Tạng Tây Tạng (Tibetan Canon)Nguyên tác: Tây Tạng
Kinh tạng Tây Tạng (Kangyur Đại Học) — 068_མདོ་སྡེ།_ཡ
Văn bản gốc(Tây Tạng)
Trang 5 / 19 (50.000 ký tự/trang)
།སངས་རྒྱས་ཐམས་ཅད་མཉེས་པར་བགྱིད་པའི་སེམས་དང་བྱང་ཆུབ་ སེམས་དཔའི་དཀྱིལ་འཁོར་ཐམས་ཅད་རབ་ཏུ་དགའ་བར་བགྱིད་པའི་སེམས་དང་། ཉན་ཐོས་དང་། རང་སངས་རྒྱས་ཐམས་ཅད་རྗེས་སུ་ཡི་རང་བའི་སེམས་དང་། སེམས་བསྐྱེད་པ་དེས་ཡོངས་སུ་ཟིན་པར་མ་གྱུར་པའི་སེམས་ཅན་དེ་གང་ཡང་མ་མཆིས་སོ། །མཆོད་ པར་མ་གྱུར་པའི་དེ་བཞིན་གཤེགས་པ་དེ་གང་ཡང་མི་བཞུགས་སོ། །གོང་དུ་སེམས་བསྐྱེད་དེ་བསྐྱེད་མ་ཐག་པའི་བསོད་ནམས་ཀྱི་ཕུང་པོ་ནི་རབ་ཏུ་མང་གི་སེམས་ཅན་ཐམས་ཅད་འཁོར་ལོས་སྒྱུར་བ་དང་། འཇིག་རྟེན་སྐྱོང་བ་དང་། བརྒྱ་བྱིན་དང་། ཚངས་པ་དང་། ཉན་ཐོས་དང་། རང་སངས་རྒྱས་སུ་གྱུར་པ་རྣམས་ཀྱི་བསོད་ནམས་ཀྱི་ཕུང་པོ་ནི་དེ་ཙམ་མ་ལགས་སོ། །བདག་གི་བསོད་ནམས་ཀྱི་ཕུང་པོ་བྱང་ཆུབ་ཏུ་སེམས་བསྐྱེད་པ་དང་ལྡན་པ་གང་ལགས་པ་དང་། སེམས་ཅན་ཐམས་ཅད་ལ་སྩལ་བ་གང་ལགས་པ་དང་། ཉན་ཐོས་ དང་། རང་སངས་རྒྱས་ཐམས་ཅད་ལ་ཕུལ་བ་གང་ལགས་པ་དང་། བྱང་ཆུབ་སེམས་དཔའ་ཐམས་ཅད་ལ་ཕུལ་བ་གང་ལགས་པ་དང་། སངས་རྒྱས་ཐམས་ཅད་ལ་དགེ་བའི་རྩ་བ་ཐམས་ཅད་ཕུལ་བའི་བསོད་ནམས་ཀྱི་ཕུང་པོ་ཡོངས་སུ་བཟུང་བ་གང་ལགས་པ་དང་། གང་ཡེ་ ཤེས་དང་། མོས་པ་མངོན་པར་བསྒྲུབས་པ་རྣམས་ཀྱི་མོས་པ་དང་ལྡན་པའི་དགེ་བའི་རྩ་བ་གང་ལགས་པ་དང་། སངས་རྒྱས་ཐམས་ཅད་ལ་ཕྱག་འཚལ་བ་དང་ལྡན་པའི་དགེ་བའི་རྩ་བ་གང་ལགས་པ་དང་། དེ་བཞིན་གཤེགས་པ་ཐམས་ཅད་ལ་ལྷག་པར་མཆོད་པ་དང་ལྡན་ པའི་དགེ་བའི་རྩ་བ་གང་ལགས་པ་དང་། མོས་པའི་སྟོབས་ལས་བྱུང་བའི་མཆོད་པ་དང་ལྡན་པའི་དགེ་བའི་རྩ་བ་གང་ལགས་པ་དང་། སྒྲིབ་པར་འགྱུར་བ་ཐམས་ཅད་སེལ་བའི་དགེ་བའི་རྩ་བ་གང་ལགས་པ་དང་། རྗེས་སུ་ཡི་རང་བ་དང་ལྡན་པའི་དགེ་བའི་རྩ་བ་གང་ལགས་ པ་དང་། སངས་རྒྱས་ཐམས་ཅད་ལ་བསྐུལ་བ་དང་ལྡན་པའི་དགེ་བའི་རྩ་བ་གང་ལགས་པ་དང་། དེ་བཞིན་གཤེགས་པ་ཐམས་ཅད་ལ་གསོལ་བ་འདེབས་པ་དང་ལྡན་པའི་དགེ་བའི་རྩ་བ་གང་ལགས་པ་དང་། བདག་གི་དགེ་བའི་རྩ་བ་རབ་འབྱམ་སངས་རྒྱས་དང་། བྱང་ ཆུབ་སེམས་དཔའ་ཐམས་ཅད་ལ་བོས་ཏེ། བདག་གིར་བགྱི་བ་དང་ལྡན་པ་གང་ལགས་པ་དང་། བདག་གི་དགེ་བའི་རྩ་བ་ཐོག་མ་དང་པོ་མ་མཆིས་པའི་ཚེ་རབས་ནས་བགྱིས་པ་ཐམས་ཅད་མཁྱེན་པར་ཡོངས་སུ་མ་བསྔོས་པ་གང་ལགས་པ་དང་། བདག་གི་དགེ་བའི་རྩ་བ་འདུས་ བྱས་ཀྱི་ཡོ་བྱད་འཚལ་བས་མངོན་པར་བསྒྲུབས་པ་གང་ལགས་པ་དང་། བདག་གི་དགེ་བའི་རྩ་བ་ཉན་ཐོས་དང་། རང་སངས་རྒྱས་ཐམས་ཅད་ཀྱི་སའི་སླད་དུ་མངོན་པར་བསྒྲུབས་པ་གང་ལགས་པ་དང་། བདག་གི་དགེ་བའི་རྩ་བ་ལས་ཀྱིས་བསྒྲུབས་པ་སྔོན་གྱི་ དུས་ནས་བསགས་པ་དེ་བཞིན་གཤེགས་པའི་ཡེ་ཤེས་ཀྱིས་མཁྱེན་པ་གང་ལགས་པ་དེ་དག་ཐམས་ཅད་ཡོངས་སུ་བསྡུའོ། །ཡོངས་སུ་བསྡུས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོའོ། །བདག་གི་དགེ་བའི་རྩ་བ་འདི་དག་གིས་སངས་རྒྱས་ཐམས་ཅད་ མཉེས་པར་བགྱིད་ཅིང་དགྱེས་པར་བགྱིད་པར་གྱུར་ཅིག །སངས་རྒྱས་ཀྱི་ཞིང་ཐམས་ཅད་ཡོངས་སུ་སྦྱོང་བར་གྱུར་ཅིག །སེམས་ཅན་ཐམས་ཅད་ཡོངས་སུ་སྨིན་པར་བགྱིད་པར་གྱུར་ཅིག །དགེ་བའི་བཤེས་གཉེན་ཐམས་ཅད་དང་། ཆོས་སྨྲ་བ་ཐམས་ཅད་མགུ་བར་བགྱིད་ ཅིང་དགའ་བར་བགྱིད་པར་གྱུར་ཅིག །དེ་བཞིན་གཤེགས་པ་ཐམས་ཅད་ཀྱི་བསྟན་པ་ཡང་དག་པར་འཛིན་ཅིང་བསྲུང་བ་དང་། ཡོངས་སུ་སྐྱོང་བར་གྱུར་ཅིག །སྒྲིབ་པའི་ལིང་ཏོག་ཐམས་ཅད་རྣམ་པར་སྦྱོང་བར་གྱུར་ཅིག །བདུད་ཀྱི་རྩོད་པའི་ དམག་ཚོགས་ཐམས་ཅད་རབ་ཏུ་འདུལ་བར་གྱུར་ཅིག །སངས་རྒྱས་ཀྱི་ཆོས་ཐམས་ཅད་མངོན་པར་རྫོགས་པར་བྱང་ཆུབ་པར་གྱུར་ཅིག །ཏིང་ངེ་འཛིན་ཐམས་ཅད་དང་། དབང་ཐམས་ཅད་ཐོབ་པ་དང་། མངོན་པར་ཤེས་པ་ཐམས་ཅད་ཀྱིས་རྣམ་པར་རྩེན་པ་དང་། རྣམ་པར་ཐར་པ་ཐམས་ཅད་ཀྱིས་རྣམ་པར་འཕྲུལ་པར་གྱུར་ཅིག །ཅི་ནས་ཀྱང་འཁོར་བ་ན་མི་འབྲལ་ཞིང་ཚེ་རབས་གཞན་དུ་རྗེས་པ་ན་ཆབ་འཚལ་བར་མི་འགྱུར་བ་དང་། བྱང་ཆུབ་སེམས་དཔའི་སྤྱོད་པ་ཕ་རོལ་ཏུ་ཕྱིན་པ་བསྐྱུད་པར་མི་འགྱུར་བ་དང་། བྱིས་པ་སོ་སོའི་སྐྱེ་ བོ་དང་འདྲེ་བས་སྒྲིབ་པའི་ཆ་དང་འཐུན་པར་མི་འགྱུར་བ་དེ་ལྟ་བུར་བདག་གི་དགེ་བའི་རྩ་བ་དེ་དག་ཡོངས་སུ་བསྔོའོ། །ཅི་ནས་ཀྱང་བྱང་ཆུབ་སེམས་དཔའ་དེ་དག་སངས་རྒྱས་ཀྱི་ཞིང་འདི་ནས་སངས་རྒྱས་མངོན་སུམ་དུ་བཞུགས་པའི་འཇིག་རྟེན་གྱི་ཁམས་གཞན་དུ་སངས་རྒྱས་ དེ་དག་ལ་མཆོད་པ་བཀོད་པའི་རྒྱན་གྱིས་བརྒྱན་པར་བགྱིད་དུ་མཆི་བ་དང་། སངས་རྒྱས་ལ་མཆོད་པ་བཀོད་པའི་རྒྱན་དེའི་ཐ་མའི་སེམས་བསྐྱེད་པ་ཐོབ་པ་ཡོངས་སུ་རྫོགས་པར་དགེ་བའི་རྩ་བ་དེ་དག་ཡོངས་སུ་བསྔོའོ། །འཆི་བའི་དུས་ཀྱི་ཚེ་ན་ཡང་སངས་རྒྱས་བཅོམ་ ལྡན་འདས་དེ་དག་གིས་ཕྱག་གཡས་པ་གསེར་གྱི་ཁ་དོག་ཅན་བརྐྱང་སྟེ། བདག་གི་སྤྱི་བོར་འཇོག་པར་གྱུར་ཅིག །ཅི་ནས་བདག་དངོས་པོ་ཐམས་ཅད་ལ་མི་ལྟ་བ་བཀོད་པ་རྒྱུན་ཐོགས་པ་མ་མཆིས་པ་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་བསྒོས་པའི་སེམས་ དང་། ཚོར་བ་ཐམས་ཅད་རྒྱུན་ཆད་པའི་སེམས་ཀྱིས་འཆི་བའི་དུས་བགྱིད་པར་གྱུར་ཅིག །དད་པ་གྲངས་མ་མཆིས་པ་དང་། རི་མོ་གུས་པར་བགྱི་བ་གྲངས་མ་མཆིས་པ་དང་། དགའ་བ་དང་དད་པ་གྲངས་མ་མཆིས་པས་སངས་རྒྱས་བཅོམ་ལྡན་འདས་དེ་དག་ལ་ལྟ་ ཞིང་རྟོག་ལ་ཀུན་དུ་སྨྲ་ཞིང་ཡང་དག་པར་སྨྲ་བཞིན་དུ་འཆི་བའི་དུས་བགྱིད་པར་གྱུར་ཅིག །མཆོད་པ་ཡིད་དུ་འོང་བས་དེ་བཞིན་གཤེགས་པ་དེ་དག་ལ་མཆོད་ཅིང་མེ་ཏོག་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། ན་བཟའ་དང་། གདུགས་ དང་། རྒྱལ་མཚན་དང་། བ་དན་དཔག་ཏུ་མ་མཆིས་པ་དག་གིས་དེ་བཞིན་གཤེགས་པ་དེ་དག་ལ་མཆོད་ཅིང་བལྟ་ལ་རྟོག་བཞིན་དུ་འཆི་བའི་དུས་བགྱིད་པར་གྱུར་ཅིག །བདག་གི་དགེ་བའི་རྩ་བ་འདིས་འཇིག་རྟེན་གྱི་ཁམས་ཐམས་ཅད་ན་སེམས་ཅན་དམྱལ་བ་ ཐམས་ཅད་རྒྱུན་ཆད་པར་གྱུར་ཅིག །དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་ཐམས་ཅད་རྒྱུན་ཆད་པར་གྱུར་ཅིག །ལྷ་དབུལ་པོ་ཐམས་ཅད་དང་། མི་དབུལ་པོ་ཐམས་ཅད་དང་། སེར་སྣ་ཐམས་ཅད་དང་། འཆལ་པའི་ཚུལ་ཁྲིམས་ཐམས་ཅད་དང་། གནོད་སེམས་ཐམས་ཅད་དང་། ལེ་ལོ་ཐམས་ཅད་དང་། རྣམ་པར་གཡེང་བ་ཐམས་ཅད་དང་། འཆལ་པའི་ཤེས་རབ་ཐམས་ཅད་རྒྱུན་ཆད་པར་གྱུར་ཅིག །བྱང་ཆུབ་ཏུ་སེམས་བསྐྱེད་པ་དང་། སངས་རྒྱས་ལ་བལྟ་བ་དང་། དམ་པའི་ཆོས་མཉན་པ་དང་། དགེ་ བའི་བཤེས་གཉེན་དང་འགྲོགས་པ་དང་མི་འབྲལ་བར་གྱུར་ཅིག །དགེ་བའི་རྩ་བ་འདིས་བདག་སངས་རྒྱས་བཅོམ་ལྡན་འདས་ཐམས་ཅད་དང་ལུས་མཉམ་པར་གྱུར་ཅིག །ངག་མཉམ་པ་དང་། སེམས་མཉམ་པ་དང་། ཡེ་ཤེས་མཉམ་པར་གྱུར་ཅིག །ཇི་ལྟར་གོང་ དུ་ཡང་སངས་རྒྱས་བཅོམ་ལྡན་འདས་དག་གིས་ཇི་ལྟར་སངས་རྒྱས་ཀྱི་མཁྱེན་པ་ཆགས་པ་མི་མངའ་ཞིང་སྒྲིབ་པ་མི་མངའ་བས་མཁྱེན་ཅིང་རབ་ཏུ་མཁྱེན་པ་དེ་ལྟ་བུས་བྱང་ཆུབ་སེམས་དཔའ་རྣམས་ཀྱིས་དགེ་བའི་རྩ་བ་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ ཏུ་ཡོངས་སུ་བསྔོ་བར་བགྱི་བ་དེ་བཞིན་དུ་བདག་གིས་ཀྱང་དགེ་བའི་རྩ་བ་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བའི་མཆོག་གིས་ཡོངས་སུ་བསྔོའོ། །གཙོ་བོ་དང་། དམ་པ་དང་། ཁྱད་པར་དུ་འཕགས་པ་དང་། རབ་དང་། ཕུལ་ དང་། གྱ་ནོམ་པ་དང་། བླ་ན་མ་མཆིས་པ་དང་། གོང་ན་མ་མཆིས་པ་དང་། མཉམ་པ་མ་མཆིས་པ་དང་། མི་མཉམ་པ་དང་མཉམ་པ་དང་། མཚུངས་པ་མ་མཆིས་པ་དང་། སྣང་བ་མ་མཆིས་པ་དང་། བདག་ཉིད་ཆེན་པོ་དང་། བླ་མ་ དང་། ཟིལ་གྱིས་མི་ནོན་པ་དང་། ཡོན་ཏན་གྱི་ཆོས་ཐམས་ཅད་སྡུད་པ་དང་། ཡང་དག་པར་རྫོགས་པའི་སངས་རྒྱས་ཀྱིས་བཀའ་སྩལ་པའི་ཡོངས་སུ་བསྔོ་བས་ཡོངས་སུ་བསྔོའོ། །ཇི་ལྟར་བདག་གི་དོན་དུ་ཡོངས་སུ་བསྔོས་པ་དེ་བཞིན་དུ་འཇིག་རྟེན་གྱི་ཁམས་རབ་ འབྱམ་མ་ལུས་པ་ཐམས་ཅད་ན་སེམས་ཅན་ཇི་ཙམ་སེམས་ཅན་གྱི་རིས་ན་མཆིས་པ་སེམས་ཅན་གྱི་ཁམས་དེ་དག་ཐམས་ཅད་ཀྱི་ཆེད་དུ་ཡང་ཡོངས་སུ་བསྔོའོ། །དགེ་བའི་རྩ་བ་འདི་ལས་སུ་དག་ཤས་ཀྱིས་འཛིན་པར་འདོད་པ་དེ་དག་གིས་ཀྱང་རྗེས་སུ་ཡི་རང་ངོ་ཞེས་བརྗོད་པར་ བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་ལ་དམ་འཆའ་བར་གནས་པས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཇི་ལྟར་ན་བྱང་ཆུབ་སེམས་དཔའི་འཆགས་པ་ཁ་ན་མ་ཐོ་བ་མེད་པ་ཡིན། རྗེས་སུ་ཡི་ རང་བ་ཁ་ན་མ་ཐོ་བ་མེད་པ་དང་། བསྐུལ་བ་ཁ་ན་མ་ཐོ་བ་མེད་པ་དང་། གསོལ་བ་འདེབས་པ་ཁ་ན་མ་ཐོ་བ་མེད་པ་དང་། ཡོངས་སུ་བསྔོ་བ་ཁ་ན་མ་ཐོ་བ་མེད་པ་ཡིན། དེ་སྐད་ཅེས་སྨྲས་པ་དང་། འཇམ་དཔལ་གཞོན་ནུར་གྱུར་པས། བྱང་ཆུབ་སེམས་དཔའ་ཆོས་ཐམས་ ཅད་ལ་དམ་འཆའ་བར་གནས་པ་ལ་འདི་སྐད་ཅེས་སྨྲས་སོ། །རིགས་ཀྱི་བུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དག་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ཆོས་མཉམ་པ་ཉིད་ལ་འཇུག་ཅིང་དེས་ཡན་ལག་ ལྔ་ས་ལ་གཏུགས་པར་བྱས་ཏེ། དེས་པུས་མོ་གཡས་པའི་ལྷ་ང་ས་ལ་འཛུགས་པ་ན་ཚིག་འདི་སྐད་ཅེས་སེམས་ཅན་ཐམས་ཅད་གཡས་ཕྱོགས་ཀྱི་ལམ་ལ་གནས་པར་གྱུར་ཅིག་ཅེས་བརྗོད་པར་བྱའོ། །དེས་པུས་མོ་གཡོན་པའི་ལྷ་ང་ས་ལ་འཛུགས་པ་ན་ཚིག་འདི་ སྐད་ཅེས་སེམས་ཅན་གང་སུ་དག་གཡོན་ཕྱོགས་ཀྱི་ལམ་ལ་གནས་པ་དེ་དག་ཐམས་ཅད་འཕགས་པའི་ལམ་ལ་གནས་ཤིང་ཡང་དག་པའི་ལམ་ལ་གནས་པར་གྱུར་ཅིག་ཅེས་བརྗོད་པར་བྱའོ། །དེས་ལག་པ་གཡས་པ་ས་ལ་འཛུགས་པ་ན་ཚིག་འདི་སྐད་ཅེས་ཇི་ལྟར་དེ་ བཞིན་གཤེགས་པ་བྱང་ཆུབ་ཀྱི་སྙིང་པོ་མཆོག་དམ་པ་ལ་བཞུགས་པ་དགེ་བའི་ཆོས་ཐམས་ཅད་དང་ལྡན་པས་དབུ་དང་སྐུ་དང་སྐྱིལ་མོ་ཀྲུང་ལ་ཡོངས་སུ་བྱུགས་ཏེ། ཕྱག་གཡས་པ་ས་ལ་བསྣུན་ནས་བདུད་དཔུང་དང་བཅས་པ་བཏུལ་ཏེ། བྱང་ཆུབ་བརྙེས་པ་དེ་བཞིན་དུ་ སེམས་ཅན་འདི་དག་གིས་ཀྱང་བདུད་ཕྱིར་རྒོལ་བ་ཆོམས་པར་གྱུར་ཅིག །བྱང་ཆུབ་ཀྱི་སྙིང་པོ་ལ་འདུག་ཅིང་ས་ཆེན་པོ་ལ་བསྣུན་ནས་སངས་རྒྱས་ཀྱི་ཡེ་ཤེས་ཐོབ་པར་གྱུར་ཅིག་ཅེས་བརྗོད་པར་བྱའོ། །དེས་ལག་པ་གཡོན་པ་ས་ལ་འཛུགས་པ་ན་ཚིག་འདི་སྐད་ཅེས་སེམས་ཅན་ གང་སུ་དག་བྱིས་པའི་ཆོས་ལ་གནས་ཏེ། གཡོན་ཕྱོགས་སུ་འཛིན་པ་ལ་གདུལ་དཀའ་བ་དེ་དག་ཐམས་ཅད་བསྡུ་བའི་དངོས་པོ་བཞིས་ཤིན་ཏུ་སྡུད་པར་གྱུར་ཅིག་ཅེས་བརྗོད་པར་བྱའོ། །དེས་གདོང་དང་དཔྲལ་བ་ས་ལ་གཏུགས་པ་ན་ཚིག་འདི་སྐད་ཅེས་སེམས་ཅན་ཐམས་ཅད་ང་ རྒྱལ་མ་མཆིས་པ་འདིས་བླ་མ་རྣམས་ལ་རིམ་གྲོ་བགྱིད་པ་རྙེད་ཅིང་སྤྱི་གཙུག་བལྟར་མི་མཐོང་བ་དང་། དགེ་བའི་ཆོས་ཐམས་ཅད་འཕགས་པར་གྱུར་ཅིག །དེ་ལྟར་བདག་ཡན་ལག་ལྔས་ཕྱག་འཚལ་བ་འདིས་སེམས་ཅན་ཐམས་ཅད་ཀྱི་སྒྲིབ་པ་ལྔ་རྣམ་པར་སེལ་བར་གྱུར་ཅིག ། དབང་པོ་ལྔ་ཡོངས་སུ་རྫོགས་པར་གྱུར་ཅིག །འདོད་པའི་ཡོན་ཏན་ལྔ་ཡོངས་སུ་ཤེས་པར་གྱུར་ཅིག །མངོན་པར་ཤེས་པ་ཉམས་པ་མེད་པ་ལྔ་ཐོབ་པར་གྱུར་ཅིག །མིག་ལྔ་ཡོངས་སུ་དག་པར་གྱུར་ཅིག །སེམས་ཅན་འགྲོ་བ་ལྔར་སྐྱེས་པ་རྣམས་འགྲོ་བ་ལྔ་ལས་ཁྱད་ པར་དུ་འཕགས་པར་གྱུར་ཅིག །ཚུལ་ཁྲིམས་ཁྱད་པར་དུ་འཕགས་པ་དང་། ཏིང་ངེ་འཛིན་ཁྱད་པར་དུ་འཕགས་པ་དང་། ཤེས་རབ་ཁྱད་པར་དུ་འཕགས་པ་དང་། རྣམ་པར་གྲོལ་བ་ཁྱད་པར་དུ་འཕགས་པ་དང་། རྣམ་པར་གྲོལ་བའི་ཡེ་ཤེས་མཐོང་བ་ཁྱད་པར་ དུ་འཕགས་པར་གྱུར་ཅིག་ཅེས་བརྗོད་པར་བྱའོ། །དེས་ཡན་ལག་ལྔ་ཡོངས་སུ་དག་པ་དང་། སྒྲིབ་པ་ལྔ་དང་བྲལ་བ་དང་། སྟོབས་ལྔ་ལ་གནས་པ་དང་། དེ་བཞིན་གཤེགས་པ་ཡིད་ལ་བྱེད་པ་དང་མ་བྲལ་བས་ཚིག་འདི་སྐད་ཅེས་སངས་རྒྱས་བཅོམ་ལྡན་ འདས་ཆོས་ཀྱི་སྐུ་དང་ལྡན་པ། སྐུ་མ་ལགས་པ། གསུང་དག་པ། གསུང་མི་མངའ་བ། སེམས་དང་བ། སེམས་མི་མངའ་བ། ཡེ་ཤེས་ཆགས་པ་མི་མངའ་བ་དང་ལྡན་པ། མ་བྱོན་མ་བཞུད་པ་ཐམས་ཅད་མཁྱེན་པ་དང་ལྡན་པ། ཐམས་ཅད་གཟིགས་པ་ དང་ལྡན་པ་རྣམས་བདག་ལ་དགོངས་སུ་གསོལ། བདག་གིས་འཁོར་བ་ཐོག་མའི་མཐའི་མུ་ནས་བཟུང་སྟེ། ཡང་དག་པའི་མཐའ་དང་། བདག་གི་མཐའ་མ་འཚལ་བས། ཆོས་མ་ལགས་པ་ལ་ཆོས་སུ་འདུ་ཤེས་བསྐྱེད་པ་དང་། འདུལ་བ་མ་ལགས་པ་ལ་ འདུལ་བར་འདུ་ཤེས་བསྐྱེད་པ་དང་། སྦྱིན་གནས་མ་ལགས་པ་ལ་སྦྱིན་གནས་སུ་འདུ་ཤེས་བསྐྱེད་པ་དང་། མི་དགེ་བ་ལ་དགེ་བར་འདུ་ཤེས་བསྐྱེད་པ་དང་། ཕྱིན་ཅི་ལོག་གི་སེམས་ཀྱིས་བདག་གི་ལུས་སུ་ལྟ་བས་ཡོངས་སུ་དཀྲིས་པ་དང་། དགེ་བའི་ཆོས་གང་སངས་ རྒྱས་ཀྱིས་བཀའ་མ་སྩལ་པ་མངོན་པར་འདུས་བགྱིས་པ་དང་། བགྱིད་པ་དང་། བགྱིད་དུ་སྩལ་བ་དང་། བགྱིད་པ་ལ་རྗེས་སུ་ཡི་རང་བར་གྱུར་པ་གང་ཅི་མཆིས་པ་དེ་བདག་འཆགས་སོ། །དམིགས་པ་ལ་གནས་ཏེ། བདག་གིས་སེམས་ཅན་མ་མཆིས་པ་ ལ་སེམས་ཅན་དུ་འདུ་ཤེས་པ་དང་། སེམས་སྒྱུ་མ་ལྟ་བུར་མ་འཚལ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་གང་ལགས་པ་དེ་ཐམས་ཅད་འཆགས་སོ། །བདག་གིས་མངོན་པར་འདུ་བགྱིད་པ་མ་མཆིས་པར་མ་འཚལ་ནས། ལུས་ དང་། ངག་དང་། ཡིད་ཀྱིས་ཆོས་དགེ་བ་དང་། མི་དགེ་བ་མངོན་པར་འདུ་བགྱིད་པ་དང་། མངོན་པར་འདུས་བགྱིས་པ་གང་ལགས་པ་དེ་འཆགས་སོ། །བདག་གིས་སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་མཉམ་པ་ཉིད་དུ་མ་འཚལ་ནས་དམིགས་པར་ལྟུང་བས་སྦྱིན་པ་བྱིན་པ་དང་། ཚུལ་ཁྲིམས་མཆོག་ཏུ་འཛིན་པས་ཚུལ་ཁྲིམས་བསྲུངས་པ་དང་། བདག་དང་གཞན་དུ་འདུ་ཤེས་པས་བཟོད་པ་བསྒོམས་པ་དང་། ལུས་དང་སེམས་ལ་ གནས་ཏེ་བརྩོན་འགྲུས་བརྩམས་པ་དང་། འདུ་ཤེས་དང་དམིགས་པ་ལ་གནས་ཏེ་བསམ་གཏན་བསྐྱེད་པ་དང་ཀུན་དུ་རྟོག་པ་དང་། རྣམ་པར་རྟོག་པ་རབ་ཏུ་འཇུག་པ་ལ་མངོན་པར་དགའ་བས་ཤེས་རབ་རྣམ་པར་དཔྱད་པ་གང་ལགས་པ་དེ་འཆགས་སོ། །བདག་གིས་དོན་དམ་པའི་ མཆོད་པ་མ་འཚལ་ནས་གཟུགས་དང་། རྒྱན་དང་། མཚན་ལ་མངོན་པར་ཞེན་པས་སངས་རྒྱས་ལ་མཆོད་པ་བགྱིས་པ་གང་ལགས་པ་དེ་འཆགས་སོ། །བདག་ཆོས་ཀྱི་དབྱིངས་ཐ་མི་དད་པའི་ཡེ་ཤེས་ལ་མ་ཞུགས་ཀྱི། ཆོས་ཐ་དད་པ་ལ་གནས་ཏེ། ཆོས་མ་ ཉན་པའམ། བཤད་པའམ། རབ་ཏུ་བསམས་པར་གྱུར་པ་གང་ལགས་པ་དེ་འཆགས་སོ། །བདག་གིས་ཆོས་འདུས་མ་བྱས་སུ་མ་འཚལ་ཏེ། དགེ་འདུན་ལ་མང་པོར་འདུ་ཤེས་ནས། དགེ་འདུན་ལ་བསྙེན་བཀུར་བགྱིས་པ་གང་ལགས་པ་དེ་འཆགས་སོ། ། བདག་གིས་དགོན་པ་མ་འཚལ་ནས་དགོན་པའི་གནས་བསྟེན་ཏེ། འདོད་པ་ཉུང་ཞིང་ཆོག་ཤེས་པ་ལ་མངོན་པར་ཞེན་པ་གང་ལགས་པ་དེ་འཆགས་སོ། །བདག་གིས་ཆོས་ཉིད་གནས་པར་མ་འཚལ་ནས་འབྱུང་བ་དང་འཇིག་པ་ལ་གནས་ཏེ། སངས་རྒྱས་ཀྱི་ཡོན་ཏན་བླང་བར་ ཞུགས་པ་གང་ལགས་པ་དེ་འཆགས་སོ། །བདག་གིས་ཆོས་ཀྱི་དབྱིངས་ཡོངས་སུ་གཟུང་བ་མ་མཆིས་པར་མ་འཚལ་མ་ཞུགས་ཀྱི། སེམས་ཅན་བསྡུ་བར་འཚལ་བའི་བསྡུ་བས་སེམས་ཅན་དག་བསྡུས་པ་གང་ལགས་པ་དེ་འཆགས་སོ། །བདག་གིས་བྱང་ཆུབ་ཀྱི་ མཚན་ཉིད་ཀྱི་རང་བཞིན་མ་འཚལ་ནས་ལྟ་བ་ལ་ཡོངས་སུ་ཞེན་པས་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་བསྒོམས་པ་གང་ལགས་པ་དེ་འཆགས་སོ། །བདག་གིས་དགེ་སྦྱོང་གི་ལམ་ཞི་བ་མ་འཚལ་ནས་རབ་ཏུ་བྱུང་བ་བསྙེན་པར་རྫོགས་ཏེ། དགེ་སློང་གི་དངོས་པོ་ བསྐྱེད་པ་གང་ལགས་པ་དེ་འཆགས་སོ། །ཀུན་རྫོབ་ལ་འཇུག་པའི་དགེ་བའི་རྩ་བ་གཞན་གང་དག་བསགས་པ་དང་། དགེ་བའི་རྩ་བ་གང་དག་གིས་འདུས་བྱས་ཀྱི་བདེ་བར་གྱུར་ཏེ། འདུས་མ་བྱས་ལས་ཤིན་ཏུ་རིང་བར་གྱུར་པ་གང་ ལགས་པ་དེ་དག་འཆགས་སོ་ཞེས་བརྗོད་པར་བྱའོ། །རིགས་ཀྱི་བུ་དེ་ལྟར་ཐོག་མར་བྱང་ཆུབ་སེམས་དཔས་བག་ལ་ཉལ་དང་བཅས་པ་དང་། མངོན་པར་འདུ་བྱེད་པ་དང་བཅས་པ་དང་། མཚན་མ་དང་བཅས་པ་དང་། འབད་པ་དང་བཅས་པ་དང་། སྤྲོས་ པ་དང་བཅས་པ་དང་། ལེན་པ་དང་བཅས་པ་དང་། གནས་པ་དང་བཅས་པ་དང་། རྟེན་པ་དང་བཅས་པའི་ཉེ་བར་ལེན་པའི་ཆོས་ཐམས་ཅད་བཤགས་པར་བྱའོ། །དེ་ལ་འདི་ལྟ་བུའི་བསྡུ་བ་དང་སྤྲོས་པ་དང་བཅས་པ་ཀུན་དུ་མི་འབྱུང་བ་གང་ཡིན་པ་དེ་ནི་སྡིག་ པ་བཤགས་པ་ཡོངས་སུ་དག་པ་ཡིན་ཏེ། འདི་ནི་བཤགས་པའི་ཕུང་པོའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་དེས་དེ་བཞིན་དུ་འདུག་སྟེ། ཚིག་འདི་སྐད་ཅེས་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་ རྣམས་ཀྱིས་དང་པོ་ཐུགས་བསྐྱེད་པ་ནས་བཟུང་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པའི་བར་དང་ལྡན་པ་རྣམས་ཀྱི་བར་དེའི་དགེ་བའི་རྩ་བ་གང་ཅི་ཡང་རུང་། སངས་རྒྱས་ཀྱིས་བཀའ་སྩལ་པ། རྩ་བ་མ་མཆིས་ཤིང་རྟེན་ མ་མཆིས་པ། གཏོང་བ་མ་མཆིས་པས་གཏོང་བ་རྣམ་པར་དག་པ་དང་། རང་བཞིན་གྱི་ཚུལ་ཁྲིམས་མི་ཟད་མི་སྐྱེ་བ་དང་། སེམས་ཅན་མ་མཆིས་པའི་བཟོད་པ་དང་། དམིགས་པ་ལས་དབེན་པའི་བརྩོན་འགྲུས་དང་། སེམས་ཀྱི་ངོ་བོ་ཉིད་ལ་ངེས་པར་ སེམས་པའི་བསམ་གཏན་དང་། ཚུ་རོལ་དང་། ཕ་རོལ་གྱི་མཐར་ལྟ་བ་རྣམ་པར་སྤངས་པའི་ཤེས་རབ་རྟེན་ཅིང་འབྲེལ་བར་འབྱུང་བ་ཟབ་མོ་ལ་འཇུག་པ་དང་། སྟོང་པ་ཉིད་ཀྱི་རྣམ་པའི་བྱམས་པ་དང་། རྣམ་པའི་རྣམ་པ་མ་མཆིས་པའི་སྙིང་རྗེ་དང་། ཆོས་ལ་ཀུན་དུ་མི་ འབྱུང་བའི་དགའ་བ་དང་། ཡལ་བར་འདོར་བ་མ་ལགས་པའི་བཏང་སྙོམས་གང་ལགས་པ་དེ་དག་ལ་རྗེས་སུ་ཡི་རང་ངོ་། །ཁྱིམ་གྱི་དངོས་པོ་ཐམས་ཅད་བཟུང་བ་མ་མཆིས་ཤིང་གང་ཡོངས་སུ་མ་བཟུང་བ། རྩ་བ་མ་མཆིས་ཤིང་རྟེན་པ་མ་མཆིས་པའི་དགེ་བའི་རྩ་བ་མ་དྲན་ པ་དྲན་པར་གྱུར་པའི་དྲན་པ་ཉེ་བར་གཞག་པ་རྣམས་དང་། མ་འགགས་པ་དང་། མ་སྐྱེས་པའི་ཡང་དག་པར་སྤོང་བ་རྣམས་དང་། ལུས་དང་། སེམས་དང་། བརྩོན་འགྲུས་དང་། འདུན་པ་དང་ལྡན་པའི་རྫུ་འཕྲུལ་གྱི་རྐང་པ་རྣམས་དང་། དབང་པོ་ལྔ་མཚན་ ཉིད་མ་མཆིས་པའི་དབང་པོ་རྣམས་དང་། ནམ་མཁའ་ལྟར་མི་ཐུལ་བའི་སྟོབས་རྣམས་དང་། དོན་དམ་པ་ཡང་དག་པར་རྟོགས་པའི་བྱང་ཆུབ་ཀྱི་ཡན་ལག་རྣམས་དང་། མི་གཉིས་པའི་ལམ་དང་ལྡན་པའི་ལམ་དང་། ཞི་བའི་ཞི་གནས་ཐོབ་པ་དང་། རིག་པ་ དང་རྣམ་པར་གྲོལ་བ་དང་འཐུན་པའི་ལྷག་མཐོང་དང་། མངོན་པར་ཤེས་པའི་ཡེ་ཤེས་མངོན་དུ་འགྲོ་བ་དེ་དག་ཐམས་ཅད་ལ་རྗེས་སུ་ཡི་རང་ངོ་། །ཐོག་མའི་མཐའ་ནས་ལུས་ཀྱི་ངོ་བོ་ཉིད་ཡོངས་སུ་དག་པ་དང་། བརྗོད་དུ་མ་མཆིས་པའི་ངག་རྣམ་པར་དག་པ་དང་། སངས་རྒྱས་ལ་རིམ་གྲོ་བགྱི་བ་བསྙེན་བཀུར་བགྱིས་པ་མ་མཆིས་པ་དང་། ཆོས་ལ་རིམ་གྲོ་བགྱི་བ་ཆོས་ཐམས་ཅད་ཡོངས་སུ་གཟུང་བ་མ་མཆིས་པ་དང་། དགེ་འདུན་ལ་རིམ་གྲོ་བགྱི་བ་ཚོགས་པ་མ་མཆིས་ཤིང་ཡོན་ཏན་མ་མཆིས་པ་དང་། སྤྱོད་ལམ་ཐམས་ཅད་རྣམ་ པར་མ་བརྟགས་པའི་སྡོམ་པ་སྤྱོད་པ་དང་། འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བྱང་ཆུབ་སེམས་དཔར་གྱུར་པ་དེ་དག་གི་ཆོས་སྤྱོད་པ། ཡང་དག་པའི་སྡོམ་པ། བདུད་ཐམས་ཅད་ཀྱིས་མི་ཤིགས་པ། འཇིག་རྟེན་ཐམས་ཅད་དང་མ་ འདྲེས་པ། ཉན་ཐོས་དང་། རང་སངས་རྒྱས་ཐམས་ཅད་ཀྱི་སར་མ་ངེས་པ། བྱང་ཆུབ་སེམས་དཔའི་ལམ་དང་འཐུན་པ། དགེ་བའི་རྩ་བ་བཟང་པོ། ལས་དཀར་པོ་མ་ལགས་པ་འགག་པར་འགྱུར་བ་གཞན་གང་ཅི་མཆིས་པ་དང་། དགེ་བའི་རྩ་བ་བཟང་པོ་ འོད་གསལ་བའི་ལས་གང་གིས་བྱང་ཆུབ་སེམས་དཔའ་དེ་དག་གིས་སངས་རྒྱས་ཀྱི་ཡེ་ཤེས་ཐོབ་པ་དང་། འཐོབ་པ་དང་། འཐོབ་པར་འགྱུར་བ་དེ་དག་ཐམས་ཅད་ལ་བདག་རྗེས་སུ་ཡི་རང་ངོ་། །འདས་པ་དང་། མ་བྱོན་པ་དང་། ད་ལྟར་བྱུང་ བའི་སངས་རྒྱས་བཅོམ་ལྡན་འདས་བྱང་ཆུབ་བརྙེས་པ་དེ་དག་གི་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བ་ཟག་པ་མ་མཆིས་པ་དང་། སྟོབས་མི་ཐུལ་བ་རྣམས་དང་། མི་འཇིགས་པ་ ཕྱིར་མི་ལྡོག་པ་རྣམས་དང་། སངས་རྒྱས་ཀྱི་ཆོས་ཆགས་པ་མ་མཆིས་པ་རྣམས་དང་། ཀུན་དུ་མི་འབྱུང་བའི་བྱམས་པ་ཆེན་པོ་དང་། སྙིང་རྗེ་ཆེན་པོ་གཞན་གྱི་དྲིང་ལ་མི་འཇོག་པ་དང་། སྤྱི་གཙུག་བལྟར་མི་མཐོང་བ་ནམ་མཁའ་དང་མཚུངས་པ་གང་ལགས་པ་དང་། གཉིས་སུ་མ་མཆིས་པའི་བསོད་ནམས་རྣམ་པར་སྨིན་པའི་མཚན་ཉིད་དང་། ལུས་དང་། ངག་དང་། སེམས་ཀྱི་རྒྱུད་བཅོས་མ་མ་ལགས་པ་ནམ་མཁའ་ལྟར་ཡོངས་སུ་དག་པ་དང་། བརྒྱ་བྱིན་དང་། ཚངས་པ་ཐམས་ཅད་ཀྱིས་བསྐུལ་བའི་ཆོས་ཀྱི་འཁོར་ལོ་དང་། བརྗོད་པ་མ་མཆིས་པ་དང་ལྡན་པའི་ཆོས་བསྟན་པ་དང་། སེམས་ཅན་ཐམས་ཅད་ལ་ཤེས་པ་སྣང་བ་རྣམ་པར་ཤེས་པ་ལས་གཞན་མ་ལགས་པ་དེ་དག་ཐམས་ཅད་ལ་རྗེས་སུ་ཡི་རང་ངོ་། །སེམས་ཅན་ཐམས་ཅད་ལ་ཕན་གདགས་པའི་སླད་དུ། ཐབས་མཁས་པའི་གནས་ ལ་གནས་པ་དག་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་བཞུགས་པའམ། ཡོངས་སུ་མྱ་ངན་ལས་འདས་པ་ཡང་རུང་སྟེ། དམ་པའི་ཆོས་ནུབ་ཀྱི་བར་དུ་དེ་དག་ལ་མཆོད་པ་བགྱིས་པ་དང་། བགྱིད་པ་དང་། བགྱིད་ པར་འགྱུར་བ་གང་ལགས་པ་དེ་དག་ཐམས་ཅད་ལ་རྗེས་སུ་ཡི་རང་ངོ་། །སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་པ་དེ་དག་གི་ཉན་ཐོས་འདུས་པ་སེམས་ཅན་ཐམས་ཅད་ལས་ཡང་དག་པར་འདས་པ་རྣམས་དང་། དད་པས་རྗེས་སུ་འབྲང་བ་རྣམས་དང་། ཆོས་ཀྱི་དབྱིངས་ལ་ཞུགས་པ་རྣམས་དང་། ཆོས་ཀྱི་རྗེས་སུ་འབྲང་བ་རྣམས་དང་། ལོག་པ་བརྒྱད་ལས་ཡང་དག་པར་འདས་པའི་བརྒྱད་པ་རྣམས་དང་། ཆགས་པ་མེད་པའི་རིགས་ལ་གནས་པའི་རིགས་ཀྱིས་པ་རྣམས་དང་། རྒྱུན་དུ་ཞུགས་པ་རྒྱུན་ལས་ བཟློག་སྟེ་ཞུགས་པ་རྣམས་དང་། ལན་ཅིག་ཕྱིར་འོང་བ་གང་དུ་ཡང་མི་འགྲོ་བ་རྣམས་དང་། ཕྱིར་མི་འོང་བ་འདི་ནས་ཤི་འཕོས་ནས་དེར་གནས་པར་འགྱུར་བ་རྣམས་དང་། དགྲ་བཅོམ་པ་གྲངས་མ་མཆིས་ཤིང་སྐྱེ་བ་མ་མཆིས་པར་རབ་ཏུ་ཕྱེ་བ་རྣམས་དང་། རང་སངས་རྒྱས་རྟེན་ཅིང་འབྲེལ་བར་འབྱུང་བ་ཟབ་མོ་ཁོང་དུ་ཆུད་པ་རྣམས་དང་། བྱང་ཆུབ་སེམས་དཔའ་ཡེ་ཤེས་མངོན་སུམ་དུ་རྟོགས་པ་རྣམས་དང་། བྱང་ཆུབ་སེམས་དཔའ་སེམས་ས་དང་མཚུངས་པའི་སེམས་དང་པོ་བསྐྱེད་པ་རྣམས་དང་། བྱང་ཆུབ་སེམས་དཔའ་སྤྱོད་པ་ཐམས་ ཅད་ལས་ཡང་དག་པར་འདས་པའི་སྤྱོད་པ་ལ་ཞུགས་པ་རྣམས་དང་། བྱང་ཆུབ་སེམས་དཔའ་འཁོར་བའི་ཆོས་ལས་འདས་ཤིང་སངས་རྒྱས་ཀྱི་ཆོས་ཐོབ་པ་ཕྱིར་མི་ལྡོག་པ་རྣམས་དང་། བྱང་ཆུབ་སེམས་དཔའ་སྐྱེ་བ་ཐམས་ཅད་ལས་ཤིན་ཏུ་འདས་པ་རྣམས་དང་། བྱང་ཆུབ་ སེམས་དཔའ་སྐྱེ་བ་གཅིག་གིས་ཐོགས་པ་རྣམས་ཀྱི་དགེ་བའི་རྩ་བ་རྟེན་པ་མ་མཆིས་པ་གང་ལགས་པ་དེ་དག་དང་། འདུས་བྱས་ལས་ཡོངས་སུ་རྒལ་བ་དེ་དག་ཐམས་ཅད་ལ་རྗེས་སུ་ཡི་རང་ངོ་། །འདས་པ་དང་། མ་འོངས་པ་དང་། ད་ལྟར་བྱུང་བའི་དུས་ཀྱི་སེམས་ཅན་ རྣམས་ཀྱི་སྦྱིན་པའི་བསོད་ནམས་བགྱི་བའི་དངོས་པོ་དང་། ཚུལ་ཁྲིམས་ཀྱི་བསོད་ནམས་བགྱི་བའི་དངོས་པོ་དང་། བསྒོམ་པ་དངོས་པོ་མ་མཆིས་པའི་དངོས་པོར་གྱུར་པའི་བསོད་ནམས་བགྱི་བའི་དངོས་པོ་སངས་རྒྱས་ཀྱི་སྤྱན་གྱིས་མཁྱེན་པ་གང་ལགས་པ་དེ་དག་ཐམས་ཅད་ལ་རྗེས་ སུ་ཡི་རང་ངོ་། །རྗེས་སུ་ཡི་རང་བའི་མཆོག་དང་། མ་ཆད་པ་དང་། མ་ལྷག་པ་དང་། ནམ་མཁའ་ལྟར་རྣམ་པར་དག་པ་དང་། ཤེས་རབ་དང་ཡེ་ཤེས་ཀྱིས་རྟོགས་པ་དང་། གཞན་ཡང་ངེས་པའི་དོན་གྱི་ཆོས་དང་ལྡན་པ་དང་། བླ་ན་མ་མཆིས་པ་དང་། ནམ་ མཁའ་དང་མཉམ་པ་དང་། མྱ་ངན་ལས་འདས་པ་དང་མཉམ་པ་དང་། མི་མཉམ་པ་དང་མཉམ་པ་ཉིད་ཀྱི་རྗེས་སུ་ཡི་རང་བས་རྗེས་སུ་ཡི་རང་ངོ་། །ཇི་ལྟར་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ ལྡན་འདས་བྱང་ཆུབ་སེམས་དཔར་གྱུར་པ། ཤེས་རབ་ཀྱི་ཕ་རོལ་ཏུ་ཕྱིན་པ་ཐབས་ལ་མཁས་པ་ཟུང་དུ་འབྲེལ་བ། མ་ཆགས་པར་སྤྱད་པ། ཤིན་ཏུ་སྤྱོད་པ་སྤྱད་པ། རབ་ཏུ་མཁྱེན་པས་མཁྱེན་པ་དེ་དག་གིས་སངས་རྒྱས་ཀྱི་ཡེ་ཤེས་མངོན་སུམ་དུ་མཛད་ ནས་དགེ་བའི་རྩ་བ་དེ་དག་ལ་རྗེས་སུ་ཡི་རང་བ་དང་། རྗེས་སུ་ཡི་རང་བར་མཛད་པ་དང་། རྗེས་སུ་ཡི་རང་བར་འགྱུར་བའི་མཉམ་པ་ཉིད་དེ་དང་། ཆོས་ཉིད་དེས་རྗེས་སུ་སློབ་པ་དེ་བཞིན་དུ་བདག་ཀྱང་རྗེས་སུ་ཡི་རང་ངོ་། །རྗེས་སུ་ཡི་རང་བ་མཆོག་དང་། མ་ཆད་ པ་དང་། མ་ལྷག་པ་དང་། ནམ་མཁའ་ལྟར་རྣམ་པར་དག་པ་དང་། ཤེས་རབ་དང་། ཡེ་ཤེས་ཀྱིས་རྟོགས་པ་དང་། གཞན་ཡང་ངེས་པའི་དོན་གྱི་ཆོས་དང་ལྡན་པ་དང་། བླ་ན་མ་མཆིས་པ་དང་། ནམ་མཁའ་དང་མཉམ་པའི་རྗེས་སུ་ཡི་རང་བས་ རྗེས་སུ་ཡི་རང་ངོ་ཞེས་བརྗོད་པར་བྱའོ། །རིགས་ཀྱི་བུ་འདི་ནི་སངས་རྒྱས་བཅོམ་ལྡན་འདས་ཀྱིས་བཀའ་སྩལ་པའི་རྗེས་སུ་ཡི་རང་བའི་ཕུང་པོ་ཁ་ན་མ་ཐོ་བ་མེད་པའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་དེས་དེ་བཞིན་དུ་འདུག་སྟེ། ཚིག་འདི་སྐད་ཅེས་ སངས་རྒྱས་བཅོམ་ལྡན་འདས་གང་དག་ཁ་ཅིག་འཇིག་རྟེན་གྱི་ཁམས་དཔག་ཏུ་མ་མཆིས་ཤིང་གྲངས་མ་མཆིས་པ་རྣམས་སུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། ཆོས་ཐམས་ཅད་མ་དམིགས་ནས་བདུད་བཞིའི་ལམ་ལས་ཡང་ དག་པར་འདས་པ། བརྗོད་དུ་མེད་པའི་ཆོས་སྐྱོན་མ་མཆིས་པ་བརྙེས་པ། ཡི་གེ་དང་། བརྗོད་པ་དང་། སྐད་ཐམས་ཅད་དང་བྲལ་བ། ཆོས་ཇི་ལྟ་བ་བཞིན་དུ་བརྙེས་པ། ཐབས་མཁས་པས་ཆོས་གཟུང་བར་མཛད་པའི་སླད་དུ་ཇི་ཙམ་དུ་བརྟགས་པ། སེམས་ཅན་ ཡོངས་སུ་སྨིན་པར་མཛད་པའི་སླད་དུ་ཐུགས་རྗེ་ཆེན་པོ་ཆུད་མ་གཟན་པ། བསྐུལ་བ་ལ་གཞེས་པ། ཅང་མི་གསུང་བ་ལ་དགྱེས་པ། བྱང་ཆུབ་ཀྱི་ཤིང་ལ་གཟིགས་པ། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་ཐམས་ཅད་ཀྱིས་མངོན་པར་བསྟོད་དེ། དགྱེས་ཤིང་བཞུགས་པའི་སངས་རྒྱས་བཅོམ་ལྡན་འདས་དེ་དག་ལ་ཆོས་ཀྱི་འཁོར་ལོ་རབ་ཏུ་བསྐོར་བར་བསྐུལ་གྱིས། སངས་རྒྱས་བཅོམ་ལྡན་འདས་རྣམས་ཀྱིས་ཆོས་ཀྱི་འཁོར་ལོ་ རབ་ཏུ་བསྐོར་དུ་གསོལ། འདི་ལྟ་སྟེ། ཆོས་ཀྱི་འཁོར་ལོ་མི་འཇུག་པའི་ཆོས་ཀྱི་འཁོར་ལོ་དང་། མངོན་པར་མི་འགྲུབ་པའི་འཁོར་ལོ་དང་། ཚུ་རོལ་དང་། ཕ་རོལ་ཡོངས་སུ་གཅོད་པའི་འཁོར་ལོ་དང་། རྟེན་ཅིང་འབྲེལ་བར་འབྱུང་བ་ཟབ་མོའི་འཁོར་ལོ་དང་། བདུད་ཕྱིར་རྒོལ་བ་ཆོམས་པའི་འཁོར་ལོ་བསྐོར་དུ་གསོལ། བརྗོད་དུ་མ་མཆིས་པའི་རྔ་བརྡུང་དུ་གསོལ། སྒྲ་མ་མཆིས་པའི་དུང་བུད་དུ་གསོལ། ཆོས་ཤེས་པའི་རྒྱལ་མཚན་དང་ཏོག་བསྒྲེང་དུ་གསོལ། ཤེས་རབ་དང་། ཡེ་ཤེས་དང་། རྣམ་པར་གྲོལ་བའི་ སྒྲོན་མ་འབར་བར་མཛད་དུ་གསོལ། ཐུགས་རྗེ་ཆེན་པོའི་སྤྲིན་བསྡུ་བར་གསོལ། ཆོས་ཆེན་པོའི་ཆུའི་ཆར་པའི་རྒྱུན་གྱིས་སེམས་ཅན་རྣམས་ཀྱི་དགེ་བའི་རྩ་བའི་ལོ་ཏོག་རྣམ་པར་སྤེལ་དུ་གསོལ། འཕགས་པའི་ཤེས་རབ་དང་། ཡེ་ཤེས་ཀྱི་ནོར་གྱིས་སེམས་ཅན་ ཐམས་ཅད་ཚིམ་པར་མཛད་དུ་གསོལ་ཞེས་བརྗོད་པར་བྱའོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་བསྐུལ་བའི་ཕུང་པོ་ཁ་ན་མ་ཐོ་བ་མེད་པའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་དེས་དེ་བཞིན་དུ་འདུག་སྟེ། ཚིག་འདི་ སྐད་ཅེས་སངས་རྒྱས་བཅོམ་ལྡན་འདས་གང་དག་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་དཔག་ཏུ་མ་མཆིས་པ་དག་ན་སངས་རྒྱས་ཀྱི་མཛད་པ་དག་ཤིན་ཏུ་མཛད་པ། ལེགས་པར་བགྱིས་པའི་ཆོས་ཀྱི་རྒྱུན་མི་གཅོད་པ། བྱང་ཆུབ་སེམས་དཔའ་རྣམས་ཤིན་ཏུ་ལུང་ བསྟན་པ། དགེ་འདུན་འཕགས་པ་རབ་ཏུ་གནས་པ། གདུལ་བའི་སེམས་ཅན་དག་ཤིན་ཏུ་བཏུལ་བ། མྱ་ངན་ལས་འདས་པའི་བདེ་བ་ཚོལ་བ། ཆོས་གཟུང་བ་འཛིན་པར་མཛད་པའི་སླད་དུ་ཡོངས་སུ་མི་སྐྱོ་བ། ཡོངས་སུ་མྱ་ངན་ལས་འདའ་བར་ བཞེད་པའི་སངས་རྒྱས་བཅོམ་ལྡན་འདས་དེ་དག་ལ་བདག་ཆོས་ཀྱི་དབྱིངས་གནས་པའི་ཚུལ་གྱིས་ཇི་ལྟར་དེ་དག་མི་སྐྱེ་བ། མ་སྐྱེས་པ་དེ་བཞིན་དུ། མ་འགགས། མི་འགག །འགག་པར་མི་འགྱུར་བར་བཞུགས་སུ་གསོལ་ལོ་ཞེས་བརྗོད་པར་བྱའོ། །རིགས་ ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་གསོལ་བ་འདེབས་པ་ཡོད་པ་མ་ཡིན་པ་ལེན་པ་མེད་པ་ཁ་ན་མ་ཐོ་བ་མེད་པའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་དེས་དེ་བཞིན་དུ་འདུག་སྟེ། ཚིག་འདི་སྐད་ཅེས་མ་མཆིས་བཞིན་དུ་བདག་གིས་མགོས་ཕྱག་ བགྱིས་པ་དང་། བཤགས་པ་དང་། རྗེས་སུ་ཡི་རང་བ་དང་། བསྐུལ་བ་དང་། གསོལ་བ་འདེབས་པ་གང་ལགས་པ་དང་། ཕྱག་འཚལ་བ་དང་། འཆགས་པ་དང་། རྗེས་སུ་ཡི་རང་བ་དང་། བསྐུལ་བ་དང་། གསོལ་བ་འདེབས་པ་དེ་ཡང་མ་ མཆིས་པ། ལེན་པ་མ་མཆིས་པ། འདུས་མ་བགྱིས་པའོ། །དེ་ལྟར་ཕྱག་འཚལ་བ་དང་། འཆགས་པ་དང་། རྗེས་སུ་ཡི་རང་བ་དང་། བསྐུལ་བ་དང་། གསོལ་བ་འདེབས་པ་གང་ལགས་པ་དེ་ཡང་མ་མཆིས་པ། ལེན་པ་མ་མཆིས་པ། འདུས་ མ་བགྱིས་པ་སྟེ། དེ་བཞིན་དུ་བྱང་ཆུབ་ཀྱང་ལེན་པ་མ་མཆིས་པ། འདུས་མ་བགྱིས་པ་སྟེ། ཆོས་ཉིད་དེ་དང་། མ་ཆད་པ་དང་། མ་ལྷག་པ་དང་། མ་སྨད་པ་དང་། མཉམ་པ་མ་མཆིས་པ་དང་། མི་མཐོ་བ་དང་། མི་དམའ་བའི་ཡོངས་སུ་བསྔོ་བས་ བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཆོས་ཕྲ་རབ་ཙམ་ཡང་མི་དམིགས་པར་ཡོངས་སུ་བསྔོའོ་ཞེས་བརྗོད་པར་བྱའོ། །མིག་གཟུགས་རྣམས་ལ་མི་འཇུག་སྟེ། གཟུགས་ཀྱང་མིག་ལ་མ་ཡིན་མོད་ཀྱི་འོན་ཀྱང་དམིགས་པའི་རྒྱུ་རྐྱེན་གྱིས་རྣམ་པར་ཤེས་པ་འབྱུང་སྟེ། རྣམ་པར་ཤེས་པ་དེ་ཡང་མིག་ལས་མ་བྱུང་། གཟུགས་ལས་ཀྱང་མ་ཡིན་ཏེ། བྱུང་ནས་ཀྱང་ཞིག་ཅིང་མེད་དེ་མི་གནས་སོ། །དེ་བཞིན་དུ་རྣ་བ་ལ་མ་ཡིན། སྒྲ་ལ་མ་ཡིན། སྣ་ལ་མ་ཡིན། དྲི་ལ་མ་ཡིན། ལྕེ་ལ་མ་ཡིན། རོ་ལ་མ་ཡིན། ལུས་ལ་མ་ ཡིན། རེག་བྱ་ལ་མ་ཡིན་ཏེ། ཡིད་ཆོས་རྣམས་ལ་མི་འཇུག །ཆོས་རྣམས་ཀྱང་ཡིད་ལ་མི་འཇུག་མོད་ཀྱི། འོན་ཀྱང་དམིགས་པའི་རྒྱུ་རྐྱེན་གྱིས་རྣམ་པར་ཤེས་པ་འབྱུང་སྟེ། དེ་ཡང་ཡིད་ལས་ཀྱང་མ་བྱུང་། ཆོས་ལས་ཀྱང་མ་ཡིན་ཏེ། དེ་ནི་བྱུང་ནས་ཞིག་ཅིང་ མེད་དེ་མི་གནས་སོ། །དེ་བཞིན་དུ་དགེ་བའི་རྩ་བ་བྱང་ཆུབ་ལ་མི་འཇུག །བྱང་ཆུབ་ཀྱང་དགེ་བའི་རྩ་བ་ལ་མི་འཇུག་མོད་ཀྱི། འོན་ཀྱང་བྱང་ཆུབ་ཀྱི་རྒྱུ་རྐྱེན་གྱིས་དགེ་བའི་རྩ་བ་ལ་དམིགས་པའི་སེམས་བསྐྱེད་པ་རྣམས་ཀྱིས་སྐྱེའོ། །དེ་ཡང་མི་གནས་པ་སྟེ། སྐྱེས་ནས་ཞིག་ཅིང་མེད་དོ། །དེ་ལ་སེམས་གང་གིས་དགེ་བའི་རྩ་བ་མངོན་པར་འདུས་བྱས་པ་དང་། སེམས་གང་གིས་བྱང་ཆུབ་ཏུ་ཡོངས་སུ་བསྔོས་པའི་སེམས་བསྐྱེད་པ་དེ་དག་ཕན་ཚུན་དུ་འབྲེལ་བར་མི་བྱེད་དོ། །འདི་ལྟ་སྟེ་དཔེར་ན། མེ་ནི་གང་ནས་མ་འོངས་ཏེ། བྱུང་ནས་ཀྱང་ཞིག་ཅིང་མེད་དོ། །དེ་བཞིན་དུ་བྱང་ཆུབ་སེམས་དཔའ་རྣམས་ཀྱི་ཤེས་རབ་ཀྱི་མེ་ཡང་གང་ནས་ཀྱང་མ་འོངས་མོད་ཀྱི་འོངས་ནས་ཀྱང་དགེ་བའི་རྩ་བ་ལ་བརྟེན་ནས་འབར་ཏེ་བྱུང་ནས་ཞིག་ཅིང་མེད་དོ། །ཡེ་ཤེས་སྣང་བ་རབ་ཏུ་ཐོབ་པ་ཆོས་རྣམ་པར་འབྱེད་པ་དེ་ལྟ་བུ་དག་ ལ་བློ་རྣམ་པར་མི་སྤྱོད་པ་གང་ཡིན་པ་དེ་ནི་བྱང་ཆུབ་སེམས་དཔའི་ཡོངས་སུ་བསྔོ་བའོ། །སྐྱོན་མེད་པར་འཇུག་པ་དང་། ལུང་བསྟན་པ་དང་། བཟོད་པ་སྣང་བའི་ཡེ་ཤེས་ཐོབ་པ་རྣམ་པར་འབྱེད་པ་རྣམས་ཀྱི་བློ་རྣམ་པར་མི་དཔྱོད་པ་གང་ཡིན་པ་དེས་སངས་རྒྱས་བཅོམ་ལྡན་འདས་མངོན་སུམ་དུ་ བྱས་ཏེ་ཡོངས་སུ་བསྔོ་བར་བྱའོ། །ཇི་ལྟར་དེ་བཞིན་གཤེགས་པ་དེ་དག་གིས་ཤེས་རབ་ཀྱི་ཕ་རོལ་ཏུ་ཕྱིན་པའི་རྒྱུ་འཐུན་པའི་ཐབས་མཁས་པའི་ཡེ་ཤེས་ཀྱིས་བྱང་ཆུབ་སེམས་དཔའ་རྣམས་ཀྱི་ཡོངས་སུ་བསྔོ་བ་བཤད་པ་དེ་བཞིན་དུ་ཐབས་མཁས་པའི་ཡེ་ཤེས་དེས་ཡོངས་སུ་ བསྔོའོ། །རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་བསྔོ་བ་ཁ་ན་མ་ཐོ་བ་མེད་པའོ། །འཇམ་དཔལ་གཞོན་ནུར་གྱུར་པས་ཕུང་པོ་གསུམ་པའི་བསྔོ་བ་འདི་བཤད་པ་ན། བྱང་ཆུབ་སེམས་དཔའ་ལྔ་བརྒྱ་མི་སྐྱེ་བའི་ཆོས་ལ་བཟོད་པ་ཐོབ་ པར་གྱུར་ཏོ། །བྱང་ཆུབ་སེམས་དཔའ་ཆོས་ཐམས་ཅད་ལ་དམ་འཆའ་བར་གནས་པ་ཡང་མགུའོ། །ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་ཡང་འཇམ་དཔལ་གཞོན་ནུར་གྱུར་པས་བཤད་པ་ལ་མངོན་པར་བསྟོད་དོ། །འཕགས་པ་ཕུང་ པོ་གསུམ་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ། །༄༅། །འཕགས་པ་བསམ་པ་ ཐམས་ཅད་ཡོངས་སུ་རྫོགས་པར་བྱེད་པ་ཞེས་བྱ་བའི་ཡོངས་སུ་བསྔོ་བ། སངས་རྒྱས་ཐམས་ཅད་ཀྱི་ཞབས་དང་། ཆོས་དང་། དགེ་སློང་གི་དགེ་འདུན་ལ་མགོ་བོས་ཕྱག་འཚལ་ལོ། །ཕྱོགས་བཅུ་བརྗོད་ཀྱིས་མི་ལང་བའི་འཇིག་རྟེན་གྱི་ཁམས་ན་བཞུགས་པའི་སངས་ རྒྱས་བཅོམ་ལྡན་འདས་དང་། ས་ཆེན་པོར་ཆུད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བདག་ལ་དགོངས་སུ་གསོལ། གང་བདག་གིས་སྐྱེ་བ་འདི་དང་། སྐྱེ་བ་གཞན་དུ་ན་ཁྱིམ་པའམ། རབ་ཏུ་བྱུང་བ་ཇི་ཙམ་དུ་འཁོར་བའི་སྔོན་གྱི་མཐའ་ མ་འཚལ་བ་ནས། སྡིག་པ་མི་དགེ་བའི་ལས་བགྱིས་ཤིང་བསགས་པ། ལུས་དང་། ངག་དང་། ཡིད་ཀྱིས་བགྱིས་པ་དང་། བགྱིད་དུ་སྩལ་བ་དང་། བགྱིད་པ་ལ་རྗེས་སུ་ཡི་རང་བ་ཤེས་པའམ། མི་ཤེས་པའམ། བསམས་པའམ། མ་བསམས་པའམ། དྲན་པའམ། མི་དྲན་པའམ། འདོད་ཆགས་ཀྱི་དབང་ངམ། ཞེ་སྡང་གི་དབང་ངམ། གཏི་མུག་གི་དབང་ངམ། དགེ་བའི་བཤེས་གཉེན་མ་ལགས་པ་དང་འབྲེལ་བའི་དབང་ངམ། མི་ཤེས་པའི་དབང་ངམ། ཡུལ་གྱི་དབང་ངམ། དུས་སུ་སྐྱེ་བའི་དབང་ངམ། ཡང་དག་པའི་ཚུལ་ཁྲིམས་འཆལ་པའམ། སྦྱོར་བས་ཚུལ་ཁྲིམས་འཆལ་པའམ། དངོས་པོས་ཚུལ་ཁྲིམས་འཆལ་པའམ། ལུས་ཀྱི་རྣམ་གསུམ་དང་། ངག་གི་རྣམ་བཞི་དང་། ཡིད་ཀྱི་རྣམ་གསུམ་གྱིས་སངས་རྒྱས་དང་། ཆོས་དང་། དགེ་འདུན་དང་། ཕ་མ་དང་། མཁན་པོ་དང་། སློབ་དཔོན་ནམ། བླ་མ་གཞན་དག་ལ་ཉེས་པ་བགྱིས་པའམ། སེམས་ཅན་གྱི་ཁམས་ལྟ་བ་ལོག་པ་ལ་བཙུད་པའམ། སེམས་ཅན་ཡང་དག་པ་སྒྲུབ་པ་ལ་གནས་པ་རྣམས་ཀྱི་བར་ ཆད་བགྱིས་པའམ། དགེ་བའི་རྩ་བ་རྣམས་ལོག་པར་སྔོ་བས་ཡོངས་སུ་བསྔོས་པའམ། དེ་བཞིན་གཤེགས་པ་ལ་ཡང་དག་པ་མ་ཡིན་པ་སྨྲས་པའམ། ཆོས་ཆོས་མ་ཡིན་པ་ཆོས་སུ་བསྟན་པའམ། ཆོས་ཆོས་མ་ཡིན་པར་བསྟན་པའམ། འདུལ་བ་མ་ ཡིན་པ་འདུལ་བར་བསྟན་པའམ། འདུལ་བ་འདུལ་བ་མ་ཡིན་པར་བསྟན་པའམ། ལམ་མ་ཡིན་པ་ལམ་དུ་བསྟན་པའམ། ལམ་ལམ་མ་ཡིན་པར་བསྟན་པའམ། སྒྲིབ་པ་གང་གིས་བསྒྲིབས་ནས་བདག་མི་དགེ་བའི་ཆོས་མངོན་དུ་འགྱུར་ཞིང་དགེ་བའི་ ཕྱོགས་ལ་སེམས་ཡང་དག་པར་མི་གནས་པའམ། སྒྲིབ་པ་གཞན་གྱིས་བསྒྲིབས་ནས་བློ་གཡེང་བར་འགྱུར་བའམ། སེམས་གཡེང་བར་འགྱུར་བའི་ནོངས་པ་གང་ལགས་པ་དེ་དག་ཐམས་ཅད་ནོངས་པ་བཤགས་པར་བགྱིའོ། །ཇི་ལྟར་བྱིས་པ། ཇི་ལྟར་བླུན་ པ། ཇི་ལྟར་མི་གསལ་བ། ཇི་ལྟར་མི་མཁས་པ། ཇི་ལྟར་འཆལ་པའི་ཤེས་རབ་ཀྱི་རང་བཞིན་ཅན་དེ་ལྟར་ནོངས་པ་ནོངས་པར་བཤགས་པར་བགྱིའོ། །ནོངས་པ་ནོངས་པར་བཤགས་ནས་ཕྱིས་སྡོམ་པ་བླངས་ཤིང་ཡང་དེ་ལྟར་མི་བགྱི་སྟེ། དེ་ལྟར་ལན་ གཉིས་དེ་ལྟར་ལན་གསུམ་དུའོ། །ཡང་སངས་རྒྱས་བཅོམ་ལྡན་འདས་དེ་དག་བདག་ལ་དགོངས་སུ་གསོལ། གང་སངས་རྒྱས་ཐམས་ཅད་སྔོན་བྱང་ཆུབ་སེམས་དཔར་གྱུར་པ་རྣམས་ཀྱིས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་མཛད་པ་འདི་ལྟ་སྟེ། སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཆོས་ཀྱི་འཁོར་ལོ་རབ་ཏུ་བསྐོར། ཆོས་ཀྱི་དུང་ཀུན་ནས་ བུས། ཆོས་ཀྱི་རྔ་རབ་ཏུ་བརྡུངས། ཆོས་ཀྱི་སྒྲོན་མ་འབར་བར་མཛད། ཆོས་དང་འཐུན་པར་ཆོས་སྒྲུབ་པ་དག་ལ་སེམས་ཅན་གྱི་ཁམས་རབ་ཏུ་བཙུད། དམ་པའི་ཆོས་ཀྱི་ཚུལ་རབ་ཏུ་བསྟན་ཅིང་དགེ་བའི་རྩ་བ་གང་གིས་རང་སངས་རྒྱས་རྣམས་རང་སངས་རྒྱས་ ཉིད་རྟོགས་པར་འགྱུར་བ་དང་། དགེ་བའི་རྩ་བ་གང་གིས་ཉན་ཐོས་རྣམས་ཉན་ཐོས་ཉིད་རྟོགས་པར་འགྱུར་ཞིང་རིག་པ་གསུམ་དང་། མངོན་པར་ཤེས་པ་དྲུག་རྟོགས་པར་འགྱུར་བ་དང་། སོ་སོ་ཡང་དག་པར་རིག་པ་མངོན་དུ་འགྱུར་ཞིང་བསམ་གཏན་དང་། རྣམ་ པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་དང་། དགེ་བའི་རྩ་བ་གང་གིས་སེམས་ཅན་རྣམས་ཀྱི་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་ངན་སོང་ངན་འགྲོ་ལོག་པར་ལྟུང་བ་ལས་ཡང་དག་པར་ འདའ་བ་དང་། འདོད་ཆགས་དང་། ཞེ་སྡང་དང་། གཏི་མུག་ཉོན་མོངས་པ་དང་། ཉེ་བའི་ཉོན་མོངས་པ་སྤོང་བ་དང་། ཚེ་རིང་བ་དང་། གནོད་པ་ཆུང་བ་དང་། མདོག་བཟང་བ་དང་། གཟུགས་བཟང་བ་དང་། གཟི་བརྗིད་ཆེ་བ་དང་། དབང་ཆེ་བ་དང་། རིགས་མཐོ་བ་དང་། ལོངས་སྤྱོད་ཆེ་བ་དང་། ཤེས་རབ་ཆེ་བ་དང་། མི་དགེ་བའི་རྩ་བ་ཐམས་ཅད་སྤངས་པ་དང་། དགེ་བའི་རྩ་བ་ཐམས་ཅད་དང་ལྡན་པ་དང་། ཐ་ན་ཕྱག་གཅིག་འཚལ་བ་དང་། ཐལ་མོ་གཅིག་སྦྱོར་བ་དང་། མེ་ཏོག་གཅིག་འབུལ་བ་དང་། སེམས་དང་བ་གཅིག་ཙམ་སྐྱེད་པའི་སེམས་ཅན་གང་ལགས་པ་དེ་དག་ཐམས་ཅད་ལ་རྗེས་སུ་ཡི་རང་སྟེ། རྗེས་སུ་ཡི་རང་བའི་མཆོག་གིས་རྗེས་སུ་ཡི་རང་ངོ་། །གཙོ་བོ་དང་། དམ་པ་དང་། རབ་དང་། ཕུལ་དང་། བླ་ ན་མ་མཆིས་པ་དང་། གོང་ན་མ་མཆིས་པ་དང་། གོང་མའི་ཡང་གོང་མ་དང་། མཉམ་པ་མ་མཆིས་པ་དང་། མི་མཉམ་པ་དང་མཉམ་པ་དང་། མཚུངས་པ་མ་མཆིས་པ་དང་། ནམ་མཁའ་ལྟར་དག་ཅིང་ཡོངས་སུ་དག་པའི་རྗེས་སུ་ཡི་རང་བས་རྗེས་སུ་ ཡི་རང་ངོ་། །གང་དག་གིས་ཆོས་ཐམས་ཅད་ཡང་དག་པར་ཐུགས་སུ་ཆུད་ནས་ཆོས་ལ་དགྱེས་པ་དང་། ཆོས་ལ་ངེས་པ་དང་། དགེ་བའི་རྩ་བ་ཐམས་ཅད་སྐྱེད་པ་དང་། འགྲོ་བ་ཐམས་ཅད་ཡོངས་སུ་སྐྱོབ་པ་དང་། ཡོན་ཏན་ཐམས་ཅད་ཡོངས་སུ་སྐྱོང་ ཞིང་ཡོངས་སུ་བསྔོ་བ་དང་། ཆོས་ཀྱི་ཕུང་པོ་སྟོང་ཕྲག་ཀུན་དང་། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་ཐམས་ཅད་དམ་བཅས་པ་དང་། སྨོན་ལམ་དང་། ཟག་པ་ཟད་པ་ཤེས་པ་ དང་། སྣོན་པ་དང་། བག་ལ་ཉལ་དང་། ཁམས་དང་། རང་བཞིན་ཤེས་པ་ཡང་དག་པར་ཐུགས་སུ་ཆུད་ལ། ཆུད་ནས་ཀྱང་སེམས་ཅན་གྱི་ཁམས་བཀའ་བློ་མི་བདེ་བར་མཁྱེན་ནས། ཐུགས་ཁྲལ་ཆུང་ངུར་ཐུགས་འཇོག་པར་མཛད་ཅིང་། ཆོས་སྟོན་པར་མི་མཛད་པ་དེ་དག་ལ་བདག་སྐུལ་མ་འདེབས་ཏེ། སྐྱེ་བོ་མང་པོ་ལ་སྨན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་ཐུགས་བརྩེ་བ་དང་། སྐྱེ་བོའི་ཚོགས་མང་པོའི་དོན་དང་། ལྷ་དང་། མི་རྣམས་ལ་སྨན་པ་དང་། བདེ་བའི་སླད་ དུ་དམ་པའི་ཆོས་བཤད་དུ་གསོལ། ཆོས་ཀྱི་འཁོར་ལོ་རབ་ཏུ་བསྐོར་དུ་གསོལ། ཆོས་ཀྱི་དུང་ཀུན་ནས་བུད་དུ་གསོལ། ཆོས་ཀྱི་རྔ་བརྡུང་དུ་གསོལ། ཆོས་ཀྱི་སྒྲོན་མ་འབར་བར་མཛད་དུ་གསོལ། ཆོས་དང་འཐུན་པར་ཆོས་སྒྲུབ་པ་དག་ལ་སེམས་ཅན་གྱི་ ཁམས་རབ་ཏུ་དགོང་དུ་གསོལ། གང་དག་ཚེ་ལ་དབང་བ། སྤྲུལ་པ་ལ་དབང་བ། བྱིན་གྱི་རླབས་ལ་དབང་བ། རྫུ་འཕྲུལ་ལ་དབང་བ། སེམས་ཅན་གདུལ་བའི་ཚོགས་སྨིན་པར་མཛད་པ་དབང་དུ་གྱུར་པ། དབང་དུ་མ་གྱུར་པ་རྣམས་ལ་ཡོངས་སུ་མྱ་ ངན་ལས་འདའ་བར་ཐུགས་གཞོལ་ཞིང་སྐུ་ཚེ་འདོར་བར་མཛད་པ་དེ་དག་ལ་བདག་གསོལ་བ་འདེབས་ཏེ། སྐྱེ་བོ་མང་པོ་ལ་སྨན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་ཐུགས་བརྩེ་བ་དང་། སྐྱེ་བོའི་ཚོགས་མང་པོའི་དོན་ དང་། ལྷ་དང་མི་རྣམས་ལ་སྨན་པ་དང་། བདེ་བའི་སླད་དུ་སྐུ་ཚེའི་འདུ་བྱེད་རྣམས་བྱིན་གྱིས་བརླབ་ཏུ་གསོལ། གང་བདག་གིས་འཁོར་བའི་སྔོན་གྱི་མཐའ་མ་འཚལ་བ་ནས་དགེ་བའི་རྩ་བ་བགྱིས་ཤིང་བསགས་པ་ལུས་དང་། ངག་དང་། ཡིད་ཀྱིས་བགྱིས་ པ་དང་། བགྱིད་དུ་སྩལ་བ་དང་། བགྱིད་པ་ལ་རྗེས་སུ་ཡི་རང་བ་སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་དང་། ཚུལ་ཁྲིམས་ལས་བྱུང་བ་དང་། བསྒོམས་པ་ལས་བྱུང་བའི་བསོད་ནམས་བྱ་བའི་དངོས་པོ་དང་། ཐ་ན་སེམས་ཅན་གཅིག་ གི་སེམས་དང་བ་གཅིག་ཙམ་བསྐྱེད་པར་གྱུར་པ་གང་ལགས་པ་དེ་དག་ཐམས་ཅད་སེམས་ཅན་ཐམས་ཅད་ལ་ཡོངས་སུ་བསྔོ་བར་བགྱིའོ། །དགེ་བའི་རྩ་བ་འདིས་སེམས་ཅན་ཐམས་ཅད་ཀྱི་དགེ་བའི་རྩ་བ་ཐམས་ཅད་ཡོངས་སུ་རྫོགས་པར་གྱུར་ཅིག །ཚེ་རིང་བ་དང་། གནོད་ པ་ཆུང་བ་དང་། མདོག་བཟང་བ་དང་། གཟུགས་བཟང་བ་དང་། གཟི་བརྗིད་ཆེ་བ་དང་། དབང་ཆེ་བ་དང་། རིགས་མཐོ་བ་དང་། ལོངས་སྤྱོད་ཆེ་བ་དང་། ཤེས་རབ་ཆེ་བ་དང་། རྫས་དང་། སྔགས་དང་། སྨན་རྙེད་པ་དང་། དགེ་བའི་བཤེས་གཉེན་དང་ ཕྲད་པ་དང་དམ་པའི་ཆོས་ཉན་པ་དང་། ཚུལ་བཞིན་ཡིད་ལ་བྱེད་པ་དང་། ཆོས་དང་འཐུན་པའི་ཆོས་སྒྲུབ་པ་དང་། འདོད་ཆགས་དང་། ཞེ་སྡང་དང་། གཏི་མུག་ཉོན་མོངས་པ་དང་། ཉེ་བའི་ཉོན་མོངས་པ་སྤོང་བ་དང་། སེམས་ཅན་དམྱལ་བ་དང་། དུད་འགྲོའི་ སྐྱེ་གནས་དང་། གཤིན་རྗེའི་འཇིག་རྟེན་ངན་སོང་ངན་འགྲོ་ལོག་པར་ལྟུང་བ་ལས་ཡང་དག་པར་འདའ་བ་དང་། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་ཐམས་ཅད་ཐོབ་པ་དང་། ལུས་ལས་བྱུང་བ་དང་། སེམས་ལས་ བྱུང་བའི་ཡིད་མི་བདེ་བ་ལས་ཡང་དག་པར་འདའ་བ་དང་། བདེ་བ་དང་། ཡིད་བདེ་བ་ཐམས་ཅད་འཐོབ་པ་དང་། ཉན་ཐོས་ཀྱི་ཡོན་ཏན་གྱི་མཆོག་ཉིད་དང་། རང་སངས་རྒྱས་ཀྱི་ཡོན་ཏན་གྱི་མཆོག་ཉིད་དང་། དེ་བཞིན་གཤེགས་པའི་སྟོབས་བཅུ་དང་། མི་འཇིགས་ པ་བཞི་དང་། སོ་སོ་ཡང་དག་པར་རིག་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་དང་། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། དགའ་བ་ཆེན་པོ་དང་། བཏང་སྙོམས་ཆེན་པོ་དང་། བག་ཆགས་འཇོམས་པ་དང་། བསྙེལ་བ་མི་མངའ་བའི་ ཆོས་ཉིད་དང་། ཐམས་ཅད་མཁྱེན་པ་ཉིད་དང་། རྣམ་པ་ཐམས་ཅད་མཁྱེན་པ་ཉིད་དང་། ཡེ་ཤེས་མི་ཟད་པ་ཉིད་དང་། ཤེས་རབ་མི་ཟད་པ་ཉིད་དང་། སྤོབས་པ་མི་ཟད་པ་ཉིད་དང་། བསོད་ནམས་མི་ཟད་པ་ཉིད་དང་། ནམ་མཁའི་མཛོད་ཉིད་དང་། ལག་ན་རིན་ པོ་ཆེ་ཉིད་དང་། བླ་ན་མེད་པ་ཐམས་ཅད་མཁྱེན་པའི་ཡེ་ཤེས་འཐོབ་པ་དང་། གཞན་ཡང་འཇིག་རྟེན་དང་། འཇིག་རྟེན་ལས་འདས་པའི་དགེ་བའི་རྩ་བ་གང་དང་གང་ལགས་པ་དེ་དག་སེམས་ཅན་ཐམས་ཅད་ལ་ཡང་དག་པར་གྲུབ་པར་གྱུར་ཅིག །གང་སེམས་ཅན་ཐམས་ ཅད་ལ་དགེ་བའི་རྩ་བ་བསྔོ་བ་བགྱིས་པ་དགེ་བའི་རྩ་བ་བསྔོས་པ་དེ་ལས་བསོད་ནམས་ཀྱི་འབྲས་བུ་ཡོད་པ་གང་ལགས་པའི་དགེ་བའི་རྩ་བ་འདིས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། སེམས་ཅན་མ་རྒལ་བ་རྣམས་ནི་ བསྒྲལ་བར་བགྱིའོ། །མ་གྲོལ་བ་རྣམས་ནི་དགྲོལ་བར་བགྱིའོ། །དབུགས་མ་ཕྱིན་པ་རྣམས་ནི་དབུགས་དབྱུང་བར་བགྱིའོ། །མྱ་ངན་ལས་མ་འདས་པ་རྣམས་ནི་ཡོངས་སུ་མྱ་ངན་ལས་བཟླ་བར་བགྱིའོ། །སྨན་པ་དང་བདེ་བའི་མཐའི་གནས་ཀྱི་གཞི་ལ་རབ་ཏུ་དགོད་པར་ བགྱི་སྟེ། དེ་ལྟར་ལན་གཉིས་ལན་གསུམ་དུའོ། །འཕགས་པ་བསམ་པ་ཐམས་ཅད་ཡོངས་སུ་རྫོགས་པར་བྱེད་པ་ཞེས་བྱ་བའི་ཡོངས་སུ་བསྔོ་བ་རྫོགས་སོ། །༄༅། །འཕགས་པ་འགྲོ་བ་ཐམས་ཅད་ཡོངས་སུ་སྐྱོབ་པར་བྱེད་པ་ཞེས་བྱ་ བའི་ཡོངས་སུ་བསྔོ་བ། སངས་རྒྱས་དང་། ཆོས་དང་། དགེ་འདུན་ཐམས་ཅད་ལ་ཕྱག་འཚལ་ལོ། །སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་བདག་ལ་དགོངས་སུ་གསོལ། བདག་ སྡིག་པ་ཐམས་ཅད་སོ་སོར་བཤགས་སོ། །བསོད་ནམས་ཐམས་ཅད་ལ་རྗེས་སུ་ཡི་རང་ངོ་། །སངས་རྒྱས་ཐམས་ཅད་ལ་གསོལ་བ་འདེབས་སོ། །བསོད་ནམས་ཐམས་ཅད་སེམས་ཅན་ཐམས་ཅད་ཀྱིས་བླ་ན་མེད་པ་ཐམས་ཅད་མཁྱེན་པའི་ཡེ་ཤེས་ཐོབ་པར་བགྱི་བའི་ སླད་དུ་ཡོངས་སུ་བསྔོ་བར་བགྱིའོ། །བདེན་པ་དང་བདེན་པའི་ཚིག་གང་གིས་བདེན་པ་གསུང་བ་སངས་རྒྱས་བཅོམ་ལྡན་འདས་ཀྱིས་དགེ་བའི་རྩ་བ་ཡང་དག་པ་ཇི་ལྟར་ཡོངས་སུ་བསྔོ་བར་མཛད་པ་དེ་ལྟར་ཡོངས་སུ་བསྔོ་བར་བགྱིའོ། །བདེན་པ་དང་བདེན་པའི་ཚིག་དེས་གང་ སེམས་ཅན་ཐམས་ཅད་ཀྱི་སྡིག་པ་མི་དགེ་བ་ཉེས་པ་བྱས་པ་དང་། ལོག་པར་སྨྲ་བ་དང་། ངན་དུ་བསམས་པ་དང་། ཉོན་མོངས་པའི་སྒྲིབ་པ་དང་། ལས་ཀྱི་སྒྲིབ་པ་དང་། རྣམ་པར་སྨིན་པའི་སྒྲིབ་པ་དང་། ཤེས་བྱའི་སྒྲིབ་པ་དང་། སྒྲིབ་པ་གང་གིས་བསྒྲིབས་ཤིང་གཡོགས་ ཏེ། ཀུན་ནས་དཀྲིས་པ། བདག་ཉིད་དང་། གཞན་དག་གི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཡང་དག་པ་ཇི་ལྟ་བ་བཞིན་མ་འཚལ་བ་དང་། དབང་པོ་དང་། བརྩོན་འགྲུས་ཀྱི་རིམ་པ་དང་། དགེ་བ་དང་། མི་དགེ་བའི་ཆོས་ཡང་དག་པ་ཇི་ལྟ་ བ་བཞིན་མ་འཚལ་བ་དང་། ཁ་ན་མ་ཐོ་བ་དང་བཅས་པ་དང་། ཁ་ན་མ་ཐོ་བ་མེད་པ་དང་། བསྟེན་པར་བྱ་བ་དང་། བསྟེན་པར་བྱ་བ་མ་ཡིན་པའི་ཆོས་ཡང་དག་པ་ཇི་ལྟ་བ་བཞིན་མ་འཚལ་བ་དང་། སྐྱེས་བུ་དམ་པ་དང་ཕྲད་པ་དང་། དམ་པའི་ཆོས་ཉན་པ་དང་། ཚུལ་བཞིན་ཡིད་ ལ་བགྱིད་པ་དང་། ཆོས་དང་འཐུན་པའི་ཆོས་སྒྲུབ་པ་མི་སྒྲུབ་པར་འགྱུར་བ་དང་། སྒྲིབ་པ་གང་གིས་བསྒྲིབས་ཤིང་གཡོགས་ཏེ། ཀུན་ནས་དཀྲིས་པ་རྣམས་སེམས་ཅན་འདུལ་བ་དང་། བདག་འདུལ་བ་དང་། གཞན་འདུལ་བ་དང་། གཉི་ག་འདུལ་བ་དང་། འཇམ་པོས་འདུལ་ བ་དང་། ཁྲོ་བས་འདུལ་བ་དང་། བཏང་སྙོམས་ཀྱིས་འདུལ་བ་དང་། བསྡིགས་པས་འདུལ་བ་དང་། བསྐྲད་པས་འདུལ་བ་དང་། སྨད་པས་འདུལ་བ་དང་། བསྟེན་པ་དང་། བསྙེན་པ་དང་། བསྙེན་བཀུར་བྱ་བས་འདུལ་བ་དང་། ཆོས་བཤད་པས་འདུལ་བ་དང་། འཛུམ་ པ་བསྟན་པས་འདུལ་བ་དང་། ནང་དུ་ཡང་དག་འཇོག་གིས་འདུལ་བ་དང་། སྦྱངས་པའི་ཡོན་ཏན་དང་ཡོ་བྱད་བསྙུངས་པས་འདུལ་བ་དང་། སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ སྤྱོད་པས་འདུལ་བ་དང་། དད་པ་དང་། ཚུལ་ཁྲིམས་དང་། ཐོས་པ་དང་། གཏོང་བ་དང་། ཤེས་རབ་དང་། སྒོམ་པས་འདུལ་བ་དང་། འདུལ་བ་གང་དང་གང་གིས་སེམས་ཅན་གྱི་ཁམས་འདུལ་བར་འགྱུར་བ་དེ་ཡང་དག་པ་ཇི་ལྟ་བ་བཞིན་མ་འཚལ་བ་དང་། ཚུལ་ཁྲིམས་ ཀྱི་རྒྱུ་མི་འབྱུང་བ་དང་། ཏིང་ངེ་འཛིན་གྱི་རྒྱུ་དང་། དམིགས་པའི་རྒྱུ་དང་། བསམ་གཏན་གྱི་རྒྱུ་དང་། ཞི་གནས་ཀྱི་རྒྱུ་དང་། ལྷག་མཐོང་གི་རྒྱུ་དང་། མངོན་པར་ཤེས་པའི་རྒྱུ་དང་། ཟག་པ་ཟད་པའི་རྒྱུ་དང་། སོ་སོ་ཡང་དག་པར་རིག་པའི་རྒྱུ་རྣམ་པར་དག་པར་མི་འགྱུར་བ་ དང་། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་དག་མངོན་དུ་མི་འགྱུར་བ་དང་། སྣང་བ་སྐྱེས་ཤིང་སྐྱེས་པ་དག་ནུབ་པར་འགྱུར་བ་དང་། རྙེད་པ་འདོད་པ་དང་། བསྙེན་བཀུར་འདོད་པ་དང་། གྲགས་པ་འདོད་པ་དང་། འཁོར་འདོད་པའི་སེམས་འབྱུང་བ་དང་། འདོད་པའི་རྣམ་པར་རྟོག་པ་དང་། གནོད་སེམས་ཀྱི་རྣམ་པར་རྟོག་པ་དང་། འཚེ་བའི་རྣམ་པར་རྟོག་པ་དང་། མི་འཆི་བར་རྣམ་པར་རྟོག་པ་དང་། སྐྱེ་བོ་ལ་རྣམ་པར་རྟོག་པ་དང་། གཉེན་ལ་རྣམ་པར་རྟོག་པ་དང་། གོས་དང་། ཟས་དང་། མལ་སྟན་དང་། ན་བའི་གསོས་སྨན་གྱི་རྐྱེན་གྱི་ཡོ་བྱད་ལ་རྣམ་པར་རྟོག་པའི་སེམས་ལ་ཀུན་ནས་གནས་པ་དང་། ཚེ་ཐུང་བ་དང་། གནོད་པ་མང་བ་དང་། མདོག་ངན་པ་དང་། གཟུགས་ངན་པ་དང་། དབང་ཆུང་བ་དང་། རིགས་དམའ་བ་དང་། ལོངས་སྤྱོད་ཆུང་བ་དང་། ཤེས་རབ་འཆལ་བ་དང་། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དང་། ངན་སོང་ངན་འགྲོར་འགྲོ་བ་དང་། ལུས་ལས་བྱུང་བའི་སྡུག་བསྔལ་རྣམ་པ་དུ་མ་དང་། སེམས་ལས་བྱུང་ བ་ཡིད་མི་བདེ་བ་ཉམས་སུ་མྱོང་བ་དང་། སྨོན་ལམ་ལོག་པ་ལ་དགའ་བ་དང་། ཡང་དག་པའི་སྨོན་ལམ་མ་རྟོགས་པ་དང་། གཞན་ཡང་སྒྲིབ་པ་གང་དང་གང་གིས་བསྒྲིབས་ཤིང་ཀུན་ནས་དཀྲིས་པའི་སེམས་ཅན་རྣམས་ཀྱི་རྣམ་པར་སྨིན་པར་འགྱུར་བ་དེ་དག་ཐམས་ཅད་བདག་ ལ་སྨིན་ནས། སེམས་ཅན་ཐམས་ཅད་རྣམ་པར་གྲོལ་ཞིང་རྣམ་པར་དག་པར་གྱུར་ཅིག །སངས་རྒྱས་ཀྱི་ཁམས་ཇི་ཙམ་པ་དང་། ཆོས་ཀྱི་ཁམས་ཇི་ཙམ་པ་དང་། དགེ་འདུན་གྱི་ཁམས་ཇི་ཙམ་པ་དང་། ཡང་དག་པའི་མཐའ་ཇི་ཙམ་པ་དང་། གཉིས་སུ་མེད་པ་ཇི་ ཙམ་པ་དང་། དེ་བཞིན་ཉིད་ཇི་ཙམ་པ་དང་། མཉམ་པ་ཉིད་ཇི་ཙམ་པ་དང་། འདོད་ཆགས་དང་། ཞེ་སྡང་དང་། གཏི་མུག་གི་ཁམས་ཇི་ཙམ་པ་དང་། འཁོར་བར་གདགས་པ་དང་། འདོགས་པར་འགྱུར་བ་ཇི་ཙམ་པ་དེ་ཙམ་དུ་སེམས་ཅན་ཐམས་ཅད་ཀྱི་ཉོན་མོངས་པ་ དང་། ཉེ་བའི་ཉོན་མོངས་པ་ཐམས་ཅད་དང་། ཀུན་ནས་ཉོན་མོངས་པའི་ཁམས་གང་ཡིན་པ་དེ་བདག་ལ་སྨིན་ནས་སེམས་ཅན་ཐམས་ཅད་རྣམ་པར་གྲོལ་ཞིང་རྣམ་པར་དག་པར་གྱུར་ཅིག །བདག་གིས་ཇི་ཙམ་དུ་སྔོན་གྱི་མཐའ་མ་འཚལ་བར་དགེ་བའི་རྩ་བ་བགྱིས་ཤིང་ བསགས་པ་གང་ལགས་པ་དེ་སེམས་ཅན་ཐམས་ཅད་ལ་ཡོངས་སུ་བསྔོ་བར་བགྱིའོ། །བདག་ནི་འདོད་ཆགས་ལ་ཆགས། ཞེ་སྡང་གིས་གདུངས། གཏི་མུག་གིས་རྨོངས་ཏེ། ཉོན་མོངས་པ་དང་། ཉེ་བའི་ཉོན་མོངས་པ་དང་། ཀུན་ནས་ཉོན་མོངས་པ་དང་ལྡན་ནས་ ཇི་ལྟར་དགེ་བའི་རྩ་བ་ཡོངས་སུ་བསྔོ་བར་བགྱི་བ་ཡང་དག་པ་ཇི་ལྟ་བ་བཞིན་མ་འཚལ་མ་མཐོང་མ་རིག་སྟེ། སངས་རྒྱས་བཅོམ་ལྡན་འདས་དེ་དག་མཁྱེན་ཅིང་གཟིགས་ལ་ཐུགས་སུ་ཆུད་པས་ཇི་ལྟར་དགེ་བའི་རྩ་བ་ཡོངས་སུ་བསྔོ་བར་ མཛད་པ་དེ་ལྟར་བདག་གིས་ཡོངས་སུ་བསྔོ་བར་བགྱིའོ། །དེ་བཞིན་གཤེགས་པའི་ཐུགས་དང་འཐུན་པས་ཡོངས་སུ་བསྔོ་བར་བགྱིའོ། །ཇི་ལྟར་སེམས་ཅན་འདུལ་བ་དང་། ཇི་ལྟར་དགེ་བའི་རྩ་བ་སྨིན་པ་དང་། ཇི་ལྟར་དགེ་བའི་རྩ་བ་རྣམ་པར་འཕེལ་བ་དང་། ཇི་ལྟར་སྡུག་བསྔལ་ཤེས་པ་དང་། ཀུན་འབྱུང་བ་སྤང་བ་ དང་། འགོག་པ་མངོན་སུམ་དུ་བྱ་བ་དང་། ལམ་བསྒོམ་པ་དང་། བླ་ན་མེད་པ་ཐམས་ཅད་མཁྱེན་པའི་ཡེ་ཤེས་འཐོབ་པ་དང་། མི་དགེ་བའི་རྩ་བ་ཐམས་ཅད་སྤང་བ་དང་། དགེ་བའི་རྩ་བ་ཐམས་ཅད་དང་ལྡན་པ་དང་། བག་ཆགས་འཇོམས་པ་དང་། བསྙེལ་བ་མི་མངའ་ བའི་ཆོས་ཉིད་དང་། རྣམ་པ་ཐམས་ཅད་མཁྱེན་པ་ཉིད་ཇི་ལྟར་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་སྔོན་བྱང་ཆུབ་སེམས་དཔར་གྱུར་པ་ཐམས་ཅད་ཀྱིས་དགེ་བའི་རྩ་བ་ཡོངས་སུ་བསྔོས་པ་དེ་བཞིན་དུ་བདག་གིས་ཡོངས་སུ་བསྔོ་བར་བགྱིའོ། ། མཉམ་པ་ཉིད་ཀྱིས་ཡོངས་སུ་བསྔོ་བ་དང་། གཉིས་སུ་མེད་པས་ཡོངས་སུ་བསྔོ་བ་དང་། འགྲོ་བ་ཐམས་ཅད་ཡོངས་སུ་བསྐྱབ་པའི་ཡོངས་སུ་བསྔོ་བས་ཡོངས་སུ་བསྔོ་བར་བགྱི་སྟེ། དེ་ལྟར་ལན་གཉིས་དེ་ལྟར་ལན་གསུམ་དུའོ། །སེམས་ཅན་གང་ཞིག་གང་དང་གང་གིས་ འདུལ་བར་འགྱུར་བ་དེ་དང་དེའི་སེམས་རྣམ་པར་རྟོག་པ་མེད་པས་བདག་མཐོང་བར་འགྱུར་ཞིང་། ཇི་ལྟ་ཇི་ལྟར་སེམས་ཅན་དག་པར་འགྱུར་བ་དེ་ལྟ་དེ་ལྟར་བདག་གི་ལུས་ཀྱི་ལས་དང་། ངག་གི་ལས་དང་། ཡིད་ཀྱི་ལས་རྟག་ཏུ་འཇུག་པར་གྱུར་ཅིག །དུས་ཇི་ལྟ་བ་དང་། ཡུལ་ཇི་ལྟ་བ་དང་། སེམས་ཅན་རྣམས་ཀྱི་འདུལ་བ་ཇི་ལྟ་བ་དེ་ལྟ་དེ་ལྟར་ཆོས་ཀྱི་དབྱིངས་འཁྲུག་པ་མེད་པར་སྟོན་པར་གྱུར་ཅིག །འཕགས་པ་འགྲོ་བ་ཐམས་ཅད་ཡོངས་སུ་སྐྱོབ་པར་བྱེད་པ་ཞེས་བྱ་བའི་ཡོངས་སུ་བསྔོ་བ་ཞེས་བྱ་བ་རྫོགས་སོ།། །།རྒྱ་གར་གྱི་མཁན་པོ་བི་དྱཱ་ཀ་ར་པྲ་བྷ་དང་། ལོཙྪ་བ་བན་དེ་ཡེ་ཤེས་སྙིང་པོས་བསྒྱུར། ཞུ་ཆེན་གྱི་ལོཙྪ་བ་བན་དེ་དཔལ་བརྩེགས་ཀྱིས་ཞུས་ཏེ་གཏན་ལ་ཕབ་པ།། །། ༄༅༅། །རྒྱ་གར་སྐད་དུ། ཨཱརྱ་སད་དྷརྨ་སྨྲྀ་ཏྱུ་པ་སྠཱ་ན། བོད་སྐད་དུ། འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་དང་པོ། སངས་རྒྱས་དང་། བྱང་ཆུབ་སེམས་དཔའ་དང་། རང་སངས་རྒྱས་དང་། འཕགས་པ་ ཉན་ཐོས་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ། ན་ལ་ཏིའི་གྲོང་གི་བྲམ་ཟེའི་གྲོང་ན་བཞུགས་སོ། །དེའི་ཚེ་ན་ཚེ་དང་ལྡན་པ་ཤ་ར་དྭ་ཏིའི་བུ། དགེ་སློང་རབ་ཏུ་མང་པོ་དག་དང་ལྷན་ ཅིག་ཏུ་སྔ་དྲོའི་དུས་ཀྱི་ཚེ་རྒྱལ་པོའི་ཁབ་ཏུ་བསོད་སྙོམས་ཀྱི་ཕྱིར་དོང་ངོ་། །དེའི་ཚེ་དགེ་སློང་རབ་ཏུ་མང་པོ་དག་བསོད་སྙོམས་ཀྱི་ཕྱིར་རྒྱུ་བ་ན། གཞན་མུ་སྟེགས་ཅན་སྤྱོད་པ་པ་ཀུན་ཏུ་རྒྱུ་བ་དག་ག་ལ་བ་དེར་དོང་སྟེ། གཞན་མུ་སྟེགས་ཅན་སྤྱོད་པ་པ་ཀུན་ཏུ་རྒྱུ་བ་དག་དང་ ལྷན་ཅིག་ཏུ་ཡང་དག་པར་དགའ་བར་འགྱུར་བ་དང་། ཡང་དག་པར་མགུ་བར་འགྱུར་བའི་ཆོས་ཀྱི་གཏམ་བྱས་ནས་གཞན་མུ་སྟེགས་ཅན་སྤྱོད་པ་པ་ཀུན་ཏུ་རྒྱུ་བ་དག་གིས་དྲིས་པ། ཀྱེ་ཤཱཀྱ་པ་དག་ཁྱེད་ཅག་གི་དགེ་སྦྱོང་གཽ་ཏ་མ་ལུས་ཀྱི་ཆད་པ་མི་དགེ་བ་མི་འདོད་པ་མི་སྡུག་པ་ ཡིད་དུ་མི་འོང་བ་སྟོན་ཅིང་གཞན་དག་གི་ལ་ཡང་རྗེས་སུ་ཡི་རང་བར་མི་བྱེད་པ་བདེན་ནམ། ངེད་ཅག་ཀྱང་ལུས་ཀྱི་ཆད་པ་མི་འདོད་པ་མི་སྡུག་པ་ཡིད་དུ་མི་འོང་བ་སྟོན་ཅིང་གཞན་དག་གི་ལ་ཡང་རྗེས་སུ་ཡི་རང་བར་མི་བྱེད་དོ། །ཀྱེ་ཁྱེད་ཅག་གི་དགེ་སྦྱོང་གཽ་ཏ་མ་ངག་གི་ ཆད་པ་མི་འདོད་པ་མི་སྡུག་པ་ཡིད་དུ་མི་འོང་བ་སྟོན་ཅིང་གཞན་དག་གི་ལ་ཡང་རྗེས་སུ་ཡི་རང་བར་མི་བྱེད། ངེད་ཅག་ཀྱང་ངག་གི་ཆད་པ་མི་འདོད་པ་མི་སྡུག་པ་ཡིད་དུ་མི་འོང་བ་སྟོན་ཅིང་གཞན་དག་གི་ལ་ཡང་རྗེས་སུ་ཡི་རང་བར་མི་བྱེད་དོ། །ཁྱེད་ཅག་གི་དགེ་སྦྱོང་གཽ་ཏ་མ་ ཡིད་ཀྱི་ཆད་པ་མི་འདོད་པ་མི་སྡུག་པ་ཡིད་དུ་མི་འོང་བ་སྟོན་ཅིང་གཞན་དག་གི་ལ་ཡང་རྗེས་སུ་ཡི་རང་བར་མི་བྱེད། ངེད་ཀྱང་ཡིད་ཀྱི་ཆད་པ་མི་འདོད་པ་མི་སྡུག་པ་ཡིད་དུ་མི་འོང་བ་སྟོན་ཅིང་གཞན་དག་གི་ལ་ཡང་རྗེས་སུ་ཡི་རང་བར་མི་བྱེད་ན། ཁྱེད་ཀྱི་དགེ་སྦྱོང་གཽ་ཏ་མའི་ཆོས་ འདུལ་བ་དང་ངེད་ཀྱི་ཐ་དད་དུ་བྱ་བ་ཅི་ཡོད། བསམ་པ་ནི་ཅི་ཡོད། ཁྱད་པར་ནི་ཅི་ཡོད། གང་གིས་ན་དགེ་སྦྱོང་གཽ་ཏ་མའི་ཆོས་འདུལ་བ་ནི་ངེད་ཀྱི་ལས་ཁྱད་པར་དུ་འཕགས། དགེ་སྦྱོང་གཽ་ཏ་མ་དེ་ནི་ཐམས་ཅད་མཁྱེན་པ་ཡིན་ནོ་ཞེས་བདག་ཉིད་ སྒྲོགས། གཞན་མུ་སྟེགས་ཅན་སྤྱོད་པ་པ་ཀུན་ཏུ་རྒྱུ་བ་དག་གིས་དེ་སྐད་དྲིས་པ་དང་། དགེ་སློང་གསར་དུ་རབ་ཏུ་བྱུང་བ་དག་ཚེ་དང་ལྡན་པ་ཤ་ར་དྭ་ཏིའི་བུ་དང་བྲལ་བས་རྗེས་སུ་ཡི་རང་བར་ཡང་མི་བྱེད་ལན་ཡང་མ་བཏབ་བོ། །དེ་ནས་དགེ་སློང་རབ་ཏུ་མང་པོ་ཚེ་དང་ ལྡན་པ་ཤ་ར་དྭ་ཏིའི་བུ་དང་བྲལ་བ་དག་བསོད་སྙོམས་ཀྱི་བྱ་བ་བྱས་ནས་ན་ལ་ཏིའི་གྲོང་ག་ལ་བ་དེར་དོང་སྟེ་ཕྱིན་ནས། དགེ་སློང་རབ་ཏུ་མང་པོ་དག་ཟས་ཀྱི་བྱ་བ་བྱས་ནས་འཁོད་དོ། །དེ་ནས་ཚེ་དང་ལྡན་པ་ཤ་ར་དྭ་ཏིའི་བུ་ཕྱི་ཞིག་ན་བསོད་སྙོམས་བླངས་ཏེ། ན་ལ་ཏིའི་ གྲོང་ག་ལ་བ་དེར་སོང་ངོ་། །དེ་ནས་དགེ་སློང་རབ་ཏུ་མང་པོ་ཚེ་དང་ལྡན་པ་ཤ་ར་དྭ་ཏིའི་བུ་ག་ལ་བ་དེར་དོང་སྟེ་ཕྱིན་ནས། དགེ་སློང་རབ་ཏུ་མང་པོ་དག་གིས་ཚེ་དང་ལྡན་པ་ཤ་ར་དྭ་ཏིའི་བུ་ལ་བསྙད་དོ། །དེ་ནས་ཚེ་དང་ལྡན་པ་ཤ་ར་དྭ་ཏིའི་བུས་དགེ་སློང་རབ་ཏུ་མང་པོ་དག་ ལ་འདི་སྐད་ཅེས་སྨྲས་སོ། །གལ་ཏེ་བདག་ཚེ་དང་ལྡན་པ་ཁྱེད་དང་ལྷན་ཅིག་རྒྱལ་པོའི་ཁབ་ཀྱི་ལམ་སྲང་དང་། བཞི་མདོ་དང་། སུམ་མདོ་གཅིག་ཏུ་རིམ་གྱིས་དོང་བ་ལས། གཞན་མུ་སྟེགས་ཅན་སྤྱོད་པ་པ་ཀུན་ཏུ་རྒྱུ་བ་རྣམས་དང་ཕྲད་པར་གྱུར་ན་ནི་དེས་ན་བདག་ གིས་གཞན་མུ་སྟེགས་ཅན་སྤྱོད་པ་པ་ཀུན་ཏུ་རྒྱུ་བ་དེ་དག་ཆོས་དང་འཐུན་པས་ཚར་བཅད་ཟིན་པ་ཞིག་ན། ཀྱེ་མ་བདག་ཀྱང་ལམ་སྲང་དང་། བཞི་མདོ་དང་། སུམ་མདོ་གཞན་ནས་བསོད་སྙོམས་ལ་རྒྱུ་རྒྱུ་ནས་འདིར་ཕྱིན་ཏེ། གང་ཚེ་དང་ལྡན་པ་དག་གཞན་མུ་སྟེགས་ ཅན་སྤྱོད་པ་པ་ཀུན་ཏུ་རྒྱུ་བ་རྣམས་དང་ལྷན་ཅིག་གཏམ་བྱས་པའི་འདྲི་བའི་ཚུལ་དེ་ནི་བདག་གིས་ཚོར་ཡང་མ་ཚོར་རོ། །ཚེ་དང་ལྡན་པ་དག་བཅོམ་ལྡན་འདས་ཀུན་ཏུ་སྤྱན་མངའ་བ་ཐམས་ཅད་མངོན་སུམ་པ། ལས་དང་འབྲས་བུ་དང་རྣམ་པར་སྨིན་པ་མཁྱེན་པ་དེ་ཧ་ཅང་མི་རིང་ བ་ཞིག་ན་མུ་སྟེགས་ཀྱི་ལྟ་བ་ཅན་ཐམས་ཅད་ཟིལ་གྱིས་མནན་ནས། ཉན་ཐོས་དང་། དགེ་བསྙེན་དང་། ལྷ་དང་མི་རྣམས་ལ་ལས་དང་འབྲས་བུ་རྣམ་པར་སྨིན་པའི་ཆོས་སྟོན་གྱིས། ཁྱེད་དེ་ལ་ཞུས་ཤིག་དང་། དེ་ཡང་ལས་དང་རྣམ་པར་སྨིན་པ་ཐམས་ཅད་སྟོན་པར་ མཛད་དོ། །གང་ལྷ་དང་བཅས་པ། བདུད་དང་བཅས་པ། ཚངས་པ་དང་བཅས་པ། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་དག་གིས་མ་མཐོང་བ་དེ་ཁྱེད་ལ་སྟོན་པར་མཛད་ཅིང་། གང་བདག་ཅག་གི་མངོན་སུམ་དུ་མ་གྱུར་པ་དེ་ཡང་ཁྱོད་ལ་བཅོམ་ལྡན་འདས་ ཤིན་ཏུ་མངོན་སུམ་དུ་གྱུར་པ། ལས་དང་འབྲས་བུ་རྣམ་པར་སྨིན་པ་མཁྱེན་པ་སྟོན་པར་མཛད་དོ། །དེ་ནས་དགེ་སློང་རབ་ཏུ་མང་པོ་དག་བཅོམ་ལྡན་འདས་ག་ལ་བ་དེར་དོང་ངོ་། །དེ་ནས་དགེ་སློང་དེ་དག་གིས་བཅོམ་ལྡན་འདས་ཉིན་མོའི་གནས་པས་བཞུགས་པ། རི་ རབ་ལྟར་རང་གི་འོད་ཀྱི་དྲ་བས་མངོན་པར་འབར་བ། ཉིན་མོའི་ཉི་མ་ལྟར་སྣང་བས་རབ་ཏུ་གསལ་བ། མཚན་མོའི་ཟླ་བ་ལྟར་ཞི་བས་རབ་ཏུ་སིམ་པར་མཛད་པ། མཚོ་ལྟར་ཤིན་ཏུ་གསལ་བ། རྒྱ་མཚོ་ལྟར་ཟབ་པ། རི་རབ་ལྟར་མི་གཡོ་བ། སེང་གེ་ལྟར་དཔའ་ བ། ཕ་མ་ལྟར་འབྱུང་པོ་ཐམས་ཅད་ཀྱི་སྐྱབས་སུ་གྱུར་པ། ཐུགས་རྗེ་ཆེན་པོས་བརླན་པའི་ཐུགས་སེམས་ཅན་ཐམས་ཅད་ཀྱི་གཉེན་གཅིག་པར་གྱུར་པ། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཀྱི་རྟེན་དུ་གྱུར་པ། བྱང་ཆུབ་ཀྱི་ཕྱོགས་ ཀྱི་ཆོས་ཆེན་པོ་སུམ་ཅུ་རྩ་བདུན་གྱིས་སྐུ་བརྒྱན་པ། རབ་ཏུ་དང་བས་ལུས་ཅན་ཐམས་ཅད་ཀྱི་མིག་མགུ་བར་མཛད་པ། ཟླ་བ་དང་ཉི་མའི་འོད་ཟིལ་གྱིས་གནོན་པ། ཤཱཀྱའི་རྒྱལ་པོའི་སྲས་ཀུན་ཏུ་སྤྱན་མངའ་བ། སྤྱན་དྲི་མ་གསུམ་དང་བྲལ་བ། བདེན་པ་གཉིས་ གསུང་བ། སྡུག་བསྔལ་གཉིས་མཁྱེན་པ། བསྒོམ་པ་གཉིས་བསྒོམས་ཤིང་མངོན་སུམ་དུ་མཛད་པ། ལམ་གྱི་འབྲས་བུ་མངོན་དུ་མཛད་པ། འགོག་པའི་དེ་ཉིད་མཁྱེན་པ། ཁམས་གསུམ་མངོན་སུམ་དུ་མཛད་པའི་སྤྱན་མངའ་བ། ཁམས་གསུམ་གཞན་ 167ཡང་དག་པར་སྟོན་པ། ཁམས་བཅྭ་བརྒྱད་ཀྱི་དེ་ཉིད་མཁྱེན་པ། མོས་པ་ཡིད་ལ་བྱེད་པའི་དེ་ཉིད་མཁྱེན་པ། ཡོན་ཏན་གྱི་ཀླུང་རང་གི་ཡོན་ཏན་བཅྭ་བརྒྱད་དག་དང་ལྡན་པ། སྲིད་པའི་འཆིང་བ་ལས་རྣམ་པར་གྲོལ་བ། སྟོབས་བཅུ་དང་ ལྡན་པ། བསྙེངས་པ་མི་མངའ་བ་བཞིས་མི་བསྙེངས་པ། ཐུགས་རྗེ་ཆེན་པོ་དང་ལྡན་པ། དྲན་པ་ཉེ་བར་གཞག་པ་གསུམ་དང་རྟག་ཏུ་ལྡན་པ་དེ་མཐོང་ངོ་། །དེ་ནས་དགེ་སློང་རབ་ཏུ་མང་པོ་དག་ཆོས་གོས་ཕྲག་པ་གཅིག་ལ་གཟར་ནས། པུས་མོ་གཡས་ པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། དུལ་བས་མགོ་བཏུད་དེ་ཕྱོགས་གཅིག་ཏུ་འཁོད་དོ། །དེ་ནས་དགེ་སློང་རབ་ཏུ་མང་པོ་དག་གིས་དགེ་སློང་གཅིག་ཅིག་བསྒོ་བ་དང་བཅོམ་ལྡན་འདས་ག་ལ་བ་དེར་ཤིན་ཏུ་ཉེ་ བར་ཕྱིན་ནས། ཡང་དེ་བཞིན་དུ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདིར་བདག་སྔ་དྲོའི་དུས་སུ་ལྷུང་བཟེད་དང་ཆོས་གོས་འཚལ་ནས། རྒྱལ་པོའི་ཁབ་ཏུ་བསོད་སྙོམས་ལ་ མཆི་མཆི་ན་ཞེས་བྱ་བ་སྔ་མ་བཞིན་ཏེ། གཞན་མུ་སྟེགས་ཅན་སྤྱོད་པ་པ་ཀུན་ཏུ་རྒྱུ་བ་རྣམས་དང་ལྷན་ཅིག་ལུས་ཀྱི་ཆད་པ་དང་། ངག་གི་ཆད་པ་དང་། ཡིད་ཀྱི་ཆད་པ་སྔོན་དུ་འགྲོ་བའི་གཏམ་འདྲི་བའི་བར་སྔ་མ་བཞིན་ཏེ། དེ་དག་བཅོམ་ལྡན་འདས་ལ་གསོལ་ཏོ། ། དེ་ནས་བཅོམ་ལྡན་འདས་ཀྱིས་དེའི་ཚེ་དགེ་སློང་དེ་དག་དང་ན་ལ་ཏིའི་གྲོང་གི་བྲམ་ཟེ་ལ་སོགས་པ་ལ་འདི་སྐད་ཅེས་བཀའ་སྩལ་ཏོ། །དགེ་སློང་དག་ཁྱེད་ཅག་ལ་ཆོས་བཤད་པར་བྱ་བ་འདི་ལྟ་སྟེ། དམ་པའི་ཆོས་དྲན་པ་ཉེ་བར་གཞག་པ་ཞེས་བྱ་བའི་ཆོས་ཀྱི་རྣམ་གྲངས་ཐོག་མར་ དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ། ཚངས་པར་སྤྱོད་པ། ཡང་དག་པར་རབ་ཏུ་བསྟན་པར་བྱས། དེ་ལེགས་པར་རབ་ཏུ་ཉོན་ལ་ ཡིད་ལ་ཟུང་ཤིག་དང་བཤད་པར་བྱའོ། །བཅོམ་ལྡན་འདས་དེ་ལྟར་འཚལ་ལོ་ཞེས་གསོལ་ཏེ། དགེ་སློང་དེ་དག་བཅོམ་ལྡན་འདས་ལ་ཉན་པ་དང་། བཅོམ་ལྡན་འདས་ཀྱིས་དེ་དག་ལ་འདི་སྐད་ཅེས་བཀའ་སྩལ་ཏོ། །དགེ་སློང་དག་དམ་པའི་ཆོས་དྲན་པ་ཉེ་བར་ གཞག་པ་ཞེས་བྱ་བའི་ཆོས་ཀྱི་རྣམ་གྲངས་དེ་གང་ཡིན་ཞེ་ན། འདི་ལྟ་སྟེ། ཆོས་ལ་ཡང་ཆོས་ཉིད་དུ། ཆོས་མ་ཡིན་པ་ལ་ཡང་ཆོས་མ་ཡིན་པ་ཉིད་དུ་མཐོང་བ་དེ་དྲན་པ་རྟག་ཏུ་ཉེ་བར་གནས་པར་འགྱུར་ཞིང་འདི་ལ་ཐེ་ཚོམ་ཡང་མི་སྐྱེ། ཆོས་ཉན་པ་ལ་མངོན་པར་ དགའ་བར་ཡང་འགྱུར། རྒན་རབས་ལ་ཡང་རིམ་གྲོ་བྱེད་དོ། །དེ་ནི་ལུས་ཀྱི་ལས་དང་། ངག་གི་ལས་དང་། ཡིད་ཀྱི་ལས་གསུམ་གྱི་ལས་ཀྱི་འབྲས་བུ་དང་། འཆི་བ་དང་། སྐྱེ་བའི་རྣམ་པར་སྨིན་པ་ཤེས་པར་འགྱུར་ཏེ། ལྟ་བ་མ་ལོག་པ་ཡིན་ཞིང་ གཞན་གྱིས་ཁ་མི་ཕྱིན་པར་འགྱུར་རོ། །དགེ་སློང་དག་དེ་ལ་ལུས་ཀྱི་ཆད་པ་རྣམ་པ་གསུམ་སྟེ། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པའོ། །དེ་ལ་སྲོག་གཅོད་པ་ཇི་ལྟ་བུ་ཡིན་ཞེ་ན། སེམས་ཅན་ཕ་རོལ་ལ་ སེམས་ཅན་དུ་འདུ་ཤེས་ཤིང་བསམས་བཞིན་དུ་སྲོག་ཆགས་བསད་དེ་སྲོག་དང་བྲལ་བར་བྱས་པ་ཡིན་ནོ། །དེ་ཡང་རྣམ་པ་གསུམ་སྟེ། ཆེན་པོ་དང་། འབྲིང་དང་། ཐ་མའོ། །དེ་ལ་ཆེན་པོ་ནི་དགྲ་བཅོམ་པ་ལ་སོགས་པ་བསད་པ་སྟེ་མནར་མེད་པར་འགྲོ་བའོ། ། འབྲིང་ནི་ལམ་ལ་གནས་པ་བསད་པའོ། །ཐ་མ་ནི་དུད་འགྲོ་དང་ཚུལ་ཁྲིམས་འཆལ་པ་སྤྱད་པ་བསད་པའོ། །ཡང་རྣམ་པ་གསུམ་སྟེ། འདས་པ་དང་། མ་འོངས་པ་དང་། ད་ལྟར་བྱུང་བའིའོ། །ཡང་རྣམ་པ་གསུམ་སྟེ། འདོད་ཆགས་ཀྱིས་བྱས་པ་དང་། ཞེ་ སྡང་གིས་བྱས་པ་དང་། གཏི་མུག་གིས་བྱས་པའོ། །དེ་ལ་འདོད་ཆགས་ཀྱིས་བྱས་པ་ནི་རི་དགས་ལ་སོགས་པ་ལའོ། །ཞེ་སྡང་གིས་བྱས་པ་ནི་སྦྲུལ་དང་ནེའུ་ལེ་ལ་སོགས་པ་ལའོ། །གཏི་མུག་གིས་བྱས་པ་ནི་མཆོད་སྦྱིན་ལ་སོགས་པ་ལའོ། །ཡང་རྣམ་པ་ གསུམ་སྟེ། རང་གིས་བྱས་པ་དང་། གཞན་གྱིས་བཅོལ་བ་དང་། གཉི་གས་བྱས་པའོ། །རྒྱུ་ལྔས་སྲོག་གཅོད་པ་བྱས་ཀྱང་ཁ་ན་མ་ཐོ་བས་གོས་པར་མི་འགྱུར་ཏེ། འདི་ལྟ་སྟེ། ལམ་དུ་འགྲོ་བར་ཞུགས་པ་མི་ཤེས་པས་སྲོག་ཆགས་ ཕྲ་མོ་དང་། གྲོག་སྦུར་ལ་སོགས་པ་སྲོག་དང་བྲལ་བར་བྱེད་པ་དང་། གཞན་ལ་མཚོན་ཆ་གཟས་པ་ལས་བསམ་པ་དང་མི་ལྡན་པར་གཞན་ལ་ཕོག་སྟེ། དེ་སྲོག་དང་བྲལ་བ་དང་། ནད་པ་ལ་སྨན་པ་ཕན་པར་འདོད་པས་ཉེས་པར་མ་མཐོང་སྟེ། སྨན་བྱིན་པ་ལས་དེ་ཤི་ བ་དང་། དེ་བཞིན་དུ་མས་བུ་གདུལ་བར་བྱ་བའི་ཕྱིར་བརྡེག་པ་ལས་དེ་སྲོག་དང་བྲལ་བ་དང་། མེ་འབར་བའི་ནང་དུ་སྲོག་ཆགས་མི་འདོད་བཞིན་དུ་ལྷུང་བ་སྟེ། རྒྱུ་རྣམ་པ་དེ་ལྔས་སྲོག་བཅད་པར་གྱུར་ཀྱང་གོས་པར་མི་འགྱུར་རོ། །ཡང་སྲོག་གཅོད་པ་རྣམ་པ་གསུམ་སྟེ། གཞན་ལ་བསྒོ་བ་དང་། བདག་ཉིད་བྱེད་པ་དང་། གཉི་གས་བྱེད་པའོ། །གཞན་ཡང་མ་བྱིན་པར་ལེན་པ་རྫོགས་པ་ཇི་ལྟ་བུ་ཡིན་ཞེ་ན། རྣལ་འབྱོར་སྤྱོད་པ་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་དེས། ཐོས་པ་ལས་བྱུང་བའི་ཤེས་པའམ། ལྷའི་མིག་གིས་ མཐོང་སྟེ། ཕ་རོལ་གྱིས་ཡོངས་སུ་བཟུང་བ་ལ་བདག་གིར་བྱ་བའི་བསམ་པས་རྐུ་བར་བྱེད་པ་འདི་ནི་མ་བྱིན་པར་ལེན་པ་རྫོགས་པ་ཡིན་ནོ། །འབྲས་བུ་ཆུང་བ་ཇི་ལྟ་བུ་ཡིན་ཞེ་ན། འདི་ལྟ་སྟེ། རྒྱལ་པོའི་ཆད་པས་ཉེན་པ་དང་། བླ་མའི་དོན་དང་། ཕ་མ་ནད་པ་དང་། རང་སངས་རྒྱས་དང་། དགྲ་བཅོམ་པ་དང་། ཕྱིར་མི་འོང་བ་དང་། རྒྱུན་དུ་ཞུགས་པ་ལ་སོགས་པ་དང་། ནད་པ་དང་། ལྟོགས་པ་དེ་དག་གི་དོན་དུ་མ་བྱིན་པར་བླངས་པ་འདི་ནི་འབྲས་བུ་ཆུང་བ་ཡིན་ནོ། །མ་བྱིན་པར་ལེན་པའི་སྡོམ་པ་མ་བླངས་པས་མ་བྱིན་པར་ལེན་པ་ འདི་ནི་རྣམ་པར་སྨིན་པ་ཆུང་བ་ཡིན་ནོ། །གཞན་ཡང་འབྲས་བུ་ཆུང་བར་འགྱུར་བ་ནི་མ་བྱིན་པར་ལེན་པ་བྱས་ནས། སེམས་ཀྱིས་འཆགས་པར་བྱེད། འགྱོད་ལ་ཕྱིར་ཞིང་མི་བྱེད། ཕ་རོལ་ཡང་མ་བྱིན་པར་ལེན་པ་ལས་ཕྱིར་ཟློག་པར་བྱེད། སྡོམ་པའི་ལུང་ཡང་ འབོགས་པར་བྱེད། ལམ་ལ་ཡང་འཇོག་པར་བྱེད། མ་བྱིན་པར་ལེན་པ་སྤོང་བ་དག་ལ་འཇོག་པར་བྱེད་ཅིང་། ལས་ཀྱི་ཉེར་བསྡོགས་དང་། ལས་ཀྱི་མཇུག་མི་བྱེད་པའོ། །མ་བྱིན་པར་ལེན་པའི་ལས་ཀྱི་ཉེར་བསྡོགས་ཇི་ལྟ་བུ་ཡིན་ཞེ་ན། འདི་ལ་མ་བྱིན་ པར་ལེན་པ་པོས་ཕ་རོལ་ལ་གཡོ་སྒྱུ་བྱེད་ཅིང་གསང་ཐབས་སུ་སྨྲ་བ་དང་། འཇལ་ལུགས་ལ་གཡོ་བྱེད་པ་དང་། མི་རིགས་པའི་ལས་ལྷག་པར་སྤྱོད་པ་རྣམ་པ་འདི་དག་ནི་ལས་ཀྱི་ཉེར་བསྡོགས་ཡིན་ནོ། །ལས་ཇི་ལྟ་བུ་ཡིན་ཞེ་ན། གང་གི་ཚེ་ཕ་རོལ་གྱིས་ ཡོངས་སུ་བཟུང་བའི་རྫས་ཀྱི་རྣམ་པ་མ་བྱིན་པར་ལེན་པ་འདི་ནི་ལས་ཡིན་ནོ། །ལས་ཀྱི་མཇུག་ཇི་ལྟ་བུ་ཡིན་ཞེ་ན། འདི་ལ་བྱས་ནས་རྗེས་སུ་ཡི་རང་བར་བྱེད་ཅིང་གོམས་པར་བྱེད་ལ་མང་དུ་བྱས་ཏེ། རྗེས་སུ་ཡི་རང་བ་ཀུན་ཏུ་འཆབ་པར་བྱེད། ཚུལ་ཁྲིམས་ དང་ལྡན་པ་གཞན་མ་བྱིན་པར་ལེན་པ་ལ་རབ་ཏུ་འཇོག་པར་བྱེད་པ་འདི་ནི་ལས་ཀྱི་མཇུག་ཡིན་ནོ། །རྣམ་པ་འདི་གསུམ་གྱིས་མ་བྱིན་པར་ལེན་པའི་ལས་ཀྱི་ཉེར་བསྡོགས་དང་། མཇུག་དང་བྲལ་བ་མ་བྱིན་པ་ལེན་པའི་ཆད་པའི་འབྲས་བུ་ཆུང་བར་འགྱུར་ཏེ། མྱོང་བར་ འགྱུར་བར་ངེས་པ་མ་ཡིན་ནོ། །གཞན་ཡང་འདོད་པས་ལོག་པར་གཡེམ་པ་ཇི་ལྟ་བུ་ཡིན་ཞེ་ན། རྣལ་འབྱོར་སྤྱོད་པ་ཆོས་ལ་ཆོས་ཀྱི་རྗེས་སུ་ལྟ་བས་མཐོང་སྟེ། འདི་ལ་འདོད་པས་ལོག་པར་གཡེམ་པ་ཀུན་ཏུ་སྤྱོད་པ་ན་རང་གི་ཆུང་མའམ་གཞན་གྱི་ཆུང་མ་དག་གི་སྐྱེ་ གནས་མ་ཡིན་པར་འཇུག་པར་བྱེད། གཞན་བྱེད་པ་ལ་ཡང་རྗེས་སུ་ཡི་རང་བར་བྱེད། མི་བྱེད་པ་ཡང་ཐབས་ཀྱིས་བྱེད་དུ་འཇུག་པ་འདི་ནི་འདོད་པས་ལོག་པར་གཡེམ་པ་ཞེས་བྱའོ། །འདོད་པས་ལོག་པར་གཡེམ་པའི་འབྲས་བུ་ཆུང་བར་འགྱུར་བ་ཇི་ལྟ་བུ་ཡིན་ཞེ་ན། འདི་ལ་བྱས་ནས་འགྱོད་ཅིང་འཆགས་ཏེ། རྗེས་སུ་ཡི་རང་བར་མི་བྱེད། གཞན་འདོད་པས་ལོག་པར་གཡེམ་པ་ཡང་ཕྱིར་ཟློག་པར་བྱེད། ལམ་ལ་འཇོག་པར་བྱེད། ལས་ཀྱི་ཉེར་བསྡོགས་དང་། ལས་ཀྱི་མཇུག་དང་བྲལ་བའི་སེམས་ཡིན་ཞིང་ཚུལ་ཁྲིམས་དང་ ལྡན་པ་ཡིན་ཏེ། འདི་ནི་འདོད་པས་ལོག་པར་གཡེམ་པའི་འབྲས་བུ་ཆུང་བར་འགྱུར་ཞིང་མྱོང་བར་འགྱུར་བར་མ་ངེས་པ་ཡིན་ནོ། །ལུས་ཀྱི་ཆད་པ་རྣམ་པ་གསུམ་པོ་དེ་དག་ནི་འབྲས་བུ་ཆུང་བ་དང་འབྲས་བུ་ཞན་པར་འགྱུར་རོ། །དེ་དག་ནི་ངའི་ཉན་ ཐོས་སམ་ང་ལས་ཐོས་ནས་ལས་དང་འབྲས་བུ་རྣམ་པར་སྨིན་པ་ཤེས་ཤིང་གཞན་གྱིས་ཁ་དྲང་དུ་མི་རུང་བ་གཞན་ལ་རག་མ་ལས་པ་མ་གཏོགས་པ། གཞན་མུ་སྟེགས་ཅན་སྤྱོད་པ་པ་ཀུན་ཏུ་རྒྱུ་བ་རྣམས་སམ། ལྷ་དང་བཅས་པའི་འཇིག་རྟེན་ནམ། བདུད་དང་བཅས་ པའམ། ཚངས་པ་དང་བཅས་པའམ། དགེ་སྦྱོང་དང་བྲམ་ཟེར་བཅས་པའི་སྐྱེ་དགུའམ། ལྷ་དང་། མི་དང་། ལྷ་མ་ཡིན་དུ་བཅས་པས་རྟོགས་པའི་ཡུལ་མ་ཡིན་ནོ། །གཞན་ཡང་ངག་གི་ཆད་པ་ལྕི་བ་ཇི་ལྟ་བུ་ཡིན་ཞེ་ན། རྣལ་འབྱོར་སྤྱོད་པ་ཆོས་དང་ལས་དང་ རྣམ་པར་སྨིན་པ་ཤེས་པ་ཡིན་ཏེ། ངག་གི་ཆད་པ་རྣམ་པ་བཞི་ལ་འདི་ལྟ་སྟེ། བརྫུན་དང་། ཕྲ་མ་དང་། ཚིག་རྩུབ་པོ་དང་། ཚིག་ཀྱལ་པ་དང་བཞིའོ། །དེ་ལ་བརྫུན་གང་ཞེ་ན། བདག་ཉིད་ལ་བདག་ཉིད་སླུ་ཞིང་གཞན་ཡང་སླུ་བ་ཡིན་ཏེ། སྨྲས་པའི་ཚེ། རྒྱལ་པོའམ། བློན་པོའི་མངོན་སུམ་དུ་གཞན་དག་ལ་གནོད་པའམ། འཕྲོག་པར་བྱེད་པ་ལོག་པས་བསྐྱེད་པའི་བརྫུན་གྱི་སྐྱོན་རབ་ཏུ་འཇུག་པ་འདི་ནི་བརྫུན་དུ་སྨྲ་བ་ངག་གི་ཆད་པ་རྫོགས་པ་ཡིན་ཏེ། སེམས་ཅན་དམྱལ་བ་མྱོང་བར་འགྱུར་བ་ཡིན་ནོ། །གཞན་ཡང་ ངག་གི་ཆད་པ་ཕྲ་མ་ཞེས་བྱ་བ་ནི་དོན་གཅིག་ལ་འཐུན་པར་ཞུགས་པ་རྣམས་ལ་དབྱེན་བྱ་བའི་བསམ་པས་ཚིག་རྗོད་པར་བྱེད་པ་འདི་ནི་ཕྲ་མའི་ངག་གི་ཆད་པ་ཡིན་ནོ། །ཕྲ་མའི་འབྲས་བུ་ཆུང་བ་ཇི་ལྟ་བུ་ཡིན་ཞེ་ན། བདག་གཏི་མུག་གིས་ངན་པ་བྱས་སོ་ཞེས་འཆགས་པར་བྱེད། གཞན་ཕྲ་མ་ལ་མངོན་པར་དགའ་བ་ཟློག་པར་བྱེད། ལམ་ལ་ཡང་དག་པར་འཇོག་པར་བྱེད་ལ་ལས་ཀྱི་ཉེར་བསྡོགས་དང་ལས་ཀྱི་མཇུག་མི་བྱེད་པ་ཡིན་ནོ། །ལས་ཀྱི་ཉེར་བསྡོགས་ཇི་ལྟ་བུ་ཡིན་ཞེ་ན། འདི་ལ་ཕྲ་མ་ལ་མངོན་པར་དགའ་བ་ཉོན་མོངས་པ་རྒྱགས་པ་ལ་ མངོན་པར་ཞུགས་པའི་ཚིག་གཞན་དུ་བཏགས་ནས་གཞན་ལ་སྨྲ་བ་འདི་ནི་ལས་ཀྱི་ཉེར་བསྡོགས་ཡིན་ནོ། །ཕྲ་མའི་ལས་ཀྱི་ལམ་དང་ཡང་དག་པར་རབ་ཏུ་ལྡན་པ་ཇི་ལྟ་བུ་ཡིན་ཞེ་ན། འདི་ལ་སྡང་བའི་སེམས་ཀྱིས་ཡང་དང་ཡང་དུ་གཞན་འབྱེད་ལ་རྗེས་སུ་ཡི་རང་ཞིང་ཀུན་དགའ་ བར་བྱེད་པ་འདི་ནི་ཕྲ་མའི་ལས་ཀྱི་ལམ་དང་ཡང་དག་པར་ལྡན་པ་ཡིན་ནོ། །ལས་ཀྱི་མཇུག་དང་བཅས་པ་ཇི་ལྟ་བུ་ཡིན་ཞེ་ན། འདི་ལ་ཕྲ་མ་བྱས་ནས་རྗེས་སུ་ཡི་རང་བར་བྱེད། ཕྱིར་ཞིང་བྱེད་བྱེད་པ་ལ་རྗེས་སུ་ཡི་རང་བར་བྱེད། ཡིད་ཀྱིས་ཀུན་ཏུ་རྟོག་པར་བྱེད། དེ་ ཉིད་ལ་མངོན་པར་དགའ་བར་བྱེད། ངང་ཚུལ་གཞན་དུ་མི་བྱེད་པ་ཡིན། སྡང་བའི་སེམས་ཡིན། གཞན་དག་གིས་བཙལ་ཅིང་ཡིད་ཆེས་པའི་གནས་སུ་མི་འགྱུར་བ་ཡིན། སྨོད་པ་ཡིན། ངོ་ཚ་བར་མི་བྱེད་ཅིང་ཁྲེལ་མེད་ལ་བདག་ཉིད་ལ་སྨོད་པར་མི་བྱེད་པ་ འདི་ནི་ཕྲ་མའི་ཆད་པ་ཡིན་ནོ། །གཞན་ཡང་ཚིག་རྩུབ་པོའི་ཆད་པ་ཇི་ལྟ་བུ་ཡིན་ཞེ་ན། རྣལ་འབྱོར་སྤྱོད་པ་ཆོས་དང་། ལས་དང་ཀུན་འབྱུང་བ་མཐོང་བ་དེས་ཐོས་པ་ལས་བྱུང་བའི་ཤེས་པས་མཐོང་སྟེ། འདི་ནི་ཚིག་རྩུབ་པོས་བདག་གདུང་བར་བྱེད་ཅིང་ཡིད་དུ་མི་འོང་ བ་རྣ་བར་ཐོས་ལ་གླགས་སྐྱེད་པར་བྱེད། དེ་གཞན་ལ་གནས་ཏེ། མཁྱུད་པ་དང་། འཆགས་པ་དང་། དགོད་པ་དང་། ཁྲོ་བའི་བསམ་པས་རྣམ་པར་སྨིན་པ་དུ་མ་རྣམ་པ་དུ་མའོ། །དེ་ལ་ཚིག་རྩུབ་པོ་ཆེན་པོས་ནི་སེམས་ཅན་དམྱལ་བའི་ཚོར་བ་མྱོང་བར་འགྱུར། ཚིག་རྩུབ་པོ་འཆགས་པས་ནི་མྱོང་བར་འགྱུར་བར་མ་ངེས་པ་ཡིན་ཏེ། འདི་དག་ནི་ངག་གི་ཆད་པ་གསུམ་པ་ཡིན་ནོ། །ལས་ཀྱི་ཉེར་བསྡོགས་དང་། ལས་ཀྱི་མཇུག་དང་། ཡང་དག་པར་ལྡན་པ་ཞེས་བྱ་བ་ནི་སྔ་མ་བཞིན་ནོ། །གཞན་ཡང་ངག་གི་ཆད་པ་བཞི་པ་ཇི་ལྟ་བུ་ ཡིན་ཞེ་ན། རྣལ་འབྱོར་སྤྱོད་པ་ལས་དང་ཆོས་དང་རྣམ་པར་སྨིན་པའི་རྣམ་པ་དུ་མ་ཤེས་པ་ཡིན་ཏེ། ཚིག་ཀྱལ་པ་ཞེས་བྱ་བ་སྔ་ཕྱི་འབྲེལ་བ་མེད་པའི་ཚིག་ཀྱལ་པ་སྔ་མ་དང་ཕྱི་མར་མི་སྦྱོར་བ་ཡིན་ཏེ། མྱོང་བར་འགྱུར་བར་མ་ངེས་ཤིང་ཁ་ན་མ་ཐོ་བ་མི་མང་བ་ཡིན་པ་འདི་ནི་ངག་གི་ ཆད་པ་བཞི་པ་ཡིན་ནོ། །གཞན་ཡང་ཡིད་ཀྱི་ཆད་པ་ཇི་ལྟ་བུ་ཡིན། རྣམ་པ་ནི་དུ་ཞིག་ཡོད་ཅེ་ན། རྣལ་འབྱོར་སྤྱོད་པ་ལས་དང་ཆོས་དང་རྣམ་པར་སྨིན་པ་ལ་རྗེས་སུ་ལྟ་བ་དེས་ཐོས་པ་ལས་བྱུང་བའི་ཤེས་པས་ཡིད་ཀྱི་ཆད་པ་རྣམ་པ་གསུམ་མཐོང་སྟེ། འདི་ ལྟ་སྟེ། བརྣབ་སེམས་ནི་གཞན་གྱི་འབྱོར་པ་མཐོང་ནས་ཤིན་ཏུ་རྟོག་པར་བྱེད། སེམས་ཀྱིས་འདོད་པར་བྱེད། རྫས་འདི་ནི་བདག་གིར་བྱའོ་སྙམ་སྟེ། བརྣབ་སེམས་འདི་ནི་ཡིད་ཀྱི་ཆད་པ་དང་པོ་ཡིན་ནོ། །གཞན་ཡང་ཡིད་ཀྱི་ཆད་པར་འགྱུར་བ་ནི་ཕ་རོལ་གྱི་ཕུན་སུམ་ ཚོགས་པ་མཐོང་ནས་ཡིད་རབ་ཏུ་སྡང་བ་གནོད་སེམས་ཏེ། ཡིད་ཀྱི་ཆད་པ་གཉིས་པ་ཡིན་ནོ། །གཞན་ཡང་ཡིད་ཀྱི་ཆད་པ་གསུམ་པ་ནི་ལོག་པར་ལྟ་བས་ཕྱིན་ཅི་ལོག་ཏུ་མཐོང་བ་ལོག་པར་ལྟ་བའི་ཆད་པའོ། །དེ་ཡང་རྣམ་པ་གཉིས་ཏེ། ཡོད་པ་འཇིག་པ་དང་། ལོག་ པར་ཤེས་པའོ། །དེ་ལ་ཡོད་པ་འཇིག་པ་ནི་འདི་ལྟར་སྦྱིན་པ་མེད། སྦྱིན་སྲེག་མེད། མཆོད་སྦྱིན་མེད། ལེགས་པར་བྱས་པ་དང་། ཉེས་པར་བྱས་པ་དག་གི་ལས་ཀྱི་འབྲས་བུ་རྣམ་པར་སྨིན་པ་མེད་དོ་ཞེས་བྱ་བ་རྒྱ་ཆེར་སྦྱར་རོ། །ལོག་པར་ཤེས་པ་ཞེས་བྱ་བ་ནི། བདེ་བ་དང་སྡུག་བསྔལ་གང་ཡིན་པ་དེ་ནི་ལྷས་བྱས་ཀྱི་ལས་ཀྱི་འབྲས་བུས་ནི་མ་བྱས་སོ་ཞེས་ཟེར་བ་སྟེ། འདི་ནི་ལོག་པར་ལྟ་བ་རྣམ་པ་གཉིས་པ་ཡིན་ནོ། །གཞན་ཡང་ཇི་ལྟར་ན་ལུས་དང་ངག་དང་ཡིད་རྣམ་པ་གསུམ་གྱི་ཆད་པ་རྣམ་པ་བཅུ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་ ན། ཚེ་འདི་ཉིད་ལ་ལས་ཀྱི་འབྲས་བུ་མྱོང་བར་འགྱུར་བར་ངེས་པ་དང་། ཤི་ནས་གཞན་དུ་སྐྱེས་ན་དེའི་རྒྱུ་ཅན་ག