Kinh tạng Tây Tạng (Kangyur Đại Học) — 079_རྒྱུད་འབུམ།_ག

ཀའ་བསྒོ་གཏོར་མ་སྦྱིན། །སློབ་མ་ཀུན་ལ་བསྲུང་བྱས་ལ། །རྡོ་རྗེ་མགོན་པོ་ཆེན་པོ་ཡི། །ཏིང་ངེ་འཛིན་དུ་གནས་པ་ལ། །གསོལ་བ་གདབ་པས་གནང་བ་སྦྱིན། །ཁྱད་པར་བདུད་རྩི་འཁྱིལ་
པས་བསྲུང་། །ཡང་དག་ཡེ་ཤེས་སེམས་དཔའ་ཆེ། །འཁོར་བའི་གཡུལ་ལས་རྒྱལ་བྱེད་པ། །རྒྱལ་བ་མ་ལུས་བསྟན་སྐྱོང་ཆེ། །དེ་ནས་ལྷག་པར་གནས་པ་བརྩམ། །ས་འཛིན་ལྷ་མོ་ཉིད་མཆོད་པས། །བཀའ་བྱིན་ནས་ནི་ཐིམ་པར་བལྟ། །བུམ་པ་བཀྲ་ཤིས་ཡང་དག་ལྡན། །མ་ཉམས་
མཚན་ཉིད་ལྡན་པ་ལྔ། །ཁ་ཚར་མ་ཉམས་རས་ཟུང་དཀྲི། །སྙིང་པོ་སྨན་དང་འབྲུ་ལྔ་སོགས། །སྤོས་དང་རིན་ཆེན་དག་གིས་དགང་། །རྒྱུན་འབབ་ཆུ་ཡིས་གང་བ་དང་། །འབྲས་ལྡན་ཤིང་གིས་ཁ་བརྒྱན་པའོ། །དེ་ནས་བསྲུང་བའི་འཁོར་ལོ་ཡི། །བཀའ་ཡི་ཁྲོ་བོ་རྣམ་པར་བསྒོམ། །
དཀྱིལ་འཁོར་དྲི་ཡི་ཐིག་ལེ་ལ། །མེ་ཏོག་གཅལ་བཀྲམ་ལྷ་རྣམས་ནི། །བསྐྱེད་ཅིང་མཆོད་ལ་གཉིས་མེད་བསྟིམ། །སོ་ཤིང་དོར་དང་ལྟས་བརྟག་པ། །བསྲུང་སྐུད་ཀུ་ཤ་སྦྱིན་པར་བྱ། །དེ་ནས་སེམས་བསྐྱེད་སྡོམ་གནས་པས། །དམ་ཚིག་གསང་བ་སྦྱིན་པར་བྱ། །ཁྱད་པར་ལྷ་ལ་
གསོལ་བཏབ་ནས། །རྡུལ་ཚོན་དཀྱིལ་འཁོར་ཐིག་གདབ་བྱ། །དང་པོར་ཡེ་ཤེས་ཐིག་གདབ་ཅིང་། །ཕྱི་ནང་དམ་ཚིག་ངེས་པར་གདབ། །གོ་རིམས་མ་ནོར་ངེས་པའི་ཚུལ། །སྲད་བུ་ཤེས་རབ་ཅན་ཐིག་གདབ། །ཚོན་ནི་བྱིན་གྱིས་བརླབས་ནས་ཀྱང་། །སྤྲ་བརྟག་རྡུལ་ཚོན་
རིམ་པར་དགྱེ། །གྲུ་བཞི་པ་ལ་སྒོ་བཞི་པ། །རྟ་བབས་བཞིས་ནི་མཛེས་པ་ཡི། །ཟླུམ་སྐོར་ཕོ་བྲང་ལེ་ཚེ་དགུ། །དབུས་མ་ཨེ་དབྱིབས་དྲག་པོ་ཉིད། །ཕྱི་རོལ་པདྨ་འདབ་བརྒྱད་པ། །ལྷ་ཁྱམས་བཅས་པའི་དཀྱིལ་འཁོར་མཆོག །འདོད་ཡོན་རིན་ཆེན་སྐེད་པད་དང་། །དྲ་ཕྱེད་བ་

ཀུ་ལི་ཡི་ཕྲེང་། །ཡང་ན་ཁ་བད་མཛེས་པའི་རྒྱན། །ཆོས་འཁོར་རི་དགས་གདུགས་དང་བཅས། །ཐོད་སྐམ་པདྨའི་ཕྲེང་བར་ལྡན། །དུར་ཁྲོད་བརྒྱད་ཀྱིས་ཡོངས་སུ་འཁོར། །རྡོ་རྗེ་མེ་འོད་འབར་བས་འཁྲིགས། །དམ་ཚིག་ཡེ་ཤེས་གཉིས་མེད་པའི། །གསང་སྔགས་ཉེ་བ་
སྔགས་པར་གནས། །བརྟན་ཞིང་མཆོད་ལ་གསོལ་བ་གདབ། །ཉེ་བར་བརྒྱན་ཅིང་ཡོངས་སུ་བསྐོར། །དེ་ནས་སློབ་དཔོན་བདག་འཇུག་བྱ། །སྦྱིན་སྲེག་ལས་ནི་རབ་ཏུ་ཤིས། །དཔལ་མགོན་པོ་ཆེན་པོ་དངོས་གྲུབ་འབྱུང་བའི་རྒྱུད་ལས་གསང་བ་ཆེན་པོའི་དཀྱིལ་འཁོར་
གསལ་བར་བྱེད་པའི་ལེའུ་སྟེ་བཅུ་བདུན་པའོ།། །།དེ་ནས་གཞན་ཡང་རྣམ་བཤད་བྱ། །ཡང་ན་ལེ་ཚེ་དགུ་ལྡན་པའི། །པདྨ་འདབ་བརྒྱད་ཕྱི་རོལ་དུ། །མུ་ཁྱུད་འཁོར་ལོ་རིམ་གསུམ་ལ། །ཨེ་དབྱིབས་ཞིང་སྐྱོང་རིམ་པ་དགོད། །ལྷ་དང་ས་བོན་ཕྱག་མཚན་ནི། །
སྐུ་གསུང་ཐུགས་ཀྱི་ཕྱག་རྒྱས་མཚན། །སློབ་མ་ཁྲུས་བྱས་རྒྱན་བཏགས་ཏེ། །མཎྜལ་མེ་ཏོག་ཕྱག་བྱ་ཞིང་། །རས་ཀྱིས་མིག་ནི་བཀབ་ནས་སུ། །དང་པོར་མེ་ཏོག་དོར་བར་བྱ། །མཚན་མ་མཐོང་བས་ལེགས་པར་དྲང་། །སྒོ་བཞི་ནས་ནི་ནང་འཇུག་ཅིང་། །གུ་གུལ་བདུག་ཅིང་
ཏིང་འཛིན་གྱིས། །ནག་པོ་ཆེན་པོའི་ལྷ་ཚོགས་ཀྱང་། །ངེས་པར་སྤྱན་དྲངས་བསྟིམ་པར་བྱ། །དེ་ལས་ངེས་པར་རྟགས་རྣམས་བྱུང་། །ཡང་ན་སོ་སོའི་མགོན་པོར་བསྐྱེད། །ཡེ་ཤེས་སེམས་དཔའ་བྱིན་གྱིས་བརླབ། །བླ་མ་དཀྱིལ་འཁོར་གཙོ་བཅས་ལས། །འོད་འཕྲོས་རང་
བྱིན་བརླབས་པར་གྱུར། །མཐོང་བ་དྲི་དང་བདུད་རྩིས་གཏོར། །གདོང་གཡོགས་བཀྲོལ་ཞིང་ལྷ་ངོ་བསྟན། །དེ་ནས་དབང་པོའི་བྱེ་བྲག་གིས། །ངེས་པར་རིམ་པས་དབང་བསྐུར་ཏེ། །བསྟན་པ་འཛིན་ཅིང་བསྟན་པ་སྐྱོང་། །བསྟན་པ་སྲུང་བར་བྱེད་པ་ཡི། །སངས་རྒྱས་བསྟན་པ་
འཕེལ་མཛད་པ། །སྐུ་ཡི་མགོན་པོ་འཁོར་བཅས་ཀྱིས། །བླ་མེད་དངོས་གྲུབ་སྦྱིན་པའི་ཕྱིར། །ཡང་དག་ཡེ་ཤེས་དབང་བསྐུར་རོ། །སྐུ་གསུང་ཐུགས་དང་ཡོན་ཏན་དང་། །ཕྲིན་ལས་ལྷ་ཡི་ཁྱད་པར་རོ། །མེ་ལོང་ཡེ་ཤེས་དབང་ཉིད་ཅན། །རྡོ་རྗེ་རིགས་ཀྱི་མགོན་པོ་ཡིས། །

དཀྱིལ་འཁོར་ཆེན་པོའི་ནང་དུ་ནི། །ཞེ་སྡང་དག་པས་དབང་བསྐུར་རོ། །མཉམ་ཉིད་སོ་སོར་རྟོག་པ་དང་། །བྱ་བ་ནན་ཏན་ཆོས་ཀྱི་དབྱིངས། །ཡེ་ཤེས་ལྔ་ཡི་རིགས་ཀྱི་གཙང་། །ངེས་པར་དབང་བསྐུར་བསྟན་པར་བྱ། །ཕྲིན་ལས་བཞི་ཡི་དབང་ཡང་
བསྐུར། །ལྷ་མོ་བརྒྱད་ཀྱིས་ལས་རྣམས་འགྲུབ། །བུམ་པ་སྤྱི་བོར་བྱིན་པ་དང་། །ཐོད་པའི་བདུད་རྩི་བླུགས་པ་ཡིས། །གསང་བ་བདེ་ཆེན་ཡེ་ཤེས་ཉིད། །རང་བྱུང་དྲི་མེད་དབང་བསྐུར་བའོ། །དེ་རྗེས་བྷ་ལིྃ་གཏད་པ་ཡིས། །ནུས་པ་ཐོགས་མེད་སྦྱིན་བྱེད་ཡིན། །སྐུ་གསུང་
ཐུགས་ཀྱི་གསང་བ་མཆོག །ལྷ་དང་སྔགས་ཀྱི་ཟབ་པའི་ཆོས། །ཏིང་འཛིན་ཆེན་པོའི་ཕྱག་རྒྱ་ཆེ། །འདི་ཉིད་དངོས་གྲུབ་ཀུན་གྱི་གཏེར། །ཟབ་ཅིང་རྒྱ་ཆེའི་དོན་སྒྲུབ་པ། །སྐལ་བ་ཅན་ལ་སྦྱིན་པར་འོས། །ཧེ་རུ་ཀ་དང་ནག་པོ་ཆེ། །བླ་མ་ཐ་དད་མེད་པ་ལ། །ཚོགས་ཀྱི་འཁོར་
ལོས་ལེགས་མཆོད་ཅིང་། །ཞབས་ལ་གཏུགས་ལ་སྨོན་ལམ་གདབ། །འདི་ནི་ཐོབ་པར་ཐེ་ཚོམ་མེད། །ཕྲིན་ལས་ཀུན་དུ་གྲུབ་སྟེར་བྱེད། །དཔལ་མགོན་པོ་ཆེན་པོ་དངོས་གྲུབ་འབྱུང་བའི་རྒྱུད་ལས་དབང་བསྐུར་ཞིང་བྱིན་གྱིས་བརླབས་པའི་ལེའུ་སྟེ་བཅྭ་བརྒྱད་པའོ།། །།
དེ་ནས་གཞན་ཡང་བཤད་བྱ་བ། །དཔལ་ལྡན་མགོན་པོ་དེ་ཉིད་ཀྱི། །ཕྱོགས་བཞི་ཡོངས་སུ་སྐྱོང་བ་ཡི། །རྒྱལ་པོ་ཆེན་པོ་རྣམ་པ་བཞི། །ཤར་ཕྱོགས་ནས་ནི་ཡུལ་འཁོར་སྲུང་། །ལྷོ་ཕྱོགས་ནས་ནི་འཕགས་སྐྱེས་པོ། །ནུབ་ཕྱོགས་ནས་ནི་སྤྱན་མི་བཟང་། །བྱང་ཕྱོགས་ནས་ནི་
རྣམ་ཐོས་སྲས། །སངས་རྒྱས་བསྟན་པ་སྲུང་བྱེད་པ། །འདི་ཉིད་གྲུབ་པ་སྟེར་བྱེད་པའོ། །རབ་ཏུ་དབེན་ཞིང་གཙང་བ་དང་། །བཀྲ་ཤིས་ཉམས་དགའི་ས་ཕྱོགས་སུ། །རྣམ་ཐོས་སྲས་ནི་བསྒྲུབ་པར་བྱ། །ས་གཞི་བ་ཡི་ལྕི་བས་བྱུག །དྲི་བཟངས་ཙན་དན་དཀར་དམར་དང་། །ཨ་ག་རུ་
དང་དུ་རུ་ཀ། །ཁ་ཆེ་གི་ཧང་སྣ་ཚོགས་སྨན། །བསྲེག་ཅིང་ཚོགས་པའི་སྨན་དུ་བྱ། །མཎྜལ་གྲུ་བཞི་མདའ་གང་བ། །དཀྱིལ་འཁོར་སྒོ་བཞི་རྟ་བབས་དང་། །རིན་ཆེན་ཁང་པ་ཡིད་འོང་བ། །ཕོ་བྲང་རིན་ཆེན་ལས་གྲུབ་པ། །སྣ་ཚོགས་པདྨ་རིན་ཆེན་གླིང་། །གཏེར་དང་དཔག་

བསམ་ལྗོན་ཤིང་བཅས། །ཀ་བ་སྟོང་ཕྲག་དུ་མ་ཡིས། །རབ་ཏུ་རྒྱས་ཤིང་ཡོངས་སུ་བསྐོར། །ལྟེ་བ་རིན་ཆེན་མུ་ཁྱུད་ལ། །ལྷ་མོ་བརྒྱད་ཀྱིས་ཡོངས་སུ་བསྐོར། །བར་མ་ལྷ་ཁྱམས་མཛེས་པ་ལ། །གནོད་སྦྱིན་ཆེན་པོ་བརྒྱད་ཀྱིས་བསྐོར། །ཕྱི་མ་རབས་བསྐོར་བ་ལ། །ཀླུ་
ཆེན་བརྒྱད་ཀྱིས་ཡོངས་སུ་བསྐོར། །སྒོ་བཞིར་གནོད་སྦྱིན་བཞི་བཀོད་པ། །དབུས་སུ་རིན་ཆེན་སེང་གེའི་ཁྲི། །སྣ་ཚོགས་པདྨ་གེ་སར་བཅས། །དེ་དབུས་ཟླ་བ་དར་གྱི་གདན། །དེ་ལ་སྐུ་གསུང་ཐུགས་ཀྱི་གནས། །ས་བོན་ཕྱག་མཚན་སྐུ་དགོད་བྱ། །སྣ་ཚོགས་མཆོད་པས་ཡོངས་
བསྐོར་ཏེ། །འབྲས་དང་གྲོ་དང་འབྲུ་སྣ་ལ། །གཏོར་མ་ཤིན་ཏུ་བཟང་བར་བཤམ། །ཁྱད་པར་མེ་ཏོག་སྣ་ཚོགས་ནི། །ནཱ་ག་གེ་སར་ཀུ་མུ་ད། །པུཎྜ་ཀེ་བ་བ་ཀུ་ལི། །བཪྴི་ཀ་དང་ཙམ་པ་ཀ། །དྷ་ནུ་ཀ་རི་མ་ལི་ཀི། །སུ་ཏི་ཀ་དང་ཨུཏྤ་ལ། །པདྨ་མནྡཱ་ར་བ་དང་། །དཎྜོད་པ་
ལ་སོགས་པའོ། །སྣ་ཚོགས་ཆུ་དང་བསྲེག་སྤོས་ཚོགས། །གུ་གུལ་ཁྱད་པར་བསྲེག་པར་བྱ། །ཀ་ར་བུ་རམ་སྦྲང་རྩི་དང་། །ཁུར་བ་འབྲས་ཆན་ཞུན་མར་དང་། །ཞལ་ཟས་བྱེ་བྲག་ཐམས་ཅད་དང་། །སྣང་གསལ་མར་མེ་བྱུག་པ་དང་། །སྒྲ་སྙན་སྣ་ཚོགས་མཆོད་པའི་རྫས། །
གདུགས་དང་རྒྱལ་མཚན་བ་དན་དང་། །འཕན་དང་བླ་རེ་ལ་སོགས་པ། །སྣ་ཚོགས་དར་གྱི་ལྡ་ལྡི་དང་། །དེ་ལྟར་བཀོད་པ་ལེགས་བརྒྱན་ནས། །བདེ་བའི་སྟན་ལ་འདུག་ནས་ཀྱང་། །རང་ལྷར་བསྐྱེད་པའི་ས་བོན་ལས། །འོད་འཕྲོས་མདུན་གྱི་དཀྱིལ་འཁོར་ལ། །རབ་ཏུ་འཕྲོས་
པས་འོད་དུ་འབར། །དེ་ལས་དབུས་སུ་རྒྱལ་ཆེན་ནི། །སྐུ་མདོག་གུར་གུམ་མདོག་འདྲ་བ། །རིན་ཆེན་སྣ་ཚོགས་རྒྱན་གྱིས་བརྒྱན། །སེང་གེའི་ཁྲི་ལ་ལེགས་བཞུགས་པའི། །ཕྱག་གཡས་ཡིད་བཞིན་ནོར་བུ་སྟེ། །རིན་ཆེན་འབར་བའི་རྒྱལ་མཚན་ཅན། །གཡོན་པ་ནེའུ་ལེའི་
སྣོད་ཅན་ལས། །ཁ་ནས་རིན་ཆེན་སྐྱུག་པར་བསམ། །གནོད་གནས་དབང་པོ་གང་བ་བཟང་། །ནོར་བུ་བཟང་དང་རྟ་ཡི་བདག །ཡང་དག་ཤེས་དང་འབྲོག་གནས་དང་། །ལྔ་རྩེན་པི་ཙི་ཀུཎྜ་ལི། །སྣ་ཚོགས་རྒྱན་དང་ཕྱག་མཚན་བཅས། །རེ་རེའང་དུ་མས་ཡོངས་བསྐོར་ནས། །

ཤིན་ཏུ་གསལ་ཞིང་བརྟན་པར་བསམ། །དེ་ནས་ས་བོན་ལས་འཕྲོས་ཏེ། །རང་བཞིན་གནས་ནས་སྤྱན་དྲངས་ལ། །མཆོད་ཅིང་བསྟོད་དེ་གཉིས་མེད་བསྟིམ། །ཁྱད་པར་གསོལ་བ་གདབ་པར་བྱ། །རྒྱལ་བ་མགོན་པོ་འཁོར་བཅས་པའི། །ཡིད་འོང་ཁང་
བཟངས་ཕོ་བྲང་འདི། །ཡིད་བཞིན་ནོར་བུའི་ཆར་འབེབས་པའི། །རིན་ཆེན་གཏེར་གྱི་དངོས་གྲུབ་གསོལ། ཨོྃ་བཻ་སྭཱ་ཧཱ། ཨོྃ་བཻ་ཤྲ་བ་ཎཱ་ཡ་སྭཱ་ཧཱ། ཨོྃ་ཛམྦྷ་ལཱ་ཡ་སྭཱ་ཧཱ། ཨོྃ་པཱུརྞཎ་བྷ་དྲཱ་ཡ་སྭཱ་ཧཱ། ཨོྃ་མ་ཎི་བྷ་དྲཱ་ཡ་སྭཱ་ཧཱ། ཨོྃ་ཀུ་བེ་རཱ་ཡ་སྭཱ་ཧཱ། ཨོྃ་སྃ་པྲ་ཛ་ནཱ་ཡ་སྭཱ་ཧཱ། ཨོྃ་གུ་ཧྱ་སྠ་ནཱ་ཡ་སྭཱ་ཧཱ།
ཨོྃ་པཱཉྩི་ཀཱ་ཡ་སྭཱ་ཧཱ། ཨོྃ་པི་ཙི་ཀུཎྜ་ལཱ་ཡ་སྭཱ་ཧཱ། དང་པོ་ལྕགས་ཀྱུའི་ཕྱག་རྒྱ་སྟེ། །གཉིས་པ་རིན་ཆེན་འབར་བ་ཉིད། །གསུམ་པ་ཀུན་ནས་བསྟོད་པར་བྱ། །དེ་ནས་གཏོར་མ་དབུལ་བར་བྱ། །གསོལ་བ་བཏབ་ནས་ཕྲིན་ལས་བཅོལ། །དེ་ནས་ཡེ་ཤེས་གཤེགས་སུ་གསོལ། །
དེར་གནས་པ་ནི་བཞུགས་པར་བྱ། །ཕྱི་རྟེན་ནང་རྟེན་ཁྱད་པར་བ། །རིམ་པ་འཁོར་ལོ་སྔགས་དང་བཅས། །མིས་མི་མཐོང་བར་སྦས་ཏེ་བཅང་། །ཁྱད་པར་རྟགས་ནི་གསལ་བར་འབྱུང་། །ཉེ་བའི་མཚན་མ་ངེས་མཐོང་ནས། །དངོས་གྲུབ་བླང་ཞིང་གཏོར་མ་དབུལ། །སྦྱིན་སྲེག་
ལས་ཀྱིས་མྱུར་དུ་འགྲུབ། །གསང་སྔགས་འབུམ་ཕྲག་བཅུ་ཡིས་ནི། །འབྲས་བུ་ཡིད་ལ་འདོད་ཀུན་འགྲུབ། །ཁ་སྐོང་མེ་ཡི་མཆོད་པ་བྱ། །གཏོར་མ་ཆེན་པོ་དང་བཅས་པ། །ལན་བདུན་ཉེ་བར་བསྙེན་པས་འགྲུབ། །འདི་ནི་ལྷ་རྣམས་ཀུན་གྱི་གཏེར། །སྒྲུབ་པ་པོ་ལ་སྩོལ་བར་
མཛད། །དཔལ་མགོན་པོ་ཆེན་པོ་དངོས་གྲུབ་འབྱུང་བའི་རྒྱུད་ལས་ཁྱད་པར་དུ་འཕགས་པ་རྣམ་ཐོས་སྲས་གནོད་སྦྱིན་ཆེན་པོ་བརྒྱད་དང་བཅས་པ་བསྒྲུབ་པའི་ལེའུ་སྟེ་བཅུ་དགུ་པའོ།། །།དེ་ནས་གཞན་ཡང་བཤད་བྱ་བ། །འཕགས་པ་ཆེན་པོ་དེ་ཉིད་ལ། །ཀླུ་
ཆེན་བརྒྱད་ཀྱིས་ཡོངས་བསྐོར་བ། །རིམ་པ་འདི་ནི་བསྟན་པར་བྱ། །ཁྱད་པར་ས་བཅུའི་དབང་ཕྱུག་ཆེ། །དཔལ་ལྡན་ཐུགས་རྗེའི་བདག་པོ་ཉིད། །ཞལ་གཅིག་ཕྱག་ནི་གཉིས་པ་ཉིད། །སྤྱན་གསུམ་ཅུང་ཟད་ཁྲོ་བའི་ཚུལ། །སྐུ་མདོག་དམར་དང་ལྗང་ཁུའི་མདོག །རིན་ཆེན་

འབར་བའི་དབུ་རྒྱན་ཅན། །སྐུ་ལ་དར་བེར་སུམ་རིམ་ལ། །སྣ་ཚོགས་ཅོད་པན་རྒྱན་གྱིས་སྤྲས། །ཕྱག་རྒྱ་རིན་ཆེན་འབར་བ་བསྣམས། །ལྷ་ཡི་བ་དན་མཛེས་པ་འཕྱར། །གཡོན་པ་མཆོད་རྟེན་སྐུ་གདུང་བསྣམས། །ནེའུ་ལེའི་རྐྱལ་བ་ནོར་སྐྱུག་འཆང་། །འཁོར་དུ་ཁྱད་པར་
ཀླུ་ཆེན་བརྒྱད། །སྐུ་ལུས་མི་ཡི་རྣམ་པ་ལ། །སྦྲུལ་མགོ་བདུན་པའི་གདེངས་ཀ་ཅན། །ཕྱག་གཉིས་ཐལ་མོ་སྦྱར་བ་ནས། །ཡིད་བཞིན་ནོར་བུ་ལེགས་བསྣམས་པ། །སེམས་དཔའི་འདུག་སྟངས་ཕྱེད་སྐྱིལ་ཅན། །ཐམས་ཅད་གཙོ་ལ་འདུད་པར་བྱེད། །ནོར་རྒྱས་པདྨ་ཉིད་དང་
ནི། །སྟོབས་ཀྱི་རྒྱུ་དང་འཇོག་པོ་ཉིད། །པདྨ་ཆེ་དང་ཧུ་ལུ་ཆེ། །དུང་སྐྱོང་རིགས་ལྡན་བརྒྱད་པོ་ཉིད། །རྒྱ་མཚོ་ཆེན་པོའི་ནང་དག་གི། །པདྨ་ལ་ནི་གནས་བཅས་ཏེ། །དེ་ལྟར་བསྐྱེད་ལ་ཡེ་ཤེས་པ། །སྤྱན་དྲངས་མཆོད་ལ་གཉིས་མེད་བསྟིམ། །དགྱེས་པའི་ཚུལ་གྱིས་རྣལ་འབྱོར་
ལ། །ཡིད་འོང་དངོས་གྲུབ་སྩོལ་བར་འགྱུར། །ཨོྃ་ཤྲཱི་བཛྲ་ཡཀྵ་བཻ་ཤྲ་བ་ཎཱ་ཡ་ཧཱུྃ་ཕཊ། ཨོྃ་བ་རུ་ཎཱ་ཡ་སྭཱ་ཧཱ། ཨོྃ་ཨ་ནནྟཱ་ཡ་སྭཱ་ཧཱ། ཨོྃ་ཏཀྵ་ཀཱ་ཡ་སྭཱ་ཧཱ། ཨོྃ་ཤྃ་ཁ་པཱ་ལཱ་ཡ་སྭཱ་ཧཱ། ཨོྃ་ཀ་ར་ཀོ་ཊཱ་ཡ་སྭཱ་ཧཱ། ཨོྃ་པདྨཱ་ཡ་སྭཱ་ཧཱ། ཨོྃ་མ་ཧཱ་པདྨཱ་ཡ་སྭཱ་ཧཱ། ཨོྃ་ཀུ་ལི་ཀཱ་ཡ་སྭཱ་ཧཱ། དེར་ནི་
གསང་སྔགས་བཟླས་པ་ཡིས། །སྔགས་ཀྱི་འོད་ཟེར་སྤྲོ་བསྡུ་བྱ། །དེ་ནས་ཀླུ་རྣམས་ཐམས་ཅད་ལ། །ཡིད་འོང་གཏོར་མ་དབུལ་བར་བྱ། །ནཱ་ག་གེ་སར་པུས་པ་དང་། །རྒྱ་མཚོ་ལྦུ་བ་ཨ་རུ་དང་། །ཛཱ་ཏི་པ་ལ་གུར་གུམ་དང་། །ཙནྡན་དཀར་དམར་པུ་ཤེལ་ཙེ། །དབང་པོ་ལག་དང་
སྙིང་ཞོ་ཤ། །ཆུ་སྲིན་སྡེར་མོ་ལེབ་རྒན་དང་། །འགྲོན་བུ་དུང་དང་མུ་ཏིག་དང་། །ཉ་ཕྱིས་གླ་གོར་ཞོ་ཤ་དང་། །མཁལ་མ་ཞོ་ཤ་རྨ་བྱའི་མདོངས། །རྟ་རུ་རྒུན་འབྲུམ་མདར་གསུམ་དང་། །གསེར་གྱི་བྱེ་མ་རས་སྐུད་དང་། །འོ་མ་དང་ནི་འབྲུ་སྣ་ལྔ། །རིན་ཆེན་སྣ་ཚོགས་མ་ལུས་པ། །
ཁྱད་པར་དུ་ནི་དབུལ་བར་བྱ། །དེ་ནས་མཆོད་ཅིང་བསྟོད་བྱ་སྟེ། །དངོས་གྲུབ་གང་འདོད་སྩལ་བར་བསམ། །དེ་ནས་ཞི་བའི་སྦྱིན་སྲེག་བྱ། །གསང་སྔགས་ཁྲི་ཕྲག་བཅུ་བཟླས་ནས། །རྟགས་བྱུང་ནས་ནི་དངོས་གྲུབ་བླང་། །དཔལ་མགོན་པོ་ཆེན་པོ་དངོས་གྲུབ་འབྱུང་བའི་རྒྱུད་ལས་

རྒྱལ་པོ་རྣམ་ཐོས་སྲས་ལ་ཀླུ་ཆེན་པོ་བརྒྱད་ཀྱིས་བསྐོར་བའི་ལེའུ་སྟེ་ཉི་ཤུ་པའོ།། །།དེ་ནས་གཞན་ཡང་བཤད་བྱ་བ། །དྲང་སྲོང་སྲས་མཆོག་དེ་ཉིད་ལ། །ལྷ་མོ་བརྒྱད་ཀྱིས་ཡོངས་བསྐོར་བའི། །ཐབས་ཉིད་རྣལ་འབྱོར་པས་ཤེས་བྱ། །རིན་
ཆེན་བདུན་པའི་ཁང་བཟངས་སུ། །ནོར་བུ་སྣ་ཚོགས་གདན་བཞུགས་པའི། །འཕགས་པ་སྐུ་མདོག་བཻ་ཌཱུརྱ། །ཞལ་གཅིག་ཕྱག་དྲུག་སྤྱན་གསུམ་པ། །རིན་ཆེན་སྣ་ཚོགས་དུ་མས་སྤྲས། །གདུག་པ་ཀླུ་ཡིས་ཉེར་བརྒྱན་ཅིང་། །གཡས་ཀྱི་དང་པོ་རྒྱལ་མཚན་འཛིན། །གཡོན་གྱི་
དང་པོ་རིན་ཆེན་སྣོད། །བར་མ་གཉིས་ནི་རྡོ་རྗེ་དང་། །པདྨ་འབར་བ་བསྣམས་པ་དང་། །ཐ་མས་ཞགས་པ་ཐོ་བ་འཕྱར། །སྟག་གི་པགས་པའི་ཤམ་ཐབས་ཅན། །དར་གྱི་ཅོད་པན་དག་གིས་མཛེས། །སྐད་ཅིག་གིས་ནི་བསམ་པར་བྱ། །ཨོྃ་བཛྲ་བི་རུ་ཀ །ཀུ་བེར་ཨཱཏྨ་ཀ །མ་ཧཱ་
ཡཀྵ་རཱ་ཛ་རཏྣ་སིདྡྷི་ཧཱུྃ་སྭཱ་ཧཱ། །གསང་སྔགས་འདི་ནི་བརྗོད་པ་ཡིས། །གནོད་སྦྱིན་མོ་རྣམས་མདུན་དུ་འགུགས། ཨོྃ་ཙནྡྲ་ཀཱནྟྱཻ་སྭཱ་ཧཱ། ཨོྃ་སུ་བྷ་དྲཱ་ཡཻ་སྭཱ་ཧཱ། ཨོྃ་དཏྟཱ་ཡཻ་སྭཱ་ཧཱ། ཨོྃ་གུཧྱཱ་ཡཻ་སྭཱ་ཧཱ། ཨོྃ་སུ་དཏྟཱ་ཡཻ་སྭཱ་ཧཱ། ཨོྃ་དེ་བྱཻ་སྭཱ་ཧཱ། ཨོྃ་ཨཱརྱཱ་ཡཻ་སྭཱ་ཧཱ། ཨོྃ་སར་སྭཏྱཻ་སྭཱ་ཧཱ། ཟླ་འོད་ཅན་མ་རབ་
བཟང་མ། །སྦྱིན་བྱེད་མ་དང་གསང་བ་མ། །རབ་སྦྱིན་མ་དང་དཔལ་ལྷ་མོ། །འཕགས་མ་དང་ནི་དབྱངས་ལྡན་ཏེ། །ཐམས་ཅད་ཞལ་གཅིག་ཕྱག་གཉིས་མ། །ཀུན་ཏུ་རྒྱལ་བ་འོད་འཕྲོ་མ། །གདུ་བུ་དཔུང་རྒྱན་མགུལ་རྒྱན་དང་། །ཞབས་གདུབ་དོ་ཤལ་ལེགས་བརྒྱན་ཅིང་། །དར་དང་
ནོར་བུས་རྣམ་པར་མཛེས། །དཀར་དང་སེར་དང་དཱུར་བའི་འོད། །གསེར་འོད་པདྨ་རཱ་ག་དང་། །ཨུཏྤལ་པདྨ་རཱ་ག་དང་། །ཨུཏྤལ་པུཎྜ་རཱི་ཀ་དང་། །པ་ལ་ཤ་ཡི་མདོག་མཚུངས་པ། །འོད་ཀྱི་ཕྲེང་བས་འཁྲིགས་པའི་ནང་། །རིན་ཆེན་སྒྲོམ་བུ་གཏེར་གྱི་སྣོད། །རིན་ཆེན་གཞོང་པ་དུང་
ཆོས་དང་། །བེ་ཙུ་ར་དང་ནོར་བུ་མེ། །དཔལ་བེ་པཉྩ་ལི་ཀ་སྟེ། །གཡོན་པ་ཀུན་ཏུ་པདྨ་བསྣམས། །སྒེག་ཅིང་འགྱིང་དང་ལྡན་པར་བསམ། །གཙོ་བོས་ལྷ་མོ་བརྒྱད་པོ་བསྐུལ། །ལྷ་མོ་བརྒྱད་པོ་ཐམས་ཅད་ཀྱིས། །རིན་ཆེན་ཆར་པ་ཕབ་ནས་ནི། །བཀའ་བཞིན་བགྱིད་པ་རྣམ་

པར་བསམ། །མགོན་པོ་མྱུར་དུ་བསྐུལ་བའི་ཚེ། །གཙོ་བོས་མི་འཇིགས་སེང་གེ་ཆིབས། །ཐུན་མོང་གི་ནི་ལས་བྱེད་པའོ། །སྟོབས་ལྡན་གླང་ཆེན་རབ་བརྟན་ཆིབས། །ཁྱད་པར་སྒྲུབ་པའི་ལས་རྣམས་བྱེད། །གཡུ་འབྲུག་སྔོན་པོ་ཆིབས་ནས་ནི། །སྣང་སྲིད་མ་ལུས་དབང་དུ་སྡུད། །
དབང་དུ་བྱེད་པའི་ལས་རྣམས་དང་། །ཁྱད་པར་སྦྱིན་སྲེག་དྲག་པོ་ནི། །བཞད་དང་རྔམ་པའི་ཚུལ་གྱིས་ནི། །མྱུར་དུ་ལས་ལ་འགྲོ་བ་ཡིན། །ཕྱི་ནས་གསང་བའི་རིམ་ཤེས་པའི། །སྟོང་ཕྲག་བཅུ་ཡིས་འགྲུབ་པ་སྟེ། །འདི་ནི་རིན་ཆེན་གའུའི་ནང་། །རིན་ཆེན་འབར་བའི་འཁོར་ལོ་ལ། །
གསང་སྔགས་ཡི་གེའི་ཕྲེང་བ་ཅན། །ས་བོན་སྤྲོ་བསྡུས་ཏིང་འཛིན་བསྒོམ། །ན་མོ་བཻ་ཤྲ་བ་ཎ་བཛྲ་མུ་ས་ལ། མུ་སུ་ན་སྟི། ཏྲི་ཤཱུ་ལ་ཨྃ་ཀུ་ཤ །པཱ་ཤ་པ་ར་ཤུ། བནྡྷ་མུད་གར་ལཱ་ལང་ཀྵི་ཏ། ཧསྟ་སྱ། ན་མོ་ན་མཿ སརྦྦ་དེ་ཝ་ཏ་སུ་ཙི་ཏ། ཀྲྀ་ཏ་ཊ་སྱ། མ་ཧཱ་ཀཱི་ལ་ཀཱི་ལཱ་ཡ། སརྦ་གྲ་
ཧཱ། ཨ་ཀ་རི་ཥ་ཎི་ཡ་བི་ཛ་ཡཱ། ཛ་ཡྃ་དཱུ། བྷ་ག་བཱ་ན། ནཱ་ད་ཀུ་བེ་རཱ། ཀྵི་ཏི་ས་ཏི་ཙཀྲ་ཏི་ནི། ཀ་ལ་ཀ་ལ། ནཱ་ད་ཀུ་བེ་ར་ཀི་རི་ཀི་ལི། ནཱ་དཀུ་བེ་ར། ཀྵི་ཏི་པ་ཏི། ཙཀྲ་ཏི་ནི། བི་ཛ་མ་ཧཱ་བྷ་ག་བ་ནི། ནཱ་ད་ཀུ་བེ་ར། བི་ཀྲ་ཏ། དྲང་སྲོང་ཀ་ར་ལ། བན་དྷ་ན། རེའུ་ཏྲ། དྷི་ཧྱ་ས། གུ་ཧྱ། ཀ་ན་
ག་ན་བ་རི་བྲྀདྷཱ། བཻ་ཤྲ་བ་ཎ། བྷ་ནེ་བྷ་ནེ། བྷི་བ་ན་བ་སི་ཏི། ཀུ་ཏི་ཀུ་ཏི། ཀུ་བེ་ར། ནཱ་ད་ཀུ་བེ་ར། ནམཿསྟུ་ཏེ་སྭཱ་ཧཱ། འདི་ནི་ཁྱད་པར་སྒྲུབ་པ་སྟེ། །གསང་སྔགས་གནོད་སྦྱིན་སྟོང་སྡེའི་ཚོགས། །མ་ལུས་འདི་ཡིས་སྐུལ་བར་བྱེད། །གར་མཁན་མཆོག་ཅེས་བྱ་བ་ཡི། །ལྷ་ནི་དུ་
མས་ཡོངས་བསྐོར་བའི། །འདི་ནི་བསྐྱེད་ཅིང་སྤྱན་དྲང་བ། །སྤྱན་དྲངས་མཆོད་ཅིང་བསྟོད་པ་དང་། །གང་སྒྲུབ་ལས་ལ་བསྐུལ་བར་བྱ། །འདི་ཡིས་རྣལ་འབྱོར་དགོས་པ་སྒྲུབ། །ཞི་བས་ནད་གདོན་མ་ལུས་ལ། །དབང་གིས་ཁམས་གསུམ་མ་ལུས་བསྒྱུར། །རྒྱས་པས་ནོར་དང་
འབྲུ་སོགས་འཕེལ། །མངོན་སྤྱོད་ཀྱིས་ནི་གདུག་པ་འདུལ། །ནོར་བུ་བཟང་པོས་གཏེར་ལ་སྤྱོད། །ཡང་དག་ཤེས་ཀྱིས་དུས་གསུམ་མཐོང་། །གང་བ་བཟང་པོས་ལོངས་སྤྱོད་འཕེལ། །གཙུག་ན་འཁྱིལ་པས་ཚེ་དཔལ་སྟེར། །འབྲོག་གནས་རྒྱལ་བས་དུད་འགྲོ་སྤེལ། །གནོད་སྦྱིན་

ལྔ་པོ་འདི་དག་གིས། །ས་གསུམ་གཡོ་བར་བྱེད་པ་སྟེ། །འདི་དག་སྒྲུབ་པོས་མཆོད་གྱུར་ན། །ཕུན་སུམ་ཚོགས་པའི་དཔལ་རྣམས་སྟེར། །རང་ཉིད་ལྷག་པའི་ལྷ་ཡིས་ནི། །ས་བོན་ལས་འཕྲོས་ལྕགས་ཀྱུས་ནི། །འདི་དག་སྲོག་གི་དབང་པོ་ལ། །དབང་བྱེད་
ལས་བྱེད་མི་ཟློག་འགྱུར། །གནོད་སྦྱིན་རྣམས་ལ་ཤིང་ཐོག་དང་། །ཀླུ་རྣམས་གཏོར་མས་ཀུན་དུ་མཆོད། །ལྷ་མོ་ཨ་རུ་ར་ཡི་འབྲུ། །མ་ལུས་མྱུར་དུ་མཆོད་པའོ། །གང་པོ་དང་ནི་མཛེས་མ་དག །ཁྱད་པར་མངག་གཞུག་གྱུར་པའོ། །དཔལ་མགོན་པོ་ཆེན་པོ་དངོས་གྲུབ་འབྱུང་བའི་རྒྱུད་
ལས་རྒྱལ་པོ་ཆེན་པོ་རྣམ་ཐོས་སྲས་འཁོར་དང་བཅས་པ་བསྒྲུབ་པའི་ལེའུ་སྟེ་ཉི་ཤུ་རྩ་གཅིག་པའོ།། །།དེ་ནས་གཞན་ཡང་བཤད་བྱ་བ། །སེམས་ཅན་རྣམས་ཀྱི་དོན་གྱི་ཕྱིར། །འཁོར་བའི་སྲིད་པ་ཇི་སྲིད་པར། །བྱང་ཆུབ་སེམས་ཀྱི་ཆོས་རྣམས་སྟོན། །རི་བོའི་རྩེ་དང་
ནགས་ཚལ་བྲག །རྒྱ་མཚོའི་འགྲམ་དང་ཤིང་གཅིག་ས། །གདོད་ནས་གྲུབ་པའི་དུར་ཁྲོད་དེ། །གནས་འདི་དག་ཏུ་བསམ་གཏན་བསྒོམ། །ལས་ཀྱི་མགོན་པོ་འཇིགས་པའི་གཟུགས། །གྲུ་གསུམ་ཕོ་བྲང་ལ་གནས་པ། །དུར་ཁྲོད་གཞལ་ཡས་འབར་བ་ནི། །མེ་དཔུང་འབར་བ་འཕྲོ་
བའི་དབུས། །ཞལ་གཅིག་པ་ལ་ཕྱག་གཉིས་པ། །སྐུ་མདོག་ནག་ཅིང་མཆེ་བ་རྣོ། །ཡན་ལག་ཐུང་ཞིང་གསུས་པ་འཕྱང་། །ཐོད་པ་སྐམ་པོའི་དབུ་རྒྱན་བྱས། །སྤྱན་གསུམ་སྡང་མིག་ཁྲོ་ཚུལ་སྟོན། །བཞིན་བསྒྱུར་མི་སྡུག་ལུས་ཅན་ནི། །ཕྱག་གཡས་རྡོ་རྗེ་གྲི་གུག་འཕྱར། །
གཡོན་པ་དམ་ཉམས་སྙིང་ཁྲག་གིས། །ཐོད་པ་བཀང་ནས་གསོལ་བར་མཛད། །དུག་སྦྲུལ་གདུག་པས་ལྷུ་ཚིགས་བརྒྱན། །དབུ་སྐྲ་དམར་སེར་གྱེན་དུ་བརྫེས། །མི་ཐོད་རློན་པའི་དོ་ཤལ་བྱས། །རོ་ཡི་གདན་ལ་བརྫིས་ནས་ཀྱང་། །དྲག་པོའི་ང་རོ་སྒྲོགས་པའི་གནས། །སྐུ་གསུང་
ཐུགས་ཀྱི་མགོན་པོ་ནི། །གསོད་བྱེད་རྔམ་བྱེད་སྒྲོལ་བྱེད་ཆེ། །བསྒྲུབ་བྱ་ངེས་པར་སྒྲོལ་བའི་ཚེ། །སྐུ་ཡི་མགོན་པོས་དམ་ཉམས་ཀྱི། །ལྟེ་བའི་སྲོག་རྩ་གཅོད་པར་བྱེད། །གསུང་གི་མགོན་པོས་དམ་ཉམས་ཀྱི། །མགྲིན་པ་ནས་ནི་ཁྲག་རྣམས་འདྲེན། །རྡོ་རྗེ་ཐུགས་ཀྱི་

མགོན་པོ་ཡིས། །སྙིང་གི་དཀར་ནག་མཚམས་སུ་ཡང་། །བྱ་རོག་མཆུ་ནི་བཙུགས་ནས་ཀྱང་། །སྲོག་རྩ་མྱུར་དུ་གཅོད་པར་བྱེད། །ཕོ་ཉ་ཤ་ཟའི་གདོང་ཅན་གྱིས། །སྤྱི་གཙུག་ནས་ནི་རྩ་ལ་འཇིབ། །ལས་བྱེད་མ་མོ་ཙཎྜི་ཀས། །གསང་བའི་མདོམས་སོར་དངས་མ་རྔུབ། །རྩ་
འཇིབ་མ་དང་ཁྲག་འཐུང་མ། །སྲོག་འཕྲོག་མས་ནི་ལས་ལ་སྦྱོར། །ཉིན་མཚན་དུས་ལས་འདའ་མི་བྱེད། །འདི་དག་གསང་སྔགས་མ་ཡེངས་བཟླས། །དུས་གསུམ་དག་ཏུ་ཏིང་འཛིན་འབད། །རྩ་བའི་སྔགས་ནི་སྲོག་ཡིན་ཏེ། །གསུང་གི་དངོས་གྲུབ་སྙིང་པོ་ཡིན། །ཉེ་བའི་སྙིང་
པོས་ཐུགས་བསྐུལ་བའོ། །ཡེ་ཤེས་ས་བོན་མི་ཤིགས་པ། །དངས་མའི་གནས་པར་དེ་བཤད་དོ། །སྐུ་གསུང་ཐུགས་དང་ཡོན་ཏན་ལས། །རིམ་པར་བཟླས་པས་བསམ་གཏན་འགྲུབ། །རྟགས་རྣམས་ཉེ་བར་མ་བྱུང་ན། །འབད་པས་བསྟེན་ཅིང་མཆོད་པར་བྱ། །གཞན་དུ་
འགྲུབ་པར་མི་འགྱུར་རོ། །ཨོྃ་མ་ཧཱ་ཀཱ་ལ་གུ་ན་ཧྲྀ་ད་ཧཱུྃ་ཕཊ། ཨོཾ་མ་ཧཱ་ཀཱ་ལ་ཏྲ་ག་ཤད་ཛཿ མ་ཧཱ་ཀཱ་ལ་སི་ཏི་ཡ་མ་དུ་ཛཿ ཨཱ་ལི་ཀཱ་ལི་མཉམ་ལྡན་པའི། །རྩ་བརྒྱད་ཕྲེང་བ་རབ་ཏུ་བསྒྲགས། །རིམ་པར་བྱིན་བརླབས་ལྡན་བྱའི་ཕྱིར། །བཟླས་པ་བརྒྱ་རྩ་བརྒྱད་དུ་བྱ། །བགྲང་ཕྲེང་
ནུས་པར་ལྡན་པ་ཡིས། །ལས་ནི་མྱུར་བར་ཤིས་པ་ཡིན། །ཤེལ་གྱིས་ཞི་བ་ཆེན་པོ་འགྲུབ། །མུ་ཏིག་གིས་ནི་རྒྱས་པ་ལ། །དྲེད་པོའི་སོ་ཡིས་གསད་པ་འགྲུབ། །དེ་གཉིས་འགྱུར་བ་བོང་བུའི་སོ། །སྡང་དང་སྐྲད་པ་རྔ་མོའི་སོ། །ཀ་སོགས་རྣམ་དག་ཡུམ་བཅུ་དྲུག །
བྱིས་པ་འཚོ་བྱེད་དབང་སོགས་ལ། །དབྱངས་དང་གསལ་བྱེད་རྣམས་བསྲེས་པས། །བཞི་ཡིས་ལྷག་པའི་པད་འབྲས་ཤིང་། །ལུང་ཏང་དམར་པོ་བདུན་གཅིག་དྲུག །ཡང་ན་ཙན་དན་འབྲུ་དགུ་འམ། །རྒྱུ་སྐར་ཕྱེད་པོས་གྲངས་མཉམ་པས། །ལུང་ཏང་ནག་པོས་རྨོངས་བྱེད་ནུས། །
དབྱངས་དང་གསལ་བྱེད་ཕྱེད་སྦྱངས་པས། །རུ་དྲཱཀྵ་ནི་མངོན་སྤྱོད་ལ། །དེ་ལྟའི་ཆོ་ག་ཤེས་པ་ཡིས། །ཚར་གཅད་ཕན་གདགས་ལས་རྣམས་སྤྱད། །གསང་སྔགས་ཡི་གེའི་འཁོར་ལོ་ནི། །མགལ་མེ་བཞིན་དུ་བསྐོར་བར་བྱ། །དེ་ལྟར་དུས་བཞིར་བསྒྲུབ་པར་བྱ། །དེས་ནི་ཉེ་

བར་འགྲུབ་པར་འགྱུར། །དེས་ཀྱང་གྲུབ་པར་མ་གྱུར་ན། །རང་ཉིད་ཡེ་ཤེས་ནག་པོ་ཡི། །གདུག་པ་འདུལ་བར་བསམས་ནས་ནི། །ལས་བྱེད་མགོན་པོའི་སྲོག་རྩ་འཕྲོག །དེ་ལྟར་བསྐུལ་བས་ལས་ལ་སྦྱོར། །གཟས་པ་པོ་དེ་སྒྲོལ་བར་བྱེད། །གལ་ཏེ་ལས་
ལ་འགྱངས་པ་ན། །སྲོག་གི་ཐིགས་པ་བླང་བ་དང་། །གསང་སྔགས་སྙིང་པོ་གོ་བཟློག་ཅིང་། །ལྟེ་བ་དཀྲུགས་པའི་ལས་བྱས་ན། །ཤི་ས་བསྟན་པར་འགྱུར་བ་སྟེ། །སྲོག་ནི་དམར་ལེན་བྱེད་པར་འགྱུར། །མ་རུངས་འདུལ་བའི་ལས་འདི་དག །སངས་རྒྱས་བསྟན་པ་བསྲུང་
བ་ལས། །གཞན་དུ་བྱས་ན་ཉེས་པར་འགྱུར། །སྦྱིན་སྲེག་དང་ནི་མནན་པ་དང་། །དེ་བཞིན་ཟོར་དགྱེ་ལས་བྱ་བ། །གསད་པ་རང་གཤེད་གནད་ལ་དབབ། །དེ་ལས་མྱུར་བར་རྟགས་བྱུང་ཚེ། །ཐུགས་དམ་བསྐང་ཞིང་གཏོར་མ་འབུལ། །ཚོགས་ཀྱི་འཁོར་ལོའི་མཆོད་པ་
དང་། །དེ་དག་ནར་མར་འགྲུབ་པར་འགྱུར། །དཔལ་མགོན་པོ་ཆེན་པོ་དངོས་གྲུབ་འབྱུང་བའི་རྒྱུད་ལས་ལས་ཉེ་བར་བསྒྲུབ་པར་བསྟན་པའི་ལེའུ་སྟེ་ཉི་ཤུ་གཉིས་པའོ།། །།དེ་ནས་གཞན་ཡང་བཤད་པར་བྱ། །དཔལ་ལྡན་ལྷ་མོ་འཁོར་དང་བཅས། །ནག་མོ་
མངོན་པར་འབྱུང་བ་ཡི། །ལས་ཀྱི་དངོས་གྲུབ་ཆོ་ག་བཤད། །དམ་ཚིག་གསང་བའི་སྔགས་པ་ཡིས། །བྲག་ནག་རྩེ་མོ་རྣོ་བ་ཡི། །ཁ་ལྷོར་བལྟས་པའི་བྲག་ཕུག་གམ། །གཞན་ཡང་རི་བོའི་ཟོམ་མམ་རྩེ། །ཤིང་གཅིག་དུར་ཁྲོད་མ་མོའི་གནས། །རབ་ཏུ་འཇིགས་པའི་གནས་
མཆོག་ཏུ། །མཎྜལ་དང་ནི་མཆོད་པ་དང་། །གཏོར་མ་ལེགས་པར་བཤམས་ནས་ནི། །ཤ་ཆེན་བསྲེགས་སྤོས་ཕུལ་ནས་ཀྱང་། །བར་ཆད་བགེགས་རྣམས་བསྐྲད་པར་བྱ། །གྲུ་གསུམ་ཁྲག་དང་དུག་གིས་བྱུག །དུག་ཤིང་ཚེར་མ་ཅན་གྱིས་བརྩིག །གཞན་ཡང་ལིངྒ་བྱས་
པ་ལ། །མི་བསད་ལྕགས་ཀྱུ་ཏྲི་ཤཱུ་ལ། །དེ་ཡི་ལུས་ལ་གདབ་པར་བྱ། །ཚིལ་ཆེན་མར་མེ་ཟུར་གསུམ་པ། །བཏང་ནས་བདག་ཉིད་ལྷར་བསྐྱེད་ལ། །དཀྱིལ་འཁོར་གྲུབ་གསུམ་ལེགས་གནས་པ། །མ་ཧཱ་ཀཱ་ལ་ཕྱག་བཞི་པ། །མདོག་ནག་ཁྲག་འཛག་མེ་དཔུང་དབུས། །

ཞལ་གཅིག་སྤྱན་གསུམ་འབར་བ་སྟེ། །གཡས་ཀྱི་དང་པོ་ཆུ་གྲི་དང་། །འོག་མ་ཏྲི་ཤཱུལ་རྩེ་གསུམ་པ། །གཡོན་གྱི་དང་པོས་མདའ་གཞུ་དང་། །གཉིས་པས་མགོ་བོ་ཁྲག་འཛག་བསྣམས། །དུར་ཁྲོད་ཀྱིས་བརྒྱན་ཤམ་ཐབས་ཅན། །དེ་ཡི་གཡས་དང་གཡོན་གཉིས་སུ། །ཤ་
ཟ་གཉིས་ནི་གནས་པར་བསམ། །ལས་ཀུན་བྱེད་པའི་ཕོ་ཉར་བསྐུལ། །དང་པོ་ལྷ་མོ་ཆེན་མོ་ནི། །ཨེ་དབུས་གསང་སྔགས་ལས་གྲུབ་པའི། །ཞལ་གཅིག་པ་ལ་ཕྱག་བཞི་པ། །སྤྱན་གསུམ་ཤིན་ཏུ་སྐུ་མདོག་གནག །ཤིན་ཏུ་རྔ་མ་ཞིང་སྒེག་པའི་སྐུ། །གཡས་ཀྱི་དང་པོ་རལ་གྲི་
འཆང་། །འོག་མ་ཤག་ཏི་འབར་བ་ཅན། །གཡོན་གྱི་དང་པོ་ཐོད་ཁྲག་འཛིན། །འོག་མ་ཁ་ཊྭཱྃ་བསྣམས་པའོ། །རལ་པ་ཁམ་ནག་གྱེན་དུ་བརྫེས། །མཆེ་གཙིགས་ཐོད་པ་དུག་སྦྲུལ་བརྒྱན། །གླང་པོའི་སྟོད་གཡོགས་སྟག་ཤམ་དང་། །རེ་ལྡེ་ནག་པོའི་ཤམ་ཐབས་གསོལ། །བོང་
བུ་གྭ་དམར་སྟེང་ནས་ནི། །ཕྱེད་ཀྲུང་འབར་བས་བཞུགས་པའོ། །ཡང་ན་ཞལ་གཅིག་ཕྱག་གཉིས་མ། །རལ་གྲི་ནེའུ་ལེའི་རྐྱལ་པ་འཛིན། །དམ་ཚིག་བསྐྱེད་ལ་ཡེ་ཤེས་དགུག །ཕྲིན་ལས་བཅོལ་བར་བྱ་བའོ། །ཨོྃ་ཤྲཱི་ཡ་དེ་ཝཱི་ཀཱ་ལི་ཀཱ་ལི་མ་ཧཱ་ཀཱ་ལི་བྷྱོ་ཧཱུྃ། ཨོྃ་རུ་རུ་རོ་རུ་བི་ཏིཥྚ་བཱ་
ཏོ་སི་ཏྲི་ཙ་པ་ལ་ཨ་ཤུག་མེ་བྷྱོ་ཛཿ། མ་ཧཱ་ཀཱ་ལི་དེ་ཝཱི་ཀ་རཱ་ལི་བི་ཀྲྀ་ཏ་ཀ་ལ་རཱ་ཏྲི་ཎི། ཙཎྜ་རཱུ་པི་ཎི་ཧཱུྃ་ཧཱུྃ་ཕཊ། རག་མོ་ཙི་ཏ་ཁ་རག་མ་ཧཱུྃ་བྷྱཿ ཨོྃ་མ་ཧཱ་ཀཱ་ལི་དེ་ཝཱི་གྲྀཧྣེ་བྷ་ལིྃ་ཏ་ཁ་ཁ་ཁཱ་ཧི་ཁཱ་ཧི། ད་ཧ་ད་ཧ། པ་ཙ་པ་ཙ། མཱ་ར་ཡ་མཱ་ར་ཡ། སྥོ་ཊ་ཡ་སྥོ་ཊ་ཡ། ཁཱ་ཧི་ཧཱུྃ་ཕཊ། བདུད་རྩི་
ལྔ་དང་ཤ་ལྔ་དང་། །སྐྱེས་པ་གྲིར་ཤིའི་སྙིང་ཁྲག་གིས། །ནག་པོ་ཆེན་པོའི་གཏོར་མར་བླུགས། །མ་ཉམས་གྲིར་ཤིའི་བྃ་བླངས་ལ། །མ་ཧཱ་རུ་དྲ་བསྟིམས་ནས་ནི། །མགོ་བོ་ལྷོ་ནུབ་མཚམས་སུ་བསྟན། །རྐང་པ་བྱང་ཤར་མཚམས་སུ་བསྟན། །གན་རྐྱལ་བཞག་ལ་བསྒྲལ་
བར་བྱ། །དེ་ཡི་ཤ་དང་ཁྲག་དང་ནི། །པགས་པ་ཚིལ་བུ་རྐང་མར་བཅས། །ཀླད་པ་ཀླད་རྒྱས་ཞག་དང་ནི། །དབང་པོ་ལྔ་དང་དོན་སྙིང་ལྔ། །རུས་པའི་བྱེ་བྲག་ཐམས་ཅད་ཀྱིས། །ཡེ་ཤེས་ནག་པོ་ཆེན་པོ་དང་། །དཔལ་ལྡན་ནག་མོ་རེ་མ་ཏི། །ལས་ཀྱི་མགོན་པོ་འཁོར་

དང་བཅས། །ཕོ་ཉ་བྲན་གཡོག་དུར་ཁྲོད་གནས། །ཌཱ་ཀིའི་ཚོགས་ཀྱི་ཐུགས་དམ་བསྐང་། །དེ་ཡི་ཤ་ཡི་ཚོགས་རྣམས་ཀྱིས། །ནག་པོ་སྟོང་གི་ཐུགས་དམ་བསྐང་། །དེ་ཡི་ཁྲག་དང་ཆུ་སེར་གྱིས། །མ་མོ་བྱེ་བའི་ཐུགས་དམ་བསྐང་། །དེ་ཡི་ཆུ་རྒྱུས་རུས་པ་རྐང་། །ཤ་ཟ་འབུམ་གྱི་ཐུགས་དམ་བསྐང་། །
མཁའ་འགྲོ་ལྔ་དང་ལྷ་མོ་བརྒྱད། །དེ་ཡི་ཕྲིན་ལས་མགོན་པོ་དང་། །ཤ་ཟ་འཁོར་དང་བཅས་ལ་དབུལ། །ཕུང་པོ་བསྒྲལ་བའི་ཚོགས་ཀྱིས་མཆོད། །རྣམ་ཤེས་བསྒྲལ་བའི་ཡེ་ཤེས་བསྒྱུར། །མི་བསྐྱོད་པ་ཡི་ཞིང་ཁམས་སུ། །རྒྱལ་བའི་སྲས་བུ་བསྐྱེད་པ་ཡིན། །རྣལ་འབྱོར་འཆི་བསླུ་བ་དང་། །བར་ཆད་
ཐམས་ཅད་ཟློག་པར་བྱེད། །མ་རུངས་བསྟན་ལ་སྡང་ཞིང་འཚེ། །སྒྲུབ་ལ་གནོད་ན་ལས་འདི་བྱ། །གཞན་དུ་བྱས་ན་བརླག་པར་འགྱུར། །དེ་ཡི་ཤ་ལ་སྦྱིན་སྲེག་བྱ། །ཚིལ་ནི་ཞུན་ཆེན་མར་མེ་བྱ། །གླད་རྒྱས་ཐོད་པའི་རྔ་ལྤགས་བྱ། །པགས་པ་ཚོགས་ཀྱི་གདན་དུ་བྱ། །བསྲེགས་པའི་རུས་པ་ཚ་ཚ་བྱ། །འདིས་
ནི་མགོན་པོ་འཁོར་བཅས་ཚོགས། །མཉེས་པར་འགྱུར་ཞིང་ཐུགས་དམ་བསྐང་། །གཞན་ཡང་ཕྲན་ཚེགས་ལས་ཀྱི་གསང་བ་རབ་ཏུ་བཤད་པར་བྱའོ། །དཀྱིལ་འཁོར་བའི་ལྷའི་ཕྲིན་ལས་ཀྱི་རྣལ་འབྱོར་དང་རབ་ཏུ་ལྡན་པས་ཞི་བའི་ལས་སྒྲུབ་པ་ལ་ནི་བིལ་བ་ལ་སོགས་པ་ལ་སྦྱིན་སྲེག་བརྒྱ་རྩ་བརྒྱད་དུ་བྱའོ། །
འབྲས་ལྡན་གྱི་ཤིང་གང་ལས་རྒྱས་པའི་ལས་སྒྲུབ་ན་སྟོང་ཕྲག་གིས་བྱའོ། །ཁཱི་ཌི་རའི་ཤིང་དང་དམར་བའི་ཤིང་གིས་ནི་དབང་གི་ལས་སྒྲུབ་ན་ཁྲི་ཕྲག་གིས་བྱའོ། །ཤིན་ཏུ་རྩུབ་པའི་ཚེར་མ་དང་ལྡན་པའི་ཤིང་དག་གིས་ནི་མངོན་སྤྱོད་ལ་འབུམ་ཕྲག་གིས་བྱ་བར་ཤིས་སོ། །བསྐྲད་པ་ལ་ནི་ཤིང་གི་ལོ་མ་རླུང་མར་བྱུང་
བའི་ཚེས་ལམ་ལྷུང་བར་བླངས་ཏེ་གཟུགས་བརྙན་བྲིས་ནས་ཡུལ་གཞན་གྱི་ཧོར་ཁྲལ་བཏགས་ཏེ་གཏང་བར་བྱའོ། །གལ་ཏེ་བཟློག་པར་འདོད་ན་ཞི་བའི་སྦྱིན་སྲེག་གི་ཐལ་བས་གཏོར་ཞིང་བ་སེར་སྐྱའི་འོ་མས་ལུས་བཀྲུས་ན་ཞི་བར་བྱེད་དོ། །རུས་ཕྱེ་སྣ་ཚོགས་པ་ལ་ཁྲག་བྱུགས་ཏེ་གཟུགས་བརྙན་བྲིས་ལ་དགྲ་བོ་
དེའི་ཕྱོགས་སུ་གཏོར་བས་ནི་ཤ་ཟ་ཆེན་པོས་འཛིན་པར་བྱེད་དོ། །ཡང་ན་ཅེ་སྤྱང་གི་ཤ་ལ་སྦྱིན་སྲེག་བྱས་ཏེ་དུར་ཁྲོད་དུ་ཐལ་བ་ཕྱར་ནས་ལྷག་མ་གཟས་པ་པོའི་སྒོ་ལ་གཏོར་ནས་བཏང་ན་དུར་ཁྲོད་ཀྱི་ཅེ་སྤྱང་གི་ཚོགས་རབ་ཏུ་འདུ་ཞིང་ངུ་ལ་སྒོ་ལ་སྡེར་མོས་འབྲད་པར་འགྱུར་རོ། །དེ་ལྟ་བུ་ལན་གསུམ་བྱས་ན་ཅེ་སྤྱང་

གིས་ཟ་བར་འགྱུར་རོ། །གང་དུ་ཐོག་གིས་ཤི་བའི་རུས་པ་ལ་རབ་ཏུ་བསྔགས་ཏེ་རི་བོང་གི་ཐོད་པར་བཅུག་སྟེ་ཤིང་རྐང་གཅིག་པའི་རྩེ་མོ་ལ་བཏགས་ན་ཐོག་འབབ་པས་འཆི་བར་འགྱུར་རོ། །ཡང་ན་དེ་ཉིད་ཀྱི་གཟུགས་བྱས་ཏེ་དེ་ཉིད་དང་རིགས་མཐུན་པའི་རུས་པ་རྙེད་ན་ཡུངས་ཀར་གྱིས་བརྡེག་ཅིང་ཕ་མེས་
ཀྱི་དུར་ཁྲོད་དུ་གྲིབ་སོ་ལྷགས་པ་དང་སྦས་ཏེ་གཏོར་མས་མནན་ཅིང་དོང་བྲུས་པར་སྦས་ལ་རོ་བསྲེགས་པའི་གཡམ་པས་མནན་ན་རིགས་འཆད་པར་འགྱུར་རོ། །གྲོག་མཁར་གྱིས་ལ་གཟུགས་བྱས་ལ། དེ་ལ་དུག་དང་ཏིལ་མར་གྱིས་བྱུགས་ལ་འབྲས་ཕུབ་ཀྱི་མེ་ལ་རབ་ཏུ་བསྲོ་ཞིང་སྔགས་བརྡེགས་ན་རིམས་ཚ་
བ་ཆེན་པོས་བཏབ་པར་འགྱུར་རོ། །གཞན་པ་ལ་ནི་སྤྲ་ཚིལ་གྱིས་བྱུགས་ཤིང་ཚེར་མའི་རིགས་མང་པོ་བཏབ་པར་བྱས་ནས་དུས་མ་ཡིན་པའི་རླུང་ལ་ཕྱར་ན་ཡུལ་གཞན་དུ་གཤིས་ངན་དུ་འཆི་བར་བྱེད་དོ། །མཚོ་ནང་གི་ཉ་སེ་བ་བཟུང་སྟེ་གྲོ་ག་ལ་ལིངྒ་བྲིས་པ་དེ་བག་ཟན་གྱི་གཟུགས་དང་བཅས་པ་ལ་རབ་ཏུ་
བསྔགས་ཏེ་སླར་བཏང་ན་ཆུ་གྲིར་མྱུར་དུ་འཆི་བར་བྱེད་དོ། །བསེ་ཤིང་ལ་ལིངྒ་བསྲེགས་ཏེ་སྒོ་ཁང་དུ་སྦས་ན་སྐྲངས་པ་ཆེན་པོས་བཏབ་པར་འགྱུར་རོ། །གལ་ཏེ་གྲོག་མཁར་གྱི་ས་ལ་གཟུགས་བྱས་ཏེ་མཆོད་རྟེན་རྙིང་པའི་འོག་ཏུ་འབྱུང་པོའི་ཉི་མ་ལམ་ནན་ནས་རོ་གཡམ་གྱིས་ཁ་བཅད་ན་ནི་འཁོར་དང་བཅས་པ་ནུས་
པ་མེད་ཅིང་རབ་ཏུ་གནོན་པར་འགྱུར་རོ། །དེ་ཉིད་ཀྱི་ཟག་པ་གང་ཡིན་པ་དང་ཕུང་ཤུལ་ནས་ས་བླངས་ཏེ་གཟུགས་བརྙན་བྱས་ལ་གནས་ཀྱི་སར་རུས་པའི་ཕུར་བུས་བཏབ་ན་ནི་འོན་པ་དང་ལོང་བ་དང་ཡན་ལག་ཉམས་པ་དང་ལྐུགས་པར་འགྱུར་ཏེ། ཀླུ་གནས་པའི་སར་སྦས་ན་དབང་པོ་ཉམས་པ་ཉིད་བྱེད་དོ། །
གལ་ཏེ་ས་ཕྱོགས་དེར་ཆར་མི་འབབ་པར་གྱུར་ན་ཀ་ར་བཱི་རའི་ཤིང་བཙུགས་ལ་བ་དམར་སེར་གྱི་འོ་མ་གཏོར་བར་བྱས་པས་ཀླུ་གནས་པའི་སར་སོང་ནས་རང་ཏིང་ངེ་འཛིན་དུ་གནས་པས་བཀའ་བསྒོ་ན་ཆར་ཆེན་པོ་འབབ་པར་བྱེད་དོ། །བལ་པོ་སེའུའི་ཤིང་དང་འབྲུག་ཤིང་དུ་བཅས་པ་གཡབ་ཅིང་ཀླུ་གཟིར་
ན་ཆར་འབབ་ཅིང་སྤྲིན་སད་པར་བྱེད་དོ། །གལ་ཏེ་སྤྲིན་བྲལ་བར་འདོད་ན་རླུང་ལྷའི་གཏོར་མ་བྱས་ལ་རླུང་གི་བ་དན་གཡབ་པར་བྱའོ། །ཁྲག་སྣ་ཚོགས་པ་ཡུངས་ཀར་ཡུངས་ནག་ཏུ་སྦྱར་ཏེ་ཀླུ་གནས་པའི་སར་སྦྱིན་སྲེག་ཏུ་བྱས་ནས་བཟླས་པའི་ཐུན་བར་དུ་གཏོར་ན་སེར་བ་མོད་ལ་འབབ་པར་འགྱུར་རོ། །ཡུངས་

ཀར་ཡུངས་ནག་ཐལ་ཆེན་ལ་རབ་ཏུ་བསྔགས་ནས་གཏོར་ན་སེར་བ་མོད་ལ་གཅོད་པར་བྱེད་དོ། །དྷ་དུ་རའི་ཤིང་ལ་སྦྱིན་སྲེག་བྱས་ན་སྨྱོ་བར་འགྱུར་རོ། །ནིམ་པའི་ཤིང་གིས་ནི་རེངས་པར་བྱེད་དོ། །མེ་ཏོག་བན་དྷུ་རི་ཀ་དང་པ་ལ་ཤ་ཡིས་དགུག་པར་འགྱུར་རོ། །ཙནྡན་དཀར་པོའི་སྦྱིན་སྲེག་བྱས་ན་གང་ལ་ཡང་གསོ་
བར་བྱེད་དོ། །ཨ་རུ་རའི་སྦྱིན་སྲེག་གིས་མྱུར་དུ་ཞི་བར་བྱེད་དོ། །མ་ཧེའི་འོ་མས་བཀྲུས་ན་བཅིངས་པ་ཐམས་ཅད་གྲོལ་ལོ། །ཨ་ལ་རུའི་ཤིང་དང་འབྲས་བུ་དང་ལྡན་པའི་ཤིང་དང་གཅིག་ཏུ་བསྲེགས་ཏེ་མཚོར་དོར་ན་རྒྱས་པར་འགྱུར་རོ། །གླང་པོ་ཆེའི་རུས་པ་ལ་གི་ཧང་དང་བཅས་པའི་གླང་སྣ་ཅན་གྱི་མེ་ཏོག་དང་སེར་བའི་
རིགས་ཀྱི་མེ་ཏོག་དང་བཅས་པ་ཀུན་དགའ་ར་བར་སྦྱིན་སྲེག་བྱས་ན་འབྱོར་པ་ཕུན་སུམ་ཚོགས་པར་བྱེད་དོ། །དེ་དག་ཐམས་ཅད་སྔགས་དང་བཅས་པའི་ནུས་པ་འགྲུབ་བོ། །དྲང་སྲོང་གི་རུས་པ་རི་བོའི་རྩེར་སྦས་ཏེ་འབྲུ་སྣས་མཆོད་པ་བྱས་ཏེ་ཆུ་བོ་རྒྱུན་དུ་འབབ་པ་མཐོང་བའི་སར་སྤྱོད་ཡུལ་དུ་འགྱུར་ན་རིགས་ཐམས་
ཅད་རབ་ཏུ་འཕེལ་བར་བྱེད་དོ། །ཨ་མྲའི་འབྲས་བུ་དང་ཤིང་ཐོག་ཛི་ཙིན་ཏ་ཀ་དང་ཛ་ལུ་དང་ཛི་བ་ཀ་རྣམས་ལ་སྣོད་དུ་བཀང་སྟེ་གཏོར་མ་བྱས་ནས་སྐུ་གཟུགས་ཀྱི་མདུན་དུ་ཕུལ་ན་ནི་གནོད་སྦྱིན་གྱིས་འབྱོར་པ་ཐམས་ཅད་སྤེལ་བར་འགྱུར་རོ། །ཕུར་བུས་གདབ་ཅིང་ཡུངས་ཀར་ཐལ་ཆེན་གྱིས་མཚམས་བཅད་པར་གྱུར་
ན་གནོད་པ་ཐམས་ཅད་ལས་བསྲུང་བར་འགྱུར་རོ། །དཔལ་མགོན་པོ་ཆེན་པོ་དངོས་གྲུབ་འབྱུང་བའི་རྒྱུད་ལས་སྣ་ཚོགས་པའི་ལས་ཀྱི་རབ་ཏུ་བྱེད་པ་བསྟན་པའི་ལེའུ་སྟེ་ཉི་ཤུ་རྩ་གསུམ་པའོ།། །།དེ་ནས་གཞན་ཡང་བཤད་བྱ་བ། །ཤིན་ཏུ་གསང་བ་བླ་ན་མེད། །ནག་པོ་མངོན་པར་འབྱུང་བ་ཡི། །ལས་ཀྱི་དངོས་གྲུབ་
ཆོ་ག་བཤད། །དཔལ་ནག་མོ་ཆེན་པོའི་ཕྱོགས་ཀྱི་ཕྲིན་ལས་ཀྱི་ལྷ་མོ་ལ། ཤར་གྱི་ལྷ་མོ་འཕྲོག་མས་འགུགས་པའི་ལས་བྱེད་དོ། །ལྷོ་ཡི་ལྷ་མོ་གླང་སྣ་མས་འཆིང་བའི་ལས་བྱེད་དོ། །ནུབ་ཀྱི་ལྷ་མོ་རལ་པ་ཅན་གྱིས་སྡོམ་པའི་ལས་བྱེད་དོ། །བྱང་གི་ལྷ་མོ་སའི་གཙུག་གིས་མྱོས་ཤིང་དབང་དུ་བྱེད་པར་འགྱུར་རོ། །ལྷ་མོ་བྱ་རྒོད་
མགོ་བོ་ཅན་མས་རེངས་པའི་ལས་བྱེད་དོ། །སྟག་གི་མགོ་བོ་ཅན་མས་བསྐྲད་པའི་ལས་བྱེད་དོ། །ཕག་རྒོད་ཀྱི་མགོ་བོ་ཅན་མས་སྨྱོར་འཇུག་པའི་ལས་བྱེད་དོ། །ཅེ་སྤྱང་གི་གདོང་གིས་དབྱེ་བའི་ལས་བྱེད་དོ། །ཁྱི་གདོང་མས་ནི་རྣམ་པར་རྨོངས་པའི་ལས་བྱེད་དོ། །ཁྭའི་གདོང་གིས་རྣམ་པར་གནོན་པའི་ལས་བྱེད་དོ། །འུག་པའི་གདོང་

གིས་ནི་ཁྲག་དྲང་བའི་ལས་བྱེད་དོ། །ཁྱུང་གི་གདོང་གིས་ནི་བརྒྱལ་བའི་ལས་བྱེད་དོ། །གཞན་ཡང་གྲོང་ཁྱེར་དཀྲུག་པའི་ལས་བྱ་བར་འདོད་ན་གྲོ་གའམ་ཤིང་ཤུན་ལ་དབྱངས་དང་གསལ་བྱེད་སྤེལ་ཞིང་གོ་བཟློག་ཏུ་བྲིས་ལ་བསྣོལ་བར་བྱས་ལ་རླུང་གི་ཤུགས་ཀྱིས་བསྒྲུབ་བྱ་གང་གི་གཟུགས་དང་མིང་
སྤེལ་གྱིས་གནས་དེ་མྱུར་དུ་བསྐྱོད་པ་རླུང་དང་མེ་དང་ཆུ་བསྣོལ་མ་རྣམ་པར་འཁྲུག་པར་བྱེད་དོ། །དེ་ནས་ཡང་ཁ་སྦྱར་དབྱེ་བའི་ལས་དག་གིས་ཕ་རོལ་གྱི་སྡེ་དག་གི་ལུས་དང་ངག་དང་སེམས་ཀྱི་དབྱེ་བས་ཕྱག་རྒྱ་དང་གསང་སྔགས་དང་ཏིང་ངེ་འཛིན་གྱིས་བསྐུལ་ནས་ལན་བདུན་མྱུར་དུ་འགྲུབ་པར་འགྱུར་རོ། །གལ་
ཏེ་ཀླུའི་དུག་གིས་གཟས་པ་པོ་འཛིན་དུ་འཇུག་པར་འདོད་ན་ཏི་ཐ་ལའི་འབྲུ་ལ་བྱས་པའི་དུག་སྦྲུལ་གྱི་གཟུགས་མགོ་གསུམ་པ་ལྕེ་བརྐྱང་བའམ་ཅི་རིགས་སུ་བྱས་པ་དེའི་ཁའི་ནང་དུ་གང་ལ་དམིགས་པའི་རྫས་དེ་མིང་དང་བཅས་པས་ཀླུ་གནས་པའི་ས་ཕྱོགས་སུ་བཏང་ན་སྦྲུལ་གྱིས་འཛིན་པའི་ལས་བྱེད་དོ། །མ་ཧེ་དང་
རྟའི་འཁྲུལ་འཁོར་འབྱུང་པོའི་ཉི་མ་ལ་ས་ཏི་ཙའི་ཁུ་བས་བྲིས་ཏེ་དེ་ཉིད་ཀྱི་ཤ་ཁྲག་དང་བཅས་པས་བསྐུལ་བར་གྱུར་ན་ནི་ཤིན་ཏུ་འཁྲུག་ཅིང་འབྱེ་བར་འགྱུར་རོ། །ཡང་ན་བི་ཏ་ན་རཽ་པ་ལ་ཏྲཻ་ཞེས་བྱ་བའི་ཆོ་གའི་ཐབས་ཀྱིས་བགེགས་ཆེན་པོ་བསྒྲལ་བའི་གཟུགས་ལ་བརྟེན་ནས་ཆོ་ག་ཕྱག་མཚན་དག་བཙུགས་
ཏེ་ལས་སུ་བྱ་བའོ། །ཡང་ན་ས་ནག་པོ་གྲུ་གསུམ་པ་ལ་ནག་པོའི་ཚོགས་ཁ་ཕྱིར་བལྟས་པ་དང་ནང་དུ་བལྟས་པ་དག་བཀོད་དེ། ཕ་རོལ་རྒོལ་བའི་ཕྱོགས་སུ་བསྐྱལ་ན་ནི་མྱུར་དུ་ཡུལ་དང་བཅས་པ་བརླག་པར་བྱེད་དོ། །ཤ་ཟ་ཆེན་པོའི་གཟུགས་ཤིན་ཏུ་འཇིགས་པ་ཁ་གདངས་པ་ནག་པོ་གྲི་གུག་དང་
ཞགས་པ་ཐོགས་པ་མདུན་དུ་དམིགས་ལ་ཕུར་བུས་བཏབ་པ་དང་བཅས་པའི་ཐབས་ཀྱི་ཕ་རོལ་གྱི་དཔུང་གཡོས་པ་དང་བཅས་པ་བཟློག་པར་བྱེད་དོ། །གཏོར་མ་ཆེན་པོ་བྱས་ཏེ་ཡང་གཏོར་ན་གཡུལ་བཤམས་པ་ལས་རྣམ་པར་རྒྱལ་བར་བྱེད་དོ། །རི་རབ་ཀྱི་གཟུགས་ལ་སྣ་ཚོགས་པའི་གཟུགས་བརྙན་
བཀོད་དེ། ཕྲིན་ལས་སེམས་དཔའ་དང་བཅས་པའི་ཕྱག་རྒྱས་བཏབ་ན་གཡུལ་ཆེན་པོ་ལས་རྒྱལ་བར་བྱེད་དོ། །དཔག་བསམ་གྱི་ཤིང་ལྗོན་པའི་ཚུལ་དུ་བྱ་བ་ལས་ཨ་ཤོ་ཀའམ་བི་ཌ་ཀའི་ཤིང་ལ་བརྟེན་ནས་ཐབས་དང་ལྡན་པའི་ཡུལ་ཕྱོགས་དེ་ཡོངས་སུ་རྒྱས་པའི་གནས་ཐོབ་པར་བྱེད་དོ། །རྡོ་རྗེ་བྱ་ཁྱུང་གི་

ཕྱག་རྒྱ་བཅས་ལ་དེས་ཀླུ་ནོན་པར་བྱས་ན་དེ་ཉིད་ཁ་དོག་དཀར་པོར་གྱུར་པའི་འཇམ་པའི་སྤྱོད་ཡུལ་གྱིས་འདུལ་བ་ལ་ནག་པོར་བསྒྱུར་བའི་རྩུབ་པའི་ཐབས་ཀྱིས་དཀྲུགས་པས་ཀླུའི་གནས་ཐམས་ཅད་དུ་ལྟས་ཆེན་པོ་དྲུག་བྱུང་བས་ཐམས་ཅད་འདར་ཞིང་མགོ་བོ་ཨརྫ་ཀའི་དོག་པ་བཞིན་དུ་འགས་པ་
སྙམ་བྱེད་ནས་མྱུར་བར་འོངས་ཏེ་བཀའ་ཉན་ཅིང་འཛམ་བུའི་གླིང་དུ་ཆར་གྱི་རྒྱུན་ཆེན་པོས་རབ་ཏུ་གང་བར་བྱེད་པར་འགྱུར་རོ། །གང་དུ་སྐྱེས་པ་གཡུལ་ངོར་བསད་པའི་མགལ་དུམ་དང་ལག་ངར་གྱི་རུས་པ་ལ་དཔལ་ནག་པོ་ཆེན་པོའི་གཟུགས་བརྙན་ཇི་ལྟ་བར་བྱས་ལ་བསྐྱེད་པ་དང་བསྟིམས་ཏེ་བཟླས་པ་བྱ། དབེན་
པར་སྦས་ནས་གསོལ་བ་བཏབ་ན་གང་འདོད་པ་འབྱུང་བར་འགྱུར་ཏེ། ས་ཀུན་ལ་ཡང་བསྲུང་བར་འགྱུར་བ་དང་འདས་པ་ལ་སོགས་པའི་དོན་ཤེས་པ་དང་། དེའི་མདུན་དུ་ཁྲུས་བྱས་ཏེ་ཉལ་ན་ལུང་སྟོན་པའམ་དགེ་མི་དགེ་གསལ་པོ་སྟོན་པར་འགྱུར་རོ། །ཡང་ན་དུར་ཁྲོད་ཀྱི་རས་སམ་དར་ནག་པོ་ལ་ཡང་རུང་སྟེ།
དམ་ཚིག་དང་ལྡན་པས་བྲིས་ཏེ། མཆོད་པ་དང་གཏོར་མར་ལྡན་པས། རབ་ཏུ་གནས་པར་བྱས་ན་སྐུ་བྱིན་བརླབས་དང་ལྡན་པར་འགྱུར་རོ། །དེ་ཉིད་ཀྱང་རིན་པོ་ཆེ་ལས་བྱས་ནས་དེའི་མདུན་དུ་གསོལ་བ་བཏབ་ན་ཟླ་བ་དྲུག་གིས་ངེས་པར་ཡང་འགྲུབ་པར་འགྱུར་རོ། །ཡང་ན་ནག་པོ་ཆེན་པོའི་གསང་སྔགས་སྔོན་དུ་
བྱས་ཏེ་ཤེས་རབ་ཡོངས་སུ་འཛིན་པ་ཁྲི་ཕྲག་གཅིག་བཟླས་ན་ཐོས་པའི་གཟུངས་ཡོངས་སུ་འཛིན་པ་དང་བློ་ཡོངས་སུ་དག་པ་དང་མི་བརྗེད་པའི་གཟུངས་ཐོབ་པར་འགྱུར་རོ། །སྲུང་བས་བསྲུང་ཞིང་བཅིངས་པ་ཐམས་ཅད་ལས་ཡོངས་སུ་གྲོལ་ལོ། །གང་དུ་སྒྲུབ་པ་པོ་ཕུན་སུམ་ཚོགས་པས་སྐུ་གསུང་ཐུགས་ཡོན་
ཏན་ཕྲིན་ལས་ཀྱི་རྟེན་ལ་རབ་ཏུ་གནས་པ་མཚན་ཉིད་དང་ལྡན་པར་བྱས་ན་དངོས་གྲུབ་ཐམས་ཅད་འགྲུབ་པ་དང་བར་ཆད་ཐམས་ཅད་ལས་བཟློག་པར་འགྱུར་བ་ཡིན་ནོ། །ཁྱད་པར་དུ་ཡང་གསང་བ་ཆེན་པོའི་དམ་ཚིག་ལ་ངེས་པར་གནས་པ་ཉིད་ཀྱིས་ཕྱོགས་དང་དུས་ཐམས་ཅད་དུ་ཡེ་ཤེས་ཀྱི་ནག་པོ་ཆེན་པོས་རྗེས་
སུ་སྐྱོང་བ་དང་རྒྱང་རིང་པོ་ནས་ཀྱང་ངེས་པར་གཟིགས་པར་མཛད་དོ། །འཇིགས་པ་ཐམས་ཅད་ལས་རབ་ཏུ་སྒྲོལ་བར་འགྱུར་རོ། །སྟོབས་དང་ཚེ་དང་དཔལ་རབ་ཏུ་སྟེར་ཅིང་མི་ཟད་པའི་ཡེ་ཤེས་ཐོབ་པར་བྱེད་པ་དང་ཉམ་ང་བ་དང་བག་ཚ་བ་མེད་པར་སེང་གེའི་སྟོབས་ཀྱིས་རྒྱུ་ཞིང་བདུད་ཀྱི་རིས་ཀྱི་ཕྱོགས་མ་ལུས་པ་ཕམ་ཞིང་

སྐྲག་སྟེ་མགོ་འགས་པ་ཙམ་དུ་བྱེད་པར་འགྱུར་ཞིང་རྒྱ་མཚོ་ཆེན་པོའི་མཐར་ཐུག་པར་འབྱེར་བར་འགྱུར་རོ། །གང་གིས་གཏུམ་པ་དང་། དཔའ་བ་དང་། དྲག་པོའི་བརྟུལ་ཞུགས་ཀྱིས་ཀུན་ཏུ་སྤྱོད་ལ་རྡོ་རྗེའི་ཏིང་ངེ་འཛིན་མི་ཤིགས་པར་འགྱུར་བ་མེད་པའི་ཚུལ་གྱིས་ཁྱབ་པར་རྒྱུ་བའོ། །གནས་ཀྱི་མཁའ་འགྲོ་མ་དང་། ཕོ་
ཉའི་མཁའ་འགྲོ་མ་དང་། འཇིག་རྟེན་གྱི་མཁའ་འགྲོ་མ་དང་། དམ་ཚིག་གི་མཁའ་འགྲོ་མ་དང་། ཤ་ཟའི་མཁའ་འགྲོ་མའི་དབང་ཕྱུག་ཏུ་འགྱུར་རོ། །རྡོ་རྗེ་རིགས་ཀྱི་མཁའ་འགྲོའི་ཕོ་ཉ་མོ་དྲུག་ཅུ་རྩ་བཞིས་ཀྱང་ཕྲིན་ལས་ཐོགས་པ་མེད་པ་འགྲུབ་པར་བྱེད་དོ། །ཞིང་སྐྱོང་ཆེན་པོ་དང་ཉེ་བའི་ཞིང་སྐྱོང་ཉི་ཤུ་རྩ་བཞི་
པོ་དག་གིས་ཀྱང་ཕྲིན་ལས་ཐོགས་པ་མེད་པ་སྒྲུབ་པར་བྱེད་པའོ། །གདུལ་དཀའ་བ་མ་ལུས་པ་འདུལ་ཞིང་འཇིག་རྟེན་གསུམ་ལས་རྣམ་པར་རྒྱལ་བར་བྱེད་དོ། །གང་དུ་རྒྱུད་འདི་འཆང་བ་དང་། ཀློག་པ་དང་། འཛིན་པ་དང་། སེམས་པ་དང་། དེ་བཞིན་ཉིད་དུ་གནས་པ་དང་། རྣལ་འབྱོར་དུ་གང་གནས་པ་ལ་ཉེ་བར་སྐྱོབ་
པར་བྱེད་དོ། །ཉེ་བར་དགོངས་པས་མཁྱེན་པར་འགྱུར་རོ། །དཔལ་མགོན་པོ་ཆེན་པོ་དངོས་གྲུབ་འབྱུང་བའི་རྒྱུད་ལས་ས་གསུམ་དུ་སྒྲུབ་པའི་དབང་ཕྱུག་ཏུ་བསྟན་པའི་ལེའུ་སྟེ་ཉི་ཤུ་རྩ་བཞི་པའོ།། །།དེ་ནས་གཞན་ཡང་བཤད་བྱ་བ། །གསང་བ་མངོན་པར་འབྱུང་བའི་གནས། །དྲང་སྲོང་ཐུབ་པས་ཡང་དག་
བསྟན། །ངེས་པར་གསང་བ་འཛིན་གྱུར་པ། །རྒྱལ་བ་ཡོན་ཏན་འབྱུང་བའི་གཏེར། །ཡེ་ཤེས་མགོན་པོ་ཆེན་པོ་དང་། །ལས་ཀྱི་མགོན་པོ་དུ་མར་བཅས། །དཔལ་ལྡན་ལྷ་མོ་ནག་མོ་ནི། །འཁོར་བཅས་དཀྱིལ་འཁོར་བསྟན་པ་སྟེ། །སྐལ་ལྡན་ལམ་འདི་འཛིན་པ་གང་། །ང་ཡིས་ལུང་བསྟན་གྱུར་པ་ཡིན། །
གདུག་པ་རྣམས་ནི་གཟུད་པའི་ཕྱིར། །མཁས་པས་སྙིང་རྗེ་བསྐྱེད་ནས་ནི། །ཆོ་ག་ཀུན་མཆོག་གིས་རབ་སྒྲུབ། །བདག་ཉིད་ཇི་བཞིན་སེམས་ཅན་དེ། །དེ་བཞིན་བདག་དེ་དམ་པའི་བདག །དཔལ་ཧེ་རུ་ཀའི་གོ་འཕང་གནས། །འདི་ལ་ཐེ་ཚོམ་མི་བྱ་སྟེ། །སུན་འབྱིན་པས་ནི་འགྲུབ་མི་འགྱུར། །རྣམ་དག་རྣམ་པ་ཅན་
སེམས་ཀྱི། །རང་བཞིན་གྱིས་ནི་མྱ་ངན་འདས། །མ་རུངས་པ་ནི་གང་དག་གིས། །སྐྱེ་བོ་བཅིངས་པར་གྱུར་པ་གང་། །དེ་ཉིད་ཐབས་དང་བཅས་པ་ཡིས། །སྲིད་པའི་བཅིང་ལས་གྲོལ་བར་འགྱུར། །དེ་ལྟར་གྲུབ་པའི་ལམ་བསྟེན་ཅིང་། །ཐུན་མོང་ཁྱད་པར་འགྲུབ་པར་འགྱུར། །དུས་བཞི་དག་ཏུ་གཏོར་མ་འབུལ། །

བགེགས་མེད་བསོད་ནམས་འཕེལ་བྱེད་པའོ། །འདིར་འཇིག་རྟེན་དང་འཇིག་རྟེན་ལས་འདས་པའི་དཔལ་ཡེ་ཤེས་ཀྱི་མགོན་པོ་ལྕམ་དྲལ་འཁོར་དང་བཅས་པ་རྣམས་ལ་གཏོར་མ་དབུལ་བར་བྱ་སྟེ། ཤ་ཆེན་པོ་དང་བཅས་པའི་གཏོར་མ་བཤམས་ལ། ཨོྃ་བ་ལིཾ་མ་ཎི་རྃ་ཧཱུྃ་ཛ། རཀྵ་ཎི་རཀྵ་ཎི་རཀྵ་མི། ཁ་ཁ་ཁཱ་ཧི་ཁཱ་ཧི་
གྲྀཧྞ་གྲྀཧྞ་བ་ལིཾ། མ་ཧཱ་བི་ཥ་ནཱྃ། པྲ་སཱ་དྷ་ཡ་པྲ་སཱ་དྷ་ཡ། ཧུ་ལུ་ཧུ་ལུ་ཕཊ། ཁ་ཁ་ཁཱ་ཧི་ཁཱ་ཧི་མཱ་ར་མཱ་ར། སརྦྦ་ཏ་ས་ན་ས་ཏྲྃ། ཝ་རི་ཧ་དྷི་ར་པྲ་ཡཙྪ་ནྟུ་སྭཱ་ཧཱ། ཨོྃ་ཨཱཿཧཱུྃ་ཞེས་པས་མཚན་ཕྱེད་ན་གཏོར་མ་བསྲེག་སྤོས་དང་བཅས་པ་དབུལ་བར་བྱའོ། །ཨོྃ་ཧཱཿཀ་ཧ་ཀ་ཧ་མ་ལི་ནི་མུ་ཁི་ཡེ་ཡཾ་སཱདྷ་ཡ། མ་ཧཱ་ཀཱ་ལ་བུདྡྷ་ཛྃ། པྲ་ཏི་ཏོ་སི།
ཀཱ་ར་ཡ་ཀཱ་ར་ཡ། པྲ་དུཥྚཱ་ན། གྲྀཧྞ་གྲྀཧྞ། མཱ་ར་མཱ་ར། ཁ་ཁ་ཁཱ་ཧི་ཁཱ་ཧི། ཤཱི་གྷྲྃ། ད་ཧ་ད་ཧ། པ་ཙ་པ་ཙ། ཧུ་ར་ཧུ་ར། མྃ་རྃ་ཧཱུྃ་ཕཊ། ཨི་དིཾ་བ་ལིྃ་གྲྀཧྞ་གྲྀཧྞ། ཤྲཱི་སརྦྦ་ཨོྃ་ཨཱཿཧཱུྃ། དཔལ་མགོན་པོ་ཆེན་པོ་དངོས་གྲུབ་འབྱུང་བའི་རྒྱུད་ལས་གསང་བ་གྲུབ་པ་དང་གཏོར་མའི་ལེའུ་སྟེ་ཉི་ཤུ་རྩ་ལྔ་
པའོ།། །།དཔལ་མགོན་པོ་ཆེན་པོ་ཁྲོས་པའི་མགོན་པོ་གསང་བ་མངོན་པར་འབྱུང་བའི་རྒྱུད་ཀུན་གྱི་རྩ་བར་གྱུར་པ་བསྟན་པ་འཛིན་པ། བསྟན་པ་སྐྱོང་བ། བསྟན་པ་བསྲུང་ངེས་པ། གསང་བ་བདུད་དཔུང་འདུལ་བར་བྱེད་པའོ། །དཔལ་མགོན་པོ་ཆེན་པོ་དངོས་གྲུབ་འབྱུང་བའི་རྒྱུད་ཀུན་གྱི་
སྙིང་པོར་གྱུར་པ་གདོད་ནས་གྲུབ་པའི་བླ་མ་ཡིན་ནོ་རྫོགས་སོ།། །།རྒྱ་གར་གྱི་མཁན་པོ་མ་ཧཱ་བཎྜི་ཏ་ཨ་བྷ་ཡཱ་ཀ་ར་གུཔྟ་པཱ་དའི་ཞལ་སྔ་ནས་དང་། བོད་ཀྱི་ལོཙྪ་བ་མཁས་པ་ཆེན་པོ་ཁེའུ་རྒད་འཁོར་ལོ་གྲགས་ཀྱིས་བསྒྱུར་ཅིང་ཞུས་པའོ། །ཡང་སླད་ནས་མཁས་པ་ཆེན་པོ་སངས་རྒྱས་གྲགས་པའི་སྤྱན་
སྔར་ཀྲེ་བོ་ཤེས་རབ་དཔལ་གྱིས་ཀྱང་ཞུ་ཏིག་བགྱིས་པའོ།། །། །།