Kinh tạng Tây Tạng (Kangyur Đại Học) — 097_རྙིང་རྒྱུད།_ཀ

ྱ། །གཡོན་པས་ཉོན་མོངས་མནན་ཚུལ་ལ། །གཡས་

པས་རྒྱུ་འདྲེན་ཟ་བའི་ཚུལ། །པུ་ཀའི་ཕྱག་རྒྱར་བཤད་པ་ཡིན། །གཡོན་པ་དུང་ཁྲག་འཛིན་པ་ལ། །གཡས་པས་འཁྲུག་ཅིང་རྔམ་ཚུལ་སྟོན། །གསྨ་རི་ཡི་ཕྱག་རྒྱ་ཡིན། །གཡོན་པས་བྱིས་པའི་ལུས་མནན་ནས། །གཡས་པས་སྙིང་འདྲེན་ཟ་ཚུལ་དུ། །སྒྲོལ་
ཚུལ་ལྟ་བ་སྨ་ཤའི་རྒྱ། །གཡས་པས་མགོ་བཅད་ཕྱིར་ནས་ཀྱང་། །གཡོན་པས་ལུས་འཛིན་སྟོབས་པ་ལྟར། །ཙཎྜ་ལི་ཡི་ཕྱག་རྒྱ་ཡིན། །ལག་གཉིས་བྲང་ལ་བསྣོལ་ནས་ནི། །ཁ་ན་རོ་ཐོགས་རལ་གསིགས་པ། །སེང་གདོང་ཚོགས་ཀྱི་ཕྱག་རྒྱ་ཡིན། །ལག་གཉིས་
ཐུར་དུ་བསྣོལ་ནས་ནི། །ཞིང་ལ་འབུར་ཚུགས་མཆེ་བ་བསྙེར། །སྟག་གདོང་ཚོགས་ཀྱི་ཕྱག་རྒྱ་ཡིན། །ལག་གཉིས་ཞིང་ཁོང་ཁ་ཕྱེ་ནས། །ལྕེ་ཡིས་ལྡག་པ་ལྟར་བྱེད་ན། །ཝ་གདོང་ཚོགས་ཀྱི་ཕྱག་རྒྱ་ཡིན། །ལག་གཉིས་ཞིང་ཁོང་ཁ་ཕྱེ་ནས། །འབུར་ཚུགས་
ལྟ་བ་ཤྭ་ནའི་རྒྱ། །ལག་གཉིས་སྤུ་གྲི་ཐོགས་ཚུལ་དུ། །གཡོན་པས་རྒྱུ་མ་གཟུང་ཞིང་ཟ། །བཞད་གདོང་ཚོགས་ཀྱི་ཕྱག་རྒྱ་ཡིན། །ཞིང་ཆེན་ཕྲག་ལ་བཀལ་ནས་ནི། །ཀེང་རུས་ཐོགས་པ་ལྟར་བྱས་པ། །དུར་བྱའི་ཚོགས་ཀྱི་ཕྱག་རྒྱ་ཡིན། །གཡོན་པས་བན་ད་
གཡས་པ་གྲི། །གློ་སྙིང་འདྲེན་པ་ལྟར་བྱེད་པ། །ཁྭ་ཁ་མ་ཡི་ཕྱག་རྒྱ་ཡིན། །གཡས་པ་རྡོ་རྗེ་ཁུ་ཚུར་ལ། །ལྕགས་ཀྱུ་འཛིན་པ་ཧུ་ལུའི་རྒྱ། །མཛུབ་གཉིས་ལྕགས་ཀྱུའི་ཚུལ་དུ་བྱས། །རྟ་སྐད་འཚེར་བ་ལྟར་བྱས་པ། །རྟ་གདོང་ཚོགས་ཀྱི་ཕྱག་རྒྱ་ཡིན། །
མཛུབ་གཉིས་རྩེ་སྦྱར་ཕག་གདོང་གིས། །ཐ་རྒོད་ལོག་པའི་ཚུལ་བསྟན་པ། །ཕག་གདོང་ཚོགས་ཀྱི་ཕྱག་རྒྱ་ཡིན། །མཛུབ་གཉིས་ལུ་གུ་རྒྱུད་དུ་འཁྱུད། །སེང་གེའི་ཚུལ་དུ་རལ་གསིགས་པ། །སེང་གདོང་ཚོགས་ཀྱི་ཕྱག་རྒྱ་ཡིན། །ལག་གཉིས་རབ་ཏུ་
བསྐྱོད་བྱ་ཞིང་། །ཕྱོགས་བཅུར་ལྟ་བར་བྱེད་པ་ནི། །སྦྲུལ་གདོང་ཚོགས་ཀྱི་ཕྱག་རྒྱ་ཡིན། །ལག་པའི་ཕྱག་རྒྱ་བཅིངས་བྱས་ཤིང་། །རྐང་པ་འཇོག་ཚུལ་སྟབས་སུ་མཆོང་། །གཡས་པའི་སྡིགས་མཛུབ་ནམ་མཁར་འཕྱར། །གཡོན་པ་དགུ་རུ་བརྟེན་པ་ནི། །

ཧུྃ་ཀ་ར་ཡི་ཕྱག་རྒྱ་ཡིན། །ལག་པ་གཡས་པ་སྡེར་མོར་གདེངས། །གཡོན་པ་འཛིན་པ་རྣམ་རྒྱལ་རྒྱ། །གཡས་ཀྱི་སོར་མོ་དབྱུག་པར་བརྐྱང་། །གཡོན་པ་གར་ཐབས་སྐོར་བར་བྱེད། །དབྱུག་སྔོན་ཅན་གྱི་ཕྱག་རྒྱ་ཡིན། །གཡས་པའི་
ཁུ་ཚུར་ནམ་མཁར་འཕྱར། །གཡོན་པས་གྲུ་མོ་བརྟེན་པ་ནི། །གཤིན་རྗེ་འཇོམས་པའི་ཕྱག་རྒྱ་ཡིན། །གཡས་པའི་གུང་མཛུབ་སྲིན་ལག་བརྐྱང་། །མཐེའུ་ཆུང་མཐེ་བོས་མནན་པར་བྱ། །གཡོན་པའང་དེ་བཞིན་ཤུགས་སུ་བྱ། །མི་གཡོ་རལ་གྲིའི་ཕྱག་
རྒྱ་ཡིན། །ལག་གཉིས་མཐེའུ་ཆུང་ལུ་གུ་རྒྱུད། །ལྷག་མ་ཁུ་ཚུར་བཅངས་པ་ལས། །དཔྲལ་བའི་ཐད་ཀར་བཟུང་བ་ནི། །རྟ་མཆོག་དཔལ་གྱི་ཕྱག་རྒྱ་ཡིན། །ལག་གཉིས་ཁུ་ཚུར་མདུན་དུ་བཅངས། །ཞགས་པའི་ཚུལ་དུ་དྲངས་པ་ནི། །གཞན་གྱིས་མི་ཐུབ་
ཕྱག་རྒྱ་ཡིན། །ལག་གཉིས་ཁུ་ཚུར་གྱེན་དུ་བསྣོལ། །དྲིལ་བུ་གསིལ་ཚུལ་བདུད་རྩི་འཁྱིལ། །ལག་པ་གཡས་པ་ཁུ་ཚུར་འཕྱར། །བརྡེག་པའི་སྟབས་སུ་བྱས་པ་ནི། །ཁམས་གསུམ་རྣམ་རྒྱལ་ཕྱག་རྒྱ་ཡིན། །ལག་གཉིས་ཁུ་ཚུར་ཐུར་དུ་བརྐྱང་། །གནོན་པའི་
སྟབས་སུ་བགྲད་པ་ནི། །སྟོབས་པོ་ཆེ་ཡི་ཕྱག་རྒྱ་ཡིན། །གྱད་ཀྱི་དོར་སྟབས་ཚུལ་དུ་གནས། །སྟོབས་སུ་མཆོང་བ་ཁྲོ་བོའི་རྒྱ། །སྲིན་མོ་རྣམས་ཀྱི་ཕྱག་རྒྱ་ནི། །རྐང་ལག་གར་ཐབས་བསྐོར་བ་ཡིན། །ཡང་ན་ཁྲོ་བོའི་ཕྱག་རྒྱ་ལས། །གཡས་གཡོན་བཟློག་པ་
ཡིན་པར་གསུངས། །ཅི་བགྱིད་བཀའ་ཉན་ཕྱག་རྒྱ་ནི། །གཡས་གཡོན་སོར་མོ་དྲག་སྤྲུགས་པའོ་ཞེས་གསུངས་སོ། །འཕགས་པ་རྒྱུད་ཀྱི་རྒྱལ་པོ་ཆེན་པོ་ཡེ་ཤེས་རྔམ་པ་གློག་གི་འཁོར་ལོའི་མདོ་ཞེས་བྱ་བ་ལས་འཇིགས་བྱེད་རྣམས་ཀྱི་ཕྱག་རྒྱ་བསྟན་པའི་
ལེའུ་སྟེ་བཅུ་པའོ།། །།དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དེས་བསྙེན་བསྒྲུབ་རྒྱུན་གྱི་ཏིང་ངེ་འཛིན་ལ་སྙོམས་པར་ཞུགས་སོ། །ཞུགས་ནས་ཀྱང་བསྙེན་བསྒྲུབ་ཟབ་མོའི་དཀྱིལ་འཁོར་འདི་དག་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་

ཕྱུང་ངོ་། །བསྙེན་བསྒྲུབ་ཡན་ལག་བསམ་ཡས་ཀྱང་། །དཀྱིལ་འཁོར་དག་ནི་ཐམས་ཅད་ལ། །རྣལ་འབྱོར་འཇུག་པའི་དོན་གྱི་ཕྱིར། །མདོར་བསྡུས་རྣམ་པ་བཞིར་བཤད་དོ། །ཐོག་མར་བསྙེན་པ་ཡིན་པར་བཤད། །གཉིས་པ་དག་ནི་ཉེ་བསྙེན་པ། །གསུམ་
པ་བསྒྲུབ་པ་ཞེས་སུ་བརྗོད། །ཐ་མ་བསྒྲུབ་ཆེན་པོ་ཞེས་བྱ། །བྱེ་བྲག་ཏུ་ནི་ཤེས་བྱས་ལ། །དེ་ནས་ལས་རྣམས་བརྩམ་པར་བྱ། །བསྙེན་བསྒྲུབ་བྱེ་བྲག་ཤེས་བྱ་ཞིང་། །དེ་ལ་གནས་པ་རབ་ཏུ་གཅེས། །དེ་དག་མི་ཤེས་མི་གནས་པས། །བསྒྲུབས་ཀྱང་
འགྲུབ་པར་མི་འགྱུར་ཏེ། །ལས་རྣམས་བརྩམས་ཀྱང་དོན་མེད་འགྱུར། །དེ་བས་ནན་ཏན་བསྐྱེད་དེ་བྱ། །བསྙེན་པའི་ཏིང་འཛིན་རབ་སྦྱོར་བས། །བྱང་ཆུབ་སེམས་ནི་ཤེས་པར་བྱ། །ཉེ་བར་བསྙེན་པ་ལ་གནས་པས། །བདག་ཉིད་ཕྱག་རྒྱ་ཆེན་པོར་
བསྒོམ། །དེ་ཡང་གསང་སྔགས་བདག་པོ་ཉིད། །རིག་མ་བསྐྱེད་དང་བསྐུལ་བྱ་བ། །བསྒྲུབ་པ་ཞེས་སུ་རྒྱལ་བས་གསུངས། །ཐབས་དང་ཤེས་རབ་འབྲེལ་བ་ལས། །རང་གི་ལྷ་ཡི་རྣལ་འབྱོར་གསུངས། །གང་ཡིན་རྡོ་རྗེ་འགྲུབ་འགྱུར་བ། །བསྒྲུབ་པ་
ཆེན་པོ་ཞེས་སུ་བྱ། །བྱང་ཆུབ་སེམས་ཞེས་བྱ་བ་ཡང་། །དམ་པའི་དོན་གྱི་སེམས་ཡིན་ཏེ། །ཆོས་རྣམས་ཐམས་ཅད་དངོས་མེད་པས། །རང་གི་སེམས་ཀྱིས་ཤེས་བྱ་བ། །བསྙེན་པའི་དམ་ཚིག་ཡིན་པར་གསུངས། །བདག་ཉིད་ཕྱག་རྒྱ་ཆེན་པོ་ནི། །
སྔགས་ཀྱི་བདག་པོའི་ཆ་ལུགས་སུ། །ཏིང་འཛིན་ནན་ཏན་ཁུགས་པར་བསྒོམ། །ཐམས་ཅད་ལྷ་ཡི་རང་བཞིན་པས། །བདག་ཉིད་ལྷ་ཡི་མཚན་ཉིད་དེ། །ཕྱག་རྒྱ་བཞི་དང་རྣམ་ལྡན་པར། །ཤེས་པ་ཉེ་བསྙེན་དམ་ཚིག་ཡིན། །རིག་མ་བསྐྱེད་དང་
བསྐུལ་བྱ་བའི། །རྟེན་དུ་བྱ་བ་ཤེས་རབ་མ། །མཚན་ལྡན་བཀྲ་ཤིས་གསང་བའི་གཟུངས། །བྷ་ག་གསང་བའི་པདྨོ་ནི། །རྒྱལ་བ་རྣམས་ཀྱི་ཕོ་བྲང་སྟེ། །འདས་པའི་སངས་རྒྱས་བྱུང་བའི་གནས། །སླད་ཀྱིས་བྱོན་པ་གཤེགས་པའི་ཤུལ། །དེ་ལྟར་

སངས་རྒྱས་བཞུགས་པའི་རྟེན། །རྣལ་འབྱོར་ངོ་ལ་དེ་ལྟར་སྣང་། །མ་རྟོགས་པ་ལ་འཁོར་བའི་ལམ། །སྒྲུབ་པ་རྣམས་ཀྱི་བསྒྲུབ་པའི་རྟེན། །རྣལ་འབྱོར་ཅན་གྱིས་ཤེས་པར་བྱ། །ཆེན་པོ་ལྔས་བསྡུས་ཐམས་ཅད་ཀུན། །དེ་ནས་ཡུམ་དུ་གནས་
མོད། །མཚན་མ་བསྒྲུབ་པའི་རྣལ་འབྱོར་པ། །བསྒྲུབ་ཕྱིར་རིགས་ཀྱི་དབྱེ་བ་བྱ། །སྨིན་མའི་དཀྱུས་རིང་ལག་སོར་ཕྲ། །ཚིགས་པ་ཟླུམ་ལ་རྐེད་སྐབས་ཕྱེད། །ཕྲ་བཤད་ཨུཏྤལ་དང་ལྡན་ཞིང་། །སོ་དཀར་སྐྲ་འཇམ་མཐོན་མཐིང་འཁྲིལ། །མིག་
ཀྱང་ཟར་མའི་མེ་ཏོག་འདྲ། །སྐྲ་མཚམས་འཁྱུག་ལ་མདོག་ཀྱང་གསལ། །སྣ་བཟང་སྐེ་རིང་སེམས་མ་འདྲ། །ལུས་དྲང་ནུ་མའི་དཀྱིལ་ན་མཐོ། །ཁོང་དལ་འགྲོ་ན་འཇབ་པ་འདྲ། །སྐད་ནི་ངང་པའི་རྒྱལ་པོ་འདྲ། །ཅིར་ཡང་མཛེས་པའི་སྟོབས་ལྡན་པ། །སྤྱི་
ཡི་རིགས་དང་མཚན་དུ་བཤད། །བཞིན་དབྱིབས་སོག་ཀ་མདོག་ཀྱང་དམར། །མིག་རིངས་སོ་ཐགས་རབ་ཏུ་དམ། །སོ་ལ་ཤེལ་ཆགས་ཀོས་ཀོ་ཕྲ། །ལུས་ལ་ཞིམ་པའི་དྲི་འབྱུང་བ། །པདྨ་ཅན་ཞེས་བྱ་བར་བཤད། །ཟླ་བའི་མདངས་ལྟར་དཀར་ལ་
གསལ། །གཙུག་ཕུད་གཡས་འཁྲིལ་སྐད་ཀྱང་ཆེ། །བོང་ཆུང་ལུས་མཛེས་ཚིག་ཏུ་སྙན། །དུང་ལྟར་ལུས་བཞིན་གཡས་སུ་འཁྱིལ། །དུང་ཅན་མ་ཞེས་བྱ་བར་གྲགས། །འདོད་པ་ཆེ་ལ་བརྟུལ་ཞུགས་ཆེ། །ཤེས་པ་གསལ་ལ་བྱད་བཞིན་ཡངས། །བུ་མོ་
མིག་མངས་མ་རུ་བཤད། །སྦས་པའི་བརྡ་དང་ཐབས་ལ་མཁས། །ཕྱི་ནང་རླུང་ཁར་གསེར་ལྟར་ལྕི། །བསྡིག་ཅིང་ཀུན་གྱིས་དྲོད་མི་ལོན། །དོན་ལ་གཞོལ་ལ་རྟོག་པ་མེད། །ཟླ་གསང་དཀར་དམར་རླུང་ཁར་ལྕི། །རིགས་དང་མཚན་དུ་བཤད་པ་ཡིན། །
སྐྲ་ནི་མཐོན་མཐིང་ལྕང་ལོར་བཤད། །སྲིད་དུ་རིང་ལ་ཕྲ་ལ་ལྡེམ། །ལྕུག་ཕྲན་མང་པོ་འདབ་རྒྱས་པ། །ལྗོན་པ་མ་ཞེས་བཤད་པ་ཡིན། །ཕྲ་ཞིང་བཤན་ལ་གཟངས་རིང་བ། །བཅུ་གཉིས་ཉི་ཤུ་ལྔ་ཡི་བར། །མཱུ་ལ་རཀྟ་འཛག་པ་ལ། །རྡོ་རྗེ་མཚོན་

གྱིས་མ་ཕོག་པ། །ལྕུག་ཕྲན་མ་ཡི་རིགས་སུ་བཤད། །སོར་མོ་གྲུ་བཞི་སྐྲ་ཡང་ཁམ། །སྨིན་ཚོགས་ཆེ་ཞིང་མིག་ཀྱང་འབུར། །འགྲམ་གླད་རིང་ལ་སྐྲ་མཚམས་དམའ། །ཤ་མདོག་ཆེ་ཞིང་རྣ་བ་རིང་། །བ་ལང་ཅན་ཞེས་བྱ་བར་བཤད། །བཞིན་
མདོག་གྲུ་གསུམ་ཁ་དོག་གནག །སྐྲ་རྩུབ་ཤེལ་ལ་ཁྲོ་གཉེར་མང་། །རི་མོ་ཅན་ཞེས་བྱ་བར་བཤད། །སྐྱེ་རྒྱུད་མེད་ཅིང་བཀྲ་མི་ཤིས། །གཅིག་པུར་འདུག་པ་གདོང་གཅིག་མའོ། །ཡན་ལག་ཐམས་ཅད་མེས་ཚིག་བཞིན། །གཏན་དུ་འཕེལ་བའི་རྒྱུ་
མེད་པ། །མེ་རེག་མ་ཡི་རིགས་སུ་བཤད། །གཞན་ཡང་ལྷ་འམ་ལྷ་མིན་ནམ། །གནོད་སྦྱིན་སྲིན་པོ་ལ་སོགས་པ། །མདོར་ན་འཇིག་རྟེན་ཁམས་རྣམས་ན། །མོ་ཡི་རིགས་ཅན་གང་ཡང་རུང་། །ཡིད་དུ་འོང་དང་མི་འོང་རྣམས། །དངོས་གྲུབ་བསྒྲུབ་པའི་
རྟེན་ཡིན་ཏེ། །ཐུགས་རྗེའི་ཡུལ་བས་ཀུན་སྙོམས་བྱའོ། །དེ་དག་གང་རྙེད་བྱིན་གྱིས་བརླབ། །དེ་ཡི་སྤྱི་བོ་གཙུག་ཏུ་ནི། །ཟླ་དཀྱིལ་མྃ་ལས་ཀུན་བཟང་མོ། །སྙིང་གར་ཟླ་དཀྱིལ་ལྃ་བསམས་ཏེ། །ཡངས་པའི་སྤྱན་དུ་བསྒོམ་པར་བྱ། །ལྕེ་སྟེངས་
ཟླ་དཀྱིལ་ཡི་གེ་པྃ། །གོས་དཀར་མ་ཡི་ལྟེ་བ་ལ། །ཟླ་དཀྱིལ་མྃ་ལས་མཱ་མ་ཀཱི། །ཡན་ལག་བཞི་ཡི་དཀྱིལ་འཁོར་ལ། །རྟྃ་ལས་སྒྲོལ་མའི་ཕྱག་རྒྱར་གསལ། །ལག་གཡས་ལྕགས་ཀྱུའི་སྐུ་རུ་བསྒོམ། །ལག་གཡོན་དྲིལ་བུ་ལྕགས་སྒྲོག་ཁ། །ཞགས་
པ་པདྨ་དག་ལའོ། །རྡོ་རྗེ་ཐབས་ལ་ཡབ་རྣམས་བསྒོམ། །དེ་ལྟར་གསལ་བར་གྱུར་པ་དང་། །བྷ་གའི་དབྱིབས་སུ་མེ་རི་བསྒོམ། །བྱང་ཆུབ་སེམས་ཀྱི་འཕྲོ་འདུ་ལས། །ལྷག་པའི་ཏིང་འཛིན་དཀྱིལ་འཁོར་བསྒོམ། །གསལ་ལྡན་མ་འམ་བྱིན་བརླབས་བྱའོ། །
མཚན་ལྡན་ཤེས་རབ་དེ་ཉིད་ལ། །རིན་ཆེན་སྣ་ཚོགས་རྒྱན་དུ་གདགས། །གསེར་གྱི་རྣ་ཆ་གདུ་བུ་དང་། །དོ་ཤལ་དཔུང་རྒྱན་སེ་མོ་དོ། །འཇམ་ཞིང་གསལ་བར་བྱས་པ་ཡི། །ཆོས་གོས་ལྔ་དང་ལྡན་པར་བྱ། །ཨ་ག་རུ་དང་དུ་རུ་སྐ། །དྲི་སྤོས་ཙནྡན་སྦྱར་བ་ཡིན། །

ཁྲུས་ཀྱི་ཆོ་ག་དག་པར་བྱ། །དྲི་ཞིམ་བྱུག་པས་ལུས་ལ་བྱུགས། །རྫས་ཀྱི་ཆུ་དང་རྫས་སྦྱར་བས། །ནང་ཡང་དག་པའི་ཁྲུས་བྱའོ། །དེ་ནས་བྱང་ཆུབ་སེམས་བསྐྱེད་དེ། །མི་དམིགས་དོན་ལ་སེམས་སྦྱར་ཕྱིར། །སྐྱེ་མེད་བྱང་ཆུབ་སེམས་ཀྱི་
དོན། །རྒྱ་ཆེར་རབ་ཏུ་བཤད་པར་བྱ། །སྣང་སྲིད་ཕྱག་རྒྱའི་དཀྱིལ་འཁོར་དུ། །ལྷུན་གྱིས་གྲུབ་པར་ཡིད་ཆེས་བྱ། །དེ་ནས་བསྐུལ་བར་བྱ་བའི་ཕྱིར། །གསང་བའི་བརྡ་ཡིས་བསྲེ་བར་བྱ། །ས་མ་ཡ་ཧོ་ཞེས་བརྗོད་ན། །ས་མ་ཡ་སྟྭྃ་ཞེས་པས་བསྲེ། །རཱ་ག་ཡཱ་མི་
ཞེས་བརྗོད་ན། །ར་ཧོ་ཧྃ་ཞེས་ཀྱང་ནི་བྱ། །ཏི་པ་སུ་ཀེ་ཞེས་བརྗོད་ན། །གན་དེ་ཙི་ཏ་ཞེས་པས་མཚོན། །ཨ་ཏི་པུ་ཧོ་ཞེས་བརྗོད་ན། །པྲ་ཏི་པུ་ཧོ་ཞེས་པས་མཚོན། །གཡས་པ་སྨིན་མ་བསྐྱོད་ན་ནི། །གཡོན་པའི་སྨིན་མས་དེ་བཞིན་མཚོན། །དེ་བཞིན་
བརྡ་སྣ་ཚོགས་པས་བསྲེ། །དེ་ནས་བསྐུལ་བར་བྱ་བ་ནི། །ཤེས་རབ་ཉི་མའི་འོད་ཟེར་གྱིས། །ཐབས་མཆོག་ཟླ་བའི་འོད་ཟེར་ལ། །བསྐུལ་བའི་ཆོ་ག་འདི་སྐད་དོ། །མི་གཡོ་མཆོག་གི་རྒྱལ་པོ་དགོངས་སུ་གསོལ། །རྣམ་པར་རྟོག་བྲལ་ཤིན་ཏུ་དྲི་མེད་སྐུ། །
འོད་ཟེར་ཟླ་རྒྱས་འདྲ་བའི་མདངས་ལྡན་ཞལ། །དགྱེས་པའི་རོལ་པའི་དོན་ལ་གཤེགས་སུ་གསོལ། །ཐབས་མཆོག་ཟླ་བའི་འོད་ཟེར་གྱིས། །ཤེས་རབ་ཉི་མའི་འོད་ཟེར་ལ། །བསྐུལ་བའི་ཆོ་ག་འདི་སྐད་དོ། །འབྱོར་ལྡན་ཡིད་འོང་རྒྱལ་བ་རྒྱ་མཚོའི་དབྱིངས། །
ཤེས་རབ་ཟབ་མོ་རྣམ་དག་པདྨའི་མདངས། །རྫུ་འཕྲུལ་ཐབས་ལ་མཁས་པའི་སྤྱོད་མཆོག་མ། །འབྱོར་ལྡན་ཡིད་འོང་ཆོ་འཕྲུལ་སྣ་ཚོགས་སྟོན། །ཧོ། ཉི་མའི་འོད་ཟེར་གྱིས་བསྐུལ་བ། །ཨེ་མའོ་པདྨ་འབར་བའི་ཟེའུ་འབྲུ་འདི། །འཛུམ་པའི་མདངས་ཀྱིས་
འབུལ་ལགས་ན། །དགྱེས་པའི་རྡོ་རྗེ་རབ་གསོར་ནས། །བྱང་ཆུབ་སེམས་སྤྲིན་དབབ་ཏུ་གསོལ། །ཟླ་བའི་འོད་ཟེར་གྱིས་བསྐུལ་བ། །ཨེ་མའོ། འོད་ཟེར་དགའ་སྟེ་ཡིད་འོང་མ། །སེམས་འཕྲེང་གདུངས་པའི་ཤེས་རབ་གཟུངས། །གའུ་འཁྲིལ་པའི་པདྨ་ལ། །རྡོ་རྗེ་

བདེ་བའི་བྱང་ཆུབ་འབར། །ཨ་ལ་ལ་ཧོ། དེ་ནས་གཉིས་མེད་བདེ་མཆོག་སེམས། །སངས་རྒྱས་སྤྲིན་གྱི་ཚོགས་ཆེན་ལ། །དགྱེས་མཉམ་མཆོག་གི་མཆོད་པ་དབུལ། །གྲུབ་པ་ཉི་ཟླའི་སྙིང་པོ་དེ། །རྣལ་འབྱོར་རྡོ་རྗེ་ཆེན་པོས་བླང་། །འགྲོ་དྲུག་སེམས་
ཅན་བག་ཆགས་སྲེག །ཞི་བའི་མཐའ་ལ་ཤི་བ་བསླང་། །ཕྱོགས་བཅུའི་རྣལ་འབྱོར་ཐུགས་དམ་བསྐུལ། །དེ་ལྟར་བྱ་བའི་དམ་ཚིག་ནི། །བསྒྲུབ་པ་ཡིན་པར་རྒྱལ་བས་གསུངས། །དེ་དག་དངོས་གྲུབ་ཐོབ་པའི་རྒྱུ། །རིག་པའི་དམ་ཚིག་བསྒོམས་
པའི་ལམ། །སྔགས་ཀྱི་བདག་པོ་བདག་འགྲུབ་སྟེ། །གང་ཡིན་ལས་ལ་འཇུག་ནུས་པའི། །དམ་ཚིག་སྒྲུབ་པོ་ཆེན་པོ་ཡིན། །ཞེས་གསུངས་སོ། །འཕགས་པ་རྒྱུད་ཀྱི་རྒྱལ་པོ་ཡེ་ཤེས་རྔམ་པ་གློག་གི་འཁོར་ལོའི་མདོ་ཞེས་བྱ་བ་ལས་བསྙེན་བསྒྲུབ་རྣམ་
བཞི་བཤད་པའི་ལེའུ་སྟེ་བཅུ་གཅིག་པའོ།། །།དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དེས་འདོད་པ་ཐམས་ཅད་རབ་ཏུ་བསྒྲུབ་པའི་སྤྲིན་བཀོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། བསྒྲུབ་པའི་མཚན་ཉིད་ལས་དངོས་
གྲུབ་ཀྱི་བྱེ་བྲག་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །དེ་ལ་འདི་ནི་ཕྲ་མོའི་ཏིང་ངེ་འཛིན་ལ་བསྒྲུབ་པའོ། །དེ་བཞིན་གཤེགས་པ་ཐམས་ཅད་ཀྱི། ཐམས་ཅད་མཁྱེན་པ་བསྒྲུབ་པའི་ཕྱིར། །རང་སེམས་ཤིན་ཏུ་སྦྱངས་པས་ན། །ཕྲ་མོའི་དངོས་
གྲུབ་བསྒྲུབ་པ་གཅེས། །རབ་ཏུ་དབེན་པའི་གནས་དག་ཏུ། །བདག་ཉིད་ནམ་མཁའི་དབུས་སུ་ནི། །ཟླ་བའི་དཀྱིལ་འཁོར་ལ་གནས་པའོ། །རང་གི་ལྷར་ནི་རང་བསྒོམས་ནས། །ཕྲ་མོའི་སྦྱོར་བ་ཀུན་དུ་བརྩམ། །རིན་ཆེན་རྒྱུ་ལས་གྲུབ་པ་ཡི། །བསྙེན་མའི་
དཀྱིལ་འཁོར་དེ་བཞིན་དུ། །སོ་སོའི་གསུང་གི་ཡིག་འབྲུ་རྣམས། །ཆེ་ཆུང་ཡུངས་ཀར་འབྲུ་ཚོད་ཙམ། །སྙིང་གའི་དཀྱིལ་དུ་གསལ་བ་ལས། །ཧཱུྃ་གིས་ཁོང་དུ་དྲངས་ནས་ནི། །ཁོང་ནས་ཁ་རུ་བྱུང་བར་བསམ། །ཧཱུྃ་གི་དབུགས་ལ་ཞོན་ནས་སུ། །སྣ་ཡི་རྩེ་

མོར་བྱུང་བ་དང་། །སྣ་རྩེ་ཉིད་དུ་གསལ་བར་བསྒོམ། །ཏིང་འཛིན་གསལ་བར་ཁུགས་པ་དང་། །སྣ་ཡི་རྩེ་ནས་ནམ་མཁའ་ལ། །ཇེ་རིང་ཇེ་རིང་ཕཊ་ཀྱིས་སྤྲོ། །རིང་དུ་སྤྲོ་བ་གོམས་པ་དང་། །འོད་དང་བཅས་པའི་ཡིག་འབྲུ་དེས། །ཕྱོགས་
བཅུར་གནས་པའི་སངས་རྒྱས་ཀྱི། གསུང་གི་ཡི་གེ་ཇི་སྙེད་པ། །དབྱར་གྱི་སྤྲིན་སྤུང་འདུས་པ་བཞིན། །ཧཱུྃ་གིས་སྙིང་ག་ཉིད་དུ་བསྡུ། །ཡུངས་ཀར་འབྲུ་ཚོད་དེ་ཉིད་ལ། །སྟོང་གསུམ་འཇིག་རྟེན་ཀུན་བཅུག་ཀྱང་། །དེ་ཡི་ནང་དུ་ས་ལེ་གསལ། །སྔགས་
ཀྱིས་བརྟགས་པའི་ལྷ་རྣམས་ཀྱི། །གནས་སུའང་དེ་ཉིད་གསལ་བར་བསྒོམ། །དེ་ལྟའི་འཕྲོ་འདུ་ཡང་དང་ཡང་། །གོམས་པར་ཅི་ནུས་དག་ཏུ་བྱ། །དེ་ནི་གསུང་གི་ཕྲ་མོར་བཤད། །སོ་སོའི་གསུང་གི་ཡིག་འབྲུ་ལས། །ཕྱག་མཚན་ཡུངས་ཀར་ཙམ་དུ་
གསལ། །སྙིང་ག་ཉིད་དུ་གསལ་བ་ནས། །རྒྱལ་བའི་ཕོ་བྲང་འདུས་ཀྱི་བར། །གོང་མའི་གོ་རིམས་དེ་ཡིས་བྱ། །དེ་ནི་ཐུགས་ཀྱི་ཕྲ་མོར་བཤད། །སོ་སོའི་ཐུགས་མཚན་གསལ་བ་ལས། །རང་རང་ལྷ་ཡི་རྣམ་པར་གསལ། །ཐུགས་ཀར་ཡུངས་ཀར་འབྲུ་ཚོད་
ཙམ། །གོང་མའི་ཚུལ་དུ་བྱ་བར་བཤད། །དེ་ནི་སྐུ་ཡི་ཕྲ་མོ་ཡིན། །དེ་ལྟར་ལྷ་ཚོགས་མ་ལུས་པར། །རིམ་གྱིས་ཡང་ན་ཅིག་ཅར་རོ། །ཅིག་ཅར་བསྒོམ་པ་ཤིན་ཏུ་དཀའ། །བདེ་གཤེགས་རྒྱལ་བ་སངས་རྒྱས་ཀྱི། །ཐམས་ཅད་མཁྱེན་པའི་སྤྱོད་
ཡུལ་མིན། །རྣལ་འབྱོར་ཅན་གྱིས་རིམ་གྱིས་ནི། །གཙོ་ནས་འཁོར་གྱི་བར་དག་ཏུ། །ཡང་ནས་ཡང་དུ་གསལ་བར་བསྒོམ། །འདི་དག་བསྒོམས་པའི་ཡོན་ཏན་ནི། །སངས་རྒྱས་ཉིད་དུ་འགྲུབ་པར་ངེས། །ཐམས་ཅད་མཁྱེན་པ་བསྒྲུབ་པའི་མཆོག །
སྐུ་གསུང་ཐུགས་ཀྱི་དཀྱིལ་འཁོར་ཀུན། །འདི་ལས་འབྱུང་བར་གདོན་མི་ཟ། །འདི་ཐོས་དངོས་གྲུབ་གཞན་རྣམས་ཀུན། །བསྒྲུབ་མི་དགོས་པར་གྲུབ་པ་ཡིན། །རྣལ་འབྱོར་ཅན་གྱིས་བསྒོམ་བྱས་ན། །ཟླ་བ་དྲུག་གིས་ངེས་པར་འགྲུབ། །ཟས་སུ་

བཤང་གཅི་ཟ་བའམ། །ཤ་རྣམས་ཟོས་ན་འགྲུབ་པ་ཡིན། །ཞེས་གསུངས་སོ། །དེ་ལ་འདི་ནི་རྡོ་རྗེ་མི་སྣང་བ་བསྒྲུབ་པའི་ཐབས་སོ། །དགོན་པའི་གནས་སམ་རི་བོ་དབེན། །མེ་ཏོག་འབྲས་བུ་རྒྱས་པ་རུ། །རང་གི་ལུས་ངག་སེམས་རྡོ་རྗེའི། །སྙིང་གར་ཟླ་
བའི་དཀྱིལ་འཁོར་ལ། །འཇམ་དཔལ་ས་བོན་མུྃ་དུ་བསྒོམ། །བདག་ལུས་དང་ནི་ཟླ་བ་དང་། །མུྃ་རྣམས་རིམ་པར་ཇེ་ཞི་ལ། །སྟོང་པ་ཉིད་ཀྱི་རྣམ་པ་ལས། །སྙིང་རྗེ་མུྃ་དང་ཟླ་བ་ལས། །རྡོ་རྗེ་འཇམ་པའི་ཕྱག་རྒྱ་བསྒོམ། །ལུས་དང་ངག་སེམས་རྡོ་རྗེ་ལས། །
རྡོ་རྗེ་འཇམ་པ་རབ་འཕྲོས་པས། །འཇམ་དཔལ་ཉིད་དང་འདྲ་བར་འགྱུར། །དཔག་ཚད་བརྒྱ་ཡི་ཁྱོན་ཙམ་དུ། །རྡོ་རྗེ་འཇམ་པའི་འོད་དང་བཅས། །རྒྱན་རྣམས་ཀུན་གྱིས་ལེགས་བརྒྱན་པའི། །འཇམ་དཔལ་ཉིད་དུ་ཀུན་གྱིས་མཐོང་། །མངོན་ཤེས་ལྡན་པའི་ལྷ་
རྣམས་ཀྱིས། །ལུས་ཀྱི་རྣམ་པ་མཐོང་མི་འགྱུར། །དེ་ནས་སླར་ནི་བསྡུས་པ་ལས། །ཐུགས་ཀའི་མུྃ་ལ་ཐིམ་བསམས་ན། །མཆོག་ཏུ་ཤེས་རབ་རྣོ་བ་དང་། །མཁྱེན་རབ་ཀུན་གྱི་བདག་པོར་འགྱུར། །ཐམས་ཅད་མཁྱེན་པའང་ཐོབ་འགྱུར་ན། །འཇིག་
རྟེན་ཤེས་བྱ་སྨོས་ཅི་དགོས། །ཞེས་གསུངས་སོ། །དེ་ལ་འདི་ནི་རྡོ་རྗེ་རིག་འཛིན་བསྒྲུབ་པའི་ཐབས་སོ། །ནམ་མཁའ་དབྱིངས་ཀྱི་དབུས་དག་ཏུ། །ཟླ་བའི་དཀྱིལ་འཁོར་བསམས་ནས་སུ། །རང་ཉིད་གང་འདོད་ལྷར་བསྒོམས་ཏེ། །སྐུ་གསུང་ཐུགས་སུ་བྱིན་
བརླབས་པའི། །དམ་རྫས་བདུད་རྩི་རྣམ་ལྔ་ལ། །སྲན་མ་ཙམ་གྱི་རིལ་བུ་བྱ། །ལྕགས་གསུམ་ག་འུར་བཅུག་ནས་ནི། །ཁར་བཅུག་རང་གི་སྙིང་པོ་ལས། །རབ་ཏུ་གོམས་པར་འདི་བྱས་ན། །གང་འདོད་རིགས་འཛིན་གདོན་མི་ཟ། །མཐའ་ཡས་ཞིང་ཁམས་
ཐམས་ཅད་ཀྱི། །རྡུལ་སྙེད་བཞུགས་པའི་སངས་རྒྱས་ཀུན། །དེ་ཡི་རྗེས་སུ་འབྲང་བར་འགྱུར། །དེ་ལ་སོགས་ཏེ་མཐའ་ཡས་མཆོག །ཅེས་གསུངས་སོ། །ཡང་ན་རང་གི་ཕྱག་རྒྱ་སྟེ། །ནམ་མཁའ་དབྱིངས་ཀྱི་དབུས་དག་ཏུ། །ཟླ་བའི་དཀྱིལ་འཁོར་སྟེང་དུ་ནི། །

བདག་ཉིད་གང་འདོད་ལྷར་བསྒོམས་ཏེ། །རང་གི་ཕྱག་རྒྱ་བརྙན་མར་བྱ། །ལག་ཏུ་ཐོགས་ལ་རང་རིག་སྔགས། །བཟླས་ན་རིག་འཛིན་གང་ཡིན་འགྱུར། །རང་གི་ལྷ་ནི་གང་ཡིན་པའི། །ཡོན་ཏན་དག་ནི་དེ་ཐོབ་འགྱུར། །ཞེས་གསུངས་སོ། །
དེ་ལ་འདི་ནི་རྡོ་རྗེ་ལྷ་དང་། །ལྷ་མོ་དགུག་པའི་ཆོ་གའོ། །ཤིང་གཅིག་དྲུང་ངམ་བཞི་མདོ་འམ། །མཚན་མ་གཅིག་དང་ཞི་གནས་སུ། །བདག་ཉིད་གཙོ་གཟུང་ལྡན་བྱས་ནས། །སྐུ་གསུང་ཐུགས་ཀྱི་བདག་ཉིད་བསམ། །སྐུ་གསུང་ཐུགས་ཀྱི་རྡོ་རྗེ་ལས། །ལག་
ན་ཀྱོ་བ་ཐོགས་པ་ཡི། །སྤྲུལ་པ་བསམ་ཡས་འཕྲོ་བར་བྱ། །ཛ་ཡཱ་ར་ཎ་ཕཊ། གང་དགུག་ལྷ་འམ་བུད་མེད་དམ། །ཡྃ་ལས་རླུང་གིས་བཏེག་བསམས་ཏེ། །ཀྱོ་བས་གདན་ནམ་སྙིང་ག་ནས། །གཟུང་སྟེ་ཧཱུྃ་གིས་བསྡུས་བྱས་ན། །སངས་རྒྱས་གྲགས་པ་
ཆེན་པོ་ཡང་། །རང་དབང་མེད་པར་ཁུགས་འགྱུར་ན། །འཇིག་རྟེན་བུ་མོ་སྨོས་ཅི་དགོས། །གང་འདོད་ལས་དེ་བྱེད་པར་འགྱུར། །ཞེས་གསུངས་སོ། །དེ་ནི་འདི་ནི་རྡོ་རྗེ་ལྕེ་བསྒྲུབ་པའི་ཐབས་སོ། །བདག་ཉིད་སྔགས་ཀྱི་སྐྱེས་བུ་ཡི། །རྡོ་རྗེའི་སྐུར་ནི་རབ་བསྒོམས་
ལ། །ལྕེ་ལ་པདྨའི་དཀྱིལ་འཁོར་དུ། །རྡོ་རྗེའི་སྦྱོར་བས་ཨོྃ་དུ་བསམ། །དེ་ལས་རྡོ་རྗེ་གསུང་དུ་གྱུར། །བསམ་ཡས་ཨྃ་གི་འཕྲོ་འདུ་ལས། །སངས་རྒྱས་གསུང་དང་སེམས་ཅན་དག །བདག་གི་ལྕེ་ལ་འདུས་པ་རུ། །ཡང་ནས་ཡང་དུ་གོམས་པར་བསྡུ། །
འཇིག་རྟེན་ཚིག་གམ་ཆོས་ཀྱི་སྒྲ། །ངག་བརྗོད་བདེན་ཞིང་ཉན་པ་དང་། །བརྫུན་དང་ཕྲ་མ་ཚིག་རྩུབ་སོགས། །ངག་གི་ཉེས་པ་ཅི་བརྗོད་ཀྱང་། །ལྕེ་སྒྲིབ་སྤངས་པར་གདོན་མི་ཟ། །ཞེས་གསུངས་སོ། །དེ་ལ་འདི་ནི་ཤ་རྣམ་པ་ལྔའི་དངོས་གྲུབ་བསྒྲུབ་པའི་ཐབས་
སོ། །བདག་ཉིད་ལུས་ངག་སེམས་རྡོ་རྗེ། །རྡོ་རྗེ་གསུམ་དུ་རྣམ་པར་བསྒོམ། །མཚན་དང་དཔེ་བྱད་ཡང་དག་ལྡན། །ཡེ་ཤེས་དམ་ཚིག་སྙིང་གར་བསྒོམ། །དབུ་རྒྱན་རྡོ་རྗེ་གསལ་བར་བྱ། །ཤ་ཆེན་དག་ནི་ཐམས་ཅད་ལ། །ས་བོན་ཨོཾ་གྱིས་རྣམ་པར་སྦྱང་། །

སྲིད་གསུམ་སེམས་ཅན་ཐམས་ཅད་ཀྱི། ཤ་ཆེན་ཇི་སྙེད་ཡོད་པ་ཀུན། །ཨོྃ་གྱི་འཕྲོ་འདུས་བསྡུས་ནས་ནི། །སྤྱོད་ཚེ་བདག་ལ་ཐིམ་པར་བསྒོམ། །གླང་པོ་དག་གི་ཤ་རྣམས་ལ། །ཧཱུྃ་ལྕེའི་དམ་ཚིག་རྡོ་རྗེ་ལ། །རྡོ་རྗེ་ཅན་གྱི་ཧཱུྃ་དུ་བསྒོམ། །ཡེ་ཤེས་
ལྔ་ཡི་སྦྱོར་བ་ཡིས། །ཟོས་ན་དམ་ཚིག་སྐུ་གསུང་ཐུགས། །རྡོ་རྗེ་ཐོབ་པར་གདོན་མི་ཟ། །ཕྱག་ན་རྡོ་རྗེའི་མཐུ་སྟོབས་འགྲུབ། །ཆོ་ག་གོ་རིམས་དེ་ཡིས་ནི། །གླང་པོ་དག་གི་ཤ་རྣམས་ལ། །ཧཱུྃ་གི་འཕྲོ་འདུས་རབ་སྦྱངས་ཏེ། །ཟོས་ན་མངོན་ཤེས་ལྔ་ཐོབ་འགྱུར། །
རྟ་ཤ་དག་ནི་ཐམས་ཅད་ལ། །སྭ་ཡི་འཕྲོ་འདུས་རབ་སྦྱངས་ཏེ། །ཟོས་ན་མི་སྣང་ཀུན་གྱི་མཆོག །ཁྱི་ཤ་དག་ནི་ཐམས་ཅད་ལ། །ཧ་ཡི་འཕྲོ་འདུས་རབ་སྦྱངས་ན། །དངོས་གྲུབ་རབ་འབྲིང་ཐ་མ་ཀུན། །ཡིད་བཞིན་ནོར་བུ་ལྟ་བུར་འགྱུར། །གཉིད་ཀྱི་དགྲ་ཡང་
མོད་ལ་འཇོམས། །བ་གླང་ཤ་ནི་ཐམས་ཅད་ལ། །ཨྃ་གྱི་འཕྲོ་འདུས་སྦྱང་བྱས་ཏེ། །ཆོ་ག་བཞིན་དུ་ཟོས་ན་ནི། །སངས་རྒྱས་ཀུན་གྱི་ལོངས་སྤྱོད་འཕྲོག །མཐུ་ཆེན་ཀུན་གྱི་བུ་མོ་ཡང་། །སྤྱོད་པར་འགྱུར་བ་གདོན་མི་ཟ། །ཞེས་གསུངས་སོ། །དེ་ལ་འདི་ནི་
རྡོ་རྗེ་མངོན་པར་ཤེས་པ་ལྔ་བསྒྲུབ་པའི་ཐབས་སོ། །རབ་ཏུ་དབེན་པའི་གནས་དག་ཏུ། །བདག་ཉིད་རྣམ་པ་ཀུན་ལྡན་པའི། །སྔགས་ཀྱི་ལུས་སུ་རྣམ་སྦྱངས་ནས། །མིག་གི་དབང་པོ་ཐམས་ཅད་ལ། །ཡིག་འབྲུ་ལྔ་ཡིས་རབ་སྦྱངས་ཏེ། །འོད་ཟེར་ལྔར་ནི་འཕྲོ་
བ་ལས། །སངས་རྒྱས་སེམས་ཅན་ཐམས་ཅད། །མིག་གི་མངོན་ཤེས་ཀུན་བསྡུས་ནས། །དབང་པོ་དེ་ལ་ཐིམ་པ་དང་། །ཟོས་སམ་མིག་ལ་རྟག་བསྐུས་ན། །སངས་རྒྱས་སེམས་ཅན་ཐམས་ཅད་ཀྱི། །སྤྱོད་ཡུལ་ཇི་སྙེད་ཡོད་པ་ཀུན། །ཤིང་ཐོག་
ལག་ཏུ་བཞག་པ་བཞིན། །རྡོ་རྗེ་མིག་གི་གསལ་བར་མཐོང་། །ཆོ་ག་གོང་མའི་ཚུལ་གྱིས་ནི། །རྣ་བའི་དབང་པོ་ཐམས་ཅད་ལ། །སངས་རྒྱས་སེམས་ཅན་ཐམས་ཅད་ཀྱི། རྣ་བའི་མངོན་ཤེས་ཀུན་བསྡུས་ནས། །ཟོས་སམ་རྣ་བའི་ནང་བཞག་ན། །སངས་རྒྱས་

སེམས་ཅན་ཐམས་ཅད་ཀྱི། །སྒྲ་རྣམས་ཐམས་ཅད་ཇི་སྙེད་པ། །རྣ་བའི་དྲུང་དུ་འདོད་པ་བཞིན་ལ། །སྙིང་གི་བྱེ་བྲག་ཐམས་ཅད་ལ། །སངས་རྒྱས་སེམས་ཅན་ཐམས་ཅད་ཀྱི། །དྲན་པའི་མངོན་ཤེས་ཀུན་བསྡུས་ནས། །ཟོས་སམ་སྙིང་གར་
བཞག་ན་ནི། །སངས་རྒྱས་སེམས་ཅན་ཐམས་ཅད་ཀྱི། ཐུགས་དང་སེམས་ཀྱི་རྒྱུད་དག་ནི། །མཁྱེན་ཅིང་རིག་པ་ཀུན་ཤེས་འགྱུར། །ཡུམ་གྱི་མཁའ་ལས་བྱུང་བ་ཡི། །རཀྟ་དག་ནི་ཐམས་ཅད་ལ། །སངས་རྒྱས་སེམས་ཅན་ཐམས་ཅད་ཀྱི། །གནས་
རྣམས་མ་ལུས་ཀུན་བསྡུས་ནས། །ཟོས་སམ་སྙིང་གར་བཞག་ན་ནི། །སྔོན་གྱི་གནས་ཀྱི་གཏན་ཚིགས་རྣམས། །ཞག་གསུམ་ལོན་བཞིན་གསལ་བར་འགྱུར། །སྙིང་གར་ཡེ་ཤེས་སེམས་དཔའ་བསྒོམ། །ཕྱོགས་བཅུར་གནས་པའི་སངས་རྒྱས་རྣམས། །
བཀུག་ནས་དེ་དག་རྫུ་འཕྲུལ་རྣམས། །ཕྲོགས་ནས་སྙིང་གར་བསྡུ་བྱས་ན། །སངས་རྒྱས་དག་ནི་ཐམས་ཅད་ཀྱི། །རྡོ་རྗེ་རྫུ་འཕྲུལ་ཐམས་ཅད་ཀུན། །འགྲུབ་པར་འགྱུར་བར་གདོན་མི་ཟ། །ཞེས་གསུངས་སོ། །དེ་ལ་འདི་ནི་རྡོ་རྗེ་བསྲུང་བ་བསྒྲུབ་པའི་ཐབས་སོ། །སྐུ་གསུང་
ཐུགས་ནི་རྣམས་བསྒོམས་ལ། །སྙིང་གར་ཉི་ཟླའི་དཀྱིལ་འཁོར་ལས། །ཁྲོ་བོ་འོད་ཀྱི་ཕྲེང་བ་ཡིས། །བསྲུང་བར་བྱ་བའི་ཟུག་རྔུ་རྣམས། །ཕྱུང་སྟེ་མེད་པར་བསམས་ནས་ནི། །ལྷ་རྣམས་དག་ནི་ཐམས་ཅད་ཀྱི། ཕྱག་རྒྱ་དག་ནི་ཐམས་ཅད་དམ། །ཡང་ན་རྡོ་རྗེ་
རྒྱ་གྲམ་མམ། །རྡོ་རྗེ་གོ་ཆའི་ཕྱག་རྒྱ་ཡིས། །ལུས་དང་ངག་སེམས་རབ་བསྲུངས་ན། །སངས་རྒྱས་ཀྱིས་ཀྱང་མི་ཚུགས་ན། །ཕལ་པ་རྣམས་ཀྱིས་སྨོས་ཅི་དགོས། །ཞེས་གསུངས་སོ། །ལས་འདི་སྦྱར་བར་བྱ་བ་ཡང་། །ལྗོངས་སམ་གྲོང་ཁྱེར་གྲོང་དག་ཏུ། །
སྔགས་ཀྱི་བདག་པོར་རབ་གནས་ལ། །ནད་ཀུན་སྤོང་བའི་ལས་འདི་བྱ། །རྡོ་རྗེ་རྩེ་ལྔ་འོད་འཕྲོ་བ། །བསྐལ་པའི་མེ་བཞིན་བསམས་ནས་སུ། །སྤྲོས་པས་ནད་རྣམས་བསྲེགས་ནས་ནི། །སླར་ཡང་རྡོ་རྗེ་ཉིད་ལ་བསྡུ། །དེ་ནས་རྡོ་རྗེ་དེ་ཉིད་ལས། །འོད་ཟེར་

སེར་པོ་སྤྲོས་པ་ཡིས། །ནད་རྣམས་སྟོང་པའི་གནས་དེ་དག །བསྐལ་པ་ཡུན་དུ་གང་བསམས་ཏེ། །གོམས་པར་ཡང་དང་ཡང་བསམས་ན། །ནད་རྣམས་ཐམས་ཅད་སེལ་བར་བྱེད། །དེ་ན་འཁོར་བའི་སྐྱེ་བོ་རྣམས། །སྤྲུལ་པའི་བདེ་བ་ཐོབ་པར་འགྱུར། །
བདེ་གཤེགས་རྣམས་ཀྱིས་བྱིན་གྱིས་རློབ། །ཚེ་རིང་ལང་ཚོ་བདེ་བར་འགྱུར། །ཞེས་གསུངས་སོ། །དེ་ལ་འདི་ནི་ཞི་བ་བསྒྲུབ་པའི་ཐབས་སོ། །རབ་ཏུ་དབེན་ཞིང་ཉམས་དགའ་བར། །རྣམ་པར་སྣང་མཛད་བསྒོམ་པ་ནི། །ནམ་མཁའི་དབུས་སུ་ཟླ་བ་ལ། །
དཀྱིལ་འཁོར་ཟླུམ་པོ་བསམས་ནས་སུ། །རྣམ་པར་སྣང་མཛད་དཀྱིལ་འཁོར་བསྐྱེད། །སྙིང་གར་ཟླ་བའི་དཀྱིལ་འཁོར་ལ། །བུད་དྷ་ལོ་ཙའི་སྙིང་པོ་བསམ། །དེ་ལས་ལྷ་མོའི་སྐུར་སྤྲོས་པས། །མཁའ་དབྱིངས་ཡོངས་སུ་གང་བར་བསྒོམ། །སླར་འདུས་འོད་ཀྱི་
ཐིག་ལེར་གསལ། །དེ་ཉིད་བདག་གི་ལུས་ལ་དབབ། །བདག་གི་བ་སྤུའི་བུ་ག་ནས། །སངས་རྒྱས་སྤྲིན་ཆེན་རབ་འཕྲོས་ཏེ། །འདོད་པའི་ལུས་ནང་གང་བར་བྱ། །སངས་རྒྱས་སྤྲིན་གྱིས་དེ་ལུས་ལ། །དབང་བསྐུར་བ་ནི་རབ་ཏུ་སྩོལ། །དེ་ཡིས་སྐད་ཅིག་དེ་ཡི་ཚེ། །
དྲག་པོ་གཏུམ་པོའང་ལྷན་ནེར་འགྱུར། །ཞེས་གསུངས་སོ། །དེ་ལ་འདི་ནི་རྒྱས་པའི་བསྒྲུབ་པའི་ཐབས་སོ། །ནམ་མཁའི་དབུས་སུ་ཟླ་བ་ལ། །ཆོས་ཀྱི་སེམས་དཔའ་བསྒོམ་པར་བྱ། །སྙིང་གར་ཟླ་བའི་དཀྱིལ་འཁོར་ལ། །གོས་དཀར་ཅན་གྱི་སྙིང་པོ་བསམ། །
དེ་ལས་གོས་དཀར་ཉིད་འཕྲོས་པས། །མཁའ་དབྱིངས་ཡོངས་སུ་གང་བར་བསྒོམ། །དེ་ལས་འོད་ཀྱི་གོང་བུ་ནི། །གྲུ་བཞི་ལམ་པར་གསལ་བར་བསྡུ། །བ་སྤུ་རྣམས་ཀྱི་བུ་ག་ནས། །རིན་ཆེན་སྤྲིན་ཆེན་རབ་སྤྲོས་པས། །རྡོ་རྗེ་ཆོས་སུ་བསྒོམས་ནས་སུ། །འདོད་
པར་བྱ་བའི་ལུས་ནང་དགང་། །ཡང་ནས་ཡང་དུ་འདི་བྱས་ན། །བར་སྣང་ཅི་འདོད་རྒྱས་པར་འགེངས། །ནོར་བུ་རིན་ཆེན་བཞིན་འདྲར་འགྱུར། །དགོས་པ་ཕྲ་མོ་སྨོས་ཅི་དགོས། །ཞེས་གསུངས་སོ། །དེ་ལ་འདི་ནི་རྡོ་རྗེ་དབང་དུ་བསྡུ་བ་བསྒྲུབ་པའི་ཐབས་སོ། །རྡོ་རྗེ་དཀྱིལ་

འཁོར་ཟླ་གམ་ནི། །ནམ་མཁའི་དབྱིངས་ཀྱི་དབུས་སུ་བསམ། །རྡོ་རྗེ་ཆོས་མཆོག་གཟུགས་སུ་བསམ། །སྙིང་གར་ཟླ་བའི་དཀྱིལ་འཁོར་ལ། །ཉིད་ཀྱི་སྙིང་པོ་བསམ་པར་བྱ། །རྒྱལ་བ་སྲས་དང་བཅས་རྣམས་ཀྱིས། །མཁའ་དབྱིངས་
ཐམས་ཅད་གང་བར་བསྒོམ། །འོད་ཟེར་སྣ་ལྔ་འཕྲོས་པ་ཡིས། །འདོད་པ་ལ་ནི་དབབ་པར་བྱ། །དེ་ནས་བསྡུས་ཏེ་བདག་ཉིད་ཀྱིས། །སྐུ་གསུང་ཐུགས་ཀྱི་བྱིན་བསྡུས་ན། །སངས་རྒྱས་ཉིད་ཀྱང་དབང་འདུ་ན། །འགྲོ་བ་དབང་མེད་སྨོས་ཅི་དགོས། །ཞེས་གསུངས་སོ། །
དེ་ལ་འདི་ནི་རྡོ་རྗེ་དྲག་པོ་བསྒྲུབ་པའི་ཐབས་སོ། །ནམ་མཁའ་དབྱིངས་ཀྱི་དབུས་སུ་ནི། །ཉི་མའི་དཀྱིལ་འཁོར་སྟེང་དུ་ནི། །ཁྲོས་པའི་གཟུགས་རྣམས་བསྒོམ་བྱ་སྟེ། །བསྐལ་པའི་མེ་དཔུང་འཕྲོས་པ་ལས། །ཁྲོས་པའི་རྡོ་རྗེ་སྲིན་པོ་དང་། །སྣ་ཚོགས་ཝ་དང་བྱ་
རོག་དང་། །བྱ་རྒོད་ཁྱི་ལ་སོགས་པ་ཡི། །ཕྲ་མེན་བསམ་ཡས་མི་བཟད་པས། །མཁའ་དབྱིངས་གང་བར་བསྒོམས་ནས་སུ། །སངས་རྒྱས་ཀུན་ལ་གནོད་བྱེད་ན། །དངོས་སམ་ཡང་ན་བསམས་ནས་ཀྱང་། །མཚོན་ཆ་ཐོགས་པ་དེ་དག་གིས། །སྙིང་དང་
ནང་གྲོལ་དབང་པོ་ཀུན། །དྲངས་ཏེ་ཟོས་པར་རབ་བསྒོམས་ན། །དགྲ་རྣམས་འཆི་བར་ངེས་པ་སྟེ། །དེ་ལྟར་རབ་ཏུ་བསྒོམས་ན་ནི། །རྒྱལ་བ་རྡོ་རྗེ་འཛིན་པ་ཡང་། །ཟླ་བ་ཕྱེད་ཀྱིས་འཆི་འགྱུར་ན། །དམ་ཚིག་ཉམས་པ་སྨོས་ཅི་དགོས། །ཞེས་གསུངས་སོ། །དེ་ལ་འདི་ནི་
སྐྱེ་འགྲོ་འདུལ་བའི་ཕུར་བུ་བསྒྲུབ་པའི་ཐབས་སོ། །སྡིག་པ་བྱེད་དམ་གནོད་བྱེད་པ། །རྡོ་རྗེ་ཕུར་བུས་གདུལ་བར་བྱ། །དུར་ཁྲོད་གནས་སམ་རྐང་གཅིག་ཏུ། །བདུད་རྩི་འཁྱིལ་པའམ་ཀི་ལིའམ། །གང་ཡང་རུང་བར་གནས་བྱས་ལ། །རྡོ་རྗེ་ཕུར་བུ་རབ་ཏུ་བསྒོམ། །
མེ་སྟག་འཕྲོ་བའི་འོད་འཕྲོ་བས། །རི་རབ་གླིང་བཞིའི་གཟུགས་བྱས་ལ། །རང་གི་སྔགས་ཀྱིས་གདབ་པར་བྱ། །དེ་ལྟར་རབ་ཏུ་གདབ་བྱས་ན། །འགྲོ་དང་མི་འགྲོ་ཐམས་ཅད་ཀུན། །དུལ་བར་གྱུར་པར་གདོན་མི་ཟ། །ཞེས་གསུངས་སོ། །དེ་ལ་འདི་ནི་གཞན་གྱི་རིག་

སྔགས་གནོན་པ་བསྒྲུབ་པའི་ཐབས་སོ། །ནམ་མཁའ་དབྱིངས་ཀྱི་དབུས་སུ་ནི། །དབང་ཆེན་དཀྱིལ་འཁོར་བསྒོམས་ནས་ནི། །ལས་ཀྱི་སེམས་དཔར་བདག་གནས་ལ། །གཡས་པ་རྡོ་རྗེ་རྩེ་ལྔ་བཞག །རིག་སྔགས་བྱེད་པ་བསམས་ནས་ནི། །ལས་ཀྱི་རྡོ་རྗེའི་རྐང་
པ་དག །དེ་ཡི་སྤྱི་ནས་མནན་པར་བསྒོམ། །རིག་སྔགས་ཉིད་ཀྱང་མནན་པར་བསམ། །དེས་ནི་མུ་སྟེགས་ཅན་དག་དང་། །ཕས་ཀྱི་རྒོལ་བ་ཐམས་ཅད་ཀུན། །མནན་པར་འགྱུར་ཏེ་ཐེ་ཚོམ་མེད། །ཅེས་གསུངས་སོ། །དེ་ལ་འདི་ནི་གཞན་གྱི་དཔུང་མནན་
པ་བསྒྲུབ་པའི་ཐབས་སོ། །ནམ་མཁའ་དབྱིངས་ཀྱི་དབུས་སུ་ནི། །ཉི་མའི་དཀྱིལ་འཁོར་དབུས་གནས་པར། །གཞན་གྱིས་མི་ཐུབ་ཁྲོ་བོ་ཆེ། །པདྨ་དམར་སེར་མདོག་འདྲ་བ། །ཤིན་ཏུ་ཆེ་ཞིང་བརྗིད་པ་བསྒོམ། །ཕ་རོལ་དམག་དཔུང་འོག་དག་ཏུ། །རླུང་དང་
མཚོ་དང་ས་སྐྱེད་ལ། །དེ་ལ་གནས་པའི་དཔུང་རྣམས་ཀྱིས། །སྟེང་དུ་ཟླ་བའི་དཀྱིལ་འཁོར་བསམ། །དེ་སྟེང་རྡོ་རྗེ་རྒྱ་གྲམ་གྱི། །སྟེང་དུ་རི་རབ་རྣམ་པར་བསྒོམ། །དེ་ཡི་སྟེང་དུ་མནན་བསམས་ན། །སངས་རྒྱས་དཔུང་ཡང་གནོན་པར་ནུས། །མི་རྒྱལ་དཔུང་
ལ་སྨོས་ཅི་དགོས། །ཞེས་གསུངས་སོ། །དེ་ལ་འདི་ནི་དགྲའི་དཔུང་རྨོངས་པར་བྱ་བ་བསྒྲུབ་པའི་ཐབས་སོ། །དགྲ་འམ་དཔུང་གི་གཟུགས་བརྙན་དག །བསམས་སམ་གཟུགས་སུ་བྱས་ནས་ནི། །རྡོ་རྗེ་ཕུར་བུ་ཚད་ལྡན་ལ། །ཧཱུྃ་ལས་ཁྲོ་བོའི་སྐུར་བསྐྱེད་ནས། །
རང་གི་རིག་སྔགས་རབ་བཟླས་ཏེ། །སྙིང་གར་བཏབ་པར་རབ་བསྒོམས་ནས། །ཁྲོས་པས་བྱས་ན་སངས་རྒྱས་ཀྱི། །དཔུང་ཡང་མྱོས་པར་གདོན་མི་ཟ། །ཞེས་གསུངས་སོ། །དེ་ལ་འདི་ནི་ཆུ་ལ་འབྱིང་བ་མེད་པ་བསྒྲུབ་པའི་ཐབས་སོ། །ནམ་མཁའ་དབྱིངས་
ཀྱི་དབུས་སུ་ནི། །སྔགས་ཀྱི་བདག་པོ་རབ་ཏུ་བསྒོམ། །ཆུ་ཡི་སྟེང་ནི་ཐམས་ཅད་དུ། །སངས་རྒྱས་དག་གིས་གཏམས་པར་བསྒོམ། །སྟེང་ནས་དལ་གྱིས་བཅག་པར་བསམ། །སངས་རྒྱས་དག་ནི་ཐམས་ཅད་ཀྱི། །སྤྱི་བོའི་སྟེང་དུ་རྐང་པ་བསྒོམ། །དེ་ལྟར་

རབ་ཏུ་གོམས་པ་དང་། །ས་ལ་འགྲོ་བཞིན་ནུས་པར་འགྱུར། །ཞེས་གསུངས་སོ། །དེ་ལ་འདི་ནི་ཐོགས་མེད་རླུང་གི་དངོས་གྲུབ་བསྒྲུབ་པའི་ཐབས་སོ། །ནམ་མཁར་རྡོ་རྗེ་དབུས་སུ་ནི། །ཟླ་བའི་དཀྱིལ་འཁོར་དབུས་གནས་པར། །ལྷ་ཡི་རྣལ་
འབྱོར་བསྒོམ་པར་བྱ། །འོག་གི་ཕྱོགས་སུ་ཡྃ་ལས་ནི། །རླུང་གིས་རབ་ཏུ་བཏེག་པར་བསྒོམ། །དེ་ལྟར་རབ་ཏུ་བསྒོམ་བྱས་ན། །མཁའ་ལ་བྱ་བཞིན་འགྲོ་བར་ནུས། །ཞིང་ཁམས་ཀུན་དུ་བགྲོད་པར་འགྱུར། །ཞེས་གསུངས་སོ། །དེ་ལ་འདི་ནི་ཉི་མ་གསལ་བ་
ཞེས་བྱ་བའི་དངོས་གྲུབ་བསྒྲུབ་པའི་ཐབས་སོ། །སྐུ་གསུང་ཐུགས་ནི་རྡོ་རྗེ་ཡི། །སྙིང་གར་ཉི་མའི་དཀྱིལ་འཁོར་བསམ། །དེ་ལས་འོད་དུ་འཕྲོས་པ་ལས། །མུན་པའི་གནས་རྣམས་བསལ་བར་ངེས། །ཞེས་གསུངས་སོ། །དེ་ལ་འདི་ནི་རླུང་བཅད་པ་བསྒྲུབ་པའི་
ཐབས་སོ། །བདག་ཉིད་རླུང་གི་ཕྱོགས་སོང་ལ། །སྟེགས་བུ་གྲུ་བཞི་ལྷམ་པར་བྱ། །སྤོས་ཀྱི་ཐིག་ལེ་བདུན་བྱས་ཏེ། །ཡྃ་ལས་རླུང་བདུན་བསྐྱེད་པར་བྱ། །རླུང་ལྷ་དགུག་པ་བྱས་ནས་སུ། །ཁམ་ཕོར་གྱིས་ནི་དགབ་བྱས་ཏེ། །དེ་སྟེང་ལྃ་ལས་རི་རབ་བསྒོམ། །
རི་རབ་རྩེ་ལ་ཁྲོ་བོ་ནི། །འབར་བ་དག་གིས་མནན་པར་བསྒོམ། །དེས་ནི་འཇིག་པའི་རླུང་རྣམས་ཀྱང་། །བཅིངས་པར་འགྱུར་བར་གདོན་མི་ཟ། །ཞེས་གསུངས་སོ། །དེ་ལ་འདི་ནི་ཆར་པ་དབབ་པའི་ཐབས་སོ། །ནམ་མཁའ་དབྱིངས་ཀྱི་དབུས་སུ་ནི། །
པདྨ་འདབ་མ་བརྒྱད་པ་བསྒོམ། །དབུས་སུ་ཁྲོ་བོ་སྟོབས་པོ་ཆེ། །འདབ་མ་ལ་ནི་ཀླུ་བརྒྱད་པོ། །བསྒོམས་སམ་ཡང་ན་བྲིས་ཀྱང་རུང་། །ཁྲོ་བོའི་ཞབས་ཀྱི་མཐིལ་གྱིས་ནི། །ཀླུ་རྣམས་རབ་ཏུ་མནན་ནས་སུ། །ཧཱུྃ་གཉིས་བར་དུ་ཀླུ་རྣམས་ཀྱི། །སྙིང་པོ་སྤེལ་
ཅིང་གཟིར་ནས་སུ། །ཀླུ་རྣམས་གནས་པའི་ས་ཕྱོགས་སུ། །ཧཱུྃ་ཞེས་བྱ་བ་བཟླས་བརྗོད་བྱ། །ཁྲོ་བོས་མནན་པའི་ཀླུ་རྣམས་ཀྱི། །ཁ་ནས་ཆར་པ་སྐྱུགས་བསམས་ན། །འཇིག་དུས་ལྟ་བུའི་ཆར་པའང་འབབ། །ཅེས་གསུངས་སོ། །དེ་ལ་འདི་ནི་ཆར་པ་དང་

སེར་བ་གཅད་པའི་ཐབས་སོ། །ནམ་མཁའི་དབྱིངས་ཀྱི་དབུས་སུ་ནི། །ཉི་མའི་དཀྱིལ་འཁོར་དབུས་གནས་པར། །རྟ་མཆོག་དཔལ་ནི་རྣམ་པར་བསམ། །ཉི་མའི་མདོག་འདྲ་འོད་བཟང་ཞལ། །ནམ་མཁའ་ཁྱབ་པར་རྣམ་པར་གདངས། །ལྕེ་ཡི་སྟེང་དུ་ཧཱུྃ་
བཞག་སྟེ། །མེ་རི་འོད་དང་བཅས་པ་ཡིས། །ཆར་ཆུས་གང་བའི་སྤྲིན་རྣམས་ཀུན། །བསྐམ་ཞིང་ལྕེ་ཡིས་བླངས་བསམས་ན། །སྐམ་པར་འགྱུར་བར་གདོན་མི་ཟ། །ཡང་ན་ལྕེ་སྟེངས་དེ་ཉིད་དུ། །ཡྃ་ལས་རླུང་དུ་བསྒོམས་ནས་ནི། །བུས་པས་སྤྲིན་རྣམས་
གཏོར་བར་འགྱུར། །ཡང་ན་རལ་གྲིའི་ཕྱག་རྒྱ་ཡིས། །ཆར་སྤྲིན་དང་ནི་ཀླུ་ཡི་གཟུགས། །བཅད་ཅིང་དུམ་བུར་གཏུབས་བསམས་ཏེ། །ཧཱུྃ་ཞེས་བྱ་བའི་སྡིགས་མཛུབ་ཀྱིས། །བསྡུས་ཏེ་རང་རིག་སྔགས་བཟླས་ན། །འཇིག་པའི་ཆར་ཆེ་དེ་རྣམས་ཀྱང་། །སྐད་ཅིག་
ན་ནི་མེད་པར་འགྱུར། །ཞེས་གསུངས་སོ། །དེ་ལ་འདི་ནི་བགེགས་བསལ་བའི་ཐབས་སོ། །ནམ་མཁའི་དབུས་སུ་ཉི་མ་ཡི། །དབུས་སུ་ཁྲོ་བོ་རྣམ་བསྒོམ་པ། །མི་གཡོ་མགོན་པོའི་ཕྱག་རྒྱ་ཆེ། །རིག་པ་མང་པོས་བསྐོར་བའོ། །རང་རིག་སྔགས་དང་
སྟངས་ཚུལ་གྱིས། །ཧཱུྃ་དང་ཕཊ་ཅེས་རྣམ་བསྒྲགས་ན། །ཁམས་གསུམ་དྲེགས་པ་ཐམས་ཅད་ཀྱང་། །རྡུལ་ཕྲན་བཞིན་དུ་རླག་པར་འགྱུར། །ཞེས་གསུངས་སོ། །དེ་ལ་འདི་ནི་ཆོམ་རྐུན་བཅིང་བའི་ཐབས་སོ། །རྐང་རྗེས་ས་དང་ཁྱི་ཁྲག་ལས། །མཚན་
མ་མིང་དུ་བཅས་པར་བྱ། །མི་ཡི་རུས་པའི་ཕུར་བུ་ལ། །འོད་ཟེར་ཅན་གྱི་སྔགས་བཟླས་པས། །ལན་གྲངས་ཉི་ཤུར་བསྔགས་ནས་ནི། །མིག་གཉིས་སུ་ནི་གདབ་པར་བྱ། །གཟུགས་བརྙན་ཚོགས་ལ་ཕུལ་ནས་ནི། །རྡོ་རྗེ་གཏུན་ཤིང་དག་གིས་བརྡུང་། །
ཨོཾ་སུམ་བྷ་བཛྲ་མུ་ས་ལེ་ན་ཙུརྞཱ་ཡ་ན་ར་བིགྷྣན་ཧཱུྃ་ཕཊ། ལས་འདི་བརྩམ་པ་བྱས་ན་ནི། །མི་རྒོད་བཟློག་པར་གདོན་མི་ཟ། །ཞེས་གསུངས་སོ། །དེ་ལ་འདི་ནི་མེ་བསད་པའི་ཐབས་སོ། །མེ་ནི་མཆེད་པའི་ས་ཕྱོགས་སུ། །མཁའ་ལྡིང་རྒྱལ་པོ་བྱ་ཁྱུང་ནི། །སྟང་

ཟིལ་ལྟ་བུའི་ཁ་དོག་ལ། །སྦྲུལ་ནག་སྟོང་གིས་རབ་བརྒྱན་པའི། །གཤོག་པ་མཁའ་ལ་གདེངས་པ་བསྒོམ། །ཀླུ་རྣམས་དང་ནི་སྤྲིན་དག་ལ། །རྡོ་རྗེ་ཚིག་ཏུ་བསྒོ་བ་ནི། །ཆར་ཆེན་ཕོབ་ལ་མེ་སོད་ཅེས། །ཐོས་ནས་སྤྲིན་ཚོགས་བུམ་པ་
ཡི། །ཆར་གྱིས་མེ་ཡང་གསོད་པར་འགྱུར། །གཤོག་པས་མེ་ཉིད་བཀབ་ནས་སུ། །མཆུས་བརྐོས་ཆུས་ནི་མཚམས་བཅད་ན། །བསྐལ་པའི་མེས་ཀྱང་འཚིག་མི་ནུས། །ཨོཾ་བཛྲ་ན་ར་ཡ་ཎ། ནི་རྦ་བ་ཡ་ཏི་ན་བྃ་བུ་མེ་གྷེ་ཧཱུྃ་ཞེས་གསུངས་སོ། །དེ་ལ་འདི་ནི་ཐོག་
བཟློག་པའི་ཐབས་སོ། །ནམ་མཁའ་དབྱིངས་ཀྱི་དབུས་སུ་ནི། །བདེ་བ་ཆེན་པོ་ཞེས་བྱ་བ། །ཞལ་གསུམ་ཕྱག་བཞིར་རྣམ་པར་གནས། །སྟོན་ཀའི་ཟླ་བའི་མདོག་འདྲ་བ། །སྙེམས་མ་དང་ནི་བྱམས་མ་དང་། །ཆུ་སྲིན་རྒྱལ་མཚན་ཞེས་བྱ་བ། །མེ་ཏོག་
རོལ་པ་ཞེས་བྱ་ཡི། །ལྷ་མོ་བཞི་ཡིས་རྣམ་པར་བསྐོར། །གཡས་པའི་ཕྱག་གིས་རྡོ་རྗེ་གསོར། །གཡོན་པའི་དྲིལ་བུ་དཀུར་བརྟེན་པ། །ཕྱག་གཉིས་མདའ་གཞུ་འགེངས་པ་སྟེ། །སྐུ་ལས་སེམས་དཔའ་འབྱུང་བའི་སྤྲིན། །ཐོར་ཚུགས་གསལ་བ་རྣམ་པར་བསྒོམ། །
ནམ་མཁའ་ལས་ནི་བབས་པ་ཡི། །ཐོག་ནི་རང་རིག་སྔགས་ཀྱིས་བཟློག །ཨྃ་མ་ཧཱ་སུ་ཁ་བཛྲ་ཆེ་གེ་མོ་ཛ། ཨོྃ་སུ་ར་ཏ་བནྡྷ་ཧཱུྃ་ཕཊ་ཅེས་གསུངས་སོ། །དེ་ལ་འདི་ནི་གཞན་གྱི་ལྕེ་གནོན་པའི་ཐབས་སོ། །མར་གྱི་ཚེས་བརྒྱད་བཅུ་བཞི་ལ། །དུར་ཁྲོད་སོལ་བ་བླངས་
ནས་སུ། །སྔགས་ཀྱི་བདག་པོར་བསྒོམས་ནས་སུ། །དབང་ཆེན་དཀྱིལ་འཁོར་སྟེང་དུ་ནི། །མི་སྙན་སྨྲ་བའམ་ཤགས་རྒོལ་བའི། །ལྕེ་ཡི་གཟུགས་སུ་བྲིས་པ་ཡི། །སྟེང་དུ་ཟླ་བའི་དཀྱིལ་འཁོར་ལ། །རྡོ་རྗེ་རྒྱ་གྲམ་བསྒོམས་པ་ཡི། །དབུས་སུ་རི་རབ་བསྐྱེད་
པར་བྱ། །དེ་སྟེང་བདག་གིས་མནན་བསམས་ན། །ཚིག་དབང་ལྷ་ཡང་དབང་འགྱུར་ན། །ཤགས་ལ་སོགས་པ་སྨོས་ཅི་དགོས། །ཞེས་གསུངས་སོ། །དེ་ལ་འདི་ནི་པྲ་དབབ་པ་བསྒྲུབ་པའི་ཐབས་སོ། །ལོ་གྲངས་བཅུ་གཉིས་ལོན་པ་ཡི། །ཁྱེའུ་བུ་མོ་གང་ཡང་རུང་། །

མཚན་ཉིད་ཐམས་ཅད་ཡོངས་རྫོགས་པ། །དབབ་པའི་སྣོད་དུ་རབ་ཏུ་བརྟག །ཏིང་འཛིན་རྩལ་དང་ལྡན་པས་བྱ། །གཞན་གྱིས་བྱས་ན་དཔྱས་པར་འགྱུར། །དང་པོར་ཕྱི་ནང་ཁྲུས་བྱས་ཏེ། །སྡིག་པ་སྦྱང་ཕྱིར་འདུལ་ཁྲིམས་དབོག །འོད་ཀྱི་འཕྲོ་འདུས་བྱིན་གྱིས་བརླབ། །
རྒྱན་གྱི་ཁྱད་པར་རྣམས་ཀྱིས་བརྒྱན། །སྙིང་གར་ཧཱུྃ་ནི་བསྒོམ་པར་བྱ། །སྤྱི་བོ་གཙུག་ཏུ་ཧ་བསྒོམ་མོ། །ཨ་ནི་ཁ་རུ་དེ་བཞིན་ཏེ། །དེ་ནས་མདུན་གྱི་ནམ་མཁའ་ལ། །འཕགས་པ་ཀུན་མཁྱེན་སྤྱན་དྲངས་ཏེ། །དེ་ལས་འོད་ཟེར་བསྐུལ་ཞིང་དབབ། །ངྷ་ནི་བསྐུལ་
བའི་སྔགས་ཚིག་སྟེ། །གང་དབབ་ཛྷཽ་ཡིས་བསྐུལ་བར་བྱ། །བྱིས་པའི་ལུས་ལ་ཐིམ་པར་བསམ། །བྱིས་པའི་ཙིཏྟ་གཞལ་མེད་ཁང་། །དབབ་པའི་ལྷ་ཉིད་བཞུགས་བསམས་ཏེ། །ལག་རྒྱ་རྡོ་རྗེ་ཐལ་མོ་ལས། །སོར་མོ་ཕྱིར་བསྣོལ་ཁ་སྦུབ་ལ། །མཐེབ་གཉིས་སོ་སོའི་
མཐིལ་བཀུག་པའོ། །རྡོ་རྗེ་ཚིག་ཏུ་བཟླས་པའི་སྔགས། །ཆེ་གེ་མོ་ཞིག་ཨ་ཨ་ཞེས། །བརྗོད་ཅིང་རབ་ཏུ་བསྐུལ་བྱས་ན། །འགུལ་བ་དང་ནི་གཡོ་བར་འགྱུར། །ཁྲུ་གང་ཙམ་ནས་ལྔ་ཡི་བར། །འཇིགས་སྐྲག་ནས་ནི་འཕར་བར་འགྱུར། །སྙིང་ལ་གནས་པའི་
ལྷ་དེས་ནི། །སྨྲ་གསུང་ཀུན་དང་ལྡན་པ་སྟེ། །འཇིག་རྟེན་འདས་དང་འཇིག་རྟེན་པའི། །ཅི་འདོད་གཏམ་ནི་སྨྲ་བར་འགྱུར། །རྟོག་པ་ཐམས་ཅད་བྲལ་བ་ཡི། །རྡོ་རྗེ་སེམས་དཔའ་ཆེན་པོ་ཡང་། །ཆོ་ག་འདི་ཡིས་འབབ་འགྱུར་ན། །འཇིག་རྟེན་པ་ལྟ་སྨོས་ཅི་དགོས། །
ཞེས་གསུངས་སོ། །དེ་ལ་འདི་ནི་དུག་གཏང་བའི་ཐབས་སོ། །སྦྲུལ་ནི་མི་སྡུག་གདུག་ཅིང་ཁྲོ། །འཇིགས་བྱེད་ནག་པོ་རབ་ཏུ་འབར། །དུག་གི་ལྕེ་གཉིས་མཆེ་བ་ཅན། །སོལ་བ་རྡོ་རྒྱུས་དག་གིས་བྲི། །བསྐུལ་བའི་ཡི་གེ་སྙིང་པོ་འདི། །སྦྲུལ་གྱི་ཁོང་པར་རབ་
ཏུ་བསམ། །ཁཾ་ཁ་དེ་ནང་མི་ཟད་དུག །འཇིགས་པར་བདེ་བ་རབ་བསྒོམས་ན། །སྦྲུལ་དེ་རབ་ཏུ་འགུལ་བར་འགྱུར། །དེ་ནས་ཟོས་ཤིག་ཅེས་བསྐུལ་ཏེ། །མཚན་མ་ནས་ནི་ཞུགས་ནས་ནི། །ཁོང་དུ་སོང་སྟེ་ཟོས་བསམས་ན། །དུག་གིས་གཟུང་བར་

གདོན་མི་ཟ། །ཞེས་གསུངས་སོ། །དེ་ལ་འདི་ནི་དུག་དབྱུང་བའི་ཐབས་སོ། །ནམ་མཁའ་དབྱིངས་ཀྱི་དབུས་སུ་ནི། །ཟླ་བའི་དཀྱིལ་འཁོར་དབུས་གནས་པར། །སྤྱན་རས་གཟིགས་ནི་བསྒོམ་པར་བྱ། །ཁ་དོག་དཀར་པོ་ཧྲི་སྤྲོས་ཏེ། །དུག་ཅན་
ཁོང་དུ་ཞུགས་པ་ཡིས། །དུག་རྣམས་ཧྲི་ལ་འདུས་ནས་ནི། །ཧཱུྃ་གིས་ཁོང་ནས་ཕྱིར་ཕྱུང་དང་། །ཕཊ་ཀྱིས་བར་སྣང་ཁམས་སུ་གཏོར། །ཡང་ན་གཞན་གྱི་ཁོང་དུ་སྤོ། །དེས་ནི་དེ་མ་ཐག་ཏུ་ཡང་། །དུག་རྣམས་དབྱུང་བར་གདོན་མི་ཟ། །ཞེས་གསུངས་སོ། །དེ་
ལ་འདི་ནི་དུག་སྤོ་བའི་ཐབས་སོ། །དུག་ཅན་སྙིང་གར་ཨོྃ་དཀར་ལས། །འོད་ཟེར་དཀར་པོས་དུག་བསྡུས་པས། །ཨོྃ་ཉིད་ནག་པོར་སྣང་བྱུང་ནས། །གཞན་གྱི་ལྕེ་འམ་མཚན་མ་འམ། །ཁོང་དུ་ཞུགས་པར་རབ་བསྒོམས་ན། །འཕོ་བ་རྟག་ཏུ་གདོན་མི་ཟ། །
ཞེས་གསུངས་སོ། །དེ་ལ་འདི་ནི་ཉེ་བའི་དུག་གསོ་བའི་ཐབས་སོ། །མཛེ་འབྲས་ཤུ་བ་ཕོལ་མིག་དང་། །འབྲུམ་བུ་ལ་སོགས་ནད་རྣམས་ཀུན། །ཨ་དཀར་དག་གི་འཕྲོ་འདུ་ཡིས། །གོང་མ་བཞིན་དུ་དབྱུང་བར་བྱ། །སྤོ་བ་ཡང་ནི་དེ་བཞིན་ནོ། །དེ་ནི་ཁམས་ལས་
གྱུར་པ་ཡི། །ནད་རྣམས་ཐམས་ཅད་ངེས་པར་སེལ། །ཞེས་གསུངས་སོ། །དེ་ལ་འདི་ནི་བཀྲེས་སྐོམ་ཞི་བ་སྒྲུབ་པའི་ཐབས་སོ། །བཀྲེས་སྐོམ་ཅན་གྱི་ཉོན་མོངས་པའམ། །ཡང་ན་བསྒྲུབ་པའམ་གང་ཡང་རུང་། །སྦྱོར་བ་འདི་ནི་བརྩམ་པར་བྱ། །རྣམ་པར་སྣང་
མཛད་གཟུགས་ཆེན་པོ། །ནམ་མཁའི་དབུས་སུ་བསྒོམ་པར་བྱ། །བ་ནི་ཁ་ཡི་ནང་དུ་བསྒོམ། །ཨོྃ་ནི་ལྕེ་ལ་རྣམ་བསམས་ཏེ། །ཡིད་བཞིན་བདུད་རྩི་ལྟ་བུ་ཡི། །བཟའ་བའི་གནས་སུ་དེ་ཉིད་བསམ། །དེས་ནི་བཀྲེས་སྐོམ་སྡུག་བསྔལ་སེལ། །ཞེས་གསུངས་
སོ། །དེ་ལ་འདི་ནི་རྣམ་པར་དག་པ་བསྒྲུབ་པའི་ཐབས་སོ། །ཨོྃ་ནི་མིག་ལ་རབ་བསམས་ཏེ། །ཡུལ་ཀུན་རྣམ་སྣང་མཛད་དུ་བསྒོམ། །དེ་ལྟར་རྟག་ཏུ་གོམས་པ་དང་། །ཆོས་ཀུན་སྐུ་གསུང་རྡོ་རྗེ་མཐོང་། །དེ་ཉིད་རྣམ་དག་སྤྱན་དུ་གྲགས། །ཞེས་གསུངས་སོ། །

དེ་ལ་འདི་ནི་འཇིག་རྟེན་པའི་ལྷ་མཐུ་བོ་ཆེ་རྣམས་ཟིལ་གྱིས་གནོན་ཅིང་ཚིག་ཉན་པ་བསྒྲུབ་པའི་ཐབས་སོ། །ནམ་མཁའ་རྡོ་རྗེའི་དབུས་སུ་ནི། །ཉི་མའི་དཀྱིལ་འཁོར་དབུས་གནས་པར། །ཁམས་གསུམ་རྣམ་པར་རྒྱལ་བ་བསམ། །བྷི་ཞེས་བྱ་བའི་སྙིང་པོ་
ཡིས། །མཐུ་ཆེན་རྣམས་ནི་དྲངས་ནས་སུ། །བསྡིགས་པ་དག་ཀྱང་བྱས་ནས་ནི། །ཟིལ་གྱིས་གནོན་ཅིང་ཉན་པར་འགྱུར། །ཞེས་གསུངས་སོ། དེ་ལ་འདི་ནི་ལྷ་མོ་ཙུན་དྷ་བསྒྲུབ་པའི་ཐབས་སོ། །སྔགས་ཀྱི་བདག་པོར་བདག་གནས་པའི། །སྙིང་གར་ཉི་མའི་
དཀྱིལ་འཁོར་ལ། །ཙྃ་ཞེས་བྱ་བའི་འཕྲོ་འདུ་ལས། །བདག་ཉིད་ཙུན་དྷའི་གཟུགས་སུ་བསྒྱུར། །རྣམ་པའི་མཆོག་རྣམས་ཀུན་ལྡན་པའི། །ཁ་དོག་དཀར་པོ་རབ་ཏུ་བསྒོམ། །འདི་ནི་ཆོས་དབྱིངས་བསྒྲུབ་པ་སྟེ། །བུད་མེད་ཐམས་ཅད་འགྲུབ་པར་འགྱུར། །
ཞེས་བཤད་དོ། །དེ་ལ་འདི་ནི་ཛྃ་བྷ་ལ་ནོར་བསྒྲུབ་པའི་ཐབས་སོ། །ནམ་མཁའི་དཀྱིལ་འཁོར་དབུས་སུ་ནི། །སངས་རྒྱས་དཀྱིལ་འཁོར་བསྒོམ་པར་བྱ། །སྙིང་གར་ཛྃ་གྱི་འཕྲོ་འདུ་ལས། །ཛྃ་བྷ་ལ་ཡི་གཟུགས་དག་གིས། །བར་སྣང་ཁམས་ཀུན་གང་བ་ནི། །
མདོག་སྔོན་ཐོར་ཚུགས་ཀྱིས་བརྒྱན་པ། །གསུས་པོ་ཆེ་ལ་མི་ཐུང་གཟུགས། །ཡིད་བཞིན་ནོར་བུ་ཐོགས་པ་ཡིས། །དབུལ་བ་ཐམས་ཅད་སེལ་བར་བསམ། །འདོད་པ་ལ་ནི་དེ་དག་དབ་བ། །དེས་ནི་དབུལ་བ་སེལ་བར་བྱེད། །ནོར་དང་གཏེར་གྱི་བདག་པོར་འགྱུར། །
ཞེས་གསུངས་སོ། །དེ་ལ་འདི་ནི་རྡོ་རྗེ་ཨཉྫ་ན་བསྒྲུབ་པའི་ཐབས་སོ། །ཤིང་གཅིག་དྲུང་ངམ་བཞི་མདོ་འམ། །མ་མོའི་གནས་སམ་ཞི་གནས་སུ། །རྡོ་རྗེ་ཨཉྫ་བསྒྲུབ་པར་བྱ། །པདྨ་བན་དྷ་ཁ་སྦྱར་དུ། །ཚིལ་ཆེན་བཤང་གཅི་ཁུ་བ་དང་། །མ་ཧཱ་ར་ཀྟ་ལས་
བྱུང་བའི། །དུ་བ་བན་དྷར་ཆགས་པ་དང་། །བཤང་གཅི་རཀྟས་སྦྲུས་ནས་ནི། །རིལ་བུ་ལྕགས་གསུམ་གྱིས་དཀྲིས་པ། །གསུམ་དུ་བྱས་ན་དེ་ཉིད་ལ། །རང་གི་གསང་སྔགས་བརྒྱ་རྩ་བརྒྱད། །ཉི་ཤུ་དགུ་ཡི་ནམ་ཕྱེད་ན། །བཏབ་ན་དངོས་གྲུབ་གྲུབ་འགྱུར་

ཏེ། །མིག་ལ་བསྐུས་ན་ཅི་ཡང་མཐོང་། །མི་སྣང་བ་དང་རྐང་མགྱོགས་དང་། །དེ་ལ་སོགས་པའི་དངོས་གྲུབ་རྣམས། །ཐོབ་པར་འགྱུར་ཏེ་གདོན་མི་ཟ། །ཞེས་གསུངས་སོ། །དེ་ལ་འདི་ནི་རྡོ་རྗེ་རོ་ལངས་བསྒྲུབ་པའི་ཐབས་སོ། །ནམ་མཁའི་
དབྱིངས་ཀྱི་དབུས་སུ་ནི། །ཉི་མའི་དཀྱིལ་འཁོར་དབུས་གནས་པར། །བདུད་རྩི་འཁྱིལ་པ་རྣམ་པར་བསྒོམ། །དུར་ཁྲོད་རི་བྲག་གཉན་པའི་སར། །རོ་ཡི་རྫས་བཙལ་དེ་ནས་ཀྱང་། །རོ་ཡི་གཉེན་པོར་བདག་བསམས་ཏེ། །དེ་ཡི་སྟེང་དུ་བདག་གནས་ལ། །
དེ་ལ་དཀྱིལ་འཁོར་ཚང་བར་བསྒོམ། །དེ་སྔགས་རྒྱུན་དུ་བཟླས་བྱ་ཞིང་། །དགུག་པའི་ཕོ་ཉ་དྲག་ཏུ་བསྐུལ། །མདོག་མདངས་བཀྲག་སྣུམ་བྱུང་བ་དང་། །བདུད་རྩི་ཡིས་ནི་བསྐུ་བར་བྱ། །དེ་ནས་འགུལ་བར་གྱུར་པ་དང་། །ཕྱག་རྒྱ་བཞི་ཡིས་གཞུམ་པར་
བྱ། །སྔགས་ཀྱི་འཕྲོ་འདུ་རྒྱུན་མི་གཅད། །དེ་ནས་རབ་ཏུ་འཕར་བ་དང་། །འགྲོ་བ་རིས་དྲུག་གང་ཡིན་པ། །རྡོ་རྗེ་དྲག་ཏུ་གདབ་པར་བྱ། །རྡོ་རྗེ་སོ་ཡིས་གཅད་བྱ་ཞིང་། །སྔགས་ཟློས་ཁོང་དུ་བསྟིམ་པར་བྱ། །དེ་ནས་ལངས་པར་གྱུར་པ་དང་། །རྡོ་རྗེ་བྱིན་
ནས་དབང་ཡང་བསྐུར། །བདུད་རྩིའི་ཆུ་ཡང་བླུད་པར་བྱ། །ལས་རྣམས་གང་འདོད་བྱེད་དུ་གཞུག །ཡང་ན་གསེར་རམ་གོས་མཚོན་ནམ། །རྐང་མགྱོགས་ལ་སོགས་དངོས་གྲུབ་རྣམས། །ཇི་ལྟར་འདོད་པ་རྐྱེན་གྱིས་བསྒྱུར། །གང་འདོད་པ་དེ་
གདོན་མི་ཟ། །ཞེས་གསུངས་སོ། །དེ་ལ་འདི་ནི་རྡོ་རྗེ་སྒྱུ་མ་བསྒྲུབ་པའི་ཐབས་སོ། །བདག་ཉིད་ལྷ་ཡི་རྣལ་འབྱོར་གྱིས། །རྡེའུ་ཤིང་བུ་ཡི་རྒྱུ་དག་ལས། །ཇི་ལྟར་འདོད་པའི་གཟུགས་བྱས་ཏེ། །ཤེའུ་རེ་སྨན་གྱིས་བྱུགས་ནས་ནི། །རྡོ་རྗེ་སྔགས་
ཀྱིས་ཚིག་འདི་བཟླས། །ཤེའུ་རེའུ་ཨི་ན་ཡ། །ཨ་མོ་ཀ་ཨ་གྷུས་ས་གྷུས། །ཤིང་བུ་དག་གིས་གདབ་བྱ་ཞིང་། །ཇི་ལྟར་འདོད་པའི་གཟུགས་སུ་འགྱུར། །དེས་ནི་སྣ་ཚོགས་གཟུགས་སུ་འགྱུར། །བསྡུ་བར་འདོད་ན་སླར་ལ་བཟློག །དེ་ཡང་བཀྲི་དྲང་

ཐབས་སུ་འགྱུར། །ཞེས་གསུངས་སོ། །དེ་ལ་འདི་ནི་རོ་བསྲེག་པའི་བསྒྲུབ་ཐབས་སོ། །ནམ་མཁའི་དབྱིངས་ཀྱི་དབུས་སུ་ནི། །བདག་ཉིད་འཇིགས་བྱེད་སྐུར་བསྒོམས་ཏེ། །རོ་ལ་སྔགས་ཀྱིས་བཏབ་ནས་ནི། །དྲི་ཞིམ་ཆུ་ཡིས་བྱུག་པར་བྱ། །ཞུན་
ཆེན་ཁུ་བར་བཙོས་པ་ཡི། །རས་ཀྱིས་ཀྱང་ནི་དཀྲི་བར་བྱ། །དབང་པོ་རྣམས་ཀྱི་གནས་དག་ཏུ། །ལྷ་ཡི་ཕྱག་རྒྱ་དགོད་པར་བྱ། །གནས་དེར་སྡོང་བུ་རེ་རེ་ལ། །ལྷ་རྣམས་སྙིང་པོ་བྲིས་པ་གདགས། །རོ་ཡི་ཕྱི་རོལ་ཤུན་པ་ལ། །འགྲོ་དྲུག་ས་བོན་བཀོད་
ནས་ནི། །རིམ་གྱིས་སྦྱང་བའི་ལས་སུ་བྱ། །ཐབ་ཁུང་དཀྱིལ་གང་ཡིན་པ་ཡི། །ཕྱག་རྒྱ་གཞུང་དང་མཐུན་པར་དགོད། །དེ་སྟེངས་ཤིང་བརྩིགས་གྲུ་བཞི་ལ། །ཀ་བ་ཟུར་བཞི་སུམ་བརྩེགས་ཀྱི། །བར་ཁང་ཡང་ཐོག་བཅས་པར་བྱ། །བར་ཁང་རོ་གཞག་
ཤར་དུ་བསྟན། །ཡང་སྟེངས་རས་སམ་ཤོག་ཤོག་ལ། །བྲིས་པའི་ཕྱག་རྒྱ་ཚང་བར་དགོད། །བར་ཁང་གློ་སྐར་ཕྱོགས་བཞི་ནས། །གཟུངས་ཐག་ཕྱོགས་བཞིར་བླ་མར་དབུལ། །དེ་མཐར་འཁོར་གྱི་ལྷ་རྣམས་དགོད། །དེ་ནས་རྡོ་རྗེ་རྒྱལ་པོ་ཡིས། །མེ་
ཡི་འཕྲོ་འདུ་རྒྱུན་མི་གཅད། །རྡོ་རྗེ་ལས་ཀྱི་ཀར་མ་ཡིས། །ལས་ཀྱི་ཕྲེང་བ་རྫོགས་པར་རོལ། །རྡོ་རྗེ་བླ་མ་གཅིག་གིས་ནི། །རོ་ཡི་ཉེས་པ་བགྲང་ཞིང་བཤགས། །རྡོ་རྗེ་སྐབས་སྦྱོར་ཆེན་པོ་ཡི། །རྡོ་རྗེ་མཆོད་པ་སྐབས་སུ་དབུལ། །བཀྲ་ཤིས་གནས་ཀྱི་
སྨོན་ལམ་ནི། །སྐབས་སམ་མཇུག་ཏུ་གདབ་པར་བྱ། །རྡོ་རྗེ་གྲངས་ཀྱི་ཏིང་འཛིན་གྱིས། །གྲངས་གཟུང་དཀར་བྱང་བླ་མ་དབུལ། །སྡིག་པའི་གནག་བྱང་གཤེགས་ཤིང་བསྲེག །མེ་ལྷ་སྤྱན་དྲང་མཆོད་པ་བྱ། །བསྟོད་པ་དག་ཀྱང་ལེགས་པར་བྱ། །རོ་ཡི་
སྒྲིབ་པ་འབྱོངས་མ་འབྱོངས། །མེ་ལ་ལྟས་སུ་བལྟ་བར་བྱ། །མཚན་མ་མི་སྡུག་བྱུང་བ་ན། །བསྲེག་སྦྱང་ཆོ་ག་རྒྱ་ཆེར་བྱ། །དེ་ནི་ཚོགས་རྣམས་རྫོགས་པར་འགྱུར། །ཞེས་གསུངས་སོ། །དེ་ལ་འདི་ནི་རྡོ་རྗེ་ཐལ་ཆེན་བསྒྲུབ་པའི་ཐབས་སོ། །དེ་ལ་ཐལ་བ་ཐམས་

ཅད་ཀུན། །གུ་གུལ་ནག་པོ་དང་སྦྱར་བ། །རིལ་བུ་ལྕགས་གསུམ་གྱིས་དཀྲིས་པ། །རྡོ་རྗེ་འཇོམས་པའི་ཕྱག་རྒྱ་དང་། །རྡོ་རྗེ་དྲག་པོའི་སྔགས་བཏབ་ན། །བར་དུ་གཅོད་པའི་གཉེན་པོར་འགྱུར། །ཞེས་གསུངས་སོ། །དེ་ལ་འདི་ནི་ཕྲིན་
ལས་བཞིའི་སྒྲུབ་ཐབས་སོ། །ལས་བཞི་སོ་སོའི་ཁྱད་པར་གྱིས། །རྫས་དང་ཁ་དོག་ཕྱོགས་དང་དབྱིབས། །ཡམ་ཤིང་བསྲེག་རྫས་ཁྱད་པར་ལས། །དཀར་དང་དམར་སེར་མཐིང་གནག་ལས། །ཤར་ལྷོ་ནུབ་བྱང་ཕྱོགས་དག་ཏུ། །ཟླུམ་པོ་ལེའུ་ཚེ་
པདྨ་ཞི། །གྲུ་བཞི་ཟུར་བརྒྱད་འཁོར་ལོ་རྒྱས། །གྲུ་ཆད་གཞུ་དབྱིབས་ཟླ་གམ་དབང་། །གྲུ་གསུམ་བྷ་ག་མངོན་སྤྱོད་པའོ། །ཏིང་འཛིན་བྱམས་དང་དང་བས་ཞི། །སྙིང་རྗེ་དགའ་བས་རྒྱས་པ་སྟེ། །དགའ་དང་ཆགས་པས་དབང་དུ་འགྱུར། །བཏང་
སྙོམས་ཁྲོས་པས་དྲག་པོར་འགྱུར། །སོ་སོའི་ལས་ཀྱི་ལྷ་རྒྱུད་ལ། །སྔགས་དང་ཕྱག་རྒྱ་ལ་སོགས་དང་། །གླུ་རྒྱུད་འབྱོར་པས་མཆོད་པར་བྱ། །ཞལ་དུ་གྱུར་པའི་མེ་བོས་ལ། །ཁྲོ་བོས་ཡེ་ཤེས་མེ་རུ་སྦྱང་། །སོ་སོའི་རྒྱུད་དུ་བཤད་བསྟབས་ཏེ། །
ཀློང་ཡངས་འཁྱིལ་པའི་ཧོམ་ཁུང་དུ། །དམ་རྫས་བདུད་རྩི་འབར་བ་ཡིས། །སྦྱང་དང་ཐོབ་ཕྱིར་བསྲེག་པར་བྱ། །ཉོན་མོངས་ལྔ་ཡི་དམ་རྫས་ནི། །ཡེ་ཤེས་ལྔ་ཡི་ཀློང་དུ་དབུལ། །ཕུང་པོ་ལྔ་ནི་ཡབ་ལྔ་ལ། །འབྱུང་བ་ཡུམ་ལྔའི་དབྱིངས་སུ་བསྟིམ། །
ཤེས་པ་བརྒྱད་ནི་མ་བརྒྱད་ལའོ། །ཡུལ་བརྒྱད་ཕྲ་མེན་བརྒྱད་ལ་བསྟིམ། །སྐྱེ་བཞེས་བསྡུས་པའི་སྲེག་རྫས་རྣམས། །རྣམ་ཐར་སྒོ་བཞིའི་ཀློང་དུ་བསྟིམ། །སྒྲིབ་དང་དངོས་གྲུབ་དོན་རྣམས་ནི། །མེ་ལ་མཁས་པས་བརྟག་པར་བྱ། །སོ་སོའི་དབྱིབས་
དང་ཁ་དོག་ལ། །དབྱིབས་དང་ཁ་དོག་ཤེས་པར་བྱ། །ཞེས་གསུངས་སོ། །དེ་ལ་འདི་ནི་རྫས་བསྒྲུབ་པའི་ཐབས་གསང་བའོ། །ཕུན་སུམ་ཚོགས་པ་བཞི་ལྡན་ནས། །གནས་དང་ས་གཞི་བརྟགས་པར་ནི། །ས་སྟེགས་ཚོན་གྱིས་བྲི་བར་བྱ། །དབུས་སུ་

ཐིག་བཞི་ལེའུ་ཚེ་དགུ། །དེའི་མཐའ་འཁོར་ལོ་རྩིབས་བརྒྱད་བྱ། །སྒོ་བཞི་སྒོ་ཁྱུད་བཅས་པར་བྲི། །མཐའ་ཟད་བསྐལ་པའི་མེ་རི་འབར། །དབུས་སུ་ཟླ་གམ་ཁ་སྤྲོད་བྲི། །ཕྱོགས་མཚམས་བརྒྱད་དུ་ཁྃ་བརྒྱད་བྲི། །འཁོར་ལོའི་བར་ཁྱམས་མུ་ཁྱུད་
ལ། །ནང་དུ་བལྟས་པའི་ཁྃ་བརྒྱད་གསལ། །རྩིབས་ལ་ནང་དུ་ལྟ་བ་བརྒྱད། །མུ་ཁྱུད་བརྒྱད་ལ་ཕྱིར་བལྟས་བརྒྱད། །གྲུ་ཆད་བཞི་ལ་ནང་བལྟས་བཞི། །སྒོ་བཞིར་ཕྱིར་བལྟ་བྲི་བར་བྱ། །ཕྱི་རོལ་བར་ཁྱམས་དེ་དག་ལ། །ཕྱི་ལྟ་ཉི་ཤུ་རྩ་བརྒྱད་
བྲི། །བསྐལ་པའི་མེ་རི་ཕྱི་ཁྱམས་ལ། །ཕྱིར་ལྟ་བཅུ་ནི་བྲི་བར་བྱ། །དེ་ལ་ཕྱག་རྒྱ་རིམ་པར་དགོད། །རོ་ཡི་ཚོལ་སྟངས་རྣམ་བཞི་ཡིས། །དུར་ཁྲོད་རྫས་མཆོག་མ་ཉམས་བཅོལ། །ཡེ་ཤེས་སྤྱན་གྱིས་ལྟ་བ་དང་། །རྡོ་རྗེ་འགྲོས་ཀྱིས་བཙལ་བ་དང་། །
ཕྱག་རྒྱའི་ཚོགས་ཀྱིས་རོལ་པ་དང་། །མ་མོའི་ཚོགས་ཀྱིས་འཇོ་ཚུལ་དང་། །བཙལ་ནས་མཎྜལ་སྒོ་བཞི་ནས། །བྲོ་ཆེན་བཞི་ཡིས་སྦྱང་བར་བྱ། །ཤར་དུ་དུག་གསུམ་འཇོམས་པའི་བྲོ། །ལྷོ་རུ་ཁྲག་འཐུང་རོལ་པའི་བྲོ། །ནུབ་ཏུ་རྟ་མཆོག་ཞལ་གྱི་
བྲོ། །བྱང་དུ་གདུལ་སྦྱོང་དྲག་པོའི་བྲོས། །སྦྱང་བར་བྱ་བ་རབ་ཏུ་གཅེས། །དེ་ནས་དབུས་སུ་གཞག་བྱ་སྟེ། །མགོ་བོ་ཤར་དུ་བསྟན་པ་དེའི། །ཕུང་པོ་བྲུྃ་ལས་གཞལ་མེད་ཁང་། །དེ་རུ་ཕྱག་རྒྱའི་ཚོགས་མཆོག་བསྒོམ། །སོ་སོའི་རྫས་ཀྱི་གནས་
རྣམས་ལ། །རིགས་ཀྱི་ལྷ་རྣམས་རིམ་པར་དགོད། །བསྙེན་པས་ཕྱིན་ཕེབས་རྟགས་བྱུང་ནས། །བམ་དེ་བྱང་ཤར་མཚམས་སུ་བསྒྲལ། །རྡོ་རྗེ་ཐིག་གིས་བཏབ་ནས་ཀྱང་། །རྫས་རྣམས་སོ་སོའི་སྐོས་སུ་གདབ། །དེས་མཚོན་རྣམ་ལྔས་བཀྲོ་བར་བྱ། །
འཁོར་ལོའི་སྤྱི་བོ་ཉིད་ནས་བཀྲོ། །རྡོ་རྗེས་སྙིང་གའི་ཕྱོགས་ནས་བཀྲོ། །རིན་ཆེན་ཟུར་བརྒྱད་ལྟེ་བ་ནས། །པདྨས་ཁ་ཡི་ཕྱོགས་ནས་སོ། །རལ་གྲིས་ཡན་ལག་རྣམས་ནས་བཀྲོ། །དེ་ནས་ཕྱག་རྒྱའི་གནས་རྣམས་སུ། །རྫས་རྣམས་གོ་རིམས་བཞིན་དུ་

དགོད། །དཔལ་དང་ལྡན་པའི་གནོད་དགུ་ལ། །སྐུ་གསུང་ཐུགས་དང་ལྡན་པར་ནི། །གསོལ་བའི་འོད་དང་བཅས་པར་དགྲམ། །རྫས་ཀྱིས་མཛེས་པར་བརྒྱན་པར་བྱ། །རྨད་དུ་བྱུང་བའི་གཏོར་མ་དགྲམ། །མཆོད་པའི་དམ་རྫས་ཚང་
བར་བཤམ། །དེ་ནས་རྣལ་འབྱོར་ཆེན་པོ་ཀུན། །བདག་ཉིད་ཕྱག་རྒྱར་གནས་པ་དེ། །བསྐྱེད་པ་ཏིང་འཛིན་ཚུལ་བཞིན་བསྐྱེད། །རང་བཞིན་རྫོགས་ཆེན་སྤྱན་དྲངས་མཆོད། །བསྒྲུབ་པ་ཉམས་ལེན་བཟློག་པར་བྱ། །དངོས་གྲུབ་གསོལ་དང་དབང་བསྐུར་
བྱ། །དེ་ནས་གཏོར་མ་ཚོ་གསུམ་དུ། །དང་པོར་བཅད་དེ་སྦྱིན་སྲེག་བྱ། །བར་མས་མཁའ་འགྲོ་ཚིམ་པར་བྱ། །ཐ་མ་མི་ཟད་གཏེར་དུ་སྦ། །ལས་རྣམས་རྫོགས་པར་བྱས་ན་ནི། །དཔལ་ཆེན་ཉིད་ཀྱང་འགྲུབ་འགྱུར་ན། །དངོས་གྲུབ་གཞན་ལྟ་སྨོས་ཅི་
དགོས། །ཞེས་གསུངས་སོ། །དེ་ལ་འདི་ནི་རྡོ་རྗེ་མཆོག་ཆེན་པོ་བསྒྲུབ་པའི་ཐབས་སོ། །དོན་དང་ལྡན་པའི་རྣལ་འབྱོར་པས། །ས་སྟེངས་ཆག་ཕྱེད་ཚད་དུ་བྱ། །སུམ་བརྩེགས་བྱས་དབུས་ཟླ་གམ་བརྒྱད། །ཕྱི་མཐའ་ཐོད་པས་བསྐོར་བ་ལ། །མེ་དཔུང་འབར་
བས་བསྐོར་བའོ། །དེ་ཡི་ཕྱི་རིམ་དམར་ཆེན་རྒྱས། །དབུས་སུ་བན་དྷ་མཚན་ལྡན་ལ། །ཡབ་ཡུམ་སྙིང་པོ་བྲིས་ལ་བཞག །ཟླ་གམ་བརྒྱད་ལ་མ་བརྒྱད་བཞག །མཐིང་གནག་མ་ཐ་མེ་རི་འབར། །དེ་འོག་ཐོད་ཚར་གསུམ་དུ་བྱ། །སྒོ་ཁྱམས་དུར་
ཁྲོད་རྫས་ཀྱིས་བརྒྱན། །སྒོ་རྩེག་སྒོ་ཁྱུད་ཐ་མ་བྲན། །གནས་མཆོག་རབ་ཏུ་དབེན་པ་ཡི། །རི་ཡི་རྩེ་འམ་ནགས་ཚལ་ལམ། །སྡེ་དཔུང་ཕྲ་མོས་མི་ཚུགས་ཤིང་། །འདུ་འཛི་འགྲོ་འོང་ཆད་པར་ཤིས། །རྣལ་འབྱོར་གདེང་དང་རབ་ལྡན་ཞིང་། །བརྗིད་
ཅིང་སྲན་ཚུགས་ཁུ་འཕྲིག་ཆུང་། །བརྟུལ་ཞུགས་ཆེ་ལ་རྟོག་པ་མེད། །ལས་ཀྱི་ཕྲེང་བ་ལྷག་ཆད་མེད། །དྲི་ཞིམ་སྨན་གྱིས་ཕྱི་བཀྲུ་ཞིང་། །ཤི་ནེ་དྷེ་ཧུས་ནང་ཡང་བཀྲུ། །ཚད་མར་སྦྱར་བའི་བཀའ་དག་དང་། །ལྡན་པས་དུས་བཏབ་བཞིན་དུ་བརྩམ། །

རྒྱུ་ཡང་བརྟག་པར་བྱ་བ་ནི། །མཛེས་ཤིང་བཀྲ་ཤིས་ལྡན་པ་ལ། །བོང་ཚོད་ལོ་ནི་དར་ལ་བབ། །རིགས་ལྔའི་མཚན་རྟགས་ཡོད་པ་ཤིས། །བསྒྲུབ་པའི་རྒྱུ་མཆོག་དེ་ལྟ་བུ། །དག་པ་གསུམ་གྱིས་གཞུང་བསྲངས་ནས། །བྱིན་གྱིས་བརླབ་པ་རབ་ཏུ་བྱ། །
དྷ་ཧུ་མ་འདས་དབང་པོ་བསྒྱུར། །བདུད་རྩི་ལྔ་ཡི་ཐིག་ལེ་ཡིས། །དབང་པོ་ལྔ་ལ་གདབ་པར་བྱ། །སྣང་སྲིད་གཏམ་ནི་དྲི་བའམ། །ལེགས་ཉེས་དྲི་བའི་པྲ་ཡང་དབབ། །རྣམ་ཤེས་འབྱུང་བའི་སྒོ་རྣམས་སུ། །སོ་སོའི་རིགས་ཀྱི་ཕྱག་རྒྱས་གདབ། །ཕྱག་
རྒྱ་བཀོད་དེ་བསྒྲལ་བར་བྱ། །ཕུང་པོ་གཞལ་ཡས་ཁང་དུ་བྱ། །ནང་གྲོལ་ཐམས་ཅད་ལྷར་བསྒོམས་ཏེ། །བསྒྲལ་སྦྱངས་སྦྱར་བ་བྱས་ནས་ནི། །མཆོད་དང་མཉེས་དང་དམ་སྐོངས་དང་། །དངོས་གྲུབ་རྣམ་གསུམ་ཐོབ་ནས་བླང་། །ཞེས་གསུངས་
སོ། །དེ་ལ་འདི་ནི་མཆོག་ཕྲན་གཙང་མ་བསྒྲུབ་པའི་ཐབས་སོ། །མཎྜལ་གྲུ་བཞི་ཚད་ལྡན་ལ། །ཟླ་གམ་སྒོ་གཅིག་རྡོ་རྗེས་བསྐོར། །མུ་ཁྱུད་སྒོ་བཞི་རབ་ཏུ་བྲི། །ཁྱུ་མཆོག་དབང་པོ་ཕྱེད་ལྡན་ལ། །ཕྱི་ནང་ཁྲུས་ཀྱང་དེ་བཞིན་བྱ། །དབུས་སུ་བཞག་
སྟེ་ཤར་དུ་བསྟན། །ལྕེ་ལ་གཟུངས་ཐག་སྣ་ལྔས་གདགས། །མན་ངག་ལུང་ལྡན་ཕྱག་ཏུ་དབུལ། །ཕྱག་རྒྱ་རྫས་དང་བཅས་པར་དགྲམ། །དེ་ཡི་ཁོང་དུ་གཞལ་ཡས་སུ། །ཡེ་ཤེས་སེམས་དཔའ་ཚོན་གང་བའི། །ཐུགས་ཀར་ནོར་བུ་རིན་ཆེན་
འབར། །དབུས་སུ་ཉི་མའི་གའུ་ལ། །དཔལ་བེའུ་ཡུངས་འབྲུའི་སྙིང་པོ་ལ། །ཏིལ་འབྲུ་ཙམ་གྱི་ཧཱུྃ་དམར་གནས། །རྡོ་རྗེ་འཕྲོ་འདུ་རྒྱུན་མི་གཅད། །རྡོ་རྗེ་པྲ་ཡང་དབབ་པར་བྱ། །དེ་ནས་མཚན་རྟགས་བཟང་བ་དང་། །དངོས་གྲུབ་བླངས་ཏེ་བསྒྲལ་
བར་བྱ། །བསྐམས་ཏེ་བདུད་རྩིའི་རྩ་བར་ཤིས། །ཞེས་གསུངས་སོ། །དེ་ལ་འདི་ནི་དྲེགས་པ་ཅན་གནོན་པ་བསྒྲུབ་པའི་ཐབས་སོ། །ཕུན་སུམ་ཚོགས་པ་བཞི་ལྡན་ནས། །ཇི་ལྟར་རིགས་པ་འདུས་པ་དང་། །མཎྜལ་གཞི་གཅིག་སྐྱོང་ནུལ་བྱ། །

ཆག་རམས་བསྟོད་པའི་མཎྜལ་བཞི། །གྲུ་བཞིར་གཞི་ལས་སྤགས་པར་བྱ། །དེ་དག་མ་ཏང་གཟུགས་སུ་བྱ། །སྙིང་ག་མན་ཆད་དབུས་སུ་བསྣོལ། །མཎྜལ་ཆེན་པོའི་འོག་ཏུ་གཞུག །དབུས་སུ་འཁོར་ལོའི་ཐིག་བཏབ་ལ། །དཔལ་
ཆེན་ལྔ་ཡི་ཕྱག་རྒྱ་གཞག །བར་ཁྱམས་གཉིས་ཀྱིས་མཛེས་པ་ལ། །གནས་དང་ཡུལ་གྱི་ཕྱག་རྒྱ་དགོད། །སྒོ་བཞིར་སྒོ་སྲུང་དེ་བཞི་གཞག །ཡན་ལག་སྤྲུལ་པའི་མགོ་བརྙན་གནས། །ཕྱི་རོལ་ཁྱམས་ལ་མེ་རིར་བྱ། །དེ་མཐའ་ཐོད་པ་ཚར་
གསུམ་བལྟམས། །དེ་ཡི་ཕྱི་རིམ་མེ་བུར་འཚུབ། །གུ་གུ་ཐུལ་དང་ཟ་ར་ཚགས། །ཞིང་དང་སྦྲུལ་ཆུན་སྒོ་ཁྱུད་ལ། །བན་དྷ་སྙིང་པོར་བཅས་པ་དག །སོ་སོའི་གནས་སུ་དེ་བཞིན་གཞག །རྡོ་རྗེའི་དབྱིབས་སུ་བརྩིགས་པའི་ཐབ། །ཟུར་བཞི་ཁ་བཞི་དག་ལ་བྱ། །སྙིང་གར་འཁོར་
ལོའི་ཐབ་ཏུ་བྱ། །རིགས་དང་མཐུན་པའི་ཡམ་ཤིང་བརྩིག །ཧོམ་ལྔ་འབྲེལ་པའི་ལས་ཆེན་ལ། །ཐབ་ཁུང་ལྔ་ཡི་བྱེ་བྲག་ཏུ། །རྒྱུད་དྲུག་ཡམ་ཤིང་སྤུངས་པ་ལས། །ཡེ་ཤེས་ལྔ་ཡི་མེ་ཀློང་དུ། །ཉོན་མོངས་ལྔ་ཡི་བསྲེག་སྦྱང་ཐིམ། །བྱ་བར་འོས་པ་
མཐའ་དག་ཀུན། །རྣལ་འབྱོར་ཅན་གྱིས་ཅི་རིགས་བྱ། །ཞེས་གསུངས་སོ། །དེ་ལ་འདི་ནི་མ་ཏང་འགྲེང་བུ་གནོན་པའི་ཐབས་སོ། །དཀྱིལ་འཁོར་མ་ཏང་གཟུགས་སུ་བྱ། །མགོ་བོ་ལྷོ་ནུབ་མཚམས་སུ་བསྟན། །མགོ་ལུས་ཡན་ལག་རྣམས་ལ་ནི། །
མཎྜལ་བཅུ་གཅིག་རབ་ཏུ་བྱ། །ཞལ་དུ་ཧོམ་ཁུང་གྲུ་གསུམ་ལ། །ཡམ་ཤིང་དག་གིས་བརྫངས་ནས་ནི། །སྦྱིན་སྲེག་ཧོམ་གྱི་ལས་རྣམས་བྱ། །སྙིང་གར་གྲུ་གསུམ་རྩེ་གསུམ་ལ། །བང་རིམ་གསུམ་པར་བྱས་ནས་ནི། །ཕུར་བུ་ཉི་ཤུ་རྩ་གསུམ་དགོད། །
ཞེ་སྡང་རྡོ་རྗེའི་ཏིང་འཛིན་བྱ། །ལྟེ་བར་གྲུ་གསུམ་མཐིང་ནག་ལ། །ཟུར་ལ་ཐོད་པ་ཚར་གསུམ་བྲི། །གཞུ་བདུན་དགྲ་སྟ་བརྒྱད་ཀྱང་དགོད། །ཕུར་བུ་དགུ་དང་ཁ་ཊྭཱཾ་དགུ། །རྩང་དམར་དྲུག་ཅུ་རྩ་བརྒྱད་དགོད། །ཡུམ་གྱི་མཁའ་རུ་བསྒོམས་ནས་སུ། །གཟིར་

གནན་དྲག་པོའི་ལས་རྣམས་བྱ། །ཡན་ལག་མགོ་མཚན་གཡས་གཡོན་ལ། །གནས་ཀྱི་མ་མོ་བརྒྱད་རྣམས་ཀྱི། །བྲི་འམ་མཚན་མ་གཞག་པར་བྱ། །གཞན་རྣམས་ཀྱང་ནི་ཅི་རིགས་པར། །མ་ཏང་དགུག་དང་དབབ་དང་གནོན། །བྱིན་བརླབས་
མཁས་པས་ཚུལ་བཞིན་བྱ། །བྱ་བ་ཐམས་ཅད་ཅི་རིགས་བྱ། །དེས་ནི་གནོན་པའི་ལས་ཆེན་འགྲུབ། །ཅེས་གསུངས་སོ། །དེ་ལ་འདི་ནི་རྡོ་རྗེ་ཚེ་བསྒྲུབ་པའི་ཐབས་སོ། །ཐམས་ཅད་འབྱོར་པར་བྱས་ནས་ནི། །ས་སྟེངས་སྐྱོང་ནུལ་ལེགས་བྱས་ལ། །
དབུས་སུ་པདྨ་འདབ་བརྒྱད་ལ། །ཟླ་གམ་དམར་པོ་སྒོ་བཞིར་ལྡན། །རྡོ་རྗེའི་ར་བས་བསྐོར་བར་བྱ། །དཔལ་ལྡན་ཚེ་ཡི་ཕྱག་རྒྱ་དགོད། །རིན་ཆེན་སྣ་ཚོགས་བུམ་པ་ལ། །ཚེ་ཡི་རྫས་ཀྱིས་གང་བ་དེ། །པདྨ་བན་དྷས་ཁ་བཀབ་ལ། །གཟུངས་ཐག་བཏགས་
ནས་དབུས་སུ་གཞག །ཚེ་དཔག་མེད་པར་དེ་མངའ་གསོལ། །བུམ་པ་རིན་ཆེན་ལས་བྱས་བཞི། །གསང་བའི་ཡུམ་དུ་དེ་མངའ་གསོལ། །རིགས་དང་མཐུན་པའི་བུམ་པ་བཞི། །རིགས་ལྔའི་སངས་རྒྱས་གཙོ་གཟུངས་དང་། །སོ་སོའི་འཁོར་གྱི་སེམས་
དཔའ་རྣམས། །གཙོ་གཟུངས་ཟུང་དུ་འབྲེལ་བར་ནི། །ཕྱོགས་ཕྱོགས་དག་ཏུ་ཚོམ་བུར་བྲི། །སྒོ་བཞིར་སྒོ་སྲུང་ལ་སོགས་གཞག །སེམས་དཔའི་ཕྱག་རྒྱ་ཀུན་བཀོད་ནས། །ཚེ་དཔག་མེད་པའི་ཐུགས་ཀ་ནས། །འཁྱིལ་ཅིང་འཚེར་བའི་བྱང་ཆུབ་
སེམས། །ཉི་ཟླའི་གའུ་གནས་པ་དེ། །ཨ་ཡུ་བྱང་ཆུབ་སེམས་སུ་ཞུ། །དེ་ལས་རྒྱལ་མཚན་མཆོད་ལྡན་དང་། །རིན་ཆེན་གཏེར་དང་དབང་བསྐུར་མཛད། །གསང་བའི་ཚེ་གཏེར་འཛིན་དང་བཞི། །ཐུགས་ཀར་འཕྲོས་ནས་དེ་བཞིན་དུ། །ཚོམ་བུ་རིམ་གྱིས་
སྤྲོས་ནས་ནི། །དཀར་དམར་འོད་ཀྱིས་བདག་ལ་བསྟིམས། །སྐྱེ་མེད་དབྱིངས་སུ་སྦས་ནས་ནི། །མི་འགྱུར་ཕྱག་རྒྱས་གདབ་པར་བྱ། །ཡང་ན་ཏིང་འཛིན་ཁྱད་པར་གྱིས། །ལོ་འམ་ཟླ་བའི་མཐའ་དག་ཏུ། །སྐྱ་རེངས་འཆར་བའི་དུས་སུ་ནི། །ཕྱག་རྒྱ་ཆེན་པོས་

གནས་པ་དེས། །ཤར་ཕྱོགས་ངོས་སུ་ཁ་བལྟས་ཏེ། །ལྷ་ཀླུ་གནོད་སྦྱིན་ཇི་སྙེད་པ། །ཤར་ཕྱོགས་ནམ་མཁར་གནས་པ་རྣམས། །ཐམས་ཅད་ཁོང་དུ་རྔུབས་པ་ལས། །ཕྱིར་མི་འབྱུང་བར་ཁོང་དུ་བསྟིམས། །དབུགས་དེ་ཐ་མར་སྣ་
རུ་བསྲིང་། །ཕྱོགས་བཅུར་དེ་ལྟར་གོམས་བྱས་ནས། །དཔལ་ཚེ་གཟི་བྱིན་ཐམས་ཅད་ཐོབ། །ཅེས་གསུངས་སོ། །དེ་ལ་འདི་ནི་བདུད་རྩི་བསྒྲུབ་པའི་ཐབས་སོ། །མཎྜལ་ཚད་དང་མཐུན་པ་ལ། །དབུས་སུ་པདྨ་འདབ་བརྒྱད་བྲི། །གྲུ་ཆད་ཟླ་གམ་བཞི་པར་
བྱ། །གཞན་ཡང་ཟླ་གམ་ཅི་རིགས་དགྲམ། །པདྨའི་རྩེ་ལ་རིན་པོ་ཆེ། །གེ་སར་དག་གིས་མཛེས་པར་བྱ། །ཕྱག་རྒྱ་འབར་བའི་ལྷ་ཚོགས་དགོད། །དབུས་སུ་ཚངས་པའི་སྐུད་པ་ཅན། །སུལ་མེད་དུང་ཅན་འཁོར་བར་གཞག །ཤར་དུ་སུལ་འགྲེང་དེ་
བཞིན་ཏེ། །ལྷོ་རུ་དཔག་བསམ་ཤིང་བུ་ཅན། །ནུབ་ཏུ་ཤོང་བུ་གཉིས་པ་གཞག །བྱང་དུ་བསེ་ཕོར་རྒྱ་གྲམ་མོ། །སྣོད་ཀྱི་མཚན་ཉིད་བཀོད་ནས་སུ། །དྲི་ཆེན་ཞུ་བ་མྃ་ས་དང་། །རཀྟ་དྲི་ཆུ་ཕྱོགས་ཕྱོགས་སུ། །དེ་དག་སྐབས་སུ་སྦྱོར་བ་ཡི། །ཀ་
ཀོལ་ལ་དང་དུ་རུ་སྐ། །ཛཱ་ཏི་ཕ་ལ་ཁ་དྲི་ཞིམ། །ལྕེ་པོག་དཀར་པོ་རིམ་བཞིན་སྦྱར། །འདི་དག་ཀྱང་ནི་རིམ་པ་བཞིན། །ཨ་ཀ་རུ་དང་ག་པུར་དང་། །གུར་གུམ་པདྨ་ལི་ག་དུར། །དེ་ནས་རས་ཡ་ནའི་ཚོགས། །རིགས་དང་ལས་དང་ཁ་དོག་གིས། །ཅི་
རིགས་སོ་སོར་དབྱེ་བར་བྱ། །ས་བོན་ལྔ་ཡིས་རྣམ་པར་སྦྱངས། །གསང་ཆེན་དེ་ཉིད་དམ་པ་ཡི། །རིགས་གཅིག་རིགས་ལྔ་རིགས་བརྒྱ་ཡིས། །སྦྱང་བ་མཆོག་ཏུ་བྱ་བ་ཡིན། །ཁྲོལ་བུ་དག་ནི་སྦྱངས་པ་ན། །བསལ་དང་བསྔོ་དང་བསྡུ་དང་དབྱེ། །ཁྲུས་
དང་བཤགས་དང་ཡོན་ཏན་བརྗོད། །བྱིན་དབབ་བཟླས་པ་རྟགས་བྱུང་དང་། །བསྡུ་དང་བཏག་བཙག་གཞལ་བ་བྱ། །མཚན་ལྡན་སྣོད་དུ་རྒྱ་ཡིས་གདབ། །རིགས་དང་མཐུན་པའི་གཟུངས་ཀྱིས་གདགས། །དབང་བསྐུར་བྱིན་བརླབ་ཚུལ་བཞིན་བྱ། །

ཏིང་འཛིན་མི་གཡེང་འབྱོངས་པ་དང་། །དངོས་གྲུབ་བླང་བ་ལ་སོགས་བྱ། །དེ་ནས་རིལ་བུ་འམ་འདེ་གུ་འམ། །སྐྱོ་མ་ལ་སོགས་ཅི་རིགས་པར། །རྣལ་འབྱོར་མཆོག་གིས་སྤྱད་པར་བྱ། །ཞེས་གསུངས་སོ། །དེ་ལ་འདི་ནི་སྟན་བསྒྲུབ་པའི་ཐབས་སོ། །གང་
ཡང་རུང་བའི་སེམས་ཅན་དེ། །ལས་བབ་པ་ཡི་རྣལ་འབྱོར་པས། །རཾ་ཡཾ་ཁཾ་གིས་སྲེག་སྦྱང་བྱ། །རྒྱུད་དྲུག་ས་བོན་འབྲུ་ལྔས་སྦྱང་། །རོལ་པའི་ཚུལ་གྱིས་བསྒྲལ་བྱ་ཞིང་། །རྣམ་ཤེས་སྦྱོར་བའི་ལྷུམས་སུ་འཕང་། །བྱང་ཆུབ་སེམས་ཀྱི་འཕྲོ་འདུ་ཡིས། །སྐུ་
བསྐྱེད་ཡེ་ཤེས་སྐུར་སྤྲོས་ཏེ། །རྫོགས་སངས་རྒྱས་ལ་སོམ་ཉི་མེད། །ཅེས་གསུངས་སོ། །དེ་ལ་འདི་ནི་ག་ཎ་བསྒྲུབ་པའི་ཐབས་སོ། །མཚན་དང་ལྡན་པའི་གཟུངས་མ་ལ། །བསྙེན་སྒྲུབ་ལུང་བཞིན་སྦྱོར་བར་བྱ། །དཀར་དམར་འདྲེས་པའི་བྱང་ཆུབ་སེམས། །
རྡོ་རྗེ་ལྕེ་ཡིས་བླང་བར་བྱ། །སངས་རྒྱས་རྣམས་ལ་མཆོད་པར་བྱ། །འགྲོ་དྲུག་སྒྲིབ་པ་སྦྱོང་བར་བྱེད། །ཅེས་གསུངས་སོ། །དེ་ལ་འདི་ནི་སྤྱིར་བསྒྲུབ་པའི་ཐབས་སོ། །ཡི་དམ་བཅས་པ་བཏང་ན་ཡང་། །བདག་ལུས་ཕྱལ་བར་མི་གཏང་ཞིང་། །དེ་ཉིད་དྲན་
པ་ཆེན་པོར་བྱ། །འཕགས་པ་མཆོད་པར་བརྩོན་པ་དང་། །རང་གི་ལྟ་བ་གསལ་བ་དང་། །གསང་སྔགས་སྡོམ་ལ་གནས་པ་དང་། །གསང་སྔགས་ཕྱག་རྒྱ་མ་ཉམས་དང་། །ཡོ་བྱད་ཚོགས་ན་ངེས་པར་འགྲུབ། །མི་ལྡན་དོན་རྣམས་བརླག་པར་འགྱུར། །
ཞེས་གསུངས་སོ། དེ་ལ་འདི་ནི་མི་འགྲུབ་པའི་ཆད་པའོ། །བསྙེན་བསྒྲུབ་རིམ་པར་མ་རྫོགས་པར། །དངོས་ལ་ཞེན་ཅིང་སྒྲུབ་བྱེད་པ། །རང་རྒྱུད་སྲེག་པར་གདོན་མི་ཟ། །ཞེས་གསུངས་སོ། །དེ་ལ་འདི་ནི་བསྒྲུབས་ནས་མ་གྲུབ་པའི་ཆད་པའོ། །བཀའ་
བཞིན་སྒྲུབ་པའི་རྣལ་འབྱོར་པས། །དུས་བཞིན་གྲུབ་པར་མ་གྱུར་ན། །རྡོ་རྗེ་སེམས་དཔའ་ལ་སོགས་པའི། །ཡེ་ཤེས་ལས་གྲུབ་ལྷ་རྣམས་ཀྱང་། །ཚལ་པར་འགས་པ་གདོན་མི་ཟ། །ཞེས་གསུངས་སོ། །དངོས་གྲུབ་གཞན་དག་དེ་དག་ཏུ། །མི་ཟད་

བསམ་གྱིས་མི་ཁྱབ་སྟེ། །དེ་དག་ལ་སོགས་བསམ་ཡས་མཆོག །ཆོས་དབྱིངས་མཉམ་དང་མི་མཉམ་དང་། །ནམ་མཁའ་དབྱིངས་ཀྱི་མཐས་ཀླས་པ། །བརྗོད་མེད་བརྗོད་ལས་འདས་པ་ཡི། །དངོས་གྲུབ་ཇི་ལྟར་འདོད་པ་འགྲུབ། །ཅེས་
གསུངས་སོ། །འཕགས་པ་རྒྱུད་ཀྱི་རྒྱལ་པོ་ཡེ་ཤེས་རྔམ་པ་གློག་གི་འཁོར་ལོའི་མདོ་ཞེས་བྱ་བ་ལས་དངོས་གྲུབ་བསྒྲུབ་པའི་རྣམ་གྲངས་བཤད་པའི་ལེའུ་སྟེ་བཅུ་གཉིས་པའོ།། །།དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དེ་མི་
འདའ་བ་དམ་ཚིག་གི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་སྡོམ་པ་ཟབ་མོ་འདི་ཕྱུང་ངོ་། །དེ་ལ་འདི་ནི་དམ་ཚིག་གི་སྡོམ་པ་ཅིའི་ཕྱིར་བསྲུང་བའོ། །སྲིད་གསུམ་སེམས་ཅན་ཐམས་ཅད་ལ། །ལོག་
རྟོག་འཁྲུལ་པ་བསམ་མི་ཁྱབ། །དེ་ཉིད་གཞིལ་བའི་གདུལ་ཐབས་སུ། །ཕྱི་ནང་སྡོམ་པ་ཇི་སྙེད་པ། །རྟོག་འདུལ་ཐབས་སུ་དེ་སྙེད་གསུངས། །ཞེས་གསུངས་སོ། །དེ་ལ་འདི་ནི་དམ་ཚིག་གི་མདོ་ཀུན་འདིར་འདུས་པའོ། །ཇི་སྙེད་སྡོམ་པ་བསམ་ཡས་ཀུན། །
གསང་སྔགས་རྒྱ་མཚོ་ཆེན་པོ་ལས། །འདུལ་བའི་ཐབས་སུ་སོ་སོར་སྣང་། །སྣང་ཡང་རྟོག་འདུལ་མ་གྲུབ་ཕྱིར། །རྨད་བྱུང་ངང་དུ་གཅིག་པར་འདུས། །དེ་བས་གསང་སྔགས་ངོ་མཚར་ཆེ། །ཞེས་གསུངས་སོ། །དེ་ལ་འདི་ནི་དམ་ཚིག་རྣམ་པར་དག་པའོ། །
ཆོས་ཀུན་ཡེ་ནས་དག་པའི་ཕྱིར། །ལོག་རྟོག་ཡེ་ནས་རྣམ་པར་དག །དེ་བས་སྡོམ་པ་རྣམ་པར་དག །དམ་ཚིག་འདི་ནི་རྨད་པོ་ཆེ། །ཞེས་གསུངས་སོ། །དེ་ལ་འདི་ནི་བསྲུང་བ་མེད་པའི་སྡོམ་པའོ། །ཐམས་ཅད་ཐིག་ལེ་རྡོ་རྗེ་བས། །བསྲུང་བའི་ཐ་
སྙད་རྣམས་དང་བྲལ། །ཀུན་ཁྱབ་བདལ་བའི་ངང་ཉིད་ལ། །བསྲུང་དུ་མེད་ན་སྡོམ་པ་ཡིན། །ནམ་མཁའ་བཞིན་དུ་ཀུན་དུ་ཁྱབ། །ཅེས་གསུངས་སོ། །དེ་ལ་འདི་ནི་རྟོགས་པའི་དམ་ཚིག་གོ། །བདེ་ཆེན་རྣམ་དག་ལྷུན་གྲུབ་པར། །ལྟ་བས་རྟོགས་ཤིང་

ཆུད་གྱུར་ན། །དམ་ཚིག་ཉིད་ཀྱང་རྣམ་དག་སྟེ། །ལྟ་བ་ཁྱད་པར་ཇི་བཞིན་དུ། །འདུལ་བའི་ཁྱད་པར་དེ་ལྟར་གནས། །དེ་བས་དམ་ཚིག་ཞེས་བྱ་བ། །རང་གི་ལྟ་བ་ཡིན་པར་གསུངས། །ཞེས་གསུངས་སོ། །དེ་ལ་འདི་ནི་དམ་ཚིག་གི་མདོ་གསང་
བའོ། །གསང་སྔགས་རྒྱ་མཚོ་ཆེན་པོ་ཡི། །དམ་ཚིག་བསམ་ཡས་ཇི་སྙེད་པ། །རྩ་བ་ཡན་ལག་གཉིས་སུ་འདུས། །རྩ་བའི་དམ་ཚིག་གསུམ་ཡིན་ཏེ། །སྐུ་གསུང་ཐུགས་སུ་རྒྱལ་བས་གསུངས། །ཡན་ལག་དམ་ཚིག་མི་སྤོང་དང་། །མི་འདོར་
སྤྱོད་དང་ཤེས་པ་དང་། །གྲུབ་པ་ཡིན་ཏེ་རྣམ་ལྔ་པོ། །མདོར་ན་རྣམ་པ་བརྒྱད་དུ་གྲགས། །ཞེས་གསུངས་སོ། །དེ་ལ་འདི་ནི་མདོ་རྒྱས་པའོ། །སྐུ་ཡི་དམ་ཚིག་ཅེས་བྱ་བ། །བླ་མ་སྤུན་ལ་གདུང་སེམས་ལྡན། །མངན་དང་དཔྱ་སེམས་སྤངས་པ་ཡིན། །
བླ་མ་ལ་ཡང་རྣམ་གསུམ་སྟེ། །དམ་ཚིག་དབང་དང་ཤེས་རབ་རྒྱུད། །མན་ངག་ལུང་སྟོན་སློབ་དཔོན་ལ། །མངན་དང་དཔྱ་བའི་སེམས་བོར་ན། །ལུས་ངག་སྒོ་ནས་སྨོས་ཅི་དགོས། །མགོ་དང་མིག་དང་གསང་མ་སྙིང་། །རྟག་ཏུ་འབྲལ་བར་
འཕངས་པ་ལྟར། །བླ་མ་རྡོ་རྗེ་སློབ་དཔོན་ལ། །མི་འབྲལ་སེམས་ཀྱིས་དེ་ལྟར་ལྟ། །དེ་ཡི་ཕྱི་བཞིན་བེའུ་ལྟར་འབྲང་། །དེ་ཡི་དགོས་པ་ཅི་ཡང་རུང་། །སྐོངས་ན་སྲོག་ལའང་མི་ལྟ་ན། །ཟང་ཟིང་གཞན་ལྟ་སྨོས་ཅི་དགོས། །ལུས་ལ་དབང་བའི་རྒྱལ་
པོ་འམ། །ལུས་སྲོག་བསྐྱེད་པའི་ཕ་མ་བས། །ཤིན་ཏུ་གཉན་ཞིང་བཀུར་བར་བྱ། །ཅི་ཕྱིར་དབྱིངས་དང་རྣམ་ཐར་གྱི། །སྒོ་རྣམས་དེ་ཡི་སྟོན་པ་ཡིན། །དངོས་གྲུབ་བྱེ་བྲག་ཇི་སྙེད་པ། །དེ་ལ་རག་ལས་རྗེས་སུ་འབྲང་། །མ་རིག་མུན་པས་གཏིབས་པ་
ལ། །སེམས་ཀྱི་སྒྲོན་མ་དེ་ཡིས་འདེགས། །ལྷ་མི་ཡོངས་ཀྱི་འདྲེན་སྟོན་ཡིན། །དུས་གསུམ་སངས་རྒྱས་ཞལ་མཐོང་ཡིན། །དགེ་བའི་རྩ་བའི་སྲོག་ཤིང་ཡིན། །ཡོན་ཏན་ཀུན་གྱི་གཏེར་མཛོད་ཡིན། །གལ་ཏེ་ཡོན་ཏན་མི་ལྡན་ཡང་། །བླ་མར་

བཟུང་ནས་སྤང་བྱས་ན། །ཀུན་གྱི་སློབ་དཔོན་བརྙས་པ་ཡིན། །དུས་གསུམ་སངས་རྒྱས་སྐུར་པ་ཡིན། །དེ་ཡི་ཉམས་པ་བརྗོད་མི་ལང་། །ཡོན་ཏན་ལྡན་པའི་བླ་མ་དེ། །ཕྱོགས་བཅུའི་སངས་རྒྱས་ཐམས་ཅད་དང་། །རྒྱལ་
སྲས་དང་ནི་མཐུ་ཆེན་རྣམས། །ཕྱག་འཚལ་མཆོད་ཅིང་བཀུར་སྟི་བྱེད། །འཇིག་རྟེན་འདི་ན་མཐུ་ཆེན་ཀུན། །དེ་ཡི་དགོངས་པ་སྐོང་བ་དང་། །ཁུར་ཞིང་བྲན་དུ་ཁས་ལེན་ན། །རྡོ་རྗེ་སློབ་མས་སྨོས་ཅི་དགོས། །རྡོ་རྗེ་སྤུན་ལ་གདུང་སེམས་ཀྱང་། །
འདྲེས་དང་མ་འདྲེས་ཡོངས་ཀྱི་སྤུན། །ཡང་དག་ལམ་དུ་ཞུགས་པ་ལ། །མངན་དང་དཔྱས་ཀྱིས་སེམས་ཙམ་ཡང་། །རྟག་ཏུ་སྤང་བར་བྱ་བ་ཡིན། །བརྩེ་ཞིང་གདུང་བའི་ཤུགས་ཕྱུང་ལ། །གཅིག་ལ་གཅིག་ནི་མིག་བཞིན་བལྟ། །མདོར་ན་སྲོག་
ལ་མི་ཆགས་པར། །སྤུན་དང་མིང་སྲིང་དགོས་པ་སྒྲུབ། །ཅི་ཕྱིར་རྡོ་རྗེ་སྤུན་རྣམས་ནི། །འདི་ནས་བྱང་ཆུབ་ཐུག་པ་རུ། །མི་འབྲལ་འགྲོགས་པའི་གྲོགས་མཆོག་སྟེ། །མར་མེ་འོད་དང་སྡོང་བུ་འདྲའོ། །དཔེར་ན་འཇིག་རྟེན་མི་རྣམས་ཀྱང་། །མང་པོ་
འདུས་ན་དཀའ་བའང་འགྲུབ། །དེ་བཞིན་རྡོ་རྗེ་མིང་སྲིང་སྤུན། །དངོས་གྲུབ་སྒྲུབ་པའི་གྲོགས་མཆོག་ཡིན། །དཔེར་ན་གྲོགས་དང་ལྡན་པའི་མི། །འཚེ་བ་རྣམས་ཀྱིས་མི་ཚུགས་བཞིན། །དེ་བཞིན་རྣལ་འབྱོར་གྲོགས་ལྡན་ཡང་། །རྒོལ་བ་རྣམས་
ཀྱིས་མི་ཚུགས་ཤིང་། །འབྲས་བུ་མྱུར་དུ་འགྲུབ་པར་འགྱུར། །དེ་བས་ནན་ཏན་བསྐྱེད་དེ་བསྲུང་། །དེ་ཡང་སྐུ་ཡི་དམ་ཚིག་སྟེ། །བསྲུང་བ་ཡིན་པར་རྒྱལ་བས་གསུངས། །མདོར་ན་སྣང་སྲིད་ཐམས་ཅད་ནི། །གཟུགས་སུ་སྣང་བ་མཐའ་ཡས་
ཀུན། །ཆོས་ཀྱི་སྐུ་ལས་མ་གཡོས་པར། །གཟུགས་སྐུ་འཇའ་ཚོན་ཚུལ་དུ་གསལ། །དེ་ཉིད་དོན་ལས་མི་འདའ་བར། །རྟོགས་པ་སྐུ་ཡི་དམ་ཚིག་ཅེས། །རྒྱལ་བ་རྣམས་ཀྱིས་རབ་ཏུ་གསུངས། །གསུང་གི་དམ་ཚིག་ཅེས་བྱ་བ། །སྔགས་ཀྱི་

རྣལ་འབྱོར་གྲལ་སྒོ་བས། །ཕྱག་རྒྱ་བཞི་རུ་རྣམ་གསལ་ནས། །རྡོ་རྗེ་སྔགས་རྣམས་རྒྱུན་མི་གཅད། །བསྒོམ་དང་བཟླས་དང་འཕྲོ་འདུའི་སྔགས། །ཏིང་འཛིན་མེ་དང་འདྲ་བ་ལ། །བཟླས་བརྗོད་རླུང་དང་འདྲས་བསྐྱོད་ནས། །སྒྲིབ་པའི་བུད་ཤིང་བསྲེག་
པར་བྱ། །བཟླས་བརྗོད་སྔགས་ཀྱིས་བརྟུལ་ཞུགས་ཀྱང་། །སྒྲ་ཆེན་མ་ཡིན་ཆུང་བར་མིན། །མགྱོགས་པར་མ་ཡིན་བུལ་བར་མིན། །དྲག་པར་མ་ཡིན་དལ་བར་མིན། །ཡིག་འབྲུ་ཡན་ལག་ཉམས་མ་ཡིན། །ཡེངས་མིན་གླལ་སོགས་བར་གཅོད་
མིན། །རྒྱུ་བའི་སེམས་རྣམས་སྤངས་པ་དང་། །བཟླས་པའི་སྐྱོན་བཅུ་སྤངས་ནས་ནི། །དུས་དང་གྲངས་དང་མཚན་མ་ཡི། །བསྙེན་པ་རབ་ཏུ་རྫོགས་པ་གཅེས། །ཡེ་ཤེས་ལྷ་རྣམས་ཉེ་བ་དང་། །དབྱིངས་དང་རྣམ་ཐར་འཛོམ་པ་དང་། །དངོས་གྲུབ་རྣམ་
གསུམ་ཐོབ་པ་དང་། །འཕྲོ་འདུས་འགྲོ་དོན་བྱ་བ་དང་། །དེ་ཡིས་ལྷ་རྣམས་མཉེས་པ་དང་། །ལས་དེ་མྱུར་དུ་འགྲུབ་པའི་ཕྱིར། །བསྲུང་བའི་དམ་ཚིག་ཡིན་པར་གསུངས། །མདོར་ན་སྣང་སྲིད་ཐམས་ཅད་ཀུན། །སྐྱེ་མེད་གསུང་ལས་མ་གཡོས་ཀྱང་། །
གསུང་གི་བྱེ་བྲག་ཉིད་ཡིན་པར། །རྟོགས་ཤིང་སླར་ཡང་དབྱིངས་སུ་ཐིམ། །རྟོགས་པ་གསུང་དུ་རྒྱལ་བས་གསུངས། །ཐུགས་ཀྱི་དམ་ཚིག་ཅེས་བྱ་བ། །སྤྱིར་གསང་བཞི་དང་བར་གསང་བཞི། །གསང་བར་འོས་དང་གཉེར་གཏད་པའི། །གསང་
སྔགས་གསང་བའི་དོན་རྣམས་ཀུན། །བུམ་པའི་ནང་གི་མེ་མར་བཞིན། །སྣོད་མ་ཡིན་པའི་གང་ཟག་ལ། །དུས་དང་གནས་སྐབས་ཀུན་དུ་གསང་། །སྣོད་དང་ལྡན་པ་རྣམས་ལ་ཡང་། །དབང་མ་ཐོབ་པར་བཤད་པ་མིན། །ཅི་ཕྱིར་གསང་དོན་དེ་
ཉིད་ལ། །མ་རྟོགས་པ་རྣམས་སྐུར་པ་འདེབས། །ལོག་པར་རྟོགས་པ་ལྟུང་བར་འགྱུར། །དོན་མ་རྟོགས་ན་ཡིད་ཆེས་མེད། །ཁམས་གསུམ་སྐྱེ་བོའི་བཅས་ཀར་འགྱུར། །དངོས་གྲུབ་བར་གཅོད་བགེགས་སུ་འགྱུར། །དེ་བས་གཞན་དུ་བསྟན་པ་མིན། །

མདོར་ན་ཐུགས་ཀྱི་དམ་ཚིག་ནི། །སྲིད་གསུམ་སེམས་ཅན་ཐམས་ཅད་ཀྱི། །སེམས་རྟོག་རྣམ་པ་ཐམས་ཅད་ཀུན། །སྐྱེ་མེད་དབྱིངས་ལས་མ་གཡོས་ཀྱང་། །སོ་སོར་རྟོགས་པ་ཐུགས་ཉིད་སྣང་། །སྣང་ཉིད་དབྱིངས་ལས་མི་འདའ་བར། །
རྟོགས་པ་ཐུགས་སུ་རྒྱལ་བས་གསུངས། །དེ་ནི་རྩ་བའི་དམ་ཚིག་གི། །མདོ་ཉིད་རྒྱས་པར་བཤད་པ་ཡིན། །རྩ་བའི་དམ་ཚིག་གི་མདོ་རྒྱས་པར་བཤད་པའོ། །མི་སྤོང་དམ་ཚིག་ཅེས་བྱ་བ། །འདོད་ཆགས་ཞེ་སྡང་གཏི་མུག་དང་། །ང་རྒྱལ་ཕྲག་དོག་ལྔ་རྣམས་
ནི། །རིགས་ལྔའི་སངས་རྒྱས་ངོ་བོ་སྟེ། །ཡེ་ཤེས་ལྔ་ཡི་རང་བཞིན་པས། །སྤངས་ན་རྣལ་འབྱོར་དོན་དང་འགལ། །མི་དོར་དང་དུ་བླང་བ་ནི། །དྲི་ཆེན་དྲི་ཆུ་རཀྟ་དང་། །མྃ་ས་དང་ནི་ཟིལ་པ་ལྔ། །འབྲས་བུ་ལྔ་ཡིས་བསྡུས་པ་རྣམས། །རྣལ་འབྱོར་པས་ནི་
རྟག་ཏུ་བཟའ། །འདི་ཡང་དམ་ཚིག་རྨད་པོ་ཆེ། །སྤྱད་པར་བྱ་བའི་དམ་ཚིག་ནི། །སྦྱོར་དང་སྒྲོལ་དང་མ་བྱིན་ལེན། །བརྫུན་དང་ངག་རྩུབ་སྨྲ་དང་ལྔ། །དོན་དམ་སྐྱེས་བུས་སྤྱད་པར་བྱ། །ཤེས་པར་བྱ་བའི་དམ་ཚིག་ནི། །ཕུང་པོ་ལྔ་དང་འབྱུང་བ་ལྔ། །དབང་པོ་