Kinh tạng Tây Tạng (Kangyur Đại Học) — 097_རྙིང་རྒྱུད།_ཀ

ང་། བརྩོན་འགྲུས་ཀྱིས་མཛེས་པའི་ཕྱིར་རྒྱན་ཆེན་པོས་རྣམ་པར་བཀོད་པར་དགོངས་པའོ། །ལང་ཀའི་བདག་པོ་གཞན་ཡང་སྐུ་
དང་། གསུང་དང་། ཐུགས་དང་། ཡོན་ཏན་དང་། ཕྲིན་ལས་ཀྱིས་བསྒྱིངས་པའི་ཕྱིར་ཆ་ལུགས་ཆེན་པོས་བརྗིད་པར་དགོངས་པའོ། །ལང་ཀའི་བདག་པོ་གཞན་ཡང་མཚན་གྱི་མེ་ཏོག་གིས་མཛེས་ཤིང་དཔེ་བྱད་ཀྱི་འབྲུས་སྤྲས་པའི་ཕྱིར་སྲས་ཀྱི་
ཚོགས་ཀྱིས་ཀུན་ནས་བརྒྱན་པའོ། །ལང་ཀའི་བདག་པོ་གཞན་ཡང་ཏིང་ངེ་འཛིན་དང་། རྩོལ་བ་དང་། ངག་དང་། རྟོག་པ་དང་། ལས་ཀྱི་མཐའ་དང་། ལྟ་བ་དང་། འཚོ་བ་དང་དྲན་པས་འཁྱིལ་བའི་ཕྱིར་བཀྲ་ཤིས་འཁྱིལ་པས་འབར་བར་དགོངས་

པའོ། །ལང་ཀའི་བདག་པོ་དེ་དག་ནི་གང་སྣང་བར་མཛད་པའི་ཆོ་འཕྲུལ་ཞེས་བྱ་སྟེ། དེ་དག་ནི་དེ་ཁོ་ན་ཉིད་དུ་སོ་སོར་མ་འདྲེས་པར་གཅིག་ཏུ་ཡོངས་སུ་འགྲེལ་ཏོ། །གསང་བ་པའི་བདག་པོས་དེ་སྐད་ཅེས་སྨྲས་པས། ལང་ཀའི་བདག་པོ་ལ་
སོགས་པ་དམན་པའི་ལུས་ཀྱི་སེམས་དཔའ་རྣམས་ཆོས་ཐམས་ཅད་ཆོ་འཕྲུལ་གྱི་རྣམ་པར་སྣང་བ་ཙམ་དུ་མཐོང་བར་གྱུར་ཏོ། །དེ་ནས་ཡང་གསང་བ་པའི་བདག་པོས་སྨྲས་པ། ལང་ཀའི་བདག་པོ་གང་དུ་རྣམ་པར་བསྒྱུར་བའི་ཆོ་འཕྲུལ་ནི་འདི་ལྟ་སྟེ།
རྣམ་པར་རྟོག་པའི་རི་བོ་བཅུའོ། །བཅུ་གང་ཞེ་ན། འདི་ལྟ་སྟེ། སྦྱོར་བའི་རྟོག་པ་དང་། ཞེན་པའི་རྟོག་པ་དང་། དངོས་གཞིའི་རྟོག་པ་དང་། སྐྱེད་པའི་རྟོག་པ་དང་། རྐྱེན་གྱི་རྟོག་པ་དང་། ལས་ཀྱི་རྟོག་པ་དང་། མཚན་མའི་རྟོག་པ་དང་། མངོན་
པའི་རྟོག་པ་དང་། སྤྱོད་པའི་རྟོག་པ་དང་། རྟགས་ཀྱི་རྟོག་པའོ། །ལང་ཀའི་བདག་པོ་རྩ་བའི་རྟོག་པ་འདི་བཅུ་ལས་རྟོག་པའི་རི་བོ་དགུ་བཅུའམ། བརྒྱད་ཅུ་རྩ་གཅིག་གིས་རྣལ་འབྱོར་གྱི་ལམ་དམ་པ་རྣམ་པར་བཅད་པས་བགྲོད་པར་དཀའ་བའི་ཕྱིར་
ཡོངས་སུ་སྦྱང་བར་བྱ་བ་ལ་བརྩོན་པར་བྱའོ། །ལང་ཀའི་བདག་པོ་དགུ་གང་ཞེ་ན། འདི་ལྟ་སྟེ། མིང་གི་རྟོག་པ་དང་། མཚན་མའི་རྟོག་པ་དང་། བརྡའི་རྟོག་པ་དང་། ཐ་སྙད་ཀྱི་རྟོག་པ་དང་། ཡོད་པའི་རྟོག་པ་དང་། མེད་པའི་རྟོག་པ་དང་། ཐེ་ཚོམ་
གྱི་རྟོག་པ་དང་། ངེས་པ་འཇོག་པའི་རྟོག་པ་དང་། དཔྱོད་པའི་རྟོག་པ་སྟེ། འདི་དག་ནི་རྣམ་པ་བཅུར་འགྱུར་བའི་རྒྱུར་གྱུར་པས་རི་བོ་བཅུ་དགུ་པའོ། །ལང་ཀའི་བདག་པོ་བཅྭ་བརྒྱད་པ་དང་གཅིག་པ་གང་ཞེ་ན། འདི་ལྟ་སྟེ། གསུམ་གསུམ་དུ་གསུམ། ལྔ་
གསུམ་དུ་བཞི། བཞི་གཅིག་ཏུ་ལྔ། དྲུག་གཅིག་ཏུ་དྲུག །གསུམ་གཅིག་ཏུ་བདུན། ལྔ་གཉིས་དང་དྲུག་གཅིག་ཏུ་བརྒྱད། བཅུ་གཉིས་གཅིག་ཏུ་དགུ། བདུན་གཅིག་ཏུ་བཅུ་སྟེ། དེ་ལྟར་སྤྱིར་བཅྭ་བརྒྱད་དེ། བརྟགས་པ་ནི་རྟོག་པ་གཅིག་

པའོ། །ལང་ཀའི་བདག་པོ་དེ་ལ་སྦྱོར་བའི་རྟོག་པ་གང་ཞེ་ན། འདི་ལྟ་སྟེ། མི་རྟོག་པ་དང་། མ་རྨོངས་པ་དང་། མི་འགོག་པའོ། །ལང་ཀའི་བདག་པོ་ཞེན་པའི་རྟོག་པ་གང་ཞེ་ན། འདི་ལྟ་སྟེ། མི་དམིགས་པ་དང་། མ་གྲུབ་པ་དང་། མ་སྐྱེས་པའོ། །
ལང་ཀའི་བདག་པོ་དངོས་གཞིའི་རྟོག་པ་གང་ཞེ་ན། འདི་ལྟ་སྟེ། རྒྱུ་གཅིག་པ་དང་། སྤྱོད་པ་གཅིག་པ་དང་། རང་བཞིན་གཅིག་པའོ། །ལང་ཀའི་བདག་པོ་སྐྱེད་པའི་རྟོག་པ་གང་ཞེ་ན། འདི་ལྟ་སྟེ། གང་གྱུར་པ་དང་། གང་ལ་གྱུར་པ་དང་། གང་གི་ཕྱིར་གྱུར་
པ་དང་། གང་གིས་གྱུར་པའོ། །ལང་ཀའི་བདག་པོ་གང་གྱུར་པ་ནི་འདི་ལྟ་སྟེ། ངང་གིས་གྱུར་པ་དང་། ཤུགས་ཀྱིས་གྱུར་པ་དང་། གྱུར་པ་དང་བཅས་པ་དང་། གྱུར་པར་བཅོས་པའོ། །ལང་ཀའི་བདག་པོ་གང་ལ་གྱུར་པ་ནི་འདི་ལྟ་སྟེ། ཡུལ་ལ་གྱུར་པ་
དང་། གནས་ལ་གྱུར་པ་དང་། གྱུར་པའི་ལས་དང་། གྱུར་པའི་འབྲས་བུའོ། །ལང་ཀའི་བདག་པོ་གང་གི་ཕྱིར་གྱུར་པ་ནི་འདི་ལྟ་སྟེ། རྒྱུའི་ཕྱིར་གྱུར་པ་དང་། འབྲས་བུའི་ཕྱིར་གྱུར་པའོ། །ལང་ཀའི་བདག་པོ་གང་གིས་གྱུར་པ་ནི་འདི་ལྟ་སྟེ། རྒྱུ་ཡིས་གྱུར་
པ་དང་། གནས་ཀྱིས་གྱུར་པ་དང་། ཐབས་ཀྱིས་གྱུར་པ་དང་། ལས་ཀྱིས་གྱུར་པ་དང་། འབྲས་བུས་གྱུར་པའོ། །ལང་ཀའི་བདག་པོ་རྐྱེན་གྱི་རྟོག་པ་གང་ཞེ་ན། འདི་ལྟ་སྟེ། བརྫིས་པ་དང་། བཤིག་པ་དང་། ཟ་བ་དང་། སྟོབས་པའོ། །ལང་ཀའི་
བདག་པོ་ལས་ཀྱི་རྟོག་པ་གང་ཞེ་ན། འདི་ལྟ་སྟེ། སྡུད་པའི་ལས་དང་། བདེ་བའི་ལས་དང་། སྣང་བའི་ལས་དང་། མཐའ་ཡས་པའི་ལས་དང་། ཐོགས་པ་མེད་པའི་ལས་དང་། མི་སྐྱོར་བའི་ལས་སོ། །ལང་ཀའི་བདག་པོ་མཚན་མའི་རྟོག་པ་གང་ཞེ་ན།
འདི་ལྟ་སྟེ། མི་འདའ་བ་དང་། རོལ་པ་དང་། ཆེ་བའོ། །ལང་ཀའི་བདག་པོ་དེ་ལ་མི་འདའ་བ་གང་ཞེ་ན། འདི་ལྟ་སྟེ། གདུལ་བྱ་ལས་མི་འདའ་བ་དང་། རང་བཞིན་ལས་མི་འདའ་བ་དང་། ཤེས་རབ་ལས་མི་འདའ་བ་དང་། ཐབས་ལས་མི་འདའ་བ་དང་།

ཐུགས་དམ་ལས་མི་འདའ་བ་དང་། ཐུགས་རྗེ་ལས་མི་འདའ་བ་དང་། དམ་པ་ལས་མི་འདའ་བ་དང་། ཕྲིན་ལས་ལས་མི་འདའ་བ་དང་། ཡེ་ཤེས་ལས་མི་འདའ་བ་དང་། ཆོས་ཉིད་ལས་མི་འདའ་བ་དང་། དགོངས་པ་ལས་མི་འདའ་བ་འདའ་བའོ། །
ལང་ཀའི་བདག་པོ་རོལ་པ་གང་ཞེ་ན། འདི་ལྟ་སྟེ། གྲུབ་པ་དང་། མཛད་པའོ། །གྲུབ་པ་གང་ཞེ་ན། འདི་ལྟ་སྟེ། མ་སྐྱེས་པ་དང་། མ་རྨོངས་པ་དང་། མི་གཡོ་བ་དང་། མ་འགགས་པ་དང་། མ་ཆགས་པ་དང་། མ་བཅིངས་པ་དང་། མི་སྐྱོར་
པ་དང་། མི་ཐོགས་པ་དང་། མ་ལུས་པ་དང་། མི་བགྲོད་པའོ། །ལང་ཀའི་བདག་པོ་མཛད་པ་གང་ཞེ་ན། འདི་ལྟ་སྟེ། གདུལ་བྱའི་གཟིགས་པར་མཛད་པ་དང་། སྤྲུལ་པ་འགྱེད་པར་མཛད་པ་དང་། ཅི་གསོལ་གསན་པར་མཛད་པ་དང་། མགོན་སྐྱབས་
དམ་པར་མཛད་པ་དང་། དུག་ཆེན་ཟད་པར་མཛད་པ་དང་། ཐེག་མཆོག་སྟོན་པར་མཛད་པ་དང་། སྐྱེ་བཞི་གཅོད་པར་མཛད་པ་དང་། རྒྱུད་དྲུག་འདོན་པར་མཛད་པ་དང་། མཐའ་དྲུག་རྫོགས་པར་མཛད་པ་དང་། ལས་བཞེས་སྒྲོལ་བར་མཛད་པའོ། །ལང་ཀའི་
བདག་པོ་ཆེ་བ་གང་ཞེ་ན། འདི་ལྟ་སྟེ། གཉེན་པོ་མེད་པའི་ཆེ་བ་དང་། འགྲན་ཟླ་མེད་པའི་ཆེ་བ་དང་། ཁྱད་པར་དུ་འཕགས་པའི་ཆེ་བ་དང་། ཆེ་བཙན་གཅིག་པུའི་ཆེ་བ་དང་། ཚམ་ངམ་རླབས་ཀྱི་ཆེ་བ་དང་། རྨད་དུ་བྱུང་བའི་ཆེ་བ་དང་། ཐམས་ཅད་
དུ་མ་ཕམ་པའི་ཆེ་བ་དང་། མངའ་དབང་རྫོགས་པའི་ཆེ་བ་དང་། ཀུན་ལས་རྒྱལ་བའི་ཆེ་བ་དང་། ཡོངས་སུ་མི་ནུབ་པའི་ཆེ་བའོ། །ལང་ཀའི་བདག་པོ་མངོན་པའི་རྟོག་པ་གང་ཞེ་ན། འདི་ལྟ་སྟེ། སྐུའི་རྔོམ་སྤྱོམ་གྱིས་བྱེ་བ་ས་ཡར་མངོན་པ་དང་། གསུང་
གི་རྔོམ་སྤྱོམ་བསྟན་པ་རྒྱ་མཚོར་མངོན་པ་དང་། ཐུགས་ཀྱི་རྔོམ་སྤྱོམ་ཆོས་ཉིད་ནམ་མཁའ་མངོན་པ་དང་། མཐུའི་རྔོམ་སྤྱོམ་ནམ་མཁའི་དབྱིངས་ལྟར་མངོན་པའོ། །ལང་ཀའི་བདག་པོ་དེ་དག་ཀྱང་ཚུལ་བཅུ་དང་དྲུག་གིས་རྫོགས་པར་འགྱུར་ཏེ། དེ་ཡང་

གང་ཞེ་ན། འདི་ལྟ་སྟེ། ཇི་ལྟར་སྣང་བའི་རི་བོ་ལྟ་བུའི་ཚུལ་དང་། ཅིར་ཡང་འགྱུར་བ་གར་ཐབས་ལྟ་བུའི་ཚུལ་དང་། ཟིལ་གྱིས་ནོན་པ་ཁྱད་པར་དུ་བྱུང་བའི་ཚུལ་དང་། ཚམ་ངམ་ཆེན་པོའི་སྟོབས་རྔམས་སུ་འགྱིང་བའི་ཚུལ་དང་། གང་དུ་རྔུབ་པ་ཞལ་གྱི་
ཚུལ་དང་། ཅིར་ཡང་འགྱུར་བ་ལྗགས་ཀྱི་ཚུལ་དང་། ཡོངས་སུ་གཅོད་པ་ཚེམས་ཀྱི་ཚུལ་དང་། གོ་བར་སྒྲོགས་པ་འབྲུག་སྒྲ་སྒྲོགས་པའི་ཚུལ་དང་། དགོངས་པ་ནམ་མཁའི་སྐར་ཚོགས་ལྟ་བུའི་ཚུལ་དང་། ཕྲིན་ལས་རྒྱ་མཚོ་དབའ་རླབས་ལྟ་བུའི་ཚུལ་དང་། ཡོན་
ཏན་ས་གཞི་རྩི་ཤིང་ལྟ་བུའི་ཚུལ་དང་། ཐུགས་རྗེ་གར་གྱི་ཕྲེང་བ་ལྟ་བུའི་ཚུལ་དང་། གནས་ཀྱི་ཁྱད་པར་འབྱུང་ཞིང་སྡུད་པ་དུར་ཁྲོད་ཀྱི་ཚུལ་དང་། གནོན་པའི་ཁྱད་པར་སྤ་བཀོང་བའི་ཚུལ་དང་། ཞིང་གི་ཁྱད་པར་བླ་ན་མེད་པའི་ཚུལ་དང་། སྤྱོད་པའི་
ཁྱད་པར་ཅིག་ཅར་གྲུབ་ལ་མི་སྐྱོར་བའི་ཚུལ་ལོ། །ལང་ཀའི་བདག་པོ་སྤྱོད་པའི་རྟོག་པ་གང་ཞེ་ན། འདི་ལྟ་སྟེ། སྐུའི་གཟི་བརྗིད་སེང་གེའི་འབུམ་གཟུགས་ལྟ་བུ་དང་། གསུང་གི་གཟི་བརྗིད་འབྲུག་སྟོང་ལྡིར་བ་ལྟ་བུ་དང་། ཐུགས་ཀྱི་གཟི་བརྗིད་ནམ་མཁའི་
གཏོས་ཆེན་ལྟ་བུ་དང་། ཡོན་ཏན་གྱི་གཟི་བརྗིད་ནོར་བུ་རིན་པོ་ཆེ་ལྟ་བུ་དང་། ཕྲིན་ལས་ཀྱི་གཟི་བརྗིད་ཆེན་པོའི་དཀྱིལ་འཁོར་ལྟ་བུ་སྟེ། ལང་ཀའི་བདག་པོ་དེ་དག་ནི་གཟི་བརྗིད་བཅུ་གཉིས་ཀྱིས་རྫོགས་པ་ཡིན་ཏེ། དེ་ཡང་གང་ཞེ་ན། འདི་ལྟ་སྟེ། སྐུ་ཆེ་ཡན་
ལག་རགས་པའི་གཟི་བརྗིད་དང་། གྲངས་མང་རྐྱེན་དང་འཚམ་པའི་གཟི་བརྗིད་དང་། བཀུར་འོས་གཙོ་བོར་མཐོང་བའི་གཟི་བརྗིད་དང་། ཁྱད་ཞུགས་ཡིད་དང་འཐད་པའི་གཟི་བརྗིད་དང་། གདངས་ཆེན་སྟོང་གསུམ་གང་བའི་གཟི་བརྗིད་དང་། ཚིག་མྱུར་ཐེ་
ཚོམ་གཅོད་པའི་གཟི་བརྗིད་དང་། བདག་ལ་ཉི་ཚེར་སྟོན་པའི་གཟི་བརྗིད་དང་། ཁྱད་པར་ཡོན་ཏན་མཐོང་བའི་གཟི་བརྗིད་དང་། ཡངས་པས་རེ་དོགས་མེད་པའི་གཟི་བརྗིད་དང་། གསལ་བས་མཐའ་གཉིས་སྤངས་པའི་གཟི་བརྗིད་དང་། ཐུགས་རྗེ་ཐུགས་དམ་

རྫོགས་པའི་གཟི་བརྗིད་དང་། མ་རྨོངས་ཐབས་ཀྱིས་འདུལ་བའི་གཟི་བརྗིད་དང་། མེད་ལ་ཟད་མི་ཤེས་པའི་གཟི་བརྗིད་དང་། གཅིག་ལ་འདོད་དགུར་སྟོན་པའི་གཟི་བརྗིད་དང་། གནོད་སྦྱོར་ཕན་པར་མཛད་པའི་གཟི་བརྗིད་དང་། ཐབས་མཁས་
སྐྱོན་གྱིས་མ་གོས་པའི་གཟི་བརྗིད་དང་། མི་བསྙེངས་ཉམ་བག་རོལ་བའི་གཟི་བརྗིད་དང་། འཁོར་བར་ཡུན་རིངས་མི་བསྙེལ་བའི་གཟི་བརྗིད་དང་། མགོན་སྐྱབས་རྒྱུན་དུ་མཛད་པའི་གཟི་བརྗིད་དང་། དགོངས་དོན་ལྷུན་གྱིས་གྲུབ་པའི་གཟི་བརྗིད་དོ། །ལང་
ཀའི་བདག་པོ་རྟགས་ཀྱི་རྟོག་པ་གང་ཞེ་ན། འདི་ལྟ་སྟེ། ཆོས་ཀྱི་རྒྱལ་པོ་བསྙེངས་པ་མི་མངའ་བའི་དབང་ཆེན་པོ་བརྙེས་པའི་རྟགས་དང་། ཉམ་བག་ཆེན་པོ་རོལ་པའི་རྟགས་དང་། གང་གི་དཔུང་གིས་མི་བསྙེངས་པའི་རྟགས་དང་། ཡུན་གྱི་དོན་སྲིད་
བརྙེས་པའི་རྟགས་དང་། སྟོབས་ཀྱིས་གཞན་གང་གནོན་པའི་རྟགས་དང་། རྫུ་འཕྲུལ་གྱིས་མི་གནས་པར་སྐྱོད་པའི་རྟགས་དང་། མི་ཟད་པའི་མཛོད་མངའ་བའི་རྟགས་ཏེ། ལང་ཀའི་བདག་པོ་དེ་ལ་མངའ་དབང་ཆེན་པོ་བརྙེས་པའི་རྟགས་ནི་འདི་ལྟ་
སྟེ། གང་དབང་བཅུ་ཡོངས་སུ་རྫོགས་པའོ། །བཅུ་གང་ཞེ་ན། སྐྱེ་བ་དང་། ཡོ་བྱད་དང་། མོས་པ་དང་། རྫུ་འཕྲུལ་དང་། ཆོས་དང་། ཡེ་ཤེས་དང་། སེམས་དང་། ཚེ་དང་། ལས་དང་། སྨོན་ལམ་ལ་དབང་བའོ། །ལང་ཀའི་བདག་པོ་ཉམ་
བག་ཆེན་པོར་རོལ་པའི་རྟགས་གང་ཞེ་ན། འདི་ལྟ་སྟེ། ཕྱག་རྒྱ་བཞི་ལ་རོལ་བ་སྟེ། སྐུའི་མཉམ་པ་ཉིད་དང་། ཐུགས་ཀྱི་ཐིགས་པ་དང་། གསུང་གི་འགྲེལ་པ་དང་། ཕྲིན་ལས་ཀྱི་རླབས་ལ་རོལ་བའོ། །ལང་ཀའི་བདག་པོ་གང་གི་དཔུང་གིས་མི་
བསྙེངས་པའི་རྟགས་ནི་འདི་ལྟ་སྟེ། སྒེག་པའི་ཚུལ་དང་། དཔའ་བོའི་ཚུལ་དང་། འཇིགས་པའི་ཚུལ་དང་། གཤེ་བའི་ཚུལ་དང་། བཞད་པའི་ཚུལ་དང་། སྙིང་རྗེའི་ཚུལ་དང་། རྔམ་པའི་ཚུལ་དང་། ངོ་མཚར་བའི་ཚུལ་དང་། ཞི་བའི་ཚུལ་ལོ། ལང་

ཀའི་བདག་པོ་ཡུན་གྱི་དོན་སྲིད་བརྙེས་པའི་རྟགས་ནི་འདི་ལྟ་སྟེ། བྱམས་པའི་བློ་དང་། སྙིང་རྗེའི་གྲོས་དང་། དགའ་བའི་ཐབས་དང་། བཏང་སྙོམས་ཀྱི་མདོའོ། །ལང་ཀའི་བདག་པོ་སྟོབས་ཀྱིས་གཞན་གང་གནོན་པའི་རྟགས་ནི་འདི་ལྟ་སྟེ། སྙིང་རྗེའི་
སྟོབས་དང་། ཆོས་ཉིད་ཀྱི་སྟོབས་དང་། མི་འབྱེད་པའི་སྟོབས་དང་། གྲུབ་པའི་སྟོབས་དང་། མ་སྤངས་པའི་སྟོབས་དང་། མ་གཡོས་པའི་སྟོབས་དང་། སྨོན་ལམ་གྱི་སྟོབས་དང་། སྤྲུལ་པའི་སྟོབས་དང་། མི་གཏོང་བའི་སྟོབས་དང་། ཆགས་པའི་
སྟོབས་སོ། །ལང་ཀའི་བདག་པོ་རྫུ་འཕྲུལ་གྱིས་མི་གནས་པར་སྐྱོད་པའི་རྟགས་གང་ཞེ་ན། འདི་ལྟ་སྟེ། ཆོས་ཉིད་ཀྱི་རྫུ་འཕྲུལ་དང་། ཡེ་ཤེས་ཀྱི་རྫུ་འཕྲུལ་དང་། ཐུགས་རྗེའི་རྫུ་འཕྲུལ་དང་། སྤྲུལ་པའི་རྫུ་འཕྲུལ་ལོ། །ལང་ཀའི་བདག་པོ་མི་ཟད་
པའི་མཛོད་མངའ་བའི་རྟགས་གང་ཞེ་ན། འདི་ལྟ་སྟེ། འདོད་པ་སྐོང་བ་དང་། མི་ཟད་པར་འབྱུང་བ་དང་། མུན་པ་སེལ་བ་དང་། རྒྱུན་མི་འཆད་པའོ། །ལང་ཀའི་བདག་པོ་དེ་དག་ནི་རྫུ་འཕྲུལ་གྱི་ཆོ་འཕྲུལ་ཞེས་བྱ་སྟེ། ལང་ཀའི་བདག་པོ་རྫུ་འཕྲུལ་གྱི་ཆོ་
འཕྲུལ་གྱིས་བསྡུས་པའི་རྟོག་པ་མཐའ་ཡས་ཇི་སྙེད་པ་ཀུན་སོ་སོར་མ་འདྲེས་པ་གཅིག་ཏུ་ཡོངས་སུ་འགྲེལ་ཏོ། །དེ་སྐད་ཅེས་སྨྲས་པས། ལང་ཀའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའི་རྣམས་ཆོས་ཐམས་ཅད་རྫུ་འཕྲུལ་གྱི་ཆོ་འཕྲུལ་ཙམ་དུ་
སྣང་བར་མཐོང་ངོ་། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་རྫུ་འཕྲུལ་གྱི་ཆོ་འཕྲུལ་བསྟན་པའི་ལེའུ་སྟེ་བཅུ་དྲུག་པའོ།། །།དེ་ནས་ཡང་གསང་བ་པའི་བདག་པོས་ལང་ཀའི་བདག་པོ་ལ་བོས་ཏེ་སྨྲས་པ། ཀྱེ་ལང་ཀའི་བདག་པོ་
ཆོས་སྣང་བའི་ཆོ་འཕྲུལ་གང་ཞེ་ན། འདི་ལྟ་སྟེ། གང་གིས་གང་དུ་ཆོས་སྣང་བར་ངེས་པའི་ཆོ་འཕྲུལ་བསྟན་པས་དེ་དང་དེར་འཇིག་རྟེན་གྱི་ཁམས་དེ་དང་དེ་དག་ཐམས་ཅད་གཡོས། རབ་ཏུ་གཡོས། ཀུན་དུ་རབ་ཏུ་གཡོས། འགུལ། རབ་ཏུ་འགུལ། ཀུན་

དུ་རབ་ཏུ་འགུལ། ལྡེག །རབ་ཏུ་ལྡེག །ཀུན་དུ་རབ་ཏུ་ལྡེག །འུར། རབ་ཏུ་འུར། ཀུན་དུ་རབ་ཏུ་འུར། ཆེམ། རབ་ཏུ་ཆེམ། ཀུན་དུ་རབ་ཏུ་ཆེམ། མཐའ་མཐོ་ན་དབུས་དམའ། དབུས་མཐོ་ན་མཐའ་དམའ། ཤར་མཐོ་ན་ནུབ་དམའ། ནུབ་
མཐོ་ན་ཤར་དམའ། ལྷོ་མཐོ་ན་བྱང་དམའ། བྱང་མཐོ་ན་ལྷོ་དམའ་བར་གྱུར་ཏེ། ཕྱི་ནང་གི་མུན་པ་ཐམས་ཅད་སྦྱངས་ནས་འགྲོ་བ་མཐའ་ཐུག་པ་མེད་པ་དག་སྤྲོ་བའི་ངོ་མཚར་བསྐྱེད། སེམས་ཀྱི་དཀྱིལ་འཁོར་འོད་གསལ། ཐེག་པ་ཆེན་པོའི་ཆོས་ཉིད་ཀྱི་དགའ་
བའི་རོ་ཚོར། ཐམས་ཅད་རེ་ཞིང་དམ་པའི་ཆོས་ཉིད་དུ་སྣང་བ་ནི་འདི་ལྟ་སྟེ། འཇིག་རྟེན་མཐའ་ཡས་རྡུལ་སྙེད་དུ། །སྤྲུལ་པ་མཐའ་ཡས་རྡུལ་སྙེད་སྤྲོས། །མུན་བསལ་དངོས་པོ་ཀུན་སྦྱངས་ཏེ། །ཐམས་ཅད་མ་བཅོས་དེ་བཞིན་སྣང་། །སྤྲུལ་པའི་དོན་ནི་རྡུལ་སྙེད་
ལས། །ཆོས་ཉིད་ངེས་པར་སྣང་བའི་སྒོ། །གཉིས་ལས་བཅུ་བཞིར་སྣང་བ་ནི། །ཡི་གེའི་འབྲུ་ཚོགས་གསལ་བར་སྣང་། །ལང་ཀའི་བདག་པོ་འདི་ལྟ་སྟེ། ཨ་ཆོས་ཀྱི་དབྱིངས་ཉིད་རྣམ་པར་སྣང་བའི་སྒོའོ། །ཧཱུྃ་ཡེ་ཤེས་ཀྱི་ཆོས་ཉིད་རྣམ་པར་སྣང་བའི་སྒོའོ། །
ཧཱུྃ་མི་གཡོ་བའི་ཆོས་ཉིད་ཡོངས་སུ་སྣང་བའི་སྒོའོ། །ཨོཾ་ཅིར་ཡང་སྣང་བའི་ཆོས་ཉིད་རྣམ་པར་སྣང་བའི་སྒོའོ། །སྭཱ་སྣ་ཚོགས་འབྱུང་བའི་ཆོས་ཉིད་རྣམ་པར་སྣང་བའི་སྒོའོ། །ཨོཾཿམཐའ་ཡས་ཆོས་ཉིད་རྣམ་པར་སྣང་བའི་སྒོའོ། །ཧཱ་དོན་ཡོད་གྲུབ་པའི་ཆོས་ཉིད་
རྣམ་པར་སྣང་བའི་སྒོའོ། །མཱུྃ་བརྗོད་པ་ལས་འདས་པའི་ཆོས་ཉིད་རྣམ་པར་སྣང་བའི་སྒོའོ། །ལཱཾ་སྐྱེ་འགག་མེད་པའི་ཆོས་ཉིད་རྣམ་པར་སྣང་བའི་སྒོའོ། །རྨཱྃ་མི་ཟད་པའི་ཆོས་ཉིད་རྣམ་པར་སྣང་བའི་སྒོའོ། །ཕྱཱྃ་སྐྱོན་མེད་པའི་ཆོས་ཉིད་རྣམ་པར་སྣང་བའི་སྒོའོ། །
ཏཱྃ་ཐོགས་པ་མེད་པའི་ཆོས་ཉིད་རྣམ་པར་སྣང་བའི་སྒོའོ། །ཧྲཱིཾཿགསུང་འཛིན་པའི་ཆོས་ཉིད་རྣམ་པར་སྣང་བའི་སྒོའོ། །ཏྲཱཾ་གོ་འབྱེད་པའི་ཆོས་ཉིད་རྣམ་པར་སྣང་བའི་སྒོའོ། །ཀྵ་མཐོང་བའི་ཆོས་ཉིད་རྣམ་པར་སྣང་བའི་སྒོའོ། །ཛྲཱིཾ་འཇོམས་པའི་ཆོས་ཉིད་རྣམ་པར་སྣང་

བའི་སྒོའོ། །ཧཱུྃ་རྩ་བ་བྱང་ཆུབ་སེམས་ཀྱི་ཆོས་ཉིད་རྣམ་པར་སྣང་བའི་སྒོའོ། །ཊཱཾ་ཅིར་ཡང་འབྱུང་བའི་ཆོས་ཉིད་རྣམ་པར་སྣང་བའི་སྒོའོ། །ཏྲཱིཾ་སྒྲ་སྒྲོགས་པའི་ཆོས་ཉིད་རྣམ་པར་སྣང་བའི་སྒོའོ། །ཨ་ཅིར་ཡང་མ་ངེས་པའི་ཆོས་ཉིད་རྣམ་པར་སྣང་བའི་སྒོའོ། །མཻ་
བྱམས་པ་ཆེན་པོའི་ཆོས་ཉིད་རྣམ་པར་སྣང་བའི་སྒོའོ། ཐླྷཱིཾ་སྙིང་རྗེ་ཆེན་པོའི་ཆོས་ཉིད་རྣམ་པར་སྣང་བའི་སྒོའོ། །ཧཱུྃ་དགའ་བ་ཆེན་པོའི་ཆོས་ཉིད་རྣམ་པར་སྣང་བའི་སྒོའོ། །མཱུྃ་བཏང་སྙོམས་ཆེན་པོའི་ཆོས་ཉིད་རྣམ་པར་སྣང་བའི་སྒོའོ། །དུ་ཏིང་ངེ་འཛིན་གྱི་ཆོ་འཕྲུལ་
གྱི་ཆོས་ཉིད་རྣམ་པར་སྣང་བའི་སྒོའོ། །པུ་དབང་བསྐུར་བའི་ཆོ་འཕྲུལ་གྱི་ཆོས་ཉིད་རྣམ་པར་སྣང་བའི་སྒོའོ། །བྃ་བྱིན་གྱི་བརླབས་ཀྱི་ཆོ་འཕྲུལ་གྱི་ཆོས་ཉིད་རྣམ་པར་སྣང་བའི་སྒོའོ། །ཧོཿམཆོད་པའི་ཆོ་འཕྲུལ་གྱི་ཆོས་ཉིད་རྣམ་པར་སྣང་བའི་སྒོའོ། །ཡ་སྟོང་པ་ཉིད་
ཀྱི་རྣམ་པར་ཐར་པའི་ཆོས་ཉིད་རྣམ་པར་སྣང་བའི་སྒོའོ། །ཐ་མཚན་མ་མེད་པའི་རྣམ་པར་ཐར་པའི་ཆོས་ཉིད་རྣམ་པར་སྣང་བའི་སྒོའོ། །ཧྲིཿསྨོན་པ་མེད་པའི་རྣམ་པར་ཐར་པའི་ཆོས་ཉིད་རྣམ་པར་སྣང་བའི་སྒོའོ། ཧཱུྃ་ཐབས་ལ་མཁས་པའི་རྣམ་པར་ཐར་
པའི་ཆོས་ཉིད་རྣམ་པར་སྣང་བའི་སྒོའོ། །ཛཿདོན་འདྲེན་པའི་ཆོས་ཉིད་རྣམ་པར་སྣང་བའི་སྒོའོ། །ཧཱུྃ་དོན་བརྗོད་པའི་ཆོས་ཉིད་རྣམ་པར་སྣང་བའི་སྒོའོ། །བྃ་དོན་སྤྱོད་པའི་ཆོས་ཉིད་རྣམ་པར་སྣང་བའི་སྒོའོ། །ཧོཿདོན་མཐུན་པའི་ཆོས་ཉིད་རྣམ་པར་སྣང་བའི་སྒོའོ། །
ཀྲྀཾ་བྱང་ཆུབ་ཀྱི་ཆོས་ཉིད་རྣམ་པར་སྣང་བའི་སྒོའོ། །ཏྲུྃ་སྟོབས་ཀྱི་ཆོས་ཉིད་རྣམ་པར་སྣང་བའི་སྒོའོ། །སྲུཾ་དབང་པོའི་ཆོས་ཉིད་རྣམ་པར་སྣང་བའི་སྒོའོ། །པྲ་རྫུ་འཕྲུལ་གྱི་ཆོས་ཉིད་རྣམ་པར་སྣང་བའི་སྒོའོ། །ཀྵྃ་སྤོང་བའི་མཚན་ཉིད་རྣམ་པར་སྣང་བའི་
སྒོའོ། །ཡེ་དྲན་པའི་ཆོས་ཉིད་རྣམ་པར་སྣང་བའི་སྒོའོ། །བྲུྃ་སྟོང་པའི་ཆོས་ཉིད་རྣམ་པར་སྣང་བའི་སྒོའོ། །ཨེ་ཁྲོ་བོའི་ཆོས་ཉིད་རྣམ་པར་སྣང་བའི་སྒོའོ། །བྃ་ཞི་བའི་ཆོས་ཉིད་རྣམ་པར་སྣང་བའི་སྒོའོ། །མ་མཐའ་རྒྱས་པའི་ཆོས་ཉིད་རྣམ་པར་

སྣང་བའི་སྒོའོ། །ཡ་སྡུད་པའི་ཆོས་ཉིད་རྣམ་པར་སྣང་བའི་སྒོའོ། །ཤྭ་ཕྱི་ནང་འབྱུང་བའི་ཆོས་ཉིད་རྣམ་པར་སྣང་བའི་སྒོའོ། །དྷ་ཆོས་འབྱུང་བའི་ཆོས་ཉིད་རྣམ་པར་སྣང་བའི་སྒོའོ། །མ་དྲན་པའི་ཆོས་ཉིད་རྣམ་པར་སྣང་བའི་སྒོའོ། །
ཧཱ་བོད་པའི་ཆོས་ཉིད་རྣམ་པར་སྣང་བའི་སྒོའོ། །པྲ་སྤྲོ་བའི་ཆོས་ཉིད་རྣམ་པར་སྣང་བའི་སྒོའོ། །ཀྵཿནི་མཐར་ཟད་པའི་ཆོས་ཉིད་རྣམ་པར་སྣང་བའི་སྒོའོ། །ཛྙཱ་ཤེས་པའི་ཆོས་ཉིད་རྣམ་པར་སྣང་བའི་སྒོའོ། །ཏེ་རྒྱུའི་ཆོས་ཉིད་རྣམ་པར་སྣང་བའི་སྒོའོ། །སྃ་
འབྲས་བུའི་ཆོས་ཉིད་རྣམ་པར་སྣང་བའི་སྒོའོ། །ཐྃ་རྐྱེན་གྱི་ཆོས་ཉིད་རྣམ་པར་སྣང་བའི་སྒོའོ། །སྐ་ཕུང་པོའི་ཆོས་ཉིད་རྣམ་པར་སྣང་བའི་སྒོའོ། །ཀྲ་ལས་ཀྱི་ཆོས་ཉིད་རྣམ་པར་སྣང་བའི་སྒོའོ། །བྃ་ནག་པོའི་ཆོས་ཉིད་རྣམ་པར་སྣང་བའི་སྒོའོ། །ཏྲ་དཀར་
པོའི་ཆོས་ཉིད་རྣམ་པར་སྣང་བའི་སྒོའོ། །ཨོཾ་རང་གྲུབ་པའི་ཆོས་ཉིད་རྣམ་པར་སྣང་བའི་སྒོའོ། །ཧཱུྃ་རྩ་བའི་ཆོས་ཉིད་རྣམ་པར་སྣང་བའི་སྒོའོ། །རྨཱུྃ་ཇི་བཞིན་པའི་ཆོས་ཉིད་རྣམ་པར་སྣང་བའི་སྒོའོ། །ལང་ཀའི་བདག་པོ་དེ་དག་ནི་ཡི་གེའི་ཆོ་འཕྲུལ་ལས་ཆོས་
རྣམ་པར་སྣང་བའོ། །དེ་ཅིའི་ཕྱིར་ཞེ་ན། ལང་ཀའི་བདག་པོ་ཡི་གེའི་སྒོ་ནས་ཆོས་ཐམས་ཅད་ནམ་མཁའ་དང་འདྲ་བར་ཁོང་དུ་ཆུད་པར་འགྱུར་རོ། །གཟུངས་དང་། སྒྲ་དང་། དྲན་པ་དང་། བློ་གྲོས་དང་། རྟོགས་པ་དང་། གསལ་བ་ཐོབ་པར་འགྱུར་རོ། །
དེ་བཞིན་དུ་ཡི་གེ་ནི་ཆོས་ཐམས་ཅད་ཀྱི་སྒོ་ཡང་འབྱེད་པར་འགྱུར་རོ། །དོན་ཡང་མཚོན་པར་བྱེད་དོ། །རང་བཞིན་ཡང་རྟོགས་པར་བྱེད་དོ། །ལང་ཀའི་བདག་པོ་དེ་དག་ནི་ཡི་གེའི་ཆོ་འཕྲུལ་གྱི་སྒོ་ནས་ཆོས་ཉིད་དུ་རྣམ་པར་སྣང་བའོ། །ལང་ཀའི་བདག་པོ་
གང་མ་བཅོས་པར་ཆོས་སྣང་བའི་ཆོ་འཕྲུལ་གང་ཞེ་ན། འདི་ལྟ་སྟེ། ཆོས་ཅན་མཚན་མར་སྣང་བའི་རང་བཞིན་རྣམས། །ཆོས་ཉིད་མཚན་མ་མེད་པའི་ངང་དུ་སྣང་། །སེམས་ཅན་དངོས་པོར་སྣང་བའི་རང་བཞིན་རྣམས། །སེམས་ཉིད་དངོས་པོ་མེད་

པའི་ངང་དུ་སྣང་། །ཇི་སྙེད་རྣམ་པར་སྣང་བའི་རང་བཞིན་རྣམས། །ཇི་བཞིན་དེ་བཞིན་ཉིད་ཀྱི་ངང་དུ་སྣང་། །ཉོན་མོངས་དུག་ལྔར་སྣང་བའི་རང་བཞིན་རྣམས། །རྣམ་གྲོལ་ཡེ་ཤེས་ལྔ་ཡི་ངང་དུ་སྣང་། །དུག་གསུམ་རྩ་བར་སྣང་བའི་རང་བཞིན་
རྣམས། །སྐུ་གསུམ་ལྷུན་གྱིས་གྲུབ་པའི་ངང་དུ་སྣང་། །གཟུང་འཛིན་རྟོག་པར་སྣང་བའི་རང་བཞིན་རྣམས། །དབྱིངས་དང་ཡེ་ཤེས་གཉིས་མེད་ངང་དུ་སྣང་། །བྱ་དང་བྱེད་པར་སྣང་བའི་རང་བཞིན་རྣམས། །ཐབས་དང་ཤེས་རབ་འབྲེལ་བའི་ངང་དུ་སྣང་། །
འཇིག་ཚོགས་ཕུང་པོར་སྣང་བའི་རང་བཞིན་རྣམས། །རྣམ་གྲོལ་ཟག་མེད་ཕུང་པོའི་ངང་དུ་སྣང་། །ཀུན་ནས་ཉོན་མོངས་འཁོར་བའི་རང་བཞིན་རྣམས། །རྣམ་བྱང་མྱ་ངན་འདས་པའི་ངང་དུ་སྣང་། །འཇིག་རྟེན་གཡོ་རྡུལ་མི་གཡོའི་རང་བཞིན་རྣམས། །
རྒྱལ་བ་བཞི་བཅུ་གཉིས་ཀྱི་ངང་དུ་སྣང་། །མྱ་ངན་འདས་དང་འཁོར་བའི་རང་བཞིན་རྣམས། །བཙལ་མེད་མ་བཅོས་དེ་ཉིད་ངང་དུ་སྣང་། །ཞེས་ཡོངས་སུ་གྲག་ཅིང་གྲགས་པར་འགྱུར་རོ། །ལང་ཀའི་བདག་པོ་དེ་ནི་ཆོས་སྣང་བའི་ཆོ་འཕྲུལ་ཏེ། །དེ་དག་
ཀྱང་སོ་སོར་མ་འདྲེས་པར་གཅིག་ཏུ་ཡོངས་སུ་འགྲེལ་ཏོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་ཆོས་སྣང་བའི་ཆོ་འཕྲུལ་བསྟན་པའི་ལེའུ་སྟེ་བཅུ་བདུན་པའོ།། །།ལང་ཀའི་བདག་པོ་ཀུན་བརྗོད་པའི་ཆོ་འཕྲུལ་གང་ཞེ་ན། འདི་
ལྟ་སྟེ། ཆོས་ཀུན་མ་འདྲེས་ཡོངས་རྫོགས་པ། །ངེས་པ་ཇི་ལྟར་ཡིན་པའི་དོན། །ཕྱིན་ཅི་མ་ལོག་ཉིད་བརྗོད་པ། །དེ་ཉིད་རྣམ་དག་ལམ་ཆེན་ཡིན། །སྐུ་དང་གསུང་ཐུགས་རང་བཞིན་ཡང་། །གང་ན་མེད་དེ་དེ་ཁོ་ན། །དཔག་མེད་རྒྱལ་བ་མཐའ་ཡས་
ཀྱང་། །གཞན་ན་མེད་དེ་དེ་ཉིད་ཡིན། །གཏི་མུག་མ་འདྲེས་ཀུན་ནས་རྨོངས། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །ཞེ་སྡང་མ་འདྲེས་མནར་སེམས་པ། །ཡོངས་སུ་རྫོགས་པས་སྟོང་

བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །ང་རྒྱལ་མ་འདྲེས་རི་བོ་ཆེ། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །འདོད་
ཆགས་མ་འདྲེས་ཀུན་དུ་ཞེན། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །ཕྲག་དོག་མ་འདྲེས་ཀུན་ནས་འཁྲུགས། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་
རྫོགས་ན། །མ་བཅོས་དེ་བཞིན་ཉིད་ཁོ་ན། །གཟུགས་ནི་མ་འདྲེས་འཇིགས་པ་ཉིད། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །ཚོར་བ་མ་འདྲེས་མྱོང་བ་ཉིད། །ཡོངས་སུ་རྫོགས་པས་
སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །འདུ་ཤེས་མ་འདྲེས་འཛིན་པ་ཉིད། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །འདུ་ཤེས་མ་འདྲེས་
མངོན་དུ་བྱེད། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །རྣམ་རིག་མ་འདྲེས་ཐ་དད་ཤེས། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་
དེ་བཞིན་ཉིད་ཁོ་ན། །སྡུག་བསྔལ་མ་འདྲེས་ཀུན་གདུང་བ། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །ཁམས་ནི་མ་འདྲེས་ས་བོན་ཉིད། །ཡོངས་སུ་རྫོགས་པས་སྟོང་བདག་མེད། །དེ་
ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །སྐྱེ་མཆེད་མ་འདྲེས་སྐྱེ་བའི་སྒོ། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །རྒྱུ་རྐྱེན་མ་འདྲེས་འདུ་འཕྲོ་ཉིད། །ཡོངས་སུ་

རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །མ་ཆགས་མ་འདྲེས་གཏོང་བ་ཉིད། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །དག་
པ་མ་འདྲེས་གདུང་བ་མེད། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །མི་གཡོ་མ་འདྲེས་མི་འཁྲུག་པ། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །
མ་བཅོས་དེ་བཞིན་ཉིད་ཁོ་ན། །བརྩོན་འགྲུས་མ་འདྲེས་ཐུབ་པ་མེད། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །བསམ་པ་མ་འདྲེས་སྡུད་པ་ཉིད། །ཡོངས་སུ་རྫོགས་པས་སྟོང་བདག་མེད། །
དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །གཅོད་པ་མ་འདྲེས་ཆགས་པ་མེད། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །བསམ་པ་ཚད་མེད་སྙོམས་འཇུག་བཞི། །
མ་འདྲེས་མི་འཁྲུག་ཡོངས་རྫོགས་པས། །སྟོང་པ་བདག་མེད་ཆོས་ཉིད་དེ། །མ་བཅོས་དེ་བཞིན་ཉིད་ཁོ་ན། །ཀུན་ཀྱང་མ་འདྲེས་འབྱུང་བ་ཉིད། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །
སྟོང་ཉིད་རྣམ་ཐར་མ་འདྲེས་དབེན། །མཚན་མེད་མ་འདྲེས་ཞི་བ་ཉིད། །སྨོན་མེད་མ་འདྲེས་སྡུག་བསྔལ་སེལ། །ཡོངས་སུ་རྫོགས་པས་སྟོང་བདག་མེད། །མ་བཅོས་དེ་བཞིན་ཉིད་ཁོ་ན། །རྣམ་ཐར་མ་འདྲེས་རྣམ་པར་འགྲེལ། །ཡོངས་སུ་རྫོགས་པས་
སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །སྟོབས་ནི་མ་འདྲེས་གདོན་མི་ཟ། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །མི་འཇིགས་མ་

འདྲེས་ཤིན་ཏུ་བརྟན། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །སྙིང་རྗེ་མ་འདྲས་སྐྱོབ་པ་ཉིད། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་
ན། །མ་བཅོས་དེ་བཞིན་ཉིད་ཁོ་ན། །བྱམས་པ་མ་འདྲེས་ཕན་འདོགས་པ། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །དགའ་བ་མ་འདྲེས་འགྱོད་པ་མེད། །ཡོངས་སུ་རྫོགས་པས་
སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །བཏང་སྙོམས་མ་འདྲེས་ཡངས་པ་ཉིད། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །གཟུགས་ནི་མ་
འདྲེས་འབྲེལ་པ་ཉིད། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །ཏིང་འཛིན་མ་འདྲེས་མི་གཡེང་བ། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་
དེ་བཞིན་ཉིད་ཁོ་ན། །མ་འདྲེས་པ་ཉིད་མི་འཕྲོགས་པ། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །ཀུན་གྲོལ་མ་འདྲེས་མངོན་སུམ་པ། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་
འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །ཆོས་ཅན་མ་འདྲེས་སྣ་ཚོགས་པ། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །ཡེ་ཤེས་ཀུན་མཁྱེན་སྐྱེ་འགག་མེད། །ཡོངས་སུ་རྫོགས་
པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །དབྱིངས་ཉིད་མེད་ལ་མི་ཟད་པ། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །སྤྲུལ་པ་མེད་འབྱུང་

རྒྱུན་མི་འཆད། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །རྫོགས་སྐུ་མ་འདྲེས་ཕུན་སུམ་ཚོགས། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །
མ་བཅོས་དེ་བཞིན་ཉིད་ཁོ་ན། །ཆོས་སྐུ་རྣམ་པར་དག་པའི་ཉིད། །ཡོངས་སུ་རྫོགས་པས་སྟོང་བདག་མེད། །དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །ཐམས་ཅད་མ་འདྲེས་ཐ་དད་པ། །ཡོངས་སུ་རྫོགས་པས་སྟོང་བདག་མེད། །
དེ་ཉིད་མ་འདྲེས་ཡོངས་རྫོགས་ན། །མ་བཅོས་དེ་བཞིན་ཉིད་ཁོ་ན། །ཆོས་ཀུན་བརྗོད་པའི་ཆོ་འཕྲུལ་ལས། །མ་བཅོས་དེ་བཞིན་ཉིད་སྣང་བ། །དབུ་མར་མི་དམིགས་གསང་བ་ཉིད། །སྐྱེས་བུ་དམ་པའི་སྤྱོད་ཡུལ་ཡིན། །གསང་སྔགས་རྡོ་རྗེ་ཐེག་ཆེན་
འདི། །དེ་བཞིན་གཤེགས་པ་ཉིད་དུ་གསལ། །ཅི་ཕྱིར་རྡོ་རྗེ་གསང་སྔགས་དང་། །སེམས་ཅན་སངས་རྒྱས་ཐ་དད་མིན། །གསང་སྔགས་རྡོ་རྗེ་རྣལ་འབྱོར་པ། །སྐྱེས་བུ་ཐབས་ཀྱི་ཕ་རོལ་ཕྱིན། །རྡོ་རྗེ་རྣལ་འབྱོར་མི་ལྡན་ན། །དེ་ཉིད་ཐབས་དང་ཤེས་
རབ་བྲལ། །དེ་བས་རྣལ་འབྱོར་ཆེན་པོ་ཡིས། །རྡོ་རྗེ་གསང་སྔགས་དམ་པ་ཡི། །ཆོ་འཕྲུལ་བཞི་ཡི་རང་བཞིན་ལས། །ནམ་ཡང་འདའ་བར་བྱ་བ་མིན། །ཞེས་སྨྲས་པས། མ་འདྲེས་པ་ཡོངས་སུ་རྫོགས་པ་ནི་ཆོས་ཐམས་ཅད་ཀུན་དུ་བཟང་པོ་ཉིད་
དོ་ཞེས་ཡོངས་སུ་གྲག་ཅིང་གྲགས་པར་གྱུར་ཏོ། །ལང་ཀའི་བདག་པོ་དེ་དག་ནི་ཀུན་བརྗོད་པའི་ཆོ་འཕྲུལ་ཏེ། དེ་དག་ཀྱང་སོ་སོར་མ་འདྲེས་པར་དེ་ཁོ་ན་ཉིད་གཅིག་ཏུ་ཡོངས་སུ་འགྲེལ་ཏོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་
པོ་ལས་ཀུན་བརྗོད་པའི་ཆོ་འཕྲུལ་བསྟན་པ་ཞེས་བྱ་བའི་ལེའུ་སྟེ་བཅྭ་བརྒྱད་པའོ།། །།ལང་ཀའི་བདག་པོ་དེ་ལ་རྗེས་སུ་བསྟན་པའི་ཆོ་འཕྲུལ་གང་ཞེ་ན། ཞི་གནས་ཡོངས་སུ་རྫོགས་པར་འགྲེལ་པ་ནི་འདི་ལྟ་སྟེ། ཇི་སྙེད་པ་ཐམས་ཅད་ཇི་

བཞིན་པ་ཉིད་དུ་ཡོངས་སུ་རྫོགས་པ་འབའ་ཞིག་གོ། །དེ་ཇི་ལྟ་ཞེ་ན། འདི་ལྟ་སྟེ། དེ་ཉིད་མི་གཡོ་ནམ་མཁའ་ལ། །གཡོ་རྡུལ་ཐ་དད་ཇི་སྙེད་པ། །མི་རྟོག་ཡེ་ཤེས་རྒྱ་མཚོ་ཆེ། །གཅིག་ལས་རྣམ་པ་ཡོངས་ཀྱིས་མེད། །རང་བཞིན་ལྷུན་
གྲུབ་དཀྱིལ་འཁོར་ཆེ། །དེ་ན་དམན་དང་སེམས་དཔའ་དང་། །སྤྱོད་པའི་རྣལ་འབྱོར་མིང་ཡང་མེད། །ལྷུན་མཉམ་བྱང་ཆུབ་སྙིང་པོ་ལས། །ངེས་པའི་དགོངས་པའི་མཉམ་རྙེད་ནས། །ཇི་བཞིན་མ་བཅོས་དེ་ཁོ་ན། །ཟབ་མོ་དམ་པ་ངེས་པའི་དོན། །ངོ་
མཚར་དམ་པ་ཆེན་པོ་ཡིས། །རྡོ་རྗེ་སྙིང་པོ་ཉིད་ལ་ཉིད། །དགོངས་པའི་དོན་ལ་འདི་སྐད་འགྲེལ། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་པ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཨེ་མའོ་ངོ་
མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགག་པ་མེད་ལས་ཐམས་ཅད་འགག །འགག་པ་ཉིད་ན་འགག་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །དམིགས་པ་མེད་ལས་ཐམས་ཅད་
དམིགས། །དམིགས་པ་ཉིད་ན་དམིགས་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །མི་གནས་པ་ལས་ཐམས་ཅད་གནས། །གནས་པ་ཉིད་ན་གནས་པ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་
སངས་རྒྱས་ཀུན་གྱི་གསང་། །འགྲོ་འོང་མེད་ལས་འགྲོ་འོང་ཉིད། །འགྲོ་འོང་ཉིད་ན་འགྲོ་འོང་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །མ་བཅོས་མ་བསླད་བྱས་པ་མེད། །ཇི་བཞིན་རང་བཞིན་རྣམ་པར་དག །
ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་ཀྱི་གསང་། །རང་བཞིན་མེད་པའི་རང་བཞིན་ལས། །བདེ་བ་ཆེན་པོ་ལྷུན་གྱིས་གྲུབ། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །གཞི་རྩ་མེད་པའི་

སེམས་ཉིད་ནི། །ཆོས་རྣམས་ཀུན་གྱི་རྩ་བ་ཡིན། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྟོང་པ་མ་ཡིན་མི་སྟོང་མིན། །དབུ་མ་དམིགས་སུ་ཡོད་མ་ཡིན། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་
རྒྱས་ཀུན་གྱི་གསང་། །ངེས་པར་བརྟགས་ན་རྟག་པ་ཉིད། །རྟག་ཆད་དེ་ཉིད་གཉེན་པོ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །ངེས་པར་ཆན་ན་ཆད་པ་མེད། །བྱང་ཆུབ་ཉིད་དེ་ལོག་རྒྱུན་ཆད། །ཨེ་མའོ་ངོ་
མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །ཆོས་སོ་ཅོག་གི་རང་བཞིན་ནི། །སངས་རྒྱས་ཉིད་དེ་ལོག་རྒྱུན་ཆད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སངས་རྒྱས་ཉིད་ལས་གཞན་པའི་
ཆོས། །སངས་རྒྱས་ཉིད་ཀྱིས་མི་བསྙེས་སོ། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །རབ་འབྱམ་མཐའ་ཡས་གང་ནས་ཀྱང་། །རྫོགས་པའི་སངས་རྒྱས་ཡོང་མི་ཚོལ། །ཨེ་མའོ་ངོ་མཚར་རྨད་ཀྱི་ཆོས། །རྫོགས་
པའི་སངས་རྒྱས་ཀུན་གྱི་གསང་། །སེམས་ཉིད་རྟོག་པ་སངས་རྒྱས་ཏེ། །དེ་ལས་གཞན་དུ་ཡོད་མ་ཡིན། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྲིད་གསུམ་ཡེ་ནས་སྙིང་པོ་ཉིད། །མ་ནོར་མ་བཅོས་ལྷུན་
གྱིས་གྲུབ། །ཨེ་མའོ་ངོ་མཚར་རྨད་ཀྱི་ཆོས། །རྫོགས་བའི་སངས་རྒྱས་ཀུན་གྱི་གསེང་། །རང་བཞིན་ལྷུན་གྱིས་གྲུབ་པའི་དབྱིངས། །བཙལ་བ་མེད་པར་རྫོགས་སངས་རྒྱས། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་
གྱི་གསང་། །ཀུན་ནས་ཀུན་དུ་ངང་བཟང་པོ། །ཐམས་ཅད་ཡེ་འབྱམ་རྨད་དུ་གྲགས། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྙིང་པོ་བྱང་ཆུབ་དེ་ཉིད་ལས། །མ་གཏོགས་གང་ཡང་ཡོད་མ་ཡིན། །ཨེ་མའོ་ངོ་

མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །ཐམས་ཅད་སངས་རྒྱས་ཡིན་པ་ལ། །རྟོག་པས་བསྒྲིབས་པས་དེ་མ་ཤེས། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །
རྟོག་པ་ཉིད་ན་རྟོག་མེད་ཕྱིར། །བདེ་གཤེགས་སྙིང་བོ་གཞན་ནས་མིན། །ཨེ་མའོ་ངོ་མཚར་རྨད་ཀྱི་ཆོས། །རྫོགས་བའི་སངས་རྒྱས་ཀུན་གྱི་གསང་། །ཀུན་གྱི་སྙིང་པོ་བྱང་ཆུབ་ལ། །ཡེ་ནས་དགོངས་པ་ལྷུན་གྱིས་གྲུབ། །ཨེ་མའོ་ངོ་མཚར་རྨད་ཀྱི་
ཆོས། །རྫོགས་པའི་སངས་རྒྱས་ཀུན་གྱི་གསང་། །རྡོ་རྗེ་གསང་བའི་སྙིང་པོ་ལ། །སྒྲུབ་དང་བསྒྲུབ་པར་བྱ་བ་མེད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །ཡེ་ཉིད་འབྲས་བུ་དམ་པ་ལ། །ཐོབ་པར་བྱ་བ་ག་
ལ་ཡོད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །གསང་སྔགས་གསང་བའི་སྙིང་པོ་འདི། །སངས་རྒྱས་སེམས་ཅན་ཀུན་གྱི་གསང་། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་
གསང་། །འདུས་པ་གསང་བ་རྨད་འབྱུང་བ། །རྡོ་རྗེ་སྙིང་པོ་འདུས་པ་ཉིད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །གསང་བ་དམ་པའི་སྙིང་པོ་འདི། །སངས་རྒྱས་ཀུན་གྱི་ངེས་པའོ། །ཨེ་མའོ་ངོ་མཚར་རྨད་
ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །ཟླ་བ་གསང་བ་ལས་བྱུང་བའི། །གསུང་གི་ཐིག་ལེ་ཟབ་མོ་བྱུང་། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སངས་རྒྱས་ཀུན་དང་མཉམ་སྦྱོར་བས། །
གཟུགས་སྣང་མཁའ་ལ་འཇའ་ལྟར་གསལ། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྣང་སྲིད་སྒྱུ་མའི་ཡེ་ཤེས་ལས། །སྤྲུལ་པའི་དྲ་བ་སྤྲིན་ཕུང་བྱུང་། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་

ཀུན་གྱི་གསང་། །སྤྲུལ་པ་ཐབས་ཀྱི་དྲ་པ་ལས། །མཐའ་གཉིས་འཛིན་པའི་ཞགས་པ་བྱུང་། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསུང་། །བྱ་བྲལ་རྣལ་འབྱོར་མཐུན་འཇུག་སྤྱོད། །སྦྱོར་ཐབས་བྱ་བ་ལས་རྒྱུད་བྱུང་། །
ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །ལྷག་པར་མཐོང་དང་ཞི་བར་གནས། །དག་པའི་མཐའ་གཉིས་ངེས་པར་བྱུང་། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྡེ་མཛོད་
དམ་པའི་བཀའ་ལུང་རྣམས། །འབྱུང་གནས་གཏན་ལ་ངེས་པར་འབེབས། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །གདུལ་བྱའི་ཡུལ་ནི་ཇི་སྙེད་པའི། །གསུང་གི་སྒོ་ཡང་དེ་སྙེད་འབྱུང་། །ཨེ་མའོ་ངོ་མཚར་རྨད་
ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །རབ་འབྱམ་རྨད་དུ་གྲགས་པ་འདི། །བཀའ་ཡི་རབ་རྒྱུད་དམ་པ་ཉིད། །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །ཇི་བཞིན་པ་ཡི་དེ་ཁོ་ན། །བསྟན་པ་འབྱུང་
བའི་སྙིང་པོ་མཆོག །ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །ཟབ་མོ་འདུས་པའི་གཏན་ཚིགས་འདི། །སངས་རྒྱས་འབྱུང་བའི་སྙིང་པོའི་ཡུམ། །རྣམ་པ་སྣ་ཚོགས་སྣང་བར་མཛད། །མི་འགྱུར་མི་འཇུག་རྡོ་རྗེ་སེམས། །
དཔག་ཏུ་མེད་པ་གསུང་མཐའ་ཡས། །ཡོན་ཏན་རིན་ཆེན་སྣ་ཚོགས་འབྱུང་། །མཐའ་དག་ལྷུན་གྲུབ་གདོན་མི་ཟ། །རྡོ་རྗེ་སྙིང་པོ་ཉིད་ལ་ཉིད། །ཉི་མ་ཐུགས་ཀྱི་དཀྱིལ་འཁོར་ཤར། །བསམ་མེད་བསམ་གྱིས་མི་ཁྱབ་པའི། །དཔག་མེད་བརྒྱད་ཁྲི་བཞི་
སྟོང་སྒོ། །གྲགས་པའི་རྣམ་གྲངས་བསམ་ཡས་ཀྱང་། །ངེས་པའི་ཐེག་པ་གཅིག་ལས་མེད། །གསང་ཉིད་མ་ངེས་འཇུག་བར་དུ། །ཐེག་པའི་སྒོ་ཡང་བསམ་མི་ཁྱབ། །གསང་ཉིད་ངེས་པར་སྣང་མ་ཐག །ཐེག་པའི་སྒོ་ཡང་དེ་ལས་མེད། །བརྗོད་དང་

བསྟན་པའི་རྣམ་གྲངས་ཀུན། །བཀྲི་བའི་དོན་དེ་དེ་ཉིད་མིན། །ཚིག་བརྡ་བརྗོད་པས་དོན་རྙེད་པ། །སྒྲོན་མེས་མུན་ཁུང་གསེར་ཚོལ་ལྟར། །གསང་བའི་སྙིང་པོའི་མཛོད་བརྟོལ་ཏེ། །དམ་པ་རྣམས་ཀྱི་གཏེར་ཆེན་འབྱིན། །ཐིག་ལེ་
གཅིག་གིས་ཀུན་ལ་ཁྱབ། །ཐམས་ཅད་ལུང་ཆེན་ངེས་པར་བསྟན། །དེ་དག་དེ་ཉིད་ངང་གྲོལ་ན། །གསང་སྔགས་མཐོང་བ་སངས་རྒྱས་ཏེ། །ཀུན་ཀྱང་བདེ་ཆེན་བྱང་ཆུབ་སེམས། །རྟོག་བྲལ་དྲི་མེད་རྣམ་པར་དག །བདེ་ཆེན་ཉིད་ལ་བདེ་ཆེན་རྫོགས། །
ཡེ་ཤེས་ཉི་མའི་སྙིང་པོ་ཤར། །མ་ལུས་མཐའ་དག་ཐིག་ལེའི་རྒྱ། །ཡེ་ནས་བཙལ་མེད་བཙལ་མི་དགོས། །རྒྱུ་འབྲས་དབྱེར་མེད་དེ་ཉིད་དེ། །མི་གཡོ་མི་རྟོག་ཡུལ་འདས་ལ། །རྒྱུ་དང་འབྲས་བུར་རྟོག་འཛིན་གྱིས། །ཐམས་ཅད་སྒྱུ་མ་འཁྲུལ་པས་
བཅིངས། །རང་བྱུང་ཡེ་ཤེས་ཉི་མ་ཉིད། །མ་བཅོས་ཇི་བཞིན་གནས་པ་ན། །སྙིང་པོ་ཉིད་དུ་གོལ་ས་མེད། །ཐམས་ཅད་བྱང་ཆུབ་སྙིང་པོ་བས། །ཀུན་ཀྱང་མ་བཙལ་བདེ་བར་གནོས། །སྣང་སྲིད་འཁོར་བའི་ཁ་བརྒྱུད་ཀྱང་། །སྙིང་པོ་དབྱིངས་
ལས་གར་མི་ཕྱིན། །མཐའ་ཐུག་མེད་པའི་གཞི་བགྲོད་ཀྱང་། །སྙིང་པོ་དེ་ལས་གཡོས་པ་མེད། །དཔག་མེད་རྒྱལ་བ་ཀུན་བསྒྲུན་ཀྱང་། །སྙིང་པོ་ཡོངས་སུ་འཕེལ་བ་མེད། །སེམས་ཅན་མཐའ་ཐུག་མེད་འབྱུང་ཡང་། །དེ་ཉིད་དེ་ལས་འགྲིབ་པ་མེད། །
སྐྱེ་བཞི་རྒྱུད་ལྔར་གང་སྣང་བ། །སངས་རྒྱས་ཉིད་དེ་ཡེ་ཤེས་སྐུ། །ཐམས་ཅད་དེ་ཉིད་དེ་གཅིག་པས། །ཡེ་ནས་སངས་རྒྱས་བདེ་ཆེན་ཉིད། །སྐྱེ་འགག་མེད་པའི་སྙིང་པོ་ཡིན། །བྱ་བྱེད་མེད་པའི་དཀྱིལ་འཁོར་གསུམ། །ཡེ་ནས་བསྒྲུབས་ཟིན་ལྷུན་གྱིས་
གྲུབ། །སྒྲུབ་པ་འདི་ལ་གང་གནས་པ། །རྣལ་འབྱོར་དེ་ཉིད་སྐལ་བ་བཟང་། །ཇི་ལྟར་བསྒོམས་བསྒྲུབས་ཅི་སྤྱད་ཀྱང་། །དེ་ཉིད་ཡིན་ཏེ་དོན་གྱི་མཆོག །རྒྱལ་བ་ཀུན་གྱི་སྙིང་པོ་ཉིད། །བྱིན་བརླབས་ངོ་མཚར་རྒྱ་ཆེར་འབྱུང་། །རྒྱལ་བ་རྒྱ་མཚོ་རྣམས་

ཀྱི་ཡུམ། །སངས་རྒྱས་བདེ་ཆེན་དེ་ལས་བྱུང་། །མ་ལུས་ཀུན་གྱི་སྙིང་པོ་འདི། །སྤྲོས་མེད་ཐིག་ལེར་གནས་པ་ལས། །རྒྱལ་སྲས་སེམས་ཅན་ཀུན་གྱི་ཕྱིར། །ཉིད་ལ་འཆད་ཅིང་ཉིད་ལ་འགྲེལ། །ཞི་གནས་མི་རྟོག་མཁའ་ཁྱབ་ལ། །ལྷག་མཐོང་མ་རྨོངས་
འཇའ་ཚོན་གསལ། །མ་འདྲེས་ཡོངས་སུ་རྫོགས་པ་ལས། །དགོངས་པ་ངེས་པར་འགྲེལ་པར་བཤད། །ལང་ཀའི་བདག་པོ་སྟོང་པ་ཉིད་ལས་དེ་སྐད་དུ་སྒྲ་བརྙན་བྱུང་བས་ཐམས་ཅད་མ་འདྲེས་པ་དང་། ཡོངས་སུ་རྫོགས་པར་འགྲེལ་པ་ནི་ཀུན་དུ་བཟང་པོ་
ཉིད་དོ། །ལང་ཀའི་བདག་པོ་དེ་ལྟར་ན་གང་གི་དགོངས་པ་ངེས་པར་འགྲེལ་པ་དེ་དག་ཀྱང་གཞི་དང་། འཇུག་པ་དང་། སྦྱོར་བ་དང་། རྩ་བ་དང་། །ངེས་པ་འབའ་ཞིག་ལས་གྱུར་པ་དང་། སྣང་བ་དང་། བརྗོད་པ་དང་། བསྟན་པར་རིག་པར་བྱའོ། །དེ་སྐད་ཅེས་
སྨྲས་པས། ལང་ཀའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས་ཡི་རངས་ཏེ། ཐམས་ཅད་མ་འདྲེས་པ་དང་། ཡོངས་སུ་རྫོགས་པར་ཐུགས་སུ་ཆུད་ནས་མཐའ་དབུས་མེད་པར་གྲོལ་ཏེ་དབུགས་ཕྱིན་པར་གྱུར་ཏོ། །སངས་རྒྱས་ཀུན་གྱི་
དགོངས་པ་འདུས་པའི་མདོ་ཆེན་པོ་ལས་གང་ཡོངས་སུ་རྫོགས་པར་འགྲེལ་བའི་ལེའུ་སྟེ་བཅུ་དགུ་པའོ།། །།ཐེག་པ་ཆེན་པོ་ངེས་པར་འབྱུང་བའི་ཚུལ་ལས་སངས་རྒྱས་ཀུན་གྱི་དགོངས་པ་ངེས་པར་འགྲེལ་བའི་གཏམ་རྒྱུད་བརྗོད་པའི་ཆོས་ཀྱི་ཕྱག་རྒྱ་ཡེ་
ཤེས་རྣམ་པར་བགྲོས་པ་སྟེ་བྱུང་ཚུལ་བསྟན་པ་ལྔ་པའོ།། །།དེ་ནས་ཡང་ལང་ཀའི་མངའ་བདག་བྱང་ཆུབ་སེམས་དཔའ་སེམས་དཔའ་ཆེན་པོ་དེས་གསང་བ་པའི་བདག་པོ་ལ་སྔོན་དུ་བྱུང་བའི་ཚིག་བཅུ་གཉིས་པའི་དྲུག་པ་གདུལ་བྱའི་སྐབས་ལ་བབ་པའི་ཆེད་ན་
བྱུང་ཞེས་འབྱུང་བའི་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ་ཉིད་ཀྱིས་ཐེག་པ་ཆེན་པོའི་གསང་བ་དམ་པ་འབྱུང་བའི་ཚུལ་སྟོན་པས་ལུང་བསྟན་པ་གཏམ་དུ་བརྗོད་པའི་སྐབས་སུ། གདུལ་བྱའི་སྐབས་ལ་བབ་པའི་ཚེ་ན་ཡང་བྱུང་ཞེས་བཀོད་པ་དེ་འཇིག་

རྟེན་པ་གང་ཞིག་གདུལ་བྱའི་སྐབས་ལ་བབ་ནས་ཡོངས་སུ་བཏུལ་བ་གྲགས་པ་ལགས། སྨྲས་པ། ལང་ཀའི་བདག་པོ་གསང་སྔགས་འབྱུང་བའི་རྒྱུ་གདུལ་བྱ་ཁྱད་པར་ཅན་འཇིག་རྟེན་སྲེག་པར་བྱེད་པ་ཁྲོ་བོ་ཚུལ་རྔམ་པ་གདུལ་བྱའི་དུས་ལ་ངེས་
པར་བབ་པའི་ཚེ་ཡོངས་སུ་བཏུལ་བ་ན་ཕྱོགས་དུས་ཀུན་གྱི་སངས་རྒྱས་ཐམས་ཅད་སྙིང་པོ་བྱང་ཆུབ་གང་ན་བ་དེར་འདུས་ནས་སྐྱེས་བུ་དམ་པ་དག་ལ་རྣམ་པར་བསྐུལ་བས་ཇི་ལྟ་ཇི་ལྟར་རྡོ་རྗེ་སེམས་དཔའི་སྤྲུལ་པའི་སྒྲོན་མ་ཡོངས་སུ་བཀོད་པ་ལྟ་བུའི་ཁྲོ་བོའི་སྤྲིན་རྣམ་
པར་འཇིགས་པ་རྡུལ་སྙེད་ཀྱིས་བཏུལ་བ་དེ་ཁོ་ནའི་ཚེ་དེ་ཁོ་ནའི་དུས་ཉིད་དུ་འབྱུང་ཞིང་གྲགས་སོ། །སྨྲས་པ། གསང་བ་པའི་བདག་པོ་གདུལ་བྱ་དེ་གང་ལས་བྱུང་། དེ་ལས་དང་སྐྱེ་བ་ཇི་ལྟར་ལགས། གསང་སྔགས་འབྱུང་བའི་རྒྱུར་ཇི་ལྟར་འགྱུར། དེ་
སྐད་ཅེས་གསོལ་བ་ལས། གསང་བ་པའི་བདག་པོས་སྨྲས་པ། ཀྱེ་ལང་ཀའི་བདག་པོ་དེ་ནི་འདི་ལྟ་སྟེ། དྲན་པ་དཔག་ཏུ་མེད་པ་འདས་པའི་དུས་ན་སྔོན་བྱུང་བ་ནི་སངས་རྒྱས་མི་བསྐྱོད་པ་ཞེས་བྱ་བ་བསྐལ་བ་ཀུན་དགའ་ཞེས་བྱ་བ་ལ་ཞིང་ཁམས་མངོན་པར་
དགའ་བ་ཞེས་བྱ་བར་བྱུང་བའི་བསྟན་པ་ལ་རབ་ཏུ་བྱུང་བའི་དགེ་སློང་ཐུབ་དཀའ་གཞོན་ནུ་ཞེས་བྱ་བ་གང་ཇི་ལྟ་བ་བཞིན་ཐེག་པ་ཆེན་པོའི་ཆོས་ཀྱི་འཁོར་ལོ་བསྐོར་བ། ཐམས་ཅད་ནས་ཐམས་ཅད་དུ་མ་བཅོས་མ་བསླད་པའི་རྣལ་འབྱོར་དུ་གནས་པ། སྐྱེས་བུ་
དམ་པར་ཆུད་པ་ཞིག་བྱུང་བ་དེས་སེམས་ཅན་ཐམས་ཅད་རྒྱལ་བའི་སྲས་སུ་མཐོང་ཞིང་དེ་དག་ཡོངས་སུ་བསྐུལ་བ་ལ་བརྩོན་པ་འབའ་ཞིག་བྱེད་དོ། །དེའི་ཚེ་དེའི་དུས་ན་འཁོར་བ་ཐོག་མ་དང་ཐ་མ་མེད་པར་སྐྱེ་བ་ཐོག་མ་དང་ཐ་མ་མེད་པའི་ལས་དང་། སྐྱེ་བ་
དཔག་ཏུ་མེད་པའི་བརྗོད་ཀྱིས་མི་རྫོགས་ཏེ། ལས་སྐབས་གཅིག་གིས་སྐྱེ་བ་ཆ་གཅིག་ལ་གཟུང་ན་འདི་ལྟ་སྟེ། ཉེ་འཁོར་དུ་ཁྱིམ་བདག་ཀེའུ་ཀ་ཡ་ཞེས་བྱ་བ་ལ་བུ་ཐར་པ་ནག་པོ་ཞེས་བྱ་བ་ཞིག་ཡོད་དེ། བུ་དེ་ལ་གཡོག་དན་བག་ཞེས་བྱ་བ་ཞིག་

ཡོད་དོ། །དེའི་ཚེ་དེའི་དུས་ན་མི་གང་དག་དགེ་སློང་ཐུབ་དཀའ་གཞོན་ནུ་ལ་རྣལ་འབྱོར་གྱི་ལམ་བསླབས་ཏེ། ཀུན་ཀྱང་རྣལ་འབྱོར་གྱི་ལམ་ལ་གནས་ཤིང་རྣལ་འབྱོར་ལ་སྤྱོད་པར་གྱུར་ཏོ། །དེའི་ཚེ་དེའི་དུས་ན་ཐར་པ་ནག་པོ་དེ་འདི་ལྟར་རྟོག་གོ །དགེ་
སློང་ཐུབ་དཀའ་གཞོན་ནུ་འདིས། ཐམས་ཅད་ཇི་ལྟ་བ་བཞིན་སྟོན་པར་ཐོས་ནས་ཐམས་ཅད་ནི་དགའ་བར་སྤྱོད་པ་བཞིན་དུ་ལམ་ཡོད་པའི་ཆོས་དག་འབྱུང་ངམ་ཞེས་རྟོག་ལ། གང་དག་ལ་ཡང་དྲིས་པ་ལས་ཐམས་ཅད་ཀྱིས་དེ་ལྟར་འབྱུང་བར་སྨྲས་སོ། །
དེ་ནས་གཡོག་དང་བཅས་པས་དགེ་སློང་ག་ལ་བ་དེར་ཞུགས་ཏེ་གནས་སུ་ཕྱིན་ནས་དེ་འདུན་པ་ལེགས་པར་འདུན་ནས་གསོལ་པ། དགེ་སློང་ཆེན་པོ་ཐམས་ཅད་ཇི་ལྟ་བར་སྤྱོད་པ་བཞིན་དུ་ལམ་སྟོན་པའི་ཐབས་ལ་མཁས་པར་ཐོས་ན་དེ་དེ་ལྟ་ཉིད་དུ་ངེས་
སམ། དེ་སྐད་ཅེས་གསོལ་པ་ལས་སྨྲས་པ། རིགས་ཀྱི་བུ་དེ་དེ་ལྟ་ཉིད་དུ་འབྱུང་བ་དག་ཡོད་པར་རུང་ངོ་། །དེ་སྐད་ཅེས་སྨྲས་པས། ཐར་པ་གཡོག་དང་བཅས་པ་དགའ་མགུ་ཡི་རངས་ཏེ། བདག་གཡོག་དང་བཅས་པ་འདི་ཁྱོད་ཉིད་ཀྱི་བཀའ་བར་གཟུང་
དུ་གསོལ། བདག་ཀྱང་ཁྱོད་ལ་ཐམས་ཅད་མི་འགག་པའི་ལམ་བླངས་ཏེ་རྣལ་འབྱོར་དུ་གནས་པར་འཚལ་བས་དམ་པ་ཉིད་དུ་ངེས་པར་གཟུང་དུ་གསོལ་ཞེས་འདུན་པ་ལས། དགེ་སློང་དེས་སྨྲས་པ། ཡིན་ནོ་ལེགས་སོ། །དེ་ལྟར་བྱའོ་ཞེས་ལེགས་
པ་བྱིན་ནས་ཐར་པ་ནག་པོ་རབ་ཏུ་བྱུང་ནས་དམ་པར་བཟུང་། དན་བག་ནི་དུས་འཛིན་དུ་བཟུང་སྟེ་དགེ་སློང་ཐར་པའི་གཡོག་ཏུ་བྱས་སོ། །དེ་ནས་ཐར་པ་དགེ་སློང་གིས་གསོལ་པ། དགེ་སློང་ཆེན་པོ་ཐམས་ཅད་ཇི་ལྟ་བའི་ལམ་དམ་པ་དེ་གང་ལགས།
སྨྲས་པ། ཇི་བཞིན་ཉིད་དེ་མ་བཅོས་ན། །དངོས་པོ་བཞི་ལ་གནས་སྤྱད་ཀྱང་། །ནམ་མཁའ་ལ་ནི་སྤྲིན་བཞིན་ཏེ། །འདི་ནི་རྣལ་འབྱོར་དམ་པའི་ལམ། །དེ་སྐད་ཅེས་སྨྲས་པས། ཐར་པ་གཡོག་དང་བཅས་པ་ཡི་རངས་ཏེ། ཨེ་མའོ་ཐབས་ལ་མཁས་

སོ། །ངེས་སོ། །ཡིན་ནོ། །གཏད་དོ། །བདག་ཐམས་ཅད་དུ་དེ་ལ་ཡོངས་སུ་གནས་སོ་ཞེས་གསོལ་ཏེ། སྒྲ་ཇི་ལྟ་བ་དེ་བཞིན་དུ་སྤྱད་པ་ལས་ཐར་བ་དགེ་སློང་ནི་བློ་གྲོས་ཀྱི་ངེས་པ་མ་རྙེད་དེ། སྒྲ་འབའ་ཞིག་ལ་ཕྱོགས་པས་དངོས་པོ་བཞི་ཁོ་
ནས་སྤྱད་དེ་ཞེན་ནས་ལུས་དམ་པའི་ཆ་བྱད་དུ་བཅུག་ནས་སེམས་ངན་འགྲོ་བའི་ལམ་དུ་ཞུགས་སོ། །གཡོག་དན་བག་ནི་སྒྲ་གཞིའི་དོན་གྱི་ངེས་པ་རྙེད་ནས་བློ་གྲོས་དམ་པར་འབྲེལ་ཏེ། དོན་འབའ་ཞིག་ལ་ཕྱོགས་པས་ཇི་བཞིན་པ་ཁོ་ནར་སྤྱད་དེ་ཞེན་ནས་ཡོངས་
སུ་རྣལ་འབྱོར་པས་ལུས་མ་རབས་ཀྱི་ཆ་བྱད་དུ་བཅུག་ནས་སེམས་དམ་པར་ངེས་པའི་ལམ་དུ་ཞུགས་སོ། །དེ་ནས་ཐར་པ་གཡོག་དང་ལྟ་བ་མ་མཐུན་ཏེ། སྨྲས་པ། བདག་ཅག་གཉིས་ནི་དཔོན་གཅིག་ལ་སྒྲ་གཅིག་ཏུ་བྱུང་བ་འདི་ལ་སོ་སོར་མ་མཐུན་པ་འདི་ཇི་
ལྟ་ཞིག །དན་བག་གིས་སྨྲས་པ། བདག་གིས་ནི་ད་ལྟར་ངེས་པར་འཇོག་པ་འདི་ཁོ་ན་ལས་གཞན་མ་ཐོས་ལགས་སོ། །སྨྲས་པ། བདག་གིས་ཀྱང་ད་ལྟར་ངེས་པ་རྙེད་དེ་སྤྱོད་པ་འདི་ཁོ་ན་ལས་གཞན་མ་ཐོས་སོ་ཞེས་སྨྲས་པས། དེ་ལ་རྩོད་པ་ཆེན་པོར་
གྱུར་ཏེ། ལྟ་བ་མ་མཐུན་པས་གཡོག་དང་སོ་སོར་བཀལ་ཏེ་མ་མཐོང་མ་ཕྲད་པར་དམ་བཅས་ནས་གཡོག་ཁམས་རིང་པོར་བཤུགས་ཏེ་སྤངས་སོ། །དེ་ནས་ཐར་པ་དགེ་སློང་དེ་མངོན་པའི་ང་རྒྱལ་ལོག་པའི་རི་བོར་སྐྱེས་ཏེ་དཔོན་ལ་སོ་སོའི་ངེས་པ་རྙེད་པ་གསོལ་བ་
ལས། དགེ་སློང་ཐུབ་དཀའ་གཞོན་ནུ་མ་བཅོས་མ་བསླད་པའི་རྣལ་མར་སྤྱོད་པས་ཁ་གསག་མེད་དེ་རང་བཞིན་གསོང་པོར་སྨྲ་བས་ན་དན་བག་ལྟར་ངེས་སོ་ཞེས་བསྒོ་བས་ཐར་བ་ཀུན་ནས་འཁྲུགས་ཏེ་སྨྲས་པ། དཔོན་པར་འདྲ་ན་གཉིག་ལྟར་རོ་ཞེས་ཀྱང་མ་མཉམ་
པར་ངེས་པར་བདག་བཀར་བཅག་པ་དང་སུན་ཕྱུང་བ་འདིས་བྱས་པས་དཔོན་འདི་ཡང་ཁམས་འདིར་མ་ཆགས་པར་བྱས་ལ། འདི་དག་བདག་གི་ཁམས་སུ་བྱའོ་ཞེས་དམ་བཅས་ནས་ཆེ་བའི་ང་རྒྱལ་སྐྱེས་ཏེ་དཔོན་ཡང་ཁམས་རིང་པོར་བཤུགས་ཏེ་ཡོངས་སུ་

སྤངས་སོ། །དེ་ནས་ཐར་པ་དེ་དེ་བཞིན་གཤེགས་པའི་གསུང་གི་སྒོ་གྲངས་མང་ཞིང་རྒྱ་ཆེ་བར་གྱུར་པས་ཐམས་ཅད་དུ་སྟོན་པ་དཔག་པར་དཀའ་བའི་ཕྱིར་ཡོངས་སུ་མ་ཆུད་དེ་གཞལ་བ་གཉིས་ཀྱིས་གཞལ་བ་མ་བྱས་པར་ཐར་པ་རང་གི་ཚད་མ་ལ་ཞེན་ཕྱོགས་སུ་
དྲངས་ནས་ཐམས་ཅད་ཀྱང་ལོག་པར་བསྒྱུར། ཉིད་ཀྱང་ལོག་པའི་རྒྱ་མཚོར་ཞུགས་ཏེ། ལོག་པའི་དཀའ་ཐུབ་དྲག་པོ་དང་། ལོག་པའི་བརྟུལ་ཞུགས་ཆེན་པོ་ལ་ཞུགས་པ་ནི་དུར་ཁྲོད་ཀྱི་མི་རོ་དག་བླངས་ཏེ་ཁ་ཟས་སུ་བྱེད་ཅིང་པགས་པ་དག་བཤུས་ཏེ་གཡང་
གཞིར་གྱོན་ཏེ་ལོངས་སྤྱོད་པ་ཅེ་སྤྱང་ནག་པོ་དང་། འཕར་བ་རྐང་རྡེབས་དང་། དྲེད་མོ་ལག་རྡེབས་དང་། བྱ་གཅན་གསོད་བྱེད་དང་། དུར་བྱ་ཀང་ཀ་དང་། ཟ་བྱེད་དུར་ཕག་ལ་སོགས་པའི་གསོན་མ་མང་པོ་བརྟེན་ཏེ་ཐམས་ཅད་ཀྱི་སྲོག་གཅོད་ཅིང་ཤ་ཁྲག་
ལ་ལོངས་སྤྱོད་པར་བྱེད་པ། སྨད་འཚོང་མའི་ཚོགས་མང་པོར་བསྡུས་ཏེ་ཆགས་པ་ཆེན་པོར་སྤྱོད་པ། དངོས་པོ་བཞི་ལས་མི་འདའ་བར་དངོས་པོ་བཞིའི་རང་བཞིན་ཇི་བཞིན་པ་དེ་ཁོ་ན་ཉིད་ལས་ཡོངས་སུ་འདས་པར་གྱུར་ཏོ། །དེ་ནས་སྐྱེ་བ་དེ་འཕོས་པར་གྱུར་
ཏེ། དེ་སྐྱེ་བ་དེའི་ཕྱི་མ་ལ་ཅེ་སྤྱང་ནག་པོའི་ལུས་སུ་སྐྱེ་བ་ལྔ་བརྒྱ་བླངས་ཏེ་སྲོག་ཆགས་འབའ་ཞིག་གསོད་པའི་ལས་སྤྱོད་ཅིང་ཤ་དང་ཁྲག་དྲོན་མོ་ཟ་བར་གྱུར་ཏོ། །སྐྱེ་བ་དེའི་ཕྱི་མ་དག་ལ་ཁྱི་ལུ་འདེ་ལ་སོགས་པ་གདུག་པས་གསོད་པའི་ལས་ཅན་ཤ་ཁྲག་
ཟས་སུ་བྱེད་པ་ཐ་དད་པའི་ལུས་སུ་སྐྱེ་བ་ལྔ་བརྒྱ་བླངས་ཤིང་གཞན་གྱིས་བསད་ཅིང་སྐྱེ་བ་འཕོ་བ་ཤ་དག་ཏུ་གྱུར་ཏོ། །སྐྱེ་བ་དེའི་ཕྱི་མ་དག་ལ་བྱ་ནེ་ལེ་ཤ་ཟན་དང་། ཁྲག་འཐུང་མཆུ་དམར་དང་། དུར་བྱ་ཀང་ཀ་དང་། རུ་རྩེ་རྐང་ལྡག་ལ་སོགས་
པ་ཐ་དད་པའི་ལུས་བླངས་ཤིང་གཞན་གྱིས་བསད་ཅིང་སྐྱེ་བ་འཕོ་བ་ཤ་དག་ཏུ་གྱུར་ཏོ། །སྐྱེ་བ་དེ་དག་གི་ཕྱི་མ་དག་ལ་སྦྲང་བུ་ཏྲེ་མ་དང་། སྲིན་བུ་པུ་ཀ་དང་། རོ་ཟ་རྐང་འཇིབ་ལ་སོགས་པ་འབུ་དང་ཤིན་ཏུ་འབུ་ཆེན་ཐ་དད་པའི་ལུས་སུ་སྐྱེ་བ་བླངས་ཤིང་དེ་

དག་ཀྱང་གཉེན་པོས་གསད་ཅིང་སྐྱེ་བ་འཕོ་བ་ཤ་དག་ཏུ་གྱུར་ཏོ། །སྐྱེ་བ་དེའི་ཕྱི་མ་དག་ལ་ངན་སྐྱུགས་ཀྱི་འདམ་ན་གནས་པའི་སྐྱེ་བོར་སྐྱེས་པ་སྐྱེ་བ་ལྔ་བརྒྱ་བླངས་ཏེ་གཉེན་པོས་གསད་ཅིང་སྐྱེ་བ་འཕོ་བ་ཤ་དག་ཏུ་གྱུར་ཏོ། །སྐྱེ་བ་དེ་དག་གི་
ཕྱི་མ་ལ་སྲོག་ཆགས་དག་གི་ལུས་ལ་གནས་ཤིང་ཟས་ཀྱང་དེ་དག་ལ་བྱེད་པའི་སྐྱེ་བོར་སྐྱེ་བ་ལྔ་བརྒྱ་བླངས་ཏེ་གཉེན་པོས་གསད་ཅིང་སྐྱེ་བ་འཕོ་བ་ཤ་དག་ཏུ་གྱུར་ཏོ། །ཡང་སྐྱེ་བ་དེའི་ཕྱི་མ་དག་ལ་གསད་པའི་ཤ་དང་། ཤི་བའི་རོ་དང་། རྣམ་པར་རུལ་བ་དང་། ལུང་
པ་ཐ་དད་རྡོ་དང་། གམ་བྲག་དང་། སྡོང་ཆེན་ལ་སོགས་པའི་ནང་དུ་གནས་པའི་སྐྱེ་བོར་གྱུར་ཏེ་དེ་ལ་གནས་ཤིང་ཟས་ཀྱང་དེས་འཚོ་བ་གཉེན་པོས་གསད་ཅིང་སྐྱེ་བ་འཕོ་བ་འབའ་ཞིག་ཏུ་གྱུར་ཏོ། །སྐྱེ་བ་དེའི་ཕྱི་མ་དག་ལ་མངལ་གྱི་གྲོང་ཁྱེར་ན་གནས་པའི་
སྐྱེ་བོར་སྐྱེ་བ་ལྔ་བརྒྱ་གནས་ཏེ་གནས་དང་འཚོ་བ་ཡང་དེ་ལས་བྱེད་པར་གྱུར་ཏོ། །ཡང་སྐྱེ་བ་དེའི་ཕྱི་མ་ལ་མནར་མེད་པའི་གནས་རྡོ་རྗེ་དམྱལ་བ་ཞེས་བྱ་བར་དེ་ཉིད་ཀྱི་ཚེའི་ཚད་བརྒྱད་ཁྲིའི་བར་དུ་གནས་ཏེ། དམྱལ་བ་དེའི་སྡུག་བསྔལ་གྱི་ཚད་ནི་བརྗོད་དུ་
མི་རུང་ངོ་། །དེ་ཅིའི་ཕྱིར་ཞེ་ན། གང་གི་མདུན་དུ་སྡུག་བསྔལ་གྱི་ཚད་དེ་བརྗོད་ན་གང་གིས་ཐོས་པ་དེ་བརྒྱལ་བར་འགྱུར་རོ། །དེའི་ཚེ་དེའི་དུས་ན་དམྱལ་བ་དེས་ཨེ་མའོ་འདི་ཅི་ཉེས་སྨྲས་པའི་སྐད་ཅིག་གཅིག་གིས་ཕྱིན་པར་གྱུར་ཏོ། །རྡོ་རྗེ་སེམས་
དཔའ་ཐུབ་པའི་དབང་པོ་ཆོས་ཀྱི་རྒྱལ་པོ་དེས་ཁོ་ན་ཉིད་ཀྱི་ལས་ཡིན་ཞེས་ཆོས་བསྟན་པས་ལས་དེ་ཡིད་ལ་བྱས་པས་ཡོངས་སུ་ཤེས་ཏེ་འགྱོད་པར་གྱུར་ཏོ། །འགྱོད་པ་ཙམ་གྱིས་གནས་དེ་ནས་འཕོས་ནས་རབ་ཏུ་ཚ་བའི་དམྱལ་བའི་གནས་སུ་ཡང་དེ་ཉིད་ཀྱི་ཚེ་
ཚད་བརྒྱད་ཁྲིར་གནས་ཏེ་མནར་མེད་པ་ཇི་ལྟ་བ་བཞིན་ནོ། །དེ་ནས་ཡང་འཕོས་ནས་ཚ་བ་ཆུང་ངུ་དང་། ངུ་འབོད་ཆེན་པོ་དང་། ངུ་འབོད་དང་། བསྡུས་འཇོམས་དང་། ཐིག་གནག་དང་། འབར་བ་དང་། ཡང་སོས་ལ་སོགས་པའི་དམྱལ་བའི་གནས་སུ་

ཡང་དེ་དག་གི་ཚེ་ཚད་བརྒྱད་ཁྲིར་གནས་ཏེ་མནར་མེད་པ་དང་རབ་ཏུ་ཚ་བ་ཇི་ལྟ་བ་བཞིན་ནོ། །དེ་དག་ནམ་ཞིག་པ་ན་ཡང་འཇིག་རྟེན་གྱི་ཁམས་གཞན་གྱི་དམྱལ་བ་རྣམས་སུ་དེ་ལྟར་འཕེན་ནོ། །དེ་དག་ལས་འཕོས་ནས་ཀྱང་གང་འཇིག་པའི་བསྐལ་
པ་མུ་གེ་དང་ནད་དང་མཚོན་གང་དུ་བྱུང་བ་དེ་དང་དེར་སྐྱེ་བར་བྱེད་དོ། །འཇིག་པ་དེ་དག་གིས་དེ་དག་གང་སྟོངས་པ་ཡང་གཞན་དག་གང་འཇིག་པའི་དུས་སུ་ཡང་དེར་སྐྱེ་བ་ལེན་པར་འགྱུར་རོ། །དེ་དག་ལས་ཐར་ནས་ཀྱང་ཤ་དང་རུས་པའི་ཆེད་དུ་གསོད་
པའི་སྐྱེ་བའི་རིགས་སུ་བསྐལ་པ་བརྒྱད་ཁྲིར་སྐྱེ་བ་ལེན་ཅིང་འཕོ་བར་འགྱུར་རོ། །དེ་ལས་ཐར་ནས་གཤིན་རྗེའི་འཇིག་རྟེན་གྱི་ཁམས་སུ་སྐྱེ་བ་ལྔ་བརྒྱར་གདུང་བར་གྱུར་ཏོ། །དེ་ལས་འཕོས་ནས་ལུས་སྲུལ་པོའི་རིགས་སུ་སྐྱེ་བ་བླངས་སོ། །སྐྱེ་བ་
དེའི་ཕྱི་མ་ལ་ཤ་ཟའི་རིགས་སུ་སྐྱེ་བ་བླངས་སོ། །སྐྱེ་བ་དེའི་ཕྱི་མ་ལ་སྲུལ་པོའི་རིགས་སུ་སྐྱེ་བ་བླངས་ཏེ། སྲུལ་པོ་གཉའ་དྲེག་ཅན་ཞེས་བྱ་བའི་བུ་སྲུལ་པོ་གཏོགས་འདོད་ཅན་ཞེས་བྱ་བར་སྐྱེ་བ་བླངས་སོ། །སྐྱེ་བ་དེའི་ཕྱི་མ་ལ་ཡུལ་ལང་ཀ་པུ་ར་ཞེས་
བྱ་བའི་སྨད་འཚོང་མ་ཞིག་གི་མངལ་དུ་ཆགས་ཏེ་སྐྱེ་བར་སྨིན་ཏོ། །དེ་དེར་སྐྱེ་བ་བླངས་ཏེ་ཟླ་བ་དགུ་ན་མ་ཤི་བར་གྱུར་པ་དང་། མི་གང་དག་གིས་དྭ་བུ་རྐོག་བུ་འདི་གསོ་བ་བྱར་ཡུལ་གང་སྨེ་བར་འགྱུར་བས་མའི་མཆན་དུ་གཞག་པར་རིགས་སོ་ཞེས་གླེངས་
ནས་དུག་ཤིང་ན་ལ་བྱི་ཞེས་བྱ་བའི་རྩ་ན་དུར་ཕག་གཏི་མུག་གི་ཚང་འཆས་པའི་བར་ན་དུག་སྦྲུལ་ཞེ་སྡང་གི་འཁྲས་སར་བྱེད་པ་ཁ་ལ་འདོད་ཆགས་དུག་བྱའི་ཚང་འཆས་པའི་རྩར་ཀུན་གྱིས་མའི་རོ་ཁང་བརྩིགས་ཏེ། རོ་ཁྱོགས་ལ་བླངས་ཏེ་དེར་བཅུག་ནས་
བུ་ཡང་མའི་རོ་མཆན་དུ་གཞག་གོ། །དྭ་བུ་དེས་མའི་རོ་ལ་འཇུས་ནས་ནུ་མ་ལ་འཇིབས་པས་ཆུ་སེར་དུ་དྲངས་ཏེ་ཞག་བདུན་གྱི་འཚོ་བ་བྱས་སོ། །དེ་ནས་ཁྲག་ཏུ་འཇིབས་པས་ཞག་བདུན་གྱི་འཚོ་བས་འཚོའོ། །དེ་ནས་ནུ་མ་ཟོས་པས་ཞག་བཅུའི་འཚོ་

བས་འཚོའོ། །དེ་ནས་མའི་ནང་གྲོལ་ཟད་པར་ཟོས་པས་འཚོ་བའི་བྱ་བར་གྱུར་ཏོ། །དེ་ནས་ཤ་ཟད་པར་ཟོས་པས་ཟླ་བ་བདུན་གྱི་འཚོ་བའི་བྱ་བ་བྱས་སོ། །དེ་ནས་གཞོན་ནུ་དེ་རྟས་པར་གྱུར་ནས་དུར་ཁྲོད་ཀྱི་རོ་རྣམས་ཀྱིས་འཚོ་བའི་
བྱ་བ་བྱས་སོ། །དེ་ནས་ཤིན་ཏུ་རྟས་པར་གྱུར་པ་དང་། རོ་རྣམས་ཟས་སུ་ཟ་ཞིང་རོ་གོས་དང་པགས་པ་རྣམས་གྱོན་ཏེ། དུར་ཁྲོད་ཀྱི་མ་མོ་དང་། ཤ་ཟ་དང་། ཡི་དགས་ཀྱི་ཚོགས་དང་། མི་མ་ལགས་པའི་ཚོགས་མང་པོ་ཡང་མི་རོ་རྣམས་ཀྱི་ཤ་
རྗེན་ཟོས་པའི་རང་བཞིན་གྱི་མཐུས་དབང་དུ་འདུས་ཏེ། དུར་ཁྲོད་ཀྱི་གདུག་པ་ཅན་ཀུན་གྱི་བདག་པོར་གྱུར་ཏེ། གཞན་གྱི་གཟི་བྱིན་འཕྲོག་པ། མི་གང་དང་གང་དག་གསོན་པོར་ཟ་ཞིང་མདངས་འཕྲོག་པ། ཤིན་ཏུ་འཇིགས་པའི་གཟུགས་ཅན་མ་རུངས་
པར་གྱུར་ཏོ། །མའི་ཤ་རྗེན་ཟོས་པས་ན་མ་ཟན་མ་ཏང་ཀ་ཞེས་མིང་གང་དག་གིས་ཡོངས་སུ་གྲགས་སོ། །ཡི་དགས་ཆེན་པོ་དེའི་ཁ་རླངས་ལས་ནི་ཚ་བའི་ནད་བྱུང་བས་འབྱུང་བས་ཁྱབ་སྟེ་འགྲོ་བ་གང་ལུས་ཅན་རྣམས་ཟུག་རྔུ་དྲག་པོས་གཟིར་བ། སྣ་ནས་
གྲང་བའི་ནད་བྱུང་བས་འབྱུང་བ་ཁྱབ་སྟེ་ཀུན་དུ་གདུང་བར་བྱེད་དོ། །མི་གདུག་གིས་ཕོག་པས་འཆི་བར་ངེས་པ། དྲག་པོའི་སྔགས་གཟེར་བཟླས་པ་བྱས་པས་ཐམས་ཅད་དབང་དུ་འདུ་བར་གྱུར་པ། ལུས་ཆེན་པོ་ལ་མདོག་ཐལ་ཀ་སྔོ་སྐྱར་འདུག་པ། ཁྲག་
དང་ཞག་གི་ཐིག་ལེས་བརྒྱན་པ། ཐོད་པའི་ཕྲེང་བ་སེ་རལ་དུ་ཐོགས་པ། དམར་པོ་ཁྲག་གིས་བསྐུས་པའི་པགས་པ་བགོས་པ། ཐོད་སྐྱོགས་ཁྲག་གིས་བཀང་བ་རྟག་པར་འཐུང་བ། སྐྲ་རལ་པ་ཁམ་ནག་འབན་ཅིང་གཉི་གས་པ། འབྲུ་མར་ཐོད་རུས་
ཟས་སུ་ཟ་བ། ཐལ་བ་དང་སྲོ་ཙ་ཨཉྫ་ནས་ལུས་བརྒྱན་པ། བྱའི་གཤོག་པ་ལུས་ལས་བྱུང་བས་ནམ་མཁའ་ལ་བྱ་བཞིན་བྱ་བ་བྱེད་པ། གཅེར་བུ་པ་ཐོགས་མེད་ཐོགས་པ་མེད་པས་ཆུ་ལ་ཉ་བཞིན་བྱ་བ་བྱེད་པ། གང་གིས་མཐོང་བ་མིག་རྩ་རིག་རིག་སྡང་

ཞིང་བརྒྱལ་བར་བྱེད་པ། ལུས་ཕག་གི་སྤུ་ཅན་རྩུབ་ལ་ཡན་ལག་སྦྲུལ་དུ་བྱུང་ཞིང་སྦྲུལ་གྱིས་བརྒྱན་པ། སེན་མོ་ཀང་ཀའི་མཆུ་སྡེར་དུ་བྱུང་བས་གང་ཟིན་པའི་ལུས་ཅན་ཤ་རུས་མྱགས་པར་བྱེད་པ། སྔོན་གོམས་པའི་མཐུས་ལུས་ཅན་ཐ་དད་གསད་པར་
དམིགས་པ། གང་མོའི་དབང་པོ་ཐམས་ཅད་སྡུད་པར་ཆགས་པ། ལུས་ཅན་མཐའ་དག་ཧག་སྔགས་ཏེ་ཟིལ་གྱིས་མནན་ནས་འདར་ཡེད་ཡེད་འཇོག་པ། འཇིག་རྟེན་གྱི་མ་མོ་དང་། འབྱུང་པོ་དང་། གནོད་སྦྱིན་མཐུ་ཅན་གྱིས་ཕྱག་བྱས་ཏེ་གཙོ་བོར་
མཐོང་བ། གདུག་པ་ཅན་མཐའ་དག་མངག་གཞུག་པ་དང་། ཕོ་ཉ་དང་། གཡོག་དང་། ཡང་གཡོག་དང་། བྲན་དང་། ཡང་བྲན་དུ་འཁོལ་ཞིང་། ཀུན་ལ་དབང་སྒྱུར་བའི་དབང་ཕྱུག་ཆེན་པོར་གྱུར་ཏོ། །སངས་རྒྱས་ཀུན་གྱི་དགོངས་པ་འདུས་པའི་མདོ་
ཆེན་པོ་ལས་གང་ཡོངས་སུ་མ་དག་པའི་སྐྱེ་རྒྱུད་བསྟན་པའི་ལེའུ་སྟེ་ཉི་ཤུ་པའོ།། །།དེ་ནས་ཡི་དགས་དྲག་པོ་དེ་ང་རྒྱལ་གྱི་གཏུམ་སྐད་འབྱིན་ཏེ། ཨེ་མའོ་ཐམས་ཅད་ཀྱི་དབང་ཕྱུག་ཆེན་པོ་ནི་བདག་ཡིན་ན། བདག་ལས་གཞན་པའི་དབང་ཕྱུག་
དང་ཕྲུ་མ་ཡོད་ན་དེ་ཡང་བདག་གིར་འགྱུར་ན། བདག་ནི་འགྲན་གྱི་ཟླ་མེད་ཆེ་བཙན་གཅིག་པུར་བྱུང་ངོ་ཞེས་ང་རྒྱལ་གྱི་གདངས་ངར་སྒྲོགས་སོ། །དེའི་ཚེ་འགྲོ་བ་རྣམས་ཀྱི་ཚུལ་འདི་ལྟར་བྱུང་སྟེ། ཤེས་བློ་ཐམས་ཅད་རྨུགས་ཤིང་བདུད་ཀྱིས་བྱིན་གྱིས་
བརླབས་པས་ཐམས་ཅད་ཀྱང་ཤིན་ཏུ་སྟོང་པ་རྒྱུན་ཆད་དུ་གྱུར་ཏེ་མཐའ་ཟད་པ་ཤ་དག་གོ། །བདག་ཏུ་ཞེན་པར་གྱུར་ཏེ་ཐེར་ཟུག་པ་ཤ་དག་གོ། །འགོག་པ་འཇུག་པར་གྱུར་ཏེ་འགགས་ཤིང་འདས་པ་ཤ་དག་གོ། །གདུག་ཅིང་གཏུམ་པར་གྱུར་
ཏེ་འོ་དོད་འབོད་པར་ལྟུང་བ་ཤ་དག་གོ། །ལོག་པར་ལྟ་བར་གྱུར་ཏེ་མནར་མེད་པར་ལྟུང་བ་ཤ་དག་གོ། །བརྐམ་ཞིང་འཇུངས་པར་གྱུར་ཏེ་གཤིན་རྗེའི་འཇིག་རྟེན་དུ་ལྟུང་བ་ཤ་དག་གོ། །ཤིན་ཏུ་གཡེང་བ་ཆེན་པོར་གྱུར་ཏེ་མི་ཁོམ་པའི་གནས་སུ་

ལྟུང་བཤད་དག་གོ། །ཤིན་ཏུ་གཏི་མུག་གིས་རྨོངས་པར་གྱུར་ཏེ་བྱོལ་སོང་གི་གནས་སུ་ལྟུང་བ་ཤ་དག་གོ། །ཤིན་ཏུ་ཆགས་པས་མྱོས་པར་གྱུར་ཏེ་མངལ་གྱི་ཁམས་སུ་འགྲོ་བ་ཤ་དག་གོ། །བྱང་ཆུབ་ཀྱི་ཤིང་སྐམས་པས་
སེམས་ཀྱི་རྩ་བ་ཚིག་པ་ཤ་དག་གོ། །ལང་ཀའི་བདག་པོ་དེ་ཡང་འདི་ལྟར་གྲགས་ཤིང་གྲགས་ཏེ་གྲགས་པར་གྱུར་ཏོ། །འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་རྟག་པ་ཡི། །དེ་བཞིན་གཤེགས་པའི་གསུང་རབ་ལ། །འགྲོ་བའི་ཚུལ་
ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ཤིན་ཏུ་སྟོང་པ་ཉིད་ལ་བརྩོན། །སྟོང་པ་ཉིད་དུ་མུ་ཆད་པས། །ཆད་པའི་ཁམས་ཆེན་ཉིད་དུ་གྱུར། །དེ་ནས་སླར་ཡང་འཕོས་པ་ཡིས། །གྲོལ་ཐར་ལམ་ནི་ཆད་པར་འགྱུར། །འདས་པའི་དུས་ན་
སྔོན་བྱུང་བ། །བདག་ཉིད་ཆེན་པོ་རྟག་པ་ཡི། །དེ་བཞིན་གཤེགས་པའི་གསུང་རབ་ལ། །འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ཤིན་ཏུ་བདག་ཏུ་ལྟ་ལ་བརྩོན། །ཐེར་ཟུག་རྟག་པ་བདག་ཆེན་གྱིས། །ཐམས་ཅད་
རྟག་པ་ཉིད་དུ་འགྱུར། །དེ་ནས་དེ་ཉིད་བླར་བྱུང་བྱུང་བས། །དམ་པ་དག་ལ་རྨོངས་པར་འགྱུར། །འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་རྟག་པ་ཡི། །དེ་བཞིན་གཤེགས་པའི་གསུང་རབ་ལ། །འགྲོ་བའི་ཚུལ་ནི་སྔོན་བྱུང་བ། །དེ་ཚེ་
སེམས་ཅན་ཐམས་ཅད་ནི། །ཤིན་ཏུ་འགོག་ལ་བརྩོན་པར་འགྱུར། །ཤིན་ཏུ་འགོག་པའི་སྦྱོར་བ་ཡིས། །འགགས་ཤིང་ཡོངས་སུ་འདས་པར་འགྱུར། །འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་རྟག་པ་ཡི། །དེ་བཞིན་གཤེགས་
པའི་གསུང་རབ་ལ། །འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ཤིན་ཏུ་ཁྲོ་གཏུམ་གདུག་པར་འགྱུར། །ཤིན་ཏུ་ཁྲོ་གཏུམ་གདུག་པ་ཡིས། །འོ་དོད་འབོད་པར་ལྟུང་བར་འགྱུར། །དེ་ནས་འཕོས་པའི་སེམས་ཅན་དེ། །

བག་ཆགས་ལས་ཀྱིས་མཚམས་སྦྱར་ནས། །ཤིན་ཏུ་གདུག་པ་ཆེན་པོར་འགྱུར། །བློ་ཡང་བདུད་ཀྱིས་བྱིན་བརླབས་ནས། །དུག་ནད་རིམས་དང་ཕྲ་མེན་མ། །གནོད་པའི་ཟུག་རྔུ་གཟེར་མདའ་འཕྲོ། །བདུད་དང་ལོག་འདྲེན་རྣམ་ཐར་འཚེ། །ཤིན་
ཏུ་གཏུམ་རྔམ་མ་རུངས་པས། འཇིག་རྟེན་གསུམ་དག་འཇིག་བྱེད་ཅིང་། །དམ་ཚིག་དག་ལ་ཟ་བ་དང་། །དམ་པའི་ཆུ་བོ་རྐ་བཟློག་སྟེ། །ལྷ་མི་འཇིག་རྟེན་འཕོ་བར་བྱེད། །འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་རྟག་པ་ཡི། །དེ་བཞིན་
གཤེགས་པའི་གསུང་རབ་ལ། །འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ལོག་པར་ལྟ་ལ་གནས་པར་འགྱུར། །ལྟ་བ་ཤིན་ཏུ་ལོག་པ་ཡིས། །མནར་མེད་དམྱལ་བ་ཆེན་པོར་ལྟུང་། །དེ་ནས་གལ་ཏེ་སླར་བྱུང་ན། །དམ་
པའི་ལམ་ཉིད་ཆད་པར་འགྱུར། །འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་རྟག་པ་ཡི། །དེ་བཞིན་གཤེགས་པའི་གསུང་རབ་ལ། །འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ཤིན་ཏུ་བརྐམ་ཞིང་འཇུངས་པར་
འགྱུར། །ཤིན་ཏུ་གདུངས་འཇུངས་བརྐམ་པ་ཡིས། །ཡི་དགས་གཤིན་རྗེའི་ཁམས་སུ་ལྷུང་། །དེ་ནས་དེ་ཉིད་སླར་བྱུང་བས། །ཤིན་ཏུ་སྐེམ་པོ་དབུལ་པོར་གྱུར། །བཀྲེས་སྐོམ་ཤིན་ཏུ་གདུངས་པ་ཡིས། །ཕན་ཚུན་གསོད་ཅིང་འཇོམས་པར་
འགྱུར། །འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་རྟག་པ་ཡི། །དེ་བཞིན་གཤེགས་པའི་གསུང་རབ་ལ། །འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ཤིན་ཏུ་ལེ་ལོས་གཡེང་བར་འགྱུར། །ཤིན་ཏུ་
གཡེང་བའི་ལེ་ལོ་ཡིས། །མི་ཁོམ་གནས་སུ་ལྟུང་བར་འགྱུར། །དེ་ནས་དེ་ཉིད་སླར་བྱུང་བས། །བསྐལ་པ་གསུམ་གྱི་བསྐལ་པར་འགྱུར། །འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་རྟག་པ་ཡི། །དེ་བཞིན་གཤེགས་པའི་

གསུང་རབ་ལ། །འགྲོ་བའི་ཚུལ་དུ་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ཤིན་ཏུ་གཏི་མུག་རྨོངས་པར་འགྱུར། །ཤིན་ཏུ་གཏི་མུག་རྨོངས་པ་ཡིས། །གཏི་མུག་བྱོལ་སོང་ཉིད་དུ་ལྟུང་། །དེ་ནས་དེ་ཉིད་སླར་བྱུང་
བས། །མཐོང་སྣང་ལམ་ཡང་ཆད་པར་འགྱུར། །འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་རྟག་པ་ཡི། །དེ་བཞིན་གཤེགས་པའི་གསུང་རབ་ལ། །འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ཤིན་ཏུ་ཆགས་
པས་མྱོས་པར་གྱུར། །ཤིན་ཏུ་ཆགས་པས་མྱོས་པ་ཡིས། །མངལ་གྱི་གྲོང་ཁྱེར་ཉིད་དུ་ལྟུང་། །དེ་ནས་དེ་ཉིད་སླར་བྱུང་བས། །འདོད་པའི་མེ་ཡིས་གདུང་བར་འགྱུར། །ཞེས་ཐམས་ཅད་དུ་གྲག་གོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་
འདས་པ་སྔོན་བྱུང་བའི་ལེའུ་ཞེས་བྱ་སྟེ་ཉི་ཤུ་གཅིག་པའོ།། །།དེ་ནས་གསང་བ་པའི་བདག་པོས་སྨྲས་པ། ལང་ཀའི་བདག་པོ་དེ་ལྟར་ཡི་དགས་དྲག་པོ་དེས་མི་གང་ཇི་སྙེད་པ་དབང་དུ་གྱུར་པའི་ཆེ་བ་བཅོམ་ཞིང་། ཨེ་མའོ་དབང་ཕྱུག་
བདག་ལས་སུ་དག་ཆེ་སུ་དག་ཡོད་ཅེས་ཉིད་ལ་དམ་པ་དང་། ལང་ཀ་ཡུལ་གྱི་གྲོང་རྡལ་མཚོ་རྐོ་རྐ་ཐང་མར་གྱི་གླིང་བྱན་ལག་མཆོངས་ཀྱི་རིམ་ལ་ཡ་གནམ་ལྕགས་ཡོད་པའི་རྩེ་ཞེས་བྱ་བ་ན་ལང་ཀའི་མངའ་བདག་སྲིན་པོའི་རྒྱལ་པོ་ཞེས་བྱ་བ། སངས་རྒྱས་
ཐུབ་པའི་དབང་པོ་ཞེས་བྱ་བའི་སློབ་མར་གྱུར་པ། མཐུ་དང་རྩལ་རྨད་དུ་བྱུང་ཞིང་ངོ་མཚར་ཆེ་བ། བློ་གྲོས་ཡོངས་སུ་ཆུབ་པ། ཐབས་རྒྱ་མཚོ་འདྲ་བ་སྤྲིན་ལྟ་བུ་འབྱུང་བ་ཞིག་འཇིག་རྟེན་ན་ཆེའོ་ཞེས་གྲགས་པ་ལས། ཡི་དགས་བྱའི་གཤོག་པ་ཅན་
དེ་རབ་ཏུ་འཁྲུགས་འཁམས་ནས་རུ་ཏྲའི་མེ་དཔུང་དུ་འབར་ནས་རང་གི་རྫུ་འཕྲུལ་དང་འཕུར་རྩལ་གྱིས་བྱན་ལག་མཆོངས་པའི་རིའི་རྩེ་མོ་ལ་བབས་ནས་ང་རྒྱལ་གྱི་གཏུམ་སྐད་དུ་རུ་ཏྲ་མ་ཏྲ་མ་ར་ཏྲ་ཞེས་བསྒྲགས་པས། ལང་ཀའི་ཡུལ་གྱི་གྲོང་རྡལ་ཤིག་ཤིག།

རབ་ཏུ་ཤིག་ཤིག །ཡམ་ཡོམ་དུ་གྱུར་པས་ལང་ཀའི་སྲིན་པོ་ཀུན་དང་སྲིན་མོ་ཀུན་ཀྱང་སྐྲག་ཅིང་དངངས་ནས། ཨེ་མའོ་འདི་ཇི་ལྟར་ཞིག་མིག་རྩ་རིག་རིག་དངངས་ཡེད་ཡེད་གནས་པ་དང་། གནོད་སྦྱིན་བྱའི་གཤོག་པ་ཅན་གཏུམ་རྔམ་འཁྲུགས་པ་
ཞིག་བདག་ཅག་གི་འཁྲས་ས་ན་གནས་པ་མཐོང་ཞིང་ཐོས་པར་གྱུར་ཏོ། །དེ་ནས་ལང་ཀའི་མངའ་བདག་ཆེན་པོ་ལ་སོགས་པ་སྲིན་པོའི་ཚོགས་ཀྱིས་དམག་གི་ཚོགས་ཀྱི་བསྡུ་བ་བྱས་ཏེ་གཞོམ་པར་འབད་ཅིང་འབད་པ་ལས། ཡང་སྲིན་པོ་བྱའི་གཤོག་
པ་ཅན་དེས་སྲིན་པོའི་ཚོགས་བག་འཁུམ་པ་ཞེས་བྱ་བའི་རྫུ་འཕྲུལ་གྱི་བྱ་བ་མངོན་དུ་བྱས་ནས། ང་ནི་དབང་ཕྱུག་ཆེན་པོ་སྟེ། །རྒྱལ་ཆེན་རིས་བཞི་ང་ཡི་གཡོག །ལྷ་སྲིན་སྡེ་བརྒྱད་ང་ཡི་བྲན། །གསང་བ་མཆོག་གི་བདག་ཡིན་པས། །སུ་ཞིག་
ང་ལ་འགྲན་ཟླ་ཡོད། །རུ་ཏྲ་མ་ཏྲ་མ་ར་ཏྲ་ཞེས་ང་རྒྱལ་གྱི་གཏུམ་སྐད་བསྒྲགས་པ་ལས་སྲིན་པོ་ཟིལ་གྱིས་ནོན་ཞིང་བག་འཁུམས་ནས། ལ་ལ་ནི་འདི་ནི་སྲིན་པོའི་ཁམས་རྒྱལ་བར་བྱེད་པ་ཞིག་སྟེ་བདག་ཅག་གི་གཙོ་བོའི་འོས་སོ་ཞེས་སྒྲོགས། ལ་ལ་ནི་འདི་ནི་
འཇིག་རྟེན་འཇིག་པར་བྱེད་པ་ཞིག་སྟེ་བདག་ཅག་གི་གཉེན་པོར་འགྱུར་བ་ཞིག་གོ་ཞེས་སྒྲོགས། ལ་ལ་དག་འདི་ནི་འཇིག་རྟེན་པའི་དབང་ཕྱུག་ཆེན་པོ་ཞིག་གོ་ཞེས་སྒྲོགས། ལ་ལ་དག་འདི་ནི་མཁའ་འགྲོ་ཚོགས་ཀྱི་ཚོགས་བདག་གོ་ཞེས་སྒྲོགས་སྲིན་པོའི་
རྒྱལ་པོ་ལང་ཀའི་མངའ་བདག་ནི་འདི་ནི་འབྱུང་པོའི་བུ་གཏོགས་འདོད་ཅན་ཞེས་བྱ་བ་ཡིན་ཏེ། འཇིག་རྟེན་གསུམ་སྐྲག་པ་དེ་ཁོ་ན་ཉིད་མ་གཏོགས་པ། ཐམས་ཅད་རླག་ཅིང་དབང་དུ་བྱེད་པ་ལོག་པའི་ཚོགས་བདག་སྟེ། འདི་གཞན་གྱིས་མི་ཐུལ་ཏེ། འདིའི་
གཉེན་པོ་སངས་རྒྱས་བཅོམ་ལྡན་འདས་རྣམས་ཀྱིས་མཛད་དེ་སྤྲུལ་པ་རྡོ་རྗེ་ཅན་གྱིས་བཏུལ་ནས་ངེས་པ་དམ་པར་བཀོད་དེ། ཡང་དག་པར་ལུང་སྟོན་པ་ཞིག་པས་འདིའི་རྒྱུས་གསང་སྔགས་དམ་པའི་ངེས་པ་ཐེག་པ་ཆེན་པོ་རྨད་དུ་བྱུང་བའི་ཆོས་འཇིག་རྟེན་དུ་འབྱུང་

བར་འགྱུར་ངེས་ཏེ། བདག་ཅག་ཀྱང་འདིའི་གཡོག་ཏུ་བྱས་ནས་སངས་རྒྱས་རྡོ་རྗེ་སྙིང་པོའི་ཞལ་མཐོང་ཞིང་གསང་སྔགས་དམ་པའི་ངེས་པ་རྙེད་པར་འགྱུར་བས་འདི་ལ་ངེས་པར་འདུན་པ་འདུན་ཅིག་ཅེས་བསྒོ་བས། སྲིན་པོའི་ཚོགས་རྣམས་ཡི་
རངས་ཏེ་རང་གི་སྡེ་དཔོན་ཅི་སྨྲ་བ་མི་འདོར་བར་དེ་ལྟར་འདུན་པས་ན་ཀུན་སྲིན་པོ་བྱའི་གཤོག་པ་ཅན་དེའི་གཡོག་ཏུ་དོང་སྟེ་ཀུན་གྱིས་སྨྲས་པ། བདག་ཅག་ཀྱང་དབང་ཕྱུག་ཆེན་པོ་ཁོ་ན་ཉིད་ལྟར་འདུན་ནོ། །ཞེས་གྲགས་ཏེ་གཙོ་བོ་དམ་པར་འཛིན་ཏོ། །དེས་དེ་
དག་འཁོར་དུ་འཛིན་པར་བྱས་སོ། །དེ་ནས་ཡང་སྲིན་པོ་བྱའི་གཤོག་པ་ཅན་དེ་སྲིན་པོ་དེའི་དེད་དཔོན་མ་ཏང་ཀ་རུ་ཏྲ་ཞེས་བྱ་བར་གྲགས་པ་དེ་ང་རྒྱལ་གྱི་ཆེ་བ་བཅོམ་སྟེ་བདག་ལས་ཆེ་བ་གང་ཞིག་ཡོད་ཡང་སུ་ཞིག་ཡིན་རུ་ཏྲ་མ་ཏྲ་མ་ར་ཏྲ་ཞེས་སྒྲ་སྒྲོགས་པ་ལས།
ལྷའི་དེད་དཔོན་མ་ཏང་ཀ་རུ་ན་ཞེས་བྱ་བ་མཐུ་དང་རྫུ་འཕྲུལ་ཐབས་དང་ཆེ་བ་ཁྱད་པར་དུ་བྱུང་བ་དེ་དཔགས་སོ་ཞེས་གྲགས་པ་ལས། བདུད་རུ་ཏྲ་ནག་པོ་དེ་ཤིན་ཏུ་འཁམས་འཁྲུགས་ནས་ང་རྒྱལ་གྱི་གཏུམ་སྐད་བསྒྲགས། རང་གི་རྫུ་འཕྲུལ་དང་འཕུར་རྩལ་
གྱིས་མ་ཏང་ཀ་རུ་ནའི་གནས་སུ་བབས་ཏེ་ཡང་སད་པར་ཛམས་ན། ཇ་ཞ་མར་སད་པ་མི་འདྲ་ནས་ལུས་ཅན་ཡིན་པས་འུད་ནས་འཐབས་འཐབས་སུ་བྱུང་བའི་ངད་ལ་ཚ་གྲང་དབུགས་ཧམ་ནས་ནད་ཀྱི་མཚོན་ཆ་སྤྲོས་ནས་ཁོ་ན་དེའི་ལུས་ལ་ཁྱབ་སྟེ། ལུས་
མེ་དབལ་ནག་པོའི་འབྲུམ་པས་གང་ནས་མི་བཟོད་པའི་ཟུག་རྔུས་གདུངས་ཏེ་ཁོ་ན་ངོ་བོ་དེ་འུད་ཐབས་སུ་བསད་དོ། །ཁོ་ན་དེའི་བམ་འཛམ་བུའི་གླིང་དུ་ཧན་པ་ལས་དགེ་གནས་ཀྱི་ཡུལ་བརྒྱད་དུ་སྣང་ངོ་། །འུད་ནས་ཁོ་ན་ཉིད་བསད་པའི་ཁྱོ་མོ་
དང་བུ་འཁོར་རྣམས་ནི་གནོད་སྦྱིན་བྱའི་གཤོག་པ་ཅན་དེའི་འཁོར་དུ་ཇེན། ལྷ་མ་ཡིན་དང་། ཤ་ཟ་དང་། རོ་ལངས་རིལ་བདུད་དེའི་སར་ཇེན། རྒྱལ་པོ་བཞི་གང་གི་སྐྱབས་སུ་བརྒྱུགས་ཀྱང་ཡོངས་སུ་མ་ཐར་བར་དེའི་བྲན་དུ་ཇེན། བརྒྱ་

བྱིན་དང་། ཚངས་པ་དང་། ཁྱབ་འཇུག་དང་། དྲག་པོ་ལ་སོགས་པ་ཀུན་ཀྱང་གང་གི་སྐྱབས་སུ་བརྒྱུགས་ཀྱང་མ་ཐར་བར་དེའི་བྲན་དུ་ཇེན། དེ་དག་གི་ཁྱོ་མོ་རིལ་ཡང་ཕྲོགས་ནས་ལ་ལ་ནི་ཁྱོ་མོར་བྱས། ལ་ལ་ནི་སླས་སུ་བྱས། ལ་ལ་ནི་བྱི་
མོར་བྱས། ལ་ལ་ནི་མཛའ་མོར་བྱས། ལ་ལ་ནི་བྲན་མོར་བྱས། ལ་ལ་ནི་ཕོ་ཉ་དང་མངག་པར་བྱས། ལྷ་མི་ཡོངས་སུ་སྲིད་བརླག་ནས་ཐམས་ཅད་ནག་པོ་བཀྲག་མེད་ཀྱི་ཁམས་སུ་གྱུར་ཏོ། །དེ་ཡང་འདི་ལྟར་གྲགས་ཤིང་གྲགས་ཏེ་གྲགས་
པར་གྱུར་ཏོ། །ནག་པོ་ཁྱུང་གཤོག་འཕུར་རྩལ་ཅན། །གཏུམ་རྔམ་ཤིན་ཏུ་མ་རུངས་པ། །མི་སྡུག་གདོང་མི་སྡུག་གཟུགས་དང་། །མི་སྙན་སྒྲ་ཡི་ཚམ་ངམ་དང་། །ཤ་སྤུངས་རུས་སྤུངས་འབུ་དང་རྣག །ཁྲག་དང་བཤང་གཅིའི་ཁུ་བ་ལ། །
ལོངས་སྤྱོད་བྱེད་ཅིང་རྟག་ཏུ་འཚོ། །ལོག་པའི་སྡེ་དཔོན་དྲག་པོ་དེས། །འདི་ན་ལྷ་མིའི་སྲིད་བརླག་ནས། །ལྷ་ཡི་སྡེ་དཔོན་ཀ་རུ་ན། །ཁོ་ན་ངོ་བོ་ཉིད་བསད་ནས། །འཁོར་ཡང་རང་གི་ཕྲུ་མར་བྱས། །གདུག་པའི་ཟུག་རྔུ་མེར་འབར་བས། །ཀུན་ཀྱང་
སྡེ་དཔོན་བཞི་ལ་དོང་། །དེ་དག་སྤུ་ཟིང་རབ་འཇིགས་པར། །དབང་པོ་དག་ལ་སྐྱབས་སུ་དོང་། །དེ་ནས་དབང་པོར་བཅས་པའི་ལྷ། །ཚངས་པའི་སྐྱབས་སུ་ཉེ་བར་དོང་། །ཚངས་པའང་ལྷ་དང་དབང་པོར་བཅས། །གཏོགས་འདོད་ལ་ནི་སྐྱབས་སུ་དོང་། །
ཚངས་པ་གཏོགས་འདོད་ལྷ་དབང་བཅས། །དྲག་པོའི་སྐྱབས་སུ་ཉེ་བར་དོང་། །ཚངས་དང་གཏོགས་འདོད་དབང་པོ་དག །ཤིན་ཏུ་སྐྲག་ཅིང་འཇིགས་འགྱུར་ཏེ། །རྡོ་རྗེ་ཅན་ལ་སྐྱབས་སུ་དོང་། །དེ་བཞིན་གང་ལ་སྐྱབས་ཡོད་པར། །ཉེ་བར་བརྒྱུགས་
ཀྱང་མ་ཐར་བར། །འཇིགས་བྱེད་དེ་ཡི་བྲན་དུ་ཇེན། །ཞེས་ཐམས་ཅད་དུ་གྲགས་པར་གྱུར་ཏོ། །འུད་ནས་བདུད་རུ་ཏྲ་ནག་པོ་ལྟ་ཞིག །ལྷ་མི་གཡོ་འགུལ་ཐམས་ཅད་དབང་དུ་མཛད་དེ། ལང་ཀའི་ཡུལ་གྱི་གྲོང་རྡལ་མཚོ་རྐོ་རྐ་ཐང་མར་བྱན་ལག་

མཆོངས་ཀྱི་རི་བམ་རི་ཐོད་པ་མཁར་ཞེས་བྱ་བར་འཁྲས་ཏེ། བདུད་ཀྱི་རྒྱལ་མཚན་ནི་ཕུག་ཏུ་བཙུགས། བདུད་ཀྱི་རུ་མཚོན་ནི་སྒོར་ཕྱར་ཏེ་རང་གི་ཕྲུ་མས་ཡོངས་སུ་བསྐོར། དྲག་པོ་རང་གི་རྫུ་འཕྲུལ་བསྐྱེད་ནས་རྫུ་འཕྲུལ་གྱིས་རི་
རབ་མཛུབ་མོའི་རྩེ་ལ་བཞག་སྟེ། སྤྱི་བོ་ལ་འགྱིང་བག་ཏུ་བསྐོར་ཞིང་ང་རྒྱལ་གྱི་གཏུམ་སྐད་སྒྲོགས་པ་ནི་འདི་ལྟ་སྟེ། རུ་ཏྲ་མ་ཏྲ་མ་ར་ཏྲ་ས་ཁམས་ན་བདག་ལས་སུ་ཞིག་ཆེ་གང་ཞིག་ཡོད། ཨེ་མའོ་སྔོན་དཔལ་ཤཱཀྱ་ཐུབ་པ་ཞེས་བྱ་བས་འཆི་བདག་
གི་བདུད་བཏུལ་བའི་ཚེ་དེའི་བསྟན་པ་ལ་བྱུང་བའི་མཆོག་ཆེན་པོ་ཉན་ཐོས་རྣམས་ཀྱིས་ཐམས་ཅད་ཞི་བར་ལྷན་པའི་སྨྲ་བས་སྨྲས་ཏེ། ངའི་བཀའ་ཉོན་ཅིག་ཅེས་ཟེར་བ་ལས་ཀྱང་བུ་ཆུང་གོ་ཟུ་འཕྲག་པ་ལ་ཁོལ་ལ་རང་གི་དཀའ་ཐུབ་ལ་བདེ་བར་ནོས་ཤིག་
ཅེས་བྱས་ནས་མ་ཉན་ནས་དེས་ཀྱང་བདག་དབང་དུ་བྱེད་མ་ནུས་སོ། །དེའི་དྲུང་ན་དཔལ་རྡོ་རྗེ་སྙིང་པོ་ངག་གི་དབང་ཕྱུག་ལྷ་ཞིག་སྣ་ཚོགས་ཀྱི་གཟུགས་སུ་སྤྲུལ་ནས་ཧྲི་ཞེས་དབང་རྒྱུད་དུ་ཉན་ན། ཁོ་ན་ཉིད་ཀྱིས་ཐ་ཁ་བརྡབ་པ་བྱས་ནས་འགྲུན་བུ་ཁྱོད་ཀྱང་
བདེ་བར་ནོས་ཤིག་ཅེས་བསྒོ་བས་དེ་ཡང་ཐག་ཁོས་ཏེ་སླར་ཇེན་ནོ། །གནམ་རིམ་པ་བཅུ་བཞི་ན་དཔལ་རྡོ་རྗེ་སྙིང་པོ་ལྷ་ཞིག་འགྲན་གྱི་ཟླ་མེད་པར་ཐོས་ནས་དེ་ཡང་བདག་དབང་དུ་བྱས་ལ་ཐམས་ཅད་འུབ་ལ་རྗེན་རྦན་ཞེས་སྒྲོགས་ཤིང་འགྲན་གྱི་ཟླ་མེད་
རྗེ་བཙན་གཅིག་པུ་ཉིད་དུ་ལྟའོ། །ཇི་ལྟ་ཇི་ལྟར་ཐར་པ་ནག་པོ་གང་ཡིན་པ་རུ་ཏྲ་ནག་པོར་སྨིན་པར་གྱུར་པ་དེའི་ཚེ་དེའི་དུས་ན་གང་ཐུབ་དཀའ་གཞོན་ནུ་དེ་ནི་སྙིང་པོ་བྱང་ཆུབ་གང་ན་བར་རྡོ་རྗེ་སེམས་དཔའི་དེ་བཞིན་ཉིད་དུ་གྱུར་ཏོ། །གང་དན་བག་དེ་ནི་དེའི་
ཚེ་དེའི་དུས་ན་རྩལ་ཆེན་རྫོགས་པའི་སྐྱེས་བུ་དམ་པ་རྡོ་རྗེ་འཛིན་པ་ཞེས་བྱ་བ་ཉིད་དུ་གྱུར་ཏོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་རུ་ཏྲ་ནག་པོའི་སྤྱོད་ཡུལ་བསྟན་པའི་ལེའུ་ཞེས་བྱ་སྟེ་ཉི་ཤུ་གཉིས་པའོ།། །།བམ་པོ་

བཞི་པར་ཟུག་པ། དེ་ནས་དེ་བཞིན་གཤེགས་པ་ཐམས་ཅད་སྙིང་པོ་བྱང་ཆུབ་གང་ན་བར་འདུས་ནས་སྟོང་པ་ཉིད་དུ་བཤིག་ནས་སྐྱེས་བུ་དམ་པ་སྟོང་པ་ཉིད་ལ་སྣང་བར་མཛད་དེ། དེ་ཉིད་ཀྱི་སྒྲ་དེ་ཉིད་ལ་གྲག་