Kinh tạng Tây Tạng (Kangyur Đại Học) — 079_རྒྱུད་འབུམ།_ག

་མངོན་པར་བསྟོད་དོ།། །།
རྣལ་འབྱོར་མ་བཞིའི་ཁ་སྦྱོར་ཞེས་བྱ་བ་རྒྱུད་ཀྱི་རྒྱལ་པོ་ཆེན་པོ་རྫོགས་སོ།། །།དཔལ་ཨོཊྜྻཱན་ནས་ངེས་པར་འབྱུང་བའི་རྣལ་འབྱོར་མའི་རྒྱུད་ཆེན་པོ་སྟོང་ཕྲག་བཅུ་གཉིས་པ་ལས་འཇིག་རྟེན་པ་དང་འཇིག་རྟེན་ལས་འདས་པའི་རྒྱལ་པོ་ཆེན་པོ་དཔལ་ཨིནྡྲ་བྷཱུ་ཏིའི་ཞབས་ཀྱིས་
བཀོལ་ཅིང་གསལ་བར་མཛད་པའོ། །བོད་ཀྱི་ལོཙྪ་བ་ལ་ཆིངས་ཡོན་ཏན་འབར་གྱིས་བསྒྱུར་ཏེ། །སླད་ཀྱིས་དེ་ཉིད་ཀྱི་ཚེ་པཎྜི་ཏ་གཉིས་ལ་ཡང་གཏུགས་ཏེ་གཏན་ལ་ཕབ་པ།། ༄༅༅། །རྒྱ་གར་སྐད་དུ།
ཨཱ་ཁྱཱ་ཏ་ཏནྟྲོཏྟ་ར་བཛྲ་བཱ་ཧྱ་བྷི་དྷ་ནཱ་ད་བཱ་རཱ་ཧྱ་བྷི་བོ་དྷ་ནཾ་ནཱ་མ། བོད་སྐད་དུ། ཕག་མོ་མངོན་པར་བརྗོད་པ་བཤད་པའི་རྒྱུད་ཕྱི་མ་ལས། ཕག་མོ་མངོན་པར་བྱང་ཆུབ་པ་ཞེས་བྱ་བ། སངས་རྒྱས་ལ་ཕྱག་འཚལ་ལོ། །དེ་ནས་རྣལ་འབྱོར་བཤད་བྱ་བ། །འདོད་པའི་དོན་ཀུན་སྒྲུབ་བྱེད་པའོ། །
ཕྱི་མ་ལས་ཀྱང་ཕྱི་མ་སྟེ། །མཁའ་འགྲོ་མ་ཡི་དྲ་བ་སྡོམ། །ཕག་མོ་ཡི་ནི་གཙོ་མོ་ཡོང་། །རྣལ་འབྱོར་རྣམས་ཀྱི་གྲུབ་སྟེར་མའོ། །རྣལ་འབྱོར་མ་ལུས་རྣམས་ཀྱི་ཡང་། །སྙིང་པོ་རྣལ་འབྱོར་བཏུས་པའོ། །སྒྲུབ་པ་པོ་ལ་ཕན་དོན་ཕྱིར། །བླ་མའི་རྒྱུད་པ་གསལ་བའོ། །ཕྱི་རོལ་རྣམ་

རྟོག་མེད་པ་དང་། །ཀུན་ཏུ་དམ་ཚིག་ཆོས་ཉིད་དང་། །སྤྱོད་དང་དོགས་པ་མེད་པ་དང་། །ཀུན་ཏུ་སེར་སྣ་རྣམས་སྤངས་ཏེ། །ཚེས་གྲངས་དང་ནི་རྒྱུ་སྐར་མེད། །བསྙེན་གནས་ཆོ་ག་གཅོར་མེད་དེ། །དག་དང་མི་དག་གཙང་ཡང་མེད། །ཆུ་ཡི་གཙང་
སྦྲ་བྱ་བ་མེད། །དུས་དང་ཚེས་ལས་རྣམ་པར་གྲོལ། །གཙང་སྦྲའི་སྤྱོད་པ་རྣམ་པར་སྤངས། །རང་རྒྱུད་སྔགས་དང་རྣལ་འབྱོར་ཤེས། །སེམས་ཅན་ཀུན་གྱི་དོན་བརྩོན་པས། །རི་སུལ་ཚང་ཚིང་ཕུག་རྣམས་དང་། །ཆུ་བོའི་འགྲམ་དང་འདུས་པ་དང་། །རྒྱ་མཚོ་ཆེན་པོའི་
འགྲམ་དག་དང་། །ཤིང་གཅིག་ས་དང་ཁང་སྟོང་དང་། །མ་མོའི་ཁྱིམ་དང་དུར་ཁྲོད་དང་། །སྐྱེད་མོས་ཚལ་མཆོག་སྣ་ཚོགས་དང་། །ལྷ་ཁང་དང་ནི་མཆོད་རྟེན་གནས། །ཁྱིམ་མམ་ཡང་ནི་བཞི་མདོ་རུ། །འདོད་པ་ཐམས་ཅད་རབ་སྟེར་བའི། །སྒྲུབ་པ་པོ་ཡིས་བསྒྲུབ་
པར་བྱ། །གནས་ནི་བསྟན་པར་བྱས་པའམ། །གང་དུ་ཡིད་ནི་དགའ་བ་རུ། །སྡོམ་པ་སྣ་ཚོགས་བསྲུང་འདོད་པའི། །དེར་ནི་དངོས་གྲུབ་ཡང་དག་འགྲུབ། །གདུལ་བྱའི་བསམ་པའི་སྦྱོར་བ་ཡིས། །བསྒོམ་པའི་དབྱེ་བ་མང་པོའོ། །ཡེ་ཤེས་ལྔ་ཡི་བདུད་རྩི་ཡིས། །
ས་གཞི་བྱུག་པ་བྱ་བ་དང་། །བཟོད་པའི་ཕ་རོལ་ཕྱིན་ནན་ཏན། །མེ་ཏོག་གཅལ་དུ་དགྲམ་པར་བྱ། །སྣ་ཚོགས་ཕྱག་རྒྱའི་གདན་དག་ལ། །གཏོང་བར་ཤིན་ཏུ་མཉམ་པར་གཞག །བསམ་གཏན་ཕ་རོལ་ཕྱིན་དམིགས་ཏེ། །སེམས་ནི་རྩེ་གཅིག་པ་ཡིས་སུ། །ཚངས་
པའི་གནས་ནི་བཞི་པོ་དང་། །བསྡུ་བའི་དངོས་པོ་བཞི་དག་དང་། །སེམས་ཅན་ཀུན་ལ་བདེ་འབྱུང་བའི། །དགེ་བ་བཅུ་ནི་དམིགས་པར་བྱའོ། །ཆོས་རྣམས་སྟོང་པ་ཉིད་དུ་ནི། །ཕྱི་ནང་བདག་ཉིད་མཐོང་བྱ་སྟེ། །དེ་ནས་སེམས་ཙམ་དུ་གནས་ཏེ། །བྱང་ཆུབ་ཀྱི་ནི་ཚོགས་
མཆོག་གོ། །སྙིང་གི་མཁའ་དབྱིངས་པད་དབུས་གནས། །ཉི་མའི་དཀྱིལ་འཁོར་བསྒོམ་པར་བྱ། །ཡེ་ཤེས་ལྔ་ཡི་རང་བཞིན་ནི། །མཆོག་གི་དེ་ཉིད་དེར་མཐོང་སྟེ། །འོད་ཟེར་སྣ་ཚོགས་རང་བཞིན་བཟང་། །ཀུན་ཏུ་རྣམ་པར་སྤྲོས་པ་ལས། །སྔར་གྲུབ་རྣམས་ནི་ཡང་དག་

བསྐུལ། །ནམ་མཁའི་ཁམས་ནི་ཉམས་དགའ་བར། །དཀྱིལ་འཁོར་དམ་པ་མཐོང་བ་སྟེ། །བྱིན་གྱིས་བརླབ་པ་དག་ཀྱང་བྱེད། །ཏིལ་གྱི་གང་བུ་བཞིན་མཐོང་སྟེ། །ཁྲོ་བོ་ལྷ་མོ་ཐམས་ཅད་དང་། །སངས་རྒྱས་བྱང་ཆུབ་སེམས་དཔའ་དང་། །བླ་མ་བྱང་ཆུབ་སེམས་དཔའ་
དག །མཆོད་དང་མཆོད་པ་བྱེད་པའི་བདག །ལྷ་མོ་རྣམ་པ་དགུ་མཐོང་སྟེ། །སངས་རྒྱས་ཚོགས་ཀྱི་སྤྲུལ་པ་སྤྲོ། །ཁྲོ་བོའི་རྒྱལ་པོ་རྣལ་འབྱོར་མ། །འགྲོ་བ་རིགས་དྲུག་སེམས་ཅན་ཡང་། །དེ་ནི་སངས་རྒྱས་ཉིད་དུ་གཞག །ནམ་མཁའི་ཁམས་ཞེས་བྱ་བའི་དབུས། །
དེ་ཉིད་དུ་ནི་ཞུགས་མཐོང་སྟེ། །ཇི་སྲིད་བྱང་ཆུབ་སྙིང་པོའི་བར། །ཐམས་ཅད་དུ་ནི་སྐྱབས་སུ་མཆི། །སེམས་ཅན་མ་ལུས་གྱུར་པ་རྣམས། །སངས་རྒྱས་གོ་འཕང་ལ་གཞག་བྱ། །སྒྲུབ་པོས་དེ་ལ་གསོལ་བ་གདབ། །རྟག་ཏུ་སྐྱབས་སུ་གསོལ་བར་བྱ། །ཕུང་པོ་ལྔ་ལ་ང་
རྒྱལ་ནི། །སེམས་བཟང་པོ་ནི་བསྐྱེད་པར་བྱ། །གཟུགས་དང་ཚོར་དང་འདུ་ཤེས་དང་། །འདུ་བྱེད་རྣམ་པར་ཤེས་ཉིད་ཀྱང་། །བྲུྃ་ཨྃ་ཧྲཱིཿཧོཿཧཱུྃ་ཞེས་པ། །རྣམ་སྣང་རྡོ་རྗེ་ཉི་མ་དང་། །དེ་བཞིན་པདྨ་གར་གྱི་དབང་། །རྡོ་རྗེ་རྒྱལ་པོ་ཞེས་གྲགས་དང་། །དེ་བཞིན་རྡོ་རྗེ་
སེམས་དཔའ་མཆོག །དེ་བཞིན་གཤེགས་པ་ཐམས་ཅད་ཉིད། །དཔལ་ལྡན་རྡོ་རྗེ་ཧེ་རུ་ཀ། །མིག་དང་རྣ་བ་སྣ་དག་དང་། །ལུས་དང་ངག་དང་དེ་བཞིན་ཡིད། །ཨོཾ་ཧཱུྃ་ཏྲཱྃ་ཨཱཿཁྃ་ཧཱུྃ། གཏི་མུག་ཞེ་སྡང་ཕྲག་དོག་དང་། །འདོད་ཆགས་སེར་སྣ་ཉིད་ཀྱང་ངོ་། །སྐྱེ་མཆེད་ཀུན་
ལ་རྡོ་རྗེ་དབང་། །ས་དང་ཆུ་དང་མེ་དང་ནི། །རླུང་དང་ནམ་མཁའ་ཉིད་དང་ནི། །ལཱྃ་བཱྃ་པཱྃ་ཏཱྃ་ཁཱྃ་ཞེས་པས། །ལྟུང་བར་བྱེད་དང་གསོད་པ་དང་། །འགུགས་པར་བྱེད་དང་གར་བྱེད་ཉིད། །པདྨའི་དྲ་བ་ལྷ་མོ་ནི། །ནམ་མཁའ་དང་མཉམ་ལྟ་བུའོ། །དེ་ལྟར་ཕུང་པོ་ཁམས་དང་སྐྱེ་
མཆེད་རྣམས་ལ་རྣལ་འབྱོར་པ་ཐ་མལ་པའི་རང་བཞིན་གྱིས་རང་བཞིན་ཡོངས་སུ་དག་པའོ། །ཞེས་རྣམ་པར་དག་པའི་ང་རྒྱལ་བྱའོ། །དེའི་འོག་ཏུ་གསུམ་ལ་སྐྱབས་སུ་གསོལ་ཏེ། །སྔགས་ཀྱི་ལུས་སུ་འགྱུར་བར་བྱའོ། །བདག་

ཉིད་ཧེ་རུ་ཀར་བསྒོམས་ཏེ། །སེམས་ཅན་ཀུན་གྱི་དོན་ཀྱང་བྱེད། །ཧེ་རུ་ཀ་ཡི་གནས་ཐོབ་པར། །བླ་ན་མེད་པའི་གོ་འཕང་ལ། །སེམས་ཅན་ཐམས་ཅད་གཞག་པར་བྱ། །ཨོྃ་སྭ་བྷ་བ་ཤུདྡྷཿསརྦདྷཱརྨྨཱ་སྭ་བྷཱ་བ་ཤུདྡྷོ྅་ཧཾ། ཞེས་ལན་གསུམ་བརྗོད་
དོ། །ཉི་མའི་འོད་ཟེར་ཕྲེང་ལྟ་བུའི། །དངོས་པོ་ཀུན་བརྩེ་ཕྱོགས་བཅུ་རུ། །འོད་ཟེར་དེ་ལས་ར་བ་དང་། །དེ་བཞིན་དུ་ནི་དྲ་བར་བལྟ། །རྡོ་རྗེ་ས་གཞི་བྱིན་གྱིས་བརླབ། །བླ་རེ་མདའ་ཡི་ར་བ་དང་། །རྡོ་རྗེ་མེ་འབར་དྲ་བ་ནི། །དེ་ཡི་ཕྱི་རོལ་རིང་དུ་བསམ། །ཨོྃ་མེ་དི་ནཱི་བཛྲཱི་བྷ་བ་
བཛྲ་བན་དྷ་ཧཱུྃ། ཨོྃ་བཛྲ་པྲཱ་ཀཱ་ར་ཧཱུྃ་བཾ་ཧཱུྃ། ཨོྃ་བཛྲ་པཉྫ་ར་ཧཱུྃ་བཾ་ཧཱུྃ། ཨོྃ་བཛྲ་བི་ཏཱ་ན་ཧཱུྃ་ཁཾ་ཧཱུྃ། ཨོྃ་ཤ་ར་ཛཱ་ལ་ཏྲཾ་སཾ་ཏྲཾ། ཨོྃ་བཛྲ་ཛྭ་ལ་ཨ་ན་ལཱ་རྐ་ཧཱུྃ་ཧཱུྃ་ཧཱུྃ། མཛུབ་མོ་མཐེ་བོང་དག་སྦྱར་ཏེ། །སེ་གོལ་གཏོགས་ཏེ་ཕྱོགས་བཅུར་ཡང་། །ཨོྃ་སུཾ་བྷ་ནི་སུམ་བྷ་ཧཱུྃ་ཧཱུྃ་ཕཊ་ཤར་དུའོ། །
ཨོྃ་གྲིཧྞ་གྲིཧྞ་ཧཱུྃ་ཧཱུྃ་ཕཊ་བྱད་དུའོ། །ཨོྃ་གྲིཧྞཱ་པ་ཡ་གྲིཧྞཱ་པ་ཡ་ཧཱུྃ་ཧཱུྃ་ཕཊ་ནུབ་ཏུའོ། །ཨོྃ་ཨཱ་ན་ཡ་ཧོ་བྷ་ག་བཱ་ན་བཛྲ་ཧཱུྃ་ཧཱུྃ་ཕཊ་ལྷོ་རུའོ། །སྔགས་ཀྱི་རྒྱལ་པོ་འདིས་བགེགས་ཐམས་ཅད་ཀྱི་མགོ་ལ་ཕུར་བུ་བཏབ་སྟེ། གཡས་སྐོར་དང་གཡོན་པ་བསྐོར་བ་མ་ཡིན་པའོ། །ཨོཾ་གྷ་གྷ་གྷ་ཏ་ཡ་
གྷཱ་ཏ་ཡ། སརྦ་དུ་ཥྚཱ་ན་བིགྷྣཱཾ་ཧཱུྃ་ཕཊ། ཀཱི་ལི་ཀཱི་ལ་ཡ། སརྦྦ་པཱ་པཾ་ཧཱུྃ་ཧཱུྃ་ཧཱུྃ། བཛྲ་ཀཱི་ལ་ཡ་བཛྲ་དྷཱ་ར་ཨཱཛྙཱ་པ་ཡ་ཏི། སརྦྦ་དུཥྚཱན་བིགྷྣཱཾ་ཀཱ་ཡ་བ་ཀ་ཙིཏྟཾ་བཛྲ་ཀཱི་ལ་ཡ་ཧཱུྃ་ཕཊ། བརྡུང་བར་བྱ་སྟེ། རྡོ་རྗེ་ཕུར་པ་ལ་ཁྲོ་བོའི་ལྟ་བས་བལྟས་ནས། གོ་རིམས་དང་གོ་རིམས་མ་ཡིན་པས་
རྡོ་རྗེས་སྒྲུབ་པ་བོས་བརྡུངས་ཏེ། ཨོྃ་བཛྲ་མུངྒ་ར་བཛྲ་ཀཱི་ལཱ་ཀོ་ཊ་ཡ་ཧཱུྃ་ཕཊ། བདུད་མེད་བདུད་ཀྱི་ལས་ཀྱང་མེད། །རང་གི་སེམས་ཀྱིས་བཅིངས་པ་བཞིན། །གང་གིས་རང་གི་སེམས་འདུལ་ན། །གང་ལས་བདུད་ནི་གནས་པར་འགྱུར། །སྟོང་ཉིད་ཡེ་ཤེས་རྡོ་རྗེ་ཡང་། །མཉམ་
གཞག་དང་བས་དྲན་པར་བྱ། །ཨོཾ་མ་ཧཱ་ཤཱུནྱ་ཏཱ་ཛྙཱ་ན་བཛྲ་སྭ་བྷ་བ་ཨཱཏྨ་ཀོ྅་ཧཾ། ཨོཾ་ཨ་ནི་མིཏྟ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅་ཧཾ། ཨོྃ་ཨ་པྲ་ཎི་ཧི་ཏ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅་ཧཾ། མིག་ཡོར་ཙམ་གྱི་ཡེ་ཤེས་ནི། །སེམས་ཙམ་རྣམ་པར་བརྟག་པར་བྱ། །ནམ་མཁའ་ལྟ་བུའི་

ཆོས་འདི་དག །ཆོས་ཅན་མེད་ཅིང་ཆོས་ཉིད་མེད། །ནམ་མཁའ་ལྟ་བུར་གོས་པ་མེད། །དངོས་པོ་མེད་ཅིང་རྟོག་པ་མེད། །སྙིང་རྗེའི་བདག་ཉིད་ཕན་བྱའི་ཕྱིར། །སྨོན་ལམ་དབང་གིས་དམིགས་བྱ་སྟེ། །ཇི་སྲིད་ས་ཡི་འོག་དམིགས་པ། །རླུང་གི་དཀྱིལ་འཁོར་བསམ་
པར་བྱ། །ཡཾ་གི་ཡི་གེ་ལས་བྱུང་བ། །གཞུ་འདྲ་ཁ་དོག་སྔོ་དང་ལྡན། །རྒྱལ་མཚན་གྱིས་མཚན་བསམ་བྱ་སྟེ། །དུ་བའི་ཕྲེང་བ་འཁྲིགས་པའོ། །དེ་ཡི་སྟེང་དུ་རཾ་ལས་ནི། །མེ་ཡི་དཀྱིལ་འཁོར་མཆོག་ཡིན་ཏེ། །ཟུར་གསུམ་པོ་ལ་ཁ་དོག་དམར། །འབར་བའི་
ཕྲེང་བ་འཁྲུག་ཅིང་དམར། །ཉི་མ་བྱེ་བ་ལྟ་བུར་གནས། །རྡོ་རྗེས་མཚན་པ་བསམ་པར་བྱ། །དེ་ཡི་སྟེང་དུ་ཆུ་ཉིད་ཀྱང་། །བཾ་ལས་བུམ་པ་མཆོག་ཏུ་གྱུར། །ཟླུམ་ཞིང་འོད་ཟེར་ཕྲེང་བར་ལྡན། །ཁ་བ་ལྟ་བུ་ཉིད་ཀྱང་ངོ་། །དེ་ཡི་སྟེང་དུ་བསམ་བྱ་བ། །ལཾ་ལས་བྱུང་བ་
སེར་པོར་ལྡན། །གྲུ་བཞི་པ་ལ་རྡོ་རྗེས་མཚན། །འོད་ཟེར་སེར་པོའི་ཚོགས་འཁྲུགས་པའོ། །དེ་སྟེང་རྣལ་འབྱོར་པ་བསྒོམས་པ། །རི་ཡི་རྒྱལ་པོ་རི་རབ་མཆོག །ཟུར་བཞི་རིན་ཆེན་བཞི་རང་བཞིན། །རྩེ་མོ་བརྒྱད་ཀྱིས་ཉེ་བར་མཛེས། །།སུཾ་ལས་བྱུང་བ་བཟང་
པོའོ། །འོད་ཟེར་བཟང་པོ་མཆོག་གི་མཆོག །དེ་ཡི་སྟེང་དུ་བསྒོམ་བྱ་བ། །བྲུཾ་ལས་བྱུང་བ་བརྟག་པ་སྟེ། །དེ་ཡོངས་གྱུར་ལས་འཁོར་ལོ་མཆོག །གཞལ་ཡས་ཁང་པ་རྣམ་པར་བསམ། །གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་རྣམ་པར་བརྒྱན། །དྲ་
བ་དྲ་བ་ཕྱེད་པས་སྤྲས། །དར་དང་མེ་ཏོག་ཆུན་པོས་བརྒྱན། །གྲྭ་ཡི་ཆ་ནི་ཐམས་ཅད་དང་། །སྒོ་ཁྱུད་ཀྱི་ནི་མཚམས་རྣམས་སུ། །རྡོ་རྗེ་རིན་པོ་ཆེ་ཡིས་སྤྲས། །ཕྱི་ཡི་དཀྱིལ་འཁོར་ཐིག་གདབ་བ། །པདྨ་འདབ་མ་བརྒྱད་པ་བྲི། །སྣ་ཚོགས་ཁ་དོག་མཆོག་གི་མཆོག །
ལྟེ་བ་དང་ནི་གེ་སར་བཅས། །ཐམས་ཅད་དག་པ་ཉིད་ཀྱི་གདན། །དེ་ཡི་དབུས་སུ་ཟླ་བའི་ཆ། །གསལ་བའི་རང་བཞིན་དྲི་མ་མེད། །དེ་སྟེང་ཨ་ལི་ཀཱ་ལི་ནི། །དབུས་སུ་བཾ་གིས་བརྒྱན་པའོ། །དེ་ཡི་དབུས་བཞེངས་གཙོ་མོ་ནི། །ཕག་མོ་རྡོ་རྗེ་རྣལ་འབྱོར་མ། །ཞལ་

བཞི་ཕྱག་ནི་བཅུ་གཉིས་ཏེ། །སྤྱན་གསུམ་ཤིན་ཏུ་ཆགས་པའོ། །གདན་ལ་ཕྱེད་སྐྱིལ་གྱིས་བཞུགས་ཏེ། །ཤིན་ཏུ་མཛེས་པས་གར་བྱེད་པའོ། །ཕྱོགས་ཀྱི་གོས་ཅན་སྐྲ་གྲོལ་བ། །ཕྱེད་ནི་དབུས་མ་དབང་ཕྱུག་ཞལ། །དཀར་དང་དམར་དང་འདི་
འདྲའི་གཟུགས། །ཐོད་པ་ཡི་ནི་དབུ་རྒྱན་མཛེས། །རྡོ་རྗེ་དྲིལ་བུ་ཕྱག་རྒྱ་བསྣམས། །པདྨ་བསྐོར་ཅིང་འཁོར་བར་ལྡན། །དཔྲལ་བར་ཕྱག་རྒྱ་འབར་བ་དང་། །མི་ཡི་པགས་པའི་བླ་གོས་དང་། །ཐོད་པ་ཁ་ཊྭཱཾ་ག་འཛིན་ཅིང་། །ཞགས་པ་ལྕགས་ཀྱུ་འཛིན་པ་གཞག། །ཅང་
ཏེའུ་གྲི་གུག་མགོ་བོ་ཡང་། །ཞལ་བཞི་པ་ནི་ཚངས་པ་ཡི། །སྔོ་དང་སེར་དང་ལྗང་གུ་ཡི། །བཟང་པོའི་ཞལ་གྱིས་ཉེ་བར་མཛེས། །ཞལ་ནི་མཆེ་བ་གཙིགས་པ་སྟེ། །ཟླ་བ་ཕྱེད་པས་སྟེང་དུ་བརྒྱན། །སྣ་ཚོགས་རྡོ་རྗེ་དབུ་རྒྱན་མཚན། །དངོས་གྲུབ་ཐམས་ཅད་རབ་སྦྱིན་བྱེད། །
ལྷ་མོ་ཕྱག་རྒྱ་དྲུག་གིས་བརྒྱན། །དུམ་བུ་བརྒྱད་པས་སྐ་རགས་ནི། །སྐ་རགས་སིལ་སིལ་སྒྲ་སྒྲོགས་པ། །རྐང་པའི་གདུབ་ཀྱིས་ཉེ་བར་མཛེས། །དཔུང་རྒྱན་མཛེས་པར་བྱེད་པ་དང་། །དཔྲལ་བར་རྡོ་རྗེ་ཕྲེང་བ་དང་། །ཕྱག་རྒྱ་རྡོ་རྗེས་མཚན་པས་སོ། །ཤིན་ཏུ་གཟུགས་
བཟང་ཡིད་དུ་འོང་། །ཤར་གྱི་འདབ་མར་མཁའ་འགྲོ་མ། །སེང་གདོང་མ་སྟེ་འཇིགས་པར་བྱེད། །བྱང་གི་ཕྱོགས་སུ་ཕག་གདོང་མ། །ལྷ་མོ་ལ་མ་འཇིགས་བྱེད་མ། །ནུབ་ཏུ་ལྷ་མོ་གླང་པོའི་གདོང་། །དུམ་སྐྱེས་མ་སྟེ་དྲག་མོའོ། །ལྷོ་རུ་ལྷ་མོ་གཟུགས་ཅན་མ། །རྟ་ཡི་གདོང་
པ་ལྷག་པའི་གཟུགས། །སྤྱན་གསུམ་སྣ་ཚོགས་གཟུགས་ཅན་མའོ། །ཐོད་པ་ཁ་ཊྭཱཾ་ག་འཛིན་ཅིང་། །མགོ་བོ་གྲི་གུག་འཛིན་པ་ཅན། །གཅེར་བུ་སྐྲ་ནི་གྲོལ་བ་སྟེ། །གར་བྱེད་པ་ཡིས་ཤིན་ཏུ་མཛེས། །ཡི་དགས་གདན་ལ་ཕྱེད་སྐྱིལ་གྱིས། །དྲག་ཅིང་གཏུམ་པ་འཇིགས་
བའོ། །འཇིགས་བྱེད་དང་ནི་དུས་མཚན་མ། །ལྷ་མོའི་ཞབས་ཀྱི་འོག་ཏུ་མནན། །མེ་ལ་སོགས་པ་མཚམས་བཞི་རུ། །བྱང་ཆུབ་སེམས་ལ་སོགས་པའི་སྣོད། །བུམ་པའི་སྟེང་དུ་རྣམ་པར་དགོད། །དུང་དང་ཀུན་ད་ཟླ་འདྲ་བའི། །བྱང་ཤར་ལ་སོགས་ཕྱོགས་

བཞི་རུ། །རྩིབས་དྲུག་པ་ཡི་འཁོར་ལོ་བྲི། །འཁོར་ལོའི་དབུས་སུ་བྲི་བྱ་བ། །རིགས་ཀྱི་ལྷ་མོ་བཞི་པོ་ནི། །ལྷ་མོ་མཱ་མ་ཀཱི་དང་སྤྱན། །སྒྲོན་མ་གོས་དཀར་མོ་དག་སྟེ། །སྔོ་དང་དཀར་དང་དམར་བ་སྟེ། །ལྷ་མོ་རྡོ་རྗེ་རིགས་དབང་ཕྱུག། །དཀར་དང་སྔོ་དང་
དམར་བ་ཡི། །ལྷ་མོ་རྟག་པའི་རིགས་ཡིན་ནོ། །ལྗང་གུ་དཀར་དང་དམར་བ་ཡི། །ལྷ་མོ་ལས་ཀྱི་རིགས་ཡིན་ནོ། །དམར་དང་སེར་དང་ལྗང་གུ་ཡི། །ལྷ་མོ་པདྨའི་རིགས་ལས་བྱུང་། །སྤྱན་གསུམ་སྐྲ་ནི་གྲོལ་བ་ཡིན། །ཕྱོགས་ཀྱི་གོས་ནི་འཛིན་པ་ཡིན། །
རྒྱན་རྣམས་ཐམས་ཅད་ཡང་དག་རྫོགས། །ཕྱག་རྒྱ་དྲུག་གིས་རྣམ་པར་བརྒྱན། །ཐོད་པ་ཁ་ཊྭཱཾ་ག་འཛིན་ཅིང་། །རང་གི་མཚན་མ་རྣམ་པ་བཞི། །རྡོ་རྗེ་འཁོར་ལོ་རྒྱ་གྲམ་དང་། །པདྨ་དམར་པོ་མཆོག་གི་མཆོག །དེ་བཞིན་ཐམས་ཅད་དྲིལ་བུ་འཛིན། །པདྨ་སྐོར་བ་
བྱེད་པའོ། །བདུད་བཞི་པོ་ནི་ཞབས་ཀྱིས་མནན། །གར་དང་བཅས་ཤིང་བཞད་པའི་ཞལ། །སྣ་ཚོགས་པདྨ་ཟླ་དབུས་བཞུགས། །རིགས་ཀྱི་དངོས་གྲུབ་རང་བཞིན་བྱེད། །མགོ་དང་ཅང་ཏེའུ་ཕྱག་ན་བསྣམས། །རྡོ་རྗེ་གྲི་གུག་གིས་ཀྱང་མཛེས། །ཐོད་པའི་ཕྲེང་
བའི་དབུ་རྒྱན་ཅན། །མགོ་བོའི་ཕྲེང་བས་བརྒྱན་པའོ། །མཚམས་ཀྱི་ཆ་ནི་ཐམས་ཅད་དུ། །གནས་ལ་སོགས་པའི་རིམ་པ་དགོད། །ཤར་གྱི་འཁོར་ལོ་རྩིབས་དྲུག་ལ། །ལྷ་མོ་ཇི་ལྟར་རྗེས་མཐུན་དགོད། །འཁོར་ལོའི་རྩིབས་དྲུག་དང་པོ་ལ། །པཱུ་ལླིར་མ་ལ་ཡར་
རབ་ཏུ་གཏུམ་མའོ། །རྩིབས་གཉིས་པ་ལ་ཛ་ལན་ད་རར། །གཏུམ་པའི་མིག་ཅན་ནོ། །གསུམ་པ་ལ་ཨོ་ཌི་ཡན་དུ་འོད་ལྡན་མའོ། །བཞི་པ་ཨར་བུ་དར་སྣ་ཆེན་མོའོ། །ལྔ་པ་གོ་ད་བ་རིར་བརྟན་པའི་བློ་ཅན་མའོ། །དྲུག་པ་རཱ་མེ་ཤྭ་རར་མི་ཐུང་མའོ། །གཉིས་པ་བྱང་
གི་འཁོར་ལོ་རྩིབས་དྲུག་ལ། དང་པོ་དེ་བི་ཀོ་ཊར་ལཾ་ཀའི་དབང་ཕྱུག་མའོ། །གཉིས་པ་མཱ་ལ་ཡར་ཤིང་གྲིབ་མའོ། །གསུམ་པ་ཀ་མ་རཱུ་པར་ས་སྲུང་མའོ། །བཞི་པ་ཨོ་ཌེར་འཇིགས་བྱེད་ཆེན་མོའོ། །ལྔ་པ་ཏྲི་ཤ་ཀུ་ནི་ར་རླུང་གི་ཤུགས་ཅན་མའོ། །དྲུག་པ་ཀོ་

ས་ལར་ཆང་འཐུད་མའོ། །གསུམ་པ་ནུབ་ཀྱི་འཁོར་ལོ་རྩིབས་དྲུག་གི་ཤར་གྱི་འཁོར་ལོའི་རྩིབས་དང་པོ་ལ་ཀ་ལིཾ་ཀར་ལྗང་ལྷ་མོའོ། །གཉིས་པ་ལམ་བ་ཀར་ཤིན་ཏུ་བཟང་མོའོ། །གསུམ་པ་ཀཉྩི་ཀཱར་རྟ་རྣ་མའོ། །བཞི་པ་ཁ་བ་ཅན་དུ་བྱ་གདོང་མའོ། །ལྔ་
པ་པྲེ་ཏ་པུ་རིར་འཁོར་ལོའི་ཤུགས་ཅན་མའོ། །དྲུག་པ་གྲྀ་ཧ་དེ་པ་ཏཱར་དུམ་སྐྱེས་མའོ། །བཞི་པ་ལྷོའི་འཁོར་ལོའི་རྩིབས་ཀྱི་ཤར་དུ་སཽ་རཱཥྚར་ཆང་འཚོང་མའོ། །གཉིས་པ་གསེར་གྱི་གླིང་དུ་འཁོར་ལོའི་གོ་ཆ་མའོ། །གསུམ་པ་ནཱ་ག་རང་ཤིན་ཏུ་དཔའ་མོའོ། །བཞི་པ་སིན་
དྷུར་སྟོབས་ཆེན་མའོ། །ལྔ་པ་མ་རུར་འཁོར་ལོས་སྒྱུར་མའོ། །དྲུག་པ་ཀུ་ལུ་ཏཱར་བརྩོན་འགྲུས་ཆེན་མོའོ། །དང་པོ་དཀར་ལྗང་ཐོད་པ་དང་། །ཁ་ཊྭཱཾ་ག་དང་འཁོར་ལོ་དང་། །ཅང་ཏེའུ་དང་གྲི་གུག་གོ། །གཉིས་པ་བྱང་དུ་ལྗང་སེར། རྡོ་རྗེ་དང་། ཐོད་པ་དང་། ཁ་ཊྭཱཾ་
ག་དང་། ཅང་ཏེའུ་དང་། །གྲི་གུག་གོ། །གསུམ་པ་ནུབ་ཏུ་དམར་སེར་ཐོད་པ་དང་། ཁ་ཊྭཱཾ་ག་དང་། པདྨ་དང་། ཅང་ཏེའུ་དང་། གྲི་གུག་གོ། །བཞི་པ་ལྷོའི་ལྷ་མོ་སེར་དམར་སྣ་ཚོགས་རྡོ་རྗེ་དང་། ཅང་ཏེའུ་དང་། གྲི་གུག་དང་། ཐོད་པ་དང་། ཁ་ཊྭཱཾ་ག་འཛིན་པའོ། །
ལྷ་མོ་ཐམས་ཅད་བུད་མེད་ཕྱེད་དབང་ཕྱུག་སྤྱན་གསུམ་པ། ཕྱག་བཞི་པ། གཅེར་བུ། སྐྲ་གྲོལ་བ། ཕྱེད་སྐྱིལ་གྱི་གར་གྱི་ཞབས་ཀྱིས་བཞུགས་པ། ཡི་དགས་ཀྱི་གདན་གྱི་སྟེང་ན། ཐོད་པའི་ཕྲེང་བའི་དབུ་རྒྱན་ཅན། ཕྱག་རྒྱ་ལྔས་བརྒྱན་པ། རྐང་གདུབ་དང་སྐ་རགས་
དང་། དབུ་རྒྱན་རྣམས་རྡོ་རྗེས་མཚན་པའོ། །དེ་ནས་འཁོར་ལོ་ཕྱིར་བསྐོར་ཏེ། རྡོ་རྗེའི་ཕྲེང་བ་ཤར་དུའོ། །འཁོར་ལོའི་ཕྲེང་བ་བྱང་དུའོ། །སྣ་ཚོགས་རྡོ་རྗེའི་ཕྲེང་བ་ནུབ་ཏུའོ། །པདྨའི་ཕྲེང་བ་ལྷོ་རུའོ། །དབུས་སུ་རྡོ་རྗེ་ར་བས་མཛེས། །མཚམས་ཀྱི་ཆ་རྣམས་ཐམས་ཅད་
དུ། །སྣ་ཚོགས་རྡོ་རྗེ་ཡང་དག་བྲི། །བློ་ལྡན་དེ་ཡི་ཕྱི་རོལ་བསྐོར། །ཡི་དགས་ཕྲེང་བ་སྣ་ཚོགས་ལྡན། །ཕྱི་རོལ་དཀྱིལ་འཁོར་སྒོ་རྣམས་དང་། །མཚམས་ཀྱི་ཆ་ནི་བཞི་རྣམས་སུ། །མཁའ་འགྲོ་དྲག་པོའི་གཟུགས་ཅན་ནོ། །དེ་ལ་མཉམ་པར་གཞག་པས་དགོད། །

ཁྭ་གདོང་མ་ནི་ཤར་དུ་དགོད། །ཁ་དོག་སྔོན་མོ་ཡིད་འཕྲོག་མའོ། །འུག་གདོང་མ་ནི་བྱང་གི་སྒོར། །དམར་ཞིང་ལྗང་ལ་མཛེས་པའོ། །ཁྱི་གདོང་མ་ནི་ནུབ་ཀྱི་སྒོར། །དྲག་ཅིང་སེར་མོ་དུ་བ་འདྲ། །ལྷོ་ཡི་ངོས་སུ་ཕག་གདོང་མ། །ལྗང་ཞིང་སྔོ་བའི་གཟུགས་ཅན་མའོ། །
སྤྱན་གསུམ་དྲག་པོ་འཇིགས་པའོ། །ཕྱོགས་ཀྱི་གོས་ནི་འཛིན་པའི་མཆོག །འབྲུ་ཚུགས་ལྟ་ཞིང་བོད་ཐུང་མ། །གཡས་བརྐྱང་པ་ཡི་ཞབས་ཀྱིས་བཞུགས། །སྣ་ཚོགས་པདྨ་ཉི་དབུས་གནས། །ཕྱག་རྒྱ་ལྔས་ནི་རྣམ་པར་བརྒྱན། །ཐོད་པའི་ཕྲེང་བའི་དབུ་རྒྱན་ཅན། །
དབུ་སྐྲ་གྲོལ་ཞིང་རྣམ་པར་བརྟགས། །གཤིན་རྗེ་བརྟན་མ་མ་ཧེའི་གདོང་། །མེ་ཡི་ཕྱོགས་སུ་བཞུགས་པའོ། །གཤིན་རྗེ་ཕོ་ཉ་བོང་བུའི་གདོང་། །བདེན་བྲལ་གྱི་ནི་ཕྱོགས་སུ་བཞུགས། །གཤིན་རྗེའི་མཆེ་བ་རྔ་མོའི་གདོང་། །རླུང་དུ་རྟེན་ཅིང་དྲག་པོར་ལྡན། །
གཤིན་རྗེའི་འཇོམས་མ་རྟ་ཡི་གདོང་། །དབང་ལྡན་རྟེན་ཅིང་རྣམ་པར་འཁོར། །ཐོད་པའི་ཕྲེང་བའི་དབུ་རྒྱན་ཅན། །སྣ་ཚོགས་གཟུགས་ཅན་ཡིད་འཕྲོག་མ། །གཅེར་བུ་སྐྲ་ནི་གྲོལ་བ་དང་། །ཕྱེད་སྐྱིལ་གྱི་ནི་གར་དང་ལྡན། །མཆེ་བ་རྣམ་པར་གཙིགས་པའི་ཞལ། །སྤྱན་
གསུམ་ཞལ་ནི་གཡོ་བ་སྟེ། །སྣ་ཚོགས་པདྨ་ཉི་དབུས་གནས། །འདོད་པ་དྲག་པོས་བརྟགས་པའོ། །འཁོར་གྱི་ལྷ་མོ་དཀྱིལ་འཁོར་རྣམས། །ཐམས་ཅད་ཡི་དགས་སྟེང་དུ་བཞུགས། །ཐོད་པ་ཁ་ཊྭཱཾ་ག་འཛིན་ཅིང་། །གྲི་གུག་མགོ་བོ་འཛིན་པར་བྱེད། །ལག་པ་གཡོན་
ན་རྔ་ཆུང་ནི། །རྡུང་བར་བྱེད་ཅིང་ཤིན་ཏུ་འཇིགས། །ཕྱི་རོལ་བསྐོར་བའི་རྣམ་པ་ནི། །གཞན་ཡང་རྣམ་པ་མང་པོར་འགྱུར། །གླུ་དང་གར་གྱི་ཡོ་བྱད་དང་། །སྣ་ཚོགས་དམ་ཚིག་མཆོག་རྣམས་དང་། །སྤོས་དང་མེ་ཏོག་མར་མེ་སོགས། །དྲི་དང་ཕྲེང་བ་བྱུག་པ་དང་། །ལྷ་
ཡི་ན་བཟའ་གཞལ་ཡས་ཁང་། །ལྷ་ཡི་རོལ་མོ་མཆོག་གི་རྣམས། །ཀུན་ནས་ཡོངས་སུ་བསྐོར་བ་ཡིས། །ཕྱི་ཡི་རྣལ་འབྱོར་མས་མཆོད་བྱེད། །དེ་ལ་སོགས་པ་མཐའ་ཡས་མཆོག །ནམ་མཁའི་ཁམས་ནི་ཡོངས་གང་ལས། །རྣལ་འབྱོར་མ་ཡི་སྦྱོར་བ་མཆོག །ཕག་མོ་

མངོན་པར་འབྱུང་བའི་མཆོག །གསང་བ་ཆེན་མོའི་མཆོག་འདི་ནི། །ཅུང་ཟད་སྨྲ་བར་མི་བྱ་སྟེ། །ཕྱི་རོལ་ཡི་དགས་ཕྲེང་བ་དང་། །དཀྱིལ་འཁོར་དམ་པ་བསྒོམ་པར་བྱ། །འདི་ལྟར་དགོད་པར་བྱ་བ་ཡི། །ཇི་ལྟར་འཁོར་ལོ་དེ་རྣམས་དགོད། །
སེན་མོ་དང་སོ་དག་ལ་ནི་རབ་ཏུ་གཏུམ་མའོ། །སྐྲ་དང་བ་སྤུ་དག་ལ་གཏུམ་པའི་མིག་ཅན་མའོ། །པགས་པ་དང་དྲི་མ་དག་ལ་འོད་ལྡན་མའོ། །ཤ་ལ་སྣ་ཆེན་མའོ། །རྩ་རྒྱུས་ལ་བརྟན་པའི་བློ་ཅན་མའོ། །རུས་པ་ལ་མིའུ་ཐུང་མའོ། །མཁལ་མ་ལ་ལང་ཀའི་
དབང་ཕྱུག་མའོ། །སྙིང་ལ་ནི་ཤིང་གྲིབ་མའོ། །མིག་ལ་ས་སྲུང་མའོ། །མཁྲིས་པ་ལ་འཇིགས་བྱེད་ཆེན་མོའོ། །གློ་བ་ལ་རླུང་གི་ཤུགས་ཅན་མའོ། །རྒྱུ་མ་ལ་ཆང་འཐུང་མའོ། །གཉེ་མ་ལ་ལྗང་ལྷ་མོའོ། །ལྟེ་བ་ལ་ནི་ཤིན་ཏུ་བཟང་མོའོ། །རྐང་པ་ལ་རྟ་རྣ་མའོ། །
མདོམས་སུ་བྱ་གདོང་མའོ། །བད་ཀན་ལ་འཁོར་ལོའི་ཤུགས་ཅན་མའོ། །རྣག་ལ་དུམ་སྐྱེས་མའོ། །ཁྲག་ལ་ཆང་འཚོང་མའོ། །རྡུལ་ལ་འཁོར་ལོའི་གོ་ཆ་མའོ། །ཚིལ་ལ་ཤིན་ཏུ་དཔའ་མོའོ། །མཆིན་པ་ལ་ཤིན་ཏུ་སྟོབས་ཅན་མའོ། །མཆིལ་མ་ལ་འཁོར་
ལོས་སྒྱུར་མའོ། །སྣབས་ལ་བརྩོན་འགྲུས་ཆེན་མོའོ། །པུ་ལླཱི་ར་མ་ལ་ཡ་སྟེ་མགོ་ལ་རབ་ཏུ་གཏུམ་མའོ། །ཛཱ་ལན་དྷ་ར་སྟེ་སྤྱི་གཙུག་ལ་གཏུམ་པའི་མིག་ཅན་མའོ། །ཨོ་ཌི་ཡན་ཏེ་རྣ་བ་གཡས་པ་འོད་ལྡན་མའོ། །ཨར་བུད་སྟེ་ལྟག་པར་སྣ་ཆེན་མའོ། །གོ་དཱ་པ་
རི་སྟེ་རྣ་བ་གཡོན་པ་ལ་བརྟན་པའི་བློ་ཅན་མའོ། །རཱ་མེ་ཤྭ་ར་སྟེ་སྨིན་མའི་དབུས་སུ་མིའུ་ཐུང་མའོ། །དེ་བི་ཀོ་ཊྚ་སྟེ་མིག་གཉིས་ལ་ལང་ཀའི་དབང་ཕྱུག་མའོ། །མཱ་ལ་ཝཱ་སྟེ་ཕྲག་པ་གཉིས་ལ་ཤིང་གྲིབ་མའོ། །ཀཱ་མ་རཱུ་པ་སྟེ་མཆན་ཁུང་གཉིས་སུ་ས་སྲུང་མའོ། །ཨོ་ཌི་
སྟེ་ནུ་མ་གཉིས་སུ་འཇིགས་བྱེད་ཆེན་མོའོ། །ཏྲི་ཤ་ཀུ་ནི་སྟེ་ལྟེ་བ་ལ་རླུང་གི་ཤུགས་ཅན་མའོ། །ཀོ་ས་ལ་སྟེ་རྣ་རྩེར་ཆང་འཐུང་མའོ། །ཀ་ལིངྐ་སྟེ་ཁ་ལ་ལྗང་ལྷ་མོའོ། །ལམ་པ་ཀ་སྟེ་མགྲིན་པར་ཤིན་ཏུ་བཟང་མའོ། །ཀཱཉྩི་སྟེ་སྙིང་གར་རྟ་རྣ་མའོ། །ཧི་མ་ལ་ཡ་སྟེ་མདོམས་

སུ་བྱ་གདོང་མའོ། །པྲེ་ཏ་པུ་རི་སྟེ་གསང་བར་འཁོར་ལོའི་ཤུགས་ཅན་མའོ། །གྲྀ་ཧ་དེ་བ་ཏཱ་སྟེ་བཤད་ལམ་དུམ་སྐྱེས་མའོ། །སཽ་རཱཥྚ་སྟེ་བརླ་གཉིས་ལ་ཆང་འཚོང་མའོ། །སུ་ཝརྞ་དྭཱི་པ་སྟེ་རྗེ་ངར་གཉིས་ལ་འཁོར་ལོའི་གོ་ཆ་མའོ། །ན་ག་ར་སྟེ་སོར་མོ་རྣམས་ལ་
ཤིན་ཏུ་དཔའ་མོའོ། །སིནྡྷུ་སྟེ་རྐང་པའི་བོལ་ལ་སྟོབས་ཆེན་མོའོ། །མ་རུ་སྟེ་མཐེ་བོང་གཉིས་ལ་འཁོར་ལོས་སྒྱུར་མའོ། །ཀུ་ལུ་ཏཱ་སྟེ་པུས་མོ་གཉིས་ལ་བརྩོན་འགྲུས་ཆེན་མོའོ། །སའི་ཁམས་ནི་ལྟུང་བར་བྱེད་མའོ། །ཆུའི་ཁམས་ནི་གསོད་པར་བྱེད་མའོ། །མེའི་
ཁམས་ནི་འགུགས་པར་བྱེད་མའོ། །རླུང་གི་ཁམས་ནི་གར་གྱི་དབང་ཕྱུག་མའོ། །ནམ་མཁའི་ཁམས་ནི་པདྨའི་དྲ་བ་ཅན་ནོ། །གཟུགས་ཀྱི་ཕུང་པོ་ནི་རྣམ་པར་སྣང་མཛད་དོ། །ཚོར་བའི་ཕུང་པོ་ནི་རྡོ་རྗེ་ཉི་མའོ། །འདུ་ཤེས་ཀྱི་ཕུང་པོ་ལ་པདྨ་གར་གྱི་དབང་ཕྱུག་གོ། །
འདུ་བྱེད་ཀྱི་ཕུང་པོ་ལ་རྡོ་རྗེ་རྒྱལ་པོའོ། །རྣམ་པར་ཤེས་པའི་ཕུང་པོ་ལ་རྡོ་རྗེ་སེམས་དཔའོ། །དེ་བཞིན་གཤེགས་པ་ཐམས་ཅད་ཉིད་ལ་དཔལ་ཧེ་རུ་ཀའོ། །མིག་གཉིས་ལ་གཏི་མུག་རྡོ་རྗེའོ། །རྣ་བ་གཉིས་ལ་ཞེ་སྡང་རྡོ་རྗེའོ། །སྣ་གཉིས་ལ་ཕྲག་དོག་རྡོ་རྗེའོ། །ཁ་ལ་
འདོད་ཆགས་རྡོ་རྗེའོ། །རེག་ལ་སེར་སྣ་རྡོ་རྗེའོ། །སྐྱེ་མཆེད་ཐམས་ཅད་ལ་དབང་ཕྱུག་རྡོ་རྗེའོ། །ཐུགས་ལ་རྡོ་རྗེ་མི་བསྐྱོད་པ། །ཁ་ལ་རྡོ་རྗེ་འོད་དཔག་མེད། །སྐུ་ལ་རྡོ་རྗེ་རྣམ་སྣང་མཛད། །ཨོཾ་བཾ་ལྟེ་བ་ལ་རྡོ་རྗེ་ཕག་མོའོ། །ཧཾ་ཡོཾ་སྙིང་གར་ཡ་མི་ནཱིའོ། །ཧྲཱིཾ་མོཾ་ཁ་ལ་རྨོངས་
བྱེད་མའོ། །ཧྲིཾ་ཧྲིཾ་མགོ་བོ་ལ་སྐྱོད་བྱེད་མའོ། །ཧཱུྃ་ཧཱུྃ་སྤྱི་གཙུག་ལ་སྐྲག་བྱེད་མའོ། །ཕཊ་ཕཊ་ཡན་ལག་ཐམས་ཅད་ལ་མཚོན་ཆ་མ་སྟེ་གཏུམ་བྱེད་མའོ། །དེ་ལྟར་རབ་ཏུ་དགོད་བྱས་ཏེ། །ཡེ་ཤེས་འཁོར་ལོ་དེ་མཐོང་ནས། །དེ་ཡི་རྣལ་འབྱོར་བརྩམ་པར་བྱ། །དངོས་པོ་
ཀུན་གྱི་ངོ་བོ་འདིས། །མཛུབ་མོ་མདུད་བྱ་གུང་མོ་ངེས་པར་སྦྱར། །མཐེ་བོང་རྡོ་རྗེ་བརྟན་པོར་རབ་སྦྱར་སྟེ། །དེ་ནི་དཔྲལ་བའི་དབུས་སུ་རབ་སྦྱར་ནས། །བསྐོར་ཞིང་བསྐོར་ཞིང་ཀུན་ཏུ་བསྐོར་བར་བྱ། །རྐང་པ་མནན་ཅིང་གྱེན་དུ་བལྟ། །གྱེན་དུ་ཕཻཾ་གྱི་སྒྲ་སྒྲོགས་པས། །

ཕྱོགས་བཅུ་འཇིག་རྟེན་ཁམས་གནས་པའི། །དཔའ་བོ་རྣལ་འབྱོར་མ་རྣམས་འགུགས། །ཛཿཧཱུྃ་བཾ་ཧོཿ། རྡོ་རྗེ་ལྕགས་ཀྱུ་ལ་སོགས་པའི་སྦྱོར་བས་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱ་བའོ། །དཔའ་བོ་དང་རྣལ་འབྱོར་མ་རྣམས་
ཀྱིས། ནམ་མཁའི་དཀྱིལ་ཡོངས་སུ་གང་བར་བལྟས་ཏེ། བདུད་རྩི་ལྔས་ཡོངས་སུ་གང་བའི་བུམ་པས་མངོན་པར་དབང་བསྐུར་བའི་ཚུལ་གྱིས་དེ་དག་ལ་དབང་བསྐུར་བ་སྦྱིན་པར་བྱའོ། །ཇི་ལྟར་བལྟམས་པ་ཙམ་གྱིས་ཀྱང་། །དེ་བཞིན་གཤེགས་ཀུན་ཁྲུས་གསོལ་བའི། །
ལྷ་ཡི་ཆུ་འདི་དག་པ་ཡིས། །དེ་བཞིན་བདག་གིས་ཁྲུས་བྱའོ། །ཨོཾ་སརྦ་ཏ་ཐ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཧཱུྃ་ཨཱཿཧཱུྃ། རླུང་དང་མེའི་དཀྱིལ་འཁོར་གྱི་སྟེང་དུ་ཨ་ལས་བྱུང་བའི་ཐོད་པར་ཡེ་ཤེས་ལྔའི་བདུད་རྩིས་གང་བ་ཆ་བཅུ་དྲུག་དང་། ཧཱུྃ་བྃ་དང་། ཨོཾ་གྱིས་བྱིན་གྱིས་བརླབས་
ཏེ་ཡི་གེ་གསུམ་དུ་གྱུར་པར་བསམ་ལ་འཁོར་ལོ་གསུམ་བསྒོམ་པར་བྱའོ། །ཨོཾ་ས་མ་ཡ་ཤུད་དྷཱཿསརྦ་དྷརྨྨཱཿས་མ་ཡ་ཤུད་དྷོ྅་ཧྃ། ཆོས་ཐམས་ཅད་ཀུན་ཏུ་རོ་གཅིག་པས་གནས་པར་སེམས་ཀྱིས་བྱའོ། །ཡེ་ཤེས་བདུད་རྩི་སྦྱིན་པ་ཡིས། །ཡེ་ཤེས་བདུད་རྩིའི་ཆུ་བཏུང་
ངོ་། །ཨོཾ་ཨ་མྲྀ་ཏ་ཨུ་ད་ཀ་ཧཱུྃ་ཧཱུྃ་ཋ་ཋ་ལེ་ཧུྃ། ཨཱ་ཁཾ་ཧཱུྃ་ཕཊ་སྭཱ་ཧཱ། ཡེ་ཤེས་བཟླས་པའི་སྦྱོར་བ་ཡིས། །འཁོར་ལོའི་ཚོགས་མཆོག་སྤྲོ་བར་བྱ། །རུས་པ་ཆེན་པོའི་ཕྲེང་བ་ཡིས། །ཕྱིས་ནི་བཟླས་པ་དེ་གནས་བྱ། །སྲོག་དང་རྩོལ་བ་རབ་བསྡམས་ཏེ། །བསམས་ན་
སྐད་ཅིག་གིས་འཆར་རོ། །དབང་བསྐུར་མཆོད་དང་དམ་ཚིག་ནི། །རོ་གཅིག་བྱས་ཏེ་བསྒོམས་པ་ཡིས། །དེ་སྙིང་ཡེ་ཤེས་སེམས་དཔའ་དང་། །མཆོད་པ་ཡེ་ཤེས་བདུད་རྩི་ཡིས། །ལུས་དང་ངག་ཡིད་དམ་ཚིག་ནི། །སེམས་ནི་བསམ་མེད་ཤིན་ཏུ་བརྟག །བཟླས་
དང་བསྒོམ་པ་ཡང་དག་ལྡན། །རྟོག་པ་ཐམས་ཅད་རྣམ་སྤངས་ཏེ། །དམ་ཚིག་མཆོག་གི་བཟླས་པ་འདིས། །གསང་སྔགས་རྒྱལ་པོའི་མཆོག་བཟླས་སོ། །ཨོཾ་བཻ་རོ་ཙ་ནཱི་ཡེ་ཧཱུྃ་ཧཱུྃ་ཕཊ་སྭཱ་ཧཱ། ཨོཾ་སརྦ་བུད་དྷ་ཌཱ་ཀི་ནཱི་ཡེ་ཧཱུྃ་ཧཱུྃ་ཕཊ་སྭཱ་ཧཱ། ཨོཾ་དང་མིང་ནི་ཡང་དག་ལྡན། །ཧཱུྃ་

ཧཱུྃ་ཕཊ་དང་ཡང་དག་ལྡན། །རབ་ཏུ་གཏུམ་སོགས་དེ་སྔགས་སོགས། །བཟླས་པའི་མཆོག་ལ་སྦྱར་བར་བྱ། །ཨོཾ་བཛྲ་བཱ་རཱ་ཧི་པྲོ་ཏཾ་གེ་པྲོ་ཏཾ་གེ་པྲོ་ཏཾ་གེ །ཧ་ན་ཧ་པྲཱ་ཎཱཾ་ཀིཾ་ཀི་ཎི་ཁིཾ་ཁི་ཎི་དྷུ་ན་དྷུ་ན། བཛྲ་ཧ་སྟེ་ཤོ་ཥ་ཡ་ཤོ་ཥ་ཡ། བཛྲ་ཁ་ཊྭཱཾ་ག་ཀ་པ་ལ་དྷཱ་རི་ཎི། མ་ཧཱ་
བི་ཤི་ཏ་མཱཾ་སཱ་ཤ་ནི། མ་ནུ་ཥཱནྟྲ། ཕྲ་བྲྀཏྟེ་སནྣི་དྷྱ་ན་ར་ཤི་རོ་མཱ་ལཱ་གྲཾ་ཐི་ཏ་དྷཱ་རི་ཎི་སུཾ་བྷ་ནི་སུཾ་བྷ། ཧ་ན་ཧ་ན། པྲཱ་ཎཱཾ་སརྦྦ་པཱ་པ། ས་ཏྭཱ་ནཱཾ་སརྦྦ་པ་ཤཱུནཱཾ་མ་ཧཱ་མཱཾ་ས་ཙྪེ་ད་ནི། ཀྲོ་དྷ་མཱུར་ཏེ་དཾ་ཥྚཱ་ཀ་རཱ་ལི་ནི། མ་ཧཱ་མུ་དྲེ་ཤྲཱིཿཧེ་རུ་ཀ་དེ་བ་སྱཱ་གྲ་མ་ཧི་ཥི་ས་ཧ་སྲ་ཤི་རེ་ས་ཧ་སྲ། བཱ་ཧ་
བེ་ཤ་ཏ་ས་ཧ་སྲཱ་ན་ནེ་ཛྭ་ལི་ཏ་ཏེ་ཛ་སེ་ཛྭཱ་ལ་མུ་ཁི་པིཾ་ག་ལ་ལོ་ཙ་ནི། །བཛྲ་ཤ་རཱི་རེ། བཛྲ་ཨཱ་ས་ནི་མི་ལི་མི་ལི། ཏི་མི་ལི་ཏི་མི་ལི། ཧེ་ཧེ། ཧ་ཧ། ཧཱུྃ་ཧཱུྃ། ཁ་ཁ། དྷུ་དྷུ། རུ་རུ། དྷུ་རུ་དྷུ་རུ། །མུ་རུ་མུ་རུ། ཨ་དྭཻ་ཏེ་མ་ཧ་ཡོ་གི་ནཱི་པ་ཋ་ཏ་སིདྡྷེ་དྲཻཾ་དྷཾ་དྲཻཾ་དྷཾ་གྲཾ་གྲཾ་ཧེ་ཧེ་ཧ་ཧ། བྷཱི་མེ་
ཧ་ས་ཧ་ས་བཱི་རེ་ཧཱ་ཧཱ་ཧོཿཧོཿ། ཧཱུྃ་ཧཱུྃ་ཏྲཻ་ལོཀྱ་བི་ནཱ་ཤ་ནི་ཤ་ཏ་ས་ཧ་སྲ་ཀོ་ཊི་ཏ་ཐཱ་ག་ཏ་པ་རི་ཝཱ་རི་ཏེ་ཧཱུྃ་ཧཱུྃ་ཕཊ། སིཾ་ཧ་རཱུ་པེ་ཁཿག་ཛ་རཱུ་པེ་གཿཏྲཻ་ལོཀྱ་ཨུ་ད་རེ་མ་ཧཱ་ས་མུ་དྲ་མེ་ཁ་ལེ་གྲ་ས་གྲ་ས་ཧཱུྃ་ཧཱུྃ་ཕཊ། བཱི་རཱ་དྭཻ་ཏེ། ཧཱུྃ་ཧཱུྃ་ཧཿཧཿ། མ་ཧཱ་པ་ཤུ་མོ་ཧ་ནི་མ་ཧཱ་ཡོ་གཱི་ཤྭ་རཱི་ཏྭཾ། ཌཱ་ཀི་
ནཱི་སརྦྒ་ལོ་ཀཱ་ནཱཾ་བན་དྷཱ་ནི་སདྱཿཔྲ་ཏྱ་ཡ་ཀཱ་རི་ཎི་ཧཱུྃ་ཧཱུྃ་ཕཊ། བྷུ་ཏ་ཏྲཱ་ས་ནི་མ་ཧཱ་བཱི་རེ་པ་ར་མ་སིད་དྷེ་ཡོ་གཱི་ཤྭ་རི་ཕཊ། ཧཱུྃ་ཧཱུྃ་ཕཊ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། དེ་ལྟར་རྡོ་རྗེ་ཕག་མོའི་མཆོག་ཏུ་གྲུབ་པའི་སྙིང་པོ་དམ་པའོ། །ཨོཾ་ན་མོ་བྷ་ག་ཝ་ཏེ་བཛྲ་བཱ་རཱ་ཧི་བཾ་ཧཱུྃ་ཧཱུྃ་ཕཊ། ཨོྃ་ན་མ་ཨཱརྱཱ་པ་རཱ་ཛི་ཏེ་ཏྲཻ་
ལོཀྱ་མཱ་ཏེ་མ་ཧཱ་བིདྱེ་ཤྭ་རི་ཧཱུྃ་ཧཱུྃ་ཕཊ། ཨོཾ་ན་མཿསརྦ་བྷུ་ཏ་བྷ་ཡ་བ་ཧེ་མ་ཧཱ་བཛྲེ་ཧཱུྃ་ཧཱུྃ་ཕཊ། ཨོཾ་ན་མོ་བཛྲཱས་ནི་ཨ་ཛི་ཏི་ཨ་པ་རཱ་ཛི་ཏེ་བ་ཤྱཾ་ཀ་རི་ནེ་ཏྲ་བྷྲ་མ་ཎི་ཧཱུྃ་ཧཱུྃ་ཕཊ། ཨོཾ་ན་མཿཤོ་ཥ་ཎི་རོ་ཥ་ཎི་ཀྲོ་དྷེ་ཀཱ་རཱ་ལེ་ཧཱུྃ་ཧཱུྃ་ཕཊ། ཨོྃ་ན་མ་སྟྲཱ་ས་ནི་མཱ་ར་ཎི་སུ་པྲ་བྷེ་ད་ནི་པ་རཱ་ཛ་ཡེ་ཧཱུྃ་ཧཱུྃ་ཕཊ། ཨོཾ་
ན་མོ་ཛ་ཡེ་བི་ཛ་ཡེ་ཛམྦྷ་ནི་སྟམྦྷ་ནི་མོ་ཧ་ནི་ཧཱུྃ་ཧཱུྃ་ཕཊ། ཨོཾ་ན་མོ་བཛྲ་བཱ་རཱ་ཧི་མ་ཧ་ཡོ་གི་ནི་ཀ་མེ་ཤྭ་རི་ཁ་གེ་ཧཱུྃ་ཧཱུྃ་ཕཊ། སྔགས་འདི་ཐམས་ཅད་དུ་བྱས་ཏེ། ཨཱ་ལི་ཀཱ་ལི་རྡོ་རྗེ་ཕག་མོའི་བདག་ཉིད་ཀྱི་དངོས་པོར་བྱ་སྟེ། རྐང་པ་བརྒྱད་པ་ཆོ་གའི་བདག་ཉིད་ཀྱིས་མཆོད་པར་བྱའོ། །

བཟླས་པ་ཡོངས་སུ་རྫོགས་ནས་ནི། །ཞི་བའི་བཏུང་བ་བཏུང་བའི་མཆོག །ཆོས་རྣམས་མཉམ་ཉིད་དམ་ཚིག་མཆོག །སུམ་ཅུ་རྩ་བདུན་གནས་ཀྱི་མཆོག །དེ་འོག་རྣམ་པར་དག་པ་བསྒོམ། །ལུས་རྗེས་སུ་དྲན་པ་མཁའ་འགྲོ་མའོ། །ཚོར་བ་རྗེས་སུ་དྲན་པ་
ལཱ་མཱའོ། །ཆོས་རྗེས་སུ་དྲན་པ་ཁཎྜ་རོ་ཧཱའོ། །སེམས་རྗེས་སུ་དྲན་པ་རཱུ་པི་ནཱིའོ། །འདུན་པའི་རྫུ་འཕྲུལ་བསྐྱེད་པ་ནི་རབ་ཏུ་གཏུམ་མའོ། །བརྩོན་འགྲུས་ཀྱི་རྫུ་འཕྲུལ་བསྐྱེད་པ་ནི་གཏུམ་པའི་མིག་ཅན་མའོ། །དཔྱོད་པའི་རྫུ་འཕྲུལ་བསྐྱེད་པ་ནི་འོད་ལྡན་མའོ། །སེམས་ཀྱི་རྫུ་འཕྲུལ་
བསྐྱེད་པ་ནི་སྣ་ཆེན་མའོ། །དད་པའི་དབང་པོ་ནི་བརྟན་པའི་བློ་ཅན་མའོ། །བརྩོན་འགྲུས་ཀྱི་དབང་པོ་ནི་མིའུ་ཐུང་མའོ། །དྲན་པའི་དབང་པོ་ནི་ལང་ཀའི་དབང་ཕྱུག་མའོ། །ཏིང་ངེ་འཛིན་གྱི་དབང་པོ་ནི་ཤིང་གྲིབ་མའོ། །ཤེས་རབ་ཀྱི་དབང་པོ་ནི་ས་སྲུང་མའོ། །དད་པའི་
སྟོབས་ནི་འཇིགས་བྱེད་ཆེན་མོའོ། །བརྩོན་འགྲུས་ཀྱི་སྟོབས་ནི་རླུང་གི་ཤུགས་ཅན་མའོ། །དྲན་པའི་སྟོབས་ནི་ཆང་འཐུང་མའོ། །ཏིང་ངེ་འཛིན་གྱི་སྟོབས་ནི་ལྗང་ལྷ་མོའོ། །ཤེས་རབ་ཀྱི་སྟོབས་ནི་ཤིན་ཏུ་བཟང་མོའོ། །ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་ནི་རྟ་རྣ་
མའོ། །བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་ནི་བྱ་གདོང་མའོ། །དགའ་བ་ཡང་དག་བྱང་ཆུབ་ཀྱི་ཡན་ལག་ནི་འཁོར་ལོའི་ཤུགས་ཅན་མའོ། །ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་ནི་དུམ་སྐྱེས་མའོ། །ཆོས་རྣམ་པར་འབྱེད་པ་ཡང་དག་བྱང་ཆུབ་
ཀྱི་ཡན་ལག་ནི་ཆང་འཚོང་མའོ། །དྲན་པ་ཡང་དག་བྱང་ཆུབ་ཀྱི་ཡན་ལག་ནི་འཁོར་ལོའི་གོ་ཆ་མའོ། །བཏང་སྙོམས་ཡང་དག་བྱང་ཆུབ་ཀྱི་ཡན་ལག་ནི་ཤིན་ཏུ་དཔའ་མོའོ། །ཡང་དག་པའི་ལྟ་བ་ནི་སྟོབས་ཆེན་མོའོ། །ཡང་དག་པའི་རྟོག་པ་ནི་འཁོར་ལོས་སྒྱུར་མའོ། །ཡང་དག་
པའི་ངག་ནི་བརྩོན་འགྲུས་ཆེན་མོའོ། །ཡང་དག་པའི་ལས་ཀྱི་མཐའ་ནི་ཁྭ་གདོང་མའོ། །ཡང་དག་པའི་འཚོ་བ་ནི་འུག་གདོང་མའོ། །ཡང་དག་པའི་རྩོལ་བ་ནི་ཁྱི་གདོང་མའོ། །ཡང་དག་པའི་དྲན་པ་ནི་ཕག་གདོང་མ་སྟེ། རྣམ་པར་ཐར་པའི་སྒོ་བཞིའོ། །ཡང་དག་པའི་ཏིང་

ངེ་འཛིན་ནི་བཅོམ་ལྡན་འདས་མ་རྡོ་རྗེ་ཕག་མོའོ། །དགེ་བའི་ཆོས་མ་སྐྱེས་པ་རྣམས་སྐྱེད་པར་བྱེད་པ་ནི་གཤིན་རྗེ་བརྟན་མའོ། །དགེ་བའི་ཆོས་སྐྱེས་པ་རྣམས་རྗེས་སུ་གནས་པ་དང་སྲུང་བར་བྱེད་པ་ནི་གཤིན་རྗེའི་ཕོ་ཉ་མའོ། །མི་དགེ་བའི་ཆོས་སྐྱེས་པ་རྣམས་སྤོང་བར་བྱེད་
པ་ནི་གཤིན་རྗེ་མཆེ་བ་མའོ། །མི་དགེ་བའི་ཆོས་མ་སྐྱེས་པ་རྣམས་མི་སྐྱེ་བར་བྱེད་པ་ནི་གཤིན་རྗེ་འཇོམས་མའོ། །ཆོས་བདག་མེད་པའི་ལམ་གནས་སུ། །དཀྱིལ་འཁོར་དམ་པར་བཞུགས་པ་ནི། །ཤེས་རབ་ཕ་རོལ་ཕྱིན་སྦྱོར་བ། །དེ་བཞིན་རྣལ་འབྱོར་པ་གནས་བྱ། །སྣང་
བ་མེད་པའི་གནས་ལ་གནས། །སྣང་བ་མེད་ལ་ཡང་དག་བརྟེན། །སྤྱོད་པ་མེད་པའི་ཆོས་རྣམས་ལ། །ཆོས་ཅན་མེད་ཅིང་ཆོས་ཉིད་མེད། །རྟེན་འབྲེལ་མཁའ་དང་མཉམ་པའི་ཆོས། །དངོས་མེད་མཚན་མ་མེད་པའོ། །འདི་ནི་དེ་ཉིད་གོ་འཕང་གནས། །ཡེ་ཤེས་དག་གི་མིག་
གིས་མཐོང་། །ཕྲ་རབ་རྡུལ་བྲལ་དང་མཉམ་པ། །འཁོར་ལོའི་གནས་མཐོང་ཤིན་ཏུ་ངེས། །སྐྲ་རྩེ་སྟོང་ཕྲག་བརྒྱ་ཡིས་ནི། །ཆ་དང་ཆ་རུ་ཡོངས་སུ་བརྟག །ཧེ་རུ་ཀ་དང་རྣལ་འབྱོར་མ། །ལྷན་ཅིག་བྷ་གའི་གནས་མཐོང་བ། །འཁོར་ལོས་སྒྱུར་བ་རབ་བརྩོན་པས། །ཁྭ་
གདོང་མ་ནི་ཕྱི་རོལ་དགོད། །ཧེ་རུ་ཀ་སོགས་བདག་པོ་ཁྱོད། །མཁའ་འགྲོ་བཞི་ཡིས་ཡོངས་སུ་བསྐོར། །ཕན་ཚུན་དུ་ནི་བདག་པོ་བྱེད། །རྡོ་རྗེ་སེམས་སོགས་སྦྱོར་བར་ལྡན། །ཕྱི་རོལ་དུར་ཁྲོད་དྲག་པོ་དང་། །ཁ་དོག་སྣ་ཚོགས་མཆོག་གི་མཆོག །ཤིང་མཆོག་སྣ་ཚོགས་
མཛེས་པ་དང་། །ཁྱི་དང་ཅེ་སྤྱང་འཇིགས་པ་དང་། །ཁྭ་དང་འུག་པ་བྱ་གར་རྒོད། །ཅེ་སྤྱང་དེ་བཞིན་རོ་བསྲེགས་པ། །ཀེང་རུས་གསལ་ཤིང་གིས་ཕུག་དང་། །འགེགས་ནས་འཕྱང་དང་ཕྱེད་བསྲེགས་དང་། །ཐོད་པ་སྐམ་པོ་པུས་མོ་དང་། །མགོ་མེད་ལག་ན་ཐོད་པ་དཀར། །རྣམ་
པ་སྣ་ཚོགས་སྦྲུལ་གྱིས་མཛེས། །དྲག་པོའི་སྦྲུལ་དང་དེ་བཞིན་རྔ། །སེང་གེ་ཕག་དང་སྟག་དང་ནི། །དེ་བཞིན་ར་དང་ལུག་དག་དང་། །གླང་པོ་རྟ་དང་བོང་བུ་དང་། །རྔ་མོ་སྣ་ཚོགས་དམ་ཚིག་མཆོག །རྣམ་པ་སྣ་ཚོགས་ཆང་དང་ནི། །འབྲུ་ཆང་བཏུང་བའི་མཆོག་རྣམས་ཀྱིས། །དཔལ་

བོ་བཟང་པོ་འདུས་པ་དང་། །སྣ་ཚོགས་རྣལ་འབྱོར་མ་ཚོགས་དང་། །ཐོད་པ་ཁ་ཊྭཱཾ་ག་དག་དང་། །གྲི་གུག་ཅང་ཏེའུ་མཆོག་རྣམས་འཛིན། །སྣ་ཚོགས་རོལ་མོ་བཟང་པོ་དང་། །བཟའ་བའི་རོ་མཆོག་ལོངས་སྤྱོད་དང་། །སྣ་ཚོགས་འོ་དང་འཁྱུད་པ་དང་། །བཅའ་དང་
བལྡག་པའི་མཆོག་རྣམས་ཀྱིས། །རྣམ་པ་དེ་ལྟར་དུར་ཁྲོད་ནི། །གནོད་སྦྱིན་རོ་ལངས་སྲིན་པོ་རྣམས། །ཧེ་རུ་ཀ་ཡི་ང་རྒྱལ་གྱིས། །དེ་ལ་གཏོར་མ་སྦྱིན་པར་བྱ། །ཅང་ཏེའུ་རྡོ་རྗེ་དྲིལ་བུ་དང་། །གར་དང་རོལ་མོ་བྱེད་པ་དང་། །ཕྱོགས་ཀྱི་གོས་ཅན་ཕྱག་རྒྱར་ལྡན། །ཧཱུྃ་ཧཱུྃ་ཕཊ་ཀི་ལི་ཀི་ལ་
བྱ། །གཡས་བརྐྱང་པ་ཡི་སྦྱོར་བ་ཡིས། །འབར་བའི་ཕྱག་རྒྱ་བཅིང་བར་བྱ། །དམ་ཚིག་ཁ་རུ་བཅུག་ནས་ནི། །སྔགས་འདི་རྗེས་སུ་དྲན་པར་བྱ། །ཨོྃ་ཨཱ་ར་ལི་ཧོ། །བཛྲ་ཌཱ་ཀི་ནཱི་ས་མ་ཡ་སྟྭཾ་དྲྀ་ཤྱ་ཧོ། །དེ་སྐད་གསུམ་དང་བཞི་དང་ལྔ་བརྗོད་པར་བྱའོ། །གཡས་སྐོར་དང་གཡོན་
སྐོར་གྱིས་ཀྱང་ཐོད་པའི་ནང་གི་སྦྱིན་པར་བྱ་བ་རྣམས། །རྡོ་རྗེ་ཐལ་མོ་ཁ་གྱེན་དུ་ཕྱེ་ལ་སྔགས་འདི་བརྗོད་དོ། །ཨོཾ་ཁ་ཁ་ཁཱ་ཧི་ཁཱ་ཧི། སརྦ་ཡཀྵ་རཱཀྵ་ས་སརྦ་བྷཱུ་ཏ་པྲེ་ཏ་པི་ཤཱ་ཙ་ཨུན་མཱ་ད་ཨ་པསྨཱ་ར་ཌཱ་ཀ་ཌཱ་ཀིནྱཱ་ད་ཡ་ཨི་མཾ་བ་ལིཾ་གྲྀཧྞཾ་ཏུ། ས་མ་ཡ་རཀྵན་ཏུ་མ་མ་སརྦྦ་སིད་དྷི་མྨེ་པྲ་ཡཙྪན་ཏུ། ཡ་ཐཻ་
བཾ་ཡ་ཐེཥྚཾ་བྷུཉྫ་ཐཱ། པི་བ་ཐ་ཛིགྷྲ་ཐ་མཱ་ཏི་ཀྲ་མ་ཐཱ། མ་མ་སརྦྦ་རྟྟཱ་ཡ་སཏྶུ་ཁཾ། བི་ཤུད་དྷ་ཡ་ས་ཧཱ་ཡི་ཀ་བྷ་བནྟུ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། །དེ་ལྟར་ཆོ་ག་དང་ཆོ་གས་ཐུན་མཚམས་བཞིར་སྦྱིན་པར་བྱའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་གསང་བའི་གསང་ཆེན་འདི་གསུངས་
པ། དངོས་པོ་མེད་པའི་བདག་ཉིད་ཆོས། །ནམ་མཁའ་ལྟ་བུ་དྲི་མ་མེད། །སྟོང་ཉིད་ཡེ་ཤེས་རྡོ་རྗེ་ཡིས། །སྟོང་པ་ཤིན་ཏུ་རྣམ་པར་བསྒོམ། །ལེགས་སོ་ཞེས་ནི་བྱ་བ་བྱིན། །རྒྱུད་རྫོགས་པ་ཡི་སྦྱོར་བ་ལས། །ལེགས་སོ་ལེགས་སོ་ཡེ་ཤེས་ཆེ། །བཤད་པའི་རྒྱུད་ཕྱི་མ་ལས་ཕག་མོ་མངོན་
པར་བྱང་ཆུབ་པ་ཞེས་བྱ་བ་རྫོགས་སོ།། །།རྒྱ་གར་གྱི་མཁན་པོ་ཛྙཱ་ནཱ་ཀ་རའི་ཞལ་སྔ་ནས་དང་། ཞུ་ཆེན་གྱི་ལོ་ཙྪ་བ་ཁུ་སྟོན་དངོས་གྲུབ་ཀྱིས་བསྒྱུར་ཏེ་གཏན་ལ་ཕབ་པ།། །།

༄༅༅། །རྒྱ་གར་སྐད་དུ། ཌཱ་ཀི་ནཱི་སརྦ་ཙིཏྟ་ཨ་དྭ་ཡ་ཨ་ཙིཏྟ་ཛྙཱ་ན་བཛྲ་བཱ་རཱ་ཧི་ཨ་བྷི་བྷ་བ་ཏནྟྲ་རཱ་ཛ་ནཱ་མ། བོད་སྐད་དུ། མཁའ་འགྲོ་མ་ཐམས་ཅད་ཀྱི་ཐུགས་གཉིས་སུ་མེད་པ་བསམ་གྱིས་མི་ཁྱབ་པའི་ཡེ་ཤེས་རྡོ་རྗེ་ཕག་མོ་མངོན་པར་འབྱུང་བའི་རྒྱུད་ཀྱི་རྒྱལ་པོ་
ཞེས་བྱ་བ། མགོན་པོ་དཔའ་བོ་འཇིགས་བྱེད་དཔལ་ཧེ་རུ་ཀ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། ཕྱི་དང་ནང་དང་གསང་བའི་དུར་ཁྲོད་ཆེན་པོའི་གནས་མཆོག་ཏུ་གྱུར་པ་ན། བཅོམ་ལྡན་འདས་ཞེ་སྡང་འཇོམས་པའི་ཧེ་རུ་ཀ་དང་། གཏི་མུག་
འཇོམས་པའི་ཧེ་རུ་ཀ་དང་། ང་རྒྱལ་འཇོམས་པའི་ཧེ་རུ་ཀ་དང་། །འདོད་ཆགས་འཇོམས་པའི་ཧེ་རུ་ཀ་དང་། ཕྲག་དོག་འཇོམས་པའི་ཧེ་རུ་ཀ་དང་། ཡུམ་སངས་རྒྱས་སྤྱན་དང་། ཡུམ་མཱ་མ་ཀཱི་དང་། ཡུམ་གོས་དཀར་མོ་དང་། ཡུམ་དམ་ཚིག་སྒྲོལ་མ་དང་། ཡུམ་ཀུན་ཏུ་
བཟང་མོ་དང་། དེ་རྣམས་ཀྱི་བྷ་ག་ལ་ལྷན་ཅིག་སྐྱེས་པའི་ཡེ་ཤེས་བསམ་གྱིས་མི་ཁྱབ་པའི་ཚུལ་དུ་བཞུགས་སོ། །དེའི་ཚེ་དེའི་དུས་ན་ཡེ་ཤེས་ཀྱི་མཁའ་འགྲོ་མ་དུར་ཁྲོད་ཀྱི་བདག་མོ་དང་། ཁྲོས་མ་ནག་མོ་དང་། བདེ་ཆེན་དཀར་མོ་དང་། སེར་མོ་དོན་གྲུབ་མ་དང་། དམར་མོ་སྒྲ་སྒྲོག་
མ་དང་། སྣ་ཚོགས་མཐར་ཕྱིན་མ་དང་། ལས་ཀྱི་གཙོ་མོ་ལ་སོགས་པའི་ཡེ་ཤེས་དང་། ལས་ལས་གྲུབ་པའི་མཁའ་འགྲོ་མའི་ཚོགས་དཔག་ཏུ་མེད་པ་དང་། གཞན་ཡང་བཛྲ་ཌཱ་ཀི་ནཱི་དང་། རཏྣ་ཌཱ་ཀི་ནཱི་དང་། པདྨ་ཌཱ་ཀི་ནཱི་དང་། །ཀརྨ་ཌཱ་ཀི་ནཱི་དང་། ས་མ་ཡ་ཌཱ་ཀི་ནཱི་དང་། བི་ཤྭ་
ཌཱ་ཀི་ནཱི་དང་། སརྦ་ཌཱ་ཀི་ནཱི་དང་། ལོ་ཀ་ཌཱ་ཀི་ནཱི་ལ་སོགས་ཏེ་དུར་ཁྲོད་བརྒྱད་ཀྱི་མཁའ་འགྲོ་མ་དང་། དཔའ་བོ་དང་དཔའ་མོའི་ཚོགས་དཔག་ཏུ་མེད་པ་དང་། གཞན་ཡང་འཇིག་རྟེན་པའི་མེས་པོ་ཚངས་པ་དང་། བརྒྱ་བྱིན་ལ་སོགས་པའི་ལྷའི་ཚོགས་དཔག་ཏུ་མེད་པ་དང་། གཞན་ཡང་
རྒྱལ་པོ་ཆེན་པོ་བཞི་པོ་རང་གི་འཁོར་དང་བཅས་པ་དང་། ཕྱོགས་སྐྱོང་བ་བཅུ་དང་། ལྷ་མ་སྲིན་སྡེ་བརྒྱད་དང་། འཁོར་དཔག་ཏུ་མེད་པ་དང་ཐབས་ཅིག་པའི་ཚུལ་གྱིས་གནས་སོ། །ཡང་དེའི་ཚེ་ན་ཡེ་ཤེས་ཀྱི་མཁའ་འགྲོ་མ་དུར་ཁྲོད་ཀྱི་བདག་མོ་ཞེས་བྱ་བ་རང་གི་སྟན་ལས་ལངས་ནས་

མགོན་པོ་དཔའ་བོ་འཇིགས་བྱེད་ཧེ་རུ་ཀ་ལ་འདི་སྐད་ཅེས་གསོལ་ཏོ། །ཀྱེ་ཀྱེ་མགོན་པོ་བདག་ལ་གསོན། །ཁྱེད་ཀྱི་འཁོར་དུ་འདུས་པ་ཡི། །སྐལ་དང་ལྡན་པ་འདི་རྣམས་ལ། །ལམ་ལོག་མུ་སྟེགས་མ་ལགས་པའི། །དམན་པ་ཉན་ཐོས་མ་ལགས་པའི། །
མ་སྨིན་མཚན་ཉིད་མ་ལགས་པའི། །བསམ་གྱིས་མི་ཁྱབ་ཆོས་ཅིག་ཞུ། །ཕྱོགས་རིས་མེད་པ་ལྟ་བའི་མཆོག །བསམ་གྱིས་མི་ཁྱབ་བཤད་དུ་གསོལ། །དགག་སྒྲུབ་མེད་པ་སྤྱོད་པའི་མཆོག །བསམ་གྱིས་མི་ཁྱབ་བཤད་དུ་གསོལ། །བར་ཆོད་སེལ་བ་བརྡ་ཡི་མཆོག །བསམ་
གྱིས་མི་ཁྱབ་བཤད་དུ་གསོལ། །སྨིན་པར་བྱེད་པ་དབང་གི་མཆོག །བསམ་གྱིས་མི་ཁྱབ་བཤད་དུ་གསོལ། །སངས་རྒྱས་ཐོབ་བྱེད་འབྲས་བུའི་མཆོག །ཡེ་ཤེས་ལྔ་ཡི་གཟུགས་བརྙན་ཏེ། །བསམ་གྱིས་མི་ཁྱབ་བཤད་དུ་གསོལ། །རྣམ་རྟོག་སེལ་བྱེད་རྣམ་རྒྱལ་ལྔ། །བསམ་
གྱིས་མི་ཁྱབ་བཤད་དུ་གསོལ། །མཁའ་འགྲོ་མ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་བསམ་གྱིས་མི་ཁྱབ་པ་ཕག་མོ་མངོན་པར་འབྱུང་བ་ཞེས་བྱ་བ་ལས། གླེང་གཞིའི་ལེའུ་སྟེ་དང་པོའོ།། །།དེ་ནས་མགོན་པོ་དེས་སྤྱན་ཕྱོགས་མཚམས་ཀུན་ལ་གཟིགས་ནས་ཞལ་
རྡོ་རྗེའི་མགུར་འཛུམ་པ་མཛད་ནས་བཀའ་སྩལ་པ་ནི། ཨེ་མ་ཧོ། ཉོན་ཅིག་དུར་ཁྲོད་བདག་མོ་ཁྱོད། །དུས་འདིར་ཚོགས་པའི་འཁོར་རྣམས་ལ། །མངོན་པར་འབྱུང་བའི་རྒྱུད་བཤད་ཀྱིས། །ཁ་སྦུབ་ཞབས་རྡོལ་དྲི་མ་ཅན། །སྣོད་སྐྱོན་གསུམ་པོ་སྤང་བྱས་ལ། །རྩེ་གཅིག་སེམས་
ཀྱིས་མཉན་པར་གྱིས། །ཕྱོགས་རིས་མེད་པའི་ལྟ་བ་དེ། །གཉུག་མའི་སེམས་ཀྱིས་བལྟ་བར་གྱིས། །དམིགས་གཏད་མེད་པའི་སྒོམ་པ་ནི། །གཉུག་མའི་ཡིད་ཀྱིས་བསྒོམ་པར་བྱ། །དགག་སྒྲུབ་མེད་པ་སྤྱོད་པའི་མཆོག །གཉུག་མའི་ཡིད་ཀྱིས་སྤྱད་པར་བྱ། །བར་ཆོད་སེལ་
བ་བརྡ་ཡི་ཆོས། །གཉུག་མའི་ཡིད་ཀྱིས་བསལ་བར་བྱ། །སྨིན་པར་བྱེད་པ་དབང་གི་མཆོག །གཉུག་མའི་སེམས་ཀྱིས་བསྐུར་བར་བྱ། །ཚེ་གཅིག་འབྲས་བུ་སངས་རྒྱས་དེ། །གཉུག་མའི་སེམས་ཀྱིས་བསྒྲུབ་པར་བྱ། །ཡེ་ཤེས་ལྔ་ཡི་གཟུགས་བརྙན་དེ། །མ་བཅོས་སེམས་

ཀྱིས་བསྒྲུབ་པར་བྱ། །རྣམ་རྟོག་སེལ་བྱེད་རྣམ་རྒྱལ་ལྔ། །མ་བཅོས་སེམས་ཀྱིས་གཅད་པར་བྱ། །མཁའ་འགྲོ་མ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་བསམ་གྱིས་མི་ཁྱབ་པ་ལས་ཕག་མོ་མངོན་པར་འབྱུང་བའི་རྒྱུད་ལས་སྟོན་པས་ཞལ་གྱིས་བཞེས་པའི་ལེའུ་སྟེ་
གཉིས་པའོ།། །།དེ་ནས་སྟོན་པས་བཀའ་སྩལ་པ། །ཚེ་གཅིག་སངས་རྒྱས་ཐོབ་འདོད་པས། །དང་པོ་གདེང་ཆེན་ལྟ་བ་གཅེས། །དེས་ན་ལྟ་བ་དང་པོར་བསྟན། །ཕྱོགས་རིས་མེད་པ་ལྟ་བའི་མཆོག །ནམ་མཁའ་ལྟ་བུ་ཤེས་པར་གྱིས། །ཐམས་ཅད་འདེགས་པ་ལྟ་
བའི་མཆོག །ས་གཞི་ལྟ་བུར་ཤེས་པར་གྱིས། །ཐམས་ཅད་སྡུད་པ་ལྟ་བའི་མཆོག །འབྱུང་བ་ཆུ་ལྟར་ཤེས་པར་གྱིས། །ཉོན་མོངས་སྲེག་པ་ལྟ་བའི་མཆོག །འབྱུང་བ་མེ་ལྟར་ཤེས་པར་གྱིས། །ངོས་གཟུང་མེད་པ་ལྟ་བའི་མཆོག །འབྱུང་བ་རླུང་ལྟར་ཤེས་པར་གྱིས། །
དེ་ནས་ཡང་སྟོན་པས་གསུངས་པ། འཕོ་འགྱུར་མེད་པ་ལྟ་བའི་མཆོག །རི་བོ་ལྟ་བུར་ཤེས་པར་གྱིས། །གཡོ་འགུལ་མེད་པ་ལྟ་བའི་མཆོག །རྒྱ་མཚོ་ལྟ་བུར་ཤེས་པར་བྱ། །གསལ་ལ་མ་འདྲེས་ལྟ་བའི་མཆོག །འཇའ་ཚོན་ལྟ་བུར་ཤེས་པར་གྱིས། །གཉིས་སུ་མེད་པ་
ལྟ་བའི་མཆོག །ག་བུར་ལྟ་བུར་ཤེས་པར་བྱ། །དེ་ནས་ཡང་གསང་བས་ཚིག་འདི་གསུངས་ཏེ། ཟིལ་གྱིས་གནོན་པ་ལྟ་བའི་མཆོག །སེང་གེ་ལྟ་བུར་ཤེས་པར་བྱ། །ཉམ་ང་མེད་པ་ལྟ་བའི་མཆོག །གླང་ཆེན་ལྟ་བུར་ཤེས་པར་བྱ། །སྟོབས་དང་ལྡན་པ་ལྟ་བའི་མཆོག །
རྟ་མཆོག་ལྟ་བུར་ཤེས་པར་བྱ། །ཀུན་ཏུ་རྒྱུག་པ་ལྟ་བའི་མཆོག །སྟག་མོ་ལྟ་བུར་ཤེས་པར་བྱ། །འཇིགས་པ་མེད་པ་ལྟ་བའི་མཆོག །དོམ་བུ་ལྟ་བུར་ཤེས་པར་བྱ། །དེ་ནས་ཡང་གསང་བའི་ཚིག་འདི་གསུངས་ཏེ། སྐྱོན་གྱིས་མ་གོས་ལྟ་བའི་མཆོག །བྱང་ཆུབ་སེམས་དེ་
དཀར་པོར་སྣང་། །དུས་གསུམ་མི་འགྱུར་ལྟ་བའི་མཆོག །བྱང་ཆུབ་སེམས་དེ་ནག་པོར་སྣང་། །ཡོན་ཏན་རྒྱས་པ་ལྟ་བའི་མཆོག །བྱང་ཆུབ་སེམས་དེ་སེར་པོར་སྣང་། །ཀུན་ལ་ཁྱབ་པ་ལྟ་བའི་མཆོག །བྱང་ཆུབ་སེམས་དེ་དམར་པོར་སྣང་། །ཕྲིན་ལས་རྫོགས་པ་ལྟ་བའི་

མཆོག། །བྱང་ཆུབ་སེམས་དེ་ལྗང་ཁུར་ཤར། །དེ་ནས་ཡང་གསང་བའི་ཚིག་གསུངས་ཏེ། །དུས་གསུམ་སྣང་བ་ལྟ་བའི་མཆོག །རྣམ་པར་སྣང་མཛད་ལྟ་བུར་ཤར། །ཆོས་ཉིད་དོན་ལ་རྟག་སེམས་པས། །རྡོ་རྗེ་སེམས་དཔའ་ལྟ་བུར་ཤར། །ཐམས་ཅད་
མཉམ་པ་ཉིད་རྟོགས་པས། །རིན་ཆེན་འབྱུང་ལྡན་ལྟ་བུར་ཤར། །ཆོས་ཅན་སོ་སོར་མ་འདྲེས་པས། །སྣང་བ་མཐའ་ཡས་ལྟ་བུར་ཤར། །སྣ་ཚོགས་སྣང་ལ་མ་འདྲེས་པས། །དོན་ཡོད་གྲུབ་པ་ལྟ་བུར་ཤར། །ཞེས་པ་གསུངས་སོ། །མཁའ་འགྲོ་མ་ཐམས་ཅད་ཀྱི་ཐུགས་
གཉིས་སུ་མེད་པའི་ཡེ་ཤེས་བསམ་གྱིས་མི་ཁྱབ་པ་ཕག་མོ་མངོན་པར་འབྱུང་བའི་རྒྱུད་ལས་ལྟ་བ་བསྟན་པའི་ལེའུ་སྟེ་གསུམ་པའོ།། །།དེ་ནས་དུར་ཁྲོད་བདག་མོ་དེས། །སྟོན་པ་ལ་ནི་འདི་སྐད་ཞུས། །རྟོགས་པ་ལྟ་བའི་རྗེས་ཐོགས་ལ། །བསྒོམ་པའི་གོ་རིམས་ཇི་ལྟ་
བུ། །ཞེས་ཞུས་པས། དེ་ནས་སྟོན་པས་བཀའ་སྩལ་པ། །སངས་རྒྱས་ཐོབ་པར་འདོད་པ་ཡིས། །རྟོགས་པའི་དོན་གོ་བསྒོམས་ལས་བྱུང་། །གཞན་དུ་འབྲས་བུ་འབྱུང་མི་འགྱུར། །སྣ་ཚོགས་སྣང་བའི་ཆོས་རྣམས་ཀུན། །ཡེ་ནས་སྤྲོས་དང་བྲལ་བ་ལ། །རྟག་པར་འཛིན་
པ་བསྒོམ་པའི་སྐྱོན། །ཕྱི་དང་ནང་གི་ཆོས་ཉིད་ལ། །ཆད་པར་འཛིན་པ་བསྒོམ་པའི་སྐྱོན། །འོ་ན་ཇི་ལྟར་བསྒོམ་ཞེ་ན། །ལམ་མེད་ལམ་གོལ་དམན་པའི་ལམ། །འདི་རྣམས་སྤངས་ཏེ་བསྒོམ་པར་བྱ། །དང་པོ་བྱང་ཆུབ་སེམས་བསྐྱེད་དེ། །སྨོན་འཇུག་གཉིས་པོ་སྔོན་དུ་
གཅེས། །གཟུང་བ་ཡུལ་མེད་སྒོམ་པའི་མཆོག །ཆོས་ཀྱི་བདག་མེད་རྟོགས་པར་བྱ། །འཛིན་པའི་སེམས་མེ་སྒོམ་པའི་མཆོག །གང་ཟག་བདག་མེད་རྟོགས་པར་བྱ། །ཆོས་རྣམས་གང་ཡིན་མི་འགེགས་པས། །ཐབས་ཀྱི་ལམ་དུ་ཤེས་པར་བྱ། །ངོ་བོ་ཅི་ཡང་མ་གྲུབ་
པས། །ཤེས་རབ་ལམ་དུ་ཤེས་པར་བྱ། །ཆོས་རྣམས་རྒྱུ་མེད་སྒོམ་པའི་མཆོག །སྟོང་པ་ཉིད་ཀྱི་རྣམ་ཐར་ཡིན། །འབྲས་བུ་སྟོང་པ་སྒོམ་པའི་མཆོག །མཚན་མེད་པ་ཡི་རྣམ་ཐར་ཡིན། །རྒྱུ་འབྲས་དབྱེར་མེད་སྒོམ་པའི་མཆོག །སྨོན་པ་མེད་པའི་རྣམ་ཐར་ཡིན། །ཀུན་ལ་

བྱམས་པ་སྒོམ་པའི་མཆོག །བྱམས་པ་ཚད་མེད་རང་བཞིན་ཡིན། །ཀུན་ལ་བརྩེ་བ་སྒོམ་པའི་མཆོག །སྙིང་རྗེ་ཚད་མེད་ངོ་བོ་ཉིད། །ཀུན་ལ་ཕན་པ་སྒོམ་པའི་མཆོག །དགའ་བ་ཚད་མེད་ངོ་བོ་ཉིད། །ཀུན་ལ་ཁྱབ་པ་སྒོམ་པའི་མཆོག །བཏང་སྙོམས་ཚད་མེད་ངོ་བོ་
ཉིད། །བསོད་ནམས་ཚོགས་སོག་སྒོམ་པའི་མཆོག །བཞི་གསུམ་བཅུ་གཉིས་བདག་ཉིད་ཅན། །ལམ་ལ་བསྒོམས་པ་སྒོམ་པའི་མཆོག །ངེས་འབྱེད་བཞི་ཡི་བདག་ཉིད་ཅན། །ཡེ་ཤེས་མཐོང་བ་སྒོམ་པའི་མཆོག །བྱང་ཆུབ་ཡན་ལག་རྣམ་བདུན་ཡིན། །གོམས་པར་
བྱེད་པ་སྒོམ་པའི་ལམ། །འཕགས་ལམ་བརྒྱད་ཀྱི་བདག་ཉིད་ཅན། །གོམས་པ་མཐར་ཕྱིན་སྒོམ་པའི་མཆོག །བཅུ་པ་ལ་ནི་ཡོངས་སུ་གྲོལ། །སངས་རྒྱས་པ་ཡི་རྣམ་ཐར་ཡིན། །ཆགས་སེམས་བྲལ་བ་སྒོམ་པའི་མཆོག །སྦྱིན་པའི་ཕ་རོལ་ཕྱིན་པ་ཡིན། །རང་སེམས་དག་
པ་སྒོམ་པའི་མཆོག །ཚུལ་ཁྲིམས་ཕ་རོལ་ཕྱིན་པ་ཡིན། །ཇི་མི་སྙམ་པ་སྒོམ་པའི་མཆོག །བཟོད་པའི་ཕ་རོལ་ཕྱིན་པ་ཡིན། །གོ་ཆ་སྦྱོར་བ་སྒོམ་པའི་མཆོག །བརྩོན་འགྲུས་ཕ་རོལ་ཕྱིན་པ་ཡིན། །གཡེང་བ་མེད་པ་སྒོམ་པའི་མཆོག །བསམ་གཏན་ཕ་རོལ་ཕྱིན་
པ་ཡིན། །འཁོར་འདས་ཤེས་པ་སྒོམ་པའི་མཆོག །ཤེས་རབ་ཕ་རོལ་ཕྱིན་པ་ཡིན། །ཉོན་མོངས་མི་སྤོང་སྒོམ་པའི་མཆོག །ཐབས་ཀྱི་ཕ་རོལ་ཕྱིན་པ་ཡིན། །མི་མཐུན་ཟིལ་གནོན་སྒོམ་པའི་མཆོག །སྟོབས་ཀྱི་ཕ་རོལ་ཕྱིན་པ་ཡིན། །ཅི་བསམས་འགྲུབ་པ་སྒོམ་པའི་
མཆོག། །སྨོན་ལམ་ཕ་རོལ་ཕྱིན་པ་ཡིན། །ཇི་སྙེད་མཁྱེན་བྱ་སྒོམ་པའི་མཆོག །ཡེ་ཤེས་ཕ་རོལ་ཕྱིན་པ་ཡིན། །ཆོས་དབྱིངས་ཡེ་ཤེས་སྒོམ་པའི་མཆོག །སྤྲོས་པ་མེད་པའི་རང་བཞིན་ཡིན། །མེ་ལོང་ཡེ་ཤེས་སྒོམ་པའི་མཆོག །ཐམས་ཅད་གཟུགས་བརྙན་ལྟར་
ཤེས་ཡིན། །མཉམ་ཉིད་ཡེ་ཤེས་སྒོམ་པའི་མཆོག །ཀུན་ལ་སྙོམས་པའི་བདག་ཉིད་ཡིན། །ཀུན་རྟོག་ཡེ་ཤེས་སྒོམ་པའི་མཆོག །མ་འདྲེས་གསལ་བའི་ངོ་བོ་ཉིད། །བྱ་གྲུབ་ཡེ་ཤེས་སྒོམ་པའི་མཆོག །ཕྲིན་ལས་ཐམས་ཅད་དུས་གཅིག་རྫོགས། །མཁའ་འགྲོ་མ་

ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་བསམ་གྱིས་མི་ཁྱབ་པ་ཕག་མོ་མངོན་པར་འབྱུང་བའི་རྒྱུད་ཅེས་བྱ་བ་ལས་སྒོམ་པའི་ལེའུ་སྟེ་བཞི་བའོ།། །།དེ་ནས་དུར་ཁྲོད་བདག་མོ་དེས། །ཧེ་རུ་ཀ་ལ་འདི་སྐད་གསོལ། །གོམས་པར་བྱ་བའི་རྗེས་ཐོགས་
ལ། །སྤྱོད་པའི་གོ་རིམས་ཇི་ལྟར་བགྱི། །དེ་ནས་སྟོན་པས་གསང་བའི་ཚིག་འདི་སྐད་ཅེས་བཀའ་སྩལ་ཏོ། །ཅུང་ཟད་དྲོད་ནི་ཐོབ་པ་དང་། །དེ་ཚེ་སྤྱོད་པ་སྤྱད་པར་བྱ། །དང་པོ་གསང་བའི་སྤྱོད་པ་བྱ། །བྱང་ཆུབ་སེམས་ནི་དྲོད་ཐོབ་ནས། །རིག་པ་བརྟུལ་ཞུགས་སྤྱོད་པར་བྱ། །
ལྷན་ཅིག་སྐྱེས་པའི་དྲོད་ཐོབ་ནས། །མ་དད་ཟློག་པའི་སྤྱོད་པ་བྱ། །ཆུ་ཚོད་ལྟ་བུའི་དྲོད་ཐོབ་ནས། །ཚོགས་ཀྱི་སྤྱོད་པ་ཅི་བདེར་སྤྱད། །སྨྱོན་པ་ལྟ་བུའི་སེམས་ཐོབ་ནས། །ཕྱོགས་མེད་རྣམ་རྒྱལ་སྤྱོད་པ་བྱ། །དེ་ཡི་དབྱེ་བ་གཞན་ན་གསལ། །གནས་དང་གྲོགས་དང་དུས་དང་
ཟས། །ལེའུ་གཞན་ནས་ཤེས་པར་བྱ། །ཀུན་གྱིས་བཀུར་བ་སྤྱོད་པའི་མཆོག །རྒྱལ་པོ་ལྟ་བུའི་སྤྱོད་པ་བྱ། །ངོ་ཚ་ཤེས་པ་སྤྱོད་པའི་མཆོག །རྗེ་རིགས་ལྟ་བུའི་སྤྱོད་པ་བྱ། །ཆགས་སྡང་འཁྲུ་བ་སྤྱོད་པའི་མཆོག །བྲམ་ཟེ་ལྟ་བུའི་སྤྱོད་པ་བྱ། །སྲིད་དང་བྲལ་བ་སྤྱོད་པའི་
མཆོག། །དམངས་རིགས་ལྟ་བུའི་སྤྱོད་པ་བྱ། །དམས་པ་འཛིན་པ་སྤྱོད་པའི་མཆོག །གདོལ་པ་ལྟ་བུའི་སྤྱོད་པ་བྱ། །དེ་ནས་གཞན་ཡང་བཤད་བྱ་སྟེ། །མཐོ་ས་འཛིན་པ་སྤྱོད་པའི་མཆོག །སེང་གེ་ལྟ་བུའི་སྤྱོད་པ་བྱ། །ཉམ་ང་མེད་པ་སྤྱོད་པའི་མཆོག །གླང་ཆེན་ལྟ་བུའི་སྤྱོད་
པ་བྱ། །ཤུགས་དང་ལྡན་པ་སྤྱོད་པའི་མཆོག །རྟ་མཆོག་ལྟ་བུའི་སྤྱོད་པ་བྱ། །རྣམ་རྟོག་གསོད་པ་སྤྱོད་པའི་མཆོག །སྤྱང་ཀི་ལྟ་བུའི་སྤྱོད་པ་བྱ། །དྲག་ཤུལ་ལྟ་བྱེད་སྤྱོད་པའི་མཆོག །དྲེད་མོ་ལྟ་བུའི་སྤྱོད་པ་བྱ། །དེ་ནས་གཞན་ཡང་བཤད་བྱ་སྟེ། །གཟའ་གཏད་མེད་པ་སྤྱོད་
པའི་མཆོག །རི་དགས་ལྟ་བུའི་སྤྱོད་པ་བྱ། །ངོ་ཚ་བྲལ་བ་སྤྱོད་པའི་མཆོག །རོ་ལངས་ལྟ་བུའི་སྤྱོད་པ་བྱ། །རོ་དང་འགྲོགས་པ་སྤྱོད་པའི་མཆོག །རིགས་ངན་ལྟ་བུའི་སྤྱོད་པ་བྱ། །དུར་ཁྲོད་གནས་པ་སྤྱོད་པའི་མཆོག །ཅེ་སྤྱང་ལྟ་བུའི་སྤྱོད་པ་བྱ། །བག་ཡོད་རྔམ་པ་སྤྱོད་པའི་

མཆོག། །ཝ་མོ་ལྟ་བུའི་སྤྱོད་པ་བྱ། །དེ་ལས་གཞན་ཡང་བཤད་པར་བྱ། །ཟུང་དུ་འབྲེལ་བ་སྤྱོད་པའི་མཆོག །ངུར་པ་ལྟ་བུའི་སྤྱོད་པ་བྱ། །གཞན་གྱིས་མི་མཐོང་སྤྱོད་པའི་མཆོག །ཁྭ་ཏ་ལྟ་བུའི་སྤྱོད་པ་བྱ། །དུག་ལྔ་སྤྱོད་པ་སྤྱོད་པའི་མཆོག །རྨ་བྱ་ལྟ་བུའི་སྤྱོད་པ་བྱ། །
དུས་ཚོད་འཛིན་པ་སྤྱོད་པའི་མཆོག །ཁུ་བྱུག་ལྟ་བུའི་སྤྱོད་པ་བྱ། །ཉེས་པས་མ་གོས་སྤྱོད་པའི་མཆོག །བྱ་རྒོད་ལྟ་བུའི་སྤྱོད་པ་བྱ། །དེ་ནས་གཞན་ཡང་བཤད་བྱ་སྟེ། །རིམ་གྱིས་འཛེག་པ་སྤྱོད་པའི་མཆོག །སྤྲེའུ་ལྟ་བུའི་སྤྱོད་པ་བྱ། །འཇིགས་པ་མེད་པ་སྤྱོད་པའི་མཆོག །
དོམ་བུ་ལྟ་བུའི་སྤྱོད་པ་བྱ། །མཚན་མོ་རྒྱུ་བ་སྤྱོད་པའི་མཆོག །ཞག་མིག་ཅན་གྱི་སྤྱོད་པ་བྱ། །གང་ལ་མི་གནས་སྤྱོད་པའི་མཆོག །བུང་བ་ལྟ་བུའི་སྤྱོད་པ་བྱ། །སྣང་བ་ལྟ་བ་སྤྱོད་པའི་མཆོག །འཕར་བ་ལྟ་བུའི་སྤྱོད་པ་བྱ། །དེ་ལས་གཞན་ཡང་བཤད་བྱ་སྟེ། །དགོས་འདོད་
འབྱུང་བ་སྤྱོད་པའི་མཆོག །ནོར་བུ་ལྟ་བུའི་སྤྱོད་པ་བྱ། །སྨན་དུག་གཉིས་མེད་སྤྱོད་པའི་མཆོག །ག་བུར་ལྟ་བུར་ཤེས་པར་བྱ། །ཅིས་ཀྱང་མི་ཚུགས་སྤྱོད་པའི་མཆོག །རྡོ་རྗེ་ལྟ་བུར་ཤེས་པར་བྱ། །མི་མཐུན་གཅོད་པ་སྤྱོད་པའི་མཆོག །རལ་གྲི་ལྟ་བུར་ཤེས་པར་བྱ། །དེ་
ནས་གཞན་ཡང་བཤད་བྱ་སྟེ། །ཐབས་དང་ཤེས་རབ་སྤྱོད་པའི་མཆོག །མདའ་གཞུ་ལྟ་བུར་ཤེས་པར་བྱ། །སྟོང་པའི་ཁ་འབྱེད་སྤྱོད་པའི་མཆོག །ཤཀ་ཏི་ལྟ་བུར་ཤེས་པར་བྱ། །འབིགས་པར་བྱེད་པ་སྤྱོད་པའི་མཆོག །མདུང་ཐུང་ལྟ་བུར་ཤེས་པར་བྱ། །ང་བདག་
གསོད་པ་སྤྱོད་པའི་མཆོག །སྟ་རེ་ལྟ་བུར་ཤེས་པར་བྱ། །གདུལ་བྱ་འདྲེན་པ་སྤྱོད་པའི་མཆོག །ལྕགས་ཀྱུ་ལྟ་བུར་ཤེས་པར་བྱ། །དགོན་པའི་གནས་དང་དུར་ཁྲོད་དང་། །གྲོང་ཁྱེར་དག་ཏུ་རྣལ་འབྱོར་རྒྱུ་བའི་ཚེ། །དེ་འདྲའི་སྐྱེས་བུའི་ཕྱག་རྒྱ་ཆེར་རྟོགས་བྱེད། །དེ་ཉིད་སེམས་
ཀྱི་ཁྱད་པར་མཐོང་གྱུར་ན། །བརྟུལ་ཞུགས་མེད་ཀྱང་སངས་རྒྱས་ས་ལ་འགྲོ། །སེམས་ཉིད་གཉིས་ཀྱི་གནད་དང་མ་བྲལ་ན། །བརྟུལ་ཞུགས་སྤྱད་ཀྱང་སྡུག་བསྔལ་སྣ་ཚོགས་སྐྱེ། །བསམ་གྱིས་མི་ཁྱབ་བརྟུལ་ཞུགས་རབ་ལྡན་ན། །རྒྱལ་པོ་རྒྱལ་རིགས་སྤྱི་བོར་དབང་བསྐུར་

ལྟར། །ཐོགས་པ་མེད་པ་ཕྱག་རྒྱ་ཆེན་པོ་དེ། །སྐྱེ་བ་འདི་ལ་སངས་རྒྱས་ས་ལ་རེག །ཅེས་གསུངས་སོ། །མཁའ་འགྲོ་མ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་བསམ་གྱིས་མི་ཁྱབ་པ་ཕག་མོ་མངོན་པར་འབྱུང་བའི་རྒྱུད་ལས་སྤྱོད་པའི་རབ་
ཏུ་དབྱེ་བའི་ལེའུ་སྟེ་ལྔ་པའོ།། །།དེ་ནས་དུར་ཁྲོད་བདག་མོ་དེས། །སྟོན་པ་ལ་ནི་འདི་སྐད་གསོལ། །ཡང་དག་བརྡ་ནི་བརྡ་ཆེན་པོ། །ཀུན་གྱིས་མི་རྟོག་སྦས་པའི་དོན། །བར་ཆད་སེལ་བ་བརྡ་ཡི་ཆོས། །བསམ་གྱིས་མི་ཁྱབ་བཤད་དུ་གསོལ། །དེ་ནས་སྟོན་པས་
བཀའ་སྩལ་པ། །སྣང་བ་ཐམས་ཅད་ལས་ཀྱི་བརྡ། །ཚིག་ནི་ཇི་སྙེད་ངག་གི་བརྡ། །དེ་ལ་བསམ་གྱིས་མི་ཁྱབ་གནས། །དོན་གྱི་བརྡ་རུ་ཤེས་པར་བྱ། །དེ་ནས་དུར་ཁྲོད་བདག་མོས་ཡང་ཞུས་པ། །གང་ཟག་འཇུག་པའི་རིམ་པ་དང་། །དཔའ་བོ་བརྟག་པའི་རིམ་པ་དང་། །
ཕྱག་རྒྱ་མོ་ཡི་བརྟག་པ་དང་། །མཆོག་དང་ཐུན་མོང་དངོས་གྲུབ་དང་། །ཚོགས་ཀྱི་འཁོར་ལོའི་དུས་དག་དང་། །རྣལ་འབྱོར་ཕག་མོ་རྫོགས་བྱེད་དང་། །བརྡ་ཡི་བྱེ་བྲག་ཇི་སྙེད་པ། །འགྲོ་མགོན་ཁྱེད་ཀྱིས་བཤད་དུ་གསོལ། །མགོན་པོ་དཔའ་བོས་བཀའ་སྩལ་པ། །ཐམས་
ཅད་ཀུན་གྱི་བརྡ་ཆེན་པོ། །སྦས་པའི་བརྡ་ནི་བཤད་བྱ་བ། །གཡས་པ་ཐབས་ཀྱི་རང་བཞིན་དང་། །གཡོན་པ་ཤེས་རབ་རང་བཞིན་དང་། །ལུས་ཀྱི་བརྡ་རྣམས་རྫོགས་པར་བྱ། །མི་རྟོག་སྒོམ་པ་སྟོན་པ་ལ། །ལག་པ་གཡོན་པ་བསྟན་པ་ནི། །ས་རོ་ཞེས་ནི་བརྗོད་པར་བྱ། །
རྐང་པ་གྲོང་ཁྱེར་ས་བགྲོད་པས། །སྤྱོད་པ་ཉམས་མྱོང་གིས་འགྲོ་བ། །གོ་བའི་ཕྱིར་ནས་རྐང་བསྟན་ཏེ། །ཨ་གྷུ་ལ་ཞེས་བརྗོད་པར་བྱ། །སྲིན་ལག་མཁའ་འགྲོ་མ་ཡི་རྩ། །དེ་ཡི་ཕྱིར་ན་དེ་བསྟན་ཏེ། །ཤེས་རབ་ཆེན་པོར་གོ་བྱའི་ཕྱིར། །བྷ་ཏ་རི་ཞེས་བརྗོད་པར་བྱ། །ལྕེ་
ཡིས་ཟས་ཀྱི་རོ་མྱོང་ལྟར། །སྟོང་པས་བདེ་བ་མྱོང་བསྟན་ཕྱིར། །ལྕེ་བསྟན་ཙརྱ་གྷ་ཞེས་བརྗོད། །སྐལ་བར་ལྡན་པའི་བདག་ཉིད་ནི། །ཡུལ་ལ་རིག་པར་བྱ་བའི་ཕྱིར། །ལྟོ་བ་ཟས་ཀྱི་སྣོད་བསྟན་པ། །ཨན་དྷ་ལི་ཞེས་བརྗོད་པར་བྱ། །ལྟོ་བ་ཟས་ཀྱི་སྣོད་ཡིན་ཕྱིར། །དེ་

བཞིན་སྣོད་ནི་བསྟན་པར་བྱ། །བླ་མའི་བརྒྱུད་པ་གོ་ཆའི་ཕྱིར། །པཾ་ཀ་ཏ་ཞེས་བརྗོད་པར་བྱ། །སོར་མོ་ལྔའི་ནི་རྒྱུད་གཅིག་ལྟར། །ལྔ་ཡི་རྩ་བ་ཨེ་བཾ་དུ། །བསྡུས་ཕྱིར་སོར་མོ་ལྔ་བསྟན་ལ། །ཚན་དྷོ་ཧ་ཞེས་བརྗོད་པར་བྱ། །སོ་ཡི་སྟོབས་ཀྱིས་ཟས་འདུལ་
ལྟར། །ཨེ་བཾ་ཇི་བཞིན་རྟོགས་པར་བྱེད། །གང་གིས་སོ་ནི་བསྟན་བྱས་པས། །ཙ་ལ་ནི་ཞེས་བརྗོད་པར་བྱ། །བྱིན་པས་ལུས་ཀྱི་སྟོབས་སྐྱེད་ལྟར། །གོམས་པས་འབྲས་བུ་སྐྱེད་པའི་ཕྱིར། །གོ་ཕྱིན་པ་ནི་བསྟན་བྱས་ལ། །མེ་ག་བ་ཞེས་བརྗོད་པར་བྱ། །ས་གཞི་
འགྲོ་བ་ཀུན་འདེགས་ལྟར། །འབྲས་བུ་དམ་ཚིག་གིས་བསྟེན་ལྟར། །ས་གཞི་གྲུ་བཞིར་བསྟན་བྱས་ལ། །མཎ་ཌལ་ཞེས་སུ་བརྗོད་པར་བྱ། །སོར་མོ་ལྔ་ནི་རྒྱུ་མཐུན་ཕྱིར། །ཕུང་ལྔ་རིགས་ལྔར་རྒྱས་བཏབ་པས། །གཡས་པའི་སོར་མོ་ལྔ་བསྟན་པ། །སྦ་རན་ཞེས་
བརྗོད་པར་བྱ། །མི་བསྐྱོད་པ་དང་རྡོ་རྗེ་འཆང་། །རྒྱས་གདབ་གཉིས་ནི་གོ་བྱའི་ཕྱིར། །དབུགས་ནི་ལ་ནི་དབྱུང་བར་བྱ། །དཔལ་ཀུན་ཤམ་ཞེས་བརྗོད་པར་བྱ། །སོ་འཆལ་བ་ཡི་ཞེ་སྡང་གིས། །འབྲས་བུའི་རྟགས་ནི་ཡིན་པའི་ཕྱིར། །གཉིས་སྣང་གཅོད་ཕྱིར་སོ་
འཆའ་བས། །མ་ཏ་ཁྲ་ཞེས་བརྗོད་པར་བྱ། །ཤ་ནི་སྲོག་ཆགས་ཐམས་ཅད་ལས། །འབྱུང་ཞིང་ཆོས་རྣམས་ཐམས་ཅད་ནི། །སེམས་ཡིན་ཕྱིར་ནས་ཤ་བསྟན་པས། །ར་ཙ་ན་ཞེས་བརྗོད་པར་བྱ། །ཁྲོ་གཉེར་ཁྲོས་པའི་རྟགས་ཡིན་པས། །བྱ་བ་ཐམས་ཅད་སྡུག་བསྔལ་
གྱི། །རྟགས་ཡིན་ཕྱིར་ན་ཁྲོ་གཉེར་བསྟན། །ནི་རི་ཧ་ཞེས་བརྗོད་པར་བྱ། །བསྡུམས་པས་དབྱེ་བ་མེད་པ་ལྟར། །འཁོར་འདས་དབྱེར་མི་ཕྱེད་པ་ལྟར། །བྷ་ག་ནི་ཞེས་བརྗོད་པར་བྱ། །དཔེ་ཡིས་མཚོན་པའི་དོན་དུ་ནི། །དྲི་མ་ཀུན་ལས་གྲོལ་བའི་ཕྱིར། །བསྡམས་པ་བཀྲོལ་
ནས་གྲེ་ནན་བརྗོད། །བྱིན་གྱིས་བརླབས་པའི་གཏོར་མ་ཡིན། །ཐམས་ཅད་ཚིམ་པར་བྱེད་པ་ལྟར། །སྣ་ཚོགས་སྣང་བའི་ཆོས་ཀུན་ལ། །བདེ་བ་ཆེན་པོའི་རོས་ཚིམ་ཕྱིར། །གཏོར་མ་བཏང་ལ་ཧིཀ་ཀ་བརྗོད། །ལྟོ་བ་ཟས་ཀྱི་སྣོད་ཡིན་ལྟར། །སེམས་ཅན་སངས་རྒྱས་སྣོད་ཡིན་

པས། །དོན་དུ་ལྟོ་བ་བསྟན་ནས་ནི། །ནི་གར་མ་ཞེས་བརྗོད་པར་བྱ། །དེ་རྣམས་ཕན་ཡོན་དཔག་མེད་པས། །སྙིང་པོ་རྒྱུད་དུ་གསལ་བར་བསྟན། །བརྡ་དང་ལྡན་པའི་རྣལ་འབྱོར་བས། །བདུད་རྩི་རྣམ་པ་ལྔ་པོ་ལ། །ལོངས་སྤྱོད་པ་ནི་ཐབས་ཀྱི་
མཆོག། །བྱིན་གྱིས་བརླབས་དང་ས་བོན་དང་། །རང་བཞིན་བདུད་རྩི་ལ་འབད་པས། །དཔག་མེད་རིམ་གྱིས་ཕན་ཡོན་འབྱུང་། །དེ་ནས་གཞན་ཡང་བཤད་བྱ་སྟེ། །ལྔ་བསྡུས་རྩེ་མོ་མནན་པ་ནི། །བུམ་པའི་དབང་སྟེ་ལུས་ཀྱི་བརྡ། །མཐེབ་སྲིན་ཨེ་ཡི་དྲང་རོ་
གཅིག། །གསང་བའི་དབང་སྟེ་ལུས་ཀྱི་བརྡ། །བྱང་ཆུབ་མཆོག་གི་ཕྱག་རྒྱ་ནི། །གསུམ་པ་ཤེས་རབ་ཡེ་ཤེས་ཡིན། །སྐྱེས་དང་མ་སྐྱེས་གཉིས་མེད་པས། །བཞི་པ་ཡིན་ཏེ་ལུས་ཀྱི་བརྡ། །དེ་ཡི་ངག་གི་བརྡ་སྨྲས་པ། །ཀ་ལ་ཤ་ཡ་བུམ་པའི་དབང་། །ཡ་ར་ལ་ཝ་གསང་
པའི་བརྡའོ། །ཨེ་བཾ་མ་ཡཱ་གསུམ་པའི་བརྡའོ། །ཨེ་ཧཱུྃ་ཨོྃ་ཨཱཿབཞི་པའོ། །མཁའ་འགྲོ་མ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་བསམ་གྱིས་མི་ཁྱབ་པ་ཕག་མོ་མངོན་པར་འབྱུང་བའི་རྒྱུད་ལས་བརྡའི་ལེའུ་སྟེ་དྲུག་པའོ།། །།དེ་ནས་དུར་ཁྲོད་བདག་མོ་
དེས། སྟོན་པ་མཚན་ཉིད་བཞི་དང་ལྡན་པ་དེ་ལ་ཕྱིའི་མཆོད་པའི་ཚོགས་དཔག་ཏུ་མེད་པ་དང་། ནང་གི་མཆོད་པའི་ཚོགས་དཔག་ཏུ་མེད་པ་དང་། གསང་བའི་མཆོད་པའི་ཚོགས་དཔག་ཏུ་མེད་པ་དང་། དེ་ཁོ་ན་ཉིད་ཀྱི་མཆོད་པ་ཕུལ་ནས་འདི་སྐད་ཞུས་སོ། །བླ་མེད་སྟོན་པ་ཧེ་རུ་
ཀ། །འཁོར་བའི་སེམས་ཅན་འདྲེན་མཛད་པ། །ཐུགས་རྗེ་ཆེ་དང་ལྡན་པ་ཁྱོད། །ནད་པ་ལྟ་བུའི་སེམས་ཅན་ལ། །ཆོས་ཀྱི་སྨན་མཆོག་བསྟན་དུ་གསོལ། །ལོང་བ་ལྟ་བུའི་སེམས་ཅན་ལ། །ཆོས་ཀྱི་སྒྲོན་མེ་སྦར་དུ་གསོལ། །རྒྱལ་པོ་ལྟ་བུའི་སྟོན་པ་ཁྱོད། །ཀུན་ལ་བྱམས་པ་མཛད་
དུ་གསོལ། །བློན་པོ་ལྟ་བུའི་སྟོན་པ་ཁྱོད། །ཀུན་ལ་ཕན་པ་མཛད་དུ་གསོལ། །ཞེས་ཞུས་སོ། །དེ་ནས་སྟོན་པ་འཇིགས་བྱེད་ཧེ་རུ་ཀ་དེ་ཐུགས་རབ་ཏུ་དགྱེས་ཏེ། སྐུའི་སྒོ་ནས་མཛེས་གར་རྣམ་པ་གསུམ་མཛད། གསུང་གི་སྒོ་ནས་རྡོ་རྗེའི་ཚིག་རྣམ་པ་གསུམ་མཛད། ཐུགས་ཀྱི་སྒོ་

ནས་ཁྱད་པར་གྱི་ཡེ་ཤེས་རྣམ་པ་གསུམ་བསྐྱེད་ནས། །འཁོར་རྣམས་ལ་སྤྱན་གཟིགས་ནས་ཚངས་པའི་གསུང་གིས་རྡོ་རྗེའི་ཚིག་འདི་བཀའ་སྩལ་ཏོ། །ཉོན་ཅིག་དུར་ཁྲོད་བདག་མོ་ཁྱོད། །འཁོར་བའི་སེམས་ཅན་ཐམས་ཅད་ལ། །མ་རིག་པ་ཡི་མུན་པས་བསྒྲིབས། །འཁོར་
བའི་རྒྱ་མཚོ་ཆེན་པོར་ལྟུང་། །ཉོན་མོངས་འདམ་དུ་བྱིང་བ་ཡིས། །དུས་གསུམ་སངས་རྒྱས་ཐམས་ཅད་ཀྱིས། །ཆོས་ཀྱི་སྒོ་མོ་བརྒྱད་ཁྲི་དང་། །བཞི་སྟོང་གི་ནི་གྲངས་སྙེད་ཀུན། །ཉོན་མོངས་པ་ཡི་གཉེན་པོར་བསྟན། །དབང་པོ་རབ་འབྲིང་དང་སྦྱར་ནས། །ཐུན་མོང་ཐེག་པ་
རིམ་གྱིས་བསྟན། །མདོ་སྡེ་འདུལ་བ་མངོན་པ་གསུམ། །བསྟན་པ་ཀུན་གྱི་རྩ་བ་ཡིན། །བདེར་གཤེགས་ཐུགས་རྗེ་བསམ་མི་ཁྱབ། །སེམས་ཅན་རྣམས་ལ་དེ་ལྟར་བསྟན། །དེ་ནས་དུར་ཁྲོད་བདག་མོ་དེས་ཡང་འདི་སྐད་ཅེས་གསོལ་ཏོ། །བླ་མེད་སྟོན་པ་ཧེ་རུ་ཀ། །
ཐུན་མོང་ཐེག་པ་དེ་ལྟར་བསྟན། །ཁྱད་པར་གསང་སྔགས་ཇི་ལྟར་ལགས། །རྒྱུད་སྡེ་རྣམས་ཀྱི་དབྱེ་བ་ཞུ། །སྨིན་པའི་ལམ་ནི་ཇི་ལྟར་ལགས། །གྲོལ་བའི་ལམ་ནི་གང་ལ་བགྱི། །དཔའ་བོ་ཆེན་པོས་བཤད་དུ་གསོལ། །ཞེས་ཞུས་སོ། །དེ་ནས་སྟོན་པ་ཧེ་རུ་ཀས། །
ཉོན་ཅིག་དུར་ཁྲོད་བདག་མོ་ཁྱོད། །སྐལ་བར་ལྡན་པའི་གང་ཟག་ལ། །གསང་སྔགས་རྒྱུད་སྡེ་ངས་བཤད་ཀྱིས། །སྣོད་སྐྱོན་གསུམ་པོ་སྤངས་ལ་ཉོན། །བྱ་བ་གཙོ་བོར་བྱེད་པ་ལ། །ཀྲི་ཡའི་རྒྱུད་སྡེ་རྣམ་ལྔ་བསྟན། །སྤྱོད་པ་གཙོ་བོར་བྱེད་པ་ལ། །གཉིས་པའི་རྒྱུད་སྡེ་རྣམ་
ལྔ་བསྟན། །སེམས་ཉིད་གཙོ་བོར་བྱེད་པ་ལ། །རྣལ་འབྱོར་རྒྱུད་སྡེ་རྣམ་ལྔ་བསྟན། །བདེ་སྟོང་གཙོ་བོར་བྱེད་པ་ལ། །བླ་ན་མེད་པའི་རྒྱུད་ལྔ་བསྟན། །ཡིད་ལ་བྱེད་པ་མེད་རྣམས་ལ། །གོང་ན་མེད་པའི་རྒྱུད་ལྔ་བསྟན། །དེའི་ཕྱིར་རྒྱུད་སྡེ་རྣམ་པ་ལྔ། །གསང་སྔགས་རྒྱུད་
ཅེས་བྱ་བར་གྲགས། །རེ་རེ་ལ་ཡང་ལྔ་ལྔ་སྟེ། །རྒྱུད་ཆེན་ཉི་ཤུ་རྩ་ལྔ་ནི། །མ་བྱུང་འབྱུང་བར་མི་འགྱུར་རོ། །ཞེས་གསུངས་སོ། །དེ་ནས་ཡང་དུར་ཁྲོད་བདག་མོ་དེས་ཡང་ཞུས་པ། །རྒྱུད་ཀྱི་དབྱེ་བ་དེ་ལྟར་ན། །སྨིན་ཞེས་བགྱི་བ་ཇི་ལྟར་ལགས། །ལམ་ཞེས་བགྱི་བ་གང་ལ་

བགྱི། །དེ་ཡི་དབྱེ་བ་བཤད་དུ་གསོལ། །ཞེས་ཞུས་སོ། །དེ་ནས་སྟོན་པས་བཀའ་སྩལ་པ། །ཉོན་ཅིག་དུར་ཁྲོད་བདག་མོ་ཁྱོད། །འཁོར་བའི་སེམས་ཅན་ཐམས་ཅད་ལ། །དེ་ཉིད་ཡོད་དེ་སྨིན་ལམ་མེད། །དེས་ན་འབྲས་བུ་ཐོབ་མི་འགྱུར། །
ལམ་ལོག་མུ་སྟེགས་བྱེད་རྣམས་ལ། །དེ་ཉིད་ཡོད་དེ་སྨིན་ལམ་མེད། །དེས་ན་འབྲས་བུ་ཐོབ་མི་འགྱུར། །དམན་པ་ཉན་ཐོས་རང་རྒྱལ་ལ། །དེ་ཉིད་ཡོད་དེ་སྨིན་ལམ་མེད། །དེ་ཕྱིར་བསྐལ་པ་གྲངས་མེད་དུ། །དཀའ་ཐུབ་སྤྱོད་པ་ཉོན་རེ་མོངས། །མ་སྨིན་མདོ་
སྡེར་ཞུགས་རྣམས་ལ། །དེ་ཉིད་ཡོད་དེ་སྨིན་ལམ་མེད། །དེས་ན་ཚེ་གཅིག་སངས་རྒྱས་དཀའ། །ཞེས་སོ། །དེ་ནས་དུར་ཁྲོད་བདག་མོ་དེས་ཡང་ཞུས་པ། སྨིན་ཞེས་བྱ་བ་གང་ལ་བགྱི། །ལམ་ཞེས་བྱ་བ་ཇི་ལྟར་ལགས། །དཔའ་བོ་ཆེན་པོས་བཤད་དུ་
གསོལ། །ཉོན་ཅིག་དུར་ཁྲོད་བདག་མོ་ཁྱོད། །སྨིན་ཞེས་བྱ་བ་ནི་སང་དྷའི་སྒྲ་ལས་ཤེས་པར་བྱའོ། །ལམ་ཞེས་བྱ་བའི་སྒྲ་ནི་ཨ་ཐ་མི་ཐའི་སྒྲ་ལས་ཤེས་པར་བྱ། འཇིག་རྟེན་པའི་ལམ་དང་སྦྱར་རོ། །ལུས་དང་ངག་དང་སེམས་དང་གསུམ། །མ་སྨིན་སྨིན་པར་
བྱེད་པའི་ཐབས། །དབང་བསྐུར་ཆོ་ག་ཇི་སྙེད་བསྟན། །དང་པོ་བསྙེན་པ་བྱ་བ་གཅེས། །གྲངས་དང་དུས་དང་མཚན་མ་ཡི། །བསྙེན་པ་རྣམ་གསུམ་རྫོགས་བྱས་ནས། །ས་ཆོག་སྟ་གོན་ཚུལ་བཞིན་བྱ། །དང་པོ་ས་གཞི་ཡོངས་སུ་གཟུང་། །གཉིས་པ་སྟ་གོན་
གནས་པ་སྟེ། །ནུབ་གསུམ་པ་ལ་འཇུག་པར་བྱ། །རྒྱུད་རྣམས་གཞན་དུ་ཤེས་པར་བྱ། །དེ་ནས་དཀྱིལ་འཁོར་ཤར་གྱི་སྒོར། །བ་ཡི་རྣམ་ལྔའི་མཎྜལ་བྲི། །སྐལ་ལྡན་སློབ་མ་དེར་བཞག་ལ། །བུམ་པའི་དབང་རྣམས་རྫོགས་པར་བསྐུར། །དཀྱིལ་འཁོར་དེ་
ཡི་ལྷོའི་སྒོ་རུ། །བདུད་རྩི་ལྔ་ཡི་མཎྜལ་བྱ། །སྐལ་ལྡན་སློབ་མ་དེར་བཞག་ལ། །གསང་བའི་དབང་རྣམས་རྫོགས་པར་བསྐུར། །དཀྱིལ་འཁོར་དེ་ཡི་ནུབ་སྒོ་རུ། །དལ་གྱི་ཆོས་འབྱུང་ཨེ་དབྱིབས་བྲི། །སྐལ་ལྡན་སློབ་མ་དེར་བཞག་ལ། །ཤེས་རབ་ཡེ་ཤེས་

དབང་བསྐུར་ཏེ། །གསུམ་པའི་དབང་རྣམས་རྫོགས་པར་བསྐུར། །དཀྱིལ་འཁོར་དེ་ཡི་བྱང་སྒོ་རུ། །ཕྲིན་ལས་རྣམ་བཞིའི་མཎྜལ་བྲི། །སྐལ་ལྡན་སློབ་མ་དེར་བཞག་ལ། །བཞི་པའི་དབང་རྣམས་རྫོགས་པར་བསྐུར། །དཀྱིལ་འཁོར་དེ་ཡི་ཕོ་བྲང་དུ། །སེང་ཆེན་
བསྣོལ་བའི་ཁྲི་སྟེངས་སུ། །སྐལ་ལྡན་སློབ་མ་དེར་བཞག་ལ། །རྡོ་རྗེ་སློབ་དཔོན་བྱེད་པའི་དབང་། །ཆོ་ག་ཐམས་ཅད་རྫོགས་པར་བསྐུར། །སྐུ་གསུང་ཐུགས་ཀྱི་དབང་གསུམ་པོ། །ཐོག་མ་ཉིད་དུ་བསྐུར་བར་བྱ། །དེ་ནས་དུར་ཁྲོད་བརྒྱད་རྣམས་ཀྱིས། །དབང་ནི་
རྣམ་པ་བརྒྱད་པོ་བསྐུར། །དེ་ནས་ཟས་རྣམས་བདུད་རྩིའི་དབང་། །ཇི་ལྟ་བར་ནི་བསྐུར་བར་བྱ། །དེ་ནས་ཕྱག་མཚན་རྣམས་ཀྱི་དབང་། །གོ་རིམས་བཞིན་དུ་བསྐུར་བར་བྱ། །དེ་ནས་ཉན་པའི་དབང་རྣམས་བསྐུར། །དེ་ནས་བཤད་པའི་དབང་རྣམས་བསྐུར། །དེ་ནས་
སྐལ་ལྡན་གང་ཟག་ལ། །མངའ་གསོལ་སུམ་ཅུ་རྩ་ལྔ་བྱ། །དེ་ནས་བཀྲ་ཤིས་རྫས་བརྒྱད་ཀྱིས། །དབང་རྣམས་མ་ལུས་རྫོགས་པར་བསྐུར། །དེ་ནས་དབང་རྫོགས་གང་ཟག་དེ། །བདེར་གཤེགས་རྣམས་ཀྱི་སྲས་ཡིན་ཏེ། །མཁྱེན་རབ་བདེ་གཤེགས་རྣམས་དང་
མཉམ། །མཐུ་སྟོབས་ཁྲོ་རྒྱལ་རྣམས་དང་མཉམ། །ཚེ་ཚད་ཉི་ཟླ་གཉིས་དང་མཉམ། །དང་པོ་ལས་ཅན་སྦྱོར་བ་ཡིས། །ས་བརྒྱད་པ་ལ་རབ་ཏུ་གནས། །དབང་བསྐུར་གནང་བ་མ་ཐོབ་ན། །རིག་པ་ཤེས་རབ་རྩལ་རྫོགས་ཀྱང་། །སློབ་དཔོན་བྱ་བ་ཡོང་མི་ནུས། །དབང་
བསྐུར་གནང་བ་མ་མཐོང་ན། །གཞན་གྱི་ཡོན་ཏན་ཀུན་འཆང་ཡང་། །འཁོར་ལོ་སྲོག་ཤིང་མེད་པ་འདྲ། །དབང་མ་ཐོབ་པར་ལས་རྩོམ་དང་། །སྒྱིད་མ་མ་རྟས་ཁལ་འགེལ་བ། །འདི་དག་ཕུང་པོའི་རྒྱུ་ཡིན་ནོ། །སློབ་དཔོན་མཉེས་པར་མ་བྱས་ཤིང་། །དབང་རྣམས་
ཐོབ་པར་མ་བྱས་ན། །ཉན་པ་ལ་སོགས་རྩོམ་པ་ནི། །འབྲས་བུ་མེད་ཅིང་བརླག་པར་འགྱུར། །མཁའ་འགྲོ་མ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་བསམ་གྱིས་མི་ཁྱབ་པ་ཕག་མོ་མངོན་པར་འབྱུང་བའི་རྒྱུད་ལས་དབང་བསྐུར་བའི་ལེའུ་སྟེ་བདུན་པའོ།། །།

དེ་ནས་དུར་ཁྲོད་ཕག་མོ་དེས། །ཧེ་རུ་ཀ་ལ་འདི་སྐད་ཞུས། །སངས་རྒྱས་ཐོབ་བྱེད་འབྲས་བུའི་ཆོས། །བསམ་གྱིས་མི་ཁྱབ་བཤད་དུ་གསོལ། །དབང་པོ་རབ་འབྲིང་ཐ་མ་གསུམ། །གང་དང་གང་གིས་གྲོལ་བ་ལགས། །དུག་ལྔ་སྤྱོད་པའི་གང་
ཟག་ལྔ། །གང་དང་གང་གིས་འཇོམས་པར་བྱེད། །དེ་ནས་སྟོན་པས་བཀའ་སྩལ་ཏེ། །ཉོན་ཅིག་དུར་ཁྲོད་བདག་མོ་ཁྱོད། །དབང་པོ་རབ་ཀྱི་གང་ཟག་ལ། །རང་བཞིན་རྣམ་དག་ཕག་མོ་བསྟན། །དབང་པོ་འབྲིང་གི་གང་ཟག་ལ། །བརྗོད་པ་སྒྲ་ཡི་ཕག་མོ་
བསྟན། །དབང་པོ་ཐ་མའི་གང་ཟག་ལ། །མཚོན་པ་བརྡ་ཡི་ཕག་མོ་བསྟན། །ཞེས་བཀའ་སྩལ་ཏོ། །དེ་ནས་དུར་ཁྲོད་བདག་མོ་དེས། །སྟོན་པ་ལ་ནི་ཚིག་འདི་གསོལ། །རང་བཞིན་རྣམ་པར་དག་པ་ཡི། །རྡོ་རྗེ་ཕག་མོ་ཇི་ལྟ་བུ། །སྒྲ་ཡི་ཕག་མོ་ཇི་ལྟ་
བུ། །དབྱིབས་ཀྱི་ཕག་མོ་ཇི་ལྟ་བུ། །ཞེས་པ་ལ་སོགས་པ་ཞུས་སོ། །ཉོན་ཅིག་དུར་ཁྲོད་བདག་མོ་ཁྱོད། །རང་བཞིན་ཉིད་ནས་དག་པ་དེ། །ཆོས་ཀྱི་སྐུ་ཡི་ངོ་བོ་ཉིད། །སྐད་ཅིག་དྲུག་གིས་རྫོགས་སངས་རྒྱས། །གྲོལ་འགྱུར་འདི་ལ་ཐེ་ཚོམ་མེད། །
བརྗོད་པ་སྒྲ་ཡི་ཕག་མོ་དེ། །ལོངས་སྤྱོད་སྒྲ་ཡི་ངོ་བོ་ཉིད། །ལོངས་སྤྱོད་རྫོགས་སྐུའི་ངོ་བོ་ཉིད། །ཟླ་དྲུག་གོམས་པའི་སྦྱོར་བ་ཡིས། །འགྲུབ་འགྱུར་འདི་ལ་ཐེ་ཚོམ་མེད། །མཚོན་པ་བརྡ་ཡི་ཕག་མོ་དེ། །སྤྲུལ་པ་སྐུ་ཡི་ངོ་བོ་ཉིད། །ཟླ་དྲུག་གོམས་པའི་སྦྱོར་བ་ཡིས། །
འགྲུབ་འགྱུར་འདི་ལ་ཐེ་ཚོམ་མེད། །ཅེས་བཀའ་སྩལ་ཏོ། །དེ་ནས་དུར་ཁྲོད་བདག་མོ་དེས། །དཔའ་བོ་ཆེ་ལ་ཡང་ཞུས་པ། །གང་ཟག་རིགས་ལ་ལྔ་ཡོད་དེ། །གཏི་མུག་ཅན་གྱི་གང་ཟག་དང་། །ཞེ་སྡང་ཅན་གྱི་གང་ཟག་དང་། །འདོད་པ་གཙོར་བྱེད་གང་ཟག་དང་། །ང་རྒྱལ་
ཅན་གྱི་གང་ཟག་དང་། །ཕྲག་དོག་ཅན་གྱི་གང་ཟག་ལྔ། །དེ་རྣམས་གང་དང་གང་གིས་གྲོལ། །ཞེས་ཞུས་སོ། །དེ་ནས་སྟོན་པས་བཀའ་སྩལ་ཏེ། །གཏི་མུག་ཅན་གྱི་གང་ཟག་ལ། །སྐུ་ཡི་ཕག་མོ་དཀར་མོ་བསྟན། །གཏི་མུག་ཚུལ་གྱིས་གཏི་མུག་འཇོམས། །འདོད་པ་

གཙོར་བྱེད་སྐྱེས་བུ་ལ། །གསུང་གི་ཕག་མོ་དམར་མོ་བསྟན། །འདོད་ཆགས་ཚུལ་གྱིས་འདོད་ཆགས་འཇོམས། །ཞེ་སྡང་ཅན་གྱི་གང་ཟག་ལ། །ཐུགས་ཀྱི་ཕག་མོ་ནག་མོ་བསྟན། །ཞེ་སྡང་ཚུལ་གྱིས་ཞེ་སྡང་འཇོམས། །ང་རྒྱལ་ཅན་གྱི་གང་ཟག་ལ། །ཡོན་ཏན་ཅན་གྱི་
ཕག་མོ་བསྟན། །ང་རྒྱལ་ཚུལ་གྱིས་ང་རྒྱལ་འཇོམས། །ཕྲག་དོག་ཅན་གྱི་གང་ཟག་ལ། །ཕྲིན་ལས་ཕག་མོ་ལྗང་ཁུ་བསྟན། །ཕྲག་དོག་ཚུལ་གྱིས་ཕྲག་དོག་འཇོམས། །དེ་ནས་དུར་ཁྲོད་བདག་མོ་དེས། །ཧེ་རུ་ཀ་ལ་ཚིག་འདི་གསོལ། །དུག་ལྔ་ཤས་ཆེ་གང་ཟག་
ལ། །འབྲས་བུ་སྐུ་ལྔ་ཇི་ལྟར་ཐོབ། །ཡེ་ཤེས་ལྔ་ནི་ཇི་ལྟར་སྣང་། །རིགས་ལྔ་ཞེས་ནི་གང་ལ་བགྱི། །ཁྲོ་མོ་ལྔ་ནི་ཇི་ལྟར་བསྒོམ། །འཁོར་ལོ་ལྔ་ནི་ཇི་ལྟར་གནས། །སྙིང་པོ་ལྔ་ནི་ཇི་ལྟར་བཟླས། །དམ་ཚིག་ལྔ་ནི་ཇི་ལྟར་བསྲུང་། །ཉམས་མྱོང་ལྔ་ནི་ཇི་ལྟར་འབྱུང་། །
ཉོན་མོངས་ལྔ་ནི་ཇི་ལྟར་འབྱུང་། །ཡེ་ཤེས་ལྔ་ནི་ཇི་ལྟར་འཕེལ། །གྲངས་ཀྱི་ཚད་ནི་ཇི་ལྟར་བཟླས། །མཚན་མའི་རྟགས་ནི་ཇི་ལྟར་འབྱུང་། །དུས་ཀྱི་ཚད་ནི་ཇི་ལྟར་ལགས། །ལས་ཚོགས་རྣམས་ནི་ཇི་ལྟར་འགྲུབ། །ཅེས་ཞུས་སོ། །དེ་ནས་དཔའ་བོ་ཧེ་རུ་ཀས། །ཐུགས་
རབ་ཏུ་དགྱེས་ཏེ་བརྡའི་ཚིག་འདི་བཀའ་སྩལ་ཏོ། །ཉོན་ཅིག་དུར་ཁྲོད་བདག་མོ་ཁྱོད། །དུག་ལྔ་སྤྱོད་པའི་གང་ཟག་ལྔ། །འབྲས་བུ་རྣམ་པ་ལྔ་ཐོབ་སྟེ། །ཀུན་ལ་ཁྱབ་པ་ཆོས་སྒྲ་དང་། །ཐེག་ཆེན་སྤྱོད་པ་ལོངས་སྐུ་དང་། །གང་ལ་གང་འདུལ་སྤྲུལ་སྐུ་དང་། །ཅིས་ཀྱང་མི་ཤིགས་རྡོ་
རྗེའི་སྐུ། །ངོ་བོ་ཉིད་ཀྱི་སྐུ་མཆོག་དང་། །སྐྱེ་བ་གཅིག་གིས་ཐོབ་པར་འགྱུར། །རྟོགས་པའི་དོན་ལ་གོམས་པར་བྱེད། །ཚེ་འདི་ཉིད་ལ་སངས་རྒྱས་འཐོབ། །རྫོགས་སངས་རྒྱས་ཀྱིས་རྒྱུད་དུ་བཤད། །ཐོབ་བྱའི་ཡེ་ཤེས་རྣམ་ལྔ་ཡང་། །སྤྲོས་བྲལ་ཆོས་དབྱིངས་ཡེ་ཤེས་དང་། །
མེ་ལོང་ཡེ་ཤེས་གཟུགས་བརྙན་ལྟར། །བདག་གཞན་གཉིས་མེད་མཉམ་པ་ཉིད། །གསལ་ལ་མ་འདྲེས་སོ་སོར་རྟོག །ཕྲིན་ལས་མཐར་ཕྱིན་བྱ་བ་གྲུབ། །ཡེ་ཤེས་ལྔ་ནི་དེ་ལྟར་སྐྱེ། །གཞན་ནས་མ་ཡིན་རང་ཉིད་ལའོ། །དུག་ལྔ་སྤྱོད་པའི་གང་ཟག་ལྔ། །རིགས་ནི་རྣམ་པ་ལྔ་

ཐོབ་སྟེ། །སྤྲོས་མེད་དེ་བཞིན་གཤེགས་པའི་རིགས། །དགོས་འདོད་འབྱུང་བ་རིན་ཆེན་རིགས། །སྐྱོན་གྱིས་མ་གོས་པདྨའི་རིགས། །སེམས་ཅན་དོན་གྲུབ་ལས་ཀྱི་རིགས། །གཞན་ནས་མ་ཡིན་རང་ཉིད་ལ། །དུག་ལྔ་སྤྱོད་པའི་གང་ཟག་
དེ། །ཡེ་ཤེས་ཁྲོ་མོ་ལྔ་བསྒོམས་ནས། །བདེ་བ་སྐྱེ་བ་སྐུ་ཡིན་པས། །བདེ་ཆེན་དཀར་མོ་བསྒོམ་པར་བྱ། །ནུས་པ་འབྱུང་བ་གསུང་ཡིན་པས། །དམར་མོ་སྒྲ་སྒྲོགས་བསྒོམ་པར་བྱ། །རྟོགས་ཚད་འཆར་བ་ཐུགས་ཡིན་པས། །ཁྲོས་མ་ནག་མོ་བསྒོམ་པར་བྱ། །
བརྟན་པར་བྱེད་པ་ཡོན་ཏན་ཏེ། །སེར་མོ་དོན་གྲུབ་བསྒོམ་པར་བྱ། །བར་ཆད་སེལ་བ་ཕྲིན་ལས་ཏེ། །སྣ་ཚོགས་མཐར་ཕྱིན་བསྒོམ་པར་བྱ། །རིམ་གྱིས་མ་ཡིན་ཅིག་ཅར་ཡིན། །རྒྱ་དང་འབུར་གྱི་ཚུལ་དུ་བྱ། །ཡིག་འབྲུ་རྣམས་ཀྱི་གནས་ལུགས་ནི། །སྤྱི་གཙུག་
བདེ་ཆེན་འཁོར་ལོ་ན། །བདེ་བྱེད་སྐུ་ཡི་ཡི་གེ་བཞི། །རང་བཞིན་རྩ་ཡི་གཟུགས་ཅན་ནོ། །མགྲིན་པ་ལོངས་སྤྱོད་འཁོར་ལོ་ན། །གསུང་མཆོག་ཡི་གེ་རྣམ་བཞི་ནི། །རང་བཞིན་རྩ་ཡི་ཚུལ་དུ་གནས། །སྙིང་ག་ཆོས་ཀྱི་འཁོར་ལོ་ན། །ཐུགས་མཆོག་ཡི་གེ་རྣམ་བཞི་ནི། །རྩ་ཡི་
དབྱིབས་དང་མཐུན་པར་གནས། །ལྟེ་བ་སྤྲུལ་པའི་འཁོར་ལོ་ན། །རྟེན་བྱེད་ཡོན་ཏན་ཡི་གེ་བཞི། །དེ་ཡི་རང་བཞིན་རྩ་ཡི་དབྱིབས། །ཕྲིན་ལས་ཡི་གེ་རྣམ་བཞི་ནི། །ཞི་རྒྱས་དབང་དྲག་ཡི་གེ་བཞི། །ལས་དང་རྗེས་མཐུན་གཟུགས་སུ་གནས། །སྙིང་པོ་ལྔ་ཡི་བཟླས་ཐབས་ནི། །ཕྱི་
དང་ནང་དང་གསང་བ་དང་། །ཕྲིན་ལས་བཞི་ཡི་ཚུལ་དུ་བཟླས། །དམ་ཚིག་ལྔ་ཡི་བསྲུང་ཚུལ་ནི། །བདེ་ཆེན་དཀར་མོའི་དམ་ཚིག་ཏུ། །སེམས་ཅན་ཀུན་ལ་བྱམས་པ་བསྒོམས། །ཁྲོས་མ་ནག་མོའི་དམ་ཚིག་ཏུ། །དྲག་ཅིང་རྩུབ་པའི་སྤྱོད་པ་བྱ། །སེར་མོ་དོན་གྲུབ་དམ་ཚིག་ཏུ། །དངོས་
པོ་ཀུན་ལ་ཆགས་མེད་བྱ། །དམར་མོ་སྒྲ་སྒྲོགས་དམ་ཚིག་ཏུ། །སྨྲ་ཞིང་བུད་མེད་བསྟེན་པར་བྱ། །སྣ་ཚོགས་མཐར་ཕྱིན་དམ་ཚིག་ཏུ། །རྒྱུད་ཅིང་མཆོད་པའི་སྤྱོད་པ་བྱ། །མཁའ་འགྲོ་སྤྱི་ཡི་དམ་ཚིག་ཏུ། །བདུད་རྩི་ལྔ་དང་ཤ་ལྔ་ལ། །རྟག་ཏུ་ལོངས་སྤྱོད་བྱ་བ་ནི། །བཟའ་བའི་དམ་ཚིག་

རྣམ་ལྔ་སྟེ། །གསང་སྔགས་སྤྱོད་པས་བསྟེན་པར་བྱ། །དེ་ནས་ཉམས་དང་བྱིན་བརླབས་ནི། །གོ་རིམས་སྐྱེ་ཚུལ་འདི་ལྟ་སྟེ། །དམིགས་པ་མེད་པའི་སྙིང་རྗེ་སྐྱེ། །སངས་རྒྱས་མཁའ་འགྲོའི་ཉམས་མྱོང་ཡིན། །ཆོས་རྣམས་གཟུགས་བརྙན་ལྟར་མཐོང་བ། །རྡོ་རྗེ་མཁའ་
འགྲོའི་ཉམས་མྱོང་ཡིན། །ཐམས་ཅད་མཉམ་པ་ཉིད་སྐྱེ་བ། །རིན་ཆེན་མཁའ་འགྲོའི་ཉམས་མྱོང་ཡིན། །ཆོས་རྣམས་མ་འདྲེས་སོ་སོར་གསལ། །པདྨ་མཁའ་འགྲོའི་ཉམས་མྱོང་ཡིན། །དངོས་པོ་གང་ལའང་ཐོགས་མེད་པ། །ལས་ཀྱི་མཁའ་འགྲོའི་ཉམས་མྱོང་ཡིན། །
ཉོན་མོངས་ལྔ་ཡི་འགྱུར་ལུགས་ནི། །གཏི་མུག་ཆོས་ཀྱི་དབྱིངས་སུ་འགྱུར། །ཞེ་སྡང་མེ་ལོང་ཡེ་ཤེས་འགྱུར། །ང་རྒྱལ་མཉམ་པ་ཉིད་ཀྱིར་འགྱུར། །འདོད་ཆགས་སོ་སོར་རྟོག་པར་འགྱུར། །ཕྲག་དོག་བྱ་བ་ནན་ཏན་འགྱུར། །དེ་ནས་འགྱུར་བ་ལམ་དུ་བྱེད། །དེ་ནས་གཞན་ཡང་
བཤད་བྱ་སྟེ། །སྐུ་ཡི་ཡི་གེ་རྣམ་བཞི་ཡིས། །ཆོས་ཀྱི་དབྱིངས་ཀྱི་ཡེ་ཤེས་འཕེལ། །གསུང་གི་ཡི་གེ་རྣམ་བཞི་ཡིས། །སོ་སོར་རྟོག་པའི་ཡེ་ཤེས་འཕེལ། །ཐུགས་ཀྱི་ཡི་གེ་རྣམ་བཞི་ཡིས། །མེ་ལོང་ལྟ་བུའི་ཡེ་ཤེས་འཕེལ། །ཡོན་ཏན་ཡི་གེ་རྣམ་བཞི་ཡིས། །མཉམ་
པ་ཉིད་ཀྱི་ཡེ་ཤེས་འཕེལ། །ཕྲིན་ལས་ཡི་གེ་རྣམ་བཞི་ཡིས། །བྱ་བ་གྲུབ་པའི་ཡེ་ཤེས་འཕེལ། །ཨཱ་ལི་དང་ནི་ཀཱ་ལི་ཡིས། །སྒྲ་དོན་དག་གིས་རྟོགས་པར་འགྱུར། །ཞེས་སོ། །དེ་ནས་གསང་བ་བཤད་བྱ་སྟེ། །གྲངས་ཀྱི་ཚད་ནི་འདི་ལྟ་སྟེ། །འབུམ་ཕྲག་གཅིག་གིས་
བགེགས་རྣམས་སྐྲོད། །འབུམ་ཕྲག་གཉིས་ཀྱིས་གྲོང་ཁྱེར་སྐྲོད། །འབུམ་ཕྲག་གསུམ་གྱིས་རྒྱལ་པོ་འཇོམས། །འབུམ་ཕྲག་བཞི་པས་བུད་མེད་འགུགས། །འབུམ་ཕྲག་ལྔ་ཡིས་ཕྱོགས་རྣམས་བསྲེག །འབུམ་ཕྲག་དྲུག་གིས་འབྱུང་བ་བཟློག །འབུམ་ཕྲག་བདུན་གྱིས་གནས་
ཁང་གཡོ། །འབུམ་ཕྲག་བརྒྱད་ཀྱིས་མངོན་ཤེས་འཆར། །འབུམ་ཕྲག་དགུ་ཡིས་ཟས་ནོར་འདུ། །འབུམ་ཕྲག་བཅུ་ཡིས་གང་འདོད་འགྲུབ། །དེ་ནས་གསང་བ་བཤད་བྱ་སྟེ། །མཚན་ལྟས་རབ་འབྲིང་ཐ་མ་གསུམ། །སྐལ་དང་ལྡན་པའི་གང་ཟག་ལ། །ཡེ་ཤེས་ཁྲོ་མོ་རྣམ་པ་ལྔ། །

མངོན་སུམ་དག་ཏུ་མཐོང་བར་འགྱུར། །དབང་པོ་རབ་ཀྱི་སྣང་བ་སྟེ། །ལས་འཕྲོ་ཅན་གྱི་སྣང་བ་ཡིན། །སྐལ་བ་འ