Kinh tạng Tây Tạng (Kangyur Đại Học) — 079_རྒྱུད་འབུམ།_ག

ཀྱིལ་འཁོར་གྱི་ཆོ་ག་ལ་ཡང་གཞན་ཕལ་པ་མཆོག་གི་བུ་མོར་རྟོགས་པར་བྱའོ། །དཀྱིལ་འཁོར་གྱི་ཕྱིར་སྦྱིན་སྲེག་གི་ཆོ་ག་དེ་ཉེ་བར་བསྟན་པར་བྱ་སྟེ། གང་ལ་གསང་བ་ཆོས་ཀྱི་དཀྱིལ་འཁོར་དང་། ཕྱི་རོལ་གྱི་དཀྱིལ་འཁོར་ལ་ཡང་ཆོ་ག་འདིས་ཐིག་
གདབ་པར་བྱ་ཞིང་། རྡུལ་ཚོན་གྱི་དཀྱིལ་འཁོར་དང་། གསང་བ་ཆོས་ཀྱི་དཀྱིལ་འཁོར་ཇི་སྙེད་པའི་རང་གི་དམ་ཚིག་སྟེ། འདི་སྐད་དུ་རྣལ་འབྱོར་གྱི་གནས་སུ་གྱུར་པའི་སའི་ཕྱོགས་སུ་ཐབ་ཁུང་བྱའོ་ཞེས་བཀའ་སྩལ་ཏོ། །སྣ་ཚོགས་ལས་ནི་རབ་བསྒྲུབ་ཕྱིར། །
སྦྱིན་སྲེག་ལས་ནི་རབ་བཤད་བྱ། །མེ་ནི་ལྷ་ཡི་ཁ་རུ་གསུངས། །སྦྱིན་སྲེག་དེ་ཉིད་རྣམ་པར་གནས། །སྦྱིན་སྲེག་གིས་ནི་ལྷ་རྣམས་ཚིམ། །ཚིམ་ནས་དངོས་གྲུབ་རབ་ཏུ་སྩོལ། །གང་ཞིག་སྔགས་ཀྱི་ལྷག་ཆད་དག །སྦྱིན་སྲེག་གིས་ནི་དེ་ཀུན་དགང་། །སྐུ་
གསུམ་མཆོག་གི་རྩེ་ལས་སྐྱེས། །དེ་ཕྱིར་སྦྱིན་སྲེག་རབ་ཏུ་བསྔགས། །གཙུབས་པ་ལས་ནི་བྱུང་བའི་མེས། །དག་བྱེད་ལས་ནི་བྱེད་པར་འགྱུར། །གདོལ་པའམ་དུར་ཁྲོད་སྐྱེས་པ་ནི། །མི་དགེ་བ་ནི་རབ་ཏུ་བསྒྲུབ། །ཟླུམ་པོ་དང་ནི་གྲུ་བཞི་དང་། །ཟླ་ཕྱེད་

དང་ནི་གྲུ་གསུམ་པ། །རྡོ་རྗེའི་མཚན་མའི་མུ་རན་དང་། །དཀྱིལ་འཁོར་གྲྭར་ནི་སྤྲོ་བར་བྱ། །ཐབ་ཁུང་དབུས་སུ་གཙུག་ཏོར་དང་། །ཆུ་སྐྱེས་རྡོ་རྗེ་རིན་ཆེན་དང་། །པདྨ་གཞུག་པར་བྱ་བའོ། །སྦྱིན་སྲེག་དེ་ཉིད་ཆོག་རིམ་པས། །རྣལ་འབྱོར་
ཇི་བཞིན་གནས་ནས་ནི། །པུས་མོའི་ནང་དུ་ལག་པ་ཉིད། །བླུགས་གཟར་མར་ཁུས་ཁྱབ་པས་ནི། །དེ་བཞིན་དགང་གཟར་དགང་བླུགས་ཉིད། །གཡས་སུ་སྦྱིན་སྲེག་ཡོ་བྱད་གཞག །གཡོན་དུ་ཆུ་ཡི་སྣོད་ཉིད་དེ། །མདུན་དུ་མཆོད་ཡོན་སྣོད་ཉིད་དོ། །ལས་
ཀུན་བྱེད་པ་བཟླས་པས་ནི། །བསང་གཏོར་དང་ནི་འཐོར་འཐུང་བྱ། །ཐབ་ཁུང་ཀུན་དུ་ཀུ་ཤ་ཡི། །རྩེ་མོ་དྲང་པོས་ཡོངས་སུ་བསྐོར། །མེ་ནི་འབར་བར་རིག་ནས་ནི། །མེ་ལྷ་སྤྱན་ནི་དྲང་བར་བྱ། །སྔགས་འདིས་ཆོ་ག་བཞིན་དུ་གཡས་པའི་མཐེ་བོང་དང་། མེ་
འཇིགས་པ་གཡོ་བས། ཨོཾ་ཨེ་ཧྱེ་ཧི་མ་ཧཱ་བྷཱུ་ཏ་དེ་པ་རྀ་ཥི་དྭི་ཛ་སཏྟ་མ་གྲྀ་ཧཱི་ཏྭཱ་ཧུ་ཏི་མ་ཧཱ་ར་མ་སྨིན་སནྣི་ཧི་ཏོ་བྷ་བ། ཨོྃ་ཨགྣེ་དཱི་པྱཱ་དཱི་པྱཱ་བི་ཤ་མ་ཧཱ་ཤྲི་ཡེ། ཧ་བྱ་ཀ་བྱ་བཱ་ཧ་ན་ཡ་སྭཱ་ཧཱ། མཆོད་པ་ལྔ་ལ་གཡོན་པའི་རྡོ་རྗེས་བསང་གཏོར་བྱ་ཞིང་། མེའི་ཕྱོགས་ནས་བཀུག་
པ་ལྟོ་བ་འཕྱང་ཞིང་མིག་གསུམ་པ་དང་། ཞལ་བཞི་པ་དང་། ཕྱག་བཞི་པ་དང་། ཁ་དོག་དམར་ཞིང་རལ་པ་ཆེན་པོ་དང་། མེའི་དཀྱིལ་འཁོར་ལ་གནས་ཤིང་ལས་ཀྱི་འོད་ཟེར་གྱིས་བརྒྱན་པ་སྟེ། ལག་པ་དང་པོ་ན་མཆོག་སྦྱིན། གཉིས་པ་ན་བགྲང་ཕྲེང་། གཡོན་
པ་ན་རིལ་བ་སྤྱི་བླུགས་ཉིད་དང་། གཉིས་པ་ན་དབྱིག་གུ་ཉིད། ཁ་དོག་དམར་པོས་རྣམ་པར་བརྒྱན་ཅིང་དྲང་སྲོང་གི་ཚོགས་ཀྱིས་ཡོངས་སུ་བསྐོར་བ་འདི་ལྟ་བུའི་གཟུགས་སུ་བསམས་ནས་ཐབ་ཁུང་གི་དབུས་སུ་གཞུག་པར་བྱའོ། །དེའི་སྦྱིན་སྲེག་ཐམས་ཅད་ལ་
ལན་གསུམ་གྱི་བར་དུ་སྲེག་བླུགས་སྦྱིན་ཏེ། དེ་ནས་འཐོར་འཐུང་བྱས་ནས་འབར་བའི་རྣམ་པས་ཐིམ་པར་བྱའོ། །རིམ་པའི་སྦྱོར་བ་འདིས་ལྷ་རྣམས་མཁས་པས་ཚིམ་པར་བྱའོ། །ཚིམ་པར་བྱས་ནས་བཟོད་པར་གསོལ་ཏོ། །དངོས་གྲུབ་འདོད་པས་ཤེས་པར་བྱ་སྟེ།

གདུགས་དང་། རྒྱལ་མཚན་དང་། རྡོ་རྗེ་དང་། བུམ་པ་དང་། པདྨ་དང་། ལྕགས་ཀྱུའི་དབྱིབས་དང་། རྩེ་གཅིག་པ་དང་། རྩེ་གཉིས་པ་དང་། རྩེ་གསུམ་པ་དང་། མཆོག་དང་། འབྲིང་དང་། ཐ་མ་དང་། ཁྱད་པར་དུ་གཡས་སུ་འཁྱིལ་བ་དང་། འབར་
བའི་ཁ་དོག་དཀར་པོ་དང་། བཟང་པོའི་འཁྱིལ་བ་མཁས་པས་བརྟག་པར་བྱ་བ་དང་། བརྒྱ་བྱིན་གྱི་གཞུ་ལྟ་བུར་གཙང་བ་དང་། སྣུམ་པ་དང་། དབང་པོ་སྦས་པ་ལྟ་བུའི་འོད་དང་། ཀུ་སུམ་བྷ་དང་། བཻ་ཌཱུརྱ་ལྟ་བུ་དང་། དྲི་ཞིམ་པ་དང་། ཡིད་དུ་འོང་བ་དང་། གསེར་
དང་། །དངུལ་ལྟ་བུ་དང་། དུ་བ་མེད་པ་དང་། ཉི་མ་ལྟ་བུ་འབར་བ་དང་། དྲི་མ་མེད་པ་དང་། ཞི་བ་ལ་ཁ་དོག་དཀར་པོ་ལྟ་བུ་དང་། རྒྱས་པ་ལ་ནི་སེར་པོ་ལྟ་བུ་དང་། རྗེས་སུ་ཆགས་པ་ལ་ནི་དམར་པོ་མཆོག་དང་། མངོན་སྤྱོད་ལ་ནི་སྔོན་པོ་དང་། ནག་པོ་དང་།
མེ་ལྕེ་མང་བ་དང་། དུ་བ་དང་། མེ་སྟག་ཐམས་ཅད་ཡང་དག་པར་ལངས་པ་དང་། ཆུང་ངུ་ཆུང་ངུར་འཆད་པ་དང་། མྱུར་བར་གཟི་བརྗིད་ཆུང་བ་དང་། ནག་པོ་དང་བཅས་པ་དང་། པ་ལ་ཤའི་མདོག་དང་། རྩེ་གསུམ་པ་དང་། ཉི་མ་ལྟ་བུ་ཉིད་དང་། དེ་བཞིན་དུ་བ་གླང་
གི་མགོ་ལྟ་བུ་ཉིད་དང་། རོའི་དྲི་དང་། ཉའི་དྲི་དང་། བོང་བུའི་དང་། ཁྱིའི་དང་། རྔ་མོའི་ནི་བགེགས་དང་། བགེགས་མེད་པའི་འབར་བའི་མཚན་མ་མཚོན་པར་བྱ་བ་ཡིན་ནོ། །མྱུར་བར་བཟླས་པ་དང་། བསྒོམ་པ་ལ་དགའ་བས་དེ་ལྟར་འགྲུབ་པར་འགྱུར་རོ།
ཨོྃ་དང་པོ་དང་། སྭཱ་ཧཱ་མཐར་འགྲོ་བའི་སྔགས་བརྗོད་དོ། །ཞི་བ་དང་། རྒྱས་པ་དང་། དབང་ལ་རྒྱུན་མི་འཆད་པར་དབྱངས་སྦྱར་བར་བྱ་ཞིང་། ཞི་བ་ལ་ཞི་བའི་ཡིད་དང་། རྒྱས་པ་ལ་ཚིམ་པས་མངོན་པར་འཕེལ་བར་འགྱུར་བ་དང་། དབང་ལ་དབང་གི་ཡིད་དང་།
མྱོས་པར་བྱེད་ཅིང་ནང་གི་གུས་པ་དང་བཅས་པ་དང་། མངོན་སྤྱོད་ལ་ཧཱུྃ་དང་ཕཊ་ཀྱིས་ལུས་འབར་ཞིང་འབར་བ་དང་། འཇིག་རྟེན་གསུམ་བཟའ་བའི་སེམས་ཀྱི་ཆོ་གས་གནས་སོ། །སྔགས་ཀྱི་ཡི་གེའི་རྐང་པ་ཡི། །ནང་དུ་ཆུད་པས་བསྐུལ་བས་སྦྱར། །གང་ཡང་ཁ་དང་

ལྡན་པའི་ལྷ། །སྣ་ཚོགས་ལས་ཀྱིས་མཆོད་པར་བྱ། །སྦྱིན་སྲེག་ཆོ་ག་ཐམས་ཅད་ལ། །སྔགས་ཀྱི་སྒྲུབ་པོས་ཆོ་ག་ཤེས་པས། །དང་པོར་སྲེག་བླུགས་གང་བར་དབུལ། །ཕྱི་ནས་ལས་ནི་བརྩམ་པར་བྱ། །སྦྱིན་སྲེག་དེ་ཉིད་ཀྱིས་ནི་བསྐུལ། །སྦྱིན་
སྲེག་ཆོ་གའི་རིམ་པ་འདི། །ཞི་བ་རྒྱས་པ་དབང་དང་ནི། །ཁུ་བ་སྲིད་པའི་སྦྱིན་སྲེག་ལ། །བཤང་གཅི་ཁྲག་དང་རྐང་དང་ནི། །རུས་པ་ཤ་ཆེན་སྦྱིན་སྲེག་གི །ཐམས་ཅད་ལས་ནི་ཁ་བཀང་ཡིན། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་དེ་བཞིན་གཤེགས་པའི་
རྡོ་རྗེ་ཡེ་ཤེས་ཀྱི་འཁོར་ལོ་སྒྲུབ་པའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འཁོར་ལོ་ཐམས་ཅད་རབ་ཏུ་བསྒྲུབ་པའི་སྦྱོར་བའི་ལས་རྒྱས་པ་ཕྱི་དང་ནང་དུ་གྱུར་པ་འདི་བཀའ་སྩལ་པ། གང་གི་གང་ཡང་ལྷའི་འཁོར་ལོའི་དབུས་སུ་བཅུག་པ་དེའི་
མཚན་དུ་བསྟན་པར་འགྱུར་བའི་རྡོ་རྗེའི་དཀྱིལ་འཁོར་ནི་མཁས་པས་བསྔགས་སོ། །ཞི་བ་དང་། རྒྱས་པ་དང་། དབང་དང་། མངོན་སྤྱོད་ཀྱི་ལས་རྣམས་ལ་བདག་པོས་འཁོར་ལོའི་རྒྱལ་མོ་རྣམ་པར་བསྒོམ་པར་སྦྱོར་བར་བྱེད་དོ། །བྷ་གའི་དབུས་སུ་ཟླ་བའི་དཀྱིལ་འཁོར་གང་བ་
བསྒོམ་པར་བྱ་སྟེ། ཏཱྃ་ལས་སྐྱེས་པའི་ལྷ་མོ་སྒྲོལ་མ་མཐུ་ཆེན་མོ་སྒེག་པའི་རོས་ཡང་དག་པར་གནས་མ། ཞལ་བརྒྱད་མ། སྤྱན་གསུམ་མ། ཕྱག་བཅུ་དྲུག་མ། ཞལ་འཛུམ་པ། མ་ར་ཀ་ཏ་ལྟ་བུ། ལང་ཚོ་ཕུན་སུམ་ཚོགས་མ། ན་བཟའ་སྣ་ཚོགས་མན་པས་མ། དོ་
ཤལ་དང་། རྐང་གདུབ་དང་། ལག་གདུབ་དང་། དཔུང་རྒྱན་དང་། རྣ་རྒྱན་དང་། སྐ་རགས་ཆེན་པོ་དང་། རྒྱན་སྣ་ཚོགས་ཀྱིས་བརྒྱན་མ། ཨུཏྤ་ལ་ཡིས་སྤྱི་བོ་བརྒྱན་མ། ཡ་བའི་མེ་ཏོག་ལྟ་བུར་མཆོག་མ། གཡོན་བརྐྱང་བས་གནས་སུ་བཞུགས་མ། སུམ་ཅུ་རྩ་
གསུམ་གྱི་བདག་པོ་ཡང་འཇིགས་ཤིང་སྐྲག་པར་མཛད་ཅིང་། གཞན་ཡང་ཐལ་མོ་སྦྱོར་བ་དང་། འོད་ཟེར་དམར་པོ་ཉེ་བར་འབར་ཞིང་སངས་རྒྱས་ཀྱི་སྤྲིན་གྱིས་ཀུན་ཏུ་ཁྱབ་པར་སྤྲོ་བ་དང་། སེམས་ཅན་ཐམས་ཅད་ལམ་ལྟ་བུར་སྡུག་པར་རྣལ་འབྱོར་པས་བསྒོམ་པར་བྱས་

ན་མྱུར་དུ་སངས་རྒྱས་ཉིད་ཐོབ་པར་འགྱུར་རོ། །དང་པོ་ན་རལ་གྲིའོ། །གཉིས་པ་ན་ཨུཏྤ་ལའོ། །གསུམ་པ་ན་མདའོ། །བཞི་པ་ན་རྡོ་རྗེའོ། །ལྔ་པ་ན་ལྕགས་ཀྱུའོ། །དྲུག་པ་ན་དབྱིག་པའོ། །བདུན་པ་ན་གྲི་གུག་གོ། །བརྒྱད་པ་ན་མི་འཇིགས་པའོ། །གཡོན་
པའི་དང་པོ་ན་ཐོད་པའོ། །གཉིས་པ་ན་སྡིགས་མཛུབ་བོ། །གསུམ་པ་ན་གཞུའོ། །བཞི་པ་ན་ཁ་ཊྭ་གའོ། །ལྔ་པ་ན་ཞགས་པའོ། །དྲུག་པ་ན་མིའི་མགོ་བོའོ། །བདུན་པ་ན་རིན་པོ་ཆེའོ། །བརྒྱད་པ་ན་བུམ་པ་འཛིན་པའོ། །གཡས་པའི་ཞལ་དང་པོ་ནི་སྔོན་པོའོ། །
གཉིས་པ་ནི་སེར་པོ་ཡང་དག་པར་འབར་བའོ། །གཡོན་པའི་དང་པོ་ནི་དཀར་པོའོ། །གཉིས་པ་ནི་ལྗང་གུ་དང་། བཻཌཱུ་རྱ་ལྟ་བུའོ། །སྟེང་གི་ཞལ་ནི་རྣམ་པར་གཙིགས་ཤིང་། དུ་བའི་མདོག་དང་། འཇིགས་པ་ཆེན་པོ་དང་། ཁྲོ་གཉེར་ཤིན་ཏུ་འཇིགས་པར་བྱེད་པ།
དངོས་གྲུབ་ཐམས་ཅད་སྦྱིན་པར་བྱེད་པ། དེ་ལྟར་ལྷ་མོ་བསྒོམ་པར་བྱའོ། །དེ་ནས་སྟེང་གི་ཞལ་བོང་བུའི་རྣམ་པ་དང་། འདོད་པའི་གཟུགས་ཅན་མ། ཞབས་བཞི་པ། རྩེ་གསུམ་སྦྲུལ་གྱིས་བསྐོར་བ། དེ་བཞིན་དུ་ཧེ་རུ་ཀ་ཞེས་བྱ་བ་ངེས་པར་རྒྱུའི་མཆོག་བསྒོམ་པར་
བྱའོ། །བྷ་གའི་ནང་དུ་ཡཾ་ལས་རླུང་གི་དཀྱིལ་འཁོར་དུ་བའི་རྣམ་པར་བསམ་པར་བྱའོ། །དེའི་སྟེང་དུ་ཟླ་བའི་དབུས་སུ་དྷཱིཿཡོངས་སུ་གྱུར་པ་ལས་འཇམ་པའི་དབྱངས་ཀྱི་གཟུགས་སུ་བདག་ཉིད་བསམས་ནས་དེའི་སྙིང་གར་ཨ་ལས་ཉི་མའི་དཀྱིལ་འཁོར་བསམས་ཏེ། དེ་ནས་
ཉི་མའི་དཀྱིལ་འཁོར་ལས་འོད་ཟེར་ཕྱུང་སྟེ་ཆོ་ག་བཞིན་དུ་མཆོད་པར་བྱའོ། །དེའི་སྟེང་དུ་ཧཱུྃ་འོད་ཟེར་ལྔ་དང་ལྡན་པ་བསམས་ནས་དེ་ཡོངས་སུ་གྱུར་པ་ལས་རྡོ་རྗེ་འཇིགས་བྱེད་ཞལ་དགུ་པ་མ་ཧེའི་གཟུགས་དང་། ཞབས་བཅུ་དྲུག་པ། ཕྱག་སུམ་ཅུ་རྩ་བཞི་པ། གཅེར་བུ་
སྐུ་མདོག་ནག་ཅིང་གཟི་བརྗིད་ཆེན་པོ། ཐོད་པ་མཆོག་གིས་བརྒྱན་པར་མཛད་ཅིང་། འཇིགས་བྱེད་ཆེན་པོའི་སྟེང་གི་ལིང་ག་དང་། གཡོན་བརྐྱང་བས་བཞུགས་ཤིང་། གསུས་པ་ཆེ་བ་དང་། སྐུ་ཆེ་ཞིང་སྐྲ་སྟེང་དུ་འབར་བས་འཇིགས་པའི་རྣམ་པ་དང་། ཐོད་པའི་ཕྲེང་

བའི་རྒྱན་གྱིས་བརྒྱན་པ། འཇིགས་པ་ཆེན་པོའི་དུས་ལྟ་བུར་སྒྲོགས་པ་དང་། སྐྱེས་པའི་པགས་པ་དང་། ཚིལ་དང་། ཁྲག་དང་། ཤ་དང་། །ལྟོ་བའི་ཚིལ་དང་། རྐང་ཟ་བ་དང་། ཚངས་པ་དང་བཅས་པ་དང་། ཉེ་དབང་དང་། དྲག་པོ་ལ་སོགས་པའི་
འཇིག་རྟེན་གསུམ་ཟ་བ་དང་། སྒྲ་ཆེར་བཞད་ཅིང་ལྕེ་ནར་བ་དང་། འཇིགས་པ་ཡང་འཇིགས་པར་མཛད་པ་བསམ་པར་བྱའོ། །དང་པོ་ནི་མ་ཧེའི་གདོང་ངོ་། །གཡས་པའི་རྭའི་ཞལ་གསུམ་ནི་སྔོན་པོ་དང་། དམར་པོ་དང་། སེར་པོ་སྟེ། །ཁྲོ་གཉེར་དང་། ཞལ་
གཙིགས་པའོ། །གཡོན་པ་ནི་དཀར་པོ་དང་། དུ་བ་དང་། ནག་པོའོ། །དེ་དག་གི་དབུས་སུ་ཞལ་ཤིན་ཏུ་དམར་བ་ཁྲག་འཛག་པའོ། །དེའི་སྟེང་དུ་འཇམ་པའི་གཟུགས་ཤིན་ཏུ་སེར་ཞིང་ཅུང་ཟད་ཁྲོ་བ་དང་། བྱིས་པའི་རྒྱན་དང་། གཙུག་པུད་ལྔའི་མཆོག་དང་
གཞོན་ནུ་སྟེ། །དེ་ལྟར་བརྟན་པར་བྱས་ནས་ཤིན་ཏུ་མཉམ་པར་གཞག་པས་སྔགས་པས་བསྒོམ་པར་བྱའོ། །དེ་ནས་གཡས་པའི་དང་པོ་ན་ནི་གྲི་གུག་གོ། །གཉིས་པ་ན་ནི་འབིགས་བྱེད་སྐྱོང་བའོ། །གསུམ་པ་ན་ནི་གཏུན་ཤིང་ངོ་། །བཞི་པ་ན་ནི་ཆུ་གྲིའོ། །
ལྔ་པ་ན་ནི་ཀ་ཎ་ཡའོ། དྲུག་པ་ན་ནི་སྟ་རེའོ། །བདུན་པ་ན་ནི་མདུང་ངོ་། །བརྒྱད་པ་ན་ནི་མདའོ། །དགུ་པ་ན་ནི་ལྕགས་ཀྱུའོ། །བཅུ་པ་ན་ནི་དབྱིག་ཏོའོ། །བཅུ་གཅིག་པ་ན་ནི་ཁ་ཊྭ་གའོ། །བཅུ་གཉིས་པ་ན་ནི་འཁོར་ལོའོ། །བཅུ་གསུམ་པ་ན་ནི་རྡོ་རྗེའོ། །བཅུ་
བཞི་པ་ན་ནི་རྡོ་རྗེ་ཐོ་བའོ། །བཅྭ་ལྔ་པ་ན་ནི་རལ་གྲིའོ། །བཅུ་དྲུག་པ་ན་ནི་ཅང་ཏེའུའོ། །ཕྱག་གཡོན་པའི་དང་པོ་ན་ནི་ཐོད་པའོ། །གཉིས་པ་ན་ནི་མགོ་བོའོ། །གསུམ་པ་ན་ནི་ཕུབ་བོ། །བཞི་པ་ན་ནི་རྐང་པའོ། །ལྔ་པ་ན་ནི་ཞགས་པའོ། །དྲུག་པ་ན་ནི་གཞུའོ། །བདུན་
པ་ན་ནི་རྒྱུ་མའོ། །བརྒྱད་པ་ན་ནི་དྲིལ་བུའོ། །དགུ་པ་ན་ནི་ལག་པའོ། །བཅུ་པ་ན་ནི་དུར་ཁྲོད་ཀྱི་རས་སོ། །བཅུ་གཅིག་པ་ན་གསལ་ཤིང་གིས་ཕུག་པའི་སྐྱེས་བུའོ། །བཅུ་གཉིས་པ་ན་ནི་མེའི་ཐབ་ཁུང་ངོ་། །བཅུ་གསུམ་པ་ན་ནི་ཐོད་པའོ། །བཅུ་བཞི་པ་ན་ནི་སྡིགས་

མཛུབ་བོ། །བཅྭ་ལྔ་པ་ན་ནི་བ་དན་ལྕེ་གསུམ་པའོ། །བཅུ་དྲུག་པ་ན་ནི་རླུང་གི་རས་སོ། །གཉིས་ཀྱིས་ནི་གླང་པོའི་པགས་པ་འཛིན་པའོ། །ཞབས་གཡས་པའི་འོག་ཏུ་ནི་མི་དང་། །མ་ཧེ་དང་། གླང་དང་། །བོང་བུ་དང་། རྔ་མོ་དང་། ཁྱི་དང་། ལུག་དང་། ཅེ་སྦྱང་
ངོ་། །ཞབས་གཡོན་པའི་འོག་ཏུ་ནི་བྱ་རྒོད་དང་། འུག་པ་དང་། ཁྭ་དང་། ནེ་ཙོ་དང་། ཁྲ་དང་། མན་ཏྲི་དང་། བྱ་རྒོད་ཆེན་པོ་དང་། བྱ་ལོང་ངོ་། །དེ་ལྟར་གྱུར་པའི་རྡོ་རྗེ་འཇིགས་བྱེད་བསམ་གཏན་ནམ་འདྲིར་གཞུག་པར་བྱའོ། །དེའི་འོག་ཏུ་དུར་ཁྲོད་ཆེན་པོ་
སྲིན་པོ་དང་། ཞིང་སྐྱོང་བ་དང་། རོ་ལངས་དང་ལྡན་པ་དང་། གསལ་ཤིང་གིས་ཕུག་པའི་སྐྱེས་བུ་དང་། བསྲེགས་པའི་སྐྱེས་བུ་དང་། མདུང་གིས་ཕུག་པ་དང་། ཁྭ་དང་། བྱ་དུ་མ་དང་། ཁྱི་དང་ལྡན་པར་ཧ་ཧས་ཀུན་ཏུ་ཁྱབ་པར་བྱེད་པ་དེ་ལྟར་ཆོ་གས་རྣལ་
འབྱོར་པས་བསྒོམ་པར་བྱའོ། །དྲག་ཤུལ་གྱི་ལས་ཐམས་ཅད་རབ་ཏུ་གྲུབ་པར་བྱེད་པ་ཞེས་བྱ་བ་རྡོ་རྗེ་འཇིགས་བྱེད་ཆེན་པོ་འདི་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་མཱྃ་ལས་ཡེ་ཤེས་སྐྱེས། །འོད་ཟེར་ཅན་ནི་སྣང་བྱེད་དོ། །རྟ་བདུན་དག་གི་ཤིང་
རྟར་གནས། །འབར་བའི་དཀྱིལ་འཁོར་འཇིགས་བྱེད་མ། །ཞལ་གསུམ་མ་ལ་སྤྱན་གསུམ་མ། །ཕྱག་དྲུག་མདོག་ནི་སེར་མོ་མཚུངས། །གཡས་པ་སྔོན་པོར་གྱུར་པ་དང་། །གཡོན་པ་ཀུན་ད་ཟླ་བ་མཚུངས། །འོད་ཟེར་དུ་མའི་འོད་གསལ་མ། །ཕྱོགས་
བཅུ་སྲུང་བ་རྩོམ་པ་མོ། །ཞལ་ནི་རྣམ་པར་འཛུམ་པ་དང་། །སྒེག་ཅིང་ཤིན་ཏུ་ལང་ཚོ་བབ། །སྣ་ཚོགས་གོས་ལ་སོགས་པ་དང་། །རྒྱན་རྣམས་ཀུན་གྱིས་རྒྱན་བྱེད་མ། །དབུ་རྒྱན་རྫོགས་པའི་སངས་རྒྱས་ལྔ། །ཐོར་ཚུགས་མེ་ཏོག་དག་གིས་སྤྲས། །གཡས་
པའི་ཕྱག་ན་རྡོ་རྗེ་སྟེ། །གཉིས་པ་ཁབ་ནི་སྐུད་པ་ཅན། །གསུམ་པར་མདའ་ནི་གསོར་བ་སྟེ། །གཡོན་པ་ལ་ནི་སྡིགས་མཛུབ་ཞགས། །ཨ་ཤོ་ཀ་ཡི་ཡལ་ག་གཉིས། །གསུམ་པ་ལ་ནི་གཞུ་ཉིད་དེ། །ཀུན་དུ་འོད་ཟེར་སྣ་ཚོགས་ནི། །སངས་རྒྱས་སྤྲིན་དང་

འདྲ་བ་སྤྲོ། །འདི་ནི་བསྒོམས་པ་ཙམ་གྱིས་ནི། །སེམས་ཅན་རྣམས་ནི་དབང་དུ་སྡུད། །རྡོ་རྗེ་སེམས་དཔའ་དེ་བཞིན་གཤེགས། །བཅོམ་ལྡན་རྡོ་རྗེ་ཅན་གྱིས་གསུངས། །ནམ་མཁའི་ཁམས་ཀྱི་ནང་སོན་པར། །ཉི་མའི་དཀྱིལ་འཁོར་ངེས་བསམ་བྱ། །
བྃ་ལས་ཡོངས་གྱུར་ལྷ་མོ་ནི། །ཁ་དོག་སེར་མོ་ཆེར་འབར་མ། །ཞལ་གསུམ་མ་ལ་སྤྱན་གསུམ་ཉིད། །ཁྲོ་བཅས་ཞལ་ནི་འཛུམ་པ་དང་། །རྒྱན་རྣམས་ཀུན་གྱིས་ཤིན་ཏུ་བརྒྱན། །ཕྱག་དྲུག་སར་བའི་ལང་ཅོ་མ། །གཡས་པའི་ཕྱག་ན་རྡོ་རྗེ་དང་། །གཉིས་
བ་ན་ནི་དགྲ་སྟ་ཉིད། །གསུམ་པ་ན་ནི་མདའ་གསོར་མ། །གཡོན་པ་ན་ནི་སྡིག་མཛུབ་ཞགས། །གཉིས་པར་ཤིང་ལོའི་རྔ་ཡབ་དང་། །གསུམ་པར་གཞུ་ནི་འཛིན་པ་ཉིད། །མེ་ཏོག་གིས་ནི་ཐོར་ཚུགས་དཀྲིས། །པདྨ་དཀར་པོ་གནས་པ་དང་། །
འོད་ཟེར་དམར་པོས་བརྒྱན་པ་མ། །ཁྲོ་བོ་འབར་བའི་སྤྲོ་བ་འབབ། །ཁྲོ་བོ་འབར་བས་ཀུན་སྐྲག་ཅིང་། །བསྲེགས་ཤིང་སྐྱེ་དགུ་གཟས་ཟིན་གང་། །ཁྲོ་བོ་འབར་བས་སྨོན་པ་དང་། །མི་བསྐྱོད་པ་ཡིས་མགོ་བོ་མནན། །དཀར་པོ་རིགས་ལྔའི་སངས་རྒྱས་ཡང་། །
བདུད་རྩི་རབ་ཏུ་ཆར་འབེབས་པ། །སྔར་བཞིན་གཡས་དང་གཞན་པའི་ཞལ། །འདི་འདྲའི་སྒྱུ་མ་ཀུན་གཞིའི་ཕྱིར། །དེ་ལྟར་རྣལ་འབྱོར་པ་ཡིས་བསྒོམ། །ནད་ཐམས་ཅད་འཇོམས་པར་བྱེད་པའི་རི་ཁྲོད་མ་ཤིང་ལོ་ཅན་ཞེས་བྱ་བ་བཅོམ་ལྡན་འདས་དེ་བཞིན་གཤེགས་
པ་རྡོ་རྗེ་ཆེན་པོས་བཀའ་སྩལ་ཏོ། །རྡོ་རྗེ་ཁྲོ་བོ་བསྒོམ་པ་ནི། །ལྷ་མོ་སྐལ་བ་ཆེན་མོ་ཉོན། །ཁྲོ་བོའི་སྐུར་ནི་བླངས་ནས་ནི། །ཁྲོ་བོའི་རྒྱལ་པོ་བསྒོམ་པར་བྱ། །ཞལ་བཞི་པ་ལ་ཕྱག་བཞི་པ། །ཇི་སྲིད་དེ་བཞིན་ཕྱག་འབུམ་ཉིད། །ཁྲོ་བོ་ཆེན་པོ་ལུས་དཀར་བ། །
དེ་མདོག་མཚོན་ཆ་འཛིན་མར་ནི། །རྡོ་རྗེ་ཕག་མོ་བརྟག་པར་བྱ། །དཔའ་བོ་ཐོད་པའི་ཕྲེང་བ་ཅན། །ཐལ་བས་ལུས་ལ་བྱུགས་པ་དང་། །ཕྱག་རྒྱ་ལྔ་ཡིས་རྣམ་པར་བརྒྱན། །མདུང་རྩེ་རལ་པའི་ཅོད་པན་མཚན། །ཞལ་གྱི་མཆེ་བ་ཅུང་ཟད་གཙིགས། །ཡི་

དགས་ཆེན་པོ་གདན་མཛད་པ། །པདྨ་ཆེན་པོ་འདབ་བརྒྱད་པ། །ཁ་དོག་དམར་པོ་མཉམ་འོད་དུ། །རིག་མ་བཞི་དང་མཉམ་པར་ལྡན། །སངས་རྒྱས་གཟུགས་བརྙན་ཉེ་བར་མཛེས། །རྟ་ཡི་གཟུགས་སོགས་ཕྱག་བཞི་མ། །ཞལ་བཞི་དང་ནི་སྦྲུལ་
གྱིས་བརྒྱན། །ཡི་གེ་ཡི་གེ་ཡང་དག་ལྡན། །ཐོད་པར་བཞུགས་ཤིང་སྐུ་མདོག་དཀར། །ཞལ་བཞི་ཡིས་ནི་རྣམ་པར་སྤྲས། །ཡར་ལ་ཝས་རྣམ་པར་བརྒྱན། །ཆོ་གས་ཇི་སྲིད་བསྒྲུབ་བྱ་བརྩམ། །རླུང་སོགས་ཇི་ལྟར་རིམ་པས་ནི། །དུ་བ་དམར་དང་
སེར་དང་དཀར། །བསམ་གཏན་འདིས་ནི་བལྟས་ཙམ་གྱིས། །འོ་མའི་ཤིང་ལྟར་བུད་མེད་རྣམས། །འཇུ་བར་འགྱུར་ཏེ་གཞན་དུ་མིན། །ར་ཡི་ཡི་གེ་ཡང་དག་ལྡན། །ཁ་དོག་དམར་པོ་ཕྱག་བཞི་མ། །འབར་བའི་ཕྲེང་ཁྱབ་འཇིགས་མ་སྟེ། །ཞལ་བཞི་ཝ་
ཡི་གདོང་གིས་སྤྲས། །ཧཱུྃ་གིས་བཀང་བ་ཉིད་ཀྱིས་ནི། །རྡོ་རྗེ་ཕྲ་མོ་རྣམ་བསྒོམས་པས། །སྣ་ཡི་རྩེ་མོར་རྫོགས་པ་ལས། །བསྒྲུབ་བྱའི་ལུས་ལ་དགང་བར་བྱ། །ཡན་ལག་ཚིགས་ནི་ཐམས་ཅད་ལ། །སྣ་ཚོགས་རྡོ་རྗེ་ངེས་སྦྱར་བ། །དེས་ནི་རྡོ་རྗེ་མཚོན་
ཆ་ཡིས། །འབར་བ་དང་ནི་ཁྲག་གི་ལུས། །ཀུན་ཏུ་འཇིགས་པར་བྱེད་པར་ནི། །རྡོ་རྗེ་མཁའ་འགྲོ་མ་ནི་བསྒོམ། །ཨོྃ་བཛྲ་ཌཱ་ཀི་ནཱི་ཨ་མུ་ཀ་སྱ་རཀྟ་མཱ་ཀར་ཥ་ཡ་ཧཱུྃ་ཕཊ། །འདིས་ནི་རིམ་པའི་རྣལ་འབྱོར་གྱིས། །ཁྲག་ནི་འགུགས་པར་བྱེད་པའི་མཆོག །ལྷ་
མོ་དེ་ལྟར་བཤད་པས་ནི། །སྐེམས་པར་འདི་ལ་ཐེ་ཚོམ་མེད། །དེ་ནས་དེ་ཉིད་ཀུན་རྫོགས་ནས། །མ་ཧེའི་གཟུགས་ནི་འཇིགས་པ་མོ། །སྐུ་མདོག་ནག་པོ་འཇིགས་ཆེན་པོ། །ཞལ་བཞི་པ་དང་འཇིགས་པར་མཛད། །ཕྱག་བརྒྱད་པ་དང་ཞབས་བཞིས་སྤྲས། །
རྡོ་རྗེ་གཏུན་ཤིང་རལ་གྲི་དང་། །འཁོར་ལོ་དེ་བཞིན་ཅང་ཏེའུ་ཉིད། །གཡོན་ན་ཁ་ཊྭཱྃ་ག་དང་ནི། །ཐོད་པ་གཞུ་དང་ཞགས་པ་ཉིད། །སྣ་ཚོགས་མཚོན་ཆ་འཛིན་པ་ཡི། །རྡོ་རྗེ་ཁྲོ་བོ་ཡང་ནི་སྤྲོ། །ཡིད་ཀྱིས་བསྒྲུབ་བྱའི་སྲུང་བ་ནི། །ཆོ་ག་ཡིས་ནི་བཀུག་ནས་ནི། །

དེས་ནི་བསྒྲུབ་བྱ་རྣམ་པར་བསམས། །ཞགས་པས་བཅིངས་ནས་ལྷོ་ཕྱོགས་སུ། །རྡོ་རྗེ་ཁྲོ་བོས་དྲངས་ནས་ནི། །རྡོ་རྗེ་གཞན་གྱིས་བརྡེག་པ་དང་། །རལ་གྲི་ཡིས་ནི་དྲལ་བ་དང་། །རྒྱུ་མ་ནར་ཞིང་མྱོས་པ་ཉིད། །ཨོྃ་བཛྲ་རཱཀྵ་ས་བྷ་ཀྵ་ཡེ་ཏི་ཕཊ། །དེ་
ནས་ཁྱི་ཡི་གདོང་བྱས་ནས། །རྡོ་རྗེ་སྲིན་པོ་བསྒོམ་པའོ། །ཨོྃ་ཧྲཱིཿཥྚྲི་བི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་སྭཱ་ཧཱ། །འདི་ནི་མ་ཧེའི་གདོང་གཤིན་རྗེའི་གཟུགས་ཀྱི་སྔགས་སོ། །ཁྭ་དང་ཝ་དང་བྱ་རྒོད་ཀྱིས། །ཐམས་ཅད་དུ་ནི་ཡོངས་སུ་བསྐོར། །དེས་ནི་བཟའ་བ་ལྡན་པར་ནི། །
ཡིད་ཀྱིས་བསྐུལ་བར་བསྒོམ་པར་བྱ། །རླུང་གི་དཀྱིལ་འཁོར་མཉམ་ཞོན་པར། །རྡོ་རྗེ་མཆེ་བ་རྣམ་པར་བསམ། །དེ་ཡི་རྒྱབ་ཏུ་ཞོན་པར་ནི། །བསྒྲུབ་པར་བྱ་བ་ཡོངས་སུ་བརྟག །རྡོ་རྗེ་ཁྲོ་བོས་གཟིར་ནས་ནི། །ལྷོ་ཡི་ཕྱོགས་སུ་ཁྱེར་བར་བྱ། །རླུང་གི་དཀྱིལ་
འཁོར་ལོ་མ་དང་། །དེ་ཡི་ངེས་པར་རྐང་རྗེས་ས། །རྡོ་རྗེའི་མགོ་བོ་རྐང་པར་ནི། །དེ་ཡི་མིང་ནི་གཟུང་བས་ས་སྦ། །དེ་ལྟར་བསྒོམ་པའི་སྦྱོར་བས་ནི། །ཆོ་ག་ཡིས་ནི་ལས་རྣམས་བྱ། །བརྒྱ་བྱིན་ཀྱང་ནི་སྐྲོད་བྱེད་ན། །ས་ཡི་སྐྱེ་བོ་སྨོས་ཅི་དགོས། །བྲམ་ཟེའི་སྐྲ་
དང་དགེ་སྦྱོང་སྤུས། །འུག་པའི་གཤོག་པ་དཀྲིས་ནས་ནི། །དེ་མིང་སྔགས་ཀྱི་ནང་བཅུག་སྟེ། །བྲིས་ནས་ས་ལ་སྦས་ནས་ནི། །རྡོ་རྗེ་ཁྲོ་བོ་གཉིས་དག་གིས། །འཐབ་པ་རུ་ནི་རྣམ་པར་བསམ། །དེ་ལྟར་རྣམ་བསམ་སྦྱོར་བས་ནི། །ཇི་ལྟར་འདོད་པས་སྡང་
བར་བྱེད། །ཙི་ཡི་ཡི་གེ་དང་ལྡན་པས། །རྟའི་རྣམ་པའི་གདོང་དུ་བྱེད་པ་ནི་ཆང་འགུགས་པར་བྱེད་པ་ལ་མཆོག་སྟེ། སྐུ་མདོག་ལྗང་གུ་དང་། ཞལ་བཞི་པ་དང་། ཞབས་བཞི་པ་དང་། ཕྱག་བརྒྱད་པ་དང་། རྟ་མགྲིན་གྱི་རྒྱལ་པོ་ཆེན་པོ་དམ་པའི་དབང་ཕྱུག་འགྲུབ་
པར་འགྱུར་རོ། །དང་པོ་ནི་ལྗང་གུ་ལ་ཅུང་ཟད་སེར་བ་སྟེ། སྤྱན་གསུམ་པའོ། །ཞལ་གཡས་པ་དང་། གཞན་པ་ནི་ནག་པོ་དང་དཀར་པོའོ། །དེ་བཞིན་དུ་སྟེང་མ་ནི་རྟ་གདོང་སྟེ། རྣམ་པར་གཙིགས་ཤིང་ལྗང་གུའོ། །གཡས་པ་ནི་བ་དན་ལྕེ་གསུམ་པ་འཕྱར་བའི་

ཚུལ་ལོ། །གཉིས་པ་ན་ནི་སྣ་ཚོགས་རྡོ་རྗེ། གསུམ་པ་ན་ནི་རལ་གྲི། བཞི་པ་ན་ནི་མདའོ། །གཡོན་པ་ན་ནི་སྣ་ཚོགས་པདྨའོ། གཉིས་པ་ལ་ནི་འཕང་མདུང་། གསུམ་པ་ལ་ནི་མེ་ལོང་། །བཞི་པ་ལ་ནི་གཞུའོ། །གཡོན་བརྐྱང་བས་ཉི་མ་ལ་བཞུགས་ཤིང་གར་དང་
བཅས་པ་དང་། སྲེད་མེད་ཀྱི་བུ་དང་། དབང་ཕྱུག་ཆེན་པོ་ལ་སོགས་པ་འགྱེལ་བར་འགྱུར་བ་དེ་ལྟར་སྔགས་པས་ཆོ་གས་བསྒོམ་པར་བྱའོ། །བསྒྲུབ་བྱའི་ལྟེ་བར་ཡྃ་གི་རྣམ་པ་བསྒོམ་པར་བྱ་ཞིང་། མྃ་གི་རྣམ་པ་གྱུར་པ་ལས་ཆང་ལྟོ་བར་བསྒོམ་པར་བྱ་སྟེ། ཕྱིས་
སྐྱུག་པར་བྱེད་པར་བལྟས་ན་ཆང་སྐྱུག་པར་འགྱུར་རོ། །རླུང་གི་ཕྱོགས་སུ་སོང་སྟེ། དཀྱིལ་འཁོར་གྲུ་བཞི་པ་བྱས་ནས་དྲིའི་ཐིག་ལེ་བདུན་བློ་དང་ལྡན་པས་བྱ་ཞིང་། །ཁམ་ཕོར་གྱིས་སྦ་བར་བྱའོ། །དེར་རི་རབ་ཟུར་བརྒྱད་པ་རྭ་བརྒྱད་ཀྱིས་ཀུན་ཏུ་སྤྲས་པར་སྤྲུལ་ཏེ། སྤྲུལ་
པའི་རྡོ་རྗེས་མནན་ནས་ཡའི་རྣམ་པ་རླུང་བདུན་པོ་ཀུན་གྱི་ས་བོན་དབུགས་རྔུབ་པས་ནང་དུ་སྦས་ཏེ། དབང་ཆེན་ལྃ་གིས་མཚན་པས་སའོ། །དེ་ལྟར་སྦྱོར་བས་བསྒྲུབས་ན་འཇིག་པ་ལྟ་བུའི་རླུང་འཆིང་བར་བྱེད་དོ། །པདྨ་འདབ་མ་བརྒྱད་པ་བསྒོམས་ནས། དེའི་འདབ་
མ་ལ་ཀླུ་བདག་བརྒྱད་དང་། དབུས་སུ་འབར་བའི་འབར་བ་ཆེན་པོ་ཅན་བཀོད་ནས་རྡོ་རྗེ་ཁྲོ་བོའི་སྐུས་ཞབས་ཀྱི་མཐིལ་གྱིས་གཟིར་བར་བྱ་བ་དང་། ལྟོ་འཕྱེས་སྤྲིན་གྱི་ཆུ་གཏོར་བར་བྱེད་པ་དང་། ཧཱུྃ་གཉིས་ཀྱི་ནང་དུ་བཅུག་ནས་དབུས་སུ་ཀླུའི་ས་བོན་བཅུག་སྟེ་གཟིར་བར་
བྱ་ཞིང་ཧཱུྃ་གིས་བཟླས་པ་བྱས་པས་ཆར་འབེབས་པར་འགྱུར་རོ། །འཇིགས་པ་ཆེན་པོ་བྱེད་པའི་ཉི་མའི་མདོག་གི་འོད་ལྟར་ཤིན་ཏུ་དམར་བས་ཁ་གདངས་ནས་ནམ་མཁའ་ལ་བཞུགས་པ་དང་། ཧཱུྃ་འབར་བའི་ལྗགས་ཀྱིས་སྤྲིན་ལ་བལྡག་པ་དང་། རོལ་མཚོ་བདུན་ཡོངས་སུ་
གང་བ་འགུགས་པ་དང་། དབུགས་རྔུབ་པ་དང་། དབུགས་འབྱིན་པས་རས་བལ་གྱི་ཕུར་མ་ལྟར་གཏོར་བ་དང་། དེ་ནས་རང་གི་ཕྱག་རྒྱའི་ཚོགས་འབར་བ་བཏོན་པས་སྐད་ཅིག་གིས་འདྲལ་བ་དང་། གཅོད་པ་དང་། ཧཱུྃ་གི་རྣམ་པས་སྡིགས་པར་བྱེད་དོ། །སྟོན་ཀའི་

དུས་ཀྱི་ནམ་མཁའ་ལྟ་བུ། མེའི་དཀྱིལ་འཁོར་ལ་གནས་པའི་མི་གཡོ་མགོན་དཔྲལ་བའི་ནང་ནས་བཏོན་ཏེ། རྣམ་པར་སྣང་མཛད་ཀྱི་གནས་སུ་ཕྱག་དྲུག་ན་རལ་གྲི་དང་། སྡིགས་མཛུབ་དང་། མདའ་དང་། ཞགས་པ་དང་། གཞུ་དང་། རྡོ་རྗེ་
སྟེ། ཆར་རབ་ཏུ་འབེབས་ཤིང་ཁྲོ་བོ་གྲངས་མེད་པས་ཡོངས་སུ་བསྐོར་བས་བདུད་ལས་རྣམ་པར་རྒྱལ་བ་དང་། བགེགས་ཐམས་ཅད་བསྐྲད་པ་དང་། ཧཱུྃ་གི་སྒྲས་གང་བས་འཇིག་རྟེན་གསུམ་གང་བ་ཡང་འཇིག་པར་བྱེད་དོ། །སྐྱེས་པའི་ཁྲག་དང་། རྐང་རྗེས་ཀྱིས་
ལས་མིའི་གཟུགས་བྱས་ནས་མིག་ལ་མིའི་རུས་པའི་ཕུར་བུ་འོད་ཟེར་ཅན་གྱི་སྔགས་ལན་ཉི་ཤུར་མངོན་པར་བསྔགས་ཏེ། གདབ་པར་བྱ་ཞིང་བཏབ་མ་ཐག་ཏུ་དེ་ཚོགས་ཀྱི་བདག་པོའི་ཁར་བཅུག་ནས་རྒྱབ་ཏུ་རྡོ་རྗེ་གཏུན་ཤིང་གིས་བརྡུང་བར་བྱ་སྟེ། ཨོཾ་སུམྦྷ་ནི་སུམྦྷ་ཧཱུྃ་
བཛྲ་མུ་ཥ་ལེ་ན་ཙཱུ་རྞཎ་ཡ་བིགྷྣའ་ན་ཧཱུྃ་ཕཊ། །དེ་ལྟར་བསམ་གཏན་གྱི་ལས་ཀྱིས་སྐྱེས་པའི་བགེགས་ཟློག་པར་བྱེད་དོ། །ནམ་མཁའ་ལྡིང་མིག་སྨན་གྱི་ཁ་དོག་ལྟ་བུ་ཀླུ་བརྒྱ་སྟོང་གིས་བརྒྱན་ཅིང་། ལུས་ལ་ཀླུ་བརྒྱད་དང་། བརྒྱ་སྟོང་གི་གདོང་དང་། ནམ་མཁར་གནས་
པའི་བཀའ་སྤྲིན་དེ་རྣམས་ཀྱིས་ཐོས་ནས་སྤྲིན་གྱི་ཚོགས་ཀྱིས་ཆར་ཟློག་པར་བྱེད་དོ། །ནམ་མཁའ་ལྡིང་གི་གཤོག་པའི་མདོག་སྔོན་པོ་ཡང་མཆུས་བསྣུན་པས་ཆུ་བོའི་ཚོགས་སྐེམས་པར་བྱེད་དོ། །ཨོྃ་བཛྲ་ནཱ་རཱ་ཡ་ཎ་ནིརྦྦཱ་པ་ཡ་བ་ཧྣིནྣ་པཱ་ཙ་བཱམྦུ་མེ་གྷཻཿཧཱུྃ། ནམ་མཁའི་
ཁམས་ཀྱི་ནང་སོན་པར། །ཞལ་གསུམ་པ་ལ་སྤྱན་གསུམ་པ། །རྒྱན་རྣམས་ཀུན་གྱིས་རྣམ་པར་བརྒྱན། །སྟག་གི་པགས་པ་མནབས་པ་དང་། །ཁ་དོག་དམར་པོ་གཟི་བརྗིད་ཆེ། །ཉི་མ་ཤར་བའི་འོད་ལྟ་བུར། །རལ་གྲི་ཉིད་དང་ཁ་ཊྭཱཾ་ག། །གཞུ་དང་དེ་
བཞིན་མདའ་ཉིད་དང་། །ཤ་ཆེན་གྱི་ནི་ཐོད་པ་དང་། །དེ་བཞིན་དུ་ནི་ཅང་ཏེའུ་ཉིད། །ཞགས་པ་ཉིད་དང་ལྕགས་ཀྱུ་དང་། །གཡོན་ན་ཨུཏྤལ་རྣམ་པར་སྤྲས། །གཡོན་བརྐྱང་འཇིགས་པ་ཆེན་པོ་ནི། །ཉི་མར་གནས་ཤིང་གར་དང་ལྡན། །དམར་པོ་འབར་ཞིང་

འཁྱིལ་བ་དང་། །གོས་ནི་ཆེན་པོ་བླ་བྲེ་དང་། །དུར་ཁྲོད་དུ་ནི་རབ་ཏུ་བྱ། །ཧྲཱིཾཿལས་བྱུང་བའི་ལྷ་མོ་ནི། །སྒྲོལ་མ་འཁོར་བ་སྒྲོལ་བ་མོ། །དེ་ལྟར་བསྒོམས་པ་ཙམ་གྱིས་ནི། །ཡོ་གིས་སངས་རྒྱས་ཉིད་ཐོབ་ན། །དངོས་གྲུབ་གཞན་ལྟ་སྨོས་ཅི་དགོས། །
དེ་ནས་དབང་དུ་བྱ་འདོད་པས། །མྱ་ངན་མེད་པའི་བརྒྱད་ལ་མྱ་ངན་མེད་པའི་འོག་ཏུ་སོང་སྟེ། གོས་དམར་པོས་བགོས་ནས་རྒྱན་ཐམས་ཅད་ཀྱིས་བརྒྱན་ཅིང་སྔགས་བཟླ་བར་བྱའོ། །ཞལ་གསུམ་པའི་རྣལ་འབྱོར་ལ་གནས་ནས་བདག་ཉིད་ཁ་དོག་དམར་པོར་བསམས་
ཏེ། ཕྱི་ནས་རང་གི་སྐུ་ལས་ཕྱག་གཉིས་མ་དམར་མོ་ལག་པས་ལྕགས་ཀྱུ་དང་། ཞགས་པ་འཛིན་མ་དབྱུང་བར་བྱའོ། །དེས་བསྒྲུབ་བྱའི་སྙིང་དང་མགྲིན་པ་བཅིངས་ནས་དགུག་པར་བསམ་པར་བྱ་ཞིང་རང་གི་ལུས་ལ་ལྷ་མོ་དེ་གཞུག་པར་བྱའོ། །བསྒྲུབ་བྱ་མྱོས་པས་
གྱུར་ནས་དེའི་སྙིང་གར་སྔགས་ཀྱི་ཡི་གེ་བཅུ་ཁ་དོག་དམར་པོར་དགོད་པར་བྱ་སྟེ། ཡང་ན་བསྒྲུབ་བྱ་དང་ཡེ་ཤེས་ཀྱི་གཟུགས་ཀྱིས་ཡི་གེ་དེ་རྣམས་ལ་དེ་ཞུགས་པས་དེ་རྣམས་ལྷན་ཅིག་ཏུ་འདྲེས་པར་གྱུར་པར་བསམ་པར་བྱའོ། །བསམ་གཏན་གྱི་སྦྱོར་བ་འདིས་ཉི་
མ་བདུན་གྱིས་འཁོར་ལོས་སྒྱུར་བ་ཡང་ཇི་སྲིད་འཚོའི་བར་དུ་དབང་དུ་བྱེད་པར་ཐེ་ཚོམ་མི་ཟའོ། །དེ་ནས་རྡོ་རྗེའི་བར་ཆད་བཟློག་པའི་དོན་དུ་བཀའ་སྩལ་པ། དཔལ་མཆོག་དང་པོའི་གཟུགས་སུ་བདག་ཉིད་ཞལ་གསུམ་པ། ཞབས་བཞི་དང་། ཕྱག་བཞི་པ། ཞལ་
དམར་པོའི་འོད་ཟེར་འབར་བ། །སྙེམས་མ་ལ་སོགས་པའི་ལྷ་མོ་བཞིས་ཡོངས་སུ་བསྐོར་བར་རྣམ་པར་བསམ་ནས་རྡོ་རྗེ་མཚོན་ཆ་མ་དང་། །རྡོ་རྗེ་ཀཱི་ལི་ཀཱི་ལ་དང་། རྡོ་རྗེ་སྡུག་པ་དང་། །རྡོ་རྗེ་སྙེམས་མའི་གཡས་ན་རྡོ་རྗེ་མདའ་འགེངས་ཤིང་འཛིན་པའོ། །གཡོན་
པ་བསྒྱིངས་ཤིང་རྐེད་པར་གཞག་པ་དང་། གཞུ་འཛིན་པར་བསམས་ཏེ། དེ་ནས་སེམས་དཔའ་ཕྱུང་སྟེ། སངས་རྒྱས་ཀྱི་མཛད་པའི་སྤྲིན་རྣམ་པ་ཐམས་ཅད་ཀྱིས་རྣམ་པར་སྤྲས་པའི་གཡས་ན་མི་འཇིགས་པ་སྦྱིན་པ་དང་། དབང་གི་ཐོད་རིན་པོ་ཆེ་འཛག་པ་ནམ་

མཁར་སོན་པས་ནི་རྡོ་རྗེ་ཟློག་པར་བྱེད་དོ། །ཨོྃ་མ་ཧཱ་སུ་ཁ་བཛྲ་ཏེ་ཛཿཧཱུྃ། དེ་ལྟར་ཤིན་ཏུ་དགའ་བའི་བཅིང་བ་བྱས་ནས་རྣལ་འབྱོར་བླ་ན་མེད་པར་བཤད་དོ། །གང་ཞིག་རྣམ་པར་ཕྱེ་བས་གསོད་པར་བྱེད་པ་འདི་བཀའ་སྩལ་ཏོ། །ཞི་བ་ལ་ནི་མཐའི་ཡ་
དང་ནི་གཉིས་དང་། ཕྱི་ནས་ཡ་དབུ་མ་ཕྱི་བས་ཡིག་འབྲུ་ལྷག་མས་ཇི་ལྟར་བདེ་བས་སོ། །ལྷ་མོ་དེ་ལྟར་བཤད་པས་ནི་ལས་ཐམས་ཅད་རབ་ཏུ་སྒྲུབ་པར་བྱེད་དོ། །རབ་ཏུ་མྱོས་མ་དབང་དུ་བྱ་བར་འདོད་པས་ཡང་བརྒྱད་པ་ལ་ཀུ་རུ་ཀུལླེའི་རྣལ་འབྱོར་ལ་གནས་ནས་
བསམ་གཏན་འདི་བྱའོ། །མྱོས་བྱེད་ཀྱི་འབྲས་བུ་བཟའ་ཞིང་། དེ་ནས་ཀ་ཀཱ་མ་ཙི་ཀའི་ཁུ་བས་ཐིག་ལེ་བྱས་ནས་སྔགས་བཟླ་བར་བྱའོ། །ཨོྃ་ཨ་མུ་ཀཱི་མེ་ཧྲཱིཿབ་ཤཱིབྷཱ་བ་ཏུ། ཁྲི་བཟླས་པས་འགྲུབ་པོ། །དེ་ནས་དུག་གིས་ཟིན་པ་བསླང་བའི་ཕྱིར་རང་གི་སྙིང་
ག་ན་པདྨ་འདབ་མ་བརྒྱད་པ་བསམ་པར་བྱའོ། །དེའི་སྟེང་དུ་དབྱངས་ཀྱི་གསུམ་པ་འདབ་མ་བརྒྱད་ལ་ཁ་དོག་དཀར་པོ་བསམ་པར་བྱ་ཞིང་། བདག་ཉིད་ཡང་འོག་གི་ཀླུའི་གཟུགས་ཁ་དོག་དཀར་པོ་ཨིའི་བདུད་རྩི་འཛག་པར་བསམ་པར་བྱའོ། །ཀླུ་དེའི་མིག་
ལས་བདུད་རྩི་བྱུང་བས་དེར་བསྒྲུབ་པར་བྱ་བ་དེའི་ལུས་ལ་ལྟུང་བར་བསམ་པར་བྱའོ། །བསམ་གཏན་གྱི་སྦྱོར་བ་འདིས་ཁམས་གསུམ་ཡོངས་སུ་གང་བའི་དུག་མེད་པར་བྱེད་དོ། །དེ་ནས་ཟླ་བ་དང་ཉི་མ་རྣམ་པར་གཟུང་བར་འདོད་པས་སཱ་ལུ་བཏགས་པའི་བདག་ཉིད་ལས་ཟླ་བ་
དང་ཉི་མ་བྱས་ཏེ། རྡོ་རྗེའི་ཆུ་ལ་གཞུག་པར་བྱ་ཞིང་སྔགས་བཟླ་བར་བྱའོ། །ཨོྃ་ཙན་དྲཱརྐཀ་མཱ་ཙ་ལ་མ་ཙ་ལ་ཏིཥྛ་ཏི ཥྛི་ཧེ་བཛྲ་ཡ་སྭཱ་ཧཱ། བྱེ་བ་ཕྲག་དྲུག་བཟླ་བར་བྱ་སྟེ། ཕྱི་ནས་ལས་འདི་ཡང་དག་པ་བརྩམ་པར་བྱའོ། །ཟླ་བ་དང་ཉི་མ་དག་གནས་ཤིང་ཉིན་མཚན་བྱེ་བྲག་
མེད་པར་གནས་པར་འགྱུར་རོ། །ཕ་རོལ་གྱི་སྡེ་རྣམ་པར་གཞིག་པའི་ཕྱིར་བསྒྲུབ་པར་བྱ་སྟེ། ཁ་ཊི་ཀཱ་དང་། བདུད་རྩི་ལྔ་དང་། ཀུཊྞཱ་ར་ཚིནྣ་དང་ལྷན་ཅིག་བཏགས་ལ་རིལ་བུ་བྱའོ། །ཨོྃ་བཛྲ་ཀརྟྟ་རི་ཧེ་བཛྲཱ་ཡ་སྭཱ་ཧཱ། དངོས་གྲུབ་ཀྱི་དོན་དུ་བྱེ་བ་བཟླས་ཤིང་དེ་གྲུབ་ན་བསྒྲུབ་

བྱ་རིལ་བ་སྤྱི་བླུགས་ཀྱི་མགྲིན་པ་བསྐོར་ནས། བཅག་ན་དགྲ་ཐམས་ཅད་ཀྱི་མགོ་འཆད་པར་འགྱུར་རོ། །ལྷ་དགས་པར་འདོད་པས་ཐིག་ལེ་བསྒྲུབ་པར་བྱ་སྟེ། རྡོ་རྗེ་བཅིངས་པས་རྡོ་རྗེ་ཅན་གྱི་མེ་ཏོག་བསྒྲུབས་ཏེ། སྟ་རེས་བཅད་པ་དང་བསྲེགས་ནས་ཉི་མ་གཟས་ཟིན་པ་
དང་མི་བསྐྱོད་པ་དང་བཏག་པར་བྱ་ཞིང་། བཏགས་ནས་དགྲ་སྟ་བྱ་སྟེ། དེ་རྡོག་པས་མནན་ནས་སྔགས་བཟླ་བར་བྱའོ། །ཨོྃ་བཛྲ་ཀུཊྛཱ་ར་སྤཱ་ཊ་ཡ་སྥ་ཊ་ཡ་ཕཊ་ཕཊ་སྭཱ་ཧཱ། དངོས་གྲུབ་ཀྱི་དོན་དུ་བྱེ་བ་བཟླས་ལ། ཕྱི་ནས་ཐིག་ལེ་བྱས་ན་གང་ལ་ཕྱག་བྱས་པ་དེ་འགས་
སོ། །དེ་ནས་ཆར་གྱི་རབ་ཏུ་སྦྱོར་བ་བཤད་པར་བྱ་སྟེ། ཨོྃ་ཨཱ་ཕུཿ། ཡི་རྣམ་པའི་ཆོ་ག་ལྟར་མཐའ་ཡས་ཀྱི་གཟུགས་བརྙན་བྱས་ལ་བདུད་རྩི་ལྔས་ནི་བླུགས་པར་བྱའོ། །མེ་ཏོག་ནག་པོས་ནི་མཆོད་པར་བྱ། ཀླུ་འདུལ་བའི་ཁུ་བས་ནི་བྱུག་པར་བྱ། གླང་པོ་ཆེའི་ཆང་གིས་
ནི་མགོ་བོ་བྱུག་པར་བྱ། ཁམ་ཕོར་ཁ་སྦྱར་དུ་ནི་གཞག་པར་བྱ། བ་ནག་པོའི་འོ་མས་ནི་དགང་བར་བྱ། གཞོན་ནུ་མ་ནག་མོས་བཀལ་བའི་སྐུད་པས་ནི་དཀྲི་བར་བྱ། རླུང་གི་ཕྱོགས་སུ་རྫིང་བུ་བྱས་ནས་དེར་མཐའ་ཡས་གཞག་པར་བྱ། དེའི་འགྲམ་དུ་ཆོ་གས་དཀྱིལ་
འཁོར་བཞེངས་པར་བྱ། དེའི་དབུས་སུ་མཐའ་ཡས་གཞག་པར་བྱའོ། །མཐའ་ཡས་མནན་པའི་ཀྱེའི་རྡོ་རྗེ་བྲི་བར་བྱ་སྟེ། ཞལ་བརྒྱད་པ། ཞབས་བཞི་པ། ཕྱག་བཅུ་དྲུག་གིས་བརྒྱན་པ། སྤྱན་ཉི་ཤུ་རྩ་བཞི་པར་བསྒོམ་པར་བྱའོ། །ཕྱིས་ནི་སློབ་དཔོན་ནང་གིས་ས་མ་
རུངས་པའི་སེམས་ཀྱིས་དབེན་པའི་གནས་སུ་སྔགས་བཟླ་བར་བྱའོ། །ཨོཾ་གྷུ་རུ་གྷུ་རུ། གྷུ་ཊ་གྷུ་ཊ། ཤ་མ་ཤ་མ། གྷ་ཊ་གྷ་ཊ། གྷོ་ཊ་ཡ་གྷོ་ཊ་ཡ། ཨ་ནནྟ་ཀྵོ་བྷ་ཀ་རཱ་ཡ། ནཱ་གཱ་དྷི་པ་ཏ་ཡེ། ཧེ་ཧེ་རུ་རུ་ཀྃ། སཔྟ་པཱ་ཏཱ་ལ། ག་ཏནྟཱ་གཱ་ནཱ་ཀཪྵ་ཡ། བརྵ་ཡ། གརྫ་ཡ།
ཏརྫ་ཡ། ཕུཿཕུཿཕུཿཕུཿཕུཿཕུཿཕུཿཕུཿཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སྭཱ་ཧཱ། གལ་ཏེ་ཆར་མི་འབབ་ན་དེའི་ཚེ་སྔགས་འདི་བཟློག་ནས་བཟླས་ན་ཆར་འབབ་པར་འགྱུར་རོ། །གལ་ཏེ་མི་འབབ་ན་དེའི་ཚེ་མགོ་ཨརྫ་ཀའི་དོག་པ་ལྟར་འགས་པར་འགྱུར་རོ། །སྤྲིན་དྲལ་བར་འདོད་པས་

དེའི་ཚེ་དུར་ཁྲོད་ཀྱི་རས་ལ་སྔགས་འདི་བྲི་བར་བྱའོ། །ཨོྃ་ཏརྫྫ་ཡ་ཏརྫ་ཡ། ཤྨ་ཤཱ་ན་པྲི་ཡཱ་ཡ་ཕཊ་སྭཱ་ཧཱ། དཔལ་ཡང་དག་པར་སྦྱོར་བ་ལས་བྱུང་བའི་རྒྱུད་ཀྱི་རྒྱལ་པོ་ཆེན་པོ་ལས་ལས་ཐམས་ཅད་ཀྱི་བསམ་གཏན་འབྱུང་བ་ཞེས་བྱ་བ་བརྟག་པའི་རྒྱལ་པོ་
སྟེ་བདུན་པའོ།། །།གཞན་དུ་མཚན་ཉིད་མཚོན་པ་ནི། །བཅོམ་ལྡན་བདག་ནི་ཉེན་པར་འཚལ། །དེ་ཉིད་བཞི་ནི་མི་འཚལ་བས། །བདེ་བ་ཆེན་པོས་བཤད་དུ་གསོལ། །འཁོར་བ་སྒྲོལ་བའི་མཚན་ཉིད་ཀྱི། །ཇི་ལྟར་དེ་ཉིད་རྡོ་རྗེ་ཉོན། །དང་པོར་
རྡོ་རྗེའི་དེ་ཉིད་དེ། །དྲིལ་བུ་ཡང་ནི་གཉིས་པ་ལ། །གསུམ་པ་ལ་ནི་ཕྲེང་བ་ཉིད། །བཞི་པར་ཡེ་ཤེས་མཚན་ཉིད་དོ། །དེ་ཉིད་བཞི་ཡི་རྦ་རླབས་ལས། །ཕ་རོལ་འདོད་པ་འདྲེན་པའོ། །དབུས་སུ་རྣམ་པར་སྣང་མཛད་མགོན། །ཤར་དུ་མི་བསྐྱོད་དེ་བཞིན་ཡང་། །
རིན་ཆེན་ལྷོ་ཡི་རྭ་ལའོ། །འོད་དཔག་མེད་ནི་ནུབ་ཏུ་དགོད། །བྱང་དུ་དོན་ཡོད་གྲུབ་པ་སྟེ། །རྭ་ལྔ་རྣམས་ཀྱི་ལྷ་ཉིད་དོ། །པདྨར་བྱང་ཆུབ་ཡན་ལག་བརྒྱད། །ས་ཇི་ལྟ་བར་གཞག་པར་བྱ། །ཕྱག་ན་པདྨ་བྱམས་པ་དང་། །ནམ་མཁའ་ཀུན་དུ་བཟང་པོ་བཞིན། །
གནོད་སྦྱིན་དབང་པོ་འཇམ་དཔལ་དང་། །རྣམ་པར་སེལ་དང་ས་ཉིད་ཀྱང་། །ལྷ་རྣམས་བརྒྱད་པོ་འདི་རྣམས་ཀྱིས། །ས་ཇི་ལྟ་བར་གཞག་པར་བྱ། །དབུས་སུ་སྐབས་གསུམ་སྒོ་ང་ལ། །ཡེ་ཤེས་ལྷ་ནི་ཐིམ་པར་བྱ། །པདྨར་ལྷ་མོ་བརྒྱད་པོ་རྣམས། །ཇི་བཞིན་
གནས་སུ་སྦྱར་བར་བྱ། །རྡོ་རྗེ་ལྕགས་ཀྱུ་ལ་སོགས་བཞི། །དེ་བཞིན་རྩེ་ནམ་ཕྱོགས་བྲལ་ལོ། །རྭ་ལ་མཁའ་འགྲོ་མ་ལྔ་སྟེ། །དབུས་སུ་ཡེ་ཤེས་མིང་ཅན་ཏེ། །ཤར་དུ་རྡོ་རྗེ་མཁའ་འགྲོ་མ། །བྱང་དུ་དྲག་མོའི་མིང་ཅན་ཏེ། །རོ་ལངས་མ་ནི་ཕྱོགས་ཀྱི་མཐར། །
གཏུམ་མོ་ལྷོ་ཡི་དབང་ཕྱུག་མ། །རྡོ་རྗེའི་དེ་ཉིད་ལྷ་རྣམས་སུ། །མཁས་པས་ཤེས་པར་བྱ་བ་ཡིན། །གང་ཕྱིར་དེ་ཉིད་རྡོ་རྗེ་ཡི། །རྡོ་རྗེའི་བདག་ཉིད་བདག་སེམས་ལ། །རྡོ་རྗེ་སྙིང་ཅན་རྣལ་འབྱོར་པ། །རྡོ་རྗེ་སེམས་ནི་བྱེད་དུ་གཞུག །རྡོ་རྗེ་དག་པ་བསྟན་པར་བྱ། །

རྡོ་རྗེ་ཆོས་ལ་བརྩོན་པའི་ཡིད། །རྡོ་རྗེ་དེ་ཉིད་ཅན་ཀུན་རྣམས། །རྡོ་རྗེ་ལས་ལ་མངོན་པར་འགྲོ། །རྡོ་རྗེ་སྤྲོ་བའི་སྦྱོར་བ་ཡིས། །རྡོ་རྗེ་སེམས་ཅན་འཁོར་བ་སྒྲོལ། །རྡོ་རྗེ་དགུག་པའི་རྣལ་འབྱོར་དང་། །རྡོ་རྗེ་རེངས་པའི་རྣལ་འབྱོར་རིག །མུན་པ་ལྟ་བུའི་ཉོན་མོངས་
པ། །རྣམ་ཤེས་མར་མེ་དང་ལྷན་ཅིག །ཡེ་ཤེས་རྡོ་རྗེས་གཞོམ་པར་བྱ། །སྣང་བའི་ཕྱོགས་ནི་འཐོབ་བའོ། །རྡོ་རྗེས་བསྒྲུབས་པ་ཐམས་ཅད་ལ། །རྡོ་རྗེའི་བདག་ཅེས་བསྟན་པ་ཡིན། །རྡོ་རྗེ་ཆོས་ཀྱི་སྙིང་པོ་ཅན། །རྡོ་རྗེ་ཐར་པའི་ལྷུར་ལེན་པ། །རྡོ་རྗེ་པདྨ་རྣམ་
མནན་ཏེ། །བསྒྲུབ་བྱ་དེ་ཉིད་ཐམས་ཅད་ནས། །རྡོ་རྗེ་པདྨ་ཀུན་ཞུགས་པ། །རྣམ་པར་མཁས་པས་བསྒྲུབ་པར་བྱ། །རྡོ་རྗེ་དྲིལ་བུའི་མཚན་ཉིད་ནི། །རྡོ་རྗེ་འཛིན་པའི་རྒྱལ་པོ་ཉོན། །ཤེས་རབ་དཀྲོལ་བའི་དེ་ཉིད་ནི། །ལྷ་ནི་ཀུན་གྱིས་ཐོས་པར་འགྱུར། །
ཆ་གསུམ་གསལ་བར་གཟུང་བ་ལ། །སྐ་རགས་བྱས་པ་བཟང་པོ་ཉིད། །ཞི་བ་ཨུཏྤལ་ཀུ་མུ་ཏ། །རིན་ཆེན་པདྨ་རྣམ་པར་གནས། །ཕྱོགས་མཚམས་བརྒྱད་པའི་དབུས་སུ་ནི། །དགུ་པ་ལ་ནི་སངས་རྒྱས་ཉིད། །ལྷ་དགུ་ལ་སོགས་རྩེ་མོ་ནི། །ལྷ་རྣམས་
དགུ་ཡིས་བྱིན་གྱིས་བརླབས། །ཆུ་སྲིན་ཁ་ལས་བྱུང་བ་ཡི། །རྩེ་མོ་འོད་ཟེར་ཟླ་བར་གནས། །རྩེ་མོ་དགུ་པ་རྣམ་པར་བཤད། །ཡེ་ཤེས་རྡོ་རྗེ་འགྲོ་བ་འདོན། །ནམ་མཁའི་ཁམས་ཀྱི་མཐར་ཐུག་པར། །བྱང་ཆུབ་སྙིང་པོར་རྣམ་པར་གནས། །ཕྱོགས་བཅུ་
ཐམས་ཅད་རིག་པའི་གནས། །འཇིག་རྟེན་ཁམས་ནི་མཐའ་ཡས་པ། །ཕྱོགས་ནི་བརྒྱད་ཅེས་བྱ་བར་ནི། །ལྷ་མོ་བརྒྱད་དུ་རབ་ཏུ་གྲགས། །ཡི་གེ་བརྒྱད་ཀྱི་ས་བོན་ནི། །ཕྱོགས་ནི་བརྒྱད་དུ་རྣམ་པར་དགོད། །ཤར་དུ་ལྷ་མོ་སྒྲོལ་མ་སྟེ། །བྱང་དུ་ཡང་ནི་གོས་
དཀར་མོ། །ནུབ་ཀྱི་ཕྱོགས་སུ་མཱ་མ་ཀཱི། །ལྷོ་རུ་ཡང་ནི་སངས་རྒྱས་སྤྱན། །གསེར་དང་སྦྲང་རྩི་གཟི་བརྗིད་མ། །རྡོ་རྗེ་ཕྲེང་བ་བཞི་པའོ། །ནང་གི་གཟུགས་ནི་ནམ་མཁའ་སྟེ། །གཟུགས་ཀྱིས་གང་བ་གཟི་བརྗིད་ཅན། །པདྨ་ཁ་ཕྱེ་ལས་བྱུང་བ། །

གཟུགས་མེད་སྲིད་པའི་གནས་སུ་ནི། །ཤེས་རབ་བདུད་རྩི་བུམ་པ་ལྟར། །ཡེ་ཤེས་བདུད་རྩིའི་གནས་སུ་ནི། །དེ་ཡི་ཡང་ནི་དབུས་སུ་ཡིད། །ལྷ་མོ་ཤེས་རབ་ཕ་རོལ་ཕྱིན། །གཟུགས་ནི་མཛེས་ཤིང་ཡོན་ཏན་གནས། །སྟེང་གི་པདྨ་རྡོ་རྗེ་རྣམས། །
ཇི་ལྟར་གོང་མ་བསམ་པར་བྱ། །ནང་གི་ཡེ་ཤེས་དབྱུག་གུ་ནི། །ཐམས་ཅད་སྡུད་ཅིང་འབྱིན་པར་བྱེད། །ཨཱ་ལི་ཀཱ་ལི་སྒོམ་པ་ནི། །གནས་ནི་བརྒྱད་དུ་བསྐྱོད་པར་བྱ། །ཨཱ་ལི་ཀ་ལི་རབ་སྦྱོར་བས། །འཁོར་བ་ཐམས་ཅད་གཅོད་པར་བྱེད། །རྡོ་རྗེ་དྲིལ་བུའི་ཐབས་ཉིད་
དེ། །ཐབས་ནི་ཡང་ནི་ནང་དུ་ཉིད། །དེ་ལ་ལག་གཉིས་རབ་ཏུ་བརྐྱང་། །རྣམ་ལྔ་འདོད་པའི་བསྐོར་བ་བྱ། །གཡས་པར་ཉི་མ་ཡང་དག་བསམ། །གཡོན་པར་ཟླ་བསམ་གཡོན་པ་ཉིད། །ལུས་ཅན་རྣམས་ཀྱི་ཐབས་ཉིད་དེ། །རང་འདོད་ལྷར་ནི་བསམ་པར་བྱ། །
བྱང་དུ་རྡོ་རྗེ་གསོར་ནས་ནི། །ཕྱི་ནས་བློ་ལྡན་ཡང་དག་གདབ། །ཧཱུྃ་གི་གླུ་ཡི་རྣམ་པ་ཡིས། །སངས་རྒྱས་ཐམས་ཅད་དགྱེས་པར་བྱེད། །རྡོ་རྗེ་གསོར་བས་མཛེས་པ་ཡིས། །རྨོངས་པའི་སེམས་ཅན་རྣམ་པར་སྒྲོལ། །ཆོས་ཀྱི་རྣམ་ཐར་འབྲས་བུ་ཉིད། །རྡོ་རྗེ་དགྱེས་
པ་འཛིན་པ་སྟེ། །ཧཱུྃ་ཧཱུྃ་ཧཱུྃ་ཧོ་ཧོ་ཧོ། །ཐབས་དང་ཤེས་རབ་རབ་དཀྲོལ་ཞིང་། །ཐབས་དང་ཤེས་རབ་ལག་པའི་དངོས། །ཨོྃ་བཛྲ་དྷརྨ་ར་ཎི་ཏ་པྲ་ར་ཎི་ཏ་སྃ་པྲ་ར་ཎི་ཏ་སརྦྦ་བུདྡྷ་ཀྵེ་ཏྲ་པྲ་ཙཱ་ལི་ནེ། པྲཛྙཱ་པཱ་ར་མི་ཏཱ་ནཱ་ད་སྭ་བྷཱ་བེ་ཙ་བཛྲ་ས་ཏྭ་ཧྲྀ་ད་ཡ་སྃ་ཏོ་ཥ་ནི་ཧཱུྃ་ཧཱུྃ་ཧཱུྃ་ཧོ་ཧོ་ཧོ་སྭཱ་ཧཱ། །
ཨོྃ་སརྦ་ཏ་ཐཱ་ག་ཏ་སིད་དྷི་བཛྲ་ས་མ་ཡེ་ཏིཥྛ་ཨེ་ཥ་ཏྭཱནྡྷའ་ར་ཡཱ་མི་ཧི་ཧི་ཧི་ཧི་ཧི་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཐབས་དང་ཤེས་རབ་ཆོས་ཀྱིས་ནི། །འགྲོ་བ་ཐམས་ཅད་སད་པར་བྱེད། །མི་ཤེས་འདམ་དུ་བྱིང་བ་ཡི། །སེམས་ཅན་སངས་རྒྱས་དོན་དུ་དཀྲོལ། །རྡོ་རྗེ་དེ་ཉིད་ཀྱིས་ནི་གཟུང་། །
ཆོས་ཀྱི་དྲིལ་བུ་དཀྲོལ་བར་བྱ། །ཐབས་དང་ཤེས་རབ་ཆོ་ག་ཡིས། །སེམས་ཅན་དོན་ནི་ཡོ་གིས་བྱེད། །དེ་ཉིད་མེད་སེམས་རྣལ་འབྱོར་པ། །གླང་པོ་དྲིལ་བུ་དཀྲོལ་བ་ཉིད། །རྣལ་འབྱོར་དེ་ཉིད་དམན་པ་ཡི། །རང་གི་དངོས་གྲུབ་རིང་དུ་བརྟག །བརྒྱད་པ་ལས་དྲིལ་

བུའི་དེ་ཁོ་ན་སྟེ་རབ་ཏུ་བྱེད་པ་དང་པོའོ།། །།ཕྲེང་བ་ལ་སོགས་མཚན་ཉིད་ནི། །ཡང་དག་ཇི་ལྟར་རྡོ་རྗེ་ཉོན། །གང་གི་ཡང་དག་ཆོ་ག་ཡིས། །འགྲུབ་འགྱུར་འདི་ལ་ཐེ་ཚོམ་མེད། །ཤེལ་དང་ཉ་ཕྱིས་མུ་ཏིག་དང་། །ཁམས་ནི་དཀར་པོ་ལ་
སོགས་གཞན། །ཞི་བའི་ལས་ལ་ཁྱད་པར་དུ། །ཕྲེང་བ་ཡི་ནི་མཚན་ཉིད་དོ། །གསེར་དང་དངུལ་དང་ཟངས་མ་པ། །པདྨའི་ས་བོན་ཁྱད་པར་དུ། །རྒྱས་པ་ལ་ནི་ཕྲེང་བ་ཉིད། །རྣམ་པར་མཁས་པས་བགྲང་བར་བྱ། །གུར་གུམ་ལ་སོགས་དྲི་སོགས་ཀྱིས། །དྲི་ནི་
ཐམས་ཅད་ཁྱད་པར་དུ། །བསྒྲུབས་ཤིང་རིལ་བུ་བྱས་ནས་ནི། །དབང་ལ་ཡོངས་སུ་རབ་ཏུ་གྲགས། །རུ་དྲཱཀྵ་དང་ལུང་ཏང་དང་། །དེ་བཞིན་སྐྱེས་པའི་རུས་པ་ཉིད། །དྲག་པོའི་ལས་ལ་སྦྱར་བར་བྱ། །མངོན་སྤྱོད་ལ་ནི་ཡོངས་སུ་གྲགས། །ཞི་རྒྱས་དབང་དང་མངོན་
སྤྱོད་ལ། །ཕུ་ཏྲ་ཛཱི་ཝ་ལས་ཀུན་བྱེད། །སྔགས་ཀྱི་བསྒྲུབ་པ་ལྔ་བཅུ་སྟེ། །དབང་ལ་དེ་ཡི་ཕྱེད་ཉིད་དོ། །བརྒྱ་ཕྲག་གཅིག་ནི་ཞི་བ་ལ། །དེ་བཞིན་རྒྱས་ལ་ལྷག་པར་བརྒྱད། །མངོན་སྤྱོད་ལ་ནི་དྲུག་ཅུ་ཉིད། །ཁྱད་པར་དུ་ནི་ལས་ལ་སྦྱར། །ཇི་ལྟར་ལས་ཀྱི་བྱེ་བྲག་
གིས། །ཕྲེང་བ་ལ་སོགས་བྱ་བའོ། །ཕྱོགས་དང་མཚམས་ནི་བརྒྱད་རྣམས་ཀྱི། །དབུས་སུ་དགུག་པ་སངས་རྒྱས་ཀྱི། །ལྷ་ནི་དགུ་སོགས་སྲད་བུ་ལ། །ལྷ་དགུས་བྱིན་གྱིས་བརླབ་པར་བྱ། །ཕྲེང་བ་ཀུན་ནི་དགྲ་བཅོམ་པ། །མཆོད་རྟེན་སྟེང་དུ་རབ་ཏུ་བརྟག །
མཆོད་རྟེན་ཆོས་ཀྱི་དབང་པོའི་ཕྱིར། །སྟེང་དུ་ཡང་ནི་ཆོས་ཀྱི་དབྱིངས། །ལག་མཐིལ་ཉི་མ་བསམས་ནས་ནི། །དབྱངས་ཡིག་དང་པོ་ལ་སོགས་པ། །ལག་པའི་དབུས་སུ་རྣལ་འབྱོར་པས། །བསྒོམ་ཞིང་བདུད་རྩི་ཡི་གེ་ནང་། །འོད་ཟེར་འཕྲོ་བ་དུ་མ་དང་། །ཁ་
དོག་དཀར་པོ་བསམས་ནས་ནི། །སོར་མོ་རྡོ་རྗེ་རྩེ་མོ་སྟེ། །གཡོན་པ་པདྨ་འདབ་མར་བསྒོམ། །པདྨ་རྡོ་རྗེ་སྙོམས་འཇུག་པའི། །ཁ་སྦྱར་དབུས་སུ་ཕྲེང་གཞག་ལ། །ཀུན་གྱི་དེ་ཉིད་བསྒོམ་བྱ་ཞིང་། །ཕྲེང་བ་བྱིན་གྱིས་བརླབ་པར་བྱ། །སོར་མོ་ལ་སོགས་བྱེ་བྲག་ལས། །

ཕྱིས་ནི་སྔགས་པས་བཟླས་པ་བྱ། །རྡོ་རྗེ་གཉིས་མེད་དངོས་པོ་ལས། །གཡོན་པའི་རྡོ་རྗེ་ཅན་གྱི་དངོས། །ཞི་ལ་ཁྲོ་བོར་དགོད་པར་བྱ། །རྒྱས་ལ་དབུ་མའི་དེ་ཉིད་ལ། །སྲིན་ལག་ལ་ནི་དབང་དུ་གསུངས། །ཀུན་གྱི་མཐའ་མར་མངོན་སྤྱོད་ལ། །མཐེ་
བོང་རྡོ་རྗེ་ལྕགས་ཀྱུ་ལྷ། །དངོས་པོ་ལས་ནི་དགུག་པར་བྱ། །མཉམ་གཞག་བཟླས་དང་སྒོམ་པ་ཡིས། །འགྲུབ་འགྱུར་འདི་ལ་ཐེ་ཚོམ་མེད། །དེ་ཉིད་མེད་པའི་རྣལ་འབྱོར་པ། །དེ་ཉིད་མེད་པའི་སྔགས་ཟློས་དང་། །རྡོ་རྗེ་དྲིལ་བུ་དེ་ཉིད་མེད། །ཕྱག་རྒྱའི་དེ་ཉིད་སྐྱེ་
མི་འགྱུར། །རྣལ་འབྱོར་པ་ཡིས་དེ་ཉིད་དམིགས། །དེ་ཉིད་ཐམས་ཅད་བྱེད་པ་ཉིད། །ཡི་གེ་རྣམས་ཀྱི་རྒྱུ་ལས་ནི། །གཟུགས་ཀྱི་སྙིང་པོ་བགྲང་བའི་གྲངས། །རྫུན་པས་རྣལ་འབྱོར་མ་སྙིང་འགྲུབ། །ཨོྃ་པ་དེ་པ་དེ། མ་ཧཱ་ཛྙཱ་
ནྃ། སརྦྦ་བུད་དྷ་མ་ཧྃ་བྷ་བེ་ཏ་ཧཱུྃ་ཧཱུྃ་ཧཱུྃ། ཧོ་ཧོ་ཧོ་ཨ་ཁྃ་སྭཱ་ཧཱ། སྔགས་ཀྱི་ཕྲེང་བ་སྦྱངས་ནས་ནི། །གང་འདོད་དེ་ཉིད་བསྒྲུབ་པར་བྱ། །དེ་ཉིད་ལས་ནི་འགྲུབ་པར་འགྱུར། །ཀུན་དུ་གསལ་བ་མེད་ན་རིང་། །ཡེ་ཤེས་དེ་ཉིད་ཁྱད་པར་དུ། །ཡེ་ཤེས་ཆེན་པོ་ཡང་དག་ཉོན། །
མཉམ་ཉིད་སེམས་ཀྱིས་དབྱེ་བ་ལས། །མཉམ་པར་གཞག་པས་འཁོར་ལོ་བརྟག །ཟླ་བའི་དཀྱིལ་འཁོར་དབུས་གནས་པར། །ཡེ་ཤེས་ས་བོན་གྱིས་ནི་སྤྲུལ། །སྐུ་མདོག་དཀར་པོ་བསྒོམ་པར་བྱ། །པདྨའི་གདན་ལ་བཞུགས་པར་ནི། །ཕྱག་གཉིས་སེམས་
དཔའི་སྐྱིལ་མོ་ཀྲུང་། །རྒྱན་རྣམས་ཀུན་གྱིས་རྣམ་པར་བརྒྱན། །ཕྱག་རྒྱ་ཆེན་པོ་ཕྱག་གཉིས་ཀྱིས། །སྙིང་གའི་གནས་སུ་བཙིར་བ་ཉིད། །སྐུ་མདོག་དཀར་པོ་ཤིན་ཏུ་མཛེས། །འཕགས་པ་རྣམ་པར་སྣང་མཛད་གཙོ། །ཀུན་ཏུ་འོད་ཟེར་སྣ་ཚོགས་ཀྱིས། །
སངས་རྒྱས་དམ་ཚིག་སྤྲིན་གྱིས་སྤྲོ། །ཟུང་ལྟར་རིམ་པའི་ཆོ་ག་ཡིས། །སྔགས་ཀྱི་བཟླས་པར་རབ་ཏུ་གྲགས། །གཡོན་དང་གཡས་པའི་ལག་གཉིས་ཀྱིས། །བསྐོར་བ་མཁའ་འགྲོ་མ་དེ་བདེ། །ཨཱ་ལི་ཀཱ་ལི་ས་བོན་ནི། །ཧཱུྃ་གི་སྲད་བུས་བརྒྱུ་བ་ཉིད། །

འདི་ཡི་ས་བོན་རྣལ་འབྱོར་པས། །བསྒོམས་ན་མྱུར་དུ་སངས་རྒྱས་ཐོབ། །བརྒྱད་པ་ལས་སྔགས་ཀྱི་བཟླས་པ་དང་སྒོམ་པ་སྟེ་རབ་ཏུ་བྱེད་པ་གཉིས་པའོ།། །།འཕོ་བའི་རྣལ་འབྱོར་མཚན་ཉིད་ཀྱི། །དེ་ཉིད་ཇི་ལྟར་རྡོ་རྗེ་ཉོན། །བཟང་པོའི་ལམ་
དུ་རྣལ་འབྱོར་པས། །འགྲོ་བ་མཛེས་པ་ཁྱོད་ལ་བསྟན། །ཡེ་ཤེས་དབང་པོ་ཉན་པར་འཚལ། །སྒོ་རྣམས་དགུ་ནི་ཇི་ལྟར་ལགས། །ཡེ་ཤེས་སྒོ་ཡི་དབྱེ་བས་ནི། །ཡོན་ཏན་སྐྱོན་ནི་ཇི་ལྟར་ལགས། །དུས་སུ་སྲོག་ནི་འཆད་པ་ཡི། །ཡང་དག་རབ་ཏུ་སྦྱོར་བ་ཉོན། །ལེགས་
པའི་ལམ་ནི་མཛེས་པའི་གནས། །ངན་པའི་ལམ་ཡང་སྐྱོན་རྣམས་ཉིད། །ལྟེ་བའི་སྟེང་ན་ཐིག་ལེ་དང་། །མིག་དང་སྣ་སོགས་རྣ་བ་དག །བཏུང་དང་བཏུང་བ་མིན་པའི་སྒོ། །མཚན་ཉིད་ལྟེ་བར་འདོད་པ་ཅན། །མཐོ་རིས་ཐིག་ལེས་གཟུགས་ལུས་ཅན། །སྟེང་ནི་
སྟེང་དུ་གནས་པ་ཡི། །འགྲོ་དང་འོང་བར་ཡོངས་སུ་གྲགས། །སྣ་ལས་གནོད་སྦྱིན་དག་ཏུ་འགྱུར། །རྣ་བ་དག་ལས་གྲུབ་པའི་ལྷ། །གལ་ཏེ་མིག་ལས་ཤེས་འགྲོ་ན། །མི་རྣམས་ཀྱི་ནི་རྒྱལ་པོར་འགྱུར། །སྲིད་པའི་སྒོ་ལས་ཡི་དགས་ཏེ། །གཅི་ལས་དེ་བཞིན་
བྱོལ་སོང་ངོ་། །དམྱལ་བ་བརྒྱད་ནི་བཏུང་མིན་པས། །དེ་ལྟར་སྤང་ཕྱིར་རིགས་ཀྱི་བུ། །སྲིད་པའི་འཕོ་བའི་མཚན་ཉིད་ནི། །གང་ཕྱིར་སྒ་ཡི་ཁྱད་པར་ནི། །འཁོར་བའི་དབྱེ་བ་ཡང་དག་འབྱུང་། །དེ་ཕྱིར་སྒོ་ཡི་ཁྱད་པར་གྱིས། །རྣལ་འབྱོར་པས་ནི་མཉམ་གཞག་
པ། །འཆི་བའི་དུས་ཀྱི་ཐོབ་པ་ནི། །འཆི་བའི་མཚན་མ་བསྟན་པ་ཉིད། །རིམ་ལ་སོགས་པས་མ་ཕྱེ་བའི། །འཕོ་བའི་རྣལ་འབྱོར་དམ་པ་ཉིད། །བུམ་པ་དང་པོར་བརྩམས་ནས་ནི། །སྒོ་རྣམས་ཐམས་ཅད་རེངས་པར་བྱེད། །མཆོད་རྟེན་རྣམས་ཀྱི་ལྕགས་སྒྲོག་
ལྔ། །སྒོ་ཡི་བུག་པའི་བསྒོམ་པ་ནི། །དེ་བས་དམའ་བའི་སྒོ་ཉིད་དོ། །ས་བོན་ཆུ་ལྟར་དཀར་པོ་ཉིད། །བཏུང་དང་བཏུང་མིན་མེ་ཡི་ནི། །དེ་ཡི་ས་བོན་འབར་བ་ལྟར། །དེ་ཡི་དང་པོ་དབུགས་ཀྱི་ཡང་། །དེ་ལ་ཤིན་ཏུ་མཉམ་གཞག་པས། །དབུགས་ནི་བུམ་པ་

ཅན་བསྒོམ་བྱ། །ལུས་ཀྱི་རླུང་གི་ཁ་དོག་དང་། །རླུང་གི་དཀྱིལ་འཁོར་སེམས་ཀྱིས་ནི། །རླུང་གི་ས་བོན་རྩ་བ་རྣམས། །རླུང་ནི་མཐའ་ཡི་རྩ་བ་ཅན། །ཐིག་ལེ་སྒྲ་དང་ལྡན་པ་ཡིས། །སེམས་ཀྱི་ས་བོན་གྱིས་ནི་དྲང་། །རྡོ་རྗེ་ཅན་གྱི་ས་བོན་གྱིས། །
འཇིགས་པའི་ལྕགས་ཀྱུ་ལ་སོགས་སྦྱར། །གནས་ནི་བཅུ་དང་ཉི་ཤུ་ནི། །རྩ་བཞིའི་གནས་ལས་འཇིགས་མས་དགུག །གོ་འཕང་གནས་ནི་གོ་འཕང་སྟེ། །བུག་པ་དགུ་ཡི་སྟེང་མས་སོ། །མཛོད་སྤུ་སྐྲ་དཀར་ས་བོན་གྱི། །ཡི་གེ་ཕྱེད་དང་གཉིས་ཀྱིས་
སྦྱར། །དྲག་པོའི་སྒྲ་ཡིས་བརྗོད་ནས་ནི། །བརྒྱད་ཀྱི་མཐའ་ཡི་ས་བོན་གྱིས། །འཇིགས་དང་འཇིགས་པའི་སྡེ་ཚན་གྱི། །དང་པོ་ལ་སོགས་དང་པོ་ཡི། །ཡི་གེ་ཕྱེད་པས་སྦྱར་ནས་ནི། །རླུང་གིས་ས་བོན་འོག་མ་ལས། །སྒྲ་ནི་སྒྲ་ཡིས་བསྐུལ་བར་བྱ། །
རླུང་གི་ས་བོན་ལྡན་པ་དང་། །རླུང་གི་དཀྱིལ་འཁོར་སེམས་ཀྱིས་ནི། །གནས་ནི་ཉི་ཤུ་རྩ་བཞིར་ནི། །དེ་ནས་སྟེང་ནས་སྟེང་དུ་མཆོག །རྣལ་འབྱོར་པས་ནི་སྐྲ་དཀར་བས། །སྟེང་གི་ཡི་གེ་བཟའ་བར་བྱ། །བུ་ག་དགུ་ཡི་སྟེང་མཆོག་ནས། །འཕྲལ་དུ་ཡིད་ཀྱིས་
འཕོ་བར་བྱེད། །ཉིན་ཞིང་བྲམ་ཟེ་གསོད་པ་དང་། །མཚམས་མེད་ལྔ་ནི་བྱེད་པ་དང་། །ཆོམ་རྐུན་ལས་ཀྱི་ལོངས་སྤྱོད་པ། །འདི་ཡི་ལམ་གྱིས་གྲོལ་འགྱུར་ཏེ། །སྡིག་པས་གོས་པར་མི་འགྱུར་ཞིང་། །སྲིད་པའི་སྐྱོན་ལས་ཤིན་ཏུ་གྲོལ། །དཔེར་ན་འདམ་
ལས་སྐྱེས་པ་ཡི། །པདྨ་གཟི་བརྗིད་དྲི་མ་མེད། །དེ་བཞིན་འདམ་སོགས་ལུས་ཀྱིས་ནི། །ཡེ་ཤེས་སྐུ་ནི་རང་འདོད་པས། །དུས་ཐོབ་ན་ཡང་འཕོ་བྱ་སྟེ། །དུས་མིན་ལྷ་ནི་གསོད་པ་ཉིད། །དེ་ཕྱིར་ལུས་ཀྱི་མཚན་ཤེས་ནས། །བློ་དང་ལྡན་པས་རྣལ་འབྱོར་བརྩམ། །
རྣལ་འབྱོར་བསྒྲུབ་བྱའི་ཁྱད་པར་ལས། །ཇི་ལྟར་དེ་ཉིད་རྡོ་རྗེ་ཉོན། །མཉམ་ཉིད་སེམས་ཀྱི་དངོས་པོ་ནི། །སྔར་གྱི་མཚན་ཉིད་ཐམས་ཅད་ལས། །སྙིང་གི་དཀྱིལ་འཁོར་དབུས་གནས་པར། །སངས་རྒྱས་ལྔ་ཡི་ས་བོན་རྣམས། །འདི་ནི་ཉི་མའི་འོད་ཟེར་འབར། །

ངོ་བོ་སེམས་ཀྱིས་མཚོན་པར་བྱ། །སྔར་གསུངས་སྟོང་པ་ཉིད་ཀྱིས་ནི། །སྔར་གྱི་མཚན་ཉིད་ཡང་དག་ལྡན། །ཧཱུྃ་ལ་གནས་པའི་སེམས་ཀྱིས་ནི། །གཟུགས་ལ་སོགས་པ་ཐམས་ཅད་གཞིག །ཟླ་བའི་དཀྱིལ་འཁོར་དབུས་གནས་པར། །ས་བོན་གྱིས་ནི་
གཟུགས་བསྐྱེད་ནས། །པདྨའི་གདན་ལ་བཞུགས་པར་ནི། །ཡེ་ཤེས་མཁའ་འགྲོར་བདག་ཉིད་བསམ། །ཞལ་གསུམ་པ་ལ་ཕྱག་དྲུག་ཉིད། །སྤྱན་གསུམ་དབུ་རྒྱན་གྱིས་ནི་བརྒྱན། །བཞད་དང་ཁྲོ་ཞིང་སྒེག་པ་དང་། །རྒྱན་རྣམས་ཀུན་གྱིས་རྣམ་པར་བརྒྱན། །ཀུན་
ད་ཟླ་བའི་མདོག་ལྟར་དཀར། །ཤིན་ཏུ་མཛེས་པའི་གོས་ཀྱིས་བརྒྱན། །སངས་རྒྱས་སྤྲིན་ནི་སྤྲོ་བར་བྱ། །སེམས་དཔའ་སྐྱིལ་མོ་ཀྲུང་དུ་གནས། །དང་པོར་མདའ་ནི་དགོད་པར་བྱ། །དེ་བཞིན་གཉིས་པར་ལྕགས་ཀྱུ་ཉིད། །གསུམ་པར་རྡོ་རྗེ་འཕྱར་བའོ། །གཡོན་
པ་སྡིགས་མཛུབ་ཞགས་པ་ཉིད། །གཉིས་པར་དཔག་བསམ་ཤིང་ལྕུག་མ། །གསུམ་པར་གཞུ་ཡི་ཆོ་གས་ཁྱབ། །འོད་ཟེར་ཕྲེང་བ་དུ་མ་དང་། །དབུགས་ནི་གཡོ་བ་མེད་པར་བསྒོམ། །ས་བོན་བརྒྱད་ལ་སོགས་པ་ཡིས། །ཡི་གེ་རྣམ་དགོད་དགོད་པར་བྱའོ། །ཨཱ་
ལི་ཀ་ལི་རབ་སྦྱོར་བས། །ཇི་ལྟར་བཏུས་པའི་ས་བོན་བཞིན། །ཐམས་ཅད་ཁ་དོག་དཀར་པོ་རྣམས། །ས་བོན་ཟླ་བའི་འོད་ཟེར་ལྡན། །པདྨའི་ཆུ་ཤིང་མེ་ཏོག་གི །སྙིང་ལ་སྒོང་སྐྱེས་གཞག་པར་བྱ། །དེ་ཡི་དབུས་སུ་ཡེ་ཤེས་དང་། །རྣམ་པར་ཤེས་པ་ལྷན་ཅིག་
ཏུ། །དངོས་པོའི་ངོ་བོས་བསྒོམ་པར་བྱ། །གཡོ་བ་མེད་ཅིང་འཚེ་བ་མེད། །དེ་ནས་ཕྱི་རོལ་རྣལ་འབྱོར་རྣམས། །རྣམ་པར་མཁས་པས་གཟུང་བར་བྱ། །གནས་གཉིས་ཀྱི་ནི་སེམས་དང་ནི། །རླུང་གི་དཀྱིལ་འཁོར་སེམས་ཀྱིས་ནི། །དེ་ཡི་དབུས་སུ་མེ་ཉིད་དེ། །
དེ་ཡི་སྟེང་དུ་ཉི་མ་དེར། །ཨཱ་ལི་ཀ་ལི་ལྡན་པ་ཡི། །ས་བོན་དེ་ཉིད་དམར་པོའོ། །རྣལ་འབྱོར་པ་ཡི་ཁྱད་པར་དུ། །དབྱུང་དང་རྔུབ་པའི་བཟླས་པ་བྱ། །ཡེ་ཤེས་ས་བོན་དབུས་སུ་ནི། །འབྱུང་བ་ཡིས་ནི་བསྣུན་བྱ་ཞིང་། །བསྣུན་པས་སྙིང་གའི་ཡེ་ཤེས་ནི། །མེ་ཏོག་

ལྟ་བུར་བསྣུན་པར་བྱ། །དབྱུང་དང་དབྱུང་མིན་བཟླས་པས་ནི། །དབྱུང་དང་རྔུབ་པའི་རྣལ་འབྱོར་གྱི། བདག་ཉིད་ཕྱི་རོལ་དུ་ནི་བྱེད། །དབྱུང་བའི་མཚན་ཉིད་མཚན་པ་དང་། རྔུབ་བའི་མཚན་ཉིད་མཚོན་པར་བྱ། དབྱུང་དང་རྔུབ་བའི་འབྱོར་གྱི། །
མཚན་ཉིད་དེ་ཉིད་བསྒོམས་པས་ནི། །མཉམ་གཞག་དངོས་པོའི་རང་བཞིན་གྱིས། །འགྲུབ་འགྱུར་འདི་ལ་ཐེ་ཚོམ་མེད། །དེ་ནས་ཕྱི་རོལ་རྣམས་ཀྱི་ལུས། །སྒྲུབ་པ་པོས་ནི་རྣམ་པར་སྤྲུལ། །གཞན་གྱི་སེམས་ཀྱི་རྗེས་སུ་སེམས། །རྣམ་པར་མཁས་པས་ཤེས་
པར་བྱ། །བསྒོམ་དང་བཟླས་པའི་ཁྱད་པར་གྱིས། །མཉམ་པར་གཞག་པའི་སེམས་ཀྱིས་ནི། །ལེགས་པའི་ལམ་ནི་བསམ་བྱས་ན། །འགྲུབ་འགྱུར་འདི་ལ་ཐེ་ཚོམ་མེད། །དེ་ནས་ཡེ་ཤེས་གཟུགས་གྱུར་དང་། །དེ་ཕྱིར་མར་མེའི་སེམས་ཀྱིས་ནི། །རྣམ་པར་
མཁས་པས་ལས་རྣམས་བྱེད། །ཉན་ཐོས་ལ་སོགས་དེ་ཉིད་ནི། །ལེགས་པར་བཤད་པ་བསྒྲགས་པ་ཉིད། །ཤེལ་ལྟར་སེམས་ནི་བརྟན་བྱས་ནས། །མར་མེའི་རྣམ་པའི་སེམས་ཀྱིས་ནི། །སྤྲོས་པ་ཐམས་ཅད་དམིགས་ནས་ནི། །སྤྲོས་པ་ཉིད་ནི་སྤྲོས་མེད་བྱེད། །
རང་བཞིན་རྣལ་འབྱོར་དམིགས་ནས་ནི། །འདི་དག་ཐམས་ཅད་ཡོངས་སུ་སྤང་། །ཀྱེ་བཅོམ་ལྡན་འདས་ཡེ་ཤེས་གང་གིས་ཡེ་ཤེས་ཁྱད་པར་དུ་འཕགས་ལགས། བཅོམ་ལྡན་འདས་ཀྱིས་བཀའ་སྩལ་པ། །ཡེ་ཤེས་རྣམ་པ་ལྔ་རུ་གསུངས། །གསང་བའི་མེ་ལོང་ཡེ་
ཤེས་ལྷའི། །ཁྲོ་བོའི་ཡེ་ཤེས་ལྷ་མ་ཡིན། །ཡི་དགས་ཡེ་ཤེས་ཉི་མ་སྟེ། །དམྱལ་བའི་འཇིགས་ཤིང་དུ་བ་ཉིད། །གཏི་མུག་ཡེ་ཤེས་བྱོལ་སོང་རྣམས། །སེམས་མེད་བརྟན་པ་ལ་སོགས་པ། །མི་ལ་རྣམ་ཤེས་ཁྱད་པར་ནི། །རྣམ་པ་ལྔ་རུ་ཤེས་པར་བྱ། །ལྔ་
ཡི་དབྱེ་བས་ཡེ་ཤེས་བསྒྲགས། །གླེན་ཞིང་ལྐུགས་པས་ཁེབས་པ་ཡི། །བྱིས་པའི་ཤེས་པའི་ཤེས་པ་ཅན། །ཡེ་ཤེས་དེ་ཉིད་ཁྱད་པར་དང་། །རྣལ་འབྱོར་བསྟན་བཅོས་ཁྱད་པར་ལས། །སྐྱེ་བ་བྱེ་བ་སྟོང་ཕྲག་ཏུ། །ང་ཡི་ཡེ་ཤེས་ཀྱིས་བསྐུལ་བ། །མཁས་པ་རྣལ་

འབྱོར་བསྟན་བཅོས་ལ། །འབད་པས་དད་པ་བསྐྱེད་པར་བྱ། །ཕྱི་རོལ་བསྟན་བཅོས་སྒྲ་ལ་སོགས། །དཔེར་ན་གར་མཁན་ཁ་དོག་བཞིན། །རྣལ་འབྱོར་བསྟན་བཅོས་རྗེས་བཙལ་བས། །བཟའ་དང་གྲོལ་བའི་གནས་སུ་བྱ། །སྙིང་པོ་ལས་ནི་སྙིང་པོ་མཆོག །རྣལ་
འབྱོར་ཞལ་མཆོག་ཁྱོད་ལ་བཤད། །བརྒྱད་པ་ལས་མུ་སྟེགས་ཀྱི་ཡེ་ཤེས་འཇིག་པ་ཞེས་བྱ་བ་སྟེ་རབ་ཏུ་བྱེད་པ་གསུམ་པའོ།། །།སྔགས་རྣམས་ཀྱི་ནི་མཚན་ཉིད་ནི། །རྡོ་རྗེ་གཙོ་བོ་རྒྱལ་པོ་ཉོན། །ཨོྃ་བཛྲཱ་མྲྀ་ཏ་མ་ཧཱ་སུ་ཁ་ཧྃ་སྭཱ་ཧཱ། སྙིང་པོའོ། །
ཨོྃ་ཨཱཿཧཱུྃ་ཧཱུྃ་སྭཱ་ཧཱ། རྡོ་རྗེ་སེམས་དཔའི་བཟླས་པའི་སྔགས་སོ། །ཨོྃ་ཨཱཿཨྃ་ཧྃ་སྭཱ་ཧཱ། རྡོ་རྗེ་དྲག་མོའི་འོ། །ཨོྃ་ཨཱཿཨཱྃ་ཧྃ་སྭཱ་ཧཱ། རྡོ་རྗེ་གཟུགས་བརྙན་མའི་འོ། །ཨོྃ་ཨཱཿཨིཾ་ཧྃ་སྭཱ་ཧྭཱ། འདོད་ཆགས་རྡོ་རྗེ་མའིའོ། །ཨོྃ་ཨཱཿཨཱིཾ་ཧྃ་སྭཱ་ཧཱ། རྡོ་རྗེ་ཞི་བ་མའིའོ། །
ཨོྃ་ཨཱཿཨུྃ་ཧྃ་སྭཱ་ཧཱ། རྡོ་རྗེ་གནོད་སྦྱིན་མའིའོ། །ཨོྃ་ཨཱཿཨཱུྃ་ཧྃ་སྭཱ་ཧཱ། །རྡོ་རྗེ་མཁའ་འགྲོ་མའིའོ། །ཨོྃ་ཨཱཿཨྃ་ཧྃ་སྭཱ་ཧཱ། སྒྲའི་རྡོ་རྗེ་མའིའོ། །ཨོྃ་ཨཱཿཨཿཧྃ་སྭཱ་ཧཱ། སའི་རྡོ་རྗེ་མའིའོ། །ཨོྃ་ཨཱཿཨོྃ་ཧྃ་སྭཱ་ཧཱ། གླིང་བུ་མའིའོ། །ཨོྃ་ཨཱཿཨོྃ་ཧྃ་སྭཱ་ཧཱ། པི་ཝང་མའི་
འོ། །ཨོྃ་ཨཱཿཨོྃ་ཧྃ་སྭཱ་ཧཱ། མུ་ཀུན་དའིའོ། །ཨོྃ་ཨཱཿཨཻཾ་ཧྃ་སྭཱ་ཧཱ། རྫ་རྔ་མའིའོ། །ཨོྃ་ཨཱཿབཛྲཱཾ་ཀུ་ཤི་ཛཿཧྃ་སྭ་ཧཱ། རྡོ་རྗེ་ལྕགས་ཀྱུ་མའིའོ། །ཨོྃ་ཨཱཿབཛྲ་པཱ་ཤེ་ཧཱུྃ་ཧྃ་སྭཱ་ཧཱ། རྡོ་རྗེ་ཞགས་པ་མའིའོ། །ཨོྃ་ཨཱཿབཛྲ་སྥོ་ཊ་བྃ་ཧྃ་སྭཱ་ཧཱ། རྡོ་རྗེ་ལྕགས་སྒྲོག་མའིའོ། །ཨོྃ་
ཨཱཿབཛྲ་གྷཎྜེ་ཧོཿཧྃ་སྭཱ་ཧཱ། རྡོ་རྗེ་དྲིལ་བུ་མའིའོ། །སྤྱན་ལ་སོགས་པའི་སྔགས་ནི་སྔ་མ་བཞིན་དུ་སྔགས་པས་བཟླས་པར་བྱའོ། །ཨོྃ་རྀ་སྭཱ་ཧཱ། མེ་ཏོག་མའིའོ། །ཨོྃ་རཱྀ་སྭཱ་ཧཱ། བདུག་པ་མའིའོ། །ཨོྃ་ལྀ་སྭཱ་ཧཱ། དྲི་མའིའོ། །ཨོྃ་ལཱྀ་སྭཱ་ཧཱ། མར་མེ་མའིའོ། །
འདི་དག་ནི་རྡོ་རྗེ་སེམས་དཔའིའོ། །ཨོྃ་ཧྲཱིཿསྭཱ་ཧཱ། ཧེ་རུ་ཀའིའོ། །ཨོྃ་བཛྲ་གུ་ཧྱེ་སི་དྷ་པ་ར་མ་ཡོ་གེ་ཤྭ་རི་ཀ་པ་ལ་མ་ལ་དྷ་རི་ཎི། རུ་དྷི་ར་པྲི་ཡེ་ཤྨ་ཤཱ་ན་བཱ་སི་ནི་ཧཱུྃ་ཕཊ་སྭཱ་ཧཱ། དཀར་མོའིའོ། །ཨོྃ་བཛྲ་ཙཎྜེ་ཤྭ་རི་ཁ་ཊྭཱྃ་གི་མ་ཧ་བཛྲི་ཎི་ཀ་པཱ་ལ་མཱ་ལཱ་མུ་ཀུ་ཊེ་ཨཱ་ཀཌྜྷ་ཨཱ་

ཀཌྜྷ་སརྦྦ་དུཥྚ་ཧྲྀ་ད་ཡ་མཱ་ཀཌྜྷ་རུ་ལུ་རུ་ལུ་བྷྱོ་ཧཱུྃ་ཕཊ། ཆོམ་རྐུན་མའིའོ། །ཨོྃ་བཛྲཱ་པ་རཱ་ཛི་ཏེ་པ་ར་མ་གུ་ཧྱེ་ཀ་པ་ལ་མཱ་ལཱ་བི་བྷཱུ་ཥི་ཏེ། སརྦ་དུཥྚ་མོ་ཧི་ནི་པྲི་ཡེ་ཨེ་ཧྱེ་ཧི་བྷ་ག་ཝ་ཏི་བཛྲ་གུ་ཧྱེ་ཤྭ་རཱི་པ་ཧུ་བི་བིདྷ་བེ་ཤདྷ་རི་ཎི། སརྦ་དུཥྚ་ནི་བཱ་ར་ཎི་ཧཱུྃ་ཕཊ། རབ་ཏུ་རྨོངས་
མའིའོ། །ཨོྃ་བཛྲ་བེ་ཏྟཱ་ལི་ཁ་ཁ་ཁཱ་ཧི་ཁཱ་ཧི། སརྦ་དུཥྚཱ་ནྦི་ཀྲྀ་ཏ་བེ་ཥ་དྷཱ་རི་ཎི་བི་ཀྲྀ་ཏཱ་ལྃ་ཀཱ་ར། བྷཱུ་ཥི་ཏེ་ཧ་ན་ཧ་ན་ད་ཧ་ད་ཧ། པ་ཙ་པ་ཙ་མཱ་བ་ལམྦ་མཱ་བི་ལམྦ། ས་མ་ཡ་མ་ནུ་སྨ་ར་པྲ་བེ་ཤ་ཡ་མཎྜ་ལ་མ་དྷྱེ། ཨུཏྟཱ་པ་ཡ་སརྦྦྃ་ཧཱུྃ་ཧཱུྃ་ཕཊ། རོ་ལངས་མའི་འོ། །ཨོྃ་ཨེ་ཧྱེ་ཧི་བྷ་ག་ཝ་
ཏི་བཛྲ་གུ་ཧྱེ་ཤྭ་རི་བ་ཧུ་བི་བི་དྷ་བེ་ཤ་དྷ་རི་ཎི་སརྦ་ཏ་ཐཱ་ག་ཏ་ཛུཥྚེ་ས་མ་ཡ་མ་ནུ་སྨ་ར། ཧ་ན་ཧ་ན། རྃ་ག་རྃ་གཱ་རྃ་གཱ་པ་ཡ། པཱུ་ར་ཡ་པཱུ་ར་ཡ། ཨཱ་བི་ཤ་ས་ཨཱ་བི་ཤ་ཡ། སརྦ་བྷཱུ་ཏྲཱན་ན་རྟ་ན་རྟ་ན་རྟཱ་པ་ཡི་ན་རྟཱ་པ་ཡ། ཧཿཧ་ཧ་ཧ་ཧ། ཧཱུྃ་ཧཱུྃ་ཕཊ། པུཀྐ་སཱིའི་འོ། །ཨོྃ་
བཛྲ་ཤཱུ་ལཱ་གྲི་བྷིནྡ་བྷིནྡ་སརྦ་དུཥྚ་ཧྲྀ་ད་ཡྃ། ཨཱ་ཀརྵ་ཡ་ཨཱ་ཀརྵ་ཡ། ཧ་ན་ཧ་ན། ད་ཧ་ད་ཧ། ནིརྨ་ཐ་ནི་རྨ་ཐ་མཱ་ར་ཡ་མ་ར་ཡ། མཱ་བི་ལམྦ་མཱ་བི་ལམྦ་ས་མ་ཡ་མ་ནུ་སྨ་ར་ཧཱུྃ་ཧཱུྃ་ཕཊ། གདོལ་པ་མོའི་འོ། །ཨོྃ་བཛྲ་མ་ཧེ་ཤྭ་རི་ཧྃ་ཧྃ་ཧྃ་ཧྃ་ཧཿརུ་ལུ་རུ་ལུ་བྷྱོ་ཧཱུྃ་ཧཱུྃ་ཕཊ། བྷཀྵ་ཡ་
སརྦ་དུཥྚ་ནྣིརྨ་ཐ་ཧྲྀ་ད་ཡྃ་ཧཱུྃ་ཧཱུྃ་ཕཊ་སྭཱ་ཧཱ། གྷ་སྨ་རཱིའི་འོ། །ཨོྃ་སུྃ་བྷ་ནི་དི་བྷ་ས་མ་ཡ་བཛྲེ་ཧཱུྃ་ཕཊ། ཧེ་རུ་ཀ་དང་མཚུངས་པའི་འོ། །ཨོྃ་བཛྲ་བྃ་ཤེ་ཧཱུྃ་སྭཱ་ཧཱ། གླིང་བུ་མའིའོ། །ཨོྃ་བཛྲ་བཱི་ཎེ་ཧཱུྃ་སྭཱ་ཧཱ། །བི་བཾ་མའིའོ། །ཨོྃ་བཛྲ་མུ་ཀུནྡེ་ཧཱུྃ་སྭཱ་ཧཱ། མུ་ཀུན་དའིའོ། །ཨོྃ་བཛྲ་
མྲྀ་རྡྃ་གེ་ཧུྃ་སྭཱ་ཧ། རྫ་རྔ་མའི་འོ། །ཨོྃ་བཛྲ་བ་ཌ་བཱ་མུ་ཁི་ཡོ་གཱི་ཤྭ་རི་ཧཱི་ཧི་ཧི་ཧི་ཧི་ཧཱུྃ་ཛཿ། རྟ་གདོང་མའིའོ། །ཨོྃ་བཛྲ་དྃཥྚཱ་བ་ར་ཧ་མུ་ཁི་ཏྲཱྃ་བ་ཏྲཱྃ་བ་ཧཱུྃ། རྡོ་རྗེ་ཕག་གདོང་མའིའོ། །ཨོྃ་བཛྲ་ཙནྡྲ་སཱུརྱ་ཧུ་ཏ་ཤ་ནི་སིང་ཧ་ནིརྣཱ་དེ་སིདྷ་ཝཀྟྲེ་སིདྷི་ནི་ཊྃ་ཊྃ་བྃ། སེང་གེའི་གདོང་མའི་འོ། །
ཨོྃ་བཛྲ་དྷཱ་ཏུ་ས་ཛཱི་བ་ནི་མ་ཧཱ་ཡཀྵི་ཎི་ཤྭ་ན་རཱུ་པི་ཎི་མ་ཧཱ་པྲཱ་ལ་ཡ་ནི་རྞྞ་དེ་ཀཱ་མ་རཱུ་པི་ཎི་ཏྲཱྃ་ཏྲ་ཊ་ཏྲ་ཊ་ཧོཿ། ཁྱི་གདོང་མའི་འོ། །སྭཱ་ཧཱ། ཞེས་བྱ་བ་ནི་ཐམས་ཅད་དུའོ། །འདི་རྣམས་ནི་དཔལ་ཧེ་རུ་ཀ་འཁོར་དང་བཅས་པའི་འོ། །ཨོྃ་ཨྃ་སྭཱ་ཧཱ། བདག་མེད་མའི་འོ། །ཨོྃ་ཨཱྃ་སྭཱ་ཧཱ།

རྡོ་རྗེ་མའི་འོ། །ཨོྃ་ཨིཾ་སྭཱ་ཧཱ། དཀར་མོའིའོ། །ཨཱོྃ་ཨཱིཾ་སྭཱ་ཧཱ། ཆུའི་རྣལ་འབྱོར་མའི་འོ། །ཨོྃ་ཨཱུྃ་སྭཱ་ཧཱ། རྡོ་རྗེ་མཁའ་འགྲོ་མའིའོ། །ཨོྃ་ཨཱུྃ་སྭཱ་ཧཱ། པུཀྐ་སཱིའི་འོ། །ཨོྃ་རྀ་སྭཱ་ཧཱ། རི་ཁྲོད་མའིའོ། །ཨོྃ་རཱྀཾ་སྭཱ་ཧཱ། གདོལ་པ་མོའིའོ། །ཨོྃ་ལྀ་སྭཱ་ཧཱ། །གཡུང་
མོའིའོ། །ཨོྃ་ལཱྀྃ་སྭཱ་ཧཱ། དཀར་མོའིའོ། །ཨོྃ་ཨེྃ་སྭཱ་ཧཱ། །ཆོམ་རྐུན་མའིའོ། །ཨོྃ་ཨཻྃ་སྭཱ་ཧཱ། །རོ་ལངས་མའིའོ། །ཨོྃ་ཨོྃ་སྭཱ་ཧཱ། གྙ་སྨ་རཱིའིའོ། །ཨོྃ་ཨཽྃ་སྭཱ་ཧཱ། ས་སྤྱོད་མའིའོ། །ཨོྃ་ཨྃ་སྭཱ་ཧཱ། མཁའ་སྤྱོད་མའིའོ། །འདི་རྣམས་ནི་བདག་མེད་མ་འཁོར་
དང་བཅས་པའིའོ། ཨོྃ་དེ་བ་པི་ཙུ་བཛྲ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཀྱེའི་རྡོ་རྗེའི་སྙིང་པོའི། །ཨོྃ་ཏྲཻ་ལོ་ཀྱཱ་ཀྵེ་པ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཕྱག་གཉིས་པའིའོ། །ཨོྃ་ཛྭ་ལ་ཛྭ་ལ་བྷྱོ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཕྱག་བཞི་པའིའོ། །ཨོཾ་ཀི་ཊི་ཀི་ཊི་བཛྲ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། །ཕྱག་དྲུག་པའི་འོ། ཨོྃ་
ན་མོ་བྷ་ག་ཝ་ཏེ་བཱི་རེ་ཤཱ་ཡ་ཧཱུྃ་ཧཱུྃ་ཕཊ། ཨོྃ་མ་ཧཱ་ཀལྤཱགྣི་སནྣི་བྷཱ་ཡ་ཧཱུྃ་ཧཱུྃ་ཕཊ། ཨོྃ་ཛ་ཊཱ་མ་ཀུ་ཊཱོཏྐ་ཊཱ་ཡ་ཧཱུྃ་ཧཱུྃ་ཕཊ། ཨོྃ་དྃ་ཥྚྲཱ་ཀ་རཱ་ལོ་གྲ་བྷཱི་ཥ་ཎ་མུ་ཁཱ་ཡ་ཧཱུྃ་ཧཱུྃ་ཕཊ། ཨོྃ་ས་ཧ་སྲ་བྷུ་ཛ་བྷཱ་སུ་རཱ་ཡ་ཧཱུྃ་ཧཱུྃ་ཕཊ། ཨོྃ་པ་ར་ཤུ་པཱ་ཤོ་དྱ་ཏ་ཤཱུ་ལ་ཁ་ཊྭཱྃ་ག་དྷཱ་རི་ཎེ་ཧཱུྃ་ཧཱུྃ་ཕཊ། ཨོྃ་བྱཱ་གྷྲ་ཛི་
ནཱམྦྷ་ར་དྷ་རཱ་ཡ་ཧཱུྃ་ཧཱུྃ་ཕཊ། ཨོྃ་མ་ཧཱ་དྷཱུ་མྲཱ་ནྡྷ་ཀཱ་ར་ཝ་པུ་ཥཱ་ཡ་ཧཱུྃ་ཧཱུྃ་ཕཊ། ཕྱག་འབུམ་པའི་འོ། །ཨོྃ་ཤྲཱི་ཧེ་ཧེ་རུ་རུ་ཀྃ་བཛྲ་ཌཱ་ཀི་ནཱི་ཛཱ་ལ་སྃ་བ་རཾ་ཧཱུྃ་ཧཱུྃ་ཕཊ་སྭཱ་ཧཱ། དུར་ཁྲོད་ལ་དགྱེས་པ་ཕྱག་གཉིས་པའིའོ། །ཨོྃ་ཤྲཱི་ཧེ་རུ་ཀ་བཛྲ་སརྦྦ་དུཥྚ་ས་མ་ཡ་མུ་ད་པྲ་བྷྃ་ཛ་ཀ་ཧཱུྃ་ཧཱུྃ་
ཕཊ་སྭཱ་ཧཱ། དྲག་པོའི་གདན་ཅན་གྱི་ཕྱག་གཉིས་པའི་འོ། །ཨོྃ་ཧྲཱིཿཧ་ཧ་ཧཱུྃ་ཧཱུྃ་ཕཊ། རིག་པའི་རྒྱལ་པོའིའོ། །འདི་རྣམས་ནི་ཧེ་རུ་ཀ་འབྱུང་བའི་སྔགས་སོ། །ཨོྃ་བཛྲ་བཻ་རོ་ཙ་ནཱི་ཡེ་བུདྡྷ་ཌཱ་ཀི་ནཱི་ཡེ་སྭཱ་ཧཱ། ཡི་གེ་བཅུ་དྲུག་པོ་འདི་རྣམས་ནི། མཁའ་འགྲོ་མའི་རྩ་བའི་སྔགས་
སོ། །ཨོྃ་མཱ་རཱི་ཙྱཻ་སྭཱ་ཧཱ། འོད་ཟེར་ཅན་གྱི་སྙིང་པོའོ། །ཨོྃ་མཱ་རཱི་ཙྱཻ་བཏྟཱ་ལི་བ་དཱ་ལི་བ་དཱ་ལི། བ་རཱ་ཧ་མུ་ཁི་སྭཱ་ཧཱ། ཉེ་བའི་སྙིང་པོའི་སྔགས་སོ། །ཨོྃ་པི་ཤཱ་ཙི་པརྞྞ་ཤ་བ་རི་སརྦྦ་མཱ་རི་པྲ་ཤ་མ་ནི་ཧཱུྃ་ཧཱུྃ་མ་ཧོ་ད་རི་ཕཊ། རི་ཁྲོད་མ་ཤིང་ལོ་ཅན་གྱིའོ། །ཨོྃ་བཛྲཱྃ་ཀུ་ཤ་ཀཪྵ་ཡ་

ཧུྃ། ཨོཾ་བཛྲ་པཱ་ཤ་བནྡྷ་ཧཱུྃ། ཨོྃ་བཛྲ་ཀཱ་ལི་ཏརྫ་ཡ་ཧཱུྃ། ཨོྃ་བཛྲ་མུཥྚི་གྲྀཧྞ་ཧཱུྃ། ཨོྃ་བཛྲ་ཀཱི་ལི་ཀཱི་ལ་ཡ་ཧཱུྃ། ཨོྃ་བཛྲ་མུངྒ་རཱ་ཀོ་ཊ་ཡ་ཧཱུྃ། སྔགས་འདི་རྣམས་ནི་ཤིན་ཏུ་གྲུབ་པ་སྟེ། དོན་ཡོད་པའི་དངོས་གྲུབ་སྒྲུབ་པའོ། །ཨོཾ་བཛྲ་ཌཱ་ཀི་ནི་ཨི་མྃ། བ་
ལིཾ་གྲྀཧྞ་གྲྀཧྞ་ཧཱུྃ་ཕཊ་སྭཱ་ཧཱ། ཨོྃ་ཛཿཧཱུྃ་བྃ་ཧོཿ། ས་མ་ཡ་སྟཱྃ། དྲྀ་ཤྱ་ཧོཿ། །དེ་ལྟར་ལན་གསུམ་བཞི་ལྔར་བཟླས་ནས་གཏོར་མ་སྦྱིན་པར་བྱའོ། །རྡོ་རྗེ་མཁའ་འགྲོ་མའི་གཏོར་མའི་སྔགས་སོ། །ཨོྃ་ཁ་ཁ་ཁཱ་ཧི་ཁ་ཧི། སརྦ་ཡཀྵ་རཱཀྵ་ས་བྷཱུ་ཏ་པྲེ་ཏ་པི་ཤཱ་ཙོནྨཱ་དཱ་པ་སྨཱ་ར་
ཌཱ་ཀ་ཌཱ་ཀི་ནྱ་ད་ཡ་ཨི་མྃ་བ་ལིཾ་གྲྀཧྞ་ཏ་ས་མ་ཡ་རཀྵནྟུ་སརྦྦ་སིདྡྷི་མྨེ་པྲ་ཡཙྪནྟུ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། འབྱུང་པོ་ཐམས་ཅད་ཀྱི་གཏོར་མའི་སྔགས་སོ། །ཨོྃ་ཀི་ཊི་ཀི་ཊི་བཛྲ་ཧཱུྃ། བྱིན་གྱིས་བརླབ་པའི་སྔགས་སོ། །ཨོྃ་ཨཱཿཧཱུྃ་ཤོདྷ་ཡ་ཤོ་དྷ་ཡ་རཀྵ་རཀྵ་ཧཱུྃ་ཕཊ། ས་སྦྱང་
བའི་སྔགས་སོ། །ཨོཾ་བཛྲ་ཌཱ་ཀི་ནཱི་ཧཱུྃ་ཕཊ་སྭཱ་ཧཱ། ཨཽཾ་གཽ་རཱི་ཧཱུྃ་ཕཊ་སྭཱ་ཧཱ། ཨོཾ་ཙཎྜ་ལཱི་ཧཱུྃ་ཕཊ་སྭཱ་ཧཱ། ཨོཾ་བེཏྟ་ལཱི་ཧཱུྃ་ཕཊ་སྭཱ་ཧཱ། སྔགས་པས་ཆོ་གས་བསྣུན་པ་དང་། གསད་པ་དང་། དགུག་པ་དང་། གར་བྱེད་པའོ། །ཨོཾ་བཛྲ་སི་ཧི་ནི་ཨཱྃ་སྭཱ་ཧཱ། ཨོཾ་བཛྲ་བྱཱ་གྷྲི་
ཨཱིཾ་སྭཱ་ཧཱ། ཨོཾ་བཛྲ་ཛྃ་བུ་ཀེ་ཨཱུྃ་སྭཱ་ཧཱ། ཨོཾ་བཛྲ་ཨུ་ལཱུ་ཀཱ་སྱ་རཱྀ་སྭཱ་ཧཱ། ཨོཾ་བཛྲ་ར་ཛེ་ནྡྲིཾ་ལྀ་སྭཱ་ཧཱ། ཨོཾ་བཛྲ་དཱིཔྟི་ཏེ་ཛེ་ཨོཾ་སྭཱ་ཧཱ། ཨོཾ་བཛྲ་ཙཱུ་ཥི་ཎི་ཙཱུ་ཥ་ཡ་སརྦྦ་ས་ཏཱྃ་ཨཽཾ་སྭཱ་ཧཱ། ཨོཾ་བཛྲ་ཀ་མྦོ་ཛེ་ཨཿསྭཱ་ཧཱ། ཨོཾ་ཧྲཱིཿསྭཱ་ཧཱ། དབུས་སུ་སྟེ། ཡེ་ཤེས་ཀྱི་མཁའ་འགྲོ་
མ་འཁོར་དང་བཅས་པའོ། །ཨོཾ་ཛཿཧཱུྃ་བྃ་ཧོཿཁྃ་རྃ། མཆོད་ཡོན་གྱི་སྔགས་སོ། །ཨོཾ་ཁྃ་ནི་རཱི་ཧཱུྃ་ཁྃ། ཞབས་བསིལ་གྱི་སྔགས་སོ། །ཨོཾ་དྷྭྃ་དྷྭྃ། དྲི་དང་བཤོས་གཙང་ལ་སོགས་པའི་སྔགས་སོ། །ཨོཾ་ཧ་ཧོ་ཧྲཱིཿསྭཱ་ཧཱ། ཕྱག་རྒྱ་ཆེན་པོའི་སྔགས་སོ། །ཨོཾ་ཀུ་
རུ་ཀུ་རུ་ས་མ་ཡཱ་དྷི་པ་ཏི་ཧཱུྃ་ཛཿསྭཱ་ཧཱ། དགུག་པའི་སྔགས་སོ། །ཧ་ཧི་ཧུ་ཧེ་ཧོ་ཧྃ། ཡན་ལག་དྲུག་ལ་དགོད་པའི་སྔགས་སོ། །དཔལ་ཡང་དག་པར་སྦྱོར་བའི་རྒྱུད་ལས་བྱུང་བ་བྱ་བ་ཐམས་ཅད་ཡང་དག་པར་འབྱུང་བའི་བརྟག་པའི་རྒྱལ་པོ་སྟེ་བརྒྱད་པའོ།། །།

དེ་ནས་བྱང་ཆུབ་སེམས་དཔའ་ཆེན་པོ་རྡོ་རྗེ་སྙིང་པོ་ལ་སོགས་པ་དང་། དེ་བཞིན་གཤེགས་པ་ཐམས་ཅད་ཀྱིས། བཅོམ་ལྡན་འདས་ལ་མཆོད་ནས། ཕྱག་འཚལ་ཏེ་འདི་སྐད་ཅེས་གསོལ་ཏོ། །མྱ་ངན་འདས་པའི་གནས་རྒྱས་པ། །བཅོམ་ལྡན་
ལྷ་ཡིས་བཤད་དུ་གསོལ། །གང་དུ་གནས་སུ་བཞུགས་གྱུར་པས། །རྒྱུ་དང་མི་རྒྱུ་བཅས་པར་རོལ། །བཅོམ་ལྡན་འདས་ཀྱིས་བཀའ་སྩལ་པ། །ཅི་རིགས་བརྟགས་པས་སེམས་འཛིན་པ། །ང་ཡིས་བཤད་པར་བྱ་ཡིས་ཉོན། །གང་ཞིག་དེ་སྐད་སྔར་གསུངས་
པ། །ཐམས་ཅད་བདག་ཉིད་རྟག་ཏུ་བཞུགས། །དཀྱིལ་འཁོར་ལུས་ཞེས་བརྗོད་པར་བྱ། །སྒོ་བཞི་ཇི་སྐད་གསུངས་པའོ། །ལྟེ་བའི་དབུས་གནས་པད་ཆེན་པོ། །ཀུན་མཁྱེན་ཡེ་ཤེས་མངོན་པར་གྲགས། །གནས་དེར་གནས་པའི་དཔའ་བོ་ནི། །དྲི་མེད་
དྲི་མ་རྣམ་པར་སྤངས། །ལུས་ལ་གནས་ཤིང་ནག་ནོག་མེད། །ལུས་ཅན་ཀུན་ལ་རྣམ་པར་རོལ། །སངས་རྒྱས་ཀུན་གྱི་རྫུ་འཕྲུལ་ཆེ། །རྣམ་པར་མཛད་ཅིང་རབ་ཏུ་བསྒྱུར། །ཁ་ཅིག་ཏུ་ནི་བྱང་ཆུབ་ཆེན་པོའི་སེམས། །ཁ་ཅིག་ཏུ་ནི་ཇི་ལྟར་སྤྱོད་རྗེས་འབྲང་། །
ཁ་ཅིག་ཏུ་ནི་དགའ་ལྡན་ལྷ་རྣམས་ལགས། །ཁ་ཅིག་ཏུ་ནི་འབབ་པར་གྱུར་པ་དང་། །ཁ་ཅིག་ཏུ་ནི་བལྟམས་པ་རྣམ་དག་ཅིང་། །ཁ་ཅིག་ཏུ་ནི་ཁབ་ནས་གསལ་བྱུང་དང་། །ཁ་ཅིག་ཏུ་ནི་བྱང་ཆུབ་ཆེན་པོར་མཆོད། །ཁ་ཅིག་ཏུ་ནི་བདུད་ལས་མཆོག་ཏུ་རྒྱལ། །
ཁ་ཅིག་ཏུ་ནི་མངོན་པར་རྫོགས་བྱང་ཆུབ། །ཁ་ཅིག་ཏུ་ནི་འཁོར་ལོ་རབ་ཏུ་བསྐོར། །ཁ་ཅིག་ཏུ་ནི་ཕས་ཀྱི་རྒོལ་བ་དག །ལྷན་ཅིག་ཆོས་ཀྱིས་ཚར་ནི་གཅོད་པ་པོ། །ཁ་ཅིག་ཏུ་ནི་དངོས་གྲུབ་ཀུན་དབང་ཕྱུག །ཁ་ཅིག་དཔལ་ལྡན་འཇིག་རྟེན་གསུམ་ལས་
རྒྱལ། །ཁ་ཅིག་ཏུ་ནི་དཔག་བསམ་ཤིང་མཆོག་ཀུན། །དངོས་གྲུབ་དབང་ཕྱུག་བླ་ན་མེད་པ་ཉིད། །དེ་ལྟར་ལ་སོགས་མཐའ་ཡས་མཆོག །སངས་རྒྱས་ཀུན་བདག་སྡོམ་པས་ནི། །དངོས་དང་དངོས་མེད་རྣམ་པར་གྲོལ། །དེ་ཕྱིར་གཏི་མུག་ཡོངས་སུ་སྤངས། །

ཨཱ་ལི་བུང་བ་ཞེས་བྱར་བརྗོད། །བུང་བ་རྡོ་རྗེ་འཇིགས་བྱེད་ཉིད། །ཨཱ་ལི་ནམ་མཁའི་མཐར་གཏུགས་པར། །ཆོས་ཀྱི་དབྱིངས་ཀྱི་རང་བཞིན་ལས། །རྒྱུ་དང་མི་རྒྱུ་གསང་བློ་འཛིན། །ཕུང་པོ་ཁམས་དང་སྐྱེ་མཆེད་དང་། །དབང་པོ་ཀུན་གྱི་བདུད་རྩི་
དང་། །ལས་རྣམས་ཐམས་ཅད་སྐྱེ་བ་ཉིད། །དེ་ཕྱིར་ཐམས་ཅད་བཀུག་ནས་ནི། །རྩ་བའི་དབུས་སུ་ཐིམ་པར་བྱ། །འཇིགས་བྱེད་རྡོ་རྗེ་སྒྲ་ཡིས་ནི། །རྫོགས་པའི་རྣལ་འབྱོར་རྫས་ལས་ནི། །རླུང་དང་མེ་དང་བདུན་པའི་དོན། །རྡོ་རྗེ་ཅན་གྱི་ས་བོན་སྦྱར། །ཐིག་
ལེ་སྒྲ་ཡིས་ཡང་དག་མནན། །ཆར་གྱི་རྒྱུན་ཞེས་བརྗོད་པར་བྱ། །དབྱངས་ཀྱི་དང་པོ་མཆོག་ས་བོན། །དེ་ཡི་དབུས་སུ་གཟུང་བར་བྱ། །ཀཱ་ལི་མེ་ཏོག་ཤེས་པར་བྱ། །མེ་ཏོག་རྡོ་རྗེ་ཅན་གྱི་ལུས། །མ་མོ་ཀུན་གྱི་ས་རྣམས་ཀྱང་། །ཀུན་ལ་འཁོར་བ་བསྐྱེད་
པར་འགྱུར། །ཡེ་ཤེས་ཆུ་བོ་རྒྱ་མཚོ་འདིར། །ཤེས་རབ་ཆུ་སྲིན་དབྱངས་ཀྱི་ཉས། །གཉིས་མེད་འདམ་གྱི་དབུས་སུ་ནི། །ཐབས་ཀྱི་རྣམ་པའི་མྱུ་གུ་ཉིད། །བྃ་དུ་ལྟ་བུར་བྱ་བ་ཉིད། །སྦྲང་རྩི་དང་ནི་བདུད་རྩིའི་གནས། །ཀཱ་ལི་དང་མི་བདུད་རྩི་ཉིད། །
ཆུ་དང་མེ་ཏོག་ནང་དུ་འཁོར། །བདུད་རྩི་ཆུ་ཡི་ཆོ་ག་མཆོག །གཉིས་ལས་ལུས་ནི་སྐྱེ་བར་འགྱུར། །གང་དུ་བདུད་རྩི་དང་ནི་ཆུ། །ལྔ་ཡི་བདག་ཉིད་དུ་ནི་གསུངས། །མེ་ནི་ཚ་བ་ཉིད་ཡིན་ཏེ། །རེག་པས་རླུང་ནི་དུ་བར་ལྟ། །ཆུ་ནི་གཤེར་བའི་དངོས་པོ་སྟེ། །ས་ནི་
གཟུགས་སུ་བལྟ་བར་བྱ། །ཡེ་ཤེས་རྡོ་རྗེ་བྱིན་བརླབས་པས། །རྣམ་པ་ལྔར་ནི་རབ་ཏུ་བསྐྱེད། །ཡང་ནི་ཆུ་ནི་ཀུན་གྱི་དབྱིབས། །དེ་བཞིན་མེ་ཡིས་ཟད་པར་བྱེད། །དེ་བཞིན་རླུང་ནི་རྟག་པ་ཡི། །ས་ནི་དབང་པོའི་གཟུགས་ཅན་མ། །ཧཱུྃ་གི་གླུ་ཡི་རྣམ་པ་ཡིས། །རྣལ་
འབྱོར་མ་ཀུན་མཉེས་པར་བྱེད། །རྡོ་རྗེ་ཡན་ལག་དགྱེས་པའི་མཐུས། །སྤྱན་གྱིས་གཟིགས་པར་མཛད་པ་ཡི། །ཡི་གེའི་དངོས་པོ་རང་བཞིན་ནི། །སྟོང་པར་རོལ་པ་ཉིད་ཀྱིས་ནི། །དངོས་དང་དངོས་མེད་རྣམ་སྤངས་པས། །སྙིང་པོ་ཡང་ནི་འཚལ་བ་ཉིད། །མ་ལུས་པ་

ཡི་བསམ་པ་དང་། །ཡི་གེ་ཐམས་ཅད་གཞོམ་པར་གྱིས། །གཉིས་གཉིས་འཁྱུད་པའི་རྣལ་འབྱོར་པས། །ཆུ་རྣམས་ཀྱི་ནི་དགོས་པ་ཅན། །གཉིས་མེད་ཆོས་ནི་ཐོབ་པ་ནི། །ཐར་པ་ཡང་ནི་ཐོབ་པ་ཉིད། །འཁོར་བའི་བདེ་བས་རྨོངས་པ་ལ། །གྲོལ་བ་ཡང་ནི་སྤངས་
པ་ཉིད། །ཐམས་ཅད་སྟོང་པའི་རང་བཞིན་ལ། །རྣལ་འབྱོར་མ་ཡི་སྔགས་ཀྱིས་རོལ། །རྣལ་འབྱོར་མ་ནི་ལྔ་པོ་རྣམས། །སངས་རྒྱས་དེ་ཉིད་མཚོན་པར་བྱ། །སྒྱུ་མར་གནས་པ་དུ་མ་ཀུན། །སྣ་ཚོགས་གཟུགས་ཀྱིས་སེམས་ཅན་སྨིན། །རྡོ་རྗེ་བརྐྱང་བའི་དགོས་པ་ནི། །
ཆོས་ཀྱི་རྨོངས་པ་བྲལ་བར་བྱེད། །རྣལ་འབྱོར་མ་ཡི་ཐར་པ་ཅན། །སྙིང་པོ་ཆོས་ལ་ཕྱག་འཚོལ་ཅིག །རིགས་ཀྱི་བུ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་གླུ་འདིས་རྒྱལ་བ་ཐམས་ཅད་ཀྱིས་བདག་ཉིད་ལས་སྐྱེ་བར་འགྱུར་བ་ལ་འདི་སྐད་ཅེས་
བཀའ་སྩལ་ཏོ། །དགུ་པ་ལས་དེ་བཞིན་གཤེགས་པ་ཐམས་ཅད་ཀྱི་སྐྱེད་པ་ཞེས་བྱ་བ་སྟེ་རབ་ཏུ་བྱེད་པ་དང་པོའོ།། །།གཏོར་མའི་ལས་ཆོ་ག་ཇི་ལྟ་བར། །རྡོ་རྗེ་གཙོ་བོ་རྒྱལ་པོ་ཉོན། །ཁྲུ་གང་ཙམ་གྱི་ཚད་དུ་ནི། །དམར་པོའི་དྲི་ཡིས་དཀྱིལ་
འཁོར་བྱ། །དཀར་པོས་ཕྱི་རོལ་གྲུ་གསུམ་བྱ། །མཆོད་ཡོན་མཆོད་སོགས་རིམ་གྲོ་དང་། །ཉ་དང་ཤ་སོགས་བཟའ་བ་དང་། །ཆང་དང་མྱོས་བྱེད་སྤྲོ་བ་ཡང་། །གཡོན་དུ་ཉེ་བར་དགོས་པ་ཀུན། །གཡས་པ་དག་ཏུ་ཆུ་ཡི་སྣོད། །སྔོན་དུ་མཆོད་ཡོན་དག་གི་
སྣོད། །རྫས་ནི་འདི་དག་ཐམས་ཅད་རྣམས། །བདུད་རྩི་ལྔ་ཡིས་སྦྱང་བར་བྱ། །རྡོ་རྗེ་སེམས་དཔའི་ཏིང་འཛིན་ནམ། །ཡང་ན་ཧེ་རུ་ཀ་དཔལ་བརྩོན། །ལས་ཀྱི་ཆོ་ག་མཐོང་བ་ཡིས། །སྔགས་དང་ཕྱག་རྒྱས་དགུག་པར་བྱ། །མེ་ཏོག་དམར་པོས་བདུག་པ་
སོགས། །དྲི་ལ་སོགས་པ་དབུལ་བར་བྱ། །ཨོཾ་གྱིས་མཚན་པའི་པདྨའི་སྣོད། །ལྕེ་ཧཱུྃ་དེ་ཉིད་ཁྱད་པར་ལས། །ཡེ་ཤེས་ལྕགས་ཀྱུའི་རབ་དབྱེ་བས། །ཡིད་ཀྱིས་ཐམས་ཅད་དགུག་པའོ། །ཀྱེ་བཅོམ་ལྡན་འདས་ཡེ་ཤེས་ཀྱི་ལྕགས་ཀྱུ་དུར་གསུངས། དེ་གང་

ལགས། བཅོམ་ལྡན་འདས་ཀྱིས་བཀའ་སྩལ་པ། །དང་པོ་སྐྱེ་དགུའི་བདག་པོར་བརྗོད། །དེ་བཞིན་གཉིས་པར་སྒྲོལ་མ་ཉིད། །གསུམ་པ་ལ་ནི་རབ་མཆོག་བརྗོད། །བཞི་པ་ལ་ནི་མང་པོ་སྐྱེས། །ལྔ་པ་ལ་ནི་སྟོབས་ཞེས་བྱ། །རིགས་ལྔ་
རྣམས་ཀྱི་སྔགས་འདི་དག །ཡེ་ཤེས་ལྔ་ཡིས་རབ་དབྱེ་བས། །ཡེ་ཤེས་ཆེན་པོ་ལྔ་པོ་འདི། །ཁྱོད་ལ་ཕན་པའི་བསམས་པས་བཤད། །ཡེ་ཤེས་ལྕགས་ཀྱུའི་རབ་དབྱེ་བས། །ལས་རྣམས་ཀུན་ལ་སྦྱར་བར་བྱ། །གལ་ཏེ་ལས་ལ་ཕན་འདོད་པས། །རྣལ་འབྱོར་
མ་ཀུན་ཚིམ་པར་བྱ། །འདོད་ལ་དགའ་བར་མི་བྱ་ཞིང་། །ལོངས་སྤྱོད་ལ་ནི་སྦྱོར་མི་བྱ། །སེམས་ཅན་དོན་རྒྱུ་རྣལ་འབྱོར་པས། །མཆོད་པ་ཐམས་ཅད་ཡང་དག་བརྟག །དབྱངས་ཀྱི་བཅུ་གསུམ་ལས་བྱུང་བ། །གང་ཞིང་ཟླ་བ་དེ་རབ་གྲགས། །དེ་ཡི་དབུས་
སུ་ས་བོན་གྱི། །ཨཱ་ལི་ཀཱ་ལི་མཉམ་སྦྱར་བས། །ལྷ་ཀུན་དེ་ནས་ཚིམ་པར་བྱ། །འབུད་པ་སྦར་བ་ཉིད་དང་ནི། །ཁྱད་པར་དུ་ནི་བསྐོལ་བ་ཉིད། །ཤེལ་གྱི་གཟུགས་ཀྱིས་བསྐྱེད་བྱ་ཞིང་། །དེ་ཕྱིར་ཐམས་ཅད་བརྟག་པར་བྱ། །དེ་ཡི་དབུས་ནས་བླངས་ནས་
ནི། །དེ་ནས་བདུད་རྩི་མྱང་བར་བྱ། །ལྷག་མ་ལ་སོགས་དངོས་པོ་ཀུན། །ཕྱི་རོལ་དཀྱིལ་འཁོར་ཚིམ་པར་བྱ། །གཡོན་པའི་ཆ་ཡི་སྣོད་དང་ནི། །གཡས་པའི་ཁྲོ་བོ་བསྟན་པར་བྱ། །རྐང་པས་མནན་ཅིང་སྟེང་དུ་བལྟ། །སྤྱི་བོར་ཕེྃ་གྱི་རྣམ་པ་འབྱུང་། །ཟླ་བ་མར་
ངོའི་བཅུ་བཞི་དང་། །ཁྱད་པར་དུ་ནི་བརྒྱད་པ་དང་། །ཡར་གྱི་ངོ་ཡི་བཅུ་པ་ལ། །མཆོད་པ་མཆོད་པའི་བདག་ཉིད་འགྱུར། །ཨོཾ་ཤིང་གཅིག་དང་ནི་དུར་ཁྲོད་དང་། །རི་བོ་དང་ནི་འབབ་ཆུ་དང་། །ཁྱིམ་དང་གྲོང་གི་ངོས་དག་དང་། །ཞིང་དང་གྲོང་ནི་སྟོང་པ་དང་། །
སེམས་ཅན་སྣོད་དང་ཐང་སྟོང་དང་། །ཆུ་ལ་ཡང་ནི་ཁྱད་པར་དུའོ། །དྲག་པོ་ནག་པོ་དྲག་ཆེན་པོ། །ལྷ་མོ་ཡང་ནི་མཉམ་པར་གནས། །ནག་པོ་ཐོད་པ་ཅན་འཇིགས་རུང་། །དགའ་ལས་འདས་དང་ལོག་འདྲེན་རྣམས། །རྒན་བྱེད་མ་དང་དྲག་མོ་དང་། །གདོལ་པ་

མོ་དང་འཇིགས་པའི་གཟུགས། །ལྷ་མོ་དཀའ་ཟློག་ཐམས་ཅད་དུ། །རྒྱལ་མ་དང་ནི་རྣམ་རྒྱལ་ཉིད། །མི་ཐུབ་མ་དང་གཞན་མི་ཐུབ། །ནག་མོ་བཟང་མོ་ནག་མོ་ཆེ། །རྩེ་མོ་ནག་མོ་རྣལ་འབྱོར་མོ། །དབང་མོ་ཟླ་མོ་འཇིགས་པ་མ། །གདུག་པ་ཅན་དང་ལམ་པ་ཀཱི། །
སུམ་ཅུ་རྩ་གསུམ་དབང་ཕྱུག་མ། །གཡོ་ལྡན་མར་མེ་འཇིབ་བྱེད་མ། །གྲོང་དུ་གནས་པའི་རྣལ་འབྱོར་མ། །འཇིགས་པའི་གཟུགས་དང་གཟུགས་ཆེན་མ། །མཆེ་བ་གཟུགས་ངན་གཙིགས་པ་ཉིད། །ཐོད་པའི་ཕྲེང་བ་འཕྱང་བ་ཅན། །མཐུ་ཆེན་ལག་ན་ཁ་ཊྭ་ག །
ལག་ན་དགྲ་སྟ་རལ་གྲི་དང་། །རྡོ་རྗེ་ལག་མ་གཞུ་ཡི་ལག །མཁའ་འགྲོ་མ་ཡི་དེ་ཉིད་ཆེ། །ལས་རྣམས་རྗེས་སུ་སྒྲུབ་པར་བྱེད། །རྣལ་འབྱོར་དཀྱིལ་འཁོར་རྒྱལ་མོ་ཆེ། །དེ་བཞིན་རྡོ་རྗེའི་དབང་ཕྱུག་གཙོ། །དེ་བཞིན་གཤེགས་པའི་སྐུ་ཆེན་ལས། །སྐྱོན་མེད་
དབང་ཕྱུག་འབྱིན་པ་མོ། །རྡོ་རྗེ་དབང་ཕྱུག་བཀའ་ལུང་འདིས། །ཐམས་ཅད་ལས་ནི་ཐམས་ཅད་དགུག །ཨོཾ་ཀ་ཀ་ཀ་ཌྷྱ་ན་བ་བ་བནྡྷ་ན་ཁ་ཁ་ཁཱ་ད་ན་སརྦྦ་དུཥྚཱ་ནཱྃ་ཧ་ན་ཧ་ན། གྷ་གྷ་གྷཱ་ཏ་ཡ་གྷཱ་ཏ་ཡ་ཨ་མུ་ཀ་སྱ་ཤཱནྟཱིཾ་ཀུ་རུ་ཧཱུྃ་ཧཱུྃ་ཕཊ་ཕཊ་ཛཿསྭཱ་ཧཱ། བདུད་རྩིའི་བསམ་
གཏན་དམིགས་ནས་ནི། །བདུད་རྩིས་ཁ་ནི་དགང་བར་བྱ། །ལས་སོགས་བསམས་ནས་རྣལ་འབྱོར་དང་། །རྣལ་འབྱོར་མ་ནི་བསྒོམ་པར་བྱ། །ལས་རྣམས་ཐམས་ཅད་རབ་འགྲུབ་འགྱུར། །ཧས་ནི་ཁ་དོག་འཕྲོག་པར་བྱེད། །ཧོས་ནི་དྲི་ནི་འཇིག་པར་བྱེད། །
ཧྲཱིཿནི་བརྩོན་འགྲུས་འཇོམས་པར་ནི། །རིམ་པ་འདི་ནི་བརྗོད་པར་བྱ། །རྣམ་གསུམ་ལན་གསུམ་བརྗོད་པས་ནི། གསུམ་གྱིས་ལྷ་རྣམས་ཚིམ་པར་བྱ། །པདྨའི་དབང་ཕྱུག་གཟུགས་གསེར་མདོག །གཟི་བརྗིད་དྲི་ཆུ་རྣམ་སྣང་དང་། །རྡོ་རྗེའི་དབང་ཕྱུག་མྱང་བ་
ནི། །ལག་ན་རྡོ་རྗེ་ལྷ་གསུམ་དག །རྣམ་པ་གསུམ་དུ་ཤེས་པར་བྱ། །འདིར་ནི་ཆོས་རྣམས་བཟང་པོར་ལྟོས། །འདུ་བ་རྣམས་ལ་ཐེ་ཚོམ་མེད། །བྲམ་ཟེ་ཁྱི་དང་གདོལ་པ་རྣམས། །རང་བཞིན་གཅིག་པ་ཉིད་དུ་ཟོ། །ཚིགས་བཅད་འདིས་ནི་དེ་ནས་སྦྱིན། །རོལ་བཅས་

མཆོག་ཏུ་རྗེས་བསྐོར་བས། །གཡོན་དང་གཡས་པའི་ལག་པ་ཡིས། །འདོད་པས་བསྐོར་བར་བྱ་བའོ། །རང་འདོད་ལྷ་ཡི་རྣལ་འབྱོར་གྱིས། །ཇི་ལྟར་རབ་ཏུ་བསྒྱུར་བས་འཇུག །བདེ་གཤེགས་ཆོས་ནི་རིན་ཐང་མེད། །འདོད་ཆགས་དྲི་མ་རྣམ་པར་
བསལ། །གཟུང་དང་འཛིན་པ་རྣམ་པར་སྤངས། །གུས་པས་དེ་ལ་ཕྱག་འཚོལ་ཅིག །ཚིགས་བཅད་འདིས་ནི་བླང་བར་བྱ། །ཡང་དག་སྤྱོད་པའི་དེ་ཉིད་འདི། །གཙང་སྦྲ་ཀུན་དུ་རྣལ་འབྱོར་པའི། །ཇི་ལྟར་བདེ་བ་ཞེས་བྱར་བརྗོད། །ཡན་ལག་ཡན་ལག་བདེ་གསོལ་
འདེབས། །གཉིས་གཉིས་འཁྱུད་པའི་སྦྱོར་བ་ཡི། །སྒྱུ་མ་ཡིས་ནི་རྣམ་པར་བརྒྱན། །དངོས་པོ་རྣམ་གྲོལ་ཕྱག་འཚོལ་ཅིག །རྡོ་རྗེ་དྲིལ་བུའི་སྒྲ་རྣམས་ཀྱིས། །ཅི་འདོད་པ་ཡི་བཀྲ་ཤིས་གླུས། །ཧཱུྃ་ཧཱུྃ་ཧཱུྃ། རྡོ་རྗེ་ཐལ་མོ་སྦྱར་བྱས་ནས། །སྙིང་ག་རུ་ནི་གཟུང་
བར་བྱ། །དེ་ནས་སེམས་ཅན་ཀུན་སོགས་ལ། །སྨོན་ལམ་རྣམས་ནི་གདབ་བྱ་བ། །སེམས་ཅན་ཐམས་ཅད་བདེ་གྱུར་ཅིག །སེམས་ཅན་ཐམས་ཅད་སྐྱོན་མེད་པར། །གང་གི་ལམ་གྱིས་འགྲོ་འགྱུར་བ། །དེ་ནི་སངས་རྒྱས་ཉིད་ཐོབ་གྱུར། །མ་བསྒྲལ་བ་
དག་བསྒྲལ་བ་བགྱི། །མ་གྲོལ་བ་དག་བདག་གིས་དགྲོལ། །རྣལ་འབྱོར་བསྟན་བཅོས་བྱ་བའི་དངོས། །ད་ལྟ་རུ་ནི་ཡང་དག་བརྟགས། །རྡོ་རྗེ་ཁུ་ཚུར་དམ་བཅིངས་ནས། །གཡོན་པ་སྙིང་གར་གཞག་པར་བྱ། །ལག་པ་གཡས་པ་བརྐྱང་ནས་ནི