Luận tạng Tây Tạng (Tengyur) — Tập 25

ས་ནས་ནི། །འཁོར་ལོ་བསྐོར་ནས་མྱ་ངན་འདས། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །ཅེས་བརྗོད་དོ། །དེ་དག་ལ་སྐྱབས་གསུམ་སྦྱིན་པར་བྱ་སྟེ། ལན་གསུམ་དུ་འདོན་དུ་གཞུག་གོ། །སྡིག་པ་བཤགས་
པ་དང་། བསོད་ནམས་ལ་རྗེས་སུ་ཡི་རང་བ་དང་། བྱང་ཆུབ་ཏུ་སེམས་བསྐྱེད་པར་བྱ་སྟེ། སེམས་དང་ངག་དང་ལུས་རྣམས་ལ་རྡོ་རྗེ་དང་པདྨ་དང་དེ་བཞིན་དུ་འཁོར་ལོ་སྟེ། དེ་རྣམས་སུ་ཧཱུཾ་ཨཱཿཨོཾ་བཀོད་ལ། དྲིའི་ཆུ་དང་རྡོ་རྗེར་བཅས་པའི་ཁུ་ཚུར་གྱིས། ཧཱུཾ་ཨོཾ་
ཨཱཿ། ཞེས་དེ་བཞིན་དུ་འདོན་ཅིང་སྙིང་ག་དང་མགོ་བོ་དང་མགྲིན་པར་བྱུགས་ཏེ། མེ་ཏོག་ལ་སོགས་པའི་རིམ་པས་སྦྱིན་ནོ། །མེ་ཏོག་སྤྱི་བོར་མདུན་དུ་སྤོས། །མར་མེ་སླར་ཡང་སྙིང་གར་དྲི། །ཧེ་རུ་ཀ་ཡི་རྣལ་འབྱོར་པས། །འདི་དག་སྙོམས་པར་འཛིན་པས་སོ། །སོ་ཤིང་

ཨ་ཤྭཏྠ་དང་ཨུ་དུམྺཱ་ར་མ་འཁྱོག་པ་སྲིན་བུ་མེད་པ་མ་གས་པ་རྨ་མེད་པ་སོར་བཅུ་གཉིས་པ། མཐེའུ་ཆུང་ཙམ་རྩེ་མོར་མེ་ཏོག་མཛེས་པ་ཅན་སྦྱིན་ནོ། །དེར་ཡང་འཆར་བཅུག་ལ་བ་ལང་གི་ལྕི་བས་ཟུར་བཞི་པར་གྲུ་བཞི་ཙམ་དུ་བྱུག་པའི་ས་ལ་མདུན་དུ་ཁ་ཤར་དུ་བལྟས་ཏེ་ལྟོས་
པ་མེད་པར་དོར་བར་བྱའོ། །ཕྱི་རོལ་དུ་ལྷུང་ན་བགེགས་སྣ་ཚོགས་པས་དངོས་གྲུབ་མེད་དོ། །ནང་དུ་ལྷུང་ན་ནི་ཞི་བ་ལ་སོགས་པའི་ལས་གོ་བར་བྱའོ། །དེ་ནས་ཡི་གེ་ཧཱུཾ་ལས་བྱུང་བའི་དེ་ཉིད་བཟླས་པའི་ཆུ་འཐོར་འཐུང་གི་ཕྱི་ནས་ཨོཾ་ཧྲཱིཿབི་ཤུདྡྷ་དྷརྨཱ་སརྦ་པཱ་པཾ་ནི་ཤྩ
སྱ་བི་ཤོ་དྷ་ཡ་སརྦྦ་བི་ཀལྤ་ན་ཨཱ་པ་ན་ཡ་ཧཱུཾ་ཞེས་པ་སྔགས་ཀྱིས་འཁྱོར་བ་གསུམ་འཐུང་དུ་གཞུག་གོ། །དེ་ནས་ཁྲིད་དེ་བཅུག་ལ་སྐུད་པ་སུམ་སྒྲིལ་མདུད་པ་གསུམ་དང་ལྡན་པ་རང་གི་འདོད་པའི་ལྷའི་བཟླས་པ་བྱས་ལ་ལག་པར་བཅིང་ལ། ཡི་གེ་ཧཱུྃ་ལས་སྐྱེས་པའི་ཀུ་ཤ་
གསར་པ་མ་ཉམས་པ་ཅིག་སྔས་ཀྱི་ཕྱིར། གཞན་ས་བོན་ཧཱུྃ་ལས་སྐྱེས་པ་གདིང་བར་བྱིན་ལ། རང་གི་སྔགས་ཀྱིས་ཡང་དག་པར་བསྲུངས་ནས། ཆོས་བསྟན་པས་སྤྲོ་བ་བསྐྱེད་པའི་ཕྱིར་བརྗོད་དོ། །འཇིག་རྟེན་དུ་ནི་ཀུན་མཁྱེན་རྣམས། །ཨུ་དུམྺཱ་རའི་མེ་
ཏོག་བཞིན། །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་ངོ་། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གང་གིས་མཉམ་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །བསྐལ་པ་བྱེ་བ་དུ་མ་རུ། །སྔོན་
ཆད་སྡིག་པ་བྱས་པ་གང་། །དེ་ཀུན་དཀྱིལ་འཁོར་འདི་འདྲ་བ། །མཐོང་བས་ཟད་པར་འགྱུར་ཡིན་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་པ་སྨོས་ཅི་དགོས། །སྐྱོབ་པའི་གསང་སྔགས་བཟླས་ན་ནི། །གོ་འཕང་བླ་ན་མེད་པར་འགྱུར། །གང་
དག་སྤྱོད་པ་མཆོག་འདི་ལ། །བློ་གྲོས་ཤིན་ཏུ་མི་གཡོ་བ། །དེ་དག་གི་ནི་ངན་འགྲོ་དག །སྡུག་བསྔལ་ཀུན་འབྱུང་བཅད་པ་ཡིན། །བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་མཉམ་མེད་དེ་རིང་རྙེད། །གང་ཕྱིར་རྒྱལ་བ་སྲས་བཅས་པ། །བདག་ཉིད་ཆེན་པོ་ཀུན་གྱིས་

ནི། །བསྟན་པ་འདི་ལ་ཁྱེད་རྣམས་ཀུན། །ཡོངས་བཟུང་སྐྱེ་བཞིན་བར་གནས་པ། །དེ་ཕྱིར་ཁྱེད་རྣམས་ཐེག་ཆེན་ལ། །ལེགས་པ་ཉིད་དུ་སྐྱེ་བར་འགྱུར། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །ཁྱེད་རྣམས་དེར་ནི་
དོང་བསན། །རང་བྱུང་སྐལ་བ་ཆེན་པོ་པ། །འཇིག་རྟེན་ཐམས་ཅད་མཁྱེན་པ་ཡི། །དེ་བཞིན་གཤེགས་པ་རྣམས་སུ་འགྱུར། །ཞེས་སོ། །སློབ་མ་སློབ་དཔོན་ཉིད་དོན་གཉེར། །འཁོར་ལོས་མི་ལྡོག་དབང་བསྐུར་བ། །སྩལ་ནས་མགོན་པོས་བདག་ལ་ནི། །འཁོར་
ལོའི་ལྷ་ནི་དེ་ཉིད་དང་། །སློབ་དཔོན་གྱི་ནི་ལས་རྣམས་དང་། །སངས་རྒྱས་ཀུན་གྱི་དམ་ཚིག་དང་། །སྡོམ་དང་གསང་བ་དམ་པ་དག །སེམས་ཅན་ཀུན་གྱི་དོན་གྱི་ཕྱིར། །རྟག་ཏུ་སློབ་དཔོན་བདག་གྱུར་གསུངས། །ཞེས་སོ། །ཁྱད་པར་གྱི་སྡོམ་པ་ལན་དུ་བཅུག་ལ་རྨི་ལམ་དུ་གང་
ཅུང་ཟད་མཐོང་བ་ནང་པར་ད་ལ་སྨྲོས་ཤིག་ཅེས་བརྗོད་དོ། །ཁྱིམ་དག་ཏུ་སེང་གེའི་ཉལ་ཐབས་སུ་ཉལ་དུ་གཞུག་གོ། །དེ་དག་ནི་སློབ་མ་ལྷག་པར་གནས་པའོ། །དེ་ནས་བླ་མ་དཀྱིལ་འཁོར་གྱི་ཁང་པར་སློབ་དཔོན་རྣལ་འབྱོར་མ་བཞི་དང་ལྷན་ཅིག་ཏུ་ཞུགས་ཏེ། ཕྱོགས་སུ་
ཕུར་བུས་བཏབ་ནས། རྡོ་རྗེ་ར་བའི་ཕྱི་རོལ་དུ་དབང་ཆེན་དང་། རཾ་ལས་མེའི་དཀྱིལ་འཁོར་གྱི་ཕྱོགས་དང་མཚམས་བཅིང་བར་བྱས་ལ་སའི་ལྷ་མོ་ལ་མཆོད་དེ། སྐྱོབ་པ་སངས་རྒྱས་ཐམས་ཅད་ཀྱིས། །སྤྱོད་པའི་ཚུལ་དང་ཁྱད་པར་དང་། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་
ནི་དཔང་དུ་གྱུར། །ཤཱཀྱ་སེང་གེ་སྐྱོབ་པ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་གིས་བདུད་ཀྱི་སྟོབས། །ཕམ་པར་བྱས་ཏེ་དཀྱིལ་འཁོར་བྲི། །ཞེས་བརྗོད་དོ། །དེ་དག་ནི་ས་ལྷག་པར་གནས་པའོ། །དེ་ནས་ནམ་མཁར་བཞུགས་སུ་གསོལ་བའི་འཁོར་ལོ་
བློ་ཡིས་སྤྱན་དྲངས་ལ་བདུད་རྩི་ལྔ་ཉེ་བར་བྱུགས་པའི་དཀྱིལ་འཁོར་ལྔ་རྣམས་སུ་རང་ཇི་ལྟ་བ་བཞིན་བཅུག་ནས་ལེགས་པར་མཆོད་དོ། །མཆེ་བ་གཙིགས་པ་ཞེས་བྱ་བ་ལ་སོགས་པའི་ཚིགས་སུ་བཅད་པས་ཡང་དག་པར་བསྟོད་ནས་བདུད་རྩི་ལྔ་དབུལ་ལོ། །པུས་མོ་གཡས་

པ་ཕབ་ལ་ལག་ཏུ་བདུག་སྤོས་ཀྱི་སྣོད་ཐོགས་ཏེ། ལན་གསུམ་བརྗོད་པར་བྱ་སྟེ། བཅོམ་ལྡན་ཁྲག་འཐུང་ཆེན་པོ་མཆོག །རིག་སྔགས་རྒྱལ་ཁྱོད་ཕྱག་འཚལ་ལོ། །ཐུགས་རྗེའི་བདག་ཉིད་དཀྱིལ་འཁོར་ནི། །མགོན་པོ་བྲི་བར་འཚལ་ལགས་ན། །སློབ་མ་རྣམས་ལ་བརྩེ་བ་དང་། །
ཁྱེད་རྣམས་ལ་ཡང་མཆོད་པའི་ཕྱིར། །བཅོམ་ལྡན་བདག་ནི་གུས་པ་ལ། །དེ་ནི་བཀའ་དྲིན་མཛད་པར་རིགས། །འགྲོ་བའི་འཁོར་ལོ་བྱ་དོན་སྩོལ། །སངས་རྒྱས་རྣམས་ནི་བདག་ལ་དགོངས། །བྱང་ཆུབ་སེམས་དཔའ་འབྲས་གནས་དང་། །གང་གཞན་གསང་སྔགས་ལྷ་རྣམས་
དང་། །འཇིག་རྟེན་སྐྱོང་བའི་ལྷ་རྣམས་དང་། །རང་བྱུང་རྫོགས་བྱང་ལ་གནས་དང་། །ཡང་དག་རྡོ་རྗེའི་སྤྱན་མངའ་བའི། །བསྟན་པ་ལ་མངོན་དགའ་བ་ཀུན། །བདག་ནི་ཆེ་གེ་མོ་རྡོ་རྗེ། །དཔལ་ལྡན་ཁྲག་འཐུང་དཀྱིལ་འཁོར་ནི། །ཇི་ལྟར་ནུས་པའི་ཡོ་བྱད་ཀྱིས། །འགྲོ་བའི་
དོན་ཕྱིར་བྲི་ལགས་ན། །ཐུགས་བརྩེ་བར་ནི་དགོངས་ནས་སུ། །དེང་བདག་སློབ་མར་བཅས་པ་ལ། །དཀྱིལ་འཁོར་ལན་ཅིག་གྱུར་པ་ཀུན། །ཉེ་བ་རུ་ནི་མཛད་པར་རིགས། །ཞེས་སོ། །དེ་དག་ནི་འཁོར་ལོའི་དབང་པོ་ལྷག་པར་གནས་པ་དང་། སངས་རྒྱས་དང་བྱང་ཆུབ་སེམས་
དཔའ་རྣམས་ལྷག་པར་གནས་པའོ། །གལ་ཏེ་རབ་ཏུ་གནས་པར་བྱ་བའི་ལྷ་ཡོད་པར་གྱུར་ན། ལྷའི་བཀྲ་ཤིས་ཀྱི་ཚིགས་སུ་བཅད་པ་རྣམས་ཀྱིས་ཕྱི་དང་ནང་གི་དབང་བསྐུར་བ་སྦྱིན་པ་སྔོན་དུ་སོང་བས། དེ་ལ་ཡང་ཚིགས་སུ་བཅད་པ་འདི་ཉིད་གདོན་པ་སྔོན་དུ་འགྲོ་བའི་རབ་གནས་ཀྱི་
ཆོ་ག་ལས་བསྟན་པའི་རིམ་པ་ལས་ལྷག་པར་གནས་པར་བྱའོ། །འདི་ནི་རབ་ཏུ་གནས་པར་བྱ་བའི་ལྷ་ལྷག་པར་གནས་པའོ། །དེ་ནས་ཐིག་སྐུད་ཁ་དོག་ལྔ་བདུད་རྩི་ལྔས་བརླན་པ་སྣོད་ལྔར་གཞུག་པ་དཀྱིལ་འཁོར་གྱི་འཁོར་ལོ་ལྔའི་བདག་ཉིད་དབུ་བརྒྱན་དུ་བཞུགས་པའི་རྟག་པ་ལ་སོགས་པའི་
ངོ་བོ་ཉིད་རྣམས་ལ་ནམ་མཁར་བཞུགས་པའི་ཐུགས་ཀར་གནས་པ་དེ་དག་གི་ཁ་དོག་ཅན་གྱི་འོད་ཟེར་གྱིས་ཐིག་སྐུད་བལྟས་ལ། ཨོཾ་མེ་པྲ་ཡཙྪ་ཤ་ཤྭ་ཏ་སུ་ཏྲཾ་སཱ་ཙཀྲཱ་སུ་ཏྲཾ་སཱ་ཙཀྲཱ་སུ་ཏྲ་ཎཱ་ཧཱུཾ་ཞེས་རྟག་པའི་གནས་སུ་རིན་ཆེན་འབྱུང་ལྡན་ལ་སོགས་པ་ཡང་སྦྱར་ཏེ། གསོལ་བ་བཏབ་པ་དང་།

དེ་རྣམས་ཀྱིས་བཏང་བ་རབ་ཏུ་གཡོ་ཞིང་འབར་བའི་མིག་གིས་རྫི་མས་འདྲེན་པའི་འབར་བའི་ལྟ་བས་བཀུག་ལ་གཅིག་ཏུ་བྱས་ཏེ། ཨོཾ་ཨཱཿཨ་ནྱོ་ནྱཱ་ནུ་ག་ཏཱ་སརྦྦ་དྷརྨཱ་ཧཱུཾ། ཨོཾ་ཨཱཿསྥ་ར་སྥ་ར་ཨ་ནུ་པྲ་བིཥྚ་སརྦྦ་དྷརྨཱ་ཧཱུཾ། ཨོཾ་ཨཱཿཨཱ་ཏྱནྟ་ཨ་ནུ་པྲ་བིཥྚ་སརྦྦ་དྷརྨཱ་ཧཱུཾ།
ཞེས་བརྗོད་ཅིང་ལྔ་པོ་གཅིག་ཏུ་བསྒྲིལ་ལོ། །ཆུར་འཁོར་ལོ་ཉིས་འགྱུར་ལ་སྒོའི་ཉི་ཤུའི་ཆ་ཡོད་པ་སྟེ། སློབ་མ་རང་གི་འདོད་པའི་རྣལ་འབྱོར་པ། ཐིག་སྐུད་འཛིན་ཅིང་རྡོ་རྗེ་དྲིལ་བུ་འཛིན་པ་དང་ལྷན་ཅིག་ཏུ་བླ་མ་རྡོ་རྗེ་དང་དྲིལ་བུ་འཆང་བས་ཡེ་ཤེས་ཀྱི་ཐིག་སྐུད་གཡོན་པའི་
རྡོ་རྗེ་ཁུ་ཚུར་གྱིས་བཟུང་སྟེ། ཛཿཞེས་བྱ་བ་གསུམ་གྱིས་སློབ་མ་ལ་བཏང་ལ། སློབ་མས་ཀྱང་ཛཿཛཿཛཿཞེས་བརྗོད་ཅིང་འགྲོ་བས་སོང་སྟེ། ལྟེ་བའི་ཕྱོགས་སུ་བཞག་ལ། གནམ་ཐིག་གདབ་བོ། །དེ་བཞིན་དུ་འོག་གི་ཐིག་ཀྱང་གདབ་བོ། །ཨོཾ་བཛྲ་ས་མ་ཡ་སཱུ་ཏྲཾ་མཱ་ཏི་ཀྲ་
མ་ཧཱུཾ། ཐིག་གི་སྒྲས་སེམས་ཅན་གྱི་དོན་གྱི་ཕྱིར། དེ་བཞིན་གཤེགས་པ་རྣམས་བསྐུལ་བར་བྱའོ། །བླ་མ་ནུབ་ཀྱི་སྒོར་གནས་ཏེ། །ཤར་དུ་ཁ་བལྟས་ལ་ཚངས་ཐིག་གདབ་བོ། །དེ་ནས་གཡས་སྐོར་དུ་འགྲོ་བས་སོང་ནས་ལྷོའི་སྒོར་གནས་ཏེ། བྱང་དུ་ཁ་བལྟས་ལ་
ཚངས་ཐིག་གཉིས་པའོ། །དེ་ནས་དེ་བཞིན་དུ་སོང་ནས་མེའི་ཕྱོགས་ཀྱི་གྲྭར་གནས་ཏེ། བྱང་དུ་ཁ་བལྟས་ལ། ཤར་ཕྱོགས་ཀྱི་ཐིག་གོ། །དེ་ནས་དེ་བཞིན་དུ་སོང་ནས་རླུང་གི་ཕྱོགས་ཀྱི་གྲྭར་གནས་ཏེ། ལྷོར་ཁ་བལྟས་ལ་ནུབ་ཕྱོགས་ཀྱི་ཐིག་གོ། །དེ་ཉིད་དུ་གནས་ཏེ། ཤར་
དུ་གདོང་བལྟས་ལ་བྱང་ཕྱོགས་ཀྱི་ཐིག་གོ། །དེ་ནས་དེ་བཞིན་དུ་སོང་སྟེ། མེའི་ཕྱོགས་ཀྱི་གྲྭར་གནས་ལ་ནུབ་ཏུ་གདོང་བལྟས་ལ་ལྷོ་ཕྱོགས་ཀྱི་ཐིག་གོ། །དེ་ཉིད་དུ་གནས་ཏེ་རླུང་གི་ཕྱོགས་ཀྱི་གྲྭར་མངོན་དུ་ཕྱོགས་ཀྱི་གྲྭར་ཐིག་གོ། །དེ་ནས་དེ་བཞིན་དུ་སོང་ནས་བདེན་བྲལ་
གྱི་ཕྱོགས་ཀྱི་གྲྭར་གནས་ཏེ། དབང་ལྡན་གྱི་ཕྱོགས་སུ་གདོང་བལྟས་པས་གྲྭའི་ཐིག་གདབ་པོ། །སློབ་མས་གཡས་སྐོར་གྱི་རིམ་པས་སོང་ནས་བླ་མ་ལ་ཁ་བལྟས་ལ་དེ་དང་དེར་བསྡད་དོ། །གལ་ཏེ་ཐིག་འདེབས་སུ་ཡང་མེད་ན་ནི་དེའི་ཚེ་གྲོགས་མེད་པས་རང་ཉིད་ཀྱི་ཕུར་བུ་

ལ་བཏབ་ལ་དེ་བཞིན་དུ་ཐིག་གདབ་པོ། །དེ་ནས་ཐིག་སྐུད་ཉིས་བལྟབ་བྱས་ལ། དབང་ལྡན་གྱི་ཕྱོགས་ནས་བརྩམས་ཏེ། ཁོར་ཡུག་གི་གདབ་པོ། །མཚན་མིན་ནས་ནི་དངོས་མི་འགྱུར། །ཐིག་སྐུད་ཆད་ན་བླ་མ་འཆི། །ལྷག་ཆད་ལས་ཀྱིས་ནད་དུ་འགྱུར། །ཕྱོགས་རྨོངས་སློབ་མ་
རྣམ་པར་འཁོར། །ཟུར་བཞི་པ་ལ་སྒོ་བཞི་པ། །རྟ་བབས་བཞི་ཡིས་མཛེས་པ་སྟེ། །དོ་ཤལ་དོ་ཤལ་ཕྱེད་པས་སྤྲས། །དར་དང་མེ་ཏོག་ཕྲེང་བས་བརྒྱན། །སྟེགས་བུ་ལ་བརྟེན་གཟུངས་ཀྱི་ཚོགས། །མཆོད་པ་རྣམས་ཀྱིས་འབྲེལ་པ་སྟེ། །གྲྭ་ཡི་ཆ་ནི་ཐམས་ཅད་དང་། །
སྒོ་ཁྱུད་ཀྱི་ནི་མཚམས་རྣམས་སུ། །རྡོ་རྗེ་རིན་ཆེན་རྣམས་ཀྱིས་བརྒྱན། །རླུང་གིས་བསྐྱོད་པ་དྲིལ་བུར་བཅས། །བ་དན་རྣམས་ཀྱི་ཕྱི་ཡི་གྲྭར། །ཕྱི་ཡི་དཀྱིལ་འཁོར་ཐིག་གདབ་བོ། །དེ་ཡི་ནང་དུ་པདྨ་ནི། །འདབ་མ་བརྒྱད་པས་ཉེ་བར་མཛེས། །སྙིང་པོ་གེ་སར་དང་ལྡན་པ། །ཕྱི་ཡི་འཁོར་
ལོའི་ཕྱེད་དུ་ནི། །ཞེས་བྱ་བ་ལ་སོགས་པ་སྦྱར་བ་དེ་དག་ནི་ཡེ་ཤེས་ཀྱི་ཐིག་ཏུ་བྱ་བ་དང་གདབ་པའོ། །དེ་བཞིན་དུ་རིན་པོ་ཆེ་ལས་བྱུང་བའམ། ལྕགས་ལྔ་ལས་བྱུང་བའམ། ཁམས་ལས་བྱུང་བའམ། ཡང་ན་འབྲས་སཱ་ལུ་ལས་བྱུང་བའམ། དམར་པོ་སོ་ཕག་
ཚོགས་པའང་རུང་། སོལ་བ་ལས་བྱས་དགེ་བ་སྟེ། །དེ་ལྟར་སྦྱར་བའི་རྡུལ་ཚོན་ལྔ། །སྣོད་ལྔར་བཞག་པ་ལ་རྟག་པ་ལ་སོགས་པ་བཀོད་དེ། །ཡེ་ཤེས་ཀྱི་རྡུལ་ཚོན་དེ་བཞིན་དུ་བཀུག་ནས་གཟི་བརྗིད་བསྐྱེད་ལ། ཨོཾ་བཛྲ་ཙི་ཏྲ་ས་མ་ཡ་ཧཱུཾ། ཞེས་པ་འདིས་བླ་མས་
མངོན་པར་བསྔགས་ནས་འཁོར་ལོའི་ནང་དུ་བཞག་ལ། ཤར་དུ་ཁ་བལྟས་ཏེ། དབང་ལྡན་གྱི་གྲྭ་ནས་གཡས་སྐོར་གྱི་རིམ་པས་རྡོ་རྗེ་ཁུ་ཚུར་གཡོན་པས་སོ་སོར་ཐུགས་རྗེའི་སྟོབས་ཀྱིས་ང་རྒྱལ་དང་ལྡན་པས་བགེགས་འཇིག་པར་བྱེད་ཅིང་རྡུལ་ཚོན་དགྱེ་བར་
བྱའོ། །ཕྱི་ནས་བསྒྲུབ་པའི་གྲོགས་མཆོག་གི་བྱའོ། །དཀར་པོ་སེར་པོ་དེ་བཞིན་དམར། །ལྗང་གུ་དང་ནི་ནག་པོ་ཉིད། །མཉམ་ཞིང་གཡས་སྐོར་ཡོ་མིན་དང་། །མ་ཆད་པར་ནི་རི་མོ་དགྱེ། །སྦོམ་པར་གྱུར་ན་ནད་དུ་འགྱུར། །ཕྲ་མོ་ཡིས་ནི་ནོར་འཇོམས་ཏེ། །

ཡོན་པོ་རྣམ་སྣང་ཆད་པ་ཡིས། །བླ་མ་དག་དང་སློབ་མ་འཆི། །ཤར་ཕྱོགས་སུ་ནི་དཀར་པོ་ཆེ། །ལྷོར་ནི་སེར་པོ་སྣང་བ་སྟེ། །ནུབ་ཀྱི་ཆ་ནི་དམར་པོའོ། །བྱང་དུ་ལྗང་གུ་ཡང་དག་ལྡན། །དབུས་ཀྱི་ས་གཞི་ཆ་དེ་ནི། །ཨིནྡྲ་ནཱི་ལ་མཚུངས་
པའི་འོད། །འདི་དག་ཚོན་གྱི་རིམ་པ་སྟེ། །རྣལ་འབྱོར་མ་རྣམས་ནི་རྟག་པ་ལ་སོགས་པའི་ངོ་བོ་ཡིན་པའི་ཕྱིར་དང་། འདྲེན་པ་མི་བསྐྱོད་པའི་རང་བཞིན་ཡིན་པའི་ཕྱིར་རོ། །སྔར་བསྟན་པའི་མདོག་དང་མཚན་མ་འཛིན་པ། སྣ་ཚོགས་པ་མངའ་བ། སྔར་བསྟན་
པའི་གནས་རྣམས་སུ་ལྷ་ལྔ་པོ་དག་མཁས་པས་བྲིའོ། །ཡང་ན་གཞན་དག་ན་རེ། རང་གི་བླ་མའི་རིམ་པ་གསལ་བར་བྱས་པས་དབུས་དང་ཕྱོགས་བཞིར་ཤིན་ཏུ་གསལ་བར་བྱ་བའི་མཚན་མ་དགོད་པ་ཡིན་ནོ་ཞེས་ཟེར་ཏེ། དེ་བཞིན་དུ་འདབ་མ་བརྒྱད་ཀྱིས་
བསྐོར་བའི་ཆུ་སྐྱེས་མཚུངས་པ་མེད་པ་ལ། ཕྱོགས་རྣམས་ནི་དམར་པོ། མཚམས་རྣམས་ནི་ཇི་ལྟར་མཛེས་པས་སྤྲས་པའོ། །ཕྱོགས་ཀྱི་འདབ་མར་རྡོ་རྗེ་ནོར་བུའི་སྙེ་མ་དང་། སྣ་ཚོགས་པདྨ་དེས་འབར་བའི་རལ་གྲི་སྟེ། ལྟེ་བར་པདྨའི་སྣོད་ནི་འོང་ཆགས་པ་དག་ཏུའོ། །
འདི་ནི་བྲི་བའི་དཀྱིལ་འཁོར་ཆོ་གས་བྲི་བར་བྱའོ། །ཉི་མ་གསུམ་པ་ལ་མཚན་མ་དགོད་པ་ལ་སོགས་པ་རྡུལ་ཚོན་དགྱེ་བར་གྲུབ་པ་དང་། ཐུགས་རྗེའི་སྟོབས་ཀྱིས་རྣལ་འབྱོར་གྱིས་ཞུགས་ལ། སྐོར་བ་བྱེད་ཅིང་ཆད་པ་དང་ལྷག་པའི་ཉེས་པ་ཞི་བར་བྱ་བའི་ཕྱིར་བལྟས་ལ།
རྒྱས་པའི་ཡང་རུང་སྟེ་སྦྱིན་སྲེག་བྱའོ། །གསེར་རམ་ཟངས་ལས་གྲུབ་པའི་འམ་ནི་མཆོད་སྦྱིན་གྱི་ཤིང་ལས་བྱས་པའི་དགང་གཟར་ཏེ། དེའི་དབྱུག་པ་ནི་སྐྱེས་བུ་ཚད་དང་ལྡན་པའི་མཐེ་བོའི་སོར་ཉི་ཤུ་རྩ་བཞི་པ་དད་པ་གཟུང་བར་རུང་བ། དེའི་སྟེང་དུ་སོར་བཞི་པའི་ཁ་ཟུར་བཞི་པ་སོར་
གཉིས་དམའ་བར་བྲིས་པ། རྡོ་རྗེ་རྩེ་ལྔ་པ་སོར་གཉིས་པས་བྱིན་གྱིས་བརླབས་པ། རོ་འབབ་པའི་བུ་གར་སོར་གཅིག་ཙམ་མམ། །མཐེའུ་ཆུང་ཙམ་སྟེ། དེའི་སྟེང་དུ་པདྨའི་རྣམ་པ་ཆུར་སོར་བརྒྱད་པ་ཞེང་དུ་ཐད་ཀར་སོར་བཞི་པ། སོར་གཉིས་བརྐོས་པས་རྡོ་རྗེ་

རྩེ་གསུམ་པ་སོར་བཞི་པ་ཅན། དབྱུག་པའི་འོག་ཏུ་རྡོ་རྗེ་རིན་པོ་ཆེ་སོར་དྲུག་པ་ཅན་ནོ། །བླུགས་གཟར་ནི་ཁྲུ་གང་ཙམ་པ་ཁ་པདྨའི་ལོ་མ་ལྟ་བུ་རྒྱར་སོར་གཉིས་པ་ལ། སོར་གཅིག་དམའ་བར་བྲིས་པའི་དབུས་སུ་རྡོ་རྗེ་རྩེ་ལྔ་པ་སོར་གཅིག་ཙམ་ཡོད་པ། དབྱུག་
པའི་འོག་ཏུ་རྡོ་རྗེ་རིན་པོ་ཆེ་ཅན་ནོ། །སོར་མོ་ལྔའི་སྦྱོར་བས་ཀྱང་དགང་གཟར་བླུགས་གཟར་བྱ་ཞིང་། སོར་མོ་གསུམ་གཅེར་བས་སྲེག་བླུགས་ཅིག་བྱའོ། །དཀྱིལ་འཁོར་གྱི་ཁང་པའི་ཤར་ཕྱོགས་སུ་ཞི་བའི་ཐབ་ཁུང་དང་། དབང་གི་ཐབ་ཁུང་བྱའོ། །ལྷོར་རྒྱས་པ་དང་། ནུབ་ཏུ་
དགུག་པ་དང་། བྱང་དུ་དྲག་ཤུལ་སྤྱོད་པའི་ཐབ་ཁུང་བྱའོ། །ལས་ཐམས་ཅད་པའི་ཐབ་ཁུང་ནི་རྒྱར་ཁྲུ་གང་ཙམ། ཁྲུ་ཕྱེད་བྲུས་པ་ཟླུམ་པོ་པདྨ་རྒྱས་པ་ལྟ་བུའི་རྣམ་པ། ཁ་ཁྱེར་ཅན། ཕྱི་རོལ་རྡོ་རྗེའི་ཕྲེང་བས་བསྐོར་བ། དེའི་ནང་དུ་རིམ་པ་བཞིན་དུ་ཐོད་པ་དང་། རྡོ་རྗེ་དང་
རིན་པོ་ཆེ་དང་། སྣ་ཚོགས་པདྨ་དང་། རལ་གྲི་བྱིན་གྱིས་བརླབས་པ། བདུད་རྩི་ལྔའམ། སྣུམ་ཆེན་ནམ། བའི་མར་རམ། ལས་དང་རྗེས་སུ་མཐུན་པའི་སྦྲང་རྩི་དང་བདུད་རྩིར་བཅས་པའི་ཡམ་ཤིང་དང་། ཏིལ་དང་། སཱ་ལུ་དང་། ཟན་དང་། ནས་དང་།
འོ་མ་དང་། ཞོ་དང་། འབྲས་ཡོས་དང་། ཀུ་ཤ་སྔོན་པོ་དང་། དཱུར་བ་དང་། ཙུ་ཏའི་འོ་མ་དང་། ཙནྡན་གྱི་ཕྱེ་མ་དང་། མེ་ཏོག་པྲི་ཡང་ཀུ་དང་། མེ་ཏོག་དཀར་པོ་དང་། སེ་འབྲུ་དང་། དྲི་ཞིམ་པོ་དང་ལྡན་པ་དང་། ཇི་ལྟར་ནུས་པའི་སྲེག་རྫས་རྣམས་
སོ། །དེ་ལ་ཡམ་ཤིང་ནི་བལ་ཤ་དང་། ཨུ་དུམྦཱ་ར་དང་། ཀསྨི་རི་དང་། ཨ་ཤྭཏྠ་དང་། པླཀྵ་དང་། ཤ་མི་དང་། ནྱ་གྲོ་དྷ་ལ་སོགས་པ་འོ་མ་ཅན་གྱི་ཤིང་ལས་བྱུང་བ། རློན་པ་མཉམ་པར་བཅད་པ། མཐོ་གང་ཙམ་མམ། མཐེའུ་ཆུང་ཙམ་རྩེ་
མོའི་ཆ་ལས་བྱུང་བ། སྦྲང་རྩི་དང་འོ་མས་རྩེ་མོ་གཉིས་བྱུགས་ལ། བསྲེག་པར་བྱ་བ་ཡིན་ནོ། །རྙིང་པ་དང་། གས་པ་དང་། ཁོང་སྟོང་དང་། ཆག་པ་དང་། ཤུན་པ་མེད་པ་དང་། ཐུང་བ་དང་། ཡོ་བ་དང་། རྩེ་མོ་ཁ་བྲག་པ་དང་། འཕྲས་པ་དང་།

སྦོམ་པ་དང་། རིང་པ་དང་། སྲིན་བུས་ཟོས་པ་དང་། སྲོག་ཆགས་དང་བཅས་པ་ཉིད་ནི་དོར་བར་བྱ་བ་ཡིན་ནོ། །བུད་ཤིང་ནི་འོ་མ་ཅན་གྱི་ཤིང་དེ་དག་ཉིད་སྲོག་ཆགས་མེད་པའམ། དགོན་པའི་བ་ལང་གི་ལྕི་བ་སྐམ་པོ་ཡིན་ཏེ།
ཐབ་ཁུང་བས་དམའ་བའོ། །ཞི་བ་དང་། རྒྱས་པ་དང་། དབང་གི་ལས་ལ་འོ་མ་ཅན་གྱི་ཤིང་གཙུབས་པ་ལས་བྱུང་བའི་མེའམ། རྒྱུན་བཞག་གི་མེའམ། དགེ་འདུན་གྱི་ཚང་བང་ནང་གི་མེ་ནི་ཞི་བ་དང་། རྒྱས་པའི་ལས་ལའོ། །རྒྱས་པ་ལ་ནི་རྒྱལ་པོའམ་ཞང་
བློན་གྱི་ཁྱིམ་ནས་བྱུང་བའམ། ནགས་ཚིག་པའམ། དགེ་འདུན་གྱིའོ། །དབང་ལ་ནི་རྗེའུ་རིགས་དང་རྗེའུ་རིགས་མིན་པའི་ཁྱིམ་ནས་བྱུང་བའོ། །དགུག་པ་ལ་ནི་གར་མཁན་དང་། སློང་མོ་པའི་ཁྱིམ་གྱིའོ། །མ་རུངས་པ་ནི་དུར་ཁྲོད་ཀྱི་རུས་པ་དང་།
རྡོ་བ་དང་། གཏུམ་པོ་ལ་སོགས་པའི་ཁྱིམ་ནས་བྱུང་བའོ། །མཆོད་ཡོན་གྱི་སྣོད་ནི་གསེར་རམ། དངུལ་ལམ། ཟངས་སམ། རྡོའམ། ཤིང་ངམ། སའི་རང་བཞིན་དུ། དུང་ངམ། ཉ་ཕྱིས་སམ། ལོ་མ་བསྐྱོད་པའང་རུང་སྟེ། མེ་ཏོག་དང་།
ཏིལ་དང་། ཀུ་ཤ་དང་། འབྲས་ཡོས་དང་ལྡན་པའི་དྲི་ཞིམ་པོའི་ཆུ་ཅན་ནོ། །ཞི་བ་ལ་སོགས་པའི་ལས་དང་རྗེས་སུ་མཐུན་པར་ལྷའི་ང་རྒྱལ་དེ་དང་མཐུན་པར་བྱས་ཤིང་བརྒྱན་ལ། ལས་དེ་ལ་བསྟན་པའི་ཕྱོགས་སུ་ཁ་བལྟ་བ་དང་། དེ་ལ་བརྗོད་པའི་སྟན་ལ་
སོགས་པའི་བྱེ་བྲག་དང་། རྡོ་རྗེ་སློབ་དཔོན་གྱི་གཡོན་ཕྱོགས་སུ་མཆོད་ཡོན་ལ་སོགས་པ་བཀོད་དེ། གཡས་སུ་ལས་དང་མཐུན་པའི་བསྲེག་བྱ་ལ་སོགས་པའི་ཡོ་བྱད་ཐམས་ཅད་བཞག་ལ། ལྷག་པའི་བསམ་པ་དེ་དང་། དེ་བཞིན་དུ་བྱས་ཏེ། རྫས་དེ་
དག་བསྲེགས་པ་སྔོན་དུ་འགྲོ་བས་དེ་དང་དེའི་ལས་བྱའོ། །དེ་ལ་པདྨར་གནས་པའི་ས་བོན་ཧཱུྃ་ལས་བྱུང་བའི་རྡོ་རྗེ་མེའི་སྙིང་གར་རཾ་དང་བཅས་པའི་སུམ་མདོའི་རིས་ཅན་གྱིས་མཚན་པ། ཕྱག་དྲུག་པ་སེར་པོ། སེར་པོ་དང་། སྔོན་པོ། དཀར་པོ་ཞལ་གསུམ་པ། རྩ་བའི་

ཕྱག་དག་གིས་ཤེས་རབ་མ་ལ་འཁྱུད་པ་དང་། ཕྱག་གཡས་པ་དང་། ཅིག་ཤོས་གཞན་དག་གིས་མི་འཇིགས་པ་དང་། ཕྲེང་བ་དང་། ཐག་གུ་དང་། དབྱུག་པ་འཛིན་པ་དང་། ཡེ་ཤེས་ཀྱི་མེ་ལྷ་ཆོ་ག་བཞིན་དུ་སྤྱན་དྲངས་པ་ལ་སོགས་པ་སྔོན་དུ་འགྲོ་
བ་ཅན་བསམས་ལ་སྦྱིན་སྲེག་བྱའོ། །དགང་གཟར་དང་བླུགས་གཟར་གྱི་ཁ་ལ་འདོད་པའི་ལྷའི་ས་བོན་རབ་ཏུ་འབར་བར་བསམས་ཏེ། བྱིན་ཟའི་ཞལ་དུ་ཡང་ཡི་གེར་བཀོད་ལ་དགང་བླུགས་དབུལ་ལོ། །དེའི་སྙིང་གར་ཡང་ལྷའི་འཁོར་ལོ་བསམས་ལ་བདུད་
རྩིའི་བདག་ཉིད་ཅན་གྱི་གཏོར་མ་རྣམས་ཀྱིས་ཚིམ་པར་བྱའོ། ཨོཾ་ཨགྣ་ཡེ་སྭཱ་ཧཱ། ཞེས་པ་ནི་ཡམ་ཤིང་བསྲེགས་པ་ཐམས་ཅད་དང་མར་གྱིའོ། །ཨོཾ་སརྦྦ་པཱ་པཾ་ད་ཧ་ན་བཛྲཱ་ཡ་སརྦྦ་པཱ་པཾ་ད་ཧ་སྭཱ་ཧཱ། ཏིལ་གྱིའོ། །ཨོཾ་བཛྲ་ཨཱ་ཡུ་ཥེ་སྭཱ་ཧཱ། དཱུར་
བའིའོ། །ཨོཾ་བཛྲ་པུཥྚ་ཡེ་སྭཱ་ཧཱ། འབྲས་ཐུག་པོ་མཆུ་མ་གྲུགས་པའིའོ། །ཨོཾ་བཛྲ་སཾ་པ་དེ་སྭཱ་ཧཱ། ཞོ་ཟན་གྱིའོ། །ཨོཾ་ཨ་པྲ་ཏི་ཧ་ཏ་བཛྲཱ་ཡ་སྭཱ་ཧཱ། ཀུ་ཤའིའོ། །རྒྱས་པའི་མཐའ་མར་ཡི་གེ་ཨོཾ་བསྐུལ་བ་དང་ལྡན་པའོ། །ཞི་བའི་མཐར་ཡི་གེ་སྭཱ་ཧཱ། བསྐུལ་
བ་དང་ལྡན་པའོ། །དབང་ལ་ནི་ཡི་གེ་ཧོཿའོ། །དགུག་པ་ལ་ནི་ཡི་གེ་ཛཿའོ། །དབྱེ་བ་ལ་ནི་ཡི་གེ་ཧཱུཾ་ངོ་། །དགའ་བ་ལ་ནི་ཡི་གེ་ཧཱུཾ་ངོ་། །དྲག་ཤུལ་སྤྱོད་པ་ལ་ནི་ཡི་གེ་ཕཊ་དེ། འོན་ཀྱང་བསྐུལ་བའང་བརྗོད་པར་བྱ་སྟེ། རིམ་པ་འདིས་ལྷ་ཐམས་ཅད་ཚིམ་པར་བྱའོ། །འབར་
བའི་མཚན་མ་རྣམས་བརྟག་པར་བྱ་སྟེ། དབང་པོའི་གཞུ་འདྲ་བ་ཁ་དོག་དཀར་བ་དང་། བྱུ་རུ་བཅག་པ་ལྟ་བུ་དང་། །གཡས་སུ་འཁྱིལ་ཞིང་ཤིན་ཏུ་སྣུམ། །ལྷམ་བུ་ཆུ་གཤེར་མཚུངས་པའི་འོད། །ལེ་བརྒན་རྩི་འདྲ་མར་གྱི་ནི། །སྲེག་བླུགས་བླུགས་གཟར་
རྣམ་པ་དང་། །རྡོ་རྗེ་རྩེ་གསུམ་པ་དང་། དུང་དང་། པདྨ་དང་། ཉ་དང་། དཔལ་བེའུ་དང་། རྔ་ཡབ་དང་། རྒྱལ་མཚན་དང་། གདུགས་ལ་སོགས་པ་དང་། བུམ་པ་དང་། གཡུང་དྲུང་གི་རྣམ་པ་འབྱུང་བ་དང་། པི་ཝང་དང་། རྫ་རྔ་ལྟར་ཟབ་པ་དང་། དྲི་ཞིམ་པ་

དང་ཤིན་ཏུ་ཡིད་འཕྲོག་པ་དང་། གསེར་དང་། དངུལ་ལྟར་སྣང་བ་དང་། དུ་བ་མེད་པ་དང་། འབར་བ་དང་། ཉི་མ་ལྟར་སྣང་བ་དྲི་མ་མེད་པ་སྟེ། དེ་དག་ལ་སོགས་པ་འབར་བའི་མཚན་ཉིད་དགེ་བ་རྣམས་ཤེས་པར་བྱའོ། །མཚན་
མ་ངན་པ་ནི་དཔལ་ཧེ་རུ་ཀའི་རྣལ་འབྱོར་ཉིད་ཀྱིས་མན་ངག་ཇི་ལྟ་བར་བགེགས་མེད་པར་བྱའོ། །མཐར་ནི་དགང་བླུགས་ཕུལ་ལ་བསང་གཏོར་དང་། འཐོར་འཐུང་དང་། མཆོད་ཡོན་འབུལ་བ་སྔོན་དུ་བྱ་བས་ལེགས་པར་མཆོད་དེ། ཡང་དག་པར་བསྟོད་ལ།
གཤེགས་སུ་གསོལ་བར་བྱའོ། །སྲེག་རྫས་ལྷག་མར་སླར་ཡང་མེ་ལ་སྦྱིན་སྲེག་བྱའོ། །ཡོད་སྲིད་ན་ཞི་བ་ལ་སོགས་པ་དོན་དུ་གཉེར་བའི་སྐྱེ་བོ་དེ་གཡོན་ལོགས་སུ་བཞག་ལ། དེའི་མཐེ་བོང་གཡས་པ་བཟུང་ལ་གཡས་སུ་བསྐོར་བའི་ཚུལ་གྱིས་བྱུར་བསལ་
བ་སྔོན་དུ་བྱས་ནས་ཆེ་གེ་མོ་ལ་ཞི་བར་གྱིས་ཤིག་ཅེས་བྱ་བ་ལ་སོགས་པའི་བསྐུལ་ཚིག་དང་ལྡན་པས་བདུན་ཕྲག་གསུམ་སྲེག་བླུགས་ཕུལ་ཏེ། དེ་ནས་ཡོན་བླངས་ལ་མེ་ལྷ་ཡང་གཤེགས་སུ་གསོལ་བར་བྱའོ། །དེའི་རྗེས་ལ་རྣམ་པར་རྒྱལ་བའི་བུམ་པ་ཤར་ངོས་སུ་
གཞག་སྟེ། དེའི་སྟེང་དུ་བུམ་པ་ཐམས་ཅད་ནས་ཆུ་ཅུང་ཟད་བླུགས་པའི་པདྨའི་སྣོད་ས་ཧ་ཀ་རའི་ལོ་འདབ་དང་ལྡན་པ་ཞིག་ཆུའི་དབང་བསྐུར་བའི་དོན་དུ་གཞག་གོ། །དེ་དང་ཉེ་བར་མན་ཇི་ལ་སོགས་པ་ལ་གནས་པའི་པདྨ་བྷནྡྷ་གཞག་བདུད་རྩི་ལྔ་དང་ལྡན་པ་ཞིག་བདུད་རྩི་ལྟུང་
བའི་དོན་དུའོ། །སྣ་ཚོགས་མཁའ་འགྲོ་མའི་བུམ་པ་ཡང་འཇུག་པར་འདོད་པ་རྣམས་ཀྱི་གཡས་ལོགས་སུ་དཀྱིལ་འཁོར་གྱི་ཁང་པའི་སྒོ་དང་ཉེ་བར་རྩྭ་ཀུ་ཤའི་ཆུན་པོ་དང་ལྡན་པ་ཞིག་བསང་གཏོར་གྱི་དོན་དུ་གཞག་གོ། །བུམ་པ་གཞན་དག་ནི་ཇི་ལྟར་མཛེས་པའོ། །
སློབ་དཔོན་གྱི་གདན་ཡང་སྒོ་དང་ཉེ་བར་འདིང་ངོ་། །དེ་ནས་མན་ངག་ཇི་ལྟ་བ་བཞིན་དཀྱིལ་འཁོར་བསྒྲུབ་པར་བྱས་ནས་བློ་ལ་ཡོད་པ་ལ་སོགས་པའི་མཆོད་པའི་མཐར། མགོན་པོས་དངོས་གྲུབ་ཐམས་ཅད་ཡོད་པར་མཛོད་ཅིག་ཅེས་གསོལ་བ་གདབ་བོ། །དེའི་

རྗེས་སུ་ཕྱི་རོལ་དུ་བྱུང་སྟེ། འདིར་བསྟེན་པའི་ཆོ་གས་གཏོར་མ་བྱིན་ནས། བླ་མས་སློབ་མ་བཞིན་དུ་བློས་ཞུགས་ལ། དབང་བསྐུར་བ་ལ་སོགས་པ་དང་། སོ་སོར་ཕྱག་བཙལ་བ་ལ་སོགས་པ་བྱས་ཏེ། བདག་ནི་སློབ་དཔོན་དུ་གྱུར་ནས་ཐམས་ཅད་བྱའོ་ཞེས་རང་གི་
བློས་མོས་པར་བྱའོ། །དེ་ཁོ་ན་ཉིད་དང་འཁོར་ལོ་ཡང་གཟུགས་བརྙན་ལྟར་ཆོས་ཉིད་ཀྱིས་ཤེས་པར་བྱས་ནས་གདོན་ཏེ། ནམ་མཁའ་ལས་བྱུང་མཚན་ལྡན་ཕྱིར། །ཐོག་མ་ཐ་མ་མེད་པའི་མཆོག །སེམས་དཔའ་རྡོ་རྗེ་ཆེ་རང་བཞིན། །ཧེ་རུ་ཀ་དེང་བདག་གྲུབ་མཛོད། །
ཀུན་མཆོག་དངོས་གྲུབ་ཆེན་པོ་སྟེ། །དབང་ཕྱུག་ཆེན་པོ་ལྷག་པའི་ལྷ། །རྡོ་རྗེ་འཛིན་པ་ཀུན་གྱི་རྒྱལ། །མི་འགྱུར་མཆོག་ཏུ་བདག་གྲུབ་མཛོད། །ཉེས་པ་མི་མངའ་རྟག་པ་ཁྱོད། །འདོད་ཆགས་ཀུན་གྱི་རྗེས་ཆགས་པ། །འདོད་ཆགས་ཆེན་པོ་དགའ་བ་ཆེ། །
བཅོམ་ལྡན་དེ་ཉིད་ཀྱིས་གྲུབ་མཛོད། །ཤིན་ཏུ་དག་པ་ཀུན་གྱི་མཆོག །གཟོད་ནས་གྲོལ་བ་དེ་བཞིན་གཤེགས། །ཀུན་དུ་བཟང་པོ་ཀུན་བདག་ཉིད། །བྱང་ཆུབ་སེམས་དཔར་བདག་གྲུབ་མཛོད། །ཀུན་མཆོག་དངོས་གྲུབ་ཆེན་པོ་སྟེ། །དབང་ཕྱུག་
ཆེན་པོ་ཕྱག་རྒྱ་མཆོག །གྲུབ་པའི་རྡོ་རྗེ་ཆེར་བསྟོད་པ། །རྡོ་རྗེ་སྙེམས་བདག་བདག་མཛོད་ཅིག །སེམས་ཅན་ཀུན་གྱི་ཡིད་ཁྱབ་པས། །སེམས་ཅན་ཀུན་གྱི་སྙིང་ལ་བཞུགས། །སེམས་ཅན་ཀུན་གྱི་ཡབ་ཉིད་དེ། །དམ་ཚིག་མཆོག་གི་འདོད་པ་ཡིན། །
བདེ་བ་གང་གིས་ཡེ་ཤེས་མཆོག །ཤེས་རབ་ཐབས་ཀྱི་དཀྱིལ་འཁོར་ཡིན། །བདེན་པ་དེ་ཡིས་བདག་ལ་མགོན། །ཁྱོད་ཀྱིས་འདོད་པ་ཡོངས་རྫོགས་མཛོད། །ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོགས་པ་མེད། །གཟུང་དུ་མེད་
ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་འབྱུང་། །དེ་བཞིན་ཁོ་ན་ཉིད་ལས་སྐྱེས། །བདེན་པ་འདི་ཡིས་དཀྱིལ་འཁོར་དུ། །གཟུགས་བརྙན་གསལ་བར་སློབ་མ་ནི། །ཀུན་གྱིས་དྲི་མེད་མཐོང་བར་ཤོག །དེ་ནས་སློབ་མ་མཆོད་པར་འོས་པའི་ཆ་བྱད་

ཅན་ཕྱི་རོལ་དུ་གདོང་གཡོགས་དམར་པོས་བཅིངས་ལ། །མེ་ཏོག་གཅིག་ཏུ་དཀར་བ་ཐལ་མོས་བཟུང་ལ། སྐྱེས་བུ་མཁས་པས་ཁྲིད་དེ་ཡོལ་བ་གཉིས་ཀྱི་བར་དུ་བཅུག་ལ། བླ་མས་ཧཱུཾ་ཞེས་པས་ཡོལ་བའི་སླར་ནས་བཏེག་ལ། ཀུ་
ཤའི་ཆུན་པོའི་ཆུས་བསངས་ལ། སྡུག་པ་ཁྱོད་སུ་ཡིན་ཞེས་དྲི་བར་བྱའོ། །སྡུག་པ་ངན་བུ་ནི་སྐལ་བ་བཟང་པོ་བ་ཡིན་ནོ་ཞེས་བརྗོད་པ་དང་ལྡན་པ་ལ་ལེགས་པར་མཆོད་དེ་དཀྱིལ་འཁོར་གྱི་ཁང་པར་གཞུག་པར་བྱའོ། །ཨོཾ་སརྦ་ཡོ་ག་ཙིཏྟ་ཨུཏྤཱ་ད་ཡཱ་མི་
ཞེས་བྱ་བས་བྱང་ཆུབ་དམ་པར་སེམས་བསྐྱེད་དུ་བཅུག་ནས། དེའི་སྙིང་གར་ས་བོན་ལས་རྡོ་རྗེ་བསམ་སྟེ། བརྗོད་པར་བྱའོ། །སུ་ར་ཏ་ས་མ་ཡ་སྟྭཾ་ཧོ་སིདྡྷྱ་བཛྲ་ཡ་ཐཱ་སུ་ཁཾ། དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབ་པར་འགྱུར་གྱིས། དེ་
བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བའི་དཀྱིལ་འཁོར་དུ་མ་ཞུགས་པ་རྣམས་ལ་སྨྲ་བར་མི་བྱའོ། །མ་དད་པ་ཡང་མ་བྱེད་ཅིག །ཛ་ཧཱུཾ་དག་གིས་བློས་བཀུག་ནས་བཅུག་སྟེ། དེ་ལ་ཨ་ཁཾ་བཱི་ར་ཧཱུཾ་ཞེས་གདོང་བཅིང་བཅུག་ནས་དཀྱིལ་འཁོར་
གྱི་སྒོར་ཁྲིའི་སྟེང་དུ་བཞག་ལ། དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱིས། ངས་ཁྱོད་ལ་ཡེ་ཤེས་གང་གིས་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱང་ཐོབ་ན། དངོས་གྲུབ་གཞན་ལྟ་སྨོས་ཀྱང་ཅི་དགོས། །དེ་ལྟ་བུའི་རྡོ་རྗེའི་
ཡེ་ཤེས་བསྐྱེད་པར་བྱ་ཡིས། ཁྱོད་ཀྱིས་དཀྱིལ་འཁོར་མ་མཐོང་བའི་མདུན་དུ་མ་སྨྲ་ཞིག །ཁྱོད་རང་གི་དམ་ཚིག་ཉམས་པར་གྱུར་ཏ་རེ་ཞེས་བརྗོད་དེ། །དེའི་སྙིང་གར་རྡོ་རྗེ་བཞག་ལ། རྡོ་རྗེ་སེམས་དཔའ་རང་ཉིད་ནི། །དི་རིང་ཁྱོད་ཀྱི་སྙིང་ལ་ཞུགས། །གལ་ཏེ་
ཚུལ་འདི་སྨྲས་ན་ནི། །ད་མ་ཐག་ཏུ་དྲལ་ཏེ་གཤེགས། །ཞེས་བརྗོད་དོ། །པདྨའི་སྣོད་ནས་བདུད་རྩི་ལྔ་སྲིན་ལག་དང་མཐེ་བོས་དེའི་ཁར་བྱིན་ནས། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུང་ལས་དངོས་གྲུབ་སྟེ། །རྡོ་རྗེ་བདུད་

རྩིའི་ཆུ་འཐུང་ཤིག །ཨོཾ་བཛྲོ་ད་ཀ་ཐཱ་ཞེས་བརྗོད་ལ་འཐུང་དུ་གཞུག་གོ། །སློབ་མའི་དམ་བཅའ་བརྟན་པར་བྱ་བའི་ཕྱིར་འདི་སྐད་བརྗོད་དོ། །དེང་ནས་བརྩམས་ཏེ་ཁྱོད་ཀྱིས་ཕྱག་ན་རྡོ་རྗེ་ང་ཡིན་གྱིས། ངས་འདི་བྱོས་ཤིག་ཅེས་བསྒོ་བ་གང་ཡིན་པ་དེ་ཁྱོད་ཀྱིས་བྱ་དགོས་སོ། །
ཁྱོད་ཀྱིས་ང་ལ་བརྙས་པར་མ་བྱེད་ཅིག །ཁྱོད་ཡ་ང་བ་མ་སྤང་བར་དུས་བྱས་ནས་སེམས་ཅན་དམྱལ་བར་ལྟུང་བར་གྱུར་ཏ་རེ། དེ་ནས་དེ་བཞིན་གཤེགས་པ་ཐམས་ཅད་ཀྱིས་ཀྱང་བྱིན་གྱིས་བརླབ་ཏུ་གསོལ། རྡོ་རྗེ་སེམས་དཔའ་འང་བདག་ལ་དབབ་ཏུ་གསོལ་ཞེས་
སྨྲར་གཞུག་གོ། །སློབ་མའི་ལུས་དང་ངག་དང་ཡིད་ལ་ཆུ་དང་རླུང་དང་ས་ལས་ཧཱ་ཨ་ཧཱུཾ་རྐང་མཐིལ་དུ་ཡང་ཡི་གེ་ཛྷཻ་ཞེས་བརྗོད་ཅིང་བསམས་ནས། རླུང་དང་མེའི་འཁོར་ལོར་སོང་སྟེ། རླུང་གིས་མེའི་འཁོར་ལོ་སྦར་བ་དང་། ཡི་གེ་ཛྷཻའི་འོད་ཟེར་རྣམས་སློབ་མ་རྡུལ་ཕྲ་རབ་
རྣམས་ལ་ཞུགས་པས་དབབ་པར་བྱ་སྟེ། ཨཱ་བེ་ཤ་ཡ་སྟཾ་བྷ་ཡ་ར་ར་ར་རཙ་ལ་ཡ་ཙ་ལ་ཡ་ཧཱུཾ་ཨ་ཧ་ཛྷཻ་ཞེས་བརྗོད་ཅིང་འགྱིང་བ་དང་བཅས་པས་དྲིལ་བུ་དཀྲོལ་ལོ། །སྒོ་སྐྱོང་བ་བཞིའི་དྲིལ་བུ་དཀྲོལ་བ་ལ་གཞོལ་བས་དོན་དུ་གཞུག་གོ། །བབས་པར་གྱུར་ན་དེའི་ལྕེ་ལ་ཡི་གེ་དམར་པོ་ཅན་
ཉིད་ཀྱི་འོད་དཔག་ཏུ་མེད་པ་བསམས་ནས། རྡོ་རྗེ་དགེ་བ་དང་མི་དགེ་བ་སྨྲོས་ཤིག་ཅེས་བརྗོད་དོ། །དབབ་པ་བརྟན་པར་བྱ་བའི་ཕྱིར་ཏིཥྛ་བཛྲ་ཞེས་བྱ་བས་ཉེ་བར་བསྡུ་བར་བྱའོ། །དབབ་པའི་ཆོ་གའོ། །པྲ་ཏཱིཙྪ་བཛྲ་ཧོཿཞེས་འདོན་དུ་བཅུག་ལ་དེའི་ལག་པ་ན་གནས་པའི་མེ་
ཏོག་དཀྱིལ་འཁོར་དུ་དོར་དུ་གཞུག་གོ། །མེ་ཏོག་དེ་ཡང་རིགས་གང་དུ་ལྷུང་བ་ཡིན་པར་ཤེས་པར་བྱས་ནས་བླངས་ཏེ། དེའི་མགོ་བོར་པྲ་ཏི་གྲིཧྞ་ཏྭཾ་ཨི་མཾ་ས་ཏྭ་མ་ཧཱ་བ་ལ་ཞེས་བརྗོད་ཅིང་བརྟག་པར་བྱའོ། །རིགས་གང་དུ་མེ་ཏོག་དེ་ལྷུང་བ་དེའི་རྣལ་འབྱོར་སྦྱིན་པར་བྱ་བའམ། འདོད་པའི་
ཁྱད་པར་གྱིས་རྣལ་འབྱོར་སྦྱིན་པར་བྱའོ། །འདི་དག་ནི་རྒྱུད་གཞན་ནས་གསུངས་པའི་ཕྲེང་བའི་དབང་བསྐུར་བ་ཡིན་ནོ། །དེའི་མིག་གཉིས་ལ་ཡི་གེ་ཨོཾ་བསམས་ལ། རྡོ་རྗེ་སེམས་དཔའ་དེང་ཁྱོད་ཀྱིས། །མིག་འབྱེད་པར་ནི་བརྩོན་པར་བྱ། །མིག་ནི་ཐམས་ཅད་འབྱེད་མཛད་དེ། །རྡོ་རྗེའི་མིག་ནི་བླ་ན་མེད། །ཅེས་

བརྗོད་ཅིང་གདོང་གཡོགས་བཀྲོལ་ནས། རིམ་གྱིས་བཅོམ་ལྡན་འདས་ཀྱི་དཀྱིལ་འཁོར་གྱི་འཁོར་ལོ་བསྟན་པར་བྱའོ། །དེ་དག་ནི་སློབ་མ་གཞུག་པའི་ཆོ་གའོ། །དེ་ཉིད་དུ་ཁྲི་ལ་མངོན་པར་ཕྱོགས་པར་སྐྱིལ་ཀྲུང་དུ་འདུག་ཏུ་བཅུག་ལ། སྔར་བསྟན་པའི་
རྣམ་པར་རྒྱལ་བའི་སྟེང་དུ་བཞག་པའི་མཆོད་ཡོན་གྱི་སྣོད་ནས་ལོ་འདབ་ཀྱིས་བླངས་པའི་ཆུས་སློབ་མ་འདོད་པའི་ལྷར་བསྒོམས་པའི་རྣལ་འབྱོར་པའི་མགོ་བོར་བཛྲ་ཨ་བྷི་ཥིཉྩ་ཞེས་དག་ཏུ་བརྗོད་ཅིང་གཏོར་བར་བྱའོ། །འདི་ནི་ཆུའི་དབང་བསྐུར་བའི་ཆོ་གའོ། །རས་ལ་སོགས་
པ་ལ་ཅོད་པན་བྱས་ཏེ། དེའི་རིགས་ཀྱི་དབང་པོས་མཚན་པར་བསམས་ལ། དེའི་མགོ་བོར་བསྐོན་ནོ། །ཅོད་པན་གྱི་དབང་བསྐུར་བའོ། །ཅོད་པན་ཉིད་ལ་བརྗོད་པར་གྱུར་པ་གཞན་དག་བྱ་སྟེ། དེའི་སྙིང་གར་རྡོ་རྗེ་ལེགས་པར་བཞག་ལ། སངས་རྒྱས་རྡོ་རྗེའི་དབང་བསྐུར་བས།
དེ་རིང་ཁྱོད་ལ་དབང་བསྐུར་འགྱུར། སངས་རྒྱས་ཐམས་ཅད་རབ་བསྒྲུབ་ཕྱིར། །རྡོ་རྗེ་འདི་དེ་ཁྱོད་ཀྱིས་ལོང་། །ཞེས་བརྗོད་ཅིང་ལག་པ་གཡས་པས་འཛིན་དུ་གཞུག་གོ། །དེ་དག་ནི་རྡོ་རྗེའི་དབང་བསྐུར་བའོ། །རང་གི་བདག་པོའི་རྣལ་འབྱོར་པ་དེའི་བྲང་དུ་དེ་ཉིད་ཀྱིས་རྡོ་རྗེ་དང་།
དྲིལ་བུ་འཛིན་པའི་ལག་པ་གཉིས་དང་པོར་བཞག་ལ། ཨོཾ་བཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩཱ་མི་ཏིཥྛ་བཛྲ་ས་མ་ཡ་སྟྭཾ། ཞེས་བརྗོད་ཅིང་ཕྱི་ནས་འཁྱུད་པར་བྱའོ། །དེ་དག་ནི་དྲིལ་བུའི་དབང་བསྐུར་བའོ། །རྡོ་རྗེ་དྲིལ་བུ་དང་ལྡན་པའི་ལག་པ་དེ་དག་དེའི་སྤྱི་བོར་གཏོད་དུ་བཅུག་ལ། ཨོཾ་བཛྲ་
སཏྭ་སྟྭཾ་ཨ་བྷི་ཥིཉྩཱ་མི། ཨོཾ་བཛྲ་ནཱ་མ་ཨ་བྷི་ཥེ་ཀ་ཏ་ཀྱེ་རྡོ་རྗེ་ཆེ་གེ་མོ་ཞེས་བྱ་བ་སྟེ། ཕྲེང་བ་ས་ལ་ལྷུང་བ་དང་མཐུན་པའི་མིང་གདགས་སོ། །མིང་གི་དབང་བསྐུར་བའོ། །དེ་བཞིན་གཤེགས་པ་ལྔའི་ངོ་བོའི་དབང་བསྐུར་བ་ལྔ་པོ་འདི་ནི་མེ་ལོང་ལྟ་བུ་ལ་སོགས་པའི་ཡེ་ཤེས་ལྔའི་
ངོ་བོ་སྒྲུབ་པར་བྱེད་དོ། །དབང་བསྐུར་བ་ལྔ་པོ་དེ་དག་ལ་རིག་པའི་དབང་བསྐུར་བའི་སྒྲས་ཀྱང་བརྗོད་པར་བྱ་བ་ཡིན་ཏེ། མ་རིག་པ་ལྔའི་གཉེན་པོ་རིག་པའི་ངོ་བོའི་ཡེ་ཤེས་ལྔ་པོ་རྣམས་སྒྲུབ་པར་བྱེད་པའི་ཕྱིར་རོ། །དེ་ནས་འདི་ལ་བརྟུལ་ཞུགས་དང་། ལུང་བསྟན་པ་དང་།

དབུགས་དབྱུང་བ་སྦྱིན་པར་བྱ་སྟེ། འདི་དེ་སངས་རྒྱས་ཐམས་ཅད་ཉིད། །རྡོ་རྗེ་སེམས་དཔའི་ལག་ན་འདུག །ཁྱོད་ཀྱིས་ཀྱང་ནི་རྟག་ཏུ་བཅང་། །ཕྱག་ན་རྡོ་རྗེའི་བརྟུལ་ཞུགས་བརྟན། ཨོཾ་སརྦྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛ་ཨེ་ཥ་སྟྭཾ་དྷ་ར་ཡ་མི་ཧི་ཧི་ཧི་ཧི་ཧཱུཾ་ཞེས་རྡོ་རྗེའི་
བརྟུལ་ཞུགས་སྦྱིན་ནས། རྡོ་རྗེ་དེ་ཁོ་ན་ཉིད་ཀྱིས་གཟུང་ངོ་། །ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་སྙེམས་ཚུལ་བདག་པོའི་བདག །ཅེས་སོ། །འདི་དེ་སངས་རྒྱས་ཐམས་ཅད་ཀྱིས། །
ཤེས་རབ་དབྱངས་ཀྱི་རྗེས་འགྲོ་བཤད། །ཁྱོད་ཀྱིས་ཀྱང་ནི་རྟག་ཏུ་བཅད། །བྱང་ཆུབ་མཆོག་ཏུ་རྒྱལ་བ་བཞེད། །ཅེས་བརྗོད་ཅིང་དྲིལ་བུ་ལེགས་པར་བླངས་ལ། དེ་ཆོས་ཀྱིས་དཀྲོལ་བར་བྱ་སྟེ། སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་
པའི་སེམས་དཔའ་མཆོག །སྲིད་པ་མཆོག་ནི་བྱེད་པ་ཡིན། །ཞེས་སོ། །གལ་ཏེ་ཕྱིར་མི་ལྡོག་པའི་དབང་བསྐུར་བ་སྦྱིན་པར་བྱ་བ་མ་ཡིན་ན་ཆོས་བསྟན་པའི་འོག་ཏུ་རྗོད་པར་བྱེད་བཞིན་པའི་རིམ་པས་ལུང་བསྟན་པ་དང་། དབུགས་དབྱུང་བ་དག་སྦྱིན་པར་བྱ་སྟེ། ཆོ་ག་འདི་ནི་རིག་པའི་
དབང་བསྐུར་བ་དང་འབྲེལ་པ་ཡིན་ནོ། །སློབ་མ་ཁྲི་ལས་བབས་ལ་བླ་མ་ལ་ཡང་དག་པར་མཆོད་དེ། བྱང་ཆུབ་རྡོ་རྗེ་སངས་རྒྱས་ལ། །མཆོད་ཆེན་ཇི་ལྟར་སྩལ་བ་བཞིན། །བདག་ཀྱང་སྐྱབས་པའི་དོན་གྱི་ཕྱིར། །ནམ་མཁའི་རྡོ་རྗེ་བདག་ལ་སྩོལ། །དེ་ནས་བླ་མ་མཉེས་པ་དང་སྡོམ་པ་བཞི་
བྱིན་ནས་ཁྲི་དེ་ཉིད་ལ་པདྨ་འདབ་མ་བརྒྱད་པར་སྔ་མ་བཞིན་དུ་འདུག་སྟེ། འདོད་པའི་ལྷའི་རྣལ་འབྱོར་པའི་རང་གི་སྙིང་ག་ནས་སྤྲུལ་པའི་རིག་མ་མཆོད་པ་དང་ལྡན་པ་རྣམས་ཀྱིས། །རྡོ་རྗེ་ཆེན་པོའི་དབང་བསྐུར་བ། །ཁམས་གསུམ་པ་ཡིས་ཕྱག་བྱས་པ། །གསང་བ་གསུམ་གྱི་གནས་ལས་བྱུང་། །
སངས་རྒྱས་ཀུན་གྱི་སྦྱིན་པར་བྱ། །ཞེས་བརྗོད་ཅིང་དེ་དག་གིས་དབང་བསྐུར་བར་བསམས་ཏེ། བླ་མས་ཀྱང་ཚིགས་བཅད་འདི་བརྗོད་དོ། །ཟུར་བཞི་པ་ལ་གྲུ་བཞི་པ། །བཀྲ་ཤིས་རྣམས་ཀྱིས་ཉེ་བར་མཛེས། །དཔངས་སུ་ཁྲུ་དོ་ཉམས་དགའ་བའི། །ཁྲུས་ཀྱི་སྟེགས་བུ་རབ་བརྟག་བྱ། །རབ་གནས་ལ་ཡང་རིམ་པ་

འདི་ཡིན་ཏེ། ཕྱི་རོལ་གྱི་ཁྲུས་ཀྱི་ཆོ་ག་ལའང་རིམ་པ་འདི་ལྟར་ཁོང་དུ་ཆུད་པར་བྱའོ། །དེ་ནས་དཀྱིལ་འཁོར་དང་ལྷའི་དེ་ཁོ་ན་ཉིད་མན་ངག་ཇི་ལྟ་བ་བཞིན་དུ་བསྟན་པར་བྱའོ། །ཕྱིར་མི་ལྡོག་པའི་དབང་བསྐུར་བའོ། །བདུན་པོ་གཅིག་ཏུ་བྱས་ནས་བུམ་པའི་དབང་ནི་དང་པོ་
ཞེས་བྱ་སྟེ། དབང་བསྐུར་བ་བདུན་ནི་བུམ་པའི་དབང་བསྐུར་བའི་སྒྲས་བརྗོད་པར་བྱ་སྟེ། དེ་ཡང་དང་པོ་ཡིན་ནོ། །གལ་ཏེ་གསང་བ་དང་ཤེས་རབ་ཀྱི་དབང་བསྐུར་སྦྱིན་པར་བྱ་བ་མ་ཡིན་ན་དེའི་ཚེ་འདིར་ལུང་བསྟན་པ་དང་། རྗེས་སུ་གནང་བ་བྱིན་ནས་དབུགས་དབྱུང་སྦྱིན་ནོ། །དེའི་ཚེ་འདི་བྱ་བ་དང་།
སྤྱོད་པའི་རྒྱུད་ལ་སོགས་པ་གཞན་ལ་འཆང་བར་འོས་པར་འགྱུར་ཏེ། རྣལ་འབྱོར་བླ་མེད་ལ་སོགས་པ་ནི་མ་ཡིན་ནོ། །འདིའི་མིང་སློབ་དཔོན་གྱི་དབང་བསྐུར་བའི་སྒྲས་ཀྱང་བརྗོད་པར་བྱ་བ་ཡིན་ནོ། །ཕྲེང་བ་ཆུ་དང་བདེ་གཤེགས་ཅོད་པན་འཆིང་། །ཕྱག་རྒྱ་གཙོ་བོ་རང་རིགས་བདག་པོ་དང་། །དཔལ་
གྱི་རྡོ་རྗེ་མིང་ཕྱིར་མི་ལྡོག་ཅེས། །འདིར་ནི་ཐེ་ཚོམ་མེད་པར་བདུན་ཡིན་ནོ། །ཞེས་བྱ་བ་ནི་བསྡུ་བའི་ཚིགས་སུ་བཅད་པའོ། །དེ་ནས་བླ་མ་ཡང་དག་པར་མཆོད་དེ། བཞིན་མཛེས་མིག་ནི་དཀྱུས་རིང་ཞིང་། །གཟུགས་དང་ལང་ཚོས་རྣམ་པར་བརྒྱན། །རྒྱན་རྣམས་ཀུན་དང་གོས་བཟང་དང་། །
ལྷ་རྫས་དྲི་ཡི་བྱུག་པ་ཅན། །རྣལ་འབྱོར་ཅིག་གིས་བྱ་བ་གོམས། །རིགས་ཀྱི་བུ་མོ་གང་ཡང་རུང་། །བླ་མ་ལ་ནི་ཕུལ་བྱས་ནས། །བྱང་ཆུབ་རྡོ་རྗེ་སངས་རྒྱས་ལ། །མཆོད་ཆེན་ཇི་ལྟར་བགྱིས་པ་ལྟར། །བདག་ལའང་སྐྱབས་པའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །ཞེས་ཚིགས་
བཅད་འདིས་གསོལ་བ་བཏབ་པ་དང་། བླ་མས་སློབ་མ་སྡོམ་པ་བཞིན་གྱི་ཡོལ་བའི་བར་དུ་བཞག་ལ་གསང་བའི་མཆོད་པའི་མཐར་ཡོལ་བའི་སླ་ནས་བཏེགས་ལ། གཡོན་པའི་སོར་མོ་མིང་མེད་དང་རྒན་པོས་རྡོ་རྗེ་བཟུང་སྟེ། གསང་བའི་དབང་བསྐུར་སྦྱིན་ནོ། །དེས་ཀྱང་ཨེ་མ་ཧོ་བདེ་བ་
ཞེས་བརྗོད་དེ་བླང་བར་བྱའོ། །སླར་ལོག་ནས་བླ་མ་ཆུ་སྐྱེས་ན་གནས་པ་རང་ཉིད་ཀྱིས་མྱངས་ལ། དེས་ཀྱང་རང་གི་རྡོ་རྗེ་མྱང་དུ་བཅུག་ལ། རང་གི་སྟན་གོར་བུ་ལ་སོགས་པ་ལ་འདུག་པར་གྱུར་པས། དེ་ནས་ཕན་ཡོན་བརྗོད་པར་བྱ་སྟེ། འདི་ནི་རྡོ་རྗེ་ཐམས་ཅད་ཀྱི། །དབང་བསྐུར་བ་ཡི་གོ་འཕང་

མཆོག །གསང་སྔགས་རྣམས་ནི་ཐམས་ཅད་དང་། །ལས་མཆོག་རབ་འབྱམ་འགྲུབ་པར་བྱེད། །དེ་དག་ནི་གཉིས་པ་གསང་བའི་དབང་བསྐུར་བ་ཡིན་ནོ། །དེ་ཡང་དེ་བཞིན་དུ་གསོལ་བ་གདབ་པོ། །མདུན་ན་འདུག་པ་དེ་དག་གི་ལག་པ་གཡས་པ་དག་རང་གི་ལག་པ་གཡོན་པའི་སྟེང་དུ་གཞག་པ་བྱས་
ནས་ཁ་བལྟས་ཏེ། དཔལ་ལྡན་ཤེས་རབ་དང་ཕྲད་ལས། །དེ་ཉིད་ཡང་དག་དམིགས་པར་བྱ། །འདི་དེ་གཟུངས་མ་ཉམས་དགའ་བ། །བསྟེན་བྱར་སངས་རྒྱས་རྣམས་ཀྱིས་བརྟགས། །འཁོར་ལོའི་རིམ་པ་རབ་འབྱོར་བས། །བདེ་བ་དམ་པ་མྱང་བར་གྱིས། །རྡོ་རྗེ་སྐྱིལ་མོ་ཀྲུང་གི་སེམས། །
ནོར་བུའི་ནང་དུ་སོན་པ་ལྟོས། །ཞེས་བརྗོད་དོ། །ཡོལ་བའི་ནང་ན་སློབ་མའི་ལུས་ལ་གཞུག་པར་བྱའོ། །ཕྱིའི་ལྷའི་བུ་མོ་རྣམས་ཀྱིས་ཀྱང་མཉམ་ན་འདུག་པའི་བླ་མ་ཕྱིར་བསྐྱེད་ལ། སློབ་མ་གསང་བའི་མཆོད་པས་གནས་པ་ལ་བལྟས་ཏེ། ནམ་མཁའ་ལ་གནས་པའི་དཀྱིལ་
འཁོར་གྱི་འཁོར་ལོ་ཁ་དོག་དཀར་པོ་ཁང་པ་བརྩེགས་པ་དང་། ལྷན་ཅིག་སྐྱེས་པར་བསམས་ནས། མར་གྱི་བུམ་པ་བཞིན་དུ་ཞུ་བར་གྱུར་པ་དབང་བསྐུར་བའི་གནས་སུ་མཛད་དེ། སློབ་མའི་ལུས་ལ་གཞུག་པར་བྱའོ། །ཕྱིའི་ལྷ་མོ་བུ་མོ་རྣམས་ཀྱིས་ཀྱང་མཉན་
ན་སྐལ་བ་བཟང་པོའི་ཅ་ཅོ་དང་གར་དང་གླུ་དང་སིལ་སྙན་གྱི་སྒྲ་དབྱངས་དང་། དྲིས་བསྒོས་པའི་གོས་དང་ཙནྡན་གྱི་ཕྱེ་མ་འཐོར་བ་ལ་སོགས་པ་བྱའོ། །བཀྲ་ཤིས་གང་ཞིག་དགའ་ལྡན་ལྷ་ཡི་གཞལ་ཡས་ཁང་གི་ནི། །སྙིང་པོ་ནས་ནི་འགྲོ་ལ་ཕན་ཕྱིར་འདིར་གཤེགས་ལས་
བྱུང་དང་། །དབང་པོ་བཅས་དང་ལྷ་ཡི་དེ་བཞིན་གཤེགས་པ་བསྐོར་བ་ཡི། །བཀྲ་ཤིས་དེས་ནི་དེ་རིང་ཁྱོད་ལ་ཞི་བར་བྱེད་གྱུར་ཅིག །ཅེས་བྱ་བ་ལ་སོགས་པའི་ཚིགས་སུ་བཅད་པ་འདོན་པར་བྱའོ། །དེ་བཞིན་དུ། རྨོངས་ལ་གཏི་མུག་བདག་ཉིད་སྦྱོར། །གཏི་མུག་
དགའ་མ་བདག་ལྡན་པས། །གཏི་མུག་རྒྱུན་གྱིས་དབང་བསྐུར་བས། །གཏི་མུག་རྡོ་རྗེ་རང་ཉིད་འགྱུར། །སྡང་ལ་ཞེ་སྡང་བདག་ཉིད་སྦྱོར། །ཞེ་སྡང་དགའ་མ་བདག་ལྡན་པ། །ཞེ་སྡང་རྒྱུན་གྱིས་དབང་བསྐུར་བས། །ཞེ་སྡང་རྡོ་རྗེ་རང་ཉིད་གྱུར། །ཆགས་ལ་འདོད་ཆགས་

བདག་རྣལ་འབྱོར། །འདོད་ཆགས་དགའ་མ་བདག་ལྡན་པ། །འདོད་ཆགས་རྒྱུན་གྱིས་གསལ་བའི་ཕྱིར། །འདོད་ཆགས་རྡོ་རྗེ་རང་ཉིད་གྱུར། །ཤེས་རབ་ཡེ་ཤེས་བདག་རྣལ་འབྱོར། །རྡོ་རྗེ་དགའ་མ་བདག་ལྡན་པ། །ཡེ་ཤེས་རྒྱུན་གྱིས་
དབང་བསྐུར་བས། །ཤེས་རབ་ཡེ་ཤེས་རང་ཉིད་འགྱུར། །ཞེས་ཀྱང་བརྗོད་དོ། །དེ་དག་གིས་མཆོད་པའི་མཐར་བླ་མ་ཡོལ་བའི་བར་ནས་འོངས་ཏེ། རང་གི་སྟན་ལ་འདུག་ལ། མདུན་དུ་ཙོག་པུར་འདུག་པ་དེ་དག་གི་ལག་པ་གཡོན་པར་བཞག་ལ། ལག་
པ་གཡས་པ་སློབ་མའི་མགོ་བོར་གཏད་དེ། །ཐབས་གཞན་གྱིས་ནི་སངས་རྒྱས་མིན། །དེ་ཕྱིར་རིག་པ་འདི་ནི་མཆོག །གཉིས་སུ་མེད་པའི་ཆོས་ཀུན་ནི། །གཉིས་ཀྱིས་དངོས་པོ་མཚོན་གྱུར་པ། །དེ་ཕྱིར་ཁྱོད་ཀྱིས་རྟག་ཏུ་ནི། །འཁོར་བ་བྲལ་བར་མི་བྱའོ། །
འདི་དེ་སངས་རྒྱས་ཐམས་ཅད་ཀྱིས། །རིག་པའི་བརྟུལ་ཞུགས་བླ་ན་མེད། །རྨོངས་པ་གང་ཞིག་འདའ་བྱེད་པ། །དེ་ལ་དངོས་གྲུབ་མཆོག་མེད་དོ། །ཞེས་སོ། །གཞན་ཡང་ཇི་ལྟར་དབང་བསྐུར་བ་ལས་ནི། སངས་རྒྱས་ལ་སོགས་ཀུན་ཐོབ་པ། །དེ་ལྟར་བྱང་ཆུབ་སྤྱོད་སོགས་དང་། །དགེ་
བ་ཚུལ་གཞན་གྱིས་ཀྱང་མིན། །ལྷག་པའི་དམ་ཚིག་བསྲུང་བར་བྱ། །རྟག་ཏུ་སྡོམ་པ་བསྐྱང་བར་བྱ། །བཟའ་བ་ཤ་ལྔ་བདུད་རྩི་སྟེ། །བསྲུང་བ་འདི་ལས་དམ་ཚིག་གཞན། །དཀོན་མཆོག་འཇིག་གསང་བུད་མེད་ཀུན། །གཞན་ལ་ལེན་དང་ངག་གི་བརྫུན། །རྣལ་འབྱོར་རྒྱུན་
དུའང་བཤད་པ་ཀུན། །དེ་དག་ཆོ་ག་བཞིན་བསྲུང་བྱ། །འདི་དག་ནི་གསུམ་པ་དང་བཞི་པའོ། །དགེ་བའི་བཤེས་གཉེན་རིགས་དང་ཚུལ་ཁྲིམས་དང་ལྡན་ཞིང་། །མན་ངག་དང་བཅས་ཡན་ལག་བཅུ་གཉིས་གསུངས་གོམས་པ། །ཤེས་རབ་ཅན་དང་མངོན་བརྩོན་ཚུལ་གཉིས་ཤེས་པ་ཡིན། འབད་
པས་ཤིན་ཏུ་དུས་ནི་རིང་པོར་མཉེས་པར་བྱ། །དད་པའི་རང་བཞིན་བརྩོན་འགྲུས་རང་བཞིན་རྩེ་བདག་ཉིད། །ལས་དང་འབྲས་བུ་རྣམས་དང་ཟབ་མོའི་ཆོས་རྣམས་དང་། །གང་ཞིག་འདི་འདྲ་རྣམས་ལ་རྟག་ཏུ་གུས་པར་འབྲེལ། །ཇི་བཞིན་ལྟར་ནི་བློ་གྲོས་གསལ་བར་ཐོབ་

པར་འགྱུར། །གཞན་ནི་སྡིག་པའི་གསང་སྔགས་འདོན་པར་བྱེད་པ་ལས། །དུག་ནི་བསལ་བར་བྱ་ཕྱིར་ཞུགས་པ་ལྟ་བུ་སྟེ། །སྐྱེ་བ་འདི་ཉིད་ལ་ནི་སྡུག་བསྔལ་མྱོང་འགྱུར་ཞིང་། །ཤིན་ཏུ་མུན་ནག་ཆེས་མི་བཟད་པར་འཇུག་པར་འགྱུར། །དེ་ནས་ལུང་བསྟན་པ་
དང་རྗེས་སུ་གནང་བ་དང་དབུགས་དབྱུང་བར་བྱ་སྟེ། བླ་མ་ལྷ་ལས་བབས་པའི་ཕྱག་རྒྱ་དང་ལྡན་པས། ཨོཾ་འདི་ནི་ཁྱོད་ལུང་བསྟན་པ་སྟེ། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པ་ཤིན་ཏུ་དག་བྱའི་ཕྱིར། །སྲིད་པའི་ངན་འགྲོ་རྣམས་ལས་བཏོན། །ཀྱེ་དེ་
བཞིན་གཤེགས་པ་རྡོ་རྗེ་ཆེ་གེ་མོ་ཞེས་བྱ་བར། སིདྡྷི་ས་མ་ཡ་སྟྭཾ་བྷུར་བྷུ་བ་སྭཿ འདི་ཡིས་ལུང་སྟོན་འགྱུར་བ་ཡི། །སྔགས་པ་འགྲོ་བ་ཀུན་གྱི་བདག །བླ་ན་མེད་པའི་བྱང་ཆུབ་ཏུ། །བདེར་གཤེགས་ཀྱིས་ཀྱང་ལུང་བསྟན་མཛད། །ཇི་ལྟ་ཇི་ལྟར་སེམས་ཅན་
རྣམས། །ངོ་བོ་ཉིད་ཀྱིས་འདུལ་འགྱུར་བ། །དེ་ལྟ་དེ་ལྟར་ཆགས་ལ་སོགས། །གཙང་མས་སེམས་ཅན་དོན་བྱའོ། །ཉིན་རེ་བཞིན་ནི་ཐུན་བཞི་རུ། །འདོད་ལྷའི་རྣལ་འབྱོར་དང་ལྡན་པ། །གྱུར་ནས་ཐུན་མོང་ཅིག་ཤོས་ཀྱི། །དངོས་གྲུབ་ཐོབ་པར་སྒྲུབ་པར་
བྱོས། །མི་སྣང་བ་ནི་ཁམས་སྟོང་ལ། །མངོན་ཤེས་ལྡན་པ་ཉིས་སྟོང་ཡིན། །རིག་པ་འཛིན་པ་སུམ་སྟོང་ལ། །རྡོ་རྗེ་ཅན་ནི་འགྲོ་ཀུན་བདག །ཞི་རྒྱས་ལ་སོགས་ལས་གང་ངམ། །དེ་ལས་གཞན་པ་གང་འདོད་པ། །འཁོར་ལོས་རྗེས་མཉེས་སྦྱོར་བ་ཡིས། །
བསྒྲུབས་ན་མྱུར་དུ་འགྲུབ་པར་འགྱུར། །དེ་དག་ནི་རྗེས་སུ་གནང་བའོ། །མཆོག་གསང་དཀྱིལ་འཁོར་དམ་པ་ནི། །མཐོང་བ་དང་ནི་ཞུགས་གྱུར་པས། །སྡིག་པ་ཀུན་ལས་ངེས་གྲོལ་བར། །ཁྱེད་རྣམས་དེ་ཉིད་ལེགས་པར་གནས། །ཞེས་བྱ་བ་ལ་སོགས་པ་ནི་
དབུགས་དབྱུང་བའོ། །དེ་ནས་བླ་མ་ལ་རང་གི་ལུས་དང་། བུ་དང་ཆུང་མ་ལ་སོགས་པའི་ཡོན་ཕུལ་ལ་ཕྱག་འཚལ་ཏེ། བླ་མས་ཀྱང་ཤིན་ཏུ་གནས་པར་གྱུར་ཅིག་ཅེས་ཤེས་པ་སྦྱིན་པར་བྱའོ། །དེ་ནས་བརྩམས་ཏེ། རྒྱུད་གཞན་དག་ཏུ་བྲི་བའི་ཕྱག་རྒྱ་

ལ་སོགས་པ་སྤྲས་པའི་དེ་ཁོ་ན་ཉིད་བཅུ་གང་ཡིན་པ་བསྟན་པར་བྱ་སྟེ། སྐལ་བ་ཅན་དུ་གྱུར་པའི་ཕྱིར་རོ། །བཟང་པོའི་ཞལ་སྔ་ནས། གསང་བ་དང་ཤེས་རབ་དག་གིས་དབང་བསྐུར་ནས་དེ་ཁོ་ན་ཉིད་ཡང་དག་པར་བསྟན་པར་བྱའོ་ཞེས་
གསུངས་སོ། །རྨོངས་ལ་ཞེས་བྱ་བ་ལ་སོགས་པ། སྔར་བརྗོད་པའི་ཚིགས་སུ་བཅད་པའི་དོན་དང་། བླང་བར་བྱ་བའི་དོན་དེ་ཁོ་ན་ཉིད་རང་རིག་པའི་མངོན་སུམ་གྱིས་གྲུབ་པ་ཡང་བརྗོད་བྱ་རྗོད་བྱེད་ཀྱི་ངོ་བོར་བརྡར་བྱས་པས་གོ་བར་བྱའོ། །གཏོར་མའི་ཉེ་བར་སྦྱར་བ་
ཡང་ཐུན་བཞིར་ཤིང་རྟའམ། སྐོན་པའམ། ཁུར་རམ་ཐ་ན་སྙིམ་པ་གསུམ་ཙམ་བཟའ་བ་དང་། བཅའ་བ་དང་། བཏུང་བ་དང་། བལྡག་པ་དང་མུར་བ་དང་། གཞིབ་པ་དང་། མེ་ཏོག་དང་། བདུག་པ་དང་། དྲི་དང་། ལྷ་བཤོས་དང་། གདུགས་དང་། རྒྱལ་མཚན་
དང་། བ་དན་དང་ལྡན་པ། བླ་རེ་རྣམ་པར་བཀྲ་བས་བྲེས་པ། སྒྲ་ཆེན་པོ་རྔ་བརྡུང་བ་དང་ལྡན་པ་ལྟས་ཏེ། མེད་ན་ཡང་ཡིད་ཀྱིས་ཐམས་ཅད་བསམས་ལ། གསང་སྔགས་འདི་དག་བྱིན་གྱིས་བརླབས་ལ་སྦྱིན་ནོ། །ཨོཾ་ཤྲཱི་ཧེ་རུ་ཀ་མ་ཧཱ་བཛྲ་ཨཱ་ཀཌྜྷྱ་ཡ། ཨཱ་ཀཌྜྷྱ་
ཡ། པྲ་བེ་ཤ་ཡ། པྲ་བེ་ཤ་ཡ། བནྡྷ་ཡ། བནྡྷ་ཡ། ཏོ་ཥ་ཡ། ཏོ་ཥ་ཡ། སརྦ་བཛྲ་ཌཱ་ཀི་ནཱི་ནཱཾ་ཧྲྀ་ད་ཡ་ཧཱུཾ་ཧཱུཾ་ཧཱུཾ་ཕཊ། ཨོཾ་བུདྡྷ་ཌཱ་ཀི་ནཱི་པྲ་ཏཱིཙྪ་མ་མ་བི་ལཾ་ཧཱུཾ་ཕཊ། ཨོཾ་བཛྲ་ཌཱ་ཀི་ནཱི་པྲ་ཏཱིཙྪ་མ་མ་བི་ལཾ་ཧཱུཾ་ཕཊ། ཨོཾ་རཏྣ་ཌཱ་ཀི་ནཱི་པྲ་ཏཱིཙྪ་མ་མ་བི་ལཾ་ཏྲཾ་ཕཊ། ཨོཾ་པདྨ་ཌཱ་ཀི་ནཱི་པྲ་ཏཱིཙྪ་མ་མ་
བི་ལཾ་ཧྲཱིཿཕཊ། ཨོཾ་བི་ཤྭ་ཌཱ་ཀི་ནཱི་པྲ་ཏཱིཙྪ་མ་མ་བི་ལཾ་ཨ་ཕཊ། ཨོཾ་སརྦ་བུདྡྷ་ཌཱ་ཀི་ནཱི་པྲ་ཏཱིཙྪ་མ་མ་བི་ལཾ་ཧཱུཾ་ཧོ། །ཨོཾ་སརྦྦ་ཡོ་གི་ནཱི་པྲ་ཏཱིཙྪ་མཾ་ལཾ་ཧཱུཾ་ཧ་ཧ་ཧ་ཧ་ཧི། གལ་ཏེ་དུར་ཁྲོད་ལ་སོགས་པར་གནས་ནས་སྦྱིན་པར་བྱ་བ་ཡིན་ན། དེའི་ཚེ་ཧེ་རུ་ཀའི་གཟུགས་སྤྲུལ་པས་
བསྟན་པར་གྱུར་པ་རྣལ་འབྱོར་མའི་ཚོགས་ཀྱིས་ཡོངས་སུ་བསྐོར་བར་སྦྱིན་ནོ། །ཡང་ན་ཧེ་རུ་ཀའི་རྣམ་པར་བརྒྱན་ཅིང་བཅོས་ནས་འདྲེན་པ་མོ་ལ་སོགས་པ་ན་ཚོད་ལོ་བཅུ་གཉིས་དང་ལྡན་པ་བཅོམ་ནས། སངས་རྒྱས་མཁའ་འགྲོ་མ་ལ་སོགས་པའི་

གཟུགས་སུ་སྒྲུབ་པར་བྱེད་པར་བརྒྱན་ཏེ། ཧེ་རུ་ཀའི་སྤྱོད་པས་ཕྱེ་བ་རྡོ་རྗེའི་གླུ་ལེན་ཅིང་རོལ་པའི་རྡོ་རྗེའི་གོམ་པས་ཀྱང་གར་བྱེད་པ་ཁ་ཊྭཱཾ་ག་དང་། ཌ་མ་རུ་ལ་སོགས་པས་འཕྲོག་པའི་རྣལ་འབྱོར་མ་སྟོང་ཕྲག་རྣམས་དང་ཆེར་རྣམ་པར་སྒེག་པ་སྔོན་དུ་སོང་བས་
རྟག་ཏུ་འགྲོ་བ་འདོན་པའི་བསམ་པ་མ་བཏང་བ། སྟོང་པ་ཉིད་དང་། སྙིང་རྗེའི་སྙིང་པོ་ཅན་རྣལ་འབྱོར་པའི་ཚོགས་བཞིན་དུ། དེ་དང་དེ་བྱེད་ཅིང་འགྲོ་བའི་དགེ་ལེགས་ཀྱི་དོན་ཁོ་ནར་སྦྱིན་ནོ། །དཀྱིལ་འཁོར་རྩོམ་པ་ནས་གཤེགས་སུ་གསོལ་བའི་མཐར་ཐུག་
པར་ཉི་མ་རེ་རེ་ཞིང་དགེ་འདུན་ལ་མཆོད་ཡོན་དང་བཅས་པ་སྦྱིན་ནོ། །རྒྱུན་མི་ཆད་པར་དཔག་ཏུ་མེད་པའི་མེ་ཏོག་དང་། བདུག་པ་དང་། དྲི་དང་། ལྷ་བཤོས་དང་། མར་མེ་ལ་སོགས་པ་དང་། གར་དང་། གླུ་དང་། སིལ་སྙན་དང་། ཕེག་རྡོབ་པ་སྣ་ཚོགས་དང་།
གདུགས་དང་། རྒྱལ་མཚན་དང་། བ་དན་སྣ་ཚོགས་པ་ལ་སོགས་པ་དང་རྣམ་པར་རྒྱལ་བའི་ཚོགས་དགོད་པ་དང་། སྒེག་པ་རྣམ་པ་སྣ་ཚོགས་པ་རྣམས་ཀྱིས་མཆོད་པ་བྱའོ། །དཀྱིལ་འཁོར་གྱི་ཁང་པ་ལ་ཡང་མུ་ཏིག་དང་། ནོར་བུ་དང་། བྱུ་རུ་རབ་ཏུ་འཕྱང་བ་
དང་། མེ་ཏོག་དྲི་ཞིམ་པོ་དང་། རས་ཤིན་ཏུ་ཡིད་དུ་འོང་བ་རྣམས་ཀྱིས་བརྒྱན་པར་བྱའོ། །ཕྱོགས་བརྒྱད་དུ་ཕྱོགས་སྐྱོང་བའི་ཁ་དོག་ལྟ་བུའི་བ་དན་གྱིས་བཀླུབ་པར་བྱའོ། །དཀྱིལ་འཁོར་གྱི་ཁང་པའི་ཕྱི་རོལ་གྱི་ཕྱོགས་ཀྱི་ཆ་བཞིར་བླ་རེས་བཀབ་པ་རྣམས་སུ་ཡུ་བ་
བསྒྲེང་པ་གསེར་གྱི་ཡུ་བ་ཅན་རྣམས་སུ་བཀུར་སྟི་ཆེན་པོ་སྔོན་དུ་འགྲོ་བས་སེང་གེའི་གདན་བཤམས་ལ། འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་དང་། ས་བཅུ་པ་དང་། ཟླ་བའི་སྒྲོན་མ་དང་། གསེར་འོད་དམ་པ་ལ་སོགས་པའི་མདོ་སྡེ་གདོན་
པར་བྱའོ། །དཀྱིལ་འཁོར་བྲི་བ་ན། གལ་ཏེ་བགེགས་ལ་སོགས་པ་བྱུང་ན་དེའི་ཚེ། མན་ངག་ཇི་ལྟ་བ་བཞིན་དུ་སེང་གེ་རྣམ་པར་བསྒྱིང་བའི་ཕྱག་རྒྱས་སྡང་བ་རྣམས་གཅད་པར་བྱའོ། །ཉི་མ་རེ་རེ་བཞིན་ལས་སོ་སོ་ལ་བླ་མ་ལ་ཡོན་དབུལ་བར་

བྱའོ། །ས་གཞི་སྡུག་པའི་ཆུང་མ་དང་། །རིན་པོ་ཆེ་དང་འབར་བའི་གསེར། །ནོར་བུ་མུ་ཏིག་བྱུ་རུ་སོགས། །ལུས་ཀྱང་གུས་པས་དབུལ་བར་བྱ། །རྟ་དང་གླང་པོ་དེ་ཉིད་ཀྱང་། །རྒྱན་ཀུན་གྱིས་ནི་བརྒྱན་པ་དང་། །བུད་མེད་བཟང་པོའང་བླ་མ་ལ། །དངོས་
གྲུབ་འདོད་པས་དབུལ་བར་བྱ། །རས་ནི་རྣམ་པ་སྣ་ཚོགས་དང་། །རྒྱན་རྣམས་ཀྱང་ནི་དབུལ་བྱ་སྟེ། །གང་གིས་བླ་མ་འདིས་མཉེས་པ། །དེ་ནི་རབ་ཏུ་འབད་པས་བྱ། །དེ་ནས་ཏིང་ངེ་འཛིན་ཟིན་ནས་ཕྱི་དང་ནང་གི་མཆོད་པ་བྱས་ལ། གཏོར་མ་བྱིན་ནས། སྨོན་ལམ་སྔོན་དུ་བྱས་ཏེ།
ཕྱི་རོལ་གྱི་འཁོར་ལོའི་སྙིང་གའི་ནང་དུ་ཆུད་པར་བྱའོ། །ཨོཾ་ཨ་ཀཱ་རོ་མུ་ཁཾ་སརྦྦ་དྷརྨཱ་ཎཱཾ་ཨཱ་དྱ་ནུཏྤནྣ་ཏྭཱ་ཏ་ཧཱུཾ་མུཿཞེས་བྱ་བའི་སྔགས་ཀྱིས་རྡུལ་ཚོན་གཤེགས་སུ་གསོལ་བར་བྱའོ། །འདི་ཉིད་ཀྱིས་བུམ་པ་དང་། ཕྱག་མཚན་དང་། སྨན་ལ་སོགས་པ་རྣམས་ཀྱང་གཤེགས་སུ་གསོལ་
བར་བྱའོ། །མཁའ་འགྲོ་མའི་གནོད་པ་ཞི་བར་བྱ་བའི་ཕྱིར་ལྷའི་རྡུལ་ཚོན་འདོད་པ་རྣམས་ལ་བྱིན་ནས་གཞན་དག་བསྡུས་ཏེ། རྣམ་པར་རྒྱལ་བའི་བུམ་པར་བླུགས་ལ། ཡོད་པར་གྱུར་ན་གླང་པོ་ཆེའི་ཕྲག་པར་བཞག་ལ། སིལ་སྙན་དུ་མ་སྒྲ་སྒྲོགས་པའི་སྒྲ་སྔོན་དུ་འགྲོ་བའི་རྒྱ་མཚོར་
འབབ་ཆུ་དང་ལྟེང་ཀ་ཆེན་པོ་རྣམས་སུ་མན་ངག་ཇི་ལྟ་བ་བཞིན་དུ་ཀླུའི་རིགས་བརྒྱད་ལ་ཕྱིའི་མེ་ཏོག་དང་འོ་མ་ལ་སོགས་པས་ལེགས་པར་མཆོད་དོ། །དེ་དག་ཀྱང་དེ་བཞིན་གཤེགས་པའི་རྡུལ་ཕྲ་རབ་ཀྱི་ཚོགས་མགོ་བོར་བཞག་ནས། རང་གི་ཁྱིམ་དུ་དད་པས་འགྲོ་བར་བྱེད་དོ། །
དེ་ནས་བུམ་པ་ཆུས་དགང་བར་བྱས་ནས་དེ་བཞིན་དུ་འོང་སྟེ། ཞི་བའི་ཆུ་དེས་ཁྲུས་དང་གསང་བར་འདོད་པའི་དོན་ཀུན་གྲུབ་པར་བྱ་བའི་ཕྱིར། ཁྲུས་དང་བཏུང་བའི་དོན་དུ་འདོད་པ་རྣམས་ལ་ཆུ་དེ་སྦྱིན་པར་བྱའོ། །ཉི་མ་གསུམ་མམ། ཉི་མ་བདུན་ནམ། ཉི་མ་གཅིག་ཏུ་འཚམ་པར་
དགའ་སྟོན་ཆེན་པོ་བྱའོ། །སྒྱུ་འཕྲུལ་ཆེན་མོ་བརྗོད་པའི་རྒྱུན་ཤིན་ཏུ་རྒྱ་ཆེ་བ་སྟོང་ཕྲག་བཅུ་གཉིས་ཡོད་དེ་དེ་ཡང་དེ་ཁོ་ན་ཉིད་བསྡུས་པ་ལ་སོགས་པའི་རྒྱུད་རྣམས་ཀྱི་བླ་མ་སྟེ། དེ་ནས་དཀྱིལ་འཁོར་གྱི་རིམ་པ་འདི་དག་ཐམས་ཅད་མདོར་བསྡུས་པ་དང་རྒྱས་པར་སེམས་ཅན་

གྱི་བསམ་པ་ཐ་དད་པའི་དབང་གིས་སྐབས་སྣ་ཚོགས་པ་ན་ཡོད་པ་ཡིན་ནོ། །རྒྱུད་བླ་མའི་ཡང་གཞུང་དགུ་བཅུར་བགྲང་བ་འདི་ནི་མདོར་བསྡུས་པ་ལ་དགའ་བའི་སེམས་ཅན་གྱི་བསམ་པའི་དབང་གིས་བསྒོམ་པའི་རིམ་པ་ཙམ་ལ་བརྟེན་ནས་བསྟན་པ་ཡིན་ནོ།
བར་མ་ལ་དགའ་བ་རྣམས་ཀྱིས་མཚན་ཡང་དག་པར་བརྗོད་པ་ལ་སོགས་པའི་དཀྱིལ་འཁོར་བཞིན་དུ་བསྒོམ་པའི་རིམ་པ་མཚུངས་པ་ཡིན་པ་དེའི་ཕྱིར་ན་རྒྱུད་རྒྱས་པ་ལས་ཐམས་ཅད་བསྟན་པ་སྟེ། བསྒོམ་པར་བྱ་བ་དང་བྲི་བར་བྱ་བ་ལྷ་ལྔའི་བདག་ཉིད་ཀྱི་
དཀྱིལ་འཁོར་གྱི་འཁོར་ལོ་ཟུར་བཞི་པ་ལ་སོགས་པ་དང་ལྡན་པར་བྱའོ། །རྒྱས་པ་ལ་དགའ་བ་རྣམས་ཀྱིས་ཀྱང་རྒྱུད་རྒྱས་པར་ལྷ་ཤིན་ཏུ་རྣམ་པ་མང་པོའི་བདག་ཉིད་ཅན་དུ་བྲི་བར་བྱ་བ་དང་། བསྒོམ་པར་བྱ་བའི་དཀྱིལ་འཁོར་དེ་ནས་བཤད་པའི་
དཀྱིལ་འཁོར་རིམ་པ་ཁོ་ནས་ཤེས་པར་བྱའོ་ཞེས་བདག་གི་བླ་མས་གསུངས་སོ། །འདི་ཉིད་ཀྱི་ཕྱིར། འདིར་ཚིགས་སུ་བཅད་པ་དགུ་བཅུར་གྲགས་པ་ནི་རྒྱུད་རྒྱས་པའི་ཕྱོགས་གཅིག་ཏུ་གྱུར་པ་ཡིན་པས་ན། འདི་སྐད་བདག་གིས་ཐོས་པ་དང་ཞེས་
བྱ་བ་ལ་སོགས་པ་མ་གསུངས་སོ། །དེ་ཉིད་ཀྱི་ཕྱིར། རྒྱུད་རྒྱས་པའི་རྗེས་སུ་འབྲངས་ནས། དེ་ནས་མཁའ་འགྲོ་མ་ཀུན་གྱིས། །ཞེས་བྱ་སྟེ། དེ་ནས་ཀྱི་སྒྲ་ནི་དེ་མ་ཐག་པའི་རྗོད་པར་བྱེད་པ་ཡིན་པས་དང་པོར་སྦྱོར་བ་ཡིན་ནོ། །འདི་དག་སྤྲོས་པ་དང་བཅས་
པར་ནི་རྒྱུད་ཕྱི་མའི་ཕྱི་མར་ཐུབ་པ་ཉིད་ཀྱིས་ཐམས་ཅད་གསུངས་པ་ཡིན་ནོ། །དེ་ཡང་ཚིག་ཙམ་ཐ་དད་པས་བསྟན་པ་ཡིན་གྱི་ཡང་འདིར་སྔོན་མེད་པ་ནི་ཅུང་ཟད་ཀྱང་མེད་དོ། །ཆོ་ག་སྔོན་འགྲོ་དཀྱིལ་འཁོར་ཆོ་ག་གཞུང་དུ་ལེགས་བྱས་པས། །འདིར་ནི་བདག་
གིས་དགེ་བ་འབར་བ་ཐོབ་པ་གང་ཡིན་དེས། །ཁམས་གསུམ་པར་གཏོགས་པ་ཡི་སེམས་ཅན་དེ་ནི་ཡུད་ཙམ་གྱིས། །དྲི་མ་མེད་པའི་དཀྱིལ་འཁོར་འཁོར་ལོའི་ལུས་ཅན་འདིར་གྱུར་ཅིག །སྒྱུ་འཕྲུལ་ཆེན་མོའི་དཀྱིལ་འཁོར་གྱི་ཆོ་ག །བླ་མའི་ཞལ་

སྔའི་མན་ངག་ཅེས་བྱ་བ། སློབ་དཔོན་མཁས་པ་འདུལ་བས་བྱིན་གྱིས་མཛད་པ་རྫོགས་སོ།། ༄། །ཧེ་རུ་ཀ་ཕྱག་རྒྱ་གཅིག་པའི་སྒྲུབ་ཐབས་བཞུགས། ༄༅༅། །དང་པོ་སྔ་བར་ལངས་ལ། ཕྱི་ནང་གི་སྒོ་སྦྱང་བར་བྱ། དེ་
ནས་མཎྜལ་དང་མཆོད་པ་དང་གཏོར་མ་བཤམས། དེ་ནས་བདག་ཉིད་ཀྱིས་སྙིང་གར་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་ཧྲཱིཿ་མཐིང་ག་ཅིག་བསྒོམས་ལ། དེ་ལས་འོད་ཟེར་འཕྲོས་པས་བླ་མ་དང་བཅས་པའི་ཡེ་ཤེས་ཀྱི་ལྷ་མདུན་གྱི་ནམ་
མཁའ་ལ་སྤྱན་དྲངས་ལ། གོང་མའི་མཆོད་པ་རྣམས་ཡི་གེ་གསུམ་གྱིས་བྱིན་གྱིས་བརླབས་ལ་དབུལ། དེ་ནས་ཡན་ལག་བདུན་པའི་མཆོད་པ་བྱ། དེ་ནས་ཡི་གེ་བརྒྱ་པས་བཟོད་གསོལ་བྱས་ལ་མི་དམིགས་པར་བསྒོམས། ཨོཾ་ཤཱུ་ནྱ་
ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་པས་སྟོང་པ་ཉིད་དུ་བསྒོམ། དེའི་ངང་ལས་ཡི་གེ་ཧཱུཾ་གི་སྣང་བ་ལས་ར་བ་དང་། དྲ་བ་དང་ས་གཞི་སྟེ། སྲུང་བའི་འཁོར་ལོ་གཞུང་བཞིན་དུ་བསྒོམ། སྲུང་བའི་འཁོར་ལོའི་ནང་དུ་པདྨ་དམར་པོ་འདབ་
མ་བརྒྱད་པ་གཅིག་བསྒོམ། དེའི་ལྟེ་བར་ཉི་མའི་དཀྱིལ་འཁོར་དེའི་སྟེང་དུ་ཡི་གེ་ཧྲཱིཿམཐིང་ག་ཅིག་བསྒོམ། དེ་རྣམས་གྱུར་པ་ལས་ཕྱག་མཚན་ཁ་ཊྭཱཾ་ག་ཅིག་ཏུ་བསྒོམ་དེ་གནས་སྐབས་གྱུར་པ་ལས་དཔལ་རྡོ་རྗེ་ཧེ་རུ་ཀ་སྐུ་མདོག་མཐིང་ག་ཕྱག་བཞི་
པ་ཞལ་བཞི་པ་ཞབས་གཉིས་པ། ཕྱག་གཡས་ན་མདའ་དང་ཐོད་པ། གཡོན་ན་གཞུ་དང་ཁ་ཊྭཱཾ་ག་བསྣམས་པ། དབུ་ལ་མི་བསྐྱོད་པས་བརྒྱན་པ། ཐོད་པ་སྐམ་པོའི་ཅོད་པན་ཅན། ཐོད་པ་རློན་པའི་དོ་ཤལ་གྱིས་བརྒྱན་པ། འོད་ཟེར་དམར་
སྨུག་གི་ནང་ན་བཞུགས་པ་ཅིག་བསྒོམས་ལ། དེའི་སྙིང་གར་ཟླ་བའི་སྟེང་དུ་ས་བོན་ཧྲཱིཿཡི་གེ་སྔོན་པོ་ཅིག་བསྒོམ། དེ་ལས་འོད་འཕྲོས་པས་ཡེ་ཤེས་ཀྱི་དཔལ་ཧེ་རུ་ཀ་མདུན་གྱི་ནམ་མཁའ་ལ་སྤྱན་དྲངས་ལ་ཐལ་མོ་སྦྱར་ནས། ཕྱག་འཚལ་

འདུད་ཅིང་ཕྱག་འཚལ་འདུད། །ཕྱག་འཚལ་བསྟོད་དེ་ཕྱག་འཚལ་འདུད། །གུས་པས་ཁྱོད་ལ་བདག་གསོལ་འདེབས། །རྡོ་རྗེ་འཛིན་པ་བདག་སྒྲུབས་ཤིག །ཅེས་བརྗོད་ལ། མཆོད་པ་དངོས་སུ་འབྱོར་ན་དབུལ། མ་འབྱོར་
ན་ཡིད་ལས་བྱུང་བའི་མཆོད་པས་མཆོད། དེ་ནས་བསྟོད་དེ། མཆེ་བ་གཙིགས་ཤིང་འཇིགས་པ་ཆེ། །སྔགས་ཀྱི་མེ་ཏོག་ཕྲེང་བས་བརྒྱན། །ཤ་ཆེན་རྟག་ཏུ་གསོལ་མཛད་པའི། །ཧེ་རུ་ཀ་དཔལ་ཕྱག་འཚལ་འདུད། །དེ་ནས་དེ་ཉིད་
འོད་དུ་ཞུ་སྟེ། བདག་ཉིད་ལ་ཐིམ་པར་བསམས་ལ། དེ་ནས་སྙིང་གའི་ཧྲཱིཿལས་སེམས་གཏད་དེ། ཐུན་མཚམས་བཅད་ལ་བསྒོམ། ཐུན་མཚམས་སུ། ཨོཾ་ཨཱ་ཧྲཱིཿཧཱུཾ་ཞེས་བཟླས་ཏིང་ངེ་འཛིན་གྱི་ཐུན་གཏོང་བའི་དུས་སུ་ཡེ་ཤེས་ཀྱི་ལྷ་
ཡིད་ཀྱིས་གཤེགས་སུ་གསོལ། དམ་ཚིག་གི་ལྷ་ནི་མི་དམིགས་པར་བྱའོ། །ཐུན་ལ་འཇུག་པའི་དུས་སུ་སྐད་ཅིག་མས་ལྷར་བསྐྱེད་ལ། ས་བོན་གྱི་འོད་ཟེར་གྱིས་ཡེ་ཤེས་ཀྱི་ལྷ་སྤྱན་དྲངས་ལ། བསྟིམས་ནས་སྔ་མ་ལྟར་བསྒོམ། ཧེ་རུ་ཀ་ཕྱག་
རྒྱ་གཅིག་པའི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། ཤ་པ་སཾ་སྐ་ར་སཱ་དྷཱ་ནཾ་བི་དྷིཿ། བོད་སྐད་དུ། རོ་བསྲེག་པའི་སྒྲུབ་ཐབས་ཀྱི་ཆོ་ག །དཔལ་རྡོ་རྗེ་འཛིན་པ་ཆེན་པོ་ལ་ཕྱག་འཚལ་ལོ། །འཕགས་པ་སྤྱན་རས་
གཟིགས་དབང་ཕྱུག་ལ་ཕྱག་འཚལ་ལོ། །གང་དག་སྔོན་གྱི་ལས་དང་འཕྲལ་གྱི་རྐྱེན་དག་གིས། །ནད་པའི་སྲོག་ཟད་ཤི་བའི་དུས་བྱས་ཚེ། །རྣམ་སྨིན་ལུས་ལ་བརྟེན་ནས་སྡིག་སྒྲིབ་སྦྱང་བའི་ཐབས། །དྲི་མེད་ལུང་དང་བླ་མའི་བཀའ་
བཞིན་བྲི། །དེ་ལ་རེ་ཞིག་དང་པོར་རོ་སྲེག་ཅིང་སྦྱང་བར་འོས་པའི་གནས་སྐབས་དང་སྦྱར་ནས། དང་པོ་བསྙེན་པ་ལ་འཇུག་པར་བྱ་སྟེ། དེ་ཡང་བསྙེན་པའི་གནས་གང་ཡིན་པར་རོ་དྲངས་ལ་ཆུ་གཙང་དྲི་ཞིམ་པོ་དང་སྦྱར་བས་ཁྲུས་བྱས་ལ། དེ་ནས་དྲི་

ཞིམ་པོའི་ལྡེ་གུས་དྲིལ་ཕྱི་བྱས་ནས། ཡི་གེ་ཙི་ལ་སོགས་པ་གནས་དྲུག་ཏུ་བྲི་བའམ་གདགས་སོ། །དེ་ནས་རས་སམ་སྣམ་བུ་གསར་པས་དཀྲིས་ལ། མེ་ཏོག་གི་ཕྲེང་བས་བརྒྱན་ནས། མཎྜལ་བའི་ཀོ་བ་ཙམ་པ་
བྱས་ལ། དེར་མེ་ཏོག་སིལ་མ་གཏོར་ཏེ། ཀུ་ཤའི་ཆུན་པོའི་སྟན་ལ་གཞག་གོ། །དེའི་དྲུང་དུ་ཡང་མཆོད་པའི་མཎྜལ་བྱ་བ་དང་། མེ་ཏོག་དགྲམ་པ་དང་། མཆོད་པ་དང་གཏོར་མ་བཤམས་པ་དང་། བླ་རེ་དང་། འཕན་དང་། ཡོལ་བ་ལ་སོགས་
པའི་རྒྱན་དང་བཅས་པར་བྱའོ། །དེ་ནས་བདག་ཉིད་ཁྲུས་བྱས་ལ། སྟན་བདེ་བ་ལ་འདུག་སྟེ། ཆོ་གའི་རིམ་པའམ་མོས་པ་ཙམ་གྱིས་དཔལ་ཧེ་རུ་ཀའི་སྐུར་བསྒོམས་ལ། གནས་དྲུག་ཏུ་ཡི་གེ་དགོད་པ་དང་། ཅོད་པན་གྱི་ལྷས་རྒྱས་གདབ་
པ་དང་། སྙིང་གར་ཟླ་བ་ལ་གནས་པའི་ཡི་གེ་ཧྲཱིཿལ་སྔགས་ཀྱི་ཕྲེང་བས་བསྐོར་བར་བསྒོམ་པར་བྱའོ། །དེ་ནས་མཆོད་པ་ཐམས་ཅད་ཡི་གེ་འབྲུ་གསུམ་གྱིས་བྱིན་གྱིས་བརླབས་ལ། དེའི་འོག་ཏུ་བདག་གི་སྙིང་གའི་ས་བོན་གྱི་འོད་ཟེར་
གྱིས། ལྷུན་གྱིས་གྲུབ་པའི་གནས་ནས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བདག་ཉིད་དཔལ་ཧེ་རུ་ཀ་མཁའ་འགྲོ་མའི་འཁོར་དང་བཅས་པ་ཡེ་ཤེས་ཀྱི་དཀྱིལ་འཁོར་ནམ་མཁའ་ལ་སྤྱན་དྲངས་ཏེ། སྤྲུལ་པ། དེ་ལ་མཆོད་པ་རྣམས་
ཀྱིས་རིམ་བཞིན་དུ་མཆོད་ནས། དེའི་རྗེས་ལ་ཡན་ལག་བདུན་པའི་མཆོད་པའམ། སྨོན་ལམ་བྱ། དེ་ནས་བསྟོད་པ་བྱ་སྟེ། མཆེ་བ་གཙིགས་ཤིང་འཇིགས་ཆེ་བ། །ཞེས་བྱ་བ་ལ་སོགས་པའི་བསྟོད་པས་བསྟོད་ལ། མཁའ་འགྲོ་མ་ལ་གཏོར་
མ་བསྔོས་ཏེ། གསོལ་བ་བཏབ་ནས། ཡི་གེ་བརྒྱ་པས་བཟོད་གསོལ་བྱས་ལ་གཤེགས་སུ་གསོལ་ལོ། །དེ་ནས་ཤཱུ་ནྱ་ཏཱ་ཛྙཱ་ནའི་སྔགས་བརྗོད་པའི་སྒོ་ནས་སྟོང་པ་ཉིད་བསྒོམས་ནས། དེའི་ངང་ལས་ཧཱུཾ་གི་སྣང་བའི་འོད་ཟེར་ལས། ར་བ་དང་། དྲ་བ་

ལས་ས་གཞི་སྟེ། སྲུང་བའི་འཁོར་ལོ་དུར་ཁྲོད་བརྒྱད་དང་བཅས་པར་བསྒོམ་མོ། །དེ་ནས་བདག་ཉིད་ཀྱི་སྙིང་གའི་ས་བོན་གྱི་འོད་ཟེར་གྱི་ལྕགས་ཀྱུས། གང་ཤི་བ་དེའི་སེམས་རྣམ་པར་ཤེས་པ་བར་དོའི་གནས་སམ། རིགས་དྲུག་གང་ན་གནས་
པའི་ཤེས་པའི་ངོ་བོ་ཨ་ཐུང་ངུ་དཀར་ལ་ཕྲ་བ་གཅིག་ཏུ་དྲངས་ཏེ། རོའི་ཁའི་ལམ་ནས་སྙིང་གར་བཅུག་པས། དེ་ཉིད་རྣམ་པར་ཤེས་པའི་སེམས་དང་ལྡན་པར་སྔར་གྱི་ཇི་ལྟ་བ་བཞིན་དུ་བསམས་ལ། དེའི་འོག་ཏུ་བཟླས་པ་བྱ་སྟེ། ཨོཾ་ཨཱཿཧྲཱིཿཧཱུཾ་ཞེས་
པ་ལ་སོགས་པའི་ལྷ་རྣམས་ཀྱི་ཕྲེང་སྔགས་བཟླས་པས། བདག་གི་སྙིང་གའི་ས་བོན་ཕྲེང་སྔགས་དང་བཅས་པ་ལས་འོད་འཕྲོས་པས། བདག་གི་སྣའི་རླུང་དང་འདྲེས་ནས། བསྒྲུབ་བྱའི་སྣའི་ལམ་ནས་སྙིང་གར་ཞུགས་པས། བསྒྲུབ་བྱའི་སྙིང་གར་ཟླ་
བ་ལ་གནས་པའི་ས་བོན་ཕྲེང་སྔགས་དང་བཅས་པར་གྱུར་པར་བསམ་མོ། །དེ་ནས་བཟླས་པ་བྱས་པས་བདག་གི་སྙིང་གའི་སྔགས་ལས་འོད་འཕྲོས་ཏེ། བསྒྲུབ་བྱའི་སྣའི་ལམ་ནས། སྙིང་གའི་སྔགས་ལ་ཕོག་པས། བསྒྲུབ་བྱའི་སྙིང་གའི་སྔགས་
ལས་འོད་འཕྲོས་ཏེ། བསྒྲུབ་བྱའི་ལས་དང་ཉོན་མོངས་པའི་སྒྲིབ་པ་ཐམས་ཅད་སྦྱང་བར་བསམ་མོ། །དེ་ལྟར་ཞག་དུ་ལྕོགས་ལ་སོགས་པར་བསྙེན་པ་བྱའོ། །དེ་ནས་བསྙེན་པ་ཐོན་པ་དང་། བསྒྲུབ་བྱའི་སྔགས་ཀྱི་ཕྲེང་བ་འོད་དུ་ཞུ་ནས། ལུས་མགོ་མཇུག་
ཏུ་ཐིམ་པས། སྒྲིབ་པ་ཐམས་ཅད་བྱང་ནས་ལུས་ཤེལ་དངས་པ་ལྟར་གྱུར་པ་བསམ་མོ། །དེ་ནས་ལྷག་པར་གནས་པ་སྟ་གོན་གྱི་ཆོ་ག་གཞུང་དང་མཐུན་པར་བྱ། དེའི་རྗེས་ལ་མདུན་དུ་ཡེ་ཤེས་ཀྱི་དཀྱིལ་འཁོར་སྤྲུལ་ལ་དེར་དཀྱིལ་འཁོར་དུ་གཞུག་པ་ནས་དབང་བསྐུར་
བ་གནས་སྐབས་དང་སྦྱར་ལ་དབང་བསྐུར་རོ། །གལ་ཏེ་བསྙེན་པ་མ་ལྕོགས་པར་གྱུར་ན། དེའི་ཚེ་ཁྲུས་བྱ་བ་ནས་དབང་བསྐུར་བའི་ཡན་ལག་རྫོགས་པར་བྱའོ། །དེ་ནས་བཀྲ་ཤིས་པའི་གནས་སུ་སའི་ཆོ་ག་སྔོན་དུ་འགྲོ་བར་རོ་དྲངས་ལ། སྦའམ་གུར་གྱི་ནང་

དུ་མཎྜལ་བྱས་ལ། ས་ཚོན་གྱིས་ཟླུམ་པོ་དཀར་པོར་བྱས་ཏེ། དེར་གཞག་གོ། །དེ་ནས་ཕྱོགས་གཅིག་ཏུ་སྲེག་ཁང་བརྩིགས་ཏེ། ཇི་ཙམ་རེགས་པའི་ས་བཅད་དེ་མཎྜལ་བྱས་ལ། དེའི་དབུས་སུ་ཁྲུ་ཕྱེད་དང་དོ་པ་ཙམ་ལ། ཟབས་སུ་དེའི་
ཕྱེད་བརྐོས་ལ། དེའི་དབུས་སུ་སོར་བཅུ་པའི་ལྟེ་བར་འཕངས་སུ་སོར་བཞི་པ་བྱས་ལ། དེར་སྣ་ཚོགས་པདྨ་འདབ་བརྒྱད། ལྟེ་བ་དཀར་པོ་འདབ་མ་རྣམས་དམར་པོར་བྱས་ལ། དེར་མཚན་མ་མི་དགོས་སོ། །མཐའ་མ་རྡོ་རྗེའི་ཕྲེང་བས་བསྐོར་རོ། །དེའི་སྟེང་གི་ཁ་ཁྱེར་སོར་ལྔ་
པའི་ཆུ་ཞེང་མཉམ་པར་བྱས་ལ་ཕྱི་རོལ་གྱི་གཞི་སེར་པོར་བྱའོ། །དེ་ནས་མཚམས་བཞིར་ཀ་བ་བཞི་བཙུགས་ལ། ཕྱོགས་གཉིས་སུ་གདུང་གཉིས་བཏང་སྟེ། དེའི་སྟེང་དུ་ཤིང་ཁང་ཚུལ་བཞིན་དུ་བརྩིགས་ལ། རོ་དེར་གཞུག་གོ། །དེ་ཉིད་ཀྱི་དྲུང་དུ་
ལས་ཐམས་ཅད་པའི་ཐབ་ཁུང་གཞུང་བཞིན་དུ་བྱས་ནས། དེ་ནས། སྦྱིན་སྲེག་གི་རྫས་བུད་ཤིང་དང་། ཡམ་ཤིང་དང་། རླུང་གཡབ་དང་། མར་ལ་སོགས་པ་བསྲེག་པར་འོས་པའི་རྫས་ཐམས་ཅད་གཞུང་བཞིན་དུ་བཤམ་མོ། །དེ་ནས་བདག་ཉིད་ཁྲུས་
བྱས་ལ། རྒྱན་ཆས་ཀྱིས་བརྒྱན་ཏེ། མཆོད་པ་ལྔ་ལ་སོགས་པ་ཐམས་ཅད་བསགས་ལ། བདག་ཉིད་དཔལ་ཧེ་རུ་ཀའི་སྐུར་བསྒོམས་ཏེ། མཆོད་པ་ཐམས་ཅད་བྱིན་གྱིས་བརླབས་ལ། སྙིང་གའི་ས་བོན་གྱི་འོད་ཟེར་གྱིས། ཡེ་ཤེས་ཀྱི་དཀྱིལ་འཁོར་སྤྱན་དྲངས་
ནས་ནམ་མཁའ་ལ་སྤྲུལ་ཏེ་བསམས་ལ། ཕྱི་ནང་གི་མཆོད་པ་ཐམས་ཅད་ཀྱིས་མཆོད་ནས། ཡན་ལག་བདུན་པའི་མཆོད་པ་དང་། བསྟོད་པ་ཡན་ལག་གཞུང་བཞིན་དུ་བྱའོ། །དེ་ནས་སྟོང་པ་ཉིད་དུ་བསྒོམ་པ་སྔོན་དུ་འགྲོ་བའི་སྲུང་བའི་འཁོར་ལོ་གཞུང་བཞིན་དུ་བསྒོམས་
ལ། དེར་སྦྱིན་སྲེག་བྱ་སྟེ། དེ་ཡང་སྦྱིན་སྲེག་གི་ཆོ་ག་ནས་བྱུང་བ་བཞིན་དུ་མེ་ལྷའི་མཆོད་པ་ཡན་ཆད་རྫོགས་པར་བྱས་ལ། དེ་ནས་མེ་ལྷ་འོད་དུ་ཞུ་སྟེ། འབར་བའི་རྣམ་པར་གྱུར་བར་བསམས་ལ་དེར་ཡེ་ཤེས་ཀྱི་ལྷ་ལ་སྦྱིན་སྲེག་གི་མཆོད་པ་བྱ་སྟེ། སྐབས་འདིར་བསྒྲུབ་

བྱའི་ལྷག་པའི་ལྷ་གང་ཡིན་པ་དེར་ཆོ་གའི་ཡན་ལག་གིས་བསྐྱེད་ལ་ཡེ་ཤེས་སེམས་དཔའ་སྙིང་གའི་ས་བོན་གྱིས་བཀུག་ནས་བསྟིམས་ཏེ། མཆོད་པ་ལྔ་ལ་སོགས་པས་མཆོད། དེ་ནས་སྲེག་རྫས་རྣམས་ཀྱིས་རིམ་བཞིན་དུ་མཆོད་ལ། འདོད་དོན་གསོལ་བ་
ཡན་ཆད་བྱ་སྟེ། སྦྱིན་སྲེག་གི་ཆོ་ག་དང་མཐུན་ནོ། །སློབ་དཔོན་ཐེབ་ཡོད་ན། གཅིག་གིས་སྡིག་པ་བསྲེག་པའི་ཏིང་ངེ་འཛིན་བྱ་སྟེ། སྲེག་ཁང་དུ་མེ་འབར་ལ། བསང་གཏོར་གྱི་ཆུས་བསངས་ལ། བསྒྲུབ་བྱའི་རྣམ་སྨིན་གྱི་ལུས་དེ་ཉིད། དཔག་ཏུ་མེད་པའི་དུས་
རྒྱུད་ལ་བསགས་པའི་ལས་དང་ཉོན་མོངས་པའི་དྲི་མའི་སྡིག་པའི་ངོ་བོ་ཡི་གེ་ཀཾ་ནག་པོའི་ཕུང་པོ་གཅིག་ཏུ་བསམས་ལ། འོག་གི་སྣ་ཚོགས་པདྨའི་ལྟེ་བ་ལས་མེ་འབར་བས། ཀཾ་དེ་རིམ་གྱིས་བསྲེག་པར་བསྒོམས་ཏེ། ཨོཾ་སརྦ་པཱ་པཾ་ཤཱནྟིཾ་ཀུ་རུ་སྭཱ་ཧཱ། ཨོཾ་སརྦ་
ཀརྨཱ་ཤཱནྟིཾ་ཀུ་རུ་སྭཱ་ཧཱ། ཨོཾ་སརྦ་དུཿཁ་ཤཱནྟིཾ་ཀུ་རུ་སྭཱ་ཧཱ། ཞེས་བརྗོད་ཅིང་སྡིག་པ་བསྲེག་པའི་ཏིང་ངེ་འཛིན་བྱའོ། །སློབ་དཔོན་གཅིག་གིས་ཉེས་པ་བཤགས་པའི་བསམ་གཏན་བྱ་སྟེ། ཤི་བའི་རྣམ་པར་ཤེས་པའི་སེམས་བར་དོའི་སྲིད་པའི་ངོ་བོ་ལུས་ངག་ཡིད་
གསུམ་གྱི་མཚན་མ་འབྲུ་གསུམ་ཁ་དོག་སོ་སོ་སྟེ། སེར་པོ་གཉིས་ཀྱིས་བརྟེན་པ་ཟླ་བའི་དཀྱིལ་འཁོར་གྱི་སྟེང་ན་གནས་པར་བསམས་ལ། བསྒྲུབ་བྱའི་སྔར་གྱི་ལུས་དེ་ཉིད་ཀྱིས་ཡི་གེ་བརྒྱ་པ་ཟློས་ཤིང་བཤགས་པ་བྱེད་པར་བསྒོམས་ཏེ། ཨོཾ་བཛྲ་སཏྭ་ས་མ་ཡ་
མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོ་ཥྱོ་མེ་བྷ་བ། སརྦ་སིདྡྷིམྨེ་པྲ་ཡ་ཙྪ། སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཿ། ཀུ་རུ་ཧཱུཾ། ཧ་ཧ་ཧ་ཧ་ཧོ། བྷ་ག་ཝན། སརྦ་ཏ་ཐཱ་ག་ཏ། བཛྲ་མཱ་མེ་མུཉྩ་བཛྲཱི་བྷ་བ། མ་ཧཱ་ས་མ་ཡ་
སཏྭ་ཨཱ། ཞེས་བརྗོད་ཅིང་བཤགས་པ་བྱེད་པར་བསམ་མོ། །སློབ་དཔོན་ཐེབ་མེད་ན། གཅིག་གིས་གསུམ་ཀའི་ཏིང་ངེ་འཛིན་རིམ་གྱིས་བྱ་བར་ཡང་རུང་ངོ་། །སྦྱིན་སྲེག་སྦྱིན་ནས། ཐབ་དེ་ཉིད་དུ་མར་དང་འོ་མ་དང་། སྦྲང་རྩི་དང་། ཀ་ར་དང་། ཕྱེ་བཟང་པོ་ལས་

ཙཱ་རུ་བཅོས་ལ། ཙཱ་རུའི་ཕུང་སྦྱིན་སྲེག་ཏུ་ཕུལ་ལ། ལྷག་མ་ལོངས་སྤྱོད་དོ། །དེ་ནས་སྨོན་ལམ་གདབ་སྟེ། ན་མོ་སངས་རྒྱས་དང་ཆོས་དང་དགེ་འདུན་གྱི་བཀའི་བྱིན་གྱི་རླབས་ཀྱི་བདེན་པ་དང་། རིག་སྔགས་དང་གསང་སྔགས་དང་སྙིང་པོ་
དང་ཕྱག་རྒྱ་དང་ཏིང་ངེ་འཛིན་གྱི་བྱིན་གྱི་རླབས་དང་། བདག་ཅག་གི་ལྷག་པའི་བསམ་པ་རྣམ་པར་དག་པའི་སྟོབས་དང་། ཆོས་ཉིད་རྟེན་ཅིང་འབྲེལ་པར་འབྱུང་བ་ཟབ་མོ་བསམ་གྱིས་མི་ཁྱབ་པའི་མཐུ་དང་བདེན་པའི་བྱིན་གྱི་རླབས་ཀྱིས། དེང་ཚེ་འཕོས་ཤིང་ལུས་
བརྗེས་པ་འདི་རྣམ་པར་སྨིན་པའི་ཕུང་པོ་འདི་ལ་བརྟེན་ནས། དགེ་བའི་རྩ་བ་གཞུང་བཞིན་དུ་བསྐྲུན་པ་འདིས། ཚེ་འཕོས་པ་འདི་དམྱལ་བའི་གནས་སུ་མི་སྐྱེ་བར་གྱུར་ཅིག །གལ་ཏེ་སྐྱེས་པར་གྱུར་ན། དམྱལ་བ་ཚ་གྲང་ལ་སོགས་པའི་སྡུག་བསྔལ་དང་བྲལ་ནས། དམྱལ་བ་རྣམས་
ལ་སྤྲུལ་པའི་སྐུ་གཤིན་རྗེ་ཆོས་ཀྱི་རྒྱལ་པོ་ལྟ་བུས་ཆོས་སྟོན་པའི་སྐལ་པ་དང་ལྡན་པར་གྱུར་ཅིག །གཞན་ཡང་ཡི་དགས་ཀྱི་གནས་སུ་མི་སྐྱེ་བར་གྱུར་ཅིག །གལ་ཏེ་སྐྱེས་པར་གྱུར་པ་ན། ཡི་དགས་ཀྱི་བཀྲེས་སྐོམ་གྱི་སྡུག་བསྔལ་ལ་སོགས་པ་དང་བྲལ་ནས།
ཡི་དགས་རྣམས་ལ་སྤྲུལ་པའི་སྐུ་ཁ་འབར་མ་ལྟ་བུས་ཆོས་སྟོན་པའི་སྐལ་པ་དང་ལྡན་པར་གྱུར་ཅིག །གཞན་ཡང་བྱོལ་སོང་གི་གནས་སུ་མི་སྐྱེ་བར་གྱུར་ཅིག །གལ་ཏེ་སྐྱེས་པར་གྱུར་པ་ན། བྱོལ་སོང་གི་བཤའ་བཞུར་ལ་སོགས་པའི་སྡུག་བསྔལ་དང་བྲལ་
ནས། བྱོལ་སོང་རྣམས་ལ་སྤྲུལ་པའི་སྐུ་གསེར་བཟང་ལྟ་བུས་ཆོས་སྟོན་པའི་སྐལ་པ་དང་ལྡན་པར་གྱུར་ཅིག །གཞན་ཡང་མིའི་འདྲེ་མིའི་སྡུག་བསྔལ་གསུམ་དང་བརྒྱད་ལ་སོགས་པ་དང་བྲལ་ནས། མི་རྣམས་ལ་སྤྲུལ་པའི་སྐུ་ཤཱཀྱ་ཐུབ་པ་ལྟ་བུས་ཆོས་སྟོན་པའི་
སྐལ་བ་དང་ལྡན་པར་གྱུར་ཅིག །གཞན་ཡང་ལྷ་མ་ཡིན་གྱི་འདྲེ། ལྷ་མ་ཡིན་གྱི་སྡུག་བསྔལ་ཁོང་ཁྲོ་དང་འཐབ་རྩོད་ལ་སོགས་པ་དང་བྲལ་ནས། ལྷ་མ་ཡིན་རྣམས་ལ་སྤྲུལ་པའི་སྐུ་ཐགས་བཟངས་རིས་ལྟ་བུས་ཆོས་སྟོན་པའི་སྐལ་བ་དང་ལྡན་པར་གྱུར་ཅིག །གཞན་ཡང་ལྷའི་

འདྲེ། ལྷའི་སྡུག་བསྔལ་འཆི་འཕོ་དང་ལྟུང་བ་ལ་སོགས་པ་དང་བྲལ་ནས། ལྷ་རྣམས་ལ་སྤྲུལ་པའི་སྐུ་བརྒྱ་བྱིན་ལྟ་བུས་ཆོས་སྟོན་པའི་སྐལ་བ་དང་ལྡན་པར་གྱུར་ཅིག །དེ་ལྟར་ཁམས་གསུམ་གྱི་སྡུག་བསྔལ་ལས་གྲོལ་ཏེ། ཁྱད་པར་གྱི་ལམ་ལྔ་ལ་བརྟེན་ནས། སྒྲིབ་པ་
གཉིས་སྤངས་ཏེ། ཚོགས་གཉིས་རྫོགས་ནས། མཐར་བླ་ན་མེད་པའི་བྱང་ཆུབ་ཕྱག་རྒྱ་ཆེན་པོ་མཆོག་གི་གོ་འཕང་ལྷུན་གྱིས་གྲུབ་སྟེ། འཁོར་བ་མ་སྟོང་གི་བར་དུ་སེམས་ཅན་ཐམས་ཅད་ཀྱི་དོན་རྒྱུན་མི་འཆད་པར་སྤྱོད་པའི་སྐལ་བ་དང་ལྡན་པར་གྱུར་ཅིག །དེ་ནས་
དགེ་བའི་རྩ་བ་བསྔོ། །དེ་ནས་ཕྱིས་སྲེག་ཁང་དུ་འོ་མ་གཏོར་ཏེ། ཞི་བའི་སྔགས་བཟླས་ཏེ། རུས་བུ་བཏུས་ལ་སཱཙྪ་བཏབ་ནས། རབ་ཏུ་གནས་པར་བྱའོ། །རོ་སྦྱང་བའི་སྒྲུབ་ཐབས་ཀྱི་ཆོ་ག །བླ་མ་དམ་པའི་གདམས་ངག་ལ་བརྟེན་ནས། གཞུང་ཉེ་བར་བསྡུས་
པ་རྫོགས་སོ།། ༄། །སྒྱུ་འཕྲུལ་ཆེན་མོའི་སྒྲུབ་ཐབས་བཞུགས། ༄༅༅། །རྡོ་རྗེ་མཁའ་འགྲོ་མ་ལ་ཕྱག་འཚལ་ལོ། །དང་པོར་སྔགས་པ་བདག་ཉིད་ཀྱི། །ཞལ་གདོང་དག་པར་བྱས་པས་ན། །དེ་ནི་འཇིག་རྟེན་པ་ཡི་ལུགས། །དོན་དམ་རྣལ་འབྱོར་འདི་ལྟ་སྟེ། །སྙིང་
གར་ཟླ་བའི་དཀྱིལ་འཁོར་ལ། །ནག་པོ་ཧཱུྃ་ནི་བསམ་པར་བྱ། །འོད་ཟེར་རྣམ་ལྔས་ཁྱབ་པར་སྤྲོས། །འཇིག་རྟེན་ཁམས་ནི་གསལ་བྱས་ནས། །སླར་འདུས་ཞལ་ནི་དག་པར་བྱ། །དེ་ནས་བསྒོམ་པའི་ས་གཞི་ནི། །བདུད་རྩི་ལྔས་ནི་གཏོར་བར་བྱ། །དེ་སྟེང་
བདེ་བའི་སྟན་ལ་འདུག །སྙིང་གར་ཟླ་དཀྱིལ་ཧཱུྃ་ནི་བསམ། །དེ་ལས་འོད་ཟེར་རབ་འཕྲོས་ནས། །རང་བཞིན་དཀྱིལ་འཁོར་སྤྱན་དྲངས་ནས། །མདུན་གྱི་ནམ་མཁར་བསམ་པར་བྱ། །རང་གི་སྙིང་གའི་ཧཱུྃ་ལས་ནི། །མཁའ་འགྲོ་མ་བཞི་རབ་སྤྲོས་ལ། །ཕྱི་ནང་མཆོད་བསྟོད་ལ་སོགས་བྱ། །
དེ་ནས་སྡིག་པ་བཤགས་པར་བྱ། །ལུས་ངག་ཡིད་གསུམ་ལས་བྱས་སྡིག །རང་གི་བྱས་སོགས་སྡིག་པ་ཀུན། །རང་བཞིན་དཀྱིལ་འཁོར་དག་པ་བཤགས། །སངས་རྒྱས་ལ་སོགས་བསོད་ནམས་ལ། །རྗེས་སུ་ཡི་རང་བ་བྱས་ནས། །རྗེས་སུ་ཡི་རང་བསོད་ནམས་འདིས། །སེམས་ཅན་

ཐམས་ཅད་དོན་དུ་བསྔོ། །དཀོན་མཆོག་གསུམ་ལ་སྐྱབས་སུ་མཆི། །བྱང་ཆུབ་སེམས་ནི་རྣམ་གཉིས་ཀྱིས། །རང་གི་ལུས་ངག་ཡིད་གསུམ་འདིས། །སངས་རྒྱས་ལ་སོགས་རྣམས་ལ་དབུལ། །ཡན་ལག་བདུན་མཆོད་བྱས་ནས་སུ། །རང་གི་
ལུས་ངག་ཡིད་གསུམ་ལ། །རང་བཞིན་ཡི་གེ་གསུམ་འདི་བསམ། །ཡི་གེ་གསུམ་ནི་འདི་ལྟ་སྟེ། །ཧེ་དང་རུ་ནི་ཀ་དང་གསུམ། །ཧེ་ཞེས་ཆོས་རྣམས་རྒྱུ་མེད་པ། །ཧ་ཞེས་ཆོས་རྣམས་སྐྱེ་འགག་མེད། །ཨེ་ཞེས་ཆོས་རྣམས་སྨྲ་བརྗོད་བྲལ། །རུ་ཞེས་ཆོས་རྣམས་བྲག་ཅ་འདྲ། །ར་ཞེས་
ཡང་དག་བདེ་ཆེན་ལུས། །ཨུ་ཞེས་ཆོས་རྣམས་མི་རྟོག་བརྟེན། །ཀཱ་ཞེས་ཆོས་རྣམས་གནས་མེད་པའོ། །ཀ་ཞེས་ཆོས་རྣམས་བདེ་དང་ལྡན། །ཨ་ལས་ཆོས་རྣམས་སྐྱེ་མེད་བསྟན། །རང་གི་ལུས་ངག་ཡིད་གསུམ་གྱི། །རང་བཞིན་ཡི་གེ་གསུམ་པོ་འདི། །ནན་ཏན་གྱིས་
ནི་དེ་ལྟར་བསྒོམ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷ་བ་ཨཱཏྨ་ཀོ྅ཧཾ། སྟོང་ཉིད་སེམས་ནི་བརྟན་བྱས་ནས། །དེ་ཉིད་ཉི་མའི་དཀྱིལ་འཁོར་གྱུར། །དེ་སྟེང་ཧཱུྃ་ནག་བསམ་བྱ་སྟེ། །དེ་གྱུར་རྡོ་རྗེར་བསྒོམ་པར་བྱ། །རྡོ་རྗེ་བུམ་པར་ཧཱུྃ་ནག་བསམ། །དེ་ལས་འོད་ཟེར་རྡོ་རྗེ་འཕྲོས། །གྲུ་བཞི་
རྡོ་རྗེ་བརྩིག་བྱས་ཏེ། །སྟེང་དུ་རྡོ་རྗེ་གཟེབ་བསམས་ནས། །འོག་ནི་རྡོ་རྗེ་ས་གཞི་སྟེ། །རྡོ་རྗེ་ར་བའི་ཕྱི་རོལ་དུ། །ལཾ་གྱུར་ས་གཞི་གྲུ་བཞི་སྟེ། །རྡོ་རྗེ་རྩེ་གསུམ་གྱིས་ནི་མཚན། །ས་ཡི་དཀྱིལ་འཁོར་ཕྱི་རོལ་དུ། །བཾ་གྱུར་ཆུ་ཡི་དཀྱིལ་འཁོར་ཟླུམ། །དེ་དབུས་བུམ་པ་དག་ཏུ་
བསམ། །ཆུ་ཡི་དཀྱིལ་འཁོར་ཕྱི་རོལ་དུ། །ཡཾ་གྱུར་རླུང་དཀྱིལ་གཞུ་ལྟ་བུར། །གཡས་གཡོན་བ་དན་མཚན་པར་བྱ། །ཡང་ན་དེ་ཡི་ཕྱི་རོལ་དུ། །རཾ་གྱུར་མེ་དཀྱིལ་གྲུ་གསུམ་བསམ། །རྡོ་རྗེ་ར་བའི་ནང་དུ་ནི། །ཕྱོགས་བཞི་མཚམས་བཞི་དག་ལ་ནི། །དུར་ཁྲོད་
བརྒྱད་ནི་བསམ་པར་བྱ། །པཾ་གྱུར་པདྨ་དམར་པོ་བསམ། །པདྨའི་ཟེ་འབྲུའི་སྟེང་དུ་ནི། །ཉི་མའི་དཀྱིལ་འཁོར་བསམ་པར་བྱ། །དབུས་སུ་མཐིང་ནག་ཧཱུྃ་ནི་བསམ། །ཧཱུྃ་ལས་འོད་ཟེར་རབ་སྤྲོས་པས། །ཕྱོགས་བཅུའི་བདེ་གཤེགས་རྣམས་བཀུག་ནས། །ཧཱུྃ་ལ་ཐིམ་ནས་

ཞུ་བར་གྱུར། །པདྨའི་འདབ་མ་བཞི་ལ་ནི། །ལྷ་མོ་བཞི་ནི་བསྐྱེད་པར་བྱ། །ཚད་མེད་བཞི་ཡི་རང་བཞིན་ལས། །རྡོ་རྗེ་མཁའ་འགྲོ་ལ་སོགས་བཞིས། །འདི་བཞིའི་རྡོ་རྗེ་གླུ་ཡིས་ནི། །མཉམ་ཉིད་ལ་གནས་བསྐུལ་བར་བྱ། །དཔལ་རྡོ་རྗེ་གླུའི་དམ་པའི་སྲིད་པ་
ཤིན་ཏུ་སྒྲུབ་བྱེད་པ། །ཀྱེ་མ་གཉེན་མཆོག་རྡོ་རྗེའི་འོད་ཀྱིས་པདྨ་རབ་ཕྱེ་ཤིག །ཨ་ལ་ལ་ལ་ལ་ཧོ། །བདེ་བ་ཆེན་པོ་རབ་ཏུ་དགྱེས་པའི་གར་མཛོད་ཅིག །ཉི་མའི་འོད་ཀྱིས་པདྨའི་ཁ་རབ་ཕྱེ་བ་བཞིན། །ཨ་ལ་ལ་ལ་ལ་ཧོ། །བདེ་བ་ཆེན་པོ་རབ་ཏུ་དགྱེས་པའི་གར་མཛོད་ཅིག །
རྡོ་རྗེའི་གླུ་ནི་བླངས་ནས་སུ། །གོང་བུ་དེ་ཉིད་ཧཱུཾ་དུ་གྱུར། །དེ་ལས་འོད་ཟེར་རབ་སྤྲོས་པས། །ཕྱོགས་བཅུའི་བདེ་གཤེགས་ཀུན་བཀུག་ནས། །ཧཱུྃ་ཉིད་ལ་ནི་ཐིམ་པར་བསམ། །སྙིང་རྗེའི་སྟོབས་ཀྱིས་རྡོ་རྗེར་གྱུར། །སྐུ་མདོག་མཐིང་ནག་ཞལ་བཞི་པ། །ཕྱག་བཞི་དག་གིས་
རབ་ཏུ་མཛེས། །དབུས་ཞལ་སྐུ་ནི་མཐིང་ནག་སྟེ། །གཡས་ཀྱི་ཞལ་སེར་གཡོན་ཞལ་ལྗང་། །ལྷག་མའི་ཞལ་ནི་དཀར་པོའོ། །གཡས་གཉིས་ཀ་པཱ་ལ་དང་མདའ། །གཡོན་གཉིས་ཁ་ཊྭཱཾ་གཞུ་ནི་འཛིན། །ཉི་མའི་དཀྱིལ་འཁོར་གདན་ལ་བཞུགས། །ཞལ་བཞི་སྤྱན་ནི་གསུམ་
གསུམ་སྟེ། །མི་མགོ་གསར་པའི་དོ་ཤལ་ལ། །རྒྱུ་མ་རློན་པའི་ཐག་པས་བརྒྱུས། །ཐོད་སྐམ་ཕྲེང་བས་དབུ་ལ་བརྒྱན། །རུས་ཆེན་རྒྱན་དང་ཡང་དག་ལྡན། །དགའ་བཞད་ཞལ་གདངས་མཆེ་བ་གཙིགས། །དབུ་སྐྲ་དམར་སེར་གྱེན་དུ་འབར། །དེ་ནས་གནས་དྲུག་བྱིན་གྱིས་
བརླབ། །དཔྲལ་བའི་མཚམས་སུ་ཙི་སེར་བསམ། །མིག་གཉིས་ལ་ནི་ཨོཾ་དཀར་པོ། །རྣ་བ་གཉིས་ལ་ཨཱ་དམར་བསམ། །སྣ་གཉིས་ལ་ནི་ཁེ་དཀར་པོ། །མགྲིན་པར་ཨཱཿདམར་བསམ་པར་བྱ། །སྙིང་གར་རེ་དམར་བསམ་པར་བྱ། །གནས་དྲུག་ཡང་དག་བྱིན་བརླབས་ནས། །
ཡབ་ཡུམ་སྐུ་ནི་དུས་གཅིག་རྫོགས། །སྟོང་ཉིད་ལ་ནི་ཤིན་ཏུ་འཁྱུད། །གཉིས་མེད་སྐུ་ལས་འོད་ཟེར་འཕྲོས། །འཇིག་རྟེན་ཁམས་གསལ་བྱས་ནས་ནི། །རྡོ་རྗེ་འཛིན་པས་དབུ་ནི་བརྒྱན། །སྐུ་གསུང་ཐུགས་ནི་བྱིན་གྱིས་བརླབས། །ཆོས་དབྱིངས་ཡེ་ཤེས་རྣམ་དག་གི །དེ་ཡི་ངོ་བོ་

བདག་ཉིད་ནི། །ཤར་གྱི་པདྨའི་འདབ་མ་ལ། །རྡོ་རྗེ་མཁའ་འགྲོ་མ་ནི་བསམ། །སྐུ་མདོག་མཐིང་ནག་ཞལ་བཞི་མ། །གཡས་སེར་གཡོན་ལྗང་གུ་ཡི་ཞལ། །ལྷག་པའི་ཞལ་ནི་དཀར་པོ་སྟེ། །གཡོན་གཉིས་ཁ་ཊྭཱཾ་དྲིལ་བུ་ལ། །གཡས་གཉིས་ཀ་པཱ་ལ་ར