Kinh tạng Tây Tạng (Kangyur Đại Học) — 068_མདོ་སྡེ།_ཡ

་འགྱུར། །ཐུབ་པ་རྣམས་ཀྱི་མཚན་འཛིན་པ། །རྫུ་
འཕྲུལ་ཆེ་ཞིང་ཡིད་གཞུངས་ལ། །འདབ་མ་བྱེ་བ་སྟོང་ལྡན་པའི། །རིན་ཆེན་པད་མར་སྐྱེ་བར་འགྱུར། །མཚན་རྣམས་འདི་དག་འཛིན་བྱེད་པ། །ཕ་དང་མ་དང་རྩ་ལག་དང་། །སྤུན་རྣམས་ཀྱི་ནི་ཡིད་འོང་ཞིང་། །ནམ་ཡང་ཕོངས་པ་མཐོང་མི་འགྱུར། །བུད་མེད་ཀྱིས་
ཀྱང་བློ་ལྡན་པ། །དེ་དག་རྣམས་ཀྱི་མཚན་ཐོས་ན། །བུད་མེད་ལུས་ལ་ཡིད་བྱུང་ནས། །མཁས་ཤིང་སྐྱེས་པར་སྐྱེ་བར་འགྱུར། །ལུས་ཅན་ཀུན་ལ་ཕན་པའི་ཕྱིར། །མྱུར་དུ་བྱང་ཆུབ་འཚང་རྒྱ་སྟེ། །ལྷ་དང་བཅས་པའི་འཇིག་རྟེན་གྱི། །རྟེན་དང་སྐྱབས་སུ་འབྱུང་བར་
འགྱུར། །དེ་ལ་མཚོན་གྱིས་མི་ཚུགས་ཏེ། །དུག་གིས་མི་ཚུགས་མེས་མ་ཡིན། །གཡོན་ཅན་དག་དང་ཆོམ་རྐུན་དང་། །རྒྱལ་པོའང་དེ་ལ་གནོད་མི་འགྱུར། །ཐུབ་པ་རྣམས་ཀྱི་མཚན་འཛིན་པ། །དེ་ལ་སྡིག་དང་ལྡན་པའི་བདུད། །ནག་པོའི་རྩ་ལག་བཞོན་བཅས་

པས། །གླགས་ནི་རྙེད་པར་ཡོང་མི་འགྱུར། །ཞིང་རྣམས་བྱེ་བ་བསམ་ཡས་སུ། །དེ་ནི་མཁའ་ལས་འགྲོ་འགྱུར་ཏེ། །ཕུན་སུམ་ཚོགས་པའི་ཞིང་དེར་ནི། །འཇིག་རྟེན་མགོན་པོ་རྣམས་ལ་བལྟ། །བརྟན་པ་སངས་རྒྱས་རྣམས་མཐོང་ནས། །དད་པ་བརྟན་པོ་ཐོབ་པར་
འགྱུར། །དེ་ཡི་བསམ་པ་མཁྱེན་ནས་སུ། །མི་མཆོག་རྣམས་ནི་ལུང་སྟོན་ཏོ། །ཐུབ་པ་རྣམས་ལས་མངོན་སུམ་བདག །བྱང་ཆུབ་ལུང་བསྟན་ཐོས་ནས་སུ། །རྟག་ཏུ་དགའ་དང་ལྡན་འགྱུར་ཞིང་། །དེ་ནི་དོགས་པ་མེད་པར་འགྱུར། །མཁས་པ་གང་ཞིག་མཚན་
འདི་དག །ཐོས་ནས་རབ་ཏུ་འཛིན་བྱེད་པ། །དེ་ནི་ཡོན་ཏན་འདི་དག་དང་། །རྒྱ་ཆེན་གཞན་ཡང་ལོས་ཀྱང་འཐོབ། །ཐུབ་པ་དྲང་སྲོང་ཆེ་གྱུར་པ། །འདི་དག་རྣམས་ཀྱི་མཚན་ཐོས་ནས། །མི་གང་མཚན་རྣམས་འཛིན་བྱེད་པ། །རྫུ་འཕྲུལ་ཆེ་མཁས་བསོད་ནམས་འདོད། །
དེ་ལྟ་བས་ན་བདག་ཉིད་ཆེ། །དེ་དག་རྣམས་ཀྱི་མཚན་ཐོས་ན། །སྐྱེས་བུ་མཁས་པས་གཟུང་བྱ་ཞིང་། །གཞན་དག་ལ་ཡང་བ་ཤད་པར་བྱ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཤཱ་རིའི་བུ་དང་། དགེ་སློང་དེ་དག་དང་། བྱང་ཆུབ་
སེམས་དཔའ་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་དཀྱིལ་འཁོར་བརྒྱད་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།
རྒྱ་གར་གྱི་མཁན་པོ་སུ་རེནྡྲ་བོ་དྷི་དང་། ཞུ་ཆེན་གྱི་ལོ་ཙཱ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ། །༄༅། །རྒྱ་གར་སྐད་དུ། ཨཱརྱ་མཾ་ག་ལ་ཨཥྚ་ཀཾ་
ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་བཀྲ་ཤིས་བརྒྱད་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡངས་པ་ན་ཨ་

མྲ་སྲུང་བའི་ཚལ་ན་བཞུགས་སོ། །དེ་ནས་ལིཙྪ་བཱིའི་བུ་རྩལ་རབ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་ལ་ལ་སྔོན་གྱི་སྨོན་ལམ་ཕུན་སུམ་ཚོགས་པ་དག་བཞུགས་པ་བཅོམ་ལྡན་འདས་གང་དག་ཐོས་ན། བདག་གིས་སྤྱི་བོས་བཀུར་ཞིང་གང་དག་བདག་གིས་སྤྱི་བོས་བཀུར་བས་མིའམ་མི་མ་ལགས་པ་ལས་
འཇིགས་པའམ། གཙེ་བ་འབྱུང་བར་མི་འགྱུར་བ་དང་། བཅོམ་ལྡན་འདས་བདག་རྒྱལ་པོའི་ཕོ་བྲང་དུ་མཆིས་ཏེ། སྨྲ་བརྗོད་པ་ན་ཅི་ནས་གང་གིས་ཀྱང་སྨྲ་བ་ལ་ཟློག་པ་མི་བགྱིད་ཅིང་ཟིལ་གྱིས་མི་ནོན་པ་དང་། མཚན་དེ་དག་ཉིད་བདག་འཛིན་ན། གཉིད་ཀྱིས་ལོག་ན་ཡང་
སྡིག་པའི་རྨི་ལམ་རྨི་བར་མི་འགྱུར་བ་དང་། བདག་མཚོན་ཆ་གཟས་པའི་གཡུལ་གྱི་ནང་དུ་ཞུགས་ན་ཡང་ལུས་ལ་མཚོན་ཆ་རྣམས་ཕོག་པར་མི་འགྱུར་ལ། དེ་ལས་བདེ་བར་ཐར་བར་ཡང་འགྱུར་བ་དེ་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་ཀྱིས་ཡོངས་སུ་བསྟན་དུ་གསོལ། དེ་སྐད་ཅེས་གསོལ་ནས། བཅོམ་ལྡན་འདས་ཀྱིས་ལིཙྪ་བཱིའི་བུ་རྩལ་རབ་ལ་འདི་སྐད་ཅེས་བཀའ་སྩལ་ཏོ། །རྩལ་རབ་ཤར་ཕྱོགས་ན་འཇིག་རྟེན་གྱི་ཁམས་གྲགས་ལྡན་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་སྒྲོན་མའི་རྒྱལ་པོ་ཞེས་བྱ་བ་བཞུགས་སོ། །རྩལ་རབ་ཤར་ཕྱོགས་ན་འཇིག་རྟེན་གྱི་ཁམས་སྐྱོ་བ་མེད་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྩལ་བརྟན་དོན་གྲུབ་དགོངས་
པ་ཞེས་བྱ་བ་བཞུགས་སོ། །རྩལ་རབ་ཤར་ཕྱོགས་ན་འཇིག་རྟེན་གྱི་ཁམས་བདེ་ལྡན་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ལ་དགོངས་པ་རྒྱ་ཆེར་གྲགས་པ་ཅན་ཞེས་བྱ་བ་བཞུགས་སོ། །རྩལ་རབ་ཤར་

ཕྱོགས་ན་འཇིག་རྟེན་གྱི་ཁམས་བགེགས་མེད་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་པའི་རྒྱན་གྱི་དཔལ་ཞེས་བྱ་བ་བཞུགས་སོ། །རྩལ་རབ་ཤར་ཕྱོགས་ན་འཇིག་རྟེན་གྱི་ཁམས་ཆད་པ་སྤངས་པ་ཞེས་བྱ་བ་ཡོད་
དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགེ་བར་གྲགས་པ་དཔལ་དམ་པ་ཞེས་བྱ་བ་བཞུགས་སོ། །རྩལ་རབ་ཤར་ཕྱོགས་ན་འཇིག་རྟེན་གྱི་ཁམས་སྣ་ཚོགས་ལྡན་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་ལྷུན་པོ་ལྟར་འཕགས་པ་རྩལ་རབ་གྲགས་པའི་དཔལ་ཞེས་བྱ་བ་བཞུགས་སོ། །རྩལ་རབ་ཤར་ཕྱོགས་ན་འཇིག་རྟེན་གྱི་ཁམས་དཔལ་འབར་བ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེམས་
ཅན་ཐམས་ཅད་ལ་དགོངས་པ་གྲགས་པའི་དཔལ་ཞེས་བྱ་བ་བཞུགས་སོ། །རྩལ་རབ་ཤར་ཕྱོགས་ན་འཇིག་རྟེན་གྱི་ཁམས་རྡོ་རྗེ་གྲགས་པ་དགའ་བ་ཅན་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡིད་ཚིམ་པར་མཛད་པ་
རྩལ་རབ་གྲགས་པའི་དཔལ་ཞེས་བྱ་བ་བཞུགས་སོ། །རྩལ་རབ་སངས་རྒྱས་བཅོམ་ལྡན་འདས་རྣམས་ཀྱི་མཚན་འདི་དག་ལེགས་པར་རབ་ཏུ་གཟུང་བར་བྱའོ། །ཀུན་ཆུབ་པར་བྱའོ། །བཅང་བར་བྱའོ། །རྩལ་རབ་སངས་རྒྱས་བཅོམ་ལྡན་འདས་ཐམས་ཅད་ནི་ཡོན་ཏན་བསམ་
གྱིས་མི་ཁྱབ་པ་དང་ལྡན་མོད་ཀྱི། འོན་ཀྱང་རྩལ་རབ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འདི་དག་གི་ས་ངས་རྒྱས་ཀྱི་ཞིང་ནི་ཡོངས་སུ་དག་པ་སྟེ། སྙིགས་མ་རྣམས་དང་བྲལ་བ་ཡིན་ནོ། །རྩལ་རབ་ཁྱོད་ཀྱིས་གང་གི་ཚེ་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འདི་དག་གི་མཚན་རྣམས་བླངས་ནས་འཛིན་ན་དེས་ཡོན་ཏན་གྱི་ཁྱད་པར་དེ་དག་དང་གཞན་དག་ཏུ་ཡང་འགྱུར་ཏེ། སངས་རྒྱས་བཅོམ་ལྡན་འདས་རྣམས་ཀྱི་མཚན་འདི་དག་ནི་སྔོན་གྱི་སྨོན་ལམ་གྱི་ཡོན་ཏན་དང་ལྡན་པ་ཡིན་པའི་

ཕྱིར་རོ། །ནུབ་མོ་སྲོད་ལ་ཉལ་ན་ཡང་ཁྱོད་ཀྱིས་མཚན་འདི་དག་བསམ་པར་བྱའོ། །ལྡང་བ་ན་ཡང་བསམ་པར་བྱའོ། །འཇིག་རྟེན་གྱི་བྱ་བ་གང་ཅི་ཡང་རུང་བ་དག་རྩོམ་པ་དག་ན་ཡང་ཐམས་ཅད་ལ་མཚན་འདི་དག་བསམས་ནས་དེའི་འོག་ཏུ་བརྩམས་ན་དེར་
ཡང་ཁྱེད་ལ་འཕེལ་བ་ཉིད་དུ་འགྱུར་གྱི་འགྲིབ་པར་ནི་མ་ཡིན་པར་ཤེས་པར་བྱ་སྟེ། འདིས་ཁྱོད་གནས་པར་གྱིས་ཤིག །དེ་ནས་ལིཙྪ་བཱིའི་བུ་རྩལ་རབ་ཀྱིས་བསྟན་པ་འདི་ཐོས་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ནས་དགའ་བ་དང་། ཡིད་བདེ་བ་སྐྱེས་ཏེ། དེ་བཞིན་
གཤེགས་པ་རྣམས་ཀྱི་མཚན་འདི་དག་ཡོངས་སུ་རྗོད་ཅིང་རིན་པོ་ཆེ་སྣ་བདུན་གྱི་མེ་ཏོག་བརྒྱད་སྟོང་གིས་བཅོམ་ལྡན་འདས་ལ་མངོན་པར་གཏོར་ཏེ་བསྐོར་བ་ཡང་བྱས་ནས། དེ་བཞིན་གཤེགས་པའི་མཚན་ཡོངས་སུ་བརྗོད་པ་བཀྲ་ཤིས་བརྒྱད་པའི་ཆོས་ཀྱི་རྣམ་གྲངས་འདི་བཟུང་སྟེ་བཅོམ་
ལྡན་འདས་ཀྱི་ཐད་ནས་སོང་ངོ་། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་འཁོར་དེ་ཉིད་དུ་འདུས་པར་གྱུར་ནས་འདུག་པ་དེས་བཅོམ་ལྡན་འདས་ལ་ཕྱག་འཚལ་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཀྱང་དེ་བཞིན་གཤེགས་པའི་
མཚན་ཡོངས་སུ་བརྗོད་པ་བཀྲ་ཤིས་བརྒྱད་པའི་ཆོས་ཀྱི་རྣམ་གྲངས་འདི་ཉམས་སུ་བླངས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ་དེའི་ཕྱིར་ཁྱོད་ཀྱིས་ལྷ་དང་། ལྷ་མ་ཡིན་གཡུལ་འགྱེད་པ་ན་ཆོས་ཀྱི་རྣམ་གྲངས་འདི་ཡོངས་སུ་བརྗོད་པར་བྱའོ། །
ཡོངས་སུ་བརྗོད་པ་ན་ལྷའི་དབང་པོ་ཁྱོད་རྒྱལ་བར་འགྱུར་རོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པའི་མཚན་ཡོངས་སུ་བརྗོད་པ་གང་ཡིན་པ་འདི་ནི། བདེ་ཞིང་འཇིགས་པ་མེད་པར་ཡོངས་སུ་བརྗོད་པ་ཡིན་པའི་ཕྱིར་རོ། །མཚན་ཡོངས་སུ་བརྗོད་པ་གང་ཡིན་པ་འདི་ནི་ཀུན་ནས་
ལྡང་བ་མེད་པར་ཡོངས་སུ་བརྗོད་པ་ཡིན་པའི་ཕྱིར་རོ། །དེ་བཞིན་གཤེགས་པའི་མཚན་ཡོངས་སུ་བརྗོད་པ་གང་ཡིན་པ་འདི་ནི་ཡང་དག་པའི་མཚན་ཡོངས་སུ་བརྗོད་པ་ཡིན་པའི་ཕྱིར་རོ། །དེ་བཞིན་གཤེགས་པའི་མཚན་ཡོངས་སུ་བརྗོད་པ་གང་ཡིན་པ་འདི་ནི་གཡུལ་ཐམས་ཅད་ལས་

ཡང་དག་པར་འདས་པར་ཡོངས་སུ་བརྗོད་པ་ཡིན་པའི་ཕྱིར་རོ། །དེ་བཞིན་གཤེགས་པའི་མཚན་ཡོངས་སུ་བརྗོད་པ་གང་ཡིན་པ་འདི་ནི་ཟིལ་གྱིས་མི་ནོན་པར་ཡོངས་སུ་བརྗོད་པ་དང་། ཞི་བར་ཡོངས་སུ་བརྗོད་པ་དང་། ཡོངས་སུ་གདུང་བ་མེད་པར་ཡོངས་སུ་བརྗོད་པ་དང་། འཇིགས་
པ་མེད་པར་ཡོངས་སུ་བརྗོད་པ་ཡིན་པའི་ཕྱིར་རོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་ཆོས་ཀྱི་རྣམ་གྲངས་འདི་ལ་མཆོད་པའི་ཕྱིར། བཅོམ་ལྡན་འདས་ལ་ལྷའི་མེ་ཏོག་མན་དཱ་ར་བ་དག་གིས་མངོན་པར་གཏོར་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་
འཚལ་ཏེ། ལན་གསུམ་བསྐོར་བ་བྱས་ནས་ཡིད་དགའ་བ་དང་། སེམས་དགེ་བ་དང་། སེམས་སྒྲིབ་པ་མེད་པ་དང་། སེམས་ཀུན་ནས་ལྡང་བ་མེད་པ་དང་། དེ་བཞིན་གཤེགས་པའི་མཚན་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་ཡིད་ལ་བྱེད་བཞིན་དུ་སླད་ཀྱིས་ཀྱང་
བདག་གིས་བཅོམ་ལྡན་འདས་ཀྱི་ཞལ་མཐོང་བར་གྱུར་ཅིག་ཅེས་ཚིག་ཏུ་སྨྲས་ནས། སུམ་ཅུ་རྩ་གསུམ་གྱི་ལྷ་རྣམས་དང་ལྷན་ཅིག་ཏུ་བཅོམ་ལྡན་འདས་ཀྱི་ཐད་ནས་དོང་ངོ་། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ལིཙྪ་བཱིའི་བུ་རྩལ་རབ་དང་། ལྷ་རྣམས་
ཀྱི་དབང་པོ་བརྒྱ་བྱིན་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་བཀྲ་ཤིས་བརྒྱད་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།
རྒྱ་གར་གྱི་མཁན་པོ་སུ་རེནྡྲ་བོ་དྷི་དང་། ཞུ་ཆེན་གྱི་ལོ་ཙཱ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། །། ༄༅། །རྒྱ་གར་སྐད་དུ། ཨཱརྱ་བུད་དྷ་ཨ་ནུ་སྨྲྀ་ཏི། བོད་སྐད་དུ། འཕགས་
པ་སངས་རྒྱས་རྗེས་སུ་དྲན་པ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་ལྟར་སངས་རྒྱས་བཅོམ་ལྡན་འདས་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་

གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་སོ། །དེ་བཞིན་གཤེགས་པ་དེ་དག་ནི་བསོད་ནམས་དག་གི་རྒྱུ་འཐུན་པ། དགེ་བའི་རྩ་བ་
རྣམས་ཆུད་མི་ཟ་བ། བཟོད་པས་བརྒྱན་པ། བསོད་ནམས་ཀྱི་གཏེར་རྣམས་ཀྱི་གཞི། དཔེ་བྱད་བཟང་པོ་རྣམས་ཀྱིས་སྤྲས་པ། མཚན་གྱི་མེ་ཏོག་རྒྱས་པ། སྤྱོད་ཡུལ་རན་པར་འཐུན་པ། མཐོང་ན་མི་འཐུན་པ་མེད་པ། དད་པས་མོས་པ་རྣམས་མངོན་པར་དགའ་བ།
ཤེས་རབ་ཟིལ་གྱིས་མི་ནོན་པ། སྟོབས་རྣམས་ལ་བརྫི་བ་མེད་པ། སེམས་ཅན་ཐམས་ཅད་ཀྱི་སྟོན་པ། བྱང་ཆུབ་སེམས་དཔའ་རྣམས་ཀྱི་ཡབ། འཕགས་པའི་གང་ཟག་རྣམས་ཀྱི་རྒྱལ་པོ། མྱ་ངན་ལས་འདས་པའི་གྲོང་ཁྱེར་དུ་འགྲོ་བ་རྣམས་ཀྱི་དེད་དཔོན། ཡེ་ཤེས་
དཔག་ཏུ་མེད་པ། སྤོབས་པ་བསམ་གྱིས་མི་ཁྱབ་པ། གསུང་རྣམ་པར་དག་པ། དབྱངས་སྙན་པ། སྐུ་བྱད་ལྟ་བས་ཆོག་མི་ཤེས་པ། སྐུ་མཚུངས་པ་མེད་པ། འདོད་པ་དག་གིས་མ་གོས་པ། གཟུགས་དག་གིས་ཉེ་བར་མ་གོས་པ། གཟུགས་མེད་པ་དག་དང་མ་
འདྲེས་པ། ཕུང་པོ་དག་ལས་རབ་ཏུ་རྣམ་པར་གྲོལ་བ། ཁམས་རྣམས་དང་མི་ལྡན་པ། སྐྱེ་མཆེད་རྣམས་བསྡམས་པ། མདུད་པ་རྣམས་ཤིན་ཏུ་བཅད་པ། ཡོངས་སུ་གདུང་བ་དག་ལས་རྣམ་པར་གྲོལ་བ། སྲེད་པ་ལས་ཤིན་ཏུ་གྲོལ་བ། ཆུ་བོ་ལས་རྒལ་བ། ཡེ་ཤེས་
ཡོངས་སུ་རྫོགས་པ། འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་ལ་གནས་པ། མྱ་ངན་ལས་འདས་པ་ལ་མི་གནས་པ། ཡང་དག་པ་ཉིད་ཀྱི་མཐའ་ལ་གནས་པ། སེམས་ཅན་ཐམས་ཅད་ལ་གཟིགས་པའི་
ས་ལ་བཞུགས་པ་སྟེ། འདི་དག་ནི་དེ་བཞིན་གཤེགས་པའི་ཡེ་ཤེས་ཡང་དག་པའི་ཆེ་བའི་ཡོན་ཏན་ཡིན་ནོ། །འཕགས་པ་སངས་རྒྱས་རྗེས་སུ་དྲན་པ་རྫོགས་སོ། །༄༅། །རྒྱ་གར་སྐད་དུ། དྷརྨ་ཨ་ནུ་སྨྲྀ་ཏི།

བོད་སྐད་དུ། ཆོས་རྗེས་སུ་དྲན་པ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དམ་པའི་ཆོས་ནི་ལེགས་པར་གསུངས་པ། ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་
པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ། སངས་རྒྱས་བཅོམ་ལྡན་འདས་ཀྱིས་ཆོས་འདུལ་བ་ལེགས་པར་གསུངས་པ། ཡང་དག་པར་ཐོབ་པ། ནད་མེད་པ། དུས་ཆད་པ་མེད་པ། ཉེ་བར་གཏོད་པ། འདི་མཐོང་བ་ལ་དོན་
ཡོད་པ། མཁས་པ་རྣམས་ཀྱིས་རང་གིས་རིག་པར་བྱ་བ། ཆོས་འདུལ་བ་ལེགས་པར་བསྟན་པ། ངེས་པར་འབྱུང་བ། རྫོགས་པའི་བྱང་ཆུབ་ཏུ་འགྲོ་བར་བྱེད་པ། མི་འཐུན་པ་མེད་ཅིང་འཐུན་པ་དང་ལྡན་པ། རྟེན་པ་དང་ལྡན་པའོ། །རྒྱུན་ལམ་ཆད་པའོ། །ཆོས་རྗེས་སུ་དྲན་པ་
རྫོགས་སོ།། ༄༅། །རྒྱ་གར་སྐད་དུ། སང་གྷ་ཨ་ནུ་སྨྲྀ་ཏི། བོད་སྐད་དུ། དགེ་འདུན་རྗེས་སུ་དྲན་པ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འཕགས་པའི་དགེ་འདུན་ནི་
ལེགས་པར་ཞུགས་པ། རིགས་པར་ཞུགས་པ། འཐུན་པར་ཞུགས་པ། དྲང་པོར་ཞུགས་པ། ཕྱག་འཚལ་བའི་འོས་སུ་གྱུར་པ། ཐལ་མོ་སྦྱར་བའི་འོས་སུ་གྱུར་པ། ཡོན་ཏན་ཡོངས་སུ་བྱང་བ་ཆེན་པོ། ཡོན་ཡོངས་སུ་སྦྱོང་བ། སྦྱིན་པའི་འོས་སུ་གྱུར་པ། ཀུན་གྱི་སྦྱིན་
པའི་འོས་སུ་གྱུར་པའོ། །དགེ་འདུན་རྗེས་སུ་དྲན་པ་རྫོགས་སོ།། ༄༅། །རྒྱ་གར་སྐད་དུ། ཤིཀྵ་ཏྲ་ཡ་ནཱ་མ་སཱུ་ཏྲ། བོད་སྐད་དུ། བསླབ་པ་གསུམ་གྱི་མདོ་ཞེས་བྱ་བ། སངས་རྒྱས་དང་། བྱང་ཆུབ་སེམས་
དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་སྤོང་བྱེད་ན། ལྗོངས་རྒྱུ་ཞིང་གཤེགས་པ་དང་། གྲོང་སྤྱིལ་བུ་ཅན་དུ་བྱོན་ཏེ། གྲོང་སྤྱིལ་བུ་ཅན་གྱི་གྲོང་གི་བྱང་ཕྱོགས་ཀྱི་ཤིང་སཱ་ལའི་ཚལ་ན། དགེ་སློང་གི་

དགེ་འདུན་ཆེན་པོ་དང་ཐབས་ཅིག་ཏུ་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་འདི་དག་ནི་ཚུལ་ཁྲིམས་ཡིན་ནོ། །འདི་ནི་ཏིང་ངེ་འཛིན་ཡིན་ནོ། །འདི་ནི་ཤེས་རབ་ཡིན་ནོ། །དགེ་སློང་དག་ཚུལ་ཁྲིམས་
ལ་གོམས་པར་བྱས་ན། ཏིང་ངེ་འཛིན་ལ་ཡུན་རིང་དུ་གནས་པར་འགྱུར་རོ། །ཏིང་ངེ་འཛིན་ལ་གོམས་པར་བྱས་ན། ཤེས་རབ་ཐོབ་པར་འགྱུར། ཤེས་རབ་ལ་གོམས་པར་བྱས་ན། འདི་ལྟ་སྟེ། འདོད་ཆགས་དང་། ཞེ་སྡང་དང་། གཏི་མུག་དག་ལས་སེམས་ཡང་དག་པ་
ཁོ་ནར་རྣམ་པར་གྲོལ་བར་འགྱུར་རོ། །དེ་ལྟར་སེམས་ཡང་དག་པ་ཁོ་ནར་རྣམ་པར་གྲོལ་བའི་འཕགས་པའི་ཉན་ཐོས་ཀྱིས་ནི་བདག་གི་ཟག་པ་འདི་ཟད་དོ། །ཚངས་པར་སྤྱོད་པ་ནི་བསྟེན་ཏོ། །བྱ་བ་ནི་བྱས་སོ། །འདི་ལས་སྲིད་པ་གཞན་མི་ཤེས་སོ་ཞེས་ཡང་དག་པ་ཁོ་ནར་ཤེས་པར་
འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །བསླབ་པ་གསུམ་གྱི་མདོ་རྫོགས་སོ།། །།
༄༅། །རྒྱ་གར་སྐད་དུ། ཨཱརྱ་ཏྲི་ཀཱ་ཡ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་སྐུ་གསུམ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་
ན། བཅོམ་ལྡན་འདས་རྒྱལ་པོའི་ཁབ་བྱ་རྒོད་ཕུང་པོའི་རི་ལ་བཞུགས་སོ། །བྱང་ཆུབ་སེམས་དཔའ་ཚད་མེད་གྲངས་མེད་པ་དང་། ལྷ་དང་། ཀླུ་དང་། འཁོར་ཐམས་ཅད་དང་ཐབས་ཅིག་ཏུ་བཞུགས་ཏེ། བཅོམ་ལྡན་འདས་ལ་བཀུར་སྟིར་བགྱིད་ཅིང་མཆོད་དོ། །དེའི་
ཚེ་འཁོར་དེར་བྱང་ཆུབ་སེམས་དཔའ་སའི་སྙིང་པོ་འདུག་པ་སྟན་ལས་ལངས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ལ་སྐུ་དུ་མངའ། བཅོམ་ལྡན་འདས་ཀྱིས་བཀའ་སྩལ་པ། སའི་སྙིང་པོ་བཅོམ་ལྡན་འདས་དེ་བཞིན་གཤེགས་པ་ལ་སྐུ་

གསུམ་མངའ་སྟེ། ཆོས་ཀྱི་སྐུ་དང་། ལོངས་སྤྱོད་རྫོགས་པའི་སྐུ་དང་། སྤྲུལ་པའི་སྐུའོ། །རིགས་ཀྱི་བུ་དེ་བཞིན་གཤེགས་པའི་སྐུ་གསུམ་ནི་རང་བཞིན་རྣམ་པར་དག་པ་ནི་ཆོས་ཀྱི་སྐུའོ། །ཏིང་ངེ་འཛིན་རྣམ་པར་དག་པ་ནི་ལོངས་སྤྱོད་རྫོགས་པའི་སྐུའོ། །སྤྱོད་པ་རྣམ་
པར་དག་པ་ནི་སངས་རྒྱས་ཐམས་ཅད་ཀྱི་སྤྲུལ་པའི་སྐུའོ། །རིགས་ཀྱི་བུ་དེ་བཞིན་གཤེགས་པའི་ཆོས་ཀྱི་སྐུ་ནི་ནམ་མཁའ་ལྟར་རང་བཞིན་མེད་པའི་དོན་ནོ། །ལོངས་སྤྱོད་རྫོགས་པའི་སྐུ་ནི་སྤྲིན་ལྟར་འབྱུང་བའི་དོན་ནོ། །སྤྲུལ་པའི་སྐུ་ནི་སངས་རྒྱས་ཐམས་ཅད་ཀྱི་ཕྲིན་ལས་
ཏེ། ཆར་བ་ལྟ་བུ་སྟེ་ཐམས་ཅད་བངས་པའི་དོན་ནོ། །བཅོམ་ལྡན་འདས་ལ་བྱང་ཆུབ་སེམས་དཔའ་སའི་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱི་སྐུ་གསུམ་གྱི་བཤད་པ་ཇི་ལྟར་བལྟ་བར་བགྱི། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སའི་སྙིང་
པོ་ལ་བཀའ་སྩལ་པ། རིགས་ཀྱི་བུ་དེ་བཞིན་གཤེགས་པའི་སྐུ་གསུམ་ནི་འདི་ལྟར་བལྟ་བར་བྱའོ། །ཆོས་ཀྱི་སྐུ་ནི་དེ་བཞིན་གཤེགས་པའི་ངོ་གང་ལ་བལྟ་བར་བྱའོ། །ལོངས་སྤྱོད་རྫོགས་པའི་སྐུ་ནི་བྱང་ཆུབ་སེམས་དཔའི་ངོ་གང་ལ་བལྟ་བར་བྱའོ། །སྤྲུལ་པའི་སྐུ་ནི་མོས་
པས་སྤྱོད་པའི་སོ་སོ་སྐྱེ་བོའི་ངོ་གང་ལ་བལྟ་བར་བྱའོ། །རིགས་ཀྱི་བུ་ཆོས་ཀྱི་སྐུ་ནི་སངས་རྒྱས་ཐམས་ཅད་དང་རང་བཞིན་འཐུན་པར་གནས་སོ། །ལོངས་སྤྱོད་རྫོགས་པའི་སྐུ་ནི་སངས་རྒྱས་ཐམས་ཅད་དང་ཏིང་ངེ་འཛིན་འཐུན་པར་གནས་སོ། །སྤྲུལ་པའི་སྐུ་ནི་སངས་རྒྱས་ཐམས་ཅད་དང་
ཕྲིན་ལས་འཐུན་པར་གནས་སོ། །རིགས་ཀྱི་བུ་ཀུན་གཞི་གནས་སུ་དག་པ་ནི་མེ་ལོང་ལྟ་བུའི་ཡེ་ཤེས་ཏེ་ཆོས་ཀྱི་སྐུའོ། །ཉོན་མོངས་པའི་ཡིད་གནས་སུ་དག་པ་ནི་མཉམ་པ་ཉིད་ཀྱི་ཡེ་ཤེས་སོ། །ཡིད་ཀྱི་རྣམ་པར་ཤེས་པ་གནས་སུ་དག་པ་ནི་སོ་སོར་ཀུན་དུ་རྟོག་པའི་ཡེ་ཤེས་ཏེ། ལོངས་སྤྱོད་
རྫོགས་པའི་སྐུའོ། །སྒོ་ལྔའི་རྣམ་པར་ཤེས་པ་གནས་སུ་དག་པ་ནི་བྱ་བ་གྲུབ་པའི་ཡེ་ཤེས་ཏེ་སྤྲུལ་པའི་སྐུའོ། །དེ་ནས་བྱང་ཆུབ་སེམས་དཔའ་སའི་སྙིང་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་བཅོམ་ལྡན་འདས་ལ་དམ་པའི་ཆོས་ཐོས་པ་ནི་

རབ་ཏུ་ལེགས་སོ། །བདེ་བར་གཤེགས་པ་རབ་ཏུ་ལེགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བཅོམ་ལྡན་འདས་ལ་ཆོས་ཀྱི་རྣམ་གྲངས་འདི་གང་གིས་རབ་ཏུ་འཛིན་པ་དེས་བསོད་ནམས་ཚད་མེད་བརྗོད་དུ་མེད་གྲངས་མེད་ཅིང་དཔག་ཏུ་མེད་པ་
ཐོབ་བོ།། །།བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་སའི་སྙིང་པོ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་
པ་སྐུ་གསུམ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།༄༅། །རྒྱ་གར་སྐད་དུ། ཨཱརྱ་ཏྲི་སྐནདྷ་ཀ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ཕུང་པོ་གསུམ་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་
དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཆོས་ཀྱི་དབྱེ་དགོན་པ་ན་བཞུགས་ཏེ། འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་ཡེ་ཤེས་ཆེན་པོས་
ལེགས་པར་ཐུགས་སུ་ཆུད་པའི་བློ་མངའ་བ། སངས་རྒྱས་ཐམས་ཅད་དང་མཉམ་པ་ཉིད་བརྙེས་པ། ཆོས་ཀྱི་སྐུ་གཉིས་སུ་མེད་པ་ལ་རྟེན་ཅིང་གནས་པ། ནམ་མཁའི་དཀྱིལ་ཡུལ་དུ་གྱུར་ཅིང་ཐུག་པ་མེད་པའི་ཡེ་ཤེས་མངའ་བ། ཆོས་ཀྱི་དབྱིངས་ཐམས་ཅད་དུ་རབ་ཏུ་ཞུགས་པའི་སྐུ་
དང་ལྡན་པ་ཆོས་ཀྱི་ཅོད་པན་ཆགས་པ་མེད་པ་མཆོག་དམ་པ་དྲི་མ་མེད་པས་བཅིངས་པ། སོ་སོ་ཡང་དག་པར་རིག་པ་ཆེན་པོ་རྗེས་སུ་བསྒྲགས་པས་ཤིན་ཏུ་རྣམ་པར་དབྱེ་བའི་དབྱངས་ཅན། བསོད་ནམས་མི་ཟད་པའི་མཛོད་ཀྱིས་ཡེ་ཤེས་ཀྱི་དཀྱིལ་འཁོར་ཡངས་ཤིང་འོད་གསལ་བ།
ཉོན་མོངས་པ་མེད་པའི་ཆོས་ཐུགས་སུ་ཆུད་པས་མི་རྟེན་པར་གནས་པ། ཆོས་ཀྱི་དབྱིངས་ཐམས་ཅད་དུ་ཤིན་ཏུ་རྣམ་པར་གྲོལ་བའི་ཡེ་ཤེས་ཀྱི་སྐུ་དང་ལྡན་པ། བསྐལ་པ་བྱེ་བ་དཔག་ཏུ་མེད་པར་ཡོན་ཏན་གྱི་ཆོས་ཡོངས་སུ་བརྗོད་ཀྱང་མི་ཟད་ཅིང་ཐུག་པ་མེད་པའི་ཡོན་ཏན་གྱི་བསྔགས་པ་

བསྟན་པའི་ཁྱད་པར་བརྙེས་པ་དེ་དག་ལ་ཕྱག་འཚལ་ལོ། །དེ་བཞིན་གཤེགས་པ་སེམས་ཅན་ཐམས་ཅད་སྙེད་ཀྱིས་སངས་རྒྱས་བཅོམ་ལྡན་འདས་གང་རྣམས་ལས་དེ་བཞིན་གཤེགས་པ་རེ་རེའི་ཚུལ་ཁྲིམས་ཀྱི་ཡོན་ཏན་གྱི་བསྔགས་པ་ཕུན་སུམ་ཚོགས་པ་ལས་བརྩམས་ཏེ། བསྐལ་
པ་མཐའ་ཡས་པར་བསྔགས་པ་བརྗོད་ཀྱང་དེ་བཞིན་གཤེགས་པ་དེའི་ཚུལ་ཁྲིམས་ཀྱི་ཡོན་ཏན་གྱི་བསྔགས་པ་ཕུན་སུམ་ཚོགས་པ་ཡང་མི་ཟད་ཅིང་ཐུག་པ་མ་མཆིས་ལ་དེ་བཞིན་གཤེགས་པ་དེ་དག་གི་སྤོབས་པ་སོ་སོ་ཡང་དག་པར་རིག་པ་ལ་ཡང་ཐུག་པ་མ་མཆིས་ཏེ། དེ་ལྟར་
སངས་རྒྱས་བཅོམ་ལྡན་འདས་ཚུལ་ཁྲིམས་དཔག་ཏུ་མ་མཆིས་པ་དེ་དག་ལ་མོས་པའི་མཆོག་གིས་མོས་སོ། །གཙོ་བོ་དང་། དམ་པ་དང་། ཁྱད་པར་དུ་འཕགས་པ་དང་། རབ་དང་། ཕུལ་དང་། གྱ་ནོམ་པ་དང་། བླ་མ་དང་། བླ་ན་མ་མཆིས་པ་དང་། མཉམ་
པ་མ་མཆིས་པ་དང་། མི་མཉམ་པ་དང་མཉམ་པ་དང་། མཚུངས་པ་མ་མཆིས་པ་དང་། སྣང་བ་མ་མཆིས་པ་དང་། བདག་ཉིད་ཆེན་པོ་དང་། ཟིལ་གྱིས་མི་ནོན་པ་དང་། ཡོན་ཏན་གྱི་ཆོས་ཐམས་ཅད་སྡུད་པ་དང་། ཡང་དག་པར་རྫོགས་པའི་སངས་རྒྱས་ཀྱིས་
བཀའ་སྩལ་པའི་མོས་པས་ལྷག་པར་མོས་སོ། །ཚུལ་ཁྲིམས་ལ་ཇི་ལྟ་བ་དེ་བཞིན་དུ་ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བ་དང་། དེ་བཞིན་དུ་བྱམས་པ་ཆེན་པོ་དང་། སྙིང་རྗེ་ཆེན་པོ་དང་། དགའ་བ་ཆེན་པོ་དང་།
བཏང་སྙོམས་ཆེན་པོ་དང་། དེ་བཞིན་དུ་སྟོབས་དང་། མི་འཇིགས་པ་དང་། དེ་བཞིན་དུ་སངས་རྒྱས་ཀྱི་ཆོས་ཐམས་ཅད་ཡང་དག་པར་འབྱུང་བའི་བར་དག་ལ་ལྷག་པར་མོས་སོ། །མོས་ནས་ཀྱང་སངས་རྒྱས་བཅོམ་ལྡན་འདས་དེ་དག་ལ་ཕྱག་འཚལ་ལོ། །བསྟོད་དོ། །བཀུར་རོ། །
བསྔགས་སོ། །རབ་ཏུ་བསྔགས་སོ། །འདུད་དོ། །རབ་ཏུ་འདུད་དོ། །ཕྱག་བགྱིའོ། །གཞོལ་ལོ། །བལྟའོ། །བརྟག་གོ། །བྱམས་པའི་ལུས་ཀྱི་ལས་དང་། བྱམས་པའི་ངག་གི་ལས་དང་། བྱམས་པའི་ཡིད་ཀྱི་ལས་ཡེ་ཤེས་སྔོན་དུ་འགྲོ་བ་དང་།

ཀུན་དུ་བཟང་བ་དང་། སངས་རྒྱས་ཀྱི་རྒྱན་གྱི་ལུས་ཀྱི་ལས་དང་། ངག་གི་ལས་དང་། ཡིད་ཀྱི་ལས་ཀྱིས་སངས་རྒྱས་བཅོམ་ལྡན་འདས་དེ་དག་ལ་ཕྱག་འཚལ་ལོ། །བསྟོད་དོ། །བཀུར་རོ། །བསྔགས་སོ། །རབ་ཏུ་བསྔགས་སོ། །འདུད་དོ། །
རབ་ཏུ་འདུད་དོ། །ཕྱག་བགྱིའོ། །གཞོལ་ལོ། །བལྟའོ། །བརྟག་གོ། །དམིགས་པ་དཔག་ཏུ་མ་མཆིས་པ་དང་ལྡན་པའི་མེ་ཏོག་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། ཆོས་གོས་དང་། གདུགས་དང་། རྒྱལ་མཚན་དང་། བ་
དན་དང་། མར་མེ་དང་། བཀོད་པ་དང་། ལྷབ་ལྷུབ་དང་། མཆོད་རྟེན་རྩིག་པ་དང་། སྐུ་གཟུགས་བགྱི་བ་དང་། རིན་པོ་ཆེ་དང་། རྒྱན་དང་། བཞོན་པ་དང་། འཆག་ས་དང་། གཙུག་ལག་ཁང་དང་། ཡོ་བྱད་ཐམས་ཅད་བཀོད་པ་རྣམ་པར་དག་པ་རྒྱ་ཆེན་པོ་འདི་
དག་གིས་ཀྱང་དེ་བཞིན་གཤེགས་པ་དེ་དག་ལ་བསྟི་སྟང་དུ་བགྱིའོ། །བཙུན་པར་བགྱིའོ། །རི་མོར་བགྱིའོ། །མཆོད་དོ། །གསོལ་ལོ། །རིམ་གྲོར་བགྱིའོ། །མཆོད་པ་མོས་པའི་སྟོབས་ལས་ངེས་པར་བྱུང་བ། ཁམས་གསུམ་པ་ལས་ཤིན་ཏུ་འདས་པ། ཉོན་
མོངས་པ་མ་མཆིས་པའི་ཆོས་ལས་བྱུང་བ། མངོན་པར་འདུ་བགྱིད་པ་མ་མཆིས་པའི་ཕྱག་རྒྱས་བཏབ་པ། ཡེ་ཤེས་སྒྱུ་མ་ལས་ཤིན་ཏུ་ཡོངས་སུ་གྲུབ་པ། ལས་སྒྱུ་མ་ལས་ཤིན་ཏུ་རྣམ་པར་ཕྱེ་བ། གནས་ཐམས་ཅད་ལས་ཤིན་ཏུ་སྤགས་པ། འཇིག་རྟེན་སྒྱུ་མ་ལས་བྱུང་བ། ངོ་
བོ་ཉིད་ཀྱི་ཆོས་དང་འབྲེལ་བ། ཡང་དག་པར་རྫོགས་པའི་སངས་རྒྱས་ཀྱིས་བཀའ་སྩལ་པའི་མཆོད་པས་དེ་བཞིན་གཤེགས་པ་དེ་དག་ལ་བསྟི་སྟང་དུ་བགྱིའོ། །བཙུན་པར་བགྱིའོ། །རི་མོར་བགྱིའོ། །མཆོད་དོ། །གསོལ་ལོ། །རིམ་གྲོར་བགྱིའོ། །གོང་དུ་ཡང་བྱང་
ཆུབ་སེམས་དཔའ་དེ་བཞིན་གཤེགས་པའི་རྒྱུད་བསབ་པར་འཚལ་བ། སེམས་ཅན་གྱི་རྒྱུད་ཡོངས་སུ་སྨིན་པར་བགྱིད་པར་འཚལ་བ། ཞིང་གི་རྒྱུད་རྣམ་པར་སྦྱོང་བར་འཚལ་བ། ལས་ཀྱི་རྒྱུད་དང་མི་འགལ་བར་འཚལ་བ། ཆོས་ཀྱི་རྒྱུད་རབ་ཏུ་རྣམ་པར་འབྱེད་པར་འཚལ་བ། དུས་

གསུམ་གྱི་རྒྱུད་ཡོངས་སུ་རྟོགས་པར་འཚལ་བ། ཕྱོགས་ཀྱི་རྒྱུད་ལ་རབ་ཏུ་འཇུག་པར་འཚལ་བ། འདོད་ཆགས་མ་མཆིས་པའི་རྒྱུད་ལ་རབ་ཏུ་འགོད་པར་འཚལ་བ། མོས་པའི་རྒྱུད་རྣམ་པར་སྦྱོང་བར་འཚལ་བ། དབང་པོའི་རྒྱུད་ལ་ལྟ་བར་འཚལ་བ། ཆོས་ཀྱི་དབྱིངས་ཀྱི་འཁོར་ལོ་
ལ་རྣམ་པར་འཕྲུལ་བར་འཚལ་བ། འགྲོ་བའི་འཁོར་ལོ་ཐམས་ཅད་བསྡུ་བར་འཚལ་བའི་བྱང་ཆུབ་སེམས་དཔའ་རྣམས་ཀྱིས་ཇི་ལྟར་སངས་རྒྱས་བཅོམ་ལྡན་འདས་དག་གིས་སངས་རྒྱས་ཀྱི་མཁྱེན་པ་ཆགས་པ་མི་མངའ་ཞིང་སྒྲིབ་པ་མི་མངའ་བས་མཁྱེན་ཅིང་རབ་ཏུ་མཁྱེན་པ་དེ་ལྟ་བུས་དེ་
བཞིན་གཤེགས་པ་དེ་དག་ལ་མཆོད་པར་བགྱི་བ་དེ་བཞིན་དུ་བདག་གིས་ཀྱང་ཡང་དག་པར་རྫོགས་པའི་སངས་རྒྱས་ཀྱིས་བཀའ་སྩལ་པའི་མཆོད་པ། བྱང་ཆུབ་སེམས་དཔའི་དཀྱིལ་འཁོར་ཐམས་ཅད་རབ་ཏུ་དགའ་བར་བགྱིད་པ། བྱང་ཆུབ་སེམས་དཔའ་ཀུན་དུ་བཟང་པོའི་སྤྱོད་པ་
རབ་འབྱམ་ལས་ངེས་པར་བྱུང་བ། བྱང་ཆུབ་སེམས་དཔའ་ཡེ་ཤེས་བླ་མ་གནས་པའི་ཡུལ་གྱི་རྗེས་སུ་ཞུགས་པས་དེ་བཞིན་གཤེགས་པ་ལ་མཆོད་པར་བགྱིའོ། །དེ་བཞིན་གཤེགས་པ་ལ་མཆོད་པའི་ལས་ཀྱི་སླད་དུ་དེ་བཞིན་གཤེགས་པ་ལ་མཆོད་པ་དང་། རིམ་གྲོ་
བགྱི་བ་གཙུག་གི་བླ་མ་ཞེས་བགྱི་བས་འཇིག་རྟེན་གྱི་ཁམས་རབ་འབྱམ་ཐམས་ཅད་དུ་འདུག་སྟེ། དེ་བཞིན་གཤེགས་པ་ལ་མཆོད་པ་འདི་ལྟ་སྟེ། ཕ་རོལ་ཏུ་ཕྱིན་པ་ལས་བྱུང་བ། མ་སྐྱེས་པའི་ཆོས་ལས་བྱུང་བ། བྱང་ཆུབ་སེམས་དཔའ་རིགས་བཙུན་པར་སྐྱེས་པའི་ཡེ་ཤེས་ཀྱི་
མིག་གིས་རིག་པ། སངས་རྒྱས་ཀྱི་ཡུལ་ཐམས་ཅད་རྒྱས་པར་འགེངས་པས་འཇིག་རྟེན་གྱི་ཁམས་ཆོས་ཀྱི་དབྱིངས་སུ་གཏོགས་པ་མིང་གིས་ཁྱབ་པ་མང་པོ་དག་ན་ཆོས་ཀྱི་དབྱིངས་རྒྱས་པར་འགེངས་པའི་འཁོར་གྱི་དཀྱིལ་འཁོར་རྣམས་དང་། ནམ་མཁའི་ཁམས་ཀྱི་མཐས་གཏུགས་
པ་ཆོས་ཀྱི་དབྱིངས་སུ་གཏོགས་པའི་འཇིག་རྟེན་གྱི་ཁམས་རྣམས་སུ་འཇུག་གོ། །དེ་བས་གོང་དུ་ཡང་མཆོད་པ་ཡོན་ཏན་དཔག་ཏུ་མ་མཆིས་པ་དང་ལྡན་པ། དགེ་བའི་རྩ་བ་ཆེན་པོའི་ཤུགས་ཀྱིས་བསྐྱེད་པ། རྡོ་རྗེའི་དབང་པོ་སྣང་བར་བགྱིད་པ། སངས་རྒྱས་ཀྱི་ཡུལ་ཐམས་ཅད་

དུ་སྣང་བའི་མེ་ཏོག་གི་རྒྱལ་པོའི་ཡེ་ཤེས་ལས་བྱུང་བའི་མཆོད་པས་དེ་བཞིན་གཤེགས་པ་དེ་དག་ལ་བསྟི་སྟང་དུ་བགྱིའོ། །བཙུན་པར་བགྱིའོ། །རི་མོར་བགྱིའོ། །མཆོད་དོ། །གསོལ་ལོ། །རིམ་གྲོར་བགྱིའོ། །ཇི་ལྟར་བདག་གི་དོན་དུ་མཆོད་པ་
དེ་བཞིན་དུ་འཇིག་རྟེན་གྱི་ཁམས་རབ་འབྱམ་མ་ལུས་པ་ཐམས་ཅད་ན་སེམས་ཅན་ཇི་ཙམ་སེམས་ཅན་གྱི་རིས་ན་མཆིས་པ། སེམས་ཅན་གྱི་ཁམས་དེ་དག་ཐམས་ཅད་ཀྱི་ཆེད་དུ་ཡང་དེ་བཞིན་གཤེགས་པ་དེ་དག་ལ་མཆོད་པར་བགྱིའོ། །དེ་ལྟར་བདག་དེ་བཞིན་གཤེགས་པ་
ལ་མཆོད་པའི་སྟོབས་ཀྱིས་བརླན་པའི་སེམས་བསྐྱེད་པ། བྱམས་པ་ཆེན་པོ་དང་། སྙིང་རྗེ་ཆེན་པོས་ཉེ་བར་བསྟན་པ། འགྲོ་བ་ཐམས་ཅད་ཡོངས་སུ་བསྐྱབ་པའི་སྨོན་ལམ་དང་ལྡན་པས་དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་ཀྱི་མཛོད་ཀྱི་རྗེས་སུ་ཞུགས་པར་གྱུར།
ཤེས་རབ་དང་། ཐབས་ཀྱི་སྟོབས་ཆེན་པོས་ཡོངས་སུ་བཟུང་བར་གྱུར། བདུད་ཀྱི་ལམ་དང་ཡུལ་ཐམས་ཅད་ལས་ཡང་དག་པར་འདས་པར་གྱུར་ནས་སྒྲིབ་པར་འགྱུར་བའི་ལས་ཐམས་ཅད་བཤགས་པར་བགྱི་སྟེ། གང་སངས་རྒྱས་བཅོམ་ལྡན་འདས་རྣམས་ཀྱིས་བཀའ་མ་
སྩལ་པ་དང་། གང་སེམས་ཅན་དམ་པ་རྣམས་ཀྱིས་རྣམ་པར་སྤངས་པ་དང་། གང་དེ་བཞིན་གཤེགས་པ་རྣམས་ཀྱིས་སྨད་པ་དང་། གང་བྱང་ཆུབ་སེམས་དཔའ་རྣམས་ཀྱིས་ཡོངས་སུ་སྤངས་པ་དང་། གང་འཕགས་པ་རྣམས་ཀྱིས་བཤུང་བ་དང་། གང་མཁས་པ་རྣམས་
དང་ཞེ་འགྲས་པ་དང་། གང་རིག་པ་རྣམས་ཀྱིས་བོར་བ་འདོད་ཆགས་དང་། ཞེ་སྡང་དང་། གཏི་མུག་གིས་རབ་ཏུ་གཟིར་བའི་དབང་གིས་བྱུང་བའམ། ང་རྒྱལ་དང་། འཆབ་པ་དང་། ཁོན་དུ་འཛིན་པའི་དབང་གིས་བྱུང་བའམ། ཕྲག་དོག་དང་། སེར་སྣ་དང་། མྱ་
ངན་གྱི་དབང་གིས་བྱུང་བའམ། སྒྱུ་དང་གཡོའི་དབང་གིས་བྱུང་བའམ། མངོན་པར་ཞེན་པའི་སྟོབས་ཀྱིས་བྱུང་བ་འདི་ལྟ་སྟེ། ལས་ཀྱི་སྒྲིབ་པའམ། ཆོས་ཀྱི་སྒྲིབ་པའམ། ཉོན་མོངས་པའི་སྒྲིབ་པའམ། ལྟ་བའི་སྒྲིབ་པའམ། མི་ཤེས་པའི་སྒྲིབ་པའམ། རྣམ་པར་

སྨིན་པའི་སྒྲིབ་པའམ། ཆོས་ཀྱིས་ཕོངས་པར་འགྱུར་བའི་སྒྲིབ་པའམ། ཉན་ཐོས་དང་། རང་སངས་རྒྱས་ཀྱི་ཐེག་པ་དང་ལྡན་པའི་སྒྲིབ་པའམ། ཐེག་པ་ཆེན་པོའི་བར་ཆད་དུ་འགྱུར་བའི་སྒྲིབ་པའམ། དགེ་བའི་རྩ་བ་ཐམས་ཅད་པ་གསོག་པ་ལ་གནོད་པའི་སྒྲིབ་པའམ། སྡིག་པའི་
གྲོགས་པོ་དང་འདྲེ་བའི་སྒྲིབ་པའམ། བྱང་ཆུབ་སེམས་དཔའ་ཀུན་དུ་བཟང་པོའི་སྤྱོད་པའི་སྨོན་ལམ་ཡོངས་སུ་རྫོགས་པར་བགྱི་བ་ལ་སྒྲིབ་པ་དང་ཆོད་པ་ཡང་རུང་སྟེ། སྒྲིབ་པའི་ལས་བགྱིས་ཤིང་བསགས་པ་སྒྲིབ་པའི་ཀུན་ནས་ལྡང་བ་གང་གིས་སེམས་ཅན་དམྱལ་བར་མཆི་བར་འགྱུར་བ་
དང་། དུད་འགྲོའི་སྐྱེ་གནས་སུ་མཆི་བར་འགྱུར་བ་དང་། ཡི་དགས་ཀྱི་ཡུལ་དུ་མཆི་བར་འགྱུར་བ་དང་། ལྷ་དབུལ་པོར་སྐྱེ་བར་འགྱུར་བ་དང་། སངས་རྒྱས་ལ་ལྟ་བ་ཡོངས་སུ་མི་འཛིན་པ་དང་། ཆོས་མཉན་པ་ཡོངས་སུ་མི་ལེན་པ་དང་། དེ་བཞིན་གཤེགས་པ་དང་། ཆོས་
དང་། དགེ་འདུན་དཀོན་མཆོག་མངོན་པར་མི་རིག་པར་འགྱུར་བ་དང་། བྱང་ཆུབ་སེམས་དཔའ་དང་འགྲོགས་པ་མི་འཐོབ་པར་འགྱུར་བ་དང་། དགེ་བའི་བཤེས་གཉེན་ཡང་དག་པས་ཡོངས་སུ་བཟུང་བ་མི་རྙེད་པར་འགྱུར་བ་དང་། དགེ་བའི་རྩ་བ་ཆབ་འཚལ་བ་ཡོངས་སུ་
འཛིན་པར་འགྱུར་བ་དང་། བྱང་ཆུབ་ཀྱི་སེམས་བརྗེད་པར་འགྱུར་བ་དང་། ཕ་རོལ་ཏུ་ཕྱིན་པའི་ལམ་མི་ཉན་པར་འགྱུར་བ་དང་། བདུད་སྡིག་ཅན་རྣམས་ཀྱིས་འཇོམས་པར་འགྱུར་བ་དང་། སངས་རྒྱས་ཀྱི་ཆོས་ཐག་རིང་དུ་བགྱིད་པར་འགྱུར་བ་དང་། དགེ་བའི་རྩ་བ་ཐམས་ཅད་བརྩམ་
པའི་སྦྱོར་བ་ལས་རྣམ་པར་ལྡོག་པར་འགྱུར་བ་དང་། དགེ་བའི་བཤེས་གཉེན་ལ་འཁུ་བར་འགྱུར་བ་དང་། བསམ་པ་ཡོངས་སུ་དག་པ་མི་འཐོབ་པ་དང་། དྲན་པ་བརྗེད་པ་མ་མཆིས་པ་མི་འཐོབ་པ་དང་། ཆོས་ལ་ལྟ་བ་མི་འཐོབ་པ་དང་། སངས་རྒྱས་ཀྱི་རྣམ་པར་སྤྲུལ་པ་ལ་མི་མོས་
པ་དང་། སངས་རྒྱས་ཀྱི་ཆོས་རྣམས་ལ་ཡིད་གཉིས་འཚལ་བར་འགྱུར་བ་དང་། ཏིང་ངེ་འཛིན་གྱི་སྒོ་ཁོང་དུ་མི་ཆུད་པ་དང་། ས་ནས་སར་གནས་པ་མི་འཐོབ་པ་དང་། བྱང་ཆུབ་སེམས་དཔའ་དང་འགྲོགས་པ་མི་འཐོབ་པ་དང་། ཕ་རོལ་ཏུ་ཕྱིན་པ་ཡོངས་སུ་རྫོགས་པར་བགྱི་བའི་

ལས་བྱས་པ་དང་ལྡན་པ་ཁོང་དུ་མི་ཆུད་པ་དང་། སྨོན་ལམ་ཆེན་པོ་ལས་ནུར་བར་འགྱུར་བ་དང་། སྤྱོད་པ་ཡོངས་སུ་དག་པ་མི་འཐོབ་པ་དང་། གཟུངས་ཀྱི་རྒྱན་གྱི་སྣང་བ་མི་འཐོབ་པ་དང་། སྤོབས་པའི་རྒྱན་གྱི་སྣང་བ་ཁོང་དུ་མི་ཆུད་པ་དང་། བྱང་ཆུབ་
སེམས་དཔའ་ཀུན་དུ་བཟང་པོའི་སྤྱོད་པའི་སྨོན་ལམ་ལ་ཡོངས་སུ་འདྲིས་པར་བགྱི་བ་ཁོང་དུ་མི་ཆུད་པ་དང་། ཆོས་མཉམ་པ་ཉིད་མི་རྟོགས་པ་དང་། བསོད་ནམས་མཉམ་པ་ཉིད་མི་སྐྱེད་པ་དང་། ཡེ་ཤེས་མཉམ་པ་ཉིད་ཁོང་དུ་མི་ཆུད་པ་དང་། འཁོར་བའི་ཆོས་རྣམས་ཀྱིས་ཀུན་
དུ་གཞོམ་པར་འགྱུར་བའི་སྒྲིབ་པ་དེ་ལྟ་བུ་ལ་སོགས་པ་དང་། བྱང་ཆུབ་སེམས་དཔའི་སྤྱོད་པ་དང་། ཡོན་ཏན་གྱི་ཆོས་ཐམས་ཅད་ཀུན་དུ་སྒྲུབ་པ་ལ་མི་ཕྱོགས་པར་འགྱུར་བའི་སྒྲིབ་པའི་འགེབས་པ་གྲངས་མ་མཆིས་པ་འབུམ་ཕྲག་བཅུ་པོ་དེ་དག་དུས་གསུམ་དུ་གཏོགས་པའི་དེ་བཞིན་
གཤེགས་པ་ཐམས་ཅད་ཆོས་ཀྱི་དབྱིངས་སུ་འདུས་པ། ཡེ་ཤེས་གཟིགས་པ་སྒྲིབ་པ་མི་མངའ་བ། ཆགས་པ་མ་མཆིས་པའི་མིག་གི་ཡུལ་བརྙེས་པ། མཉམ་པ་ཉིད་ཀྱི་རྗེས་སུ་ཞུགས་པའི་སྐུ་དང་ལྡན་པ་ཆོས་ཀྱི་དབྱིངས་མུན་པ་མ་མཆིས་པར་ཞུགས་པའི་ཡེ་ཤེས་ཀྱི་སྤྱན་བརྙེས་
པའི་དེ་བཞིན་གཤེགས་པ་དེ་དག་ཐམས་ཅད་ཀྱི་སྤྱན་སྔར་བདག་མངོན་སུམ་དུ་གྱུར་པར་མོས་ནས། དེ་བཞིན་གཤེགས་པའི་ཡུལ་ཚད་མེད་པར་བརྟགས་ཏེ། སྐྲའི་རྩེ་མོའི་ཆ་ཤས་བཞག་པའི་ཁྱོན་ཙམ་རེ་རེ་ལ་དེ་བཞིན་གཤེགས་པ་སེམས་ཅན་ཐམས་ཅད་སྙེད་དུ་ལྷག་པར་མོས་སོ། །
སྐྲའི་རྩེ་མོའི་ཆ་ཤས་གཅིག་བཞག་པའི་ཁྱོན་ལ་ཇི་ལྟ་བ་དེ་བཞིན་དུ་ཆོས་ཀྱི་དབྱིངས་ཐམས་ཅད་དུ་ཡང་དེ་བཞིན་གཤེགས་པ་སེམས་ཅན་ཐམས་ཅད་སྙེད་དུ་ལྷག་པར་མོས་སོ། །དེ་བཞིན་གཤེགས་པ་རེ་རེ་ལ་ཡང་ལུས་ཐོབ་པ་འགྲོ་བ་ཐམས་ཅད་ཀྱི་སེམས་སྙེད་ཀྱིས་ཞབས་ཀྱི་འོག་ཏུ་
གཏུགས་ཏེ་ཕྱག་འཚལ་ལོ། །ལུས་ཐོབ་པ་རེ་རེ་ལ་ཡང་མགོ་དག་གི་ལམ་ངེས་པའི་ཚིག་སྙེད་དུ་ལྷག་པར་མོས་སོ། །མགོ་རེ་རེ་ལ་ཡང་ཁའི་སྒོ་ཞིང་ཐམས་ཅད་ཀྱི་རྡུལ་ཕྲ་རབ་ཏུ་དབྱེ་བ་སྙེད་དུ་ལྷག་པར་མོས་སོ། །ཁའི་སྒོ་རེ་རེ་ལ་ཡང་ལྕེའི་རྩེ་མོ་ཞིང་ཐམས་ཅད་ཀྱི་རྡུལ་ཕྲ་རབ་ཏུ་

དབྱེ་བ་སྙེད་དུ་ལྷག་པར་མོས་སོ། །ལྕེའི་རྩེ་མོའི་དཀྱིལ་འཁོར་རེ་རེ་ལ་ཡང་ངེས་པའི་ཚིག་གི་སྒྲར་བརྟགས་པའི་ཐ་སྙད་ཡང་དག་པར་རྫོགས་པའི་སངས་རྒྱས་ཀྱིས་བཀའ་སྩལ་པ། འགྲོ་བ་ཐམས་ཅད་ཀྱི་ཚིག་གི་སྤྱོད་པ་དང་མཉམ་པས་སྒྲིབ་པ་མ་མཆིས་པའི་དཀྱིལ་འཁོར་དང་འཐུན་
པར་གྱུར་ནས་ལྷག་པའི་བསམ་པ་ཉོན་མོངས་པའི་རི་ཆེན་པོ་རྣམ་པར་འཐོར་བ་ལས་བྱུང་བའི་སྒྲིབ་པར་འགྱུར་བའི་ལས་དེ་དག་འཆགས་སོ། །མི་འཆབ་བོ། །འཇིག་རྟེན་གྱི་ཁམས་ཐམས་ཅད་དུ་འཚལ་བར་འགྱུར་བའི་བཤགས་པས་འཆགས་སོ། །བསལ་ལོ། །རྣམ་
པར་གཞིག་གོ། །རབ་ཏུ་གཞོམ་མོ། །སྤང་ངོ་། །གདོན་ཏོ། །ལས་ལ་དབང་བས་དབང་བགྱིའོ། །སྟོབས་བསྐྱེད་པ་བརྙེས་པ་རྣམས་ཀྱི་བདེ་བ་ཉེ་བར་བསྟན་པའི་སླད་དུ་ཡོངས་སུ་བསྔོའོ། །གོང་དུ་ཡང་བྱང་ཆུབ་སེམས་དཔའ་དེ་བཞིན་གཤེགས་པ་ཐམས་ཅད་
མཉེས་པར་བགྱིད་པར་འཚལ་བ། བྱང་ཆུབ་སེམས་དཔའི་སྤྱོད་པ་ཐམས་ཅད་ཡོངས་སུ་སྦྱོང་བར་འཚལ་བ། བྱང་ཆུབ་སེམས་དཔའ་རྣམ་པར་གཞག་པ་ཐམས་ཅད་ལས་ཡང་དག་པར་འདའ་བར་འཚལ་བ། བྱང་ཆུབ་སེམས་དཔའི་སྨོན་ལམ་ཐམས་ཅད་ཡོངས་སུ་རྫོགས་པར་
བགྱིད་པར་འཚལ་བ། བྱང་ཆུབ་སེམས་དཔའི་གཏེར་ཐམས་ཅད་ཐོབ་པར་འཚལ་བ། དེ་བཞིན་གཤེགས་པ་ཐམས་ཅད་ཀྱི་བསྟན་པ་ཡང་དག་པར་འཛིན་པར་འཚལ་བ། ཕ་རོལ་ཏུ་ཕྱིན་པ་ཐམས་ཅད་ཡོངས་སུ་རྫོགས་པར་བགྱིད་པར་འཚལ་བ། སེམས་ཅན་ཐམས་ཅད་
ཡོངས་སུ་སྨིན་པར་བགྱིད་པར་འཚལ་བ། འཇིག་རྟེན་གྱི་ཁམས་ཡོངས་སུ་དག་པ་ཐམས་ཅད་རྟོགས་པར་འཚལ་བ། བྱང་ཆུབ་སེམས་དཔའ་ཀུན་དུ་བཟང་པོའི་སྤྱོད་པའི་སྨོན་ལམ་ཡོངས་སུ་རྫོགས་པར་བགྱི་བ་རྟོགས་པར་འཚལ་བ་རྣམས་ཀྱིས་ཇི་ལྟར་སངས་རྒྱས་བཅོམ་ལྡན་འདས་
བདག་གིས་སངས་རྒྱས་ཀྱི་མཁྱེན་པ་ཆགས་པ་མི་མངའ་ཞིང་སྒྲིབ་པ་མི་མངའ་བས་མཁྱེན་ཅིང་རབ་ཏུ་མཁྱེན་པ་དེ་ལྟ་བུས་སྒྲིབ་པར་འགྱུར་བའི་ལས་བཤགས་པར་བགྱི་བ་དེ་བཞིན་དུ་ཅི་ནས་ཀྱང་བདག་གིས་བཤགས་པས་ལེགས་པར་བཤགས་པར་འགྱུར་བ་དང་། ཡོངས་སུ་དག་པར་འགྱུར་

བ་དང་། འོད་གསལ་བར་འགྱུར་བ་དང་། ཁ་ན་མ་ཐོ་བ་མ་མཆིས་པར་འགྱུར་བ་དང་། གསལ་བར་འགྱུར་བ་དང་། དུག་མ་མཆིས་པར་འགྱུར་བ་དང་། སྒྲིབ་པ་མ་མཆིས་པར་འགྱུར་བ་དང་། བར་དུ་གཅོད་པ་མ་མཆིས་པར་འགྱུར་བ་དང་། ཡོན་ཏན་གྱི་
ཆོས་ཐམས་ཅད་སྒྲུབ་པར་འགྱུར་བ་དེ་ལྟ་བུར་སྒྲིབ་པར་འགྱུར་བའི་ལས་ཀྱི་ཉེས་པ་ཐམས་ཅད་འཆགས་སོ། །ཇི་ལྟར་བདག་གི་དོན་དུ་བཤགས་པ་དེ་བཞིན་དུ་འཇིག་རྟེན་གྱི་ཁམས་རབ་འབྱམ་མ་ལུས་པ་ཐམས་ཅད་ན་སེམས་ཅན་ཇི་ཙམ་སེམས་ཅན་གྱི་རིས་ན་མཆིས་པ་སེམས་ཅན་གྱི་ཁམས་
དེ་དག་ཐམས་ཅད་ཀྱི་ཆེད་དུ་ཡང་སྒྲིབ་པར་འགྱུར་བའི་ལས་ཀྱི་ཉེས་པ་འཆགས་སོ། །དེ་ལྟར་བདག་གི་ལས་ཀྱི་ཉེས་པ་སྒྲིབ་པར་འགྱུར་བ་ཐམས་ཅད་སོ་སོར་བཤགས་ནས་སྒྲིབ་པ་མ་མཆིས་པ་རྣམ་པར་དག་པའི་དཀྱིལ་འཁོར་ལ་གནས་ཏེ། འགྲོ་བ་ཐམས་ཅད་ཀྱི་དགེ་བའི་རྩ་བ་ལ་རྗེས་
སུ་ཡི་རང་ངོ་། །དགེ་བའི་རྩ་བའི་ཚོགས་ཀྱི་ཁྱད་པར་གང་གིས་ངན་སོང་དབུལ་པོ་ཡི་དགས་ཀྱི་མི་ཁོམ་པར་མཆི་བ་ཐམས་ཅད་རྣམ་པར་བཟློག་པ་དེ་ལ་ཡང་རྗེས་སུ་ཡི་རང་ངོ་། །སེམས་ལ་གནོད་པ་མ་མཆིས་ཤིང་འོད་གསལ་བ། དགེ་བའི་རྩ་བའི་ཚོགས་ཀྱི་ཁྱད་པར་གང་གིས་
ངན་སོང་དུད་འགྲོའི་སྐྱེ་གནས་ཀྱི་མི་ཁོམ་པར་མཆི་བ་ཐམས་ཅད་རྣམ་པར་བཟློག་པ་དེ་ལ་ཡང་རྗེས་སུ་ཡི་རང་ངོ་། །དགེ་བའི་རྩ་བའི་ཚོགས་ཀྱི་ཁྱད་པར་གང་གིས་སེམས་ཅན་དམྱལ་བའི་མི་ཁོམ་པར་མཆི་བ་ཐམས་ཅད་རྣམ་པར་བཟློག་པ་དེ་ལ་ཡང་རྗེས་སུ་ཡི་རང་ངོ་། །བཟང་པོའི་
གནས་དགེ་བའི་རྩ་བའི་ཚོགས་ཀྱི་ཁྱད་པར་གང་གིས་ལྷ་དང་མིར་སྐྱེ་བ་ཐམས་ཅད་ཡོངས་སུ་འཛིན་པ་དེ་ལ་ཡང་རྗེས་སུ་ཡི་རང་ངོ་། །དགེ་བའི་རྩ་བའི་ཚོགས་ཀྱི་ཁྱད་པར་གང་གིས་བསམ་གཏན་གྱི་དགའ་བ་དང་མགུ་བ་དང་བདེ་བ་ཐམས་ཅད་མྱོང་བ་དེ་ལ་ཡང་རྗེས་སུ་ཡི་རང་ངོ་། །
དགེ་བའི་རྩ་བའི་ཚོགས་ཀྱི་ཁྱད་པར་གང་གིས་འཁོར་བ་ལ་ཡིད་འབྱུང་བའི་སེམས་ཐོབ་པ་དེ་ལ་ཡང་རྗེས་སུ་ཡི་རང་ངོ་། །དགེ་བའི་རྩ་བའི་ཚོགས་ཀྱི་ཁྱད་པར་གང་གིས་དགེ་བའི་བཤེས་གཉེན་ཡང་དག་པས་ཡོངས་སུ་བཟུང་བ་ཐོབ་པ་དེ་ལ་ཡང་རྗེས་སུ་ཡི་རང་ངོ་། །དགེ་བའི་རྩ་

བའི་ཚོགས་ཀྱི་ཁྱད་པར་གང་གིས་དགེ་བའི་བཤེས་གཉེན་རྣམས་ལ་གུས་པའི་སེམས་རྙེད་པ་དེ་ལ་ཡང་རྗེས་སུ་ཡི་རང་ངོ་། །དགེ་བའི་རྩ་བའི་ཚོགས་ཀྱི་ཁྱད་པར་གང་གིས་སངས་རྒྱས་བཅོམ་ལྡན་འདས་རྣམས་མཉེས་པར་བགྱིད་དེ། མཉེས་ནས་མི་མཉེས་པར་མི་འགྱུར་བ་དེ་ལ་ཡང་
རྗེས་སུ་ཡི་རང་ངོ་། །དགེ་བའི་རྩ་བའི་ཚོགས་ཀྱི་ཁྱད་པར་གང་གིས་སངས་རྒྱས་བཅོམ་ལྡན་འདས་རྣམས་ལས་ཆོས་བསྟན་པ་མངོན་སུམ་དུ་ཉན་ཅིང་ཐོས་ནས། སོམ་ཉི་དང་། ཡིད་གཉིས་བཟློག་པ་དེ་ལ་ཡང་རྗེས་སུ་ཡི་རང་ངོ་། །དགེ་བའི་རྩ་བའི་ཚོགས་ཀྱི་ཁྱད་པར་གང་
གིས་འཇིག་རྟེན་གསུམ་པོ་ཐམས་ཅད་ནས་འབྱུང་བ་རྟོགས་པ་དེ་ལ་ཡང་རྗེས་སུ་ཡི་རང་ངོ་། །དགེ་བའི་རྩ་བའི་ཚོགས་ཀྱི་ཁྱད་པར་གང་གིས་སེམས་ཅན་ཐམས་ཅད་ཀྱི་སྟོན་པའི་སེམས་བསྐྱེད་པ་རྙེད་པ་དེ་ལ་ཡང་རྗེས་སུ་ཡི་རང་ངོ་། །དགེ་བའི་རྩ་བའི་ཚོགས་ཀྱི་ཁྱད་པར་གང་གིས་འགྲོ་བ་
ཐམས་ཅད་ཐོགས་པ་མ་མཆིས་པའི་མིག་ཐོབ་པ་དེ་ལ་ཡང་རྗེས་སུ་ཡི་རང་ངོ་། །དགེ་བའི་རྩ་བའི་ཚོགས་ཀྱི་ཁྱད་པར་གང་གིས་ངོས་མཉམ་པའི་རྗེས་སུ་མཆི་བ་སྨོན་ལམ་ཆེན་པོ་ཡོངས་སུ་དག་པར་བགྱིད་པ་དེ་ལ་ཡང་རྗེས་སུ་ཡི་རང་ངོ་། །དགེ་བའི་རྩ་བའི་ཚོགས་ཀྱི་ཁྱད་པར་
གང་གིས་ལུས་མཚན་དང་། དཔེ་བྱད་བཟང་པོས་ལེགས་པར་བརྒྱན་པ་ཐོབ་པ་དེ་ལ་ཡང་རྗེས་སུ་ཡི་རང་ངོ་། །དགེ་བའི་རྩ་བའི་ཚོགས་ཀྱི་ཁྱད་པར་གང་གིས་ཡོན་ཏན་ཐམས་ཅད་རྣམ་པར་དག་པའི་རྒྱན་དག་ཡོངས་སུ་དག་པ་ཐོབ་པ་དེ་ལ་ཡང་རྗེས་སུ་ཡི་རང་ངོ་། །དགེ་བའི་རྩ་བའི་ཚོགས་ཀྱི་ཁྱད་
པར་གང་གིས་སྟོབས་བཅུས་བརྒྱན་པའི་སེམས་རིན་པོ་ཆེ་ཐོབ་པ་དེ་ལ་ཡང་རྗེས་སུ་ཡི་རང་ངོ་། །དགེ་བའི་རྩ་བའི་ཚོགས་ཀྱི་ཁྱད་པར་གང་གིས་ཐམས་ཅད་མཁྱེན་པ་ཉིད་ཀྱི་ཤུགས་ལས་ཕྱིར་མི་ལྡོག་པ་ཐོབ་པ་དེ་ལ་ཡང་རྗེས་སུ་ཡི་རང་ངོ་། །དགེ་བའི་རྩ་བའི་ཚོགས་ཀྱི་ཁྱད་
པར་གང་གིས་གཟུངས་ཀྱི་རིགས་ཁོང་དུ་ཆུད་པ་དེ་ལ་ཡང་རྗེས་སུ་ཡི་རང་ངོ་། །དགེ་བའི་རྩ་བའི་ཚོགས་ཀྱི་ཁྱད་པར་གང་གིས་ཆོས་ཀྱི་དབྱིངས་རྣམ་པར་དག་པ་ཁོང་དུ་ཆུད་པ་དེ་ལ་ཡང་རྗེས་སུ་ཡི་རང་ངོ་། །དགེ་བའི་རྩ་བའི་ཚོགས་ཀྱི་ཁྱད་པར་གང་གིས་རྣམ་པར་སྨིན་པ་མི་ཟད་པ་ལ་

གནས་ཏེ། མངོན་པར་ཤེས་པ་ཐོབ་པ་དེ་ལ་ཡང་རྗེས་སུ་ཡི་རང་ངོ་། །དགེ་བའི་རྩ་བའི་ཚོགས་ཀྱི་ཁྱད་པར་གང་གིས་སངས་རྒྱས་ཀྱི་ཞིང་གི་རྒྱན་བསྒྲུབ་པ་ཁོང་དུ་ཆུད་པ་དེ་ལ་ཡང་རྗེས་སུ་ཡི་རང་ངོ་། །དགེ་བའི་རྩ་བའི་ཚོགས་ཀྱི་ཁྱད་པར་གང་གིས་
བདུད་ཀྱི་རྩོད་པའི་དམག་ཚོགས་ཐམས་ཅད་རབ་ཏུ་བཅོམ་ནས་ཁྱུ་མཆོག་ཏུ་གྱུར་པ་ཁོང་དུ་ཆུད་པ་དེ་ལ་ཡང་རྗེས་སུ་ཡི་རང་ངོ་། །དགེ་བའི་རྩ་བ་ཉན་ཐོས་དང་། རང་སངས་རྒྱས་ཐམས་ཅད་ཀྱི་ཆོས་མཉམ་པ་ཉིད་ལས་སྐྱེས་པའི་རིག་པ་དང་། རྣམ་པར་གྲོལ་བ་དང་། འདོད་
ཆགས་དང་བྲལ་བ་དང་། ཟག་པ་མ་མཆིས་པ་དང་ལྡན་པ་གང་ལགས་པ་དེ་དག་ལ་ཡང་རྗེས་སུ་ཡི་རང་ངོ་། །བྱང་ཆུབ་སེམས་དཔའ་ཐམས་ཅད་ཀྱི་དགེ་བའི་རྩ་བ་གང་དག་བྱང་ཆུབ་སེམས་དཔའི་སྤྱོད་པ་ཐམས་ཅད་དང་ལྡན་པ་ནས། བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཁོང་དུ་ཆུད་པ་དང་ལྡན་པའི་བར་གྱི་དགེ་བའི་རྩ་བ་དེ་དག་ལ་ཡང་རྗེས་སུ་ཡི་རང་ངོ་། །དེ་བཞིན་གཤེགས་པ་ལ་མཆོད་པའི་ལས་ཀྱི་སླད་དུ། དེ་བཞིན་གཤེགས་པ་ལ་མཆོད་པ་དང་། རིམ་གྲོར་བགྱི་བ་བྱང་ཆུབ་སེམས་དཔའ་དབང་བསྐུར་བ་རྣམས་ཀྱི་ཁྱད་པར་དུ་འགྲོ་
བ་ཞེས་བགྱི་བས་འཇིག་རྟེན་གྱི་ཁམས་རབ་འབྱམ་ཐམས་ཅད་དུ་འཇུག་པ་གང་ལགས་པ་དེ་ལ་ཡང་རྗེས་སུ་ཡི་རང་ངོ་། །དེ་བཞིན་གཤེགས་པ་ལ་མཆོད་པའི་ལས་ཀྱི་སླད་དུ། དེ་བཞིན་གཤེགས་པ་ལ་མཆོད་པ་དང་རིམ་གྲོར་བགྱི་བ་བྱང་ཆུབ་སེམས་དཔའ་དགའ་ལྡན་གྱི་གནས་མཆོག་ན་
གནས་པ་རྣམས་ཀྱི་ཁྱད་པར་དུ་འགྲོ་བ་ཞེས་བགྱི་བས་འཇིག་རྟེན་གྱི་ཁམས་རབ་འབྱམ་ཐམས་ཅད་དུ་འཇུག་པ་གང་ལགས་པ་དེ་ལ་ཡང་རྗེས་སུ་ཡི་རང་ངོ་། །དེ་བཞིན་གཤེགས་པ་ལ་མཆོད་པའི་ལས་ཀྱི་སླད་དུ་དེ་བཞིན་གཤེགས་པ་ལ་མཆོད་པ་དང་། རིམ་གྲོ་བགྱི་བ་བྱང་ཆུབ་
སེམས་དཔའ་མངལ་ན་གནས་པ་རྣམས་ཀྱི་བསོད་ནམས་ཀྱི་མེ་ཏོག་རྒྱས་པའི་སྙིང་པོ་སྣང་བ་ཞེས་བགྱི་བས་འཇིག་རྟེན་གྱི་ཁམས་རབ་འབྱམ་ཐམས་ཅད་དུ་འཇུག་པ་གང་ལགས་པ་དེ་ལ་ཡང་རྗེས་སུ་ཡི་རང་ངོ་། །དེ་བཞིན་གཤེགས་པ་ལ་མཆོད་པའི་ལས་ཀྱི་སླད་དུ། དེ་བཞིན་གཤེགས་

པ་ལ་མཆོད་པ་དང་། རིམ་གྲོ་བགྱི་བ་བྱང་ཆུབ་ཀྱི་སྙིང་པོ་མཆོག་དམ་པ་ན་གནས་པ་བྱང་ཆུབ་སེམས་དཔའ་ཀུན་དུ་བཟང་པོའི་གཙུག་གི་བླ་མ་ཞེས་བགྱི་བས་འཇིག་རྟེན་གྱི་ཁམས་རབ་འབྱམ་ཐམས་ཅད་དུ་འཇུག་པ་གང་ལགས་པ་དེ་ལ་ཡང་རྗེས་སུ་ཡི་རང་ངོ་། །ཡང་དག་པར་རྫོགས་
པའི་སངས་རྒྱས་དུས་གསུམ་དུ་གཤེགས་པ་རྣམས་ཀྱི་དགེ་བའི་རྩ་བ་ཐབས་མཁས་པ་བསམ་གྱིས་མི་ཁྱབ་པས་རྣམ་པར་འཕྲུལ་པ་དང་ལྡན་པ་གང་ལགས་པ་དེ་ལ་ཡང་རྗེས་སུ་ཡི་རང་ངོ་། །གོང་དུ་ཡང་བྱང་ཆུབ་སེམས་དཔའ་བདུད་ཀྱི་རྩོད་པའི་དམག་ཚོགས་ཐམས་ཅད་རབ་ཏུ་
གདུལ་བར་འཚལ་བ། ཕས་ཀྱི་རྒོལ་བའི་ཚོགས་ཐམས་ཅད་ཟིལ་གྱིས་གནོན་པར་འཚལ་བ། མ་རིག་པའི་མུན་པ་མུན་གནག་དང་། རབ་རིབ་ཀྱི་ལིང་ཏོག་མང་པོ་སེལ་བར་འཚལ་བ་ངན་སོང་དང་། མི་ཁོམ་པ་དང་། ངན་འགྲོའི་ལམ་ཐམས་ཅད་གཅོད་པར་འཚལ་བ།
ཡེ་ཤེས་ཀྱི་དཀྱིལ་འཁོར་ཐམས་ཅད་རྣམ་པར་སྦྱོང་བར་འཚལ་བ། ཆོས་ཐམས་ཅད་སྣང་བ་ཐོབ་པར་འཚལ་བ། ཀུན་དུ་བཟང་པོའི་ལུས་ཁྱུ་མཆོག་ཏུ་གྱུར་པ་ཐོབ་པར་འཚལ་བ། འགྲོ་བ་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་ཚིམ་པར་བགྱིད་པའི་དབྱངས་ཀྱི་ཡན་ལག་རྣམ་པར་
དག་པ་ཐོབ་པར་འཚལ་བ། ཆོས་ཐམས་ཅད་ཇི་ལྟ་བ་བཞིན་དུ་རྟོགས་པར་བགྱི་བའི་སླད་དུ། ཡེ་ཤེས་ཀྱི་མིག་རྣམ་པར་སྦྱོང་བར་འཚལ་བ། འཁོར་བའི་འཁོར་ལོ་བཟློག་པར་འཚལ་བ། ཆོས་ཀྱི་འཁོར་ལོ་ཆེན་པོ་རབ་ཏུ་བསྐོར་བར་འཚལ་བ། སྟོབས་བཅུའི་ཡེ་ཤེས་ཀྱིས་
ནོན་པར་འཚལ་བ་རྣམས་ཀྱིས་ཇི་ལྟར་སངས་རྒྱས་བཅོམ་ལྡན་འདས་དག་གིས་སངས་རྒྱས་ཀྱི་མཁྱེན་པ་ཆགས་པ་མི་མངའ་ཞིང་སྒྲིབ་པ་མི་མངའ་བས་མཁྱེན་ཅིང་རབ་ཏུ་མཁྱེན་པ་དེ་ལྟ་བུས་དགེ་བའི་རྩ་བའི་ཚོགས་ཐམས་ཅད་ལ་རྗེས་སུ་ཡི་རང་བར་བགྱི་བ་དེ་བཞིན་དུ་བདག་ཀྱང་རྗེས་སུ་
ཡི་རང་བའི་མཆོག་གིས་རྗེས་སུ་ཡི་རང་ངོ་། །གཙོ་བོ་དང་། དམ་པ་དང་། ཁྱད་པར་དུ་འཕགས་པ་དང་། རབ་དང་། ཕུལ་དང་། གྱ་ནོམ་པ་དང་། བླ་མ་དང་། བླ་ན་མ་མཆིས་པ་དང་། མཉམ་པ་མ་མཆིས་པ་དང་། མི་མཉམ་པ་དང་མཉམ་པ་དང་། མཚུངས་

པ་མ་མཆིས་པ་དང་། སྣང་བ་མ་མཆིས་པ་དང་། བདག་ཉིད་ཆེན་པོ་དང་། ཟིལ་གྱིས་མི་ནོན་པ་དང་། ཡོན་ཏན་གྱི་ཆོས་ཐམས་ཅད་སྡུད་པ་དང་། ཡང་དག་པར་རྫོགས་པའི་སངས་རྒྱས་ཀྱིས་བཀའ་སྩལ་པའི་རྗེས་སུ་ཡི་རང་བས་རྗེས་སུ་ཡི་རང་ངོ་། །
ཇི་ལྟར་བདག་གི་དོན་དུ་རྗེས་སུ་ཡི་རང་བ་དེ་བཞིན་དུ་འཇིག་རྟེན་གྱི་ཁམས་རབ་འབྱམ་མ་ལུས་པ་ཐམས་ཅད་ན་སེམས་ཅན་ཇི་ཙམ་སེམས་ཅན་གྱི་རིས་ན་མཆིས་པ་སེམས་ཅན་གྱི་ཁམས་དེ་དག་ཐམས་ཅད་ཀྱི་ཆེད་དུ་ཡང་དགེ་བའི་རྩ་བ་དེ་དག་ཐམས་ཅད་ལ་རྗེས་སུ་ཡི་རང་ངོ་། །དེ་ལྟར་
བདག་དགེ་བའི་རྩ་བ་ཐམས་ཅད་ལ་རྗེས་སུ་ཡི་རངས་ནས་སངས་རྒྱས་བཅོམ་ལྡན་འདས་ཐམས་ཅད་ལ་བསྐུལ་ལོ། །དེ་ལྟར་ན་ཕྱོགས་བཅུའི་འཇིག་རྟེན་གྱི་ཁམས་ཕྱོགས་བཅུའི་མུ་ཐུག་ཡོངས་སུ་རྗེ་བར་འཇུག་པ། འཇིག་རྟེན་གྱི་ཁམས་ཐམས་ཅད་གཞི་ཕྱལ་བའི་
རྗེས་སུ་འགྲོ་ཞིང་འཇུག་པ། སྟེང་གཡོགས་མེད་པའི་རྒྱུད་ཀྱི་ཕྱོགས་ཡོངས་སུ་རྗེ་བར་བཤད་པ། འཆོལ་བའི་རྒྱུད་ཀྱི་འཇིག་རྟེན་གྱི་ཁམས་མངོན་དུ་སྒྲུབ་པ། རྣམ་པར་དབྱེ་བའི་མིག་འཕྲུལ་ལྟ་བུ་ཆོས་ཀྱི་དབྱིངས་སུ་གཏོགས་པའི་འཇིག་རྟེན་གྱི་ཁམས་རབ་འབྱམ་ཐམས་ཅད་
ན་སངས་རྒྱས་བཅོམ་ལྡན་འདས་གང་དག་ཁ་ཅིག་བདུད་ཀྱི་རྩོད་པའི་དམག་ཚོགས་ཐམས་ཅད་མངོན་པར་བཏུལ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། ཆོས་ཐམས་ཅད་ལ་སྒྲིབ་པ་མེད་པ་ཉིད་བརྙེས་པ། བྱང་ཆུབ་ཀྱི་སྙིང་པོ་
མཆོག་དམ་པར་གཤེགས་པ། ཆོས་ཀྱི་ཚུལ་གཡོ་བ་མ་མཆིས་པའི་རང་བཞིན་དུ་གྱུར་པ། ཆོས་ཀྱི་སྐུ་རབ་ཏུ་ཞི་བ་དང་ལྡན་པ་དག་འདི་ལྟ་སྟེ། ཆོས་གཟུང་བར་མཛད་པའི་སླད་དུ་འཇིག་རྟེན་ཐམས་ཅད་ན་བསྐུལ་བའི་ས་ལ་གཞེས་ཏེ། ཆོས་ཀྱི་འཁོར་ལོ་མི་སྐོར་བའི་སངས་རྒྱས་བཅོམ་ལྡན་
འདས་དེ་དག་ལ་བདག་གིས་བླ་མ་ལ་རི་མོ་གུས་པར་བགྱི་བ་ཆེན་པོས་ལུས་བཏུད་པ་བགྱིས་ནས་ཆོས་ཀྱི་འཁོར་ལོ་ཆེན་པོ་རབ་ཏུ་བསྐོར་བར་བསྐུལ་གྱིས། བྱང་ཆུབ་སེམས་དཔའ་ཐམས་ཅད་ཡོངས་སུ་གྲུབ་པར་བགྱི་བ་དང་། འགྲོ་བ་ཐམས་ཅད་བསྐྱབ་པ་དང་། ཉོན་མོངས་པ་ཐམས་ཅད་

རྣམ་པར་བྱང་བར་བགྱི་བ་དང་། སོམ་ཉི་ཐམས་ཅད་ཡང་དག་པར་གཞོམ་པ་དང་། ཐེ་ཙོམ་ཐམས་ཅད་ཀུན་དུ་གཅད་པ་དང་། སངས་རྒྱས་དང་། ཆོས་དང་། དགེ་འདུན་ཐམས་ཅད་རབ་ཏུ་བསྒྲགས་པ་དང་། སངས་རྒྱས་ཀྱི་ཞིང་ཐམས་ཅད་དུ་སངས་རྒྱས་འབྱུང་བ་
རྒྱུན་མི་འཆད་པར་བགྱི་བའི་སླད་དུ་སངས་རྒྱས་བཅོམ་ལྡན་འདས་རྣམས་ཀྱིས་ཕ་རོལ་ཏུ་ཕྱིན་པའི་ཡན་ལག་ཐམས་ཅད་ཤིན་ཏུ་ཡོངས་སུ་སྦྱངས་པ། ཕྱིར་མི་ཟློག་པ། སྟོབས་བཅུས་ཟིལ་གྱིས་མི་ནོན་པ། འཁོར་བའི་འཁོར་ལོ་རབ་ཏུ་འཇོམས་པ། ལྟ་བར་གྱུར་པ་དང་། ཉོན་
མོངས་པ་ཐམས་ཅད་རབ་ཏུ་འཇིག་པ། སོ་སོ་ཡང་དག་པར་རིག་པ་བཞི་རྗེས་སུ་བསྒྲགས་པ། ཤིན་ཏུ་རྣམ་པར་ཕྱེ་བའི་སྒྲ་དང་ལྡན་པ། འཕགས་པའི་བདེན་པ་བཞིའི་ཚུལ་ངེས་པར་བརྟགས་པའི་ཆོས་ཀྱི་འཁོར་ལོ་ཆེན་པོ་བསྐོར་བར་གསོལ་ལོ། །སྙིང་རྗེ་ཆེན་པོའི་སྟོབས་ལ་ལྷག་པར་
དམིགས་པར་བགྱི་བ་དང་། རང་གི་བྱང་ཆུབ་སེམས་དཔའི་སྤྱོད་པ་རྒྱུན་མི་གཅད་པར་བགྱི་བ་དང་། བྱང་ཆུབ་སེམས་དཔའི་ལམ་ཐམས་ཅད་ཡོངས་སུ་སྦྱང་བའི་སླད་དུ་བྱང་ཆུབ་སེམས་དཔའ་ཐམས་ཅད་ལ་ཡང་བདག་སྐུལ་ལོ། །སྙིང་རྗེ་ཆེན་པོའི་སྟོབས་ལ་ལྷག་པར་དམིགས་
པར་བགྱི་བའི་སླད་དུ་ཉན་ཐོས་དང་། རང་སངས་རྒྱས་ཐམས་ཅད་ལ་ཡང་བདག་སྐུལ་ལོ། །མི་དགེ་བའི་ཆོས་ཐམས་ཅད་རྣམ་པར་བཟློག་པ་དང་། དགེ་བའི་ཆོས་ཐམས་ཅད་ཡོངས་སུ་རྫོགས་པར་བགྱི་བའི་སླད་དུ། སེམས་ཅན་ཐམས་ཅད་ལ་ཡང་བདག་སྐུལ་ལོ། །གོང་
དུ་ཡང་བྱང་ཆུབ་སེམས་དཔའ་བསྐུལ་བའི་ཕུང་པོ་དང་ལྡན་པ་རྣམས་ཀྱིས་ཇི་ལྟར་སངས་རྒྱས་བཅོམ་ལྡན་འདས་རྣམས་ཀྱིས་སངས་རྒྱས་ཀྱི་མཁྱེན་པ་ཆགས་པ་མི་མངའ་ཞིང་སྒྲིབ་པ་མི་མངའ་བས་མཁྱེན་ཅིང་རབ་ཏུ་མཁྱེན་པ་དེ་ལྟ་བུས་སངས་རྒྱས་ཐམས་ཅད་དང་། བྱང་ཆུབ་སེམས་དཔའ་
ཐམས་ཅད་དང་། ཉན་ཐོས་དང་། རང་སངས་རྒྱས་ཐམས་ཅད་དང་། སེམས་ཅན་ཐམས་ཅད་ལ་བསྐུལ་བར་བགྱི་བ་དེ་བཞིན་དུ་བདག་ཀྱང་བསྐུལ་བའི་མཆོག་དང་། གཙོ་བོ་དང་། དམ་པ་དང་། ཁྱད་པར་དུ་འཕགས་པ་དང་། རབ་དང་། ཕུལ་དང་། གྱ་ནོམ་པ་དང་།

བླ་མ་དང་། བླ་ན་མ་མཆིས་པ་དང་། གོང་ན་མ་མཆིས་པ་དང་། མཉམ་པ་མ་མཆིས་པ་དང་། མི་མཉམ་པ་དང་མཉམ་པ་དང་། མཚུངས་པ་མ་མཆིས་པ་དང་། སྣང་བ་མ་མཆིས་པ་དང་། བདག་ཉིད་ཆེན་པོ་དང་། ཟིལ་གྱིས་མི་ནོན་པ་དང་།
ཡོན་ཏན་གྱི་ཆོས་ཐམས་ཅད་སྡུད་པ་དང་། ཡང་དག་པར་རྫོགས་པའི་སངས་རྒྱས་ཀྱིས་བཀའ་སྩལ་པའི་བསྐུལ་བས་སྐུལ་ལོ། །ཇི་ལྟར་བདག་གི་དོན་དུ་བསྐུལ་བ་དེ་བཞིན་དུ་འཇིག་རྟེན་གྱི་ཁམས་རབ་འབྱམ་མ་ལུས་པ་ཐམས་ཅད་ན་སེམས་ཅན་ཇི་ཙམ་སེམས་ཅན་གྱི་
རིས་ན་མཆིས་པ་སེམས་ཅན་གྱི་ཁམས་དེ་དག་ཐམས་ཅད་ཀྱི་ཆེད་དུ་ཡང་སྐུལ་ལོ། །གོང་དུ་ཡང་དེ་བཞིན་གཤེགས་པ་ཐམས་ཅད་ལ་བདག་མངོན་པར་གསོལ་བ་ད་ལྟ་ན་ཕྱོགས་བཅུའི་འཇིག་རྟེན་གྱི་ཁམས་ཕྱོགས་བཅུའི་མུ་ཐུག་ཡོངས་སུ་རྗེ་བར་འཇུག་པ། འཇིག་རྟེན་གྱི་ཁམས་
ཐམས་ཅད་གཞི་ཕྱལ་བའི་རྗེས་སུ་འགྲོ་ཞིང་འཇུག་པ། སྟེང་གཡོགས་མེད་པའི་རྒྱུད་ཀྱི་ཕྱོགས་ཡོངས་སུ་རྗེ་བར་བཤད་པ། འཆོལ་བའི་རྒྱུད་ཀྱི་འཇིག་རྟེན་གྱི་ཁམས་མངོན་པར་སྒྲུབ་པ། རྣམ་པར་དབྱེ་བའི་མིག་འཕྲུལ་ལྟ་བུ་ཆོས་ཀྱི་དབྱིངས་སུ་གཏོགས་པའི་འཇིག་རྟེན་གྱི་
ཁམས་རབ་འབྱམ་ཐམས་ཅད་ན་སངས་རྒྱས་བཅོམ་ལྡན་འདས་གང་དག་ཁ་ཅིག་ཆོས་ཀྱི་འཁོར་ལོ་དག་ཤིན་ཏུ་བསྐོར་བ། གདུལ་བ་དག་ཤིན་ཏུ་བཏུལ་བ། ཟམ་པ་དག་ཤིན་ཏུ་བཏགས་པ། བསྟན་པ་དག་ཤིན་ཏུ་བྱིན་གྱིས་བརླབས་པ། བྱང་ཆུབ་སེམས་དཔའ་དག་ཤིན་ཏུ་
ལུང་བསྟན་པ། སངས་རྒྱས་ཀྱི་མཛད་པ་དག་ཤིན་ཏུ་མཛད་པ། ཕས་ཀྱི་རྒོལ་བའི་ཕྱོགས་ཐམས་ཅད་ཤིན་ཏུ་ཚར་གཅད་པ། རྗེས་སུ་བསྟན་པ་རྣམས་ཤིན་ཏུ་འཕགས་པ། ཞིང་ཐམས་ཅད་དུ་བསྒྲགས་པ། འགྲོ་བ་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་རྣམ་པར་དག་པའི་
གནས་རྣམས་ཞིང་དེ་དང་དེ་དག་དང་། འཇིག་རྟེན་གྱི་ཁམས་རབ་འབྱམ་དེ་དང་དེ་དག་དང་། སེམས་ཅན་གྱི་རིས་དེ་དང་དེ་དག་ན་སེམས་ཅན་རབ་འབྱམ་མ་གུས་པར་གྱུར་པ། དབང་པོ་ཡོངས་སུ་སྐྱོ་བ། སྣོད་དུ་མ་གྱུར་པ། དེ་བཞིན་གཤེགས་པ་ལ་ལྟ་བའི་རྒྱུན་བཅད་པ། རྟག་

ཏུ་ཆགས་པ། ཡུལ་ལ་མངོན་པར་དགའ་བ། འདུས་བྱས་ཀྱི་སྒྲིབ་པས་ཟིན་པ། འདོད་པའི་ཡོན་ཏན་ལྔ་ལ་སྲེད་པའི་དབང་དུ་མཆིས་པ་དེ་དང་དེ་དག་ལ་ཡུལ་ཐམས་ཅད་ལ་བདག་མེད་པར་ཡང་དག་པར་སྟོན་ཅིང་སེམས་ཅན་འཁོར་བ་ལ་མངོན་པར་དགའ་བ་རྣམས་ཡིད་འབྱུང་བ་བསྐྱེད་
པའི་ཆེད་དང་། འདུ་བྱེད་ཐམས་ཅད་མི་རྟག་པར་རབ་ཏུ་བསྟན་པའི་ཆེད་དུ་འབྱོར་པ་ཐམས་ཅད་མཐར་རྒུད་པའི་སྒོར་ཡང་དག་པར་སྟོན་ལ། སངས་རྒྱས་ཡོངས་སུ་མྱ་ངན་ལས་འདས་པ་ཆེན་པོ་ཞི་བར་ཡང་དག་པར་བསྟན་པའི་ཆེད་དུ་སྲོག་གི་དབང་པོ་ཐམས་ཅད་མཐར་འཆི་བར་ཡང་དག་
པར་སྟོན་ཅིང་དེ་བཞིན་གཤེགས་པ་འཕོས་ཏེ། ཤིན་ཏུ་བྲལ་ནས་འཇིག་རྟེན་དུ་མི་དགའ་བ་ཆེན་པོ་སྟོན་ལ། ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་གྱི་མདུན་དུ་ཡོངས་སུ་མྱ་ངན་ལས་འདས་པ་ཆེན་པོ་སྟོན་ཏེ། ལྷའི་དབང་པོ་ཐམས་ཅད་ངུ་བ་དང་། ཀླུའི་
དབང་པོ་ཐམས་ཅད་མྱ་ངན་བགྱིད་པ་དང་། གནོད་སྦྱིན་གྱི་དབང་པོ་ཐམས་ཅད་སྨྲེ་སྔགས་འདོན་པ་དང་། འགྲོ་བའི་དབང་པོ་ཐམས་ཅད་རབ་ཏུ་མི་དགའ་བའི་ཡོངས་སུ་མྱ་ངན་ལས་འདས་པ་ཆེན་པོ་ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་གྱི་མདུན་དུ་སྟོན་པ་ན་
བདག་གིས་བླ་མ་ལ་རིམ་གྲོ་གུས་པ་ཆེན་པོས་ལུས་བཏུད་པ་བགྱིས་ནས་སངས་རྒྱས་བཅོམ་ལྡན་འདས་དེ་དག་ལ་སྐུ་ཚེ་བསྲིང་བ་དང་། རིང་དུ་བཞུགས་པར་གསོལ་གྱིས། སངས་རྒྱས་བཅོམ་ལྡན་འདས་རྣམས་འགྲོ་བ་ཐམས་ཅད་སྡུག་བསྔལ་གྱི་ཕུང་པོ་ལས་བཟློག་པ་དང་། སེམས་
ཅན་ཐམས་ཅད་རབ་ཏུ་བདེ་བ་ལ་དགོད་པ་དང་། སེམས་ཅན་ཐམས་ཅད་ཀྱི་དབུལ་པོའི་ལམ་རྣམ་པར་གཅད་པ་དང་། སེམས་ཅན་ཐམས་ཅད་འཁོར་བའི་འབྲོག་དགོན་པ་ཆེན་པོ་ལས་བསྒྲལ་བ་དང་། འགྲོ་བ་ཐམས་ཅད་སངས་རྒྱས་ཀྱི་ཡུལ་སྒྲིབ་པ་མ་མཆིས་པ་ལ་གནས་པ་ལ་
དགོད་པ་དང་། དབུལ་པོའི་ལམ་ཐམས་ཅད་གཅད་པ་དང་། འགྲོ་བ་ཐམས་ཅད་ཆོས་དཀོན་མཆོག་གིས་ཚིམ་པར་བགྱི་བ་དང་། འཇིག་རྟེན་གྱི་ཁམས་ཐམས་ཅད་ཡོངས་སུ་སྦྱང་བ་དང་། འགྲོ་བ་ཐམས་ཅད་གདུལ་བ་མཐར་ཐུག་པ་དང་། བྱང་ཆུབ་སེམས་དཔའ་ཐམས་

ཅད་ཡོངས་སུ་གཟུང་བའི་སླད་དུ་བསྐལ་པ་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་ཁམས་ཀྱི་མཐས་གཏུགས་པར་བཞུགས་སུ་གསོལ། སངས་རྒྱས་བཅོམ་ལྡན་འདས་དེ་དག་ལ་བདག་མངོན་པར་གསོལ་བའི་མཆོག་གིས་མངོན་པར་གསོལ་ལོ། །
གཙོ་བོ་དང་། དམ་པ་དང་། ཁྱད་པར་དུ་འཕགས་པ་དང་། རབ་དང་། ཕུལ་དང་། གྱ་ནོམ་པ་དང་། བླ་མ་དང་། བླ་ན་མ་མཆིས་པ་དང་། གོང་ན་མ་མཆིས་པ་དང་། མཉམ་པ་མ་མཆིས་པ་དང་། མི་མཉམ་པ་དང་མཉམ་པ་དང་། མཚུངས་པ་མ་
མཆིས་པ་དང་། སྣང་བ་མ་མཆིས་པ་དང་། བདག་ཉིད་ཆེན་པོ་དང་། ཟིལ་གྱིས་མི་ནོན་པ་དང་། ཡོན་ཏན་གྱི་ཆོས་ཐམས་ཅད་སྡུད་པ་དང་། ཡང་དག་པར་རྫོགས་པའི་སངས་རྒྱས་ཀྱིས་བཀའ་སྩལ་པའི་མངོན་པར་གསོལ་བས་གསོལ་ལོ། །གོང་དུ་ཡང་
སངས་རྒྱས་བཅོམ་ལྡན་འདས་དག་གིས་ཇི་ལྟར་སངས་རྒྱས་ཀྱི་མཁྱེན་པ་ཆགས་པ་མི་མངའ་ཞིང་སྒྲིབ་པ་མི་མངའ་བས་མཁྱེན་ཅིང་རབ་ཏུ་མཁྱེན་པ་དེ་ལྟ་བུས་བྱང་ཆུབ་སེམས་དཔའ་རྣམས་ཀྱི་གུས་པ་དེ་ལྟ་བུ་དང་། ལུས་བཏུད་པ་དེ་ལྟ་བུ་དང་། ངག་གི་ལས་འབྱུང་བ་དེ་ལྟ་བུ་
དང་། ཡིད་ཀྱི་ལས་སྒྲུབ་པ་དེ་ལྟ་བུས་སངས་རྒྱས་བཅོམ་ལྡན་འདས་མྱ་ངན་ལས་འདའ་བར་ཕྱོགས་པར་དགོངས་པ་ལ་ཕྱི་མའི་མཐའི་མུར་ཐུག་པའི་བསྐལ་པར་སྐུ་ཚེ་ཡོངས་སུ་བསྐྱང་བར་མངོན་པར་གསོལ་བར་བགྱི་བ་དེ་བཞིན་དུ་བདག་ཀྱང་གསོལ་ལོ། །ཇི་ལྟར་བདག་གི་དོན་དུ་
གསོལ་བ་དེ་བཞིན་དུ་འཇིག་རྟེན་གྱི་ཁམས་རབ་འབྱམ་མ་ལུས་པ་ཐམས་ཅད་ན་སེམས་ཅན་ཇི་ཙམ་སེམས་ཅན་གྱི་རིས་ན་མཆིས་པ་སེམས་ཅན་གྱི་ཁམས་དེ་དག་ཐམས་ཅད་ཀྱི་ཆེད་དུ་ཡང་མངོན་པར་གསོལ་ལོ། །བདག་དེ་ལྟར་དེ་བཞིན་གཤེགས་པ་ལ་མངོན་པར་གསོལ་བའི་དགེ་
བའི་རྩ་བའི་སྟོབས་བསྐྱེད་པ་ཐོབ་པར་གྱུར། བསམ་པ་དང་ལྷག་པའི་བསམ་པའི་སྟོབས་ཀྱིས་བརྟན་པར་གྱུར། དད་པ་དང་མོས་པའི་སྟོབས་ལ་ཤིན་ཏུ་གནས་པར་གྱུར་ནས་ལྷག་པའི་བསམ་པའི་སྣོད་ཡངས་པ་ཡང་དག་པར་བསྐྱེད་དེ། དགེ་བའི་རྩ་བ་རབ་འབྱམ་ཐམས་ཅད་ཡང་

དག་པར་གཟུང་ངོ་། །བྱང་ཆུབ་སེམས་དཔའི་དཀྱིལ་འཁོར་ཐམས་ཅད་ན་འདས་པ་དང་། མ་འོངས་པ་དང་། ད་ལྟར་བྱུང་བའི་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་སྒྲིབ་པ་མ་མཆིས་པ་ལ་བརྩོན་པ། ཆོས་ཀྱི་དབྱིངས་ཀྱི་དཀྱིལ་འཁོར་རྣམ་པར་དག་པ་རྗེས་སུ་
དྲན་པ། འགྲོ་བ་ཐམས་ཅད་ཡོངས་སུ་སྐྱོབ་པའི་སེམས་དང་ལྡན་པ། དགེ་བའི་རྩ་བའི་ཚོགས་ཆེན་པོ་བླང་བར་རབ་ཏུ་བརྩོན་པ། བྱང་ཆུབ་སེམས་དཔའ་སེམས་དཔའ་ཆེན་པོའི་རྩོལ་བས་རྩོལ་བ། གོ་ཆ་ཆེན་པོ་བགོས་པ། སྨོན་ལམ་ཆེན་པོ་མངོན་པར་སྒྲུབ་པ། དགེ་
བ་རྩོམ་པ་རྒྱ་ཆེན་པོ་ལ་རབ་ཏུ་བརྩོན་པ། ཕ་རོལ་ཏུ་ཕྱིན་པ་ཆེན་པོའི་དཀྱིལ་འཁོར་དུ་རབ་ཏུ་སྦྱོར་བ། ཡོན་ཏན་གྱི་ས་ཐམས་ཅད་རྣམ་པར་སྦྱོང་བར་འཚལ་བ། མཐའ་དང་དབུང་མ་མཆིས་པའི་ས་ལ་གནས་པར་འཚལ་བ། འགྲོ་བ་ཐམས་ཅད་ཀྱིས་ཡོངས་སུ་རྫོགས་པར་
འཚལ་བ། སེམས་ཀྱི་འཁྲི་ཤིང་རྣམ་པར་སྦྱོང་བར་འཚལ་བ། ཆོས་ཀྱི་སྒོ་ཉེ་བར་སྟོབས་པར་འཚལ་བ། དགེ་བའི་རྩ་བ་ཆེན་པོའི་ཤུགས་རྣམ་པར་སྤེལ་བར་འཚལ་བའི་བྱང་ཆུབ་སེམས་དཔའ་ཐམས་ཅད་ཀྱིས་འདི་ལྟ་སྟེ། སེམས་ཅན་ཐམས་ཅད་སྟོབས་བཅུ་རྣམ་པར་དག་
པའི་མཐར་གཏུགས་པ་དང་། སངས་རྒྱས་ཐམས་ཅད་ལ་མཆོད་པ་དང་། རིམ་གྲོ་བགྱི་བའི་སླད་དུ་ཐམས་ཅད་མཁྱེན་པ་ཉིད་ལ་དགེ་བའི་རྩ་བ་ཇི་སྙེད་ཅིག་བསྐྱེད་པ་དང་། སྐྱེད་པར་འགྱུར་བ་དང་། བསྐྱེད་པ་དེ་དག་དང་། བྱང་ཆུབ་སེམས་དཔའ་ཐམས་ཅད་ཀྱི་དགེ་བའི་
རྩ་བ་གཅིག་པུ་ལ་བཏང་བ་རྣམས་དང་། ཡང་དགེ་བའི་རྩ་བ་གང་དག་བྱང་ཆུབ་སེམས་དཔའི་ས་ནས་སར་འཕར་བའི་མོད་ལས་སྐྱེས་པ་རྣམས་དང་། དགེ་བའི་རྩ་བ་བྱང་ཆུབ་སེམས་དཔའ་ཀུན་དུ་བཟང་པོའི་སྤྱོད་པའི་སྨོན་ལམ་ཡོངས་སུ་རྫོགས་པ་ལས་བྱུང་བ་རྣམས་དང་། བྱང་ཆུབ་
སེམས་དཔའི་ས་འཕྲུལ་པ་དང་ལྡན་པ་ལ་ཞུགས་པ་དང་། ཆོས་ཐམས་ཅད་ཀྱི་དོན་མཐོང་བ་རྗེས་སུ་ཐོབ་པ། ཆགས་པ་མ་མཆིས་པའི་ཡེ་ཤེས་ཀྱི་སའི་སྙིང་པོ་རྡོ་རྗེ་ལྟར་སྲ་བ། མི་ཤིགས་པའི་སེམས་བསྐྱེད་པ་རྣམས་ཀྱི་དགེ་བའི་རྩ་བའི་ཚོགས་ཀུན་ནས་སྒོ། དེ་བཞིན་གཤེགས་

པ་ཐམས་ཅད་མངོན་སུམ་དུ་གྱུར་པ། ལས་ཀྱི་ཤུགས་ཀུན་ནས་ངོས་ཡེ་ཤེས་འཕགས་པ་ཞེས་བགྱི་བས་བསྐྱེད་པ། སེམས་ཀྱི་སྐད་ཅིག་སེམས་ཀྱི་སྐད་ཅིག་ལ་ཡང་དེ་བཞིན་གཤེགས་པ་ལ་མཆོད་པ་དང་། རིམ་གྲོ་བགྱི་བར་འཇུག་སྟེ། དེ་དག་འཇུག་
པ་དང་། དགེ་བའི་རྩ་བའི་རྒྱུ་འཐུན་པས་ཐམས་ཅད་མཁྱེན་པ་ཉིད་ཀྱི་ཚད་མེད་པའི་རྐྱེན་རྣམས་ཀྱིས་སེམས་ཀྱི་སྐད་ཅིག་སེམས་ཀྱི་སྐད་ཅིག་ལ་སེམས་ཅན་གྱི་ཁམས་ཐམས་ཅད་ལ་མངོན་པར་འགེབས་ཤིང་ཇི་ཙམ་དུ་ཐབས་ཀྱི་ཚུལ་བརྗོད་པ་ལ་འཇུག་པ་དཔག་ཏུ་མ་མཆིས་པ་དག་
གིས་བྱང་ཆུབ་སེམས་དཔའ་ཐམས་ཅད་དང་མཉམ་པ་ཉིད་ཀྱང་ཡང་དག་པར་འགྲུབ་སྟེ། བྱང་ཆུབ་སེམས་དཔའ་དེ་དག་ཐམས་ཅད་དགེ་བའི་རྩ་བའི་ཤུགས་དེ་དག་ཐམས་ཅད་རྒྱུན་མི་འཆད་པར་གཏོང་བ་དེ་ཙམ་དུ་བདག་གིས་ལྷག་པའི་བསམ་པའི་སྣོད་ལ་མོས་པའི་ལམ་
ཤིན་ཏུ་རྣམ་པར་དག་པ་ཡང་དག་པར་བསྐྱེད་ནས་དགེ་བའི་རྩ་བའི་ཤུགས་དེ་དག་ཐམས་ཅད་ཡང་དག་པར་མནོད་དོ། །ཡང་དག་པར་གཟུང་ངོ་། །བདག་གིར་བགྱིའོ། །བླང་ངོ་། །ལྷག་པར་མོས་སོ། །ཀུན་གྱི་རྗེས་སུ་ཞུགས་པར་བགྱིའོ། །བདག་གིར་བགྱི་
བ་མཆོག་དང་། གཙོ་བོ་དང་། དམ་པ་དང་། ཁྱད་པར་དུ་འཕགས་པ་དང་། རབ་དང་། ཕུལ་དང་། གྱ་ནོམ་པ་དང་། བླ་མ་དང་། བླ་ན་མ་མཆིས་པ་དང་། མཉམ་པ་མ་མཆིས་པ་དང་། མི་མཉམ་པ་དང་མཉམ་པ་དང་། མཚུངས་པ་མ་མཆིས་པ་དང་། སྣང་
བ་མ་མཆིས་པ་དང་། བདག་ཉིད་ཆེན་པོ་དང་། ཟིལ་གྱིས་མི་ནོན་པ་དང་། ཡོན་ཏན་གྱི་ཆོས་ཐམས་ཅད་སྡུད་པ་དང་། ཡང་དག་པར་རྫོགས་པའི་སངས་རྒྱས་ཀྱིས་བཀའ་སྩལ་པའི་བདག་གིར་བགྱི་བས་བདག་གིར་བགྱིའོ། །གོང་དུ་ཡང་བྱང་ཆུབ་སེམས་དཔའ་བསོད་
ནམས་ཀྱི་ཚོགས་ཡང་དག་པར་ལེན་པར་འཚལ་བ། ཡོན་ཏན་གྱི་ཚོགས་བསྒྲུབ་པར་འཚལ་བ། སྒྲིབ་པ་མ་མཆིས་པའི་ཡུལ་ལ་འཇུག་པར་འཚལ་བ། ཆགས་པ་མ་མཆིས་པའི་མཐའ་ལ་གནས་པར་འཚལ་བ། དུས་གསུམ་ཐམས་ཅད་དུ་འདུག་པར་འཚལ་བ་རྣམས་ཀྱིས་

ཇི་ལྟར་སངས་རྒྱས་བཅོམ་ལྡན་འདས་དག་གིས་མཁྱེན་ཅིང་རབ་ཏུ་མཁྱེན་པ་དེ་ལྟ་བུས་དགེ་བའི་རྩ་བ་ཐམས་ཅད་བདག་གིར་བགྱི་བ་དེ་བཞིན་དུ་བདག་གིས་ཀྱང་བདག་གིར་བགྱིའོ། །བདག་གིར་བགྱི་བའི་མཆོག་དང་། གཙོ་བོ་དང་། དམ་པ་དང་། ཁྱད་པར་དུ་འཕགས་
པ་དང་། དཔེ་མ་མཆིས་པ་དང་། སྣང་བ་མ་མཆིས་པ་དང་། མཉམ་པ་མ་མཆིས་པ་དང་། འདྲ་བ་མ་མཆིས་པ་དང་། མི་འདྲ་བ་རྣམ་པར་དག་པ་དང་། རྟོག་པ་དང་། ཚིག་གི་ལམ་དང་། བསྔགས་པ་བསྟན་པ་མཐའ་ཡས་པ་ཐམས་ཅད་ཀྱིས་བདག་གིར་བགྱི་བས་བདག་གིར་
བགྱིའོ། །ཇི་ལྟར་བདག་གི་དོན་དུ་བདག་གིར་བགྱི་བ་དེ་བཞིན་དུ་འཇིག་རྟེན་གྱི་ཁམས་རབ་འབྱམ་མ་ལུས་པ་ཐམས་ཅད་ན་སེམས་ཅན་ཇི་ཙམ་སེམས་ཅན་གྱི་རིས་ན་མཆིས་པ། སེམས་ཅན་གྱི་ཁམས་དེ་དག་ཐམས་ཅད་ཀྱི་ཆེད་དུ་ཡང་བདག་གིར་བགྱིའོ། །
བདག་གི་མོས་པ་དང་ལྡན་པའི་དགེ་བའི་རྩ་བ་གང་ལགས་པ་དང་། སངས་རྒྱས་ཐམས་ཅད་ལ་ཕྱག་འཚལ་བ་དང་ལྡན་པའི་དགེ་བའི་རྩ་བ་གང་ལགས་པ་དང་། དེ་བཞིན་གཤེགས་པ་ཐམས་ཅད་ལ་ལྷག་པར་མཆོད་པ་དང་ལྡན་པའི་དགེ་བའི་རྩ་བ་གང་ལགས་པ་དང་། མོས་པའི་
སྟོབས་ལས་ངེས་པར་བྱུང་བའི་མཆོད་པ་དང་ལྡན་པའི་དགེ་བའི་རྩ་བ་གང་ལགས་པ་དང་། སྒྲིབ་པར་འགྱུར་བ་ཐམས་ཅད་སེལ་བའི་དགེ་བའི་རྩ་བ་གང་ལགས་པ་དང་། རྗེས་སུ་ཡི་རང་བ་དང་ལྡན་པའི་དགེ་བའི་རྩ་བ་གང་ལགས་པ་དང་། སངས་རྒྱས་ཐམས་ཅད་ལ་བསྐུལ་བ་དང་ལྡན་
པའི་དགེ་བའི་རྩ་བ་གང་ལགས་པ་དང་། དེ་བཞིན་གཤེགས་པ་ཐམས་ཅད་ལ་མངོན་པར་གསོལ་བ་དང་ལྡན་པའི་དགེ་བའི་རྩ་བ་གང་ལགས་པ་དང་། བདག་གི་དགེ་བའི་རྩ་བ་རབ་འབྱམ་ཐམས་ཅད་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཤིན་ཏུ་ཕུལ་ནས་བདག་གིར་
བགྱི་བ་དང་ལྡན་པའི་དགེ་བའི་རྩ་བ་གང་ལགས་པ་དང་། བདག་གི་དགེ་བའི་རྩ་བ་ཐོག་མ་དང་པོ་མ་མཆིས་པའི་ཚེ་རབས་ནས་བགྱིས་པ་ཐམས་ཅད་མཁྱེན་པར་ཡོངས་སུ་མ་བསྔོས་པ་གང་ལགས་པ་དང་། བདག་གི་དགེ་བའི་རྩ་བ་འདུས་བྱས་ཀྱིས་ཡོ་བྱད་འཚལ་བས་མངོན་པར་

བསྒྲུབས་པ་གང་ལགས་པ་དང་། ཉན་ཐོས་དང་། རང་སངས་རྒྱས་ཀྱིས་མངོན་པར་བསྒྲུབས་པའི་དགེ་བའི་རྩ་བ་གང་ལགས་པ་དང་། བདག་གི་དགེ་བའི་རྩ་བ་ལས་ཀྱིས་མངོན་པར་བསྒྲུབས་པ། དུས་ཐམས་ཅད་དུ་བསགས་པ། དེ་བཞིན་གཤེགས་
པའི་ཡེ་ཤེས་ཀྱིས་མཁྱེན་པ་གང་ལགས་པ་དེ་དག་ཐམས་ཅད་ཡོངས་སུ་བསྡུའོ། །བཟླུམ་མོ། །བསྡུ་བར་བགྱིའོ། །གོང་དུ་ཡང་བྱང་ཆུབ་སེམས་དཔའ་སངས་རྒྱས་ཐམས་ཅད་ལ་མཆོད་པར་འཚལ་བ། དེ་བཞིན་གཤེགས་པ་ཐམས་ཅད་ཀྱི་བསྟན་པ་ཡང་དག་པར་འཛིན་
པར་འཚལ་བ་རྣམས་ཀྱིས་ཇི་ལྟར་སངས་རྒྱས་བཅོམ་ལྡན་འདས་དག་གིས་མཁྱེན་ཅིང་རབ་ཏུ་མཁྱེན་པ་དེ་ལྟ་བུས་དགེ་བའི་རྩ་བ་ཐམས་ཅད་ཡོངས་སུ་བསྡུ་བར་བགྱི་བ་དེ་བཞིན་དུ་བདག་གིས་ཀྱང་ཡོངས་སུ་བསྡུའོ། །བསྡུས་ནས་འདི་ལྟ་སྟེ། འདས་པའི་སངས་རྒྱས་བཅོམ་ལྡན་
འདས་རྣམས་ལ་མཆོད་པའི་ལས་དང་། མཚན་རྒྱས་པར་བགྱི་བ་དང་། མ་བྱོན་པའི་སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་སེམས་དཔའ་ཀུན་དུ་བཟང་པོའི་སྨོན་ལམ་ཡོངས་སུ་རྫོགས་པར་བགྱི་བ་དང་། སྟོབས་བཅུ་དང་། བྱང་ཆུབ་ཀྱི་ཕྱོགས་མྱུར་དུ་ཁོང་དུ་
ཆུད་པར་བགྱི་བའི་སླད་དུ་སེམས་ཅན་ཐམས་ཅད་ལ་སྩལ་ཏོ། །གཏང་ངོ་། །ཡོངས་སུ་གཏང་ངོ་། །རྣམ་པར་གཏང་ངོ་། །ངེས་པར་གཏང་ངོ་། །ཉན་ཐོས་དང་། རང་སངས་རྒྱས་ཐམས་ཅད་ལ་དབུལ་ལོ། །གཏང་ངོ་། །ཡོངས་སུ་གཏང་ངོ་། །རྣམ་པར་
གཏང་ངོ་། །ངེས་པར་གཏང་ངོ་། །བྱང་ཆུབ་སེམས་དཔའ་ཐམས་ཅད་ལ་དབུལ་ལོ། །གཏང་ངོ་། །ཡོངས་སུ་གཏང་ངོ་། །རྣམ་པར་གཏང་ངོ་། །ངེས་པར་གཏང་ངོ་། །སངས་རྒྱས་ཐམས་ཅད་ལ་དབུལ་ལོ། །གཏང་ངོ་། །ཡོངས་སུ་གཏང་ངོ་། །རྣམ་
པར་གཏང་ངོ་། །ངེས་པར་གཏང་ངོ་། །དེ་བཞིན་གཤེགས་པ་རེ་རེ་ལ་མཆོད་པའི་ལས་ཀྱི་སླད་དུ་ད་ལྟར་བྱུང་བའི་སངས་རྒྱས་བཅོམ་ལྡན་འདས་ཐམས་ཅད་མཁྱེན་པ་བྱང་ཆུབ་ཀྱི་ཡན་ལག་ཏུ་གྱུར་པ་རྣམས་ཀྱི་འཁོར་གྱི་དཀྱིལ་འཁོར་ཆོས་ཀྱི་དབྱིངས་ཀྱི་ཚད་ཙམ་རྣམས་སུ་མཆོད་པ་

བཀོད་པ་ཐམས་ཅད་ཀྱི་རྒྱན་གྱིས་ཆོས་ཀྱི་དབྱིངས་ཀུན་དུ་གནས་པར་གྱུར་ཅིག །རིན་པོ་ཆེ་ཐམས་ཅད་ཀྱིས་ཁེབས་པའི་རྒྱན་གྱིས་ཆོས་ཀྱི་དབྱིངས་ཀུན་ཏུ་གནས་པར་གྱུར་ཅིག །མེ་ཏོག་ཐམས་ཅད་ཀྱི་བླ་རེ་བྲེས་པའི་རྒྱན་གྱིས་ཆོས་ཀྱི་དབྱིངས་ཀུན་དུ་གནས་པར་གྱུར་ཅིག །
རིན་པོ་ཆེ་ཐམས་ཅད་ཀྱི་རྒྱལ་མཚན་བསྒྲེང་བའི་རྒྱན་གྱིས་ཆོས་ཀྱི་དབྱིངས་ཀུན་དུ་གནས་པར་གྱུར་ཅིག །རིན་པོ་ཆེ་ཐམས་ཅད་ཀྱི་དྲ་བ་བྲེས་པའི་རྒྱན་གྱིས་ཆོས་ཀྱི་དབྱིངས་ཀུན་དུ་གནས་པར་གྱུར་ཅིག །རིན་པོ་ཆེ་ཐམས་ཅད་ཀྱི་ན་བཟས་གཡོགས་པའི་རྒྱན་གྱིས་ཆོས་ཀྱི་དབྱིངས་
ཀུན་དུ་གནས་པར་གྱུར་ཅིག །གཞལ་དུ་མ་མཆིས་པའི་གོས་ཀྱི་སྤྲིན་གྱི་ཆར་དང་རིན་པོ་ཆེ་ཐམས་ཅད་ཀྱིས་སངས་རྒྱས་ལ་མཆོད་པ་བཀོད་པའི་རྒྱན་གྱིས་ཆོས་ཀྱི་དབྱིངས་ཀུན་དུ་གནས་པར་གྱུར་ཅིག །སྙིང་པོའི་སྤོས་ཐམས་ཅད་ཀྱིས་བདུགས་པའི་རྒྱན་གྱིས་ཆོས་ཀྱི་དབྱིངས་ཀུན་
དུ་གནས་པར་གྱུར་ཅིག །རྒྱན་གྱི་དམིགས་པ་ཐམས་ཅད་ལ་ཆགས་པ་ལས་གྲོལ་བའི་སིལ་སྙན་འཁྲོལ་བ་དང་ལྡན་པའི་དབྱིངས་ཀྱི་རྒྱན་གྱིས་ཆོས་ཀྱི་དབྱིངས་ཀུན་དུ་གནས་པར་གྱུར་ཅིག །རིན་པོ་ཆེ་ཐམས་ཅད་ཀྱི་པད་མ་བཀྲམ་པའི་རྒྱན་གྱིས་ཆོས་ཀྱི་དབྱིངས་ཀུན་དུ་གནས་
པར་གྱུར་ཅིག །ཐམས་ཅད་ཀྱི་རྗེས་སུ་སྒྲོགས་པའི་སྤྲིན་གྱི་རྒྱན་གྱིས་ཆོས་ཀྱི་དབྱིངས་ཀུན་དུ་གནས་པར་གྱུར་ཅིག །རིན་པོ་ཆེ་ཐམས་ཅད་ཀྱི་སྤྲིན་སྣང་བ་རབ་ཏུ་འབྱེད་པའི་རྒྱན་གྱིས་ཆོས་ཀྱི་དབྱིངས་ཀུན་དུ་གནས་པར་གྱུར་ཅིག །ལྷའི་ཐམས་ཅད་ལས་ཤིན་ཏུ་འདས་པ་རིན་པོ་ཆེའི་
ཅོད་པན་སྣ་ཚོགས་ཀྱི་སྤྲིན་གྱི་རྒྱན་གྱིས་ཆོས་ཀྱི་དབྱིངས་ཀུན་ཏུ་གནས་པར་གྱུར་ཅིག །དེ་ལྟར་དགེ་བའི་རྩ་བ་འདིས་ཇི་ལྟར་བྱང་ཆུབ་སེམས་དཔའ་ཀུན་དུ་བཟང་པོ་རྣམས་དེ་བཞིན་གཤེགས་པའི་འཁོར་གྱི་དཀྱིལ་འཁོར་དུ་མཆོད་པ་ཐམས་ཅད་དང་ལྡན་པས་འཇུག་པ་དེ་བཞིན་དུ་བདག་
ཀྱང་དགེ་བའི་རྩ་བ་འདིས་དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་དུ་དེ་ལྟར་དཔག་ཏུ་མ་མཆིས་པའི་མཆོད་པ་ཕྱི་མའི་མཐའི་མུར་ཐུག་པར་བྱིན་གྱིས་རློབ་པ་ལ་འཇུག་པར་གྱུར་ཅིག །གོང་དུ་ཡང་ཇི་ལྟར་སངས་རྒྱས་བཅོམ་ལྡན་འདས་དག་གིས་མཁྱེན་ཅིང་

རབ་ཏུ་མཁྱེན་པ་དེ་ལྟ་བུས་བྱང་ཆུབ་སེམས་དཔའ་རྣམས་ཀྱིས་དགེ་བའི་རྩ་བ་ཐམས་ཅད་སེམས་ཅན་ཐམས་ཅད་དང་། ཉན་ཐོས་དང་། རང་སངས་རྒྱས་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་དང་། དེ་བཞིན་གཤེགས་པ་ཐམས་ཅད་
ལ་དོན་པར་བགྱི་བ་དང་། གསོལ་བར་བགྱི་བ་དང་། དབུལ་བར་བགྱི་བ་དེ་བཞིན་དུ་བདག་ཀྱང་དགེ་བའི་རྩ་བ་ཐམས་ཅད་སེམས་ཅན་ཐམས་ཅད་དང་། ཉན་ཐོས་དང་། རང་སངས་རྒྱས་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་དང་། དེ་བཞིན་གཤེགས་པ་ཐམས་
ཅད་ལ་གསོལ་ལོ། །ཡོངས་སུ་གཏང་ངོ་། །དོན་ཏོ། །དབུལ་ལོ། །བདག་གིས་སེམས་ཅན་ཐམས་ཅད་དང་། ཉན་ཐོས་དང་། རང་སངས་རྒྱས་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་དང་། སངས་རྒྱས་བཅོམ་ལྡན་འདས་ཐམས་ཅད་ལ་དགེ་བའི་རྩ་བ་ཐམས་ཅད་ཕུལ་
ནས་བསོད་ནམས་ཀྱི་ཕུང་པོ་ཡོངས་སུ་བསྡུས་པ་བསོད་ནམས་ཀྱི་ཕུང་པོ་དཔག་ཏུ་མ་མཆིས་ཤིང་བསམ་གྱིས་མི་ཁྱབ་པ་དེ་བཞིན་གཤེགས་པའི་ཡེ་ཤེས་ཀྱིས་མཁྱེན་པ་གང་ལགས་པ་དེས་བདག་བརྟན་པར་གྱུར་ནས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་
སེམས་བསྐྱེད་པར་བགྱིའོ། །ཇི་ལྟར་བཅོམ་ལྡན་འདས་དེ་བཞིན་གཤེགས་པ་མར་མེ་མཛད་ཀྱིས་བཅོམ་ལྡན་འདས་དེ་བཞིན་གཤེགས་པ་ཟླ་འོད་ལ་མཆོད་པ་དམ་པས་མཆོད་ནས། དང་པོ་བྱང་ཆུབ་ཏུ་ཐུགས་བསྐྱེད་པ་དེ་བཞིན་དུ་བདག་ཀྱང་བྱང་ཆུབ་ཏུ་སེམས་བསྐྱེད་
པར་བགྱིའོ། །ཇི་ལྟར་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ཚོང་དཔོན་གྱི་བུ་མངོན་དགར་གྱུར་པ་ན། བཅོམ་ལྡན་འདས་དེ་བཞིན་གཤེགས་པ་མཛེས་ཆེན་ལ་བརྟེན་ཏེ། དང་པོ་བྱང་ཆུབ་ཏུ་ཐུགས་བསྐྱེད་པ་དེ་བཞིན་དུ་བདག་ཀྱང་བྱང་ཆུབ་ཏུ་སེམས་བསྐྱེད་
པར་བགྱིའོ། །ཇི་ལྟར་བཅོམ་ལྡན་འདས་དེ་བཞིན་གཤེགས་པ་ཚེ་དཔག་མེད་དགེ་སློང་ཆོས་ཀྱི་འབྱུང་གནས་སུ་གྱུར་པ་ན། བཅོམ་ལྡན་འདས་དེ་བཞིན་གཤེགས་པ་འཇིག་རྟེན་དབང་ཕྱུག་རྒྱལ་པོ་ལ་ཚིགས་སུ་བཅད་པའི་དབྱངས་ཀྱིས་མངོན་པར་བསྟོད་ནས་བྱང་ཆུབ་ཏུ་

ཐུགས་བསྐྱེད་པ་དེ་བཞིན་དུ་བདག་ཀྱང་བྱང་ཆུབ་ཏུ་སེམས་བསྐྱེད་པར་བགྱིའོ། །ཇི་ལྟར་བཅོམ་ལྡན་འདས་དེ་བཞིན་གཤེགས་པ་མི་འཁྲུགས་པས་སེམས་ཐོགས་པ་མ་མཆིས་པ་དང་། སེམས་མི་འཁྲུགས་པ་དང་། ཚེ་རབས་ཐམས་ཅད་དུ་རབ་ཏུ་འབྱུང་བ་དང་། མངོན་
པར་འབྱུང་བའི་སེམས་ཀྱིས་སེང་གེའི་སྒྲ་མངོན་པར་བསྒྲགས་ཏེ། དེ་བཞིན་གཤེགས་པ་སྤྱན་རབ་ཏུ་དང་བ་ལས་བྱང་ཆུབ་ཏུ་ཐུགས་བསྐྱེད་པ་དེ་བཞིན་དུ་བདག་ཀྱང་སེམས་བསྐྱེད་པར་བགྱིའོ། །ཇི་ལྟར་བཅོམ་ལྡན་འདས་དེ་བཞིན་གཤེགས་པ་དཔལ་བཟང་པོས་བཅོམ་ལྡན་
འདས་དེ་བཞིན་གཤེགས་པ་རྒྱ་མཚོའི་དཔལ་ལ་དགེ་བའི་རྩ་བའི་རྣམ་པ་མང་པོ་བསྐྱེད་ནས་བྱང་ཆུབ་ཏུ་ཐུགས་བསྐྱེད་པ་དེ་བཞིན་དུ་བདག་ཀྱང་སེམས་བསྐྱེད་པར་བགྱིའོ། །ཇི་ལྟར་བྱང་ཆུབ་སེམས་དཔའ་བྱམས་པ་རྒྱལ་པོ་གསེར་མདོག་ལྟ་བུར་གྱུར་པ་ན་བཅོམ་ལྡན་འདས་དེ་
བཞིན་གཤེགས་པ་གསེར་གྱི་མཆོད་སྡོང་གི་འོད་ལ་བཀོད་པ་དུ་མས་མཆོད་པ་དང་། རིམ་གྲོ་བགྱིས་ནས་བྱང་ཆུབ་ཏུ་ཐུགས་བསྐྱེད་པ་དེ་བཞིན་དུ་བདག་ཀྱང་སེམས་བསྐྱེད་པར་བགྱིའོ། །ཇི་ལྟར་བྱང་ཆུབ་སེམས་དཔའ་བློ་གྲོས་རྒྱ་མཚོ་ཡུལ་ཤིན་ཏུ་རྣམ་པར་དག་པའི་འཁོར་ལོས་
སྒྱུར་བའི་རྒྱལ་པོར་གྱུར་པ་ན། དེ་བཞིན་གཤེགས་པ་ཡོན་ཏན་གྱི་འོད་ཟེར་མཐའ་ཡས་ལ་བཀུར་སྟི་བགྱིས་ནས་བྱང་ཆུབ་ཏུ་ཐུགས་བསྐྱེད་པ་དེ་བཞིན་དུ་བདག་ཀྱང་སེམས་བསྐྱེད་པར་བགྱིའོ། །ཇི་ལྟར་བྱང་ཆུབ་སེམས་དཔའ་ནམ་མཁའ་མཛོད་ལྷས་དབང་བསྐུར་ཏེ། སྟོང་
གསུམ་གྱི་འཁོར་ལོས་སྒྱུར་བའི་རྒྱལ་པོར་གྱུར་པ་ན། དེ་བཞིན་གཤེགས་པ་སྨོན་ལམ་ཐམས་ཅད་ལས་ཡང་དག་པར་བྱུང་བ་རིན་པོ་ཆེའི་གཟི་བརྗིད་མངོན་པར་འཕགས་པའི་རྒྱལ་པོ་ལ་གདུགས་གཅིག་བཞིན་དུ་རིན་པོ་ཆེའི་ཕུང་པོ་རི་རབ་ཙམ་པས་པར་བགྱིས་ཏེ། བར་གྱི་བསྐལ་པ་
བཞི་བཅུར་མཆོད་པ་དང་། རིམ་གྲོ་བགྱིས་ནས་བྱང་ཆུབ་ཏུ་སེམས་བསྐྱེད་པ་དེ་བཞིན་དུ་བདག་ཀྱང་སེམས་བསྐྱེད་པར་བགྱིའོ། །ཇི་ལྟར་འཇམ་དཔལ་གཞོན་ནུར་གྱུར་པ་འཁོར་ལོས་སྒྱུར་བའི་རྒྱལ་པོར་གྱུར་པ་ན། བཅོམ་ལྡན་འདས་དེ་བཞིན་གཤེགས་པ་སྒྲ་དབྱངས་

བསྒྲགས་པའི་རྒྱལ་པོ་ལ་མཆོད་པ་དང་། རིམ་གྲོ་རྣམ་པ་དུ་མ་བགྱིས་ནས་བྱང་ཆུབ་ཏུ་སེམས་བསྐྱེད་པ་དེ་བཞིན་དུ་བདག་ཀྱང་སེམས་བསྐྱེད་པར་བགྱིའོ། །ཇི་ལྟར་བྱང་ཆུབ་སེམས་དཔའ་ཀུན་དུ་བཟང་པོས་བཅོམ་ལྡན་འདས་དེ་བཞིན་གཤེགས་པ་ཡེ་ཤེས་
རྡོ་རྗེ་རྒྱ་མཚོའི་རྒྱལ་པོ་ལ་བསྟི་སྟང་བགྱིས་ནས་བྱང་ཆུབ་ཏུ་སེམས་བསྐྱེད་པ་དེ་བཞིན་དུ་བདག་ཀྱང་སེམས་བསྐྱེད་པར་བགྱིའོ། །མཆོག་དམ་པ་ང་རྒྱལ་ཞི་བ་སེམས་མ་ལགས་པའི་སེམས་དང་། འགྲོ་བ་ཐམས་ཅད་ཡོངས་སུ་བསྐྱབ་པའི་སེམས་དང་། བྱང་ཆུབ་ཀྱི་
སེམས་དེས་ཁྱབ་པར་མ་གྱུར་པའི་ཆོས་ཀྱི་དབྱིངས་དེ་གང་ཡང་མ་མཆིས་སོ། །བྱང་ཆུབ་ཏུ་སེམས་བསྐྱེད་པའི་དགེ་བའི་རྩ་བའི་ཚོགས་དེས་དུས་གསུམ་དུ་མ་ཁྱབ་པ་ཅུང་ཟད་ཀྱང་མ་མཆིས་སོ།