Kinh tạng Tây Tạng (Kangyur Đại Học) — 099_རྙིང་རྒྱུད།_ག

་གསུངས་སོ། །ཨོྃ་པྲ་མཱ་རྟེ་ན། ན་མོ་བཛྲ་བཛྲ་ཀི་མོ་ན་ཏ། ཨ་ཧང་པྲ་ཁུ་མ་ཁུམ་མོ་མུ་སྟི་སྭཱ་ཧཱ། དེ་སྐད་ཅེས་ནི་གསུངས་པ་ཡིས། །རང་བཞིན་གྱིས་ནི་དབང་དུ་འགྱུར། །བདུད་
རྣམས་དག་ནི་ཁྲོ་ཞིང་གཏུམ། །སྲིན་པོ་དག་ནི་འཇིགས་ཤིང་རྔམ། །མུ་སྟེགས་ལོག་འདྲེན་རྒོལ་བར་བྱེད། །དེ་དག་གདུལ་བར་བྱ་བའི་ཕྱིར། །ཕྲིན་ལས་དམ་པ་འདི་བརྩམས་སོ། །དཀྱིལ་འཁོར་སྔ་མ་བཞིན་བྲིས་ལ། །དབུས་ཀྱི་ཕོ་བྲང་ལྟེ་བ་ལ། །བདུད་རྣམས་

འདུལ་བའི་སྙིང་པོ་བྲི། །ཤར་གྱི་འཁོར་ལོའི་རྩིབས་སྟེངས་སུ། །དྲི་ཟ་དབང་བསྡུའི་སྙིང་པོ་བྲི། །ལྷོ་ཡི་ཕྱོགས་ཀྱི་འཁོར་ལོ་ལ། །མུ་སྟེགས་སྒྲོལ་བའི་སྙིང་པོ་བྲི། །ནུབ་ཀྱི་ཕྱོགས་ཀྱི་འཁོར་ལོ་ལ། །ཀླུ་རྣམས་ཚར་གཅོད་སྙིང་པོ་བྲི། །བྱང་གི་ཕྱོགས་
ཀྱི་འཁོར་ལོ་ལ། །གནོད་སྦྱིན་ཚོགས་རྣམས་དབང་སྡུད་བྲི། །ཧུྃ་བི་གྷ་ནན། ཧུྃ་རཀྴ་ནན། ཨོྃ་ཏིར་ཏི་ཀ་ནན། ཨོྃ་མར་ནན་ན། མཚམས་ཀྱི་དཀྱིལ་འཁོར་ལྟེ་དབུས་སུ། །མཚམས་ཀྱི་བགེགས་གནོན་སྙིང་པོ་བྲི། །ཧུྃ་དྷ་ཧུྃ་པཱཿ ཧུྃ་ལཱ། ཧུ་སྭཱ། གྲུ་ཆད་རྣམ་པ་
བཞི་པོ་ལ། །ཐོད་པ་རློན་པ་བྲི་བར་བྱ། །མུ་ཁྱུད་ཐོད་པའི་ཕྲེང་བ་གཏང་། །ཕྱི་རོལ་སྦྲུལ་གྱིས་ཡོངས་སུ་དགང་། །དེ་ལྟར་དཀྱིལ་འཁོར་ཟིན་པ་དང་། །རྣམ་པར་འཚེ་བའི་གཟུགས་རྣམས་ཀུན། །ཁམ་པ་རྫ་ཡི་གའུ་ལ། །གཟུགས་སུ་ཡོངས་སུ་བྲི་བྱ་སྟེ། །
དབུས་སུ་ཡོངས་སུ་གཞག་པར་བྱ། །ཁ་དོག་དམར་པོས་བཅིངས་ནས་ནི། །རྩེ་གཅིག་ཕྱག་རྒྱ་བཅས་བྱས་ལ། །གསང་སྔགས་འདི་ཡང་འབུམ་ཁྲི་བརྗོད། །ཨོྃ་པྲ་མ་རྟ་ན་མོ་ཧ་སྲ་བཛྲ་ཛ་ཀི་མོ་ན་དྷ་ཨ་ཧང་པྲ་ཁུ་མ་མོ་ཐ་ཐ་སྭཱ་ཧཱ། ན་མོ་དོ་གི་ཁ་དྷ་མུ་པྲ་པ་ཐ་བྱི་ཐ་
ཨུ་སྟེ་ནི་ནན་སརྦ་ཏ་ཏ་ན་ཕཊ། ཕྱག་རྒྱ་དེ་དང་བཅས་པས་བརྡེག །ཞག་གསུམ་བཟླས་པ་བྱས་ན་ནི། །བགེགས་དང་ལོག་འདྲེན་དབང་དུ་འདུས། །གཞན་ཡང་དེ་བཞིན་བཞུགས་པའི་ཁྲོ། །དཀར་དང་དམར་དང་སེར་བ་དང་། །སྨུག་ནག་ལྗང་ནག་ཁམ་པ་དང་། །
སོ་སོའི་ཆ་ལུགས་རྔམ་པའི་གཟུགས། །མགོན་པོ་གཤིན་རྗེ་ནག་པོ་ཡིས། །བགེགས་དང་ལོག་འདྲེན་གཟིར་ཅིང་གནོན། །རྔམ་པའི་ཞལ་དུ་འདི་བསྟབས་སོ། །ཨོྃ་ཆེ་གེ་མོ་ཁ་རམ་ཁཱ་ཧི། ཨོྃ་ཧྲིཥྚྲྀ་ཆེ་གེ་མོ་ཁ་རམ་ཁཱ་ཧི། ཨོྃ་ཀཱ་ལ་རཱུ་པ་ཆེ་གེ་མོ་ཁ་རམ་ཁཱ་ཧི། །ཧུྃ་ཧུྃ་
ཕཊ་ཕཊ་ཨ། །ཉིན་ཞག་གསུམ་གྱི་བར་དུ་བཟླས། །དེ་ནས་ཕྱག་རྒྱ་གསུམ་བཅས་ཏེ། །ཡང་ནས་ཡང་དུ་གཟིར་ཅིང་གནོན། །ཕྱག་རྒྱ་དེ་དང་གསང་སྔགས་འདིས། །ལན་གྲངས་སྟོང་རྩ་གཅིག་ཏུ་བརྡེག །ཨོྃ་ཧྲིཥྚྲྀ་བཛྲ་ཡ་ཡ་ན་པརྣ་སུ་པུཏྟ་ཧུྃ་ཧུྃ་ཕཊ་ཕཊ་ཨ། །ལས་དང་

རྫས་དང་སྔགས་དང་ནི། །ཕྱག་རྒྱ་བརྩོན་འགྲུས་མ་ཡེངས་པར། །འབུམ་མམ་གྲངས་ནི་ཅི་མང་དུ། །ཡང་ནས་ཡང་དུ་ནན་ཏན་བྱ། །ཞེས་བཅོམ་ལྡན་འདས་འཇམ་དཔལ་འཇིགས་བྱེད་ཀྱི་རྒྱལ་པོས་རབ་ཏུ་གསུངས་སོ། །འཕགས་པ་ལས་བཞི་འཁོར་ལོ་གསང་བའི་རྒྱུད་ལས་ལོག་
འདྲེན་མཐར་བྱེད་ཀྱིས་མནན་པའི་ལེའུ་སྟེ་དགུ་པའོ།། །།དེ་ནས་བཅོམ་ལྡན་འདས་གཤིན་རྗེའི་བདག་ཉིད་དེས་མཐར་བྱེད་འབྱུང་བ་འདི་ཉིད་ཀྱི་སྐུ་དང་གསུང་དང་ཐུགས་ཡོན་ཏན་ཕྲིན་ལས་ལས་ཕྱུང་ངོ་། །གནོད་སྦྱིན་མཐར་བྱེད་ཕྲིན་ལས་འདི། །དཀྱིལ་འཁོར་སྔ་མ་བཞིན་
བྲིས་ལ། །བཟླས་པའི་སྙིང་པོ་བྲི་བར་བྱ། །ཡ་སྟེ་སྐྱེད་པ་མེ་སྟེ་སྲེག །ཏོས་ལ་སྙིང་རྗེ་རུ་ལ་ཆགས། །ནྫ་ནི་འབྱུང་བྱེད་ཡབ་ཀྱི་གསང་། །ཡོ་ལ་ཀུན་འབྱུང་ཏ་ལ་བསྡུ། །བདག་ཉིད་ལས་ཀྱི་མཐར་བྱེད་སྐུ། །ཡབ་ཡུམ་གཉིས་མེད་རོལ་པ་ལས། །བྱང་ཆུབ་སེམས་ཀྱི་འོད་ཟེར་
འཕྲོ། །འཛུམ་དང་བཅས་པས་ཡུལ་ལ་འབུལ། །བྱང་ཆུབ་བླ་མེད་སངས་རྒྱས་ལ། །མཆོད་ཅིང་ཅི་ལྟར་མཛད་པ་ལྟར། །བདག་ཀྱང་རབ་ཏུ་བསྒྲལ་སླད་དུ། །ཏིང་འཛིན་འདུ་བ་ནམ་མཁའ་འདྲ། །ཞེས་གསུངས་པས་ཕྱོགས་བཅུའི་གདུག་པ་ཅན་ཐམས་ཅད་སྤ་གོང་སྟེ་བྲེད་
ནས་མྱོས་པར་གྱུར་ཏེ། དཔེར་ན་མི་ར་རོ་བ་བཞིན་ནོ། །དེ་ནས་ནན་ཏན་གྱི་ཕྲིན་ལས་འདི་ཉིད་ཀྱི་སྐུ་དང་གསུང་དང་ཐུགས་ཡོན་ཏན་ཕྲིན་ལས་ལས་ཕྱུང་ངོ་། །གདུག་པ་མ་ལུས་འདུལ་མཛད་པ། །ཁྲོ་བོ་ཆེན་པོ་ཧཱུྃ་སྒྲ་ཅན། །ལས་རྣམས་མཐར་བྱེད་ཕྲིན་ལས་སྐུ། །
གནོད་སྦྱིན་སྡང་སེམས་ལྡན་པ་ཀུན། །བར་ཆད་བྱ་བར་སེམས་པ་སྟེ། །དེ་དག་ཟིལ་གྱིས་གནོན་པའི་ཕྱིར། །སྐུ་མདོག་ནག་པོ་ཆེན་པོ་སྟེ། །དབུ་སྐྲ་ཁམ་ནག་གྱེན་དུ་འཁྱིལ། །ཐོད་པ་ཚར་གསུམ་དབུ་རྒྱན་ཅན། །ཕྱག་གཡས་ཞིང་ཆེན་གཡོན་བྷན་དྷ། །སྤྱན་གསུམ་
མཆེ་གཙིགས་ཞབས་ཀྱང་བརྐྱང་བསྐུམ་སྟེ། །མི་མཐུན་བགེགས་དང་སྡང་བའི་དགྲ། །མ་ལུས་དབང་སྡུད་ཕྲིན་ལས་མཆོག་གི་སྐུ། །མི་སྡུག་ཚུལ་འཆང་དྲེགས་པའི་ཁྱོ་ཤུག་ལྡན། །ཞིང་ཆེན་གཡང་གཞི་རྒྱན་དུ་བྱས། །ཞེ་སྡང་དབང་སྡུད་སྟག་གི་ཤམ་ཐབས་

ཅན། །ཉོན་མོངས་དབང་སྡུད་གླང་ཆེན་ཀོ་རློན་ཅན། །འདྲེན་པའི་ཁྲོ་རྒྱལ་གདུག་འདུལ་དམ་པ་འདི། །དུས་ངན་ཐ་མའི་སེམས་ཅན་འདུལ་དཀའ་བ། །ཉོན་མོངས་དབང་སྡུད་དཔལ་གྱི་ཞལ་དུ་སྟོབས། །འགྲོ་བ་མ་ལུས་ཐུགས་རྗེས་དབྱིངས་ལ་དགོད། །
ཞེ་སྡང་ཤུགས་འཆང་ཁྲོ་བོའི་གཙོ། །གདུག་པར་གྱུར་པའི་དགྲ་བགེགས་འདུལ་མཛད་པ། །ང་རྒྱལ་ལ་སོགས་རྟག་ཏུ་དུག་གསུམ་སྐུ། །ཡེ་ཤེས་ངང་ལས་ཐམས་ཅད་རྫོགས་པར་མཛོད། །ཨོྃ་བཛྲ་ཧྲིཥྚཱྀ་བི་ཀྲི་ཏཱ་ནན། ཏ་ཐཱ་ག་ཏ་ཡ་མ་ར་ཙ་ཧཱུྃ་ཕཊ་ཨ། ཞེས་
པའི་སྔགས་དང་བཅས་ལ་བདག་ཉིད་ལས་མཐར་བྱེད་ཀྱི་སྐུར་བསྒོམས་ལ་ཕྲིན་ལས་བཅོལ་ཞིང་གནོན་པ་དྲག་ཏུ་བཟླས་པའི་སྙིང་པོ་བཟླས་སོ། །དེའི་དུས་སུ་སྦྱིན་སྲེག་བྱེད་ན་ཕྲིན་ལས་བརྩམ་པར་བྱ་སྟེ། །མེ་ཐབ་ཨེ་ཡི་དབྱིབས་འདྲ་ལ། །བང་རིམ་སུམ་
བརྩེགས་ཁ་ཁྱེར་ཅན། །ངོས་ལ་མེ་ཡི་ཕྲེང་བ་གཏང་། །ཁ་ཁྱེར་རྡོ་རྗེ་ར་བ་ལ། །མུ་རན་ཐོད་པའི་ཕྲེང་བ་སྟེ། །མེ་སྟེ་བསྲེག་བྱ་འཆང་ཞེས་པ། །ཁ་དོག་ནག་པོ་ཤིན་ཏུ་རིད། །ཕྱག་ན་ཞུགས་གླིང་བགྲད་ཕྲེང་དང་། །བེ་ཅོན་རིལ་བ་ཐོགས་པ་སྟེ། །ཚུལ་བཞིན་
སྤྱན་དྲངས་གདན་བཞུགས་བསྟོད། །དབང་དང་ཕྱག་ཚང་གཤེགས་པ་རྣམས། །གང་ལྟར་འཚམ་པ་བཞིན་དུ་བྱ། །གཉིས་འོག་རང་བཞིན་ཡ་མའི་སྐུ། །གཉིས་མེད་སྤྱན་དྲངས་བཞུགས་ལ་བཅོལ། །སྦྱིན་སྲེག་ཕྲིན་ལས་ཟིན་པ་དང་། །བཅོལ་བསྐུལ་དག་ཀྱང་
རབ་ཏུ་བྱ། །རྫས་ནི་དུག་དང་ལན་ཚྭ་དང་། །སྐེ་ཚེ་སྦྲང་རྩི་ཡུངས་ནག་དང་། །གུ་གུལ་ནག་པོ་ལ་སོགས་པའི། །ལྕགས་འདྲའི་རྫས་ལ་རབ་ཏུ་བསྔགས། །བདག་ཉིད་ལྷ་ཡི་སྐུར་བསྒོམས་ལ། །དཀྱིལ་འཁོར་བྱིན་གྱིས་བརླབས་པ་ཡི། །སྔགས་འདི་རབ་ཏུ་རྩེ་གཅིག་
བཟླས། །ཨོྃ་ཧཱུྃ་ཡ་ཁང་མེ་ཏྲ་ཧ་མུ་ཁ་ཧྲི་ཥྚྲྀ་ཡ་མ་ར་ཙ་ཕཊ་ཧུྃ། ཕྱག་རྒྱ་ཟིལ་གནོན་ཕྱག་རྒྱ་བཅའ། །དཀྱིལ་འཁོར་བསྐོར་ཞིང་གསང་སྔགས་བཟླས། །བདག་ཉིད་ནུབ་ཀྱི་ཕྱོགས་འདུག་སྟེ། །ལས་ཀྱི་མཐར་བྱེད་སྐུར་བསྒོམས་ལ། །གསང་སྔགས་མི་བུལ་མི་དྲག་

པར། །བཟླས་ན་མྱུར་དུ་འགྲུབ་པ་ནི། །ཡིད་འཁྲུགས་མྱོས་ནས་དབང་མེད་འགྱེལ་བ་དང་། །རབ་ཏུ་བརྒྱལ་ནས་ཐལ་བར་འཇིག་པ་དང་། །དེ་རྣམས་མི་འགྲུབ་པ་རུ་ངེས་མ་བཤད། །ཅེས་བཅོམ་ལྡན་འདས་དོན་ཡོད་པའི་ཁྲོ་བོས་གསུངས་སོ། །འཕགས་པ་
ལས་བཞི་འཁོར་ལོ་གསང་བའི་རྒྱུད་ལས། གནོད་སྦྱིན་མཐར་བྱེད་ཀྱིས་གནོན་པའི་ལེའུ་སྟེ་བཅུ་པའོ།། །།དེ་ནས་ཡང་འཇམ་དཔལ་གཤིན་རྗེ་གཤེད་ཆེན་པོས་མཐར་བྱེད་འབྱུང་བ་འདི་སྐུ་དང་གསུང་དང་ཐུགས་ལས་ཕྱུང་ངོ་། །སྲིན་པོ་མཐར་བྱེད་
ཕྲིན་ལས་འདི། །དཀྱིལ་འཁོར་བསྒོམ་པ་བྱ་བར་བསྟན། །ཡ་སྟེ་རྒྱུ་ལ་ཏ་སྟེ་རྐྱེན། །ཡོ་ནི་ཀུན་དུ་བསྐུལ་བ་ལ། །ནི་ནི་སྡུད་པའི་དོན་ཡིན་ཏེ། །རི་ཞེས་བྱ་བ་ལྷུན་སྟུག་པ། །ཡ་ལ་འདུས་ཏེ་ཀྵེ་ལ་ཐིམ། །བདག་ཉིད་ཆིངས་ཞེས་བྱ་བའི་སྐུ། །དབུ་གསུམ་
པོ་ལ་ཕྱག་དྲུག་སྟེ། །གཡས་དཀར་གཡོན་དམར་དབུས་སེར་ནག །ཕྱག་དྲུག་ཕྱག་མཚན་བསྣམས་པ་ནི། །གཡས་པ་བ་སུ་ཏ་ཡི་ཞགས། །གཡས་པར་གསལ་ཤིང་ཐ་མ་ལྕགས་ཀྱུའོ། །གཡོན་གྱི་དང་པོ་ཆུ་སྲིན་བར་མ་ཀ་ཏ་རི། །ཐ་མ་རྡོ་རྗེ་རྒྱ་གྲམ་
བསྣམས་པའོ། །སྐུ་སྟོད་གླང་ཆེན་ཀོ་རློན་ལ། །སྐུ་སྨད་སྟག་གི་ཤམ་ཐབས་ཏེ། །ཞིང་ཆེན་གཡང་གཞིས་སྐུ་ལ་བརྒྱན། །གཞན་ཡང་དུར་ཁྲོད་རྒྱན་མཆོག་རྣམས། །མ་ལུས་སྐུ་ལ་རྫོགས་པ་ལ། །བསྐུལ་བའི་དབྱངས་འདི་བླང་བར་བྱ། །མི་ཤིགས་རྡོ་རྗེ་གར་
གྱི་བདག །རྡོ་རྗེ་གསང་བའི་གཤིན་རྗེ་སྟེ། །ཕྲིན་ལས་རྒྱལ་པོ་གྲུབ་པའི་ལས། །ཨོྃ་དང་ཨྃ་དང་ཧཱུྃ་ཞེས་པ། །ཨོྃ་ནི་དཔྲལ་བའི་སྟེང་དུ་དམིགས། །ཨྃ་ནི་ལྕེ་ཡི་སྟེང་དུ་ལ། །ཧཱུྃ་ནི་ཐུགས་ཀ་ཉིད་དུའོ། །དེ་ལས་འོད་ཟེར་རབ་སྤྲོས་ཏེ། །བདག་ལུས་ནམ་
མཁའ་ལྟ་བུར་གྱུར། །ཕཊ་ཅེས་བྱ་བ་རབ་བརྗོད་པས། །འཇིག་རྟེན་ཁམས་རྣམས་འོད་ཀྱིས་ཁེབས། །དེ་ཉིད་སྲེག་པ་མ་ཡིན་ཏེ། །ཡིད་ཀྱི་ཡེ་ཤེས་མེ་འབར་བ། །གཅིག་གི་སྟོང་ཉིད་གང་ཡིན་པ། །ཀུན་གྱི་སྟོང་པ་དེ་ཡིན་ནོ། །ཇི་ལྟར་མཁའ་ལ་མཚོན་སྣང་

བ། །ནམ་མཁའ་ཉིད་ལས་བྱུང་བ་ལྟར། །སྔགས་ཀྱི་འཕྲོ་འདུ་བཏང་བ་ཡང་། །སེམས་ལས་བྱུང་བ་ནམ་མཁའ་ལ། །རྣམ་ཤེས་སྟོང་པའི་ངང་ལ་འདུ། །བདག་ཉིད་ཆོས་ཀྱི་སྐུར་བསྒོམས་ལ། །ཞེ་སྡང་འཕྲོ་འདུ་མང་བྱས་ལ། །བསྐྱེད་པའི་
སྔགས་ནི་དྲག་ཏུ་བཟླས། །ཨོྃ་མ་ཧཱ་དཾ་ཥྚོ་ཏ་ཀ་པེ་ར་ཨ་ར་ནེ་ཙ་ན་ཀ་ཏ་ཁཻ་ཆེ་གེ་མོ་ལ་དུས་ཞེས་པ་དང་། སྔགས་གོང་ནས་འབྱུང་བ་དང་། སྤེལ་ཏེ་ལས་བྱས་ན་གདོན་མི་ཟའོ་ཞེས་གཤིན་རྗེ་ཁྲོ་བོའི་རྒྱལ་པོས་གསུངས་སོ། །འཕགས་པ་ལས་བཞི་འཁོར་
ལོ་གསང་བའི་རྒྱུད་ལས་ཀླུ་མཐར་བྱེད་ཀྱིས་གནོན་པའི་ཐབས་ཀྱི་ལེའུ་སྟེ་བཅུ་གཅིག་པའོ།། །།དེ་ནས་ཡང་ཁྲོ་བོ་ཆེན་པོ་གཤིན་རྗེ་གཤེད་ཀྱིས་མཐར་བྱེད་འབྱུང་བ་འདི་ཉིད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ལས་ཕྱུང་ངོ་། །ཡ་མ་མཐར་བྱེད་
ཕྲིན་ལས་ནི། །དཀྱིལ་འཁོར་སྔ་མ་འདྲ་བར་དམིགས། །བཟླས་པའི་སྙིང་པོ་འདི་ཡང་བྲི། །ཡ་སྟེ་འབྱུང་བྱེད་ཀྵེ་ཡིས་སྲེག །ཡ་ནི་ཡང་དག་ཙ་ནི་སྐེམས། །ནི་ཞེས་པ་ནི་ཁུག་ཅིག་པའོ། །ར་ཞེས་བྱ་བ་བསྒྲལ་བ་ལ། །མ་ལས་སྐྱེས་བྱེད་སླར་སྡུད་པའོ། །བདག་
ཉིད་ཡ་མ་མཐར་བྱེད་སྐུ། །སྐུ་མདོག་ལྗང་ནག་ཞལ་གཅིག་ཕྱག་གཉིས་པ། །སྐུ་ལ་ཐོད་པ་ཕྱེད་ཚལ་བརྒྱན། །དབུ་ཡི་སྐྲ་ནི་ཁམ་ནག་ལ། །རལ་པ་གྱེན་དུ་འཁྱིལ་བ་སྟེ། །ཕྱག་གཡས་ཆུ་སྲིན་དབྱུག་ཏོ་འཕྱར། །གཡོན་པ་ཕྱག་ན་ཞིང་ཆེན་ཟ་བའོ། །སྐུ་
སྟོད་གླང་ཆེན་ཀོ་རློན་ལ། །སྐུ་སྨད་སྟག་གི་ཤམ་ཐབས་ཅན། །དུར་ཁྲོད་མེ་དབུས་བཞུགས་པ་ལ། །ཡུམ་ཡང་དེ་དང་འདྲ་བར་བསྒོམ། །བཟླས་པའི་ཏིང་འཛིན་མེ་འདྲ་ལ། །བཟླས་བརྗོད་རླུང་འདྲ་གཡོ་ཞིང་བསྐྱོད། །ལྕེ་ལ་ཉི་མའི་དཀྱིལ་འཁོར་ལ། །སྟེང་དུ་བཟླས་
པའི་སྙིང་པོ་དགོད། །ཐ་མ་དབྱངས་དང་བཅས་པ་ལ། །ཧྲིཥྚྲྀ་སྔགས་ཀྱི་ཕྲེང་བ་གདབ། །ཕར་འཕྲོས་རྣམ་ཤེས་འགུགས་པར་བསམ། །ཚུར་བསྡུས་གཤིན་རྗེ་ཉིད་ལ་ཐིམ། །འཕྲོ་འདུ་བཟླས་པ་དེ་དག་ཀུན། །གོང་དུ་བཤད་པ་དག་ལ་ཡང་། །དེ་དག་རབ་ཏུ་སྦྱར་

ཞེས་བཤད། །དེ་ནས་བཅོམ་ལྡན་འདས་གཤིན་རྗེའི་ཁྲོ་བོས་བསྐུལ་བ་འདི་གསུངས་སོ། །ཨོྃ་ཡ་མ་ལས་ཀུན་འཇིགས་པར་བྱེད་པ་ནི། །ཐམས་ཅད་དབང་སྡུད་ཡ་མ་མཐར་བྱེད་སྐུ། །ཞལ་གཅིག་ཕྱག་གཉིས་སྐུ་མདོག་ལྗང་། །ཞབས་གཉིས་དོར་ཐབས་ཀླུ་རྒྱལ་གནོན། །
སྐུ་ལ་སྦྲུལ་ནག་སྟོང་གིས་བརྒྱན་པ་ནི། །བགེགས་རྣམས་འདུལ་ཞིང་རྟག་ཏུ་འཆི་བར་མཛད། །སྐུ་ལ་ཐོད་པའི་ཕྱེད་ཚལ་བརྒྱན་པ་ནི། །འགྲོ་བ་ཐུགས་རྗེ་ཕྱོགས་གཅིག་དགོངས་པའི་རྟགས། །དབུ་སྐྲ་རལ་པ་གྱེན་དུ་འཁྱིལ་བ་ནི། །སྲིད་གསུམ་མ་ལུས་དབང་དུ་སྡུད་པའི་རྟགས། །
ཕྱག་གཡས་ཆུ་སྲིན་དབྱུག་ཏོ་བསྣམས་པ་ནི། །དགྲ་བགེགས་འཇིགས་པ་ཆེ་ལས་སྒྲོལ་བའི་རྟགས། །གཡོན་པ་ཞིང་དབྱུག་ཕྱག་ན་བསྣམས་པ་ནི། །ཐུགས་རྗེས་སེམས་ཅན་མྱ་ངན་ལམ་ལ་འཇོག །ཀོ་རློན་གཡང་གཞིས་སྐུ་ལ་བརྒྱན་པ་ནི། །དུག་ལྔ་མ་སྤངས་
གནས་སུ་དག་པའི་རྟགས། །སྟག་གི་གཡང་གཞིས་སྐུ་ལ་བརྒྱན་པ་ནི། །དུག་གསུམ་གནས་སུ་བསྒྲལ་ནས་ཆོས་ཀྱི་སྐུ། །སྐྱེ་མེད་དང་ལས་གཡོ་བསྐྱོད་མི་མངའ་ཡང་། །ཞེ་སྡང་ཕྲིན་ལས་བྱ་བའི་དུས་ལ་བབ། །ཨོྃ་ཧྲིཥྚྲྀ་ཡ་མ་ར་ཙ་སརྦ་མ་ར་ཡ་ནན་ཛ་ས་མ་ཡ།
ཞེས་བརྗོད་ཅིང་ཞེ་སྡང་དང་ལྡན་པར་ཏིང་ངེ་འཛིན་གྱིས་བཟླས་པ་དང་སྦྱར་ཏེ་ལས་བྱས་ན་གདོན་མི་ཟའོ། །དེ་དག་ནི་འདི་འོས་པ་ཙམ་གྱིས་མ་ཡིན་ཏེ་ཡང་དང་ཡང་དུ་འདྲིས་པར་བྱས་ལ་ནན་ཏན་གྱིས་མ་བྱས་ན་འཕྲལ་དུ་ཕྲ་མོ་ཙམ་གྱིས་འགྲུབ་པ་མ་ཡིན་ནོ། །འཕགས་
པ་ལས་བཞི་འཁོར་ལོ་གསང་བའི་རྒྱུད་ལས་ཡ་མ་མཐར་བྱེད་ཀྱིས་གནོན་པའི་ལེའུ་སྟེ་བཅུ་གཉིས་པའོ།། །།དེ་ནས་ཡང་ལས་ཕྲན་ཚེགས་བསྒྲུབ་པ་འདི་ཉིད་ཀྱི་སྐུ་དང་གསུང་དང་ཐུགས་ཡོན་ཏན་ཕྲིན་ལས་ལས་ཕྱུང་ངོ་། །ཟླ་བ་འདྲ་བའི་དཀྱིལ་འཁོར་ལ། །
པདྨ་འམ་འཁོར་ལོ་གང་ཡང་རུང་། །ཡང་ན་རིན་ཆེན་དྲ་བ་ལ། །དྲ་མིག་རྣམས་ནི་འདུག་པར་གནས། །རིན་ཆེན་ཕུར་བུ་ནང་དུ་བལྟས། །དེ་རུ་བྲི་འམ་གཟུགས་པར་བྱ། །ཐ་མ་སྦྲུལ་གྱི་ཞགས་པས་བསྐོར། །དཀྱིལ་འཁོར་དེ་ཡི་དབུས་སུ་ནི། །ཁྲུ་གང་ཐུར་

དུ་བརྐོས་བྱས་ལ། །གའུ་ཁ་སྦྱར་ནང་དུ་ནི། །ཡུངས་ཀར་བླུགས་ལ་བཟླས་པ་བྱ། །རྟགས་ལ་མ་ཡེངས་འཕྲོ་འདུ་ཡིས། །རྒྱུན་མི་འཆད་པར་བསྒྲུབ་པར་བྱ། །ཨོྃ་བཛྲ་ཀཱ་ལ་ད་དུ་ཁ་ལ། པྲ་མ་རྟ་ན་ཧཱུྃ་ཕཊ། སླེ་ཁ་སླེ་ཁ་ཕཊ་ཕཊ་ཅེས་བཟླས་
ལ། །བདག་ཉིད་ཡ་མཱན་ཏ་ཀར་བསྒོམས་ལ། སྔགས་ནི་ནུས་ཚད་དུ་བཟླས་ན་འགྲུབ་ངེས་སོ། །ཡུངས་ཀར་རྒྱལ་པོ་བསྒྲུབ་པའོ། །དེ་ནས་འཁོར་ཁྲོ་བོ་ལ་སོགས་པས། བཅོམ་ལྡན་འདས་གཤིན་རྗེ་གཤེད་ལ་འདི་སྐད་ཅེས་གསོལ་ཏོ། །ཨེ་མའོ་
དབྱིངས་ལས་བྱུང་བ་དང་། མཁའ་ལ་རྒྱུ་དང་ས་ལ་དབང་བ་གསུམ་གྱིས་བསྐུལ་བའི་དབྱངས་འདི་བདག་ཅག་ལེན་ལགས་སོ། །ཡེ་ཤེས་མཁའ་ལྡན་མ་མོའི་དཔལ། །གཟི་བརྗིད་འབར་བའི་ཕྲིན་ལས་ཅན། །དཔལ་གྱི་ཕྱག་བརྙན་རཀྟའི་དྲི་སྣོམ་
མ། །མ་མོ་ཁྱོད་ནི་ཀུན་གྱི་གཙོ་མོ་དཔག་ཚད་བརྒྱད་ཁྲིར་རྒྱུག །བུད་མེད་ལུས་ལ་འཇིགས་བྱེད་ཚུལ་འཆང་བ། །ཁ་ནས་མེ་འབར་རྒྱ་མཚོའི་གཏིང་ནས་སྐེམས། །མིག་ནས་ཞག་འཛག་རི་རབ་ཐལ་བར་རློག །སྐད་ཅིག་ཙམ་ལ་སྟོང་ཁམས་དབང་དུ་སྡུད། །འཇིག་
རྟེན་ལྷ་ཆེན་བརྒྱད་ཀྱང་འདར་ཡེད་ཡེད། །ཆེ་གེ་མོ་ཞིག་དབང་དུ་སྡུད་པར་བྱེད། །བུད་མེད་གཟུགས་ཅན་དུས་ལ་བབ། །ཆེ་གེ་མོ་ཨོྃ་ཏྲག་རགྴ། ཧྲི་ཥྚྲྀ་ཡ་མ་མམ་ནན་ཞེས་བསྐུལ་བ་ནི་དབྱིངས་ཀྱི་མ་མོའོ། །ནམ་མཁའི་གཏིང་དཔག་ཡངས་ལ་གནས་བཅས་ཤིང་། །བར་
སྣང་ཁམས་ལ་རྒྱུ་བའི་ཚོགས། །ཁམས་གསུམ་ཐམས་ཅད་དབང་དུ་སྡུད། །ལྕགས་ཀྱི་བྱ་ཁྲ་ལྟ་བུ་ནི། །མ་མོ་རྣམས་ཀྱི་མཆོག་ཀྱང་ཡིན། །ཁ་འབར་སྟོང་གི་གཙོ་མོ་སྟེ། །འཇིགས་བྱེད་རྣམས་ཀྱི་དབང་བྱེད་མ། །སྲིད་གསུམ་དབང་དུ་སྡུད་པ་མོ། །གཟིགས་པའི་
གོ་འཕང་ནམ་མཁའ་འདྲ། །གཤེགས་ཤིང་བཞུགས་པ་གློག་པས་མགྱོགས། །གཡས་ཀྱི་གཤོག་པ་བརྡབས་པ་ཡིས། །བདུད་དང་སྲིན་པོ་རྡུལ་དུ་རློག །གཡོན་གྱི་གཤོག་པ་བརྡབས་པ་ཡིས། །དགྲ་བགེགས་འབྱུང་པོ་དབང་དུ་སྡུད། དམ་ཚིག་ཅན་གྱི་

དུས་ལ་བབ། །ཨོྃ་མ་ར་ཏྲག་རགྴ། ཏྲི་ཡོ་ཡ་མ་ར་ཙ་ཀ་ཀ་རུ་བ་ཧྲིཥྚྲྀ་ཛ་ཞེས་བསྐུལ་བ་ནི་མཁའ་ལྡིང་གི་ཚོགས་སོ། །ཡ་མ་ན་སྟེ་གྲུབ་པ་མོ། །ལ་ལ་ལག་ན་རྒྱུ་ཞགས་འཆང་། །ལ་ལ་ལག་ན་ཐོད་ཕྲེང་འཛིན། །ལ་ལ་ཞིང་ཆུང་བ་སུ་འདྲེན། །ལ་ལ་མེ་ཁྱེར་རྒྱ་མཚོ་
སྐེམས། །ལ་ལ་འགུགས་བྱེད་ཉམས་པ་འཛིན། །ལ་ལ་སྦྲུལ་ནག་ཞགས་པ་འཛིན། །ལ་ལ་ཕོ་ཉ་འགུགས་ཤིང་འདྲེན། །སྔགས་པས་བོས་ཤིང་གདུངས་པའི་ཚེ། །དམ་ཚིག་དུས་ལ་བབ་པོ་ས་མ་ཡ། །སྡང་བར་སེམས་པའི་སྙིང་ནས་དྲོངས། །བརྩེ་བའི་ཚོགས་
ཀྱི་དུས་ལ་བབ། །ཨོྃ་ཀ་ཧ་ཏྲག་རཀྴ། རཏྣ་ཀ་ལ་ཧྲིཥྚྲྀཾ་སྭཱ་ཧཱ། ཞེས་སྤྱན་དྲངས་ཞིང་བསྐུལ་བ་ནི་གཏེར་བདག་གི་ཚོགས་སོ། །དེ་ནས་བཅོམ་ལྡན་འདས་གཤིན་རྗེ་གཤེད་ཀྱིས་འདི་སྐད་ཅེས་གསུངས་སོ། །རྒྱུད་ཀྱི་རྒྱལ་པོ་ལས་བཞི་འཁོར་ལོ་འདི། དུས་
ཕྱི་མ་ལ་རྣལ་འབྱོར་པ་གང་ཞིག་བསྒྲུབ་པའི་ལས་བྱེད་ན། ང་ཡང་ཐུགས་དམ་ལས་མི་གཡེལ་ལ། འཁོར་ཁྲོ་བོ་དང་། ཁྲོ་མོ་ལ་སོགས་པས་ཀྱང་། ངའི་ཐུགས་དམ་རྗེས་སུ་བསྒྲུབ་པར་མཛད་པས །དུས་ཐ་མ་ལ་དམ་པའི་ཆོས་འདི་རྣལ་འབྱོར་པའི་སྐུ་
ལ་བསྔོ་བ་ལ་སོགས་པ་ལ་དམ་ཚིག་འབྱུང་བར་ཞལ་གྱིས་བཞེས་སོ། །དེ་ནས་འཁོར་རྣམས་བཅོམ་ལྡན་འདས་ཁྲོ་བོའི་རྒྱལ་པོ་གཤིན་རྗེས། དུས་ཐ་མ་ལ་འབྱུང་བར་ཞལ་གྱིས་བཞེས་པ་ལ་དགའ་ནས། ཡི་རངས་ཏེ་མངོན་པར་བསྟོད་དོ། །འཕགས་
པ་ལས་བཞི་འཁོར་ལོ་གསང་བའི་རྒྱུད་ལས། མཇུག་བསྐུལ་བ་དང་གནང་བའི་ལེའུ་སྟེ་བཅུ་གསུམ་པའོ།། །།འཕགས་པ་ལས་བཞི་འཁོར་ལོ་གསང་བ་ཆེན་པོ་རྩ་བའི་རྒྱུད་རྫོགས་སྷོ།། །།དེ་ནས་འཁོར་ཁྲོ་བོ་དང་ཁྲོ་མོ་ལ་སོགས་པ་རྣམས་ཀྱིས། ངག་
མཐུན་པས་བཅོམ་ལྡན་འདས་ཁྲོ་བོའི་རྒྱལ་པོ་དེ་ལ་འདི་སྐད་ཅེས་གསོལ་ཏོ། །ཨེ་མའོ་བཅོམ་ལྡན་ཁྲོ་རྒྱལ་གཙོ། །ལས་བཞི་འཁོར་ལོའི་རྒྱུད་འདི་ལ། །ངོ་མཚར་རྨད་བྱུང་བསྟན་པ་ལ། །བདག་ཅག་ཐེ་ཚོམ་འཚལ་བ་རྣམས། །བདེར་གཤེགས་གསུང་

གི་ངོ་བོ་ཡིས། །ཞུ་བའི་དམིགས་རྣམས་བཤད་དུ་གསོལ། །འཕགས་པ་ཞེས་བགྱི་ཇི་ལྟར་ལགས། །ལས་བཞི་ཞེས་བགྱི་ཇི་ལྟར་ལགས། །འཁོར་ལོ་ཞེས་བགྱི་ཇི་ལྟར་ལགས། །གསང་བ་ཞེས་བགྱི་ཇི་ལྟར་ལགས། །རྒྱུད་ཅེས་བགྱི་བ་ཇི་ལྟར་ལགས། །རྣམ་དག་
དབྱིངས་ལས་བཞེངས་ནས་ནི། །ཞུ་བའི་དམིགས་རྣམས་བཤད་པར་མཛོད། །དེ་ནས་བཅོམ་ལྡན་འདས་ཀྱིས་ཁྲོ་བོ་གཞན་ལ་གདུག་པར་མཛད་པ་ཡིས། ཚངས་པའི་དབྱངས་ཀྱིས་གསུང་ཕྱུང་སྟེ། འདི་སྐད་འཁོར་ལ་བཀའ་སྩལ་ཏོ། །རིགས་ཀྱི་འཁོར་
རྣམས་ཞུ་བ་ཡི། །དམིགས་རྣམས་ཞུ་བ་རབ་ཏུ་ལེགས། །འཕགས་པ་ཞེས་སུ་བསྟན་པ་ནི། །གདུག་པ་མ་ལུས་ཀུན་ལས་འཕགས། །ཡེ་ཤེས་སེམས་དཔའ་འབྱུང་བའི་གཞི། །དཔེ་ཡིས་དེ་ལ་བསྐྲུན་དུ་མེད། །ལས་བཞི་ཞེས་སུ་གྲགས་པ་ཡང་། །
དེ་ལ་ལས་ནི་རྣམ་པ་གཉིས། །ཐབས་དང་ཤེས་རབ་འདུལ་དབང་དང་། །སྐུ་གསུམ་ཕྲིན་ལས་འདུལ་བ་སྟེ། །ཐབས་དང་ཐབས་སུ་འབྲེལ་བ་ལ། །ཤེས་རབ་འབྲེལ་བས་ཡུམ་ཞེས་བྱ། །ཆོས་དང་ལོངས་སྤྱོད་པ་ཡི་སྐུ། །འདུལ་དབང་ལས་ཞེས་བྱ་བར་
གྲགས། །དེ་ལ་བཞི་ཞེས་བྱ་བ་ཡང་། །ཞི་བ་རྒྱས་པ་དབང་མངོན་ནོ། །ཞི་བ་བྱ་བའི་ངེས་ཚིག་ཀྱང་། །ཏིང་འཛིན་རིམ་པ་བྱམས་པ་ལ། །འཕྲོ་འདུ་དཀར་ལ་འཚེར་བ་སྟེ། །ཐམས་ཅད་མགུ་བར་བྱེད་པ་དང་། །མི་མཐུན་པ་རྣམས་ཞི་བྱའི་ཕྱིར། །དེ་ཕྱིར་ཞི་བ་ཞེས་
བྱའོ། །རྒྱས་པ་གསེར་ལྟར་སེར་བ་ལ། །ཏིང་འཛིན་སྤྲུལ་པ་མང་པོར་ཁྱབ། །ཕྱོགས་བཅུར་འགྲོ་བའི་དོན་བྱས་ཏེ། །བསྐུལ་བའི་ས་ལ་གཞེས་པ་ཡི། །སངས་རྒྱས་ཐམས་ཅད་སྤྱན་དྲངས་ཏེ། །བདག་གི་བ་སྤུའི་བུ་གནས། །ཀུན་དུ་ཞུགས་ཏེ་རྒྱས་པ་ལ། །ཚེ་དང་དབང་
ཐང་དཔལ་ལ་སོགས། །ཐམས་ཅད་རྒྱས་པས་རྒྱས་ཞེས་བྱ། །དེ་ལ་དབང་གི་ངེས་ཚིག་ཀྱང་། །ཕྱོགས་བཅུའི་འཇིག་རྟེན་ཐམས་ཅད་ནས། །བདག་གི་ཡིད་ལ་བསམས་པ་ཀུན། །ཡབ་ཡུམ་སྤྲུལ་པའི་ཁྱད་པར་ལས། །ཅི་འདོད་ཐམས་ཅད་དབང་དུ་སྡུད། །ལས་དང་བྱ་

བ་མ་ལུས་དང་། །བདག་ཉིད་ལྷ་ཡི་སྐུར་བསྒོམས་པས། །འདུ་བར་འགྱུར་བ་གདོན་མི་ཟ། །དེ་ལ་དྲག་པོའི་ཕྲིན་ལས་ཀྱང་། །གཤིན་རྗེ་གཤེད་དང་གཤེད་བདག་མོ། །ཡབ་ཡུམ་ཁྱད་པར་སྤྲིན་ལྟ་བུ། །ནམ་མཁའ་ཁེབས་པ་བྱེད་པ་ལྟར། །གཉིས་མེད་བྱང་ཆུབ་
ཁྱད་པར་ལས། །འཕྲོ་འདུ་འོད་ཟེར་སྤྲིན་ལྟ་བུ། །ནམ་མཁའ་གང་བར་ཁྱབ་པ་ལ། །ཁྲོ་བོའི་སྤྲུལ་པས་ཁེབས་གྱུར་ཏེ། །འཇིག་རྟེན་རྡུལ་དུ་བཤིག་ནས་ནི། །གདུག་པ་མ་ལུས་ཀུན་བཏུལ་ཏེ། །སླར་བསྡུས་ཡབ་ཡུམ་སྐུ་ལ་བསྡུ། །དེ་ལྟར་ནས་དང་ཡུངས་འབྲུ་
ཙམ། །མ་ལུས་ཀུན་དུ་འགེངས་བྱེད་ཅིང་། །དམིགས་པ་གང་ན་གནས་པ་དག །བཙལ་ཏེ་སླར་ཡང་འགུགས་ལ་སོགས། །འདི་དང་འདི་ཞེས་བྱ་མེད་པར། །འཁོར་བ་ཚང་ནས་སྤྲུགས་བསམས་ཏེ། །དྲག་པོའི་ཕྲིན་ལས་གྲུབ་པར་བསམ། །འཁོར་ལོ་ཞེས་
སུ་བསྟན་པ་ཡང་། །མི་འཁོར་འཁོར་ཕྱིར་རྩེ་མོ་འཕྲོ། །ལྟེ་བ་འཁོར་ལ་རྩེ་མོས་གཅོད། །དེ་ཕྱིར་འཁོར་ལོ་ཞེས་སུ་གྲགས། །གསང་བ་ཞེས་སུ་གྲགས་པ་ཡང་། །ཀུན་ལ་མི་བསྟན་རྩ་བ་སྟེ། །ཐུན་མོང་ཀུན་གྱི་མ་ཡིན་པས། །དེ་ཕྱིར་གསང་བ་
ཞེས་བྱའོ། །དེ་ལ་རྒྱུད་ཅེས་བྱ་བ་ཡང་། །ཚང་ཞིང་འབྲེལ་བས་བཏགས་པ་དང་། །བྲེང་ཆགས་དགོས་པ་སྒྲུབ་པ་ཡི། །དེ་ཕྱིར་རྒྱུད་ཅེས་བྱ་བར་བཤད། །དེ་ནས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཉི་མ་བཞི་ལ་ལས་བཞི་ཞིག །གསུངས་
ཤིང་ངེས་པར་བསྟན་པ་སྟེ། །དངོས་པོ་ཅི་ལ་བསྒོམ་པར་བགྱི། །ཞི་བ་ལ་ནི་ཇི་ལྟར་བགྱི། །སྔགས་རྣམས་ཇི་ལྟར་བཟླས་པར་བགྱི། །ཕྲིན་ལས་ངེས་པར་བསྟན་པ་སྟེ། །རྒྱས་པ་དག་ལ་ཇི་ལྟར་བསྟན། །སྔགས་རྣམས་བརྗོད་པ་ཇི་ལྟ་བུ། །དབང་ལ་ཇི་ལྟར་
བསྒོམ་པར་བགྱི། །སྔགས་རྣམས་བརྗོད་པ་ཇི་ལྟ་བུ། །དྲག་པོའི་ལས་སུ་བསྟན་པ་ལ། །ལྷ་ནི་ཇི་ལྟར་བསྒོམ་པར་བགྱི། །བཟླས་པའི་སྔགས་རྣམས་ཇི་ལྟར་ལགས། །ཕྲིན་ལས་རྣམ་བཞིར་བསྟན་པ་དེས། །ལས་ནི་ཇི་ལྟ་བུ་ཞིག་འགྲུབ། །གཞི་འམ་

གནས་ནི་ཇི་ལྟ་བུ། །དེ་དག་ཇི་ལྟ་བུ་ཡིས་བྲི། །ངེས་པར་བསྟན་པའི་མན་ངག་ལ། །བདག་ཅག་རྣམས་ལ་བསྟན་དུ་གསོལ། །དེ་ནས་བཅོམ་ལྡན་ཁྲོ་འདུལ་དེས། །གསུང་ནི་འདི་སྐད་བཀའ་སྩལ་ཏོ། །གང་བསྒོམ་ལྷ་རྣམས་སྐུ་མདོག་
དཀར། །ཡུམ་ཡང་དེ་དང་འདྲ་བ་ལ། །ཕྱོགས་བཅུའི་འཁོར་རྣམས་རིགས་དང་སྦྱར། །བདག་ཉིད་ཡ་མཱན་ཏ་ཀ་རུ། །སྐུ་མདོག་གསལ་བར་བསྒོམས་ནས་ནི། །བཟླས་པའི་སྔགས་འདི་མགུ་བས་བཟླས། །ཡ་མར་ཙ་ས་ཏོ་མེ་ཡ། ཆེ་གེ་མོ་བ་ལུ་ཀ་ཤཱིནྟཾ་ཀུ་རུ་
སྭཱ་ཧཱ། ཡ་མེ་ཏོ་རུན་ཡོ་ཏ་ཡ། ཆེ་གེ་མོཀྵ་ར་ཙ་ཤཱནྟིཾ་ཀུ་རུ་སྭཱ་ཧཱ། ཡ་ཏ་ཡོ་ནི་རི་ཡ་ཀྵེ་ཡ། ཆེ་གེ་མོ་པ་ལ་མུ་སྟི་ཤཱནྟིཾ་ཀུ་རུ་སྭཱ་ཧཱ། ཡཀྵེ་ཡ་ཙ་ནི་ར་མ་ཡ། ཆེ་གེ་མོ་མ་ར་ཡ་ཤཱནྟིཾ་ཀུ་རུ་སྭཱ་ཧཱ། མི་དྲག་མི་བུལ་མི་ཞན་པར། །ཏིང་འཛིན་སྦྱོར་བ་ལྡན་བྱས་ཏེ། །
ཉི་མ་རེ་ལ་རིམ་བཞིན་སྦྱར། །གྲུབ་པར་འགྱུར་བར་གདོན་མི་ཟའོ། །ཕྲིན་ལས་ངེས་པར་གྲུབ་པ་སྟེ། །བསྒོམ་པར་བྱ་བ་སྐུ་མདོག་སེར། །ཡུམ་ཡང་དེ་དང་འདྲ་བ་ལ། །ཕྱི་མ་རིམ་བཞིན་སྦྱར་བར་བྱ། །གསེར་ལྟ་བུ་ཡི་ཏིང་འཛིན་ལ། །འཕྲོ་འདུ་བྱང་ཆུབ་སེམས་
ལྟ་བུ། །ཕྱོགས་བཅུ་མ་ལུས་དོན་བྱས་ཏེ། །བདག་གི་ཕུང་པོ་མ་ལུས་དང་། །ཚེ་དང་ལོངས་སྤྱོད་འཕེལ་བར་བསམ། །དེ་ཚེ་སྔགས་འདི་བཟླས་པར་བྱ། །ཡ་མ་ར་ཙ་ས་ཏོ་མེ་ཡ། ཆེ་གེ་མོ་བྲ་མ་ཡ། པུཥྚིཾ་ཀུ་རུ་སྭཱ་ཧཱ། ཡ་མེ་ཏོ་རུ་ན་ཡོ་ཏ་ཡ། ཆེ་གེ་མོ་ཀ་ཀྵ་པུཥྚིཾ་ཀུ་རུ་སྭཱ་ཧཱ། ཡ་ཏ་
ཡོ་ནི་ར་ཡ་ཀྵེ་ཡ། ཆེ་གེ་མོ་ཞིག་ས་སྟི་པུཥྚིཾ་ཉུ་རུ་སྭཱ་ཧཱ། ཡཀྵེ་ཡ་ཙ་ནི་ར་མ་ཡ། ཆེ་གེ་མོ་ཞིག་མཱ་ར་ཡ་བུཥྚིཾ་ཀུ་རུ་སྭཱ་ཧཱ། །དེ་ཚེ་རང་རིག་ཏིང་འཛིན་གྱི། །མཐུ་དང་ལྡན་པར་བྱས་ཏེ་ནི། །སྔགས་དེ་བཟླས་པ་བྱས་ན་ནི། །འགྲུབ་པར་འགྱུར་ཏེ་ཐེ་ཚོམ་མེད། །ཐམས་
ཅད་དབང་དུ་བསྡུ་བའི་ཕྱིར། །ལྷ་ཡང་སྐུ་མདོག་ཟངས་ལྟ་བུ། །ཡུམ་ཡང་དེ་དང་འདྲ་བར་བསྒོམ། །ལྷ་རྣམས་གཞུང་བཞིན་བསྐྱེད་པ་ནི། །མཐར་བྱེད་འབྱུང་བའི་བཟླས་བའོ། །ཡ་མ་ར་ཙ་ས་ཏོ་མེ་ཡ། ཆེ་གེ་མོ་ཧུྃ་ཧུྃ་བ་ཤང་ཀུ་རུ་སྭཱ་ཧཱ། ཡ་མེ་ཏོ་རུ་ན་ཡོ་

ཏ་ཡ། ཆེ་གེ་མོ་ཧུྃ་ཧཱུྃ་ཕཊ་ཕཊ་སྭཱ་ཧཱ། ཡ་ཏ་ཡོ་ནི་ར་ཡཀྵེ་ཡ། ཆེ་གེ་མོ་ཧུྃ་ཧཱུྃ་ཕཊ་ཕཊ། ཀཱ་ལ་རཱུ་པ་སྭཱ་ཧཱ། ཡཀྵེ་ཡ་ཙ་ནི་ར་མ་ཡ་ཆེ་གེ་མོ་ཧུྃ་ཧཱུྃ་ཕཊ་ཕཊ། ཀཱ་ལ་རཱུ་པ་ཧུྃ་ཧཱུྃ་ཕཊ་ཕཊ། །སྔགས་ཀྱི་བཟླས་པ་བྱས་ན་ནི། །བླ་མེད་སངས་རྒྱས་ཐམས་ཅད་ཀྱང་། །འདུ་
ཞེས་གསུངས་ཏེ་གདོན་མི་ཟའོ། །ལྷ་ནི་སྐུ་མདོག་ལྕགས་ལྟ་བུ། །མཐིང་ག་རབ་ཏུ་ཁྲོས་པ་ལ། །གཅེར་བུ་རལ་པ་གཅིག་སྟེ་འཇིགས། །མ་རུངས་འདུལ་བ་བསྒོམས་ནས་ནི། །བཟླས་པ་འདི་ནི་དྲག་ཏུ་བཟླས། །ཡ་མ་ར་ཙ་ས་ཏོ་མེ་ཡ་ཆེ་གེ་མོ་ཨ་མུ་ཁཾ་བྲ་མ་
ཡ་ནི་ཧཱུྃ་པཊ། ཡ་མེ་ཏོ་རུ་ན་ཡོ་ཏ་ཡ། ཆེ་གེ་མོ་ཨ་མུ་ཁྃ་མུ་ར་ཙ་ཡ་ཧཱུྃ་ཕཊ། ཡ་ཏ་ཡོ་ནི་ར་ཡཀྵེ་ཡ་ཆེ་གེ་མོ་ཨ་མུ་ཁྃ་རཀྟ་ཙ་ར་ཧཱུྃ་ཕཊ། ཡཀྵེ་ཡ་ཙ་ནི་ར་མ་ཡ་ཆེ་གེ་མོ་ཨ་མུ་ཁྃ་མཱ་ར་ཡ་ཧཱུྃ་ཕཊ། བདག་ཉིད་འཇིགས་བྱེད་སྐུར་བསྒོམས་ལ། །སྔགས་ཀྱི་
ཕྲེང་བས་ཕོག་འགྱུར་ན། །མངོན་ཤེས་ལྡན་པའི་སངས་རྒྱས་ཀྱང་། །འཆི་བར་འགྱུར་བར་གདོན་མི་ཟ། །ཞི་བའི་དུས་སུ་བཟླས་པ་ཡིས། །དང་པོས་སེམས་ནི་གཡོས་པར་འགྱུར། །གཉིས་པས་ཡིད་ལ་འབྱུང་བར་འགྱུར། །གསུམ་པས་དཀར་པོའི་ངོ་བོ་
དང་། །བཞི་བས་ཐམས་ཅད་ཞི་བར་འགྱུར། །རྒྱས་པའི་དུས་སུ་བཟླས་པ་ཡིས། །དང་པོས་དཔལ་ཡང་འཕེལ་བར་བྱེད། །གཉིས་པས་དབང་ཐང་སྐྱེད་པར་བྱེད། །གསུམ་པས་གཟི་བྱིན་རྙེད་འགྱུར་ཏེ། །བཞི་བས་ཚེ་རིང་མ་ལུས་རྒྱས་པར་འགྱུར། །
དབང་གི་དུས་སུ་བཟླས་པ་ཡིས། །དང་པོས་སེམས་ཀྱང་གཡོས་པར་བྱེད། །གཉིས་པས་འཇུག་པར་ནུས་པ་སྟེ། །གསུམ་པས་དམིགས་པ་དབང་དུ་འདུ། །བཞི་པས་ཐམས་ཅད་དབང་དུ་འདུའོ། །དྲག་པོའི་བཟླས་པ་བྱས་པ་ཡིས། །དང་པོས་མགོ་
ནི་འཁོར་བར་བྱེད། །གཉིས་པས་ཡིད་འཁྲུགས་གསུམ་པས་ཁྲག་ཏུ་སྐྱུགས། །བཞི་པས་གདོན་མི་ཟ་བའོ། །གཞི་འམ་གནས་སུ་བསྟན་པ་ནི། །བཅུ་གཉིས་འཁོར་ལོ་རྩིབས་ཅན་དེ། །ཡི་དགས་ཀྱི་ནི་གོས་ལ་བྲི། །ཞི་བ་པདྨ་ཟླ་བ་ལ། །རྒྱས་

པ་གླང་པོའི་རྒྱབ་ཏུ་བྱ། །དབང་ནི་བུད་མེད་སྙིང་གར་ཏེ། །དགུག་པ་སེང་གེ་དྲེའུ་དང་གཉིས། །དབྱེ་བ་རྟ་དང་མ་ཧེ་གཉིས། །སྨྱོ་འབོག་ཤ་བའི་རྒྱབ་ཏུ་བྱ། །ལྐུགས་པ་ལུག་གི་ཁོང་དུ་གཞུག །བསྐྲད་པ་རྔ་མོའི་རྒྱབ་ཏུ་བྱ། །གསང་བ་སྐྱེས་པའི་སྙིང་ག་སྟེ། །
གནོན་པ་རི་རབ་འོག་ཏུ་བྱ། །སྣག་ཚའི་མཚན་ཉིད་བསྟན་པ་ཡང་། །ཁྲག་སྣ་གསུམ་དང་བྱི་ལའི་གཅིན། །ཕོ་རོག་དག་གི་སྒྲོ་རྩ་ལ། །ཤི་བའི་སྐྲ་ལས་པིར་བྱས་ལ། །གང་བརྩམས་འགྲུབ་པར་ངེས་པར་བཤད། །དེ་ནས་བཅོམ་ལྡན་འདས་བརྩམ་པའི་རྒྱལ་པོའི་ཏིང་ངེ་འཛིན་
མཆོག་དེ་ལ་འདི་སྐད་ཅེས་གསོལ་ཏོ། །ངེས་པར་བསྟན་པའི་རྒྱུད་འདི་ལ། །ཁྲོ་བོའི་བཟླས་པ་ཇི་ལྟར་ལགས། །ཡུམ་གྱི་བཟླས་པ་ཇི་ལྟར་ལགས། །མ་མོའི་སྔགས་རྣམས་ཇི་ལྟར་ལགས། །ཁྲོ་བོའི་སྔགས་རྣམས་ཇི་ལྟར་ལགས། །ཞེ་སྡང་འཇོམས་མཛད་ཁྲོ་བོ་དེས། །
གསུང་ནི་འདི་སྐད་བཀའ་སྩལ་ཏོ། །ཁྲོ་བོ་ཡབ་ཡུམ་ལྕེ་ལ་གཞག །མ་མོ་སྔགས་ཀྱི་མཐུ་བྱིན་ཆེ། །ཁྲོ་བོ་མང་པོ་འོད་འཕྲོ་བའོ། །དེ་ཡི་བཟླས་པ་འདི་དག་གོ །ཨོྃ་ཨ་ཀྲོ་དྷེ་ཀ་ཡ་མཱན་ཏ་ཀ་ཀཱ་ལ་རཱུ་པ་པ་ཙ་ཏེ་ནི་ཧཱུྃ་ཕཊ། ཨོྃ་ཨྃ་ཧུྃ་པ་ཏཱ་ལི་རགྴ་མན། ཨོྃ་རོ་ག་མདུན་བྷྱོ།
ཙ་མུན་ཏ་ཀྱི་ཀྱི་མ་བྷྱོ། ནམ་གྲུ་མ་བ་ཡ་ཏི་བྷྱོ། ཨོྃ་ཨོྃ་ཨོྃ། ཀྲོ་དྷ་བཛྲ་བ་སྨི། བཛྲ་ཀྲོ་དྷ་མ་ལ། བཛྲ་ཀྲོ་དྷ་ཏིསྠ། བཛྲ་ཀྲོ་དྷ་ཀངྐ། བཛྲ་ཀྲོ་དྷ་སྨིག་ཤ །བཛྲ་ཀྲོ་དྷ་རག་ཁང་། བཛྲ་ཀྲོ་དྷ་ཏ་ཀི་ནི། བཛྲ་ཀྲོ་དྷ་རགྴ། བཛྲ་ཀྲོ་དྷ་ཡཀྵ། བཛྲ་ཀྲོ་དྷ་ཀུ་ཎ་ཌ་ལི། བཛྲ་
ཀྲོ་དྷ་ཀྲི་ཏ། བཛྲ་ལོ་ཀ། བཛྲ་བ་སྨི། བཛྲ་ཤུ་ལ། བཛྲ་ཀུ་ལན། བཛྲ་ཀངྐ། བཛྲ་མུ་ལ། བཛྲ་སྲི་ཏ། བཛྲ་བ་མུ། བཛྲ་ཤུ་ལ། བཛྲ་སྨ་ར། ཧུྃ་ཧུྃ་ཧུྃ་ཧུྃ་ཧུྃ་ཧུྃ་ཧུྃ་ཧུྃ་ཧུྃ་ཧུྃ། ཧུྃ་ཧུྃ་ཧུྃ་ཧུྃ་ཧུྃ་ཧུྃ་ཧུྃ་ཧུྃ་ཧུྃ་ཧུྃ། ཛཿཧཱུྃ་བྃ་ཧོཿ བྷྱོ་བྷྱོ་བྷྱོ་བྷྱོ། །དེ་ནས་ཡང་བཅོམ་ལྡན་འདས་འཇམ་དཔལ་
ཡེ་ཤེས་སེམས་དཔའ་ཁྲོ་བོའི་རྒྱལ་པོ་དེ་ལ་འདི་སྐད་ཅེས་གསོལ་ཏོ། །ངེས་པར་བསྟན་པའི་རྒྱུད་འདི་ལ། །ཚེ་ཞེས་བགྱི་བ་ཇི་ལྟར་ལགས། །ཡུངས་ཀར་བསྒྲུབ་པ་ཇི་ལྟར་ལགས། །དེ་ཡིས་ལས་ནི་ཅི་ཞིག་འགྲུབ། །ཕུར་བུ་ཞེས་བགྱི་ཇི་ལྟར་ལགས། །དང་པོ་

དམ་བཅའ་ཇི་ལྟར་ལགས། །བཅོམ་ལྡན་ཁྲོ་བོའི་རྒྱལ་པོ་ལ། །དེ་སྐད་ཅེས་ནི་ཞུས་པ་དང་། །གསུང་ནི་འདི་སྐད་བཀའ་སྩལ་ཏོ། །ཚེ་ཞེས་བྱ་བའི་དོན་འདི་ཡང་། །ཆོས་ཉིད་སྤྲོས་པ་མེད་པ་ལ། །ཀུན་དུ་མི་འགྱུར་ནམ་མཁའ་འདྲ། །བསྐྱོད་མེད་དུས་ཀྱིས་
བཤིག་ཏུ་མེད། །འགྲོ་བ་འཁྲུལ་པའི་ངོ་གང་ལ། །བག་ཆགས་ངན་པས་བསླུས་པ་ཡིས། །ཚེ་ལ་བར་ཆོད་འོང་བར་གསུངས། །དེ་ཕྱིར་ཚེ་ཡི་བསྒྲུབ་པ་གསུངས། །ཡུངས་ཀར་བསྒྲུབ་པའི་མཚན་ཉིད་ཀྱང་། །བག་ཆགས་འཁྲུལ་པས་གནོད་འགྱུར་བ། །
མི་མཐུན་པ་དང་གཉེན་པོ་སྟེ། །དེ་དག་འདུལ་བའི་དོན་དུ་བསྟན། །དེ་ནི་ལས་ཀྱི་འབྲས་བུ་ཡང་། །སྔོན་ནས་ལས་ངན་མཐུ་རྟགས་ཏེ། །མི་མཐུན་པ་དེ་འགུགས་པར་བྱེད། །དེ་ནས་ཡུངས་ཀར་རྒྱལ་པོས་བྱའོ། །ཕུར་བུ་ཞེས་སུ་བསྟན་པ་ཡང་། །
བདག་ཉིད་ཁྲོ་བོ་ཆེན་པོ་སྟེ། །གཉིས་མེད་མཁའ་ལ་གནས་བསམས་ཏེ། །ཕུར་བུ་ཞེས་ནི་དེ་ལ་བྱའོ། །ཕྱོགས་བཅུའི་ཐུགས་ལས་སྐྱེས་པ་སྟེ། །དེ་ཕྱིར་ཕུར་བུ་ཞེས་སུ་བསྟན། །དང་བོར་དམ་བཅས་འདི་ལྟར་རོ། །ལྔ་བརྒྱ་དུས་ཀྱི་ཐ་མ་ལ། །མཚམས་མེད་
ལྔ་ནི་ཀུན་སྤྱོད་ཅིང་། །གོས་ངན་རེ་བ་གོན་པ་དང་། །ཟས་ངན་ལྕི་བ་ཟ་བའི་ཚེ། །དེ་ཚེ་ང་ཡི་བསྟན་པ་འབྱུང་། །དུས་ངན་ཐ་མ་བྱུང་བའི་ཚེ། །ལྷ་མོའི་ནང་ན་འོད་ཟེར་ཅན། །འཕགས་པའི་ནང་ན་འཇམ་དཔལ་གཉིས། །འདི་གཉིས་མ་གཏོགས་དངོས་གྲུབ་
གཞན། །རིགས་འཛིན་ཀུན་ལ་མ་ཡིན་ནོ། །ཁྲོ་བོའི་རྒྱལ་པོ་འདི་ཡིས་ནི། །ངེས་པར་དབང་དུ་མ་གྱུར་པའི། །དང་པོ་འདས་དང་ད་ལྟར་གྱི། །ཕྱིས་འབྱུང་བ་ནི་གང་ཡང་མེད། །དགྲ་བགེགས་འབུམ་མམ་སྟོང་ཡང་རུང་། །དེ་མ་ཐག་ཏུ་བརླག་པར་བྱེད། །
ཁྲག་གི་ཆར་ཡང་འབེབས་པར་བྱེད། །ཅེས་གསུངས་པས། འཇིག་རྟེན་གྱི་ཁམས་འདི་དག་ཐམས་ཅད་ཚར་བཅད་དེ། དྲག་པོའི་ཕྲིན་ལས་གྲུབ་པར་གྱུར་ཏོ། །དེ་ནས་འཁོར་རྣམས་ཀྱིས། འཇམ་དཔལ་ཁྲོ་བོ་གཤིན་རྗེ་གཤེད་པོ་ལ་འདི་སྐད་ཅེས་

བསྟོད་དོ། །འཕགས་པ་ཁྲོ་བོ་འཇམ་དཔལ་གཤིན་རྗེ་གཤེད། །ཆོས་སྐུ་བྱང་ཆུབ་སེམས་ཀྱི་རང་བཞིན་ལས། །ཚད་མེད་བཞི་ཡི་ངང་ཉིད་རྣམ་དག་པས། །བདག་ཉིད་ཁྲོ་བོ་འབར་བའི་སྐུ་སྟོན་ཅིང་། །ཚངས་པ་བརྒྱ་བྱིན་ལྷ་ཆེན་དྲག་པོ་རྣམས། །
གཉིས་མེད་བྱང་ཆུབ་སེམས་ཀྱིས་སྒྲོལ་བར་མཛད། །མ་ཧེའི་སྟེང་ན་ཞབས་ནི་བརྐྱང་བསྐུམ་གནས། །ལས་ཀྱི་དབྱུག་པ་དག་གིས་རྡུལ་དུ་རློག །ཀླུ་ཡི་རྒྱལ་པོས་སྐུ་ལ་བརྒྱན་པ་ནི། །སྙན་ཆ་མགུར་དང་དབུ་དང་ཕྱག་ཞབས་རྣམས། །ཡན་ལག་ལྔ་ལ་ངེས་པར་
དཀྲིས་ཏེ་གནས། །དབུ་སྐྲ་ཁམ་ནག་རལ་པ་གྱེན་དུ་འབར། །སྤྱན་གསུམ་གཉིས་མེད་རྣམ་ཐར་དོན་ལ་གཟིགས། །མགོ་བཅད་ཕྲེང་བས་དབུ་ཡི་རྒྱན་དུ་བྱས། །ལྗགས་དང་མཆེ་བ་གློག་ལྟར་འདྲིལ་ཞིང་འབར། །འཇིགས་བྱེད་དྲག་པོའི་ཞལ་སྤྱན་
རབ་ཏུ་བགྲད། །མི་ལྤགས་རློན་པ་དག་གིས་སྟོད་གཡོགས་ཤིང་། །སྟག་ལྤགས་རློན་པས་སྐུ་ཡི་རྒྱན་དུ་བྱས། །དེ་འདྲའི་སྐུ་མདོག་འབར་བའི་ཆ་ལུགས་འཆང་། །ངོ་མཚར་རྨད་བྱུང་ཆེ་ལ་ཕྱག་འཚལ་ལོ། །ཞེས་བསྟོད་ནས་གཉིས་སུ་མེད་པར་གྱུར་
ཏོ། །འཕགས་པ་ལས་བཞི་འཁོར་ལོ་གསང་བའི་རྒྱུད་ལས་ལེའུ་བཅུ་བཞི་པའོ།། །།འཕགས་པ་ལས་བཞི་འཁོར་ལོ་གསང་བའི་རྒྱུད་ལས། རྒྱུད་ཕྱི་མ་རིམ་པར་བཀོད་པ་རྫོགས་སྷོ།། །།
༄༅༅། །རྒྱ་གར་སྐད་དུ། སརྦ་ཏ་ཐཱ་ག་ཏ་བུད་ཏྲོ་པཱུ་ན་གུ་ཧྱ་བ་ནོ་ཤི་ཨ་ཤྭད་ད། མ་བིན་ས་མ་ཧཱ་ཏནྟྲ་ནཱ་མ། བོད་སྐད་དུ། དེ་བཞིན་གཤེགས་པ་ཐམས་ཅད་ཀྱི་དགོངས་པ་བླ་ན་མེད་པ་གསང་བ་རྟ་མཆོག་རོལ་པའི་རྒྱུད་ཆེན་པོ་ཞེས་བྱ་བ། དཔལ་
རྡོ་རྗེ་སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་རྡོ་རྗེ་བདེ་བ་ཆེན་པོ་ཕྱོགས་བཅུ་དང་དུས་གསུམ་གྱི་སངས་རྒྱས་མ་ལུས་པའི་འབྱུང་གནས། སྐུ་གསུང་ཐུགས་ཡོན་ཏན་ཕྲིན་ལས་རྡོ་རྗེ་གསང་བ་

གཞན་ལས་ཁྱད་པར་དུ་གྱུར་པ་མཚན་དང་དཔེ་བྱད་ཕུན་སུམ་ཚོགས་པས་སྤྲས་པ། བཀོད་པ་རྒྱན་གྱི་དཀྱིལ་འཁོར་ལྷུན་པོ་བརྩེགས་ཤིང་ཡོན་ཏན་རིན་པོ་ཆེའི་འབྱུང་གནས་སྣ་ཚོགས་རྣམ་པར་སྣང་བའི་ངོ་བོ། །ཟབ་པ་དང་རྒྱ་ཆེ་བའི་ཡན་ལག་ཐམས་ཅད་
གསལ་བར་བྱེད་ཅིང་ཡེ་ཤེས་ཀྱི་ཚོགས་ཀྱིས་ཆོས་མ་ལུས་པ་མཐར་ཕྱིན་པ། ཀུན་དུ་ཕྲིན་ལས་རྒྱ་ཆེར་འཕྲུལ་པའི་བདག་ཉིད། དཔལ་བདེ་བྱེད་པདྨ་གར་གྱི་དབང་ཕྱུག་ཆགས་པ་ཆེན་པོའི་ཏིང་ངེ་འཛིན་བརྙེས་པ་མེད་པའི་ཆོས་ཉིད་ཀྱིས་ཐམས་ཅད་ལ་དབང་
བསྐུར་བ་དེ་ཉིད་ལྷ་ཐམས་ཅད་འདུ་བའི་གནས་གཞལ་ཡས་ཁང་བར་དུ་གྱུར་བ། འོག་མིན་རྡོ་རྗེ་ལྷུན་པོའི་གནས་ཡེ་ཤེས་ཀྱི་སྣང་བ་རིན་པོ་ཆེ་སྣ་ཚོགས་ནི་འོད་འབར་བའི་ཁང་བཟངས། འདོད་པའི་ཡོན་ཏན་གཟུགས་སྡུག་པ་སྣ་ཚོགས་དང་། དྲི་ཞིམ་པ་སྣ་
ཚོགས་དང་། རོ་བྲོ་བ་སྣ་ཚོགས་དང་། རེག་བྱ་འཇམ་པ་སྣ་ཚོགས་དང་། ཆོས་ཀྱི་བདེ་བ་བསྐྱེད་པ་སྣ་ཚོགས་ཕྱོགས་བཅུར་འཕྲོ་ཞིང་འཁྲིགས་པ་རྩེ་མོ་མཐོ་ཞིང་ཁྱམས་ཀྱི་རྣམ་པར་ཕྱེ་བར་སྒོ་བཞི་སྒོ་ཁང་དང་བཅས་པར་བཞུགས་སོ། །དེའི་ཚེ་བདེ་བར་གཤེགས་
པའི་རོལ་པ་ཆེན་པོ་ཀུན་དུ་སྣང་བ་དང་། འོད་ཀྱི་དཔལ་དང་། དགའ་བའི་དབང་ཕྱུག་དང་། ཆོ་འཕྲུལ་བཀོད་པ་དང་། རྣམ་པར་གཟིགས་དང་། མི་བསྐྱོད་རྡོ་རྗེ་དང་། མངོན་པར་སྣང་བ་དང་། བརྟན་པའི་དབང་ཕྱུག་དང་། འབྲུག་སྒྲ་དང་། དྲི་མ་མེད་པ་དང་།
རིན་ཆེན་ཕུང་པོ་དང་། ནམ་མཁའི་མཛོད་དང་། རིན་ཆེན་དྲ་བ་དང་། དཀོན་མཆོག་མཚན་དང་། རིན་ཆེན་ཏོག་དང་། འོད་ཟེར་སྣང་བ་དང་། ཚེ་མཐའ་ཡས་དང་། ཆོས་ཀྱི་དབང་ཕྱུག་དང་། ཆགས་པ་མེད་པའི་འོད་དང་། དགའ་བའི་སྤྱན་དང་། དོན་
ཐམས་ཅད་ཡོད་པ་དང་། བརྩོན་འགྲུས་ཤུགས་ཅན་དང་། ལས་ཆེན་འཕྲུལ་ལས་དང་། གནོད་སྦྱིན་འདུལ་བ་དང་། སྣ་ཚོགས་དབང་ཕྱུག་གོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བདེ་བའི་བློ་གྲོས་དང་། རྒྱ་མཚོའི་སྒྲ་དབྱངས་དང་།

གཟི་བརྗིད་བཀོད་པ་དང་། འཁོར་ལོ་རྣོན་པོ་དང་། ཤེས་སྣང་བ་དང་། རྡོ་རྗེ་རྒྱལ་མཚན་དང་། འོད་ཟེར་འཕྲོ་བ་དང་། དྲག་ཤུལ་ཅན་དང་། དྲི་མ་སེམས་དཔའ་དང་། སྒྱུ་མའི་སྤྲུལ་པ་དང་། རིན་ཆེན་རྒྱལ་པོ་དང་། དྲ་བ་ཅན་དང་། ལག་བཟངས་
དང་། གསེར་འོད་འཕྲོ་བ་དང་། རིན་ཆེན་སྙེ་མ་དང་། ཆོས་ཀྱི་མཐོ་བ་དང་། དྲི་མ་མེད་པ་དང་། མུན་པ་སེལ་བ་དང་། དགའ་བའི་དབྱངས་དང་། གཞོན་ནུ་རིན་ཆེན་དང་། རྡོ་རྗེ་རྣམ་པར་གནོན་པ་དང་། གར་མཁན་དང་། བྲོའི་རྒྱ་མཚོ་དང་། ཐོགས་མེད་བཀོད་
པ་དང་། པདྨོ་དགའ་བ་དང་། ས་ལི་དབང་ཕྱུག་དང་། རིན་ཆེན་སྤུངས་པ་དང་། སྤྲིན་གྱི་ཕྲེང་བ་དང་། ཡིད་འོང་མེ་ཏོག་དང་། ཡེ་ཤེས་སྒྲོན་མ་དང་། སྤོབས་པ་བརྩེགས་པ་དང་། ཁ་ལོ་སྒྱུར་བ་དང་། དྲན་པའི་དབང་ཕྱུག་དང་། པདྨའི་བློ་གྲོས་དང་། ལས་བྱེད་པའི་སྟོབས་དང་། སྙིང་པོ་
བློ་གྲོས་རྣམས་སོ། །དེ་དག་ཀུན་ཀྱང་རང་རང་གི་བཙུན་མོའི་ཚོགས་དང་འཁྲིལ་བའི་ཚུལ་གྱིས་བཞུགས་སོ། །གཞན་ཡང་པདྨོ་འཕྲོ་བ་དང་། པདྨ་འཛིན་པ་དང་། པདྨ་སྒྲོགས་པ་དང་། པདྨ་བསྐྱོད་པ་དང་། པདྨ་ཚིམ་བྱེད་དང་། པདྨ་འཐོར་བ་དང་། པདྨ་སྣང་
བ་དང་། པདྨ་དབང་བྱེད་རྣམས་ཀྱང་རང་རང་གི་ཕྲིན་ལས་ཀྱིས་བཀོད་དོ། །གཞན་ཡང་འཇིགས་བྱེད་ཆེན་པོ་བྱམས་པའི་དབང་ཕྱུག་བརྩེ་བའི་དབང་ཕྱུག་དང་། པད་གྲོལ་དབང་ཕྱུག་དང་། གྲོལ་བའི་དབང་ཕྱུག་དང་། སྦྱིན་པའི་དབང་ཕྱུག་དང་། སྤྱོད་པའི་
དབང་ཕྱུག་དང་། སྨྲ་བའི་དབང་ཕྱུག་དང་། མཐུན་པའི་དབང་ཕྱུག་ཀྱང་རང་རང་གི་རིག་པ་བཅས་པས་འཁོད་དོ། །དེ་དག་ལ་སོགས་པའི་འཁོར་གྱི་ཚོགས་རྣམ་པར་འབྱེད་པ་དང་། འབྱེད་པ་མེད་པར་སྣང་བའི་སངས་རྒྱས་དང་། བྱང་ཆུབ་སེམས་དཔའི་ཚོགས་
འབུམ་ཕྲག་བཅུ་གཉིས་དང་། ཐབས་ཅིག་ཏུ་བཞུགས་སོ། །དེ་ནས་བཅོམ་ལྡན་འདས་ཏིང་ངེ་འཛིན་གྱི་རྒྱལ་པོ་པདྨ་ཆགས་པའི་སྤྱན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཐུགས་ཀའི་དཔལ་བེའུ་ལ་སོགས་པའི་གནས་རྣམས་

ནས། འོད་ཟེར་གྱི་དཀྱིལ་འཁོར་གསལ་བར་བྱེད་པ་བཀྱེ་བས། དེས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་གསལ་བར་བྱས་པ་དང་། ཡ་མཚན་གྱི་ལྟས་ཆེན་པོ་བཅོ་བརྒྱད་འབྱུང་བར་གྱུར་ཏོ། །དེ་ནས་སྣོད་དང་བཅུད་དུ་བཅས་པའི་གསལ་ཞིང་འབར་བར་གྱུར་
ནས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐུགས་དམ་བསྐུལ་ཏེ། དེ་དག་གིས་ཀྱང་ཆོ་འཕྲུལ་རྣམ་པར་འཁོད་པ་ཞེས་བྱ་བ་ཕྱག་རྒྱ་ཆེན་པོས་རང་གིས་འཁོར་ལོའི་ཁྱམས་དག་ཏུ་སྤྲོ་བར་བྱེད་མཛད་དོ། །དེ་ཡང་ཞིང་ཁམས་རྣམ་པར་སྦྱོང་ཞིང་
སླར་འཁོར་གྱི་འཁོར་དང་བཅས་པ་འོད་ཟེར་འཕྲོ་བའི་གནས་སུ་འདུས་སོ། །དེ་ལྟར་འཆད་པའི་རྒྱ་ཆེན་པོའི་རྣམ་པར་རོལ་འཕྲུལ་བས་རོལ་ཞིང་ཞལ་འཛུམ་པ་དང་བཅས་པར་གྱུར་ནས་བཞུགས་པ་ལས་འཁོར་ཐམས་ཅད་ཀྱིས་ཐེ་ཚོམ་སྐྱེས་པར་གྱུར་ཏོ། །དེའི་དུས་ན་
མཐུན་པར་གླེང་བ་ནི། ཀྱེ་མ་ཧོ་ཡ་མཚན་སྣ་ཚོགས་ཆོས། །རྒྱལ་བའི་མཛད་པ་ཡ་མཚན་ཆེ། །ཆོ་འཕྲུལ་དཔག་མེད་གྱུར་པ་ཡི། །དགོས་པའི་དོན་ཉིད་ཇི་ལྟ་བུ། །རྒྱུ་རྐྱེན་མེད་པར་སངས་རྒྱས་ནི། །གསང་གསུམ་དམ་ཚིག་སྤྲོ་མི་མཛད། །དེ་ཡི་མཚན་ཉིད་ཡང་
སྣང་བ། །གསང་བའི་དབང་པོ་བསྐུལ་བར་མཛོད། །ཁྱོད་ནི་རྒྱལ་བ་ཀུན་གྱི་སྲས། །དགོངས་དོན་རྒྱ་མཚོ་དོན་མངའ་བ། །བཀའ་ཡི་བདག་པོ་དགོངས་མཛོད་དག །ལེགས་པར་ཞུ་ཞིང་གསོལ་གདབ་མཛོད། །དེ་ནས་གསང་བའི་བདག་པོ་ལག་ན་རྡོ་རྗེས་ལྔ་བརྒྱ་
དང་བཅས་པས་གཞན་དག་གི་ཐེ་ཚོམ་རྣམ་པར་གཅོད་པ་དང་རང་ཉིད་ཀྱི་སྒོ་གསལ་བར་བྱ་བའི་ཕྱིར་མདུན་རོལ་ནས་ལངས་ཏེ། ཕྱོགས་བཅུ་ནས་འཁོད་ནས་མཆོད་པའི་ཚོགས་རྒྱ་ཆེན་པོ་བཀོད་ཅིང་རྒྱལ་བ་ཀུན་ལ་མཆོད་དེ། ལན་བརྒྱ་རྩ་བརྒྱད་དུ་བསྐོར་བ་བྱས་
ཤིང་རྩེ་གཅིག་ཏུ་གུས་པས་ཕྱག་འཚལ་ནས། དགའ་བའི་བཞིན་གྱིས་གསོལ་བ་བཏབ་པ། ཨེ་མ་རྒྱལ་བ་ཉིད་ཀྱི་སྐུ། །རྣམ་པར་འཕྲུལ་པའི་དཀྱིལ་འཁོར་དག །ཏིང་འཛིན་ཡེ་ཤེས་གནས་ལས་བྱུང་། །དགའ་མཛད་དཀྱིལ་འཁོར་འདུས་པ་དང་། །བྱང་

ཆུབ་སེམས་སྤྲིན་ཆར་ཆེན་གྱིས། །ཉོན་མོངས་ལ་སོགས་སྦྱོང་མཛད་ཅིང་། །ཐུགས་རྗེ་ཆེན་པོ་ཡེ་ཤེས་ཀྱིས། །ཚོགས་པའི་འབྲས་བུ་ལེགས་སྨིན་མཛད། །སྐུ་མདངས་དགའ་བའི་བཞིན་བཅས་པས། །གསང་བའི་ཐེག་པ་བསྟན་དུ་གསོལ། །ཁྱོད་
ཀྱི་དགོངས་དོན་གཏིང་དཔག་དཀའ། །ཟབ་ཅིང་ཕྲ་ལ་རྒྱ་ཆེ་བས། །འཁོར་རྣམས་ཐེ་ཚོམ་རི་བོས་གནོན། །ཐུགས་རྗེ་ཆེ་མངའ་གསལ་བར་མཛོད། །འདི་དག་ཐམས་ཅད་བསྟན་པའི་སྣོད། །མགོན་པོ་བཏང་སྙོམས་ལྷུན་མངའ་མཛད། །དུས་འདིར་རྩོམ་པ་དོན་ཆེ་སྟེ། །སྨོན་
ལམ་འབྲས་བུ་མཐར་ཕྱིན་མཛོད། །དེ་སྐད་ཅེས་གསོལ་པ་དང་། །བཅོམ་ལྡན་འདས་རྡོ་རྗེ་འཛིན་པ་དེ་ཉིད་ཀྱིས་སྟོང་གསུམ་གྱི་སྟོང་ཆེན་པོའི་བརྟན་གཡོའི་དཀྱིལ་འཁོར་ཐམས་ཅད་ཐུགས་མཉམ་པ་ཉིད་རྩེ་གཅིག་གི་སྒོ་ནས་གཟིགས་སོ། །རྣམ་པར་གཟིགས་ཀུན་དུ་གཟིགས།
དེ་ལྟར་དགོངས་ནས་དཀྱིལ་འཁོར་འདི་དག་ཐམས་ཅད་སྨྲ་བསམ་ལས་འདས་པར་སྣ་ཚོགས་རྣམ་པར་སྨྲོས་ཤིག །དེ་ཉིད་དངོས་པོ་དང་བར་གཟིགས་ནས། གཟིགས་པའི་མཐའ་དང་། དགོངས་པའི་མཐའ་དང་། མཛད་པའི་མཐའ་ཀུན་ལ་སྙོམས་པའི་ཏིང་ངེ་འཛིན་ལ་
སྙོམས་པར་བཞུགས་ཏེ། བཀོད་པ་དང་། རྣམ་པར་བཀོད་པ་དང་། རྣམ་པར་བཤད་པ་དང་། དགོངས་པ་དང་། རྣམ་པར་དགོངས་པ་དང་། རོལ་པ་དང་། རོལ་པ་ཆེན་པོ་དང་། མཛད་པ་དང་། སྣ་ཚོགས་མཛད་པས་ཀུན་དུ་སྤྲོ་བར་མི་བྱེད་དེ། འཇིག་རྟེན་དྲུག་གི་
རྣམ་པས་བསྡུས་པའི་སྟོང་གསུམ་གྱི་དངོས་པོ་འདི་དག །སངས་རྒྱས་ཀྱི་དཀྱིལ་འཁོར་འདི་ལས་གཞན་དུ་སྣང་བར་མི་དགོངས་སོ། །དེའི་དུས་དང་ས་དང་སའི་ཁྱད་པར་དང་། དཀྱིལ་འཁོར་བཀོད་པ་དག་ཀྱང་རྣམ་པར་མི་གཟིགས། ཀུན་དུ་མི་གཟིགས་ཤིང་དགོངས་
པ་ཡང་མི་འགོག་གོ། །དེ་དག་ནི་མཐར་ཡང་མི་གནས་ཤིང་ནམ་མཁའ་ལྟ་བུར་བཞུགས་སོ། །དེ་ནས་ཏིང་ངེ་འཛིན་དེ་ལ་ཞུགས་མ་ཐག་ཏུ་འཁོར་གྱི་དཀྱིལ་འཁོར་དེ་དག་ཀྱང་ཆོས་ཐམས་ཅད་ཀྱི་དཀྱིལ་འཁོར་གྱི་རང་བཞིན་ནམ་མཁའ་ལྟ་བུར་རྟོགས་པར་འགྱུར་རོ། །དེ་ནས་

ཡང་གསང་བའི་བདག་པོ་ལག་ན་རྡོ་རྗེ་ངོ་མཚར་གྱི་སྒོ་ནས་བསྐུལ་ཞིང་གཞན་དག་གི་དོན་ཐུགས་གཡོ་བར་མཛད་པའི་གླུས་གཡོ་སློང་བར་མཛད་དེ། ཚུལ་བན་དོན་གྱི་རྒྱལ་པོ་ཆེ། །འདྲེན་པ་ཀུན་གྱི་རྒྱུད་ཉིད་པས། །ནམ་མཁའ་ལྟ་བུའི་རྒྱུད་ཉིད་པས། །ནམ་མཁའ་ལྟ་བུའི་དཀྱིལ་འཁོར་ནས། །
ཐུགས་རྗེ་ཆེན་པོའི་ཡ་མཚན་སྟོན། །ཀྱེ་མའོ་མགོན་པོ་དོན་ཀུན་གནས། །ཞི་བའི་ལས་དམ་འཇུག་བྱེད་པ། །བྱང་སེམས་ཐུགས་རྗེའི་རླན་བྲལ་ལམ། །རྡོས་ཅན་ཆོས་དང་འགྲང་འགྱུར་ཅིང་། །ཞེས་གསོལ་བ་བཏབ་པ་ལས་ཀྱང་ཅི་ཡང་མི་གསུང་བར་བཞུགས་སོ། །དེ་ནས་ཡང་ཡུམ་
གཟི་ལྡན་པདྨོ་ཞེས་བྱ་བས་རྣམ་པར་མི་རྟོག་པའི་ཏིང་ངེ་འཛིན་ལས་སློང་བའི་གླུས་སྐུལ་བར་མཛད་དེ། མི་དམིགས་ཏིང་འཛིན་བསམ་འདས་བརྗོད་དང་བྲལ། །བདེ་བ་ཆེན་པོ་ཡེ་ཤེས་བྱང་ཆུབ་སེམས། །མི་དམིགས་ཐུགས་རྗེ་མི་འདའ་དམ་ཚིག་གིས། །རོལ་བའི་ཆོ་འཕྲུལ་རྒྱ་
ཆེན་བསྟན་དུ་གསོལ། །དེ་སྐད་ཅེས་ཡང་བསྐུལ་བའི་རྗེས། །མགོན་པོའི་གནས་རྣམས་ལ་དགོངས་ནས། །འོད་ཟེར་རྣམས་བཀོད་འཛུམ་མཛད་དེ། །འཁོར་བ་ལེགས་སྦྱིན་སྐབས་དབྱེ་མཛད། །ལེགས་སོ་ལེགས་སོ་རྡོ་རྗེ་ཅན། །པདྨོ་འཛིན་པའི་གྲོགས་བཅས་པས། །
ཡང་ཡང་བསྐུལ་བར་མཛད་པས་ན། །གནང་ཞིང་བསྟན་པར་མཛད་པ་ལ། །དགའ་བའི་སྤྱན་རྗེས་དང་བར་གྱིས། །གང་འདོད་རྟོགས་པ་ཞི་བར་མཛོད། །མ་འོངས་རྟོགས་པ་མཐའ་དག་རྣམས། །ཐུགས་རྗེ་ཤུགས་ཀྱིས་བཟུང་མཛད་དེ། །དོན་ཀུན་ཁྱབ་པའི་སྣང་བ་ཡིས། །
གཟུང་བར་བྱ་བའི་སྐབས་དབྱེ་མཛད། །ཞེས་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་དགོངས་པ་བླ་ན་མེད་པའི་གསང་བའི་རྟ་མཆོག་རོལ་པའི་རྒྱུད་ཆེན་པོ་ལས་རྣམ་པར་སྤྲུལ་པའི་ལེའུ་སྟེ་དང་པོའོ།། །།དེ་ནས་དགའ་ཞིང་འཁོར་འདུས་པས། །དགའ་
བའི་བཞིན་བཟངས་རྒྱས་མཛད་དེ། །གཙོ་བོས་ཇི་ལྟར་བཀའ་སྩལ་བཞིན། །ཐུགས་རྗེས་འབྱུང་བའི་དཀྱིལ་འཁོར་གཟུངས། །དེ་ནས་གཟིགས་ལྡན་པདྨོ་ཅན། །འཛུམ་མདངས་རྒྱས་པས་བསྐུལ་མཛད་དེ། །འོ་བྱེད་འཁྱུད་པ་ལ་སོགས་པ། །དགའ་བཞིན་

ཆགས་པར་རྣམ་པར་འགྱུར། །ཨེ་མ་རིག་པའི་རྒྱལ་པོ་ཁྱོད། །ཐུགས་རྗེ་ཆེན་པོ་ཉི་འོད་བཞིན། །ཐུགས་རྗེ་འབྱུང་བའི་དཀྱིལ་འཁོར་གཟུངས། །ཕྱོགས་རིས་མེད་པས་གོ་འབྱེད་པས། །ཡུལ་དུ་གྱུར་པ་ཀུན་རྒྱུད་དགོངས། །མི་དམིགས་ཆོ་འཕྲུལ་ནམ་
མཁའ་ལས། །བཀོད་པ་རྒྱ་མཚོ་སྤྲིན་ཕུང་བཞིན། །ཐུགས་རྗེ་སྤྲུལ་པའི་ཆར་ཆེན་པོས། །སྣ་ཚོགས་ལས་བརྒྱད་དག་པར་མཛོད། །དེ་ནས་གཙོ་བོ་རྡོ་རྗེ་འཆང་། །ཏིང་ངེ་འཛིན་ལས་བཞེངས་མཛད་དེ། །རང་གི་མཚན་མོས་རབ་མཛེས་པས། །རྒྱལ་པོ་ཟིལ་
གནོན་གཟི་བརྗིད་ཅན། །ཕྱག་གི་འཁོར་ལོ་རབ་བསྐོར་ཅིང་། །ཕྱོགས་རྣམས་ཀུན་དུ་གཟིགས་མཛད་དེ། །མི་དམིགས་ནམ་མཁའི་དབྱིངས་དག་ན། །རྡོ་རྗེ་སྤྲུལ་སྐུ་མངོན་ཕྱུང་ནས། །གཟི་ལྡན་པདྨོ་ཆེན་མོ་དང་། །རོལ་པའི་ཚུལ་དུ་བཞུགས་མཛད་དེ། །འཛུམ་
མིག་ཆགས་པའི་བཞིན་དག་གིས། །འཁོར་རྣམས་སློང་བའི་སྔགས་བརྗོད་དོ། །ཨོྃ་ཨཱཿཧཱུྃ་མ་ཧཱ་བྷསྨི་ཤ་ཀུ་རུ་བི་ན་ཧྲྀ་ད་ཡ་ཨྃ་བྷ་བ་ཧི་ཨ་ལ་ལ་ཧོ། །གཉིས་སུ་མེད་པའི་བྱང་སེམས་ཀྱིས། །དཀྱིལ་འཁོར་སྦྱོར་ཞིང་བསྡུ་བར་མཛོད། །བསོད་ནམས་ཡེ་ཤེས་ཚོགས་
རྫོགས་སྐུ། །རྡོ་རྗེ་གར་གྱི་རོལ་མཛད་ཅིང་། །དགའ་མཆོག་རྡོ་རྗེ་བྱང་ཆུབ་སེམས། །འཛུམ་ཞིང་འཁྱིལ་བའི་པདྨོའི་གནས། །དཀར་འཚེར་དག་པའི་རང་བཞིན་ཏེ། །དམར་པོ་དབང་དང་གཉིས་མེད་པར། །གསལ་ཁྱབ་ཀུན་དུ་སྤྲོས་པ་ལས། །དཀྱིལ་འཁོར་སྤྲུལ་པ་
མཐའ་ཡས་འཐོན། །ཞི་འགོག་མྱ་ངན་འདས་པ་དང་། །བྱང་ཆུབ་མགོན་གནས་ལམ་ཞེས་དག །གཉིས་མེད་གཉིས་སུ་སྦྱོར་མཛད་ཅིང་། །རང་གི་དཀྱིལ་འཁོར་གནས་ལ་བཀོད། །ངོ་མཚར་སྤྲུལ་པ་རྣམ་པར་རོལ། །བརྗིད་དང་བཅས་པས་གར་མཛད་ཅིང་། །འཛུམ་པར་
མཛད་དང་རོལ་པ་དང་། །ཀུན་དུ་འགྱིང་དང་སྤྱན་མཛེས་བལྟམ། །སྨིན་རིང་བསྐྱོད་ཅིང་བསྒྱུར་བ་དང་། །རྡོ་རྗེ་ཕུར་པས་གཡའ་བས་སློང་། །འདོར་ཞིང་སྐུམ་དང་འཇོག་ལྡེག་དང་། །རྣམ་པར་རོལ་པའི་གར་གྱིས་ཀྱང་། །རིགས་ཀྱི་ཕྲིན་ལས་སྣ་ཚོགས་སྤྲུལ། །ནམ་མཁའ་

ཀུན་ཏུ་ཁྱབ་པར་མཛད། །རྣམ་པར་རོལ་པའི་བདེ་འབྱུང་བར། །བྱང་ཆུབ་སེམས་སོགས་ཞི་ཞིང་གསལ། །རོལ་པའི་ཆར་ཉིད་མངོན་བབས་པས། །འཇིག་རྟེན་དྲུག་གི་ཕྱོགས་བཅུ་ན། །བརྟན་དང་གཡོ་བ་མ་ལུས་པའི། །སངས་རྒྱས་ཞིང་ཁམས་དག་བྱས་ནས། །བྱང་
ཆུབ་སེམས་ཚོགས་རོལ་པ་ལ། །བརྡེག་དང་འཁྱུད་དང་སྡོམ་པ་ལས། །སྦྱོར་དང་བསྟིམ་དང་མཉེས་པ་དང་། །ཀུན་དུ་རབ་དགྱེས་ཡེ་ཤེས་ཐིག །སྣ་ཚོགས་སྣང་བ་ཉི་མའི་འོད། །ཡང་དག་བདེ་ལ་རབ་གནས་མཛོད། །དེ་འདུས་པའི་ཆེ་ཚོགས་པའོ། །ཕྱོགས་བཅུ་ཀུན་
ནས་བཞེས་མཛད་དེ། །ཐབས་དང་ཤེས་རབ་བྱིན་བརླབས་པའི། །བྱང་སེམས་རྣམ་དག་རྒྱུན་གྱིས་མཆོད། །རྔ་དང་སིལ་སྙན་སྒྲ་སྒྲོགས་ཤིང་། །དབང་པོ་ཚིམ་པའི་རོལ་རྩེད་དང་། །གར་དབྱངས་གླུ་དྲུག་སྣ་ཚོགས་ཀུན། །སྟོང་གསུམ་གང་བར་གསུང་བྱས་ཏེ། །
བཅོམ་ལྡན་པདྨོ་བདེ་ཡང་བདེ། །གཟི་ལྡན་ཡུམ་དང་བཅས་པར་མཆོད། །ཨེ་མ་འདུས་པའི་ཚོགས་དབུས་ནས། །ཐུགས་རྗེ་ཆེ་མངའ་ཉི་དཀྱིལ་བཞིན། །འཁོར་ལོ་ཀུན་སྒྱུར་སྒྲོལ་མཛད་པས། །རང་གི་དཀྱིལ་འཁོར་རྒྱས་པར་མཛད། །རྡོ་རྗེ་འཆང་བའི་གསོལ་
འདེབས་ཀྱིས། །དཀྱིལ་འཁོར་དག་ལ་ལྷུན་གྲུབ་རྫོགས། །པདྨའི་དཔལ་ལྡན་སེམས་པ་ཆེ། །ཕྲིན་ལས་ཡེ་ཤེས་གནས་ཀུན་སྦྱོང་། །ཁྱོད་ཞབས་བསྐྱེད་པ་ཐུགས་རྗེའི་སྟོབས། །ཁམས་གསུམ་མ་ལུས་དག་པ་ཡི། །དེ་བཞིན་ཉིད་ཀྱི་ཡེ་ཤེས་མཆོག །མགོན་
པོ་བཀའ་དྲིན་མཛད་པས་ལེགས། །དེ་སྐད་གསོལ་བཏབ་དགྱེས་པར་འགྱུར། །ཕྱག་རྒྱ་ཆེན་པོའི་གནས་ལ་བཞུགས། །དེ་ནས་དགའ་བའི་བྱང་ཆུབ་སེམས། །སྔོན་གྱི་རྒྱུད་དང་ལམ་བཞི་ལས། །སྤྲུལ་པའི་བྱང་ཆུབ་སེམས་དཔའ་དང་། །སྔོན་གྱི་རྒྱུད་དང་
ལམ་གྲོགས་རྣམས། །དགོངས་ཤིང་ཐུགས་རྗེའི་ཡེ་ཤེས་ཐུགས། །རང་བཞིན་གནས་ནས་ཀུན་དགོངས་ཏེ། །ཕྱོགས་བཞི་ནས་ནི་བསྐུལ་བར་མཛད། །ཀྱེ་ཀྱེ་མཆོག་གསུམ་བདེ་བའི་སྐུ། །བྱམས་པའི་ཐུགས་མངའ་སྐུ་གསལ་མཛད། །རྡོ་རྗེ་རྒྱལ་པོ་བྱང་

ཆུབ་སེམས། །བདག་དགོངས་འགྲོ་བའི་དོན་ཆེན་མཛད། །ཀྱེ་ཀྱེ་ཡོན་ཏན་རིན་ཆེན་ཚོགས། །ཐུགས་རྗེ་མཉམ་ཉིད་ཡེ་ཤེས་ཆེ། །རྒྱལ་པོ་འཁོར་ལོ་བྱང་ཆུབ་ཉིད། །དཀྱིལ་འཁོར་སྣ་ཚོགས་སྤྲུལ་པའི་མཛོད། །ཀྱེ་ཀྱེ་རྣམ་པར་དག་པའི་སྐུ། །
དགའ་བ་རྒྱ་མཚོ་འབྱུང་བའི་གནས། །སོ་སོའི་ཡེ་ཤེས་སྣ་ཚོགས་འབྱེད། །ཆོས་རྣམས་ཀུན་གྱི་དེ་བཞིན་ཉིད། །ཀྱེ་ཀྱེ་འགྲོ་བའི་དོན་ཆེན་བདག །བཏང་སྙོམས་མི་འདོར་སྣ་ཚོགས་དོར། །བྱ་བ་གྲུབ་པའི་ཏིང་འཛིན་མཆོག །ཕྱོགས་བཅུའི་དཀྱིལ་འཁོར་རྣམ་དག་
སྟོན། །རང་དགའི་བསྐུམ་པས་གཡོ་མཛད་དེ། །ཕྱོགས་བཞི་བྱང་ཆུབ་དགའ་གནས་འཇུག །ཀྱེ་མའི་འགྲོ་རྣམས་དེ་བཞིན་ཉིད། །བྱང་ཆུབ་སེམས་ཀྱི་རྣམ་འཕྲུལ་ལས། །ཉོན་མོངས་གཟུང་འཛིན་སྒྲིབ་པ་ཡིས། །རང་གི་མཐའ་ལམ་འགེས་པར་བྱེད། །འདི་དག་
ཐུགས་རྗེའི་གནས་སུ་རུང་། །ཡེ་ཤེས་གསལ་བའི་ཐབས་མང་པོས། །ཐམས་ཅད་དུས་གཅིག་བསྒྲལ་བྱས་ནས། །རང་གི་བདེ་ཆེན་དོན་སྟོན་མཆོག །ཞེས་གསུངས་པདྨའི་རིག་པ་འཛིན། །སངས་རྒྱས་སྲས་བཅས་དགའ་བར་མཛད། །དེ་བཞིན་གཤེགས་པ་
ཐམས་ཅད་ཀྱི་དགོངས་པ་བླ་ན་མེད་པ་གསང་བ་དཔལ་རྟ་མཆོག་རོལ་པའི་རྒྱུད་ལས་ཐུགས་རྗེ་སྤྲུལ་པའི་རོལ་པའི་ལེའུ་སྟེ་གཉིས་པའོ།། །།དེ་ནས་བྱང་ཆུབ་སེམས་དཔའི་གཙོ། །རྡོ་རྗེ་འཆང་བ་སྟན་ལས་ལངས། །བདེ་གཤེགས་བསྔགས་པ་རྗོད་བྱེད་ཅིང་། །བསྐུམ་པས་
དབྱངས་ཀྱིས་གསོལ་བ་བཏབ། །ཀྱེ་མ་ཧོ་མཆོག་གསུམ་དམ་ཚིག་སྐུ། །ཡེ་ཤེས་བླ་ན་མེད་པའི་བདག །བྱང་ཆུབ་སེམས་ཀྱི་དཀྱིལ་འཁོར་ཉིད། །རྣམ་འཕྲུལ་ཐུགས་རྗེའི་དུས་ཉིད་པས། །རིགས་ཀྱི་འཁོར་ལོ་དཔག་མེད་སྐུ། །དེ་རིང་བཀྲ་ཤིས་ཕུན་སུམ་ཚོགས། །ཐུགས་
རྗེ་ཆེན་པོ་ཡལ་འདོར་ན། །ཅི་ཕྱིར་ཐེག་ཆེན་མཆོག་ཏུ་སྔགས། །ཡང་དག་ཞུས་པའི་ཚིག་གསན་ནས། །ཐུགས་རྗེའི་དཀྱིལ་འཁོར་གཟིགས་པར་མཛད། །མགོན་པོའི་པདྨའི་སྐུ་དེ་ཉིད། །གཟི་ལྡན་ཡུམ་དང་རོལ་མཛད་ཅིང་། །དྲི་མེད་ཡེ་ཤེས་ཕྱོགས་གཟིགས་ཤིང་། །

གཉིས་མེད་བྱང་ཆུབ་སེམས་ཀྱི་དཀྱིལ་འཁོར་གསལ། །ཐེག་པ་གསང་ཆེན་ཆེར་འབྱུང་བའི། །ལམ་འདི་དཔལ་ལྡན་རོལ་མོའི་མཆོག །སངས་རྒྱས་སྲས་བཅས་སྡུད་མཛད་དེ། །གཞན་འཕྲུལ་གནས་ཚོགས་གཡོ་མཛད་ཅིང་། །སྟོང་གསུམ་འདི་དག་སྤྱོད་
མཛད་ཅིང་། །ཏིང་ངེ་འཛིན་ལ་སྙོམས་འཇུག་སྟེ། །སྐུ་ལས་འོད་ཟེར་སྤྲོ་བར་མཛད། །དེས་ཁྱབ་རིགས་ཀྱི་དཀྱིལ་འཁོར་གསལ། །ཡེ་ཤེས་འོད་མདངས་སེམས་དཔའི་སྐུ། །གནས་ལྔར་གསང་བའི་སྔགས་ཀྱིས་གཞུག །ཕྱག་རྒྱ་ཆེན་པོ་ཡོངས་རྫོགས་སྐུ། །
ཞལ་གསུམ་ཕྱག་དྲུག་དགའ་བའི་མདངས། །དམར་གསལ་པདྨ་རཱ་གའི་མདངས། །གཡས་གཡོན་ཞལ་གཉིས་སྔོ་དང་སེར། །རིགས་རྒྱན་མཚན་མ་ཀུན་གྱིས་མཛེས། །ཕྱག་ན་པད་སྤོང་བུམ་པ་དང་། །རྡོ་རྗེ་རྩེ་ལྔ་དཔལ་བེའུ་དང་། །མཐའ་མས་མདའ་
གསོར་གཞུ་འཛིན་པའོ། །རིན་ཆེན་སྣ་ཚོགས་ན་བཟའ་དང་། །ཕྱག་རྒྱའི་ཡུམ་བཅས་རོལ་པ་མཛད། །གཞལ་ཡས་ཁང་པ་སྒོ་བཞི་དང་། །རིན་ཆེན་སྣ་ཚོགས་རྟ་བབས་བཅས། །དྲ་བ་དྲ་ཕྱེད་མུ་ཏིག་ཕྲེང་། །བྷན་དྷ་དྲིལ་བུ་སོགས་ཀྱིས་སྤྲས། །དབུས་
ཀྱི་དཀྱིལ་འཁོར་ཆེར་འཕགས་པའི། །ཕོ་བྲང་ཀ་བ་གདུང་རྣམས་ལ། །པདྨོ་རྡོ་རྗེ་སོགས་པས་སྤྲས། །འདོད་པའི་ཡོན་ཏན་ཕུན་སུམ་ཚོགས། །གནས་རྣམས་ཀུན་དུ་རིན་ཆེན་ཁྲི། །པདྨ་འཁོར་ལོ་ཉི་ཟླས་མཚན། །ཕྱི་རོལ་བར་ཁྱམས་འཁོར་བ་དང་། །སྣོད་
རྣམས་ཀུན་དུ་པདྨ་ལ། །ཐབས་དང་ཤེས་རབ་བྱེ་བྲག་གིས། །ཉི་མ་ཟླ་བ་རྐྱང་པའོ། །དེ་ནས་པདྨོ་རྣམ་དག་ཀུན། །དབུས་ཀྱི་གདན་ལ་བཞུགས་མཛད་དེ། །དགྱེས་པའི་གར་དབྱངས་བསྐྱོད་པའི་མཐུས། །ཐབས་དང་ཤེས་རབ་རྫོགས་པར་མཛད། །དེ་ཚེ་
ཐུགས་མཆོག་བྱང་ཆུབ་སེམས། །མཁའ་ཀློང་རྣམ་པར་དག་པས་ན། །རིག་པ་བདེ་བ་ཆེན་པོའི་སྐུ། །སྣ་ཚོགས་སྣ་ཚོགས་ཤར་བ་དེ། །གསུང་ཉིད་ཡི་གེ་འཁོར་ལོའི་ཚོགས། །འབར་བ་འོད་ཟེར་རྩེ་ལྔ་བ། །ཆོ་གའི་ཡན་ལག་རིམ་བཞིན་དུ། །ཐུགས་

ཀྱི་མཚན་མ་དམ་ཚིག་བྱ། །སྔགས་བཅས་འཕྲོ་ཞིང་འདུ་བའི་ཚུལ། །རྒྱལ་པོ་བདེར་གཤེགས་ཡབ་ཡུམ་དང་། །བྱང་ཆུབ་སེམས་དཔའ་སེམས་མ་དང་། །ལས་མཛད་ཁྲོ་བོ་ཡབ་ཡུམ་དང་། །ཕྱག་རྒྱ་ཆེན་པོའི་སྐུར་གྱུར་ནས། །རིགས་
ཀྱི་རྒྱལ་ཕྲེང་མཚན་མས་མཛེས། །རང་གི་དཀྱིལ་འཁོར་གནས་བཞུགས་ཤིང་། །རྡོ་རྗེ་གསང་བའི་གྲལ་དུ་འཁོད། །དེ་ཚེ་མགོན་པོ་བདེ་ཆེན་པོ། །རིགས་ཀུན་བདག་འགྱུར་ཞེས་བྱ་བས། །པདྨོ་རྣམ་པར་འཕྲུལ་བ་ཡི། །དཀྱིལ་འཁོར་ཆེན་པོ་འབྱིན་
པར་མཛད། །བྱང་སེམས་ཀམ་ལས་རྣམ་འཕྲུལ་བའི། །བདེར་གཤེགས་འོད་ཟེར་སྣང་བའི་སྐུ། །ཞལ་དང་ཕྱག་ལ་སོགས་པའི་རྒྱན། །གཙོ་བོའི་ཆ་ལུགས་ཅི་ལྟ་བར། །རང་འོད་ཡུམ་དང་འཁྲིལ་བར་མཛོད། །བཀྲ་ཤིས་མཚན་ལྡན་བདེ་བ་ལ། །རཱ་ག་པདྨོ་ཧཱུྃ་ཞེས་པས། །
སྔགས་མཆོག་ཡི་གེ་འབྲུ་བརྒྱད་དེ། །ལས་ཀུན་གྲུབ་པར་མཛད་པ་ཡིན། །གང་གི་པདྨ་ཤ་རི་དང་། །བྷུ་དྷ་ཧཱུྃ་གིས་བསྣན་བྱས་ན། །ཞི་རྒྱས་དབང་དྲག་ལས་ཀུན་དང་། །གྲུབ་ཆེན་བརྒྱད་ཀྱི་ཚོགས་སོག་རྣམས། །སྦྱོར་བ་ཙམ་གྱིས་གྲུབ་འགྱུར་ཞིང་། །ཡུན་རིངས་གནས་
པ་གནས་པ་ཡིན། །འབྱིན་པའི་དུས་སུ་གསང་སྔགས་ལ། །ཡི་གེ་ཛ་ཡིས་གདགས་བྱས་ནས། །རྣམ་འཕྲོ་རིགས་ཀྱི་དཀྱིལ་འཁོར་སྦྱོར། །རིགས་བདག་སྐུ་གནས་དགྱེས་པར་བཞུགས། །ཐུགས་རྗེ་སྐུལ་བའི་གླུ་དང་སྔགས། །འོད་ཟེར་ཚོགས་ཀྱིས་སྐུལ་བ་མཛོད། །
དམ་ཚིག་གསུམ་སྟོན་སྔགས་ཀྱི་མཐུས། །དགྱེས་ཆགས་བརྟན་པས་གཟི་དང་ལྡན། །ཨོྃ་རྣམ་དག་པདྨོ་བདེ་བའི་དབྱིངས། །ཡེ་ཤེས་བྱིན་ལས་གསལ་བའི་མཆོག །དཀྱིལ་འཁོར་གསང་གསུམ་དམ་ཚིག་ཆེ། །མཉམ་ཉིད་རིགས་བདག་ཐུབ་པ་ཆེ། །བྱིན་བརླབས་
འདོར་བར་མི་མཛད་པས། །སངས་རྒྱས་རྣམས་ཀྱི་སྐུ་གསུང་ཐུགས། །གསལ་མཛད་གཉིས་སུ་མེད་པའི་སྐུ། །རང་གི་ངོ་བོས་གནས་པ་ཡིན། །གཙོ་བོ་སྔགས་ཀྱིས་བསྐུལ་བྱས་ཏེ། །འོད་ཟེར་རྒྱན་བཅས་ཐུགས་ཀར་བསྡུས། །ཡི་གེ་ཨཱ་ནས་ཨཿའི་བར། །བཅུ་

དྲུག་འོད་ཟེར་འཕྲོ་བྱས་པས། །འགྲོ་ཀུན་སངས་རྒྱས་སྐུར་བཀོད་ཅིང་། །རིགས་མཐུན་དཀྱིལ་འཁོར་ཀུན་གསལ་འགྱུར། །སྔགས་ཀྱི་འོད་ཟེར་སྒྲར་བཅས་པས། །ཆོས་རྣམས་བཅུ་དྲུག་དག་པའི་དབྱིངས། །རང་གི་གནས་སུ་བཀོད་བྱས་པས། །མཚན་མཆོག་སུམ་ཅུ་རྩ་
གཉིས་རྫོགས། །དེ་བཞིན་ཀཱ་ནས་ཀྵ་ཡི་བར། །སུམ་ཅུ་རྩ་བཞིའི་རིམ་བཞིན་གསལ། །བརྙན་པའི་ཡི་གེ་དྲུག་དང་བཅས། །འོད་འཕྲོས་ཐམས་ཅད་སངས་རྒྱས་སྐུ། །ཡེ་ཤེས་དཀྱིལ་འཁོར་གསལ་བྱས་ནས། །སྔགས་ཀྱི་འོད་ཟེར་སྒྲར་བཅས་ནས། །ཆོས་མང་
ཡེ་ཤེས་ཟག་པ་མེད། །སླར་ཉིད་སྐུ་ཡི་གནས་ཞུགས་པས། །དཔེ་བྱད་བཟང་པོ་བརྒྱད་ཅུ་རྫོགས། །གཞན་ཡང་རིན་ཆེན་སྣ་བདུན་དང་། །བཀྲ་ཤིས་བརྒྱད་སོགས་ཀུན་གྱིས་སྤྲས། །ཁྃ་ལས་རྣམ་འཕྲུལ་ཆེ་མཐའ་ཡས། །ཞལ་གཅིག་ཕྱག་བཞི་དཀར་དམར་
མདངས། །པདྨ་སོགས་དང་རལ་གྲི་འཛིན། །ཆོས་ཀྱི་སྣང་བའི་རྒྱན་གྱིས་བསྒྲུབས། །པདྨ་རྒྱན་འབྲིང་རང་བཞིན་མཆོག །ཤར་གྱི་དཀྱིལ་འཁོར་གནས་ལ་བཞུགས། །གྃ་ལས་སྤྲུལ་པའི་ཆོས་དབང་ཕྱུག །དམར་སེར་ཞལ་གཅིག་ཕྱག་གཉིས་པ། །པདྨའི་ཕྲེང་བ་
བུམ་པ་འཛིན། །དཀྱིལ་འཁོར་གནས་སུ་བཞུགས་པའོ། །གྷྃ་ལས་སྤྲུལ་པའི་ཆགས་མེད་འོས། །ཞལ་གཅིག་ཕྱག་གཉིས་བྱུ་རུའི་འོད། །པད་གནས་གླེགས་བམ་མེ་ལོང་འཛིན། །ནུབ་ཀྱི་དཀྱིལ་འཁོར་གནས་བཞུགས་པའོ། །ངྃ་ལས་སྤྲུལ་པའི་སྤྱན་དག་
མ། །ཞལ་གཅིག་ཕྱག་གཉིས་བཙོད་ཀྱི་མདོག །རིན་ཆེན་ཕྲེང་བས་བསིལ་ཡབ་འཛིན། །བྱང་གི་དཀྱིལ་འཁོར་གནས་བཞུགས་པའོ། །ཙྃ་ལས་སྤྲུལ་པའི་མི་བསྐྱོད་པ། །ཞལ་གཅིག་ཕྱག་བཞི་ཆུ་ཤེལ་མདོག །རྡོ་རྗེ་དྲིལ་འཛིན་འཁྲིལ་པའི་ཚུལ། །
དཔལ་བེའུ་བུམ་སོགས་འོད་ཕྲེང་རྒྱན། །ཚྃ་ལས་སྤྲུལ་པའི་རྟ་དབང་ཕྱུག །ཞལ་གཅིག་ཕྱག་བཞི་བཻ་ཌཱུརྱ། །རིན་ཆེན་སྙེ་མ་དུང་ཕོར་འཛིན། །ལྷོ་ཡི་དཀྱིལ་འཁོར་གནས་ལ་བཞུགས། །ཛྃ་ལས་སྤྲུལ་པའི་འབྲུག་སྒྲ་ནི། །ཞལ་གཅིག་ཕྱག་གཉིས་གུར་

གུམ་མདོག །རིན་ཆེན་ཆག་ཤིང་འགུ་དྷེ་འཛིན། །ནུབ་ཀྱི་དཀྱིལ་འཁོར་གནས་ལ་བཞུགས། །ཉྃ་ལས་སྤྲུལ་པའི་དྲི་མེད་དཔལ། །ཞལ་གཅིག་ཕྱག་བཞི་མར་གད་མདོག །རིན་ཆེན་པད་སྲུངས་ཟ་མ་ཏོག །བྱང་གི་དཀྱིལ་འཁོར་གནས་ལ་
བཞུགས། །ཏྃ་ལས་སྤྲུལ་པའི་རིན་ཆེན་དབྱངས། །ཞལ་གཅིག་ཕྱག་བཞི་གསེར་གྱི་མདོག །རིན་ཆེན་དྲིལ་བུ་ཡུམ་དང་འཁྲིལ། །རིན་ཆེན་མཛོད་སྤུངས་འཁོར་ལོ་སོགས། །ཐྃ་ལས་སྤྲུལ་པའི་ནམ་མཁའི་མདོག །ཞལ་གཅིག་ཕྱག་བཞི་སྔོ་སྐྱའི་མདངས། །
རིན་ཆེན་གླིང་བུ་པདྨོ་འཛིན། །ཤར་གྱི་དཀྱིལ་འཁོར་གནས་ལ་ཞུགས། །དྃ་ལས་སྤྲུལ་པའི་དྲ་བ་ཅན། །ཞལ་གཅིག་ཕྱག་བཞི་མཐིང་གའི་མདོག །རིན་ཆེན་ཕྲེང་དང་པདྨོ་འཛིན། །ལྷོ་ཡི་དཀྱིལ་འཁོར་གནས་ལ་བཞུགས། །དྷྃ་ལས་སྤྲུལ་པའི་དཀོན་མཆོག་
རྒྱན། །ཞལ་གཅིག་ཕྱག་བཞི་དམར་སྐྱའི་མདངས། །ཆོས་ཀྱི་རྒྱལ་མཚན་རྒྱུད་མངས་འཛིན། །ནུབ་ཀྱི་དཀྱིལ་འཁོར་གནས་ལ་བཞུགས། །ནྃ་ལས་སྤྲུལ་པའི་རིན་ཆེན་ཏོག །ཞལ་གཅིག་ཕྱག་བཞི་མ་ར་ཏ། །དགོས་འདོད་བུམ་པ་དཔག་བསམ་ཤིང་། །
བྱང་གི་དཀྱིལ་འཁོར་གནས་ལ་བཞུགས། །ཊྃ་ལས་སྤྲུལ་པ་ཀུན་དུ་སྣང་། །ཞལ་གཅིག་ཕྱག་བཞི་གསེར་གྱི་མདོག །འཁོར་ལོ་དྲིལ་འཛིན་ཡུམ་དང་བུམ་པ་འཛིན། །གཙུག་ཏོར་དྲི་མེད་རྡོ་རྗེ་འཛིན། །ཐྃ་ལས་སྤྲུལ་པའི་འོད་ཀྱི་དཔལ། །ཞལ་གཅིག་ཕྱག་བཞི་
ཤེལ་གྱི་མདོག །འཁོར་ལོ་དྲ་བ་རལ་གྲི་འཛིན། །ཤར་གྱི་དཀྱིལ་འཁོར་གནས་ལ་བཞུགས། །དྃ་ལས་སྤྲུལ་པའི་དགའ་དབང་ཕྱུག །ཞལ་གཅིག་ཕྱག་བཞི་ཉི་མའི་མདངས། །འཁོར་ལོ་རྒྱལ་མཚན་དགའ་བའི་མཛོད། །ལྷོ་ཡི་དཀྱིལ་འཁོར་གནས་ལ་
བཞུགས། །ཏྃ་ལས་སྤྲུལ་པའི་ཆོ་འཕྲུལ་བཀོད། །ཞལ་གཅིག་ཕྱག་བཞི་དམར་སྐྱའི་མདངས། །ཉི་མའི་འོད་ཕྲེང་རྡོ་རྗེས་སྤྲས། །ནུབ་ཀྱི་དཀྱིལ་འཁོར་གནས་ལ་བཞུགས། །ནྃ་ལས་སྤྲུལ་པའི་རྣམ་པར་གཟིགས། །ཞལ་གཅིག་ཕྱག་གཉིས་ལྗང་སྐྱའི་མདངས། །

ཀུ་ཤའི་ཆུན་པོའི་ཨ་མྲའི་མདངས། །བྱང་གི་དཀྱིལ་འཁོར་གནས་ལ་བཞུགས། །པྃ་ལས་སྤྲུལ་པའི་དོན་ཡོད་པ། །ཞལ་གཅིག་ཕྱག་བཞི་ལྗང་སྔོའི་མདོག །རྒྱ་གྲམ་དྲིལ་བཅས་ཡུམ་དང་འཁྲིལ། །རྡོ་རྗེ་གདེངས་པོས་རལ་གྲི་འཛིན། །ཕྃ་ལས་སྤྲུལ་པའི་བརྩོན་
འགྲུས་འཁྱུགས། །ཞལ་གཅིག་ཕྱག་བཞི་ཀར་ཏི་ཀ །རྒྱ་གྲམ་ཕྲེང་བ་རྩེ་གསུམ་འཛིན། །ཤར་གྱི་དཀྱིལ་འཁོར་གནས་ལ་བཞུགས། །བྃ་ལས་སྤྲུལ་པའི་ལས་ཆེན་པོ། །ཞལ་གཅིག་ཕྱག་བཞི་སེར་སྐྱའི་མདོག །པདྨའི་ཕྲེང་བ་ནོར་བུ་འཛིན། །ལྷོ་ཡི་དཀྱིལ་
འཁོར་གནས་ལ་བཞུགས། །བྷྃ་ལས་སྤྲུལ་པའི་གནོད་སྦྱིན་འདུལ། །ཞལ་གཅིག་ཕྱག་བཞི་པདྨའི་མདངས། །ཕྱག་ན་རྡོ་རྗེ་མཆེ་བ་འཛིན། །ནུབ་ཀྱི་དཀྱིལ་འཁོར་གནས་ལ་བཞུགས། །མྃ་ལས་སྤྲུལ་པའི་སྣ་ཚོགས་དམ། །ཞལ་གཅིག་ཕྱག་བཞི་ལྗང་སེར་མདངས། །
ཟླ་བ་རིན་ཆེན་དབྱུག་པ་འཛིན། །བྱང་གི་དཀྱིལ་འཁོར་གནས་ལ་བཞུགས། །བདེར་གཤེགས་རྒྱལ་བ་དེ་དག་ཀྱང་། །ཙཀྲ་སྒྱུར་རྒྱལ་མ་ལུས་དང་། །མཚན་དང་དཔེ་བྱད་སྣ་ཚོགས་རྒྱན། །རིགས་བཙུན་བཙུན་མོ་མཛེས་པར་བྱ། །ཡང་སྤྲུལ་བྱམས་པའི་དབང་
ཕྱུག་ནི། །ཞལ་གཅིག་ཕྱག་བཞི་གངས་རི་མདོག །རྡོ་རྗེ་གདེངས་དབྱུག་རལ་གྲི་དང་། །ཏྲི་ཤཱུལ་ཐོད་བཅས་པདྨའི་ལྕུག །རྔམ་བརྗིད་འཁོར་བཅས་ཡུམ་དང་འཁྲིལ། །དྲག་པོའི་རྒྱན་ཆ་ཤར་གྱི་སྒོ། །ཁྭ་ལས་སྤྲུལ་པ་རྩེ་བའི་དབང་། །ཞལ་གཅིག་ཕྱག་བཞི་
གསེར་གྱི་མདོག །རིན་ཆེན་དབྱུག་པ་པདྨོ་དང་། །ཐོད་རྔ་རྡོ་རྗེ་མྱུ་གུའོ། །རྃ་ལས་སྤྲུལ་པའི་རྣམ་གྲོལ་དབང་། །ཞལ་གཅིག་ཕྱག་བཞི་དམར་མདངས་གསལ། །པདྨ་དང་ནི་དྲིལ་བུ་དང་། །ཐོད་སྤྲུལ་རས་སྔོན་བ་དན་འཛིན། །ལྃ་ལས་སྤྲུལ་པའི་འགྲོ་དབང་ཕྱུག །
ཞལ་གཅིག་ཕྱག་བཞི་ལྗང་གུའི་མདོག །རྡོ་རྗེ་རྒྱ་གྲམ་པདྨོ་དང་། །གྲི་གུག་གཏུན་ཤིང་ཕྲེང་བ་ཅན། །རིན་ཆེན་ཕྲེང་བས་མཛེས་བྱས་ནས། །འཁོར་བཅས་རྔམ་པའི་མདངས་བཅས་པས། །ལྷོ་ལ་སོགས་པའི་སྒོ་བཞི་རུ། །གཞན་འཇིགས་དྲག་པོའི་ལས་ཀྱིས་

འཁོད། །ཤྃ་ལས་སྤྲུལ་པའི་བྱིན་དབང་ཕྱུག །ཞལ་གཅིག་ཕྱག་བཞི་དཀར་དམར་འོད། །རྩེ་གསུམ་བྷན་དྷ་རིན་ཆེན་འཁྲིལ། །མི་ཡི་ཐོད་པ་རི་མོས་མཚན། །ཥྃ་ལས་སྨྲ་བའི་དབང་ཕྱུག་སྟེ། །ཞལ་གཅིག་ཕྱག་བཞི་སེར་སྐྱའི་མདངས། །
རིན་ཆེན་རྩེ་དགུ་བགྲད་ཕྲེང་དང་། །པདྨའི་ལྕུག་མ་སྡིགས་མཛུབ་མཛད། །ས་ལས་སྤྲུལ་པའི་སྤྱོད་དབང་ཕྱུག །ཞལ་གཅིག་ཕྱག་བཞི་དམར་སྐྱའི་མདངས། །དབྱུག་པ་རྩེ་གཅིག་པདྨ་དང་། །དགྲ་སྟ་ཞགས་པ་ཕྱག་ན་འཛིན། །ཧྃ་ལས་སྤྲུལ་པའི་དབང་
ཕྱུག་སྟེ། །ཞལ་གཅིག་ཕྱག་བཞི་ལྗང་གུའི་སྐུ། །རལ་གྲི་ལྕགས་ཀྱུ་དགྲ་སྟ་དང་། །མེ་ཡི་ཕྲེང་བ་འཁོར་ལོ་འཛིན། །གཞན་འཇོམས་འཇིགས་པའི་ཁྲོ་བོའི་མཆོག །རང་འོད་རིགས་མཐུན་ཡུམ་དང་རོལ། །དྲག་པོའི་རྒྱན་ཚོགས་མ་ལུས་འགེངས། །པདྨའི་འདབ་མ་
བཞིན་དུ་འཁོད། །ཀ་ལས་བདེ་བའི་བློ་གྲོས་དང་། །ཞལ་གཅིག་ཕྱག་བཞི་ནམ་མཁའི་མདངས། །ཡུམ་བཅས་རྡོ་རྗེ་དྲིལ་བུ་དང་། །ནམ་མཁའི་མཛོད་ཀྱི་འོད་ཀྱི་དཀྱིལ་འཁོར་དང་། །ཁ་ལས་ཁང་པ་རྒྱ་མཚོའི་སྒྲ་དབྱངས་ཅན། །ཞལ་གཅིག་ཕྱག་བཞི་བུ་ཤ་ར། །
རིན་ཆེན་པི་བང་ཕྲེང་བ་དང་། །རྔ་ཡབ་རྡོ་རྗེ་ཅོད་པན་ཐོགས། །ག་ལས་གཟི་བརྗིད་བཀོད་པ་ནི། །ཞལ་གཅིག་ཕྱག་བཞི་རྒྱ་སྐེགས་མདོག །པདྨའི་ལྕུག་མ་ཟླ་བ་དང་། །འཁོར་ལོ་ཡིད་བཞིན་བུམ་པ་དང་། །གྷ་ལས་སྤྲུལ་པའི་འཁོར་ལོ་གནོན་པ་ནི། །ཞལ་གཅིག་
ཕྱག་བཞི་མ་ར་དང་། །འཁོར་ལོ་དབྱུག་པ་མ་མོ་ཤིང་། །རྒྱ་གྲམ་རིན་ཆེན་ལྕུག་མ་འཛིན། །ཙ་ལས་ཤེས་རབ་སྣང་བ་ནི། །ཞལ་གཅིག་ཕྱག་བཞི་ལྗང་སྐྱའི་མདངས། །རིན་ཆེན་ཕུང་པོ་པདྨ་དང་། །རྩེ་གསུམ་དྲིལ་ཐབས་འོད་དཀྱིལ་འཁོར། །ཚ་ལས་རྡོ་རྗེ་རྒྱལ་མཚན་
ཏེ། །ཞལ་གཅིག་ཕྱག་བཞི་གསེར་གྱི་མདོག །རིན་ཆེན་གདུགས་མཛེས་ཉི་མ་དང་། །དཔའ་བོ་ལོངས་སྤྱོད་པདྨའི་སྤྱན། །ཛ་ལས་འོད་ཟེར་འཕྲོ་བ་ཅན། །ཞལ་གཅིག་ཕྱག་བཞི་མདངས་དམར་གསལ། །པདྨ་འཁོར་ལོ་མཆོད་སྡོང་བུ། །མུ་ཏིག་ཆུན་པོ་ཟ་མ་ཏོག །

ཛྷ་ལས་སྤྲུལ་པའི་དྲག་ཤུལ་ཅན། །ཞལ་གཅིག་ཕྱག་བཞི་ལྗང་སེར་མདོག །འོད་ཀྱི་མེ་ཕུང་མེ་འོད་དང་། །རལ་གྲི་འབར་བ་གཡས་དང་གཡོན། །ཏ་ལས་སྤྲུལ་པའི་དྲི་མ་སེལ། །ཞལ་གཅིག་ཕྱག་གཉིས་དམར་སྐྱའི་མདངས། །ཉི་མའི་ཕྲེང་བ་གཎ་ཌཱི་རྡེག །ཆོས་ཀྱི་
ཙཀྲ་རྫོགས་བྱེད་པའོ། །ཐ་ལས་སྒྱུ་མའི་འཕྲུལ་པ་ནི། །ཞལ་གཅིག་ཕྱག་བཞི་པ་ལ་ཤ། །སེང་གེ་རྒྱ་མཚོ་རིན་ཆེན་ཕྲེང་། །རིན་ཆེན་བུམ་པ་དེ་བཅུད་བཅས། །ལས་ཀྱི་རིན་ཆེན་རྒྱལ་པོ་ནི། །ཞལ་གཅིག་ཕྱག་བཞི་རཱ་གའི་མདངས། །རི་བོ་པདྨ་ཆུ་དྲི་དང་། །གསེར་ཉ་འཕྱོ་
བའི་རྫིང་བུ་ཡིན། །དྷ་ལས་འཕྲོས་པའི་དྲ་བ་ཅན། །ཞལ་གཅིག་ཕྱག་བཞི་ལྗང་གུའི་མདོག །རྒྱ་གྲམ་དྲིལ་བུ་འཕྲོ་བ་དང་། །བྷན་དྷ་སྦྲང་ཡབ་འཛག་པའི་རྒྱུན། །ཏ་ལས་སྤྲུལ་པའི་ལག་བཟངས་ནི། །ཞལ་གཅིག་ཕྱག་བཞི་ཀར་ཏའི་འོད། །པདྨའི་རྒྱལ་མཚན་དཀར་
དམར་མདངས། །དྲི་ཡི་གཞོང་པ་ཀུ་ཤའི་ཚུལ། །ཐ་ལས་གསེར་འོད་འཕྲོ་བ་འཛིན། །ཞལ་གཅིག་ཕྱག་བཞི་མཐིང་གའི་མདོག །གླེགས་བམ་མཛེས་པའི་སྐུ་གཟུགས་དང་། །རིན་ཆེན་མཛོད་དང་ཟླ་བའི་འོད། །ཌ་ལས་རིན་ཆེན་སྙེ་མ་ནི། །ཞལ་གཅིག་ཕྱག་བཞི་པད་
རཱ་ག །པདྨའི་སྡོང་བུ་དཔག་བསམ་ཤིང་། །བྷན་དྷ་རྩེ་གསུམ་ཟླ་ཚེས་གཟུགས། །དྷ་ལས་ཆོས་ཀྱི་མཐོང་བ་ནི། །ཞལ་གཅིག་ཕྱག་བཞི་སྣ་ཚོགས་སྐུ། །གོ་ཆ་ཡེ་ཤེས་སྒྲོན་མ་དང་། །དཔལ་བེའུ་ཟུར་བརྒྱད་ནོར་བུ་ཏོག །སྣ་ཚོགས་སྤྲིན་ཕུང་སེར་གྲ་བཅས། །མཆེ་
བ་དྲིལ་བུ་ངང་པ་འཛིན། །བྷ་ལས་གཞོན་ནུ་རིན་ཆེན་ནི། །ཞལ་གཅིག་ཕྱག་བཞི་ལྗང་སེར་མདོག །རྒྱ་གྲམ་འཁོར་ལོའི་ཕྲེང་བ་དང་། །འོད་ཟེར་རྩེ་གསུམ་སྔགས་པའི་བུམ། །སེམས་དཔའ་ཆེན་པོ་དེ་དག་རྣམས། །རྒྱན་ཕྲེང་ཆ་ལུགས་འོད་ཟེར་དང་། །ཡུམ་
གནས་འཁྲིལ་ཞིང་རང་གནས་ཀྱི། །གཙོ་ལ་འཁྲིལ་བའི་ཚུལ་དུ་བཞུགས། །ཉམ་ན་ལས་འཕྲུལ་བ་ཡི། །རྡོ་རྗེ་རྣམ་པར་གནོན་ལ་སོགས། །རིགས་ཀྱི་མཚན་མ་ཅི་བཞིན་དུ། །པདྨ་རཱ་ག་རཀྟ་མདངས། །བེའུ་གསེར་མདོག་ཨིན་དྲ་བཞིན། །པདྨ་རྡོ་རྗེ་

རིམས་སོགས་མཚན། །ཞལ་གཅིག་ཕྱག་བཞི་ཡུམ་དང་འཁྲིལ། །འོག་མའི་ཕྱག་མཚན་མཐུན་པ་ཡི། །རང་རྟགས་མཚན་མ་སྣ་ཚོགས་དང་། །པདྨའི་ལྕུག་མས་མཚན་བྱས་པའི། །མེ་ཏོག་འབྲས་བུ་རྣམས་ཀྱིས་མཛེས། །ཤར་ལ་སོགས་པའི་
ཕྱོགས་བཞི་རུ། །བྱང་ཆུབ་སེམས་དཔའི་ཆ་ལུགས་ཀྱིས། །རང་གི་དཀྱིལ་འཁོར་གནས་སུ་འཁོད། །ཡ་ཝ་ར་ལས་སྤྲུལ་པ་ཡི། །པདྨ་འཕྲོ་བ་ལ་སོགས་བཞི། །ཞལ་གཅིག་ཕྱག་གཉིས་དཀར་དང་སེར། །དམར་ལྗང་པདྨོ་མེ་ལོང་དང་། །རིན་ཆེན་ཕྲེང་བ་བི་བང་གར། །མཆོད་པ་
ལས་མཛད་ནང་གི་མཚམས། །ཥ་ཤ་ས་ཧ་ལས་འཕྲུལ་པའི། །པདྨོ་ཚིམ་བྱེད་ལ་སོགས་བཞི། །ཞལ་གཅིག་ཕྱག་གཉིས་རིགས་གཉིས་གཟུགས། །བདུག་སྤོས་མེ་ཏོག་དུང་དང་དྲི། །འགྱིང་ཚུལ་ཏྲི་ཤཱུལ་ལས་ཀྱི་ཚུལ། །མཆོད་པས་ཕྱི་ཡི་མཚམས་ན་གནས། །
དེ་དག་གི་གསང་སྔགས་ནི། ཨོྃ་དྷེ་ཧི་རཱ་ག་པདྨ་ཤི་རི་བུ་ཏ་ཧཱུྃ་ཧཱུྃ་སྭཱ་ཧཱ། ཨོྃ་པདྨ་མ་ཧཱ་དྷ་བ་ར་བུ་ན་སི་ཏ་མ་ཧཱ་དྷ་མ་ཧྲྀ་ད་ཡཱ་ཧཱུྃ་ཧཱུྃ། བྲད་ཏང་ཡ་ཛ་སྭཱ་ཧཱ། དབུས་ཀྱི་དཀྱིལ་འཁོར་གྱིའོ། །ཨོྃ་ཙཀྲ་ཨ་ལོ་ཀ་ན་མ་རཀྵ་སྃ་བྷ་ར་ད་ན་ཧྲི་ཏི་བ་ཡ་བ་ཏི་ཛ་སྭཱ་ཧཱ། ནུབ་ཕྱོགས་པའི་
དཀྱིལ་འཁོར་རོ། །ཨོྃ་བཛྲ་ད་ར་བ་ཀྲྀ་ཏ་ཡ་ནི་ཤྃ་ར་ཏི་བ་ཤྃ་ནི་ཛ་སྭཱ་ཧཱ། ཤར་ཕྱོགས་ཀྱི་དཀྱིལ་འཁོར་ལའོ། །ཨོྃ་རཏྣ་ཀུ་ཏི་དུ་མན་ཏ་བྷན་དྷ་བྷན་དྷ་དུ་ན་དུ་ན་བི་ཛ་སྭཱ་ཧཱ། ལྷོ་ཕྱོགས་ཀྱི་དཀྱིལ་འཁོར་པའོ། །ཨོྃ་པི་ཤ་ཙི་ན་དྷ་མ་མ་དུ་རུ་ཧ་ཧ་ཧ་ཧ་སརྦ་གུརྦ་ནི་ཧཱུྃ་ཕཊ་
སྭཱ་ཧཱ། བྱང་གི་དཀྱིལ་འཁོར་བའོ། །ཨོྃ་མ་མ་ཨ་བ་ལོ་ཀ་ན་རུ་རུ་ཡུ་རུ་སི་དེ་བྷྱོ་དེ་སཏྭ་མ་མ་ཧཱུྃ་ཛ་སྭཱ་ཧཱ། རིགས་ཀྱི་བྱང་ཆུབ་སེམས་དཔའ་རྣམས་ཀྱིའོ། །ཨོྃ་བི་ལོ་ཀ་ནཱ་མ་སི་ཏ་ན་མ་ཀུ་རུ་ཀུ་རུ་བོ་དྷི་ས་ཏྭ་བྷ་ར་བུ་ན་ཛ་ཧཱུྃ་ཛ་སྭཱ་ཧཱ། རིགས་ལས་སྤྲུལ་པའི་བྱང་ཆུབ་སེམས་
ཀྱིའོ། །ཨོྃ་བིན་དྷ་བིན་དྷ་སརྦ་ཀརྨ་སི་དེ་དེ་པི་ཀུ་རུ་བུ་ཏ་སྃ་བོ་ཧ་ཧཱུྃ་ཨོྃ་ཨྃ་ཛ་སྭཱ་ཧཱ། ལྷ་མོ་རྣམས་ཀྱིའོ། །ཨོྃ་ཨ་པ་སྨ་ར་ཀྲོ་དྷ་སྣི། ཡཀྴ་ཧཱུྃ་ཧཱུྃ་ཧཱུྃ་བི་ཏྃ་པ་ཀ་ཕཊ་སྭཱ་ཧཱ། ཁྲོ་བོ་རྣམས་ཀྱིའོ། །གསང་སྔགས་རྒྱལ་པོ་མི་བཟད་པས། །རྣམ་པར་སྤྲུལ་པ་སྐུ་ཡིས་ནི། །སྟོང་

གསུམ་གནས་ནས་གཡོ་མཛད་དེ། །རང་གི་ལྷ་ལ་གསལ་བར་མཛོད། །དེ་ནས་མགོན་པོ་རྡོ་རྗེ་འཛིན། །བདེ་ཆེན་གར་གྱི་དབང་ཕྱུག་གིས། །དཀྱིལ་འཁོར་རྣམ་གསུམ་གསལ་བྱེད་པའི། །ཏིང་ངེ་འཛིན་ལ་སྙོམས་ཞུགས་ནས། །དཀྱིལ་འཁོར་བྱིན་བརླབས་
དབང་བསྐུར་ཞིང་། །རིགས་ཀྱི་བདག་པོས་གསལ་བར་མཛོད། །གནས་ཀུན་མཚན་མ་ཡོངས་དག་ནས། །རྣམ་གསུམ་སྣང་བ་གཉིས་མེད་འགྱུར། །ཨོྃ་ན་མ་སརྦ་ཏ་ཐཱ་ག་ཏ་ཀཱ་ཡ་བཱ་ཀ་ཙིཏྟ་མ་ཧཱ་བོ་དྷི་ཧྱ་སུ་ཏྲྃ་ཏྲི་ཤ་ཤུ་དྷེ་སོ་ནཱ་ཁྱ་ཧཱུྃ་ཧཱུྃ་ཧཱུྃ། ཨོྃ་རིན་ཆེན་དབུ་
རྒྱན་གྱི་སྔགས་སརྦ་བུ་ཏ་ཀུ་རུ་རཏྣ་མ་མ་ཀུ་ཏ། ཨ་ཨ་བཱིརྱ་སད་མ་མ་ཀུ་ཨ་བྷི་ཥིཉྩ་ཨོྃ་ཨཱཿཧཱུྃ་སྭཱ་ཧཱ། ཨོྃ་པདྨ་ཨ་མོ་ཀ་ས་མ་ཡ་ཤྲི་ཧ་ཧ་ཧ་ཚིན་དྷ་མ་ནི་ཨ་སྨི་ཤ་བི་མ་མ་ཡ་ཧཱུྃ་ཧཱུྃ། སྔགས་གསུམ་གྱི་གསལ་བར་ཕྱེད་པའོ། །ཨོྃ་བི་ཤ་ཙིན་དྷ་མ་ནི་ཨ་བ་སྃ་
བོ་ད་མ་མ་ཀུ་རུ་སི་ལ་ལ་ཏ་སི་ན་བི་བུད་པ་པྃ་ད་ཧཱུྃ་ཧཱུྃ་ཧཱུྃ། རྣམ་པར་སྤྲོ་བའི་སྔགས་སོ། །ཨོྃ་མ་ཏ་ལ་ནི་བི་ཤ་ཙཀྲ་ཀུ་མ་ཏ་བུ་ཏ་ན་མ་སི་ལ་དུ་ཏྲི་སི་ཧཱུྃ་ཕཊ་སྭཱ་ཧཱ། དཀྱིལ་འཁོར་གསལ་བའི་སྔགས་སོ། །ཨོྃ་ཨྃ་ཨ་ཨ་མིན་དུ་ཤེ་མ་ལ་ཤན་དུན་དྷེ་ཏ་ཐཱ་ག་ཏེ་བྷྱོད་
ཏི་པདྨ་ཀུ་རུ་ཨཱཿཧཱུྃ་སྭཱ་ཧཱ། རྦད་པའི་སྔགས་སོ། །ཨོྃ་པདྨ་མུ་ཁྃ་པདྨ་པ་བ་ས་བོ་ཏི་དི་ར་ཡྃ་གུ་རུ་ཧཱུྃ་ཧཱུྃ་ཧཱུྃ་ཧྃ་ཧྃ་དར་ཤ་སྭཱ་ཧཱ། སྙིང་པོའི་སྔགས་སོ། །ཨོྃ་ན་མ་སུ་ཏྲྃ་བྷོ་ག་ག་ན་གུ་མ་ལེ་སྃ་སཱ་ར་ཧཱུྃ་ཕཊ་སྭཱ་ཧཱ། རིག་པ་མཆོག་གི་སྔགས་སོ། །ཨོྃ་བ་ག་ག་བ་སྃ་པོ་པདྨ་དྷ་
ཨ་ཧྱེ་ཧྱི་མ་ཧཱ་ཀཱ་རུ་མ་ད་ཨ་མ་དྷུ་ན་ཛ་ཛ། སྤྱན་དྲང་བའི་སྔགས་སོ། །ཨོྃ་པདྨོ་སྃ་ག་ག་སུ་ར་ཏ་ར་ག་ས་མ་ཡེ་སྟྭྃ། གདན་གྱི་སྔགས་སོ། །ཨོྃ་ཨ་མུ་ཀ་སི་ནམ་སརྦ་བྷྱོ་ག་ག་ཏ་པཱུ་ཙ་མེ་ད་ན་ད་ཧཱུྃ་ཏྲི་སྭཱ་ཧཱ། མཆོད་པའི་སྔགས་སོ། །ཨོྃ་པདྨ་བི་ལོ་ཀུ་མ་ལ་སུ་ནྃ་
ཏུ་ཏྲྃ་སྭཱ་ཧཱ་བ་སྃ་ཧི་ཧི། དགྱེས་པར་བྱ་བའི་སྔགས་སོ། །དེ་ནས་གསང་བའི་བདག་པོ་མཆོག །རྡོ་རྗེ་གསང་བ་རྨད་འབྱུང་བའི། །སྐུ་དང་གསུང་ཐུགས་གསང་སྔགས་ཆེ། །བྱིན་གྱིས་བརླབས་པ་དོན་བཤད་མཛད། །བདེ་བར་གཤེགས་པའི་ཡེ་ཤེས་མཆོག །

དེ་དག་དཀྱིལ་འཁོར་རྣམ་འཕྲུལ་མཆོག །དྲི་མ་མེད་པའི་བྱང་ཆུབ་སེམས། །དེ་ནི་དཀྱིལ་འཁོར་སྙིང་པོ་མཆོག །རྡོ་རྗེ་གསང་བའི་གནས་ཆེན་པོ། །ཐབས་དང་ཤེས་རབ་རོལ་པའི་ཚུལ། །རང་བཞིན་བྱང་ཆུབ་སེམས་ཉིད་ལས། །རང་བཞིན་ལྷུན་གྲུབ་རྫོགས་
ཆེན་པོ། །འགྲོ་བའི་སྣང་བ་དམ་པའི་མཆོག །རང་བཞིན་དག་པ་དྲི་མེད་ཆོས། །དཀྱིལ་འཁོར་གནས་མཆོག་གཉིས་མེད་པའོ། །ཕུང་པོ་ཁམས་སོགས་རྣམ་དག་སྐུ། །ཨེ་མའོ་ཆོས་སྐུ་མྱ་ངན་འདས། །ཨེ་མའོ་ཆོས་རྣམས་ཡེ་ཤེས་སྐུ། །ཨེ་མའོ་ཆོས་ཀུན་རྣམ་པར་འཕྲུལ། །རྒྱ་
ཆེ་སྔགས་ཀྱི་ཚུལ་ལྡན་པའི། །དཀྱིལ་འཁོར་གསང་གསུམ་ངོ་མཚར་ཆེ། །ཐབས་ལྔ་མཛད་པ་སྣ་ཚོགས་ཀྱིས། །སྔོན་དང་ད་ལྟ་འབྲེལ་དོན་འབྱུང་། །ཐབས་མཁས་ཕ་རོལ་ཕྱིན་བཅུ་རྫོགས། །བསོད་ནམས་ཡེ་ཤེས་དག་པའི་ཤུགས། །ས་དང་ས་འདས་དོན་ཆེན་པོ། །
ཏ་ཐཱ་ག་ཏའི་བྱིན་བརླབས་དབྱིངས། །ལ་ལ་སྐུ་དང་གསུང་དང་ཐུགས། །ཟབ་པ་དེ་ཉིད་རང་གི་མཐུས། །གསང་གསུམ་གནས་ལ་ཕྱག་འཚལ་ལོ། །ཡ་མཚན་ཆོས་ལ་ཕྱག་འཚལ་ལོ། །རྣམ་འཕྲུལ་སྐུ་ལ་ཕྱག་འཚལ་ལོ། །བྱང་ཆུབ་སེམས་ལ་ཕྱག་འཚལ་ལོ། །ཞེས་སོ། །
དེ་བཞིན་གཤེགས་པ་ཐམས་ཅད་ཀྱི་དགོངས་པ་བླ་ན་མེད་པའི་གསང་བ་དཔལ་རྟ་མཆོག་རོལ་པའི་རྒྱུད་ལས་དཀྱིལ་འཁོར་རྣམ་པར་འཕྲུལ་པའི་ལེའུ་སྟེ་གསུམ་པའོ།། །།དེ་ནས་འདུས་པའི་འཁོར་ཚོགས་རྣམས། །དགའ་བ་ཆེན་པོ་ངོ་མཚར་གྱིས། །རྒྱུད་གསུམ་རྣམ་
དག་ཚིམ་གྱུར་ནས། །དགྱེས་པའི་དབྱངས་ཀྱིས་གསོལ་བ་བཏབ། །ཨེ་མའོ་ངོ་མཚར་ཡ་མཚན་ཆེ། །གཉིས་མེད་རོལ་པ་ཡ་མཚན་ཆེ། །དྲི་མེད་དག་པ་ཡ་མཚན་ཆེ། །འོད་འཕྲོ་འདུ་བ་ཡ་མཚན་ཆེ། །བྱང་ཆུབ་སྤྲིན་ཕུང་ཡ་མཚན་ཆེ། །སངས་རྒྱས་འབྱུང་བ་ཡ་མཚན་
ཆེ། །འཕྲུལ་པ་འབྱུང་པ་ཡ་མཚན་ཆེ། །ཁྲོ་བོ་འབྱུང་བ་ཡ་མཚན་ཆེ། །བྱིན་བརླབས་ཆོ་འཕྲུལ་ཡ་མཚན་ཆེ། །ཐ་བ་རླན་མཛད་ཡ་མཚན་ཆེ། །འགོག་པ་རླུང་མཛད་ཡ་མཚན་ཆེ། །བདག་ཅག་འཁོར་ཚོགས་འདུས་པ་རྣམས། །དམ་ཚིག་ཅན་དུ་བྱིན་བརླབས་

མཛད། །ཟ་འོག་རིམ་པ་ཅི་བཞིན་དུ། །རྡོ་རྗེ་གསང་བའི་གྲལ་དུ་འགོད། །དེ་ནས་བཅོམ་ལྡན་བདེ་ཆེན་པོས། །ཆགས་པ་ཆེན་པོ་རྡོ་རྗེའི་སྐུ། །སྐུ་དང་གསུང་ཐུགས་གཉིས་མེད་པའི། །འཁོར་རྣམས་རབ་ཏུ་སྦྱང་བའི་ཕྱིར། །རྡོ་རྗེ་རྒྱན་གྱི་ཏིང་འཛིན་གྱིས། །རང་གི་དཀྱིལ་འཁོར་གསལ་
བར་མཛོད། །དེ་ཚེ་བྱང་ཆུབ་སེམས་ཆེན་པོ། །འོད་ཟེར་ཀུན་དུ་ཁྱབ་པ་དེས། །དགའ་བ་ཆེན་པོའི་མཆོད་པ་ཡིས། །གནས་ཀྱི་མཚན་མ་གསལ་བར་མཛོད། །འདུ་ཤེས་མེད་དང་འགོག་གནས་སོགས། །རང་གི་རྟོག་པའི་མཐའ་ཞེས་རྣམས། །དྲི་མ་མེད་པའི་བྱང་ཆུབ་སེམས། །
རིན་ཆེན་ཆུ་དེས་དབང་བསྐུར་ནས། །རང་གི་ཡེ་ཤེས་དབང་ཐོབ་སྟེ། །འགྲོ་བའི་དོན་བྱེད་ནུས་དང་ལྡན། །ལས་ལ་སྤྱོད་པའི་གནས་རྣམས་དང་། །རང་སྐྱོབ་པ་ཡི་སེམས་དག་གིས། །ཐུགས་རྗེ་ཆེན་པོའི་བྱང་ཆུབ་སེམས། །སངས་རྒྱས་བསྟན་པ་འདི་གཉེར་རོ། །བྱང་ཆུབ་
སེམས་ཀྱི་མཚན་མ་ཡིས། །འདུས་པའི་གནས་ལྔ་རིག་པར་བྱ། །ཨོྃ་གུ་ཧྱ་བཛྲ་ས་མ་སྟྭྃ། ཨ་ལ་ལ་ཧོ། །རྡོ་རྗེ་རོ་ལངས་བསྡུས་པ་ཡིས། །གསང་བའི་དམ་ཚིག་ཆེན་པོ་རྣམས། །རིགས་ཀྱི་དགོངས་པ་ཇི་ལྟ་བར། །རྡོ་རྗེ་གསང་བའི་ལས་ལ་གནས། །སྐལ་བཟང་དམ་
ཚིག་ཆེན་པོ་སྟེ། །དེ་ལས་འདས་ན་རླག་པར་འགྱུར། །བཀའ་ཡི་བསྒོ་བའི་དོན་ཆེན་པོས། །འདས་པའི་འཁོར་ཚོགས་བསམ་ཡས་པས། །དམ་ཚིག་ཐོབ་པས་གྲལ་འཁོད་དོ། །དེ་ནས་གསང་བའི་བདག་པོ་ཉིད། །དབང་ཐོབ་ལས་མཛད་ཆེན་པོ་དེས། །བཅོམ་ལྡན་འདས་ལ་
གཙུག་གི་ཕྱག །རྣལ་འབྱོར་ལུགས་སུ་བྱས་ནས་ནི། །ཕྱི་ནང་གསང་བའི་མཆོད་པས་མཆོད། །མཉམ་འགྱུར་གསོལ་བ་རབ་ཏུ་གདབ། །འདི་ལྟར་མ་བྱུང་ངོ་མཚར་ཁྱོད། །སངས་རྒྱས་རྣམས་ཀྱི་དབང་ཕྱུག་ཆེ། །མངོན་སྤྱོད་ཡ་མཚན་སྟོན་པར་སྤྱོད། །བཀའ་ཡི་འཁོར་ལོ་
དམ་པ་ཉིད། །སྨྲ་བསམ་ཡུལ་ལས་རབ་འདས་ཀྱང་། །དཔེས་མཚོན་སྣང་བ་ལ་བརྟེན་ནས། །ཡི་གེ་མིང་ཚོགས་ལ་སོགས་ཀྱིས། །གསལ་བར་མཚོན་ཏེ་གོ་བར་མཛོད། །སྟོན་པ་དབང་ཕྱུག་དམ་པ་དེས། །གསོལ་བ་བཏབ་པའི་དོན་དགོངས་ནས། །བརྗོད་བསམ་འདས་

བའི་ཏིང་འཛིན་ལས། །མཉམ་པར་བཞུགས་ནས་མི་གསུང་བཞུགས། །དེ་ནས་འདུས་པའི་འཁོར་ཚོགས་ཀྱིས། །སྟོབས་མཆོག་སེང་གེ་ཆེན་པོ་ལ། །ལོགས་སུ་བཏུད་དེ་ཕྱག་འཚལ་ནས། །རྨད་འབྱུང་མཆོད་པ་སྣ་ཚོགས་བྱས། །གསོལ་བཏབ་བློ་
མཆོག་སེང་གེ་ཁྱོད། །བདག་ཅག་ཞུ་བའི་གནས