Kinh tạng Tây Tạng (Kangyur Đại Học) — 097_རྙིང་རྒྱུད།_ཀ

ངུས་ནས་སྨྲེས་ཏེ་གསོལ་པ། ཀུན་སྣང་མུན་སེལ་སྒྲོན་མ་དགོངས་སུ་གསོལ། །མུན་ནག་སྨག་ཏུ་འཁྱམས་
པ་བདག་ཅག་རྣམས། །ལམ་ནོར་ལམ་སྟོར་ཀུན་དུ་འཐོམས་འགྱུར་ཏེ། །སུས་ཀྱང་མ་བཀག་འགོག་པར་བྱེད་མེད་དེ། །བདག་ཏུ་རྨོངས་པའི་མ་རིག་མུན་པས་བསྒྲིབས། །རྣམ་ཤེས་གཏི་མུག་མུན་པས་འཐིབས་པ་ལ། །བདག་ཏུ་རྨོངས་པས་མུན་པ་མ་
བསལ་བས། །ཀུན་ནས་བསྒྲིབས་པའི་མུན་ནག་རྒྱུན་མི་འཆད། །སྨག་ཆེན་སངས་པར་དཀའ་བའི་སྡུག་བསྔལ་ལས། །མཁྱེན་རབ་གསལ་བའི་སྒྲོན་མ་བསྟན་དུ་གསོལ། །ཞེས་སྐྱབས་དམ་པར་དོང་ངོ་། །དེ་ནས་མི་དང་མི་མ་ཡིན་པའི་ཚོགས་ཀྱང་ཤིན་ཏུ་ངུས་
ནས་སྨྲེས་ཏེ་གསོལ་པ། ཐབས་མཁས་ཐུགས་རྗེ་སྨན་པ་དགོངས་སུ་གསོལ། །གྲོང་ཁྱེར་གསུམ་དུ་འཁྱམས་པ་བདག་ཅག་རྣམས། །འཁོར་བའི་གཅོང་རྙིང་ནད་ཀྱིས་ཟིན་གྱུར་པ། །སུས་ཀྱང་མ་བཟུང་འཛིན་པར་བྱེད་མེད་དེ། །བདག་འཛིན་ཉོན་མོངས་མ་
རིག་ནད་ཀྱིས་བཟུང་། །ཟུག་རྔུ་བཟོད་དཀས་རྣམ་ཤེས་གཟིར་བ་ལ། །དངོས་པོར་འཛིན་པའི་གཅོང་རྙིང་མ་སྦྱངས་པས། །ཀུན་ནས་གདུང་བའི་ཟུག་རྔུ་རྒྱུན་མི་འཆད། །ཐར་མེད་འཚོ་བར་དཀའ་བའི་སྡུག་བསྔལ་ལས། །ཐབས་མཁས་ཐུགས་རྗེའི་སྨན་གྱིས་སྦྱང་

དུ་གསོལ། །ཞེས་ལུས་འབངས་སུ་ཕུལ་ལོ། །དེ་ནས་གནོད་སྦྱིན་གྱི་ཚོགས་ཀྱིས་ཤིན་ཏུ་ངུས་ནས་སྨྲེས་ཏེ་གསོལ་པ། ཐབས་མཁས་ཐུགས་རྗེ་གྲུ་གཟིངས་དགོངས་སུ་གསོལ། །འཁོར་བའི་རྒྱ་མཚོར་འཁྱམས་པ་བདག་ཅག་རྣམས། །སྡུག་བསྔལ་
དབའ་རླབས་འཇིངས་སུ་བྱིང་གྱུར་པ། །སུས་ཀྱང་མ་མནན་གནོན་པར་བྱེད་མེད་དེ། །རྣམ་རྟོག་དངོས་པོར་འཛིན་པའི་རི་བོས་མནན། །ལས་ཀྱི་ཆུ་བོས་འཁོར་བར་གཡེངས་པ་ལ། །དངོས་པོར་འཛིན་པའི་རྐ་མགོ་མ་བསྒྱུར་བས། །ལས་དབང་དྲག་པོ་ཆུ་བོ་
རྒྱུན་མི་འཆད། །མི་ཐར་འབོག་པར་དཀའ་བའི་སྡུག་བསྔལ་ལས། །ཐབས་མཁས་ཐུགས་རྗེའི་གྲུ་ཡིས་བསྒྲལ་དུ་གསོལ། །ཞེས་སྐྱབས་དམ་པར་དོང་ངོ་། །དེ་ནས་འབྱུང་པོའི་ཚོགས་ཀྱིས་ཤིན་ཏུ་ངུས་ནས་སྨྲེས་ཏེ་གསོལ་པ། རང་འབྱུང་བདུད་རྩིའི་
རྒྱལ་པོ་དགོངས་སུ་གསོལ། །དུག་ཆེན་གླིང་དུ་འཁྱམས་པ་བདག་ཅག་རྣམས། །ཀུན་ནས་མྱོས་པ་མྱོས་ཤིང་ཉམས་གྱུར་པ། །སུས་ཀྱང་མ་སྦྱར་སྦྱོར་བར་བྱེད་མེད་དེ། །ཕྱིན་ཅི་ལོག་ཏུ་ལྟ་བའི་དུག་གིས་མྱོས། །དུག་ཆེན་ནད་ཀྱིས་རྣམ་ཤེས་གཟིར་བ་
ལ། །ཁོང་ནས་འཁྱིལ་བའི་དུག་རྩ་མ་བཅད་པས། །དུག་ནད་འབར་བའི་སྡུག་བསྔལ་རྒྱུན་མི་འཆད། །མི་ཟད་བཟོད་པར་དཀའ་བའི་སྡུག་བསྔལ་ལ། །རང་འབྱུང་དག་པའི་བདུད་རྩིས་བྱུག་ཏུ་གསོལ། །ཞེས་སྐྱབས་དམ་པར་དོང་ངོ་། །དེ་ནས་ཡང་རྡོ་རྗེ་
སྲིན་པོ་དེས་བཀའ་སྩལ་པ། ཡིན་ནོ་ལེགས་སོ་རིགས་ཀྱི་བུ། །རུ་ཏྲ་དག་གིས་ཁྱོད་རེ་འཁོར། །རུ་ཏྲ་དག་གིས་ཁྱོད་རེ་འཚོག །བདག་ཏུ་འཛིན་པས་ཁྱོད་རེ་འཁོར། །བདག་ཏུ་འཛིན་པས་ཁྱོད་རེ་འཚོག །ཞེ་སྡང་དག་གིས་ཁྱོད་རེ་འཁོར། །ཞེ་སྡང་
དག་གིས་ཁྱོད་རེ་འཚོག །གཏི་མུག་དག་གིས་ཁྱོད་རེ་འཁོར། །གཏི་མུག་དག་གིས་ཁྱོད་རེ་འཚོག །འདོད་ཆགས་དག་གིས་ཁྱོད་རེ་འཁོར། །འདོད་ཆགས་དག་གིས་ཁྱོད་རེ་འཚོག །ཆུ་བོ་བཞི་ཡིས་ཁྱོད་རེ་འཁོར། །ཆུ་བོ་བཞི་ཡིས་ཁྱོད་རེ་

འཚོག །ལོག་པར་ལྟ་བས་ཁྱོད་རེ་འཁོར། །ལོག་པར་ལྟ་བས་ཁྱོད་རེ་འཚོག །ཇི་ལྟར་ཁྱོད་ནི་ཐམས་ཅད་དུ། །ཡེ་ནས་རྒྱལ་བའི་སྲས་ཡིན་ན། །གྲོང་ཁྱེར་གསུམ་དུ་ཅི་སྟེ་འཁོར། །རང་རང་རྣམ་རྟོག་ལས་ཁོ་ནའོ། །ལས་ཀྱི་རྒྱ་མཚོ་
དབའ་རླབས་དང་། །བདག་ཏུ་འཛིན་པའི་མདུད་པ་དང་། །ཁོང་ནས་འབར་བའི་མེ་ཆེན་དང་། །ཀུན་ནས་འཐིབས་པའི་མུན་ནག་དང་། །དངོས་པོ་རྟོག་པའི་གཅོང་རྙིང་དང་། །རྣམ་པར་གཡེང་བའི་ཆུ་བོ་དང་། །ཁོང་ནས་འཁྱིལ་བའི་དུག་རྩ་རྣམས། །རང་
བྱུང་རྡོ་རྗེས་མ་བྱས་ན། །གཞན་ལ་རེ་གསོལ་གདུང་སྨྲེས་པ། །ཆུ་འདོད་སྨིག་རྒྱུ་སྙེགས་པ་འདྲ། །གང་འདིར་ཉིད་བདེར་མ་སྦྱར་ན། །གཞན་གྱིས་བདེ་བར་ག་ལ་འགྱུར། །ཡེ་ནས་བདེ་བར་གནས་བཞིན་དུ། །ད་གདོད་གང་དུ་བདེ་ཚོལ་བ། །བཙལ་བས་
རྙེད་པར་ཡོང་མི་འགྱུར། །སྡུག་བསྔལ་ཉིད་ལ་མངོན་པར་རྒྱུ། །འོ་མ་དག་ལས་མར་བྱུང་བ། །དེ་ཉིད་ཡེ་ནས་མར་མེད་པ། །ཐབས་མཆོག་དཔག་མེད་རྒྱལ་བས་ཀྱང་། །བསྲུབས་པ་མ་གཏོགས་དེ་མི་རྙེད། །དེ་བཞིན་རང་གི་དེ་ཉིད་ལས། །བཙལ་
ཀྱང་རྒྱལ་བས་མི་བརྙེས་ན། །ཁྱེད་ཅི་གཞན་ལས་བདེ་འདོད་དམ། །མི་ཤེས་བློ་ཆུང་སྙིང་རེ་རྗེ། །ཞེས་བཀའ་སྩལ་པ་དང་། ལང་ཀའི་བདག་པོ་དབང་ཕྱུག་ཆེན་པོ་ལ་སོགས་པ་འདུས་པ་ཕལ་པོ་ཆེའི་ཚོགས་ཀྱིས་གསོལ་པ། ཀྱེ་སྐྱེས་བུ་ཆེན་པོ་བདག་ཅག་
རྣམས་རང་རང་གི་དེ་ཁོ་ན་ཉིད་བལྟ་བར་འཚལ་ན། དེ་ཇི་ལྟར་ཡོངས་སུ་བལྟ་བར་བགྱི་ཞེས་གསོལ་པ་ལས་སྐྱེས་བུ་ཆེན་པོ་དེས་བཀའ་སྩལ་པ། ཀྱེ་འདུས་པའི་ཚོགས་རྒྱལ་བའི་སྲས་རྣམས་རང་རང་གི་དེ་ཁོ་ན་ཉིད་མཐོང་བར་འདོད་ན་དཀྱིལ་འཁོར་ཆེན་
པོ་གསུམ་གྱི་སྒོ་འབའ་ཞིག་ཏུ་འཇུག་པར་བྱའོ། །དེ་ཡང་རྩ་བ་བྱང་ཆུབ་སེམས་ཀྱི་དཀྱིལ་འཁོར་འབའ་ཞིག་གི་སྒོར་འཇུག་པར་བྱའོ། །དེ་ཅིའི་ཕྱིར་ཞེ་ན། དཀྱིལ་འཁོར་ཆེན་པོ་གསུམ་དང་རང་རང་གི་དེ་ཁོ་ན་ཉིད་སོ་སོ་མ་ཡིན་ཐ་མི་དད་དོ། །དེ་ཡང་རྩ་བ་

བྱང་ཆུབ་སེམས་ཀྱི་དཀྱིལ་འཁོར་དུ་འདུས་པའི་ཕྱིར་རོ། །དེ་སྐད་ཅེས་བཀའ་སྩལ་པ་ལས། འདུས་པ་ཆེན་པོའི་ཚོགས་ཀྱིས་གསོལ་པ། དཔའ་བོ་ཆེན་པོ་བདག་ཅག་དཀྱིལ་འཁོར་གསུམ་དུ་གཞུག་ཏུ་གསོལ། སྐྱེས་བུ་ཆེན་པོ་ཡང་དག་པར་གཞུག་ཏུ་གསོལ།
དེ་སྐད་ཅེས་གསོལ་པ་ལས། སྐྱེས་བུ་ཆེན་པོ་དེས་བཀའ་སྩལ་པ། རྣལ་འབྱོར་འཇུག་པའི་བྱིས་པ་ཁྱེད། །འཇིག་རྟེན་དྲུག་ལས་དྲངས་ནས་ཀྱང་། །འདས་དང་མ་འདས་ས་མཚམས་ཀྱི། །འགྱུར་དབང་མ་ངེས་ས་ལ་གཞག །ཅེས་གསུངས་སོ། །དེ་ནས་
འདུས་པའི་ཚོགས་ཀྱིས་འདི་སྐད་གསོལ་ཏོ། །དཔའ་བོ་ཆེན་པོ་དགོངས་སུ་གསོལ། །བདག་ཅག་སྐལ་ལྡན་འདུས་པའི་ཚོགས། །སྒོ་འདིར་འཇུག་པར་འཚལ་ལགས་ན། །རྒྱལ་བའི་སྲས་སུ་གཟུང་དུ་གསོལ། །ཞེས་གསོལ་བ་ལས། སྐྱེས་བུ་ཆེན་པོས་
བཀའ་སྩལ་པ། །སྐལ་ལྡན་འདུས་པའི་ཚོགས་ཆེན་ཁྱེད། །བདེ་བར་འོངས་སོ་ལེགས་པར་འོངས། །གྲུབ་པ་ལུང་གི་གསང་སྒོ་འདིར། །སུ་དག་འོངས་པ་སླར་མི་ལྡོག །ཅེས་གསུངས་སོ། །དེ་ནས་འདུས་པའི་ཚོགས་དེ་དག་བྱང་ཆུབ་ཏུ་འགྱུར་བའི་ལྷག་པའི་
སེམས་འདི་ལྟར་སྐྱེས་སོ། །བདག་ཅག་མཐའ་ཡས་སེམས་ཅན་རྣམས། །དོན་གྱི་སངས་རྒྱས་ཡིན་མོད་ཀྱང་། །རྟོག་པའི་དབང་གིས་འཁོར་བ་ལ། །བྱང་ཆུབ་མཆོག་ཏུ་སེམས་བསྐྱེད་དོ། །སེམས་ཉིད་སངས་རྒྱས་ཡིན་པ་ལས། །མུན་པས་བསྒྲིབས་པས་
དེ་མ་ཤེས། །བྱང་ཆུབ་སེམས་ཀྱི་ལམ་འདི་ནས། །སངས་རྒྱས་ས་ལ་འཇུག་པར་བགྱི། །ཞེས་གསོལ་ཏོ། །དེ་ནས་ཡང་འདུས་པའི་ཚོགས་རྣམས་ཀྱིས་གསོལ་པ། བདེ་ཆེན་ལྷུན་གྲུབ་གཞལ་ཡས་འདིར། །རྣམ་པར་ཐར་པའི་སྒོ་བཞི་ནས། །ཚད་མེད་
ཐུགས་རྗེའི་སྒོ་ཕྱེ་ནས། །བྱམས་པའི་ཞལ་བཟངས་བསྟན་དུ་གསོལ། །ཞེས་གསོལ་ཏོ། །དེ་ནས་སྐྱེས་བུ་ཆེན་པོ་དེས་འདི་སྐད་ཅེས་བཀའ་སྩལ་ཏོ། །ཨེ་མའོ་སྐལ་ལྡན་འདུས་པའི་ཚོགས། །འཁོར་བའི་ལམ་སྒོ་ཀུན་བཅད་དེ། །བྱང་ཆུབ་ལམ་ལ་གཟུད་པའི་ཕྱིར། །རྡོ་

རྗེ་གསང་སྒོ་དབྱེ་བར་བྱ། །ཞེས་གསུངས་ཏེ་ཞལ་འཛུམ་པའི་མདངས་ལས་འོད་ཟེར་ཕྱུང་བས་དོན་ལ་ངེས་པར་འཇུག་པའི་སྒོ་བྱེ་བར་གྱུར་ཏོ། །དེ་ནས་འདུས་པའི་ཚོགས་རྣམས་མགུ་ཞིང་རངས་པའི་སྒོ་ནས་རྣལ་འབྱོར་དུ་རྣམ་པར་འདུན་ནས་འདི་སྐད་
ཅེས་གསོལ་ཏོ། །ཕོ་བྲང་རྨད་འབྱུང་གཞལ་ཡས་ནས། །རྒྱལ་བ་རྒྱ་མཚོ་ཀུན་བཞུགས་ལ། །རྣལ་འབྱོར་ངེས་པར་ལྷག་པར་མོས། །རྡོ་རྗེ་གདུང་ལ་སྐྱབས་སུ་མཆི། །ཞེས་གསོལ་ཏོ། །དེ་ནས་ཡང་འདུས་པའི་ཚོགས་ཀྱིས་འདི་སྐད་ཅེས་གསོལ་ཏོ། །ཐོག་མ་མེད་
པའི་དུས་མཐའ་ནས། །མ་རིག་ལོག་རྟོག་དབང་གིས་ན། །སྡིག་པ་བགྱིས་པ་ཅི་མཆིས་པ། །དེ་དག་ཐམས་ཅད་སོ་སོར་བཤགས། །ཞེས་གསོལ་ཏོ། །ཡང་འདུས་པའི་ཚོགས་དེ་དག་གིས་འདི་སྐད་ཅེས་གསོལ་ཏོ། །རིག་འཛིན་རྡོ་རྗེ་རྒྱལ་བ་ཡིས། །འཁོར་བ་ཇི་
ལྟར་བསྒྲལ་བ་ལྟར། །བདག་ཅག་རབ་ཏུ་བསྒྲལ་བའི་ཕྱིར། །རྡོ་རྗེ་ཉི་མ་སྩལ་དུ་གསོལ། །ཞེས་གསོལ་ཏོ། །དེ་ནས་སྐྱེས་བུ་ཆེན་པོས་བཀའ་སྩལ་པ། ཁྱེད་ནི་དགའ་བ་ཅི་ལ་དགའ། །ཁྱེད་ནི་དད་པ་ཅི་ལ་དད། །ཁྱེད་ནི་མོས་པ་ཅི་ལ་མོས། །ཁྱེད་ནི་འདོད་པ་ཇི་
ལྟ་བ། །དེ་སྐད་ཅེས་བཀའ་སྩལ་པ་དང་། འདུས་པའི་ཚོགས་ཀྱིས་གསོལ་པ། བདག་ཅག་སྐལ་ལྡན་བདེ་ཆེན་པོ། །རབ་དགྱེས་སེམས་ལ་བདག་ཅག་དགའ། །མཆོག་ཉིད་དོན་ལ་བདག་ཅག་དང་། །ཨེ་མའོ་བདེ་མཆོག་དགའ་ཚལ་འདིར། །སངས་རྒྱས་
མཛད་དཀའ་སྤྱད་ནས་ནི། །འགྲོ་བ་ཐམས་ཅད་བསྒྲལ་བར་མོས། །ཞེས་གསོལ་ཏོ། །ཡང་འདུས་པའི་ཚོགས་ཀྱིས་གསོལ་པ། རྒྱལ་མཆོག་སྐྱེས་བུ་ཁྱེད་ཅི་འདྲ། །དེ་འདྲ་ཁོ་ནར་སྤྱད་པར་བགྱི། །སྤྱོད་པ་བསམ་རྒྱས་རྨད་འབྱུང་བ། །འགྲོ་ལ་ཕན་པའི་དོན་དུ་
སྤྱད། །འཁོར་བའི་མཐའ་རིངས་འཇིག་རྟེན་པ། །མ་བསྒྲལ་བ་ནི་བསྒྲལ་བར་བགྱི། །མ་གྲོལ་བ་ནི་གྲོལ་བར་བགྱི། །དབུགས་མ་ཕྱུང་བ་དབུགས་ཕྱུང་སྟེ། །མྱ་ངན་འདས་པའི་ཞིང་ཁམས་སུ། །སྙིང་པོ་བྱང་ཆུབ་ཉིད་དུ་སྦྱར། །ཞེས་གསོལ་ཏོ། །དེ་ནས་ཡང་

འདུས་པའི་ཚོགས་ཀྱིས་དམ་ཚིག་བསྐུལ་བར་གསོལ་པ། མི་ཕྱེད་གསང་བའི་རྣལ་འབྱོར་པ། །གཉིས་མེད་དོན་གྱི་དབྱིངས་ལས་བྱུང་། །དབྱིངས་ནི་མི་འཇིག་རྡོ་རྗེ་སྟེ། །འདུ་འབྲལ་མེད་པར་གཅིག་པས་ན། །གསང་བ་གསུམ་གྱི་དབྱིངས་ཉིད་དུ། །གཉིས་སུ་
མེད་པར་ནན་ཏན་མཛོད། །ཅེས་གསོལ་ཏོ། །དེ་ནས་སྐྱེས་བུ་ཆེན་པོ་དེས་བཀའ་སྩལ་པ། རྡོ་རྗེ་ཅན་གྱི་རྣལ་འབྱོར་ཁྱེད། །རྡོ་རྗེ་ཅན་དུ་གཅིག་ངེས་ན། །གསང་བ་གསུམ་དུ་མཉམ་པའི་ཕྱིར། །མི་ཕྱེད་རྡོ་རྗེ་དམ་ཚིག་སྦྱིན། །མི་ཕྱེད་རྡོ་རྗེ་དམ་ཚིག་ནི། །གསང་བ་
གསུམ་གྱི་དབྱིངས་ནས་ཕྱུང་། །དཀྱིལ་འཁོར་གསུམ་གྱི་དམ་ཚིག་ནི། །གྲུབ་ན་འཇིག་པའི་དུས་མེད་དོ། །ཞེས་བཀའ་སྩལ་ཏོ། །ཡང་འདུས་པའི་ཚོགས་ཀྱིས་གསོལ་པ། འདུ་འབྲལ་མེད་པའི་ཆོས་ཀྱི་སྤུན། །རིགས་མི་མཐུན་ཡང་དམ་ཚིག་གཅིག །འདའ་བར་
བཀའ་བས་བསྡུས་པས་ན། །དམ་ཚིག་ཅན་དུ་ནན་ཏན་མཛོད། །ཅེས་གསོལ་ཏོ། །དེ་ནས་ཡང་སྐྱེས་བུ་ཆེན་པོ་དེས་ཡང་འདི་སྐད་ཅེས་བཀའ་སྩལ་ཏོ། །གསང་བ་གསུམ་གྱི་དམ་པ་རྣམས། །ཁྱེད་ཀྱིས་རབ་ཏུ་བསླུས་གྱུར་ན། །དེ་ཀུན་ཁྲོས་ནས་ཁྲག་ཆེན་པོ། །
ཉམས་པའི་སྙིང་ནས་དྲངས་ཏེ་འཐུང་། །ཞེས་དམ་ཚིག་དམ་པ་བྱིན་ནོ། །དེ་ནས་ཡང་སྐྱེས་བུ་དམ་པ་དེས་བཀའ་སྩལ་པ། མ་འོངས་སངས་རྒྱས་བློ་ལྡན་ཁྱོད། །བླ་མེད་ཡེ་ཤེས་བསྐྱེད་པའི་ཕྱིར། །རྒྱུད་སྦྱོང་གསང་བ་གསུམ་དུ་བཞུགས། །རང་གི་མེ་
ལོང་ཉིད་ལ་ལྟོས། །གནས་གསུམ་ཉིད་དུ་བཀོད་པ་ཡི། །གསང་ཆེན་གསང་བ་རབ་གསང་བ། །མཐོང་བས་དེ་བཞིན་ཉིད་དུ་འགྱུར། །གཞན་མིན་རང་བྱུང་དེ་ཁོ་ན། །བློ་ཆུང་རྣམས་ལ་མ་སྨྲ་ཤིག །གལ་ཏེ་སྨྲས་པར་གྱུར་ན་ནི། །ཐ་ཚིག་དྲག་
པོས་ཉམས་གྱུར་ནས། །མེ་ཆེན་འབར་བའི་གནས་སུ་སྲེག །ཅེས་དམ་ཚིག་དམ་པ་བསྒྲགས་སོ། །ལང་ཀའི་བདག་པོ་འདུས་པའི་ཚོགས་དེ་དག་འདི་ལྟར་གསང་བ་གསུམ་གྱི་དམ་པར་བཞུགས་པ་དེའི་ཚེ་དེའི་དུས་ན་ལ་ལ་ནི་འདུན་པའི་རྣལ་འབྱོར་ལ་

གནས་པ་ཤ་དག་ཏུ་གྱུར་ཏོ། །ལ་ལ་ནི་རིགས་ཆེན་འབྱེད་པའི་རྣལ་འབྱོར་ལ་གནས་པ་ཤ་དག་ཏུ་གྱུར་ཏོ། །ལ་ལ་ནི་དབུགས་ཆེན་འབྱིན་པའི་རྣལ་འབྱོར་ལ་གནས་པ་ཤ་དག་ཏུ་གྱུར་ཏོ། །ལ་ལ་ནི་ལུང་ཆེན་ཐོབ་པའི་རྣལ་འབྱོར་ལ་གནས་
པ་ཤ་དག་ཏུ་གྱུར་ཏོ། །ལ་ལ་ནི་རྩལ་ཆེན་རྫོགས་པའི་རྣལ་འབྱོར་ལ་གནས་པ་ཤ་དག་ཏུ་གྱུར་ཏོ། །དེ་ལྟར་ན་དེའི་ཚེ་དེའི་དུས་ཉིད་ན་འདུས་པའི་ཚོགས་ཕལ་མོ་ཆེ་དེ་དག་ནི་རྡོ་རྗེ་མིང་གིས་དབང་བསྐུར་བས་དབང་བསྐུར་ཏེ། ལ་ལོ་ནི་རྡོ་རྗེ་མྱུ་གུ་ཞེས་བྱ་བར་
གྲགས་པར་གྱུར་ཏོ། །དེ་བཞིན་དུ་ལ་ལ་ནི་ཆོས་ཀྱི་མྱུ་གུ་ཞེས་བྱ་བར་གྲགས་སོ། །ལ་ལ་ནི་རིན་ཆེན་མྱུ་གུ་ཞེས་བྱ་བར་གྲགས་སོ། །ལ་ནི་ཟླ་བའི་རྩལ་ཞེས་བྱ་བར་གྲགས་སོ། །ལ་ལ་ནི་ཉི་མའི་མདངས་ཞེས་བྱ་བར་གྲགས་སོ། །ལ་ལ་ནི་སེང་གེའི་རྩལ་
ཞེས་བྱ་བར་གྲགས་སོ། །ལ་ལ་ནི་ནམ་མཁའི་རྡོ་རྗེ་ཞེས་བྱ་བར་གྲགས་སོ། །དེ་དག་ལས་མ་རུངས་པ་ཁ་ཅིག་ནི་ལ་ལ་ནི་རྡོ་རྗེ་སྤྱང་ཀི་ཞེས་བྱ་བར་གྲགས་སོ། །ལ་ལ་ནི་རྡོ་རྗེ་དུས་མཚམས་ཞེས་བྱ་བར་གྲགས་སོ། །ལ་ལ་ནི་རྡོ་རྗེ་ཕྱོགས་འདུལ་ཞེས་བྱ་བར་
གྲགས་སོ། །ལ་ལ་ནི་རྡོ་རྗེ་དུར་ཁྲོད་ཞེས་བྱ་བར་གྲགས་སོ། །རུ་ཏྲ་ནག་པོ་དེ་ཁོ་ན་ཉིད་ནི་རྡོ་རྗེ་རོ་ལངས་དུར་ཁྲོད་ཀྱི་བདག་པོ་ཞེས་བྱ་བར་གྲགས་ཏེ། བསྐལ་པ་ཆེན་པོ་བཟང་པོའི་ཡུན་དུ་གནས་ནས་རྣལ་འབྱོར་ཡོངས་ཀྱི་མགོན་པོ་དགེ་བསྙེན་ལེགས་ལྡན་
ནག་པོ་ཞེས་བྱ་བར་གྱུར་ནས་གང་དག་ཆོས་སྲུངས་པ་རྣམས་ཀྱི་སྲུང་མའི་བྱ་བ་བྱེད་དོ། །བསྐལ་པ་དེའི་ཕྱི་མ་ལ་འོག་གི་ཕྱོགས་ཀྱི་འཇིག་རྟེན་གྱི་ཁམས་ཐལ་བས་ཁེབས་པ་ཞེས་བྱ་བར་དེ་བཞིན་གཤེགས་པ་ཐལ་བའི་དབང་པོའི་དབྱངས་ཞེས་བྱ་བར་མངོན་
པར་རྫོགས་པར་སངས་རྒྱས་པར་འགྱུར་རོ་ཞེས་ལུང་བསྟན་པ་ཐོབ་པར་གྱུར་ཏོ། །ལང་ཀའི་བདག་པོ་དེའི་ཚེ་དེའི་དུས་ན་འཇིག་རྟེན་གྱི་ཁམས་རྣམ་པ་དྲུག་ཏུ་གཡོས་སོ། །རབ་ཏུ་གཡོས། ཀུན་དུ་རབ་ཏུ་གཡོས་པར་གྱུར་ཏོ། །འགུལ། རབ་ཏུ་འགུལ། ཀུན་

དུ་རབ་ཏུ་འགུལ་ཏོ། །ལྡེག་རབ་ཏུ་ལྡེག །ཀུན་དུ་རབ་ཏུ་ལྡེག་གོ། །འུར་རབ་ཏུ་འུར། ཀུན་དུ་རབ་ཏུ་འུར་རོ། །ཆེམ་རབ་ཏུ་ཆེམ། ཀུན་དུ་རབ་ཏུ་ཆེམ་མོ། །མཐའ་མཐོ་ན་དབུས་དམའོ། །དབུས་མཐོ་ན་མཐའ་དམའོ། །ཤར་མཐོ་ན་ནུབ་དམའ། ནུབ་
མཐོ་ན་ཤར་དམའ། བྱང་མཐོ་ན་ལྷོ་དམའ། ལྷོ་མཐོ་ན་བྱང་དམའ་བར་གྱུར་ཏོ། །འཇིག་རྟེན་པ་ཀུན་ཀྱང་ངོ་མཚར་དུ་གྱུར་ཏེ་མངོན་པར་བསྟོད་དོ། །ལྷ་དང་བཅས་པའི་འཇིག་རྟེན་པ་ཁ་ཅིག་ནི་དེ་ཁོ་ན་ཉིད་གསང་བ་དམ་པ་ལ་རྗེས་སུ་ཡི་རང་བར་གྱུར་ཏོ། །
ཁ་ཅིག་ནི་མ་སྐྱེས་པའི་ཆོས་ལ་བཟོད་པ་ཐོབ་པར་གྱུར་ཏོ། །ཁ་ཅིག་ནི་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །ཁ་ཅིག་ནི་ཕྱིར་མི་ལྡོག་པའི་ས་ལ་གནས་པར་གྱུར་ཏོ། །ཁ་ཅིག་ནི་ལུང་བསྟན་པ་ཐོབ་པ་ཤ་དག་ཏུ་གྱུར་ཏོ། །དེའི་
ཚེ་དེའི་དུས་ན་རུ་ཏྲ་ཐར་པ་ནག་པོ་ལ་སོགས་པ་མིའི་ཐོད་པ་ཅན་མ་རུངས་པ་རྣམས་སྐྱེས་བུ་ཆེན་པོ་རྡོ་རྗེ་མ་རུངས་པ་དེ་ལ་ལུས་ཀྱི་བག་བཞི་ས་ལ་ཕབ་པའི་ཕྱག་རྣལ་འབྱོར་གྱི་ལུགས་སུ་བྱས་ནས་ཐལ་མོ་སྦྱར་སྤྱི་བོས་བཏུད་ནས་འདི་སྐད་ཅེས་གསོལ་ཏོ། །ཨ་
ཧོ་སུ་ཁ་ཀྵྃ་བརྱ་དེ་བ་ཤི་ཤ། །ཨེ་མའོ་སྐྱེས་བུ་ཆེན་པོ་གཡོ་བ་ཕུན་སུམ་ཚོགས་པ་བྱུང་ངོ་། །ཆོས་ཉིད་ཀྱི་བྱིན་གྱི་བརླབས་ལགས་སམ། གཟུགས་ཕུན་སུམ་ཚོགས་པ་བྱུང་ངོ་། གཟུགས་གནས་སུ་དག་གམ། སྙིང་རྗེའི་གཟུགས་ལགས་སམ། སྒྲ་
ཕུན་སུམ་ཚོགས་པ་བྱུང་ངོ་། །སྒྲ་གནས་སུ་དག་གམ། ཤེས་རབ་ཀྱི་སྒྲ་ལགས་སམ། དྲི་ཕུན་སུམ་ཚོགས་པ་བྱུང་ངོ་། །དྲི་གནས་སུ་དག་གམ། བྱང་ཆུབ་སེམས་ཀྱི་དྲི་ལགས་སམ། རོ་ཕུན་སུམ་ཚོགས་པ་བྱུང་ངོ་། །རོ་གནས་སུ་དག་གམ། ཏིང་ངེ་
འཛིན་གྱི་རོ་ལགས་སམ། །རེག་ཕུན་སུམ་ཚོགས་པ་བྱུང་ངོ་། །རེག་གནས་སུ་དག་གམ། །དམ་ཚིག་གི་རེག་ལགས་སམ། ཚོར་བ་ཕུན་སུམ་ཚོགས་པ་བྱུང་ངོ་། །ཚོར་བ་གནས་སུ་དག་གམ། ཚོར་བ་བཏང་སྙོམས་ལགས་སམ། བདག་ཅག་ནི་སྔོན་

བས་མཐུ་རྩལ་སྐྱེས་པ་སྙམ་བགྱིད་དོ། །རྫུ་འཕྲུལ་སྐྱེས་པ་སྙམ་བགྱིད་དོ། །དབང་ཐོབ་པ་སྙམ་མོ། །རིག་པ་ཤར་བ་སྙམ་མོ། །དེ་ལྟ་བུའི་འབྱུང་གནས་སངས་རྒྱས་ཀུན་གྱི་གསང་བ་དམ་པ་འདི་ནི་འདི་ལྟར་ཟབ་པ། འདི་ལྟར་རྒྱ་ཆེ་བ།
མཆོག་དམ་པ་གྱ་ནོམ་པ། ཕུལ་དུ་གྱུར་པ་འདི་མཐོང་བར་མཛད་པའི་སྐྱེས་བུ་ཆེན་པོ་ཁྱོད་བདག་ཅག་རྣམས་ཀྱི་ཕ་ལགས་སོ། །བདག་ཅག་རྣམས་ཀྱི་མ་ལགས་སོ། །སྐྱེས་བུ་ཆེན་པོ་ཉིད་ལྟ་མ་ལགས་ཀྱི་དམ་པ་འདི་ལ་གནས་པའི་གང་ཟག་གང་ཞིག་
ཀྱང་བདག་ཅག་རྣམས་ཀྱི་ཕ་ལགས་སོ། །བདག་ཅག་རྣམས་ཀྱི་མ་ལགས་སོ། །སྲིད་པ་འགྲེ་བཟློག་ཀྱང་བཀའ་འགྲེ་མི་བཟློག །ཀྱེ་མའོ་སྐྱེས་བུ་ཆེན་པོ་ཁྱེད་ལྟ་ཅི་སྨོས། ཁྱོད་ཀྱི་དམ་པ་འདི་ལ་གནས་པའི་གང་ཟག་ཀྱང་འདི་ལྟར་ལྷའི་དབང་པོ་
གཙུག་གི་ནོར་བུ་བཞིན་སྤྱི་བོས་བསྐུར་བར་བགྱིའོ། །དེའི་ཁྱོ་མོ་དང་། བུ་དང་། བུ་མོ་དང་། ནོར་དང་། གཡོག་དང་། ཡང་གཡོག་དང་། འཁོར་དང་། ཉེ་དུ་དང་། སྣག་གི་གཉེན་མཚམས་དང་། ཕྲུ་མ་དང་། ཡུལ་འཁོར་དང་། ཡུལ་ཁམས་
ཀྱི་སྐྱེ་བོ་གང་ཆོས་ཡོངས་སུ་སྲུང་བ་རྣམས་ཀྱང་བསྲུང་བ་དང་། བསྐྱབ་པ་དང་། སྦ་བར་བགྱིའོ། །ཆོས་སྲུང་བ་དེ་དག་ལ་འཚེ་བའི་མི་དང་མི་མ་ལགས་པ་གང་ལགས་པ་དེ་དག་ཀྱང་ཡོངས་སུ་གཞོམ་ཞིང་བརླག་པར་བགྱིའོ། །མཚམས་གཅད་ཅིང་བཅིང་
བར་བགྱིའོ། །དེ་དག་གི་གང་བསམ་པ་དང་ཅི་བཅོལ་བ་རིལ་ཡང་བྲན་གྱི་བྱ་བས་ཡོངས་སུ་རྫོགས་པར་བགྱིའོ། །དེ་དག་གིས་ཀྱང་ཆོས་སྲུང་ཞིང་ཆོས་བཞིན་དུ་གནས་ནས་བདག་ཅག་རྣམས་ཀྱི་ཅི་ཡང་ཡིད་བཞིན་དུ་གྲུབ་པ། ལྷ་ཆེན་པོ་རྣམས་ཀྱི་གསང་
སྔགས་འཇིག་རྟེན་མངོན་རྟགས་ཀྱི་འབྱུང་གནས་རྡོ་རྗེ་མཐུ་བོ་ཆེས་མངོན་པའི་མཐུ་ཅན་དུ་བརྗོད་པ་དང་། དམ་རྫས་དང་། དགེ་མཚན་དང་། རྟགས་རྟེན་རྣམས་ཀྱང་བདག་ཅག་དང་འབྲེལ་བའི་ཆེད་དུ་བཅང་བར་བགྱི་བ་ལགས་སོ། །དེ་ཅིའི་སླད་དུ་ཞེ་ན།

དེ་དག་ནི་བདག་ཅག་གི་དམ་པ་ལགས་པའི་སླད་དུའོ། །ཀྱེ་མའོ་སྐྱེས་བུ་ཆེན་པོ་འདི་ལྟ་སྟེ། བདག་ཅག་རྣམས་ཀྱི་གསང་སྔགས་མངོན་པའི་མཐུ་ཅན་འདི་ནི། བསྙེན་སྒྲུབ་ཡན་ལག་བཞི་དང་བཅས་པ་སྟེ། དེ་ཡང་གང་ཞེས་ན་འདི་ལྟ་སྟེ། ཨོྃ་བྷུར་ཁུང་མ་ཧཱ་པྲ་
ཎ་ཡ། བྷུརྩི་བྷུརྐི། བྱི་ག་གེ། བི་མ་ན་སེ། ཨེ་ཧོ་ཤི་མོ། ཨུ་ཙྪུཥྨ་ཀྲོ་དྷ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། སྐྱེས་བུ་ཆེན་པོ་དེ་ནི་བསྙེན་པའི་ཡན་ལག་ལགས་སོ། །ཨོཾ་བྷུ་དུ་གུརྨ། ཨ་པྲ་ཎ། བྷུརྩི་ཙི་ཀྱི་ཕྱི། མན་སྱེ། ཁ་ཤོ་མོ་ག་ཀྲོ་དྷ། ཧཱུྃ་ཧཱུྃ་ཕཊ་ཕཊ་སྭཱ་ཧཱ།
སྐྱེས་བུ་ཆེན་པོ་དེ་ནི་ཉེ་བའི་བསྙེན་པར་རིག་པར་བྱའོ། །ཨོཾ་བྷུ་དུ་ཀུ་རུ། ཨི་ཙི་ཀི་ཕྱི་ཨུ་ཙྪུསྨ་ཀྲོ་དྷ་ཧཱུྃ་ཕཊ། སྐྱེས་བུ་ཆེན་པོ་འདི་ནི་སྒྲུབ་པར་རིག་པར་བྱའོ། ཨོྃ་བྷུརྐུ་ཏི་ཕཊ། སྐྱེས་བུ་ཆེན་པོ་འདི་ནི་སྒྲུབ་པ་ཆེན་པོར་རིག་པར་བྱའོ། །སྐྱེས་བུ་ཆེན་པོ་འདི་དག་ཀྱང་
རེ་རེ་ཞིང་འབུམ་འབུམ་རྫོགས་ནས་གདོད་ཅིག་གང་བྱ་བའི་ལས་ལ་འཇུག་ན་ཐེ་ཚོམ་མ་མཆིས་པར་འགྲུབ་པ་ལགས་སོ། །དེ་ཅིའི་སླད་དུ་ཞེ་ན། དུས་གསུམ་གྱི་སངས་རྒྱས་རྣམས་ཀྱིས་ཀྱང་མངོན་པའི་མཐུ་ཅན་དུ་བསྔགས་པ་བརྗོད་པ་ལགས་སོ། །རྡོ་རྗེ་མཐུ་
བོ་ཆེས་ཀྱང་འཇིག་རྟེན་གྱི་མངོན་རྟགས་འདིས་མཛད་པ་ལགས་སོ། །བདག་ཅག་རྣམས་ཀྱིས་ཀྱང་ཆོ་འཕྲུལ་གྱི་མངོན་རྟགས་འདིས་བགྱིད་པ་ལགས་ཏེ། སྐྱེས་བུ་ཆེན་པོ་གསང་སྔགས་འདི་གང་གིས་ཆེད་དུ་གཉེར་བར་མངོན་རྟགས་མ་མཆིས་ན་བདེ་བ་ཡོང་མ་
མཆིས་པ་ལགས་སོ། །བཀའ་ཚད་མ་རྣམས་ཀྱང་ངེས་པར་མ་མཆིས་པ་ལགས་སོ། །བདག་ཅག་རྣམས་ཀྱང་རང་རང་གི་ངག་བདེན་པའི་དམ་པ་ལས་ཉམས་པའི་སླད་དུ་དམྱགས་མ་མཆིས་པར་མགོ་འགས་ཤིང་ཁྲག་ཏུ་སྐྱུག་པ་ལགས་སོ། །སྐྱེས་བུ་ཆེན་པོ་
དེ་བས་ན་གསང་སྔགས་འདི་ལ་ནི་ཐེ་ཚོམ་མ་མཆིས་ཏེ་གང་ཞིག་གང་ལ་ཕན་པ་སྒྲུབ་ཅིང་ངོ་མཚར་བསྐྱེད་པ་དང་། བླུན་པོ་དག་སངས་རྒྱས་ཀྱི་བཀའ་ལ་ཡིད་ཆེས་པར་བགྱི་བའི་ཐབས་དམ་པ་རྣམས་ཀྱིས་བཤད་པ་ལགས་ཏེ། དེ་དག་གིས་ཡན་ལག་བཞི་པ་འདི་

རྟག་ཏུ་བསྟེན་ན་ལེགས་སོ་ཞེས་གསོལ་པ་ལས། སྐྱེས་བུ་དམ་པ་དེས་བཀའ་སྩལ་པ། ཨ་ཧོཿ། རིགས་སོ། །སྟད་དོ། །ཡིན་ནོ། །ངེས་སོ། །བདེན་ནོ། །ལེགས་སོ། །མ་རུངས་པ་ཁྱེད་མ་དང་བཅས། ཆུང་མ་དང་བཅས། བུ་དང་བུ་
མོ་དང་བཅས། གཡོག་དང་ཡང་གཡོག་དང་བཅས་པ་ཁྱེད་རྣམས་བརྩེ་བ་དང་མ་བྲལ་ན་མར་བྱའོ། །གདུང་བ་དང་མ་བྲལ་ན་སྲིང་མོར་བྱའོ། །བརྩོན་པ་དང་མ་བྲལ་ན་བྲན་དུ་བྱའོ། །བྱང་ཆུབ་ཀྱི་སེམས་དང་མ་བྲལ་ན་བུར་བྱའོ། །འདུ་འབྲལ་མེད་ན་སློབ་
མར་བྱའོ། །བསྐུལ་བ་ལ་མགྱོགས་ན་ཕོ་ཉར་བྱའོ། །བཀའ་བཞིན་བྱེད་ན་བཀའ་ལ་གདགས་སོ་ཞེས་རྣལ་འབྱོར་ཆེན་པོའི་གྲལ་དུ་བཞག་སྟེ། ཆོས་དང་གང་ཆོས་སྲུངས་པ་རྣམས་ཀྱི་སྲུང་མར་དབང་བྱིན་ནོ། །སངས་རྒྱས་ཀུན་གྱི་དགོངས་པ་འདུས་པའི་
མདོ་ཆེན་པོ་ལས་ཐར་པ་ནག་པོ་གོལ་བ་ལ་མ་གོལ་བར་ལུང་བསྟན་པའི་ལེའུ་སྟེ་སུམ་ཅུ་གཅིག་པའོ།། །།ཐེག་པ་ཆེན་པོ་ངེས་པར་འབྱུང་བའི་ཚུལ་ལས་གདུལ་བྱའི་སྐབས་ལ་བབ་པའི་ཚེ་ན་རུ་ཏྲ་ཡོངས་སུ་བཏུལ་བའི་གཏམ་རྒྱུད་བརྗོད་པའི་
ཆོས་ཀྱི་ཕྱག་རྒྱའི་ཡེ་ཤེས་རྣམ་པར་བགྲོས་པ་སྟེ་བྱུང་ཚུལ་བསྟན་པ་དྲུག་པའོ།། །།བམ་པོ་ལྔ་པར་ཟུག་པ། དེ་ནས་ཡང་ལང་ཀའི་བདག་པོ་བྱང་ཆུབ་སེམས་དཔའ་སེམས་དཔའ་ཆེན་པོ་དེས་གསང་བ་པའི་བདག་པོ་དེ་ལ་སྔོན་དུ་བྱུང་བའི་ཚིག་བཅུ་གཉིས་
པའི་བདུན་པ་བྱིན་གྱི་བརླབས་ལས་སྣང་བ་ན་ཡང་བྱུང་ཞེས་འབྱུང་བ་འདི་སྐད་ཅེས་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ་ཉིད་ཀྱིས་ཐེག་པ་ཆེན་པོ་གསང་བ་དམ་པ་བྱུང་བའི་ཚུལ་སྟོན་པས་ལུང་བསྟན་པ་གཏམ་དུ་བརྗོད་པའི་སྐབས་སུ་བྱིན་གྱི་བརླབས་
ལས་སྣང་བ་ན་ཡང་གྱུང་ཞེས་བརྗོད་པ་དེ་ཇི་ལྟ་བུ་ཞིག་ཏུ་སྣང་ཞིང་གྲགས་པ་ལགས། སྨྲས་པ། ལང་ཀའི་བདག་པོ་གང་གདུལ་བྱའི་སྐབས་ལ་བབ་པར་གདུལ་བྱ་ཡོངས་སུ་རྫོགས་པའི་སྐྱེས་བུ་དེ་དག་ཡོངས་སུ་སྣང་བ་དེ་ཁོ་ན་ཉིད་ལ་བྱའོ། །སྨྲས་པ། གསང་བ་

བའི་བདག་པོ་གང་གདུལ་བྱ་སྐབས་ལ་བབ་པར་གདུལ་བྱ་ཡོངས་སུ་རྫོགས་པའི་སྐྱེས་བུ་དམ་པ་དེ་དག་གང་དུ་ཇི་ལྟར་སྣང་བར་འགྱུར། དེ་སྐད་ཅེས་དྲིས་པ་ལས། གསང་བ་པའི་བདག་པོས་འདི་སྐད་ཅེས་སྨྲས་སོ། །ཀྱེ་ལང་ཀའི་བདག་པོ་གདུལ་བྱ་ཡོངས་སུ་རྫོགས་
པའི་སྐྱེས་བུ་དམ་པ་དེ་དག་ནི་ཐམས་ཅད་ཡོངས་སུ་སྣང་བར་འགྱུར་རོ། །དྲིས་པ། དེ་ཇི་ལྟར་ཡོངས་སུ་སྣང་བར་འགྱུར། སྨྲས་པ། ལང་ཀའི་བདག་པོ་སྐྱེས་བུ་དམ་པ་དེ་དག་ནི་ཆོས་རྣམས་ཀྱི་ཆོས་ཉིད་དེ་ཁོ་ན་ཉིད་ལས་མི་གཞན་ལ། དེ་ལས་ནི་རྣམ་ཤེས་དང་།
ཡེ་ཤེས་དང་། སྐུ་དང་། སྤྲུལ་པ་དང་། ཡི་གེ་དང་། ཚིག་དང་། ཆོས་དང་། སྐུ་གདུང་དང་རིང་བསྲེལ་ལ་སོགས་པ་ཆོས་ཐམས་ཅད་དུ་སྣང་ངོ་། །ལང་ཀའི་བདག་པོ་དེ་ཁོ་ན་ཉིད་ཀྱི་བྱིན་གྱི་བརླབས་འབའ་ཞིག་ལས་སྣང་བར་འགྱུར་ཏེ། ལང་ཀའི་བདག་
པོ་ཇི་ལྟ་ཇི་ལྟར་ནམ་མཁའི་དབྱིངས་ན་ཉི་ཟླ་སྐར་ཚོགས་ལས་མ་གཡོས་པའི་གཟུགས་བརྙན་ཆུ་དང་བ་ཐ་དད་པར་སྣང་བ་བཞིན། ཆོས་རྣམས་ཀྱི་ཆོས་ཉིད་གསང་བའི་དབྱིངས་རྣམ་པར་དག་པ་ལས་ཆོས་ཐམས་ཅད་སྣང་བ་ཡིན་ལ། ཆོས་ཐམས་ཅད་ནི་སྐུ་
གསུང་ཐུགས་ཡོན་ཏན་ཕྲིན་ལས་ལྔ་ཁོ་ནར་ཟད་དེ། དེ་ནི་གང་ཐེག་པ་ཆེན་པོའི་གསང་སྔགས་མཚོན་པར་བྱེད་པའི་སྒོར་སྣང་བ་ཡིན་ནོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ཀྱི་རང་བཞིན་གསང་བའི་དབྱིངས་གང་ཡིན་པ་དེ་ནི་ཐེག་པ་ཆེན་པོའི་གསང་
སྔགས་དེ་ཁོ་ན་ཉིད་ཡིན་པར་ཕྱིན་ཅི་མ་ལོག་པར་ངེས་པའི་ཕྱིར་རོ། །དེ་ལ་ནི་ངོ་བོ་ཉིད་ཀྱི་སྐུ་ཞེས་བྱ་བར་གྲགས་ཤིང་གྲགས་པར་གྱུར་ཏོ། །ལང་ཀའི་བདག་པོ་གང་སེམས་ཀྱི་ཆོས་ཉིད་ལས་ནི་རྣམ་པར་ཤེས་པ་བཞིར་སྣང་ལ། རྣམ་པར་ཤེས་
པ་བཞི་ནི་རྩ་བའི་རྣམ་པར་ཤེས་པ་དང་། དམིགས་པའི་རྣམ་པར་ཤེས་པ་དང་། ཀུན་དུ་སྣང་བའི་རྣམ་པར་ཤེས་པ་དང་། འཇུག་པའི་རྣམ་པར་ཤེས་པའོ། །རྣམ་པར་ཤེས་པ་བཞི་ལས་ཡེ་ཤེས་ཆེན་པོ་ལྔར་སྣང་སྟེ། སེམས་ཀྱི་ཆོས་ཉིད་

དེ་ཁོ་ན་ཉིད་ལས་ཆོས་ཉིད་ཀྱི་དབྱིངས་ཀྱི་ཡེ་ཤེས་སུ་སྣང་ངོ་། །རྩ་བའི་རྣམ་པར་ཤེས་པ་ལས་མེ་ལོང་ལྟ་བུའི་ཡེ་ཤེས་སུ་སྣང་ངོ་། །དམིགས་པའི་རྣམ་པར་ཤེས་པ་ལས་མཉམ་པ་ཉིད་ཀྱི་ཡེ་ཤེས་སུ་སྣང་ངོ་། །ཀུན་དུ་སྣང་གི་རྣམ་པར་ཤེས་
པ་ལས་སོ་སོར་རྟོག་པའི་ཡེ་ཤེས་སུ་སྣང་ངོ་། །འཇུག་པའི་རྣམ་པར་ཤེས་པ་ལས་བྱ་བ་སྒྲུབ་པའི་ཡེ་ཤེས་སུ་སྣང་ངོ་། །ལང་ཀའི་བདག་པོ་དེ་ཡང་མིན་པ་ཞིག་ཡིན་པར་བསྒྲུབས་པའམ། མི་འདྲ་བ་ཞིག་འདྲ་བར་བཅོས་པ་ནི་མ་ཡིན་གྱི། མ་བཅོས། མ་
བསླད། མ་བྱས་པ། མ་བརྩམས་པར་ཡེ་ནས་རང་བཞིན་གྱིས་དེ་ལྟར་སྣང་བ་ཉིད་དུ་ཟད་དོ། །དེ་ནས་ལང་ཀའི་བདག་པོས་དྲིས་པ། གསང་བ་པའི་བདག་པོ་གང་གི་ཡེ་ཤེས་འདི་ལྟར་ལྔ་ཁོ་ནར་ཟད་དམ། འོན་ཏེ་གཞན་ཐ་དད་པར་ཡང་སྣང་། སྨྲས་པ།
ལང་ཀའི་བདག་པོ་ཡེ་ཤེས་ནི་གང་གི་དབང་གིས་ལྔར་ཡང་སྣང་ལ། བསམ་གྱིས་མི་ཁྱབ་པ་དང་། སྐད་ཅིག་བཅུ་དྲུག་དང་། རིགས་གཅིག་པ་དང་། རྣམ་པ་གསུམ་དང་། དེ་ཁོ་ན་ཉིད་གསུམ་དང་། རྣལ་འབྱོར་བཞི་དང་། རང་འབྱུང་བ་གཅིག་གོ། །ལང་
ཀའི་བདག་པོ་དེ་ལ་ཡེ་ཤེས་ལྔ་སོ་སོར་མ་འདྲེས་པ་ལས་ནི་རིགས་ལྔར་སྣང་ལ། ཡོངས་སུ་རྫོགས་པ་ལས་ནི་སྐུ་བཞིར་སྣང་ངོ་། །འདི་ལྟ་སྟེ། རྩ་བའི་རྣམ་པར་ཤེས་པ་མེ་ལོང་ལྟ་བུའི་ཡེ་ཤེས་ལས་ནི་རྡོ་རྗེའི་གདུང་དང་སྡེའི་སངས་རྒྱས་ཤ་དག་ཏུ་སྣང་ངོ་། །སེམས་
ཀྱི་ཆོས་ཉིད་ཆོས་ཀྱི་དབྱིངས་ཀྱི་ཡེ་ཤེས་དེ་ཁོ་ན་ཉིད་ལས་ནི་གླང་པོའི་གདུང་དང་སྡེའི་སངས་རྒྱས་ཤ་དག་ཏུ་སྣང་ངོ་། །དེ་ཉིད་ལ་ནི་ངོ་བོ་ཉིད་ཀྱི་སྐུ་ཞེས་སྣང་ལ། ཡེ་ཤེས་དེ་གཉིས་འདུས་པ་ལས་ནི་ཆོས་ཀྱི་སྐུར་སྣང་ངོ་། །དམིགས་པའི་རྣམ་པར་ཤེས་པ་
མཉམ་པ་ཉིད་ཀྱི་ཡེ་ཤེས་ལས་ནི་ནོར་བུའི་གདུང་དང་སྡེའི་སངས་རྒྱས་ཤ་དག་ཏུ་སྣང་ངོ་། །ཀུན་དུ་སྣང་བའི་རྣམ་པར་ཤེས་པ་སོ་སོར་རྟོག་པའི་ཡེ་ཤེས་ལས་པདྨོའི་གདུང་དང་སྡེའི་སངས་རྒྱས་ཤ་དག་ཏུ་སྣང་ངོ་། །ཡེ་ཤེས་དེ་གཉིས་འདུས་པ་ལས་ནི་རྫོགས་

ལོངས་སྤྱོད་པའི་སྐུར་སྣང་ངོ་། །འཇུག་པའི་རྣམ་པར་ཤེས་པ་བྱ་བ་གྲུབ་པའི་ཡེ་ཤེས་ལས་གཞོན་ནུའི་གདུང་དང་སྡེའི་སངས་རྒྱས་ཤ་དག་ཏུ་སྣང་ངོ་། །དེ་ཉིད་ལས་ནི་གསང་བའི་སྐུ་དང་སྤྲུལ་པའི་སྐུ་ཐ་དད་པར་སྣང་ངོ་། །སྤྲུལ་པའི་སྐུ་ཐ་དད་པ་ལས་ནི་ཡི་
གེ་ཐ་དད་པ་དང་། ཚིག་ཐ་དད་པ་དང་། ཆོས་ཀྱི་སྒོ་དཔག་ཏུ་མེད་པ་དང་། སྐུ་གདུང་དང་རིང་བསྲེལ་ཐ་དད་པར་སྣང་སྟེ། དེ་དག་ནི་ཐེག་པ་ཆེན་པོ་གསང་སྔགས་ཀྱི་སྒོ་མཚོན་པར་སྣང་བ་ཡིན་ནོ། །ལང་ཀའི་བདག་པོ་དེ་བས་གསང་སྔགས་ནི་ཆོས་ཐམས་
ཅད་ལ་ཐམས་ཅད་དུ་རང་བཞིན་གྱིས་སྣང་བ་ཡིན་ལ། སྐྱེས་བུ་དམ་པ་རྣམས་ནི་གསང་སྔགས་ཀྱི་བྱིན་གྱི་བརླབས་ཀྱིས་སྣང་བར་སྟོན་པར་མངོན་པ་ཡིན་ནོ། །ལང་ཀའི་བདག་པོ་དེ་ཅིའི་ཕྱིར་ཞེ་ན། གསང་སྔགས་ཀྱིས་མ་ཁྱབ་པ་དང་། མི་གནས་པ་
དང་། གསང་སྔགས་སུ་མ་གྱུར་པའི་ཆོས་ནི་གང་ཡང་མེད་དེ། གསང་སྔགས་ཀྱི་ངེས་པ་ཕྱིན་ཅི་ལོག་པར་རྙེད་པའི་སྐྱེས་བུ་དམ་པ་ལ་ལ་དག་གསང་སྔགས་མཐོང་བར་འདོད་པའི་མེ་ལོང་དུ་ནི་ཐམས་ཅད་འགྱུར་ཏེ། ཇི་ལྟ་ཇི་ལྟར་སངས་རྒྱས་ནས་སྲོག་
ཆགས་ལྡེམ་བུ་དང་ནམ་མཁའ་ནས་ཕྲ་རྡུལ་ཡན་ཆད་ཀྱིས་ལྷན་ནེ། ལྷང་ངེ། ལྷག་གེར་གསལ་བར་བྱེད་པའོ། །ཐེ་ཚོམ་གཅོད་པར་བྱེད་པའོ། །མཛོད་དམ་པར་གྱུར་པའོ། །གླེགས་བམ་ཆེན་པོར་གྱུར་པའོ། །རྒྱ་ཆེན་པོར་བཤད་པའོ། །ཡོངས་སུ་
གོ་བར་སྒྲོགས་པའོ། །ལང་ཀའི་བདག་པོ་དེ་བས་ན་གསང་སྔགས་ནི་རང་བཞིན་གྱིས་སྣང་བར་ཟད་ལ། སྐྱེས་བུ་དམ་པ་རྣམས་ཀྱིས་ནི་བྱིན་གྱི་བརླབས་ཀྱིས་སྟོན་པར་ཟད་དོ། །ལང་ཀའི་བདག་པོས་སྨྲས་པ། གསང་བ་པའི་བདག་པོ་ཅིག་ཐམས་ཅད་
སྣང་བ་དེ་གསང་སྔགས་སམ། འོན་ཏེ་ཐམས་ཅད་ཀྱི་རང་བཞིན་མི་སྣང་བ་དེ་གསང་སྔགས་སམ། ཅི་གཉི་ག་མ་ཡིན་པ་ཞིག་གསང་སྔགས་ཡིན། གསང་བ་པའི་བདག་པོས་སྨྲས་པ། ཀྱེ་ལང་ཀའི་བདག་པོ་ཐམས་ཅད་སྣང་བ་དེ་ཡང་གསང་

སྔགས་མ་ཡིན། གལ་ཏེ་གསང་སྔགས་ཡིན་ན་ནི་གསང་སྔགས་ཞེས་བརྗོད་པ་ཉིད་འགལ་ལ། གང་སེམས་ཅན་གྱི་འདུ་ཤེས་དང་སངས་རྒྱས་ཀྱི་དགོངས་པ་ཡང་ཁྱད་པར་མེད་པར་འགྱུར་རོ། །དེ་ལས་གཞན་ན་ཡང་གསང་སྔགས་ཡོད་པ་
མ་ཡིན། གལ་ཏེ་དེ་ལས་གཞན་པ་འབའ་ཞིག་གསང་སྔགས་ཡིན་ན་ནི་ཐམས་ཅད་ཆོས་ཉིད་དུ་མ་འདུས་པར་འགྱུར་རོ། །ཐམས་ཅད་ཀྱི་རང་བཞིན་མི་སྣང་བ་དེ་ཡང་གསང་སྔགས་ཡིན་ན་ནི། གཞན་དུ་མུ་ཆད་པ་དག་ཡང་དག་པར་རྫོགས་པ་ཉིད་དུ་གྱུར་ཏོ། །
གང་གཉི་ག་མ་ཡིན་པ་དེ་ཡང་གསང་སྔགས་མ་ཡིན། གལ་ཏེ་གཉིས་ཀ་མ་ཡིན་པ་ཞིག་གསང་སྔགས་ཡིན་ན་ནི་གསང་སྔགས་ཞེས་བྱ་བ་ཞིག་བཙལ་བས་རྙེད་པའི་གནས་གཞན་ན་མེད་དོ། །ལང་ཀའི་བདག་པོས་སྨྲས་པ། གསང་བ་པའི་བདག་པོ་འོ་ན་ཅི་
གསང་སྔགས་ཞེས་བགྱི་བ་གང་ལགས། གསང་བ་པའི་བདག་པོས་སྨྲས་པ། ལང་ཀའི་བདག་པོ་གསང་སྔགས་ཞེས་བྱ་བ་ནི་སྣང་བ་དང་མི་སྣང་བ་གཉིས་སུ་མེད་པ། གཉིས་ཀྱི་ངོ་བོ་ཉིད་ལས་གྲོལ་བ། དབུ་མར་མི་དམིགས་པ་གང་ཡིན་པ་དེ་ཁོ་ན་ཉིད་
དོ། །ལང་ཀའི་བདག་པོས་སྨྲས་པ། གསང་བ་པའི་བདག་པོ་འོ་ན་གསང་སྔགས་ཀྱི་ངོ་བོ་དེ་རབ་ཏུ་དཔག་པར་དཀའ་ཞིང་བལྟ་བར་དཀའ་ན་དེ་གང་གིས་བལྟ་བར་བྱ། གསང་བ་པའི་བདག་པོས་སྨྲས་པ། ལང་ཀའི་བདག་པོ་གསང་སྔགས་ཀྱི་ངོ་བོ་དེ་ནི་
གང་གི་བློ་ཤིན་ཏུ་ཞིབ་པ། ཆེས་ཞིབ་པ། ཤིན་ཏུ་ཟབ་པ། ཆེས་ཟབ་པས་བལྟ་བར་བྱའོ། །སྨྲས་པ། གསང་བ་པའི་བདག་པོ་བློ་ཞིབ་པ། ཤིན་ཏུ་ཞིབ་པ། ཆེས་ཞིབ་པ་ནི་གང་ལགས། ཤིན་ཏུ་ཟབ་པ། ཆེས་ཟབ་པ་ནི་གང་ལགས། སྨྲས་པ།
ལང་ཀའི་བདག་པོ་བློ་ཤིན་ཏུ་ཞིབ་པ། ཆེས་ཞིབ་པ་ནི་འདི་ལྟ་སྟེ། གང་ལ་ལ་དག་སའི་ཁམས་འདི་ལ་དཔག་ཚད་གཅིག་ལ་རྡུལ་ཕྲ་རབ་མི་འཁྲུགས་ཁྲག་ཁྲིག་གཅིག་དང་། བྱེ་བ་ཁྲག་ཁྲིག་འབུམ་ཕྲག་སུམ་ཅུ་དང་། བྱེ་བ་དྲུག་ཅུ་ཕྲག་བརྒྱ་དང་།

བྱེ་བ་ཕྲག་སུམ་ཅུ་རྩ་གཉིས་དང་། འབུམ་ཕྲག་ལྔ་དང་ཁྲི་ཉིས་སྟོང་ཡོད་ལ། དེ་དག་ལ་ཡང་མེ་དང་། ཆུ་དང་། རླུང་གི་རྡུལ་ཕྲ་རབ་ཏུ་ཕྱེ་ནས་སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་ཆེན་པོ་གཅིག་ལ་རྡུལ་ཕྲ་རབ་ཏུ་ཡོད་པའི་རྩིས་ཀྱིས་གཅོད་
པ་དང་། གཞན་ཡང་ཕྱིའི་ས་ཆེན་པོ་འདི་ལ་དབྱིབས་ཐ་དད་པ་མཐའ་ཡས་པ་དག་བརྟགས་ཏེ་འདི་དག་ནི་འབྱུང་བ་འཁྱུགས་པ་དང་། འཁྱུལ་བ་དང་། འཕྲིས་པ་དང་། འཁྱོགས་པ་དང་། འཁྲིལ་བ་དང་། འཁིལ་བ་དང་། ལྗར་བ་དང་། གཤར་བ་དང་།
ཞ་བ་དང་། ལྡེམས་པ་དང་། འབུས་པ་དང་། འཁྲིས་པ་དང་། འཆུས་པ་ལ་སོགས་པ་ཐ་དད་པའི་དབང་གིས་སོ་སོར་རྟོག་པ་དང་། གཞན་ཡང་མིང་དང་། བརྡ་དང་། མཚན་མ་དང་། ཐ་སྙད་དང་། བཏགས་པ་སྣ་ཚོགས་ཀྱི་རྗེས་སུ་འཇུག་ཅིང་སོ་སོའི་
མཚན་ཉིད་མཐའ་ཡས་པའི་རྗེས་སུ་རྟོག་མཐའ་མངས་པ་དང་། དཔྱོད་མཐའ་ཆེར་འགྲོ་བ་དག་གི་རྒྱུས་ཐམས་ཅད་མཁྱེན་པ་དག་གི་རྒྱུར་འགྲོ་ཞེས་ཟེར་བ་དག་ཡོད་དེ། ལང་ཀའི་བདག་པོ་དེ་དག་ལ་ནི་ཤིན་ཏུ་ཞིབ་པ། ཆེས་ཞིབ་པ་ཞེས་མི་བྱའི། དེ་དག་ནི་
རྩིང་བ། ཆེས་རྩིང་བ་ཞེས་བྱའོ། །དེ་ཅིའི་ཕྱིར་ཞེ་ན། བླུན་པོ་གང་དག་བྱེ་མ་ལ་གསེར་ཕྱེ་བཙག་པར་འདོད་ན་ལྷང་ཚེར་ལ་གསེར་ཕྱེར་འདུ་ཤེས་ཏེ་ཚོལ་བ་བཞིན། རྣམ་པ་ཐམས་ཅད་མཐོང་ཞིང་རྙེད་པར་མི་འགྱུར་རོ། །དེ་ཅིའི་ཕྱིར་ཞེ་ན། དེ་ལ་ནི་རྣམ་པ་
ཐམས་ཅད་ཡོད་དེ་ཡེ་ཤེས་མེད་པའི་ཕྱིར་རོ། །ལང་ཀའི་བདག་པོ་གང་བློ་ཞིབ་པ། ཆེས་ཞིབ་པ་ནི་འདི་ལྟ་སྟེ། ཆོས་གཅིག་གི་ཆོས་ཉིད་དེ་ཁོ་ན་ཉིད་ཕྱིན་ཅི་མ་ལོག་པར་ཤེས་པས་ཆོས་ཐམས་ཅད་ཀྱི་ཆོས་ཉིད་དེ་ཁོ་ན་ཉིད་ཕྱིན་ཅི་མ་ལོག་པར་ཤེས་པས་སོ། །
གང་རྡུལ་ཕྲ་རབ་དང་། དབྱིབས་སྣ་ཚོགས་དང་། མིང་དང་། བརྡ་དང་། མཚན་མ་དང་། ཐ་སྙད་དང་། བཏགས་པ་ཐམས་ཅད་ངང་གིས་ཤེས་པར་འགྱུར་ཏེ། དེ་ལ་ནི་རྣམ་པ་ཐམས་ཅད་དང་། ཡེ་ཤེས་གཉིས་སུ་མེད་པ། གཉིས་ཀྱི་ངོ་བོ་ལས་

གྲོལ་བར་ཡོད་པའི་ཕྱིར་མ་མཐོང་མི་ཤེས་པའི་ཆོས་གཅིག་ཀྱང་མེད་དོ། །ལང་ཀའི་བདག་པོ་བློ་ཟབ་པ། ཆེས་ཟབ་པ་ནི་གང་ཞེ་ན། གང་ལ་ལ་དག་ཆོས་ཐམས་ཅད་ལ་མུ་དང་། གཏིང་དང་། མཐའ་དང་། དབུས་ཚོལ་ཞིང་འབྱེད་པ་དག་
ཡོད་དེ། དེ་དག་ནི་བློ་ཟབ་པ་ཆེས་ཟབ་པ་ཞེས་མི་བྱའི། ཐུག་པ་ཉིད་དུ་ཐུག་པ་ཞེས་བྱའོ། །དེ་ཅིའི་ཕྱིར་ཞེ་ན། གང་འཁྲུལ་པ་དག་སྨིག་རྒྱུ་ལ་ཆུར་འདུ་ཤེས་ཏེ་སྙེག་པའམ། ལྡོངས་པ་དག་ནམ་མཁའི་མཐའ་ཚོལ་བ་བཞིན། ཆོས་ཐམས་ཅད་ཀྱི་མུ་དང་།
གཏིང་དང་། མཐའ་དང་། དབུས་བཙལ་བས་ཀྱང་མི་རྙེད་ལ་དབྱེ་བར་ཡང་མེད་དོ། །ལང་ཀའི་བདག་པོ་འོན་ཏང་ནི་ཆོས་ཐམས་ཅད་ལ་མུ་དང་གཏིང་མེད་པ། མཐའ་དང་དབུས་མེད་པར་ཆུབ་པ་གང་ཡིན་པ་དེ་ནི་བློ་ཟབ་པ། ཆེས་ཟབ་པ་ཞེས་བྱའོ། །དེ་ཅིའི་
ཕྱིར་ཞེ་ན། སངས་རྒྱས་ཀུན་གྱི་དགོངས་པ་ཐམས་ཅད་ནི་རྟོག་དཔྱོད་དང་བྲལ་བའོ། །ལང་ཀའི་བདག་པོ་དེའི་ཕྱིར་གསང་སྔགས་ཀྱི་ངོ་བོ་ལ་ནི་རབ་ཏུ་དཔག་པར་དཀའ་བའི་ཕྱིར་བློ་ཞིབ་པ། ཆེས་ཞིབ་པ། ཟབ་པ་ཆེས་ཟབ་པས་བལྟ་བར་བྱའོ། །སྨྲས་པ།
གསང་བ་པའི་བདག་པོ་གསང་བའི་དབྱིངས་དེ་དཔེ་གང་ལས་ལྟོས་ཏེ་ཤེས་པར་བྱ། སྨྲས་པ། ལང་ཀའི་བདག་པོ་གསང་བའི་དབྱིངས་དེར་དཔེར་བྱ་བ་ནི་འཇིག་རྟེན་ན་མེད་དོ། །རེ་ཞིག་དཔེར་ཉེ་བར་མངོན་སུམ་པར་བྱ་ན་ནམ་མཁའ་ལ་གཟུང་བར་བྱ་སྟེ། ནམ་
མཁས་ཀྱང་བསྒྲུན་དུ་ཡོད་པ་མ་ཡིན་ཏེ། འཇིག་རྟེན་ན་མངོན་སུམ་པའི་དཔེར་དེ་ལས་མེད་པའི་ཕྱིར་དཔེར་ནམ་མཁའ་ལས་ལྟོས་ཏེ་དེ་ལས་ཤེས་པར་བྱའོ་ཞེས་དམ་པ་རྣམས་ཀྱིས་བཤད་དོ། །སྨྲས་པ། གསང་བ་པའི་བདག་པོ་གསང་བ་པའི་
དབྱིངས་དང་ནམ་མཁའ་གཉིས་ཆོས་ཇི་ལྟར་མཐུན་པར་སྦྱར་བར་བྱས། སྨྲས་པ། ལང་ཀའི་བདག་པོ་གསང་བའི་དབྱིངས་དང་ནམ་མཁའ་ཉིད་ཀུན་དུ་ཆོས་མཐུན་པ་ནི་མ་ཡིན་ཏེ། རང་རིག་སྟོང་པ་ཉིད་དང་། རིག་མེད་སྟོང་པ་ཉིད་ཀྱི་ཕྱིར་རོ། །སྨྲས་པ།

གསང་བ་པའི་བདག་པོ་འོ་ན་ཅིག་གསང་བའི་དབྱིངས་དེར་ནམ་མཁའ་མ་འདུས་པ་ཞིག་གམ། སྨྲས་པ། ལང་ཀའི་བདག་པོ་དེ་ཇི་སྙམ་དུ་སེམས། གསང་བའི་དབྱིངས་དེར་ནི་ནམ་མཁའ་འདུས་ལ། ནམ་མཁའི་ཁོངས་སུ་ནི་གསང་བའི་དབྱིངས་མ་འདུས་སོ། །
སྨྲས་པ། གསང་བ་པའི་བདག་པོ་ནམ་མཁའ་གང་ལགས། སྨྲས་པ། ལང་ཀའི་བདག་པོ་ནམ་མཁའ་ནི་གང་གོ་སྐབས་ཡོད་པ་ཁོ་ནའོ། །སྨྲས་པ། གསང་བ་པའི་བདག་པོ་འོ་ན་ཅིག་གསང་བའི་དབྱིངས་དེ་ནམ་མཁས་ཇི་ལྟར་མཚོན་ཏེ་ཤེས་པར་
འགྱུར། སྨྲས་པ། ལང་ཀའི་བདག་པོ་ཆོས་མཐུན་པའི་དཔེ་ཉེ་བར་བཟུང་བ་སྟེ། གང་གི་གོ་སྐབས་ཡོད་པ་དང་མེད་པ་ལ་ཟད་མི་ཤེས་པ་དང་། སྟོང་པ་ལ་ཐམས་ཅད་འབྱུང་བ་སྟེ། ཕྱོགས་ཙམ་དུ་ཆོས་དེ་དག་མཐུན་ཀྱང་རང་རིག་པའི་དཔེར་ནི་ཕྱོགས་མེད་
དོ། །གསང་བའི་དབྱིངས་དེ་ནི་ཐམས་ཅད་རང་རིག་པའི་ཕྱིར་རང་འབྱུང་གི་ཡེ་ཤེས་ཞེས་བྱ་སྟེ། ཡེ་ཤེས་དེ་ལ་ནི་སྐབས་ཁ་ཅིག་ཏུ་ནི་རྣམ་པར་མི་རྟོག་པའི་ཡེ་ཤེས་ཞེས་བྱའོ། །ཁ་ཅིག་ཏུ་ནི་སྟོང་པ་ཉིད་ཀྱི་ཡེ་ཤེས་ཞེས་བྱའོ། །ཁ་ཅིག་ཏུ་ནི་ཆོས་
ཀྱི་དབྱིངས་ཀྱི་ཡེ་ཤེས་ཞེས་བྱའོ། །ཁ་ཅིག་ཏུ་ནི་རྣམ་དག་གསལ་བའི་ཡེ་ཤེས་ཞེས་བྱའོ། །ཁ་ཅིག་ཏུ་ནི་མཉམ་པ་ཉིད་ཀྱི་ཡེ་ཤེས་ཞེས་བྱའོ། །ཁ་ཅིག་ཏུ་ནི་སོ་སོར་རྟོག་པའི་ཡེ་ཤེས་ཞེས་བྱའོ། །ཁ་ཅིག་ཏུ་ནི་བྱ་བ་གྲུབ་པའི་ཡེ་ཤེས་ཞེས་
བྱའོ། །ལང་ཀའི་བདག་པོ་དེ་དག་ལ་ནི་ནམ་མཁའ་ལྟ་བུའི་ཡེ་ཤེས་དང་། མེ་ལོང་ལྟ་བུའི་ཡེ་ཤེས་དང་། ཆེན་པོ་ལྟ་བུའི་ཡེ་ཤེས་དང་། སྣ་ཚོགས་བཀོད་པའི་ཡེ་ཤེས་དང་། ཡིད་བཞིན་ནོར་བུའི་ཡེ་ཤེས་ཞེས་ཀྱང་བྱའོ། །ལང་ཀའི་བདག་པོ་
མེ་ལོང་ནི་ཆོས་མཐུན་པའི་དཔེ་ཉེ་བར་བཟུང་བ་སྟེ། སྐྱོན་སེལ་བ་དང་། ལེགས་པ་སྐྱེད་པ་དང་། གསལ་བར་བྱེད་པ་དང་། གཟུགས་བརྙན་འབྱུང་བ་དང་། རྩོལ་བ་མེད་པ་དང་། མངོན་པར་འདུ་བྱེད་པ་མེད་པ་དང་། ལྡན་པ་མ་ཡིན་པ་དང་། མི་ལྡན་པ་མ་

ཡིན་པ་དང་། མི་ཉེ་བ་དང་། མི་རིང་བ་དང་། ཀུན་ནས་འབྱུང་བ་དང་། ཚད་ཡོངས་སུ་མ་ཆད་པ་དང་། གཞན་མ་ཡིན་པ་དང་། བསྒྲིབས་པ་མ་ཡིན་པ་དང་། མུན་པ་མ་ཡིན་པ་དང་། བསྐལ་པ་མ་ཡིན་པ་སྟེ། ལང་ཀའི་བདག་པོ་ཕྱོགས་
ཙམ་དུ་ཆོས་དེ་དག་མཐུན་ཀྱང་རང་རིག་པ་ཉིད་ཀྱི་དཔེར་ནི་ཕྱོགས་མེད་དོ། །ལང་ཀའི་བདག་པོ་ཆེན་པོ་ནི་ཆོས་མཐུན་པའི་དཔེ་ཉེ་བར་བཟུང་བ་སྟེ། ཡོངས་སུ་རྫོགས་པར་རིག་པ་ཉིད་དེ། ཆེ་ཆུང་མེད་པར་ཡོངས་སུ་རྫོགས་པ་དང་། རིང་ཐུང་མེད་པ་དང་། བཟང་
ངན་མེད་པ་དང་། སྐྱོན་ཡོན་མེད་པ་དང་། བླང་དོར་མེད་པ་དང་། ལེགས་ཉེས་མེད་པ་དང་། གཙང་སྨེ་མེད་པ་དང་། བདེ་སྡུག་མེད་པ་དང་། མཐོ་དམན་མེད་པ་དང་། ཡངས་དོག་མེད་པ་དང་། སྒྲོ་སྐུར་མེད་པ་དང་། འདྲེས་པ་མེད་པ་དང་། མི་ཕྱེད་པར་
ཡོངས་སུ་རྫོགས་པ་སྟེ། ལང་ཀའི་བདག་པོ་ཕྱོགས་ཙམ་དུ་ཆོས་དེ་དག་མཐུན་ཀྱང་རང་རིག་པ་ཉིད་ཀྱི་དཔེར་ནི་ཕྱོགས་མེད་དོ། །ལང་ཀའི་བདག་པོ་སྣ་ཚོགས་བཀོད་པ་ནི། ཆོས་མཐུན་པའི་དཔེར་ཉེ་བར་བཟུང་བ་སྟེ། གནས་པ་དང་། འཇུག་པ་དང་། མ་
འདྲེས་པ་དང་། གསལ་བ་དང་། རྣམ་པར་ཕྱེ་བ་དང་། ལོངས་སྤྱོད་སྣ་ཚོགས་དང་། སྣང་བ་དང་། ཀུན་དུ་མ་རྨོངས་པ་སྟེ། ལང་ཀའི་བདག་པོ་ཕྱོགས་ཙམ་དུ་ཆོས་དེ་དག་མཐུན་ཀྱང་རང་རིག་པ་ཉིད་ཀྱི་དཔེར་ནི་ཕྱོགས་མེད་དོ། །ལང་ཀའི་བདག་པོ་ནོར་བུ་
རིན་པོ་ཆེ་ནི་ཆོས་མཐུན་པའི་དཔེ་ཉེ་བར་བཟུང་བ་སྟེ་རྣམ་པར་མི་རྟོག་པ་དང་། བྱ་བ་བྱེད་པ་དང་། འདོད་པ་འབྱུང་བ་དང་། དགོས་པ་ཚང་བ་དང་། རེ་བ་སྐོང་བ་དང་། རྒྱུན་མི་འཆད་པ་དང་། དགའ་བ་སྐྱེད་པ་དང་། མི་ཟད་པ་དང་། བདེ་བ་ལ་འགོད་པ་
དང་། ཐམས་ཅད་དུ་གྲུབ་པ་དང་། ཐོགས་པ་མེད་པ་དང་། མི་སྐྱོར་བ་དང་། རབ་ཏུ་སྦྱིན་པ་དང་། དགོས་པ་གྲུབ་པ་སྟེ། ལང་ཀའི་བདག་པོ་ཆོས་དེ་དག་ཕྱོགས་ཙམ་དུ་མཐུན་ཀྱང་རང་རིག་པ་ཉིད་ཀྱི་དཔེར་ནི་ཕྱོགས་མེད་དོ། །སྨྲས་པ། གསང་བ་པའི་

བདག་པོ་ཡེ་ཤེས་ཞེས་བྱ་བ་དེ་གང་དོན་གྱི་དབང་གང་གི་ཚིག་བླ་དགས་ལགས། སྨྲས་པ། ལང་ཀའི་བདག་པོ་ཆོས་ཐམས་ཅད་ཡེ་ཇི་བཞིན་པའི་དོན་ཕྱིན་ཅི་མ་ལོག་པའི་སྐྱེ་འགག་མེད་པར་མཁྱེན་པ་ལས་བཏགས་པས་ན་དེ་ན་དོན་གྱི་དབང་དེ་ཁོ་ནའི་
ཚིག་བླ་དགས་སུ་ཤེས་པར་བྱའོ། །ལང་ཀའི་བདག་པོ་ཡང་འདི་ལྟར་ནམ་མཁའ་ལྟ་བུར་གྱུར་པ་དང་། མེ་ལོང་ལྟ་བུར་གྱུར་པ་དང་། འཇའ་ཚོན་ལྟ་བུར་གྱུར་པ་དང་། དབྱིབས་དང་། ཁ་དོག་ལྟ་བུར་གྱུར་པ་དང་། སྤྲིན་རླངས་ལྟ་བུར་གྱུར་པ་དང་། མ་བཅོས་པར་སྣང་བ་དེ་ཕྱོགས་
ཙམ་དུ་ཆོས་དེ་དག་མཐུན་ཀྱང་རང་རིག་པ་ཉིད་ཀྱི་དཔེར་ནི་ཕྱོགས་མེད་དོ། །ལང་ཀའི་བདག་པོ་ཐམས་ཅད་གསལ་བ་དང་། སྒོ་མི་འགག་པ་དང་། ཆོ་འཕྲུལ་འབྱུང་བ་དང་། གཅིག་ཏུ་སྡུད་པ་དང་། ཕུན་སུམ་ཚོགས་པ་སྟེ་དེ་དག་ནི་བྱ་བ་བྱེད་པར་
རིག་པར་བྱའོ། །ལང་ཀའི་བདག་པོ་མ་འདྲེས་པ་དང་། ཡོངས་སུ་རྫོགས་པ་དང་། མ་འདྲེས་པ་ཡོངས་སུ་རྫོགས་པའི་རིལ་དང་། རྒྱུན་དང་། དམིགས་པ་མེད་པ་སྟེ། དེ་དག་ནི་བལྟ་བར་སྣང་བར་རིག་པར་བྱའོ། །ལང་ཀའི་བདག་པོ་མ་འགགས་པ་
དང་། མ་འཕྲོས་པ་དང་། མ་འཚོལ་བ་དང་། མ་ལུས་པ་དང་། རྒྱུར་གྱུར་པ་སྟེ་དེ་དག་ནི་རྩལ་གྱི་ནུས་པར་རིག་པར་བྱའོ། །ལང་ཀའི་བདག་པོ་དེ་ལྟར་ན་སེམས་ལས་ནི་སེམས་སྣང་བ་ཡིན་ལ། སྣང་བ་ནི་ཡེ་ཤེས་ངོས་ཟིན་པར་བྱ་སྟེ། དེ་དག་ཀྱང་
གསང་བ་དམ་པ་དེ་ཁོ་ན་ཉིད་ཀྱི་བྱིན་གྱི་བརླབས་སྣང་བར་རིག་པར་བྱའོ་ཞེས་སྨྲས་པས། ལང་ཀའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས་ཐུགས་ཡོངས་སུ་རྟོག་པའི་ཐེ་ཚོམ་ཆད་དོ། །སངས་རྒྱས་ཀུན་གྱི་དགོངས་པ་འདུས་པའི་མདོ་
ཆེན་པོ་ལས་ཐུགས་ཡེ་ཤེས་སྣང་བ་དམ་པའི་རྒྱན་བཀོད་པའི་ལེའུ་སྟེ་སུམ་ཅུ་གཉིས་པའོ།། །།དེ་ནས་ཡང་ལང་ཀའི་མངའ་བདག་བྱང་ཆུབ་སེམས་དཔའ་སེམས་དཔའ་ཆེན་པོ་དེས་གསང་བ་པའི་བདག་པོ་ལ་དྲིས་པ། གསང་བ་པའི་བདག་པོ་སེམས་ཀྱི་

དེ་ཁོ་ན་ཉིད་ནི་གང་ལགས། རྣམ་པར་ཤེས་པ་ནི་གང་ལགས། ཡེ་ཤེས་ནི་གང་ལགས། སྐུ་ཞེས་གང་ལ་བགྱི། གསང་བ་པའི་བདག་པོས་སྨྲས་པ། ལང་ཀའི་བདག་པོ་དྲིས་པ་དེ་བཞིན་ནི་འདི་སྐད་དུ་ཐོས་སོ། །སེམས་ནི་སེམས་དང་།
སེམས་སྣང་བ་དང་། སེམས་ལས་བྱུང་བ་སྟེ། དེ་ཉིད་དང་། དེ་འཇུག་པ་དང་། དེ་རྒྱུན་ནོ། །རྣམ་པར་ཤེས་པ་ནི་ཀུན་གཞི་དང་། འཇུག་པར་བྱེད་པའི་ཡིད་དང་རྒྱུན་དུ་འབྱུང་བའི་སྒོ་ལྔའོ། །ཡེ་ཤེས་ནི་གང་དེ་ཉིད་དུ་ངོས་ཟིན་པའོ། །སྐུ་ནི་གང་གི་འབྱུང་
འཇུག་སྣང་བའི་གཞིའོ། །ཡང་ལང་ཀའི་བདག་པོས་དྲིས་པ། གསང་བ་པའི་བདག་པོ་ངོས་ཟིན་པ་ནི་གང་། འབྱུང་བ་ནི་གང་། འཇུག་པ་ནི་གང་། སྣང་བ་ནི་གང་། གཞི་ནི་གང་། གསང་བ་པའི་བདག་པོས་སྨྲས་པ། ལང་ཀའི་བདག་པོ་གང་དྲི་བ་དེ་ལྔ་
ནི་འདི་སྐད་དུ་ཐོས་སོ། །གང་ངོས་ཟིན་པ་ནི་གཞན་ནས་མ་བྱུང་བར་ཟིན་པ་ཉིད་དོ། །དེ་ཅིའི་ཕྱིར་ཞེ་ན། ལང་ཀའི་བདག་པོ་གལ་ཏེ་གཞན་ནས་འབྱུང་བ་ཞིག་ན་ནི་གློ་བུར་བ་སྟེ་ཡེ་ཤེས་ཞེས་བྱ་བ་དེ་ཉིད་དེ་ལྟར་མི་རུང་ངོ་། །འབྱུང་བ་ནི་སྤྲུལ་པ་ལ་བྱའོ། །དེ་
ཅིའི་ཕྱིར་ཞེ་ན། སྤྲུལ་པ་ནི་མ་བྱུང་མ་མྱོང་གང་དུ་རྒྱུན་དུ་འབྱུང་བའོ། །འཇུག་པ་ནི་རྫོགས་ལོངས་སྤྱོད་པ་སྟེ། དེ་ཅིའི་ཕྱིར་ཞེ་ན། དེ་ནི་ནང་དུ་ཡང་དག་གནས་པ་ཉིད་དུ་གང་གི་རྣལ་འབྱོར་འཇུག་པར་བྱེད་པ་ཉིད་དོ། །སྣང་བ་ནི་ཆོས་ཀྱི་སྐུ་སྟེ། དེ་ཅིའི་
ཕྱིར་ཞེ་ན། གཉིས་འདུས་པ་ལས་གཉིས་འབྱུང་བའི་རང་བཞིན་དུ་སྣང་བའོ། །གཞི་ནི་ངོ་བོ་ཉིད་ཀྱི་སྐུ་སྟེ། དེ་ཅིའི་ཕྱིར་ཞེ་ན། ཆོས་ཐམས་ཅད་འབྱུང་བའི་གཞི་དངོས་པོ་མེད་པའི་ངོ་བོ་ཉིད་ཀྱི་ཕྱིར་རོ། །ཡང་ལང་ཀའི་བདག་པོས་དྲིས་པ། གསང་བ་
པའི་བདག་པོ་སྤྲུལ་པ་ནི་གང་། རྫོགས་ལོངས་སྤྱོད་པ་ནི་གང་། ཆོས་ཀྱི་སྐུ་ནི་གང་། ངོ་བོ་ཉིད་ནི་གང་། གསང་བ་པའི་བདག་པོས་སྨྲས་པ། ལང་ཀའི་བདག་པོ་གང་འདི་ལྟར་དྲི་བ་འདི་བཞི་ནི་འདི་སྐད་དུ་ཐོས་སོ། །སྤྲུལ་པ་ནི་གང་མེད་པ་ལས་རྒྱུན་གྱིས་

འབྱུང་བ་ལ་བྱའོ། །རྫོགས་ལོངས་སྤྱོད་པ་ནི་སྨིན་པ་ཕུན་སུམ་ཚོགས་པ་ལ་བྱའོ། །ཆོས་ཀྱི་སྐུ་ནི་ཡོངས་སུ་རྣམ་པར་དག་པ་ལ་བྱའོ། །ངོ་བོ་ཉིད་ནི་ཇི་བཞིན་པ་དེ་ཉིད་ལ་བྱའོ། །ཡང་ལང་ཀའི་བདག་པོས་དྲིས་པ། གསང་བ་པའི་བདག་པོ་རྒྱུན་གྱི་འབྱུང་
བ་ནི་གང་། སྨིན་པ་ཕུན་སུམ་ཚོགས་པ་ནི་གང་། ཡོངས་སུ་རྣམ་པར་དག་པ་ནི་གང་། ཇི་བཞིན་པ་དེ་ཉིད་ནི་གང་། གསང་བ་པའི་བདག་པོས་སྨྲས་པ། ལང་ཀའི་བདག་པོ་འདི་ལྟར་དྲི་བ་བཞི་ནི་འདི་ལྟ་སྟེ། རྒྱུན་གྱི་འབྱུང་བ་ནི་སེམས་ལས་གྱུར་པ་རྒྱུན་
མི་འཆད་པའོ། །སྨིན་པ་ཕུན་སུམ་ཚོགས་པ་ནི་སེམས་ལས་བྱུང་བའོ། །ཡོངས་སུ་རྣམ་པར་དག་པ་ནི་སེམས་སྣང་བའོ། །ཇི་བཞིན་པ་དེ་ཉིད་ནི་སེམས་ཉིད་དོ། །ལང་ཀའི་བདག་པོ་དེ་ཅིའི་ཕྱིར་ཞེ་ན། གང་གྱུར་པ་མུན་པ་སངས་ན་སྤྲུལ་པ་མངོན་དུ་སྣང་ངོ་། །
གང་འབྱུང་བ་མུན་པ་སངས་ན་རྫོགས་ལོངས་སྤྱོད་པ་མངོན་དུ་སྣང་ངོ་། །གང་སྣང་བ་མུན་པ་སངས་ན་ཆོས་ཀྱི་སྐུ་མངོན་དུ་སྣང་ངོ་། །ངོ་བོ་ཉིད་ལ་ནི་མུན་པ་དང་། སྣང་བ་དང་། སངས་པ་དང་། འཐིབས་པ་ལས་འདས་པའི་ཕྱིར་ཚིག་གི་ལམ་དང་ཡོངས་སུ་བྲལ་
བ་ཉིད་དོ། །ལང་ཀའི་བདག་པོ་དེ་དག་ཉིད་ལ་ནི་སྙིང་པོ་གསང་བའི་ཁྱད་པར་གྱིས་དག་པ་དང་མ་དག་པ་ཡོད་པར་རིག་པར་བྱའོ། །སྨྲས་པ། གསང་བ་པའི་བདག་པོ་དག་པ་ནི་གང་ལགས། མ་དག་པ་ནི་གང་ལགས། སྨྲས་པ། ལང་ཀའི་བདག་པོ་འདི་ལྟ་སྟེ།
གང་དུ་དག་པ་དང་། ཕྱོགས་སུ་དག་པ་དང་། ཡོངས་སུ་རྣམ་པར་དག་པ་དང་། ཐམས་ཅད་ནས་ཐམས་ཅད་དུ་དག་པ་ཆེན་པོའོ། །ལང་ཀའི་བདག་པོ་དེ་ལ་གང་དུ་དག་པ་ནི་འདི་ལྟ་སྟེ། གང་གསུམ་དུ་སྣང་བ་ཞི་བ་ནི་རྣམ་པར་དག་པའོ། །ཆོས་ཀྱི་དབང་
ཕྱུག་ནི་སྨིན་པའོ། །ཆོས་ཀྱི་རྒྱལ་ཚབ་ནི་རྒྱུན་ནོ། །ཕྱོགས་སུ་དག་པ་ནི་འདི་ལྟ་སྟེ། གང་ལ་མ་རིག་པར་རང་རིག་པ་ནི་རྣམ་པར་དག་པའོ། །བདེ་བར་ཞུགས་པ་ནི་སྨིན་པའོ། །གང་དུ་སྣང་བ་ནི་རྒྱུན་ནོ། །ཡོངས་སུ་རྣམ་པར་དག་པ་ནི་འདི་ལྟ་སྟེ། གང་ནམ་

མཁའ་ཉིད་ནི་རྣམ་པར་དག་པའོ། །བདེ་བ་ལ་ལོངས་སྤྱོད་པ་ནི་སྨིན་པའོ། །ཡོངས་སུ་བསྒྱུར་བ་ནི་རྒྱུན་ནོ། །ཐམས་ཅད་ནས་ཐམས་ཅད་དུ་དག་པ་ཆེན་པོ་ནི་འདི་ལྟ་སྟེ། གང་གཞིར་སྣང་བ། གང་མ་བསླད་པ་ནི་དེ་ཉིད་དོ། །གང་སྐུ་མེད་པ་ནི་
རྣམ་པར་དག་པའོ། །ཡོངས་སུ་རྫོགས་པ་ནི་སྨིན་པའོ། །ཅིར་ཡང་འབྱུང་བ་ནི་རྒྱུན་ནོ། །ལང་ཀའི་བདག་པོ་དེ་ལ་གང་དུ་དག་པ་དང་། ཕྱོགས་སུ་དག་པ་དང་། ཡོངས་སུ་རྣམ་པར་དག་པ་ནི་མ་དག་པ་ཞེས་བྱའོ། །དེ་ཅིའི་ཕྱིར་ཞེ་ན། ཐམས་ཅད་དུ་
དག་པར་བྱར་མེད་པ་ལ་དག་པར་འདོད་ཅིང་དག་པར་བྱེད་པའི་ཕྱིར་རོ། །སྨྲས་པ། གསང་བ་པའི་བདག་པོ་ཅི་ག་དེ་ལ་གང་དུ་དག་པ་དང་། ཕྱོགས་སུ་དག་པ་དང་། ཡོངས་སུ་རྣམ་པར་དག་པ་དེ་ལ་དག་པ་ཞེས་ཅིའི་ཕྱིར་བརྗོད། སྨྲས་པ། ལང་
ཀའི་བདག་པོ་དེ་དག་ནི་གང་ཡོངས་སུ་བསྒྲིབས་པ་ལས་གང་དུ་སངས་པ་དང་། ཕྱོགས་སུ་སངས་པ་དང་། ཡོངས་སུ་རྣམ་པར་སངས་པའི་ཕྱིར་རོ། །ལང་ཀའི་བདག་པོ་ཐམས་ཅད་ནས་ཐམས་ཅད་དུ་དག་པར་བྱར་མེད་པ་ལ་ནི་དག་པ་ཞེས་བྱའོ། །དེ་ཅིའི་
ཕྱིར་ཞེ་ན། དེ་ལ་ནི་དག་པར་བྱ་བའི་རྒྱུ་ཅི་ཡང་མེད་པའི་ཕྱིར་རོ། །ཡང་ལང་ཀའི་བདག་པོས་དྲིས་པ། གསང་བ་པའི་བདག་པོ་རྒྱུན་ཡིན་ལ་སྨིན་པ་མ་ཡིན་པ་ནི་གང་། སྨིན་པ་ཡིན་ལ་རྒྱུན་མ་ཡིན་པ་ནི་གང་། གཉིས་ཀ་ཡིན་པ་ནི་གང་། གཉིས་ཀ་མ་
ཡིན་པ་ནི་གང་ཞེས་དྲིས་པ་ལས། སྨྲས་པ། ལང་ཀའི་བདག་པོ་ཇི་སྐད་དུ་དྲི་བ་བཞི་ནི་འདི་ལྟ་སྟེ། རྒྱུན་ཡིན་ལ་སྨིན་པ་མ་ཡིན་པ་ནི་གང་འདས་ཀྱང་པདྨོའི་དབང་གིས་འཁོར་བ་དཔག་ཏུ་མེད་པ་ལ་ཕན་འདོགས་པའོ། །སྨིན་པ་ཡིན་ལ་རྒྱུན་མ་ཡིན་པ་ནི་
སའི་སྔ་རོལ་ཉིད་དོ། །གཉིས་ཀ་ཡིན་པ་ནི་གང་ལྷག་མ་དང་བཅས་པས་འདས་པའོ། །གཉིས་ཀ་མ་ཡིན་པ་ནི་རྣམ་པར་དག་པའོ། །ཡང་ལང་ཀའི་བདག་པོས་དྲིས་པ། གསང་བ་པའི་བདག་པོ་དེ་དག་གི་མཛད་པ་ནི་གང་ལགས། སྐུ་ནི་གང་ལགས།

དགོངས་པ་ནི་གང་ལགས། གཞི་ནི་གང་ལགས། སྨྲས་པ། ལང་ཀའི་བདག་པོ་དེ་དག་གི་མཛད་པ་ནི་སངས་རྒྱས་ཀུན་གྱི་མཛད་པ་སྟེ་རྒྱུན་གྱི་བྱ་བ་ཅིར་ཡང་སྣང་བའོ། །སྐུ་ནི་སངས་རྒྱས་ཀུན་གྱི་སྐུ་སྟེ་ཡོངས་སུ་སྨིན་པའོ། །དགོངས་པ་ནི་སངས་རྒྱས་
ཀུན་གྱི་དགོངས་པ་སྟེ་རྣམ་པར་དག་པའོ། །གཞི་ནི་སངས་རྒྱས་ཀུན་གྱི་འབྱུང་གནས་ཏེ་དེ་ཉིད་དོ། །ལང་ཀའི་བདག་པོ་དེ་དག་ནི་མང་པོ་དང་། གཅིག་དང་། གཅིག་མང་པོ་དང་། དེ་དག་ལས་འདས་པ་ཞེས་ཀྱང་བྱའོ། །དེ་ཅིའི་ཕྱིར་ཞེ་ན། རྒྱུན་ནི་
སྣ་ཚོགས་དཔག་གིས་མི་ལང་བའི་ཕྱིར་མང་པོ་ཞེས་བྱའོ། །སྨིན་པ་ནི་གང་ཐམས་ཅད་གཅིག་པའི་ཕྱིར་གཅིག་ཅེས་བྱའོ། །རྣམ་པར་དག་པ་ནི་རྒྱུན་དང་སྨིན་པའི་གཞིར་གྱུར་པའི་ཕྱིར་གཅིག་མང་པོ་ཞེས་བྱའོ། །དེ་ཉིད་ནི་དེ་དག་གི་འབྱུང་འཇུག་གིས་
ཟད་འཕེལ་མེད་པའི་ཕྱིར་དེ་དག་ལས་འདས་པ་ཞེས་བྱའོ། །ཡང་ལང་ཀའི་བདག་པོས་དྲིས་པ། གསང་བ་པའི་བདག་པོ་དེ་དག་རྟག་པ་ཞིག་གམ། འོན་ཏེ་མི་རྟག་པ་ཞིག །ཡོད་པ་ཞིག་གམ། འོན་ཏེ་མེད་པ་ཞིག །གཅིག་པ་ཞིག་གམ། ཐ་དད་པ་
ཞིག་ཅེས་དྲིས་པ་ལས། གསང་བ་པའི་བདག་པོས་སྨྲས་པ། ལང་ཀའི་བདག་པོ་ཇི་སྐད་དུ་དྲི་བ་དྲུག་ནི་འདི་ལྟ་སྟེ། དེ་དག་ནི་རྟག་པ་ཡང་ཡིན་ནོ། །མི་རྟག་པ་ཡང་མ་ཡིན་ནོ། །རྟག་ཀྱང་རྟག་ལ་མི་རྟག་ཀྱང་མི་རྟག་པ་ཡང་མ་ཡིན་ནོ། །རྟག་པ་ཡང་
མ་ཡིན། མི་རྟག་པ་ཡང་མ་ཡིན་པ་ཡང་མ་ཡིན་ནོ། །དེ་དག་ནི་ཡོད་པ་ཡང་ཡིན་ནོ། །མེད་པ་ཡང་ཡིན་ནོ། །ཡོད་ཀྱང་ཡོད་ལ་མེད་ཀྱང་མེད་པ་ཡང་ཡིན་ནོ། །ཡོད་པ་ཡང་མ་ཡིན། མེད་པ་ཡང་མ་ཡིན་པ་ཡང་ཡིན་ནོ། །གཅིག་པ་ཡང་ཡིན་ནོ། །
ཐ་དད་པ་ཡང་ཡིན་ནོ། །གཅིག་པ་ཡང་མ་ཡིན། །ཐ་དད་པ་ཡང་མ་ཡིན་པ་ཡང་ཡིན་ནོ། །གཅིག་པ་དང་ཐ་དད་པའི་ངོ་བོ་ལས་གྲོལ་བ་ཡང་ཡིན་ནོ། །ལང་ཀའི་བདག་པོ་དེ་ཅིའི་ཕྱིར་ཞེ་ན། འདི་ལྟ་སྟེ། མི་འགྱུར་ཞིང་གཉེན་པོ་མེད་པ་དང་། གང་འབྱུང་བ་མི་

དམིགས་པ་དང་ཀུན་གྱི་གཞིར་གྱུར་པ་དང་། མཐའ་ཡོངས་སུ་མི་དམིགས་པ་དང་། ཐེར་ཟུག་མ་ཡིན་པ་དང་། རྒྱུན་དུ་འབྱུང་བ་དང་། དགོངས་པ་དམ་པ་དང་། དངོས་པོ་མེད་པ་དང་། རྒྱུད་དག་པའི་ཡུལ་དུ་གྱུར་པ་དང་། མཐའ་དབུས་ལས་
འདས་པ་དང་། ཐ་སྙད་ལས་འདས་པ་དང་། ཡེ་ཇི་བཞིན་པ་དང་། བསམ་དུ་མེད་པ་དང་། བསམ་གྱིས་མི་ཁྱབ་པ་དང་། སོ་སོའི་སྤྱོད་ཡུལ་དང་། ཁྱད་པར་ཅིར་ཡང་མཚུངས་པའི་ཕྱིར་རྟག་པར་ཡང་ཟུང་ཤིག །མི་རྟག་པར་ཡང་ཟུང་ཤིག །ཡོད་པར་
ཡང་ཟུང་ཤིག །མེད་པར་ཡང་ཟུང་ཤིག །གཅིག་པར་ཡང་ཟུང་ཤིག །ཐ་དད་པར་ཡང་ཟུང་ཤིག །གཅིག་དང་ཐ་དད་པའི་ངོ་བོ་ལས་གྲོལ་བར་ཡང་ཟུང་ཤིག །ལང་ཀའི་བདག་པོ་དེ་ལྟར་ན་གདུལ་བྱའི་དབང་གི་ཕྱིར་སྐུ་ལ་ནི་ངེས་པ་མེད་དེ་བསམ་གྱིས་
མི་ཁྱབ་པར་ཟུང་ཤིག །ལྔར་ཡང་ཟུང་ཤིག །བཞིར་ཡང་ཟུང་ཤིག །གསུམ་དུ་ཡང་ཟུང་ཤིག །གཉིས་སུ་ཡང་ཟུང་ཤིག །གཅིག་ཏུ་ཡང་ཟུང་ཤིག །ངེས་པར་སྐུ་དང་། གསུང་དང་། ཐུགས་དང་། ཡོན་ཏན་དང་། ཕྲིན་ལས་ཞེས་ཐ་སྙད་དུ་
བཏགས་པར་ཟད་ཀྱི། སྐུ་ནི་ནམ་མཁའོ། །གསུང་ནི་སྒྲ་བརྙན་ནོ། །ཐུགས་ནི་ཆོས་ཉིད་དོ། །ཡོན་ཏན་ནི་སྒྱུ་མའོ། །ཕྲིན་ལས་ནི་སྤྲུལ་པ་སྟེ། དེ་དག་ནི་གང་ལ་འདུལ་བའི་དབང་དུ་བྱིན་གྱི་བརླབས་ལ་སྣང་བར་ཟད་ཀྱི་ཡང་དག་པར་ན་སྣང་བ་ནི་ཅུང་ཟད་
ཀྱང་མེད་དོ། །ལང་ཀའི་བདག་པོ་དེ་དག་གི་ངོ་བོ་ནི་རྣམ་པར་ཤེས་པའོ། །ངོས་ཟིན་པ་ནི་ཡེ་ཤེས་སོ། །མངོན་སུམ་པ་ནི་སངས་རྒྱས་སོ། །ལང་ཀའི་བདག་པོ་དེ་ལྟར་ན་གསང་སྔགས་ཀྱི་ངོ་བོ་དེ་ནི་ཡོངས་སུ་དཔག་པར་དཀའ་བའི་ཕྱིར་གང་མུན་པའི་
ཁམས་པས་ནི་རྣམ་པར་ཤེས་པ་ཞེས་བྱ་བར་བཏགས་སོ། །སྣང་བའི་ཁམས་པ་དག་གིས་ནི་ཡེ་ཤེས་ཞེས་བྱ་བར་བཏགས་སོ། །མིག་དང་བ་རྣམས་ཀྱིས་ནི་སངས་རྒྱས་སུ་བཏགས་སོ། །དམ་པའི་མིག་ཅན་རྣམས་ཀྱིས་ནི་གསང་སྔགས་སུ་ངོས་ཟིན་

པ་ཡིན་ནོ། །དེ་ནས་ཡང་ལང་ཀའི་བདག་པོས་དྲིས་པ། གསང་བ་པའི་བདག་པོ་དེ་དག་གི་ཞིང་ཁམས་ནི་གང་། འཁོར་ནི་གང་། བསྟན་པ་ནི་ཅི་ཞིག་སྒྲོགས། དུས་ནི་གང་། མཛད་པ་ནི་གང་ཞེས་དྲིས་སོ། །གསང་བ་པའི་བདག་པོས་སྨྲས་པ། ལང་ཀའི་
བདག་པོ་ཇི་སྐད་དུ་དྲི་བ་ལྔ་ནི་འདི་ལྟ་སྟེ། གང་ངོ་བོ་ཉིད་མེད་པ་དེའི་ཞིང་ཁམས་ནི་བསྐྱེད་དུ་མེད་པའོ། །འཁོར་ནི་སངས་རྒྱས་པ་མེད་པའོ། །བསྟན་པ་ནི་བསམ་དུ་མེད་པའོ། །དུས་ནི་ཚད་ལས་འདས་པའོ། །མཛད་པ་ནི་ཅིར་ཡང་མཛད་པའོ། །གང་རྣམ་པར་
དག་པ་དེའི་ཞིང་ཁམས་ནི་བདལ་ཁྱབ་ཆེན་པོའོ། །འཁོར་ནི་ཡེ་ཤེས་རྒྱ་མཚོའི་ཚོགས་སོ། །བསྟན་པ་ནི་བྱ་བ་མེད་པའི་ཆོས་སོ། །དུས་ནི་ཐམས་ཅད་ནས་ཐམས་ཅད་དུའོ། །མཛད་པ་ནི་ཆོས་ཐམས་ཅད་སྣང་བར་མཛད་པའོ། །གང་སྨིན་པ་དེའི་ཞིང་ཁམས་ནི་
བདེ་བ་ཅན་ནོ། །འཁོར་ནི་ཡོངས་སུ་སྨིན་པ་རྒྱ་མཚོའི་ཚོགས་སོ། །བསྟན་པ་ནི་བརྗོད་དུ་མེད་པའོ། །དུས་ནི་གང་ནམ་གནས་གཙང་མ་ནའོ། །མཛད་པ་ནི་རྣལ་འབྱོར་དམ་པ་ཉིད་དོ། །གང་གསང་བ་དེའི་ཞིང་ཁམས་ནི་པདྨོ་ཅན་ནོ། །འཁོར་ནི་རྒྱལ་བ་རྒྱ་མཚོའི་
ཚོགས་སོ། །བསྟན་པ་ནི་གསང་སྔགས་རྒྱ་མཚོ་ཉིད་དོ། །དུས་ནི་གཙུག་ཏོར་འཁོར་ལོས་སྒྱུར་བ་འདོད་པ་ན་རྒྱལ་བ་ཀུན་གྱི་སྐུ་སྒྲུན་པར་འབྱོར་པའི་དུས་ཉིད་ནའོ། །མཛད་པ་ནི་སྐྱེས་བུ་དམ་པོ་རྣམས་དགོངས་པ་དམ་པའི་ཐེ་ཚོམ་གཅོད་པར་མཛད་པའོ། །གང་
རྒྱུན་གྱི་ཞིང་ཁམས་ནི་མོས་པ་ཅན་ནོ། །འཁོར་ནི་མོས་པ་ཐ་དད་པའི་ཚོགས་སོ། །བསྟན་པ་ནི་བསམ་གྱིས་མི་ཁྱབ་པའོ། །དུས་ནི་སྒྲོན་མ་ཡོངས་སུ་བཀོད་པ་ནའོ། །མཛད་པ་ནི་གང་གི་མུན་པ་སེལ་བར་མཛད་པའོ། །ལང་ཀའི་བདག་པོ་དེ་དག་ཀྱང་སོ་སོར་
བལྟ་བར་ནི་མི་བྱའོ། །དེ་ཅིའི་ཕྱིར་ཞེ་ན། གང་ངོ་བོ་ཉིད་མེད་པ་ལས་དེ་ལྟར་སྣང་བར་ཟད་དེ། དེ་ནི་དེ་ཁོ་ན་ཉིད་གསང་བ་དམ་པའི་བྱིན་གྱི་བརླབས་འབའ་ཞིག་སྣང་བའོ། །ལང་ཀའི་བདག་པོ་དེ་བས་ན་གསང་བ་དམ་པ་ངོ་བོ་ཉིད་མེད་པ་དེ་ནི་ཉི་མའི་སྙིང་བོ་ལྟ་བུའོ། །

བྱིན་གྱི་བརླབས་ལས་སྣང་བ་ནི་ཟེར་དང་འོད་ལྟ་བུར་རིག་པར་བྱའོ་ཞེས་སྨྲས་པས། ལང་ཀའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས་སྐུ་ཡོངས་སུ་རྟོག་པའི་ཐེ་ཚོམ་ཆད་པར་གྱུར་ཏོ། །སངས་རྒྱས་ཀུན་གྱི་དགོངས་པ་
འདུས་པའི་མདོ་ཆེན་པོ་ལས་སྐུ་ཡོངས་སུ་སྣང་བ་དམ་པའི་རྒྱན་བཀོད་པའི་ལེའུ་སྟེ་སུམ་ཅུ་གསུམ་པའོ།། །།དེ་ནས་ཡང་ལང་ཀའི་བདག་པོ་བྱང་ཆུབ་སེམས་དཔའ་སེམས་དཔའ་ཆེན་པོ་དེས། །དེ་བཞིན་གཤེགས་པའི་གསུང་གི་བྱིན་གྱི་བརླབས་ཇི་
ལྟར་སྣང་བ་དཔག་པར་བྱ་བའི་ཕྱིར་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ་གང་གི་ཐུགས་དང་སྐུའི་བྱིན་གྱི་བརླབས་ལས་སྣང་བ་ཡོངས་སུ་བཀོད་པ་དེ་དག་གི་གསུང་གི་བྱིན་གྱི་བརླབས་ལས་སྣང་བ་ཇི་ལྟར་དཔག་པར་བགྱི། དེ་སྐད་ཅེས་དྲིས་པ་ལས།
གསང་བ་པའི་བདག་པོས་སྨྲས་པ། ལང་ཀའི་བདག་པོ་ཇི་སྐད་དུ་དྲི་བ་དེ་ནི་འདི་ལྟ་སྟེ། ངོ་བོ་ཉིད་མེད་པ་གསང་བ་དམ་པ་གསང་བ་དེ་ལ་ནི་ཚིག་དང་སྒྲའི་ཐ་སྙད་མེད་དེ་ཐམས་ཅད་ནས་ཐམས་ཅད་དུ་གསུང་བ་མེད་པ་ཁོ་ནའོ། །གལ་ཏེ་གསང་བ་དེ་དག་དཔག་
པར་ནི་གང་ཡོངས་སུ་དག་པའི་སྐྱེས་བུ་དམ་པས་ཀྱང་མི་དཔོགས་ཏེ། གང་གི་ཕྱིར་དེ་དཔོགས་པ་ཉིད་ན་ངོ་བོ་ཉིད་མེད་པ་གསང་བ་དམ་པ་ཉིད་དུ་ངེས་པའི་ཕྱིར་དཔག་པར་རབ་ཏུ་དཀའོ། །ལང་ཀའི་བདག་པོ་འོན་ཀྱང་འདི་ལྟར་རིག་པར་བྱ་སྟེ། གང་ངོ་བོ་ཉིད་
མེད་པའི་གསུང་ནི་ནམ་མཁའ་ལྟ་བུའོ། །རྣམ་པར་དག་པའི་གསུང་ནི་ཉི་མའི་སྙིང་པོ་ལྟ་བུའོ། །ཡོངས་སུ་སྨིན་པའི་གསུང་ནི་མེ་ལོང་ལྟ་བུའོ། །གསང་བ་དམ་པའི་གསུང་ནི་སེང་གེ་ལྟ་བུའོ། །རྒྱུན་དུ་འབྱུང་བའི་གསུང་ནི་གསུང་གཅིག་ཡན་ལག་བསམ་
གྱིས་མི་ཁྱབ་པར་འབྱུང་བའི་ཕྱིར་བསམ་གྱིས་མི་ཁྱབ་པ་ཞེས་བྱའོ། །ལང་ཀའི་བདག་པོ་གང་བསམ་གྱིས་མི་ཁྱབ་པ་དེ་དག་ཀྱང་བཞིར་འབྱུང་ཞིང་བཞིར་སྣང་བ། བཞི་ལས་རྒྱས་པར་ཤེས་པར་བྱའོ། །བཞི་གང་ཞེ་ན་འདི་ལྟ་སྟེ། གསུང་གི་རང་

བཞིན་དང་། རྣམ་གྲངས་དང་། ཡན་ལག་དང་། གཟུགས་བརྙན་རྣམས་སུ་ཤེས་པར་བྱའོ། །ལང་ཀའི་བདག་པོ་དེ་ལ་རང་བཞིན་གང་ཞེ་ན་འདི་ལྟ་སྟེ། གདངས་སུ་ཆེ་བ་དང་། ཡོངས་སུ་ཁྱབ་པ་དང་། གོ་བར་མྱུར་བ་དང་། ཐེ་ཚོམ་གཅོད་པ་དང་།
གཅིག་ལ་གཟིགས་སྙམ་པ་དང་། ཉི་ཚེར་སྟོན་པ་དང་། ཀུན་ནས་འཇུག་པ་དང་། འདུན་པ་སྐྱེད་པ་དང་། ཁྱད་དུ་ཞུགས་པ་དང་། ཐམས་ཅད་འདུལ་བའོ། །ལང་ཀའི་བདག་པོ་རྣམ་གྲངས་གང་ཞེ་ན། འདི་ལྟ་སྟེ། ཚངས་པ་ལྟ་བུ་དང་། སིལ་སྙན་ལྟ་བུ་
དང་། གླུ་གར་ལྟ་བུ་དང་། ཀ་ལ་པིང་ཀ་ལྟ་བུ་དང་། འབྲུག་དབྱངས་ལྟ་བུ་དང་། སྒྲ་བརྙན་ལྟ་བུའོ། །ལང་ཀའི་བདག་པོ་ཡན་ལག་ནི་འདི་ལྟ་སྟེ། འདུ་ཤེས་བསྐྱེད་པ་དང་། རྣམ་པར་རིག་པ་དང་། མཉན་པར་འོས་པ་དང་། མི་མཐུན་པ་མེད་པ་དང་།
ཤིན་ཏུ་ཟབ་པ་དང་། རྗེས་སུ་འབྱུང་བ་དང་། གང་གིས་མི་ཚུགས་པ་དང་། རྣར་སྙན་པ་དང་། རྣམ་པར་མ་འཁྲུགས་པ་དང་། ཤིན་ཏུ་གསལ་བ་སྟེ། རྣམ་གྲངས་ཀྱི་སྒོ་རེ་རེར་གང་དུ་བྱུང་བ་དེ་དང་དེར་ཡན་ལག་ཀུན་རྫོགས་པར་འབྱུང་ངོ་། །ལང་
ཀའི་བདག་པོ་དེ་ལ་གཟུགས་བརྙན་གང་ཞེ་ན། གཟུགས་བརྙན་ནི་ཡི་གེའི་ཚོགས་སུ་སྣང་ལ། ཡི་གེ་ནི་གསང་བ་དམ་པའི་བྱིན་གྱི་བརླབས་ལས་འབྱུང་བར་རིག་པར་བྱའོ། །ལང་ཀའི་བདག་པོ་གསང་བ་དམ་པའི་བྱིན་གྱི་བརླབས་ནི་ཡི་གེར་
ཡང་མ་ཟད་དེ་ཡི་གེ་ལ་སོགས་པའི་ཆོས་ཐམས་ཅད་མེད་པ་ལས་འབྱུང་ཞིང་བཏགས་པ་ལྟར་ཆགས། གང་ལྟར་བསྒྲུབས་པ་ལྟར་འགྲུབ། གང་དུ་མཐོང་བ་དེ་ལྟར་བལྟས་པར་སྣང་བའི་ཕྱིར་ཡི་གེ་ཡང་མི་དམིགས་པའི་དབྱིངས་ཀྱི་བྱིན་གྱི་
བརླབས་ལས་གསུང་གི་གཟུགས་བརྙན་དུ་འབྱུང་བར་ཟད་དོ། །ལང་ཀའི་བདག་པོ་འོན་ཏང་ན་ཐམས་ཅད་རང་བཞིན་གྱིས་སྟོང་སྟེ་ངང་གིས་མ་བཅོས་ཡང་གིས་འོད་གསལ་བས་བཙལ་དུ་མེད་ཅིང་ཡེ་ནས་བྱང་ཆུབ་པ་ལས་གང་བྱང་ཆུབ་དོན་དུ་གཉེར་ཞིང་འབད་

བ་ནི་དཀའ་བ་བྱེད་པའོ། །སྨྲས་པ། གསང་བ་པའི་བདག་པོ་འོ་ན་སེམས་ཅན་དང་སངས་རྒྱས་གཉིས་ཅིའི་ཕྱིར་ཐ་དད། སྨྲས་པ། ལང་ཀའི་བདག་པོ་དེ་ནི་རྐྱེན་ཇི་བཞིན་པའི་ཕྱིར་རོ། །ལང་ཀའི་བདག་པོ་དེ་བས་ན་འདི་ལྟ་སྟེ། གཟུགས་བརྙན་
གྱི་རྒྱུ་དང་། གཟུགས་བརྙན་འབྱུང་བའི་སྒོ་དང་། གཟུགས་བརྙན་གྱི་གཟུངས་དང་། གཟུགས་བརྙན་གྱི་དམ་ཚིག་དང་། གཟུགས་བརྙན་གྱི་སྤྲུལ་པའོ། །ལང་ཀའི་བདག་པོ་དེ་ལ་གཟུགས་བརྙན་གྱི་རྒྱུ་ནི་དང་བ་མི་དམིགས་པ་སྟེ་ཅི་ཡང་མེད་པ་ལས་ཅི་ཡང་
འབྱུང་བའོ། །ལང་ཀའི་བདག་པོ་གཟུགས་བརྙན་འབྱུང་བའི་སྒོ་ནི་གང་དུ་གཉིས་འདུས་པ་སྟེ་ཅི་ཡང་མིན་པ་ལས་ཅིར་ཡང་རིག་པར་བྱེད་པའོ། །ལང་ཀའི་བདག་པོ་གཟུགས་བརྙན་གྱིས་གང་མཚོན་པར་བྱེད་མོད་ཀྱི་གཟུགས་བརྙན་ལས་དངོས་གཞི་འབྱུང་བ་ཡང་
མ་ཡིན། མི་འབྱུང་བ་ཡང་མ་ཡིན། སྣང་བ་ཡང་མ་ཡིན། མི་སྣང་བ་ཡང་མ་ཡིན། ཁྱབ་པ་ཡང་མ་ཡིན། མ་ཁྱབ་པ་ཡང་མ་ཡིན། དཔེར་ན་ནམ་མཁའི་སྒྲ་བསྒྲགས་པར་ནི་ཀུན་གྱིས་ནུས་མོད་ཀྱི་ནམ་མཁའ་གང་ཞེ་ན། འདི་ཁོ་ནའོ་ཞེས་ནི་གང་
གིས་ཀྱང་བསྟན་པར་མི་ནུས་སོ། །ལང་ཀའི་བདག་པོ་དེ་བཞིན་དུ་གཟུགས་བརྙན་གྱིས་ཀྱང་དངོས་གཞི་མཚོན་པར་ནུས་ཀྱི་འདི་ཁོ་ནའོ་ཞེས་བསྟན་པར་ནི་མི་ནུས་སོ། །དེ་ཅིའི་ཕྱིར་ཞེ་ན། གཟུགས་བརྙན་ནི་དངོས་གཞི་ལས་བྱུང་བས་མཚོན་པར་ཡང་ནུས་ལ།
གཟུགས་བརྙན་ཡིན་པའི་ཕྱིར་གང་གི་སྤྱོད་ཡུལ་དུ་ཡང་གྱུར་པ་ཡིན་ལ། དངོས་གཞི་ནི་གང་གིས་ཀྱང་སྤྱོད་ཡུལ་དུ་མ་གྱུར་པས་འདིའོ་ཞེས་བསྟན་པར་མི་ནུས་སོ། །དེ་བས་སངས་རྒྱས་ཀུན་གྱི་དགོངས་པ་གསང་བ་དེ་ནི་སངས་རྒྱས་འཇིག་རྟེན་དུ་བྱུང་ཡང་རུང་།
མ་བྱུང་ཡང་རུང་། སེམས་ཅན་རྣམས་སངས་རྒྱས་ཀྱང་རུང་། མ་རྒྱས་ཀྱང་རུང་། ཐམས་ཅད་ཀྱི་རང་བཞིན་དུ་ཡེ་ནས་གནས་ཤིང་ཐམས་ཅད་ལ་ཁྱབ་ཀྱང་ཐམས་ཅད་ཀྱིས་མཐོང་བ་ནི་མ་ཡིན་ནོ། །དེ་ལས་བྱུང་བ་ཐམས་ཅད་ནི་ཤེས་པར་ཡང་རུང་ལ། དེས་ནི་དེ་

ཉིད་མཚོན་པར་ཡང་རུང་ན། དེ་ལས་བྱུང་བས་དེ་ཉིད་དེ་ནི་འདི་ཁོ་ནའོ་ཞེས་བསྟན་པར་ནི་མི་ནུས་སོ། །ལང་ཀའི་བདག་པོ་གཟུགས་བརྙན་གྱི་གཟུངས་ནི་ཅི་ཡང་མེད་ཅིང་མ་མཐོང་བ་དེ་ཉིད་ཅི་ཡང་འབྱུང་ཞིང་ཅི་གང་དང་ཡང་མ་བྲལ་བ་སྟེ། འདི་ལྟ་སྟེ། གཟུགས་
བརྙན་གང་ཡིན་པ་དེ་ནི་དངོས་གཞིའོ། །དངོས་གཞི་གང་ཡིན་པ་དེ་ནི་གཟུགས་བརྙན་ནོ། །དངོས་གཞི་དང་གཟུགས་བརྙན་གང་ཡིན་པ་དེ་ནི་གསང་བ་དམ་པའི་དབྱིངས་སོ། །གསང་བ་དམ་པ་གང་ཡིན་པ་དེ་ནི་དངོས་གཞི་དང་གཟུགས་བརྙན་ནོ། །འོན་
ཏང་ན་གསང་བ་དམ་པ་ནི་རྒྱ་མཚོ་དང་འདྲ་ལ། བྱིན་གྱི་བརླབས་ལས་བྱུང་བ་ཐམས་ཅད་ནི་རླབས་དང་འདྲ་བ་སྟེ། འདི་གཉིས་ལ་གཉིས་སུ་མེད་པ། གཉིས་ཀྱི་མཐའ་ལས་གྲོལ་བ། དབུ་མར་ཡང་མི་དམིགས་པ། གཉིས་སུ་མི་འགྱུར་བར་གཟིགས་
པ་སྟེ་དེ་ཁོ་ན་ཉིད་དེ་ནི་གཟུངས་སོ། །དེ་བཞིན་དུ་ཅིས་ཀྱང་མི་ཕྱེད་མི་ཤིགས་པ་དང་། གང་དུ་ཡང་མི་དམིགས་པ་དང་། མཉམ་པ་ཉིད་དང་། མི་འགྱུར་བ་ཉིད་དང་། ནམ་མཁའི་རང་བཞིན་དང་། མིང་དང་། ཚིག་དང་། དོན་དང་། གསང་སྔགས་
ཀྱི་གཟུངས་སོ། །འོན་ཏང་ན་གཟུགས་བརྙན་གྱི་རང་བཞིན་ཡང་མི་དམིགས་པའི་དབྱིངས་ལ་དངོས་གཞིའི་རང་བཞིན་ཡང་མི་དམིགས་པའི་དབྱིངས་ཁོ་ན་བས་དེ་ནི་དེ་གཉིས་ཀྱི་གཟུངས་སོ། །མི་དམིགས་པའི་དབྱིངས་དེ་ནི་ཐམས་ཅད་དུ་སེམས་ཅན་དང་སངས་
རྒྱས་ལ་སོགས་པ་ཐམས་ཅད་སྐྱེད་ཅིང་དེའི་རང་བཞིན་དེ་ཡིན་པའི་ཕྱིར་གཅིག་པས་ན་སོ་སོ་མ་ཡིན་པའི་གཟུངས་སོ། །ལང་ཀའི་བདག་པོ་གཟུགས་བརྙན་གྱི་དམ་ཚིག་ནི་གང་གི་གཟུགས་བརྙན་གང་དེ་ལས་མི་འདའ་བ་སྟེ། ཇི་ལྟར་སྣང་ཡང་དངོས་གཞི་དེ་
ལས་མི་འགྱུར་མི་འདའ་བ་སྟེ། དེ་ལྟར་འབྱུང་འཇུག་མེད་པ། ཕྱི་ནང་མེད་པ། སྒོ་ཕུགས་མེད་པ། འདུ་འབྲལ་མེད་པས་ན་དམ་ཚིག་གོ། །ཐམས་ཅད་དེའི་ངང་ལས་མི་འདའ་བའི་ཕྱིར་དམ་ཚིག་ཅེས་བྱའོ། །ལང་ཀའི་བདག་པོ་དཔེར་ན་རྡོ་རྗེ་སེམས་

དཔའ་ནི་གང་སངས་རྒྱས་རྣམས་ཀྱི་སྤྱོད་ཡུལ་དགོངས་པ་དམ་པ་ཡིན་ན་དེའི་གཟུགས་བརྙན་ཞིག་བླུན་པོ་གང་ཞིག་གི་མདུན་དུ་བཞག་ན་བླུན་པོ་དེ་ཇི་སྙམ་དུ་སེམས། སྨྲས་པ། གསང་བ་པའི་བདག་པོ་དེ་ནི་འདི་ལྟར་འདི་ནི་རྡོ་རྗེ་སེམས་དཔའ་
ཉིད་མ་ཡིན་ཏེ། དེའི་འདྲ་བ་འབའ་ཞིག་གོ་སྙམ་དུ་རྟོག་པའོ། །སྨྲས་པ་ལང་ཀའི་བདག་པོ་དེ་བས་ན་གང་དམ་པ་དག་གིས་བལྟས་ན་མི་དམིགས་པའི་དབྱིངས་ན་རྡོ་རྗེ་སེམས་དཔའ་དང་དེའི་གཟུགས་བརྙན་གཉིས་གཞན་དང་གཞན་ན་སོ་སོ་ན་གནས་པ་
མ་ཡིན་ནོ། །དེ་ཅིའི་ཕྱིར་ཞེ་ན། དེ་གཉིས་ཀྱི་རང་བཞིན་དེ་ཁོ་ན་ཉིད་དེ་དེ་བཞིན་ཡིན་པའི་ཕྱིར་རོ། །དེ་སོ་སོ་བ་ཞིག་ཡིན་ནི་དམིགས་པས་འབྲས་བུ་སྐྱེ་བར་མི་རིགས་སོ། །ལང་ཀའི་བདག་པོས་སྨྲས་པ། གསང་བ་པའི་བདག་པོ་དེ་དག་ལ་ཁྱད་
པར་མ་མཆིས་སམ། སྨྲས་པ་ལང་ཀའི་བདག་པོ་མི་ཤེས་པའི་དབང་དུ་གཟུགས་བརྙན་དང་དེས་མཚོན་པའི་དོན་ཞེས་བརྗོད་ཅིང་སྣང་བར་ཟད་ཀྱི། དམ་པ་རྣམས་ཀྱི་དེ་ཁོ་ན་ཉིད་བརྩོན་པར་བྱས་ན་དེ་ལ་ནི་ཁྱད་པར་ཅུང་ཟད་ཀྱང་མེད་དོ། །སྨྲས་པ།
གསང་བ་པའི་བདག་པོ་འོ་ན་ཆོས་རྣམས་བརྗོད་པ་དང་། མཚོན་པ་དང་ཐ་སྙད་ཀྱིས་ཅི་ཞིག་བགྱི། སྨྲས་པ། ལང་ཀའི་བདག་པོ་དེ་ནི་ཁོ་བོས་གང་གི་དོགས་པ་བསལ་ཟིན་ཏོ། །སྨྲས་པ། གསང་བ་པའི་བདག་པོ་འོ་ན་གང་བློ་ཆེན་པོ་དག་
བྱ་དཀའ་བ་ཆེན་པོས་འབད་ཅིང་ལེགས་པར་བསྐྲུན་ཏེ་ཅི་ཞིག་བྱ། སྨྲས་པ་ལང་ཀའི་བདག་པོ་དེ་དེ་ལྟ་མོད་ཀྱི་གང་མཚན་མ་ལ་ཞེན་པ་དག་ཁྲིད་པའི་ཕྱིར་དང་། གང་བློ་ཆེ་ཡང་ད་དུང་ཚེགས་ཆུང་ངུའི་ཐབས་རླབས་པོ་ཆེས་དོན་ཆེན་པོར་རེད་
ཟིན་པའི་ཉམས་མ་རྙེད་པའི་ཕྱིར་རོ། །ལང་ཀའི་བདག་པོ་དེ་ཁོ་ན་ཉིད་ལས་ནི་རྒྱུན་དུ་ཆོ་འཕྲུལ་རྣམས་སྣང་བ་ཡིན་ཏེ། རིན་པོ་ཆེའམ་སྤྲིན་ལྟ་བུར་ཅི་ཡང་མེད་པ་ལས་ཅི་ཡང་སྣང་ཞིང་གང་ཆུང་ངུ་ལས་མང་པོར་མཆེད་པའི་ཕྱིར་སྲིད་པ་དང་མྱ་ངན་

ལས་འདས་པའི་ཆོས་ཐམས་ཅད་སྣང་བ་འདི་ཅི་ཡང་མེད་པ་ལས་སྣང་ངོ་། །དེ་བས་ན་གསུང་གི་གཟུགས་བརྙན་འདི་དག་ཀྱང་ཅི་ཡང་མེད་པ་ཁོ་ན་ལས་སྣང་བའི་ཆོས་ཉིད་དུ་རིག་པར་བྱའོ། །ལང་ཀའི་བདག་པོ་གཟུགས་བརྙན་གྱི་སྤྲུལ་པ་ནི་ཐ་དད་དེ་གསུང་གི་
གཟུགས་བརྙན་ནི་ཡི་གེར་སྣང་བ་ཡིན་ལ། ཡི་གེའི་སྤྲུལ་པ་ནི་འདི་ལྟ་སྟེ། མིང་དང་། བྱུང་ཚུལ་དང་། གཟུགས་དང་། རང་བཞིན་དང་། སྒྲ་དང་། ལས་དང་། སྒོ་དང་། རྣམ་གྲངས་དང་། ཡི་གེའི་གཞི་རྣམས་ཀྱི་དེ་ཁོ་ན་ཉིད་གསང་བ་དམ་པ་དེ་
མཐོང་ཞིང་ཤེས་པར་འགྱུར་རོ། །དེས་ཆོས་ཐམས་ཅད་ལ་མཁས་ཤིང་གྲོལ་བར་འགྱུར་རོ། །དེ་ལ་ལང་ཀའི་བདག་པོ་ཡི་གེ་དེའི་མིང་ནི་འདི་ལྟ་སྟེ། གང་ལ་ཡང་མེད་ལ་གང་མཚོན་པའི་བླ་དགས་ཏེ། གང་སྐྱེ་བ་མེད་པ་མཚོན་པར་བྱེད་པའི་ཡི་གེ་ལ་ནི་
མིང་ཨ་ཞེས་བླ་དགས་སུ་བཏགས་སོ། །བྱ་བ་མཚོན་པར་བྱེད་པའི་ཡི་གེ་ལ་ནི་མིང་ཀ་ཞེས་ཚིག་བླ་དགས་སུ་བཏགས་སོ། །ཁྱབ་པ་མཚོན་པར་བྱེད་པའི་ཡི་གེ་ལ་ནི་མིང་ཁ་ཞེས་ཚིག་བླ་དགས་སུ་བཏགས་སོ། །སྐྱེ་བ་མཚོན་པར་བྱེད་པའི་ཡི་གེ་ལ་ནི་མིང་ག་
ཞེས་ཚིག་བླ་དགས་སུ་བཏགས་སོ། །གྲོལ་བ་མཚོན་པར་བྱེད་པའི་ཡི་གེ་ལ་ནི་མིང་གྷ་ཞེས་ཚིག་བླ་དགས་སུ་བཏགས་སོ། །འཛིན་པ་མཚོན་པར་བྱེད་པའི་ཡི་གེ་ལ་ནི་མིང་ང་ཞེས་ཚིག་བླ་དགས་སུ་བཏགས་སོ། །སྤྱོད་པ་མཚོན་པར་བྱེད་པའི་ཡི་གེ་ལ་ནི་མིང་
ཙ་ཞེས་ཚིག་བླ་དགས་སུ་བཏགས་སོ། །འདུ་འབྲལ་མཚོན་པར་བྱེད་པའི་ཡི་གེ་ལ་ནི་མིང་ཚ་ཞེས་ཚིག་བླ་དགས་སུ་བཏགས་སོ། །མི་གནས་པ་མཚོན་པར་བྱེད་པའི་ཡི་གེ་ལ་ནི་མིང་ཛ་ཞེས་ཚིག་བླ་དགས་སུ་བཏགས་སོ། །དྲི་མ་མཚོན་པར་བྱེད་པའི་ཡི་
གེ་ལ་ནི་མིང་ཛྷ་ཞེས་ཚིག་བླ་དགས་སུ་བཏགས་སོ། །ཤེས་པ་མཚོན་པར་བྱེད་པའི་ཡི་གེ་ལ་ནི་མིང་ཉ་ཞེས། བླ་དགས་སུ་བཏགས་སོ། །དེ་ཉིད་མཚོན་པར་བྱེད་པའི་ཡི་གེ་ལ་ནི་མིང་ཏ་ཞེས། བླ་དགས་སུ་བཏགས་སོ། །བྱེད་པ་མཚོན་པར་བྱེད་པའི་ཡི་གེ་

ལ་ནི་མིང་ཐ་ཞེས་བླ་དགས་སུ་བཏགས་སོ། །ཉེར་ཞི་མཚོན་པར་བྱེད་པའི་ཡི་གེ་ལ་ནི་མིང་ད་ཞེས་བླ་དགས་སུ་བཏགས་སོ། །ཆོས་མཚོན་པར་བྱེད་པའི་ཡི་གེ་ལ་ནི་མིང་དྷ་ཞེས་བླ་དགས་སུ་བཏགས་སོ། །མིང་མཚོན་པར་བྱེད་པའི་ཡི་གེ་ལ་ནི་མིང་
ན་ཞེས་བླ་དགས་སུ་བཏགས་སོ། །ལམ་མཚོན་པར་བྱེད་པའི་ཡི་གེ་ལ་ནི་མིང་ཊ་ཞེས་བླ་དགས་སུ་བཏགས་སོ། །གནས་མཚོན་པར་བྱེད་པའི་ཡི་གེ་ལ་ནི་མིང་ཋ་ཞེས་བླ་དགས་སུ་བཏགས་སོ། །ཀུན་ནས་འཁྲུལ་པ་མཚོན་པར་བྱེད་པའི་ཡི་གེ་ལ་ནི་མིང་ཌ་ཞེས་བླ་
དགས་སུ་བཏགས་སོ། །རང་བཞིན་མཚོན་པར་བྱེད་པའི་ཡི་གེ་ལ་ནི་མིང་ཌྷ་ཞེས་བླ་དགས་སུ་བཏགས་སོ། །ཡུལ་མཚོན་པར་བྱེད་པའི་ཡི་གེ་ལ་ནི་མིང་ཎ་ཞེས་བླ་དགས་སུ་བཏགས་སོ། །དོན་དམ་པ་མཚོན་པར་བྱེད་པའི་ཡི་གེ་ལ་ནི་མིང་པ་ཞེས་བླ་དགས་སུ་
བཏགས་སོ། །འབྲས་བུ་མཚོན་པར་བྱེད་པའི་ཡི་གེ་ལ་ནི་མིང་ཕ་ཞེས་བླ་དགས་སུ་བཏགས་སོ། །འཆིང་གྲོལ་མཚོན་པར་བྱེད་པའི་ཡི་གེ་ལ་ནི་མིང་བ་ཞེས་བླ་དགས་སུ་བཏགས་སོ། །སྲིད་པ་མཚོན་པར་བྱེད་པའི་ཡི་གེ་ལ་ནི་མིང་བྷ་ཞེས་བླ་དགས་སུ་བཏགས་
སོ། །དྲན་པ་མཚོན་པར་བྱེད་པའི་ཡི་གེ་ལ་ནི་མིང་མ་ཞེས་བླ་དགས་སུ་བཏགས་སོ། །མི་འགྱུར་བ་མཚོན་པར་བྱེད་པའི་ཡི་གེ་ལ་ནི་མིང་ཡ་ཞེས་བླ་དགས་སུ་བཏགས་སོ། །རྒྱུ་རྐྱེན་མཚོན་པར་བྱེད་པའི་ཡི་གེ་ལ་ནི་མིང་ཝ་ཞེས་བླ་དགས་སུ་བཏགས་སོ། །
རྡུལ་མཚོན་པར་བྱེད་པའི་ཡི་གེ་ལ་ནི་མིང་ར་ཞེས་བླ་དགས་སུ་བཏགས་སོ། །བཅོམ་པ་མཚོན་པར་བྱེད་པའི་ཡི་གེ་ལ་ནི་མིང་ལ་ཞེས་བླ་དགས་སུ་བཏགས་སོ། །ཞི་བ་མཚོན་པར་བྱེད་པའི་ཡི་གེ་ལ་ནི་མིང་ཤ་ཞེས་བླ་དགས་སུ་བཏགས་སོ། །ཤེས་པ་སྐྱེ་
བར་བྱེད་པ་མཚོན་པར་བྱེད་པའི་ཡི་གེ་ལ་ནི་མིང་ཥ་ཞེས་བླ་དགས་སུ་བཏགས་སོ། །རྣམ་པ་ཐམས་ཅད་ཤེས་པ་མཚོན་པར་བྱེད་པའི་ཡི་གེ་ལ་ནི་མིང་ས་ཞེས་བླ་དགས་སུ་བཏགས་སོ། །རྒྱུ་མཚོན་པར་བྱེད་པའི་ཡི་གེ་ལ་ནི་མིང་ཧ་ཞེས་བླ་དགས་སུ་བཏགས་སོ། །

མཐར་ཟད་པ་མཚོན་པར་བྱེད་པའི་ཡི་གེ་ལ་ནི་མིང་ཀྵ་ཞེས་བླ་དགས་སུ་བཏགས་སོ། །བདག་མཚོན་པར་བྱེད་པའི་ཡི་གེ་ལ་ནི་མིང་ཨ་ཞེས་བླ་དགས་སུ་བཏགས་སོ། །གཡེང་བ་མཚོན་པར་བྱེད་པའི་ཡི་གེ་ལ་ནི་མིང་ཨི་ཞེས་བླ་དགས་སུ་བཏགས་སོ། །རི་
མཚོན་པར་བྱེད་པའི་ཡི་གེ་ལ་ནི་མིང་ཨཱི་ཞེས་བླ་དགས་སུ་བཏགས་སོ། །ཞེན་པ་མཚོན་པར་བྱེད་པའི་ཡི་གེ་ལ་ནི་མིང་ཨུ་ཞེས་བླ་དགས་སུ་བཏགས་སོ། །མུན་པ་མཚོན་པར་བྱེད་པའི་ཡི་གེ་ལ་ནི་མིང་ཨུ་ཞེས་བླ་དགས་སུ་བཏགས་སོ། །གདུང་མཚོན་པར་
བྱེད་པའི་ཡི་གེ་ལ་ནི་མིང་ཨེ་ཞེས་བླ་དགས་སུ་བཏགས་སོ། །མནར་སེམས་མཚོན་པར་བྱེད་པའི་ཡི་གེ་ལ་ནི་མིང་ཨཻ་ཞེས་བླ་དགས་སུ་བཏགས་སོ། །འཇིག་པ་མཚོན་པར་བྱེད་པའི་ཡི་གེ་ལ་ནི་མིང་ཨོ་ཞེས་བླ་དགས་སུ་བཏགས་སོ། །སྟོང་པ་མཚོན་པར་
བྱེད་པའི་ཡི་གེ་ལ་ནི་མིང་ཨཽ་ཞེས་བླ་དགས་སུ་བཏགས་སོ། །ནུབ་པར་མཚོན་པར་བྱེད་པའི་ཡི་གེ་ལ་ནི་མིང་ཨ་ཞེས་བླ་དགས་སུ་བཏགས་སོ། །སྐུ་མཚོན་པར་བྱེད་པའི་ཡི་གེ་ལ་ནི་མིང་ཨྃ་ཞེས་བླ་དགས་སུ་བཏགས་སོ། །ངག་མཚོན་པར་བྱེད་པའི་ཡི་གེ་
ལ་ནི་མིང་ཨཱཿཞེས་བླ་དགས་སུ་བཏགས་སོ། །ཐུགས་མཚོན་པར་བྱེད་པའི་ཡི་གེ་ལ་ནི་མིང་ཧཱུྃ་ཞེས་བླ་དགས་སུ་བཏགས་སོ། །ཡོན་ཏན་མཚོན་པར་བྱེད་པའི་ཡི་གེ་ལ་ནི་མིང་སྭ་ཞེས་བླ་དགས་སུ་བཏགས་སོ། །ཕྲིན་ལས་མཚོན་པར་བྱེད་པའི་ཡི་གེ་ལ་ནི་མིང་
ཧཱ་ཞེས་བླ་དགས་སུ་བཏགས་སོ། །དགུག་པ་མཚོན་པར་བྱེད་པའི་ཡི་གེ་ལ་ནི་མིང་ལྕགས་ཀྱུ་ཞེས་བླ་དགས་སུ་བཏགས་སོ། །སྡུད་པ་མཚོན་པར་བྱེད་པའི་ཡི་གེ་ལ་ནི་མིང་འོད་དཔག་ཞེས་བླ་དགས་སུ་བཏགས་སོ། །འདྲེན་པ་མཚོན་པར་བྱེད་པའི་ཡི་
གེ་ལ་ནི་མིང་རེ་བ་ཞེས་བླ་དགས་སུ་བཏགས་སོ། །སྦྱོར་བ་མཚོན་པར་བྱེད་པའི་ཡི་གེ་ལ་ནི་མིང་ཟླ་ཚེས་ཞེས་བླ་དགས་སུ་བཏགས་སོ། །མིང་མཚོན་པར་བྱེད་པའི་ཡི་གེ་ལ་ནི་མིང་ཐིག་ཅེས་བླ་དགས་སུ་བཏགས་སོ། །གཅོད་པ་མཚོན་པར་བྱེད་པའི་

ཡི་གེ་ལ་ནི་མིང་དབྱུག་པ་ཞེས་བླ་དགས་སུ་བཏགས་སོ། །ལང་ཀའི་བདག་པོ་དེ་དག་ནི་ཡི་གེའི་མིང་དུ་རིག་པར་བྱའོ། །ལང་ཀའི་བདག་པོ་དེ་ལ་ཡི་གེའི་བྱུང་ཚུལ་གང་ཞེ་ན། འདི་ལྟ་སྟེ། སྟོན་པ་གསང་བ་མཆོག་ཉིད་ཀྱིས། །འདུས་
པ་དག་ལ་བོས་ཏེ་གསུངས། །གཞན་ཡང་འདུས་པའི་རྣལ་འབྱོར་རྣམས། །ཡི་གེའི་རྗེས་སུ་དོན་དཔགས་ན། །ཡི་གེའི་དོན་ནི་གསལ་བར་སྟོན། །ཅི་ཕྱིར་དོན་ཉིད་ཡི་གེར་སྣང་། །དབྱིངས་ལས་ཨ་བྱུང་ཨ་ལས་ནི། །ཡི་གེ་ཡིད་བཞིན་སྤྲིན་ཚོགས་འཕྲོ། །
ཨ་ནི་རང་བཞིན་ཡི་གེ་སྟེ། །རྟེན་དང་བྲལ་བས་རྒྱུ་རྐྱེན་མེད། །ཁོང་ནས་ཀུན་ཁྱབ་ནམ་མཁའ་འདྲ། །ཆོས་ཉིད་སྐྱེ་མེད་ཟབ་མོ་ཡིས། །ཆོས་ཀུན་ཁྱབ་གནས་ཟིན་པ་ལྟར། །ཁྱབ་གནས་ཨ་ཡི་རང་བཞིན་གྱིས། །ཡི་གེ་ཀུན་ཁྱབ་ཀུན་ཟིན་ཏེ། །མིང་
དང་ཚིག་ཚོགས་སྣ་ཚོགས་བསྒྱུར། །སྐྱེས་བུ་ཐུགས་ཀྱི་དཔལ་བེའུ་ནས། །ཐམས་ཅད་འབྱུང་བ་ཀུན་གྱི་གཞི། །མགུར་གྱི་གསང་བའི་དབྱིངས་སུ་ཤར། །ཆོ་འཕྲུལ་ཡི་གེ་ལྔར་སྣང་བ། །མགུར་གྱི་སྒྲ་བྱུང་མགུར་ལས་གྲགས། །ཨ་ཀ་ཁ་ག་གྷ་ང་།
ཨ་ལས་ཡིག་འབྲུ་ཟེར་འཕྲོས་པས། །ལྗགས་ཀྱི་དབང་པོ་ཟླ་གམ་འཕྲོས། །ཆོ་འཕྲུལ་ཡི་གེ་ལྔར་སྣང་བ། །ལྗགས་ཀྱི་སྒྲ་བྱུང་ལྗགས་ལས་གྲགས། །ཙ་ཚ་ཛ་ཛྷ་ཉ། ཨ་ཡི་འོད་ཟེར་རྩེ་མོ་ལས། །ལྗགས་ཀྱི་ཟླ་གམ་རྩེ་མོ་འཕྲོས། །ཆོ་འཕྲུལ་ལྔ་གཉིས་
ཡི་གེར་སྣང་། །རྩེ་མོར་སྒྲ་བྱུང་ཐོར་ཏོར་གྲགས། །ཏ་ཐ་ད་དྷ་ན། ཊ་ཋ་ཌ་ཌྷ་ཎ། དེ་བཞིན་དེ་ལས་དེ་བྱུང་བ། །ཞལ་གྱི་སྒྲོས་ལས་འཁྱིལ་འབར་བས། །དེ་བཞིན་ཡིག་འབྲུ་ལྔར་སྣང་བ། །ཞལ་གྱི་སྒོར་བྱུང་ཞལ་ལས་གྲགས། །པ་ཕ་བ་བྷ་མ།
ཡིག་འབྲུ་ཀུན་གྱི་མཆོག་དེ་ཉིད། །གསུང་གི་རྒྱུན་ལམ་དེར་བྱུང་བ། །ཡུལ་ལ་རིག་པའི་འབྲུར་ཤར་བ། །ཆོ་འཕྲུལ་ཡི་གེ་སྣ་ཚོགས་སྣང་། །ཡ་ཝ་ར་ལ། ཤ་ཥ་ས་ཧ། ཀྵ། ཨ་ཨཱ་ཨི་ཨཱི་ཨུ་ཨཱུ་ཨེ་ཨཱཻ་ཨོ་ཨཱཽ་ཨྃ་ཨ། རྀ་རཱྀ་ལྀ་ལཱི་ཨ་ཧོ། རང་འབྱུང་གནས་

ཁྱབ་དབྱིངས་ལས་ནི། །སྨྲ་བའི་ཕྲེང་བའི་འོད་ཟེར་ཤར། །སྨྲ་བའི་ཡེ་ཤེས་ལས་བསྒྲུན་ན། །འདྲེན་པ་སྤྲུལ་པའི་ས་བོན་འབྱུང་། །དཔག་མེད་རྒྱལ་བའི་སྐུ་གསུང་ཐུགས། །ཡི་གེ་སྤྲུལ་པ་དེ་ཉིད་ཡིན། །མ་སྐྱེས་པ་ཡི་ཐུགས་ཉིད་དེ། །དང་པོ་མགུར་གྱི་གཟུགས་
བརྙན་ཏེ། །གཉིས་པ་ལྗགས་ཀྱི་གཟུགས་བརྙན་ཡིན། །གསུམ་པ་རྩེ་མོ་ལས་བྱུང་བ། །བཞི་པ་འབྱུང་བའི་སྒྲོས་ལ་ཤར། །ལྔ་པ་གསུང་གི་རྒྱུན་ལམ་ཡིན། །ཐམས་ཅད་སྡུད་པའི་ཡི་གེ་ཡ། །སྲེག་པ་འབྱུང་བའི་ཡི་གེ་ར། །འཇོམས་པ་ཆེན་པོ་ཡི་གེ་ལ། །
མུན་པ་སེལ་བའི་ཡི་གེ་ཝ། །མཚན་མ་དག་པའི་ཡི་གེ་ཤ། །སྟོང་པ་ཆེན་པོའི་ཡི་གེ་ཥ། །ཆོ་འཕྲུལ་འབྱུང་བའི་ཡི་གེ་ཀྵ། །རྣམ་པ་ཀུན་གྱི་ཡི་གེ་ས། །འཁོར་བ་གནོན་པའི་ཡི་གེ་ཧ། །འབྱུང་བ་ཀུན་གྱི་ཡི་གེ་ཨ། །བརྗོད་པ་ཀུན་གྱི་ཡི་གེ་ཨྭཱ། །
ཚད་མེད་པ་དང་ལམ་རྣམས་ཀྱི། ཡི་གེ་བཅུ་དྲུག་རྫོགས་པ་ཉིད། །སྐུ་དང་གསུང་ཐུགས་ཡོན་ཏན་གྱི། །ཚིག་འབྱུང་སྨྲ་བའི་ཡི་གེ་བཞི། །བདུན་དང་བཅུ་གཉིས་གསུང་གི་རྒྱུན། །འབྱུང་བ་ཉིད་དུ་མགོན་པོས་བཤད། །ལང་ཀའི་བདག་པོ་དེ་དག་ནི་ཡི་
གེའི་བྱུང་ཚུལ་དུ་རིག་པར་བྱའོ། །ལང་ཀའི་བདག་པོ་འདི་ལ་ཡི་གེའི་གཟུགས་གང་ཞེ་ན། འདི་ལྟ་སྟེ། གང་ཁ་དོག་དང་དབྱིབས་འབའ་ཞིག་གོ། །ལང་ཀའི་བདག་པོ་དེ་ལ་ཁ་དོག་གང་ཞེ་ན། རང་བཞིན་དང་། རིགས་དང་། སྣ་ཚོགས་དང་། མ་ངེས་
པའོ། །ལང་ཀའི་བདག་པོ་དབྱིབས་ནི་ཐ་དད་པ་སྟེ། འདི་ལྟར་ཨ་འབའ