Kinh tạng Tây Tạng (Kangyur Đại Học) — 099_རྙིང་རྒྱུད།_ག

ཀྱིལ་འཁོར་བསྡུ་མཛད་ནས། །བདག་དང་གཉིས་མེད་རོལ་པའི་མཐུས། །ཁྲོ་བོའི་རྒྱལ་པོ་སྐུ་ཆེན་དག །སངས་རྒྱས་ཀུན་གྱི་སྐུ་གསུང་ཐུགས། །གསང་གསུང་
དམ་ཚིག་ཕྱག་རྒྱ་ཆེ། །དཀྱིལ་འཁོར་རྒྱུ་ཡི་དམ་ཚིག་སྐུ། །བཀོད་པའི་དཀྱིལ་འཁོར་མཛེས་པའོ། །ཆོས་དབྱིངས་ཡོན་ཏན་འབྱུང་གནས་གཞལ་ཡས་ཁང་། །རྒྱལ་བའི་དཀྱིལ་འཁོར་རིགས་ཀྱི་ཅོད་པན་ཅན། །རིགས་ཀྱི་དབང་ཕྱུག་སྐྱེ་འགྲོ་མ་ལུས་སྒྲོལ། །རྡོ་རྗེ་
བཀོད་པ་རྒྱན་གྱི་དཀྱིལ་འཁོར་ཆེ། །དབང་པོ་ཡུལ་ཚོགས་རིགས་ཀྱི་སྐུ་ལྔར་ལྡན། །ཤེས་རབ་ཐབས་དང་མི་གཉིས་འདུ་འབྲལ་མེད། །དུས་གསུམ་ཅིག་ཆར་སྒྲོལ་བས་ཚར་གསུམ་རྒྱན། །ཁམས་གསུམ་ཡོངས་སྒྲོལ་མཛད་ཀྱི་རྒྱན་དུ་ཆེ། །མི་གནས་མྱ་ངན་
གསུང་རབ་རྒྱ་མཚོ་སྒྲོགས། །མ་བསྒྲིབས་མ་གསལ་གོ་འཕང་མཛེས་པར་མཐོང་། །མི་ལྡོག་ཡུལ་སྒྲོལ་སྟབས་དྲུག་མཛེས་པར་མགྱོགས། །གར་ཡང་ཐོགས་མེད་བྱིན་བརླབས་ཤུགས་དང་ལྡན། །འཚེར་སྐད་གདངས་སྙན་མ་སྲིང་སྤྲོ་བ་འགྱེད། །ཁམ་དམར་

རལ་པའི་དབུས་ནས་དབུགས་འབྱུང་བ། །དཔྲལ་བ་ཞུར་པོ་བརྗིད་པའི་ཁྱད་པར་དང་། །རྟ་མགྲིན་འོད་འབར་གསལ་བའི་ཁྱད་པར་ནི། །དོན་མཆོག་ཁྱད་པར་ཡོན་ཏན་རྨད་དུ་བྱུང་། །ལྗང་གུ་མེ་འབར་རྟ་མགོའི་རང་བཞིན་ནི། །འགྱུར་མེད་ཡེ་ཤེས་ཇི་བཞིན་གསལ། །
བྱམས་པའི་མདངས་ཀྱིས་ཁམས་གསུམ་ཁྱད་པར་གཟིགས། །རྡོག་མ་ལེ་བརྒན་འབར་བའི་ཁྱད་པར་མཆོག །སྟུག་པོ་བཀོད་སོགས་ཞིང་ཁམས་རབ་འབྱམ་ན། །རྡུལ་གཅིག་སྟེང་ན་རྡུལ་སྙེད་ཁྲོ་བོ་ཀུན། །ཞིང་ཁམས་གསུམ་དག་མ་ལུས་དབང་དུ་སྡུད། །ཤེས་
རབ་ཐབས་སུ་འབྲེལ་པའི་རྟ་སྐད་ནི། །གྲུབ་པའི་དཔལ་ཚོགས་ཚངས་པའི་རྟ་དབྱངས་ཡིན། །དང་པོའི་གདངས་ཀྱིས་རྒྱལ་བའི་ཞིང་ཁམས་སྒྲོགས། །གདངས་སྐད་གཉིས་པ་རི་རབ་རྩེ་ལ་འཚེར། །གསུང་སྙན་གདངས་གསུམ་སྙན་པའི་ཁྱད་པར་ནི། །བཅུ་དྲུག་སླད་མའི་ངན་
རྟོག་ཐར་ལམ་སྟོན། །སྤྱན་མིག་གློག་ལྟར་འགྱུ་བ་ཆེར་འཕགས་ཤིང་། །ཤ་ཁྲག་རློན་པ་ཟ་བའི་སྲིན་པོ་འཇོམས། །འཚེར་ཅན་ཡིད་ལ་གདུང་བའི་རྟ་སྐད་ནི། །མུན་མཐུའི་འགྲོ་བ་མ་ལུས་གསལ་བར་མཛད། །རྒྱུ་དབྱིངས་གྲངས་དང་གཟིགས་ཐབས་རྟོག་པའི་དོན། །
ཧཱུྃ་ལས་དཔལ་ཆེན་ཁྲོ་བོའི་དཀྱིལ་འཁོར་བསྐྱེད། །གནས་ནི་སྣ་ཡི་དབུགས་རིངས་དྲོ་བ་ལགས། །ཕྱག་རྒྱའི་དཀྱིལ་འཁོར་རྣམ་པར་འཕྲུལ་པ་འབྱུང་། །ཤངས་ཀྱི་རླུང་སྒྲོམ་ཡངས་པས་ཡེ་ཤེས་སྲོག །གསང་བའི་ཚུབ་མས་སྡུག་བསྔལ་སྙིང་ནས་འབྱིན། །རྒྱ་ཆེན་
སྤྲུལ་པས་བག་ཆགས་ཚར་གཅོད་དེ། །འཁོར་བའི་རྒྱ་མཚོ་ལུགས་ལས་བཟློགས་པ་ཡི། །རིགས་ཀྱི་རླུང་གིས་དུག་ལྔ་དབྱིངས་སུ་སྒྲོལ། །ཟླུམ་དཀར་གཟངས་རིངས་རྣོ་དབལ་ཚེམས། །ཞལ་དུ་བདར་བའི་བྱང་ཆུབ་སེམས། །མ་སྐྱེས་ཆོས་ཉིད་ཀུན་ལ་རོལ། །ཞི་
རྒྱས་དབང་སྡུད་དྲག་པོ་ཡི། །ཅིར་ཡང་འགྱུར་བའི་ཧོམ་ཁུང་སྟེ། །ལས་ལྔ་འབྲེལ་བའི་ཞལ་ཞེས་བྱ། །འཁོར་བ་ཡོངས་སུ་སྨིན་པ་དང་། །ལས་མངས་ཉོན་མོངས་དབང་བཙན་དང་། །སྐྱེ་བ་མི་སྐྱེ་ལུང་མ་བསྟན། །དེ་སྨིན་མཛད་པ་ཆེན་པོ་ཡི། །འཇོག་ལྡོག་ཅིར་ཡང་

གྱུར་པ་དང་། །རྗོད་བྱེད་གཉིས་ཀའི་བསྟན་གྱུར་ནས། །འབྱར་ཞིང་བསྐྱོད་པས་ལྗགས་ཉིད་དོ། །ཡིག་འབྲུའི་རྒྱུ་ཉིད་བདེར་གཤེགས་ཐུགས། །རྡོ་རྗེ་མྱུ་གུ་ཏིང་འཛིན་ཐུགས། །འོད་ཉིད་ཉོན་མོངས་རྣམ་དག་འཇོམས། །རིག་བྱེད་ཡེ་ཤེས་ཕྱག་རྒྱ་དང་། །
ཡིག་འབྲུ་ས་བོན་ཕྱག་རྒྱ་དང་། །ཡོན་ཏན་རྫོགས་པའི་ཕྱག་རྒྱའོ། །སྲིད་པ་གསུམ་སྟེ་ལྟ་བ་དང་། །རྒྱུད་དང་ལས་ཀྱི་རིམ་པའོ། །དེ་ཕྱིར་ཡེ་ཤེས་རོལ་པའི་དབྱིངས། །སྙིང་པོ་ཕྱག་མཚན་ཕྱ་མོ་དག །བསྟན་པར་གྱུར་ནས་མཁའ་ཡི་དབྱིངས། །ཆོས་སྐུ་ཆུ་ཡི་ཟླ་
བ་བཞིན། །སྣ་ཚོགས་སྣང་ལ་རང་བཞིན་མེད། །དུར་ཁྲོད་ཆེན་པོའི་གནས་ཀུན་དུ། །གར་གྱི་དབང་ཕྱུག་རྣམ་པར་རོལ། །ཤར་དུ་རོལ་པའི་ཕྱག་བཞི་མཚན་མ་ནི། །ཁྲོ་ཆེན་སྙིང་འབྱིན་ཁ་ཊྭཱཾ་འབར་བ་དང་། །རྡོ་རྗེ་ལྕགས་ཀྱུ་སྦྲུལ་གྱི་ཞགས་པས་རོལ། །དེ་བཞིན་
ལྷོ་ལ་སོགས་པའི་ཕྱག་ཀྱང་བཞི། །ཐོད་པ་ཁྲག་བཀང་རྡོ་རྗེ་ལུ་གུ་རྒྱུད། །རྡོ་རྗེ་བེ་ཅོན་ཐོད་རློན་འཛིན་པར་རོལ། །མེ་ཡི་ཞགས་པ་དག་དང་ཁྱུང་གི་ཁྲ། །སྡིགས་འཛུབ་རྩེ་ལ་ཡེ་ཤེས་འབར། །རྡོ་རྗེ་ཁ་ཊྭཱཾ་ག་ནི་རབ་ཏུ་འཁྲོལ། །རྡོ་རྗེ་རྩེ་དགུ་རྩེ་ལྔ་གདེངས་པ་དང་། །
རྩེ་གསུམ་རྩེ་གཅིག་འབར་བ་གསོར་ཞིང་བརྡེག །ཡེ་ནས་མ་སྐྱེས་དང་བའི་ཆོ་འཕྲུལ་སྟོན། །ཡེ་ཤེས་ལྔ་ཡི་ཡོན་ཏན་ཁྱད་པར་ནི། །རིན་ཆེན་དྲ་བ་སངས་རྒྱས་སྟོང་གིས་བརྒྱན། །ཀླུ་རྒྱལ་ནག་པོ་འདྲ་བའི་ཐབས་ཤེས་ཀྱིས། །རྩེ་བ་རྣམ་ཐར་སྒོ་གསུམ་སྐུ་
གསུང་ཐུགས། །སྤྲུལ་པའི་དོན་མཛད་དཀྱིལ་འཁོར་སྣ་ཚོགས་སྟོན། །གསང་བའི་ཡུམ་བཞིས་སྐུ་ལ་འཁྲིལ་བྱེད་ཅིང་། །བྱང་ཆུབ་སེམས་བཞི་དེ་ཉིད་སྟོན་པར་བྱེད། །རྡོ་རྗེ་དྲ་བས་རིན་ཆེན་གློག་འགྱུ་བ། །ཁྱུང་གཤོག་ཨ་མོ་ཐེབ་གཤོག་སྡེར་མོ་ཅན། །
སངས་རྒྱས་སྟོང་རྩ་གཉིས་ཀྱི་ཐུགས་རྗེ་ཤར། །ཐབས་ཀྱི་རྣམ་པར་འཕྲུལ་པས་གཡས་ནས་བརྐྱང་། །སྲིད་གསུམ་མ་རིག་མུན་པ་སེལ་བྱེད་པའི། །ཤེས་རབ་ཟླ་སྟོང་རྩ་གཉིས་གཡོན་ནས་ཁྱབ། །ཐབས་དང་ཤེས་རབ་འབྲེལ་པའི་བྱིན་བརླབས་ཆེ། །སྤྲུལ་

པ་འཕྲོས་པས་དུག་གསུམ་རྒྱུན་མི་འཆད། །སྣ་ཚོགས་རོལ་པའི་ཕྱག་རྒྱ་ཞེས་པ་ཡི། །ཕྲིན་ལས་བརྒྱད་ཀྱིས་བདག་ཉིད་སྐུ་ཆེ་བའི། །དཔའ་བོ་སྟག་གིས་སྟེང་ཕྱོགས་འདུལ་ཞབས་བརྒྱད། །རྒྱ་བྱེའུ་ལྕགས་ཀྱིས་ཤར་ལྷོའི་ཞབས་བརྒྱད་དེ། །རྡོ་རྗེ་འཆོལ་བས་ལྷོ་
ཡི་ཕྱོགས་ན་བརྗིད། །བསེ་ཁྲབ་སྨུག་པོས་ལྷོ་ནུབ་རྐང་པ་བརྐྱང་། །སྣ་ཚོགས་བརྗིད་པས་བྱང་ཤར་མཚམས་སུ་གྱོན། །ཤུ་ཀན་དར་གྱིས་བྱང་ཤར་ཞབས་མཛེས་ཤིང་། །མཆེ་བ་དམར་པོས་ནུབ་བྱང་བརྒྱངས་པའི་གདན། །སྦྲུལ་ནག་འཁྲིལ་པའི་ཞབས་ཀྱིས་འོག་
ཕྱོགས་འདུལ་བར་མཛད། །ཁྲོ་བརྒྱད་གནོན་ཅིང་གཟིར་བས་ཞབས་བརྡེབས་ཤིང་། །དུག་ཆེན་བཅོམ་ཞིང་སྒལ་ཚིགས་གནོན། །བྲང་གནོན་ལྡན་པ་འཇོམ་ཞིང་འཇིགས་མཛད་དང་། །འཁོར་གྱི་སྐུ་ལ་སྦས་པས་ཡེ་ཤེས་གསལ། །སྐུ་ཉིད་འཁོར་ལ་སྦས་པས་དབྱིངས་
ཀྱིས་བརྒྱན། །ཐུགས་རྗེ་རོལ་པས་གཞལ་ཡས་ཁང་དུ་བསྟན། །ཕྲིན་ལས་རོལ་པས་ཧཱུྃ་མཛད་ཧཱུྃ་གིས་བརྒྱན། །ས་བཅུ་ཟིལ་གནོན་སྟོབས་བཅུའི་དབང་དང་ལྡན། །དེ་ནས་གར་གྱི་དབང་ཕྱུག་ཆེ། །དམ་ཚིག་གར་གྱི་བྱིན་བརླབས་ཀྱིས། །རྒྱུན་གྱི་ཏིང་འཛིན་ལ་གནས་
ནས། །ཡུམ་ཆེན་གཟི་ལྡན་དགྱེས་པར་མཛད། །དམ་ཚིག་ཆེན་པོའི་ཕྱག་རྒྱ་ནི། །མཉེས་མཛད་གཟི་ལྡན་དབང་ཕྱུག་མ། །ཇི་སྙེད་བུད་མེད་སྣ་ཚོགས་དང་། །གསུང་གི་རྡོ་རྗེ་མི་སྨད་དོ། །གཙོ་བོ་རབ་ཏུ་གདུངས་པ་ལ། །རབ་ཏུ་སྨྲ་བར་གང་བྱེད་པ། །སྒེག་པའི་ཚིག་
གིས་བརྒྱན་ནས་སུ། །སྲི་ཞུའི་སེམས་ཀྱིས་གདུངས་པ་ལ། །ཡེ་ཤེས་ཚོགས་ཀྱིས་རབ་བསྐོར་བའི། །ལྷ་མོའི་ཚོགས་རྣམས་བསྐོར་བྱས་ཏེ། །རང་གི་ཕྱག་རྒྱའི་དཀྱིལ་འཁོར་དུ། །གཉིས་མེད་མཉམ་པའི་རྒྱ་གཞི་གདབ། །བྱང་ཆུབ་སེམས་ཚོགས་གསལ་བའི་
རྒྱུན། །ཐིམ་པའི་དཀྱིལ་འཁོར་དོན་ཆེན་གསལ། །དབྱིངས་ཕྱུག་སྤྲུལ་ཚོགས་བསམ་ཡས་དག །ངེས་པའི་ཡེ་ཤེས་རོལ་པའི་སྐུ། །སྟོང་གསུམ་དབང་པོར་གདོན་མི་ཟ། །འཇིག་རྟེན་གསུམ་གྱི་འབྱུང་གནས་མཆོག །དུས་གསུམ་ཀུན་གྱི་གནས་དང་

རྟེན། །ཕྱོགས་བཅུ་དཀྱིལ་འཁོར་ཐམས་ཅད་ན། །དམ་ཚིག་ཆེན་པོ་དེ་ཉིད་མང་། །ཕྱི་ནང་གསང་བའི་མཐར་ཕྱིན་པ། །ཐམས་ཅད་པདྨོ་རྣམ་དག་པས། །ཆོ་འཕྲུལ་རྣམ་ཀུན་དེ་བཞིན་ཉིད། །ཐུགས་རྗེ་ཆགས་པའི་ཕྲིན་ལས་ཀྱིས། །དབང་དྲག་
ཕྲིན་ལས་གནོད་སྦྱིན་གནས། །གཉིས་མེད་འབར་བས་ཐམས་ཅད་སྲེག །ལས་དང་བག་ཆགས་སྒྲིབ་སོགས་ཀུན། །གནས་ནས་གཤེགས་མཛད་ཡེ་ཤེས་ཚོགས། །ལྷུན་གྱིས་དང་བས་ཀུན་དུ་འཇོམས། །སྙིགས་མ་ལྔ་བརྒྱ་དུས་ཀྱི་མཐའ། །སྲིད་གསུམ་སེམས་
ཅན་འདུལ་དཀའ་བ། །འཕྲོ་འདུ་འཁྱིལ་བའི་འོད་མདངས་མཛད། །འཇིག་རྟེན་མཁྱེན་དང་མྱ་ངན་འདས། །གཉིས་མེད་ཐུགས་ཀྱིས་ས་ལེ་མཁྱེན། །དེ་ལྟར་དགོངས་པའི་ཁྱད་པར་དེ། །འགྲོ་བ་མཐའ་དག་འདུལ་དོན་དུ། །རྣམ་པར་ཐར་པ་དབུ་གསུམ་བསྟན།
གཡས་དཀར་གཡོན་དམར་དབུས་མཐིང་ག །ཡེ་ཤེས་དྲུག་གི་ཕྱག་མཚན་ནི། །གཡས་པས་རྡོ་རྗེ་རྡེའུ་ཆུང་དང་། །མདུང་རྩེ་གསུམ་པ་འཛིན་པས་རོལ། །དྲིལ་བུ་རྒྱུ་ཞགས་ཐོད་རློན་གཡོན། །བསྐལ་པའི་མེ་རི་སྦྲུལ་ཞགས་དང་། །ཐོད་རློན་ཕྲེང་བ་རྒྱན་དུ་
བྱས། །སྒེག་པ་དཔའ་བོ་འཇིགས་སུ་རུང་། །དགོད་དང་གཤེ་དང་འཇིགས་པར་བྱེད། །སྙིང་རྗེ་རྔམ་དང་ཞི་བའི་སྐུ། །སྐུ་གསུང་ཐུགས་ཀྱི་གར་ཐབས་ཅན། །འཇིགས་བྱེད་ཁྲོ་བོ་རྣམ་པར་རྒྱལ། །སྐྱེ་བ་མེད་པའི་ཆོས་དབྱིངས་སུ། །མཚན་མ་མེད་པའི་ཆོས་
བཤད་པས། །ཆོས་ཀྱི་དབྱིངས་ཀྱི་ཡེ་ཤེས་རྒྱལ། །ལོངས་སྐུ་མཚན་དང་དཔེ་བྱད་ཀྱིས། །མི་འཇིགས་སྟོབས་མཆོག་གདན་སྟེངས་ན། །སངས་རྒྱས་ཞིང་ཁམས་ཐམས་ཅད་དུ། །ཟབ་མོ་རྒྱ་ཆེན་ཆོས་མ་བསྟན། །དངོས་དང་དངོས་མེད་གསལ་བྱེད་
པས། །མེ་ལོང་ལྟ་བུའི་ཡེ་ཤེས་དང་། །སྤྲུལ་པ་འགྲོ་མང་དོན་གྱི་ཕྱིར། །ཕལ་མང་བཀོད་པའི་ས་རྣམས་སུ། །དངོས་པོ་མཚན་མ་རྣམ་འཕྲུལ་གྱིས། །བྱ་བ་གྲུབ་པའི་ཡེ་ཤེས་ཚོགས། །ཐམས་ཅད་མཚན་མ་ནམ་མཁའི་དངོས། །དེ་ཉིད་སྒྲོ་བཏགས་

ཆོས་དང་བྲལ། །ཀུན་ལྡན་བྱམས་སེམས་དེ་ཁོ་ན། །རང་བཞིན་དག་པ་དྲི་མ་མེད། །ཧེ་རུ་ཀ་ཡི་བདེ་ཆེན་དབྱིངས། །ཆོས་རྣམས་ཀུན་གྱི་རྒྱུ་ཡིན་དེ། །འོད་གསལ་བ་ཡི་གནས་འཇུག་པས། །རྣལ་འབྱོར་ཆེན་པོ་ཞེས་བྱ་བཤད། །དེ་བཞིན་
གཤེགས་པ་ཐམས་ཅད་ཀྱི་དགོངས་པ་གསང་བ་དཔལ་རྟ་མཆོག་རོལ་པའི་རྒྱུད་ལས། དཀྱིལ་འཁོར་རྒྱུའི་དོན་ཕྱུང་བའི་ལེའུ་སྟེ་ཉི་ཤུ་གཉིས་པའོ།། །།དེ་ནས་བཅོམ་ལྡན་དཔལ་གྱི་སྐུས། །གར་གྱི་དབང་ཕྱུག་ལྷུན་གྲུབ་མཆོག །ཐུགས་རྗེ་བརྗིད་
པའི་སྟོབས་ལྡན་པས། །ཡོན་ཏན་ཁྱད་པར་བསྟན་པའི་ཕྱིར། །ནམ་མཁའི་རི་མོ་ཕྱག་རྒྱའི་རྔོམ། །ཅིར་ཡང་འགྱུར་བའི་བཞུགས་པའི་རྔོམ། །ཟིལ་གྱིས་གནོན་པའི་གནས་མཆོག་རྔོམ། །ཚམ་ངམ་ཆེན་པོའི་སྟང་སྟབས་རྔོམ། །སྐུ་མདོག་བརྒྱད་ཀྱིས་
བརྗིད་པའི་མཆོག །ཕྱག་རྒྱའི་དོན་དང་ལྡན་པའི་སྐུ། །ཧྃ་ལྔ་འབྲེལ་པར་གྱུར་པའི་ཞལ། །ཟླ་ཁམ་ཅིར་ཡང་འགྱུར་བའི་ལྗགས། །སྐྱེ་ཤི་རྩད་ནས་གཅོད་པའི་ཚེམས། །རྣམ་པའི་འབྲུག་ལྟར་སྒྲོགས་པའི་དབྱངས། །ཏིང་འཛིན་ནམ་མཁའི་སྐར་ཚོགས་བཞིན། །
ཕྲིན་ལས་རྒྱ་མཚོ་རླབས་ཚོགས་ལྟར། །བྱིན་བརླབས་ཆོ་འཕྲུལ་སྤྲིན་ཕུང་ཚོགས། །མཛད་པའི་རོལ་མོ་གར་ཐབས་རྔམ། །བདུད་དང་སྲིན་མོ་འཛོམས་བྱེད་རྣམས། །ཁམས་གསུམ་ཟིལ་གྱིས་གནོན་པའི་གདན། །སྟོང་གསུམ་དུས་གཅིག་བསྒྲལ་བའི་ཞིང་། །
རྟོག་པ་འཇོམས་པའི་བརྟུལ་ཞུགས་མཆོག །སྐུ་གསུང་ཐུགས་མཆོག་ཡོན་ཏན་ནི། །རྔོམ་བརྗིད་སུམ་ཅུ་རྩ་དྲུག་མངའ། །རྒྱ་ཆེན་ཡན་ལག་རགས་པས་བརྗིད། །གྲངས་མ་རྐྱེན་དང་འཚམ་པས་བརྗིད། །བཀུར་གཤོག་གཙོ་བོ་མཐོང་བས་བརྗིད། །ཁྱད་
ཞུགས་བླ་མ་ཡིན་པས་བརྗིད། །གདངས་ཆེན་སྟོང་གསུམ་གང་བས་བརྗིད། །གསལ་བས་མཐའ་གཉིས་ཡངས་པས་བརྗིད། །ཐུགས་རྗེ་ཐུགས་དམ་མཐར་ཕྱིན་བརྗིད། །མ་རྨོངས་ཐབས་ཀྱིས་འདུལ་བས་བརྗིད། །མ་

འགགས་ས་ལེ་མཁྱེན་པས་བརྗིད། །མེད་ལ་ཟད་མི་ཤེས་པས་བརྗིད། །གཅིག་ལ་འདོད་དགུར་སྒྱུར་བས་བརྗིད། །གནོད་སྦྱིན་ཕམ་པར་མཛད་པས་བརྗིད། །ཐབས་མཁས་སྐྱོན་གྱིས་མ་གོས་བརྗིད། །རིམས་བྲལ་ཉམ་ཐག་རོལ་པས་བརྗིད། །
འཁོར་བ་ཡུན་རིངས་མགོན་མཛད་བརྗིད། །ཅིག་ཆར་ཟིལ་གྱིས་གནོན་པས་བརྗིད། །བྱ་བའི་ཡེ་ཤེས་རྫོགས་པས་བརྗིད། །སྐུ་གསུང་ཡོན་ཏན་ཕྲིན་ལས་ཐུགས། །ཟིལ་གནོན་ང་རྒྱལ་བཅག་པར་བྱ། །དེ་སུ་རོ་ཡི་ནང་ནས་ནི། །གློག་འགྱུ་ལྕེ་ནི་ལན་
གསུམ་འབྱུང་། །སོ་འམ་སེན་མོ་གཅད་པར་བྱ། །དེ་ཉིད་རལ་གྲི་བཟང་པོར་འགྱུར། །རྣལ་འབྱོར་པ་ཡི་གྲངས་བཞིན་དབྱུང་། །དེ་ཐོགས་ནམ་མཁའ་ལ་སོང་ནས། །རིག་པ་འཛིན་པའི་སྔགས་བརྗོད་བྱ། །ཨོྃ་བྷཱུ་རུ་ན་ར་ས་མ་ཏ་ཡ་ཧཱུྃ་ཕཊ། །གར་གྱི་དབང་
ཕྱུག་ང་རྒྱལ་གྱིས། །གང་འདོད་གནས་སུ་འགྲོ་བྱ་ཞིང་། །དྲེགས་བྱེད་ཚོགས་རྣམས་ཟིལ་གནོན་ཏེ། །བརྟུལ་ཞུགས་སྤྱོད་པས་གླུ་བླང་ཞིང་། །བརྟུལ་ཞུགས་སྤྱོད་པ་སྣ་ཚོགས་པས། །ཡུད་ཙམ་གཅིག་ལ་གནས་སུ་དག་པར་བྱེད། །བཅོམ་ལྡན་པདྨ་ཧེ་རུ་
ཀའི། །སྐུ་གསུང་ཐུགས་ཀྱི་དཀྱིལ་འཁོར་ནི། །ཇི་ལྟར་སྤྲུལ་ཞིང་ཅིར་ཡང་སྣང་། །མཚན་ཉིད་གཅིག་ཏུ་མ་ངེས་པས། །སྐུ་གསུང་ཐུགས་སྤྲུལ་བསམ་ཡས་ཆེ། །རང་བཞིན་ལས་དང་ཡོན་ཏན་གྱི། །བྱིན་བརླབས་ཡ་མཚན་སྒྲིབ་མེད་གསལ། །ཁམས་
གསུམ་ཀུན་ལས་རྩལ་འཕགས་ཤིང་། །རང་གི་དཀྱིལ་འཁོར་རྣམ་གསལ་ལས། །བྱིན་བརླབས་འགྲོ་ལ་རྒྱ་ཆེར་སྟོན། །ཆོས་དང་ལོངས་སྤྱོད་རྫོགས་པ་དང་། །སྤྲུལ་སྐུ་སྣ་ཚོགས་འདུལ་བའོ། །ཚིག་གི་གསུང་རབ་རིག་པའི་གསུང་། །བཞི་ལ་སུམ་ཅུ་
དྲུག་གིས་བརྗིད། །དུག་གསུམ་སྐུ་གསུང་ཐུགས་ཀྱིས་སྦྱངས། །དུག་ལྔ་བདེ་བ་ཆེན་པོས་སྤྱད། །དབྱིངས་ལས་ཡེ་ཤེས་རོལ་པའི་མཐུས། །སྐྱེ་འགྲོ་མ་ལུས་རྒྱས་བཏབ་ནས། །རང་བཞིན་དག་པའི་དབྱིངས་སུ་སྦྱོང་། །རྒྱལ་བ་གང་གི་ཐུགས་རྗེས་ཀྱང་། །འདི་ལ་སྐྱབས་

སུ་ཡོད་མ་ཡིན། །སྲིད་པ་གསུམ་དུ་དག་བྱས་ནས། །སྲིད་པའི་ཕྱག་རྒྱས་ཕྱག་རྒྱ་གསང་བས་འདེབས། །ཐིག་ལེ་ཆོས་སྐུ་རིག་པའི་མཆོག །གར་གྱི་དབང་ཕྱུག་ཞེས་སུ་བསྔགས། །དེ་བཞིན་གཤེགས་པ་ཐམས་ཅད་ཀྱི་དགོངས་པ་བླ་ན་མེད་པའི་གསང་བ་དཔལ་རྟ་མཆོག་
རོལ་པའི་རྒྱུད་ལས། ཁྲོ་བོ་རྔོམ་བརྗིད་སྟོན་པའི་ལེའུ་སྟེ་ཉེར་གསུམ་པའོ།། །།དེ་ནས་འཁོར་གྱི་གཙོ་བོ་མཆོག །གསང་བའི་བདག་པོ་ལ་སོགས་པས། །ཡང་དང་ཡང་དུ་ཕྱག་འཚལ་ལོ། །མཆོད་པ་རྒྱ་ཆེན་ཕུལ་བྱས་ཏེ། །འགྲོ་བ་བརྩེ་བའི་སེམས་ཅན་
ལས། །བསྒྲུབ་པའི་རིམ་པ་ཞུ་བར་མཛད། །བཅོམ་ལྡན་དངོས་གྲུབ་ཀུན་གྱི་བདག །གདུལ་བྱ་ཀུན་གྱི་དོན་གྱི་ཕྱིར། །ཐུན་མོང་དངོས་གྲུབ་ཇི་ལྟ་བུར། །དེ་བཞིན་མཆོག་གི་དངོས་གྲུབ་དག །བསྒྲུབ་པར་བྱ་བའི་ཐབས་ནི་གང་། །ལས་ཀྱི་ཆོ་ག་ཅི་ལྟ་བུར། །
ཡན་ལག་ཚོགས་པའི་ལྡན་བྱས་ནས། །ཚེ་འདི་མཆོག་ཏུ་གྱུར་རམ་ཅི། །ཐབས་མང་ཆོ་ག་བཤད་པར་བྱ། །དེ་ནས་བཅོམ་ལྡན་འདས་ཀྱི་དབང་། །རང་གི་དཀྱིལ་འཁོར་གནས་བཞུགས་ཏེ། །མ་འོངས་འགྲོ་ལ་ཕན་པའི་ཕྱིར། །སྐུ་གསུང་ཐུགས་ཀྱི་སྦྱོར་
བ་ལས། །ངོ་མཚར་འཕྲུལ་པ་འདི་གསུངས་སོ། །རྒྱལ་བ་ཀུན་གྱི་དམ་ཚིག་ཆེ། །རྣམ་གསུམ་ཕྱག་རྒྱ་ལ་གནས་ནས། །ལས་ཀྱི་དངོས་གྲུབ་བསྒྲུབ་པ་ནི། །གནས་བཟང་དག་ཏུ་བརྩམ་པར་བྱ། །ཕྱག་རྒྱའི་གྲོགས་ལ་བརྟེན་པ་ན། །བཟླས་བརྗོད་ཡན་ལག་མ་
ཉམས་པར། །གསང་སྔགས་ཡི་གེ་བཅུ་བཞི་པ། །སུམ་འབུམ་དག་ཏུ་བརྗོད་བྱས་ནས། །རོལ་པ་མཚན་མ་བསྒྲུབ་པའི་ཕྱིར། །མཆོག་ཆེན་མཚན་མ་མཉམས་པ། །རབ་བརྟགས་དུར་ཁྲོད་གནས་ནས་བླངས། །ཁྲོ་བོ་ཆེན་པོའི་ཚམ་ངམ་གྱིས། །ཡུངས་ཀར་ཐལ་
བ་ལ་སོགས་པས། །སུམ་བྷ་ནི་ཡི་སྔགས་བརྗོད་ཅིང་། །ཡི་དགས་གཤིན་རྗེ་བསྐྲད་པར་བྱ། །དེ་ནས་དྲི་ཞིམ་སྦྱར་བ་ཡི། །དག་བྱེད་ཆུ་ཡིས་ལེགས་བཀྲུས་ཏེ། །མེ་ཏོག་ཕྲེང་སོགས་རྒྱན་གྱིས་བརྒྱན། །གསུང་གི་ཕྱག་རྒྱ་བྱིན་བརླབས་ཤིང་། །དཔའ་བོས་

རང་གི་ཁྱིམ་དུ་བླང་། །གླུ་དྲུག་དབྱངས་དྲུག་བཅས་པ་ཡིས། །ཁྲོ་རྒྱལ་རོལ་བའི་བྲོ་ཡིས་སྦྱངས། །བསྒྲུབ་པའི་དཀྱིལ་འཁོར་ཉམས་དགའི་མཆོག །རྒྱ་ཁྱོན་འདོམ་གང་ཁྲུ་ཡིས་བསྟོད། །ཅི་བཞིན་ལ་སོགས་ཆོ་ག་བཞིན། །རྫས་དང་ས་
གཞི་དག་བྱ་ཞིང་། །ས་བོན་གནས་པའི་ལས་རྫོགས་ནས། །བསྲུང་ཞིང་དཀྱིལ་འཁོར་བྲི་བར་བྱ། །ཡབ་ཡུམ་བསྒྲུབ་པའི་གྲོགས་བཅས་རྣམས། །དཀྱིལ་འཁོར་ཕྱོགས་བཞིར་གནས་བཟུང་སྟེ། །མཆོག་ཆེན་དཀྱིལ་འཁོར་ཁ་རུ་བཞག །བསྲུང་བའི་འཁོར་
ལོ་ལེགས་ལྡན་པས། །སྟོང་ཉིད་ཏིང་འཛིན་ནས་བརྩམས་ཏེ། །དཀྱིལ་འཁོར་མཉེས་སོགས་རྫོགས་བྱས་ནས། །རོ་ལངས་དགུག་ཅིང་གཞུག་བྱ་སྟེ། །བར་ཆད་མེད་པར་བཟླས་བརྗོད་བྱ། །ཨོྃ་བི་ར་ན་ཏྲག་ཤ་ཏ་ཧ་ལ་ཏའི་ལོ་མ་ཏ་ཡ་མན་ཏ་ཙན་ཏྲ་ཧཱུྃ་ཕཊ།
ཏིང་འཛིན་འོད་ཟེར་གསལ་བའི་རྒྱུན། །ཟུར་མ་ཆག་པར་བརྗོད་བྱས་ཏེ། །འབུམ་ཚོ་གཅིག་གིས་གཡོ་འགྱུར་ཞིང་། །གཉིས་ཀྱིས་འོད་དང་བཅས་པར་སྣང་། །འབུམ་ཕྲག་གསུམ་གྱིས་སྒྲ་བསྟན་ཞིང་། །ལངས་ཏེ་ཀུན་དུ་ལྟ་བར་བྱེད། །དེ་ཚེ་རྣལ་
འབྱོར་དབང་པོ་ཡིས། །སྐྲ་ནས་བཟུང་ནས་བསྒྱེལ་བྱས་ལ། །རྟ་མཆོག་སྔགས་ཀྱིས་དབང་དུ་བྱ། །རྡོ་རྗེ་ཁྱུང་གཤོག་ཕྱག་རྒྱ་ཡིས། །དོན་གྱི་གསུང་གིས་གོ་བར་སྤྱོད་པས་བྲོ་ཡང་བརྡུང་། །ཏིང་འཛིན་སྔགས་དང་ཡན་ལག་རྣམས། །མ་བྲལ་རང་གི་གནས་འོངས་
ཏེ། །དཀྱིལ་འཁོར་མཐའ་མ་བསྐོར་བྱས་ནས། །མཆོད་པ་བྲོ་གླུ་དང་བཅས་པས། །ལྷ་རྣམས་མཉེས་པའི་ཆོ་ག་བྱ། །དེ་ནས་བརྟུལ་ཞུགས་ཆེན་པོ་ཡིས། །གོ་ལ་ལང་གྷ་གནོན་པ་ཡིས། །བྲོ་ལ་སོགས་པ་རྫོགས་བྱས་ནས། །རོ་དེ་གསེར་དུ་གྱུར་བ་
ཡིན། །དེ་ནི་མཆོད་དང་སྦྱིན་པ་དང་། །རང་ལ་དགོས་པའི་ཡོ་བྱད་བྱ། །དེ་བཞིན་གཤེགས་པ་ཐམས་ཅད་ཀྱི་དགོངས་པ་བླ་ན་མེད་པའི་གསང་བ་དཔལ་རྟ་མཆོག་རོལ་པའི་རྒྱུད་ལས། རོ་ལངས་བསྒྲུབ་པ་བསྟན་པའི་ལེའུ་སྟེ་ཉི་ཤུ་བཞི་པའོ།། །།དེ་ནས་

གར་གྱི་དབང་ཕྱུག་གིས། །གཟི་ལྡན་ཡུམ་དང་རོལ་མཛད་ཅིང་། །འཁོར་གྱིས་ཞུས་པའི་ཚིག་གསན་ནས། །ཐུན་མོང་དངོས་གྲུབ་བཟང་པོ་ཉིད། །མ་འོངས་འགྲོ་ལ་ཕན་གདགས་ཕྱིར། །རིམ་པ་བཞིན་དུ་ཕན་གདགས་མཛད། །དབང་ཐོབ་དམ་ཚིག་ལ་གནས་
པས། །ཡིད་མཐུན་གནས་མཆོག་བཟང་པོ་རུ། །མིག་སྨན་སྦྱོར་བ་བསྒྲུབ་བྱས་ཏེ། །བྱིན་བརླབས་ལྡན་པས་འགྲོ་དོན་བྱས། །རང་གི་ཏིང་འཛིན་ལ་གནས་པས། །རང་གི་གསང་སྔགས་འབུམ་རྫོགས་ནས། །མཚན་མ་ཕྲ་མོ་མཐོང་བ་དང་། །བསྒྲུབ་པའི་
དཀྱིལ་འཁོར་བརྩམ་པར་བྱ། །དཀྱིལ་འཁོར་གང་ཡང་རུང་བ་ཡི། །ཕྱག་རྒྱ་གསང་སྔགས་ཏིང་འཛིན་ལྡན། །རིན་ཆེན་སྔགས་ཀྱི་བཟླས་བརྗོད་ནི། །འབུམ་ཕྲག་གསུམ་དུ་གསུང་བར་བྱ། །ཨོྃ་པདྨ་མ་ཙ་ག་ཧྲུ་ཨ་ལ་ས་མ་ར་སི་ཏི་ཡོ་ན་ཧཱུྃ་ཕཊ།
དཀྱིལ་འཁོར་གནས་ཀྱི་རྟགས་མཐོང་ནས། །གྲོང་མཐའི་གནས་སུ་འགྲོ་བྱས་ཏེ། །སུས་ཀྱང་མ་མཐོང་མཚན་མོ་རུང་། །ལྷ་འདྲེ་གཏུམ་པོའི་གྲོང་དུ་བསྡད། །རང་གི་འཁོར་གྱི་ཚོགས་རྣམས་ཀྱིས། །མི་རྒོད་བཙན་འབྲང་བསྲུང་བར་བྱ། །དེར་ནི་བྷན་དྷ་མཚན་
ལྡན་དུ། །གཟི་ཆེན་མར་ནི་བལྟས་ནས་སུ། །མཚན་གཅིག་ཡལ་བར་སྔགས་བཟླས་ཤིང་། །ཏིང་འཛིན་མ་ཉམས་སྦྱོར་བ་བྱས། །སྐྱ་རེངས་དང་པོ་འཆར་དུས་སུ། །དུད་པས་བདུགས་ཏེ་བཅང་བར་བྱ། །གླུ་དང་བྲོ་ཡི་བརྟུལ་ཞུགས་དང་། །ལྷ་རྣམས་ཀུན་
གྱི་སྟང་སྟབས་ཀྱིས། །གནས་དེའི་བདག་པོ་དབང་དུ་སྡུད། །རིག་པ་འཛིན་པའི་སྔགས་ལྡན་པས། །སླར་ཉིད་མིག་སྨན་ཤས་གཅིག་བྱུག །དེ་ནས་འཁོར་གྱི་ཚོགས་བསྒོ་ཞིང་། །སྐྱེ་འགྲོ་ཀུན་ལ་གསང་བར་བྱ། །པདྨ་བསྒྲུབ་པའི་ཨན་རྫ་ལིས། །ཅི་འདོད་དངོས་
པོ་མཐོང་བར་འགྱུར། །གཞན་ཡང་རིལ་བུའི་སྒྲུབ་ཐབས་ནི། །བདུད་རྩི་ལྔ་ལས་འབྱུང་བ་ཡི། །རྫས་དག་ཤ་ལྔ་དང་བསྲེས་ཏེ། །ཐོད་པ་མཚན་ལྡན་ནང་བཞག་ནས། །དཀྱིལ་འཁོར་རྒྱན་དང་ལྡན་གནས་སུ། །ཐབས་དང་ཤེས་རབ་ལྡན་གནས་སུ། །གར་གྱི་

དབང་ཕྱུག་སྐུ་བསྒོམས་ཤིང་། །ཡི་གེ་བཅུ་བཞི་གསང་སྔགས་ཀྱིས། །འབུམ་ཕྲག་གསུམ་དུ་བཟླས་བྱས་ཏེ། །མཚན་མ་ཕྲ་མོ་མཐོང་བ་དང་། །བདུད་རྩི་གོང་བུ་བསྒྲིལ་བྱས་ཏེ། །རྒྱ་ཤུག་འབྲས་བུའི་ཚད་ཙམ་དུ། །རིན་ཆེན་ཟ་མ་ཏོག་ཏུ་གཞུག །དཀྱིལ་
འཁོར་དེ་ཡི་དབུས་བཞག་པས། །བསྲུང་བའི་ཙ་ཀྲས་བསྲུང་བྱ་ཞིང་། །རིག་པ་འཛིན་པའི་གསང་སྔགས་ནི། །འབུམ་ཕྲག་ལྔ་རུ་བརྗོད་པར་བྱ། །འོད་ཟེར་ལྕགས་ཀྱུ་འབྱུང་བར་འགྱུར། །ཨོྃ་མ་ཧཱ་པདྨ་སྃ་བོ་ཏ་ཧུ་ལུ་ཧུ་ལུ་ཧཱུྃ་ཕཊ་སྭཱ་ཧཱ། དེ་ནས་རིལ་བུ་དེ་བླངས་ཏེ། །ཁའམ་
ལག་ཏུ་བཟུང་བྱས་ནས། །གང་འདོད་གནས་སུ་འགྲོ་བྱེད་ཅིང་། །ཅི་འདོད་པ་དག་གྲུབ་པར་བྱེད། །ལྷ་ཡི་གནས་མཆོག་ཉམས་དགའ་བས། །སྔ་དྲོ་གཅིག་གིས་འཁོར་བར་ནུས། །གཞན་ཡང་བཅུད་ལེན་བཟང་པོ་ཉིད། །སྐྱེས་བུ་གང་གིས་བསྒྲུབ་འདོད་པས། །བདུད་
རྩི་རྒྱལ་པོ་ཨ་རུ་ར། །གསེར་གྱི་མདོག་ཏུ་འདུག་པས་མཆོག །ཉི་ཤུ་རྩ་གཅིག་ར་བོར་སྦ། །སུལ་རངས་རྒྱས་པར་གྱུར་པ་དང་། །བ་གཅིན་ཕུར་མོ་ཐལ་བ་དང་། །སེར་སྐྱའི་བ་མར་བཙོ་བར་བྱ། །དེ་ཉིད་སྦྲང་རྩི་དང་སྦྱར་བས། །ཉི་ཤུ་རྩ་གཅིག་ཞག་གི་བར། །
ཞོ་རེའི་ཚད་དུ་བསྐྱེད་ཅིང་བཟའ། །དཀྱིལ་འཁོར་གསང་བ་ལ་བརྟེན་ནས། །གར་གྱི་དབང་ཕྱུག་སྐུར་བསྒོམས་ཤིང་། །རིག་འཛིན་པ་ཡི་སྔགས་བརྗོད་ཅིང་། །མཚན་རྟགས་གསལ་བར་མ་མཐོང་བར། །ཡན་ལག་མ་ཉམས་བརྩོན་འགྲུས་བསྐྱེད། །ཨོྃ་པདྨོ་
བི་ཧ་ར་ཧ་ར་ཏ་ས་ནི་ཧཱུྃ་ཕཊ་སྭཱ་ཧཱ། །གསང་སྔགས་སུམ་འབུམ་མ་རྫོགས་པར། །ཨ་རུ་ར་ཡི་འབྲས་བཟང་སྟོང་གི་ཚད། །ལེགས་པར་སྦྱར་ཏེ་ཟོས་པའི་མཐུས། །ནད་དང་ཟུག་རྔུའི་ཚོགས་འཇོམས་ཤིང་། །ཚེ་རིང་བདེ་བ་ཕུན་སུམ་ཚོགས། །རྒས་ལ་
སོགས་པའི་སྐྱོན་སེལ་ཅིང་། །རིག་འཛིན་གནས་སུ་འགྲོ་བར་བྱེད། །དེ་བཞིན་དབང་པོའི་ལག་པ་དང་། །ཁ་ར་བུ་རམ་ཉེ་ཤིང་དང་། །ཟུར་རྔུལ་མུ་ཟིལ་སོགས་པས། །རང་གི་ཆོ་ག་ཤེས་པ་ཡིས། །རིག་པ་འཛིན་པའི་སྔགས་ཀྱིས་འགྲུབ། །གར་དབང་

དཀྱིལ་འཁོར་ལ་ནི་བརྟེན་བྱས་ཏེ། །སོ་སོར་མཉམས་སྦྱངས་པའི་ས། །བ་ཡི་འོ་མ་དང་སྦྱར་ཞིང་། །བ་ཡི་མར་གྱིས་གཟུངས་བཏབ་ནས། །མཚན་མ་མ་བྱུང་བར་དུ་གཞག །དེ་ནི་རིག་འཛིན་དངོས་གྲུབ་ཐོབ། །ཨོྃ་པདྨོ་ཨི་དྲ་དྲ་ཨ་ཧེ་དེ་བི་ན་ཧཱུྃ་ཕཊ།
ཨོྃ་པདྨར་རྒྱ་ཨ་གར་ཏ་དར་ཤ་ཧཱུྃ་ཕཊ། ཨོྃ་པདྨོ་ས་མོན་བི་ཤ་ལེ་ཧཱུྃ་ཕཊ། ཨོྃ་གྷུ་ལི་ས་བོ་ཏམ་གོ་ར་ན་ཧཱུྃ་ཕཊ། ཨོྃ་པདྨོ་མེ་ཤ་ཨ་ནན་ད་ཏ་ཡ་ཀ་ར་ཧཱུྃ་ཕཊ། དེ་དག་ལས་རྣམས་འགྲུབ་པ་དང་། །རྟག་ཏུ་རང་གིས་འཆར་བྱས་ཤིང་། །གསང་བའི་སྔགས་ལམ་
ལ་བརྟེན་ནས། །ཚེ་འདི་གྲུབ་པར་གྱུར་པ་ཡིན། །དེ་བཞིན་གཤེགས་པ་ཐམས་ཅད་ཀྱི་དགོངས་པ་བླ་ན་མེད་པའི་གསང་བ་དཔལ་རྟ་མཆོག་རོལ་པའི་རྒྱུད་ལས། ཐུན་མོང་གི་དངོས་གྲུབ་བསྒྲུབ་པའི་ལེའུ་སྟེ་ཉེར་ལྔ་པའོ།། །།དེ་ནས་གར་གྱི་དབང་ཕྱུག་ཉིད། །
ཕྱག་རྒྱ་རོལ་པའི་སྐུར་བཅས་ཀྱིས། །སྣོད་ལྡན་བྱང་ཆུབ་སེམས་དཔའ་དག །མཆོག་གི་དངོས་གྲུབ་སྐྱེད་བྱེད་པའི། །རིག་འཛིན་གནས་ཀྱི་མཚན་ཉིད་བཤད། །དམར་པོ་དབང་གི་དཀྱིལ་འཁོར་དུ། །བྷན་དྷ་མཚན་དང་ལྡན་པ་བརྒྱད། །པདྨའི་འདབ་མ་ལ་བཀྲམ་
ནས། །ཚེ་འདས་སྔགས་ཀྱིས་བརྒྱན་པར་བྱ། །དེ་ནི་བཟའ་བཏུང་ལོངས་སྤྱོད་ཚོགས། །མ་ཉམས་ཕུན་སུམ་ཚོགས་པར་སྤྱད། །གར་དབང་ལྷ་ལ་མོས་པ་ཡིས། །གསང་སྔགས་རྒྱལ་པོ་རྗོད་བྱེད་ཅིང་། །སུམ་འབུམ་བཟླས་པའི་གྲངས་ཚད་ནས། །མཐའ་སྔགས་
གཞན་གྱིས་བརྒྱན་བྱས་ཏེ། །རྟགས་མཐོང་བར་དུ་བཟླས་བརྗོད་བརྩམ། །ཨོྃ་ཨ་སུ་ཤ་ཨོྃ་ཨ་ཡུ་ཤ་སོ་ཏ་བྲུྃ། །འོད་ཟེར་དུ་བ་ལྟ་བུ་དང་། །ཕྱག་རྒྱའི་དབྱིངས་དང་འབྱུང་བའི་དུས། །བྲོ་དྲུག་གླུ་དང་གར་བཅས་པས། །བརྟུལ་ཞུགས་ཆེན་པོ་བདུད་རྩི་སྤྱད། །སྐུ་གསུང་
ཐུགས་མཆོག་ཕྱག་རྒྱ་ཆེ། །གསང་བའི་ཡུམ་བསྐྱེད་སྙིང་པོ་མཆོག །ཨོཾ་ཨེ་ཀ་ཏེ་བི་ག་ཏེ་མ་ཏང་ཀ་ཏེ་སྭཱ་ཧཱ། །མ་ཉམས་ཉམས་པའི་ཕྱག་རྒྱར་གསལ། །གཉིས་སུ་མེད་པར་སྦྱོར་བ་ཡིས། །རྡོ་རྗེ་པདྨོར་ལྡན་བྱས་པས། །ཐབས་ཀྱི་ཕྱག་རྒྱའི་ཆོ་འཕྲུལ་ལ། །

གཟི་ལྡན་གསང་བ་ཨེ་གྲུ་གསུམ། །ཉི་མ་པདྨ་ཤེས་རབ་ལྡན། །སོ་སོ་གསལ་བའི་བརྡས་མཚོན་ཏེ། །ཨོྃ་བྲུྃ་པདྨ་ཨཱ་ཡུ་ཤེ། །བྱིན་བརླབས་རྣམ་པར་འཕྲོ་བ་ཡིས། །ཕྱོགས་བཅུའི་སངས་རྒྱས་ཐུགས་བསྐུལ་ཞིང་། །བྱང་ཆུབ་སེམས་མཆོག་
ཚེ་ཡི་རྒྱུན། །སྒྲུབ་པ་པོ་ལ་གསལ་བར་མཛད། །པད་འདབ་བརྒྱད་པ་ཉི་མར་བཅས། །དབུས་སུ་གསང་བའི་རྡོ་རྗེ་ཆེ། །ཧཱུྃ་གིས་གསོར་ཞིང་ཨ་ཡིས་བསྐྱོད། །ཡང་དང་ཡང་དུ་བསྐུལ་བ་ནི། །སྐུ་གསུང་དབྱིངས་སུ་གྱུར་པའོ། །དེ་ལ་བྱང་ཆུབ་སེམས་མཆོག་
རྒྱུན། །བྷན་དྷ་མཚན་ལྡན་ནང་དུ་བཅུག །རྣལ་འབྱོར་གར་དང་ལེགས་བཅས་པས། །བཀྲ་ཤིས་ཚིགས་བཅད་གླུ་བླང་ཞིང་། །བཀྲ་ཤིས་གར་དང་དབྱངས་སུ་བཅས། །ལོངས་སྤྱོད་སྟོན་མོ་ཀུན་གསོལ་ཞིང་། །དངོས་གྲུབ་དོན་ཕྱིར་གསོལ་བ་གདབ། །དེ་བཞིན་གཤེགས་
པ་ཐམས་ཅད་ཀྱི་དགོངས་པ་བླ་ན་མེད་པའི་གསང་བ་དཔལ་རྟ་མཆོག་རོལ་པའི་རྒྱུད་ཆེན་པོ་ལས་ཚེ་བསྒྲུབ་པའི་ལེའུ་སྟེ་ཉེར་དྲུག་པའོ།། །།དེ་ནས་གར་གྱི་ལྷ་མཆོག་གིས། །ཐམས་ཅད་བདུད་རྩིར་བྱིན་བརླབས་ནས། །ཕྱི་ནང་སྣོད་བཅུད་མ་ལུས་ཀུན། །
རིགས་ལྔའི་སྐུ་རུ་བསྒྲུབ་པའི་ཕྱིར། །རང་ལས་བྱུང་བའི་རང་བཞིན་དང་། །དངོས་གྲུབ་སྙིང་པོ་ཀུན་བསྡུས་བཤད། །ཆོས་རྣམས་མ་ལུས་རྣམས་བརྟགས་ནས། །རིགས་ལྔའི་དཀྱིལ་འཁོར་ཚུལ་དུ་གནས། །དེ་ལས་འབྱུང་བའི་དངོས་རྣམས་ཀྱིས། །དེ་ཉིད་ལྟ་བུར་
སྦྱོར་བ་བྱ། །དང་པོར་བསོད་ནམས་ཚོགས་བསགས་ཤིང་། །རྡོ་རྗེ་བླ་མ་མཉེས་བྱས་པས། །ཕུན་སུམ་ཚོགས་པའི་གནས་དག་ཏུ། །ལྷ་ཉིད་ཉེ་བར་བསྒོམས་བྱས་པས། །དཀྱིལ་འཁོར་ཆེན་པོ་བརྩམ་པར་བྱ། །རིགས་ཀྱི་ལྷ་ཡི་དཀྱིལ་འཁོར་གྱིས། །རིགས་
ཀྱི་ཕྱག་རྒྱ་བསྒྲུབ་པར་བྱ། །དྲི་དབྱིབས་ཁ་དོག་རོ་ལ་སོགས། །ཤ་ལྔ་བདུད་རྩིར་བཅས་པ་དག །བྷན་དྷ་མཚན་ལྡན་ལྔ་རུ་ནི། །དཀྱིལ་འཁོར་འཁོར་དང་ཕྱོགས་བཞིར་དགྲམ། །རྡོ་རྗེ་བཀོད་པའི་དཀྱིལ་འཁོར་གྱིས། །སོ་སོར་སྤང་བ་སྦྱང་བྱས་ཏེ། །ཕྱག་རྒྱ་

སྔགས་དང་ཏིང་འཛིན་མཐུས། །རིགས་ཀྱི་དཀྱིལ་འཁོར་མངོན་པར་བསྒྲུབ། །མཆོད་ཅིང་མཉེས་པར་བྱས་ནས་ནི། །ལས་ཀུན་གྲུབ་པའི་གསང་སྔགས་བརྗོད། །ཨོྃ་པདྨོ་བཛྲ་ཧྲི་གྷུ་ན་སིདྷི་སརྦ་པཉྩ་ཨ་མྲྀ་ཏ། ཨོྃ་ཨཱཿཧཱུྃ་སྭཱ་ཧཱ། དེ་ལ་འོད་དང་དུ་བ་དང་། །དྲི་
དང་ལྷ་མོ་རྟགས་དག་ནི། །བཟླས་བརྗོད་ཐུན་མོང་ཁྱད་པར་དག །འབུམ་ཚོ་གསུམ་གྱིས་འགྲུབ་པར་འགྱུར། །དེ་ནས་གྲུབ་པའི་རྟགས་མཐོང་ནས། །དེ་དག་བཏག་ཙམ་སྦྱང་བྱ་ཞིང་། །མཁའ་འགྲོ་རོལ་པའི་བརྟུལ་ཞུགས་ཀྱིས། །བསོད་ནམས་སྦྱང་ཞིང་བྱིན་གྱིས་
བརླབས། །དཀྱིལ་འཁོར་བཀོད་པ་རྒྱན་དང་བཅས། །ཁྲོ་བོ་འབར་བར་ཞལ་སྒྱུར་ཞིང་། །ཡབ་ཡུམ་གདུང་བའི་གླུ་དབྱངས་དང་། །བྱང་ཆུབ་སེམས་དཔའ་འཕྲོ་འདུ་ཡིས། །དཀྱིལ་འཁོར་དབུས་ཀྱི་གནས་བཞུགས་པར། །བདུད་ཀྱི་གར་གྱི་དབང་ཕྱུག་བསྐྱེད། །སླར་
ཉིད་ཁྲོ་བོ་དཀྱིལ་འཁོར་གྱིས། །གཟུགས་འདུལ་གཙོ་བོའི་ཐུགས་ཀར་ཞུགས། །ཡེ་ཤེས་དཀྱིལ་འཁོར་ཀུན་བཀུག་ནས། །དམ་ཚིག་བདུད་རྩི་གཉིས་མེད་འགྱུར། །སླར་འབྱུང་པདྨོའི་རྒྱལ་པོའི་སྐུ། །དབུས་ཀྱི་དཀྱིལ་འཁོར་གདན་ལ་བཞུགས། །མཆོད་
བསྟོད་དགའ་བས་མཉེས་བྱས་ནས། །བྲོ་གར་གླུ་ཡིས་ཐུགས་དམ་བསྐང་། །ཁྱད་པར་གསང་སྔགས་རྒྱལ་པོའི་མཐུས། །ཡེ་ཤེས་ལྔར་ལྡན་འོད་ཟེར་ཅན། །ཨོྃ་མ་ཧཱ་སརྦ་ཏ་ཐཱ་ག་ཏ་པཉྩ་ཨ་མྲྀ་ཏ་རུ་ལུ་རུ་ལུ་ཧཱུྃ་ཕཊ་སྭཱ་ཧཱ། ཇི་སྲིད་མཚན་མ་མ་བྱུང་བར། །སྔགས་ཀྱི་
རྒྱལ་པོ་བརྗོད་པར་བྱ། །དེ་ནས་རྟ་མགྲིན་ཕྱག་རྒྱ་ཡིས། །སྒྲུབ་པ་ཆེན་པོ་གསང་བའི་དོན། །རྡོ་རྗེ་རྟ་མཆོག་ཕྱག་རྒྱ་ཆེ། །བདུད་རྩི་རྫས་ཀྱིས་དབང་བསྐུར་ཞིང་། །རྣལ་འབྱོར་གྲོགས་བཅས་ཚིམ་པར་བྱ། །ཕྱོགས་རྣམས་ཀུན་ནས་གདུངས་བའི་གླུས། །དཀྱིལ་
འཁོར་ལྷ་དང་བླ་མ་མཆོད། །དངོས་གྲུབ་གསོལ་བའི་ཚིག་བརྗོད་ཅིང་། །དགའ་བའི་ལོངས་སྤྱོད་རྒྱ་ཆེར་བྱ། །ལྷ་རྣམས་ཀུན་ལ་དགྱེས་འདུལ་ཞིང་། །དམ་མེད་དབང་པོ་སྔགས་ཀྱིས་བསྐྲད། །བདུད་རྩི་གཏོར་བས་ལུས་རླག་འགྱུར། །རང་གི་ཡེ་ཤེས་ལས་ལས་

སྐྱེས། །དེ་ནས་ལས་མཛད་སྲུང་མ་དང་། །མགྲོན་ཚོགས་གཏོར་མས་མཉེས་བྱས་ཏེ། །བསོད་ནམས་ཡེ་ཤེས་ཚོགས་ཆེན་པོ། །རབ་ཚོགས་འགྲོ་བའི་དོན་ཕྱིར་བསྔོ། །དེ་བཞིན་གཤེགས་པ་ཐམས་ཅད་ཀྱི་དགོངས་པ་དཔལ་རྟ་མཆོག་རོལ་པའི་རྒྱུད་
ཆེན་པོ་ལས་བདུད་རྩི་བསྒྲུབ་པའི་ལེའུ་སྟེ་ཉི་ཤུ་བདུན་པའོ།། །།དེ་ནས་རྟ་མཆོག་རོལ་པའི་སྐུ་དབུས་སུ། །དཀྱིལ་འཁོར་དབུས་སུ་དགྱེས་ཚུལ་གྱིས། །འགྲོ་རྣམས་ཀུན་ལ་བསྐུལ་མཛད་ཅིང་། །ཕྲིན་ལས་གསང་བའི་དོན་བཤད་མཛད། །བསམ་གཏན་ལས་
ཀྱིས་འབྱུང་བ་ཡི། །ཞི་རྒྱས་དབང་དྲག་མངོན་སྤྱོད་དང་། །མནན་བཟློག་རེངས་དང་བསད་ལ་སོགས། །ཏིང་འཛིན་གསལ་ནས་གོམས་པའི་མཐུས། །བདག་དང་གཞན་དོན་ལས་ལ་སྦྱར། །ཞི་བ་ཞི་བའི་ཡི་གེ་སྟེ། །བསྒྲུབ་བྱ་ཟླ་དཀྱིལ་ལ་བཞག་ནས། །རྣམ་
པར་སྣང་མཛད་འོད་སྔགས་ཀྱིས། །དུས་གསུམ་ལྷ་དང་མངོན་སྦྱར་ཞིང་། །བྱང་ཆུབ་སེམས་ཀྱི་བདེ་བསྐྱེད་དེ། །ཟུག་རྔུ་རྟོག་པ་རྣམ་པར་སེལ། །ཡུན་རིངས་གོམས་པར་བསྟན་པའི་མཐུས། །མེ་འབར་གནས་ཀྱང་ཞི་བར་ནུས། །རྒྱས་ལ་རྒྱས་པའི་གཟུགས་
བགྱིས་ཏེ། །རིན་ཆེན་འབྱུང་ལྡན་ལ་འབྱུང་བའི། །འཁོར་ལོས་སྒྱུར་རྒྱལ་ཆ་ལུགས་ཀྱིས། །སེར་པོ་འོད་དཔུང་འབར་བ་བརྗིད། །རང་གི་བཙུན་མོའི་ཚོགས་དང་བཅས། །བདེར་གཤེགས་བྱིན་བརླབས་ཀུན་བསྡུས་ཤིང་། །སྐུ་གསུང་ཐུགས་ཀྱི་ཡོན་ཏན་དང་། །
ཕྲིན་ལས་སྒོ་ནས་བརྩམ་པར་མཛད། །སྔགས་དང་འོད་ཟེར་གསང་བ་ཡིས། །རིན་ཆེན་སྣ་བདུན་གསེར་ལ་སོགས། །མཁའ་མཛོད་ཆར་སྤྲིན་བཞིན་དུ་འབེབས། །ཚོགས་རྣམས་རང་གིས་ལོངས་སྤྱོད་ཅིང་། །འགྲོ་རྣམས་གཞན་ལ་སྦྱིན་པར་བྱེད། །ཐབས་
དང་དབང་དུ་བསྡུས་ཕྱིར་རོ། །འོད་དཔུང་དམར་པོ་མཐའ་ཡས་ས་སྐུ། །པདྨའི་དཀྱིལ་འཁོར་དབུས་བཞུགས་ཤིང་། །ཆགས་པ་ཆེན་པོས་འགྲོ་འདུལ་བ། །རིགས་ཀྱི་ཏིང་འཛིན་སྔགས་ཀྱི་མཐུས། །ལྷ་ཚོགས་འགྲོ་རྣམས་དབང་སྡུད་ཅིང་། །འཁོར་བཅས་དང་

བར་གྱུར་པ་ཡིན། །གང་ཞིག་སྡང་བའི་སེམས་ཡོད་པ། །འཕྲད་པ་བཞིན་རྒྱས་ཆགས་པར་འགྱུར། །གང་ཞིག་གསད་པའི་ལས་གྲུབ་མཛོད། །དེ་ནི་མཐིང་ནག་ལས་ཀྱི་ཁྲོ་བོའི་ཏིང་འཛིན་ལས། །ཁྲོ་བོ་སྤྲུལ་པའི་འཕྲོ་འདུ་ཡིས། །བསྒྲུབ་བྱ་དང་ཕྲ་ཞིང་དགུག་པ། །
མེ་ཡི་དཀྱིལ་འཁོར་ལ་གཞག་སྟེ། །ཤིན་ཏུ་མ་རུངས་མཚོན་ཆར་ལྡན། །དཀོན་མཆོག་གསུམ་ལ་སྔོ་བྱེད་ཅིང་། །སྐྱེ་བོ་ཡོངས་ལ་འཚེ་བ་དང་། །སློབ་དཔོན་ཀུན་ལ་བསྔོ་བ་དང་། །སངས་རྒྱས་ཐུགས་རྗེས་བཟོད་མི་མཛད། །ལས་ཀྱི་ཁྲོ་བོ་སྣ་ཚོགས་ཀྱིས། །
མཚོན་ཆ་མེ་འོད་འབར་འཕྲོས་ནས། །སྡིག་པ་ཅན་དེ་བསྒྲལ་མཛད་ཅིང་། །བྱ་ཁྱི་ཅེ་སྤྱང་ཤ་ཟ་དང་། །ཁྲག་འཐུང་མང་པོ་འདུས་པ་ཡིས། །བསྟོད་པའི་ཚུལ་དུ་རོལ་ཞིང་དགྱེས། །ཏིལ་ཙམ་མེད་པར་ཟོས་པ་དང་། །སེམས་ཉིད་བདེ་བ་ཆེན་པོའི་གནས། །དེ་
དག་ཏིང་འཛིན་གསང་སྔགས་དང་། །དཀྱིལ་འཁོར་སོ་སོའི་རྣམ་པ་བསྒྲུབ། །ཨོྃ་བྷཱུ་ཏ་ཙཀྲ་སམ་བ་ག་ཏི་ལོ་ཙཱ་ན་ཆེ་གེ་མོ་ཤཱིནྟཾ་ཀུ་རུ་སྭཱ་ཧཱ། ཨོྃ་རཏྣ་སྃ་བྷ་གུ་རུ་མ་མ་ཀི་ཆེ་གེ་མོ་པུཥྚིཾ་ཀུ་རུ་སྭཱ་ཧཱ། ཨོྃ་ཡཱ་མི་ཏེ་ས་ར་བ་ར་ཧོ་ཆེ་གེ་མོ་པ་ཤྃ་ཀུ་རུ་སྭཱ་ཧཱ། ཨོྃ་
ཀརྨ་སནྟི་བ་ཀྲོཏ་ནི་ཆེ་གེ་མོ་ཧཱ་ཡཱ་སྭཱ་ཧཱ། རང་གི་དཀྱིལ་འཁོར་གནས་བཟང་པོ། །རང་གི་དཀྱིལ་འཁོར་ལ་གནས་ཏེ། །སྔགས་དང་ཏིང་འཛིན་སྦྱོར་བའི་མཐུས། །ཆོ་ག་མངོན་དུ་འགྲུབ་པར་བྱེད། །གཞན་ཡང་རྨོངས་དང་རེངས་པ་དང་། །དབྱེ་ཞིང་དགུག་དང་
བསྐྲད་པ་དང་། །གནོན་ལ་སོགས་པའི་ལས་རྣམས་ཀྱང་། །རང་གི་ལྟ་བའི་སྦྱོར་བ་ཡིས། །བསམ་གཏན་སྔགས་ཀྱིས་འགྲུབ་པར་འགྱུར། །དེ་བཞིན་གཤེགས་པ་ཐམས་ཅད་ཀྱི་དགོངས་པ་བླ་ན་མེད་པའི་གསང་བ་དཔལ་རྟ་མཆོག་རོལ་པའི་རྒྱུད་ཆེན་པོ་ལས་
བསམ་གཏན་གྱི་སྦྱོར་བའི་རིམ་པ་སྟེ་ཉེར་བརྒྱད་པའོ།། །།དེ་ནས་སྦྱོར་བའི་རྒྱལ་པོ་དང་། །ཕྲིན་ལས་ཀུན་གྱི་མཆོག་གྱུར་པའོ། །རྫས་རྣམས་རྟེན་པའི་མཚན་མ་ཉིད། །འདོང་འདོད་འབྲས་བུ་སྒྲུབ་བྱེད་པའོ། །གར་གྱི་དབང་ཕྱུག་ཕྱག་རྒྱའི་སྐུ། །

རྣམ་སྤྲོ་ལྷ་ཡི་དཀྱིལ་འཁོར་གྱིས། །སོ་སོའི་འདོད་དོན་སྒྲུབ་པར་བྱེད། །རྡོ་རྗེ་ཙཀྲ་རིན་ཆེན་དང་། །པདྨ་རྒྱ་གྲམ་ལ་སོགས་ཏེ། །ལས་ཀུན་ལྷ་ཡི་ང་རྒྱལ་གྱིས། །མཚན་རྟགས་མ་བྱུང་བར་དུ་བསྒྲུབ། །གཟུགས་བརྙན་དཀྱིལ་འཁོར་གཞིར་
བཞག་ནས། །ལྷ་ཡི་དཀྱིལ་འཁོར་སྒྲུབ་བྱེད་ཅིང་། །མཚན་མའི་རྫས་ལ་བརྟེན་བྱས་ཏེ། །བརྟེན་པར་མཆོད་ཅིང་མཉེས་པ་དང་། །ལས་ཀུན་པ་ཡི་གསང་སྔགས་བརྗོད། །ཨོྃ་མ་མ་སརྦ་བི་ཏ་ཧ་ར་ཀུ་རུ་སྭཱ་ཧཱ། །སརྦ་ས་མོ་ཀུ་ནི། ལྃ་བ་ཤཱནྟིཾ་ཀུ་རུ་ད་ནི་ཧཱུྃ།
པུཥྚིཾ་རཏྣ་མ་ཀུ་རུ་སྭཱ་ཧཱ། །པ་ཤྃ་ཀུ་རུ་པདྨོ་ཧྲྀ་ད་ཡ་ཨྃ། སྟྃ་བ་ན་མོ་ཤ་ཨ་ཀརྨ་པ་ནི་ཧཱུྃ་ཕཊ། །ཅུང་ཞིག་གཟུགས་ནི་འདུ་བའམ། །འོད་འཕྲོས་བསྐྱོད་པར་གྱུར་པ་དང་། །ང་རྒྱལ་ལྡན་པས་ལག་ཐོགས་ཏེ། །གསང་སྔགས་དྲག་ཏུ་བརྗོད་པར་བྱ། །གང་
ཞིག་ཞི་དང་རྒྱས་པ་དང་། །དབང་ལ་སོགས་ནི་སྒྲུབ་འདོད་པས། །དེ་དག་དེ་དང་མཐུན་པ་དང་། །ལས་ཀྱི་དཀྱིལ་འཁོར་ལ་གནས་བསམ། །ཕྱག་རྒྱའི་མཚན་མ་བསྐུལ་བྱས་ཏེ། །རང་གི་ལས་ལ་རྣམ་པར་གནས། །དགུག་ལ་སོགས་པའི་ལས་
དག་དང་། །ལྕགས་ཀྱུ་ལ་སོགས་ལས་ཀྱི་བསྒྲུབ། །རྟེན་གྱི་མཚན་མ་དང་བྲལ་བར། །ཅི་འདོད་བྱ་བ་མཐར་ཕྱིན་འགྲུབ། །ཐབས་དང་སྒྲུབ་བྱེད་གསང་སྔགས་ལ། །སོ་སོའི་ལས་ཀྱི་མཐའ་བརྒྱན་ཏེ། །ཡི་གེ་བཅུ་བཞིའི་རྗེས་ཐོགས་སུ། །སུམ་འབུམ་
གྲངས་ཀྱིས་བསྒྲུབ་པར་བྱ། །ཨོྃ་བི་ལོ་གི་མ་མ་དུཤྚ་ན་ག་ག་ན་རུ་ལུ་རུ་ལུ་ཧཱུྃ་ཕཊ། དང་པོ་རྩ་བའི་སྔགས་ནི། གསུམ་འབུམ་དག་ཏུ་བཟླས་བྱས་ནས། །སླར་ཡང་དེ་ཡི་གྲངས་མཐུན་པ། །གང་འདོད་ལས་རྣམས་འགྲུབ་པར་འགྱུར། །དེ་བཞིན་
གཤེགས་པ་ཐམས་ཅད་ཀྱི་དགོངས་པ་བླ་ན་མེད་པའི་གསང་བ་དཔལ་རྟ་མཆོག་རོལ་པའི་རྒྱུད་ཆེན་པོ་ལས་རྟེན་གྱི་སྒོ་ནས་སྤྱད་པའི་ལེའུ་སྟེ་ཉི་ཤུ་དགུ་པའོ།། །།འགྲོ་གནས་ཐམས་ཅད་སྲུང་བྱེད་ཅིང་། །ཕན་གདགས་ཆོ་ག་བཟང་པོ་ཉིད། །

རྒྱལ་བའི་བྱིན་བརླབས་གནས་པའི་ཐབས། །རྣམ་པ་ཡིས་ནི་བརྩམ་བྱས་ཏེ། །གྲོང་ཁྱེར་ལ་སོགས་བསྲུང་འདོད་པས། །ཆུ་དང་བྱེ་མ་ལ་སོགས་ལ། །གསང་སྔགས་རྒྱལ་པོ་བརྗོད་པར་བྱ། །ཨོྃ་ན་མོ་ཀུ་རུ་སརྦ་བི་ད་ར་ནི་མོ་ས་དེ་ནི་ར་ཤ་ནི་ར་ཤ་ཀྲ་ར་ཀྲ་ཏ་ཧཱུྃ་ཕཊ། །རང་གི་
ལྷ་ཡི་སྦྱོར་ལྡན་པས། །སྟོང་དུ་བརྗོད་ཅིང་ཕྱོགས་བཅུར་གཏོར། །གང་སྲུང་བ་དག་ཤིས་འགྱུར་ཅིང་། །འབྱུང་པོའི་ཚོགས་ཀྱིས་མི་ཚུགས་འགྱུར། །གཞན་ཡང་རིའུ་ཆ་དགུ་པ་ཡི། །འཁོར་ལོ་ཤིང་ཤུན་ཚོགས་ལ་བྲི། །མུ་ཁྱུད་དག་གིས་མཐའ་བསྐོར་ནས། །གསང་
སྔགས་རྒྱལ་པོ་དགོད་པར་བྱ། །དབུས་སུ་དགོད་པའི་གསང་སྔགས་ནི། །ཡི་གེ་བཅུ་བཞི་གསང་སྔགས་བསམ། །དེའི་མཐའ་མར་ཨོྃ་མཐར་ཧེ་ཧེ་དང་། ཧུ་རུ་ཀཾ་པ་བག་ཤ་ཧ་ཧ་མ་མྲ་བྲི་ཧཱུྃ་ཕཊ་སྭཱ་ཧཱ །དེ་མཐར་དབྱངས་དང་གསལ་བྱེད་གང་། །བསྲུང་བའི་སྔགས་དང་བཅས་པ་
ནི། །གུར་གུམ་བཟང་པོས་བྱུགས་བྱས་ཏེ། །རྡོ་རྗེ་རྒྱ་གྲམ་དབུས་སུ་གཞུག །གང་གི་མིང་བཅས་འབུམ་བཟླས་ཤིང་། །བཏགས་པའི་སྲུང་བའི་མཆོག་ཏུ་འགྱུར། །གཞན་ཡང་བུམ་པ་བཟང་པོ་རུ། །བདུད་རྩི་འོ་མ་སྦྱར་བ་དག །རང་གི་གསང་སྔགས་ཡུངས་ཀར་
བཅས། །གར་དབང་ཆགས་པའི་སྐུར་བསྒོམས་ཤིང་། །སྔགས་ཐོད་བསྲུང་བར་འགྱུར་བར་བྱེད། །དེ་བཞིན་གཤེགས་པ་ཐམས་ཅད་ཀྱི། །གསང་བ་འདི་ཉིད་བཤད་པ་ལས། །ཕྱོགས་བཅུའི་བྱང་ཆུབ་སེམས་བཅས་པས། །དེ་ལ་ཐམས་ཅད་དགའ་
མཛད་ཅིང་། །ལྷ་རྣམས་ཀུན་ལ་སླར་བསྒོ་མཛད། །དེ་དག་དད་པའི་ཤུགས་ཀྱིས་ནི། །རྒྱུད་ཀྱི་རྒྱལ་པོ་འདི་བཟུང་ཞིང་། །དེ་འཛིན་གཞན་ལའང་བྱམས་པར་འགྱུར། །དེ་བཞིན་གཤེགས་པ་ཐམས་ཅད་ཀྱི་གསང་བ་དཔལ་རྟ་མཆོག་རོལ་པའི་རྒྱུད་ཆེན་
པོ་ཞེས་བྱ་བ་ལས་བསྲུང་བའི་ལེའུ་སྟེ་སུམ་ཅུ་པའོ།། །།དེ་བཞིན་གཤེགས་པ་ཐམས་ཅད་ཀྱི་དགོངས་པ་བླ་ན་མེད་པའི་གསང་བ་དཔལ་རྟ་མཆོག་རོལ་པའི་རྒྱུད་ཆེན་པོའི་རྩ་བ་རྫོགས་སོ།། །།

༄༅༅། །རྒྱ་གར་སྐད་དུ། ཤྲཱི་ཧེ་རུ་ཀ་ཀཱ་རུ་ཎ་ཀྲཱི་ཌི་ཏ་ཏ་ན་ཏྲ་གུ་ཧྱ་གྃ་བྷཱི་ར་ཨུ་ཏ་ཏ་མ་ནཱ་མ། བོད་སྐད་དུ། དཔལ་ཧེ་རུ་ཀ་སྙིང་རྗེ་རོལ་པའི་རྒྱུད་གསང་བ་ཟབ་མོའི་མཆོག་ཅེས་བྱ་བ། །དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །འདི་སྐད་བདག་
གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་དང་། རྡོ་རྗེ་དང་། རིན་པོ་ཆེ་དང་། པདྨ་དང་། ལས་ཀྱི་རིགས་ཐམས་ཅད་ཀྱི་མཆོག་ཏུ་གསང་བ་ཆེན་པོ་དམ་ཚིག་གི་སྡོམ་པ་གཉིས་སུ་མེད་པའི་བདེ་བ་ཆེན་པོ་དབང་བརྙེས་པ།
ཐབས་དང་ཤེས་རབ་ཀྱི་རྣལ་འབྱོར་གྱི་དབང་ཕྱུག་ཆེན་པོ། ཁམས་གསུམ་ཐམས་ཅད་ཀྱི་བདག་པོ་ཆེན་པོ། དེ་བཞིན་གཤེགས་པ་ཐམས་ཅད་ཀྱི་གསང་བ་ཆེན་པོ་ནམ་མཁའི་དབྱིངས་ཐམས་ཅད་དུ་མཉམ་པར་འཇུག་པ། ཕ་རོལ་ཏུ་ཕྱིན་པའི་སྐབས་
དང་ལྡན་པ། ཆེ་མཆོག་ཧེ་རུ་ཀའི་ཤེས་རབ་དང་ཡེ་ཤེས་ཀྱི་དབང་བསྐུར་བ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རིན་པོ་ཆེ་གསང་བ་རྡོ་རྗེ་མཆོག་ཏུ་གསང་བའི་བཅོམ་ལྡན་འདས་བུད་མེད་ཀྱི་དཀྱིལ་ན་གསུང་བརྗོད་པ་
མེད་པར་བཞུགས་སོ། །སངས་རྒྱས་ཀྱི་ཞིང་ནམ་མཁའི་དབྱིངས་ཀྱི་རྡུལ་ཕྲན་དང་མཉམ་པ། རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོ་དང་། རྡོ་རྗེ་ནམ་མཁའ་ལ་འགྲོ་བ་དང་། ནམ་མཁའ་ལ་འགྲོ་བ་ཆེན་མོ་དང་། སྐལ་བ་དང་ལྡན་པ་དང་། འཇིབ་པར་བྱེད་པའི་
གསང་བ་ཆེན་མོའི་གཡོག་དང་། འབྱུང་བ་ཆེན་པོ་ལྔ་དང་། འབྱུང་བ་ལས་གྱུར་པའི་ལྷའི་ཚོགས་འབུམ་ཕྲག་བརྒྱ་སྟོང་གིས་ཁྱབ་པ་འདི་ལྟ་སྟེ། སྙིང་པོ་ཡེ་ཤེས་རྡོ་རྗེ་དང་། ཆོས་ཀྱི་དབྱིངས་ཀྱི་ཡེ་ཤེས་རྡོ་རྗེ་དང་མེ་ལོང་ཡེ་ཤེས་རྡོ་རྗེ་དང་། སོ་སོར་ཀུན་ཏུ་རྟོག་པའི་ཡེ་ཤེས་རྡོ་རྗེ་
དང་། མཉམ་པ་ཉིད་ཡེ་ཤེས་རྡོ་རྗེ་དང་། བྱ་བ་ནན་ཏན་ཡེ་ཤེས་རྡོ་རྗེ་དང་། ནམ་མཁའ་ཡེ་ཤེས་རྡོ་རྗེ་དང་། རླུང་ཡེ་ཤེས་རྡོ་རྗེ་དང་། མེ་ཡེ་ཤེས་རྡོ་རྗེ་དང་། ཆུ་ཡེ་ཤེས་རྡོ་རྗེ་དང་། ས་ཡེ་ཤེས་རྡོ་རྗེ་དང་། ཐབས་དང་ཤེས་རབ་ཡེ་ཤེས་རྡོ་རྗེ་དང་། གཟུགས་ཡེ་

ཤེས་རྡོ་རྗེ་དང་། སྒྲ་ཡེ་ཤེས་རྡོ་རྗེ་དང་། དྲི་ཡེ་ཤེས་རྡོ་རྗེ་དང་། རོ་ཡེ་ཤེས་རྡོ་རྗེ་དང་། རེག་ཡེ་ཤེས་རྡོ་རྗེ་དང་། སྐུ་ཡེ་ཤེས་རྡོ་རྗེ་དང་། གསུང་ཡེ་ཤེས་རྡོ་རྗེ་དང་། ཐུགས་ཡེ་ཤེས་རྡོ་རྗེ་དང་། བདེ་བ་ཆེན་པོ་ཡེ་ཤེས་རྡོ་རྗེ་དང་། ཀུན་དུ་བཟང་པོ་ཡེ་ཤེས་རྡོ་རྗེ་དང་། གསུང་
གི་དབང་པོ་ཡེ་ཤེས་རྡོ་རྗེ་དང་། གཉིས་སུ་མེད་པའི་ཡེ་ཤེས་རྡོ་རྗེ་དང་། ཞི་བའི་ཡེ་ཤེས་རྡོ་རྗེ་དང་། གདུལ་དཀའ་འདུལ་བའི་ཡེ་ཤེས་རྡོ་རྗེ་དང་། རྒྱལ་བའི་ཡེ་ཤེས་རྡོ་རྗེ་དང་། མེ་ཏོག་གི་ཡེ་ཤེས་རྡོ་རྗེ་དང་། རབ་ཏུ་དགའ་བའི་ཡེ་ཤེས་རྡོ་རྗེ་དང་། དབང་གི་ཡེ་
ཤེས་རྡོ་རྗེ་དང་། ཉི་མའི་ཁྲོ་བོ་ཡེ་ཤེས་རྡོ་རྗེ་དང་། རྒྱལ་མཚན་ཡེ་ཤེས་རྡོ་རྗེ་དང་། རྡོ་རྗེ་སྒྲ་ཡེ་ཤེས་རྡོ་རྗེ་དང་། འགྲོ་བ་འདུལ་བ་ཡེ་ཤེས་རྡོ་རྗེ་དང་། །གཞོན་ནུ་ཡེ་ཤེས་རྡོ་རྗེ་དང་། རྒྱུ་ཡེ་ཤེས་རྡོ་རྗེ་དང་། གསུང་མེད་པའི་ཡེ་ཤེས་རྡོ་རྗེ་དང་། སྣ་ཚོགས་ཀྱི་ཡེ་ཤེས་
རྡོ་རྗེ་དང་། གོ་ཆ་ཡེ་ཤེས་རྡོ་རྗེ་དང་། ཡང་དག་པར་ཟབ་པར་བྱེད་པའི་ཡེ་ཤེས་རྡོ་རྗེ་དང་། འདུས་པའི་ཡེ་ཤེས་རྡོ་རྗེ་དང་། བདེ་བ་ཆེན་པོའི་ཡེ་ཤེས་རྡོ་རྗེ་དང་། བྱང་ཆུབ་སེམས་ཡེ་ཤེས་རྡོ་རྗེ་དང་། རིན་ཆེན་དབང་བསྐུར་བ་ཡེ་ཤེས་
རྡོ་རྗེ་དང་། པདྨོ་དམར་པོ་ཡེ་ཤེས་རྡོ་རྗེ་དང་། དམ་ཚིག་ཡེ་ཤེས་རྡོ་རྗེ་དང་། མཆོད་པའི་ཡེ་ཤེས་རྡོ་རྗེ་དང་། རྣལ་འབྱོར་མ་ཆེན་མོ་གཡོག་དང་བཅས་པ་རྣམས་ལ་འདི་ལྟ་སྟེ། ཤིན་ཏུ་དགའ་བའི་དབང་མོ་ཞེས་བྱ་བའི་ཡེ་ཤེས་རྡོ་རྗེ་དང་། རྨོངས་པར་བྱེད་པའི་དབང་མོ་ཡེ་ཤེས་རྡོ་རྗེ་དང་། གསོད་ཅེས་
བྱ་བའི་དབང་མོ་ཡེ་ཤེས་རྡོ་རྗེ་དང་། རྡོ་རྗེ་དབྱིངས་ཕྱུག་མ་ཡེ་ཤེས་རྡོ་རྗེ་དང་། ཡེ་ཤེས་དབྱིངས་ཕྱུག་མ་ཡེ་ཤེས་རྡོ་རྗེ་དང་། རིན་ཆེན་དབྱིངས་ཕྱུག་མ་ཡེ་ཤེས་རྡོ་རྗེ་དང་། པདྨའི་དབྱིངས་ཕྱུག་མ་ཡེ་ཤེས་རྡོ་རྗེ་དང་། ལས་ཀྱི་དབྱིངས་ཕྱུག་མ་ཡེ་ཤེས་རྡོ་རྗེ་དང་།
གནོན་པར་བྱེད་མ་ཡེ་ཤེས་རྡོ་རྗེ་དང་། འཇུམས་པར་བྱེད་མ་ཡེ་ཤེས་རྡོ་རྗེ་དང་། རྨོངས་པར་བྱེད་མ་ཡེ་ཤེས་རྡོ་རྗེ་དང་། རྒྱས་འདེབས་པར་བྱེད་མ་ཡེ་ཤེས་རྡོ་རྗེ་དང་། འདྲེན་པར་བྱེད་མ་ཡེ་ཤེས་རྡོ་རྗེ་དང་། གསོད་པར་བྱེད་མ་ཡེ་ཤེས་རྡོ་རྗེ་དང་། འབིགས་པར་

བྱེད་མ་ཡེ་ཤེས་རྡོ་རྗེ་དང་། གཅོད་པར་བྱེད་མ་ཡེ་ཤེས་རྡོ་རྗེ་དང་། སྡིགས་བྱེད་ཅེས་བྱ་བ་ཡེ་ཤེས་རྡོ་རྗེ་དང་། ཚིག་བྱེད་ཅེས་བྱ་བ་ཡེ་ཤེས་རྡོ་རྗེ་དང་། ཡན་ལག་ཐམས་ཅད་འཕྲོག་བྱེད་ཡེ་ཤེས་རྡོ་རྗེ་དང་། འཇིབ་བྱེད་མ་ཡེ་ཤེས་རྡོ་རྗེ་དང་། ཁྲག་
ལ་དགའ་མ་ཡེ་ཤེས་རྡོ་རྗེ་དང་། གཅོད་བྱེད་མ་ཡེ་ཤེས་རྡོ་རྗེ་དང་། ཕམ་བྱེད་མ་ཡེ་ཤེས་རྡོ་རྗེ་དང་། ནམ་མཁའ་ལ་འགྲོ་མ་ཡེ་ཤེས་རྡོ་རྗེ་དང་། དག་འཕྲོག་མ་ཡེ་ཤེས་རྡོ་རྗེ་དང་། ཟས་ཤ་རློན་ཟ་བ་ཡེ་ཤེས་རྡོ་རྗེ་དང་། སྲིན་མོ་ཡེ་ཤེས་རྡོ་རྗེ་དང་། གནོད་སྦྱིན་མ་ཡེ་
ཤེས་རྡོ་རྗེ་དང་། གནོད་བྱེད་ཅེས་བྱ་བ་ཡེ་ཤེས་རྡོ་རྗེ་དང་། སྦྲུལ་ཡེ་ཤེས་རྡོ་རྗེ་དང་། སེང་གེ་ཡེ་ཤེས་རྡོ་རྗེ་དང་། སྟག་ཡེ་ཤེས་རྡོ་རྗེ་དང་། རི་དགས་ཡེ་ཤེས་རྡོ་རྗེ་དང་། ཕག་ཡེ་ཤེས་རྡོ་རྗེ་དང་། སྤྲེའུ་ཡེ་ཤེས་རྡོ་རྗེ་དང་། ཁྱི་ཡེ་ཤེས་རྡོ་རྗེ་དང་། བྱི་ལ་ཡེ་ཤེས་
རྡོ་རྗེ་དང་། ར་ཡེ་ཤེས་རྡོ་རྗེ་དང་། བྱ་རོག་ཡེ་ཤེས་རྡོ་རྗེ་དང་། ཝ་ཡེ་ཤེས་རྡོ་རྗེ་དང་། བྱ་རྒོད་ཡེ་ཤེས་རྡོ་རྗེ་དང་། སྲེ་མོ་ཡེ་ཤེས་རྡོ་རྗེ་དང་། མིའི་ཀེང་རུས་དང་། འབུ་ཆེན་པོའི་རོ་དང་། ཡི་དགས་དང་། ཤ་ཟ་དང་། གཟིག་དང་། བོང་བུ་དང་། རྟ་དང་། མ་ཧེ་དང་།
བ་ལང་དང་། འུག་པ་དང་། རྡོ་རྗེ་འཕྲོག་པར་བྱེད་མ་ཆེན་མོ་དང་། རྡོ་རྗེ་ཟས་འདྲེན་མ་ཆེན་མོ་དང་། དེ་ལ་སོགས་ཏེ་མཐའ་ཡས་མཆོག་མི་མཉམ་པ་དང་མཉམ་པ་དང་བཅས་པ། ཆོས་ཀྱི་དབྱིངས་རྡོ་རྗེ་ནམ་མཁའ་ལ་འགྲོ་མའི་ཚོགས་གཡོག་དང་བཅས་པ། རྡོ་རྗེའི་
རིགས་ཡེ་ཤེས་རྡོ་རྗེ་དང་། ཡེ་ཤེས་ཀྱི་ཁྲོ་བོ་ཡེ་ཤེས་རྡོ་རྗེ་དང་། ཡེ་ཤེས་ཀྱི་ཁྲོ་མོ་ཡེ་ཤེས་རྡོ་རྗེ་དང་། སྤྲུལ་པའི་ཡེ་ཤེས་རྡོ་རྗེ་དང་། སྤྲུལ་པའི་ཕྲ་མེན་མ་ཡེ་ཤེས་རྡོ་རྗེ་དང་། ཡང་སྤྲུལ་མ་ཆེན་མོ་ཡེ་ཤེས་རྡོ་རྗེ་དང་། བདུད་རྩི་ལྷ་མོ་ཡེ་ཤེས་རྡོ་རྗེ་དང་། དེ་དག་ལ་
སོགས་ཏེ་བྱེ་བ་ཕྲག་བརྒྱ་སྟོང་པོ་རྣམས་སྒྲ་ཅ་ཅོ་འབྱིན་ཅིང་ནམ་མཁའ་དབྱིངས་རབ་འབྱམ་ཆེན་པོའི་ཚོགས་རྣམས་ཀྱིས་མཆོད་པར་བྱེད་ཅིང་། བུད་མེད་ཀྱི་དཀྱིལ་ན་གསུང་བརྗོད་པ་མེད་པར་བཞུགས་སོ། །དེ་ནས་བཅོམ་ལྡན་འདས་དཔལ་ཆེ་མཆོག་ཧེ་རུ་ཀ་ཀུན་དུ་

བཟང་པོ་དཔལ་རྡོ་རྗེ་སེམས་དཔའ་ཤིན་ཏུ་དགྱེས་པ་གདོན་མི་ཟ་བའི་ཚོགས་རྡོ་རྗེ་གཏོང་བ་དབང་མོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རྣམ་པ་སྣ་ཚོགས་ཀྱི་རོལ་པ་ཆེན་པོས་རྣམ་པར་རོལ་པ། སྤྲུལ་པ་ཆེན་པོའི་གར་དང་། གླུ་དང་། སིལ་སྙན་དང་། གཟུགས་
དང་། སྒྲ་དང་། དྲི་དང་། རོ་དང་། རེག་པའི་བདེ་བ་ཆེན་པོ་དང་འཕགས་པར་འགྱུར་བ་དང་། རོལ་པ་ལ་སོགས་པའི་རེག་པ་བདེ་བ་ལ་སྤྱོད་པའི་གར་ཉེ་བར་སྟོན་ཅིང་། རྣམ་པ་སྣ་ཚོགས་ཀྱི་ཚོགས་ཀྱི་ཚུལ་ཆེན་པོ་འཕགས་པར་འགྱུར་བ་དང་། རྣམ་པ་སྣ་ཚོགས་ཀྱིས་
གནོན་པ་དང་། རྣམ་པ་སྣ་ཚོགས་ཀྱིས་སྤྲོས་པ་དང་། གར་བྱེད་པ་དང་། ཟ་བར་བྱེད་པ་དང་། འཇིབ་པར་བྱེད་པ་དང་། སྤྲས་པར་བྱེད་པ་དང་། ཟློག་པར་བྱེད་པ་དང་། མྱོང་བར་བྱེད་པ་དང་། འགྱུར་བར་བྱེད་པ་དང་། འཕྲོག་པར་བྱེད་པ་དང་། རྩོམ་པར་བྱེད་པ་དང་།
ཀུན་དུ་འདེབས་པར་བྱེད་པ་དང་། བདེ་བ་ཉེ་བར་སྟོབས་ཤིང་རེག་པ་རོའི་བྱེ་བྲག་མང་པོ་བྱེ་བ་ཕྲག་བརྒྱ་སྟོང་ཚད་མེད་པར་ནམ་མཁའི་དབྱིངས་རྡུལ་ཕྲན་ལས་འདས་པར་མཉམ་པར་འཇོག་པས་ཉེ་བར་གནས་ཤིང་འཚོ་སྐྱོང་སྟེ། འདས་པ་དང་། མ་འོངས་པ་དང་། ད་ལྟར་
བྱུང་བའི་དེ་བཞིན་གཤེགས་པ་ཐམས་ཅད་ལ་མི་གཟིགས། དགོངས་པ་ཉེ་བར་མི་འཇོག །ཐབས་དང་ཤེས་རབ་སྟོན་པར་མི་མཛད། ཤིན་ཏུ་འགལ་བ་ཕྱིན་ཅི་ལོག་པ་ལ་འཇོག་པར་མི་མཛད། ཉེ་བར་འཇོག་པར་མི་མཛད། །མ་དད་པ་རྣམས་དད་པར་ཡང་མི་མཛད། མ་
དུལ་བ་རྣམ་དུལ་བར་ཡང་མི་མཛད། ཉེ་བར་གཙེས་པ་རྣམས་འཚེ་བ་ཞི་བར་ཡང་མི་མཛད། མ་འགགས་པ་རྣམས་འགོག་པར་ཡང་མི་མཛད། མ་བསྐུལ་བ་རྣམས་བསྐུལ་བར་ཡང་མི་མཛད། མ་རྒྱས་པ་རྣམས་རྒྱས་པར་ཡང་མི་མཛད། རྣམ་པར་རྨོངས་
པ་རྣམས་སེལ་བར་ཡང་མི་མཛད། དགའ་བར་འགྱུར་བ་རྣམས་མི་དགའ་བར་ཡང་མི་མཛད། དགའ་བར་མ་གྱུར་པ་རྣམས་དགའ་བར་ཡང་མི་མཛད། མ་ཁྲོས་པ་རྣམས་ཁྲོས་པར་ཡང་མི་མཛད། མི་གདུག་པ་གདུག་པར་ཡང་མི་མཛད། འཇིགས་བྱེད་

ཆེན་པོ་དང་། དྲག་པོ་མ་རུངས་པ་ཆེན་པོ་དང་། གཏུམ་པོ་ཆེན་པོ་དང་། ལྷ་དང་ལྷ་མ་ཡིན་དང་། ལོག་འདྲེན་དང་། གདུག་པ་ཆེན་པོ་དང་། ཡི་དགས་དང་། ཤ་ཟ་དང་། གནོད་སྦྱིན་དང་། སྲིན་པོ་དང་། ཤིན་ཏུ་གདུག་པའི་གདུག་པ་
ཆེན་པོ་དང་། ཚ་བའི་དོན་དང་། ནད་དང་། སྦྲུལ་དང་། སེམས་ཅན་ཐམས་ཅད་ལ་འཚེ་བར་བྱེད་པ་རྣམས་ཉེ་བར་ཞི་བར་ཡང་མི་མཛད། རྣམ་པར་དུལ་བར་ཡང་མི་མཛད། དེ་ནས་དེ་བཞིན་གཤེགས་པ་ཐམས་ཅད་འདུས་ནས་དགོངས་པ་ཉེ་བར་བཞག་སྟེ།
སྤྱན་གཉིས་མི་འཛུམས་པར་གཟིགས་ནས་བཅོམ་ལྡན་འདས་རྡོ་རྗེ་འཛིན་པ་ཆེན་པོ་དེ་བཞིན་གཤེགས་པ་ཐམས་ཅད་ཀྱི་བདག་པོ་ལ་བསྐོར་ཞིང་སྐུ་གསུང་ཐུགས་ཀྱི་རྡོ་རྗེའི་ཕྱག་གིས་ཕྱག་བྱས་ནས། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ཆེན་
པོའི་དབྱངས་ཀྱིས་བསྐུལ་ཞིང་གསོལ་བ་བཏབ་བོ། །རྡོ་རྗེ་སེམས་དཔའ་སངས་རྒྱས་ཀུན། །རྣམ་དག་སྲས་བཅས་བྱང་ཆུབ་རྣམས། །ཡུན་རིངས་བསྒོམས་ནས་ཤིན་ཏུ་གདུངས། །དགའ་བའི་ཡིད་ཀྱིས་དགྱེས་པར་མཛོད། །ཀྱེ་འདོད་ཆགས་དྲི་མེད་ཀུན་
དུ་བཟང་པོའི་སྤྱོད་པ་སྟེ། །འདོད་ཆགས་དམ་ཚིག་ལ་ནི་ཕྱེ་མཛད་ནས། །དཀའ་བ་དྲུག་སྤྱད་ཤིན་ཏུ་གསུངས་པ་ཡིས། །འདོད་པ་བདེ་བ་ཉིད་ཀྱིས་འཇིག་པར་མཛོད། །རྣམ་དག་རྡོ་རྗེ་ལས་བྱུང་ཡེ་ཤེས་ཆུ། །རིན་ཆེན་འབར་བའི་བྱང་ཆུབ་སེམས་ནི་
རབ་ཕྱུང་ནས། །རྒྱལ་བ་ཐམས་ཅད་རྣམས་ཀྱི་དབུ་ནི་སྐམས་པ་ལ། །དྲི་མེད་རིན་ཆེན་ཆར་གྱིས་སྤྱི་བོར་དབང་བསྐུར་མཛོད། །མཉམ་དང་མི་མཉམ་འདོད་ཆགས་ཚུལ་དག་པ། །པདྨའི་གནས་སུ་རྡོ་རྗེ་མཛོད་གཏོད་པས། །སྣ་ཚོགས་སེམས་དཔའ་
སེམས་བརླན་བརླག་གྱུར་པས། །སྦྱོར་བ་གཞན་མིན་མ་རྟོགས་བཤད་དུ་གསོལ། །རྡོ་རྗེ་སེམས་ཁྱོད་དབང་མཆོག་བདེ་བ་བྱེད་པའི་མཆོག །རྡོ་རྗེ་པདྨོ་དབྱེ་བའི་ཚུལ་གྱིས་སྦྱོར་མཛོད་དེ། །རྒྱལ་བ་ཀུན་གྱི་གཟུགས་ཀྱི་སྐུ་ནི་རབ་བཏུད་ནས། །ཐམས་ཅད་བདེ་བའི་སྒྲུབ་པ་

ཉིད་ཀྱིས་མཉེས་པར་མཛོད། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀུན་དུ་དཔལ་རྡོ་རྗེ་སེམས་དཔའ་དེ་བཞིན་གཤེགས་པ་ཐམས་ཅད་ཀྱི་དབྱངས་ཀྱིས་ངེས་པར་བསྐུལ་བ་ཐུགས་སུ་ཆུད་ནས་བཞེངས་ཏེ། །བརྗིད་པ་དང་བཅས་པས་གར་མཛད་ཅིང་།
ཞལ་འཛུམ་པ་དང་འདོར་བ་དང་། བསྐུམ་པ་དང་། འགྱིང་བ་དང་། སྤྱན་མཛེས་པས་སྨིན་རིང་བསྐྱོད་ཅིང་བསྒྱུར་བ་དང་། པདྨོ་ཕྱག་གིས་གཡས་གཡོན་གར་གྱི་ཕྲེང་བའི་ཚུལ་གྱིས་སའི་ངོས་ལ་ཞབས་འཕེན་ཅིང་བསྒྱུར་བ་དང་། འདོར་ཞིང་བསྐུམ་པ་དང་། འཇོག་ཅིང་
འདེགས་པའི་རྣམ་པར་གནོན་པས་ནམ་མཁའི་དབྱིངས་ཐམས་ཅད་དུ་ཁྱབ་པར་མཛད་དེ། རླུང་གི་ཁམས་དང་། མེའི་ཁམས་དང་། ཆུའི་ཁམས་དང་། སའི་ཁམས་ཀུན་ཁྱབ་པར་མཛད་དེ། བཅོམ་ལྡན་འདས་བྱང་ཆུབ་ཀྱི་སེམས་ལ་ཀུན་དུ་ཁྱབ་པར་མཛད་དེ། སྣ་
ཚོགས་དང་། ཕྲ་བ་དང་། སྦོམ་པ་དང་། བུད་མེད་དང་། གཞོན་ནུ་དང་། རྒན་པ་དང་། སྐྱེས་པ་དང་། སྐྱེས་པ་མ་ཡིན་པ་དང་། ལྷ་དང་། ཀླུ་དང་། གནོད་སྦྱིན་དང་། སྐར་མ་དང་། གཤིན་རྗེ་དང་། ཆུ་བདག་དང་། བརྒྱ་བྱིན་དང་། འབྱུང་བ་དང་། འབྱུང་བ་ལས་
གྱུར་པ་ཐམས་ཅད་ལ་བཅོམ་ལྡན་འདས་ཀུན་དུ་བཟང་པོས་རྒྱས་པར་བྱས་ཏེ་ཡང་དག་པར་གནས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ངོ་མཚར་དུ་གྱུར་ཏེ། ཡང་འདུས་ནས་ཕྱག་གར་དང་བཅས་ནས་ཐལ་མོ་སྦྱར་ནས་བཅོམ་
ལྡན་འདས་ཀུན་དུ་བཟང་པོ་ཆེན་པོ་ལ་སྤྱི་བོས་བཏུད་ནས་གསོལ་བ་བཏབ་པ། བཅོམ་ལྡན་འདས་ཀུན་གྱི་གསང་བའི་ཧེ་རུ་ཀ་ཆེན་པོ་རོལ་པའི་ཐིག་ལེ་འདི། །གཉིས་མེད་ཡེ་ཤེས་ཡང་དག་འབྱུང་། །བཅོམ་ལྡན་ཁྱོད་ཀྱིས་བཤད་དུ་གསོལ། །སེམས་ཅན་
ཀུན་གྱི་མ་སྐྱེས་པ། །སྐྱེས་དང་མ་སྐྱེས་རྣམ་སྤངས་པའི། །འབྱུང་དང་འབྱུང་འགྱུར་རབ་སྦྱོར་བའི། །མཆོག་ཏུ་རྟག་པའི་སྦྱོར་བའོ། །ཐམས་ཅད་རིན་ཆེན་འབྱུང་གནས་དག །ནམ་མཁའ་དྲི་མེད་འདྲ་བ་ཡི། །རྒྱལ་མཚན་ཆེན་པོ་བསྒྲེང་བྱ་སྟེ། །རྡོ་རྗེ་ཆེན་པོས་

དབང་བསྐུར་བའོ། །ལོངས་སྤྱོད་ཆོས་ནི་ཡང་དག་འབྱུང་། །པདྨོའི་མཆོག་ནི་དམར་པོ་མདོག །འདོད་ཆགས་དེ་ཉིད་གསང་བ་ཆེ། །བདེ་བྱེད་ཐམས་ཅད་བདུད་རྩིའི་མཆོག །ལ་ལ་ཨར་ནི་དོན་དང་ལྡན། །ཡང་དག་མཛེས་པ་འགྱིང་བའི་འགྲོས། །
ས་ཕྱོགས་ཡེ་ཤེས་བདེ་བ་ཆེ། །བྱང་ཆུབ་སེམས་ཐིག་མཆོག་ཉིད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཀུན་དུ་བཟང་པོ་དེ་བཞིན་གཤེགས་པ་ཐམས་ཅད་ཀྱི་གསང་བའི་བདག་པོས་གསོལ་བ་བཏབ་པ་མཁྱེན་ནས་འགོག་པ་ཆེན་པོ་ཡེ་ཤེས་རྡོ་རྗེ་
ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཅང་མི་གསུང་བར་བཞུགས་སོ། །དེ་བཞིན་གཤེགས་པ་དེ་དག་ངོ་མཚར་དུ་གྱུར་ཏེ། །ཡང་འདུས་ནས་བཅོམ་ལྡན་འདས་དཔལ་བདེ་བ་ཆེན་པོ་ཀུན་དུ་བཟང་པོ་ཆེན་པོ་ལ་དེ་ཁོ་ན་ཉིད་ཀྱི་དབྱངས་ཀྱིས་བསྐུལ་
ཏེ་བཞེས་པར་མཛད་དོ། །ཨོྃ་ཨཱཿཧཱུྃ། མི་སྐྱེ་ཡེ་ཤེས་བདེ་མཆོག་རོ་ལ་མནམས། །སེམས་དཔའི་མཆོག་ཉིད་འགོག་པ་རྣམས་ལས་བསླང་། །ཆགས་མེད་ཀུན་དུ་མྱ་ངན་འདས་མཛད་བཞེངས་ཤིང་མནམས། །མཆོག་ཏུ་གསང་བའི་དམ་བཅས་འཇིག་རྟེན་
སྒྲོལ། །བྱང་ཆུབ་སྐྱེ་གནས་དབྱིངས་ལས་གར་མཛོད་ཅིག །སྔོན་གྱི་ཉོན་མོངས་རྡོ་སྐམས་གཟིར་བ་ཡི། །བདེ་མཆོག་རྒྱན་དང་ལྡན་པའི་ཐབས་ཀྱིས་བསྐུལ་ཏེ་གོ་བར་མཛད། །དེ་ནས་བཅོམ་ལྡན་འདས་དཔལ་ཀུན་དུ་བཟང་པོ་ཆེན་པོས་དེ་བཞིན་གཤེགས་པ་ཐམས་
ཅད་ཀྱི་སྙིང་པོ་ཆེན་པོ་ཧེ་རུ་ཀ་རོལ་པའི་ཏིང་ངེ་འཛིན་ལ་སྙོམས་པར་ཞུགས་ནས། རང་གིས་གསང་བའི་ཐིག་ལེ་ཤིན་ཏུ་དགྱེས་བ་ཆེན་པོ་ཞེས་བྱ་བའི་འོད་ཟེར་གྱི་ཚོགས་ཕྱུང་ནས། །དེ་བཞིན་གཤེགས་པ་ཐམས་ཅད་ཀྱི་གསང་བའི་སྙིང་པོའི་ཐི་ལེའི་དབུས་སུ་རྒྱས་པར་
བྱས་ཏེ། ནམ་མཁའི་དབྱིངས་ཐམས་ཅད་དུ་སྣང་བར་བྱས་ཏེ། སྟེང་དང་འོག་ཏུ་ཡང་བཞུགས་ཏེ། མ་ལུས་ལུས་པ་མེད་པའི་རིལ་དང་། སེམས་ཅན་ཐམས་ཅད་ལ་གསལ་བར་བྱས་ནས་ཤིན་ཏུ་དགྱེས་པ་ཆེན་པོའི་རོ་བདེ་མ་མཉེས་པར་བྱས་ནས་སླར་དེ་ཉིད་དུ་

སླར་ལོག་ནས། བཅོམ་ལྡན་འདས་ཤིན་ཏུ་དགྱེས་པ་ཆེན་པོའི་སྙིང་པོ་གསང་བ་མཆོག་གི་ཐིག་ལེའི་དབུས་ན་བཞུགས་སོ། །དེ་ནས་དེ་བཞིན་གཤེགས་པ་ཐམས་ཅད་འོད་ཟེར་གྱི་ཚོགས་ཀྱི་ཕྲེང་བ་མཆོག་ཏུ་བདེ་བར་གྱུར་པ་སྙིང་པོ་དེས་བསྐུལ་བ་ནི་གར་མཛད་ཅིང་རང་རང་གི་
ཏིང་ངེ་འཛིན་དུ་དམིགས་ནས་བཅོམ་ལྡན་འདས་ཀུན་དུ་བཟང་པོ་ཆེན་པོའི་ཐུགས་ཀྱི་དབུས་སུ་མཆོག་ཏུ་གསང་བ་ཤིན་ཏུ་དགྱེས་པ་ཆེན་པོའི་བདེ་བར་བསྒྲུབས་ཏེ། སྐུ་རང་གི་བུད་མེད་ཀྱི་ཚུལ་དུ་བསྐྱེད་ནས། བཅོམ་ལྡན་འདས་ཀྱི་ཐུགས་ཀ་ནས་མངོན་པར་འབྱུང་བར་གྱུར་
ཏོ། །དེ་ལ་ལ་ལ་ནི་སྤྱན་པདྨ་ལྟ་བུར་བསྒྱུར་ཅིང་སྨིན་དཀྱུས་རིང་། །སངས་རྒྱས་ཚུལ་གྱིས་གར་མཛད་པའི། །སངས་རྒྱས་རྣལ་འབྱོར་དཀྱིལ་འཁོར་དུ། །རབ་དགྱེས་རྡོ་རྗེ་གདོན་མི་ཟ། །རྡོ་རྗེ་སེམས་ལ་དགྱེས་མཛད་ཅིང་། །བདེ་བའི་སངས་རྒྱས་བདེ་བ་ཡིས། །བཅོམ་
ལྡན་སངས་རྒྱས་བཞུགས་པར་འགྱུར། །ཞལ་བསྒྱུར་སྨིན་མ་བསྒྱུར་བ་ཡིས། །སྤྱན་ཡང་བསྒྱུར་ཞིང་ཤིན་ཏུ་གནོན། །སོར་མོ་རྣམས་ཀྱང་རབ་བསྒྱུར་དང་། །རྡོ་རྗེ་ཚུལ་གྱིས་གར་མཛད་ཅིང་། །སེམས་དཔའ་ཆེ་ལ་མཉེས་པར་མཛད། །རྡོ་རྗེ་རྣལ་འབྱོར་
མ་དཀྱིལ་དུ། །སྐུ་ནི་སྐད་ཅིག་བསྐུལ་བ་ཡིས། །བཅོམ་ལྡན་རྡོ་རྗེ་གནས་པར་འགྱུར། །ཞལ་ནི་བརྗིད་ཅིང་རིན་ཆེན་དབུ། །དྲི་མེད་སྤྱི་བོར་གར་མཛད་ཅིང་། །དཀྱིལ་འཁོར་ཞལ་གྱིས་རྣམ་བསྒྱུར་བ། །བྱང་ཆུབ་སེམས་ནི་མེད་པར་མཛད། །དུར་ཁྲོད་ཡོན་
ཏན་ཚོགས་དག་གིས། །པདྨའི་སྤྱན་གྱིས་གཟིགས་མཛད་ཅིང་། །བདེ་བའི་བདག་པོ་ཆེན་པོ་ལ། །རིན་ཆེན་ཚུལ་གྱིས་མཉེས་པར་མཛད། །རབ་ཏུ་དགྱེས་གསལ་བདེ་བ་ཡི། །པདྨ་དམར་ལ་ཆེ་མཛད་དོ། །འདོད་ཆགས་བྲལ་ཞི་རབ་ཏུ་བསྒྱུར། །པདྨའི་
དྲ་བས་འབྲེལ་བ་ཡི། །པདྨའི་རྣལ་འབྱོར་མ་དཀྱིལ་དུ། །བརྗིད་པའི་སྤྱན་གྱིས་ཀུན་གཟིགས་པའི། །བདེ་བ་ཆེ་ལ་མཉེས་པར་མཛད། །བཅོམ་ལྡན་པདྨོ་གནས་པར་འགྱུར། །ཕྱག་གི་སོར་མོ་རྩེ་མོ་མཐའ། །རྣམ་པར་བསྒྱུར་བར་གར་མཛད་ཅིང་། །ཕྱག་

སྦྱར་ཁོང་སྟོང་པདྨ་ཡིས། །གློག་བཞིན་དཔྲལ་ནས་སྤྱི་གཙུག་ཏུ། །མཆོད་པའི་སྤྲིན་གྱིས་ལོངས་སྤྱོད་པས། །སྣ་ཚོགས་བདེ་བྱེད་གཙོ་ཉིད་ལ། །ལས་ཀྱི་ཚུལ་གྱིས་མཉེས་མཛད་ཅིང་། །བཅོམ་ལྡན་སྣ་ཚོགས་གནས་པར་འགྱུར། །དེ་ནས་བཅོམ་
ལྡན་འདས་ཀུན་དུ་བཟང་པོ་ཆེན་པོ་དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བ་བྱང་ཆུབ་སེམས་ཀྱི་ཏིང་ངེ་འཛིན་ལ་སྙོམས་པར་ཞུགས་ནས། །དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བ་ཐིག་ལེ་བྱང་ཆུབ་ཀྱི་དཀྱིལ་འཁོར་གྱི་རྒྱལ་པོ་ཤིན་
ཏུ་དགྱེས་པ་བདེ་བ་ཆེན་པོ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །དཀྱིལ་འཁོར་ཉིད་ཀྱི་ཚུལ་གྱིས་སུ། །ཆོ་ག་སྦྱོར་བ་སྤྲོས་བྱས་ཏེ། །དེ་དང་མཐུན་པའི་དཀྱིལ་འཁོར་གདོན། །སྦྱོར་བའི་གར་གྱིས་གར་བྱས་ཤིང་། །ཅི་ལྟར་ཡང་དག་བརྟག་
པར་བྱ། །ཅི་ལྟར་དཀྱིལ་འཁོར་དེ་ཁོ་ན། །ཧེ་རུ་ཀ་དཔལ་དཀྱིལ་འཁོར་ནི། །རྡོ་རྗེ་སེམས་དཔའ་དཔའ་བོས་ཀྱང་། །བརྟག་པར་ནུས་པ་མ་ཡིན་ནོ། །དཀྱིལ་འཁོར་ཡེ་ཤེས་ཀྱིས་བརྟགས་པས། །སྙིང་པོ་ཕྱག་རྒྱ་སྔགས་རིག་གིས། །ལྟ་ཡི་སྦྱོར་བ་རྒྱས་བཏབ་
པས། །ཆོ་ག་ཤེས་པས་བྲི་བར་བྱ། །གྲུ་བཞི་པ་ལ་སྒོ་བཞི་བ། །རྟ་བབས་བཞི་དང་ཡང་དག་ལྡན། །ཐིག་གིས་ཡོངས་སུ་འཁོར་བར་བཏབ། །དབུས་སུ་འཁོར་ལོ་རྩིབས་བཞིར་ལྡན། །ཀུན་དུ་ཡོངས་སུ་མུ་ཁྱུད་བཅས། །ཕྱི་རོལ་རྡོ་རྗེ་ར་བས་བསྐོར། །དེའི་དབུས་
སུ་བཅོམ་ལྡན་འདས་ཆེ་མཆོག་ཧེ་རུ་ཀ་རིགས་བཞི་ཧེ་རུ་ཀས་ནི་བསྐོར། །གྲྭ་བཞི་ཤྭ་རི་ཡུམ་དང་བཅས། །དེའི་ཕྱི་རིམ་འཁོར་ལོ་རྩིབས་ནི་བཅུ་དྲུག་ལ་ཡེ་ཤེས་ཁྲོ་མོ་བཅུ་དྲུག །དེའི་ཕྱི་རིམ་པདྨ་བཅུ་དྲུག་ལ་སྤྲུལ་པའི་ཁྲོ་བོ་ཕ་བཅུ་དྲུག །དེའི་ཕྱི་རིམ་པདྨ་
བཅུ་དྲུག་ལ་སྤྲུལ་པའི་ཕྲ་མེན་མ་བཅུ་དྲུག་དེའི་ཕྱི་རིམ་སྣམ་བུ་གཅིག་ལ་ཡང་སྤྲུལ་བཅུ་དྲུག །དེའི་ཕྱི་རིམ་སྣམ་བུ་གཅིག་ལ་ཡང་ཞེ་སྤྲུལ་བཅུ་དྲུག །དེའི་ཕྱི་རོལ་སྣམ་བུ་གཅིག་ལ་སྨན་གྱི་ལྷ་མོ་སུམ་ཅུ་རྩ་གཉིས། །དེའི་ཕྱི་རིམ་སྣམ་བུ་ལ་བཅོམ་ལྡན་

འདས་དེ་ཁོ་ན་ཉིད་ཀྱི་སྐུ་བསིལ་དཔག་བསམ་གྱི་ཤིང་བཞིན། དེའི་རྩ་བ་ན་སྨན་བདུད་རྩི་ལྷག་མ་རེ་རེ། གསེར་གྱི་མེ་ཏོག་གཞོན་ནུ་རེ་རེ། བཅོམ་ལྡན་འདས་ལ་མཆོད་ཅིང་བདུད་རྩི་བུམ་པ་ཐོགས་ནས་སྐུ་ཁྲུས་མཛད་པ་རེ་རེ། དེའི་ཕྱི་རིམ་སྣམ་བུ་ལ་དབང་ཕྱུག་མ་
ལས་ལས་གྲུབ་པ། མགོ་བརྙན་མ་ཉི་ཤུ་རྩ་བརྒྱད་དགོད། །ཡང་བཅོམ་ལྡན་འདས་ཀྱི་དཀྱིལ་འཁོར་གྱི་དགོད་པའི་དོན་བཟུང་ཞིང་བཀའ་སྩལ་པ། དཀྱིལ་འཁོར་གྱི་ནི་དབུས་ཉིད་དུ། །བཅོམ་ལྡན་ཆེ་མཆོག་ཧེ་རུ་ཀ། །དབུ་ནི་ཉི་ཤུ་རྩ་གཅིག་ལ། །
ཕྱག་ནི་བཞི་བཅུ་རྩ་གཉིས་སོ། །ཞབས་བརྒྱད་ལྷ་ཆེན་ཕོ་མོ་མནན། །གླང་ཆེན་ཀོ་རློན་གོས་སུ་གྱོན། །ཞིང་ཆེན་གཡང་གཞི་ཡ་བ་སྐོར། །སྦྲུལ་ནག་ཆུན་པོས་དབུ་ལ་བརྒྱན། །ཐོད་པ་རློན་པས་སེ་རལ་ཁ། །སྟག་ལྤགས་མགོ་ཆེན་ཤམ་ཐབས་ཅན། །
ཁྲག་དང་ཞག་གི་ཚོམ་བུར་བཅས། །བདེར་གཤེགས་རིགས་བཞི་ཧེ་རུ་ཀ། །ཁྱུ་མཆོག་མ་ཧེ་གཟིག་དང་སྟག །མི་འཇིགས་སེམས་ཅན་བཞི་ཡི་ཁྲི། །སྨུག་ནག་སྔོ་ནག་སེར་ནག་དང་། །དམར་ནག་ལྗང་ནག་འཇིགས་པའི་གཟུགས། །དབུ་གསུམ་ཕྱག་དྲུག་
ཞབས་བཞིར་བགྲད། །ཆ་ལུགས་མགོ་བོ་ཡབ་དང་མཐུན། །དབུས་ཀྱི་དབུ་གྱེན་དུ་ལྟ་བའི་ཞལ་གྱི་ནང་དུ་རྡོ་རྗེ་བཅུག་ནས་གཉིས་སུ་མེད་པའི་སྦྱོར་བ་ཚུལ་བཞིན་དུ་མཛད་ཅིང་བཞུགས་སོ། །རིགས་ཀྱི་ཡུམ་ཀུན་གཙོ་བོ་ཡབ་དང་མཐུན། །ཡེ་ཤེས་ལས་
གྲུབ་པའི་ཁྲོ་བོ་རྡོ་རྗེ་ཐོགས་མེད་དང་། ཁྲོ་བོ་རྡོ་རྗེ་མདུང་དང་། ཁྲོ་བོ་རྡོ་རྗེ་མེ་དཔལ་དང་། ཁྲོ་བོ་རྡོ་རྗེ་མདའ་བསྙག་དང་། ཁྲོ་བོ་རྡོ་རྗེ་ཕུར་བུ་དང་། ཁྲོ་བོ་རྡོ་རྗེ་ཐོ་བ་དང་། ཁྲོ་བོ་རྡོ་རྗེ་བྱ་གྲི་དང་། ཁྲོ་བོ་རྡོ་རྗེ་རྣོན་པོ་དང་། ཁྲོ་བོ་རྡོ་རྗེ་རལ་གྲི་དང་། ཁྲོ་བོ་རྡོ་རྗེ་ཞགས་
པ་དང་། ཁྲོ་བོ་རྡོ་རྗེ་གཏུན་ཁུང་འཛིན་དང་། ཁྲོ་བོ་རྡོ་རྗེ་གཞུ་འཛིན་དང་། ཁྲོ་བོ་རྡོ་རྗེ་རལ་པ་གཅིག་པ་དང་། ཁྲོ་བོ་རྡོ་རྗེ་ཡེ་ཤེས་དང་། ཁྲོ་བོ་རྡོ་རྗེ་ལྕགས་སྒྲོག་དང་། ཁྲོ་བོ་རྡོ་རྗེ་རྒྱ་གྲམ་འཛིན་དང་། ཁྲོ་མོ་རྡོ་རྗེ་པདྨ་བྷྲྀ་ཀུ་ཊི་དང་། ཁྲོ་མོ་རྡོ་རྗེ་རལ་གཅིག་མ་

དང་། ཁྲོ་མོ་རྡོ་རྗེ་རྩེ་མོ་དང་། ཁྲོ་མོ་འཇིགས་སུ་རུང་མ་དང་། ཁྲོ་མོ་མི་ཐུབ་རྡོ་རྗེས་འདུལ་བ་དང་། ཁྲོ་མོ་བཀྲ་ཤིས་མ་དང་། ཁྲོ་མོ་དཔལ་ལྡན་མ་དང་། ཁྲོ་མོ་པདྨའི་ཕྲེང་ཐོགས་མ་དང་། ཁྲོ་མོ་ནོར་བདག་མ་དང་། ཁྲོ་མོ་གྲགས་མ་དང་། ཁྲོ་མོ་གྲགས་ཆེན་མོ་དང་། ཁྲོ་
མོ་རིན་འོད་ལྡན་མ་དང་། ཁྲོ་མོ་པདྨའི་སྤྱན་མངའ་མ་དང་། ཁྲོ་མོ་ཟས་སྦྱིན་མ་དང་། ཁྲོ་མོ་བདུད་རྩི་འཁྱིལ་མ་དང་། ཁྲོ་མོ་རྡོ་རྗེ་དུར་ཁྲོད་མ་དང་། སྐུ་མདོག་གཅིག་ཏུ་མ་ངེས་ཏེ། སྣ་ཚོགས་ཅིར་ཡང་འགྱུར་བའོ། །སྤྲུལ་པའི་
ཁྲོ་བོ་འདི་དག་ཀྱང་སྐུ་མདོག་སྣ་ཚོགས་སུ་འགྱུར་བའོ། །ཁྲོ་བོ་ཧཱུྃ་ཀ་ར་དང་། ཁྲོ་བོ་རྣམ་པར་རྒྱལ་བ་དང་། ཁྲོ་བོ་ནཱི་ལ་དཎྜ་དང་། ཁྲོ་བོ་ཡ་མཱན་ཏ་ཀ་དང་། ཁྲོ་བོ་མི་གཡོ་མགོན་དང་། ཁྲོ་བོ་ཧ་ཡ་གྲཱི་བ་དང་། ཁྲོ་བོ་ཊ་ཀི་རཱ་ཛ་དང་། ཁྲོ་བོ་བདུད་རྩི་འཁྱིལ་པ་
དང་། ཁྲོ་བོ་ཁམས་གསུམ་རྣམ་པར་རྒྱལ་བ་དང་། ཁྲོ་བོ་མ་ཧཱ་བ་ལ་དང་། ཁྲོ་བོ་བསྙུད་ཀྱི་རྒྱལ་པོ་དང་། ཁྲོ་བོ་ཟླ་བའི་གཙོ་བོ་དང་། ཁྲོ་བོ་རྡོ་རྗེ་ཁུ་ཚུར་དང་། ཁྲོ་བོ་གོམ་པ་འདོར་བ་དང་། ཁྲོ་བོ་གནོད་སྦྱིན་རྡོ་རྗེ་དང་། ཁྲོ་བོ་ལས་ཐམས་ཅད་པ་དང་། ཁྲོ་མོ་
སྤྲུལ་པའི་ཕྲ་མེན་མ་དང་། རྡོ་རྗེ་གོའུ་རི་དང་། རྡོ་རྗེ་ཙོའུ་རི་དང་། རྡོ་རྗེ་པྲ་མོ་ཧ་དང་། རྡོ་རྗེ་བེ་ཏཱ་ལི་དང་། རྡོ་རྗེ་པུཀྐ་སི་དང་། རྡོ་རྗེ་གྷ་སྨ་རི་དང་། རྡོ་རྗེ་སྨ་ཤ་ནི་དང་། རྡོ་རྗེ་ཙཎྜ་ལི་དང་། རྡོ་རྗེ་སིང་ཧ་མུ་ཁ་དང་། རྡོ་རྗེ་བྱཱ་གྷྲྀ་མུ་ཁ་དང་། རྡོ་རྗེ་སྲི་ལ་མུ་ཁ་དང་། རྡོ་རྗེ་
བྲ་ན་མུ་ཁ་དང་། རྡོ་རྗེ་ཀྲི་ཏ་མུ་ཁ་དང་། རྡོ་རྗེ་ཀཾ་ཀ་མུ་ཁ་དང་། རྡོ་རྗེ་ཁྭ་ཀ་མུ་ཁ་དང་། རྡོ་རྗེ་ཨཱུ་ལུ་ཀ་མུ་ཁ་དང་འདི་རྣམས་སྐུ་མདོག་གཅིག་ཏུ་མ་ངེས་སོ། །འདི་ཀུན་ཞིང་བསྣོལ་མའི་ཁྲི་ལ་བཞུགས་སོ། །བདུད་རྩི་ལྷ་མོ་དེ་རྣམས་ཀྱང་། ཕྱག་མཚན་རྡོ་རྗེ་བུམ་པ་
འཛིན། སྐུ་མདོག་དམར་པོ་པདྨའི་གདན་ལ་བཞུགས་སོ། །བཅོམ་ལྡན་འདས་སེང་གེའི་ཁྲི་ཉི་ཟླ་བརྩེགས་པའི་གདན་ལ་སྐུ་ལུས་གླང་པོ་ཆེའི་ཆ་བྱད་དུ་སྤྲུལ་ནས་མཛད། །ཡང་སྤྲུལ་ཆེན་མོ་སེང་གེ་ལྕམ་དྲལ་དང་། སྟག་ལྕམ་དྲལ་དང་། ཝ་ལྕམ་དྲལ་དང་།

སྤྱང་མོ་ལྕམ་དྲལ་དང་། བྱ་རྒོད་ལྕམ་དྲལ་དང་། ཀང་ཀ་ལྕམ་དྲལ་དང་། བྱ་རོག་ལྕམ་དྲལ་དང་། འུག་པ་ལྕམ་དྲལ་དང་། འདི་དག་ཀུན་གྱི་ཡེ་ཤེས་སྤྲུལ་པའོ། །ཕ་བང་ལྕམ་དྲལ་དང་། ཟེར་མོ་ལྕམ་དྲལ་དང་། ཕོ་རོག་ལྕམ་དྲལ་དང་། སྐྲ་ཀ་ལྕམ་དྲལ་དང་།
ཁྭ་ཏ་ལྕམ་དྲལ་དང་། བྱི་ལ་ལྕམ་དྲལ་དང་། སྤྲེའུ་ལྕམ་དྲལ་དང་། །ཁྱི་ལྕམ་དྲལ་དང་། སྤྲུལ་པ་སྣ་ཚོགས་ཀྱིས་འགྲོ་བའི་དོན་མཛད་དོ། །ལས་གྲུབ་པ་དབང་ཕྱུག་མ། །བྱོ་མིའི་སྲིན་མོ་དམར་སེར་ཤིང་ཆེན་ཏྲི་ཤཱུ་གཡག་མགོ་མ། །ཚངས་པའི་དམར་སྐྱ་
བྷན་དམར་རྩེ་ལྔ་སྦྲུལ་མགོ་མ། །ཁྲོ་བོ་ཁྱབ་འཇུག་འབྱུང་སྡིག་སྙིང་འདྲེན་གཟིག་གི་མགོ །ཁྱབ་འཇུག་དཀར་དམར་དུང་དམར་བྱི་ཞགས་སྲེ་མོ་མགོ །གཞོན་ནུ་སེར་མོ་རྡོ་རྗེ་ཕ་བང་མགོ །དབང་མོ་དམར་སྐྱ་བམ་ཆེན་ཁྲོ་ཆེན་དྲེད་ཀྱི་མགོ །དམར་མོ་དུང་དམར་
རྒྱུ་ཞགས་དམར་མོ་དོམ་གྱི་མགོ །བདུད་རྩི་སྔོན་མོ་རིན་ཆེན་ཆུ་སྲིན་མགོ། །ཞི་བ་སྔོ་སྐྱ་བམ་ཆེན་སྙིང་འབྱིན་སྟག་གི་མགོ། །བེ་ཅོན་ནག་མོ་བམ་ཆེན་ཐོད་རློན་ཁྲ་ཡི་མགོ། །སྲིན་མོ་ནག་མོ་བམ་ཆེན་རྒྱུ་ཞགས་ཝ་ཡི་མགོ །ཟ་བྱེད་ནག་མོ་བམ་ཆེན་སྙིང་འབྱིན་སྟག་
གི་མགོ །དགའ་བྱེད་ནག་མོ་ཁོང་ཆེན་བགེགས་རྒྱལ་བྱ་རྒོད་མགོ །ཁྲག་འཐུང་དམར་མོ་རྡོ་རྗེ་དབྱུག་དུང་དམར་རྟའི་མགོ །གཅིག་པུ་དཀར་དམར་ནམ་མཁའ་ལྡིང་གི་མགོ །ཡིད་འཕྲོག་དམར་སེར་བཞིས་བསྡུས་བྱི་ཟ་ཁྱི་ཡི་མགོ །གྲུབ་མ་དཀར་དམར་
སད་མ་བྱི་ཟ་པུ་ཤུད་མགོ །རླུང་མོ་དམར་སེར་རོ་ཟ་རྡོ་རྗེ་ཤ་བའི་མགོ །གསོད་བྱེད་སྐྱ་ལྗང་བམ་ཆེན་རྡེའུ་ཆུང་སྐྱེ་ཀའི་མགོ །མེ་མོ་དམར་སེར་མོ་སྲག་རྒྱུ་འདྲེན་སྐྱིན་གྱི་མགོ །ཕག་མོ་ལྗང་ནག་རྩེ་སྦྱིན་རློན་དམར་ཕག་གི་མགོ །དམར་མོ་ལྗང་སྔོན་བདུད་རྩིའི་
ཁྲག་འཐུང་ཁྲ་ཡི་མགོ །སྣ་ཆེན་ལྗང་ནག་བམ་ཆེན་ལོངས་སྤྱོད་བ་ལང་མགོ །གྲུབ་མོ་ལྗང་སེར་བདུད་རྩི་བྷན་དམར་སྦྲུལ་གྱི་མགོ །ཕག་མོ་ལྕགས་ཀྱུ་ཕུ་ཏྲ་རྡོ་རྗེ་ཁུ་བྱུག་མ། ར་ནི་སེར་མོ་རྒྱུ་ཞགས་ར་ཡི་མགོ །བུམ་སྣ་དམར་མོ་ལྕགས་སྒྲོག་ཀུན་

འཇོམས་སེང་གེའི་མགོ །གསུས་འཛིན་སེར་མོ་བདུད་རྩི་དྲིལ་ཆེན་གཟིག་གི་མགོ །སེམས་ཅན་ཐམས་ཅད་མཆོག་དག་དང་། །དགྱེས་པ་ཐམས་ཅད་རབ་བསྒྲུབ་ཕྱིར། །ང་ཡི་དེ་ཉིད་གསུང་གིས་ནི། །དཀྱིལ་འཁོར་དེ་ཉིད་བསྟན་པ་ཡིན། །
སངས་རྒྱས་བྱང་ཆུབ་བདེ་ཆེན་པོ། །གང་གིས་ཆུད་པས་རྫོགས་སངས་རྒྱས། །སེམས་ཅན་མཆོག་གི་སྟོན་བྱེད་ན། །དེ་ཉིད་སངས་རྒྱས་བྱང་ཆུབ་འགྲུབ། །དེ་ནས་བཅོམ་ལྡན་གཅིག་འདུས་ནས། །རབ་ཏུ་སྤྲོ་བའི་སྤྱན་གདངས་ནས། །ཞབས་དང་ཞབས་ཀྱིས་གནོན་པ་
ཡིས། །སྡུད་ཅིང་འདོར་བ་འཇུག་པར་མཛད། །གཡས་དང་གཡོན་གྱི་ཕྱག་གཉིས་ཀྱིས། །བརྗིད་པའི་རྩེ་མོ་མཐའ་ནས་དགྲོལ། །ཅུང་ཟད་ཟུར་གྱིས་གནོན་པ་ཡིས། །མཛེས་པའི་སྤྱི་གཙུག་རྣམ་བསྒྱུར་བའི། །སྤྱན་གྱི་ཕྱག་རྒྱས་ཕྱག་མཛད་པའི། །འགྲོ་ལ་
ཕྱག་རྒྱས་བཏབ་པར་འགྱུར། །དཔའ་བོ་རྡོ་རྗེ་སེམས་དཔའ་ལ། །བསྐུལ་བའི་དབྱངས་ཀྱིས་རབ་ཏུ་བསྐུལ། །གསང་བ་དགྱེས་པའི་དཀྱིལ་འཁོར་དུ། །ཤིན་ཏུ་དགྱེས་ཚེ་རྡོ་རྗེ་དག །སངས་རྒྱས་ཀུན་གྱི་བདེ་ཆེན་པོ། །མཆོག་ཏུ་དགྱེས་པའི་དཀྱིལ་འཁོར་དུ། །བཅོམ་
ལྡན་འདས་ཀྱིས་བཤད་དུ་གསོལ། །རྣམ་པ་ཀུན་དུ་སྐྱེ་མེད་རོལ་ཅིང་ཆུད་མཛད་པ། །བདག་ཅག་གཟུགས་དང་བཅས་ཏེ་རྣམ་སྤྱོད་འགྱུར་མེད་པའི། །བདེ་མཆོག་བྱང་ཆུབ་སེམས་དཔའ་ནི། །རྣམ་པ་ཀུན་དུ་སྡུག་བསྔལ་ཡོངས་བྲལ་ཏེ། །ཆེ་བའི་ཡེ་ཤེས་ལྷུན་གྲུབ་
མཆོག་དང་ལྡན། །བདེ་སྤྱོད་དེ་ལ་རོལ་པས་ཚུལ་བཞིན་མཛད། །རྡོ་རྗེ་གླུ་ནི་བླངས་པ་ཡིས། །ཤིན་ཏུ་སྲིད་པའི་མྱ་ངན་འདས། །དག་ཆེན་དེ་བཞིན་གཤེགས་པ་རྣམས། །དཀྱིལ་འཁོར་འདི་ལ་བྱིན་གྱིས་བརླབས། །དེ་ནས་བཅོམ་ལྡན་འདས་འཛུམ་པ་དང་བཅས་པས་
སྤྱན་ཨུཏྤ་ལ་ཁ་བྱེ་བ་བཞིན། སྨིན་མ་དང་སྐུ་རྣམ་པར་སྒྱུར་བ། གློག་དང་ཆུ་རླབས་སུ་གྱུར་པ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་དེ་ཁོ་ན་ཉིད་འདི་གསུངས་སོ་ཞེས། དཀྱིལ་འཁོར་ཞེས་ནི་རབ་ཏུ་བྱ། །ཡེ་ཤེས་རྡོ་རྗེ་ཐུགས་ལ་གནས། །དཀྱིལ་འཁོར་

རྡོ་རྗེ་མཆོག་ཉིད་དོ། །ཉིད་ཀྱི་སྦྱོར་བ་བཏགས་པ་ཡིན། །རྡོ་རྗེ་དགྱེས་པའི་དཀྱིལ་འཁོར་དུ། །འོད་ཟེར་དཀར་པོ་ཕྲེང་བས་མཛེས། །བྱང་ཆུབ་སེམས་དཔའ་འདྲ་བའོ། །རྡོ་རྗེ་དཔའ་བོ་དཀྱིལ་འཁོར་དུ། །ཟླ་བ་ཁམ་པ་མཛེས་པ་ཡི། །མཐིང་ག་འབར་བ་ཀུན་རྒྱས་པ། །མེ་
ལ་རླུང་གིས་བུས་པ་བཞིན། །དགྱེས་པའི་མཆོག་ནི་རབ་བསྒྲུབ་པའི། །རིན་ཆེན་རྡོ་རྗེ་དཀྱིལ་འཁོར་ནི། །དགའ་བར་བྱེད་པའི་དཀྱིལ་འཁོར་ཡིན། །རབ་ཏུ་དགའ་བ་ཉི་མ་བཞིན། །དཀྱིལ་འཁོར་དགྱེས་མཆོག་འབྱུང་བྱེད་པ། །དམ་པའི་དབང་པོ་པདྨ་འདྲ། །འདབ་
མ་བརྒྱད་པོ་དགྱེས་པ་ཡི། །གེ་སར་ཟེ་བས་མཛེས་བྱ་བའོ། །ལས་ནི་ཐམས་ཅད་འགྲུབ་བྱེད་པ། །རྡོ་རྗེ་ལས་ཀྱི་དཀྱིལ་འཁོར་ནི། །དགའ་བྱེད་དཀྱིལ་འཁོར་གྲུ་གསུམ་སྟེ། །འབར་བ་ཆེན་པོ་མེ་དང་འདྲ། །དེ་ལ་སོགས་པ་མཐའ་ཡས་པའི། །དཀྱིལ་འཁོར་
རྣམས་ནི་བརྟག་བྱ་སྟེ། །རྡོ་རྗེ་སེམས་དཔའ་ཆེན་པོ་ཡིས། །ཅི་ལྟར་དེ་ཉིད་སྤྲུལ་པ་ཡིན། །དེ་ནས་བཅོམ་ལྡན་འདས་ཉིད་ཀྱི་དཀྱིལ་འཁོར་བཞེངས་ནས་རྡོ་རྗེ་བརྗིད་པའི་གར་མཛད་ཅིང་གླུ་དང་། སིལ་སྙན་དང་། གླིང་བུ་དང་། པི་ཝང་དང་། རྫ་རྔ་དང་། དུ་ན་ཝ་
དང་། པ་ན་ཝ་དང་། པ་ལ་ཀི་དང་། ཞི་བའི་ཐལ་མོས་སོགས་པ་ཀུན་དུ་གདུངས་པ་དང་། སིལ་སྙན་ལ་སོགས་པ་རོལ་པས་ལྷའི་རོ་དང་། རོའི་ཟས་དང་། བཟའ་བ་དང་། བཅའ་བ་དང་། བཏུང་བ་དང་། ཐེག་པ་དང་། སྟན་དང་། གོས་དང་། བལྡག་པ་དང་།
འཇིབ་པ་དང་། འཇམ་པ་ལ་སོགས་པ་བཅོམ་ལྡན་འདས་ཀུན་དུ་བཟང་པོས་བསྟབས་ནས་གུས་པ་དང་བཅས་ནས་འཛུམ་པ་དང་བཅས་པའི་སྤྱན་གདངས་ཏེ། དབྱངས་འདིས་བསྟོད་པ་མཛད་དོ། །བྱམས་པས་ཀུན་དུ་གཟིགས་པས་ཐུགས་རྗེའི་སྤྱན། གྲོལ་བར་
མཐུན་པའི་ལམ་སྟོན་དུག་ལྔས་འབྲེལ། །གཟུངས་ཀྱི་རང་བཞིན་བདེར་གཤེགས་ཀུན་ལ་སྟོབས། །བདེ་ཆེན་ཀུན་དུ་རྒྱས་པས་ཆེ་བའི་ཡེ་ཤེས་འདྲེན། །སྐུ་ཉིད་སྟོང་པས་ཚོགས་པའི་རྒྱལ་པོ་བཞིན། །ཆོས་ཉིད་བདེ་བ་རེག་པས་སྐུ་ཉིད་སྟོན། །བྱང་ཆུབ་བགྲོད་

ཕྱིར་ཆོས་ཀྱི་སྒོ་མོ་བསྟན། །གཟུངས་བསྟན་རིགས་ལྔའི་གཙོ་བོ་རྣམས་མཛད་དོ། །དགྱེས་པ་དྲོངས་ལ་བསྣམས་ཤིང་རོལ་མོ་མཛད། །བདེ་བ་བསྣམས་ཤིང་དབྱིངས་ནས་བསླང་བའི་ཕྱིར། །སྐྱེ་འགག་མེད་པའི་ཚུལ་དུ་རྣམ་པར་ལྡན། །སྙིང་རྗེར་རྒྱུན་
བཅས་བདེ་བ་ཆེན་པོ་སྟོན། །ཆོས་ཉིད་བདེ་བ་ཆེན་པོས་ནམ་མཁའ་བཞིན། །བདེ་བ་མཆོག་གི་ངང་ལས་སྤྲུལ་པའི་ལྷ་མོ་ཀྱེ། །རོལ་པས་འདུས་པའི་ཚོགས་ལ་སྩལ་བར་མཛོད། །བདེ་ལ་བསྣམས་ཤིང་བདེ་ལ་མནོས་ཧཱུྃ། །བདེ་མཆོག་ཆར་པ་རབ་ཏུ་དབབ་པར་
གསོལ། །དབྱིངས་ལས་བདེར་གཤེགས་སློབ་མ་གཟུང་དུ་གསོལ། །ཅི་ལྟར་བཞུགས་པའི་གནས་སུ་བཞུགས་སུ་གསོལ། །ངོ་མཚར་བྱང་ཆུབ་ཚེ་འདི་བདེ་བ་ཐོབ། །ཕ་རོལ་ཕྱིན་དྲུག་གང་ལ་མི་རྟེན་པར། །མི་སྐྱེ་མྱ་ངན་འདས་པའི་གཟུགས་དང་
རྣམ་པར་ལྡན། །བདེ་བ་ཆོས་ཀྱི་དབྱིངས་ལ་གནས་པ་ཡི། །རྨོངས་པའི་བདེ་བས་འགྲོ་ལ་སྙིང་རྗེ་ཆེ། །བྱང་ཆུབ་སེམས་ཀྱི་དགྱེས་མཆོག་མི་ཆགས་པའི། །གླུ་འདི་དག་ནི་བླངས་པ་ཡིས། །ཡིད་དང་འཐད་པའི་བདེ་ཆེན་པོ། །དངོས་གྲུབ་མྱུར་དུ་ཐོབ་པར་
འགྱུར། །དེ་ནས་བཅོམ་ལྡན་འདས་ཀུན་དུ་བཟང་པོས། དེ་བཞིན་གཤེགས་པ་ཐམས་ཅད་ཀྱིས་གསོལ་བའི་དབྱངས་ཀྱིས་བསྟོད་པ། པདྨ་དང་འདྲ་བའི་སྤྱན་གཉིས་ཀྱིས་ཀུན་དུ་གཟིགས་ཤིང་། །འཛུམ་པ་དང་བཅས་པས་ཞལ་རྒྱས་པར་གྱུར་
ནས། སངས་རྒྱས་ཀྱི་ཞིང་རྡུལ་ཕྲན་གྱི་ཚོགས་འཇིག་རྟེན་གྱི་ཁམས་མང་པོ་བསྐལ་བར་རྒྱས་པའི་སྤྲིན་གྱི་རྒྱ་མཚོ་ཆེན་པོ་སྙེད་མ་ལུས་ལུས་པ་མེད་པའི་དེ་བཞིན་གཤེགས་པ་དང་། རྡོ་རྗེ་དང་། ནོར་བུ་དང་། རིན་པོ་ཆེ་དང་། པདྨོ་དང་། ལས་ཀྱི་རིགས་
ལས་བྱུང་བའི་དེ་བཞིན་གཤེགས་པ་དང་། རྡོ་རྗེ་འཛིན་དང་། རིན་ཆེན་འཛིན་པ་དང་། སྣ་ཚོགས་རྡོ་རྗེ་འཛིན་པ་ཐམས་ཅད་དང་། རྣལ་འབྱོར་དབང་ཕྱུག་ཚོགས་དང་། ཐུགས་ལས་བྱུང་བ་དང་། མཚོན་དང་། དགའ་བ་དང་། སྒེག་མོ་

ལ་སོགས་པ་རྣལ་འབྱོར་གཡོག་གི་ཚོགས་ཚད་མེད་པར་བྱེད་པར་འདྲེན་པ་དང་། འགུགས་པར་བྱེད་པ་དང་། འཇིགས་པར་བྱེད་པ་ལ་སོགས་པའི་ནམ་མཁའ་ལ་འགྲོ་བའི་ཚོགས་དང་། གྲགས་པ་མེད་པའི་ཚོགས་དང་། རྡོ་རྗེ་འཕྲོག་པར་བྱེད་པའི་ཚོགས་
དང་། གཞན་ཡང་ཕྱི་རོལ་གྱི་རྡོ་རྗེ་དང་། རིན་ཆེན་པདྨ་དང་། ལས་ཀྱི་རིགས་ལས་བྱུང་བའི་རྣལ་འབྱོར་པ་དང་། རྣལ་འབྱོར་གྱི་དབང་ཕྱུག་ཆེན་པོ་དང་། ནམ་མཁའ་ལ་འགྲོ་བའི་ཚོགས་རྣམས་ལ་རྣམ་པར་གྱུར་པ་དང་བཅས་པ་ཀུན་དུ་གཟིགས་པའི་སྤྱན་
གྱིས་གར་མཛད་མ་དང་། ཀུན་དུ་གནོན་པ་དང་། ཚོགས་ཀྱིས་འདེབས་པ་དང་། ཕྱག་ན་གར་མཛད་མ་དང་། འགྱིང་བ་དང་། ཀུན་དུ་རྣམ་པར་འདོར་བའི་གནོན་པས་འཁོར་གྱི་དཀྱིལ་འཁོར་ལ་བྱིན་གྱིས་བརླབས་ནས་དགྱེས་པའི་གདོན་མི་ཟ་བ་ཞེས་
བྱ་བ་དཀྱིལ་འཁོར་གྱི་རྒྱལ་པོ་ཆེན་པོ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་གསུངས་པ། དེ་ཉིད་བདག་ནི་མཉམ་བཞག་དང་། །དེ་བཞིན་ལྷའི་དེ་བཞིན་ཉིད་དང་། །སྔགས་དང་ཕྱག་རྒྱ་དེ་བཞིན་ཉིད། །དཀྱིལ་འཁོར་གྱི་ནི་མཆོག་ཏུ་འགྱུར། །
ཡན་ལག་ཐམས་ཅད་བསམ་ལས་འདས། །ཡོད་མེད་གཉིས་ལས་མི་གནས་པ། །འདྲེན་དང་ཚིག་ལས་ཡང་དག་འདས། །འདི་ནི་དཀྱིལ་འཁོར་མཆོག་ཅེས་བྱའོ། །ཆོས་མིན་ཆོས་ནི་རྣམ་དཔྱོད་པས། །ཆོས་རྣམས་ཐམས་ཅད་བརྟག་པར་བྱ། །
རྣམ་དག་ནམ་མཁའ་འདྲ་བ་ཡི། །དཀྱིལ་འཁོར་འདི་ནི་བསྟན་པ་ཡིན། །འདོད་ཆགས་མི་ཆགས་འདོད་ཆགས་མཉམ། །ཆུ་ཡི་པདྨོ་དམར་བ་འདྲ། །རང་སེམས་འདོད་ཆགས་ཤིན་ཏུ་ཆགས། །འདི་ནི་དཀྱིལ་འཁོར་མཆོག་ཡིན་ནོ། །གཟུགས་
མེད་གཟུགས་ནི་དྲི་མེད་པའི། །ཁམས་གསུམ་ལས་ནི་འཇུག་བྱེད་པའི། །སེམས་ནི་ཆུ་ཉིད་དང་བ་བཞིན། །དཀྱིལ་འཁོར་ཞེས་བྱའོ། །དེ་ནས་དེ་བཞིན་གཤེགས་པ་ཐམས་ཅད་གཡོག་དང་བཅས། ཕོ་ཉ་དང་། ཕོ་ཉ་མོ་དང་། ནམ་མཁའ་

ལ་འགྲོ་བའི་ཚོགས་དང་། ཡང་བཅོམ་ལྡན་འདས་དཔལ་ཀུན་དུ་བཟང་པོ་བཞེངས་ནས་འདི་སྐད་ཅེས་གསོལ་ཏོ། །ཀྱེ་མ་རབ་དགྱེས་དཔའ་བ་མཆོག །ཀྱེ་མ་རབ་བགེགས་ཕྱོགས་བསྒྱུར་བ། །རྣལ་འབྱོར་ཆེན་པོ་ཚོགས་མཆོག་ནི། །གསང་བའི་
དཀྱིལ་འཁོར་ཉིད་ཀྱིས་གསུངས། །སངས་རྒྱས་སྦྱོར་བ་རབ་ཏུ་ཟབ། །རྡོ་རྗེ་སྤྱོད་པ་བླ་ན་མེད། །འཇིག་རྟེན་གསུམ་པོ་བདེ་ཐོབ་པའི། །དཀྱིལ་འཁོར་གསང་བ་ཉིད་ཀྱིས་གསུངས། །པདྨོ་རིན་ཆེན་སྣ་ཚོགས་ཆེ། །ཐབས་ཀྱིས་སྦྱོར་བ་གར་མཛད་པ། །རྣམ་
གྲངས་སེམས་ཀྱི་འཇིག་རྟེན་དུ། །བདེ་ཆེན་དཀྱིལ་འཁོར་ཉིད་ཀྱིས་གསུངས། །དེ་ནས་བཅོམ་ལྡན་འདས་ལ། ཐམས་ཅད་གར་དང་བཅས་པའི་ཕྱག །སོར་མོ་འདབ་མ་ཀུན་དུ་འབྲེལ། །རྡོ་རྗེ་ཐལ་མོ་གར་རྣམས་བསྒྱུར། །བརྗིད་བག་དག་ཏུ་རབ་ཏུ་བཅས། །
གྲོལ་ཞིང་མ་མཆུ་ཚེམས་ཀྱིས་མནན། །ཆུ་སྐྱེས་འདབ་མ་བཞིན་དུ་གཟིགས་པས་བཤད། །དབྱངས་ལེན་པ་དང་གཅིག་ལ་གཅིག་བསྐུལ་དང་། །སྣང་ཞིང་ཀུན་དུ་མ་ཆགས་པར། །ཆགས་མེད་བདེ་བ་མཆོག་གིས་ནི། །བདེ་བའི་རྣལ་འབྱོར་གཟུགས་ཀྱིས་རྣམས། །
སྟོབས་ཞིང་བདེ་བ་སྦྱིན་མཛད་པ། །ནམ་མཁའི་རང་བཞིན་བསམ་གྱིས་མི་ཁྱབ་སྟེ། །སྟོབས་ཤིང་བཞེངས་ཏེ་གྲུབ་པར་མཛོད། །ཆགས་པས་རབ་ཏུ་མི་གོས་པའི། །བདེ་བ་རེག་ཅིང་དགོངས་སུ་གསོལ། །དེ་ནས་བཅོམ་ལྡན་འདས་ཀུན་དུ་བཟང་པོ་ཆེན་
པོ་དགྱེས་པ་ཆེན་པོས་བསྐུལ་བས་ཐུགས་སད་པར་གྱུར་ཏེ། ཤིན་ཏུ་དགྱེས་ནས་རྡོ་རྗེ་དཔལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཤིན་ཏུ་དགྱེས་པ་ཆེན་པོ་རྣལ་འ