Kinh tạng Tây Tạng (Kangyur Đại Học) — 099_རྙིང་རྒྱུད།_ག

གདན་སྟེངས་སུ། །ལྟ་བྱེད་ཡུལ་ལ་གནས་གྱུར་པ། །ཕྲ་མེན་གཟི་བརྗིད་བྱ་རྒོད་གདོང་། །

རྣལ་འབྱོར་དམར་ནག་ཀྲི་ཏ་མ། །མཆུ་བརྡར་རྐན་བརྡབས་གཡང་གཞི་གྱོན། །ཟངས་གྲི་རྣོན་པོ་གཡས་པ་ན། །རྒྱུ་ཞགས་དྲང་བ་གཡོན་པ་ན། །རཀྵ་ས་ལ་བརྐྱང་བསྐུམ་བཞུགས། །ལྷོ་ནུབ་མཚམས་སུ་བསམ་བྱ་བ། །སྲིན་པོ་བསྒྱེལ་བའི་གདན་
སྟེངས་སུ། །ཉན་བྱད་ཡུལ་ལ་གནས་གྱུར་པ། །ཕྲ་མེན་གསལ་བྱེད་དུར་བྱའི་གདོང་། །རྣལ་འབྱོར་རྣལ་མ་ཀངྐ་མ། །མཆུ་བརྡར་རྐན་བརྡབས་གཡང་གཞི་གསོལ། །སྟིར་ཆུང་སྟོད་སྨད་གཡས་གཡོན་ན། །རྔམ་པའི་ཚུལ་གྱིས་ཕྲག་ལ་བཀལ། །རཀྵ་ས་ལ་
བརྐྱང་བསྐུམ་བཞུགས། །ནུབ་བྱང་མཚམས་སུ་བསམ་བྱ་བ། །སྲིན་པོ་བསྒྱེལ་བའི་གདན་སྟེངས་སུ། །སྣོམ་བྱེད་ཡུལ་ལ་གནས་གྱུར་བ། །ཕྲ་མེན་ས་ལེ་བྱ་རོག་གདོང་། །རྣལ་འབྱོར་དམར་ནག་ཁ་ཁྭ་མ། །མཆུ་བརྡར་རྐན་བརྡབས་གཡང་གཞི་གྱོན། །
ཟངས་གྲི་དམར་པོ་གཡས་པ་ན། །བྷན་དྷ་རཀྟ་གཡོན་པ་ན། །རཀྵ་ས་ལ་བརྐྱང་བསྐུམ་བཞུགས། །བྱང་ཤར་མཚམས་སུ་བསམ་བྱ་བ། །སྲིན་པོ་བསྒྱེལ་བའི་གདན་སྟེངས་སུ། །མྱོང་བྱེད་ཡུལ་ལ་གནས་གྱུར་པ། །ཕྲ་མེན་རྫོགས་བྱེད་འུག་པའི་གདོང་། །རྣལ་
འབྱོར་ལྗང་ནག་ཧུ་ལུ་མ། །མཆུ་བརྡར་རྐན་བརྡབས་གཡང་གཞི་གསོལ། །རྡོ་རྗེ་ལྕགས་ཀྱུ་གཡས་པ་ན། །སྟིར་ཆུང་སྤྱི་འཇོམས་གཡོན་པ་ན། །རཀྵ་ས་ལ་བརྐྱང་བསྐུམ་བཞུགས། །འབར་བའི་བར་ཁྱམས་ཐ་མ་ལ། །ཐོད་སྐམ་འབར་བའི་གཞལ་ཡས་
ན། །ཞིང་ཆེན་བསྣོལ་མའི་གདན་སྟེངས་སུ། །ཤར་གྱི་ཕྱོགས་སུ་བསམ་བྱ་བ། །ཉུལ་བྱེད་ཡུལ་ལ་གནས་གྱུར་པ། །སྦོར་བྱེད་ཆེན་མོ་མི་ཟད་མ། །སྣ་ཚོགས་འགྱུར་བའི་སྐུ་མདོག་མ། །ཞིང་ཆེན་རོལ་པའི་སླག་པ་གསོལ། །རལ་པ་ཁམ་ནག་གྱེན་
དུ་འབར། །སྤྱུགས་པས་གླུ་བླངས་སྲིད་གསུམ་འབར། །ཧ་ཧ་གད་མོས་ཡེ་ཤེས་རོལ། །ཉི་ཟེར་ཞགས་པ་གཡས་པ་ན། །བྷན་དྷ་རཀྟ་གཡོན་པ་ན། །རོ་རློན་སྟེང་དུ་བརྐྱང་བསྐུམ་བཞུགས། །ལྷོ་ཡི་ཕྱོགས་སུ་བསམ་བྱ་བ། །མི་མགོན་ཐུབ་པ་གནས་

གྱུར་པ། །སྤོར་བྱེད་ཆེན་མོ་མདུང་ཐུང་འཕེན། །རྣལ་འབྱོར་སེར་ནག་ཉུལ་ཆེན་མ། །རལ་པ་ཁམ་ནག་གྱེན་དུ་འཁྱིལ། །མི་ཡི་གཡང་གཞི་གོས་སུ་གྱོན། །སྤྱུགས་པས་གླུ་བླངས་སྲིད་གསུམ་སྦྱངས། །ཧ་ཧ་གད་མོས་མི་རྣམས་སྤོར། །རྡོ་རྗེ་མདུང་ཐུང་གཡས་པ་
ན། །བྷན་དྷ་རཀྟ་གཡོན་པ་ན། །རོ་རློན་སྟེང་དུ་བརྐྱང་བསྐུམ་བཞུགས། །ནུབ་ཀྱི་ཕྱོགས་སུ་བསམ་བྱ་བ། །ཆོས་ཀྱི་དབྱིངས་ལས་གནས་གྱུར་པ། །སྤོར་བྱེད་རྡོ་རྗེ་དྲིལ་འཁྲོལ་མ། །རྣལ་འབྱོར་མཚོན་དུ་མེད་པའི་སྐུ། །རལ་པ་ཁམ་ནག་གྱེན་དུ་འབར། །ཆོས་ཉིད་
དབྱིངས་ཀྱི་ན་བཟའ་གསོལ། །སྤྱུགས་པས་གླུ་བླངས་སྟོང་ཁམས་སྤོར། །ཧ་ཧ་གད་མོས་དབྱིངས་སུ་སྦྱོར། །གསུང་བསྒྲགས་དྲིལ་བུ་གཡས་པ་ན། །བྷན་དྷ་རཀྟ་གཡོན་པ་ན། །རོ་རློན་སྟེང་དུ་བརྐྱང་བསྐུམ་བཞུགས། །བྱང་གི་མཚམས་སུ་བསམ་བྱ་བ། །ལྷ་མིན་ཐུབ་
པ་གནས་གྱུར་པ། །སྤོར་བྱེད་ཐོད་ཕྲེང་སྐར་མདའི་གདོང་། །རྣལ་འབྱོར་སྔོ་ནག་ཉུལ་ཆེན་མ། །སྲོག་ཆགས་ཆེན་པོའི་གཡང་གཞི་གྱོན། །རལ་པ་ཁམ་ནག་གྱེན་དུ་འབར། །སྤྱུགས་པས་གླུ་བླངས་ཁམས་གསུམ་སྦྱངས། །ཧ་ཧ་གད་མོས་ལྷ་རྣམས་སྤོར། །རྡོ་རྗེ་
སྐར་མདའ་གཡས་པ་ན། །བྷན་དྷ་རཀྟ་གཡོན་པ་ན། །རོ་རློན་སྟེང་དུ་བརྐྱང་བསྐུམ་བཞུགས། །ཤར་ལྷོ་མཚམས་སུ་བསམ་བྱ་བ། །ལྷ་འདུལ་ཐུབ་པ་གནས་གྱུར་པ། །སྤོར་བྱེད་ཁྱུང་ཐོགས་གནོད་སྦྱིན་མ། །རྣལ་འབྱོར་མཐིང་ནག་ཉུལ་ཆེན་མ། །འཇིགས་
བྱེད་གཡང་གཞི་གོས་སུ་གྱོན། །རལ་པ་ཁམ་ནག་གྱེན་དུ་འབར། །སྤྱུགས་པས་གླུ་བླངས་སྟོང་ཁམས་གྲགས། །ཧ་ཧ་གད་མོས་ལྷ་རྣམས་སྤོར། །རྡོ་རྗེ་ཁྱུང་ཆེན་གཡས་པ་ན། །བྷ་དྷ་རཀྟ་གཡོན་པ་ན། །རོ་རློན་སྟེང་དུ་བརྐྱང་བསྐུམ་བཞུགས། །ལྷོ་ནུབ་
མཚམས་སུ་བསམ་བྱ་བ། །ཡི་དགས་ཐུབ་པ་གནས་གྱུར་པ། །སྤོར་བྱེད་མེ་ཁྱེར་གློག་ཕྲེང་འཛིན། །རྣལ་འབྱོར་དམར་ནག་ཉུལ་ཆེན་མ། །ཡི་དགས་མགྲིན་རིངས་གཡང་གཞི་གྱོན། །རལ་པ་ཁམ་ནག་གྱེན་དུ་འབར། །སྤྱུགས་པས་གླུ་བླངས་སྣང་སྲིད་སྦྱངས། །

ཧ་ཧའི་གད་མོས་ཡི་དགས་སྤོར། །རྡོ་རྗེ་གློག་ཕྲེང་གཡས་པ་ན། །བྷན་དྷ་རཀྟ་གཡོན་པ་ན། །རོ་རློན་སྟེང་དུ་བརྐྱང་བསྐུམ་བཞུགས། །ནུབ་བྱང་མཚམས་སུ་བསམ་བྱ་བ། །བྱོལ་སོང་ཐུབ་པ་གནས་གྱུར་པ། །སྤོར་བྱེད་འཇིགས་ཆེན་སློག་ཤ་རྡེབས། །
རྣལ་འབྱོར་སྨུག་ནག་ཉུལ་ཆེན་མ། །རལ་པ་ཁམ་ནག་གྱེན་དུ་འབར། །སླག་ཆེན་བརྗིད་པའི་གཡང་གཞི་གྱོན། །སྤྱུགས་པས་གླུ་བླངས་སྟོང་ཁམས་གྲགས། །ཧ་ཧའི་གད་མོས་བྱོལ་སོང་སྤོར། །རྡོ་རྗེ་སླག་ཤ་གཡས་པ་ན། །བྷན་དྷ་རཀྟ་གཡོན་པ་ན། །རོ་རློན་
སྟེང་དུ་བརྐྱང་བསྐུམ་བཞུགས། །བྱང་ཤར་མཚམས་སུ་བསམ་བྱ་བ། །དམྱལ་མགོན་ཐུབ་པ་གནས་གྱུར་པ། །སྤོར་བྱེད་གཤིན་རྗེ་རལ་གྲི་སླ། །རྣལ་འབྱོར་སྔོ་ནག་ཉུལ་ཆེན་མ། །རལ་པ་ཁམ་ནག་གྱེན་དུ་འབར། །གཤིན་རྗེ་གཡང་གཞི་གོས་སུ་གྱོན། །སྤྱུགས་
པས་གླུ་བླངས་སྲིད་གསུམ་སྦྱངས། །ཧ་ཧའི་གད་མོས་དམྱལ་བ་སྤོར། །རྡོ་རྗེ་རལ་གྲི་གཡས་པ་ན། །བྷན་དྷ་རཀྟ་གཡོན་པ་ན། །རོ་རློན་སྟེང་དུ་བརྐྱང་བསྐུམ་བཞུགས། །འབར་བའི་དཀྱིལ་འཁོར་སྒོ་བཞི་ལ། །ཕྱིན་ཅི་ལོག་བཞི་གནས་གྱུར་པ། །ཤར་གྱི་སྒོར་ནི་
བསམ་བྱ་བ། །ཕག་ཆེན་པོ་ཡི་གདན་སྟེངས་སུ། །རྟ་གདོང་སྲིན་མོའི་གཡང་གཞི་གསོལ། །རྡོ་རྗེ་ལྕགས་ཀྱུ་གཡས་པ་ན། །བྷན་དྷ་རཀྟ་གཡོན་པ་ན། །ཕག་ཆེན་པོ་ཡི་གདན་སྟེངས་སུ། །སྟོབས་ཆེན་ཁྲོ་བོ་ཆེན་པོ་དང་། །འཁྲིལ་བ་ཆེན་པོའི་ཚུལ་དུ་
བཞུགས། །རྔམ་པའི་ཚུལ་གྱིས་ཕྱིར་བལྟས་པའོ། །ལྷོ་ཡི་སྒོར་ནི་བསམ་བྱ་བ། །ར་གདོང་ཆེན་མོའི་གདན་སྟེངས་སུ། །ཕག་གདོང་ཆེན་མོའི་གཡང་གཞི་གྱོན། །ལྕགས་ཀྱི་དྲིལ་ཞགས་གཡས་པ་ན། །བྷན་དྷ་རློན་པ་གཡོན་པ་ན། །ར་གདོང་ཆེན་མོའི་
གདན་སྟེངས་སུ། །ཁྲོ་ཆེན་གཤིན་རྗེ་གཤེད་པོ་དང་། །འཁྲིལ་བ་ཆེན་པོའི་ཚུལ་གྱིས་སུ། །རྔམ་པའི་ཚུལ་གྱིས་བལྟས་པའོ། །ནུབ་ཀྱི་སྒོར་ནི་བསམ་བྱ་བ། །བུམ་རྣ་ཆེན་མོའི་གདན་སྟེངས་སུ། །དྲེད་གདོང་ཆེན་མོ་གཡང་གཞི་གྱོན། །ལྕགས་སྒྲོག་མེ་འབར་

གཡས་པ་ན། །བྷན་དྷ་རློན་པ་གཡོན་པ་ན། །སྲིན་པོ་བུམ་རྣའི་གདན་སྟེངས་སུ། །ཁྲོ་ཆེན་རྟ་མགྲིན་ཆེན་པོ་དང་། །འཁྲིལ་བ་ཆེན་པོའི་ཚུལ་གྱིས་སུ། །རྔམ་པའི་ཚུལ་གྱིས་ཕྱིར་བལྟས་པའོ། །བྱང་གི་སྒོར་ནི་བསམ་བྱ་བ། །གསུས་པོ་ཆེ་ཡི་གདན་སྟེངས་སུ། །སྤྱང་གདོང་
ཆེན་མོ་གཡང་གཞི་གྱོན། །དྲིལ་བུ་ཐལ་ཆེན་གཡས་པ་ན། །བྷན་དྷ་རློན་པ་གཡོན་པ་ན། །གསུས་པོ་ཆེ་ཡི་གདན་སྟེངས་སུ། །ཁྲོ་ཆེན་བདུད་རྩི་འཁྱིལ་པ་དང་། །འཁྲིལ་བ་ཆེན་པོའི་ཚུལ་གྱིས་སུ། །རྔམ་པའི་ཚུལ་གྱིས་ཕྱིར་བལྟས་པའོ། །ཧོ་བཛྲ་གུ་ཧྱ་ཚིག་ཏུའོ། །
གསང་བའི་སྙིང་པོའི་དེ་ཁོ་ན་ཉིད་ངེས་པ་སྒྱུ་འཕྲུལ་བླ་མ་ཆེན་པོ་ལས་བདུད་བཏུལ་བ་དང་ཉིད་ཀྱི་སྐུ་གསུང་ཐུགས་ཀྱི་ཆེ་བའི་ཡོན་ཏན་ཕྱོགས་བཅུར་གསལ་བའི་ལེའུ་སྟེ་དགུ་པའོ།། །།དེ་ནས་དགྱེས་པ་ཆེན་པོ་ཡེ་ཤེས་རྒྱལ་པོ་དེ་ཉིད་གསུང་གི་དཀྱིལ་འཁོར་ཆེན་པོ་འདི་
ཡང་དག་པར་གྲགས་ཤིང་དམ་ཚིག་རྗེས་སུ་འཛིན་པའི་དགོངས་པ་རྩེར་ཆིབ་ནས་སྐུ་གསུང་ཐུགས་རྡོ་རྗེ་ལས་འདི་དག་ཕྱུང་ངོ་། །བྲུྃ་བི་ཤྭ་ཀྲོ་དྷ་བཛྲ་ཛྭ་ལ་མཎྜ་ལ་ཙཀྲ་ཧཱུྃ། ཕཊ་ཕཊ་ཕཊ། ཧ་ལ་ཧ་ལ་དུ་ཏྲི་ཙཀྲ་ནཱན། སཱུརྱ་ཙནྡྲ་པདྨ་དེ་བ་ཏིཥྛ་ནཱན། །ཧཱུྃ་ཧཱུྃ་ཧ་ཧ་ཧཱུྃ་ཧཱུྃ་བཛྲ་མ་ཧཱ་
ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚཱ་ན་ཏ་ཀ་ཧ་ན་ད་ཧ་པ་ཙ་ཧཱུྃ་ཕཊ། ཧཱུྃ་བཛྲ་དྷ་ར་མ་ཧཱ་ཀྲོ་དྷཱི་ཤྭ་རི་ཛྭ་ལ་ནི་ཧཱུྃ་ཕཊ། ཨོྃ་སརྦ་ཏ་ཐཱ་ག་ཏ་མ་ཧཱ་ཤཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚཱ་ན་ཏ་ཀ་ཧ་ན་ད་ཧ་པ་ཙ་ཧཱུྃ་ཕཊ། ཨོྃ་སརྦ་ཏ་ཐཱ་ག་ཏོ་བུདྡྷ། མ་ཧཱ་ཀྲོ་དྷཱི་ཤྭ་རི་ཛྭ་ལ་ནི་ཧཱུྃ་ཕཊ། ཨོྃ་ཏྲཱྃ་རཏྣ་མ་ཧཱ་ཤྲཱི་ཧེ་རུ་ཀ་
མ་ཧཱ་ཙཎྜ་སརྦ་དུཥྚཱ་ན་ཏ་ཀ་ཧ་ན་ད་ཧ་པ་ཙ་ཧཱུྃ་ཕཊ། ཏྲཱྃ་སཱུརྱ་རཏྣ་མ་ཧཱ་ཀྲོ་དྷཱི་ཤཱ་རི་ཛྭ་ལ་ནི་ཧཱུྃ་ཕཊ། ཨོྃ་ཧྲཱིཿ པདྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚཱ་ན་ཏ་ཀ་ཧ་ན་ད་ཧ་པ་ཙ་ཧཱུྃ་ཕཊ། ཧྲཱིཿཤྭ་པདྨ་བ་མུ་ཀ་མ་ཧཱ་ཀྲོ་དྷཱི་ཤྭ་རི་ཛྭ་ལ་ནི་ཧཱུྃ་ཕཊ། ཧ་ཀརྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚཱ་ན་
ཏ་ཀ་ཧ་ན་ད་ཧ་པ་ཙ་ཧཱུྃ་ཕཊ། ཀརྨ་མ་ཧཱ་ཀྲོ་དྷཱི་ཤྭ་རི་ཛྭ་ལ་ནི་ཧཱུྃ་ཕཊ། བཛྲ་ཀེའུ་རི་ཧ། བཛྲ་ཙེའུ་རི་ཧ། བཛྲ་པྲ་མོ་ཧཱ་ཧ། བཛྲ་པེ་ཏཱ་ལི་ཧ། བཛྲ་པུཀྐ་སི་ཧ། བཛྲ་གྷསྨ་རི་ཧ། བཛྲ་སྨ་ཤ་ནི་ཧ། བཛྲ་ཙཎྜ་ལི་ཧ། བཛྲ་སིང་ཧ་མུ་ཁ་ཧེ། བཛྲ་བྱཱ་གྷྲྀ་མུ་ཁ་ཧེ། བཛྲ་སྲི་ལ་མུ་

ཁ་ཧེ། བཛྲ་ཤྭ་ན་མུ་ཁ་ཧེ། བཛྲ་གྲྀ་དྷ་མུ་ཁ་ཧེ། བཛྲ་ཀངྐ་མུ་ཁ་ཧེ། བཛྲ་གཱ་ཀ་མུ་ཁ་ཧེ། བཛྲ་ཧུ་ལུ་ཀ་མུ་ཁ་ཧེ། བཛྲ་ཨཱརྱ་ཏེ་ཙ་ཏེ་ང་ཙ། བཛྲ་ཨ་མོ་གྷ་ཧཱུྃ། བཛྲ་ཨཱ་ལོ་ཀ་བྃ། བཛྲ་བྷསྨི་པཱ་ལ་ཡ་བ་ཏོ་ཧོ། ཨེཧྱེ་ཧི་ཕྲི་ཏ་ཨཱརྱ་ནི་ཙ་
ཏུ་ར་བ་ཡ་ཕཊ། བཛྲ་བེ་ཡོ་གི་པྲ་ཏི་ཨཱརྱ་ནི་ཙ་ཏུ་ར་ཐཱ་ཡ་ཧཱུྃ་ཕཊ། བཛྲ་མུ་ཨ་ནི་ཨ་པྲ་ཏི་ཨཱརྱ་ནི་པ་ཤི་ཀ་ར་ཕཊ། བཛྲ་མུ་ནི་ཨ་པྲ་ཏི་ཨཱརྱ་པ་ནི་ཤི་ཀ་ར་ཕཊ། བཛྲ་མུ་ནི་ཨ་སུཾ་བ་ཨ་ནི་བ་ཤི་ཀ་ར་ཕཊ། བཛྲ་མུ་ནི་
ཨ་པྲ་ཏི་ཨཱརྱ་ནི་པ་ཤི་ཀ་ར་ཕཊ། བཛྲ་མུ་ནི་ཨ་དུ་པྲི་ཏི་ཨ་ནི་པ་ཤི་ཀ་ར་ཕཊ། ཨེ་ཧྱེ་ཧི་ཨཱ་ན་ཡ་ཧོ། ཨོྃ་རུ་ལུ་རུ་ལུ་ཧཱུྃ་བྷྱོ་ཧཱུྃ། ཛཿཧཱུྃ་བྃ་ཧོཿ བཛྲ་ཀྲོ་དྷ་ས་མ་ཡ་ཧཱུྃ་ཕཊ་ཅེས་གསུང་གི་དཀྱིལ་འཁོར་གྱིས་སྟོང་གསུམ་གྱི་དཀྱིལ་འཁོར་ཁྱབ་པར་དུས་གཅིག་ཁྱབ་པར་
གྲགས་པ་དང་། དམ་ནོད་པ་བཀའ་ཉན་གྱི་ཚོགས་མའི་སྲིན་མོ་ལ་སོགས་པ་རྣམས་ཀྱིས་ཀྱང་སོ་སོའི་སྲོག་གི་སྙིང་པོ་ཕུལ་ལོ། །བཛྲ་མ་ནུ་རཱཀྵ་སི། བཛྲ་པྲ་མ་ནི། བཛྲ་རཽ་ཏྲི། བཛྲ་བཻཥྞ་བེ། བཛྲ་པིང་ག་ལཾ། བཛྲ་ཀེ་མ་རི། བཛྲ་ཨིནྡྲ་ན། བཛྲ་སུ་ར་ཡ་ཏྲ། བཛྲ་སོ་ཧུ་མྱ།
བཛྲ་ཨ་མྲྀ་ཏ། བཛྲ་ད་ན་ཏ། བཛྲ་རཱཀྵ་སི། བཛྲ་བཀྵ་སི། བཛྲ་ར་ཏི་ཧྃ། བཛྲ་རུ་ཏི་ཧྃ། བཛྲ་ཨེ་ཀ་ཙ་རྃ། བཛྲ་མ་ནོ་ཧ་རྃ། བཛྲ་ས་ན་དྷི་ཧྃ། བཛྲ་བ་ཡ་བྱ། བཛྲ་མ་ཧཱ་མ་རམ་ན། བཛྲ་ཨགྣེ་ཡེ། བཛྲ་ཙ་མུནྟྲི། བཛྲ་པུ་ཏྲ་ན། བཛྲ་བ་རུ་ཎི། བཛྲ་མ་ཧཱ་ཀཱ་ལ། བཛྲ་
ཏཱིཀྵྞ་བྃ། བཛྲ་ལཾ་པོ་དྷ་ར། ཡེ་ཤེས་རྒྱལ་པོ་དགོངས་སུ་གསོལ། །ཁྲོ་ལ་ཁྲོས་པས་ཞི་མཛད་པ། ཐུགས་རྗེས་ཁྲོ་དཔལ་རྔམ་པའི་ཚོགས། །འབར་བའི་བྱིན་བརླབས་རྨད་པོ་ཆེ། དེ་ཉིད་དུ་ནི་བདག་ལ་སྩོལ། །ཨོཾ་བཛྲ་ས་མ་ཡ་སྟྭཾ། ཨོྃ་བཛྲ་ས་མ་ཡ་ཧོཿ། བཛྲ་ས་མ་ཡ་
ཕཊ། ཨ་ལི་ཨུ་ལི་ཏ་ལི་ཏ་པ་ལི་དྃ་སྟྃ་ཁོ་ན་རཽ་ཏྲི་ཁ་ར་ཡོ་ག་ནི་ཁ་རྃ་ཧཱུྃ་ཧ་ཧེ་ཕཊ་ཅེས་བརྗོད་པས །འཇིག་རྟེན་དྲུག་གི་ཕྱོགས་བཅུ་ཀུན། །ཚིག་ཅིང་འབར་བས་ཐམས་ཅད་ཁྱབ། །གསུང་གི་ཁྲོ་ཚོགས་ཆེན་པོ་ཡིས། །ཀུན་དུ་ཁྱབ་ཅིང་གང་གྱུར་ཏོ། །དེ་ནས་བཅོམ་

ལྡན་འདས་དགྱེས་པ་ཆེན་པོ་ཡེ་ཤེས་རྒྱལ་པོ་དེ་ཉིད་ཀྱི་དེ་དག་གི་དཀྱིལ་འཁོར་བསྟན་པའི་ཕྱིར་ངེས་པར་བརྗོད་པ་འདི་བརྗོད་དོ། །འབར་བའི་འཁོར་ལོ་རྩིབས་བཞི་པ། །གྲུ་ཆད་བཞིས་བརྒྱན་པར་ཁྱམས་དང་། །གྲུ་བཞི་སྒོ་ཁྱུད་བཞི་དང་ལྡན། །འབར་བའི་བར་
ཁྱམས་གསུམ་གྱིས་མཛེས། །ཐོད་སྦྲུལ་སྣ་ཚོགས་ཉི་མས་བརྗིད། །འབར་བའི་ཕྲེང་བ་མང་པོ་འཁྲུག །ཁྱུ་མཆོག་མ་ཧེ་གཟིག་དང་སྟག །གཏུམ་པ་དོམ་གྱི་སྦར་བས་ནི། །དབང་ཕྱུག་ལྷ་ཆེན་ལ་སོགས་པ། །དྲེགས་པ་ཆེན་པོ་གཏུམ་ཚོགས་མནན། །གདན་དུ་
བྱས་ཏེ་སྐུ་བཞུགས་པ། །སྨུག་ནག་སྔོ་ནག་སེར་ནག་དང་། །དམར་ནག་ལྗང་ནག་འཇིགས་པའི་གཟུགས། །དབུ་དགུ་ཕྱག་ནི་བཅྭ་བརྒྱད་དང་། །དབུ་གསུམ་ཕྱག་དྲུག་ཞབས་བཞིར་བགྲད། །རྔམ་པའི་སྒྲ་ཆེན་འཇིགས་པར་སྒྲོགས། །སྟག་ལུག་སྦྲུལ་དང་
ཉི་མར་ཆས། །སྟི་ར་ཆེ་ཆུང་ནང་ཞགས་དང་། །ཁྱུང་དང་ཡིད་བཞིན་ནོར་བུ་དང་། །སྟོང་གི་འཇིག་རྟེན་ཁོར་ཡུག་བཅས། །རྡོ་རྗེ་དུང་ཆེན་གང་བ་དང་། །རལ་གྲི་དགྲ་སྟང་ཤོལ་ལ་སོགས། །རང་གི་ལག་ཆ་སྣ་ཚོགས་དང་། །བཙུན་མོ་འཇིགས་པའི་ཚོགས་དང་
བཅས། །གནས་དང་ཡུལ་གྱི་ཕྱག་རྒྱ་དང་། །སྤོར་བྱེད་ཆེན་མོ་བརྒྱད་རྣམས་དང་། །དབྱུག་པ་མཚོན་ཆ་སྣ་ཚོགས་འཛིན། །སྒོ་བཞིའི་ཕྱག་རྒྱར་མཛེས་པ་དང་། །ལྕགས་ཀྱུ་ལ་སོགས་ཐོད་པས་མཛེས། །སླས་དང་བྱི་མོ་བྲན་མོའི་ཚོགས། །བཅུ་གཉིས་དང་
ནི་བརྒྱད་ཀྱིས་མཛེས། །རང་གི་སྟན་དང་ལག་ཆར་ཆས། །ཅི་བགྱི་ཞེས་ནི་ཆས་ཏེ་གནས། །ཞེས་གསུངས་པ་དང་། འཇིག་རྟེན་དྲུག་གི་ཕྱོགས་བཅུ་ཐམས་ཅད་དུ། སྐུ་གསུང་ཐུགས་བསམ་གྱིས་མི་ཁྱབ་པའི་དཀྱིལ་འཁོར་གྱིས་གང་ཞིང་ཁྱབ་པར་གྱུར་
ཏོ། །དེ་ནས་བཅོམ་ལྡན་འདས་ཡེ་ཤེས་རྒྱལ་པོ་དེ་ཉིད་དོན་ཡོད་པའི་འབྲས་བུ་ཆེན་པོ་དམ་ཚིག་ཆེན་པོས་གཟུང་བའི་ཕྱིར་འདའ་བར་དཀའ་བའི་དམ་ཚིག་རྡོ་རྗེ་འདི་གསུངས་སོ། །བླ་མེད་མི་སྤོང་བླ་མ་བཀུར། །སྔགས་དང་ཕྱག་རྒྱ་རྒྱུན་མི་གཅད། །ཡང་དག་ལམ་

དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །རྩ་བའི་དམ་ཚིག་ཆེན་པོ་ནི། །གདོང་ཆེན་བཅུ་ཡི་དོན་རྟོགས་ཀྱང་། །རྩ་བ་གསུམ་པོ་མི་འདའོ། །ཡན་ལག་དམ་ཚིག་ལྔ་གཉིས་ནི། །གཏི་མུག་འདོད་ཆགས་ཞེ་སྡང་དང་། །ང་རྒྱལ་ཕྲག་
དོག་མི་སྤོང་ངོ་། །དཀར་རྩི་དམར་རྩི་དྲི་ཤ་ཆུ། །དག་པའི་སྣོད་བཅུད་མི་དོར་རོ། །སྤྱི་དཔལ་བཅུ་ཡི་མངའ་བརྙེས་ཀྱང་། །ཡན་ལག་བཅུ་པོ་མི་དོར་རོ། །གཞན་ཡང་ཡན་ལག་དམ་ཚིག་རྣམས། །འདའ་བར་མི་མཛད་རྡོ་རྗེ་དམ། །ས་མ་ཡ་ནི་རྡོ་རྗེ་ཆེ། །མི་འདའ་
རྒྱལ་བ་ཉིད་ཀྱི་དམ། །བསམ་རྫོགས་ལྷུན་གྲུབ་ཆེ་མཐར་ཕྱིན། །སྲིད་གསུམ་དག་པ་དབང་ཆེན་སྒྱུར། །མི་འཇིགས་ཀུན་ཏུ་བཟང་པོར་སྤྱོད། །ཐེག་པ་མཐའ་ཡས་འདུལ་བའི་ཐབས། །ཇི་སྙེད་སྡོམ་པ་མཐའ་ལས་པ། །མ་ལུས་རྣམ་དག་ལྷུན་གྱིས་རྫོགས། །
ཉམས་འགྱུར་ཉེས་པ་བརྗོད་མི་ལང་། །ཚེ་ཐུང་བསམ་པ་ལོག་པ་དང་། །མྱ་ངན་སྡུག་བསྔལ་ཆེན་པོ་དང་། །དམྱལ་བ་ཉིད་ནི་རྡོ་རྗེ་བྱེད། །དགུ་རྫོགས་བཅུར་ལྡན་གསུམ་གྱིས་སྦྱངས། །བསྐང་བ་ལ་སོགས་མཐའ་ཡས་མཆོག །ཅེས་གསུངས་པས་དེ་བཞིན་
གཤེགས་པ་ཉིད་དེ་བཞིན་གཤེགས་པ་ཉིད་ཀྱིས་འདུལ་བར་འགྱུར་རོ། །སྒྱུ་འཕྲུལ་དྲ་བ་བླ་མ་ཆེན་པོ་ལས་འཇིགས་བྱེད་ཆེན་པོ་གསུང་གི་དཀྱིལ་འཁོར་དང་དམ་ཚིག་རྡོ་རྗེའི་ལེའུ་སྟེ་བཅུ་པའོ།། །།དེ་ནས་བཅོམ་ལྡན་འདས་དགྱེས་པ་ཆེན་པོ་ཡེ་ཤེས་རྒྱལ་
པོ་དེ་ཉིད་ཆོས་ཐམས་ཅད་མན་ངག་བླ་མ་ཆེན་པོའི་སྙིང་པོ་བྱང་ཆུབ་ཀྱི་སེམས་བདེ་བ་ཆེན་པོའི་ངང་དུ་སྙིགས་མ་མེད་པར་བྱུང་བཏབ་པའི་ཕྱིར་སྐུ་གསུང་ཐུགས་བླ་མ་ཆེན་པོའི་ཐིག་ལེ་ཆེན་པོའི་དཀྱིལ་འཁོར་ནས་མན་ངག་བླ་མ་ཆེན་པོའི་སྙིང་པོ་འདི་ཕྱུང་ངོ་། །
བྱང་ཆུབ་སེམས་ཀྱི་བདེ་ཆེན་ལ། །རྒྱུ་རྐྱེན་རྟེན་དང་ལེན་བཅས་པའི། །སྐྱོན་མེད་ཐིག་ལེ་ཆེན་པོ་ལས། །མ་རྟོགས་པ་དང་ལོག་པར་རྟོགས། །ཕྱོགས་རྟོགས་ཡང་དག་ཉིད་མ་རྟོགས། །འདུལ་བ་དགོངས་པ་གསང་བ་དང་། །རང་བཞིན་གསང་བའི་

དོན་རྣམས་ནི། །ཡི་གེ་ཚིག་ལ་རབ་བརྟེན་ཏེ། །ཁོང་ནས་གབ་སྦས་དོན་འབྱིན་པ། །སྟོན་པ་རྡོ་རྗེའི་ཐུགས་ལ་གནས། །དཀྱིལ་འཁོར་ལྡན་པའི་དཀྱིལ་འཁོར་གྱིས། །དཀྱིལ་འཁོར་ལ་ནི་དཀྱིལ་འཁོར་བསྒོམ། །དཀྱིལ་འཁོར་དཀྱིལ་འཁོར་ལས་བྱུང་བ། །ཐུགས་
ཀྱི་དཀྱིལ་འཁོར་དཀྱིལ་འཁོར་མཆོག །དཀྱིལ་འཁོར་གསང་བའི་ཐིག་ལེ་དབྱིངས། །འབྱུང་བ་ཤེས་རབ་རིགས་ཀྱི་ཡུམ། །བྱེད་པ་རིགས་ཀྱི་གཙོ་བོ་སྟེ། །བྱང་ཆུབ་སེམས་ཀྱི་རྡོ་རྗེའི་ཚོགས། །དབང་པོ་ཡུལ་དུས་རིག་པའི་རྣམས། །བདག་ཉིད་ཆེན་པོ་ལྷག་
པར་རྫོགས། །ཐུགས་ཀྱི་ཡེ་ཤེས་ལྔས་བལྟ་ཞིང་། །སྙིང་པོ་ཐིག་ལེ་མཉམ་སྦྱོར་བས། །བདེ་བའི་ཡེ་ཤེས་ཆེན་པོར་རོལ། །ཡེ་ཤེས་དགྱེས་པ་མཆོག་ཏུ་འབུལ། །ཟད་མེད་ཟག་པ་མེད་པ་ཡི། །བསོད་ནམས་ཡེ་ཤེས་སྒྱུ་མར་རོལ། །རོལ་མོའི་དཀྱིལ་
འཁོར་མཐའ་ཡས་མཆོག །གསང་བའི་ཐིག་ལེ་ཉིད་ཀྱི་དབྱིངས། །ཕྱོགས་བཅུ་དུས་བཞི་རྫོགས་པའི་དབྱིངས། །སྐུ་གསུང་ཡོན་ཏན་ཕྲིན་ལས་ཐུགས། །གསང་བའི་དཀྱིལ་འཁོར་ཐམས་ཅད་ཀུན། །མ་ལུས་བདག་གིས་དབང་སྒྱུར་རོ། །དབང་སྒྱུར་ཡེ་ཤེས་རོལ་པ་
ཡིས། །དཀྱིལ་འཁོར་ལ་གནས་དཀྱིལ་འཁོར་རྫོགས། །རྫོགས་པའི་དཀྱིལ་འཁོར་ལྷུན་གྱིས་གྲུབ། །རྫོགས་ཆེན་རྟོགས་པ་ཆེན་པོ་ཡིས། །རྒྱན་དུ་དཀྱིལ་འཁོར་མ་ལུས་ཐོགས། །རྫོགས་པའི་དཀྱིལ་འཁོར་མཉམ་སྦྱོར་བས། །ཐུགས་ཀྱི་དཀྱིལ་འཁོར་མ་
ལུས་འབྱུང་། །ཕྱོགས་བཅུའི་དཀྱིལ་འཁོར་འདུལ་བའི་མགོན། །སྒྱུ་མའི་དཀྱིལ་འཁོར་མ་ལུས་སྒྲོལ། །བྱ་བ་མེད་པའི་དཀྱིལ་འཁོར་སྤྱོད། །ཡེ་ཤེས་རྫོགས་པའི་དཀྱིལ་འཁོར་ལ། །ཐོས་བསམ་བསྒོམ་པའི་མཉམ་སྦྱོར་བས། །རང་འབྱུང་ཀུན་ནས་ལྷུན་
གྱིས་གྲུབ། །འདི་ནི་སངས་རྒྱས་ཐམས་ཅད་ཀྱི། །རང་བཞིན་རྫོགས་པའི་དཀྱིལ་འཁོར་ཡིན། །རྒྱུ་རྐྱེན་རྟེན་དང་ལྡན་པ་ཡི། །ཐམས་ཅད་བྱང་ཆུབ་སེམས་ཀྱི་དབྱིངས། །བྱང་ཆུབ་སེམས་ཀྱི་བདེ་ཆེན་གྱིས། །དཀྱིལ་འཁོར་ཐམས་ཅད་དབྱིངས་སུ་ཐིམ། །

ཐིག་ལེ་ཆེན་པོ་བླ་མ་ལས། །སྒྱུ་མ་བྱང་ཆུབ་ལམ་དུ་བསྟན། །སྐྱོན་དང་ཡོན་ཏན་ཐམས་ཅད་ཀྱང་། །བྱང་ཆུབ་ཐིག་ལེ་ཉིད་ཀྱི་ངང་། །སྤྱོད་པ་རྣམ་པ་ཉིད་ཀྱི་ཡང་། །ཐིག་ལེ་ཆེན་པོའི་ལམ་དུ་ངེས། །སྒྱུ་མ་རོལ་པའི་དཀྱིལ་འཁོར་ཡང་། །ཐིག་ལེ་
ཆེན་པོའི་དབྱིངས་སུ་སྦྱོར། །སྡོམ་པ་རྣམ་པ་བཅུ་གསུམ་དང་། །སྤྱི་ཡི་དམ་ཚིག་མཐའ་ཡས་པ། །ཐིག་ལེ་ཆེན་པོའི་ངང་དུ་གསལ། །སྣོད་བཅུད་འཇིག་རྟེན་མ་ལུས་པ། །ཐིག་ལེ་ཉིད་ཀྱི་རོལ་པའི་དབྱིངས། །ཚོགས་ཆེན་རྣམ་པ་གཉིས་པོ་ཡང་། །བྱང་ཆུབ་
སེམས་ཀྱི་དབྱིངས་སུ་ངེས། །གཞལ་ཡས་ཁང་དང་རྒྱན་རྣམས་དང་། །ཆོ་འཕྲུལ་བྱང་ཆུབ་སེམས་སུ་ཐིམ། །ཁྲོ་ཚོགས་བདུད་འདུལ་རོལ་པ་ཡང་། །བྱང་ཆུབ་སེམས་སུ་ངེས་པ་ཡིན། །འགྲོ་དྲུག་སེམས་ཅན་གསུམ་པོ་ཡང་། །ཡེ་ཤེས་དྲུག་དང་སྐུ་གསུམ་
དུ། །ངེས་པའི་ཐིག་ལེ་ཆེན་པོ་ཡིན། །ལྔ་ཡི་རྟེན་དང་རྐྱེན་བཞི་ཡང་། །དབྱིངས་ཀྱི་མ་དང་དུས་ཀྱི་སྲིང་། །ཐིག་ལེ་ཆེན་པོའི་ངང་དུ་འདུས། །སྔ་ཕྱི་གསུམ་དང་ཡོད་མེད་ཁམས། །སྐུ་གསུང་ཐུགས་སུ་ངེས་བསྟན་པའི། །ཐིག་ལེ་བྱང་ཆུབ་སེམས་སུ་ངེས། །
ཕུང་པོ་ཁམས་དང་སྐྱེ་མཆེད་ཀྱང་། །ཕྱག་རྒྱ་བཞི་བཅུ་གཉིས་པོ་ཡང་། །ཐིག་ལེ་ཉིད་ལས་གཞན་ན་མེད། །བཞི་ཡི་ལས་དང་གཅིག་པོ་ཡང་། །ཐིག་ལེ་སེམས་ཀྱི་ངང་དུ་གསལ། །འགྲོ་བའི་དོན་དུ་འབྱུང་བ་ཡི། །དགུ་དང་སྟོང་ཕྲག་བརྒྱ་བཅུ་བཞི། །བྱང་ཆུབ་
སེམས་ལས་གཞན་ན་མེད། །བདེ་སྐྱིད་སྡུག་བསྔལ་མང་པོ་ཡང་། །རྟོགས་པ་བདེ་ཆེན་དབྱིངས་ཀྱི་དོན། །ཡེ་ཤེས་ཡེ་ཤེས་རོལ་པ་ཡང་། །རྡོ་རྗེ་སྙིང་པོའི་དབྱིངས་སུ་ངེས། །ཀུན་བཟང་རྡོ་རྗེ་སེམས་དཔའ་དང་། །དུས་གསུམ་རྒྱལ་བ་རྒྱ་མཚོ་རྣམས། །ཉག་གཅིག་
ཡབ་ཏུ་ངེས་པར་རྫོགས། །ཐར་པའི་ལམ་མཆོག་དབྱིངས་ཀྱི་ཡུམ། །ཀུན་དུ་བཟང་མོ་ལ་སོགས་ཀྱང་། །ཐིག་ལེ་མ་ཡི་ངང་དུ་གསལ། །གཞལ་ཡས་ཁང་དང་དཀྱིལ་འཁོར་དང་། །བཞུགས་གནས་ཁྱད་པར་མང་པོ་ཡང་། །ཡེ་ཤེས་ཆེན་པོའི་གནས་སུ་བསྡུ། །

མཆོད་པའི་རྒྱན་དང་ལོངས་སྤྱོད་ཀུན། །རིགས་པའི་བྱང་ཆུབ་སེམས་ཆེན་པོ། །ཆོ་འཕྲུལ་ཆེན་པོའི་ངང་དུ་འདུས། །རྒྱུ་འབྲས་གཉིས་ཀྱི་ངོ་བོ་དང་། །ཆོས་སོ་ཅོག་གི་རང་བཞིན་རྣམས། །བྱང་ཆུབ་སེམས་སུ་ངེས་པས་ན། །དཀར་ནག་ལས་ཀྱིས་མ་གསུངས་སོ། །བྱང་
ཆུབ་སེམས་ཀྱི་བདེ་ཆེན་ནི། །ཅི་ཡང་མེད་ལས་ཅིར་ཡང་སྣང་། །ཅིས་ཀྱང་མ་བཅོས་གཡུང་དྲུང་སྐུ། །ཅིར་མི་མཛད་ལ་ཐམས་ཅད་སྒྲོལ། །དམིགས་པ་མེད་པར་ཀུན་ལ་ཁྱབ། །མ་བསྐོས་རྒྱལ་པོ་ཡང་དག་པ། །མ་སྦྱངས་ཡེ་ཤེས་སྙིང་པོ་ཆེ། །མ་བསྒོམས་ཅིག་ཅར་དོན་ཉིད་རྫོགས། །མ་བསྒྲུབས་
རྒྱལ་བ་ཀུན་གྱི་གཙོ། །མ་སྦྱངས་སྐྱོན་དང་ཡོན་ཏན་མེད། །ཚིག་དང་ཡི་གེས་མི་མཚོན་ཏེ། །སངས་རྒྱས་ཉིད་ཀྱིས་རྙེད་པར་དཀའ། །ཀུན་བཟང་རྡོ་རྗེ་སེམས་དཔའ་ཡིས། །རྙེད་ནས་རྫོགས་པའི་དཀྱིལ་འཁོར་སྤྱོད། །
སྤྱོད་པས་འགྲོ་བ་སྒྲོལ་བ་སྟེ། །དེ་ལ་ཉེས་པའི་སྐྱོན་མི་མངའ། །ཞེས་གསུངས་པས། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་དབྱེར་མེད་པར་དགྱེས་ནས་སྟུག་པོས་བརྒྱན་པའི་རྒྱན་ཉིད་དུ་བཞུགས་སོ། །སྒྱུ་འཕྲུལ་དྲ་བ་བླ་མ་ཆེན་པོ་ལས་
མན་ངག་སྙིང་པོ་བྱང་ཆུབ་སེམས་བདེ་བ་ཆེན་པོའི་ལེའུ་སྟེ་བཅུ་གཅིག་པའོ།། །།དེ་ནས་ཡང་ཡེ་ཤེས་རྒྱལ་པོ་དེ་ཉིད་དེ་བཞིན་གཤེགས་པ་རྣམས་ཀྱི་དགོངས་པ་ཡང་དག་པའི་ཕྲིན་ལས་ཆེན་པོ་འདི་མ་བྱོན་པའི་དེ་བཞིན་གཤེགས་པ་རྣམས་ཀྱི་ཆེད་དུ་སྐུ་
གསུང་ཐུགས་ཡོན་ཏན་ཕྲིན་ལས་རྡོ་རྗེ་ལས་ཕྱུང་ངོ་། །ཨེ་ཡི་ཚོགས་ཀྱི་དཀྱིལ་འཁོར་མཆོག །འབར་བ་གཏུམ་ཆེན་རྔམ་པ་ལ། །ཁྲོས་པའི་ཡིད་ཀྱིས་མཆོད་སྦྱིན་བྱ། །སངས་རྒྱས་བསོད་ནམས་སྐུ་ཡང་འཇིག །བདུད་རྩི་ལྔ་འམ་ཟས་ལྔ་ལ། །མཚན་མ་མིང་
དུ་བཅས་པར་བྱ། །བཀུག་ནས་རྡོ་རྗེའི་ཕུར་པས་གདབ། །རྡུལ་དུ་བྱས་ནས་ཚོགས་ལ་འབུལ། །ཨེ་ཡི་ཚོགས་ཀྱི་དཀྱིལ་འཁོར་དུ། །ལུ་གུ་རྒྱུད་དུ་སྦྲེལ་བསྡམས་ནས། །བཅིངས་གྱུར་བསྐྱོད་ནས་ཕྱོགས་བཅུར་གཡོས། །མྱོས་འགྱུར་གས་ཏེ་ཚིག་

པར་འགྱུར། །པྃ་གྱི་ཚོགས་ཀྱི་དཀྱིལ་འཁོར་མཆོག །འབར་བའི་གཟི་བརྗིད་ལྷུན་ཆེན་ལ། །ཆགས་པའི་ཡིད་ཀྱིས་མཆོད་སྦྱིན་བྱ། །རྡོ་རྗེ་གསུམ་ཡང་དབང་དུ་འགྱུར། །བདུད་རྩི་ལྔ་འམ་ཟས་ལྔ་ལ། །མཚན་མ་མིང་དུ་བཅས་པར་བྱ། །རྡོ་རྗེ་ཆགས་
པའི་ཕུར་བས་གདབ། །ཆགས་པའི་ཚོགས་ལ་ཐིམ་པར་དབུལ། །བྃ་གྱི་ཚོགས་ཀྱི་དཀྱིལ་འཁོར་དུ། །ལུ་གུ་རྒྱུད་དུ་སྦྲེལ་བསྡམས་ནས། །ཅི་འདོད་དེ་བཞིན་བྱེད་པར་འགྱུར། །མ་ཡི་ཚོགས་ཀྱི་དཀྱིལ་འཁོར་མཆོག །འབར་བའི་འདུ་འཕྲོའི་གཟི་ཆེན་
ལ། །དགའ་བའི་ཡིད་ཀྱིས་མཆོད་སྦྱིན་བྱ། །ཡོན་ཏན་ནམ་མཁའི་མཐའ་དང་མཉམ། །བདུད་རྩི་ལྔ་འམ་ཟས་ལྔ་ལ། །ཡོན་ཏན་ཡིད་བཞིན་གཏེར་དུ་བརྟག །ང་རྒྱལ་དགའ་འཕྲོའི་ཕུར་བས་གདབ། །རྡོ་རྗེ་གཟི་བརྗིད་འཕེལ་བར་བརྟག །མ་ཡི་ཚོགས་ཀྱི་དཀྱིལ་
འཁོར་དུ། །ལུ་གུ་རྒྱུད་དུ་སྦྲེལ་བསྡམས་ནས། །གཟི་བརྗིད་འབར་བའི་འཕྲུལ་ཆེན་སྤྲོ། །ཡིད་བཞིན་ནམ་མཁའི་མཐའ་དང་མཉམ། །ཡ་ཡི་ཚོགས་ཀྱི་དཀྱིལ་འཁོར་མཆོག །གསལ་བའི་གཟི་བརྗིད་འཚེར་བ་ལ། །དང་བའི་ཡིད་ཀྱིས་མཆོད་སྦྱིན་བྱ། །གཏུམ་ཆེན་
རྔམ་པོའང་ལྷ་ནེར་འགྱུར། །བདུད་རྩི་ལྔའམ་ཟས་ལྔ་ལ། །གཏུམ་ཆེན་འཁྲུག་པའི་ངོ་བོར་བརྟག །ལྷན་ནེར་གསལ་བའི་ཕུར་བས་གདབ། །འབར་བ་ལྷ་ནེའི་ཚོགས་ལ་འབུལ། །ཡ་ཡི་ཚོགས་ཀྱི་དཀྱིལ་འཁོར་དུ། །ལུ་གུ་རྒྱུད་དུ་སྦྲེལ་བསྡམས་ནས། །འབར་བ་ལྷ་
ནེའི་བྱིན་གྱིས་ཁྱབ། །ཐམས་ཅད་གཡོ་བ་མེད་པར་འགྱུར། །ཨ། ཐམས་ཅད་རྫོགས་པ་ཆེན་པོ་སྟེ། །ལས་སུ་མ་གྱུར་གཅིག་ཀྱང་མེད། །ལས་ཀྱི་ཁྱད་པར་རྫོགས་པ་ཡི། །སྲིད་པ་གསུམ་དུ་བསྡུས་པ་རྣམས། །བྱིན་གྱིས་མ་བརླབས་གཅིག་ཀྱང་མེད། །རྫོགས་པ་
ཆེན་པོའི་ཕྲིན་ལས་ཀྱིས། །སྦྱངས་པས་བསམ་རྫོགས་ལྷུན་གྱིས་གྲུབ། །ཧོ། སླས་དང་བྱི་མོ་བྲན་མོའི་ཚོགས། །ལྷག་མ་ཁ་ཆུ་འདོད་པ་སྦྱིན། །རང་གི་དམ་ཚིག་རབ་བསྒྲུབས་ཏེ། །གང་འདོད་ལས་དེ་བྱེད་པར་བསྒོ། །ཁྲག་འཐུང་ཆེན་པོ་ལ་སོགས་ཏེ། །བྲོ་གར་གླུ་ཚིག་

ཆེན་མོས་ནི། །ཇི་ལྟར་འདོད་པ་ཐམས་ཅད་ཀུན། །ཐམས་ཅད་མ་ལུས་བྱེད་པ་ཡིན། །མཛོད་ལྡན་ཆེན་མོ་ལ་སོགས་ཏེ །བྲོ་གར་གླུ་ཚིག་ཆེན་མོས་ནི། །འདུ་བར་འདོད་ན་འདུ་བར་བྱེད། །འཕེལ་བར་འདོད་ན་འཕེལ་བར་བྱེད། །ལྦོས་མོ་ཆེན་མོ་ལ་སོགས་ཏེ། །བྲོ་གར་
གླུ་ཚིག་ཆེན་མོས་ནི། །རྨོངས་པར་འདོད་ན་རྨོངས་པར་བྱེད། །མྱོས་པར་འདོད་ན་མྱོས་པར་བྱེད། །སེང་གདོང་ཆེན་མོ་ལ་སོགས་ཏེ། །བྲོ་གར་གླུ་ཚིག་ཆེན་མོས་ནི། །ཐམས་ཅད་ཀུན་ལ་ཟ་བར་བྱེད། །རྡུལ་ཆ་ཙམ་ཡང་མེད་པར་བྱེད། །བཞད་གདོང་ཆེན་མོ་ལ་སོགས་ཏེ། །
བྲོ་གར་གླུ་ཚིག་ཆེན་མོས་ནི། །ཐམས་ཅད་ཀུན་ལ་འབྱིན་པར་བྱེད། །ཀུན་ལ་རབ་ཏུ་ཉམས་པར་བྱེད། །ཨ། སྤོར་བྱེད་ཆེན་མོ་ལ་སོགས་ཏེ། །ཉུལ་བྱེད་ཆེན་མོ་བརྒྱད་རྣམས་ལ། །བྲོ་གར་གླུ་ཚིག་ཆེན་མོས་ནི། །ཐམས་ཅད་ཀུན་ལ་ཉུལ་བར་བྱེད། །མ་ལུས་གནས་
ནས་སྤོར་བར་བྱེད། །སླས་དང་བྱི་མོ་བྲན་མོའི་ཚོགས། །བྲོ་གར་གླུ་ཚིག་ཆེན་མོས་ནི། །སྦད་ཅིང་གཏང་བར་བྱ་བ་སྟེ། །ཐམས་ཅད་མ་ལུས་བྱེད་པ་ཡིན། །ལྗོན་ཤིང་དང་ནི་ལྕུག་ཕྲན་ཚལ། །སྡོང་གཅིག་དང་ནི་མེ་རེག་ཏུ། །དང་བ་དགའ་བ་ཆགས་པ་དང་། །ཁྲོས་
པས་ཀ་ལི་རབ་ཏུ་བྱ། །ཞེས་གསུངས་པས་ཕྲིན་ལས་རྣམ་པ་བཞི་སྟི་རའི་རྔ་དང་བཅས་པར་ཕྱོགས་བཅུ་འཇིག་རྟེན་གྱི་ཁམས་འདུལ་བར་གྱུར་ཏེ། དེ་ནས་བཅོམ་ལྡན་འདས་ཡེ་ཤེས་རྒྱལ་པོ་འཇིགས་བྱེད་ཆེན་པོ་དེ་ཉིད་དམ་ཚིག་སྟི་རའི་རྔ་བླ་མ་རྡུང་ཞིང་སྟི་ར་རྔམ་
པའི་མདངས་འདི་ཕྱུང་ངོ་། །ཨེ་ཡི་ཚོགས་ཆེན་འབྱམ་པ་རུ། །སྟི་ཆའི་རྔ་ཆེན་སྒྲ་བསྒྲགས་པས། །ཧཱུྃ་ཧ་ཧེ་ཕཊ་སྒྲ་འབྱིན་ཅིང་། །ཡིག་འབྲུ་བརྒྱད་ཀྱི་བྱིན་བརླབས་ཀྱིས། །རུ་ལུ་ཧཱུྃ་བྷྱོའི་གསུང་སྒྲོགས་པ། །ཁྲོ་བོ་རྔམ་པའི་སྒྲ་སྐད་ཀྱིས། །སྲིད་པ་གསུམ་ཚང་
བཤིག་ནས་ཀྱང་། །སྟོང་གསུམ་བསྒྲལ་བའི་སྒྲ་འབྱིན་པའོ། །སྟི་ར་རྔ་ཆེན་འདི་བརྡུངས་པས། །གནོད་སྦྱིན་སྲིན་པོ་ཀུན་བསྒྲལ་ཏེ། །མུ་སྟེགས་ཀུན་གྱི་སྙིང་ཡང་འབྱིན། །སྟི་རའི་རྔ་ཆེན་འདི་བསྒྲགས་པས། །སྟེང་གསུམ་ཁྲོ་བོའི་ཚོགས་ཀྱིས་བཀང་། །ཀུན་ཀྱང་

རྔ་བརྡུང་དི་རི་རི། །རྔ་སྒྲ་ཆེན་པོས་སྟོང་གསུམ་བཤིག །རྔ་སྒྲ་ཆེན་པོས་བདུད་དཔུང་བསྒྲལ། །རྔ་སྒྲ་ཆེན་པོས་སྲིད་གསུམ་སྦྱངས། །རྔ་སྒྲ་ཆེན་པོས་དགྲ་བགེགས་འདུལ། །རྔ་སྒྲ་ཆེན་པོས་ངན་སོང་སྦྱངས། །རྔ་སྒྲ་འབྲུག་གི་སྒྲ་བསྒྲགས་པས། །ན་རག་
དམྱལ་ཁམས་སྟོངས་བར་བྱེད། །རྔ་སྒྲ་ཏུག་ཆེམ་རི་རབ་རྙིལ། །སྟི་ར་རྔ་ཆེན་སྒྲ་ཕྱུང་བས། །ཕྱིན་ཅི་ལོག་རྣམས་སྙིང་ཡང་འབྱིན། །རྔ་ཆེན་འབྲུག་གི་སྒྲ་སྒྲོགས་ཤིང་། །རྔ་ཐབས་གློག་སྟོང་འགྱུར་བ་བཞིན། །དེ་བཞིན་གཤེགས་པའི་ཐུགས་དམ་བསྐང་། །མ་མོ་
མཁའ་འགྲོའི་དམ་ཚིག་བསྐང་། །རྣལ་འབྱོར་རྣམ་ལྔའི་དམ་ཚིག་བསྐུལ། །སྟི་ར་རྔ་ཆེན་འདི་བརྡུངས་པས། །ཉན་ཐོས་མདོ་སྡེ་གནས་ནས་སྦར། །རང་རྒྱལ་ལྟ་བ་དབྱིངས་སུ་སྒྲོལ། །སྟི་རའི་རྔ་ཆེན་འདི་བསྒྲགས་པས། །ལྷ་དང་མི་ཡི་ཐེག་པ་ཡང་། །བླ་མེད་ཐེག་
པའི་དབྱིངས་སུ་བཙུད། །སྟི་ར་རྔ་སྒྲ་འདི་བསྒྲགས་པས། །སྟོང་ཁམས་སྟི་རའི་རྔ་སྒྲས་བཀང་། །ཀུན་ཀྱང་རྔ་བརྡུང་དི་རི་རི། །རྔ་ཐབས་གློག་སྟོང་ལྕེ་འབྱིན་ཅིང་། །རྔ་སྐད་འབྲུག་སྟོང་སྒྲ་སྒྲོགས་པས། །བྱིན་བརླབས་ལྕགས་ཀྱི་སེར་ཆེན་འབེབས། །སྟོང་གསུམ་
འཁྲུག་ཅིང་སྲིད་གསུམ་འཐོར། །རྔ་ཐབས་གཡབ་མོར་བོར་བ་དང་། །ཁ་དང་ཀ་ཡི་དུ་མཚོན་གྱིས། །ཐམས་ཅད་གནམ་ལྕགས་ཆེན་པོས་བཏབ། །ཀ་ལ་ཆེན་པོ་ལ་སོགས་ཏེ། །རྡོ་རྗེ་ཆགས་འོག་ལྡེགས་པའི་རྣམས། །དུས་གཅིག་ཏུ་ནི་ཙིཏྟ་འབྱིན། །སྟི་ར་
ཆེན་པོའི་རྔ་སྒྲ་ཡིས། །སྲིད་པ་ཁྲག་གི་རྒྱ་མཚོར་བསྐྱིལ། །དུས་གཅིག་ཏུ་ནི་དབང་ཆེན་རྫོགས། །རྔ་སྒྲ་རིན་ཆེན་ཁང་པ་བརྩེགས། །བསམ་རྫོགས་ཆེ་ལ་དབང་ཐང་ཐོབ། །རྔ་སྒྲས་གཡོ་བ་མེད་པར་བྱེད། །ཆོས་ལ་འཛུད་པའི་སྒྲ་ཡང་འབྱིན། །རྔ་སྒྲས་ཅི་འདོད་
དགོངས་པ་རྫོགས། །བྱང་ཆུབ་སེམས་ལྟར་དེ་མ་ཐག །ཅེས་གསུངས་པས་དེ་བཞིན་གཤེགས་པ་ཐམས་ཅད་དེ་བཞིན་གཤེགས་པ་ཉིད་ཀྱི་སྦྱོར་བར་གྱུར་ཏོ། །དེ་ནས་བཅོམ་ལྡན་འདས་དགྱེས་པ་ཆེན་པོ་ཡེ་ཤེས་རྒྱལ་པོ་དེ་ཉིད་ཀྱི་དཀྱིལ་འཁོར་བླ་མ་ཆེན་པོ་

མན་ངག་གི་སྙིང་པོ་དང་བཅས་པ་དེ་ལ་ཤིན་ཏུ་རྔམ་པའི་མདངས་ཀྱིས་དགྱེས་པ་ཆེན་པོའི་གླུ་འདི་བླངས་སོ། །ཧཱུྃ་གཏུམ་ཆེན་དུས་མཐའི་མེ་ལྟར་འབར། །འོད་ཟེར་ཉི་མ་འབུམ་གྱི་གཟི། །ཁྲོ་གཉེར་གློག་སྟོང་འགྱུ་བ་བཞིན། །མཚེ་བ་ཟད་ཡག་ཟ་བྱེད་ཆེ། །
ཧོ། ཧཱུྃ་རྔམ་པའི་ང་རོ་འབྲུག་སྟོང་ལྡིར། །ཏུག་ཆེམ་རི་རབ་འབུམ་རྙིལ་སྐད། །ཨ་ལ་ལ་ཡི་གད་རྒྱངས་ཆེ། །སྤྱུགས་པའི་འཐོར་རླུང་གཡེང་བ་ཆེ། ཧོ། ཧཱུྃ་ཁྲོ་བོའི་ཤེས་རབ་འོད་པོ་ཆེ། །ཡེ་ཤེས་དཀྱིལ་འཁོར་ཀུན་དུ་གསལ། །འབར་བའི་ཡེ་ཤེས་ཀུན་དུ་
འཇོམས། །སྣ་ཚོགས་ཡེ་ཤེས་ཐིག་ལེ་ཆེ། ཧོ། ཧཱུྃ་ཁྲོ་བོའི་རྒྱལ་པོ་སྤྲིན་ཆེན་པོ། །ཁྲོས་པའི་དཀྱིལ་འཁོར་ཆར་ཆེན་འབེབས། །དཀྱིལ་འཁོར་ཡིད་བཞིན་འབྱུང་བའི་གཏེར། །སྣ་ཚོགས་ཁྲོས་པའི་ཐིག་ལེ་ཆེ། ཧོ། ཧཱུྃ་བདུད་རྣམས་ཀུན་གྱི་བདུད་ཆེན་པོ། །
བདུད་ཀྱི་བདུད་སྟེ་བདུད་རྣམས་འཇོམས། །འཇིགས་པའི་ཚོགས་ཀྱང་འཇིགས་བྱེད་པ། །འཇིགས་བྱེད་ཆེན་པོ་བདལ་བ་ཆེ། །ཧཱུྃ་རྡོ་རྗེ་བྲག་ཆེན་སྲ་བ་པོ། །རྡོ་རྗེ་ཆུ་བོ་སྡུད་ཆེན་པོ། །རྡོ་རྗེ་མེ་སྟེ་ཀུན་འབར་ཆེ། །རྡོ་རྗེ་རླུང་སྟེ་འཐོར་རླུང་ཆེ། ཧོ། ཧཱུྃ་སྟོང་གསུམ་ཁྲོ་བོའི་དཀྱིལ་
འཁོར་ཚོགས། །འཇིགས་བྱེད་མཚོན་དུ་མེད་པའི་སྐུ། །སྣ་ཚོགས་གསུང་དང་སྣ་ཚོགས་ཐུགས། །འཇིགས་བྱེད་རྔམ་པའི་ཡེ་ཤེས་གཏེར། །ཧོ་ཞེས་བླངས་པས་སྟོང་གསུམ་གྱི་དེ་བཞིན་གཤེགས་པའི་འཇིགས་བྱེད་ཆེན་པོ་རྣམས་དབྱེར་མེད་པས་མཉེས་
པར་གྱུར་ཏོ། །སྒྱུ་འཕྲུལ་དྲ་བ་བླ་མ་ཆེན་པོ་ལས་ལྷུན་གྱིས་གྲུབ་པའི་ཕྲིན་ལས་དང་ཡོངས་སུ་མཉེས་པའི་ལེའུ་སྟེ་བཅུ་གཉིས་པའོ།། །།རྡོ་རྗེ་སེམས་དཔས་གསུངས་པའི་དོན། །གསང་བ་ཀུན་གྱི་བླ་མ་སྟེ། །སྒྱུ་འཕྲུལ་དྲ་བའི་རྒྱལ་པོ་ཡིན། །ངེས་དོན་ཆོས་
ཀྱི་སྙིང་པོ་ལས། །འདུལ་བ་མདོ་སྡེ་ཆོས་མངོན་དང་། །དམ་ཚིག་སྒྲུབ་དང་གྲུབ་པ་དང་། །སྐུ་དང་གསུང་དང་ཐུགས་ཀྱི་རྒྱུད། །སྒྱུ་འཕྲུལ་དྲ་བ་ལས་འཕྲོས་ཏེ། །སྡེ་སྣོད་ཀུན་དང་རྒྱུད་ཀུན་ཡང་། །འབྱུང་ནས་གཏན་ལ་ངེས་པར་འབེབས། །འགྲོ་དྲུག་སེམས་

ཅན་གསུམ་པོ་ཡང་། །སྟ་ན་ཆེན་པོའི་དབྱིངས་སུ་བསྟན། །ལིང་ག་པདྨར་བཅས་པ་ཡང་། །ག་ན་ཆེན་པོའི་དབྱིངས་སུ་སྦྱོར། །སྣང་སྲིད་ཁ་དོག་མང་པོ་ཡང་། །ག་ན་ཆེན་པོའི་ལམ་དུ་བསྟན། །རང་བཞིན་གསང་བའི་སྙིང་པོ་འདི། །རྟོགས་ནས་
སྨྲ་བར་གང་བྱེད་པ། །དེ་ཉིད་ང་ཡིན་དབང་ཡང་རྫོགས། །རྟག་ཏུ་བྱང་ཆུབ་སེམས་ལ་གནས། །ཚེ་འདི་ཉིད་ཀྱིས་མངོན་སངས་རྒྱས། །ནོར་བུ་རིན་ཆེན་འབར་བ་ལྟར། །བསམ་པ་ཐམས་ཅད་ཡིད་བཞིན་འགྲུབ། །ཅེས་གསུངས་པས་ཕྱོགས་བཅུ་དུས་གསུམ་གྱི་དེ་
བཞིན་གཤེགས་པ་ཐམས་ཅད་དབྱེར་མེད་པར་དགྱེས་ཏེ། མཉམ་པ་ཉིད་ཀྱི་དབྱིངས་ན་ལྷུན་སྟུག་པོ་བཀོད་པའི་རྒྱན་ཉིད་དུ་བཞུགས་སོ། །གསང་བའི་སྙིང་པོ་དེ་ཁོ་ན་ཉིད་ངེས་པའི་སྒྱུ་འཕྲུལ་བླ་མ་ཆེན་པོ་ལས་གདེང་ཆེན་པོའི་ལེའུ་སྟེ་བཅུ་གསུམ་པའོ།། །།
རྟོགས་པའི་རྒྱལ་པོ་སྒྱུ་འཕྲུལ་དྲ་བའི་ལེའུ་སྟོང་ཕྲག་བརྒྱ་པ་ལས་ལུང་གི་སྤྱི་སངས་རྒྱས་ཐམས་ཅད་ཀྱི་གསང་བ་གསང་བའི་སྙིང་པོ་དེ་ཁོ་ན་ཉིད་ངེས་པའི་བླ་མ་ཆེན་པོའི་ལེའུ་ལས་ཐམས་ཅད་མ་ལུས་པར་འཕྲོས་པ་དེ་དག་གི་འབྲས་བུའི་མཆོག་རྫོགས་སོ།། །།
༄༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་ཀརྨ་ཙ་ཏུཤྩ་ཀྲ་གུ་ཧྱ་ཏནྟྲ། བོད་སྐད་དུ། འཕགས་པ་འཇམ་དཔལ་ལས་བཞི་འཁོར་ལོ་གསང་བའི་རྒྱུད། འཕགས་པ་འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་
ཐོས་པ་དུས་གཅིག་ན། བཅོམ་ལྡན་འདས་དགྱེས་པ་ཆེན་པོར་གྱུར་ཏེ། ཡུམ་ཆེན་མོ་དང་གཉིས་སུ་མེད་པའི་མཁའ་ལ་བཞུགས་པ་ལ་འདི་ལྟ་སྟེ། འཁོར་ཁྲོ་བོ་དང་། ཁྲོ་མོ་དང་། མ་མོ་དང་། མངག་གཞུག་དང་། འབངས་ལ་སོགས་པ་རྣམས་
ཀྱིས། དེ་བཞིན་གཤེགས་པ་ཆེན་པོ་ལ་འདུད་པའི་ཚུལ་དུ་བཞུགས་སོ། །དེ་ནས་བཅོམ་ལྡན་འདས་བཙུན་མོ་དང་གཉིས་སུ་མེད་པར་གྱུར། སྐྱེ་འགག་དང་བྲལ་བའི་དོན་འདི་སྟོན་ཏོ། །ཡེ་ནས་མ་སྐྱེས་གཤིན་རྗེ་ཆེན་པོའི་ཚོགས། །རྣམ་དག་

དབྱིངས་ཀྱི་རང་ཉིད་རྣམ་པར་དག་པ་ལ། །གཉིས་མེད་འདུས་པའི་སྲས་མཆོག་གཤིན་རྗེ་གཤེད། །ཐབས་དང་ཤེས་རབ་རྣམ་པར་དག་པ་ཡི། །ཀུན་གྱི་ཡེ་ཤེས་ཐམས་ཅད་འདུས་པ་སྟེ། །ཐུགས་རྗེ་ཆེན་པོས་འགྲོ་བའི་དོན་མཛད་པ། །སེམས་ཅན་
མ་ལུས་མྱ་ངན་འདས་པའི་ལམ། །ཡེ་ཤེས་ཐམས་ཅད་དེ་ཡི་ངང་ལ་རྫོགས། །འཁོར་བའི་ཉེས་སྐྱོན་ཐམས་ཅད་ཚར་གཅད་ཕྱིར། །འདོད་ཆགས་འདུས་པའི་དཔལ་ལྡན་གར་གྱི་བདག །བྱེ་བ་ཕྲག་བརྒྱ་དཔག་ཏུ་མེད་པར་ཡང་། །འདུལ་བའི་དབང་
གིས་དེ་ལྟ་བུ་ཡི་གཟུགས་སུ་བསྟན། །ཞེས་གསུངས་པས་འཁོར་གྱི་ཁྲོ་བོ་དང་ཁྲོ་མོ་ལ་སོགས་པ་ཐམས་ཅད་མགུ་བར་གྱུར་ཏོ། །དེ་ནས་བཅོམ་ལྡན་འདས་འཇམ་དཔལ་གཤིན་རྗེ་གཤེད་ཆེན་པོ་ལ་འདི་སྐད་ཅེས་གསོལ་བ་བཏབ་བོ། །སེམས་
ཅན་འཁོར་བས་གདུངས་པ་ལ། །མྱ་ངན་འདས་པའི་ལམ་མཆོག་བསྟན། །བསྟན་པ་དམ་པ་འདི་གསུངས་པས། །ཐམས་ཅད་སྒྲོལ་བ་ངོ་མཚར་ཆེ། །ཞེས་གསོལ་ཏོ། །དེ་ནས་དེ་བཞིན་གཤེགས་པ་ཐམས་ཅད་ཡུམ་དང་གཅིག་ཏུ་འདུས་
ཏེ། འདི་སྐད་ཅེས་གསུངས་སོ། །སྤྲུལ་པའི་སྐུ་དག་ཚད་མེད་དཔག་ཏུ་མེད། །ཐུན་མོང་མ་ཡིན་འཇམ་དཔལ་གཤིན་རྗེ་གཤེད། །སྐུ་གསུང་ཐུགས་ཀྱི་ཕྲིན་ལས་རྨད་དུ་བྱུང་། །མི་དགེ་བཅུ་དང་མཚམས་མེད་ཚར་གཅད་པ། །ཟུག་རྔུ་མི་མངའ་ཆོས་ཉིད་རྨད་
པོ་ཆེ། །ཆོས་ཀྱི་སྐུ་དང་ལོངས་སྤྱོད་རྫོགས་པའི་སྐུ། །སྤྲུལ་པའི་སྐུ་དང་གསུམ་ནི་དོན་དམ་ཀུན་དུ་སྦྱོར། །ཕྱོགས་བཅུ་བདེ་བར་གཤེགས་པ་ཐུགས་ཀྱི་དཔལ། །ཡང་དག་ཡེ་ཤེས་དཔལ་ཡིན་འཇམ་དཔལ་ཡིན། །ཞེས་བསྟོད་དེ་གཉིས་སུ་མེད་པར་གྱུར་ཏོ། །དེ་ནས་དེ་
བཞིན་གཤེགས་པ་དམ་པ་དེ་ལ་འཁོར་གྱིས་དེ་བཞིན་དུ་གསོལ་པ་ལ་དགྱེས་ཏེ། འདི་སྐད་ཅེས་གསུངས་སོ། །ཞི་བ་གཉིས་མེད་ཆོས་ཀྱི་ངང་ཉིད་ལས། །སྙིང་པོ་གཉིས་མེད་བྱང་ཆུབ་སེམས་དཔའི་དོན། །ཐམས་ཅད་འདུས་པའི་བླ་མེད་དམ་པ་སྟེ། །དེ་བཞིན་

གཤེགས་པའི་སྙིང་པོ་འདི་བཤད་དོ། །ཨོྃ་སརྦ་ཏ་ཐཱ་ག་ཏ་ཨེ་ཧྱེ་ཧི་ཏ་ཐཱ་ག་ཏ་པྲ་བ་ཏི། བོ་དྷི་སཏྭ་དྷརྨ་དྷཱ་ཏུ། ཨེ་ཧྱེ་ཧི་ཛཿཧཱུྃ་ཧྱེ་ཧི་ཧྱེ་ཧི་ཧཱུྃ་ཧཱུྃ་ཧཱུྃ། ཞེས་བརྗོད་ནས་བརྡས་མཚོན་པར་གྱུར་ཏོ། །དེ་ནས་བཅོམ་ལྡན་འདས་སྟེང་གི་ཕྱོགས་སུ་སེམས་ཅན་ཐམས་ཅད་
སྒྲོལ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་པས་ཕྱོགས་ལ་ཕྱོགས་སུ་བལྟས་ཏེ། རང་བཞིན་གྱིས་སྒྲོལ་བའི་ནུས་པ་ཅན་དུ་གྱུར་ཏེ། ཐམས་ཅད་ཀྱང་སྒྲོལ་བར་གྱུར་ཏོ། །དེ་ནས་ཡུམ་གྱི་ཚོགས་ཐམས་ཅད་ཀྱིས་དགྱེས་པ་ཆེན་པོའི་
བརྡ་འདིས་བཅོམ་ལྡན་འདས་ལ་བསྐུལ་ལོ། །ཨེ་མའོ་ཕྱོགས་བཅུ་དུས་གསུམ་རྫོགས་པ་ཡི། །ཡེ་ཤེས་འདུས་པའི་ཕྲིན་ལས་མཆོག །བླ་མེད་ཐེག་པ་ངེས་པ་ལ། །སྦྱོར་བ་མཆོག་གིས་བཤད་དུ་གསོལ། །ཞེས་བསྐུལ་བས། ཕྱོགས་བཅུའི་དེ་བཞིན་
གཤེགས་པ་ཐམས་ཅད་དགྱེས་པར་གྱུར་ཏོ། །དེ་ནས་ཕྱོགས་བཅུའི་དེ་བཞིན་གཤེགས་པ་རྣམས་དབང་ཕྱུག་གི་འཁོར་མྱ་ངན་ལས་འདས་པ་ཐམས་ཅད་དང་བཅས་ནས་སྐུའི་རྒྱན་གྱིས་བརྒྱན་ཏེ། སོ་སོའི་བཙུན་མོའི་དགྱེས་པས་སྐུའི་ཉམས་སུ་བསྟར་བར་གྱུར་
ཏོ། །དེ་ལྟར་གྱུར་པས་དེ་བཞིན་གཤེགས་པ་ཐམས་ཅད་བ་སྤུ་ལངས་ཏེ་འདི་སྐད་ཅེས་ཆེད་དུ་བརྗོད་དོ། །སྐུ་གསུང་ཐུགས་རྣམས་འགྲོ་བ་སོ་སོར་འདུལ། །ངང་གི་ཞི་བའི་དབྱིངས་ལས་མ་གཡོས་ཀྱང་། །ཕྲིན་ལས་རྣམ་བཞིས་འགྲོ་བ་སོ་སོར་འདུལ། །དེ་ཕྱིར་
མཆོག་གི་རྒྱལ་པོ་འདི་བཤད་དོ། །ཞེས་གསུངས་པས། འཁོར་རྣམས་རབ་ཏུ་དགའ་མགུར་རངས་པར་གྱུར་ཏེ་འདི་སྐད་ཅེས་གསོལ་ཏོ། །སྐུ་གསུང་ཐུགས་ཀྱིས་འགྲོ་བ་རང་རང་འདུལ། །དབྱིངས་ལས་འདྲེན་པ་རྡོ་རྗེ་གསོར་བྱས་ཏེ། །འདི་ལྟར་འདུལ་བར་མཛད་
པ་ངོ་མཚར་ཆེ། །ཞེས་བརྗོད་དོ། །སྐུ་ལ་ཞུགས་ནས་མི་སྣང་བར་གྱུར་ཏོ། །དེ་ནས་དེ་བཞིན་གཤེགས་པ་ཐམས་ཅད་ཁྲོ་བོས་འདུལ་བར་མཁྱེན་ནས་འདི་སྐད་ཅེས་གསུངས་སོ། །ཁྲ་དང་སྤྱང་ཀི་སྲིན་མོ་མུ་སྟེགས་རྣམས། །བདུད་དང་ལོག་འདྲེན་ཐམས་ཅད་

ཚར་གཅད་ཕྱིར། །ཆོས་ཉིད་སྒྱུ་མ་ལྟ་བུ་སྤྲུལ་ནས་ཕྲིན་ལས་མཛད། །ཅེས་གསུངས་པས། འཁོར་རྣམས་ངོ་མཚར་དུ་གྱུར་ཏེ། འདི་སྐད་དུ། ཨེ་མའོ་ཆེ་བའི་ཡོན་ཏན་ཀུན་ལ་ཁྱབ་པ་ལ། །ངང་གིས་ཁྲོ་བོར་བསྟན་པ་འདི་ལྟ་བུ། །ངོ་མཚར་རྨད་བྱུང་སྤྲུལ་པ་འདི་ལྟ་
བུ། །རབ་ཏུ་མི་སྲུན་འདུལ་བ་ངོ་མཚར་ཆེ། །ཞེས་གསོལ་ཏོ། །དེ་ནས་བཅོམ་ལྡན་འདས་ཀྱིས་མ་བསྐུལ་བར་འདི་སྐད་ཅེས་གསུངས་སོ། །ཁྱད་པར་རིམ་པར་བསྟན་པའི་ཁྲོ་གཉེར་ནི། །ཡེ་ཤེས་དབྱིངས་ཀྱིས་ཀུན་ལ་ཁྱབ་པར་སྟོན། །ཁྲོ་བོ་བཞི་དང་བརྒྱད་དང་བཅུ་
ལ་སོགས། །སྟོན་པ་མཆོད་ཕྱིར་ཁྲོ་བོ་མང་པོ་བསྟན། །ངང་ཁྲོ་ཀུན་ཁྱབ་ཤུགས་ཁྲོ་རང་རང་འདུལ་བ་ཡི། །བྱེ་བྲག་སོ་སོར་རབ་ཏུ་ཤེས་བྱ་ལ། །མཚན་མ་དྲག་པོ་ཞི་བ་དབང་དང་རྒྱས། །གོ་རིམས་བཟློག་སྟེ་རབ་ཏུ་བཤད་པར་བྱ། །ལྟེ་བར་བཅས་པའི་རྩིབས་ཅན་ལ། །འཁོར་
བ་གཅོད་བྱེད་རྩེ་མོ་ཅན། །གྲུ་གསུམ་ཨེ་ཡི་ཕོ་བྲང་ཨ། །ཟླ་གམ་རྣམ་གསུམ་དབང་གི་ཚུལ། །མུ་ཁྱུད་དད་ཅན་རྒྱས་པ་ཕྱི། །རྣམ་བཞིར་ལྡན་པའི་འཁོར་ལོ་ལ། །རབ་ཏུ་མཛེས་པའི་ཐིག་གདབ་བོ། །དབུས་སུ་མ་ཧེའི་ཞིང་གདན་ལ། །རྩེ་དབུས་ཞིང་རྐྱང་རེ་རེའོ། །
རུས་པ་ཚོགས་ཀྱི་དབའ་རླབས་བྲག་ཏུ་སྤུངས། །རཀྟ་ཁྲག་གི་དཔའ་ཀློང་མཚོ་ལྟ་བུ། །གནམ་ལྕགས་ངུར་མོ་རབ་ཏུ་ཏ་ལ་ལ། །དུར་ཁྲོད་རབ་ཏུ་བརྒྱན་པ་དེ་བཤམ་མོ། །དབུས་སུ་ཁྲོ་རྒྱལ་གཤིན་རྗེ་གཤེད། །སྐུ་ནི་ནག་པོ་དུག་འདྲ་ལ། །དབུ་གསུམ་དཀར་དམར་མཐིང་
བ་སྟེ། །རལ་པ་ཁམ་ནག་སྲིད་རྩེར་འབར། །རྩེ་ལ་མེ་འབར་རྐེད་ནས་ཞག་ཀྱང་འཛག །རྩ་བ་ཆུ་སྟེ་སྡང་མིག་རབ་ཏུ་བགྲད། །ཕྱག་དྲུག་ཕྱག་མཚན་བསྣམས་པའི་ཐོར་ཚུགས་ནི། །སྡིགས་མཛུབ་རྒྱུ་ཞགས་ལྕགས་ཀྱུ་གཡས། །དུང་ཆེན་མདུང་ཐུང་གསལ་ཤིང་
གཡོན། །ཞབས་བཞི་ཐུར་དུ་བསྟན་པ་ནི། །བརྐྱང་བསྐུམ་ཚུལ་གྱིས་འགྲོ་བ་དབང་དུ་སྡུད། །སྐུ་སྟོད་གླང་ཆེན་ཀོ་བ་ཞིང་ཕྲག་ལ། །སྐུ་སྨད་སྟག་སྟེ་ཤམ་ཐབས་ཚམ་ངམ་ཅན། །ཨེ་ཡི་ཕོ་བྲང་དབུས་སུའོ། །ཡུམ་ཡང་ཡབ་དང་སྐུ་མཐུན་ཏེ། །ཕོ་བྲང་དབུས་སུ་

གཡོན་དུའོ། །ཞལ་གཅིག་ཕྱག་གཉིས་མཆེ་བ་ཅན། །ཁྲམ་བམ་བྷན་དྷ་བསྣམས་པའོ། །རྩེ་ལ་ཁྲོ་བོ་ཡབ་ཡུམ་བཅུ། །རབ་ཏུ་ཁྲོས་པའི་སྡང་མིག་ཅན། །གོ་རིམས་བཞིན་དུ་དགོད་པར་བྱ། །ཟླ་གམ་དུར་ཁྲོད་མ་མོ་སྟེ། །སྒོ་ལ་དེ་བཞིན་བསྲུང་
བའོ། །དེ་ལ་རིམ་པས་མགུ་བར་བྱ། །ཞེས་བརྗོད་དེ། འདི་སྐུ་གསུང་ཐུགས་ལས་ཕྱུང་ངོ་། །ཨོྃ་ཨ་ཀྲོ་མཉྫུ་ཤྲཱི་མུྃ། །ཧཱུྃ་བཛྲ་ཀྲོ་དྷ་བྷིད་ནན་ཧཱུྃ། ཨོྃ་བཛྲ་བེ་ཏཱ་ལི་རཀྵ་མཾ། །ཧུྃ་ཧུྃ་ཧུྃ་ཧུྃ་ཧུྃ་ཧུྃ་ཧུྃ་ཧུྃ་ཧུྃ་ཧུྃ། ཧུྃ་ཧུྃ་ཧུྃ་ཧུྃ་ཧུྃ་ཧུྃ་ཧུྃ་ཧུྃ་ཧུྃ་ཧུྃ། ཨོྃ་རུ་རུ་དུ་ན། ཨོྃ་ཛ་ཛ་ཡ་བ།
ཨོྃ་ཡ་ཤུག་བྷྱོ་བྷྱོ་བྷྱོ། ཛཿཧཱུྃ་བྃ་ཧོཿ །ཞེས་བརྗོད་པས་ཕྱོགས་བཅུ་ཐམས་ཅད་འཁྲུགས་ཏེ། གཡོས་སོ། །འགུལ་ཏོ། །ལྡེག་གོ། །ཆེམ་མོ། །འུར་ཏེ། གཡོ་འགུལ་དུ་གྱུར་ཏེ། འཁྲུགས་པར་གྱུར་ཏོ། །དེ་ནས་ཡུམ་གྱི་ཏིང་ངེ་འཛིན་ལ་ཞུགས་པར་གསོལ་
བ་གདབ་སྟེ། གསོལ་བར་ཞུས་པ། ཨེ་མའོ་རབ་ཏུ་བློ་ལྡན་ཁྱོད། །འཇིག་རྟེན་འཁྲུགས་པར་མཛད་པའོ། །དབང་མེད་ལས་ཀྱིས་མནར་བ་ལ། །བདེར་གཤེགས་གསུང་དུ་གསུངས་པ་སྟེ། །རབ་ཏུ་བདེ་བར་མཛད་དུ་གསོལ་ཞེས་གླེངས་པས། བཅོམ་ལྡན་འདས་ཀྱིས་
ཏིང་ངེ་འཛིན་མཆོག་གི་རྒྱལ་པོ་ཞེས་བྱ་བ་ལ་སྙོམས་པར་ཞུགས་སྟེ་འདི་གསུངས་སོ། །ཨོྃ་བཛྲཱ་ན་ལ་ཀ་ལ་ཧཱུྃ་བཛྲ་ག་ཏ་པྲ་བེ་ཤ་ཧོ། ཞེས་གསུངས་པས། འཇིག་རྟེན་གྱི་ཁམས་འདི་དག་རབ་ཏུ་འཇམ་པར་གྱུར་ཏོ། །གྱུར་པས་སེམས་ཅན་ཐམས་ཅད་སླར་སྔོན་ཁོ་ན་
བཞིན་དུ་གྱུར་ཏེ། བཅོམ་ལྡན་འདས་གཤིན་རྗེ་གཤེད་ཆེན་པོ་ལ་སྐྱབས་སུ་དོང་ངོ་། །དེ་ནས་བཅོམ་ལྡན་འདས་ཀྱིས་ཐབས་དང་ཤེས་རབ་ཀྱི་ཕྱག་རྒྱས་མཉེས་པར་བྱ་བ་འདི་གསུངས་སོ། །རྩེ་གཅིག་མཉམ་པར་གཞག་བྱ་སྟེ། །སྒེག་མོ་གཡོན་དུ་གནས་
པར་བྱ། །བསྐུལ་བའི་ཏིང་འཛིན་བརླན་པ་ལ། །བསྐྱོད་པ་བྱང་ཆུབ་ལམ་དུ་དྲངས། །གནས་ཉིད་བདེར་གཤེགས་སྐྱེད་པའི་རྐྱེན། །རྩེ་མོ་ཨོྃ་ལ་ཕཊ་དུ་བསྟན། །ཞེས་གསུངས་པས། ཕྱོགས་བཅུའི་དེ་བཞིན་གཤེགས་པ་ཐམས་ཅད་རོལ་མོས་མཉེས་

པར་གྱུར་ཏོ། །འཕགས་པ་ལས་བཞི་འཁོར་ལོ་གསང་བའི་རྒྱུད་ལས། གླེང་གཞིའི་རྩ་བའི་ལེའུ་སྟེ་དང་པོའོ།། །།དེ་ནས་བཅོམ་ལྡན་འདས་ཀྱིས་ཕྲིན་ལས་ཞི་བར་བྱ་བ་འདི་ཆེད་དུ་བརྗོད་དོ། །རབ་ཏུ་དཀར་བའི་ཡུལ་དག་ལ། །མགུ་བའི་སེམས་དང་ལྡན་བྱས་ཏེ། །དང་བས་
མགུ་བའི་ལས་བྱས་ཞེས། །བླ་མེད་རྒྱལ་བས་རབ་ཏུ་བཤད། །ས་གཞི་དཀར་བ་རབ་མཉམ་ལ། །གྲུ་བཞིར་ལྡན་པའི་དཀྱིལ་འཁོར་ལ། །ལྟེ་བར་བཅས་ཤིང་རྩིབས་བརྒྱད་པ། །མཁས་པས་བསྒྲིམས་ཏེ་བྲི་བར་བྱ། །དཀར་དང་ལྡན་པའི་ཟླ་བ་ལ། །གཅིག་ནས་གསུམ་ནས་
མགོ་བཙུགས་ལ། །ཁམས་གསུམ་རབ་ཏུ་མགུ་བྱའི་ཕྱིར། །ཉམས་སུ་ལོན་པར་བྱས་ལ་བསྒྲུབས། །དབུས་སུ་ཡེ་ཤེས་བདག་པོ་ལ། །ཤར་དུ་ནག་འཇོམས་ཆེན་པོ་སྟེ། །ལྷོ་རུ་ཡ་བ་ཏི་ཞེས་བྱ། །ནུབ་ཏུ་ཁྲོ་བོ་དམིགས་པ་ལ། །བྱང་དུ་བདུད་འཇོམས་དགོད་པར་བྱ། །
ཤར་ལྷོ་ལྷོ་ནུབ་ནུབ་བྱང་དང་། །བྱང་ཤར་མཚམས་སུ་དགོད་པ་ནི། །གླང་མགོ་ཁྲོ་ཚེ་གཅོད་སྦྱོང་རྗེ། །ལས་གྲུབ་བརྒྱད་དེ་གོ་རིམས་བཞིན། །སྟེང་འོག་དམར་པོ་བྲག་དགོད་བསྒྲོམས་ཏེ་དགོད། །ཟླ་གམ་ལམ་མོ་གསུམ་རྣམས་སོ། །སྒོ་སྒོར་སྒོ་སྲུང་མ་རྣམས་བྲི། །
དེ་ཡི་ཡུམ་དང་བཅས་པ་རྣམས། །ཁྲོ་བོ་ཉིད་དང་སྐུ་མཐུན་པའོ། །སེམས་དཔའི་འདུག་སྟངས་གནས་བྱས་ལ། །སྒེག་མོ་གཡོན་དུ་བསྟེན་བྱས་ལ། །སྔགས་གཡོག་མཛེས་པར་ཚོགས་བྱས་ལ། །མགུ་བའི་ཕྲིན་ལས་བརྩམ་པར་བྱ། །སྐེ་ཚེ་ཐལ་བ་རུས་པ་ལ། །
ཛམྦྷ་ལ་ཡི་གཟུགས་ལྟ་བུར། །བྱས་ལ་སྙིང་གར་བྲི་བ་ནི། །ཨ་མ་པ་ལ་སི་ཏིའམ། །གང་འདོད་པ་ཡི་ཡི་གེ་དེ། །ཕཊ་དང་སྭཱ་ཧཱས་དམ་ལྟར་བྱ། །མིང་བྱང་གོང་ལྟར་བྲི་བྱས་ལ། །གང་ལྟར་འཚམ་པ་བཞིན་དུ་བཞག །དེ་ལ་འདི་ཡང་རབ་ཏུ་བརྗོད། །ཨོྃ་ཨ་
ཀྲོ་བཛྲ་ཤཱནྟིཾ་ན་ག་བཛྲ་སྭཱ་ཧཱ། ཨོྃ་ཨ་ཀྲོ་ཏེ་ཀ་ཤཱནྟིཾ་བ་ལ་བུྃ་ཞེས་བརྗོད་ལ་སྙིང་གར་བརྒྱབ་ན། ཐམས་ཅད་མགུ་ནས་དང་བའི་སེམས་ཀྱིས་ཞི་བར་འགྱུར་རོ། །དེ་ནས་ཞི་བའི་ལས་བྱས་ཟིན་ནས། ཕྱོགས་བཅུའི་གདུག་པ་ཞི་བར་བྱ་སྟེ། བདག་ལ་མི་དགའ་བ་

མེད་ན་ལས་འགྲུབ་པ་ཡིན་ནོ། །འཕགས་པ་ལས་བཞི་འཁོར་ལོ་གསང་བའི་རྒྱུད་ལས། ཐམས་ཅད་ཞི་བའི་ལེའུ་སྟེ་གཉིས་པའོ།། །།དེ་ནས་བཅོམ་ལྡན་འདས་ཀྱིས་ཐམས་ཅད་རྒྱས་པར་བྱ་བ་འདི་ཆེད་དུ་བརྗོད་དོ། །གསེར་ལས་གྲུབ་པའི་ཡུལ་དག་
ལའང་། །དཔལ་རྒྱས་སེམས་དང་ལྡན་བྱས་ཏེ། །རྒྱས་པར་བྱ་བའི་སེམས་ཀྱིས་སུ། །དཀྱིལ་འཁོར་དམ་པ་བཤད་པར་བྱ། །དཀྱིལ་འཁོར་སྔ་མ་བཞིན་བྱས་ལ། །བ་ཡི་ཆག་ཆག་བཏབ་བྱས་ཏེ། །རྣལ་འབྱོར་དམ་པ་བློ་ལྡན་པས། །ཐིག་འདི་གདབ་པ་རབ་ཏུ་བརྩམ། །
གསེར་ལས་གྲུབ་པའི་ཐིག་སྐུད་ལ། །དཔལ་ལྡན་འཕེལ་བའི་སེམས་དང་བཅས། །སློབ་མ་དམ་པ་ལས་གྲུབ་པར། །བསམས་ལ་ཐིག་འདི་གདབ་པར་བྱ། །ཕོ་བྲང་གསེར་ལ་རྩེ་མོ་གཡུ། །རྡོ་རྗེ་རྩིག་པ་གསེར་ལས་གྲུབ། །གྲུ་ཆད་སྒོ་རྣམས་ལྕགས་ལས་གྲུབ། །
རྣལ་འབྱོར་སྔགས་པ་བློ་ལྡན་པས། །ཐིག་བཞི་རེའུ་ཆ་བརྒྱད་དུ་འགྱུར། །མཐའ་ནས་ཐིག་གདབ་མན་ངག་ཅན། །དེ་ལ་སོགས་པ་བསམ་པར་བྱ། །རིན་ཆེན་སྐྱིལ་ཀྲུང་འདུག་བྱས་ལ། །དབུས་སུ་གསང་སྔགས་བདག་བོས་ཏེ། །ཕྱོགས་ཕྱོགས་སྒོ་བ་དམ་པ་རྣམས། །
སྔ་མ་བཞིན་དུ་བསྒོམས་ནས་ཀྱང་། །རང་སྔགས་སྐྱེས་བུ་དེ་བསྐྱེད་དོ། །ཨོྃ་ཨ་ཀྲོ་ཏེ་ཀ་པུཥྚིཾ་བ་ལ་ན་ཧཱུྃ། ཨོྃ་ཨ་ཀྲོ་པུཥྚིཾ་ཏི་བ་ཏ་ན་སྟྭྃ། ཞེས་བརྗོད་པས་བདག་པོ་ཡབ་ཡུམ་ལ། །འཁོར་རྣམས་འབྲུ་རེ་བ་ལས་སམ། །རང་རང་བསྐྱེད་པ་དམ་པ་སྟེ། །སྔགས་དང་ལྡན་པར་
ཏིང་འཛིན་གསལ། །བཞུགས་དང་བརྟན་དང་མཆོད་པ་དང་། །ཕྱག་བྱེད་པ་ལ་སོགས་པ་ཡི། །ལས་ཀྱི་བྱ་བ་མ་ལུས་པར། །ཐམས་ཅད་མ་ལུས་ཚང་བར་བྱ། །སྐྱེད་དང་གྲུབ་པའི་འབྲས་བུ་ནི། །རྒྱལ་བ་བསྙེན་ཏེ་ཐག་མི་རིང་། །རང་གྲུབ་འབྲས་བུ་དེ་ལ་སོགས། །ཕྱོགས་
དུས་ཀུན་ནས་གཤེགས་པ་ཡི། །དངོས་གྲུབ་དམ་པ་རབ་སྟེར་ཞེས། །འདྲེན་པ་དཔའ་བོས་ཡང་དག་བཤད། །དེ་ནས་གཞན་ཡང་རབ་བཤད་པ། །དཀྱིལ་འཁོར་སྔ་མ་བཞིན་བྱས་ནས། །ས་ཞག་གསེར་ལས་གྲུབ་པ་ལ། །གཟུགས་ནི་དམ་པ་རབ་ཏུ་བྱ། །ཕྱི་གན་གན་རྐྱལ་

མནན་བྱས་ལ། །ནང་ཧཱུྃ་པུཥྚིྃ་ཨ་བུ་ཙེ་སྭཱ་ཧཱ། སྙིང་གར་བྲིས་ནས་བརྗོད་བྱ་བ། །སྙིང་པོ་སྔགས་ཀྱི་དམ་པ་སྟེ། །བླ་མེད་དམ་པས་རབ་ཏུ་བཤད། །ཨོྃ་བཛྲ་པུཥྚིཾ་ཨཱ་ཡུ་བ་ཤང་ཤྲཱི་པུཥྚིཾ་སྭཱ་ཧཱ་ཞེས་བརྗོད་ན་ཐམས་ཅད་རྒྱས་པར་འགྱུར་རོ། །འཕགས་པ་ལས་བཞི་འཁོར་ལོ་
གསང་བའི་རྒྱུད་ལས། །ཐམས་ཅད་རྒྱས་པར་བྱ་བའི་ལེའུ་སྟེ་གསུམ་པའོ།། །།དེ་ནས་བཅོམ་ལྡན་འདས་དེ་བདག་ཉིད་དབང་གིས་འདུ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཆེད་དུ་བརྗོད་པ་འདི་བརྗོད་དོ། །ཟངས་ལས་འབྲེལ་བའི་ཡུལ་དག་ལ། །རང་
དབང་མེད་དེ་དབང་བསྡུས་ནས། །འདུ་བའི་སེམས་དང་ལྡན་བྱས་ཏེ། །དཀྱིལ་འཁོར་རབ་ཏུ་བཤད་པར་བྱ། །ཟངས་སམ་དམར་པོའི་ས་དག་ལ། །དཀྱིལ་འཁོར་སྔ་མ་དག་དང་འདྲ། །ལེགས་པར་ཁོད་སྙོམས་ཟིན་པ་དང་། །ཐིག་ནི་རབ་ཏུ་གདབ་པར་བྱ། །ལྟེ་བ་ཅན་ལ་རྩིབས་
བརྒྱད་པ། །ཀུན་ཏུ་ཟླུམ་པས་རྒྱས་པ་མཐའ། །ལྟེ་དབུས་གཞུ་བདུངས་བྲིས་བྱས་ལ། །དེ་སྟེང་བདག་པོ་དམ་པ་གཞག །ཐམས་ཅད་མ་ལུས་མཆོག་ཏུ་འགུགས། །ས་པ་ལ་ཡང་ཐོགས་པ་མེད། །ཞེས་ནི་ཡང་དག་བླ་མེད་དེས། །བཤད་པར་བྱ་སྟེ་རབ་ཏུ་བསྟེན། །
གཞན་ཡང་རབ་ཏུ་བཤད་བྱ་བ། །སེམས་ཀྱི་དཀྱིལ་འཁོར་དམ་པ་སྟེ། །བླ་མེད་ཡང་དག་ངེས་པའི་ལམ། །སངས་རྒྱས་བྱང་ཆུབ་ལ་སོགས་རྣམས། །གཞུང་ལས་འབྱུང་བའི་ཚིག་དོན་རྣམས། །མ་ནོར་གསུངས་པའི་བཀའ་བཞིན་དུ། །བསྒྲུབས་ན་འགྲུབ་པར་བཤད་
པའོ། །དེ་དག་འགགས་པར་གྱུར་པ་ན། །ཕལ་པ་གཞན་ལྟ་སྨོས་ཅི་དགོས། །བསྡུ་དང་འདྲེན་པ་བྱང་ཆུབ་ལམ། །འདི་དག་གོ་འཕང་ཐོབ་བྱའི་ཕྱིར། །ཡུངས་ཀར་རྐང་རྗེས་ས་འམ་གཞན། །ཁྲག་གསུམ་ཐལ་ཆེན་བསྲེས་བྱས་ལ། །གའུའི་ནང་དུ་བླུགས་བྱས་ལ། །
གའུ་གཉིས་ནི་ཁ་སྦྱར་ཏེ། །སྐུད་པ་དམར་པོ་ཟངས་ལ་སོགས། །བཅིང་བ་བསྡམས་ཏེ་དཀྲིས་བྱས་ལ། །དཀྱིལ་འཁོར་གྱི་ནི་ཐོག་ཏུ་གཞག །ཡུངས་ཀར་ཟངས་གཉིས་བསྲེག་བྱས་ཏེ། །དུད་པས་གའུ་དེ་ལ་བདུག །དེ་ལ་བདུགས་པར་གྱུར་པ་དང་། །བཟླས་

པའི་སྙིང་པོ་བརྗོད་བྱ་ཞིང་། །ལན་གྲངས་ཁྲི་ཚད་དུ་མ་རུ། །བརྗོད་ན་སངས་རྒྱས་ལ་སོགས་རྣམས། །འགུགས་པར་གྱུར་ན་ཕལ་བ་གཞན། །སྨོས་ཅི་དགོས་ཏེ་ངེས་པར་འགུགས། །ཨོྃ་བཛྲ་ཨ་ཀྲོ་མཉྫུ་ཤྲཱི་བ་ཤང་མ་ཧཱ་སརྦ་ཏིལ་བྲུྃ། ལན་གྲངས་
མང་དུ་བརྗོད་བྱས་ན། །ཅི་ལྟར་བསམས་པ་ཐམས་ཅད་འགུགས། །རྒྱ་ཤུག་བསྐུས་པའི་ཁུ་བ་དང་། །མ་ཡི་ལག་པའི་ཁུ་བ་གཉིས། །སྔ་མ་བཞིན་དུ་བཀུག་བྱས་ན། །འགུགས་པར་འགྱུར་ཞེས་དཔའ་བོས་བཤད། །ཡང་ན་རང་གི་ལག་པའང་རུང་། །ཞེས་
གསུངས་པས་ཐམས་ཅད་མ་ལུས་པར་འདུས་ཏེ། དཔེར་ན་ཕྱོགས་ཐམས་ཅད་ནས་མཚོ་ལ་སྦྲང་མ་འདུ་བ་བཞིན་དུ་འདུས་ཏེ་བདག་གི་དབང་དུ་བྱ་བ་དེ་དབང་དུ་འགྱུར་རོ་ཞེས་བཅོམ་ལྡན་འདས་འཇམ་དཔལ་གཤིན་རྗེས་གསུངས་སོ། །འཕགས་པ་ལས་བཞི་
འཁོར་ལོ་གསང་བའི་རྒྱུད་ལས། དབང་གི་ལེའུ་སྟེ་བཞི་པའོ།། །།དེ་ནས་བཅོམ་ལྡན་འདས་ཁྲོ་བོ་ཆེན་པོ་གཤིན་རྗེའི་ཚོགས་འདུ་མཛད་དེ། །རང་བཞིན་གྱི་མཐུ་ཅན་འདི་གསུངས་སོ། །འབྱུང་བྱེད་ཡེ་ཤེས་དཀྱིལ་འཁོར་ནི། །དཀྱིལ་འཁོར་སྔ་མ་བཞིན་
བྱས་ལ། །བདག་ཉིད་ཁྲོ་བོ་ཆེན་པོ་སྟེ། །ཡུམ་ཡང་དེ་བཞིན་དེ་ཡིའོ། །ཡབ་ཡུམ་གཉིས་མེད་བྱིན་བརླབས་ལས། །ཐིག་སྐུད་རྒྱུས་པ་ལྕགས་ལས་བྱས། །དེ་ནི་ལས་ཀྱི་ཐིག་ཅེས་བྱ། །ཐིག་བཞི་བཏབ་པས་དཀྱིལ་འཁོར་བརྒྱད། །འཁོར་ལོ་རྩིབས་བཞི་མུ་
ཁྱུད་བཅས། །ཀུན་དུ་གྲུ་བཞི་སྒོ་ཁྱུད་ཅན། །གྲུ་ཆད་ལྡན་ཏེ་དུར་ཁྲོད་རྒྱན། །མཛེས་པར་བྲིས་ཏེ་གཞན་ན་མིན། །སྟེན་པའི་ལྷ་སྟེ་སྔ་མ་བཞིན། །བསྐྱེད་པའི་སྔགས་འདི་བརྗོད་བྱས་པས། །བདག་དང་འདྲ་བར་བསྐྱེད་པར་བྱ། །ཨོྃ་ཨ་ཀྲོ་ཏེ་ཀ་ཧཱུྃ་ཨ། ཧཱུྃ་བཛྲ་
བེ་ཏཱ་ལི་རཀྴ་མཾ། བྷྱོ་བྷྱོ་བྷྱོ། ཧུྃ་ཧུྃ་ཧུྃ་ཧུྃ་ཧུྃ་ཧུྃ་ཧུྃ་ཧུྃ་ཧུྃ་ཧུྃ། ཛཿཧཱུྃ་བྃ་ཧོཿ །བྷྱོ་བྷྱོ་བྷྱོ་བྷྱོ། ཞེས་བརྗོད་པ་ཙམ་གྱིས་འཇིག་རྟེན་གྱི་ཁམས་འདི་དག་ཐམས་ཅད་གཡོས་སོ། །རབ་ཏུ་གཡོས་སོ། །ཀུན་དུ་རབ་ཏུ་གཡོས་སོ། །འགུལ་འགུལ། རབ་ཏུ་འགུལ། ཀུན་དུ་རབ་ཏུ་

འགུལ་ལོ། །ལྡེག་ལྡེག །རབ་ཏུ་ལྡེག །ཀུན་དུ་རབ་ཏུ་ལྡེག་གོ། །ཆེམ་ཆེམ། རབ་ཏུ་ཆེམ། ཀུན་དུ་རབ་ཏུ་ཆེམ་ཆེམ་མོ། །འུར་འུར། རབ་ཏུ་འུར་འུར། ཀུན་དུ་རབ་ཏུ་འུར་འུར་རོ། །དབུས་མཐོ་ན་མཐའ་དམའ། །མཐའ་མཐོ་ན་དབུས་དམའ་སྟེ། འཇིག་རྟེན་
གྱི་ཁམས་འདི་དག་རབ་ཏུ་གཡོས་པར་གྱུར་ཏོ། །དེ་ནས་བཅོམ་ལྡན་འདས་རྡོ་རྗེའི་བདག་ཉིད་དེས་འདི་སྐད་ཅེས་གསོལ་ཏོ། །བཅོམ་ལྡན་འདས་རབ་ཏུ་གསུང་གི་གསང་སྔགས་གསུངས་པས་བདག་ཅག་སྤྲོ་ལགས་སོ། །འཇིག་རྟེན་དུ་འདི་ལྟ་བུར་མཐུ་ཅན་ལ་
བདག་ཞུ་ལགས་སོ། །བཅོམ་ལྡན་འདས་རང་བཞིན་གྱིས་ཁྲོ་བར་མཛད་པ་དེ་ལ་བདག་མངོན་དུ་སེམས་ཅན་ཐམས་ཅད་རབ་ཏུ་ཡང་ཞུ་བར་འཚལ་ལགས་སོ། །བཅོམ་ལྡན་འདས་ཁྲོ་བོ་ཆེན་པོར་འདུ་མཛད་པ་དེས་འདི་སྐད་ཅེས་གསུངས་སོ། །ཨོྃ་ཤྲཱི་བ་ར་ཡཀྴ་
གུ་ཡ། སརྦ་ཏ་ཀྲི་བཛྲ་ཀཱ་ལ་རཱུ་པ་མ་ར་ན་ཕཊ་ཅེས་གསུངས་པས། འཇིག་རྟེན་ན་དབང་ཆེ་བ་དང་། མཐུ་ཆེ་བ་ལ་སོགས་པ་ཐམས་ཅད་བཏུལ་ནས་འདི་སྐད་ཅེས་གསུངས་སོ། །ཕྱོགས་བཅུའི་འཇིག་རྟེན་གང་ནས་ཀྱང་། །གསུང་དུ་མེད་པའི་ཆོས་ཉིད་ལ། །རང་
སེམས་འཕྲོ་འདུར་གྱུར་པ་ལས། །ཕྱོགས་བཅུར་གསུངས་པ་དེ་དག་ཡིན། །དེ་བས་ནན་ཏན་བསྐྱེད་བྱས་ཏེ། །དྲག་པོའི་ཚམ་ངམ་བཤད་པར་བྱ། །འཇིག་རྟེན་བཅུད་ཀྱི་གདུག་པ་ཀུན། །ཚམ་ངམ་གློག་ལྟར་འགྱུར་བ་ལས། །ངོ་མཚར་ཡ་མཚན་བསྒྲག་པར་བྱ། །
ཨེ་མའོ་ཡབ་ཡུམ་གཉིས་མེད་རོལ་པའི་མཁའ་དཀྱིལ་ནས། །ཕྱོགས་བཅུར་འཕྲོ་བ་བྱང་ཆུབ་སེམས། །རིགས་ཀྱི་ཡབ་དང་དེ་བཞིན་བཙུན་མོ་ནི། །རྟག་པར་བསྒོམས་ཏེ་དེ་བཞིན་གཤེགས་པར་བྱ། །རྫས་དང་ཕྱག་རྒྱ་སྔགས་དང་བཅས་རྣམས་ནི། །གཟུགས་དང་
འདོད་པའི་འབྲས་བུ་གང་འདོད་གྲུབ་པར་རོ། །མི་དགེ་བཅུ་དང་ལྡན་པའི་རྣམ་པར་འདྲེན་པ་དེར་བྱས་ཏེ། །སྔགས་དང་ཕྱག་རྒྱ་རྫས་རྣམས་དང་། །གའུ་པདྨ་དམ་པ་དང་། །ཁམ་པ་རྫ་ཡི་འཇི་བ་ཡིས། །ཁྲག་སྣ་གསུམ་དང་གི་ཝང་ངོ་། །དེ་དག་ཕྲིན་ལས་

མཆོག་ཡིན་ཏེ། །གྲུབ་པར་འགྱུར་བ་གདོན་མི་ཟ། །བླ་མེད་དཔའ་བོས་ཡང་དག་གསུངས། །ཕྱོགས་བཅུའི་གདུག་པ་མ་ལུས་ཀུན། །འདུལ་བར་འགྱུར་ཏེ་ཐེ་ཚོམ་མེད། །འཕགས་པ་ལས་བཞི་འཁོར་ལོ་གསང་བའི་རྒྱུད་ལས་དྲག་པོའི་ལེའུ་སྟེ་
ལྔ་པའོ།། །།དེ་ནས་བཅོམ་ལྡན་འདས་འཇམ་དཔལ་གཤིན་རྗེ་གཤེད། ཡེ་ཤེས་ལྷུན་གྱིས་གྲུབ་པའི་ངང་ལ་ལོངས་སྤྱོད་པར་བྱ་བའི་ཕྱིར། ཆེད་དུ་བརྗོད་པ་འདི་བརྗོད་དོ། །རང་བཞིན་འཕགས་པ་ཀུན་དུ་ཤེས་རབ་སྟེ། །དེ་བཞིན་རྣམ་པར་མི་རྟོག་ཡིན་པས་ན། །འདི་
གཉིས་ཆོས་ཀྱི་སྐུ་ཞེས་རབ་ཏུ་བཤད། །ཆོས་ཀྱི་ལོངས་སྤྱོད་འདུལ་བའི་དོན་ལ་རྒྱས། །འགྲོ་བའི་དོན་རྫོགས་མ་ལུས་སྐུར་འབྱུང་དང་། །བདུད་དང་མུ་སྟེགས་སྲིན་པོ་གདུལ་བའི་ཕྱིར། །མཚན་དང་དཔེ་བྱད་གཟུགས་སུ་སྤྲུལ་ནས་ནི། །མ་ལུས་ཚར་གཅོད་དོན་དུ་འདི་གསུངས་
སོ། །འཁོར་ལོ་རྩིབས་བརྒྱད་དུ་ཁྱུད་ཟླུམ་པོར་བཅས། །སྦྲུལ་གྱིས་རྒྱ་གྲམ་དག་གི་མཐའ་བསྐོར་ལ། །ལྟེ་བར་རྡོ་རྗེ་རྒྱ་གྲམ་བྲི་བར་བྱ། །དེ་ཡི་སྟེང་དུ་ཀ་པཱ་ལ་གཉིས་ལ། །གཅིག་ལ་གཤིན་རྗེ་དབུ་དྲུག་པ་ཡི་གཟུགས། །གཅིག་ལ་ཡུམ་ཆེན་ཁྲོ་གཉེར་གཟུགས་བྲིས་ལ། །ནང་
དུ་དགྲ་བོ་རྐང་རྗེས་སུ་དང་ནི། །དྲི་དང་དེ་བཞིན་ཁྲག་སྣ་གསུམ། །ཐལ་ཆེན་རྒྱ་ཤུག་བསྐུས་པའི་ཁུ་བ་དང་། །བརྫིས་ལ་དགྲ་བོའི་གཟུགས་བྱས་ལ། །བཅུག་ལ་སྐུད་པ་དཀར་པོས་བཅིང་། །དཀྱིལ་འཁོར་ཐོག་ཏུ་གཞག་པར་བྱ། །ཨོྃ་ཡ་མཱནྟ་ཀ །ཧྲཱིཥྚིཾ་བཛྲ་ཀྲོ་དྷ་ཡ་མཱནྟ་ཀ་
བཛྲ་ཀྲོ་དྷ་ཕཊ་ཕཊ་ཨ། ཞེས་བརྗོད་པ་ཙམ་གྱིས་ནི། ཡབ་ཡུམ་སྐུ་མདོག་མཐིང་ནག་ལ། །དབུ་སྐྲ་ཁམ་ནག་རལ་པ་གྱེན་དུ་བརྫེས། །དབུ་ལ་ཐོད་པ་རློན་པས་བརྒྱན། །སྐུ་ལ་སྦྲུལ་ནག་ཆུན་པོ་དང་། །ཞབས་བཞི་བརྐྱང་བསྐུམ་ཚུལ་དུ་བཞུགས། །ཕྱག་དྲུག་ཕྱག་མཚན་བསྣམས་
པ་ནི། །གཡས་ཀྱི་དང་པོ་སྡིགས་མཛུབ་ལ། །རྒྱུ་ཞགས་ལྕགས་ཀྱུ་བར་ཐ་མ། །དུང་ཆེན་ཏྲི་ཤཱུལ་གསལ་ཤིང་གཡོན། །དེ་ལྟར་ཆ་ལུགས་གསལ་བ་དང་། །དབྱངས་འདི་བླང་བར་ནན་ཏན་བྱ། །ཧཱུྃ་རྔམ་པའི་རྒྱལ་པོ་ཁྲག་འཐུང་གཤིན་རྗེ་གཤེད། །ཁམས་གསུམ་དབང་སྡུད་

རྟགས་སུ་ཞལ་གསུམ་པོ། །དབྱིངས་ནས་སྤྲུལ་པའི་ཡབ་ཡུམ་ལྷུན་གྱིས་གྲུབ། །ལས་ངན་འཁྲུལ་བའི་སེམས་ཅན་གདུལ་དཀའ་བ། །གདུག་པ་དེ་དག་འདུལ་ཕྱིར་གཤེགས་སུ་གསོལ། །དམ་ཚིག་གི་ཕྱག་རྒྱ་བཅས་ལ། ཛཿཧཱུྃ་བྃ་ཧོཿ། ས་མ་ཡ་སྟྭཾ། ཞེས་པ་ལན་
གྲངས་མང་དུ་བརྗོད། དེས་ནི་བརྟན་པར་བཞུགས་པར་འགྱུར། །ཁྲག་ཆེན་རྒོད་ཁྲག་ཤ་དང་ཚིལ། །ཆེན་པོ་ལ་སོགས་གཏོར་མ་བཤམ། །དེ་ནི་དཀྱིལ་འཁོར་ཐོག་དག་ཏུ། །བདག་ཉིད་ཏིང་འཛིན་གསལ་བ་ལས། །སྔགས་འདི་འབུམ་ཕྲག་གཅིག་ཏུ་བཟླས། །
ཨོྃ་བཛྲ་ཧ་སྟ་བ་བ་ཧེ་ཧ་དཱ་ན་ཧྲཱིཥྚིཾ་ཆེ་གེ་མོ་མཱ་ར་ཡ་ཧུྃ་ཧུྃ་ཕཊ་ཕཊ། ཆེ་གེ་མོ་ཧསྟ་བ་པྲི་ཏི་ནིར་ཏེ་ས་ཧཱུྃ་ཧཱུྃ་ཕཊ་ཕཊ། ཉིན་ཞག་གཅིག་ལ་ལན་འབུམ་བཟླས། །ཉིན་ཞག་གསུམ་གྱི་བར་དུ་བཟླས། །དེ་དག་བཟླས་པ་རྫོགས་པ་དང་། །གཏོར་མའི་ལས་དག་བརྩམ་བྱ་
སྟེ། །བསྐྱེད་དང་བསྐུལ་དང་རྫོགས་པ་དང་། །ཕྱོགས་བཅུའི་ཁྲོ་བོ་སྤྱན་དྲངས་ཏེ། །བཞུགས་དང་བརྟན་དང་མི་གཡོ་སོགས། །མ་ལུས་རྫོགས་པའི་ཕྲིན་ལས་བྱ། །དེ་ལྟར་ཕྲིན་ལས་རྫོགས་པ་དང་། །ཡང་ནས་ཡང་དུ་བསྟབ་པ་བྱ། །དེ་ལྟར་བསྟབ་པ་བྱས་པས་ན། །དགྲ་བགེགས་
དབང་འགྱུར་སྨོས་ཅི་དགོས། །དེ་ནས་ཡང་འདི་ཆེད་དུ་བརྗོད་དེ་གསུངས་སོ། །ཨོྃ་ང་ནི་ཕྱོགས་བཅུ་དུས་གསུམ་གྱི། །བདེར་གཤེགས་ཐུགས་ཀྱི་སྲས་ཡིན་པར། །བདུད་དང་སྲིན་པོ་ལོག་འདྲེན་རྣམས། །མ་ལུས་ཚར་གཅོད་བྱིན་བརླབས་ཏེ། །མགོན་པོ་
གཤིན་རྗེ་ཉིད་ཀྱི་སྲས། །དོན་རྣམས་ཐམས་ཅད་མ་ལུས་པ། །དེ་ཉིད་དུ་ནི་བསྒྲུབ་པར་བྱ། །དགྲ་རྣམས་ཐམས་ཅད་འདུལ་བའི་ཕྱིར། །ཕྲིན་ལས་རྡོ་རྗེ་ཅན་གྱིས་མཛོད། །ཞེས་བརྗོད་ཅིང་སྔགས་ཀྱིས་བརྡེག་པ་ནི་ཕྲིན་ལས་མཆོག་གི་རྒྱལ་པོ་ཞེས་གསུངས་
སོ། །དུས་དང་དུས་དང་ཞག་གྲངས་ནི། །ཉི་མ་གཅིག་ལ་སྟོང་རྩ་གཅིག །ནམ་གྱི་གུང་ལ་བརྒྱ་རྩ་གཅིག །ཐོ་རངས་ཐུན་གཅིག་བརྒྱ་རྩ་གཅིག །སྲོད་ཀྱི་གུང་ལ་བརྒྱ་རྩ་གཅིག །དེ་ལྟར་ཉིན་ཞག་གསུམ་བར་དུ། །བཟླས་པ་ཞག་གྲངས་ཚང་བྱ་ཞིང་། །ཕྱག་རྒྱ་བཅའ་

ཞིང་གཟུགས་ལ་བརྡེག །ཉ་ལ་བྱས་ན་གདོན་མི་ཟ། །ཨོྃ་མཱ་ར་ན་ཁ་ད་སརྦ་ཧྲཱིཥྚིཾ་ཡ་མན། ཧུྃ་ཧུྃ་ཏྲེ་ཁ་ད་པ་ར་ན་པ་ལ་ཧུྃ་ཧུྃ་ཕཊ་ཕཊ་སྭཱ་ཧཱ། རྡོ་རྗེ་རྩེ་གཅིག་པའི་ཕྱག་རྒྱ་བཅས་ལ་དགྲ་བོའི་གཟུགས་ལ་བརྡེག་གོ། །ཨོྃ་བཛྲ་ཧཱུྃ་ཁཾ་སྥ་ར་ན་ཕཊ། ཧཱུྃ་ཨཱ་བེ་ཤ་ཡ། ཧུྃ་ཧུྃ་
ཕཊ་ཕཊ་ཨ། ཡང་ཕྱག་རྒྱ་གོང་མ་བཅས་ལ། ཨོྃ་བཛྲ་ཀྲོ་དྷ་ནཱི་ལ་ཏནྟྲ་ཧུྃ་ཧུྃ། ཧྲཱིཥྚིཾ་ཀྲྀ་ཏ་ན་ན། ཧུྃ་ཧྲཱི་ཥྚིཾ་བི་ཀྲྀ་ཏ་ནན་ནན་ཞེས་བརྗོད་ལ། བདག་གི་ལག་པས་དབང་བསྐུར་རོ། །ཡང་ཕྱག་རྒྱ་བཅས་ལ། །སྔགས་འདི་ལ་ཡང་ལན་གྲངས་མང་དུ་བྱའོ། །ཨོཾ་བཛྲཱ་ཙཎྜ་ཧྲཱིཥྚིཾ་བཛྲ་སྟི་ར་བཾ།
ཁ་ཧི་ཧུྃ་ཧུྃ་ཆེ་གེ་མོ་དབང་དུ་སྡུས་ཤིག །ཧྲིལ་ཧྲིལ་ཞེས་ལན་གྲངས་མང་དུ་བརྗོད་དོ། །རྡོ་རྗེ་རྒྱ་གྲམ་གྱི་ཕྱག་རྒྱས་བརྡེག་གོ། །ཡང་ཕྱག་རྒྱ་བཅས་ལ་སྔགས་འདིས་བརྡེག་གོ། །ཨོཾ་བཛྲ་ཀང་ཀ་མ་ཀ་ལ་ཡ་ན་ཧུྃ་ཕཊ་ཕཊ་ཨ། ཞེས་འབུམ་བཟླས་ལ་རྡོ་རྗེ་རྩེ་ལྔ་པའི་ཕྱག་རྒྱས་
བརྡེག་གོ། །ཡང་ཕྱག་རྒྱ་བཅས་ལ་སྔགས་འདིས་བརྡེག་གོ། །ཨོྃ་བཛྲ་ཨ་གུ་ཤ་ཏྲེ་ཐ་སྟི་ར་བྃ་ཧུྃ་ཧུྃ་ཕཊ་ཕཊ་ཆེ་གེ་མོ་མཱ་ར་ཡ་ཛ་ཧཱུྃ་ཞེས་དབང་དུ་སྡུས་ཤིང་། ཧུྃ་ཧུྃ་ཕཊ་ཕཊ་ཞེས་ལན་གྲངས་མང་དུ་བརྗོད་དོ། །རྡོ་རྗེ་གདེངས་པའི་ཕྱག་རྒྱ་བཅས་ལ་དབང་དུ་བསྡུའོ། །ཡང་
ཕྱག་རྒྱ་བཅས་ལ་སྔགས་འདིས་བརྡེག་གོ། །ཨོྃ་ཧུྃ་ཧུྃ་ཕཊ་ཕཊ་འདུས་འདུས་རང་རང་ཡྃ་ཡྃ་རྃ་རྃ་ཧྲིང་ཧྲིང་དུ་བ་བྷྱོ་ཧུྃ་ཕཊ་ཆེ་གེ་མོ་དུན་བྷྱོ་ཞེས་བཟླས་ལ། ཁ་ཊྭཱཾ་གི་ཕྱག་རྒྱས་བརྡེག་གོ། །དེ་ལྟར་ལས་དེ་དག་ཡོངས་སུ་རྫོགས་པའི་ཏིང་ངེ་འཛིན་དང་ལྡན་པར་བྱས་ལ།
བཟླས་པ་བྱས་ན་ལས་ཅི་བྱས་པ་ཐམས་ཅད་དབང་དུ་འདུ་བར་ངེས་ཞེས་བཅོམ་ལྡན་འདས་ཀྱིས་གསུངས་སོ། །འཕགས་པ་ལས་བཞི་འཁོར་ལོ་གསང་བའི་རྒྱུད་ལས། ངན་སྔགས་དབང་སྡུད་ཀྱི་ལེའུ་སྟེ་དྲུག་པའོ།། །།དེ་ནས་ཡང་བཅོམ་ལྡན་འདས་གཤིན་རྗེའི་
གཤེད། བཅོམ་ལྡན་འདས་ཀུན་ལ་ཁྱབ་པའི་ཕྲིན་ལས་བསྒྲུབ་པ་འདི། སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ལྔ་ཕུང་ཡན་ལག་གཞོམ་པ་དང་། །དུག་གསུམ་རྩད་ནས་གཅད་པ་དང་། །འབྲས་བུ་རྒྱལ་བར་བསྒྲུབ་བྱའི་ཕྱིར། །ནན་ཏུར་ཕྲིན་

ལས་བཤད་པར་བྱ། །དང་པོའི་ལས་ནི་རྒྱས་དང་གསང་། །དགུག་དང་གཏད་དང་བཅིང་དང་དགྲོལ། །སྦྱོར་བའི་གདུག་པ་མ་ལུས་ཀུན། །ཕྲིན་ལས་འདི་ཡིས་བྱེད་པར་འགྱུར། །དང་པོར་བཙལ་བའི་བཙལ་ཐབས་ནི། །རྣམ་པ་དྲུག་དང་ལྡན་པས་བཙལ། །སྟག་
མོ་གད་ལ་མཆོང་སྟབས་དང་། །སེང་གེ་གངས་ལ་འགྱིང་ཚུལ་དང་། །ཁྭ་སྤྱང་གཟན་ལ་རྒྱུག་ཚུལ་དང་། །བྱ་རྒོད་གཟན་ལ་འབབས་ཚུལ་དང་། །དོམ་ཆེན་རྨི་ལམ་རྨི་ཚུལ་དང་། །ཁྭ་སྐེག་ཐང་ཤིང་སྙེག་ཚུལ་གྱིས། །རོ་ཡི་ཕུང་པོ་བཙལ་བར་བྱ། །རི་ལ་
འདུག་ན་འགྱིང་བས་བཙལ། །སྲིབས་ལ་འདུག་ན་མཆོང་བས་བཙལ། །གདགས་ལ་འདུག་ན་འདུག་པས་བཙལ། །འོར་ན་འདུག་ན་འབབས་པས་བཙལ། །བྲག་ལ་འདུག་ན་རྨི་བས་བཙལ། །ནགས་ལ་འདུག་ན་སྙེག་པས་བཙལ། །རྒྱལ་རིགས་
ཡིན་ན་སེང་གེ་སྟངས། །བྲམ་ཟེ་ཡིན་ན་སྟག་མོ་སྟངས། །རྗེའུ་རིགས་ཡིན་ན་བྱ་རྒོད་སྟངས། །དམངས་རིགས་ཡིན་ན་དོམ་གྱིས་བྱ། །མ་ནིང་ཡིན་ན་སྤྲེའུ་ཡིས་བྱ། །དོག་ལ་ཡིན་ན་ཁྭ་སྤྱང་སྟངས། །དེ་ལྟར་རོ་ཡི་ཚོལ་སྟངས་ནི། །རྣམ་པ་དྲུག་དང་ལྡན་པས་བཙལ། །བརྟགས་
ནས་འོངས་པ་གྱུར་པ་དང་། །གཤིན་རྗེ་རྒྱལ་པོའི་ཚམ་ངམ་བྱ། །ཁྲོ་བོ་བཅུ་ཡིས་སྟང་སྟབས་ཀྱིས། །རོ་ལ་ཀུན་ཏུ་བསྐོར་བྱས་ལ། །དཀྱིལ་འཁོར་ཆེན་པོའི་དབུས་སུ་གཞག །དེ་ལྟར་གཞག་པའི་ལས་བྱས་ནས། །མགོ་ནི་ལྷོ་ནུབ་མཚམས་སུ་བསྟན། །རྐང་པ་བྱང་ཤར་
མཚམས་སུ་བསྟན། །ལག་པ་གཡས་པ་ལྷོ་ཡི་ཕྱོགས། །ལག་པ་གཡོན་པ་ནུབ་ཀྱི་ཕྱོགས། །རྐང་པ་གཡས་པ་ཤར་གྱི་ཕྱོགས། །རྐང་པ་གཡོན་པ་བྱང་གི་ཕྱོགས། །དེ་ལྟར་གན་རྐྱལ་བཞག་བྱས་ལ། །ད་ནི་ཕུར་བ་དགོད་བྱ་སྟེ། །མིག་དང་རྣ་བ་སྣ་དང་ལྕེ། །ལག་
གཉིས་རྐང་གཉིས་ཕོ་མཚན་དང་། །ལྐོག་མ་དེ་བཞིན་སྙིང་ག་དང་། །ལྟེ་བ་པུས་མོ་དཔུང་བ་གཉིས། །གྲུ་མོ་དེ་བཞིན་ལོང་བུ་གཉིས། །མཚོག་མ་དེ་བཞིན་སྤྱི་བོ་དང་། །དཀུ་དང་དེ་བཞིན་མཆན་ཁུང་གཉིས། །དཔྲལ་བ་རྣམས་སུ་གདབ་བྱས་ལ། །ཕུར་བ་དེ་དག་

ལྷ་ཡི་སྐུར། །རབ་ཏུ་བརྟགས་ཏེ་གོམས་པ་དང་། །རང་བཞིན་གནས་ནས་གཤེགས་པ་དང་། །ཏིང་ངེ་འཛིན་དུ་བསྒོམས་པ་དང་། །གཟུགས་བརྙན་ནང་དུ་བཀོད་པ་གསུམ། །ཚད་པས་གདུངས་པའི་བྱེ་མ་ལ། །མར་ཞུ་དེ་བཞིན་ཐིམ་པ་བཞིན། །གཉིས་སུ་མེད་པར་
ཤེས་བྱ་ལ། །གོང་དུ་བསྟན་པའི་ལྷ་རྣམས་ནི། །རྣམ་ཤེས་བཞི་དང་དབང་པོ་བཞི། །དེ་ལས་གྱུར་པའི་ཡུལ་རྣམས་ནི། །བརྒྱད་པོ་ངང་དུ་ཤེས་པར་བྱ། །སྒོ་མ་ལུས་ལ་གྲགས་པའོ། །ཐབས་དང་ཤེས་རབ་འབྲེལ་པའི་ཕྱིར། །སྟེང་འོག་ཁྲོ་བོ་དེ་ལས་གྱུར། །དེ་དག་ཀུན་གྱི་
སྐུ་གསུང་ཐུགས། །མ་མོ་གསུམ་གྱིས་ང་ཉིད་དེ། །ཡབ་ནི་ཀུན་ལ་ཁྱབ་པ་ལ། །ཡུམ་ནི་ཀུན་ལ་སྡུད་པ་སྟེ། །བྱ་བ་བྱེད་པ་བདག་ཉིད་དོ། །ཕུང་པོ་ཀུན་ལ་ཁྱབ་པ་ལ། །མཉེས་པས་ཕུལ་ཕྱིན་ལྷ་ཡི་ཚོགས། །འགྲོ་དྲུག་ཀུན་ལ་མ་ལུས་སྣང་། །དེ་ལྟར་ལས་རྣམས་ཟིན་
པ་དང་། །ཞག་གྲངས་དུ་བྱ་དམ་ཡང་བཅའ། །དངོས་གྲུབ་ཐོབ་པར་འདོད་པ་ཡི། །རྣལ་འབྱོར་ཆེན་པོས་ཏིང་འཛིན་གསལ། །དེ་ལྟར་བྱས་ནས་མི་ལ་སོགས། །ཐམས་ཅད་དབང་དུ་འདུ་བར་གསུངས། །དགྲ་བགེགས་ལ་ལྟ་སྨོས་ཅི་དགོས། །དྲག་པོའི་ཕྲིན་ལས་
གྲུབ་འདོད་པས། །དགྲ་བོའི་མིང་བྱང་བྲིས་བྱས་ལ། །བམ་གྱི་ཁ་ཡི་ནང་དུ་གཞུག །རྡོ་རྗེ་རྒྱ་གྲམ་རྒྱ་ཡིས་གདབ། །ཧེ་རུ་ཀ་ཡི་ཕྱག་རྒྱས་མནན། །ཡུངས་ཀར་རྒྱལ་པོས་དྲག་ཏུ་བརྡེག །རྒྱ་ཤུག་བཀུས་པས་དྲག་ཏུ་བླུགས། །ཉི་མ་བཞི་ལ་དྲག་ཏུ་བརྡེག །སྔགས་དང་
ཕྱག་རྒྱ་རྒྱུན་མི་བཅད། །དམ་རྫས་མཆོད་པ་ཤིན་ཏུ་དགྲམ། །རྣལ་འབྱོར་ཏིང་འཛིན་དྲག་ཏུ་བྱ། །ཡེངས་ན་བར་ཆད་འབྱུང་བར་འགྱུར། །གཡེང་བར་མི་མཛད་ཁྲོ་བོས་གསུངས། །དེས་ནི་ལས་ཀྱི་འབྲས་བུ་ཡང་། །ཤིན་ཏུ་ཟད་པ་མེད་པ་སྟེ། །མཁའ་
ལ་འཕུར་དང་ས་ལ་འཛུལ། །ཆུ་ལ་བྱིང་མེད་མངོན་ཤེས་ལྡན། །ཞེས་གསུངས་སོ། །རྒྱུད་ཀྱི་རྒྱལ་པོ་ཆེན་པོ་ལས་བཞི་འཁོར་ལོ་གསང་བའི་རྒྱུད་ལས་རོ་ལངས་ཀྱི་སྒྲུབ་པ་ལ། ངན་སྔགས་ཀྱི་ཕུར་བུས་གདབ་པའི་ལེའུ་སྟེ་བདུན་པའོ།། །།དེ་ནས་

བཅོམ་ལྡན་འདས་འཇམ་དཔལ་གཤིན་རྗེ་ཉིད་རང་བཞིན་ལྷུན་གྱིས་གྲུབ་པ་འདི་ཆེད་དུ་བརྗོད་དོ། །ཡེ་ཤེས་འཁྱིལ་བའི་དཀྱིལ་འཁོར་བསྐྱེད་སྟེང་ན། །ཡེ་ཤེས་ཉི་མ་གསལ་བའི་ཐིག་ཕྲན་གདབ། །མུ་ཁྱུད་ཟླུམ་པོ་སྦྲུལ་གྱི་ཞགས་པ་བྲི། །སྟེགས་བུ་ཕྱོགས་མཚམས་ཕུར་བུས་
བསྐོར་བར་བྱ། །དེ་ལྟར་བྲིས་པའི་དཀྱིལ་དུ་དགོད་པ་ནི། །ཨོྃ་ནི་དབུས་ཀྱི་ལྟེ་བ་ལ། །ཤར་དུ་ཧྲི་ལ་ལྷོ་རུ་སྟཾ། །ནུབ་ཕྱོགས་ཧུྃ་ལ་བྱང་དུ་ཧ། །བྱང་ཤར་མཚམས་སུ་ཛ་ཞེས་པ། །ཤར་ལྷོ་ཏྲི་ལ་ལྷོ་ནུབ་མེ། །ནུབ་བྱང་ཨ་ལ་རབ་ཏུ་རྟེན། །རྟེན་པའི་ཡི་གེ་དེ་བཀོད་ནས། །དབུས་སུ་
བསྟན་པར་བསྒོམ་པ་ནི། །གཤིན་རྗེ་སྟེ་སྐུ་དམར་ནག་ལ། །དབུ་གསུམ་པོ་ལ་ཕྱག་ཀྱང་དྲུག །དབུ་ལ་ཐོད་པ་ཚལ་གྱིས་བརྒྱན། །ཞལ་གཡས་སྨུག་ནག་གཡོན་ལྗང་བ། །དབུས་ནི་སྐུ་དང་རབ་མཐུན་པ། །སྐུ་ལ་ཐོད་པ་བརྒྱན་གྱི་ཚལ། །ཞབས་བཞི་བརྐྱང་བསྐུམ་དུ་བཞུགས་
པ། །ཡབ་ཀྱི་སྐུ་ལ་རབ་འཇུག་པ། །གཡོན་ཕྱོགས་གནས་པ་གོང་མ་བཞིན། །ཨོྃ་ཨ་མྲྀ་ཏ་ཏ་ཀ་སརྦ་ཨ་མྲྀ་ཏ་ཀྲོ་ཏ་ཧཱུྃ་ཕཊ། །ཨོྃ་ཨ་མྲྀ་ཏ་ཀྲོ་ཊ་ཧཱུཾ་ཕཊ། །དེ་ལྟར་ཡབ་ཡུམ་གསལ་བར་བསྐྱེད། །པདྨའི་གདན་ལ་རབ་བཞུགས་པའོ། །འཁོར་ལ་སོགས་པའི་རིམ་པ་ནི། །བསྐྱེད་
པ་གོང་མའི་རིམ་པའོ། །རྟག་ཏུ་བཟླས་པ་བསྙེན་པའི་སྔགས། །མི་དྲག་མི་བུལ་མི་ཞན་པར། །ཏིང་འཛིན་གསལ་བར་བསྒོམ་བྱས་ཏེ། །ཞི་ལ་འཚེར་བའི་ཏིང་འཛིན་ལ། །རི་རབ་དབུས་ཀྱི་ལྟེ་དབུས་ལ། །རབ་བརྟན་འོག་གི་གོ་གོ་ནས། །རྡོ་རྗེ་ཚེ་ཡི་དབང་སྩོལ་ཏེ། །
ཕྱོགས་བཅུ་གདུག་པའི་ཚེ་འདྲེན་ཏེ། །གདུག་པ་མ་ལུས་འགུགས་པར་འགྱུར། །ཚེའི་སྙིང་པོ་འདི་རྟག་ཏུ་བཟླས། །ཨོྃ་ས་མ་ཡ་མཉྫུ་ཤྲཱི་མུ་ཏྲ་ཨ་ཀོ་ཨཱ་ཡུ་ཕ་ལ་སི་ཏི་ནི་བྲུྃ་ཨ། དེས་ནི་ཚེ་ཡི་དབང་ཐོབ་ནས། །སངས་རྒྱས་སྐུ་དང་མཉམ་པ་དང་། །བསྐལ་པ་མ་ཞིག་
བར་དུ་ནི། །ལོ་ལྔ་ལོན་པ་བཞིན་དུ་གནས། །དེ་ནས་བསྐུལ་བའི་གནས་འདི་གསུངས། །ཨེ་མའོ་ཕྱོགས་བཅུ་ཀུན་ནས་འདུས་པ་ཡི། །ཡེ་ཤེས་རྒྱལ་པོའི་ཐིག་ལེ་འདི། །གསང་ཆེན་རྨད་དུ་བྱུང་བ་སྟེ། །རྒྱུ་དྲུག་འཁོར་བའི་སེམས་ཅན་རྣམས། །ཡེ་ནས་

ལྷུན་གྱིས་གྲུབ་པའི་བཅུད། །ཐམས་ཅད་མ་ལུས་ཆོས་སོ་ཅོག །ཆོས་ཀྱི་སྐུ་འམ་ཆོས་ཀྱི་དབྱིངས། །དོན་དམ་ཚིག་དང་མངོན་སུམ་པ། །དངོས་པོ་མཚན་མ་ཐམས་ཅད་ལས། །ཁྱབ་པའི་མྱ་ངན་ཐུགས་རྗེ་ཆེ། །ཕྲ་མོ་སེམས་ཀྱི་རང་བཞིན་ཏེ། །གཏི་
མུག་མུན་པ་སེལ་བ་སྟེ། །ཉོན་མོངས་དྲི་མ་ཀུན་དང་བྲལ། །ཤིན་ཏུ་སད་པ་མྱ་ངན་འདས། །ཐུགས་རྗེའི་རང་བཞིན་གཤིན་རྗེ་སྟེ། །རྡོ་རྗེ་ཚེའི་རང་བཞིན་མི་འགྱུར་བའོ། །ཞེས་གསུངས་པས་ཕྱོགས་བཅུ་དུས་གསུམ་གྱི་བདེ་བར་གཤེགས་པ་ཐམས་ཅད་རྔམ་པའི་ཞལ་
ནས་འདི་སྐད་ཅེས་གསུངས་སོ། །ཨེ་མའོ་ཕྱོགས་བཅུའི་འཇིག་རྟེན་ཡེ་ནས་དབེན། །བདེར་གཤེགས་ཐམས་ཅད་ཡེ་ནས་ལྷུན་གྱིས་གྲུབ། །མཐའ་གཉིས་སྤངས་པའི་ཡེ་ཤེས་ལྷུན་རྫོགས་པའི། །ཕྱོགས་བཅུའི་སྟོང་ཁམས་འཇིག་རྟེན་རྒྱན་དུ་བཅས། །
ཐབས་དང་ཤེས་རབ་ཀྱིས་ནི་དབང་བསྐུར་ན། །བདུད་དང་སྲིན་པོ་ལོག་འདྲེན་ཚེ་བསྡུས་ཏེ། །དབང་བསྐུར་གནང་བ་དེས་ཀྱང་བྱིན་བསྐྱེད་དེ། །ཤར་ཕྱོགས་དྲི་ཟའི་གནས་ནས་ཚེ་དྲོངས་ཤིག །ཨོྃ་བཛྲ་ཀུ་ལ་ཨེ་སྭ་ཤྭ་ར་ན་ཧ་ཧ་ཧོ་ཧོ་ཧུྃ་ཧུྃ། ཞེས་ནི་དབྱངས་དང་བཅས་པ་
ཡིས། །རྡོ་རྗེ་རིགས་ལས་གྲུབ་པ་ཡི། །བདེ་བར་གཤེགས་པ་ཐམས་ཅད་ཀྱིས། །མགོན་པོ་གཤིན་རྗེ་ཚེ་དབང་བསྐུར། །དེ་ནས་རིན་པོ་ཆེའི་ཚེའི་དབང་བསྐུར་བའི་ཕྱིར་འདི་གསུངས་སོ། །ཨེ་མའོ་རིན་ཆེན་འཆང་བ་ཀུན་གྱི་བདག །འཇིག་རྟེན་དབང་ཕྱུག་
དབང་བྱེད་པ། །གཙོ་མཆོག་ཁྱབ་པར་བྱིན་བརླབས་ཏེ། །མི་འགྱུར་རིགས་ཀྱི་ཚེ་ཐོབ་ནས། །ལྷོ་ཕྱོགས་གཤིན་རྗེའི་གནས་ནས་ཚེ་དྲོངས་ཤིག །ཨོྃ་རཏྣ་ཀུ་ལ་ཨཱ་ཡུ་ཧེ་ཧེ་ཧོ་ཧོ་ཧྃ། རིན་ཆེན་དགྱེས་པའི་དབང་བསྐུར་བས། །ཁྱད་པར་བྱིན་བརླབས་
ཐོབ་གྱུར་ཅིག །དེ་ནས་པདྨ་རིགས་ཀྱི་ཚེའི་དབང་འདི་ཡང་གསུངས་སོ། །ཨེ་མའོ་ཁྲོ་གཏུམ་རྔམ་པའི་ཚོགས། །པདྨ་རིགས་ཀྱི་དབང་ཕྱུག་སྟེ། །སྣང་བ་མེད་ལས་ལྷུན་གྱིས་གྲུབ། །རྡོ་རྗེ་འཆང་གིས་དབང་བསྐུར་བས། །ཀླུ་འདུལ་ཚེ་ཡི་དབང་ཐོབ་ཤོག །

པདྨ་ཀུ་ལ་ཨཱ་ཡུ་ཧེ་ཧེ་ཧོ་ཧོ་ཧྃ། ལྷུན་གྱིས་གྲུབ་པ་ཚེ་ཡི་དབང་། །ཐོགས་མེད་དམ་པ་ཐོབ་པར་ཤོག །དེ་ནས་ལས་ཀྱི་རིགས་ཀྱི་ཚེའི་དབང་བསྐུར་བ་འདི་བརྗོད་དོ། །ཨེ་མའོ་རང་བཞིན་མཚན་མ་མེད་པ་ཡི། །ཡེ་ཤེས་ལྔ་ལྡན་ཕྲིན་ལས་གཙོ། །གཉིས་སུ་མེད་པ་ལས་ཀྱི་རིགས། །
ལས་རྣམས་ཐམས་ཅད་དབང་བསྐུར་བས། །གནོད་སྦྱིན་གདོན་ལས་ཚེ་དྲོངས་ཏེ། །གནོད་སྦྱིན་བགེགས་འདུལ་དབང་ཐོབ་ཤོག །ཨོྃ་ཀརྨ་ཀུ་ལ་ཨཱ་ཡུ་ཧེ་ཧེ་ཧོ་ཧོ་ཧྃ། ཞེས་བརྗོད་པས་ཐམས་ཅད་ཚེའི་དབང་ཉིད་དུ་གྱུར་ཏེ། ཆེད་དུ་བརྗོད་པ་འདི་བརྗོད་དོ། །ཚད་མེད་བཞི་ཡི་ཐུགས་
རྗེས་ཀྱང་། །ཉོན་མོངས་དགྲ་རྣམས་ཞི་གྱུར་ཅིག །ཅེས་ཕྱོགས་བཅུ་དུས་གསུམ་གྱི་བདེ་བར་གཤེགས་པ་ཐམས་ཅད་ཀྱི་ཚེའི་དབང་བསྐུར་རོ། །འཕགས་པ་ལས་བཞིའི་འཁོར་ལོ་གསང་བའི་རྒྱུད་ལས། འཇམ་དཔལ་ཚེ་སྒྲུབ་པའི་ལེའུ་སྟེ་བརྒྱད་པའོ།། །།དེ་ནས་
བཅོམ་ལྡན་འདས་གཤིན་རྗེའི་བདག་ཉིད་དེ། མཐའ་བྱེད་འབྱུང་བ་དེ་ཉིད་ཀྱི་སྐུ་དང་གསུང་དང་ཐུགས་ལས་བྱུང་ངོ་། །གཤིན་རྗེ་ལས་ཀྱི་ཕྲིན་ལས་འདི། །མྱོས་དང་མགོ་འཁོར་བྱེད་པ་དང་། །ཡིད་འཁྲུག་ཁྲག་ཏུ་སྐྱུག་པར་བྱེད། །ལོག་འདྲེན་རྣམ་པ་དྲུག་ཏུ་བསྟན། །
ལོག་འདྲེན་མཐར་བྱེད་དཀྱིལ་འཁོར་ནི། །བཅུ་གཉིས་འཁོར་ལོ་རྩིབས་ཅན་དེ། །ཡི་དགས་ཀྱི་ནི་གོས་ལ་བྲི། །སུམ་བརྩེགས་ལྡན་པའི་མུ་རན་ལ། །དབྱངས་ཀྱི་ཡི་གེས་ཀུན་ཏུ་བསྐོར། །ཧྲིཥྚིའི་སྔགས་ཀྱིས་གནོན་བྱས་ལ། །ཐ་ལ་ཐོད་པ་གཏང་བར་བྱ། །དེ་ནས་
སྔགས་ཀྱིས་དགང་བར་བྱ། །ཡ་མ་ན་ཏེ་ར་ཙའི་ཚོགས། །ས་སྟེ་འབྱུང་བྱེད་དོ་ཡི་རྟེན། །མེ་སྟེ་ཐམས་ཅད་སྲེག་པའོ། །བདག་ཉིད་གཤིན་རྗེ་མཐར་བྱེད་སྐུར་བསྐྱེད་ལ། །ཡུམ་ཡང་དེ་རུ་བསྒོམ་བྱས་ལ། །ཕྱོགས་བཅུ་གདུག་པ་ཐམས་ཅད་ཀུན། །མ་ལུས་ཚམ་
ངམ་དྲག་པར་བྱ། །བཟླས་པའི་སྙིང་པོ་མ་ནོར་བར། །སྒྲ་དང་འདུ་བྱེད་རབ་སྤངས་ཏེ། །བདེ་ཞིང་ཡིད་འོང་གནས་དག་ལས། །རབ་ཏུ་སྡང་མིག་སྡང་སེམས་བཅས། །སྒྲ་དང་བཅས་པའི་སེམས་སྤངས་ཏེ། །ཉི་མ་ཤར་ནས་ནུབ་ཀྱི་བར། །རྒྱུན་དང་དུས་སུ་བསྟན་པའོ། །

བར་བར་བསྐུལ་བའི་ལས་བྱ་ཞིང་། །བཅོལ་བའི་ལས་དག་རབ་ཏུ་བརྗོད། །དེ་ནས་བཅོམ་ལྡན་འདས་ཁྲོ་བོ་གཤིན་རྗེའི་ཚོགས་ཐམས་ཅད་ཡུམ་བཙུན་མོ་དང་གཉིས་སུ་མེད་པར་བྱས་ཏེ། བཟླས་པའི་སྔགས་འདི་སྐུ་དང་གསུང་དང་ཐུགས་ལས་ཕྱུང་ངོ་། །
ཨོཾ་ཧྲཱིཥྚྲི་པི་ཀྲི་ཏཱ་ན་ན། ཧུྃ་ཧུྃ་པ་ན་ཨ་ནུ་ད་བྷ་བ། སརྦ་དྷརྨ་ཙ་ཙཱརྱ་ཨ་ཏི་བ་ཧྃ། ཨོྃ་ལྃ་ཡྃ་ཨྃ། བཛྲ་བོ་དྷི་ཏ་ཐཱ་ག་ཏ་ཀྲོ་དྷི་ཤྭ་རི། ཨ་བྱི་ཏ་བཛྲ་ཀྲོ་དྷི་ཤྭ་རི། ཧེ་ཧེ་ཧྃ་ཧྃ། སྔགས་འདི་རབ་ཏུ་བརྗོད་བྱས་པས། །ཁ་དོག་ཆེ་ཞིང་ལུས་པོ་ཆེ་བ་དང་། །རྒྱ་དག་ཡོངས་སུ་
མ་ཆད་ཐམས་ཅད་ནམ་མཁའ་སྟེ། །གསལ་བའི་ཤེས་རབ་ཐམས་ཅད་ནམ་མཁའ་འདྲ། །མཐར་ཕྱིན་སྔགས་ཀྱི་ལུང་ལ་མཁས་པར་བྱ། །དེ་ཡི་སྦྱོར་བ་ཐམས་ཅད་དགྱེས་སྐོངས་ཤིང་། །དབང་སྡུད་སྔགས་སྟེ་དྲག་པོའི་ལས་དང་སྦྱར། །མི་དམིགས་གཙོ་
བོའི་སྔགས་དང་ཕྱག་རྒྱར་གནས། །སྒྲོལ་དང་མཐར་ཕྱིན་ཕྲིན་ལས་གནས་སུ་བསྟན། །ཏིང་འཛིན་རིམ་པ་འདི་དག་ལྡན་པར་བྱ། །ཁྲོ་བོ་དེ་བཞིན་གཤེགས་པའི་ཏིང་ངེ་འཛིན་དང་། སྒྱུ་མ་ལ་དབང་སྒྱུར་བའི་ཏིང་ངེ་འཛིན་དང་། གོ་འཕང་ཆེན་པོ་ལ་སྦྱར་
བའི་ཐབས་ཀྱི་ཏིང་ངེ་འཛིན་དང་། རྗེས་སུ་བསྟན་པའི་ཆོ་འཕྲུལ་དང་ལྡན་པའི་ཏིང་ངེ་འཛིན་དང་། ཐུགས་རྗེས་ཞེ་སྡང་སྒྲོལ་བའི་ཏིང་ངེ་འཛིན་དང་། ཤེས་རབ་ཀྱིས་འདོད་ཆགས་སྒྲོལ་བའི་ཏིང་ངེ་འཛིན་དང་། །ཡེ་ཤེས་ཀྱིས་གཏི་མུག་སྒྲོལ་བའི་ཏིང་ངེ་འཛིན་
དང་། ཡོན་ཏན་གྱིས་ང་རྒྱལ་འཇོམས་པའི་ཏིང་ངེ་འཛིན་དང་། འབད་པ་མེད་པའི་བརྩོན་འགྲུས་ཀྱིས་ཕྲག་དོག་འཇོམས་པའི་ཏིང་ངེ་འཛིན་ཏོ། །དེ་དག་འཇོམས་པའི་སྔགས་ནི་འདི་དག་གོ། །པྲཛྙཱ་ཀུ་ལ། ཛྙཱ་ན་ཀུ་ལ། དྷ་ཀ་ཀུ་ལ། གུ་ན་ཀུ་ལ། བཱིརྱ་
ཀུ་ལ། བྷཱུ་ཏ་ཀུ་ལ། བཛྲ་ཀུ་ལ། པདྨ་ཀུ་ལ། ཀརྨ་ཀུ་ལ། རཏྣ་ཀུ་ལ། སརྦ་ཏ་ཐཱ་ག་ཏ་ཧོ། ཞེས་བརྗོད་ནས་འདི་སྐད་ཅེས་གསུངས་སོ། །དཔེར་ན་མེ་དང་འོད་བཞིན་དུ། །འོད་ལ་སྦྲང་མ་འདུ་ན་ཡང་། །མེ་ལྕེའི་དྲོད་ནི་འོད་ལ་ཡོད། །འོད་

ཀྱིས་སྦྲང་འཚིག་ཅི་བཞིན་དུ། །སྐྱོན་གྱིས་དྲི་མ་ཐམས་ཅད་དང་། །བདུད་དང་མུ་སྟེགས་ལོག་འདྲེན་དང་། །མི་མཐུན་པ་ཡི་དགྲ་དང་བགེགས། །ཤེས་རབ་ཐབས་ཀྱིས་གཟིར་གནོན་པའི། །མེ་ལྕེ་དང་ནི་སྦྲང་མ་འདྲའོ། །ཐ་དད་པ་ཡི་མི་མཐུན་པའང་། །འཕགས་པ་འཇམ་དཔལ་
གཤིན་རྗེ་ཉིད། །འཁྲིགས་པ་མེད་ཅིང་སྒྲོལ་བར་བྱེད། །མི་སྐྱེ་ཡེ་ཤེས་རལ་གྲི་ཡིན། །ཉོན་མོངས་སྡུག་བསྔལ་དྲལ་བྱས་ནས། །གནས་དང་གནས་མ་ཡིན་པ་ཡི། །རྒྱུ་དང་རྒྱུ་མ་ཡིན་པ་ཡི། །ཉོན་མོངས་སེམས་ཅན་མཐོ་རིས་གནས། །བསྒྲལ་བའི་ཞིང་དུ་སྨོས་པ་དེ། །དེ་ལ་
དེ་བཞིན་དྲག་ཏུ་བྱ། །རིགས་དང་ལོ་གྲངས་མཐུན་པ་ལ། །དེ་བཞིན་བྱས་ན་སྐྱོན་པ་སྟེ། །དེ་དག་ཡོངས་སུ་ཤེས་པར་བྱ། །ལས་དང་བྱ་བ་རྩོལ་བ་རྣམས། །ཉམས་ཀྱི་ཕྱག་རྒྱ་རང་དོན་སད། །དེ་རྟགས་དཀའ་བ་མི་འགྱུར་ཏེ། །མི་ལ་ཡ་ཡི་འོག་གོས་ལ། །གི་ཝང་དག་
གིས་བྲིས་བྱས་ཏེ། །འོག་ནས་འབྱུང་བའི་གསང་སྔགས་དང་། །གང་བྱ་སྤེལ་ལ་བྲིས་བྱས་ལ། །རཀྟ་དག་གི་ཁ་ཆུས་བྲན། །ཐུབ་པ་དྲུག་གི་སྙིང་པོ་བྲི། །གསང་བའི་སྔགས་འདི་དྲག་ཏུ་བརྗོད། །ཨོྃ་ཧྭིཥྚྲྀ་ཀྲོ་དྷ་བི་ཀྲི་ཏ། ཧྲིཥྚྲྀ་ཀྲོ་དྷི་མ་ར་ཏ། པྲ་སང་ཧེ་ཏེ་བ་མུ་ཀ །
ཧེ་ཧང་ཧེ་ཧང་། ཀཱ་ལ་རཱུ་པ་ཧུྃ་ཧུྃ་ཕཊ་ཕཊ་ཨ། དེ་སྐད་གསུང་གི་སྒྲ་བསྒྲགས་པས། །དགྲ་དང་བགེགས་དང་མུ་སྟེགས་དང་། །བདུད་དང་སྲིན་པོ་མ་ལུས་རྣམས། །གཟིར་ཅིང་གནོན་པ་དྲག་ཏུ་བྱ། །མི་མཐུན་ཕྱོགས་ཀྱི་འབྱུང་པོ་དེ། །གདུལ་བར་བྱ་བའི་དོན་ཆེད་དུ། །
ཁྲོ་བོའི་སྐུ་རུ་བསྒོམ་བྱས་ཏེ། །ཐམས་ཅད་བསྒྲལ་བར་བྱ་བ་ཡི། །རང་བཞིན་གྲུབ་པ་འདི