Kinh tạng Tây Tạng (Kangyur Đại Học) — 055_མདོ་སྡེ།_ད

བ་མོར་
བྱས་པ་སྦྱར་བ་ལས་མི་ལ་ལ་ཞིག་འོངས་ཏེ། ཀྱེ་ལྷ་སྤོས་ཀྱི་ཕྱེ་མའི་ཚོགས་སྦྱར་བ་འདི་ལས་སྤོས་གཞན་དང་མ་འབགས་པ། སྤོས་གཞན་དང་མ་འདྲེས་པའི་ཡན་ལག་གཅིག་ཅིག་བླང་བར་འཚལ་ལོ་ཞེས་དེ་སྐད་ཟེར་ན། བློ་གྲོས་བརྟན་པ་དེ་ཇི་སྙམ་དུ་སེམས། སྤོས་ཀྱི་ཕྱེ་མ་སྦྱར་
བ་དེ་ལས་སྤོས་གཞན་དང་མ་འབགས་པ། སྤོས་གཞན་དང་མ་འདྲེས་པའི་ཡན་ལག་གཅིག་བླང་བར་ནུས་སམ། གསོལ་པ། བཅོམ་ལྡན་འདས་དེ་ནི་མི་ནུས་སོ། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་བརྟན་པ་དེ་བཞིན་དུ་བྱང་ཆུབ་སེམས་དཔའ་དེའི་ལུས་ཡུན་རིང་
པོ་ནས་ཕ་རོལ་ཏུ་ཕྱིན་པ་ཐམས་ཅད་ཀྱིས་བསྒོས་པ་དང་། ཕ་རོལ་ཏུ་ཕྱིན་པ་ཐམས་ཅད་ཀྱིས་བསྒོས་པའི་སེམས་དང་། སེམས་ལས་བྱུང་བ་ཐམས་ཅད་འབྱུང་བར་འགྱུར་ཏེ། དེའི་སེམས་བསྐྱེད་ཅིང་སེམས་བསྐྱེད་པ་ཐམས་ཅད་ལ་ཕ་རོལ་ཏུ་ཕྱིན་པ་དྲུག་པོ་དག་འབྱུང་བར་འགྱུར་རོ། །
བློ་གྲོས་བརྟན་པ་ཇི་ལྟར་ན་བྱང་ཆུབ་སེམས་དཔའ་དེའི་སེམས་བསྐྱེད་པ་ཐམས་ཅད་ལ་ཕ་རོལ་ཏུ་ཕྱིན་པ་དྲུག་པོ་དག་འབྱུང་བར་འགྱུར་ཞེ་ན། བློ་གྲོས་བརྟན་པ་འདི་ལྟར་གང་སེམས་ཀྱིས་བཏང་བ་དང་། སྤངས་པ་དང་། མངོན་པར་མ་ཞེན་པ་དེ་ནི་དེའི་སྦྱིན་པའི་ཕ་རོལ་ཏུ་ཕྱིན་པའོ། །

གང་སེམས་ཞི་བ་དང་། རབ་ཏུ་ཞི་བ་དང་། ཉེ་བར་ཞི་བ་དང་། ཤིན་ཏུ་ཞི་གནས་སུ་གྱུར་པ་དེ་ནི་དེའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །གང་སེམས་ཀྱི་མི་ཟད་པའི་ཆོས་ཉིད་དང་། ཡུལ་ཐམས་ཅད་ཀྱིས་སྨས་པར་མི་འགྱུར་བ་དེ་ནི་དེའི་བཟོད་པའི་ཕ་རོལ་ཏུ་ཕྱིན་པའོ། །
གང་སེམས་ཀྱི་རྣམ་པར་སྒྲུབ་པ་དང་། དབྱེ་བ་དང་། དབེན་པ་དང་། རྣམ་པར་ཤེས་པ་དེ་ནི་དེའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །གང་སེམས་ཀྱི་ངེས་པར་སེམས་པ་དང་། ཉེ་བར་རྟོག་པ་དང་། གང་ཡང་དེའི་ཤིན་ཏུ་སེམས་པ་དེ་ནི་བསམ་གཏན་གྱི་ཕ་རོལ་ཏུ་ཕྱིན་པའོ། །གང་སེམས་
རབ་ཏུ་ཤེས་པ་དང་། སོ་སོར་རྟོག་པ་དང་། རབ་ཏུ་ཞི་བ་དང་། ཉེ་བར་ཞི་བ་དང་། མངོན་སུམ་དུ་ཤེས་པ་དེ་ནི་དེའི་ཤེས་རབ་ཀྱི་ཕ་རོལ་ཏུ་ཕྱིན་པའོ། །བློ་གྲོས་བརྟན་པ་དེ་ལྟར་ན་དཔའ་བར་འགྲོ་བའི་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ལ་ནི་འཇུག་པ་འདིས་སེམས་བསྐྱེད་
པ་ཐམས་ཅད་ལ་ཕ་རོལ་ཏུ་ཕྱིན་པ་དྲུག་འཇུག་གོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་བརྟན་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ཙམ་དུ་བྱང་ཆུབ་སེམས་དཔའ་གང་དཔའ་བར་འགྲོ་བའི་ཏིང་ངེ་འཛིན་འདི་ཤིན་ཏུ་ཡོངས་སུ་གྲུབ་
པ་དེའི་གནས་པ་ནི་བསམ་གྱིས་མི་ཁྱབ་སྟེ་ངོ་མཚར་ཏོ། །བཅོམ་ལྡན་འདས་བྱང་ཆུབ་སེམས་དཔའ་དེ་བཞིན་གཤེགས་པའི་གནས་པས་གནས་པར་འཚལ་བས་དཔའ་བར་འགྲོ་བའི་ཏིང་ངེ་འཛིན་འདི་ལ་བརྩོན་པར་བགྱིའོ། །དེ་ཅིའི་སླད་དུ་ཞེ་ན། དེ་ལྟར་དེ་ནི་བྱིས་པ་སོ་སོའི་སྐྱེ་བོ་
ཐམས་ཅད་ཀྱི་གནས་པ་རྣམས་ན་ཡང་གདའ་ལ། གང་ལ་ཡང་ཆགས་པར་མི་འགྱུར། ཞེ་སྡང་བར་མི་འགྱུར། གཏི་མུག་པར་མི་འགྱུར་རོ། །དེ་ནས་བཅོམ་ལྡན་འདས་ལ་ཚངས་པ་བྱམས་པ་མཆོག་ཅེས་བྱ་བ་དེས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་
དཔའ་བྱིས་པ་སོ་སོའི་སྐྱེ་བོ་ཐམས་ཅད་ཀྱིས་གནས་པས་གནས་པར་འཚལ་བས་དཔའ་བར་འགྲོ་བའི་ཏིང་ངེ་འཛིན་འདི་ལ་བསླབ་པར་བགྱིའོ། །དེ་ཅིའི་སླད་དུ་ཞེ་ན། དེ་ལྟར་དེ་ནི་བྱིས་པ་སོ་སོའི་སྐྱེ་བོ་ཐམས་ཅད་ཀྱི་གནས་པ་རྣམས་ན་ཡང་གདའ་ལ། གང་ལ་ཡང་མི་ཆགས། མི་

འཆིང་། ཆགས་པར་མི་འགྱུར། ཞེ་སྡང་བར་མི་འགྱུར། གཏི་མུག་པར་མི་འགྱུར་རོ། །དེ་ནས་བཅོམ་ལྡན་འདས་ཀྱིས་ཚངས་པ་བྱམས་པ་མཆོག་ལ་ལེགས་སོ་ཞེས་བྱ་བ་བྱིན་ཏེ། ལེགས་སོ་ལེགས་སོ། །ཚངས་པ་དེ་དེ་བཞིན་ནོ། །ཇི་སྐད་སྨྲས་པ་བཞིན་ཏེ། བྱང་ཆུབ་སེམས་དཔའ་
བྱིས་པ་སོ་སོའི་སྐྱེ་བོ་ཐམས་ཅད་ཀྱི་གནས་པས་གནས་པར་འདོད་པས་བསླབ་པ་ཐམས་ཅད་ལ་རློམ་སེམས་མེད་པར་དཔའ་བར་འགྲོ་བའི་ཏིང་ངེ་འཛིན་འདི་ལ་བསླབ་པར་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་བློ་གྲོས་བརྟན་པས་འདི་སྐད་ཅེས་གསོལ་ཏོ། །བཅོམ་ལྡན་འདས་
ཇི་ལྟར་སློབ་ན་བྱང་ཆུབ་སེམས་དཔའ་བསླབ་པ་ཐམས་ཅད་ལ་རློམ་སེམས་མ་མཆིས་པར་དཔའ་བར་འགྲོ་བའི་ཏིང་ངེ་འཛིན་འདི་ལ་སློབ་པ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་བརྟན་པ་ལ་འདི་སྐད་ཅེས་བཀའ་སྩལ་
ཏོ། །བློ་གྲོས་བརྟན་པ་འདི་ལྟ་སྟེ་དཔེར་ན་འཕོང་གི་སློབ་དཔོན་ནམ། འཕོང་གི་སློབ་མ་ནི་ཐོག་མར་བ་ལང་གི་ཀོ་བ་ལ་ཕོག་པར་བྱེད་དོ། །གང་གི་ཚེ་ན་བ་ལང་གི་ཀོ་བ་ལ་ལོབས་པ་དེའི་ཚེ་ཤིང་ལེབ་ལ་ཕོག་པར་བྱེད་དོ། །གང་གི་ཚེ་ཤིང་ལེབ་ལ་ལོབས་པ་དེའི་ཚེ་འབེན་ལ་ཕོག་པར་བྱེད་དོ། །
གང་གི་ཚེ་འབེན་ལ་ལོབས་པ་དེའི་ཚེ་དབྱུག་གུ་ལ་ཕོག་པར་བྱེད་དོ། །གང་གི་ཚེ་དབྱུག་གུ་ལ་ལོབས་པ་དེའི་ཚེ་སྐྲ་བརྒྱ་ལ་ཕོག་པར་བྱེད་དོ། །གང་གི་ཚེ་སྐྲ་བརྒྱ་ལ་ལོབས་པ་དེའི་ཚེ་སྐྲ་བཅུ་ལ་ཕོག་པར་བྱེད་དོ། །གང་གི་ཚེ་སྐྲ་བཅུ་ལ་ལོབས་པ་དེའི་ཚེ་སྐྲ་གཅིག་ལ་ཕོག་པར་བྱེད་དོ། །གང་གི་
ཚེ་སྐྲ་གཅིག་ལ་ལོབས་པ་དེའི་ཚེ་སྒྲས་མཚོན་པ་ལ་ཕོག་པ་ལ་སློབ་པར་བྱེད་དོ། །གང་གི་ཚེ་སྒྲས་མཚོན་པ་ལ་ལོབས་པ་དེའི་ཚེ་མི་འཆོར་བར་ཕོག་པར་འགྱུར་རོ། །གང་གི་ཚེ་མི་འཆོར་བར་ཕོག་པ་དེའི་ཚེ་འཕོང་སློབ་པ་ཚར་ཕྱིན་པ་ཡིན་ཏེ། དེ་འདོད་ན་ནུབ་མོ་མུན་པ་མུན་ནག་གི་ནང་ན་
ཡང་མི་དང་མི་མ་ཡིན་པ་གང་དང་གང་དག་གི་སྒྲ་བསྒྲགས་པ་དེ་དག་དེར་ལྷུན་གྱིས་གྲུབ་ཅིང་མི་འཆོར་བ་ཉིད་དུ་མདའ་འགྲོའོ། །བློ་གྲོས་བརྟན་པ་དེ་བཞིན་དུ་བྱང་ཆུབ་སེམས་དཔའ་དཔའ་བར་འགྲོ་བའི་ཏིང་ངེ་འཛིན་འདི་ལ་སློབ་པ་ན་ཐོག་མ་ཉིད་དུ་བསམ་པ་ལ་སློབ་བོ། །གང་གི་ཚེ་བསམ་པ་ལ་

ལོབས་པར་གྱུར་པ་དེའི་ཚེ་སྦྱོར་བ་ལ་འཇུག་གོ། །གང་གི་ཚེ་སྦྱོར་བ་ལ་བསླབས་པར་གྱུར་པ་དེའི་ཚེ་ལྷག་པའི་བསམ་པ་ལ་འཇུག་གོ། །གང་གི་ཚེ་ལྷག་པའི་བསམ་པ་ལ་བསླབས་པར་གྱུར་པ་དེའི་ཚེ་བྱམས་པ་ཆེན་པོ་ལ་འཇུག་གོ། །གང་གི་ཚེ་བྱམས་པ་ཆེན་པོ་ལ་བསླབས་པར་
གྱུར་པ་དེའི་ཚེ་སྙིང་རྗེ་ཆེན་པོ་ལ་འཇུག་གོ། །གང་གི་ཚེ་སྙིང་རྗེ་ཆེན་པོ་ལ་བསླབས་པར་གྱུར་པ་དེའི་ཚེ་དགའ་བ་ཆེན་པོ་ལ་འཇུག་གོ། །གང་གི་ཚེ་དགའ་བ་ཆེན་པོ་ལ་བསླབས་པར་གྱུར་པ་དེའི་ཚེ་བཏང་སྙོམས་ཆེན་པོ་ལ་འཇུག་གོ། །གང་གི་ཚེ་བཏང་སྙོམས་ཆེན་པོ་ལ་བསླབས་པར་གྱུར་པ་དེའི་ཚེ་བྱང་
ཆུབ་སེམས་དཔའི་འཕགས་པའི་གནས་པ་བཞི་ལ་བསླབས་པ་ཡིན་ཏེ། བཞི་གང་ཞེ་ན། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། དགའ་བ་ཆེན་པོ་དང་། བཏང་སྙོམས་ཆེན་པོའོ། །གང་གི་ཚེ་བྱང་ཆུབ་སེམས་དཔའི་འཕགས་པའི་གནས་པ་འདི་བཞི་ལ་བསླབས་པར་གྱུར་པ་དེའི་
ཚེ་རྗེས་སུ་འཐུན་པའི་མངོན་པར་ཤེས་པ་ལྔ་པོ་མི་ཉམས་པ་དག་ལ་སློབ་བོ། །གང་གི་ཚེ་རྗེས་སུ་འཐུན་པའི་མངོན་པར་ཤེས་པ་ལྔ་པོ་མི་ཉམས་པ་དག་ལ་བསླབས་པར་གྱུར་པ་དེའི་ཚེ་ཕ་རོལ་ཏུ་ཕྱིན་པ་དྲུག་ཚར་ཕྱིན་པ་ཡིན་ནོ། །གང་གི་ཚེ་ཕ་རོལ་ཏུ་ཕྱིན་པ་དྲུག་ཚར་ཕྱིན་པར་གྱུར་པ་དེའི་ཚེ་
ཐབས་མཁས་པ་རྟོགས་པར་ཁོང་དུ་ཆུད་པ་ཡིན་ནོ། །གང་གི་ཚེ་ཐབས་མཁས་པ་རྟོགས་པར་ཁོང་དུ་ཆུད་པ་དེའི་ཚེ་རྗེས་སུ་འཐུན་པའི་བཟོད་པ་གཉིས་པ་ལ་གནས་པ་ཡིན་ནོ། །གང་གི་ཚེ་རྗེས་སུ་འཐུན་པའི་བཟོད་པ་གཉིས་པ་ལ་གནས་པ་དེའི་ཚེ་མི་སྐྱེ་བའི་ཆོས་ལ་བཟོད་པ་འཐོབ་བོ། །
གང་གི་ཚེ་མི་སྐྱེ་བའི་ཆོས་ལ་བཟོད་པ་དང་ལྡན་པ་དེའི་ཚེ་སངས་རྒྱས་བཅོམ་ལྡན་འདས་རྣམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་འགྱུར་རོ། །གང་གི་ཚེ་སངས་རྒྱས་བཅོམ་ལྡན་འདས་རྣམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་
བསྟན་པ་དེའི་ཚེ་ས་བརྒྱད་པ་ལ་འཇུག་པར་འགྱུར་རོ། །གང་གི་ཚེ་ས་བརྒྱད་པ་ལ་ཞུགས་པར་གྱུར་པ་དེའི་ཚེ་བྱང་ཆུབ་སེམས་དཔའི་ཏིང་ངེ་འཛིན་ད་ལྟར་གྱི་སངས་རྒྱས་མངོན་སུམ་དུ་བཞུགས་པ་མཐོང་སྟེ། དེ་ཏིང་ངེ་འཛིན་དེ་དང་ལྡན་པས་སངས་རྒྱས་མཐོང་བ་དང་མི་འབྲལ་བར་འགྱུར་རོ། །

གང་གི་ཚེ་སངས་རྒྱས་མཐོང་བ་དང་མི་འབྲལ་བ་དེའི་ཚེ་སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་ཤིང་ཡོངས་སུ་གྲུབ་པ་ཐོབ་པར་འགྱུར་རོ། །དེས་སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་ཤིང་ཡོངས་སུ་གྲུབ་པ་ལ་གནས་ནས་སངས་རྒྱས་ཀྱི་ཞིང་བཀོད་པ་ཕུན་སུམ་ཚོགས་པ་མངོན་
པར་སྒྲུབ་བོ། །དེ་སངས་རྒྱས་ཀྱི་ཞིང་བཀོད་པ་ཡོངས་སུ་བཟུང་ནས་སྐྱེ་བ་དང་། རིགས་དང་། རུས་ཕུན་སུམ་ཚོགས་པ་དང་། མངལ་དུ་འཇུག་པ་དང་། མངོན་པར་འབྱུང་བ་ཕུན་སུམ་ཚོགས་པ་ཡོངས་སུ་རྫོགས་པར་བྱེད་དོ། །དེ་སྐྱེ་བ་དང་། རིགས་དང་། རུས་ཕུན་སུམ་ཚོགས་པ་དང་། མངལ་
དུ་འཇུག་པ་དང་། མངོན་པར་འབྱུང་བ་ཕུན་སུམ་ཚོགས་པར་གྱུར་ནས་ས་བཅུ་ཡོངས་སུ་རྫོགས་པར་བྱེད་དོ། །དེ་ས་བཅུ་ལ་གནས་ནས་སངས་རྒྱས་ཐམས་ཅད་ཀྱིས་དབང་བསྐུར་བ་འཐོབ་བོ། །དེ་སངས་རྒྱས་ཐམས་ཅད་ཀྱིས་དབང་བསྐུར་བ་ཐོབ་ནས་བྱང་ཆུབ་སེམས་དཔའི་ཏིང་ངེ་འཛིན་ཐམས་
ཅད་ཐོབ་པར་འགྱུར་རོ། །དེ་བྱང་ཆུབ་སེམས་དཔའི་ཏིང་ངེ་འཛིན་ཐམས་ཅད་ཐོབ་ནས་ཕྱིས་དཔའ་བར་འགྲོ་བའི་ཏིང་ངེ་འཛིན་འདི་ཐོབ་པར་འགྱུར་རོ། །དཔའ་བར་འགྲོ་བའི་ཏིང་ངེ་འཛིན་ཐོབ་པའི་བྱང་ཆུབ་སེམས་དཔའ་དེ་ནི་སེམས་ཅན་རྣམས་ལ་སངས་རྒྱས་ཀྱི་མཛད་པས་ཉེ་བར་གནས་པར་
འགྱུར་ཏེ། བྱང་ཆུབ་སེམས་དཔའི་ཆོས་ཉིད་དེ་ཡང་མི་གཏོང་ངོ་། །བློ་གྲོས་བརྟན་པ་དེ་ལྟར་ན་བྱང་ཆུབ་སེམས་དཔའ་གང་ཆོས་དེ་ལྟ་བུ་དག་ལ་བསླབས་པར་གྱུར་པ་དེ་ནི་དཔའ་བར་འགྲོ་བའི་ཏིང་ངེ་འཛིན་འདི་ཐོབ་པར་འགྱུར་རོ། །བློ་གྲོས་བརྟན་པ་དཔའ་བར་འགྲོ་བའི་ཏིང་ངེ་འཛིན་འདི་ལ་
གནས་པའི་བྱང་ཆུབ་སེམས་དཔས་ནི་གང་དུ་ཡང་བསླབ་པར་མི་བྱའོ། །དེ་ཅིའི་ཕྱིར་ཞེ་ན། སྔོན་ལེགས་པར་བསླབས་པའི་ཕྱིར་ཏེ། སངས་རྒྱས་ཀྱི་ཆོས་ཐམས་ཅད་དེ་ལ་མངོན་དུ་འགྱུར་རོ། །བློ་གྲོས་བརྟན་པ་འདི་ལྟ་སྟེ། དཔེར་ན་འཕོང་གི་སློབ་དཔོན་ནམ། འཕོང་གི་སློབ་
མ་ནི་སྒྲས་མཚོན་པ་ལ་ཕོག་པར་བྱེད་པར་གནས་པས་ཕྱིས་གང་དུ་ཡང་མི་སློབ་བོ། །དེ་ཅིའི་ཕྱིར་ཞེ་ན། སྔོན་ལེགས་པར་བསླབས་པའི་ཕྱིར་ཏེ། ཕོག་པར་བྱ་བ་ཐམས་ཅད་དེ་ལ་མངོན་དུ་འགྱུར་རོ། །བློ་གྲོས་བརྟན་པ་དེ་བཞིན་དུ་དཔའ་བར་འགྲོ་བའི་ཏིང་ངེ་འཛིན་འདི་ལ་

གནས་པའི་བྱང་ཆུབ་སེམས་དཔས་ཀྱང་ཆོས་གང་ལ་ཡང་བསླབ་པར་མི་བྱའོ། །དེ་ཅིའི་ཕྱིར་ཞེ་ན། དེ་སྔོན་ལེགས་པར་བསླབས་པའི་ཕྱིར་ཏེ། ཏིང་ངེ་འཛིན་ཐམས་ཅད་དང་། སྙོམས་པར་འཇུག་པ་ཐམས་ཅད་དང་། རྣམ་པར་ཐར་པ་ཐམས་ཅད་དང་། བྱང་ཆུབ་སེམས་
དཔའི་ཡོན་ཏན་གྱི་ཆོས་ཐམས་ཅད་དེ་ལ་མངོན་དུ་འགྱུར་རོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་བློ་གྲོས་བརྟན་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་སྤོབས་སོ། །བདེ་བར་གཤེགས་པ་བདག་སྤོབས་སོ། །བཅོམ་ལྡན་འདས་ཀྱིས་བཀའ་སྩལ་པ། བློ་
གྲོས་བརྟན་པ་དེའི་དུས་ལ་ད་བབ་པར་ཤེས་ན་ཁྱོད་སྤོབས་པར་གྱིས་ཤིག །བློ་གྲོས་བརྟན་པས་གསོལ་པ། བཅོམ་ལྡན་འདས་འདི་ལྟ་སྟེ། དཔེར་ན་སྟོང་གསུམ་གྱི་སྟོང་ཆེན་པོ་ལ་དབང་བའི་ཚངས་པ་ཆེན་པོ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ལ་ཚེགས་ཆུང་ངུས་རྣམ་
པར་ལྟ་བར་བགྱིད་དོ། །བཅོམ་ལྡན་འདས་དེ་བཞིན་དུ་དཔའ་བར་འགྲོ་བའི་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ཡང་ཚེགས་ཆུང་ངུས་བྱང་ཆུབ་སེམས་དཔའི་ཆོས་ཐམས་ཅད་ལ་རྣམ་པར་ལྟ་ཞིང་སེམས་ཅན་ཐམས་ཅད་ཀྱི་སེམས་དང་། སྤྱོད་པ་རྣམས་ཀྱང་འཚལ་ཏོ། །བཅོམ་
ལྡན་འདས་ཀྱིས་བཀའ་སྩལ་པ། བློ་གྲོས་བརྟན་པ་དེ་དེ་བཞིན་ནོ། །ཇི་སྐད་སྨྲས་པ་བཞིན་ཏེ། བྱང་ཆུབ་སེམས་དཔའ་གང་དག་དཔའ་བར་འགྲོ་བའི་ཏིང་ངེ་འཛིན་འདི་ལ་གནས་པ་དེ་དག་ནི་ཀུན་ཏུ་རྣམ་པར་བལྟས་པར་བལྟ་བར་བྱས་ཏེ། སངས་རྒྱས་ཀྱི་ཆོས་ཐམས་ཅད་མངོན་སུམ་
དུ་གྱུར་པ་དག་གོ །དེ་ནས་བཅོམ་ལྡན་འདས་ལ་བརྒྱ་བྱིན་ལྷུན་པོའི་རྩེ་འཛིན་ཅེས་བྱ་བ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་མཐའི་གླིང་ན་གནས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟ་སྟེ། དཔེར་ན་རི་རབ་ཀྱི་རྩེ་མོ་ལ་གནས་ན་ཚེགས་ཆུང་ངུས་བང་
རིམ་ཐམས་ཅད་བལྟའོ། །བཅོམ་ལྡན་འདས་དེ་བཞིན་དུ་དཔའ་བར་འགྲོ་བའི་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ཡང་ཚེགས་ཆུང་ངུས་ཉན་ཐོས་ཀྱི་སྤྱོད་པ་ཐམས་ཅད་ལ་རྣམ་པར་ལྟ་ཞིང་རང་སངས་རྒྱས་ཀྱི་སྤྱོད་པ་ཐམས་ཅད་དང་། བྱང་ཆུབ་སེམས་དཔའི་སྤྱོད་པ་

ཐམས་ཅད་དང་། སེམས་ཅན་ཐམས་ཅད་ཀྱི་སྤྱོད་པ་ལ་ཡང་རྣམ་པར་བལྟའོ། །དེ་ནས་བྱང་ཆུབ་སེམས་དཔའ་བློ་གྲོས་བརྟན་པས་བརྒྱ་བྱིན་ལྷུན་པོའི་རྩེ་འཛིན་ལ་འདི་སྐད་ཅེས་སྨྲས་སོ། །ཀྱེ་གྲོགས་པོ་ཁྱོད་གླིང་བཞི་པའི་འཇིག་རྟེན་གྱི་ཁམས་གང་ནས་འདིར་འོངས། རི་རབ་གང་གི་རྩེ་མོ་
ལ་གནས། དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་བློ་གྲོས་བརྟན་པ་ལ་བརྒྱ་བྱིན་ལྷུན་པོའི་རྩེ་འཛིན་གྱིས་འདི་སྐད་ཅེས་སྨྲས་སོ། །རིགས་ཀྱི་བུ་བྱང་ཆུབ་སེམས་དཔའ་གང་དཔའ་བར་འགྲོ་བའི་ཏིང་ངེ་འཛིན་འདི་ཐོབ་པ་དེ་ལ་ཁྱོད་གང་ན་གནས་ཞེས་གནས་མི་འདྲིའོ། །དེ་ཅིའི་
ཕྱིར་ཞེ་ན། དེ་ནི་སངས་རྒྱས་ཀྱི་ཞིང་ཐམས་ཅད་ན་གནས་སོ། །དེ་ནི་གང་དུ་ཡང་མངོན་པར་ཞེན་པས་མི་གནས་སོ། །དེ་ནི་དམིགས་པས་མི་གནས་སོ། །དེ་ནི་ལྟ་བར་གྱུར་པས་མི་གནས་སོ། །དེ་ནས་བྱང་ཆུབ་སེམས་དཔའ་བློ་གྲོས་བརྟན་པས་བརྒྱ་བྱིན་ལྷུན་པོའི་རྩེ་འཛིན་ལ་འདི་སྐད་
ཅེས་སྨྲས་སོ། །ཀྱེ་གྲོགས་པོ་ཅི་ཁྱོད་ཀྱིས་དཔའ་བར་འགྲོ་བའི་ཏིང་ངེ་འཛིན་འདི་ཐོབ་བམ། བརྒྱ་བྱིན་ལྷུན་པོའི་རྩེ་འཛིན་གྱིས་སྨྲས་པ། རིགས་ཀྱི་བུ་ཅི་ཏིང་ངེ་འཛིན་འདི་ཐོབ་པའམ། མ་ཐོབ་པས་ཉེ་བར་གནས་སམ། སྨྲས་པ། དེ་ནི་མ་ཡིན་ནོ། །སྨྲས་པ། རིགས་
ཀྱི་བུ་དེ་ལྟ་བས་ན་བྱང་ཆུབ་སེམས་དཔའ་གང་ཏིང་ངེ་འཛིན་འདིས་གནས་པ་དེ་ནི་ཆོས་གང་ཡང་མི་འཐོབ་ཅིང་ཐོབ་པ་མེད་དོ། །བྱང་ཆུབ་སེམས་དཔའ་བློ་གྲོས་བརྟན་པས་སྨྲས་པ། ཀྱེ་གྲོགས་པོ་ཁྱོད་ཀྱི་སྤོབས་པ་ལས་ན་ཁྱོད་ནི་དཔའ་བར་འགྲོ་བའི་ཏིང་ངེ་འཛིན་འདི་ལ་གནས་སོ། །
སྨྲས་པ། རིགས་ཀྱི་བུ་ཆོས་ཐམས་ཅད་གནས་མེད་པའི་ཕྱིར་ཁོ་བོས་ནི་དཔའ་བར་འགྲོ་བའི་ཏིང་ངེ་འཛིན་འདི་གང་ལ་གནས་པའི་ཆོས་དེ་མ་མཐོང་ངོ་། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ཏིང་ངེ་འཛིན་འདི་ལ་གནས་པ་ནི་ཆོས་གང་ལ་ཡང་མི་གནས་སོ། །གང་ལ་
ཡང་མི་གནས་པ་དེ་ལ་ནི་ལེན་པ་མེད་དོ། །གང་ལ་ལེན་པ་མེད་པ་དེ་ལ་ཆོས་བསྟན་པ་གང་ཡང་མེད་དོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་བློ་གྲོས་བརྟན་པ་ལ་འདི་སྐད་ཅེས་བཀའ་སྩལ་ཏོ། །བློ་གྲོས་བརྟན་པ་ཁྱོད་ཀྱིས་བརྒྱ་བྱིན་ལྷུན་པོའི་རྩེ་འཛིན་མཐོང་ངམ། གསོལ་

པ། བཅོམ་ལྡན་འདས་མཐོང་ངོ་། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་བརྟན་པ་བརྒྱ་བྱིན་ལྷུན་པོའི་རྩེ་འཛིན་འདི་ནི་དཔའ་བར་འགྲོ་བའི་ཏིང་ངེ་འཛིན་འདི་ཐོབ་པའོ། །ངེས་པར་གྱུར་པ་ཐོབ་པའོ། །ཚེགས་མེད་པ་ཐོབ་པའོ། །འདི་ནི་དཔའ་བར་འགྲོ་བའི་ཏིང་
ངེ་འཛིན་ལ་གནས་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་བརྒྱ་བྱིན་གྱི་གནས་ཇི་སྙེད་ཡོད་པ་དེ་ཐམས་ཅད་དུ་འདི་སྟོན་པར་བྱེད་དོ། །དེ་ནས་བཅོམ་ལྡན་འདས་ལ་ལྷའི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་བརྒྱ་བྱིན་ལྷུན་པོའི་རྩེ་འཛིན་འདི། བརྒྱ་
བྱིན་གྱི་གནས་ཐམས་ཅད་དུ་གདའ་བ་ལགས་ན། བདག་གིས་ནི་འདི་བརྒྱ་བྱིན་གྱི་གནས་རི་རབ་ཀྱི་རྩེ་མོར་སྔོན་ཆད་མ་མཐོང་ངོ་། །དེ་ནས་བརྒྱ་བྱིན་ལྷུན་པོའི་རྩེ་འཛིན་གྱིས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །ཀཽ་ཤི་ཀ་གལ་ཏེ་ཁྱོད་ལྟ་བུ་ལ་ཁོ་བོ་ལྟ་བུའི་གཟུགས་ཀྱི་ལུས་ཡོངས་སུ་
གྲུབ་པ་བསྟན་དུ་ཟིན་ན། དེའི་ཕྱིར་བརྒྱ་བྱིན་གྱི་གནས་ཐམས་ཅད་དུ་ཁྱེད་གདའ་བར་མི་འགྱུར་ཏེ། ཀཽ་ཤི་ཀ་ཁོ་བོ་ནི་ཁྱོད་ཀྱི་བརྒྱ་བྱིན་གྱི་གནས་སུ་རྒྱུ་མོད་ཀྱི་ཁོ་བོ་ཁྱོད་ཀྱིས་མི་མཐོང་ངོ་། །དེ་ནས་བཅོམ་ལྡན་འདས་ལ་ལྷའི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་
བདག་ཅག་ནི་སྐྱེས་བུ་དམ་པ་འདིའི་གཟུགས་ཀྱི་ལུས་ཡོངས་སུ་གྲུབ་པ་མཐོང་བར་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། ཅི་ཀཽ་ཤི་ཀ་སྐྱེས་བུ་དམ་པ་འདིའི་གཟུགས་ཀྱི་ལུས་ཡོངས་སུ་གྲུབ་པ་མཐོང་བར་འདོད་དམ། གསོལ་པ། བཅོམ་ལྡན་འདས་མཐོང་བར་འཚལ་
ལོ། །དེ་ནས་བཅོམ་ལྡན་འདས་ཀྱིས་བརྒྱ་བྱིན་ལྷུན་པོའི་རྩེ་འཛིན་ལ་བཀའ་སྩལ་པ། སྐྱེས་བུ་དམ་པ་ཁྱོད་ཀྱིས་ལྷའི་དབང་པོ་བརྒྱ་བྱིན་འདི་ལ་རང་གི་གཟུགས་ཀྱི་ལུས་ཡོངས་སུ་གྲུབ་པ་སྟོན་ཅིག །དེ་ནས་བརྒྱ་བྱིན་ལྷུན་པོའི་རྩེ་འཛིན་གྱིས་བདག་གི་གཟུགས་ཀྱི་ལུས་ཡོངས་སུ་གྲུབ་
པ་བསྟན་ཏོ། །གཟུགས་ཀྱི་ལུས་ཡོངས་སུ་གྲུབ་པ་བསྟན་མ་ཐག་ཏུ་དེ་ནས་འཁོར་དེ་ན་བརྒྱ་བྱིན་ནམ། ཚངས་པའམ། འཇིག་རྟེན་སྐྱོང་བའམ། གནས་གཙང་མའི་རིས་ཀྱི་ལྷའམ། ཉན་ཐོས་ཀྱི་ཐེག་པ་པའམ། རང་སངས་རྒྱས་ཀྱི་ཐེག་པ་པའམ། བྱང་ཆུབ་སེམས་དཔའི་

ཐེག་པ་པའམ། དེ་མ་ཡིན་པ་སེམས་ཅན་གཞན་ཡང་རུང་སྟེ། གང་དག་གིས་དཔའ་བར་འགྲོ་བའི་ཏིང་ངེ་འཛིན་འདི་མ་ཐོབ་པ་དེ་དག་ཐམས་ཅད་ཀྱི་ལུས་ནི་འདི་ལྟ་སྟེ། དཔེར་ན་སྣག་ཚའི་ཕུང་པོ་བཞིན་དུ་སྣང་ངོ་། །བརྒྱ་བྱིན་དེའི་ལུས་ནི་རི་རབ་བཞིན་དུ་མངོན་པར་འཕགས་ཤིང་ལམ་མེ་ལྷན་ནེ་ལྷང་
ངེར་སྣང་ངོ་། །དེ་བཞིན་གཤེགས་པའི་སྐུ་ནི་དེའི་ཉིས་གྱུར་ཏུ་བཞུགས་པར་སྣང་ངོ་། །དེ་ནས་བཅོམ་ལྡན་འདས་ལ་ལྷའི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་ཆེན་པོ་འདིའི་གཟུགས་ཀྱི་ལུས་ཡོངས་སུ་གྲུབ་པ་ངོ་མཚར་ཏེ། བཅོམ་ལྡན་འདས་བརྒྱ་
བྱིན་དང་། ཚངས་པ་དང་། འཇིག་རྟེན་སྐྱོང་བ་འདི་དག་གི་ལུས་ནི་སྣག་ཚའི་ཕུང་པོ་བཞིན་དུ་མཆིས་པར་གདའོ། །བཅོམ་ལྡན་འདས་བདག་རི་རབ་ཀྱི་རྩེ་མོ་འདི་ལ་མཆིས་ཤིང་གང་གི་ཚེ་ན་བདག་ཆོས་བཟང་ལྷའི་མདུན་སར་མཆིས་པ་དེའི་ཚེ། བཅོམ་ལྡན་འདས་བདག་གི་མགུལ་དུ་བརྒྱ་
བྱིན་ཐོགས་པ་ཞེས་བགྱི་བའི་ནོར་བུ་རིན་པོ་ཆེ་ཆེན་པོ་ཐོགས་པས་དེའི་འོད་ཀྱིས་ལྷའི་འཁོར་ཐམས་ཅད་མོག་མོག་པོར་གྱུར་ཏེ། ལམ་མེར་མ་མཆིས། ལྷན་ནེར་མ་མཆིས། ལྷང་ངེར་མ་མཆིས་ན། བཅོམ་ལྡན་འདས་སྐྱེས་བུ་དམ་པ་དེའི་འོད་ཀྱིས་བདག་མོག་མོག་པོར་བགྱིས་ལགས་
ཏེ། བདག་གི་བརྒྱ་བྱིན་ཐོགས་པའི་ནོར་བུ་རིན་པོ་ཆེ་ཆེན་པོ་དེ་ཡང་ལམ་མེར་མ་མཆིས། ལྷན་ནེར་མ་མཆིས། ལྷང་ངེར་མ་མཆིས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་བཀའ་སྩལ་ཏོ། །ཀཽ་ཤི་ཀ་གལ་ཏེ་སྟོང་གསུམ་གྱི་
སྟོང་ཆེན་པོའི་འཇིག་རྟེན་གྱི་ཁམས་འདི་བརྒྱ་བྱིན་ཐོགས་པའི་ནོར་བུ་རིན་པོ་ཆེ་ཆེན་པོས་ཡོངས་སུ་གང་དུ་ཟིན་ཀྱང་ལྷ་ཐམས་ཅད་སྣང་བ་ཞེས་བྱ་བའི་ནོར་བུ་རིན་པོ་ཆེ་ཞེས་བྱ་བ་ཡོད་དེ། དེའི་འོད་ཀྱིས་བརྒྱ་བྱིན་ཐོགས་པའི་ནོར་བུ་རིན་པོ་ཆེ་དེ་དག་ཐམས་ཅད་མོག་མོག་པོར་འགྱུར་རོ། །ཀཽ་
ཤི་ཀ་གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་ལྷ་ཐམས་ཅད་སྣང་བའི་ནོར་བུ་རིན་པོ་ཆེས་ཡོངས་སུ་གང་དུ་ཟིན་ཀྱང་རྡོ་རྗེ་སྣང་བ་ཞེས་བྱ་བའི་ནོར་བུ་རིན་པོ་ཆེ་ཡོད་དེ། དེའི་འོད་ཀྱིས་ལྷ་ཐམས་ཅད་སྣང་བའི་ནོར་བུ་རིན་པོ་ཆེ་དེ་དག་ཐམས་ཅད་མོག་མོག་པོར་འགྱུར་

རོ། །ཀཽ་ཤི་ཀ་གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྡོ་རྗེ་སྣང་བའི་ནོར་བུ་རིན་པོ་ཆེས་ཡོངས་སུ་གང་དུ་ཟིན་ཀྱང་སྣང་བ་ཐམས་ཅད་བསྡུས་པ་ཞེས་བྱ་བའི་ནོར་བུ་རིན་པོ་ཆེ་ཡོད་དེ། དེས་རྡོ་རྗེ་སྣང་བའི་ནོར་བུ་རིན་པོ་ཆེ་ཐམས་ཅད་མོག་མོག་པོར་བྱེད་དོ། །
ཀཽ་ཤི་ཀ་བརྒྱ་བྱིན་འདིའི་མགུལ་དུ་སྣང་བ་ཐམས་ཅད་བསྡུས་པ་ཞེས་བྱ་བའི་ནོར་བུ་རིན་པོ་ཆེ་ཆེན་པོ་ཐོགས་པ་མཐོང་ངམ། བཅོམ་ལྡན་འདས་གང་གི་ཚེ་བདག་གིས་བརྟགས་པ་དེའི་ཚེ་ན་མིག་ཟི་ཟི་པོར་གྱུར་ལགས་ཏེ། དེའི་འོད་ནི་དེ་ལྟ་བུ་ལགས་སོ། །བཀའ་སྩལ་པ། ཀཽ་ཤི་ཀ་བྱང་ཆུབ་
སེམས་དཔའ་གང་དཔའ་བར་འགྲོ་བའི་ཏིང་ངེ་འཛིན་འདི་ཐོབ་པར་གྱུར་པ་དེ། གང་གི་ཚེ་ན་ལྷའི་དབང་པོ་བརྒྱ་བྱིན་དུ་གྱུར་པ་དེའི་ཚེ། དེའི་མགུལ་དུ་ནོར་བུ་རིན་པོ་ཆེ་དེ་ལྟ་བུ་ཐོགས་པར་འགྱུར་རོ། །དེ་ནས་བཅོམ་ལྡན་འདས་ལ་ལྷའི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་
འདས་གང་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མ་བསྐྱེད་པའི་སེམས་ཅན་དེ་དག་ནི་གཟུགས་ཀྱི་ལུས་ཡོངས་སུ་གྲུབ་པ་འདི་ལྟ་བུ་ལས་ཡོངས་སུ་ཉམས་སོ། །བཅོམ་ལྡན་འདས་སེམས་ཅན་དེ་དག་ནི་དཔའ་བར་འགྲོ་བའི་ཏིང་ངེ་འཛིན་འདི་ལས་ཡོངས་སུ་ཉམས་སོ། །
དེ་ནས་ལྷའི་དབང་པོ་བརྒྱ་བྱིན་གྱིས་བཤད་པ་དེ་ལྷའི་བུ་སྦེད་པས་ཐོས་ནས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །ཀྱེ་ཡབ་ཉན་ཐོས་ཀྱི་ངེས་པར་གྱུར་པ་ལ་ཞུགས་པའི་སེམས་ཅན་བརྒྱ་ཕྲག་མང་པོ་དག་སངས་རྒྱས་ཀྱི་ཆོས་ལ་འདོད་པའི་སེམས་བསྐྱེད་ཀྱང་ཅི་ཞིག་བྱར་ཡོད་དེ།
དེ་དག་ནི་འཁོར་བའི་རྒྱུན་གྱི་མཚམས་བཅད་པའོ། །ཀྱེ་ཡབ་གང་དག་གིས་བྱང་ཆུབ་ཏུ་སེམས་བསྐྱེད་པ་དང་། གང་དག་བྱང་ཆུབ་ཏུ་སེམས་བསྐྱེད་པ་དང་། གང་དག་བྱང་ཆུབ་ཏུ་སེམས་བསྐྱེད་པར་འགྱུར་བ་དེ་དག་གིས་ནི་སངས་རྒྱས་ཀྱི་ཆོས་འདི་དག་ལ་འདོད་པའི་སེམས་བསྐྱེད་པར་བྱ་སྟེ།
དེ་དག་ནི་གཟུགས་ཀྱི་ལུས་ཡོངས་སུ་གྲུབ་པ་འདི་ལྟ་བུ་ཐོབ་པར་འགྱུར་རོ། །ཀྱེ་ཡབ་འདི་ལྟ་སྟེ། དཔེར་ན་ཉི་མ་དང་ཟླ་བའི་བསྔགས་པ་ཇི་ཙམ་མང་དུ་བརྗོད་ཅིང་བསྔགས་པ་བཤད་པ་ལ་མི་དམུས་ལོང་གིས་འདོད་པའི་སེམས་བསྐྱེད་ཀྱང་དེས་དེ་དག་མི་མཐོང་སྟེ། མྱོང་བར་མི་འགྱུར་རོ། །

ཀྱེ་ཡབ་དེ་བཞིན་དུ་ཉན་ཐོས་ཀྱི་ངེས་པར་གྱུར་པ་ལ་ཞུགས་པ་ནི་སངས་རྒྱས་ཀྱི་ཆོས་རྣམས་ཀྱི་བསྔགས་པ་བརྗོད་བསྔགས་པ་བསྟན་པ་ལ་འདོད་པའི་སེམས་ཇི་ཙམ་མང་དུ་བསྐྱེད་ཀྱང་དེས་སངས་རྒྱས་ཀྱི་ཆོས་དང་ཡོན་ཏན་རྣམས་མི་ཤེས་མི་མཐོང་མི་མྱོང་ངོ་། །ཀྱེ་ཡབ་དེ་བས་ན་གཟུགས་འདོད་པས་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱི་སྟེ། དེའི་གཟུགས་ཀྱི་ལུས་ཁ་དོག་ཡོངས་སུ་གྲུབ་པ་འདི་ལྟ་བུར་འགྱུར་རོ། །ལྷའི་བུ་སྦེད་པས་བསྟན་པ་འདི་བཤད་པའི་ཚེ་ལྷའི་བུ་ཁྲི་ཉིས་སྟོང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་
བྱང་ཆུབ་སེམས་དཔའ་བློ་གྲོས་བརྟན་པས་ལྷའི་བུ་སྦེད་པ་ལ་འདི་སྐད་ཅེས་སྨྲས་སོ། །ལྷའི་བུ་ཁྱོད་ཀྱིས་དགེ་བའི་རྩ་བ་ཇི་ཙམ་གྱིས་བུད་མེད་ཀྱི་ལུས་ལས་བསྒྱུར། སྨྲས་པ། རིགས་ཀྱི་བུ་ཐེག་པ་ཆེན་པོ་ལ་གནས་པས་ནམ་བུད་མེད་དམ། སྐྱེས་པར་གནས་ཀྱང་ཉེས་པར་མི་འགྱུར་རོ། །
དེ་ཅིའི་ཕྱིར་ཞེ་ན། ཐམས་ཅད་མཁྱེན་པའི་སེམས་ནི་ཁམས་གསུམ་དང་ལྷན་ཅིག་མི་གནས་པའི་ཕྱིར་ཏེ། བུད་མེད་དང་སྐྱེས་པ་ནི་སེམས་ཀྱིས་རབ་ཏུ་ཕྱེ་བ་ཡིན་ནོ། །ཡང་རིགས་ཀྱི་བུ་ཁྱོད་ཀྱིས་དགེ་བའི་རྩ་བ་ཇི་ཙམ་གྱིས་བུད་མེད་ཀྱི་ལུས་ལས་བསྒྱུར་ཅེས་གང་དེ་སྐད་སྨྲས་པ་ནི་ཇི་
ཙམ་དུ་ཁྱིམ་ཐབ་ལ་གཡོ་མེད་ཅིང་ཕངས་པར་སེམས་པས་རིམ་གྲོ་བྱས་པས་སོ། །སྨྲས་པ། ཁྱོད་ཀྱིས་ཇི་ལྟར་ཁྱིམ་ཐབ་ལ་རིམ་གྲོ་བྱས། སྨྲས་པ། སྟོན་པ་ཙམ་དུ་ཕངས་པར་བསམས་པས་སོ། །སྨྲས་པ། ཇི་ལྟར་ཁྱོད་ཀྱིས་གཡོ་མེད་པར་བྱས། སྨྲས་པ། ལུས་ཀྱི་ལས་
ཇི་ལྟ་བ་དང་། ངག་གི་ལས་ཇི་ལྟ་བ་དེ་བཞིན་དུ་ཡིད་ཀྱི་ལས་བགྱིས་ཏེ། རིགས་ཀྱི་བུ་དེ་ནི་བུད་མེད་ཀྱི་གཡོ་མེད་པའོ། །སྨྲས་པ། ཁྱོད་ཀྱིས་བུད་མེད་ཀྱི་ལུས་ལས་ཇི་ལྟར་བསྒྱུར། སྨྲས་པ། ཇི་ལྟར་བསྒྲུབས་པ་བཞིན་དུའོ། །སྨྲས་པ། ཁྱོད་ཀྱིས་ཇི་ལྟར་བསྒྲུབས། སྨྲས་པ། ཇི་ལྟར་བསྒྱུར་བ་
བཞིན་དུའོ། །སྨྲས་པ། ལྷའི་བུ་བཤད་པ་དེའི་དོན་གང་ཡིན། སྨྲས་པ། རིགས་ཀྱི་བུ་ཆོས་ཐམས་ཅད་ནི་ཆོས་ཀྱི་དབྱིངས་སུ་རོ་གཅིག་པས་ན། རིགས་ཀྱི་བུ་ཆོས་ཐམས་ཅད་ནི་མི་འགྲུབ་མི་ལྡོག་གོ། །ཡང་རིགས་ཀྱི་བུ་ཇི་སྲིད་དུ་བདག་སྨོན་པར་གྱུར་པ་དེ་སྲིད་དུ་བདག་ལ་བུད་མེད་ཀྱི་

མཚན་བྱུང་ངོ་། །རིགས་ཀྱི་བུ་གང་གི་ཚེ་ན་བདག་ལ་སྐྱེས་པའི་མཚན་བྱུང་བར་གྱུར་པ་དེའི་ཚེ་ཡང་བདག་གིས་བུད་མེད་ཀྱི་རང་བཞིན་གྱི་ཆོས་ཉིད་དེ་མ་སྤངས་སོ། །རིགས་ཀྱི་བུ་དེ་བས་ན་འདི་ལྟ་སྟེ། བུད་མེད་དམ། སྐྱེས་པར་འཛིན་པ་ནི་ཕྱིན་ཅི་ལོག་ཏུ་འཛིན་པའོ། །རིགས་ཀྱི་
བུ་གང་ཡང་ཕྱིན་ཅི་ལོག་དང་། ཕྱིན་ཅི་མ་ལོག་པ་དེ་གཉི་ག་གཉིས་སུ་མེད་པ་གཉིས་སུ་དབྱེར་མེད་པའོ། །དེ་ཅིའི་ཕྱིར་ཞེ་ན། རིགས་ཀྱི་བུ་ཆོས་ཐམས་ཅད་ནི་ཤིན་ཏུ་གཉིས་དང་བྲལ་བའོ། །དེ་ནས་བྱང་ཆུབ་སེམས་དཔའ་བློ་གྲོས་བརྟན་པས་ལྷའི་བུ་སྦེད་པ་ལ་འདི་སྐད་ཅེས་སྨྲས་སོ། །ཅི་ལྷའི་
བུ་ཁྱོད་ཀྱིས་དཔའ་བར་འགྲོ་བའི་ཏིང་ངེ་འཛིན་འདིའི་ཕྱོགས་འགའ་ཡང་མངོན་སུམ་དུ་གྱུར་ཏམ། སྨྲས་པ། རིགས་ཀྱི་བུ་གཞན་གྱིས་བསྟན་པས་བདག་ལ་མངོན་སུམ་དུ་གྱུར་གྱི། བདག་གི་ཡེ་ཤེས་ཀྱིས་མངོན་སུམ་དུ་གྱུར་པ་ནི་མ་ལགས་སོ། །རིགས་ཀྱི་བུ་བདག་གིས་མངོན་པར་ཤེས་
པ་གང་གི་ཚེ་ན་བཅོམ་ལྡན་འདས་ཤཱཀྱ་ཐུབ་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒྱལ་པོ་ཟས་གཙང་མའི་ཁབ་ན་བྱང་ཆུབ་སེམས་དཔར་གྱུར་ཅིང་བདག་གི་མལ་དུ་སླས་ཀྱི་ནང་ན་བཞུགས་པ་དེའི་ཚེ། མཚན་མོ་མི་ཉལ་ཙམ་ན་ཤར་ཕྱོགས་ནས་ཚངས་པ་
གང་གཱའི་ཀླུང་གི་བྱེ་མ་སྙེད་ལྷགས་ཏེ། དེ་ན་བྱང་ཆུབ་སེམས་དཔའ་ལ་འདི་ལྟ་སྟེ། བྱང་ཆུབ་སེམས་དཔའི་ལམ་དང་། ཉན་ཐོས་ཀྱི་ལམ་ཡོངས་སུ་ཞུས་པ་དང་། བྱང་ཆུབ་སེམས་དཔས་དེ་དག་ལ་ཇི་ལྟར་ཞུ་བ་ཞུས་པ་བཞིན་དུ་ལན་བླན་ཏེ། དེ་ན་བྱང་ཆུབ་སེམས་དཔའ་ལ་ཚངས་པ་
གཅིག་གིས་འདི་སྐད་ཅེས་སྨྲས་སོ། །སྐྱེས་བུ་དམ་པ་ཆོས་ཤེས་པ་ཐོབ་པ་དང་། ཐོགས་པ་མེད་པའི་ཤེས་རབ་དང་། སྤོབས་པ་འདི་ལྟ་བུ་ཡང་ཡོད་ལ། འདོད་པའི་ལོངས་སྤྱོད་དང་། རྒྱལ་སྲིད་ལ་ཆགས་པར་ཡང་བྱེད་པ་འདི་ནི་མི་རིགས་སོ། །དེ་ནས་ཚངས་པ་གཞན་བྱང་ཆུབ་
སེམས་དཔའི་ཐབས་ཤེས་པའི་ཡོན་ཏན་གྱི་ཆོས་ལ་མངོན་སུམ་དུ་གྱུར་པ་དེ་དག་གིས་འདི་སྐད་ཅེས་སྨྲས་སོ། །རིགས་ཀྱི་བུ་འདི་ནི་འདོད་པའི་ལོངས་སྤྱོད་དང་། རྒྱལ་སྲིད་ཀྱི་ཕྱིར་ཁྱིམ་ན་གནས་པ་མ་ཡིན་གྱི། འདི་ནི་སེམས་ཅན་ཡོངས་སུ་སྨིན་པར་བྱ་བའི་ཕྱིར་ཁྱིམ་ན་གནས་ཏེ། འདི་ནི་

འཇིག་རྟེན་གྱི་ཁམས་གཞན་དུ་ཡང་ཆོས་ཀྱི་འཁོར་ལོ་སྐོར་ལ། འདིར་ཡང་བྱང་ཆུབ་སེམས་དཔར་གྱུར་པར་སྣང་ངོ་། །དེའི་ཚེ་ཚངས་པ་དེས་འདི་སྐད་ཅེས་སྨྲས་སོ། །བྱང་ཆུབ་སེམས་དཔའ་ཏིང་ངེ་འཛིན་གང་ལ་གནས་ན་འདི་འདྲ་བའི་རྣམ་པར་འཕྲུལ་པར་འགྱུར། དེ་དག་གིས་སྨྲས་པ།
ཚངས་པ་འདི་ནི་དཔའ་བར་འགྲོ་བའི་ཏིང་ངེ་འཛིན་གྱི་ཡུལ་ལོ། །རིགས་ཀྱི་བུ་དེའི་ཚེ་བདག་འདི་སྙམ་དུ་སེམས་ཏེ། རིགས་ཀྱི་བུ་འདི་ལྟར་འདོད་པ་ལ་ཡང་ཡོངས་སུ་སྤྱོད་ཅིང་རྒྱལ་སྲིད་ཀྱང་ཡོངས་སུ་སྡུད་ལ་ཏིང་ངེ་འཛིན་ཀྱང་ཐོབ་པ་ནི་བྱང་ཆུབ་སེམས་དཔའ་རྣམས་ཀྱི་ཏིང་ངེ་འཛིན་གྱི་རྩལ་ངོ་
མཚར་ཏོ་སྙམ་མོ། །རིགས་ཀྱི་བུ་བདག་གིས་དེ་ཐོས་ནས་བྱང་ཆུབ་སེམས་དཔའ་ལ་ཤིན་ཏུ་སྟོན་པར་འདུ་ཤེས་མངོན་པར་བཞག་གོ། །བདག་གིས་དད་པ་ཡང་རྙེད་ནས་བདག་གིས་ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། བདག་ཀྱང་
ཡེ་ཤེས་དང་། ཡོན་ཏན་གྱི་ཆོས་འདི་ལྟ་བུ་དང་ལྡན་པར་གྱུར་ཅིག་ཅེས་བགྱིས་སོ། །རིགས་ཀྱི་བུ་འདི་ལ་ནི་བདག་ཕྱོགས་ཙམ་ཞིག་མངོན་དུ་གྱུར་གྱི། དཔའ་བར་འགྲོ་བའི་ཏིང་ངེ་འཛིན་འདིའི་ཡོན་ཏན་གྱི་བྱེ་བྲག་ནི་བསམ་གྱིས་མི་ཁྱབ་བོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་
དཔའ་བློ་གྲོས་བརྟན་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ལྷའི་བུ་སྦེད་པའི་ལྷག་པའི་བསམ་པ་བསྟན་པ་ནི་ངོ་མཚར་ཏེ། དེ་ནི་དགེ་བའི་བཤེས་གཉེན་བཅོམ་ལྡན་འདས་ཀྱིས་ཡོངས་སུ་ཟིན་པས་འདི་ལྟ་སྟེ་དཔེར་ན། ད་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་རྣམ་པར་འཕྲུལ་པ་བཞིན་དུ་བཅོམ་ལྡན་འདས་ལྷའི་བུ་སྦེད་པ་འདི་ཡང་རིང་པོ་མི་ཐོགས་པར་དཔའ་བར་འགྲོ་བའི་ཏིང་ངེ་འཛིན་འདི་ལ་གནས་ཏེ་རྣམ་པར་འཕྲུལ་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་དེ་བཞིན་ནོ། །དེ་ནས་བཅོམ་ལྡན་འདས་ལ་
བྱང་ཆུབ་སེམས་དཔའ་བློ་གྲོས་བརྟན་པས་འདི་སྐད་ཅེས་གསོལ་ཏོ། །བཅོམ་ལྡན་འདས་འཁོར་འདི་ན་བྱང་ཆུབ་སེམས་དཔའ་དཔའ་བར་འགྲོ་བའི་ཏིང་ངེ་འཛིན་འདི་ཐོབ་པ་གང་ལ་ལ་དག་འདུས་པ་མཆིས་སམ། དེ་ནས་འཁོར་དེ་ན་ལྷའི་བུ་སངས་རྒྱས་བློ་གྲོས་མངོན་སུམ་ཞེས་བྱ་བ་འདུས་

པར་གྱུར་ཏེ། འདུག་པ་དེས་བྱང་ཆུབ་སེམས་དཔའ་བློ་གྲོས་བརྟན་པ་ལ་འདི་སྐད་ཅེས་སྨྲས་སོ། །བློ་གྲོས་བརྟན་པ་ཁྱོད་དེ་བཞིན་གཤེགས་པ་ཡེ་ཤེས་རྒྱ་མཚོ་ཆེན་པོའི་སྤྱན་སྔར་འདུག་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་གྱི་ཆོས་རིན་པོ་ཆེ་མཐའ་
ཡས་པ་དང་ལྡན་པ་གོ་ཆ་ཆེན་པོ་བགོས་པ་རྣམས་ཀྱི་ནང་དུ་ཕྱིན་ནས། བཅོམ་ལྡན་འདས་བྱང་ཆུབ་སེམས་དཔའ་དཔའ་བར་འགྲོ་བའི་ཏིང་ངེ་འཛིན་འདི་ཐོབ་པ་གང་ལ་ལ་དག་འཁོར་འདིར་འདུས་པ་མཆིས་སམ་ཞེས་དེ་སྐད་ཟེར་བའི་ཁྱོད་ཀྱི་ཞུ་བ་ནི་ཁོ་བོས་བསམས་ན། འདི་ལྟ་སྟེ། དཔེར་ན། འདྲོན་པ་
བྱིས་པའི་རང་བཞིན་ཅན་ལ་ལ་ཞིག་རྒྱ་མཚོ་ཆེན་པོར་ཞུགས་ནས། རྒྱ་མཚོ་ཆེན་པོ་འདི་ན་གང་དག་བླངས་ཏེ། འགྲོ་བར་བྱ་བའི་རིན་པོ་ཆེ་དག་ཡོད་དམ་ཞེས་དེ་སྐད་ཟེར་བ་དང་མཚུངས་པ་སྙམ་བྱེད་དོ། །བློ་གྲོས་བརྟན་པ་འཁོར་འདི་ན་ནི་བྱང་ཆུབ་སེམས་དཔའ་གང་དག་དཔའ་བར་འགྲོ་བའི་ཏིང་ངེ་
འཛིན་འདི་ཐོབ་པ་བརྒྱ་བྱིན་གྱི་ཁ་དོག་དང་། གཟུགས་དང་ལྡན་པ་དག་ཀྱང་ཡོད་དོ། །བྱང་ཆུབ་སེམས་དཔའ་གང་དག་དཔའ་བར་འགྲོ་བའི་ཏིང་ངེ་འཛིན་འདི་ཐོབ་པ་ཚངས་པའི་ཁ་དོག་དང་། གཟུགས་དང་ལྡན་པ་དག་ཀྱང་ཡོད་དོ། །བྱང་ཆུབ་སེམས་དཔའ་གང་དག་དཔའ་བར་འགྲོ་བའི་ཏིང་ངེ་
འཛིན་འདི་ཐོབ་པའི་ལྷའི་ཁ་དོག་དང་། གཟུགས་དང་ལྡན་པ་དག་ཀྱང་ཡོད་དོ། །བྱང་ཆུབ་སེམས་དཔའ་འཁོར་ལོས་སྒྱུར་བའི་ཁ་དོག་དང་། གཟུགས་དང་ལྡན་པ་དག་ཀྱང་ཡོད་དོ། །བྱང་ཆུབ་སེམས་དཔའ་དགེ་སློང་གི་ཁ་དོག་དང་། གཟུགས་དང་ལྡན་པ་དག་ཀྱང་ཡོད་དོ། །བྱང་ཆུབ་སེམས་
དཔའ་དགེ་སློང་མའི་ཁ་དོག་དང་། གཟུགས་དང་ལྡན་པ་དག་ཀྱང་ཡོད་དོ། །བྱང་ཆུབ་སེམས་དཔའ་དགེ་བསྙེན་གྱི་ཁ་དོག་དང་། གཟུགས་དང་ལྡན་པ་དག་ཀྱང་ཡོད་དོ། །དགེ་བསྙེན་མའི་ཁ་དོག་དང་། གཟུགས་དང་ལྡན་པ་དག་ཀྱང་ཡོད་དོ། །མཚན་གྱིས་ལེགས་པར་བརྒྱན་པ་དག་ཀྱང་
ཡོད་དོ། །བྱང་ཆུབ་སེམས་དཔའ་གང་དཔའ་བར་འགྲོ་བའི་ཏིང་ངེ་འཛིན་འདི་ཐོབ་པ་དག་སེམས་ཅན་གདུལ་བའི་ཕྱིར་ལུས་དང་། ཁ་དོག་དམན་པ་དང་ལྡན་པ་དག་ཀྱང་ཡོད་དོ། །བློ་གྲོས་བརྟན་པ་འཁོར་འདི་ན་བྱང་ཆུབ་སེམས་དཔའ་ཉན་ཐོས་ཀྱི་ཁ་དོག་དང་། གཟུགས་དང་། སྤྱོད་ལམ་དང་

ལྡན་པ་དག་ཀྱང་ཡོད་དོ། །བྱང་ཆུབ་སེམས་དཔའ་གང་དཔའ་བར་འགྲོ་བའི་ཏིང་ངེ་འཛིན་འདི་ཐོབ་པ་དག་རང་སངས་རྒྱས་ཀྱི་ཁ་དོག་དང་། གཟུགས་དང་། སྤྱོད་ལམ་དང་ལྡན་པ་དག་ཀྱང་ཡོད་དོ། །བློ་གྲོས་བརྟན་པ་གང་གི་ཚེ་ན་དེ་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་གལ་ཏེ་རྒྱལ་རིགས་ཀྱི་འཁོར་ཏམ། གལ་ཏེ་བྲམ་ཟེའི་འཁོར་ཏམ། གལ་ཏེ་ཁྱིམ་བདག་གི་འཁོར་ཏམ། གལ་ཏེ་དགེ་སྦྱོང་གི་འཁོར་ཏམ། གལ་ཏེ་ལྷའི་འཁོར་ཏམ། གལ་ཏེ་བརྒྱ་བྱིན་གྱི་འཁོར་ཏམ། གལ་ཏེ་ཚངས་པའི་འཁོར་ཏམ། གལ་ཏེ་འཇིག་རྟེན་སྐྱོང་གི་འཁོར་ཏམ།
འཁོར་གང་དང་གང་དུ་གཤེགས་པར་དེ་བཞིན་གཤེགས་པ་སེམས་ཅན་དེ་དག་ཇི་ལྟར་མོས་པ་དེ་ལྟ་བུའི་ཁ་དོག་དང་། གཟུགས་དང་། སྤྱོད་ལམ་དུ་སྣང་ཞིང་དེ་དག་གིས་ཀྱང་དེའི་ཁ་དོག་དེ་འདྲ་བ་ཉིད་དུ་མཐོང་སྟེ། བློ་གྲོས་བརྟན་པ་དེ་ཡང་དཔའ་བར་འགྲོ་བའི་ཏིང་ངེ་འཛིན་ལ་སྔོན་བསམ་པ་སྦྱངས་
པའི་བྱེ་བྲག་ཏུ་བལྟའོ། །བློ་གྲོས་བརྟན་པ་དེ་ལྟར་ན་ཁྱོད་ཀྱིས་གང་དང་གང་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་སྟོན་པ་མཐོང་བ་དེ་དང་དེར། ཁྱོད་ཀྱིས་འདི་ན་བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་ཆེན་པོ་བགོས་པ། ཆོས་ཐམས་ཅད་ཀྱི་དབང་
ཕྱུག་དང་ལྡན་པར་གནས་པ། ཆོས་ཀྱི་འཁོར་ལོ་སྐོར་བ་དཔག་ཏུ་མེད་པ་དག་ཡོད་པར་ཤེས་པར་གྱིས་ཤིག །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་བློ་གྲོས་བརྟན་པས་འདི་སྐད་ཅེས་གསོལ་ཏོ། །བཅོམ་ལྡན་འདས་འདིའི་སྤོབས་པ་ཇི་ལྟ་བ་དང་། འདིའི་ཡེ་ཤེས་ཐོགས་པ་མ་
མཆིས་པར་འཆད་པ་ཇི་ལྟ་བ་དང་། འདིའི་སྤྱོད་པ་རྣམ་པར་འབྱེད་པ་འཆད་པ་ཇི་ལྟ་བ་ལས་ན། བདག་ནི་ལྷའི་བུ་སངས་རྒྱས་བློ་གྲོས་མངོན་སུམ་འདིས་དཔའ་བར་འགྲོ་བའི་ཏིང་ངེ་འཛིན་འདི་ཐོབ་བོ་སྙམ་བགྱིད་དོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་
བློ་གྲོས་བརྟན་པ་ལ་འདི་སྐད་ཅེས་བཀའ་སྩལ་ཏོ། །བློ་གྲོས་བརྟན་པ་དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། ལྷའི་བུ་འདི་ནི་དཔའ་བར་འགྲོ་བའི་ཏིང་ངེ་འཛིན་ལ་གནས་ཏེ། ཏིང་ངེ་འཛིན་འདི་མངོན་དུ་བྱས་ནས་འཆད་དོ། །དེ་ནས་བཅོམ་ལྡན་འདས་ཀྱིས་ལྷའི་བུ་སངས་རྒྱས་བློ་གྲོས་

མངོན་སུམ་ལ་བཀའ་སྩལ་པ། ལྷའི་བུ་ཁྱོད་ཀྱིས་དཔའ་བར་འགྲོ་བའི་ཏིང་ངེ་འཛིན་འདི་སྦྱངས་པའི་བྱེ་བྲག་གི་ཕྱོགས་འགའ་ཞིག་སྟོན་ཅིག །དེ་ནས་བྱང་ཆུབ་སེམས་དཔའ་བློ་གྲོས་བརྟན་པ་ལ་ལྷའི་བུ་སངས་རྒྱས་བློ་གྲོས་མངོན་སུམ་གྱིས་འདི་སྐད་ཅེས་སྨྲས་སོ། །བློ་
གྲོས་བརྟན་པ་ཁྱོད་དཔའ་བར་འགྲོ་བའི་ཏིང་ངེ་འཛིན་འདིའི་ཕྱོགས་ཙམ་གྱི་ཁྱུ་མཆོག་ཏུ་གྱུར་པ་ལྟ་བར་འདོད་དམ། སྨྲས་པ། ལྷའི་བུ་ལྟ་བར་འདོད་དོ། །དེ་ནས་ལྷའི་བུ་སངས་རྒྱས་བློ་གྲོས་མངོན་སུམ་གྱིས་དཔའ་བར་འགྲོ་བའི་ཏིང་ངེ་འཛིན་འདི་ཐོབ་པའི་ཕྱིར་དེའི་ཚེ་ཐམས་ཅད་དང་ལྡན་པའི་འཁོར་
འདི་འཁོར་ལོས་སྒྱུར་བའི་རྒྱལ་པོའི་ཁ་དོག་དང་། གཟུགས་སུ་གནས་པ་དང་། མཚན་གྱིས་ལེགས་པར་བརྒྱན་པ་དང་། འཁོར་དང་བཅས་པ་དཔུང་གི་མཐུ་དང་ལྡན་པ་དང་། རིན་པོ་ཆེ་སྣ་བདུན་དང་ལྡན་པར་འདུ་ཤེས་པ་དེ་འདྲ་བའི་རྫུ་འཕྲུལ་མངོན་པར་འདུ་བྱེད་པའི་ལྟས་བསྟན་ནས།
སྨྲས་པ། བློ་གྲོས་བརྟན་པ་ཅི་མཐོང་། སྨྲས་པ། ལྷའི་བུ་ཁོ་བོས་ནི་ཐམས་ཅད་དང་ལྡན་པའི་འཁོར་འདི་འཁོར་ལོས་སྒྱུར་བའི་ཁ་དོག་དང་། དབྱིབས་དང་། གཟུགས་སུ་གནས་པ་དང་། མཚན་གྱིས་ལེགས་པར་བརྒྱན་པ་དང་། འཁོར་དང་བཅས་པ་དཔུང་གི་མཐུ་དང་ལྡན་པ་
དང་། རིན་པོ་ཆེ་སྣ་བདུན་དང་ལྡན་པར་མཐོང་ངོ་། །དེ་ནས་ལྷའི་བུ་སངས་རྒྱས་བློ་གྲོས་མངོན་སུམ་གྱིས་ཐམས་ཅད་དང་ལྡན་པའི་འཁོར་ལྷའི་དབང་པོ་བརྒྱ་བྱིན་གྱི་ཁ་དོག་དང་། དབྱིབས་དང་། གཟུགས་སུ་གནས་པ་དང་། སུམ་ཅུ་རྩ་གསུམ་གནས་ཀྱི་ཁང་པ་ན་གནས་ཤིང་
ལྷའི་བུ་མོ་བརྒྱ་སྟོང་གིས་ཡོངས་སུ་བསྐོར་ཏེ། སིལ་སྙན་དང་། ཕེག་རྡོབ་པ་དང་། རོལ་མོའི་སྒྲ་དབྱངས་བྱེད་པར་འདུ་ཤེས་པ་དེ་འདྲ་བའི་རྫུ་འཕྲུལ་མངོན་པར་འདུ་བྱེད་པར་བྱིན་གྱིས་བརླབས་ནས་སྨྲས་པ། བློ་གྲོས་བརྟན་པ་ཅི་མཐོང་། སྨྲས་པ། ལྷའི་བུ་ཁོ་བོས་ནི་ཐམས་
ཅད་དང་ལྡན་པའི་འཁོར་འདི་ལྷའི་དབང་པོ་བརྒྱ་བྱིན་གྱི་ཁ་དོག་དང་། དབྱིབས་དང་། གཟུགས་སུ་གནས་པ་དང་། སུམ་ཅུ་རྩ་གསུམ་གྱི་ལྷའི་ཁང་པ་ན་གནས་ཤིང་ལྷའི་བུ་མོ་བརྒྱ་སྟོང་གིས་ཡོངས་སུ་བསྐོར་ཏེ། སིལ་སྙན་དང་། ཕེག་རྡོབ་པ་དང་། རོལ་མོའི་སྒྲ་

དབྱངས་བྱེད་པར་མཐོང་ངོ་། །དེ་ནས་ལྷའི་བུ་སངས་རྒྱས་བློ་གྲོས་མངོན་སུམ་གྱིས་ཡང་གང་ཐམས་ཅད་དང་ལྡན་པའི་འཁོར་དེ་ཚངས་པའི་ཁ་དོག་དང་། དབྱིབས་དང་། གཟུགས་སུ་གནས་པ་དང་། སྤྱོད་ལམ་ཤིན་ཏུ་ཞི་བ་དང་། ཚངས་པའི་གནས་ཀྱི་གཞལ་མེད་ཁང་ན་གནས་པ་དང་།
ཚད་མེད་པ་བཞིའི་བསམ་གཏན་ལ་བསམ་གཏན་དུ་བྱེད་པར་འདུ་ཤེས་པ་དེ་ལྟ་བུའི་བྱིན་གྱི་རླབས་པ་བྱིན་གྱིས་བརླབས་ནས། སྨྲས་པ། བློ་གྲོས་བརྟན་པ་ཅི་མཐོང་། སྨྲས་པ། ལྷའི་བུ་ཁོ་བོས་ནི་ཐམས་ཅད་དང་ལྡན་པའི་འཁོར་འདི་ཚངས་པའི་ཁ་དོག་དང་། དབྱིབས་དང་། གཟུགས་སུ་
གནས་པ་དང་། སྤྱོད་ལམ་རབ་ཏུ་ཞི་བ་དང་། ཚངས་པའི་གནས་ཀྱི་གཞལ་མེད་ཁང་ན་གནས་པ་དང་། ཚད་མེད་པ་བཞིའི་བསམ་གཏན་ལ་བསམ་གཏན་དུ་བྱེད་པར་མཐོང་ངོ་། །དེ་ནས་ལྷའི་བུ་སངས་རྒྱས་བློ་གྲོས་མངོན་སུམ་གྱིས་ཡང་འཁོར་དེ་དག་གནས་བརྟན་འོད་སྲུང་ཆེན་པོའི་ཁ་དོག་
དང་། གཟུགས་དང་། དབྱིབས་དང་། ཆོས་གོས་སྣམ་སྦྱར་དང་། ཐང་བ་དང་། ལྷུང་བཟེད་ཐོགས་པའི་སྤྱོད་ལམ་འཛིན་པ་དང་། རྣམ་པར་ཐར་པ་བརྒྱད་ཀྱི་བསམ་གཏན་ལ་བསམ་གཏན་བྱེད་པ་ཅི་འདྲ་བ་དེ་འདྲ་བར་སྣང་ལ། སྣ་ཚོགས་སུ་མེད་ཅིང་ཁ་དོག་གཅིག་ཏུ་གྱུར་པ་དེ་ལྟ་བུའི་བྱིན་གྱི་
རླབས་པ་བྱིན་གྱིས་བརླབས་ནས། སྨྲས་པ། བློ་གྲོས་བརྟན་པ་ཅི་མཐོང་། སྨྲས་པ། ལྷའི་བུ་ཁོ་བོས་ནི་ཐམས་ཅད་དང་ལྡན་པའི་འཁོར་འདི་གནས་བརྟན་འོད་སྲུང་ཆེན་པོའི་ཁ་དོག་དང་། གཟུགས་དང་། དབྱིབས་དང་། ཆོས་གོས་སྣམ་སྦྱར་དང་། ཐང་བ་དང་། ལྷུང་བཟེད་ཐོགས་
པའི་སྤྱོད་ལམ་འཛིན་པ་དང་། རྣམ་པར་ཐར་པ་བརྒྱད་ཀྱི་བསམ་གཏན་ལ་བསམ་གཏན་བྱེད་པ་ཅི་འདྲ་བ་དེ་འདྲ་བར་སྣང་ལ། སྣ་ཚོགས་སུ་མེད་ཅིང་ཁ་དོག་གཅིག་ཏུ་གྱུར་པ་དེ་ལྟ་བུར་མཐོང་ངོ་། །དེ་ནས་ལྷའི་བུ་སངས་རྒྱས་བློ་གྲོས་མངོན་སུམ་གྱིས་དཔའ་བར་འགྲོ་བའི་ཏིང་ངེ་འཛིན་འདི་ཉིད་
ཀྱི་ཁྱུ་མཆོག་ཏུ་གྱུར་པ་བསྟན་པའི་ཕྱིར་ཐམས་ཅད་དང་ལྡན་པའི་འཁོར་བཅོམ་ལྡན་འདས་ཤཱཀྱ་ཐུབ་པའི་ཁ་དོག་དང་། གཟུགས་དང་། དབྱིབས་དང་། སྤྱོད་ལམ་དང་། མཚན་བཀོད་པས་བརྒྱན་པ་དང་། ཞབས་འབྲིང་བ་དགེ་སློང་གི་དགེ་འདུན་ཅི་འདྲ་བ་དེ་འདྲ་བར་དེ་བཞིན་གཤེགས་

པ་མང་པོ་ཐམས་ཅད་སོ་སོ་ན་དགེ་སློང་གི་དགེ་འདུན་དང་བཅས་པར་སྣང་བ་དེ་ལྟ་བུའི་མཚན་མ་བསྟན་ནས། སྨྲས་པ། བློ་གྲོས་བརྟན་པ་ཅི་མཐོང་། སྨྲས་པ། ལྷའི་བུ་ཁོ་བོས་ནི་ཐམས་ཅད་དང་ལྡན་པའི་འཁོར་འདི་དེ་བཞིན་གཤེགས་པའི་ཁ་དོག་དང་། གཟུགས་དང་།
དབྱིབས་དང་། སྤྱོད་ལམ་དང་། མཚན་བཀོད་པས་བརྒྱན་པ་དང་། ཞབས་འབྲིང་བ་དགེ་སློང་གི་དགེ་འདུན་གྱིས་ཡོངས་སུ་བསྐོར་བ་ཅི་འདྲ་བ་དེ་འདྲ་བར་སོ་སོ་ན་དགེ་སློང་གི་དགེ་འདུན་དང་བཅས་པར་མཐོང་ངོ་། །སྨྲས་པ། བློ་གྲོས་བརྟན་པ་འདི་ནི་དཔའ་བར་འགྲོ་བའི་ཏིང་ངེ་འཛིན་གྱི་ཁྱུ་
མཆོག་ཏུ་གྱུར་པ་སྟེ། བློ་གྲོས་བརྟན་པ་བྱང་ཆུབ་སེམས་དཔའ་ཏིང་ངེ་འཛིན་དེ་དང་ལྡན་པ་ནི་འདོད་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡུངས་འབྲུ་གཅིག་ཏུ་བྱིན་གྱིས་རློབ་བོ། །ཡང་ན་ཡུངས་འབྲུ་གཅིག་གི་ནང་དུ་ཆུད་པར་ཀུན་དུ་སྟོན་ཅིང་གླིང་བཞི་པའི་འཇིག་རྟེན་གྱི་
ཁམས་ཐམས་ཅད་ཀྱང་སྣང་བར་འགྱུར། ཉི་མ་དང་ཟླ་བ་ཐམས་ཅད་ཀྱང་སྣང་བར་གྱུར་ཏེ། སེམས་ཅན་དག་ལ་གནོད་པར་ཡང་མི་འགྱུར་རོ། །བློ་གྲོས་བརྟན་པ་དེ་ལྟར་ན་ཏིང་ངེ་འཛིན་འདི་ནི་བསམ་གྱིས་མི་ཁྱབ་བོ།། །།བམ་པོ་གསུམ་པ། དེ་ནས་ཉན་ཐོས་ཆེན་
པོ་དེ་དག་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་དག་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དེ་དག་དང་། བྱང་ཆུབ་སེམས་དཔའ་དེ་
དག་གིས་མགྲིན་གཅིག་ཏུ་ཚིག་སྨྲས་པ། བཅོམ་ལྡན་འདས་གང་དག་གིས་དཔའ་བར་འགྲོ་བའི་ཏིང་ངེ་འཛིན་འདི་ཐོབ་པའམ། ཐོབ་པར་གྱུར་པའི་བྱང་ཆུབ་སེམས་དཔའ་དེ་དག་ནི་བསམ་གྱིས་མི་ཁྱབ་པར་བལྟ་བ་ལགས་སོ། །བཅོམ་ལྡན་འདས་སེམས་ཅན་དེ་དག་ནི་དེ་བཞིན་གཤེགས་
པའི་འགྲོས་སུ་མཆི་བ་ལགས་སོ། །མངོན་པར་ཤེས་པའི་ཡེ་ཤེས་དང་། རིག་པ་དང་ལྡན་པ་ལགས་ཏེ། བཅོམ་ལྡན་འདས་དེ་ལྟར་བདག་ཅག་སྟན་གཅིག་ལ་མཆིས་པ་ལས་འདི་འདྲ་བའི་ཁ་དོག་དང་། གཟུགས་སུ་གདའ་བར་གྱུར་ནས། བདག་ཅག་གཅིག་ལ་གཅིག་ཁ་

དོག་དང་། གཟུགས་དང་། སྤྱོད་ལམ་དེ་ལྟ་བུར་མཐོང་སྟེ། བཅོམ་ལྡན་འདས་བདག་ཅག་ནི་གང་དག་དཔའ་བར་འགྲོ་བའི་ཏིང་ངེ་འཛིན་རྣར་མི་གྲག་པའི་སེམས་ཅན་དེ་དག་བདུད་ཀྱིས་བྱིན་གྱིས་བརླབས་པའོ། །བཅོམ་ལྡན་འདས་ཐ་ན་གང་དག་དཔའ་བར་འགྲོ་བའི་ཏིང་ངེ་འཛིན་འདི་
ཐོས་པའི་སེམས་ཅན་དེ་དག་ཀྱང་སངས་རྒྱས་ཐམས་ཅད་ཀྱིས་ཡོངས་སུ་བཟུང་བ་ལགས་ན་འདོན་པར་བགྱིད་པ་ལྟ་ཅི་སྨོས། ཐོས་ནས་ནན་ཏན་བགྱིད་པ་ལྟ་ཅི་སྨོས། གང་དག་གིས་དཔའ་བར་འགྲོ་བའི་ཏིང་ངེ་འཛིན་འདི་ཐོས་པ་ལྟ་ཅི་སྨོས་སྙམ་བགྱིད་དོ། །བཅོམ་ལྡན་འདས་ཆོས་ཐམས་
ཅད་ཀྱི་ཕ་རོལ་དུ་མཆི་བར་འཚལ་བས་དཔའ་བར་འགྲོ་བའི་ཏིང་ངེ་འཛིན་མཉན་པར་བགྱིའོ། །གཟུང་བར་བགྱིའོ། །བཀླག་པར་བགྱིའོ། །ཀུན་ཆུབ་པར་བགྱིའོ། །གཟུགས་དང་། ཁ་དོག་ཐམས་ཅད་སྟོན་པར་འཚལ་བ་དང་། སེམས་ཅན་ཐམས་ཅད་ཀྱི་སྤྱོད་པ་དང་། སྤྱོད་ལམ་
ཇི་ལྟ་བ་བཞིན་དུ་སྟོན་པར་འཚལ་བ་དང་། དེ་དག་གི་སེམས་རབ་ཏུ་རྟོགས་པར་འཚལ་བ་དང་། དེ་དག་གི་ནད་ཇི་ལྟ་བ་བཞིན་དུ་སྨན་གྱིས་གསོ་བར་འཚལ་བས་དཔའ་བར་འགྲོ་བའི་ཏིང་ངེ་འཛིན་འདི་ཉིད་མཉན་པར་བགྱིའོ། །བཀླག་པར་བགྱིའོ། །བསྒོམ་པར་བགྱིའོ། །གང་དག་གིས་
དཔའ་བར་འགྲོ་བའི་ཏིང་ངེ་འཛིན་འདི་ཐོབ་པའི་སྐྱེས་བུ་དམ་པ་དེ་དག་ནི་སངས་རྒྱས་ཐམས་ཅད་ཀྱི་ཡུལ་དུ་མཆིས་པ་ལགས་སོ། །རང་བྱུང་གི་ཡེ་ཤེས་ལ་དབང་བགྱིད་པ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཉན་ཐོས་ཆེན་པོ་དེ་དག་དང་། ལྷ་དང་། ཀླུ་དང་།
གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དེ་དག་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དེ་དག་དང་། བྱང་ཆུབ་སེམས་དཔའ་དེ་དག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་དེ་དེ་བཞིན་ནོ། །
ཇི་སྐད་སྨྲས་པ་དེ་བཞིན་ཏེ། དཔའ་བར་འགྲོ་བའི་ཏིང་ངེ་འཛིན་འདི་མ་ཐོབ་པའི་ཕྱིར་བྱང་ཆུབ་སེམས་དཔའ་དེ་ལ་ནི་བྱང་ཆུབ་སེམས་དཔའ་ཞེས་ང་མི་སྨྲའོ། །དཔའ་བར་འགྲོ་བའི་ཏིང་ངེ་འཛིན་འདི་མ་ཐོབ་པའི་ཕྱིར་བྱང་ཆུབ་སེམས་དཔའ་དེ་ལ་ནི་མངོན་པར་ཤེས་པ་ཐོབ་པ་ཞེས་ང་མི་སྨྲའོ། །

དཔའ་བར་འགྲོ་བའི་ཏིང་ངེ་འཛིན་འདི་མ་ཐོབ་པའི་ཕྱིར་བྱང་ཆུབ་སེམས་དཔའ་དེ་ལ་ནི་སྦྱང་བ་བྱས་པའོ་ཞེས་ང་མི་སྨྲའོ། །དཔའ་བར་འགྲོ་བའི་ཏིང་ངེ་འཛིན་འདི་མ་ཐོབ་པའི་ཕྱིར་བྱང་ཆུབ་སེམས་དཔའ་དེ་ལ་ནི་སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་
དང་། བསམ་གཏན་དང་། ཤེས་རབ་དང་། ཐབས་དང་ལྡན་པའོ་ཞེས་ང་མི་སྨྲའོ། །དཔའ་བར་འགྲོ་བའི་ཏིང་ངེ་འཛིན་འདི་མ་ཐོབ་པའི་ཕྱིར་བྱང་ཆུབ་སེམས་དཔའ་དེ་ལ་ནི་མང་དུ་ཐོས་པའོ་ཞེས་ང་མི་སྨྲའོ། །དཔའ་བར་འགྲོ་བའི་ཏིང་ངེ་འཛིན་འདི་མ་ཐོབ་པའི་ཕྱིར་བྱང་ཆུབ་སེམས་དཔའ་
དེ་ལ་ནི་སྤོབས་པ་དང་ལྡན་པའོ་ཞེས་ང་མི་སྨྲའོ། །རིགས་ཀྱི་བུ་དག་དེ་བས་ན་ངེས་པར་འབྱུང་བའི་ལམ་ཐམས་ཅད་དུ་ངེས་པར་འབྱུང་བར་འདོད་པའི་བྱང་ཆུབ་སེམས་དཔས་རློམ་སེམས་ཐམས་ཅད་མེད་པའི་ཕྱིར་དཔའ་བར་འགྲོ་བའི་ཏིང་ངེ་འཛིན་འདི་བསླབ་པར་བྱའོ། །དེ་ནས་བྱང་ཆུབ་
སེམས་དཔའ་བློ་གྲོས་བརྟན་པས་ལྷའི་བུ་སངས་རྒྱས་བློ་གྲོས་མངོན་སུམ་ལ་འདི་སྐད་ཅེས་སྨྲས་སོ། །ལྷའི་བུ་བྱང་ཆུབ་སེམས་དཔའ་ཏིང་ངེ་འཛིན་འདི་ཐོབ་པར་འདོད་པས་གང་ལ་བརྩོན་པར་བྱ། སྨྲས་པ། རིགས་ཀྱི་བུ་བྱང་ཆུབ་སེམས་དཔའ་ཏིང་ངེ་འཛིན་འདི་ཐོབ་པར་འདོད་པས་
སོ་སོའི་སྐྱེ་བོའི་ཆོས་རྣམས་ལ་བརྩོན་པར་བྱའོ། །སྨྲས་པ། ལྷའི་བུ་ཇི་ལྟར་ན་བྱང་ཆུབ་སེམས་དཔས་སོ་སོའི་སྐྱེ་བོའི་ཆོས་རྣམས་ལ་བརྩོན་པར་བྱ། སྨྲས་པ། ཅི་ནས་ཀྱང་སོ་སོའི་སྐྱེ་བོའི་ཆོས་རྣམས་སངས་རྒྱས་ཀྱི་ཆོས་རྣམས་དང་ལྡན་པ་ཡང་མ་ཡིན། མི་ལྡན་པ་ཡང་མ་ཡིན་
པར་མཐོང་བ་དེ་ལྟ་བུར། རིགས་ཀྱི་བུ་བྱང་ཆུབ་སེམས་དཔས་སོ་སོའི་སྐྱེ་བོའི་ཆོས་ལ་བརྩོན་པར་བྱའོ། །སྨྲས་པ། ལྷའི་བུ་ཅི་སངས་རྒྱས་ཀྱི་ཆོས་རྣམས་ལྡན་པའམ། མི་ལྡན་པར་ཉེ་བར་གནས་སམ། སྨྲས་པ། རིགས་ཀྱི་བུ་སོ་སོའི་སྐྱེ་བོའི་ཆོས་རྣམས་ཀྱང་སྦྱར་བའམ།
དབྲལ་བར་མི་ནུས་ཏེ། གང་ཡང་རིགས་ཀྱི་བུ་སངས་རྒྱས་ཀྱི་ཆོས་རྣམས་དང་། སོ་སོའི་སྐྱེ་བོའི་ཆོས་རྣམས་གཉིས་སུ་མེད་ཅིང་གཉིས་སུ་དབྱེར་མེད་དེ། ཚུལ་གཅིག་པས་དེའི་ཕྱིར་བརྩོན་པ་ཞེས་བྱའི་རིགས་ཀྱི་བུ་འདི་ལ་སྦྱར་བའམ། དབྲལ་བར་བྱ་བའི་ཆོས་ནི་གང་

ཡང་མེད་དོ། །དེ་ཅིའི་ཕྱིར་ཞེ་ན། རིགས་ཀྱི་བུ་ཆོས་ཐམས་ཅད་ནི་མི་སྐྱེ་བའི་དེ་བཞིན་ཉིད་དང་ལྡན་ནོ། །ཆོས་ཐམས་ཅད་ནི་མི་འགོག་པའི་དེ་བཞིན་ཉིད་དང་ལྡན་ནོ། །ཆོས་ཐམས་ཅད་ནི་མི་འཁྲུགས་པའི་དེ་བཞིན་ཉིད་དང་ལྡན་ནོ། །ཆོས་ཐམས་ཅད་ནི་འདུ་བ་མེད་པའི་དེ་བཞིན་ཉིད་དང་
ལྡན་ནོ། །ཆོས་ཐམས་ཅད་ནི་འབྲལ་བ་མེད་པའི་དེ་བཞིན་ཉིད་དང་ལྡན་ནོ། །ཆོས་ཐམས་ཅད་ནི་ནམ་མཁའ་བཞིན་དུ་དབེན་པ་དང་ལྡན་ནོ། །ཆོས་ཐམས་ཅད་ནི་སྟོང་པ་ཉིད་ཀྱི་མཉམ་པ་ཉིད་དང་ལྡན་ནོ། །ཆོས་ཐམས་ཅད་ནི་མ་སྐྱེས་པའི་ཆོས་ཉིད་དང་ལྡན་ཏེ་ཤི་འཕོ་མེད་དོ། །སྨྲས་པ།
ལྷའི་བུ་དཔའ་བར་འགྲོ་བའི་ཏིང་ངེ་འཛིན་གང་དུ་འགྲོ་བ་ཡིན། སྨྲས་པ། རིགས་ཀྱི་བུ་དཔའ་བར་འགྲོ་བའི་ཏིང་ངེ་འཛིན་ནི་སེམས་ཅན་ཐམས་ཅད་ཀྱི་སེམས་དང་སྤྱོད་པ་ལ་འགྲོ་བ་ཡང་ཡིན་ལ། སེམས་དང་ལྟ་བ་དང་། དམིགས་པར་འདུ་ཤེས་པ་ལ་འགྲོ་བ་ནི་མ་ཡིན་ནོ། །སྲིད་པར་
འགྲོ་བའི་འཆི་འཕོ་དང་། སྐྱེ་བ་ཐམས་ཅད་དུ་འགྲོ་བ་ཡང་ཡིན་ལ། སྲིད་པར་འགྲོ་བའི་ཉོན་མོངས་པར་འགྲོ་བ་ནི་མ་ཡིན་ནོ། །རིགས་ཀྱི་བུ་དཔའ་བར་འགྲོ་བའི་ཏིང་ངེ་འཛིན་ནི་ཏིང་ངེ་འཛིན་ཐམས་ཅད་སྟོན་པར་འགྲོ་བ་ཡང་ཡིན་ལ་མཉམ་པ་ཉིད་འཁྲུགས་པར་འགྲོ་བ་ནི་མ་ཡིན་ནོ། །སངས་
རྒྱས་ཀྱི་ཞིང་ཐམས་ཅད་དུ་འཇུག་པར་འགྲོ་བ་ཡང་ཡིན་ལ་ཞིང་སྣ་ཚོགས་སུ་འདུ་ཤེས་པར་འགྲོ་བ་ནི་མ་ཡིན་ནོ། །སངས་རྒྱས་ཐམས་ཅད་སྟོན་པར་འགྲོ་བ་ཡང་ཡིན་ལ་སངས་རྒྱས་ཀྱི་གཟུགས་དང་། མཚན་ལ་རྣམ་པར་རྟོག་ཅིང་སྟོན་པར་འགྲོ་བ་ནི་མ་ཡིན་ནོ། །སྒྲ་དང་། སྐད་
ཐམས་ཅད་སྟོན་པར་འགྲོ་བ་ཡང་ཡིན་ལ་ཡི་གེའི་འདུ་ཤེས་ཡོངས་སུ་རྟོག་པར་འགྲོ་བ་ནི་མ་ཡིན་ནོ། །རིགས་ཀྱི་བུ་དཔའ་བར་འགྲོ་བའི་ཏིང་ངེ་འཛིན་ནི་སངས་རྒྱས་ཐམས་ཅད་མཐོང་བར་འགྲོ་བ་ཡང་ཡིན་ལ་ཤིན་ཏུ་མཐོང་བར་འགྲོ་བ་ནི་མ་ཡིན་ནོ། །རིགས་ཀྱི་བུ་དེ་ལྟ་བས་ན་དཔའ་བར་
འགྲོ་བའི་ཏིང་ངེ་འཛིན་ཇི་ལྟ་བུར་འགྲོ་བ་ཡིན་ཞེས་གང་དེ་སྐད་སྨྲས་པ་ནི་དེ་བཞིན་གཤེགས་པའི་འགྲོ་བ་གང་ཡིན་པ་ཏིང་ངེ་འཛིན་འདིའི་འགྲོ་བ་ཡང་དེ་ཡིན་ནོ། །སྨྲས་པ། ལྷའི་བུ་དེ་བཞིན་གཤེགས་པ་ཇི་ལྟ་བུར་གཤེགས། སྨྲས་པ། དེ་བཞིན་གཤེགས་པ་ནི་དེ་བཞིན་

ཉིད་ཀྱི་ཕྱིར་མི་འགྲོ་བར་གཤེགས་སོ། །སྨྲས་པ། ལྷའི་བུ་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བར་མི་གཤེགས་སམ། སྨྲས་པ། རིགས་ཀྱི་བུ་ཆོས་ཐམས་ཅད་ཡོངས་སུ་མྱ་ངན་ལས་འདའ་བར་འགྲོ་བ་ཡིན་ཏེ། དེ་བས་ན་དེ་བཞིན་གཤེགས་པ་ཡོངས་སུ་
མྱ་ངན་ལས་འདའ་བར་གཤེགས་པ་མ་ཡིན་ནོ། །དེ་ཅིའི་ཕྱིར་ཞེ་ན། མྱ་ངན་ལས་འདའ་བའི་འགྲོ་བ་ནི་ཡོངས་སུ་མྱ་ངན་ལས་མི་འདའོ། །སྨྲས་པ། ལྷའི་བུ་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་ཡོངས་སུ་མྱ་ངན་ལས་མ་འདས་སམ། སྨྲས་པ། ཅི་རིགས་ཀྱི་
བུ་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་སྐྱེས་སམ། སྨྲས་པ། ལྷའི་བུ་དེ་ནི་དེ་བཞིན་གཤེགས་པས་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་སྐྱེས་ལ་མྱ་ངན་ལས་ཀྱང་འདས་སོ་ཞེས་བཀའ་སྩལ་ཏོ། །སྨྲས་པ། རིགས་ཀྱི་བུ་གང་ཡང་དེ་བཞིན་གཤེགས་
པས་ལྷ་དང་མིའི་སྐྱེ་བོ་མང་པོ་ལ་ཕན་པའི་ཕྱིར། སྐྱེ་བོ་མང་པོ་ལ་བདེ་བའི་ཕྱིར། འཇིག་རྟེན་ལ་སྙིང་བརྩེ་བའི་ཕྱིར། སྐྱེ་བོ་ཕལ་པོ་ཆེ་དང་ལྷ་དང་མི་རྣམས་ཀྱི་དོན་གྱི་ཕྱིར། ཕན་པའི་ཕྱིར། བདེ་བའི་ཕྱིར། གང་ཟག་གཅིག་འཇིག་རྟེན་དུ་འབྱུང་སྟེ། འདི་ལྟ་སྟེ། དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སོ་ཞེས་དེ་སྐད་ཅེས་བཀའ་སྩལ་པ། །ཅི་དེ་བཞིན་གཤེགས་པས་གང་སྐྱེ་བའམ། འགག་པར་འགྱུར་བའི་གང་ཟག་དེ་རྙེད་དམ། སྨྲས་པ། ལྷའི་བུ་དེ་བཞིན་གཤེགས་པས་གང་སྐྱེ་བའམ། འགག་པར་འགྱུར་
བའི་ཆོས་གང་ཡང་མ་རྙེད་དོ། །སྨྲས་པ། རིགས་ཀྱི་བུ་དེ་བཞིན་ཏེ། དེ་བཞིན་གཤེགས་པ་ནི་སངས་རྒྱས་འབྱུང་བར་ཡང་འཆད་མོད་ཀྱི། དེ་བཞིན་གཤེགས་པའི་ཆོས་ཉིད་ནི་འབྱུང་བའམ། འགག་པ་མེད་དོ། །དེ་བཞིན་གཤེགས་པ་ནི་སངས་རྒྱས་ཡོངས་སུ་མྱ་ངན་ལས་
འདའ་བར་ཡང་འཆད་མོད་ཀྱི། དེ་བཞིན་གཤེགས་པའི་དེ་བཞིན་ཉིད་ནི་ཡོངས་སུ་མྱ་ངན་ལས་ཀྱང་མི་འདའོ། །སྨྲས་པ། ལྷའི་བུ་དེ་བཞིན་གཤེགས་པ་དཔག་ཏུ་མེད་པ་ད་ལྟར་མངོན་པར་རྫོགས་པར་སངས་མ་རྒྱས་སམ། སྨྲས་པ། རིགས་ཀྱི་བུ་མི་སྐྱེ་བའི་ཆོས་ཉིད་

ཇི་ལྟ་བ་དང་། མི་འགོག་པའི་ཆོས་ཉིད་ཇི་ལྟ་བ་དེ་བཞིན་དུ་དེ་བཞིན་གཤེགས་པ་སྐྱེས་ཤིང་མངོན་པར་རྫོགས་པར་སངས་རྒྱས་ཏེ། རིགས་ཀྱི་བུ་བདག་ནི་དེ་བཞིན་གཤེགས་པ་མངོན་པར་རྫོགས་པར་སངས་རྒྱས་པ་དང་། ཡོངས་སུ་མྱ་ངན་ལས་འདས་པ་ཐ་དད་པར་མི་འདོད་དོ། །སྨྲས་
པ། ཅིའི་ཕྱིར། སྨྲས་པ། རིགས་ཀྱི་བུ་དེ་བཞིན་གཤེགས་པས་ནི་ཆོས་ཐམས་ཅད་ཤིན་ཏུ་ཡོངས་སུ་མྱ་ངན་ལས་འདས་པར་མངོན་པར་རྫོགས་པར་སངས་རྒྱས་སོ། །སྨྲས་པ། ལྷའི་བུ་ཆོས་གང་ཤིན་ཏུ་ཡོངས་སུ་མྱ་ངན་ལས་འདས་པ་དེ་མངོན་པར་རྫོགས་པར་སངས་རྒྱས་པར་
བྱ་ནུས་སམ། སྨྲས་པ། རིགས་ཀྱི་བུ་ཇི་ལྟར་ཡོངས་སུ་མྱ་ངན་ལས་འདས་པ་དེ་བཞིན་དུ་དེས་མངོན་པར་རྫོགས་པར་སངས་རྒྱས་མོད་ཀྱི་མྱ་ངན་ལས་འདས་པའི་དེ་བཞིན་ཉིད་དེ་ལས་ཀྱང་མི་འདའོ། །རིགས་ཀྱི་བུ་དེ་བཞིན་གཤེགས་པས་ནི་སྐྱེ་བས་ཀྱང་བྱང་ཆུབ་མངོན་པར་རྫོགས་
པར་སངས་རྒྱས་པ་མ་ཡིན། འགག་པས་ཀྱང་མ་ཡིན། ཆོས་གང་ལ་ཡང་གནས་པས་ཀྱང་བྱང་ཆུབ་མངོན་པར་རྫོགས་པར་སངས་རྒྱས་པ་མ་ཡིན་ཏེ། རིགས་ཀྱི་བུ་གང་ན་མི་སྐྱེ་བ་མི་འགག་པ། མི་གནས་པ་དེ་ནི་ཡོངས་སུ་མྱ་ངན་ལས་འདས་པའོ། །སྨྲས་པ། ལྷའི་བུ་
ཁྱོད་དཔའ་བར་འགྲོ་བའི་ཏིང་ངེ་འཛིན་འདི་ལ་གནས་ཏེ་དེ་ལྟར་འཆད་དམ། སྨྲས་པ། རིགས་ཀྱི་བུ་བདག་ནི་ཆོས་གང་ལ་ཡང་གནས་ཏེ་འཆད་པ་མེད་དོ། །སྨྲས་པ། ལྷའི་བུ་ཁྱོད་ཇི་ལྟར་གནས་མེད་པ་ལ་གནས་ཏེ་འཆད་པར་བྱེད། སྨྲས་པ། རིགས་ཀྱི་བུ་དེ་ཇི་སྙམ་དུ་སེམས།
གང་དེ་བཞིན་གཤེགས་པས་སྤྲུལ་པ་སྤྲུལ་པས་འཆད་པ་དེ་གང་དུ་གནས་ཏེ་འཆད། སྨྲས་པ། དེ་བཞིན་གཤེགས་པས་སྤྲུལ་པ་དེ་ནི་དེ་བཞིན་གཤེགས་པའི་བྱིན་གྱི་བརླབས་ཀྱིས་འཆད་དོ། སྨྲས་པ། རིགས་ཀྱི་བུ་ཡང་དེ་བཞིན་གཤེགས་པས་བྱིན་གྱིས་བརླབ་པ་གང་
ཞིག་བྱིན་གྱིས་བརླབས་ཏེ། སྤྲུལ་པ་ལ་བྱིན་གྱིས་རློབ་པར་མཛད། ཅི་བདག་བྱིན་གྱིས་བརླབས་པའམ། སྨྲས་པ། དེ་མ་ཡིན་ནོ། །སྨྲས་པ། གཞན་བྱིན་གྱིས་བརླབས་པའམ། །སྨྲས་པ། དེ་མ་ཡིན་ནོ། །སྨྲས་པ། ཆོས་བསྟན་པ་བྱིན་གྱིས་བརླབས་པའམ། སྨྲས་པ།

དེ་མ་ཡིན་ནོ། །སྨྲས་པ། དེ་བཞིན་གཤེགས་པ་གང་དུ་གནས་ཏེ་བྱིན་གྱིས་རློབ། སྨྲས་པ། ལྷའི་བུ་དེ་བཞིན་གཤེགས་པ་ནི་གནས་མེད་པ་ལ་གནས་ཏེ་སྤྲུལ་པ་སྤྲུལ་པར་མཛད་དོ། །སྨྲས་པ། རིགས་ཀྱི་བུ་ཇི་ལྟར་དེ་བཞིན་གཤེགས་པ་གནས་མེད་པ་ལ་གནས་ཏེ་
སྤྲུལ་པ་སྤྲུལ་པར་མཛད་པ་བཞིན་དུ་སྤྲུལ་པ་དེ་དག་ཀྱང་གནས་མེད་པ་ལ་གནས་བཞིན་དུ་འཆད་དོ། །རིགས་ཀྱི་བུ་དེ་བཞིན་དུ་ཆོས་ཐམས་ཅད་ནི་གནས་མེད་པ་ལ་གནས་པ་ཡིན་ཏེ། བདག་ཀྱང་གནས་མེད་པ་ལ་གནས་ནས་ཏིང་ངེ་འཛིན་འདི་འཆད་དོ། །སྨྲས་པ། ལྷའི་བུ་གནས་མེད་པ་
ལ་གནས་ན་ཁྱོད་ཇི་ལྟར་ན་སྤོབས་པར་འགྱུར། སྨྲས་པ། ཇི་ལྟར་གནས་མེད་པ་དེ་བཞིན་དུ་སྤོབས་སོ། །སྨྲས་པ། ལྷའི་བུ་ཇི་ལྟར་ན་བྱང་ཆུབ་སེམས་དཔའ་སྤོབས་པ་ཕུན་སུམ་ཚོགས་པ་ཡིན། སྨྲས་པ། རིགས་ཀྱི་བུ་གང་གི་ཚེ་བྱང་ཆུབ་སེམས་དཔའ་བདག་ཏུ་འདུ་ཤེས་པས་མི་
འཆད། གང་ཟག་ཏུ་འདུ་ཤེས་པ་དང་། སེམས་ཅན་དུ་འདུ་ཤེས་པ་དང་། ཆོས་སུ་འདུ་ཤེས་པས་མི་འཆད་པ་དེ་ལྟ་བུ་ནི་རིགས་ཀྱི་བུ་བྱང་ཆུབ་སེམས་དཔའ་སྤོབས་པ་ཕུན་སུམ་ཚོགས་པ་ཡིན་ཏེ། ཆོས་འཆད་པ་ན་ཇི་ལྟར་ཡི་གེ་མི་ཟད་ཅིང་ཟད་པར་མི་འགྱུར་བ་དེ་བཞིན་དུ་ཆོས་མི་ཟད་ཅིང་
ཟད་པར་མི་འགྱུར་ལ། ཡི་གེ་རྣམ་པ་སྣ་ཚོགས་སུ་ཡང་མི་འཆད། ཆོས་རྣམ་པ་སྣ་ཚོགས་སུ་ཡང་མི་འཆད་དེ། རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སྤོབས་པ་ཕུན་སུམ་ཚོགས་པ་ཡིན་ནོ། །རིགས་ཀྱི་བུ་གཞན་ཡང་གང་གི་ཚེ་བྱང་ཆུབ་སེམས་དཔའ་སེམས་ཀྱི་སྒྱུ་མའི་
ཆོས་ཉིད་ཀྱང་མི་འདོར། འདོད་ཆགས་དང་བྲལ་བའི་ཆོས་ཉིད་ཀྱང་མི་འདོར། བྲག་ཅའི་སྒྲ་ལྟ་བུའི་ཆོས་ཉིད་ཀྱང་མི་འདོར་ན། རིགས་ཀྱི་བུ་དེ་ལྟ་བུ་ནི་བྱང་ཆུབ་སེམས་དཔའི་སྤོབས་པ་ཕུན་སུམ་ཚོགས་པ་ཡིན་ནོ། །ཇི་ལྟར་ཡི་གེ་དེ་དག་ཡུལ་ན་མི་གནས། ཕྱོགས་ན་མི་གནས། ནང་
ན་མ་ཡིན། ཕྱི་རོལ་ན་མ་ཡིན། གཉིས་ཀ་མེད་པར་ཡང་མ་ཡིན་ཞིང་གང་ན་ཡང་མི་གནས་ཏེ། ཚོགས་པ་ལས་བྱུང་བ་དེ་བཞིན་དུ་རིགས་ཀྱི་བུ་ཆོས་ཐམས་ཅད་ཀྱང་ཡུལ་ན་མི་གནས། ཕྱོགས་ན་མི་གནས། ནང་ན་མ་ཡིན། ཕྱི་རོལ་ན་མ་ཡིན། གཉི་ག་མེད་པར་ཡང་མ་ཡིན།

འདས་པ་མ་ཡིན། མ་འོངས་པ་མ་ཡིན། ད་ལྟར་བྱུང་བ་མ་ཡིན་ཏེ། ཡི་གེ་གང་དག་གིས་དེ་དག་བཤད་པ་དེ་དག་ཀྱང་དེ་ལྟར་ཡི་གེ་མི་ཟད་པ་མངོན་སུམ་དུ་གྱུར་པས་འཆད་པས་ན་དེའི་ཕྱིར་སྤོབས་པ་ཕུན་སུམ་ཚོགས་པ་ཞེས་བྱའོ། །སྨྲས་པ། ལྷའི་བུ་ཁྱོད་ཇི་ལྟར་འཆད་པ་དེ་བཞིན་དུ་
སྤོབས་སམ། སྨྲས་པ། རིགས་ཀྱི་བུ་བདག་དེ་བཞིན་དུ་སྤོབས་ཏེ། བྲག་ཅའི་སྒྲ་བྱུང་བའི་རང་བཞིན་ཇི་ལྟ་བ་དག་གི་ལམ་གྱི་སྒྲས་བཤད་པ་ཐམས་ཅད་ཀྱང་དེ་བཞིན་དུ་རྟོགས་པར་བྱའོ། །སྨྲས་པ། ལྷའི་བུ་རྟོགས་པ་ཞེས་བྱ་བ་ཅི། སྨྲས་པ། རིགས་ཀྱི་བུ་རྟོགས་པ་ཞེས་བྱ་བ་དེ་ནི་
ནམ་མཁའ་རྟོགས་པའི་ཚིག་བླ་དགས་སོ། །རིགས་ཀྱི་བུ་འདི་ལྟ་སྟེ་དཔེར་ན་ནམ་མཁའ་ནི་དཔེ་མེད་པ་ཡིན་ནོ། །རིགས་ཀྱི་བུ་དེ་བཞིན་དུ་ཆོས་ཐམས་ཅད་ཀྱང་དཔེ་མེད་པས་ན་དེའི་ཕྱིར་རྟོགས་པ་ཞེས་བྱའོ། །གང་དུ་དེ་འགྲོ་བའི་ཆོས་དེ་དག་གི་དཔེ་ཡང་བྱ་བར་སླ་བ་མ་ཡིན་པས་ན་དེའི་
ཕྱིར་རྟོགས་པ་ཞེས་བྱའོ། །ཡེ་ཤེས་དེ་ནི་དཔེ་མེད་པ། འདྲ་བ་མེད་པ། དངོས་པོ་ཐམས་ཅད་བྲལ་བ་དེ་རྟོགས་པར་བྱེད་པས་ན་དེའི་ཕྱིར་རྟོགས་པ་ཞེས་བྱའོ། །དེ་ནས་བཅོམ་ལྡན་འདས་ཀྱིས་ལྷའི་བུ་སངས་རྒྱས་བློ་གྲོས་མངོན་སུམ་ལ་ལེགས་སོ་ཞེས་བྱ་བ་བྱིན་ནས། ལྷའི་བུ་ལེགས་
སོ་ལེགས་སོ། །ཁྱོད་ཀྱི་ཚིག་འདི་ནི་ལེགས་པར་སྨྲས་པའོ། །གལ་ཏེ་བཤད་པར་བྱ་ན་དེ་ལྟར་བཤད་དོ། །བྱང་ཆུབ་སེམས་དཔས་བཤད་པ་དེ་ཐོས་ནས། སྐྲག་པར་མི་བྱ། དངང་བར་མི་བྱ། དངང་བར་འགྱུར་བར་མི་བྱའོ། །དེ་ཅིའི་ཕྱིར་ཞེ་ན། རྟོགས་པར་བྱ་བ་དེ་མ་རྟོགས་
པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་ནུས་པའི་ཕྱིར་རོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་བློ་གྲོས་བརྟན་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ལྷའི་བུ་སངས་རྒྱས་བློ་གྲོས་མངོན་སུམ་འདི་སངས་རྒྱས་
ཀྱི་ཞིང་གང་ནས་མི་མཇེད་ཀྱི་འཇིག་རྟེན་གྱི་ཁམས་འདིར་མཆིས། ལྷའི་བུ་སངས་རྒྱས་བློ་གྲོས་མངོན་སུམ་གྱིས་སྨྲས་པ། རིགས་ཀྱི་བུ་ཅི་ཞིག་བྱ། སྨྲས་པ། ལྷའི་བུ་གང་ན་སྐྱེས་བུ་དམ་པ་འདི་ལྟ་བུ་དག་གི་གཙུག་ལག་ཁང་ངམ། གནས་ཁང་ངམ། གནས་སམ། འཆག་

ས་ཡོད་པའི་ཕྱོགས་དེར་ཕྱག་འཚལ་ལོ། །ཕྱག་བྱའོ། །ལྷའི་བུས་སྨྲས་པ། བློ་གྲོས་བརྟན་པ་དཔའ་བར་འགྲོ་བའི་ཏིང་ངེ་འཛིན་བཤད་པ་འདི་ཉིད་གླེགས་བམ་དུ་བྲིས་ནས་གང་དག་གི་ལག་ཏུ་སོང་བར་གྱུར་པའི་སེམས་ཅན་དེ་དག་ཀྱང་ལྷ་དང་བཅས་པའི་འཇིག་རྟེན་གྱིས་
ཕྱག་བྱ་བ་ཡིན་ནོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་བློ་གྲོས་བརྟན་པ་ལ་འདི་སྐད་ཅེས་བཀའ་སྩལ་ཏོ། །བློ་གྲོས་བརྟན་པ་ལྷའི་བུ་སངས་རྒྱས་བློ་གྲོས་མངོན་སུམ་འདི་ནི་དེ་བཞིན་གཤེགས་པ་མི་འཁྲུགས་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་མངོན་དགའ་
ནས་དཔའ་བར་འགྲོ་བའི་ཏིང་ངེ་འཛིན་འདི་ཉན་ཅིང་འཆད་དུ་མི་མཇེད་ཀྱི་འཇིག་རྟེན་གྱི་ཁམས་འདིར་འོངས་སོ། །གསོལ་པ། བཅོམ་ལྡན་འདས་དེ་བཞིན་གཤེགས་པ་མི་འཁྲུགས་པ་དེ་བྱང་ཆུབ་སེམས་དཔའ་དེ་དག་ལ་དཔའ་བར་འགྲོ་བའི་ཏིང་ངེ་འཛིན་འདི་མི་འཆད་དམ། ཅི་ལགས་ན། ལྷའི་
བུ་སངས་རྒྱས་བློ་གྲོས་མངོན་སུམ་འདི་འཇིག་རྟེན་གྱི་ཁམས་མངོན་དགའ་དེ་ནས་མི་མཇེད་ཀྱི་འཇིག་རྟེན་གྱི་ཁམས་འདིར་མཆིས། བཀའ་སྩལ་པ། བློ་གྲོས་བརྟན་པ་གང་ཏིང་ངེ་འཛིན་འདི་མི་འཆད་པའི་དེ་བཞིན་གཤེགས་པ་དེ་ནི་ཤིན་ཏུ་དཀོན་མོད་ཀྱི། བློ་གྲོས་བརྟན་པ་ལྷའི་བུ་སངས་
རྒྱས་བློ་གྲོས་མངོན་སུམ་འདི་མི་མཇེད་ཀྱི་འཇིག་རྟེན་གྱི་ཁམས་འདིར་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། ལྷའི་བུ་འདི་ནི་མི་མཇེད་ཀྱི་འཇིག་རྟེན་གྱི་ཁམས་འདིར་གང་སྙིགས་མ་ལྔའི་ཉེས་པ་གང་ཡིན་པ་དེ་དག་སྤང་བ་དང་། སངས་རྒྱས་ཀྱི་ཞིང་གི་ཡོན་ཏན་བཀོད་
པ་དག་ཀྱང་ཡོངས་སུ་གཟུང་བ་དང་། སེམས་ཅན་རྣམས་ཀྱང་ཡོངས་སུ་སྨིན་པར་བྱ་བ་དང་། དཔའ་བར་འགྲོ་བའི་ཏིང་ངེ་འཛིན་འདི་ཡང་ཤིན་ཏུ་བསྒོམ་པ་ཡོངས་སུ་རྫོགས་པར་བྱ་བའི་ཕྱིར་ལྷའི་བུ་སངས་རྒྱས་བློ་གྲོས་མངོན་སུམ་འདི་འཇིག་རྟེན་གྱི་ཁམས་མངོན་དགའ་དེ་ནས་མི་
མཇེད་ཀྱི་འཇིག་རྟེན་གྱི་ཁམས་འདིར་འོངས་སོ། །གསོལ་པ། བཅོམ་ལྡན་འདས་ལྷའི་བུ་སངས་རྒྱས་བློ་གྲོས་མངོན་སུམ་འདི་ཇི་སྲིད་ན་མི་མཇེད་ཀྱི་འཇིག་རྟེན་གྱི་ཁམས་འདིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར། འདི་

བྱང་ཆུབ་ཐོབ་ནས་མིང་ཅི་ཞེས་བྱ་བར་འགྱུར། བཅོམ་ལྡན་འདས་དེའི་ཚེ་དེའི་དུས་ན་འཇིག་རྟེན་གྱི་ཁམས་འདི་མིང་ཇི་སྐད་ཅེས་བགྱི་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་བརྟན་པ་བསྐལ་པ་བཟང་པོ་འདི་འདས་ཤིང་སངས་རྒྱས་སྟོང་ཡོངས་སུ་མྱ་ངན་ལས་འདས་
ནས་བསྐལ་པ་དྲུག་ཅུ་རྩ་གཉིས་ན་སངས་རྒྱས་འབྱུང་བར་འགྱུར་ཏེ། དེ་ན་རང་སངས་རྒྱས་ཀྱང་བྱེ་བ་ཁྲག་ཁྲིག་བརྒྱ་ཕྲག་སྟོང་འབྱུང་བར་འགྱུར་རོ། །བློ་གྲོས་བརྟན་པ་བསྐལ་པ་དྲུག་ཅུ་རྩ་གཉིས་པོ་དེ་དག་འདས་ནས་ལྷའི་བུ་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དྲི་མ་མེད་པར་གྲགས་པའི་རྒྱལ་པོ་ཞེས་བྱ་བར་འགྱུར་རོ། །བློ་གྲོས་བརྟན་པ་དེའི་ཚེ་དེའི་དུས་ན་མི་མཇེད་ཀྱི་འཇིག་རྟེན་གྱི་ཁམས་འདི་ནི་མཐོང་ན་དད་པ་ཞེས་བྱ་བའི་འཇིག་
རྟེན་གྱི་ཁམས་སུ་འགྱུར་ཏེ། བློ་གྲོས་བརྟན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཞིང་མཐོང་ན་དད་པ་ཞེས་བྱ་བའི་འཇིག་རྟེན་གྱི་ཁམས་དེ་ན་སེམས་ཅན་དེ་དག་ཐམས་ཅད་དད་པ་རྙེད་པས་མཛེས་པར་འགྱུར་ཏེ། དེ་ན་སེམས་ཅན་
གང་ཡང་འདོད་ཆགས་ཀྱིས་སེམས་ཀུན་ཏུ་དཀྲིས་ཤིང་འདུག་པར་མི་འགྱུར། ཞེ་སྡང་གིས་སེམས་ཀུན་ཏུ་དཀྲིས་ཤིང་འདུག་པར་མི་འགྱུར། གཏི་མུག་གིས་སེམས་ཀུན་ཏུ་དཀྲིས་ཤིང་འདུག་པར་མི་འགྱུར་ཏེ། སེམས་ཅན་དེ་དག་ཐམས་ཅད་ཆོས་སྤྱོད་པ་དང་ལྡན་ཞིང་ཆོས་ལ་དད་པ་རྙེད་པར་
འགྱུར་རོ། །བློ་གྲོས་བརྟན་པ་དེ་བཞིན་གཤེགས་པ་འོད་དྲི་མ་མེད་པར་གྲགས་པའི་རྒྱལ་པོའི་ཚེའི་ཚད་ནི་བསྐལ་པ་བར་མ་བཅུའི་ཚད་དུ་འགྱུར་རོ། །སེམས་ཅན་རྣམས་ནི་ཐེག་པ་གསུམ་གྱིས་ངེས་པར་འབྱུང་བར་འགྱུར་རོ། །དེ་ན་བྱང་ཆུབ་སེམས་དཔའ་དཔའ་བར་འགྲོ་བའི་ཏིང་ངེ་འཛིན་ཐོབ་
པ་དང་། ཆོས་ཐམས་ཅད་ལ་རྣམ་པར་འཕྲུལ་པ་དང་ལྡན་པ་ནི་ཚད་མེད་པར་འགྱུར་རོ། །བློ་གྲོས་བརྟན་པ་དེའི་ཚེ་དེའི་དུས་ན་གང་བདུད་དང་། བདུད་ཀྱི་རིས་ཀྱི་ལྷ་འབྱུང་བ་དེ་དག་ཐམས་ཅད་ཀྱང་ཐེག་པ་ཆེན་པོ་ལ་ཡང་དག་པར་ཞུགས་པར་འགྱུར། སེམས་ཅན་ཐམས་ཅད་ལ་སྙིང་

རྗེས་གནས་པར་འགྱུར་རོ། །སངས་རྒྱས་ཀྱི་ཞིང་དེ་ཡང་ངན་སོང་གསུམ་ཡོངས་སུ་སྤངས་པར་འགྱུར། མི་ཁོམ་པ་བརྒྱད་ལས་འདས་པ་དང་། རྟག་ཏུ་བརྒྱན་པའི་སངས་རྒྱས་ཀྱི་ཞིང་དུ་འགྱུར་ཏེ། བྱང་གི་སྒྲ་མི་སྙན་གྱི་གླིང་དང་འདྲ་བར་འགྱུར་རོ། །སངས་རྒྱས་ཀྱི་ཞིང་དེ་ནི་བདུད་
དང་ཕྱིར་རྒོལ་བ་བཅོམ་པ་དང་། ལྟ་བ་ཐམས་ཅད་དང་བྲལ་བར་འགྱུར་རོ། །བཅོམ་ལྡན་འདས་དེ་བཞིན་གཤེགས་པ་འོད་དྲི་མ་མེད་པར་གྲགས་པའི་རྒྱལ་པོ་ཡོངས་སུ་མྱ་ངན་ལས་འདས་ནས་བདེ་བར་གཤེགས་པས་གསུངས་པའི་དམ་པའི་ཆོས་ནི་ལོ་བྱེ་བ་ཕྲག་འབུམ་དུ་གནས་པར་འགྱུར་རོ། །བློ་
གྲོས་བརྟན་པ་ལྷའི་བུ་འདི་ནི་བཀོད་པ་འདི་ལྟ་བུས་མི་མཇེད་ཀྱི་འཇིག་རྟེན་གྱི་ཁམས་འདིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ནས་བྱང་ཆུབ་སེམས་དཔའ་བློ་གྲོས་བརྟན་པས་ལྷའི་བུ་སངས་རྒྱས་བློ་གྲོས་མངོན་སུམ་ལ་འདི་སྐད་ཅེས་སྨྲས་
སོ། །ལྷའི་བུ་ཁྱོད་ནི་དེ་བཞིན་གཤེགས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པས་རྙེད་པ་ཤིན་ཏུ་རྙེད་དོ། །ལྷའི་བུས་སྨྲས་པ། རིགས་ཀྱི་བུ་གང་ཆོས་ཐམས་ཅད་ཀྱི་མ་རྙེད་པ་དེ་ནི་ཆོས་ཀྱི་རྙེད་པའོ། །གང་ཆོས་འགའ་ཞིག་དམིགས་པ་དེ་ལ་ནི་ཆོས་ཀྱི་རྙེད་པ་
ཅི་ཡང་མེད་དོ། །རིགས་ཀྱི་བུ་དེ་ལྟ་བས་ན་གང་ཆོས་ཐམས་ཅད་ཀྱི་མ་རྙེད་པ་སོ་སོར་མ་རྙེད་པ་མ་དམིགས་པ་དེ་ནི་ཆོས་ཀྱི་རྙེད་པ་ཡིན་ཏེ། རིགས་ཀྱི་བུ་བདག་ཀྱང་རྙེད་པ་ལེགས་པར་རྙེད་དོ། །ལྷའི་བུ་དེ་ལ་འདི་བཤད་ཅིང་ལུང་བསྟན་པའི་ཚེ་སྲོག་ཆགས་སྔོན་དགེ་བའི་རྩ་བ་བསྐྱེད་པ་ཉི་ཁྲི་ལྔ་
སྟོང་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །བྱང་ཆུབ་སེམས་དཔའ་ཁྲིས་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །དཔའ་བར་འགྲོ་བའི་ཏིང་ངེ་འཛིན་འདི་འཆད་
པའི་ཚེ། བདུད་སྡིག་ཅན་མིག་གིས་མི་རྩོལ་བར་བགྱི་བའི་སླད་དུ་མི་མཆི་བ་བཅོམ་ལྡན་འདས་ངོ་མཚར་ཏོ། །བདེ་བར་གཤེགས་པ་ངོ་མཚར་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་ཁྱོད་བདུད་སྡིག་ཅན་སྐབས་སུ་མཐོང་བར་འདོད་དམ། གསོལ་པ་བཅོམ་ལྡན་འདས་

འཚལ་ལོ། །དེ་ནས་དེའི་ཚེ་བཅོམ་ལྡན་འདས་ཀྱིས་སྨིན་མཚམས་ཀྱི་མཛོད་སྤུ་ནས་བདུད་སྡིག་ཅན་ཞགས་པ་ལྔའི་བཅིང་བས་བཅིངས་ལ། བཅིངས་པ་དེ་གཅོད་པའམ། དེ་ལས་ཐར་བར་བྱེད་མི་ནུས་པར་གང་ཐམས་ཅད་དང་ལྡན་པའི་འཁོར་གྱིས་མཐོང་བར་འགྱུར་བ་དེ་ལྟ་བུའི་འོད་ཕྱུང་ནས།
བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་ཁྱོད་ཀྱིས་བདུད་སྡིག་ཅན་ཞགས་པ་ལྔའི་བཅིང་བས་བཅིངས་པ་མཐོང་ངམ། གསོལ་པ། བཅོམ་ལྡན་འདས་མཐོང་ངོ་། །བདེ་བར་གཤེགས་པ་མཐོང་ངོ་། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་དེ་ནི་དཔའ་བར་འགྲོ་
བའི་ཏིང་ངེ་འཛིན་འདིའི་ཁྱུ་མཆོག་ཏུ་གྱུར་པ་ཡིན་ནོ། །ཤཱ་རིའི་བུ་སངས་རྒྱས་ཀྱི་ཞིང་གང་དག་ན་དཔའ་བར་འགྲོ་བའི་ཏིང་ངེ་འཛིན་འདི་འཆད་དམ། སྟོན་པའི་སངས་རྒྱས་ཀྱི་ཞིང་དེ་དག་ན་བདུད་དམ། བདུད་ཀྱི་རིས་ཀྱི་ལྷ་གང་དག་ཡིད་རབ་ཏུ་ཞེ་སྡང་ཞིང་ཆོས་ལ་བར་ཆད་བྱ་བའི་ཕྱིར་ཉེ་བར་
གནས་པ་དེ་དག་ཐམས་ཅད་དཔའ་བར་འགྲོ་བའི་ཏིང་ངེ་འཛིན་གྱི་གཟི་བརྗིད་དང་། སངས་རྒྱས་བཅོམ་ལྡན་འདས་དེ་དག་གི་བྱིན་གྱི་བརླབས་ཀྱིས་བདག་ཞགས་པ་ལྔའི་བཅིང་བས་བཅིངས་པར་ཤེས་པར་འགྱུར་རོ། །ཤཱ་རིའི་བུ་ད་ལྟར་ཡང་རུང་ང་ཡོངས་སུ་མྱ་ངན་ལས་འདས་པའི་ཚེ་
ཡང་རུང་སྟེ། དཔའ་བར་འགྲོ་བའི་ཏིང་ངེ་འཛིན་འདི་གང་ན་འཆད་དམ། སྟོན་ཏམ། ཡི་གེར་འདྲིའམ། གླེགས་བམ་དུ་བྱེད་པར་འགྱུར་བ་དེར་བདུད་སྡིག་ཅན་ནམ། བདུད་ཀྱི་རིས་ཀྱི་ལྷའམ། དེ་མ་ཡིན་པ་གཞན་ཡང་ཡིད་ཀྱི་རྟོག་པ་རབ་ཏུ་ཞེ་སྡང་བ་ཇི་སྙེད་པ་དེ་དག་ཐམས་ཅད་དཔའ་
བར་འགྲོ་བའི་ཏིང་ངེ་འཛིན་གྱི་གཟི་བརྗིད་དང་། སངས་རྒྱས་བཅོམ་ལྡན་འདས་དེ་དག་གི་བྱིན་གྱི་རླབས་ཀྱིས་བདག་ཞགས་པ་ལྔའི་བཅིང་བས་བཅིངས་པར་ཤེས་པར་འགྱུར་རོ། །དེ་ནས་འཁོར་དེར་འདུས་པའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་
ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དེ་དག་ཐམས་ཅད་ཀྱིས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ནི་དཔའ་བར་འགྲོ་བའི་ཏིང་ངེ་འཛིན་འདི་ལ་ཐེ་ཙོམ་མི་འཚལ་ལོ། །ནེམ་ནུར་མ་མཆིས་སོ། །བར་

ཆད་ཀྱང་མི་བགྱིད་དོ། །བདག་ཅག་བཅིང་མི་འཚལ་ཏེ། བཅོམ་ལྡན་འདས་བདག་ཅག་ནི་ཏིང་ངེ་འཛིན་འདི་ཡོངས་སུ་གཟུང་བའི་སླད་དུ་ཆོས་སྨྲ་བ་དེའང་བསྲུང་བར་བགྱིད་དོ། །དཔའ་བར་འགྲོ་བའི་ཏིང་ངེ་འཛིན་འདི་ལ་ཡང་སྟོན་པར་འདུ་ཤེས་བསྐྱེད་པར་བགྱིའོ། །དེ་
སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དེ་དག་ལ་འདི་སྐད་ཅེས་བཀའ་སྩལ་ཏོ། །ཀྱེ་གྲོགས་པོ་དག་དེའི་ཕྱིར་
ཁྱེད་ལྟ་བར་གྱུར་པའི་འཆིང་བ་བཅུ་གཉིས་ལས་ཡོངས་སུ་ཐར་བར་གྱིས་ཤིག་བཅུ་གཉིས་གང་ཞེ་ན། འདི་ལྟ་སྟེ། བདག་ཏུ་ལྟ་བའི་འཆིང་བ་དང་། སེམས་ཅན་དུ་ལྟ་བའི་འཆིང་བ་དང་། སྲོག་ཏུ་ལྟ་བའི་འཆིང་བ་དང་། གང་ཟག་ཏུ་ལྟ་བའི་འཆིང་བ་དང་། ཆད་པར་ལྟ་བའི་འཆིང་
བ་དང་། རྟག་པར་ལྟ་བའི་འཆིང་བ་དང་། ངར་འཛིན་པར་ལྟ་བའི་འཆིང་བ་དང་། ང་ཡིར་འཛིན་པར་ལྟ་བའི་འཆིང་བ་དང་། འབྱུང་བར་ལྟ་བའི་འཆིང་བ་དང་། འཇིག་པར་ལྟ་བའི་འཆིང་བ་དང་། འཇིག་ཚོགས་ལ་ལྟ་བའི་འཆིང་བ་དང་། ཆོས་ཐམས་ཅད་ལ་མངོན་པར་ཞེན་
པར་ལྟ་བའི་འཆིང་བ་ལས་སོ། །ཀྱེ་གྲོགས་པོ་དག་དེ་བཞིན་གཤེགས་པའམ། དེ་བཞིན་གཤེགས་པས་གསུངས་པའི་ཆོས་འདུལ་བ་ལ་གང་ལ་ལ་དག་གཤེ་བའམ། སྤོང་བའམ། ཟློག་པར་བྱེད་པ་དེ་དག་ཐམས་ཅད་ནི་བཅིང་བ་འདི་བཅུ་གཉིས་ཀྱིས་བཅིངས་ནས། ཟློག་
པར་བྱེད། སྤོང་བར་བྱེད། གཤེ་བར་བྱེད་དོ། །ཀྱེ་གྲོགས་པོ་དག་གང་དག་དེ་བཞིན་གཤེགས་པས་གསུངས་པའི་ཆོས་འདུལ་བ་འདི་ཐོས་ནས་མོས་པར་བྱེད། ཡིད་ཆེས་པར་བྱེད་དེ། སྤོང་བར་མི་བྱེད་པ་དེ་དག་ཐམས་ཅད་ནི་ལྟ་བར་གྱུར་པའི་འཆིང་བ་བཅུ་གཉིས་ཀྱི་བཅིང་བ་
འདི་དག་ལས་ཡོངས་སུ་གྲོལ་བར་འགྱུར་རོ། །དེ་ནས་བཅོམ་ལྡན་འདས་ལ་གནས་བརྟན་ཤཱ་རིའི་བུས་འདི་སྐད་ཅེས་གསོལ་ཏོ། །ཅི་བཅོམ་ལྡན་འདས་བདུད་སྡིག་ཅན་གྱིས་དཔའ་བར་འགྲོ་བའི་ཏིང་ངེ་འཛིན་འདིའི་མིང་ཐོས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ།

ཤཱ་རིའི་བུ་ཐོས་མོད་ཀྱི་འོང་བ་དང་བདག་བཅིང་བ་དེ་ལས་ཐར་བར་བྱེད་མི་ནུས་སོ། །གསོལ་པ། བཅོམ་ལྡན་འདས་གང་དེ་བཞིན་གཤེགས་པས་དཔའ་བར་འགྲོ་བའི་ཏིང་ངེ་འཛིན་འདིའི་མིང་བྱིན་གྱིས་བརླབས་ན་ཐོས་པར་གྱུར་པ་བཅོམ་ལྡན་འདས་ངོ་མཚར་ཏོ། །བདེ་བར་གཤེགས་པ་ངོ་མཚར་
ཏོ། །བཀའ་སྩལ་པ། ཤཱ་རིའི་བུ་ཆོག་གིས་ཁྱོད་དེ་སྐད་མ་ཟེར་ཅིག །ཤཱ་རིའི་བུ་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་མེས་ཡོངས་སུ་གང་བ་ཡང་འབོགས་ཏེ། དཔའ་བར་འགྲོ་བའི་ཏིང་ངེ་འཛིན་འདིའི་མིང་ཉན་དུ་འགྲོ་བར་བྱའོ། །དེ་ཅིའི་ཕྱིར་ཞེ་ན། ཤཱ་རིའི་བུ་དཔའ་བར་འགྲོ་
བའི་ཏིང་ངེ་འཛིན་འདི་ནི་ཐོས་ནས་ཀྱང་གཅེས་སྤྲས་བྱེད་པ་ཡིན་གྱི། བསམ་གཏན་བཞི་ལ་གནས་ཤིང་ཚངས་པའི་འཇིག་རྟེན་དུ་སྐྱེ་བ་ནི་དེ་ལྟ་མ་ཡིན་ནོ། །ཞེས་ངས་བཤད་དོ། །ཤཱ་རིའི་བུ་བདུད་སྡིག་ཅན་གྱིས་དཔའ་བར་འགྲོ་བའི་ཏིང་ངེ་འཛིན་འདིའི་མིང་ཐོས་པ་དེ་ཉིད་དེའི་བདུད་ཀྱི་ལས་
ཐམས་ཅད་རབ་ཏུ་ཞི་བར་འགྱུར་བའི་རྒྱུར་འགྱུར་རོ། །གང་ཡང་བཅིང་བས་བཅིངས་བཞིན་དུ་ཐོས་པ་དེ་ཉིད་དེའི་ལྟ་བར་གྱུར་པའི་འཆིང་བ་བཅུ་གཉིས་ལས་རབ་ཏུ་ཐར་བར་འགྱུར་བའི་རྒྱུར་འགྱུར་རོ། །ཤཱ་རིའི་བུ་དེ་བས་ན་ལྟ་བར་གྱུར་པའི་བདུད་ཀྱི་ཞགས་པས་བཅིངས་པར་གནས་པས་ཀྱང་
དཔའ་བར་འགྲོ་བའི་ཏིང་ངེ་འཛིན་འདི་མཉན་པར་བྱ་ན་དགའ་བ་དང་། དད་པ་དང་། མཆོག་ཏུ་དགའ་བ་ཐོབ་པས་མཉན་པ་ལྟ་ཅི་སྨོས། དེ་ནས་འཁོར་དེར་བྱང་ཆུབ་སེམས་དཔའ་བདུད་ཀྱི་སྤྱོད་པའི་ཡུལ་གྱིས་མི་གོས་པ་ཞེས་བྱ་བ་ཞིག་འདུས་པར་གྱུར་ཏེ་འདུག་གོ། །དེ་ནས་བཅོམ་ལྡན་
འདས་ལ་བྱང་ཆུབ་སེམས་དཔའ་བདུད་ཀྱི་སྤྱོད་པའི་ཡུལ་གྱིས་མི་གོས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བདུད་སྡིག་ཅན་འཁོར་འདིར་མཆི་བར་མཛད་དུ་གསོལ། བཅོམ་ལྡན་འདས་བདག་གིས་དེ་ལ་བདུད་ཀྱི་སྤྱོད་པའི་ཡུལ་ཐམས་ཅད་བསྟན་པར་བགྱིའོ། །དཔའ་བར་
འགྲོ་བའི་ཏིང་ངེ་འཛིན་འདི་ལ་ཡང་འཇུག་པར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། ད་དེའི་དུས་ལ་བབ་པར་སེམས་ནའོ། །དེ་ནས་བྱང་ཆུབ་སེམས་དཔའ་བདུད་ཀྱི་སྤྱོད་པའི་ཡུལ་གྱིས་མི་གོས་པ་འཁོར་དེར་མི་སྣང་བར་གྱུར་ནས། བདུད་ཀྱི་གནས་སུ་འདུག་པར་

གྱུར་ཏོ། །དེ་ནས་བྱང་ཆུབ་སེམས་དཔའ་བདུད་ཀྱི་སྤྱོད་པའི་ཡུལ་གྱིས་མི་གོས་པས་བདུད་སྡིག་ཅན་ལ་འདི་སྐད་ཅེས་སྨྲས་སོ། །སྡིག་ཅན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔའ་བར་འགྲོ་བའི་ཏིང་ངེ་འཛིན་འཆད་ན་ཁྱོད་མི་ཉན་
ཏམ། དེ་ན་སེམས་ཅན་དཔག་ཏུ་མེད་པ་དག་བྱང་ཆུབ་ཀྱི་ཕྱིར་གོ་ཆ་གྱོན་པར་བྱེད་དེ། དེ་དག་ཁྱོད་ཀྱི་ཡུལ་ལས་འདའ་བར་འགྱུར་རོ། །གཞན་ཡང་སེམས་ཅན་ཤིན་ཏུ་དཔག་ཏུ་མེད་པ་དག་ཁྱོད་ཀྱི་ཡུལ་ལས་འདའ་བར་འགྱུར་རོ། །དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་
བདུད་ཀྱི་སྤྱོད་པའི་ཡུལ་གྱིས་མི་གོས་པ་ལ་བདུད་སྡིག་ཅན་གྱིས་འདི་སྐད་ཅེས་སྨྲས་སོ། །རིགས་ཀྱི་བུ་བདག་ནི་དཔའ་བར་འགྲོ་བའི་ཏིང་ངེ་འཛིན་ཉན་ན་མཆི་བར་ནི་མི་ནུས་སོ། །དེ་ཅིའི་སླད་དུ་ཞེ་ན། བདག་ནི་ཞགས་པའི་བཅིང་བ་ལྔས་བཅིངས་ཏེ། ལག་པ་གཉིས་དང་། རྐང་པ་
གཉིས་དང་། མགུལ་བར་བཅིངས་པས་དེར་མཆི་མི་ནུས་སོ། །སྨྲ