Luận tạng Tây Tạng (Tengyur) — Tập 25

ཾ་རྣམས་ཀྱིས་རླུང་དང་མེ་དང་ཆུ་དང་ས་རྣམས་ཟླ་བ་ཕྱེད་པ། གྲུ་གསུམ་པ། ཟླུམ་པོ། གྲུ་བཞི་པའི་དཀྱིལ་འཁོར་ཆོ་ག་རིམ་བཞིན་དུ་བསྒོམ་མོ། །དེའི་དབུས་སུ་ཧཱུཾ་སུཾ་ཧཱུཾ་གིས་རིན་པོ་ཆེ་སྣ་བདུན་གྱི་དངོས་པོའི་རི་རབ་ཆེན་པོ་བསྒོམས་ཏེ། ཨོཾ་ཧཱུཾ་སྭཱ་ཧཱ། ཞེས་བྱ་བའི་
སྔགས་ཀྱིས་ལག་པ་ཁ་སྦུབ་སྟེ་རྡོ་རྗེའི་དངོས་པོའི་ས་གཞིར་བྱིན་གྱིས་བརླབ་པར་བྱ་སྟེ། རི་རབ་རྩེ་མོར་སྔགས་དེ་ཁོ་ནས་རྣལ་འབྱོར་ནམ་མཁའི་དཀྱིལ་འཁོར་རིན་པོ་ཆེ་སྣ་བདུན་གྱི་གཞལ་ཡས་ཁང་གི་ནང་ན་གྲུ་བཞི་དང་སྒོ་བཞི་དང་ཏྭ་ར་ན་བཞིས་བརྒྱན་པ་སྟེ་དྲ་བ་དང་དྲ་ཕྱེད་དུ་བརྒྱན་པའོ། །
དྲིལ་བུ་དང་དྲ་བས་ཀླུབས་པའི་སུམ་རིམ་ལ་སེང་གེ་དང་རྨ་བྱ་དང་ངང་པའི་རྒྱལ་པོ་དང་ཆུ་སྲིན་རྣམས་ཀྱིས་བརྒྱན་པའི་རྒྱལ་མཚན་གྱིས་སྒོ་བཞི་བརྒྱན་ཏེ་གྲྭ་དང་མཚམས་ན་ཟླ་བ་རྡོ་རྗེས་བརྒྱན་པའོ། །དེའི་ནང་ན་དབུས་ན་སེང་གེ །ཤར་ཕྱོགས་སུ་གླང་པོ་ཆེའི་གདན། བྱང་ཕྱོགས་སུ་རྨ་

བྱའི་གདན། ནུབ་ཕྱོགས་སུ་བྱ་ཁྱུང་གི་གདན། ལྷོ་ཕྱོགས་སུ་ཀིང་ཀ་ར། དབང་ལྡན་གྱི་མཚམས་སུ་སེང་གེ །མེའི་མཚམས་སུ་རྡོ་རྗེའི་གདན། བདེན་བྲལ་གྱི་མཚམས་སུ་མ་ཧེ། རླུང་གི་མཚམས་སུ་སྤྱང་ཀི་རྣམས་ཀྱི་གདན་ཏེ། དེ་ལྟར་རེ་མིག་དགུའི་གདན་བྱིན་གྱིས་བརླབས་པར་
བྱའོ། །སྒོ་བཞི་ལ་རོའི་གདན་ནོ། །དེའི་ཕྱི་རོལ་རྡོ་རྗེའི་ཕྲེང་བས་བྱིན་གྱིས་བརླབ་པར་བྱའོ། །ཡང་དེའི་ཕྱི་རོལ་དུ་འཁོར་ལོ་ཟླུམ་པོ་དེ་ལ་ལྷ་ཀུན་གྱི་གནས། པདྨའི་སྟེང་ན་ཟླ་བའི་གདན་དུ་བྱིན་གྱིས་བརླབ་པར་བྱའོ། །དེའི་ཕྱི་རོལ་དུ་དཀྱིལ་འཁོར་གྱི་སྣམ་བུ་ལ་ཡང་དེ་ཁོ་ན་བཞིན་དུ་
པདྨའི་སྟེང་གི་ཟླ་བའི་དཀྱིལ་འཁོར་གྱི་གདན་ལ་འཇིགས་པ་ཆེན་པོའི་ཏིང་ངེ་འཛིན་གྱིས་དམིགས་པར་བྱའོ། །དེ་ནས་ནམ་མཁའ་ལས་བབས་ཏེ། སེང་གེའི་གདན་ལ་གནས་ནས་གོང་མ་བཞིན་དུ་སྔགས་ཀྱིས་སངས་རྒྱས་རྣལ་འབྱོར་ནམ་མཁའ་བསྒོམ་པར་བྱའོ། །དེ་ནས་རྡོ་རྗེ་
མཁའ་འགྲོ་མ་སུཾ་ཞེས་བྱ་བའི་སྙིང་པོས་ཕྱུང་སྟེ། སེམས་ཅན་ཐམས་ཅད་བྱང་ཆུབ་ཏུ་སེམས་བསྐྱེད་པ་དང་། དཀོན་མཆོག་གསུམ་ལ་སྐྱབས་སུ་འགྲོ་བ་ལ་སོགས་པ་སྐལ་བ་ཇི་ལྟ་བ་བཞིན་དུ་སྦྱར་ནས་བསྡུ་བའི་ཚུལ་གྱིས་སླར་བསྡུས་ཏེ། མདུན་དུ་གླང་པོ་ཆེའི་གདན་ལ་རྡོ་རྗེ་མཁའ་
འགྲོ་མ་བསམས་ཏེ། སྐུ་མདོག་དཀར་པོ་ཕྱག་གཉིས་ཁ་ཊྭཱཾ་ག་དང་རྣལ་འབྱོར་མའི་ལྷུང་བཟེད་འཛིན་པ། སྤྱན་གསུམ་པ་སྐྲ་སིལ་བུར་བཏང་བ་སངས་རྒྱས་ཀྱིས་དབུ་ལ་བརྒྱན་པ། གླང་པོ་ཆེའི་པགས་པས་སྨད་གཡོགས་ཤིང་ན་ར་ཙ་རྨས་སྟོད་གཡོགས་པ། །གླང་པོ་ཆེའི་གདན་
ལ་ཉི་མའི་དཀྱིལ་འཁོར་ལ་རོལ་པའི་སྐྱིལ་མོ་ཀྲུང་དུ་བཞུགས་པ། རྡོ་རྗེ་མཁའ་འགྲོ་མའི་བདག་ཉིད་བསྒོམ་པར་བྱའོ། །སུཾ་བཛྲ་ཌཱ་ཀི་ནཱི་ཨ་ཧཾ། ཞེས་བརྗོད་པར་བྱའོ། །དེ་བཞིན་དུ་ཀྵུཾ་ཞེས་བརྗོད་པས་དྲག་མོའི་མཁའ་འགྲོ་མ་སྤྲོས་ཏེ་སེམས་ཅན་ཀུན་ལ་མ་རིག་པའི་མུན་པ་ཡེ་ཤེས་ཀྱི་མིག་
ཅན་དུ་བྱས་ཏེ། སླར་འདུས་དྲག་མོའི་མཁའ་འགྲོ་མ་གསེར་གྱི་མདོག་ཅན་སྒྲ་སྒྲོགས་ནས་མཆེ་བ་གཙིགས་པ་སྐྲ་གྱེན་དུ་བསྒྲིལ་བ་དང་སངས་རྒྱས་ལྔས་དབུ་བརྒྱན་པ། རྨ་བྱའི་གདན་ལ་ཕྱེད་ཀྱི་སྐྱིལ་མོ་ཀྲུང་གིས་བཞུགས་པ། སྦྲུལ་གྱིས་བརྒྱན་པ་ཁ་ཊྭཱཾ་ག་དང་ལྷུང་བཟེད་འཛིན་པ་མེའི་དཀྱིལ་

འཁོར་ལ་གནས་པ། རྡོ་རྗེ་མཁའ་འགྲོ་མ་བཞིན་དུ་སྟོད་གཡོགས་དང་སྨད་གཡོགས་བསྣམས་པ། དྲག་མོའི་བདག་ཉིད་དུ་བསྒོམས་ཏེ། ཀྵུཾ་གཽ་རཱི་ཌཱ་ཀི་ནཱི་ཨ་ཧཾ། ཞེས་བྱིན་གྱིས་བརླབ་པར་བྱའོ། །དེ་བཞིན་དུ་ཡུཾ་ཞེས་བརྗོད་པས་རོ་ལངས་མའི་མཁའ་འགྲོ་མ་ཀུན་སྤྲོས་
ཏེ་སེམས་ཅན་ཐམས་ཅད་བྱང་ཆུབ་ཀྱི་ལམ་ལ་བཀོད་ནས་སླར་ལོག་སྟེ་གཅིག་ཏུ་གྱུར་ནས་བྱ་ཁྱུང་གི་གདན་ལ་སོགས་པའི་འདུག་སྟངས་ཀྱིས་འདུག་པ་བྱི་རུ་དང་འདྲ་བའི་མདོག་གཞན་རྡོ་རྗེ་མཁའ་འགྲོ་མ་དང་འདྲ་བར་རོ་ལངས་མའི་གཟུགས་བསམས་ཏེ་ཡུཾ་བེ་ཏཱ་ལཱི་ཌཱ་ཀི་ནཱི་ཨ་ཧཾ། ཞེས་ང་རྒྱལ་བྱའོ། །
དེ་ཁོ་ན་བཞིན་དུ་ཧཱུཾ་ཞེས་བརྗོད་པས་སྙིང་ག་ནས་སྤྲོས་པའི་ཚུལ་གྱིས་གདོལ་པ་མོའི་མཁའ་འགྲོ་མ་སྤྲོས་ཏེ་སེམས་ཅན་ཐམས་ཅད་ཇི་ལྟར་འདོད་དོན་ཡོངས་སུ་བསྐང་ནས་སླར་ལོག་སྟེ་གཅིག་ཏུ་གྱུར་ཏེ། གདོལ་པ་མོའི་གཟུགས་ཇི་ལྟར་སྤྲུལ་པ་ལས་བསྐྱེད་པ་ལ་མཉམ་པར་གཞག་སྟེ། སྐུ་
མདོག་ནག་མོ་དང་། སྐྲ་དམར་པོ་སིལ་བུར་འདུག་པ། པུས་མོའི་སྐྱིལ་མོ་ཀྲུང་དུ་འདུག་པ། ཐལ་མོ་སྦྱར་བ་སྤྱི་བོར་གཞག་སྟེ། གཞན་ནི་དྲག་མོ་མཁའ་འགྲོ་མ་དང་འདྲ་བར་བསྒོམས་ཏེ། ཨོཾ་ཙཎྜ་ལཱི་ཌཱ་ཀི་ནཱི་ཨ་ཧཾ་ཞེས་ང་རྒྱལ་བྱའོ། །དེ་བཞིན་དུ་བྱང་ཤར་མཚམས་སུ་ནི་སྨྼྻུཾ་གིས་བསྐྱེད་
པའི་སེང་གེའི་མདོག་ཅན་སྐུ་མདོག་དཀར་པོ་དང་སེར་པོ་དང་གོས་དམར་པོ། །ཕྱག་གཉིས་པའི་གཡས་པ་ཁ་ཊྭཱཾ་ག་གྱེན་དུ་བསྒྲེང་བ། གཡོན་སྡིགས་མཛུབ་དང་ཞགས་པ་འཛིན་པ། བདུད་ཐམས་ཅད་སྐྲག་པར་བྱེད་པ། སེང་གེའི་མཁའ་འགྲོ་མ་དེ་སེང་གེའི་གདན་ལ་རོལ་པའི་སྐྱིལ་མོ་ཀྲུང་གིས་བཞུགས་
པ་བསྒོམ་པར་བྱའོ། །དེ་བཞིན་དུ་ཤར་ལྷོའི་མཚམས་ན་ཧྨྼྻུཾ་གིས་བསྐྱེད་པ་སྟག་མོ་སྐུ་མདོག་དཀར་བ་དང་ནག་མོ་གོས་དམར་པོ་གཡས་པ་ན་ལྕགས་ཀྱུ་གཡོན་པ་ན་ཞགས་པ་འཛིན་པ། གོང་ནས་གསུངས་པའི་གདན་ལ་ཟླུམ་པོའི་སྐྱིལ་མོ་ཀྲུང་གིས་བཞུགས་པར་བསྒོམ་མོ། །དེ་བཞིན་དུ་ལྷོ་ནུབ་མཚམས་སུ་ས་བོན་ཡྨྼྻུཾ་གིས་བསྐྱེད་
པའི་ཅེ་སྤྱང་མ་སྤྱང་ཀིའི་མགོ་ཅན་མ་སྐུ་མདོག་དཀར་མོ་དང་ནག་མོ། །གོས་དམར་པོ་དང་། ཕྱག་གཉིས་ཀྱིས་ཞགས་པ་དང་དགྲ་སྟ་འཛིན་པ་གོང་དུ་གསུངས་པའི་གདན་ལ་ཕྱེད་ཀྱི་སྐྱིལ་མོ་ཀྲུང་གིས་བཞུགས་པར་བསྒོམ་མོ། །ནུབ་བྱང་མཚམས་ན་ན་ས་བོན་

ཀྵྨྼྻུཾ་གིས་བསྐྱེད་པའི་འུག་པ་མོ་སྐུ་མདོག་དམར་མོ་དང་སེར་མོ་གོས་དམར་པོ་ཕྱག་གཉིས་ལ་བེ་ཅོན་དང་ཞགས་པ། གོང་དུ་གསུངས་པའི་གདན་ལ་འཇོ་བའི་ཚུལ་དུ་བསྒོམ་པར་བྱའོ། །ཤར་ལ་སོགས་པའི་སྒོ་བཞི་ལ་ས་བོན་བུཾ་ལས་མཁའ་འགྲོ་མ། ས་བོན་པཾ་ལས་མར་མེ་མ། །ས་
བོན་ཕྲོཾ་ལས་འཇིབ་བྱེད་མ། །ས་བོན་ཕྲིཾ་ལས་འཕྲོག་བྱེད་མ། །བསྐྱེད་དེ་གོང་དུ་གསུངས་པའི་གདན་ལ་སོགས་པ་བཞིན་དུ་གནས་པ་སྐུ་མདོག་དཀར་པོ་དང་སེར་པོ་དང་དམར་པོ་དང་ནག་པོ་དང་། ཕྱག་གཉིས་ཁར་བཅུག་པ་དང་། སྤྱི་བོར་ཐལ་མོ་སྦྱར་བ་དང་། ཁ་དང་སྙིང་གར་
ལག་པ་གཞག་པ་དང་། གཏུན་ཤིང་འཛིན་པ་རྣམས་ཏེ་སྐྲ་སིལ་བུར་བཏང་བ་མཁའ་འགྲོ་མ་ལ་སོགས་པའི་སྒོ་སྲུང་སྙིང་ག་ནས་སྤྲོས་ཏེ་གཞག་པར་བྱའོ། །རྡོ་རྗེ་ཕྲེང་བའི་ཕྱི་རོལ་ན་ས་བོན་ཧ་ཧོཿཧྲཱིཿལས་བསྐྱེད་པ། །པུཀྐ་སཱི་དང་། ཁྲོ་གཉེར་མ་དང་། གཏུམ་མོ་བདུད་རྩིའི་སྣོད་ཕྱག་
གིས་འཛིན་པ་རྣམས་ཤར་དུ་དགོད་དོ། །ས་བོན་གྷི་གྷྲ་ལས་བསྐྱེད་པ་དྲག་མོ་དང་། ཁྲག་འཐུང་མ་དང་། ཤ་ཟ་མ་རྣམས་ལྕགས་ཀྱུ་རྣམ་པ་ལྔས་གང་བའི་པདྨའི་སྣོད་འཛིན་པ་བྱང་དུ་དགོད་དོ། །ས་བོན་ཀུ་རུ་ཀུ་རུ་ལས་བསྐྱེད་པའི་ཁྲོ་མོ་དང་། འབར་མ་དང་། འཇིགས་མ་
རྣམ་གསུམ་གཏོར་མའི་སྣོད་ཕྱག་གིས་འཛིན་པ་ནུབ་ཏུ་དགོད་དོ། །ས་བོན་བཏྟཱ་ལཱི་ལས་བསྐྱེད་པའི་ཐོད་ཕྲེང་མ་དང་། རྡོ་རྗེ་མ་དང་། བུམ་པ་མ་དང་གསུམ་དམ་ཚིག་གི་ཟས་དང་བཏུང་བའི་སྣོད་ཕྱག་གིས་འཛིན་པ་ལྷོར་དགོད་དོ། །དབང་ལྡན་མཚམས་ལ་སོགས་པའི་གྲྭ་བཞི་
ལ་དབང་ལྡན་མཚམས་སུ་ས་བོན་ལཱ་སྱེ་ཧཱུཾ་དང་། སུ་པྲི་ཡ་གནྡྷེ་ཧཱུཾ་གིས་སྒེག་མོ་དང་དྲི་ཆབ་མ་བསྐྱེད། དཀུར་བརྟེན་པའི་ཕྱག་རྒྱ་དང་དྲི་ཆབ་ཀྱི་སྣོད་འཛིན་པའོ། །མེའི་མཚམས་སུ་ས་བོན་ཧཱུཾ་ཧོཿདང་སྲིཾ་གིས་བསྐྱེད་པའི་པི་ཝང་མ་དང་མེ་ཏོག་མ་བསྐྱེད་དེ། པི་ཝང་བརྡེབ་པ་དང་མེ་
ཏོག་འཐོར་བའི་མཆོད་པའི་ཕྱག་རྒྱ་དང་བཅས་པའོ། །བདེན་བྲལ་མཚམས་སུ་ས་བོན་ཧཱུཾ་ཧཱུཾ་ཧཱུཾ་དང་ཨོཾ་ལས་བསྐྱེད་པ་དབྱངས་ལེན་མ་དང་སྤོས་མ་བསྐྱེད་དེ་ཁའི་མདུན་དུ་དཀར་པོ་བསྐུལ་བ་དང་སྤོས་ཕོར་འཛིན་པའི་ཕྱག་རྒྱ་དང་བཅས་པའོ། །རླུང་གི་མཚམས་ཀྱི་ས་བོན་ནི་ཧཱུཾ་

ནྲྀ་ཏྱེ་ཧཱུཾ་དང་ཀྵུཾ་ལས་སྐྱེས་པའི་གར་བྱེད་མ་དང་མེ་མར་མ་སྟེ། །གར་བྱེད་ཅིང་སྤྱི་བོར་ཐལ་མོ་སྦྱར་བ་དང་མར་མེ་ལག་པས་འཛིན་པའི་ཕྱག་དང་བཅས་པའོ། །དེ་དག་ཀུན་ཀྱང་དྲི་ཞིམ་པའི་མེ་ཏོག་ཕྲེང་བས་བརྒྱན་པ། བར་གྱི་དཀྱིལ་འཁོར་ཟླུམ་པོའི་འཁོར་ལོའི་
སྔོན་དུ་འགོད་པར་བྱའོ། །དེའི་ཕྱི་རོལ་གྱི་དཀྱིལ་འཁོར་གྱི་ཤར་སྒོ་ནས་ས་བོན་ཁེ་ཞེས་པས་ནི་ཁྱབ་འཇུག་གོ། །བྱང་གི་ཕྱོགས་སུ་ཨོཾ་ཞེས་པས་ཚངས་པའོ། །ནུབ་སྒོ་ནས་ས་བོན་ཧཱུཾ་ཞེས་པས་ལྷ་ཆེན་པོའོ། །ལྷོ་ཕྱོགས་སུ་ས་བོན་མུ་མུ་ཞས་པས་བརྒྱ་བྱིན་ནོ། །དབང་ལྡན་གྱི་
མཚམས་སུ་ས་བོན་མུ་མུ་ཞེས་པས་དབང་ལྡན་ནོ། །མེའི་མཚམས་ན་ས་བོན་དྷ་ན་ཨ་གྲེ་ཞེས་པས་ནོར་ལྷ་ཀུ་བེ་རའོ། །བདེན་བྲལ་མཚམས་ན་ས་བོན་ཁ་ནི་ཞེས་པས་འབྱུང་པོའི་བདག་པོའོ། །རླུང་གི་མཚམས་ན་ས་བོན་བུ་ཕུ་ཞེས་པས་ཆུ་ལྷ་ཝ་རུ་ཎའོ། །ཤར་གྱི་སྣམ་བུ་ལ་ཨོཾ་
གུཾ་ཨ་སྭཱ་ཧཱ། ཀེང་རུས་འཇིགས་བྱེད་དོ། །ཨོཾ་གུཾ་ཨ་དྷེ་སྭཱ་ཧཱ། ཁ་ཊྭཱཾ་སྲིན་པོའིའོ། །ཨོཾ་གུཾ་ཨིཾ་སྭཱ་ཧཱ། ཚོགས་ཀྱི་དབང་ཕྱུག་གོ། །ཨོཾ་གུཾ་ཨི་སྭཱ་ཧཱ། དྲིལ་སྣའོ། །དེ་དག་ནི་མཁའ་འགྲོ་མའི་སྐུ་མདོག་དང་མཐུན་ནོ། །བྱང་གི་སྣམ་བུ་ལ་ཨོཾ་ཙུ་ཨུ་སྭཱ་ཧཱ། གཏུམ་པའི་དབང་
ཕྱུག་གོ། །ཨོཾ་ཙུ་ཨུ་སྭཱ་ཧཱ། བདུན་པའི་ལྷ་མོའོ། །ཨོཾ་ཛུ་རེ་སྭཱ་ཧཱ། ཚེ་བའི་དབང་ཕྱུག་གོ། །ཨོཾ་ཛུ་རེ་སྭཱ་ཧཱ། སྒྲ་འཇིགས་བྱེད་དོ། །དེ་དག་ནི་མར་མེ་མའི་སྐུ་མདོག་དང་མཐུན་ནོ། །ནུབ་ཀྱི་སྣམ་བུ་ལ་ཨོཾ་ཏུཾ་ལེ་སྭཱ་ཧཱ། འདོད་པའི་བདག་པོའོ། །ཨོཾ་ཐེ་ལེ་སྭཱ་ཧཱ། ཐ་ན་དེའི་དབང་
ཕྱུག་གོ། །ཨོཾ་དུམ་ཨེ་སྭཱ་ཧཱ། ཅང་ཏེའུའི་རྔ་བཞག་གོ། །ཨོཾ་ཏུཾ་ཨེ་སྭཱ་ཧཱ་རྔ་ཆེན་འཇིགས་བྱེད་དོ། །དེ་དག་ནི་འཇིགས་བྱེད་མའི་སྐུ་མདོག་དང་མཐུན་ནོ། །ལྷོའི་སྣམ་བུ་ལ་ཨོཾ་ཊུཾ་ཨོཾ་སྭཱ་ཧཱ། པི་ཝང་དབང་ཕྱུག་གོ། །ཨོཾ་ཋུཾ་ཨོཾ་སྭཱ་ཧཱ། ང་རོ་ཆེན་པོའོ། །ཨོཾ་ཌུཾ་ཨཾ་སྭཱ་ཧཱ། མཆེ་བ་གཙིགས་
པའོ། །ཨོཾ་ཌུཾ་ཨཾ་སྭཱ་ཧཱ། གཞུ་འཛིན་པའོ། །དེ་དག་ནི་འཕྲོག་བྱེད་མའི་སྐུ་མདོག་དང་མཐུན་ནོ། །དེ་རྣམས་ཀྱང་ཕྱག་བཞི་བཞི་སྟེ། ཁ་ཊྭཱཾ་ག་དང་བྷནྡྷ་དང་ལྷ་མོ་ལ་འཁྱུད་པ་དང་དྲིལ་བུ་འཛིན་པ་དང་སྤྱན་གསུམ་དང་ལྡན་པའོ། །རྒྱན་ཐམས་ཅད་ཀྱིས་བརྒྱན་པ། ཐོད་པའི་ཕྲེང་

བས་བཅིངས་པ་སྟེ། དེ་དག་ནི་ཕྱི་རོལ་གྱི་དཀྱིལ་འཁོར་ལའོ། །དེ་ལྟར་ལྷ་སོ་སོའི་སྔགས་རེ་རེས་རྫོགས་པའི་སྐད་ཅིག་གིས་ཏིང་ངེ་འཛིན་གྱིས་མངོན་སུམ་དུ་དམ་ཚིག་གི་དཀྱིལ་འཁོར་གྱི་ལྷ་ཡོངས་སུ་གང་བར་བསྐྱེད་པར་བྱའོ། །དེ་ཡན་ཆད་ནི་དཀྱིལ་འཁོར་རྒྱལ་པོ་མཆོག་ཅེས་
བྱའོ། །དེ་ནས་ནམ་མཁའི་ཁམས་ཀུན་དུ་དེ་བཞིན་གཤེགས་པ་ཐམས་ཅད་རང་བཞིན་རྡུལ་ཕྲ་རབ་ཀྱི་གཟུགས་ཀྱིས་སེམས་ཅན་ཐམས་ཅད་ཀྱི་དོན་བྱེད་པ་ལ་སོགས་པ་ཐམས་ཅད་རྩོམ་པ་རྣམས་ཀྱི་སྔགས་དང་ཕྱག་རྒྱའི་རིམ་པ་འདི་བྱའོ། །ཏིལ་དང་ནས་དང་འབྲས་ཡོས་དང་།
མེ་ཏོག་དཀར་པོ་དང་དྲི་ཆུ་དང་བསྲེས་པའོ། །འོ་མས་གང་བ་འབྱོར་པ་གསེར་ལ་སོགས་པ་ཡོན་ཆབ་ཀྱི་སྣོད་རང་གི་གཡོན་གྱི་གློར་གཞག་སྟེ་སྔགས་བཟླས་ཏེ་སྟ་གོན་ལ་གནས་པར་བྱའོ། །རྡོ་རྗེ་ཁུ་ཚུར་གཉིས་བཅིངས་ཏེ། །ས་གདུགས་དང་ནི་དཀར་པོ་སྦྲེལ། །དཀར་པོ་ལྕགས་
ཀྱུ་ཞེས་བྱ་བའི་དམ་ཚིག་འགུགས་པའོ། །ཨོཾ་བཛྲ་ཨཾ་ཀུ་ཤ་ཛཿ། ཞེས་བྱ་བའི་ཕྱག་རྒྱ་དང་སྔགས་ཀྱིས་འཇིག་རྟེན་ལས་འདས་པའི་ལྷ་སྤྱན་དྲང་ངོ་། །རྡོ་རྗེ་ཁུ་ཚུར་གཉིས་བཅིངས་ཏེ། །གི་ཝང་དྲི་མ་གསུམ་བསྒྲེང་ནས། །དྲི་མ་གསུམ་གྱི་ཚིགས་གསུམ་ལ། །གི་ཝང་བཀུག་ནས་
གནས་པར་བྱའོ། །ཨོཾ་ཀཪྵ་ནི་ཧཱུཾ་ཕཊ། ཅེས་བྱ་བའི་ཕྱག་རྒྱ་དང་སྔགས་ཀྱིས་འཇིག་རྟེན་པའི་ལྷ་ཐམས་ཅད་དགུག་པར་བྱའོ། །གོང་མ་བཞིན་དུ་མཆོད་ཡོན་དབུལ་བར་བྱའོ། །དེ་ནས་རྡོ་རྗེ་ཁུ་ཚུར་གཉིས་བཅིངས་ནས། དཀར་པོ་དང་གི་ཝང་སྦྲེལ་ལ། ཨོཾ་སྨྼྻུཾ་སྭཱ་ཧཱ། སེང་གེ་མའི་སྔགས་དང་
ཕྱག་རྒྱས་བགེགས་བསྐྲད་པར་བྱའོ། །དེ་ནས་རྡོ་རྗེ་ཁུ་ཚུར་གཉིས་བཅིངས་ཏེ། རྒྱབ་དང་རྒྱབ་ཏུ་ཡང་སྦྱར་ནས། །བཛྲ་སྥོ་ཊ་བཾ། ཞེས་ལྕགས་སྒྲོག་གི་ཕྱག་རྒྱ་དང་སྔགས་ཀྱིས་སྒོ་བཅིང་པར་བྱའོ། །དེ་ནས་ཡེ་ཤེས་མཁའ་འགྲོ་མའི་དམ་ཚིག་གི་ཕྱག་རྒྱ་ཟླ་བ་དང་ཉི་མ་ཁ་སྦྱར་
ནས་པདྨ་ཁ་བྱེ་བའི་ཚུལ་དུ་བྱའོ། །ཨོཾ་ཏིཥྛ་ཨཱ་ས་ན་ཧཱུཾ་སྭཱ་ཧཱ། སྔགས་དང་ལྡན་པས་ལྷ་ཐམས་ཅད་གདན་ལ་བཞུགས་པར་བྱའོ། །དེ་ནས་རིམ་པ་འདིས་ཕྱག་རྒྱ་བཞི་བསྟན་པར་བྱ་སྟེ། རང་གི་སྙིང་གར་རྡོ་རྗེ་རྩེ་ལྔ་པ་བསམས་ཏེ། ཨོཾ་ཡོ་ག་བ་ར་དྲྀ་ཤྱ་ཛཿཧཱུཾ་བཾ་ཧོཿས་མ་ཡ་སྟྭཾ།

ས་མ་ཡ་ཧོ། །པདྨ་ཡེ་ཤེས་སྦྱར་བར་བྱ། །ས་ཡི་གདུགས་དང་རྣམ་ཤེས་སྦྱར། །གཉིས་ཀ་ལུ་གུ་རྒྱུད་དུ་ནི། །ལྷག་མ་བ་དན་ཚུལ་དུ་བྱ། །དྲི་མ་གསུམ་དང་དུད་པར་སྦྱར། །རྩེ་མོ་ལྔ་པོར་རྡོ་རྗེ་འཛིན། །སྙིང་པོའི་སྔགས་ཏེ་རྣལ་འབྱོར་ནམ་མཁའ་བྱིན་གྱིས་
བརླབ་པའི་སྔགས་དང་ཕྱག་རྒྱའོ། །ཨོཾ་ཧཱུཾ་ཨ་སྭཱ་ཧཱ། རྣལ་འབྱོར་ནམ་མཁའི་དམ་ཚིག་གི་སྔགས་སོ། །དེ་ནས་ཉི་མ་ཟླ་བའི་སྙིམ་པར་བྱས་ཏེ། པདྨའི་ཚུལ་གྱིས་རྣམ་པར་ཕྱེ་བར་བྱ་སྟེ། ཨོཾ་ཨཱཿཧཱུཾ་ཨ་སྭཱ་ཧཱ། ཤེས་རབ་ཀྱི་ཕ་རོལ་ཏུ་ཕྱིན་པའི་སྔགས་དང་ཕྱག་རྒྱའོ། །ས་གདུགས་
རྣམ་ཤེས་སྦྱར་ནས་སུ། །ལྷག་མ་རྡོ་རྗེ་བཞིན་དུ་བསྒྲེང་། །ཨོཾ་སུཾ་སྭཱ་ཧཱ། རྡོ་རྗེ་མའི་སྔགས་དང་ཕྱག་རྒྱའོ། །ཕྱག་རྒྱ་དེ་ཉིད་གཉིས་བཅིངས་ཏེ། གཉིས་ཀ་རྒྱབ་གཉིས་སྦྱར་བར་བྱ། ཨོཾ་ཀྵུཾ་སྭཱ་ཧཱ། དྲག་མོའི་སྔགས་དང་ཕྱག་རྒྱའོ། །ཁུ་ཚུར་གཉིས་ནི་སྤྲེལ་ནས་སུ། །ཁ་ཡི་ཕྱོགས་
སུ་དགྲོལ་བར་བྱ། །ཨོཾ་ཡུཾ་སྭཱ་ཧཱ། རོ་ལངས་མའི་སྔགས་དང་ཕྱག་རྒྱའོ། །ཁུ་ཚུར་དམ་པོར་གཉིས་བཅིངས་ཏེ། །དཀར་པོ་གི་ཝང་བསྒྲེང་ནས་སུ། །རྩེ་དང་རྩེ་མོ་སྤྲད་བྱས་ཏེ། །རིན་ཆེན་ཚུལ་དུ་སྦྱར་བར་བྱ། །ཨོཾ་ཧཱུཾ་སྭཱ་ཧཱ། གདོལ་པ་མོའི་སྔགས་དང་ཕྱག་རྒྱའོ། །མདུན་དུ་ལག་པ་
གར་བྱས་ནས། །ཕྱག་རྒྱ་ཐམས་ཅད་བཅིང་བར་བྱ། །རྡོ་རྗེ་ཁུ་ཚུར་གཉིས་བཅིངས་ཏེ། །དཀར་པོ་གི་ཝང་སྦྲེལ་བར་བྱ། །ཨོཾ་སྨྼྻུཾ་སྭཱ་ཧཱ། སེང་གེ་མའི་སྔགས་དང་ཕྱག་རྒྱའོ། །དེ་ཡི་ཕྱག་རྒྱ་དམ་བཅིངས་ཏེ། །དུད་པ་དྲི་མ་གསུམ་བསྒྲེང་ངོ་། །ཨོཾ་ཧྨྼྻུཾ་སྭཱ་ཧཱ། སྟག་མོའི་སྔགས་དང་ཕྱག་
རྒྱའོ། །དེ་ཡི་ཕྱག་རྒྱ་བརྟན་བཅིངས་ཏེ། །ས་གདུགས་དང་ནི་པདྨ་སྦྲེལ། །ཨོཾ་ཡྨྼྻུཾ་སྭཱ་ཧཱ། ཅེ་སྤྱང་མའི་སྔགས་དང་ཕྱག་རྒྱའོ། །རྡོ་རྗེ་ཁུ་ཚུར་གཉིས་བཅིངས་ཏེ། །ཕན་ཚུན་ལན་གསུམ་གདབ་པར་བྱའོ། །ཨོཾ་ཀྵྨྼྻུཾ་སྭཱ་ཧཱ། འུག་པ་མོའི་སྔགས་དང་ཕྱག་རྒྱའོ། །ནང་གི་ལྷ་མོ་དགུ་རྣམས་ནི། །
སྙིང་པོ་ཕྱག་རྒྱ་སྔགས་བཞིན་དུ། །ཟླ་བའི་ལག་པ་ཕྱེ་ནས་སུ། སྟེང་དུ་ཉི་མ་བསྟིམ་པར་བྱ། །ཨོཾ་ཤཱི་གྷྲཾ་སྭཱ་ཧཱ། བྱང་ཕྱོགས་ཀྱི་རྣལ་འབྱོར་མ་རྣམས་ཀྱི་སྔགས་དང་ཕྱག་རྒྱའོ། །རྡོ་རྗེ་ཐལ་མོ་བརྟན་བཅིངས་ཏེ། །ཉི་མ་ཟླ་བ་རྣམ་པར་ཕྱེ། །ཨོཾ་ཀུ་རུ་ཀུ་རུ་སྭཱ་ཧཱ། ནུབ་

ཕྱོགས་ཀྱི་རྣལ་འབྱོར་མ་རྣམས་ཀྱི་སྔགས་དང་ཕྱག་རྒྱའོ། །ཟླ་བ་ཉི་མ་ཕྱེ་ནས་སུ། །རྒྱབ་དང་རྒྱབ་ཏུ་སྤྲད་པར་བྱ། །རྩེ་མོ་གཉིས་ཀ་ཁ་སྤྲད་དེ། །ལྷ་མོ་རྣལ་འབྱོར་མ་གསུམ་སྟེ། །ཨོཾ་བཏྟཱ་ལི་བཏྟཱ་ལི་ཧཱུཾ་སྭ་ཧཱ། ལྷོའི་རྣལ་འབྱོར་རྣམས་ཀྱི་སྔགས་དང་ཕྱག་རྒྱའོ། །རྡོ་རྗེ་ཁུ་ཚུར་གཉིས་བཅིངས་ཏེ། །
སྟ་ཟུར་གཉིས་སུ་གཞག་པར་བྱ། །ཨོཾ་ཧཱུཾ་སྭཱ་ཧཱ། སྒེག་མོའིའོ། །གཡོན་གྱི་ལག་པ་ཕྱེ་ནས་སུ། །འཇིགས་པ་རྣམ་ཤེས་སྦྱར་བར་བྱ། །ཉི་མ་ཀུན་གྱིས་བཟུང་བ་ནི། །དུང་གི་ཕྱག་རྒྱ་ཇི་བཞིན་དུ། །ༀ་སུཾ་པྲི་ཡ་གནྡྷེ་སྭཱ་ཧཱ། དྲི་ཆབ་ཀྱི་སྔགས་དང་ཕྱག་རྒྱའོ། །དབང་ལྡན་མཚམས་ནའོ། །པི་ཝང་ཚུལ་
གྱིས་པི་ཝང་སྟེ། ཨོཾ་ཧཱུཾ་ཧོཿསྭཱ་ཧཱ། པི་ཝང་མའི་སྔགས་དང་ཕྱག་རྒྱའོ། །ལག་པ་གཉིས་ཀྱི་ཐལ་མོ་ནི། །བསྐོར་ཞིང་གྱེན་དུ་གཏོར་བར་བྱ། །ཨོཾ་སྲིཾ་སྭཱ་ཧཱ། མེ་ཏོག་མའི་སྔགས་དང་ཕྱག་རྒྱའོ། །མེའི་མཚམས་ནའོ། །རྡོ་རྗེ་ཁུ་ཚུར་བཅིངས་ནས་སུ། །ཁུ་ཚུར་བཅིངས་ནས་དཀར་པོ་
ནི། །བསྒྲེང་ནས་ཁ་ཡི་མདུན་དུ་བསྐུལ། །ཨོཾ་ཧཱུཾ་ཧཱུཾ་ཧཱུཾ་སྭཱ་ཧཱ། དབྱངས་མཁན་མའི་སྔགས་དང་ཕྱག་རྒྱའོ། །རྡོ་རྗེ་ཁུ་ཚུར་དམ་བཅིངས་ཏེ། །མཁྲིག་མ་ཟླ་བས་གཟུང་བར་བྱ། །ཨོཾ་ཨི་སྭཱ་ཧཱ། སྤོས་མེ་མའི་སྔགས་དང་ཕྱག་རྒྱའོ། །བདེན་བྲལ་མཚམས་ནའོ། །ཡེ་ཤེས་དཀར་པོ་སྦྱར་
ཏེ་སྤྱི་བོར་བརྐྱང་། །རྣམ་ཤེས་གི་ཝང་སྦྱར་ཏེ་དཀུ་རུ་བརྐྱང་། ཨོཾ་སུ་ནྲྀ་ཏྱེ་སྭཱ་ཧཱ། གར་མཁན་མའི་སྔགས་དང་ཕྱག་རྒྱའོ། །ཉི་མ་ཁུ་ཚུར་བཅིངས་ནས་སུ། །ཡེ་ཤེས་གྱེན་དུ་བསྒྲེང་བར་བྱ། །ཨོཾ་ཀྵུཾ་སྭཱ་ཧཱ། མར་མེའི་སྔགས་དང་ཕྱག་རྒྱའོ། །གཡས་ཀྱི་སྟ་ཟུར་མཚམས་སུ་ནི། །ཟླ་
བའི་ལག་པ་བརྐྱང་བར་བྱ། །བསྒྲེང་ནས་གཡོན་གྱི་ཕྱག་ན་བསྣམས། ཨོཾ་ནྱེ་དྷེ་སྭཱ་ཧཱ། རླུང་མཚམས་སུའོ། །ཉི་མའི་ལག་པ་ཁར་བཅུག་སྟེ། །ཧ་ཧ་གད་སྒྲོགས་བཞད་བྱེད་པ། །ཨོཾ་ཕུཾ་ཕུ་སྭཱ་ཧཱ། མཁའ་འགྲོ་མའི་སྔགས་དང་ཕྱག་རྒྱའོ། །ཐལ་མོ་སྤྱི་བོར་བཞག་པ་ནི། །ཨོཾ་ཕེཾ་ཕུ་སྭཱ་ཧཱ། བྱང་
གི་འབར་བྱེད་མའི་སྔགས་དང་ཕྱག་རྒྱའོ། །ཡི་དགས་ཐལ་མོ་ཁར་བཅུག་སྟེ། ཨོཾ་ཕྲོཾ་ཕུཾ་སྭཱ་ཧཱ། ནུབ་ཀྱི་འཇིགས་བྱེད་མའིའོ། །ཟླ་བའི་ཁུ་ཚུར་དམ་བཅིངས་ཏེ། །རྣ་བའི་རྩ་ལ་སྦྱར་བར་བྱ། ཨོཾ་ཕྲིཾ་ཕུ་སྭཱ་ཧཱ། ལྷོར་འཕྲོག་བྱེད་མའིའོ། །ཕྱག་རྒྱ་ཐམས་ཅད་སོ་སོ་རུ། །སྙིང་པོ་སྔགས་དང་སྦྱར་

བར་བྱ། །ཐམས་ཅད་ལྷ་མོ་རྣལ་འབྱོར་མ། །རྡོ་རྗེ་སྒྲོག་གིས་བརྟན་པར་བྱ། །རྡོ་རྗེ་ཁུ་ཚུར་གཉིས་བཅིངས་ཏེ། །རྒྱབ་དང་རྒྱབ་ཏུ་སྦྱར་བར་བྱ། །ཨོཾ་བཛྲ་སྥོ་ཊ་བཾ། རྡོ་རྗེ་ལྕགས་སྒྲོག་གི་སྔགས་དང་ཕྱག་རྒྱའོ། །མདའ་བཀང་བ་ཡི་ཚུལ་དུ་ནི། །རྣ་བར་མདའ་འདྲེན་
ཐུགས་བསྐུལ་ལོ། །ཨོཾ་ཁྲུཾ་སྭཱ་ཧཱ། མདའ་འཛིན་པའི་སྔགས་དང་ཕྱག་རྒྱའོ། །འཁྱུད་དང་ནུ་མ་འཛིན་པ་ནི། །བདག་གིས་ལག་པ་གཉིས་ཀྱིས་བཟུང་། །ཨོཾ་སུ་པྲི་ཡ་ཏེ་མེ་ཧཱུཾ་སྭཱ་ཧཱ། ནུ་མ་འཛིན་པའི་སྔགས་དང་ཕྱག་རྒྱའོ། །ཉི་མའི་ལག་པ་ཕྱེ་བས་ཏེ། །དཀར་པོ་ཡེ་ཤེས་སྦྱར་བར་བྱ། །
དེ་ཡི་དུད་པ་ལ་སོགས་བསྒྲེང་། །རྡོ་རྗེ་ཕྱག་རྒྱ་བསྟན་པར་བྱ། །ཨོཾ་ཧཱུཾ་སྭཱ་ཧཱ། རྡོ་རྗེའི་སྔགས་དང་ཕྱག་རྒྱའོ། །དེ་ཉིད་ཟླ་བ་སྦྱར་བྱས་ནས། །དྲིལ་བུའི་ཕྱག་རྒྱར་རབ་ཏུ་གྲགས། །ཨོཾ་ཨཾ་སྭཱ་ཧཱ། དྲིལ་བུའི་སྔགས་དང་ཕྱག་རྒྱའོ། །སྙིང་གར་ཉི་མ་ཟླ་བ་སྦྱར། །པདྨ་ས་གདུགས་
བསྐྱོད་བྱས་ནས། །གསང་བའི་གནས་སུ་སྦྱར་བར་བྱ། །ཨཱ་ལིའི་ཕྱག་རྒྱར་གྲགས་པ་ཡིན། །ཨོཾ་ཨཱ་སྭཱ་ཧཱ། ཨཱ་ལིའི་སྔགས་དང་ཕྱག་རྒྱའོ། །ཁུ་ཚུར་བྱས་ནས་ཨོཾ་བསྒྲེང་ནས། །ཨོཾ་ཁེ་སྭཱ་ཧཱ། ཤར་གྱི་ཁྱབ་འཇུག་གིའོ། །ཁུ་ཚུར་སྙིང་གར་སྐུལ་བྱེད་ཅིང་། །ཨོཾ་ཨཾ་སྭཱ་ཧཱ།
བྱང་གི་ཚངས་པའིའོ། །བ་དན་གསུམ་ནི་གྱེན་བསྒྲེང་ནས། ཨོཾ་ཧཱུཾ་སྭཱ་ཧཱ། ནུབ་ཀྱི་དྲག་པོའིའོ། །ཟླ་བ་གི་ཝང་བསྒྲེང་བ་ལ། །ཉི་མའི་ལག་པ་ཕྱེ་ནས་སུ། །དེ་ཡི་རྩེ་མོ་ཁོ་ནར་སྦྱར། །ཨོཾ་མུ་མུ་སྭཱ་ཧཱ། ལྷོའི་གདུགས་འཛིན་པའིའོ། །ཁུ་ཚུར་བཅིངས་ནས་དཔྲལ་བ་ནས། དུད་པ་དཀར་པོ་
གཤིབས་ནས་ཀྱང་། །ཨོཾ་མུ་མུ་ཧཱུཾ་སྭཱ་ཧཱ། དབང་ལྡན་མཚམས་ནས་དབང་ལྡན་གྱིའོ། །ཁུ་ཚུར་གཉིས་ནི་གཤིབས་ནས་སུ། །དཀར་པོ་གི་ཝང་བསྒྲེང་བྱས་ནས། །རྩེ་དང་རྩེ་རུ་ཁ་སྤྲད་དེ། །རིན་ཆེན་ཚུལ་དུ་སྦྱར་བར་བྱ། །ཨོཾ་ནཱ་དཱ་གྲེ་ཧཱུྃ་སྭཱ་ཧཱ། མེའི་མཚམས་ན་ཀུ་བེ་རའོ། །ཁུ་ཚུར་བྱས་ནས་
དཀར་པོ་བསྒྲེང་། །ཨོཾ་ཁ་དེ་ནི་ཧཱུཾ་ཕཊ། བདེན་བྲལ་གྱི་མཚམས་ན་འབྱུང་པོའི་བདག་པོའོ། །རྡོ་རྗེ་ཁུ་ཚུར་གཉིས་བཅིངས་ནས། །དུད་པ་དཀར་པོ་བསྒྲེང་བར་བྱ། །ཨོཾ་བྷུར་བྷུ་ཝ་སྭཱ་ཧཱ། །རླུང་གི་མཚམས་ན་བ་རུ་ཎའོ། །རྡོ་རྗེ་ཁུ་ཚུར་གཉིས་བཅིངས་ཏེ། །དུད་པ་དྲི་མ་གསུམ་བསྒྲེང་ནས། །རྩེ་དང་

རྩེ་མོ་ཁ་སྤྲད་དེ། །སེམས་མ་རྡོ་རྗེ་རབ་ཏུ་གྲགས། །ཕྱག་རྒྱ་དེ་ནི་ཀེང་རུས་འཇིགས་བྱེད་ལ་སོགས་པ་རྣམས་ཀྱི་ཐུན་མོང་དུ་བསྟན་པའོ། །སྔགས་ནི་རང་རང་གི་སྔགས་བརྗོད་དེ་ཤེས་པར་བྱའོ། །ཨོཾ་ཀུཾ་ཨ་སྭཱ་ཧཱ། ཀེང་རུས་འཇིགས་བྱེད་ཀྱིའོ། །ཨོཾ་ཁུཾ་ཨཱ་སྭཱ་ཧཱ། ཁ་དང་སྲིན་
པོའིའོ། །ཨོཾ་གུཾ་ཨི་སྭཱ་ཧཱ། ཚོགས་ཀྱི་དབང་ཕྱུག་གིའོ། །ཨོཾ་གཾ་ཨཱི་སྭཱ་ཧཱ། དྲིལ་བུ་རྣ་བའིའོ། །ཨོཾ་ཙུཾ་ཨུ་སྭཱ་ཧཱ། གཏུམ་མོའི་དབང་ཕྱུག་གིའོ། །ཨོཾ་ཚུཾ་ཨཱུ་སྭཱ་ཧཱ། བདུན་པའི་ལྷའིའོ། །ཨོཾ་ཛུཾ་རྀ་སྭཱ་ཧཱ། ཚ་བའི་དབང་ཕྱུག་གོ། །ཨོཾ་ཛུཾ་རཱྀ་སྭཱ་ཧཱ། ཧཱུཾ་སྒྲ་འབྱིན་བྱེད་དོ། །ཨོཾ་
ཏུཾ་ལྀ་སྭཱ་ཧཱ། འདོད་པ་དྲག་པོའིའོ། །ཨོཾ་ཐུཾ་ལཱྀ་སྭཱ་ཧཱ། ཐན་ལེ་དབང་ཕྱུག་གིའོ། །ཨོཾ་དུཾ་ཨེ་སྭཱ་ཧཱ། ཅང་ཏེའུའི་ཕྱི་གཞག་གིའོ། །ཨོཾ་ཐུཾ་ཨཻ་སྭཱ་ཧཱ། རྔ་ཆེན་འཇིགས་བྱེད་ཀྱིའོ། །ཨོཾ་ཏུཾ་ཨོ་སྭཱ་ཧཱ། པི་ཝང་དབང་ཕྱུག་གིའོ། །ཨོཾ་ཐུཾ་ཨཽ་སྭཱ་ཧཱ། ང་རོ་ཆེན་པོའིའོ། །ཨོཾ་དུཾ་ཨཾ་
སྭཱ་ཧཱ། མཆེ་བ་རྣམ་པར་གཙིགས་པའིའོ། །ཨོཾ་དུ་ཨཿསྭཱ་ཧཱ། གཞུ་འཛིན་མའིའོ། །དེ་དག་ནི་དམ་ཚིག་གི་ཕྱག་རྒྱ་ཡིན་ནོ། །ཆོས་ཀྱི་ཕྱག་རྒྱ་ནི་ལྷ་དང་རང་གི་ལྕེའི་པདྨའི་འདབ་མ་ལ་དེའི་དབུས་སུ་རང་གི་སྔགས་ཀྱི་ཡི་གེ་རྣམ་པར་བསྒོམ་པར་བྱའོ། །དེ་ནི་ཆོས་ཀྱི་ཕྱག་རྒྱའོ། །ལས་
ཀྱི་ཕྱག་རྒྱ་ནི་སྔོན་བཞིན་དུ་བཅིང་བ་གོང་མ་དང་འདྲ་སྟེ། ལྷ་དང་རང་གི་ཐུགས་ཀར་ཡི་གེ་ཨ་ལས་རྡོ་རྗེ་རྒྱ་གྲམ་བསམས་ཏེ་ཕྱག་མཚན་མེད་པར་འཆིང་བ་ནི་ལས་ཀྱི་ཕྱག་རྒྱའོ། །ཕྱག་མཚན་དེ་ཁོ་ན་ཕྱག་མཚན་དང་ལྡན་པར་བྱས་ཏེ། རྣལ་འབྱོར་ནམ་མཁའ་ལ་སོགས་པའི་ཕྱག་རྒྱ་ཆེན་པོ་
ཡིན་ནོ། །དེ་ནས་རྣལ་འབྱོར་ནམ་མཁའི་དཀྱིལ་འཁོར་གྱི་ལྷ་རྣམས་ལ་སྒེག་མོ་ལ་སོགས་པ་མཆོད་པ་བརྒྱད་ཀྱིས་རིམ་པ་བཞིན་དུ་མཆོད་དེ་ཟླ་བ་ཉི་མའི་ལག་པ་ཕྱེ་སྟེ། དུད་པ་དྲི་མ་གསུམ་བསྒྲེང་སྟེ། ཕྱག་རྒྱ་དེས་ནི་ཡོན་ཆབ་དབུལ་ལོ། །ཨོཾ་ཨརྒྷཾ་པྲ་ཏཱིཙྪ་ཨརྒྷཾ་ཧཱུཾ་སྭཱ་ཧཱ། ཡང་མེ་ཏོག་ལ་
སོགས་པས་མཆོད་དོ། པྲ་ཝ་ར་སཏྐཱ་ར་པྲ་ཏཱིཙྪ་སྭཱ་ཧཱ། དེ་ནས་གོང་མ་བཞིན་དུ་དྲི་ལ་སོགས་པས་མཆོད་དེ་མཆོད་པ་ཉི་ཤུ་བས་ཀྱང་རིམ་པ་འདིས་མཆོད་པར་བྱའོ། །དེ་ལ་ཉི་ཤུ་འདི་ལྟ་སྟེ། སོ་སོ་རེ་རེ་གར་བྱས་ནས། །སྔོན་དུ་སྒེག་པ་ལ་སོགས་པ་བཅིང་ངོ་། །དེ་ནས་པི་ཝང་གི་ཚུལ་དང་།

གླིང་བུའི་ཚུལ་དང་། དུང་གི་ཚུལ་དང་། ཕྱག་འཚལ་བའི་ཚུལ་དང་། སྦྲང་གཡབ་ཀྱི་ཚུལ་དང་། རྒྱལ་མཚན་གྱི་ཚུལ་དང་། བླ་རེའི་ཚུལ་དང་། འཕེན་གྱི་ཚུལ་དང་། གདུགས་ཀྱི་ཚུལ་དང་། རྔ་བརྡུང་བའི་ཚུལ་དང་། རྫ་རྔ་བརྡུང་བའི་ཚུལ་དང་། རྔ་པ་ཊ་
ཧ་བརྡུང་བའི་ཚུལ་དང་། གར་བྱེད་པའི་ཚུལ་དང་། དགོད་པའི་ཚུལ་དང་། འགྱིང་བའི་ཚུལ་དང་། ཁྲོ་བའི་ཚུལ་དང་། མདའ་འཕང་པའི་ཚུལ་དང་། རྡོ་རྗེ་གསོར་བའི་ཚུལ་དང་། ནུ་མ་འཚིར་བའི་ཚུལ་དང་། ཐལ་མོ་སྦྱོར་བའི་ཚུལ་ལོ། །སྔགས་ནི་ཀུན་ལ་ཧཱུཾ་སྦྱར་བར་བྱའོ། །རྡོ་
རྗེ་དེ་བཞིན་དུ་ནི་གཟུང་བྱའོ། །དྲིལ་བུ་ཆོས་སུ་གཟུང་བར་བྱའོ། །ཨོཾ་བཛྲ་གྷཎྜེ་ར་ཎི་ཏ་པྲ་ར་ཎི་ཏ་སཾ་པྲ་ར་ཎི་ཏ་སརྦྦ་བུདྡྷ་ཀྵེ་ཏྲ་པྲ་ཙ་ལི་ཏེ་པྲ་ཛྙཱ་པཱ་ར་མི་ཏཱ་ནཱ་དཱ་སྭ་བྷཱ་ཝ་ཧཱུཾ་ཧཱུཾ་ཧཱུཾ་ཧོཿ། དྲིལ་བུ་དཀྲོལ་ནས་དེ་དག་ལ་སོགས་པའི་མཆོད་པ་བྱའོ། །དཔལ་ལྡན་སྐུ་གསུང་ཐུགས་ལས་གྲོལ་བའི་ཞལ་
གསུམ་པ། །འགྱིང་བག་ཁྲོ་བོ་དགོད་པ་དེ་བཞིན་སྤྱན་ཡང་གསུམ། །ཀླུ་དབང་ནོར་བུའི་འོད་མདོག་ཤིན་ཏུ་མཛེས་པའི་སྐུ། །ཕྱག་མཚན་དྲུག་གིས་མཚན་པའི་ཕྱག་མཆོག་དྲུག །ཁ་ཊྭཱཾ་ལྷུང་བཟེད་རལ་གྲི་དགྲ་སྟ་རྡོ་རྗེ་དྲིལ་བུ་འཛིན། །ཧ་ཧ་ལ་སོགས་གང་སྒྲོགས་དམྱལ་བའི་ལང་ལིང་
གཅོད་བྱེད་པ། །ཐར་པར་ཕྱིན་པའི་སྲིད་པའི་རང་བཞིན་སྐྱེ་བའི་མཆོག །ཡེ་ཤེས་མཁའ་འགྲོ་མ་ཁྱོད་ཞབས་གཉིས་ཕྱག་འཚལ་བསྟོད། །དཔལ་ལྡན་སངས་རྒྱས་མི་གཟུགས་མཛེས་པའི་སྐུ་མདོག་དཀར་པོའི་སྐུ། །བྱང་ཆུབ་སེམས་ཀྱི་བདུད་རྩི་དམ་པས་གང་བའི་སྣོད་འཛིན་
པ། །མགོན་མེད་སེམས་ཅན་ཀུན་དོན་དཀོན་མཆོག་གསུམ་སྐྱབས་མཛད། །རྡོ་རྗེ་མཁའ་འགྲོ་མ་ཁྱོད་ཞབས་ལ་ཕྱག་འཚལ་ལོ། །དཔལ་ལྡན་རིན་ཆེན་སྤྱི་གཟུགས་ཤིན་ཏུ་གསེར་མདོག་སྐུ། །ཁ་ཊྭཱཾ་བདུད་རྩི་དམ་པས་བཀང་བའི་ལྷུང་བཟེད་འཛིན། །སྡུག་བསྔལ་སེམས་ཅན་མང་པོ་ཚིམ་
པར་བྱེད་པའི་སྐུ། །དྲག་མོ་མཁའ་འགྲོ་མ་ཁྱོད་ཞབས་གཉིས་ལ་ཕྱག་འཚལ། །དཔལ་ལྡན་ཆོས་ཀྱི་སྤྱི་གཟུགས་པདྨ་རཱ་གའི་མདོག །ཁ་ཊྭཱཾ་ཡར་བསྒྲེང་དྲག་མོའི་རོ་ཅན་འཛིན་པ་པོ། །ཀུན་འགྲོ་ལ་སོགས་སྲིད་པའི་འཆིང་བ་གཅོད་བྱེད་མ། །རོ་ལངས་མཁའ་འགྲོ་མ་ཁྱོད་ཞབས་གཉིས་ལ་ཕྱག་འཚལ། །

དཔལ་ལྡན་ལས་ཀྱི་སྤྱི་གཟུགས་མདོག་ལྗང་དོན་ཡོད་གཟུགས། །ཁ་ཊྭཱཾ་དྲག་མོ་མི་ཡི་ཐོད་པ་སར་བ་འཛིན། །འདོད་པའི་ཉོན་མོངས་སྲིད་པའི་འཆིང་བྱེད་གཅོད་བྱེད་མ། །གདོལ་བའི་མཁའ་འགྲོ་མ་ཁྱོད་ཞབས་གཉིས་ལ་ཕྱག་འཚལ། །དཔལ་ལྡན་སེང་གེ་མ་དང་སྟག་མོ་ཅེ་སྤྱང་འུག་
མགོ་མ། །སྡིགས་མཛུབ་ཞགས་པ་དང་ནི་དགེ་བའི་ལྕགས་ཀྱུ་དགྲ་སྟ་ཅན། །དམྱལ་བའི་སྡུག་བསྔལ་མང་པོ་ཐམས་ཅད་གཅོད་མཛད་མ། །སྤྲུལ་པའི་སྐུ་རྣམས་ཁྱེད་ཀྱི་ཞབས་གཉིས་ལ་ཕྱག་འཚལ། །མཁའ་འགྲོ་མར་མེ་འཇིབ་བྱེད་འཕྲོག་བྱེད་ཁྱེད་རྣམས་ནི། །མཆོག་ཏུ་ས་རྣམས་
སྲུང་བར་བྱེད་པ་དྲག་པོ་རྣམས། །སྡང་བ་གདུལ་དཀའ་གཞན་གྱི་རིག་པ་གཅོད་མཛད་མ། །ལྷ་ཡི་མཁའ་འགྲོ་མ་ཀུན་ཞབས་གཉིས་ལ་ཕྱག་འཚལ། །སྒེག་མོ་ཡིད་དགའ་ཡིད་འོང་ཕྲེང་བ་དབྱངས་ལེན་མ། །གར་སོགས་དབྱངས་སྒྲར་གར་གྱི་ཡན་ལག་དགུ། །སྣ་ཚོགས་རྣམ་
བཀོད་མེ་ཏོག་མཆོག་གི་སྤོས་རྣོ་བ། །ཡེ་ཤེས་སྣང་བ་མར་མེ་དྲི་ཞིམ་ཞིང་། །དཔའ་བོ་དབང་མཆོག་རྣལ་འབྱོར་མ་ཡི་འཁོར་ལོ་ནི། །སྦྱོར་བ་ཤིན་ཏུ་སྦྱོར་བ་སྦྱོར་བ་ཆེན་པོ་ལ། །ལུས་ངག་ཡིད་ཀྱིས་ཆགས་པས་ནན་ཏན་དྲག་ཏུ་ནི། །དཔལ་ལྡན་གསང་བའི་གདན་མཆོག་མཆོད་
ནས་ཕྱག་འཚལ་ལོ། །དཔལ་ལྡན་དེ་ཉིད་རྒྱལ་པོ་དམ་པ་དབང་ཕྱུག་སྤྱི་གཟུགས་ཀྱིས། །དཔལ་ལྡན་གསང་བའི་གདན་མཆོག་འོད་ཟེར་རབ་འབར་བ། །དཔལ་ལྡན་རྡོ་རྗེ་དྲིལ་བུ་དཀྲོལ་སྦྱོར་དེ་བཞིན་ཉིད། །དཔལ་ལྡན་ཡེ་ཤེས་བརྟེན་པའི་དབང་ཕྱུག་ལོངས་སྤྱོད་འདུད། །དེ་ལྟར་
བསྟོད་པ་བྱས་ནས་དྲིལ་བུ་དཀྲོལ་བར་བྱའོ། །ཨོཾ་ཤུདྡྷོ་མ་མ་ཧཱུཾ་ཨ་ཨ་ཨ་ཨཾ་སྭཱ་ཧཱ། དེ་ནས་ཐམས་ཅད་སྦྱོར་བ་བཞི་ལ་སོགས་པའི་སྦྱོར་བ་ཆེན་པོའི་བར་དུ་ཆོས་ཐམས་ཅད་བདག་མེད་པའི་རང་བཞིན་དུ་བསྒོམ་པར་བྱའོ། །ཇི་སྲིད་མི་སྐྱོའི་བར་དུའོ། །སྐྱོ་བར་གྱུར་ན་གོང་མ་བཞིན་དུ་
མཆོད་པ་ཐམས་ཅད་ཀྱིས་མཆོད་ནས་རིམ་པ་བཞིས་གཏོར་མ་ཡང་དབུལ་བར་བྱའོ། །དང་པོ་དཀྱིལ་འཁོར་མདུན་དུ་བྱས་ནས་ཕྱག་རྒྱ་འདིས་དགུག་པར་བྱའོ། །རྡོ་རྗེ་ཁུ་ཚུར་གཉིས་བཅིངས་ཏེ། །རྒྱབ་དང་རྒྱབ་ཏུ་སྦྱར་བར་བྱ། །ས་གདུགས་པདྨས་དཀྲིས་ནས་སུ། །དཀར་པོ་གི་ཝང་

བསྒྲེང་བར་བྱ། །དཀར་པོ་དགུག་ནས་འདྲེན་པ་ནི། །ལྷ་རྣམས་དགུག་པའི་དམ་པའོ། །དགུག་པ་དམ་ཚིག་གི་ཕྱག་རྒྱ་དམ་པའོ། །ཨོཾ་བཏྟཱ་ལི་མ་ཧཱ་བཏྟཱ་ལི་ཧཱུཾ་ཧཱུཾ་ཧཱུཾ་སྭཱ་ཧཱ། དགུག་པའི་དམ་ཚིག་གི་སྔགས་སོ། །དེ་ནས་ཡོན་ཆབ་དང་ཁྲུས་ཆབ་དབུལ་ལོ། །དི་དང་མེ་
ཏོག་དང་སྤོས་དང་འབྱོར་བ་ཇི་བཞིན་དུ་བསྟེན་པ་ཟས་ལྕགས་ཀྱུ་ལྔ་ལ་སོགས་པ་དང་། ཟན་དང་སྲན་མ་ལ་སོགས་པ་དང་ཉ་སྐམ་པོ་དང་བྱིས་སྐྱུ་དང་ལྡན་པའི་གཏོར་མའི་སྣོད་ལ་ལག་པས་རེག་པས་སྔགས་འདི་བཟླས་པས་གཏོར་མ་སྦྱིན་ནོ། །ཨོཾ་ཤིང་གཅིག་དང་ནི་དུར་ཁྲོད་དང་། །
རི་བྲགས་དང་ནི་ཕྱུགས་ཀྱི་ལྷས། །ཡུལ་གྱི་མདོ་དང་ལམ་དང་ཞིང་། །ཁྱད་པར་དུ་ནི་ཁྱིམ་སྟོང་དང་། །སྣོད་དང་ཐང་དང་ས་སྟེང་དང་། །ཁྱད་པར་གདོལ་བའི་ཁྱིམ་གནས་དང་། །ནག་པོ་དྲག་པོ་དྲག་ཆེན་པོ། །ལྷ་མིན་མཉམ་དུ་བསྟེན་པ་དང་། །ནག་པོ་གཙིགས་བྱེད་འཇིགས་བྱེད་པ། །དགའ་
ལས་འདས་དང་བགེགས་རྒྱལ་པོ། །དགའ་བྱེད་མ་དང་དྲག་མོ་དང་། །འཇིགས་བྱེད་མ་དང་ཨུ་མས་བསྟོད། །རྒྱལ་མོ་རྣམ་པར་རྒྱལ་དབང་མོ། །ཐུབ་མེད་གཞན་གྱིས་མི་ཐུབ་མ། །ནག་མོ་བཟང་མོ་ནག་ཆེན་མོ། །ནག་སྦོམ་མ་དང་རྣལ་འབྱོར་མ། །དབང་བྱེད་མ་དང་ཟླ་བ་མོ། །ནག་
མོ་སྡང་བའི་ལམྤ་ཀི །འཕྲོག་བྱེད་མ་དང་མེ་མར་མ། །འཇིགས་བྱེད་ཡུལ་གནས་རྣལ་འབྱོར་མ། །དྲག་མོའི་གཟུགས་དང་གཟུགས་ཆེན་མོ། །མཆེ་བ་གཙིགས་དང་ཐོད་ཆེན་མ། །ཁ་ཊྭཱཾ་རྫུ་འཕྲུལ་ཆེན་མོ་དང་། །རལ་གྲི་དགྲ་སྟའི་ལག་པ་གང་། །རྡོ་རྗེ་དེ་བཞིན་ཆུ་ལག་དང་། །མཁའ་
འགྲོ་ལྔ་ཡི་དེ་ཉིད་ཆེ། །ལས་ཀུན་རྗེས་སུ་སྒྲུབ་པ་ཡི། །སྦྱོར་བའི་དཀྱིལ་འཁོར་རྒྱ་ཆེན་པོ། །རྡོ་རྗེའི་དབང་ཕྱུག་དེ་བཞིན་གཙོ། །དེ་བཞིན་གཤེགས་པའི་སྐུ་ཆེན་པོ། །གོས་མེད་སྦྱོར་བ་སྐྱེད་བྱེད་མ། །རྡོ་རྗེ་དབང་ཕྱུག་མ་ཡི་བཀས། །ཐམས་ཅད་ཐམས་ཅད་དགུག་པའོ། །ཨོཾ་ཀཀྐ་ཌྷ་ན་བབྦནྡྷ་
ན་སྤྱན་དྲངས་པའི་སྔགས་དང་ཕྱག་རྒྱའོ། །ཁཁྑ་དྷ་ན་ཧཱུཾ་ཧཱུཾ་ཧཱུཾ་ཕཊ་ཕཊ་རཾ་སྭཱ་ཧཱ། སྤྱན་དྲངས་པའི་ཕྱག་རྒྱ་དེ་ཉིད་ལས་དཀར་པོ་དང་གི་ཝང་བསྒྲེང་བའོ། །ཨོཾ་བཏྟཱ་ལི་བཏྟཱ་ལི་ཧཱུཾ་ཧཱུཾ་ཧཱུཾ་ཧོཿསྭཱ་ཧཱ། དགའ་བར་བྱ་བའི་སྔགས་དང་ཕྱག་རྒྱའོ། །གཏོར་མའི་སྣོད་བཞག་སྟེ་རྡོ་རྗེ་བཅིངས་ཏེ་རལ་གྲི་བྱུག་

པའི་ཚུལ་དུ་བྱས་ཏེ། ཨོཾ་ཨ་ཀཱ་རོ་མུ་ཁཾ་སརྦྦ་དྷརྨཱ་ཎཱཾ། ཨཱདྱ་ནུཏྤནྣ་ཏྭཱཏ་ཨོཾ་གུཾ་སྭཱ་ཧཱ། སྒེག་མོ་ལ་སོགས་པའི་མཆོད་པས་ཀྱང་མཆོད་དེ་བསྟོད་པ་བྱ་ཞིང་དྲིལ་བུ་དཀྲོལ་བར་བྱའོ། །སེམས་དཔའ་ཆེན་པོ་དང་པོ་མཆོག །དགའ་བ་ཆེན་པོ་དགའ་བ་ཆེ། །ཀུན་དུ་བཟང་པོ་ཀུན་
གྱི་བདག །རྡོ་རྗེ་སྙིང་པོ་གཙོ་བོའི་གཙོ། །ཐུགས་ཀྱི་སེམས་དཔའ་ཏིང་འཛིན་མཆོག །རྡོ་རྗེ་རྡོ་རྗེ་ཆེན་པོའི་སྟོབས། །ཀུན་དུ་བཟང་པོའི་སྤྱོད་པའི་མཆོག །བདུད་དང་བདུད་ནི་རབ་འཇོམས་པ། །ཀུན་གྱི་ཁྲོ་བོ་ཁྲོ་ཆེན་པོ། །སངས་རྒྱས་སངས་རྒྱས་ཆོས་སྐྱེས་
སོགས། །རྡོ་རྗེ་ཧཱུཾ་བྱེད་ཧཱུཾ་བྱེད་པ། །འཇིག་རྟེན་དབང་ཕྱུག་ནོར་བུ་སྦྱིན། །ཆགས་པ་ཆེན་པོ་བདེ་བ་ཆེ། །འདོད་པ་ཐར་པ་ནོར་ཆེན་པོ། །སྲིད་གསུམ་འཇིག་རྟེན་གསུམ་གྱི་མཆོག །འཇིག་རྟེན་གསུམ་མཆོག་ཁམས་གསུམ་ལ། །མི་གཡོ་རབ་མཆོག་མི་གསལ་བ། །
ཤིན་ཏུ་ཕྲ་བ་རབ་འདུས་པ། །གཡོ་དང་རབ་མཆོག་ཐོབ་པ་ཡི། །སྲིད་དང་འཁོར་བ་དག་བྱེད་པ། །ཐོག་མ་མེད་པ་ཐ་མེད་པ། །འདོད་ཆགས་དག་པ་ཏིང་འཛིན་མཆོག །སྣ་ཚོགས་འདོད་ཆགས་དབང་ཕྱུག་ཆེ། །ནམ་མཁའི་མཐའ་ལས་རྟག་པའི་དོན། །འབྱུང་བ་
ཆེན་པོ་ཀུན་གྱི་གཞི། །ལོངས་སྤྱོད་དཔལ་གྱི་རྒྱལ་པོ་གཙོ། །འདོད་པ་ཐམས་ཅད་རྫོགས་བྱེད་པ། །ཕྱག་འཚལ་བསྟོད་དེ་ཕྱག་འཚལ་བསྟོད། །གུས་པས་ཁྱོད་ལ་ཕྱག་འཚལ་ལོ། །རྡོ་རྗེ་སེམས་དཔའ་རབ་གྲུབ་བསྟོད། །བདག་གིས་ཆོ་ག་མ་ཚང་བ་རྣམས་ནི་བཅོམ་ལྡན་
འདས་ལ་བཟོད་པར་གསོལ། །ཁྱོད་ཀྱིས་སེམས་ཅན་དོན་ཀུན་མཛོད། །དངོས་གྲུབ་གསོལ་ནས་ཅི་བདེར་གཤེགས། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འདིར་ནི་གཤེགས་སུ་གསོལ། །ཕྱི་རོལ་ལྷ་རྣམས་ཀྱང་སེ་གོལ་གསུམ་དང་སྔགས་འདིས་གཏང་བར་བྱའོ། །
ཨོཾ་གཙྪ་གཙྪ་ཧཱུཾ་སྭཱ་ཧཱ། ཇི་ལྟར་སྤྲུལ་པའི་དཀྱིལ་འཁོར་རྣམས་རང་གི་དབུགས་ཀྱིས་དྲངས་ནས། རང་གི་ལུས་ལ་ཞུགས་ཏེ། རང་གི་གནས་ལ་དགོད་པར་བྱའོ། །འདི་ལྟ་སྟེ་སྤྱི་བོ་དང་མིག་དང་རྣ་བ་དང་སྣ་དང་། ལྕེ་ལ་གོ་རིམས་བཞིན་དུ་དྲག་མོའི་མཁའ་འགྲོ་མ་དང་། གདོལ་པའི་མཁའ་

འགྲོ་མ་དང་། རོ་ལངས་མའི་མཁའ་འགྲོ་མ་དང་། རྡོ་རྗེ་མཁའ་འགྲོ་མ་རྣམས་དགོད་དོ། །སེང་གེ་མ་དང་། སྟག་མོ་དང་། ཅེ་སྤྱང་མ་དང་། འུག་པ་མ་རྣམས་གོ་རིམས་བཞིན་དུ་མགྲིན་པ་དང་། དཔུང་པ་གཉིས་དང་སྙིང་ག་དང་། ལྟེ་བ་རྣམས་ལ་དགོད་དོ། །སྒོ་བ་བཞི་ནི་
བརླ་གཡས་གཡོན་དང་རྗེ་ངར་ལའོ། །པུཀྐ་སཱི་ལ་སོགས་པ་གོ་རིམས་བཞིན་དུ་ལྕེའི་ཐིག་ལེའི་སྟེང་དུ་པུཀྐ་སཱི་ལ་སོགས་པ་བསྟིམ་པར་བྱའོ། །བྲང་ལ་སོགས་པའི་ཡན་ལག་ལྔ་ལ་ནི་དྲག་མོ་ལ་སོགས་པ་བསྟིམ་པར་བྱའོ། །ཁའི་གནས་སུ་བྱིན་གྱིས་བརླབས་ནས་གཏུམ་མོ་ལ་སོགས་
པ་བསྟིམ་པར་བྱའོ། །སོའི་ཕྲེང་བ་དང་ལྕེ་ལ་ཡང་ཐོད་ཕྲེང་མ་ལ་སོགས་པ་བསྟིམ་པར་བྱའོ། །དེ་དག་གི་བདུད་རྩི་ལ་སོགས་པའི་སྣོད་ནི་ལུས་ལ་བྱིན་གྱིས་བརླབ་པར་བྱའོ། །འཇིག་རྟེན་གྱི་ལྷ་ཚངས་པ་དང་ཁྱབ་འཇུག་ལ་སོགས་པ་ནི་བ་སྤུའི་བུ་ག་དང་རྐང་པ་ལ་སོགས་པ་ལ་གོ་རིམས་བཞིན་
དུ་ཐིམ། ཀེང་རུས་འཇིགས་བྱེད་ལ་སོགས་པའི་བྱང་ཆུབ་སེམས་དཔའ་བཅུ་དྲུག་ནི་རྣལ་འབྱོར་ནམ་མཁའི་དབུགས་དང་འོད་ཟེར་ལ་ཐིམ་པར་བྱའོ། །སྙིང་གར་སྒེག་མོ། ནུ་མའི་བར་དུ་དྲི་ཆབ་མའོ། །མགྲིན་པ་ལ་པི་ཝང་མའོ། །མགོ་བོ་ལ་མེ་ཏོག་མའོ། །སོའི་ཕྲེང་བ་གཉིས་ལ་
དབྱངས་མའོ། །གསང་བར་སྤོས་མེ་མའོ། །དཔུང་པ་གཉིས་པོར་གར་བྱེད་མའོ། །མིག་གཉིས་ལ་མར་མེ་མའོ། །གཟུགས་ཀྱི་རྣམ་པའམ་ངོ་བོ་ཉིད་དུ་རྣམ་པར་བསམ། དངོས་པོ་ཐམས་ཅད་ཀྱི་ངོ་བོ་རྣལ་འབྱོར་ནམ་མཁའ་བདག་གོ་ཞེས་ང་རྒྱལ་གཟུང་བར་བྱའོ། །
བསྲུང་བ་དགོད་པ་དང་། །དབང་བསྐུར་བ་དང་། །གོ་ཆ་བགོ་བ་བྱས་ནས་རྡོ་རྗེ་ར་བ་ལ་སོགས་པ་བསམས་ནས་གཞག་པར་བྱའོ། །ཉལ་བ་དང་། འདུག་པ་དང་། འགྲོ་བ་དང་། འགྲེང་བ་དང་། རྟག་ཏུ་ཤིན་ཏུ་མཉམ་པར་གཞག་ནས་ལྷ་དང་བདག་གི་སྦྱོར་བ་བསྒོམ། །དེ་དག་ནི་ཤིན་ཏུ་
སྦྱོར་བ་ཞེས་བྱའོ། །དེ་ནས་ལོངས་སྤྱོད་རྣལ་འབྱོར་པ་བཞིན་དུ་ཇི་སྙེད་དམ་ཚིག་གི་རྫས་དེ་དག་གིས་ཚོགས་ཀྱི་འཁོར་ལོའི་ཟས་རིམ་པར་མཆོད་པ་འདིས་བྱའོ། །ཡི་གེ་ཀྵུཾ་གིས་དགའ་བར་བྱ་བ་དང་། ཡི་གེ་ཡུཾ་གིས་དག་པར་བྱ་བ་དང་། ཡི་གེ་ཧཱུཾ་གིས་མཁྲེགས་པར་བྱ་བ་དང་། ཡི་གེ་སུཾ་

གྱིས་བདུད་རྩིར་བྱའོ། །ཡི་གེ་ཧཱུཾ་གིས་རོ་མཉམ་པོར་བྱ་བ་དང་། པདྨའི་སྣོད་ལ་བཞག་ལ་ཉི་མའི་ལག་པ་ལ་བདུད་རྩིའི་སྣོད་བཞག་ནས། །ཟླ་བའི་ལག་པའི་མཐེ་བོང་དང་སྲིན་ལགས་དང་རི་རབ་ཏུ་བསྒོམ། །ཨོཾ་ཧཿཧོཿཧྲཱིཿས་བོན་གྱི་སྐུ་གསུང་ཐུགས་གཟུགས་དང་དྲི་དང་རོ་དང་དཔའ་བོ་
ལྷ་གསུམ་གྱི་བདག་ཉིད་གཟུང་འཛིན་སྤངས་པའི་རང་བཞིན་དཀྱིལ་འཁོར་གྱི་ལྷ་རེ་རེའི་འཁོར་ལོ་ལ་མཐེ་བོང་དང་སྲིན་ལག་གིས་འཐོར་འཐུང་སྦྱིན་པར་བྱའོ། །དེ་ནས་མཆོད་ནས་ཕྱག་བྱས་ཏེ་དེ་ནས་རང་གི་ལུས་ལ་གནས་པའི་ལྷ་དང་འཁོར་ལོའི་ལྷ་ཇི་ལྟར་དགའ་བར་ཚིམ་པར་བྱའོ། །དེ་ཁོ་ན་
བཞིན་དུ་ཚོགས་ཀྱི་འཁོར་ལོའི་གོ་ཆ་ལ་ཡང་སྦྱོར་བ་གསུམ་གྱི་རང་བཞིན་ལྷའི་སྦྱོར་བ་ལ་གནས་ནས་ཚོགས་ཀྱི་འཁོར་ལོ་ལ་མཆོད་པར་བྱའོ། །འདི་ལྟ་སྟེ་དཔྲལ་བ་དང་སྤྱི་བོ་དང་ལྕེའི་རྩེ་མོ་ལ་ཐིག་ལེ་གསུམ་བྱིན་ནས་ཇི་ལྟར་བདེ་བར་བྱའོ། །དེ་ལྟར་མངོན་སུམ་དུ་དགའ་བ་ཡུལ་གྱི་མཆོད་པ་
རྣམས་ཀྱིས། དེ་བཞིན་གཤེགས་པ་རྣམས་ལ་མཆོད་ནས། །ཡོངས་སུ་རྫོགས་པ་ལ་གོང་མ་བཞིན་དུ་མེ་ཏོག་ལ་སོགས་པས་རྫོགས་པར་བྱའོ། །དེའི་འོག་ཏུ་ལྷག་མའི་གཏོར་མ་སྦྱིན་པར་བྱའོ། །ཚིགས་བཅད་བཟླས་ནས་གཏང་བར་བྱའོ། །ཚིགས་བཅད་ནི་འདི་ལྟ་སྟེ། ཨོཾ་བཏྟཱ་ལི་
བཏྟཱ་ལི་ཚེ། ཨོཾ་ཀུ་རུ་ཀུ་རུ་བཏྟཱ་ལི་མ་ཧཱ་བཏྟཱ་ལི་སྭཱ་ཧཱ། དུར་ཁྲོད་ནག་མོ་དངོས་གྲུབ་ཞལ། །གཏུམ་མོ་འཇིགས་བྱེད་ཡི་དགས་ཁ། །དམ་ཚིག་སྲིན་མོ་ཁྲག་དགའ་མ། །ཀཱི་ལི་ཀཱི་ལི་སྒྲ་སྒྲོགས་མ། །དུར་ཁྲོད་རོ་ཡི་ཚལ་དབུས་སུ། །ཚོགས་དང་ཕོ་ཉ་བཅས་པ་རུ། །འཇིག་རྟེན་གཏུམ་མོ་དུད་སོལ་
མ། །གསོལ་ཅིག་བཞེས་ཤིག་དམ་ཚིག་མ། །གནས་ནས་དབང་དུ་མཛད་དུ་གསོལ། །ཏིཥྛ་སིདྡྷི་ཀུ་རུ་ཧུ་ཧུ་ཨོཾ་ཕྲོཾ་ཧ་གྲི་ཧ་སརྦ་དུཥྚཱ་ན་བྷཀྵ་ཕུཾ་ཕེཾ་ཕྲོཾ་ཕྲིཾ་ཕཊ་སྭཱ་ཧཱ། རྡོ་རྗེ་དམ་པ་བཅིངས་ནས་སུ། །དཀར་པོ་གི་ཝང་བསྒྲེང་ནས་སུ། །གཉིས་ཀ་རྩེ་མོ་བཀུག་ནས་ནི། །ཁ་ཡི་འགྲམ་དུ་གཞག་པར་བྱ། །ལྷག་
མའི་གཏོར་མ་བྱིན་གྱིས་བརླབ། །དུད་པ་སོལ་བ་ཞེས་བྱ་བའི་སྔགས་དང་ཕྱག་རྒྱའོ། །བཅོམ་ལྡན་འདས་རྣལ་འབྱོར་ནམ་མཁའ་དང་ཡེ་ཤེས་མཁའ་འགྲོ་མའི་སྒྲུབ་ཐབས། །སློབ་དཔོན་ཆེན་པོ་རྣམ་པར་རྒྱལ་བའི་དབང་པོའི་སྡེས་མཛད་པ་རྫོགས་སོ།། །།

༄། །གདན་བཞིའི་དེ་ཁོ་ན་ཉིད་བཞི་པ་བཞུགས།། ༄༅༅། །འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །ནམ་མཁའི་བཙུན་མོ་དང་འདུས་ལས། །དཔལ་ལྡན་དགའ་བ་བཞི་སྟོན་པ། །འཇིག་རྟེན་གསུམ་པོ་བསྐྱེད་པའི་མགོན། །སྣ་ཚོགས་གཟུགས་ཅན་དེ་ལ་འདུད། །གདན་བཞིའི་
རིམ་པ་ལས་འོངས་པ། །འཁོར་ལོ་བཞི་ལ་ཡང་དག་གནས། །དེ་ཉིད་བཞི་ཞེས་གང་བཤད་པ། །དེ་ནི་བདག་གིས་གསལ་བར་བྲི། །དག་བྱས་བདེ་བའི་སྟན་གནས་ཏེ། །མདུན་དུ་བདེ་གཤེགས་ཡང་དག་མཆོད། །བློ་ལྡན་མ་ལུས་སྟོང་བསྒོམས་ནས། །རྒྱུད་ལས་གསུངས་པ་བསམ་
པར་བྱ། །ལྷུན་པོའི་རྩེ་མོར་ཁང་བརྩེགས་ནི། །ཤིན་ཏུ་མཛེས་པ་ཡིད་དུ་འོང་། །དེར་ནི་བྱང་ཆུབ་སེམས་ཉིད་ལས། །སྤྲུལ་པའི་དཀྱིལ་འཁོར་བསྒོམ་པར་བྱ། །རྐང་པའི་མཐིལ་དུ་གནས་པ་ཡི། །རླུང་གི་དཀྱིལ་འཁོར་གཞུ་ལྟ་བུ། །ཇི་སྲིད་ལྟེ་བའི་མཚོ་སྐྱེས་སུ། །རིམ་གྱིས་སྟེང་དུ་འགྲོ་བ་སྟེ། །
དེ་ནས་མེ་ཡིག་ལས་བྱུང་བ། །མེ་ཡི་དཀྱིལ་འཁོར་གྲུ་གསུམ་ཚུལ། །འདིས་ནི་བདག་དང་ཀུན་བསྲེགས་ནས། །སྣ་ཚོགས་ནམ་མཁའ་མཚུངས་པར་བསམ། །དེ་ནས་སྔགས་དང་མཚན་མ་ཡི། །ཆོ་ག་རིམ་པས་ལུས་སུ་བསྒོམ། །སེང་གེའི་སྟན་ལ་གནས་པ་ཡི། །རི་བོང་ཅན་གྱི་འོད་འཛིན་
འཕྲོ། །མེ་དང་ཆུ་ཡི་དབུས་གནས་པ། །སྣ་ཚོགས་པདྨ་ཡིད་འོང་བ། །དེར་ནི་ཀུན་དུ་རྣམ་འཕྲོ་བའོ། །སྡེ་ཚན་དང་པོ་བསམ་བྱས་ཏེ། །གངས་དང་ཀུན་ད་ཟླ་འདྲ་བའི། །འོད་ཟེར་ཚོགས་ནི་ཤིན་ཏུ་བསིལ། །སངས་རྒྱས་ཚོགས་ཆེན་རྣམས་འཕྲོ་བའོ། །སྣ་ཚོགས་གཟུགས་ཅན་ནོར་བུའི་འོད། །ཡེ་
ཤེས་ལྷ་མོའི་བདག་ཉིད་གསལ། །ཆོས་ཀྱི་དབྱིངས་ཀྱི་རང་བཞིན་ཉིད། །དབུགས་ཀྱི་རླུང་ལ་ཞོན་ནས་སུ། །འབའ་སན་ཏི་ཡི་བདུད་རྩི་འཐུང་། །གཟུགས་དང་སྒྲ་དང་དྲི་དང་རོ། །རེག་བྱ་དང་ནི་ཆོས་ཀྱི་ཁམས། །གཞན་ཡང་མིག་དང་རྣ་བ་དང་། །སྣ་དང་ལྕེ་དང་ལུས་དང་ཡིད། །རྣམ་ཤེས་དྲུག་
དང་འབྱུང་བ་དང་། །འབྱུང་ལས་གྱུར་དང་ཕུང་པོ་ལྔ། །བརྟན་པ་དང་ནི་གཡོ་བའོ། །འགྲོ་བ་ཐམས་ཅད་དེ་ལས་བྱུང་། །ཤར་དང་ལུས་ངན་ཕྱོགས་སུ་ནི། །དབྱངས་ཡིག་དང་པོ་གཉིས་པ་དགོད། །ནུབ་ཏུ་བཅུ་པའི་མཐའ་མ་སྟེ། །ལྷོ་ཡི་འདབ་མར་དེ་ཡི་མཐའ། །མཁའ་འགྲོ་མ་དང་དྲག་མོའི་

གཟུགས། །རོ་ལངས་མ་དང་གཏུམ་མོ་དང་། །སེང་གེ་སྟག་དང་ཅེ་སྤྱང་མོ། །འུག་པ་མོ་སྟེ་མཚམས་བཞིར་དགོད། །དཀར་དང་སེར་དང་དེ་བཞིན་དམར། །སྔོ་དང་སྔོ་བསངས་བཞི་པའོ། །མཚམས་སུ་ཁ་དོག་འདྲེས་མ་རུ། །མ་ནིང་ལས་སྐྱེས་བསམ་པར་བྱ། །ཞལ་གཅིག་ཕྱག་
གཉིས་ཤིན་ཏུ་དྲག །ལྷ་ཡི་རྒྱན་གྱིས་ཤིན་ཏུ་ཀླུབས། །སྤྱན་གསུམ་ཁྲོ་ཞིང་བཞད་པ་སྟེ། །ཁ་ཊྭཱཾ་ག་དང་མི་ཐོད་ལྡན། །མཚམས་ཀྱི་ལྷ་མོ་གཡོན་ན་ནི། །སྡིགས་མཛུབ་དང་ནི་ཞགས་པ་རྣམས། །རལ་གྲི་ལྕགས་ཀྱུ་དགྲ་སྟ་དང་། །དབྱུག་པ་རྣམས་ཏེ་ཕྱག་གཡས་ནའོ། །ལྷ་མོ་
རྡོ་རྗེ་ཅོད་པན་ཅན། །སྟག་གི་པགས་པའི་ཤམ་ཐབས་ཅན། །མི་ཡི་པགས་པའི་བླ་གོས་དང་། །སྒེག་པ་ཡི་ནི་ཉམས་ཀྱིས་མཛེས། །མཆེ་བ་ཅན་དང་ཅོད་པན་ཅན། །ངང་པ་ཅི་བགྱི་ཕྱོགས་ཀྱི་གདན། །མཚམས་སུ་སེང་གེ་སྟག་གདོང་དང་། །འུག་པ་དང་ནི་ཅེ་སྤྱང་ངོ་། །མཁའ་འགྲོ་
མ་དང་མར་མེ་མ། །འཇིབ་མ་འཕྲོག་བྱེད་རང་རྒྱ་ཅན། །རོ་དང་ཉི་མའི་སྟན་བཞུགས་པ། །རང་གི་གནས་ཀྱི་མདོག་བཞིན་བསམ། །མེ་ལོང་མཉམ་ཉིད་སོ་སོར་རྟོག །བྱ་གྲུབ་ཤིན་ཏུ་དག་རྣམས་ལས། །སངས་རྒྱས་གཟུགས་སུ་བསྐྱེད་ནས་སུ། །རང་གི་རིགས་ཀྱི་ཕྱག་རྒྱས་གདབ། །
གང་ཞིག་ཕྱི་རོལ་དཀྱིལ་འཁོར་དགའ། །དེ་ཡིས་དེ་དག་ལུས་བསྒོམས་ནས། །དབྱངས་ཡིག་དང་པོ་ཐིག་ལེའི་གཟུགས། །སྔར་བསྟན་བཞིན་དུ་ལྟེ་བར་བསྒོམ། །བདག་ཉིད་དེ་ལྟར་བསྒོམས་ནས་སུ། །དངོས་གྲུབ་ཐམས་ཅད་བསྒྲུབ་པར་བྱ། །སྔགས་ཀྱིས་བདག་ཉིད་མ་བསྟེན་
པར། །ལས་རྣམས་བྱ་བར་ནུས་མིན་པས། །ཇི་སྲིད་སྣང་བར་མཐོང་བའི་བར། །རྣལ་འབྱོར་ཅན་གྱིས་དེ་སྲིད་བསྒོམ། །མཚན་མ་ཐོབ་ན་མྱུར་དུ་ནི། །རྟག་ཏུ་གྲོལ་བའི་དངོས་གྲུབ་འགྲོ། །ཁ་སྣ་མིག་དང་རྣ་བ་ནི། །རང་གི་ལག་པས་བསྡམས་ནས་སུ། །མ་ཡེངས་བློ་ཡིས་བལྟས་ནས་ནི། །ཡང་
དག་སྦྱོར་བས་ཐིག་ལེ་མཐོང་། །རླུང་དང་མེ་དང་ས་དང་ཆུ། །འཁོར་ལོར་བསྒྱུར་བའི་ཐིག་ལེ་སྟེ། །དེ་ཡི་མཚན་ཉིད་ཤེས་བྱས་ནས། །ལས་ནི་ཇི་བཞིན་སྦྱར་བར་བྱ། །དཀར་པོ་སྣང་ན་ཞི་བར་བྱ། །སེར་ཞིང་དམར་བས་རྒྱས་པ་སྟེ། །སྔོན་པོས་ནང་གི་ལས་ནི་བྱ། །དུ་བའི་མདོག་གིས་བསྐྲད་

ཅིང་གསད། །ལག་གཉིས་གསང་བར་མཉམ་གཞག་སྟེ། །མཆོད་རྟེན་འོག་ཏུ་ཐུར་སེལ་ལ། །ཀ་ཤའི་ཡི་གེ་བལྟས་ནས་སུ། །ཤིན་ཏུ་མཉམ་པར་གཞག་ནས་བསྡམ། །མིག་གཉིས་སྣ་རྩེར་བལྟས་ནས་སུ། །རླུང་གིས་ལྟེ་བར་གསལ་བར་བསམ། །གཟུགས་ནི་
སྟོང་པར་བརྟན་བྱས་ན། །ཡིད་བཅིང་བ་ཡི་དམ་པ་ཡིན། །རྣམ་པར་སྣང་མཛད་དབྱངས་དང་པོ། །དེ་བཞིན་སངས་རྒྱས་ལྔར་ལྡན་པས། །རང་གི་ལྷ་ཡི་སྦྱོར་བ་ནི། །འབྱུང་དང་འཇུག་པས་བཟླས་པར་བྱ། །དྲོད་མཐའ་ཚེག་དྲག་བཅས་པ་དང་། །དེ་ཉིད་དགུ་པས་བརྒྱན་པ་
དང་། །མེ་ལ་གནས་ཤིང་ཨི་ཡིས་བརྒྱན། །འདི་ཡིས་རྫས་རྣམས་བྱིན་གྱིས་བརླབ། ཨོཾ་ཨཱཿཧཱུཾ་སྭཱ་ཧཱ། བཟླས་པའོ། །ཧ་ཧོ་ཧྲཱིཿབྱིན་གྱིས་བརླབ་པའོ། །ཨ་ཨཱ་ཨཾ་ཨཿརྀ་རཱྀ་ལྀ་ལཱྀ། ཕུཾ་ཕེཾ་ཕྲོཾ་ཕྲིཾ། དཀྱིལ་འཁོར་གྱི་འཁོར་ལོའི་ས་བོན་ནོ། །རླུང་དང་མེ་ཡི་དཀྱིལ་འཁོར་ལ། །
གནས་པ་ཡི་ནི་ཐོད་པ་ལ། །ལུས་ལས་བྱུང་བ་ཐམས་ཅད་བསམ། །ཟླ་བ་ཞུ་བའི་ཚུལ་དུ་གྱུར། །དེ་ནས་ཟླ་བ་བར་སྣང་འཛག །པདྨའི་དབང་ཕྱུག་ཤིན་ཏུ་མདོག་མཛེས་ཤིང་། །རྣམ་པར་སྣང་མཛད་དྲི་ཞིམ་བཏུང་བར་མཛོད། །ཕྱག་ན་རྡོ་རྗེ་རོ་བྲོ་རྡོ་རྗེ་དབང་། །རྣམ་གསུམ་ལྷ་གསུམ་
དུ་ནི་གཟུང་བར་བྱ། །ལྟེ་བར་མེ་ཡི་རང་བཞིན་བསམ་བྱ་བ། །འོད་གསལ་འོད་ཟེར་དྲ་བའི་ཚོགས་འཕྲོ་བ། །ཉི་མར་གནས་ལ་དག་པའི་བློ་ཡིས་ནི། །བསྲེག་པའི་ལྷ་ལ་གཏོར་ན་གོས་མི་འགྱུར། །ནང་གི་སེམས་ལས་སྤྲུལ་པ་ཡི། །བདག་གི་གདན་ནི་བསྒོམ་པ་དང་། །སྔགས་དང་ཐིག་ལེའི་
དེ་ཁོ་ན་ཉིད་ཀྱི་དུམ་བུ་སྟེ་དང་པོའོ།། །།ཡེ་ཤེས་ལུས་སུ་བསྒོམས་ནས་ནི། །ཐུར་སེལ་རླུང་ནི་བསྡམས་ནས་ཀྱང་། །སྟེང་དུ་དྲངས་ཏེ་བསྡམ་བྱས་ལ། །འབྱུང་དང་འཇུག་པའི་བརྟན་པོར་བྱ། །ཆུ་ཤིང་མེ་ཏོག་ལྟ་བུའི་རྩ། །སྙིང་གར་གནས་ཤིང་འོག་ཏུ་ལྟ། །སྣ་ཚོགས་
པདྨས་མཛེས་པ་ལ། །ས་བོན་དག་གིས་དགོད་བྱ་སྟེ། །དེ་ཡི་དབུས་གྱུར་ས་བོན་ནི། །སངས་རྒྱས་ཀུན་གྱི་བདག་ཉིད་མཆོག །དབྱུག་པ་འཇིག་རྟེན་དབང་ཕྱུག་མགོན། །གྱ་གྱུར་རྡོ་རྗེ་འཛིན་པའི་གཙོ། །ཡན་ལག་དམ་ཚིག་རྡོ་རྗེ་སྟེ། །མགོ་ནི་རིན་ཆེན་རྒྱལ་པོ་ཡིན། །ཐིག་ལེ་སྒྲ་དང་

བཅས་པ་ནི། །སངས་རྒྱས་གཙོ་བོ་ཞེས་བྱར་གྲགས། །ཟླ་བའི་ཟེར་ལྟར་དྲི་མེད་པའི། །རིགས་ཀྱིས་ཁྱབ་པའི་འོད་ཟེར་འཕྲོ། །གལ་ཏེ་སྣ་ཚོགས་སྒྲུབ་འདོད་ན། །ཤེས་རབ་ཅན་གྱིས་འདི་བསམ་བྱ། །དེ་ནས་དྲོད་ཀྱི་གསུམ་པ་དང་། །བརྒྱད་ཀྱི་མཐའ་དང་བདུན་པ་ཡི། །དང་པོ་དེ་བཞིན་
དྲོད་པའི་མཐའ། །སྒྲ་དང་བཅས་པས་ཡང་དག་བརྒྱན། །ཤར་གྱི་ཕྱོགས་སུ་མཁའ་འགྲོ་མ། །དེ་བཞིན་བྱང་དུ་དྲག་མོ་བསྒོམ། །ནུབ་ཀྱི་ཕྱོགས་སུ་རོ་ལངས་མ། །ལྷོ་ཕྱོགས་མཁའ་འགྲོ་གཏུམ་མོ་སྟེ། །སྔོན་དུ་བསྟན་པའི་མདོག་བཞིན་དུ། །ཕྱོགས་ཀྱི་འདབ་མར་བསྒོམ་པར་བྱ། །མཚམས་
སུ་ཁ་དོག་འདྲེན་མ་རུ། །བརྩེགས་པའི་ས་བོན་བཞི་པོ་བསམ། །ཡན་ལག་བརྒྱད་ཀྱི་གོ་ཆ་གང་། །སྔགས་དེ་ཉིད་ཀྱིས་རྣལ་འབྱོར་ལྡན། །འོད་ཟེར་འབར་བའི་ཕྲེང་འཁྲུག་པའི། །སྔགས་དེ་དག་ནི་བལྟ་བར་བྱ། །ལས་བཞི་ཡི་ནི་གནས་སྐབས་ལ། །རྗེས་སུ་མཐུན་པའི་མི་ཤིགས་
བསྒོམས། །དེ་བཞིན་ལས་བཞི་སྒྲུབ་བྱེད་པས། །ལུས་ཀྱང་ཁ་དོག་བཞི་རུ་དགོད། །ཞལ་གཅིག་ཕྱག་གཉིས་ལ་སོགས་པ། །ཞལ་ཕྱག་ཇི་སྙེད་འདོད་པར་བྱ། །དྲག་ལ་ཁྲོ་བོར་བསྒོམ་པར་བྱ། །ཞི་བ་ལ་ནི་ཞི་བའི་ལུས། །རླུང་དང་མེ་ཡི་སྟེང་དུ་ནི། །ཉི་མ་ལ་གནས་དྲག་པོར་བྱ། །ས་ཆུ་ཟླ་
བ་ལ་གནས་ཏེ། །ཞི་བའི་ལས་ནི་བསྒོམ་པར་བྱ། །ཨོཾ་སུཾ་ཀྵུཾ་ཡུཾ་ཧཱུཾ་ཧཱུཾ། སྨྼྻུཾ་ཧྨྼྻུཾ་ཡྨྼྻུཾ་ཀྵྨྼྻུཾ། ཕུཾ་ཕེཾ་ཕྲོཾ་ཕྲིཾ། དཀྱིལ་འཁོར་གྱི་ས་བོན་ནོ། །ཨོཾ་ཧྲཱི་ཊ་ཊ་དྷ་ར་ཧཱུཾ་ཧཱུཾ་ཧཱུཾ་ཕུ་ཕུ་ཕུ། །ཨཱ་ཨཱ་ཨཱ་ཕཊ་ཕཊ་ཕཊ། ཀླུ་བརྒྱད་ཀྱི་དུག་དབྲོག་པའོ། །ཨོཾ་ཧྲཱི་ཀྲིཾ་ཀྵུཾ་སྭཱ་ཧཱ། །གྲོང་ཁྱེར་དཀྲུགས་པའིའོ། །ཨོཾ་བཏྟཱ་ལི་
རཀྵ་རཀྵ་ཧཱུཾ་ཧཱུཾ་ཕུ་ཕུཾ་ཕཊ། དམ་ཚིག་སྲུང་བའི་འཁོར་ལོ་འདི་བྲིས་ནས། དཔུང་པར་བཏགས་ཏེ་བསྲུང་བར་མོས། །ནད་པ་ནད་ལས་གྲོལ་གྱུར་ཞིང་། །དུས་ལ་བབ་པས་མཐོ་རིས་འགྲོ། །རྡོ་རྗེ་འཛིན་པར་སྙོམས་ཞུགས་ནས། །གཞན་གྱི་གདན་ནི་བསྟན་པ་སྟེ། །དངོས་གྲུབ་སྣ་
ཚོགས་བྱེད་པའི་གནས། །དངོས་གྲུབ་ཐམས་ཅད་ཀྱིས་ནི་གནས། །ཚེས་གཅིག་སོགས་ལ་རྐང་གཡོན་གྱི། །མཐེ་བོང་སོགས་འཕེལ་མགོ་བོར་གནས། །དེ་ནས་གཡས་ཀྱི་ཆ་ལ་ནི། །ཟླ་བ་གཉིས་ཀྱིས་འཇུ་བར་འགྱུར། །རླུང་དང་མེ་དང་ཉི་མ་ལ། །གནས་པའི་རང་ལ་ས་བོན་

བལྟ། །ཐམས་ཅད་དབང་བསྐུར་ཕྱག་རྒྱ་ནི། །བློ་དང་ལྡན་པས་གསང་སྔགས་ཀྱི། །སྦྱོར་བ་འདི་ཡིས་སློབ་མ་དབབ། །ར་མ་ར་མ་ཏུ་ཧཱུཾ་བཛྲ་ས་མ་ཡ་མ་ནུ་པཱ་ལ་ཡ་ཨོཾ་ཨཱཾ་ཧཱུཾ་ཧྲཱི། སྔགས་འདི་གནས་བཞིར་བཀོད་ནས་སུ། །རྫས་བཅུ་དག་ནི་བཟུང་ནས་
ཀྱང་། །འབུམ་དུ་བཟླས་ནས་བསྒྲུབ་པར་བྱ། །དེ་ནི་ཁ་རུ་བླུགས་ཙམ་གྱིས། །སློབ་མ་མྱུར་དུ་བབས་ནས་ནི། །གང་གིས་འཁོར་ལོའི་སྟེང་དུ་ནི། །ཤིན་ཏུ་མྱུར་བར་འཁོར་ཞིང་གནས། །དེས་ནི་འཁོར་བ་སྒྱུ་མ་དང་། །སྨིག་རྒྱུ་ལྟ་བུར་མཐོང་བར་འགྱུར། །སྙིང་གར་རྡོ་རྗེ་བཀོད་
ནས་སུ། །ཏིཥྛ་བཛྲ་ཞེས་བརྗོད་ལ། །ཞི་བར་ཤེས་ནས་མི་གཡོ་ཞིང་། །བྱུང་ཆུབ་སེམས་ནི་བརྟན་པར་བགྱི། །ཞེས་བརྗོད་དོ། །རི་དགས་དབང་ཞོན་རྡོ་རྗེ་གཞུ་དང་མདའ། །ཐོགས་ཤིང་རང་འོད་བཙུན་མོ་ཐོད་པ་དྲིལ། །བསྣམས་པའི་ཞལ་གསུམ་ཕྱག་དྲུག་མདོག་
སྔོ་བ། །སྙིང་གའི་ཕྱོགས་སུ་རྣམ་པར་བསྒོམ་བྱས་ནས། །རྫོགས་ལྡན་ཡི་གེ་འབུམ་ཕྲག་གཅིག་ཏུ་བཟླས། །གཉིས་ལྡན་དུས་སུ་སྔགས་པས་འབུམ་ཕྲག་གཉིས། །གསུམ་ལྡན་ལ་ནི་སུམ་འགྱུར་བྱ་བ་སྟེ། །རྩོད་དུས་བྱེ་བ་གསུམ་དང་འབུམ་ཕྲག་བཞི། །ལེ་ལོའི་ཉེས་པ་ཕན་
མིན་གདམས་ངག་དང་། །སྤྲོ་བ་ཉམས་དང་ཡུལ་ལ་ཆགས་པ་དང་། །དད་པ་དང་བྲལ་དགེ་བའི་རྩ་བ་ཉམས། །དེ་དག་ཐུབ་པའི་བཀའ་ནི་འགྲུབ་མི་འགྱུར། །ནང་གི་སེམས་ལས་སྤྲུལ་པ་ཡི། །བྱིན་གྱིས་བརླབས་པའི་རིམ་པ་དང་བཅས་པའི་གཞན་གྱི་གདན་བསྒོམ་པའི་དེ་ཁོ་
ན་ཉིད་དེ་དུམ་བུ་གཉིས་པའོ།། །།སྦྱོར་བའི་གདན་ལ་གནས་པ་ཡི། །འདབ་མ་བཅུ་དྲུག་པདྨ་ཆེ། །གནས་དེར་གནས་པའི་ལྷ་མོ་རྣམས། །སྣ་ཚོགས་གཟུགས་ཅན་ཡིད་དགའ་མ། །ཡི་གེའི་དབང་ཕྱུག་དབུས་ས་བོན། །སངས་རྒྱས་ཀུན་གྱི་རང་བཞིན་ཏེ། །མ་མོའི་ཚོགས་
དང་ཡང་དག་ལྡན། །རི་དགས་མཚན་མའི་བདུད་རྩི་འཛིན། །ཤར་དུ་མ་མོ་གསུམ་ཡིན་ཏེ། །དེ་བཞིན་བྱང་དུ་རྣམ་པ་གསུམ། །ནུབ་ཀྱི་ཕྱོགས་སུའང་གསུམ་ཡིན་ཏེ། །ལྷོ་ཡི་ཕྱོགས་སུ་རྣམ་གསུམ་དགོད། །མཚམས་སུ་མ་ནིང་ས་བོན་རྣམས། །སྔོན་བཞིན་འདྲེན་མར་

ཤེས་པར་བྱ། །ཕྱོགས་ཀྱི་འདབ་མའི་ས་བོན་རྣམས། །ཕྱོགས་ཀྱི་བདེ་གཤེགས་མདོག་ཏུ་བལྟ། །མཆོད་རྟེན་རྩེ་མོའི་སྒོ་རུ་ནི། །བློ་ལྡན་ཡི་གེའི་དབང་ཕྱུག་བསམ། །དེ་འོད་བདུད་རྩིར་འཛག་པ་ཡིས། །ཆོས་ཀྱི་དཀྱིལ་འཁོར་བཀྲུ་བར་བྱ། །དེ་ཡི་འོག་ཏུ་འབབ་བསྒྱུར་བས། །
ས་ཡི་བུ་གར་ཐིམ་པར་བྱ། །བདུད་རྩི་ཆར་པ་ལས་བྱུང་དེས། །ལྷ་མོ་ཐམས་ཅད་བསྐྱངས་པར་འགྱུར། །ཤིན་ཏུ་མཉམ་གཞག་སེམས་ཀྱིས་ནི། །སྲིད་པ་སྟོང་ཉིད་བསྒོམས་བྱས་ནས། །མངོན་སུམ་སངས་རྒྱས་ཉིད་འགྱུར་ན། །དངོས་གྲུབ་གཞན་ལྟ་སྨོས་ཅི་དགོས། །འདི་ནི་
སྔོན་པོར་བསྒོམ་གྱུར་ན། །ནད་དང་སྐྲ་དཀར་འབྱུང་མི་འགྱུར། །དབང་ཆེན་ལ་གནས་བསམས་ནས་ནི། །དཔུང་རྣམས་ཐམས་ཅད་བཅིང་བར་འགྱུར། །དཀར་པོའི་མདོག་གིས་ལྟས་མཁན་དང་། །དྲི་མ་མེད་པའི་སྙན་དངགས་འགྱུར། །ཟླ་དྲུག་ཙམ་དུ་གོམས་པ་ཡིས། །
དངོས་གྲུབ་འདིར་འགྱུར་ཐེ་ཚོམ་མེད། །ཡེ་ཤེས་ལྷ་མོར་ཀུན་འཁྱུད་པའི། །རྡོ་རྗེ་སེམས་དཔར་རྣམ་བསྒོམས་ལ། །དངོས་གྲུབ་ཀུན་བྱེད་གདན་དང་ནི། །སྔགས་ཀྱིས་ཕ་རོལ་སོན་ཤེས་བྱ། །འདི་ནི་སྦྱོར་བའི་གདན་ཤེས་བྱ། །རྣལ་འབྱོར་ཐམས་ཅད་ཡང་དག་འབྱུང་། །
སྙིང་པོ་ལས་ཀྱང་སྙིང་པོ་སྦྱོར། །སངས་རྒྱས་ཡེ་ཤེས་སྒྲུབ་བྱེད་པ། །ཐུབ་པའི་དབང་པོ་ཞེས་བྱ་སྟེ། །གདན་དེ་འདོད་པ་ཐམས་ཅད་པའོ། །དེ་ལས་ལོངས་སྤྱོད་སྤྱད་བྱས་ན། །དེར་ནི་ཆགས་ལས་ཁྱད་པར་འགྲོ། །སྟེང་གི་ལམ་དུ་འབར་བ་དག །ཇི་སྲིད་མགྲིན་པའི་བར་
དུ་དམིགས། །མགྲིན་པར་འཁྱུད་ནས་ལྷ་མོ་རྣམས། །གང་ཡང་མགྲིན་པར་ཡང་དག་རིག །གཡས་གཡོན་གྱི་ནི་མཐེ་བོ་ཡིས། །སྟེང་དུ་འགྲོ་བ་བཙིར་བར་བྱ། །རྒྱས་པའི་འོག་ཏུ་བསྐྱོད་པ་ཡིས། །བདེ་བ་དམ་པ་རིག་པར་བྱའོ། །ཐོག་མཐའ་སྤངས་པའི་སྐད་ཅིག་སྟེ། །
དེར་ནི་དངོས་པོ་དམིགས་མི་འགྱུར། །བྱང་ཆུབ་སེམས་ནི་བདེ་བ་ཆེ། །རང་རིག་པ་ནི་སྐྱེ་གྱུར་པ། །བརྗོད་ལས་རིང་དུ་སོང་བ་སྟེ། །མཐོང་མེད་གང་ནའང་གནས་པ་མིན། །བླ་མའི་བསྙེན་བཀུར་བརྩོན་པ་ཡིས། །བསོད་ནམས་ལས་ནི་རང་གི་རྟོགས། །དེ་ལྟ་མོད་ཀྱིས་

ལུས་དང་ནི། །བླ་མའི་མན་ངག་གིས་མཚོན་ཆ། །དེ་ཉིད་ཁ་དོག་མེད་ཅིང་མཚན་ཉིད་མེད། །ཐུབ་དབང་འཆི་བའི་གནས་སྐབས་ལྟ་བུར་རྟོགས། །དག་པའི་ལུས་སུ་བསྒོམས་ནས་སྔགས་ཀྱིས་ནི། །མན་ངག་ཇི་བཞིན་སྒོ་རྣམས་བསྡམས་ནས་སུ། །རྣམ་
ཤེས་ས་བོན་རླུང་ལ་ཡང་དག་གནས། །ཚིགས་དགུ་ནས་ནི་སྟེང་དུ་འཕོ་བར་བྱ། །འཁོར་བའི་རྒྱ་མཚོ་འཇིགས་སུ་རུང་བའི་འདམ་དུ་བྱིང་བ་ཡི། །འཚེ་ཞིང་རྨོངས་པར་འགྲོ་བར་ཞུགས་གང་ཡིན། །ཉི་མ་སྟོང་གིས་མངོན་ཤེས་དྲུག་ལྡན་ལུས། །བླ་ན་མེད་པའི་གོ་འཕང་
ཐོབ་པར་འགྱུར། །ནང་གི་སེམས་ལས་སྤྲུལ་པའི་སྦྱོར་བའི་གདན་གྱི་བསམ་གཏན་གྱི་དེ་ཁོ་ན་ཉིད་དང་། བདག་མེད་མའི་མངོན་པར་བྱང་ཆུབ་པ་དང་། །གོང་དུ་འཕོ་བ་སྟེ་དུམ་བུ་གསུམ་པའོ།། །།རི་ཡི་རྩེར་གནས་གེ་སར་དང་། །སྣ་ཚོགས་འདབ་མ་འཇམ་པ་
ལ། །དེ་ཡི་དབུས་གནས་དཔའ་བོ་ནི། །འདོད་དོན་ཐམས་ཅད་སྒྲུབ་བྱེད་པ། །འབྱུང་པོ་ཀུན་གྱི་གནས་ཡིན་ཏེ། །ཐམས་ཅད་བསྐྱེད་པའི་རྒྱུ་ཡང་ཡིན། །ལུས་ཅན་ཀུན་ལ་ཁྱབ་པ་སྟེ། །ཐམས་ཅད་ཐམས་ཅད་བདག་ཉིད་གནས། །ཧཾ་གི་ས་བོན་ཡང་དག་འབྱུང་། །འཇིག་
རྟེན་གསུམ་བསྐྱེད་གཙོ་བོ་ཡིན། །ཡིད་བཞིན་ནོར་བུའི་བདག་ཉིད་དེ། །རིན་ཆེན་སྣ་ཚོགས་འབྲས་བུ་འབྱུང་། །མཚན་ནི་སུམ་ཅུ་རྩ་གཉིས་ལྡན། །དཔེ་བྱད་བཟང་པོ་བརྒྱད་ཅུར་བཅས། །རླུང་བསྐྱོད་པ་ལ་ཞོན་ནས་སུ། །རྟག་ཏུ་ལྟེ་བར་འགྲོ་འོང་བྱེད། །མགོ་བོ་མཐའ་ན་རླུང་
དཀྱིལ་འཁོར། །གཞུ་ཡི་དབྱིབས་ལྟར་གནས་པ་སྟེ། །སྟེང་དང་འོག་གི་རླུང་ལ་ནི། །འདབ་མ་བཞི་པོ་ཡང་དག་གནས། །ལྕེ་དང་རྐན་ནི་སྦྱར་ནས་སུ། །རྟག་ཏུ་སྒྲ་དང་བཅས་བྱེད་པ། །གཅིག་ཏུ་གྱུར་ཅིང་ཐིམ་གྱུར་པ། །དེར་ནི་ཕྱག་རྒྱ་ཆེན་པོར་བརྗོད། །འཇུག་པའི་རླུང་ནི་བསྡམས་
ནས་སུ། །སྟེང་དུ་དྲངས་ཏེ་སྦྱར་བར་བྱ། །ཇི་སྙེད་ལྡོག་པར་འགྱུར་བར་དུ། །རྣལ་འབྱོར་པ་ཡིས་བཙིར་བར་བྱ། །ཇི་ལྟར་མར་ལ་མར་བླུགས་ཤིང་། །ཇི་ལྟར་ཆུ་ལ་ཆུ་བཞག་དང་། །ནམ་མཁའ་དང་ནི་ནམ་མཁའ་བཞིན། །རང་གིས་རང་ནི་རིག་པར་འགྱུར། །འཇུག་དང་འབྱུང་དང་

གནས་པ་ཡི། །དལ་ཞིང་ངལ་བའི་རིས་ཀྱིས་སུ། །ཆ་མེད་དགེ་བ་རབ་ཞི་ནས། །རང་བཞིན་མེད་པ་ཉིད་དུ་འགྲོ། །ཡེ་ཤེས་འདི་ནི་རང་རིག་སྟེ། །ཀུན་དུ་རྟོག་པ་ཐམས་ཅད་སྤངས། །བདག་བྱིན་བརླབ་པའི་རིམ་གྱིས་ནི། །དེ་ཉིད་རྣལ་འབྱོར་ཅན་ཤེས་བྱ། །ཀུན་དུ་དགའ་ལ་
སོགས་རིམ་དང་། །ཉེ་བར་བསྟན་པ་ལ་སོགས་བྱེ་བྲག་དང་། །རྣལ་འབྱོར་ལ་སོགས་རིམ་པ་ཡིས། །བླ་མའི་ལུང་ལས་མཆོག་ཏུ་བདེ། །ས་བོན་མེད་ཅིང་བསྒོམ་པ་མེད། །རང་བཞིན་སྟོང་པ་གནས་མེད་པ། །མ་ལུས་བསྲེག་པར་གཤེགས་པར་བྱ། །ཁྱད་པར་འགྲོ་བའི་བདེ་
བ་དང་། །གང་ཕྱིར་ཆགས་པའང་རྣམ་རྟོག་སྟེ། །ཆགས་བྲལ་དེ་ཡིས་དྲི་མར་བཅས། །གཏི་མུག་སྤངས་པ་གང་ཡིན་པ། །གཉིད་ལོག་སད་པ་བཞིན་ཤེས་བྱ། །ས་འོག་ས་སྟེང་མཐོ་རིས་སུ། །སྐད་ཅིག་གཅིག་གིས་སྐུ་གཅིག་འགྱུར། །བདག་དང་གཞན་གྱི་རྟོག་པ་
ཡིས། །བཅིང་བར་ནུས་པ་མ་ཡིན་ནོ། །སྔགས་ཀྱི་རྗེས་འབྲངས་མན་ངག་ཤིན་ཏུ་བསྟན། །གང་ཡིན་དངོས་རྣམས་ཆུ་ཟླ་ལྟ་བུར་བལྟ། །ཡུལ་ལ་མངོན་ཞེན་དག་ནི་བཟློག་འགྱུར་ཞིང་། །ཐུབ་པའི་དབང་པོའི་ལམ་ནི་ཉེ་བར་འགྱུར། །རང་གི་སེམས་ཉིད་བདུད་ཡིན་པས། །དེ་བས་སེམས་
ནི་དབང་དུ་བྱ། །རང་སེམས་དབང་དུ་བྱས་ནས་ནི། །བདུད་དང་དགྲ་དག་ཡོད་མ་ཡིན། །དཔེར་ན་གེ་སར་དྲི་ཞིམ་ལ། །མྱོས་པའི་བུང་བ་པང་ནང་དུ། །ཉི་མ་ནུབ་པས་བཅིངས་ནས་སུ། །སྡུག་བསྔལ་སྣ་ཚོགས་མྱོང་བར་འགྱུར། །དེ་བཞིན་བླ་མའི་ལུང་ནི་ཉི་མ་ནུབ་པའི་སེམས་ཅན་གང་། །འཁོར་བ་རབ་འཇིགས་
རབ་རིབ་བདེ་བའི་ཞགས་པས་བཅིང་གྱུར་པ། །དེ་ཤར་བ་ཡིས་དེ་ཁོ་ན་ཉིད་ལམ་ནི་ཉེར་མཚོན་ནས། །རྗེས་སུ་མཐུན་པའི་ལམ་གྱིས་གོ་འཕང་མཆོག་ནི་ཐོབ་པར་འགྱུར། །དཔེར་ན་ཟས་ལ་ལོངས་སྤྱོད་དང་། །འདོད་ལ་མངོན་པར་ཞེན་པ་བཞིན། །དེ་བཞིན་དུ་ནི་གོམས་བྱས་པས། །
དངོས་ཀུན་སྟོང་པ་ཉིད་དུ་མཐོང་། །འཁོར་ལོ་བཞི་ལ་གནས་པ་ཡིས། །གདན་བཞི་པ་ཡི་དེ་བཞིན་བཞི། །དགྲ་ལས་རྒྱལ་བའི་སློབ་དཔོན་གྱིས། །རང་གིས་མྱོང་བ་བཞིན་དུ་བྲིས། །གདན་བཞི་པའི་ཤེས་རབ་ཡེ་ཤེས་ཀྱིས་མངོན་པར་བྱང་ཆུབ་གཏན་ལ་ཕབ་པ་སྟེ་དུམ་བུ་བཞི་པའོ།། །།

དཔལ་གདན་བཞི་པའི་དེ་ཁོ་ན་ཉིད་བཞི་པ་སློབ་དཔོན་ཛེ་ཏཱ་རིས་མཛད་པ་རྫོགས་སོ།། །།རྒྱ་གར་གྱི་མཁན་པོ་ག་ཡ་དྷ་ར་དང་། བོད་ཀྱི་ལོ་ཙཱ་བ་འགོས་ལྷས་བཙས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། ༄༅༅། །རྒྱ་གར་སྐད་དུ། ཥ་ཊ་ཏ་ཏྭ་
བྱ་བསྠཱ་ན། བོད་སྐད་དུ། དེ་ཁོ་ན་ཉིད་དྲུག་རྣམ་པར་གཞག་པ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །དཔལ་ལྡན་ཁྱབ་བདག་ལྔ་ཡི་དངོས། །ཡེ་ཤེས་མཁའ་འགྲོ་ལ་བཏུད་དེ། །བླ་མའི་བཀའ་བཞིན་ཉེར་བསྟེན་ཏེ། །དེ་ཉིད་དྲུག་འདི་བདག་གིས་བྱ། །གསང་རྒྱུད་
འཕགས་པ་གདན་བཞི་ལས། །བཏུས་ཏེ་སློབ་མ་བློ་ཞན་ལ། །ཕན་ཕྱིར་དད་པས་འདི་བྱས་ཀྱང་། །མཁས་པས་དཔྱད་ཅིང་བཟོད་པར་གསོལ། །རྡོ་རྗེ་དྲིལ་བུ་བགྲང་ཕྲེང་དང་། །ཡེ་ཤེས་དང་ནི་རྣམ་བཞི་ལ། །བདུད་རྩི་འདོད་དང་མཆོད་རྟེན་གཉིས། །བསྣན་ཏེ་དྲུག་ཏུ་ཤེས་པར་
བྱ། །དང་པོ་རྡོ་རྗེ་བསྡམས་པ་ནི། །བཀྲོལ་ཏེ་ལག་པ་གཉིས་བརྐྱང་ནས། །པདྨའི་ལག་སྐོར་ལྔ་བྱས་ཏེ། །པུས་མོ་གཡས་གཡོན་སྟེང་དུ་གཞག །ལག་མཐིལ་གཉིས་ལ་བསྒོམ་པ་ནི། །གཡས་སུ་ཉི་མའི་དཀྱིལ་འཁོར་དང་། །གཡོན་དུ་ཟླ་བའི་དཀྱིལ་འཁོར་དག །མ་དང་ཨ་ལས་
བསྐྱེད་པར་བྱ། །དེ་སྟེང་རྡོ་རྗེ་དྲིལ་བཞག་ནས། །ཧཱུཾ་དང་ཨ་ལས་བསྐྱེད་པར་བྱ། །ཨཱ་ལི་ཀཱ་ལིའི་སྦྱོར་པ་ཡིས། །ཐབས་དང་ཤེས་རབ་དངོས་སུ་ནི། །རྟོགས་ཏེ་དེ་ཉིད་བསྒོམ་པར་བྱའོ། །དེ་ནས་རྡོ་རྗེའི་དེ་ཉིད་ནི། །བསྒོམ་པའི་མན་ངག་འདི་ལྟ་སྟེ། །རྡོ་རྗེའི་སྟེང་གི་རྩེ་ལྔ་ལ། །
རིགས་ལྔའི་ལྷ་དང་སྦྱར་བར་བྱ། །དཀྱིལ་གྱི་རྩེ་མོར་རྣམ་སྣང་མཛད། །ཤར་གྱི་རྩེ་མོར་མི་བསྐྱོད་པ། །ལྷོ་རྩེར་རིན་ཆེན་འབྱུང་ལྡན་ཏེ། །སྣང་བ་མཐའ་ཡས་ནུབ་ཏུ་དགོད། །བྱང་དུ་དོན་ཡོད་གྲུབ་པ་བསྒོམས། །དེ་འོག་པདྨ་འདབ་བརྒྱད་ལ། །བྱང་ཆུབ་སེམས་བརྒྱད་ཤེས་
བྱ་སྟེ། །པདྨའི་ཕྱག་དང་བྱམས་པ་དང་། །ནམ་མཁའ་མཛོད་དང་ཀུན་དུ་བཟང་། །ཕྱག་ན་རྡོ་རྗེ་འཇམ་དཔལ་དང་། །སྒྲིབ་སེལ་དང་ནི་ས་སྙིང་པོ། །ལྷ་རྣམས་བརྒྱད་པོ་འདི་དག་ནི། །ཇི་བཞིན་ཕྱོགས་སུ་བསྒོམ་པ་ཡིན། །དབུས་ཀྱི་སྒོ་ང་ལྟ་བུ་ལ། །ཡེ་ཤེས་ལྔ་ནི་བསྒོམ་

པར་བྱ། །དེ་ཡི་ཕྱི་རོལ་ཕྱོགས་བཞི་ན། །ལྕགས་ཀྱུ་ལ་སོགས་རྣམ་བཞི་བསྒོམ། །དེ་འོག་འདབ་བརྒྱད་པདྨར་ཡང་། །སྒེག་མོ་ལ་སོགས་བརྒྱད་བསྒོམ་པ། །རྒྱུད་ལས་སྦས་ནས་མ་གསུངས་ཀྱང་། །མན་ངག་དོན་གྱིས་ཤེས་པར་བྱ། །འོག་གི་རྩེ་མོ་རྣམ་ལྔ་ཡང་། །བཅོམ་
ལྡན་མཁའ་འགྲོ་མ་ལྔ་སྟེ། །དབུས་རྩེ་ཡེ་ཤེས་མཁའ་འགྲོ་མ། །དེ་ཡི་ཕྱི་རོལ་ཕྱོགས་བཞི་ན། །ཤར་དུ་རྡོ་རྗེ་མཁའ་འགྲོ་མ། །དེ་བཞིན་དྲག་མོ་བྱང་ཕྱོགས་ཏེ། །རོ་ལངས་མ་ནི་ནུབ་ཀྱི་རྩེར། །ལྷོ་རུ་གདོལ་པའི་མཁའ་འགྲོ་མ། །རྡོ་རྗེ་དེ་ཉིད་ལྷ་མོར་བསྒོམ། །དེ་ལྟར་སུམ་ཅུ་རྩ་
གཅིག་ལྟར། །རྟོགས་ཏེ་རྡོ་རྗེར་བསྒོམས་ནས་ནི། །ཧཱུཾ་གི་དབྱངས་འདི་བླང་བྱས་ཏེ། །སངས་རྒྱས་ཐམས་ཅད་མཉེས་པར་བྱ། །ཧཱུཾ། མཛེས་པའི་རྡོ་རྗེ་གསོར་ནས་སུ། །སེམས་ཅན་ཐར་པ་ལ་ནི་དགོད། །རྣམ་པར་ཐར་པ་ཆོས་ཀྱི་དོན། །རྡོ་རྗེ་སྙིང་པོ་འཛིན་པར་བྱ། །ཧཱུཾ་ཧཱུཾ་ཧཱུཾ་
ཧོ་ཧོ་ཧོ། །དེ་ནི་འཁོར་བ་གཅོད་གྱུར་ཏེ། །ཉོན་མོངས་མུན་པ་བསལ་བྱས་ནས། །བླ་མེད་བྱང་ཆུབ་ཐོབ་པ་དང་། །ཡེ་ཤེས་སྣང་བ་ཐོབ་པར་འགྱུར། །རྡོ་རྗེ་དེ་ཉིད་མ་ཤེས་ན། །བྱང་ཆུབ་དངོས་གྲུབ་རིང་དུ་སྤངས། །རྡོ་རྗེ་དག་པར་མ་གྱུར་ན། །བརྒྱ་བྱིན་མཚོན་ཆ་རྡོ་རྗེ་འདྲ། །
དེ་ནས་དྲིལ་བུ་དེ་ཉིད་ནི། །ནང་གི་ནམ་མཁའི་ཁམས་ལ་ནི། །བྱང་ཆུབ་སྙིང་པོ་གནས་པ་ཡིན། །མཚན་ཉིད་མེད་པར་སྤང་བ་ནི། །བུམ་པ་ཤེས་རབ་བདུད་རྩིའོ། །དེ་སྟེང་འདབ་བརྒྱད་པདྨ་ལ། །ས་བོན་བརྒྱད་ལས་ལྷ་མོ་བརྒྱད། །ཤར་དུ་ལྷ་མོ་སྒྲོལ་མ་སྟེ། །ན་བཟའ་དཀར་མོ་
བྱང་གི་ཕྱོགས། །ནུབ་ཏུ་མཱ་མ་ཀཱི་ཞེས་བྱ། །དེ་བཞིན་ལྷོ་རུ་སངས་རྒྱས་སྤྱན། །མེ་ཡི་མཚམས་སུ་སྐུལ་བྱེད་མ། །རྡོ་རྗེ་ལུ་གུ་རྒྱུད་དབང་ལྡན། །ཁྲོ་གཉེར་མ་ནི་རླུང་མཚམས་སུ། །བདེན་བྲལ་མཚམས་སུ་རིན་ཆེན་སྒྲོན། །ལྷ་མོ་དེ་བརྒྱད་དབུས་སུ་ཡང་། །ཤེས་རབ་ཕ་རོལ་
ཕྱིན་པ་སྟེ། །པདྨ་རྒྱས་པའི་སྤྱན་མངའ་མ། །གཟུགས་རྫོགས་འོད་དང་ལྡན་པར་བསྒོམ། །སྟེང་གི་པདྨ་འདབ་བརྒྱད་ལ། །སྔོན་བཞིན་སྒེག་མོ་ལ་སོགས་བརྒྱད། །རྩེ་ལྔར་མཁའ་འགྲོ་མ་ལྔ་བསྒོམ། །དབུས་ཀྱི་ལྕེ་ལ་ཡེ་ཤེས་ཏེ། །ཐམས་ཅད་འདུ་དང་འཕྲོ་བར་བྱེད། །ཉི་ཤུ་རྩ་

གཉིས་ལྷར་སྦྱོར་བ། །རྣམ་པར་དག་པའི་དྲིལ་བུ་འདི། །སྔགས་འདི་དག་ནི་བཟླས་ནས་སུ། །ཕྱོགས་བརྒྱད་དག་ཏུ་ལེན་གསུམ་དཀྲོལ། །ཨོཾ་བཛྲ་གྷཎྜེ་ར་ཎི་ཏ་པྲ་ར་ཎི་ཏ་སརྦ་བུདྡྷ་པྲ་ཙ་ལི་ཏེ་པྲཛྙཱ་པཱ་ར་མི་ཏཱ། ནཱ་དཱ་སྭ་བྷཱ་ཝེ་ཧཱུཾ་ཧཱུཾ་ཧཱུཾ་ཧོ་ཧོ་ཧོ་ཨ་སྭཱ་ཧཱ། ཤེས་རབ་ཆོས་ཀྱི་དྲིལ་བུ་འདི། །
སངས་རྒྱས་ཐམས་ཅད་བླང་བྱས་ནས། །མི་ཤེས་འདམ་ལས་བྱིང་བ་ཡི། །སེམས་ཅན་སངས་རྒྱས་དོན་དུ་དཀྲོལ། །དེ་ཉིད་སྦྱོར་བ་དམན་ན་ནི། །དངོས་གྲུབ་རིང་དུ་མཚོན་པ་སྟེ། །དེ་ཉིད་མེད་པའི་རྣལ་འབྱོར་པའི། །གླང་ཆེན་དྲིལ་བུ་དཀྲོལ་བ་འདྲ། །དེ་ནས་བགྲང་ཕྲེང་དེ་ཉིད་ཀྱི། །ཡང་
དག་ཆོ་ག་ཤེས་པར་བྱའོ། །ཤེལ་དང་ཉ་ཕྱིས་མུ་ཏིག་དང་། །དཀར་པོ་ལ་སོགས་གཞན་ཡང་རུང་། །ཞི་བའི་ལས་ལ་ཁྱད་པར་གསུངས། །གསེར་དང་དངུལ་དང་ཟངས་མ་དང་། །པདྨའི་སྙིང་པོ་རྒྱས་པ་ཡིན། །གུར་གུམ་ལ་སོགས་དྲི་ཡིས་ནི། །བྱུག་པའི་རི་ལུ་དབང་ལ་སྨོས། །རུ་དྲཱ་ཀྵ་དང་ལུང་
ཐང་དང་། །མི་རུས་མངོན་སྤྱོད་ཅེས་སུ་གསུངས། །ཞི་རྒྱས་དབང་དང་མངོན་སྤྱོད་ལ། །བོ་དེ་ཙེས་ནི་ལས་ཀུན་བྱེད། །དེ་ཡི་གྲངས་ནི་འདི་ལྟ་སྟེ། །སྔགས་སྒྲུབ་པ་ལ་ལྔ་བཅུ་དང་། །དབང་ལ་དེ་བཞིན་ཉི་ཤུ་ལྔ། །ཞི་བ་ལ་ནི་བརྒྱ་ཕྲག་སྟེ། །བརྒྱ་རྩ་བརྒྱད་ནི་རྒྱས་པའི་ཡིན། །
མངོན་སྤྱོད་ལ་ནི་དྲུག་ཅུའོ། །ཕྲེང་ཐག་དགུ་སྒྲིལ་བྱས་པ་ལ། །མདོ་འཛིན་ཉིས་བརྩེགས་ཤེས་པར་བྱ། །གཡས་པའི་ལག་མཐིལ་ཉི་མ་ལ། །ཨཱཿཡིག་དམར་པོ་བསྒོམ་པར་བྱ། །གཡོན་གྱི་ལག་མཐིལ་ཟླ་བ་ལ། །ཧཱུཾ་ཡིག་དམར་པོ་བསྒོམ་ནས་སུ། །ས་བོན་དེ་ཉིད་ལས་བསྐྱེད་
པ། །གཡས་སོར་རྡོ་རྗེ་རྩེ་ལྔ་པ། །གཡོན་ནི་པདྨ་འདབ་ལྔར་བསྒོམ། །ཕྲེང་བ་གང་ཡིན་དཀྱིལ་བཞག་སྟེ། །རྡོ་རྗེ་པདྨ་སྙིམ་པར་སྦྱར། །རི་ལུ་དགྲ་བཅོམ་བསྒོམས་ནས་སུ། །ཕྲེང་ཐག་ལྷ་དགུར་བྱིན་གྱིས་བརླབ། །མདོ་འཛིན་འོག་མ་མཆོད་རྟེན་ཏེ། །གོང་མ་ཆོས་ཀྱི་སྐུ་རུ་
བསྒོམ། །བགྲང་ཕྲེང་དེ་ཉིད་བསྒོམ་ནས་སུ། །སྔགས་འདི་ཡིས་ནི་བྱིན་གྱིས་བརླབ། །ཨོཾ་ཡ་ཏེ་ཡ་མ་ཧཱ་ཛྙཱ་ན་སརྦ་བུདྡྷ་མ་ཧཱ་བྷེ་བེ་ཏ། །ཧཱུཾ་ཧཱུཾ་ཧཱུཾ་ཧོ་ཧོ་ཧོ་ཨ་སྭཱ་ཧཱ། ཆོས་ཀྱི་སྐུ་དང་མཆོད་རྟེན་ལ། །དགྲ་བཅོམ་བསྐོར་བ་བྱེད་བསམས་ཏེ། །མཆོད་རྟེན་གྲིབ་མའང་

མི་འགོང་ཕྱིར། །བསྒྱུར་ལོག་བྱས་ནས་ཕྲེང་བ་བགྲང་། །ཕྲེང་བ་དེ་རྣམས་བགྲང་བ་ཡང་། །སོ་སོའི་ཁྱད་པར་གྱིས་ཤེས་ཏེ། །ཞི་བའི་ཕྲེང་བ་མཛུབ་ལ་བཞག །དེ་བཞིན་རྒྱས་པ་གུང་མོ་སྟེ། །སྲིན་ལག་ལ་ནི་དབང་དུ་བཤད། །མངོན་སྤྱོད་མཐེ་ཆུང་ཤེས་པར་བྱ། །
སྒྲུབ་པའི་ལྷ་གང་འགུགས་བསམས་ཏེ། །མཐེ་བོང་ལྕགས་ཀྱུས་བཀུག་པར་བསྒོམ། །དེ་ཡང་ལྷ་མོ་གཡོན་པས་འདྲེན། །གཡས་པས་ལྷ་རྣམས་འདྲེན་པ་ཡིན། །དེ་ལྟར་དག་པའི་བགྲང་ཕྲེང་གིས། །གང་འདོད་དངོས་གྲུབ་འགྲུབ་པར་བྱེད། །དེ་ཉིད་མེད་པའི་ཕྲེང་
བ་ནི། །བུད་མེད་རྒྱན་གྱི་དོ་ཤལ་འདྲ། །དེ་ནས་ཡེ་ཤེས་དེ་ཉིད་ནི། །འདི་ལྟར་ཡང་དག་ཤེས་པར་བྱ། །ཆོས་ཀུན་ཡེ་ཤེས་གཅིག་པ་ལ། །ཁྱད་པར་རིང་ཐུང་གྱུར་ནས་གནས། །ལྷ་དང་ཀླུ་དང་གནོད་སྦྱིན་དང་། །དྲི་ཟ་དང་ནི་ལྷ་མིན་དང་། །ནམ་མཁའ་ལྡིང་དང་མིའམ་
ཅི། །རྒྱལ་ཆེན་དང་ནི་གང་བ་བཟང་། །ལྟོ་འཕྱེ་དང་ནི་གྲུལ་བུམ་དང་། །མི་དང་མི་མིན་མཁའ་འགྲོ་མ། །བྱོལ་སོང་དང་ནི་ཡི་དགས་དང་། །དམྱལ་བར་བཅས་པའི་སེམས་ཅན་དང་། །བྱོལ་སོང་གཟུགས་ཀྱི་ཁྱད་པར་དང་། །ཕྲ་མོ་སྒོ་ང་འཛིན་སོགས་པའི། །དེ་རྣམས་གཡོ་
བ་ཐམས་ཅད་དང་། །མི་གཡོ་བ་ཡི་རྣམ་པ་ཡང་། །ས་ཆུ་མེ་དང་རླུང་གི་ཁམས། །ཕྲ་མོ་གཙོ་དང་ལོ་མ་དང་། །རྡོ་དང་བོང་བ་རྩེ་མོ་སོགས། །ཐམས་ཅད་ཡེ་ཤེས་སྣང་བ་ཡིན། །དེ་ཡང་སེམས་དང་ལྡན་པ་དང་། །སེམས་པ་མེད་པ་གཉིས་སུ་འདོད། །སེམས་པ་དང་
ལྡན་ཁྱད་པར་ནི། །ཡེ་ཤེས་བྱེ་བྲག་འདི་ལྟ་སྟེ། །རྒྱལ་ཆེན་སུམ་ཅུ་རྩ་གསུམ་དང་། །འཐབ་བྲལ་དང་ནི་དགའ་ལྡན་དང་། །འཕྲུལ་དགའ་གཞན་འཕྲུལ་དབང་བྱེད་དང་། །ཚངས་རིས་ཚངས་པའི་མདུན་ན་འདོན། །ཚངས་ཆེན་དང་ནི་འོད་ཆུང་དང་། །དཔག་མེད་འོད་དང་
འོད་གསལ་དང་། །དགེ་ཆུང་དགེ་རྒྱས་ཚད་མེད་དགེ །སྤྲིན་མེད་དང་ནི་བསོད་ནམས་སྐྱེས། །འབྲས་བུ་ཆེ་དང་མི་ཆེ་བ། །མི་གདུང་བ་དང་གྱ་ནོམ་སྣང་། །ཤིན་ཏུ་མཐོང་དང་འོག་མིན་ཏེ། །ཉི་ཤུ་རྩ་གསུམ་ལྷ་རྣམས་ནི། །ཡེ་ཤེས་རགས་ཤིང་ཟབ་པ་ནི། །ཉིས་འགྱུར་

ཉིས་འགྱུར་ཤེས་པར་བྱ། །དེ་ཡང་རྒྱལ་ཆེན་རིགས་བཞི་ནས། །གཞན་འཕྲུལ་དབང་བྱེད་བར་དུ་ནི། །འདོད་པ་ལྔ་ཡི་ཡེ་ཤེས་དག །གོང་ནས་གོང་དུ་ཟབ་པ་ཡིན། །ལྷ་མིན་ཡེ་ཤེས་ཁྲོ་བ་སྟེ། །ཡི་དགས་ཡེ་ཤེས་སྨེ་བ་ཡིན། །གཏི་མུག་
ཡེ་ཤེས་བྱོལ་སོང་གི །དམྱལ་བའི་འཇིགས་པས་དུབ་པ་ཡིན། །མི་ཤེས་ཡེ་ཤེས་རྣམ་ལྔ་སྟེ། །གླེན་པ་དང་ནི་འོན་པ་དང་། །ལྐུགས་པ་དང་ནི་བྱིས་པ་དང་། །ཡེ་ཤེས་ཅན་དང་རྣམ་པ་ལྔ། །བྱེ་བྲག་ཏུ་ནི་ཤེས་པར་བྱ། །གཞན་ཡང་གནོད་སྦྱིན་ལ་སོགས་
པས། །རྩ་བའི་རྒྱུད་ལས་མ་གསུངས་ཀྱང་། །དོན་གྱི་ཡེ་ཤེས་ཁྱད་པར་ནི། །རྣལ་འབྱོར་པས་ནི་ཤེས་པར་བྱ། །དེ་འདྲའི་ཡེ་ཤེས་དེ་ཉིད་ནི། །རྣལ་འབྱོར་གང་གིས་རྟོགས་གྱུར་པ། །དེ་ནི་ཚེ་རབས་ས་ཡ་སྟོང་། །སངས་རྒྱས་ཤེས་པས་བསྐུལ་བའོ། །རྣལ་འབྱོར་
གཙུག་ལག་ལས་བྱུང་བའི། །ཡེ་ཤེས་དེ་ཉིད་མི་ཤེས་ཏེ། །ཕྱི་ཡི་གཙུག་ལག་ཤེས་ན་ཡང་། །གར་མཁན་ཆ་ལུགས་དང་འདྲའོ། །དེ་ནས་བདུད་རྩིའི་འོད་དེ་ཉིད། །མན་ངག་འདི་ལྟར་ཤེས་པར་བྱ། །བྷནྡྷའམ་ཉ་ཕྱིས་ལ་སོགས་པ། །བདུད་རྩི་ལྔ་དང་བསྲེས་པ་
ཡིས། །བདུད་རྩིའི་འོད་ཀྱིས་བཀང་བྱས་ལ། །སྔགས་དང་ཕྱག་རྒྱས་དག་པར་བྱ། །གཡས་པ་ཟླ་དཀྱིལ་བསམ་པ་ལ། །བདུད་རྩིའི་འོད་ཀྱིས་སྣོད་བཞག་སྟེ། །གཡོན་པ་རྩེ་གསུམ་ཕྱག་རྒྱ་ཡིས། །སྣོད་ལ་རེག་ནས་སྔགས་འདི་བརྗོད། །ཨོཾ་ཧ་ཧོ་ཧྲཱིཿསྭཱ་ཧཱ། ཧ་ཡིས་
ཁ་དོག་འཕྲོག་པ་དང་། །ཧོ་ཡིས་ཕྱི་ཡི་དྲི་མ་བསལ། །ཧྲཱིཿཡིས་མཐུ་ཡང་འཇོམས་བྱེད་པ། །རིམ་པ་དེ་ནི་ཤེས་པར་བྱ། །དེ་ལྟར་ལོག་པ་བསལ་ནས་སུ། །འདི་ལྟར་ཡང་དག་སྦྱོར་བ་བསྒོམ། །གཟུགས་ནི་པདྨའི་དབང་ཕྱུག་སྟེ། །རྣམ་པར་སྣང་མཛད་དྲི་ཆུ་དངོས། །
རོ་ནི་རྡོ་རྗེ་དབང་ཕྱུག་སྟེ། །སྐུ་གསུང་ཐུགས་ཀྱི་ངོ་བོར་བསམ། །དེ་འོག་ཕྱག་རྒྱ་སྔགས་ཀྱིས་ཡང་། །བསྲབས་ནས་བདུད་རྩི་འོད་དུ་འགྲུབ། །ས་བོན་སུཾ་ལས་བསྐྱེད་པ་ཡི། །གཡོན་པའི་མཐིལ་དུ་ཟླ་བ་བསྒོམ། །དེ་དཀྱིལ་བདུད་རྩི་ས་བོན་སུཾ། བསྒོམས་ནས་སྲིན་

ལག་མཐེབ་རྩེར་སྦྱར། །བདུད་རྩིའི་དཀྱིལ་དུ་ཕྱག་རྒྱ་དེ། །བཞག་ནས་རིམ་པ་འདི་ལྟར་བསྒོམ། །ཧཱུཾ་ལས་བསྐྱེད་པའི་མཐེ་བོང་ནི། །དབང་ཆེན་ས་གཞིར་བསྒོམ་པ་དང་། །སུཾ་ལས་བསྐྱེད་པའི་སྲིན་ལག་ནི། །རི་རབ་ཟུར་བཞིར་བསྒོམ་པར་བྱ། །སྲིན་ལག་རྩེར་ཡང་སུཾ་བསྒོམས་
ཏེ། །བདུད་རྩིའི་སྙིང་པོ་གསུམ་བཟླས་ནས། །ལན་གསུམ་བདུན་ནི་བསྒྲུབ་པར་བྱ། །འཁོར་བ་བདུད་རྩིར་དམིགས་ནས་ནི། །ལྷ་དང་རྣལ་འབྱོར་མཁའ་འགྲོ་མ། །སོ་སོར་གཏོར་ནས་མཉེས་པར་བྱ། །ལྕེ་དང་དཔྲལ་བ་སྤྱི་བོ་ལ། །བདུད་རྩིའི་ཐིག་ལེ་བཞག་ནས་སུ། །
ཡི་དམ་ལྷ་ཡང་མཆོད་བྱ་ཞིང་། །དམ་ཚིག་ཙམ་དུ་བཏུང་བར་གྲགས། །གང་ཚེ་རྣལ་འབྱོར་ཚོགས་པའི་ཚེ། །དབྱངས་འདི་བླངས་ནས་གཞན་ལ་དབུལ། །གཟིགས་ཤིང་མཛེས་པ་དམ་པའི་ཆོས། །འདི་ལ་ཐེ་ཚོམ་བྱར་མི་རུང་། །བྲམ་ཟེ་ཁྱི་དང་གདོལ་པ་དག །རང་བཞིན་
གཅིག་ཏུ་བསྒོམས་ནས་གསོལ། །རྣལ་འབྱོར་གཞན་གྱིས་བླང་བ་ཡང་། །དབྱངས་དང་ཕྱག་རྒྱ་ཤེས་བྱ་སྟེ། །གཡས་པ་པདྨའི་གདན་བསྒོམས་ནས། །གཡོན་གྱི་རྩེ་གསུམ་ཕྱག་རྒྱས་བླང་། །བདེ་བར་གཤེགས་ཤིང་ཆོས་ཀྱི་མཆོག །དྲི་མ་མེད་པའི་གནས་འདི་ལ།
གཟུང་དང་འཛིན་པ་རྣམ་གྲོལ་བ། །དེ་བཞིན་ཉིད་དེ་ཕྱག་འཚལ་ལོ། །དེ་ལྟར་མན་ངག་རྟོགས་ནས་སུ། །བདུད་རྩིའི་འོད་ལ་བརྟེན་བྱས་ནས། །འཁོར་བའི་སྡུག་བསྔལ་བཅོམ་ནས་སུ། །ཐར་པའི་རྩི་རུ་འགྲུབ་པ་ཡིན། །དེ་ཉིད་མེད་པའི་རྣལ་འབྱོར་པ། །མདངས་དང་སྟོབས་དང་ལོངས་
སྤྱོད་ཕྱིར། །སྲེད་པའི་སྒོ་ནས་འཐུང་བྱེད་ན། །སེམས་ཅན་ཕལ་པའི་བཏུང་བ་འདྲ། །དེ་ནས་མཆོད་རྟེན་དེ་ཉིད་ཀྱང་། །ཡང་དག་པར་ནི་བསམ་པར་བྱ། །ནང་བཞིན་ནམ་མཁའ་དང་འདྲ་བར། །དངོས་ཀུན་སྟོང་པ་ཉིད་དུ་བསྒོམ། །རང་གི་སེམས་དང་དབྱེར་མེད་པའི། །གདན་བཅས་ཧཱུཾ་
ཡིག་འདུས་པར་བསྒོམ། །དེ་ཡི་ཁམས་གསུམ་འཇིག་རྟེན་ནི། །མཆོད་རྟེན་གནས་སུ་བསྒོམ་པར་བྱ། །ས་ཡི་ཁྲི་འཕང་ཟུར་བཅུ་གཉིས། །དགུག་པའི་ཕྱོགས་བརྒྱད་གླིང་ཡིན་ཏེ། །བང་རིམ་བདུན་དུ་བསམས་པ་ནི། །གསེར་གྱི་རི་བདུན་ཤེས་པར་བྱ། །དྲིལ་བུ་དབྱིངས་སུ་བུམ་པ་ནི། །

ལྷ་གནས་རི་རབ་བསྒོམ་བྱ་སྟེ། །བུམ་རྟེན་འཁོར་བ་གདུང་བའི་དབྱིབས། །ཀླུ་ཡི་རྒྱལ་པོ་ནོར་རྒྱས་ཡིན། །ཁ་ཁྱེར་རིམ་པ་དྲུག་ལྡན་པ། །འདོད་རིས་ལྷ་རྣམས་དྲུག་ཏུ་བཏགས། །དབུས་སུ་སྲོག་ཤིང་ཡར་བསྒྲེང་བ། །བདག་མེད་ཆོས་ཉིད་ཟད་མེད་བསྒོམ། །འཁོར་
ལོ་བཅུ་བདུན་གྱིས་བརྒྱན་པ། །གཟུགས་ཁམས་གནས་བཅུ་བདུན་དུ་བཏགས། །ཆོས་ཀྱི་དབྱིབས་པ་ཡར་འཕགས་པ། །གཟུགས་མེད་ཁམས་བཞིར་ཤེས་པར་བྱ། །དེ་ཡི་སྟེང་གི་སྒོ་ངའི་དབྱིབས། །རང་གི་སེམས་ནི་སྐུ་རུ་བསྒོམ། །དེ་ལ་དེ་བཞིན་གཤེགས་པ་དང་། །
སངས་རྒྱས་བྱང་ཆུབ་སེམས་དཔའ་དང་། །རང་གི་སློབ་དཔོན་ཡི་དམ་ལྷ། །བཞུགས་པར་དམིགས་ནས་རང་སེམས་དང་། །དབྱེར་མེད་བསྒོམས་ནས་ཕྱག་བྱས་ནས། །མཆོད་དང་བསྟོད་པ་དབུལ་བྱས་ནས། །བླ་ན་མེད་པའི་གོ་འཕང་ཐོབ། །གཞན་དུ་གཟུང་འཛིན་མ་སྤངས་པར། །
དངོས་སུ་རྟོགས་ནས་ཕྱག་བྱས་ན། །འཁོར་བ་ལས་བསྒྲལ་མི་འགྲུབ་སྟེ། །མུ་སྟེགས་ཕྱག་གནས་ལྷ་རྟེན་འདྲ། །དེ་ཉིད་དྲུག་གི་རིམ་པ་འདི། །ཕྱི་ནང་གང་དུ་སྦྱོར་ན་ཡང་། །འགལ་བ་མེད་ཅིང་དངོས་གྲུབ་སྟེར། །སྟོན་པ་ཐུན་མོང་བསྟན་ཕྱིར་རོ། །སྨྲྀ་ཏི་ཛྙཱ་ན་ཀཱིརྟི་ཡིས། །སློབ་
མས་ཞུས་པ་འདི་བྱས་པའི། །དགེ་བ་ཐོབ་པ་གང་ཡིན་པ། །དེ་ཡིས་སེམས་ཅན་སངས་རྒྱས་ཤོག །དེ་ཁོ་ན་ཉིད་དྲུག་རྣམ་པར་གཞག་པ། རྒྱ་གར་གྱི་མཁན་པོ་སྨྲྀ་ཏི་ཛྙཱ་ན་ཀཱིརྟིས་མཛད་པ་རྫོགས་སོ།། །།པཎྜི་ཏ་དེ་ཉིད་ཀྱིས་བསྒྱུར་ཅིང་གཏན་ལ་ཕབ་པའོ།། །།
༄༅༅། །རྒྱ་གར་སྐད་དུ། མ་ཧཱ་མཱ་ཡཱ་ཏནྟྲ་སྱ་པཉྫི་ཀཱ་མཱ་ཡཱ་ཝ་ཏཱི་ནཱ་མ། བོད་སྐད་དུ། སྒྱུ་འཕྲུལ་ཆེན་མོའི་རྒྱུད་ཀྱི་དཀའ་འགྲེལ་སྒྱུ་མ་ཅན་ཞེས་བྱ་བ། །རྡོ་རྗེ་མཁའ་འགྲོ་མ་ལ་ཕྱག་འཚལ་ལོ། །ཉོན་མོངས་ལ་ནི་མི་སྲུན་མེད། །འགྲོ་བས་རྒྱལ་བར་རབ་ཏུ་གསུངས། །མི་གཙང་བ་
ཡི་རྣམ་རྟོག་རྣམས། །སྡོང་པོ་དང་ནི་ཚང་ཚིང་རྣམས། །བསྲེག་པའི་མེ་འདྲར་བཅོམ་བྱས་ཏེ། །འགྲོ་བའི་དོན་ནི་བྱ་བའི་ཕྱིར། །རྟག་ཏུ་རྩེ་མོ་བྱེད་པ་ཡིན། །ལས་ལས་ཕྱིར་ལྡོག་གྱུར་པའོ། །སྒྱུ་འཕྲུལ་གཟུངས་མའི་ཐེག་པ་ལས། །རྒྱལ་བའི་བླ་མ་རྒྱུར་གྱུར་ཅིག །དོན་རྣམས་ཅི་ལྟར་

གནས་པ་བཞིན། །ཚིག་གཉིས་གསལ་བར་མི་སྟོན་ཡང་། །དོན་རྣམས་ཇི་ལྟར་གནས་བཞིན་ཡིན། །ཇི་ལྟ་ཇི་ལྟར་གསུངས་པ་ཡི། །ཚིག་ལས་མི་འགལ་ཟླ་བ་ཡིས། །བྱས་པའི་རྒྱུད་ཀྱི་དཀའ་འགྲེལ་ནི། །སྒྱུ་མ་ཅན་འདི་རྒྱས་གྱུར་ཅིག །སྒྱུ་མ་ཆེན་མོ་རྣམ་བཤད་ཀྱི། །
ཚིག་བཤད་རྣམས་ལ་བཟོ་བར་ནི། །བདག་ནི་རབ་ཏུ་གསུང་མི་བྱ། །ཀྱེ་ལེགས་པ་པོ་ཉིད་ཚིག་འདི་ལ། །ཡོངས་སུ་ཞུགས་པར་བྱ་བ་མིན། །དོན་ཉིད་སྙིང་པོར་གཟུང་བར་བྱ། །དེ་ནས་མཁའ་འགྲོ་མ་རྣམས་དང་། །གསང་བའི་དབང་ཕྱུག་མ་རྣམས་ཀྱིས། །ཡང་དག་གསང་བའི་
རྒྱུད་ཉིད་ནི། །བདག་གིས་རབ་ཏུ་བཤད་ལ་སོགས། །འདི་དག་གི་ནི་ཚིག་གཉིས་ཀྱིས། །དབུ་གཉིས་བདག་ནི་འདིར་མ་བྱུང་། །དེ་ནས་ཡང་ནི་ཚིག་སྒྲ་གཉིས། །དབུ་ནི་སྟོང་པ་མ་ལུས་སྦྱོར། །དེ་ལྟར་འགལ་བར་བདག་གིས་གོ། །ཡོངས་བཤད་ཡོངས་སུ་བཤད་པ་ནི། །རྩ་བའི་
རྒྱུད་ལས་གང་གསུངས་པ། །སྔགས་འབྱུང་བ་ཞེས་བྱ་བའི་ལེའུ། །བཅུ་པ་ཉིད་ལས་ངེས་པར་ཕུལ། །རྫུ་འཕྲུལ་ཐམས་ཅད་འཕྲོས་པ་སྟེ། །ཡང་ན་ལེའུ་ཉིད་བཅུ་གཅིག་པ། །དེ་ཕྱིར་བཤད་པའི་དོན་གྱི་དོན། །དེ་དུས་ལྷ་མོ་རྒྱུད་ཉིད་འདི། །དེ་ཕྱིར་གང་ནས་བྱུང་བ་བསྟན། །རྡོ་
རྗེ་ཞེས་བྱ་མི་ཤིགས་ཏེ། །སེམས་དེ་ཉིད་ནི་ནམ་མཁའ་བཞིན། །བདེ་བར་གཤེགས་པས་གསུངས་པ་ནི། །སེམས་ནི་ནམ་མཁར་ཡང་དག་བཤད། །སྐབས་ནི་ཐམས་ཅད་སྦྱིན་པའི་ཕྱིར། །དེ་སེམས་ནམ་མཁའ་ལ་ནི་འཕུར། །ཡང་ན་ཡང་དག་འགྲོ་བ་སྟེ། །བསྐལ་པའི་དུ