Kinh tạng Tây Tạng (Kangyur Đại Học) — 097_རྙིང་རྒྱུད།_ཀ

ཡུལ་ལྔ་ཁ་དོག་ལྔ། །རིགས་ལྔ་ཡེ་ཤེས་ལྔ་ཉིད་དུ། །དོན་ལྡན་སྐྱེས་བུས་ཤེས་པར་བྱ། །ལུང་དང་ལྡན་པའི་རྣལ་འབྱོར་པས། །གྲུབ་པར་བྱ་བའི་དོན་ཆེན་ཡང་། །སངས་རྒྱས་ལྔ་ལས་གཞན་མི་བསྒྲུབ། །གྲུབ་པར་བྱ་བའི་དམ་ཚིག་སྟེ། །འདི་དག་བསྲུང་
བར་རབ་ཏུ་གཅེས། །དེ་ཡང་ཅི་ཕྱིར་བསྲུང་ཞེ་ན། །འདོད་ཆགས་རང་དང་སྤྱིར་སྣང་བ། །ཆགས་ཤིང་ཞེན་པ་ཐམས་ཅད་ཀུན། །པདྨ་རིགས་ཀྱི་ངོ་བོ་ཡིན། །ཞེ་སྡང་དེ་བཞིན་རྡོ་རྗེའི་རིགས། །གཏི་མུག་སངས་རྒྱས་ཡིན་པར་གསུངས། །ང་རྒྱལ་ཡིད་བཞིན་
ནོར་བུ་སྟེ། །ཕྲག་དོག་ཞེས་བྱ་ལས་སུ་བཤད། །དེ་བས་སྤང་བར་བྱ་བ་མིན། །དྲི་ཆེན་སྣང་མཛད་གཙོ་བོ་ཡིན། །དྲི་ཆུ་གདོན་མི་ཟ་གྲུབ་པ། །རཀྟ་སྣང་བ་མཐའ་ཡས་སྐུ། །མྃ་ས་རིན་ཆེན་འབྱུང་ལྡན་གཙོ། །བྱང་ཆུབ་སེམས་ནི་རྡོ་རྗེ་སེམས། །དེས་ན་དང་དུ་

བླང་བར་གསུངས། །སེམས་ཅན་ཐམས་ཅད་གསད་བྱ་བ། །རྡོ་རྗེ་སེམས་དཔའི་དམ་ཚིག་ཡིན། །བུད་མེད་རྣམས་ལ་ཆགས་བྱ་བ། །སྣང་བ་མཐའ་ཡས་དམ་ཚིག་སྟེ། །གཞན་གྱི་ནོར་འཕྲོག་རྣམ་སྣང་གིས། །རིན་ཆེན་འབྱུང་བའི་བརྫུན་ཕྲ་མ། །
ངག་རྩུབ་གདོན་མི་ཟ་འགྲུབ་པའི། །དམ་ཚིག་ཡིན་པར་རྒྱལ་བས་གསུངས། །དེ་བས་སྤྱད་པར་བྱ་བའོ། །གཟུགས་སུ་སྣང་བ་རྣམ་སྣང་མཛད། །ཚོར་བ་རིན་ཆེན་འབྱུང་ལྡན་གཙོ། །འདུ་ཤེས་སྣང་བ་མཐའ་ཡས་ཏེ། །འདུ་བྱེད་གདོན་མི་ཟ་གྲུབ་
པ། །རྣམ་ཤེས་རྡོ་རྗེ་སེམས་དཔའོ། །ས་ནི་རྡོ་རྗེ་ཞེས་སུ་བཤད། །རིན་ཆེན་ཆུ་སྟེ་པདྨ་མེ། །ཐོགས་མེད་རླུང་གི་རང་བཞིན་ཏེ། །ནམ་མཁའི་ཁམས་ནི་རྣམ་སྣང་མཛད། །མིག་གི་དབང་པོ་རྣམ་སྣང་མཛད། །རྣ་བ་རིན་ཆེན་འབྱུང་བའི་ཚུལ། །སྣང་
བ་མཐའ་ཡས་སྣ་ཞེས་གྲགས། །ལྕེ་ནི་གདོན་མི་ཟ་གྲུབ་པ། །ལུས་ནི་མི་བསྐྱོད་པ་རུ་བཤད། །གཟུགས་ནི་རྣམ་པར་སྣང་མཛད་ཚུལ། །སྒྲ་ནི་རིན་ཆེན་འབྱུང་བ་སྟེ། །དྲི་ནི་སྣང་བ་མཐའ་ཡས་སོ། །རོ་ནི་དོན་ཡོད་གྲུབ་པ་ཡིན། །རེག་རྣམས་མི་
བསྐྱོད་པ་རུ་བཤད། །དེ་བཞིན་དཀར་པོ་རྡོ་རྗེའི་རིགས། །སེར་པོ་བདེར་གཤེགས་རིགས་སུ་བཤད། །མཐིང་ག་རིན་ཆེན་དམར་པོ་ཆོས། །ལྗང་གུ་ལས་ཀྱི་རིགས་སུ་བཤད། །དེ་ཕྱིར་ཤེས་པར་བྱ་བ་ཡི། །དམ་ཚིག་ཡིན་པར་དཔའ་བོས་
གསུངས། །བསྒྲུབ་པར་བྱ་བའི་འབྲས་བུ་ཡང་། །རིགས་ལྔ་ཉིད་དུ་གྲུབ་པས་ན། །དེ་གྲུབ་པ་ཡི་དམ་ཚིག་ཡིན། །དམ་ཚིག་འདི་ནི་རྨད་པོ་ཆེ། །ཡན་ལག་དམ་ཚིག་འདའ་བའོ། །ཞེས་གསུངས་སོ། །ཡན་ལག་གི་དམ་ཚིག་མདོ་རྒྱས་པའོ། །དེ་
ལ་འདི་ནི་དབྱེ་བའོ། །རྩ་བ་ཡན་ལག་དམ་ཚིག་རྣམས། །བསྲུང་བ་རྟོག་པ་གཉིས་སུ་དབྱེ། །དེ་དག་དངོས་སུ་བསྲུང་བས་ན། །མི་འདའ་བསྲུང་བའི་སྡོམ་བཅས་ཡིན། །རྣམ་པར་དག་པའི་ངང་ཉིད་དུ། །དེ་དག་རྟོགས་པས་ཁྱད་པར་དུ། །རྟོགས་པའི་

དམ་ཚིག་ཡིན་པར་གསུངས། །དེ་ལ་འདི་ནི་དམ་ཚིག་ཉམས་པ་ལྟུང་བའི་གནས་སོ། །རྩ་བ་ཉམས་པའི་སྐྱོན་ཆེན་ཡང་། །བསྐལ་པ་གྲངས་མེད་བགྲངས་པར་ཡང་། །དམྱལ་བའི་གནས་སུ་ལྟུང་བར་འགྱུར། །རྡོ་རྗེ་བླ་མའི་སྐུ་སྨད་ན། །
དུས་གསུམ་སངས་རྒྱས་བརྙས་པ་ཡིན། །བྱང་ཆུབ་སེམས་ལ་སྐུར་པས་ན། །དེ་ཡི་སྡིག་པ་བརྗོད་མི་ལང་། །དཔེར་ན་འཇིག་རྟེན་ས་ཡི་རྡུལ། །གྲངས་ཀྱིས་བགྲང་བར་ཤེས་ཀྱང་སྲིད། །རྒྱ་མཚོ་ཆེན་པོའི་ཆུ་ཐིགས་ཀྱང་། །གྲངས་ཀྱིས་བགྲང་ཞིང་ཤེས་སུ་
རུང་། །འདི་ཡི་སྡིག་པ་བརྗོད་མི་ནུས། །ཤིན་ཏུ་མི་བཟད་སྡུག་བསྔལ་ལས། །ཐར་བར་ནམས་ཀྱང་མི་འགྱུར་ཏེ། །སྲིད་གསུམ་སེམས་ཅན་གསད་པས་ནི། །བླ་མའི་བཀའ་བཅག་ཆར་མི་ཕོད། །རྡོ་རྗེ་སྤུན་ལ་སྨད་པ་ནི། །ཉམས་པའི་སྐྱོན་ཡང་བརྗོད་
པར་དཀའ། །བསྐལ་པ་གཅིག་གི་བར་དག་ཏུ། །དམྱལ་བ་ཆེན་པོར་ལྟུང་བར་འགྱུར། །ཚེ་འདིར་བསྒྲུབ་པ་ལོག་པ་དང་། །འབད་པའི་འབྲས་བུ་མེད་པར་འགྱུར། །གསུང་གི་དམ་ཚིག་ཉམས་གྱུར་ན། །དབྱིངས་དང་རྣམ་པར་ཐར་པ་ཡི། །སྒོ་རྣམས་ཉམས་
པར་གྱུར་པས་ན། །བསྒྲུབ་པ་ཐམས་ཅད་ལོག་པར་འགྱུར། །ཡི་དགས་གནས་སུ་ཡུན་རིང་སྟེ། །ལྐུགས་པའི་གནས་སུ་གྱུར་པ་ཡིན། །ཐུགས་ཀྱི་དམ་ཚིག་ཉམས་གྱུར་ན། །ཡི་དགས་ཀྱི་ནི་ལུས་སུ་སྐྱེ། །ཐོང་གཤོལ་འབར་བ་ལྔ་བརྒྱ་ཡིས། །དེ་ཡི་ལྕེ་
ལ་གཤོག་པར་བྱེད། །བསྐལ་པ་དུ་མར་མྱོང་བ་དང་། །དངོས་གྲུབ་འབྲས་བུ་མེད་པར་འགྱུར། །མདོར་ན་རྩ་བ་ཉམས་གྱུར་ན། །འབྲས་བུ་མེད་ཅིང་ངན་སོང་ལྟུང་། །རྡོ་རྗེ་སེམས་དཔའ་བདག་ཉིད་ཀྱང་། །དེ་ཡི་སྙིང་ཁྲག་འཐུང་བར་ངེས། །མི་སྤོང་དམ་ཚིག་
ཉམས་གྱུར་ན། །དངོས་གྲུབ་ཐམས་ཅད་སྤངས་པར་འགྱུར། །མི་དོར་དམ་ཚིག་ཉམས་གྱུར་ན། །དངོས་གྲུབ་འབྲས་བུ་མི་འཐོབ་ཅིང་། །ཡི་དགས་སྤྲེའུའི་གནས་སུ་སྐྱེ། །སྤྱད་པའི་དམ་ཚིག་ཉམས་གྱུར་ན། །འདུ་ཤེས་མེད་པའི་འགོག་པར་ལྟུང་། །ཤེས་

པའི་དམ་ཚིག་ཉམས་གྱུར་ན། །འདུ་ཤེས་མེད་པའི་ཁྲོས་པས་ལྟུང་། །གྲུབ་པའི་དམ་ཚིག་ཉམས་གྱུར་ན། །བདུད་ཀྱི་ཁམས་སུ་ལྟུང་བར་འགྱུར། །རྟོགས་པའི་དམ་ཚིག་ཉམས་གྱུར་ན། །རུ་ཏྲ་ཆེན་པོའི་གནས་སུ་ལྟུང་། །དེ་ལ་སོགས་ཏེ་བསམ་མི་
ཁྱབ། །ཅེས་གསུངས་སོ། །དེ་ལ་འདི་ནི་ཉམས་པ་བསྐང་བའི་ཚད་དོ། །དམ་ཚིག་ཉམས་པར་གྱུར་པ་ན། །མགོན་བཙུན་མཉམ་པའི་དོན་རྟོགས་ན། །དེ་ཉིད་སྐོངས་པའི་གནས་སུ་འགྱུར། །བླ་མ་སྤུན་ལ་སྨད་གྱུར་ན། །ཚེ་འདི་ཉིད་ལ་མཉེས་བྱས་ཏེ། །མཐོལ་
བཤགས་དྲག་པོས་འགྱོད་བྱས་ན། །དེ་ནི་སྐོངས་པའི་ལས་སུ་འགྱུར། །གལ་ཏེ་བདག་གམ་བླ་མ་སྤུན། །མ་བསྐངས་བར་དུ་ཚེ་འཕོས་ན། །དེ་ནི་བསྐང་བའི་ཚད་ལས་འདས། །གསུང་གི་ཐ་ཚིག་རལ་གྱུར་ན། །རྡོ་རྗེ་ཆོས་སུ་བདག་བསྒོམས་ལ། །ཐ་ཚིག་
གང་བརླག་འབུམ་འབུམ་གདོན། །ཐུགས་ཀྱི་ཐ་ཚིག་རལ་གྱུར་ན། །རྡོ་རྗེ་སེམས་དཔར་བསྒོམས་པ་ལ། །ལོ་གསུམ་བར་དུ་མི་སྨྲ་བར། །བསམ་གཏན་སྦྱོར་བར་རབ་ཏུ་བྱ། །ཡན་ལག་དམ་ཚིག་ཉམས་གྱུར་ན། །སོ་སོའི་རིགས་ཀྱིས་དེ་བཞིན་བསྐོང་། །
ཞེས་གསུངས་སོ། །དེ་སྐད་ཅེས་གསུངས་པས་འདུས་པའི་འཁོར་ཚོགས་རྣམས་ཀྱིས་གསང་སྔགས་ཀྱི་དམ་ཚིག་ནི། རང་རང་གི་སྙིང་ལ་གནས་པར་མཐོང་ནས། ཨ་ལ་ལ་ཞེས་པའི་སྒྲ་ཕྱུང་ནས་རང་རང་གི་དམ་ཚིག་ལ་དམིགས་སོ། །འཕགས་པ་རྒྱུད་ཀྱི་
རྒྱལ་པོ་ཡེ་ཤེས་རྔམ་པ་གློག་གི་འཁོར་ལོའི་མདོ་ཞེས་བྱ་བ་ལས་དམ་ཚིག་རྣམ་པར་བཀོད་པའི་ལེའུ་སྟེ་བཅུ་གསུམ་པའོ།། །།དེ་ནས་བཅོམ་ལྡན་འདས་གསང་བ་མཆོག་གི་བདག་པོས་བརྟུལ་ཞུགས་རྣམ་པར་རོལ་པ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་སོ། །ཞུགས་ནས་ཀྱང་གསང་སྔགས་ཐམས་ཅད་ཀྱི་བརྟུལ་ཞུགས་རྣམ་པར་རོལ་པ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །གསང་སྔགས་རྒྱ་མཚོ་ཆེན་པོ་ཡི། །བརྟུལ་ཞུགས་ངོ་མཚར་རྨད་བྱུང་བ། །ཆོས་ཀུན་རོལ་པར་

སྣང་བའི་ཕྱིར། །ཇི་ལྟར་སྤྱད་ཀྱང་བརྟུལ་ཞུགས་ཏེ། །དཀའ་ཐུབ་དཀའ་བ་སྤྱད་མི་དགོས། །དཀའ་ཐུབ་སྡོམ་ལ་རྟེན་པའི་མིས། །བསྒྲུབས་ཀྱང་འགྲུབ་པར་མི་འགྱུར་ཏེ། །དཀའ་ཐུབ་སྡོམ་ལ་མི་གནས་ཤིང་། །འདོད་པའི་ལོངས་
སྤྱོད་རབ་བསྟེན་པས། །བསྒྲུབས་ན་མྱུར་དུ་འགྲུབ་པར་འགྱུར། །རིགས་ངན་དང་ནི་སྨེ་ཤ་ཅན། །རྟག་ཏུ་གསོད་ལ་བརྩོན་པ་དང་། །མ་བྱིན་ལེན་དང་མི་ཚངས་སྤྱོད། །བརྫུན་དུ་སྨྲ་ལ་དགའ་བ་དང་། །རྩུབ་པའི་ངག་ལ་དགའ་བ་ནི། །གསང་སྔགས་
བསྒྲུབ་པའི་སྣོད་དུ་འགྱུར། །ཕ་དང་ཁུ་བོ་མེས་པོ་ལ། །ཞེ་སྡང་སེམས་ཀྱིས་བསྒྲལ་བྱས་ན། །རྡོ་རྗེ་སེམས་དཔའི་དངོས་གྲུབ་ཐོབ། །མ་དང་བུ་མོ་སྲིང་མོ་ལ། །འདོད་ཆགས་སེམས་ཀྱིས་སྦྱར་བྱས་ན། །ཆགས་པ་ཆེན་པོའི་དངོས་གྲུབ་ཐོབ། །སྙིང་རྗེ་མེད་པར་
གསོད་པ་དང་། །འཇིགས་པ་མེད་པར་སྦྱོར་བ་ལ། །བཤང་གཅི་ཟས་སུ་ཟ་བ་དང་། །རང་གི་ཁུ་བས་མཆོད་པ་དང་། །དུར་ཁྲོད་རྒྱན་ལ་དགའ་བ་ནི། །ཐེག་མཆོག་འདི་ལ་འགྲུབ་པར་འགྱུར། །བསོད་སྙོམས་ཟས་ལ་མི་ཆགས་ཤིང་། །མ་བསླངས་པ་ལའང་
ཆགས་མི་བྱ། །ནགས་ཚལ་དགོན་པའི་ས་ཕྱོགས་སུ། །བསོད་སྙོམས་བླངས་ཏེ་བཟའ་བར་བྱ། །སེམས་ཀྱི་བརྟུལ་ཞུགས་ཆེན་པོ་ཡིས། །ཏིང་འཛིན་སྟོབས་དང་ལྡན་པར་བྱ། །ལུས་ཀྱི་བརྟུལ་ཞུགས་ཆེན་པོ་ཡིས། །ཐོགས་མེད་སྟང་ཐབས་ཚུལ་དུ་གནས། །
ངག་གི་བརྟུལ་ཞུགས་ཆེན་པོ་ཡིས། །སྔགས་ཀྱི་ཡི་གེ་དྲག་ཏུ་བརྗོད། །དབེན་པའི་ཕྱོགས་སུ་གནས་བཅས་ལ། །གཡང་གཞི་གོས་སུ་གྱོན་ནས་ནི། །ཆེ་བའི་ང་རྒྱལ་རྟག་ཏུ་བསྐྱེད། །ཝ་ཡི་བརྟུལ་ཞུགས་ཆེན་པོ་ཡིས། །སྤང་བར་བྱ་བའི་ཐབས་སུ་སྤྱད། །
ཅང་ཤེས་བརྟུལ་ཞུགས་ཆེན་པོ་ཡིས། །ཤེས་བྱ་ཀུན་ལ་འཇུག་པར་བྱ། །ལུས་ཀྱི་རྩལ་གྱི་བྱ་བ་དག །གྱི་ལིང་བརྟུལ་ཞུགས་ཆེན་པོས་བྱ། །ཕག་གི་བརྟུལ་ཞུགས་ཆེན་པོ་ཡིས། །གཙང་སྨེ་མེད་པར་ཀུན་ལ་སྤྱད། །གླང་ཆེན་མྱོས་པའི་བརྟུལ་ཞུགས་

ཀྱིས། །མི་འབྱེད་རྨོངས་ཚུལ་བསྟན་པར་བྱ། །སྟག་མཆོག་རྔམ་པའི་བརྟུལ་ཞུགས་ཀྱིས། །དཔའ་བརྟུལ་གཏུམ་པའི་ལས་ཆེན་བྱ། །ཁྱུང་ཆེན་མཁའ་ལྡིང་བརྟུལ་ཞུགས་ཀྱིས། །ལྟ་བ་སྤྱི་རྒྱ་རླབས་ཀྱིས་གཅད། །གཏུམ་ཐུང་དོམ་གྱི་བརྟུལ་ཞུགས་ཀྱིས། །
རེ་བ་མེད་པའི་ལས་ཆེན་བྱ། །རྒྱ་མཚོ་གཏེར་གྱི་བརྟུལ་ཞུགས་ཀྱིས། །ཡིད་ཐུབ་མི་ལྡོག་བརྟན་པར་བྱ། །ལྐུགས་པ་ལུག་གི་བརྟུལ་ཞུགས་ཀྱིས། །གཏི་མུག་བཞིན་དུ་ཤེས་རབ་ལྡན། །རི་བོ་ལྟ་བུའི་བརྟུལ་ཞུགས་ཀྱིས། །མི་འགྱུར་རབ་ཏུ་བརྟན་པར་
བྱ། །ནམ་མཁའ་ལྟ་བུའི་བརྟུལ་ཞུགས་ཀྱིས། །ཡངས་དོག་ཀུན་དང་བྲལ་བར་བྱ། །གནམ་ལྕགས་ལྟ་བུའི་བརྟུལ་ཞུགས་ཀྱིས། །དྲག་ཤུལ་ལས་ལ་སྦྱར་བར་བྱ། །ལག་ན་རྡོ་རྗེའི་བརྟུལ་ཞུགས་ཀྱིས། །མཐུ་སྟོབས་དག་ལ་སྤྱད་པར་བྱ། །ཁ་དོག་
བརྟུལ་ཞུགས་ཆེན་པོ་ཡིས། །ཟོན་བག་ཁུ་འཕྲིག་སྤྱད་པར་བྱ། །གླང་ཆེན་ཆུར་འཇུག་བརྟུལ་ཞུགས་ཀྱིས། །ངེས་པའི་ང་རྒྱལ་སྤྱད་པར་བྱ། །རི་དགས་སེང་གེའི་བརྟུལ་ཞུགས་ཀྱིས། །གྲོགས་ངན་ལ་སོགས་སྤང་བར་བྱ། །རེག་འཇམ་བྱ་ཡི་བརྟུལ་
ཞུགས་ཀྱིས། །འགྲོགས་ན་བདེ་ཞིང་ཆགས་པར་བྱ། །སྒྱུ་མ་རྒྱ་ཡི་བརྟུལ་ཞུགས་ཀྱིས། །ཐབས་ལ་མཁས་པའི་ལས་ཆེན་བྱ། །ཅེ་སྤྱང་ཁྲ་ཡི་བརྟུལ་ཞུགས་ཀྱིས། །གཙང་སྨེ་མེད་པར་སྤྱད་པ་དང་། །ཐོགས་མེད་གསོད་ལ་བརྩོན་པར་བྱ། །ང་རྒྱལ་
སྟག་མཆོག་བརྟུལ་ཞུགས་ཀྱིས། །ཆེ་བའི་ང་རྒྱལ་བསྐྱེད་པར་བྱ། །མཁའ་ལྡིང་ལྟ་བུའི་བརྟུལ་ཞུགས་ཀྱིས། །ཀུན་དུ་མཛེས་པའི་སྤྱོད་པ་སྤྱད། །རྒྱལ་པོ་འཁོར་སྐྱོང་བརྟུལ་ཞུགས་ཀྱིས། །ས་ཐུབ་འཁོར་དང་ལྡན་པར་བྱ། །བཅུ་གཉིས་དང་ནི་གསུམ་དག་
གི། །བརྟུལ་ཞུགས་བློ་དང་ལྡན་པར་བྱ། །དེ་ལ་སོགས་ཏེ་བསམ་མི་ཁྱབ། །ཅེས་གསུངས་སོ། །འཕགས་པ་རྒྱུད་ཀྱི་རྒྱལ་པོ་ཡེ་ཤེས་རྔམ་པ་གློག་གི་འཁོར་ལོའི་མདོ་ཞེས་བྱ་བ་ལས་རྣལ་འབྱོར་གྱི་རིག་པའི་བརྟུལ་ཞུགས་ཀྱི་ལེའུ་སྟེ་བཅུ་བཞི་པའོ།། །།

དེ་ནས་བཅོམ་ལྡན་འདས་གསང་བ་མཆོག་གི་བདག་པོ་ཆན་པོས་ཕྲིན་ལས་རྒྱ་མཚོ་ལྷུན་གྱིས་གྲུབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །ཞུགས་ནས་ཡང་འདུས་པའི་འཁོར་རྣམས་ལ་འདི་སྐད་ཅེས་གསུངས་སོ། །འདུས་
པའི་འཁོར་རྣམས་ཉོན་ཅིག །བཙལ་མེད་ལྷུན་གྲུབ་དཀྱིལ་འཁོར་ལས། །ཕྲིན་ལས་རྒྱ་མཚོ་བསམ་ཡས་ཀྱང་། །རྣལ་འབྱོར་དགོས་པའི་དབང་དག་ཏུ། །ལས་བཞི་དག་ཏུ་རྒྱལ་བས་གསུངས། །དང་པོས་ཞི་བའི་ལྷ་ཡིན་ཏེ། །གཉིས་པ་རྒྱས་པ་ཞེས་
སུ་བྱ། །གསུམ་པ་དབང་དུ་སྡུད་པའི་ལས། །བཞི་པ་དྲག་པོའི་ལས་སུ་གསུངས། །དེ་དག་ལྷ་ཡི་དཀྱིལ་འཁོར་དང་། །གནས་དང་དུས་དང་རྫས་རྣམས་དང་། །དབྱིབས་དང་ཁ་དོག་མཎྜལ་དང་། །ཡུལ་དང་ཏིང་ངེ་འཛིན་དག་དང་། །ཕྱོགས་དང་སྟན་དང་
འདུག་སྟངས་དང་། །ཐོ་བ་ཕུར་པ་གཏོར་མ་དང་། །བཟླས་བརྗོད་ཧོམ་དང་བསྐུལ་ཚིག་དང་། །འཁོར་ལོ་མེ་ལྷའི་མཚན་ཉིད་དང་། །ཡུལ་དང་གྲུབ་པའི་འབྲས་བུ་སྟེ། །བཅུ་གཉིས་དང་ནི་གཉིས་དག་གིས། །བྱ་བ་ཐམས་ཅད་རྫོགས་པར་གསུངས། །ཡ་
ནི་ཞི་བའི་མཚན་ཉིད་དེ། །མ་ཞེས་བྱ་བ་རྒྱས་པ་ཡིན། །དབང་དུ་སྡུད་པ་བྃ་དུ་བཤད། །ཨེ་ཉིད་དྲག་པོའི་མཚན་ཉིད་དོ། །ལྷ་ཡི་རྣལ་འབྱོར་རིམ་པ་ཡང་། །རྡོ་རྗེ་སེམས་དཔའ་ཞི་དྲག་བྱ། །རྣམ་སྣང་མཛད་དང་རིན་ཆེན་འཛིན། །རྒྱས་པའི་ལས་ནི་
བྱེད་པར་འགྱུར། །སྣང་བ་མཐའ་ཡས་རྒྱས་པ་དང་། །དབང་གི་ལས་ནི་བྱེད་པར་འགྱུར། །གདོན་མི་ཟ་བས་ལས་ཀུན་བྱེད། །ཡང་ན་དྲག་པོ་ཉིད་ལའོ། །ཀུན་དུ་བཟང་པོས་ཅི་ཡང་བྱེད། །སྤྱན་ནི་ཞི་བའི་མཆོག་ཡིན་ཏེ། །བསྲུང་བ་མཱ་མ་ཀཱི་ཡིས་བྱེད། །གོས་
དཀར་ཅན་གྱིས་དབང་དུ་བྱེད། །སྒྲོལ་མ་ལས་རྣམས་ཀུན་ལ་སྦྱར། །ས་ཡི་སྙིང་པོས་རྒྱས་པར་བྱེད། །ནམ་མཁའི་སྙིང་པོས་འཕེལ་བར་བྱེད། །ལག་ན་རྡོ་རྗེས་དྲག་པོ་བྱེད། །སྤྱན་རས་གཟིགས་ཀྱིས་སྙིང་བརྩེ་བར། །ཡིད་ཀྱིས་ཡིད་དུ་འོང་བར་བྱེད། །

བྱམས་པས་ཆོས་ཀྱི་འཁོར་ལོ་བསྐོར། །སྒྲིབ་པ་སེལ་བས་རྣམ་དག་བྱེད། །ཀུན་དུ་བཟང་པོས་ནོར་སྒྲུབ་བྱེད། །འཇམ་དཔལ་ཤེས་རབ་རྣོ་བར་བྱེད། །སྒེག་མོས་སངས་རྒྱས་མཚན་རྣམས་འགྲུབ། །ཕྲེང་བས་རྒྱན་དང་ལྡན་པ་དང་། །སངས་རྒྱས་ཡུལ་དུ་
ཕྱིན་པར་བྱེད། །གླུ་ཡིས་དབྱངས་སྙན་གྲུབ་པར་བྱེད། །རིག་མ་དག་དང་ལྷན་ཅིག་རྩེན། །གར་གྱིས་ཕྱག་རྒྱ་གར་མཆོག་དང་། །སངས་རྒྱས་རྣམས་དང་ལྷན་ཅིག་འགྲོགས། །བདུག་པས་ཡིད་འོང་དངོས་གྲུབ་ཐོབ། །མེ་ཏོག་རབ་དགྱེས་མཛེས་པར་བྱེད། །
དཱི་བས་འོད་གསལ་མདངས་དང་ལྡན། །དྲི་ཡིས་དྲི་ང་དག་པར་བྱེད། །ལྕགས་ཀྱུ་ཡིས་ནི་སྤྱན་དྲང་དང་། །རྡོ་རྗེས་དགུག་པའི་ལས་རྣམས་བྱེད། །ཞགས་པས་འདྲེན་ཅིང་འཆིང་བར་བྱེད། །སྒྲོག་གིས་དབང་དུ་བྱེད་ཅིང་སྡོམ། །དྲིལ་བུས་དགྱེས་སྒྲོལ་དབབ་པར་བྱེད། །
བྱེད་པ་པོ་དང་བྱ་བ་མོས། །ཐམས་ཅད་ཐམས་ཅད་ཀུན་ལ་སྦྱོར། །རྡུལ་སྙེད་དབང་པོ་དྲུག་རྣམས་ཀྱིས། །ཅིས་འདུལ་ཐབས་ཀྱིས་སྣ་ཚོགས་བྱེད། །ཁྲག་འཐུང་ཆེན་པོས་གཏི་མུག་འཇོམས། །ཁྲག་འཐུང་རྡོ་རྗེས་ཞེ་སྡང་འཇོམས། །རིན་ཆེན་ཧེ་རུས་ང་
རྒྱལ་འཇོམས། །པདྨ་ཧེ་རུས་འདོད་ཆགས་འཇོམས། །ལས་ཀྱི་ཧེ་རུས་ཕྲག་དོག་འཇོམས། །ཁྲག་འཐུང་ཆེན་པོས་ཐིམ་པར་བྱེད། །བཛྲ་ཀྲོ་དྷིས་འཁྱུད་པར་བྱེད། །རཏྣ་ཀྲོ་དྷིས་སྦྱོར་བར་བྱེད། །པདྨ་ཀྲོ་དྷིས་སྐྱོད་པར་བྱེད། །ཀརྨ་ཀྲོ་དྷིས་འབེབས་
པར་བྱེད། །དཀར་མོའི་ཚོགས་ཀྱིས་འགུགས་པར་བྱེད། །རྐུན་མོའི་ཚོགས་ཀྱིས་མཐུ་འཕྲོག་བྱེད། །རྨོངས་མའི་ཚོགས་ཀྱིས་མྱོས་པར་བྱེད། །ཐལ་བྱེད་མས་ནི་ཐལ་བར་རློག །སྦོས་མོའི་ཚོགས་ཀྱིས་དབང་དུ་བྱེད། །གཏུམ་མོས་སྒྲོལ་ཞིང་མྱོས་
པར་བྱེད། །སྨེ་ཤ་ཅན་གྱིས་ཟ་བར་བྱེད། །མ་ཚོགས་མས་ནི་རྒྱུད་འཕེལ་བྱེད། །སེང་གདོང་ཚོགས་ཀྱིས་ཟིལ་གྱིས་གནོན། །སྟག་གདོང་ཚོགས་ཀྱིས་འཇོམས་པར་བྱེད། །ཝ་གདོང་ཚོགས་ཀྱིས་རོལ་པར་བྱེད། །ཁྱི་གདོང་ཚོགས་ཀྱིས་གསོད་ཅིང་

ཟ། །རྒོད་གདོང་ཚོགས་ཀྱིས་རྒྱུག་པར་བྱེད། །དུར་བྱས་རྣམ་པར་འདྲེན་པར་བྱེད། །བྱ་རོག་ཚོགས་ཀྱིས་དབང་དུ་འདུ། །འུག་གདོང་ཚོགས་ཀྱིས་འདྲེན་ཅིང་ལྟ། །གཤེད་པོས་འགུགས་ཤིང་སྒྲོལ་བར་བྱེད། །བདུད་རྩི་འཁྱིལ་པས་
སྐྲོད་པར་བྱེད། །གཞན་གྱིས་མི་ཐུབ་མངག་གཞུག་བྱེད། །རྟ་ཡིས་དུག་རྣམས་འཇོམས་པར་བྱེད། །དབྱུག་སྔོན་ཅན་གྱིས་གསོད་པར་བྱེད། །སྟོབས་ཆེན་ཆར་འབེབས་བྱེད་པའི་མཆོག །མི་གཡོ་བས་ནི་སྐྲག་ཅིང་འཁྲུག །རྡོ་རྗེ་ཧཱུྃ་གིས་
འཆིང་བར་བྱེད། །རྣམ་པར་རྒྱལ་བས་གནོན་པར་བྱེད། །ཁམས་གསུམ་བདག་པོས་འཇོམས་པར་བྱེད། །ཕྲ་མེན་ཚོགས་རྣམས་མང་པོ་ཀུན། །མངག་གཞུག་ཕོ་ཉའི་ལས་རྣམས་བྱེད། །སླས་དང་བྱི་མོའི་ཚོགས་རྣམས་ཀྱིས། །ཐམས་ཅད་
ཐམས་ཅད་བྱེད་པར་འགྱུར། །མདོར་ན་ལྷ་ཡི་རྣལ་འབྱོར་ནི། །ཅིས་འདུལ་ཐབས་ཀྱིས་དེ་ལྟར་རོ། །ཡིད་འོང་བཀྲ་ཤིས་དབེན་པ་རུ། །རྡོ་རྗེ་ཞི་བ་སྒྲུབ་པར་ཤིས། །མེ་ཏོག་ནགས་ཚལ་སྐྱེད་མོས་ཚལ། །ཉམས་དགའ་བར་ནི་རྒྱས་པར་ཤིས། །ཁ་
དོག་དམར་ཞིང་གཅོང་རོང་མང་། །རི་བོར་གནས་སུ་དབང་དུ་བྱ། །སུམ་མདོ་གྲོག་གླེ་རྐང་གཅིག་དྲུང་། །རྩུབ་པའི་གནས་སུ་དྲག་པོ་བྱ། །སྔ་དྲོ་ཞི་བ་གུང་ལ་རྒྱས། །སྲོད་ལ་དབང་བྱ་གུང་ལ་ནི། །དྲག་པོའི་ལས་རྣམས་བརྩམ་པར་བྱ། །རྫས་དང་བསྲེག་བྱའི་རྫས་
རྣམས་ཀྱང་། །དཀར་ཞིང་དམར་བའི་རྫས་རྣམས་དང་། །ཞོ་དང་ལྡན་པའི་ཞིང་དག་ག །རྩེ་མོ་ལས་བྱས་ཞི་བའི་རྫས། །སེར་ཞིང་ཁ་བའི་རོར་ལྡན་པའི། །བར་གྱི་ཤིང་ལས་བྱས་པ་ཀུན། །རྒྱས་པའི་ལས་སུ་བསྔགས་པ་ཡིན། །སྐྱུར་ཞིང་ཁ་དོག་དམར་
བ་དང་། །དྲུངས་པ་ལས་བྱས་ཤིང་གི་རྣམས། །དབང་གི་རྫས་སུ་རབ་ཏུ་གྲགས། །གནག་ཅིང་རྩུབ་པ་ཚ་བ་ཡི། །རོར་ལྡན་རྩ་བའི་ཤིང་ལས་བྱས། །རྡོ་རྗེ་དྲག་པོ་ཉིད་ལའོ། །ཟླུམ་པོ་དང་ནི་འཁོར་ལོ་དག །ཞི་བ་ཡི་ནི་ལས་སུ་གསུངས། །ཟུར་བཞི་ཟུར་

དྲུག་ཟུར་བརྒྱ་དམ། །པདྨ་འམ་རིན་ཆེན་དབྱིབས་འདྲ་བ། །རྒྱས་པའི་ལས་ལ་ཤིས་པའོ། །ཟླ་བ་ཁམ་དང་གཞུ་ཡི་དབྱིབས། །པདྨོ་སྨྱུང་པོའམ་མཁའ་འདྲ་བ། །དབང་དུ་བྱ་བའི་ལས་ཡིན་ནོ། །གྲུ་གསུམ་མམ་ནི་གྲུ་ཆད་དམ། །རྡོ་རྗེའི་དབྱིབས་དང་མདའ་
འདྲ་བར། །བྱས་པ་རྡོ་རྗེ་དྲག་པོ་ལའོ། །དཀར་པོ་ཞི་བ་སེར་པོ་རྒྱས། །དམར་པོ་དབང་ལ་ནག་པོ་དྲག །ལྗང་གུ་སྤྱི་ཡི་ལས་སུ་གསུངས། །སེར་སྐྱ་ཞི་རྒྱས་ལས་ཡིན་ཏེ། །དམར་སྐྱ་ཞི་བ་དབང་གི་ལས། །སྔོ་སྐྱ་ཞི་བ་དྲག་པོའི་ལས། །རྒྱས་དང་དབང་དང་དྲག་
པོ་ལའང་། །ཞི་བའི་ཚུལ་དུ་སྦྱར་བར་བྱ། །དེས་ན་ལས་རྣམས་རེ་རེ་ལའང་། །བཞི་བཞི་དག་ཏུ་རྒྱལ་བས་གསུངས། །ཟླུམ་པོའི་ཐབ་ཁུང་རྡོ་རྗེ་ཡིས། །བརྒྱན་པ་ཞི་བའི་དཀྱིལ་འཁོར་ཡིན། །པདྨ་གྲུ་བཞི་རིན་པོ་ཆེས། །བརྒྱན་པ་རྒྱས་པའི་ལས་སུ་ཤིས། །
ཟླ་གམ་ཁུང་བུ་མདའ་གཞུས་བརྒྱན། །དབང་དུ་བསྡུ་བའི་དཀྱིལ་འཁོར་ཡིན། །གྲུ་གསུམ་རྩང་ཐོད་ཀྱིས་བརྒྱན་པ། །དྲག་པོ་སྤྱོད་པའི་དཀྱིལ་འཁོར་ཡིན། །ལྗོན་པ་མ་དང་ལྕུག་ཕྲན་མ། །སྡོད་ཅིག་མ་དང་མེ་རེག་མ། །སྤྱན་དང་མཱ་མ་གོས་དཀར་སྒྲོལ། །བྱིན་
གྱིས་བརླབ་པའི་གནས་བྱས་ཏེ། །དད་བྱམས་སྙིང་རྗེ་དང་བ་དང་། །དགའ་ཆགས་བཏང་སྙོམས་ཁྲོས་པ་ཡི། །ཏིང་འཛིན་དག་གིས་ཞི་དང་རྒྱས། །དབང་དྲག་སོ་སོའི་འཕྲོ་འདུ་བྱ། །བྱང་དུ་བལྟས་ཏེ་ཞི་བ་བྱ། །རྒྱས་པའི་ཚེ་ན་ཤར་དུ་བལྟ། །དབང་ལ་ནུབ་ཏུ་
དྲག་པོ་ལྷོ། །ཞི་བ་ཀུ་ཤའི་ཁྲི་སྟེངས་སུ། །རྫོགས་པའི་སྐྱིལ་མོ་ཀྲུང་དུ་གནས། །པདྨའི་སྟེང་དུ་སེམས་དཔའ་ཡི། །སྐྱིལ་མོ་ཀྲུང་གིས་རྒྱས་པར་བྱ། །ཁྲི་སྟེང་དག་ཏུ་ཕྱེད་སྐྱིལ་གྱིས། །དབང་དུ་བསྡུ་བའི་ལས་བྱའོ། །ས་གཞི་གྲུ་གསུམ་ཉིད་ལ་ནི། །རུས་
སྦལ་གྱི་ནི་རྒྱས་བཏབ་ཀྱིས། །མངོན་པར་སྤྱོད་པ་བརྩོན་པར་བྱ། །ཟླུམ་པོ་གྲུ་བཞི་ཟླ་གམ་དང་། །ཟུར་གསུམ་ཐོ་བའི་གཏུན་ཚོགས་ཀྱིས། །ལས་བཞི་ཡུམ་གྱི་གཏུན་ཁུང་དུ། །གཏི་མུག་ང་རྒྱལ་འདོད་ཆགས་དང་། །ཞེ་སྡང་མཚན་མ་རྡུལ་དུ་བརྡུང་། །

གསེར་དངུལ་ཟངས་དང་ལྕགས་དག་གམ། །ཞོ་ཅན་སེར་སྐྱུར་རྩུབ་ཤིང་ལ། །རི་རབ་ཚུལ་དུ་རབ་བརྗིད་པའི། །ཕུར་པ་ལས་རྣམས་སོ་སོ་ཡི། །ལྷ་ཡི་དཀྱིལ་འཁོར་བསྒོམས་པ་ལ། །རྩེ་མོ་ཡྃ་བྃ་ཨེ་ཡི་དབྱིབས། །མཚན་མ་མིང་དུ་
བཅས་པ་ལ། །བཏབ་ན་ཞི་རྒྱས་དབང་དྲག་འགྱུར། །དངུལ་ཕྱེ་འབྲས་ཆན་དཀར་པོ་ལ། །ཞི་བར་འགྱུར་བའི་གཏོར་མར་སྦྱར། །གསེར་ཕྱེ་འབྲུ་ཆན་སེར་པོ་ལ། །རྒྱས་པར་འགྱུར་བའི་གཏོར་མ་སྦྱར། །དབང་ལ་ཟངས་ཕྱེ་འབྲུ་དམར་ཆ་ན། །དྲག་པོའི་ལྕགས་ཕྱེ་
ཤ་ཁྲག་ལའོ། །ཤཱན་ཏིང་པུཥྚིང་བ་ཤང་དང་། །མཱ་ར་ཡ་ཡི་སྔགས་ཚིག་ལ། །སྭཱ་ཧཱ་སྭཱ་ཧཱ་ཧཱུྃ་ཕཊ་ཀྱིས། །བརྒྱན་པའི་མགོ་ལ་ཨོྃ་བཞག་པ། །བཟླས་པའི་སྔགས་སུ་ཤེས་པར་བྱ། །ཧོམ་ཁུང་ཟླུམ་པོ་གྲུ་བཞི་དང་། །ཟླ་གམ་གྲུ་གསུམ་གདེངས་པ་རུ། །རྡོ་རྗེ་
རིན་ཆེན་མདའ་གཞུ་དང་། །རྡོ་རྗེ་རྩེ་དགུའི་ཕྱག་རྒྱ་གཞག །ཞོ་ཅན་སེར་སྐྱུར་རྩུབ་པ་ཡི། །ཡམ་ཤིང་དག་ལ་མེ་སྦར་ཏེ། །ལྷན་ནེ་གཟི་བྱིན་ལྷུན་ཆེན་དང་། །གཏུམ་ཆེན་རྔམ་པའི་ལྷ་ཚོགས་ལ། །ལས་བཞིའི་ཚུལ་དུ་བསྲེགས་ན་འགྲུབ། །སྔགས་དང་འདོད་
པའི་མིང་སྤེལ་ཏེ། །བསྐུལ་པ་བྱ་བའི་ཚིག་ཏུ་བཤད། །རས་སམ་གྲོ་ག་ཤིང་ཤུན་ལ། །ཞི་རྒྱས་འཁོར་ལོའི་སྔགས་བཅས་བྲི། །ལྕགས་གསུམ་ག་པུར་བཅུག་ནས་ནི། །མཆོད་ཅིང་བསྐུལ་ན་གདོན་མི་ཟ། །ཞིང་ཆེན་རས་སམ་སྨད་དཀྲིས་ལ། །དབང་དྲག་
འཁོར་ལོའི་སྔགས་བཅས་བྲི། །ཁམ་ཕོར་ནང་ངམ་ཐོད་པར་གཞུག །དུར་ཁྲོད་གནས་ལ་སོགས་པ་རུ། །བསྐུལ་ཞིང་མནན་པ་བྱས་ན་ནི། །གདོན་མི་ཟ་བར་མནན་པར་འགྱུར། །ལས་བཞིའི་མེ་ལྷའི་མཚན་ཉིད་ནི། །མེ་ཡི་ལྷ་ནི་སྣང་མཐའ་ཡས། །
མེ་ཡི་ལྷ་མོ་གོས་དཀར་མོ། །ཐབས་དང་ཤེས་རབ་འབྲེལ་བས་ནི། །གང་འདོད་ལས་དེ་བྱེད་པར་འགྱུར། །གདུག་རྩུབ་རྣམས་ལ་ཞི་བ་སྦྱར། །དབུལ་ཕོངས་རྣམས་ལ་རྒྱས་པ་སྦྱར། །དབང་ནི་འདོད་གཟིར་རྣམས་ལ་སྟེ། །ཞེ་སྡང་ཅན་ལ་དྲག་པོའི་ལས། །ཐམས་

ཅད་ཞི་བར་འགྱུར་བ་དང་། །ཡིད་བཞིན་ནམ་མཁའ་འགེངས་པ་དང་། །དགུག་ཅིང་ཕྱི་བཞིན་འབྲེང་བ་དང་། །མྱོས་ནས་གས་ཏེ་འཚིག་པ་ནི། །ལས་བཞིའི་འབྲས་བུར་རྒྱལ་བས་གསུངས། །འཕགས་པ་རྒྱུད་ཀྱི་རྒྱལ་པོ་ཡེ་ཤེས་རྔམ་པ་གློག་གི་འཁོར་
ལོའི་མདོ་ཞེས་བྱ་བ་ལས་ལས་ཀྱི་རིམ་པར་ཕྱེ་བའི་ལེའུ་སྟེ་བཅྭ་ལྔ་པའོ།། །།དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དེས་སྐྱེ་འགྲོ་ཐམས་ཅད་འདུལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཞུགས་ནས་ཀྱང་བརྣག་
པའི་ནན་ཏུར་འདི་དག་གསུངས་སོ། །རྡོ་རྗེ་སློབ་དཔོན་སྨོད་པ་དང་། །སངས་རྒྱས་བསྟན་པ་འཇིག་པ་དང་། །ལུ་གུ་རྒྱུད་ལས་འགལ་བྱེད་དང་། །རྡོ་རྗེ་སྤུན་ལ་འཁུ་བྱེད་པ། །རྣལ་འབྱོར་སྤྱི་ཡི་དགྲར་གྱུར་དང་། །སྐྱེ་བོ་ཡོངས་ལ་གནོད་པ་དང་། །མ་ཆགས་
པ་ཡི་སེམས་ཅན་ལ། །བརྣག་པའི་ནན་ཏུར་བྱ་བར་གསུངས། །དགུག་དང་གསད་དང་བསྐམ་པ་དང་། །དབྱེ་དང་བསྐྲད་དང་མནན་པ་དང་། །བཅིང་བའི་ལས་དང་བདུན་དག་གིས། །གྲུབ་པར་འགྱུར་ཞེས་རབ་ཏུ་གསུངས། །དགུག་པའི་ལས་དག་བྱ་བ་ཡང་། །
བདག་ཉིད་རྣལ་འབྱོར་ལྡན་བྱས་ཏེ། །རྐང་རྗེས་ཉིད་ཀྱིས་བླངས་ལ། །མི་རུས་བསྲེགས་པའི་ཐལ་བ་དང་། །དུར་ཁྲོད་རོ་ཡི་རས་དག་དང་། །རྒྱ་མཚོར་འབབ་པའི་ཆུ་བོ་ཡི། །འགྲམ་ཉིད་ནས་ནི་བླངས་པའི་ས། །རླུང་གིས་ཁྱེར་བའི་ཤིང་ལོ་དང་། །གྲོག་མཁར་
ས་རྣམས་བཏགས་ནས་སུ། །ལུང་བོང་གཅིན་གྱིས་སྤྲུ་བར་བྱ། །དེ་ནས་ཡན་ལག་ཚང་བ་ཡི། །གཟུགས་ལ་སྙིང་གར་གྲོ་ག་འམ། །ཤིང་ཤུན་ལེགས་པར་གླན་ནས་ནི། །ར་ཁྱི་ཁྲག་གིས་མིང་བྲིས་ཏེ། །ཧཱུྃ་དང་ཕཊ་ཀྱི་བར་དུ་གཞུག །དྲག་པོའི་དཀྱིལ་
འཁོར་གྲུ་གསུམ་དུ། །མགོ་ནི་ལྷོ་ནུབ་མཚམས་སུ་བསྟན། །གང་ན་གནས་པ་དེ་ཉིད་ནས། །དེ་ཡི་རྣམ་པར་ཤེས་པ་ནི། །ཐོགས་མེད་རླུང་དང་འདྲ་བ་སྟེ། །ལྕགས་ཀྱུ་ཡིས་ནི་སྙིང་དྲངས་ཏེ། །ཡྃ་ལས་རླུང་གིས་བཏེག་ནས་ནི། །བདག་གི་དྲུང་དུ་ཕྱིན་པ་དང་། །

གཟུགས་བརྙན་ནང་དུ་དེ་བཅུག་པ། །སྲིན་བུ་མེ་ཁྱེར་འདྲ་བར་གསལ། །ཞགས་པའི་ཕྱག་རྒྱས་དམ་དུ་གཞུག །ལྕགས་སྒྲོག་ཕྱག་རྒྱས་སྒྲོག་ཏུ་གཞུག །དྲིལ་བུའི་ཕྱག་རྒྱས་བརྟན་པར་བྱ། །གུ་གུལ་ནག་པོའི་དུད་པས་བདུག །ཡུངས་
ཀར་རྒྱལ་པོའི་མཚོན་གྱིས་བརྡེག །རྡོ་རྗེ་མིག་གིས་བལྟར་མངོན་པར། །ཉམས་པ་དེ་ཉིད་གནོན་པར་ནི། །ཉིན་མཚན་ཀུན་ལ་དྲངས་ཏེ་བསམ། །ཡང་ན་སུྃ་བྷའང་ལྷག་པར་འཇེབས། །དེ་ནི་དགུག་པའི་མཆོག་ཏུ་གསུངས། །གལ་ཏེ་གསད་པའི་ལས་
བྱ་ན། །དགུག་པ་དེ་ཉིད་སྦྱར་བྱས་ཏེ། །དུག་ཤིང་སྙིང་པོའི་ཚེར་མ་ཡིས། །ཁུགས་པའི་གཟུགས་དེ་དབུག་པར་བྱ། །དྲག་པོར་གྱུར་པའི་ཕུར་པ་ཡིས། །དཔྲལ་བ་སྙིང་མགྲིན་པུས་མོ་གཉིས། །གནས་ལྔ་དག་ཏུ་བཏབ་པར་བསྒོམ། །རྡོ་རྗེ་རྩེ་མོའི་སྔགས་ཀྱིས་
གདབ། །རྡོ་རྗེ་རྩེ་གཅིག་ཕྱག་རྒྱ་དང་། །བེ་ཅོན་རྡོ་རྗེ་གནོད་སྦྱིན་དང་། །རྡོ་རྗེ་བརྗིད་པས་ཕུར་པ་གནོན། །བསྐལ་པའི་མཐར་ཡང་ཟུག་བསམས་ཏེ། །གུ་གུལ་དུད་པས་མྱོས་སུ་གཞུག །ཡུངས་ཀར་རྒྱལ་པོས་བརྡེག་པར་བྱ། །དེ་ནས་གཟུགས་ཀྱི་དངོས་
པོ་དེ། །རབ་ཏུ་རྣོ་བའི་མཚོན་ཆ་ཡིས། །ཕོ་ནི་རྐང་པ་གཡས་ནས་གཏུབ། །མོ་ནི་རྐང་པ་གཡོན་ནས་གཏུབ། །རྨད་དུ་བྱུང་བའི་གཏོར་མ་དང་། །བཅས་ཏེ་འབར་བའི་ལྷ་ཚོགས་ལ། །དྲག་པོ་ཧོམ་དུ་སྦྱིན་སྲེག་བྱ། །ཉིན་མཚན་གུང་ལ་བྱ་བར་གསུངས། །ལས་
འདི་བྱས་ན་ངེས་པར་ཡང་། །ལྷ་ཡིས་བསྲུངས་ཀྱང་འཆི་བར་འགྱུར། །གལ་ཏེ་སྐམ་པའི་ལས་བྱས་ན། །དགུག་པ་དེ་ཉིད་སྦྱར་བྱས་ཏེ། །དེ་ཡི་མིང་ནས་སྨོས་ནས་ནི། །གཟུགས་དེ་དུག་གི་ཚེར་མས་དབུག །དུག་དང་སྐྱེ་ཚེ་ལན་ཚྭ་དང་། །འབྲུ་མར་ཚ་བར་
རབ་བསྲེས་ཏེ། །ཚ་བའི་རིམས་ཀྱིས་གདབ་པའི་ཕྱིར། །དེ་ཡི་ལུས་ནང་གང་བར་དགང་། །ཚེར་མའི་མེ་ལ་བསྐམ་པར་བྱ། །མཚན་མ་མིང་དུ་བཅས་པ་སྟེ། །ཁམ་ཕོར་རམ་ནི་ཐོད་པར་གཞུག །དགྲ་ཡི་སྒོ་གང་མནན་བྱས་ན། །སྐམ་པར་འགྱུར་བར་གདོན་མི་

ཟ། །ཡང་ན་ཚ་བས་བཏབ་པར་འགྱུར། །གལ་ཏེ་གནས་ནས་སྤོ་བྱ་ན། །ཏིང་འཛིན་ལྡན་པའི་རྣལ་འབྱོར་པས། །དགུག་པ་དེ་ཉིད་སྦྱར་བྱས་ཏེ། །རྡོ་རྗེ་མིག་གིས་མཐོང་བ་དང་། །རླུང་གི་དཀྱིལ་འཁོར་སྟེང་དག་ཏུ། །རྡོ་རྗེ་རྔ་མོ་རབ་བསམས་ཏེ། །དེ་ཉིད་
རྒྱབ་ཏུ་བསྐྱོན་ནས་ནི། །རྡོ་རྗེ་ཁྲོ་བོ་འབར་བ་ཡིས། །གཤིན་རྗེའི་ཕྱོགས་སུ་ཁྲིད་པ་དང་། །གཞན་གྱིས་བརྡེག་པའི་ཐབས་སུ་སྦྱར། །རལ་གྲིས་རྒྱུ་མ་གཏུབས་པ་དང་། །བྱ་རོག་འུག་པ་བྱ་རྒོད་ཀྱིས། །ཟ་ཞིང་འཐོག་པར་རྣམ་བསམས་ནས། །དེ་ཡི་མིང་ནས་
བསྐུལ་བྱས་ན། །དེས་ནི་མྱུར་དུ་སྐྲོད་པར་འགྱུར། །རྡོ་རྗེ་མི་འཆི་ལས་ཀྱིས་སྦྱར། །ཡང་ན་རྐང་རྗེས་ས་དང་ནི། །ཤིང་ལོ་རླུང་གིས་གཙུབས་པ་ལ། །མཚན་མ་མིང་དུ་བཅས་པར་བྱ། །མིང་ནས་དྲག་ཏུ་བསྐུལ་བྱ་ཞིང་། །རྡོ་རྗེ་འབར་བའི་ཁྲོ་བོ་ཡིས། །གཤིན་རྗེའི་
དྲུང་དུ་ཁྲིད་པ་དང་། །བགེགས་ཀྱི་དྲུང་དུ་མནན་བྱས་ན། །དེས་ཀྱང་བསྐྲད་པའི་ལས་སུ་འགྱུར། །ཡང་ན་དགྲ་ཡི་སྒོ་ག་རུ། །ཐོད་པ་མ་གས་མ་ཆག་པར། །རྡོ་རྗེ་སྔགས་ཀྱི་ཚིག་བྲིས་ཏེ། །རྡོ་རྗེ་མི་འཆི་རྣམ་པར་བསྒོམ། །དགྲ་ཡི་སྒོ་རུ་བཞག་ན་ནི། །བསྐྲད་
པར་འགྱུར་བ་གདོན་མི་ཟ། །གལ་ཏེ་དབྱེ་བའི་ལས་བྱས་ན། །ཁྲོ་བོའི་སྔགས་དང་མིང་སྤེལ་ཏེ། །འུག་པའི་སྒྲོ་ལ་བྲིས་ནས་ནི། །བྲམ་ཟེའམ་དགེ་སྦྱོང་སྐྲས་དཀྲིས་ཏེ། །ལམ་གྱི་བཞི་མདོར་བརྐོས་ཏེ་གཞུག །དེ་ལ་རྡོ་རྗེ་ཁྲོ་བོ་གཉིས། །འཐབ་ཅིང་རྩོད་པར་རྣམ་བསམས་
ན། །གསད་དེ་དབྱེ་བར་གདོན་མི་ཟ། །གལ་ཏེ་མནན་པའི་ལས་བྱས་ན། །དགུག་པ་དེ་ཉིད་སྦྱར་བྱས་ཏེ། །མངོན་སུམ་ཁུགས་པར་གྱུར་པ་དང་། །དེ་སྟེང་དབང་ཆེན་རིམ་པར་བསྐྱེད། །རི་རབ་སྟེང་དུ་བསྒོམ་པ་ནི། །ལས་ཀྱི་ལྷ་སྟེ་དོན་ཡོད་གྲུབ། །རྡོ་རྗེ་རྒྱ་གྲམ་
བརྗིད་ལྡན་པས། །བསྐལ་པ་ཡུན་དུ་གནོན་པར་བསམ། །གཟུགས་བརྙན་ཐོད་པ་གང་བར་གཞུག །ལམ་གྱི་བཞི་མདོར་དེ་བཞིན་བྱ། །དེས་ནི་རབ་ཏུ་མནན་པར་འགྱུར། །གལ་ཏེ་བཅིང་བར་འདོད་པ་ན། །དགུག་པ་དེ་ཉིད་སྦྱར་བྱས་ཏེ། །མཚན་མ་མིང་དུ་བཅས་པ་

དེ། །ཚོན་སྐུད་སྣ་ལྔས་མགོ་ལུས་དཀྲི། །རྡོ་རྗེ་སྒྲོག་གིས་བཅིངས་བསམས་ནས། །ཐོད་པ་མ་ཉམས་ནང་དུ་གཞུག །ལམ་གྱི་བཞི་མདོའམ་དུར་ཁྲོད་དུ། །སྦས་ན་ངེས་པར་བཅིངས་པར་འགྱུར། །གཞན་ཡང་གསད་པའི་བརྟུལ་ཞུགས་ནི། །
ཁྲག་དང་དྲི་ཆུ་བཤང་གཅི་ཡིས། །གཤེར་བར་བྱས་བའི་གོས་གྱོན་ཏེ། །ཁྲོ་བོའི་རྒྱལ་པོར་སྦྱར་བྱས་ནས། །རྐང་པས་གཟུགས་བརྙན་མནན་ནས་ནི། །ཁྲོས་པས་གསང་སྔགས་བརྒྱ་རྩ་བརྒྱད། །རྫོགས་པར་བཟླས་ན་ངེས་པར་འཆི། །ཐལ་བའི་སྐྱོ་མ་སྤངས་
པའམ། །སྐྲ་བཤིག་གཅེར་བུར་ཕུད་པའང་རུང་། །དེ་ལྟ་བུ་ཡི་སྦྱོར་བ་ཡིས། །སངས་རྒྱས་དག་ཀྱང་འཆི་འགྱུར་ན། །ཁམས་གསུམ་སྐྱེ་བོ་སྨོས་ཅི་དགོས། །ཞེས་གསུངས་པས་འདུས་པའི་འཁོར་ཚོགས་ཐམས་ཅད་འཇིགས་སྐྲག་སྟེ། རང་རང་གི་སྟན་ལས་
ལངས་ནས་ལུས་ས་ལ་བརྡབས་པའི་ཕྱག་རྣལ་འབྱོར་གྱི་ལུགས་སུ་བྱས་ཏེ། ཆོ་འཕྲུལ་རྣམ་པ་དུ་མ་བསྟན་ནས་ངོ་མཚར་རྨད་དུ་བྱུང་བའི་རྡོ་རྗེའི་ཚིག་གིས་བསྟོད་པ། ཨེ་མའོ་ངོ་མཚར་ཡ་མཚན་གྱི། །ཆོ་འཕྲུལ་ཀུན་གྱི་འབྱུང་གནས་གཙོ། །ངོ་མཚར་ཀུན་གྱི་
བདག་པོ་མཆོག །རྡོ་རྗེ་རྒྱལ་ལ་ཕྱག་འཚལ་འདུད། །བྱང་ཆུབ་སེམས་དཔའ་དཀྱིལ་འཁོར་དང་། །ཕྱག་རྒྱ་བསྙེན་སྒྲུབ་བསྒྲུབ་པ་དང་། །སྡོམ་དང་གསལ་ཞུགས་ལས་རྣམས་དང་། །ནན་ཏུར་བདག་པོ་ཁྱོད་ལ་འདུད། །ཁྱོད་ནི་སངས་རྒྱས་ཀུན་གྱི་ཡབ། །དེ་བཞིན་
རྒྱལ་སྲས་སྙིང་པོར་འགྱུར། །བདག་ཅག་རྣམས་ཀྱིས་རྟེན་པའི་གནས། །མ་རུངས་འདུལ་གཙོ་ཁྱོད་ལ་འདུད། །ཨེ་མའོ་སྣང་དང་མི་སྣང་བརྟན་གཡོ་ལ་སོགས་ཆོས་ཀུན་ཉིད་ཀྱི་སྒྱུ་འཕྲུལ་དྲ་བ་འཁྲུལ་ལ་སྣང་། །བསམ་ཡས་བསམ་དཔག་ལས་འདས་ཆོས་
ཀུན་ངོ་མཚར་རྨད་བྱུང་ཆོ་འཕྲུལ་སྣ་ཚོགས་ཀུན་དུ་སྣང་། །རྟོག་མེད་མཉམ་ཉིད་དབྱིངས་ལས་ཇི་སྲིད་འཕྲུལ་ཀྱང་དབྱིངས་ལས་གཡོས་པ་རྡུལ་གྱི་ཆ་ཙམ་མེད། །དོན་དམ་བདེན་པའི་ཆོ་འཕྲུལ་ཀུན་རྫོབ་གསང་སྔགས་ཆེ་བའི་ཁྱད་པར་རྨད་འབྱུང་ཨེ་མའོ་ངོ་

མཚར་ཆེ། །ཞེས་མགྲིན་གཅིག་ཏུ་གསོལ་བ་བཏབ་སྟེ། འདུས་པའི་འཁོར་ཚོགས་རྣམས་ལ་ལ་ནི་བྱང་ཆུབ་སེམས་ཀྱི་མཚན་ཉིད་ལ་སེམས་ཤིང་ཅང་མི་སྨྲ་བར་འཁོད་དོ། །ལ་ལ་ནི་དཀྱིལ་འཁོར་རྣམས་རིམ་གྱིས་དགོད། ལ་ལ་ནི་ལྷུན་གྱིས་གྲུབ་པའི་
གར་དང་ཕྱག་རྒྱ་ཉེ་བར་སྟོན། ལ་ལ་ནི་གསང་སྔགས་ཀྱི་སྒོ་ཟབ་མོ་བསྙེན་སྒྲུབ་རྣམ་པ་བཞིར་འཇུག་ཅིང་མི་ལྡོག །ལ་ལ་ནི་ངོ་མཚར་རྨད་དུ་བྱུང་བའི་ཆེ་བ་དག་སྟོན། ལ་ལ་ནི་གསང་སྔགས་ཀྱི་དམ་ཚིག་སྙིང་ལ་གནས་པར་སྡོམ། ལ་ལ་ནི་བརྟུལ་
ཞུགས་ཟབ་མོ་ལ་འཇོལ་ཉག་ཏུ་རོལ། ལ་ལ་ནི་གདུག་པའི་ཚོགས་ཉེན་ཅིང་ཚར་གཅོད། ལ་ལ་ནི་རྨུགས་པ་དང་། རེངས་པ་དང་། འདོད་གཟིར་དང་། དྲེགས་པ་རྣམས་དང་། སྦྱོར་བའི་ལས་ཀྱི་རོལ་པས་དགྱེས། ལ་ལ་ནི་ནན་ཏུར་གྱི་ཆེ་བ་སྟོན་ཅིང་ལིང་
ལོང་ཕྱད། ཐམས་ཅད་བླ་འཁྱལ་བའི་སྤྱོད་པ་ཅན་དུ་གྱུར་ཏོ། །བཅོམ་ལྡན་འདས་གསང་བ་མཆོག་གི་བདག་པོ་ནི་ཡུམ་རྔམ་པ་ཀྲོ་དྷིའི་རྒྱལ་མོ་དང་གཉིས་སུ་མེད་པར་དེ་བཞིན་ཉིད་ཀྱི་དབྱིངས་ལ་དགོངས་ཤིང་ཅང་མི་གསུང་བར་གྱུར་ཏོ། །འཕགས་པ་རྒྱུད་
ཀྱི་རྒྱལ་པོ་ཡེ་ཤེས་རྔམ་པ་གློག་གི་འཁོར་ལོའི་མདོ་ཞེས་བྱ་བ་ལས་ནན་ཏུར་གྱི་ལས་རིམ་པར་ཕྱེ་བའི་ལེའུ་སྟེ་བཅུ་དྲུག་པ་རྫོགས་སྷོ།། །།རྒྱ་གར་གྱི་མཁན་པོ་བཛྲ་བི་ཤྭ་མི་ཏྲ་དང་ཞུ་ཆེན་གྱི་ལོ་ཙྪ་བ་པ་གོར་བཻ་རོ་ཙ་ན་རཀྵི་ཏས་བསྒྱུར་ཅིང་
ཞུས་ཏེ་གཏན་ལ་ཕབ་པའོ།། །།དེ་ནས་ཡང་སྨྲ་བའི་སེང་གེ་བྱེད་པ་པོ་རྡོ་རྗེ་ཀུན་དུ་བཟང་པོས་བཅོམ་ལྡན་འདས་གསང་བ་མཆོག་གི་བདག་པོ་དེ་དེ་བཞིན་ཉིད་ཀྱི་ངང་ལ་མི་གཡོ་བར་བརྣལ་བཞིན་དུ་ཆོ་འཕྲུལ་འབྱུང་བའི་གླུ་འདིས་རྣམ་པར་བསྐུལ་ལོ། །ཨེ་
མའོ་མི་དམིགས་ཆོས་དབྱིངས་དག་པ་ལས། །འབར་བའི་སྐུ་མཆོག་བདག་ལ་བསྟན་དུ་གསོལ། །རོལ་པའི་ཆོ་འཕྲུལ་མི་ཟད་རྒྱན་དུ་ཆེ། །དོན་ལ་རྔམ་པའི་སྤྱོད་པས་རོལ་དུ་གསོལ། །ཨ་ལ་ལ་ཧོ་ཞེས་བསྐུལ་བས་བསྐུལ་བར་ཐུགས་སུ་ཆུད་ནས་སྐུ་ཉི་མའི་སྙིང་

པོ་ལྟ་བུ་མངོན་དུ་ཕྱུང་སྟེ་ཆོ་འཕྲུལ་རྣམ་པར་འཕྲུལ་པས་སྣོད་བཅུད་དང་སའི་ཁྱད་པར་ཐམས་ཅད་ལ་སྣང་བར་མཛད་པའོ། །དེ་ནས་སྨྲ་བའི་སེང་གེ་བྱེད་པ་པོ་རྡོ་རྗེ་ཀུན་དུ་བཟང་པོས་མཆོད་པ་རྒྱས་པ་དེ་ཁོ་ན་ཉིད་ཀྱིས་མངོན་པར་མཆོད་དེ་བརྐྱང་
ཕྱག་འཚལ་ནས་གསོལ་བ་བཏབ་པ། ཨེ་མའོ་གསང་མཆོག་དག་པའི་བདག །ཡེ་ཤེས་ཤེས་བགྱི་ཇི་ལྟར་ལགས། །རྔམ་པ་ཞེས་ནི་གང་ལ་བགྱི། །གློག་ཕྲེང་ཞེས་པ་ཇི་ལྟར་ལགས། །འཁོར་ལོ་ཞེས་པ་ཇི་ལྟ་བུ། །མདོ་ཡི་དོན་ནི་ཇི་ལྟར་ལགས། །
བཅོམ་ལྡན་འདས་ཀྱིས་བཤད་དུ་གསོལ། །ཞེས་གསོལ་བ་བཏབ་པ། གསང་བ་མཆོག་གི་བདག་པོས་གསོལ་བ་བཏབ་པ་ཐུགས་སུ་ཆུད་ནས་ཡེ་ཤེས་སྙིང་པོ་ཅན་རྣམས་ཉོན་ཅིག །ཡེ་ཤེས་ཡེ་ཤེས་ཞེས་བྱ་བ། །ཤེས་དང་ཤེས་བྱ་ཐ་དད་མིན། །རིག་
པའི་ངོ་བོ་རྣམ་པ་ལྔ། །སྟོང་ཉིད་སྙིང་རྗེ་དབྱེར་མེད་པས། །བྱང་ཆུབ་སེམས་སུ་རྒྱལ་བས་གསུངས། །དྲེགས་པ་འདུལ་ཞིང་ནན་ཐུར་གྱིས། །ཐོགས་ཆགས་མེད་པའི་བརྟུལ་ཞུགས་པས། །སྔགས་སྤྱོད་རྔམ་པའི་ཁྱད་པར་དེ། །རྔམ་པས་རྔམ་པའི་མཚན་
ཉིད་ཡིན། །གློག་ནི་མྱུར་དུ་འཇུག་པའི་ཕྱིར། །འཇུག་པའི་ཡན་ལག་བཞི་དག་དང་། །སྡོམ་དང་ལས་བཞིའི་ཁྱད་པར་གྱིས། །དངོས་གྲུབ་ལས་ལ་མྱུར་འཇུག་པའོ། །རང་བཞིན་ཏིང་འཛིན་གཟུགས་བརྙན་དང་། །ཕྱག་རྒྱ་དངོས་གྲུབ་འབྲེལ་བཅས་
ནི། །འཁོར་ལོ་ཞེས་སུ་རྒྱལ་བས་གསུངས། །དེ་བས་མིང་ནི་དོན་མཐུན་གྲགས། །རིག་ཅིང་གསལ་བའི་ངོ་བོ་པས། །ཡེ་ཤེས་ཞེས་སུ་བརྗོད་པ་ཡིན། །རྔམ་པ་ཞེས་པ་དྲག་ཤུལ་སྤྱོད། །མྱུར་ཞིང་བར་ཆད་མེད་པས་ན། །ལོག་གི་ཕྲེང་བ་ཞེས་
སུ་བྱ། །སྐོར་དང་གཅོད་དང་རྒྱུན་མི་གཅད། །འཁོར་ལོ་ལྟ་བུའི་རྣམ་པ་དེར། །གསང་བ་ཀུན་འདུས་མདོ་བྱའོ། །ཞེས་གསུངས་སོ། །དེ་ནས་སྨྲ་བའི་སེང་གེ་བྱེད་པ་པོ་རྡོ་རྗེ་ཀུན་དུ་བཟང་པོས་གསོལ་པ། རྒྱུད་ཅེས་བགྱི་བ་ཇི་ལྟ་བུ། མདོ་འདི་

འབྲེལ་པ་ཇི་ལྟར་ལགས། །དེ་བཞིན་དགོས་དང་ཡང་དགོས་ཅི། །བརྗོད་པ་ཇི་ལྟར་ཤེས་པར་བགྱི། །བཅོམ་ལྡན་གསང་བ་མཆོག་གི་བདག་པོས་བཀའ་སྩལ་པ། འབྲེལ་དང་མ་ཚང་མེད་པ་དང་། །ཕུན་སུམ་ཚོགས་ཕྱིར་རྒྱུད་ཅེས་བྱ། །འདི་དོན་
རིག་པའི་སྐྱེས་བུ་ཡིས། །གསང་བ་ཀུན་དོན་ཤེས་པའི་ཕྱིར། །ཕྱོགས་བཅུ་ཀུན་དུ་རབ་གྲགས་པའི། །རྒྱུད་ཀུན་དང་ནི་འབྲེལ་པར་བཤད། །གསང་བའི་སྒོར་ཞུགས་རྣལ་འབྱོར་པ། །བྱང་ཆུབ་སེམས་དང་དཀྱིལ་འཁོར་དང་། །ཕྱག་རྒྱ་བསྙེན་དང་
དངོས་གྲུབ་དང་། །སྡོམ་དང་བརྟུལ་ཞུགས་མ་རུངས་མཉེས། །ལས་དང་ནན་ཏུར་བྱ་བའི་རྣམས། །མཆོག་ཏུ་དགོས་པས་དགོས་པ་ཡིན། །བདེན་གཉིས་རྟོགས་ནས་བདག་གཞན་དོན། །གྲུབ་པ་ཡང་དགོས་ཡིན་པར་བཤད། །དགོས་པའི་དོན་
ཡང་རྫོད་བྱེད་པའི། །དོན་བསྡུས་མདོ་འདི་བརྗོད་པ་ཡིན། །དེ་བས་རྣམ་པ་བཞི་པོ་ཡིས། །བདེ་བླག་ཏུ་ནི་རྟོགས་པར་འགྱུར། །ཞེས་གསུངས་སོ། །ཡང་སྨྲ་བའི་སེང་གེས་གསོལ་པ། དབང་མཆོག་དམ་པ་མ་ཐོབ་པར། །སྒྲུབ་པ་ཅི་ཡང་མི་འགྲུབ་པ། །
ཇི་ལྟར་དབང་བསྐུར་མཚན་ཉིད་ལགས། །སྣོད་ནི་ཇི་ལྟ་བུ་དག་ལགས། །གོ་རིམས་ཇི་ལྟ་བུ་དག་ལགས། །རྣམ་གྲངས་དག་གི་མཚན་ཉིད་ཅི། །དབང་ཐོབ་རྟགས་དང་མཚན་མ་ཅི། །བཅོམ་ལྡན་སྙིང་པོས་བཤད་དུ་གསོལ། །གསང་བ་མཆོག་
གི་བདག་པོས་བཀའ་སྩལ་པ། གསང་བའི་ཚིག་ལ་གསལ་འདྲིས་ཤིང་། །དོན་ལ་གཞོལ་ཞིང་ཡིད་ཆེས་ཀྱང་། །དབང་བསྐུར་བཀའ་རྟགས་མ་བྱིན་པར། །ནོར་བུ་བློན་བྲལ་བསྐོས་པ་ལྟར། །ས་རྣམས་ཐོབ་པར་མི་འགྱུར་རོ། །སེམས་ཀྱིས་
ཆོས་ལ་དབང་ཐོབ་ན། །རྫས་ཚིག་གང་ཟག་དབང་རྣམས་ཀུན། །མ་བསྐུར་ན་ཡང་ཐོབ་པར་འགྱུར། །བསྐུར་ནའང་ཉེས་པ་མེད་པར་བཤད། །རིག་པ་རང་དབང་ཐོབ་གྱུར་ན། །བསྐུར་བའི་དབང་ལ་ཐོགས་པ་མེད། །དེ་ནི་དབང་གི་མཚན་

ཉིད་ཡིན། །རས་ཆོད་བྱེད་ཅིང་ཚུལ་འཆོས་པའི། །དད་དང་མི་ལྡན་བརྩོན་འགྲུས་ཆུང་། །བློ་ཞན་ངེས་མེད་འཕྱར་ལ་གཡེང་། །བླ་མ་སྤུན་ལ་སྲི་ཞུ་ཆུང་། །དེ་ནི་དབང་གི་སྣོད་མ་ཡིན། །དད་དང་ལྡན་ཞིང་བརྩོན་འགྲུས་ཆེ། །
མཉན་བསམ་སློབ་ལ་མི་སྐྱོ་བ། །བླ་མ་སྤུན་ལ་བཀུར་སྟི་བྱེད། །གསང་བ་ཉན་པའི་དབང་བསྐུར་རོ། །རྣམ་བཞི་ལས་ཀྱི་དགོས་པ་ཚང་། །བྱ་བའི་ལས་ལ་མ་རྨོངས་ན། །ཀར་མ་ལས་ཀྱི་དབང་བསྐུར་རོ། །ལྟ་བས་མཉམ་པའི་དོན་རྟོགས་
ན། །རྒྱལ་འཐེབ་འཆད་ཅིང་སྟོན་པའི་དབང་། །ཚད་མ་གསུམ་དང་རབ་ལྡན་ཞིང་། །རྐྱེན་ཐུབ་རྡོ་རྗེ་སློབ་དཔོན་དབང་། །ཐེག་པའི་རིམ་པ་ཐམས་ཅད་ལ། །ཕྱོགས་རིས་མེད་ཅིང་མ་རྨོངས་ན། །རབ་འབྱམ་རྒྱལ་པོའི་དབང་ཐོབ་པའོ། །རྐྱེན་ཐུབ་
བརྟུལ་ཞུགས་ཆེ་བ་དང་། །སྐྱོན་རྣམས་སྤངས་ཤིང་དམ་ཚིག་ལྡན། །གསང་བ་སྒྲུབ་པའི་དབང་ཐོབ་པའོ། །དང་པོར་གསང་བ་ཉན་པའི་དབང་། །རིན་ཆེན་རིགས་ཀྱིས་རྣ་བ་ལའོ། །དེ་ནས་རྡོ་རྗེ་ལས་ཀྱི་དབང་། །ལས་ཀྱི་རིགས་ཀྱིས་ཡན་ལག་
ལའོ། །དེ་ནས་གསང་བ་སྒྲུབ་པའི་དབང་། །རྡོ་རྗེ་རིགས་ཀྱིས་སྙིང་གར་རོ། །དེ་ནས་རྒྱལ་འཐེབ་རྒྱལ་པོའི་དབང་། །སངས་རྒྱས་རིགས་ཀྱིས་སྤྱི་བོ་ལའོ། །དེ་ནས་གསང་བ་འཆང་བའི་དབང་། །པདྨའི་རིགས་ཀྱིས་ལྕེ་ལ་བསྐུར། །དེ་ནས་རབ་འབྱམ་རྒྱལ་
པོའི་དབང་། །ཡན་ལག་རིགས་ལྔས་དབང་བསྐུར་རོ། །དང་པོ་གསུམ་པ་བདག་གི་དོན། །གཉིས་པ་བཞི་པ་གཉིས་ཀ་སྟེ། །ལྔ་པ་དྲུག་པ་གཞན་དོན་དུ། །དབང་མཆོག་བསྐུར་བའི་གོ་རིམས་ཡིན། །རྣམ་གྲངས་གོ་རིམས་མཚན་ཉིད་ནི། །དང་
པོར་ཕྱི་ཡི་དབང་བཅུ་བསྐུར། །དེ་ནས་ནང་དབང་བཅུ་དང་གཅིག །དེ་ནས་སྒྲུབ་པའི་བཅུ་དང་གསུམ། །ཐ་མར་གསང་བ་རྣམ་པ་གཉིས། །བཅུ་ཕྲག་གསུམ་དང་དྲུག་དག་གིས། །དབང་མཆོག་དམ་པ་བསྐུར་བ་ཡིན། །དང་པོ་བཀའ་རྟགས་ཕྱག་

རྒྱའི་དབང་། །གཉིས་པ་རྟགས་ཀྱི་མཚན་མའི་དབང་། །གསུམ་པ་ཤེས་རབ་གཟུགས་ཀྱིས་ཏེ། །བཞི་པ་བཀྲ་ཤིས་བུམ་པའི་དབང་། །ལྔ་པ་བཀྲ་ཤིས་རྫས་ཀྱི་དབང་། །དྲུག་པ་རིན་ཆེན་སྣ་བདུན་དབང་། །བདུན་པ་གདན་མཆོག་དམ་པའི་
དབང་། །བརྒྱད་པ་མཛེས་པ་རྒྱན་གྱི་དབང་། །དགུ་པ་གསང་བ་མིང་གི་དབང་། །བཅུ་པ་རྒྱལ་རྟགས་འཁོར་ལོ་སྟེ། །ཕྱི་དབང་བཅུ་པོ་རྫོགས་པ་དང་། །རྡོ་རྗེ་ནང་དུ་གཞུག་པར་བྱ། །དང་པོ་གསང་བ་ཉན་ཅིང་སློབ་པའི་དབང་། །གཉིས་པ་གླེགས་
བམ་ཟབ་མོ་གཏད་པར་བྱ། །གསུམ་པ་རྣམ་བཞི་ལས་ཀྱི་རྫས་ཀྱང་སྦྱིན། །བཞི་པ་རྒྱལ་ཚབ་དམ་པའི་མཛོད་གསུམ་སྦྱིན། །ལྔ་པ་སློབ་དཔོན་བཞི་ཡི་ཐེག་ཆེན་རྟགས། །དྲུག་པ་ཉི་ཟླ་པདྨ་སེམས་ཅན་གདན། །བདུན་པ་རྒྱལ་པོ་གསང་བའི་རིན་ཆེན་
བདུན། །བརྒྱད་པ་གཟུགས་བརྙན་སྤྱི་བོར་གཞག །དགུ་པ་སྐུ་གསུམ་ཡེ་ཤེས་སྦྱིན། །བཅུ་པ་བཀྲ་ཤིས་དམ་རྫས་དབང་། །དེ་ནས་ལག་ཏུ་རྡོ་རྗེ་སྦྱིན། །བཅུ་དང་གཅིག་གིས་ནང་བཅུག་ནས། །སྒྲུབ་པའི་དབང་མཆོག་སྦྱིན་པར་བྱ། །དང་པོར་སེམས་
ཀྱི་གཏན་ཚིགས་སྦྱིན། །གཉིས་པ་སྙིང་རྗེའི་དབང་བསྐུར་སྦྱིན། །གསུམ་པ་ཡི་གེ་འཁོར་ལོ་སྦྱིན། །བཞི་པ་ཐོང་གཤོལ་འབར་བ་སྦྱིན། །བྷན་དྷ་གང་བ་སྦྱིན་དང་ལྔ། །དྲུག་པ་མཚོན་ཆ་སྣ་ཚོགས་ཏེ། །བདུན་པ་སྐྱོན་མེད་པདྨ་སྦྱིན། །བརྒྱད་པ་
སྟི་རའི་དབྱུག་པ་སྦྱིན། །དགུ་པ་སྦྲུལ་ནག་ཆུན་པོ་སྦྱིན། །བཅུ་པ་དྲི་མེད་ལྷ་མོ་སྦྱིན། །གཅིག་པ་འདོད་པའི་ལོངས་སྤྱོད་ཀུན། །གཉིས་པ་སྒྲུབ་རྫས་རབ་ཏུ་སྦྱིན། །གསུམ་པ་རྡོ་རྗེ་གསང་མི་སྦྱིན། །བཅུ་དང་གསུམ་པ་རྫོགས་པ་དང་། །གསང་བ་དམ་པ་སྦྱིན་
པ་ཡང་། །དཀར་དམར་འདྲེས་པའི་བྱང་ཆུབ་སེམས། །བུ་མཆོག་དེ་ཡི་ལྕེ་ལ་གཞག །སྙིང་པོ་དོན་དམ་བྱང་ཆུབ་སེམས། །དེ་ཡི་བློ་ལ་གཞག་པར་བྱ། །དབང་མཆོག་ཐོབ་པའི་ལྟས་རྣམས་ཀྱང་། །བློ་རྩལ་ཆེ་བའི་བདག་ཉིད་དང་། །སྣང་བ་ལུས་ཀྱི་

སྔ་ལྟས་དང་། །ངོ་མཚར་ཆེ་བའི་རྫས་རྙེད་དང་། །མཚན་མ་པྲ་ཡི་རྨི་ལྟས་འབྱུང་། །བློ་རྩལ་ཆེ་བའི་ཁྱད་པར་དུ། །ཡང་དག་བདེན་པའི་དོན་རྣམས་ལ། །མི་སྐྲག་དགའ་མགུ་སྐྱེ་བར་འགྱུར། །འཁོར་བའི་ཆོས་ལ་སྐྱོ་སེམས་འབྱུང་། །
རྣམ་གྲངས་ཆོས་ལ་དད་མི་འགྱུར། །ཇི་ལྟར་སྣང་བའི་མཚན་མ་ཀུན། །སྒྱུ་མ་བཞིན་དུ་ཤེས་པར་འགྱུར། །འཇིག་རྟེན་པ་ཡི་མཐུ་ཆེན་ལ། །འཇིགས་ཤིང་ཉམ་ང་མེད་པར་འགྱུར། །དེ་ལ་སོགས་ཏེ་མཐའ་ཡས་མཆོག །སྣང་བ་ལུས་ཀྱི་སྔ་ལྟས་ཀྱང་། །
ལུས་ཀྱིས་བཟོད་པ་ཐོབ་པ་དང་། །འདུ་བའི་ནད་དང་བྲལ་བ་དང་། །ཁམ་ཀྱི་ཟས་དང་བྲལ་བ་དང་། །དབང་པོའི་གཟི་མདངས་གསལ་བ་དང་། །བར་སྣང་དག་ལ་ལྡིང་བ་དང་། །ཤིང་བལ་ལྟ་བུར་ཡང་བ་དང་། །ཆུ་ལ་མི་འབྱིང་མེས་མི་འཚིག །རླུང་གིས་
ཁྱེར་བར་ནུས་མི་འགྱུར། །དེ་ལ་སོགས་ཏེ་མཐའ་ཡས་མཆོག །ངག་གིས་ཇི་སྙེད་བརྗོད་པ་བཞིན། །འགྱུར་བ་ཡིན་པར་ཤེས་པར་བྱ། །རྫས་ཀྱི་དམ་པ་ཡོན་ཏན་ལྡན། །རྙེད་ཅིང་ཐོབ་པ་དག་ཏུ་འགྱུར། །ཉམས་དང་རྨི་ལམ་དག་ཏུ་ཡང་། །དབང་
མཆོག་ཇི་ལྟར་བསྐུར་བ་བཞིན། །དེ་དག་ནུས་པའི་རྣམ་པ་འབྱུང་། །དེ་དག་དབང་བསྐུར་ཐོབ་པའི་རྟགས། །ཞེས་གསུངས་སོ། །དེ་ནས་ཡང་སྨྲ་བའི་སེང་གེ་བྱེད་པ་པོ་རྡོ་རྗེ་ཀུན་དུ་བཟང་པོས་འདི་སྐད་ཅེས་གསོལ་བ་བཏབ་བོ། །ཡེ་ཤེས་རྣལ་འབྱོར་
ཅན་རྣམས་ཀྱིས། །གསང་བ་སྦས་པའི་ཐབས་ཚུལ་དུ། །སྦས་པས་གྲུབ་པའང་མྱུར་བ་དང་། །གསང་བའི་དམ་ལ་གནས་བྱ་དང་། །བརྡ་ལ་དགའ་བའི་མི་རྣམས་ཀུན། །ཉེ་ཞིང་གདུང་བར་བྱ་བའི་ཕྱིར། །ལུས་དང་ངག་གི་བརྡ་རྣམས་ཀུན། །གསང་བའི་
བདག་པོས་བཤད་དུ་གསོལ། །ཞེས་གསོལ་བ་བཏབ་པ་དང་། གསང་བའི་བདག་པོས་བཀའ་སྩལ་པ། །གསང་བ་སྦས་པའི་ཐབས་ཚུལ་དུ། །བརྡ་ཡི་དམ་ཚིག་བཤད་པར་བྱ། །འདུས་པའི་འཁོར་རྣམས་ལེགས་པར་ཉོན། །ལུས་བརྡ་དམ་ཚིག་

ཕྱག་རྒྱ་ནི། །ལག་པ་གཡས་པས་བྱ་བ་ཀུན། །རྣལ་འབྱོར་པ་ཡིས་བྱ་བའི་བརྡ། །གཡོན་པས་བྱ་བ་མ་ཡིས་བརྡ། །སྤྱི་བོར་ཉུག་པའི་ལག་བརྡ་ནི། །ཕྱག་འཚལ་བ་ཡི་བརྡ་ཡི་རྒྱ། །དཔྲལ་བར་རེག་པ་ཕྱག་ལན་ཡིན། །ལག་པ་གཡས་པ་བརྐྱང་བྱས་
ཏེ། །མགོ་བོ་བཏུད་པར་བྱས་པ་ནི། །ཁམས་བདེ་འམ་ཞེས་འདྲི་བའི་བརྡ། །ལག་པ་གཡོན་པ་བརྐྱང་ནས་ནི། །གཡོན་དུ་འདུད་པ་བདེ་བའི་ལན། །མིག་གཉིས་དག་ལ་རེག་པ་ན། །གཟུགས་མཛེས་སྟོན་ཅིག་ཅེས་པའི་བརྡ། །གཡས་པ་སྐྱེས་
པ་མཛེས་པ་ཡིན། །གཡོན་པ་བུད་མེད་བཟང་མོར་བཤད། །རྣ་བ་དག་ལ་རེག་པའི་བརྡ། །གཡོན་པ་ལེགས་པའི་གླུ་སྙན་བརྡ། །གཡས་པ་ཚིག་སྙན་སྨྲ་བའི་བརྡ། །སྣ་ཕུག་གཉིས་ལ་རེག་པ་ནི། །གཡས་པ་བདུག་པ་འདོད་པ་སྟེ། །གཡོན་པ་
དྲི་དག་སློང་བའི་བརྡ། །ལྕེས་ནི་ལྡག་པར་བྱེད་པའི་བརྡ། །གཡས་སུ་ལྡག་པ་ཤ་འདོད་པའོ། །གཡོན་དུ་ཆང་འདོད་བརྡ་རུ་བཤད། །མཆེ་བས་མ་མཆུ་མནན་པ་ནི། །གཡོན་པ་བུད་མེད་རེག་བྱ་འདོད། །གཡས་པ་སྐྱེས་པ་དེ་བཞིན་ནོ། །ལྐོག་མར་རེག་
པ་གསང་བ་ཡི། །ཐེག་མཆོག་གསང་བ་སྨྲ་བའི་བརྡ། །སྐེ་ལ་རེག་པར་བྱེད་པ་ནི། །བདག་ཉིད་དབྱངས་སྙན་ལེན་པའི་བརྡ། །སྙིང་གའི་དཀྱིལ་དུ་རེག་པ་ནི། །དོན་རྟོགས་པ་ཡི་བརྡ་རུ་བཤད། །རིག་ནས་ཕྱིར་ལ་འགྱེད་པ་ནི། །སྤྱོས་པའི་བརྡ་རུ་ཤེས་པར་བྱ། །
སླར་ཡང་སྙིང་གར་གཏུགས་པ་ནི། །སླར་ཡང་བསྡུ་བའི་བརྡ་ཡིན་ནོ། །ལྟེ་བའི་དཀྱིལ་དུ་རེག་པ་ནི། །དབུ་མའི་ནན་ཏན་སྤྱོད་པ་ཡིན། །དབང་པོ་རབ་ཏུ་གསལ་བྱས་ན། །ཏིང་འཛིན་སྒྲིམ་ཞེས་བྱ་བ་ཡིན། །ཕྲག་པ་གཉིས་ནི་སྟོན་པའི་བརྡ། །གཡས་པ་འགུགས་
པའི་བརྡ་ཡིན་ནོ། །གཡོན་པ་སླར་གཏོད་པ་ཡི་བརྡ། །དཔུང་པ་གཉིས་ལ་ཉུག་པའི་བརྡ། །གཡས་པ་དྲེགས་པ་འདུལ་བའི་བརྡ། །གཡོན་པ་ལོངས་སྤྱོད་གྲུབ་པའི་བརྡ། །ཁུ་ཚུར་གཡས་བཅངས་དབང་དུ་སྡུད། །གཡོན་པ་བཅངས་ན་ཐོང་ཤིག་པའོ། །བརླ་

གཉིས་མྱུག་པའི་བརྡ་དག་ཀྱང་། །གཡས་པ་ཆོས་ལ་སྦྱོར་བའི་བརྡ། །གཡོན་པ་འདོད་ཆགས་རྩོམ་པའི་བརྡ། །པུས་མོའི་ལྷ་ངའི་བརྡ་དག་ཀྱང་། །གཡོན་པ་རབ་ཏུ་འདུད་པ་ཡིན། །ཡང་ན་བཅིང་བ་ཡིན་པར་བཤད། །གཡས་པས་རབ་
ཏུ་དགྲོལ་བ་ཡིན། །རྐང་པས་གནོན་པའི་བརྡ་དག་ཀྱང་། །གཡོན་པས་ཐམས་ཅད་གནོན་པར་བྱེད། །གཡས་པས་འཇོམས་པར་བྱེད་པ་ཡིན། །མཛུབ་མོ་བསྒྲེང་བའི་བརྡ་ཚུལ་གྱིས། །ཁྲོ་བོའི་བརྡ་རུ་བཤད་པ་ཡིན། །དབང་པོ་གྱེན་དུ་བསྒྲེང་བ་ནི། །དེ་ཚེ་
མཛའ་བར་འདོད་པའི་བརྡ། །ཆུང་ངུའི་རྩེ་མོ་བསྒྲེང་བ་ནི། །དེ་ཚེ་སྦྱོར་བར་འདོད་པའི་བརྡ། །སྦོན་པོ་མངོན་པར་སྟོན་པ་ན། །བཀྲེས་ཞེས་བྱ་བའི་བརྡ་ཡིན་ནོ། །གང་ཚེ་ཤིན་ཏུ་མཐོར་སྟོན་ན། །མངོན་པའི་ང་རྒྱལ་བསྐྱེད་པའི་བརྡ། །ཁྲོ་མོ་ལྕགས་ཀྱུར་དྲངས་
བྱས་ན། །དེ་ཚེ་ཚུར་ཤོག་བརྡ་ཡིན་ནོ། །དེ་ཉིད་ཟློག་པ་ཁྱེད་ཅིག་པའོ། །ལག་གཉིས་གར་ཐབས་བསྐོར་ནས་ཀྱང་། །སེ་གོལ་དྲག་རྡོབས་འདྲེན་པའི་བརྡ། །བསྐོར་ནས་སྦྱར་བ་ཕྱག་རྒྱའི་བརྡ། །བསྐོར་ནས་ཐལ་མོ་སྤྱི་བོར་གཞག །འདི་ནི་མཆོད་
པའི་བརྡ་ཡིན་ནོ། །བསྐོར་ནས་སྙིང་གར་གཞག་པ་ནི། །བསམ་གཏན་རྩེ་གཅིག་བརྡ་ཡིན་ནོ། །བསྐོར་ནས་གཉིས་ཀྱིས་སྟོན་པ་ནི། །མཆོད་པ་སྟོབས་པའི་བརྡ་ཡིན་ནོ། །དབང་མོ་ལྕེ་ལ་རེག་པ་ནི། །ཚོགས་མཆོད་དུས་ལ་བབ་པའི་བརྡའོ། །གར་
ཐབས་བསྐོར་ནས་དབང་མོར་འཐོར། །དེ་ནས་ལྕེ་ལ་རེག་པ་ནི། །འཛའ་གད་བྲིམ་པའི་བརྡ་ཡིན་ནོ། །དེ་ལ་སོགས་ཏེ་བསམ་མི་ཁྱབ། །ངག་བརྡ་དམ་ཚིག་ཕྱག་རྒྱ་ཡང་། །ཨ་ཏི་བུ་ཞེས་བྱ་བ་ནི། །ཕྱག་འཚལ་ཞེས་པའི་བརྡ་ཡིན་ནོ། །པྲ་ཏི་པུ་ཞེས་བྱ་
བ་ནི། །ཕྱག་ལན་འཚལ་བའི་བརྡ་ཡིན་ནོ། །རི་མོ་ཞེས་བྱ་གཟུགས་ཀྱི་བརྡ། །གླུ་ནི་སྒྲ་ཡི་བརྡ་རུ་བཤད། །ཚིམ་བྱེད་དྲི་ཡི་བརྡ་ཡིན་ནོ། །ར་ས་ཨ་ན་རོ་ཡི་བརྡ། །བདེ་བ་ཞེས་བྱ་རེག་པ་ཡིན། །དགའ་བ་ཞེས་པ་རབ་ཏུ་རིག །སྦྱོར་བ་ཞེས་པ་ཆོས་སུ་

བཤད། །མེ་ཏོག་ཞེས་བྱ་ཁྲག་ཡིན་ནོ། །བདུག་པ་ཞེས་པ་མདངས་ཀྱི་བརྡ། །མར་མེ་ཞེས་པ་ཤ་ཆེན་ལའོ། །དཔའ་བོ་ཞེས་པ་ཆང་དུ་བཤད། །སྤོས་ཞེས་ཐལ་ཆེན་དག་ལའོ། །འདོད་ཆགས་སྲ་བ་ཚྭ་ཡིན་ཏེ། །ཁུ་བ་གཡོན་ཅན་སྐྱུར་པོ་ཡིན། །བྲན་མོ་
ཚོད་མའི་བརྡ་ཡིན་ནོ། །ཆུར་བ་ཞོ་ལ་ཟླ་རྒྱས་ཏེ། །སྨན་གྱི་མཆོག་ནི་ཤ་ཡི་བརྡ། །ཟན་ནི་ཚེ་ཞེས་བྱ་བའི་བརྡ། །ཨརྨ་མི་ཞེས་བྱ་བའི་བརྡ། །རྒུན་འབྲུམ་ཞེས་པ་རྟ་ཡི་བརྡ། །གླང་པོ་པ་ན་སེ་ཞེས་བྱ། །ན་ལི་ཀི་རི་ཁྱི་ཡི་བརྡ། །ཨ་རུ་ག་ནི་བ་ལང་ངོ་། །ཏི་
ཞེས་མཁའ་འགྲོའི་བརྡར་བསྟན་ཏོ། །ཨ་རལ་ཞེས་པ་མཁའ་འགྲོ་མ། །དར་དིར་སིལ་སྙན་སྒྲ་རུ་བཤད། །ཛ་ཞེས་བྱ་བ་འདྲེན་པའི་བརྡ། །ཧཱུྃ་ནི་སྡུད་པའི་བརྡ་ཡིན་ནོ། །བྃ་ནི་སྡོམ་པ་ཡིན་པར་བཤད། །ཧོ་ནི་ཞུགས་ནས་དབང་དུ་འགྱུར། །ཨེ་ཧི་ཞེས་པ་ཚུར་
སྤྱོན་བརྡ། །ཡ་ཧི་ཕར་བཞུད་ཞེས་པའོ། །ཏི་སྟ་ཧ་ནི་དྲངས་ཤིག་པའོ། །ཁ་ཁ་ཁཱ་ཧི་ཟོ་ཤིག་པའོ། །ཨ་པའི་ཞེས་པ་ཡང་ནས་ཡང་། །ད་ར་ད་ར་བྱིན་ཅིག་པའོ། །རུ་ཏ་མ་ཏ་རོལ་ཞེས་པའོ། །ཧུ་ལུ་ཧུ་ལུ་ཞུགས་ཤིག་པའོ། །ཨ་ར་ར་ར་བསྐུལ་ཅིག་པའོ། །
དེ་ལ་སོགས་ཏེ་བསམ་ཡས་མཆོག །ཞེས་གསུངས་སོ། །དེ་ནས་ཡང་སྨྲ་བའི་སེང་གེའི་བྱེད་པ་པོ་རྡོ་རྗེ་ཀུན་དུ་བཟང་པོས་གསོལ་པ། ཨེ་མའོ་གསང་ཆེན་བདེ་བ་ཆེ། །མི་འགྱུར་ནམ་མཁའ་དངོས་པོ་མེད། །ལྷུན་གྲུབ་བདེ་ཆེན་རྣམ་པར་དག །དག་མཆོག་
ལྷ་ལ་ཕྱག་འཚལ་བསྟོད། །གསང་བ་ཞེས་བགྱི་རྣམ་པ་དུ། །སྦས་པ་ཞེས་བགྱི་རྣམ་པ་དུ། །ཐིག་ལེ་ཞེས་བགྱི་ཇི་ལྟར་གནས། །མཉམ་ཉིད་ཞེས་པ་རྣམ་པ་དུ། །དག་པ་ཞེས་པ་རྣམ་པ་དུ། །རྟོགས་པ་རྣམ་པ་དུ་རུ་བཞེད། །མཚན་ཉིད་གསུམ་
ཞེས་ཇི་ལྟ་བུ། །ཏིང་འཛིན་གསུམ་པོ་ཇི་ལྟར་ལགས། །བདག་ཅག་རྣམས་ལ་སྨན་སླད་དུ། །བདེ་བར་གཤེགས་པས་བཤད་དུ་གསོལ། །ཞེས་གསོལ་བ་བཏབ་པས། གསང་བ་མཆོག་གི་བདག་པོས་ཐུགས་སུ་ཆུད་དེ་བཀའ་སྩལ་པ། གསང་

བ་ཞེས་པ་རྣམ་པ་བཞི། །རང་བཞིན་དོན་གྱི་གསང་བ་དང་། །གབ་པ་སྦས་པའི་གསང་བ་དང་། །བསྟན་མེད་རྫས་ཀྱི་གསང་བ་དང་། །སྣོད་མེད་བཀའ་ཡི་གསང་བ་དང་། །ཆོས་ཉིད་རང་བཞིན་གསང་བ་དང་། །ཐུགས་ཀྱི་
ཀློང་ནས་བསྐུངས་པ་དང་། །དམན་ལ་མི་བསྟན་རྫས་རྣམས་དང་། །གསང་སྔགས་ཐེག་ཆེན་ཟབ་མོའི་དོན། །རབ་ཏུ་ཤེས་པ་དཀའ་བའི་ཕྱིར། །བསྟན་པར་ཡང་ནི་མི་བྱ་བས། །གསང་བ་ཞེས་སུ་རྒྱལ་བས་གསུངས། །དེ་ཉིད་སྦས་པས་སྦས་
པའི་དོན། །སྦས་པ་རྣམ་པ་གསུམ་ཡིན་ཏེ། །ཕྱི་ཡི་སྦས་པ་གསང་བ་དང་། །དེ་བཞིན་ནང་གི་སྦས་པ་དང་། །གཉིས་ཀར་མ་ངེས་སྦས་པ་སྟེ། །རྨད་འབྱུང་སྔགས་ཀྱི་སྤྱོད་པ་སྟེ། །ཕྱི་རོལ་སྡེ་པས་མཐོང་ཐོས་ན། །དེ་ལ་བཟོད་པ་ཐོབ་
མིན་པས། །དེ་ནི་སྦས་པ་ཕྱི་ཞེས་བྱ། །ལྷུན་གྲུབ་བདེ་ཆེན་ཟབ་མོ་དེ། །མིང་གི་རྣལ་འབྱོར་ཕལ་དག་གིས། །རྟོགས་ཤིང་ཁོང་དུ་ཆུད་པར་དཀའ། །དེ་ནི་ནང་གི་སྦས་པ་ཡིན། །ཕྱི་ནང་གཉིས་སུ་ཐ་དད་མིན། །བདེན་པ་གཉིས་སུ་དབྱེར་
མེད་པ། །རྒྱལ་བ་སངས་རྒྱས་སྤྱོད་ཡུལ་དེ། །མ་ངེས་སྦས་པར་རྒྱལ་བས་གསུངས། །སྦས་པའི་དོན་རྣམས་གསལ་འབྱིན་པ། །བླ་མ་རྡོ་རྗེའི་ཐུགས་ལ་གནས། །དེས་ན་སྦས་ཞེས་ངེས་པར་གསུངས། །ཐབས་དང་ཤེས་རབ་ཞེས་བྱ་
བ། །གཉིས་སུ་མེད་པའི་བྱང་ཆུབ་སེམས། །དེ་ཉིད་ཐིག་ལེ་རྣམ་གསུམ་སྟེ། །ཐབས་མཆོག་ཡབ་ཀྱི་མཁའ་ཉིད་དང་། །ཤེས་རབ་ཡུམ་གྱི་ཀློང་ཉིད་དང་། །གཉིས་མེད་བདེ་ཆེན་ངང་ཉིད་དུ། །ཆོས་ཀུན་འདུས་ཤིང་གཅིག་པ་དང་། །
སྤྲོས་མེད་ཐིག་ལེར་གནས་པའི་ཕྱིར། །ཐིག་ལེ་ཞེས་སུ་རྒྱལ་བས་གསུངས། །མཉམ་པ་ཉིད་ཀྱང་རྣམ་གསུམ་སྟེ། །དོན་དམ་དབྱིངས་སུ་མཉམ་པ་དང་། །ཀུན་རྫོབ་སྒྱུ་མར་མཉམ་པ་དང་། །དབྱེར་མེད་གཅིག་པར་མཉམ་པ་སྟེ། །མ་སྐྱེས་

མ་གྲུབ་དབྱེར་མེད་པར། །ཆོས་ཀུན་མཉམ་པར་གནས་པས་ན། །མཉམ་པ་ཞེས་སུ་བརྗོད་པ་ཡིན། །སྣོད་དང་བཅུད་དང་རྒྱུད་རྣམས་ཀུན། །དག་པས་དག་པ་གསུམ་ཡིན་ཏེ། །ཡུམ་གྱི་དབྱིངས་དང་ཡབ་ཀྱི་མཁའ། །ཡེ་ཤེས་ལྔ་ཡི་རང་བཞིན་དུ། །
སྣོད་བཅུད་རྒྱུད་ཀུན་དག་པའི་ཕྱིར། །དག་པ་གསུམ་དུ་རྒྱལ་བས་གསུངས། །རྟོགས་པ་ཡང་ནི་རྣམ་པ་བཞིར། །རྣལ་འབྱོར་ནང་པ་བཞེད་པ་སྟེ། །རྒྱུ་གཅིག་པ་དང་ཡིག་འབྲུའི་ཚུལ། །བྱིན་གྱིས་བརླབས་དང་མངོན་སུམ་པས། །རྫོགས་ཆེན་དོན་ལ་
འཇུག་འགྱུར་ཏེ། །རྒྱུ་ནི་བདེན་གཉིས་གཅིག་པ་རུ། །གཅིག་པས་གཅིག་པའི་མཚན་ཉིད་དང་། །སྐུ་གསུང་ཐུགས་ཀྱི་ཡི་གེ་རུ། །ཆོས་ཀུན་རང་བཞིན་རྟོགས་པ་དང་། །སྐྱེ་མེད་དབྱིངས་ཀྱི་བྱིན་བརླབས་ལས། །ཆོས་ཀུན་སྣང་བར་ཤེས་པ་
དང་། །དེ་ལྟ་བུ་ཡི་རང་བཞིན་ཏེ། །གཞན་ལ་མ་རྟེན་མི་འགལ་བར། །མངོན་སུམ་རིག་པས་ཐག་ཆོད་ན། །རྣལ་འབྱོར་ས་ལ་སླེབས་པ་ཡིན། །མ་རྟོགས་པ་ཡང་བཞི་ཡིན་ཏེ། །ཡེ་ནས་མ་རྟོགས་བླུན་པ་དང་། །ལོག་པའི་རྣམ་པར་
རྟོག་པ་དང་། །ཕྱོགས་གཅིག་རྟོགས་པའི་ཁྱད་པར་དང་། །གསང་བ་དེ་ཉིད་མ་རྟོགས་པ། །དཀའ་ཐུབ་མེད་པའི་འཇིག་རྟེན་དང་། །ལོག་པར་སྤྱོད་པའི་དཀའ་ཐུབ་དང་། །ཉན་ཐོས་དམན་པའི་ལམ་པ་དང་། །བྱང་ཆུབ་ས་ལ་གནས་པ་རྣམས། །
གསང་བ་དེ་ཉིད་མ་རྟོགས་པར། །བདེར་གཤེགས་རྒྱལ་བ་ཉིད་ཀྱིས་གསུངས། །དེས་ན་རྟོགས་པ་རྣམ་བཞི་ཡིས། །རྣལ་འབྱོར་ས་ལ་བསྙེན་པ་ཡིན། །ཤེས་པ་དང་ནི་འཇུག་པ་དང་། །འབྲས་བུའི་མཚན་ཉིད་ཅེས་བྱ་བས། །ས་ལ་ཉེ་དང་སར་ཆུད་
དང་། །ས་ཐོབ་འབྲས་བུ་རྣམ་པ་གསུམ། །རྒྱུ་འབྲས་ཚུལ་དུ་གནས་པ་ནི། །ནུས་མཐུར་ལྡན་པའི་ཤེས་རབ་ཀྱིས། །རིག་འཛིན་ཞིང་སྟེ་ཤེས་རབ་གསུམ། །ཡུམ་ཡང་མཚན་ཉིད་གསུམ་ཡིན་ཏེ། །ཀུན་དུ་བརྟགས་དང་གཞན་དབང་དང་། །ཡོངས་

སུ་གྲུབ་པ་ཞེས་སུ་བརྗོད། །ལོག་པའི་བསམ་པས་མཐོང་བརྟགས་པ། །ཀུན་དུ་བརྟགས་ཏེ་ཡོད་པ་མིན། །བདེན་གཉིས་རྒྱུ་དང་འབྲས་བུའི་ཚུལ། །འབྲེལ་བ་གཞན་དབང་ཡིན་པར་གསུངས། །བདེན་གཉིས་རྒྱུ་འབྲས་དབྱེར་མེད་
པར། །ཡོངས་སུ་གྲུབ་པར་བདེར་གཤེགས་གསུང་། །ཀུན་བརྟགས་ལོག་པར་ཤེས་པ་ནི། །ཤེས་པའི་མཚན་ཉིད་ཅེས་སུ་བྱ། །གཞན་དབང་ཚུལ་དུ་གོམས་བྱ་བ། །འཇུག་པའི་མཚན་ཉིད་ཅེས་སུ་བྱ། །ཡོངས་སུ་གྲུབ་ལ་གནས་བཅས་ན། །དེ་
ཉིད་འབྲས་བུའི་མཚན་ཉིད་ཡིན། །དེ་བཞིན་ཉིད་དང་ཀུན་དུ་སྣང་། །རྒྱུ་ཡི་ཏིང་འཛིན་རབ་བསྒོམས་པས། །རྫོགས་པའི་བྱང་ཆུབ་ཐོབ་པ་སྟེ། །ཡོངས་སུ་གྲུབ་པའི་བློ་གསལ་ན། །དེ་བཞིན་ཉིད་དུ་རྣམ་པར་གྲགས། །ཀུན་སྣང་སྙིང་རྗེའི་ངོ་བོ་དང་། །ཡིག་
འབྲུ་ཁ་དོག་གསལ་བ་ཡི། །རྒྱུ་ཡི་ཏིང་འཛིན་གསལ་བ་ནི། །བསྐྱེད་པ་གཞན་གྱི་དབང་ཡིན་ཏེ། །དེ་ཉིད་ལོག་རྟོག་ཀུན་བརྟགས་པའོ། །དེས་ན་རྣལ་འབྱོར་སྐྱེས་བུ་ཡིས། །མཚན་མེད་ངང་ལ་གནས་བཅས་ནས། །མཚན་མའི་རྣལ་འབྱོར་བསྒོམ་པར་བྱའོ། །
མཚན་མ་མེད་དང་མཚན་མ་ཡང་། །ཐ་དད་མེད་པར་ཤེས་པར་བྱ། །དེ་ལྟར་རིག་པའི་རྣལ་འབྱོར་པ། །དེ་ཉིད་ང་ཡིན་ས་ཐོབ་ཡིན། །སངས་རྒྱས་ཞེས་ཀྱང་དེ་ལ་བྱ། །སངས་རྒྱས་རྣམས་ཀྱང་མཆོད་པ་བྱེད། །བྱང་ཆུབ་སེམས་དཔའ་སྨོས་ཅི་དགོས། །འཇིག་
རྟེན་ལྷ་ཀླུ་མཐུ་ཆེན་ཡང་། །དེ་ལ་མཆོད་ཅིང་བཀུར་སྟི་བྱེད། །ཕྱི་བཞིན་འབྲེང་ཞིང་དགོས་པ་སྐོང་། །ཞེས་གསུངས་པས། འདུས་པའི་འཁོར་ཚོགས་རྣམས་ཀྱིས་རང་རང་གི་ལུས་ས་ལ་བརྡབས་ནས་ཨ་ལ་ལ་ཞེས་བྱ་བའི་སྒྲ་ཕྱུང་སྟེ་ཤིན་ཏུ་ངོ་མཚར་ཏོ། །དེ་ནས་
སྨྲ་བའི་སེང་གེ་བྱེད་པ་པོ་རྡོ་རྗེ་ཀུན་དུ་བཟང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཐེ་ཚོམ་ཐམས་ཅད་གཅོད་པའི་བདག་པོ་མཆོག་རྒྱུད་ཀྱི་རྒྱལ་པོ་ཆེན་པོ་འདི་ཉིད་ཡེ་ཤེས་རྔམ་པ་གློག་གི་འཁོར་ལོའི་མདོ་ཆེན་པོ་ཞེས་བྱ་བ་རྒྱུད་ཀྱི་འགྲེལ་པ། རྟགས་ཀྱི་

རོལ་པ། དོན་གྱི་བཀོད་པ་རྡོ་རྗེ་རྣམ་པར་རོལ་པའི་གཞུང་ཆེན་པོ་འདི་ཡི་བླ་མ་རྡོ་རྗེ་སློབ་དཔོན་སྐྱེས་བུ་དམ་པས་མ་ནོར་བར་རྟོགས་ཤིང་གཞན་དག་ལ་ཡང་མ་ནོར་བར་སྟོན་པ་དེ་ལ་བདག་ཅག་རྣམས་ཀྱིས་ཇི་ལྟར་བལྟ་བར་བགྱི། ཇི་ལྟ་བུའི་རང་བཞིན་དུ་འཚལ་བར་
བགྱི། བཅོམ་ལྡན་འདས་ལུང་བསྟན་དུ་གསོལ། བདེ་བར་གཤེགས་པས་ལུང་བསྟན་དུ་གསོལ། དེ་ནས་བཅོམ་ལྡན་འདས་གསང་བ་མཆོག་གི་བདག་པོས་གསོལ་པ་བཏབ་པ་དེ་མཁྱེན་ནས་འདི་སྐད་ཅེས་གསུངས་སོ། །སྨྲ་བའི་སེང་གེ་ང་ལ་ཞུ་བར་
སྤོབས་པ་ལེགས། རབ་ཏུ་ལེགས་ཀྱིས་ཉོན་ཅིག །གཞུང་འདི་བླ་མ་རྡོ་རྗེ་སློབ་དཔོན་དེ་ནི་སྐྱེས་བུ་དམ་པ་འབའ་ཞིག་ཏུ་མ་ཟད་དེ། དེ་ནི་བླ་ན་མེད་པ་ཡང་དག་པར་རྫོགས་པའི་སངས་རྒྱས་རྡོ་རྗེ་འཛིན་པ་ཉིད་དུ་བལྟ་བར་བྱའོ། །དེ་ཅིའི་ཕྱིར་ཞེ་ན། དེ་
ནི་རྡོ་རྗེ་འཛིན་པ་ཆེན་པོ་དང་། དབྱེར་མེད་ཅིང་ཐ་མི་དད་དེ། བླ་མ་དེ་ནི་བསྐལ་པ་ཆེན་པོ་གྲངས་མེད་པའི་ཕ་མཐའ་ཡི་ཡང་ཕ་མཐའ་འདས་པ་ནས་རྒྱལ་བ་སངས་རྒྱས་བརྗོད་དུ་མེད་པ་ཡི་ཡང་བརྗོད་པ་རྣམས་ལ་ཚོགས་ཐམས་ཅད་ཡོངས་སུ་རྫོགས་པར་སྦྱངས་
ཤིང་རང་གི་སེམས་ཀྱི་རྒྱུད་རྣམ་པར་སྦྱངས་པའི་ནུས་མཐུས་གསང་བ་འདིའི་དོན་ལ་ཡིད་ཆེས་ཤིང་གསང་བའི་དོན་འདི་ལྟ་བུའི་བླ་མ་རྡོ་རྗེ་སློབ་དཔོན་ཆེན་པོ་ཉིད་དུ་རིག་པར་བྱ་སྟེ། དེ་ནི་སངས་རྒྱས་ཉིད་དང་ཐ་མི་དད་ཅིང་བྱང་ཆུབ་ཀྱི་སེམས་ཉིད་དུ་བལྟ་བར་བྱའོ། །
དེ་ལ་འདི་ནི་ཕྱོགས་བཅུ་དུས་བཞིའི་སངས་རྒྱས་མ་ལུས་མི་ལུས་ལུས་པ་མེད་པའི་སངས་རྒྱས་ཀྱི་ཞིང་རྡུལ་ཕྲ་རབ་དང་མཉམ་པ་རྣམས་ཀྱང་སྤྱི་བོ་གཙུག་གིས་ཁུར་ཞིང་ཕྱག་འཚལ་བ་དང་མཆོད་པ་བྱེད་ཅིང་རྗེས་སུ་འབྲེང་ན་གཞན་བྱང་ཆུབ་སེམས་དཔའ་དང་རྡོ་རྗེ་འཛིན་
པ་རྣམས་ལ་ཕྱག་འཚལ་ཞིང་མཆོད་པ་ཅི་ཞིག་སྨོས་ཏེ། འཇིག་རྟེན་གྱི་མཐུ་བོ་ཆེ་རྣམས་ཀྱང་དེའི་བྲན་དུ་ཁས་ལེན་ཅིང་འཁོར་གྱི་དཀྱིལ་འཁོར་ཡང་སྐྱོང་ཞིང་ཅི་བསྒོ་བ་ཐམས་ཅད་ཀྱང་བསམ་པ་ཡིད་བཞིན་དུ་གྲུབ་པར་བྱེད་དོ། །དེ་བས་ན་ཡང་དག་པར་

རྫོགས་པའི་སངས་རྒྱས་ཉིད་དུ་བལྟ་བར་བྱའོ། །དེ་ནི་དེ་བཞིན་གཤེགས་པ་སྐྱེས་བུ་འདུལ་བ། ཁ་ལོ་སྒྱུར་བ། འཇིག་རྟེན་དང་འཇིག་རྟེན་ལས་འདས་པའི་སྟོན་པ་ཆེན་པོ་ཡིན་པར་བལྟའོ། །སེམས་ཅན་ཐམས་ཅད་ཀྱི་
མགོན་དང་སྐྱབས་དང་། རྟེན་དང་། གླིང་དང་། དེད་དཔོན་དང་། འདྲེན་པ་དང་། སྒྲོལ་བའི་གྲུ་ལྟ་བུ་ཡིན་པར་ཤེས་པར་བྱའོ། །དེ་ནི་ཡེ་ཤེས་ཀྱི་སྒྲོན་མ་ཆེན་པོ་འཛིན་པ་སྟེ་དེ་བས་ན་སངས་རྒྱས་ཉིད་དུ་བལྟའོ། །དེ་བས་ན་བླ་མ་དེ་དང་
ཕྲད་པའི་གང་ཟག་རྣལ་འབྱོར་པ་དེས་ཀྱང་ཡང་དག་པར་རྫོགས་པའི་སངས་རྒྱས་ཉིད་དང་ཕྲད་པར་རིག་པར་བྱའོ། །སྨྲ་བའི་སེང་གེས་གསོལ་པ། བཅོམ་ལྡན་འདས་བླ་མ་རྡོ་རྗེ་སློབ་དཔོན་དེའི་རྗེས་སུ་འབྲང་ཞིང་གསང་བ་འདི་ལྟ་བུ་ལ་མོས་ཤིང་འཛིན་པ་
དང་། རྣ་བའི་དབང་པོས་ཉན་ཅིང་གཞུང་བཞིན་དུ་སྒྲུབ་པའི་གང་ཟག་རྣལ་འབྱོར་པ་དེའི་རྣམ་པར་སྨིན་པ་ནི་ཇི་ལྟ་བུ་ཞིག་བདག་ཅག་རྣམས་ཀྱིས་ཇི་ལྟར་འཚལ་བར་བགྱི། གསང་བ་མཆོག་གི་བདག་པོས་བཀའ་སྩལ་པ། བླ་མ་དེའི་རྗེས་
སུ་འབྲེང་ཞིང་གསང་བ་འདི་ལ་མོས་ཤིང་འཛིན་པ་དང་། རྣ་བའི་དབང་པོས་ཉན་ཅིང་གཞུང་བཞིན་དུ་སྒྲུབ་པའི་གང་ཟག་རྣལ་འབྱོར་པ་དེ་ནི་གང་ཟག་འབའ་ཞིག་མ་ལགས་ཏེ། ས་ལ་བསྙེན་པ་དང་། ས་ཐོབ་པའི་རྣལ་འབྱོར་པ་སྟེ། རིགས་ཀྱི་བུ་ཁྱེད་
རྣམས་ཀྱིས་ཀྱང་སྤུན་དང་གྲོགས་པོ་ལྟ་བུར་ཤེས་པར་བྱའོ། །གང་ཕྱོགས་བཅུ་དུས་བཞིའི་སངས་རྒྱས་ཇི་སྙེད་པ་རྣམས་ཀྱང་རྣལ་འབྱོར་པ་དེ་ལ་ཉེ་བའི་སྲས་དམ་པར་དགོངས་ཤིང་བྱིན་གྱིས་རློབ་པར་འགྱུར་རོ། །དེ་ཅིའི་ཕྱིར་ཞེ་ན། གང་ཟག་གསང་བ་འདི་
ནི་ཐོས་ཤིང་མོས་པའི་སྐལ་བ་དང་ལྡན་པ་ཡང་བསྐལ་པ་གྲངས་མེད་པའི་ཕ་མཐའ་ནས་ཚོགས་བསགས་ཤིང་སྦྱངས་པའི་མཐུས་དེས་ལྟར་འགྱུར་བར་རིག་པར་བྱའོ། །དེ་བས་ན་སྨྲ་བའི་སེང་གེ་ཁྱོད་ཉིད་ལ་སོགས་པའི་རྡོ་རྗེ་འཛིན་པ་རྣམས་དང་ཐ་མི་དད་

པར་རིག་པར་བྱའོ། །དེ་དག་གི་དངོས་གྲུབ་ཀྱང་ཚེ་འདི་ཉིད་ལ་འགྲུབ་ཅིང་གཞན་འཇིག་རྟེན་གྱི་མཐུ་ཆེན་རྣམས་ཀྱང་བཀའ་ཉན་ཅིང་ལས་བྱེད་པར་འགྱུར་རོ། །ཡང་སྨྲ་བའི་སེང་གེས་གསོལ་པ། བཅོམ་ལྡན་འདས་བླ་མ་རྡོ་རྗེ་སློབ་དཔོན་ཆེན་པོ་རྣལ་
འབྱོར་གྱི་འཁོར་དང་བཅས་པ་རྣམས་གསང་བའི་ཐེག་པ་འདི་ཉིད་ལ་མོས་ཤིང་དད་པའི་སེམས་ཀྱིས་གཡོ་སྒྱུ་དང་། གསོག་འཇོག་སྤངས་པའི་ཕྱི་རབས་ཀྱི་དད་པ་ཅན་གྱི་སྐྱེ་བོ་དེའི་རྣམ་པར་སྨིན་པ་ཅིར་འགྱུར། བདག་ཅག་ལ་སོགས་པ་རྣམས་ཀྱིས་ཇི་
ལྟར་བལྟ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དད་པ་ཅན་གྱི་སྐྱེ་བོ་བླ་མ་འཁོར་དང་བཅས་པ་གསང་བའི་ཐེག་པ་འདི་ཉིད་ལ་མོས་ཤིང་དད་པ་དང་རྣ་བའི་དབང་པོས་ཉན་ཅིང་གཡོ་སྒྱུ་དང་གསོག་འཇོག་སྤངས་པ་དེའི་རྣམ་
པར་སྨིན་པའི་ལེགས་པའི་ཡོན་ཏན་ཡང་བརྗོད་ཅིང་ཚད་གཟུང་བར་རབ་ཏུ་དཀའོ། །ལ་ལ་དག་གིས་སོ་སོ་སྐྱེ་བོ་སངས་རྒྱས་ཀྱི་ཞིང་ཡོངས་སུ་གང་བ་ལ་སྦྱིན་པ་བྱིན་པའམ། སྲོག་བཏོན་པའམ་དགེ་བ་བཅུ་དང་། ཚད་མེད་པ་བཞི་དང་། བསྡུ་བའི་
དངོས་པོ་བཞིས་རྒྱུའི་ཐེག་པའི་སྒོ་ནས་འགྲོ་བའི་དོན་བྱས་པ་བས་ནི་བླ་མ་འཁོར་དང་བཅས་པ་དང་གསང་བའི་ཐེག་པ་འདིའི་སྒོ་ནས་སྐད་ཅིག་ཙམ་འགྲོ་བ་གཅིག་གི་དོན་བྱས་པའི་བསོད་ནམས་ཀྱི་དགེ་བའི་རྩ་བ་འབུམ་གྱི་ཆ་ཡང་མི་ཕོད་དོ། །རིགས་ཀྱི་བུ་ལ་ལ་
དག་གིས་སངས་རྒྱས་ཀྱི་ཞིང་ཡོངས་སུ་གང་བའི་ཉན་ཐོས་སམ། རང་སངས་རྒྱས་སམ། བྱང་ཆུབ་སེམས་དཔའི་ཐེག་པ་དེ་སྙེད་ལ་རིམ་གྲོ་བཀུར་སྟི་ཚུལ་བཞིན་དུ་བསྐལ་པ་གྲངས་མེད་པའི་ཡུན་དུ་བྱས་པའི་བསོད་ནམས་ཀྱིས་ནི་གསང་བའི་ཐེག་པ་
འདི་ལ་གནས་པའི་གང་ཟག་རྣལ་འབྱོར་པ་གཅིག་ལ་ཐ་ན་དྲོ་གཅིག་གམ། སྐད་ཅིག་ཡུད་ཙམ་དུ་བཀུར་སྟི་ཚུལ་བཞིན་དུ་བྱས་པའི་བསོད་ནམས་ཀྱི་འབུམ་གྱི་ཆར་ཡང་མི་ཕོད་དོ། །དེ་ཅིའི་ཕྱིར་ཞེ་ན། དེ་ནི་གསང་བའི་ཐེག་པ་འདི་ཉིད་

ལས་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའི་ཐེག་པ་རྣམས་འབྱུང་ཞིང་གསང་བའི་ཐེག་པ་ཉིད་ལ་འགྲོ་བ་གཟུད་པའི་ཐབས་སུ་བསྟི་བའི་གནས་སུ་གསུངས་པ་ཡིན་གྱི་གཏན་དུ་གཞག་པའི་ས་ནི་མ་ཡིན་
ནོ། །དེ་བས་ན་ང་ཉིད་ཀྱི་སྤྲུལ་པ་བས་ཀྱང་ཆོས་རྣམ་པ་སྣ་ཚོགས་ཇི་ལྟར་འདུལ་བར་སྟོན་པ་ཡིན་ནོ། །དེ་བས་ན་གསང་སྔགས་ཀྱི་ཡོན་ཏན་ནི་བསམ་གྱིས་ཀྱང་མི་ཁྱབ་བོ། །རིགས་ཀྱི་བུ་གང་ཟག་ལ་ལ་དག་གིས་བསྐལ་པ་བརྗོད་དུ་མེད་པའི་
ཡང་བརྗོད་དུ་མེད་པར་རྒྱུའི་ཐེག་པའི་སྒོ་ནས་དགེ་བའི་རྩ་བ་རྒྱས་པར་སྤྱད་པ་བས་ནི་གསང་བའི་ཐེག་པ་འདིའི་དོན་སྐད་ཅིག་ཙམ་ཡིད་ལ་བྱས་པའི་བསོད་ནམས་ཁྱད་པར་དུ་འཕགས་ཏེ་འབུམ་གྱི་ཆར་ཡང་མི་ཕོད་དོ། །རིགས་ཀྱི་བུ་གང་ཟག་ལ་ལ་
ཞིག་གིས་བསྐལ་པ་གང་གཱའི་ཀླུང་གི་བྱེ་མ་སྙེད་དུ་སོ་སོའི་སྐྱེ་བོའམ། ཉན་ཐོས་སམ། རང་རྒྱལ་བའམ། བྱང་ཆུབ་སེམས་དཔས་སངས་རྒྱས་ཀྱི་ཞིང་ཡོངས་སུ་གང་བ་སྙེད་ལ་མེ་ཏོག་དང་། ཕྲེང་བ་དང་། བྱུག་སྤོས་དང་། བླ་བྲེ་
དང་། རྒྱལ་མཚན་དང་། བ་དན་དང་། ལྷབ་ལྷུབ་དང་། རོལ་མོའི་ཁྱད་པར་མང་པོ་ལ་སོགས་པས་སངས་རྒྱས་ཀྱི་ཞིང་ཡོངས་སུ་གང་བར་བྱས་ཏེ་ཕུལ་བ་བས་ཐ་ན་གསང་བའི་ཐེག་པ་ལ་གནས་པའི་རྣལ་འབྱོར་པ་གཅིག་ཙམ་ལའང་གཡོ་
སྒྱུ་དང་། གསོག་འཇོག་སྤངས་པའི་སྒོ་ནས་འདོད་པའི་ཡོན་ཏན་གྱི་ཚོགས་སྐད་ཅིག་ཙམ་བཏེག་ཅིང་ལོངས་སྤྱད་པའི་བསོད་ནམས་ཁྱད་པར་དུ་འཕགས་ཏེ་འབུམ་གྱི་ཆར་ཡང་མི་ཕོད་དོ། །དེ་ཅིའི་ཕྱིར་ཞེ་ན། སོ་སོའི་སྐྱེ་བོའམ། ཉན་ཐོས་སམ།
རང་སངས་རྒྱས་སམ། བྱང་ཆུབ་སེམས་དཔའི་བསོད་ནམས་དང་ཡེ་ཤེས་ཀྱི་ཕུང་པོ་དེ་དག་པས་གསང་བའི་ཐེག་པ་ལ་གནས་པ་གཅིག་གི་བ་སྤུའི་ཆ་གཅིག་གི་བསོད་ནམས་དང་། ཡེ་ཤེས་ཀྱི་ཕུང་པོ་ཁྱད་པར་དུ་འཕགས་ཏེ་འབུམ་གྱི་ཆར་ཡང་མི་

ཕོད་དོ། །དེ་བཞིན་དུ་གང་ཟག་ལ་ལ་ཞིག་གིས་མེ་ཏོག་ལ་སོགས་པས་སངས་རྒྱས་ཀྱི་ཞིང་ཡོངས་སུ་གང་བའི་བསོད་ནམས་དང་ཡེ་ཤེས་ཀྱི་ཕུང་པོ་གང་ཡིན་པས་འདོད་པའི་ཡོན་ཏན་ཚོགས་ཆེན་པོ་གཅིག་གི་རྡུལ་ཕྲ་རབ་ཀྱི་ཆ་ཙམ་གྱི་བསོད་ནམས་
དང་ཡེ་ཤེས་ཀྱི་ཕུང་པོ་གང་ཡིན་པ་དེ་བས་འདོད་པའི་ཡོན་ཏན་ཚོགས་ཆེན་པོ་གཅིག་གི་རྡུལ་ཕྲ་རབ་ཀྱི་ཆ་ཙམ་གྱི་བསོད་ནམས་དང་ཡེ་ཤེས་ཀྱི་ཕུང་པོ་ཁྱད་པར་དུ་འཕགས་ཏེ་འབུམ་གྱི་ཆར་ཡང་མི་ཕོད་དོ། །རིགས་ཀྱི་བུ་དེ་བས་ན་དད་པ་ཅན་གྱི་
སྐྱེ་བོ་གསང་བའི་ཐེག་པ་ཉིད་དང་། གསང་བའི་ཐེག་པ་ལ་གནས་པའི་བླ་མ་འཁོར་དང་བཅས་པ་ལ་དད་པའི་སེམས་ཀྱིས་གཡོ་སྒྱུ་དང་། གསོག་འཇོག་སྤངས་པའི་དེའི་བསོད་ནམས་དང་ཡེ་ཤེས་ཀྱི་ཕུང་པོ་ནི་ཚད་མེད་དོ། །དེ་བསོད་ནམས་
དང་ཡེ་ཤེས་ཀྱི་ཕུང་པོ་ནི་ཐམས་ཅད་མཁྱེན་པའི་སངས་རྒྱས་རྣམས་ཀྱིས་ཀྱང་བགྲང་བར་མི་ནུས་སོ། །དེ་ནས་སྨྲ་བའི་སེང་གེས་འདི་སྐད་ཅེས་གསོལ་ཏོ། །བཅོམ་ལྡན་འདས་གསང་སྔགས་ཀྱི་ཡོན་ཏན་ནི་ཚད་མ་མཆིས་སོ། །བདེ་བར་གཤེགས་
པ་ཚད་མ་མཆིས་ལགས་སོ། །བཅོམ་ལྡན་འདས་འོན་ཀྱང་བདག་ཅག་ལ་སོགས་པ་དང་། མ་འོངས་པའི་འགྲོ་བ་རྣམས་དྲང་བའི་སླད་དུ་སྔོན་འདས་པའི་ལོ་རྒྱུས་ཀྱི་གཏན་ཚིགས་རྣམས་ཞུ་བར་འཚལ་ན་གནང་བའི་སྐབས་དབྱེ་བར་གསོལ། གསང་
བ་མཆོག་གི་བདག་པོས་བཀའ་སྩལ་པ། སྨྲ་བའི་སེང་གེ་ཁྱོད་ང་ལ་ཞུ་བར་སྤོབས་ཀྱིས་ཅི་དང་ཅི་འདོད་པ་དྲིས་ཤིག་དང་ངས་ཁྱོད་ལ་བཤད་པར་བྱའོ། །དེ་ནས་སྨྲ་བའི་སེང་གེས་གསོལ་པ། བཅོམ་ལྡན་འདས་གསང་བའི་ཐེག་པ་འདི་རྣ་བའི་དབང་
པོས་ཐོས་པའི་ཡོན་ཏན་དང་རྣམ་པར་སྨིན་པ་ཇི་ལྟ་བུར་འགྱུར། གསང་བ་མཆོག་གི་བདག་པོས་བཀའ་སྩལ་པ། རིགས་ཀྱི་བུ་རྣམས་ཉོན་ཅིག །གསང་བའི་ཐེག་པ་འདི་རྣ་བའི་དབང་པོས་ཐོས་པའི་ཡོན་ཏན་ནི་མིང་ཙམ་ཐོས་པས་ཀྱང་ངན་

འགྲོ་ལས་སྐྱོབ་པར་འགྱུར་རོ། །དེ་ཡང་ཇི་ལྟར་ཡོངས་སུ་ཤེས་ཞེ་ན། སྔོན་འདས་པའི་དུས་དྲན་པ་ཐོག་མའི་ཚེ་གསང་བའི་ཐེག་པའི་ལྷའི་གནས་རིམ་པ་གསུམ་ན་ཚུལ་བཞིན་དུ་སྤྱོད་པ་ལས་འོད་ལྡན་ཞེས་བྱ་བའི་ལྷའི་བུ་
ཞིག་མི་རྟག་པའི་དུས་ལ་བབ་སྟེ་འཆི་བའི་སྔ་ལྟས་རྣམས་བྱུང་བར་གྱུར། དེ་རབ་ཏུ་མི་དགའ་བའི་འདུ་ཤེས་སུ་གྱུར་ནས་ཚེ་ཕྱི་མ་ལ་གང་དུ་སྐྱེ་སྙམ་པའི་འདུ་ཤེས་འབའ་ཞིག་སྐྱེས་པ་ལས། ལྷའི་བུ་དེ་ཉིད་མངོན་པར་ཤེས་པ་ལས་མི་གཙང་བ་ཟ་
བའི་བྱོལ་སོང་གི་རིགས་སུ་སྐྱེ་བར་མཐོང་སྟེ་ཤིན་ཏུ་འཇིགས་པའི་སེམས་སྐྱེས་ནས་མགོན་སྐྱབས་གཞན་མེད་པར་མཐོང་སྟེ་གསང་བའི་ཐེག་པའི་མཚན་ཐོས་ནས་དེ་བཞིན་དུ་ཡིད་ལ་དྲན་པར་བྱས་སོ། །དེའི་ཚེ་འོད་ལྡན་ཞེས་བྱ་བ་ལྷའི་བུ་དེ་ངན་
འགྲོའི་ལམ་དེ་ལས་གྲོལ་ཏེ་གསང་བའི་ཐེག་པ་འཛིན་པའི་གནས་ག་ལ་བ་དེར་སྐྱེས་སོ། །དེར་སྐྱེས་ནས་ཀྱང་ཚོགས་ཆེན་པོ་ལ་ལོངས་སྤྱོད་པ་སྐལ་བ་ཅན་དུ་གྱུར་པ་དེ་བཞིན་དུ་ཤེས་པར་བྱའོ། །ཡང་གསོལ་པ། གསང་བ་མཆོག་གི་བདག་པོ་
གསང་བའི་ཐེག་པ་འདི་ལ་དགའ་ཞིང་མོས་པ་དང་། འདུན་པ་སྐྱེས་པའི་གང་ཟག་དེ་ནི་རྣམ་པར་སྨིན་པའི་ཡོན་ཏན་ཇི་ལྟ་བུར་འགྱུར། ལུང་བསྟན་དུ་གསོལ། གསང་བ་མཆོག་གི་བདག་པོས་བཀའ་སྩལ་པ། གསང་བའི་ཐེག་པ་འདི་
ལ་དགའ་ཞིང་། མོས་པ་དང་འདུན་པ་སྐྱེད་པའི་གང་ཟག་དམ་པ་དེ་ནི་རིག་འཛིན་རྒྱལ་བའི་སྲས་དམ་པར་འགྱུར་བར་གདོན་མི་ཟའོ། །དེ་ཡང་ཇི་ལྟར་ཡོངས་སུ་ཤེས་ཞེ་ན། སྔོན་འདས་པའི་དུས་ང་དྲན་པ་ཐོག་མའི་ཚེ་བྲམ་ཟེ་རྒྱལ་བྱེད་ཅེས་
བྱ་བའི་བུ་བྱམས་ལྡན་ཞེས་བྱ་བ་ཞིག་གསང་བའི་ཐེག་པ་འདི་ལ་དགའ་ཞིང་མོས་ནས་འདུན་པ་སྐྱེས་ཏེ་གསང་བའི་ཐེག་པ་འདི་ཀུན་དུ་བཙལ་བས་རང་གི་སྒྲིབ་པའི་བག་ཆགས་སྟུག་པོས་གེགས་བྱས་ནས། རྙེད་པར་མ་གྱུར་ཏེ་ས་ཕྱོགས་ཤིན་ཏུ་ཡང་དབེན་

པ་ཅིག་ཏུ་འདུག་ནས་གསང་བ་ལ་རབ་ཏུ་གདུང་བའི་ཤུགས་ཀྱིས་ངུ་ཞིང་སྨྲེ་སྔགས་ཀྱི་ཚིག་འདི་སྐད་ཅེས་སྨྲས་སོ། །ཀྱེ་མའོ་བདག་གི་ལས་འདི་ཤིན་ཏུ་ཕམ། །ཐོག་མ་སྐྱེས་ནས་རྒས་བར་དུ། །འབད་དེ་གསང་བའི་དོན་བཙལ་ཡང་། །གསང་
བ་མ་རྙེད་ལས་རེ་ངན། །ད་ཡང་ཇི་ལྟར་བཙལ་ན་རྙེད། །བཙལ་ཡང་རྙེད་པར་མི་འགྱུར་ན། །ཐུགས་རྗེ་བདག་ལ་སྐྱབས་མཛོད་ཅིག །ཅེས་སྨྲས་ནས་ནམ་མཁའ་སྟོང་པ་ལས་ཆོ་འཕྲུལ་གྱི་སྒྲ་འདི་སྐད་ཅེས་གྲག་གོ། །བྲམ་ཟེའི་བུ་ནི་སྐལ་
ལྡན་ཁྱོད། །ཡིད་དམ་བརྟན་པ་ཤིན་ཏུ་ལེགས། །ཁྱོད་ནི་དོན་གྱི་སྐལ་བ་ཅན། །ཕྱོགས་བཅུ་དུས་བཞིའི་སངས་རྒྱས་ཀྱིས། །ཁྱོད་ལ་བྱིན་གྱིས་རློབ་པ་མཛོད། །རང་ཉིད་ལྟ་བ་མ་ཡེངས་པར། །བག་ཆགས་སྦྱངས་པའི་ཐབས་
དག་ལ། །མཁས་ཤིང་བརྩོན་པར་བྱ་དགོས་ཏེ། །རང་གི་ཁྲག་རྣམས་དྲངས་ནས་སུ། །དད་ཅིང་གཙང་བ་ཙནྡན་ཆུར། །དམིགས་ནས་རྒྱལ་བ་ཀུན་མཆོད་ན། །མྱུར་དུ་གསང་དོན་རྙེད་པར་འགྱུར། །ཞེས་བར་སྣང་
ལས་ལུང་བསྟན་པ་ཐོས་ནས་རབ་ཏུ་དགའ་བའི་སེམས་ཀྱིས་ལུས་ཀྱི་རྩ་རྣམས་ཁྲག་དྲངས་ནས་འཕགས་པ་རྣམས་ལ་མཆོད་པ་དེ་ཉིད་དུ་གསང་བའི་དོན་མཐོང་སྟེ། རིག་འཛིན་རྒྱལ་བའི་སྲས་དམ་པར་གྱུར་པ་དེ་བཞིན་ཤེས་པར་བྱའོ། །
དེ་ནས་ཡང་སྨྲ་བའི་སེང་གེས་གསོལ་པ། བཅོམ་ལྡན་འདས་གསང་བ་མཆོག་གི་བདག་པོས་གསང་བའི་ཐེག་པ་འདིའི་སྒོར་ཞུགས་ཤིང་ཚོགས་ཀྱི་དཀྱིལ་འཁོར་དམ་པ་མཐོང་བའི་གང་ཟག་དམ་པ་དེའི་འབྲས་བུ་ཇི་ལྟར་ལགས། ལུང་
བསྟན་དུ་གསོལ། བདེ་བར་གཤེགས་པས་ལུང་བསྟན་དུ་གསོལ། གསང་བ་མཆོག་གི་བདག་པོས་བཀའ་སྩལ་པ། གསང་བའི་ཐེག་པའི་སྒོར་ཞུགས་ཤིང་ཚོགས་ཀྱི་དཀྱིལ་འཁོར་དམ་པ་མཐོང་བའི་གང་ཟག་དེ་ནི་དངོས་གྲུབ་

ཏུ་གྱུར་ཏོ་འཚལ་ཐམས་ཅད་ཇི་ལྟར་འདོད་པ་བཞིན་ཐོབ་པར་འགྱུར་རོ། །དེ་ན་ཡང་ཇི་ལྟར་ཡོངས་སུ་ཤེས་ཞེ་ན། སྔོན་འདས་པའི་དུས་ང་དྲན་པ་ཐོག་མའི་ཚེ་ལྷའི་གནས་རིམ་པ་གསུམ་ན་གསང་བ་སྤྱོད་པ་ལས་དགེ་བའི་རྒྱལ་པོ་
བཀོད་པ་ཞེས་བྱ་བའི་ལྷའི་བུ་ཞིག་ཚོམ་བུ་འབུམ་དང་བཅས་ནས་གསང་བ་རྒྱ་ཆེར་སྤྱོད་པ་ལས་རིན་ཆེན་འོད་ལྡན་ཞེས་བྱ་བའི་ལྷའི་བུ་ཞིག་གསང་སྔགས་རྒྱ་ཆེར་སྤྱོད་པ་དེ་ཉིད་ལ་ཤིན་ཏུ་དད་པ་སྐྱེས་པ་ལས་ཡོ་བྱད་ཕུན་སུམ་ཚོགས་པ་དང་བཅས་པ་གསང་བའི་
གནས་དེར་ཕྱིན་ཏེ་གསང་བའི་སྒོར་ཞུགས་ནས་ཚོགས་ཀྱི་དཀྱིལ་འཁོར་ཆེན་པོ་ཡང་མཐོང་བར་བྱས་ཏེ་དེ་ཉིད་ཀྱི་དུས་ཀྱི་ཚེ་དག་ཏུ་དངོས་གྲུབ་ཏུ་གྱུར་ཏོ་འཚལ་བ་ཐམས་ཅད་ཇི་ལྟར་བསམས་པ་བཞིན་དུ་ཐོབ་པར་གྱུར་པ། དེ་བཞིན་དུ་ཤེས་པར་བྱའོ། །དེ་
ནས་སྨྲ་བའི་སེང་གེས་གསོལ་པ། གསང་བའི་ཐེག་པ་འདི་མངོན་དུ་སྤྱོད་པའི་རྣལ་འབྱོར་པ་གང་ཞིག་ལ་དགའ་བའི་ཡིད་ཀྱིས་མངོན་དུ་ཕྱོགས་པ་དེའི་འབྲས་བུ་ཇི་ལྟ་བུར་འགྱུར་བ་ལུང་བསྟན་དུ་གསོལ། གསང་བ་མཆོག་གི་བདག་པོས་བཀའ་སྩལ་པ།
སྨྲ་བའི་སེང་གེ་གཞན་ཡང་གསང་བའི་ཐེག་པ་སྤྱོད་པ་ལ་མངོན་དུ་ཕྱོགས་པའི་གང་ཟག་དེའི་རྣམ་པར་སྨིན་པ་ནི་གསང་བ་དངོས་སུ་སྤྱོད་པའི་རྣལ་འབྱོར་པ་དེ་དང་འདྲ་བར་ཐོབ་པར་འགྱུར་རོ། །དེ་ཡང་ཇི་ལྟར་ཡོངས་སུ་ཤེས་ཞེ་ན། སྔོན་འདས་པའི་
དུས་ང་དྲན་པ་ཐོག་མའི་ཚེ་རྒྱལ་པོ་དབང་ཕྱུག་འོད་ལྡན་ཞེས་བྱ་བའི་རྣལ་འབྱོར་པ་ཞིག་ཚོམ་བུ་འབུམ་དང་བཅས་ནས་སྔགས་ཀྱི་སྤྱོད་པ་ལ་རྒྱ་ཆེར་ཞུགས་ཏེ་འབྲས་བུ་ངོ་མཚར་རྨད་དུ་བྱུང་བ་ཐོབ་པར་ཀུན་དུ་གྲགས་པ་ལས། གཞན་གྱི་སྡེ་པ་བྲམ་ཟེ་དགེ་
སློང་བྱ་བ་ཞིག་ཤིན་ཏུ་དགའ་བའི་སེམས་སྐྱེས་ནས་འབྱོར་པའི་ཡོ་བྱད་མང་པོ་དང་བཅས་ནས་ཚོགས་ཀྱི་དཀྱིལ་འཁོར་དེ་ཉིད་དུ་འཇུག་པར་གསོལ་བ་བཏབ་པ་ལས་རྒྱལ་པོས་མ་གནང་སྟེ་གསང་སྒོ་བསྡམས་སོ། །བྲམ་ཟེ་དེ་དད་པ་མ་ལོག་པར་འབྱོར་

པའི་ཡོ་བྱད་ཅི་ཡོད་པ་རྒྱལ་པོའི་སྤྱན་སྔར་ཕུལ་ཏེ་རྒྱལ་པོ་གནས་པའི་ཡུལ་ཕྱོགས་སུ་ཡིད་ཀྱིས་ཕྱོགས་ཏེ་སྨོན་ལམ་བཏབ་ཅིང་རྗེས་སུ་ཡི་རང་བར་བྱས་སོ། །དེའི་རྣམ་པར་སྨིན་པས་རྒྱལ་པོ་དང་བྲམ་ཟེ་གཉིས་འབྲས་བུ་མཐོ་དམན་མེད་པར་ཐོབ་པ་བཞིན་དུ་
ཤེས་པར་བྱའོ། །ཡང་སྨྲ་བའི་སེང་གེས་གསོལ་པ། གསང་བའི་ཐེག་པ་འདིའི་བསླབ་པ་མཐར་ཕྱིན་པ་འདི་ཡོན་ཏན་གྱི་ཁྱད་པར་ཇི་ལྟ་བུ་ལགས། གསང་བ་མཆོག་གི་བདག་པོས་བཀའ་སྩལ་པ། གསང་བའི་ཐེག་པ་འདི་འདིའི་བསླབ་པ་
མཐར་ཕྱིན་པའི་ཆེ་བའི་ཁྱད་པར་གྱིས་ཐེག་པ་མཐའ་དག་གི་བསླབ་པ་ཡང་མཐར་ཕྱིན་ཅིང་ལུང་བསྟན་པ་ཡང་ཐོབ་པར་འགྱུར་རོ། །དེ་ཡང་ཇི་ལྟར་ཡོངས་སུ་ཤེས་ཞེ་ན། སྔོན་འདས་པའི་དུས་སུ་ང་དྲན་པ་ཐོག་མའི་ཚེ་བྲམ་ཟེའི་བུ་གསལ་སྦྱིན་ཞེས་
བྱ་བས་གསང་བ་ཆེན་པོ་འདིའི་བསླབ་པ་མཐར་ཕྱིན་ཏེ། རང་གི་སེམས་གོམས་པར་བྱས་པས་ཐེག་པ་མཐའ་དག་གི་བསླབ་པ་མཐར་ཕྱིན་ཅིང་། དེ་ཉིད་དུ་བར་སྣང་ལས་ལུང་བསྟན་པའི་སྒྲ། རིགས་ཀྱི་བུ་ཁྱོད་དུས་ཕྱི་མའི་ཚེ་ཆོས་ཀྱི་རྒྱལ་པོ་ཆེན་
པོར་གྱུར་ནས། ཞིང་ཁམས་རྣམ་པར་དག་པ་ཞེས་བྱ་བར་སངས་རྒྱས་ནས། སྨྲ་བའི་སེང་གེ་ཞེས་བྱ་བར་གྲགས་པར་འགྱུར་རོ་ཞེས་བྱ་བར་ལུང་བསྟན་པ་དེ་བཞིན་དུ་ཤེས་པར་བྱའོ། །ཡང་སྨྲ་བའི་སེང་གེས་གསོལ་པ། ཚོགས་ཆེན་པོ་གཅིག་
གི་བསོད་ནམས་ཀྱི་ཁྱད་པར་ཇི་ལྟ་བུ་ལགས། གསང་བ་མཆོག་གི་བདག་པོས་བཀའ་སྩལ་པ། སྨྲ་བའི་སེང་གེ་སོ་སོའི་སྐྱེ་བོའམ། ཉན་ཐོས་སམ། རང་སངས་རྒྱས་སམ། ས་ལ་གནས་པའི་བྱང་ཆུབ་སེམས་དཔའ་སངས་རྒྱས་ཀྱི་ཞིང་
ཡོངས་སུ་གང་བ་སྙེད་ལ་སྦྱིན་མཆོད་སངས་རྒྱས་ཀྱི་ཞིང་བྱུར་བུར་གཏམས་པས་བསྐལ་པའམ། བསྐལ་པ་གྲངས་མེད་པར་བྱིན་པའི་བསོད་ནམས་ཀྱིས་ནི་རྣལ་འབྱོར་གཅིག་ལ་ཚོགས་གཅིག་སྐད་ཅིག་ཏུ་མཆོད་པ་རྒྱ་ཆེར་བྱས་པའི་བསོད་ནམས་དང་ཡེ་ཤེས་

ཀྱི་ཚོགས་འབུམ་གྱི་ཆར་ཡང་མི་ཕོད་དོ། །དེ་ཡང་ཇི་ལྟར་ཡོངས་སུ་ཤེས་ཞེ་ན། སྔོན་འདས་པའི་དུས་ནང་དྲན་པ་ཐོག་མའི་ཚེ་ལས་དག་པའི་བྲམ་ཟེའི་བུ་གསལ་ལྡན་ཞེས་བྱ་བ་ཞིག་གསང་བའི་ཐེག་པ་འདི་ལ་དད་པར་འགྱུར་རོ། །
བྲམ་ཟེའི་བུ་དགེ་ལྡན་ཞེས་བྱ་བ་ཞིག་ནི་རྒྱུའི་ཐེག་པ་ལ་དད་པར་འགྱུར་རོ། །དེའི་ཚེ་བྲམ་ཟེའི་བུ་དེ་གཉིས་ཐ་ཚིག་བཅས་ཏེ། དགེ་ལྡན་གྱིས་མཆོད་སྦྱིན་བཟང་པོ་རྒྱ་ཆེར་སྤེལ་ལོ། །གསལ་ལྡན་གྱིས་ནི་ཚོགས་མཆོད་རྒྱ་ཆེར་བྱས་སོ། །དེ་
གཉིས་ཀྱི་འབྲས་བུའི་ཁྱད་པར་ནི། སྔགས་སྤྱོད་པའི་བྲམ་ཟེ་གསལ་ལྡན་ནི་ཚེ་དེ་ཉིད་ལ་མངོན་པར་རྫོགས་པར་སངས་རྒྱས་པར་གྱུར་ཏོ། །རྒྱུའི་ཐེག་པ་ལ་སྤྱོད་པའི་དགེ་ལྡན་ནི། བསྐལ་པ་གྲངས་མེད་པ་གསུམ་དུ་དཀའ་བ་བྱས་ནས། འབྲས་
བུ་ཐོབ་པ་དེ་བཞིན་དུ་ཤེས་པར་བྱའོ། །ཡང་སྨྲ་བའི་སེང་གེས་གསོལ་པ། གསང་བའི