Kinh tạng Tây Tạng (Kangyur Đại Học) — 099_རྙིང་རྒྱུད།_ག

་འཇིག་པར་འགྱུར་རོ། །དེས་ན་ཕྱོགས་ཐམས་ཅད་འཁོར་དང་བཅས་པ་འདུས་
ལ། བདག་གི་བཀའ་ཉན་པར་མཛོད་ཅིག་ཅེས་བསྒྲགས་སོ། །དེའི་ཚེ་འཇིག་རྟེན་གྱི་དྲག་བྱེད་ཆེན་པོའི་ཚོགས་ཀྱིས་རང་རང་གི་རྫུ་འཕྲུལ་བསྟན་ཅིང་སྨྲས་པ། ཁྱེད་ཇི་ལྟ་བུའི་ང་རྒྱལ་ཅན་ཅིག་ཡིན། ངེད་རྣམས་རེ་རེས་ཀྱང་འཁོར་དཔག་ཏུ་མེད་པ་སྐྱོང་བའི་རྒྱལ་པོ་ཆེན་པོ་
ཡིན་པས། ཡུལ་འཁོར་གྲངས་མེད་པ་ལ་དབང་བྱེད་ཅིང་། གཞན་གྱི་རེག་ནས་དམ་པར་གྱུར་པ་ལགས་པས་ཁྱོད་རང་ཞི་བ་ལ་གནས་ན་ལེགས་སོ་ཞེས་མཐུན་པར་བརྗོད་པས། བདུད་ཀྱི་རྒྱལ་པོ་ཡང་ཤིན་ཏུ་ཉོན་མོངས་པས་རྒྱས་ཏེ་གཞན་དག་ལ་སྨྲས་པ། ལྷར་བཅས་

འཇིག་རྟེན་འདི་དག་ཀུན། །ང་ཡི་བཀའ་ལས་གནས་པ་ཡིན། །སྐྱེ་འགྲོ་མ་ལུས་གང་དག་ཀུན། །རྒྱལ་པོའི་བཀའ་གསང་ཉན་པར་གྱིས། །ཁམས་གསུམ་བདག་པོ་ལྷ་ཡི་ལྷ། །ས་རྣམས་ཀུན་གྱི་ས་སྟེང་པ། །བདག་ནི་མཐུ་དང་རྫུ་འཕྲུལ་ཚད། །ཀུན་གྱིས་འགྲན་པར་
ནུས་མ་ཡིན། །ང་ཡི་བཀའ་ལས་འདའ་བྱེད་ན། །སྲོག་སྲིད་བརླག་ཅིང་གནས་ཀྱང་འཐོར། །ཞེས་བརྗོད་དོ། །དེ་ནས་ཚངས་པའི་རྒྱལ་པོས། རང་གི་འཁོར་དཔག་ཏུ་མེད་པ་བསྡུས་ཏེ། དེ་དག་གི་དབུས་ནས་སྲིན་པོ་ཆེན་པོའི་གཟུགས་འཛིན་པའི་ཁྲོ་བོར་གནས་ནས། རང་
གི་མཐུ་ལས་སྤྲུལ་པའི་ཁྲོ་བོ་དང་། མཚོན་ཆའི་ཚོགས་སྤྲོ་བར་མཛད་དོ། །དེ་བཞིན་དུ་ཁྱབ་འཇུག་དང་། དབང་ཕྱུག་ཆེན་པོ་དང་། བརྒྱ་བྱིན་དང་། ཚོགས་ཀྱི་བདག་པོ་དང་། བྷྲྀང་གི་རི་ཏི་དང་། གཞོན་ནུ་གདོང་དྲུག་པ་རྣམས་ཀྱིས་ཀྱང་རང་རང་གི་འཁོར་དང་དཔག་
ཏུ་མེད་པ་བསྡུས་ཏེ། དེ་དག་གི་དབུས་ན་འགྱིང་ཞིང་སྤྲུལ་པ་བསམ་གྱིས་མི་ཁྱབ་པར་སྤྲོས་ཏེ། དབང་དང་རྫུ་འཕྲུལ་སྟོན་ཏོ། །རི་རབ་ཀྱི་ཁ་ཁྱེར་ལ་གནས་པའི་རྒྱལ་པོ་ཆེན་པོ་བཞིས་ཀྱང་རང་རང་གི་འཁོར་གྱི་དབུས་ན་འགྱིང་ཞིང་མཐུ་དང་རྫུ་འཕྲུལ་སྟོན་པར་མཛད་
དོ། །གསེར་གྱི་རི་ལ་གནས་པའི་ཕྱོགས་སྐྱོང་བརྒྱ་བྱིན་དང་། དབང་ལྡན་དང་། གཤིན་རྗེ་དང་། བདེན་བྲལ་དང་། ཆུ་ལྷ་དང་། གནོད་སྦྱིན་དང་། ཉི་མ་དང་། སའི་ལྷ་རྣམས་ཀྱིས་ཀྱང་རང་རང་གི་གནས་དང་བཅས་པར་འཇིགས་པའི་མཚོན་ཆ་དང་བཅས་པར་འཁོད་
དོ། །ཉི་མ་དང་། ཟླ་བ་དང་། མིག་དམར་དང་། ཕུར་བུ་དང་། པ་བ་སངས་དང་། སྤེན་པ་དང་། གཟའ་ཆེན་པོ་རྣམས་ཀྱིས་ཀྱང་རང་རང་གི་འཁོར་དང་བཅས་པས་འཇིགས་པའི་ཁྲོ་བོའི་ཚོགས་དང་། མཚོན་ཆར་བཅས་པས་འཁོད་དོ། །མཐའ་ཡས་དང་།
འཇོག་པོ་དང་། སྟོབས་ཀྱི་རྒྱུ་དང་། རིགས་ལྡན་དང་། ནོར་རྒྱས་དང་། དུང་སྐྱོང་དང་། པདྨ་དང་། ཆུ་ལྷ་རྣམས་ཀྱིས་རང་རང་གི་གཡོག་འཁོར་རྣམས་དང་། འཇིགས་པའི་སྤྲུལ་པས་འཁོད་དོ། །དེ་བཞིན་དུ་ཁམས་གསུམ་གྱི་དྲེགས་བྱེད་ཀྱི་ཚོགས་གནས་

པའི་གནོད་སྦྱིན་དང་། དྲི་ཟ་དང་། གྲུལ་བུམ་དང་། འགྲོ་བ་དྲུག་གཙོ་བོ་དབང་ཆེ་ཞིང་མཐུ་ཡོད་པ་རྣམས་དང་། མ་མོ་རྣམས་དང་། གཤིན་རྗེ་དང་། ལྷ་མ་ཡིན་རྣམས་དང་། འདབ་བཟངས་དང་། སྲིན་པོ་དང་། ནམ་མཁའ་ལྡིང་དང་། རྒྱུ་སྐར་
གྱི་ཚོགས་སུ་བཅས་པ་རྣམས་ཀྱིས་ཀྱང་རང་རང་གི་འཁོར་གྱི་དཀྱིལ་འཁོར་གྱི་དབུས་ན་འཇིགས་པའི་གཟུགས་ཀྱི་མཚོན་ཆ་དང་ང་རོ་དང་བཅས་པས་རྣམ་པར་འཕྲུལ་ཞིང་འཁོད་དོ། །དེ་ནས་བདུད་ཀྱི་རྒྱལ་པོ་ཡང་ཉོན་མོངས་པ་སྐྱེས་ཏེ། རང་གི་འཁོར་
རྣམས་འདུ་བར་མཛད་ཅིང་རྫུ་འཕྲུལ་གྱི་ནུས་པ་ཅི་ཡོད་པ་དུས་འདི་དག་གཅིག་ཏུ་སྟོན་ནས། མཚོན་ཆ་སྣ་ཚོགས་འབར་བའི་གཞལ་ཡས་ཁང་ནས་དྲག་པོ་འབར་བར་འཇིགས་པའི་སྐུར་སྟོན་ཏོ། །ཁྲོ་མོའི་ཚོགས་དང་རོལ་པ་མཛད་པ་ལགས།
འཁོར་བའི་ཚོགས་མཚོན་ཆ་མེ་འོད་བཅས་པ་ཕྱོགས་བཅུར་སྤྲོས་ཏེ་ནམ་མཁའ་ཐམས་ཅད་གང་བར་བྱས་ནས་ཐོག་སེར་ནད་དང་ཚུབ་མ་ཐམས་ཅད་སྐྱེས་སོ། །དེས་འཇིག་རྟེན་གྱི་ལྷ་ཀུན་མྱོས་ཤིང་རྨོངས་པར་གྱུར་པ་དང་། །འཇིགས་པའི་ཚོགས་ཀྱིས་ཕྱོགས་
ཐམས་ཅད་ནས། འཁོར་བའི་མེ་འོད་འབར་བའི་མཚོན་ཆས་བསད་ཅིང་གཏུབས་པ་ལས། སོ་སོའི་ཚོགས་བྲེད་པར་གྱུར་ཏེ། རང་གི་སྙིང་པོ་ཕུལ་ཞིང་སྐྱབས་སུ་གསོལ་ལོ། །དེ་ནས་ལྷ་ཐམས་ཅད་འདུ་བར་བྱེད་པའི་བདུད་ཀྱི་སྡེ་དེ་དག་ལ་མནས་དོར་ཞིང་དམ་ཚིག་
བྱིན་ཏེ། སོ་སོའི་སྙིང་པོ་བླངས་ཏེ། འཁོར་ཚོགས་ཐམས་ཅད་རྗེ་དཔོན་དང་བྲལ་ཏེ། ལྷ་ཆེན་པོ་བརྒྱད་ནི་རང་གི་རྩེ་ལ་འཁོད་དོ། །རྒྱལ་པོ་ཆེན་པོ་བཞི་ནི་ཤར་གྱི་གླིང་ལ་འཁོད་དོ། །གནོད་སྦྱིན་དང་། ཕྱོགས་སྐྱོང་དག་ནི་ཤར་གྱི་གླིང་ཕྲན་གཉིས་སུ་འཁོད་དོ། །འགྲོ་བ་རིས་
དྲུག་གི་སེམས་ཅན་རྣམས་ནི་ལྷོར་དགོད་དོ། །དྲི་ཟ་དང་མ་མོ་རྣམས་ནི་ལྷོའི་གླིང་ཕྲན་ལ་དགོད་དོ། །ལྷ་མ་ཡིན་རྣམས་ནི་ནུབ་ཏུ་དགོད་དོ། །གཤིན་རྗེ་དང་འདབ་བཟངས་དང་སྲིན་པོ་རྣམས་ནི་ནུབ་ཀྱི་གླིང་གི་གླིང་ཕྲན་གཉིས་ལ་དགོད་དོ། །གཟའ་དང་རྒྱུ་སྐར་རྣམས་

ནི་བྱང་དུ་དགོད་དོ། །དེ་བཞིན་གཤེགས་པ་ཐམས་ཅད་ཀྱི་དགོངས་པ་གསང་བ་བླ་ན་མེད་པ་ལས། བདུད་ཀྱི་སྤྲུལ་པ་བསྟན་པའོ། །དེ་ནས་བདུད་ཀྱི་རྒྱལ་པོ་དེ་ཉིད་ཤིན་ཏུ་དགའ་ཞིང་འཁོར་ཐམས་ཅད་ལ་བཀའ་བསྒོ་བ། །རྒྱལ་པོ་གཅིག་གི་འཁོར་དུ་གནས་པས་ནི། །
ཡིད་དང་མཐུན་པར་སྤྱོད་པས་གནས་པ་ཡིན་པས། ཁྱེད་རྣམས་ཀྱིས་ཀྱང་ངས་ཅི་ལྟར་བསྒོ་བའི་བཀའ་བཞིན་ཉོན་ལ། ཐར་པའི་ལམ་འདི་ཆོད་ལ། སྟོན་པ་གཞན་ལ་གུས་པར་མ་བྱེད་ཅིག །ཁོ་བོའི་འཇིག་རྟེན་སྟོངས་པར་འོང་ངོ་། །བསམ་པ་རྒྱ་ཆེན་པོ་མེད་པའི་འགྲོ་བ་
འདི་དག་ནི། གཏི་མུག་ཅན་གྱི་རང་བཞིན་ཏེ། །བྱོལ་སོང་ལྟ་བུ་ཡིན་པས། བདེ་ལེགས་ཀྱི་གནས་ཐོབ་པའི་དོན་མེད་པ་ཡིན་ནོ། །ཡང་ཚིགས་སུ་བཅད་དེ་སྨྲས་པ། ཀྱེ་འདུ་ཤེས་མེད་པའི་འགྲོ་བ་དག །རང་གི་བདེ་བ་སྤོང་བྱེད་ཅིང་། །ཐར་པའི་ལམ་གཞན་
སྒྲུབ་བྱེད་པ། །དེ་དག་འཁྲུལ་པས་རང་རྒྱུད་བརླག །ཉེས་འདོད་བདེ་ལེགས་སྤོང་བྱེད་པ། །རྨོངས་པས་འགྲོ་རྣམས་སྙིང་རེ་རྗེ། །རེ་ཞིག་ཐུགས་རྗེ་སྐལ་ལྡན་པས། །བདག་གི་འཁོར་དུ་འདུས་པ་ཡིན། །གནས་གཞན་གོང་མ་ཐོབ་འདོད་པས། །བདག་ལ་དད་སེམས་
གུས་པར་གྱིས་ཤིག་ཅེས་བསྒོའོ། །དེ་དག་གིས་ཀྱང་དེ་ལྟར་ཉན་ཏེ། །རང་རང་གི་གནས་ཤོར་ཞིང་མྱ་ངན་གྱི་སེམས་སྐྱེས་ཀྱང་ཅི་ལྟར་བྱ་བའི་ཐབས་མེད་དེ། དེ་ལྟར་འཁོད་ཅིང་གནས་སོ། །དེ་ནས་བདུད་ཀྱི་རྒྱལ་པོ་རང་གི་གནས་སུ་སོང་སྟེ། འཁོར་དང་
བཅས་པ་རྣམས་དགའ་བའི་ལོངས་སྤྱོད་འདོད་པའི་ཡོན་ཏན་ལ་སྤྱོད་ཅིང་། །དགྱེས་པའི་གླུ་གར་དང་རོལ་མོ་ལ་སྤྱོད་དོ། །ཇི་ལྟར་ཁམས་གསུམ་ཀུན་གྱི་བདག་པོ་ནི་བདག་ཡིན་པས་འདི་ལས་ལྷག་པའི་བསྒྲུབ་བྱ་ནི་གཞན་དག་ཡོད་པར་བདག་གིས་མ་མཐོང་
ངོ་། །ད་སངས་རྒྱས་ཀྱི་ཚོགས་དང་བྱང་ཆུབ་སེམས་དཔའ་དག་ཀྱང་བདག་གི་དབང་དུ་བསྡུ་ན་ཐབས་ཅི་ལྟར་བརྩམ་ཞིང་། །རང་གི་འཁོར་དག་ལ་ཡང་འདྲི་བར་བྱེད་དོ། །དེ་ནས་བདུད་ཀྱི་གྲོང་ཁྱེར་ཀུན་ལ་བསྒོ་སྟེ། སངས་རྒྱས་ཀྱི་འཁོར་རྣམས་ལ་མི་དགེ་བའི་

ལྟས་དང་མཚན་མ་ངན་པའི་ཆོ་འཕྲུལ་སྣ་ཚོགས་ཀྱི་བསྒྲུབ་པ་ཐམས་ཅད་དུ་རབ་ཏུ་འཆད་ཅིང་། །ཅི་འདོད་པ་རྣམས་ལ་གྲུབ་པར་བྱ་ན་བདག་ཅག་ལ་མོས་པ་བྱེད་དོ། །དེའི་རྗེས་ལ་དེ་དག་གི་གཙོ་བོ་རྣམས་བདག་གི་འཁོར་དུ་འདུས་པའི་ཚེ་ཐབས་སྣ་ཚོགས་
ཀྱི་སྒོ་ནས་གདུལ་བར་བྱའོ། །གལ་ཏེ་འོངས་པར་མ་ནུས་པ་བདག་ནི་ཁོ་རང་གི་གནས་དེ་ཉིད་དང་བཅས་པ་གཞོམ་པར་བྱའོ་ཞེས་བརྗོད་དོ། །དེའི་སྟོང་གསུམ་གཡོ་བར་བྱེད་པའི་ཚོགས་ཀྱི་ཁྲོ་བོའི་མཚོན་ཆའི་ཚོགས་དང་བཅས་པ་སྤྲུལ་ནས། དཀར་པོའི་རིགས་ལ་དགའ་
བའི་འགྲོ་བ་རྣམས་མ་ལུས་བཅོམ་ཞིང་། ས་ལ་གནས་པའི་བྱང་ཆུབ་སེམས་དཔའ་རྣམས་ཀྱང་བརླག་པར་བཤམས་པ་ལས། བདེན་པའི་མཐུ་གང་ལ་གནོད་པར་མ་གྱུར་ཏོ། །དེ་ནས་རབ་ཏུ་ཁྲོས་ཏེ། བདག་གི་ཁམས་གསུམ་འདི་དུས་གཅིག་ཏུ་གདུལ་བར་བྱ་
སྤྱོད་པ་ལ། ངན་པའི་ཚུལ་ཅན་གཡོ་སྒྱུ་དང་བཅས་པ་འདི་དག་མི་འདུལ་ལམ། དེ་རང་གི་སྡེ་ཚན་འོག་མ་ལ་གནས་པ་ཀུན་བསྐུལ་ཏེ། ཐར་པའི་ལམ་ལ་གནས་པ་འདི་དག་རིགས་ཀྱིས་གདུལ་བར་བྱའོ་ཞེས་བརྗོད་དོ། །དེ་ནས་ཚངས་པ་ལ་སོགས་པ་བསྒོ་བར་མཛད་
པ་དང་། དེ་དག་གིས་ཀྱང་རང་རང་གི་སྤྲུལ་པ་དང་། མཚོན་ཆ་རྣམས་ཕྱོགས་ཀུན་དུ་སྤྲོ་ཞིང་། རང་གི་གསང་སྔགས་དྲག་པོའི་ཚོགས་དག་ཀྱང་རྗོད་པར་བྱེད་དོ། །དེས་འཇིག་རྟེན་འཁྲུགས་ཤིང་གཡོས་ནས་ཐམས་ཅད་བྲེད་པར་གྱུར་ཏོ། །བླ་ན་མེད་པའི་གསང་བ་
དཔལ་རྟ་མཆོག་རོལ་པའི་རྒྱུད་ལས། བདུད་ཀྱི་སྡེ་དང་བཅས་པ་ཤུགས་འབྱུང་བའི་ལེའུ་སྟེ་དགུ་པའོ།། །།དེ་ནས་བཅོམ་ལྡན་བདེ་ཆེན་མཆོག །སངས་རྒྱས་ཀུན་གྱི་བདག་ཉིད་ཀྱིས། །སྟོང་གསུམ་སོ་སོར་འདུལ་མཛད་ཕྱིར། །རྣམ་འཕྲུལ་ཏིང་འཛིན་
གནས་ལ་བཞུགས། །དེ་བཞིན་ཉིད་ལས་མ་གཡོས་ཀྱང་། །ཐུགས་རྗེ་ཆེ་དང་སྨོན་ལམ་མཐུས། །སོ་སོའི་ལས་རྟོག་མཐུན་བཞིན་དུ། །སྣ་ཚོགས་རྟོག་པའི་ཚུལ་མ་སྟོན། །འདོད་ཆགས་ལ་ཞེན་སྨོན་པ་དག །ཆགས་པ་ཆེན་པོས་འདུལ་བར་མཛད། །དེ་བཞིན་

ཞེ་སྡང་གཏི་མུག་དང་། །ང་རྒྱལ་ཕྲག་དོག་འདུལ་དོན་དུ། །མཐུན་བྱས་སྣང་བ་སྣ་ཚོགས་དང་། །མི་མཐུན་སྒོ་ནས་འདུལ་བར་མཛད། །པདྨོ་བདེར་གཤེགས་རྡོ་རྗེ་དོན། །རིན་ཆེན་རིན་ཆེན་ལས་སྣ་ཚོགས། །ཕྱག་རྒྱ་ཆེ་སོགས་འཁོར་ལོ་སྒྱུར། །ཇི་ལྟ་བ་བཞིན་དག་
པར་མཛད། །ཐབས་ཆེན་རྣམ་དག་པདྨོའི་དོན། །ཤེས་རབ་སྤྲུལ་པའི་མཆོག་འགྱུར་བས། །གར་གྱི་དབང་ཕྱུག་བདེ་བ་ཆེ། །རྡོ་རྗེ་ལྟ་ཉིད་སྤྲུལ་པར་མཛད། །གཞན་ཡང་མཛད་པ་རྒྱ་ཆེན་པོ། །སྣ་ཚོགས་མཐུ་ཡིས་འདུལ་མཛད་དེ། །དག་པའི་འགྲོ་བ་མཐུན་བྱས་
སྐུ། །གསེར་འོད་མཚན་དང་དཔེ་བྱད་ལྡན། །གོ་བྱེད་ཐེག་པ་བླ་ན་མེད། །ཟབ་མོ་གསང་སྔགས་ཇི་བཞིན་པར། །རྒྱལ་བ་བདེར་གཤེགས་ཕྱག་རྒྱའི་སྐུ། །རབ་སྤྲུལ་དཀྱིལ་འཁོར་སྣ་ཚོགས་པའི། །ལ་ལས་བྱང་སེམས་རྒྱ་ཆེན་མཆོག །ལ་ལར་ལམ་ལྔ་དག་པར་
སྦྱོར། །ལ་ལར་ཕ་རོལ་ཕྱིན་བཅུ་རྫོགས། །ལ་ལར་འབྲས་བུའི་དོན་ལ་སྦྱོར། །ལ་ལར་དགའ་ལྡན་ལྷ་ཡུལ་འཕགས། །ལྷུམས་སུ་ཞུགས་དང་བལྟམས་པ་དང་། །འཇིག་རྟེན་སྤྱོད་མཐུན་རོལ་རྩེད་སོགས། །གཞན་གྱི་སྐུར་སྤང་བྱ་བ་རྣམས། །བཅས་
ཀའི་ཅན་གྱི་བསམ་འཕྲུལ་པ། །མཐུན་འཇུག་ཐབས་ཀྱི་བྱ་བ་མཆོག །དཀའ་ཐུབ་མཛད་དང་དཀའ་བ་སྤྱོད། །རྡོ་རྗེ་གདན་ལ་ཡང་སངས་རྒྱས། །བདུད་འདུལ་མངོན་རྫོགས་སངས་རྒྱས་ཤིང་། །རྩེ་གཅིག་ཏིང་འཛིན་བསྐུལ་ནས་བཞུགས། །ཆོ་འཕྲུལ་
མཛད་པ་ཀུན་འདུལ་ཞིང་། །ཆོས་ཀྱི་འཁོར་ལོ་རིམ་བཞིན་བསྐོར། །མྱ་ངན་འདའ་ཚུལ་རིང་བསྲེལ་སྟོན། །ཞི་ཚོགས་ཁྲོ་བོར་འཁྱིལ་པ་དང་། །རང་བྱུང་དུད་འགྲོའི་གཟུགས་སྣ་ཚོགས། །སྣོད་ཀྱི་འཇིག་རྟེན་ཀུན་མཐུ་སྐུ། །ཚངས་པ་ཁྱབ་འཇུག་འཇིག་རྟེན་
སྐྱོང་། །བདུད་དང་སྲིན་པོ་གཟུགས་སོགས་ཀྱིས། །འགྲོ་བའི་ལས་རྟོག་དག་མཛད་ཅིང་། །རང་གི་ཡེ་ཤེས་དོན་བཀོད་བྱ། །དེ་ཚེ་འགྲོ་བའི་གནས་མཚོན་ཚོགས། །ལས་ཀྱི་སྟོབས་ཚོགས་མཐུས་བརྡབས་རྣམས། །དེ་བཞིན་ཉིད་མཐུས་ཚོགས་ཆེན་པོས། །ཡང་

དག་ལམ་ལས་རབ་གྲོལ་ཞིང་། །ང་རྒྱལ་ཆེན་པོའི་དྲེགས་ཚོགས་སྐྱེས། །རང་གི་མཐུ་དང་རྫུ་འཕྲུལ་སྟོན། །ཉོན་མོངས་ལས་ཀྱི་ལམ་ལ་ཞེན། །རང་གི་རིགས་ཚོགས་བསྡུ་བར་བྱེད། །འཇིག་རྟེན་གསུམ་འཇིག་ཨ་ལ་ལ། །ཁམས་གསུམ་
གཙོ་བོ་བདག་ཅག་རྣམས། །སུ་ཞིག་སྤྲུལ་པ་ཨ་ལ་ལ། །འཇིག་པར་མཛད་པའི་འོས་མ་ལགས། །རང་གི་དཀའ་ཐུབ་བདེ་གནས་པས། །མྱ་ངན་འདས་པའི་ལམ་མཆོག་སྟེ། །གཞན་གྱི་བསྟན་པ་ཅི་ཞིག་བྱ། །བདེ་ཚོགས་འཇིགས་པའི་ཡན་ལག་གོ། །སུ་
ཞིག་རང་གི་བདེ་སྤོང་ཞིང་། །གཞན་ནས་སྡུག་བསྔལ་དོན་གཉེར་བ། །གཟུགས་མང་སྤྲུལ་པ་བསམ་ཡས་ཀྱང་། །རང་གི་སྐུ་མཛེས་བསྒྱུར་བ་དཀའ། །སྒྲ་མང་སྤྲུལ་པ་བསམ་ཡས་པས། །རང་གི་གསུང་ཉན་འཕྲོ་བྱེད་དམ། །སེམས་རྟོག་བྱ་བའི་འོད་བཅས་
ཀྱིས། །ཏིང་འཛིན་རྩེ་གཅིག་འགྱུར་བ་མེད། །དྲག་པོའི་སྟོབས་མཆོག་གཟི་ལྡན་རྣམས། །རང་གིས་རང་སྤྱོད་བདེ་བར་སྡོད། །དེ་ནས་བདུད་དཔུང་དང་པོ་དང་། །དབང་ཕྱུག་ཚངས་པ་ཁྱབ་འཇུག་ཆེ། །རྒྱ་བྱེད་གླུ་དང་དྲེགས་བྱེད་རྣམས། །རབ་ཏུ་ཁྲོས་ཏེ་རང་གི་
མཐུས། །སྟོན་ཞིང་དྲག་པོའི་གསང་སྔགས་དང་། །གཏུམ་ཚིག་ང་རོ་འབོད་སྒྲོགས་བྱེད། །དེ་ཚེ་རྒྱལ་པོའི་བྱིན་བརླབས་མཐུས། །མཐུན་འཇུག་ཐབས་ཀྱིས་འདུལ་མཛད་དེ། །ཐེག་པ་གསང་བ་བླ་མེད་མཆོག །ཁྱད་པར་སྒོ་གསུམ་གསང་བྱེད་ཅིང་། །ཡང་
དག་དོན་ལ་བདེ་བཀོད་ཕྱིར། །ཐུགས་རྗེ་ཆེན་པོས་མཐུན་མཛད་དེ། །འཇུག་པའི་ལམ་རིང་བདེ་བསྟན་ཞིང་། །དགའ་བའི་སྒོ་ནས་བདེ་མཛད་ཀྱང་། །རང་གི་ཉོན་མོངས་དྲེགས་པའི་མཐུས། །དོན་འཇུག་མཐུན་པའི་སྤྱོད་སྒོ་འཇིག །གཏི་མུག་ཆེན་པོ་མུན་གཏིབས་ནས། །
ང་རྒྱལ་རི་བོ་ཀུན་དུ་བཀོད། །ཞེ་སྡང་མེ་ལྕེ་འབར་བསྲེགས་ཤིང་། །ཕྲག་དོག་རླུང་གིས་བསྐྱོད་བྱས་ནས། །འདོད་ཆགས་ཆུ་བོས་འབྱིན་པར་འགྱུར། །དྲེགས་པའི་མཐུ་ཡིས་རབ་ཁྲོས་ཏེ། །ཚོགས་རྣམས་གཅིག་ལ་གཅིག་བསྒོ་ཞིང་། །གསང་སྔགས་རྫུ་འཕྲུལ་སྟོབས་

ཕྱུང་ནས། །རབ་ཏུ་བསྒྲགས་པའི་མཐུ་ཡིས་ནི། །འཇིག་རྟེན་གསུམ་དག་འཁྲུག་པར་བྱེད། །མི་ནད་མུ་གེ་འཁྲུག་པ་དང་། །མཚོན་ཆ་ལོ་ཏོག་འབྲས་བུ་འཕྲོག །འབྱུང་པོའི་འཇིགས་གཟུགས་ཉེས་ཚོགས་རྣམས། །རྒྱུན་མི་འཆད་དུ་འཁོར་བར་འབྱུང་། །ས་གཞི་མེ་འབར་
ཆུ་བདག་བྱེད། །དུག་དང་དབྱིག་དུག་རླུང་བཞིན་གཡོས། །བདེ་ལམ་མཐོ་རིས་ཐར་ལམ་གཅོད། །མི་དག་སེམས་ཀྱིས་ནོན་འགྱུར་ཞིང་། །འགྲོ་རྣམས་སྡུག་བསྔལ་བསྐྱེད་བྱས་པས། །སངས་རྒྱས་རྣམས་ཀྱིས་ཐུགས་ཁྲལ་བསྐྱེད། །དེ་ནས་བྱང་ཆུབ་སེམས་བཅས་
པའི། །འཁོར་རྣམས་དུས་གཅིག་བསྟན་པར་བཞེངས། །གཙོ་བོའི་ཕྱོགས་སུ་འདུད་བྱེད་ཅིང་། །ལན་གྲངས་བསྐོར་ཞིང་ཕྱག་ཀྱང་འཚལ། །མགོན་པོ་བདེ་བ་མཉེས་བྱེད་ཅིང་། །མཆོད་ནས་གསོལ་བ་གདབ་པར་བྱ། །ཐུགས་རྗེ་ཆེ་མངའ་ལྷ་ཡི་ལྷ། །བྱམས་སོགས་
དགའ་བའི་བདུད་རྩི་ཆུས། །གདོས་བཅས་ཐལ་བར་བརླག་མཛད་པས། །ཐིམ་འགྱུར་རྡོ་རྗེ་ཡེ་ཤེས་ཚོགས། །ཆོ་འཕྲུལ་དཀྱིལ་འཁོར་བསྟན་དུ་གསོལ། །མཛད་པའི་བྱིན་བརླབས་བསྟན་དུ་གསོལ། །དེ་དག་ཉོན་མོངས་རླབས་འཁྲུགས་པས། །རང་གཞན་ཐར་
ལམ་བདེ་བར་འཇོམས། །བྱང་ཆུབ་སེམས་ཉིད་རླན་བྲལ་ལམ། །སྲིད་གསུམ་ཡལ་བར་དོར་བྱེད་ན། །ཐུགས་རྗེ་ཆེན་པོ་གང་ལ་གདགས། །ཨེ་མ་ཧོ་འབྲས་བུ་མྱ་ངན་འདས། །ཨེ་མ་ཧོ་བྱང་སེམས་པདྨའི་རྫིང་། །ཨེ་མ་ཧོ་བརྗོད་བྲལ་ཀུ་མུ་ད། །ཨེ་མ་ཧོ་མེ་ཏོག་
འབྲས་བཅས་ཤིང་། །འདི་དག་དཀྱིལ་འཁོར་རྣམ་དག་པས། །རིགས་མཆོག་མཚན་ཉིད་ཡོན་ཏན་གནས། །དུས་འདིར་དག་པར་ག་ལ་མཛད། །ཐུགས་རྗེ་ཆེན་པོ་ག་ལ་གདགས། །འདི་དག་སྐལ་ལྡན་གསུང་བའི་སྣོད། །རྡོ་རྗེ་ཐེག་པའི་བསྟན་པ་འཛིན། །ད་
ལྟར་རྣམ་རྟོག་རི་བོས་ནོན། །ཐབས་ཀྱིས་འདུལ་བར་མི་འགྱུར་བས། །ཤུགས་ཀྱིས་བསྒྲལ་བར་བྱ་བའི་ཕྱིར། །དཀྱིལ་འཁོར་སྣ་ཚོགས་བསྟན་དུ་གསོལ། །ཞེས་གསོལ་ཏོ། །དེ་བཞིན་གཤེགས་པ་ཐམས་ཅད་ཀྱི་དགོངས་པ་བླ་ན་མེད་པའི་གསང་བ་

དཔལ་རྟ་མཆོག་རོལ་པའི་རྒྱུད་ཆེན་པོ་ལས་མཛད་པ་ཆེན་པོའི་ལེའུ་སྟེ་བཅུ་པའོ།། །།དེ་ནས་བཅོམ་ལྡན་འདས་ཀྱིས་ལྷ་ཆེན་པོ་རྣམས་འདུལ་བར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། །རྡོ་རྗེ་བཀོད་པའི་དཀྱིལ་འཁོར་
ཆེན་པོ་འདི་ཉིད་སྐུ་གསུང་ཐུགས་ཀྱི་དབྱིངས་ནས་ཕྱུང་སྟེ་སྤྲུལ་པ་མཛད་དོ། །གྲུ་བཞི་པ་ལ་སྒོ་བཞི་པའི། །རྟ་བབས་རྒྱན་ཚོགས་ཀུན་གྱིས་སྤྲས། །རིན་ཆེན་ནོར་བུའི་ཕྲེང་སོགས་དང་། །བྷན་དྷ་དྲིལ་བུ་འདོད་པ་ལྔ་ཡི་ཚོགས། །མཆོད་པ་བླ་རེ་རྒྱལ་མཚན་གདུགས། །ཁ་
དོག་ཉི་ཤུ་རྩ་ལྔས་སྤྲས། །འཁོར་ལོ་རེའུ་མིག་དགུ་པ་ལས། །སེང་གེ་ལ་སོགས་གདན་ཁྲི་སྤྲས། །ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ། ཡེ་ཤེས་མ་འདྲེས་བདེ་ཆེན་གསལ། །རྣམ་འཕྲུལ་རིགས་
མཆོག་གཟུངས་ཀྱི་དམ་ཚིག་དང་། །ཁྲོ་ཞིང་འདྲེན་པའི་མདངས་ཀྱིས་གནས། །རིགས་གཉིས་ལུང་གིས་རྒྱུད་པའི་སྐུ། །དམར་ནག་ཞལ་གསུམ་ཕྱག་དྲུག་པ། །སེར་དཀར་དམར་བའི་ཞལ་གཉིས་དག །བཞིན་མདངས་ཚངས་པའི་ཚུལ་གྱིས་གནས། །དབུས་
མ་ཁྲོ་འཛུམ་བརྗིད་བག་དང་། །པདྨ་རྡོ་རྗེ་འཁོར་ལོ་དང་། །དྲིལ་བུ་རིན་ཆེན་རྩེ་གསུམ་འཛིན། །རིན་ཆེན་ཕྲེང་བའི་ཆུན་འཕྱང་དང་། །མུ་ཏིག་དོ་ཤལ་དཔུང་རྒྱན་སྤྲས། །སྟོད་གཡོགས་སྨད་དཀྲིས་ན་བཟའ་བཀླུབས། །དབུ་རྒྱན་སྙན་ཆ་སོར་གདུབ་ཚོགས། །
མཚན་བཟང་དཔེ་བྱད་མཛེས་པར་བརྒྱན། །རིགས་ཀྱིས་མཆོད་པས་དབུ་སྐྲ་སིལ། །རང་འོད་བཙུན་མོའི་སྐུ་བཅས་པ། །ཕྱུང་ནས་ཕྱོགས་བཅུའི་སྔགས་ཀྱིས་སྤྲོས། །ཧཱུྃ་ཕཊ་པདྨོ་གྷྲྀ་ག་ཛ་སྭཱ་ཧཱ། ཨོྃ་དུྃ་དྲུྃ་བྷིན་དྷ་ཛ་པྲ་མོ་ཧྃ། །མཛད་པའི་ཕྲིན་ལས་རྫོགས་
བྱས་ནས། །སླར་འདུས་བདག་པོའི་སྐུ་ལ་ཐིམ། །ཤར་དུ་རྣམ་སྣང་ཕྱག་རྒྱ་ཆེ། །གསེར་མདོག་ཞལ་གསུམ་ཕྱག་དྲུག་པ། །རྩེ་གསུམ་བེ་ཅོན་པདྨོ་རལ་གྲི་བྷན་དྷ་འཛིན། །ལྷོ་རུ་རིན་ཆེན་འབྱུང་ལྡན་ཉིད། །མཐིང་ག་ཞལ་གསུམ་ཕྱག་དྲུག་པ། །རིན་

ཆེན་པདྨ་གྲི་གུག་དང་། །ཤུ་ལ་བུམ་པ་རྩེ་གསུམ་འཛིན། །ནུབ་ཏུ་སྣང་བ་མཐའ་ཡས་སྐུ། །དམར་པོ་ཞལ་གསུམ་ཕྱག་དྲུག་པ། །ཐོད་དབྱུག་རྩེ་གསུམ་པདྨོ་དང་། །དགྲ་སྟ་འཁོར་ལོ་རལ་གྲི་འཛིན། །བྱང་དུ་དོན་ཡོད་གྲུབ་པ་ཉིད། །ལྗང་གུ་ཞལ་གསུམ་ཕྱག་དྲུག་པ། །
རལ་གྲི་རྡོ་རྗེ་དབྱུག་པ་མདུང་། །པདྨོ་རྩེ་གསུམ་གཤིན་རྗེའི་རྐང་། །ཀུན་གྱི་གཡས་དཀར་གཡོན་པ་ནི། །དམར་ལྗང་སེར་དང་ལེ་བརྒན་མདོག །རང་གི་བཙུན་མོའི་མགུལ་ནས་འཁྱུད། །ཞལ་གཅིག་ཕྱག་གཉིས་བདག་པོ་ལྷར། །སྐུ་མདོག་གསང་བའི་མདངས་
དང་ལྡན། །ཕྱག་དང་ཆ་ལུགས་ཀུན་གྱིས་བརྒྱན། །ཨོྃ་ཛི་ན་ཛི་ག་ལཾ། དྭེ་ཥ་ར་ཏི། སྭ་རཏྣ་དྷྲྀ་ག །མྃ་མོ་ཧ་ར་ཏི། ཨོྃ་ཨཱ་རོ་ལི་ཀ །པྃ་རཱ་ག་ར་ཏི། ཧ་པྲ་ཛྙཱ་དྷྲྀག །ཏཱྃ་བཛྲ་ར་ཏི། ཧཱུྃ་ཕཊ་སྭཱ་ཧཱ། །འོད་ཟེར་འཕྲོ་བའི་ཚོགས་བཅས་པས། །རིགས་ཀྱི་
དཀྱིལ་འཁོར་གསལ་བར་མཛད། །འཁོར་ལོ་སྒྱུར་རྒྱལ་ཆ་ལུགས་དང་། །དགྱེས་པའི་སྐྱིལ་ཀྲུང་ཚུལ་གྱིས་བཞུགས། །ཁྱམས་ཀྱི་ཕྱོགས་དང་མཚམས་རྣམས་སུ། །སེམས་དཔའ་བརྒྱད་དང་སེམས་མ་བརྒྱད། །ཐུགས་ཀྱི་ཡེ་ཤེས་ཡི་གེ་ལས། །
རང་གི་གསང་སྔགས་དག་གིས་གདོན། །ས་སྙིང་དཀར་སེར་རིན་ཆེན་འཛིན། །ནམ་སྙིང་མཐིང་ག་རལ་གྲི་འཛིན། །སྤྱན་རས་དམར་སྐྱ་པདྨ་འཛིན། །གསང་བདག་ལྗང་སྐྱ་རྡོ་རྗེ་འཛིན། །གཡོན་པ་པདྨོ་ཡུ་བ་ཅན། །བསྙེམས་པའི་ཚུལ་གྱིས་
ཕྱོགས་སུ་འདུད། །སྒེག་མོ་ཕྲེང་བ་དབྱངས་དང་གར། །དཀར་སེར་དམར་ལྗང་འོད་འཕྲོ་མདོག །མེ་ལོང་རིན་ཆེན་ཕྲེང་བ་དང་། །དབྱངས་སྙན་གར་ཐབས་མཛེས་པའི་ཚུལ། །ཨོྃ་ཀྴི་ར་ཛ་ཡ། ཧཱུྃ་ལཱ་སྱེ་ས་མ་ཡ་སྟྃ། །ཏྲཱྃ་མཱ་ལེ་ས་མ་ཡ་ཧོ། ཧྲཱིཿཔདྨ་བྷན་དྷ་ཧྲི།
གི་རྟི་ར་ཧོ་ཧྃ། ཨ་ནྲྀ་ཏི་ར་ག་ཡཱ་མི་ཧཱུྃ་ཕཊ། བྱམས་པ་དཀར་སེར་ཀླུ་ཤིང་འཛིན། །སྒྲིབ་སེལ་འཁོར་ལོ་མཐིང་ག་སྟེ། །འཇམ་དཔལ་དམར་སྐྱ་ཨུཏྤལ། །ཀུན་བཟང་ལྗང་སེར་རིན་ཆེན་སྙེ། །གཡོན་པ་པདྨོ་ལྕུག་མ་འཛིན། །སེམས་དཔའི་སྟབས་ཀྱིས་གདན་ལ་བཞུགས། །

བདུག་སྤོས་མེ་ཏོག་འཐོར་བ་དང་། །མར་མེ་དྲི་ཆབ་ལྷ་མོ་རྣམས། །སེར་དཀར་དམར་ལྗང་གོ་རིམས་བཞིན། །མཚན་དང་མཐུན་པའི་རྫས་ཀྱིས་མཛེས། །ཨོྃ་མེ་ར་ནི། ཛ་དྷཱུ་པ་པྲ་བེ་ཤ །ཐི་ལིང་སྭ་ར་མ་པ་ཡ། ཧཱུྃ་པུག་པ་ཨཱ་བེ་ཤ་ཧཱུྃ་སྭ་ར་ཙ་ཡ། བྃ་དཱི་པ་བུ་
གི་ནི། མུྃ་ཤི་ར་ཙ་ཡ། ཧོ་གན་དྷེ་ཙི་ཏ་ཡ་ཧཱུྃ་ཕཊ། །ཤར་སྒོར་གཤིན་རྗེ་གཤེད་པོ་ཆེ། །མཐིང་ནག་བེ་ཅོན་རྩེ་གསུམ་ཕྲེང་། །ལྷོ་སྒོར་སྟོབས་ཆེན་སེར་སྐྱའི་མདངས། །རྡོ་རྗེ་ཞགས་པ་རིན་ཆེན་ཕྲེང་། །ནུབ་སྒོར་རྟ་མཆོག་འཇིགས་བྱེད་རྒྱལ། །ཐོད་སྦྲུལ་དྲིལ་བུ་ལུ་གུ་
རྒྱུད། །བྱང་སྒོར་རྡོ་རྗེ་འཁྱིལ་པ་སྟེ། །ལྗང་སྐྱ་རྡོ་རྗེ་རྩེ་གསུམ་མཐུ། །ཁྲོ་བོ་ཆ་ལུགས་རྔམ་བརྗིད་དང་། །དུར་ཁྲོད་རིམ་པའི་ཆས་ཀྱིས་བརྒྱན། །ལྕགས་ཀྱུ་ཞགས་པ་ལྕགས་སྒྲོག་དྲིལ། །སྤྱན་དམར་འཇིགས་བྱེད་འོད་དཔུང་དང་། །རྡོ་རྗེ་མཆེ་སོགས་ཁྲོ་གཉེར་
ཅན། །ཡབ་ཡུམ་འཁྱིལ་པ་བརྐྱང་བསྐུམ་སྐུ། །ཧཱུྃ་ཕཊ་རུ་ལུའི་གསུང་འདོན་ཅིང་། །ལས་ཀྱི་འཁོར་ལོ་གནོན་པའི་ཚུལ། །ཨོྃ་རུ་ལུ་པདྨཱན་ཏ་ཀྲྀད་ཧཱུྃ་ཕཊ། །ཛ་བཛྲ་ཀྲོ་དྷཱི་ཤྭ་རི་ཧཱུྃ་པྲ་ཛྙཱནྟ་ཀྲྀད་ཕཊ། །ཧཱུྃ་རཏྣ་ཀྲོ་དྷི་ཤྭ་རི། །ཧཱུྃ་པདྨཱ་ན་ཏ་ཀྲྀད་ཕཊ། བཾ་པདྨ་ཀྲོ་དྷི་ཤྭ་
རི་ཧཱུྃ་བི་ག་ནཱན་ཏ་ཀྲྀད། ཧོ་ཀརྨ་ཀྲོ་དྷི་ཤྭ་རི་ཧཱུྃ་ཕཊ་སྭཱ་ཧཱ། །ཕྱི་ནང་མེད་པར་དཀྱིལ་འཁོར་ཆེན་པོ་སྟེ། །ཐུགས་རྗེ་ཡེ་ཤེས་ཆེ་ལས་སྤྲུལ། །ཕྱག་རྒྱ་བཞི་ཡི་རྒྱས་བཏབ་ཅིང་། །དབུ་ལ་རིགས་ཀྱི་བདག་པོས་བརྒྱན། །འོད་དཔུང་སྤྲུལ་པའི་ལྷ་འཁོར་གྱིས། །འཇིག་རྟེན་
གསུམ་པོ་སྣང་བྱེད་ཅིང་། །ཚངས་པ་ལ་སོགས་ལྷ་ཆེན་བརྒྱད་རྣམས་འགུགས། །རྡོ་རྗེ་བརྗིད་གནོན་སྔགས་ཀྱི་མཐུས། །དེ་དག་དྲན་པ་མེད་པར་འགྱུར། །མཚོན་ཆའི་ཚོགས་ཀྱིས་སྒྲོལ་བྱས་ཏེ། །དུག་གསུམ་ཕུང་པོ་གསོལ་བར་མཛད། །ཕྲིན་ལས་ཁྲོ་བོ་
བརྗིད་གླུ་ཡིས། །ལྷ་ཆེན་འཁོར་རྣམས་དབང་དུ་སྡུད། །དཀྱིལ་འཁོར་ཆེན་པོར་གཞག་བྱས་ནས། །སྔ་མའི་ཤ་རུས་གནས་ནས་སྟོན། །རྡོ་རྗེ་བདུད་རྩིའི་ཏིང་འཛིན་གྱིས། །ལྷ་ཆེན་རྣམས་ཀྱིས་སླར་ལུས་གསོལ། །འཁོར་བཅས་པ་ཡི་དབང་བསྐུར་ཞིང་། །

རྡོ་རྗེ་འཆང་གི་གྲལ་ལ་དགོད། །དམ་ཚིག་གསང་བའི་བརྡས་བསྒོས་ཤིང་། །ཕྲིན་ལས་བཀའ་ཉན་གཉེར་གཏད་དེ། །གཞལ་ཡས་ཁང་གི་རྒྱན་དུ་བཞག །ཀུན་ཀྱང་ཚིག་དབྱངས་མཐུན་པ་བསྒོས། །དམ་ཚིག་མནའ་སྲོག་ཐལ་མྱོང་འགྱུར་ཞེས་བརྗོད་དོ། །དེ་བཞིན་
གཤེགས་པ་ཐམས་ཅད་ཀྱི་དགོངས་པ་བླ་ན་མེད་པའི་གསང་བ་དཔལ་རྟ་མཆོག་རོལ་པའི་རྒྱུད་ཆེན་པོ་ལས་རྡོ་རྗེ་བཀོད་པའི་དཀྱིལ་འཁོར་སྤྲུལ་པའི་ལེའུ་སྟེ་བཅུ་གཅིག་པའོ།། །།དེ་ནས་པདྨོ་ཆགས་པའི་སྐུས། །གསུང་གི་གཟི་མདངས་རྒྱས་མཛད་དོ། །ཕྱག་
རྒྱ་རྫུ་འཕྲུལ་གནས་སྦྱོར་བས། །གསེར་མིག་འདབ་བཟངས་གྲོང་ཁྱེར་དང་། །ལང་ཀའི་གནས་ཚོགས་སྲིན་པོའི་སྡེ། །ཀླུ་རྒྱལ་དབང་དུ་བསྡུ་བའི་ཕྱིར། །རྫུ་འཕྲུལ་ཀུན་སྟོབས་འཁོར་ལོ་ཡིས། །ལྷ་ཆེན་ལ་སོགས་གདུལ་བར་དགོངས། །ཏིང་ངེ་འཛིན་ལ་སྙོམས་
ཞུགས་ཏེ། །པདྨོ་རྟ་མཆོག་སྤྲུལ་པ་མཛད། །དེ་བཞིན་ཉིད་དབྱིངས་སྙོམས་འཇུག་ལས། །སེམས་དཔའ་རྒྱལ་བ་ཀུན་གྱི་ཡབ། །རྡོ་རྗེ་འཛིན་ཐུབ་དབང་ཉིད་དང་། །རིགས་ཉིད་སྤྲུལ་པའི་ལུང་ལས་གྲུབ། །སྐུ་མདོག་དམར་པོ་རཱ་གའི་མདོག །ཞལ་གསུམ་རྟ་
མགོ་ལྗང་གུ་ཅན། །ཕྱག་ནི་གྲི་གུག་ཁ་ཊྭཱྃ་ག། །ཐོད་པ་ཁྲག་མེ་དཔུང་སྤྲུལ་ལྔ། །གནས་བརྒྱད་ཀླུ་བདག་ཐོད་ཕྲེང་དང་། །གླང་ཆེན་སྟག་གི་པགས་པ་གྱོན། །སྒྲ་སྐད་དྲག་པོ་ཕྱོགས་བཅུར་སྒྲོག །བགེགས་ལ་སོགས་པའི་ཆ་ལུགས་ཅན། །དྲང་སྲོང་ཁྲོས་
པའི་ཆ་ལུགས་ཀྱིས། །ཀླུ་ཡི་འགྲོ་བ་རྨོངས་མཛད་པ། །པདྨའི་གདན་ལ་བརྐྱང་བསྐུམ་གྱིས། །ཡུམ་ཆེན་དཔལ་ལྡན་མ་དང་སྦྱོར། །ཨོྃ་པདྨོ་གུ་རུ་ཧེ་ཧེ་རུ་ལུ་ཧཱུྃ་ཕཊ། འཁོར་ལོ་འབར་བ་ཕྱོགས་མཚམས་སུ། །ཡེ་ཤེས་ཁྲོ་བོ་ཆེན་པོ་བརྒྱད། །ཧྲཱི་ལས་གྲུབ་
པའི་འཇིགས་གཟུགས་ཅན། །རྟ་མགོ་ལྗང་གུ་བརྗིད་པ་ཡི། །ཤར་དུ་པདྨའི་དབང་ཕྱུག་ནི། །དཀར་པོ་ཞལ་གསུམ་ཕྱག་དྲུག་པའོ། །རྡོ་རྗེ་པདྨ་ཀླུ་ཞགས་དང་། །རིན་ཆེན་དབྱུག་པ་རལ་གྲི་མདུང་། །སེང་གེ་རྒྱལ་མོ་སྐུ་དང་འཁྲིལ། །སྣ་ཚོགས་མི་མཐུན་

ཞབས་ཀྱིས་གནོན། །ཉི་མ་ཟླ་བའི་སྙན་ཆས་བརྒྱན། །སྦྲུལ་གྱི་ཕྲེང་བས་གནས་ཀུན་བརྒྱན། །ལྷོ་རུ་གཟི་ཆེན་དྲག་པོ་ནི། །མདོག་ནག་རལ་གྲི་རྩེ་གསུམ་ལྔ། །རྡོ་རྗེ་རྩེ་གསུམ་མདའ་དང་གཞུ། །དྲག་པོ་གནས་ཀྱི་སྐུ་དང་འཁྲིལ། །མེ་རི་འབར་བས་ཀུན་
དུ་ཁྱབ། །སྟག་མོ་བཅིངས་པས་གཞན་གནས་འཇིགས། །སྤྲུལ་པའི་ཕོ་ཉ་མེ་འབྲུག་གི། །ཁྲོ་བོ་ཡི་ནི་དཀྱིལ་འཁོར་ཚོགས། །ནུབ་ཏུ་རྡོ་རྗེ་དྲ་བ་མཆོག །དམར་སེར་རྡོ་རྗེ་དབྱུག་པ་བྲི། །འཁོར་ལོ་སྦྲུལ་ཞགས་མེ་ལོང་ཆུ། །ལྷ་མོ་འཇིགས་ཆེན་ཞབས་ཀྱིས་གནོན། །
འོད་འབར་གློག་གི་ཕྲེང་བ་ཅན། །སྤྲུལ་པའི་ཕོ་ཉ་ཅེ་སྤྱང་གདོང་། །འབུམ་ཕྲག་གྲི་དང་ཐོད་ཁྲག་འཛིན། །བྱང་དུ་འོད་བྱེད་འཇིགས་ཆེན་སྐུ། །ལྗང་གུ་རྩེ་གསུམ་མདའ་བོ་ཆེ། །ནོར་བུ་དུང་ཁྲག་ལྕུག་མ་དུང་ཁྲག་འཆང་། །ར་རོ་མིག་དམར་ཟིལ་གྱིས་ནོན། །རྒྱལ་བདག་
ཁྲོ་བོའི་སྐུ་དང་འཁྲིལ། །ཅོད་པན་ཀླུ་མགོ་གདེངས་ཀའི་རྒྱན། །དུས་མཚུངས་ཕུད་ཀྱི་སྒྲ་ཆེན་སྒྲོགས། །ཀུན་ཀྱང་ཐོད་ཕྲེང་གཡང་གཞི་དང་། །དུར་ཁྲོད་གནས་འབྱུང་གཙང་སྨེ་བྱེད། །མཚམས་ཀྱི་ཁྲོ་བོ་ཆེན་པོ་བཞི། །རིགས་ཀྱི་ཕྱེད་གཟུགས་ཐིག་ལེས་མཚན། །ཞལ་
གསུམ་ཕྱག་དྲུག་འོད་མདངས་ཅན། །རྡོ་རྗེ་ཐོད་དབྱུག་གླུ་ཡི་སྒྲ། །ཅེ་སྤྱང་བྱ་ཁྱུང་གནམ་ལྕགས་སྤྲིན། །འོད་ཕྲེང་ཐིག་ལེ་དབྱུ་གུའི་རྒྱན། །རྣམ་འཕྲུལ་ཀླུ་ཐབས་ཨུ་ཧ་ར། །འདོད་ཡོན་ལྷ་མོའི་ཚོགས་ཀྱིས་བསྐོར། །ཀུན་དུ་སྤྱན་དམར་རྡོ་རྗེའི་མཚན། །གནས་སུ་
འཇིགས་པའི་ཧཱུྃ་སྒྲ་སྒྲོགས། །ཀླུ་ཡི་རྒྱལ་པོའི་གནས་ན་བཞུགས། །གཞན་གྱི་རྫུ་འཕྲུལ་འཇོམས་པར་བྱེད། །ཨོྃ་མ་ཧཱ་ཧ་ཡ་གྲཱི་བ་པདྨ་དྷ་རུ་ནྃ་བི་དྷ་ཧ་ར་ཧཱུྃ་ཕཊ་རྩ་བའི་སྔགས་སོ། །ཨོྃ་ན་མོ་ཨུད་ཏྃ་ཧེ་རུ་ལུ་རུ་ཀྃ་བ་མུ་ཁ། །ཨཱ་ཀ་ར་ཥ་ཡ་རཀྵ་ན་གྃ་གུ་རུ་ཧཱུྃ་ཕཊ་སྙིང་
བོའི་སྔགས་སོ། །ཨོྃ་པདྨ་རག་མ་ཀུརྱ་ར་ཀྃ་རུ་ལུ་རུ་ལུ་ཧཱུྃ་ཕཊ་ཉེ་བའི་སྙིང་པོའོ། །དཀྱིལ་འཁོར་ཆེན་པོའི་ཕྱོགས་བཞི་རུ། །ལྕགས་ཀྱུ་ལྕགས་སྒྲོག་ཞགས་པ་དྲིལ་བུ་རྣམས། །དཀར་དམར་སེར་ལྗང་འོད་མདངས་འབར། །སེང་གེ་ཅེ་སྤྱང་སྟག་འབྲུག་དང་། །

མགོ་བརྩེགས་སྤྲུལ་པའི་འཁོར་དང་བཅས། །རང་གི་ལས་ཀྱིས་འཁོད་པ་དང་། །འཇིགས་པའི་ཆ་ལུགས་རྔམ་གཟུགས་གནས། །ལས་མཛད་ཀླུ་ཡི་དཀྱིལ་འཁོར་འདུལ། །ཀླུ་ཆེན་བརྒྱད་སོགས་བསྡུས་བྱས་ན། །མཐུ་དང་རྫུ་འཕྲུལ་མེད་པར་བྱ། །རང་གི་དམ་ཚིག་
དྲན་པའི་ཤུགས། །སྤྱན་རྣམས་སྤྱན་ངར་འདོད་པར་བྱེད། །ཨོྃ་ན་ག་མེ་ག་ན་ན་ག་ར་ཙ་ཡ་ས་མ་ཡ་ཧཱུྃ། །དཀྱིལ་འཁོར་གསང་བར་དབང་བསྐུར་ནས། །འོད་བཟང་གཟི་མདངས་མེ་དཔུང་འབར། །རིགས་ཀྱི་དབུ་རྒྱན་གསལ་བྱེད་ཕྱེ། །ཡེ་ཤེས་འོད་ཚོགས་
གནས་བཅས་ཏེ། །དཀྱིལ་འཁོར་གསང་བར་གོམས་ཞུགས་ཀྱིས། །ཚུལ་འཛིན་དཀོན་མཆོག་མངོན་དུ་དབྱེ། །ཚོགས་རྣམས་མ་ལུས་མགྲིན་གཅིག་ཏུ། །གར་དབང་སྐུ་ལ་སྐྱབས་གསོལ་ཞིང་། །འདོད་ཡོན་གསོལ་འདེབས་དམ་བཅས་པ། །བསོད་ནམས་
ཕུང་པོའི་གཏེར་ལ་སྤྱོད། །ཀྱེ་མ་དཀྱིལ་འཁོར་ཡ་མཚན་ཆེ། །བདག་ཅག་འཁོར་རྣམས་རབ་སྒྲོལ་མཛད། །རྒྱལ་བའི་དཀྱིལ་འཁོར་དཔེ་བྲལ་བས། །ཉི་མའི་དཀྱིལ་འཁོར་བཞིན་དུ་གནས། །བདེ་ཆེན་ལམ་འདི་སྔོན་མ་རྟོགས། །ད་ལྟར་ཐུགས་
རྗེ་དྲིན་གྱིས་རྙེད། །རྣལ་འབྱོར་གསང་བར་འཛིན་བྱེད་ཀྱིས། །ཇི་ལྟར་བསྒོས་པའི་བཀའ་བཞིན་འགྱིད། །རྡོ་རྗེ་གསང་བའི་དམ་འདི་ལས། །གལ་ཏེ་ཉམས་ན་འདས་པར་ཤོག་ཅེས་དམ་བཅས་སོ། །དེ་བཞིན་གཤེགས་པ་ཐམས་ཅད་ཀྱི་དགོངས་པ་བླ་ན་མེད་
པའི་གསང་བ་དཔལ་རྟ་མཆོག་རོལ་པའི་རྒྱུད་ཆེན་པོ་ལས་རྟ་མགྲིན་དབང་གི་དཀྱིལ་འཁོར་སྤྲུལ་པའི་ལེའུ་སྟེ་བཅུ་གཉིས་པའོ།། །།དེ་ནས་བཅོམ་ལྡན་པདྨའི་སྐུས། །ཡུམ་ལ་ཆགས་ཚུལ་འཛུམ་མདངས་ཀྱིས། །བཀའ་ཡི་བསྒོ་བས་དགྱེས་
མཛད་དེ། །མི་ཤིགས་ཏིང་འཛིན་ལ་གནས་མཛད། །ཕྱོགས་སྐྱོང་དྲི་ཟ་རྒྱལ་ཆེན་པོ། །རང་གི་ཆུང་མ་ཚོགས་བཅས་པས། །གནས་གཞན་འཇིགས་པར་མཛད་པ་དང་། །རང་གི་མཐུས་བཅུས་འདུལ་བར་མཛད། །སྐུ་ནི་བཻ་ཌཱུརྱ་འཚེར་བའི་མདངས། །

ཞལ་གསུམ་ཕྱག་རྒྱ་དྲུག་གིས་རོལ། །རིན་ཆེན་མཛོད་བུམ་སྔགས་ཆེན་ལྕུག །འཁོར་ལོ་ཕྲེང་བ་མ་ག་ཏ། །རྒྱན་དང་ཆ་ལུགས་རིན་ཆེན་ཚོགས། །དབྱིངས་ཀྱི་དབང་ཕྱུག་ཡུམ་ཆེན་མོ། །དམར་སྐྱ་ཟབ་མོའི་ཚུལ་དུ་སྦྱོར། །འོད་འཕྲོ་སེམས་དཔའི་གདུག་
པའི་འཕྲོ། །རིགས་ལྔའི་དབུ་རྒྱན་རིན་ཆེན་ཕྲེང་། །ཕྱག་རྒྱ་བཞི་ཡིས་བརྗིད་པའི་ལྷ། །རིན་ཆེན་འབར་བའི་གཞལ་ཡས་ཁང་། །གྲུ་བཞི་སྒོ་བཞི་རྟ་བབས་བརྒྱན། །བར་ཁྱམས་འཁོར་གྱི་དབུས་ནས་འགྱིང་། །པདྨའི་ལྟེ་བར་སྐྱིལ་ཀྲུང་བཞུགས། །ཤར་དུ་འཇོམས་བྱེད་
རྡོ་རྗེའི་སྐུ། །དཀར་གསལ་རྡོ་རྗེ་དྲིལ་བུ་འཛིན། །ལྷོ་རུ་རིན་ཆེན་བློ་གྲོས་སྐུ། །དཔལ་བེའུ་གདུགས་མཛེས་འོད་མང་སེར། །ནུབ་ཀྱི་ཕྱོགས་ཀྱི་རྒྱལ་པོ་རྟོག །དཀར་དམར་པདྨ་གླེགས་བམ་འཛིན། །བྱང་དུ་འཇིག་རྟེན་ཀུན་སྒྲོལ་བ། །ལྗང་སྐྱ་རྡོ་རྗེ་རྒྱ་གྲམ་བྲི། །ཤར་ལྷོ་དྲ་བའི་
དབང་ཕྱུག་ནི། །སེར་སྐྱ་རིན་ཆེན་བྷྲྀང་ག་ར། །ལྷོ་ནུབ་ཆོས་ཀྱི་ལྷུན་པོ་མཆོག །རྩེ་གསུམ་པདྨའི་ལྕུག་མ་འཛིན། །ནུབ་བྱང་རྒྱལ་བའི་ཡེ་ཤེས་ཏོག །སྔོ་སྐྱ་སེང་གེའི་བུམ་པ་འཛིན། །བྱང་ཤར་སྒྱུ་འཕྲུལ་དྲ་བ་བརྩེགས། །ལྗང་སེར་གཡུང་དྲུང་རྡོ་རྗེ་མཚན། །འདི་དག་འཁོར་
ལོས་སྒྱུར་རྒྱལ་བྱིན། །མཚན་དང་དཔེ་བྱད་འོད་མདངས་རྒྱན། །སྐྱེས་བུ་ཆེན་པོའི་ལོངས་སྤྱོད་འཕེལ། །ཆ་མཐུན་ཡུམ་དང་འཁྲིལ་བར་བཞུགས། །ཨོྃ་བི་ཏ་ཛྙཱ་ན་ཏ་ན་སྃ་བོ་ག་ཏ་ཧཱུྃ་ཕཊ། ཨོྃ་དྷརྨ་མུ་ནི་ནས་ནས་ཧཱུྃ། ཨོྃ་བི་ཧ་ར་ཕྲ་མོ་ཐ་ན་ཧཱུྃ་ཕཊ། ཨོྃ་ཛྙཱ་ན་ལོ་ཏྲ་སྃ་བོ་ག་ཡ་ཧཱུྃ་
ཕཊ། ཨོྃ་རཏྣ་མ་རུ་དྷེ་ས་གྲུྃ་བ་ཧཱུྃ་ཕཊ། ཨོྃ་མ་ཧཱ་ཤུ་ཏི་མུ་ས་མོ་ཧ་ཧཱུྃ་ཕཊ། ཨོྃ་བུད་དྷ་བུད་དྷ་སརྱ་ན་ཀུ་མཱ་ར་ཧཱུྃ་ཕཊ། ཨོྃ་ན་མ་ག་ག་ན་སི་ཏ་ཡོ་ག་ཧཱུྃ་ཕཊ། ཨོྃ་ནི་ས་ཧ་ཧེ་ཧི་ཧུ་མུ་ག་ར་བ་རི་ཧཱུྃ་ཕཊ། འཁོར་ལོའི་གསང་སྔགས་རབ་བརྗོད་པས། །ལྷ་རྣམས་ཕྱི་ཡི་གནས་
སུ་སྤྲོ། །དྲག་པོའི་རྒྱུ་འབྲས་སྦྱང་བྱས་ཏེ། །གནས་ཀུན་དག་པའི་ཡེ་ཤེས་ཆེ། །རིགས་མཆོག་ཡེ་ཤེས་འོད་གསལ་བས། །ཤར་གྱི་དབང་པོ་དྲི་ཟ་སོགས། །གནས་མགོན་སྐྱབས་དང་དབང་དུ་མཛད། །ཉོན་མོངས་ལས་ཀྱི་དྲེགས་པའི་ཚོགས། །རང་རྒྱུད་ཞི་ནས་བྱང་

སེམས་བཅས། །བཅོམ་ལྡན་འདས་ཀྱི་སྤྱན་སྔར་འཁོད། །སྙིང་པོ་མདོངས་གསོལ་ཕུལ་བར་འགྱུར། །ཨོྃ་ཏྲག་ཤ་ཀ་སརྦ་ར་མ་མས་ཧཱུྃ་ཧཱུྃ་སྭཱ་ཧཱ། །བཅོམ་ལྡན་འདས་བདག་ཅག་གི་རིག་པ་འདི་བྱིན་གྱིས་བརླབ་ཏུ་གསོལ། །བསྟན་པ་མྱུར་དུ་སྤེལ་ཅིག །རྒྱ་ཆད་པའི་
སྔགས་ཀྱིས་ཐམས་ཅད་བསྲུང་བར་གྱུར་པ་བདེ་ལེགས་སུ་བྱ་བའི་གནས་པ་བདག་ཅག་དུས་ཐམས་ཅད་དཀྱིལ་འཁོར་འདིར་གནས་ཤིང་དེ་འཛིན་པའི་རྣལ་འབྱོར་པ་དག་བསྲུང་བར་བྱ་བ་དང་བྲན་བཞིན་དུ་གནས་པར་བགྱིའོ། །སླར་ཡང་བདག་ཅག་རྣམས་མགོན་པོས་
བཞེངས་ལ་བྱིན་གྱིས་བརླབས་ཏེ་དབང་བསྐུར་བ་དང་གྲོལ་བར་མཛད་དུ་གསོལ་ཞེས་གསོལ་བ་བཏབ་པ་དང་། །བཅོམ་ལྡན་འདས་ཀྱིས་རིག་པའི་སྙིང་པོ་འདི་བྱིན་གྱིས་བརླབས་སོ། །ཨོྃ་ཨུ་ཨོྃ་མྲྀ་ཏ་བི་ག་ན་ཤུ་ཏ་ཧཱུྃ་ཕཊ་སྭཱ་ཧཱ་ཞེས་གསུངས་པ་དང་། །དེ་དག་དང་
པོའི་སངས་རྒྱས་བཞིན་དུ་འོད་ཟེར་དང་བཅས་པར་གྱུར་ནས་གཞལ་ཡས་ཁང་གི་རྒྱན་དུ་འཁོད་དོ། །དེ་བཞིན་གཤེགས་པ་ཐམས་ཅད་ཀྱི་དགོངས་པ་བླ་ན་མེད་པའི་གསང་བ་དཔལ་རྟ་མཆོག་རོལ་པའི་རྒྱུད་ཆེན་པོ་ལས་ཐུགས་ཡེ་ཤེས་སེམས་དཔའི་དཀྱིལ་
འཁོར་འཕྲུལ་པའི་ལེའུ་སྟེ་བཅུ་གསུམ་པའོ།། །།དེ་ནས་བདེ་བྱེད་གར་དབང་ཕྱུག །པདྨ་ཚོགས་པའི་སྐུ་ཆེན་པོས། །ཡོན་ཏན་རིན་ཆེན་སྒྱུ་མའི་ཆོས། །ཏིང་ངེ་འཛིན་ལ་སྙོམས་ཞུགས་ནས། །མཁའ་འགྲོ་ཚོགས་བཅས་གཤིན་རྗེ་རྣམས། །རྒྱལ་
པོ་རྒྱལ་ཆེན་རྒྱལ་མོར་གནས། །འཁོར་བཅས་འདུལ་བར་བྱ་བའི་ཕྱིར། །མཁའ་འགྲོ་ཆེན་མོའི་ཚོགས་འཕྲུལ་མཛད། །ཐབས་དང་ཤེས་རབ་གཉིས་མེད་ལས། །གཟི་ལྡན་གར་གྱི་དབང་ཕྱུག་མ། །པདྨ་རཱ་ག་ནམ་མཁའི་མདོག །ཞལ་གཅིག་པ་ལ་ཕྱག་བཞི་
སྟེ། །པདྨའི་སྡོང་པོ་བདུད་རྩིའི་སྣོད། །རྡོ་རྗེ་ཁ་ཊྭཱཾ་ཞགས་པ་ཐོགས། །རིན་ཆེན་ཕྲེང་བའི་རྒྱན་གྱིས་བཀླུབས། །ཁྱོད་བཞེད་འཇིགས་མདངས་ཚུལ་འཛིན་ཅིང་། །བརྐྱང་བསྐུམ་ཞིང་མཆོག་ཉི་མའི་དཀྱིལ། །གཡང་གཞི་ཉི་མའི་ཕྲེང་བ་ས་བརྒྱན། །ཨོྃ་པདྨ་མ་

ཧཱ་ཀྲོ་དྷི་ཤྭ་རི་ཧཱུྃ་ཕཊ། དཔལ་གྱི་ལྷ་མོ་མཆོག་ཉིད་དང་། །ཨོྃ་དང་སྤྲུལ་ཏེ་ཕྱོགས་དང་མཚམས། །པདྨའི་གདན་ལ་ཞིང་གིས་མཚན། །བརྐྱང་བསྐུམ་སྐུ་མདོག་སྔོན་མོའི་ཚོགས། །ཕྱག་ན་གྲི་གུག་ཐོད་པ་ཁྲག །འབར་བའི་ཆ་ལུགས་སྒ་འབར་མ། །
ཕྱི་རོལ་སྤྲུལ་པའི་ཚོགས་བཅས་པས། །དུར་ཁྲོད་ཆེན་པོའི་གནས་སུ་རོལ། །རྡོ་རྗེ་རིན་ཆེན་པདྨོ་དང་། །ལས་དང་སྒྱུ་འཕྲུལ་མཁའ་ལ་བཞད། །སྣ་ཚོགས་སྒྱུ་མ་བཞིན་རྒྱས་སྤྱན། །ཁ་དོག་ཕྱོགས་མཚམས་ཇི་ལྟ་བུ། །གསལ་ཞིང་མུན་པའི་རྡུལ་གྱིས་གོས། །ཞིང་
གི་དབྱུག་པ་རྩེ་གསུམ་དང་། །གསེར་གྱི་མདའ་དང་རྡོ་རྗེ་དང་། །ཆུ་སྲིན་རྒྱལ་མཚན་ཞགས་པ་དང་། །ཞིང་ཆེན་རྡོ་རྗེ་རྩེ་དགུ་གདེངས། །གྲི་གུག་རྒྱུ་མའི་ཞགས་པ་སྡོམ། །རྡོ་རྗེ་གདེངས་པ་རྩེ་གསུམ་ཁྲག །ཞིང་ཆེན་ཁོག་ཕྱེས་སྙིང་འདྲེན་ཅིང་། །དེ་བཞིན་རླུང་ཡབ་
ཐོད་པ་འཆང་། །ཨོྃ་བཛྲ་ཏ་ཀྲྀད་མ་ཧཱ་ལ་ཏི་ཏི་ཧཱུྃ་ཧཱུྃ་ཕཊ། །ཨོྃ་བཛྲ་ཏ་ཏྲི་མེ་དར་ཧཱུྃ་ཕཊ། ཨོྃ་ཌཱ་ཀི་མད་ཀུམ་པ་ཡ་ཧཱུྃ་ཕཊ། ཨོྃ་ཌཱ་ཀི་ནཱི་ཏི་བྲེ་ཤ་ཧཱུྃ་ཕཊ། ཨོྃ་བཛྲ་ཌཱ་ཀི་བི་ལ་ས་ཧཱུྃ་ཕཊ། ཨོྃ་བཛྲ་ཌཱ་ཀི་དྲི་ཀུ་ཊ་མ་ལེ་ཧཱུྃ་ཕཊ། ཨོྃ་བཛྲ་ཌཱ་ཀི་ཛྭ་ལ་ཛྭ་ལ་ཧཱུྃ་ཕཊ། །ཕྱི་རོལ་
པདྨའི་འདབ་མ་ལ། །སེང་གེ་རྟ་དང་ཅེ་སྤྱང་ཝ། །བྱ་རྒོད་ཀང་ཀ་བྱ་རོག་འུག །མགོ་བརྙན་མཆེ་གཤོག་ཆེན་མོ་བརྒྱད། །ཧཱུྃ་ལས་སྤྲུལ་ཏེ་མདོག་དམར་པོ། །ཕྱག་ན་གྲི་གུག་ཐོད་པ་ཁྲག །རྡོ་རྗེ་རལ་གྲི་རྩེ་གསུམ་མདུང་། །འཁོར་ལོ་དགྲ་སྟ་བེ་ཅོན་མདའ། །
གཏུན་ཤིང་ཞིང་ཁོག་གཡང་གཞི་སྤྲུལ། །ནེའུ་ལེ་གཞོང་པ་རིན་ཆེན་ཁྱུང་། །ཞལ་གདངས་སོ་སོའི་ཕྱོགས་མདངས་བཞིན། །ཀུན་ཀྱང་ཁྲོ་བཅས་ཁྱམས་པར་གནས། །ཞིང་ལྤགས་གཡང་གཞི་ཐོད་ཕྲེང་སྤྲུལ། །ཁྲག་ཞག་ཐལ་བའི་ཚོམ་བུས་བརྒྱན། །
མཁའ་འགྲོ་རིགས་བདུན་མ་སྲིང་སྤྲུལ་པའི་ཚོགས། །མཆེ་གཤོག་འབར་བ་ཕྱོགས་བཅུར་འཁྲུགས། །ཨོྃ་སེ་ར་བ་ར་ན་ཧཱུྃ་ཕཊ། ཨོྃ་ནི་རྃ་ཏེ་ཤ་པ་མུ་ཁ་ཧཱུྃ་ཕཊ། ཨོྃ་ཀྃ་ན་མ་དུ་ན་ཧཱུྃ་ཕཊ། ཨོྃ་མུ་ར་ན་ནྃ་ཧཱུྃ་ཕཊ། ཨོྃ་སཱུརྱ་ས་མོ་ཀ་ཧཱུྃ་ཕཊ། ཨོྃ་

བཛྲ་སྣི་ག་ཤ་བྲུྃ་ཧཱུྃ་ཕཊ། ཨོྃ་ནི་ཤ་ཀུརྱ་ར་ན་ཧཱུྃ་ཕཊ། ཨོྃ་རེ་ལྃ་སུ་བག་ཤ་ཧཱུྃ་ཕཊ། མཁའ་འགྲོ་བཅུ་དྲུག་འདི་དག་ཀྱང་། །འོད་འབར་གློག་གི་ཕྲེང་བ་ཅན། །འོད་ཀྱི་རུ་ལུའི་སྒྲ་འབྱིན་ཅིང་། །སྤྱན་མུར་ཁྲོ་གཉེར་མཆེ་བ་ཅན། །ཞལ་གཅིག་ཕྱག་བཞི་རོལ་པའི་སྟབས། །
དབྱིངས་དང་ཤེས་རབ་རབ་རྟོགས་ལ། །སོ་སོའི་ཕྲིན་ལས་མཛད་པའི་ཕྱག །ཞལ་དང་སྐུ་ནི་སོ་སོའི་མདོག །ཨོྃ་རུ་ཁུ་སྃ་ཏ་གུ་ན་ཌཱེ་ཏ་ས་མོ་ར་ག་ཧཱུྃ་ཕཊ་སྙིང་པོའི་སྔགས་སོ། །ཨོྃ་བཛྲ་ཌཱ་ཀི་ཛཱ་ལ་ཤྃ་བ་ར་ཀུ་མ་ར་ཧཱུྃ་ཕཊ་ཉེ་བའོ། །ཨོྃ་ཌཱ་ཀི་ཧཱུྃ་སྃ་བ་ར་ཛཱ་ལི་མུ་ཁ་མ་
མེ་ཧཱུྃ་ཕཊ་རྩ་བའི་སྔགས་སོ། །མཁའ་འགྲོ་མ་ཡི་དཀྱིལ་འཁོར་སྤྲོ་བའི་མཐུས། །དེ་དག་དྲན་པ་མེད་པར་བརྒྱལ། །སླར་ཉིད་རང་གི་འཁོར་དུ་བསྡུས། །དམ་ཚིག་དཀྱིལ་འཁོར་ཆེན་པོར་བཀོད། །དེ་ནས་མཁའ་འགྲོའི་ཚོགས་དང་བཅས། །གདུལ་བྱ་རྣམས་
ཀྱི་གནས་དོར་ནས། །རྒྱལ་བའི་བསྟན་པ་བཟུང་བྱེད་ཅིང་། །རྡོ་རྗེ་ཐེག་པ་སྦྱོར་བར་མཛད། །དེ་བཞིན་གཤེགས་པ་ཐམས་ཅད་ཀྱི་དགོངས་པ་བླ་ན་མེད་པའི་གསང་བ་དཔལ་རྟ་མཆོག་རོལ་པའི་རྒྱུད་ལས་མཁའ་འགྲོ་མ་སྤྲུལ་པའི་ལེའུ་སྟེ་བཅུ་བཞི་པའོ།། །།
དེ་ནས་བཅོམ་ལྡན་དགྱེས་པའི་གཙོ། །གར་གྱི་དབང་ཕྱུག་དེ་བཞིན་གཤེགས། །གཟི་ལྡན་ཡུམ་དང་ཞལ་སྦྱོར་ཞིང་། །ཕྱོགས་བཅུའི་དཀྱིལ་འཁོར་སྤྲུལ་པའོ། །ཏིང་ངེ་འཛིན་ལ་སྙོམས་ཞུགས་ནས། །ཕྱོགས་ཀྱི་བགེགས་འདུལ་བྱེད་པའོ། །ཁམས་གསུམ་
གནོན་པའི་དཀྱིལ་འཁོར་སྤྲུལ། །སངས་རྒྱས་ཀུན་གྱི་རང་བཞིན་གནས། །རིན་ཆེན་འབར་བའི་ཁང་བཟངས་ན། །རིན་ཆེན་པདྨ་སེང་གེའི་གདན། །དྲི་མེད་ཉི་ཟླ་སྤྲས་པ་ལ། །དབུས་ཀྱི་ལྷ་མཆོག་ཆེན་པོ་ནི། །ཞབས་བརྒྱད་ཕྱག་ནི་བཅུ་དྲུག་དང་། །དམར་སེར་
ཉི་མའི་དཀྱིལ་འཁོར་བཞིན། །བགེགས་ལ་སོགས་པའི་ཚུལ་དང་ལྡན། །པདྨ་རྡོ་རྗེ་འཁོར་ལོ་གྲི། །ཐོད་པ་རིན་ཆེན་དགྲ་སྟ་རས། །ཡུམ་ཆེན་དབང་ཕྱུག་སྒེག་མོ་དང་། །རྒྱན་ཚོགས་རིན་ཆེན་ཕྲེང་བ་ཅན། །དྲི་མེད་པདྨས་བཀླུབས་པའོ། །ཨོྃ་བ་ག་བ་ཏེ་རུ་ཀྃ་སྃ་

པོ་ག་ཏ་ཡ་ཧཱུྃ་ཕཊ། །མདུན་དུ་རྡོ་རྗེ་སེམས་དཔའ་ནི། །དཀར་སེར་རྡོ་རྗེ་དྲིལ་བུ་འཛིན། །གཡས་སུ་རིན་ཆེན་སེམས་དཔའ་སྟེ། །སེར་པོ་རིན་ཆེན་འཁོར་ལོ་ཐོགས། །རྒྱབ་ཏུ་པདྨོའི་སེམས་དཔའ་ཉིད། །དམར་སེར་རྩེ་གསུམ་བུམ་པ་ཐོགས། །གཡོན་དུ་
ལས་ཀྱི་སེམས་དཔའ་སྟེ། །ལྗང་སེར་དྲིལ་བུ་ཏྲི་ཤཱུ་ལ། །ཨོྃ་བཛྲ་སྭ་ཏྟ་ཧཱུྃ་ཕཊ། །ཨོྃ་རཏྣ་སྭཏྟ་ཧཱུྃ་ཕཊ། །ཨོྃ་པདྨ་སྭཏྟ་ཧཱུྃ་ཕཊ། །ཨོྃ་ཀརྨ་སྭཏྟ་ཧཱུྃ་ཕཊ། །འཁོར་ལོ་པདྨའི་རྩེ་མོ་ལ། །ཡུམ་དང་འཁྲིལ་བའི་ཚུལ་གྱིས་འཁོད། །ཕྱི་རོལ་པདྨའི་རིགས་བདུན་ལ། །བདེར་
གཤེགས་ཡབ་ཡུམ་ཉིས་སྟོང་ཚོགས། །བདེར་གཤེགས་རྡོ་རྗེ་རིན་ཆེན་དང་། །པདྨ་རྒྱ་གྲམ་སྣ་ཚོགས་མཁའ། །སྐུ་མདོག་པདྨ་རཱ་ག་དང་། །ཨིནྡྲ་ལ་སོགས་རིམ་བདུན་ལ། །རལ་པ་རྩེ་མཛོད་བུམ་པ་ལ། །ལྕུག་མ་དྲིལ་བུ་གླེགས་བམ་དང་། །ཆོས་ཀྱི་
རྒྱལ་མཚན་ཕྲེང་བ་འཛིན། །ཀུན་ཀྱང་ཞལ་གསུམ་ཕྱག་དྲུག་པ། །རིན་ཆེན་རྒྱན་ཕྲེང་འོད་མདངས་ཅན། །ཕྱག་མཚན་གྲི་གུག་ཐོད་པ་དང་། །པདྨའི་ཕྲེང་བ་རྩེ་གསུམ་བསྣམས། །ལྷག་པའི་ཕྱག་བཞི་འཛིན་པར་མཛད། །དང་པོར་རང་རྟགས་ཕྱག་རྒྱ་བསྣམས། །
ཨོྃ་བཛྲ་དུ་ཀི་བི་ཤི་ཀ་དུ་ཀུྃ་དི་ཀྃ་མྃ་ཧྲི་སྃ་ག་ཏ་སཱུྃ་སྲ་མོ་ཏ་ཕཊ་སྭཱ་ཧཱ། །དེ་བཞིན་གཤེགས་པ་རྣམས་ཀྱིའོ། །ཨོྃ་བཛྲ་ས་མོ་ཡོ་ག་ཏ་ས་ར་ལ་སུ་ཧཱུྃ་ཕཊ། །རིན་པོ་ཆེ་རྣམས་ཀྱིའོ། །ཨོྃ་པདྨ་བུྃ་སི་ཉི་ཧྃ་ཧེ་ཧེ་མྃ་བྃ་ཧཱུྃ་ཕཊ། །པདྨའི་རིགས་རྣམས་ཀྱིའོ། །ཨོྃ་ཀརྨ་བྷྱོ་ཏྲུྃ་ཧཱུྃ་
རཀྵ་མུརྱ་ས་ཧཱུྃ་ཕཊ། །ལས་ཀྱི་རིགས་ཀྱིའོ། །ཨོྃ་བཛྲ་ཙཀྲ་བྲུྃ་སི་ཏི་ཡོ་གཱི་ཤྭ་རི་ཧཱུྃ་ཕཊ། །འཁོར་ལོའི་རིགས་ཀྱིའོ། །དེ་ནས་དཀྱིལ་འཁོར་སྤྲུལ་པའི་ཚོགས། །ཕྱོགས་རྣམས་ཀུན་དུ་སྤྲོས་བྱས་པས། །རྡོ་རྗེ་རིགས་ཀྱི་ཕོ་ཉ་ཡིན། །ཕྱོགས་ཀྱི་རྒྱལ་པོའི་གདོན་
རྣམས་འགུགས། །སྐྲག་ཤིང་བྱེད་ནས་དགྲ་འགུགས་ཤིང་། །སོ་སོའི་རིགས་དབྱེར་འཁྲུག་པ་དག །རྡོ་རྗེ་གསང་བའི་སྔགས་ཀྱིས་གཟེར། །རང་གི་དམ་ཚིག་རྗེས་སུ་དྲན། །སྲོག་གི་སྙིང་པོ་དབུལ་བར་བྱ། །རྡོ་རྗེ་གསང་བའི་དམ་ཚིག་གིས། །དབང་བསྐུར་

བྱིན་བརླབས་རྫོགས་བྱས་ནས། །དཀྱིལ་འཁོར་གསང་བའི་གནས་སུ་འཁོད། །གསང་བ་འཛིན་པའི་གནས་འདོར་ནས། །རང་གི་ལུས་སུ་གནས་བྱས་ཏེ། །གཞལ་ཡས་ཁང་གི་རྒྱན་དུ་གཞག །དེ་དག་གི་སྙིང་པོ་ནི། ཨོྃ་ས་མུ་དར་ཛིན་ན་ག་སུ་ཏྲ་བྷ་བ་སི་ཏྲི་སྣི་ཤ་ཧཱུྃ་
པྲུྃ་ཕཊ་ཞེས་པའོ། །སླར་གསོ་བའི་སྔགས་ནི། ཨོྃ་སུ་མུ་གེ་ཌྃ་སྃ་མྱག་ཧེ་ཧེ་རུ་ཏུ་པ་ལ་སི་ཏྃ་ཛ་ཧཱུྃ་ཕཊ། ལྷ་རྣམས་ཀྱི་སྙིང་པོ་བསྡུས་པ་ནི། །ཨོྃ་སརྦ་ས་ཀ་ར་བྲུྃ་བག་ཤ་སྃ་མེ་བྲྃ་མུ་རཀྵ་ཧཱུྃ་ཞེས་པའོ། །དེ་བཞིན་གཤེགས་པ་ཐམས་ཅད་ཀྱི་དགོངས་པ་བླ་ན་མེད་པའི་
གསང་བ་དཔལ་རྟ་མཆོག་རོལ་པའི་རྒྱུད་ལས་ཁམས་གསུམ་གནོན་པའི་ལེའུ་སྟེ་བཅྭ་ལྔ་པའོ།། །།དེ་ནས་བཅོམ་ལྡན་གར་དབང་སྐུ། །སངས་རྒྱས་ཐམས་ཅད་འདུས་མཛད་ནས། །ཁྲོ་བོའི་དཀྱིལ་འཁོར་སྤྲུལ་བྱས་ཏེ། །གནོད་སྦྱིན་གྲུལ་བུམ་འདུལ་
བར་མཛད། །གཞལ་ཡས་གྲུ་གསུམ་མཐིང་ནག་ལ། །དབུས་སུ་འཁོར་ལོ་ཉི་མའི་གདན། །དཔལ་ཆེན་པདྨ་ཧེ་རུ་ཀ །དུར་ཁྲོད་ཆེན་པོའི་རྒྱན་གྱིས་བརྗིད། །ཞལ་གསུམ་པ་ལ་ཕྱག་དྲུག་སྟེ། །སྐུ་མདོག་པདྨ་རཱ་གའི་མདངས། །རྩེ་གསུམ་གཏུན་ཤིང་རལ་
གྲི་དང་། །པདྨ་ཞགས་པ་ཐོད་རྔ་འཛིན། །གླང་ཆེན་ཀོ་བ་ཐོད་རློན་སྤྲུལ། །ཡུམ་དང་ཞལ་སྦྱོར་འཁྲིལ་བའི་ཚུལ། །ཐབས་དང་ཤེས་རབ་སྦྱོར་བ་ལས། །ཡི་གེ་ལས་སྤྲུལ་ཁྲོ་བོའི་རྒྱན། །ཤར་དུ་རྣམ་རྒྱལ་མདོག་དཀར་སྔོ། །ཞལ་གསུམ་ཕྱག་དྲུག་རྡོ་རྗེ་
དུང་། །འཁོར་ལོ་རིན་ཆེན་པདྨ་དང་། །རལ་གྲི་མེ་འོད་ཀྱིས་མཚན་པ། །ལྷོ་རུ་གཤིན་རྗེ་གཤེད་པོ་ནི། །སྔོ་ནག་ཞལ་གསུམ་ཕྱག་དྲུག་པ། །ཐོད་དབྱུག་རིན་ཆེན་ནེའུ་ལེ་དང་། །རྩེ་གསུམ་མེ་དཔུང་ཐོད་རྔ་འཛིན། །ནུབ་ཏུ་རྟ་མཆོག་ཁྲོ་བོའི་སྐུ། །ཞལ་གསུམ་
ཕྱག་དྲུག་དམར་སྐྱའི་མདོག །འཁོར་ལོ་སྡིགས་མཛུབ་རྩེ་གསུམ་དང་། །རལ་གྲི་ཐོད་པ་ཌ་མ་རུ། །བྱང་དུ་བདུད་རྩི་འཁྱིལ་པ་སྟེ། །ལྗང་སྔོན་ཞལ་གསུམ་ཕྱག་དྲུག་པ། །རྒྱ་གྲམ་གྲི་གུག་པདྨ་དང་། །བེ་ཅོན་རྩེ་གསུམ་སེང་གེ་འཛིན། །ཤར་

ལྷོར་དབྱུག་པ་སྔོན་པོ་ནི། །སྔོ་སྐྱ་ཞལ་གསུམ་ཕྱག་དྲུག་པ། །དབྱུག་པ་ཙཀྲ་པདྨ་དང་། །རྔ་ཡབ་བྷན་དྷ་དྲིལ་བུ་འཛིན། །ལྷོ་ནུབ་མི་གཡོ་མགོན་པོ་ནི། །ཞལ་གསུམ་སེར་སྐྱ་ཕྱག་དྲུག་པ། །རིན་ཆེན་རལ་གྲི་གཏུན་ཤིང་འཛིན། །པདྨ་ཐོད་ཁྲག་
མདུང་རྩེ་གསུམ། །ནུབ་བྱང་འདོད་པའི་རྒྱལ་པོ་ནི། །དམར་སྐྱ་ཞལ་གསུམ་ཕྱག་དྲུག་པ། །རྡོ་རྗེ་དབྱུག་པ་རིན་ཆེན་བུམ། །ཐོད་པ་བདུད་རྩི་སྟིང་འཛིན་པའོ། །བྱང་ཤར་སྟོབས་ཆེན་དུད་ཀའི་མདོག །ཞལ་གསུམ་ཕྱག་དྲུག་འཇིགས་པའི་མདངས། །རྡོ་རྗེ་རྩེ་གསུམ་བམ་
ཆེན་ཁོག །སྣ་ཚོགས་རྡོ་རྗེ་བམ་ཆེན་ཁྲག །འཇིགས་པའི་ཆ་ལུགས་ཁྲོ་ཕྲེང་དང་། །གྱད་ཀྱི་དོར་ཐབས་རོལ་པའི་སྟབས། །ཨོྃ་བཛྲ་ཀྲོ་དྷ་བི་ཛ་ཡ་ཧཱུྃ་ཕཊ། །ཨོྃ་བཛྲ་ཀྲོ་དྷ་ཡ་མཱ་ན་ཏ་ཀ་ཧཱུྃ་ཕཊ། ཨོྃ་བཛྲ་ཀྲོ་དྷ་ཧ་ཡ་གྲཱི་བ་ཧཱུྃ་ཕཊ། ཨོྃ་བཛྲ་ཀྲོ་དྷ་ཨ་མྲྀ་ཏ་ཀུ་ཎ་ཌ་ལི་ཧཱུྃ་ཕཊ།
ཨོྃ་བཛྲ་ཀྲོ་དྷ་ནཱི་ལ་དཎྜ་ཧཱུྃ་ཕཊ། ཨོྃ་བཛྲ་ཀྲོ་དྷ་ཨཱརྱ་ཨ་ཙ་ལ་ཧཱུྃ་ཕཊ། ཨོྃ་བཛྲ་ཀྲོ་དྷ་ཊཀྐི་རཱ་ཛ་ཧཱུྃ་ཕཊ། ཨོྃ་བཛྲ་ཀྲོ་དྷ་མ་ཧཱ་བ་ལ་ཧཱུྃ་ཕཊ། ཕྱོགས་སྐྱོང་རྒྱལ་པོ་གནོད་སྦྱིན་དང་། །གྲུལ་བུམ་ཚོགས་རྣམས་དབང་བསྡུས་ཏེ། །གསང་སྔགས་དྲག་པོས་བསྒྲལ་
བྱས་ན། །སླར་གསོལ་ཡེ་ཤེས་ལྷུམས་སུ་གྱུར། །དཀྱིལ་འཁོར་གསང་བའི་དབང་བསྐུར་ཞིང་། །དམ་ཚིག་ལ་གཞན་དཀྱིལ་འཁོར་ཚུལ། །ཀུན་གྱི་སྲོག་སྙིང་ཕུལ་བ་ནི། །དམ་ཚིག་ཆེན་པོས་བྱིན་བརླབས་མཛད། །སླར་ཡང་དམ་ཚིག་འཛིན་པའི་སྔགས། །
འཁོར་རྣམས་ཀུན་ལ་སྦྱིན་པར་མཛད། །ཨོྃ་བཛྲ་ཀྲ་ཀ་ར་མུརྡ་སི་ན་བ་མུ་ཀ་ཧཱུྃ་ཕཊ། ཨོྃ་ཨཱཿཧཱུྃ་བཛྲ་སུ་ཀ་ཏ་བྷ་མོ་ཏྲྃ་ཨ་ལ་ལ་ཧཱུྃ་ཕཊ། །ལྷ་རྣམས་ཀུན་གྱི་དམ་ཚིག་ནི། །རྡོ་རྗེ་གསང་བ་གསུམ་ལས་བྱུང་། །རྡོ་རྗེ་གནོད་སྦྱིན་དྲག་པོའི་སྐུ། །ཁམས་གསུམ་
དུས་ཀྱིས་དབང་བསྐུར་ནས། །འཁོར་བའི་ཆོས་ལས་རྒྱལ་བྱེད་ཅིང་། །བྱང་ཆུབ་སེམས་ཀྱིས་དེ་ཉིད་གསལ། །དེ་བཞིན་གཤེགས་པ་ཐམས་ཅད་ཀྱི་དགོངས་པ་བླ་ན་མེད་པའི་གསང་བ་དཔལ་རྟ་མཆོག་རོལ་པའི་རྒྱུད་ལས་ཁྲོ་བོ་ཕྲིན་ལས་རོལ་པའི་ལེའུ་སྟེ་

བཅུ་དྲུག་པའོ།། །།དེ་ནས་བཅོམ་ལྡན་གར་དབང་སྐུས། །གཟི་བརྗིད་དགོད་པའི་རྒྱན་བཀོད་ཅིང་། །ལྷ་མིན་གྲོང་ཁྱེར་འདུལ་བའི་ཕྱིར། །ཡུམ་གྱི་དཀྱིལ་འཁོར་འཕྲུལ་བར་མཛད། །ཆོས་དབྱིངས་སྤྲུལ་པའི་གནས་བཟང་མཆོག །རྒྱལ་བའི་རང་བཞིན་རིན་
ཆེན་སྤྲོས། །གྲུ་བཞི་ཁང་པ་སྒོ་དང་བཅས། །རྟ་བབས་ཀ་བ་བརྒྱད་ཀྱིས་མཛེས། །དབུས་ཀྱི་པདྨའི་གདན་བཞུགས་པ། །གཉིས་མེད་རོལ་པའི་ཡུམ་གྱི་སྐུ། །མདོག་དམར་རྒྱན་དུ་ཟངས་ཆེན་གཟུགས། །ཞལ་གཅིག་ཕྱག་བཞི་མཛེས་པའི་མདངས། །འཁོར་
ལོ་དུང་ཁྲག་པདྨོ་དང་། །རིན་ཆེན་འབར་བ་རྩེ་དགུ་འཛིན། །རིན་ཆེན་པདྨའི་ཕྲེང་བ་ཅན། །སྟོད་བཟང་ན་བཟའ་དཀྱིལ་བཟང་བཞུགས། །ཨོྃ་པདྨ་མུ་ཤ་ར་ས་མ་ཀ་ཏ་ཧཱུྃ་ཕཊ། །ཤར་ལ་སོགས་པའི་ཕྱོགས་རྣམས་སུ། །པདྨ་དབྱིངས་ཕྱུག་གསལ་བ་མོ། །རིན་
ཆེན་ཕྲེང་བ་གླུ་མ་ཆེ། །དཀར་དམར་སེར་དང་ལྗང་གུའི་མདོག །རྡོ་རྗེ་གསུམ་པ་པདྨོ་དྲ་བ་དང་། །ན་ར་སི་ལའི་སྣོད་རིན་ཚོགས། །རང་གི་དཀྱིལ་འཁོར་མ་སྤྲོས་ཤིང་། །སྣ་ཚོགས་པདྨའི་གདན་ལ་བཞུགས། །ཨོྃ་ཙུན་དྷེ་ཤྭ་རི་ཧཱུྃ་ཕཊ། ཨོྃ་ཥྞི་ཤ་བཛྲ་སྃ་བྲུྃ་ག་
ཧཱུྃ་ཕཊ། ཨོྃ་བྱི་ཙུ་སྭ་ཏེ་ཧཱུྃ་ཕཊ། མཚམས་ཀྱི་པདྨའི་འདབ་མ་ལ། །དེ་བཞིན་བདེ་བ་སྐྱེད་བྱེད་ཡུམ་ཆེན་བཞི། །དྲ་བ་མོ་དང་གློག་འགྱུར་རྒྱན། །གཤོག་པ་ཅན་དང་འདོད་པའོ། །དཀར་སེར་དམར་སྐྱ་སྔོ་བསངས་དང་། །ལྗང་གུ་མདོག་ལེགས་ལ་
བཞུགས་ནས། །རྡོ་རྗེ་རིན་ཆེན་པདྨོ་དང་། །ཨུཏྤལ་ལྗང་གུ་ལེགས་མཛད་པའོ། །ཨོྃ་ནུ་ཏེ་ནོ་ཙ་ཀྲུ་ཧཱུྃ་ཕཊ། ཨོྃ་སྃ་བོ་ག་ཏ་སུ་ཧེ་བྱ་ཧཱུྃ་ཕཊ། ཨོྃ་མ་མ་ཀྲི་བྲུྃ་ཧེ་ཧེ་ཧཱུྃ་ཕཊ། ཨོྃ་ཏ་རེ་ག་ག་ན་ཨ་མ་ལ་ཧཱུྃ་ཕཊ། །ཕྱོགས་རྣམས་ཀུན་དུ་མཁའ་ཁྱབ་པ། །ཏིལ་གང་
བཞིན་དུ་གནས་གྱུར་པ། །མ་མོ་གཤིན་རྗེའི་ཚོགས་རྣམས་ཀུན། །འཁྲུག་རྔམ་རོད་རོད་པོར་གྱུར་ནས། །ཐུགས་རྗེ་ཅན་ལ་སྐྱབས་སུ་མཆི། །སྲོག་གི་སྙིང་པོ་དབུལ་བར་བྱེད། །དེ་ནས་དཀྱིལ་འཁོར་བསྡུས་བྱས་ཏེ། །རང་གི་གནས་སུ་དབང་བསྐུར་ཞིང་། །

དམ་ཚིག་དགའ་བའི་སྡོམ་པ་རྙེད། །བདེར་གཤེགས་ཡེ་ཤེས་གསལ་བར་འགྱུར། །ཀུན་གྱིས་མཐུན་པར་ཁས་བླངས་ཏེ། །དམ་ཚིག་བསྲུང་ཞིང་རྣལ་འབྱོར་སྐྱོང་། །ཨོྃ་མེ་མ་རཀྟ་ས་བྲ་ཏི་ཨིད་དྃ་ས་བུ་ཏ་ཕཊ། ཨོྃ་ཏྲཀྴ་ར་ལ་སི་བད་ཊ་ཏ་ཕཊ། མ་
མོ་དང་འབྱུང་པོ་རྣམས་ཀྱི་སྙིང་པོའོ། །ཨོྃ་ཡུ་མེ་སི་དྷ་རུ་ལུ་རུ་ལུ་ཧཱུྃ་ཕཊ། གནོད་སྦྱིན་རྣམས་ཀྱིའོ། །ཨོྃ་ཨཱཿཧཱུྃ་ཡོ་ག་བྲི་གུ་མེ། ཧ་ས་ཧ་ས། རུ་ལུ་རུ་ལུ་ཧཱུྃ་ཕཊ། སླར་གསོ་ཞིང་བྱིན་གྱིས་བརླབ་པའི་སྔགས་སོ། །དེ་བཞིན་གཤེགས་པ་ཐམས་ཅད་ཀྱི་དགོངས་པ་བླ་
ན་མེད་པའི་གསང་བ་དཔལ་རྟ་མཆོག་རོལ་པའི་རྒྱུད་ལས་རིན་ཆེན་དབྱིངས་ཀྱི་དཀྱིལ་འཁོར་འཕྲུལ་པའི་ལེའུ་སྟེ་བཅུ་བདུན་པའོ།། །།དེ་ནས་གར་གྱི་དབང་ཕྱུག་ཉིད། །དུས་གསུམ་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་འཁོར་ལོ་ཡིས། །ས་འོག་ས་
བླ་ས་སྟེངས་རྣམས། །འཇོམས་བྱེད་གཟའ་དང་རྒྱུ་སྐར་དང་། །བདུད་དང་དེ་ཡི་རིགས་འཁོར་ཀུན། །འདུ་བར་བྱ་བའི་ཏིང་འཛིན་ལ། །སྙོམས་ཞུགས་འཁོར་ལོ་སྤྲུལ་པ་མཛད། །ཐབས་དང་ཤེས་རབ་བསྒྲུབ་བྱས་པའི། །འོད་ཟེར་གསལ་བས་སྟོང་གསུམ་གང་། །རིན་ཆེན་
འབར་བའི་གཞལ་ཡས་ཁང་། །སྒོ་བཞི་རྟ་བབས་ཕྲེང་བས་བརྒྱན། །འཁོར་ལོ་རིམ་གསུམ་གདན་དང་བཅས། །རྡོ་རྗེ་པདྨ་རིན་ཆེན་གྱིས། །ཁོར་ཡུག་སེང་གེ་གླང་ཆེན་མཆོག །ཉི་མས་མཛེས་པའི་པདྨོ་ཡི། །དབུས་ཀྱི་དཔའ་བོ་ཡུམ་དང་བཅས། །ཞལ་གཅིག་
ཕྱག་བཞི་རྡོ་རྗེ་རིན། །པདྨ་རལ་གྲི་འཛིན་པར་མཛད། །དམར་སེར་ཀུན་དུ་རྒྱུ་བ་ནི། །ལྗང་སེར་པདྨ་དྲིལ་བུས་འཁྱུད། །མཚན་དང་དཔེ་བྱད་རྒྱན་ཕྲེང་བཀླུབས། །སངས་རྒྱས་འདུས་པའི་དབུ་རྒྱན་ཅན། །ཕྱག་རྒྱ་བཞི་ཡིས་མཛེས་བྱས་པའོ། །རྡོ་རྗེ་འཁོར་ལོ་རྩིབས་
རྣམས་ལ། །རིགས་ཀྱི་སེམས་དཔའ་ཉི་ཤུ་བཞི། །དཀར་དང་དམར་དང་སེར་བའི་མདངས། །རྡོ་རྗེ་དྲིལ་བུ་པདྨ་བསྒོམ། །འཁོར་ལོ་རིན་ཆེན་སྙེ་མ་བསྣམས། །དང་པོའི་ཕྱག་གཉིས་མཚན་བྱས་ཤིང་། །ལྷག་མ་གྲི་གུག་ཐོད་པ་ཐོགས། །ཁྲོ་ཞིང་སེམས་དཔའི་ཆ་

ལུགས་ཀྱིས། །རྒྱན་ཕྲེང་རིགས་ཀྱི་དབང་པོ་གསུམ། །རིན་ཆེན་འབར་བའི་རྒྱན་གྱིས་བཀླུབས། །ཨོྃ་བཛྲ་སྭ་ཏ་ཀྲོ་དྷ་ཧེ་ཧེ་རུ་ལུ་ཧཱུྃ་ཕཊ། །རྡོ་རྗེ་རིགས་རྣམས་ཀྱིའོ། །པདྨ་ཏེ་ཤྠ་སྭཱ་ད་ན་མ་ཀུ་རུ་ཀུ་རུ་ཧཱུྃ་ཕཊ། །པདྨ་རིགས་ཀྱི་སེམས་དཔའ་རྣམས་ཀྱིའོ། །ཨོྃ་ཨི་ཀུ་རི་
ཙག་བན་དྷ་སི་དྷི་ཕཊ་ཕཊ། ཀྲོ་དྷི་ཤྭ་རི་ཧཱུྃ་ཕཊ། །དེ་བཞིན་གཤེགས་པ་རིགས་ཀྱིའོ། །སྒོ་བཞི་མཛེས་གཟུགས་ཁྲོ་མོ་ནི། །མི་མཐུན་བློ་གྲོས་དཔའ་ཆེན་མོ། །ཡེ་ཤེས་མཁའ་དབྱིངས་བཞི་རྣམས་ཏེ། །དཀར་སེར་དམར་དང་རིམ་པ་བཞིན། །རྡོ་རྗེ་ལྕགས་ཀྱུ་
ཞགས་པ་དང་། །ལྕགས་སྒྲོག་དྲིལ་བུ་མཚན་མའི་ཕྱག །ཨོྃ་བཛྲ་ཨྃ་གུ་ཤ་ཛཿཔཱ་ཤ་ཧཱུྃ། སྥོ་ཊ་པྃ། གྷེནྜེ་ཧོཿ། ཕཊ། དགུག་གཞུག་བཅིང་བའི་ལས་དག་དང་། །དབབ་པའི་ཆོ་ག་མཉེས་པར་བྱེད། །དུས་གསུམ་སངས་རྒྱས་ཐམས་ཅད་ཀུན། །སྐུ་གསུང་
ཐུགས་ཀྱི་དཀྱིལ་འཁོར་འདུས། །རིགས་གསུམ་སེམས་དཔའ་ཁྲོ་བོར་བསྟན། །འཇིགས་བྱེད་ཆ་ལུགས་རྔམ་པའི་སྟབས། །རྡོ་རྗེ་གཅོད་བྱེད་འཇིགས་པ་ཆེ། །རྡོ་རྗེ་འཇོམས་པའི་ཡིད་འཕྲོག་བྱེད། །རྡོ་རྗེ་རབ་བཟང་བློ་གྲོས་མཆོག །རྡོ་རྗེའི་བསྟན་པ་
གཡུལ་ལས་རྒྱལ། །པདྨའི་སྤྲིན་ཆེན་འབྲུག་སྒྲའི་དབྱངས། །པདྨའི་བློ་གསལ་མྱ་ངན་འཇོམས། །པདྨའི་སྡོང་པོ་ང་རོ་མྱོས། །པདྨའི་འོད་ཟེར་བདུད་རྩིའི་འོད། །འཁོར་བ་བརྩེགས་པ་མྱུར་དུ་བཟློག །འཁོར་ལོ་དགའ་བ་སྦྲང་རྩིའི་མཆོག །འཁོར་ལོ་སྒྲོལ་
དང་རྩེ་གསུམ་འཆིང་། །འཁོར་ལོ་རོལ་པ་དགའ་བྱེད་སྟོབས། །འདི་དག་སྤྲུལ་པ་འཁོར་ཚོགས་སྐུས། །གནས་གསུམ་པོ་དག་འདུལ་བར་མཛད། །དེ་ནས་གཟའ་དང་རྒྱུ་སྐར་རྣམས། །གདུག་པའི་ང་རོ་ཆུ་མ་ཤུམས། །སྒྲ་ཆེན་སྒྲོགས་ཤིང་སྤྲུལ་ནས་ཀྱང་། །
མཐུ་དང་རྫུ་འཕྲུལ་མེད་པར་འགྱུར། །དཀྱིལ་འཁོར་ཆེན་པོ་སྐྱབས་གསོལ་ཞིང་། །བསྟན་པ་བཟུང་བར་དམ་བཅས་སོ། །དེ་དག་སོ་སོའི་སྲོག་སྙིང་དག །ལུས་སེམས་དད་པས་ཕུལ་བྱས་པས། །དཀྱིལ་འཁོར་ཆེན་པོ་དབང་བསྐུར་ཞིང་། །རབ་གནས་

གདན་ལ་གཞག་པར་བྱ། །དེ་བཞིན་གཤེགས་པ་ཐམས་ཅད་ཀྱི་དགོངས་པ་བླ་ན་མེད་པའི་གསང་བ་དཔལ་རྟ་མཆོག་རོལ་པའི་རྒྱུད་ཆེན་པོ་ལས་རང་སངས་རྒྱས་ཐམས་ཅད་ཁྲོ་བོར་བྱུང་བའི་ལེའུ་སྟེ་བཅྭ་བརྒྱད་པའོ།། །།དེ་ནས་བཅོམ་ལྡན་དབང་གི་ལྷ། །
པདྨ་བདེ་ཆེན་ཡུམ་བཅས་ལ། །འགྲོ་དྲུག་རྒྱུ་འབྲས་བྱ་བའི་ཕྱིར། །བདེ་ཆེན་བྱང་སེམས་དཀྱིལ་འཁོར་སྤྲུལ། །དཀྱིལ་འཁོར་ཆེན་པོའི་གནས་འབར་བ། །རིན་ཆེན་ཕྲེང་སོགས་འཇིགས་བྱེད་བརྒྱད། །དུར་ཁྲོད་ཆེན་པོའི་གནས་བཞིན་བརྒྱན། །དབུས་ཀྱི་འཁོར་ལོ་
གདན་བཅས་ལ། །རིགས་ལྔའི་ཧེ་རུ་ཀ་བཞུགས་མཛད། །ཡུམ་ཆེན་ལྔ་དང་འཁྲིལ་བར་སྦྱོར། །ཀུན་ཀྱང་ཞལ་གསུམ་ཕྱག་དྲུག་པ། །དམར་ནག་དཀར་སེར་ལྗང་གུའི་མདངས། །རྡོ་རྗེ་ཁ་ཊྭཱཾ་རལ་གྲི་དང་། །ཏྲི་ཤཱུལ་ཞིང་དབྱུག་ཐོ་བ་བསྣམས། །གཡས་པར་དུང་
ཕོར་གཡོན་ཐོད་ཁྲག །བར་མ་གྲི་གུག་པདྨ་སྟེ། །ཐ་མ་ཡུམ་དང་འཁྲིལ་བའི་ཚུལ། །སྤྱན་དགུ་སྡང་མིག་དམར་པོ་བཟློག །ཁྲོ་གཉེར་རལ་པ་གྱེན་དུ་བརྫེས། །ཐོད་སྤྲུལ་ཁྲག་དང་ཐལ་བས་བརྒྱན། །གཡང་གཞི་རི་ཤའི་རྒྱན་གྱིས་མཛེས། །ཨོྃ་བཛྲ་ཤྲཱི་ཧེ་རུ་ཀ་
བཛྲ་ཀྲོ་དྷཱི་ཤྭ་རི་ཧཱུྃ་ཕཊ། ཨོྃ་བྷུདྡྷ་ཤྲཱི་ཧེ་རུ་ཀ་བྷུདྡྷ་ཀྲོ་དྷཱི་ཤྭ་རི་ཧཱུྃ་ཕཊ། ཨོྃ་རཏྣ་ཤྲཱི་ཧེ་རུ་ཀ་ཧཱུྃ་ཕཊ། རཏྣ་ཀྲོ་དྷཱི་ཤྭ་རི་ཧཱུྃ་ཕཊ། པདྨ་ཤྲཱི་ཧེ་རུ་ཀ་ཧཱུྃ་ཕཊ། ཨོྃ་པདྨ་ཀྲོ་དྷཱི་ཤྭ་རི་ཧཱུྃ་ཕཊ། ཨོྃ་ཀརྨ་ཤྲཱི་ཧེ་རུ་ཀ་ཧཱུྃ་ཕཊ། ཀརྨ་ཀྲོ་དྷཱི་ཤྭ་རི་ཧཱུྃ་ཕཊ། །བདེ་ཆེན་བྱང་ཆུབ་སེམས་ཀྱི་རྒྱན། །རོལ་
པ་ཀུན་ཏུ་ཁྱབ་མཛད་དེ། །ཁམས་གསུམ་མ་འདྲེས་རྣམ་པར་དབྱིངས། །བདེ་བ་ཆེན་པོ་གཉིས་མེད་འགྱུར། །དབང་བསྐུར་བྱིན་བརླབས་རིགས་ཀྱིས་བསྐུར། །བསྐྱེད་དེ་དབུ་ལ་རང་གི་བདག་པོས་བརྒྱན། །སྨོན་འཇུག་གཡོ་ལྡང་བསྐྱོད་པ་ཡི། །ལྷ་མོ་བཞི་དང་མཉམ་པར་
སྦྱོར། །དེ་བཞིན་གཤེགས་པ་ཐམས་ཅད་ཀྱི་དགོངས་པ་བླ་ན་མེད་པའི་གསང་བ་དཔལ་རྟ་མཆོག་རོལ་པའི་རྒྱུད་ལས་བདེ་བ་ཆེན་པོའི་ལེའུ་སྟེ་བཅུ་དགུ་པའོ།། །།དེ་ནས་བཅོམ་ལྡན་འདས་དགོངས་པ་ཉིད་ལ་བཞག་སྟེ་བཞུགས་སོ། །དེའི་ཚེ་དེའི་དུས་ན་བདུད་ཀྱི་རྒྱལ་

བོ་མ་ཏྲ་རུ་ཏྲས། རང་གི་རྫུ་འཕྲུལ་ཆེན་པོ་བསྟན་ཞིང་། །འཁོར་དང་བཅས་པས་ཕྱོགས་བཅུར་རྒྱུག་ཅིང་རིག་པ་འཛིན་པ་དང་། །རྣལ་འབྱོར་མཐའ་དག་གི་བར་གཅོད་བྱེད་ཅིང་བདེ་འགྲོའི་བདེ་བ་ཐམས་ཅད་རྒྱུན་གཅོད་པ་དང་། །རང་ཉིད་ཀྱི་ཉོན་མོངས་པ་བསྐྱེད་
དོ། །དེ་ནས་བཅོམ་ལྡན་འདས་ཀྱིས་ཐུགས་རྣམ་པར་འཕྲུལ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། །རིགས་ཀྱི་འོད་ཟེར་མཐའ་ཡས་པ་ཞེས་བྱ་བས་སྟོང་གསུམ་གྱི་འཇིག་རྟེན་ཐམས་ཅད་སྐད་ཅིག་གིས་གསལ་བར་མཛད་དོ། །རྒྱལ་བའི་དབང་པོ་སྟོང་
གསུམ་འདིར། །ཁང་བཟངས་མཛེས་པར་བྱིན་བརླབས་ཏེ། །རིན་ཆེན་ཀ་བ་གདན་ཕྲེང་དང་། །གཟུགས་མཛེས་ལ་སོགས་ཀུན་གྱིས་སྤྲས། །ཉི་མ་ཟླ་བ་རིན་ཆེན་ཁྲི། །པདྨ་སེང་གེ་ལ་སོགས་གནོན། །སྒོ་བཟང་ཁྱམས་སུ་བཅས་པ་ཡི། །རྣམ་དག་གཞལ་ཡས་ཁང་
བཟངས་སྤྲུལ། །དེ་ནས་བཅོམ་ལྡན་བདེ་ཆེན་པོས། །དཔལ་ལྡན་གར་གྱི་དབང་ཕྱུག་སྐུས། །སངས་རྒྱས་དཀྱིལ་འཁོར་རིགས་ཚོགས་རྣམས། །དགའ་བའི་སྤྲིན་གྱིས་བསྐུལ་བར་མཛད། །བདེ་བ་ཆེན་པོ་གཉིས་མེད་མཐུས། །རིགས་ཀྱི་དཀྱིལ་འཁོར་གཅིག་ཏུ་གྱུར། །ཡོངས་
རྫོགས་གསལ་བ་རྒྱ་ཆེན་པོས། །དཀྱིལ་འཁོར་རྒྱ་ཆེན་སྤྲུལ་པར་མཛད། །དབུས་སུ་པདྨའི་རིགས་རྒྱལ་པོ། །གཙོ་བོ་པདྨ་རྡོ་རྗེའི་མདངས། །ཞལ་གསུམ་ཕྱག་དྲུག་འཇིགས་བྱེད་སྐུ། །རྡོ་རྗེ་དགའ་བའི་སྤྱན་འདྲིལ་ཞིང་། །ཤར་ལ་སོགས་པའི་ཕྱོགས་ཀུན་དུ། །བདེར་
གཤེགས་རྡོ་རྗེ་སེམས་དཔའི་མཆོག །རྣམ་སྣང་རིན་ཆེན་དོན་གྲུབ་རྣམས། །རིན་ཆེན་ཕྱོགས་ཀྱི་མཚོན་མདངས་གསལ། །རྡོ་རྗེ་འཁོར་ལོ་རིན་ཆེན་དང་། །རལ་གྲི་པདྨ་སྣ་ཚོགས་དང་། །གཙོ་བོ་པདྨའི་དྲུག་མཚན་ཅན། །སྟོང་པའི་སྒྲ་སྙན་དྲིལ་བུ་གཡོན། །སངས་རྒྱས་
སྤྱན་མཛེས་མཱ་མ་ཀཱི། །དཀར་མོ་དམ་ཚིག་སྒྲོལ་མ་དག །མདོག་བཟང་ཕྱག་མཚན་གཙོ་བོ་བཞི། །སངས་རྒྱས་ཏིང་འཛིན་རྫུ་འཕྲུལ་སྟོབས། །ཐབས་དང་ཤེས་རབ་ཉིས་སྟོང་ཚོགས། །འཁོར་ལོ་འབར་བའི་རྩེ་མོ་ལ། །རང་གི་མཚན་མ་སོ་སོའི་ཚུལ། །

དམར་མདངས་དཀར་དང་གསེར་གྱི་མདོག །ནི་ར་ཀ་ཏའི་མདོག་འཚེར་ཞིང་། །པདྨ་རྡོ་རྗེ་འཁོར་ལོ་རིན། །པདྨ་ཏྲི་ཤཱུལ་བཅས་པ་འཛིན། །གཡས་ན་འཁོར་ལོ་གོ་རིམས་བཞིན། །རྡོ་རྗེ་སྐྱིལ་ཀྲུང་ལེགས་བརྒྱན་བརྗིད། །གཞན་ཡང་ཁྲོ་བོའི་
ཚོགས་འབར་བ། །ཕྱི་རོལ་འཁོར་ལོའི་བར་ཁྱམས་དང་། །སྒོ་ལ་སོགས་པའི་འཇིགས་གཟུགས་ཀྱིས། །རྔམ་པའི་མདངས་བཅས་འཁོད་པ་ནི། །ཁྲི་ཚོགས་ཡང་སྤྲུལ་མཚོན་ཆ་དང་། །རིགས་ཀྱི་སྤྲུལ་པའི་དོན་བྱེད་པའི། །ཁམས་གསུམ་འཇིགས་བྱེད་ཁྲོ་བོ་དང་། །
མཁའ་འགྲོའི་དག་པའི་ཚོགས་བཅས་རྣམས། །དུར་ཁྲོད་རྒྱན་གྱིས་རབ་མཛེས་ཤིང་། །རིགས་ཀྱི་ཁ་དོག་མཚོན་ཆ་དང་། །འོད་ཟེར་འཕྲོ་བ་འཁྲིགས་པའི་ཚུལ། །གསང་སྔགས་དྲག་པོ་བརྗོད་མཛད་པའོ། །དེ་ལྟར་དཀྱིལ་འཁོར་ཁྲོ་ཞི་ཚོགས། །སྐད་ཅིག་གསལ་
བར་རྫོགས་བྱས་ནས། །ཕྱི་ཡི་གནས་སུ་སྤྲོ་ཞིང་བྱ། །གསང་སྔགས་རྒྱུན་གྱི་སྐལ་བར་བྱེད། །ཧཱུྃ་ཨ་ལ་ལ་ཧོ། མ་ཧཱ་པདྨ་ཧྲྀ་ད་ཡ། ཨ་ཨཱ་ཨོྃ་ཨཱཿཧཱུྃ། མ་ཧཱ་པདྨ་ཀུ་རུ། ཧ་ལ་ཧ་ལ་བྷི་ཤ་ན་ཧཱུྃ་ཧཱུྃ་ཕཊ། །སྟོང་ཁམས་སངས་རྒྱས་བཞུགས་པའི་གནས། །རབ་
འཁྲུག་བྲེད་རྒྱས་རྨོངས་པ་དག །འབར་བའི་དཀྱིལ་འཁོར་འོད་ཀྱིས་བདེར་བྱས་ཤིང་། །རང་གི་སངས་རྒྱས་ཞིང་ལ་བཀོད། །དཀྱིལ་འཁོར་གནས་སུ་བསྡུས་བྱས་ནས། །རང་གི་འཁོར་ལོ་མཛེས་བྱས་ཏེ། །དབང་བསྐུར་བྱིན་བརླབས་རྫོགས་འགྱུར་ནས། །དབུ་ལ་
རིགས་ཀྱི་བདག་པོས་བརྒྱན། །ཨོྃ་པདྨ་ཀུན་དྷཱ་ལི་ཧྲྀ་ད་ཡ་ན་བི་མུ་ཀུ་རུ་ཧ་ན་ད་ཧ་ཧཱུྃ་ཕཊ། །གསང་སྔགས་ཀུན་གྱིས་བརྗོད་བྱས་ན། །འཇིག་རྟེན་གསུམ་པོ་སྡུད་པ་ཡི། །ཕོ་ཉ་རྡོ་རྗེ་ཀཱི་ལ་ཡ། །དྲེགས་བྱེད་གཙོ་བོ་དག་རེངས་བྱ། །དེ་ནས་བཅོམ་ལྡན་བདེ་ཆེན་སྐུས། །
སངས་རྒྱས་ཐམས་ཅད་བསྐུལ་བའི་ཕྱིར། །རྡོ་རྗེ་སེ་གོལ་ལན་གསུམ་བརྡབ། །དམ་ཚིག་ཆེན་པོའི་སྔགས་ཆེན་བརྗོད། །དེ་བཞིན་གཤེགས་པའི་རིགས་ཚོགས་རྣམས། །ཏིང་འཛིན་བསྡུ་བའི་རྡོ་རྗེ་ལས། །གཅིག་ཏུ་གནས་ནས་འགྲོ་བ་གཟིགས། །དྲེགས་

བྱེད་གཙོ་བོ་མ་རུངས་རྣམས། །རྒྱུ་དང་འབྲས་བུ་ལོག་འཁྲུལ་ཞིང་། །སངས་རྒྱས་བསྟན་པ་ལོག་མི་འགྱུར། །ལོག་པའི་ལམ་ལ་མངོན་ཞེན་ཅིང་། །མངོན་པའི་ང་རྒྱལ་མཐུས་བསྙེམས་ནས། །འཇིག་རྟེན་གསུམ་དག་ཕུང་བྱེད་ན། །ཞི་བས་འདུལ་བར་མི་འགྱུར་
ན། །ཁྲོ་བོའི་རོལ་པ་མཛད་མོད་ཀྱི། །འདུལ་བར་གཟིགས་ནས་བཀའ་གྲོས་མཛད། །ཀྱེ་མ་འདུལ་བའི་ཚོགས་ཆེན་དག །འདས་པའི་དུས་ན་སྔོན་བྱུང་ལྟར། །ད་ལྟའི་དུས་འདིར་བྱུང་བ་སྟེ། །དེ་བཞིན་གཤེགས་པའི་གསུང་རབ་ལས། །ལོག་པའི་
ལམ་དུ་འཁྲུལ་པ་སྟེ། །ཁྲོ་བོའི་ཚུལ་དུ་བྱུང་གྱུར་པ། །དེ་ཚེ་སེམས་ཅན་ཐམས་ཅད་ཀུན། །ཤིན་ཏུ་ཁྲོ་ཞིང་གཏུམ་པར་འགྱུར། །དེ་ལྟར་གྱུར་པའི་མཚན་ཉིད་ཀྱིས། །མནར་མེད་ལ་སོགས་གནས་ངན་ལེན། །མི་བཟད་སྡུག་བསྔལ་མཐའ་ལ་བརྟེན། །
ཇི་ལྟ་བུ་ཡི་ཐབས་ཀྱིས་འདུལ། །ཤིན་ཏུ་གཏི་མུག་མདོངས་པའི་ཚོགས། །དེ་བཞིན་བག་ཆགས་ངན་པ་ཡིས། །རིག་འཛིན་བདུན་རྒྱུད་གཅོད་བྱེད་ཅིང་། །བསྟན་པའི་གསུང་རབ་འཇིག་པར་འགྱུར། །ལས་ཀྱི་མུན་པས་འགྲོ་བ་འཁྱམས། །དུས་ངན་
རིགས་ངན་ཕྲ་མེན་མ། །གནོད་བྱེད་གདོན་དང་ལོག་འདྲེན་དང་། །སྲིད་གསུམ་འཇིག་ཅིང་དམ་ཚིག་འདྲལ། །འདི་ལྟ་བུ་ཡི་ཐབས་ཀྱིས་ནི། །སངས་རྒྱས་ཐུགས་རྗེ་རྣམ་འཕྲུལ་བསྟན། །ང་རྒྱལ་ཆེན་པོ་མདོངས་པ་ཡི། །ལྟ་བ་རི་བོ་མཐུ་བརྙེས་ཚོགས། །
ད་ལྟའི་ཚེ་ནི་འདི་བྱུང་འགྱུར། །རྒྱལ་བ་འདས་དུས་སྦྱོར་བྱེད་ཅིང་། །ཇི་བཞིན་ལས་ལ་འཁྲུལ་བར་བྱེད། །སངས་རྒྱས་ཀུན་གྱི་བདག་ཉིད་མཛོད། །མངོན་སྤྱོད་རོལ་པའི་ཐབས་ཆེན་གྱིས། །འདི་དག་བསྟན་པའི་དུས་ལ་བབ། །སྲིད་གསུམ་གདུག་
ཅིང་གཏུམ་པ་ལ། །ཞི་བས་ཕན་པར་མི་འགྱུར་ཏེ། །ཤེས་རབ་ཐབས་ཀྱི་ངོ་བོ་ལས། །ཁྲོ་བོ་དེ་བཞིན་གཤེགས་ཀུན་མཛད། །ཁྲོ་བོའི་ཚུལ་ཅན་ཁྲོས་པ་ཡི། །འཇིག་རྟེན་གསུམ་དག་སྲེག་བྱེད་ན། །སངས་རྒྱས་ཐུགས་རྗེ་ཁྲོས་པ་ཡིས། །ཁམས་གསུམ་

མ་ལུས་སྨོས་ཅི་དགོས། །རང་བཞིན་དག་པའི་ངོ་བོ་ལས། །ཕྲག་དོག་འཁྲུལ་པའི་རླུང་དག་གིས། །འཇིག་རྟེན་ཕྱིན་ཅི་ལོག་ཏུ་འཁྱམས། །ཇི་བཞིན་གནས་པ་ལམ་བྲལ་བས། །ཁམས་གསུམ་བརླག་པའི་ལམ་ལ་ཞུགས། །འཇིག་རྟེན་འདི་དག་སྙིང་
རྗེ་ཞིང་། །མངོན་ཤེས་གདུལ་དཀའི་རྨོངས་ཚོགས་རྣམས། །ཁྲོ་བོའི་ཚོགས་ཀྱིས་སྦྱོར་བར་མཛད། །ཞེས་བསྒྲགས་སོ། །དེ་བཞིན་གཤེགས་པ་ཐམས་ཅད་ཀྱི་དགོངས་པ་བླ་ན་མེད་པའི་གསང་བ་དཔལ་རྟ་མཆོག་རོལ་པའི་རྒྱུད་ལས་རྣམ་པར་འཕྲུལ་པའི་དཀྱིལ་
འཁོར་བསྒྲལ་བྱའི་ལེའུ་སྟེ་ཉི་ཤུ་པའོ།། །།དེ་ནས་བཅོམ་ལྡན་དགྱེས་ཆེན་པོས། །པདྨ་གར་གྱི་དབང་ཕྱུག་སྐུས། །མ་ཏང་རུ་ཏྲ་ལ་སོགས་པས། །བདུད་ཀྱི་ཚོགས་བཅས་འདུལ་བའི་ཕྱིར། །ཡུམ་ཆེན་སྐུ་གཅིག་རོལ་མཛད་དེ། །བྱང་ཆུབ་སེམས་སྤྲིན་
ཕྱོགས་བཅུར་སྤྲོ། །དཀྱིལ་འཁོར་རྣམ་གསུམ་དཀྱིལ་འཁོར་གསལ། །དཀྱིལ་འཁོར་འདུས་ཚོགས་དཀྱིལ་འཁོར་ཆེ། །དཀྱིལ་འཁོར་ཆེན་པོའི་བདག་ཉིད་ཆེ། །དགྱེས་བཅས་གར་བཅས་གདན་ལ་བཞུགས། །ཞལ་གསུམ་གངས་རི་མདངས་ལྡན་
པ། །པདྨ་གཏུན་ཤིང་རྩེ་གསུམ་ཐོགས། །རིན་ཆེན་རྒྱན་སོགས་དབུ་རྒྱན་བཅས། །དཀྱིལ་འཁོར་སྤྲུལ་པའི་ཏིང་འཛིན་གྱིས། །སྣོད་གཅིག་དུས་གཅིག་སྤྲུལ་པ་མཛད། །མཐའ་དང་དབུས་མེད་འཇིག་རྟེན་གནས་རྣམས་ཀུན། །དྲག་པོ་འཐིང་ནག་འབར་བའི་
གཞལ་ཡས་ཁང་། །འཁོར་ལོ་རྩིབས་དྲུག་བར་ཁྱམས་ཉི་རིམ་ལྡན། །ཀུན་དུ་ཟླ་ཁམ་སྒོ་ཁྱུད་གྲུ་བཞིར་བཅས། །རིན་ཆེན་འབར་བའི་ཐོད་དབྱུག་རྒྱན་དང་བཅས། །ཚད་མེད་ཡེ་ཤེས་འཁོར་ལོ་ལ་བསྟེན་ཅིང་། །འཇིགས་བྱེད་ཁྲོ་བོའི་རྒྱན་ཚོགས་མང་པོ་
བཀླུབས། །ནམ་མཁའི་མཐའ་མཉམ་ལྷུན་གྱིས་གྲུབ་པའི་གནས། །སྨོན་ལམ་དབང་དང་ཐུགས་རྗེའི་བྱིན་བརླབས་ཀྱིས། །འཇིག་རྟེན་དྲུག་དང་དུས་བཞི་ཕྱོགས་བཅུ་ན། །གཟུགས་ཁམས་མ་ལུས་དབང་དུ་བསྡུ་བ་ན། །དྲག་པོ་ལྷ་བརྒྱད་ང་རྒྱལ་གཞོམ་པའི་

ཕྱིར། །ལྷ་ཆེན་ཕྱོགས་སྐྱོང་ཚོགས་ཀྱིས་རྩིག་པ་བྱས། །སྐུ་བཞི་དཔལ་བརྒྱད་ཚང་བར་བྱ་བའི་ཕྱིར། །རྒྱལ་ཆེན་རིགས་བཞི་བཟུང་ནས་ཀ་བ་བྱས། །ཐེག་པ་གཞན་ལས་འཕགས་པའི་དོན། །གླང་ཆེན་ཀ་ལ་ལིང་གིས་ཀ་གཏན་བྱས། །གླིང་བཞིའི་མི་རྣམས་དགོས་
འདོད་བསྐང་བའི་ཕྱིར། །གཟའ་སྐར་མིག་ཚགས་བྱས་པས་འགྱུར་ལྡོག་མེད། །འཇིག་རྟེན་ཟིལ་གྱིས་གནོན་པའི་ཕྱིར། །སེང་གེ་ཀ་ལ་ཤ་ཡིས་ཀ་ཞུ་བྱས། །འཁོར་བའི་གཅོང་རྙིང་གཏན་ནས་སྦྱང་བའི་ཕྱིར། །སེང་གེའི་ཁ་ནས་བདུད་རྩིའི་འོ་མ་འཛག །ཐོད་རུས་བར་
ཁྱམས་རྡོ་རྗེའི་གཟེར་གྱིས་བརྒྱན། །ཞིང་ཆེན་རྔ་ཡབ་བླ་རེ་འཕན་གདུགས་དང་། །ཐུགས་རྗེ་བྱང་སེམས་ཀུན་དུ་ཁྱབ་པའི་ཕྱིར། །ཉི་ཟླ་འབར་བའི་རྒྱན་ཆས་གསལ་བར་ལྡན། །སྤྲུལ་པའི་མེ་རླུང་འབྲུག་གིས་དུས་བཞིར་ཕྱེ། །ཁྲོ་བོའི་འབྱུང་གནས་ཐུགས་རྗེའི་སྒྲ་དང་
བཅས། །རིན་ཆེན་ཁྲི་དང་པདྨ་ཉི་ཟླ་གདན། །གསེར་གྱི་སེང་གེ་སྤྱན་གསུམ་པ། །དྲུག་བཞི་རྩལ་འཕགས་ཉི་ཤུ་བརྒྱད། །ཁྲི་རྐང་བརྒྱད་ཀྱིས་བར་ཁྱམས་དག་ལ་གནས། །ཐུགས་རྗེ་ཆེ་བས་ཉི་མ་ཉི་ཤུ་བརྒྱད། །འཇིགས་པ་སྤངས་པའི་སེང་གེ་ཉི་ཤུ་བརྒྱད། །སྤྲུལ་
སྐུ་ཐོབ་པས་དབང་མོ་ཉི་ཤུ་བརྒྱད། །ཀུན་དུ་འོད་ཀྱིས་ལ་རབ་གནས་པ། །རིན་ཆེན་ཁྲི་རྐང་འདེགས་པའི་སྟོབས་དང་ལྡན། །མགོན་གནས་དབེན་པར་གཞན་དག་གིས། །མཐོང་རྐང་སྦས་པའི་ཆོས་ཉིད་ལུང་། །ཕྲིན་ལས་རྣམ་པར་རྫོགས་པའི་གནས། །རིགས་བཞི་
ཁྲག་འཐུང་ཧེ་རུ་ཀ །བཞུགས་གནས་མི་འགྱུར་ཆོས་ཀྱི་སྐུ། །དེ་ཉིད་ཀུན་དུ་འོད་ཀྱི་ལུང་། །པདྨ་ལེ་བརྒན་ཕྱོགས་བཅུའི་འོད། །སངས་རྒྱས་ཐམས་ཅད་བསྐྱེད་པའི་ཚུལ། །ཆགས་པར་གྱུར་པ་པདྨ་སྟེ། །ཆེ་བའམ་ཡོན་ཏན་ལུང་དུ་སྟོན། །མཁའ་དབྱིངས་
རྣམ་དག་དྲི་མེད་པས། །མ་ཆགས་པདྨ་ཅན་གྱི་ལུང་། །སྟོང་ཞིང་གསལ་བས་གཞན་གང་འཕགས། །ཉི་ཟླའི་དཀྱིལ་འཁོར་བརྩེགས་པ་ཡིན། །སེང་གེ་འཁོར་ལོ་ཚོགས་ཆེན་པོས། །ཐབས་དང་ཤེས་རབ་ཡ་བྲལ་བས། །སྤྲོས་མེད་རང་གིས་བཟླུམས་པ་ནི། །

མ་སྐྱེས་པ་ཡི་ཆོས་ཉིད་ལུང་། །འོད་ཟེར་གསལ་བས་འཚེར་བས་ན། །ཡང་གབ་སྦས་པ་ཡེ་ཤེས་ལུང་། །འཕྲོ་འདུ་ཁྱབ་པར་གྱུར་པའི་ཚོགས། །ཤེས་རབ་རིགས་ཀྱི་གསང་བའི་ཡུམ། །ཐབས་དང་ཤེས་རབ་དགྱེས་པའི་ཏིང་འཛིན་གྱིས། །
ཚོགས་ཆེན་ཡོངས་རྫོགས་དཀྱིལ་འཁོར་ཆེན་པོ་ནི། །བདག་པོ་ཁྲོ་བོ་ཆེན་པོའི་སྐུ་ཉིད་དུ། །གསང་སྔགས་འདི་ཡིས་ཡོངས་རྫོགས་བྱ། །ཨོྃ་པདྨ་ཤྲཱི་ཧེ་རུ་ཀ་པདྨ་ཀྲོ་དྷཱི་ཤྭ་རི་ཧཱུྃ། མ་ཧཱ་ཙ་ཎ་ཌ་སརྦྦ་དུཥྚ་ན་ཕཊ། །དཀྱིལ་འཁོར་བདག་པོ་རྔམ་བརྗིད་ཆ་ལུགས་དང་། །འབར་
བའི་མེ་འོད་དམར་གསལ་འཕྲོ་བའི་མདངས། །དབུ་ལྔ་ཕྱོགས་བཞིར་ལས་བཞིའི་ཚུལ་དུ་བཞུགས། །དབུ་མ་མཉམ་ཉིད་བདེ་བ་དབྱིངས་སུ་གཟིགས། །རལ་པའི་སྲིད་རྩེ་མེ་འོད་བཞིན་དུ་འབར། །སྨིན་མ་ཁྲོ་གཉེར་སྨ་ར་སོགས་མྱུར་བ། །ལུས་ཐུང་སྐུ་རྒྱན་གྱད་ཀྱི་ཆ་
བྱད་ལ། །བཅྭ་ལྔའི་སྤྱན་གྱིས་རང་གི་ཡུལ་རྣམས་གཟིགས། །རྡོ་རྗེ་རིན་ཆེན་ཁྱུང་གི་གཤོག་པས་གཏམས། །བཅུ་དྲུག་རོལ་པའི་སྤྱན་དང་ཕྱག་མཚན་དང་། །སྒེག་པོའི་ཞབས་བརྒྱད་ཆས་དང་འཆས་པར་གནས། །འཇིག་རྟེན་གསུམ་པོ་ཟིལ་གྱིས་གནོན་པའི་ཕྱིར། །
ཁྲོ་བོའི་ཚོགས་བཅས་འགྱིང་བག་ཡུམ་བཅས་གནོན། །འོད་ཟེར་སྣ་ཚོགས་འཕྲོ་བའི་རྩེ་མོ་ལ། །བདེར་གཤེགས་རིགས་ལྔའི་སྣང་བ་སྣ་ཚོགས་སྟོན། །རང་གི་ཞིང་སྦྱོང་དྲག་པོའི་གནས་འདུལ་ཞིང་། །ཐམས་ཅད་རིགས་ཀྱི་དཀྱིལ་འཁོར་ཆེ་ལ་དགོད། །ཕྱོགས་བཅུའི་
རྒྱལ་བའི་དཀྱིལ་འཁོར་མ་ལུས་ཀྱིས། །ཡབ་ཡུམ་གཉིས་ཀྱི་དགའ་བ་བསྐྱེད་པར་མཛད། །གནས་སུ་ཉི་ཟླ་པད་དཀྱིལ་ཟླ་བ་ལ། །སྐུ་གསུང་ཐུགས་ཀྱི་ས་བོན་ཡོངས་རྫོགས་གསལ། །ཨོྃ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་བ་ཨཱཏ་མ་ཀོ྅ཧྃ། ཨོྃ་སརྦ་ཏ་ཐཱ་ག་ཏ་བཱ་ཀ་
བཛྲ་སྭ་བྷཱ་བ་ཨཱཏ་མ་ཀོ྅ཧྃ། ཨོྃ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་བ་ཨཱཏྨ་ཀོ྅ཧྃ། འཁོར་ལོ་འབར་བའི་རྩེ་མོ་དྲུག་རྣམས་ལ། །མཁའ་འགྲོའི་རྒྱལ་མོ་ཁམ་རྒྱ་ཆེན་མོ་དྲུག །ཞག་གཅིག་ཕྱག་གཉིས་འཇིགས་པའི་ཆ་ལུགས་ཅན། །རིགས་དྲུག་མཚན་མ་ཆ་ལུགས་

ཅི་ལྟ་བུ། །བུདྡྷ་བཛྲ་ཨོྃ། སཏྭ་བཛྲ་ཧཱུྃ། རཏྣ་བཛྲ་ཏྲཱྃ། པདྨ་བཛྲ་ཏྲཱི། ཀརྨ་བཛྲ་ཧ། གྷུ་ན་བཛྲ་ཕཊ། ཕྱི་རོལ་དཀྱིལ་འཁོར་ཁྱབ་པར་སྤྲོས་བྱས་ཏེ། །འགྲོ་རྣམས་དུད་སོགས་ཁམས་རྣམས་དག་བྱས་ནས། །རྡོ་རྗེ་འཁོར་ལོ་རིན་ཆེན་པདྨོ་དང་། །རལ་གྲི་ཁ་ཊྭཱྃ་རྩེ་གསུམ་
དྲིལ་བུ་བཅས། །གཡོན་པ་བདུད་རྩི་ཐོད་པ་གང་བ་ཐོགས། །མཁའ་འགྲོ་རབ་གཏུམ་རིགས་ཀྱི་དབུ་རྒྱན་ཅན། །རང་གི་ཕྲེང་བ་དུར་ཁྲོད་རྒྱན་གྱིས་བཀླུབས། །ལས་ཀྱི་ཁམ་རྒྱ་སྣ་ཚོགས་གཟུགས་ཀྱིས་བཞུགས། །དཔལ་ཆེན་ཐུགས་ཀྱི་དཀྱིལ་འཁོར་ནས། །ལོང་
བ་རྒྱབ་འབྲེལ་རྒྱན་རྣམས་རྫོགས། །སྐུ་མདོག་མཚན་མ་སྣ་ཚོགས་ལ། །ཕྱག་སྦྲེལ་ཟངས་ཀྱི་ཐོད་པ་ཐོགས། །ཨོྃ་ཤྲཱི་ཁཱའི་ཨོྃ་ཤྭ་རི་ཁཱའི། ཏྲྃ། ཤྲཱི་ཁཱའི་ཨ། དམུས་ལོང་འཁོར་བ་བཅུ་དྲུག་དག་བྱུང་སྟེ། །ཐོད་རུས་བར་ཁྱམས་གནས་སུ་བཀོད་པར་བྱ། །
ཨོྃ་ཤྲཱི་ཁཱའི་ཧཱུྃ། ཤྲཱི་ཁཱའི་ཧཱུྃ། ལྕགས་ཀྱི་སྤྱང་མོ་བརྒྱད་རྣམས་ཡང་སྤྲུལ་བཅས། །ཡེ་ཤེས་སྤྲུལ་པའི་ཁྱི་བཅུ་རྔམ་པར་འཁོད། །མེ་རི་སྤྲིན་ལྟར་གཏིབས་པ་རིལ་ཞིང་འཁྲུགས། །བར་ཁྱམས་ཕྱི་མའི་གནས་ལ་ཀུན་དུ་འཁོད། །ཨོྃ་ཏིབ་ཏ་ཙཀྲ་ཤྭ་ན་མུ་
མོ་ར་ཁྃ་ཧཱུྃ་ཕཊ། ཀུ་ཀུ་ར་ཡགྴ་ཧཱུྃ་ཕཊ། །དཔལ་ཆེན་ཐུགས་ཀྱི་དཀྱིལ་འཁོར་ནས། །ཛཿཧཱུྃ་བྃ་ཧོཿ ཕྱག་རྒྱ་ལས། །མགོ་དགུ་བརྩེགས་པའི་རྐང་གཅིག་པོ། །མགོ་བརྒྱད་ལག་བརྒྱད་རོལ་པ་དང་། །མགོ་དྲུག་ལག་དྲུག་རྐང་དྲུག་དང་། །མགོ་གསུམ་
རྐང་གསུམ་ལག་གསུམ་པོ། །དཀྱིལ་འཁོར་ཆེན་པོ་སྒོ་བཞི་རུ། །ཚད་མེད་སྤྲུལ་པའི་ཕྱག་རྒྱས་རོལ། །དེ་དག་རོལ་པའི་བྱིན་བརླབས་ལས། །སྟེང་འོག་ཕྱོགས་མཚམས་མ་ལུས་པའི། །ཐབས་དང་ཤེས་རབ་བྱང་ཆུབ་སེམས། །མེ་འབྲུག་རླུང་འབྲུག་
ཕྱག་རྒྱས་གསལ། །རབ་ཏུ་རྫོགས་པའི་ཚུལ་དུ་བྱུང་། །ཨོྃ་ཛི་ན་ལ་ཏོ་ཙ་རྃ་ཡགྴ་ཀུ་རུ་བན་ཙྪ་ཧཱུྃ་ཕཊ། །གཞན་ཡང་སྤྲུལ་པའི་དཀྱིལ་འཁོར་ཚོགས། །བསེ་ཡི་བྱན་ལག་དམར་པོ་དང་། །དུང་བྱ་ཁྲུང་ཁྲུང་ལ་སོགས་རྣམས། །འཇིག་རྟེན་

ཙམ་པའི་ཚོགས་ཀྱིས་བསྐོར། །ཨོྃ་ཧ་ཧ་རུ་རུ་མ་ཧཱ་ཙནྡེ་ཤྭ་རི་བི་ཤ་ན་ཡ་ཧཱུཾ་ཧཱུཾ་ཕཊ། །ཀུན་གྱི་རྩ་བའི་སྔགས་སོ། །ཨོྃ་པདྨ་བི་ཏ་སི་ཏོ་ཧེ་ཧེ་ཙཀྲ་བྷྱོ་ཕཊ། །སྙིང་པོའི་སྔགས་སོ། །ཨོྃ་ཧུ་ལུ་ཧུ་ལུ་ཧཱུྃ་ཕཊ། ཨེ་ཨ་མ་ར་ལི་ཧཱུྃ་ཛ། ཉེ་བའི་སྙིང་པོའོ། །ཨོྃ་
བྷྱོ་ཨེ་ཨཱ་ར་ལི་ཛ་ཞེས་བརྗོད་པས་ཁྲོ་བོ་འཁོར་ལོ་མ་ལུས་པར་བྱོན་ཞིང་། །རང་གི་དཀྱིལ་འཁོར་གཉིས་སུ་མེད་པར་གྱུར་ནས། །ཧེ་རུ་ཀ་ཆེན་པོ་ཉིད་ཀྱི་དཀྱིལ་འཁོར་ཆེན་པོའི་རྒྱུའི་དཀྱིལ་འཁོར་དུ་གནས་ཤིང་། །རང་གི་དཀྱིལ་འཁོར་རྣམས་དམ་ཚིག་བཀོད་པར་མཛད་
དོ། །དེ་ནས་སྤྲུལ་པའི་འཁོར་ལོ་ཚོགས། །མ་ལུས་རོལ་པར་བྱིན་བརླབས་ཤིང་། །བདུད་དང་གྲགས་བྱེད་རྨོངས་བྱེད་ཅིང་། །རང་གི་གནས་སུ་འདུ་བར་མཛད། །ཨོྃ་ཧུ་ལུ་ཧུ་ལུ་རྃ་ཛ་ལ་ཨེ་ཨ་ར་ལི་ཛཿཧཱུྃ་བྃ་ཧོཿ། ཨ་ལ་ལ་ཧོ། །ཨོྃ་མ་ཏྲ་རུ་ཏྲ་ཧ་ལ་ཧ་ལ་ཧཱུྃ་ཕཊ། དུག་
གསུམ་དངོས་པོ་སྦྱང་བའི་ཕྱིར། །རྔམ་པའི་ཁྲོ་ཚོགས་ཕྱོགས་བཅུར་སྤྲོ། །ཁྲོ་འཛུམ་ཕྱག་རྒྱ་བསྟན་མཛད་ཅིང་། །ཧེ་ཧེ་རུ་རུའི་གསང་སྔགས་བརྗོད། །ཧ་ལ་རྡོ་རྗེའི་གད་རྒྱངས་ཀྱིས། །བདུད་དང་སྲིན་པོ་ལ་སོགས་བརྒྱལ་བར་མཛོད། །ཨོྃ་སརྦ་པ་པ་ཀ་ར་ཧེ་ཏ་པ་བྱི་ཤ་
མ་ཏ་རུ་ཏྲ་ཧཱུྃ་ཕཊ། ཨོྃ་སརྦ་པ་པ་ཧེ་ཏ་བ་བྱི་ཤ་ཁ་ཏང་རུ་ཏྲ་ཧཱུྃ་ཕཊ། ཨོྃ་སརྦ་པ་པ་ཀ་ར་ཧེ་ཏ་པ་བྱི་ཤ་ཁ་ཏང་རུ་ཏྲ་ཧཱུྃ་ཕཊ། དཔལ་ཆེན་ཐུགས་ཀྱི་དཀྱིལ་འཁོར་ཕོ་ཉའི་ཚོགས། །དཔལ་ཆེན་རྡོ་རྗེ་ཐོག་ཐོག་སེར་ཆེན་འབེབས། །ཧཱུྃ་དང་ཕཊ་ཀྱིས་སྲིད་གསུམ་འཁོར་
བ་འཇིག །ཧཱུྃ་དང་ཕཊ་ཀྱི་བྱིན་བརླབས་བསམ་མི་ཁྱབ། །རྡོ་རྗེ་ཁྲག་འཐུང་ཁྲག་གི་རྒྱ་མཚོ་སྐེམས། །རྡོ་རྗེ་མཚོན་ཆ་གནམ་ལྕགས་ཐུ་ལུམ་འདྲིལ། །གསང་སྔགས་ལོག་པར་ལྟ་བའི་བདུད་རྣམས་འཇོམས། །རྡོ་རྗེ་སེར་ཆེན་ཐོག་བཅས་འབར་ཞིང་འཁྲུགས། །ཉམས་
པའི་སྙིང་དང་དབང་པོ་ཐལ་བར་རློག །ཡེ་ཤེས་ཐུགས་རྗེ་ཨ་ལ་ལ། །ཨོྃ་མ་ཧཱ་ཤྲཱི་ཧེ་རུ་ཀ་བྷནྡྷ་བྷནྡྷ། གརྫ་གརྫ། ཧ་ལ་ཧ་ལ་ཧཱུྃ་ཕཊ། །དེ་ནས་བདུད་དང་རུ་ཏྲ་བཅས། །རྡོ་རྗེ་མཚོན་ཆས་བསྒྲལ་བསྒྲལ་ནས། །འཁོར་གྱི་ལོངས་སྤྱོད་རོལ་མཛད་ཅིང་། །ཤ་ཁྲག་ནང་

གྲོལ་བདུད་རྩི་དང་། །རུས་རྐང་དབང་པོར་བཅས་པ་ལ། །ཚོགས་ཀྱི་ལོངས་སྤྱོད་སྟོན་མོར་མཛད། །ཀུན་གྱི་དགྱེས་པ་རྡོ་རྗེའི་གླུས། །མཐུན་པར་སྒྲ་དབྱངས་གཅིག་གིས་བསྟོད། །ཐུགས་རྗེ་རྣམ་དག་པདྨའི་རང་བཞིན་ལས། །ཐུགས་ཀར་ལྃ་ལས་སྤྲུལ་པའི་བྱང་ཆུབ་
སེམས། །ཕྱོགས་བཞི་དབུས་ལྔར་བརྗིད་པའི་སྐུ་མཆོག་ནི། །གྲུབ་པའི་སངས་རྒྱས་མཁྱེན་པའི་ཡེ་ཤེས་ལྔ། །དཔལ་ལུས་ཁྱད་པར་འཕགས་པ་ཞལ་གྱི་དབྱིངས། །དབང་མཆོག་ལྷུན་གྱིས་གྲུབ་པའི་རྟ་སྐད་ཅན། །ཐར་ལམ་ཐུགས་རྗེ་ཐབས་མཁས་སྤྲུལ་པ་ཡི། །ཡེ་
ཤེས་བྱིན་བརླབས་ཁྲོ་རྒྱལ་འབུམ་དུ་སྤྲུལ། །སྨིན་མཛད་སྨོན་ལམ་ཡུན་རིངས་གྲུབ་པ་ཡི། །དམིགས་པའི་མཐའ་བྲལ་པདྨ་ཡུམ་གྱི་ཚུལ། །ཆོས་རྣམས་མ་ལུས་གསལ་བར་གཟིགས་པའོ། །ཆགས་མེད་ཐུགས་རྗེ་པདྨའི་ཚུལ། །སྒྲ་སྐད་ཐམས་ཅད་མཐའ་ལས་
གྲོལ། །ཟབ་དང་རྒྱང་རིང་ཆོས་ཀྱི་དོན་རྣམས་མཚན་ཉིད་ལས། །ཤངས་ཀྱི་རླུང་སྒྲོམ་དུག་གསུམ་རྩད་ནས་ཆོད། །ཞལ་གྱི་ཧྃ་ལ་འབྲེལ་པས་རྒྱུད་ལྔ་གཅོད། །རྣོ་དབལ་མཆེ་བ་སྐྱེ་ཤི་རྩད་ནས་གཅོད། །ལེ་བརྒན་ལྗགས་ཀྱི་གསུང་སྒྲ་རྒྱ་མཚོར་འཆད། །
རོལ་པའི་ཕྱག་གིས་འགྲོ་བ་འདུལ་ལ་མཁས། །གཤོག་བཞི་བསྐྱོད་པས་ཕྲིན་ལས་རྣམ་བཞི་མཛད། །ཞབས་རོལ་པས་ནི་ཟིལ་གནོན་མཛད་པའི་ཚུལ། །སྐུ་ཆེ་ཡན་ལག་རགས་པ་རི་བོ་བཞིན། །ཐུགས་མཆོག་ཡེ་ཤེས་སྟོང་ཉིད་ཉི་མ་བདལ། །ཡེ་ཤེས་
ལྷ་མཆོག་བྱིན་བརླབས་འབྱུང་བའི་གནས། །ངོ་མཚར་རོལ་པས་ཁྲོ་བོ་ཀུན་གྱི་རྗེ། །དཔའ་བོ་སྐུ་མཆོག་མངའ་ལ་ཕྱག་འཚལ་བསྟོད། །དེ་ནས་བདེ་ཆེན་དབང་གི་སྐུས། །འཁོར་ལོ་དམ་ཚིག་སྒྲོགས་མཛད་ཅིང་། །རྡོ་རྗེ་གསང་བའི་སྐུ་གསུང་ཐུགས། །གསལ་བར་
བྱིན་བརླབས་བསྐྱེད་པར་མཛད། །ཨོྃ་ཨཱཿཧཱུྃ་སརྦ་པཉྩ་ཨ་མྲྀ་ཏ་ས་མ་ཡོ་གི་སིདྡྷི་ཧཱུྃ། པ་ཧོ་ཀ་ཀ་མ་ལ་སུ་ཏ་ས་ཧཱུྃ། ཨོྃ་བཛྲ་ས་མ་ཡ་ཀྲོ་དྷ་ས་མ་ཡ་ཨོྃ་ཨཱཿཧཱུྃ། མ་ཧཱ་ཡོ་གི་ཙིཏྟ་རྃ་བ་རཀྟ་མ་ལ་ཁཱའི་ཁཱའི་ཧཱུྃ། ཨོྃ་ཁ་ཁ་ལེ་ལ་རུ་ལུ་རུ་ལུ་ཧཱུྃ་ཕཊ། ཨི་དྷ་ན་ས་མ་

ཡ་ཨ་ལ་ལ་ཧོ་ཞེས་རྡོ་རྗེའི་གླུ་བླངས་སོ། །པདྨོ་གར་མཛད་དོ། །བདེ་བ་ཆེན་པོས་མཆོད་པས་ཚིམ་པར་འགྱུར་རོ། །དེའི་དུས་ན་བདུད་ལ་སོགས་པ་རྣམས་བསྒྲལ་བའི་ཚོགས་རྣམས་བྱང་ཆུབ་སེམས་བདེ་བ་ཆེན་པོའི་ཡེ་ཤེས་ཀྱིས་བརྒྱན་ཏེ། །དབང་བསྐུར་
བའི་མཐུ་སོགས་ཀྱིས། །བདག་པོ་རིག་འཛིན་ཐམས་ཅད་ཀྱི་བདག་པོ་ཞེས་བྱ་བར་འགྱུར་རོ། །དཀྱིལ་འཁོར་ཆེན་པོའི་ཕྱི་རོལ་དུ་འཁོད་ཅིང་གསང་བའི་དཀྱིལ་འཁོར་འཛིན་པར་གྱུར་ཏོ། །དེའི་འཁོར་རྣམས་ཀྱང་དམ་ཚིག་གི་སྙིང་པོ་བླངས་ན་བྲན་དུ་མཛད་པར་ཁས་བླངས་
སོ། །སྙིང་པོ་བརྗོད་པ་ནི། །མ་མ་ཏྲག་ཤ་རུ་ཏྲ་མ་མ་བྷྱོ། སླར་བསྒོ་བའི་སྔགས་ནི། ཨོྃ་རུ་ལུ་རུ་ལུ་ཧཱུྃ་བྷྱོ་པདྨ་ཧྲྀ་དྡྷ་རུ་རུ་ཧཱུྃ་བྷྱོ་ཧཱུྃ། །དེ་བཞིན་གཤེགས་པ་ཐམས་ཅད་ཀྱི་དགོངས་པ་བླ་ན་མེད་པའི་གསང་བ་དཔལ་རྟ་མཆོག་རོལ་པའི་རྒྱུད་ལས་གསང་ཆེན་འདུས་
པའི་ལེའུ་སྟེ་ཉི་ཤུ་གཅིག་པའོ།། །།དེ་ནས་བཅོམ་ལྡན་གར་དབང་གིས། །རིགས་ཀྱི་ད