Kinh tạng Tây Tạng (Kangyur Đại Học) — 070_མདོ་སྡེ།_ལ

པའི་བདེ་བ་བལྟ་བར་དགའ་བ་རྣམས་སོ། །ཇི་སྐད་དུ་བཤད་པའི་ཡུལ་ཕྱོགས་དེ་དག་རྣམས་ཐམས་ཅད་ལ་གསར་དུ་སྐྱེས་པའི་ལྷ་དེས་དང་པོ་མཐོང་བ་ཡིན་པས་ལྷ་མོ་དེ་དག་རྣམས་དང་ལྷན་ཅིག་ཏུ་རྩེ་བར་བྱེད་ཅིང་བག་མེད་པས་རྒྱུ་བར་བྱེད་དོ། །གཞན་ཡང་ཡུལ་ཕྱོགས་གཞན་དག་རྣམས་སུ་
ཡང་མི་ངོམས་པའི་འདོད་པའི་སྲེད་པ་རྣམས་ཀྱིས་ཉེ་བར་འགྲོ་སྟེ། གང་ན་བདུད་རྩིའི་རང་བཞིན་གྱི་ས་ཕྱོགས་ཡོད་པ་དེར་ཟས་དོན་དུ་གཉེར་བར་བྱ་བའི་ཕྱིར་ཉེ་བར་འགྲོ་བར་བྱེད་དོ། །དེ་དེར་ཇི་ལྟར་ལེགས་པར་བྱས་པའི་ལས་དང་འདྲ་བར་ཟ་བར་བྱེད་དོ། །དེ་ཉེ་བར་ཟོས་ནས་ཀྱང་ཡུལ་གྱི་མེས་
བསྲེགས་པར་གྱུར་པས་གང་ན་བཏུང་བའི་ཆུ་ཀླུང་ཡོད་པ་དེར་ལྷན་ཅིག་སྤྱོད་པའི་འཁོར་དང་བཅས་ནས་ཉེ་བར་འགྲོའོ། །དེའི་འཁོར་དེ་དག་རྣམས་ཉིད་དང་རྒྱ་ཆེན་པོའི་སྲེད་པའི་རླབས་རྣམས་ཀྱིས་ཁྱེར་བར་གྱུར་པ་ན་བདུད་རྩི་འདི་དག་རྣམས་དང་ཕྲད་པར་གྱུར་ཏེ། དེ་ནས་དེ་དག་བཏུང་བའི་ས་གཞིར་
སོང་ནས་རྣམ་པ་སྣ་ཚོགས་པའི་ནོར་བུའི་སྣོད་རྣམས་སུ་མྱོས་བྱེད་དེ་དག་འཐུང་བར་བྱེད་དོ། །དེ་ཕྱིར་ཞིང་ཉིད་ཀྱང་མྱོས་བྱེད་ཀྱིས་རངས་པར་གྱུར་པ་ནི་མར་ཀུན་ཏུ་བླུགས་པར་གྱུར་པ་ཉིད་ཀྱི་མེ་འགྲན་ཟླ་མེད་པར་གྱུར་པ་བཞིན་དུ་འདིའི་ཡུལ་གྱི་སྲེད་པ་རྣམས་ཀྱང་རབ་ཏུ་འབར་བར་འགྱུར་རོ། །དེ་ཡང་
ཡུལ་དེ་དག་རྣམས་ཀྱིས་ཀུན་ཏུ་རྨོངས་པར་གྱུར་ནས་ཕྱིར་ཞིང་ཉིད་ཀྱང་ལྷའི་བུ་མོ་དེ་དག་ཉིད་དང་ལྷན་ཅིག་ཏུ་གར་དང་རབ་ཏུ་དགའ་བར་ཡང་བྱེད་དོ། །དེ་དག་དེ་བཞིན་དུ་གནས་དེར་རྩེད་མོ་རྣམས་བྱས་ནས། སླར་ཡང་གང་ན་པད་མའི་རྫིང་བུ་ཡོད་པར་གྱུར་པ་དེར་ཉེ་བར་འགྲོ་བར་བྱེད་དོ། །ཆུ་ལ་རྩེ་བར་
བྱ་བར་འདོད་པའི་དབང་དུ་བྱས་ནས་ཐམས་ཅད་ལ་ཡང་རིག་པར་བྱས་ཏེ། གང་ན་པད་མའི་རྫིང་བུ་དེ་ཡོད་པ་དེར་ཀུན་ཏུ་ཉེ་བར་འགྲོའོ། །གཞན་ཡང་དེ་ཡུལ་རྣམས་ཀྱིས་རྒྱགས་པར་གྱུར་ནས་དེ་དག་རྣམས་དང་ལྷན་ཅིག་ཏུ་ཆུའི་རྩེད་མོ་བྱེད་པར་འགྱུར་རོ། །ལྷའི་བུ་མོ་དེ་དག་རྣམས་ཉིད་དང་ལྷའི་བདེ་བ་མཆོག་ཏུ་དཔེ་
མེད་པ་རྣམས་མངོན་སུམ་དུ་ཉེ་བར་ལོངས་སྤྱོད་པ་བྱེད་དོ། །དེ་གཞན་ཡང་དེ་ཁོ་ན་བཞིན་དུ་རྒྱགས་པས་རྒྱགས་པར་གྱུར་ནས་རྣ་བ་ཚིམ་པར་བྱ་འདོད་པས་འགྲན་གྱི་དོ་མེད་པའི་ཡུལ་གྱིས་ཀུན་ཏུ་ཁྲིད་པའི་ཕྱིར་རྔ་སྐད་ཡན་ལག་ལྔ་པ་ཉན་པར་འདོད་དོ། །དེ་ནས་གཞན་ཡང་དེ་དག་རྣམས་ཉིད་ཀྱི་དཀྱིལ་དུ་སོང་ནས་ལྷ་དེ་

གཅིག་པུ་གླུ་ལེན་ནོ། །གླུ་ཉན་པར་ཡང་བྱེད་དོ། །རྔ་སྐད་ཡན་ལག་ལྔ་དང་ལྡན་པ་ཐམས་ཅད་ཀྱི་རྣ་བ་དང་ཡིད་འཕྲོག་པར་བྱེད་པ་གང་ཡིན་པ་ནི་དངོས་པོ་གཞན་རྣམས་ཀྱི་དཔེ་བྱ་བར་ཡང་སླ་བ་མ་ཡིན་ནོ། །དེ་དེ་ལྟར་འདོད་པའི་ཡོན་ཏན་ལྔ་ལ་ཉེ་བར་ལོངས་སྤྱོད་པར་འགྱུར་བས་ཀྱང་ངོམས་
པར་འགྱུར་བ་ཡང་མ་ཡིན་ནོ། །སྲིད་པས་རྣམ་པར་གདུངས་པར་གྱུར་པའི་བསམ་པ་ཅན་རྣམས་ནི་སྲིད་པས་རྣམ་པར་ངོམས་པར་འགྱུར་བ་ཡང་མ་ཡིན་ཏེ། ཇི་ལྟར་མེ་ནི་བུད་ཤིང་རྣམས་ཀྱིས་ངོམས་པར་མི་འགྱུར་ལ་དེ་བཞིན་དུ་འདོད་པ་དང་བཅས་པས་འདོད་པ་དང་ལྡན་པ་རྣམས་རྣམ་པར་ངོམས་པ་མི་སྐྱེའོ། །
དེ་དེ་ན་རྣམ་པ་དུ་མ་དང་རྣམ་པར་རྟོག་པ་དུ་མའི་བདེ་བ་རྣམས་ཉེ་བར་ལོངས་སྤྱོད་པར་གྱུར་པས་དུས་རིང་དུ་རྩེ་འཇོ་བྱས་ནས། གཞན་ཡང་ནོར་བུའི་རང་བཞིན་གྱི་ཁང་བུ་དེ་ཉིད་ཀྱིས་ངང་པའི་ནགས་དེ་ཉིད་དུ་སླར་ཡང་རབ་ཏུ་འཇུག་པར་བྱེད་དེ། ཕྱིར་བཞིན་འབྲང་བར་གྱུར་པའི་འཁོར་རྣམས་ཐམས་ཅད་དང་དེ་
སོང་ནས་ཕྱིར་ཞིང་ཉིད་ཀྱང་སྔ་ན་མ་མཐོང་བའི་ཡུལ་ཕྱོགས་གཞན་རྣམས་སུ་འཇུག་པར་བྱེད་དོ། །ནགས་དེའི་དགའ་བར་གྱུར་པ་ཡང་འདི་དག་ཡིན་ཏེ། ཇི་ལྟར་བལྟས་པར་གྱུར་པ་དེ་ལྟར་ནགས་དེ་ནི་ཆེས་དགའ་བར་གྱུར་པ་ཡིན་ནོ། །དབང་པོ་རྣམས་ཀྱང་ཡུལ་རྣམས་ཀྱིས་ངོམས་པ་ཡང་མེད་དོ། །དེ་ལྟར་བྱས་
པས་ནགས་དེ་དག་ནི་བལྟ་བར་ནུས་པ་ཡང་མ་ཡིན་ནོ། །དེ་བཞིན་དུ་འབབ་ཆུ་དང་རྫིང་བུ་དང་ནགས་དང་ཉེ་བའི་ནགས་དང་ཤིང་གི་ཚོགས་རྣམས་དང་ལྷ་དང་ལྷ་མོའི་ཚོགས་རྣམ་པ་དུ་མ་རྣམས་ཀྱང་དེ་ན་མཐོང་ངོ་། །དེ་ཁོ་ན་བཞིན་དུ་རྔ་སྐད་ཡན་ལག་ལྔ་དང་ལྡན་པས་རྩེ་བར་གྱུར་པས་གཞན་ཡང་མཁའ་ལྡིང་གི་
རྒྱལ་པོ་དུས་བཟངས་དེ་རྣམ་པར་ཡངས་པའི་པད་མའི་རྫིང་བུ་གང་ན་གནས་པར་གྱུར་པ་དེར་ལྷའི་བུ་མོའི་ཚོགས་ཀྱིས་ཡོངས་སུ་བསྐོར་བ་དང་བཅས་ནས་དེ་དག་རྣམས་ལེགས་པར་ཉེ་བར་འགྲོ་བར་བྱེད་དོ། །དེ་ལྟར་དེས་མང་དུ་མཐོང་ངོ་། །དེ་ལྟར་དེས་ལྷའི་ཚོགས་བརྒྱ་སྟོང་དུ་མ་རྣམས་གླུ་ལེན་པར་གྱུར་པ་དང་།
ལྷ་རྫས་ཀྱི་རིམ་པས་བདེ་བ་དང་། ཡང་དག་པར་ལྡན་པར་གྱུར་པ་རྣམས་མཐོང་བར་འགྱུར་རོ། །གང་དག་ལ་དཔེས་གཞལ་བར་བྱ་བ་རྣམས་ནི་ཅུང་ཟད་ཀྱང་ཡོད་པ་མ་ཡིན་ལ། གང་གིས་དཔེར་བྱེད་པར་གྱུར་པའི་འཇིག་རྟེན་ཀུན་ཏུ་གསལ་བར་བྱེད་པའི་ཉི་མ་ཡང་གང་དག་གིས་ཁྱད་པར་གྱིས་སྲིན་

བུ་མེ་ཁྱེར་ཙམ་དུ་ཡང་མ་ཡིན་ནོ། །འོད་ཟེར་གྱི་དབང་དུ་བྱས་ནས་དེ་ལས་གཞན་པ་རྣམས་གང་དག་གིས་དཔེར་བྱེད་པ་ཡིན། དེ་ལྟར་ལྷ་རྣམས་ནི་དཔེ་མེད་པའི་ཡུལ་རྣམས་ཀྱིས་ཉེ་བར་འཚོ་བ་ཡིན་ནོ། །རོ་རྣམས་ཀྱི་ཡང་དཔེ་བྱ་བར་ནུས་པ་མ་ཡིན་ཏེ། མི་རྣམས་ཀྱི་ཡང་གང་གི་ཕྱིར་རོའི་མཆོག་ཏུ་གྱུར་པ་
རྣམས་ལ་འདི་ལྟ་སྟེ། སྦྲང་རྩི་དང་བཅོས་པའི་ཆང་དང་བུ་རམ་ཤིང་དང་ཤའི་རིགས་སུ་གྱུར་པ་རྣམས་དང་སྟེ། ཤིན་ཏུ་ལེགས་པར་སྦྱར་བའི་རོ་དེ་རྣམས་ཐམས་ཅད་དང་ཡང་དག་པར་ལྡན་པས་ཀྱང་། བདུད་རྩི་དམར་པོ་དག་གི་ཁྱད་པར་གྱིས་བིམ་པའི་འབྲས་བུ་ཙམ་དང་ཡང་འདྲ་བ་མ་ཡིན་ནོ། །མི་རྣམས་
ཀྱི་རོ་ཐམས་ཅད་དང་ཡང་དག་པར་ལྡན་པ་དེ་གང་གིས་དཔེར་བྱེད་པར་འགྱུར། རོའི་དབང་དུ་བྱས་ནས་ལྷ་རྣམས་ཀྱི་བཅུ་དྲུག་ཆར་ཡང་མི་ཕོད་དོ། །དྲི་རྣམས་ཀྱི་ཡང་དཔེར་བྱ་བ་ནུས་པ་མ་ཡིན་ཏེ། འདི་ན་མི་རྣམས་ཀྱི་དྲི་ཞིམ་པར་གྱུར་པ་རྣམས་ཐམས་ཅད་ལ་འདི་ལྟ་སྟེ། ཙན་དན་དང་། ཨ་ག་རུ་དང་།
ཕྱེ་མ་དང་། བྱུག་པ་དང་། ནི་ཁུ་སྟི་དང་། ཙམ་པ་ཀ་དང་། ཀེ་ཏ་ཀ་དང་། ཡིད་བདེ་བའི་མེ་ཏོག་དང་། ཛཱ་ཏིའི་དྲི་དང་། དབྱར་གྱི་དུས་པ་དང་། ཨུད་པ་ལ་དང་། ཀུ་སུ་མཱ་དང་། ནི་ཙུ་ལ་ལ་སོགས་པའིའོ། །དེ་དག་རྣམས་བསྡོམས་ནས་གཅིག་ཏུ་བྱས་པས་ཀྱང་ལྷ་རྣམས་ཀྱི་མེ་ཏོག་ཐམས་ཅད་ཀྱི་ཐ་
མར་གྱུར་པ་ནིམ་པའི་ལོ་མའི་བཅུ་དྲུག་གི་ཆར་ཡང་མི་ཆོག་གོ། །དེ་ལྟར་བྱས་ནས་དྲི་རྣམས་ཀྱི་དཔེར་བྱ་བར་ཡང་མི་ནུས་སོ། །ལྷ་རྣམས་ཀྱི་རེག་བྱ་ནི་དཔེ་མེད་པ་དང་ཡང་དག་པར་ལྡན་པ་ཡིན་ཏེ་ལྷ་རྣམས་ཀྱི་གང་ཡིན་པ་ལ་ནི་མི་རྣམས་ཀྱིས་རྟོགས་པའི་ཡུལ་མ་ཡིན་ནོ། །མི་རྣམས་ཀྱི་རེག་བྱ་རྣམས་ཐམས་
ཅད་ཀྱི་མཆོག་ཏུ་གྱུར་པ་རྣམས་ཀྱང་འདི་ལྟ་སྟེ། སྲིན་བལ་དང་། མོན་དར་དང་། དུ་ཀུ་ལ་དང་། བལ་དང་། རས་བལ་ལ་སོགས་པ་དང་གཞན་ཡང་མི་རྣམས་ཀྱི་གང་དག་རྣམ་པ་དེ་ལྟ་བུར་གྱུར་པ་དེ་དག་ཐམས་ཅད་བསྡོམས་པར་གྱུར་པས་ཀྱང་། ལྷ་རྣམས་ཀྱི་རེག་བྱ་ཐམས་ཅད་ལས་ཐ་མར་གྱུར་པ་འདི་
ལྟ་སྟེ། ལྷ་རྫས་ཀྱི་རྡོ་རྗེར་གྱུར་པའི་སྲིད་པའི་སྡུག་བསྔལ་བྱེད་པ་རྣམས་ཀྱི་ཡང་བཅུ་དྲུག་ཆར་ཕྱེ་བ་ཙམ་དུ་ཡང་མི་ཆོག་པར་འདོད་དོ། །རྒྱུ་དེས་ན་ལྷ་རྣམས་ཀྱི་རེག་བྱ་ཡང་དཔེ་མེད་པ་ཡིན་ལ་དེ་དག་ལ་ཡང་དཔེ་བྱ་བར་ནུས་པ་མ་ཡིན་ནོ། །སྒྲ་རྣམས་ཀྱང་དཔེ་མེད་པ་དང་ཡང་དག་པར་ལྡན་པས་ལྷ་

རྣམས་རྒྱུ་བ་ཡིན་ནོ། །འདི་ན་མི་རྣམས་ཀྱི་མཆོག་ཏུ་གྱུར་པའི་སྒྲ་ནི་འདི་ལྟ་སྟེ། པི་བང་དང་། ས་ཀཱ་ཤ་དང་། གླིང་བུ་དང་། རྫ་རྔ་དང་། གླུ་ལ་སོགས་པ་རྣམས་ཡིན་ནོ། །ཆགས་པར་གྱུར་པ་དེ་དག་རྣམས་ཐམས་ཅད་བསྡོམས་པས་ཀྱང་ལྷ་རྣམས་ཀྱི་རྒྱན་གྱི་མཆོག་གི་བཅུ་
དྲུག་ཆར་ཡང་མི་ཆོག་པར་འདོད་དེ། ལྷ་རྣམས་ཀྱི་སྒྲ་རྣམས་ཀྱང་དཔེ་མེད་པ་དང་ཡང་དག་པར་ལྡན་པ་ཡིན་ནོ། །དཔེར་བྱ་བ་ནི་འདི་དག་རྣམས་ཡིན་ཏེ། རྒྱལ་ཆེན་རིས་བཞིའི་ལྷ་རྣམས་དང་མིའོ། །སུམ་ཅུ་རྩ་གསུམ་པ་རྣམས་ཀྱིས་ནི་འཐབ་བྲལ་བ་ལ་མ་ཡིན་ནོ། །དེའི་ཁྱད་པར་ཡང་མི་
རྣམས་ཀྱི་འདོད་པ་དང་རྒྱལ་ཆེན་རིས་བཞིའོ། །དེའི་ཁྱད་པར་གྱིས་སུམ་ཅུ་རྩ་གསུམ་པ་དང་རྒྱལ་ཆེན་རིས་བཞིའོ། །རྒྱལ་ཆེན་རིས་བཞིའི་ཡུལ་དང་སུམ་ཅུ་རྩ་གསུམ་པའི་ཁྱད་པར་གང་ཡིན་པའི་ཁྱད་པར་འདི་དག་གིས་ཀྱང་། སུམ་ཅུ་རྩ་གསུམ་པ་རྣམས་ཀྱི་འདོད་པའི་རིམ་པ་རྣམས་དང་ལས་ཀྱི་ཁྱད་པར་
རྣམས་ཀྱིས་འདོད་པ་ན་སྤྱོད་པའི་ལྷ་དྲུག་པོ་རྣམས་ཀྱི་ཡང་ལྷ་རྫས་ཀྱི་ཡུལ་རྣམས་ཀྱི་ཡོན་ཏན་ཁྱད་པར་དུ་འཕགས་པ་ཡིན་ནོ། །དེའི་ཕྱིར་ཡང་ལྷ་རྣམས་ནི་བདེ་བ་དཔེ་མེད་པ་དུ་མ་རྣམས་དང་ཡང་དག་པར་ལྡན་པ་ཡིན་ནོ། །ལྷ་དེ་དག་ངང་པའི་ནགས་དེ་ན་རྩེད་མོ་རྩེ་བར་གྱུར་པ་ལས་བར་སྣང་ལ་འགྲོ་བའི་
རྒྱལ་པོ་དེ་དང་ཉེ་བར་ཕྱིན་པར་གྱུར་ཏེ། གང་ལ་འདི་རྩེ་བར་གྱུར་པ་རྣམ་པར་ཡངས་པའི་པད་མའི་རྫིང་བུར་ལྷན་ཅིག་རྗེས་སུ་སྤྱོད་པ་རྣམས་ཀྱིས་ཡོངས་སུ་བསྐོར་ཞིང་པད་མའི་ནགས་ལ་ལེགས་པར་གནས་ཏེ་ཉེ་འཁོར་ན་ལྷའི་ཚོགས་ཀྱིས་ཡོངས་སུ་བསྐོར་ཏོ། །དེ་དག་རྣམས་གང་ཡིན་པ་དེའི་
པད་མ་གཅིག་པོ་གང་ལ་འདི་རྩེ་བར་བྱེད་པ་དེ་ནི་ཚད་དཔག་ཚད་ཙམ་མོ། །རིན་པོ་ཆེ་སྣ་བདུན་གྱི་དཔེར་བྱ་བར་གྱུར་པ། རྡོ་རྗེའི་ཟེའུ་འབྲུ་རྣམས་ཀྱིས་རེག་ན་བཟོད་པར་གྱུར་པ་བླ་ན་མེད་པའི་དྲི་དང་ཁ་དོག་རྣམས་དང་ལྡན་པ་དཔེ་མེད་པར་གྱུར་པ་འོད་ཟེར་དུ་མ་རྣམས་ཀྱིས་རྣམ་པར་སྣང་བར་བྱས་པ་
འདབ་མ་སྟོང་ཕྲག་བརྒྱ་པ་གང་ཡིན་པ་འདིའི་དབུས་སུ་གནས་པར་གྱུར་ནས་པད་མའི་རྫིང་བུར་མུ་སུ་ལུན་དྷ་ལ་སོགས་པ་རྣམས་ལ་ཆོས་སྟོན་པར་བྱེད་དོ། །དེ་ཡང་སྨོན་ལམ་གྱི་དབང་གིས་འཐབ་བྲལ་བའི་ལྷ་རྣམས་ཀྱི་ནང་དུ་སྐྱེ་བོ་རྣམས་ལ་ཕན་པའི་དོན་དང་བདེ་ལེགས་སུ་འགྱུར་བའི་དོན་དུ་སྟེ་ཕན་

པར་འདོད་པ་དག་གིས་དེར་སྐྱེས་སོ། །དེ་དག་རྣམས་ལ་ཆོས་སྟོན་པར་བྱེད་དེ། བག་མེད་པ་སྤང་བའི་དོན་དུའོ། །ལྷ་གསར་དུ་སྐྱེས་པ་དེ་མཐར་གྱིས་རྣམ་པར་ཡངས་པའི་པད་མའི་རྫིང་དེར་སླེབ་པར་གྱུར་ཏོ། །དེ་མངོན་པར་མཐོང་ནས་ཀྱང་དུས་བཟངས་དེས་ཚིགས་སུ་བཅད་པ་རྗོད་པར་བྱེད་པ། ཇི་ལྟར། འདོད་པས་ངོམས་
པ་མེད་པ་དང་། །སྲེད་པས་ཀྱང་ནི་གདུངས་པ་ཡི། །སེམས་དང་དབང་པོ་གཡོ་བ་ཡི། །དུས་འདི་ཡོངས་སུ་འདའ་བ་ཡིན། །འཆིང་བ་ལྔ་ཡིས་བཅིངས་འགྱུར་ཞིང་། །དྲུག་གིས་རྣམ་པར་རྨོངས་པ་ཡང་། །དུས་གསུམ་ལ་ཡང་རྣམ་རྨོངས་པའི། །དུས་འདི་ཡོངས་སུ་འདའ་བ་ཡིན། །འགྲོ་བའི་བཙོན་རར་བཅིངས་ན་ཡང་། །སྐྱོ་
བའི་དབང་དུ་འགྲོ་མིན་པ། །བག་མེད་ཡུལ་གྱིས་རྨོངས་པས་ཀྱང་། །དུས་འདི་ཡོངས་སུ་སྐྱེལ་བ་ཡིན། །རྒོད་དང་ཁྲེལ་མེད་ཆགས་པ་དང་། །ལུས་ཀྱི་མཛེས་པ་ལ་དགའ་ཞིང་། །འདོད་པས་ཡིད་ནི་ངོམས་མེད་པའི། །དུས་འདི་ཀུན་ནི་འགག་པ་ཡིན། །མི་རྟག་བསྒྲུབ་པར་མི་ནུས་པའི། །བདེ་ལ་ཆགས་པའི་ལུས་ཅན་
རྣམས། །བུད་མེད་མཐོང་བས་བརྒྱལ་བ་ཡི། །དུས་འདི་ཡོངས་སུ་འདའ་བ་ཡིན། །སྐྱེ་དང་འཆི་བའི་དབང་ཉིད་དང་། །སྲེད་པས་ཀྱང་ནི་རྨོངས་པ་ཡི། །བྱིས་པའི་སྐྱེ་བོ་རྣམས་ཀྱི་ཡང་། །དུས་འདི་ཡོངས་སུ་འདའ་བ་ཡིན། །གཏི་མུག་མུན་པར་བྱིང་བ་དང་། །ཀུན་ནས་འདོད་ཆགས་ཀྱིས་ཕྲོགས་པའི། །སྲེད་པས་ངོམས་
པ་མེད་འདི་ཡི། །ཞེ་སྡང་འཆིང་བས་བཅིངས་ནས་ནི། །དུས་འདི་ཡོངས་སུ་འདའ་བར་བྱེད། །ལོག་པར་ལྟུང་བ་མངོན་མི་ཤེས། །རྣམ་པར་རྟོག་པས་ཉེར་བཅོམ་པའི། །སྐྱེ་བོ་ཆགས་པའི་ཡིད་ཅན་རྣམས། །དུས་འདི་ཡོངས་སུ་འགག་པ་ཡིན། །དུས་དེ་ཙམ་དུ་དགའ་འགྱུར་ཡང་། །ཡོངས་སུ་སྨིན་ནས་ཕན་མིན་
པའི། །འདོད་པ་ལ་ནི་ཆགས་པའི་ཡིད། །དུས་འདི་ཡོངས་སུ་སྐྱེལ་བ་ཡིན། །སྔོན་གྱི་སྡུག་བསྔལ་མངོན་མི་ཤེས། །ལྷ་ཡི་བདེ་ལ་དགའ་བ་ཡང་། །རྣམ་བྲལ་དེ་ནི་མི་ཤེས་པར། །དུས་འདི་ཡོངས་སུ་འདའ་བ་ཡིན། །ལས་ཀྱི་དྲ་བས་ཀུན་ནས་བཅིངས། །བཀྲེན་པ་ཉིད་ཀྱི་བྱེད་པ་ཡིས། །དམ་པའི་ལམ་ལས་ཡོངས་
ཉམས་ནས། །དུས་འདི་ཡོངས་སུ་འདའ་བར་བྱེད། །རྣམ་རྨོངས་སེམས་དང་བྲལ་བས་ནི། །སྲིད་པའི་སྐྱོན་ནི་ཤེས་པ་མིན། །གཏི་མུག་མུན་པར་ནུབ་པ་ཡིས། །དུས་འདི་ཡོངས་སུ་འདའ་བར་བྱེད། །ལས་ཞགས་གཅིག་གིས་བཅིངས་ནས་ནི། །གྲོགས་མེད་གཅིག་པུའི་ལུས་ཅན་རྣམས། །ལྷ་མོའི་ཚོགས་ཀྱིས་

རྣམ་རྨོངས་པས། །དུས་འདི་ཡོངས་སུ་འགག་པར་བྱེད། །དབང་པོ་རྣམས་ཀྱིས་ཁྲིད་པ་དང་། །དམ་པའི་ལམ་ལ་འཁྲུལ་བས་ཀྱང་། །བུད་མེད་དེ་ནི་ཤེས་མིན་པས། །དུས་འདི་ཡོངས་སུ་འདའ་བར་བྱེད། །སྡོམ་དང་སྡོམ་མིན་ཤེས་མིན་དང་། །གནོད་སེམས་མང་པོར་གྱུར་པ་དང་། །ལེགས་པར་བསྡམས་པའི་
ལམ་ཞིག་པ། །དུས་འདི་ཡོངས་སུ་སྐྱེལ་བར་བྱེད། །ཕན་དང་ཕན་མིན་ཕྱི་རོལ་དང་། །དོན་དང་དོན་མིན་ལ་རྨོངས་པའི། །རྩེད་མོས་བྱིས་པ་དང་མཚུངས་པའི། །དུས་འདི་ཡོངས་སུ་འདའ་བར་འགྱུར། །ཆུ་ཀླུང་འབབ་ཆུ་ལྟེང་ཀ་དང་། །ནགས་དང་སྐྱེད་ཚལ་ས་གཞི་ལ། །རྩེ་དགའ་ལ་ནི་ཆེད་ཆེ་འདིའི། །དུས་འདི་ཡོངས་
སུ་ཟད་པ་ཡིན། །ཁང་བུ་དང་ནི་རི་སྟེང་དང་། །པད་མའི་ཚལ་གྱི་རྫིང་བུར་ཡང་། །དགའ་བར་འདོད་པའི་ལོངས་སྤྱོད་ལ། །དུས་འདི་ཡོངས་སུ་འདའ་བར་བྱེད། །ལས་དང་ལས་ཀྱི་རྣམ་སྨིན་ལ། །སྣང་བ་མེད་པའི་ལུས་ཅན་རྣམས། །ཟས་ལ་ཆགས་པ་འབའ་ཞིག་གིས། །དུས་འདི་ཡོངས་སུ་ཟད་པར་བྱེད། །ཁམས་
གསུམ་འདི་ན་རྟག་ཏུ་ཡང་། །ལས་ཀྱི་རླུང་གིས་ཡོངས་སུ་བསྐོར། །འཁྲུལ་འཁོར་བཞིན་དུ་རྟག་ཏུ་འཁོར། །བྱིས་པ་རྣམས་ཀྱིས་གོ་བའང་མིན། །མཐོན་པོའི་རང་བཞིན་འཕྱང་མོ་ཞོན། །སྐྱེས་བུ་ལོག་པར་ལྟུང་བ་ཡིན། །རྣམ་པར་རྨོངས་པས་སྐྱོན་རྣམས་ནི། །བཟློག་ལ་རབ་ཏུ་འབད་མི་བྱེད། །དེ་དག་དང་ནི་དེ་ལས་
གཞན། །འདོད་པའི་བདེ་བ་ཡོངས་སྤོང་བ། །འདོད་དང་བྲལ་བ་བརྟན་པ་ཡི། །སྐྱོབ་པ་མྱ་ངན་འདས་པ་ཡི། །དེ་ནི་ཐོག་མ་བར་ཐ་མར། །དགེ་བའི་བདེ་ལེགས་བླ་ན་མེད། །གང་ཞིག་ཐོབ་ནས་ཐུབ་པ་རྣམས། །ཡམས་དང་བྲལ་བའི་ཞི་བར་རྒྱུ། །འདོད་སྐྱེས་སྲིད་བདེ་དམ་པ་ནི། །དེ་ནི་ལོག་ལྟུང་ནང་དུ་ཆུད། །སྡུག་
བསྔལ་རྣམ་སྨིན་སྐྱེས་མིན་པའི། །འདོད་པའི་ཁྱད་པར་འགའ་ཞིག་མེད། །དེ་ཕྱིར་འདོད་པ་ཞེས་བྱའི་བློ། །ནམ་ཡང་བསྐྱེད་པར་མི་བྱའོ། །དེ་ཡང་སྡུག་བསྔལ་རྣམ་འཁོར་བའི། །རྒྱུར་གྱུར་ཤིན་ཏུ་མི་བཟད་པའོ། །དེ་ལྟར་ངང་པ་དེས་ལྷ་གསར་དུ་སྐྱེས་པ་དེ་མངོན་པར་ལེགས་པར་མཐོང་ནས་ཚིགས་སུ་
བཅད་པ་བརྗོད་ལ། ཡུལ་རྣམས་ལ་སྨད་ར་ཡང་བྱས་སོ། །དེས་དེ་ལྟ་བུ་རྣམས་ཁོ་ན་བཤད་པར་གྱུར་པ་ན་ལྷ་དེ་མཐའ་མ་ཉིད་ཐོབ་པར་འགྱུར་རོ། །ལྷ་དེས་ལེགས་པར་བཤད་པ་དེ་དག་རྣམས་ལ་བརྩི་བགྲང་མ་བྱས་པས་དེ་བཞིན་དུ་ཡུལ་གྱིས་ཀུན་ཏུ་རྨོངས་པར་གྱུར་ནས་སླར་ཡང་དེ་ཉིད་ཀྱི་མདུན་དུ་རྩེ་

བ་དང་དགའ་བ་དང་ཡོངས་སུ་སྤྱོད་པར་ཡང་བྱེད་ཅིང་། ཆུ་ལ་རྩེ་བར་བྱེད་དོ། །པད་མའི་རྫིང་བུར་ཞུགས་པར་གྱུར་ནས་པད་མ་དག་བཅད་དེ་ལྷའི་བུ་མོ་དེ་དག་དང་ལྷན་ཅིག་ཏུ་རྩེད་མོ་ཡང་རྩེ་བར་བྱེད་དེ་ལྷ་རྫས་ཀྱི་བདེ་བ་དང་ལྡན་པའི་ཡུལ་གྱིས་རྣམ་པར་རྨོངས་པའི་ཕྱིར་རོ། །ཕན་པའི་ཚིག་དེ་དག་རྣམས་
ཉེ་བར་ཐོས་པར་གྱུར་ནས་ཀྱང་དགའ་བར་བྱེད་པ་ཉིད་ནི་འདོད་པའི་དབང་དུ་སོང་བའི་ཕྱིར་རོ། །དེ་ནས་ཡང་ནམ་མཁའ་ལྡིང་གི་རྒྱལ་པོ་དེ་མུན་པའི་སྣོད་ཀྱི་ལྷ་དེ་དག་རྣམས་ལ་གཞན་ཡང་རྗོད་པར་བྱེད་པ། ཇི་ལྟར་ཡུལ་འདི་དག་གིས་རྣམ་པར་རྨོངས་པར་གྱུར་པ་དེས་ན་ཕན་པའི་ཚིག་འདི་དག་རྣམས་མི་ཐོས་
སོ། །མ་ཐོས་པར་གྱུར་ཡང་སོང་དང་དེ་ཤེས་པར་བྱེད་པ་འབྱུང་བར་འགྱུར་གྱིས། དེ་ལྟར་ནམ་མཁའ་ལྡིང་གི་རྒྱལ་པོ་དེས་རྗོད་པ་དང་། ལྷ་རྫས་ཀྱི་ཆེས་གཙོ་བོར་གྱུར་པ་མཆོག་ཏུ་ཡང་རྣ་བ་དང་ཡིད་འཕྲོག་པར་བྱེད་པའི་སྒྲ་དག་རིང་བ་ནས་ཐོས་པར་གྱུར་ཏོ། །ལེགས་པར་བྱས་པའི་ལས་ཆེས་ལྷག་པར་
གྱུར་པའི་སྒྲ་གང་ཡིན་པ་དེས་པ་ཊ་ཧ་དང་། གླིང་བུ་དང་། པི་བང་དང་། རྔ་མུ་ར་བའི་ཚོགས་དང་ཆགས་པར་འགྱུར་བའི་གླུ་དང་རོལ་མོའི་སྒྲ་ཐམས་ཅད་ཉམས་པར་བྱེད་དོ། །དེ་ནས་ལྷ་གང་དག་རྣམ་པར་ཡངས་པའི་པད་མའི་རྫིང་བུ་ན་རྩེད་མོ་རྩེ་བར་བྱེད་པ་དེ་དག་ལས་དེ་རྣམས་ཐམས་ཅད་ཀྱང་གང་ནས་སྒྲ་
ཐོས་པར་གྱུར་པ་དེར་ཁ་ཕྱོགས་ཏེ་གནས་སོ། །དེ་ནས་རིང་བ་ཉིད་ནས་འོངས་པར་གྱུར་པ་ནི་ཁང་བུ་བརྒྱ་སྟོང་གིས་ཡོངས་སུ་བསྐོར་ཅིང་ལྷ་རྫས་ཀྱི་གླུ་མཁན་གྱི་སྒྲས་ཆགས་པ་སྐྱེད་པར་བྱེད་པའི་སྒྲ་རྣམས་ཉེ་བར་བསྒྲགས་པར་གྱུར་པ་སྟེ། ཇི་ལྟར་གཟའ་དང་སྐར་མ་དང་རྒྱུན་སྐར་རྣམས་ཀྱིས་ཡོངས་སུ་བསྐོར་
བའི་ཟླ་བ་རྣམ་པར་མཛེས་པ་བཞིན་དུ། དེ་ལྟར་རྣམ་པར་མཛེས་ཤིང་གསལ་བ་ཡིན་ནོ། །དེ་ལྟར་ཡང་ཁང་བུའི་ཕྲེང་བ་བརྒྱ་སྟོང་གིས་ཡོངས་སུ་བསྐོར་བར་གྱུར་པ་དང་དེའི་ལུས་ལས་ཀུན་ནས་འཕྲོ་བའི་འོད་ཟེར་གྱི་ཕྲེང་བ་རྣམས་ཀྱིས་ལྷའི་ཚོགས་ཐམས་ཅད་ཀྱི་ཡིད་འཕྲོག་པར་གྱུར་པས། མཆོག་ཏུ་
གསལ་བར་བྱེད་པ་དང་ལྷ་མོ་བརྒྱ་སྟོང་གིས་ཀྱང་ཉེ་བར་གླུ་ལེན་པར་གྱུར་པས་ཤིན་ཏུ་འཐབ་བྲལ་བ་རྣམས་ཀྱི་བདག་པོ་འོངས་པར་གྱུར་ཏེ། འདབ་མ་སྟོང་ཕྲག་བརྒྱ་པ་རིན་པོ་ཆེ་སྣ་བདུན་གྱིས་ཉེ་བར་སྣང་བར་བྱེད་པ་མཆོག་ཏུ་མཛེས་པར་གྱུར་ཅིང་། དགའ་བའི་པད་མའི་དབུས་ཀྱི་སྙིང་པོ་གང་ཡིན་པ་དེ་

ལ་ཉེ་བར་གནས་ཤིང་ཆོས་ཉན་པར་འདོད་པས་ལྷན་ཅིག་སྤྱོད་པས་ཡོངས་སུ་བསྐོར་ནས་གང་ནས་བྱང་ཆུབ་སེམས་དཔའ་དུས་བཟངས་ནམ་མཁའ་ལྡིང་གི་རྒྱལ་པོ་ཡོད་པ་དེར་འོངས་པ་ཡིན་ནོ། །དེ་ནས་ནམ་མཁའ་ལྡིང་གི་རྒྱལ་པོ་བྱང་ཆུབ་སེམས་དཔའ་དེས་དེ་དག་ཉེ་བར་མཐོང་བར་གྱུར་
ནས་རྩོམ་པ་ཆེན་པོས་དེ་རིངས་པར་འགྲོ་བར་བྱེད་དེ་དེ་ཡང་ངང་མོ་གཞན་དག་རྣམས་ཀྱིས་ཡོངས་སུ་བསྐོར་ཞིང་། ངང་པ་ཡང་རིན་པོ་ཆེ་བདུན་གྱི་ནོར་བུའི་ཐིག་ལེ་རྣམས་ཀྱིས་རྣམ་པར་བཀྲ་བར་གྱུར་པ་བརྒྱ་སྟོང་དུ་མས་ཡོངས་སུ་བསྐོར་ནས་ནམ་མཁའི་དཀྱིལ་དུ་འཕགས་པར་གྱུར་ནས། གང་ན་འཐབ་
བྲལ་གྱི་མངའ་བདག་ཡོད་པ་དེར་ཉེ་བར་ཕྱིན་ཏོ། །ངང་པ་དེ་དག་གིས་ཀྱང་དགའ་བའི་དབྱངས་དག་ཀྱང་ཉེ་བར་བསྒྲགས་སོ། །དེ་བཞིན་དུ་ལྷ་དང་བྱའི་རྒྱལ་པོ་དག་ཕན་ཚུན་དུ་གུས་པ་དང་བཅས་པ་དང་རབ་ཏུ་འདུད་པས་ཕྱག་བྱས་ནས། སྨོན་ལམ་གྱི་དབང་གིས་འཐབ་བྲལ་གྱི་ལྷ་རྣམས་ཀྱི་བག་མེད་པ་
གདུལ་བའི་དོན་དུ་སྐྱེས་པར་གྱུར་པའི་བྱང་ཆུབ་སེམས་དཔའ་དུས་བཟངས་དེས་ལྷ་རྣམས་ཀྱི་མངའ་བདག་དེ་ལ་བརྗོད་པ། རྣམ་པར་ཡངས་པའི་པད་མའི་རྫིང་བུ་གང་ཡིན་པ་འདིར་འཐབ་བྲལ་གྱི་བདག་པོ་དུས་ཤིན་ཏུ་རིང་བ་ནས་ཅི་ལ་འོངས་པ་ལགས། ངས་ཀྱང་ལྷ་གཞན་གྱི་དྲུང་ནས་ཐོས་པ་ཡང་
ཇི་ལྟར། མུ་སུ་ལུན་དྷ་ནི་བག་མེད་པས་བག་མེད་པར་མི་རྒྱུ་བ་དང་ཚོགས་པ་རྒྱུ་བ་རྣམ་པར་རྒྱུ་བའི་ས་དག་ཏུ་དེ་བཞིན་གཤེགས་པ་དྲུག་གི་མཆོད་རྟེན་དེ་དག་རྣམས་ལ་འདིས་ཕྱག་བྱས་ཤིང་ལྷའི་ཚོགས་དང་བཅས་པ་རྣམས་ཀྱིས་གང་རྫུ་འཕྲུལ་གྱི་སྟོབས་ཀྱིས་མངོན་པར་བྲིས་པར་གྱུར་པའི་མདོ་དེ་
དག་ཀྱང་བཀླགས་ཤིང་ལྷ་རྣམས་ལ་ཡང་ཉེ་བར་བསྟན་ནོ། །ལྷ་རྣམས་ཀྱང་ངེས་པར་བདེན་པ་ཡིན་པའི་རྒྱུ་འདིས་ང་ཁྱེད་ཀྱི་དྲུང་དུ་མ་འོངས་སོ། །ངས་རྣམ་པར་ཡངས་པའི་པད་མའི་རྫིང་དུ་འོངས་ནས་རྩེད་མོ་རྩེ་བར་བྱེད་པའི་ལྷ་གཞན་དག་རྣམས་ལ་ཆོས་བསྟན་ཏེ། དོན་དམ་པར་གྱུར་པ་ཉེ་བར་
འཕེལ་བར་བྱེད་པ་དགེ་བར་གྱུར་པ་བག་མེད་པ་དང་བྲལ་བར་བྱེད་པ་པོ་ཐམས་ཅད་ལ་མཐར་ཐུག་པར་ཕན་པར་བྱེད་པར་གྱུར་པའོ། །དེ་ལ་རྒྱུ་འདི་དག་གིས་ཀྱང་ང་ལྷ་ཁྱོད་ཉིད་ཀྱི་རྩར་ང་མ་འོངས་པ་ཡིན་པར་ཤེས་པར་གྱིས་ལ་མི་དགའ་བར་མི་བྱ་བ་དང་རྗེས་སུ་མཐུན་པར་བྱ་བ་དང་ཆོས་ལ་

གུས་པར་བྱ་བ་རྣམས་བྱའོ། །དེ་ནས་དེའི་ཚིག་འདི་དག་རྣམས་ཐོས་ནས་མུ་སུ་ལུན་དྷས་འདི་སྐད་ཅེས་སྨྲས་སོ། །དམ་པ་ཁྱོད་ཀྱི་ཡོན་ཏན་འདི་དག་ཀྱང་ཤེས་ལགས་ཀྱི་འཇིགས་པར་མ་མཛད་ཅིག །ཁྱོད་ཉིད་ནི་འཐབ་བྲལ་ན་གནས་པའི་ལྷ་འདི་རྣམས་ཐམས་ཅད་ཀྱི་ཉེ་བར་གནས་པའི་དགེ་
བའི་བཤེས་གཉེན་བཅོམ་ལྡན་འདས་ལགས་ཀྱིས་མཁའ་ལྡིང་ལ་མངའ་མཛད་པའི་རྒྱལ་པོ་གཤེགས་མཛོད། གང་ན་རྣམ་པར་ཡངས་པའི་རྫིང་བུ་ཡོད་པ་དེར་བདག་ཅག་གཤེགས་སོ། །འདིར་དེ་སྐད་ཅེས་ཕན་ཚུན་དུ་བརྗོད་ནས་མཁའ་ལྡིང་གི་རྒྱལ་པོ་དེ་ཡང་འཐབ་བྲལ་གྱི་བདག་པོ་དང་ལྷ་
བརྒྱ་སྟོང་དུ་མས་ཁང་བུ་རྣམས་དང་ངང་པ་དུ་མ་རྣམས་ཀྱིས་ཀྱང་ཡོངས་སུ་བསྐོར་བར་གྱུར་ནས་གང་ན་རྣམ་པར་ཡངས་པའི་པད་མའི་རྫིང་བུ་དེར་ཉེ་བར་ལེགས་པར་འགྲོ་སྟེ། ནམ་མཁའི་དཀྱིལ་ནས་རོལ་མོའི་སྒྲ་དང་རྔ་སྒྲ་དང་གླུ་དང་བཅས་པས་མཆོག་ཏུ་དགེ་བར་གྱུར་པའི་སེམས་ཀྱིས་ཀུན་
ནས་བདེ་བར་གཏོགས་པའི་ཡིད་དྲི་མ་མེད་པར་གྱུར་པས། བག་དང་ལྡན་པར་རྒྱུ་བ་དང་། དེ་བཞིན་དུ་རྣམ་པ་དེ་སྲིད་ཀྱི་བག་མེད་པའི་ས་རྣམས་ལ་འཇུག་པར་འགྱུར་བའི་འོད་ཟེར་གྱི་མཆོག་དང་ལྡན་པར་གྱུར་པ་རྣམས་རྔ་སྒྲ་དང་ལྡན་པར་སོང་ནས་རྣམ་པར་ཡངས་པའི་མིང་ཅན་གྱི་རྫིང་འདིར་
ཞུགས་པར་གྱུར་ཏོ། །དེ་ནས་ཕྱིན་པར་གྱུར་པ་དང་ལྷ་གཞན་ཆེས་རབ་ཏུ་དགའ་བའི་ཡིད་ཀྱིས་པད་མའི་རྫིང་བུ་དེར་རྩེད་མོ་རྩེ་བ་རྣམས་ཀུན་ནས་ལེགས་པར་མཐོང་བར་གྱུར་པས་རྩེད་མོ་རབ་ཏུ་རྩེ་བར་རྩོམ་མོ། །རྩེ་བར་གྱུར་པའི་ལྷ་དེ་དག་རྣམས་ཐམས་ཅད་ཀྱིས་ཀྱང་སྒྲ་འཐུག་པོའི་སྒྲ་ཀུན་
ནས་སྒྲོགས་པར་བྱེད་པ་བཞིན་དུ་ནམ་མཁའི་དཀྱིལ་དེ་དག་རྣམས་ཐམས་ཅད་ནས་ཐོས་པར་གྱུར་ཏེ། ཐོས་ནས་ཡིད་འཕྲོག་པར་བྱེད་པ་དང་དེས་ཁྲོ་བ་མེད་པར་བྱེད་པ་དང་རྣ་བ་དང་ཡིད་འཕྲོག་པར་བྱེད་པ་རྣམས་སོ། །དེ་ནས་ཕྱིན་པར་གྱུར་པ་དེ་དག་རྣམས་ཐམས་ཅད་པད་མའི་རྫིང་བུའི་བདེ་བ་
འདོད་པ་དང་ཡང་ཡུད་ཙམ་ཅིག་ཉེ་བར་བྲལ་ཞིང་དེ་དག་རྣམས་ཐམས་ཅད་སྒྲ་ཡང་མེད་པར་གྱུར་པ་དང་། རྣམ་པ་དེ་སྲིད་ཀྱི་ལྷ་རྫས་ཀྱི་ཡུལ་རྣམས་ཀྱིས་ཀྱང་ཁྲིད་པར་མ་གྱུར་ཅིང་གཡོ་བར་གྱུར་པའི་སེམས་ཀྱང་ཆོས་ལ་གུས་པས་ཀུན་ཏུ་གནས་པས་གཡོ་བ་མེད་པའི་སེམས་སུ་གྱུར་ཅིང་། ཆུའི་

རྩེད་མོ་ལ་རྣམ་པར་དགའ་བ་དང་པད་མའི་རྩེ་མོ་ལ་རྣམ་པར་དགའ་བ་རྣམས་དང་ཡང་བྲལ་བར་གྱུར་པ་དང་བྱས་པར་གྱུར་པའི་ལས་རྣམས་ཆུད་མི་འཛའ་བ་ལ་ཀུན་ཏུ་བལྟས་ནས་ནམ་མཁའ་ལ་འགྲོ་བའི་རྒྱལ་པོ་དེ་ལ་འཐབ་བྲལ་གྱི་བདག་པོ་དེས་འདི་སྐད་ཅེས་སྨྲས་སོ། །ཇི་ལྟར་དུས་བཟངས་ལེགས་
པར་ཆོས་བསྟན་པར་བྱ་བའི་དུས་འདི་ཡང་བཟང་པོ་ཡིན་ཏེ། ལྷ་འདི་དག་རྣམས་རྒྱགས་པ་དང་བྲལ་བར་གྱུར་པས་འདིར་ལྷ་དང་བཅས་པ་འདི་དག་རྣམས་ལ་ཆོས་བསྟན་པར་བྱ་བའི་དུས་འདི་ནི་བཟང་པོ་ལགས་སོ། །དེ་ནས་མཁའ་ལྡིང་གི་རྒྱལ་པོ་སྐྱེ་བ་གཞན་དྲན་པར་གྱུར་པ་དེས་བཅོམ་ལྡན་འདས་འཁོར་
བ་འཇིག་གང་ཡིན་པ་དེའི་སྤྱན་སྔར་ཐོས་པར་གྱུར་པའི་མདོ་དེ་བསྟན་པའི་དོན་དུ་དམིགས་ཤིང་། ཡུད་ཙམ་ཅིག་སྒྲ་མེད་པར་བྱས་ཏེ། དེ་ནས་དེ་ལྟར་མདོ་སྟོན་པར་རྩོམ་མོ། །ལྷ་རྣམས་ཉོན་དང་ཆོས་ལྔ་པོ་འདི་དག་རྣམས་ནི་རྣམ་པར་སྨད་པར་བྱ་བ་ཡིན་ཏེ་བག་མེད་པར་སྟེན་པར་བྱེད་པ་གང་ཡིན་
པའི་ལྷ་རྣམས་སམ་མི་ཡང་རུང་སྟེ། མི་རིགས་པར་གྱུར་པའི་སྐྱོན་ཡིན་ནོ། །ལྔ་གང་ཞེ་ན་འདི་ལྟ་སྟེ། བག་མེད་པར་གྱུར་པས་བག་མེད་པར་སྤྱོད་པ། རྣམ་པར་གཡེང་བའི་ཡིད་ཀྱིས་གཞན་ཉིད་བསམ་པ་ན་གཞན་ཉིད་རྗོད་པར་བྱེད་དོ། །དེ་ཡང་སྙིང་པོ་མེད་པ་དོན་མེད་པར་བྱེད་པ་པོ་སྔ་མ་དང་ཕྱི་མ་འགལ་
བ་ཡེ་ཡེའོ་གཞན་རྣམས་ལ་ཡང་སེམས་འཛིན་པར་འགྱུར་བ་མ་ཡིན་ནོ། །དེ་ཅིའི་ཕྱིར་ཞེ་ན། བག་མེད་པས་རྣམ་པར་གཡེངས་པར་གྱུར་པའི་བློས་རིག་པ་མ་ཡིན་ནོ། །བདག་གིས་གཏམ་འདི་ཅི་སྨྲས་པ་དང་རྣམ་པ་ཇི་ལྟ་བུ་ཅིག་ཀྱང་བདག་གིས་སྨྲས་བྱ་བ་དང་བདག་གིས་གང་ལ་སྨྲ་བར་བྱ་བ་ཡང་སྟེ།
དེའི་བློ་རྣམ་པར་གཡེངས་པར་འགྱུར་ཞིང་རྣམ་པར་མི་གནས་པས་གང་རུང་བ་ལ་དེ་སྨྲ་བར་བྱེད་དོ། །དེ་དེ་ལྟར་ཡང་མོར་འགྱུར་རོ། །ཡོངས་ལས་ཁ་ཉན་པར་འགྱུར་རོ། །ཡིད་དུ་མི་འོང་བར་འགྱུར་རོ། །གཞན་དག་རྣམས་ཀྱིས་ཀྱང་རྣམ་པར་གཤེ་བར་བྱེད་དོ། །དེ་ཐམས་ཅད་ལ་རྩྭ་བཞིན་དུ་བདག་ཉིད་
འདུད་པར་བྱེད་དོ། །འདི་དག་ནི་སྐྱོན་དང་པོ་ཡིན་ཏེ། བག་མེད་པས་ཀུན་ཏུ་བཅིངས་པའི་སྐྱོན་རྣམས་ཀྱིས་ཀྱང་ལོག་པར་ལྟུང་བ་རྣམས་སུ་སྐྱེ་བར་འགྱུར་བ་ནི་འགྲོ་བ་གསུམ་པོ་རྣམས་ཕན་ཚུན་དུ་གང་ཡང་རུང་བ་རྣམས་སུའོ། །འདི་ནི་བག་མེད་པ་རྣམས་ཀྱི་སྐྱོན་གྱི་དང་པོ་ཡིན་ནོ། །གཞན་ཡང་བག་མེད་

པ་རྣམས་ལ་སྐྱོན་གཉིས་པ་ཡོད་དེ། གང་ཞེ་ན་འདི་ལྟ་སྟེ། དགོས་པ་དང་དགོས་པ་མ་ཡིན་པ་རྣམས་ཀྱང་མི་ཤེས་པའོ། །བག་མེད་པས་ཉམས་པར་གྱུར་པའི་བློས་རྟོགས་པར་མི་འགྱུར་ཏེ། བདག་གི་ལེགས་པར་བྱས་པའི་དོན་རྣམས་ནི་ཅི་ཡིན། ཅི་ནི་བྱ་བ་མ་ཡིན་པ་ཡིན། དེའི་ལས་དེ་དག་རྣམས་ཀྱི་
འབྲས་བུ་ནི་རྣམ་པ་ཅི་འདྲ་བ་ཅིག་ཏུ་འགྱུར། དེ་ཇི་ལྟར་ལས་རྣམས་ཤེས་པ་མ་ཡིན་པ་དེ་དེ་ལྟར་རྣམ་པར་སྨིན་པ་རྣམས་ཡང་མི་ཤེས་སོ། །དེ་ལས་དང་འབྲས་བུ་རྣམས་ལ་རྣམ་པར་རྨོངས་པར་གྱུར་ཅིང་རྨོངས་པ་ནི་ལུས་ཞིག་པར་གྱུར་ནས་བག་མེད་པ་དེའི་སྐྱོན་གྱིས་ངན་སོང་ལོག་པར་ལྟུང་བར་གྱུར་
པ་དམྱལ་བ་རྣམས་སུ་སྐྱེ་བར་འགྱུར་རོ། །གཞན་ཡང་སྐྱོན་གསུམ་པ་བག་མེད་པ་ལ་ཡོད་དེ། བག་མེད་པ་ལ་ཀུན་ཏུ་འཁྲིད་པར་གྱུར་པའི་ལྷའམ་མི་རྣམས་ཀྱང་རུང་སྟེ་གྲོགས་པོ་དམ་པ་མ་ཡིན་པ་སྟེན་པར་བྱེད་ལ། དཀོན་མཆོག་གསུམ་ལ་སྙེན་པར་མི་བྱེད་པ་དང་། ཤེས་རབ་དང་
ཚུལ་ཁྲིམས་ལ་ཡང་མ་ཡིན། བླ་མ་རྣམས་ལ་ཡང་སྟེན་པར་མི་བྱེད་དོ། །སྐྱོན་དང་ཡོན་ཏན་གྱི་ཁྱད་པར་རྣམས་ཀྱང་ཀུན་ཏུ་མི་ཤེས་སོ། །འཁོར་བའི་སྡུག་བསྔལ་རྣམས་ཀྱང་ཤེས་པར་མི་འགྱུར་རོ། །ལས་རྣམ་པ་སྣ་ཚོགས་པ་རྣམས་ཀྱང་ཀུན་ཏུ་མི་རྟོགས་སོ། །སྲོད་དང་ཐོ་
རངས་མི་ཉལ་བར་བརྩོན་པར་གནས་པའི་རང་བཞིན་ཅན་མ་ཡིན་ནོ། །དེ་ཤི་བར་གྱུར་པའི་འོག་ཏུ་བག་མེད་པ་དེའི་སྐྱོན་གྱིས་ངན་སོང་ལོག་པར་ལྟུང་བ་དམྱལ་བར་སྐྱེའོ། །གཞན་ཡང་སྐྱོན་བཞི་པ་བག་མེད་པ་ལ་ཡོད་དེ། དེ་གང་ཞེ་ན། འདི་ལྟ་སྟེ། དེ་ཁོ་ནར་
སྐྱེས་པར་གྱུར་པའི་སྐྱེས་བུ་རྣམས་དང་ལྷ་རྣམས་ཀྱང་དེ་ཁོ་ན་བཞིན་དུ་ཚེའི་འདུ་བྱེད་རྣམས་ཟད་པར་འགྱུར་ཞིང་ལེགས་པར་བྱས་པའི་ལས་རྣམས་ཟད་པར་གྱུར་ནས་ནི་འཆི་བདག་གི་རྒྱལ་པོ་འོང་བར་འགྱུར་ལ། གང་དང་ལྷན་ཅིག་ཏུ་སྐྱེས་པར་གྱུར་པའི་བག་མེད་པ་སྟེན་པར་བྱེད་པ་
རྣམས་ལ་དེ་དང་ལྷན་ཅིག་ཏུ་རྣམ་པར་འབྲལ་བ་འབྱུང་བར་འགྱུར་རོ། །བཞི་པོ་འདི་དག་རྣམས་གང་ཡིན་པ་དང་ནི་ངེས་པ་ཁོ་ནར་ལྷན་ཅིག་ཏུ་འབྲལ་བར་འབྱུང་བར་འགྱུར་རོ། །བཞི་གང་ཞེ་ན། འདི་ལྟ་སྟེ། ལང་ཚོ་དང་ནད་མེད་པ་དང་སྲོག་དང་ཕུན་སུམ་ཚོགས་པ་རྣམས་སོ། །བཞི་པོ་འདི་དག་རྣམས་

དང་ནི་ངེས་པ་ཁོ་ནར་ལྷན་ཅིག་ཏུ་འབྲལ་བར་བྱ་དགོས་སོ། །དེ་དག་རྣམས་ལ་ཡང་མཁས་པ་རྣམས་ཀྱིས་སྐབས་དབྱེ་བར་མི་བྱ་བ་དང་བག་མེད་པ་དེ་ཡང་འདིར་བསྟེན་པར་མི་བྱའོ། །ཇི་ལྟར་བག་མེད་པ་དེས་ཀྱང་འདིར་དགྲ་བཞིན་དུ་འབྱུང་བར་འགྱུར་བས།
འདི་ནི་བསྟེན་པར་མི་བྱའོ། །བག་མེད་པས་ཟིལ་གྱིས་མནན་པར་གྱུར་པ་རྣམས་ནི་ལྷའམ་མི་རྣམས་ཀྱང་རུང་སྟེ་བརླག་པར་འགྱུར་རོ། །དེའི་ཕྱིར་ན་འདི་ཡོངས་སུ་སྤང་བར་བྱའོ། །གཞན་ཡང་བག་མེད་པར་གྱུར་པ་རྣམས་ཀྱི་སྐྱོན་ལྔ་པའོ། །འདི་གང་ཞེ་ན། འདི་
ལྟ་སྟེ། གང་ལ་འཇིགས་པའི་གནས་སུ་གྱུར་པ་དེ་དག་ཁོ་ན་ལ་ཡིད་ཆེས་པར་བྱེད་དེ། འཇིགས་པའི་གནས་སུ་གྱུར་ཅིང་ཡིད་མི་ཆེས་པ་ཇི་ལྟར་བུད་མེད་རྣམས་དང་མཚུངས་པ་གཞན་ཉིད་ནི་ཡོད་པ་མ་ཡིན་ནོ། །བག་མེད་པའི་དབང་དུ་གྱུར་པའི་སྐྱེས་བུ་ངན་པ་རྣམས་
ནི་དེ་དག་རྣམས་ཉིད་ལ་ཡིད་ཆེས་པ་སྐྱེད་པར་བྱེད་ཅིང་གང་འགའ་ཞིག་ལ་ཡིད་ཆེས་པར་མི་བྱེད་པ་རྣམས་ཀྱང་དེ་ཇི་སྲིད་ཤི་བར་མ་གྱུར་གྱི་བར་དུ་སྙིང་ལ་འགེབས་པར་བྱེད་དེ། ཅི་ལྟར་མེའི་ལྷན་ཅིག་སྐྱེས་པ་ཚ་བ་ཡིན་པ་དེ་བཞིན་དུ་བུད་མེད་རྣམས་ཀྱི་ཡང་གཡོ་དང་འདོད་པ་ཅན་
དང་། སྒྱུ་དང་། ཕྲག་དོག་དང་། མངོན་པར་འཁུ་བར་འགྱུར་བ་དང་། ང་རྒྱལ་དང་མི་སྙན་པར་བྱེད་པ་དང་ལོག་པར་བསྒྲུབ་པ་དང་ཀུན་དུ་འདྲེས་པའི་སེམས་དང་སྐྱོན་དེ་རྣམས་བུད་མེད་དང་ལྷན་ཅིག་སྐྱེས་པ་ཡིན་ཏེ། བག་མེད་པས་ཀུན་ནས་འཁྲིད་པར་གྱུར་པའི་སྐྱེས་
བུ་ངན་པ་དེ་ཚིག་ཙམ་འབའ་ཞིག་གིས་རབ་ཏུ་རྣམ་པར་བཅོམ་པར་གྱུར་ནས་དེ་དག་ཉིད་ལ་ཡིད་ཆེས་པར་བྱེད་དོ། །དེ་དག་ཉིད་ཀྱིས་ཀུན་ནས་འཆུམས་པར་གྱུར་ཅིང་བློ་རབ་ཏུ་སད་པར་བྱེད་དོ། །དེ་ལྟར་མདོར་བསྡུས་པར་གྱུར་ན་བག་མེད་པ་རྗེས་སུ་འབྲང་བ་དང་བཅས་པ་
རྣམས་ལ་སྐྱོན་ཆེན་པོ་ལྔ་ཡོད་དོ། །རབ་ཏུ་དབྱེ་བ་ལས་ནི་ཚད་མེད་པར་འགྱུར་རོ། །དེའི་ཕྱིར་ལྷའམ་མི་རྣམས་ཀྱིས་ཀྱང་རུང་སྟེ་རབ་ཏུ་བརྩོན་པ་མཆོག་གིས་བག་མེད་པ་ཡོངས་སུ་སྤང་བར་གྱིས་ཤིག་དེ་དག་ནི་མྱ་ངན་ལས་འདས་པའི་སྒོ་གཏན་ཡིན་ནོ། །འདི་ལྟ་སྟེ།

བག་མེད་པ་སྟེན་ཅིང་བསྒོམས་ལ་ལན་མང་དུ་བྱས་པས་ནི་དམྱལ་བར་འགྱུར་རོ། །བག་མེད་པ་སྟེན་པ་རྣམས་ནི་ཡི་དགས་སམ་དུད་འགྲོ་རྣམས་སུ་ཡང་སྐྱེ་བར་འགྱུར་རོ། །བག་ཡོད་པས་གནས་པ་རྣམས་ལ་ནི་ཡོན་ཏན་ལྔ་པོ་འདི་དག་རྣམས་ཡོད་དེ། བག་ཡོད་པ་རྣམས་ཀྱིས་བསྔགས་པའོ། །
ལྔ་གང་ཞེ་ན། འདི་ལྟ་སྟེ། སྤྱོད་པ་ཀུན་ནས་བསྡམས་པར་འགྱུར་བ་དང་། བློ་ཀུན་དུ་ལེགས་པར་གནས་པ་དང་། བྱ་བ་བྱེད་པ་དང་བློ་མཉམ་པར་བཞག་པ་དང་གཅིག་ཏུ་ཕན་པ་བྱེད་པ་དང་། དུག་རྣམས་བཞིན་དུ་བག་མེད་པ་ཡོངས་སུ་སྤོང་བར་བྱེད་དོ། །དེས་རྣམ་པ་གསུམ་ཀུན་དུ་རིག་གོ། །འདི་
ནི་བག་ཡོད་པ་ལ་མངོན་པར་དགའ་བར་གྱུར་པ་རྣམས་ཀྱི་ཡོན་ཏན་དང་པོའོ། །གཞན་ཡང་བག་ཡོད་པ་ལ་མངོན་པར་དགའ་བར་གྱུར་པའི་ཡོན་ཏན་གཉིས་པ་ཡོད་པ་ལ། འདི་གང་ཞེ་ན། འདི་ལྟ་སྟེ། ལས་རྣམས་ཀྱི་ལྕི་བ་ཉིད་ཀུན་དུ་ཤེས་པའོ། །དེ་སྐྱེས་བུ་དམ་པ་ལ་རྟེན་པར་གྱུར་པས་ལས་དང་
བཅས་པའི་འབྲས་བུ་རིག་ནས་བྱ་བ་དག་བྱེད་དོ། །སྐྱེས་བུ་དམ་པ་མ་ཡིན་པ་ལ་མི་རྟེན་ནོ། །དམན་པའི་ལས་རྣམས་མི་བྱེད་དོ། །གང་ལ་ཡང་རྟག་ཏུ་རྣམ་པར་སྨོད་པར་འགྱུར་བ་དང་གང་ལས་སྐྱོན་མཐོང་བ་དེ་དག་རྣམས་ཡོངས་སུ་སྤོང་བར་བྱེད་དོ། །གང་ལ་ཡོན་ཏན་མཐོང་བར་གྱུར་པ་དེ་དག་
ལ་ཉེ་བར་བསྟེན་ནོ། །ཡོན་ཏན་དང་ལྡན་པ་དང་ཡོན་ཏན་ཤེས་པར་གྱུར་པའི་བློ་གྲོས་བཟང་པོ་རྣམས་ལ་སྡིག་པ་མི་འབྱུང་ངོ་། །གཞན་ཡང་བག་མེད་པ་སྤངས་པར་གྱུར་པ་དང་བག་ཡོད་པ་སྟེན་པར་བྱེད་པའི་ཡོན་ཏན་གསུམ་པ་ཡོད་དེ། གང་ཞེ་ན། དེ་བཞིན་དུ་སྲོག་གི་མཐར་ཐུག་པར་གྱུར་
ཀྱང་བུད་མེད་རྣམས་ཀྱི་དབང་དུ་འགྲོ་བ་མ་ཡིན་ནོ། །ཚིག་རྣམས་ལ་ཡང་དད་པར་མི་བྱེད་དོ། །རྟག་ཏུ་དེའི་རང་བཞིན་ལ་རྗེས་སུ་རྟོག་གོ། །འཇིག་རྟེན་གཉིས་སུ་འཆིང་བར་བྱེད་པ་ཡང་གང་གི་ཕྱིར་བུད་མེད་དག་ཡིན་པར་གྱུར་པ་དེ་བཞིན་དུ་ཡང་རིག་ལ་གཟུགས་ཀྱི་འཁྲུལ་བར་ཡང་མི་འགྱུར་
རོ། །ཚིག་ལ་ཡང་དད་པར་མི་བྱེད་དོ། །དེ་དེ་བཞིན་དུ་ཡང་དག་པ་ཇི་ལྟ་བ་ཁོ་ན་བཞིན་དུ་སོ་སོར་རྟོག་པར་བྱེད་དོ། །དེའི་གར་དང་གླུ་དང་རྒོད་པ་དང་འགྱིང་བག་དང་རྒྱན་ཆས་ཀྱང་ཀུན་ནས་འཁྲིད་པར་མི་བྱེད་དོ། །བག་ཡོད་པ་དང་བག་ཡོད་པར་གྱུར་པའི་སྐྱེས་བུ་དེ་རྣམས་ཀྱིས་ཀྱང་གཞན་རྣམ་

པ་དེ་ལྟ་བུའི་བག་མེད་པའི་གནས་རྣམས་མི་བྱེད་དོ། །དེའི་འཁོར་ཡང་བསྲབས་པར་འགྱུར་ཏེ། གང་དག་བུད་མེད་ཀྱི་བག་མེད་པས་ཀུན་དུ་ཁྲིད་པར་མི་འགྱུར་བ་རྣམས་སོ། །དེ་ཡང་དེས་སྤོང་དུ་འཇུག་ལ་བག་ཡོད་པ་ཡང་རྗོད་པར་བྱེད་དོ། །གཞན་ཡང་བག་ཡོད་པའི་ཡོན་
ཏན་བཞི་པ་ཡོད་དེ། འདི་ཡང་གང་ཞེ་ན། འདི་ལྟ་སྟེ། བག་ཡོད་པ་ནི་ལོངས་སྤྱོད་རྣམས་ལ་མ་ཡིན། འདོད་པ་རྣམས་ལ་མ་ཡིན་ནོ། །བརྒྱ་ལ་ན་དབུགས་འབྱིན་པར་བྱེད་ཀྱི་རྟག་ཏུ་བློ་ལ་མི་བྱེད་དོ། །སེམས་ཀྱིས་རབ་ཏུ་རྟོག་པར་མི་བྱེད་དོ། །ཅི་ལྟར་འདོད་པ་དེ་དག་རྣམས་ནི་རྟག་པ་དང་
བརྟན་པ་དང་ཡིད་ཆེས་པའི་ས་ཡང་མ་ཡིན་ལ་འདི་དག་རྣམས་ནི་རྒུད་པའི་མཐར་ཐུག་པར་འགྱུར་བ་དང་ཤིན་ཏུ་མྱུར་བར་རབ་ཏུ་འཇིག་པར་འགྱུར་བའི་ཆོས་ཅན་ནོ། །དེ་བཞིན་དུ་ནད་མེད་པ་ལ་ཡང་བག་ཡོད་པ་རྣམས་ཀྱིས་ནམ་ཡང་ཡིད་ཆེས་པ་བསྐྱེད་པར་ནི་མི་བྱེད་དེ། ནད་མེད་པ་རྣམས་ཐམས་ཅད་
ཀྱང་ནད་ཀྱིས་ཟིལ་གྱིས་གནོན་ནོ། །དེ་བཞིན་དུ་ལང་ཚོ་ལ་ནམ་ཡང་ཡིད་ཆེས་པ་བསྐྱེད་པར་མི་བྱེད་དེ། ལང་ཚོ་འདི་དག་རྣམས་ཐམས་ཅད་ཀྱང་རྒ་བས་ཉེ་བར་ཟིལ་གྱིས་གནོན་པར་འགྱུར་བས་དེ་ལང་ཚོས་སྒྲུབ་པར་མི་བྱེད་དོ། །ཁེངས་པར་མི་འགྱུར་རོ། །ཇི་ལྟར་གསོན་པས་ཀྱང་སྒྲུབ་པར་
མི་བྱེད་དོ། །རངས་པར་མི་བྱེད་དོ། །དཀའ་ལས་རྣམས་ཀྱང་མི་བྱེད་དོ། །དེ་ཅིའི་ཕྱིར་ཞེ་ན། ནམས་ཀྱང་འཆི་བདག་གི་རྒྱལ་པོས་འཕྲོག་པར་བྱེད་པར་འགྱུར་བའི་ཕྱིར་རོ། །དེ་ལྟར་བག་ཡོད་པར་སྤྱོད་པ་རྣམས་ཡིད་ཆེས་པར་མི་བྱེད་དོ། །འདུས་བྱས་ཀྱི་ཆོས་རྣམས་ལ་བག་མེད་པར་སྤྱོད་པར་གྱུར་ཏ་
རེ། བག་ཡོད་པར་འགྱུར་བས་བག་ཡོད་པ་སྤྱད་པ་ལ་ཡོན་ཏན་གཞན་ཡང་ལྔ་པ་ཡོད་པ་ནི། འདི་ལྟ་སྟེ། ཐོས་པ་དང་ལྡན་པར་འགྱུར་རོ། །འཕགས་པ་རྣམས་ལ་རྗེས་སུ་སྟེན་པར་བྱེད་དོ། །ཡེ་ཤེས་ལ་མངོན་པར་དགའ་བར་འགྱུར་རོ། །དཀོན་མཆོག་གསུམ་ཁྱད་པར་དུ་བྱེད་པའི་རང་བཞིན་ཅན་དུ་འགྱུར་
རོ། །མ་ཐོས་པ་དང་ལྡན་པའི་དོན་རྣམས་རྣམ་པར་དཔྱད་པ་ལ་མཁས་པར་འགྱུར་རོ། །དེས་འཆི་བདག་གི་དུས་ཀུན་དུ་ཤེས་སོ། །སྡུག་བསྔལ་དང་འཆི་བའི་རྒྱུ་མཚན་རྣམས་རྣམ་པར་ཤེས་སོ། །དེ་ལ་ལྷ་རྣམས་ཀྱི་འཆི་འཕོ་བའི་རྒྱུ་མཚན་རྣམས་ནི་ཐོས་པའི་དོན་གྱིས་ཤེས་སོ། །སྐྱེས་བུ་འཆི་བའི་རྒྱུ་

མཚན་དང་དེ་ངན་སོང་དུ་འགྲོ་བའི་རྒྱུ་མཚན་རབ་ཏུ་འོང་བ་རྣམས་ཀྱང་ཤེས་ཏེ། ཇི་ལྟར་བདག་ངན་སོང་དུ་འགྲོ་བར་འགྱུར་རོ། །དེའི་རབ་ཏུ་བྱ་བ་རྣམས་ཀྱང་ཀུན་དུ་རིག་གོ། །དེ་ལ་ཡང་སེམས་རབ་ཏུ་དང་ངོ་། །དེའི་སེམས་བསྐྱེད་པར་གྱུར་པ་ཙམ་གྱིས་ངན་སོང་དུ་འགྲོ་བའི་རྒྱུ་མཚན་དེ་དག་ནུབ་པར་འགྱུར་རོ། །
བདེ་འགྲོའི་རྒྱུ་མཚན་ཡང་རབ་ཏུ་འབྱུང་བར་འགྱུར་རོ། །མཆོག་ཏུ་གྱུར་པའི་འབྲས་བུ་དེ་དག་རྣམས་ནི་བག་ཡོད་པ་ཡིན་ནོ། །མཆོག་ཏུ་སྡུག་བསྔལ་བར་གྱུར་པའི་འཆིང་བ་རྣམས་ཐམས་ཅད་ཀྱི་དྲུང་ན་ཡང་ལྷག་པར་གྱུར་པའི་འབྲས་བུ་ཡིན་ནོ། །དེ་དག་ནི་བག་མེད་པའི་སྐྱོན་ལྔ་དང་བག་ཡོད་
པའི་ཡོན་ཏན་ལྔ་ཡིན་ནོ། །དེ་ནས་དེའི་ཚེ་དུས་བཟངས་དེས། འཁོར་བ་འཇིག་གིས་གསུངས་པའི་ཚིགས་སུ་བཅད་པ་རྗོད་པར་བྱེད་པ། འདོད་པ་རྣམ་པར་སྤངས་པ་ཡི། །བག་ཡོད་སངས་རྒྱས་བསྔགས་པར་མཛད། །རྒ་དང་འཆི་བའི་ཁོག་ཙེ་ཡི། །བག་མེད་པ་ནི་བཙོག་པ་ཡིན། །བག་མེད་སྐྱེ་
བོ་གྲོལ་བ་མིན། །བག་མེད་སྡུག་བསྔལ་སྐལ་ལྡན་ཡིན། །བག་མེད་འཆི་བ་དེ་དག་གི། །བློ་དམན་རྣམས་ནི་གཅོད་པར་བྱེད། །བག་ཡོད་པས་ནི་དགེ་རྣམས་ཀྱི། །ལྷ་རྣམས་ཀྱི་ནི་གནས་སུ་འགྲོ། །དེ་ཕྱིར་གང་ཞིག་བག་མེད་པ། །རྗེས་སྟེན་སླར་ཡང་ལྟུང་བ་ཡིན། །བག་མེད་སྐྱེས་བུ་
ཐམས་ཅད་ནི། །དེ་ལྟར་འཁོར་བ་ལས་སྒྲོལ་མིན། །གང་གིས་ལུས་ཅན་རྣམ་བསྡམས་པའི། །བག་མེད་ཞགས་པས་ཉེར་འགྲོ་རྣམས། །དོན་མིན་དོན་དང་འདྲ་བ་དང་། །དོན་ཡང་རྟག་ཏུ་དོན་མིན་བཞིན། །བག་མེད་པ་ཡི་སྐྱེས་བུ་ནི། །ཐམས་ཅད་ཕྱིན་ཅི་ལོག་ཏུ་མཐོང་། །འཇིག་རྟེན་དོན་ཡང་མེད་པ་ལ། །
ངེས་པར་ལེགས་པ་ག་ལ་ཡོད། །མཁས་པ་བློ་ཡི་ཕ་རོལ་འགྲོས། །བག་མེད་ཀུན་དུ་རབ་མི་བསྔགས། །དེ་ཕྱིར་བག་མེད་པ་ནི་མི་ཡིས་སྟེན་མི་བྱ། །དེ་ནི་ངན་སོང་རྣམས་ཀྱི་དང་པོའི་རྩེ་མོ་ཡིན། །སྐྱེ་གནས་སྟོང་དུ་འགྲོ་བར་བྱེད་པའི་སྡུག་བསྔལ་དེ། །བརྟན་པ་སྲིད་པའི་ཕ་རོལ་མཆོག་ཏུ་འགྲོ་བས་སྤོངས། །
དེ་ལྟར་དུས་བཟངས་འདིས་ལྷ་བརྒྱ་སྟོང་དུ་མ་རྣམས་ཀྱིས་ཡོངས་སུ་བསྐོར་བར་གྱུར་པའི་མུ་སུ་ལུན་དྷ་དེའི་མདུན་དུ་ཆོས་བཤད་པར་གྱུར་ཏེ། གཞན་ཡང་ཕན་པ་ལ་རབ་ཏུ་ཞུགས་པར་གྱུར་ཅིང་ལྷ་དང་མི་རྣམས་ལ་ཕན་པར་འདོད་པའི་ཕྱིར་རོ། །གཞན་ཡང་མཁའ་ལྡིང་གི་རྒྱལ་པོ་དེ་ཉིད་ཀྱིས་མུ་སུ་ལུན་དྷ་ལ་ཆོས་ཀྱི་

མཆོག་རྣམས་སྟོན་པར་བྱེད་དོ། །ཇི་ལྟར་ལྔ་པོ་འདི་དག་རྣམས་ནི་བག་མེད་པ་སྐྱེས་པའི་གཉེན་པོར་གྱུར་པ་ལ་འདི་ལྟ་སྟེ། འདི་ན་བག་མེད་པའི་སྐྱེས་བུ་རྣམས་ནི་ཐམས་ཅད་ལས་ཁྱད་པར་དུ་སྡུག་བསྔལ་བར་འགྱུར་རོ། །དེ་བག་མེད་པའི་སྐྱོན་རྣམས་གང་དང་གང་གིས་སྡུག་བསྔལ་དང་ལྡན་པར་
འགྱུར་རོ། །དེ་སྐྱོན་དང་བཅས་པ་ཡིན་པར་ཤེས་པར་གྱུར་ནས་ཡོངས་སུ་སྤང་བར་བྱ་སྟེ། ཡོན་ཏན་དང་སྐྱོན་དག་ཤེས་པར་གྱུར་ཅིང་ཡོན་ཏན་དང་སྐྱོན་དག་མཐོང་བར་གྱུར་པ་རྣམས་ཀྱིས་དེ་ཡོངས་སུ་སྤངས་པར་གྱུར་པ་ལས་ནི་འདི་དག་དོན་མ་ཡིན་པར་མི་འགྱུར་རོ། །སྡུག་བསྔལ་བར་ཡང་མི་འགྱུར་རོ། །
མི་དགེ་བ་མངོན་པར་འཕེལ་བར་ཡང་མི་འགྱུར་རོ། །ཤེས་བཞིན་དུ་ཡང་རྒྱུ་བར་འགྱུར་རོ། །འདི་ནི་བག་མེད་པའི་གཉེན་པོར་གྱུར་པ་གཅིག་ཡིན་ནོ། །གཞན་ཡང་བག་མེད་པའི་གཉེན་པོར་གྱུར་པ་གཉིས་པ་གང་ཞེ་ན། ཡང་དག་པ་ཇི་ལྟ་བའི་དོན་མཐོང་བའོ། །ཡང་དག་པ་མཐོང་བར་གྱུར་པས་ཀྱང་
སྐྱེས་བུ་རྣམས་ཀྱིས་ཐམས་ཅད་ངེས་པར་ལེགས་པར་རྟོགས་པར་འགྱུར་ཏེ་དེ་ཁོ་ན་ཉིད་བཞིན་ཁོ་ནར་མཐོང་བར་འགྱུར་རོ། །དེ་ཁོ་ན་ཉིད་རིག་པ་དེ་ནི་བག་མེད་པའི་སྐྱོན་རྣམས་ཤེས་པར་གྱུར་ནས་བག་མེད་པས་ཀུན་དུ་བཀྲི་བར་མི་ནུས་སོ། །གཞན་ཡང་བག་མེད་པའི་གཉེན་པོ་གསུམ་པར་གྱུར་པ་རྣམས་འདི་ལྟ་
སྟེ། བག་ཡོད་པ་སྟེན་པར་བྱེད་པ་གང་ཡིན་པ་དེ་དག་རྣམས་ལ་སྟེན་པར་བྱེད་དོ། །དེ་དག་རྣམས་ཀྱི་དྲུང་ནས་ཚུལ་ཁྲིམས་སྲུང་བར་བྱེད་དོ། །སྤྱོད་པ་རྣམས་རྣམ་པར་འགྲང་བར་བྱེད་དོ། །ལུས་ངག་གི་བྱ་བ་རྣམས་ཀྱང་སློབ་པར་བྱེད་དོ། །ཚུལ་ཁྲིམས་དེ་དང་མཉམ་པ་ཡོད་པ་རྣམས་དང་ལྷན་ཅིག་ཏུ་གནས་པར་
བྱེད་དོ། །བག་མེད་པ་དེ་དག་ཉིད་ཀྱི་སྐྱོན་རྣམས་ཤེས་པར་གྱུར་ནས་ཡོངས་སུ་སྤོང་བར་བྱེད་པ་རྣམས་ཀྱི་ནི་མཐར་འབྲལ་བར་འགྱུར་རོ། །གཞན་ཡང་བག་མེད་པའི་གཉེན་པོར་གྱུར་པ་བཞི་པ་འདི་དག་ཀྱང་གང་ཞེ་ན་འདི་ལྟ་སྟེ། ཡེ་ཤེས་དང་ཚུལ་ཁྲིམས་དང་ལྡན་པར་གྱུར་པའི་སྐྱེས་བུ་རྣམས་ནི་རྟག་ཏུ་ཡང་དེ་
ཉིད་ལ་མངོན་པར་དགའ་བར་གྱུར་པས་བག་མེད་པ་རབ་ཏུ་འཇོམས་སོ། །བག་ཡོད་པ་རབ་ཏུ་སྟེན་པར་བྱེད་དོ། །བག་མེད་པ་རབ་ཏུ་བཅོམ་པར་གྱུར་པ་དེའི་བདེ་བ་རྣམས་ཉེ་བར་འགྱུར་རོ། །སྡུག་བསྔལ་རིང་དུ་བྱས་པར་འགྱུར་རོ། །གཞན་ཡང་དེས་བག་མེད་པའི་སྐྱོན་རྣམས་མཐོང་བར་གྱུར་ཅིང་དེ་དེ་ཁོ་ན་

བཞིན་དུ་བག་མེད་པ་རྣམས་སྤོང་བར་བྱེད་དོ། །འདི་ནི་བག་མེད་པའི་གཉེན་པོ་བཞི་པ་ཡིན་ནོ། །གཞན་ཡང་བག་མེད་པའི་གཉེན་པོ་ལྔ་པ་འདི་ལྟ་སྟེ། སྐྱེས་བུ་བག་མེད་པའི་ཉེས་དམིགས་ཅན་རྣམས་ལ་རྒྱལ་པོའམ་རྒྱལ་པོའི་བློན་པོ་རྣམས་ཀྱིས་ཀྱང་རུང་སྟེ་ཆད་པས་གཅོད་པར་བྱེད་པ་རྣམས་ཇི་ལྟ་
བ་བཞིན་དུ་མཐོང་བའོ། །དེའི་སྲོག་གི་ཆད་པའམ་དེའི་རང་གི་ཐམས་ཅད་འཕྲོག་པར་བྱེད་པའི་ཆད་པའམ་དེའི་ལུས་སྒྱུར་བར་བྱེད་པའམ་དེའི་ལག་པ་གཅོད་པར་བྱེད་པའམ་རྣམ་པ་དེ་ལྟ་བུའི་ཆད་པ་རྣམས་བག་མེད་པ་ལས་འབྱུང་བར་གྱུར་པ་གང་གི་ཚེ་མཐོང་བ་དེའི་ཚེ་དེ་ལས་གཞན་པའི་བག་མེད་
པ་རྣམས་ལ་ཡང་འཇིགས་པར་འགྱུར་རོ། །དེ་འཇིགས་པ་དང་བཅས་པར་གྱུར་པ་ཉིད་ཀྱིས་དྲི་མ་ཅན་བག་མེད་པ་རྣམས་ཡོངས་སུ་སྤོང་བར་བྱེད་དོ། །དེ་བཞིན་དུ་བག་མེད་པ་རྣམས་རབ་ཏུ་འཇོམས་པར་ཡང་བྱེད་དོ། །བག་ཡོད་པ་ཡང་ཀུན་ནས་སྟེན་པར་བྱེད་དོ། །དེ་ལས་རྗེས་སུ་དཔགས་ནས་
དེ་སྡིག་པ་རྣམས་མི་བྱེད་དེ་བདག་དམྱལ་བར་སྐྱེ་བར་མ་གྱུར་ཅིག་སྙམ་དུ་བསམས་པའི་ཕྱིར་རོ། །བག་མེད་པ་སྟེན་པར་གྱུར་པའི་ལྷ་དེ་དག་རྣམས་ནི་སྡིག་པ་བྱེད་དོ། །འདི་ནི་བག་མེད་པའི་གཉེན་པོ་ལྔ་པའོ། །དེ་ལྟར་བག་མེད་པ་དེ་དག་རྣམས་ནི་ལྷ་རྣམས་ལ་མཛེས་པ་མ་ཡིན་ལ་མི་རྣམས་ལ་ཡང་མ་ཡིན་
ནོ། །མདོ་དེ་དག་ཐོས་ནས་ཀྱང་ལྷ་མང་པོ་རྣམས་མཆོག་ཏུ་ཡིད་བྱུང་བར་གྱུར་ནས་བག་མེད་པ་ཡོངས་སུ་སྤོང་བར་བྱེད་དོ། །མུ་སུ་ལུན་དྷས་ཀྱང་མཁའ་ལྡིང་གི་རྒྱལ་པོ་དེས་བཤད་པ་དེ་རྣམས་ལ་མངོན་པར་དགའ་ཞིང་རྗེས་སུ་ཡི་རང་བར་ཡང་གྱུར་ནས་སླར་ཡང་ལྷའི་ཚོགས་དེ་དག་རྣམས་ཉིད་དང་ཇི་ལྟར་
འོངས་པར་གྱུར་པ་ལྟར་ནམ་མཁའ་ལ་འཕགས་ཏེ་དོང་ངོ་། །དེ་དག་རྣམས་ལས་ཀྱང་གཞན་དུ་གྱུར་པའི་ལྷ་ལྷག་མ་རྣམས་ཁ་ཅིག་ནི་རྣམ་པར་ཡངས་པ་དེ་ཉིད་ཀྱི་ནང་ན་རྩེད་མོ་རྩེ་བར་བྱེད་དོ། །ཁ་ཅིག་ནི་ཇི་ལྟར་འོངས་པར་གྱུར་པ་དེ་བཞིན་དུ་སླར་ཡང་ནགས་དང་ཉེ་བའི་ནགས་རྣམས་སུ་ཞུགས་པར་གྱུར་
ཅིང་ལྷ་དག་རབ་ཏུ་རྩེ་བར་ཡང་བྱེད་དེ། དེ་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པར་གྱུར་པའི་ལེགས་པར་བྱས་པའི་ལས་རྣམས་ཟད་པར་མ་གྱུར་པའི་དུས་དེ་སྲིད་དུ་ལྷའི་རིགས་དེར་རྩེ་བར་བྱེད་ཅིང་དགའ་བར་ཡང་བྱེད་དོ། །དེ་དེ་དག་རྣམས་ཟད་པར་གྱུར་ཅིང་ལྷའི་རིགས་དེ་ལས་ཤི་འཕོས་

པར་གྱུར་ནས་ཀྱང་ཇི་ལྟར་ལས་ཀྱིས་ཉེ་བར་འགྲོ་བ་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེ་བར་འགྱུར་རོ། །གལ་ཏེ་ན་འགའ་ཞིག་མི་རྣམས་དང་སྐལ་བ་འཐུན་པར་གྱུར་པ་མིར་སྐྱེས་ན། དེ་མཆོག་ཏུ་སྐྱིད་པ་ཉིད་དུ་འགྱུར་ཏེ། ལས་དེའི་རྒྱུ་འཐུན་པས་ཡིད་གཞུངས་པ་དང་ཤེས་རབ་
ཀྱིས་འཚོ་བ་དང་རྒྱལ་པོ་མངོན་པར་འདོད་པ་དང་ཤིན་ཏུ་ཕུན་སུམ་ཚོགས་པར་འགྱུར་རོ། །འགྲོ་བ་དང་ཡང་དག་པར་ལྡན་པའི་ས་རྫོགས་སོ།། །།གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་འཐབ་བྲལ་བའི་ལྷ་རྣམས་ཀྱི་ས་ལ་ཀུན་དུ་ལྟ་བར་བྱེད་དོ། །ཇི་ལྟར་ཡོད་པའི་འཐབ་
བྲལ་བ་རྣམས་ཀྱིས་འོད་ཟེར་འཕྲོ་བ་ཞེས་བྱ་བ་དེས་ཐོས་པ་ལས་བྱུང་བའི་ཤེས་རབ་ཀྱིས་མཐོང་ངོ་། །དེར་ལས་གང་གིས་སེམས་ཅན་རྣམས་སྐྱེ་བར་འགྱུར་བ་ཡང་དེས་མཐོང་བར་གྱུར་པ་ནི་སྐྱེས་བུ་དམ་པ་གང་གིས་ཐོས་པའི་དོན་དང་ལྡན་ཞིང་ཚུལ་ཁྲིམས་དང་ལྡན་པར་འགྱུར་ཏེ། མཆོག་ཏུ་གྱུར་པའི་ཡང་དག་
པའི་ལྟ་བ་དང་ལྡན་པ་གང་གིས་ཕ་རོལ་ལ་ཡིད་གདུང་བར་མི་བྱེད་པ་དང་དྲང་པོ་དང་ཡིད་དྲང་པོར་གྱུར་པས་སྲོག་གཅོད་པ་དང་མ་བྱིན་པར་ལེན་པ་ཡང་སྤངས་པར་གྱུར་པ་རྣམས་ནི་སྔར་བཞིན་ནོ། །འདོད་པ་ལ་ལོག་པར་གཡེམ་པ་ཡང་རྣམ་པར་སྤངས་པར་གྱུར་པའོ། །དེ་ལྟར་ཡང་ཅུང་ཟད་ཅིག་ཀྱང་བུད་མེད་དག་
ལ་ཚུལ་བཞིན་མ་ཡིན་པ་ཡིད་ལ་བྱེད་པར་གྱུར་པས་ལྟ་བར་མི་བྱེད་དེ། འདོད་པ་ལ་ལོག་པར་གཡེམ་པར་གྱུར་པའི་འཇིགས་པ་རྣམས་ཀྱིས་འཇིགས་པའི་ཕྱིར་རོ། །ཤིན་ཏུ་རྣམ་པར་དག་པའི་ལས་ཤིན་ཏུ་རྣམ་པར་དག་པའི་འཚོ་བ་ལས་ཀྱི་མཐའ་རྣམས་ཤིན་ཏུ་རྣམ་པར་དག་པར་གྱུར་པ། དེ་ལུས་ཞིག་ནས་
མཐོ་རིས་བདེ་འགྲོའི་འཇིག་རྟེན་འོད་ཟེར་འཕྲོ་བ་ཅན་གྱི་སར་སྐྱེ་བར་འགྱུར་རོ། །དེ་ལ་སྐྱེས་པར་གྱུར་པ་ནི་ལྷ་རྫས་ཀྱི་ཡུལ་རྣམས་ལ་ལོངས་སྤྱོད་པར་གྱུར་པའི་བུད་མེད་བརྒྱ་སྟོང་གིས་ཡོངས་སུ་བསྐོར་བ་ལས་ཀྱི་མཐའ་རྣམས་ཡོངས་སུ་དག་པ། འདོད་པའི་ཡོན་ཏན་ལྔའི་རྒྱགས་པས་དབང་པོ་དྲུག་གི་དབང་དུ་
སོང་བར་གྱུར་ནས་དེ་ནགས་དང་ཉེ་བའི་ནགས་ཀུན་དུ་བལྟ་བ་ལ་བག་མེད་པ་རྣམས་ཇི་ལྟ་ཇི་ལྟར་ལྷ་དེས་ལྷ་རྫས་ཀྱི་སྲེད་པ་དུ་མ་རྣམས་རྣམ་པ་དུ་མར་མཐོང་བར་གྱུར་པ་དེ་ལྟར་བག་མེད་པར་རྒྱུ་བར་འགྱུར་རོ། །འདི་ལྟར་གྱུར་པ་ཡིན་ཏེ་ལྷ་དེ་ལྷ་རྫས་ཀྱི་ཡུལ་དེ་དག་རྣམས་ཉིད་སྒྲུབ་པ་ལ་ཆེད་ཆེ་བ་ཡོངས་སུ་སྒྲུབ་པ་ལྷག་

པར་འགྱུར་རོ། །དེ་དགའ་བར་གྱུར་པའི་ས་གཞི་མཉམ་པ་མནན་ན་ནེམ་པ་བཏེག་ན་འཕར་བ་འཇམ་པོར་གྱུར་པ་རིན་པོ་ཆེ་བདུན་དང་ལྡན་པས་ཤིན་ཏུ་རྣམ་པར་ཕྱེ་བའི་ས་གཞི་ཆ་མཆོག་ཏུ་དགའ་བར་གྱུར་པ་ལ་རབ་ཏུ་འཇུག་པར་བྱེད་དོ། །ས་གཞི་དེ་ནི་རྣམ་པ་དེ་ལྟ་བུ་རྣམས་ཡིན་ཏེ། ཤིང་གང་དག་ལ་ཞོན་པར་གྱུར་པ་དེ་དག་
རྣམས་ཀྱང་དེ་ཁོ་ན་བཞིན་དུ་རེག་པར་བཟོད་པར་འགྱུར་རོ། །མཆོག་ཏུ་མཉེན་པར་གྱུར་པ་སྦྱངས་པ་འཇམ་པོའི་གསེར་གྱི་འདབ་མ་དང་འབྲས་བུ་རྣམས་ཇི་ལྟར་འདོད་པར་གྱུར་པའི་རོ་དང་དྲི་དང་ཁ་དོག་དང་ལྡན་པས་ཤིན་ཏུ་ཡང་ལྷ་རྣམས་ཀྱི་ཟས་ཀྱི་རྒྱུར་འགྱུར་རོ། །དེ་ལྟར་ལྷ་དེ་དག་རྣམས་ཉིད་འདི་ལྟར་འགྱུར་ཏེ། གང་
གི་ཚེ་བདག་ཅག་རྣམས་འབྲས་བུ་འདི་དག་རྣམས་ལས་མཆོག་ཏུ་རོ་དང་དྲི་དང་ཁ་དོག་དང་རེག་བྱ་རྣམས་ཕུན་སུམ་ཚོགས་པའི་བཏུང་བ་འབྲས་བུ་དེ་དག་ལས་འབབ་པར་གྱུར་མོད། དེ་ནས་སེམས་བསྐྱེད་པ་ཙམ་ཉིད་ན་ལྷ་དེ་རྣམས་ཉིད་ཀྱི་དྲུང་དུ་འབྲས་བུ་བཟང་པོ་དེ་དག་ལས་བཏུང་བ་སྔ་ན་མེད་པ་རོ་དང་ཁ་དོག་གི་
ཡོན་ཏན་དང་ལྡན་པ་རབ་ཏུ་འབབ་པའོ། །དེ་ཡང་ལྷས་ནོར་བུའི་རང་བཞིན་གྱི་སྣོད་ལེགས་པར་བཞག་ནས་ལྷ་མོ་དང་བཅས་པ་རྣམས་འཐུང་བར་བྱེད་དོ། །དེ་དག་རྣམས་ཀྱི་བཏུང་བ་དེ་ཡང་དམན་པ་དང་བར་མ་དང་མཆོག་ཏུ་གྱུར་པའི་ཁ་དོག་དང་རོ་དང་དྲིར་འགྱུར་ཏེ། ལས་དུ་མ་རྣམས་དང་འདྲ་བ་ཡིན་པས་ཇི་
ལྟར་ལེགས་པར་བྱས་པར་གྱུར་པའི་ལས་རྣམས་ནི་རོས་ཀྱང་སོ་སོར་སྟོན་པར་བྱེད་པ་ལྟ་བུར་འགྱུར་རོ། །དེ་ནས་ལྷ་དེ་དག་རྣམས་བཏུང་བ་དེ་འཐུངས་པར་གྱུར་ནས་གཞན་ཡང་རྒྱགས་པ་དུ་མས་རྒྱུ་བར་བྱེད་ཅིང་བག་མེད་པར་རྒྱུ་བས་བསྲེགས་ནས་ནགས་དང་ཉེ་བའི་ནགས་རྣམས་ལྟ་བའི་གཡོ་འགུལ་གྱིས་བསྲེགས་
པས་རབ་ཏུ་གར་བྱེད་པ་དང་གླུ་དང་གར་དང་དགོད་པ་དང་ཕན་ཚུན་དུ་ལྷན་ཅིག་ཏུ་སྐྱོད་པར་བྱེད་པས་གང་ན་ནགས་དང་ཉེ་བའི་ནགས་རྣམས་ཡོད་པ་དེར་ཉེ་བར་འགྲོ་བར་བྱེད་དེ་བལྟ་བར་བྱ་བའི་དོན་དུའོ། །དེ་གང་ཁོ་ན་ནས་ཇི་ལྟར་འགྲོ་བར་བྱེད་པ་དེས་དེ་དེ་ཁོ་ན་ནས་རྣམ་པ་དུ་མར་དཔེ་མེད་པའི་ལྷ་རྫས་ཀྱི་གཟུགས་
རྣམས་མཐོང་བར་འགྱུར་རོ། །སོ་སོར་སྟོན་པར་བྱེད་པ་ལྟ་བུར་གྱུར་པའི་རོ་ཡང་མྱོང་བར་བྱེད་དོ། །དེ་ལ་དེས་རྣམ་པ་དུ་མ་དང་རྣམ་པར་རྟོག་པ་དུ་མར་གྱུར་པའི་རོ་རྣམས་མྱོང་བར་བྱེད་དོ། །དེ་བཞིན་དུ་ཡིད་འཕྲོག་པར་བྱེད་པ་གང་ཡིན་པ་ཁོ་ནའི་དྲི་རྣམས་སྣོམ་པར་བྱེད་དོ། །དེ་ལ་དེས་རྣམ་པ་དུ་མ་དང་རྣམ་པར་

རྟོག་པ་དུ་མར་གྱུར་པ་རྣམས་སྣོམ་པར་བྱེད་དོ། །ཡིད་ཀྱི་རྗེས་སུ་འཐུན་པའི་རེག་བྱ་འདོད་པར་གྱུར་པ་རྣམས་གང་དག་ཁོ་ན་ཡིན་པ་ལྷ་རྣམས་ཀྱིས་རེག་བྱ་རེག་པར་འདོད་པ་དེ་ཉིད་རྣམ་པ་དུ་མ་དང་མཆོག་ཏུ་བདེ་བའི་རྗེས་སུ་འཐུན་པ་རྣམས་ལ་རིག་པར་བྱེད་དོ། །ལྷ་སྒྲ་གང་དང་གང་དག་ཉན་པར་འདོད་
པ་དེ་ཉིད་རྣམ་པར་རྟོག་པ་དུ་མ་དང་མཉམ་པར་དགའ་བའི་སྒྲ་དུ་མ་རྣམས་ཀྱིས་ཡིད་ཀྱི་རྗེས་སུ་འཐུན་པར་གྱུར་པའི་རྣམ་པར་རྟོག་པ་དུ་མས་ཉན་པར་བྱེད་དོ། །ལྷ་མཆོག་ཏུ་དགེ་བའི་ཚུལ་ཁྲིམས་ཀྱི་འབྲས་བུ་ལ་ཉེ་བར་ལོངས་སྤྱོད་པར་གྱུར་པས། ཡོན་ཏན་རྣམས་ཕུན་སུམ་ཚོགས་པར་གྱུར་པའི་ཡུལ་ལྔ་པོ་
རྣམས་ལ་རྣམ་པར་སྤྱོད་དོ། །དེ་དག་དེ་ལྟར་རྣམ་པར་རྒྱུ་ཞིང་རྩེད་མོ་རྩེ་བ་ལ་བློས་ལྷུང་བར་གྱུར་པས་དུས་ཡུན་རིང་པོར་ཡུལ་གྱི་བདེ་བས་ངོམས་པ་མེད་པ་རྣམས་ཀྱིས། དེ་ནས་མངོན་པར་དགའ་བའི་ནགས་ཞེས་བྱ་བའི་ནགས་མཐོང་བར་གྱུར་པ་ལ་ཤིང་ལྗོན་པ་བརྒྱ་སྟོང་དུ་མ་དང་ལྡན་པ་ཉེ་འཁོར་ན་ཡང་ཉེ་
བའི་ནགས་ཀྱིས་ཀུན་དུ་བརྒྱན་པའོ། །མངོན་པར་དགའ་བའི་ནགས་དེ་ན་ཡང་དགའ་བ་འདི་དག་རྣམས་ཡོད་དེ། དེ་དག་རྣམས་ནི་ཇི་ལྟར་སོ་སོ་ཐ་དད་པར་རྩ་བ་དང་ཡལ་ག་དང་ཡལ་ག་ཕྲ་མོ་དག་དང་ལྡན་པར་གྱུར་པ་ཡིན་ལ་དེ་ལ་ངོས་གཅིག་གི་ཉེ་འཁོར་ཀུན་ནས་མཆོག་ཏུ་དཀར་བ་དང་། མཆོག་
ཏུ་དཀར་བར་སྣང་བར་འགྱུར་བས་གངས་ཀྱི་མདོག་དང་ཞད་འདྲ་བའི་ནགས་ནི་དངུལ་གྱི་ལྗོན་ཤིང་གི་ནགས་ཞེས་བྱ་བ་ཡིན་ཏེ། ཉེ་འཁོར་དེ་ནི་དེ་བཞིན་དུ་ཀུན་ཏུ་སྣང་བར་བྱེད་དོ། །ཇི་ལྟར་འཛམ་བུའི་གླིང་དུ་ཟླ་བ་རྒྱས་པར་གྱུར་པ་དེ་བཞིན་དུ་འོད་ཟེར་རྣམས་ཡིན་ནོ། །ནགས་དེར་གཏོགས་པའི་ཤིང་རེ་རེའི་འོད་ཀྱང་དེ་
བཞིན་དུ་འགྱུར་ཏེ། ཡུལ་ཐམས་ཅད་ལས་ཀྱང་མཆོག་ཏུ་དགའ་བར་གྱུར་པ་དེས་མིག་སྔར་དགའ་བར་གྱུར་པའི་འོད་ཀྱིས་སྡུག་པ་འཛིན་པ་སྐྱེད་པའོ། །གཞན་ཡང་ལོགས་གཞན་ནི་ཀར་ཀེ་ཏ་ན་བཞིན་དུ་ཉེ་བར་མཛེས་པར་གྱུར་པ་སྟེ། མཆོག་ཏུ་དམར་བའི་ཚོགས་སུ་གྱུར་པ་འོད་དམར་པོ་རྣམས་ཀྱིས་རྣམ་པར་
བརྒྱན་པ་འདབ་མ་དམར་པོ་རྣམས་ལ་བྱ་དམར་པོའི་ཚོགས་ཀྱིས་ཀུན་དུ་བརྗོད་པར་གྱུར་པས་མངོན་པར་དགའ་ཞིང་རྣམ་པར་སྣང་སྟེ་རྣམ་པར་རྟོག་པ་དུ་མར་གྱུར་པ་རྣམས་ཐམས་ཅད་ལས་མཆོག་ཏུ་དམར་བར་སྣང་བས་དམར་བར་གྱུར་པའི་ནགས་དེས་ནམ་མཁའ་རྣམ་པར་གསལ་བར་བྱེད་དོ། །རྟག་ཏུ་མངོན་པར་དགའ་

བའི་ལོགས་གཞན་གསུམ་པ་དེའི་ལོགས་ཀྱི་ཉེ་འཁོར་ན་ཉེ་བའི་ནགས་དག་དང་ལྡན་པ་ཁ་དོག་གཅིག་ཏུ་གྱུར་པས་ཀྱང་ཤིན་ཏུ་ཁྱད་པར་དུ་འབར་བར་བྱེད་པར་གྱུར་པ་ནི་མཐིང་ག་རབ་ཏུ་དང་བའི་མདོག་དང་ལྡན་པས་ཉེ་འཁོར་ཀུན་དུ་འོད་ཟེར་གྱིས་སྣང་བར་བྱེད་དོ། །དེའི་འོད་རྣམས་ཀྱིས་ཀྱང་དེ་ལས་གཞན་པའི་ནམ་
མཁའི་དཀྱིལ་རྣམས་ཀྱང་དེ་བཞིན་དུ་སྔོན་པོས་ཤིན་ཏུ་བར་ཡང་མཛེས་སོ། །འཛམ་བུ་གླིང་པའི་ནམ་མཁར་ཇི་ལྟ་བ་བཞིན་དུ་བཻ་ཌཱུརྱ་དེའི་འོད་རྣམས་ཀྱིས་དེ་དག་རྣམས་མཛེས་པར་བྱེད་དོ། །རྟག་ཏུ་མངོན་པར་དགའ་བའི་ནགས་དེ་ན་ཕལ་ཆེ་བ་ཉིད་དུ་གཞན་ཡོད་པ་ནི་མ་ཡིན་གྱི་ཉེ་བའི་ནགས་ཤེལ་གྱི་རང་
བཞིན་དུ་གྱུར་པ་ཉེ་འཁོར་ན་མཆོག་ཏུ་དང་བར་གྱུར་པའི་འོད་རྣམས་ཀྱིས་རྣམ་པར་སྣང་བར་བྱེད་དོ། །རྩ་བ་དང་འདབ་མ་དང་ཡལ་ག་དང་ཡལ་ག་ཕྲ་མོ་དང་ལྡན་པས་ཆེན་པོར་གྱུར་པ་ཆུ་ཀླུང་དང་འབབ་ཆུ་དང་རྫིང་བུ་ཕུན་སུམ་ཚོགས་པ་དུ་མ་དང་ལྡན་པར་གྱུར་པའོ། །ནགས་ཆེན་པོ་དེ་ཉིད་ཀྱི་ལོགས་གཞན་ལ་ཡང་
ནགས་རྣམ་པར་སྣང་བར་བྱེད་པ་ནི་ཨིན་དྲ་ནཱི་ལའི་ལྗོན་ཤིང་གི་ནགས་ཡིན་ཏེ། རྩ་བ་དང་ཡལ་ག་དང་འདབ་མ་དང་ཟེ་བ་དང་ལྡན་པར་གྱུར་པ་ཉེ་འཁོར་རྣམས་ནི་མཆོག་ཏུ་སྔོ་བ་དང་ལྡན་པས་ཡིད་འཕྲོག་པར་གྱུར་པའི་འཁྲི་ཤིང་གི་ཤིང་རྣམས་དང་ལྡན་པ་ལ་རྣམ་པ་སྣ་ཚོགས་པར་ཡིད་འཕྲོག་པར་བྱེད་པའི་བདེ་བའི་སྒྲ་
དང་ལྡན་པར་གྱུར་པའི་བྱ་རྣམས་ཀྱིས་གང་བ། པད་མའི་རྫིང་བུ་རྣམ་པ་དུ་མ་དག་གིས་ཀྱང་ཉེ་བར་མཛེས་པར་གྱུར་པའི་ཉེ་བའི་ནགས་རྣམས་ཀྱི་རྣམ་པར་སྣང་བར་བྱེད་དོ། །དེ་ན་འོད་ཟེར་འཕྲོ་བའི་ལྷ་དེ་རང་གིས་ལས་རྣམ་པར་འཕྲོ་བའི་འོད་ཀྱིས་ཀུན་ནས་བརྒྱན་པའི་ལུས་ཅན་རྣམས་གང་ན་རྟག་ཏུ་མངོན་པར་
དགའ་བའི་ནགས་ཡོད་པ་དེར་ཉེ་བར་ལེགས་པར་འགྲོ་བར་བྱེད་ལ། བལྟ་བར་འདོད་པས་དང་རྩེ་བར་འདོད་པའི་ཕྱིར་ཏེ། ནགས་དང་ཉེ་བའི་ནགས་དེ་དག་རྣམས་སུ་རྩེད་མོས་རྒྱུ་བར་འདོད་པ་རྣམས་སྲེད་པའི་རྒྱན་རྒྱུན་གྱིས་ཀུན་ནས་བཅིངས་ཤིང་འདོད་པའི་ཡོན་ཏན་ལྔས་ངོམས་པ་མེད་པས་ཀུན་ནས་
དྲངས་ནས་ལྷ་དེ་སླར་ཡང་ཀུན་དུ་དགའ་བར་གྱུར་པ་དང་རྩེ་བར་གྱུར་པས་གང་ན་རྟག་ཏུ་མངོན་པར་དགའ་བའི་ནགས་ཞེས་བྱ་བའི་མིང་ཅན་དེར་དེ་ཉེ་བར་འགྲོ་བར་བྱེད་དོ། །ནགས་དེའི་ནང་ན་ཡང་ཐམས་ཅད་རྣམ་པར་བཀྲ་བར་གྱུར་པ་སྟེ། རྣམ་པ་སྣ་ཚོགས་པའི་ཁ་དོག་གི་མེ་ཏོག་དུ་མ་རྣམས་

དང་ལྡན་པ་དང་འབྲས་བུས་གང་བར་གྱུར་པའི་ནགས་དེ་ཡང་ལྗོན་ཤིང་མཆོག་ཏུ་དྲི་ཞིམ་པ་དང་ལྡན་པ་རྣམས་ཀྱིས་ཁྱབ་པར་གྱུར་པའོ། །བུང་བ་རྣམས་འབབ་པར་གྱུར་པས་ཀྱང་མེ་ཏོག་གི་འཁྲི་ཤིང་རྣམས་མངོན་པར་ཁྱབ་པ་དང་རྟག་ཏུ་ཡིད་འཕྲོག་པར་བྱེད་པའི་བྱའི་ཚོགས་དག་
གིས་ཀྱང་བསྟེན་པར་གྱུར་པའི་འཁྲི་ཤིང་ཀུན་ནས་དུད་པ་རྣམས་ཀྱིས་ཉེ་བར་མཛེས་པ་དང་འོད་ཟེར་གྱི་ཕྲེང་བ་ཀུན་དུ་འདྲེས་པར་གྱུར་པ་འབབ་ཆུ་དང་ཆུ་གཤོར་དང་རྫིང་བུ་དང་ཁང་བུ་དང་ཆུ་ཚག་ཚིག་དང་ཤིང་གི་ཚང་ཚིང་དང་འཁྲི་ཤིང་གི་ཁང་པ་དང་མེ་ཏོག་གི་འབྱུང་གནས་རྣམས་ཀྱིས་ཉེ་བར་མཛེས་
པར་གྱུར་པ་སྟེ། རྣམ་པར་རྟོག་པ་དུ་མས་ནགས་ཀྱི་རྒྱལ་པོ་རྣམ་པར་བཀྲ་བ་འཁྲི་ཤིང་ཀུན་ནས་འཁྲིས་པས་དགའ་བའི་ས་གཞི་ཤིན་ཏུ་དགའ་བར་གྱུར་པས་ཤིན་ཏུ་ཡང་རྣམ་པར་སྣང་ངོ་། །ལྷའི་ཚོགས་གཞན་དག་བརྒྱ་ཕྲག་རྣམས་ཀྱིས་ཀྱང་ལན་ཅིག་མ་ཡིན་པར་བསྟེན་པར་གྱུར་པ་འཁྲི་ཤིང་གི་
ཁང་པ་དང་པད་མའི་རྫིང་བུ་དང་། ཆུ་ཀླུང་གི་ངོས་དང་། འབབ་ཆུ་དང་སྨན་དང་ལྗོངས་དང་། ལྗོན་ཤིང་གི་ཚང་ཚིང་རྣམས་སྟེན་པར་གྱུར་པས་ཆེས་དགའ་བར་གྱུར་པ་གླུ་དང་། གར་དང་དགོད་པ་དང་འགྱིང་བ་དང་། རྒྱན་ཆའི་སྒྲས་ཡིད་འཕྲོག་པར་གྱུར་པས་རབ་ཏུ་གླུ་ལེན་པ་བཞིན་དུ་ནགས་དེ་ཉེ་
བར་རྣམ་པར་སྣང་ངོ་། །བདེ་བའི་དོན་དུ་ནགས་ཀྱི་མེ་ཏོག་རྣམས་རབ་ཏུ་གཡོ་བར་གྱུར་པ་ནི་རླུང་ལེགས་པར་རབ་ཏུ་གཡོ་བས་མེ་ཏོག་གི་རྒྱན་རྒྱུན་རྣམས་འཕྱང་ཞིང་རབ་ཏུ་སྐྱོད་པར་བྱེད་པར་གྱུར་པ་རྣམས་ནི་རབ་ཏུ་གར་བྱེད་པ་བཞིན་དུ་ནགས་དེ་དག་རྣམས་ཐམས་ཅད་ཆེས་ལྷག་པར་རྣམ་པར་སྣང་བར་
གྱུར་པས་ལྷམ་མེའོ། །དེ་ནས་ལྷ་དེ་དག་རྣམས་ནགས་དེར་ཞུགས་པར་གྱུར་པ་དང་། ཡིད་ཤིན་ཏུ་ངོ་མཚར་ཞིང་ཡིད་ཆེས་རབ་ཏུ་རངས་པར་ཡང་གྱུར་ནས་ཕྱིར་ཞིང་ཉིད་ཀྱང་ཀུན་དུ་རྩོམ་པ་ལྟ་བུར་གྱུར་པའི་ཡིད་ཀྱིས་ཕན་ཚུན་གྲོགས་བྱས་པར་གྱུར་ནས་རྒྱགས་པ་ལ་དོན་གཅིག་པ་རྣམས་གར་བྱེད་
དོ། །དགོད་པར་བྱེད་དོ། །གླུ་ལེན་པར་བྱེད་དོ། །རྟག་ཏུ་ཡང་ཡུལ་རྣམས་ལ་ཕྱོགས་པར་གྱུར་པའི་ཡིད་དང་བག་མེད་པ་ལ་འགྲོ་བར་བྱེད་པའི་ཡིད་ཀྱིས་ནགས་ཀྱི་གསེབ་རྣམས་སུ་རྟག་ཏུ་ལྷ་མོ་རྣམས་དང་རྩེ་བར་བྱེད་དོ། །དེ་དེ་ལྟར་རྩེ་བར་གྱུར་པས་ནགས་ནས་ནགས་རྣམས་སུ་དགའ་

བར་གྱུར་པ་ལས་གལ་ཏེ་ཤེད་ན་མན་དཱ་ར་བའི་ཚལ་དུ་ཕྱིན་ཏེ། རིན་པོ་ཆེ་བདུན་གྱིས་ཉེ་བར་སྤྲས་པར་གྱུར་པའི་བཅུད་དུ་གྱུར་ཅིང་སྙིང་པོར་གྱུར་པ་ནགས་དེའི་རྒྱལ་པོ་ལྟ་བུར་གྱུར་པ། ཉི་མ་བརྒྱ་བས་ལྷག་པའི་འོད་ཟེར་རྣམས་ཀྱིས་རྣམ་པར་མཛེས་པར་གྱུར་པའི་པད་མའི་རྫིང་བུའི་དབུས་སུ་འགྲོ་བར་བྱེད་དེ། དེ་ནས་
ཡང་མན་དཱ་ར་བའི་ཤིང་ལྗོན་པ་ལ་རྣམ་པར་བཀྲ་བ་ཞེས་བྱ་བའི་རྨ་བྱའི་རྒྱལ་པོ་རབ་ཏུ་གནས་སོ། །ཐིག་ལེ་བདུན་གྱིས་རྣམ་པར་བཀྲ་བར་གྱུར་པའི་སྒྲོ་མགྲིན་པའི་དབྱངས་ཤིན་ཏུ་སྙན་པ་དང་ལྡན་པས་ནགས་མ་ལུས་པ་རྣམས་གང་བར་བྱེད་དེ། བག་མེད་པའི་ལྷ་རྣམས་ཀྱི་བག་མེད་པ་གདུལ་བར་བྱ་བའི་དོན་དུ་
སྨོན་ལམ་གྱི་དབང་གིས་བྱང་ཆུབ་སེམས་དཔའ་དེར་སྐྱེས་པ་ཡིན་ཏེ། ལྷ་དེ་དག་རྣམས་ནི་ཡུལ་ལྔའི་མེ་རྣམས་ཀྱི་དབུས་སུ་སོང་བའི་ཕྱིར་ན་འདོད་ཆགས་ཀྱི་མེས་འདི་ན་སྲེག་པར་གྱུར་པ་རྣམས་ཀུན་དུ་མངོན་པར་མཐོང་ནས། ལྗོན་ཤིང་གི་ཡལ་གའི་བར་དུ་སོང་ནས་རབ་ཏུ་བརྟན་པའི་འགྲོས་ཀྱིས་རྗེས་སུ་
ཐུགས་བརྩེ་བར་གྱུར་པས་ལྷ་དེ་དག་ལ་འདི་སྐད་ཅེས་སྨྲས་སོ། །ལྷ་འདི་དག་རྣམས་ནི་ངེས་པ་ཁོ་ནར་ཤིན་ཏུ་བག་མེད་པ་རྣམས་ཀྱི་ཡང་མཆོག་ཏུ་གྱུར་པས་ལྟུང་བར་འགྱུར་བ་ནི་ཤིན་ཏུ་མ་གོ་བ་ཡིན་ནོ། །དེ་དག་རྣམས་ཀྱིས་བདེ་བ་འདི་དག་རྣམས་ལས་ཤིན་ཏུ་འདའ་བར་འགྱུར་ཏེ། འདི་དག་
རྣམས་སྐད་ཅིག་པ་ཡིན་ཞིང་བརྟན་པ་མ་ཡིན་པའི་ལྷ་རྣམས་ཀྱི་བདེ་བ་ཐམས་ཅད་ནི་རབ་ཏུ་ལྟུང་བར་འགྱུར་ཏེ། རི་གཟར་པོའི་ཆུའི་བང་དང་འདྲ་བར་ཤིན་ཏུ་འཇུག་པར་འགྱུར་བ་ཡིན་ནོ། །དེ་དག་རྣམས་རྣམ་པ་ཐམས་ཅད་དུ་ཡང་མི་གོ་བར་བག་མེད་པའི་ཕྱིར་ན་ཆེས་ལྷག་པར་སྲེད་པ་རྣམས་དོན་དུ་གཉེར་བར་
བྱེད་དོ། །དེ་ནས་དེའི་ཚེ་རྣམ་པར་བཀྲ་བའི་རྨ་བྱའི་རྒྱལ་པོ་དེས་ཚིགས་སུ་བཅད་པ་བརྗོད་པ། ཇི་ལྟར། རྣམ་པ་སྣ་ཚོགས་རྨི་ལམ་དོན། །ཆུ་ཡི་ཆུ་བུར་དང་འདྲ་བ། །དྲི་ཟའི་གྲོང་ཁྱེར་དང་མཚུངས་པའི། །ལས་ལ་ལྷ་རྣམས་ལྟུང་བ་ཡིན། །སྲེད་པ་སྐྱེད་བྱེད་ལྟར་གྱུར་པ། །མཐར་ནི་རྣམ་པར་འཇོམས་བྱེད་དང་། །
འོད་བྱེད་རྣམ་པར་ཡངས་པ་ཡིན། །འདོད་པ་ལ་ནི་ལྷ་ལྟུང་ངོ་། །ཤིན་ཏུ་མྱུར་བར་བྲག་བར་ཆུ། །ཤུགས་ཀྱིས་འབབ་པར་གྱུར་ལྟ་བུའི། །ངན་སོང་རྣམ་པ་ལྔ་པོར་ཡང་། །ལྷ་ནི་འདོད་པས་སྒྱུར་བ་ཡིན། །ཤིན་ཏུ་གཡོ་བའི་རླུང་ཤུགས་ཀྱིས། །གཡོ་བའི་རླབས་ཀྱི་ཆུ་ཟླ་དང་། །ཟོ་ཆུན་

འཁོར་མོའི་ལིམ་ལོག་ལྟའི། །འདོད་པ་ལ་ནི་ལྷ་རྣམས་ལྟུང་། །གློག་དང་ཟོ་ཆུན་འཁོར་མོ་མཚུངས། །སྨིག་རྒྱུ་དང་ཡང་མཚུངས་པ་དང་། །དབུ་བ་བཞིན་ཡང་སྙིང་པོ་མེད། །འདོད་པ་ལ་ནི་ལྷ་རྣམས་ལྟུང་། །གླང་ཆེན་རྣ་བ་གཡོ་བ་དང་། །ཆུ་ཤིང་
ལོ་མ་མཚུངས་པ་ཡི། །འཕགས་མིན་སྐྱེ་བོ་ཀུན་དགའ་བའི། །རྔ་སྒྲ་ལ་ནི་ལྷ་རྣམས་ལྟུང་། །ཀིམ་པ་ཀ་ཡི་འབྲས་བུ་མཚུངས། །ཉ་མཆིལ་ཟས་ཀྱི་རིགས་ཅན་དང་། །སྒྱུ་མ་བཞིན་དང་མི་རྟག་པའི། །འདོད་པ་ལ་ནི་ལྷ་རྣམས་ཞུགས། །དགའ་བར་གྱུར་པའི་བུད་མེད་ཀྱང་། །
འཇིགས་བཅས་ཉེ་བར་འཚེ་བ་དང་། །ལྔ་རྣམས་ཤིན་ཏུ་སྟོང་པ་དང་། །གཡོ་བར་བྱེད་པའི་ཁྱད་པར་ཅན། །བཏུང་བ་མངར་པོ་དེ་དག་གི། །འདོད་པ་ལ་ནི་ལྷ་རྣམས་ལྟུང་། །སྲིད་པའི་འཆིང་བའི་རྒྱུར་གྱུར་པའི། །བག་མེད་གཅིག་པུའི་རོ་ཤེས་པའི། །ངན་སོང་མྱུར་དང་མི་
བཟད་པའི། །འདོད་པ་ལ་ནི་ལྷ་རྣམས་ལྟུང་། །དགའ་བར་གྱུར་པའི་བུད་མེད་ནི། །འཇིགས་བཅས་ཉེ་བར་འཚེ་བ་དང་། །དུག་དང་མེ་དང་མཚོན་འདྲ་བའི། །འདོད་པ་ལ་ནི་ལྷ་རྣམས་ལྟུང་། །དེ་རྟག་ཏུ་མངོན་པར་དགའ་བའི་ནགས་སུ་ཞུགས་པར་གྱུར་པའི་ལྷ་དེ་དག་རྣམས་
ལ་དེས་རྗེས་སུ་སྟོན་པར་བྱེད་དོ། །རྣམ་པར་བཀྲ་བའི་རྨ་བྱའི་རྒྱལ་པོ་དེ་མཆོག་ཏུ་དགེ་བའི་ཀུན་ཏུ་རྟོག་པ་དང་ཡང་དག་པར་ལྡན་པར་གྱུར་པའི་སྨོན་ལམ་གྱི་དབང་གིས་ལྷའི་རིས་དེ་ཉིད་དུ་སྐྱེས་པར་གྱུར་ལ། དེས་དེ་དག་རྣམས་མིར་གྱུར་པ་གང་ཡིན་པ་ན་དེ་དག་གིས་མཐོང་བའི་དངོས་
པོ་འདྲ་བ་དེ་རྣམས་ཀྱི་དཔེས་འཇལ་བར་བྱེད་ཀྱི། ལྷ་རྫས་རྣམས་ཀྱིས་ནི་མ་ཡིན་ཏེ། རྒྱུ་གང་གིས་ལྷ་དེ་དག་རྣམས་ཀྱིས་ཅུང་ཟད་ཐོས་པར་གྱུར་པས་སྐྱེ་བ་གཞན་རྣམས་རྗེས་སུ་དྲན་པར་གྱུར་ཅིང་། དེ་ལས་ཀྱི་འབྲས་བུ་དེ་དག་རྣམས་རྗེས་སུ་དྲན་པར་གྱུར་ནས་རྟག་ཏུ་སྒོམ་པར་བྱེད་
པ་དང་། དེ་ཤིན་ཏུ་ལྷག་པར་ཡང་འདོད་པ་རྣམས་ལ་སྒྲུབ་པར་མི་བྱེད་པ་དང་། དེ་ལྟར་བྱས་པས་ཀྱང་མི་བཞིན་དུ་རྟག་ཏུ་སོ་སོར་འགྱོད་པ་དང་ལྡན་པ་དང་། འདོད་པའི་ཉེས་དམིགས་རྣམས་ཀྱང་སྟེ། ལེགས་པར་བཤད་པ་རྣམས་ལྷ་དེ་དག་ཁ་ཅིག་གིས་ཐོས་པར་གྱུར་ནས་སྐྱེ་བ་

གཞན་དག་དྲན་པ་དང་ལྡན་པར་གྱུར་ཏོ། །དེ་ལས་དེས་ལས་རྣམས་ཀྱི་འབྲས་བུ་རྗེས་སུ་དྲན་པར་གྱུར་ནས་ཡུད་ཙམ་ཞིག་འདོད་པ་རྣམས་ལ་བག་མེད་པ་དང་ལྡན་པར་མི་བྱེད་དོ། །དགེ་བ་རྗེས་སུ་དྲན་པ་ཡང་ཀུན་ཏུ་སྐྱེས་པར་འགྱུར་རོ་དེ་དག་རྣམས་ཀྱིས་འདིར་ཡུད་ཙམ་ཅིག་ཕན་པར་
འགྱུར་བ་དང་བདེ་བར་འགྱུར་བ་དང་སྐྱེ་བ་གཞན་བརྒྱ་སྟོང་འཕེན་པར་བྱེད་པ་རྣམས་ཀྱང་ཀུན་ཏུ་བྱུང་བར་གྱུར་པ་ནི་གཞན་ལ་ཕན་པ་ལ་རབ་ཏུ་ཞུགས་པའི་བྱང་ཆུབ་སེམས་དཔའ་རྣམ་པར་བཀྲ་བ་དེས་ཚིགས་སུ་བཅད་པ་དེ་དག་རྣམས་བཤད་པའི་རྒྱུས་བྱས་པ་ཡིན་ནོ། །དེ་ནས་སླར་ཡང་དབང་
པོ་དེ་ཉིད་ཀྱིས་ཀུན་ནས་ཁྲིད་པར་གྱུར་ནས་ནགས་དེ་ཉིད་ཀུན་ཏུ་ལྟ་བར་རྩོམ་པར་བྱེད་དེ། དེ་དག་རྣམས་ཀྱི་མགོ་བོ་ལ་པད་མའི་ཕྲེང་བ་ཅན་རང་གི་འོད་དང་ལྡན་པ་ལྷ་རྫས་ཀྱི་རྒྱན་གྱིས་ཀུན་ནས་བརྒྱན་པ་རྔ་སྐད་ཡན་ལག་ལྔ་དང་ལྡན་པས་ཀུན་ནས་བསྒྲགས་པའི་སྒྲའི་རྒྱགས་པས་རྒྱགས་པ་རྣམས་
སོ། །ནགས་དེ་ན་ནི་རབ་ཏུ་ཕལ་ཆེ་བར་གྱུར་པའི་ཤིང་ལྗོན་པ་དང་། འབྲས་བུ་དང་ཆུ་ཀླུང་དང་འབབ་ཆུ་དང་རྫིང་བུ་དང་ཆུ་མིག་རྣམས་ཕུན་སུམ་ཚོགས་པར་གྱུར་པ་རྣམས་ཤིན་ཏུ་ཁྱད་པར་དུ་འཕགས་པར་ཡིད་དགའ་བར་གྱུར་པ་རྣམས་མཐོང་ངོ་། །ལྷ་རྣམས་བག་མེད་པར་གྱུར་པ་
ལ་རོ་གཅིག་ཏུ་བྱས་ནས་སྐྱེ་བ་དང་རྒ་བ་དང་འཆི་བའི་འཇིགས་པ་དང་རྣམ་པར་བྲལ་བར་གྱུར་པས། དེ་དག་རྣམས་དེ་ལྟར་གར་བྱེད་པར་གྱུར་ཅིང་། མེ་ཏོག་གི་ཕྲེང་བའི་ནགས་ཞེས་བྱ་བའི་ནགས་གཞན་དུ་ལེགས་པར་རྗེས་སུ་ཕྱིན་པར་གྱུར་ཏོ། །ནགས་དེ་ན་ཡང་ཤིང་ཤཱ་ལིའི་འཁྲི་
ཤིང་བརྒྱ་སྟོང་དུ་མ་དང་ལྡན་པ་ཤིང་དང་མེ་ཏོག་དུ་མ་ཀུན་ཏུ་འབྱུང་བར་འགྱུར་བ་རྣམས་ཀྱི་མདོག་དང་དྲི་དང་དབྱིབས་དང་འདབ་མ་དང་མྱུ་གུ་དང་ཟེའུ་འབྲུར་གྱུར་པའི་མེ་ཏོག་རྣམས་ཀྱིས་ཉེ་བར་མཛེས་པར་བྱས་པ། མེ་ཏོག་དེ་དག་རྣམས་ཐམས་ཅད་ནི། འཁྲི་ཤིང་ལ་ལེགས་པར་རབ་ཏུ་བརྒྱུས་པ་རྣམས་
ཡིན་ནོ། །དེ་དག་རྣམས་ཀྱི་ནགས་དག་ཅིག་ན་ཡོད་པ་རྣམས་ནི་རིན་པོ་ཆེ་བདུན་གྱི་རང་བཞིན་དུ་གྱུར་པའི་རྣམ་པར་བཀྲ་བའི་གཟུགས་དང་སྒྲ་མཆོག་ཏུ་སྙན་པར་གྱུར་པའི་དབྱངས་རྣམ་པ་དུ་མ་དང་ལྡན་པའི་བུང་བ་རྣམས་ཀྱིས་ཉེ་བར་མཛེས་པ་དང་། མེ་ཏོག་གི་ཕྲེང་བའི་ནགས་དེ་ན་རྣམ་པར་

འགྱུར་བ་དུ་མའི་མེ་ཏོག་གི་ཕྲེང་བ་རྣམས་ཀྱིས་ལྷ་དེ་དག་རྣམས་རྣམ་པ་སྣ་ཚོགས་པའི་རྩེད་མོ་རྩེ་བར་བྱེད་དོ། །དེ་དེ་ལྟར་མཛེས་པར་གྱུར་པ་ལས་ཀྱང་སླར་ཡང་བཅུ་འགྱུར་བས་ཀྱང་ཆེས་ལྷག་པར་མཚུངས་པའི་ལྷ་མོ་རྣམས་ཀྱིས་མཛེས་པར་གྱུར་ཏོ། །ལྷ་མོ་
རྣམས་ཀྱང་མེ་ཏོག་གི་ཕྲེང་བའི་ནགས་ན་ཆེད་ཆེར་གྱུར་པས་ཕན་ཚུན་དུ་གནོད་པ་དང་བྲལ་བར་གྱུར་ནས་དོན་གཅིག་ཏུ་གྱུར་པའི་ནགས་དང་ཉེ་བའི་ནགས་ཀྱི་འོད་ཀྱི་རང་བཞིན་སྒྲོན་མའི་ཤིང་གི་གསེབ་རྣམས་ཀྱི་མེ་ཏོག་འཐོག་པར་བྱེད་དོ། །རྣམ་པ་དུ་མར་གྱུར་པའི་མེ་ཏོག་རྣམས་ཀྱིས་གང་འགའ་
ཞིག་གི་དྲི་ནི་དཔག་ཚད་ལྔར་འགྲོའོ། །ཁ་ཅིག་གི་བཅུར་རོ། །ཁ་ཅིག་གི་ནི་ཉི་ཤུར་རོ། །ཁ་ཅིག་གི་ནི་དཔག་ཚད་སུམ་ཅུ་རྩ་གཉིས་སུ་དྲི་རབ་ཏུ་རྒྱུའོ། །དེ་ལྟར་ནགས་དེ་ན་མཆོག་ཏུ་དྲི་ཕུན་སུམ་ཚོགས་པར་གྱུར་པའི་རྣམ་པ་དུ་མའི་མེ་ཏོག་རྣམས་དང་ཡང་ཉེ་བར་ལྡན་པས་ལྷ་མོ་དང་
ལྷ་དག་རྒྱགས་པས་ཐམས་ཅད་རྩེ་བར་གྱུར་ཅིང་དགོད་པར་གྱུར་པས་གང་ན་བག་མེད་པའི་ཆུ་ཞེས་བྱ་བའི་ཆུ་ཀླུང་དེར་འགྲོའོ། །བཏུང་བ་དེ་ཡང་སྒྲ་དང་རེག་བྱ་དང་རོ་དང་གཟུགས་ཕུན་སུམ་ཚོགས་པར་འབབ་བོ། །དེ་མཐོང་བར་གྱུར་ནས་ལྷ་དེ་དག་རབ་ཏུ་དགའ་བའི་ཡིད་ཀྱིས་འཐུང་
བར་འདོད་པར་གྱུར་ནས་ཆུ་ཀླུང་གི་འགྲམ་དུ་འཁོད་དོ། །སྐོམ་པར་གྱུར་ནས་ཀྱང་དེ་དག་རྣམས་ཀྱིས་འཐུངས་པར་ཡང་གྱུར་ཏོ། །རྟག་པར་རྒྱགས་པ་ཞེས་བྱ་བའི་བྱ་བག་མེད་པའི་ཆུ་ཀླུང་དེ་ཉིད་ཀྱི་འགྲམ་ན་རབ་ཏུ་གནས་སོ། །དེས་ཚིགས་སུ་བཅད་པ་བརྗོད་པ། ཇི་ལྟར། བག་
མེད་ཆུ་བོར་ཀུན་ཏུ་ནུབ། །ཡུལ་རྣམས་ཀྱིས་ནི་ཀུན་ཏུ་ཁྲིད། །ཡིད་ནི་རྣམ་པར་རྨོངས་བྱེད་པ། །མྱོས་བྱེད་བཏུང་བས་ཡང་ཅི་བྱ། །ཡུལ་གྱི་མེ་ཡིས་བསྲེགས་པ་ཡིས། །དོན་དང་དོན་མིན་མི་ཤེས་ཕྱིར། །ནགས་དང་ཉེ་ནགས་སུ་བརྐམ་པ། །མྱོས་བྱེད་བཏུང་བས་ཀྱང་ཅི་
བྱས། །དེ་ལྟར་རྟག་པར་རྒྱགས་པའི་བྱ་དེས་མཆོག་ཏུ་མྱོས་བྱེད་ཀྱི་བཏུང་བ་ལ་ཀུན་ཏུ་ཆགས་པར་གྱུར་པ་རྣམས་མངོན་པར་མཐོང་ནས་རྗེས་སུ་འདོམས་པར་བྱེད་པའི་ཚིགས་སུ་བཅད་པ་བརྗོད་དེ། དེ་དག་རྣམས་ཀྱིས་མ་ཐོས་ནས་སླར་ཡང་མྱོས་བྱེད་དེ་ཉིད་འཐུང་བར་བྱེད་དོ། །མཆོག་

ཏུ་རངས་པའི་ཡིད་ཅན་འོད་ཀྱི་ཕྲེང་བ་མཆོག་དང་ལྡན་པ་རྣམས་དེ་མེ་ཏོག་གི་ཕྲེང་བའི་ནགས་དེར་ཡང་དུས་རིང་དུ་རྣམ་པ་དུ་མ་རྣམས་དང་གཞན་དང་མི་འདྲ་བ་རྣམས་ཀྱི་མྱོས་བྱེད་ཀྱི་བྱ་བ་དག་བྱས་ནས། སླར་ཉིད་ཀྱང་ཡུལ་གྱིས་ངོམས་པ་མེད་པས་འདོད་པའི་ཡོན་ཏན་ལྔ་པོ་དེས་ཀྱང་
བག་མེད་པར་གྱུར་ནས་རྔ་སྐད་ཡན་ལག་ལྔ་དང་ལྡན་པས་ལྷན་ཅིག་ཏུ་གར་བྱེད་པར་གྱུར་ཅིང་། གང་ན་མེ་ཏོག་གི་ཁང་པ་ཞེས་བྱ་བ་ཡོད་པ་དེར་ཉེ་བར་ལེགས་པར་འགྲོ་བར་བྱེད་དེ། བྲོ་གར་དང་གླུ་དང་རོལ་མོའི་སྒྲ་དང་བཅས་ནས་རྒྱགས་པས་རྣམ་པར་རྒྱུ་བ་རྣམས་འགྱིང་བག་གིས་
འགྲོ་བར་བྱེད་དོ། །དེ་ནས་མེ་ཏོག་ཆེན་པོ་ཕུན་སུམ་ཚོགས་པའི་ནགས་དེ་ཀུན་ནས་ལྷག་པར་ལྟ་བ་བྱེད་དེ། ལྷ་རྣམས་སྔ་ན་མེད་པའི་ལྟ་བས་གདུངས་པའི་ཕྱིར་རོ། །ལྷ་དེ་དག་རྣམས་ཀྱང་དེ་ལྟར་དགའ་བའི་ནགས་དང་ཉེ་བའི་ནགས་དང་པད་མའི་ཚལ་དང་རིན་པོ་ཆེ་བདུན་གྱི་རིའི་རྩེ་མོ་དང་
ལྡན་པའི་ལྷའི་རིས་དེ་དག་རྣམས་མངོན་པར་མཐོང་ནས་མཆོག་ཏུ་ངོ་མཚར་བ་སྐྱེས་པར་གྱུར་ཏེ་ཅ་ཅོ་དང་མིག་ཀྱང་རིག་རིག་པོར་གྱུར་ཅིང་ཉེ་འཁོར་ཀུན་ཏུ་མིག་སྒྱུར་བར་བྱེད་པས་ཀྱང་ངོམས་པར་འགྱུར་བ་ནི་མ་ཡིན་ནོ། །ལྷ་དེ་དག་དང་ལྷ་མོ་རྣམས་ཀྱང་དེ་ཁོ་ན་བཞིན་དུ་སྔ་ན་མེད་པ་
མཐོང་བས་གཡོ་ཞིང་ཞེན་པས་དེ་རིམ་གྱིས་རྣམ་པར་རྟོག་པ་བརྒྱ་སྟོང་དུ་མས་མེ་ཏོག་དང་ཉེ་བར་ལྡན་པའི་མེ་ཏོག་གི་ཁང་པ་ཀུན་ཏུ་མངོན་པར་མཐོང་བར་གྱུར་པ་དེས་སླར་ཉིད་ཀྱང་ཡིད་ཆེས་པ་རྩོམ་པ་དང་ལྡན་པ་བཞིན་དུ་གར་བྱེད་པ་དང་དགོད་པར་བྱེད་པ་དང་གླུ་ལེན་པར་ཡང་བྱེད་དེ། དེ་དག་
རྣམས་དེ་ཁོ་ན་བཞིན་དུ་བག་མེད་པས་མཆོག་ཏུ་སྡུག་པར་གྱུར་པས། འཁྲི་ཤིང་གི་ཁང་བུ་རྣམས་སུ་ཞུགས་སོ། །ཁྱིམ་དེ་དག་རྣམས་ཀྱང་། འཁྲི་ཤིང་གི་ཤིང་ལྗོན་པ་རྣམས་ཉེ་བར་དུད་པར་གྱུར་པ་འདབ་མ་རྣམ་པར་བཀྲ་བར་མཛེས་པར་གྱུར་པའི་རིན་པོ་ཆེའི་རང་བཞིན་རྣམ་པ་སྣ་ཚོགས་
པའི་འཁྲི་ཤིང་གིས་ཉེ་བར་སྒུ་བ་རྣམས་ལ་འདི་ལྟ་སྟེ། བཻ་ཌཱུརྱའི་འཁྲི་ཤིང་གི་ཁང་བུ་གང་ཡིན་པ་དེ་ལ་ནི་གསེར་འབར་བའི་མདོག་གི་འདབ་མས་ཀུན་ཏུ་ཁྱབ་པར་གྱུར་པའོ། །གང་ཡང་གསེར་གྱི་འཁྲི་ཤིང་ཉེ་བར་སྒུ་བའི་ཁང་བུ་གང་ཡིན་པ་དེ་དག་རྣམས་ལ་ནི་བཻ་ཌཱུརྱའི་འདབ་མ་

རྣམས་ཀྱིས་གང་བར་གྱུར་ཅིང་ཀར་ཀེ་ཏ་ནའི་མདོག་གི་འབྲས་བུས་ཉེ་བར་མཛེས་པར་བྱས་པའོ། །ཨིན་དྲ་ནཱི་ལའི་རང་བཞིན་གྱི་འཁྲི་ཤིང་གིས་མཛེས་པར་བྱས་པའི་འཁྲི་ཤིང་གི་ཁྱིམ་གང་ཡིན་པ་དེ་ལ་ནི་དངུལ་གྱི་རང་བཞིན་གྱི་འདབ་མ་རྣམས་ཀྱིས་ཕུབས་
སུ་གྱུར་པར་བྱས་ཤིང་། ཤེལ་གྱི་རང་བཞིན་ཅན་རྣམས་ལ་ནི་གསེར་གྱི་འབྲས་བུ་དང་ལྡན་པའོ། །ཀར་ཀེ་ཏ་ནའི་ཤིང་འཁྲིལ་བ་རྣམས་གང་ཡིན་པ་དེ་ལ་ནི་ཨིན་དྲ་ནཱི་ལའི་རང་བཞིན་གྱི་འདབ་མ་རྣམས་ཀྱིས་ཉེ་བར་མཛེས་པར་གྱུར་ཅིང་གསེར་གྱི་རང་བཞིན་གྱི་འབྲས་བུས་
མཛེས་པར་བྱས་པའོ། །ཤེལ་གྱི་འཁྲི་ཤིང་རྣམ་པར་བརྒྱངས་པ་ཉེ་བར་ཕུབ་པར་གྱུར་པའི་འཁྲི་ཤིང་གི་ཁང་པ་གང་ཡིན་པ་དེའི་ཚེ་ནི་དེ་ལ་གསེར་གྱི་འདབ་མ་རྣམས་ཀྱིས་ཉེ་བར་མཛེས་པར་གྱུར་པ་དང་། སྔོན་པོ་ཆེན་པོའི་ཁ་དོག་གི་འབྲས་བུས་མཛེས་པར་གྱུར་པའོ། །དེ་ན་
ཡང་རྣམ་པར་རྟག་པར་མཛེས་པའི་བུང་བའི་ཚོགས་རྣམས་ཀྱིས་ཡིད་འཕྲོག་པར་བྱེད་པའི་སྒྲའི་མཆོག་རྣམས་ཉེ་བར་སྒྲོགས་པར་བྱེད་པ་མེ་ཏོག་ཆེན་པོའི་ཁང་པ་ཞེས་བྱ་བའི་ནགས་དེ་ན་ནི་ནང་རྣམས་ཀྱང་དེ་ལྟར་མཆོག་ཏུ་དགའ་བར་གྱུར་པ་ཡིན་ཏེ། གང་ན་ལྷ་དག་མྱོས་པ་ལ་
དོན་གཅིག་པས་དགའ་བར་བྱེད་པའོ། །ནགས་དེའི་ཕྱི་རོལ་རྣམས་ན་ཡང་མཆོག་ཏུ་དགའ་བར་གྱུར་པ་རྣམས་ཡོད་པ་ལ་འདི་ལྟ་སྟེ། པད་མའི་རྫིང་བུ་དག་ན་གསེར་གྱི་འདབ་མ་རྣམས་དང་བཻ་ཌཱུརྱ་སྔོན་པོ་རྣམས་དང་ཨིན་དྲ་ནཱི་ལའི་ཟེའུ་འབྲུ་དང་། དངུལ་གྱི་རང་བཞིན་གྱི་སྙིང་པོ་ཅན་
གྱི་ཉེ་འཁོར་རྣམས་ཁྱབ་པར་གྱུར་པ་དང་། བུང་བའི་ཚོགས་རྣམས་ཀྱིས་ཀྱང་ནགས་དེ་ཉེ་བར་མཛེས་པར་བྱས་པ་ངང་པ་དང་ཀཱ་རཎྜ་བ་དང་། ངང་ངུར་དང་། ཀ་དམྤའི་སྒྲ་ཀུན་ཏུ་སྒྲོགས་པར་བྱེད་པས་སྒྲ་ཡིད་འཕྲོག་པར་གྱུར་པ་རྣམས་ཀྱིས་ཉེ་བར་མཛེས་པར་གྱུར་ཅིང་ཡོངས་སུ་བསྐོར་
ནས་ནགས་དེ་ཆེས་ལྷག་པར་རྣམ་པར་མཛེས་སོ། །མེ་ཏོག་གི་ཕྲེང་བ་རྣམས་ཉིད་ཀྱི་པད་མའི་ནགས་དེའི་ཉེ་འཁོར་ཀུན་ནས་འཁོར་བར་གྱུར་པ་ལ་དེས་ཀྱང་མེ་ཏོག་གི་ཁང་པའི་ནགས་ཆེན་པོ་ཡོངས་སུ་བསྐོར་ནས་མཛེས་སོ། །པད་མའི་ཕྲེང་བ་དེ་དག་རྣམས་ཀྱི་ཕྱི་རོལ་གྱི་ཤིང་གི་ནགས་

གང་དག་ལ་རི་དགས་དང་བྱའི་ཚོགས་རྣམས་མཆོག་གི་རབ་ཏུ་དགའ་བར་གྱུར་པས་ཁ་ཅིག་ནི་ཤིང་གི་རྩ་བ་ནས་བྱུང་ནས་སྡོད་དོ། །ཁ་ཅིག་ནི་པད་མ་དང་ཉེ་བ་ན་ཟ་བར་བྱེད་དེ། ལྷ་རྫས་ཀྱི་ནགས་ཀྱི་འབྲས་བུ་དང་མེ་ཏོག་དང་རྩ་བ་རྣམས་མཆོག་ཏུ་དྲི་ཞིམ་པའི་མདོག་དང་རོ་དང་
དྲི་དང་ཡང་དག་པར་ལྡན་པ་རྣམས་ལ་སྟེ། ལྷན་ཅིག་སྤྱོད་པའི་འཁོར་དང་བཅས་པ་རྣམས་སོང་ནས་ལྷའི་མཆོག་དེ་དག་དགའ་བར་བྱེད་དོ། །རི་དགས་དང་བྱ་དེ་དག་རྣམས་ཁ་ཅིག་ནི་མཆོག་ཏུ་དགའ་བར་གྱུར་པའི་ལྷ་རྫས་ཀྱི་སྒྲ་ཐོས་པས་ཡིད་འཕྲོག་པར་འགྱུར་ཞིང་ཆགས་པ་དང་
མཚུངས་པ་དང་དཔེ་མེད་པའི་ལྷ་རྫས་ཀྱི་གླུ་རྣམས་ཉན་པར་བྱེད་དོ། །རྣ་བ་དང་མིག་གདངས་པ་ངོ་མཚར་ཞིང་རྒྱགས་པའི་རི་དགས་རྣམས་དགའ་བར་བྱེད་དོ། །ཁ་ཅིག་ནི་གཞན་རི་དགས་མོ་དང་ཕན་ཚུན་ལྷན་ཅིག་མངོན་དུ་ཕྱོགས་པ་ཉིད་ཀྱིས་ཤིང་གི་རྩ་བར་བྱུང་ཞིང་གནས་ནས་
སྐྱུགས་ལྡད་བྱེད་པར་གྱུར་པས་མནན་ན་ནེམ་པ་བཏེག་ན་འཕར་བའི་ས་གཞི་དགའ་བར་གྱུར་པ་རྣམས་སུ་ཉེ་བར་གནས་ནས་ཕན་ཚུན་དུ་ལྟ་བར་བྱེད་དོ། །ཀུན་རྗོད་པར་ཡང་བྱེད་དོ། །རི་དགས་རི་དགས་མོ་དང་ལྷན་ཅིག་ཏུ་རིན་པོ་ཆེ་སྣ་བདུན་གྱིས་རྣམ་པར་བཀྲ་ཞིང་ཉེ་བར་འབར་
བར་གྱུར་པའི་ཐིག་ལེས་ཉེ་བར་བཀྲ་བར་བྱས་པའི་ལུས་ཅན་གྱི་ནགས་ཀྱི་ནང་རྣམས་སུ་དགའ་བར་བྱེད་དོ། །བྱ་རྣམས་དང་རི་དགས་རྣམས་ཀྱང་རྣམ་པ་སྣ་ཚོགས་པའི་ཁ་དོག་དང་དབྱིབས་དང་རིགས་རྣམས་སོ། །མཆོག་ཏུ་ཞི་བར་གྱུར་པ་རྣམ་པར་རྟོག་པ་སྣ་ཚོགས་པ་རྣམས་ཀྱིས་དགའ་བར་
བྱེད་པ་རྣམས་ལ་འདི་ལྟ་སྟེ། ཁ་ཅིག་ནི་པད་མ་ཁས་བླངས་ནས་གླུའི་སྒྲ་རྣམས་ཉན་ནོ། །ཡོངས་སུ་འཆམ་པར་བྱེད་དེ་འཁོར་ལོའི་འགྲོས་ཀྱིས་རྩེད་མོ་རྩེ་བར་བྱེད་པའི་འགྲོས་ཅན་རྣམས་ལྷན་ཅིག་སྤྱོད་པ་དང་བཅས་ནས་བཞད་གད་བྱེད་པ་ཡིན་ནོ། །ཁ་ཅིག་ནི་ཁྱུར་གྱུར་པར་ཉེ་བར་
གནས་ནས་སྒྲོ་དག་ཀུན་ཏུ་གྱོན་པས་ལུས་གོང་བུར་བྱས་ཤིང་ཀུན་བློ་འཐུན་པར་གྱུར་པས་དེ་དག་རྣམས་སོང་སྟེ། ནགས་ཀྱི་གསེབ་ལ་བརྟེན་ནས་སྒྲ་ཉན་པར་བྱེད་དོ། །ཁ་ཅིག་ནི་རིན་པོ་ཆེ་གཞན་དག་རྣམས་ཁ་ན་བཟུང་ནས་འོད་ཟེར་གྱི་ཕྲེང་བ་དང་ལྡན་པའི་ཡུལ་ཕྱོགས་གཞན་དང་

གཞན་རྣམས་སུ་ཉེ་བར་འདྲེ་བར་བྱེད་དོ། །ཁ་ཅིག་ནི་གཞན་རི་རྣམས་ཀྱི་རྩེ་མོ་རིན་པོ་ཆེ་བདུན་གྱི་འོད་ཀྱིས་སྣང་བར་བྱས་པ་ལ་བསྙེང་ཞིང་སྤྲུགས་ཏེ་སྒྲོའི་ཕྲེང་བ་སྟེང་དུ་རྣམ་པར་བརྐྱང་ནས་གླུ་ལེན་པར་གྱུར་པ་དེས་ཐོས་པས་ཀུན་ཏུ་ཁྲིད་དེ། གང་ན་གླུའི་སྒྲ་དེ་
ཡོད་པར་གྱུར་པའི་མེ་ཏོག་གི་ཁང་པ་དེར་འགྲོ་སྟེ། ནམ་མཁའ་ལ་མཛེས་པར་གྱུར་པའི་སྒྲོའི་སྒྲ་རྣམས་ཀྱིས་མཆོག་ཏུ་ཡིད་རབ་ཏུ་དགའ་བར་གྱུར་པར་རོ། །ལྗོན་པའི་ནགས་ཀྱི་ནགས་གཞན་རྣམས་ནས་ཀྱང་སྣ་ཚོགས་པའི་སྒྲོ་རྣམ་པར་བཀྲ་བའི་ལུས་ཅན་གྱི་བྱ་གང་དག་
གིས། མེ་ཏོག་རབ་ཏུ་རྒྱས་པའི་འཁྲི་ཤིང་དག་ཁ་ནས་ཁྱེར་ནས་གང་ན་དེ་མེ་ཏོག་གི་ཁང་པའི་ནགས་ཡོད་པ་དེར་བསྙེན་ཏེ་འོང་བར་བྱེད་དོ། །གཞན་ཡང་ཕྱོགས་ཀྱི་ཆ་གཞན་རྣམས་ནས་ཀྱང་གླུ་ལེན་པ་དེ་མངོན་པར་ཐོས་པར་གྱུར་ནས། ངང་པ་དང་ངང་མོ་རྣམས་ཕན་ཚུན་དུ་
ཕན་པར་གྱུར་པ་དང་ཕན་ཚུན་དུ་ཁ་ནས་རིན་པོ་ཆེའི་ཕྲེང་བ་རྣམས་ཡོངས་སུ་ཁྱེར་བ། ཁ་དོག་སྣ་ཚོགས་པའི་འོད་ཀྱིས་རྒྱན་དུ་བྱས་པ་རྣམས་གང་ན་མེ་ཏོག་གི་ཁང་པ་ཡོད་པར་ནམ་མཁའི་དཀྱིལ་ན་མཛེས་པར་ག