ་ཏུ་བརྟག་པར་བྱའོ་ཞེས་སོ། །དེ་ལྟ་བུའི་ལྷན་ཅིག་སྐྱེས་པའི་དགའ་བའི་མན་ངག་ཅན་གྱི་བསྔགས་པ་གསུངས་པ། དེ་ཐོབ་ཕྱིན་ཆད་ཅེས་པ་ལ་སོགས་པའོ། །དེ་ཡི་ཉེས་པས་མི་གོས་
སོ། །ཞེས་པ་ནི་ཉེས་པ་དེ་ཉིད་ཤེས་པའི་ཕྱིར་རོ། །ཇི་ལྟར་ཞེ་ན། ཀླུ་འཇིགས་པའི་རང་བཞིན་གྱིས་གྲུབ་པའི་སྔགས་དང་། སྨན་དང་ལྡན་པའི་གང་ཟག་གིས་སྦྲུལ་གསོད་པར་བྱེད་པ་དེ་བཞིན་དུ། རྣལ་འབྱོར་ཐམས་ཅད་ཀྱི་བདག་པོ་དབང་ཕྱུག་ཆེན་པོ་ལ་དེ་བཞིན་གཤེགས་

པ་ཐམས་ཅད་ཀྱི་ཡེ་ཤེས་བདུད་རྩི་ལྟ་བུའི་སྨན་གྱིས་རྒྱས་བཏབ་པས་ནི་ཕྱིན་ཅི་ལོག་ཏུ་སྣང་བའི་ཉོན་མོངས་པ་ནི་སྦྲུལ་ལྟ་བུ་སྟེ་ཕྱིན་ཅི་ལོག་ཉིད་མེད་པར་ཤེས་པས་ཅི་བྱར་ཡོད་ཅེས་སོ། །དཔེ་གཞན་གསུངས་པ་གང་ཞིག་ཅེས་པ་ལ་སོགས་པའོ། །གདུགས་ཐོགས་པ་
ལ་དེའི་སྟེང་ནས་ཆར་པས་བྱར་མེད་ནས་འདོད་པའི་གནས་སུ་ཕྱིན་པ་དང་འདྲ་བར། གཉིས་སུ་མེད་པའི་ཡེ་ཤེས་ཀྱི་གདུགས་ནི་གོམས་པ་ཁྱད་པར་དུ་བྱེད་པའི་ལམ་སྟེ། རིམ་པ་གཉིས་པའོ། །དེ་ལ་གནས་པ་ལ་རྟོག་པའི་ཆར་པས་ཇི་ལྟར་གནོད་དེ་དེ་ཉིད་ལམ་དུ་ཤེས་པའི་ཕྱིར་རོ། །
གཞན་དུ་མ་ཤེས་པས་དེའི་འཆིང་བར་འགྱུར་བ་སྟེ། ཀ་ཏ་ཀ་བཞིན་དུ་ལེན་པ་པོའི་གཙོ་བོ་ཡིན་པའི་ཕྱིར་རོ། །ད་ནི་ཐེག་པ་འོག་མ་པ་རྣམས་ཀྱི་སྤྱོད་ཡུལ་མ་ཡིན་པར་གསུངས་པ། དེ་འདྲ་ཞེས་པ་ལ་སོགས་པའོ། །སོ་སོའི་སྐྱེ་བོ་ཞེས་པ་ནི་ཚངས་པ་ལ་སོགས་པའོ། །ཉན་ཐོས་ནི་རྒྱུན་དུ་
ཞུགས་པ་ལ་སོགས་པའོ། །རང་སངས་རྒྱས་ནི་བསེ་རུ་ལྟ་བུ་དང་། ཚོགས་ཤིང་སྤྱོད་པའོ། །རྣལ་འབྱོར་སྤྱོད་པ་དང་དབུ་མ་པ་ནི་བྱང་ཆུབ་སེམས་དཔའི་ལམ་ལ་གནས་པའོ། །བྱང་ཆུབ་སེམས་དཔའ་ནི་ས་བཅུ་ལ་གནས་པའོ། །བླ་བཅས་སངས་རྒྱས་ཞེས་པ་ནི་བྱ་བའི་རྒྱུད་ཀྱི་སངས་རྒྱས་
དང་སྤྱོད་པའི་རྒྱུད་ཀྱི་སངས་རྒྱས་དང་རྣལ་འབྱོར་རྒྱུད་ཀྱི་སངས་རྒྱས་སོ། །དེ་ཐམས་ཅད་ཀྱིས་ཀྱང་འདི་ནི་ཅུང་ཟད་ཀྱང་མི་ཤེས་སོ་ཞེས་སོ། །འོ་ན་གང་གིས་ཤེས་ཤེ་ན། འདིའི་དོན་ཞེས་པ་ལ་སོགས་པའོ། །འདིའི་དོན་ཤེས་པའི་མ་འོངས་པའི་དུས་ན་རྡོ་རྗེ་འཛིན་པ་ནི་བླ་མ་སྟེ་རྡོ་རྗེ་འཛིན་པ་དེའི་ལུས་ལ་གནས་པའི་
ཕྱིར་རོ། །དེ་རྗེས་སུ་མཐུན་པའི་ཡོན་གྱིས་མཉེས་པར་བྱས་ནས་ཤེས་པར་བྱའོ་ཞེས་སོ། །དེའི་འང་སྔོན་དུ་སོང་བའི་རྒྱུ་ནི་རང་གི་ཚེ་རབས་སྔོན་དུས་བསོད་ནམས་ཆེན་པོ་བསགས་པའི་སྟོབས་ཀྱིས་ཕྱི་རོལ་གྱི་ཡི་གེ་ལ་སོགས་པ་ལ་བརྟེན་པ་མེད་པར་བླ་མས་སློབ་མའི་རྒྱུད་དུ་རྣམ་པར་འཕོ་ཞེས་སོ། །
གཉིས་སུ་མེད་པའི་རྣམ་པ་ལ་དང་པོའི་ལས་ལ་སོགས་པའི་མཐའ་གཉིས་དགག་པར་གསུངས་པ། དེ་ལ་ཞེས་པ་ལ་སོགས་པའོ། །དཀྱིལ་འཁོར་ནི་རི་མོའི་དཀྱིལ་འཁོར་རོ། །སྦྱིན་སྲེག་ནི་ཐབས་ལ་སོགས་པ་དང་ལྡན་པའོ། །གཏོར་མ་ནི་འབྱུང་པོ་ལ་སོགས་པའིའོ། །བཟླས་པ་ནི་

ཕྲེང་བའི་སྔགས་ལ་སོགས་པ་བཟླ་བའོ། །བགྲང་ཕྲེང་ནི་ལས་ཀྱི་བྱེ་བྲག་གིས་གྲངས་དང་ཁ་དོག་ལ་སོགས་པའོ། །སྐྱིལ་མོ་ཀྲུང་ནི་རྡོ་རྗེའི་སྐྱིལ་མོ་ཀྲུང་ལ་སོགས་པའོ། །སྟང་སྟབས་ནི་གཡས་བརྐྱང་བ་ལ་སོགས་པ་སོ་སོའི་ཚུལ་སྤྱོད་པའི་ཁྱད་པར་རོ། །སོགས་ཀྱིས་བསྡུས་པ་ཚོགས་ཀྱི་འཁོར་
ལོ་དང་། ཕྱིའི་མཆོད་པ་ལ་སོགས་པའོ། །དེ་རྣམས་ལ་ཞེས་པ་ནི་སྤྲོས་བྲལ་རྣམ་པར་སླུ་བ་སྟེ་སྤྲོས་པར་སྣང་བའི་ཕྱིར་རོ། །དེའི་བྱ་བ་མ་ཡིན་ཞེས་ཏེ་གཅིག་ཏུ་སྤྱོད་པའི་ཚུལ་གྱིས་སོ། །དགག་པ་མ་ཡིན་ཞེས་ཏེ་དེ་ལ་གནས་པས་བསོད་ནམས་ཀྱི་ཚོགས་རྫོགས་པར་བྱ་བའི་ཕྱིར་མི་དགག་
སྟེ། ལྷག་པའི་ལྷ་ནི་མཚན་མ་མེད་པའི་ལྷ་སྟེ་དེ་ལས་ཐམས་ཅད་འབྱུང་བའི་ཕྱིར་ན་སྤྲུལ་ཕྱིར་རོ་ཞེས་སོ། །དེ་བས་ན་འབྲས་བུ་ལ་མངོན་པར་ཞེན་པ་རྣམས་ཀྱིས་དེ་མི་རྟོགས་པར་བསྟན་པའི་ཕྱིར། བྱ་བ་རྣམས་ལ་ཞེས་པ་ལ་སོགས་པའོ། །དེ་ནི་གོ་སླ་བས་མ་བཤད་དོ། །དེ་ལྟ་བུའི་བྱ་
བ་ལ་ལམ་དུ་འཛིན་པའི་གདོན་ཆེན་པོའི་ནད་ཀྱིས་ཟིན་པ་ལ་གཉིས་སུ་མེད་པའི་ཡེ་ཤེས་དུས་གསུམ་དུ་གཡོ་བ་མེད་པའི་སྨན་བདུད་རྩི་ལྟ་བུ་རྣམ་པར་རྟོག་པའི་ཤི་བ་ལ་སོགས་པའི་སྡུག་བསྔལ་དང་བྲལ་བར་བྱེད་པས་གོང་མའི་རིམ་པ་ལྟར་གསོ་བར་བྱེད་པ་ནི་སྐྱེས་བུ་དམ་པའོ་ཞེས་ཏེ།
ཐབས་ཐམས་ཅད་ཀྱིས་མཉེས་པར་བྱས་ཏེ་དེ་བླང་བར་བྱའོ་ཞེས་པའི་ཐ་ཚིག་གོ། །ད་ནི་བདག་ཉིད་ཆེན་པོ་རྣམས་ཀྱིས་དེ་རིག་པར་བྱས་ནས་གོམས་པར་བྱ་བའི་ཐབས་གསུངས་པ་དེ་བས་ཞེས་པ་ལ་སོགས་པའོ། །ལུས་ངག་ཡིད་གསུམ་གྱི་སྡོམ་པ་མཆོག་ཅེས་པ་ནི་རྡོ་རྗེ་སེམས་དཔའ་
ལས་བྱུང་བའི་ཕྱིར་སྐྱེས་པ་དང་བུད་མེད་ཀྱི་གཟུགས་དུ་མ་ལ་བརྙས་པར་མི་བྱ་བ་ནི་ལུས་ཀྱི་སྡོམ་པའོ། །གསུང་རྡོ་རྗེའི་རང་བཞིན་པས་ན་འདོད་པ་བསྐྱེད་པའི་ཚིག་རྩུབ་མོ་ལ་སོགས་པ་ཅི་རིགས་པར་སྨྲ་ཞིང་དགག་པར་མི་བྱ་བ་ནི་ངག་གི་སྡོམ་པའོ། །དེ་བཞིན་དུ་རྡོ་རྗེ་སེམས་དཔའི་ངོ་བོ་བས་ངན་པར་
རྟོགས་པ་དང་བཟང་པོར་རྟོགས་པ་ནི་རང་གི་སེམས་ཕྱི་མ་སུན་མི་དབྱུང་བ་ནི་ཡིད་ཀྱི་སྡོམ་པའོ། །དེ་ལ་སོགས་པ་རྣལ་འབྱོར་པ་སྙིང་པོའི་སྡོམ་པ་དང་བཟའ་བའི་དམ་ཚིག་མཆོག་ལ་གནས་པར་བྱས་ནས་ཞེས་སོ། །ངའོ་སྙམ་པས་གཟི་བསྐྱེད་ལ། །ཞེས་པ་ནི་ཐབས་དང་ཤེས་རབ་གཉིས་ཀྱི་སྒོ་ནས་མཉམ་

པར་སྦྱར་བས་བདག་གི་ལུས་ངག་ཡིད་གསུམ་ཡེ་ཤེས་སུ་རབ་ཏུ་བསྡུས་ནས་དེ་ལྟ་བུ་རློམ་པའི་ངའོ་སྙམ་པས་སེམས་ཀྱི་གཟི་བསྐྱེད་པའོ། །དེས་རིམ་པ་གཉིས་པ་ནི་རྫོགས་པའི་རིམ་པ་སྟེ་སྒྲུབ་པོ་ཞེས་པའི་ཐ་ཚིག་གོ། །ཇི་ལྟ་བུ་ཞེ་ན། དགོན་པའམ་ཞེས་པ་ལ་སོགས་
པའོ། །དགོན་པའམ་ཞེས་པ་ནི་གྲོང་ལས་རྒྱང་གྲགས་བརྒྱད་ཀྱི་ཕྱེད་ཕན་ཆད་དོ། །གྲོང་གི་མཐར་ཞེས་པ་ནི་གྲོང་གི་དགོན་པའོ། །དང་པོའི་ལམ་ལ་ཞུགས་པའི་རྣལ་འབྱོར་པ་གཉིས་ཀྱི་གནས་སོ། །ཡང་དག་པར་ན་སེམས་རྣམ་པར་དག་པ་ལས་ཡེ་ཤེས་འབྱུང་བའི་ཕྱིར་ན་གང་རུང་ཅི་
རུང་དེ་ལྟ་བུ་ཞེས་བྱ་བ་སྨོས་སོ། །བྱ་བར་འོས་པའི་ལས་ཀུན་ཡང་། །བྱས་ནས་ཞེས་པ་ནི་དེར་སྟེགས་བུ་བརྩིགས་པ་དང་བདུད་རྩི་ལྔས་བྱུགས་པ་དང་། མེ་ཏོག་དགྲམ་པ་ལ་སོགས་པ་བྱས་ནས་བདེ་བའི་སྟན་ལ་རྡོ་རྗེ་སྐྱིལ་མོ་ཀྲུང་གིས་འདུག་པར་བྱའོ་ཞེས་སོ། །དེ་ནས་ཅི་ཞིག་བྱ་ཞེ་ན། དང་
པོའི་རིམ་པ་དང་གཉིས་པའི་གཞི་རྣམ་པར་དགོད་པའི་ཕྱིར། བསྐྱེད་པའི་རིམ་པ་གསུངས་པ། དེ་ནས་ཞེས་པ་ལ་སོགས་པའོ། །སེམས་ཅན་ཐམས་ཅད་ཀུན་ཞེས་པ་ནི་ཡུལ་ཚད་མེད་པའོ། །ཡུལ་ཅན་གང་ཞེ་ན། ཚངས་སྤྱོད་ཆེན་པོ་བཞིས་དམིགས་ཏེ་ཞེས་པ་ནི་སྟོན་པ་སངས་རྒྱས་བཅོམ་
ལྡན་འདས་ཚངས་པ་ཆེན་པོ་སྟེ་དེའི་སྤྱོད་པ་ནི་སྙིང་རྗེ་ལ་སོགས་པ་བཞིའོ། །དེས་དམིགས་པའོ། །ཇི་ལྟར་དམིགས་ཤེ་ན། ས་བོན་གྱི་འོད་ཟེར་གྱིས་སྣང་བའི་སེམས་ཅན་རྣམས་མཐོང་བའི་ལམ་དུ་བྱས་ལ། དེ་རྣམས་སྡུག་བསྔལ་དང་དེའི་རྒྱུ་ལས་གྲོལ་བར་བྱའོ་སྙམ་པ་ནི། སྙིང་རྗེས་
དམིགས་པའོ། །དེ་ལས་གྲོལ་ནས་འཇིག་རྟེན་དང་འཇིག་རྟེན་ལས་འདས་པའི་བདེ་བ་སྒྲུབ་པོ་སྙམ་པ་ནི་བྱམས་པས་དམིགས་པའོ། །དམུ་རྒོད་ལྟར་བཅོས་དཀའ་བའི་སེམས་ཅན་རྣམས་ལ་དོན་དེ་ཇི་ལྟར་ནུས་སྙམ་པ་ལ། དཔག་བསམ་གྱི་ཤིང་ལྟ་བུའི་ས་བོན་ལས་རང་གི་ལྷའི་སྐུར་སྣང་ན་སྒྲུབ་ནུས་
སོ་སྙམ་པ་ལ་རངས་པ་ནི་དགའ་བས་དམིགས་པའོ། །དེ་རྣམས་ཀྱིས་བླ་ན་མེད་པའི་བྱང་ཆུབ་ཡིད་ལ་བྱེད་པས་བསྟོད་པ་ལ་སོགས་པ་ལ་མི་སེམས་པ་ནི་བཏང་སྙོམས་ཀྱིས་དམིགས་པའོ། །དེ་ལ་སོགས་པས་ཞེས་པ་ནི་ས་བོན་གྱི་འོད་ཀྱིས་ཚོགས་བསགས་པའི་རྟེན་གསལ་བར་བྱ་བ་དང་། དེ་ལ་

མཆོད་པ་དང་། ཕྱག་འཚལ་བ་དང་། སྡིག་པ་བཤགས་པ་དང་། རྗེས་སུ་ཡི་རང་བ་དང་། བསྔོ་བ་དང་། གསུམ་ལ་སྐྱབས་སུ་གསོལ་བ་དང་། བྱང་ཆུབ་ཏུ་སེམས་བསྐྱེད་པ་དང་། ལམ་བསྟེན་པའོ། །དེ་རྣམས་ཅིའི་ཕྱིར་ཞེ་ན། རང་རྒྱུད་ཀྱི་ལས་ཀྱི་སྒྲིབ་པ་དག་པར་བྱས་ནས་ཞེས་སོ། །
དེ་ཡང་རང་གི་རྒྱུད་དྲི་མ་མེད་པ་ལ་རྟོག་པས་གློ་བུར་དུ་མཚམས་མེད་པ་ལ་སོགས་པས་བསྒོས་པ་དང་ཆོ་ག་དེ་རྣམས་ཀྱིས་དག་པར་བྱས་པ་སྟེ། ཇི་ལྟར་ཞིང་དུལ་བ་ལ་ལོ་ཏོག་རྒྱས་པར་འགྱུར་བ་དང་། རས་ཤིན་ཏུ་དཀར་པོ་ལ་ཚོན་འཇེན་པ་དང་འདྲ་བར། གང་ཟག་ལས་ཀྱི་སྒྲིབ་པ་ཟད་པ་ལ་དཀྱིལ་
འཁོར་གྱི་འཁོར་ལོ་འཇུག་པར་འགྱུར་བའི་ཕྱིར་རོ། །དེ་ལྟར་ན་ཡང་དོན་གཞན་དུ་འགྱུར་བ་དང་། དངོས་པོར་འཛིན་པ་ནི་དཀྱིལ་འཁོར་གྱི་འཁོར་ལོ་དང་མི་མཐུན་པའི་ཕྱིར་དེ་ཟློག་པ་གསུངས་པ། སེམས་ཙམ་ཞེས་པ་ལ་སོགས་པའོ། །དེ་ཡང་སྙིང་རྗེ་ཆེན་པོ་སྔོན་དུ་སོང་བའི་སྔགས་པས་
བྱང་ཆུབ་ཀྱི་སེམས་བྱིན་གྱིས་བརླབ་པའི་སྔགས་ཀྱིས་གུད་ན་ཡོད་པ་ལྟ་བུའི་ཕྱི་རོལ་གྱི་རང་བཞིན་སྟོང་པར་བྱས་ཏེ། དེར་སྣང་བ་ཡིད་ལ་མི་བྱེད་པས་སོ། །དེ་ཉིད་སེམས་ཙམ་སྟེ་ཆད་པའི་མཐའ་དགག་པའི་ཕྱིར་ཡི་གེ་གསུམ་དུ་བལྟ་བར་བྱ་སྟེ། དེ་ཡང་དངོས་པོར་འཛིན་པ་སྟོང་པ་ཉིད་དུ་བྱས་
ནས་རྣམ་པར་ཤེས་པ་རང་རིག་མཐའ་གཉིས་དང་བྲལ་བ་ཙམ་དུ་གནས་པར་བྱའོ་ཞེས་སོ། །རང་རིག་དེ་ཡང་ཟླ་བ་སོགས། །གདན་དུ་བརྟགས་ནས་ཞེས་པ་ལ་ཚིག་གི་དོན་འདི་འབྱུང་སྟེ། རླུང་གི་དཀྱིལ་འཁོར་ལ་སོགས་པའི་སྟོབས་ཀྱིས་གྲུབ་པའི་ས་གཞི་དང་། ལྕགས་རི་དང་གླིང་
སོ་སོའི་ཁ་དོག་ལ་སོགས་པ་བཟློག་པའི་ཕྱིར་སྲུང་བའི་འཁོར་ལོས་བརྟགས་པ་དང་། རང་རིག་པ་ཞེས་ཚིག་སྔ་མའོ། །དེ་ནས་ནམ་མཁའ་ལ་ཐོགས་པར་བྱེད་པའི་རེག་བྱ་དང་བྲལ་བའི་ཕྱོགས་གང་ཡིན་པ་དེའི་རྟོག་པ་བཟློག་པའི་ཕྱིར། ཆོས་ཀྱི་འབྱུང་གནས་སུ་བརྟགས་པ་དང་། དེ་ལ་རི་
རབ་དང་གླིང་དང་ཤིང་གེལ་པ་དང་ལྷ་དང་མིའི་གྲོང་ཁྱེར་དང་། ཁང་བཟངས་ལ་སོགས་པ་བཟློག་པའི་ཕྱིར་གཞལ་ཡས་ཁང་དུ་བརྟགས་པ་དང་། དེ་ལ་གནས་མལ་ལ་སོགས་པའི་རྟོག་པ་བཟློག་པའི་ཕྱིར་ཟླ་བ་དང་ཉི་མ་དང་པདྨའི་གདན་དུ་བརྟགས་པའོ། །དེ་བས་ན་ཁྱབ་བྱེད་ཀྱི་ཚིག་གིས་

གོང་དུ་བསྡུ་བར་བྱའོ། །ཡི་གེའི་སྨྱུ་གུས་བསྣུན་བྱས་ཞེས་པ་ནི་གདན་དེ་ལ་ཆོ་ག་དང་པོ་རྫོགས་པས་རང་རིག་པའི་སྨྱུ་གུས་བསྣུན་ནས་ཡི་གེར་བརྟགས་པའོ། །དེ་ལས་རང་གི་ལྷའི་སྐུར་བསྐྱེད་པར་བྱའོ་ཞེས་པའི་དོན་ཏོ། །དེས་འདི་སྐད་སྟོན་ཏེ་ཁང་པ་བརྩེགས་མའི་
དབུས་སུ་ཡི་གེ་གསུམ་ལ་གནས་པའི་སེམས་བབས་པ་ལ་སོགས་པ་ཟླ་བ་གཉིས་སུ་གྱུར་པ་དང་། དེ་གཅིག་ཏུ་གྱུར་པ་དང་དེ་ལས་ཡི་གེར་གྱུར་པ་དང་། དེ་ལས་མཚན་མ་ཡི་གེས་མཚན་པར་གྱུར་པ་དང་། དེ་ལས་སྤྲོ་བསྡུ་དང་ལྡན་པའི་ང་རྒྱལ་བྱ་བ་དང་། རང་དང་འདྲ་བ་ལས་བྱུང་བའི་སྐུར་
བསྐྱེད་པ་ནི་དང་པོའོ། །དེས་སེམས་ཅན་རྣམས་སྣོད་དུ་རུང་བར་བྱས་ནས། ཡི་གེ་གསུམ་འཇུག་པ་ལ་སོགས་པས་འོད་དུ་ཞུ་བ་ལས་གོང་གི་ཚད་མེད་པ་བཞི་ལྷ་མོར་གྱུར། དེ་བསྐུལ་བས་རང་གི་ལྷའི་ས་བོན་དུ་གྱུར། དེ་ལས་མཚན་མོ་ཡི་གེས་མཚན་པ་དེ་ལས་རང་དང་འདྲ་བའི་དེ་བཞིན་གཤེགས་
པ་ལས་བྱུང་བའི་རང་གི་ལྷའི་སྐུར་བསྐྱེད་ནས། བདག་ཉིད་རང་གི་ལྷའི་ང་རྒྱལ་འཆང་བ་ནི་གཉིས་པའོ། །དེའི་མིག་ལ་སོགས་པ་བྱིན་གྱིས་བརླབས་ནས་དེ་ལ་སྐུ་རྡོ་རྗེ་ལ་སོགས་པ་ཕྱག་རྒྱ་བཞིས་རྒྱས་བཏབ་སྟེ་དབང་བསྐུར་བླང་བའོ། །དེ་བཞིན་དུ་བར་མའི་བསྙེན་པ་ལ་སོགས་པས་ལྷ་མོའི་
སྐུར་བསྐྱེད་དེ། རིགས་ལྔས་གཏམས་པར་བྱས་ནས་གཉི་གའི་ཡན་ལག་དག་པར་བྱས་ཏེ། བདེ་མཆོག་མྱོང་བར་བྱ་བའི་ཕྱིར་རང་གི་ལྷ་མོ་ལ་བཅུག་ནས་གཉིས་ཀྱི་སྦྱོར་བ་བརྩམ་པ་ནི་དང་པོའི་རྣལ་འབྱོར་རོ། །དཀྱིལ་འཁོར་འཁོར་ལོ་སྤྲུལ་པར་བྱ། །ཞེས་པ་ནི་དེ་བཞིན་གཤེགས་པ་ཐམས་
ཅད་ཞུགས་པའི་ཟླ་བར་ཞུ་བ་དང་། གཙོ་བོའི་ས་བོན་དུ་གྱུར་པ་དང་། རང་གི་ལྷའི་འམ་གཙོ་བོའི་དཀྱིལ་འཁོར་དུ་གྱུར་པ་དང་། དེ་ནས་བཛྲ་དྷྲྀཀ་ལ་སོགས་པའི་སྔགས་ཀྱིས་དགོད་པ་སྟེ་བཞི་པའོ། །དེ་ནས་བྱིན་གྱིས་བརླབས་པའི་ཕྱིར་ཡེ་ཤེས་ཀྱི་འཁོར་ལོ་སྤྱན་དྲང་བ་དང་། མཆོད་ཡོན་
དབུལ་བ་དང་། བསྟིམ་པ་ལ་སོགས་པ་བྱས་ནས་ཆེན་པོའི་བསྙེན་པ་ལ་སོགས་པས་རྫོགས་པར་བྱས་པའོ། །དེ་མཉེས་ཞེས་པ་ནི་དེ་མཉེས་པར་བྱ་བའི་ཆོ་ག་བླ་ན་མེད་པའི་མཆོད་པ་དང་། བསྟོད་པ་དང་། བདུད་རྩིས་ཚིམ་པར་བྱ་བ་ནི་དཀྱིལ་འཁོར་རྒྱལ་བ་མཆོག་གོ། །དེ་ལ་གོམས་པ་

བསླབས་པས་ཞེས་པ་ནི་སྦྱོར་བ་གཉིས་ལ་ནན་ཏན་དུ་བྱས་པས་ཞེས་སོ། །དེ་ཅི་བྱེད་ཅེ་ན། ཕྱི་རོལ་ལུས་ནི་ལོག་བྱེད་དེ། །ཞེས་སོ། །དེ་ཡང་ལས་ཀྱི་སྒྲིབ་པ་དང་། དངོས་པོར་འཛིན་པ་བཟློག་པའི་རྣལ་འབྱོར་པས་སྲུང་བའི་འཁོར་ལོ་ལ་སོགས་པས་ཕྱི་རོལ་གྱི་ལུས་སྦྱངས་ནས། དེ་ན་གནས་
པའི་སེམས་ཅན་ནི་སྐྱེ་གནས་བཞིས་བསྡུས་པ་སྟེ། ཏིང་ངེ་འཛིན་ལྷག་མས་གོ་རིམས་བཞིན་དུ་དྲོད་གཤེར་ལས་སྐྱེས་པ་དང་། རྫུས་ཏེ་སྐྱེས་པ་དང་། མངལ་ནས་སྐྱེས་པ་དང་། སྒོ་ང་ལས་སྐྱེས་པ་སྦྱོང་བ་སྟེ། འདི་ནི་འོག་ནས་འཆད་དོ། །དེ་ལྟར་བསྐྱེད་པའི་རིམ་པས་གཞི་རྣམ་པར་བཀོད་ནས།
ད་ནི་རྫོགས་པའི་རིམ་པས་དེ་སྦྱང་བའི་ཐབས་གསུངས་པ། སངས་རྒྱས་ཞེས་པ་ལ་སོགས་པའོ། །དགའ་བའི་ཡེ་ཤེས་ཀྱི་རང་བཞིན་མི་ཤིགས་པའི་ཐིག་ལེ་བསྒོམ་པར་བཤད་པའོ། །སངས་རྒྱས་རྣམས་ཞེས་པ་ནི་རྟག་པ་ལ་སོགས་པའོ། །དེའི་སྤྱོད་ཡུལ་མཆོག་ནི་དངོས་པོ་ཐམས་ཅད་ཀྱི་མཐའི་དེ་
བཞིན་ཉིད་དོ། །དེ་བསྒོམ་པར་བྱ་ཞེས་སོ། །ཇི་ལྟར་བསྒོམ་པར་བྱ་ཞེ་ན། རང་སྙིང་དམ་ཚིག་ཕྱག་རྒྱ་ཞེས་ཏེ་རང་གི་ལྷའི་སྙིང་གར་དམ་ཚིག་གི་ཕྱག་རྒྱ་ཡེ་ཤེས་སེམས་དཔའ་གནས་དང་བཅས་པའོ། །ཐུགས་ཀར་མཚན་མ་ལ་གནས་པ་ཞེས་པ་ནི་དེའི་ཐུགས་ཀར་ཟླ་བ་ལ་ཕྱག་མཚན་གྱི་དཀྱིལ་དུ་ཟླ་བ་ལ་གནས་པའི་ཞེས་སོ། །དེ་གང་ཡིན་ཞེ་ན། དེ་བཞིན་
གཤེགས་པ་ཀུན་གྱི་ཡེ་ཤེས་མཆོག་སྟེ་དེ་ཡོད་ན་གཞན་འབྱུང་བ་སྟེ། དེ་ཡང་བསྐྱེད་པའི་རིམ་པ་རྣམས་ལ་རང་གི་ལྷའི་ཡི་གེའི་གཟུགས་སུ་རབ་ཏུ་སྣང་བ་དངོས་པོ་གང་གིས་ཀྱང་གཞོམ་དུ་མེད་པས་ས་བོན་འོད་ཟེར་ལྔ་འབར་བ་བསྒོམ་པར་བྱའོ། །དེའི་ཁ་དོག་རྣམ་པ་ལྔའི་ཞེས་པ་ནི་ས་བོན་དེའི་འོད་
ཟེར་ཁ་དོག་ལྔ་དང་ལྡན་པ་རང་གི་ལྷའི་སྟེང་གི་སྒོ་སྟེ། སྣ་བུག་གཡས་ནས་རྣམ་པར་སྤྲོ་བར་བྱའོ་ཞེས་སོ། །དེའི་རྩེ་ལས་དཀྱིལ་འཁོར་གྱི་ཞེས་པ་ནི་འོད་ཟེར་གྱི་རྩེ་ལས་བྱུང་བའི་དཀྱིལ་འཁོར་དང་ལྡན་པའི་བདེ་བར་གཤེགས་པའི་ཚོགས་རྣམས་ཕྱུང་ནས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་
རབ་ཏུ་བཀང་ནས། དེས་དབུགས་ཀྱི་ཀུན་རྟོག་ལས་བྱུང་བའི་སེམས་ཅན་ཞེས་པ་ནི་ཡང་དག་པ་མ་ཡིན་པའི་ཀུན་དུ་རྟོག་པ་རླུང་གི་རྟ་ལ་ཞོན་པས་སེམས་ཅན་ཐམས་ཅད་བསྒྲུབ་པ་སྟེ། སངས་རྒྱས་སྐུར་བསྐྱེད་ནས་ཞེས་པ་ནི། དེ་རྣམས་སངས་རྒྱས་ཀྱི་སྐུར་བསྐྱེད་པའོ། །དེ་གང་གིས་ཤེ་ན། ཟླ་བར་

ཞུ་བྱས་ཏེ། ཐིམ་པས་རྣམ་པར་དག་བྱས་ནས། །ཞེས་པ་ནི་འཕྲོས་པའི་དཀྱིལ་འཁོར་ཟླ་བ་ལྟ་བུར་ཞུ་བ་སེམས་ཅན་ཐམས་ཅད་ལ་ཐིམ་པས་དེ་རྣམས་གོང་མ་ལྟ་བུར་གྱུར་པའོ། །དེ་ཉིད་ཀྱང་ཡེ་ཤེས་ངོ་བོར་རང་ལ་ཞེས་ཏེ་ཆུ་ལྟར་དངས་པའི་ཡེ་ཤེས་ཀྱི་ངོ་བོར་འདུ་ཞིང་རང་
གི་གཡོན་པའི་ཧ་སར་ཞུགས་པར་བྱ་ཞེས་སོ། །ནང་གི་ལ་ཡང་དེ་བཞིན་དུ་ཞུགས་ནས་གོང་གི་མཚན་མའི་དབུས་ན་གནས་པའི་ས་བོན་ལ་ཞུགས་པར་བྱ་སྟེ་འགྲུབ་པའི་རྒྱུ་དང་གནས་བརྟན་པའོ། །དེས་ཅིར་འགྱུར་ཞེ་ན། དེ་ཉིད་ཅེས་པ་ལ་སོགས་པའོ། །ཡོན་ཏན་ཀུན་ནི་སྟོབས་ལ་སོགས་པའོ། །དེ་
བསྐྱེད་པའི་རིན་པོ་ཆེ་ནི་དངོས་པོ་ཀུན་ལ་ཁྱབ་པའི་བདག་ཅེས་སོ། །དེ་ཡང་གང་གིས་མི་ཆོམས་པས་ན་མི་ཤིགས་པའོ། །མ་སྤྲོས་པས་ན་ཐིག་ལེ་ཆེའོ། །དེ་ཉིད་འོད་ཟེར་ལྔ་དང་ལྡན་པའི་སྲན་ཙ་ན་ཀ་ཙམ་དུ་རང་གི་སེམས་བསྡུས་ཏེ་དེར་ཆོས་ཐམས་ཅད་ཀྱང་བསྡུས་ནས་རྣམ་པར་བསམ་པ་ནི་
དེའི་ཚད་བསྟན་པའོ། །དེའི་འོད་ཟེར་ཞེས་པ་ནི་ཐིག་ལེ་དེའི་འོད་ཟེར་གྱིས་སོ། །རང་གི་གནས་ཞེས་པ་ནི་ཐིག་ལེ་རང་གི་གནས་སོ། །དེ་ལས་ཕྱིར་བྱུང་དམ་ཚིག་གི་ཕྱག་རྒྱ། ནང་གསལ་ཞེས་པ་ནི་མཚན་མ་ལས་བྱུང་བའི་འོད་ཟེར་གྱིས་ཡེ་ཤེས་སེམས་དཔའི་ནང་གསལ་ནས་དེ་ལས་ཀྱང་ཕྱིར་
བྱུང་ནས་ཕྱི་ལུས་གསལ་ནས། དེས་ཀྱང་དེའི་དཀྱིལ་འཁོར་གསལ་བར་བྱས་ནས། དེ་ལས་ཕྱིར་བྱུང་བས་དེའི་གནས་ཀྱང་གསལ་ཞེས་ཏེ། ཡེ་ཤེས་སེམས་དཔའི་གནས་མཚན་མ་གསལ་བར་བྱའོ། །དེ་ལས་ཀྱང་ཕྱིར་བྱུང་ནས་བདག་ཉིད་ཀྱི་ནང་གི་ལུས་གནས་ཀྱི་སེམས་སྒྲ་ཡིག་བཅུ་དྲུག་
གི་གཟུགས་སུ་གནས་པ་གསལ་བར་བྱས་ནས་བསྡུ་བའོ། །དེ་དག་ཀྱང་གང་ཞེ་ན། མཐེ་བོའི་རྩ་བར་ཡི་གེ་ཨ། །ཞེས་པ་ལ་སོགས་པའོ། །དེ་ཡང་ཚེས་གཅིག་ལ་སོགས་པའི་རིམ་པར་ཤེས་པར་བྱའོ། །བཅུ་དྲུག་དུས་སུ་རྫོགས་གྱུར་པ། །ཞེས་པ་ནི་ཕྱིའི་ཟླ་བ་རྫོགས་པའི་དུས་སུ་དེ་ཡང་
རྫོགས་པའོ། །དེ་ནས་བཟློག་སྟེ་ཤེས་པར་བྱའོ། །བཅུ་དྲུག་དུས་སུ་རྫོགས་པར་འགྱུར་བ་ནི་བསྒྲུབ་པས་གནས་དཀྲུགས་པ་བཅུ་དྲུག །དེ་ཡང་བཅུ་དྲུག་པར་འགྱུར། དེ་ཡང་ཐིག་ལེ། དེ་ཡང་ཟླ་བ་ལྟ་བུར་སོང་ནས་དགའ་བའི་ཤེས་པ་འབྱུང་བའོ། །གོང་གི་འོད་ཀྱིས་རྣམ་པ་བཀུག་སྟེ་

ཞེས་པ་ནི་ཡི་གེ་བཅུ་དྲུག་པོ་རྣམ་པར་བཀུག་ནས་ཐིག་ལེའི་ནང་དུ་བཅུག་ལ་དེར་རང་གི་སེམས་དང་པོའི་ཡེ་ཤེས་ལྟར་བག་ཞད་བཟུང་བས་ཅིར་འགྱུར་ཞེ་ན། ལྷའི་འཁོར་ལོ་ཆེ། རྟེན་དང་བཅས་པ་མོས་པས་བསྒོམ། །ཞེས་ཆོས་འབྱུང་བ་ནས་བརྩམས་ཏེ་ཐིག་ལེའི་རྣལ་འབྱོར་ཡན་ཆད་ལྷག་པར་
མོས་པས་བསྒོམ་པར་བྱའོ་ཞེས་སོ། །དེ་དབུས་བདག་པོ་ཐུགས་ཀ་རུ། །ཞེས་པ་ནི་ཐིག་ལེའི་དབུས་སུ་དམ་ཚིག་སེམས་དཔའི་ཐུགས་ཀར་ཡེ་ཤེས་སེམས་དཔའི་འཁོར་ལོ་གོང་མའི་རིམ་པས་ལྷག་པར་མོས་པས་བསྒོམས་ལ། དེའི་ཐུགས་ཀར་མཚན་མ་ལ་ཡང་མི་ཤིགས་པའི་ཐིག་ལེ་
ཆེན་པོ་བསྒོམ་པར་བྱས་ནས་ཞེའོ། །ཅི་ཙམ་ཞེ་ན། ཡུངས་ཀར་ཚད་ཙམ། དེ་ལས་འོད་ཟེར་སྤྲོ་བར་བྱའོ། །དེས་རང་གི་གནས་ནི་མཚན་མ་ཕྲ་མོའོ། །ཕྱག་རྒྱ་ནི་དེའི་གནས་དམ་ཚིག་གི་ཕྱག་རྒྱའོ། །ནང་གསལ་ཞེས་པ་ནི་དེའི་ལུས་ཀྱི་ནང་ངོ་། །དཀྱིལ་འཁོར་གསལ་བྱས་ཞེས་པ་ནི་དེའི་
དཀྱིལ་འཁོར་རོ། །དེའི་གནས་ཞེས་པ་ནི་མཚན་མའོ། །བདག་པོའི་ནང་གསལ་ཞེས་པ་ནི་དམ་ཚིག་སེམས་དཔའི་ཕྱག་རྒྱ་གཞན་ནོ། །ཕྱིའི་ལུས་ཞེས་པ་ནི་བདག་པོའིའོ། །དཀྱིལ་འཁོར་ཞེས་པ་ནི་བཅོ་བརྒྱད་དོ། །རྟེན་བཅས་ཞེས་པ་ནི་གཞལ་ཡས་ཁང་དང་ཆོས་འབྱུང་བའོ། །དེ་ནས་བཅུ་
དྲུག་གནས་པའི་ཞེས་པ་ནི་ནང་འདྲེས་པ་ལས་བཅུ་དྲུག་ཏུ་གཞག་པའི་འོད་ཟེར་བ་སྤུའི་བུ་ག་ལས་ཕྱུང་བྱས་ཏེ། དེས་ཕྱིའི་ལུས་ནི་ཕྱི་རོལ་གྱི་དམ་ཚིག་སེམས་དཔའི་ལུས་ཀྱི་དཀྱིལ་འཁོར་འཁོར་ལོ་ནི་དེ་འཁོར་ལོ་བཅོ་བརྒྱད་དོ། །རྟེན་དང་བཅས་པ་ཞེས་པ་ནི་གཞལ་ཡས་ཁང་དང་། ཆོས་འབྱུང་
དང་སྲུང་བའི་འཁོར་ལོའོ། །དེ་ནས་འོད་ཟེར་དེ་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་བདེ་བར་གཤེགས་པ་ཀུན་གྱི་སྤྱན་སྔར་གཤེགས་ཏེ་ཡེ་ཤེས་ཀྱི་བདུད་རྩི་ཞུགས་ནས་དེས་ཀྱང་གནས་ཏེ་དེ་སྒྲུབ་པའི་ཕྱིར་ཞལ་ནས་ཞུགས་ཏེ་ཞེས་པ་ནི་དེ་རྣམས་ཀྱིའོ། །ཐིག་ལེར་ཞེས་པ་ནི་
མི་ཤིགས་པའི་ཐིག་ལེར་སོང་ནས་བདུད་རྩི་བླངས་ནས་དེ་རྣམས་ཀྱི་རྡོ་རྗེའི་ལམ་ནས་བྱུང་ནས་འོ་མའི་རྒྱུན་ལྟར་འདུ་ཞིང་འོངས་པར་བྱས་ནས། ཐབས་ཀྱི་ཡེ་ཤེས་གཡས་ཞུགས་ཏེ། །ཞེས་པ་ནི་རྟག་པ་ལ་སོགས་པས་གནང་བའི་བདུད་རྩི་གཡས་ཀྱི་ཧ་སར་ཞུགས་པའོ། །གཞན་ནི་གཡོན་དུ་ཞུགས་

པའི་ཞེས་པ་ནི་སྤྱན་མ་ལ་སོགས་པའིའོ། །ཡེ་ཤེས་ཀྱི་ཐིག་ལེ་ཞེས་པ་ནི་དང་པོའི་ཐིག་ལེའོ། །སྣང་བའི་ཐིག་ལེ་ཞེས་པ་ནི་དེ་ལས་སྣང་བའི་ཐིག་ལེ་སྟེ་ཆོས་ཉིད་ད། །ཐིམ་པར་གྱུར་ཞེས་པ་ནི་བཞིའི་བར་དུ་སྒོ་གཉིས་ཞོན་ནས་ཐིག་ལེ་དེ་ལ་ཐིམ་པར་གྱུར་པའོ། །དེ་ཡང་ཇི་ལྟ་བུའི་ངོ་བོར་
བསམ་ཞེ་ན། དེ་ནི་ཞེས་པ་ལ་སོགས་པའོ། །དེ་ཡང་བྱང་ཆུབ་ཀྱི་སེམས་ཀྱི་ངོ་བོ་བས་ན་འཛག་པའི་ངང་ཚུལ་ཅན་ནོ། །ཡེ་ཤེས་ལྔའི་ཡུལ་དམ་པ་བས་ན་འོད་ཟེར་ལྔ་འབར་རོ། །སྐྱོན་ཐམས་ཅད་དག་པས་ན་དཀར་འཚེར་བའོ། །འདོད་ཆགས་ཆེན་པོ་རྣམ་པར་དག་པས་ན་ཅུང་ཟད་དམར་བའོ། །
རང་གི་སེམས་ཐབས་ཀྱིས་སྟེར་བས་མི་གཡོ་ཞིང་གཟུང་བར་བྱ་ཞེས་ཏེ། རྩེ་གཅིག་པ་མ་འཕྲོས་པ་དབུགས་འཇུག་པའི་སྤྱོད་པས་སོ། །དེ་ལས་གོང་མའི་རིམ་པ་ལྟར་ཞེས་པ་ནི་མཐར་ཐུག་པ་ནས་བརྩམས་ཏེ་བཞག་པ་ལ་སོགས་པ་མེད་པར་བྱུང་ནས་སྤྲོ་བ་སྟེ་དེས་བདུད་རྩི་བླང་བ་ལ་སོགས་པ་
བྱས་ནས། རིམ་པས་འདུ་ཞིང་མཐའ་ལ་བསྡུ་བ་དང་། ཡང་དེ་ལ་སེམས་གོང་མ་ལྟར་བཟུང་བ་ཡང་དག་པར་བྱས་པས་སེམས་དངོས་པོ་ཀུན་ལས་འགོག་པའི་རྡོ་རྗེར་གྱུར་ནས་བརྟན་པའི་རྟགས་སྐྱེ་བ་སྟེ། ནམ་ཞིག་དེ་ལ་རེག་གྱུར་པ། །ཞེས་པ་ནི་དུས་ནམ་ཞིག་ན་མི་འགྱུར་བའི་ཐིག་ལེ་ལ་ལྷ་མོའི་
ལམ་གྱིས་རེག་པར་གྱུར་པ་དེའི་ཚེ། སངས་རྒྱས་ཀུན་གྱི་མཆོག་འཛིན་པ། །ཡིད་སྦྱིན་དཔལ་དང་འདྲ་བར་འགྱུར་བའོ། །དེ་ཡང་ཕྱིན་ཅི་མ་ལོག་པ་འདི་ལ་གོམས་པ་མེད་པས་ན་འདི་ལ་གོམས་པར་བྱས་པས་དེར་འགྲོ་བའི་དང་པོ། རྟགས་རྣམས་ཡང་དག་སྐྱེ་བར་འགྱུར། །ཞེས་ཏེ། དགོད་པ་
དང་གླལ་བ་དང་འདར་བ་ལ་སོགས་པའོ། །དེ་སྐྱེས་པས་ངེས་པར་རྟག་པར་འགྱུར་བ་ལ་སོམ་ཉི་མི་བྱའོ། །དེ་ལ་ཞེན་པ་དགག་པ་ནི་འོག་ནས་འཆད་དོ། །འདི་དང་པོ་བསྒོམ་པའི་དགོས་པ་གསུངས་པ། ཕུང་པོ་ཞེས་པ་ལ་སོགས་པའོ། །བདག་གི་ཕུང་པོ་ལ་སོགས་པ་ལྷར་སྣང་བ་འདོད་ཆགས་
ཆེན་པོའི་ཡེ་ཤེས་ཀྱི་མེས་བཞུས་ནས་བཅུ་དྲུག་ཏུ་འདུས་ཏེ། ཡང་ཐོག་མའི་སྙིང་གའི་པདྨར་སྡུད་པར་བྱེད་པས་ན་མི་ཤིགས་པའི་ཐིག་ལེའི་ཆོ་ག་འདི་ནི་དང་པོར་བཤད་ཅེས་སོ། །དེ་ལ་ཞེས་པ་ལ་སོགས་པ་ནི་དགའ་བ་བར་མའི་ཡེ་ཤེས་ཀྱི་རང་བཞིན་གསང་བའི་ཐིག་ལེ་བསྒོམ་པའི་ཆོ་ག་

གསུངས་པ། དེ་ཞེས་པ་ནི་སྙིང་ག་ན་གནས་པའོ། །བསྒྲུབ་པས་བྱིན་བརླབས་པས་ཞེས་པ་ནི་ཧཱུཾ་ཕཊ་ཀྱི་རྣམ་པ་དང་ལྡན་པར་གཡོ་བའི་རླུང་གིས་སོ། །སྣ་ཡི་རྩེ་མོར་འགྲོ་བས་ན། །ཞེས་པ་ནི་རང་གི་རྡོ་རྗེ་ཁ་སྟེ་དེར་འཛིན་པའོ། །དེ་བས་ན། །མི་ཤིགས་ཐིག་ལེ་རྗེས་ཐོགས་ལ། །གསང་བའི་ཐིག་
ལེ་སྟེ་གསང་གནས་སུ་བསྒོམས་པའི་ཕྱིར་དེ་སྐད་དེ། དེ་བཤད་དོ་ཞེས་དགོངས་པ་བསྟན་ཏོ། །ཡེ་ཤེས་ཐིག་ལེ་ཞེས་པ་ནི་ཡེ་ཤེས་སེམས་དཔའི་མཚན་མའི་དབུས་ཀྱི་ཐིག་ལེ་ལས་འོད་ཟེར་ལྕགས་ཀྱུ་འདྲ་བ་ཕྱོགས་བཅུའི་འཇིག་རྟེན་གྱི་ཁམས་སུ་སྤྲོས་པས་དེས་བདེ་བར་གཤེགས་པ་
དཀྱིལ་འཁོར་གྱི་འཁོར་ལོ་དང་བཅས་པ་བཀུག་ནས་དེ་རྣམས་ཀྱང་ལྷག་པའི་བྱང་ཆུབ་ཀྱི་སེམས་ཡེ་ཤེས་ལྟ་བུར་གྱུར་ནས་རང་གི་སྙིང་གར་རབ་ཏུ་བཙུད་དོ། །དེ་རྣམས་ཞུ་ནས་ཞེན་པ་ནི་གནས་ལ་སོགས་པ་ཞུ་ནས། ཐིག་ལེ་ལ་སྣང་བའི་ཐིག་ལེ་ཞུགས་པས་ཐིག་ལེ་ལ་ཡང་གཡས་ནས་
འགྲོ་བ་རྡུལ་དང་གཡོན་ནས་འགྲོ་བ་མུན་པ་དང་། དབུས་ནས་འགྲོ་བ་སྙིང་སྟོབས་ཀྱི་ཚུལ་དུ་བབས་པར་བསམས་ནས་དེ་རང་གི་རྡོ་རྗེ་ནོར་བུའི་དཀྱིལ་དུ་གནས་པ་ལས་ཞེས་ཏེ་རྒྱུ་དང་གནས་དང་པོའོ། །འབྱུང་བ་ལྔ་ཡི་གཟུགས་ཅན་མཆོག །ཅེས་པ་ནི་དེ་ལས་གྲུབ་པ་ལྟར་སྣང་བའི་ཕྱིར་རོ། །ཡེ་ཤེས་
ལྔའི་ངོ་བོ་ཉིད་དུ་གནས་པས་ན་འོད་ཟེར་ལྔ་འབར་བར་སྣང་ངོ་། །དེ་ཡང་གང་ཞེ་ན་རང་ལྷའི་མཚན་མ་ཕྲ་མོ་ཞེས་ཏེ། རྡོ་རྗེ་དང་རལ་གྲི་ནས་ཙམ་མོ། །འཁོར་ལོ་དང་པདྨ་ནི་སྲན་ཙ་ན་ཀ་ཙམ་མོ། །རིན་པོ་ཆེ་ནི་ཡུངས་ཀར་གྱི་འབྲུ་ཚད་ཙམ་མོ། །དེའི་རིགས་ཀྱི་མཚན་མ་ཡང་དེ་བཞིན་དུ་བསམས་ནས་
མཚན་མ་དེའི་བུམ་པར་རྟེན་གྱི་དཀྱིལ་འཁོར་ཡུངས་ཀར་ཙམ་གྱི་དབུས་སུ་རང་གི་ལྷའི་འཁོར་ལོ་ཐིག་ལེ་དང་བཅས་པ་ལྷག་པར་མོས་པས་བསྒོམ་པར་བྱ་བ་སྟེ་ཚད་བསྟན་པའོ། །གལ་ཏེ་དེར་སེམས་བྱིང་བའམ། །སྐྱོ་ན་རྡོ་རྗེ་བུམ་པ་ལས་བྱུང་བ་སྟེ། ལྷ་མོའི་པདྨའི་སྣ་རྩེར་རྣམ་པར་གནས་པར་བྱས་
ནས་དགའ་བྲལ་གྱི་དགའ་བའི་ངོ་བོ་བརྟག་པར་བྱའོ་ཞེས་སོ། །དེ་ལས་རྣམ་པ་གཞན་ཡང་ཤེས་པར་བྱའོ། །འདི་ཡི་ཐིག་ལེའི་རྣལ་འབྱོར་ལས། །ཞེས་པ་ནི་ཕྲ་མོའི་ཐིག་ལེའི་རྣལ་འབྱོར་ཏེ། དམ་ཚིག་སེམས་དཔའི་ཐུགས་ཀ་ན་ཡེ་ཤེས་སེམས་དཔའ། དེའི་ཐུགས་ཀ་ན་ཐིག་ལེ་སྟེ་དེ་སྦྱོར་

བ་རྫོགས་པའི་ཕྱིར་རོ། །གཞན་ནི་གཉིས་ཀྱི་དང་པོ་དང་རང་གི་སྦྱོར་བ་རྫོགས་པའི་ཕྱིར་རོ་ཞེས་བཤད་དོ། །གོང་གི་རིམ་པས་འོད་ཟེར་ལྔ། །ཞེས་པ་ནི་རང་གི་གནས་ལ་སོགས་པ་གསལ་བར་བྱས་ནས། མཚན་མ་ཕྲ་མོ་ལས་བྱུང་བའི་འོད་ཟེར་རྡོ་རྗེའི་ལམ་ནས་རང་གི་ནང་
གསལ་བར་བྱས་ནས། སྟེང་གི་སྒོའི་གཡས་ནས་བྱུང་བ་དང་། བདུད་རྩི་ཞུ་ནས་སླར་ཡང་བདུད་རྩི་འགུགས་པ་དང་། འོ་མའི་རྒྱུན་ལྟར་འོང་ཞིང་གཡོན་དུ་རིམ་བཞིན་དུ་འཇུག་པ་དང་། ཐིག་ལེ་ནི་གཞི་སྟེ་དེར་བཞུགས་པ་ནི་དབུགས་དགག་གཏོང་གི་ཡན་ལག་གོ་ཞེས་ཏེ། རྒྱུ་དང་གནས་དང་སྤྲོ་
བསྡུ་དགག་པ་དང་གཏོང་བས་བསྡུས་པའི་ཕྱིར་རོ། །དེ་ནས་གསང་བའི་ཐིག་ལེ་ཆེ། །ཞེས་པ་ནི་གསང་བ་ནི་ཐིག་ལེར་སྣང་བ་སྟེ་ཏིང་ངེ་འཛིན་གསུམ་པའོ། །རབ་ཏུ་ཕྲ་བ་ཞེས་པ་ནི་ཤིན་ཏུ་ཕྲ་བའི་ཐིག་ལེ་དེ་ལ་གོང་མ་ལྟར་ཐབས་ཀྱིས་ལྟེ་བར་རང་གི་སེམས་དལ་བུས་བཟུང་བས་སོ། །དེས་ཅིར་འགྱུར་
ཞེ་ན། དངོས་པོ་མེད་པའི་གནས་སུ་འགྱུར། །ཞེས་ཏེ། དངོས་པོ་རྣམས་ནི་གཞིག་པ་དང་། །གཞོམ་པས་སྟོང་པ་མ་ཡིན་ཏེ། །རང་བཞིན་མེད་པའི་སྦྱོར་བས་གཞན་གྱི་བློ་ལྡོག་པས་ན་དེ་ཁོ་ན་ལ་བཟུང་བས་དངོས་པོ་མེད་པའི་གནས་སུ་འགྱུར་རོ། །དེའི་རྟགས་གང་ཞེ་ན། དེ་ཡང་ཞེས་པ་ལ་
སོགས་པའོ། །གཟུང་བ་གོམས་པ་ནི་དེའི་ཡན་ལག་གོམས་པའོ། །ཕྱིན་ཅི་ལོག་པ་ནི་རྣམ་པར་ལོག་ཅེས་པ་ནི་ས་ལ་སོགས་པ་ལ་རྣམ་པ་གཉིས་ཏེ། ཕྱིན་ཅི་ལོག་ཏུ་སྣང་བ་དང་། ཡེ་ཤེས་ལ་སྣང་བའོ། །ཡེ་ཤེས་ལ་སྣང་བ་ནི་རྣལ་འབྱོར་པ་རྣམས་ཀྱི་ནུས་པས་མཉམ་པར་གཞག་པའི་གནས་
སྐབས་སུ་ལྡོག་པའི་རྟགས་རྙེད་པ་དང་། ཅུང་ཟད་ལོག་པ་དང་། ཁྱད་པར་གྱི་ལམ་གྱིས་གཏན་ནས་ལོག་པ་དང་། མཉམ་པར་མ་བཞག་པའི་གནས་སྐབས་སུའང་སྣང་བ་སྟེ། འདི་ནི་མཐར་ཐུག་པའི་གནས་རྟོགས་པའི་ཕྱིར་ཇི་ལྟ་བ་བཞིན་དུ་ལོག་པའི་གཏམ་མོ། །དེ་ཡང་དང་པོས་རྣམ་པར་ལྡོག་
པའི་རྟགས་སུ་རྣལ་འབྱོར་པ་དེ་ལ་ཅི་འབྱུང་ཞེ་ན། སྨིག་རྒྱུ་ལྟ་བུར་སྣང་བ་ནི། །རྟགས་ནི་དང་པོར་ཤེས་པར་བྱ། །ཞེས་ཏེ། ཐིག་ལེ་དེའི་འོད་ཟེར་གསལ་བ་དང་། མི་གསལ་བའི་དཔེ་སྨིག་རྒྱུ་དང་འདྲ་བ་འབྱུང་སྟེ། དེའི་སྐབས་སུ་འདི་ལྟར་ཤེས་པར་བྱའོ། །བདག་གི་རྒྱུད་ལ་གནས་པའི་ཕྱིན་ཅི་

ལོག་ཏུ་སྣང་བའི་ས་འདི་ནི་རྣམ་པར་ལྡོག་ཏུ་རུང་བ་སྟེ། བདག་གིས་ནི་རྟགས་ཤེས་སོ་སྙམ་དུ་བློའི་གཟེངས་བསྟོད་ལ་ཡང་དེ་ལ་ཞེན་པར་བྱའོ། །གཞན་རྣམས་ལ་ཡང་དེ་བཞིན་དུ་སྦྱར་བར་བྱའོ། །དུ་བ་ལྟ་བུ་ཞེས་པ་ནི་སྨིག་རྒྱུ་ལས་གསལ་བ་སྟེ་སྔོ་བའམ་དཀར་བ་ལ་སོགས་པ་ནི་མ་ཡིན་ནོ། །མཁའ་
སྣང་ཞེས་པ་ནི་ནམ་མཁའ་ལ་སྣང་བ་སྟེ་སྲིན་བུ་མེ་ཁྱེར་རོ། །དེ་ཡང་དུ་བ་ལས་གསལ་བ་སྟེ། དེ་འདྲ་བ་ནི་མ་ཡིན་ནོ། །མར་མེ་ལྟ་བུར་རབ་འབར་བ། །ཞེས་པ་ནི་མཁའ་སྣང་ལས་ཁྱད་པར་དུ་འཕགས་པ་སྟེ་དེ་འདྲ་བ་ནི་མ་ཡིན་ནོ། །དེ་རྣམས་འོད་ཟེར་གྱི་ཚུལ་དུ་འོག་མ་ལས་གོང་མ་གསལ་ཞིང་མཐོང་
བའོ། །ཟབ་གསལ་གཉིས་མེད་ཀྱི་དོན་འདྲ། །ཞེས་པ་ནི་ཇི་བཞིན་མ་ཡིན་པའི་ཕྱིར་དུ་བ་འདྲ་སྟེ་བརྟག་པའི་སྐུའོ། །དེ་ཡང་ཇི་ལྟར་སྣང་ཞེ་ན། སྤྲིན་མེད་ནམ་མཁའ་ལྟར་གསལ་བ། །ཞེས་པ་ནི་སྤྲིན་མེད་པའི་ནམ་མཁའ་ནི་ཁྱད་པར་དུ་གསལ་བར་སྣང་བ་སྟེ། གོང་གི་འོད་ཟེར་ཉིད་ལྷའམ་མཚན་མ་ལ་
སོགས་པའི་གཟུགས་སུ་སྣང་ཞིང་བདག་གི་དབང་པོ་དང་གཞན་གྱི་ཡང་སྤྱོད་ཡུལ་དུ་སྣང་བར་འགྱུར་བའོ། །རང་དངོས་ནི་མ་ཡིན་ནོ། །མཚན་མ་ལྔ་པོ་དེ་ཡིས་ནི། །ཞེས་པ་ནི་བརྟན་པར་འགྱུར་བའི་མཚན་མ་ལྔ་པོ་དེས་སོ། །མི་གནས་མྱ་ངན་འདས་ཐོབ་པ། །ཞེས་པ་ནི་མི་གནས་པའི་མྱ་ངན་ལས་
འདས་པ་ནི་གྲུབ་པའི་རྣལ་འབྱོར་པ་སྟེ། དེའི་རྟགས་རྙེད་པས་ན་སྦྱོར་བ་ལ་འབད་པའོ། །དེའི་རྟགས་ཀྱང་མཚན་མ་ལྔ་པ་སྟེ། གཞན་ཡང་སྒྲུབ་པའི་རྣལ་འབྱོར་གཉིས་པ་དང་། དང་པོའི་རྟགས་ཀྱང་བཞི་པ་དང་གསུམ་པར་ཤེས་པར་བྱའོ། །གཉིས་པ་ནི་བསྙེན་པའི་རྣལ་འབྱོར་པའི་ས་སྟེ།
འཁྲུལ་པ་བཟློག་པའི་སེམས་གཟེངས་བསྟོད་པ་བཞིན་དུ་འདིར་ཡང་ཤེས་པར་བྱའོ། །དེ་བས་ན། རྣལ་འབྱོར་པས་ནི་འདི་ལ་འབད། །ཅེས་སོ། །གཟུང་བ་ཡི་ནི་ཡན་ལག་གོ། །ཞེས་པ་ནི་རང་གི་སྲོག་རིན་པོ་ཆེ་ལྟ་བུ་གཟུང་བས་རྟགས་རྙེད་པའི་ཡན་ལག་ཏུ་འགྱུར་བའི་ཕྱིར་རོ། །ད་ནི་
རྗེས་སུ་དྲན་པའི་ཡན་ལག་གསུངས་པ། དེ་ལྟར་དེ་ལ་ཞེས་པ་ལ་སོགས་པའོ། །དོན་དེས་ཁྱབ་བྱའི་ཕྱིར་ཞེས་པ་ནི་མཚན་མ་ལྔ་མཐོང་བའི་དོན་ལྷ་དང་ཕྱག་མཚན་ལ་སོགས་པ་དེས་ཆོས་ཐམས་ཅད་ལ་ཁྱབ་པར་བྱ་བའི་ཕྱིར་རོ། །རྡོ་རྗེ་ཡི་ནི་ལམ་ནས་སུ། །ཞེས་པ་ནི་གསང་བའི་པདྨ་སྟེ་ཤིང་

རྟའི་ལམ་ཞེས་པ་བཞིན་ནོ། །ནམ་མཁའི་ཁམས་སུ་སྤྲོ་བར་བྱ། །ཞེས་པ་ནི་ནམ་མཁའི་ཁམས་སུ་གཏོགས་པ་ཐམས་ཅད་དུ་གཞན་དང་གཞན་གྱི་གཟུགས་ཀྱིས་སྤྲོ་བར་བྱ་སྟེ། དེ་བཞིན་དུ་བསྡུ་བར་ཡང་བྱའོ། །སྔོན་མཐོང་བའི་དོན་ལ། སོ་སོར་སྣང་བ་བསྐྱེད་པར་བྱ། །
ཞེས་པ་ནི་ཏིང་ངེ་འཛིན་གཉིས་ཀྱི་གནས་སྐབས་སུ་མཐོང་བའི་སྐུ་དང་ཕྱག་མཚན་དང་། རང་བཞིན་ལ་སོགས་པའི་སྣང་བ་བསྐྱེད་པར་བྱའོ་ཞེས་སོ། །སངས་རྒྱས་རྗེས་སུ་དྲན་པ་ནི་གོ་རིམས་བཞིན་དུ་རྣམ་པར་སྣང་མཛད་ཀྱི་དཀྱིལ་འཁོར་གྱི་འཁོར་ལོ་སྟེ་སྤྲོ་བསྡུ་ལས་གསལ་བར་བྱའོ། །ཆོས་
རྗེས་སུ་དྲན་པ་ནི་ཚེ་དཔག་མེད་ཀྱིའོ། །རྡོ་རྗེ་རྗེས་སུ་དྲན་པ་ནི་མི་བསྐྱོད་པའི་འོ། །རིགས་རྗེས་སུ་དྲན་པ་ནི་རིན་ཆེན་འབྱུང་ལྡན་དང་དོན་ཡོད་གྲུབ་པ་དང་སྤྱན་མ་ལ་སོགས་པའོ། །ཁྲོ་བོ་རྗེས་སུ་དྲན་པ་ནི་གཤིན་རྗེ་གཤེད་ལ་སོགས་པ་བཞིའི་སྟེ། དེ་རྣམས་ཀྱི་དཀྱིལ་འཁོར་གྱི་འཁོར་ལོ་
རེ་རེའི་དབང་དུ་བྱས་པ་སྟེ་གཅིག་ལའང་རྟོགས་པར་བྱའོ། །རེ་རེ་ལའང་དགོས་པའི་རྣམ་པ་གཞན་གསུངས་པ་དེ་བཞིན་ཞེས་པ་ལ་སོགས་པའོ། །དམ་ཚིག་རྗེས་སུ་དྲན་པ་ནི་སྔོན་མཐོང་བའི་དོན་ལ་གང་དྲན་ཞེ་ན། རྗེས་སུ་ཆགས་པ་ཆོ་ག་བཞི། །དང་པོ་ཞེས་ཏེ་རྗེས་སུ་ཆགས་པའི་སྔགས་
བཟླ་བ་དང་། དེ་བཞིན་གཤེགས་པ་ཐམས་ཅད་རྗེས་སུ་ཞུགས་པ་སྔོན་དུ་འགྲོ་བའི་ཟླ་བར་ཞུགས་པའི་ཆོ་ག་སྤྲོ་བ་དང་བསྡུ་བ་ལ་གསལ་བར་བྱ་བའོ། །དཀྱིལ་འཁོར་རྗེས་སུ་དྲན་པ་ནི་སྔོན་མཐོང་བའི་དོན་ལ་གང་དྲན་ཞེ་ན། ཆོ་ག་གཉིས་པ་ལ་སོགས་པའི་དཀྱིལ་འཁོར་ཞེས་གོང་མ་ལས་ཕྱེ་
བ་སྟེ། གཙོ་བོའི་ས་བོན་དང་། ལྷའི་འཁོར་དང་དེ་དབྱུང་བ་དང་། འཁོར་ལོ་གཞན་དང་གཉིས་སུ་མེད་པར་བྱ་བ་དང་། ལོངས་སྤྱོད་བཞིས་བྱིན་གྱིས་བརླབས་ལ་སྤྲོ་བ་དང་བསྡུ་བ་ལས་གསལ་བར་བྱའོ། །སྐུ་དང་གསུང་དང་ཐུགས་དང་སེམས་ཅན་རྗེས་སུ་དྲན་པ་ནི་སྔོན་མཐོང་བའི་དོན་ལ་གང་ཞེ་ན།
སྐུ་དང་གསུང་དང་ཐུགས་བསྒོམ་པའི། །རྡོ་རྗེ་གསུམ་ནི་ཞེས་ཏེ་ཆུང་ངུ་དང་བར་མ་དང་ཆེན་པོའི་རྡོ་རྗེ་གསུམ་བསྒོམ་པ་དེ་སྤྲོ་བ་དང་བསྡུ་བ་ལས་རང་ཡང་དྲན་པར་རྣམ་པར་སྨོན་ཞིང་དེའི་གཟུགས་དྲན་པའོ། །སྔགས་ཐམས་ཅད་ཀྱི་སྤྱི་གཟུགས་རྗེས་སུ་དྲན་པ་ནི་སྔོན་མཐོང་བའི་དོན་ལ་གང་དྲན་ཞེ་ན།

ཡེ་ཤེས་ལྔ་ཡི་རྡོ་རྗེ་སེམས། །བསྐྱེད་པ་ཞེས་པ་ནི་འགྲོ་བའི་སེམས་བབས་པ་ལ་སོགས་པའི་རིམ་པས་རྡོ་རྗེ་འཆང་བ་བསྐྱེད་པ་ལས་དང་བཅས་པ་དང་། རང་གི་ལྷ་ལོངས་སྤྱོད་བཞི་དང་ལྡན་ཞེས་ཏེ། བར་གྱི་སེམས་འཇུག་པ་ལ་སོགས་པའི་རིམ་པས་རང་གི་ལྷ་བསྙེན་སྒྲུབ་བཞི་དང་ལྡན་པ་སྤྲོ་བ་
དང་བསྡུ་བ་ལས་གཟུགས་དང་མཚན་མ་ལ་སོགས་པའི་རྗེས་སུ་གསལ་བ་རྙེད་པའོ། །དམ་ཚིག་རྗེས་སུ་དྲན་པ་ནི་སྔོན་མཐོང་བའི་དོན་ལ་གང་དྲན་ཞེ་ན། བདུད་རྩི་མྱང་བ་ལ་སོགས་པ་ཞེས་ཏེ་གསང་བའི་མཆོད་པ་ས་བོན་མྱང་བ་དང་། བདུད་རྩི་མྱང་བ་དང་། ཐམས་ཅད་མཉམ་
པ་ཉིད་དུ་བྱ་བ་ལ་སོགས་པ་སྤྲོ་བ་དང་བསྡུ་བ་ལས་གསལ་བར་བྱེད་པའོ། །ཤེས་རབ་ཀྱི་ཕ་རོལ་ཏུ་ཕྱིན་པ་དང་མ་སྐྱེས་པ་རྗེས་སུ་དྲན་པ་ནི་སྔོན་མཐོང་བའི་དོན་ལ་གང་དྲན་ཞེ་ན། སྤྲོས་པའི་དཀྱིལ་འཁོར་དེ་དག་ཀྱང་། ཅི་ཡང་ཡོད་པ་མ་ཡིན་
ཏེ་ཞེས་ཏེ་དཀྱིལ་འཁོར་དེ་དག་ལས་གཞན་གྱིས་བརྟགས་པའི་ཆོས་ཅི་ཡང་ཡོད་པ་མ་ཡིན་པས་ན་སྟོང་པ་ཉིད་དེ། ཤེས་རབ་ཀྱི་ཕ་རོལ་ཏུ་ཕྱིན་པའོ། །དེ་ནི་གཉིས་མེད་ངོ་བོ་རུ། །ཞེས་པ་ནི་དཀྱིལ་འཁོར་དེ་དག་ཀྱང་དེའི་དུས་ཉིད་ན་གསལ་བ་མི་འགོག་པ་སྟེ། དེ་བས་ན་དེ་
གཉིས་སུ་མེད་པའི་ངོ་བོར་སྤྲོ་བ་དང་བསྡུ་བ་ལས་དྲན་པའོ། །ཞེ་སྡང་གི་རིགས་ལ་སོགས་པ་མཆོད་པ་རྗེས་སུ་དྲན་པ་ནི་སྔོན་མཐོང་བའི་དོན་ལ་གང་དྲན་ཞེ་ན། རང་གི་རིགས་ཀྱི་ཞེས་པ་ལ་སོགས་པ་སྟེ། དེ་ཡང་རང་གི་རིགས་ཀྱི་བུད་མེད་བར་མའི་བསྙེན་སྒྲུབ་བཞིས་དག་པ་རིགས་ལྔས་རྒྱས་བཏབ་
པ་ནས། རྗེས་སུ་ཆགས་པས་མཉེས་པར་བྱ་བ་སྤྲོ་བ་དང་བསྡུ་བ་ལས་གསལ་བར་བྱེད་པའོ། །དེ་རྣམས་ནི་སྔོན་མཐོང་བའི་དོན་ལ་རྗེས་སུ་དྲན་པས་ན་རྗེས་སུ་དྲན་པའི་ཡན་ལག་གོ། །གང་དག་གཟུང་བ་ལ་ཉམས་པའི་བློ་ཅན་རྣམས་ཀྱིས་འདི་བྱའོ་ཞེས་གཞན་དག་ཀྱང་འདོད་དོ། །ད་ནི་དགའ་བྲལ་གྱི་ཡེ་ཤེས་ཀྱི་རང་
བཞིན་སྤྲུལ་པའི་ཐིག་ལེ་གསུངས་པ། དེ་ལྟར་ཞེས་པ་ལ་སོགས་པའོ། །ཡན་ལག་གསུམ་གྱིས་ནི་ཞེས་པ་ནི་དགག་གཏོང་དང་། གཟུང་བ་དང་། རྗེས་སུ་དྲན་པའི་ཡན་ལག་གིས་སོ། །དེ་གསང་བའི་ཐིག་ལེ་བསྒོམ་པར་བྱས་ནས། སྤྲུལ་པའི་ཐིག་ལེ་བསྒོམ་པའི་དགོས་པ་གསུངས་པ།

ནོར་བུ་ལས་ནི་བྱུང་ནས་ཀྱང་། །ཁམས་ཀུན་ཁྱབ་པར་བྱེད་པས་ནི། །ཞེས་ཏེ་དབང་གི་མཐར་ཐུགས་རྗེ་རྒྱས་པའི་ཡན་ལག་ཏུ་གནས་པས་སྤྲུལ་པའི་འཁོར་ལོ་སྟེ་སྤྲུལ་པའི་སྐུ་སྒོམ་པར་བྱེད་པའམ་ཡང་ན་ཐིག་ལེ་བཞི་ལ་སོགས་པར་སྤྲོས་པའི་ཕྱིར་ན་སྤྲུལ་པ་སྟེ་དེ་བསྒོམས་
བཤད་དོ་ཞེས་སོ། །ཇི་ལྟར་ཞེ་ན། རང་གི་སྤྱི་བོ་ཞེས་པ་ལ་སོགས་པའོ། །རང་གི་སྤྱི་བོ་ཞེས་པ་ནི་རང་གི་ལྷའི་མགོའི་དབུས་ཏེ་ཀླད་རྒྱས་སུའོ། །སྐུ་ཡི་རྡོ་རྗེ་ཐུགས་ཀ་རུ། །ཞེས་པ་ནི་བསྐྱེད་པའི་རིམ་པའི་སྐབས་སུ་གནས་བསྐྱེད་ནས། ས་བོན་མཚན་མ་ཕྲ་མོ་ལས་གྱུར་པའི་སྐུའི་རྡོ་རྗེ་
བསམས་ཏེ་དེའི་ཐུགས་ཀ་རུའོ། །མཚན་མ་ལ་གནས་རླུང་དཀྱིལ་འཁོར། །ཞེས་པ་ནི་ཟླ་བ་ལ་ས་བོན་ལས་གྱུར་པའི་འཁོར་ལོའི་ལྟེ་བར་རླུང་གི་དཀྱིལ་འཁོར་ཁ་དོག་དུད་ཀ་དབྱིབས་གཞུའི་ཚུལ་དུ་གནས་པ་ལ་ཟླ་བའི་གདན་བསམས་ནས་དེ་ལ་སྐུ་རྡོ་རྗེའི་ས་བོན་ཨོཾ་དཀར་པོ་བསྒོམས་ནས་
དེ་ཡང་འོང་བའི་མཚན་ཉིད་བསམ་ཞེས་ཏེ། གནས་སྐབས་ཀྱི་བཞི་དང་ལྡན་ཡང་འོང་བའི་མཚན་ཉིད་དུ་གནས་པའོ། །གཞན་མ་རྣམས་ཀྱང་རིམ་པ་དེས་བསྒྲེ་བར་བྱའོ། །ཆུ་ནི་ཟླུམ་པོའོ། །མེ་ནི་གྲུ་གསུམ་མོ། །དབང་ཆེན་ནི་གྲུ་བཞིའོ། །དེ་ལྟར་འབྱུང་བའི་དཀྱིལ་འཁོར་བཞི་ནི་རྫོགས་
པའི་རྣལ་འབྱོར་པའོ། །རང་གི་ལྷའི་ས་བོན་ནི་འབྱུང་བ་དང་འཇུག་པ་དང་གནས་པ་ལས་གྲོལ་བའི་ངོ་བོ་སྟེ་གཉིས་སུ་མེད་པའི་ཡེ་ཤེས་ཀྱི་རང་བཞིན་ནོ། །དེ་བས་ན་བདག་ཉིད་བཞི་དང་འབྲེལ་པར་བྱས་ནས། རྡོ་རྗེ་བཟླས་པའི་རིམ་པ་བསྟན་པར་བྱ་བའི་ཕྱིར། དེ་ལྟར་ཞེས་པ་ལ་སོགས་
པའོ། །མི་ཤིགས་པའི་ཞེས་པ་ནི་དབྱེར་མེད་པས་ན་གང་གིས་ཀྱང་མི་ཤིགས་པ་སྟེ། དེ་བས་ན་རྡོ་རྗེའི་བཟླས་པའོ། །དེའང་ཇི་ལྟར་བྱ་ཞེ་ན། གཡས་པ་ཞེས་པ་ལ་སོགས་པའོ། །དེ་ལ་གཡས་པ་ནི་རང་གི་སྟེང་སྒོའི་བུག་པ་གཉིས་ཀྱི་གཡས་སོ། །དེ་ལས་བྱུང་བའི་ཁམས་གང་ཞེ་ན།
རླུང་གི་དཀྱིལ་འཁོར་ཆེན་པོ་སྟེ་ཞེས་ཏེ་ལས་ཀྱི་ཕྱག་རྒྱ་ལས་བྱུང་བའི་རླུང་གི་དཀྱིལ་འཁོར་ནི་ཡེ་ཤེས་ཀྱི་ངོ་བོ་བས་ཆེན་པོའོ། །དེ་ཡང་ཁ་དོག་ནི་དུད་ཀའི་ཚུལ་དུ་རྒྱུ་བའོ། །དེའི་རང་བཞིན་ལས་ཀྱང་། འབྱུང་བ་རླུང་གི་ངོ་བོ་ཡིས། །ཞེས་ཏེ། ཕྱིར་འབྱུང་བའི་ཧཱུཾ་ནི་ཕྱག་རྒྱ་ཆེན་པོ་བས་

ན་ཧཱུཾ་གི་ངོ་བོ་སྟེ་དེས་སྣང་སྲིད་ཆོས་ཀུན་ཁྱབ་ནས་ཞེས་པ་ནི་དག་པ་དང་མ་དག་པ་ཐམས་ཅད་ལ་ཁྱབ་ནས། དེ་རྣམས་ཀུན་ཀྱང་དག་པར་བྱས་ནས་ཡེ་ཤེས་བདུད་རྩི་ལྟ་བུར་གྱུར་པར་བྱས་པ་ནི་དེའི་ལས་སོ། །ཨོཾ་གྱི་ངོ་བོར་འོད་བྱས་ནས། །ཞེས་པ་ནི་སླར་འདུ་བ་ནི་ལས་ཀྱི་ཕྱག་རྒྱའི་རང་
བཞིན་པས་ན་ཨོཾ་གྱི་ངོ་བོའོ། །ཡེ་ཤེས་ཀྱི་སྐུ་གོང་མ་དང་བཅས་པར་བྱས་ནས་རང་གི་རྒྱུད་ཀྱི་བག་ཆགས་ནི་དངོས་གྲུབ་ཆེན་པོའི་རྟགས་སྐྱེ་བ་དང་འགལ་བའི་ལས་ཏེ། དེ་ཡང་བཀྲུས་ནས་དག་བྱས་ནས། །ཞེས་ཏེ། དེ་རྣམས་ཀྱང་ཟླ་བ་ལྟ་བུར་ཞུ་བའི་ཆུས་བཀྲུས་ནས་དག་པར་བྱས་
ཏེ། ཨོཾ་དེ་ལ་ཞུགས་པ་ནི་རང་གི་ལས་སོ། །ཨཱཿཡི་ངོ་བོ་གནས་བྱས་ནས། །ཞེས་པ་ནི་གཉིས་པོས་གྲོལ་བའི་རླུང་ནི་ཆོས་ཀྱི་ཕྱག་རྒྱའི་རང་བཞིན་པས་ན། ཨཱཿའི་ངོ་བོའོ། །དེ་ལ་གནས་པ་ནི་ཕྱི་ནང་གི་ཆོས་དེ་ཉིད་དུ་ཞུགས་པ་སྟེ་རང་གི་ལས་སོ། །དེ་ལ་ལྷ་ཡི་དེ་བཞིན་ཉིད། །ཅེས་
པ་ནི་གནས་པ་དེ་ལ་ལྷའི་དེ་བཞིན་ཉིད་དེ་གཉིས་སུ་མེད་པའི་ཡེ་ཤེས་སོ། །གཟུང་བས་དལ་བུས་ཞེས་པ་ནི་གནས་པའི་དུས་སུ་གཟུང་བ་ནི་དལ་བུ་སྟེ་མྱུར་བའི་ཡན་ལག་གོ། །དེ་ཡང་གོང་གིས་བཟུང་བས་ཁྱད་པར་དུ་བྱས་པའི་ཕྱིར་ན་མྱུར་བའི་ཡན་ལག་ཡིན་ཡང་། དངོས་པོ་མེད་པའི་གནས་སུ་
འགྱུར། །ཞེས་ཏེ། ཕྱི་དང་ནང་གི་ཆོས་ཡང་དག་པར་སྣང་བ་ཡང་དུས་དེར་མི་དམིགས་པའི་ཕྱིར་རོ། །གཞན་མ་རྣམས་ལ་དོན་དེས་བསྒྲེ་བར་བྱའོ། །གཡོན་པ་ཞེས་པ་ནི་སྣ་བུག་གཉིས་ཀྱི་ཚིག་སྔ་མའོ། །ཆུའི་དཀྱིལ་འཁོར་ཞེས་པ་ནི་ཟླུམ་པོ་མགྲིན་པར་མཚན་མ་ལ་གནས་པའོ། །གཉིས་
ཀ་ལས་ནི་ཞེས་པ་ནི་རེ་རེ་ཞེས་ཚིག་སྔ་མའོ། །དྲག་ཏུ་ཞེས་པ་ནི་གསུམ་པོ་བས་ཞེས་ཚིག་སྔ་མའོ། །མེའི་དཀྱིལ་འཁོར་ཞེས་པ་ནི་གྲུ་གསུམ་ཐུགས་ཀར་མཚན་མ་ལ་གནས་པའོ། །དེ་བཞིན་གཉིས་ལས་ཞེས་པ་ཡང་སྔ་མ་བཞིན་དུ་ཤེས་པར་བྱའོ། །དལ་བུས་འབྱུང་ཞེས་པ་ཡང་སྔ་མ་ལྟར་ཤེས་
པར་བྱའོ། །དབང་ཆེན་གྱི་ནི་དཀྱིལ་འཁོར་ཞེས་པ་ནི་གྲུ་བཞི་མགྲིན་པའི་འོག་ཏུ་མཚན་མ་ལ་གནས་པའོ། །འཇུག་དང་གནས་དང་ལྡང་བ་ལས། །ཞེས་པ་ནི་གནས་སྐབས་ཀྱིས་ཀུན་ལ་ཡོད་ཀྱང་དེའི་རང་བཞིན་ནི་ཡི་གེ་གསུམ་པས་ན་རྡོ་རྗེ་གསུམ་གྱི་བཟླས་པའོ། །གྲོལ་བའི་ཡེ་ཤེས་རྙེད་གྱུར་

པ། །ཞེས་པ་ནི་གསུམ་པོས་གྲོལ་བའི་ཡེ་ཤེས་ནི་རྩ་བའི་ཡེ་ཤེས་དམིགས་པ་མེད་པའོ། །དེ་ནི་གསུམ་པོའང་མི་དམིགས་པས་ན་མ་ནིང་སྟེ་ཡེ་ཤེས་དཔའི་བཟླས་པའོ། །དེ་བས་ན་དེར་དེ་ལྟ་བུའི་ཡེ་ཤེས་རྙེད་པར་འགྱུར་བ་ལ་སོམ་ཉི་དང་ཡིད་གཉིས་མ་བྱེད་ཅིག་ཅེས་པའོ། །
ད་ནི་རྣལ་འབྱོར་ཆེན་པོ་དེའི་བཟླས་པའི་གྲངས་གསུངས་པ། ཕྱག་རྒྱ་ཞེས་པ་ལ་སོགས་པའོ། །ཕྱག་རྒྱ་བཞི་པ་ནི་རླུང་རྟེན་དང་བཅས་པ་ནི་ལས་ཀྱི་ཕྱག་རྒྱའོ། །ཆུ་རྟེན་དང་བཅས་པ་ནི་ཆོས་ཀྱི་ཕྱག་རྒྱའོ། །མེ་རྟེན་དང་བཅས་པ་ནི་ཕྱག་རྒྱ་ཆེན་པོའོ། །ས་རྟེན་དང་བཅས་པ་ནི་དམ་ཚིག་གི་
ཕྱག་རྒྱའོ། །དེ་དང་འབྲེལ་པའི་བཟླས་པའི་གྲངས་ནི་ཉིས་བརྒྱ་ཉི་ཤུ་རྩ་ལྔ་སྟེ་ཞེས་པ་ནི་ཕྱག་རྒྱ་རེ་རེ་གཡས་པ་ལ་སོགས་པའི་རིམ་པ་ནས་ཉིས་བརྒྱ་ཉི་ཤུ་རྩ་ལྔར་གྱུར་ཏེ། དེ་ནི་དགུ་བརྒྱར་རྣམ་པར་བསྒྲེས། །ཞེས་པ་ནི་བུག་པ་གཅིག་ཏུ་ཕྱག་རྒྱ་བཞི་ལ་དགུ་བརྒྱར་རྣམ་པར་བསྒྲེས་པ་སྟེ། བཞིས་
བསྒྲེས་པའོ། །ཞག་གཅིག་ཏུ་ཞེས་པ་ནི་ཉིན་ཞག་གཅིག་གོ། །ཉི་ཤུ་བཞིས་ཞེས་པ་ནི་གཡས་དང་གཡོན་དུ་འགྲོ་བ་ཉི་ཤུ་རྩ་བཞིས་ཞག་གཅིག་སྟེ། ཤུགས་ལས་གང་བ་དང་། དྲག་ཤུལ་གྱིས་སྒྲུབ་པ་སྤངས་ནས་ཡི་གེའི་ཚིག་དང་མཚུངས་པ་ཁྲི་ཕྲག་གཉིས་དང་སྟོང་ཕྲག་གཅིག་དང་།
བརྒྱ་ཕྲག་དྲུག་ཏུ་འདུས་པ་ཐམས་ཅད་དུ་བཟླས་བརྗོད་ཀྱི་གྲངས་བྱེད་དོ་ཞེས་བྱ་བར་སྦྱར་རོ། །གང་གིས་ཤེ་ན། རྣལ་འབྱོར་དབང་ཕྱུག་ཆེན་པོ་ཡིས། །ཞེས་ཏེ། ཡེ་ཤེས་དབང་དུ་གྱུར་པས་སོ། །དུས་བཞིའམ་ཞེས་པ་ནི་མ་ཡིན་ཏེ། ཉིན་མཚན་ཞེས་སྨོས་སོ། །དེས་ཅི་རྟོགས་ཤེ་ན། དེ་ཡིས་
ཞེས་པ་ལ་སོགས་པའོ། །རྣམ་པའི་ཆོས་ཐམས་ཅད་ཅེས་པ་ནི་རང་གི་ཤེས་པ་ལས་མ་གཏོགས་པའི་ཆོས་གང་ཡང་མེད་པ་སྟེ། དེ་ལྡང་བའི་དུས་སུ་ཕྱི་རོལ་དང་འཇུག་པའི་དུས་ནང་དང་། གནས་པའི་དུས་གཉི་ག་བེམས་པོ་མེད་ཅིང་ཀུན་འདུས་སེལ་བ་བཅུ་གཉིས་ལ་སོགས་པའི་དོན་དུ་
རྟོགས་བར་འགྱུར་རོ། །དེ་ཡང་གང་ཞེ་ན། སྒྱུ་མ་ཞེས་པ་ལ་སོགས་པའོ། །སྒྱུ་མ་ནི་རྐྱེན་ཚོགས་པའི་དབང་གིས་སྣང་ཡང་མེད་པའོ། །སྨིག་རྒྱུ་ནི་མྱ་ངམ་གྱི་རླུང་དུ་སྣང་ཡང་མེད་པའོ། །བྲག་ཅ་ནི་བྲག་དང་སྒྲ་ལས་གྲག་ཀྱང་མེད་

པའོ། །མགལ་མེའི་འཁོར་ལོ་ནི་འཁོར་ལོ་ལྟ་བུར་སྣང་ཡང་དེ་ལྟར་མ་ཡིན་ནོ། །འཁྲུལ་པ་ནི་མིའམ་སྦྲུལ་ལ་སོགས་པ་ལྟར་སྣང་ཡང་དེ་ལྟར་མ་ཡིན་ནོ། །དྲི་ཟའི་གྲོང་ཁྱེར་ནི་རྒྱ་མཚོའི་རླབས་གྱེན་དུ་སྣང་ཡང་གཙང་པོ་དང་རི་ལ་འབྲེལ་ཙམ་ན་གྲོང་ཁྱེར་དང་ཁང་པ་དཀར་པོ་ལ་སོགས་
པར་སྣང་ཡང་མེད་པའོ། །ཆུ་བུར་ནི་ཆར་པ་འབབ་པའི་དུས་སུ་ཆུ་ལས་བྱུང་བ་ནི་མེད་པའོ། །མིག་འཕྲུལ་ནི་ཕེ་ན་ཨ་ཤོ་བྱ་བའི་མིང་སྙན་པའི་བྱས་ཁྱེར་བ་སྩལ་བས་གཞན་ངེས་པ་ལྟར་སྣང་ཡང་དེ་ལྟར་མ་ཡིན་པའོ། །གཟུགས་བརྙན་མེ་ལོང་དང་གདོང་གི་དཀྱིལ་འཁོར་ལ་བརྟེན་ཏེ་སྣང་
ཡང་མེད་པའོ། །ཆུ་ཟླ་ནི་ཆུ་བོ་དང་ལྟེང་ཀ་ལ་སོགས་པའི་ཆུ་མང་པོ་ལ་སྣང་ཡང་མེད་པའོ། །སོགས་ཀྱི་སྒྲས་བསྡུས་པས་རྨི་ལམ་དང་དབང་པོའི་གཞུ་ལ་སོགས་པའོ། །དེ་ཙམ་ནས་གང་དང་སྐལ་བ་མཉམ་ཞེ་ན། ས་བཅུ་དབང་ཕྱུག་རྣམས་དང་སྐལ་བ་མཉམ་སྟེ་ཞེས་སོ། །དེ་ཡང་བཅུ་
པ་ཆོས་ཀྱི་སྤྲིན་ལ་གནས་པའི་བྱང་ཆུབ་སེམས་དཔའ་ནི་རྣམ་པར་འཕྲུལ་པ་ལ་སོགས་པའི་ཡོན་ཏན་དཔག་ཏུ་མེད་པ་དང་ལྡན་པ་སྟེ། དེ་དང་སྐལ་བ་མཉམ་པ་ནི་ཡེ་ཤེས་དང་དབང་དུ་གྱུར་པ་སྟེ་དེས་ཡེ་ཤེས་ཡང་དག་པ་མངོན་དུ་བྱེད་པའི་ཕྱིར་རོ། །དེ་བས་ན་རང་བཞིན་གྱིས་གནས་པས་ན་
རང་བཞིན་གྱིས་བཟླས་པ་དེ་ལ། རྣལ་འབྱོར་པས་ནི་རབ་ཏུ་འབད། །ཅེས་པ་སྟེ། ལས་དང་པོ་པ་ལ་སོགས་པས་བསླབ་པར་བྱའོ་ཞེས་སོ། །མན་ངག་མེད་པར་མི་རྟོགས་པར་བསྟན་པའི་ཕྱིར། འདི་ནི་ཞེས་པ་ལ་སོགས་པའོ། །སྔགས་ཟློས་ཀྱང་ཞེས་པ་ལ་སོགས་པ་ནི་ཐོག་མ་མེད་པའི་
དུས་ན་སེམས་ཅན་ཐམས་ཅད་ཀྱང་རླུང་དང་ལྷན་ཅིག་ཏུ་བྱུང་བས་ན་རྡོ་རྗེ་བཟླས་པ་ལ་གནས་ཀྱང་བླ་མས་མ་ཟིན་པས་རྟོགས་པར་མི་འགྱུར་རོ་ཞེས་སོ། །ཕྱི་རོལ་ཞེན་པ་ཡོངས་སུ་སྤངས་པའི་ཕྱིར་གསུངས་པ། དེ་ནི་ཡང་དག་ཅེས་པ་ལ་སོགས་པའོ། །བསྒོམ་པའི་བར་ཆོད་ཅེས་པ་ནི་
བགྲང་ཕྲེང་དང་སྒྲ་ལ་སོགས་པ་ལ་དམིགས་པས་སེམས་གཡེང་བར་འགྱུར་བའི་ཕྱིར་རོ། །ཅིའི་ཕྱིར་བཟླ་ཞེ་ན་བཟླས་པའི་ངོ་བོ་ཞེས་པ་ལ་སོགས་པ་གོ་སླ་བས་མ་བཤད་དོ། །དེ་ལ་གནས་པས་ཕྱི་རོལ་གྱི་བཟླས་པ་ཡང་མི་འགལ་བར་གསུངས་པ་དོན་དེ་ལ་གནས་ཞེས་པ་ལ་སོགས་པའོ། །དེའི་

དཔེ་ཡང་གླང་ཆེན་རྙེད་ན་ཐ་མལ་པའི་གསེར་འཛམ་བུ་ན་དའི་གསེར་དུ་གྱུར་པའི་ཕྱིར་བུད་ཤིང་ནི་དེའི་ལྕི་བ་སྟེ་ཞར་ལས་འབྱུང་བ་དང་འདྲའོ། །དེ་བཞིན་དུ་རྡོ་རྗེའི་བཟླས་པའི་ངོ་བོ་ཤེས་པས་ཕྱི་རོལ་གྱི་བཟླས་པས་ཀྱང་བསོད་ནམས་ཀྱི་ཚོགས་རྫོགས་པས་དེ་ཉིད་ཀྱང་ནུས་
པ་ཅན་དུ་བྱེད་པའོ། །ད་ནི་རྡོ་རྗེ་བཟླས་པས་བསྒྲུབ་པའི་མཚན་མ་འབྱུང་བར་གསུངས་པ་དེ་བས་ཞེས་པ་ལ་སོགས་པའོ། །རྡོ་རྗེ་བཟླས་པ་ལ་འབད་པའི་རྣལ་འབྱོར་པ་ལྷུན་གྱིས་གྲུབ་པ་ཉིད་དུ་གནས་པ་ཉལ་བ་དང་སྙེས་པ་དང་འཕྲེས་པ་དང་གཉིད་ལ་སོགས་པ་མེད་མོད་ཀྱི། བདེ་བར་
གཤེགས་པས་བྱིན་གྱིས་བརླབས་པའི་གཉིད་ཅུང་ཟད་འོད་བས་ན་དེའི་དུས་སུ་ཕྱག་རྒྱ་ཆེན་པོ་ཞེས་ཏེ། ཕྱག་རྒྱ་ལས་སྐྱེས་པའི་ཡེ་ཤེས་ཆེན་པོ་བས་ན་དེ་སྐད་དེ། དེ། གྲུབ་པའི་མཚན་མ་ཡང་འབྱུང་འགྱུར། །ཞེས་ཏེ་བཀྲ་ཤིས་པའི་ལྷའི་སྨོན་ལམ་ལ་སོགས་པ་ཡང་དང་ཡང་དུ་
འབྱུང་སྟེ་ཡིད་ལ་བྱེད་པའི་བག་ཆགས་ཀྱི་མཚན་མ་མ་ཡིན་པའི་ཕྱིར་རོ། །ཇི་སྐད་དུ། རྩ་བའི་རྒྱུད་ལས། བསམ་གཏན་བཟླས་པ་འབད་པ་ཡིས། །སྒྲུབ་པ་པོས་ནི་རྟག་ཏུ་མཐོང་། །ཞེས་སོ། །དེ་བྱུང་ཞེས་པ་ནི་མཚན་མའོ། །ཆོ་ག་ལ་གནས་པ་ཞེས་པ་ནི་གསུངས་པའི་བརྟུལ་ཞུགས་
ལ་སོགས་པའི་ཆོ་གའོ། །སྐད་ཅིག་གིས་ནི་ཞེས་པ་ནི་མཆོག་གི་སྒྲུབ་པ་ཆེན་པོས་སོ། །ཀུན་མཁྱེན་ཆེ་ཞེས་པ་ནི་གཟུགས་ལ་སོགས་པ་ཀུན་ཟབ་མོ་དང་ཡང་དག་པར་གསལ་བ་མཁྱེན་པས་ན་ཀུན་མཁྱེན་ཏེ་རྣལ་འབྱོར་བཞི་པའོ། །རྒྱུད་ལ་རབ་ཏུ་འཕོ་བར་ནི། །ཞེས་པ་ནི་བྱ་བ་གཞན་སྤངས་
པས་ལུས་གནས་པར་འགྱུར་བ་ཙམ་གྱིས་ཆོག་ཤེས་པ་རྩེ་གཅིག་པའི་རྣལ་འབྱོར་པ་དེའི་མཐོང་བའི་ཆོས་ཉིད་ཀྱི་ཚེ་ལ་རྒྱུད་འཕོ་བའོ། །དེ་ལ་ནི། ཐེ་ཚོམ་མེད་པར་ངེས་པས་ན། །ཞེས་ཏེ། ལམ་ཁྱད་པར་ཅན་གྱི་འབྲས་བུ་ཁྱད་པར་ཅན་དུ་འགྱུར་བ་བསྐྱེད་པས་ན། དེ་ལ་ངོ་མཚར་བ་ཅི་
ཞིག་ཡོད་དེ་དེའི་ཆོས་ཉིད་དེ་ཡིན་པའི་ཕྱིར་རོ། །དེ་བས་གང་ནས་གསུངས་པ་ཡི། ཆོ་ག་འདི་ལ་རབ་ཏུ་འབད། །ཅེས་པའོ། །ད་ནི་དེ་རྣམས་ཀྱི་དོན་མཇུག་བསྡུ་བ་གསུངས་པ། དེ་ལྟར་ཞེས་པ་ལ་སོགས་པའོ། །དེ་ནི་གོ་སླའོ། །ད་ནི་ལྷན་ཅིག་སྐྱེས་པའི་དགའ་བའི་རང་བཞིན་མི་ཤིགས་

པའི་ཐིག་ལེ་དེ་ཁོ་ན་ཉིད་བསྒོམ་པའི་ཆོས་གསུངས་པ། ད་ནི་ཞེས་པ་ལ་སོགས་པའོ། །གཉིས་མེད་ཡེ་ཤེས་ཞེས་པ་ནི་ཟབ་མོ་དང་གསལ་བ་གཉིས་སུ་མེད་པའི་ཡེ་ཤེས་ནམ་མཁའ་ལྟར་དག་པ་གང་ཡིན་པའོ། །དེ་ཀུན་རྫོབ་ཀྱི་གཟུགས་སུ་ཇི་ལྟར་གནས་ཤེ་ན། ཐིག་ལེ་ཁ་དོག་ལྔ་པ་
ཙ་ན་ཀའི་འབྲུ་ཙམ་དུ་རྣམ་པར་གནས་ཏེ། དེ་ལ་བརྟེན་ནས་ཞེས་པ་ནི་དེ་ལས་རླུང་ལ་སོགས་པའི་དཀྱིལ་འཁོར་བྱུང་ནས་མི་གཡོ་བ་ལ་སོགས་ཞེས་པ་ནི་སྣོད་ཀྱི་འཇིག་རྟེན་ལྕགས་རི་དང་ལྷའི་ཁང་པ་ལ་སོགས་པ་ཡང་། དེ་ལས་འབྱུང་བར་བྱེད་ཅེས་པར་སྦྱར་རོ། །དེ་བཞིན་དུ་གཡོ་བ་
དང་བཅས་ཞེས་ཏེ། བཅུད་ཀྱི་སེམས་ཅན་ཚངས་པ་ལ་སོགས་པའི་ལྷ་དང་ལྷ་མིན་དང་སོགས་ཀྱི་སྒྲས་བསྡུས་པ་མི་དང་བྱོལ་སོང་དང་ཡི་དགས་དང་དམྱལ་བ་ལ་སོགས་པ་ཡང་དེ་ལས་འབྱུང་བར་བྱེད་ཅེས་བྱ་བ་དང་སྦྱར་རོ། །གང་གི་དུས་སུ་འབྱུང་བར་བྱེད་ཅེ་ན། ཐམས་ཅད་
རབ་ཏུ་མི་སྣང་ཡང་། །ཞེས་ཏེ། ལས་སུ་སྨྲ་བའི་གཞུང་གིས་གནས་པའི་བསྐལ་པ་ཟད་ནས་མེ་ལ་སོགས་པས་ཉི་ཤུའི་བར་དུ་རྣམ་པར་གཞིག་སྟེ་སྟོང་པར་འགྱུར་བའི་དུས་སུ་ཡང་། ཐིག་ལེ་འགོག་པར་མི་འགྱུར་ཏེ། །ཞེས་པ་ནི་ཡེ་ཤེས་ཀྱི་རྡོ་རྗེའི་
རང་བཞིན་པས་ན་མེ་ལ་སོགས་པ་གང་གིས་ཀྱང་གཞིག་ཏུ་མེད་པའི་ཕྱིར་དེ་ཁོ་ན་སྣང་བའོ། །དེ་ནས་ཆགས་པར་འགྱུར་བའི་དུས་སུ་གོང་མ་ལྟར། རྒྱུ་དང་མི་རྒྱུ་བཅས་པ་ཀུན། །སླར་ཡང་ཐིག་ལེ་དེ་ལས་འབྱུང་བར་བྱེད། །ཅེས་པའོ། །དེ་ལ་ཕྱི་རོལ་པ་རྣམས་ཀྱིས་འཁྲུལ་པར་གསུངས་པ་
དེ་ལས་ཞེས་པ་ལ་སོགས་པའོ། །སྐྱེ་བོ་རྣམས་ཞེས་པ་ནི་ཁ་ན་མ་ཐོ་བ་ལས་རིང་དུ་སོང་བའི་ཆོས་མ་ཐོབ་པ་གྲུབ་པའི་མཐའ་འཛིན་པའོ། །དེས་ཡང་དག་པའི་དོན་མ་རྟོགས་པའི་ཕྱིར་མི་ཤིགས་པའི་ཐིག་ལེར་མ་ཤེས་ཏེ། ཚངས་པའི་སྒོ་ང་ཞེས་འཁྲུལ་ཏེ། སེམས་ཅན་གྱི་ལས་
ཀྱིས་ཚངས་པ་མི་སྣང་ཡང་དེའི་སྒོ་ང་ལུས་པས་དེ་ལས་ཐམས་ཅད་སྐྱེས་པའོ་ཞེས་འདོགས་ཤིང་ཚངས་པ་ལ་མེས་པོ་ཞེས་སྨྲ་སྟེ། རང་གིས་ཀྱང་དེ་བཞིན་དུ་འཁྲུལ་ཏེ་དེ་ཁོ་ན་ཡིན་ནོ་སྙམ་དུ་རློམ་སེམས་སོ། །དེ་བས་ན་དེ་ལས་སྟོང་པ་ཉིད་དུ་ཁས་བླངས་པའི་སྐྱེ་བོ་རྣམས་ཀྱིས་དུས་ལས་བྱུང་

བ་ལ་སོགས་པས་སྒྲོ་འདོགས་ཤིང་དེའི་ལམ་ལ་འཇུག་པར་བྱེད་དོ། །དེ་ལྟ་ན་ཡང་དེའི་རང་བཞིན་ནི་ཆོས་ཀུན་གྱིས་ཀྱང་མི་བསྒུལ་བ་སྟེ། མེ་ལ་སོགས་པའི་འབྱུང་བ་གང་གིས་ཀྱང་མི་ཤིགས་པ་སྟེ། མི་ཤིགས་པའི་ཐིག་ལེ་སྟེ། ཇི་སྲིད་འདི་ནི་ལུས་གནས་པས། །
ཞེས་པས་ནི་བཅུད་ཀྱི་སེམས་ཅན་རྣམས་ཀྱི་སྙིང་གའི་པདྨ་ཁ་སྦྱར་གྱི་དབུས་ན་ཐིག་ལེ་རྣམ་པར་གནས་པའོ། །ཇི་སྲིད་རང་བཞིན་དགའ་བའི་མན་ངག་ཐོབ་ནས་དེའི་དོན་ལ་མི་འཛིན་པ་དེ་སྲིད་དུ། ལས་དང་ལས་མིན་རབ་བྱེད་པས། །ཞེས་ཏེ། སྲོག་གཅོད་པ་སྤོང་བ་ལ་སོགས་པའི་ལས་
དང་། སྲོག་གཅོད་པ་ལ་སོགས་པའི་ལས་མ་ཡིན་པ་རབ་ཏུ་བྱེད་དེ། ཅིའི་ཕྱིར་ཞེ་ན། དེའི་རང་བཞིན་མ་ཤེས་པས་ལས་སུ་སྨྲ་བ་སྟེ། དེས་མཐོ་རིས་དང་དམྱལ་བ་ལ་སོགས་པར་འགྲོ་བར་འགྱུར་རོ། །དེའི་རང་བཞིན་ཡོངས་སུ་ཤེས་པ་ནི་ལས་ཀྱིས་འཁོར་བར་ཡོངས་སུ་མི་ནུས་ཏེ་ལས་
དེ་ཉིད་དེར་ཐིམ་པའི་ཕྱིར་རོ། །དེ་བས་ན་བརྟན་པོ་ཞེས་ཏེ། ཅིའི་ཕྱིར་ཞེ་ན། འཇིག་པ་རྣམས་སྤངས་པའི་ཞེས་པ་ནི་མི་རྟག་པ་ལ་སོགས་པའི་བསྐལ་པ་རྣམ་པར་སྤངས་པའོ། །དེའི་ཕྱིར་དེ་ལྟ་བུའི་མི་ཤིགས་ཐིག་ལེ་བསྒོམ་པར་བཤད་པར་ཁས་འཆེས་པའོ། །ཇི་ལྟར་ཞེ་ན། དེའི་གཞི་
བསྐྱེད་པའི་རིམ་པ་བསྒོམ་པ་གསུངས་པ་ཚངས་པའི་ཞེས་པ་ལ་སོགས་པའོ། །དེ་ཡང་ས་བོན་བསྒོམ་པ་སྔོན་དུ་འགྲོ་བའི་ཚངས་པའི་སྤྱོད་པ་བཞིས་སེམས་ཅན་ལ་དམིགས་པས་ལས་ཀྱི་སྒྲིབ་པ་ཟད་བྱེད་གོང་མ་ལྟར་བྱས་ནས། ཕྱི་རོལ་གྱི་སྟོང་ཞེས་ཏེ་དངོས་པོར་འཛིན་པ་བཟློག་པའི་ཕྱིར་
སྟོང་པ་ཉིད་ཀྱི་ཏིང་ངེ་འཛིན་ཀྱང་གོང་མ་ལྟར་བྱས་ནས། སོགས་ཀྱི་སྒྲས་བསྡུས་པ་རྟེན་བསྒོམ་པ་དང་། རྒྱུ་ལ་དམིགས་པ་དང་། དེ་གྱུར་པ་ལས་ཚད་མེད་པས་བསླང་བས་ས་བོན་ལ་སོགས་པའི་རིམ་པས། རང་གི་ལྷའི་སྐུ་རུ་བསྐྱེད་ནས་ཞེས་ཏེ་བསྙེན་པའོ། །ཀྱང་ཞེས་པ་ནི་ཉེ་བར་བསྒྲུབ་
པ་སྟེ། ཕྱག་རྒྱ་བཞིས་བཏབ་པ་ནི་བསྒྲུབ་པའོ། །དེ་བཞིན་དབང་བསྐུར་བླང་བ་དང་། ལྷ་མོའི་ཆོ་ག་དང་། དཀྱིལ་འཁོར་འཁོར་ལོའི་ཏིང་ངེ་འཛིན་ལ་སོགས་པ་སྔ་མ་བཞིན་ཤེས་པར་བྱས་ནས་ཞེས་སོ། །རིམ་པ་འདི་ཡིས་ཞེས་པ་ནི་འོག་ནས་འབྱུང་བས་སོ། །ཐིག་ལེ་ལ་ཞེས་པ་

ནི་མི་ཤིགས་པའི་ཐིག་ལེ་ཁོ་ན་ལའོ། །རང་གི་སེམས་ནི་ཡང་དག་གཟུང་། །ཞེས་པ་ནི་དབུགས་འཇུག་པའི་སྤྱོད་པའི་སེམས་ཀྱིས་གསང་བའི་ངོ་བོའི་སེམས་ཡང་དག་པར་བཟུང་བ་སྟེ། འདི་ནི་དེ་ཁོ་ནའི་དབང་དུ་བྱས་པའི་ཕྱིར་རོ། །གཞན་རྣམས་ཀྱང་དེའི་ངོ་བོ་ཡིན་པས་སོ། །
ཇི་ལྟར་ཞེ་ན། རང་གི་ཞེས་པ་ལ་སོགས་པའོ། །དེ་ཡང་རང་གི་ལྷའི་ཡེ་ཤེས་སེམས་དཔའི་ཐུགས་ཀར་ཟླ་བ་ལ་གནས་པའི་མཚན་མའི་དབུས་ན་གནས་པའི་ས་བོན་ལས་ཁ་དོག་ལྔ་པའི་འོད་ཟེར་ལྔ་འཕྲོས་པའི་རྩེ་ལས་འོད་ཆགས་ཅན་ལ་སོགས་པའི་ཐབས་ཀྱི་དཀྱིལ་འཁོར་
གྱི་འཁོར་ལོ་དཔག་ཏུ་མེད་པ་སྤྲུལ་ལོ། །འཁོར་ལོ་དེ་དག་གིས་ཀྱང་ཁམས་ཀུན་དུ་ཁྱབ་པར་བྱས་ནས། ལས་ཅི་བྱེད་ཅེ་ན། དབུགས་ཀྱི་རྟ་ཞོན་ཀུན་རྟོག་རྣམས། །ཞེས་ཏེ་རླུང་དང་ལྷན་ཅིག་ཏུ་བྱུང་བའི་ཀུན་དུ་རྟོག་པ་གློ་བུར་བ་ནི་གཟུང་བ་དང་འཛིན་པར་རྟོག་པ་སྟེ། དེ་ལས་
བྱུང་བ་དང་བཅས་པའོ། །དེ་དག་རྣམ་པར་གསལ་བས་སེམས་ཅན་དེ་དག་ཀྱང་དཀྱིལ་འཁོར་གྱི་འཁོར་ལོར་བྱས་ཏེ་ཞེས་སོ། །གཉིས་པ་དཀྱིལ་འཁོར་བསྡུ་བྱས་ནས། །ཞེས་པ་ནི་བྱེད་པ་པོ་དང་བཅས་པའི་ངོ་བོ་སྟེ། དེ་དག་ཀྱང་བྱང་ཆུབ་ཀྱི་སེམས་ཡེ་ཤེས་ཀྱི་ངོ་བོ་བདག་
གི་སྣ་བུག་གཡོན་དུ་ཞུགས་པར་བྱས་པའོ། །དང་པོ་ནི་གཞན་ནོ། །དེ་གང་དུ་གནས་ཤེ་ན། ཡེ་ཤེས་སེམས་དཔའི་ཐུགས་ཀ་ན་གནས་པའི་མཚན་མའི་དབུས་ན་གནས་པའི་རང་གི་ལྷའི་ས་བོན་ལ་ཐིམ་པས་ཞེས་སོ། །དེས་ཅིར་འགྱུར་ཞེ་ན། དེ་ནི་ཞེས་པ་ནི། ས་བོན་དེ་ཉིད་དོ། །
སངས་རྒྱས་ཡོན་ཏན་ཅི་གསུངས་པ། །ཞེས་པ་སྣ་ཚོགས་པའི་མདོ་དང་རྒྱུད་ལས་གསུངས་པའི་སྟོབས་ལ་སོགས་པ། ཡང་དག་པར་སྐྱེད་པར་བྱེད་པའི་མི་ཤིགས་པའི་ཐིག་ལེ་ཁ་དོག་སྣ་ཚོགས་པའི་འོད་ཟེར་ལྔ་འབར་བ་རྣམ་པར་གསལ་བར་བྱའོ་ཞེས་སོ། །དེ་ལས་ཀྱང་འོད་ཟེར་བྱུང་བས་
ཞེས་པ་ནི་ཐིག་ལེ་ལས་སོ། །རང་གནས་ཞེས་པ་ནི་རང་གི་གནས་མཚན་མ་གསལ་བར་བྱའོ། །དེ་ལས་ཕྱིར་བྱུང་ནས་ཡེ་ཤེས་སེམས་དཔའི་ནང་གི་ལུས་གསལ་བར་བྱ་སྟེ། དེ་ནས་ཕྱིའི་ལུས་དང་། དེའི་དཀྱིལ་འཁོར་དང་། གནས་རྟེན་མཚན་མ་དང་བཅས་པ་གསལ་བར་བྱས་ནས། དེ་ལས་

ཀྱང་བྱུང་སྟེ་དམ་ཚིག་སེམས་དཔའི་ནང་གི་ལུས་ལ་མཐེ་བོའི་རྩ་བ་ལ་སོགས་པ་གནས་བཅུ་དྲུག་ན་གནས་པའི་བྱང་ཆུབ་ཀྱི་སེམས་སྒྲ་ཡིག་བཅུ་དྲུག་གི་གཟུགས་སུ་གནས་པ་བཀུག་པར་བྱས་ནས་མི་ཤིགས་པའི་ཐིག་ལེའི་ནང་དུ་རང་གི་སེམས་ཉིད་ཐིམ་པར་བྱའོ་ཞེས་སོ། །
དེར་ནི་ཞེས་པ་ནི་ཐིག་ལེར་རོ། །རང་གི་སེམས་ཅུང་ཟད་བཟུང་བས་ཞེས་པ་ནི་གོང་མའི་རིམ་པས་འདིའི་མཐའ་བཟུང་བས་སོ། །དེས་ཅིར་འགྱུར་ཞེ་ན། རྟེན་དང་རྟེན་ཅན་གྱི་འཁོར་ལོར་མོས་བྱས་ཞེས་ཏེ། དེར་ཆོས་འབྱུང་བ་ནས་བདུད་རྩི་མྱང་བའི་བར་གྱིས། ཏིང་ངེ་འཛིན་གྱི་དཀྱིལ་འཁོར་
རྫོགས་པར་མོས་པས་བསྒོམས་ནས། དེའི་དབུས་ཀྱི་དམ་ཚིག་སེམས་དཔའ་སྣང་བའི་ཐུགས་ཀར་ཡེ་ཤེས་སེམས་དཔའ་སྣང་བ་བསྒོམས་ཏེ། དེའི་ཐུགས་ཀར་མཚན་མ་ལ་ཟླ་བའི་དབུས་སུ་མི་ཤིགས་པའི་ཐིག་ལེ་ཡེ་ཤེས་ལ་ཞེས་པ་ནི་མེ་ལོང་ལྟ་བུའི་ཡེ་ཤེས་ལ་སོགས་པའི་རང་བཞིན་གྱིས་
ཐིག་ལེ་གོང་དུ་སྒོམ་པ་ལས། །སྣང་བའི་ངོ་བོ་ཞེས་པ་ནི་དེའི་ཡུལ་ཅན་དང་ལྡན་པའི་ཐིག་ལེ་མཚན་མ་ཐམས་ཅད་ཀྱིས་མ་སྤྲོས་པའི་ངོ་བོ་བསྒོམ་པར་བྱའོ། །ཞེས་སོ། །ཡང་སྤྲོས་པ་གསུངས་པ། དེའི་འོད་ཀྱིས་ཞེས་པ་ནི་ཐིག་ལེ་དེའོ། །རང་གི་གནས་ཞེས་པ་ནི་རང་གི་གནས་
མཚན་མའོ། །སོགས་ཀྱིས་བསྡུས་པ་ཡེ་ཤེས་སེམས་དཔའི་ནང་དང་ཕྱིའི་ལུས་ཀྱང་དཀྱིལ་འཁོར་དང་གནས་དང་། དམ་ཚིག་སེམས་དཔའི་ནང་དང་ཕྱིའི་ལུས་དང་དཀྱིལ་འཁོར་དང་། རྟེན་རྣམས་གསལ་བར་བྱས་པ་ནི་ཡེ་ཤེས་ཐིག་ལེའོ། །ནང་གསལ་ཞེས་པ་ནི་གཞག་པའི་འོད་ཟེར་
གྱིས་ཞེས་པ་ནི་གནས་བཅུ་དྲུག་ཏུ་གཞག་པའི་འོད་ཟེར་ཕྱིར་བྱུང་ནས་ཕྱིའི་ལུས་དང་དཀྱིལ་འཁོར་དང་རྟེན་དང་བཅས་པ་གསལ་བར་བྱས་ནས་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་སྤྱན་སྔར་གཤེགས་ཏེ་བདུད་རྩི་ཞུ་བར་བྱས་ནས། དེ་རྣམས་ཀྱིས་ཀྱང་གནང་ནས་དེ་བླང་བར་བྱ་
བའི་ཕྱིར་དེ་རྣམས་ཀྱི་ཞལ་དུ་ཞུགས་ནས་སྙིང་ག་ན་གནས་པའི་མི་ཤིགས་པའི་ཐིག་ལེར་སོང་སྟེ། ཆ་ཤས་ལྔའི་ཡི་གེ་ཧཱུཾ་གི་གཟུགས་སུ་གནས་པའི་བདུད་རྩི་བླངས་ནས་དེ་རྣམས་རྡོ་རྗེའི་ལམ་ནས་བྱུང་ནས། འོ་མའི་རྒྱུན་ལྟར་ཕྱོགས་བཅུ་ནས་འོངས་པར་བྱས་ནས་དེས་སེམས་ཅན་དང་ཞེས་

པ་ནི་ཁམས་གསུམ་པོ་ཐམས་ཅད་དོ། །སངས་རྒྱས་ཞེས་པ་ནི་ས་འོག་མ་པ་ལ་སོགས་པ་ཐམས་ཅད་དོ། །དེ་རྣམས་ནི་རྒྱུ་བའོ། །མི་རྒྱུར་བཅས་ཞེས་པ་ནི་སྣོད་ཀྱི་འཇིག་རྟེན་ནོ། །དེ་དག་ཐམས་ཅད་ཀྱང་བྱང་ཆུབ་སེམས་ཀྱི་ངོ་བོ་ཡང་དག་པར་བསྡུས་ནས་གུར་སོགས་ཞུགས་ཞེས་ཏེ་
སྲུང་བའི་འཁོར་ལོ་ལ་ཞུགས་པའོ། །དེ་ཡང་དེ་བཞིན་དུ་གྱུར་ནས་ཆོས་དབྱིངས་ཕྱག་རྒྱ་ཞེས་པ་ནི་ཆོས་ཀྱི་འབྱུང་གནས་ལའོ། །དེ་ཡང་། རྟེན་གྱི་འཁོར་ལོར་ཞུགས་བྱས་ལ། །ཞེས་པ་ནི་གཞལ་ཡས་ཁང་ངོ་། །དེ་ཡང་བསྡུས་ཏེ། དཀྱིལ་འཁོར་དུ་ནི་རབ་བསྡུས་ཏེ། །ཞེས་པ་ནི་ལྷ་
འཁོར་ལོ་བཅོ་བརྒྱད་ལའོ། །དེ་ཡང་དེ་བཞིན་དུ་གྱུར་ནས་བདག་ལ་ཐིམ་པར་བྱས་ཏེ་བདག་ཉིད་ཀྱང་མི་སྣང་བར་གྱུར་ཏེ། ཡེ་ཤེས་སེམས་དཔའི་གནས་མཚན་མ་ལ་དམིགས་པའོ། །དེ་ཡང་རྟེན་རྣམས་ལ་བསྡུ། དེ་ཡང་ཡེ་ཤེས་སེམས་དཔའི་འཁོར་ལོ་ལ་བསྡུ། འཁོར་ལོ་ཡང་ཡེ་
ཤེས་སེམས་དཔར་ཞུགས་པར་བྱའོ། །ཡེ་ཤེས་སེམས་དཔའ་ཡང་མི་སྣང་བར་གྱུར་ནས་དེའི་ཐུགས་ཀྱི་མཚན་མ་འབའ་ཞིག་ལ་དམིགས་པར་བྱའོ། །མཚན་མ་དེ་ཡང་བསྡུ་བར་བྱས་ནས་མི་ཤིགས་པའི་ཐིག་ལེར་སེམས་གཟུང་བར་བྱའོ། །དེ་ལ། ཡང་ནི་ནང་གི་ཚོགས་ཀུན་
བསྡུས། །ཞེས་པ་ནི་ཐིག་ལེ་དེ་ཡང་རྟེན་རྣམས་ལའོ། །འཁོར་ལོ་དེ་ཡང་དམ་ཚིག་སེམས་དཔའ། དེ་ཡང་ཡེ་ཤེས་སེམས་དཔའི་གནས་ལ་སོགས་པའི་རིམ་གྱིས་ཞུགས་ནས་དེའི་ཐུགས་ཀའི་མཚན་མའི་དབུས་ན་གནས་པའོ། །རང་སྣང་ཐིག་ལེ་ཞེས་པ་ནི་རང་གི་དེ་བཞིན་ཉིད་བྱིན་
གྱིས་རློབ་པའི་ཐིག་ལེ་སྟེ། དེ་འབའ་ཞིག་ལ་བླ་མའི་མན་ངག་གིས་སེམས་ཡང་དང་ཡང་དུ་གཟུང་བར་བྱའོ་ཞེས་སོ། །ཇི་ཙམ་སྐྱོ་བའམ་བྱིང་བ་ལ་སོགས་པ་མེད་ཀྱི་བར་དུ་གཟུང་བའི་ཕྱིར་རོ། །ཇི་ལྟར་ནུས་བཞིན་བསྒོམ་པ་དེར། །སེམས་ནི་ཡང་དང་ཡང་དུ་ཞུགས། །ཞེས་སོ། །ཡང་
ནི་དེ་ལས་ཕྱིར་བྱུང་སྟེ། །ཞེས་པ་ནི་ཡང་དག་པར་རྫོགས་པའི་དེ་མ་ཐག་ཏུ་གཏོང་བ་སྟེ། ཐིག་ལེ་དེ་ལས་འོད་ཟེར་རང་གི་གནས་མཚན་མ་ལ་སོགས་པ་མི་སྣང་བ་རྣམས་བསྡུ་བའི་རིམ་པ་ལྟར་བཟློག་ནས་གསལ་བར་བྱའོ། །དེ་ནས་ཡང་ནི་གོང་མ་ལྟར། །རིམ་པར་བཅུག་ནས་ཐིམ་

བྱས་ཏེ། །སེམས་ནི་ཐིག་ལེར་གཞག་པར་བྱ། །ཞེས་པ་ནི་གོང་མའི་རིམ་པ་ཁོ་ན་ལྟར་རྒྱུ་བ་ནས་བཟུང་སྟེ། ཇི་སྲིད་སྣང་བའི་ཐིག་ལེ་ལ་ཐིམ་པ་དེ་སྲིད་ཀྱི་བར་དུ་བསྡུས་ནས་དེ་ལ་སེམས་དགོད་པར་བྱའོ། །རང་གི་དབང་པོ་ཞེས་པ་ནི་རང་གི་སྲོག་གོ། །དེར་བཟུང་
ནས་ཞེས་པ་ནི་ཐབས་ཀྱིས་སྟེར་བས་ཐིག་ལེ་དེར་སྤྲོ་བ་དང་བསྡུ་བ་ལས་གྲོལ་བའི་ངོ་བོས་བཟུང་བའོ། །དེའི་སྟོབས་ཀྱིས། ས་ཡི་དཀྱིལ་འཁོར་ཆུ་ལ་ཞུགས། །ཞེས་པ་ལ་སོགས་པའི་ཤློ་ཀ་གསུམ་གསང་བའི་ཐིག་ལེའི་སྐབས་སུ་གསུངས་པ་ཁོ་ན་ལྟར་རྒྱུད་ལས་གསུངས་པའི་མཚན་མ་
ལྔ་འབྱུང་བར་འགྱུར་ཞེས་སོ། །ཅིའི་ཕྱིར་ཞེ་ན། རྡོ་རྗེ་སེམས་དཔའ་ཞུགས་ཕྱིར་རོ། །ཞེས་ཏེ། རྩ་བའི་ཡེ་ཤེས་དམིགས་པ་ནི་རྡོ་རྗེ་སེམས་དཔའ་སྟེ། དེ་ཞུགས་པ་ནི་བརྟན་པའོ། །བརྟན་པའི་སྟོབས་ལས་ཤིན་ཏུ་ཡོངས་སུ་དག་པའི་སྐུ་ཡང་ནམ་ཞིག་ན་འཇུག་པར་འགྱུར་བའོ། །ཇི་
སྐད་དུ། བཟུང་བས་རྟག་ཏུ་སྟོབས་ལྡན་ཏེ། །རྡོ་རྗེ་སེམས་དཔའ་ཡང་དག་འཇུག །ཅེས་པའི་ཕྱིར་རོ། །ལྔ་པོའི་མཚན་མ་བཟློག་པའི་ཐབས་གསུངས་པ། ཐིག་ལེ་ལ་ནི་ཞེས་པ་ལ་སོགས་པའོ། །དེ་ཡང་ཐིག་ལེ་ལ་གོམས་པར་བྱེད་པའི་དུས་སུ་སེམས་ཡང་དང་ཡང་དུ་བཟུང་བས་
གླལ་བ་དང་དགོད་པ་དང་འདར་བ་དང་། ནམ་མཁའ་ལ་འཕར་བ་དང་། བརྒྱལ་བ་འབྱུང་བ་དེའི་ཚེ། །ཐིག་ལེ་ཡང་དག་སྤྲོ་བྱས་ནས། །ཞེས་པ་ནི་སྣང་བའི་ཐིག་ལེའི་དམིགས་པ་བཏང་ནས་ཡི་གེ་དང་མཚན་མ་དང་ཡེ་ཤེས་སེམས་དཔའ་ལ་སོགས་པ་ལ་དམིགས་པར་བྱ་བ་ནི་གོང་
མའི་རིམ་པ་ལྟར་ཀུན་དུ་ཁྱབ་པར་བྱས་པས་དེ་ལྡོག་པར་འགྱུར་རོ་ཞེས་སོ། །གཞན་ཐལ་བྱུང་དུ་ཞེས་པ་ནི་ཁམས་འཁྲུགས་པའི་སྐྱོན་དུ་འགྱུར་བའང་ཡོད་དོ། །དེ་རྣམས་ཡང་དང་ཡང་དུ་བཟློག་པ་ལས་གོང་དུ་སྨོས་པ་རྣམས་འབྱུང་བ་ལ་སོམ་ཉི་མི་བྱའོ། །དེའི་འབྲས་བུ་གསུངས་པ་
འདི་ནི་ཞེས་པ་ལ་སོགས་པའོ། །འདི་གང་གིས་བསྒོམ་པས་ན་འདི་ནི་ཞེས་པ་ལ་སོགས་པའོ། །དེ་རྣམས་ནི་གོ་སླ་བས་མ་བཤད་དོ། །ད་ནི་གཉིས་སུ་མེད་པའི་ཡེ་ཤེས་ཀྱི་མིང་གི་རྣམ་གྲངས་མདོ་དང་རྒྱུད་ལས་གྲགས་པ་རྣམས་གསུངས་པའོ། །དེ་ལྟར་ཞེས་པ་ལ་སོགས་པའོ། །

དཔག་མེད་དམ་པ་ཞེས་པ་ནི་དཔག་ཏུ་མེད་པའི་སངས་རྒྱས་དང་བྱང་ཆུབ་སེམས་དཔའ་རྣམས་སོ། །དེའི་ཕུན་སུམ་ཚོགས་པ་ནི་དེའི་ཐོབ་པར་བྱ་བ་སྟེ་སྟོབས་བཅུ་ལ་སོགས་པའོ། །དེ་དམིགས་ཡང་དག་སྐྱེ་འགྱུར་བ། །ཞེས་པ་ནི་དེ་རྣམས་ཆོས་ཀྱི་དེ་བཞིན་ཉིད་ཡང་དག་པར་དམིགས་
པ་ལས་སྐྱེ་བར་འགྱུར་བའོ། །དེའི་བསྒོམ་པའི་ཆོ་ག་རྣམས་བཤད་ནས་ཞེས་པ་ནི་རྣམ་པ་གཉིས་ཀྱིས་དེ་ལ་དམིགས་པའི་བསྒོམ་པ་རྣམ་པར་བཤད་ནས་ད་ནི་དེའི་མིང་གི་རྣམ་གྲངས་མདོ་དང་རྒྱུད་ལས་གྲགས་པ་དག་ཀྱང་བསྟན་པར་བྱའོ་ཞེས་སོ། །དེ་དག་ཀྱང་གང་ཞེ་ན། དེ་བཞིན་ཉིད་
དང་ཞེས་པ་ལ་སོགས་པའོ། །དུས་ཐམས་ཅད་དུ་དེ་བཞིན་ཉིད་གནས་པའི་ཕྱིར་ན་དེ་བཞིན་ཉིད་དོ། །དངོས་པོ་ཐམས་ཅད་ཡང་དག་པའི་མཐར་འགྱུར་བའི་ཕྱིར་ཡང་དག་མཐའོ། །ཡོན་ཏན་བསམ་གྱིས་མི་ཁྱབ་པའི་རྒྱུ་བས་ན་བསམ་གྱིས་མི་ཁྱབ་པའི་དབྱིངས་སོ། །ཆོས་ཐམས་ཅད་
ལས་མི་འགྱུར་བས་ན་ཆོས་ཉིད་དོ། །གཉིས་པོའི་བདག་དང་བྲལ་བའི་ངོ་བོ་བས་ན་ཆོས་སྐྱོན་མེད་པའོ། །བརྟགས་པ་ཐམས་ཅད་ཀྱིས་མ་ཟིན་པས་ན་སྟོང་པ་ཉིད་དོ། །གཞན་གྱིས་བརྟགས་པའི་རྒྱུ་མེད་པས་ན་མཚན་མ་མེད་པའོ། །ཡེ་ཤེས་ལས་མ་གཏོགས་པ་མེད་པས་ན་སྨོན་པ་མེད་
པའོ། །བྱེད་པའི་སྒོ་ནས་མིང་གི་རྣམ་གྲངས་ཀྱང་། ཉོན་མོངས་ཁུར་ཆེན་འབོར་བྱེད་པ། །ཞེས་པ་དང་། གཞན་གྱི་སེམས་ཤེས་བྱེད་པ་དང་། །ཞེས་པ་ལ་སོགས་པ་ཤློ་ཀ་གཅིག་དང་། རྒྱུ་སོགས་བཅུ་གཉིས་འབྱུང་བྱེད་དང་། །ཞེས་པས་བསྟན་ཏེ། འདི་སྐད་དུ་སྟོན་ཏེ་གང་གིས་ཇི་
ལྟ་བ་བཞིན་བསྒོམས་པས་དེ་དག་ཐམས་ཅད་འགྲུབ་པའི་ཕྱིར་དེ་སྐད་དོ། །ཤེས་བྱའི་ངོ་བོ་ཉིད་མེད་ཅིང་བརྟགས་པས་སྐྱེ་བ་མེད་པའོ། །རང་བཞིན་གྱིས་དག་པས་ན་འོད་གསལ་བའོ། །ཡེ་ཤེས་ལྔའི་རང་བཞིན་ཡིན་པས་ན་མངོན་པར་བྱང་ཆུབ་སེམས་སོ། །ཕྱིན་ཅི་ལོག་གི་དངོས་པོ་
ཐམས་ཅད་ཟད་པས་ན་དངོས་པོ་མཐར་ཕྱིན་པའོ། །ཡེ་ཤེས་དམ་པའི་ཡུལ་དུ་གྱུར་པས་ན་དོན་དམ་པའི་བདེན་པའོ། །བློས་གཞག་པ་མ་ཡིན་པས་ན་རྫོགས་པའི་རིམ་པའོ། །བརྟགས་པ་ཐམས་ཅད་ཀྱང་ཐིམ་པས་ན་ཡོངས་སུ་དག་པས་སྐུ་གཙང་ངོ་། །གང་གིས་རེག་པ་ལ་དོན་ཆེན་

པོ་མི་འབྱུང་བ་མ་ཡིན་པས་ན་ཀུན་གྱིས་བསྟེན་བྱའོ། །གློ་བུར་གྱི་དྲི་མས་མ་གོས་པས་ན་མཁའ་ལྟར་དག་པའོ། །གཉེན་པོ་ཡེ་ཤེས་ཀྱིས་སྦྱངས་པ་མ་ཡིན་པས་ན་གདོད་ནས་འོད་གསལ་བའོ། །ཡང་དག་པའི་ཚད་མས་འཚེ་བ་མེད་པས་ན་གང་གིས་ཀྱང་མི་ཤིགས་
པའོ། །བརྡ་ལ་སོགས་པའི་ཀུན་བརྟགས་དང་བྲལ་བས་ན་དངོས་པོ་མེད་པའོ། །བདག་པོའི་སྒོ་ནས་ཀྱང་། སངས་རྒྱས་ཐམས་ཅད་སྐྱོན་མེད་པའི་ཡེ་ཤེས་ཀྱི་རང་བཞིན་པས་ན། དཔལ་ཆེན་ཡེ་ཤེས་ཡོངས་དག་གོ། །ཀུན་རྫོབ་ཀྱི་རྣམ་པའི་གཟུགས་ཀྱིས་ཡོངས་སུ་དག་པའི་ཐིག་
ལེར་སངས་རྒྱས་ཐམས་ཅད་ཀྱི་ཁ་སྦྱར་གྱི་དབུས་ན་གནས་པས་ན་ཐིག་ལེ་བརྟན་པོ་ཡོངས་དག་གོ། །ཁྱབ་བདག་ཏུ་གནས་ཤིང་སངས་རྒྱས་ཐམས་ཅད་ཀྱིས་མ་མཁྱུད་ཀྱང་ཕལ་ཆེས་པའི་སྤྱོད་ཡུལ་དུ་མ་གྱུར་པས་ན་གསང་ཆེན་ནོ། །སངས་རྒྱས་ཐམས་ཅད་ཀྱི་ཡེ་ཤེས་ནམ་མཁའ་ལྟ་བུ་
དང་འདྲེས་པའི་ཕྱིར་ནམ་མཁའི་སྤྱོད་ཡུལ་ལོ། །དེ་ཉིད་ཀྱི་ཕྱིར་ན་དེ་ལས་ཐ་དད་པའི་སྒོམ་པ་མེད་པའོ། །སངས་རྒྱས་ལ་སོགས་པས་ཀྱང་མངོན་པར་འདོད་པའི་གང་ཟག་ལ་ཐབས་ཀྱིས་སྟེར་བས་ན་རྗེ་བཙུན་མན་ངག་ཆེན་པོའོ། །བརྒྱུད་པའི་སྒོ་ནས་ཀྱང་སྟོན་པ་སངས་རྒྱས་བཅོམ་ལྡན་
འདས་ཀྱིས་སྐལ་བ་དང་ལྡན་པའི་སེམས་ཅན་མཐོང་ནས་ཇི་སྲིད་དེ་མ་ཆད་ཀྱི་བར་དུ་སྣང་བས་ན་རྣ་བ་ནས་རྣ་བར་འཕོ་བར་བྱེད་དོ། །དེའི་རྒྱུད་རིམ་གྱིས་མ་ཟིན་པས་ཉན་ཐོས་དང་རང་སངས་རྒྱས་ཀྱིས་མ་ཤེས་སོ། །སོགས་ཀྱིས་བསྡུས་པ་འཇིག་རྟེན་གྱི་སྤྱད་མཁན་ཆེན་པོ་ལ་སོགས་པས་
མི་ཤེས་སོ། །དེ་ཅིའི་ཕྱིར་ཞེ་ན། ཡི་གེ་མེད་པ་ཉིད་དང་ནི། །ཚིག་དང་བྲལ་བས་བརྗོད་མེད་སོགས། །ཞེས་ཏེ་གལ་ཏེ་ཡི་གེ་ལ་སོགས་པའི་ངོ་བོ་ཡོད་ན་ད་ལྟར་ཀུན་གྱིས་ཤེས་པ་ཞིག་ན། འདི་ནི་ཡི་གེ་ལ་སོགས་པ་དང་བྲལ་བའི་མན་ངག་ཆེན་པོ་བས་ན་ཇི་ལྟར་ཤེས་ཏེ་མ་ནོར་བའི་ལམ་
དུ་བརྟེན་པ་པོ་མེད་ན་མི་འབྱུང་བ་སྟེ། རང་གིས་རང་གི་ཡེ་ཤེས་མཐོང་བའི་ཕྱིར་རོ། །ཇི་སྐད་དུ། གཅིག་ལ་གཅིག་གི་དབང་གིས་ན། །རྣམ་པར་རིག་པ་ཕན་ཚུན་ངེས། །ཞེས་བཤད་པ་ལྟ་བུའོ། །དོན་ཟབ་ཅིང་རྒྱ་ཆེ་བ་སྨོས་པའི་ཕྱིར་ན་མདོ་སྡེ་སྟེ་ཤེས་རབ་ཀྱི་ཕ་རོལ་ཏུ་ཕྱིན་པ་འབུམ་ལ་སོགས་

པའོ། །རྒྱུ་དང་འབྲས་བུ་འབྲེལ་བའི་ཕྱིར་ན་རྒྱུད་དེ་དཔལ་རྡོ་རྗེ་དབུ་རྒྱན་ལ་སོགས་པའོ། །དེ་རྣམས་ལས་མིང་གི་རྣམ་གྲངས་དེ་དང་འདྲ་བ་མཐའ་ཡས་པ་འདས་པ་དང་ད་ལྟར་གྱི་སངས་རྒྱས་རྣམས་ཀྱིས་ནི་གསུངས་ཤིང་མ་འོངས་པའི་སངས་རྒྱས་རྣམས་ཀྱིས་གསུང་བར་འགྱུར་བ་ཀུན་དངོས་པོ་
ཐམས་ཅད་ཀྱི་དེ་བཞིན་ཉིད་འདི་ལས་གཞན་ཅི་ཡང་མ་གསུངས་སོ་ཞེས་པའོ། །ད་ནི་དེ་ལྟ་བུའི་དོན་དེ་གོང་ནས་གསུངས་པའི་རིམ་པས་བསྒོམས་ནས་བསྒྲུབ་པའི་བདག་ཉིད་ཅན་དུ་འགྱུར་བར་གསུངས་པ། དེ་བས་ཞེས་པ་ལ་སོགས་པའོ། །དད་པ་སྔོན་དུ་འགྲོ་བ་ཡི། །སེམས་ཀྱིས་ཞེས་པ་
ནི་དད་པ་གཅེས་སུ་བྱེད་པ་ནི་དཀར་པོའི་ཆོས་ཐམས་ཅད་ཀྱི་འབྱུང་བའི་རྒྱུ་ཡིན་པས་དེས་བསམ་པའི་དངོས་པོ་འདོད་པ་འབྱུང་སྟེ་དེས་སེམས་མངོན་པར་སྤྲོ་བ་སྟེ་རྐང་ཐུང་དུ་བྱས་ཏེ། གོང་དུ་གསུངས་པའི་ཆོས་ཀུན་གྱི་དེ་བཞིན་ཉིད་གསལ་ཟབ་གཉིས་སུ་མེད་པའི་དོན་ཆེན་པོ། རིམ་པ་གཉིས་པའི་དེ་
ཁོ་ན་ཉིད་བླ་མའི་ཞལ་ནས་མི་སླུ་བའི་དེ་ཁོ་ན་ཉིད་དུ་གནས་པ་ཡང་དག་པར་གཟུང་ངོ་། །དེ་གང་གིས་གཟུང་ཞེ་ན། དེ་གཟུང་ཞེས་པ་ལ་སོགས་པའོ། །དེ་ཡང་བསྒོམས་པ་ལས་བྱུང་བའི་ཤེས་རབ་ཀྱིས་གོང་མའི་རིམ་པས། རྟག་ཏུ་གོམས་བྱེད་ཅེས་ཏེ་བྱ་བར་འོས་པ་ཚོགས་པའི་གནས་སུ་བསྐྱེད་པའི་རིམ་པ་དང་
རྫོགས་པའི་རིམ་པ་གཉིས་གང་ཡང་རུང་བ་ལ་སེམས་རྩེ་གཅིག་པའམ་བྱ་བས་སྐལ་བ་གང་རུང་གིས་ཞུགས་ཏེ་གོམས་པར་བྱེད་པའི་སྐྱེས་བུ་གང་ཡིན་པ་དེ་རྫོགས་པའི་རིམ་པ་དེ་ལ་བརྟེན་པའི་རྟགས་སྐྱེས་པ་སྟེ་རྟགས་ཀྱི་རྟགས་དང་ཞེས་ཚིག་སྔ་མའོ། །དེ་གཉིས་ཀ་ཡང་ལས་དང་པོ་པའི་རྣལ་འབྱོར་
པ་ཞེས་བྱའོ། །ས་ནས་སར་ནི་འཕར་བ་ལྟར། །བློ་ཡི་རྣམ་པ་གོང་དུ་འཕེལ། །ཞེས་ཏེ། དཔེར་ན། བྱང་ཆུབ་སེམས་དཔའ་ས་ནས་སར་འཕར་བཞིན་དུ། རྣལ་འབྱོར་པ་རྣམས་ཀྱི་ཡང་བློའི་རྣམ་པ་གོང་དུ་འཕེལ་བ་དང་། དེས་དོན་འདི་སྟོན་ཏེ། ལས་དང་པོ་པ་དེ་བརྟན་པར་ཤེས་ནས་རང་གི་
རིགས་ཀྱི་ཕྱག་རྒྱ་དང་ལྷན་ཅིག་ཏུ་མཉམ་པར་གཞག་པ་ལས་འཁོར་ལོའི་གཟུགས་ལ་དམིགས་པས་བདག་པོའི་བཀའ་ཐོབ་པའི་དུས་སུ་ཅུང་ཟད་ཡེ་ཤེས་དབང་དུ་གྱུར་པ་འཕར་བའོ། །དེ་ཉིད་ཀྱང་རང་གི་བྱ་བས་ནུས་པ་བརྟན་པོར་རྟོགས་ནས་ཡང་དེ་ཉིད་དང་མཉམ་པར་གཞག་པ་ལས་རང་གི་

ལྷའི་ས་བོན་ལ་དམིགས་པས་དེ་དག་ཀྱང་རིགས་གསུམ་གྱི་ཡི་གེ་བཞི་དང་ལྷན་ཅིག་ཏུ་གྱུར་ནས། དེ་ཉིད་རླུང་གསུམ་དུ་རྟོགས་པའི་དུས་སུ་ཡེ་ཤེས་ཐིག་ལེ་དབང་དུ་གྱུར་པའི་རྣལ་འབྱོར་པར་འཕར་བའོ། །དེས་ཀྱང་རང་གི་བྱ་བས་མཚན་མ་ལ་སོགས་པ་རྙེད་ནས། འོག་ནས་
འབྱུང་བའི་ཆོ་གས་ལྷ་མོ་ལ་སོགས་པ་དང་མཉམ་པར་གཞག་པ་ལས། ས་བོན་ཟླ་བ་ལྟ་བུ་རིགས་ཅན་གྱི་ཆར་དམིགས་པས། དེའི་ཡན་ལག་གཞན་དང་། ཡང་དང་པོ་དང་། ཕྱིས་ཀྱི་དུས་སུ་ཇི་ལྟ་བ་བཞིན་དུ་བྱུང་བ་ལས་ཡང་དག་པའི་ཡེ་ཤེས་དབང་དུ་གྱུར་པའི་རྣལ་འབྱོར་པར་འཕར་བའོ། །
རིག་འཛིན་ལ་སོགས་འཕྲུལ་པ་ཡིས། །གཞན་གྱི་དོན་དེ་ལ་སྦྱོར་བྱེད། །ཅེས་པ་ནི། བར་མའི་སྐབས་སུ་དེ་རྣམས་གྲུབ་པས་དེའི་གཟུགས་སམ། ཉན་ཐོས་དང་རང་རྒྱལ་བ་པ་དང་། ཚངས་པ་ལ་སོགས་པའི་གཟུགས་སུ་གནས་ནས་དེས་འདུལ་བའི་སྐྱེ་བོ་གཞན་ཡང་དོན་འདི་ལ་
སྦྱར་ནས་ཕྱི་རོལ་གྲོལ་བར་བྱེད་ཅེས་སོ། །དེ་ཡིས་ཞེས་པ་ནི་གཉིས་སུ་མེད་པའི་ཡེ་ཤེས་སོ། །བརྟན་འགྱུར་རྣལ་འབྱོར་ཞེས་པ་ནི་དེ་གོམས་པས་བརྟན་པ་སྟེ་ལས་དང་པོ་པའོ། །སྒྲུབ་པའི་བདག་ཉིད་ཅན་དུ་འགྱུར། །ཞེས་པ་ནི་རྣལ་འབྱོར་པ་གཉིས་ཏེ། གྲུབ་པའི་མཚན་མའི་བདག་
ཉིད་ཅན་ཡིན་པའི་ཕྱིར་རོ། །དེ་ཡང་གྲུབ་པའི་མཚན་མ་ནི་བཞི་སྟེ། དབབ་པ་དང་། ལུང་དང་། བཀྲ་ཤིས་པའི་ལྷའི་རྨི་ལམ་དང་། ཐ་མལ་པ་ཐམས་ཅད་དོ། །དེ་ནི་དེའི་བདག་ཉིད་དོ། །ད་ནི་གཉིས་སུ་མེད་པའི་ཡེ་ཤེས་ལ་དེ་ལྟར་གོམས་པར་བྱས་པས་དེ་མངོན་དུ་བྱ་བའི་
ཐབས་གསུངས་པ། བདག་ཉིད་ཅན་དེས་ཞེས་པ་ལ་སོགས་པའོ། །བདག་ཉིད་ཅན་ཞེས་པ་ནི་སྒྲུབ་པའི་བདག་ཉིད་ཅན་གཉིས་པའོ། །སྒྲུབ་པ་མཆོག་ཅེས་པ་ནི་ཕྱག་རྒྱ་ཆེན་པོའི་དངོས་གྲུབ་སྒྲུབ་པའི་ཐབས་ཏེ་གཞན་ལས་དམ་པར་འགྱུར་བའི་ཕྱིར་རོ། །དེ་ཡང་འོག་ནས་ཇི་སྐད་
དུ་གསུངས་པ་བརྩམ་པར་བྱའོ་ཞེས་སོ། །ཇི་ལྟར་ཞེ་ན། མངོན་དུ་བྱེད་པའི་ཕྱག་རྒྱ་གསུངས་པ། ལྷ་མོ་ཞེས་པ་ལ་སོགས་པའོ། །དེ་ཡང་རང་གི་རིགས་ཀྱ