Kinh tạng Tây Tạng (Kangyur Đại Học) — 097_རྙིང་རྒྱུད།_ཀ

འི་བྱ་བ་ཡང་། །སྔོན་དུ་བྱུང་བའི་ལུང་བསྟན་པའི། །འགྲོ་བའི་ལུས་ཀྱི་སེམས་དཔའ་དག །བྱུང་ནས་གསལ་བྱེད་ལོག་སུན་འབྱིན། །
དེ་སྐད་ཅེས་བཀའ་སྩལ་པས་དྲི་བ་བཞི་པ་དང་ལྔ་པའི་ཡོངས་སུ་རྟོག་པ་ཚད་དེ་ཡོངས་སུ་མྱ་ངན་ལས་འདས་པར་གྱུར་ཏོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་གདམས་ངག་ངེས་པར་གཞག་པའི་ལེའུ་སྟེ་གཉིས་པའོ།། །།དེའི་ཚེ་དེའི་
དུས་ན་གང་དག་མི་ཆེན་པོ་རྣམས་ནི་ཡོངས་སུ་གདུང་བ་མེད་པར་ནང་དུ་ཡང་དག་འཇོག་གོ། །བྱིས་པ་རྣམས་ནི་ཡོངས་སུ་གདུང་བར་གྱུར་ཏེ་བློ་ཡ་ཡ་པོར་གྱུར་ཅིང་ཤིན་ཏུ་བློང་ནས་རྟག་པར་རབ་ཏུ་ངུའོ། །འཇིག་རྟེན་པ་ལ་ལ་ནི་ཤི་ལ་ཐུག་པར་གྱུར། ལ་ལ་ནི་
བརྒྱལ་ཅིང་འབོག་པར་གྱུར། ལ་ལ་ནི་ཁམས་ནས་རོ་བམ་པ་བཞིན་དུ་གྱུར་ཏོ། །དེ་བཞིན་དུ་ཐམས་ཅད་ཀུ་ཅོ་མང་པོ་ཕ་ཤི་བ་བཞིན་དུ་ཀྱི་ཧུད་ཀྱི་ཧུད་ཞེས་གདུང་བའི་སྒྲ་སྒྲོགས་སོ། །ལྷ་དང་བཅས་པའི་འཇིག་རྟེན་ཡང་སྣོད་ནི་ཡིད་དུ་མི་འོང་བར་གྱུར་ཏོ། །བཅུད་

ཀྱང་སེམས་ཀྱི་དཀྱིལ་འཁོར་མོག་མོག་པོར་གྱུར་ཏོ། །ཆོས་འདི་པར་ཕྱོགས་པ་རྣམས་ནི་མདངས་ནག་པོར་གྱུར་ཏོ། །བདུད་ཀྱི་ཆ་འཛིན་ཅིང་གཞན་གྱི་སྡེ་པ་རྣམས་ནི་བཞིན་གྱི་དཀྱིལ་འཁོར་དཀར་པོར་གྱུར་ཏེ་ཀུན་ཀྱང་ཀྱལ་ཀའི་ཚིག་སྒྲོགས་པར་གྱུར་ཏོ། །དེ་
ནས་ལོ་བརྒྱད་དང་བཅུ་གཉིས་འདས་པ་ན་དམ་པའི་རིགས་ཅན་སེམས་དཔའ་ཆེན་པོ་དག་ནང་དུ་ཡང་དག་འཇོག་ལས་ལངས་པ་དང་། འཇིག་རྟེན་གྱི་སྟོན་པ་ནུབ་པར་གྱུར་པས་རྨ་ག་ཆད་པར་དུས་ནས་ཀུན་ཀྱང་རང་རང་གི་མངོན་པར་ཤེས་པས་ལང་ཀའི་ཡུལ་གྱི་
གྲོང་རྡལ་གྱི་མཚོ་གླིང་རིམ་ལ་ཡ་གནམ་ལྕགས་ཡོད་པའི་རྩེ་ལ་རྫུ་འཕྲུལ་གྱི་བྱ་བས་མངོན་པར་རབ་ཏུ་འདུས་སོ། །ཡོངས་སུ་འདུས་ནས་འདུས་པ་དེ་ཀུན་ཀྱང་མགྲིན་གཅིག་ཏུ་ཤིན་ཏུ་ཉམ་ཐག་པའི་ང་རོས་སྨྲེ་སྔགས་ཀྱི་གདུང་བ་བཏོན་པ་ནི་འདི་ལྟ་སྟེ། ཨེ་
མའོ་ཀྱི་ཧུད་ཨེ་མའོ་བློང་། །སྟོན་པའི་སྒྲོན་མའི་འོད་ནུབ་ན། །འཇིག་རྟེན་མུན་པ་གང་གིས་སེལ། །ཚད་མའི་ཞལ་དེ་མི་བཞུགས་པས། །ཚད་མས་གསུངས་པའི་བསྟན་པ་ལ། །འཇུག་པར་འཚལ་བའི་འགྲོ་བ་རྣམས། །ལོག་པར་འཇུག་པར་མི་འགྱུར་
རམ། །ཚད་མར་དམ་བཅས་གང་ཟག་གིས། །དེས་མ་རྙེད་པའི་གང་ཟག་ལ། །ཕན་པར་བྱ་ཕྱིར་བཀའ་བཀྲོལ་བས། །གཏན་ལ་ཕེབས་པར་འགྱུར་ཞིག་གུ། །ལེགས་ཉེས་འབྱེད་པའི་སྤྱན་ཟུམ་པས། །བཀའ་ཉིད་ཁྱད་དུ་གསོད་པ་ཡི། །སྐྱོན་གྱི་སྤྱི་
གཙུག་མཐར་ཕྱིན་པས། །ལོག་སྟོབས་འཕེལ་བར་མི་འགྱུར་རམ། །ལོག་པའི་བསྟན་པའི་སྤྲིན་འཁྲིགས་པས། །བདེན་པ་གཉིས་ཀྱི་ཉི་ཟླ་ནུབ། །འགྲོ་བ་གང་ཞིག་ལམ་ཚོལ་བ། །མུན་པར་འཁྱམས་པར་མི་འགྱུར་རམ། །སྟོན་པ་མྱ་ངན་འདས་
འོག་ཏུ། །བདུད་དང་སྲིན་པོ་མུ་སྟེགས་དང་། །གནོད་སྦྱིན་འབྱུང་བོ་མི་མ་ཡིན། །མ་རུངས་གདུག་པ་སུས་འདུལ་འགྱུར། །དྲི་མེད་བསྟན་པའི་བདུད་རྩི་འདི། །ནུབ་ན་ཤིན་ཏུ་མ་རུང་ན། །རྩལ་དང་ལྡན་པ་སུ་ཞིག་གིས། །འབར་ཞིང་སྣང་བར་བྱེད་པར་འགྱུར། །

བསླབ་པ་དམ་པའི་རིན་པོ་ཆེ། །བྲལ་ན་ཤིན་ཏུ་མ་རུང་ན། །སྐྱེས་བུ་དམ་པ་གང་ཞིག་གིས། །ཚུལ་རྣམས་འཛིན་པར་བྱེད་པར་འགྱུར། །སྟོན་པ་མི་བཞུགས་དེ་རྗེས་ན། །སྟོན་པའི་སློབ་མ་ཇི་སྙེད་པ། །འཕགས་དང་གང་ཟག་ཐ་དད་པ། །
ལུང་བསྟན་འབྱུང་བ་གང་སུ་ཞིག །བསྟན་པ་ནམ་མཁའ་འདྲ་བ་ལ། །མོས་པ་ཐ་དད་པར་བཟུང་ནས། །ཡིན་དང་མ་ཡིན་ཆ་འཛིན་ཅིང་། །རྩོད་པ་འཕེལ་བར་མི་འགྱུར་རམ། །དེ་ཉིད་ངེས་པར་རིགས་གཅིག་ལ། །རིགས་མི་མཐུན་པར་ཐ་དད་སྤྱོད། །རིགས་
གཅིག་ཐ་དད་རིགས་རྣམས་སུ། །བསླད་ཅིང་བཅོས་པར་མི་འགྱུར་རམ། །རིན་ཐང་མེད་པའི་རིན་པོ་ཆེ། །མི་མཁས་གང་ཟག་ཐ་དད་པས། །ཉོན་མོངས་འདོད་པས་ཁྲིད་དབང་གིས། །དུག་དང་བརྗེ་བར་མི་འགྱུར་རམ། །ཆོས་ཀྱི་རྒྱལ་པོ་སྟོན་པ་སྟེ། །འདི་སྔོན་
ཕན་ཆད་ཞལ་བཞུགས་ཚེ། །མ་རུངས་པ་རྣམས་འཚེ་བགྱིད་ན། །གདུག་པ་དར་བར་མི་འགྱུར་རམ། །གང་འདིར་བསྟན་པ་གནས་པའི་ཡུན། །ཇི་སྲིད་གཅིག་ཏུ་གནས་པར་འགྱུར། །གང་འདིར་སྔར་འབྱུང་གང་སྔར་འབྱུང་། །ཕྱིས་འབྱུང་དུས་འདི་ཇི་ལྟར་འགྱུར། །
སྟོན་པའི་བསྟན་པ་ཐ་མའི་ཚེ། །ངེས་པར་ཇི་ལྟར་འགྱུར་ཞིག་གུ། །བསླབ་པ་འཛིན་པའི་སློབ་མ་རྣམས། །ཐ་མ་ཇི་ལྟར་འགྱུར་ཞིག་གུ། །འདི་ནས་མྱ་ངན་འདས་འོག་ཏུ། །གང་ལྟར་སུ་ཡི་སྟོན་པར་གཤེགས། །ཞིང་ཁམས་ཕྱོགས་ནི་གང་ན་བཞུགས། །དེ་ན་
བསྟན་པ་ཅི་ཞིག་སྒྲོགས། །ང་ཡོད་འཇིག་རྟེན་མགོན་མེད་རྣམས། །མགོན་དང་སྐྱབས་སུ་གང་ཞིག་འགྱུར། །འཕྲུལ་གྱི་བློ་དང་གྲོས་སྟོར་ན། །བློ་དང་གྲོས་ནི་གང་ནས་བཙལ། །ངེས་པའི་དོན་འདི་མ་རྙེད་ན། །ང་ཡོད་ངེས་དོན་གང་ལས་གཟུང་། །མཆོད་
གནས་ཡིད་རྟེན་མི་བཞུགས་ན། །སྐུ་གདུང་ཇི་ལྟར་འགྱུར་ཞིག་གུ། །སླད་ཀྱིས་མཆོད་གནས་ཅི་ལ་བགྱི། །ད་ལྟར་སྟོན་པ་འདས་འོག་ཏུ། །གདུང་འཚོབ་སྐྱེས་བུ་འབྱུང་འགྱུར་རམ། །ཨེ་མའོ་ཀྱི་ཧུད་ཨེ་མའོ་བློང་ཞེས་ཡོངས་སུ་གདུང་བ་བཏོན་ཏོ། །སངས་

རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་ཐོག་མར་དམ་པས་གདུང་བ་བཏོན་པའི་ལེའུ་སྟེ་གསུམ་པའོ།། །།དེ་སྐད་སྨྲས་ཏེ་གདུངས་པ་ལས། །སྲིད་གསུམ་འགྲོ་བའི་གཉེན་གཅིག་པ། །རྒྱལ་བ་རྒྱ་མཚོ་རྣམས་ཀྱིས་གསན། །སྙིང་རྗེའི་
བདག་པོ་དེ་དག་ཀུན། །ལྕང་ལོ་ཅན་གྱི་ཕོ་བྲང་དུ། །གསང་བའི་བདག་པོ་གནས་སུ་འདུས། །བསྐུལ་བ་ཆེན་པོ་འདི་སྐད་གསུངས། །གསང་བ་པ་ཡི་བདག་པོ་ཁྱོད། །སྔོན་གྱི་གོ་ཆ་ཡལ་ལམ་ཅི། །འཇིག་རྟེན་སྡུག་བསྔལ་མི་ཤེས་སམ། །སྙིང་རྗེའི་ས་ལ་བབས་
ནས་ཀྱང་། །འཇིག་རྟེན་གདུང་བ་བསལ་བའི་རིགས། །སོ་སོའི་རིགས་ཀྱི་ཆ་བཟུང་བས། །མ་རུངས་པ་དག་ཀུན་བཏུལ་ཏེ། །འདོད་ཁྲིད་ཐབས་སུ་ཚིག་རྣམས་ཀྱིས། །ལས་ཀྱི་ཆ་དང་སྤྱོད་མཐུན་པར། །འདུ་ཤེས་བསྒྱུར་བ་བྱས་ནས་ནི། །བཀའ་ཡི་བགྲོ་བ་བཤད་
སྦྱར་ནས། །ཡང་དག་དོན་ལ་དགོད་པའི་རིགས། །དེ་སྐད་རྣམ་པར་བསྐུལ་བ་ལས། །དཔའ་བོ་རྡོ་རྗེ་འཛིན་རྒྱལ་པོས། །གདུལ་དཀའ་འདུལ་ལ་མཁས་པའོ། །འཇིག་རྟེན་ཀུན་ལ་རྒྱལ་བའི་མཆོག །གསང་བའི་རྟགས་འཛིན་རྡོ་རྗེ་ཅན། །དགྱེས་ཤིང་
གདན་ལས་བཞེངས་ནས་ནི། །ཆོ་འཕྲུལ་ཆེན་པོ་ཀུན་བསྟན་ནས། །འཇིག་རྟེན་ལོག་པའི་གཙོ་བོ་རྣམས། །སྐལ་དང་ལྡན་པར་ལུང་བསྟན་པ། །ལས་དང་སྐལ་བར་རབ་ལྡན་ཞིང་། །རྒྱལ་བས་འབྱུང་བར་ལུང་བསྟན་པའི། །བསོད་ནམས་ཆེན་པོའི་
སྐལ་ཅན་རྣམས། །སྤྲུལ་པས་ཇི་ལྟར་ལུང་བསྟན་བཞིན། །ད་ལྟར་དུས་ལ་འདིར་བབས་ཀྱིས། །འཁོར་བའི་སྙིང་པོར་ལུང་བསྟན་ཕྱིར། །ཆོ་འཕྲུལ་རྣམས་ཀྱི་བྱིན་རླབས་ཀྱིས། །བསྟན་པའི་སྙིང་པོ་དམ་པ་ཞིག །ཇི་ལྟར་བཤད་ཅིང་ལུང་བསྟན་
བཞིན། །སྐལ་ལྡན་ཅན་ལ་བགྲོ་བར་བྱའོ། །དྲག་ཤུལ་ཅན་ཞེས་བྱ་བའི་རི། །དགོན་པ་ཆེན་པོའི་གནས་འདི་ནི། །ཡེ་ཤེས་སྙིང་པོ་ཅན་རྣམས་ཀྱི། །ཐེག་ཆེན་གསང་བ་འབྱུང་བའི་གནས། །ཐོག་མ་ཐ་མའི་དུས་མེད་པར། །དམ་པ་རྣམས་

ཀྱིས་བསྔགས་པ་ཡིན། །ཐོག་མ་ཐ་མ་མེད་པ་ཡི། །རྒྱལ་བ་དཔག་ཏུ་མེད་པ་ཡིས། །དམ་པའི་དགོན་གནས་ཆེན་པོ་དེར། །སེམས་ཀྱི་དཀྱིལ་འཁོར་མེ་ལོང་བཞིན། །བསྟན་པ་དེ་ལྟར་བདག་གིས་ཀྱང་། །ཐོག་མ་ཐ་མ་མེད་
པ་རུ། །བསྐུལ་བའི་དུས་ནི་གར་བྱུང་བར། །བདག་ཀྱང་དེ་བཞིན་ཆོ་འཕྲུལ་སྣང་། །ཞེས་བགྲོས་སོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་གང་གི་གདུང་བ་སེལ་བར་བགྲོས་པའི་ལེའུ་སྟེ་བཞི་པའོ།། །།དེ་ནས་དེའི་ཚེ་
དེ་ཉིད་དུ། །གནོད་འདུལ་རྒྱལ་པོས་དེ་གསུངས་ནས། །མི་ཡི་གནས་ཀྱི་འཇིག་རྟེན་ཁམས། །གླིང་བཞི་བ་ལས་འཛམ་གླིང་གི། །དྲག་ཤུལ་ཅན་ཞེས་བྱ་བའི་རི། །གནོད་སྦྱིན་འདུ་བའི་ས་ཡིན་ཏེ། །ཆོས་འཛིན་རིགས་ཀྱི་གྲུབ་གནས་སུ། །ཐུགས་
རྗེའི་ས་ལ་མངོན་སྤྲུལ་གཤེགས། །ས་རྣམས་ཡོངས་སུ་གཡོས་འགྱུར་ཏེ། །རྨད་དུ་བྱུང་བའི་ཆོ་འཕྲུལ་གྱིས། །ཐམས་ཅད་སྦྱངས་ཏེ་བདེ་བར་སྣང་། །སྔོན་དུ་སྣང་བའི་སྐལ་ལྡན་ཅན། །དམན་པའི་ལུས་འཛིན་དམ་པའི་རིགས། །མི་ལས་རྒྱལ་རིགས་
དྲ་མ་ཆེ། །རྒྱལ་བུ་རྒྱལ་བྱིན་ལྟས་སུ་ཤར། །དེ་ཚེ་དམ་པའི་རིགས་ཅན་རྣམས། །དགའ་བ་དང་བཅས་ཐེ་ཚོམ་སྐྱེས། །སྤོབས་པ་ཆེན་པོའི་དྲི་བ་དྲིས། །ཨེ་མའོ་ངོ་མཚར་རྨད་རེ་ཆེ། །སྐྱེས་བུ་ཆེན་པོ་ཁྱོད་སུ་ཞིག །གང་ནས་བྱོན་ཏེ་གང་ལྟར་བྱུང་། །
གང་ལ་བརྟེན་ནས་གང་དུ་བྱོན། །དོན་གྱི་ཆེད་ཀ་ཅི་ཞེས་དྲིས། །ཆོ་འཕྲུལ་ཆེན་པོས་འདི་སྐད་དུ། །ང་ནི་ཅིས་ཀྱང་མི་བསྐྱོད་དེ། །མི་འཁྲུག་རྡོ་རྗེ་སེམས་དཔའ་ཡིན། །སྙིང་རྗེས་གཡོ་ཞིང་བསྐྱོད་པས་ན། །སྲིད་པ་གསུམ་གྱི་གཉེན་གཅིག་པོ། །སྟོང་པ་
ཆེན་པོ་ང་ཡི་ཡུལ། །རྡོ་རྗེ་རིགས་ཆེན་ང་ཡི་གདུང་། །ཕ་ནི་ཐབས་མཆོག་དཔག་ཏུ་མེད། །མ་ནི་ཤེས་རབ་བརྗོད་ལས་འདས། །ཐོག་མ་མེད་པའི་དུས་ཀྱི་ཚེ། །ང་ཡི་ཡིད་བཞིན་ནོར་བུ་སྟོར། །ནོར་བུ་རིན་ཆེན་བདུད་རྩི་དེ། །ཡོད་པར་མ་ཤེས་སྟོར་བར་

ཚོར། །དེ་ཚེ་ཀུན་ནས་དབུལ་བ་དང་། །ཐར་མེད་ནད་ཀྱིས་གཟིར་འགྱུར་ཞིང་། །མུན་པ་མུན་ནག་སྨག་ཏུ་འཁྱམས། །བགྲོད་པར་བྱ་བའི་ལམ་ཡང་སྟོར། །གདུངས་པར་གྱུར་ཀྱང་དེར་མ་ཤེས། །དེ་ཚེ་ང་ཡི་བཤེས་གཉེན་མཆོག །བྱམས་མགོན་དམ་པ་
ཞིག་གི་བསྟན། །ཨེ་མའོ་ཁྱོད་ཅི་མི་ཤེས་སམ། །མཐོང་ཡུན་ཀུན་དུ་བདེ་བ་ཡི། །དོན་སྲིད་ཆེན་པོ་འབྱུང་འགྱུར་བ། །ནོར་བུ་རིན་ཆེན་མ་བརླག་གམ། །འོན་ཏེ་ཡོད་པར་མི་ཤེས་སམ། །འདི་ཅི་ཆད་པར་འདུག་གམ་ཅི། །དེ་སྐད་བཤེས་གཉེན་མཆོག་
དེས་སྦྲན། །དེ་ཚེ་ང་ཡིས་སླར་སྦྲན་པ། །དོན་སྲིད་ཆེན་པོ་འབྱུང་བ་དེ། །ཡོད་པར་མ་ཤེས་སྟོར་བར་ཚོར། །འདི་དང་ཕྲད་པར་བྱ་ཡི་ཐབས། །བཤེས་གཉེན་ཁྱོད་ཀྱིས་ལུང་སྟོན་ཅིག །དམ་པ་དེ་ཡིས་དམིགས་བསྟན་པ། །དེ་དང་མྱུར་དུ་ཕྲད་འདོད་ན། །བཙལ་
བའི་ཐབས་ལ་བརྩོན་བྱ་དགོས། །ས་མཁན་དམ་པས་དམིགས་མཚོན་ཏེ། །མུན་སྣང་ཁམས་དང་ས་ཁམས་དང་། །སྣ་ཚོགས་ལམ་རྣམས་བགྲོད་བྱས་ནས། །བཙལ་ཀྱང་གཞན་ནས་མི་རྙེད་དེ། །རང་གི་ས་ཁམས་ཉིད་ནས་འབྱུང་། །དེ་ནི་རིན་ཆེན་སྔར་རྙེད་
པའི། །དམ་པ་རྣམས་ཀྱི་ཁྱིམ་ཡིན་ཏེ། །དེ་ནི་སྔར་རྙེད་གྱུར་པ་ཡི། །རྙེད་པ་རྣམས་ཀྱི་རྙེད་གནས་ཡིན། །དེ་སྐད་ཐོས་ནས་དེ་ཚེ་ངས། །གང་ཚེ་བཙལ་བའི་ཆེད་ཕྱིར་དུ། །དམ་པ་དེ་ལ་ལམ་ལྟོས་ཏེ། །བློ་གྲོས་དམ་པས་ངེས་བཅད་ནས། །ཐེག་ཆེན་ཅང་
ཤེས་དེ་ཞོན་ཏེ། །མུན་སྣང་གཉིས་ཀྱི་ཁམས་ནས་འོངས། །གཅན་འཕྲང་ཆུ་བོ་བཞི་རྒལ་ཏེ། །སྣ་ཚོགས་ལམ་བགྲོད་ཀུན་བཙལ་ནས། །དམ་པ་རྣམས་ཀྱི་ལམ་དུ་ཞུགས། །ས་དང་རྣམ་ཐར་ལམ་བགྲོད་དེ། །མྱ་ངན་འདས་པའི་གྲོང་ཁྱེར་བསྙགས། །
ནོར་བུ་རིན་ཆེན་རྩད་བཅད་ན། །མ་བྱུང་མ་རྙེད་རང་ཉིད་ཀྱི། །ཆོས་ཉིད་དབྱིངས་ཀྱི་ཁྱིམ་ནས་རྙེད། །རྙེད་པ་ཉིད་ན་རྙེད་མེད་དེ། །སྟོང་བ་ཉིད་ནའང་སྟོང་བྲལ་མེད། །ཡོད་མིན་མེད་མིན་སྟོར་རྙེད་མེད། །གཞན་ནས་མ་བྱུང་རང་འབྱུང་བར། །ཤེས་ལ་རྙེད་

བཏགས་མ་ཤེས་ལ། །སྟོར་ཞེས་ཐ་སྙད་བཏགས་པར་ཟད། །ཡོད་དང་སྟོར་དང་རྙེད་པའི་དུས། །ཐོག་མ་མེད་པའི་དུས་ནས་སོ། །དེ་ལྟར་ཆོས་ཉིད་མེད་པ་ལས། །སྤྲུལ་པ་སྣང་བའི་དུས་འདིར་ནི། །མུན་སྣང་གཉིས་ཀྱི་ཁམས་འདིར་འོངས། །
ང་ནི་ཐབས་ཀྱི་མཉན་པ་མཁན། །འཁོར་བའི་ཆུ་བོ་མཐའ་མེད་ལས། །སྲིད་གསུམ་བསྒྲལ་བར་དམ་བཅས་ཀྱིས། །ཐར་པར་འདོད་པ་ལམ་འདིར་ཤོག །ང་ནི་ཐབས་ཀྱི་མིག་མཁན་ཏེ། །འཇིག་རྟེན་ལོང་བ་དཔག་མེད་རྣམས། །ལིང་ཐོག་བསལ་བར་དམ་
བཅས་ཀྱིས། །གང་ཞིག་མཐོང་འདོད་ལམ་འདིར་ཤོག །ང་ནི་ཐབས་ཀྱི་སྨན་པ་སྟེ། །གྲོང་ཁྱེར་གསུམ་གྱི་ནད་པ་རྣམས། །གཅོད་རྙིང་སྦྱང་བར་དམ་བཅས་ཀྱིས། །གང་ཞིག་བདེ་འདོད་ལམ་འདིར་ཤོག །ང་ནི་ཐབས་ཀྱི་ས་མཁན་ཏེ། །འགྲོ་བ་ལམ་ལོག་
ལམ་སྟོར་རྣམས། །མ་ནོར་ཁྲིད་པར་དམ་བཅས་ཀྱིས། །ཡང་དག་ལམ་འདོད་ལམ་འདིར་ཤོག །ང་ནི་ཐུགས་རྗེ་སྤྱན་རས་མཁན། །འཁོར་བའི་དགྲ་དཔུང་འཇིགས་པ་ལས། །ཐམས་ཅད་བསྐྱབ་པར་དམ་བཅས་ཀྱིས། །འཇིགས་དང་བྲལ་འདོད་ལམ་འདིར་
ཤོག །ང་ནི་རྡོ་རྗེ་རྫོང་ཆེན་ཏེ། །འཁོར་བའི་གཡུལ་ཆེན་དམག་དཔུང་ལས། །འགྲོ་བའི་འཁྲས་སར་དམ་བཅས་ཀྱིས། །གང་ཞིག་མཁར་འདོད་ལམ་འདིར་ཤོག །ང་ནི་ཐབས་ཀྱི་ཚོང་དཔོན་ཏེ། །འདོད་པ་རྒྱ་མཚོས་མི་ངོམས་རྣམས། །གཏེར་ཆེན་སྦྱིན་
པར་དམ་བཅས་ཀྱིས། །གང་ཞིག་གཏེར་འདོད་ལམ་འདིར་ཤོག །ང་ནི་ཐབས་ཀྱི་སྒྲོན་མ་སྟེ། །མུན་ནག་སྨག་ཏུ་འཁྱམས་པ་རྣམས། །མུན་ནག་བསལ་བར་དམ་བཅས་ཀྱིས། །གང་ཞིག་སྣང་འདོད་ལམ་འདིར་ཤོག །ང་ནི་ཡིད་བཞིན་ནོར་བུ་སྟེ། །
ཡང་དག་ཡིད་བཞིན་འདོད་པ་རྣམས། །ཡིད་བཞིན་བསྐང་བར་དམ་བཅས་ཀྱིས། །ལྷུན་གྱིས་གྲུབ་འདོད་ལམ་འདིར་ཤོག །ང་ནི་བཀའ་ཡི་ལྡེ་མིག་སྟེ། །བཀའ་སྒྲོམ་ཐར་རམ་གསང་བ་རྣམས། །རྣམ་པར་འབྱེད་པར་དམ་བཅས་ཀྱིས། །གང་ཞིག་གྲོལ་

འདོད་ལམ་འདིར་ཤོག །ང་ནི་བཀའ་ཡི་འགྲེལ་བ་སྟེ། །གསུང་གི་གླེགས་བམ་ཟབ་མོ་རྣམས། །ངེས་པར་དགྲོལ་བར་དམ་བཅས་ཀྱིས། །གང་དག་ཤེས་འདོད་ལམ་འདིར་ཤོག །རྣམ་དག་ལམ་ཆེན་ཀུན་སྒྲོལ་འདིར། །སྐལ་ལྡན་གང་ཞིག་སུ་བཞུགས་པ། །
ནོར་བུ་རིན་ཆེན་འོད་འབར་བ། །ངེས་པར་འཆར་གྱིས་བརྩོན་པར་གྱིས། །དེ་ཉིད་སེམས་ཀྱི་མེ་ལོང་སྟེ། །མངོན་སུམ་གསལ་བར་རྟོགས་མ་ཐག །འགྲོ་བའི་ལུས་ལ་སངས་རྒྱས་ཡིན། །རྡོ་རྗེ་གསང་ཆེན་གསང་བ་ཡི། །ངེས་དོན་དམ་པའི་མཛོད་མཆོག་རྣམས། །
འདིར་བགྲོས་གསལ་བར་བཤད་སྦྱར་བས། །ལྷ་དང་མི་ཡི་རིག་འཛིན་ལས། །རིམ་པར་བརྒྱུད་དེ་གྲགས་པར་འགྱུར། །ལྷ་མི་འཇིག་རྟེན་ཐམས་ཅད་ཀྱི། །མུན་པའི་གདུང་བ་ཀུན་བསལ་ནས། །སེམས་ཀྱི་དཀྱིལ་འཁོར་གསལ་བར་འགྱུར། །ཅི་ཕྱིར་
མུན་པའི་གདུང་བར་ཞུགས། །ཐུབ་པ་མྱ་ངན་འདས་གདུང་བ། །དེ་ནི་ནམ་མཁའི་སྐུ་མངའ་བ། །འདའ་དང་མི་འདའ་མི་མངའ་སྟེ། །འཕོ་འགྱུར་མེད་པས་ནམ་མཁའ་བཞིན། །དེ་སྐད་སྤྲུལ་པའི་སྒྲ་འབྱུང་བས། །སྔོན་དུ་བྱུང་བའི་རིགས་ཅན་རྣམས། །
མཆོག་ཏུ་དགའ་བ་ཆེར་སྐྱེས་ཏེ། །དགའ་མགུ་རངས་པའི་བསམ་པ་ཡིས། །ལུས་བཏུད་ཤིན་ཏུ་གུས་སྦྱར་ནས། །སྤྱན་སྔར་འདུག་སྟེ་འདི་སྐད་གསོལ། །མཚན་མོའི་མུན་ནག་སྤྲིན་རུམ་ནས། །གློག་འགྱུར་བར་སྣང་སྟོན་ལྟ་བུར། །ཐོག་མ་ཐ་མ་མེད་པ་
ཡི། །དེ་བཞིན་ཉིད་ཀྱི་དབྱིངས་ཉིད་ལས། །རྣམ་དག་ལམ་ཆེན་དེ་ཉིད་དུ། །བྱུང་བའི་སྐྱེས་བུ་དོན་གྲུབ་ཁྱོད། །དམ་པ་རྣམས་ཀྱི་གསང་འཛིན་ཅིང་། །གསང་བ་པ་ཡི་བདག་པོར་གྲགས། །བཀའ་རྣམས་བགྲོ་བར་ཁྱོད་བསྔགས་པས། །ཁྱོད་ནི་བཀའ་
འགྲེལ་ཆེན་པོར་གྲགས། །སེམས་ཀྱི་དཀྱིལ་འཁོར་ཐམས་ཅད་ལ། །མཛོད་གསུམ་གསང་བའི་ཉི་ཤར་བས། །ཤེས་བྱའི་མུན་པ་ཀུན་བསལ་ཕྱིར། །ཁྱོད་ནི་གསལ་བའི་ཉི་མར་གྲགས། །གདུལ་དཀའ་མ་ལུས་ཀུན་འདུལ་ཞིང་། །བདུད་ཀྱི་བདུད་སྡེ་

བདུད་རྣམས་འཇོམས། །འཇིགས་པའི་ཚོགས་ཀྱང་འཇོམས་བྱེད་པས། །ཁྱོད་ནི་བདུད་ཀྱི་བདུད་དུ་གྲགས། །དེ་བཞིན་ཉིད་ཀྱི་ངོ་བོ་ཉིད། །སེམས་ཉིད་རང་བཞིན་འོད་གསལ་བ། །ཆོས་ཀུན་གཟུགས་བརྙན་སྣང་བས་ན། །ཆོས་ཀྱི་མེ་ལོང་ཞེས་
ཀྱང་གྲགས། །དུག་འཇོམས་སྨན་གྱི་དཀྱིལ་འཁོར་གྱིས། །ཟུག་རྔུ་འབྱིན་པ་བླ་ན་མེད། །ནད་དོ་ཅོག་གི་དགྲར་གྱུར་པས། །ཁྱོད་ནི་སྨན་པའི་རྒྱལ་པོར་གྲགས། །དགའ་མགུ་རངས་པར་མཛད་པས་ན། །ཁྱོད་ནི་གདུང་བ་སེལ་བར་གྲགས། །འདོད་པ་ཡིད་
བཞིན་སྐོང་བས་ན། །ཁྱོད་ནི་ཡིད་བཞིན་ནོར་བུར་གྲགས། །དམ་པ་རྣམས་དང་མཐུན་མཛོད་ལ། །བདག་ཅག་རིག་པ་འཛིན་རྣམས་ལ། །དམ་པའི་སྤྲུལ་པ་གང་ལྟར་ནུབ། །དམ་པའི་སྒྲོན་མ་ཇི་ལྟར་བཀོད། །དམ་པའི་གསང་ལུང་ཇི་ལྟར་འབྱུང་། །
གསང་བ་རྒྱུད་ཀྱི་བགྲོ་བ་མཛོད། །དགོངས་པའི་ཚིག་གསུམ་བགྲོ་བ་མཛོད། །ནམ་མཁའི་རྡོ་རྗེ་བགྲོ་བ་མཛོད། །ཅེས་གསོལ་བ་བཏབ་བོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་ལུང་དམ་པ་བགྲོ་བར་གསོལ་བ་བཏབ་པའི་ལེའུ་སྟེ་
ལྔ་པའོ།། །།དེ་སྐད་ཅེས་གསོལ་བ་བཏབ་པ་ལས། །གསང་བའི་བདག་པོས་བཀའ་སྩལ་པ། །སྔོན་དུ་བྱུང་བར་ལུང་བསྟན་པའི། །འགྲོ་བ་ལུས་ཀྱི་སེམས་དཔའ་རྣམས། །གདུང་སྔགས་དྲི་བ་དང་བཅས་པའི། །སྒྱུ་མའི་རྟོག་པ་དགྲོལ་གྱིས་
ཉོན། །སེམས་ཀྱི་དཀྱིལ་འཁོར་དེ་བཞིན་ཉིད། །ནམ་མཁའ་བཞིན་དུ་ནུབ་པ་མེད། །རང་བཞིན་ཡེ་ནས་འོད་གསལ་བས། །དེ་ལ་གང་སྒྲིབ་དེ་ཉིད་སེལ། །ཚད་མ་གཉིས་ཀྱིས་གང་གཞལ་བ། །ཤེས་བྱ་དེ་ཡང་ཚད་མར་འགྱུར། །ལེགས་ཉེས་རྩ་
བའང་དེ་ཉིད་པས། །དེ་ཉིད་དེ་ལ་འགྱུར་བ་མེད། །སེམས་ཀྱི་རང་བཞིན་འོད་གསལ་བས། །དཀར་བས་དཀར་བའི་ཉི་ཟླ་མེད། །སངས་རྒྱས་མྱ་ངན་ཡོང་མི་འདའ། །ཆོས་ཀྱང་ནུབ་པར་མི་འགྱུར་ཏེ། །ལེ་ལོ་ཅན་ལ་ཕན་གདགས་ཕྱིར། །སྤྲུལ་པ་རྣམས་ནི་འདའ་

ཚུལ་སྟོན། །ཇི་ལྟར་ནམ་མཁའ་ཞིག་འགྱུར་ན། །དེ་ཚེ་མྱ་ངན་འདའ་བར་འགྱུར། །གང་དག་གདུག་པ་མ་རུངས་པ། །བདག་མེད་སྟོང་པའི་སྟོབས་ཀྱིས་འདུལ། །རང་བཞིན་འོད་གསལ་སྤྲོས་བྲལ་བའི། །བསྟན་པ་རྒྱ་མཚོའང་དེ་ཉིད་པས། །རང་
འབྱུང་སེང་གེ་རྩལ་ཅན་གྱིས། །ཀུན་དུ་འབར་ཞིང་སྣང་བར་བྱེད། །བསླབ་པ་ལྷག་པའི་སེམས་ཉིད་པས། །བསྒྲུབ་པ་ཀུན་གྱི་མཆོག་འདི་ནི། །ས་རབ་སྣང་བ་ཕྱིས་འབྱུང་བའི། །འགྲོ་བ་ལུས་ཀྱི་སེམས་དཔའ་འཛིན། །མཐའ་ཐུག་མེད་པའི་སེམས་
ཅན་རྣམས། །བྱང་ཆུབ་སྙིང་པོར་ཡེ་གནས་པས། །དེ་བཞིན་ཉིད་དུ་རྒྱུད་དེས་ཕྱིར། །ཀུན་ཀྱང་མི་སློབ་དེ་ལུང་སྟོན། །སེམས་ཉིད་ཡོད་དང་མེད་དོ་ཞེས། །བྱིས་པ་རྣམས་ནི་རྩོད་པར་བྱེད། །མཁས་པ་ཡེ་ནས་རྩོད་དང་བྲལ། །ཡོད་མེད་རྟོག་པའི་ཚིག་
མི་བརྗོད། །ང་ཡི་གསང་སྔགས་གསང་བ་འདི། །སངས་རྒྱས་ཀུན་གྱི་གསང་ཡིན་ཕྱིར། །གང་མི་དཔོགས་པར་གཞན་དཔགས་པས། །གསང་བར་སྒྲ་གཅིག་ཐ་དད་འབྱུང་། །དམ་པ་རྣམས་ཀྱི་གསང་ལུང་འདི། །གང་དག་མི་ཤེས་རྨོངས་འཕྱར་བས། །
དུག་དང་བདུད་རྩིར་རྗེ་བས་ནི། །ཕུང་བྱེད་གཉིས་ཀ་སྲེག་པར་འགྱུར། །ཀུན་གསལ་མེ་ལོང་འོད་པོ་ཆེ། །མ་འདྲེས་ཡོངས་རྫོགས་སྟོན་པ་དེ། །མཁའ་ལྟར་འཕོ་འགྱུར་མེད་པས་ན། །འཚེ་བའང་གློག་འགྱུ་སྤྲིན་བཞིན་མེད། །བྱང་ཆུབ་སྙིང་པོ་ཡོད་ཀྱི་
བར། །དེ་སྲིད་བསྟན་པ་གནས་པ་ཡིན། །ཐོག་མ་ཐ་མ་མེད་པ་ནས། །བྱུང་བས་སྔ་ཕྱི་ཡོད་མ་ཡིན། །དང་པོ་མེད་ལས་བྱུང་བརྗོད་པས། །ཐ་མའང་བརྗོད་བྲལ་མེད་པར་འགྱུར། །གདུང་འཛིན་ཐོག་མའང་དེ་བཞིན་ཉིད། །ཐ་མའང་དེ་ལས་གཞན་མི་
འགྱུར། །འདི་ནས་དེ་བཞིན་ཉིད་འདིར་གཤེགས། །བདལ་ཁྱབ་ཆེན་པོའི་ཞིང་ན་བཞུགས། །སེམས་ཀྱི་དཀྱིལ་འཁོར་འོད་གསལ་བ། །དེ་བཞིན་ཉིད་དུ་རྣམ་པར་སྣང་། །བྱིས་པའི་ཆེད་དུ་ཆོ་འཕྲུལ་ཞིག །མེ་ཏོག་བཀོད་པའི་འཇིག་རྟེན་ན། །མ་གྲགས་

པ་ཞེས་བྱ་བར་སྣང་། །སྣང་བའང་ཉིད་ན་སྣང་བ་མེད། །དེ་བཞིན་ཞིང་ཁམས་གང་དག་ཏུ། །སྤྲུལ་པའི་སངས་རྒྱས་སྣང་མཛད་པ། །སྒྱུ་མའི་འཕྲུལ་པ་ཇི་བཞིན་དུ། །མི་སྣང་འོད་ཀྱང་གཞན་དུ་སྣང་། །མི་བསྐྱོད་རྡོ་རྗེ་ཐུགས་མཆོག་ཀྱང་། །
ཐུགས་རྗེ་སྤྲུལ་པའི་བྱིན་བརླབས་ཀྱིས། །འཇིག་རྟེན་ཁམས་ནི་དཔག་ཏུ་མེད། །མུན་སྣང་རང་འབྱུང་རང་བཞིན་ཡིན། །སྐྱེ་མེད་ཡེ་ཤེས་ཉིད་ཀྱི་དབྱིངས། །གདོད་ནས་བདེར་གཤེགས་སྙིང་པོ་ལས། །རྣམ་རྟོག་གློ་བུར་ལས་ཀྱིས་བསྒྲིབས། །དེ་ཉིད་འགྲོ་
མགོན་སྐྱབས་ཆེན་ཡིན། །རྒྱལ་བའི་དགོངས་པ་ཚིག་གསུམ་པོ། །འཕྲུལ་གྱི་བློ་དང་གྲོས་མཆོག་སྟེ། །ཡུན་གྱི་དོན་སྲིད་ཆེན་པོ་ལས། །བློ་གྲོས་དམ་པའི་ཡུལ་དུ་སྣང་། །རྒྱལ་བ་ཀུན་གྱི་ཐུགས་འཇུག་པ། །ཇི་བཞིན་པ་ཡི་དེ་ཁོ་ན། །ཉིད་དུ་ངེས་པའི་ངོ་བོ་
ལ། །བློ་བཞག་དེ་ཉིད་ངེས་པ་ཡིན། །ཆོས་ཀུན་ནམ་མཁའི་མཚན་ཉིད་དེ། །ཡེ་ཤེས་སྐུ་ཅན་རྒྱལ་བ་རྣམས། །སྐུ་ལ་དངོས་ཅན་དངོས་མེད་པར། །སྐུ་གདུང་རིང་བསྲེལ་ཇི་ལྟར་འབྱུང་། །སེམས་ཅན་རྣམས་ལ་ཕན་དོན་དུ། །མེད་པ་ཉིད་ལས་སྤྲུལ་པ་
ཡི། །སྒྱུ་མ་རིང་བསྲེལ་ཡུངས་འབྲུ་ཙམ། །ཐུགས་རྗེ་ཐབས་ཀྱིས་གཞག་ཚུལ་བསྟན། །ངེས་པར་རིང་བསྲེལ་གང་འདོད་པ། །བྱེ་མ་དག་ལས་མར་འདོད་འདྲ། །གང་ཚེ་འབྲས་བཏབ་ཏིལ་འབྲུ་སྨིན། །དེ་ཚེ་རིང་བསྲེལ་ཡོད་པར་འགྱུར། །གཟུགས་སྣང་བྲབ་
སྒྲོགས་སྙིང་པོ་ཅན། །སྐུ་དང་གསུང་ཐུགས་སྙིང་པོ་ཅན། །མཆོད་གནས་ཡིད་རྟེན་དམ་པ་ཞེས། །འགྲོ་མགོན་རྡོ་རྗེ་སེམས་དཔས་བཤད། །དཔག་ཏུ་མེད་པའི་རྒྱལ་བ་རྣམས། །འཁོར་བའི་སེམས་ཅན་རྒྱུད་ལས་བྱུང་། །འཁོར་བའི་སེམས་ཅན་རྒྱུན་བཅད་ན། །
སངས་རྒྱས་རྒྱུན་ཡང་ཆད་པ་ཡིན། །དཔེར་ན་ནམ་མཁའི་གཞའ་ཚོན་ནི། །དང་པོ་གཞན་ནས་འོངས་པ་དང་། །ཐ་མ་གཞན་དུ་སོང་བ་མེད། །དེ་ཉིད་རང་འབྱུང་རང་ཞི་ལྟར། །སྤྲུལ་པ་རང་འབྱུང་རང་ཞི་བས། །དེ་ཉིད་དེ་ལ་ནུབ་པ་མེད། །འདས་ཀྱང་མ་བྲལ་

ཐ་དད་མིན། །མ་འདས་པ་ནའང་གཅིག་མིན་ཏེ། །འདའ་དང་མི་འདའ་ལས་འདས་པས། །བྲལ་དང་མ་བྲལ་ག་ལ་ཡོད། །དེས་ན་གང་ལ་ཅི་ཕྱིར་གདུང་། །གདུང་བ་རྨོངས་པ་འཁྲུལ་པ་ཡིན། །ཨེ་མའོ་ངོ་མཚར་ཇི་ལྟ་བུ། །འདི་གོ་ཇི་ལྟར་འཁྲུལ་ཞིག་གུ། །
ཞེས་གསང་བའི་བདག་པོ་དེས་སེང་གེ་རྣམ་པར་ལྟ་བའི་ཚུལ་གྱིས་གཞས་བཏབ་པས་རྨོངས་པས་གདུངས་པ་རྣམས་དགའ་མགུ་རངས་ནས་གདུང་བ་ཡོངས་སུ་སངས་ཏེ་སེམས་མ་བཅོས་པར་གནས་ཏེ་དེ་བཞིན་གྱི་དཀྱིལ་འཁོར་ཐམས་ཅད་འོད་གསལ་བར་གྱུར་
ཏོ། །དེ་ནས་ལང་ཀའི་བདག་པོས་གསང་བ་བའི་བདག་པོ་ལ་གསོལ་པ། །གསང་བ་པའི་བདག་པོ་ཆེན་པོ་གདུང་བ་ཐམས་ཅད་སེལ་ཏམ། །འོན་ཏེ་མི་མཇེད་ཀྱི་འཇིག་རྟེན་གྱི་གདུང་བ་འབའ་ཞིག་སེལ། །གསང་བ་པའི་བདག་པོས་སྨྲས་པ། ལང་ཀའི་བདག་
པོ་ཁོ་བོ་ནི་གདུང་བ་ཐམས་ཅད་སེལ་བ་སྟེ། །འདས་པའི་དུས་ཀྱི་གདུང་བ་ཇི་སྙེད་པ་ཡང་བསལ་ཏོ། །ད་ལྟ་མི་མཇེད་ཀྱི་འཇིག་རྟེན་གྱི་ཁམས་འདི་ཡི་གདུང་བ་ཡང་བསལ། །འཇིག་རྟེན་གྱི་ཁམས་གཞན་རྡུལ་སྙེད་ཀྱི་གདུང་བ་ཡང་བསལ། མ་འོངས་པའི་
གདུང་བ་ཇི་སྙེད་པ་ཡང་སེལ་བར་འགྱུར་རོ། །དེ་བས་ན་གང་དག་ཡོངས་སུ་གདུང་བ་རྣམས་ནི་མི་ཤེས་པ། རྨོངས་པ། ཤེད་མ་བྱེ་བ་ཁོ་ན་ཡིན་གྱི་ཤེས་པ། མ་རྨོངས་པ་མཁས་པ་ཤེད་བྱེ་བ་རྣམས་ནི་གང་དུ་ཡང་གདུང་བ་མེད་པ་གདུང་བ་དང་བྲལ་བ་ཡིན་
ནོ། །ཞེས་ཐོས་པས་ལང་ཀའི་བདག་པོ་ལ་སོགས་པ་འགྲོ་བ་ལུས་ཀྱི་སེམས་དཔའ་རྣམས་ཡོངས་སུ་གདུང་བ་ལས་སངས་སོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་གང་རྨོངས་པ་གདུང་བ་སེལ་བ་ཞེས་བྱ་བའི་ལེའུ་སྟེ་དྲུག་པའོ།། །།
ཐེག་པ་ཆེན་པོ་ངེས་པར་འབྱུང་བའི་ཚུལ་ལས་གང་རྨོངས་པའི་གདུང་བ་སེལ་བའི་གཏམ་རྒྱུད་བརྗོད་པ་ཆོས་ཀྱི་ཕྱག་རྒྱའི་ཡེ་ཤེས་རྣམ་པར་བགྲོས་པ་སྟེ་བྱུང་ཚུལ་བསྟན་པ་དང་པོའོ། །དེ་ནས་ལང་ཀའི་བདག་པོས་སྔོན་དུ་གནང་བའི་ཚིག་བཅུ་གཉིས་པའི་

གཉིས་པ་གང་དུ་སྒྲོན་མ་ཡོངས་སུ་བཀོད་པ་ན་ཡང་འབྱུང་ཞེས་ལུང་བསྟན་པ་ཡོངས་སུ་དྲི་བའི་ཕྱིར་གསང་བ་པའི་བདག་པོ་ལ་གསོལ་པ། གསང་བ་པའི་བདག་པོ་སྔོན་བདག་གིས་ཕྱིན་ཅི་མ་ལོག་པར་ཐོས་པ། གང་རྨོངས་པ་རྣམས་ཀྱི་
གདུང་བ་སེལ་ཅིང་སེམས་ཅན་རྣམས་ཀྱི་སེམས་ཀྱི་དཀྱིལ་འཁོར་གསལ་བར་བྱེད་པ་བྱང་ཆུབ་སེམས་དཔའ་ཆེན་པོ་རྣམས་ཀྱི་བློ་གྲོས་དམ་པའི་མཛོད། དེ་བཞིན་གཤེགས་པ་རྣམས་ཀྱི་དགོངས་པ་དེ་ཁོ་ན་ཉིད་གསང་བ་དམ་པ་ཕྱིན་ཅི་མ་ལོག་པ་ཡང་
དག་པའི་ལྟ་བ། སངས་རྒྱས་ཀུན་གྱིས་བསྔགས་པ། །ཐེག་པ་ཆེན་པོ་དེ་འདེགས་པའི་ཚུལ་ཚད་མ་ནུབ་པར་གྱུར་ཕན་ཆད་དུ་འབྱུང་བར་འགྱུར་ཞིག་གུ་ཞེས་དྲིས་པ་ལས། གསང་བ་པའི་བདག་པོས་སྨྲས་པ། ལང་ཀའི་བདག་པོ་ཅིག་འདི་ཇི་སྙམ་དུ་
སེམས། ཁྱོད་མི་ཤེས་སམ། ཡུལ་ཚད་མ་ཉིད་ཀྱིས་བཀའ་སྩལ་གྱིས་ཀུན་ཛ་ར་ཆོས་ཀྱི་སྤུན་ལ་བཀའ་སྩལ་པ་འདི་ལྟ་སྟེ། རིག་པ་འཛིན་པ་ཁྱོད་ཀྱི་དྲི་བ་འདི་ལྟ་སྟེ། དེ་ཁོ་ན་ཉིད་གསང་བ་དམ་པ་དེ་ནི་གནས་སྐབས་གཉིས་དང་བཅུར་འབྱུང་བ་སྟེ།
གང་རྨོངས་པ་གདུང་བ་སེལ་བ་ན་ཡང་འབྱུང་། །གང་འཇིག་རྟེན་གྱི་སྒྲོན་མ་ཡོངས་སུ་བཀོད་པ་ན་ཡང་འབྱུང་། །གང་གིས་ངེས་པ་རྙེད་པ་ན་ཡང་འབྱུང་། སྙིང་པོ་བྱང་ཆུབ་ཉིད་དུ་ངེས་པ་ན་ཡང་འབྱུང་། དགོངས་པ་ངེས་པར་འགྲེལ་པ་ན་ཡང་འབྱུང་། གདུལ་
བྱ་སྐབས་ལ་བབ་པའི་ཆེད་ན་ཡང་འབྱུང་། བྱིན་གྱིས་བརླབས་ལས་སྣང་བ་ན་ཡང་འབྱུང་། བརྒྱུད་པ་ཐབས་ཀྱིས་གྲགས་པ་ན་ཡང་འབྱུང་། གང་གི་ཆེད་དུ་མཛད་པ་ན་ཡང་འབྱུང་། ལུང་ཆེན་ངེས་པར་བསྟན་པ་ན་ཡང་འབྱུང་། ལས་རྒྱུད་ཡོངས་སུ་
གཅོད་པ་ན་ཡང་འབྱུང་། དགོངས་པ་རྣམ་པར་བགྲོ་བ་ན་ཡང་འབྱུང་སྟེ། དེ་དག་ནི་ཐམས་ཅད་དང་ཐམས་ཅད་ནས་ཐམས་ཅད་དུ་ཡོངས་སུ་རྣམ་པར་སྣང་ངོ་། །སྣང་བར་གྱུར་ཏོ། །སྣང་བར་འགྱུར་རོ་ཞེས་ལུང་བསྟན་པ་གང་དུ་གྲོགས་པ་མི་ཤེས་

སམ་ཞེས་སྨྲས་པ་ལས། ལང་ཀའི་བདག་པོས་སྨྲས་པ། ཨེ་མའོ་གསང་བ་པའི་བདག་པོ་དེ་ནི་བདག་གིས་ཐོས་པ་དམ་པ་ཐོས་སོ། །ཐོས་པའི་མཆོག་ཐོས་སོ། །གསང་བ་པའི་བདག་པོ་ཡོངས་སུ་རྨོངས་པ་གདུངས་པ་ནི་སངས་པ་ལྟ་ན། སྒྲོན་མ་ཡོངས་
སུ་བཀོད་པ་ན་ཡང་འབྱུང་ཞེས་པ་ཇི་ལྟ་བ་བཞིན་དུ་གྲགས་པ་ལགས། མི་མཇེད་ཀྱི་འཇིག་རྟེན་གྱི་ཁམས་འདིར་ད་ལྟར་ཡོངས་སུ་འདས་པ་འདི་སྒྲོན་མ་བཀོད་པ་ཞེས་བྱ་བར་འགྱུར་རམ། འདས་པ་འདི་ཡང་མི་མཇེད་ཀྱི་འཇིག་རྟེན་གྱི་ཞིང་ཁམས་འདི་འབའ་
ཞིག་གི་སྒྲོན་མ་སངས་རྒྱས་མྱ་ངན་ལས་འདས་སམ། འོན་ཏེ་འཇིག་རྟེན་གྱི་ཁམས་མཐའ་དག་ན་ཞིང་ཁམས་ཇི་སྙེད་པའི་སྒྲོན་མ་བཀོད་པའི་སངས་རྒྱས་མྱ་ངན་ལས་འདའ་བར་འགྱུར་ཞེས་དྲིས་པ་ལས། གསང་བ་པའི་བདག་པོས་སྨྲས་པ། ལང་ཀའི་བདག་པོ་
དེ་ཇི་སྙམ་དུ་སེམས། འདི་ཡང་སྒྲོན་མ་ཞེས་བྱ་སྟེ། ད་ལྟར་འདས་པ་ནི་ཞིང་ཁམས་མཐའ་དག་གི་སངས་རྒྱས་ལྟ་ཞོག་འཛམ་བུའི་གླིང་བྱེ་བ་ཕྲག་ས་ཡའི་སངས་རྒྱས་ལྟ་ཡང་ཞོག །འཛམ་བུའི་གླིང་གཅིག་གི་སངས་རྒྱས་གཅིག་ཡོངས་སུ་མྱ་ངན་ལས་འདས་པར་
ཟུང་ཤིག །དེ་ཅིའི་ཕྱིར་ཞེ་ན། ཞིང་ཁམས་འདི་ནི་སྤྲུལ་པའི་སངས་རྒྱས་ཉག་གཅིག་གི་ཞིང་ཁམས་ཡིན་པའི་ཕྱིར་རོ། །དེ་བཞིན་དུ་བསམ་གྱིས་མི་ཁྱབ་པའི་སངས་རྒྱས་ཇི་སྙེད་པ་འཇིག་རྟེན་གྱི་ཁམས་གཞལ་དུ་མེད་པ་ན་སྒྲོན་མའི་བྱ་བ་མཛད་དོ། །དེ་དག་
ཇི་ལྟ་བ་དེ་ལྟར་སྤྲུལ་པའི་སངས་རྒྱས་རྡུལ་སྙེད་ཀྱང་དེ་བཞིན་དུ་བལྟའོ། །དེ་ནས་ལང་ཀའི་མངའ་བདག་བྱང་ཆུབ་སེམས་དཔའ་སེམས་དཔའ་ཆེན་པོས་དྲིས་པ། གསང་བ་པའི་བདག་པོ་མི་མཇེད་ཀྱི་ཞིང་ཁམས་འཛམ་བུའི་གླིང་གཅིག་གི་སྤྲུལ་པའི་སངས་
རྒྱས་ཉག་གཅིག་མྱ་ངན་ལས་འདས་པ་འདི་སངས་རྒྱས་གང་གི་སྤྲུལ་པར་ཡོངས་སུ་གཟུང་བར་བགྱི། གསང་བ་པའི་བདག་པོས་སྨྲས་པ། །ལང་ཀའི་བདག་པོ་འདི་ནི་རྡོ་རྗེ་སེམས་དཔའི་སྤྲུལ་པ་བསམ་གྱིས་མི་ཁྱབ་པ་ལས་སྤྲུལ་པ་ཆ་གཅིག་འབའ་ཞིག་ཁོ་

ནར་ཟུང་ཤིག །སྨྲས་པ། གསང་བ་པའི་བདག་པོ་ཞིང་ཁམས་འདིར་ཤཱཀྱ་ཐུབ་པ་ཞེས་བྱ་བར་གྲགས་ན་འདི་ཇི་ལྟར་ཡོངས་སུ་ཤེས་པར་བགྱི། སྨྲས་པ། ལང་ཀའི་བདག་པོ་དེ་ནི་རྡོ་རྗེ་སེམས་དཔའི་སྤྲུལ་པའི་བླ་དགས་འབའ་ཞིག་གོ། །ལང་
ཀའི་བདག་པོ་དེ་ཅིའི་ཕྱིར་ཞེ་ན། རྡོ་རྗེ་སེམས་དཔའི་སྤྲུལ་པ་བསམ་གྱིས་མི་ཁྱབ་པས་འཁོར་བ་བསམ་གྱིས་མི་ཁྱབ་པའི་དཔུང་གཏན་བཅོམ་པའི་ཕྱིར་ཐུབ་པ་ཆེན་པོ་ཞེས་ཡོངས་སུ་གྲགས་སོ། །ཇི་ལྟར་འཇིག་རྟེན་དྲུག་གི་ཕྱོགས་བཅུར་ཡང་ཐུབ་པ་ཆེན་པོ་ཞེས་བྱ་བར་
ཡང་གྲགས་པ་ནི་འདི་ལྟ་སྟེ། ལྷའི་གནས་སུ་ཐུབ་པ་ཆེན་པོ་སྲིད་ཐུབ་འཛིན་ཞེས་བྱ་བར་གྲགས་སོ། །ལྷ་མ་ཡིན་གྱི་གནས་སུ་ཐུབ་པ་ཆེན་པོ་རྣམ་པར་རྒྱལ་བ་ཞེས་བྱ་བར་གྲགས་སོ། །མིའི་གནས་སུ་ཐུབ་པ་ཆེན་པོ་ཤཱཀྱ་སེང་གེ་ཞེས་བྱ་བར་གྲགས་སོ། །
བྱོལ་སོང་གི་གནས་སུ་ཐུབ་པ་ཆེན་པོ་རྣམ་པར་གནོན་པ་ཞེས་བྱ་བར་གྲགས་སོ། །ཡི་དགས་ཀྱི་གནས་སུ་ཐུབ་པ་ཆེན་པོ་རྣམ་པར་སྣང་བྱེད་ཅེས་བྱ་བར་གྲགས་སོ། །དམྱལ་བའི་གནས་སུ་ཐུབ་པ་ཆེན་པོ་ཆོས་ཀྱི་རྒྱལ་པོ་ཞེས་བྱ་བར་གྲགས་སོ། །
ཀྱེ་ལང་ཀའི་བདག་པོ་དེར་ཡང་མ་ཟད་དེ། དེ་ཇི་ལྟ་བ་དེ་ལྟར་དེ་བཞིན་དུ་མི་མཇེད་ཀྱི་འཇིག་རྟེན་དྲུག་གི་ཕྱོགས་བཅུ་ན་ཐུབ་པ་དྲུག་གི་སྒྲོན་མ་ཡོངས་སུ་སྣང་བ་དེ་ལྟ་དེ་ལྟར་རྡུལ་སྙེད་ཀྱི་འཇིག་རྟེན་གྱི་ཁམས་བསམ་གྱིས་མི་ཁྱབ་པའི་འཇིག་རྟེན་དྲུག་གི་
ཕྱོགས་བཅུ་མཐའ་ཡས་པ་ན་རྡུལ་སྙེད་ཀྱི་ཐུབ་པ་དྲུག་གི་སྒྲོན་མ་མཐའ་ཡས་པར་སྣང་བ་ཡང་འདི་ལྟ་སྟེ། ཤར་ཕྱོགས་ཀྱི་འཇིག་རྟེན་གྱི་ཁམས་གླིང་བཞི་པ་སྟོང་ཕྲག་བཅུ་གཉིས་འདས་པ་ན་འཇིག་རྟེན་གྱི་ཁམས་དྲི་མ་མེད་པ་ཞེས་བྱ་བ་ཞིང་ཁམས་དེ་
ཐམས་ཅད་རིན་པོ་ཆེ་སྣ་ཚོགས་ལས་གྲུབ་པ། དེ་ན་གནས་པའི་འགྲོ་བ་རྣམས་ཚེ་དང་ལོངས་སྤྱོད་ཐམས་ཅད་སུམ་ཅུ་རྩ་གསུམ་དང་མཉམ་པ། བར་མ་དོར་འཆི་བ་མེད་ཅིང་བརྫུས་ནས་སྐྱེ་བ་ཤ་དག་ཀྱང་འདོད་པ་ཐམས་ཅད་བསམས་པས་འགྲུབ་སྟེ། དེ་ན་

སྦྱིན་པ་ཡང་མེད། གཏོང་བ་ཡང་མེད། ལེན་པ་དང་སློང་བ་པོ་ཡང་མེད་དེ། འཇིག་རྟེན་གྱི་ཁམས་གཞན་དག་ན་གཏོང་སློང་ཡོད་པ་དག་གི་གཏམ་ཐོས་པ་ན་དེ་ལ་ཡོངས་སུ་སྨོན་པ་ཡིན་ཏེ། དེ་ན་རྡོ་རྗེ་སེམས་དཔའི་སྤྲུལ་པ་ཐུབ་པའི་དབང་པོ་དེ་དེ་བཞིན་གཤེགས་
པ་ཤཱཀྱ་ཐུབ་པ་དྲི་མེད་སྒྲ་ཞེས་བྱ་བར་བསྟན་ནས་ཐེག་པ་ཆེན་པོའི་ཆོས་སེམས་ཀྱི་དཀྱིལ་འཁོར་འོད་གསལ་བ། གསང་སྔགས་ཀྱི་ངོ་བོ་ཉིད་སྒྲོན་མ་ཆེན་པོ་ཡོངས་སུ་སྣང་ངོ་། །དེ་ཉིད་ཀྱི་འཇིག་རྟེན་དྲུག་གི་ཕྱོགས་བཅུ་ན་ཡང་ཐུབ་པ་དྲུག་གི་སྒྲོན་མ་
སྣང་བས་འགྲོ་བ་དྲུག་གི་སེམས་ཀྱི་དཀྱིལ་འཁོར་ཡོངས་སུ་གསལ་བར་བྱེད་དོ། །ཡང་ཐུབ་པའི་དབང་པོ་དེ་ལྷོ་ཕྱོགས་ཀྱི་འཇིག་རྟེན་གྱི་ཁམས་སྟོང་ཕྲག་བརྒྱ་འདས་པ་ན་འཇིག་རྟེན་གྱི་ཁམས་ཡོན་ཏན་འབྱུང་བ་ཞེས་བྱ་བ་ན་དེ་བཞིན་གཤེགས་པ་ཤཱཀྱ་
ཐུབ་པ་དཀོན་མཆོག་སྤྲིན་ཞེས་བྱ་བར་སྤྲུལ་ནས་སེམས་ཀྱི་དཀྱིལ་འཁོར་འོད་གསལ་བ་གསང་སྔགས་ཀྱི་ངོ་བོ་དེ་ཉིད་ཡོངས་སུ་སྣང་བར་བྱེད་དོ། །དེ་ཉིད་ཀྱི་འཇིག་རྟེན་དྲུག་གི་ཕྱོགས་བཅུ་ན་ཡང་ཐུབ་པ་ཆེན་པོ་དྲུག་གི་སྒྲོན་མ་སྣང་བས་འགྲོ་བ་དྲུག་གི་
སེམས་ཀྱི་དཀྱིལ་འཁོར་གསལ་བར་བྱེད་དོ། །ཡང་ཐུབ་པའི་དབང་པོ་དེ་ནུབ་ཕྱོགས་ཀྱི་འཇིག་རྟེན་གྱི་ཁམས་སྟོང་ཕྲག་ཉི་ཤུ་འདས་པ་ན་འཇིག་རྟེན་གྱི་ཁམས་རྒྱན་ཤིན་ཏུ་བཀྲམ་པ་ཞེས་བྱ་བ་ན་གང་ཟག་བརྫུས་ནས་སྐྱེས་པ་ཤ་དག་སྟེ། ཚེ་ལོ་བརྒྱད་
ཁྲི་བཞི་སྟོང་གནས་པའི་ཞིང་ཁམས་དེ་ན་དེ་བཞིན་གཤེགས་པ་ཤཱཀྱ་ཐུབ་པ་ཡོན་ཏན་འབྱུང་གནས་ཞེས་བྱ་བར་བསྟན་ནས་སེམས་ཀྱི་དཀྱིལ་འཁོར་འོད་གསལ་བ་གསང་སྔགས་ཀྱི་ངོ་བོ་དེ་ཉིད་སྟོན་ཏོ། །དེ་ཉིད་ཀྱི་འཇིག་རྟེན་དྲུག་གི་ཕྱོགས་བཅུ་ན་ཡང་
ཐུབ་པ་དྲུག་གི་སྒྲོན་མ་སྣང་བས་སེམས་ཀྱི་དཀྱིལ་འཁོར་གསལ་བར་བྱེད་དོ། །ཡང་ཐུབ་པའི་དབང་པོ་དེ་བྱང་ཕྱོགས་ཀྱི་འཇིག་རྟེན་གྱི་ཁམས་སྟོང་ཕྲག་སུམ་ཅུ་འདས་པ་ན་འཇིག་རྟེན་གྱི་ཁམས་བག་ཚ་བ་མེད་པ་ཞེས་བྱ་བ་ན་དེ་བཞིན་གཤེགས་པ་ཤཱཀྱ་

ཐུབ་པ་སེང་གེ་སྒྲ་ཞེས་བྱ་བར་བསྟན་ནས་སེམས་ཀྱི་དཀྱིལ་འཁོར་འོད་གསལ་བ་གསང་སྔགས་ཀྱི་ངོ་བོ་དེ་ཉིད་སྟོན་ཏོ། །དེ་ཉིད་ཀྱི་འཇིག་རྟེན་དྲུག་གི་ཕྱོགས་བཅུ་ན་ཡང་ཐུབ་པ་དྲུག་གི་སྒྲོན་མ་སྣང་བས་འགྲོ་བ་དྲུག་གི་སེམས་ཀྱི་དཀྱིལ་འཁོར་
འོད་གསལ་བར་བྱེད་དོ། །དེ་བཞིན་དུ་ཐུབ་པའི་དབང་པོ་དེ་ཤར་ལྷོའི་འཇིག་རྟེན་གྱི་ཁམས་སྟོང་ཕྲག་བརྒྱད་ཅུ་རྩ་བཞི་འདས་པ་ན་འཇིག་རྟེན་གྱི་ཁམས་རྣམ་པར་མཛེས་པ་ཞེས་བྱ་བ་ན་དེ་བཞིན་གཤེགས་པ་ཤཱཀྱ་ཐུབ་པ་མཛེས་པའི་ཏོག་ཅེས་བྱ་བར་སྤྲུལ་
ནས་གོང་མ་བཞིན་དུ་ཆོས་སྟོན་ཏོ། །ལྷོ་ནུབ་མཚམས་ཀྱི་འཇིག་རྟེན་གྱི་ཁམས་སྟོང་ཕྲག་བདུན་ཅུ་འདས་པ་ན་འཇིག་རྟེན་གྱི་ཁམས་རབ་ཏུ་སྣང་བ་ཞེས་བྱ་བ་ན་དེ་བཞིན་གཤེགས་པ་ཤཱཀྱ་ཐུབ་པ་དེ་གཟི་བརྗིད་རྒྱན་ཞེས་བྱ་བར་བསྟན་ནས་གོང་མ་བཞིན་དུ་
ཆོས་སྟོན་ཏོ། །ནུབ་བྱང་མཚམས་ཀྱི་འཇིག་རྟེན་གྱི་ཁམས་སྟོང་ཕྲག་ལྔ་བཅུ་འདས་པ་ན་འཇིག་རྟེན་གྱི་ཁམས་རབ་ཏུ་དང་བ་ཞེས་བྱ་བ་ན་དེ་བཞིན་གཤེགས་པ་ཤཱཀྱ་ཐུབ་པ་དེ་ཙནྡན་དྲི་མཆོག་དཔལ་ཞེས་བྱ་བར་བསྟན་ནས་གོང་མ་བཞིན་དུ་ཆོས་སྟོན་ཏོ། །
བྱང་ཤར་མཚམས་ཀྱི་འཇིག་རྟེན་གྱི་ཁམས་སྟོང་ཕྲག་བཞི་བཅུ་རྩ་བཞི་འདས་པ་ན་འཇིག་རྟེན་གྱི་ཁམས་གདུང་བ་སེལ་བ་ཞེས་བྱ་བ་ན་དེ་བཞིན་གཤེགས་པ་ཤཱཀྱ་ཐུབ་པ་དེ་སྙིང་རྗེའི་རྒྱལ་པོ་དེ་ཞེས་བྱ་བར་བསྟན་ནས་གོང་མ་བཞིན་དུ་ཆོས་སྟོན་ཏོ། །
དེ་བཞིན་དུ་རྣམ་པར་སྣང་བའི་འཇིག་རྟེན་གྱི་ཁམས་ཞེས་བྱ་བ་ན་སངས་རྒྱས་མྱུར་དུ་འཛིན་པ་ཞེས་བྱ་བར་བསྟན་ནས་ཆོས་སྟོན་ཏོ། །ཡང་རིན་ཆེན་བཀོད་པའི་འཇིག་རྟེན་གྱི་ཁམས་ན་སངས་རྒྱས་དགའ་བའི་སྤྱན་སྤྲིན་ཞེས་བྱ་བར་བསྟན་ནས་ཇི་ལྟ་བ་དེ་བཞིན་དུ་
ཆོས་སྟོན་ཏོ། །ཡང་རྣམ་པར་བཀྲམ་པ་ཞེས་བྱ་བའི་འཇིག་རྟེན་གྱི་ཁམས་ན་དེ་བཞིན་གཤེགས་པ་ཡོངས་སུ་དགོངས་པའི་རྒྱལ་པོ་ཞེས་བྱ་བར་བསྟན་ནས་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་བཻ་ཌཱུརྱའི་སྙིང་པོ་ཞེས་བྱ་བའི་འཇིག་རྟེན་གྱི་ཁམས་ན་

སངས་རྒྱས་གསེར་གྱི་འོད་ཟེར་ཞེས་བྱ་བར་བསྟན་ནས་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་འོད་དམ་པ་ཞེས་བྱ་བའི་འཇིག་རྟེན་གྱི་ཁམས་ན་དེ་བཞིན་གཤེགས་པ་འོད་ཀྱི་དཔལ་ཞེས་བྱ་བར་བསྟན་ནས་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་རྣམ་པར་ཞི་བ་ཞེས་བྱ་
བའི་འཇིག་རྟེན་གྱི་ཁམས་ན་དེ་བཞིན་གཤེགས་པ་ཞི་བའི་དབང་པོ་ཞེས་བྱ་བར་བསྟན་ནས་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་སྤྲིན་རྣམ་པར་བཀོད་པ་ཞེས་བྱ་བའི་འཇིག་རྟེན་གྱི་ཁམས་ན་དེ་བཞིན་གཤེགས་པ་སྤྲིན་གྱི་དཔལ་ཞེས་བྱ་བར་བསྟན་ནས་ཡང་
དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་ཡིད་མངོན་པར་དགའ་བ་ཞེས་བྱ་བའི་ཞིང་ཁམས་ན་སངས་རྒྱས་ཡིད་དུ་འོང་བའི་དབྱངས་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་མེ་ལོང་གི་དཀྱིལ་འཁོར་ཤིན་ཏུ་སྦྱངས་པ་ཞེས་
བྱ་བ་ན་སངས་རྒྱས་མེ་ལོང་གི་འོད་སྣང་བ་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་ཟླ་བས་བརྒྱན་པ་ཞེས་བྱ་བའི་ཞིང་ཁམས་ན་སངས་རྒྱས་ཟླ་འོད་དཔལ་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་
ཉི་མའི་འོད་ཟེར་བརྒྱན་པ་ཞེས་བྱ་བའི་ཞིང་ཁམས་ན་དེ་བཞིན་གཤེགས་པ་ཉི་མའི་སྙིང་པོའི་དཔལ་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་སྤོས་དྲི་ངད་ལྡན་ཞེས་བྱ་བའི་ཞིང་ཁམས་ན་སངས་རྒྱས་སྤོས་ཀྱི་རྒྱལ་པོ་ཞེས་
བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་རྣམ་པར་སྤྲོས་པའི་རྒྱན་ཞེས་བྱ་བའི་ཞིང་ཁམས་ན་སངས་རྒྱས་མངོན་པར་སྤྲོ་བའི་རྒྱལ་པོ་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་རིན་པོ་
ཆེ་སྤྲོས་པ་ཞེས་བྱ་བའི་ཞིང་ཁམས་ན་སངས་རྒྱས་རིན་ཆེན་རྒྱལ་པོ་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་འོད་ཟེར་འབྱུང་བ་ཞེས་བྱ་བའི་ཞིང་ཁམས་ན་སངས་རྒྱས་འོད་ཟེར་དཔལ་ཞེས་བྱ་བར་བསྟན་ནས་ཡང་

དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་དཀའ་བ་རྣམ་པར་སྤྱོད་པ་ཞེས་བྱ་བའི་ཞིང་ཁམས་ན་སངས་རྒྱས་དཀའ་ཐུབ་རྒྱལ་པོ་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་གཙུག་ཏོར་བཀོད་པ་ཞེས་བྱ་
བའི་ཞིང་ཁམས་ན་སངས་རྒྱས་གཙུག་ཏོར་སྙིང་པོ་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་ངེས་པ་ཅན་ཞེས་བྱ་བའི་ཞིང་ཁམས་ན་སངས་རྒྱས་ངེས་པར་གཤེགས་པ་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་
དུ་ཆོས་སྟོན་ཏོ། །ཡང་ངེས་པར་འཕགས་པ་ཞེས་བྱ་བའི་ཞིང་ཁམས་ན་སངས་རྒྱས་ངེས་པར་གསུངས་པ་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་བདེ་སྤྱོད་ཅེས་བྱ་བའི་ཞིང་ཁམས་ན་སངས་རྒྱས་བདེ་བ་ཆེན་པོ་ཞེས་བྱ་
བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་མེ་ཏོག་བཀྲམ་པ་ཞེས་བྱ་བའི་ཞིང་ཁམས་ན་སངས་རྒྱས་མེ་ཏོག་དབང་པོའི་དབྱངས་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་ཡོངས་སུ་གྲགས་
པ་ཞེས་བྱ་བའི་ཞིང་ཁམས་ན་སངས་རྒྱས་གྲགས་པའི་དཔལ་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་རྣམ་པར་འཕྲུལ་པ་ཞེས་བྱ་བའི་ཞིང་ཁམས་ན་སངས་རྒྱས་སྤྲུལ་པའི་རྒྱལ་པོ་ཞེས་བྱ་བར་བསྟན་ནས་
ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་རྣམ་པར་སྦྱངས་པ་ཞེས་བྱ་བའི་ཞིང་ཁམས་ན་སངས་རྒྱས་སྒྲ་དབྱངས་མི་ཟད་པ་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་སྨན་གྱིས་བརྒྱན་པ་ཞེས་བྱ་བའི་ཞིང་
ཁམས་ན་སངས་རྒྱས་སྨན་གྱི་རྒྱལ་པོ་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་གསེར་གྱི་འོད་སྣང་བ་ཞེས་བྱ་བའི་ཞིང་ཁམས་ན་སངས་རྒྱས་གསེར་གྱི་འོད་འཕྲོ་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་

བཞིན་དུ་ཆོས་སྟོན་ཏོ། །ཡང་འོད་ཟེར་བཀོད་པ་ཞེས་བྱ་བའི་ཞིང་ཁམས་ན་སངས་རྒྱས་བཀོད་པའི་རྒྱལ་པོ་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་གསེར་གྱི་འབྱུང་གནས་ཞེས་བྱ་བའི་ཞིང་ཁམས་ན་སངས་རྒྱས་
གསེར་གྱི་གཟུ་བ་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་དཔལ་གྱི་འབྱུང་གནས་ཞེས་བྱ་བའི་ཞིང་ཁམས་ན་སངས་རྒྱས་དཔལ་གྱི་རྒྱལ་པོ་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་
སྣང་བ་དམ་པ་ཞེས་བྱ་བའི་ཞིང་ཁམས་ན་སངས་རྒྱས་སྣང་བ་བརྩེགས་པའི་དཔལ་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་མྱ་ངན་མེད་པ་ཞེས་བྱ་བའི་ཞིང་ཁམས་ན་སངས་རྒྱས་མྱ་ངན་མེད་པའི་དཔལ་ཞེས་བྱ་བར་བསྟན་
ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་དགའ་བའི་མདངས་ཞེས་བྱ་བའི་ཞིང་ཁམས་ན་སངས་རྒྱས་དགའ་མཆོག་དཔལ་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་གཟི་བརྗིད་འབྱུང་བ་ཞེས་བྱ་བའི་ཞིང་
ཁམས་ན་སངས་རྒྱས་གཟི་བརྗིད་དཔལ་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་སངས་རྒྱས་མང་པོ་འདུ་བ་ཞེས་བྱ་བའི་ཞིང་ཁམས་ན་སངས་རྒྱས་ཀུན་གྱི་དགེ་བའི་བཤེས་གཉེན་ཞེས་བྱ་བར་བསྟན་ནས་ཡང་དག་པ་ཇི་
ལྟ་བ་དེ་བཞིན་དུ་ཆོས་སྟོན་ཏོ། །ཡང་ཡོངས་སུ་སྦྱོང་བ་ཞེས་བྱ་བའི་ཞིང་ཁམས་ན་སངས་རྒྱས་ངན་སོང་ཐམས་ཅད་སྦྱོང་བ་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་ཐ་དད་སྤྱོད་པ་ཞེས་བྱ་བའི་ཞིང་ཁམས་ན་སངས་རྒྱས་
འཇིག་རྟེན་ཀུན་གྱི་སློབ་དཔོན་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་རྒྱལ་མཚན་གྱི་རྩེ་མོའི་དཔུང་རྒྱན་ཞེས་བྱ་བའི་ཞིང་ཁམས་ན་སངས་རྒྱས་རྣམ་པར་རྒྱལ་བ་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་

ཆོས་སྟོན་ཏོ། །ཡང་མེ་ཏོག་མཛེས་པའི་རྒྱན་ཞེས་བྱ་བའི་ཞིང་ཁམས་ན་སངས་རྒྱས་མེ་ཏོག་བཀོད་པའི་རྒྱལ་པོ་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་མཛེས་པར་སྣང་བ་ཞེས་བྱ་བའི་ཞིང་
ཁམས་ན་སངས་རྒྱས་ཐམས་ཅད་སྣང་བ་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་ཙནྡན་བཀོད་པ་ཞེས་བྱ་བའི་ཞིང་ཁམས་ན་སངས་རྒྱས་ཙནྡན་དྲི་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་
ཏོ། །ཡང་སེང་གེ་འབྱུང་གནས་ཞེས་བྱ་བའི་ཞིང་ཁམས་ན་སངས་རྒྱས་སེང་གེ་འབུམ་གཟུགས་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །ཡང་སྟོང་གསུམ་གྱི་སྟོང་ཆེན་པོའི་མི་མཇེད་ཅེས་བྱ་བ་འདི་ན་སངས་རྒྱས་ཐུབ་
པ་ཆེན་པོ་ཞེས་བྱ་བར་བསྟན་ནས་ཡང་དག་པ་ཇི་ལྟ་བ་དེ་བཞིན་དུ་ཆོས་སྟོན་ཏོ། །དེ་བཞིན་དུ་འཇིག་རྟེན་གྱི་ཁམས་བྱེ་བ་ས་ཡར་རྡོ་རྗེ་སེམས་དཔའི་མཚན་བྱེ་བ་ས་ཡར་བསྟན་ནས་ཆོས་ཡང་དག་པ་ཇི་ལྟ་བ་བཞིན་དུ་སྣང་བར་མཛད་དེ། ལ་ལར་
ནི་མངོན་པར་རྫོགས་པར་སངས་རྒྱས། །ལ་ལར་ནི་ད་དུང་དུ་ཡུམ་གྱི་ལྷུམས་ན་བཞུགས། ལ་ལར་ནི་དགའ་ལྡན་གྱི་གནས་ན་བཞུགས། །ལ་ལར་ནི་ཡོངས་སུ་མྱ་ངན་ལས་འདས་སོ། །ལ་ལར་ནི་འདའ་བའི་ཚུལ་བསྟན་ནས་འཇིག་རྟེན་གྱི་ཁམས་
གཞན་ནས་གཞན་གྱི་སྒྲོན་མར་སྣང་། ལ་ལར་ནི་འཁོར་ལོས་སྒྱུར་བའི་རྒྱལ་པོའི་ཆ་ལུགས་ཀྱིས་ཐེག་པ་ཆེན་པོའི་ཆོས་སྟོན། ལ་ལར་ནི་ཉན་ཐོས་ཀྱི་ཆ་བྱད་ཀྱིས་ཐེག་པ་ཆུང་ངུའི་ཆོས་སྟོན། ལ་ལར་ནི་རང་སངས་རྒྱས་ཀྱི་ཆ་བྱད་ཀྱི་རྫུ་འཕྲུལ་གྱིས་
ཆོས་སྟོན། ལ་ལར་ནི་སྙིང་པོ་བྱང་ཆུབ་ན་བཞུགས། ལ་ལར་ནི་སྐུལ་བའི་ས་ལ་གཞེས། ལ་ལར་ནི་ཐར་པའི་ཆ་ལུགས་ཀྱིས་སོ། །ལ་ལར་ནི་ཁྱིམ་པའི་ཆ་ལུགས་ཀྱིས་སོ། །ལ་ལར་ནི་ལྷའི་ཆ་བྱད་ཀྱིས་སོ། །ལ་ལར་ནི་ཀླུའི་ཆ་བྱད་ཀྱིས་སོ། །ལ་

ལར་ནི་ལྷ་མ་ཡིན་གྱི་ཆ་བྱད་ཀྱིས་སོ། །ལ་ལར་ནི་བདུད་ཀྱི་ཆ་བྱད་ཀྱིས་སོ། །ལ་ལར་ནི་གནོད་སྦྱིན་གྱི་ཆ་བྱད་ཀྱིས་སོ། །ལ་ལར་ནི་སྲིན་པོའི་ཆ་བྱད་ཀྱིས་སོ། །ལ་ལར་ནི་འབྱུང་པོའི་ཆ་བྱད་ཀྱིས་སོ། །ལ་ལར་ནི་ནམ་མཁའ་ལྡིང་གི་ཆ་བྱད་ཀྱིས་སོ། །
ལ་ལར་ནི་ཡ་མཚན་ཅན་གྱི་ཆ་བྱད་ཀྱིས་སོ། །ལ་ལར་ནི་བྱོལ་སོང་གི་ཆ་བྱད་ཀྱིས་སོ། །ལ་ལར་ནི་ཡི་དགས་ཀྱི་ཆ་བྱད་ཀྱིས་སོ། །ལ་ལར་ནི་བཟོད་ལྡན་གྱི་ཆ་བྱད་ཀྱིས་སོ། །ལ་ལར་ནི་ཤན་པའི་ཆ་བྱད་ཀྱིས་སོ། །ལ་ལར་ནི་སྨད་འཚོང་མའི་ཆ་བྱད་ཀྱིས་སོ། །
ལ་ལར་ནི་ན་ཆུང་གི་ཆ་བྱད་ཀྱིས་སོ། །ལ་ལར་ནི་སྐུ་གདུང་ལྟ་བུར་སྣང་ངོ་། །ལ་ལར་ནི་རིང་བསྲེལ་ལྟ་བུར་སྣང་ངོ་། །ལ་ལར་ནི་རྡོ་རྗེ་སེམས་དཔའ་ཉིད་ལྟ་བུར་སྣང་ངོ་། །ལ་ལར་ནི་རྣམ་པར་སྣང་མཛད་ལྟ་བུར་སྣང་ངོ་། །ལ་ལར་ནི་རིན་ཆེན་འབྱུང་ལྡན་ལྟ་
བུར་སྣང་ངོ་། །ལ་ལར་ནི་སྣང་བ་མཐའ་ཡས་ལྟ་བུར་སྣང་ངོ་། །ལ་ལར་ནི་དོན་ཡོད་གྲུབ་པ་ལྟ་བུར་སྣང་སྟེ། དེ་དག་ཀྱང་ཡང་དག་པར་ཇི་ལྟ་བ་བཞིན་དུ་ཆོས་སྟོན་ཏོ། །གཞན་ཡང་གཏི་མུག་གི་རྒྱལ་པོ་དགྲོལ་བར་བྱ་བའི་ཕྱིར་ཚངས་པའི་གཟུགས་ལྟ་
བུར་སྣང་ངོ་། །ཞེ་སྡང་གི་རྒྱལ་པོ་དགྲོལ་བར་བྱ་བའི་ཕྱིར་ཁྱབ་འཇུག་གི་གཟུགས་ལྟ་བུར་སྣང་ངོ་། །འདོད་ཆགས་ཀྱི་བདག་པོ་དགྲོལ་བར་བྱ་བའི་ཕྱིར་དྲག་པོའི་གཟུགས་ལྟ་བུར་སྣང་ངོ་། །ང་རྒྱལ་གྱི་བདག་པོ་དགྲོལ་བར་བྱ་བའི་ཕྱིར་ཚོགས་བདག་ལྟ་བུར་
སྣང་ངོ་། །ཕྲག་དོག་གི་བདག་པོ་དགྲོལ་བར་བྱ་བའི་ཕྱིར་དབང་པོ་ལྟ་བུར་སྣང་ངོ་། །དེ་བཞིན་དུ་སྐྱེ་བ་ཐམས་ཅད་ཀྱི་གཟུགས་སུ་སྣང་བ་ནི་འཇུག་སྲེད་དང་། །སྲེད་མེད་དང་། དབང་ཕྱུག་དང་། སྟོབས་ལྡན་དང་། ནོར་འཛིན་དང་། སྤྲེའུ་དང་། ར་དང་།
ལུ་འདེ་དང་། ཁྱི་དང་། སྦྲང་མ་དང་། བྱ་རོག་དང་། མེ་ཁྱེར་དང་། སྲོག་ཆགས་དང་། གང་ཟིན་པ་དེ་དང་དེའི་གཟུགས་སུ་སྣང་བར་མཛད་ཅིང་དེའི་ཆ་བྱད་ཀྱིས་གང་དག་ཇི་ལྟར་མོས་པ་རྣམས་ལ་དེ་བཞིན་དུ་སྣང་སྟེ། ཇི་ལྟར་ཉི་ཟླའི་དཀྱིལ་འཁོར་གྱི་གཟུགས་

བརྙན་གཞལ་མེད་ཁང་ལས་མ་གཡོས་པར་ཆུ་ཐ་དད་པའི་ནང་དུ་གཟུགས་བརྙན་ཐ་དད་པར་སྣང་བ་བཞིན་དུ་སངས་རྒྱས་རྡོ་རྗེ་སེམས་དཔའ་ཉིད་ལས་མ་གཡོས་བཞིན་དུ་ཞིང་ཁམས་དཔག་ཏུ་མེད་པར་སངས་རྒྱས་མཐའ་ཡས་པར་སྣང་ངོ་། །དེ་ལྟར་
ན་གང་མིང་སྣ་ཚོགས་སུ་བཏགས་པའི་སངས་རྒྱས་ཀྱི་ཞིང་ཁམས་མཐའ་ཡས་པ་ན་འཁོད་པའི་སེམས་ཅན་རྣམས་ཀྱིས་སངས་རྒྱས་རྡོ་རྗེ་སེམས་དཔའི་མཚན་སྣ་ཚོགས་པར་ཤེས་པ་ནི་བརྗོད་ཀྱིས་མི་ལང་བའི་བསྐལ་པར་སྨྲས་ཀྱང་ཤར་ཕྱོགས་གཅིག་པུའི་སངས་
རྒྱས་ཀྱི་ཞིང་ན་བཞུགས་པའི་མཚན་ཉིད་ཀྱི་མཐའ་ཡང་མི་དམིགས་སོ། །དེ་བཞིན་དུ་ཕྱོགས་བཅུ་ཐམས་ཅད་ཀྱི་སངས་རྒྱས་ཀྱི་ཞིང་ན་འཁོད་པའི་སེམས་ཅན་རྣམས་བརྗོད་ཀྱིས་མི་ལང་བའི་བསྐལ་པར་སྨྲས་ཀྱང་མཚན་གྱི་མཐའ་ནི་མི་རྫོགས་སོ། །ཇི་ལྟར་
སེམས་ཅན་མོས་པ་ཆུང་ངུ་རྣམས་ཀྱིས་རྡོ་རྗེ་སེམས་དཔའི་ཞིང་ཁམས་ཚད་མེད་པ་དང་མཚན་མཐའ་ཡས་པ་ཐོས་ན་བློ་ག་ཆད་པ་དང་མྱོས་པར་འགྱུར་རོ། །ཇི་ལྟར་རྡོ་རྗེ་སེམས་དཔའི་ཞིང་ཁམས་དེ་དག་ཐམས་ཅད་ན་སེམས་ཀྱི་དཀྱིལ་འཁོར་འོད་གསལ་བ་
གསང་སྔགས་ཀྱི་ངོ་བོ་དེ་ཉིད་འབའ་ཞིག་ཡང་དག་པ་ཇི་ལྟ་བ་བཞིན་དུ་རབ་ཏུ་ཕྱིན་ཅི་མ་ལོག་པར་རིམ་གྱིས་དང་། ཅིག་ཅར་བར་སྟོན་ཏོ། །དེ་ཅིའི་ཕྱིར་ཞེ་ན། རྡོ་རྗེ་སེམས་དཔའི་ཞིང་ཁམས་ན་འཁོད་པའི་སེམས་ཅན་ཆེན་པོ་དེ་དག་ནི་སེམས་ཀྱི་
རང་བཞིན་སྣ་ཚོགས་པའི་ཕྱིར། བློ་ཤིན་ཏུ་ཟབ་པ་དང་། མི་ཟབ་པ་དང་། ཡངས་པ་དང་། དོག་པ་དང་། བརྟན་པ་དང་། འགྱུར་བ་དང་། རྣོ་བ་དང་། རྟུལ་བ་དང་། མྱུར་བ་དང་། བུལ་བ་དང་། ཤས་སྟག་པས་བསྔགས་ཀྱི་ངོ་བོ་ཉིད་ཀྱི་གཏམ་རིམ་
གྱིས་པ་དང་ཅིག་ཅར་བར་ཐོས་ནས་དེ་དག་ལ་ཡང་མི་སྐྲག་མི་དབང་གི་དགའ་ཞིང་མགུ་བ་དང་། རངས་པར་འགྱུར་བའི་ཕྱིར་སྣ་ཚོགས་སུ་སྣང་བའོ། །དེ་ན་གནས་པའི་ཚེའི་ཚད་ཀྱང་ཐུང་བ་དང་། རིང་བ་དང་། དཔག་ཏུ་མེད་པ་དང་། བརྒྱ་པ་དང་བརྒྱད་ཁྲི་བཞི་

སྟོང་ཐུབ་པ་ཡིན་ནོ། །ལོངས་སྤྱོད་ནི་ཇི་ལྟར་བསམས་པ་བཞིན་དུ་འགྱུར་བ་ཡང་ཡོད། དཀའ་བས་འབྱོངས་པ་དང་མི་འབྱོངས་པ་ཡང་ཡོད། །ཀུན་ཀྱང་ལུང་བསྟན་པ་ཐོབ་པ་ཤ་སྟག་གོ། །སངས་རྒྱས་རྡོ་རྗེ་སེམས་དཔའི་མཚན་གང་གིས་ཐོས་པ་
དེས་རྒྱལ་བ་མང་པོ་ལ་སྔོན་དུ་བྱ་བ་བྱས་པ་ཡིན་ནོ། །རྡོ་རྗེ་སེམས་དཔའི་ཞིང་ཁམས་ཉིད་དུ་ངེས་པར་འབྱུང་བ་ཡིན་ནོ། །རྒྱལ་བ་རྣམས་ཀྱིས་བྱིན་གྱིས་བརླབས་པ་ཡིན་ནོ། །ཐེག་པ་ཆེན་པོར་ངེས་པར་འབྱུང་བ་དག་ཡིན་ནོ། །མངོན་པར་ཤེས་པ་
དག་དང་ལྡན་པ་ཡིན་ནོ། །སངས་རྒྱས་ཀྱི་སྲས་སུ་ངེས་པ་དག་ཡིན་ནོ། །ལྷག་མཐོང་གི་མིག་དང་ལྡན་པ་དག་ཡིན་ནོ། །ཀྱེ་ལང་ཀའི་བདག་པོ་དེའི་ཕྱིར་འཛམ་བུའི་གླིང་གཅིག་གི་སངས་རྒྱས་ཉག་གཅིག་འདི་མྱ་ངན་ལས་འདས་པ་ཡིན་ནོ། །དེ་བཞིན་དུ་རྡོ་རྗེ་
སེམས་དཔའི་སྤྲུལ་པའི་སངས་རྒྱས་མཐའ་དག་ལ་མྱ་ངན་ལས་འདས་པ་ཡང་ཡོད་མ་འདས་པ་ཡང་ཡོད་དོ་ཞེས་སྨྲས་པས་ལུས་ཀྱི་སེམས་དཔའ་དེ་ཡིད་ཡོངས་སུ་རངས་པར་གྱུར་ཏོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་རྡོ་རྗེ་སེམས་
དཔའི་ཆོ་འཕྲུལ་ཡོངས་སུ་བཀོད་པའི་ལེའུ་སྟེ་བདུན་པའོ།། །།དེ་ནས་ལང་ཀའི་བདག་པོས་དྲིས་པ། གསང་བ་པའི་བདག་པོ་རྡོ་རྗེ་སེམས་དཔའ་ཞེས་དངོས་གང་ལ་བགྱི། གསང་བ་པའི་བདག་པོས་སྨྲས་པ། ལང་ཀའི་བདག་པོ་རྡོ་རྗེ་སེམས་
དཔའ་ནི་སེམས་ཀྱི་དཀྱིལ་འཁོར་འོད་གསལ་བ་གསང་སྔགས་ཀྱི་ངོ་བོ་ཇི་བཞིན་པའི་དེ་ཁོ་ན་ལ་བྱའོ། །ལང་ཀའི་བདག་པོས་དྲིས་པ། ཀྱེ་གསང་བ་པའི་བདག་པོ་སེམས་ཀྱི་དཀྱིལ་འཁོར་ཞེས་བགྱི་བ་ནི་གང་། དེ་བཞིན་དུ་འོད་གསལ་བ་ཞེས་བྱ་བ་
དང་། གསང་སྔགས་ཀྱི་ངོ་བོ་ཞེས་བྱ་བ་དང་། ཇི་བཞིན་པའི་དེ་བཞིན་པ་དེ་ཁོ་ན་ཉིད་ཅེས་གང་ལ་བགྱི། གསང་བ་པའི་བདག་པོས་སྨྲས་པ། ལང་ཀའི་བདག་པོ་སེམས་ཞེས་བྱ་བ་ནི་མ་བྱས་མ་བཅོས་སྣ་ཚོགས་སུ་འབྱུང་བའོ། །དཀྱིལ་འཁོར་ཞེས་བྱ་

བ་ནི་ཐིག་ལེ་གང་ཡིན་པ་ཉིད་དོ། །འོད་ཅེས་བྱ་བ་ནི་སྣང་བའོ། །གསལ་བ་ཞེས་བྱ་བ་ནི་གང་མི་ཤེས་པ་ལས་གཞན་གང་གིས་ཀྱང་མ་བསྒྲིབས་པའོ། །གསང་བ་ཞེས་བྱ་བ་ནི་སྨྲར་བྱེད་པ་སྤྱོད་ཡུལ་དུ་མ་གྱུར་པ་ལ་བྱའོ། །སྔགས་
ཞེས་བྱ་བ་ནི་ཡོན་ཏན་གྱི་འབྱུང་གནས་སུ་བརྗོད་པ་ལ་བྱའོ། །ངོ་བོ་ཉིད་ཅེས་བྱ་བ་ནི་དངོས་པོ་མེད་པ་མི་དམིགས་པ་ཀུན་འབྱུང་བའི་གཞི་ལ་བྱའོ། །ཇི་བཞིན་པ་ཞེས་བྱ་བ་ནི་མ་བཅོས་མ་བསླད་པ་ལ་བྱའོ། །དེ་བཞིན་པ་ཞེས་བྱ་བ་ནི་མ་བྱས་མ་བཏགས་
པ་ལ་བྱའོ། །དེ་ཁོ་ན་ཉིད་ཅེས་བྱ་བ་ནི་མ་ནོར་མི་འགྱུར་བ་ལ་བྱའོ། །ཡང་ལང་ཀའི་བདག་པོས་དྲིས་པ། གསང་བ་བའི་བདག་པོ་མ་བྱས་མ་བཅོས་པ་ཞེས་བྱ་བ་ནི་གང་། སྣ་ཚོགས་འབྱུང་བ་ཞེས་བྱ་བ་ནི་ཇི་ལྟ་བུ་གསང་བ་པའི་བདག་པོས་སྨྲས་པ། ལང་
ཀའི་བདག་པོ་བྱེད་པ་པོ་མེད་ལ་བྱ་བས་བཙལ་དུ་མེད་པའི་ཕྱིར་མ་བྱས་པའོ། །གཞི་ཇི་བཞིན་པའི་ཕྱིར་མ་བཅོས་པའོ། །གང་མེད་པ་ལས་རྒྱུན་དུ་འབྱུང་ཞིང་ཡུལ་ཐ་དད་ལ་འགྲོ་བ་ལེགས་པ་དང་། ཉེས་པ་དང་། གཉིས་ཀ་མ་ཡིན་པ་སྣ་ཚོགས་འབྱུང་བ་
སྟེ་གང་དེ་ཉིད་ནི་ནམ་མཁའ་ལྟ་བུའོ། །དེ་རྒྱུན་ནི་འབྱུང་བ་སྟེ། སྤྲིན་དང་ཁུག་རླངས་དང་འཇའ་རླན་ལ་སོགས་པ་ལྟ་བུའོ། །ཡང་དྲིས་པ་གསང་བ་པའི་བདག་པོ་དེ་ལ་ཅིའི་ཕྱིར་རྡོ་རྗེ་སེམས་དཔའ་ཞེས་བགྱི། སྨྲས་པ་ལང་ཀའི་བདག་པོ་དེ་ཁོ་ན་ཉིད་ཇི་
བཞིན་པ་དེ་ནི་ཐམས་ཅད་ནས་ཐམས་ཅད་དུ་གཉེན་པོ་མེད་པ། འཕོ་འགྱུར་མེད་པ། སྐྱེ་འགག་མེད་པ། དེ་ཁོ་ན་ཉིད་སེམས་རང་རིག་པ། དགོངས་པ་ངེས་པར་འགྲེལ་པ་ལས་ཆོ་འཕྲུལ་སྣ་ཚོགས་འབྱུང་བའི་དངོས་པོ་མེད་པ་ཉིད་དུ་བཅོམ་པའི་ཕྱིར་རྡོ་རྗེ་
སེམས་དཔའ་ཞེས་བྱའོ། །ལང་ཀའི་བདག་པོ་དེ་ལ་ནི་བླ་ན་མེད་པའི་བྱང་ཆུབ་ཀྱི་སེམས་ཞེས་ཀྱང་བྱའོ། །ཆོས་རྣམས་ཀྱི་ཆོས་ཉིད་དེ་བཞིན་ཉིད་ཅེས་ཀྱང་བྱའོ། །སེམས་ཀྱི་སྟོང་པ་ཉིད་ཅེས་ཀྱང་བྱའོ། །མཐའ་ལས་འདས་པ་ཞེས་ཀྱང་བྱའོ། །དབུ་མར་མི་

དམིགས་པ་ཞེས་ཀྱང་བྱའོ། །སངས་རྒྱས་ཀུན་གྱི་དངོས་གཞི་ཞེས་ཀྱང་བྱའོ། །སྤྲུལ་པ་ཀུན་གྱི་འབྱུང་གནས་ཞེས་ཀྱང་བྱའོ། །སངས་རྒྱས་ཀུན་གྱི་དགེ་བའི་བཤེས་གཉེན་ཞེས་ཀྱང་བྱའོ། །ཞིང་ཁམས་ཀུན་གྱི་སྒྲོན་མ་ཞེས་ཀྱང་བྱའོ། །ཐུགས་རྗེ་ཐབས་ཀྱི་
འབྱུང་གནས་ཞེས་ཀྱང་བྱའོ། །ཆོས་ཐམས་ཅད་ཀྱི་གཟུགས་བརྙན་སྣང་བ་ཞེས་ཀྱང་བྱའོ། །ལང་ཀའི་བདག་པོ་དེ་དག་ཀྱང་གང་གི་དོན་དུ་དེ་ལྟར་བཏགས་ཀྱི་དེ་ཁོ་ན་ཉིད་ལ་ནི་མིང་དུ་བཏགས་པ་མེད་དེ། དེ་དག་ནི་བླ་དགས་ཉིད་དུ་རིག་པར་བྱའོ། །ལང་ཀའི་
བདག་པོ་དེའི་ཕྱིར་ན་སངས་རྒྱས་ནི་བླ་དགས་སོ། །ཆོས་ཀྱང་བླ་དགས་སོ། །བྱང་ཆུབ་ཀྱང་བླ་དགས་སོ། །དེ་བཞིན་དུ་དབྱིངས་དང་ཡེ་ཤེས་དང་ཆོས་ཀྱི་སྐུ་དང་། སྐུ་ཐ་དད་པ་དང་། སེམས་ཅན་དང་། འཇིག་རྟེན་ལ་སོགས་པ་ཐམས་ཅད་དུ་བཏགས་ཤིང་
ཆགས་པ་ཇི་སྙེད་པ་དག་བླ་དགས་འབའ་ཞིག་ཏུ་རིག་པར་བྱའོ། །ལང་ཀའི་བདག་པོ་བླ་དགས་གང་ཡིན་པ་ནི་གློ་བུར་དུ་བཏགས་པ་སྟེ་ཡེ་ནས་ལྡན་པ་ནི་མ་ཡིན་ནོ། །ལང་ཀའི་བདག་པོ་གལ་ཏེ་ཡེ་ནས་ལྡན་པ་ཞིག་ཡིན་ནི། གང་གློ་བུར་པ་ཐམས་ཅད་
མི་འབྱུང་བར་འགྱུར་རོ། །ལང་ཀའི་བདག་པོ་གློ་བུར་ནི་སྤྲིན་བཞིན་ཏེ་ཐེར་ཟུག་པ་མ་ཡིན། ཡེ་ནས་ལྡན་པ་མ་ཡིན། བརྟག་བཟོད་པ་མ་ཡིན་ནོ། །ལང་ཀའི་བདག་པོ་དེའི་ཕྱིར་མིང་དང་། བརྡ་དང་ཐ་སྙད་དང་མཚན་མ་དང་། བཏགས་པ་དང་། ལས་
དང་ལས་ཀྱི་རྣམ་པར་སྨིན་པ་ཐམས་ཅད་ནི་གློ་བུར་པ་སྟེ་འབྱུང་བ་དང་། སངས་པ་དང་། སྒྲིབ་པ་དང་། དང་བར་རིག་པར་བྱའོ། །ལང་ཀའི་བདག་པོ་གལ་ཏེ་ལས་དང་ལས་ཀྱི་རྣམ་པར་སྨིན་པ་ལ་སོགས་པ་གློ་བུར་དུ་མ་བཏགས་ན་ནི་དེ་བཞིན་ཉིད་ཅེས་བྱ་བ་དེ་
དེ་ལྟར་མི་རུང་བ་ཞིག་ན་ལང་ཀའི་བདག་པོ་དེ་བཞིན་ཉིད་དེ་ནི་གང་གི་དབང་དུ་མི་འགྱུར་བའི་བླ་དགས་སུ་རིག་པར་བྱའོ། །ལང་ཀའི་བདག་པོ་དེའི་ཕྱིར་ཆོས་ཐམས་ཅད་མིང་མེད། ཚིག་མེད། བརྗོད་དུ་མེད། ཚིག་གི་ལམ་ཆད་པའོ། །སྨྲས་པ། གསང་བ་པའི་

བདག་པོ་གང་མིང་དུ་བཏགས་པའི་གཞིལ་གཞིའི་དོན་ཙམ་དུ་ཡང་མི་རྟོག་གམ། སྨྲས་པ། ལང་ཀའི་བདག་པོ་གཞིའི་དོན་ཙམ་དུ་ཡང་མི་རྟོག །རྣམ་པར་མི་རྟོག་གོ། །དེ་ཅིའི་ཕྱིར་ཞེ་ན། གཞིའི་དོན་ཙམ་ཞིག་ནི་འདི་ཞེས་
སངས་རྒྱས་ཉིད་ཀྱིས་བཙལ་ཀྱང་མི་བརྙེས་སོ། །དེ་བས་ན་གློ་བུར་གྱི་རྟོག་པ་དང་། མི་རྟོག་པ་ལ་སངས་རྒྱས་དང་། སེམས་ཅན་ཞེས་བཏགས་པར་ཟད་ཀྱི་དེ་བཞིན་ཉིད་དེ་ལ་ནི་སངས་རྒྱས་སེམས་ཅན་དུ་ཅུང་ཟད་ཀྱང་མེད་དེ། འོན་ཀྱང་བྱིས་པ་རྣམས་
ནི་གློ་བུར་དག་གི་སྤྲིན་གྱིས་བསྒྲིབས་པས་གློ་བུར་གྱི་ཆོས་དག་ཆེད་དུ་བྱེད་ཅིང་འཁོར་བ་དང་བྱང་ཆུབ་གཉིས་སུ་རྟོག་པར་བྱེད་དོ། །སེམས་ཅན་དང་སངས་རྒྱས་གཉིས་སུ་རྟོག་པར་བྱེད་དོ། །སྨྲས་པ། གསང་བ་པའི་བདག་པོ་འོ་ན་སེམས་ཅན་དང་སངས་
རྒྱས་འདི་གཉིས་ཇི་ལྟར་ཤེས་པར་བྱ། སྨྲས་པ། ལང་ཀའི་བདག་པོ་སྟོང་པ་ཉིད་དུ་ཤེས་པར་བྱའོ། །སྨྲས་པ། གསང་བ་པའི་བདག་པོ་སྟོང་པ་ཉིད་ཅི་ལ་གནས། སྨྲས་པ། ལང་ཀའི་བདག་པོ་སྟོང་པ་ཉིད་ནི་ཆོས་ཐམས་ཅད་ལ་གནས་སོ། །སྨྲས་པ། གསང་
བ་པའི་བདག་པོ་ཆོས་ཐམས་ཅད་ཅི་ལ་གནས། སྨྲས་པ། ལང་ཀའི་བདག་པོ་ཆོས་ཐམས་ཅད་སྟོང་པ་ཉིད་ཁོ་ནའི་ཕྱིར་ཅི་ལ་ཡང་མི་གནས་སོ། །སྨྲས་པ། གསང་བ་པའི་བདག་པོ་སྟོང་པ་ཉིད་ལ་གནས་པ་ཅི་ལ་གནས་པ་ལགས། སྨྲས་པ། ལང་ཀའི་བདག་པོ་
སྟོང་པ་ཉིད་ལ་གནས་པ་ནི་བྱམས་པ་ཆེན་པོ་ལ་གནས་པ་སྟེ་གང་སྟོང་པ་ཉིད་དེས་སེམས་ཅན་གྱི་དོན་ཡོངས་སུ་རྫོགས་པར་གནས་པའོ། །དེ་ཅིའི་ཕྱིར་ཞེ་ན། སངས་རྒྱས་དང་སེམས་ཅན་ལ་སྟོང་པ་ཉིད་ལས་དོན་ཅི་ཡང་མེད་པའི་ཕྱིར་རོ། །སྨྲས་པ།
གསང་བ་པའི་བདག་པོ་སངས་རྒྱས་དང་སེམས་ཅན་ཀུན་སྟོང་ན་གང་གི་ཐུགས་རྗེ་ཆེན་པོས་གང་ལ་ཇི་ལྟར་མཛད། ཐུགས་རྗེ་ཆེན་པོ་དེ་གང་གི་ཚིག་བླ་དགས་ལགས། སྨྲས་པ། ལང་ཀའི་བདག་པོ་ཆོས་ཐམས་ཅད་སྟོང་པ་ཉིད་ལ་རང་བཞིན་གྱིས་གནས་པས་

ན་གཉིས་སུ་མ་མཐོང་བས་སྙིང་རྗེའི་ཡུལ་མེད་པ་ནི་ཐམས་ཅད་ཀྱི་སྙིང་པོ་བྱང་ཆུབ་ཏུ་ཡོ་བསྒྲལ་བའི་ཕྱིར་སྙིང་རྗེ་ཆེན་པོ་ཡིན་ལ། བྱིས་པའི་སྙིང་རྗེ་དག་གིས་སྟོང་གསུམ་གྱི་སྟོང་ཆེན་པོའི་སེམས་ཅན་སྲོག་བཏོན་པ་དང་གང་ཐར་བར་བཏོན་པ་དེ་ནི་སྙིང་རྗེ་ཆུང་
ངུར་རིག་པར་བྱའོ། །ལང་ཀའི་བདག་པོ་དེ་བས་ན་སྙིང་རྗེ་ཆེན་པོ་ལ་རྒྱུན་དུ་གནས་པས་གནས་པར་བྱའོ། །ལང་ཀའི་བདག་པོ་གང་སྙིང་རྗེ་ཆེན་པོ་ལ་གནས་པ་དག་ནི་སེམས་ཅན་འགའ་ཡང་གྲོལ་བར་མི་བྱེད་འཆིང་བར་ཡང་མི་བྱེད་དེ། རྡོ་རྗེ་མཚོན་གྱིས་
དངོས་སུ་བསད་པ་མེད་པར་བསད་པ་ཁོ་ནའོ། །དེ་ཅིའི་ཕྱིར་ཞེ་ན། སེམས་ཅན་མེད་པ་ལས་སེམས་ཅན་དུ་བཏགས་པའི་ཕྱིར་རོ། །སྙིང་རྗེ་ཆེན་པོ་དེ་ནི་དེ་བཞིན་ཉིད་དང་གློ་བུར་གཉིས་ཀྱི་ཁྱད་པར་གྱི་ཚིག་བླ་དགས་སུ་རིག་པར་བྱའོ། །ལང་ཀའི་བདག་པོ་དེ་ལྟ་
བས་ན་འདི་ལྟ་སྟེ། མཐའ་ཡས་མིང་དུ་བཏགས་པ་ཡི། །ཡོད་མཐོང་སྣང་གྲགས་ཆོས་རྣམས་ཀུན། །བླ་དགས་ཙམ་དུ་བཏགས་པར་ཟད། །དེ་ལ་དངོས་གཞི་ག་ལ་ཡོད། །གང་ལ་མིང་དུ་བཏགས་པའི་གཞི། །མེད་རྒྱུ་བཏགས་ཆགས་བསྒྲུབས་འགྲུབ་ཅིང་། །
གང་དུ་བལྟས་པར་སྣང་བ་ཡིན། །དེས་ན་བྱ་མེད་བྱས་པ་ཟིན། །མི་སྣང་བ་ལས་ཀུན་སྣང་བ། །ཐམས་ཅད་ཐམས་ཅད་གློ་བུར་སྣང་། །སྣང་ཉིད་མེད་པའི་སྙིང་པོ་སྟེ། །ཡོད་མེད་གཉིས་སུའང་དམིགས་པ་མེད། །སངས་རྒྱས་མེད་ལས་སངས་རྒྱས་དང་། །བྱང་
ཆུབ་ཆོས་ཉིད་ལ་སོགས་པའི། །ཐ་དད་མིང་གི་བླ་དགས་རྣམས། །མི་ཤེས་རྨོངས་ལ་བསྟན་ཕྱིར་བཏགས། །དེ་ཉིད་ལ་ནི་སངས་རྒྱས་དང་། །བྱང་ཆུབ་ཆོས་ཉིད་ལ་སོགས་པའི། །ཐ་སྙད་མིང་གི་བླ་དགས་རྣམས། །མིང་མེད་ཚིག་ཏུ་བརྗོད་པ་མེད། །ཆོས་
ཉིད་ནམ་མཁའི་དཀྱིལ་ཡངས་ནས། །ཡེ་ཤེས་ཉི་མའི་སྐུ་གསལ་བས། །ཐུགས་རྗེ་སྒྲོན་མའི་འོད་ཟེར་གྱིས། །གཏི་མུག་མུན་བསལ་རྣམ་པར་སྣང་། །ཞེས་སྨྲས་པས། ལང་ཀའི་བདག་པོ་ལ་སོགས་པ་འགྲོ་བ་ལུས་ཀྱི་སེམས་དཔའ་རྣམས་གཞན་ལ་རེ་རྩོལ་

མེད་པར་དབུགས་ཕྱིན་པར་འགྱུར་ཏོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་གསང་སྔགས་རང་གི་ངོ་བོ་བསྟན་པའི་ལེའུ་སྟེ་བརྒྱད་པའོ།། །།ཐེག་པ་ཆེན་པོ་ངེས་པར་འབྱུང་བའི་ཚུལ་ལས་སྒྲོན་མ་ཡོངས་སུ་བཀོད་
པའི་གཏམ་རྒྱུད་བརྗོད་པ་ཆོས་ཀྱི་ཕྱག་རྒྱའི་ཡེ་ཤེས་རྣམ་པར་བགྲོས་པ་སྟེ་བྱུང་ཚུལ་བསྟན་པ་གཉིས་པའོ།། །།བམ་པོ་གཉིས་པར་ཟུག་པ། དེ་ནས་ལང་ཀའི་བདག་པོས་ཡང་གསང་བ་པའི་བདག་པོ་ལ་སྔོན་བྱུང་བའི་ཚིག་བཅུ་གཉིས་པའི་གསུམ་པའི་གང་
གིས་ངེས་པ་རྙེད་པ་ན་ཡང་བྱུང་ཞེས་བསྟན་པ་དྲིས་པ། ཀྱེ་གསང་བ་པའི་བདག་པོ་ཉིད་ཀྱིས་ཐེག་པ་ཆེན་པོ་གསང་བ་དམ་པ་བྱུང་བའི་ཚུལ་སྟོན་པས་ལུང་བསྟན་པ་གཏམ་དུ་བརྗོད་པའི་སྐབས་སུ་གང་གིས་ངེས་པ་རྙེད་པ་ན་ཡང་བྱུང་ཞེས་བཀོད་པ་དེ་ཇི་ལྟ་བ་ཞིག་
ཏུ་རྙེད་དེ་གྲགས་པ་ལགས། སྨྲས་པ། ལང་ཀའི་བདག་པོ་གང་གིས་གསང་སྔགས་ཀྱི་ངོ་བོ་རྡོ་རྗེ་སེམས་དཔའ་དེ་ཁོ་ན་ཉིད་ཀྱི་ངེས་པ་ཕྱིན་ཅི་མ་ལོག་པ་རྙེད་པ་དེ་ཁོ་ན་ཉིད་ལ་བྱའོ། །སྨྲས་པ། གསང་བ་པའི་བདག་པོ་གསང་སྔགས་ཀྱི་ངོ་བོ་རྡོ་རྗེ་སེམས་
དཔའ་དེ་གང་ནས་བྱུང་། གང་ན་གནས། གང་དུ་སྣང་། ཇི་ལྟར་བྱུང་དེ་སྐད་ཅེས་དྲིས་པ་ལས། གསང་བ་པའི་བདག་པོས་སྨྲས་པ། ཀྱེ་ལང་ཀའི་བདག་པོ་གསང་སྔགས་ཀྱི་ངོ་བོ་ཉིད་རྡོ་རྗེ་སེམས་དཔའ་དེ་ནི་འཁོར་བ་དང་བཅས་མྱ་ངན་ལས་འདས་པ་
གཉིས་ཀྱི་ཁམས་ནས་བྱུང་ངོ་། །སངས་རྒྱས་ཀུན་གྱི་ཐུགས་དང་སེམས་ཅན་ཀུན་གྱི་སེམས་ལ་གནས་སོ། །ཞིང་ཁམས་མཐའ་ཡས་པར་སྣང་ངོ་། །ཡེ་ཇི་བཞིན་པ་དང་། རྒྱུད་དག་པར་རང་བྱུང་ངོ་། །ཡང་ལང་ཀའི་བདག་པོས་དྲིས་པ། གསང་
བ་པའི་བདག་པོ་རྡོ་རྗེ་སེམས་དཔའ་ཉིད་དུ་ངེས་པ་གང་ལ་གཞག་པར་བགྱི། གསང་བ་པའི་བདག་པོས་སྨྲས་པ། ལང་ཀའི་བདག་པོ་རྡོ་རྗེ་སེམས་དཔའ་ནི་གཅིག་དང་ཐ་དད་པའི་ངོ་བོ་ཉིད་ལས་གྲོལ་ཏེ་ཆོས་རྣམས་ཀྱི་ཆོས་ཉིད་མ་བཅོས་མ་བསླད་པ།

སྙིང་པོ་བྱང་ཆུབ་ཏུ་ཡེ་ནས་གནས་པ་དེ་ལ་ཡེ་ཇི་བཞིན་པའི་རྡོ་རྗེ་སེམས་དཔའ་ཞེས་གདགས་སོ། །སེམས་ཅན་ཀུན་གྱི་སེམས་ཀྱི་ཆོས་ཉིད་གང་མཐོང་བའི་གནས་སྐབས་ལ་ནི་རྒྱུད་དག་པའི་རྡོ་རྗེ་སེམས་དཔའ་ཞེས་གདགས་སོ། །དེ་བཞིན་དུ་སངས་རྒྱས་
ཐམས་ཅད་ཀྱང་ཡེ་ཇི་བཞིན་པ་དང་། རྒྱུད་དག་པའི་སངས་རྒྱས་སུ་རྣམ་པར་སྣང་ངོ་། །དེ་བས་ན་རྡོ་རྗེ་སེམས་དཔའི་ངེས་པ་ནི་ཐམས་ཅད་ཀྱི་ཡེ་ཇི་བཞིན་པའི་དེ་ཁོ་ན་ཉིད་ལ་གཞག་པར་བྱའོ། །ཡང་ལང་ཀའི་བདག་པོས་དྲིས་པ། གསང་བའི་བདག་པོ་
སེམས་ཅན་ཀུན་གྱི་སེམས་ཀྱི་ཆོས་ཉིད་དེ་གང་ལགས། །གང་ཞིག་མཐོང་ན་དེ་མཐོང་བ་ལགས། དེ་སྐད་ཅེས་དྲིས་པ་ལས། གསང་བ་པའི་བདག་པོས་སྨྲས་པ། ལང་ཀའི་བདག་པོ་སེམས་ཅན་ཀུན་གྱི་ཇི་ལྟ་བ་དེ་མཐོང་ན་མཐོང་བ་ཡིན་ནོ། །སེམས་
ཅན་ཀུན་གྱི་ཇི་ལྟ་བ་དེ་ནི་བླ་ན་མེད་པའི་བྱང་ཆུབ་ཡིན་ནོ། །དེ་ལ་ནི་ཆོས་རྡུལ་ཙམ་ཡང་མི་དམིགས་སོ། །དེ་ནི་ནམ་མཁའི་མཚན་ཉིད་དེ། དེ་ལ་ནི་བྱང་ཆུབ་པ་ཡང་མེད་ལ་བྱང་ཆུབ་པར་བྱ་བའང་མེད་དོ། །དེ་ལ་ནི་སེམས་ཅན་ཡང་མེད་ལ་
སེམས་ཅན་དུ་གདགས་པ་ཡང་མེད་དོ། །ཆོས་ཅན་ཡང་མེད་ལ་ཆོས་ཅན་དུ་གདགས་པ་ཡང་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་བྱང་ཆུབ་ཀྱི་མཚན་ཉིད་ཡིན་ལ་བྱང་ཆུབ་ནི་ནམ་མཁའི་མཚན་ཉིད་དེ། ནམ་མཁའི་ནི་མཚན་ཉིད་
ཐམས་ཅད་དང་བྲལ་བའོ། །དེའི་ཕྱིར་བྱང་ཆུབ་ནི་སེམས་ལས་བཙལ་བར་བྱའོ། །སེམས་དེ་ནི་རང་བཞིན་གྱིས་ཡོངས་སུ་དག་པའི་ཕྱིར་ནང་ན་ཡང་མེད། ཕྱི་རོལ་ན་ཡང་མེད་གཉིས་ཀར་ཡང་མི་དམིགས་སོ། །སེམས་དེ་ནི་སངས་རྒྱས་ཀྱིས་ཀྱང་
མ་གཟིགས། མི་གཟིགས། གཟིགས་པར་མི་འགྱུར་རོ། །དེ་ཇི་ལྟར་མ་གཟིགས་ན་ཁ་དོག་ཏུ་མ་གཟིགས་སོ། །དབྱིབས་སུ་མ་གཟིགས་སོ། །མུན་པར་མ་གཟིགས་སོ། །སྣང་བར་མ་གཟིགས་སོ། །ཕོ་མོར་མ་གཟིགས་སོ། །མ་ནིང་དུ་མ་

གཟིགས་སོ། ཁམས་གསུམ་གྱི་རང་བཞིན་དུ་མ་གཟིགས་སོ། །ལྷའི་སེམས་སུ་མ་གཟིགས་སོ། །ཀླུའི་སེམས་སུ་མ་གཟིགས་སོ། །དེ་བཞིན་དུ་གནོད་སྦྱིན་གྱི་སེམས་དང་། དྲི་ཟའི་སེམས་དང་ལྷ་མ་ཡིན་དང་ནམ་མཁའ་ལྡིང་དང་།
མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དང་། བྱོལ་སོང་དང་། ཡི་དགས་དང་། དམྱལ་བ་ལ་སོགས་པ་འགྲོ་བ་རིས་ཐ་དད་པའི་སེམས་སུ་མ་གཟིགས་སོ། །རྟོག་པ་དང་རྣམ་པར་རྟོག་པ་ཐམས་ཅད་དང་བྲལ་བའོ། །དེ་ཅིའི་ཕྱིར་
ཞེ་ན། སེམས་ཀྱི་རང་བཞིན་གང་ཡིན་པ་དེ་ནི་རྡོ་རྗེ་སེམས་དཔའི་རང་འབྱུང་གི་ཡེ་ཤེས་ཡིན་ལ་ཡེ་ཤེས་དེ་ནི་ནམ་མཁའི་རང་བཞིན་ཏེ་རང་བཞིན་མེད་པའི་ཕྱིར་རོ། །ཡང་ལང་ཀའི་བདག་པོས་དྲིས་པ། ཀྱེ་གསང་བ་པའི་བདག་པོ་སེམས་ཅན་གྱི་སེམས་
དེ་ཅིའི་ཕྱིར་རྡོ་རྗེ་སེམས་དཔའི་རང་འབྱུང་གི་ཡེ་ཤེས་ཡིན། གསང་བ་པའི་བདག་པོས་སྨྲས་པ། ལང་ཀའི་བདག་པོ་སེམས་ཅན་གྱི་དེ་བཞིན་ཉིད་གང་ཡིན་པ་དང་། རྡོ་རྗེ་སེམས་དཔའི་དེ་བཞིན་ཉིད་གང་ཡིན་པ་འདི་ལ་གཉིས་སུ་མེད་ཅིང་གཉིས་སུ་བྱར་མེད་
དོ། །དེ་ཇི་ལྟ་ཞེ་ན་འདི་ལྟ་སྟེ། གང་ཆགས་པའི་སེམས་ཀྱི་དེ་བཞིན་ཉིད་གང་ཡིན་པ་དེ་ནི་རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་གང་ཡིན་པ་དེ་ནི་དེ་ཁོ་ན་ཉིད་དོ། །གང་ཆགས་པ་མེད་པའི་སེམས་ཀྱི་དེ་བཞིན་ཉིད་ནི་རྡོ་རྗེ་
སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་ཞེ་སྡང་གི་སེམས་ཀྱི་དེ་ཁོ་ན་ཉིད་ནི་རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་བྱམས་པའི་སེམས་ཀྱི་དེ་བཞིན་
ཉིད་ནི་རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་གཏི་མུག་གི་སེམས་ཀྱི་དེ་བཞིན་ཉིད་ནི་རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་ཤེས་རབ་

ཆེན་པོའི་དེ་བཞིན་ཉིད་ནི་རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་ཐེ་ཚོམ་གྱི་སེམས་ཀྱི་དེ་བཞིན་ཉིད་ནི་རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་
ངེས་པའི་སེམས་ཀྱི་དེ་བཞིན་ཉིད་ནི་རྡོ་རྗེ་སེམས་དཔའི་དེ་བཞིན་ཉིད་དེ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་མུན་པའི་སེམས་ཀྱི་དེ་བཞིན་ཉིད་ནི་རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་
ཉིད་དོ། །གང་སྣང་བའི་སེམས་ཀྱི་དེ་བཞིན་ཉིད་ནི་རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་ང་རྒྱལ་གྱི་སེམས་ཀྱི་དེ་བཞིན་ཉིད་ནི་རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་
བཞིན་ཉིད་ནི་དེ་ཁོ་ན་ཉིད་དོ། །གང་ཕྲག་དོག་གི་སེམས་ཀྱི་དེ་བཞིན་ཉིད་ནི་རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །གང་བསྡུ་བའི་སེམས་ཀྱི་དེ་བཞིན་ཉིད་ནི་རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་
རྗེ་སེམས་དཔའི་དེ་བཞིན་ཉིད་ནི་དེ་ཁོ་ན་ཉིད་དོ། །དེ་བཞིན་དུ་སྤྲོ་བའི་སེམས་ཀྱི་དེ་ཁོ་ན་ཉིད་དང་། འབྱེད་པའི་སེམས་ཀྱི་དེ་ཁོ་ན་ཉིད་དང་། འཁྲུག་པའི་སེམས་ཀྱི་དེ་ཁོ་ན་ཉིད་དང་། ཞི་བའི་སེམས་ཀྱི་དེ་ཁོ་ན་ཉིད་དང་། འཐབ་པའི་སེམས་ཀྱི་དེ་ཁོ་
ན་ཉིད་དང་། འཇར་བའི་སེམས་ཀྱི་དེ་ཁོ་ན་ཉིད་དང་། རྩོད་པའི་སེམས་ཀྱི་དེ་ཁོ་ན་ཉིད་དང་། མཐུན་པའི་སེམས་ཀྱི་དེ་ཁོ་ན་ཉིད་དང་། བརྗོད་པའི་སེམས་ཀྱི་དེ་ཁོ་ན་ཉིད་དང་། བརྗོད་པ་མེད་པའི་སེམས་ཀྱི་དེ་ཁོ་ན་ཉིད་དང་། ལྷའི་སེམས་ཀྱི་དེ་ཁོ་ན་
ཉིད་དང་། ཀླུའི་སེམས་ཀྱི་དེ་ཁོ་ན་ཉིད་དང་། བདུད་ཀྱི་སེམས་ཀྱི་དེ་ཁོ་ན་ཉིད་དང་། ལྷ་མ་ཡིན་གྱི་སེམས་ཀྱི་དེ་ཁོ་ན་ཉིད་དང་། གནོད་སྦྱིན་གྱི་སེམས་ཀྱི་དེ་ཁོ་ན་ཉིད་དང་། མིའི་སེམས་ཀྱི་དེ་ཁོ་ན་ཉིད་དང་། ལྟོ་འཕྱེའི་སེམས་ཀྱི་དེ་ཁོ་ན་ཉིད་དང་།

འབྱུང་པོའི་སེམས་ཀྱི་དེ་ཁོ་ན་ཉིད་དང་། ནམ་མཁའ་ལྡིང་གི་སེམས་ཀྱི་དེ་ཁོ་ན་ཉིད་དང་། དྲི་ཟའི་སེམས་ཀྱི་དེ་ཁོ་ན་ཉིད་དང་། གྲུལ་བུམ་གྱི་སེམས་ཀྱི་དེ་ཁོ་ན་ཉིད་དང་། སྐྱེས་པའི་སེམས་ཀྱི་དེ་ཁོ་ན་ཉིད་དང་། བུད་མེད་ཀྱི་སེམས་ཀྱི་དེ་
ཁོ་ན་ཉིད་དང་། མ་ནིང་གི་སེམས་ཀྱི་དེ་ཁོ་ན་ཉིད་དང་། བདག་གི་སེམས་ཀྱི་དེ་ཁོ་ན་ཉིད་དང་། གཞན་གྱི་སེམས་ཀྱི་དེ་ཁོ་ན་ཉིད་དང་། ཕའི་སེམས་ཀྱི་དེ་ཁོ་ན་ཉིད་དང་། མའི་སེམས་ཀྱི་དེ་ཁོ་ན་ཉིད་དང་། བུའི་སེམས་ཀྱི་དེ་ཁོ་ན་ཉིད་དང་། ཕུ་
ནུའི་སེམས་ཀྱི་དེ་ཁོ་ན་ཉིད་དང་། དགྲ་བོའི་སེམས་ཀྱི་དེ་ཁོ་ན་ཉིད་དང་། དབང་ཕྱུག་གི་སེམས་ཀྱི་དེ་ཁོ་ན་ཉིད་དང་། ཚངས་པའི་སེམས་ཀྱི་དེ་ཁོ་ན་ཉིད་དང་། གཏོགས་འདོད་ཀྱི་སེམས་ཀྱི་དེ་ཁོ་ན་ཉིད་དང་། དབང་པོའི་སེམས་ཀྱི་དེ་ཁོ་ན་ཉིད་དང་།
ཚོགས་བདག་གི་སེམས་ཀྱི་དེ་ཁོ་ན་ཉིད་དང་། ཀུན་དུ་རྒྱུ་བའི་སེམས་ཀྱི་དེ་ཁོ་ན་ཉིད་དང་། ཚོང་པའི་སེམས་ཀྱི་དེ་ཁོ་ན་ཉིད་དང་། ཞིང་པའི་སེམས་ཀྱི་དེ་ཁོ་ན་ཉིད་དང་། ཆུ་བོ་ལྟ་བུའི་སེམས་ཀྱི་དེ་ཁོ་ན་ཉིད་དང་། ལྟེང་ཀ་ལྟ་བུའི་སེམས་ཀྱི་དེ་ཁོ་ན་
ཉིད་དང་། ཁྲོན་པ་ལྟ་བུའི་སེམས་ཀྱི་དེ་ཁོ་ན་ཉིད་དང་། བཀོད་པ་ལྟ་བུའི་སེམས་ཀྱི་དེ་ཁོ་ན་ཉིད་དང་། འཁོར་ལོ་ལྟ་བུའི་སེམས་ཀྱི་དེ་ཁོ་ན་ཉིད་དང་། ཟོ་ཆུ་ལྟ་བུའི་སེམས་ཀྱི་དེ་ཁོ་ན་ཉིད་དང་། བསྐོལ་ཆུ་ལྟ་བུའི་སེམས་ཀྱི་དེ་ཁོ་ན་ཉིད་དང་། གསེར་
ཆུ་ལྟ་བུའི་སེམས་ཀྱི་དེ་ཁོ་ན་ཉིད་དང་། ཀུན་དུ་བསྲུང་བའི་སེམས་ཀྱི་དེ་ཁོ་ན་ཉིད་དང་། སེར་སྣ་ལྟ་བུའི་སེམས་ཀྱི་དེ་ཁོ་ན་ཉིད་དང་། གཏོང་བ་ལྟ་བུའི་སེམས་ཀྱི་དེ་ཁོ་ན་ཉིད་དང་། བྱི་ལ་ལྟ་བུའི་སེམས་ཀྱི་དེ་ཁོ་ན་ཉིད་དང་། ལྕེ་འབབ་པ་ལྟ་བུའི་
སེམས་ཀྱི་དེ་ཁོ་ན་ཉིད་དང་། གློག་ལྟ་བུའི་སེམས་ཀྱི་དེ་ཁོ་ན་ཉིད་དང་། སྤྲིན་ལྟ་བུའི་སེམས་ཀྱི་དེ་ཁོ་ན་ཉིད་དང་། བྱི་བ་ལྟ་བུའི་སེམས་ཀྱི་དེ་ཁོ་ན་ཉིད་དང་། ཁྱི་ལྟ་བུའི་སེམས་ཀྱི་དེ་ཁོ་ན་ཉིད་དང་། གླུ་ལྟ་བུའི་སེམས་ཀྱི་དེ་ཁོ་ན་ཉིད་དང་། གར་ལྟ་

བུའི་སེམས་ཀྱི་དེ་ཁོ་ན་ཉིད་དང་། སིལ་སྙན་ལྟ་བུའི་སེམས་ཀྱི་དེ་ཁོ་ན་ཉིད་དང་། རྨ་བྱ་ལྟ་བུའི་སེམས་ཀྱི་དེ་ཁོ་ན་ཉིད་དང་། རྔ་སྒྲ་ལྟ་བུའི་སེམས་ཀྱི་དེ་ཁོ་ན་ཉིད་དང་། དུས་ཀྱི་འབྲུག་སྒྲ་ལྟ་བུའི་སེམས་དང་། སེང་གེ་ལྟ་བུའི་སེམས་དང་། བུང་བ་ལྟ་བུའི་
སེམས་དང་། སྦྲང་མ་ལྟ་བུའི་སེམས་དང་། ཆུ་སྲིན་ལྟ་བུའི་སེམས་དང་། རུས་སྦལ་ལྟ་བུའི་སེམས་དང་། སྤྲུལ་པ་ལྟ་བུའི་སེམས་དང་། མ་ཧེ་ལྟ་བུའི་སེམས་དང་། འུག་པ་ལྟ་བུའི་སེམས་དང་། སྤྲེའུ་ལྟ་བུའི་སེམས་དང་། བྱ་རོག་ལྟ་བུའི་སེམས་དང་།
རྟ་ལྟ་བུའི་སེམས་དང་། བཞད་ལྟ་བུའི་སེམས་དང་། ཀང་ཀ་ལྟ་བུའི་སེམས་དང་། སྤྱང་ཀིའི་སེམས་དང་། ཝའི་སེམས་དང་། གླང་པོ་ལྟ་བུའི་སེམས་དང་། ལུག་ལྟ་བུའི་སེམས་དང་། ཁྲ་ལྟ་བུའི་སེམས་དང་། ཁྱིམ་གྱི་སེམས་དང་། ཁྱིམ་
མེད་པའི་སེམས་དང་། ཐར་པའི་སེམས་དང་། མ་ཐར་པའི་སེམས་དང་། སྲིན་པོའི་སེམས་དང་། མི་རྒོད་ཀྱི་སེམས་དང་། ན་ཆུང་གི་སེམས་དང་། རྒྱལ་པོའི་སེམས་དང་། སྨད་འཚོང་མའི་སེམས་དང་། འཕྱོན་མའི་སེམས་དང་། བྲམ་ཟེའི་
སེམས་དང་། ཤེན་པའི་སེམས་དང་། ཡི་དགས་ཀྱི་སེམས་དང་། དམྱལ་བའི་སེམས་དང་། ཚེར་མའི་སེམས་དང་། ཤིང་བལ་གྱི་སེམས་དང་། ས་འོག་གི་སེམས་དང་། ནམ་མཁའི་སེམས་དང་། དྲ་བའི་སེམས་དང་། རྒྱའི་སེམས་དང་།
ཞགས་པའི་སེམས་དང་། ལིག་རིའི་སེམས་དང་། ལྕགས་ཀྱུའི་སེམས་དང་། ཐོ་བའི་སེམས་དང་། ཇུ་ཐུར་གྱི་སེམས་དང་། སྣོད་ཀྱི་སེམས་དང་། ཁྲི་མོན་གྱི་སེམས་དང་། མེ་ལྕེའི་སེམས་དང་། ཐུ་ལུམ་གྱི་སེམས་དང་། མར་མེའི་
སེམས་དང་། ཉི་མའི་སེམས་དང་། ཟླ་བའི་སེམས་དང་། དངུལ་གྱི་སེམས་དང་། གསེར་གྱི་སེམས་དང་། མེ་སྟག་གི་སེམས་དང་། རླུང་གི་སེམས་དང་། ཆུའི་སེམས་དང་། མདུང་ཤིང་གི་སེམས་དང་། གཏུན་ཤིང་གི་སེམས་དང་། སྒོའི་

སེམས་དང་། ཤིང་ལེབ་ཀྱི་སེམས་དང་། མེའི་སེམས་དང་། སའི་སེམས་དང་། འདམ་གྱི་སེམས་དང་། རྙོག་ཆུའི་སེམས་དང་། ཚོན་རྩིའི་སེམས་དང་། ནོར་བུའི་སེམས་དང་། དུག་གི་སེམས་དང་། སྨན་གྱི་སེམས་དང་།
ཁ་ཟས་ཀྱི་སེམས་དང་། ཆུ་དོང་གི་སེམས་དང་། མདའི་སེམས་དང་། རལ་གྲིའི་སེམས་དང་། འཁོར་ལོའི་སེམས་དང་། གཞུའི་སེམས་དང་། སྒྲོག་གི་སེམས་དང་། ཤིང་གི་སེམས་དང་། ལན་ཚྭའི་སེམས་དང་། སྤུ་གྲིའི་སེམས་དང་། ཐིག་
གི་སེམས་དང་། རྡོ་རྗེའི་སེམས་དང་། རི་རབ་ཀྱི་སེམས་དང་། རྒྱ་མཚོའི་སེམས་དང་། ཕ་བོང་གི་སེམས་དང་། ཞང་གི་སེམས་དང་། ཕུག་གི་སེམས་དང་། སྐྱེ་བའི་སེམས་དང་། མེ་ཏོག་གི་སེམས་དང་། འབྲས་བུའི་སེམས་དང་། རྩ་བའི་
སེམས་དང་། ཡལ་གའི་སེམས་དང་། སྡོང་བུའི་སེམས་དང་། མངར་བའི་སེམས་དང་། ཁ་བའི་སེམས་དང་། སྐྱུར་བའི་སེམས་དང་། ཚ་བའི་སེམས་དང་། སླ་བའི་སེམས་དང་། བསྐ་བའི་སེམས་དང་། ཡི་གེའི་སེམས་དང་། ཚ་ཚའི་
སེམས་དང་། ལྡེ་མིག་གི་སེམས་དང་། བྱ་གག་ལྟ་བུའི་སེམས་དང་། ཀུན་དགའ་ར་བ་ལྟ་བུའི་སེམས་དང་། དབྱར་སྤྲིན་ལྟ་བུའི་སེམས་དང་། མེ་ལོང་ལྟ་བུའི་སེམས་དང་། ཏིལ་གྱི་མར་ཁུ་ལྟ་བུའི་སེམས་དང་། དགུན་ཆང་ལྟ་བུའི་སེམས་
ལ་སོགས་པ་མཐའ་ཡས་པའི་སེམས་ཀྱི་དེ་བཞིན་ཉིད་གང་ཡིན་པ་དེ་ནི་རྡོ་རྗེ་སེམས་དཔའི་དེ་བཞིན་ཉིད་དོ། །རྡོ་རྗེ་སེམས་དཔའི་དེ་བཞིན་ཉིད་གང་ཡིན་པ་དེ་ནི་ཇི་བཞིན་པའི་དེ་ཁོ་ན་ཉིད་དོ། །ཀྱེ་ལང་ཀའི་བདག་པོ་དེ་ཅིའི་ཕྱིར་ཞེ་ན། རྡོ་རྗེ་སེམས་
དཔའི་དེ་བཞིན་ཉིད་ནི་མ་བཅོས་མ་བསླད། མ་བྱས་མ་བརྟགས་ཇི་བཞིན་པ་ཡིན་ལ། སེམས་ཅན་ཀུན་གྱི་སེམས་ཀྱི་དེ་བཞིན་ཉིད་གང་ཡིན་པ་དེ་ཡང་མ་བཅོས། མ་བསླད་མ་བྱས། མ་བརྟགས་ཇི་བཞིན་པ་དེ་ཁོ་ན་ཉིད་ཡིན་པའི་ཕྱིར་རོ། །གང་

ཐམས་ཅད་མཁྱེན་པའི་སྤྱན་གྱིས་ཀྱང་དེ་གཉིས་ཀྱི་རང་བཞིན་སོ་སོར་མ་གཟིགས་མི་གཟིགས་གཟིགས་པར་མི་འགྱུར་རོ། །གང་རྒྱལ་ཚབ་སྐྱེས་བུ་རྣམས་ཀྱི་སོ་སོར་རྟོག་པའི་ཤེས་རབ་ཀྱིས་ཀྱང་སོ་སོར་མ་ཕྱེད་མི་ཕྱེད་ཕྱེད་པར་མི་འགྱུར་རོ། །ཀྱེ་
ལང་ཀའི་བདག་པོ་གང་གསང་སྔགས་ཀྱི་ངེས་པ་རྙེད་པར་འདོད་པ་རྣམས་ཀྱིས་སེམས་ཀྱི་དེ་ཁོ་ན་ཉིད་ངོ་ཤེས་པར་བྱའོ། །དེ་ཅིའི་ཕྱིར་ཞེ་ན། བྱ་བའི་རྣལ་འབྱོར་པ་ལྟར་སེམས་ཐ་དད་པར་སྣང་བ་རྣམས་བྱ་བ་མེད་པའི་རྣལ་འབྱོར་པ་ལྟར་སེམས་དེ་ཁོ་ན་
ཉིད་གཅིག་ཏུ་སྣང་ལ་དེ་ཁོ་ན་ཉིད་གཅིག་ནི་དེ་ཁོ་ན་ཉིད་གསང་བ་དམ་པ་ཡིན་པའི་ཕྱིར་སངས་རྒྱས་ཐམས་ཅད་ཀྱི་ཐུགས་རྡོ་རྗེ་སེམས་དཔས་ཀྱང་སེམས་ཀྱི་དེ་ཁོ་ན་ཉིད་ཐུགས་སུ་ཆུད་པས་གསང་སྔགས་ཀྱི་ངེས་པ་བརྙེས་སོ། །དེ་ཇི་ལྟ་ཞེ་ན་སེམས་
ཀྱི་དེ་ཁོ་ན་ཉིད་ནི་རྣམ་པར་དག་པའི་སྒོ་ཡིན་ནོ། །ཆོས་སྣང་བའི་སྒོ་ཡིན་ནོ། །ཆོས་ཀྱི་དབྱིངས་ཡིན་ནོ། །ཆོས་ཀྱི་གླེགས་བམ་ཆེན་པོ་ཡིན་ནོ། །ཆོས་ཀྱི་རྒྱུན་གྱི་ཏིང་ངེ་འཛིན་ཆེན་པོ་ཡིན་ནོ། །ཀྱེ་ལང་ཀའི་བདག་པོ་དེ་ཡང་འདི་ལྟ་སྟེ། གང་གིས་
སེམས་ཀྱི་དེ་ཁོ་ན། །གསང་བའི་སྙིང་པོ་དེས་རྙེད་ན། །འདྲེན་པའི་ཚིག་གིས་མ་བཀྲོལ་ཡང་། །སེམས་ལ་ཆོས་འབྱུང་འབུམ་ཕྲག་ཡས། །སྨྲ་བའི་སྒོ་མོར་ཐམས་ཅད་གསལ། །དོན་ལ་ངེས་པའི་གཏན་ཚིགས་ནི། །ཚིག་ཏུ་མཚོན་ཏེ་འབྱིན་