Luận tạng Tây Tạng (Tengyur) — Tập 14

དིར་ནི་སྔོན་དུ་ཡུལ་དང་གྲོང་གི་བདག་པོ་རྣམས་ལ་དང་པོ་དབུས་མཐའི་མིང་གིས་གཏོར་མ་དབུལ། །འཕྲོག་མ་ལ་ཡང་ཆང་བུ་
གཉིས་དང་གཞན་ཡང་ཁྲོ་བོའི་རྒྱལ་པོའི་ཆེད་དུ་སྔགས་པས་གཏོར་མའོ། །ཕོ་ཉ་རྣམས་ལ་ཟས་ཀྱི་རྩེ་མོ་ས་སྟེངས་རྣམས་སུ་བཞག་སྟེ་ཁྱབ་བདག་རྡོ་རྗེ་རྣམས་ཀྱིས་སྦྱིན། །ཟོས་པའི་ལྷག་མ་འབྱུང་པོ་རྣམས་ལ་སྦྱིན་ཏེ་གཞན་ཡང་དགེ་བའི་དོན་དུ་སྦྱིན་པའི་ཚིགས་བཅད་བརྗོད། །ཉལ་བའི་དུས་སུ་འཁྲིག་པའི་
མཆོད་པ་བྱས་ནས་ཡན་ལག་ཁ་དང་གཉིས་ཀྱི་རིགས་རྣམས་ཉིད་དང་ནི། །རང་གི་མགོ་དང་མགྲིན་པ་སྙིང་ག་ལྟེ་གསང་སྤྱི་བོའི་འཁོར་ལོ་རྣམས་ལ་རྡོ་རྗེའི་ཡན་ལག་དགོད། །ཅེས་པ་སྟེ། དེ་ནས་ཨ་ཡིག་ལས་བྱུང་བའི་བུམ་པ་གསུམ་མོ། །དེ་རྣམས་ཀྱི་སྟེང་དུ་ཨོཾ་ཡིག་ལས་བྱུང་བའི་ཐོད་པའོ། །ནང་ན་གནས་
པ་ནི་ཕུང་པོ་དང་ཁམས་ཀྱི་ས་བོན་རྣམས་ལས་བྱུང་བའི་བདུད་རྩི་ལྔ་དང་སྒྲོན་མ་ལྔ་རྣམས་སོ། །དེ་རྣམས་ཀྱི་འོག་ཏུ་གནས་པའི་རླུང་གི་དཀྱིལ་འཁོར་གྱིས་རབ་ཏུ་སྦར་བའི་མེས་བཞུ་བར་བྱའོ། །དེ་ཉིད་ཧཱུྃ་ཡིག་ལས་བྱུང་བའི་རྡོ་རྗེས་དཀྲུག་པར་བྱའོ། །དེ་དང་བཅས་པའི་རོ་གཅིག་ཏུ་གྱུར་པས་ཟླ་བ་ཞུ་བའི་གཟུགས་སུ་
བལྟའོ། །དེ་ནས་རྣམ་པར་དག་པར་བྱ་བ་ལ་སོགས་པའི་སྔགས་ཀྱི་རྐང་བ་བརྗོད་པ། ཨོཾ་ཨོཾ་བཛྲ་ཙནྡྲ་སརྦ་དྷརྨྨཱ་སུ་བི་ཤུདྡྷཿ། སྭ་བྷཱ་བ་སརྦ་དྷརྨཱ་ན་བི་ཤོ་དྷ་ཡ་སྭཱ་ཧཱ། ཨོཾ་ཨཱཿབཛྲ་སཱུརྱ་སརྦ་དྷརྨྨཱ་པྲ་བོ་དྷ་ཀཱ་སརྦ་དྷརྨཱ་ན་པྲ་པོ་དྷ་ཡ་སྭཱ་ཧཱ། ཨོཾ་ཧུྃ་བཛྲཱ་ན་ལ་སརྦ་དྷརྨྨཱ་པྲ་དཱི་བ་ཀ་སརྦ་དྷརྨྨཱཾ་པྲ་དཱི་པ་ལ་ཡ་སྭཱ་ཧཱ། ཨོཾ་ཧོ་སརྦ་

དྷརྨྨཱ་བཛྲཱ་མྲྀ་ཏ་ཀ་ར་སརྦ་དྷརྨཱ་ན་བཛྲཱ་མྲྀ་ཏཾ་ཀུ་རུ་ཀུ་རུ་སྭཱ་ཧཱ། ཞེས་པ་རྣམས་ཀྱིས་ལག་པ་གཡོན་པས་རྣམ་པར་དགབ་པར་བྱ་བ་དང་། ལག་པ་གཡས་པས་སྤེལ་བར་བྱ་བ་དང་། ཐལ་མོས་ཁ་བཅད་དེ་རེག་པས་རབ་ཏུ་སྦར་བར་བྱ་བ་དང་། རྡོ་རྗེ་བྱ་ཁྱུང་གི་ཕྱག་རྒྱས་རྡོ་རྗེ་བདུད་རྩིར་བྱའོ། །
གཞན་ཡང་ཁམས་གསུམ་རྣམ་པར་རྒྱལ་བའི་ཕྱག་རྒྱས་ཡུལ་གྱི་བདག་པོ་སྤྱན་དྲང་བར་བྱ་བ་དང་། ཁྱིའི་ཕྱག་རྒྱས་གྲོང་གི་བདག་པོ་རྣམས་ལའོ། །རྩེ་ལྔ་པའི་ཕྱག་རྒྱས་ཁྲོ་བོའི་རྒྱལ་པོ་རྣམས་ལའོ། །གྲི་གུག་གི་ཕྱག་རྒྱས་ཟད་པར་རྣམས་ལའོ། །རལ་གྲིའི་ཕྱག་རྒྱས་ལྷ་རྣམས་ལའོ། །རིན་པོ་ཆེའི་
ཕྱག་རྒྱས་གཟའ་རྣམས་ལའོ། །པདྨའི་ཕྱག་རྒྱས་ཀླུ་རྣམས་ལའོ། །འཁོར་ལོའི་ཕྱག་རྒྱས་འབྱུང་པོ་རྣམས་ལའོ། །དེ་ཡང་ཨོཾ་ཨཱཿཧཱུྃ་ཨ་མུ་ཀ་ཨཱ་གཙྪ་ཨཱ་གཙྪ་ཤཱི་གྷྲཾ་ཨི་དཾ་བ་ལིཾ་གྲྀཧྞ་གྲིཧྞ་བུ་ཀྟྭཱ་པཱི་ཏྭཱ་ཏྲྀ་པྟཾ་ཀྲྀ་ཏྭཱ་སརྦ་སཏྭ་ནཱཾ་ཤཱནྟི་ཙིཏྟཾ་ཀྲྀ་ཏྭཱ་ཨ་པ་རསྠཱ་ནཾ་གཙྪ་གཙྪ་སྭཱ་ཧཱ། ཞེས་པ་གཏོར་མའི་སྔགས་འདིས་
ཡུལ་གྱི་བདག་པོ་དང་། གྲོང་གི་བདག་པོའམ་དེ་ལྟར་ཡུལ་ལམ། གྲོང་གི་མིང་གི་ཡི་གེ་གང་ཡང་རུང་བ་གསུམ་དང་ལྔ་དང་བདུན་ཡིན་ན། དེ་ཡང་མིང་གི་ཡི་གེ་དང་པོ་དང་། དབུས་དང་མཐའ་མ་རྣམས་བཅུག་སྟེ། གཏོར་མ་རྣམས་སྦྱིན་ནོ། །གལ་ཏེ་དེ་གཉིས་དང་བཞི་དང་། དྲུག་ལ་སོགས་པ་མཉམ་
པའི་མིང་གི་ཡི་གེ་ཡིན་ན། དང་པོ་དང་མཐའ་མ་བཅུག་ལ་སྦྱིན་པར་བྱའོ། །དེ་ནས་སྔོན་དུ་སྤྲོས་པའི་ཁྲོ་བོ་ལ་སོགས་པ་རྣམས་ལ་བལྟས་ལ། །ཇི་ལྟ་བ་བཞིན་སྔགས་ཀྱི་རྐང་པ་རྣམས་བརྗོད་ལ། ཨོཾ་ཨཱཿཧུྃ་ཧོ་ཨུཥྞཱི་ཥ་སུཾ་བྷ་ནི་སུཾ་བྷ་བིགྷྣཱཾ་ཏ་ཀ་ནཱི་ལ་དཎྜ་པྲཛྙཱནྟ་ཀ །ཊཀྐི་རཱ་ཛཱ་པདྨཱནྟ་ཀ །ཨ་ཙ་ལ་ཡ་མཱནྟ་ཀ །
མ་ཧཱ་བ་ལེ་བྷྱཿས་པ་རི་ཝཱ་རེ་བྷྱཿཨི་དཾ་བ་ལིཾ་གནྡྷཾ་པུཥྤཾ་དྷཱུ་པཾ་དཱི་བཾ་ཨཱཀྵ་ཏཾ། ད་དཱ་མ་ཧེ། ཏེ་ཙ་ཨཱ་ག་ཏྱ་ས་པ་རི་ཝཱ་རེཿ། ཤཱི་གྷྲཾ་ཨི་དཾ་བ་ལིཾ་གྲྀཧྞན་ཏུ། ཁཱ་དནྟུཿཔི་ཝནྟུ་ཛཿཧུྃ་བཾ་ཧོཿསཾ་ཏྲྀཔྟཱ་སརྦ་ས་ཏྭཱ་ནཱཾ་ཤཱནྟིཾ་པུཥྚིཾ་རཀྵ་ཨཱ་བ་ར་ཎ་གུཔྟིཾ་ཀུརྦནྟུ་ཧཱུྃ་ཧཱུྃ་ཕཊ་བཛྲ་དྷ་ར་ཨཱཛྙཱ་པ་ཡ་ཏི་སྭཱ་ཧཱ། ཞེས་པ་ནི་ཁྲོ་བོའི་རྒྱལ་
བོ་རྣམས་ཀྱི་གཏོར་མའི་སྔགས་སོ། །དེ་ལྟར་ཨོཾ་ཨཱཿཧུྃ་ཧོ་ཨཱ་ཀཱ་ཤ་བཱ་ཡུ་ཏེ་ཛོད་ཀ་པྲྀ་ཐི་བཱི་སཱ་དྷི་ཏེ་བྷྱཿས་པ་རི་ཝཱ་རེ་བྷྱཿཨི་དཾ་བ་ལིཾ་གནྡྷཾ། པུཥྤ། དྷཱུ་པཾ། དཱི་པཾ། ཨཀྵཏཾ་ད་དཱ་མ་ཧེ། ཏེ་ཙ་ཨཱ་ག་ཏྱ་ས་པ་རི་ཝཱ་རཱ་ཤཱི་གྷྲཾ་ཨི་དཾ་བ་ལིཾ་གྲིཧྞནྟུ། ཁ་དནྟུ་པི་ཝནྟུ་ཛཿཧཱུྃ་བཾ་ཧོཿསཾ་ཏྲྀབྷཱ། སརྦ་ས་ཏྭཱ་ནཱཾ་ཤཱནྟིཾ་པུཥྚཾ་རཀྵ་ཨཱ་

ཝ་ར་ཎ་གུཔྟིཾ་ཀུརྦནྟུ་ཧཱུྃ་ཧཱུྃ་ཕཊ་བཛྲ་དྷཱ་ར་ཨཱཛྙཱ་པ་ཡ་ཏི་སྭཱ་ཧཱ། ཞེས་པ་ནི་ནམ་མཁའ་ལ་སོགས་པ་ཟད་པར་རྣམས་ཀྱི་གཏོར་མའི་སྔགས་སོ། །དེ་ལྟར་ཨོཾ་ཨཱཿཧུྃ་ཧོཿབྲཧྨ་བིཋྞུ་ནཻ་རྀ་ཏྱ་བཱ་ཡུ་ཡམ་ཨགྣེ་ས་མུ་དྲེ་ཤྭ་རེནྡྲ། ཡཀྵེ་བྷྱོཿས་པ་རི་ཝཱ་ར་བྷྱཿཨི་དཾ་བ་ལིཾ་གནྡྷཾ་པུཥྤཾ། བྷཱུ་པཾ། དཱི་པཾ། ཨཀྵ་ཏཾ་ད་དཱ་མ་ཧེ། ཏེ་ཙ་ཨཱ་ག་ཏྱ་ས་པ་
རི་ཝཱ་རཱཿཤཱི་གྷྲཾ་ཨི་དཾ་བ་ལིཾ་གྲྀཧྞནྟུ་ཁཱ་དནྟུ་པི་ཝནྟུ་ཛཿཧུཾ་བཾ་ཧོཿསཾ་ཏྲྀཔྟཱ། སརྦ་སཏྭ་ནཱཾ་ཤཱནྟིཾ་པུཥྚི་རཀྵ་ཨཱ་བ་ར་ཎ་གུཔྟིཾ་ཀུརྦནྟུ་ཧཱུྃ་ཧཱུྃ་ཕཊ་བཛྲ་དྷ་ར་ཨཱཛྙཱ་པ་ཡ་ཏི་སྭཱ་ཧཱ། ཞེས་པ་ནི་ཕྱོགས་སྐྱོང་རྣམས་ཀྱི་གཏོར་མའི་སྔགས་སོ། །དེ་ལྟར་ཨོཾ་ཨཱཿཧུཾ་ཧོཿརཱ་ཧུ་ཀཱ་ལ་ཨགྣེ་ཙནྡྲ་སཱུརྱ་བུདྡྷ་མཾ་ག་ལ་ཤུ་ཀྲ་བྲྀ་ཧ་སྤ་ཏི་ཀེ་ཏུ་ཤ་ནི་
བྷྱཿས་པ་རི་ཝཱ་རེ་བྷྱཿཨི་དཾ་བ་ལིཾ་གནྡྷཾ། པུཥྤཾ། དྷཱུ་པཾ། དཱི་པཾ། ཨཀྵ་ཏཾ། ད་དཱ་མ་ཧེ། ཏེ་ཙ་ཨཱ་ག་ཏྱ་ས་པ་རི་ཝཱ་རཱཿཤཱི་གྷྲཾ། ཨི་དཱཾ་བ་ལིཾ་གྲྀཧྞནྟུ། ཁཱ་དནྟུ། པི་ཝནྟུ། ཛཿཧཱུྃ་བཾ་ཧོཿསཾ་ཏྲིཔྟཱ། སརྦ་ས་ཏྭ་ནཱཾ་ཤཱནྟིཾ་པུཥྟིཾ་རཀྵ་ཨཱ་བ་ར་ཎ་གུཔྟིཾ་ཀུརྦནྟུ་ཧཱུྃ་ཧཱུཾ་ཕཊ། བཛྲ་དྷཱ་ར་ཨཱཛྙཱ་པ་ཡ་ཏི་སྭཱ་ཧཱ། ཞེས་པ་ནི་གཟའ་རྣམས་
ཀྱི་གཏོར་མའི་སྔགས་སོ། །དེ་ལྟར་ཨོཾ་ཨཱཿཧུྃ་ཧོཿཛ་ཡ་བི་ཛ་ཡ་པདྨ་ཀརྐོ་ཊ་ཀ་བཱ་སུ་ཀི་ཤཾ་ཁ་པཱ་ལ་ཀུ་ལི་ཀ་ཨ་ནནྟ་ཏཀྵ་ཀ་མ་ཧཱ་པདྨ་བྷྱཿས་པ་རི་ཝཱ་རེ་བྷྱཿཨི་དཾ་བ་ལིཾ་གནྡྷཾ། པུཥྤཾ། དྷཱུ་པཾ། དཱི་པཾ། ཨཀྵ་ཏཾ། ད་དཱ་མ་ཧེ། ཏེ་ཙ་ཨཱ་ག་ཏྱ་ས་པ་རི་ཝཱ་རཱཿཤཱི་གྷྲཾ། ཨི་དཾ་བ་ལིཾ་གྲྀཧྞནྟུ། ཁཱ་དནྟུ། པི་ཝནྟུ། ཛཿ
ཧཱུྃ་བཾ་ཧོཿསཾ་ཏྲྀ་པྟཱ། སརྦ་ས་ཏྭཱ་ནཱཾ། ཤཱནྟིཾ། པིུཥྚིཾ། རཀྵ་ཨཱ་བ་ར་ཎ་གུཔྟིཾ་ཀུརྦནྟུ་ཧཱུྃ་ཧཱུྃ་ཕཊ། བཛྲ་དྷཱ་ར་ཨཱཛྙཱ་པ་ཡ་ཏི་སྭཱ་ཧཱ། ཞེས་པ་ནི་ཀླུ་རྣམས་ཀྱི་གཏོར་མའི་སྔགས་སོ། །དེ་ལྟར་ཨོཾ་ཨཱཿཧུྃ་ཧོཿབེ་ཏཱ་ཌ་བེ་ཀྲྀ་ཏ་མུ་ཁ་ཤྭ་ཀཱ་ཀཱ་སཱུ་ཀ་ར་གྲྀ་དྷྲ་བྱཱ་གྷྲོ་ལཱུ་ཀ་ཛཾ་བུཀ་ག་རུ་ཌ་མུ་ཁེ་བྷྱཿས་པ་རི་ཝཱ་རེ་བྷྱཿཨི་དཾ་བ་ལིཾ་གནྡྷཾ་པུཥྤཾ་
དྷཱུ་པཾ། དཱཾ་པཾ། ཨཀྵ་ཏཾ། ད་དཱ་མ་ཧེ། དེ་ཙ་ཨ་ག་ཏྱ། ས་པ་རི་ཝཱ་རཱཿཤཱི་གྷྲཾ། ཨི་དཾ་བ་ལི་གྲྀཧྞནྟུ། ཁཱ་དནྟུ། པི་ཝནྟུ། ཛཿཧཱུྃ་བཾ་ཧོཿསཾ་ཏྲྀཔྟཱ། སརྦ་ས་ཏྭ་ནཱཾ། ཤཱནྟིཾ། པུཥྤིཾ། རཀྵ་ཨཱ་བ་ར་ཎ་གུཔྟིཾ་ཀུརྦནྟུ་ཧཱུྃ་ཧཱུྃ་ཕཊ། བཛྲ་དྷ་ར་ཨཱ་ཛྙཱ་པ་ཡ་ཏི་སྭཱ་ཧཱ། ཞེས་པ་ནི། འབྱུང་པོ་རྣམས་ཀྱི་གཏོར་མའི་སྔགས་སོ། །
དེ་ནས་གཤེགས་སུ་གསོལ་བ་ནི། དེ་ཡང་དེ་ཉིད་ལས་གསུངས་པ། གཤེགས་སུ་གསོལ་བའི་དུས་སུ། གསང་བའི་འཁོར་ལོ་ཧཾ་ཡིག་ལས། ཁྲོ་བོའི་འཁོར་ལོར་གཞུག་པར་བྱའོ། །གཙུག་ཏོར་དུ་ཨཾ་ཡིག་ལས་ཟད་པར་སྟོང་པ་ལ་སོགས་པའོ། །དཔྲལ་བར་ཨི་ཡིག་ལས། ཕྱོགས་སྐྱོང་གི་འཁོར་

ལོའོ། །མགྲིན་པར་རྀ་ཡིག་ལས་གཟའི་འཁོར་ལོའོ། །སྙིང་གར་ཨུ་ཡིག་ལས་ཀླུའི་འཁོར་ལོའོ། །ལྟེ་བར་ལྀ་ཡིག་ལས་འབྱུང་པོའི་འཁོར་ལོ་རབ་ཏུ་གཞུག་པ་ཞེས་བྱ་བ་ནི། གཤེགས་སུ་གསོལ་བའི་ཆོ་གའོ། །མགོན་པོ་བྱིས་པ་བློ་དམན་རྣམས་ཀྱིས་དྲན་ཕྱིར། །དཔལ་
ལྡན་འཇིག་རྟེན་མགོན་པོ་ཉིད་ཀྱི་སྒྲུབ་ཐབས། །ལས་ནི་ཕྱུང་བས་དེ་ཡི་ཕྱིར་ན་ཡབ་དང་། །མཚུངས་པར་གང་ཞིག་མི་གཅིག་ཕལ་བཟོད་པ་ལྟར་དུ། །བདག་ལ་རབ་ཏུ་བརྩེ་བས་ཐུགས་རྗེས་བརླན་པ་བཟོད་པར་མཛོད་ཅིག །དེ་ལྟར་དཔལ་དང་ལྡན་པའི་འཇིག་རྟེན་དབང་ཕྱུག་གི་སྤྲུལ་པ། པདྨ་དཀར་
པོས་ཡང་དག་པར་མཛད་པའི་དྲི་མ་མེད་པའི་འོད་ལས་ཕྱུང་བ། བཅོམ་ལྡན་འདས་དཔལ་དུས་ཀྱི་འཁོར་ལོའི་སྒྲུབ་ཐབས་ཀྱི་ཆོ་གའི་རིམ་པར་ཕྱེ་བ་རྫོགས་སོ།། །།དུས་ཀྱི་འཁོར་ལོ་པ་ཆེན་པོ། པཎྜི་ཏ་སཱ་དྷུ་པུ་ཏྲས་པཎྜི་ཏ་ཆེན་པོ་དྷརྨ་ཨཱ་ཀར་ཤཱནྟིའི་དོན་དུ་མཛད་པ། རྒྱ་གར་གྱི་པཎྜི་ཏ་ཆེན་པོ་ཝཱ་
གཱི་ཤྭ་ར་གུཔྟ་པ་དང་། སྒྲ་བསྒྱུར་གྱི་ལོ་ཙཱ་བ་དགེ་སློང་ཆོས་རབ་བདག་གིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། ༄༅༅། །རྒྱ་གར་སྐད་དུ། ཤྲཱི་ཀཱ་ལ་ཙཀྲ་མཎྜ་ལོ་པ་ཡི་ཀཱ་བི་དྷིཿ། བོད་སྐད་དུ། དཔལ་དུས་ཀྱི་འཁོར་ལོའི་དཀྱིལ་འཁོར་གྱི་ཆོ་ག་ཞེས་བྱ་བ། དཔལ་
དུས་ཀྱི་འཁོར་ལོ་ལ་ཕྱག་འཚལ་ལོ། །དངོས་དང་དངོས་མེད་རྣམ་པར་མཁྱེན་པས་འཁོར་བའི་འཇིགས་པ་རབ་ཏུ་འཇོམས་པར་མཛད་པ་ཡི། །ཐབས་དང་ཤེས་རབ་རང་བཞིན་ཁྱབ་བདག་དཔལ་ལྡན་དུས་འཁོར་ངེས་པར་གཞན་གྱི་དོན་མཛད་ལ། །ཕྱག་བྱས་སེམས་ཅན་དོན་ཕྱིར་རྒྱུད་གསུངས་ཆོ་ག་བཞིན་དུ་
དེ་ཡི་དཀྱིལ་འཁོར་ཆོ་ག་ཉིད། །རང་གི་དོན་དང་འོན་ཀྱང་གཞན་དོན་དུ་ཡང་འགྱུར་བས་ཡིད་ལ་འདོད་པ་སྒྲུབ་བྱེད་བཤད། །འདིར་ཐོག་མ་མེད་པའི་མ་རིག་པའི་མུན་པའི་ཚོགས་ཀྱིས་བློའི་མིག་བསྒྲིབས་པས་མི་བདེན་པའི་ལམ་ནས་འགྲོ་བའི་སེམས་ཅན་གྱི་ཚོགས་སྡུག་བསྔལ་སྤྱོད་པ་བསལ་བར་ནུས་པར་ཡང་དག་
པར་མཐོང་བས། སྙིང་རྗེ་མཆོག་དང་ལྡན་པ་མངོན་པར་ཤེས་པ་ཐོབ་པའི་དགེ་སློང་ངམ། དགེ་ཚུལ་ལམ་ཁྱིམ་ན་གནས་པ་རྣམས་སྙིང་རྗེ་དང་ལྡན་པ་ལ་སོགས་པ་མངོན་པར་ཤེས་པ་མེད་པའི་རྡོ་རྗེ་སློབ་དཔོན་དང་པོར་བསྙེན་གནས་ཀྱི་བསླབ་པ་གནས་པ་ལ་སོགས་པས་དཀྱིལ་འཁོར་དུ་དབང་བསྐུར་བ་ལ་སོགས་པའི་

མྱ་ངན་ལས་འདས་པའི་གྲོང་ཁྱེར་དུ་འཇུག་པའི་ལམ་གྱིས་དེ་རྣམས་ཀྱི་སྤོབས་པའི་རིམ་པ་ཇི་ལྟ་བ་བཞིན་དུ་རྗེས་སུ་གཟུང་བ་ནི། དེ་ཡང་སློབ་མ་དམ་པ་རྣམས་ཀྱིས་གསོལ་བ་གདབ་པ་དང་། དགེ་བའི་ཉི་མ་ལ་སོགས་པ་ལ་གཏོར་མ་དང་། མཆོད་པ་ལ་སོགས་པ་སྔོན་དུ་སོང་བས། དཀྱིལ་འཁོར་གྱི་ས་གཞི་ཡོངས་སུ་
བརྟག་པར་བྱ་སྟེ། དེ་ཡང་གྲོང་ཁྱེར་ལ་སོགས་པའི་དབང་ལྡན་དང་། བྱང་ཕྱོགས་སུ་ཞི་བ་དང་རྒྱས་པའོ། །ཤར་དང་མེའི་མཚམས་སུ་དབྱེ་བ་དང་བསྐྲད་པའོ། །བདེན་བྲལ་དང་ལྷོ་ཕྱོགས་སུ་དབང་དང་དགུག་པའོ། །ནུབ་དང་རླུང་དུ་རེངས་པ་དང་རྨོངས་པའོ། །གྲོང་ཁྱེར་ལ་སོགས་པའི་དབུས་སུ་ལས་
ཐམས་ཅད་པའི་དཀྱིལ་འཁོར་བྲི་བ་སྟེ། དེ་ཡང་དབུས་ཅུང་ཟད་མཐོ་བ་ལ་ཤར་དང་བྱང་ཅུང་ཟད་གཞོལ་བའི་ས་གཞི་རུ་གཟུང་བར་བྱ་བ་ནི་དེ་ཡང་དབྱེ་བ་ལ་བཞི་སྟེ། བྲམ་ཟེ་དང་། རྒྱལ་རིགས་དང་། རྗེའུ་རིགས་དང་། དམངས་རིགས་རྣམས་ཀྱི་དབྱེ་བས་ཁ་དོག་དང་དྲི་དང་རོ་རྣམས་ཀྱིས་ཤེས་པར་བྱའོ། །ཞི་བ་དང་
རྒྱས་པ་ལ་དཀར་པོའོ། །དབང་དང་དགུག་པ་ལ་དམར་པོའོ། །རེངས་པ་དང་རྨོངས་པ་ལ་སེར་པོའོ། །གསད་པ་དང་བསྐྲད་པ་ལ་ནག་པོའོ། །རོ་ཐམས་ཅད་དང་། དྲི་ཐམས་ཅད་དང་། ནམ་མཁའི་ཁམས་རྣམ་པར་དག་པ་ལས་ཐམས་ཅད་པ་ལ་ལྗང་གུའོ། །དེར་ནི་དོང་བྲུས་དེ་ཉིད་ཀྱིས། །མྱུར་བར་དོང་ཉིད་
རབ་ཏུ་དགང་། །གལ་ཏེ་གང་བར་གྱུར་པ་ན། །ས་གཞི་དེ་ཉིད་དགེ་བར་ཤེས། །སླར་ཡང་དོང་དེ་མཐོ་གང་ཙམ། །བྲུ་བར་བྱས་ཏེ་ཆུས་བཀང་ལ། །གོམ་པ་བརྒྱ་རུ་འགྲོ་བར་བྱ། །འོངས་ནས་བལྟ་བར་བྱས་པ་དང་། །གང་བར་གྱུར་ན་ས་གཞི་དགེ །དམའ་ན་དགེ་བར་མི་འདོད་སྤང་། །ཆུ་ཉིད་སྒྲ་དང་
བཅས་ཙམ་གྱིས། །ཀླུ་ཡི་འཇིགས་སོགས་གོ་བར་བྱ། །ཞེས་པ་ནི་ས་གཞི་བརྟགས་པའོ། །དེ་ལྟར་སློབ་དཔོན་གྱིས་སའི་མཚན་ཉིད་ཤེས་པར་བྱ་ལ། །དཔྱིད་ཟླ་འབྲིང་པོ་དང་དཔྱིད་ཟླ་ཐ་ཆུངས་སམ། ཟླ་བ་གཞན་རྣམས་ཀྱི་ཚེས་ལྔའམ་བཅུ་ལ། གདུག་པའི་གཟའ་ལ་འཇུག་ཕོད་ལ་སོགས་པ་དང་
བྲལ་བའི་དུས་ཀྱི་སྔ་དྲོ་ལ། ཁྲུ་བཞི་ཙམ་བ་ལང་གི་ལྕི་བས་བྱུགས་ཏེ། །དཀྱིལ་འཁོར་དུ་བརྟགས་པའི་ས་གཞིའི་ཆའི་དབུས་སུ་ཤར་ལ་ཁ་ཕྱོགས་ཏེ་བསྡད་ལ་ལྷའི་རྣལ་འབྱོར་ལ་གནས་ཏེ། དེ་ན་གནས་པའི་ཞིང་སྐྱོང་རྣམས་ལ་མེ་ཏོག་ལ་སོགས་པས་མཆོད་ནས། འདི་ན་གནས་པའི་ལྷ་ཀླུ་དང་། །གནོད་སྦྱིན་

སྲིན་པོའམ་ནི་གཞན། །དེ་ཉིད་རྣམས་ལ་ས་གཞི་སློང་། །དཀྱིལ་འཁོར་དོན་དུ་དེ་སྩོལ་ཅིག །ཅེས་ལན་གསུམ་དུ་བརྗོད་ནས་གསུང་བར་འགྱུར་བའི་ཆོ་གས་དག་པ་ལ་སོགས་པ་བྱས་ལ། གྲོང་གི་མིང་ངམ། རང་རང་གི་མིང་དང་སྔགས་འདིས་གཏོར་མ་སྦྱིན་ནོ། །ཨོཾ་ཨཱཿཧཱུཾ་
ཨ་མུ་ཀ་སྱ་ས་པ་རི་ཝཱ་རཱ་ཡ། ཨི་དཾ་བ་ལིཾ་གནྡྷཾ། པུཥྤཾ། དྷཱུ་པཾ། དཱི་པཾ། ཨཀྵ་ཏཾ་ད་ངཱ་མ་ཧེ་ས་པ་རི་ཝཱ་རཱཿཤཱི་གྷྲཾ་ཨཱ་གཙྪ་ཏུ། ཛཿཧཱུྃ་བཾ་ཧོཿཨི་དཾ་བ་ལི་གྲྀཧྣ་ཏུ་ཁཱ་དཾ་ཏུ་པི་ཝ་ཏུ་ས་པ་རི་ཝཱ་རཱ་ཀཿསརྦ་ས་ཏྭཱ་ནཱཾ་ཤཱནྟི་པུཥྚི་རཀྵ་ཨ་ཝ་ར་ཎ་གུཔྟིཾ་ཀ་རོ་ཏུ་ཨི་དཾ་སྠཱ་ནཾ་ཏྱཀ་ཏྭ་བཱ་ཧྱེ་མཎྜ་ལ་བྷཱུ་མྱཱཾ་ཏིཥྛ་ཏུ་ཧཱུྃ་ཧཱུྃ་ཕཊ་བཛྲ་དྷཱ་ར་ཨཱཛྙཱ་པ་ཡ་ཏི་
སྭཱ་ཧཱ། ཞེས་པ་ཞིང་སྐྱོང་གཤེགས་པའི་ཆོ་གའོ། །དེ་ནས་སྒྲུབ་ཐབས་སུ་གསུངས་པའི་ཆོ་གས་སྲུང་བའི་འཁོར་ལོ་བསྒོམས་ཏེ། བགེགས་བསྲེག་པ་དང་བསྐྲད་པ་དང་གདབ་པ་རྣམས་བྱས་པ་དང་། ཁྲོ་བོའི་ཚོགས་སྤྲོས་ལ་ཕྱོགས་བཅུ་བསྲུངས་ནས་སའི་ལྷ་མོ་སྤྱན་དྲང་བར་བྱ་སྟེ། དེའི་རིམ་པ་ནི་རང་གི་སྙིང་
གར་ཟླ་བ་དང་ས་གཞི་ལ་ཡང་པདྨའི་སྟེང་དུ་ཟླ་བ་ལ་ལཱཾ་ཡིག་ཡོངས་སུ་གྱུར་པ་ལས་འཁོར་ལོ་སེར་པོའོ། །དེ་ཡོངས་སུ་གྱུར་པ་ལས་སའི་ལྷ་མོ་ཞལ་གསུམ་ཕྱག་དྲུག་མ་གཡས་ན་འཁོར་ལོ་དང་དབྱུག་པ་དང་། རྡོ་རྗེ་རྣམས་འཛིན་པ། གཡོན་ན་དུང་དང་། ལྕགས་སྒྲོག་དང་། དྲིལ་བུ་རྣམས་འཛིན་པ། ན་བཟའ་
སེར་པོ་དང་། རིན་པོ་ཆེས་བརྒྱན་པར་བསམས་ལ། ཐུགས་ཀའི་ས་བོན་གྱི་འོད་ཟེར་གྱིས་སྔོན་དུ་གསུངས་པའི་གཟུགས་ལྟར། ཛཿཧཱུྃ་བཾ་ཧོཿཞེས་པའི་སྔགས་ཀྱིས་སྤྱན་དྲངས་ཏེ། དམ་ཚིག་སེམས་དཔའ་དང་ཡེ་ཤེས་སེམས་དཔའ་གཅིག་ཏུ་བྱས་ནས་ཡོན་ཆབ་སྣོད་ཆུ་དང་མེ་ཏོག་དང་། དྲི་ལ་སོགས་
པ་དང་བཅས་པའི་ཡོན་ཆབ་དབུལ་བའི་ཚིགས་སུ་བཅད་པ་འདི་ལྟ་སྟེ། ལྷ་ཡི་བདག་པོ་དང་བཅས་བདུད་སྡེ་རྒྱལ་བས་བཅོམ་དུས་ལྷ་མོ་ཁྱོད་ནི་དཔང་དུ་གྱུར་པའི་ཚེ། །ཁྱེད་ལ་ལྷ་མོ་མཆོག་གི་མཆོད་དང་ཕྱག་བྱས་བཞེས་པའི་ཕྱིར་ནི་དེ་བཞིན་ང་ཡི་ཡོན་ཆབ་འདི་ཡང་བཞེས། །ཞེས་པས་བསྟོད་ལ།
བྱང་ཆུབ་རྒྱུ་རུ་སྟོབས་མཆོག་ལྡན་པའི་བདུད་ཀྱི་སྡེ་རྣམས་རྒྱལ་བས་བཅོམ་པ་ཇི་ལྟ་བ་བཞིན་དུ། །དེ་བཞིན་བདག་ཀྱང་སློབ་མ་རྣམས་ཀྱི་དབང་གི་དོན་དུ་བདུད་ཀྱི་སྟོབས་རྣམས་འཇིག་པར་བྱེད་པའོ། །ཞེས་པས་གསོལ་བ་བཏབ་ལ་སྔགས་འདིས་མཆོད་དོ། །ཨོཾ་ལཱཾ་ཨཱཿཧཱུྃ་བ་སུདྡྷ་རི་སརྦ་བུདྡྷ་ཛྙཱན་ནི་སརྦ་

ས་ཏྭོ་པ་ཀཱ་རི་ཎི་བཛྲ་སཏྭ་ཨཱ་ཛྙཱ་པ་ཡ་ཏི་ཤཱི་གྷྲཾ་ཨཱ་གཙྪ་ཨཱ་གཙྪ་ཨི་དཾ་གནྡྷཾ། པུཥྤཾ། བྷཱུ་པཾ། དཱི་པཾ། ནཻ་བེ་དྱཾ་ཕ་ལ་ཨཀྵ་ཏཾ། ད་དཱ་མི་ཏཱ་ཝ་ཏྭ་མེ་ཝ་གྲྀཧྞ་གྲྀཧྞ་མཎྜ་ལ་ཨར་ཐཾ་མ་མ་སྠཱ་ནཱཾ་ད་དཱ་སརྦ་ས་ཏྭ་ནཱཾ། ཤཱནྟི་པུཥྚི་ཀྲྀ་ཏྭ་སུ་བྷ་ཙིཏྟེ་ན་ཨི་དཾ་སྠཱ་ནཱཾ་ཏྱ་ཀ་ཏྭཱ་ཨ་པ་ར་སྠཱ་ནཱ་གཙྪ་གཙྪ་སྭཱ་ཧཱ། ཞེས་པ་ནི་སའི་ལྷ་མོ་གཤེགས་སུ་
གསོལ་བའི་ཆོ་གའོ། །དེ་ནས་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཕྱོགས་བཅུ་ནམ་མཁའི་ཁམས་ཁྱབ་པར་བལྟས་ལ་ཡོན་ཆབ་ལ་སོགས་པ་བྱིན་ནས་མེ་ཏོག་ལ་སོགས་པས་མཆོད་ལ། དེ་རྣམས་ལ་རབ་ཏུ་གསོལ་བ་གདབ་པ་འདི་ལྟ་སྟེ། སངས་རྒྱས་རྣམས་དང་སྡིག་པ་བྲལ་བའི་བྱང་ཆུབ་
སེམས་དཔའ་ཕྱོགས་རྣམས་ལ་བཞུགས་གང་དག་བཙུན་མོར་བཅས། །སྙིང་རྗེ་མཆོག་ལྡན་དེ་ཉིད་རྣམས་ཀྱིས་བདག་ལ་དཀྱིལ་འཁོར་དུ་ནི་དབང་བསྐུར་དོན་དུ་བསྐྱབ་ཏུ་གསོལ། །ཞེས་པས་སོ། །དེ་ནས་བགེགས་དང་ལོག་པར་འདྲེན་པ་ལ་སོགས་པ་གཞན་རྣམས་རྡོ་རྗེ་ལྕགས་ཀྱུས་དགུག་པར་བྱའོ། །རྡོ་རྗེ་
ཞགས་པས་བཅིང་བར་བྱའོ། །རྡོ་རྗེ་ཕུར་བུ་ཁྲོ་བོའི་རྒྱལ་པོའི་ལྟེ་བ་མན་ཆད་མདུང་གི་རྣམ་པ་ཅན་དུ་སྡང་བ་རྣམས་ཀྱི་སྟེང་ནས་འདེབས་པར་བསམས་པའི་སྔགས་ཀྱི་རྐང་པ་འདི་ལྟ་སྟེ། ཨོཾ་ཨཱཿཧུྃ་ཧོ་ཧཾ་ཀྵཿཧཱུྃ་ཧཱུྃ་ཧཱུྃ་ཕཊ་ཕཊ་ཕཊ། བཛྲ་ཀཱི་ལ་ཀཱ་ཡ་བཱཀ་ཙིཏྟ་ཛྙཱ་ན་ཨ་དྷི་པ་ཏེ་ཥ་ཊ་མུ་ཁ་ཥ་ཊ་བྷུ་ཛ་ཥ་ཊ་སརྦ་ཙ་ར་ཎ་སརྦ་
བིགྷྣཱཾ་བི་ནཱ་ཡཱ་ཀཱ་དི་དུཥྚཱ་ནཱཾ། ཀཱ་ཡ་བཱཀ་ཙིཏྟ་ཛྙཱ་ནཱ་ཀཱི་ལ་ཡ་ཀཱི་ལ་ཡ་ཧཱུྃ་ཧཱུྃ་ཕཊ་ཕཊ། དེ་ནས་རྡོ་རྗེ་ཐོ་བའི་སྔགས་ནི། ཨོཾ་ལླཱི་བཛྲ་མུངྒ་ར་མཱ་རཱ་དཱི་ནཱཾ་ཤི་ར་སི་ཀཎྛེ་ཧྲྀ་ད་ཡེ་ན་བྷྱོ་གུ་ཧྱ་ཨན་ཏེ་བཛྲ་ཀཱི་ལ་ཀན་ཨཱ་ཀོ་ཊ་ཡ་ཨཱ་ཀོ་ཊ་ཡ་ཀྵཾ་ཀྵཱཾ་ཀྵིཾ་ཀྵཱིཾ་ཀྵྼིཾ་གྵྼཱྀཾ་ཀྵུཾ་ཀྵཱུཾ་གྵླྀཾ་གྵླཱྀཾ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ། ཅེས་བརྗོད་ཅིང་ཙནྡན་དམར་པོས་
བྱུགས་ལ་ཁ་དོག་ལྔའི་སྐུད་པས་དཀྲི། སྟེང་གི་ཕྱོགས་སུ་མེ་ཏོག་དང་གྲུབ་པའི་ཡུངས་ཀར་གྱིས་བཅིངས་ལ། །སེང་ལྡེང་ལས་བྱུང་བའི་ཕུར་པ་ཆུར་སོར་བཅུ་གཉིས་པ་སྦོམས་སུ་སོར་བཞི་པས་ས་གཞིའི་ཕྱོགས་བཅུ་རུ་གདབ་པར་བྱའོ། །དེ་རྣམས་ལ་ཁྲོ་བོ་རང་རང་གི་མཚོན་ཆ་དང་བཅས་པ་བཅུ་སྤྲོས་ལ་དགོད་
དོ། །འདི་ནི་ས་གཞི་ཕུར་བུས་བསྲུང་བའི་དོན་དུ་བགེགས་རྣམས་ལ་ཕུར་བུས་གདབ་པའི་ཆོ་གའོ། །དེ་ནས་དེ་ལྟར་བགེགས་མེད་པར་བསམས་ལ་ལྟོ་འཕྱེ་བ་བརྟག་པར་བྱ་སྟེ། དཀྱིལ་འཁོར་གང་དུ་བྱེད་པའི་ས་གཞི་དེར་ས་སྟེགས་གྲུ་བཞི་པ་བྱས་ལ། ས་གཞི་དེ་ཉིད་ཀྱི་དབུས་སུ་ལྟོ་འཕྱེ་ཉལ་བ་ལ་

སོགས་པའི་མཚན་ཉིད་ཤེས་པར་བྱས་ལ་ས་གཞི་དག་པར་བྱའོ། །དེ་ཡང་ཉི་མ་བགྲོད་པའི་དབྱེ་བས་སྟོན་ཟླ་ར་བ་ལ་སོགས་པ་ཟླ་བ་གསུམ་གསུམ་རིམ་པ་ཇི་ལྟ་བ་བཞིན་དུ། ཤར་དང་། ལྷོ་དང་ནུབ་དང་། བྱང་གི་ཕྱོགས་རྣམས་སུ་མགོ་བསྟན་ནས་ལྷོ་ལ་སོགས་པར་ཁ་བལྟས་པ་སྟེ་ས་གཞི་
དེའི་དབུས་སུ་ལྟོ་འཕྱེ་ཉལ་ཞེས་བཤད་པས་སོ། །དེ་ལྟར་ཤེས་པར་བྱས་ལ། བྱང་ཕྱོགས་ཀྱི་སྒྲུབ་པ་པོ་དང་ཐབས་ཅིག་ཏུ་རྡོ་རྗེ་ཁུ་ཚུར་གྱིས་སྐུད་པ་བཟུང་སྟེ། མེ་དང་རླུང་དུ་གནས་ནས་ཤར་དང་ལྷོ་དང་། བྱང་དང་། ནུབ་ཀྱི་ཕྱོགས་དག་ཏུ་གཡས་སྐོར་གྱིས་འགྲོ་ཞིང་ཐིག་བརྐྱང་ངོ་། །ཡང་དེ་ལྟར་བསྐོར་ཞིང་ས་
བརྐོ་བར་བྱའོ། །ལྟོ་འཕྱེའི་ལྟེ་བའི་ཕྱོགས་ནས་ཏེ་ལྟོ་བ་ལས་ཁྲུ་གང་སྤངས་པའམ་ལྟེ་བའི་ཐད་སོ་སྤངས་པའོ། །ས་གཞི་དེ་ཉིད་ལ་རྡོ་བ་གནས་ན་རླུང་གིས་འཇིག་པར་འགྱུར་རོ། །རུས་པས་ནི་གཟེར་བར་འགྱུར་རོ། །གྱོ་མོ་དག་གིས་ནི་ལྐུག་པར་འགྱུར་རོ། །སྦུན་པ་དང་སོལ་བ་དག་གིས་ནི་རིམས་སམ་
འཆི་བར་འགྱུར་རོ། །སྐྲ་དང་རྩྭ་དང་ཐལ་བ་དང་ཤིང་བུ་ལ་སོགས་པ་རྣམས་ཀྱིས་ནི་བར་ཆོད་ཕྲ་མོར་འགྱུར་རོ། །རྒྱུ་མཚན་དེས་ན་དེ་རྣམས་དོར་བར་བྱའོ། །གལ་ཏེ་དེ་ནས་རིན་པོ་ཆེའམ་དུང་ངམ་འཆིང་བུ་རྣམས་བྱུང་ན་ཤིན་ཏུ་དགེ་བར་འགྱུར་རོ། །སྔོན་དུ་གསུངས་པའི་མཚན་ཉིད་དང་ལྡན་པའི་ས་གཞི་མ་རྙེད་ན་
ཆུ་འམ་རྡོ་མཐོང་བའི་བར་དུ་བརྐོས་ལས་དེ་རྣམས་དོར་ཏེ། ས་གཞན་གྱིས་དགང་བ་ནི་དྲི་དང་རོའི་དོན་དུ་ལས་ཀྱི་བྱེ་བྲག་གིས་སའི་བྱེ་བྲག་སྟེ། ས་དཀར་པོ་ལ་ཙནྡན་གྱི་ཆུ་དང་བསྐ་བ་དང་ཁ་བ་དག་གིས་བསྲེས་པས་དགང་ངོ་། །དམར་པོ་ལ་པདྨའི་ཆུ་དང་ཚ་བ་གསུམ་གྱིས་སོ། །སེར་པོ་ལ་བོང་བུ་དང་རྟ་དང་མི་
རྣམས་ཀྱི་གཅིན་དང་བུ་རམ་གྱིས་སོ། །ནག་པོ་ལ་ཤ་རུལ་དང་ལན་ཚྭ་དང་སྐྱུར་བ་རྣམས་ཀྱིས་སོ། །དེ་ནས་དཀར་པོར་ཞི་བ་ལ་ས་གཞིའི་སྙིང་པོར་ཤེལ་གཞུག་པར་བྱའོ། །རྒྱས་པ་ལ་དུང་ངོ་། །རིམས་གཞོམ་པ་ལ་མུ་ཏིག་གོ། །དམར་པོ་ལ་དབང་དུ་བྱ་བ་ལ་གོ་རོ་ཙ་ནའོ། །དགུག་པ་ལ་མཚལ་ལོ། །དུག་རེངས་པ་ལ་
ལྡོང་རོས་སོ། །སེར་པོ་ཕུར་བུས་གདབ་པ་ལ་ལུག་གི་རྭའོ། །རེངས་པ་ལ་བ་བླའོ། །རྨོངས་པ་ལ་སྦྲུལ་ལོ། །ནག་པོར་གསད་པ་ལ་མིའི་རུས་པའོ། །བསྐྲད་པ་ལ་བྱ་རོག་གི་སྒྲོའོ། །ལྗང་གུར་ནི་རིན་པོ་ཆེ་ལྔ་རྣམས་གཞུག་པའོ། །དེ་ནས་དཔངས་ལ་ཁྲུ་ཕྱེད་དང་དོ་པ་ཀུན་དུ་མཉམ་པ་ཅུང་ཟད་རུས་སྦལ་གྱི་རྒྱབ་འདྲ་

བ་ཤར་དང་བྱང་གཞོལ་བའི་དཀྱིལ་འཁོར་གྱི་ས་གཞི་བཅའོ། །གཞན་ཡང་བརྗོད་པ། རོ་ཡི་སྐྱོན་རྣམས་མ་ལུས་པ། །དབྱུང་བར་ནུས་པར་མ་གྱུར་ན། །ལག་པས་མནན་ལ་སྔགས་ཉིད་བཟླས། །དེ་ཉིད་དག་པ་ཆེན་པོར་བཤད། །ཁང་བཟངས་རྡོ་སྟེང་འབྲོག་དང་ལམ། །ལྷ་ཁང་ལ་སོགས་ཆུ་འགྲམ་དང་། །
སྔོན་དུ་དག་པར་བྱས་པ་རྣམས། །མ་སྦྱངས་པ་ནས་དག་པ་ཡིན། །ཞེས་གསུངས་པས་འོན་ཀྱང་རྡོ་རྗེ་ཤུགས་ཀྱི་རྣལ་འབྱོར་གྱིས་འདིར་བགེགས་བསྐྲད་པ་ནི། ཡི་གེ་བདུན་པ་བཟླས་པའི་ཡུངས་ཀར་དང་ཆུ་དང་ཐལ་བ་རྣམས་ཀྱིས་བསྣུན་པ་དང་། ཤར་ནས་བརྩམས་ནས་རྣམ་ལྔས་ས་གཞི་ལ་བྱུགས་ཏེ་བཅལ་
ལ་ཡང་སྦྱང་བ་འདི་ལྟ་སྟེ། ཨོཾ་བྷུཿཁཾ་ཞེས་བརྗོད་ལ་ནམ་མཁར་བྱའོ། །དེ་ནས་ཧཱུཾ་ལཱཾ་ཧཱུཾ་ཞེས་པས་རྡོ་རྗེའི་ས་གཞིར་བསམས་ལ། ཨོཾ་མེ་དི་ནཱི་བཛྲཱ་བྷ་བ་བཛྲ་བནྡྷ་ཧཱུཾ། ཨོཾ་ཧ་ན་ཧ་ན་བཛྲ་ཀྲོ་དྷ་ཧཱུྃ་ཕཊ། ཨོཾ་ཨཱཿཧཱུྃ་ཤོ་དྷ་ཡ་ཤོ་དྷ་ཡ་རཀྵ་རཀྵ་ཧཱུྃ་ཧཱུྃ་ཕཊ། ཅེས་པའི་སྔགས་བརྗོད་ཅིང་། ཐལ་མོ་ས་ལ་བཞག་ལ་བྱིན་
གྱིས་བརླབས་སོ། །དེ་ནས་སྔོན་དུ་གནས་གཞན་དུ་གཤེགས་པའི་སའི་ལྷ་མོ་ཡིད་ཀྱིས་སྤྱན་དྲངས་ལ་གཏོར་མ་དང་ཞབས་བསིལ་ལ་སོགས་པས་མཆོད་ནས། ཨོཾ་ཨཱཿཧཱུྃ་ཧོ་ཧཾ་ཀྵཿཞེས་པ་བརྗོད་ལ་པདྨའི་ལག་སྐོར་བྱས་པ་དང་། དེ་ཉིད་དུ་ཐིམ་པར་བསམ་མོ། །དེ་ནས་རྐང་པ་བཅུ་དྲུག་པའི་སྔགས་བརྗོད་པ་དང་ཁམས་
གསུམ་པོ་སྟོང་པར་རོ་གཅིག་པར་བརྟན་པར་ངེས་པ་ས་གཞི་རྣམ་པར་དག་པའི་རང་བཞིན་དེ་ཉིད་དུ་ལྷག་པར་མོས་པར་བྱ་བ་འདི་ནི་གང་ན་མེད་པའི་རྣམ་པར་དག་པའོ། །དེ་ནས་མེ་ཏོག་གི་ཕྲེང་བ་སྣ་ཚོགས་པ་དྲིལ་བུ་དང་བཅས་པ་དང་། ན་བཟའ་སྣ་ཚོགས་དང་བླ་རེ་རྣམས་ཀྱིས་དཀྱིལ་འཁོར་གྱི་ས་གཞི་ཐམས་ཅད་
ལེགས་པར་བརྒྱན་པར་བྱའོ། །འདི་ནི་ས་སྦྱང་བའི་བྱེ་བྲག་གསུམ་གྱི་ཆོ་གའོ། །དེ་ནས་མེ་ཏོག་གིས་སྤྲས་པའི་དཀྱིལ་འཁོར་གྱི་ས་གཞིའི་དབུས་སུ་བསྡད་ལ་རྡོ་རྗེ་དང་། རྡོ་རྗེ་དྲིལ་བུ་བཟུང་ནས་བྲི་བྱའི་དཀྱིལ་འཁོར་གྱི་རྣལ་འབྱོར་དང་ལྡན་པས་སྲུང་བའི་འཁོར་ལོ་ལ་སོགས་པས་བགེགས་རྣམས་བརླག་པར་བྱ་
བ་ནི། སྤོས་སྣོད་བཟུང་སྟེ། ལྕེ་ཧཱུྃ་ལས་རྡོ་རྗེར་བསྐྱེད་ནས་བརྗོད་པ། ཕྱོགས་རྣམས་ཀུན་ན་བཞུགས་པ་ཡི། །སངས་རྒྱས་བདག་ལ་དགོངས་སུ་གསོལ། །འདིར་ནི་ཆེ་གེ་རྡོ་རྗེ་བདག །དཀྱིལ་འཁོར་འདྲི་བར་འདོད་པ་ཡི། །སངས་རྒྱས་ལ་སོགས་བྱོན་པར་ཞུ། །འདི་ནི་དངོས་གྲུབ་རབ་ཏུ་སྩོལ། །ཞེས་

རྫོགས་པའི་སངས་རྒྱས་ལ་སོགས་པ་ལ་གསོལ་བ་བཏབ་པ་དང་། ཤར་ལ་སོགས་པའི་ཕྱོགས་བཞི་ན་གནས་པའི་སློབ་མ་བཞིའམ་གསུམ་ལ་སོགས་པའམ། སློབ་དཔོན་ཉིད་ཀྱིས་རྡོ་རྗེ་དྲིལ་བུ་བཟུང་ལ། དོན་ཡོད་གྲུབ་པ་ལ་སོགས་པའི་རྣལ་འབྱོར་རིམ་པ་བཞིན་དུ་དེ་དང་དེ་རུ་འགྲོ་ཞིང་།
སེམས་དཔའ་ཀུན་ལས་སེམས་ཆེན་པོ། །རང་བཞིན་དག་པས་དྲི་མ་མེད། །ཀུན་དུ་བཟང་པོ་ཐུགས་ཀྱི་མཆོག །དཀྱིལ་འཁོར་དམ་པ་བཤད་དུ་གསོལ། །དེ་བཞིན་གཤེགས་ཀུན་རང་བཞིན་བྲལ། །དེ་བཞིན་གཤེགས་པ་ཀུན་གྱི་གནས། །ཆོས་ཀུན་བདག་མེད་པ་ཡི་མཆོག །དཀྱིལ་འཁོར་
དམ་པ་བཤད་དུ་གསོལ། །ཆོས་རྣམས་ཞི་བ་ལས་བྱུང་མཆོག །རྣམ་པར་དག་པའི་ཡེ་ཤེས་སྤྱོད། །ཀུན་དུ་བཟང་པོ་གསུང་གི་མཆོག །དཀྱིལ་འཁོར་དམ་པ་བཤད་དུ་གསོལ། །མཚན་ཉིད་ཐམས་ཅད་ཡོངས་སུ་རྫོགས། །མཚན་ཉིད་བྲལ་བ་རྣམ་པར་སྤངས། །ཀུན་དུ་བཟང་པོ་སྐུ་ཡི་མཆོག །
དཀྱིལ་འཁོར་དམ་པ་བཤད་དུ་གསོལ། །ཞེས་པའི་ཚིགས་སུ་བཅད་པ་བཞིའི་རིམ་པ་བཞིན་བདག་ཉིད་ཀྱིས་གསོལ་བ་འདེབས་སུ་གཞུག་པ་ལ་སོགས་པ་བྱའོ། །དེ་ནས་དཀྱིལ་འཁོར་གྱི་འཁོར་ལོ་སྤྲོ་བ་ལ་སོགས་པ་སྔོན་དུ་སོང་བས་བསྒོམས་པའི་དཀྱིལ་འཁོར་རྡོ་རྗེ་ཁུ་ཚུར་གཉིས་བཅིངས་ཏེ་མཛུབ་མོ་
སྒྲེང་བ་རྩེ་མོ་སྤྲད་པ་འོག་ཏུ་ཕྱོགས་པས་སྤྱི་བོར་བཞག་ལ། ཧཱུྃ་བཛྲ་ཨུ་ཏི་ཥྛ། ཞེས་བྱ་བ་བརྗོད་དེ་ནམ་མཁའ་ལ་གདེག་གོ། །སྐྱིལ་མོ་ཀྲུང་བཀྲོལ་ཏེ་ལངས་ནས་ཤར་དུ་ཕྱོགས་པ་དང་མཉམ་པར་བསྡད་ལ། ཐལ་མོ་སྤྱི་བོར་སྦྱར་ལ་དེ་བཞིན་གཤེགས་པ་རྣམས་ལ་ཕྱག་བྱས་པ་དང་། སེམས་ཅན་རྣམས་མ་
རིག་པའི་མུན་པར་ལྷུང་བ་བདུད་ཀྱི་བྱིན་གྱིས་བརླབས་པ་མཐོང་ནས་བདུད་དེ་རྣམས་བརླག་པར་བྱ་བའི་དོན་དུ་སྐད་ཅིག་གིས་རྡོ་རྗེ་ཤུགས་ཀྱི་སྐུ་ཁྲོ་གཉེར་དང་མཆེ་བ་གཙིགས་པ་དང་ལྡན་པར་བྱས་ནས་མིག་གཡས་པར་མ་ལས་ཉི་མ་དང་གཡོན་པར་ཊ་ལས་ཟླ་བ་དང་མིག་འབྲས་ལ་ཧཱུྃ་ལས་དུས་མཐའི་མེ་དང་མཚུངས་པར་
ལྡན་པའི་རྡོ་རྗེའི་ལྟ་སྟངས་འདིར་ཕྱོགས་ཐམས་ཅད་ཀྱི་འགྲོ་བར་བལྟས་ལ། ང་རྒྱལ་བསྐྱེད་པ་ནི། བདག་ནི་དཔལ་ལྡན་རྡོ་རྗེ་འཆང་། །བདག་ཉིད་རྡོ་རྗེ་ཤུགས་ཉིད་དོ། །བདག་ནི་སངས་རྒྱས་རྒྱལ་པོ་ཆེ། །བདག་ནི་སྟོབས་ཆེན་རྡོ་རྗེའོ། །བདག་ནི་རྣལ་འབྱོར་དབང་པོའི་རྒྱལ། །བདག་ནི་ཕྱག་རྒྱ་རྡོ་རྗེ་བསྟན། །

ཞེས་བས་སོ། །དེ་ནས་རྐང་མཐིལ་དུ་འབར་བཞིན་པའི་རྡོ་རྗེ་བསྒོམས་ལ་གསུང་བར་འགྱུར་བའི་རིམ་པས་བགྱིང་བ་དང་བཅས་པའི་པདྨའི་ལག་སྐོར་བྱ། རྡོ་རྗེ་གསོར་དྲིལ་བུ་དཀྲོལ་ཞིང་དབང་ལྡན་ནས་བརྩམས་ཏེ་གཡས་སྐོར་གྱིས་རྡོ་རྗེའི་འགྲོས་ཀྱིས་བཅག་པར་བྱ་བ་ནི། སློབ་མ་དང་བཅས་སམ་གཅིག་པུས་
དཀྱིལ་འཁོར་གྱི་ས་གཞི་ལ་གར་བྱ་བ་སྟེ། མིག་དག་ལག་དག་དཔྱི་དག་དང་། །རྐང་རྩིབས་ལོགས་ཀྱིས་གཡས་སྐོར་བྱ། །མདངས་དང་བརྗིད་ཀྱིས་སྦྱོར་བ་ཡིས། །གཡས་མིན་པ་ཡང་དེ་བཞིན་ནོ། །དེ་ལྟར་རྒྱུན་གྱིས་གར་བྱས་ནས། །བསྡུས་ཏེ་བསྐོར་བྱས་དེ་ནས་ཡང་། །མྱུར་བའི་བརྗིད་ཀྱིས་དེ་བཞིན་
གར། །བྱ་ཞིང་གཙོ་བོའི་གཟུགས་ཀྱིས་བསྐོར། །ལུས་ངག་ཡིད་རྣམས་བརྟན་གནས་པས། །གསོན་ཅིག་བགེགས་ཀྱི་ཚོགས་རྣམས་ཀུན། །དཔལ་ལྡན་རྡོ་རྗེ་འཛིན་བདག་གིས། །བཀའ་སྩལ་བཞིན་དུ་མི་བྱེད་ན། །རྡོ་རྗེ་འབར་བ་འདི་ཡིས་ནི། །རིགས་གསུམ་ལས་བྱུང་འཇོམས་པར་བྱེད། །གལ་
ཏེ་བདག་གི་བཀའ་འདས་ན། །རྣམ་པར་རླག་འགྱུར་གཞན་དུ་མིན། །ཞེས་པ་ལན་གསུམ་བརྗོད་ཅིང་ཁྲོ་བོ་དཔག་ཏུ་མེད་པ་སྤྲོས་ལ་བགེགས་རྣམས་བཅོམ་སྟེ། དཀྱིལ་འཁོར་གྱི་ས་གཞིའི་འོག་གི་བར་ཧཱུྃ་ལས་བྱུང་བའི་རྡོ་རྗེའི་རང་བཞིན་དུ་བྱིན་གྱིས་བརླབ་བོ། །འདིར་འཆག་པའི་དུས་སུ་སོ་སོ་བདག་ཉིད་ཀྱི་གཡོན་ན་
གནས་པའི་དྲིལ་བུའི་ནང་དུ་བདག་ཉིད་ཀྱི་རྡོ་རྗེ་གཞུག་པར་བྱའོ། །དེའི་རྡོ་རྗེའི་བདག་ཉིད་ཀྱི་གཡོན་གྱི་དྲིལ་བུ་རུའོ། །དེ་བཞིན་དུ་མདུན་དང་གཡས་དང་རྒྱབ་རྣམས་ལ་ཡང་ངོ་། །དེ་ནས་ཧུྃ་ཧཱུྃ་ལས་བྱུང་བའི་རྡོ་རྗེ་རྩེ་ལྔ་པ་རྐང་པའི་འོག་ཏུ་རྣམ་པར་བསམས་ལ་རྡོ་རྗེ་རྩེ་ལྔ་པའི་ཕྱག་རྒྱས་རྐང་པའི་མཐིལ་དུ་རེག་སྟེ། རྐང་
པའི་མཐིལ་གྱི་རྡོ་རྗེ་དེས་ས་གཞིའི་དབུས་སུ་བཅག་པ་ནི། གཡས་བརྐྱང་བ་དང་གཡོན་བརྐྱང་དང་མཉམ་པའི་རྐང་སྟབས་ཀྱིས་ཡོངས་སུ་བསྐོར་རོ། །རྐང་མཐིལ་དུ་ཡཾ་ཡཱ། བཀོད་ལ་རལ་གྲིའི་ཕྱག་རྒྱས་རེག་སྟེ་ཤར་དུ་ཟླུམ་པོའི་འདུག་སྟངས་ཀྱིས་སོ། །རཾ་རཱཿབཀོད་ལ་རིན་པོ་ཆེའི་ཕྱག་རྒྱས་རེག་སྟེ་ལྷོ་རུ་
རོལ་པས་སོ། །ལཾ་ལཱཿབཀོད་ལ་འཁོར་ལོའི་ཕྱག་རྒྱས་རེག་སྟེ་ནུབ་ཏུ་ས་གའོ། །ཝཾ་ཝཱཿབཀོད་ལ་པདྨའི་ཕྱག་རྒྱས་རེག་སྟེ་བྱང་དུ་པདྨའི་འདུག་སྟངས་ཀྱིས་བྱིན་གྱིས་བརླབས་ནས་བཅག་པའོ། །དེ་ཡང་ལག་པ་གཉིས་ཐལ་མོ་སྦྱར་བར་བྱས་ཏེ་མཐེ་བོང་དག་སྦྱར་ཏེ་དེ་ལྟར་མཐེའུ་ཆུང་དག་ཀྱང་ངོ་། །གུང་མོ་དག་སྟེང་

དུ་སྦྱར་ནས་དེ་དག་གི་རྒྱབ་ཏུ་མཛུབ་མོ་གཉིས་ཟླ་བ་ཕྱེད་པའི་རྣམ་པར་དགུག་གོ། །སྲིན་ལག་གཉིས་རང་རང་གི་ལག་མཐིལ་དུ་སོན་པ་འདི་ནི་རྡོ་རྗེ་རྩེ་ལྔ་པའི་ཕྱག་རྒྱའོ། །རྡོ་རྗེ་ཁུ་ཚུར་བཅིངས་ཏེ་གུང་མོ་དང་མཛུབ་མོ་སྦྱར་ཏེ་སྒྲེང་བ་རལ་གྲིའི་ཕྱག་རྒྱའོ། །སོར་མོ་ལྔ་སྦྱར་ཏེ་གུང་མོ་དབུས་ནས་
སྟེང་དུ་ཅུང་ཟད་ཕྱུང་བ་རིན་པོ་ཆེའི་ཕྱག་རྒྱའོ། །སོར་མོ་རྣམས་འཁོར་ལོའི་རྩིབས་ཀྱི་རྣམ་པར་བརྐྱང་བ་འཁོར་ལོའི་ཕྱག་རྒྱའོ། །མཐེ་བོང་དང་མཐེའུ་ཆུང་སྦྱར་ཏེ་ལྷག་མ་རྣམས་བརྐྱང་བ་པདྨའི་ཕྱག་རྒྱའོ། །དེ་ནས་རྐང་པ་གཡོན་པ་བསྐུམ་སྟེ་རྐང་པ་གཡས་པ་མཐོ་ལྔ་རུ་བརྐྱང་ནས་རོལ་པས་དྲང་པོར་གནས་པ་འདི་ནི་
གཡས་བརྐྱང་ངོ་། །དེ་ལས་ཟློག་པ་ནི་གཡོན་བརྐྱང་ངོ་། །རྐང་པ་གཉིས་ཀྱི་སོར་མོ་རྣམས་མཉམ་པར་གནས་པ་མཉམ་པའི་འདུག་སྟངས་སོ། །རྐང་པ་གཉིས་ཀྱི་བར་ལ་སོར་མོ་ཉི་ཤུ་རྩ་དྲུག་དང་ལྡན་པས་པུས་མོ་ཡ་གཅིག་གྱེན་དུ་ཅུང་ཟད་བཀན་པས་རོལ་པའོ། །རྐང་པ་གཉིས་ཀྱི་བར་ལ་སོར་མོ་ཉི་ཤུ་རྩ་
བཞི་དང་ལྡན་པས། པུས་མོ་གཉིས་རྒྱབ་ཏུ་ཅུང་ཟད་བཀན་པ་ས་གའོ། །ས་ག་ལས་ངང་པའི་གཤོག་པ་ལྟར་བྱས་ཏེ་བར་ལ་ཁྲུ་དོ་བྱས་པ་ཟླུམ་པོའོ། །དེ་ནས་དཀྱིལ་འཁོར་གྱི་ས་གཞི་ལ་དྲི་ཡིས་བྱུགས་ལ། བཛྲ་གནྡྷ་ཞེས་པ་ལ་སོགས་པའི་སྔགས་ཀྱི་རྐང་པས་ཡང་དག་པར་མཆོད་དོ། །ཡང་སྔོན་གྱི་
ཆོ་གར་གསུངས་པ་ལྟར་རྡོ་རྗེ་སའི་ལྷ་མོ་སྤྱན་དྲང་བའི་སྔགས་ནི། ཨོཾ་ལཱཾ་ཧཱུྃ་བཛྲ་བྷཱུ་མི་ཏིཥྛ་མ་ཙལ་ཧཱུྃ་ཧཱུྃ་ཕཊ་བཛྲ་དྷཱ་ར་ཨཱ་ཛྙཱ་པ་ཡ་ཏི་སྭཱ་ཧཱ། ཞེས་པས་ཏེ་དེ་ལས་སླར་ཡང་ཡོན་ཆབ་ལ་སོགས་པ་སྦྱིན་པར་བྱའོ། །འདི་ནི་ས་ལྷག་པར་གནས་པའི་ཆོ་གའོ། །གལ་ཏེ་གང་ཞིག་ས་ལྷག་པར་གནས་པའི་སྔོན་དུ་ས་ཡོངས་
སུ་གཟུང་བ་དང་བགེགས་ལ་ཕུར་བུས་གདབ་པར་འདོད་པ་ཡོད་དོ། དེ་ནི་ཡང་དག་པ་མ་ཡིན་ནོ། །གང་གི་ཕྱིར་ན་ལྷག་གནས་ལ་ཡོངས་སུ་བཟུང་བ་དོན་ཡོད་པའི་ཕྱིར་དང་། བགེགས་ལ་ཕུར་བུ་གདབ་པའི་ཆོ་ག་ཡངས་སྦྱང་བའི་དུས་སུ་རིགས་ཏེ། སྲུང་བའི་འཁོར་ལོ་བསྒོམས་པས་བགེགས་བསྲེག་ཅིང་རྣམ་
པར་བཅོམ་ནས་ཕུར་བུས་བཏབ་སྟེ་ས་སྦྱང་བར་རིགས་པའི་ཕྱིར་རོ། །དེ་ཡང་རྒྱུད་ལས། དེ་རྣམས་ཀུན་ལ་གསོལ་བ་བཏབ་སྟེ་སེང་ལྡེང་ལས་བྱུང་མཁྲང་བའི་ཕུར་པ་རྣམས་ཀྱིས་ས་ལ་གདབ། །ཅེས་གསུངས་པས་སོ། །གལ་ཏེ་དུས་གསུམ་དུ་མཉམ་པར་གཞག་པའི་དུས་སུ་ཡང་བགེགས་ལ་ཕུར་བུས་གདབ་པར་

འདོད་པ་ལ་ཉིན་མཚན་གྱིས་བར་དུ་ཆོད་པ་ལ་ཅིའི་ཕྱིར་མི་འདོད་ཅེ་ན། སྒོམ་པའི་དུས་སུ་འདོད་དེ། འོན་ཀྱང་སེང་ལྡེང་ལ་སོགས་པའི་ཕུར་བུ་མི་འདོད་དོ། །ཁྱོད་ཀྱི་འདོད་པ་ལྟར་ན་ཚོན་བྲི་བའི་སྐབས་སུ་ཡང་བགེགས་ལ་ཕུར་བུ་འདེབས་པའི་ཆོ་ག་དགོས་པར་ཐལ་ལོ། །ས་ལྷག་པར་གནས་པ་སྔོན་དུ་བྱས་
པའི་ཕྱིར་འདིར་ཐལ་ཏེ་ཅིའི་ཕྱིར་ཞེ་ན། འོན་ཏེ་ས་སྦྱང་བའི་སྐབས་སུ་དེ་ལྟར་བྱས་པའི་ཕྱིར་ས་ལྷག་པར་གནས་པའི་སྔོན་དུ་བགེགས་ལ་ཕུར་བུ་གདབ་པའི་ཆོ་ག་དགོས་པར་མི་འགྱུར་རོ་ཞེས་པའོ། །དེ་ནས་སློབ་མ་རྣམས་ཁྲུས་བྱས་པ་དང་དྲི་ཞིམ་པས་ལུས་ལ་བྱུགས་ཏེ། འཆད་པར་འགྱུར་བའི་ཆོ་གས་སོ་ཤིང་
གིས་བརྟག་པར་བྱས་པ་དང་། དེའི་འཁོར་ལོ་དྲུག་རྣམས་སུ་ཟླ་བ་ལ་སོགས་པའི་གདན་དྲུག་ལ་རིང་པོ་དྲུག་གིས་ཐབས་ཀྱི་རིགས་རྣམས་ལ་སྐུ་གསུང་ཐུགས་ཀྱི་བྱེ་བྲག་གིས་བསྲུང་བར་བྱའོ། །ཐུང་ངུ་དྲུག་གིས་ཤེས་རབ་ཀྱི་ལའོ། །དེ་ལྟར་རབ་ཏུ་གནས་པར་བྱ་བ་ཡང་སྟེ་ལུགས་མ་ལ་སོགས་པ་ལའོ། །པོ་ཏི་
རྣམས་ལ་ཐུང་ངུ་རྣམས་ཀྱིས་སོ། །དེ་ནས་གསོལ་བ་གདབ་པར་བྱ་བ་ནི། སེམས་ཅན་རྣམས་ནི་ཐར་པའི་རྒྱུ་རུ་དཔལ་ལྡན་དུས་ཀྱི་འཁོར་ལོའི་དཀྱིལ་འཁོར་བདག་གིས་བྲི་བར་བྱ། །ཞེས་པ་དེའི་ཕྱིར་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་སློབ་མ་ལ་སོགས་པ་རྣམས་ལ་བྱིན་གྱིས་རློབ་པར་བྱེད་དོ། །འདི་ནི་
སློབ་མ་གཟུང་བའི་ཆོ་གའི་རིམ་པའོ། །དེ་ནས་དཀྱིལ་འཁོར་གྱི་ས་གཞི་ལ་ཡི་གེ་དྲུག་པ་བཟླས་ཤིང་དྲི་ཞིམ་པོ་དང་བདུད་རྩི་ལྔས་ཉེ་བར་བྱུགས་ཏེ། མེ་ཏོག་གི་ཚོགས་ཆལ་བར་བཀྲམ་ལ་ལུས་ལ་ཁྲུས་བྱས་དྲི་ཞིམ་པོས་བྱུགས། ན་བཟའ་དམར་པོ་དང་མེ་ཏོག་གི་ཕྲེང་བས་བརྒྱན། རྣ་རྒྱན་དང་། མགུལ་རྒྱན་དང་།
ལག་གདུབ་དང་། རྐང་གདུབ་དང་། སྐ་རགས་དང་། གཙུག་གི་ནོར་བུ་དང་། ཐལ་བ་དང་། ཟླ་བ་ཕྱེད་པ་དང་། མཆོད་ཕྱིར་ཐོགས་དང་། སྟག་གི་པགས་པ་རྣམས་ཀྱི་རྒྱན་སྒྲུབ་ཐབས་སུ་གསུངས་པ་ལྟར་སྔགས་ཀྱིས་བྱིན་གྱིས་བརླབས་ལ་བརྒྱན་པར་བྱའོ། །དེ་ནས་དཀྱིལ་འཁོར་གྱི་ཤར་དུ་གནས་ནས་
ནུབ་ཏུ་ཁ་ཕྱོགས་ཏེ་དཀྱིལ་འཁོར་གྱི་གཙོ་བོའི་རྣལ་འབྱོར་དང་ལྡན་པས་ལྷ་རྣམས་ཀྱི་བཞུགས་གནས་གོ་བར་བྱས་ལ་ཙནྡན་དང་གུར་གུམ་ལ་སོགས་པས་མཎྜལ་བྱས་ཏེ། དེ་དང་དེ་རྣམས་སུ་དམ་ཚིག་གི་འཁོར་ལོ་རྣམ་པར་བསྒོམས་ལ་དེ་རྣམས་ལ་ནམ་མཁར་གནས་པའི་ཡེ་ཤེས་སེམས་དཔའ་སྤྱན་དྲངས་ཏེ་

གཞུག་པ་དང་། མཆོད་པ་དང་བསྟོད་པ་དང་བདུད་རྩི་མྱང་བའི་ཆོ་ག་རྣམས་བྱས་ལ་བསྒོམ་བྱའི་དཀྱིལ་འཁོར་གྱི་ཕྱི་རོལ་གྱི་ཤར་ལ་སོགས་པའི་ཕྱོགས་རྣམས་ལ་བུམ་པ་དྲུག་གམ་བཅུ་ལྷག་པར་གནས་པར་བྱ་བ་ནི། དེ་ཡང་ཞི་བ་དང་རྒྱས་པ་ལ་བུམ་པའི་ནང་གི་རྒྱལ་སོར་བཅུ་དྲུག་པ་སྲིད་དུ་
འོག་ནས་མཆུའི་བར་དུ་སོར་ཉི་ཤུ་པ་མཆུ་འོག་ཏུ་འཕྱང་བ་ལ་སོར་གཉིས་པ། མགྲིན་པ་ལ་སོར་དྲུག་པ་ཁའི་མཆུ་ནས་མཆུ་ལ་སོར་བརྒྱད་པ་བརྒྱད་ཀྱི་ཆ་གཉིས་དབུས་ཀྱི་བུག་པ་ལ་ཡོད་པ་མཆུ་གཉིས་ལ་ཆ་གཅིག་པ། གསད་པ་ལ་དུར་ཁྲོད་ཀྱི་སོལ་བ་དང་། མིའི་ཞག་གིས་བྱུགས་པའི་མིའི་ཐོད་པའོ། །དབྱེ་
བ་དང་བསྐྲད་པ་ལ་བུམ་པའི་ནང་གི་རྒྱལ་སོར་བཅུ་གཉིས་པ་སྲིད་དུ་སོར་བཅུ་བཞི་པ། མགྲིན་པ་ལ་སོར་བརྒྱད་དེ་ཅུང་ཟད་འཁྱོགས་པ་ཁ་ལ་སོར་དྲུག་པ་མཆུ་ལ་སོར་གཅིག་པའོ། །དབང་དང་དགུག་པ་ལ་བཟོ་བོས་ཇི་ལྟར་བྱས་པའི་བུམ་པའོ། །རེངས་པ་ལ་ཐུང་ཞིང་རྒྱ་དང་སྲིད་དུ་སོར་བཅུ་དྲུག་པ། མགྲིན་པ་
ལ་སོར་བ་ཞི་པ་ཁ་ལ་སོར་དྲུག་པ་མཆུ་ལ་སོར་གཉིས་པའོ། །ལས་ཐམས་ཅད་པ་ལ་ཞི་བ་ལ་སོགས་པའི་ལས་ལ་བཤད་པའི་བུམ་པ་གཟུང་བར་བྱའོ། །གསེར་རམ་དངུལ་ལམ་ཤེལ་ལམ་ཟངས་རྣམས་ལས་བྱས་པའི་བུམ་པ་ཇི་ལྟར་རྙེད་པའམ། གསེར་ལ་སོགས་པ་མེད་ན་བཤད་པའི་མཚན་ཉིད་དང་ལྡན་
པ་རྣམས་སྟོང་པར་བྱས་ཏེ། བཾ་ལས་རིན་པོ་ཆེའི་གཟུགས་སུ་བསམས་ལ་ཞི་བ་དང་རྒྱས་པའི་དོན་དུ་འབྲས་སམ་རྡོ་རྒྱུས་སམ་ཙནྡན་དཀར་པོས་བྱུག །ལྷ་རྣམས་ཀྱི་མཚན་མ་བྲི། བདུད་རྩི་ལྔ་དང་བཅས་པའི་དྲི་ཞིམ་པོའི་ཆུ་དང་། རིན་པོ་ཆེ་ལྔ་དང་། སྨན་ལྔ་དང་། འབྲུ་ལྔ་རྣམས་ནང་དུའོ། །མཛེས་པའི་
ཤིང་དང་ལྡན་པ། མགྲིན་པར་རས་ཟུང་གིས་དཀྲིས་པ་བླ་རེའི་འོག་ཏུ་འཆད་པར་འགྱུར་བའི་རྡུལ་ཚོན་གྱི་དཀྱིལ་འཁོར་ལ་མཚན་མ་དགོད་པའི་རིམ་པ་ལྟར་དཀྱིལ་འཁོར་གྱི་རྣམ་པར་དྲི་ཞིམ་པོའི་མཎྜལ་ཇི་ལྟར་རིགས་པའི་གདན་སོ་སོར་བྱས་པའི་སྟེང་དུ་མདུན་དུ་གཞག་གོ། །དེ་ཡང་རས་ཀྱི་སྐུད་པ་དཀར། །མཁས་
པས་ཆོ་ག་བཞིན་དུ་དཀྲི། །ཞེས་པ་འདིའི་འདོད་པ་ལྟར་ན་ཧཱུྃ་ལན་བདུན་བརྗོད་པའི་སྐུད་པས་ཨོཾ་བཛྲ་ཤི་ཁ་རེ་རུ་ཊ་མ་ཊ་དཱི་ཤཱཾ་བནྡྷཱ་བནྡྷཱ་ཧཱུྃ། ཞེས་པའི་སྔགས་ཀྱིས་དཀྲི་བར་བྱའོ། །ད་ནི་ནང་གི་འབྲུ་བཅུད་རྣམས་བསྟན་པ། ཨིནྡྲ་ནཱི་ལ་དང་། པདྨ་རཱ་ག་དང་། ཟླ་བ་ཆུ་ཤེལ་དང་། ཀརྐེ་ཊ་དང་། ཀེ་ཀེ་རུ་རྣམས་

དང་། གསེར་དང་། དངུལ་དང་། ཟངས་དང་། རྣོན་པོ་དང་། ཁབ་ལེན་ཏེ་ལྕགས་རྣམས་དང་། དེ་བཞིན་དུ་མུ་ཏིག་དང་། བྱུ་རུ་དང་། མུ་མེན་དང་། ཤཱུ་ལ་མ་ཎི་དང་། ཐིག་ལེ་དྲུག་པ་རྣམས་ནི་འབྲིང་པོའོ། །ཤེལ་དང་། མཆོང་དང་། གཟི་དང་། མཆིང་བུ་དང་། ནོར་བུ་སྔོ་བསངས་རྣམས་ནི་ཐ་མའོ། །དེ་རྣམས་མེད་
ན་དྲི་ཞིམ་པོའི་མེ་ཏོག་ཁ་དོག་ལྔ་ཡིས་སོ། །ཡང་བྲཧྨ་དཎྜི་ཆ་གཉིས་དང་། བིཥྞུ་ཀྲཱནྟ་ཆ་གཅིག་དང་། རུ་ཏྲ་ཛཱ་ཊཱ་ཆ་གསུམ་དང་། ཨཱི་ཤཱ་རི་ཆ་བཞི་དང་། དེ་ཝཱ་ཊཱ་ལི་ཆ་ལྔ་ལ་སོགས་པ་རྣམས་སོ། །ཡང་ཏིལ་དང་། ནས་དང་། སྲན་མ་ཥ་དང་། སོ་བ་དང་། གྲོ་ལ་སོགས་པ་རྣམས་སོ། །ཡང་སྐྱུར་ཤིང་
དང་། གེ་སར་དང་། མྱ་ངན་མེད་དང་། བྱང་ཆུབ་ཤིང་དང་ཨུ་དུཾ་ཝཱར་ལ་སོགས་པའི་ཤིང་རྣམས་སོ། །ཡང་རས་ནི་སྔོན་པོ་དང་། ནག་པོ་དང་། དམར་པོ་དང་། དཀར་པོ་དང་། སེར་པོ་རྣམས་སོ། །རྣམ་རྒྱལ་གྱི་བུམ་པ་ལ་སྣ་ཚོགས་པདྨའི་ལྟེ་བ་ལ་དཀར་པོ་དང་། དམར་པོ་དང་། ནག་པོ་དང་། སེར་
པོ་སྟེ། ཟླ་བ་དང་ཉི་མ་དང་སྒྲ་གཅན་དང་དུས་ཀྱི་མེའི་དཀྱིལ་འཁོར་རྣམས་ཀྱི་སྟེང་དུ་རྡོ་རྗེ་རྩེ་གསུམ་པ་སྔོན་པོ་བཅོམ་ལྡན་འདས་ཀྱིའོ། །ཤར་གྱི་བུམ་པ་ལ་རལ་གྲི་ནག་པོ། ལྷོའི་ལ་རིན་པོ་ཆེ་དམར་པོ། ནུབ་ནི་ལ་འཁོར་ལོ་སེར་པོ། བྱང་གི་ལ་པདྨ་དཀར་པོ། མེ་མཚམས་གྱི་ལ་རལ་གྲི་ནག་པོ། བདེན་བྲལ་
གྱི་ལ་པདྨ་དམར་པོ། བདེ་བྱེད་ཀྱི་ལ་ཨུཏྤལ་དཀར་པོ། རླུང་གི་ལ་འཁོར་ལོ་སེར་པོ་རྣམས་བྲི་ཞིང་། ནུབ་ཀྱི་རྒྱལ་བའི་བུམ་པ་ལ་གྲི་གུག་བྲི་བར་བྱའོ། །རྣམ་པར་རྒྱལ་བའི་བུམ་པའི་སྟེང་དུ་རྣམ་པར་རྒྱལ་བ་ཆེན་པོའི་དུང་གཞག་གོ། །དེ་རྣམས་ལས་རྣམ་པར་རྒྱལ་བ་ཆེན་པོར་རིན་པོ་ཆེ་ལྗང་གུའོ། །རྒྱལ་
བ་དང་རྣམ་པར་རྒྱལ་བར་སྔོན་པོའོ། །ཤར་དང་མེར་ནག་པོའོ། །ལྷོ་དང་བདེན་བྲལ་དུ་དམར་པོའོ། །བྱང་དང་དབང་ལྡན་དུ་དཀར་པོའོ། །ནུབ་དང་རླུང་དུ་སེར་པོའོ། །དེ་ལྟར་ཁབ་ལེན་དང་། རྣོན་པོ་དང་། ཟངས་མ་དང་། དངུལ་དང་། གསེར་རྣམས་ཀྱང་ངོ་། །དེ་ལྟར་སྨན་རྣམས་ཆ་གཅིག་རྣམ་པར་རྒྱལ་
བ་ལའོ། །དེ་ལྟར་ཆ་གཉིས་པ་དང་། གསུམ་པ་དང་། བཞི་པ་དང་། ལྔ་པ་རྣམས་རིམ་པ་བཞིན་ཤར་དང་། མེ་དང་། ལྷོ་དང་། བདེན་བྲལ་དང་། བྱང་དང་། དབང་ལྡན་དང་། ནུབ་དང་། རླུང་རྣམས་ཀྱི་བུམ་པ་རྣམས་སུའོ། །ཐམས་ཅད་གཏུམས་པ་རྣམ་པར་རྒྱལ་བ་ཆེན་པོར་བཅུག་སྟེ། དེ་གཙོ་བོ་བྱ་བ་ཀུན་བྱེད་པའི་

རྣམ་རྒྱལ་སྟེང་དུ་བཞག་ལ་དེར་སྔར་བསྟན་པའི་བདུད་རྩི་ལྔ་དང་བཅས་པའི་དྲི་ཞིམ་པོའི་ཆུ་བླུགས། མེ་ཏོག་ཕྲེང་བས་བརྒྱན། ཨོཾ་བཛྲ་ཨ་མྲྀ་ཏ་ཨུ་ད་ཀ་ཋ་ཧཱུཾ། ཞེས་པ་དང་ཡི་གེ་དྲུག་པ་ལན་བདུན་བཟླས་ཏེ། དེ་ལྟར་བདུད་རྩིར་བྱས་ལ་དེའི་ནང་དུ་ཨོཾ་ཏཱཔྟེ་ཏཱཔྟེ་མཧཱ་ཏཱཔྟེ་སྭཱ་ཧཱ། ཞེས་པས་ལྷའི་
ཆུའི་རང་བཞིན་སྤྱན་དྲངས་པ་དང་། ལྷའི་འཁོར་ལོ་གདན་དང་བཅས་པ་རྣམ་པར་བསམས་ལ་རང་གི་སྙིང་གའི་ས་བོན་གྱི་འོད་ཟེར་གྱིས་ཡེ་ཤེས་པ་སྤྱན་དྲངས་ཏེ། ཞབས་བསིལ་དང་འཐོར་འཐུང་དང་ཡོན་ཆབ་ལ་སོགས་པ་སྔོན་དུ་སོང་བ་དང་། དེ་ཉིད་དམ་ཚིག་གི་འཁོར་ལོ་ལ་གཞུག་གོ། །དེའི་ནང་དུ་ཆགས་པ་ཆེན་
པོས་ཞུ་བ་དང་། བྱང་ཆུབ་སེམས་ཀྱི་གཟུགས་སུ་རོ་གཅིག་ཏུ་གྱུར་པ་རྣམ་པར་བསམ་མོ། །ཡང་མཚན་མ་ལས་དམ་ཚིག་གི་ལྷ་དང་། ཡེ་ཤེས་ཀྱི་ལྷ་ཡང་རོ་གཅིག་ཏུ་གྱུར་པར་བལྟའོ། །དེ་ཡང་མ་ཏོག་གི་ཕྲེང་བ་དང་ལྡན་པའི་རྡོ་རྗེ་བཟུང་བས་རྣམ་རྒྱལ་ཀྱི་བུམ་པ་ལ་སོགས་པ་ལ་རེག་ལ་འཁོར་ལོའི་གཙོ་
བོའི་སྙིང་པོའི་སྔགས་བརྒྱ་རྩ་བརྒྱད་དང་། ཨོཾ་ཧཾ་ཧཱཾ་ཧིཾ་ཧཱིཾ་ཧཱིཾ་ཧྲཱིཾ་ཧུཾ་ཧཱུཾ་ཧླིཾ་ཧླཱྀཾ་བཛྲ་པདྨ་ཨ་མྲྀ་ཏ་གྷ་ཊ་སུ་བི་ཤུདྡྷ་དྷརྨཱ་དྷཱ་ཏུ་སྭ་བྷཱ་བ་སརྦ་དྷརྨཱ་ན་སུ་བི་ཤུདྡྷ་དྷརྨཱ་དྷཱ་ཏུ་སྭ་བྷཱ་ཝཱཾ་ཀུ་རུ་ཀུ་རུ་སྭཱ་ཧཱ། ཞེས་པའི་སྔགས་བཟླས་ཤིང་དཀྱིལ་འཁོར་གྱི་དབུས་སུ་རྣམ་པར་རྒྱལ་བའི་བུམ་པ་གཞག་གོ། །བུམ་པ་གཞན་རྣམས་ནི་ལྷ་རང་རང་གི་སྔགས་ཉི་ཤུ་རྩ་
གཅིག་དང་སྔགས་འདི་ལན་ཉི་ཤུ་རྩ་གཅིག་བཟླས་ཏེ་རང་རང་གི་གནས་སུ་གཞག་གོ། །དེ་ནས་རྣམ་རྒྱལ་ལ་སོགས་པའི་བུམ་པ་རྣམས་མེ་ཏོག་ལ་སོགས་པས་ཡང་དག་པར་མཆོད་ནས། ཇི་སྲིད་དཀྱིལ་འཁོར་གྱི་བྱ་བ་རྫོགས་ཀྱི་བར་དེ་སྲིད་དུ་བགེགས་རྣམས་སྲུང་བར་གྱིས་ཤིག་ཅེས་བརྗོད་ལ་གཏོར་མ་བྱིན་པ་དང་དེ་རྣམས་
ལ་རེག་སྟེ། མཆོག་སྦྱིན་རྡོ་རྗེ་མཆོག་ཁྱོད་འདུད། །ཅེས་པ་ལ་སོགས་པས་བསྟོད་པ་སྔོན་དུ་སོང་བ་དང་དྲིལ་བུ་དཀྲོལ་བར་བྱ་བའི་སྔགས་ནི། ཨོཾ་ཧྲཾ་ཧྲཱིཾ་ཧྲྼཾ་ཧྲྀཾ་ཧྲླཱྀཾ་ཧྲཱཿ། ཨོཾ་བཛྲ་སཏྭཱ་ཡ་སྭཱ་ཧཱ། ཨོཾ་ཨ་མོ་གྷ་སིདྡྷ་ཡ་སྭཱ་ཧཱ། ཨོཾ་རཏྣ་སཾ་བྷ་ཝཱ་ཡ་སྭཱ་ཧཱ། ཨོཾ་ཨ་མི་ཏཱ་བྷཱ་ཡ་སྭཱ་ཧཱ། ཨོཾ་བཻ་རོ་ཙ་ནཱ་ཡ་སྭཱ་ཧཱ། ཨོཾ་
ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཨོཾ་པཱཎྜ་ར་ཝཱ་སི་ནི་ཝཱར་དེ་སྭཱ་ཧཱ། ཨོཾ་མ་མ་ཀཱི་ཀི་རི་ཀི་རི་སྭཱ་ཧཱ། ཨོཾ་ལོ་ཙ་ན་བ་སུ་དེ་སྭཱ་ཧཱ། ཞེས་པའི་སྔགས་ཀྱིས་སོ། །དེ་ནས་གཞོན་ནུ་མས་བཀལ་བའི་སྐུད་བ་དཔའ་བོས་བཅད་པ་ལྟར་ཉོས་པ་དང་ཁ་དོག་བཟང་པོ་ལྔས་བསྒྱུར་ལ། ཨོཾ་ཨཱཾ་ཨཱི་རཱྀ་ཨཱུཾ་ལཱྀཾ་བཛྲ་སཱུ་ཏྲ་

སརྦ་དྷརྨཱ་ཨེ་ཀ་ཨཱ་ཀཱ་རསྭ་བྷཱ་ཝེ་ན་ཀུ་རུ་ཀུ་རུ་སྭཱ་ཧཱ། ཞེས་པས་བྱིན་གྱིས་བརླབས་ལ་དྲིལ་སོགས་པས་མཆོད་དེ་ཤར་ཕྱོགས་ཀྱི་ས་གཞི་ལ་བཞུགས་སུ་གསོལ་ལོ། །དེ་ནས་མུ་ཏིག་ལ་སོགས་པའམ་འབྲས་སཱ་ལི་ལ་སོགས་པ་ལས་བྱུང་བའི་ལེགས་པར་ཚོས་སུ་བཙོས་པའི་ཚོན་རྣམས་ལ། ཨོཾ་ཨཾ་ཨི་རྀ་ཨུཾ་ལིཾ་
སུ་བི་ཤུདྡྷ་པཉྩ་སྐནྡྷ་སྭ་བྷ་ཝ་པཉྩ་སྐནྡྷ་ན་སུ་བི་ཤུདྡྷ་དྷརྨ་ན་ཀུ་རུ་ཀུ་རུ་སྭཱ་ཧཱ། ཞེས་པས་བྱིན་གྱིས་བརླབས་ཏེ། དྲི་ལ་སོགས་པ་བྱིན་ཏེ་ཚོན་གྱི་སྣོད་རྣམས་ནུབ་ཕྱོགས་སུ་གཞག་གོ། །དེ་ནས་རྡོ་རྗེ་མཚན་ཉིད་དང་ལྡན་པས་ཨོཾ་ཧུྃ་ཀྲོ་དྷ་བཛྲ་སརྦ་སཏྭ་ཀཱ་རུ་ཎ་ཨཱཏྨ་ཀཱ་སརྦ་དྷརྨྨཱ་ཨེ་ཀ་སུ་ཁ་སྭ་བྷཱ་ཝ་སརྦ་དྷརྨྨཱ་ན་བཛྲ་སུ་
ཁ་སྭ་བྷཱ་ཝན་ཀུ་རུ་ཀུ་རུ་སྭཱ་ཧཱ། ཞེས་པ་དང་བཅས་པས་ལྷོ་ཕྱོགས་སུ་གཞག་གོ། །དེ་ནས་རྡོ་རྗེ་དྲིལ་བུ་ལ་ཨོཾ་ཧོ། །བཛྲ་གྷཎྜེ་སརྦ་དྷརྨཱ་ཨེ་ཀ་པྲཛྙཱ་དྷཱ་ནི་སྭ་བྷཱ་ཝེ་སརྦ་ཨཱ་ཀཱ་རེ་སརྦ་དྷརྨཱ་པྲ་བོ་དྷ་ནི་སརྦ་དྷརྨཱ་ན་སྭ་བྷཱ་ཝེ་ན་པྲ་བོ་དྷ་ཡ་པྲ་བོ་དྷ་ཡ་སྭཱ་ཧཱ། ཞེས་པ་དང་དྲི་ལ་སོགས་པ་བྱིན་ལ་བྱང་ཕྱོགས་སུ་གཞག་པར་བྱའོ། །
འདི་ནི་བུམ་པ་ལ་སོགས་པ་ལྷག་པར་གནས་པའི་ཆོ་གའོ། །དེ་ནས་དཀྱིལ་འཁོར་གྱི་ས་གཞི་ལ་དྲི་ཞིམ་པོའི་མེ་ཏོག་རབ་ཏུ་དགྲམ་པར་བྱས་ནས་ལྷ་རྣམས་ཀྱི་གནས་སོ་སོར་བདུད་རྩི་ལྔ་དང་བཅས་པའི་དྲི་ཞིམ་པོས་མཎྜལ་བྱས་ཏེ། དེ་ཉིད་ལ་རང་གི་སྙིང་གར་གནས་པའི་ས་བོན་གྱི་འོད་ཟེར་གྱིས་འཁོར་ལོའི་
གཙོ་བོ་དང་བཅས་པའི་ལྷ་ཚོགས་སྤྱན་དྲངས་ལ་གདན་རྣམས་ལ་རིམ་པ་བཞིན་བཞུགས་པར་བྱས་པ་དང་། ཞབས་བསིལ་ལ་སོགས་པས་ཡང་དག་པར་མཆོད་དེ། བསྟོད་པ་དང་བདུད་རྩི་མྱང་བར་བྱས་ནས་པུས་མོ་གཡས་པ་ས་ལ་བཙུགས་ཏེ་ལྕེ་ཧཱུྃ་ལས་རྡོ་རྗེ་རྩེ་གཅིག་པ་ཧཱུྃ་གིས་མཚན་པར་བསྐྱེད་ལ་ལག་པ་གཡས་
པས་སྤོས་སྣོད་བཟུང་སྟེ་གཡོན་པས་དྲིལ་བུ་དཀྲོལ་ཞིང་བརྗོད་པ། བཅོམ་ལྡན་དུས་ཀྱི་འཁོར་ལོ་ཉིད། །རིག་སྔགས་རྒྱལ་ལ་ཕྱག་འཚལ་ལོ། །དཀྱིལ་འཁོར་སྙིང་རྗེའི་བདག་ཉིད་ཅན། །བྲི་བར་འདོད་དོ་མགོན་པོ་ཀྱེ། །སློབ་མ་རྗེས་སུ་གཟུང་ཕྱིར་དང་། །ཁྱོད་ཉིད་མཆོད་པར་བྱ་བའི་ཕྱིར། །དེ་ཕྱིར་བཅོམ་
ལྡན་ཉིད་ལ་བདག །གུས་པས་བཀའ་དྲིན་གནང་བར་ཞུ། །བདག་ལ་དགོངས་ཤིག་སངས་རྒྱས་རྣམས། །འགྲོ་ལ་འཁོར་ལོའི་བྱ་བ་སྟེར། །ལམ་ལ་གནས་པའི་བདེ་སེམས་དང་། །གང་དག་སྔགས་ཀྱི་ལྷ་རྣམས་དང་། །ཕྱོགས་སྐྱོང་རྣམས་དང་ལྷ་གཞན་དང་། །བྱང་ཆུབ་མཐར་སྐྱོང་འབྱུང་པོ་དང་། །

བསྟན་པ་སྐྱོང་བའི་སེམས་ཅན་དང་། །གང་དག་རྡོ་རྗེའི་སྤྱན་ལྡན་དང་། །བདག་ནི་རྡོ་རྗེ་ཆེ་གེ་ཉིད། །དུས་ཀྱི་འཁོར་ལོའི་དཀྱིལ་འཁོར་ནི། །འགྲོ་རྣམས་དག་ཕྱིར་བྲི་བར་བྱ། །ཇི་ལྟར་ནུས་པ་དེ་བཞིན་དུ། །རྗེས་སུ་བརྩེ་བ་དང་ལྡན་པས། །བདག་དང་སློབ་མར་བཅས་པ་ལ། །
དཀྱིལ་འཁོར་དང་བཅས་མ་ལུས་པ། །ཉེ་བར་བྱོན་པར་མཛད་དུ་གསོལ། །ཞེས་པའི་དོན་གོ་བར་བྱས་ལ་ལན་གསུམ་དུ་གསོལ་བ་གདབ་བོ། །ཡང་མེ་ཏོག་ལ་སོགས་པས་མཆོད་པ་བྱའོ། །འདི་ནི་ལྷ་ལྷག་པར་གནས་པའི་ཆོ་གའོ། །དེ་ནས་སྲུང་བའི་འཁོར་ལོ་བསྒོམ་པ་སྔོན་དུ་སོང་བས་བཅོམ་ལྡན་
འདས་ཀྱི་རྣལ་འབྱོར་ལ་དམིགས་པར་བྱའོ། །ཡང་གཤེགས་སུ་གསོལ་བ་དང་། རྐང་པ་བཅུ་དྲུག་པའི་སྔགས་ལན་བདུན་བཟླས་ཏེ། འཆད་པར་འགྱུར་བའི་ཆོ་གས་ཉལ་བར་བྱའོ། །དེ་ཡང་ཇི་སྲིད་དགེ་བའི་མཚན་མ་མཐོང་བའི་བར་དུ་སྟེ། མི་དགེ་བ་མཐོང་ན་གསུངས་པར་འགྱུར་བའི་ཆོ་གས་
གཏོར་མ་སྦྱིན་པར་བྱའོ་ཞེས་སོ། །དེ་ནས། དམ་ཚིག་འདའ་བར་ཐེ་ཚོམ་ན། །སློབ་མ་མིན་པ་མི་གཞུག་གོ། །ཞེས་གསུངས་པའི་ཕྱིར། སྒོ་རྣམས་སུ་སྔོན་དུ་རང་གིས་དབང་བསྐུར་བའི་སློབ་མ་མཚན་ཉིད་དང་ལྡན་པ་གསུང་བར་འགྱུར་བའི་བརྟུལ་ཞུགས་ཀྱི་ངེས་པ་དང་ལྡན་པ་རྩ་བའི་ལྟུང་བ་བཅུ་བཞི་དང་བྲལ་
བ་གསུང་བར་འགྱུར་བའི་སྡོམ་པ་སྔོན་དུ་སོང་བས་སམ། སློབ་དཔོན་གྱི་སྡོམ་པ་སྔོན་དུ་སོང་བས་ཤར་གྱི་སྒོ་རུ་བསྡད་པ་ལ་ལྷག་པར་གནས་པའི་ཆོ་གས་གདུལ་བྱར་གྱུར་པ་ལྷག་པར་བྱའོ། །དེ་ཡང་བཞིས་བྱ་བའམ་གཅིག་གིས་སམ་གཞན་ཡང་ལྔ་པ་ལས་ཀྱི་རྡོ་རྗེས་སམ། དེ་རྣམས་མེད་ན་རང་ཉིད་ཀྱིས་
བྱ་བའོ། །དེ་ལྟར་སློབ་མ་ལྷག་པར་གནས་པ་ཙམ་བྱ་བའོ། །ལྷག་པར་གནས་པའི་དོན་དུ་དཀྱིལ་འཁོར་གྱི་ལྷ་རྣམས་བཞུགས་པ་ལ་ཡང་དག་པར་མཆོད་པ་དང་། ཡེ་ཤེས་ཀྱི་ཐིག་ལ་སོགས་པའི་དོན་དུ་དཀྱིལ་འཁོར་གྱི་ས་གཞིའི་སྟེང་གི་ནམ་མཁའ་ལ་བློས་དམིགས་ནས་མཚན་མ་མཐོང་བ་དང་། ཁ་
ཤར་དུ་ཕྱོགས་ཏེ་དཀྱིལ་འཁོར་གྱི་གཙོ་བོའི་རྣལ་འབྱོར་དང་ལྡན་པས་སྔར་བརྗོད་པའི་ཐིག་སྐུད་ལག་པ་གཡོན་པའི་མཐིལ་དུ་སོར་མོའི་རྩེ་མོ་དང་རྩ་བའི་བར་དུ་བཟུང་ལ། ཨོཾ་ཨཱཿ་ཧུྃ་ཧོ་ཧཾ་རྣམས་ལས་བྱུང་བའི་དེ་བཞིན་གཤེགས་པ་ལྔའི་ཐུགས་ཀ་རྣམས་སུ་ཨོཾ་ཡིག་ལ་སོགས་པ་ལས་ཡོངས་སུ་རྫོགས་པའི་ཡེ་

ཤེས་ཀྱི་ཐིག་འོད་ཟེར་གྱི་རང་བཞིན་བལྟས་ལ། ཨོཾ་ཨཱཿཤཱ་ཤྭ་ཏ་བཛྲ། སཱུ་ཏྲཱཾ་མེ་པྲ་ཡཙྪ་མ་ཧཱ་མཎྜ་ལ་སཱུ་ཏྲ་ཎཱ་ཡ་ཧཱུྃ། ཞེས་པའི་སྔགས་ཀྱིས་རྣམ་པར་སྣང་མཛད་ལ་གསོལ་བ་གདབ་བོ། །དེ་ནས་མིང་རྗེས་ལ་ར་ཏྣ་སཾ་བྷ་བ་ལ་སོགས་པ་ཡང་ངོ་། །ཛ་ཡིག་ལས་བྱུང་བའི་ཟླ་བ་དང་ཉི་མ་སེར་པོ་མིག་གཉིས་
ལ་བཀོད་དེ། ཨོཾ་དཱིཔྟ་དྲྀཥྚཱཾ་ཀུ་ཤི་ཛཿ། ཞེས་བརྗོད་ལ་མིག་གཉིས་རབ་ཏུ་བསྐྱོད་ཅིང་རྫི་མས་དགུག་པ་ནི་འབར་བཞིན་པའི་ལྟ་སྟངས་ཀྱི་ལྕགས་ཀྱུ་ལྟ་བུས་རྣམ་པར་སྣང་མཛད་ལ་སོགས་པ་སྤྲོས་ལ་དེ་རྣམས་བཀུག་ཅིང་བཀུག་ལ་ལག་པ་ན་གནས་པའི་ཐིག་སོ་སོའི་ཁ་དོག་ལ་གཞུག་གོ། །དེ་ལྟ་བུ་དེས་འདི་རྣམས་མེ་
ལོང་ལྟ་བུའི་ཡེ་ཤེས་ལ་སོགས་པ་ཡེ་ཤེས་ལྔའི་བདག་ཉིད་དོ། །དེ་ནས་སློབ་མ་རྣམས་རྣམ་པར་སྣང་མཛད་དམ་རྡོ་རྗེ་ཤུགས་ཀྱི་གཟུགས་སུ་བྱས་ལ་དེ་དང་སྟབས་ཅིག་ཏུ་དང་པོར་ཐིག་སྐུད་ལྔ་ལྔ་རེ་རེ་རུ་བཀལ་ལ་དེ་ནས་དེ་ལྟར་བཀལ་པ་ལྔ་སྐུད་པ་གཅིག་ཏུ་བྱ་བ་ནི། ཨོཾ་ཨཱཿཨ་ནྱོ་ནྱ་ཨ་ནུ་ག་ཏཿསརྦ་དྷརྨཱ་སྤ་ར་སྤ་རཱ་ནུ་པྲ་ཝིཥྚཿ
སརྦ་དྷརྨཱ་ཨ་དྱན་ཏཱ་ནུ་པྲ་ཝཥྚིཿསརྦ་དྷརྨཱཿཨོཾ་ཨཱཿཧཱུྃ་ཞེས་བརྗོད་ཅིང་སྲིད་དུ་དཀྱིལ་འཁོར་གྱི་ཉིས་འགྱུར་ལ་སྦོམས་སུ་སློབ་དཔོན་གྱི་ནས་ཀྱི་ཚད་དུ་བཀལ་བར་བྱའོ། །དེ་ནས་དཀྱིལ་འཁོར་གྱི་ནུབ་ཀྱི་ཕྱོགས་ཀྱི་ས་གཞི་ལ་ཁ་ཤར་དུ་ཕྱོགས་ཏེ་རྡོ་རྗེའི་ཐིག་མེ་ཏོག་ལ་སོགས་པས་ཡང་དག་པར་མཆོད་ལ་དེ་ནས་ཤྲཱི་ཁཎྜ་འབྲས་སཱ་ལུའི་
ཕྱེ་མ་ལ་སོགས་པ་ལ་སྦགས་ཏེ་སློབ་དཔོན་གྱི་ལག་པ་གཡོན་པས་སྐུད་པ་བསྡུས་ལ་ནུབ་ཏུ་གནས་ཏེ། ཁ་ཤར་དུ་ཕྱོགས་པས་དཀྱིལ་འཁོར་གྱི་ས་གཞི་ལ་བརྐྱང་སྟེ་སྔགས་འདི་བརྗོད་པར་བྱའོ། །ཨོཾ་ཨཱཿཧཱུྃ་ཀཱ་ཡ་བཱཀ་ཙིཏྟ་ཨེ་ཀ་བྷཱུ་ཏ། སརྦ་དྷརྨཱ། ཨེ་ཀཱ་ཀཱ་རེ་ཎ་བཛྲ་ས་ཏྭ་ཧཾ་བཛྲ་བྷཱུ་མི་སཱུ་ཏྲ་ཡཱ་མི་ཧུྃ་ཨཱཿ
ཕཊ་ཅེས་པ་དང་། དེ་ནས་ཡང་། ཨོཾ་བཛྲ་སཱུ་ཏྲཱ་ཨེ་ཀཱ་ཀཱ་ར་སྭ་རུ་པེ་ཎ་ཛཿཛཿཛཿསརྦ་དྷརྨཱ་ན་སཱུ་ཏྲ་ཨོཾ་ཨཱཿ་ཧུྃ་ཧོ་ཧཾ་ཀྵ་ཕཊ། ཅེས་པས་རྐང་པ་གཡོན་པས་ཕྱེད་ཀྲུང་བཅས་ནས་གཡས་པ་ས་ལ་བཞག་སྟེ་སློབ་མ་དེ་ལས་བཟློག་པས་སོ། །སློབ་དཔོན་ལྷོའི་ས་གཞི་ལ་གནས་ནས། །སློབ་མ་བྱང་གི་ས་
གཞི་ལ་གནས་ཏེ། ཤར་དང་ཤར་མིན་དང་། ལྷོ་དང་བྱང་གི་ཚངས་ཐིག་གཉིས་ཡོངས་འཇོམས་སྤངས་ནས་ལྟེ་བའི་ཐད་སོར་ནམ་མཁའི་ཐིག་འདེབས་པ་པོས་རྡོ་རྗེ་དང་བཅས་པའི་ལག་པ་གཡས་པའི་མཐེ་བོང་གི་གུང་མོས་སྐུད་པ་དང་བཅས་པའི་སེ་གོལ་གདབ་བོ། །ཐིག་རྣམས་འདེབས་པའི་དུས་

སུ། ཨོཾ་བཛྲ་ས་མ་ཡ་ཧཱུྃ་སཱུ་ཏྲཾ་མཱ་ཏི་ཀྲ་མ་ཧཱུྃ་ཧཱུྃ་ཨོཾ་སྭ་ཨཱཿ། ཞེས་བརྗོད་པའི་སྒྲས་ནམ་མཁའི་ཁམས་ཐམས་ཅད་ཁྱབ་པའི་དེ་བཞིན་གཤེགས་པ་བལྟའོ། །དེ་རྣམས་འོངས་ཏེ་སྐུད་པ་ལ་ཐིམ་པར་བསམ་མོ། །དེ་ནས་ནམ་མཁའི་ཐིག་གཉིས་ཇི་ལྟ་བར་ས་གཞི་ལ་ཚངས་པའི་
ཐིག་གཉིས་ཀའི་ལག་པ་སྐུད་པ་དང་བཅས་པ་མཉམ་པར་ཕབ་སྟེ་གདབ་པར་བྱའོ། །དེ་ལྟར་སློབ་དཔོན་མེ་མཚམས་གནས་ཏེ་རླུང་མཚམས་ཀྱི་ཐིག་གོ། །བདེན་བྲལ་གནས་ཏེ་དབང་ལྡན་མཚམས་ཀྱི་ཐིག་གོ། །སློབ་མ་དེ་ལས་བཟློག་པར་གནས་སོ། །ཐིག་སྐུད་ཆད་ན་བླ་མ་འཇིག་སྟེ། གཞན་ཡང་
ཡོངས་སུ་འཇོམས་བྱེད་འགོམས་ན་བུ་རྣམས་དེ་བཞིན་འགྱུར། །ཞེས་པའི་དོན་གྱིས་ལེགས་པར་གདབ་པར་བྱའོ། །དེ་ནས་ཚངས་ཐིག་ལས་གཡས་དང་གཞན་པའི་ཕྱོགས་སུ་གཙོ་བོའི་པདྨའི་ལྟེ་བ་དང་སྒོའི་པདྨའི་དོན་དུ་ཐིག་གཉིས་པ་གདབ་པའོ། །དེ་ལས་ཆ་གཅིག་སྤངས་པར་སྒོ་ཁྱུད་ཀྱི་ནང་གི་རྩིག་པའི་
དོན་དུའོ། །དེ་ལས་ཆ་གཅིག་སྤངས་པ་ཀ་བའི་དོན་དུའོ། །དེ་ལས་ཆ་ཕྱེད་སྤངས་པ་ཕྱིའི་རྩིག་པའི་དོན་དུའོ། །དེ་ལས་གཙོ་བོའི་པདྨའི་འདབ་མའི་དོན་དུ་ཕྱེད་དང་བཅས་པའི་ཆ་གཉིས་པའོ། །དེ་ནས་ཆ་གཅིག་སྤངས་པ་རྡོ་རྗེ་ཕྲེང་བའི་དོན་དུའོ། །དེ་ལས་ཆ་ཕྱེད་སྤངས་པར་ལོགས་ཀྱི་ནང་གི་རྩིག་པའི་དོན་
དུའོ། །དེ་ལས་ཕྱེད་དང་བཅས་པའི་ཆ་གཅིག་གིས་ལོགས་ཀྱི་ཕྱིའི་རྩིག་པའི་ཐིག་གོ། །དེ་ལས་ཕྱེད་དང་བཅས་པའི་ཆ་གཅིག་ལ་རྟ་བབས་ཀྱི་ཀ་བའི་བར་གྱི་ཐིག་གོ། །དེ་ལས་ཆ་ཕྱེད་སྤངས་པར་ལྷ་སྣམ་ཀྱི་པདྨའི་ཐིག་གོ། །དེ་ལས་ཆ་གཅིག་སྤངས་པ་རྡོ་རྗེ་ཕྲེང་བའི་ཐིག་གོ། །རྡོ་རྗེ་ཕྲེང་བའི་ཐིག་
གཉིས་ཀྱི་བར་དུ་ལྷ་སྣམ་ཀྱི་པདྨའི་ཆ་བཞི་པའོ། །དེ་དག་གི་ལོགས་དག་ལ་ཀ་བ་དག་གི་རྒྱ་ལ་ཆ་གཅིག་པ་དཔངས་སུ་ཆ་བཞི་པའོ། །དེ་དག་གི་ལོགས་དག་ལ་བུམ་པའི་གནས་རྒྱ་ལ་ཆ་གསུམ་པ་དཔངས་སྔ་མ་དང་མཚུངས་པའོ། །དེ་དག་གི་ལོགས་དག་ལ་ཀ་བ་དག་གོ། །ཕྱི་རོལ་གྱི་རྡོ་རྗེ་ཕྲེང་བའི་ཐིག་གི་ཕྱི་
རོལ་ལས་ཆ་ཆུང་བདུན་སྤངས་པ་ལ་ཐིག་གདབ་བོ། །དེ་ལས་ཆ་བཞི་སྤངས་པ་ལ་ལྷ་རྣམས་ཀྱི་སྣམ་བུའི་ཐིག་གོ། །དེ་ལས་ཆ་གཅིག་སྤངས་པ་ལ་རྩ་བའི་ཐིག་སྟེ་ཟུར་ཐིག་གི་བར་དུའོ། །རྩ་བའི་ཐིག་གི་བར་ནི་ཐུགས་ཀྱི་དཀྱིལ་འཁོར་རོ། །དེ་ལྟར་གསུང་དང་སྐུའི་དཀྱིལ་འཁོར་ལ་ཡང་ངོ་། །ཚངས་པའི་

ཐིག་ལས་གཡས་དང་གཡོན་གྱི་ཐིག་གཉིས་དབྱི་བར་བྱས་པས་ཆ་དྲུག་པ་འཁོར་ལོའི་བརྒྱད་ཆ་ནི་སྒོ་རུ་འགྱུར་རོ། །སྒོ་ཁྱུད་དང་ལོགས་དང་ངོས་རྣམས་ནི་སྒོ་དང་འཚམ་མོ། །རྩ་བའི་ཐིག་ལས་ཕྱེད་དང་བཅས་པའི་ཆ་གཅིག་སྤངས་པ་རྩིག་པའི་ཐིག་གོ། །དེ་ལས་ཆ་གསུམ་སྤངས་པ་འདོད་ཡོན་གྱི་ཐིག་གོ། །
དེ་ནས་ཕྱེད་དང་བཅས་པའི་ཆ་གཅིག་སྤངས་པ་རིན་པོ་ཆེ་ཕ་གུའི་ཐིག་གོ། །དེ་ལས་ཆ་གསུམ་སྤངས་པ་དྲ་བ་ཕྱེད་པའི་ཐིག་གོ། །དེ་ནས་ཕྱེད་དང་བཅས་པའི་ཆ་གཅིག་སྤངས་པ་བ་གུ་ལའི་སྣམ་བུའོ། །དེ་ཉིད་དང་མཚུངས་པ་ཀྲ་མ་ཤིཪྵའོ། །འདི་རྣམས་མ་ལུས་པ་ཟུར་ཐིག་ནས་ཟུར་ཐིག་གི་ཚད་ཀྱིས་སོ། །དེ་
ནས་ཀ་བའི་སྟེང་དུ་རྟ་བབས་སྒོའི་སུམ་འགྱུར་རོ། །དེ་ཉིད་སུམ་བརྩེགས་བྱས་ཏེ་དང་པོ་ལ་ཆ་དྲུག་པའོ། །གཉིས་པ་ལ་ཕྱེད་དང་བཅས་པའི་ཆ་བཞིའོ། །གསུམ་པ་ལ་ཕྱེད་དང་བཅས་པའི་ཆ་གསུམ་མོ། །ཧར་མི་ལ་གཉིས་སོ། །བུམ་པ་ལ་ཡང་ཆ་གཉིས་སོ། །དེ་ཡང་རྩེག་དང་པོའི་ཀ་བའི་སྟེང་ལ་སྣམ་
བུའི་ཞིང་ལ་ཆ་ཉི་ཤུ་རྩ་བཞི་པ་དཔངས་ལ་ཆ་གཅིག་པའོ། །དེའི་སྟེང་དུ་མ་ད་ཨ་པ་ར་ཎ་ཆ་གཅིག་པ་ཞེང་ལ་ཆ་བཅུ་དྲུག་པའོ། །དེའི་སྟེང་དུ་ཆ་བཞི་པ་གྲུ་བཞི་པའི་དབུས་སུ་མཆོད་པའི་ལྷ་མོའི་གནས་སོ། །དེའི་ལོགས་དག་ལ་ཀ་བ་ཆ་གཅིག་པ་དག་གོ། །དེ་དག་གི་ལོགས་དག་ལ་ཡང་མཆོད་པའི་ལྷ་མོའི་གནས་དག་
གོ། །དེ་དག་གི་ལོགས་དག་ལ་ཡང་ཀ་བ་དག་གོ། །དེ་དག་གི་ལོགས་དག་ལ་རྟ་བབས་ཀྱི་ཀ་བ་དག་གི་སྟེང་དུ་མཆེ་བ་ཅན་གྱི་གླང་པོའི་མགོ་སེང་གེས་མནན་པ་དག་གི་སྟེང་དུ་སྣམ་བུའི་ཞེང་ལ་ཆ་བཅོ་བརྒྱད་པ་དཔངས་སུ་ཆ་གཅིག་པ། དེའི་སྟེང་དུ་མད་ཨ་པ་ར་ཎ་དཔངས་ལ་ཆ་གཅིག་ཞེང་ལ་ཆ་བཅུ་གཉིས་
པའོ། །དེའི་སྟེང་གི་སྣམ་བུའི་དཔངས་སུ་ཆ་གཉིས་པ་ཞེང་ལ་ཆ་བཅུ་གཉིས་པའོ། །དེ་ཉིད་ལ་བཞི་ཆས་མ་གང་བའི་ཆ་གཅིག་པའི་ཀ་བ་རྣམས་སོ། །ཀ་བའི་བར་རྣམས་སུ་ལྷ་གསུམ་གྱི་གནས་ཆ་གསུམ་གསུམ་པའོ། །ཕྱིའི་ཀ་བ་དག་གི་ལོགས་དག་ལས་སཱ་ལ་བྷཉྫི་ཀཱ་དག་གོ། །དེ་དག་གི་མགོ་བོའི་
སྟེང་དུ་ཆ་ཕྱེད་པའི་སྣམ་བུ་ཞེང་ལ་ཆ་བཅོ་ལྔ་པའོ། །དེའི་སྟེང་དུ་མ་ད་ཨ་པ་ར་ཎ་ཆ་གཅིག་པ་ཞེང་ལ་ཆ་བརྒྱད་པའོ། །དེའི་སྟེང་དུ་སྣམ་བུའི་དཔངས་ལ་གཉིས་པ་ཞེང་ལ་ཆ་བརྒྱད་པའོ། །དེ་ཉིད་ལ་ཀ་བ་སོ་སོ་ལ་ཆ་ཕྱེད་དང་བཞིའོ། །ཀ་བའི་བར་རྣམས་སུ་ལྷའི་གནས་རྣམས་སོ་སོ་ལ་ཆ་གཉིས་གཉིས་

པ་གསུམ་མོ། །ཕྱིའི་ཀ་བ་དག་གི་ལོགས་དག་ཏུ་ས་ལ་བྷཉྫ་ཀཱ་གཉིས་སོ། །དེའི་སྟེང་དུ་དཔངས་ལ་ཆ་ཕྱེད་པའི་སྣམ་བུའི་ཞེང་ལ་ཆ་བཅུ་གཉིས་པའོ། །དེའི་སྟེང་དུ་ཧར་མིའི་ཞེང་ལ་ཆ་བརྒྱད་པའོ། །དེའི་སྟེང་དུ་བུམ་པའོ། །དེ་དག་གི་གཡས་དང་གཡོན་དུ་རྒྱལ་མཚན་གྱི་
དབྱུག་པའི་གནས་སོ། །དེ་ལྟར་སྣམ་བུ་ཐམས་ཅད་ཀྱི་རྩེ་མོ་ལ་དྲིལ་བུ་དང་རྔ་མ་དང་མེ་ལོང་དང་རྒྱལ་མཚན་དང་དར་དཔྱངས་རྣམས་སོ། །དེ་ནས་ཐུགས་ཀྱི་དཀྱིལ་འཁོར་འདིའི་རྩ་བའི་ཐིག་གི་ཕྱི་རོལ་དུ་གསུང་གི་དཀྱིལ་འཁོར་གྱི་ཕྱོགས་ཀུན་དུ་ཆ་བཅུ་གཉིས་བཅུ་གཉིས་ཀྱི་གནས་ལ་ཐིགས་ཀྱི་དཀྱིལ་འཁོར་གྱི་
རྩིག་པ་ལ་སོགས་པ་ནས་ཀྲ་མ་ཤིཪྵའི་བར་གྱིས་མནན་ཏེ་གནས་སོ། །དེའི་ཕྱི་རོལ་དུ་ཆ་དྲུག་སྤངས་ཏེ་ཐིག་གོ། །དེ་ལས་ཆ་དྲུག་སྤངས་པར་ལྷའི་སྣམ་བུའི་ཐིག་གོ། །སྣམ་བུ་དེ་ལས་པདྨ་ཆ་བཞི་པ་སྟེ་འོན་ཀྱང་ཕྱོགས་ལ་གནས་པ་རྣམས་ཐུགས་ཀྱི་དཀྱིལ་འཁོར་གྱི་རྟ་བབས་ཀྱི་རྩེགས་གཉིས་པའི་མ་ད་
ཨ་པ་ར་ཎ་དང་ཀ་བ་གཉིས་ཀྱི་ཆ་ཕྱེད་ཕྱེད་པ་བསལ་ལ་ཆ་བཞིའི་གནས་ལ་དགོད་པར་བྱའོ། །ལྷ་མོ་རྣམས་མེད་ན་སྔ་མ་ལྟར་རོ། །དེ་ནས་ལྷ་རྣམས་ཀྱི་སྣམ་བུ་ལས་ཆ་གཅིག་དཔངས་ལ་རྩ་བའི་ཐིག་གོ། །དེ་ཡང་ཐིག་གསུམ་ཟུར་ཐིག་གི་བར་དུའོ། །རྩ་བའི་ཐིག་ལས་ཚངས་ཐིག་དག་གིས་གཡས་
གཡོན་གྱི་ཆ་དྲུག་དྲུག་བསུབས་བས་སྒོ་རྣམས་སོ། །དེ་ནས་སྒོ་ཁྱུད་ལ་སོགས་པ་རྟ་བབས་ཀྱི་བར་རྣམས་ཐུགས་ཀྱི་དཀྱིལ་འཁོར་གྱི་སྒོ་ཁྱུད་ལ་སོགས་པའི་ཉིས་འགྱུར་གྱི་ཚད་ཀྱིས་སོ། །གསུང་གི་དཀྱིལ་འཁོར་གྱི་རྩ་བའི་ཐིག་གི་ཕྱི་རོལ་དུ་སྐུའི་དཀྱིལ་འཁོར་ཏེ། དེའི་ཕྱོགས་ཀུན་དུ་ཆ་ཉི་ཤུ་རྩ་བཞིའི་
གནས་ལ་གསུང་གི་དཀྱིལ་འཁོར་གྱི་རྩིག་པ་ལ་སོགས་པ་ཀྲ་མ་ཤིཪྵའི་བར་གྱིས་མནན་ཏེ་གནས་སོ། །དེའི་ཕྱི་རོལ་དུ་ཆ་བཅུ་སྤངས་ཏེ་ཐིག་གོ། །དེ་ནས་ལྷ་རྣམས་ཀྱི་སྣམ་བུའི་ཐིག་ཆ་བཅུ་གཉིས་པའོ། །ལྷའི་སྣམ་བུ་ལ་པདྨ་བཅུ་གཉིས་ཏེ། སོ་སོ་ལ་ཆ་བཅུ་གཉིས་པའོ། །དེ་ལྟར་དེ་རྣམས་ཆ་བདུན་དང་
ལྡན་པར་བྱས་ལ་དབུས་ཀྱི་ཆ་ལ་ལྟེ་བའོ། །དང་པོ་རྣམས་འདབ་མ་བཞི་པའོ། །གཉིས་པ་རྣམས་འདབ་མ་བརྒྱད་པའོ། །གསུམ་པ་རྣམས་འདབ་མ་བཅུ་དྲུག་པའོ། །དེ་ལྟར་གསུམ་པ་ལ་འདབ་མ་ཉི་ཤུ་རྩ་བརྒྱད་དོ། །ལྷ་རྣམས་ཀྱི་སྣམ་བུའི་ཐིག་ལས་ཆ་གཉིས་པ་སྤངས་པ་རྩ་བའི་ཐིག་སྟེ་ཐིག་གསུམ་ཟུར་

གྱི་བར་རོ། །རྩ་བའི་ཐིག་ལས་ཚངས་པའི་ཐིག་གི་གཡས་དང་གཡོན་རྣམས་སུ་ཆ་བཅུ་གཉིས་སྔ་མ་ལྟར་གསུངས་པའི་སྒོའི་ཚད་དོ། །དེ་ནས་སྒོ་ཁྱུད་ལ་སོགས་པ་རྟ་བབས་ཀྱི་མཐར་ཐུག་པ་གསུང་གི་དཀྱིལ་འཁོར་གྱི་སྒོ་ཁྱུད་ལ་སོགས་པའི་ཉིས་འགྱུར་གྱི་ཚད་དོ། །གསུང་གི་དཀྱིལ་འཁོར་གྱི་རྟ་བབས་ཀྱི་
ཕྱི་རོལ་དུ་སྐུའི་དཀྱིལ་འཁོར་གྱི་ནང་རྣམས་སུ་ཆ་བཅུ་གཉིས་ལ་ཤིང་རྟ་གནས་སོ། །དེ་ནས་པདྨའི་དཀྱིལ་འཁོར་ལ་ཆ་ཉི་ཤུ་རྩ་བཞི་པའོ། །དེ་ནས་སའི་དཀྱིལ་འཁོར་ལ་ཆ་བཅུ་གཉིས་པའོ། །དེ་ནས་ཆུ་དང་མེ་དང་རླུང་གི་དཀྱིལ་འཁོར་རྣམས་ལ་ཆ་ཉི་ཤུ་རྩ་བཞི་པའོ། །ནམ་མཁའ་དཀྱིལ་འཁོར་ལ་ཆ་བཅུ་གཉིས་
པའོ། །དེ་ནས་མེ་རིའི་དཀྱིལ་འཁོར་ལ་ཆ་ཉི་ཤུ་རྩ་བཞི་པའོ། །དེ་ལྟར་པདྨའི་དཀྱིལ་འཁོར་ལ་སོགས་པ་དཀྱིལ་འཁོར་བདུན་རྣམས་རིམ་པ་བཞིན་བསྐོར་བ་ནི་མེ་རིའི་ཕྱིའི་བར་དུ་ལྟེ་བའི་ཕུར་བུ་ལ་བཏགས་ཏེ་དེ་ལྟར་བརྒྱད་དོ། །གལ་ཏེ་དེ་ལྟར་དཀྱིལ་འཁོར་རྫོགས་པར་བྲི་བ་མ་གྲུབ་ན་དབང་གི་དོན་དུ་ཐུགས་ཀྱི་
དཀྱིལ་འཁོར་ཙམ་བཀའ་སྩལ་བའི་ཕྱིར་རོ། །དེ་ཡང་དབང་གི་དོན་རྣམས་དཀྱིལ་འཁོར་གྱི་དོན་དུ་རིགས་ཀྱི་དབང་ལས་ཕྱིའི་དཀྱིལ་འཁོར་ལ་རབ་ཏུ་བྲལ་བར་འགྱུར་ཞེས་སོ། །ཡང་དེ་བཞིན་དུ་སྒོ་ལ། ཧི་ཡིག་ལས་བྱུང་ཁྲོ་བོའི་ལྟེ་བ་ཡིས། །ཞེས་པའི་བཀའ་སྩལ་གྱིས་བཅོམ་ལྡན་འདས་ཀྱི་ཆ་བྱད་ལ་བཟུང་སྟེ། ཐར་
པའི་སྒོ་སྒྲིབ་པས་རྣམ་པར་བཅིང་བའི་བསམ་པ་དང་ལྡན་པས་གཡོན་དང་གཡས་ཀྱི་མིག་དག་ཏུ་ཧི་ཡིག་དག་ལས་ཟླ་བ་དང་ཉི་མ་བསྐྱེད་ལ་ཁྲོ་བོའི་ལྟ་བས་ཐམས་ཅད་དུ་ལྟ་ཞིང་ཧིཿཧིཿཞེས་བརྗོད་ཅིང་རྩ་བའི་ཐིག་སོགས་པ་རང་རང་གི་ཤེས་རབ་ཀྱིས་བརྟགས་ལ་དབྱི་བར་བྱའོ། །དེ་ནས་གཏོར་མ་དང་མཆོད་པ་ལ་སོགས་པ་སྔོན་
དུ་སོང་བ་དང་། ཨོཾ་ཨཱཿཧཱུྃ་བཛྲ་མུཿཞེས་པས་ཡེ་ཤེས་ཀྱི་ཐིག་གཤེགས་སུ་གསོལ་བ་ནི་ནམ་མཁའ་ལ་གནས་པའི་དེ་བཞིན་གཤེགས་པའི་ཐུགས་ཀར་རོ། །ཁ་དོག་ལྔའི་སྐུད་པ་གནས་གང་ཡང་རུང་བར་གཞག་པར་བྱའོ། །འདི་ནི་ཐིག་གདག་པའི་ཆོ་གའི་རིམ་པའོ།། །།དེ་ནས་གཏོར་མ་དང་མཆོད་པ་
ལ་སོགས་པ་བྱ་སྟེ། ཨ་ཨཾ་རཾ་ཨུ་ལྀའི་ས་བོན་རྣམས་ལས་རྫོགས་པའི་ཚོན་གྱི་བྱེ་བྲག་ཁ་དོག་ལྔ་རྣམ་པ་རིམ་པ་བཞིན་དུ། ཨོཾ་ཨཱཿ་ཧུྃ་ཧོ་ཧཾ་ཀྵཿརྣམས་ལས་རྫོགས་པའི་སངས་རྒྱས་རྣམ་པར་སྣང་མཛད་ལ་སོགས་པའི་རང་བཞིན་དུ་བསྒོམས་ལ་ནམ་མཁའ་ལ་གནས་པའི་དེ་བཞིན་གཤེགས་པ་ཐམས་ཅད་ཀྱི་

ཐུགས་ཀ་ནས་ཨོཾ་ཡིག་ལ་སོགས་པ་ལས་ཡོངས་ས་སུ་རྫོགས་པའི་ཡེ་ཤེས་ཀྱི་ཚོན་རྣམས་སྐུད་པ་སྦྱང་བའི་དུས་ལྟར་བཀུག་སྟེ་གཞུག་གོ། །དེ་དང་བཅས་པ་རོ་གཅིག་ཏུ་གྱུར་པ་ཡེ་ཤེས་ཀྱི་ཚོན་དེ་རྣམས་ལ་ཨོཾ་ཡིག་ལ་སོགས་པའི་སྔགས་བརྗོད་ནས་ཡང་། ཨོཾ་བཛྲ་ཙི་ཏྲ་ས་མ་ཡ་ཧཱུྃ།
ཞེས་པའི་སྔགས་བརྒྱ་རྩ་བརྒྱད་བཟླས་སོ། །དེ་ལྟར་འབར་བའི་ལྟ་སྟངས་ཀྱིས་སོ་སོ་ལ་ཧི་ཡིག་བཀོད་དེ་ཡང་དག་པར་སྦྱར་རོ། །ཡང་ཨོཾ་རཾ་ཛོ་བ་ཧུ་ལ་ཡེ་ན་སཏྭན་སཏྭ་བུདྡྷ་ཤྩ་བྷ་ག་ཝཱ་ན་ཏཿ། སཏྭ་རཱ་གཱ་ནུ་རཀྟ་སྟེ་ན་ས་ཏྱེན་ས་ར་ཛོ་ཛྭ་ལ་ཏུ། ཞེས་པའི་བདེན་པའི་བྱིན་གྱི་རླབས་ཀྱིས་སྤར་བར་
བྱའོ། །དེ་ཉིད་ལྷའི་རྣལ་འབྱོར་གྱི་དཀའ་ཐུབ་ཀྱིས་འབར་བར་བྱའོ། །དེ་ནས་དཀྱིལ་འཁོར་གྱི་ལྟེ་བའི་དབུས་སུ་ཧཱུྃ་ཞེས་པའི་སྔགས་བརྗོད་ཅིང་གདོན་པར་བྱ་ཞིང་རང་གི་ལག་པའི་རྡོ་རྗེ་ལ་བློས་ཐིམ་པར་བསམ་མོ། །ཁུང་བུ་ཚོན་སྣ་ལྔ་ཡིས་དགང་བར་བྱས་པ་དང་། དྲིལ་བུ་དཀྲོལ་ཞིང་རྡོ་རྗེའི་གླུ་བླངས་
ཏེ། མཚན་མ་ངན་པ་བཅོམ་ནས། འདི་ནི་ཆོས་དབྱིངས་དག་པ་སྟེ། །སེམས་ཅན་ཁམས་རྣམས་རབ་ཏུ་སྒྲོལ། །རྡོ་རྗེ་འཛིན་པའི་རྒྱལ་པོ་ཁྱོད། །དེ་བཞིན་གཤེགས་པ་ཀུན་གྱི་གནས། །ཉེས་པ་ཐམས་ཅད་རྣམ་པར་གྲོལ། །འཁོར་ལོའི་དབུས་སུ་ཡང་དག་གནས། །དེ་ལྟར་ཆོས་ཀྱི་དབྱིངས་ཤིན་
ཏུ་རྣམ་པར་དག་པར་བསྒོམས་ནས། དང་པོར་དཀྱིལ་འཁོར་གྱི་དབུས་སུ་བསྡད་ལ་ལག་པ་གཡོན་པ་རྡོ་རྗེ་འཆང་བར་བྱས་ལ། ཨོཾ་བཛྲ་རཾ་ག་ས་མ་ཡ་ཧཱུྃ་ཞེས་པའམ། ཡི་གེ་དྲུག་པ་བརྗོད་ཅིང་བྱང་ཤར་མཚམས་ནས་བརྩམས་ཏེ་ཤར་དུ་ཁ་ཕྱོགས་པས་ར་བ་གསུམ་བྲི་བར་བྱའོ། །དེ་ཡང་། སྦོམ་པོས་ནད་བྱེད་
པ་དང་རེ་ཁཱ་ངན་དང་ཕྲ་བས་རྫས་རྣམས་འབྲི་བར་རབ་ཏུ་གསལ་བར་འགྱུར། །ཆད་པས་འཆི་བ་དང་ནི་འཁྱོག་པོས་མི་ཡི་བདག་པོ་སྐྱེ་བོར་བཅས་པ་སྐྲོད་དེ་དེ་བཞིན་དུ། །མཚན་མ་དང་ནི་ཉི་མ་ཟླ་བ་ཆད་ན་འཇིག་འཇོམས་སྔགས་པ་རྣམས་ལ་དངོས་གྲུབ་ཡོད་པ་མིན། །རྡུལ་ཚོན་རྣམ་པར་འདྲེས་པས་རིགས་དག་
འཆད་དེ་རྒྱལ་བའི་རིགས་ཀྱི་དཀྱིལ་འཁོར་དུ་ནི་རིག་པར་བྱ། །ཞེས་པའི་དོན་ནི་བདག་ཉིད་ཀྱིས་ཏེ་གཞན་གྱིས་ཀྱང་དེ་ལྟར་བྲི་བར་བྱའོ། །འདིར་གཙོ་བོའི་ཞལ་གྱི་དབྱེ་བས་ཕྱོགས་ཀྱི་རྣམ་པར་དབྱེ་བ་ལ་ཚོན་གྱི་ཁ་དོག་བྱེ་བྲག་སྟེ། དེ་ལྟར་ཐུགས་ཀྱི་འཁོར་ལོའི་ནང་གི་རྡོ་རྗེ་ཕྲེང་བ་གཉིས་པའི་བར་ནག་

པོའོ། །ཐུགས་དང་གསུང་དང་སྐུ་རྣམས་ཀྱི་ཤར་གྱི་ས་གཞི་ནག་པོའོ། །ལྷོ་རྣམས་དམར་པོའོ། །བྱང་རྣམས་དཀར་པོའོ། །ནུབ་རྣམས་སེར་པོའོ། །འདོད་ཡོན་རྣམས་དཀར་པོའོ། །རིན་ཆེན་ཕ་གུ་རྣམས་དམར་པོའོ། །དྲ་བ་དང་། དྲ་བ་ཕྱེད་པ་དང་། བཀུ་ལི་དང་། ཀྲ་མ་ཤིཪྵ་རྣམས་དཀར་
པོ་སྟེ་གཞི་ནག་པོའོ། །རྟ་བབས་ཀྱི་ཀ་བ་རྣམས་སེར་པོའོ། །ལས་ཐམས་ཅད་པ་ལ་གཙོ་བོའི་པདྨ་ལྗང་གུའོ། །ཞི་བ་ལ་སོགས་པ་ལ་དཀར་པོ་ལ་སོགས་པའི་ཁ་དོག་ཏུ་འགྱུར་རོ། །རྡོ་རྗེའི་ཕྲེང་བ་ནག་པོའོ། །ཀ་བ་རྣམས་ན་ཤར་དུ་རལ་གྲི་ནག་པོ་རྣམས་སོ། །ལྷོར་རིན་པོ་ཆེ་དམར་པོ་རྣམས་སོ། །བྱང་དུ་པདྨ་དཀར་པོ་རྣམས་སོ། །
ནུབ་ཏུ་འཁོར་ལོ་སེར་པོ་རྣམས་སོ། །པདྨ་ལ་གནས་པའི་བུམ་པ་བརྒྱད་པོ་དཀར་པོ་པདྨའི་འདབ་མ་ལ་ཁ་ཕྱོགས་པའོ། །པདྨ་ཐམས་ཅད་ཀྱི་ལྟེ་བ་སུམ་ཆ་པའོ། །རྡོ་རྗེ་ཕྲེང་བ་གཉིས་པ་ལྗང་གུའོ། །ལྷའི་སྣམ་བུ་རྣམས་དཀར་པོའོ། །ར་བ་གསུམ་ནི་དཀར་པོ་དང་། དམར་པོ་དང་། ནག་པོ་རྣམས་སོ། །
ར་བ་དེ་རྣམས་ཀྱི་སའི་ཆ་དགུ་ལས་ཆ་རེ་རེ་དོར་ཏེ་ཆ་གཉིས་གཉིས་ལ་ར་བའོ། །སྒོ་ཁྱུད་རྣམས་སུ་རིན་པོ་ཆེ་རྡོ་རྗེས་སྤྲས་པའོ། །རྟ་བབས་རྣམས་ཁ་དོག་སྣ་ཚོགས་པའོ། །གསུང་གི་དཀྱིལ་འཁོར་གྱི་ལྷ་སྣམ་གྱི་སྣམ་བུ་དཀར་པོའོ། །དེ་ཉིད་ལ་པདྨ་བརྒྱད་པོ་ནི་ཉི་མ་དང་ཟླ་བ་དང་བྲལ་བའི་ཕྱོགས་རྣམས་དམར་པོའོ། །
མཚམས་རྣམས་དཀར་པོའོ། །ར་བ་ལྔ་ནི་ནང་ནས་རིམ་གྱིས་ལྗང་གུ་དང་། ནག་པོ་དང་། དམར་པོ་དང་། དཀར་པོ་དང་། སེར་པོ་རྣམས་སོ། །སྐུའི་དཀྱིལ་འཁོར་ནི་གསུང་དང་མཚུངས་པ་ལས་རྟ་བབས་ཀྱི་ཀ་བའི་འོག་རྩིག་པའི་རྩར་གདེངས་ཀ་རྣམས་ཀྱི་གདན་ཏེ་སོ་སོ་ལ་ཆ་བཅུ་གཉིས་པའོ། །དེ་ཡང་ཤར་
ཕྱོགས་སུ་རླུང་གི་དཀྱིལ་འཁོར་ནག་པོ་ཟླུམ་པོ་སྟེང་དུ་རྒྱལ་མཚན་གྱིས་མཚན་པ་དག་གོ། །ལྷོ་ཕྱོགས་སུ་གྲུ་གསུམ་གཡུང་དྲུང་རིས་ཀྱིས་མཚན་པ་དག་གོ། །ནུབ་ཕྱོགས་སུ་གྲུ་བཞི་རྡོ་རྗེས་མཚན་མ་དག་གོ། །བྱང་ཕྱོགས་སུ་ཟླ་ཕྱེད་རྣམ་པ་པདྨས་མཚན་པ་དག་གོ། །ཤར་ཕྱོགས་ཀྱི་གཡས་ཀྱི་ཟླུམ་པོའི་
གཡས་སུ་བདུད་རྩིའི་བུམ་པ་ཀླུའི་རྒྱལ་པོ་རྒྱལ་བའོ། །ནུབ་ཕྱོགས་ཀྱི་གཡོན་གྱི་གྲུ་བཞིའི་གཡོན་དུ་བདུད་རྩིའི་བུམ་པ་རྣམ་པར་རྒྱལ་བའོ། །ཤར་ཕྱོགས་ཀྱི་རྟ་བབས་ཀྱི་རྩེགས་དང་པོའི་གནས་དབུས་མ་ཆོས་ཀྱི་འཁོར་ལོ་དག་དང་། གཡས་དང་གཡོན་དུ་རི་དགས་ཕོ་དང་མོ་རྣམས་ནག་པོའོ། །ལྷོ་ཕྱོགས་སུ་

བུམ་པ་བཟང་པོ་དང་གཡས་དང་གཡོན་དུ་དུང་དང་པདྨ་རྣམས་དམར་པོའོ། །ནུབ་ཏུ་བྱང་ཆུབ་ཀྱི་ཤིང་དང་། གཡས་དང་གཡོན་དུ་མིའམ་ཅི་དང་མིའམ་ཅི་མོ་རྣམས་སེར་པོའོ། །བྱང་དུ་དུཾ་དུ་བྷི་དང་གཡས་དང་གཡོན་དུ་དབྱུག་པ་དང་ཐོབ་དཀར་པོའོ། །པདྨའི་འདབ་མ་ཁ་དོག་ལྔ་སྟེ་
དེ་ཉིད་ལ་མཆོད་པའི་རྫས་རྣམས་དགོད་དོ། །སའི་དཀྱིལ་འཁོར་སེར་པོའོ། །དེའི་དབང་ལྡན་མཚམས་སུ་ཟླ་བའི་དཀྱིལ་འཁོར་གང་བ་ཆ་བཅུ་གཉིས་པའོ། །བདེན་བྲལ་མཚམས་སུ་ཉི་མའི་དཀྱིལ་འཁོར་ནུབ་བཞིན་པའོ། །ཆུའི་དཀྱིལ་འཁོར་དཀར་པོའོ། །མེའི་དཀྱིལ་འཁོར་དམར་པོའོ། །
རླུང་གི་དཀྱིལ་འཁོར་ནག་པོའོ། །དེ་དག་གི་དབུས་སུ་ཆ་ཉི་ཤུ་རྩ་བཞི་ལ་འཁོར་ལོ་རྩིབས་བརྒྱད་པའི་དུར་ཁྲོད་བརྒྱད་བྲི་བར་བྱའོ། །དེ་རྣམས་ཀྱི་ཕྱོགས་རྣམས་དམར་པོ་མཚམས་རྣམས་དཀར་པོའོ། །ཤར་དང་ནུབ་ཀྱི་འཁོར་ལོའི་ཕྱི་རོལ་དུ་སྟོང་པའི་དཀྱིལ་འཁོར་དག་གོ། །དེ་ཡང་དེ་དག་ནི་སྒྲུབ་ཐབས་
ཀྱི་ལེའུར་གསུངས་པ་ལྟར་རོ། །འཁོར་ལོ་བཅུ་ལ་མཚན་མ་གྲི་གུག་བྲི་བར་བྱའོ། །རླུང་གི་དཀྱིལ་འཁོར་ལ་མཚན་མ་སྣ་ཚོགས་དགོད་པར་བྱའོ། །ནམ་མཁའི་དཀྱིལ་འཁོར་གྱི་ཁ་དོག་སྔོན་པོའོ། །དེ་ཉིད་ཀྱི་ཕྱོགས་གཉིས་སུ་ཆ་གསུམ་གསུམ་པ་ཙམ་བསྐོར་བར་བྱའོ། །དབུས་ཀྱི་ཆ་དྲུག་ལ་རྡོ་རྗེའི་
ར་བའོ། །མ་རིའི་ཕྲེང་བ་ཁ་དོག་ལྔའོ། །ཐུགས་ཀྱི་དཀྱིལ་འཁོར་གྱི་ཤར་གྱི་རྡུལ་ཚོན་ནག་པོའི་དཔངས་ལ་ནས་ཀྱི་རྐང་པ་གཅིག་གོ། །ལྷོ་ཕྱོགས་ཀྱི་དམར་པོ་ལ་རྐང་པ་གཉིས་སོ། །ནུབ་ཕྱོགས་ཀྱི་སེར་པོ་ལ་བཞིའོ། །བྱང་ཕྱོགས་ཀྱི་དཀར་པོ་ལ་གསུམ་མོ། །རྩིག་པའི་ཚོན་རྣམས་ནི་སེར་པོའི་
སུམ་འགྱུར་དུ་བྱ་བ་སྟེ་རྡོ་རྗེའི་རབ་ལ་ཡང་ངོ་། །རེ་ཁཱ་གཞན་རྣམས་ནི་ཚོན་སེར་པོ་ཉིས་འགྱུར་རོ། །པདྨ་རྣམས་ནི་སྣམ་བུ་རྣམས་ཀྱི་ཉིས་འགྱུར་རོ། །ཟླ་བ་དང་ཉི་མ་རྣམས་ནི་པདྨ་རྣམས་ཀྱི་ཉིས་འགྱུར་རོ། །དེ་ལྟར་གསུངས་པ་རྣམས་ཀྱི་ཉིས་འགྱུར་གསུང་གི་དཀྱིལ་འཁོར་ལའོ། །དེ་ཉིད་ཀྱི་
ཉིས་འགྱུར་སྐུའི་དཀྱིལ་འཁོར་ལ་སྟེ། ཀྲ་མ་ཤཱིཪྵའི་ཕྱི་རོལ་གྱི་མཆོད་པའི་ས་གཞི་ལ་ནས་གཅིག་གོ། །སའི་དཀྱིལ་འཁོར་ལ་སོགས་པ་རྣམས་རྡོ་རྗེའི་ར་བ་དང་མེ་རི་རྣམས་ཀྱི་དཔངས་སུ་སྐུའི་རྩིག་པའི་ཚད་ཀྱིས་སོ། །ས་གཞི་གཞན་རྣམས་ལ་ཚོན་སུམ་འགྱུར་རོ། །དེ་ལྟར་གཙོ་བོའི་པདྨའི་ལྟེ་བར་ལྟེ་

བ་དང་མཉམ་པའི་སྟེང་དུ་དཀར་པོ་དང་། དམར་པོ་དང་། ནག་པོ་དང་། དམར་པོའི་ཟླ་བ་དང་ཉི་མ་དང་སྒྲ་གཅན་དང་དུས་མེ་རྣམས་ལ་རྡོ་རྗེ་རྩེ་མོ་གསུམ་པ་བཅོམ་ལྡན་འདས་དུས་ཀྱི་འཁོར་ལོའོ། །ཤར་གྱི་འདབ་མ་ལ་སྤོས་སྣོད་ནག་པོའོ། །ལྷོ་ཕྱོགས་སུ་མར་མེ་དམར་པོའོ། །ནུབ་ཕྱོགས་སུ་དུང་སེར་པོའོ། །
བྱང་ཕྱོགས་སུ་ལྷ་བཤོས་དཀར་པོའོ། །མེ་མཚམས་ལ་སོགས་པར་རྔ་ཡབ་ནག་པོ་དང་། དམར་པོ་དང་། སེར་པོ་དང་། དཀར་པོ་རྣམས་སོ། །དེའི་ཕྱི་རོལ་གྱི་དབང་ལྡན་དུ་ཆོས་ཀྱི་དུང་དཀར་པོའོ། །མེ་རུ་ཡིད་བཞིན་གྱི་ནོར་བུ་ནག་པོའོ། །བདེན་དྲལ་དུ་ཆོས་ཀྱི་གཎྜཱི་དམར་པོའོ། །རླུང་དུ་དཔག་བསམ་གྱི་ཤིང་
སེར་པོའོ། །འཕར་མ་གཉིས་པའི་ཤར་ཕྱོགས་ཀྱི་པདྨ་དཀར་པོ་དང་ཉི་མ་དམར་པོའི་སྟེང་དུ་རལ་གྲི་ནག་པོའོ། །མེ་མཚམས་སུ་པདྨ་དམར་པོ་དང་ཟླ་བའི་སྟེང་དུ་ཨུཏྤལ་སྔོན་པོའོ། །ལྷོ་ཕྱོགས་སུ་རིན་པོ་ཆེ་ཆ་དགུ་བ་དམར་པོའོ། །བདེན་བྲལ་དུ་པདྨ་དམར་པོའོ། །ནུབ་ཕྱོགས་སུ་འཁོར་ལོ་སེར་པོའོ།
རླུང་དུ་འཁོར་ལོ་སེར་པོའོ། །བྱང་དུ་པདྨ་དཀར་པོའོ། །དབང་ལྡན་དུ་ཨུཏྤལ་དཀར་པོའོ། །འཕར་མ་གསུམ་པའི་སྒོ་སོ་སོའི་ལོགས་རྣམས་ལ་པདྨ་བརྒྱད་དེ། །དེ་རྣམས་ལ་དྲུག་ལ་ཉི་མའོ། །ནུབ་དང་བྱང་གི་གཡོན་གྱི་ཕྱོགས་ལ་ཟླ་བའོ། །ཟུར་རྣམས་ཀྱི་པདྨ་ལ་ཟླ་བ་བཞིའོ། །དེ་རྣམས་ཀྱི་དབང་ལྡན་
ནས་བརྩམས་ཏེ། མེ་ལོང་དང་། རྡོ་རྗེ་དང་། རལ་གྲི་དང་། གོས་དང་། རྡོ་རྗེ་དང་། རིན་པོ་ཆེ་དང་། བདུད་རྩིའི་སྣོད་དང་། ཆོས་འབྱུང་དང་། འཁོར་ལོ་དང་། དྲིའི་དུང་དང་། པི་ཝང་དང་པདྨ་རྣམས་དཀར་པོ་དང་། ནག་པོ་དང་། ནག་པོ་དང་། ལྗང་གུ་དང་། དམར་པོ་དང་། དམར་པོ་དང་། ལྗང་གུ་དང་། སེར་པ་དང་། སེར་པོ་དང་།
སྔོན་པོ་དང་། དཀར་པོ་རྣམས་སོ། །ཤར་གྱི་སྒོ་ལ་པདྨ་དང་ཉི་མའི་སྟེང་དུ་རལ་གྲི་ནག་པོའོ། །ལྷོ་ཕྱོགས་སུ་དབྱུག་པ་དམར་པོའོ། །ནུབ་ཕྱོགས་སུ་པདྨ་སེར་པོའོ། །བྱང་ཕྱོགས་སུ་ཐོ་བ་དཀར་པོའོ། །དེ་རྣམས་ལས་ཉི་མའི་དཀྱིལ་འཁོར་རྣམས་ཀྱི་པདྨ་དཀར་པོ་རྣམས་སོ། །
ཟླ་བའི་དཀྱིལ་འཁོར་རྣམས་ཀྱི་པདྨ་དམར་པོ་རྣམས་སོ། །ཤར་ཕྱོགས་ཀྱི་འདོད་ཡོན་གྱི་རྟ་བབས་ཀ་བའི་འོག་གི་གཡོན་དུ་དུང་ནག་པོའོ། །གཡས་སུ་མེ་ཏོག་གི་ཕྲེང་བ་སྔོན་པའོ། །ལྷོ་ཕྱོགས་སུ་སྤོས་སྣོད་དང་མར་མེ་དམར་པོའོ། །ནུབ་ཕྱོགས་སུ་ཅོད་པན་དང་མུ་ཏིག་གི་ཕྲེང་བ་སེར་པོའོ། །བྱང་

ཕྱོགས་སུ་འབྲས་བུ་དང་བདུད་རྩིས་གང་བའི་སྣོད་དཀར་པོའོ། །དེ་ལྟར་འདོད་ཡོན་སྣམ་བུ་ཀུན་ལ་གླུ་མ་ལ་སོགས་པའི་མཆོད་པའི་ལྷ་མོ་རྣམས་སོ། །ཤར་གྱི་རྟ་བབས་ཀྱི་མཆོད་པའི་གནས་ཀྱི་དབུས་སུ་གོས་སོ། །ལྷོ་ཕྱོགས་སུ་པདྨའོ། །ནུབ་ཕྱོགས་སུ་ཕཊ་ཧའོ། །བྱང་ཕྱོགས་སུ་རྡོ་རྗེའོ། །
གསུང་གི་དཀྱིལ་འཁོར་གྱི་ཤར་གྱི་པདྨའི་ལྟེ་བ་དང་འདབ་མ་རྣམས་ལ་གྲི་གུག་ནག་པོ་རྣམས་སོ། །མེ་མཚམས་སུ་འཁོར་ལོ་ནག་པོ་རྣམས་སོ། །ལྷོ་ཕྱོགས་སུ་དབྱུག་པ་དམར་པོ་རྣམས་སོ། །བདེན་བྲལ་དུ་མདུང་ཐུང་དམར་པོ་རྣམས་སོ། །ནུབ་ཕྱོགས་སུ་རྡོ་རྗེ་སེར་པོའོ། །རླུང་དུ་ཚངས་པའི་དབྱུག་
པ་སེར་པོ་རྣམས་སོ། །བྱང་ཕྱོགས་སུ་རྩེ་གསུམ་པ་དཀར་པོ་རྣམས་སོ། །དབང་ལྡན་དུ་པདྨ་དཀར་པོ་རྣམས་སོ། །སྐུའི་དཀྱིལ་འཁོར་གྱི་པདྨའི་ལྟེ་བ་དང་། འདབ་མ་རྣམས་ཀྱི་མཚན་མ་རྣམས་ལ། ཤར་སྒོའི་གཡས་སུ་རལ་གྲི་རྣམས་སོ། །མེ་མཚམས་སུ་དཔག་བསམ་གྱི་ཤིང་རྣམས་སོ། །
ལྷོའི་སྒོའི་གཡོན་དུ་རྡོ་རྗེས་མཚན་པའི་དབྱུག་པ་རྣམས་སོ། །གཡས་སུ་མདུང་ཐུང་རྣམས་སོ། །བདེན་བྲལ་དུ་མདུང་རྣམས་སོ། །ནུབ་སྒོའི་གཡོན་དུ་རིན་པོ་ཆེའམ་དབྱུག་པ་རྣམས་སོ། །གཡས་སུ་རྡོ་རྗེ་རྣམས་སོ། །རླུང་དུ་ཁབ་རྣམས་སོ། །བྱང་གི་སྒོའི་གཡོན་དུ་རྩེ་གསུམ་རྣམས་སོ། །
གཡས་སུ་ཞགས་པ་རྣམས་སོ། །དབང་ལྡན་དུ་དགྲ་སྟ་རྣམས་སོ། །ཤར་སྒོའི་གཡོན་དུ་འཁོར་ལོ་རྣམས་སོ། །ཤར་གྱི་སྒོ་རུ་དབྱུག་པའོ། །དེའི་ཕྱི་རོལ་དུ་རྡོ་རྗེ་ལྗང་གུའོ། །ལྷོའི་སྒོ་རུ་མདའ་དམར་པོའོ། །ནུབ་ཀྱི་སྒོ་རུ་དབྱུག་ཏོའོ། །དེའི་ཕྱི་རོལ་དུ་རྩེ་གསུམ་སྔོན་པོའོ། །བྱང་གི་སྒོ་རུ་
གཏུན་ཤིང་དཀར་པོའོ། །དེ་ལྟར་དབྱུག་པ་ལ་སོགས་པ་རྣམས་པདྨ་དང་ཉི་མ་ལ་གནས་པའོ། །གསུང་དང་སྐུའི་དཀྱིལ་འཁོར་གྱི་ཕྱོགས་ཀྱི་པདྨ་རྣམས་དམར་པོའོ། །མཚམས་ཀྱི་པདྨ་རྣམས་དཀར་པོའོ། །འདིར་གསུང་གི་དཀྱིལ་འཁོར་གྱི་ཤར་སྒོའི་འདོད་ཡོན་གྱི་སྣམ་བུའི་གཡས་སུ་ཨུཏྤལ་དང་
གོས་དང་གྲི་གུག་དང་། འཁོར་ལོ་དང་ཁ་ཊྭཱཾ་ག་རྣམས་ནག་པོའོ། །གཡོན་དུ་གྲི་གུག་དང་། རལ་གྲི་དང་། གྲི་གུག་དང་། ཡང་གྲི་གུག་རྣམས་ནག་པོའོ། །ལྷོའི་སྒོའི་གཡས་སུ་པདྨ་དང་། བདུད་རྩིའི་སྣོད་དང་། དབྱུག་པ་དང་། མདུང་ཐུང་དང་། པདྨ་རྣམས་དམར་པོའོ། །གཡོན་དུ་མདའ་དང་། དགྲ་

སྟ་དང་། གྲི་གུག་དང་། ཡང་གྲི་གུག་རྣམས་དམར་པོའོ། །ནུབ་སྒོའི་གཡས་སུ་འཁོར་ལོ་དང་། དྲིའི་དུང་དང་། རྡོ་རྗེ་དང་། ཁབ་དང་། འཁོར་ལོ་རྣམས་སེར་པོའོ། །གཡོན་དུ་ཕུབ་དང་། ཆོས་འབྱུང་དང་། འཁོར་ལོ་དང་། གྲི་གུག་རྣམས་སེར་པོའོ། །བྱང་སྒོའི་གཡས་སུ་ཨུཏྤལ་དང་། མེ་ལོང་དང་། རྩེ་
གསུམ་དང་། པདྨ་དང་། ཨུཏྤལ་རྣམས་དཀར་པའོ། །གཡོན་དུ་རྡོ་རྗེ་སྔོན་པོ་དང་། ཐོ་བ་དང་། གྲི་གུག་དང་། ཡང་གྲི་གུག་རྣམས་དཀར་པོའོ། །དེ་ལྟར་མཚན་མ་སུམ་ཅུ་རྩ་དྲུག་སྐུའི་དཀྱིལ་འཁོར་གྱི་འདོད་ཡོན་ལ་ཡང་གོ་བར་བྱའོ། །དེ་ནས་ཧཱུྃ་ཡིག་དང་། ཡི་གེ་དྲུག་པ་བཟླས་ཤིང་བདུད་རྩི་ལྔ་དང་བཅས་པ་
དྲིའི་ཆུས་དཀྱིལ་འཁོར་གྱི་ཕྱི་རོལ་བྱུགས་ནས་དེ་ཉིད་བཟླས་ཤིང་ཆུས་དཀྱིལ་འཁོར་ལ་བསང་གཏོར་བྱའོ། །དེ་ནས་ཚོན་རྣམས་ཀྱི་ལྷག་མའི་ཡེ་ཤེས་པ་ཨོཾ་ཨཱཿཧཱུྃ་བཛྲ་མུཿཞེས་བརྗོད་དེ་གཤེགས་སུ་གསོལ་བ་དང་། འདུ་འཛི་མེད་པའི་ས་རུ་གཞག་པར་བྱའོ། །འདི་ནི་ཚོན་དགྱེ་བའི་ཆོ་གའི་རིམ་པའོ།། །།
དེ་ནས་སྔོན་དུ་ལྷག་པར་གནས་པར་བྱས་པའི་བུམ་པ་རྣམས་དཀྱིལ་འཁོར་གྱི་ཤར་ལ་སོགས་པའི་ཕྱོགས་རྣམས་སུ་བཞི་གཞག་གོ། །ཡང་ནུབ་ཏུ་རྣམ་པར་རྒྱལ་བའི་བུམ་པ་ལྔའོ།