Luận tạng Tây Tạng (Tengyur) — Tập 42

ང་ཕྱིར། །རྟོག་བཅས་ཆོ་ག་དེ་དག་ཀུན། །ངལ་བ་ལ་སོགས་སྤང་བར་བྱ། །རང་བཞིན་ལས་ནི་བྱེད་པའང་

ཡོད། །རང་བཞིན་ཡོངས་སུ་ཤེས་པ་ལ། །བྱེད་པ་མེད་ཅིང་བྱ་བ་འང་མེད། །དཔེར་ན་མི་གང་ཆུ་ཀླུང་གི །ཕ་རོལ་དུ་ནི་འགྲོ་བ་དག །རྩྭ་དང་ཤིང་སོགས་བསྡུ་བྱས་ནས། །དེ་ལས་རྒལ་བའི་རྫིང་བྱས་ཏེ། །མཇུག་ཏུ་རབ་ཏུ་རྒལ་བྱས་ནས། །བོར་ནས་བདེ་བར་
འགྲོ་བ་ལྟར། །དེ་བཞིན་འཁོར་བའི་ཕ་རོལ་གྱི། །དངོས་པོ་དེ་ཉིད་རྟོགས་བྱས་ནས། །རྟོག་བཅས་ཆོས་རྣམས་སྤང་བྱས་ཏེ། །བྱང་ཆུབ་བདེ་བ་ཐོབ་པའོ། །དེ་ཕྱིར་རྣམ་རྟོག་རྣམ་སྤངས་ལ། །ཟབ་གསལ་གཉིས་མེད་ཆོས་སྤེལ་ཏེ། །དེ་བཞིན་གཤེགས་པས་གསུངས་ལམ་ལ། །སྔགས་
རིགས་རྣམ་རྟོག་མ་བྱེད་ཅིག །རྣམ་རྟོག་གཏི་མུག་ཆེན་པོ་སྟེ། །འཁོར་བར་ལྟུང་བར་བྱེད་པ་ཡིན། །ནམ་མཁའ་ལྟ་བུ་དྲི་མེད་པའི། །ཟབ་གསལ་གཉིས་མེད་ཏིང་འཛིན་མནོས། །གཉིས་ཀྱི་དབང་པོ་མཉམ་སྦྱོར་བས། །ལུས་ངག་ཡིད་གསུམ་རབ་བསྡུས་ནས། །ངའོ་སྙམ་པའི་
གཟི་བྱིན་བསྐྱེད། །རྣམ་པ་ཀུན་གྱིས་རབ་བརྒྱན་ནས། །རྣལ་འབྱོར་ལྡན་པས་ཚེ་འདི་ལ། །ཡེ་ཤེས་རྫོགས་པ་ཉིད་ངེས་གྱུར། །རྡོ་རྗེ་ཅན་ལུས་དམ་ཚིག་པས། །ལས་བྱུང་སྐྱེས་པ་བུད་མེད་ཀྱི། །དུ་མའི་གཟུགས་ལ་བརྙས་མི་བྱ། །རྡོ་རྗེ་སེམས་ལྡན་དམ་ཚིག་པས། །ངན་པར་རྟོག་པ་
བཟང་པོར་རྟོག །རང་གི་སེམས་ཀྱིས་རང་སེམས་ལས། །ཕྱི་མས་སྔ་མ་སུན་མི་དབྱུང་། །རྡོ་རྗེ་ངག་གི་དམ་ཚིག་པས། །འདོད་པ་བསྐྱེད་པའི་ཚིག་རྩུབ་མོ། །ཕྲ་མ་ལ་སོགས་བདེ་བ་ཡི། །ཚིག་ཏུ་རྣམ་པར་སྨྲ་བར་བྱ། །ཤ་ནི་རྣམ་པར་སྣང་མཛད་ཡིན། །རྐང་ནི་རྡོ་རྗེ་མི་བསྐྱོད་པ། །ཁྲག་
ནི་དཀོན་མཆོག་དཔལ་དུ་བརྗོད། །རུས་པ་འོད་དཔག་མེད་པ་ཡིན། །རྩ་ཡི་ཚོགས་ནི་དོན་ཡོད་གྲུབ། །དེ་འདྲའི་གསང་ཆེན་དམ་པ་འདི། །བློ་ལྡན་རྣམས་ཀྱིས་བསྟེན་པར་བྱ། །འདོད་ཆགས་ཞེ་སྡང་གཏི་མུག་དང་། །སྲེད་དང་འདུ་བྱེད་འཕེལ་བྱེད་པའི། །ཆོས་ལྔ་སྐྱེས་མཆོག་རྣམས་ཀྱིས་
གསུངས། །བཤང་གཅི་ཁུ་བ་མཆིལ་མ་ཁྲག །འཛག་པ་འབྱུང་བ་བཞིས་བསྡུས་པ། །བསྒོམ་པའི་བློ་གྲོས་རྟོགས་པ་ཡིས། །རྟག་ཏུ་བཟའ་ཞིང་སྦྱིན་སྲེག་བྱ། །དམ་ཚིག་དང་ལྡན་དེ་ཉིད་བསྒོམ། །མྱུར་དུ་སྲིད་པའི་འཆིང་བ་ལ། །གློག་གིས་མུན་པ་བསལ་བ་བཞིན། །སྐད་ཅིག་

ཙམ་གྱིས་ཡེ་ཤེས་འབར། །དེ་བས་དེ་ཉིད་ཐོབ་བྱས་ནས། །སྙིང་རྗེས་སེམས་ཅན་ཀུན་དམིགས་ནས། །དགོན་པ་ལ་སོགས་གནས་ནས་ནི། །རྟག་ཏུ་གཉིས་མེད་དོན་བསྒོམ་བྱ། །སྡུག་བསྔལ་གྱི་རྒྱུ་སྡུག་བསྔལ་ལས། །གྲོལ་འདོད་རྣལ་འབྱོར་གང་ཡིན་པས། །བློ་གྲོས་ཀྱིས་ནི་དེ་
ཐབས་བཙལ། །ཐབས་ཀྱིས་དེ་བཞིན་གཤེགས་པར་འགྱུར། །དེ་བས་སྙིང་རྗེ་འབའ་ཞིག་གིས། །གཞིར་གྱུར་ཡོན་ཏན་ཐམས་ཅད་བྱུང་། །སྙིང་རྗེ་སྡོང་བོ་རྩ་བ་ནི། །སྡུག་བསྔལ་སེམས་ནི་གྲོལ་འདོད་པས། །དགའ་བ་སྡོང་བུ་ཡལ་ག་ནི། །བདེ་བ་ཤིན་ཏུ་རྒྱས་པར་འདོད། །ཡལ་
ག་འཕེལ་ནས་གསལ་འགྱུར་བ། །སེམས་ཀྱི་དེ་ཁོ་ན་ཉིད་རིག །མ་དག་པ་ཉིད་བསལ་བས་དག །ཐབས་ནི་དེ་དག་ཁྱད་པར་དུ། །ལྷ་ཉིད་ཀྱིས་ནི་སྤྱོད་པར་བྱེད། །དེ་དོན་སྤྱད་ནས་སྤྲོ་སྐྱེས་པ། །དགའ་བ་ཚིམ་བྱེད་ཅེས་བྱའོ། །སྤོང་བ་ལེན་པ་ལོ་མ་ནི། །རྒྱུན་མི་འཆད་པར་སྨོན་ལམ་འདེབས། །
ཚོགས་གཉིས་བསྒོམས་པས་ཞིང་གཤིན་ལྟར། །བྱས་པས་མེ་ཏོག་འབྲས་བུ་བྱུང་། །རྟེན་འབྲེལ་རྣམ་པ་གཉིས་བྱུང་བས། །རང་རྒྱུད་ནང་དུ་སྨིན་བྱེད་པའི། །སྦྱོར་བ་མེ་ཏོག་མོ་གཤམ་མིན། །གཞན་རྒྱུད་སྨིན་བྱེད་སྦྱོར་བ་ནི། །ཕྱི་རོལ་མེ་ཏོག་མོ་གཤམ་མིན། །རང་གི་རྒྱུད་ནི་སྨིན་
གྱུར་ནས། །དེ་བཞིན་གཞན་རྒྱུད་རབ་སྨིན་པ། །འབྲས་བུར་ཤེས་བྱ་དེ་དག་རྣམས། །སྙིང་རྗེས་རབ་ཏུ་འགྲུབ་པར་འགྱུར། །རྩ་བ་སྙིང་རྗེ་མེད་གྱུར་ན། །དཀའ་བ་བཟོད་པར་མི་ནུས་སོ། །དེ་བཞིན་བསོད་ནམས་སྤེལ་མི་ནུས། །སེམས་ཅན་དོན་རྣམས་བྱེད་མི་ནུས། །དེས་ན་བསམ་པའི་
དགའ་བ་བྲལ། །བློ་གྲོས་ཀྱིས་ནི་སྨོན་ལམ་མེད། །དགེ་བའི་ཆོས་ནི་ལེན་མི་བྱེད། །འགྲོ་བ་ཆོས་ལ་མི་འཛུད་པ། །ཡོངས་སུ་སྨིན་བྱ་ལས་ནི་བྲལ། །སྙིང་རྗེ་མེད་པས་དེ་དག་ཏུ། །འཕེལ་བས་སྙིང་རྗེ་གཞི་རབ་གཟུང་། །སྙིང་རྗེས་བཟོད་པ་བསམ་པ་སྨོན། །སྐྱེ་བ་སེམས་ཅན་ཡོངས་སྨིན་
བྱེད། །རྩ་བ་སྡོང་བུ་ཡལ་ག་དར་། །ལོ་མ་མེ་ཏོག་འབྲས་བུ་དང་། །སྙིང་རྗེ་སྡོང་པོ་འདི་དག་ནི། །རྩ་བ་ལ་སོགས་ངོ་བོ་ལ། །ཕྱིས་ནི་འབྲས་བུ་མཆོག་འགྱུར་བའི། །སྙིང་རྗེས་སེམས་ཅན་དོན་ལ་སྤྱོད། །སྡུག་བསྔལ་ལས་ནི་བདེ་བ་སྐྱེད། །ཤིན་ཏུ་རྒྱས་པར་གྱུར་པ་སྟེ། །བཟོད་པའི་

མཚན་ཉིད་སྡོང་པོ་ནི། །རྒྱས་པ་ལས་ནི་ཡལ་ག་འཕེལ། །དེ་བས་དེ་ཉིད་བསྒོམ་པ་ལ། །དོན་ཆེན་རབ་ཏུ་འདོད་པ་ཡི། །བཏང་སྙོམས་ཀུན་དུ་ཁྱབ་པ་སྟེ། །ཚངས་ཆེན་སྤྱོད་པ་དམ་པའོ། །དེ་དག་ལ་གནས་རྣལ་འབྱོར་པས། །སྙིང་པོ་སངས་རྒྱས་སྤྱོད་
ཡུལ་མཆོག །གང་དེ་ཀུན་བདག་ལ་གནས་པའི། །མཐའ་ཡི་དེ་ཉིད་བསྒོམ་པར་བྱ། །དཔྲལ་བ་ལ་གནས་རྐང་མཐིལ་བར། །ཐིག་ལེ་རུ་ནི་བསྡུ་བར་བྱ། །བྱང་ཆུབ་སེམས་དག་འོད་གསལ་བས། །ཟླ་བ་ཤེལ་དང་མཉམ་པའི་འོད། །ཡེ་ཤེས་ལྔ་ཡི་ངོ་བོ་ཉིད། །ཙ་ན་ཀ་ཡི་འབྲུ་ཚོད་ཙམ། །
དེ་དབུས་གཡོ་གནས་དཀྱིལ་འཁོར་ནི། །མི་གསལ་གསལ་བར་ཡང་དག་སྦྱོར། །དེ་གསལ་མི་ཤིགས་ཐིག་ལེའི་གཟུགས། །ཡུངས་ཀར་གྱི་ནི་འབྲུ་ཚོད་ཙམ། །འོད་ཟེར་སྣ་ལྔ་འབར་འཛག་པའི། །ཚུལ་ཅན་སྙིང་དབུས་རྟག་ཏུ་གནས། །དེ་ལ་བལྟས་པས་ཡེ་ཤེས་ཆེ། །སྐད་ཅིག་ཙམ་གྱིས་
རྣལ་འབྱོར་པ། །འབར་བ་འདི་ལ་ཐེ་ཚོམ་མེད། །སྟེང་གི་སྣ་ལས་ངེས་པར་འབྱུང་། །ཕྱོགས་བཅུའི་དེ་བཞིན་གཤེགས་པ་ཡི། །ཞལ་ཞུགས་སྙིང་གི་བདུད་རྩི་བླངས། །རྡོ་རྗེ་ལམ་བྱུང་འོ་མ་ལྟར། །འདུས་ནས་གཡས་གཡོན་རབ་ཞུགས་ཏེ། །གོང་གི་ཐིག་ལེ་ལ་གནས་ཏེ། །འགོག་
པའི་རྡོ་རྗེ་སེམས་ཉིད་དུ། །དེ་ལ་ནམ་ཞིག་སུས་རེག་པ། །སངས་རྒྱས་ཀུན་གྱིས་མཆོག་སྦྱིན་པ། །ཡིད་བཞིན་དཔལ་དང་འདྲ་བར་འགྱུར། །ཡང་ནི་འཛག་པའི་ཐིག་ལེ་ལས། །བྱུང་བས་ནོར་བུ་རྣམ་པར་གནས། །རང་གི་མཚན་མའི་དབུས་གནས་པ། །གོང་གི་དཀྱིལ་འཁོར་ལྟར་བསྒོམས་
ཏེ། །དེ་ལ་སྣང་བའི་ཐིགས་པ་ལས། །གོང་གི་རིམ་པས་སྤྲོ་བསྡུ་བས། །བཟུང་སྟེ་དེ་ལ་རེག་འགྱུར་བས། །རྒྱུད་གསུངས་ལྔ་པོ་ཡང་དག་འབྱུང་། །དེ་བྱུང་རྗེས་དྲན་རབ་བསྒོམས་པས། །དོན་དེས་ཀུན་ལ་ཁྱབ་པར་བྱ། །ཡང་ནི་སྤྲུལ་པའི་ཐིག་ལེ་ནི། །རྣམ་པ་བཞི་པོ་བསྒོམ་པར་བྱ། །སྤྱི་
བོར་རླུང་དབུས་ཨོཾ་བསམ་མོ། །མགྲིན་པར་ཆུ་དབུས་ཨཱཿབསམ་མོ། །ཐུགས་ཀར་མེ་དབུས་ཧཱུཾ་བསམ་མོ། །མགྲིན་འོག་དབང་ཆེན་རང་ལྷ་ཡི། །ས་བོན་ཐིག་ལེར་བསམ་པའོ། །ཐིག་ལེ་བཞི་ལས་ཟེར་འབྱུང་བ། །སྟེང་གི་སྣ་ལས་ངེས་པར་འབྱུང་། །གཡས་འབྱུང་རླུང་གི་དཀྱིལ་འཁོར་

ནི། །ཁ་དོག་ནག་པོའི་ངོ་བོ་ནི། །སྐུ་ཡི་རྡོ་རྗེ་རང་བཞིན་ནི། །མུན་པ་རུ་ནི་ཤེས་པར་བྱ། །གཡོན་འབྱུང་ཆུ་ཡི་དཀྱིལ་འཁོར་ནི། །ཁ་དོག་དཀར་པོའི་ངོ་བོ་ཉིད། །གསུང་གི་རྡོ་རྗེ་རང་བཞིན་ཏེ། །རྡུལ་དུ་རབ་ཏུ་ཤེས་པར་བྱ། །གཉི་ག་དྲག་འབྱུང་མེ་དཀྱིལ་འཁོར། །ཁ་དོག་དམར་པོའི་ངོ་བོ་
ཉིད། །ཐུགས་ཀྱི་རྡོ་རྗེ་རང་བཞིན་ཏེ། །སྙིང་སྟོབས་སུ་ནི་ཤེས་པར་བྱ། །གཉི་ག་དལ་འབྱུང་དབང་ཆེན་ཏེ། །གསེར་གྱི་མདོག་ཏུ་སྣང་བ་སྟེ། །ལྷ་ཐམས་ཅད་ཀྱི་ངོ་བོ་སྟེ། །དགའ་བ་བར་མའི་ཡེ་ཤེས་སོ། །རེ་རེ་ཕྱག་རྒྱ་བཞི་བཞི་སྟེ། །འབྱུང་བ་ཧཱུཾ་གི་ངོ་བོ་ཡིས། །སངས་རྒྱས་ལ་
སོགས་སྤྲོ་བར་བྱེད། །དེ་ཡི་དུས་སུ་གནས་པ་ཡིས། །ཆོས་ཀུན་འགྲུབ་པར་བྱེད་པའོ། །འཇུག་པ་ཨོཾ་གྱི་ངོ་བོ་ཡིས། །སངས་རྒྱས་ལ་སོགས་སྡུད་པར་བྱེད། །དེ་ཡི་དུས་སུ་གཡོ་བ་ཡི། །ཆོས་ཀུན་འགྲུབ་པར་བྱེད་པའོ། །གནས་པ་ཨཱཿཡི་ངོ་བོ་ཡིས། །སངས་རྒྱས་ལ་སོགས་
གཟུང་བ་ཡིས། །དེ་བཞིན་གཡོ་གནས་ཆོས་རྣམས་ཀུན། །གཉིས་མེད་ཡེ་ཤེས་འཇུག་པའོ། །དེ་ལ་དེ་ཉིད་རབ་བཟུང་བས། །ཡེ་ཤེས་སེམས་དཔའི་ངོ་བོའོ། །དེ་དུས་ཆོས་ཀུན་གཉིས་མེད་ཀྱི། །ཡེ་ཤེས་སུ་ནི་སྐད་ཅིག་ཞུགས། །དེ་ལྟར་དབྱེར་མེད་བཟླས་པ་འདི། །སེམས་ཅན་
ཐམས་ཅད་རབ་ཟློས་ཀྱང་། །རྣམ་རྟོག་རྨོངས་པས་རབ་བསྒྲིབས་པས། །དེ་ཡི་ངོ་བོ་མི་ཤེས་ཏེ། །འགྲོ་བ་ལྔར་ནི་འཁོར་བར་འགྱུར། །ཕྱག་རྒྱ་བཞི་འབྲེལ་རེ་རེ་ནི། །ཉིས་བརྒྱ་ཉི་ཤུ་རྩ་ལྔ་སྟེ། །དེ་བཞིས་བསྒྲེས་པས་དགུ་བརྒྱའོ། །དེ་ནི་འཕོ་བ་ཉི་ཤུ་བཞིས། །བརྩིས་པ་ཁྲི་ཕྲག་གཉིས་དང་ནི། །
ཆིག་སྟོང་དང་ནི་དྲུག་བརྒྱའོ། །དེ་ནི་རྒྱུད་ཆེན་གསང་འདུས་སུ། །ཀློག་དང་ཁ་ཏོན་བྱེད་པ་དང་། །སྤྲོ་དང་བསྡུ་བའི་ངོ་བོ་ལས། །བཟླས་པ་རུ་ནི་བཤད་པའོ། །འདི་འདྲའི་བཟླས་པ་མ་རྟོགས་པས། །ཕྱི་རོལ་བཟླས་པ་མངོན་ཞེན་པས། །ཡང་དག་དོན་ནི་རྟོགས་མི་ནུས། །དེ་བས་རྣལ་འབྱོར་
བར་ཆོད་པ། །ཕྱི་རོལ་བཟླས་པ་སྤང་བྱས་ཏེ། །རྡོ་རྗེ་འཆང་བའི་ངོ་བོ་མཆོག །རང་བཞིན་བཟླས་པ་མཆོག་ཆེན་བསྒོམ། །དེ་བསྒོམས་སྟོབས་ཀྱིས་ཕྱོགས་རྣམས་ཀུན། །སྒྱུ་མ་དང་ནི་སྨིག་རྒྱུ་དང་། །དྲི་ཟའི་གྲོང་ཁྱེར་དབང་པོ་དང་། །ཆུ་ཟླ་དང་ནི་རྨི་ལམ་དང་། །སྤྲུལ་པ་དང་ནི་ཆུ་བུར་དང་། །

བྲག་ཅ་དང་ནི་གཟུགས་བརྙན་དང་། །འཁྲུལ་པ་མགལ་མེ་འཁོར་ལོ་རུ། །སྐད་ཅིག་སོགས་པས་རབ་རྟོགས་སོ། །དེ་བས་ཐབས་དེ་དངོས་ཀུན་གྱི། །དེ་ཉིད་བདེན་པས་བསྒྲུབ་པའོ། །གཉིས་མེད་བདེ་བ་གསང་ཆེན་པོའི། །སངས་རྒྱས་བྱང་ཆུབ་སྒྲུབ་བྱེད་པ། །
སངས་རྒྱས་ཀྱི་ནི་ངོ་བོ་སྟེ། །ཟད་མེད་མི་འཇིགས་རྟག་པའོ། །ཐོག་མ་ཐ་མ་མེད་པའི་མཆོག །ཡོད་པ་མེད་ཅིང་མེད་པ་མེད། །དབང་པོ་དང་བཅས་དབང་པོ་མེད། །འབྱུང་བའི་ངོ་བོ་འབྱུང་བ་མེད། །གཟུགས་དང་བཅས་ཤིང་གཟུགས་མེད་པས། །སྦྱོར་བའི་ལམ་གྱིས་མཐོང་བའོ། །ཕྱི་
ཡི་སྦྱོར་བ་གཟུགས་ཕུང་སོགས། །ཀུན་རྫོབ་འབྱུང་བ་བཞི་པོ་དང་། །གཡོ་དང་བཅས་པའི་ཆོས་རྣམས་ཀུན། །དེ་གཅིག་པོས་ནི་ཁྱབ་པ་སྟེ། །ཐམས་ཅད་སེམས་ཙམ་ཁོ་ནའོ། །ཅི་ཕྱིར་སེམས་ཅན་ཐམས་ཅད་ཀུན། །རྣམ་ཤེས་ཕུང་པོ་ཁོ་ནའོ། །བླུན་པོ་རྨོངས་པ་རྣམས་ཀྱིས་ནི། །དེ་དོན་
ཅུང་ཟད་ཤེས་མི་འགྱུར། །སེམས་དང་སེམས་བྱུང་ཡེ་ཤེས་དང་། །ཤེས་པ་རྣམ་ཤེས་གཅིག་པའོ། །གང་ཚེ་ལུས་ཀྱི་རྐྱེན་ཉིད་འགྱུར། །ཆོས་ཀུན་ཆོས་རོ་གཅིག་ཏུ་འགྱུར། །དངོས་པོ་ཀུན་ཀྱང་དེ་ཚེ་འགྱུར། །ཅི་ཡི་ཕྱིར་ན་ཆོས་རྣམས་ནི། །ཆུ་རྒྱུན་བཞིན་དུ་རྒྱ་མཚོ་ལས། །ཐར་པ་
ན་གཅིག་ཁོ་ན་སྟེ། །མང་པོ་རུ་ནི་མི་སྣང་ངོ་། །དེ་ཡི་ནང་གི་སྦྱོར་བ་ནི། །བླ་མ་དམ་པའི་ཞལ་ནས་ནི། །ཐོབ་ཀྱི་དེ་ལ་ཐེ་ཚོམ་མེད། །དེ་ནི་ཟབ་གསལ་གཉིས་སྦྱོར་བས། །སྦྱོར་བ་ཞེས་སུ་བཤད་པའོ། །རྩེ་གཅིག་པས་ནི་ཏིང་ངེ་འཛིན། །མཉེས་བྱེད་ཚིམ་པར་བྱེད་པ་སྟེ། །གཏོར་མ་ཞེས་
ནི་རབ་ཏུ་བྱ། །སྡིག་པ་ཞི་ཕྱིར་ཞི་བའོ། །བསོད་ནམས་ཀུན་གྱིས་རྒྱས་པའོ། །ཆགས་པ་ཆེན་པོས་དབང་དུ་འདོད། །ཐམས་ཅད་གསོད་ཕྱིར་མངོན་སྤྱོད་དོ། །རྟགས་ཆེན་དགུག་ཕྱིར་དགུག་པའོ། །ཉན་ཐོས་ལ་སོགས་ཆོས་རྣམས་ནི། །རིང་དུ་ཞི་བྱེད་བསྐྲད་པའོ། །སྔགས་པ་གང་
གནས་རྣལ་འབྱོར་པས། །རྟོགས་པར་ནུས་པས་བསྲུང་བའོ། །དེ་ཤེས་ཆོས་རྣམས་ངོ་བོ་ཀུན། །གཉིས་མེད་གཅིག་རྟོགས་མིག་རྣོན་ནོ། །རྣམ་པར་རྟོག་པ་མ་ལུས་རྣམས། །ཡེ་ཤེས་ངོ་བོར་དེ་འགྱུར་བས། །དུག་གཞོམ་པ་ཡི་ཆོ་གའོ། །ཕུང་པོ་ལ་སོགས་བླུན་པའི་རྫས། །ཡེ་ཤེས་མེས་

བསྲེགས་སྦྱིན་སྲེག་གོ། །ཟབ་པ་དང་ནི་གསལ་བ་ཡིས། །ཆོས་ཀུན་མཉམ་པས་ཐིག་གདབ་པོ། །གསལ་བའི་འཇའ་ཚོན་ལྟ་བུའི་སྐུས། །ཉི་ཤུ་རྩ་གཅིག་ཆོས་ཀུན་ལ། །རང་བཞིན་གྱིས་བཟུང་མཚོན་བཏབ་པོ། །དེ་ཡི་ངོ་བོ་ཀུན་གནས་པ། །སློབ་དཔོན་སློབ་མ་ཀུན་ཞུགས་
པའོ། །མིང་ཙམ་གྱིས་ནི་ལོག་འབྱུང་ཡང་། །རང་རིག་བདེ་བས་རྟོགས་པས་ན། །དབང་བསྐུར་ཞེས་ནི་བཤད་པ་ཡིན། །དེ་ལ་སོགས་པ་མཐའ་ཡས་ཀྱིས། །ཆོས་ཀུན་མིང་ཅན་དེ་ཉིད་མཆོག །ཡན་ལག་ཐམས་ཅད་ལས་འདས་ཤིང་། །རྟོག་དང་རྟོག་པ་མེད་ལས་གྲོལ། །གུག་
སྐྱེད་ཚེག་དྲག་ལས་འདས་པ། །འདི་ནི་དཀྱིལ་འཁོར་མཆོག་ཅེས་བྱ། །ཆོས་དང་ཆོས་མིན་རྣམ་དཔྱོད་པ། །ཆོས་རྣམས་ཐམས་ཅད་རྟོགས་པར་སྣང་། །རྣམ་དག་ནམ་མཁའ་འདྲ་བ་ཡི། །དཀྱིལ་འཁོར་འདི་ནི་བསྟན་པ་ཡིན། །འདོད་ཆགས་མི་ཆགས་འདོད་ཆགས་མཉམ། །ཆུ་ཡི་
པདྨ་དམར་པོ་འདྲ། །རང་སེམས་འདོད་ཆགས་ཤིན་ཏུ་ཆགས། །འདི་ནི་དཀྱིལ་འཁོར་མཆོག་ཡིན་ནོ། །གཟུགས་དང་གཟུགས་མིན་དྲི་མེད་པའི། །གང་ཁམས་ཀུན་འཇུག་གྱུར་པ་ཡི། །སེམས་ནི་ཆུ་དང་སྐུལ་བྱེད་པའི། །དཀྱིལ་འཁོར་དཀྱིལ་འཁོར་ཞེས་བྱའོ། །དེ་འདྲའི་རང་རིག་
དཀྱིལ་འཁོར་ལས། །རྟོག་ལས་རླུང་བྱུང་མེ་དང་ནི། །ཆུ་དང་ས་སྟེ་དེ་དག་ལས། །ཕྱིར་ལོག་ཕུང་སོགས་རབ་གྲུབ་པས། །དེ་འདྲའི་དཀྱིལ་འཁོར་བསྒྲིབས་པར་འགྱུར། །སྐྱེས་བུ་གང་ཞིག་བླ་མ་ཆེ། །དེ་བཞིན་ཉིད་ཤེས་བཀུར་བ་ལས། །དེ་ཡི་བྱིན་རླབས་ཡེ་ཤེས་ཆེ། །གང་གིས་རྟོགས་
པས་སྔ་མ་ཡི། །རིམ་པས་བསྒྲུབ་ལ་ཤིན་ཏུ་དཔའ། །དེ་ཡིས་ཕུང་ཕྱིན་ལོག་རྣམས་ལ། །རིམ་གྱིས་ལོག་ནས་ཡེ་ཤེས་ཀྱི། །སྤྲོས་བྲལ་དཀྱིལ་འཁོར་འབར་བར་འགྱུར། །དེ་བས་ནན་ཏན་ཐམས་ཅད་ཀྱིས། །མཆོག་གི་དཀྱིལ་འཁོར་འདི་བསྒོམ་བྱ། །སྐད་ཅིག་ཙམ་དུ་དད་པ་ཡང་། །མྱུར་
དུ་རྡོ་རྗེ་སེམས་དཔར་འགྱུར། །དེ་ཡི་ཐེག་པ་བསམ་ཡས་ཀྱི། །ཚུལ་ཁྲིམས་སྡོམ་པ་ཀུན་ཀྱང་བསྲུངས། །དཀྱིལ་འཁོར་ཀུན་དུ་ཞུགས་པའོ། །དེ་ཕྱིར་འདི་ཡི་བསོད་ནམས་ཚོགས། །ནམ་མཁའ་སྣོད་བྱས་ཤོང་མི་འགྱུར། །ཅིའི་ཕྱིར་ཤཱཀྱ་ཐུབ་པ་ཡིས། །གྲངས་མེད་བར་དུ་ཚོགས་

བསགས་ཀྱང་། །འདི་དོན་མ་རྟོགས་ནཻར་ཉྫར། །ཅི་ཡང་མ་ཡིན་ཏིང་འཛིན་གནས། །དེ་ཚེ་བདེ་གཤེགས་ཀུན་གྱིས་ཀྱང་། །ཐལ་བྱུང་བློ་ཅན་དེ་བཟློག་སྟེ། །ནམ་མཁའི་དབྱིངས་ལྟར་རྣམ་དག་པའི། །ཟབ་གསལ་གསལ་མེད་རབ་བསྟན་ཏེ། །ནམ་ཕྱེད་དུས་
སུ་རྒྱལ་བ་ལྟར། །དེ་ཉིད་བསྒོམས་པས་ཐོ་རངས་སུ། །སྐད་ཅིག་གིས་ནི་ཡང་དག་རྟོགས། །བྱང་ཆུབ་སྙིང་པོར་བཞུགས་བྱས་ནས། །དཔུང་ཆེན་བདུད་རྣམས་རབ་བཅོམ་སྟེ། །སེམས་ཅན་གཟུང་བར་བྱ་བའི་ཕྱིར། །ཆོས་ཀྱི་འཁོར་ལོ་བསྐོར་བའོ། །དེ་ནས་བཟུང་སྟེ་དོན་མཆོག་འདི། །སྐལ་བར་ལྡན་པ་འགའ་
ཞིག་ལ། །ཞལ་ནས་ཞལ་དང་སྙན་ནས་སྙན། །བརྒྱུད་དེ་ངེས་པའི་དོན་བསྟན་པའོ། །དེ་དོན་བསྒོམ་འགྱུར་རྣལ་འབྱོར་པས། །འཁོར་བ་ཉིད་ན་གནས་པའི་ཚེ། །འཁོར་བའི་ཉེས་པས་མི་གོས་སོ། །ཡེ་ཤེས་ཀྱིས་ནི་རྒྱས་བཏབ་པས། །ཉོན་མོངས་རྟག་ཏུ་འགལ་འགྱུར་ཏེ། །སྨན་ནི་ཕྱེ་མར་སྦྱར་བ་ཡིས། །
སྦྲུལ་ནི་གསོད་པར་བྱེད་པ་བཞིན། །གྲོལ་བའི་ཐིག་ལེ་མི་ཕྱེད་འདིས། །ཚེ་འདི་ཉིད་ལ་དངོས་གྲུབ་ཐོབ། །འདི་ཡི་སྟོབས་ཀྱིས་དགོས་པ་ཀུན། །སྐད་ཅིག་གིས་ནི་འགྲུབ་པར་བྱེད། །གང་གིས་དེ་མཐོང་ཡང་དག་བལྟ། །བདག་པོ་ཆེན་པོ་རབ་མཆོད་ན། །དེ་ཡི་སྟོན་པ་ཀུན་མཐོང་སྟེ། །རྒྱལ་
བ་མཆོག་ལ་མཆོད་པར་འགྱུར། །སྲིད་པ་གཅོད་པར་གྱུར་པ་དང་། །འགྲོ་བའི་སྟོན་པ་མཆོག་ཏུ་འགྱུར། །དེ་ལ་ལྷ་ཀུན་མཆོད་བྱེད་ཅིང་། །སྐད་ཅིག་སྐད་ཅིག་ཕྱག་ཀྱང་བྱེད། །ཇི་ལྟར་སྟོན་པ་རྫོགས་སངས་རྒྱས། །ཕན་བྱེད་འཇིག་རྟེན་སྐྱེས་གྱུར་པ། །སྣ་ཚོགས་ཡེ་ཤེས་རྗེས་བསྡུས་པ། །རྣལ་
འབྱོར་ཆེན་པོ་དེ་བཞིན་འགྱུར། །གང་གིས་དམ་སྡོམ་རྣམས་བསྡུས་ཏེ། །བདེ་ཆེན་རྡོ་རྗེ་སེམས་བསྒོམས་ན། །དངོས་གྲུབ་ཆེན་པོ་དེས་ཐོབ་པའི། །རྡོ་རྗེ་སེམས་དཔས་རྒྱས་བཏབ་བོ། །མི་འགྲུབ་པ་ནི་ཅུང་ཟད་མེད། །བདེ་ཆེན་ཕྱག་རྒྱ་ཆེན་པོ་ཡིས། །སོ་སོ་རང་རིག་རྗེས་ལས་གྲུབ། །དེ་བས་
འདི་བསྒོམས་རྣལ་འབྱོར་པས། །སྤྱོད་པ་ཀུན་ལ་རོལ་པར་བྱ། །རྣལ་འབྱོར་གསུམ་པའི་དུས་ཀྱི་ཚེ། །སྣ་ཚོགས་དོན་ཆེན་ལ་གཟུད་ཕྱིར། །ལ་ལར་ཤིན་ཏུ་དཀའ་བ་སྤྱོད། །ལ་ལར་ཁབ་ནས་བྱུང་ཚུལ་བྱ། །ལ་ལར་བྱང་ཆུབ་སེམས་དཔའི་ཚུལ། །ལ་ལར་ལྷུམས་སུ་ཞུགས་པའི་ཚུལ། །

ལ་ལར་སྐྱེ་བ་སྟོན་པའམ། །ལ་ལར་འཆི་བ་སྟོན་པའམ། །ལ་ལར་སྤྱོད་ཅིང་རོལ་པའམ། །ལ་ལར་བདུད་ལས་རྒྱལ་བ་དང་། །ལ་ལར་བྱང་ཆུབ་མངོན་བྱང་ཆུབ། །ལ་ལར་ཆོས་ཀྱི་འཁོར་ལོ་བསྐོར། །ལ་ལར་སྣ་ཚོགས་འཇུག་པར་མཛད། །ལ་ལར་དུས་སུ་མཛེས་པའི་གཟུགས། །ལ་ལར་
འདོད་གཟིར་བུད་མེད་གཟུགས། །ལ་ལར་མི་སྡུག་རྒན་མོའི་གཟུགས། །ལ་ལར་གཅེར་བུ་པད་གདོང་མ། །ལ་ལར་སྐྱེས་བུ་རྒན་པོའི་ཚུལ། །རེས་འགའ་དར་བབ་སྐྱེས་ཚུལ་དང་། །ལ་ལར་ལང་ཚོ་སྐྱེས་བུའི་ཚུལ། །ལ་ལར་དགེ་སློང་ཚུལ་དུ་གནས། །ལ་ལར་དེ་བཞིན་དགེ་སློང་མ། །ལ་
ལར་རྣལ་འབྱོར་དབང་ཕྱུག་ཆེ། །ལ་ལར་ཕུག་གནས་བསམ་གཏན་པ། །ལ་ལར་རྒྱལ་པོ་ལོངས་སྤྱོད་ཅན། །ལ་ལར་མཚོན་ཐོགས་སྐྱེས་བུའི་ཚུལ། །ལ་ལར་སྨྱོན་པ་བརྟུལ་ཞུགས་ཅན། །ལ་ལར་ཁྱི་དང་བྱ་རོག་གཟུགས། །ལ་ལར་དེ་བཞིན་གླང་ཆེན་སོགས། །ལ་ལར་ཚངས་པ་ཆེན་པོའི་
ཚུལ། །ལ་ལར་སྐྱེ་དགུའི་བདག་པོའི་ཚུལ། །ལ་ལར་འདོད་པའི་དབང་ཕྱུག་ཚུལ། །ལ་ལར་འདོད་པ་བྲལ་བའི་མཆོག །ལ་ལར་ཞི་བ་ཚུལ་གནས་པ། །ལ་ལར་དྲག་པོ་ཚུལ་གནས་པ། །ལ་ལར་སྲིན་པོའི་གདོན་ལ་སོགས། །ལ་ལར་རྟག་ཏུ་ཉལ་བར་བྱེད། །ལ་ལར་ཀུན་དུ་རྒྱུག་པར་བྱེད། །
ལ་ལར་ཀུན་དུ་ཚིག་ངན་སྨྲ། །དེ་ལ་སོགས་པ་མཐའ་ཡས་པ། །རྣལ་འབྱོར་ཆེན་པོས་སྤྲུལ་པའོ། །ཐབས་དེས་སེམས་ཅན་ཐམས་ཅད་ཀུན། །དོན་གཅིག་ལ་ནི་གཟུད་ཕྱིར་རོ། །དེ་འདྲའི་སྤྱོད་པ་ལ་གནས་པ། །སྐད་ཅིག་གིས་ནི་སྦྱོར་བ་བདུན། །རྟོགས་ནས་ཇི་སྲིད་བར་དུ་ནི། །རོ་མྱང་
མཚན་ཉིད་བརྒྱད་ལྡན་པར། །ཡང་དག་ཡེ་ཤེས་དབང་གྱུར་ལ། །བྱ་བ་བྱེད་པའི་དབང་ཕྱུག་ཆེ། །འཁོར་བའི་མཐའ་ཡི་ཕ་རོལ་སོན། །བདེན་པ་གཉིས་མེད་རྣལ་འབྱོར་ཆེ། །ཁུར་བོར་བདག་དོན་རྗེས་སུ་རྙེད། །གླང་པོ་ཆེན་པོ་དུལ་བའོ། །ཚེར་མ་དཀྲུགས་པ་ཐམས་ཅད་མཁྱེན། །དེ་བཞིན་
གཤེགས་པ་བཅོམ་ལྡན་འདས། །ལོངས་སྤྱོད་རྫོགས་སྐུ་ཆོས་ཀྱི་སྐུ། །སྤྲུལ་པའི་སྐུ་ཞེས་བྱ་བའོ། །སྐུ་གསུང་ཐུགས་ཀྱི་དཀྱིལ་འཁོར་མཆོག །སྤྲུལ་པ་དཔག་མེད་སྤྱི་ཡི་གཟུགས། །བདག་པོ་རྡོ་རྗེ་འཆང་བ་སྟེ། །གྲོལ་བའི་ཐིག་ལེས་མཚོན་པའོ། །དཔལ་ལྡན་སངས་རྒྱས་ཀུན་གྱི་

བདག །རྡོ་རྗེ་འཆང་བ་ཀུན་གྱི་གནས། །ཆོས་རྣམས་ཀུན་གྱི་ཆོས་ཉིད་དེ། །སངས་རྒྱས་ཀུན་གྱིས་བསྒྲུབ་བྱའོ། །སངས་རྒྱས་རྣམས་ཀྱིས་ཆོས་བསྟན་པ། །རིམ་པ་གཉིས་ལ་ཡང་དག་གནས། །བསྐྱེད་པ་ཡི་ནི་རིམ་ཉིད་དང་། །རྫོགས་པའི་རིམ་པ་ཁོ་
ནའོ། །བསྐྱེད་པའི་རིམ་པ་རྣམ་པ་གཉིས། །དེ་བཞིན་རྫོགས་པའི་རིམ་པའོ། །རིམ་པ་གཉིས་ཀྱི་བྱེ་བྲག་གིས། །སྔགས་ཀྱི་སྐུ་དང་ཡེ་ཤེས་སྐུ། །ཡེ་ཤེས་སྐུ་ལ་ཡེ་ཤེས་དང་། །རྣམ་པར་དག་པའི་སྐུ་གཉིས་སོ། །རྣམ་པར་དག་པ་སྦྱོར་བ་བདུན། །རྫོགས་པའི་རིམ་པའི་རྫོགས་རིམ་
སྟེ། །རྣམ་པ་ཀུན་གྱི་མཆོག་ལྡན་པ། །ཐམས་ཅད་མཁྱེན་པ་བླ་མེད་འགྱུར། །དོན་འདི་གནས་པའི་རྣལ་འབྱོར་ཆེ། །བསྐྱེད་པའི་རིམ་པ་ཞལ་གཅིག་དང་། །ཞལ་གསུམ་ནག་པོ་ལ་སོགས་པ། །གང་དད་པ་ཡིས་ཉེས་མི་འགྱུར། །སྣ་ཚོགས་རྣམ་པར་སྣང་གྱུར་པའི། །དག་དང་མ་དག་ཆོས་
རྣམས་ཀུན། །གསང་བའི་དོན་གྱི་དེ་ཁོ་ནའོ། །རྡོ་རྗེ་སེམས་ལས་བྱུང་ཕྱིར་རོ། །དེ་བས་དེ་ཉིད་དོན་དམ་པ། །རྣལ་འབྱོར་གང་གིས་རྟོགས་འདོད་པས། །དེ་ཤེས་བླ་མ་མཉེས་བྱས་ཏེ། །ཇི་བཞིན་དོན་ནི་ཡང་དག་བླང་། །ཤེས་རབ་དྲི་མེད་མ་ལུས་སེལ་བྱེད་པས། །རྣམ་པར་བཤད་པ་བདག་
འདྲས་མི་དཔོགས་ཀྱང་། །སྐྱེས་བུ་དམ་པ་འགའ་ཞིག་གིས་བཟུང་ནས། །བཅིངས་པ་གྲོལ་འདོད་ཕྱིར་ན་བདག་གིས་ཀྱང་། །དེ་ལྟར་བྱས་པ་ལས་བྱུང་དགེ་བ་དེས། །འགྲོ་སེམས་ཕྱིན་ཅི་ལོག་ལས་བཟློག་བྱས་ཏེ། །སངས་རྒྱས་ཡེ་ཤེས་དཀྱིལ་འཁོར་འཁོར་ལོ་ཡི། །ལམ་གྱིས་རྡོ་རྗེ་འཛིན་
པའི་སར་འགྲོ་ཤོག །གྲོལ་བའི་ཐིག་ལེ་ཞེས་བྱ་བ་དཀྱིལ་འཁོར་ཆེན་པོའི་རྡོ་རྗེ་སློབ་དཔོན་སངས་རྒྱས་དཔལ་ཡེ་ཤེས་ཞབས་ཀྱི་ཞལ་སྔ་ནས་མཛད་པ་རྫོགས་སོ།། །།རྒྱ་གར་གྱི་མཁན་པོ་ཀ་མ་ལ་གུ་ཧྱ་དང་། བོད་ཀྱི་ཞུ་ཆེན་གྱི་ལོ་ཙཱ་བ་ཆེན་པོ་མངའ་བདག་ལྷ་ཡེ་ཤེས་རྒྱལ་མཚན་གྱིས་
བསྒྱུར་ཅིང་ཞུས་ཏེ་གཏན་ལ་ཕབ་པའོ།། ༄༅༅། །རྒྱ་གར་སྐད་དུ། ཨཱཏྨ་སཱ་དྷ་ནཱ་བ་ཏཱ་ར་ནཱ་མ། བོད་སྐད་དུ། བདག་སྒྲུབ་པ་ལ་འཇུག་པ་ཞེས་བྱ་བ། བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དཔལ་ལྡན་རྟོག་པའི་དྲི་མ་མ་ལུས་པ་དང་

བྲལ་ཞིང་ཀུན་དུ་རྟོག་པ་ལས། །བྱུང་དེའི་བདག་ཉིད་འགྲོ་བ་ཐམས་ཅད་ངེས་པར་མི་གནས་སེམས་ནི་གང་ཡིན་འདིར། །མཛེས་པའི་རྣམ་པའི་ཡིད་རྒྱུན་ཚོགས་ལུས་ཅན་ངེས་པར་ལེགས་པའི་གནས་དེ་ལ། །ཕྱག་བྱས་སྐྱེ་བ་བརྒྱུད་པར་ཉེ་བར་འཚེ་བ་གཅོད་བྱེད་ཡང་དག་བཤད་པར་བྱ། །
རྣམ་པར་རྟོག་པ་ཙམ་དང་སོ་སོར་འབྲེལ་པ་དེའི་རང་བཞིན་མ་ལུས་པ་འདི་ནི་གཅིག་ཏུ་སྡུག་བསྔལ་དཔག་ཏུ་མེད་པའི་མཚན་ཉིད་ཡིན་ལ། །སྐད་ཅིག་མ་གཅིག་ནས་གཅིག་ཏུ་བརྒྱུད་པའི་བདག་ཉིད་ཅན་གྱི་སྲིད་པ་ཉམས་སུ་མྱོང་བ་དེ་རྣམ་པར་ལྡོག་པ་ཙམ་ནི་མྱ་ངན་ལས་འདས་པ་ཡིན་པས་དེ་
བསྒྲུབ་པའི་ཕྱིར་རབ་ཏུ་འབད་པར་བྱ་སྟེ། རྣམ་རྟོག་ལས་གཞན་འཁོར་བ་ཞེས། །བྱ་བ་འགའ་ཡང་ཡོད་མིན་ཏེ། །དེ་ཕྱིར་རྣམ་རྟོག་བྲལ་གྱུར་པས། །རྟག་ཏུ་ཁྱོད་ནི་མྱ་ངན་འདས། །ཞེས་གང་གསུངས་པ་ཡིན་ནོ། །གཟུགས་ལ་སོགས་པའི་ངོ་བོ་ཉིད་དུ་སོ་སོར་སྣང་བར་གྱུར་པ་མ་
ཡིན་ནམ་ཇི་ལྟར་ན་རྣམ་པར་རྟོག་པ་ཙམ་གྱི་བདག་ཉིད་འཁོར་བར་འགྱུར་ཞེ་ན། མ་ཡིན་ཏེ། གཟུགས་ལ་སོགས་པ་རྟོགས་པའི་ཡུལ་ཉིད་དུ་མ་གྲུབ་པ་སྟེ། གཟུགས་ལ་སོགས་པ་སོ་སོར་སྣང་བ་མ་རྟོགས་པར་གཞན་གཟུང་བའམ། དེ་འཛིན་པ་ཅུང་ཟད་ཀྱང་དམིགས་སུ་མེད་
པའི་ཕྱིར་རོ། །ཡུལ་རྟོགས་པར་གྱུར་པ་མ་ཡིན་པར་ཡང་རང་གི་ངོ་བོ་ཡོད་པའི་ཐ་སྙད་ཀྱི་ཡུལ་མི་འགྲུབ་སྟེ། ཤིན་ཏུ་ཐལ་བར་འགྱུར་བའི་ཕྱིར་རོ། །དེ་དང་འབྲེལ་པའི་དངོས་པོ་གཞན་རྟོགས་པས་དེ་རྟོགས་པར་འགྱུར་བ་ཡང་མ་ཡིན་ཏེ། འགའ་ཞིག་མངོན་སུམ་གྱི་
བདག་ཉིད་ལས་ཤིན་ཏུ་འདས་པ་ལ་འབྲེལ་པ་རབ་ཏུ་མ་གྲུབ་པའི་ཕྱིར་རོ། །ནང་དུ་སོ་སོར་སྣང་བར་གྱུར་པ་རང་གི་བདེ་བ་ལ་སོགས་པའི་སྣང་བ་ནི་འཛིན་པ་ཉིད་ཡིན་ལ། སྔོན་པོ་ལ་སོགས་པ་དེ་ལས་ཕྱི་རོལ་གྱི་གཟུགས་ཉིད་དུ་རྟོགས་པའི་མཚན་ཉིད་ནི་གཟུང་བ་ཡིན་ནོ་ཞེ་ན་མ་ཡིན་ཏེ། སྔོན་
པོ་ལ་སོགས་པ་ལ་བདེ་བ་ལ་སོགས་པའི་བྱེད་པ་མ་གྲུབ་པའི་ཕྱིར་རོ། །རྟོག་པའི་བྱེད་པ་མེད་པར་ཡང་འཛིན་པ་ཞེས་བྱ་བ་དེ་ལྟ་ན་ནི། ཕྱི་རོལ་གྱི་གཟུགས་ལ་སོགས་པ་ཡང་འཛིན་པ་ཉིད་དུ་ཐལ་བར་འགྱུར་བའི་ཕྱིར་རོ། །ཅིག་ཅར་རང་དབང་ཉིད་དུ་སོ་སོར་སྣང་བ་དག་ནི། ཅུང་ཞིག་ནི་གཟུང་

བ། ཅུང་ཞིག་ནི་འཛིན་པའོ་ཞེས་སོ་སོར་ངེས་པའི་རྣམ་པ་ནི་མ་མཐོང་ངོ་། །བདག་ནི་སྔོན་པོ་ལ་སོགས་པ་རིག་པའོ་ཞེས་བྱ་བ་ཡང་རྣམ་པར་རྟོག་པ་ཙམ་ཉིད་དེ། ཕྱི་དང་ནང་ཉིད་དུ་རང་དགས་སོ་སོར་སྣང་བ་རྣམས་ཁོང་དུ་ཆུད་པའི་ཕྱིར་རོ། །འཛིན་པ་ལ་སོགས་པ་
རྣམ་པར་རྟོག་པའི་རྒྱུན་འདི་ཐམས་ཅད་ཉིད་ནི་རང་དབང་དུ་ཉམས་སུ་མྱོང་བ་རབ་ཏུ་སྟོན་པ་ལ་གཞོལ་བ་ཡིན་ཏེ། སོ་སོར་སྣང་བ་རྣམས་གཅིག་ལ་གཅིག་ཡོངས་སུ་འཛིན་པའི་བྱེད་པ་དང་བྲལ་བའི་དངོས་པོ་ཉིད་ཡིན་པའི་ཕྱིར་རོ། །དེ་ལྟ་བས་ན་འགའ་ཞིག་ལ་འགའ་ཞིག་གིས་འཛིན་པ་ཞེས་བྱ་བ་ནི་མ་
ཡིན་ནོ། །དེ་ལྟར་ཡང་རབ་འབྱོར་ཆོས་ཀྱིས་ཆོས་ཡོངས་སུ་ཤེས་པ་ནི་མ་ཡིན་ནོ་ཞེས་བྱ་བ་རྒྱས་པར་གསུངས་པ་ཡིན་ནོ། །གང་ཡང་གཟུང་བ་ནི་ཤེས་པ་གཉིས་ཀྱིས་ཤེས་པར་བྱེད་དོ་ཞེས་བྱ་བ་ལ་སོགས་པ་གསུངས་པ་དེ་དང་དེ་ནི་གཟུགས་ལ་སོགས་པ་ཞེན་པ་ཙམ་ལ་ལྟོས་ནས་ལ་ལར་གང་ཟག་
ལ་སོགས་པ་བསྟན་པ་དང་འདྲ་བས་ཉེས་པ་མེད་དོ། །དེ་ལྟ་ཡིན་དུ་ཆུག་ན་ཡང་འགྲོ་བ་རྣམས་ཀྱང་རྣམ་པར་རིག་པ་ཙམ་གྱི་རང་བཞིན་གཟུང་བ་དང་འཛིན་པ་མེད་པའི་རང་བཞིན་ཅན་ཡིན་ལ། དེ་ཡང་ལྡོག་པ་མེད་པའི་ཕྱིར་གང་གིས་དེ་རྣམ་པར་ལྡོག་པ་ཙམ་མྱ་ངན་ལས་འདས་པ་ཞེས་བྱ་ཞེ་ན། མ་ཡིན་
ཏེ་རྣམ་པར་ཤེས་པ་ཡང་གཅིག་དང་དུ་མའི་རང་བཞིན་དང་བྲལ་བ་ཡིན་པའི་ཕྱིར་རོ། །འདི་ལྟར་དེ་གཅིག་མ་ཡིན་ཏེ། །སྔོན་པོ་ལ་སོགས་པ་ཐ་དད་པས་དམིགས་པ་སྣ་ཚོགས་པའི་ཕྱིར་རོ། །དཀར་པོ་ལ་སོགས་པ་ཁ་དོག་གཅིག་པ་ཡང་ཐོག་མ་དང་དབུས་དང་ཐ་མའི་ཆ་ཐ་དད་པར་སྣང་བའི་ཕྱིར་དང་།
དོན་བྱེད་པའི་ཉེ་བར་སྦྱོར་བ་ཐ་དད་པས་དུ་མ་ཉིད་ནི་དེ་ཙམ་གྱི་མཚན་ཉིད་ཡིན་པའི་ཕྱིར་རོ། །དུ་མ་ཡང་མ་ཡིན་ཏེ། རྡུལ་ཕྲ་རབ་ཀྱི་རྣམ་པར་རྟོག་པས་དཀར་པོ་ལ་སོགས་པའི་རྣམ་པར་སྣང་བའི་ཆ་རྣམས་རྟོགས་པ་མེད་པའི་ཕྱིར་རོ། །གཅིག་དང་དུ་མ་ལ་མ་གཏོགས་པ་རྣམ་པ་གཞན་ཡང་ཡོད་པ་མ་ཡིན་
ཏེ། འདི་དག་ཕན་ཚུན་མེད་པ་ཉིད་པས་འགལ་བའི་ཕྱིར་རོ། །ཐམས་ཅད་དུ་བདག་མེད་པ་ཉིད་མ་ཡིན་ནམ་གང་དངོས་པོ་རྣམས་ཉམས་སུ་མྱོང་བའི་དོན་བྱེད་པའི་རབ་ཏུ་དབྱེ་བ་བྱ་ཞེ་ན། མ་བརྟགས་གཅིག་པུའི་བདག་ཉིད་སྔ་མ་སྔ་མའི་རྣམ་པར་རྟོག་པ་ཙམ་ཉིད་ཡིན་པའི་ཕྱིར་དེ་རྟོགས་པ་ལས་

གཞན་མ་ཡིན་པའི་ཕྱིར་རོ་ཞེས་བྱ་བས་བསྟན་ཏོ། །དེ་ལྟ་ཡིན་དུ་ཆུག་ན་དངོས་པོ་ཐམས་ཅད་ཀྱི་ངོ་བོ་ཡོད་པ་ཉིད་དུ་འགྱུར་ཏེ། ཡོད་པའི་དངོས་པོ་ནི་དོན་བྱེད་ནུས་པའི་མཚན་ཉིད་ཡིན་པའི་ཕྱིར་རོ་ཞེ་ན། དེ་ནི་མ་ཡིན་ཏེ། སོ་སོར་སྣང་བ་ཙམ་དུ་ཡོད་པར་ཁས་བླངས་པས་མི་འགལ་བ་ཡིན་པའི་
ཕྱིར་དང་། ཇི་སྐད་དུ་བཤད་པའི་རིམ་པའི་མཚན་ཉིད་དང་བྲལ་བ་ཉིད་ཀྱི་ཕྱིར། བདག་མེད་པར་རྣམ་པར་གཞག་པ་ཙམ་ཡིན་གྱི་སོ་སོར་སྣང་བ་ཙམ་ལ་བསྙོན་པའི་ཕྱིར་ནི་མ་ཡིན་ཏེ། རབ་འབྱོར་གཟུགས་ཀྱང་གཞན་ལ་སྟོང་པ་ཉིད་ཀྱང་གཞན་མ་ཡིན་ཏེ། འོན་ཀྱང་གཟུགས་ནི་གཟུགས་ཀྱི་རང་
བཞིན་གྱིས་སྟོང་པ་ཉིད་དོ་ཞེས་རྒྱས་པར་གང་གསུངས་པ་ཡིན་ནོ། །དེ་ཉིད་ཀྱི་ཕྱིར་ཀུན་རྫོབ་ཀྱི་དངོས་པོ་མ་ལུས་པ་སྔ་མ་དང་ཕྱི་མའི་དབྱེ་བས་སྣང་བ་ཡིན་པའི་ཕྱིར། རྟག་པ་ཡིན་ཞེས་དོགས་པར་མི་བྱའོ། །གང་ཡང་འདི་ལྟ་སྟེ། ཀྱེ་རྒྱལ་བའི་སྲས་ཁམས་གསུམ་པ་འདི་དག་ནི་རྣམ་པར་
རིག་པ་ཙམ་མོ་ཞེས་གསུངས་པ་དེ་ཡང་ཤིན་ཏུ་དངོས་པོ་ལ་མངོན་པར་ཞེན་པ་དག་ཕྱི་རོལ་གྱི་དོན་ལ་ཞེན་པ་ཙམ་བཟློག་པའི་ཕྱིར་ཏེ། དེ་ལས་ནི་བདེ་བ་ལ་སོགས་པ་སེམས་ཙམ་དུ་ཞེན་པ་ཡང་གསལ་བ་སྲིད་པའི་ཕྱིར་རོ། །དེ་ལྟར་ཡང་། སེམས་ཙམ་ལ་ནི་བརྟེན་ནས་སུ། །ཕྱི་རོལ་དོན་ལ་མི་
བརྟག་གོ། །དེ་བཞིན་ཉིད་ལ་དམིགས་ནས་ནི། །སེམས་ཙམ་ལས་ཀྱང་འདའ་བར་བྱ། །ཞེས་གསུངས་པ་ཡིན་ནོ། །དེ་ལྟ་བས་ན་འདི་ལྟར་ང་དང་ངའི་ཞེས་བྱ་བ་ལ་སོགས་པའི་རྣམ་པར་རྟོག་པའི་རང་བཞིན་ཅན་གྱི་འགྲོ་བའི་སྐྱེ་བ་དེ་དང་འགལ་བ་ནི་བཤད་མ་ཐག་པའི་རྣམ་པས་བདག་མེད་པར་
མཐོང་བ་ཡིན་པའི་ཕྱིར་རོ། །ཕྱིན་ཅི་ལོག་གི་གཞན་གྱི་དབང་དུ་གྱུར་པའི་འགྲོ་བ་དེ་དག་མངོན་པར་གདོན་པའི་ཕྱིར་སྙིང་རྗེ་མཆོག་གི་བསམ་པ་བསྐྱེད་ནས་ཆོས་ཐམས་ཅད་སྟོང་པ་ཉིད་ཁོ་ན་ལ་དང་པོར་མངོན་དུ་ཕྱོགས་པར་བྱའོ། །སྙིང་རྗེས་རབ་ཏུ་ཕྱེ་བ་ཡིན་ཡང་གཏོང་བ་ལ་སོགས་པ་དམིགས་
པས་རབ་ཏུ་ཕྱེ་བའི་སྦྱིན་པ་ལ་སོགས་པའི་དགེ་བའི་རྒྱུན་ནི་བདག་དང་གཞན་དུ་རྣམ་པར་རྟོག་པའི་ཕྱིར། རྣམ་པར་མི་རྟོག་པའི་གོ་འཕང་བསྒྲུབ་པར་བྱ་བ་ལ་ཅུང་ཞིག་ཀྱང་ནུས་པ་ཡོད་པ་མ་ཡིན་ཏེ། ཕྱིན་ཅི་ལོག་གི་ཞེན་པ་ནི་རང་དང་རྗེས་སུ་མཐུན་པའི་རྣམ་པར་རྟོག་པ་སྐྱེ་བའི་རྒྱུ་ཡིན་པའི་ཕྱིར་རོ། །

དེ་སྐད་དུ་ཡང་། ཤེས་རབ་མེད་ན་མིག་མེད་ཕ་རོལ་ཕྱིན་ལྔ་འདི། །དམིགས་བུ་མེད་པར་བྱང་ཆུབ་རེག་པར་ནུས་མ་ཡིན། །ཞེས་གསུངས་པ་ཡིན་ནོ། །དངོས་པོ་མ་ལུས་པའི་བདག་མེད་པ་ཉིད་ལ་མངོན་པར་ཞེན་པ་ནི་བདག་ཉིད་རྣམ་པར་རྟོག་པ་ཉིད་ཡིན་ན་ཡང་ཕྱིན་
ཅི་མ་ལོག་པའི་རང་གི་ཡུལ་ལ་ཞེན་པའི་རང་བཞིན་ཉིད་ཡིན་པས་ཕྱིན་ཅི་ལོག་གི་རྟོག་པ་མ་ལུས་པ་དང་ལྷན་ཅིག་ཏུ་འགལ་བ་ཡིན་པ་ཉིད་དུ་རྟོགས་ཏེ། གང་ཞིག་གང་དང་དུས་གཅིག་གི་ཚེ་འགལ་བར་མཐོང་བ་དེ་ནི་ཤིན་ཏུ་གོམས་པ་ན་ཡང་རང་དང་འགལ་བ་ཤིན་ཏུ་ལྡོག་པར་བྱེད་པ་ནི་མེ་ལས་གྲང་
བ་ཉིད་ལ་སོགས་པ་ལྟ་བུ་ཡིན་གྱི་རྣམ་པ་གཞན་དུ་ན་ཕྱིན་ཅི་ལོག་གི་དོགས་པས་ཐ་སྙད་ཐམས་ཅད་མི་འཐད་པར་འགྱུར་བའི་ཕྱིར་རོ། །འདིར་ཡང་། གལ་ཏེ་ཆོས་ལ་བདག་མེད་སོ་སོར་རྟོག །སོ་སོར་དེ་རྟོགས་གལ་ཏེ་བསྒོམ་པ་ནི། །དེ་ནི་མྱ་ངན་འདས་པའི་འབྲས་བུའི་རྒྱུ། །རྒྱུ་གཞན་གང་
ཡིན་གྱིས་ནི་གྲོལ་མི་འགྱུར། །ཞེས་གསུངས་སོ། །བདག་མེད་པ་ལ་གོམས་པ་ཡང་ཐབས་ཀྱི་བྱེ་བྲག་དང་བྲལ་བ་ཡིན་ན་གང་གི་ཕྱིར་དེས་རྟོག་པའི་དྲི་མ་མ་ལུས་པ་དང་བྲལ་ཞིང་འགྲོ་བ་མ་ལུས་པ་ལ་ཕན་པར་མཛད་པའི་ཐམས་ཅད་མཁྱེན་པའི་ཡེ་ཤེས་སྐྱེད་པར་མི་ནུས་པ་དེའི་ཕྱིར་ཐབས་ཤིན་ཏུ་
མངོན་དུ་གྱུར་པ་ལ་རབ་ཏུ་འབད་པར་བྱའོ། །སྐྱེ་བོ་མ་ལུས་པ་ལ་ཕན་པའི་བདག་ཉིད་ནི་ཐམས་ཅད་མཁྱེན་པའི་ཡེ་ཤེས་ཡིན་ལ། ཕན་པ་ཡང་མཐར་ཐུག་པའི་རྒྱ་ཆེ་བ་ལས་བྱུང་བ་ཡིན་ནོ། །དེའི་རྒྱུ་ཡང་ཐབས་གོམས་པ་ཁོ་ན་ཡིན་ཏེ། བདག་མེད་པ་ལ་གོམས་པ་ནི་རྣམ་པར་རྟོག་པ་ཙམ་སྤངས་
པའི་འབྲས་བུ་ཅན་ཉིད་ཡིན་པའི་ཕྱིར་རོ། །དེ་ཡང་། ཟབ་པའི་ཕྱིར་དང་རྒྱ་ཆེའི་ཕྱིར། །རྣམ་མི་རྟོག་དང་ཡོངས་སུ་སྨིན། །འདི་ལ་དེ་གཉིས་བསྟན་པས་ན། །དེ་ཕྱིར་བླ་ན་མེད་པའི་ཐབས། །ཞེས་གསུངས་སོ། །དེ་བས་ན་ཕྱིན་ཅི་མ་ལོག་པའི་སྦྱིན་པ་ལ་སོགས་པ་ལ་སེམས་དཔའི་རབ་ཏུ་
འཇུག་པ་ནི་ཐབས་ཡིན་ཏེ། ཐམས་ཅད་མཁྱེན་པ་ཉིད་ལ་ཡོངས་སུ་བསྔོས་པར་གྱུར་ན་དེ་དག་རྫོགས་པའི་བྱང་ཆུབ་ཀྱི་རྒྱུ་ཉིད་དུ་འགྱུར་བའི་ཕྱིར་རོ། །དེ་སྐད་དུ་ཡང་། སྦྱིན་དང་ཚུལ་ཁྲིམས་བཟོད་དང་དེ་བཞིན་བརྩོན་འགྲུས་དང་། །བསམ་གཏན་ཤེས་རབ་བྱང་ཆུབ་ཡོངས་སུ་བསྔོ་བར་

གྱིས། །བྱང་ཆུབ་ཕུང་པོར་ཞེན་པས་མཆོག་འཛིན་མ་བྱེད་ཅེས། །དང་པོའི་ལས་ཅན་དེ་ལ་དེ་སྐད་བསྟན་པར་བྱ། །ཞེས་གསུངས་པ་ཡིན་ནོ། །དེ་ནི་དེ་ལྟ་མ་ཡིན་ཏེ། རྒྱུ་མི་འདྲ་བ་གོམས་པ་ལས་རྫོགས་པའི་བྱང་ཆུབ་གོམས་པ་མངོན་སུམ་དུ་གྱུར་པ་དང་རྗེས་སུ་མཐུན་པའི་བསྒོམ་པ་
མེད་པའི་ཕྱིར་རོ། །བདག་ཉིད་ཀྱི་རང་གི་ངོ་བོ་ཉིད་ཀྱིས་ཟབ་པ་དང་རྒྱ་ཆེ་བའི་བདག་ཉིད་ཅན་གྱི་འབྲས་བུ་ནི་རང་གི་རང་བཞིན་ལས་བསྒྲུབ་པའི་བྱ་བ་ཡིན་ལ། དེའི་བདག་ཉིད་ཅན་གྱི་རྒྱུ་ཡང་འདི་ལ་ཡོད་པ་མ་ཡིན་ཏེ། སྦྱིན་པ་ལ་སོགས་པའི་སེམས་དཔའ་ནི་ཕལ་ཆེར་རང་བཞིན་གྱིས་རྒྱ་
ཆེ་བ་མ་ཡིན་པའི་ཡུལ་ཅན་ཡིན་པ་ཉིད་ཀྱི་ཕྱིར་རོ། །སྨོན་ལམ་ཡང་དུས་ཀྱིས་ཤིན་ཏུ་བསྐལ་པ་ཉིད་ཀྱིས་རྫོགས་པའི་སངས་རྒྱས་ཀྱི་ཆེ་བ་བདག་ཉིད་ཀྱི་ཡུལ་ཅན་ཉིད་ཡིན་པས་རྒྱ་ཆེ་བ་མ་ཡིན་པའི་བདག་ཉིད་ཀྱི་རྣམ་པར་རྟོག་པའི་གཉེན་པོ་མ་ཡིན་པ་ཉིད་དོ། །གང་གི་ཕྱིར་ཐ་མལ་པའི་
རང་གི་ངོ་བོ་སྐྱེ་བོ་དཔག་ཏུ་མེད་པ་ལ་ཕན་པ་མ་ཡིན་པ་ཉིད་ཀྱིས་བརྩེ་བ་དང་ལྡན་པས་སྤང་བར་བྱ་བ་ཡིན་ནོ། །སྨོན་ལམ་གྱི་གྲོགས་སུ་གྱུར་པའི་སྦྱིན་པ་ལ་སོགས་པ་སེམས་དཔའི་བདག་ཉིད་ཀྱི་གཉེན་པོ་ལ་རབ་ཏུ་འཇུག་པར་གྱུར་ཀྱང་དེའི་རྒྱུན་ཡང་ལྡོག་པར་མི་འགྱུར་ན། དུས་གཞན་ན་
ལྡོག་པར་འགྱུར་རོ་ཞེས་གང་ལས་ཡང་དག་པར་ཡིད་ཆེས་པར་འགྱུར། ཟབ་མོ་ལ་ཞེན་པས་རང་གི་མི་མཐུན་པའི་ཕྱོགས་ཟད་པར་གྱུར་པ་དེ་ལྟ་བུར་གྱུར་པའི་རྣམ་པ་མ་དམིགས་པའི་ཕྱིར་རོ། །རང་ལས་བཟློག་པ་གཞན་བདག་མེད་པར་བསྒོམས་པར་གྱུར་པས་བདག་གི་དངོས་པོ་རྟོག་པའི་
དྲི་མ་མེད་པར་རབ་ཏུ་སྒྲུབ་པར་བྱེད་པ་ནི་མ་ཡིན་ཏེ། དེ་རང་གི་ངོ་བོའི་རྣམ་པར་རྟོག་པ་དང་འགལ་བས་འཇུག་པ་མེད་པའི་ཕྱིར་རོ། །གང་གི་ཚེ་རང་གི་སེམས་དང་ཐ་མི་དད་པའི་སྒོ་ནས་འཛིན་པ་ལ་སོགས་པའི་རྣམ་པ་སྟོང་པ་ཉིད་དུ་མངོན་དུ་བྱེད་པ་དེའི་ཚེ་དེ་ནི་བདེན་པ་མ་ཡིན་པའི་རྣམ་པར་རྟོག་པ་མ་
ལུས་པའི་གཉེན་པོ་ཉིད་དུ་དེ་ལྟར་རྟོགས་པར་འགྱུར་བའི་བསྒོམ་པ་གོམས་པར་ཤིན་ཏུ་འཕེལ་བར་གྱུར་པས་ཀུན་དུ་རྟོག་པ་མ་ལུས་པ་བསལ་བའི་གོ་འཕང་བསྐྱེད་པར་འགྱུར་ཞེས་རྟོག་པ་ཡིན་པའི་ཕྱིར་རྟོག་པ་སྔོན་དུ་གཏོང་བ་རྣམས་ཀྱི་འཇུག་པའི་ཡུལ་དུ་འགྱུར་རོ། །དེ་བས་ན་རྒྱ་ཆེ་བ་མ་ཡིན་པའི་

བདག་གི་དངོས་པོར་སྣང་བའི་མངོན་སུམ་གྱི་གཉེན་པོའི་ཕྱོགས་སུ་གྱུར་པ་མ་ཡིན་པས། འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་བྱ་བ་ལ་སོགས་པའི་སྨོན་ལམ་ནི་དངོས་སུ་རྫོགས་པའི་སངས་རྒྱས་འཐོབ་པའི་རྒྱུ་མ་ཡིན་ཏེ། ཇི་སྐད་དུ། རིགས་
ཀྱི་བུ་ཁྱོད་དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་མངོན་པར་མ་ཤེས་པར་དཀའ་བ་སྤྱོད་པ་ལ་སྤྲོ་བས་ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་བྱ་སྙམ་ཞེས་གང་གསུངས་པ་ཡིན་ནོ། །དེ་བས་ན་བདག་མེད་པ་དང་འདྲ་བར་རྒྱ་ཆེ་བའི་རང་གི་ངོ་བོ་
ཡང་ཐ་མི་དད་པ་ཉིད་དུ་བསྒོམ་པར་བྱའོ། །རྒྱ་ཆེ་བ་ཡང་མེད་པ་ཉིད་མ་ཡིན་ནམ། བསྒོམ་བྱར་བྱ་བ་དེས་ཇི་ལྟར་མངོན་པར་འདོད་པའི་འབྲས་བུ་བསྒྲུབ་པར་འགྱུར་ཞེ་ན། དེ་ནི་མ་ཡིན་ཏེ། ཟད་པར་ས་ལ་སོགས་པ་དང་འདྲ་བར་ཡང་དག་པ་མ་ཡིན་པ་བསྒོམ་པ་གོམས་པ་ཡང་གསལ་པོར་སྣང་
བའི་རྒྱུ་ཉིད་ཡིན་པའི་ཕྱིར་རོ། །འདི་ཇི་ལྟར་ན་ཡང་དག་པ་མ་ཡིན་ཞེ་ན་རྫོགས་པའི་སངས་རྒྱས་ཀྱི་སྐུའི་རྣམ་པ་དང་བྲལ་བའི་རང་གི་བདག་ཉིད་ལ་དེའི་ངོ་བོ་སྒྲོ་འདོགས་པས་འཇུག་པ་ནི་རྣ་བ་མོས་པ་ཡིད་ལ་བྱེད་པ་ཉིད་ཡིན་པའི་ཕྱིར་རོ་ཞེ་ན། དེ་ལྟ་ན་ནི་དེ་ཁོ་ན་ཡིད་ལ་བྱེད་པ་ཡང་ཡང་དག་པ་ཉིད་མ་
ཡིན་ཏེ། དེ་ཁོ་ན་ཉིད་ཇི་ལྟ་བ་བཞིན་ཡུལ་ལ་འཇུག་པ་མ་ཡིན་པའི་ཕྱིར་རོ། །གཅིག་ཏུ་རྣམ་པར་མི་རྟོག་པའི་མཚན་ཉིད་ཀྱི་དེ་ཁོ་ན་ཉིད་ལ་དེ་བཞིན་དུ་ཡིད་ལ་བྱེད་པ་ཡང་མ་ཡིན་ཏེ། དེ་ནི་ལས་དང་པོ་པའི་གནས་སྐབས་ན་རྣམ་པར་རྟོག་པའི་ངོ་བོ་ཉིད་ཀྱིས་འཇུག་པ་ཡིན་པའི་ཕྱིར་རོ། །རྣམ་པར་
རྟོག་པ་དང་བཅས་པ་ཡིན་པ་དེ་ལྟ་ན་ཡང་དངོས་པོ་ཇི་ལྟ་བ་བཞིན་དུ་གནས་པ་ཉིད་ཀྱིས་དེ་ཁོ་ན་ཉིད་ནི་དེས་ངེས་པར་བྱས་པ་ཡིན་པའི་ཕྱིར་དེ་ཁོ་ན་ཉིད་ཡིད་ལ་བྱེད་པ་ཉིད་དུ་དེ་རྣམ་པར་གཞག་པར་བྱའོ། །དེ་ལས་གཞན་པ་ནི་ཤིན་ཏུ་མེད་པའི་རང་གི་ངོ་བོ་ལ་སྒྲོ་འདོགས་པར་བྱེད་པ་ཡིན་པའི་ཕྱིར་མོས་པ་
ཡིད་ལ་བྱེད་ཅེས་ཐ་སྙད་གདགས་པ་སྟེ། ཐ་མལ་པའི་བདག་ཉིད་ལ་ཐུབ་པ་མཆོག་གི་རྣམ་པ་མེད་བཞིན་དུ་དེ་ཁོ་ན་ཉིད་དང་འདྲ་བར་ཡིད་ལ་བྱེད་པའི་ཕྱིར་རོ། །དེ་ནི་དེ་ལྟ་མ་ཡིན་ཏེ། གང་གི་ཕྱིར་བདག་མེད་པ་ཡིད་ལ་བྱེད་པས་རང་གི་ངོ་བོ་ཇི་ལྟ་བ་བཞིན་དུ་གནས་པ་ཡུལ་དུ་བྱེད་ན་རང་གི་ཡུལ་

ཉིད་དུ་སོ་སོར་སྣང་བའམ། ཕྱིན་ཅི་ལོག་གི་རྣམ་པར་རྟོག་པའི་ཡུལ་དུ་གྱུར་པ་ཡིད་ལ་བྱེད་ཅེ་ན། དེ་ལ་ཕྱོགས་དང་པོས་ནི་མོས་པ་ཡིད་ལ་བྱེད་པ་དེ་ཡང་གཞན་དང་མཚུངས་པ་ཡིན་ཏེ། རང་གི་ཡུལ་དུ་གྱུར་པའི་རྣམ་པ་ཡོངས་སུ་འཛིན་པ་ཉིད་དུ་འཇུག་པའི་ཕྱིར་རོ། །རྣམ་པ་གཞན་དུ་མོས་པ་ཡིད་
ལ་བྱེད་པ་ཉམས་པར་ཐལ་བར་འགྱུར་བའི་ཕྱིར་རོ། །རང་གི་ཡུལ་ནི་རྣམ་པར་ཤེས་པས་རྟོགས་པར་མ་གྱུར་པ་ནི་ལྷག་པར་མོས་པའི་ཐ་སྙད་ཀྱི་ཡུལ་མ་ཡིན་ཏེ། ཤེས་པ་ཐམས་ཅད་རང་གི་ཡུལ་དུ་འདོད་པའི་རྣམ་པར་རྟོག་པའི་མཚན་ཉིད་ཅན་ཡིན་པའི་ཕྱིར་རོ། །དེ་ལ་ཕྱོགས་གཉིས་པ་དེ་
ཡང་རིགས་པ་མ་ཡིན་ཏེ། བདག་མེད་པའི་ཤེས་པས་འཛིན་པ་ལ་སོགས་པར་ཞེན་པས་ཡུལ་དུ་མི་བྱེད་པའི་ཕྱིར་རོ། །ཤེས་པ་ལས་མ་གཏོགས་པ་གཞན་དེའི་ཡུལ་ཅན་ཞེས་བྱ་བ་མེད་པ་གང་གིས་ན་ཅིག་ཤོས་དེ་ཡུལ་དུ་བྱས་པ་ཡིན་ནོ་ཞེས་བསྟན། དེ་བས་ན་དེ་ཁོ་ན་ཉིད་ཡིད་ལ་བྱེད་པ་དང་འདྲ་
བར་རང་གི་ཤེས་པའི་རྣམ་པ་ཙམ་དུ་ཡུལ་ཉིད་ཡིན་པའི་ཕྱིར་རྒྱ་ཆེ་བ་ལ་མོས་པ་ཡང་དག་པ་མ་ཡིན་པ་ག་ལ་ཡིན། ཐ་མལ་པའི་བདག་ཉིད་འདི་ནི་རྒྱ་ཆེ་བའི་རྣམ་པ་ལ་སྒྲོ་འདོགས་པས་འཇུག་པ་ཡང་མ་ཡིན་ཏེ། ཐ་མལ་པའི་རང་གི་ངོ་བོ་ལ་མོས་པས་རྫོགས་པའི་སངས་རྒྱས་ཀྱི་སྐུའི་རྣམ་པ་ཡུལ་
དུ་མི་བྱེད་པ་ཉིད་ཀྱི་ཕྱིར་ཡུལ་མ་ཡིན་པ་ལ་སྒྲོ་འདོགས་པ་མི་སྲིད་པའི་ཕྱིར་རོ། །ཐ་མལ་པའི་རང་བཞིན་ནི་རྣམ་པར་རྟོག་པ་ཐ་མལ་པར་སྣང་བའི་མཚན་ཉིད་ཡིན་ལ། བདེ་བར་གཤེགས་པའི་རྣམ་པའི་སྤྱོད་ཡུལ་ཡིད་ལ་བྱེད་པ་ཤིན་ཏུ་སྟོབས་དང་ལྡན་པ་ནི་དེའི་ངོ་བོར་སྣང་བ་མ་ཡིན་ནོ། །གལ་ཏེ་
ཡང་རྒྱ་ཆེ་བ་མ་ཡིན་པའི་བདག་ཉིད་རང་གི་ངོ་བོ་ལ་རྣམ་པ་གཞན་དུ་ཅུང་ཞིག་ཀྱང་སྒྲོ་འདོགས་པར་མི་བྱེད་ན་དེ་ཇི་ལྟར་འདིའི་གཉེན་པོར་འགྱུར་ཞེ་ན། བདེ་བར་གཤེགས་པའི་རང་གི་ངོ་བོར་སྣང་བའི་ཡིད་ལ་བྱེད་པའི་རང་གི་ངོ་བོ་ནི་ཐ་མལ་པ་མ་ཡིན་པའི་རང་བཞིན་ཉིད་དུ་སྐྱེ་བའི་ཕྱིར་དང་། རྒྱུན་མི་
འཆད་པར་བསྒོམ་པ་གོམས་པས་རིགས་མཐུན་པའི་ཤེས་པ་སྐྱེ་བ་ནི་ཤིན་ཏུ་གསལ་བའི་རྒྱུ་ཉིད་ཡིན་པའི་ཕྱིར་རོ། །རྒྱ་ཆེ་བའི་ཤེས་པ་སྐྱེ་བའི་དུས་དེའི་ཚེ་ཅིག་ཤོས་ཐ་མལ་པའི་རྣམ་པའི་སྤྱོད་ཡུལ་ཤེས་པས་ཉམས་སུ་མྱོང་བར་འགྱུར་བ་མེད་དོ། །ཐ་མལ་པའི་རང་གི་ངོ་བོ་ཁོང་དུ་ཆུད་པར་

མ་གྱུར་པ་དེ་ཡང་ཡོད་པ་ཉིད་དུ་ངེས་པར་བྱར་མི་ནུས་ཏེ། དེ་ནི་རྟོག་པ་ཙམ་ཉིད་ཀྱི་རང་བཞིན་ཉིད་ཡིན་པའི་ཕྱིར་རོ་ཞེས་ངེས་པར་བྱས་པ་ཡིན་ནོ། །དེ་བས་ན་ཀུན་དུ་རྟོག་པ་སྤངས་པ་འོད་ཟེར་མ་ལུས་པ་སྤྲོ་བ་ཅན་གྱི་ཀུན་དུ་བཟང་པོའི་བདག་ཉིད་སྒོམ་པར་བྱེད་པ། དེ་ཁོ་
ན་བྱང་ཆུབ་ཀྱི་སྣོད་ཡིན་ཏེ། དེ་སྐད་དུ། ཕྱག་རྒྱའི་ཆོ་ག་གང་དག་གིས། །བསྐལ་པ་བྱེ་བ་གྲངས་མེད་དུ། །སངས་རྒྱས་ཉིད་ནི་མི་འཐོབ་པ། །ཚེ་འདི་ཉིད་ལ་ཐོབ་པར་འགྱུར། །དེ་ལ་བདག་ཏུ་བརྟག་བྱ་ཞིང་། །ཞེས་བྱ་བ་ནས། རང་ལྷ་ཉིད་ཀྱི་རྣལ་འབྱོར་གྱིས། །དེ་ཕྱིར་བདག་ཉིད་
བསམ་པར་བྱ། །ཞེས་བྱ་བའི་བར་དུ་གསུངས་པ་ཡིན་ནོ། །དེ་ལྟར་ཡང་དག་པ་ཡིད་ལ་བྱེད་པ་ཉིད་ལ་ལྟོས་ནས། བཅོམ་ལྡན་འདས་ཡེ་ཤེས་ཤིན་ཏུ་རྫོགས་པས་དེ་ཁོ་ནའི་རྣལ་འབྱོར་ལ་རྫོགས་པའི་སྒྲུབ་པ་ཡང་ཉེ་བར་བསྔགས་པ་མཛད་དེ། རྫོགས་པའི་སངས་རྒྱས་ལ་མོས་པ་ནི་
རྫོགས་པའི་རྣལ་འབྱོར་དང་ཐ་མི་དད་པར་མཆོག་ཏུ་འཛིན་པའི་ཕྱིར་རོ། །མཆོག་ཏུ་འཛིན་པ་མེད་པ་དེ་ནི་བདག་ཉིད་བདེ་བར་གཤེགས་པ་ཡིད་ལ་བྱེད་པར་མི་འགྱུར་ཏེ། བཅོམ་ལྡན་འདས་ནི་ཐ་དད་པར་ཞེན་པ་སྤངས་པ་ཉིད་ཀྱི་ཕྱིར་རོ། །གཞན་བཅོམ་ལྡན་འདས་ཀྱི་རྣམ་པ་དག་ལ་དེའི་
མཚན་ཉིད་མེད་པར་རང་གི་ངོ་བོ་ལ་ཆགས་པའི་རྣམ་པར་རྟོག་པ་ནི་ཁ་ན་མ་ཐོ་བ་མེད་པའི་འབྲས་བུར་འགྱུར་བ་ཡང་མ་ཡིན་ཏེ། དེའི་ཕྱིར་རྒྱལ་བའི་སྐུ་ནི་མཐའ་མེད་ལ། །ཡིད་ཀྱིས་བདག་གཞན་མངོན་ཞེན་དྲི་མེད་ལུས། །སངས་རྒྱས་ཀུན་དང་མཚུངས་པར་བློ་གྲོས་མཆོག །སྐྱེ་བོ་མ་ལུས་རེ་བའི་
དངོས་གྲུབ་འགྱུར། །དེ་ལ་ཡང་ཐུབ་པ་འོད་ཟེར་དཔག་ཏུ་མེད་པ་སྤྲོ་བ་དང་ལྡན་པ་རང་དང་གཞན་གྱི་ཕུན་སུམ་ཚོགས་པ་མཐའ་ཡས་པའི་རྟེན་དུ་གྱུར་པ་ཉིད་ཀྱིས་ཡང་དག་པའི་ཐབས་ཀྱི་མཆོག་གི་མཚན་ཉིད་ཅན་ཤེས་རབ་དང་བྲལ་བས་ཕོངས་པར་འགྱུར་པ་ལ་མངོན་སུམ་དུ་ཕྱོགས་པས་སྒོམ་
པར་བྱེད་ན་ཡང་ཕུན་སུམ་ཚོགས་པ་ཀུན་མ་ལུས་པ་ཐོབ་པར་བྱེད་པ་མ་ཡིན་པའི་ཕྱིར་དེ་རང་གི་ངོ་བོ་ལ་ཕྱིན་ཅི་མ་ལོག་པའི་སེམས་སུ་བྱའོ། །རྙོག་པ་མེད་པའི་ཕུན་སུམ་ཚོགས་པ་ནི་ཤེས་རབ་དང་ཐབས་ལས་རབ་ཏུ་བྱུང་བ་ཉིད་ཀྱི་ཕྱིར་རོ། །དེ་དག་ཀྱང་ཕྱིན་ཅི་མ་ལོག་པའི་རྒྱ་ཆེ་བའི་སེམས་དང་མཚན་ཉིད་གཅིག་

པ་ཉིད་ཡིན་ན་ཡང་ཐ་དད་པའི་ཐ་སྙད་ལ་ཞེན་པས་ཐ་དད་པའི་ཕྱིར་རོ། །འདི་ལྟར་དེ་ཁོ་ན་ཉིད་ལ་སེམས་ཕྱིན་ཅི་ལོག་པ་ལས་བཟློག་པའི་ངོ་བོ་ཉིད་ཀྱིས་ཤེས་རབ་ཏུ་ཤེས་པར་བྱ་ལ། རང་གི་འབྲས་བུ་ལ་ནུས་པ་མེད་པ་ལས་བཟློག་པ་ནི་ཐབས་སུ་བསྟན་པ་ཡིན་ནོ། །ཤེས་རབ་ཡན་ལག་ཀུན་
དུ་འཁྱུད་པ་ལས། །མཆོག་ཏུ་དགའ་བ་ཉམས་སུ་བསྟར་བ་ཡི། །ཕུན་ཚོགས་རང་བཞིན་ཡན་ལག་ཐབས་གྱུར་ཏེ། །རྒྱུན་ཆད་མེད་པར་བློ་ལྡན་གྱིས་བསྒོམ་བྱ། །དེའི་འོག་ཏུ། ཤེས་རབ་ཐབས་ལས་རབ་བྱུང་བའི། །དབྱེར་མེད་དམིགས་པའི་སྤྲུལ་འཕྲོ་བར། །སྣང་བས་ཡུལ་དུ་
རྣམ་གཞག་པའི། །ཡུལ་གྱི་རང་ལུས་ཡང་དག་མཆོད། །ཇི་སྐད་བཤད་པའི་རིམ་པས་ཤེས་རབ་དང་ཐབས་ཀྱི་བདག་ཉིད་ཅན་གྱི་རང་གི་ངོ་བོ་མངོན་དུ་བྱས་ནས་ཇི་སྲིད་སྤྲུལ་པ་རྣམས་ལ་དེས་དབང་ཐོབ་པར་གྱུར་པ་དེ་སྲིད་དུ་བདག་གི་ངོ་བོ་དང་ཐ་མི་དད་པའི་ངོ་བོ་མངོན་སུམ་དུ་བྱ་བ་ཡིན་ཏེ།
ཕྱིན་ཅི་མ་ལོག་པ་དང་རང་གི་འབྲས་བུ་སྐྱེད་པར་རུང་བ་ཉིད་ཀྱིས་ན་ཤེས་རབ་དང་ཐབས་ཀྱི་བདག་ཉིད་དུ་མཚན་ཉིད་གཅིག་པ་ཉིད་ཀྱི་ཕྱིར་དང་། རྒྱུད་ཀྱང་ཐ་མི་དད་པའི་རང་བཞིན་ཡིན་པའི་ཕྱིར་ཏེ། ཀུན་དུ་རྟོག་པ་སྔ་མ་སྔ་མ་ལས་བྱུང་བའི་རྣམ་པར་རྟོག་པའི་རྒྱུན་ནི་རྒྱུད་ཡིན་ཏེ། སྤྲུལ་པ་ཞེས་
བྱ་བ་ཡང་གཞན་པ་ཉིད་མ་ཡིན་ཏེ། དེ་བཞིན་དུ་ཀུན་དུ་བརྟགས་པ་ཙམ་ཡིན་པའི་ཕྱིར་རོ། །ཁ་དོག་ལ་སོགས་པ་ཐ་དད་པས་སྣ་ཚོགས་པའི་རང་བཞིན་ཉིད་ཡིན་པས་ཇི་ལྟར་གཅིག་ཉིད་ཅེས་བྱ་ཞེ་ན། དེ་ལྟར་ན་ནི་འགའ་ཞིག་ཀྱང་གཅིག་ཉིད་དུ་མི་འགྱུར་ཏེ། ལྷའི་སྐུ་གཅིག་ཉིད་ལ་ཡང་ཆ་ཤས་
དུ་མའི་རང་བཞིན་ཉིད་ཀྱིས་སྣ་ཚོགས་པའི་བདག་ཉིད་ཡིན་པའི་ཕྱིར་ལ། ཆ་ཤས་མེད་པ་ཡང་དམིགས་པར་མ་གྱུར་པའི་ཕྱིར་རོ། །ཇི་ལྟར་ཀུན་རྫོབ་ཏུ་རྫས་གཅིག་པ་ཉིད་ཀྱིས་གཅིག་ཏུ་རྣམ་པར་གཞག་པ་དེ་ལྟར་ཚུལ་གཞན་པའི་སྣ་ཚོགས་པའི་རང་བཞིན་ཉིད་ལ་ཡང་དེའི་ངོ་བོར་རྟོགས་པ་ལ་ལྟོས་
ནས་ཐམས་ཅད་བདག་ཉིད་ཡིན་ནོ་ཞེས་ཐ་མི་དད་པའི་ཞེན་པས་ཡིད་ལ་བྱེད་པ་ལ་འཇུག་པའི་ཕྱིར་རོ། །དེ་དག་གིས་ནི་དངོས་པོ་ཐམས་ཅད་མཉམ་པ་ཉིད་དུ་ལྷག་པར་མོས་པར་བཤད་པ་ཡིན་ཏེ་འཛིན་པ་ལ་སོགས་པའི་རྣམ་པ་དང་བྲལ་བར་ཐམས་ཅད་དུ་མཚུངས་པ་ཉིད་ཀྱི་ཕྱིར་རོ། །གཞན་དུ་དེར་

སྣང་བ་ལ་ལྷག་པར་ཞེན་པའི་ཡུལ་རྣམས་ལས་གཞན་པ་ཐམས་ཅད་ཅེས་བྱ་བའི་ཐ་སྙད་ཀྱི་གཞིར་གྱུར་པ་གཞན་ཡོད་པ་ཡང་མ་ཡིན་ཏེ། དེ་རྣམས་ཀྱང་ཅིག་ཅར་རྟོགས་པའི་རང་བཞིན་ཡིན་པས་ཐ་དད་པར་དབྱེར་མི་ནུས་པའི་ཕྱིར་གཅིག་གི་མཚན་ཉིད་གཞན་ཡོད་པ་
ཡང་མ་ཡིན་ནོ་ཞེས་བསྟན་པ་ཡིན་ནོ། །དེ་བས་ན་ཡང་དག་པ་ཇི་ལྟ་བའི་རང་གི་ངོ་བོ་སོ་སོར་རྟོགས་པ་ལ་གཞོལ་བ་ནི་ཀུན་རྫོབ་འབའ་ཞིག་པོ་འདི་ལ་ཐམས་ཅད་བདག་མཚུངས་པ་ཡིན་ནོ་ཞེས་ཤེས་པ་འཇུག་པར་འགྱུར་བ་ཡིན་གྱི་དངོས་པོ་འགའ་ལ་ཡང་གང་གིས་ཀྱང་ཐ་དད་པའམ། ཐ་མི་དད་
པར་ཡུལ་དུ་བྱེད་པར་ནི་མི་ནུས་ཏེ། ཤེས་པ་ཐམས་ཅད་ནི་རང་གི་ངོ་བོ་ཙམ་ལ་གནས་པ་ཉིད་ཀྱིས་གཞན་གྱི་ངོ་བོ་ཡོངས་སུ་འཛིན་པ་མེད་ལ། ཡུལ་དུ་མ་བྱས་པར་ནི་ཐ་དད་པ་ལ་སོགས་པའི་ཐ་སྙད་མི་རུང་བའི་ཕྱིར་རོ། །དེ་ལྟར་རྣལ་འབྱོར་པའི་རང་གི་སེམས་རྒྱུ་བ་རེ་རེ་ཡང་མི་མཐུན་པའི་ཕྱོགས་
མ་ལུས་པ་ལས་ལྡོག་པའི་ངོ་བོ་ཉིད་ཀྱིས་དཀྱིལ་འཁོར་པའི་ལྷ་མ་ལུས་པ་ཉིད་ཀྱི་རང་བཞིན་དུ་སོ་སོར་བརྟག་པར་བྱ་བ་ཡིན་ཏེ་འདི་ལྟར་རང་རང་གི་ལྷའི་ཏིང་ངེ་འཛིན་རྣམས་ནི་ཕྱིན་ཅི་ལོག་དེ་དང་དེ་མི་དམིགས་པས་སྟོན་པར་བྱེད་པ་ཉིད་ཡིན་པའི་ཕྱིར་རོ། །གང་གི་ཕྱིར་སེམས་ཀྱི་རང་བཞིན་གང་ཡིན་པ་
དེ་ཉིད་འཛིན་པ་ལ་སོགས་པའི་རྣམ་པ་དང་བྲལ་བའི་ཕྱིར་ཆོས་ཀྱི་དབྱིངས་ཀྱི་རང་བཞིན་ཡིན་ལ། དེ་ཉིད་གློ་བུར་གྱི་དྲི་མ་དང་བྲལ་བས་འོད་གསལ་བ་ཉིད་ཡིན་པའི་ཕྱིར་དང་། ཡེ་ཤེས་གཞན་བསྐྱེད་པའི་རྒྱུ་མཚན་ཉིད་ཡིན་པའི་ཕྱིར་མེ་ལོང་ལྟ་བུའི་ཡེ་ཤེས་ཀྱི་བདག་ཉིད་ཡིན་ནོ། །མི་དམིགས་པའི་
སྙིང་རྗེ་ལ་སོགས་པའི་བདག་ཉིད་ཀྱིས་རྒྱུད་གཞན་ཐ་དད་པར་འཛིན་པ་མེད་པའི་ཕྱིར་མཉམ་པ་ཉིད་ཀྱི་ཡེ་ཤེས་སོ། །ཤེས་བྱ་ཐམས་ཅད་ལ་ཕྱིན་ཅི་མ་ལོག་པའི་ཕྱིར་སོ་སོར་རྟོག་པའི་ཡེ་ཤེས་སོ། །འགྲོ་བ་མ་ལུས་པ་ལ་ཕན་པའི་རྒྱུ་ཡིན་པ་ཉིད་ཀྱིས་བྱ་བ་ནན་ཏན་གྱི་ཡེ་ཤེས་ཀྱི་བདག་ཉིད་ཡིན་ནོ། །
དེ་བས་ན་དེ་དག་ནི་གོ་རིམས་བཞིན་དུ་རྟག་པ་ལ་སོགས་པའི་བདག་པོ་རྣམས་ཀྱི་རང་བཞིན་ནོ། །དམིགས་པའི་གཉེན་པོ་ཉིད་ཀྱིས་རྣམ་པར་ཐར་པའི་སྒོ་སྟོང་པ་ཉིད་ཀྱི་མཚན་ཉིད་དང་། དེ་བཞིན་དུ་མཚན་མ་དང་ལོག་པའི་སྨོན་ལམ་དང་ཕྱིན་ཅི་ལོག་ཏུ་མངོན་པར་འདུ་བྱེད་པའི་གཉེན་པོ་ཉིད་ཀྱིས་རིམ་

པ་བཞིན་དུ། མཚན་མ་མེད་པ་དང་། སྨོན་པ་མེད་པ་དང་། མངོན་པར་འདུ་མི་བྱེད་པའི་རྣམ་པར་ཐར་པའི་བདག་ཉིད་དག་ཡིན་ནོ། །དེ་ལྟ་བས་ན་གོ་རིམས་བཞིན་དུ་རྡོ་རྗེ་སེམས་མ་ལ་སོགས་པའི་རིགས་ཀྱི་ཡུམ་གྱི་རང་བཞིན་ཏེ། སྟོང་པ་ཉིད་ལ་སོགས་པ་རྣམ་པར་ཐར་པའི་སྒོ་བཞི་པོ་དག་
གིས་ཆོས་ཀྱི་དབྱིངས་ལ་དམིགས་པར་བྱེད་པས་ཏིང་ངེ་འཛིན་ཐམས་ཅད་སྐྱེ་བའི་རྒྱུ་ཉིད་ཡིན་པའི་ཕྱིར་རོ། །དེ་ཉིད་ནང་ལ་ཕྱིན་ཅི་ལོག་པའི་གཉེན་པོ་ཉིད་ཀྱིས་ན་ནང་སྟོང་པ་ཉིད་ཀྱི་རྣམ་པ་དང་། ཕྱི་དམིགས་པ་མེད་པའི་ཕྱིར་ཕྱི་སྟོང་པ་ཉིད་ཀྱི་རང་བཞིན་དང་། དེའི་རྟེན་ལས་མི་དམིགས་པའི་
རང་བཞིན་ཉིད་ཀྱིས་ཕྱི་ནང་སྟོང་པ་ཉིད་ཀྱི་བདག་ཉིད་ཅན་དང་། སྣོད་ཀྱི་འཇིག་རྟེན་ལ་ཞེན་པ་དང་བྲལ་བ་ཉིད་ཀྱིས་ན་ཆེན་པོ་སྟོང་པ་ཉིད་ཀྱི་མཚན་ཉིད་ཡིན་ནོ། །དེའི་ཕྱིར་མེ་ལོང་ལྟ་བུའི་ཡེ་ཤེས་ལ་བརྟེན་པའི་རྡོ་རྗེ་སེམས་དཔའ་ལ་སོགས་པའི་ཏིང་ངེ་འཛིན་གྱི་རང་བཞིན་ཡིན་ཏེ། མིང་དང་གཟུགས་
ལ་སོགས་པའི་བག་ཆགས་ཡོངས་སུ་གྱུར་པ་མེ་ལོང་ལྟ་བུའི་ཡེ་ཤེས་ནི་ནང་མི་དམིགས་པ་ལ་སོགས་པའི་རྟེན་ཉིད་ཡིན་པའི་ཕྱིར། ཇི་ལྟར་རང་རང་གི་ཕྱིན་ཅི་ལོག་གི་གཉེན་པོ་ཉིད་ཀྱིས། བྱང་ཆུབ་ཀྱི་སེམས་སྐྱེ་བ་དང་། འདྲེན་པར་བྱེད་པ་དང་། རྗེས་སུ་ཆགས་པ་དང་། ལེགས་སོ་ཞེས་
བྱ་བའི་རྒྱུ་ཉིད་ཡིན་པའི་ཕྱིར་རོ། །དེ་བཞིན་དུ་སྟོང་པ་ཉིད་ཀྱི་ཡེ་ཤེས་ཀྱང་མཚན་མ་མེད་པའི་ཕྱིར་སྟོང་པ་ཉིད་སྟོང་པ་ཉིད་དང་། དོན་དམ་པ་ལ་མཆོག་ཏུ་མཚན་མར་འཛིན་པར་བྱེད་པ་མེད་པའི་ཕྱིར་དོན་དམ་པ་སྟོང་པ་ཉིད་དང་། འདུས་བྱས་ཀྱིས་བསོད་ནམས་ཉིད་ཀྱི་ཚོགས་ལ་མཚན་མར་
ཡོངས་སུ་འཛིན་པ་མེད་པའི་ཕྱིར། འདུས་བྱས་སྟོང་པ་ཉིད་དང་། འདུས་མ་བྱས་བྱང་ཆུབ་ཀྱི་ཕྱོགས་ལ་ཡང་མཚན་མར་རྗེས་སུ་འཛིན་པ་མེད་པའི་ཕྱིར་འདུས་མ་བྱས་སྟོང་པ་ཉིད་ཡིན་ནོ། །དེ་བས་ན་མཉམ་པ་ཉིད་ཀྱི་ཡེ་ཤེས་ཀྱི་འཁོར་ལོ་རྡོ་རྗེ་རིན་ཆེན་ལ་སོགས་པ་བཞིའི་བདག་ཉིད་ཡིན་
ཏེ། ཉོན་མོངས་པ་ཅན་གྱི་ཡིད་གནས་གྱུར་པའི་བདག་ཉིད་ཅན་མཉམ་པ་ཉིད་ཀྱི་ཡེ་ཤེས་འཛིན་པ་ལ་སོགས་པའི་སྒོ་ནས་ཇི་སྐད་དུ་བཤད་པའི་མཚན་མར་འཛིན་པ་མེད་པའི་ཕྱིར་དང་། རང་རང་གི་མི་མཐུན་པའི་ཕྱོགས་སྤངས་པའི་སྒོ་ནས་དབང་བསྐུར་བ་དང་། གཟི་བརྗིད་འཕེལ་བ་དང་།

སྦྱིན་པའི་ཕ་རོལ་ཏུ་ཕྱིན་པ་ལ་ངེས་པར་སྦྱོར་བར་བྱེད་པ་དང་། རབ་ཏུ་སྤྲོ་བར་བྱེད་པའི་རྒྱུ་ཡིན་པའི་ཕྱིར་རོ། །དེ་ཉིད་སེམས་ཅན་གྱི་དོན་ལ་ཤིན་ཏུ་སྨོན་པའི་མངོན་པར་ཞེན་པ་མེད་པའི་ཕྱིར་མཐའ་ལས་འདས་པ་སྟོང་པ་ཉིད་དང་། བདག་གིས་འཁོར་བའི་
ཐོག་མ་དང་ཐ་མ་མེད་པ་ཡོངས་སུ་དོར་བར་བྱའོ་ཞེས་སྨོན་པ་ལེན་པ་མེད་པའི་ཕྱིར་ཐོག་མ་དང་ཐ་མ་མེད་པ་སྟོང་པ་ཉིད་དང་། བདག་གི་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་ལ་ཡང་དགེ་བ་ཡོངས་སུ་དོར་བར་མི་བྱའོ་ཞེས་མངོན་པར་ཞེན་པ་མེད་པའི་ཕྱིར་དོར་བ་མེད་པ་སྟོང་
པ་ཉིད་དང་། བདག་གིས་རང་གི་མཚན་ཉིད་ཀྱི་རིགས་ནི་ཡོངས་སུ་སྦྱོང་བར་བྱའོ་ཞེས་དོན་དུ་གཉེར་བ་དང་བྲལ་བའི་ཕྱིར་རང་བཞིན་སྟོང་པ་ཉིད་ཡིན་ནོ། །དེའི་ཕྱིར་རྣམ་པར་རྟོག་པའི་ཡིད་གནས་གྱུར་པའི་མཚན་ཉིད་ཅན་སོ་སོར་རྟོག་པའི་ཡེ་ཤེས་ལ་བརྟེན་པ་རྡོ་རྗེ་ཆོས་ལ་སོགས་པ་བཞི་པོའི་
བདག་ཉིད་ཡིན་ཏེ། རྣམ་པར་རྟོག་པའི་ཡིད་གནས་གྱུར་པའི་མཚན་ཉིད་ཅན་གྱི་སོ་སོར་རྟོག་པའི་ཡེ་ཤེས་ནི་ཇི་སྐད་དུ་བཤད་པའི་ཕྱིན་ཅི་ལོག་གིས་དབེན་པས་ཆོས་ཀྱི་དེ་ཁོ་ན་ཉིད་སོ་སོར་རྟོག་པ་ཉིད་ཡིན་པའི་ཕྱིར་དང་། དེའི་སྒོ་ནས་ཀྱང་རང་བཞིན་གྱིས་དག་པའི་ཆོས་ཉིད་དང་ཤེས་རབ་དང་། ཡེ་
ཤེས་ལས་ཕྱིར་མི་ལྡོག་པ་ཉིད་དང་། དགོངས་པའི་དོན་མ་ལུས་པ་ཡོངས་སུ་ཤེས་པའི་རྒྱུ་ཉིད་ཡིན་པའི་ཕྱིར་རོ། །དེ་ཉིད་མཚན་དང་དཔེ་བྱད་ཀྱི་བདག་ཉིད་ཅན་གྱི་གཟུགས་ཀྱི་སྐུ་ལ་མངོན་པར་ཞེན་པ་མེད་པའི་ཕྱིར་རང་གི་མཚན་ཉིད་སྟོང་པ་ཉིད་དང་། སྟོབས་དང་། མི་འཇིགས་པ་ལ་
སོགས་པའི་རང་བཞིན་གྱི་ཆོས་ཀྱི་སྐུ་ལ་མངོན་པར་ཞེན་པ་མེད་པའི་ཕྱིར། །ཆོས་ཐམས་ཅད་སྟོང་པ་ཉིད་དང་། གང་ཟག་དང་ཆོས་སུ་ཀུན་ནས་སྒྲོ་འདོགས་པ་མེད་པའི་ཕྱིར་དངོས་པོ་མེད་པ་སྟོང་པ་ཉིད་དང་། ཇི་སྐད་དུ་བཤད་པའི་སྟོང་པ་ཉིད་ཀྱི་མཚན་ཉིད་ལ་སྐུར་པ་མི་འདེབས་པ་དང་།
མངོན་པར་ཞེན་པ་མེད་པའི་ཕྱིར་དངོས་པོ་མེད་པའི་རང་བཞིན་སྟོང་པ་ཉིད་ཡིན་ནོ། །དེ་བས་ན་བྱ་བ་ནན་ཏན་གྱི་ཡེ་ཤེས་ལ་བརྟེན་པ་རྡོ་རྗེ་ཆོས་ལ་སོགས་པ་བཞི་པོའི་བདག་ཉིད་ཡིན་ཏེ། མིག་ལ་སོགས་པའི་ཤེས་པ་གནས་གྱུར་པའི་བདག་ཉིད་བྱ་བ་ནན་ཏན་གྱི་ཡེ་ཤེས་ནི་ཇི་སྐད་དུ་བཤད་

པའི་ཕྱིན་ཅི་ལོག་སྤངས་པའི་སྒོ་ནས་བདེ་བར་གཤེགས་པ་མ་ལུས་པ་མཆོད་པ་དང་། ཀུན་ནས་བསྲུང་བ་དང་། བགེགས་བསལ་བ་དང་། ལུས་ལ་སོགས་པ་སྟོང་པ་ཉིད་ཀྱི་ཡེ་ཤེས་ཀྱི་རྒྱུ་ཉིད་ཡིན་པའི་ཕྱིར་རོ། །དེ་བཞིན་དུ་སེར་སྣ་དང་། འཆལ་བའི་ཚུལ་ཁྲིམས་དང་མི་བཟོད་པ་དང་།
ལེ་ལོ་དག་གི་གཉེན་པོ་ཉིད་ཀྱིས་དེ་ཉིད་སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་བདག་ཉིད་ཡིན་ནོ། །དེའི་ཕྱིར་གསང་བའི་མཆོད་པ་བཞི་པོའི་རང་བཞིན་ཡིན་ཏེ། གོ་རིམས་བཞིན་དུ་མེ་ལོང་ལྟ་བུའི་ཡེ་ཤེས་ལ་སོགས་པ་བསྒྲུབ་
པ་ནི་རང་གི་རྣམ་པར་ཐར་པའི་སྒོ་རྣམ་པར་དག་པའི་སྟོབས་ཀྱི་ལྷུན་གྱིས་གྲུབ་པར་མངོན་པར་འདོད་པའི་ཁྱད་པར་སྐྱེད་པར་བྱེད་པ་ཉིད་ཡིན་པའི་ཕྱིར་རོ། །དེ་ཉིད་རྣམ་པར་གཡེང་བ་དང་། ཤེས་རབ་འཆལ་པ་དང་། ཡང་དག་པ་མ་ཡིན་པའི་སྨོན་ལམ་དང་། ཐབས་མ་ཡིན་པ་
སྤངས་པའི་སྒོ་ནས་བསམ་གཏན་དང་། ཤེས་རབ་དང་། སྨོན་ལམ་དང་། ཐབས་ཀྱི་ཕ་རོལ་ཏུ་ཕྱིན་པའི་མཚན་ཉིད་ཀྱིས་ཕྱིའི་མཆོད་པ་བཞི་པོའི་བདག་ཉིད་ཡིན་ཏེ། འབད་པ་དང་བཅས་པའི་ལམ་གྱིས་ཆོས་ཀྱི་དབྱིངས་ལ་དགའ་བས་འཇུག་པའི་རང་བཞིན་ཉིད་ཡིན་པའི་
ཕྱིར་རོ། །དད་པ་དང་། བརྩོན་འགྲུས་དང་། དྲན་པ་དང་། ཏིང་ངེ་འཛིན་གྱི་ངོ་བོ་ཉིད་ཀྱིས་སྒོ་བཞི་བསྲུང་བ་བཞི་པོའི་བདག་ཉིད་ཡིན་ཏེ། ཐེག་པ་ཆེན་པོའི་ཆེན་པོ་ལ་མངོན་པར་ཡིད་ཆེས་པ་དང་། འཇུག་པ་དང་། ཀུན་ནས་དགའ་བ་དང་། རྒྱུན་མི་འཆད་པའི་རྒྱུ་ཉིད་
ཡིན་པའི་ཕྱིར་རོ། །དེ་ཉིད་ཤེས་རབ་ཡོངས་སུ་དག་པ་ཙམ་ལ་ལྟོས་ནས་ཇི་སྐད་དུ་བཤད་པའི་སྟོང་པ་ཉིད་ཀྱི་རབ་ཏུ་དབྱེ་བའི་སྒོ་ནས་བྱམས་པ་ལ་སོགས་པའི་ཏིང་ངེ་འཛིན་བཅུ་དྲུག་གི་བདག་ཉིད་ཡིན་ནོ། །ཐབས་འབའ་ཞིག་ཙམ་ལ་ལྟོས་པ་ནི་འཇིག་རྟེན་པའི་ཏིང་ངེ་འཛིན་མ་ལུས་པའི་རང་
བཞིན་ནོ། །དེ་ཉིད་ཀུན་ནས་ཉོན་མོངས་པའི་ཕུང་པོ་དང་། ཁམས་དང་། སྐྱེ་མཆེད་དུ་སྒྲོ་འདོགས་པ་དང་བྲལ་བའི་ཕྱིར་རྣམ་པར་བྱང་བའི་ཕུང་པོ་ལ་སོགས་པའི་མཚན་ཉིད་དུ་རིག་པར་བྱའོ། །དེ་ཉིད་ཀུན་དུ་རྟོག་པ་མ་ལུས་པའི་སེམས་པས་སྒྲོ་བཏགས་པ་སྤངས་ཏེ་དེའི་ཕྱིར་ཇི་

སྲིད་དེ་ཁོ་ན་ཉིད་དུ་ཀུན་དུ་རྟོག་པ་དེ་སྲིད་དུ་དེ་ལ་ཡང་དག་པར་བརྟེན་པར་བྱ་སྟེ། དེའི་ངོ་བོ་ཉིད་དུ་ཞེན་པ་ཉིད་ཀྱིས་དེ་སྐྱེ་བའི་ཡང་དག་པའི་རྟེན་ཡིན་པའི་ཕྱིར་ཏེ། རྣལ་འབྱོར་པའི་ཡེ་ཤེས་སྐྱེད་པར་བྱེད་པ་ཡིན་པར་འདོད་པའི་ཕྱིར་རོ། །དེ་ཉིད་དངོས་པོ་མ་ལུས་པ་
བདག་དང་ཐ་མི་དད་པ་ལ་བལྟས་ནས་སྣང་བའི་ཡུལ་དུ་གྱུར་པ་གཟུགས་ལ་སོགས་པ་ཡུལ་ཐམས་ཅད་ཀྱིས་ཡང་དག་པར་མཆོད་པར་བྱའོ། །ཇི་ལྟར་བདག་ཉིད་ལ་མཆོད་པ་ལེགས་པ་ཡིན། གཟུགས་ལ་སོགས་པ་ཅུང་ཟད་ཉམས་སུ་མྱོང་བ་ཐམས་ཅད་ཀྱང་བཀག་པ་ཡིན་ནོ་ཞེ་ན་དེ་
ནི་མ་ཡིན་ཏེ། ཐམས་ཅད་དུ་བདག་ཉིད་ཁོ་ན་མཆོད་པར་བྱ་བ་ཉིད་ཡིན་པའི་ཕྱིར་རོ། །གང་གི་ཕྱིར་འདིར་སེམས་ལས་མ་གཏོགས་པ་གཞན་བདག་ཏུ་མངོན་པར་འདོད་པ་མ་ཡིན་ལ། སེམས་ལས་གཞན་མཆོད་པར་བྱ་བ་ཉིད་ཀྱང་མེད་དོ། །ལུགས་སྐུ་ལ་སོགས་པའི་རང་གི་ངོ་བོ་ཡང་
མངོན་པར་འདོད་པའི་ལྷ་ཉིད་དུ་སེམས་ཀྱིས་སྒྲོ་བཏགས་པ་ཡིན་པའི་ཕྱིར་རོ། །སོ་སོར་སྣང་བ་ཙམ་ལས་ལྷག་པ་གཞན་ཡོད་པ་ཡང་མ་ཡིན་ཏེ། རང་ལ་ལྷ་ཉིད་དུ་སྒྲོ་བཏགས་པའི་བདག་ཉིད་ཀྱང་བླ་ན་མེད་པའི་འབྲས་བུ་ཡིན་ནོ་ཞེས་བསྟན་པ་དང་འདྲའོ། །གང་ཡང་ཅུང་ཟད་ཉམས་སུ་
མྱོང་བ་བཀག་པའི་ཕྱིར་རོ་ཞེས་སྨྲས་པ་དེ་ཡང་རིགས་པ་མ་ཡིན་ཏེ། དགག་པའི་ངག་འཇུག་པའི་སྤྱིས་ཁྱད་པར་གྱི་སྒྲུབ་པས་དགག་པར་གྱུར་པའི་ཕྱིར་རོ། །ཡུལ་གཅིག་ཉིད་ལ་སྒྲུབ་པ་དང་། དགག་པ་དག་འགལ་བར་གྱུར་པ་ཡང་ཡུལ་དུ་མ་ཉིད་ལ་ནི་མ་ཡིན་ནོ། །བྱ་བའི་རང་གི་ངོ་བོ་ལ་
ཁྱད་པར་མེད་པའི་ཡུལ་དུ་མ་ཉིད་དུ་མི་འཐད་དོ་ཞེ་ན་མ་ཡིན་ཏེ་ཚོགས་པའི་ཁྱད་པར་གྱིས་འདོད་པ་དང་། འདོད་པ་མ་ཡིན་པའི་འབྲས་བུ་སྐྱེད་པར་རྗེས་སུ་མཐུན་པ་ཉིད་ཀྱི་ཕྱིར་འདོད་པ་མ་ཡིན་པའི་འབྲས་བུ་ནི་དགག་པར་བྱ་བའི་ཡུལ་ཡིན་ནོ། །དེ་ཡི་ངོ་བོ་ལ་ཞེན་པ་ཙམ་གྱིས་ཐམས་ཅད་
དེ་བཞིན་དུ་འགྱུར་བ་ཡང་མ་ཡིན་ཏེ། སྔགས་ལ་སོགས་པས་མངོན་པར་སྦྱངས་པ་ལོངས་སྤྱོད་པའི་དུག་ལས་འཆི་བ་ལ་སོགས་པ་འབྱུང་བའི་ནུས་པ་མ་མཐོང་བའི་ཕྱིར་རོ། །དེ་བཞིན་དུ་འདིར་ལུས་ལ་སོགས་པའི་ལས་ཕྱིར་ཕྱོགས་པ་ཐུན་མོང་དུ་གཞན་ནས་བཀག་པ་ཡིན་ཡང་འདིར་ཁྱད་

པར་ཅན་གྱི་སྙིང་རྗེ་ལ་སོགས་པས་ཀུན་ནས་བསླང་བས་འདོད་པ་མ་ཡིན་པའི་འབྲས་བུར་མི་འགྱུར་ཏེ། དེ་ལྟར་གྱུར་པའི་གང་ཟག་རྣམས་ལ་བརྩེ་བས་སྤང་བ་ལ་སོགས་པའི་ལས་ཀྱིས་གནོད་པ་སྐྱེད་པ་ལྟ་བུ་དང་། བུད་མེད་ཆུ་ལ་སོགས་པས་ཁྱེར་བ་ལ་སོགས་པ་ལ་ཕའི་འདུ་ཤེས་ཀྱིས་
བཏོན་པ་དང་འདྲ་བ་ཡིན་ནོ། །བྱང་ཆུབ་སེམས་དཔའ་དག་ལ་ཇི་སྲིད་དུ་དགེ་བ་ལ་སོགས་པའི་ཡིད་ལ་བྱེད་པས་རབ་ཏུ་ཞུགས་པའི་ལས་དེ་ནི་མངོན་པར་སྣང་བའི་ཡུལ་ཡིན་ཏེ། བྱང་ཆུབ་སེམས་དཔའི་ལམ་གྱི་མཚན་ཉིད་ཁོ་ན་ཉིད་ཡིན་པའི་ཕྱིར་ཏེ། སྙིང་བརྩེར་ལྡན་དང་བྱམས་
ཕྱིར་དང་། །སེམས་དགེ་བ་ལ་ཉེས་པ་མེད། །ཅེས་བྱ་བ་དང་། བརྩེར་ལྡན་གཞན་གྱི་དོན་མཐོང་ན། །བཀག་པ་རྣམས་ཀྱང་དེ་ལ་གནང་། །ཞེས་གང་གསུངས་ལ། གཞན་ཡང་། བྱང་ཆུབ་སེམས་དཔའི་ཀུན་རྟོག་ལས། །དགེ་བའམ་གལ་ཏེ་མི་དགེ་བའང་རུང་། །གང་ཕྱིར་
དེ་ཡི་ཡིད་དབང་འགྱུར། །ཐམས་ཅད་དགེ་བ་ཉིད་ཡིན་ནོ། །ཞེས་གསུངས་པ་ཡིན་ནོ། །ཐབས་ལ་མཁས་པ་མ་གཏོགས་པར་སྲོག་གཅོད་པ་ལ་སོགས་པ་ལས་ངེས་པར་ལྡོག་པར་རྣམ་པར་གཞག་པ་ཡིན་པའི་ཕྱིར་ལ། ཐབས་ལ་མཁས་པ་ནི་དེ་གནང་བ་ཡིན་པའི་ཕྱིར་ཏེ། སུམ་
ཅུ་རྩ་གསུམ་པའི་མདོ་དང་། མངོན་པར་རྫོགས་པར་བྱང་ཆུབ་པ་ལས་ཀྱང་། འདིར་བྱང་ཆུབ་སེམས་དཔའ་ཐམས་ཅད་ཀྱིས་ཐམས་ཅད་དུ་སྲོག་གཅོད་པ་ལས་སླར་ལྡོག་པར་བྱ་སྟེ། གཞན་དུ་དཀོན་མཆོག་གསུམ་ལ་གནོད་པ་བྱེད་པའི་སེམས་ཅན་མཐོང་ན་ཞེས་བྱ་བའི་བར་དང་།
དེ་བཞིན་དུ་མ་བྱིན་པར་ལེན་པ་ལས་སླར་ལྡོག་པར་བྱ་སྟེ། སེམས་ཅན་སེར་སྣ་ཅན་མཐོང་ན་ཞེས་བྱ་བའི་བར་དང་། དེ་བཞིན་དུ་གཞན་གྱི་ཆུང་མ་གཞན་གྱིས་ཡོངས་སུ་བཟུང་བ་ལ་བརྣབ་སེམས་ཀྱི་སེམས་སྐྱེད་པར་ཡང་མི་བྱེད་ན་འོན་ཀྱང་ཡན་ལག་མ་ཡིན་པས་བཤད་པའམ། གཉིས་
ཀྱིས་གཉིས་སྤྲོད་པ་ལྟ་ཅི་སྨོས། གཞན་དུ་དེ་ལྟ་བུས་འདུལ་བ་རྣམས་ལ་ནི་ཞེས་བྱ་བ་རྒྱས་པར་གང་གསུངས་པ་ཡིན་པས་བསླབ་པ་ཐམས་ཅད་ཀྱི་ཆ་བལྟ་བར་བྱའོ། །འདོད་ཆགས་ཀྱི་བསམ་པས་ཀུན་ནས་སློང་བའི་ལུས་དང་ངག་གི་ལས་ནི་ཀུན་ནས་ཉོན་མོངས་པའི་འབྲས་བུ་ཅན་ཡིན་

པའི་ཕྱིར་མི་དགེ་བ་ཡིན་གྱི་རང་གི་ངོ་བོས་ནི་མ་ཡིན་ཏེ། དེ་ལུང་དུ་མ་བསྟན་པ་ཉིད་ཡིན་པའི་ཕྱིར་རོ། །གང་ཡང་གཞན་ལ་ཕན་པའི་བསམ་པས་རབ་ཏུ་ཞུགས་པ་དེ་ནི་བླ་ན་མེད་པའི་འབྲས་བུ་སྐྱེད་པར་བྱེད་པ་ཉིད་ཀྱིས་བྱང་ཆུབ་སེམས་དཔའི་བསླབ་པའི་རང་
བཞིན་ནོ། །བདག་ཉིད་ཀྱི་ཚུལ་ཁྲིམས་སྲུང་བར་བྱེད་པ་ནི་བྱང་ཆུབ་སེམས་དཔའི་ཁ་ན་མ་ཐོ་བ་དང་བཅས་པར་འགྱུར་བ་མ་ཡིན་ཏེ། བཅོམ་ལྡན་འདས་ཀྱིས། ཆོས་གང་ངེས་པ་རྣམས་ཀྱི་བྱང་ཆུབ་ཡོན་ཏན་འབྱུང་འགྱུར་བ། །འདི་ནི་ཡོན་ཏན་ཆོས་ལྡན་རྣམས་ཀྱི་ཚུལ་ཁྲིམས་དོན། །
ཆོས་གང་ཕན་བྱེད་རྣམས་ཀྱི་བྱང་ཆུབ་ཡོན་ཏན་ཉམས་བྱེད་པ། །འདི་ནི་ཚུལ་ཁྲིམས་འཆལ་ཞེས་འདྲེན་པ་རྣམས་ཀྱིས་གསུངས། །ཞེས་གང་གསུངས་པ་དང་། འཕགས་པ་བློ་གྲོས་མི་ཟད་པས་བསྟན་པ་ལས་ཀྱང་། ཐབས་ལ་མཁས་པས་ཐམས་ཅད་ལ། །རྣམ་པར་སྨད་པར་
མི་བྱའོ། །ཞེས་གསུངས་པ་ཡིན་ནོ། །གཟུགས་ལ་སོགས་པའི་ཡུལ་ལ་ལོངས་སྤྱོད་པར་མཚུངས་སུ་ཟིན་ཀྱང་ཞེན་པའི་དབང་གིས་ཁ་ན་མ་ཐོ་བ་དང་བཅས་པ་དང་། ཁ་ན་མ་ཐོ་བ་མེད་པར་རྣམ་པར་གཞག་པ་ཡིན་པའི་ཕྱིར་རོ། །ཉོན་མོངས་པའི་བདག་ཉིད་ཅན་གྱི་ལོངས་སྤྱོད་ལ་
ཞེན་པར་གྱུར་པས་ཡུམ་ལྔ་ལ་ལོངས་སྤྱོད་པ་ནི་ཉོན་མོངས་པའི་ཡུལ་ལ་ལོངས་སྤྱད་པ་ཡིན་ལ། ཉོན་མོངས་པའི་བསམ་པ་མེད་པས་ནི་ཀུན་ནས་ཉོན་མོངས་པ་ཅན་མ་ཡིན་ནོ། །དེ་ཡང་རྣམ་པ་གསུམ་སྟེ། འཇིག་རྟེན་པའི་འབྲས་བུ་དང་རྗེས་སུ་མཐུན་པ་དང་། རང་གི་མྱ་ངན་ལས་འདས་
པ་དང་རྗེས་སུ་མཐུན་པ་དང་། བླ་ན་མེད་པའི་འབྲས་བུ་དང་མཐུན་པའོ། །དེ་ལ་དང་པོ་ནི་མཐོ་རིས་ལ་སོགས་པ་ཐོབ་པའི་ཕྱིར་ལྷ་ལ་སོགས་པ་ལ་ཇི་ལྟ་བ་བཞིན་དུ་ཐོབ་པའི་ཡུལ་སྟོབས་པའི་ཡིད་ལ་བྱེད་པའོ། །གཉིས་པ་ཉན་ཐོས་ལ་སོགས་པའི་བྱང་ཆུབ་དོན་དུ་གཉེར་བ་ཡིན་ཏེ། དེ་ཁོ་ན་ཉིད་
དུ་གཟུགས་ལ་སོགས་པ་རྣམས་ལ་མི་རྟག་པ་ལ་སོགས་པའི་རྣམ་པར་སོ་སོར་རྟོག་པ་ཡིན་ཏེ། ཇི་སྐད་དུ་ཡང་དག་པར་ལྡན་པའི་ལུང་ལས། དགེ་སློང་དག་དགེ་སློང་གི་མིག་གིས་གཟུགས་མཐོང་བ་ན་གཟུགས་རྣམས་ཟིལ་གྱིས་གནོན་པར་བྱེད་ཀྱི་གཟུགས་ཀྱིས་དེ་དག་ཟིལ་གྱིས་གནོན་པར་མི་འགྱུར་རོ་ཞེས་

བྱ་བ་ནས། མི་རྟག་པར་དམིགས་ནས་གནས་པར་བྱེད་པ་དེའི་ཕྱིར་གཟུགས་ཀྱིས་ཟིལ་གྱིས་གནོན་པར་མི་འགྱུར་རོ་ཞེས་བྱ་བའི་བར་དུ་རྒྱས་པར་གསུངས་པ་ཡིན་ནོ། །གསུམ་པ་ལ་ཡང་རྣམ་པ་བཞི་སྟེ། སྨོན་ལམ་ལ་མོས་པས་རབ་ཏུ་འཇུག་པ་དང་། དེ་ཁོ་ན་ཉིད་འབའ་ཞིག་སོ་སོར་
རྟོག་པས་རབ་ཏུ་འཇུག་པ་དང་། རྒྱ་ཆེ་བ་ཙམ་གྱི་དམིགས་པས་རབ་ཏུ་འཇུག་པ་དང་། ཟབ་པ་དང་རྒྱ་ཆེ་བས་རབ་ཏུ་འཇུག་པའོ། །དེ་ལ་གཟུགས་ལ་སོགས་པས་སྣང་བ་ཐོབ་པ་རྣམས་ཀྱི་དེའི་རང་བཞིན་ངོ་བོ་ཉམས་སུ་མྱོང་བའི་རྗེས་སུ་འབྲངས་ནས་འགྲོ་བ་མ་ལུས་པ་ལ་ཕན་པ་སྐྱེ་བའི་སེམས་
པ་ལ་སྔོན་དུ་ཕྱོགས་པ་ཉིད་ཡིན་ཏེ། སྤྱོད་ཡུལ་ཡོངས་སུ་དག་པ་ལས་འདིར་བྱང་ཆུབ་སེམས་དཔའི་མིག་གིས་གཟུགས་ཡིད་བདེ་བའི་གནས་སུ་གྱུར་པ་མཐོང་བ་ན་སེམས་ཅན་ཐམས་ཅད་ཀྱིས་དེ་བཞིན་གཤེགས་པའི་སྐུའི་མཆོག་ཐོབ་པར་གྱུར་ཅིག་ཅེས་དེ་ལྟར་ཡང་སེམས་བསྐྱེད་པར་
བྱའོ། །ཡིད་མི་བདེ་བའི་གནས་སུ་གྱུར་པ་མཐོང་བ་ན་སེམས་ཅན་ཐམས་ཅད་འཁོར་བའི་སྡུག་བསྔལ་ལས་སྐྱོ་བར་གྱུར་ཅིག་ཅེས་དེ་ལྟར་ཡང་སེམས་བསྐྱེད་པར་བྱའོ། །བཏང་སྙོམས་ཀྱི་གནས་སུ་གྱུར་པ་མཐོང་ན་སེམས་ཅན་ཐམས་ཅད་ཆོས་ཐམས་ཅད་ལ་སེམས་མཉམ་པར་གྱུར་
ཅིག་ཅེས་དེ་ལྟར་ཡང་སེམས་བསྐྱེད་པར་བྱའོ་ཞེས་རྒྱ་ཆེར་གང་གསུངས་པ་དང་། དེ་ལྟར་མདོ་སྡེའི་རྒྱན་ལས་ཀྱང་། །ཇི་ལྟ་ཇི་ལྟར་དབང་པོའི་སྤྱོད་ཡུལ་ལ། །བརྩེ་ལྡན་བདག་ཉིད་སྤྱོད་པས་འཇུག་གྱུར་པ། །དེ་ལྟ་དེ་ལྟར་ཅི་རིགས་མཐུན་གནས་ཏེ། །བརྩེ་བས་སེམས་ཅན་དག་
ལ་མངོན་དུ་བྱེད། །ཅེས་གསུངས་པ་ཡིན་ནོ། །གཉིས་པ་ནི་བརྩེ་བ་དང་བཅས་པས་སེམས་ཅན་གྱི་ཁམས་ལ་ལྟོས་པ་དང་བཅས་པས་ཡུལ་ལ་ལོངས་སྤྱོད་པ་མ་ལུས་པ་རྣམས་ལ་བདག་མེད་པའི་སོ་སོར་རྟོག་པའི་ཡིད་ལ་བྱེད་པ་ཡིན་ཏེ། བཅོམ་ལྡན་འདས་ཀྱིས་རིགས་ཀྱི་བུ་དགེ་
སློང་ཆོས་སྨྲ་བ་དེ་ལ་བདུད་སྡིག་ཅན་གྱིས་བར་ཆད་བྱ་བའི་ཕྱིར་སེམས་བསྒྱུར་བའི་གཟུགས་དང་། སྒྲ་དང་། དྲི་དང་། རོ་དང་། རེག་བྱ་དག་ཉེ་བར་བསྟན་པ་དེ་དག་འདིར་ཐབས་ལ་མཁས་པ་དང་། ཤེས་རབ་ཀྱིས་ཟིལ་གྱིས་མནན་ནས་ཡོངས་སུ་སྤྱད་པར་བྱའོ་ཞེས་རྒྱས་པར་གང་

གསུངས་པ་ཡིན་ཏེ། དེ་ཁོ་ན་ཉིད་ཡིད་ལ་བྱེད་པ་ནི་ཉེས་པ་མ་ལུས་པ་སྐྱེ་བའི་གཉེན་པོ་ཉིད་ཡིན་པའི་ཕྱིར་རོ། །གང་གི་ཕྱིར་འདོད་པ་མ་ཡིན་པའི་ལས་མངོན་པར་བསྒྲུབ་པ་ཡང་དེ་ཁོ་ན་ཉིད་ལ་སོ་སོར་རྟོག་པས་ཉམས་ཤིང་ཟད་པར་འགྱུར་ཏེ། དེའི་དབང་གིས་ནི་
འདོད་པའི་འབྲས་བུ་སྐྱེད་པའི་ནུས་པ་ཉེ་བར་བཅོམ་པར་འགྱུར་ན་གང་དུ་ཡང་དག་པར་སོ་སོར་རྟོག་པའི་བདག་ཉིད་ཅན་གྱི་གཟུགས་ལ་སོགས་པ་ཁོང་དུ་ཆུད་པ་དེ་ལ་ཉོན་མོངས་པ་ཅན་གྱི་ལས་ཀྱི་སྐབས་ལྟ་ག་ལ་ཡོད། ཕྱིན་ཅི་ལོག་གི་སེམས་ཀྱི་ཁྱད་པར་ཉོན་མོངས་པ་ཅན་གྱི་ལས་ནི་བདག་མེད་པ་
སོ་སོར་རྟོག་པ་དེ་དང་འགལ་བའི་ཕྱིར་ཅིག་ཅར་སྐྱེ་བར་མི་འགྱུར་རོ། །དེ་སྐད་དུ་ཡང་། འཇིག་རྟེན་སྣ་ཚོགས་གང་དེ་འདོད་པ་མིན། །སྐྱེས་བུའི་ཀུན་རྟོག་འདོད་ཆགས་འདོད་པ་ཡིན། །འཇིག་རྟེན་སྣ་ཚོགས་དེ་བཞིན་གནས་ཀྱང་ནི། །འོན་ཀྱང་བརྟན་རྣམས་འདི་ལ་འདོད་པ་སྤང་། །
ཞེས་གསུངས་སོ། །གསུམ་པ་ཡང་རྒྱ་ཆེ་བ་ལ་དམིགས་པ་ཉིད་ཀྱི་ཕྱིར་རང་གི་བདག་ཉིད་ཀྱི་གཟུགས་ལ་སོགས་པ་ཡང་ཐ་མལ་པའི་གཟུགས་ལ་ཞེན་པའི་གཉེན་པོ་ཉིད་ཡིན་པས་བརྒྱུད་པས་རྫོགས་པའི་སངས་རྒྱས་ཀྱི་གོ་འཕང་ལ་འཇོག་པའི་རྒྱུ་ཡིན་ཏེ། རྫོགས་པའི་སངས་རྒྱས་
ཀྱི་ངོ་བོའི་ང་རྒྱལ་གྱི་རྗེས་སུ་མཐུན་པའི་གཟུགས་ལ་སོགས་པ་ལོངས་སྤྱོད་པའི་ཕྱིར་རོ། །གལ་ཏེ་དེ་ལྟ་ཡིན་དུ་ཆུག་ན་དེ་ལྟ་ན་ཡང་བཅོམ་ལྡན་འདས་རང་གི་ངོ་བོར་ཡོངས་སུ་བསྒོམ་པ་དེ་ནི་དོན་དམ་པ་ཉིད་དུ་རྫོགས་པའི་སངས་རྒྱས་ཀྱི་རང་བཞིན་མ་ཡིན་པ་ཉིད་ཀྱི་ཕྱིར་རོ་ཞེ་ན། དེ་
ལྟ་ན་ནི་ཐ་མལ་པའི་བདག་ཉིད་ལོངས་སྤྱོད་པ་ཡང་ཡོད་པར་མི་འགྱུར་ཏེ། དེ་ཁོ་ན་ཉིད་དུ་གང་གཟུགས་ལ་སོགས་པ་མེད་པ་ཉིད་ཀྱི་ཕྱིར་རོ། །ཇི་ལྟར་བདག་གིས་གཟུགས་ལ་སོགས་པ་མཐོང་ངོ་ཞེས་ཞེན་པས་ཡུལ་དུ་བྱས་པའི་གཟུགས་ལ་སོགས་པ་དེ་དག་ནི་དེ་ཁོ་ན་ཉིད་དུ་དེ་
ལྟར་ཡོད་པ་མ་ཡིན་ནོ་ཞེས་བསྟན་པ་དང་འདྲའོ། །དེ་བས་ན་དེ་ཁོ་ན་ཉིད་དུ་གནས་པ་ལ་ལྟོས་པ་མེད་པའི་ཞེན་པ་འགའ་ཞིག་ནི་མི་འདོད་པ་སྐྱེད་པ་ཉིད་ཀྱི་ཕྱིར་མི་དགེ་བ་ཡིན་ལ། ཅིག་ཤོས་ནི་མཆོག་གི་སྐྱེས་བུའི་དོན་ལ་མཁོ་བ་ཉིད་ཀྱི་ཕྱིར་དགེ་བ་ཡིན་ནོ་ཞེས་བྱ་བ་བཅོམ་ལྡན་འདས་ཀྱི་

གཞུང་ལས་མཐོང་ངོ་། །དེ་ཉིད་ཀྱི་ཕྱིར་མིང་ཙམ་གྱི་སྒོ་ནས་ཀྱང་རྫོགས་པའི་སངས་རྒྱས་ཀྱི་ང་རྒྱལ་ནི་ཕུན་སུམ་ཚོགས་པ་མཆོག་རྫོགས་པར་བྱེད་པའི་རྒྱུ་ཡིན་ནོ་ཞེས་རྣམ་པར་གཞག་པ་ཡིན་གྱི་བདག་ཉིད་ཀྱིས་ཉེ་བར་ལོངས་སྤྱོད་པ་ཁོ་ནས་ཐམས་ཅད་དགེ་བའི་བདག་ཉིད་དུ་མི་འགྱུར་རོ་ཞེས་
རྣམ་པར་གཞག་པར་ནི་མི་ནུས་ཏེ། བསམ་པའི་དབང་གིས་དེ་ཡང་དགེ་བའི་བདག་ཉིད་ཡིན་པའི་ཕྱིར་རོ། །བྱང་ཆུབ་སེམས་དཔའ་འགའ་ཞིག་ལོ་སྟོང་ཕྲག་བརྒྱད་ཅུར་དེ་བཞིན་གཤེགས་པ་འཁོར་དགེ་སློང་སྟོང་ཕྲག་བརྒྱད་ཅུ་དང་བཅས་པ་རེ་རེ་ལ་བསྐལ་པ་དུ་མར་བདེ་བའི་ཡོ་བྱད་
ཐམས་ཅད་ཀྱིས་སྟོབས་པར་བྱེད་ལ་བྱང་ཆུབ་སེམས་དཔའ་གཞན་འགའ་ཞིག་ཀྱང་དམ་པའི་ཆོས་ཡོངས་སུ་གཟུང་བའི་རྒྱུས་བདག་ཉིད་བསོད་སྙོམས་ཀྱིས་ལོངས་སྤྱོད་པར་བྱེད་ན་སྔ་མ་དེ་བས་བྱང་ཆུབ་སེམས་དཔའ་འདི་ལ་བསོད་ནམས་མང་དུ་འབྱུང་བར་འགྱུར་རོ་ཞེས་གསུངས་པ་ཡིན་
ནོ། །རྣམ་པར་རྟོག་པ་བཞི་པ་ནི་ཉིད་ཀྱི་རང་བཞིན་ངོ་བོ་ཉིད་རྟོག་པའི་དྲི་མ་མ་ལུས་པ་སྤངས་པས་བདེ་བར་གཤེགས་པའི་སྐུའི་བདག་ཉིད་ཅན་འོད་ཟེར་ཅན་གྱི་ཚོགས་རྣམ་པ་དུ་མའི་སྒོ་ལས་ཡང་དག་པར་བྱུང་བའི་སྤྲུལ་པ་སྣ་ཚོགས་རྣམ་པར་འཕྲོ་བས་འགྲོ་བ་མ་ལུས་པའི་དོན་མཛད་པ་ལ་
གཞོལ་བ་དེ་དང་རྗེས་སུ་མཐུན་པའི་གཟུགས་ལ་སོགས་པ་གོང་དུ་སྨོས་པའི་ཁྱད་པར་གྱིས་དངོས་པོ་མ་ལུས་པ་མཉམ་པ་ཉིད་ཀྱིས་བལྟ་བ་ནི་གཅིག་ཏུ་ཕུན་སུམ་ཚོགས་པ་མཆོག་གི་རྒྱུ་ཡིན་ཏེ། མངོན་སུམ་དུ་བསྒྲུབ་པར་བྱ་བའི་ངོ་བོ་ལ་དམིགས་པ་ཉིད་ཀྱི་ཕྱིར་རོ། །དེ་ལྟ་བུའི་རྣམ་པའི་
གཟུགས་ལ་སོགས་པ་ལ་མ་ངེས་པར་དཔྱོད་པའི་བདག་ཉིད་ཀྱི་རྫོགས་པའི་སངས་རྒྱས་ཀྱི་མཆོད་པ་ལ་ཁ་ན་མ་ཐོ་བ་དང་བཅས་པར་དོགས་པ་ཉིད་ནི་ཁ་ན་མ་ཐོ་བ་ཆེན་པོའི་རྒྱུ་མ་ཡིན་ཏེ། ཐ་མལ་པའི་ཕྱིན་ཅི་ལོག་གི་ཡིད་ལ་བྱེད་པའི་གཉེན་པོ་ཉིད་ཀྱིས་འདི་ནི་ལྷག་པའི་ཚུལ་ཁྲིམས་ཀྱི་
བསླབ་པའི་བདག་ཉིད་ཡིན་པའི་ཕྱིར་རོ། །མིག་ལ་སོགས་པའི་ཡུལ་ཡང་དག་པ་མ་ཡིན་པ་རྣམས་ལ་ཡིད་ལ་བྱེད་པ་ཐམས་ཅད་འགོག་པས་མྱ་ངན་ལས་འདས་པ་མཆོག་གི་གཞི་ཉིད་ཡིན་པའི་ཕྱིར་སྡོམ་པ་མཆོག་གི་དོན་ཡིན་ནོ། །དེ་ལྟར་ཡང་། མིག་གི་སྡོམ་པ་ལེགས་པ་སྟེ། །

རྣ་བའི་སྡོམ་པ་ལེགས་པ་ཡིན། །སྣ་ཡི་སྡོམ་པ་ལེགས་པ་སྟེ། །ལྕེ་ཡི་སྡོམ་པ་ལེགས་པ་ཡིན། །ལུས་ཀྱི་སྡོམ་པ་ལེགས་པ་སྟེ། །ཡིད་ཀྱི་སྡོམ་པ་ལེགས་པ་ཡིན། །དགེ་སློང་ཀུན་དུ་བསྡམས་པ་ཡིས། །སྡུག་བསྔལ་ཀུན་ལས་རབ་ཏུ་གྲོལ། །ཞེས་གསུངས་
སོ། །རང་དང་གཞན་རྫོགས་པའི་སངས་རྒྱས་ཀྱི་ངོ་བོར་དམིགས་པ་ཉིད་ཀྱིས་ལྷག་པའི་སེམས་ཀྱི་བསླབ་པའི་རང་བཞིན་ལ། རང་གི་ངོ་བོ་ལ་ཕྱིན་ཅི་མ་ལོག་པས་ལྷག་པའི་ཤེས་རབ་ཀྱི་བསླབ་པ་ལ་དམིགས་པ་ཡང་མ་ཡིན་ནོ། །དེ་བཞིན་དུ་སེར་སྣ་ལ་སོགས་པའི་ཉེས་པ་ལས་ལྡོག་པ་
ཉིད་ཀྱིས་ཕ་རོལ་ཏུ་ཕྱིན་པ་ལ་སོགས་པ་མ་ལུས་པ་ནང་དུ་འདུས་པ་ནི་སྔ་མའི་རྗེས་སུ་འབྲངས་ནས་བལྟ་བར་བྱའོ། །དེའི་ཕྱིར་རྣམ་པ་དེ་ལྟ་བུའི་བྱང་ཆུབ་ཀྱི་སེམས་བསྐྱེད་པ་དང་རྗེས་སུ་མཐུན་པའི་རང་བཞིན་ལས་རྣམ་པར་ལོག་པ་རྣམས་ནི་རྒྱུའི་མཆོག་སྤངས་པ་རྫོགས་པའི་བྱང་ཆུབ་ཀྱི་སྣོད་དུ་མི་འགྱུར་
ཞིང་། གནས་མ་ཡིན་པ་ལ་སྐྲག་པ་ནི་དོན་མེད་པ་བརྒྱུད་པ་སྐྱེད་པར་བྱེད་པའི་རྒྱུ་ཉིད་ཡིན་ཏེ། འགྲོ་བ་གང་ཞིག་རྨོངས་པའི་རྒྱུ་ཡིས་གནས་མ་ཡིན་ལ་སྐྲག་འགྱུར་བ། །ཡུན་རིངས་དུས་སུ་བསོད་ནམས་ཕུང་པོ་ཆེན་པོ་མིན་པ་འབྱུང་འགྱུར་རྒྱུས། །རིགས་མེད་བཤེས་མེད་བློ་མ་སྦྱངས་
ཤིང་སྔ་མར་དགེ་བ་མ་བསྐྱེད་པས། །ཆོས་འདི་དག་ལ་སྐྲག་པར་གྱུར་པ་དོན་ཆེན་འདི་ལས་ཉམས་པར་འགྱུར། །རྫོགས་པའི་བྱང་ཆུབ་གཞན་དོན་མཆོག་གི་རྒྱུར་གྱུར་སྣ་ཚོགས་མཐུ་ཡི་གནས། །དེ་ལས་དེ་དང་མཉམ་ཉིད་སེམས་འདི་འབའ་ཞིག་རྒྱུ་ཡི་མཆོག་ཡིན་ཞེས། །བདག་གིས་
བཤད་པར་གྱུར་པ་ལས་ཀྱང་ཅུང་ཟད་དྲི་མེད་བསོད་ནམས་དེས། །སངས་རྒྱས་ཡེ་ཤེས་འཁྲུལ་སྤངས་བློ་ཅན་སྐྱེ་བོ་བྱང་ཆུབ་ཐོབ་གྱུར་ཅིག །སློབ་དཔོན་སངས་རྒྱས་ཡེ་ཤེས་ཀྱི་ཞལ་སྔ་ནས་ཀྱིས་མཛད་པ་བདག་སྒྲུབ་པ་ལ་འཇུག་པ་ཞེས་བྱ་བ་རྫོགས་སོ།། །།པཎྜི་ཏ་ཤཱནྟི་བྷ་དྲ་དང་། ལོ་ཙཱ་
བ་འགོས་ལྷས་བཙས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། ༄༅༅། །རྒྱ་གར་སྐད་དུ། བྷཊྚཱ་ར་ཀ་ཨཱརྱ་ཛཾ་བྷ་ལ་ཛ་ལེནྡྲ་སཱ་དྷ་ནཾ། བོད་སྐད་དུ། རྗེ་བཙུན་འཕགས་པ་གནོད་འཛིན་ཆུ་དབང་གི་སྒྲུབ་པའི་ཐབས། སངས་རྒྱས་རིན་ཆེན་འབྱུང་ལྡན་ལ་ཕྱག་འཚལ་

ལོ། །བྱང་ཆུབ་ཏུ་སེམས་བསྐྱེད་པ་དང་། སྡོམ་པ་དང་། དབང་བསྐུར་བ་དང་། བརྩོན་འགྲུས་དང་དད་པ་དང་ལྡན་པའི་སྔགས་པས་གནས་ཡིད་དུ་འོང་བར་མཎྜལ་དང་མཆོད་པ་དང་གཏོར་མ་གཤམས་ཏེ། སྟན་བདེ་བ་ལ་ཅི་བདེ་བར་གནས་པས་བླ་མ་དང་། སངས་རྒྱས་དང་བྱང་
ཆུབ་སེམས་དཔའ་རྣམས་དང་། འཕགས་པ་ཛཾ་བྷ་ལ་ཡང་བསྐུལ་ཏེ། ཕྱག་འཚལ་བ་ལ་སོགས་པ་ཡན་ལག་བདུན་པ་བྱའོ། །དེ་ནས་ཚད་མེད་པ་བཞི་བསྒོམས་ནས་བྱང་ཆུབ་ཏུ་སེམས་བསྐྱེད་དོ། །དེ་ནས་ཤཱུ་ནྱ་ཏཱས་སྟོང་པ་ཉིད་དུ་བསྒོམས་ལ། དེའི་ངང་ལས་པདྨ་དང་ཟླ་བའི་སྟེང་དུ་
ཡི་གེ་ཛཾ་སེར་པོ་དང་། བཱི་ཛ་པཱུ་ར་ཡོངས་སུ་གྱུར་པ་ལས་བྱུང་བའི་འཕགས་པ་ཛཾ་བྷ་ལ་སྐུ་མདོག་གསེར་བཙོ་མ་འདྲ་བ། གསུས་པ་རབ་ཏུ་ཆེ་བ། སངས་རྒྱས་ལྔའི་རིན་པོ་ཆེའི་ཅོད་པན་དང་ལྷའི་རས་ཀྱིས་བརྒྱན་པ། རྒྱན་མ་ལུས་པས་བརྒྱན་པ། ཞལ་གཅིག་པ་ཕྱག་གཉིས་པ་
གཡས་པ་ན་བཱི་ཛ་པཱུ་ར་འཛིན་པ། གཡོན་ནེའུ་ལེའི་ཁ་ནས་འབབ་པའི་རིན་པོ་ཆེ་ཡོད་པ་འཛིན་པ། ཨུཏྤ་ལ་སྔོན་པོའི་ཕྲེང་བ་ཅན་འོད་ཟེར་དཔག་ཏུ་མེད་པ་འཁྲིགས་པ། ཞབས་ཀྱི་འོག་ན་རིན་པོ་ཆེའི་སྙེ་མའི་བུམ་པ་ཡོད་པ། སྟེང་གི་ངོས་གཉིས་ན་རིན་པོ་ཆེའི་སྙེ་མ་ལས་ནོར་གྱི་ཆར་
འབེབས་པའམ། འབེབས་པའི་གནོད་སྦྱིན་གཉིས་སོ། །འདི་ལྟ་བུ་རབ་ཏུ་གསལ་བར་བསྒོམ་མོ། །དེ་ནས་རང་གི་སྙིང་གའི་ཛཾ་ཡིག་ལས་འོད་ཟེར་འཕྲོས་པས། དེ་དང་འདྲ་བའི་འཕགས་པ་ཛཾ་བྷ་ལ་མདུན་གྱི་ནམ་མཁའ་ལ་གནས་པ་ལ། མཆོད་པ་དངོས་དང་ཡིད་ལས་བྱུང་བས་
མཆོད་ལ། མཚན་བརྒྱ་རྩ་བརྒྱད་པས་བསྟོད་དེ། གཉིས་སུ་མེད་པར་བྱས་ལ་གནས་གསུམ་དུ་ཡི་གེ་འབྲུ་གསུམ་དང་། ཕྱག་རྒྱས་བརྒྱན་ནོ། །ལག་པ་གཉིས་ཁུ་ཚུར་བཅངས་ཏེ་གུང་མོའི་ཚིགས་དབུས་མ་དང་། གསུམ་པ་བཀུག་པ་འདི་ནི་ཕྱག་རྒྱའོ། །དེ་ནས་དབང་བསྐུར་ཏེ་རིན་
ཆེན་རྡོ་རྗེ་དབུ་རྒྱན་དུ་བསམ་མོ། །དེ་ནས་དགོད་པ་ནི། སྤྱི་བོར་ཨོཾ། ཁ་ལ་ཛཾ། དཔུང་པ་གཡས་པ་ལ་བྷ། གཡོན་པ་ལ་ལ། སྙིང་གར་ཛ། བརླ་གཡས་པ་ལ་ལེན། གཡོན་པ་ལ་དྲ། གསང་གནས་སུ་ཡེ། བྱིན་པ་དག་ལ་སྭཱ། རྐང་མཐིལ་དག་ལ་ཧཱ་དགོད་དོ། །

དེ་ནས་སེར་སྣ་ཅན་དང་དབུལ་པོ་རྣམས་ལ་དམིགས། སྤྲོ་བསྡུ་ཅི་ནུས་བྱ་སྟེ་ཡིད་སྐྱོ་ན་སྔགས་བཟླས་སོ། །དེ་ནས་ཡི་གེ་བརྒྱ་པ་བརྗོད་ལ། དགེ་བ་ཇི་ལྟར་འདོད་པར་བསྔོས་ལ་བཏང་ངོ་། །ལངས་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཅི་རིགས་པར་ཀླག་གོ། །
ཕྱི་རོལ་ཆེ་ཆུང་བྱས་ནས་ཁྲུས་བྱའོ། །མཉམ་པར་འཇོག་ཙ་ན་ཡི་གེ་བརྒྱ་པས་བརྟན་པར་བྱའོ། །འདི་ལྟར་ཐུན་མཚམས་གསུམ་མམ་བཞིར་བྱའོ། །ཐུན་མཚམས་རེ་རེ་ལ་ཡང་དང་པོ་དང་ཐ་མར་མཆོད་པ་དང་བསྟོད་པ་བྱས་ལ་ཐུན་ཐ་མ་ལ་གཤེགས་སུ་གསོལ་ཞིང་། ཐུན་དང་པོ་ལ་
སྤྱན་དྲངས་ཏེ། མཆོད་པ་ཡང་དངོས་སུ་མ་འབྱོར་ན་ཡིད་ཀྱིས་བྱའོ། །གཏོར་མ་ཡང་ཐུན་མཚམས་ཐུན་མཚམས་ཀྱི་དང་པོ་འཇུག་ཀ་འཇུག་ཀར་སྦྱིན་ནོ། །ཡང་ནས་ཡང་དུ་སྤྱོད་ལམ་གྱི་བྱ་བར་ཆུ་དབུལ་བ་དང་། མཚན་བརྒྱ་རྩ་བརྒྱད་གདོན་ནོ། །ཡང་ན་བདག་ཉིད་ལྷག་པའི་ལྷ་གང་
ཡང་རུང་བའི་རྣལ་འབྱོར་དུ་གནས་པས་བཟླས་པ་དང་བསྟོད་པ་དང་ཆུ་དབུལ་བས་བསྒྲུབ་སྟེ། དེའི་རིམ་པ་ཡང་འཕགས་པ་ཛཾ་བྷ་ལའི་ལུགས་མ་རབ་ཏུ་གནས་པར་བྱས་ལ་བྱ། གོང་ངམ་ཉི་མའི་རྩེ་ལ་སྣོད་བཟང་པོ་གས་ཆག་དང་བུག་རྡོལ་མེད་པར་དེ་བཞུགས་ལ་བསྟོད་པ་དང་བཟླས་པ་ཅི་ནུས་
བྱས་ཏེ། དེ་ནས་ཆུ་ཕུལ་ལ་དངོས་གྲུབ་གསོལ་བ་གདབ་པོ། །དེ་ནས་ཡང་ཟ་མ་ཏོག་སེར་པོ་དྲི་ཞིམ་པོས་བཀང་བར་སྦའོ། །དེ་ལ་ཆུ་དབུལ་བའི་མན་ངག་ནི་ཟླ་བ་དང་རྡོ་རྗེ་བསམ། ཡི་གེ་ཨཾ་ལས་གདུ་བུ་ནི། །སོ་སོར་མཁྲིག་མར་བསམ་པར་བྱ། །བཾ་ནི་ཟླ་བའི་མདོག་ཅན་ཏེ། །དེ་
ལས་བདུད་རྩི་རབ་འབབ་པ། །དྲི་མེད་སེར་པོ་མངོན་ཕྱོགས་པས། །མཁས་པས་བུམ་པ་བཞིན་དུ་བལྟ། །མཛུབ་མོ་ལ་ནི་ནོར་བུ་བཟང་། །གང་བཟང་ཞེས་བྱ་གུང་མོ་ལའོ།