Kinh tạng Tây Tạng (Kangyur Đại Học) — 070_མདོ་སྡེ།_ལ

རྣམས་ནི་གང་གི་ཕྱིར་ཐ་མལ་པ་ཡིན་པའི་ཕྱིར་ན་བསྒྲུབ་པར་བླ་བ་ཡིན་ལ་ཐོག་མ་མེད་པའི་དུས་ནས་འཇུག་པར་འགྱུར་བ་ལུས་དང་ལྷན་ཅིག་ཏུ་འགྲོགས་པར་གྱུར་པའི་ངན་སོང་དུ་འགྲོ་བ་རྣམས་ནི་རྟོགས་པར་ཡང་མི་འགྱུར་
རོ། །སོ་སོའི་སྐྱེ་བོ་ཐོས་པ་དང་མི་ལྡན་པ། དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་དེ་ནི་འཇིགས་པར་འགྱུར་བའི་ལུས་འཆོས་པར་བྱེད་ཀྱི། སྐྲ་དང་ཁ་སྤུ་བྲེགས་ནས་གོས་ངུར་སྨྲིག་བགོས་ཏེ། རབ་ཏུ་བྱུང་བར་གྱུར་པ། གང་གི་དོན་དུ་རབ་ཏུ་བྱུང་བར་གྱུར་ནས་ཀུན་
ནས་སྤོང་བས་འདོད་ཆགས་ཞེ་སྡང་གཏི་མུག་གིས་ཐོག་མ་མེད་པའི་དུས་ནས་འཇུག་པའི་ལུས་སྲེག་པ་འཆོས་པར་མི་བྱེད་དོ། །གང་གིས་ཀྱང་འདི་དག་སྲེག་པར་འགྱུར་བ་དེས་ཀྱང་གང་གི་ཕྱིར་ལུས་རྣམས་བསྲེགས་པས་ཤིན་ཏུ་སྲེག་པར་བྱེད་པ་དང་། རྣམ་པར་ཆུད་གཟན་ཞིང་
རྣམ་པར་ཆུད་གཟོན་པར་བྱེད་དོ། །ཕྱི་བཞིན་རྗེས་སུ་འབྲེལ་ནས་ལམ་དུ་འགྲོ་བ་ན་འགྲོགས་པར་བྱེད་པའི་སྐྱོན་ཆེན་པོ་གསུམ་པོ་འདོད་ཆགས་ཞེ་སྡང་གཏི་མུག་དེ་དག་རྣམས་ཡོངས་སུ་བཏང་ནས་གཞན་རྣམས་ལ་ཀུན་ཏུ་འཕོ་བར་བྱེད་པ་དེའི་རབ་ཏུ་བྱུང་བ་དོན་མེད་པར་འགྱུར་
རོ། །གསོ་བ་ངན་པའི་སྐྱེས་བུ་རང་གི་སེམས་ཀྱིས་ཡོངས་སུ་བསླུས་པ་སྐྱེས་བུ་གཏི་མུག་ཅན་བསླུས་པར་གྱུར་པ་ཡང་ཡིན་ཏེ། དཔེར་ན་བློ་གྲོས་དམན་པའི་སྐྱེས་བུ་འགའ་ཞིག་རྩ་བ་མེད་པ། གྲོགས་མེད་པ། ནོར་མེད་པར་སྟོབས་དང་ལྡན་པའི་དགྲ་ཞིག་འོངས་པར་གྱུར་
ན་དགྲ་དེ་ནི་འདིས་བརྩད་པར་བྱ་བ་དག་གིས་བྱ་བར་མི་ནུས་སོ། །སྟོབས་ཀྱིས་ཀྱང་བཟློག་པར་མི་ནུས་ཏེ། དགྲ་བོ་འདི་ནི་ཤིན་ཏུ་སྟོབས་དང་ལྡན་པས་དེ་བརྟན་པ་དང་ལྡན་པར་འགྱུར་རོ། །ཐོས་པ་དང་མི་ལྡན་པའི་བྱིས་པ་སོ་སོའི་སྐྱེ་བོ་དེ་རྣམས་ཀྱིས་དགྲ་དེའི་འཇིགས་པ་མ་བརྩིས་
པར་དམན་པའི་སྐྱེས་བུ་གཞན་དགྲ་འཇིགས་པས་སྐྲག་ཅིང་ལྷན་ཅིག་ཏུ་དབང་དུ་གྱུར་ནས་འགྲོགས་པར་བྱེད་དོ། །དེ་དེ་ལྟར་དྲན་པ་ངན་པ་ཤེས་རབ་འཆལ་བ། ལེ་ལོ་ཅན་སྐྱེས་བུ་བག་མེད་པར་གྱུར་པ། སོང་ཞིང་འཐུངས་པར་བྱེད་པ་ཇི་སྲིད་དུ་གཞན་གྱི་ཆུང་མ་དང་བག་མེད་པ་

རྣམས་སྟེན་པར་བྱེད་པ་འདི་དག་ནི་དགེ་སློང་ངན་པ་དགེ་སློང་དུ་ཁས་འཆེས་པ་རང་གི་དགྲ་རྣམས་བཟོད་པར་བྱེད་དོ། །སྟོབས་ཆེན་པོས་བརྩོན་པ་དུ་མས་ཀྱང་འཇིག་རྟེན་ལས་འདས་པའི་ཕྱི་བཞིན་རྗེས་སུ་འབྲང་བར་འགྱུར་བས་ཟིལ་གྱིས་མནན་ནས་
དེས་ཤིན་ཏུ་སྤྲོ་བའི་གནས་ལ་འདྲིས་པར་བྱེད་ཅིང་རྣམ་པར་རྟོག་པ་དང་མཉམ་པར་འཇུག་པ་གང་ཆེས་སྟོབས་དང་ལྡན་པས་རྗེས་སུ་འབྲང་བ། འདོད་ཆགས་ཞེ་སྡང་གཏི་མུག་རྣམས་བཟོད་པར་བྱས་ནས་གང་དག་ལུས་རབ་ཏུ་བྱུང་བར་གྱུར་པ། རང་གི་སྐྱེ་བོ་དང་། གྲོགས་པོ་དང་།
བུ་མོ་རྣམས་ཡོངས་སུ་སྤངས་པས་རབ་ཏུ་བྱུང་བའི་ཡིད་བོར་ཏེ། རྫས་ཀྱི་རྒྱུས་གཞན་དག་གི་དབང་གིས་ལྷན་ཅིག་ཏུ་འགྲོ་བར་བྱེད་དོ། །ཇི་ལྟར་ང་ནི་ཁྱེད་རྣམས་ལ་རླུང་དང་། བད་ཀན་དང་། མཁྲིས་པ་རྣམས་དགྲར་འདོད་དོ། །དེ་དག་རྣམས་བདག་ཅག་གིས་འདི་ལྟར་གོ་བར་བྱ་སྟེ།
ཡིད་རྣམ་པར་དཀྲུག་པར་བྱེད་པ་དང་། འཆི་བདག་གི་རྒྱལ་པོ་ཡང་གསུམ་དུ་འགྲོ་བའི་དགྲ་གསུམ་པོ་འདི་དག་རྣམས་ཡིན་ཏེ། བཟློག་པར་དཀའ་བའི་འདོད་ཆགས་ཞེ་སྡང་གཏི་མུག་གང་ཡིན་པ་འདིས་འདོད་པའི་ཐག་པས་བཅིངས་ནས་ཤིན་ཏུ་བག་མེད་པར་འཇིག་རྟེན་ཕ་རོལ་ཏུ་འཁྲིད་
པར་བྱེད་དོ། །དོན་གྱི་མཆོག་ལ་བག་མེད་པ་ནོར་གྱི་འདོད་པ་རབ་ཏུ་སྟོབས་ཆེ་བ་རྣམས་ཀྱིས་བློ་སྡུག་བསྔལ་བར་བྱེད་པ་ཡིན་པ་དེའི་ཕྱིར་སྐྱོན་དེ་དག་རྣམས་གོ་བར་གྱིས་ལ་སྨན་པ་མ་བྱེད་ཅིག །གལ་ཏེ་འགའ་ཞིག་འཆོས་པའི་སྨན་པ་བྱེད་ན་གང་གཞན་དག་རྣམས་སུ་དེ་བདེ་བར་མི་འགྱུར་རོ། །
དེ་ནས་དེའི་ཚེ་བཅོམ་ལྡན་འདས་དེས་ཚིགས་སུ་བཅད་པ་གསུངས་པ། ཇི་ལྟར། བད་ཀན་ལ་སོགས་སྐྱོན་མ་ཡིན། །སྐྱོན་གཞན་འདོད་ཆགས་ལ་སོགས་འདོད། །བད་ཀན་སོགས་ཀྱིས་ངན་སོང་དུ། །ཡིད་ཅན་སྐྱེ་བར་འགྱུར་མ་ཡིན། །སེམས་ཀྱི་སྐྱོན་རྣམས་འདི་དག་གིས། །ངན་སོང་སྟོན་པར་བྱེད་པ་
ཡིན། །དེ་ཕྱིར་དེ་དག་ཞི་བ་ཉིད། །མཆོག་ཡིན་བད་ཀན་སོགས་འདིར་མིན། །ཐོག་མཐར་མཆོག་ཏུ་ལེགས་པར་ནི། །ཆགས་ལ་ཀུན་བསྟན་འཐོབ་པ་མིན། །གང་སེམས་སྨན་པ་དེ་སྨན་པ། །ལུས་ཀྱི་སྨན་པ་སྨན་པ་མིན། །ཡིད་འཆོས་པ་ནི་ཤེས་པར་དཀའ། །དེ་བཞིན་མིན་འདོད་འཇིག་

རྟེན་པའི། །དེ་ལྟར་བཅོམ་ལྡན་འདས་འོད་སྲུང་གིས་རྒྱུ་འདིས་ན་རབ་ཏུ་བྱུང་བས་སྨན་པ་མ་བྱེད་ཅིག་ཅེས་གསུངས་སོ། །སྨན་པ་བྱེད་པ་ལ་སྐྱོན་གཞན་ཡང་ཡོད་པ་ནི་འདི་ལྟ་སྟེ། སྨན་པ་བྱེད་པ་ན་སྐྱོན་དུ་མ་འཕེལ་བར་འགྱུར་ཏེ། འདོད་པས་ཟིལ་གྱིས་གནོན་པར་བྱེད་དོ། །
ཕྱིར་རྩོད་པར་བྱེད་པར་འགྱུར་ལ་སྨན་པ་གཞན་དེ་ལ་སྨད་ར་ཡང་སྨྲ་བར་བྱེད་དོ། །འཚོ་བ་རྣམས་ཡང་ཉེ་བར་འཇོམས་སོ། །དེ་ལ་འདི་དག་རབ་ཏུ་སྐྱེ་སྟེ། ཤིན་ཏུ་ཡང་ཡི་དགས་སུ་སྐྱེ་བའི་རྒྱུ་བྱེད་དོ། །དེ་ལྟར་དྲི་མ་རྣམས་ཀྱིས་ཟིལ་གྱིས་གནོན་པར་འགྱུར་བའི་སེམས་གཡོ་བས་
གཏི་མུག་སྟོབས་ཆེ་བར་འགྱུར་རོ། །དེ་གཏི་མུག་གིས་ཟིལ་གྱིས་མནན་པས་བུད་མེད་ཀྱི་འགྲོ་བ་ལེགས་པར་མངོན་པར་མཐོང་ན་ཚུལ་བཞིན་མ་ཡིན་པ་ཡིད་ལ་བྱེད་པས་འཁྲིད་པར་འགྱུར་རོ། །བློ་གྲོས་རྨོངས་པ་དེ་བུད་མེད་དག་མངོན་པར་མཐོང་ནས་འདོད་ཆགས་ཀྱི་ཟིལ་
གྱིས་གནོན་ནོ། །སྐྱོན་དེ་དག་རྣམས་བད་ཀན་ལ་སོགས་པ་དེ་དག་ལ་མེད་དོ། །འདོད་ཆགས་ལ་སོགས་པའི་སྐྱོན་རྣམས་ལ་བཅོས་གྱིས་དང་། དམྱལ་བ་དང་། ཡི་དགས་དང་། དུད་འགྲོའི་འགྲོ་བ་རྣམས་ཀྱི་རྒྱུར་གྱུར་པའི་སྟོབས་ཆེ་བ་ཡིན་གྱིས། དེ་ཡང་དེ་ལྟར་གྱུར་པས་བུད་
མེད་ཀྱི་འགྲོ་བ་མཐོང་ནས་ཚུལ་བཞིན་མ་ཡིན་པ་ཡིད་ལ་བྱེད་པས་འཁྲིད་པར་འགྱུར་རོ། །དྲན་པ་རྨོངས་པ་དེ་བུད་མེད་དག་མཐོང་ནས་འདོད་ཆགས་ཀྱི་ཟིལ་གྱིས་གནོན་པར་འགྱུར་རོ། །རབ་ཏུ་བྱུང་བ་རྣམས་ཀྱིས་འདོད་ཆགས་ལ་སོགས་པ་རྣམས་རྟག་ཏུ་རྟོགས་པ་ལ་རབ་ཏུ་བརྩོན་པར་བྱའི་
བད་ཀན་ལ་སོགས་པ་རྣམས་ནི་མ་ཡིན་ནོ། །འདི་དག་ནི་ཆོས་གཞན་གཉིས་པ་ཡིན་ཏེ། དགེ་སྦྱོང་མྱ་ངན་ལས་འདས་པ་ལ་ཁ་ཕྱོགས་པས་མི་བྱ་སྟེ། བསམ་གཏན་ལ་སྙོམས་པར་ཞུགས་པ་ན་རྣམ་པར་སྲེག་པར་བྱེད་པའི་ཕྱིར་རོ། །གཞན་ཡང་ཆོས་གསུམ་པ་
ཡོངས་སུ་སྤང་བར་བྱའོ། །འདི་ཡང་གང་ཞེ་ན། འདི་ལྟ་སྟེ། རི་མོའི་ལས་བྱེད་པའོ། །རི་མོའི་ལས་བྱེད་པའི་རབ་ཏུ་བྱུང་བ་རྣམས་ནི་འདོད་ཆགས་ཀྱིས་རབ་ཏུ་འབྱུང་བར་བྱ་བ་ཡིན་ཏེ། ཁ་དོག་གི་འདུ་ཤེས་ཅན་གྱིས་འདོད་ཆགས་གཞན་སྐྱེད་པར་བྱེད་པ་ཡིན་ནོ། །ལས་རྣམ་པ་སྣ་ཚོགས་པ་

རྣམས་ཀྱིས་འཇིག་རྟེན་འདི་བོར་ནས་ཁ་དོག་སྣ་ཚོགས་པར་གྱུར་པ་གཞན་རྣམས་བྱེད་དོ། །སེམས་རྣམ་པར་བཀྲ་བ་རྣམས་མངོན་པར་མི་ཤེས་པར་གཞན་ཁ་དོག་རྣམ་པ་སྣ་ཚོགས་པ་རྣམས་དེ་བྱེད་དོ། །དེ་ལ་རབ་ཏུ་བྱུང་བ་རྣམས་ཀྱིས་རྟག་པ་ཁོ་ནར་ལས་
རྣམ་པ་སྣ་ཚོགས་པ་རྣམས་ཤེས་པར་བྱ་སྟེ། སེམས་རི་མོ་མཁན་གྱིས་དོན་དམ་པའི་ཚོན་ཆེན་པོ་ལྔས་འགྲོ་བ་ལྔ་ཚོན་གྱིས་བསྒོ་བར་བྱེད་དོ། །ཇི་ལྟར་སེམས་རི་མོ་མཁན་དང་། ཚོན་ཆེན་པོ་ལྔ་པོ་རྣམས་གང་ཞེ་ན། མཆོག་ཏུ་རྒྱ་ཆེ་བའི་དད་པ་ལ་སོགས་པ། དཀར་པོའི་ལས་
རྣམས་ཤིན་ཏུ་སྦྱངས་པའི་ཁ་ནས་དང་། འདུན་པས་རབ་ཏུ་སྦྱིན་པ་མདུན་དུ་བྱས་པས་མཆོག་ཏུ་རྒྱ་ཆེ་བར་གྱུར་པ་དྲི་མ་རྣམས་དང་། སེར་སྣའི་དྲི་མ་དང་རྣམ་པར་བྲལ་བར་གྱུར་པ། མཆོག་ཏུ་དགའ་བའི་ཡིད་ཀྱིས་ཚུལ་ཁྲིམས་ཀྱི་རི་ལ་ལེགས་པར་ལངས་པའི་ཚུལ་ཁྲིམས་ཀྱིས་ལྷ་
རྣམས་རྣམ་པར་བཀྲ་བར་སེམས་རི་མོ་མཁན་གྱིས་བྲིས་པའོ། །གཞན་ཡང་དགེ་སྦྱོང་གིས་སེམས་ཀྱི་ལས་འདི་དག་ཉེ་བར་གཟུང་བར་བྱའོ། །འདི་ལྟ་སྟེ། མི་རྣམས་ནི་དམན་པ་དང་། བར་མ་དང་། ཁྱད་པར་དུ་འཕགས་པའི་ལས་རྣམས་ཀྱི་ཚོན་མང་པོས་རྣམ་པར་བཀྲ་བར་བྱས་
སོ། །དེ་ལ་གང་དག་ནོར་རྣམས་དང་ལྡན་པ་དང་། མཆོག་ཏུ་ཚུལ་ཁྲིམས་དང་ལྡན་པ་དེ་དག་རྣམས་ཀྱང་མཆོག་ཏུ་དཀར་བའི་ལས་ཀྱི་ཚོན་རྣམས་ཀྱིས་རྣམ་པར་བཀྲ་བར་བྱས་སོ། །གང་ཡང་མཆོག་ཏུ་ནོར་རྣམས་དང་ལྡན་པ། ཚུལ་ཁྲིམས་དང་ལྡན་པ་དེ་དག་ནི་ནག་པོ་དང་དཀར་པོ་གཉིས་
ཀྱི་ཚོན་གྱིས་རྣམ་པར་བཀྲ་བར་བྱས་སོ། །གང་དག་ནོར་ཆུང་བ་ཚུལ་ཁྲིམས་དང་ལྡན་པ་དེ་དག་ནི་དཀར་པོ་དང་དམར་བའི་ཚོན་གཉིས་ཀྱིས་རྣམ་པར་བཀྲ་བར་བྱས་སོ། །གང་དག་དབུལ་པོ་ཚུལ་ཁྲིམས་འཆལ་བ་དེ་ནི་ནག་པོའི་ཚོན་གྱིས་རྣམ་པར་བཀྲ་བར་བྱས་སོ། །གང་དག་བརྩོན་འགྲུས་
དམན་པ་འདོད་ཆགས་སྟོབས་ཆེ་བ་དེ་ནི་ནག་པོ་དང་དབུལ་པོའི་ཚོན་དག་གིས་རྣམ་པར་བཀྲ་བར་བྱས་སོ། །གང་དག་གཟུགས་དང་ལྡན་པ་མཆོག་ཏུ་རིགས་བཟང་བར་གྱུར་པ་དེ་རབ་ཏུ་དང་བའི་ཚོན་དཀར་པོས་མངོན་པར་བྲིས་སོ། །གང་དག་བར་མའི་རིགས་སུ་སྐྱེས་པ་དེ་དག་ནི་དམར་

པོའི་ཚོན་གྱིས་མངོན་པར་བྲིས་སོ། །གང་དག་ཉུང་བར་གྱུར་པ་དེ་དག་ནི་ནག་པོའི་ལས་རྣམས་ཀྱི་ཚོན་གྱིས་སེམས་རི་མོ་མཁན་གྱིས་མངོན་པར་བྲིས་སོ། །གང་ཡང་རྒྱལ་པོའམ་རྒྱལ་པོའི་བློན་པོ་ལེགས་པར་བྱས་པའི་ལས་རྣམས་འདས་ནས་མདུན་དུ་མི་དགེ་བ་མང་པོ་རྣམས་
བྱེད་པར་གྱུར་པ་དེ་དག་རྣམས་ཀྱི་དཀར་པོའི་མདོག་འདི་དག་རྣམས་ནི་ཉམས་ནས་ཀྱང་ནག་པོ་ཉེ་བར་འཕེལ་བར་འགྱུར་རོ། །གང་ཡང་དབུལ་པོར་གྱུར་པ་རིགས་ཤིན་ཏུ་དམན་པར་སྐྱེས་པ་དེའི་ཁ་དོག་ནག་པོའི་ལས་བྱས་པ་རྣམས་ནི་ནུབ་པར་གྱུར་ནས་ཀྱང་དཀར་པོའི་མདོག་རྣམས་ཀྱང་
རབ་ཏུ་འབྱུང་བར་འགྱུར་རོ། །གང་ཡང་བར་མའི་རིགས་སུ་གྱུར་པ་གཟུགས་ཕུན་སུམ་ཚོགས་པ་དང་། ལས་ཀྱང་བར་མ་རྣམས་བྱེད་པར་གྱུར་པ་དེ་དག་རྣམས་ནི་སེམས་རི་མོ་མཁན་གྱིས་དཀར་པོ་དང་དམར་པོ་དག་གིས་བཀྲ་བར་བྱས་སོ། །དེ་ལྟར་ཚོན་དུ་མ་རྣམས་ཀྱིས་མིའི་འཇིག་རྟེན་མཆོག་
ཏུ་བཀྲ་བར་གྱུར་པས་མཆོག་ཏུ་བཀྲ་བར་མངོན་པར་བྲིས་སོ། །གཞན་ཡང་འགྲོ་བ་གཞན་ལ་རྣམ་པར་བལྟ་བར་བྱ་སྟེ། གང་དག་ཅེ་ན། འདི་ལྟ་སྟེ་དམྱལ་བའི་འོ་དམྱལ་བ་རྣམས་ཡང་སེམས་རི་མོ་མཁན་གྱིས་གཉིས་ཀྱིས་མངོན་པར་བྲིས་པར་གྱུར་པ་ལ་འདི་ལྟ་སྟེ། སེར་པོ་དང་ནག་པོས་ཀྱང་ངོ་། །དེ་ལ་
ཇི་ལྟར་སེར་པོས་ཡིན་ན་འདི་ལྟ་སྟེ། ཞེ་སྡང་ངོ་། །ཚོན་ནག་པོས་ཡང་འདི་ལྟ་སྟེ། ཕྲག་དོག་གོ། །དམན་པ་དང་བར་མར་གྱུར་པའི་དམྱལ་བར་སྐྱེས་པ་རྣམས་ནི་མདོག་གཉིས་ཉིད་ཁོ་ནས་རྣམ་པར་བཀྲ་བར་བྱས་པར་གྱུར་པ་འདི་ལྟ་སྟེ། སྔོན་པོ་དང་ནག་པོ་དག་གིས་སོ། །དེ་ལྟར་དམྱལ་བ་རྣམས་ཚོན་
རྣམས་ཀྱིས་རྣམ་པར་བཀྲ་བར་བྱས་པ་ངེས་པར་རྟོགས་པར་གྱུར་པ་དང་། ཡང་འགྲོ་བ་གཞན་ལ་རྣམ་པར་བལྟ་བར་བྱ་སྟེ། གང་ཞེ་ན། འདི་ལྟ་སྟེ། ཡི་དགས་རྣམས་སོ། །ཡི་དགས་རྣམས་ཀྱང་མཆོག་ཏུ་སྡུག་བསྔལ་བར་གྱུར་པ་སྟེ། ཕྲག་དོག་དང་སེར་སྣ་དག་གིས་རྣམ་པར་བཀྲ་བར་གྱུར་པའོ། །
དེ་དག་རྣམས་ནི་ནག་པོའི་ཚོན་རྣམས་ཉིད་ཀྱིས་ཀྱང་རྣམ་པར་བཀྲ་བར་བྱས་ཏེ། ཁ་དོག་ནག་པོར་གྱུར་པའི་མུན་པ་རྣམས་ན་རྒྱུ་ཞིང་སྤྱོད་པར་འགྱུར་རོ། །བཀྲེས་པ་དང་སྐོམ་པས་བསྲེགས་པའི་ཡི་དགས་རྣམས་ནི་ལས་ནག་པོ་དང་ནག་པོའི་ལུས་དེ་དག་ཐམས་ཅད་ཉིད་ཀྱང་ལས་གཅིག་གི་ཚོན་གྱིས་རྣམ་

པར་བཀྲ་བར་བྱས་པའོ། །གཞན་ཡང་དུད་འགྲོ་རྣམས་ཀྱང་ལས་གང་དག་གི་ཚོན་གྱིས་རྣམ་པར་བཀྲ་བར་བྱས་པ་ཡིན་ན། ནག་པོ་དང་དམར་པོའོ། །དེ་ལ་གང་དག་མཆོག་ཏུ་སྡུག་བསྔལ་བར་གྱུར་པ་ཕན་ཚུན་དུ་འཇིགས་པས་འཇིགས་པར་གྱུར་པ་དེ་དག་རྣམས་
ནི་ནག་པོའི་ཚོན་ཉིད་ཀྱིས་རྣམ་པར་བཀྲ་བར་བྱས་སོ། །གང་ཡང་ཕན་ཚུན་དུ་འཇིགས་པས་འཇིགས་པར་གྱུར་པ་དེ་ནི་དམར་པོའི་ཚོན་རྣམས་ཉིད་ཀྱིས་སེམས་རི་མོ་མཁན་གྱིས་བཀྲ་བར་བྲིས་སོ། །དེ་དག་རྣམས་ཀྱང་གཞལ་དུ་མེད་པའི་དུད་འགྲོ་རྣམས་ཡིན་ཏེ། ཕན་ཚུན་དུ་གསོད་པ་དང་འཆིང་
བས་འཇིགས་པར་གྱུར་པ་དེ་དག་རྣམས་ཀྱང་མདོར་བསྡུ་ན་ནམ་མཁའ་ལ་རྒྱུ་བར་གྱུར་པ་རྣམས་ལས་གང་དག་ཤ་ཟ་བར་བྱེད་པ་ཡང་འདི་ལྟ་སྟེ། རྨ་བྱ་དང་། བྱེའུ་ལཱ་བ་ཀ་དང་། ངང་པ་ལ་སོགས་པའོ། །ས་གཞི་ལ་སྤྱོད་པ་ཡང་བ་ལང་དང་། མ་ཧེ་ཥཱ་དང་། ཕག་པ་དང་། ནགས་ཕྱུགས་ལ་
སོགས་པའོ། །ཆུ་ལ་རྒྱུ་བ་ཡང་ཉ་ལ་སོགས་པ་སྟེ། དེ་དག་རྣམས་ནི་ནག་པོའི་ཚོན་གྱིས་རྣམ་པར་བཀྲ་བར་བྱས་སོ། །གང་དག་གསོད་པའི་འཇིགས་པ་ཅན་མ་ཡིན་པ་དེ་དག་རྣམས་ནི་དམར་པོའི་ཚོན་གྱིས་བཀྲ་བར་བྱས་ཏེ། དཔེར་ན་མཐོ་རིས་ཀྱི་བྱ་རྣམས་སོ། །དེ་ལྟར་འགྲོ་བ་ལྔ་པོ་དེ་དག་
ཕལ་ཆེར་ཚོན་སྣ་ལྔས་བཀྲ་བར་བྱས་སོ། །ཀྱེ་མ་དེ་ཉིད་དཔྱོད་པར་བྱེད་པས་ཉམ་ཐག་པར་ཆུད་པའི་མཆོག་ཏུ་སྡུག་བསྔལ་བ་སྡུག་བསྔལ་སྔར་ནུབ་པར་གྱུར་པ། བག་མེད་པར་རྗེས་སུ་ཚོལ་བར་གྱུར་པས་ཕན་ཚུན་དུ་གནོད་པར་བྱེད་པས། བཀྲེས་པ་དང་སྐོམ་པས་བྱས་པའི་སྡུག་བསྔལ་རྣམས་ཀྱིས་
ཉེ་བར་བཅོམ་པར་གྱུར་པའོ། །དེས་དེ་ལྟར་རྣམ་པར་ངོ་མཚར་བ་རྣམས་ལ་མ་སྤྱད་པར་ཉམས་སྨད་པ་དང་། ལེ་ལོ་ཅན་དུ་གྱུར་པ་བསམ་གཏན་སྒོམ་པའི་རང་བཞིན་ཅན་མ་ཡིན་ལ། སེམས་རི་མོ་མཁན་མི་ཤེས་པར་རང་གི་སྐྱེ་བ་ལས་གཞན་དུ་གྱུར་པའི་རི་མོ་རྣམས་སེམས་པར་བྱེད་དོ། །རབ་ཏུ་བྱེད་དོ། །དེ་
ལ་མཆོག་ཏུ་ཡང་རྣམ་པར་བཀྲ་བར་གྱུར་པ་དེ་དག་ཉིད་ནི་འདི་ལྟ་སྟེ། འཁོར་བའི་སྐྱེ་བ་དང་། རྒ་བ་དང་། འཆི་བ་དང་། མི་སྡུག་པ་རྣམས་དང་ཕྲད་པ་དང་། སྡུག་པ་རྣམས་དང་འབྲལ་བ་དང་། གྲང་བ་དང་། ཚ་བ་དང་། བཀྲེས་པ་དང་། སྐོམ་པ་དང་། ཕན་ཚུན་མི་དགའ་བར་བྱེད་པ་དང་། དགའ་བར་བྱེད་

པའི་རྟག་ཏུ་གར་བྱེད་པར་གྱུར་པའི་བདེ་བ་དང་སྡུག་བསྔལ་རྣམས་དམྱལ་བ་དང་། ཡི་དགས་དང་། དུད་འགྲོ་དང་། ལྷ་དང་། མི་རྣམས་སུ་སྣ་ཚོགས་པའི་ལས་ཀྱི་གོ་འཕང་བྲིས་པར་གྱུར་པའི་འཁོར་བ་ངོ་མཚར་བ་དེ་དོན་དུ་གཉེར་བ་ཡང་མ་ཡིན་ནོ། །ཡིད་ལ་མི་བྱེད་པས་སྐྱོ་བ་མི་སྐྱེའོ། །ཇི་སྲིད་དུ་གཞན་
བསམ་གཏན་ལ་སྙོམས་པར་འཇུག་པ་ན་རྣམ་པར་འཚིག་པར་འགྱུར་བའི་རི་མོ་གཞན་བྱེད་དོ། །དགེ་སྦྱོང་རྣམ་པར་འཚིག་པར་གྱུར་པའོ། །གཞན་ཡང་རིམ་པ་གཞན་དག་གིས་མཆོག་ཏུ་རྣམ་པར་བཀྲ་བའི་འཁོར་བ་ལ་དཔྱོད་པར་བྱེད་དེ། ཇི་སྲིད་ཚོན་གཞན་རྣམས་ཀྱིས་རྣམ་པར་བཀྲ་བར་བྱས་པ་ལ་
དཔྱོད་པར་བྱེད་དོ། །འདི་ལྟ་སྟེ། རྣམ་པར་བཀྲ་བར་གྱུར་པའི་ཡུལ་རྣམས་དང་ཉེ་བར་འབྲེལ་བར་གྱུར་པ་གང་གིས་བཅིངས་པའི་སེམས་དུས་ཡུན་རིང་དུ་དམྱལ་བ་དང་། ཡི་དགས་དང་། དུད་འགྲོའི་འགྲོ་བ་རྣམས་ལ་ཡོངས་སུ་འཁྱམ་མོ། །ཇི་ལྟར་ཞེ་ན། འདི་ལྟ་སྟེ། གང་གི་ཚེ་མིག་
གིས་གཟུགས་སྡུག་པ་ཡིད་དུ་འོང་བར་གྱུར་པ་ཡུལ་གྱི་འདོད་ཆགས་སྐྱེད་པར་བྱེད་པ་རྣམས་མཐོང་བར་གྱུར་ན་དེ་དེ་དག་རྣམས་ལ་ཆགས་པར་འགྱུར་རོ། །དེ་དག་ནི་ནག་པོའི་ཚོན་གྱིས་བྱུགས་པ་ཡིན་ནོ། །དམྱལ་བ་དང་། ཡི་དགས་དང་། དུད་འགྲོ་རྣམས་སུ་སྐྱེ་བར་འགྱུར་རོ། །གང་གི་ཚེ་
གཟུགས་དེ་དག་ཉིད་མིག་གིས་མངོན་པར་མཐོང་བར་གྱུར་ནས། འདི་ལྟར་སེམས་པར་བྱེད་དེ། ཇི་ལྟར་གཟུགས་འདི་དག་རྣམས་ནི་མི་རྟག་པ་མི་བརྟན་པ་ཡོངས་སུ་མི་འགྱུར་བའི་ཆོས་མ་ཡིན་པས་ན་ཆོས་ཙམ་དུ་གྱུར་པའི་འཁོར་བ་འདི་ལ་འདོད་ཆགས་པར་མི་བྱའོ། །དེའི་ཚེ་དཀར་པོའི་ཚོན་
རྣམས་ཀྱིས་བསྐུས་ནས་ལྷ་དང་མིར་སྐྱེ་བར་འགྱུར་བ་དང་། གང་མྱ་ངན་ལས་འདས་པར་འགྲོ་བར་ཡང་འགྱུར་རོ། །དེ་ལྟར་མིག་གིས་རྣམ་པར་ཤེས་པར་བྱ་བ་རྣམས་ལ་མི་ཆགས་སོ། །རབ་ཏུ་རྟོག་པར་མི་བྱེད་དོ། །སྤྲོ་བར་མི་བྱེད་དོ། །འདུན་པའི་འདོད་ཆགས་སུ་མི་བྱེད་དོ། །མཆོག་ཏུ་དཀར་
པོར་གྱུར་པའི་ལས་རྣམས་ཀྱིས་ལྷ་ལས་ཀྱང་ཆེས་ལྷར་གྱུར་པ་རྣམས་དང་མི་རྣམས་སུ་བདེ་བར་འགྱུར་རོ། །དེ་ལྟར་ཡང་དགེ་སྦྱོང་ངན་པར་གྱུར་པ་འདིས་སྤྱོད་པར་མི་བྱེད་དོ། །བསམ་གཏན་དུ་མི་བྱེད་དོ། །དེ་བཞིན་དུ་མིག་གིས་རྣམ་པར་ཤེས་པར་བྱ་བའི་ཡུལ་རྣམས་ལ་གང་གི་ཚེ་

འདི་ཆགས་པར་གྱུར་ནས་ཡང་དག་པ་ཇི་ལྟ་བ་ཡིན་པར་གོ་བར་བྱེད་པར་གྱུར་པ་དེའི་ཚེ་ནག་པོའི་ལས་རྣམས་བྱེད་པར་འགྱུར་རོ། །དེས་ནག་པོའི་ལས་རྣམས་མ་རྟོགས་པར་བློ་དམན་པ་དེ་ཚོན་རྣམས་ཀྱིས་རྣམ་པར་བཀྲ་བར་བྱེད་དོ། །དེའི་ཕྱིར་ན་བསམ་གཏན་
ལ་སྙོམས་པར་འཇུག་པ་ན་རྣམ་པར་སྲེག་པར་འགྱུར་བའི་ལས་རྣམས་མི་བྱའོ། །བྱས་པར་གྱུར་པ་རྣམས་ཀྱང་དགེ་སྦྱོང་གིས་ཡིད་ལ་མི་བྱའོ། །གང་དག་ཅེ་ན། འདི་ལྟ་སྟེ། རྣ་བས་རྣམ་པར་ཤེས་པར་བྱ་བའི་སྒྲ་ཡིད་དུ་འོང་བ་རྣམས་ཡང་སྟེ། དེ་ལ་ཡིད་དུ་འོང་བ་རྣམས་ལ་གང་
གི་ཚེ་ཆགས་པར་གྱུར་པ་ན་ཡང་དག་པ་ཇི་ལྟ་བ་བཞིན་ཀུན་ནས་ལྟ་བར་བྱེད་དེ། ཇི་ལྟར་སྒྲ་འདི་དག་རྣམས་ནི་མི་བརྟན་པ། མི་རྟག་པ། རབ་ཏུ་རྣམ་པར་ཉམས་པར་འགྱུར་བའི་ཆོས་ཅན་ནོ་ཞེས་དེ་ལྟར་རྣམ་པར་ཤེས་པ་ཆགས་པར་མི་བྱེད་དོ། །ཀུན་ཏུ་སྤྲོ་བར་མི་བྱེད་དོ། །རབ་ཏུ་རྟོག་
པར་མི་བྱེད་དོ། །དེའི་ཚེ་འདིས་དཀར་པོའི་མཐའ་རྣམས་བྱས་པར་གྱུར་པ་ཡིན་ནོ། །མཆོག་ཏུ་རྒྱ་ཆེ་བའི་ཚོན་དེས་ཀྱང་ལྷ་དང་མི་རྣམས་སུ་སྐྱེ་བར་འགྱུར་བར་མཆོག་ཏུ་རྣམ་པར་བཀྲ་བར་བྱས་པར་གྱུར་པ་ཡིན་ནོ། །དེ་ལ་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་འདིས་སྒྲ་རྣམ་པར་
བཀྲ་བ་དེ་ལ་དཔྱོད་པར་མི་བྱེད་པ་ནས་ཇི་སྲིད་དུ་རི་མོའི་ལས་གཞན་རྣམས་བྱེད་པས་བསམ་གཏན་ལ་སྙོམས་པར་ཞུགས་པ་ན་རབ་ཏུ་སྲེག་པར་འགྱུར་རོ། །གཞན་ཡང་སྒྲ་དེ་ཉིད་ཐོས་པར་གྱུར་ནས་སྨན་པ་བློ་རབ་ཏུ་དམན་པ་ཐོས་པ་དང་མི་ལྡན་པ། བྱིས་པ་སོ་སོའི་སྐྱེ་བོ་དེ་ལྟར་རབ་
ཏུ་འཇུག་པར་བྱེད་དོ་ཇི་ལྟར་ཡིད་དུ་འོང་བའི་སྒྲ་ཚིམ་པ་སྐྱེད་པར་བྱེད་པ། ཡིད་འཕྲོག་པར་གྱུར་པ་དེ་ཉིད་ཀྱི་དེ་ཚུལ་བཞིན་མ་ཡིན་པ་ཡིད་ལ་བྱེད་པས་རབ་ཏུ་རྟོག་པར་བྱེད་དོ། །འདུན་པ་སྐྱེད་པར་བྱེད་དོ། །དེ་ལ་ཆགས་པ་དང་ལྡན་པ་འགྱུར་རོ། །དེ་དག་ནི་ནག་པོའི་ཚོན་དང་ལྡན་
པས་སེམས་རི་མོ་མཁན་གྱིས་དམྱལ་བ་དང་། ཡི་དགས་དང་། དུད་འགྲོ་རྣམས་ཉེ་བར་བྲིས་པ་ཡིན་ནོ། །དགེ་སྦྱོང་ངན་པ་འདི་ལས་རྣམ་པར་བཀྲ་བ་དེ་དག་བཏང་ནས་གཞན་དག་ཉིད་དུ་རི་མོ་བཀྲ་བར་བྱེད་དོ། །བསམ་གཏན་ལ་སྙོམས་པར་འཇུག་པ་ན་རྣམ་པར་སྲེག་པར་

འགྱུར་རོ། །གཞན་ཡང་འཁོར་བ་རྣམ་པར་བཀྲ་བར་གྱུར་པ་དེ་མ་བསམས་པར་དགེ་སྦྱོང་ངན་པ་གཞན་ཉིད་དུ་རི་མོ་བཀྲ་བར་བྱེད་དོ། །གང་ཞེ་ན། འདི་ལྟར་དབང་པོའི་ཡུལ་གྱིས་ཉེ་བར་ཀུན་ནས་བཅིངས་པར་གྱུར་པའི་འཁོར་བ་འདི་ཡིད་དུ་འོང་བར་བྱེད་པའི་ཡུལ་
གྱིས་འཇོམས་པར་བྱེད་དོ། །ཇི་ལྟར་ཞེ་ན། འདི་ལྟར་སྣའི་རྣམ་པར་ཤེས་པས་དྲི་རྣམས་ལའོ། །དེ་གང་གི་ཚེ་སྐྱེས་བུ་དམ་པ་རྣམས་ནི་སྣས་དྲི་ཞིམ་པོའམ་མི་ཞིམ་པ་རྣམས་ཀྱང་མི་འཛིན་ནོ། །དེ་མི་མཛེས་པ་རྣམས་ལ་ཡང་ཀུན་ཏུ་མི་ཆགས་སོ། །ཚུལ་བཞིན་མ་ཡིན་པ་ཡིད་
ལ་བྱེད་པས་མི་འཕྲོགས་སོ། །དེ་བཞིན་དུ་དྲི་འདི་དག་རྣམས་ནི་མི་རྟག་པ། མི་བརྟན་པ། ཐེར་ཟུག་མ་ཡིན་པ་ཡོངས་སུ་འགྱུར་བའི་ཆོས་ཅན་དང་། ཆོས་རྣམས་འབྱུང་བར་མི་འགྱུར་བ་དང་། བྱུང་ནས་ཀྱང་ཕྱིར་ལྡོག་པར་འགྱུར་རོ། །དེ་ལྟར་གང་གི་ཚེ་ཡང་དག་པ་ཇི་ལྟ་བར་གྱུར་
པ་ན་དྲི་རྣམས་སྣོམ་པས་དེ་ལྟར་དེ་ཆགས་པར་མི་འགྱུར་རོ། །ཀུན་ཏུ་སྤྲོ་བར་མི་བྱེད་དོ། །དེའི་ཚེ་དཀར་པོའི་ཆོས་རྣམས་ཡང་དག་པར་འཕེལ་བར་འགྱུར་རོ། །ཁ་དོག་གིས་ཤིན་ཏུ་འབར་བར་ཡང་མི་འགྱུར་རོ། །ཡང་དག་པ་ཇི་ལྟ་བས་དང་ཡོངས་སུ་ཤེས་པར་གྱུར་པ་དེ་དག་གིས་
ལྷ་དང་མི་རྣམས་སུ་སྟེ། དེ་དགེ་སྦྱོང་ངན་པ་འདིས་ལས་རྣམ་པར་བཀྲ་བ་དེ་དག་བོར་ནས་གཞན་དག་རྣམས་ཉིད་དུ་རི་མོའི་ལས་རྣམས་བྱེད་པས་བསམ་གཏན་སྒོམ་པ་ན་རྣམ་པར་སྲེག་པར་བྱེད་དོ། །གཞན་ཡང་དྲི་ཞིམ་པ་དང་མི་ཞིམ་པའི་དྲི་དེ་དག་རྣམས་ཉིད་སྣོམ་པར་བྱེད་པ་ན་དྲི་དེ་དག་རྣམས་
ཉིད་ལ་ཆགས་པར་བྱེད་དོ། །སྦྱོར་བར་བྱེད་དོ། །སྤྲོ་བར་བྱེད་དོ། །ཚུལ་བཞིན་མ་ཡིན་པར་ཡིད་ལ་བྱེད་པས་འདི་འཕྲོག་པར་འགྱུར་རོ། །གཤེ་བར་བྱ་བའི་གནས་སུ་གྱུར་པ་དེ་ནག་པོའི་ལས་རྣམས་ཀྱིས་བྱུགས་པར་གྱུར་ནས་དམྱལ་བ་དང་། ཡི་དགས་དང་། དུད་འགྲོར་
འཁོར་བར་བྱེད་པ་གང་ཡིན་པའི་ལས་རྣམ་པར་བཀྲ་བ་གཞན་དེ་དག་རྣམས་ཉིད་དགེ་སྦྱོང་ངན་པ་འདིས་སྤངས་ནས་རི་མོས་རྣམ་པར་བཀྲ་བའི་ལས་རྣམས་བྱེད་དོ། །བསམ་གཏན་སྒོམ་པ་ན་རྣམ་པར་སྲེག་པར་འགྱུར་རོ། །གཞན་ཡང་ལས་རྣམ་པར་བཀྲ་བ་རྣམས་ལ་འདི་

ལྟ་སྟེ། ལྕེའི་རྣམ་པར་ཤེས་པས་རོ་ཡིད་དུ་འོང་བས་ཡིད་དུ་འོང་བར་འགྱུར་བའི་རོ་རྣམས་མྱངས་པར་གྱུར་ན་ཡང་དགའ་བར་མི་བྱེད་དོ། །ཁྲོ་བར་མི་བྱེད་དོ། །འཆིང་བར་མི་འགྱུར་རོ། །ཚུལ་བཞིན་དུ་ཡིད་ལ་བྱེད་པ་དང་ལྡན་པས་རོ་དེ་ཉིད་རྣམ་པར་འབྱེད་པར་བྱེད་པ་སྟེ། ཇི་ལྟར་རོ་
འདི་དག་རྣམས་ནི་བྱུང་ནས་ཀྱང་མེད་པར་འགྱུར་རོ། །ལག་པའི་མཐིལ་གྱིས་བཅུག་པར་གྱུར་པའི་ཟས་འདི་དག་རྣམས་ནི་ལྕེ་ལ་འབབས་སོ། །དེ་རྣམས་ལ་མངར་མྱོས་ཞེས་བྱ་བའི་སྲིན་རྣམས་ཀྱིས་ཀྱང་རེག་ནས་ལྷན་ཅིག་ཏུ་མྱོང་བར་བྱེད་པ་ཉིད་ན་གླད་པ་ལས་སྣབས་ཞེས་བྱ་བའི་བློ་འབྱུང་བའི་གླད་
པ་རྣམས་རབ་ཏུ་ཟགས་ནས། སྣའི་སྦུབས་ནང་ན་མར་རབ་ཏུ་འབབས་པར་འགྱུར་ལ། རབ་ཏུ་ཟགས་པའི་རྣག་གི་ཐིགས་པ་དེ་དག་རྣམས་དང་ལྷན་ཅིག་ཏུ་ལྕེས་གཡུགས་ཤིང་། འགྲམ་སོའི་རང་ཐག་གི་དབུས་སུ་ཕྱེ་མར་བཏགས་པ་རྣམས་ལྕེས་མྱོང་བར་བྱེད་པ་གང་གིས་བྱིས་པ་འདི་དག་
རྣམས་འཆིང་བར་བྱེད་པ་ཡིན་ནོ། །རོ་དེ་དག་རྣམས་ཉིད་ཡང་དག་པ་ཇི་ལྟ་བ་བཞིན་དུ་འདིས་སེམས་པར་བྱེད་དོ། །དེས་ཚུལ་བཞིན་ཡིད་ལ་བྱེད་པས་རྣམ་པར་འབྱེད་པར་ཡང་བྱེད་དོ། །འདི་ནི་དཀར་པོའི་ཁ་དོག་རྣམས་དང་ཡང་དག་པར་ལྡན་པས་ལྷ་དང་མི་རྣམས་སུ་མཆོག་ཏུ་སྐྱིད་པར་
འགྱུར་རོ། །དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་འདིས་དེ་ལྟར་ལས་རྣམ་པ་སྣ་ཚོགས་པ་རྣམས་ཀྱིས་འཇིག་རྟེན་འདི་རྣམ་པར་བཀྲ་བར་བྱས་པ་དེ་དག་རྣམས་མི་རིག་པར་བསམ་གཏན་བསམ་པར་བྱེད་པ་ན་བར་དུ་གཅོད་པའི་རི་མོ་བཀྲ་བ་གཞན་དག་རྣམས་ཉིད་བྱེད་པ་ཡིན་ནོ། །གཞན་ཡང་
ལྕེ་ལ་བབས་པར་གྱུར་པའི་རོ་དེ་དག་ཉིད་ལ་སྲིན་མངར་མྱོས་ཀྱིས་རེག་པར་གྱུར་པ་རྣམས་ལ་མྱོང་བར་བྱེད་པ་ན་བློ་གྲོས་དམན་པའི་ཕྱིར་ན། ཀྱེ་མ་ཟས་འདི་དག་ནི་ཤིན་ཏུ་དགའ་བར་གྱུར་པ། མཆོག་ཏུ་བསོད་པ། མཆོག་ཏུ་མཛེས་པ། མཆོག་ཏུ་རྒྱ་ཆེ་བའི་མདོག་དང་། རོ་དང་། དྲི་དང་ལྡན་
པར་གྱུར་པ། མཆོག་ཏུ་གཙང་བར་གྱུར་པ་ཞེས་ཟས་དེའི་རྒྱགས་པས་རྒྱགས་ནས། ལུས་དང་། ངག་དང་། ཡིད་ཀྱིས་ཉེས་པར་སྤྱད་པ་རྣམས་སྤྱོད་པ་འདི་དག་རྣམས་ནི་ཚོན་ནག་པོས་རྣམ་པ་སྣ་ཚོགས་པར་བྱས་ནས་དུད་འགྲོར་སྐྱེ་བར་འགྱུར་རོ། །ཚུལ་བཞིན་མ་ཡིན་པ་ཡིད་ལ་བྱེད་པར་

ཀུན་ནས་འཁྲིད་པར་བྱེད་དོ། །དེ་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་འདིས་ལས་རྣམ་པ་སྣ་ཚོགས་པ་དེ་དག་རྣམས་བོར་ནས་བསམ་གཏན་སྒོམ་པ་ན་བར་ཆད་བྱེད་པར་འགྱུར་བའི་ཐ་མལ་པའི་ལས་གཞན་རྣམས་ཉིད་བྱེད་དོ། །གཞན་ཡང་རྣམ་པར་བཀྲ་བར་གྱུར་པའི་ལས་གང་དག་གིས་
འཇིག་རྟེན་འདི་དག་རྣམས་རྣམ་པར་བཀྲ་བར་བྱས་པ་ཡིན་ནོ། །དཔེར་ན་འཇིག་རྟེན་དབང་པོ་རྟུལ་པོ་རྣམས་ནི་ཡུལ་རྣམས་ཀྱིས་འཁྲིད་པར་བྱེད་དོ། །འདི་ལྟ་སྟེ། ལུས་ཀྱི་རྣམ་པར་ཤེས་པར་བྱ་བ་རེག་བྱའོ། །དེ་ལ་གང་དག་ཡང་དག་པ་ཇི་ལྟ་བ་ཁོ་ནར་ཚུལ་བཞིན་ཡིད་ལ་བྱེད་པས་འཁྲིད་པར་
བྱེད་དེ། ཇི་ལྟར་ཡང་རེག་བྱ་ཞེས་བྱ་བའི་དོན་འདི་ཡང་རེག་བྱ་ནི་གསུམ་འདུས་པས་ཀུན་དུ་སྐྱེས་པ་ཡིན་ཏེ། འདི་ནི་རྟག་པ་མ་ཡིན། བརྟན་པ་མ་ཡིན། ཐེར་ཟུག་མ་ཡིན། བྱེད་པ་པོ་མ་ཡིན་གྱི། འདི་ནི་མདོག་ཙམ་འབའ་ཞིག་གིས་ཡིད་དགའ་བར་གྱུར་པ་དང་། ལུས་འདི་ནི་དབང་པོའི་
རྗེས་སུ་འཐུན་པ་ཙམ་འབའ་ཞིག་ཏུ་གཙང་བ་ཡིན་གྱི་རྟག་པ་ནི་མ་ཡིན་ནོ། །བདེ་བ་མ་ཡིན། བདག་དང་བཅས་པ་ཡང་མ་ཡིན་གྱི། འདི་ནི་ཚོགས་པ་འདུས་པ་ཙམ་འབའ་ཞིག་ཡིན་ཏེ། འབྱུང་བ་ཆེན་པོ་བཞི་ལས་བྱུང་བའི་ཟ་མ་ཏོག་ཏུ་གྱུར་པའོ། །ཟུག་རྔུར་གྱུར་པ་རྟག་ཏུ་ཉེ་བར་འཚེ་བར་
བྱེད་པ། རྟག་པ་ཁོ་ནར་ཡང་ནད་ཀྱིས་ཉེ་བར་འཚེ་བར་བྱེད་པ། ཉེ་བར་འཚེ་བ་ཐམས་ཅད་ཀྱིས་འཁྲིད་པར་བྱེད་པ་ཡིན་ནོ། །དེ་གང་དག་ཁོ་ནས་ཡང་དག་པ་ཇི་ལྟ་བར་ལུས་དེ་ཉིད་དང་རེག་བྱ་ལ་ཡང་སོ་སོར་རྟོག་པར་བྱེད་དོ། །དེའི་ཚེ་འདི་རེག་བྱས་འདི་འཁྲིད་པར་མི་འགྱུར་རོ། །རེག་བྱ་འདི་
ནི་གཞན་མ་ཡིན་གྱི། རེག་བྱ་འདི་ནི་བློ་བུར་འབའ་ཞིག་གོ། །འདི་ནི་ཉེ་བར་འཚེ་བ་དང་བཅས་པའོ། །རང་དབང་མེད་པ་ཡིན་ནོ་ཞེས་གང་དག་དེ་བཞིན་དུ་ཚུལ་བཞིན་ཡིད་ལ་བྱེད་པས་དཔྱོད་པར་བྱེད་དོ། །དེ་དག་རྣམས་ནི་དཀར་པོའི་ཚོན་གྱིས་རྣམ་པར་བཀྲ་བར་བྱས་ནས། ལྷ་དང་མིར་སྐྱེ་བར་
འགྱུར་བ་དེ་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་འདིས་དཔྱོད་པར་མི་བྱེད་དོ། །སེམས་རི་མོ་མཁན་གྱིས་འཇིག་རྟེན་པ་འདིའི་ལས་རྣམས་རྣམ་པར་བཀྲ་བར་བྱས་པར་གྱུར་པ་དེ་འདིས་བཏང་ནས། བསམ་གཏན་ལ་སྙོམས་པར་འཇུག་པ་ན་བར་ཆད་བྱེད་པའི་ཐ་མལ་པའི་ཚོན་རྣམས་ཀྱིས་རི་མོས་

བཀྲ་བའི་ལས་གཞན་རྣམས་ཉིད་བྱེད་དོ། །གཞན་ཡང་རེག་བྱ་དེ་ཉིད་ལ་ཐོས་པ་དང་མི་ལྡན་པའི་བྱིས་པ་སོ་སོའི་སྐྱེ་བོ་བློ་གྲོས་དམན་པ་རྣམས་ཀྱིས་རེག་བྱ་དེ་གཞན་ཉིད་དུ་རྣམ་པར་རྟོག་པར་བྱེད་དོ། །ཚུལ་བཞིན་མ་ཡིན་པའི་ཡིད་ལ་བྱེད་པར་གྱུར་པས་ཇི་ལྟར་བདག་གི་རེག་བྱ་འདི་དག་ནི་མཆོག་
ཏུ་བདེ་བར་གྱུར་པ། མཆོག་ཏུ་ལུས་རྒྱས་པའི་རྒྱུ་འདིས་བདག་ཚིམ་པར་བྱས་པ་དག་གིས་བདག་བདེ་བར་གནས་པར་བྱའོ། །དེ་བཞིན་དུ་ཐོས་པ་དང་མི་ལྡན་པའི་བྱིས་པ་སོ་སོའི་སྐྱེ་བོ་གང་ཡིན་པ་དེ་དག་རྣམས་ཀྱིས་རེག་བྱ་ལ་ཚུལ་བཞིན་མ་ཡིན་པའི་ཡིད་ལ་བྱེད་པས་དཔྱོད་པར་བྱེད་དོ། །འདི་དག་རྣམས་ནི་ཚོན་
ནག་པོ་དང་ཀུན་ནས་ལྡན་པར་གྱུར་པས་དམྱལ་བ་དང་། ཡི་དགས་དང་། དུད་འགྲོ་རྣམས་སུ་སྐྱེ་བར་འགྱུར་རོ། །དེ་ནི་ཚོན་ནག་པོས་རྣམ་པར་བཀྲ་བར་བྱས་པ་ཡིན་ནོ། །དེ་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་འདིས་དཔྱོད་པར་མི་བྱེད་ཅིང་། ལས་རྣམ་པར་བཀྲ་བ་དེ་དག་སྤངས་ནས་བསམ་གཏན་སྒོམ་
པ་ན་བར་ཆད་བྱེད་པར་འགྱུར་བའི་རྣམ་པར་བཀྲ་བ་གཞན་ཉིད་དུ་གྱུར་པ་འཇིག་རྟེན་པའི་ཚོན་གཞན་ཉིད་ཀྱིས་རྣམ་པར་བཀྲ་བར་བྱེད་དོ། །གཞན་ཡང་དགེ་སྦྱོང་དུ་ཁས་འཆེས་པ་འཇིག་རྟེན་པའི་ལས་རྣམས་ལ་མངོན་པར་དགའ་བར་གྱུར་པས་ཡིད་ཀྱིས་དམ་པའི་ཆོས་རྣམས་སེམས་པར་མི་བྱེད་དོ། །འཕགས་
པའི་བདེན་པ་བཞིར་འགོག་པ་དང་། ལམ་རྣམ་པ་བཅུ་དྲུག་དབུགས་འབྱུང་བ་དང་རྔུབ་པ་དྲན་པ་དང་། བསམ་གཏན་བཞི་དང་། ཚངས་པའི་གནས་པ་བཞི་དང་། འབྲས་བུ་བཞི་དང་། ཆོས་དེ་དག་རྣམས་སྤངས་ནས་རང་བཞིན་གྱིས་མི་ཤེས་པར་གྱུར་པ། ཆགས་པས་བདག་གི་སེམས་ཀུན་
ནས་བསྒོ་བར་བྱེད་པ་འབའ་ཞིག་ཏུ་གྱུར་པ་གཞན་ཉིད་བྱེད་དེ། བསམ་གཏན་སྒོམ་པ་ན་བར་དུ་གཅོད་པར་བྱེད་པར་གྱུར་པ་གཞན་དུ་ན་ཀུན་ནས་ཉོན་མོངས་པར་གྱུར་པ་ཤེས་པ་མ་ཡིན་པའི་རྣམ་པར་བཀྲ་བའི་ལས་གཞན་རྣམས་ཉིད་བྱེད་དོ། །གང་གི་རྒྱུས་ཚུལ་བཞིན་མ་ཡིན་པའི་ཡིད་ལ་བྱེད་པ་རྣམས་
འཕེན་པར་གྱུར་པས་ལུས་ཞིག་པར་གྱུར་པ་དང་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེ་བར་འགྱུར་རོ། །གཞན་ཡང་སྐྱོན་ཆེན་པོར་གྱུར་པ་གང་གི་ཚེ་བུད་མེད་རྣམས་མངོན་པར་འདྲིད་པར་བྱེད་པ་ནི་དམྱལ་བར་འགྲོ་བར་འགྱུར་བའི་རྒྱུ་ཡིན་ཏེ། མཛེས་པར་གྱུར་པ། རྒྱན་དང་ཆ་བྱད་སྣ་

ཚོགས་པ་དང་ལྡན་པ་མཐོང་ན་སྡུག་པར་གྱུར་པའི་གཟུགས་བྱིས་པ་སོ་སོའི་སྐྱེ་བོ་རྣམས་ཡིད་འཕྲོག་པར་བྱེད་པའི་ལུས་མངོན་པར་མཐོང་ནས་ཀྱང་དེ་དག་རྣམས་ཡིད་འཕྲོག་པར་འགྱུར་བ་དང་། ཡིད་འདོད་ཆགས་སུ་ཆུད་པར་ཡང་འགྱུར་ན་གང་དག་འདིར་བུད་མེད་དངོས་སུ་ཡོད་པ་རྣམས་ལ་ལྟ་ཅི་སྨོས། གཞན་
དག་རྣམས་དང་བདག་ཉིད་ཀྱང་ཀུན་དུ་འདོད་ཆགས་པར་བྱེད་པ་པོའི་ལུས་ཞིག་པར་གྱུར་པ་ན་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེའོ། །དེ་ནས་དེའི་ཚེ་བཅོམ་ལྡན་འདས་འོད་སྲུང་དེས་ཚིགས་སུ་བཅད་པ་གསུངས་པ། ཇི་ལྟར། ལས་ཀྱིས་བཀྲ་བ་མ་བསམས་པར། །གང་ཞིག་རི་མོ་ལ་འཇུག་པ། །
རི་མོའི་ལས་ཀྱིས་དེ་བསྲེགས་ནས། །དམྱལ་བའི་རྗེས་སུ་རྒྱུག་པ་ཡིན། །གང་ཞིག་བདེ་ལེགས་མི་སེམས་པར། །ཟག་བཅས་ལ་ནི་ཉེར་ཆགས་པ། །སྙིང་ལ་ཆགས་ཅན་རྨོངས་པ་དེ། །གཡང་སའི་རྗེས་སུ་རྒྱུག་པ་ཡིན། །ལོང་བ་ལ་བརྟེན་སྐྱེས་བུ་གང་། །བསམ་གཏན་སྒོམ་པར་
བྱེད་པ་ན། །རང་ཉིད་བཀྲ་བ་དེ་བཏང་ནས། །དེ་ལ་བྱིས་རྣམས་རབ་ཏུ་ཆགས། །རི་མོའི་ལས་ལ་རྣམ་སྤྱོད་པའི། །རི་མོའི་ཞགས་པས་བྱིས་པ་དེ། །རི་མོའི་ལས་ཀྱིས་རྨོངས་པ་ཡིས། །དབང་མེད་པར་ནི་དམྱལ་བར་ཁྲིད། །ཚོན་གྱི་རི་མོ་བཀྲར་གྱུར་ཡང་། །སེམས་ཀྱི་རི་མོའི་དཔེར་མི་
ཕོད། །ཆར་གྱིས་རི་མོ་དེ་རབ་འཇིག །ལས་ཀྱི་རི་མོ་འདི་འཇིག་མིན། །ཤིན་ཏུ་བཀྲ་བའི་རི་མོ་གང་། །རི་མོ་དམ་པར་དེ་མི་འདོད། །ལས་ཀྱི་རི་མོའི་རི་མོ་ཆེ། །ཁམས་གསུམ་གོ་འཕང་བཀྲ་བར་བྱས། །སྣ་ཚོགས་རི་མོའི་གཟུགས་ཀྱིས་གང་། །སེམས་ཅན་འགྲོ་བ་ལྔ་ན་འཁྱམ། །
ལས་རྣམས་སྣ་ཚོགས་དེ་དག་ཀུན། །རི་མོ་མཁན་གྱིས་རྣམ་པར་བྲིས། །རི་མོ་མཁན་གྱི་སེམས་འདིས་ནི། །ལས་ཀྱི་དྲ་བ་རྣམ་བཀྲར་བྱས། །གང་འདི་དྲ་བས་བཅིངས་ནས་ནི། །འགྲོ་བ་འཁྲུལ་བ་རྣམ་པར་རྨོངས། །ཆར་ཚད་རྡུལ་དང་དུ་བ་ཡིས། །ཚོན་སྐྱེས་རི་མོ་འཇིག་པ་ཡིན། །
བསྐལ་པ་བྱེ་བ་སྟོང་དུ་ཡང་། །སེམས་ཀྱི་རི་མོ་འཇིག་མི་འགྱུར། །ས་གཞི་རྣམས་ནི་འཇིག་འགྱུར་ཞིང་། །རྒྱ་མཚོ་ཡང་ནི་སྐམ་འགྱུར་ཡང་། །སེམས་ཀྱིས་བྱས་པའི་རི་མོ་གང་། །དེ་ནི་ཉམས་སུ་མྱོང་བར་གནས། །རང་གི་ལས་ཀྱི་རི་མོ་ཡང་། །རྣམ་པར་རྨོངས་པས་མ་མཐོང་ངོ་། །

ཇི་སྲིད་དུ་ནི་ནོར་འདོད་པས། །རི་མོ་གཞན་ནི་རབ་ཏུ་བྱེད། །དེའི་ཕྱིར་ན་བསམ་གཏན་སྒོམ་པར་བྱེད་པ་ན་བར་དུ་གཅོད་པར་གྱུར་པ་སྐྱོན་དུ་མ་ཀུན་དུ་རྟོགས་པར་འགྱུར་བ། མ་གུས་པར་འགྱུར་བ་ལ་སྟེན་པར་བྱེད་པའི་རི་མོའི་ལས་རྣམས་དགེ་སློང་གིས་མི་བྱའོ། །དེ་དག་ལ་རྣམ་པར་
གཡེང་བར་གྱུར་པའི་ཡིད་ཀྱིས་བདེ་ལེགས་ཐོབ་པར་མི་འགྱུར་རོ། །དགེ་བའི་ལས་རྣམས་ལས་གཅིག་ཀྱང་ཡིད་ལ་བྱས་ཏེ་སྒོམ་པར་མི་བྱེད་དོ། །དེའི་ཕྱིར་ན་བདེ་ལེགས་ལག་ཏུ་འོང་བར་འདོད་པ་རྣམས་དང་། ལས་ཀྱི་འཇིགས་པས་འཇིགས་པར་གྱུར་པ་རྣམས་ཀྱིས་འདི་ལྟར་བསླབ་པར་བྱ་སྟེ།
ཚོན་གྱིས་བསྒོ་བར་མི་བྱེད་པའོ། །རྗེས་སུ་གཟུང་བ་སྟེ། འདི་ནི་བདག་ཅག་རྣམས་ལ་རྗེས་སུ་གདམས་པའོ། །སྐྱོན་དེ་དག་རྣམས་རིག་པར་བྱས་ལ་ཆོས་གསུམ་པ་འདི་དགེ་སྦྱོང་གིས་མི་བྱའོ། །གཞན་ཡང་ཆོས་བཞི་པ་དགེ་སྦྱོང་གིས་མི་བྱ་སྟེ། འདི་ཡང་གང་ཞེ་ན། ཐོས་པ་ངན་པ་
སྙན་དངགས་སྡེབ་པའོ། །འདི་ན་དགེ་སློང་གང་དག་བུ་དང་། བུ་མོ་དང་། རང་གི་སྐྱེ་བོ་རྣམས་དང་། སྤུན་དང་། ཕ་དང་། གཉེན་བཤེས་རྣམས་ཀྱང་སྤངས་ནས་རབ་ཏུ་བྱུང་སྟེ། ཉོན་མོངས་པ་སྤང་བའི་དོན་དུ་བསམ་གཏན་སྒོམ་པར་བྱེད་པར་གྱུར་ཅིང་། ཉོན་མོངས་པ་རྣམས་ཀྱང་ཡིད་རྩེ་
གཅིག་པས་གཞོམ་པར་བྱ་བ་ཡིན་གྱི། རྣམ་པར་གཡེང་བའི་ཡིད་ཀྱིས་ནི་མ་ཡིན་ནོ། །གང་དག་སྙན་དངགས་བྱེད་པར་གྱུར་པ་དེ་དག་རྣམས་ནི་སྣ་ཚོགས་པ་རྣམས་ལ་བརྟེན་ནས་བློ་རྣམ་པར་གཡེང་བར་འགྱུར་རོ། །དེའི་ཡིད་རྣམ་པར་གཡེང་བར་གྱུར་པས་ནི་དགེ་བའི་ཆོས་རྣམས་ཀྱི་བར་དུ་གཅོད་
པར་བྱེད་པར་འགྱུར་རོ། །བསམ་གཏན་སྒོམ་པར་མི་བྱེད་དོ། །བསམ་གཏན་དུ་མི་བྱེད་དོ། །བླ་མ་ལ་སྟེན་པར་མི་བྱེད་དོ། །དམ་པའི་ཆོས་ཉན་པ་ལ་མངོན་པར་དགའ་བར་མི་འགྱུར་རོ། །དཀོན་མཆོག་གསུམ་མཆོད་པ་ལ་མངོན་པར་དགའ་བར་མི་འགྱུར་རོ། །ངེས་པར་འབྱུང་བའི་ལམ་ལ་
མངོན་པར་དགའ་བའི་རང་བཞིན་ཅན་དུ་མི་འགྱུར་རོ། །རྟག་པར་རྒྱུན་དུ་ཡང་སྙན་དངགས་སྡེབ་པ་ལ་མངོན་པར་དགའ་བར་འགྱུར་རོ། །དེ་སྙན་དངགས་དེའི་རྟེན་གྱི་དོན་དུ་ཐོས་པ་ངན་པ་རྣམ་པ་སྣ་ཚོགས་པ་རྣམས་ཉན་པར་བྱེད་དོ། །གང་དག་ཆོས་ཉིད་ལས་འདས་པར་གྱུར་པ་ཉན་པ་ལ་དགའ་བར་

འགྱུར་བ་ཙམ་འབའ་ཞིག་པ་ཚུལ་བཞིན་མ་ཡིན་པའི་ཡིད་ལ་བྱེད་པ་ཀུན་དུ་སྐྱེད་པར་བྱེད་པ་འབྲེལ་པ་མེད་པ་རྣམས་རྗོད་པར་བྱེད་པ་དང་ལྡན་པར་གྱུར་པ་དེ་དག་ལ་ཡང་དགེ་སྦྱོང་ངན་པ་འདི་དད་པར་བྱེད་དོ། །དེ་ཡང་དང་ཡང་དུ་ཉན་པར་བྱེད་པས་ཐོས་པ་ངན་པའི་ལམ་དེ་ཉིད་ཀྱིས་འཁྲིད་པར་བྱེད་དོ། །དེས་
ཁྲིད་པར་གྱུར་པས་སླར་ཉིད་ཀྱང་ཁྱིམ་པར་འགྱུར་རོ། །དེ་ཡང་དམ་པའི་ཆོས་ལས་ཀྱང་ཡོངས་སུ་ཉམས་པར་འགྱུར་རོ། །དེ་ནི་སྙན་དངགས་ལ་མངོན་པར་དགའ་བ་ཉིད་ཀྱིས་དགའ་བར་གྱུར་པ་དེ་སྡེབས་བྱེད་པར་གྱུར་གྱི། དེ་བསམ་གཏན་སྒོམ་པ་ལ་ནི་ལེ་ལོ་ཅན་དུ་འགྱུར་ཞིང་དགེ་འདུན་གྱི་ནང་
དུ་འཇུག་པ་དང་ལྡན་པ་ཡང་མ་ཡིན་ནོ། །ཟས་དང་གནས་ལ་ལོངས་སྤྱོད་པ་རྣམས་ཐམས་ཅད་ཀྱིས་ཀྱང་དེའི་བར་དུ་གཅོད་པར་འགྱུར་རོ། །གང་དག་ལེ་ལོ་ཅན་དུ་གྱུར་པ་རྣམས་དང་པོ་ཁོ་ནར་ཚུལ་ཁྲིམས་འཆལ་བས་ནི་དགེ་འདུན་གྱི་ནང་དུ་འཇུག་པར་མི་བྱ་ན་གནས་མལ་རྣམས་དང་།
ནད་ཀྱི་རྐྱེན་སྨན་གྱི་ཚད་དུ་གྱུར་པ་དང་། གཞན་རྣམས་ལྟ་བརྗོད་ཀྱང་ཅི་དགོས་ནས། གསོང་པོར་སྨྲས་པ་དང་། ཕྱག་བྱས་པས་ཀྱང་ལེ་ལོ་ཅན་གྱི་བར་ཆད་བྱེད་པར་འགྱུར་རོ། །བསམ་གཏན་དུ་བྱ་བ་ལས་སྙན་དངགས་གང་བསྡེབས་པར་གྱུར་པ་ལ་ཆེད་ཆེར་བྱེད་པས་བརྩམ་པར་འོས་པའི་སྙན་
དངགས་དེ་དག་བྱེད་ལ་དེ་དག་འབའ་ཞིག་ཏུ་ནི་མ་ཟད་ཀྱི། ཡང་དང་ཡང་དུ་དེ་ལ་འགྲོ་བ་ཁོ་ན་དང་། དེའི་ཚེ་དེ་ལ་རྟེན་པ་ལ་སེམས་མངོན་པར་དགའ་བ་དང་། རྣམ་པ་སྣ་ཚོགས་པའི་ཐབས་རྣམས་ཀྱི་བློ་རྣམ་པ་སྣ་ཚོགས་པ་དང་། རྣམ་པར་རྟོག་པ་དུ་མ་རྣམས་ཀྱིས་ཀུན་ནས་བཅོམ་པ་དང་།
རྣམ་པ་སྣ་ཚོགས་པའི་རོ་རྣམས་སྐྱེད་པར་བྱེད་པའི་སྙན་དངགས་བྱེད་དོ། །དེས་དེའི་ཡིད་རྣམ་པར་དཀྲུགས་པར་གྱུར་པས་ཚེའི་འདུ་བྱེད་རྣམས་ནི་ཟད་པར་གྱུར་ལ། འཆི་བདག་གི་རྒྱལ་པོ་ནི་ཉེ་བར་འོངས་པར་གྱུར་པས་བྱ་བ་རྣམས་མ་བྱས་པར་ཡང་གྲོགས་མེད་ཅིང་། འཇིག་རྟེན་
འདས་པའི་ལམ་དང་རྣམ་པར་བྲལ་བ་གང་ཡིན་པའི་ཕྱོགས་སུ་འགྲོ་བར་བྱ་དགོས་སོ། །དེ་ཡང་སྙན་དངགས་ཀུན་དུ་སྡེབ་པ་དེ་ལ་བློ་སོང་བར་གྱུར་པ་ཡིན་ནོ། །སྐྱེས་བུ་འདི་ནི་དེས་རྨོངས་པར་གྱུར་ནས་བར་དུ་གཅོད་པ་ཆེན་པོ་རྣམས་ཀྱིས་བསླུས་པའི་མཆོག་ཐོབ་པར་འགྱུར་རོ། །གྱ་རྒུད་

ཀྱིས་མི་ཐོབ་པར་གྱུར་ཅིང་དབང་པོ་རྣམས་ཚང་བ་དང་། རབ་ཏུ་བྱུང་བར་གྱུར་པ་དང་། མཆོག་ཏུ་དགའ་བ་དེ་དག་ཐོབ་ནས་ཀྱང་ཅིའི་ཕྱིར་སྙན་དངགས་སྡེབ་པས་བསླུས་ནས་དུས་བྱེད་པར་འགྱུར་བ་ནི་རང་གི་དོན་ལས་ཉམས་པ་ཡིན་ནོ། །སྙན་དངགས་བྱེད་པར་གྱུར་པ་ན་
སྐྱོན་གཞན་ཡང་ཡོད་དེ། དེ་ཡང་ཕལ་ཆེར་རྣམ་པར་རྟོག་པས་ཉེ་བར་བཅོམ་པའི་སེམས་དྲི་མ་ཅན་དྲི་མ་ཅན་གྱི་ཀུན་ཏུ་སྤྱོད་པ་དག་གིས་སྙན་དངགས་བྱེད་དོ། །རྣམ་པར་རྟོག་པ་དེ་ཉིད་ལས་གཞན་རྣམ་པར་རྟོག་པ་དེ་ལྟ་བུའི་རྣམ་པ་ནི་འགའ་ཡང་མི་འབྱུང་ངོ་། །ཇི་ལྟར་བུད་མེད་ཀྱི་རྣམ་པར་རྟོག་པ་རྣམས་
ནི་དགེ་སློང་གིས་མི་བྱའོ། །རྣམ་པར་རྟོག་པ་དེས་ཀྱང་རང་ཉིད་སྲེག་པར་བྱེད་དོ། །མེ་ཇི་ལྟ་བར་རང་གི་རྣམ་པར་རྟོག་པས་སྲེག་པར་འགྱུར་རོ། །དེ་ལྟར་བུད་མེད་ཀྱི་རྣམ་པར་རྟོག་པ་རྣམས་ཀྱང་བྱིས་པའི་སྐྱེ་བོའི་ཚོགས་རྣམས་ཐམས་ཅད་ཉིད་ལ་སྐྱེ་བ་གཞན་བརྒྱ་སྟོང་གི་བར་དུ་ཡང་མཐོང་
བ་ཡིན་ནོ། །སྙན་དངགས་རྣམས་ཀྱང་དང་པོ་ཁོ་ན་བུད་མེད་རྣམས་ལ་ཅི་ནས་ཀྱང་འབབ་པ་ཡིན་ནོ། །དེ་བུད་མེད་ཀྱི་རྣམ་པར་རྟོག་པས་ཉེ་བར་བཅོམ་པར་གྱུར་པས་ཇི་སྲིད་དུ་རྐང་པ་ནས་མགོ་བོའི་བར་རྣམས་ལ་དེ་སྲིད་དུ་རྣམ་པ་དུ་མའི་ཚུལ་བཞིན་མ་ཡིན་པ་ཡིད་ལ་བྱེད་པ་སྐྱེད་པར་འགྱུར་བ་བྱིས་པའི་སྐྱེ་
བོ་རྣམས་ཐམས་ཅད་ཀྱི་ཡིད་འཕྲོག་པར་བྱེད་པར་སྙན་དངགས་ཀྱིས་བུད་མེད་ཀྱི་ལུས་ཀྱི་ཆ་རྣམས་དེས་རབ་ཏུ་བསྔགས་པར་བྱེད་དོ། །མཆོད་པར་བྱེད་དོ། །ཡིད་ལའང་རབ་ཏུ་འཇོག་པར་བྱེད་དོ། །གཙང་མ་ཡིན་པར་རབ་ཏུ་སྟོན་ནོ། །དེ་བདག་ཉིད་ཐམས་ཅད་ཀྱིས་ཚུལ་བཞིན་མ་ཡིན་པ་ཡིད་
ལ་བྱེད་པས་འཁྲིད་པར་འགྱུར་ལ་གཞན་དག་རྣམས་ཀྱང་ཚུལ་བཞིན་མ་ཡིན་པ་ཡིད་ལ་བྱེད་པ་དེ་ལ་རབ་ཏུ་འགོད་པར་བྱེད་དོ། །རང་དང་གཞན་ཡོངས་སུ་ཉམས་པར་བྱེད་པ་པོ་དེ་ནི་ཤི་བར་གྱུར་ནས་ལུས་ཞིག་པའི་འོག་ཏུ་ངན་སོང་ལོག་པར་ལྟུང་བ་ཐབས་མ་ཡིན་པས་ཀུན་དུ་བཅོམ་པའི་དམྱལ་བར་
སྐྱེའོ། །ཐོས་པ་ངན་པ་སྙན་དངགས་སྡེབ་པར་བྱེད་པ་དེའི་སྐྱོན་ནི་འདི་ཡིན་ནོ། །གཞན་ཡང་ཐོས་པ་ངན་པ་སྙན་དངགས་རྣམས་སྡེབ་པར་བྱེད་པའི་སྐྱོན་ཆེན་པོ་ནི་འདི་ལྟ་སྟེ། དགེ་སྦྱོང་ངན་པ་དེ་སྙན་དངགས་སྡེབ་པར་བྱེད་པས་རྒྱགས་ཤིང་མུན་པར་གྱུར་ཏེ། བློ་ཤིན་ཏུ་ལོང་བར་གྱུར་པའི་ཕྱིར་

ཐོས་པ་མ་ཡིན། མཐོང་བ་མ་ཡིན། གཞན་དག་རྣམས་ཀྱི་དྲུང་ན་ཉན་པ་ཡང་མ་ཡིན་ནོ། །དེ་ལ་འདི་སྙན་དངགས་སྡེབ་པར་བྱེད་པར་འདོད་པས་ཀྱང་ངེས་པར་འཆིང་བར་འགྱུར་རོ། །རབ་ཏུ་གནས་པར་བྱེད་དོ། །གཞན་དག་རྣམས་ཀྱང་རྣམ་པ་སྣ་ཚོགས་པའི་ཚིག་གི་རྐང་པ་རྗོད་པ་རྣམས་
ཀྱིས་ཉེ་བར་འབྲེལ་བར་བྱེད་དོ། །ཇི་ལྟར་སྐྱེ་བར་འགྱུར་བ་དེ་བཞིན་དུ་དེ་ཉིད་ཀྱིས་དོན་དེ་དག་རྣམས་དངོས་སུ་མཐོང་བར་གྱུར་ནས་དེ་དག་གིས་སྐྱེས་བུ་ངན་པ་དེ་དེ་བཞིན་དུ་འཇོམས་པར་འགྱུར་རོ། །རང་གི་སེམས་ཀྱིས་ཀུན་ནས་སློང་བས་ཡོངས་སུ་བསྡེབས་པའི་རྫུན་དེ་དག་རྣམས་ཀྱི་སྐྱོན་དེས་ལུས་
ཞིག་ནས་ཤི་བའི་འོག་ཏུ་ཐབས་མིན་པའི་ལོག་པར་ལྟུང་བ་དམྱལ་བ་རྣམས་སུ་སྐྱེ་བར་འགྱུར་རོ། །སྙན་དངགས་སྡེབ་པར་བྱེད་པའི་སྐྱོན་གྱིས་གཞན་ཡང་སྐྱོན་ཆེན་པོར་འགྱུར་རོ། །ཐོས་པ་ངན་པ་སྙན་དངགས་སྡེབ་པར་བྱེད་པ་རྣམས་ཀྱི་ནི་འདི་ལྟ་སྟེ། ཐོས་པ་ངན་པ་སྙན་དངགས་སྡེབ་པ་ལ་
མངོན་པར་དགའ་བར་གྱུར་པས་སྙན་དངགས་གཞན་དག་རྣམས་རྙེད་པ་ཡང་ཉན་པར་བྱེད་དོ། །དེས་དེ་དག་རྣམས་ཐོས་ནས་ཀྱང་རང་གི་རྣམས་སྒྲུབ་པའི་དོན་དུ་རབ་ཏུ་ཞེ་སྡང་བར་བྱེད་པ་དང་། སྔོན་གྱི་སྙན་དངགས་པ་རྣམས་ལ་འཕྱ་བར་བྱེད་དོ། །མཛེས་པར་གྱུར་པའི་སྙན་དངགས་ལ་རབ་ཏུ་
ཞེ་སྡང་བར་བྱེད་པའི་དགེ་སྦྱོང་ངན་པ་དེ་ནི་དེ་ལྟར་བསམ་གཏན་སྒོམ་པས་སྟོང་པར་གྱུར་ནས་གནོད་སེམས་མངོན་པར་འཕེལ་བར་འགྱུར་རོ། །དྲི་མ་ཅན་གྱི་ལས་རྣམས་ནི་ཀུན་ནས་རབ་ཏུ་བསགས་པར་འགྱུར་ལ། འདིའི་དཀར་པོའི་ཆོས་རྣམས་ནི་ཟད་པར་འགྱུར་བས་འཇིག་རྟེན་ཕ་རོལ་ཏུ་བདེ་
བར་བྱེད་པའི་གྲོགས་ཚངས་པ་མཚུངས་པར་སྤྱོད་པ་རྣམས་དེ་ལྟར་གཤེ་བར་བྱེད་དོ། །ཐོས་པ་ངན་པ་སྙན་དངགས་སྡེབ་པར་བྱེད་པ་རྟག་ཏུ་བག་མེད་པ་ལ་སེམས་པ་རྣམས་ལ་ནི་གཞན་ཡང་སྐྱོན་ཆེན་པོ་ཡོད་དེ། ཐོས་པ་ངན་པ་སྙན་དངགས་རྣམས་སྡེབ་པ་ལ་ཆེད་ཆེར་བྱེད་པ་རྣམས་ནི་ཉིན་མེད་མཚན་
མེད་དུ་དེ་ལ་བློ་བཟོད་བླགས་མེད་པར་གྱུར་ནས་སྙན་དངགས་སྡེབ་པ་ལ་ཤིན་ཏུ་ཆེད་ཆེ་བར་འགྱུར་རོ། །དེ་དམ་པའི་ཆོས་སེམས་པར་བྱེད་པ་ཉིད་མ་ཡིན་ནོ། །སྒོམ་པར་མི་བྱེད་དོ། །ཉོན་མོངས་པ་རབ་ཏུ་ཞི་བར་བྱ་བའི་ཆེད་དུ་མི་འཇུག་གོ། །དེ་ཉན་པ་ལ་བློ་ཞུགས་པར་གྱུར་ན་ཡང་དམ་པའི་ཆོས་

འབྱུང་བར་དོན་མེད་དེ་ཕྱིར་ལོག་ནས་འགྲོའོ། །གང་བསྐལ་པ་སྟོང་ཕྲག་བརྒྱར་ཡང་རྙེད་པར་མི་འགྱུར་བ་གང་ཡིན་པ་དེ་དག་རྣམས་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་འདིས་དེ་ལྟར་ཉམས་པར་བྱེད་དོ། །ཐོས་པ་ངན་པ་སྙན་དངགས་སྡེབ་པར་བྱེད་པ་ལ་ནི་གཞན་ཡང་སྐྱོན་ཆེན་པོ་
ཡོད་དེ། སྐྱེས་བུ་ངན་པ་དེ་སྙན་དངགས་ཀྱི་འདོད་པ་དང་། ཐོས་པ་ངན་པ་དག་གི་བསྟོད་པས་ཀྱང་ཕྱིན་ཅི་ལོག་ཏུ་སྨྲ་བར་བྱེད་དོ། །དེ་ཀུན་དུ་སྤྱོད་པར་གྱུར་པ་རྣམས་ལ་སྟེན་པར་བྱེད་དོ། །སྨྱོན་པ་བཞིན་དུ་གནས་རྣམས་ཐམས་ཅད་ལ་རབ་ཏུ་གཡོ་བའི་བློ་དང་ལྡན་པར་འགྱུར་རོ། །ལོག་པར་རྗོད་
པར་བྱེད་པ་རྣམས་ཀྱིས་བཅིངས་པར་གྱུར་པའི་བསྟོད་པ་བསྡེབས་པ་རྣམས་ལ་ནི་དོན་མེད་པ་ཡིན་ནོ། །འདུ་བྱེད་ཐམས་ཅད་ཡོངས་སུ་ཟད་པར་འགྱུར་བ་ཡིན་པའི་ཕྱིར་ཡང་འདི་ལ་དོན་མེད་པ་ཡིན་ནོ། །སྙན་དངགས་ཀྱི་རྒྱགས་པས་ཟིན་པར་གྱུར་པ་དེ་དག་རྣམས་ནི་ཧ་ཅང་ཐལ་ཆེས་པར་ཤིན་ཏུ་
ཉམས་པར་གྱུར་ནས་ཆང་གི་བཏུང་བ་སྟེན་པར་བྱེད་དོ། །དེ་ལ་སྟེན་པར་གྱུར་པའི་བློ་རྣམ་པར་གཡེང་བས་ཀྱང་ཕན་ཚུན་དུ་དོན་བྱེད་དོ། །ཆང་གིས་ཀུན་ནས་གཡེངས་པར་གྱུར་པའི་བློས་དོན་ཆུང་ཟད་ཅིག་བྱེད་པར་འགྱུར་བ་ཡང་མ་ཡིན་ནོ། །སེམས་ཀྱང་རྣམ་པར་གཡེང་བར་བྱེད་པར་འགྱུར་
བ་ཡིན་པའི་ཕྱིར་དང་། དོན་མ་ཡིན་པ་རྣམས་ལ་འཇུག་པ་པོ་ངན་སོང་གི་སྒོར་གྱུར་པའི་ཆང་སྟེན་པར་བྱེད་པ་ཡིན་ནོ། །དེ་ཆང་གིས་ཟིན་པས་མི་དགེ་བ་རྣམས་ཐམས་ཅད་བྱེད་དོ། །བུད་མེད་དག་མངོན་པར་མཐོང་ནས་ཚུལ་བཞིན་མ་ཡིན་པའི་ཡིད་ལ་བྱེད་པས་འཁྲིད་པར་འགྱུར་རོ། །
དེ་ཉེ་བར་ཁྲིད་པར་གྱུར་ནས་དགེ་སྦྱོང་ངན་པ་མི་ཚངས་པར་སྤྱོད་པར་བྱེད་དོ། །དེ་ནི་རྒྱུད་ཚིག་པར་གྱུར་པ། ནང་རུལ་བར་གྱུར་པ། ཐོས་པ་དང་མི་ལྡན་པ། སྲེད་པའི་རིགས་སུ་གྱུར་པ། བི་དུ་ལའི་མེ་ཏོག་བཞིན་དུ་འབྲས་བུ་མེད་པའོ། །བྲིས་པའི་མར་མེ་བཞིན་དུ་འོད་མེད་པ་བྲིས་པའི་
ཟླ་བ་བཞིན་དུ་གྱུར་པ། གྲང་བ་བཞིན་དུ་རྣམ་པར་སྨད་པར་བྱ་བ་དེ་ནི་དེ་དག་རྣམས་ཁོ་ན་བཞིན་དུ་གྱུར་པས་འདི་ནི་གོས་ཀྱིས་གཡོགས་པ་ཙམ་འབའ་ཞིག་ཡིན་ནོ། །དགེ་སྦྱོང་གི་གཟུགས་དགེ་སྦྱོང་མ་ཡིན་ནོ། །ཐོས་པ་ངན་པ་སྙན་དངགས་བསྡེབས་པར་གྱུར་པའི་སྐྱོན་གྱི་རྩ་བ་དེ་ལས་ལུས་ཞིག་

པར་གྱུར་ནས་ངན་སོང་ལོག་པར་ལྟུང་བ་དམྱལ་བར་སྐྱེའོ། །དེའི་ཕྱིར་གང་དག་དགེ་སྦྱོང་ཡིན་པར་གྱུར་པ་དེ་དག་རྣམས་ཀྱིས་ཐོས་པ་ངན་པ་སྙན་དངགས་སྡེབ་པར་མི་བྱའོ། །གལ་ཏེ་བྱེད་པར་གྱུར་ན་ཡང་དེས་དམ་པའི་ཆོས་གསལ་བར་བྱེད་པར་འགྱུར་བ་རྣམས་གང་ཡིན་པ་དང་། ཅི་སྟེ་ཡང་དམ་པའི་ཆོས་
རྣམས་ཡོངས་སུ་རྟོགས་པར་འགྱུར་བ་སངས་རྒྱས་ལ་བསྟོད་པ་བྱའོ། །དཀོན་མཆོག་གསུམ་ལ་བསྟོད་པར་བྱའོ། །དམ་པའི་ཆོས་ཤིན་ཏུ་གསལ་བར་བྱེད་པའི་སྙན་དངགས་བྱའོ། །དེ་ལས་མྱ་ངན་ལས་འདས་པའི་མཐར་ཐུག་པར་འགྱུར་རོ། །ངལ་བ་འབྲས་བུ་དང་བཅས་པར་འགྱུར་རོ། །དེ་དག་
གིས་དེ་རབ་ཏུ་བསྔགས་པར་ཡང་འགྱུར་རོ། །ལུས་ཞིག་པར་གྱུར་ནས་ཤི་བའི་འོག་ཏུ་ལྷ་རྣམས་སུ་སྐྱེ་བར་འགྱུར་རོ། །ཡང་དག་པའི་སྙན་དངགས་བསྡེབས་པར་གྱུར་པ་དང་། །དམ་པའི་ཆོས་གསལ་བར་འགྱུར་བ་བསྡེབས་པ་དག་གིས་ཏེ། དེས་ཀྱང་དེ་ལྟར་བྱ་བ་ཡིན་གྱི་གཞན་དུ་ན་བར་ཆད་
བྱེད་པར་འགྱུར་རོ། །གཞན་ཡང་ཆོས་ལྔ་པ་དགེ་སྦྱོང་དག་བསམ་གཏན་སྒོམ་པ་ན་བར་དུ་གཅོད་པར་བྱེད་པ་ཡིན་ཏེ། འདི་དག་རྣམས་ཀྱང་གང་ཞེ་ན། འདི་ལྟ་སྟེ། རྒྱུ་སྐར་འགྲང་བ་དང་སེམས་པར་བྱེད་པའོ། །དགེ་སྦྱོང་དག་དགེ་སྦྱོང་དུ་ཁས་འཆེས་པ་རྣམས་ཀྱིས་གནས་སྐབས་ཐམས་ཅད་
དུ་ཡང་རྒྱུ་སྐར་བགྲང་བ་དང་བསམ་པར་ཡང་མི་བྱའོ། །དེ་ལས་ཀྱང་དགེ་སྦྱོང་ལ་འཇིག་རྟེན་པ་རྣམས་ཀྱིས་རྣམ་པར་སྨོད་པར་འགྱུར་རོ། །བསམ་གཏན་སྒོམ་པར་བྱེད་པ་ན་བར་དུ་གཅོད་པར་འགྱུར་རོ། །དེ་བསམས་པས་ཀྱང་བསོད་ནམས་དང་ཚེའི་འདུ་བྱེད་རྣམས་ནུབ་པར་འགྱུར་རོ། །
བདེ་ལེགས་རྣམས་ཀྱང་འཐོབ་པར་མི་འགྱུར་རོ། །ཚེ་ཟད་པར་གྱུར་པ་དེ་བྱ་བ་མ་ཡིན་པ་བྱེད་པའི་ཕྱིར་ནད་ལས་དང་། རྒ་བ་ལས་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། ངལ་བ་རྣམས་ལས་ཡོངས་སུ་གྲོལ་བར་མི་འགྱུར་རོ། །
དུས་ཡུན་རིང་པོར་འཁོར་བར་ཡོངས་སུ་འཁྱམ་པར་འགྱུར་རོ། །འདི་ལ་རྒྱུ་སྐར་བགྲངས་པ་རྣམས་ཀྱིས་ཀྱང་ཅུང་ཟད་ཀྱང་མི་བྱེད་དོ། །བདག་ལ་མ་ཡིན་ཞིང་། གཞན་རྣམས་ལ་ཡང་སྐྱོབ་པ་ནི་རྒྱུ་སྐར་རྣམས་མ་ཡིན་ནོ། །དེ་ཅིའི་ཕྱིར་ཞེ་ན། ལས་ཀྱིས་དེ་དག་རྣམས་འཇུག་པར་བྱེད་

པ་ཡིན་གྱི། རྒྱུ་སྐར་རྣམས་ནི་སྐྱབས་མ་ཡིན་ནོ། །དེ་ཅིའི་ཕྱིར་ཞེ་ན། རྒྱུ་སྐར་གཅིག་ཉིད་ལ་ཡང་བདེ་བ་ཅན་རྣམས་དང་། སྡུག་བསྔལ་ཅན་རྣམས་དང་། སྐྱེ་གཟུགས་ངན་པ་དང་། གཟུགས་བཟང་བ་དང་། རིགས་དང་ལྡན་པ་དང་། རིགས་དམན་པ་
དང་། ཆོས་པ་དང་། ཆོས་མ་ཡིན་པ་དང་། དབུལ་པོ་དང་། ཕྱུག་པོ་དང་། རྐུན་མ་དང་། རྒྱལ་པོ་དང་། ཆོམ་རྐུན་དང་། མཁས་པ་དང་། རྨོངས་པ་དང་། བུད་མེད་དང་། སྐྱེས་པ་དང་། ཚུལ་ཁྲིམས་དང་ལྡན་པ་དང་། ཚུལ་ཁྲིམས་འཆལ་པ་དང་། བརྩོན་འགྲུས་བརྩམས་
པ་དང་། ལེ་ལོ་ཅན་དང་། འཇིག་རྟེན་པ་སྡུག་པར་འཛིན་པ་དང་། དེ་དག་ལ་སོགས་པ་གཞན་རྣམས་ཀྱང་རྒྱུ་སྐར་གཅིག་ལ་སྐྱེའོ། །གལ་ཏེ་ཡང་རྒྱུ་སྐར་རྣམས་རྒྱུ་མཚན་ཡིན་པར་གྱུར་ན། དེ་ལ་གང་དག་རྒྱུ་སྐར་གཅིག་ལ་སྐྱེས་པར་གྱུར་པ་དེ་དག་རྣམས་ཐམས་ཅད་ཀྱང་མཚུངས་པར་འགྱུར་རོ། །
སྐྱེས་བུ་རྣམས་ཀྱིས་ཇི་སྐད་བཤད་པའི་རྒྱུ་སྐར་རྣམས་ནི་བགྲང་བར་མི་བྱ་སྟེ། སྔོན་གྱི་སྐྱོན་དང་ཡོན་ཏན་དང་བཅས་པ་རྣམས་མངོན་པར་མི་ཤེས་པའི་ཕྱིར་རོ། །དགེ་བ་དང་མི་དགེ་བར་གྱུར་པའི་དུས་རྣམས་སུ་སྐར་མར་གྱུར་པའི་རྒྱུ་སྐར་རྣམས་འགྲང་བར་བྱེད་དོ། །གཞན་ཡང་རྒྱུ་སྐར་འདི་
དག་རྣམས་འགྲང་བ་དང་དཔྱོད་པར་བྱེད་པ་ནི་འདི་ལྟ་སྟེ། རྒྱུ་སྐར་རྣམས་མ་ཤར་བ་དང་། གང་གི་ཕྱིར་མདུན་དུ་བྱས་པར་གྱུར་པས་རྣམ་པར་དག་པ་རྣམས་ཀྱང་ཉུང་བ་དང་། ལྷག་པར་འགྱུར་བ་དང་། མངོན་པར་གསལ་བ་ཡིན་པ་དང་། རྒྱུ་སྐར་གྱིས་རྒྱུ་སྐར་གཞན་རྣམས་ཟིལ་གྱིས་
ཀྱང་གནོན་ནོ། །གཞན་ཡང་གཟའ་སྐར་དེ་ཉིད་ཀྱང་དུས་གཞན་ན་ཟིལ་གྱིས་གནོན་པར་འགྱུར་རོ། །དེ་དག་རྣམས་ལས་རྒྱུ་སྐར་གྱི་མཛེས་པ་དང་། མཛེས་པ་མ་ཡིན་པ་རྣམས་དཔྱོད་པར་བྱེད་པ་ཡིན་ནོ། །གང་སེམས་པར་བྱེད་པ་དང་འགྲང་བར་བྱེད་པའི་རྒྱུ་སྐར་རྣམས་ཀྱི་དབང་གིས་
བདེ་བ་དང་སྡུག་བསྔལ་བ་ཡིན་ན། གང་གིས་ཇི་ལྟར་བདག་ཉིད་ལ་སྟོབས་དང་ལྡན་པར་འགྱུར་ཞིང་བདེ་བ་དང་། སྡུག་བསྔལ་གྱི་དབང་དུ་བྱས་ནས་གང་གིས་ཟིལ་གྱིས་གནོན་པར་འགྱུར། ཇི་ལྟར་ན་གཞན་རྣམས་ཀྱིས་སྡུག་བསྔལ་དང་བདེ་བ་བྱེད་པར་འགྱུར་བ་ཡིན། དེའི་ཕྱིར་

ལས་རྣམས་ཉིད་ཁོ་ན་ལས་དགེ་ལེགས་དང་དགེ་ལེགས་མ་ཡིན་པའི་འབྲས་བུ་རྣམས་ཡིན་ནོ། །རྒྱུ་སྐར་རྣམས་དང་། གཟའ་རྣམས་ཀྱང་གང་གི་ཚེ་གཟའ་གཞན་དང་འཁྲུགས་པར་གྱུར་པ་ན། དེའི་ཚེ་དེ་དག་རྣམས་ལ་ཡང་གཟེར་ཟུག་འབྱུང་ངོ་། །ཇི་ལྟར་ཉི་མ་དང་ཟླ་བ་དག་ཀྱང་གཟའ་སྒྲ་
གཅན་འཛིན་གྱིས་སྡུག་བསྔལ་བར་བྱེད་དོ། །དེ་ལ་གང་དག་བདག་ཉིད་ཀྱི་ལ་ནུས་པ་མེད་པ་དེ་ཇི་ལྟར་གཞན་རྣམས་ཀྱི་ལ་ནུས་པ་འབྱུང་བར་འགྱུར། དེའི་ཕྱིར་གཟའ་དགུ་པོ་རྣམས་ཀྱི་དཔྱད་ར་ནི་དགེ་སྦྱོང་གིས་མི་བྱའོ། །དགེ་སྦྱོང་དུ་ཁས་འཆེས་པ་རྣམས་ཀྱིས་མི་བྱའོ། །འཛིན་པར་
བྱེད་པ་གཟའ་ཆེན་པོ་རྣམས་ནི་གསུམ་པོ་འདི་དག་རྣམས་ཡིན་ནོ། །འདི་ལྟ་སྟེ། རྒ་བ་དང་། ན་བ་དང་། འཆི་བ་རྣམས་ཡིན་ཏེ། གང་ཞིག་རྟག་ཏུ་འཇིག་རྟེན་པ་རྣམས་ལ་གནས་པར་གྱུར་པ་ཐ་མར་འཛིན་པར་བྱེད་པའི་གཟའ་ཆེན་པོ་གསུམ་པོ་རྣམས་སེམས་པར་མི་བྱེད་པར་ནི་ཇི་
སྲིད་དུ་དགེ་སྦྱོང་ངན་པ་དགེ་སྦྱོང་དུ་དམ་བཅའ་བས་གཟའ་གཞན་འཇིག་རྟེན་པ་རྣམས་ཉིད་དཔྱོད་པར་བྱེད་དོ། །བློ་གྲོས་མེད་པ། ཐོས་པ་དང་མི་ལྡན་པའི་བྱིས་པར་གྱུར་པས་སྐྱོན་དང་བཅས་པར་གྱུར་པའི་འཇིག་རྟེན་པའི་རྒྱུ་སྐར་ཉི་ཤུ་རྩ་བརྒྱད་པོ་རྣམས་དཔྱོད་པར་བྱེད་དོ། །གང་ཞིག་
རྣམ་པར་དཔྱད་པར་འགྱུར་ཞིང་ཡང་དག་པ་ཇི་ལྟ་བ་བཞིན་དུ་སོ་སོར་བརྟགས་པར་གྱུར་ན་མྱ་ངན་ལས་འདས་པའི་གྲོང་ཁྱེར་དུ་ལེགས་པར་འཇུག་པར་བྱེད་པའི་འཇིག་རྟེན་ལས་འདས་པའི་རྒྱུ་སྐར་ཉི་ཤུ་རྩ་བརྒྱད་པོ་རྣམས་ནི་དཔྱོད་པར་མི་བྱེད་དོ། །དེ་དག་རྣམས་ཀྱང་གང་ཞེ་ན། འདི་
ལྟ་སྟེ། ཕུང་པོ་ལྔ་པོ་རྣམས་དང་། ཉེ་བར་ལེན་པའི་ཕུང་པོ་ལྔ་པོ་རྣམས་དང་། ཁམས་བཅྭ་བརྒྱད་པོ་རྣམས་སོ། །དེ་དག་རྣམས་དཔྱོད་པར་གྱུར་པས་ནི་མྱ་ངན་ལས་འདའ་བར་འགྱུར་རོ། །ཡང་དག་པ་ཇི་ལྟ་བར་འདོད་ཆགས་འགོག་པར་བྱེད་པ་དང་། ཀུན་ནས་སྡོམ་
པ་དང་། འདུལ་བར་བྱེད་པས་ཀྱང་མྱ་ངན་ལས་འདའ་བ་ཡིན་ནོ། །དགེ་སློང་རྒྱུ་སྐར་སེམས་པར་བྱེད་པ་རྣམས་ནི་ཡང་རིམ་པ་གཞན་གྱིས་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་རྣམས་ཀྱིས་ཟླ་བ་བཅུ་གཉིས་འགྲང་བར་བྱེད་དོ། །དེ་དག་རྣམས་བགྲངས་པ་ལས་

ཀྱང་དོན་མ་ཡིན་པར་འགྱུར་རོ། །ཉོན་མོངས་པ་རྣམས་སྤོང་བར་མི་བྱེད་པ་དང་། མྱ་ངན་ལས་འདའ་བར་ཡང་མི་འགྱུར་རོ། །འཁོར་བའི་སྐྱེ་མཆེད་བཅུ་གཉིས་འགྲང་བར་བྱེད་པ་རྣམས་ཀྱིས་གང་དག་ལེགས་པར་སྡོམ་པ་དང་། ཡང་དག་པའི་དོན་ཡོངས་སུ་ཤེས་པར་
བྱེད་པ་དང་། འདོད་ཆགས་དང་བྲལ་བ་དང་། ལེགས་པར་ཀུན་ནས་སྡོམ་པར་གྱུར་པ་རྣམས་ཀྱིས་ཀྱང་མྱ་ངན་ལས་འདའ་བ་ཡིན་ནོ། །དགེ་སྦྱོང་ངན་པ་དགེ་སྦྱོང་དུ་ཁས་འཆེས་པས་དེ་དག་རྣམས་མ་རྩེས་པར་ཀུན་ནས་ཉོན་མོངས་པར་གྱུར་པ་གཞན་རྣམས་དཔྱོད་པར་བྱེད་དོ། །ཡང་གང་ཞིག་
དཔྱད་པར་གྱུར་ནས་ནད་དང་། རྒས་པ་དང་། འཆི་བ་རྣམས་ལས་ཡོངས་སུ་འགྲོལ་བར་མི་འགྱུར་བའི་རིམ་པ་གཞན་གྱིས་ངན་པ་རྣམས་སེམས་པར་བྱེད་པའི་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་ཀུན་ནས་ཉོན་མོངས་པ་ཅན་དུ་གྱུར་པའི་དུས་དྲུག་པོ་རྣམས་དཔྱོད་པར་བྱེད་དོ། །གང་དག་
རྣམས་དཔྱད་པར་གྱུར་ཅིང་། ཡང་དག་པ་ཇི་ལྟ་བར་སོ་སོར་རྣམ་པར་དཔྱད་ཅིང་རྣམ་པར་གནས་པར་གྱུར་ནས། དེ་དག་རྣམས་མྱ་ངན་ལས་འདའ་བར་འགྱུར་བའི་དགོས་པ་དང་བཅས་པས་ཀུན་ནས་ཉོན་མོངས་པ་ཅན་ཉེ་བར་འཚེ་བ་དང་བཅས་པར་གྱུར་པའི་སུམ་ཅུ་རྩ་དྲུག་གིས་ལུས་དཔྱོད་
པར་མི་བྱེད་དོ། །ཡང་རིམ་པ་གཞན་གྱིས་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་རྣམས་འཇིག་རྟེན་པའི་དུས་ཀྱིས་བྱས་པའི་ལྟས་སུ་གྱུར་པ་རྣམས་ལ་དཔྱོད་པར་བྱེད་དེ། །ཇི་ལྟར་དཀར་པོའི་དུས་ཀྱི་ལྟས་རྣམས་ནི་མཛེས་པའོ། །དཀར་པོ་མ་ཡིན་པ་ནི་མི་མཛེས་པའོ། །ཆེ་གེ་མོ་ཞིག་
གི་དུས་ན་ལྟས་འདི་དག་རྣམས་འབྱུང་བར་ཆེ་གེ་མོ་གཅིག་གི་དུས་ན་ནི་མ་ཡིན་ནོ། །རྣམ་པ་དེ་ལྟ་བུར་གྱུར་པའི་བསམ་ཁྲལ་ངན་པ་རྣམས་སེམས་པར་བྱེད་ཀྱི། གང་དག་ཤེས་པར་གྱུར་པ་རྣམས་དང་། ཕ་རོལ་ཏུ་བདེ་བར་གྱུར་པ་རྣམས་དང་། མྱ་ངན་ལས་འདའ་བར་འགྱུར་བ་དང་། མྱ་
ངན་ལས་འདའ་བའི་མཐར་ཐུག་པར་འགྱུར་བ་སེམས་ཀྱི་དམིགས་པའི་མཚན་ཉིད་དུ་གྱུར་པའི་དགེ་བ་དང་། མི་དགེ་བ་དང་། ལུང་དུ་མ་བསྟན་པར་གྱུར་པའི་ལྟས་དང་ལྟས་མ་ཡིན་པ་རྣམས་ཀྱི་དཔྱད་ར་དཔྱོད་པར་མི་བྱེད་དོ། །ཇི་ལྟར་དགེ་བའི་སེམས་དང་ལྡན་པར་གྱུར་པའི་དགེ་བ་དམིགས་པའི་ལྟས་

ལས་མཛེས་པར་གྱུར་པའི་བདེ་བར་འགྲོ་བའི་འགྲོ་བ་བདག་ལ་འབྱུང་བར་འགྱུར་རོ། །མྱ་ངན་ལས་འདའ་བར་འགྲོ་བར་འགྱུར་བའི་དགེ་བའི་སེམས་ཆེ་གེ་མོ་ཅིག་ལ་དམིགས་པ་བདག་ལ་སྐྱེས་སོ། །མི་དགེ་བ་ཀུན་ནས་ཉོན་མོངས་པ་ཅན་དེས་ནི་བདེ་བ་མ་ཡིན་ཞིང་ཤེས་པ་མ་ཡིན་ནོ། །བདག་བདེ་
འགྲོར་འགྲོ་བར་ཡང་མི་འགྱུར་རོ། །ལུང་དུ་མ་བསྟན་པ་ལ་དམིགས་པའི་བདག་གི་སེམས་ཆེ་གེ་མོ་ཅིག་སྐྱེས་པར་གྱུར་ཏེ། དེ་ནི་རྣམ་པར་སྨིན་པ་ལུང་དུ་མ་བསྟན་པ་ཡིན་ནོ། །གཞན་ཡང་དགེ་སྦྱོང་ངན་པ་དགེ་སྦྱོང་གི་གཟུགས་བརྙན་དེ་འཇིག་རྟེན་པའི་ལམ་གྱིས་སྐད་ཅིག་དང་། ཐང་
ཅིག་དང་། ཡུད་ཙམ་དང་། ཉི་མ་དང་། ཟླ་བ་ཕྱེད་དང་། ཟླ་བ་དང་ཡང་དག་པར་ལྡན་པའི་དགེ་བ་དང་། མི་དགེ་བའི་དུས་ཀྱི་མི་རྣམས་ཀྱི་ཚེའི་དུས་རྣམས་སེམས་པར་བྱེད་ཀྱི་བདག་གི་ཚེའི་འདུ་བྱེད་རྣམས་ནི་སྐད་ཅིག་པ་ཡིན་ཏེ། ཇི་ལྟར་འདི་དག་རྣམས་ནི་སྐད་ཅིག་པ། ཐང་
ཅིག་དང་། ཡུད་ཙམ་དང་། ཉི་མ་དང་། ཟླ་བ་དང་། ཟླ་བ་ཕྱེད་པར་འགོར་བ་མེད་པར་ཟད་པར་འགྱུར་བས་ཅིས་ཀྱང་བཟློག་ཏུ་མེད་པ་སྟོབས་ཆེན་པོ་དང་ལྡན་པའི་འཆི་བའི་དུས་སུ་གྱུར་པའི་འདུ་བྱེད་རྣམས་འཛད་པར་འགྱུར་བའི་དུས་ལ་ནི་དཔྱོད་པར་མི་འགྱུར་རོ། །བསམ་གཏན་བྱེད་
པ་ན་བར་དུ་གཅོད་པར་གྱུར་པ་འཇིག་རྟེན་པའི་རིམ་པ་གཞན་ཀུན་ནས་ཉོན་མོངས་པ་ཅན་རྣམས་ཀྱིས་ཀྱང་རྒྱུ་སྐར་གྱི་དཔྱད་ར་རྣམས་དཔྱོད་པར་བྱེད་དོ། །སྒོམ་པར་བྱེད་དོ། །ལན་མང་དུ་བྱེད་དོ། །སེམས་ཀྱིས་རབ་ཏུ་སྒོམ་པར་བྱེད་དོ། །རབ་ཏུ་འཇོག་པར་བྱེད་དོ། །གཞན་དག་རྣམས་
ལ་ཡང་སྦྱིན་པར་སྟོན་ནོ། །ཇི་ལྟར་རྒྱུ་སྐར་ཆེ་གེ་མོ་གཟའ་ཆེ་གེ་མོས་ཉེ་བར་གཟིར་བར་གྱུར་ནས་མནར་བར་བྱེད་དོ། །འདོད་པར་གྱུར་པའི་ཀུན་དུ་སྦྱོར་བའི་རྒྱུ་སྐར་གཟིར་བར་བྱེད་དོ། །དེ་བསམས་པར་གྱུར་པ་ན་ནད་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་།
ཡིད་མི་བདེ་བ་རྣམས་ལས་སྒྲོལ་བར་བྱེད་པ་པོ་འཁོར་བ་ལས་འདྲེན་པར་བྱེད་པ་པོ་རྣམས་ནི་དེ་ལྟར་དཔྱོད་པར་ནི་མི་བྱེད་ན། རྒྱུ་སྐར་ལ་ཇི་ལྟ་བ་བཞིན་དུ་དེ་ཉིད་ནི་ཆོས་ཀྱི་གཟར་གྱུར་པའི་ཆོས་གཞན་རྣམས་ཀྱིས་ཟིལ་གྱིས་གནོན་པར་འགྱུར་རོ། །འདི་ལྟ་སྟེ། སྐྱེ་བའི་རྒྱུ་སྐར་རྣམས་

ནི་འཆི་བའི་གཟའ་རྣམས་ཀྱིས་ཉེ་བར་འཛིན་ནོ། །ནད་མེད་པའི་རྒྱུ་སྐར་རྣམས་ནི་ནད་ཀྱི་གཟའ་རྣམས་ཀྱིས་ཉེ་བར་འཛིན་ནོ། །ལང་ཚོའི་རྒྱུ་སྐར་རྣམས་ནི་རྒས་པའི་གཟའ་རྣམས་ཀྱིས་ཉེ་བར་འཛིན་ནོ། །འཐུན་པ་དང་ཀུན་དུ་ཕྲད་པའི་རྒྱུ་སྐར་རྣམས་ནི་འཐུན་པ་དང་བྲལ་བའི་གཟའ་
རྣམས་ཀྱིས་ཉེ་བར་ཟིན་ནོ། །ལྷའི་འཇིག་རྟེན་དུ་སྐྱེས་པའི་རྒྱུ་སྐར་རྣམས་ནི་འཆི་འཕོ་བའི་གཟའ་རྣམས་ཀྱིས་ཉེ་བར་ཟིན་ནོ། །མིར་སྐྱེས་པའི་རྒྱུ་སྐར་རྣམས་ནི་ཚོལ་ཁྲོའི་སྡུག་བསྔལ་གྱི་གཟའ་རྣམས་ཀྱིས་ཉེ་བར་ཟིན་ནོ། །བདེ་བའི་ཚོར་བའི་རྒྱུ་སྐར་རྣམས་ནི་སྡུག་བསྔལ་གྱི་ཚོར་བའི་གཟའ་རྣམས་
ཀྱིས་ཉེ་བར་ཟིན་ནོ། །དགེ་བའི་སེམས་བསྐྱེད་པའི་རྒྱུ་སྐར་རྣམས་ནི། མི་དགེ་བའི་སེམས་བསྐྱེད་པའི་གཟའ་རྣམས་ཀྱིས་ཉེ་བར་ཟིན་ནོ། །མི་སྡུག་པའི་རྒྱུ་སྐར་རྣམས་ནི་ཞེ་སྡང་གི་གཟའ་རྣམས་ཀྱིས་ཉེ་བར་ཟིན་ནོ། །ཤེས་པའི་རྒྱུ་སྐར་རྣམས་ནི་གཏི་མུག་གི་གཟའ་རྣམས་ཀྱིས་ཉེ་བར་ཟིན་
ནོ། །དགེ་སྦྱོང་ངན་པ་དགེ་སྦྱོང་དུ་ཁས་འཆེས་པར་གྱུར་པ་དེ་རང་ཉིད་ཀྱི་བསམ་ཁྲལ་རྣམས་སེམས་པར་མི་བྱེད་དོ། །འཇིག་རྟེན་ལས་འདས་པའི་ཡོངས་སུ་དཔྱད་པར་བྱ་བའི་དཔྱོད་པ་རྣམས་སེམས་པར་མི་བྱེད་དོ། །འཇིག་རྟེན་པའི་དེ་དག་རྣམས་དང་། འཇིག་རྟེན་ལས་འདས་པའི་ཡང་
ཇི་སྐད་དུ་བཤད་པའི་རྒྱུ་སྐར་དཔྱད་པར་བྱ་སྟེ། སྔ་མ་བཞིན་ནོ། །ཚུལ་བཞིན་ཡིད་ལ་བྱེད་པས་ཡང་དག་པ་ཇི་ལྟ་བ་བཞིན་སོ་སོར་བརྟག་པར་བྱའོ། །ཇི་སྐད་དུ་བཤད་པའི་གཟའ་རྣམས་ཀྱང་སྔར་བཞིན་དུ་ཡང་དག་པ་ཇི་ལྟ་བར་གཟའ་རྣམས་བསམ་པར་བྱའོ། །བསྒོམ་པར་བྱའོ། །ཡང་
དག་པ་ཇི་ལྟ་བ་བཞིན་དུ་གྱུར་པ་ཤེས་པའི་ལམ་ཡན་ལག་བརྒྱད་ཀྱིས་སོ་སོར་བརྟག་ན་ནི་གཟའ་དང་རྒྱུ་སྐར་གྱི་དཔྱད་ར་རྣམས་འབྲས་བུ་དང་བཅས་པར་འགྱུར་རོ། །མྱ་ངན་ལས་འདའ་བར་ཡང་འགྱུར་བ་དང་། ཤིས་པར་འགྱུར་བ་དང་། བདེ་བར་འགྱུར་བ་ཡང་ཡིན་ནོ། །ཐ་མལ་
པའི་འཇིག་རྟེན་པའི་གཟའ་རྣམས་དཔྱད་པ་དང་། རྒྱུ་སྐར་རྣམས་ཀྱང་དཔྱད་པར་གྱུར་པའི་སྐྱེས་བུ་ནི་བརྒྱ་སྟོང་དུ་མ་རྣམས་སུ་འགྲོས་ནོར་ནས་དམྱལ་བ་དང་། ཡི་དགས་དང་། དུད་འགྲོ་རྣམས་སུ་སྐྱེ་བར་འགྱུར་རོ། །འཇིག་རྟེན་པ་དེ་དག་རྣམས་ནི་འཁོར་བར་ཀུན་ནས་འཇུག་པར་བྱེད་

པ། འདོད་ཆགས་ཞེ་སྡང་གཏི་མུག་རྣམས་ཀུན་ནས་སྐྱེད་པར་བྱེད་པ་ཡིན་ནོ། །གང་ཡང་དུས་དང་། གཟའ་དང་། རྒྱུ་སྐར་དེ་དག་རྣམས་འཇིག་རྟེན་ལས་འདས་པའི་ལམ་གྱིས་བསམ་པར་བྱ་བར་བཤད་པ་དེ་དག་རྣམས་རྣལ་འབྱོར་དཔྱོད་པས་བསམས་ཤིང་བསྒོམས་ཏེ། ཡང་དག་
པ་ཇི་ལྟ་བ་བཞིན་དུ་སོ་སོར་བརྟགས་པས་རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་སྟོང་ཕྲག་བརྒྱ་ལས་རྣམ་པར་གྲོལ་བའི་གོ་འཕང་འཐོབ་པར་འགྱུར་ཏེ། རྟག་ཏུ་རྒས་པ་མེད་པ་དང་། འཆི་བ་མེད་པ་དང་། ཟག་
པ་མེད་པའི་མྱ་ངན་ལས་འདས་པའི་མཆོག་དེ་ལྟ་བུ་དེ་དག་རྣམས་ལ་བསླབ་པར་བྱའོ། །དགེ་སྦྱོང་རྣམས་དང་། དགེ་སྦྱོང་དུ་དམ་བཅས་པ་རྣམས་དང་། སྡུག་བསྔལ་ཟད་པར་འདོད་པ་རྣམས་ཀྱིས་འཁོར་བའི་སྡུག་བསྔལ་ཟད་པར་འགྱུར་བའི་རྒྱུ་སྐར་རྣམས་ལ་དཔྱད་པ་བསྒོམ་པར་བྱའོ། །
དུས་དཔྱོད་པ་ཡང་རང་བཞིན་ཇི་ལྟ་བུ་མ་ཡིན་པའི་ཀུན་ནས་ཉོན་མོངས་པ་ཅན་གྱི་ཤེས་པ་རྣམས་དང་བདེ་བའི་མཐར་ཐུག་པར་འགྱུར་བ་མ་ཡིན་ནོ། །ཤེས་པར་འགྱུར་བ་མ་ཡིན། མྱ་ངན་ལས་འདས་པའི་མཐར་ཐུག་པར་འགྱུར་བ་ཡང་མ་ཡིན་གྱི། དགེ་སློང་དེས་བསམ་གཏན་སྒོམ་པར་
གྱུར་པ་ན་རྣམ་པར་སྲེག་པར་བྱེད་པ་འབའ་ཞིག་ཏུ་གྱུར་པ་དང་། རྒྱུ་སྐར་འགྲང་བ་དང་སེམས་པར་བྱེད་པ་ན་དགེ་སློང་ལ་རྣམ་པར་གཤེ་བར་བྱེད་པར་ཡང་འགྱུར་རོ། །གཞན་ཡང་ཆོས་དྲུག་པར་གྱུར་པ་བསམ་གཏན་སྒོམ་པ་ན་བར་དུ་གཅོད་པར་བྱེད་པ་རྣམས་ནི་དགེ་སྦྱོང་དང་དགེ་སྦྱོང་དུ་ཁས་
འཆེས་པ་རྣམས་ཀྱིས་བསམ་པར་ཡང་མི་བྱའོ། །འདི་ཡང་གང་ཞེ་ན། འདི་ལྟ་སྟེ། རྒྱུ་མཚན་སེམས་པ་དགེ་སྦྱོང་གིས་མི་བྱའོ། །འཇིག་རྟེན་པ་ཀུན་ནས་ཉོན་མོངས་པ་འདོད་ཆགས་དང་། ཞེ་སྡང་དང་། གཏི་མུག་རྣམས་ཀུན་དུ་གསལ་བར་བྱེད་པར་གྱུར་པ་དགེ་བའི་ཆོས་
རྣམས་ཀྱི་བར་དུ་གཅོད་པར་བྱེད་པ་རྣམས་ཀུན་དུ་འཕེལ་བར་བྱེད་པ་ནི་རྒྱུ་མཚན་སེམས་པ་ལས་ཡིན་ཏེ། དེ་ལ་ས་གཡོ་བ་འབྱུང་བ་རྣམས་ཉིན་མོ་དང་། མཚན་མོར་ཡང་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་རྣམས་ནི་ཀུན་ནས་ཉོན་མོངས་པའི་ས་གཞི་ལས་ཀྱི་རྒྱུ་མཚན་ཉེ་བར་

མཚོན་པར་བྱེད་དོ། །ཇི་ལྟ་བར་རྒྱུ་མཚན་འདི་དག་རྣམས་འབྱུང་བར་འགྱུར་ཏེ། འདི་ལྟར་ཆུ་ཀུན་དུ་གནས་པའི་རྫིང་བུ་དག་རླུང་གིས་དཀྲུགས་པར་བྱེད་ལ། ཇི་སྲིད་དུ་རབ་ཏུ་གཡོས་པར་གྱུར་པས་རྙོག་པ་ཅན་དུ་འགྱུར་རོ། །ལྷའི་ཆར་འབབ་ན་གྲོག་མ་རྣམས་གཟེར་
ཟུག་གིས་ཕྱིར་འབྱུང་བར་འགྱུར་རོ། །ཟླ་བ་གཟས་འཛིན་པར་འགྱུར་ན་ཆུར་མར་ནག་འབྱིང་བར་འགྱུར་རོ། །བྱ་རྣམས་དམའ་བ་ནས་འགྲོ་ན་ཡང་ནམ་མཁའ་ལ་ཉི་མ་གཟས་འཛིན་པར་འགྱུར་རོ། །ཕྱོགས་རྣམས་ལ་འདོད་ཆགས་དང་བྲལ་བར་ཉེ་བར་དམིགས་པར་འགྱུར་རོ། །དགེ་བ་ལ་
ནི་འདི་དག་རྣམས་འབྱུང་བར་འགྱུར་ཏེ། ཇི་ལྟར་འཇམ་པོར་གྱུར་པའི་རླུང་རྣམས་རབ་ཏུ་རྒྱུ་བར་འགྱུར་རོ། །ཕྱོགས་རྣམས་ཤིན་ཏུ་དྲི་མ་མེད་པར་གྱུར་པ་དང་། མཛེས་པའི་བྱ་དག་གཡས་ཕྱོགས་ནས་བསྐོར་བར་ཀུན་དུ་མཐོང་བར་འགྱུར་རོ། །མི་དགེ་བ་འབྱུང་བར་གྱུར་ན་དམར་རེངས་
དང་ཕྱོགས་ཀྱི་མདོག་རྣམས་རྩུབ་པར་མཐོང་ངོ་། །རླུང་རྩུབ་མོ་དག་རབ་ཏུ་རྒྱུ་བར་འགྱུར་རོ། །སྐྱ་རེངས་དམར་པོ་ཁྲག་གི་མདོག་ཏུ་འགྱུར་བ་དང་། ཀུན་ནས་དེའི་ཆ་བྱད་ཀྱིས་ཉི་མ་ནམ་མཁའ་ལ་ཤར་ནས་གནས་སོ། །དེ་ལྟར་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པར་བྱེད་པ་འདིས་
བསམ་གཏན་སྒོམ་པའི་བར་དུ་གཅོད་པར་བྱེད་པའི་རྒྱུ་མཚན་རྣམས་མཚོན་པར་བྱེད་དོ། །རྒྱལ་པོ་དག་ལ་ཡང་སྟོན་པར་བྱེད་དོ། །རྙེད་པ་དང་བཀུར་སྟིའི་དོན་དུ་རྒྱལ་བ་དང་འཕམ་པར་འགྱུར་བ་རྣམ་པར་དཔྱོད་པར་བྱེད་དོ། །དེས་དེ་བཞིན་དུ་རྒྱལ་པོ་རྒྱལ་བ་དང་འཕམ་པ་འདོད་པར་གྱུར་
པས་འདོད་ཆགས་དང་། ཞེ་སྡང་དང་། གཏི་མུག་རྣམས་ཡིད་ལ་ཀུན་ཏུ་སྐྱེ་སྟེ། དེ་དག་གི་རྩ་བ་ལས་ནི་གཏི་མུག་ཡིན་པས་སྐྱོན་གསུམ་པོ་འདིས་གཡོགས་པར་གྱུར་པ་དེ་ནི་དགེ་སྦྱོང་མ་ཡིན་ལ་ཁྱིམ་པ་ཡང་མ་ཡིན་ནོ། །དེའི་ཕྱིར་དགེ་སྦྱོང་དང་དགེ་སྦྱོང་དུ་དམ་བཅས་པར་གྱུར་པ་རྣམས་
ཀྱི་རྒྱུ་མཚན་གྱི་དཔྱད་ར་མི་བྱའོ། །འདི་དག་ནི་ཀུན་ནས་ཉོན་མོངས་པ་ཡིན་ནོ། །ཡང་རིམ་པ་གཞན་གྱིས་མ་རུངས་པའི་རྒྱུ་མཚན་འདི་དཔྱོད་པར་གྱུར་པ་ལ། ཇི་ལྟར་གང་འགའ་ཞིག་རྒྱུ་མཚན་ཅན་ཡིན་པར་གྱུར་པ་དེ་རྒྱལ་པོས་ཅི་ནས་ཀྱང་ལྟད་མོའི་དུས་ན་ལྟད་མོ་འཛུགས་པར་འགྱུར་རོ། །

རྒྱལ་པོ་དག་ཕན་ཚུན་དུ་ཀུན་དུ་འཇོམས་པར་གྱུར་པ། སྐྱེ་བོ་ཐམས་ཅད་འཁྲུག་པར་བྱེད་པའི་འཁྲུག་པའི་ལྟད་མོ་ལས་སེམས་ཅན་བརྒྱ་སྟོང་དུ་མ་རྣམ་པར་ཉམས་པར་འགྱུར་རོ། །གསོད་པར་བྱེད་པ་དང་། འཛིན་པར་བྱེད་པས་ཀྱང་ཡུལ་ལྗོངས་དང་། ཡུལ་འཁོར་དང་། གྲོང་ཆུང་རྣམས་
ཕན་ཚུན་དུ་སྟོངས་པར་བྱེད་དོ། །སྲོག་ཆགས་བརྒྱ་སྟོང་དུ་མ་རྣམས་ཀྱང་སྡུག་བསྔལ་བར་འགྱུར་རོ། །དེའི་ཚེ་རྒྱལ་པོ་དག་ཕན་ཚུན་དུ་འགྲས་པར་གྱུར་པས་ཏེ། དེ་ལ་མདོར་བསྡུ་ན་སྐྱེ་བོའི་ཚོགས་ཆེན་པོ་འདི་དག་རྣམས་ཀྱི་ནི་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པས་ལྟད་མོ་བཙུགས་པ་ཡིན་
ནོ། །རྒྱལ་པོ་གཅིག་རྣམ་པར་རྒྱལ་བར་གྱུར་པས་རྒྱལ་པོ་གཞན་ལ་དབང་ཆེ་བའི་རྒྱུ་མཚན་ཉེ་བར་མཚོན་པར་བྱས་ནས་དེ་འདི་སྙམ་དུ་ཉེ་བར་སེམས་ཏེ། གལ་ཏེ་རྒྱལ་པོ་འདི་རྣམ་པར་རྒྱལ་བར་གྱུར་ན་དེ་ལས་བདག་ཆེན་པོར་འགྱུར་བ་དང་། རྒྱལ་པོའི་སྤྱན་སྔ་ནས་རྙེད་པ་དང་བཀུར་སྟི་ཡང་བདག་ལ་ཆེན་
པོ་འབྱུང་བར་འགྱུར་རོ། །དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་དེ་ཉིད་ཀྱི་དགེ་བ་གང་ཡིན་པའི་ཆོས་དེ་ནུབ་པར་འགྱུར་རོ། །བསམ་གཏན་ལ་སྙོམས་པར་ཞུགས་པ་ན་ཡང་དགེ་བ་མངོན་པར་མི་འཕེལ་ལོ། །རྒྱལ་བ་དང་མི་རྒྱལ་བ་རྣམས་ཀུན་དུ་རྟོག་པར་བྱེད་པ་པོ་ཞི་བར་གྱུར་པའི་ཆོས་རྣམས་
ཀྱང་མ་བསམས་པས་ལུས་ཞིག་པར་གྱུར་པ་ན་ཤི་བའི་འོག་ཏུ་ངན་སོང་ལོག་པར་ལྟུང་བ་དམྱལ་བར་སྐྱེའོ། །རྒྱུ་མཚན་འདི་དག་གི་ཕྱིར་ན་དགེ་སྦྱོང་རྣམས་དང་དགེ་སྦྱོང་དུ་ཁས་འཆེས་པས་རྒྱུ་མཚན་གྱི་དཔྱད་ར་འཇིག་རྟེན་པ་མི་བྱའོ། །འཇིག་རྟེན་པའི་དཔྱད་ར་གང་ཡིན་པ་འདི་ནི་སྐྱོན་གསུམ་སྐྱེད་
པར་བྱེད་པ་ཡང་འདི་ཡིན་ཏེ། དགེ་བའི་ཆོས་རྣམས་ཀྱི་བར་དུ་གཅོད་པར་བྱེད་པ་ཡིན་ནོ། །དེ་ལ་སྐྱོན་གསུམ་པོ་དེ་དག་རྣམས་ལ་རིམ་གྱིས་ངེས་པར་རྣམ་པར་གྲོལ་བར་འགྱུར་བའི་འཇིག་རྟེན་ལས་འདས་པའི་སྒྲུབ་པ་དཔྱད་པར་བྱའོ། །གང་ཞེ་ན་འདི་ལྟ་སྟེ། ཇི་ལྟར་འདིས་ས་གཞི་གཡོ་བ་ཉེ་
བར་མཚོན་པར་བྱེད་པ། ཉིན་མོ་དང་མཚན་མོར་ཡང་ཇི་ལྟར་ས་གཡོ་བ་འབྱུང་བར་འགྱུར་རོ་ཞེས་དེ་ཁོ་ན་ལྟར་ནི་ནམ་ཡང་དཔྱོད་པར་མི་བྱེད་དེ། ཉིན་དང་མཚན་དུ་ཡང་སེམས་ཀྱི་ས་གཞི་གཡོ་བ་འབྱུང་བར་འགྱུར་བའི་ཕྱིར་རོ། །དཔེར་ན་ས་གཞི་འདི་ཀུན་ནས་གཡོ་བར་གྱུར་ན་ནགས་དང་།

ཉེ་བའི་ནགས་དང་། རི་དང་། ཆུ་ཀླུང་དང་། ཤིང་དང་། གྲོང་དང་། ཚོང་འདུས་སུ་བཅས་པའི་འཇིག་རྟེན་འདི་དག་རྣམས་འཇིག་པ་འབྱུང་བར་འགྱུར་རོ། །དེ་ཁོ་ན་བཞིན་དུ་སེམས་ཀྱི་ས་གཞི་འདི་རབ་ཏུ་གཡོས་པར་གྱུར་ན། དེ་ལ་བརྟེན་པ་དེ་དག་རྣམས་ཐམས་ཅད་ལས་འཇིག་
རྟེན་ལས་འདས་པ་སྒྲུབ་པར་བྱེད་པའི་ཆོས་དགེ་བའི་ས་ཆེན་པོ་པ་དང་བཅས་པ་རྣམས་མ་གཏོགས་པ་གཞན་དག་རྣམས་ནི་རབ་ཏུ་གཡོ་བར་འགྱུར་རོ། །དེའི་ཕྱིར་དང་པོ་ཁོ་ནར་དགེ་སྦྱོང་དགེ་སྦྱོང་དུ་དམ་བཅས་པ་རྣམས་ཀྱིས་ས་གཞི་བཞིན་དུ་སེམས་ཀྱི་ས་གཞི་གཡོ་བ་རྣམས་ལ་སོ་སོར་བརྟག་པར་
བྱའོ། །གང་གི་ཕྱིར་འཁོར་བར་བྱེད་པ་དང་། སེམས་ཀྱི་ས་གཞི་རབ་ཏུ་གཡོ་བར་ཡང་བྱེད་དོ། །གསུམ་གྱིས་སེམས་ཀྱི་ས་གཞི་རྣམས་རབ་ཏུ་གཡོ་བར་ཡང་བྱེད་དོ། །འདི་ལྟ་སྟེ། འདོད་ཆགས་དང་། ཞེ་སྡང་དང་། གཏི་མུག་གིས་རབ་ཏུ་གཡོ་བར་བྱེད་དེ། ཇི་ལྟར་ཡང་ས་གཞི་དག་
གཡོ་བ་འབྱུང་བར་འགྱུར་བ་ན་ཆུ་མཉམ་པ་དང་ལྡན་པ་རྣམས་རླུང་གིས་དཀྲུགས་པར་བྱེད་དོ། །སོ་སོའི་སྐྱེ་བོའི་སེམས་ཀྱང་དེ་ཁོ་ན་བཞིན་དུ་འབྱུང་བར་འགྱུར་ཏེ། འདོད་ཆགས་སམ། ཞེ་སྡང་ངམ། གཏི་མུག་ཀྱང་སྐྱེས་པར་གྱུར་པ་ན་སྙོམས་པར་གནས་པ་ལས་སྙིང་དང་བཞིན་གྱི་མདངས་
ཀྱང་དམར་བའམ། བཞིན་གྱི་མདངས་མི་གསལ་བ་འབྱུང་བར་འགྱུར་རོ། །དེའི་ཕྱིར་དགེ་སྦྱོང་རྣམས་དང་། དགེ་སྦྱོང་དུ་ཁས་འཆེས་པ་མྱ་ངན་ལས་འདས་པ་ལ་མངོན་དུ་ཕྱོགས་པ་རྣམས་དང་། དགེ་སྦྱོང་དུ་ཁས་འཆེས་པ་རྣམས་ཀྱི་རྒྱུ་མཚན་དེ་དག་རྣམས་ཉེ་བར་གཟུང་བར་བྱའོ། །
རྒྱུ་མཚན་དེ་དག་རྣམས་ཀྱི་རྒྱུ་མཚན་གྱིས་ཉེ་བར་རྟོག་པ་རྣམས་ནི་ནམ་ཡང་སྡུག་བསྔལ་བར་མི་འགྱུར་རོ། །སེམས་ཀྱི་ས་གཞིའི་རྒྱུ་མཚན་དུ་གྱུར་པ་འདི་དག་རྣམས་ནི་འཇིག་རྟེན་ལས་འདས་པ་ཡིན་ནོ། །གཞན་ཡང་གལ་ཏེ་ཐ་མལ་པའི་རྒྱུ་མཚན་འདི་དག་གིས་ཉེ་བར་མཚོན་པར་བྱེད་དེ།
ཇི་ལྟར་གྲོག་མ་རྣམས་ཚང་ནས་ཕྱིར་འབྱུང་བར་འགྱུར་བ་དེ་བཞིན་དུ་ལྷའི་ཆར་འབབ་པར་འགྱུར་ལ། དེ་ཁོ་ན་བཞིན་དུ་དགེ་སྦྱོང་དགེ་སྦྱོང་དུ་ཁས་འཆེས་པ་རྣམས་ཀྱིས་འཇིག་རྟེན་ལས་འདས་པ་འདི་དག་བརྟག་པར་བྱ་སྟེ། ཇི་ལྟར་གྲོང་དང་། གྲོང་ཁྱེར་དང་། ཚོང་འདུས་དག་ལས་སྦྱིན་

པ་པོ་དང་། སྦྱིན་བདག་རྣམས་དང་། དགེ་སྦྱོང་དང་། བྲམ་ཟེ་རྣམས་ཀྱིས་དང་། ཁྱིམ་བདག་རྣམས་ཀྱིས་ཁྱིམ་ཡང་བཤིག་ནས་གང་ན་སངས་རྒྱས་བཞུགས་པ་དེར་འོང་ངོ་། །དེའི་ཚེ་ཡང་དག་པའི་རྒྱུ་མཚན་དུ་གྱུར་པ་སྟོན་པར་མཛད་པའི་རྒྱུ་མཚན་རྣམས་ཀྱང་དགེ་སྦྱོང་དང་བྲམ་ཟེ་རྣམས་ཀྱིས་འདི་
ལྟར་ཉེ་བར་མཚོན་པར་འགྱུར་རོ། །ཇི་ལྟར་ཆུང་དུ་ན་འདིར་སངས་རྒྱས་བཅོམ་ལྡན་འདས་ཀྱི་ལེགས་པར་བསྟན་པའི་གསུང་གིས་དམ་པའི་ཆོས་དག་གི་ཆར་འབེབས་པར་འགྱུར་ཏེ། སྦྱིན་པ་པོ་དང་། སྦྱིན་བདག་རྣམས་དང་། དགེ་སྦྱོང་དང་། བྲམ་ཟེ་དང་། ཁྱིམ་བདག་རྣམས་གང་དག་ཡིན་པ་
དེ་དག་རྣམས་གང་ན་བཅོམ་ལྡན་འདས་སྤྲིན་དང་ལྡན་པར་གྱུར་པས་ཆར་མངོན་པར་འབེབས་པར་མཛད་པ་དེར་ཉེ་བར་ལེགས་པར་འགྲོ་བར་བྱེད་དོ་ཞེས་པའི་རྒྱུ་མཚན་འདི་དག་ནི་མཆོག་ཡིན་གྱི་ཐ་མལ་པའི་ཆར་འབབ་པར་འགྱུར་བའི་རྒྱུ་མཚན་ནི་མ་ཡིན་ནོ། །གཞན་ཡང་དགེ་སྦྱོང་ངན་པ་དགེ་སྦྱོང་དུ་
ཁས་འཆེས་པ་འདི་དག་གིས་ཟླ་བ་གཟས་འཛིན་པའི་རྒྱུ་མཚན་ཉེ་བར་རྟོག་པར་བྱེད་དོ། །མ་ཐ་ཡང་ཟླ་བ་གཟས་འཛིན་པ་འབྱུང་བར་འགྱུར་ཏེ། ཇི་ལྟར་ཆུར་མར་ནག་ནུབ་པར་འགྱུར་རོ། །རྒྱུ་མཚན་དེ་དག་རྣམས་ནི་མཛེས་པ་མ་ཡིན་ཞིང་ཞི་བར་འགྱུར་བ་ཡང་མ་ཡིན་ནོ། །དགེ་སྦྱོང་གིས་གང་
མཛེས་པར་གྱུར་པའི་རྒྱུ་མཚན་འཇིག་རྟེན་ལས་འདས་པ་འདི་དུ་མ་རྣམས་དཔྱད་པར་བྱའོ། །ཆུང་དུ་ན་དུས་ཐ་མར་གྱུར་པ་རྩོད་ལྡན་གྱི་དུས་ན་དམ་པའི་ཆོས་ཟླ་བ་གཟས་འཛིན་པ་འབྱུང་བར་འགྱུར་ཏེ། ཇི་ལྟར་དམ་པའི་ཆོས་ཀྱི་མར་ནག་འདི་དག་རྣམས་ལོག་པར་ལྟ་བའི་སྐྱེ་བོ་རྣམས་ཀྱི་སྙིང་ལ་ནུབ་པར་འགྱུར་
རོ། །འབྱིན་པར་མི་བྱེད་དོ། །རྒྱུ་མཚན་འདི་དག་རྣམས་མཆོག་ཡིན་གྱི་འཇིག་རྟེན་པའི་ཟླ་བ་གཟས་འཛིན་པའི་རྒྱུ་མཚན་ནི་མ་ཡིན་ནོ། །གཞན་ཡང་གལ་ཏེ་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་འདི་འཇིག་རྟེན་པའི་ཟླ་བ་གཟས་འཛིན་པ་མཆོག་ཡིན་པའི་རྒྱུ་མཚན་རྣམས་ཉེ་བར་མཚོན་པར་བྱེད་
དོ། །ཇི་ལྟར་ཟླ་བ་གཟས་འཛིན་པར་འགྱུར་ཏེ། ཇི་ལྟར་བྱ་འདི་དག་རྣམས་ཀྱང་ནམ་མཁའ་ལ་དམའ་བ་ནས་འཕུར་རོ་ཞེས་ཉེ་བར་འཛིན་པའི་རྒྱུ་མཚན་འདི་ནི་མཛེས་པ་མ་ཡིན་ནོ། །དགེ་སྦྱོང་རྣམས་དང་དགེ་སྦྱོང་དུ་ཁས་འཆེས་པ་རྣམས་ཀྱིས་མཛེས་པར་གྱུར་པ་འཇིག་རྟེན་ལས་འདས་པའི་རྒྱུ་མཚན་

འདི་དག་ཉེ་བར་བརྟག་པར་བྱ་སྟེ། ཇི་ལྟར་དུས་ཀྱིས་དམ་པའི་ཆོས་ཀྱི་ཟླ་བ་གཟས་འཛིན་པ་ཇི་ལྟ་བར་འབྱུང་བར་འགྱུར་བ་ན་ཇི་ལྟར་དམ་པའི་ཆོས་ཀྱི་ལམ་དུ་ཞུགས་པར་གྱུར་པ་མཆོག་ཏུ་དགེ་བ་དང་ལྡན་པའི་དགེ་སྦྱོང་རྣམས་དམའ་བར་འགྲོ་བར་འགྱུར་རོ། །བྱ་བཞིན་དུ་དམའ་ཞིང་དམའ་བ་
ནས་ཀུན་དུ་སྤྱོད་པར་བྱེད་པའི་ལོག་པར་ལྟ་བ་ཅན་རྣམས་ཀྱི་སྒོ་ནམ་མཁའ་ལྟ་བུར་གྱུར་པ་ནས་དམན་པ་དམན་པའི་ཚིག་རྣམས་བརྗོད་པར་འགྱུར་རོ། །དུས་ཀྱི་སྐྱོན་དུ་གྱུར་པ་རྒྱུ་མཚན་གྱི་མཆོག་འདི་དག་རྣམས་ཉེ་བར་གཟུང་བར་བྱའོ། །དགེ་སྦྱོང་དགེ་སྦྱོང་དུ་ཁས་འཆེས་པ་རྣམས་ཀྱིས་ཐ་མལ་པའི་ཟླ་
བ་གཟས་འཛིན་པ་ནི་མ་ཡིན་ནོ། །གཞན་ཡང་རྒྱུ་མཚན་གང་གི་ཕྱིར་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་འདི་ཉི་མ་གཟས་འཛིན་པའི་རྒྱུ་མཚན་ཉེ་བར་རྟོག་པར་བྱེད་དེ། འཇིག་རྟེན་པའི་ཇི་ལྟར་འབྱུང་བར་འགྱུར་བ་རྣམས་ལ་ཉི་མ་གཟས་བཟུང་བར་གྱུར་པ་ན་ཕྱོགས་རྣམས་ལེ་བརྒན་གྱི་མདོག་
ཏུ་རྟོགས་པར་གྱུར་ན་འདིར་དགེ་བ་དག་འབྱུང་བར་འགྱུར་རོ། །རླུང་འཇམ་པོ་རྣམས་རབ་ཏུ་འབྱུང་བར་འགྱུར་རོ། །ཕྱོགས་རྣམས་དངས་པ་དང་ལྡན་པ་དང་མཛེས་པ་དག་གིས་གཡས་ཕྱོགས་ནས་བསྐོར་བར་འགྱུར་བ་མཐོང་ངོ་། །བསམ་གཏན་སྒོམ་པ་ལ་བར་དུ་གཅོད་པར་འགྱུར་བས་དགེ་སྦྱོང་
དགེ་སྦྱོང་དུ་ཁས་འཆེས་པ་རྣམས་ཀྱི་རྒྱུ་མཚན་འདི་དག་ནི་མཛེས་པ་མ་ཡིན་ནོ། །འཇིག་རྟེན་པ་འདི་དག་རྣམས་ནི་འདིར་ཤེས་པ་མ་ཡིན་ནོ། །བདེ་བར་གྱུར་པ་ཡང་མ་ཡིན་ནོ། །དེ་ཁོ་ན་བཞིན་དུ་དགེ་སྦྱོང་དགེ་སྦྱོང་དུ་ཁས་འཆེས་པ་རྣམས་ཀྱིས་ཤིས་པར་བྱེད་པའི་རྒྱུ་མཚན་གཞན་རྣམས་བཟུང་བས་
འཇིག་རྟེན་ལས་འདས་པ་རྣམས་ཉེ་བར་མཚོན་པར་བྱའོ། །ཇི་ལྟར་ཆུང་དུ་ན་བྱང་ཆུབ་སེམས་དཔའི་ཉི་མ་ལ་ཐམས་ཅད་མཁྱེན་པ་ཉིད་དུ་བྱང་ཆུབ་པའི་གཟས་འཛིན་པར་འགྱུར་བ་འབྱུང་སྟེ། བསྐལ་པ་གཅིག་གམ། བསྐལ་པ་གཉིས་སམ། བསྐལ་པ་གསུམ་ཉིད་ཀྱིས་ཀྱང་སྟེ། བྱང་ཆུབ་སེམས་
དཔའ་འབྱུང་བ་འདི་ནི་དགེ་སྦྱོང་དག་འཇིག་རྟེན་ལས་འདས་པའི་རྒྱུ་མཚན་ཡིན་ནོ། །ཇི་ལྟར་འདིའི་བརྩོན་འགྲུས་དང་། སྦྱིན་པ་དང་། ཐོས་པ་དང་། ཡེ་ཤེས་རྣམས་ལ་ཆགས་པ་ཆགས་པར་གྱུར་པའི་མདོག་གིས་སེམས་ཅན་ཐམས་ཅད་ལ་སྙིང་རྗེ་དང་བྱམས་པས་ཆགས་པ་དང་ལྡན་པའི་ལུས་ཀྱི་

ཕྱོགས་རྣམས་ཀྱིས་མཚོན་པར་གྱུར་པ་ན་དགེ་བ་འདི་དག་རྣམས་འབྱུང་བར་འགྱུར་རོ། །གལ་ཏེ་ཡོན་ཏན་རབ་ཀྱི་ཕུལ་དང་ལྡན་པའི་བྱང་ཆུབ་སེམས་དཔའ་འདི་འབྱུང་བར་གྱུར་པ་ན་མ་འོངས་པ་ན་བྱའི་ལྟས་སུ་གྱུར་པའི་ཉན་ཐོས་དང་། རང་སངས་རྒྱས་དང་། དགྲ་བཅོམ་པར་གྱུར་པའི་བྱ་རྣམས་
འཇུག་པར་འགྱུར་བའི་རྟགས་རྣམས་ཀྱང་མཐོང་བར་འགྱུར་རོ། །གཡས་ཕྱོགས་ནས་བསྐོར་བ་ནི་ཡང་དག་པའི་གོ་འཕང་ཡིད་ལ་བྱེད་པ་གཡས་ནས་བསྐོར་བ་དེའི་ཚིག་བླ་དགས་ཡིན་ནོ། །གཞན་ཡང་འདིའི་ཇི་ལྟ་བ་ཉིད་དུ་འཇིག་རྟེན་པའི་རྒྱུ་མཚན་རྣམས་ལ་རབ་ཏུ་ལྟ་བར་བྱེད་དེ། ཇི་ལྟ་བར་དགེ་བར་
འབྱུང་བར་མི་འགྱུར་བ་ནི་སྐྱ་རེངས་དམར་པོ་དང་ཕྱོགས་རྣམས་ཀྱང་རྩུབ་པར་རབ་ཏུ་མཐོང་ངོ་། །རླུང་རྩུབ་མོར་གྱུར་པས་རླུང་རྣམས་རབ་ཏུ་རྒྱུའོ། །སྐྱ་རེངས་དམར་པོ་དེའི་ཀུན་དུ་ཆ་བྱད་ཀྱིས་ཉི་མ་ནམ་མཁའ་ལ་ཤར་ནས་གནས་པར་འགྱུར་རོ། །ཇི་ལྟར་དགེ་སྦྱོང་ངན་པ་འདི་བསམ་གཏན་སྒོམ་པ་ན་བར་
ཆད་བྱེད་པར་འགྱུར་བའི་འཇིག་རྟེན་པའི་རྒྱུ་མཚན་ཉེ་བར་རྟོག་པར་བྱེད་དོ། །དེ་བཞིན་དུ་ཡང་དགེ་སྦྱོང་བཟང་པོས་འཇིག་རྟེན་ལས་འདས་པའི་རྒྱུ་མཚན་དད་པ་ཅན་ཐམས་ཅད་ལ་ཀུན་དུ་སྟོན་པར་བྱེད་པར་འགྱུར་ཏེ། ཇི་ལྟར་མི་མཛེས་པར་གྱུར་པ་རྣམས་འབྱུང་བར་འགྱུར་ན། དེ་ལ་ཅི་ཞིག་མི་མཛེས་
པར་འབྱུང་བར་འགྱུར་བ་འདི་ལྟ་སྟེ། དམ་པའི་ཆོས་རྣམས་ནུབ་པར་འགྱུར་བའོ།