Kinh tạng Tây Tạng (Kangyur Đại Học) — 055_མདོ་སྡེ།_ད

་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་གཅེས་སྤྲས་བྱེད་པ་ཡིན་ཏེ། ཐམས་ཅད་མཁྱེན་པའི་ཡེ་ཤེས་བླ་ན་མེད་པ་སྡུད་པ་ཡིན་
པར་རིག་པར་བྱའོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་སྔོན་བྱུང་བའི་ལེའུ་འདི་ཉིད་རྒྱས་པར་ཚིགས་སུ་བཅད་པའི་དབྱངས་ཀྱིས་རྒྱ་ཆེར་ཡང་དག་པར་རབ་ཏུ་བསྟན་ཏོ། །ངས་དྲན་བསམ་གྱིས་མི་ཁྱབ་བསྐལ་པ་ན། །འདས་པའི་དུས་ན་མི་ཡི་གཙོ་བོ་ནི། །དྲང་
སྲོང་ཆེན་པོ་འཇིག་རྟེན་དོན་མཛད་བྱུང་། །དེ་ཡི་མཚན་ནི་དབྱངས་ཀྱི་བྱིན་ཞེས་བྱ། །བྱེ་བྲག་བརྒྱད་ཅུར་ཡོངས་སུ་ཚང་བ་ཡི། །དེ་ཡི་ཉན་ཐོས་འཁོར་མང་དང་པོ་བྱུང་། །གཉིས་པ་བྱེ་བ་བདུན་ཅུར་ཚང་བ་བྱུང་། །གསུམ་པ་དགྲ་བཅོམ་བྱེ་བ་དྲུག་ཅུ་ཡོད། །ཀུན་ཀྱང་ཟག་པ་ཟད་ཅིང་ཉོན་
མོངས་མེད། །ཐམས་ཅད་རྫུ་འཕྲུལ་སྟོབས་ཀྱིས་ཕ་རོལ་ཕྱིན། །ཚེ་ཚད་ལོ་ནི་སྟོང་ཕྲག་བཞི་བཅུ་སྟེ། །ཞིང་ཡང་ཡོངས་སུ་དག་ཅིང་མཛེས་པར་གྱུར། །སྐྱོབ་པ་དེ་ཡི་བྱང་ཆུབ་སེམས་དཔའ་གང་བྱུང་བ། །དཔག་མེད་དེ་དག་གཞན་ཕན་དབང་བསྐུར་ཐོབ། །དབང་དང་ས་ལ་རབ་ཏུ་གནས་པ་
སྟེ། །ཤིང་མཆོག་དྲུང་དུ་བྱང་ཆུབ་འཚང་རྒྱར་ཉེ། །འཛམ་བུའི་གླིང་འདིར་རྒྱལ་པོ་བྱུང་བ་ནི། །སྟོབས་བརྟན་དང་ནི་སྟོབས་ཆེན་ཞེས་བྱ་བ། །གཅིག་ནི་དེ་ཡི་ཕྱེད་དབང་རྒྱལ་པོ་བྱེད། །ཅིག་ཤོས་ཕྱེད་ལ་དབང་བའི་རྒྱལ་པོར་གྱུར། །རྒྱལ་པོ་སྟོབས་ཆེན་རྣམ་པར་རྒྱལ་བའི་སར། །ལྷ་དང་
མིས་མཆོད་སངས་རྒྱས་བྱུང་བར་གྱུར། །བདེ་བར་གཤེགས་ལ་རྒྱལ་པོ་དད་རྙེད་ནས། །ལོ་གྲངས་སྟོང་དུ་ཚང་བར་བསྙེན་བཀུར་བྱས། །སེམས་ཅན་གཞན་མང་དེ་ཡི་རྗེས་སློབ་པས། །དེ་བཞིན་གཤེགས་པ་ལ་ཡང་བཀུར་སྟི་བྱེད། །འཇིག་རྟེན་ཟང་ཟིང་གིས་ཏེ་ཆོས་ཀྱིས་མིན། །ཉན་ཐོས་
བཅས་པ་རྙེད་པ་མང་བར་གྱུར། །སྐྱེས་བུ་དམ་པའི་སེམས་ནི་འདི་སྙམ་སྟེ། །ཅི་ནས་འདི་ཀུན་འདོད་པ་རབ་སྤངས་ནས། །ང་ཡི་བསྟན་པ་འདི་ལ་རབ་འབྱུང་བར། །ཆོས་འདོད་འདི་དག་ལ་ནི་ཆོས་བསྟན་སྙམ། །བདེ་བར་གཤེགས་པའི་སྦྱངས་ཆོས་བསླབ་པ་དང་། །ཁྱིམ་གནས་ཉེས་པ་སྡུག་

བསྔལ་མཐའ་ཡས་དང་། །ཆོས་ལ་སྒྲུབ་པ་ཆོས་ཀྱི་མཆོད་ཡིན་ཞེས། །མི་མཆོག་དེས་ནི་ཚིགས་སུ་བཅད་པ་གསུངས། །ས་བདག་རྒྱལ་པོས་ཚིགས་བཅད་དེ་ཐོས་ནས། །མི་དབང་གཅིག་པུ་དབེན་སོང་བསམས་པ་ནི། །ཁྱིམ་ན་གནས་བཞིན་དུ་ཡང་ཐམས་ཅད་ཀྱིས། །ཆོས་ཀྱི་
མཆོད་མཆོག་བྱ་བར་མི་ནུས་སྙམ། །མཆིལ་མ་བཞིན་དུ་རྒྱལ་སྲིད་དེས་བཏང་སྟེ། །སྲོག་ཆགས་སྟོང་ཕྲག་བརྒྱད་ཅུར་བཅས་པ་དག །རྒྱལ་བ་དེ་ཡི་དྲུང་དུ་ཉེར་འོངས་ཏེ། །ཞབས་ལ་ཕྱག་འཚལ་ནས་ནི་སྤྱན་སྔར་འདུག །རྒྱལ་བས་དེ་དག་གི་ཡང་བསམ་མཁྱེན་ནས། །ཏིང་འཛིན་ཞི་བ་
བལྟ་དཀའ་འདི་བཤད་དེ། །དེ་དག་དགའ་ཞིང་རབ་མོས་བདེ་བས་ཚིམ། །མགུ་ཞིང་རངས་པས་དེ་ཚེ་རབ་ཏུ་བྱུང་། །དེ་དག་རབ་བྱུང་ཏིང་འཛིན་འདི་བཟུང་སྟེ། །བཅངས་ཤིང་བཀླགས་ཏེ་ཡོངས་སུ་ཆུབ་བྱས་ནས། །བསྐལ་པ་བྱེ་བ་ཉི་ཤུ་ཚང་བར་ནི། །ནམ་ཡང་ངན་འགྲོ་ལོག་ལྟུང་སོང་མ་གྱུར། །
དེ་དག་ཐམས་ཅད་དགེ་བའི་རྩ་བ་དེས། །སངས་རྒྱས་བྱེ་བ་ཕྲག་སྟོང་ལེགས་པར་མཐོང་། །རྒྱལ་བ་དེ་དག་ཀུན་གྱི་བསྟན་པ་ལ། །དེ་དག་རབ་བྱུང་ཏིང་འཛིན་འདི་ལ་བསྒོམ། །དེ་དག་ཕྱི་མའི་དུས་ལ་སངས་རྒྱས་གྱུར། །མཐའ་ཡས་བརྩོན་པ་མིང་ནི་དཔའ་བརྟན་ཡིན། །སྲོག་ཆགས་
བྱེ་བ་མང་པོའི་དོན་བྱས་ཏེ། །ཕྱི་མའི་དུས་ལ་མེ་བཞིན་མྱ་ངན་འདས། །སྔོན་ཚེ་རྒྱལ་པོ་སྟོབས་ཆེན་བྱུང་བ་ནི། །སངས་རྒྱས་ཡེ་ཤེས་དཔའ་བ་འཇིག་རྟེན་བྱུང་། །དེ་ཚེ་སྲོག་ཆགས་བྱེ་སྟོང་མང་པོ་རྣམས། །བྱང་ཆུབ་བཀོད་ནས་ཕྱི་དུས་མྱ་ངན་འདས། །དེ་ཕྱིར་སངས་རྒྱས་དག་གིས་བརྗོད་པ་ཡི། །
མདོ་འདི་ཕྱི་དུས་ཐོས་ནས་གཟུང་བར་གྱིས། །འདི་ལྟ་བུ་ཡི་ཆོས་མཛོད་འདི་བཟུང་ན། །མི་ཡི་གཙོ་བོར་མྱུར་དུ་འགྲུབ་པར་འགྱུར། །དབྱངས་བྱིན་གྱི་ལེའུ་སྟེ་ལྔ་པའོ།། །།དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་
ནུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འདོད་ཅིང་། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་ཏིང་ངེ་འཛིན་འདི་ཡོངས་སུ་སྦྱང་བར་བྱའོ། །གཞོན་ནུ་དེ་ལ་ཏིང་ངེ་འཛིན་ཡོངས་སུ་སྦྱང་བ་གང་

ཞེ་ན། གཞོན་ནུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་སྙིང་རྗེ་ཆེན་པོ་ལ་ཞུགས་པའི་སེམས་ཀྱིས་དེ་བཞིན་གཤེགས་པ་བཞུགས་པའམ། །ཡོངས་སུ་མྱ་ངན་ལས་འདས་པ་རྣམས་ལ་འདི་ལྟ་སྟེ། ཆོས་གོས་དང་བསོད་སྙོམས་དང་མལ་ཆ་དང་ན་བའི་གསོས་སྨན་དང་ཡོ་བྱད་རྣམས་
དང་མེ་ཏོག་དང་བདུག་པ་དང་སྤོས་དང་ཕྲེང་བ་དང་བྱུག་པ་དང་ཕྱེ་མ་དང་ན་བཟའ་དང་གདུགས་དང་རྒྱལ་མཚན་དང་རྣམ་པར་རྒྱལ་བའི་བ་དན་རྣམས་དང་རོལ་མོ་དང་སིལ་སྙན་རྣམས་ཀྱིས་མཆོད་པར་བྱ་བ་ལ་བརྩོན་པ་ཡིན་ཏེ། དགེ་བའི་རྩ་བ་དེ་ཡང་ཏིང་ངེ་འཛིན་ཐོབ་པར་ཡོངས་སུ་བསྔོའོ། །དེ་ཆོས་
གང་ལ་ཡང་རེ་བའི་ཕྱིར་དེ་བཞིན་གཤེགས་པ་ལ་མཆོད་པར་མི་བྱེད་དེ། འདོད་པ་ལ་རེ་བ་མ་ཡིན། ལོངས་སྤྱོད་ལ་རེ་བ་མ་ཡིན། མཐོ་རིས་ལ་རེ་བ་མ་ཡིན། འཁོར་བ་ལ་རེ་བ་མ་ཡིན་གྱི་དེ་ནི་ཆོས་ལ་སེམས་པ་ཡིན་ནོ། །དེ་འདོད་ན་དེ་བཞིན་གཤེགས་པ་ཆོས་ཀྱི་སྐུར་ཡང་མི་དམིགས་ན་དེ་
གཟུགས་ཀྱི་སྐུར་ལྟ་ག་ལ་ཞིག་དམིགས་པར་འགྱུར། གཞོན་ནུ་དེ་ལྟ་བས་ན་དེ་བཞིན་གཤེགས་པ་རྣམས་ལ་མཆོད་པ་དེ་ནི་འདི་ཡིན་ཏེ། འདི་ལྟ་སྟེ། དེ་བཞིན་གཤེགས་པ་མི་མཐོང་བ་དང་། བདག་ཉིད་མི་དམིགས་པ་དང་། ལས་ཀྱི་རྣམ་པར་སྨིན་པ་ལ་མི་རེ་བའོ། །གཞོན་ནུ་འཁོར་
གསུམ་ཡོངས་སུ་དག་པའི་མཆོད་པ་འདིས་དེ་བཞིན་གཤེགས་པ་ལ་མཆོད་ན་ཏིང་ངེ་འཛིན་འདི་རབ་ཏུ་འཐོབ་ཅིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མྱུར་དུ་མངོན་པར་རྫོགས་པར་འཚང་རྒྱའོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་ཏིང་ངེ་འཛིན་
ཡོངས་སུ་སྦྱང་བ་བསྟན་པ་འདི་རྒྱས་པར་ཚིགས་སུ་བཅད་པའི་དབྱངས་ཀྱིས་རྒྱ་ཆེར་ཡང་དག་པར་རབ་ཏུ་བསྟན་ཏོ། །ཡེ་ཤེས་མཐའ་ཡས་པ་ལ་སྤོས་ཕུལ་བས། །སྐྱེས་བུ་རྣམས་ཀྱི་དྲི་ཡང་མཐའ་ཡས་འགྱུར། །བསྐལ་པ་བྱེ་བར་ངན་འགྲོར་དེ་མི་འགྲོ །དེ་དག་དྲི་བསུང་ང་བར་ཡོང་མི་འགྱུར། །
དེ་དག་བསྐལ་པ་བྱེ་བར་སྤྱད་སྤྱོད་ཅིང་། །སངས་རྒྱས་བྱེ་བ་སྟོང་ལ་མཆོད་བྱས་ནས། །དེ་དག་ཡེ་ཤེས་སྤོས་ཀྱིས་མངོན་འཕགས་ཏེ། །སངས་རྒྱས་ཚུལ་ཁྲིམས་དྲི་མཆོག་ལྡན་པར་འགྱུར། །གལ་ཏེ་སེམས་ཅན་གང་དག་སྤོས་བྱིན་དང་། །དེ་བཞིན་གང་ལ་སྦྱིན་པར་བྱ་བ་དང་། །སེམས་

འདིས་སྦྱིན་པར་བྱེད་པ་མེད་ཤེས་ན། །དེ་ནི་དེ་ཡི་འཐུན་བཟོད་ཆུང་ངུ་ཡིན། །བཟོད་པ་ཆེན་པོ་བསྟེན་པ་དེ་ལ་ནི། །བསྐལ་པ་བྱེ་བ་གང་གཱའི་བྱེ་སྙེད་དུ། །མི་ཡིས་ཁམ་ཚད་ཙམ་དུ་བཅད་གཏུབས་ཀྱང་། །དེ་ཡི་སེམས་ནི་ལྡོག་པར་ཡོང་མི་འགྱུར། །ཅི་ཡི་ཕྱིར་ན་
བཟོད་པའི་མིང་དུ་གདགས། །ཇི་ལྟར་རྗེས་སུ་འཐུན་པ་ཞེས་ཀྱང་བྱ། །གང་གི་རྒྱུས་ནི་ཕྱིར་མི་ལྡོག་ཅེས་བྱ། །ཇི་ལྟར་བྱང་ཆུབ་སེམས་དཔའ་ཞེས་ཀྱང་བརྗོད། །རང་བཞིན་བདག་མེད་ཆོས་ལ་དེ་བཟོད་དེ། །བདག་མེད་འདུ་ཤེས་པ་ལ་ཉོན་མོངས་མེད། །ཆོས་རྣམས་ཐམས་ཅད་
ནམ་མཁའ་ཇི་བཞིན་ཤེས། །དེ་ཕྱིར་དེ་ལ་བཟོད་པའི་མིང་དུ་བཏགས། །རྒྱལ་བ་ཀུན་གྱི་རྗེས་སུ་འཐུན་སློབ་ཅིང་། །མཁས་པ་དེ་ནི་ཆོས་མིན་མི་སྤྱོད་དེ། །སངས་རྒྱས་ཆོས་ལ་ཐེ་ཙོམ་མི་སྐྱེད་པ། །དེ་ནི་རྗེས་སུ་འཐུན་པའི་བཟོད་པ་ཡིན། །དེ་ལྟར་སྤྱོད་པ་དག་ལ་འཇིག་རྟེན་ན། །ཇི་
སྙེད་བདུད་ཡོད་སངས་རྒྱས་གཟུགས་བསྒྱུར་ནས། །བྱང་ཆུབ་རྙེད་དཀས་ཉན་ཐོས་གྱིས་ཤིག་ཅེས། །ཚིག་ཏུ་སྨྲ་ཡང་མི་འཛིན་ལྡོག་མི་འགྱུར། །སེམས་ཅན་མི་འཐུན་ལྟ་ལས་རྟོག་བྱེད་ཅིང་། །མི་འཆི་འཐོབ་པའི་ལམ་ནི་འདིའོ་ཞེས། །ལོག་པའི་ལམ་སྤངས་ལམ་ལ་འཇོག་པར་བྱེད། །
དེ་ཕྱིར་བྱང་ཆུབ་སེམས་དཔའ་ཞེས་ཀྱང་བྱ། །རྗེས་སུ་འཐུན་བཟོད་ལམ་ལ་གནས་པ་དང་། །བདག་མེད་ཤེས་པས་སད་པར་བྱས་པ་ལ། །རྨི་ལམ་ན་ཡང་མི་དང་གང་ཟག་དང་། །སྲོག་དང་སེམས་ཅན་ཡོད་པར་ཡོང་མི་འཛིན། །བདུད་རྣམས་བྱེ་བ་གང་གཱའི་བྱེ་མ་སྙེད། །སངས་
རྒྱས་གཟུགས་བསྒྱུར་དེ་དག་དྲུང་འོངས་ཏེ། །ལུས་ཀྱི་ནང་ན་སྲོག་མེད་གྱུར་ན་ནི། །ཁྱེད་ཅག་སངས་རྒྱས་འགྲུབ་པ་མིན་ཞེས་སྨྲ། །ཡེ་ཤེས་ཀྱིས་ནི་ཕུང་པོ་སྟོང་པར་ཤེས། །ཤེས་ནས་ཉོན་མོངས་རྣམས་དང་ང་མི་འགྲོགས། །ཐ་སྙད་ཙམ་གྱིས་རྣམ་པར་སྤྱོད་བྱེད་ཅིང་། །འཇིག་
རྟེན་འདི་ན་མྱ་ངན་འདས་པར་གནས། །ཇི་ལྟར་སྐྱེས་བུ་དག་གི་བུ་སྐྱེས་ནས། །འདི་ཡི་མིང་ནི་འདི་ཞེས་མིང་བཏགས་པ། །ཕྱོགས་རྣམས་སུ་ཡང་དེ་ཡི་མིང་མི་རྙེད། །མིང་དེ་གང་ནས་ཀྱང་ནི་འོངས་པ་མེད། །དེ་བཞིན་བྱང་ཆུབ་སེམས་དཔའ་མིང་བཏགས་ཏེ། །བྱང་ཆུབ་སེམས་དཔའ་

འདི་ཞེས་ཡོངས་བཙལ་ཀྱང་། །ཕྱོགས་རྣམས་ན་ཡང་དེ་ཡི་མིང་མི་རྙེད། །དེ་ལྟར་གང་ཤེས་བྱང་ཆུབ་སེམས་དཔའ་ཡིན། །རྒྱ་མཚོའི་དབུས་ནས་ཇི་སྟེ་མེ་འབར་ཡང་། །བྱང་ཆུབ་སེམས་དཔའ་འཇིག་ཚོགས་ལྟ་བ་མེད། །འདི་ལྟར་བྱང་ཆུབ་སེམས་བསྐྱེད་ཚུན་ཆད་ནི། །དེ་ལ་སྲོག་ཏུ་ལྟ་
བར་འགྱུར་བ་མེད། །འདི་ལ་གང་ཡང་སྐྱེས་ཤིང་ཤི་མེད་དེ། །མིང་དང་ཤེད་སྐྱེས་སེམས་ཅན་བྱུང་བ་མེད། །ཆོས་རྣམས་རང་བཞིན་སྟོང་པ་སྒྱུ་མ་བཞིན། །མུ་སྟེགས་ཅན་གྱིས་རྣམ་པར་རིག་མི་ནུས། །ཁ་ཟས་དག་ལ་ཤིན་ཏུ་བརྐམ་པ་དང་། །ལྷུང་བཟེད་གོས་ལ་ཆགས་ཤིང་ཞེན་མེད་དང་། །
འཕྱར་བ་རྣམས་དང་ཁེངས་པ་དག་གིས་ཀྱང་། །སངས་རྒྱས་བྱང་ཆུབ་འདི་ནི་ཤེས་མི་ནུས། །གཉིད་དང་རྨུགས་པས་ནོན་པས་ལེ་ལོ་ཅན། །ང་རྒྱལ་ཅན་དང་ཁྲེལ་མེད་འགྱིང་བ་དང་། །སུ་དག་སངས་རྒྱས་ལ་ནི་དད་མེད་པ། །དེ་དག་བྱང་ཆུབ་དམ་པ་ཤེས་མི་ནུས། །ཚུལ་ཉམས་པ་ཡི་
སོ་སོའི་སྐྱེ་བོ་དང་། །གང་དག་ཆོས་ལ་དད་པ་མེད་པ་དང་། །ཚངས་པ་མཚུངས་སྤྱོད་དག་ལ་རི་མོ་མེད། །དེ་དག་བྱང་ཆུབ་འདི་ནི་རྟོགས་མི་ནུས། །ཚུལ་མ་ཉམས་ཤིང་ཁྲེལ་ཡོད་ངོ་ཚ་ཤེས། །ཆོས་དང་སངས་རྒྱས་དག་ལ་གང་དགའ་ཞིང་། །ཚངས་པ་མཚུངས་སྤྱོད་དག་ལ་རབ་ཏུ་གུས། །དེ་
དག་བྱང་ཆུབ་དམ་པ་མཆོག་འཐོབ་འགྱུར། །གང་དག་སྤྱོད་ཡུལ་དྲན་པ་ཉེ་བར་གཞག །བདེ་ཞིང་དགའ་བའི་མལ་དུ་ཞུགས་པ་དང་། །ཟས་སུ་བསམ་གཏན་སྐོམ་དུ་ཏིང་ངེ་འཛིན། །དེ་དག་གིས་ཀྱང་བྱང་ཆུབ་མཆོག་རབ་འཐོབ། །བདག་མེད་པ་ཡི་འདུ་ཤེས་ཉིན་པར་གནས། །འཆག་
སར་སྟོང་པ་དང་ནི་རྗེས་སུ་དྲན། །བྱང་ཆུབ་ཡན་ལག་མེ་ཏོག་ཡིད་འོང་བསུང་། །བརྩོན་པ་དེ་དག་བྱང་ཆུབ་དམ་པ་ཐོབ། །བྱང་ཆུབ་སེམས་དཔའ་མཁས་པའི་སྤྱོད་པ་དག །སྐྱེ་བོ་གཞན་རྣམས་དང་ནི་ཉན་ཐོས་དང་། །རང་སངས་རྒྱས་ཀྱི་ས་ཡང་མ་ཡིན་ན། །དེ་ལ་རྟོགས་པར་སུ་ཞིག་
འདུན་མི་སྐྱེད། །གལ་ཏེ་བསྐལ་བྱེ་གང་གཱའི་བྱེ་མ་སྙེད། །དེ་སྲིད་དུ་ནི་ཚེ་ཡི་ཚད་གྱུར་ནས། །ངས་ནི་སངས་རྒྱས་ཀྱི་ཡང་ཡེ་ཤེས་ཀྱི། །སྤུ་གཅིག་བསྔགས་པ་བརྗོད་ཀྱང་མཐར་མི་ཕྱིན། །དེ་ཕྱིར་ཟིལ་གྱིས་མི་ནོན་རྒྱལ་བ་ཡིས། །བཤད་པའི་ཕན་ཡོན་འདི་དག་ཐོས་ནས་ནི། །

ཏིང་འཛིན་འདི་ནི་མྱུར་དུ་ལུང་མནོད་ཀྱིས། །བྱང་ཆུབ་མཆོག་ནི་རྙེད་པར་དཀའ་མི་འགྱུར། །ཏིང་ངེ་འཛིན་ཡོངས་སུ་སྦྱང་བ་བྱ་བའི་ལེའུ་སྟེ་དྲུག་པའོ།། །།དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་
དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འདོད་ཅིང་། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་བཟོད་པ་གསུམ་གྱི་ཡེ་ཤེས་ལ་མཁས་པར་བྱའོ། །དེས་བཟོད་པ་དང་པོ་རབ་ཏུ་ཤེས་པར་བྱ།
བཟོད་པ་གཉིས་པ་རབ་ཏུ་ཤེས་པར་བྱ། བཟོད་པ་གསུམ་པ་རབ་ཏུ་ཤེས་པར་བྱ་སྟེ། བཟོད་པ་གསུམ་གྱི་ཁྱད་པར་ལ་མཁས་པར་བྱའོ། །བཟོད་པ་གསུམ་གྱི་ཡེ་ཤེས་ཀྱི་ཁྱད་པར་ལ་མཁས་པར་བྱའོ། །དེ་ཅིའི་ཕྱིར་ཞེ་ན། གཞོན་ནུ་འདི་ལྟར་ནམ་བྱང་ཆུབ་སེམས་དཔའ་སེམས་དཔའ་
ཆེན་པོ་བཟོད་པ་གསུམ་གྱི་ཁྱད་པར་ལ་མཁས་པར་གྱུར་ཅིང་། བཟོད་པ་གསུམ་གྱི་ཡེ་ཤེས་ཀྱི་ཁྱད་པར་ལ་མཁས་པར་གྱུར་པ་དེའི་ཚེ་གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་མྱུར་དུ་ཏིང་ངེ་འཛིན་འདི་འཐོབ་ཅིང་། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་
པར་རྫོགས་པར་འཚང་རྒྱའོ། །གཞོན་ནུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་བཟོད་པ་གསུམ་ལ་འཇུག་པའི་ཆོས་ཀྱི་རྣམ་གྲངས་འདི་གཟུང་བར་བྱའོ། །བཟུང་ནས་ཀྱང་
གཞན་ལ་རྒྱ་ཆེར་ཡང་དག་པར་རབ་ཏུ་བསྟན་པར་བྱ་སྟེ། དེ་ནི་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་འཇིག་རྟེན་ལ་སྙིང་བརྩེ་བ་དང་། སྐྱེ་བོ་ཕལ་པོ་ཆེ་དང་ལྷ་དང་མི་རྣམས་ཀྱི་དོན་དང་། ཕན་པ་དང་བདེ་བར་འགྱུར་རོ། །དེ་ནས་བཅོམ་ལྡན་འདས་ཀྱིས་ཟླ་འོད་གཞོན་
ནུར་གྱུར་པ་ལ་བཟོད་པ་གསུམ་ལ་འཇུག་པའི་ཆོས་ཀྱི་རྣམ་གྲངས་འདི་ཚིགས་སུ་བཅད་པའི་དབྱངས་ཀྱིས་ཡང་དག་པར་རབ་ཏུ་བསྟན་ཏོ། །སུ་དག་དང་ཡང་རྩོད་པར་མི་བྱེད་ཅིང་། །དོན་མེད་ལྡན་པའི་ཚིག་རྣམས་མི་སྨྲ་སྟེ། །དོན་དང་ཆོས་ལ་རྟག་པར་རབ་ཏུ་གནས། །འདི་དག་བཟོད་པ་

དང་པོར་བཤད་པ་ཡིན། །ཆོས་རྣམས་ཐམས་ཅད་སྒྱུ་མ་འདྲར་ཤེས་ཏེ། །དེ་ནི་མཚན་མའི་སྤྱོད་ཡུལ་ལྡན་མ་ཡིན། །ཡེ་ཤེས་འཕེལ་བའི་ས་ལས་མི་ཉམས་ཏེ། །འདི་དག་བཟོད་པ་དང་པོའི་ཁྱད་པར་རོ། །མདོ་སྡེའི་ཚུལ་ཀུན་ལ་ཡང་དེ་མཁས་ཤིང་། །ལེགས་པར་སྨྲས་ལ་མཁས་
པ་ཤིན་ཏུ་མོས། །བདེར་གཤེགས་མཁྱེན་ལ་མཐའ་ཡས་ཡེ་ཤེས་ཅན། །འདི་དག་བཟོད་པ་དང་པོའི་ཁྱད་པར་རོ། །ལེགས་པར་བཤད་པའི་ཆོས་ནི་གང་ཐོས་ཀྱང་། །སངས་རྒྱས་དག་གིས་བཤད་པར་ཐེ་ཚོམ་མེད། །རྒྱལ་བ་ཀུན་གྱི་ཆོས་ལ་དེ་མོས་ཏེ། །འདི་དག་བཟོད་པ་དང་
པོའི་ཁྱད་པར་རོ། །སྟོང་པ་བདེ་བར་གཤེགས་པས་བཤད་པ་ལྟར། །ངེས་དོན་མདོ་སྡེ་དག་གི་བྱེ་བྲག་ཤེས། །གང་ལས་སེམས་ཅན་གང་ཟག་སྐྱེས་བུ་བསྟན། །ཆོས་དེ་ཐམས་ཅད་དྲང་བའི་དོན་དུ་ཤེས། །འཇིག་རྟེན་འདི་ན་མུ་སྟེགས་མང་ཡོད་པ། །དེ་དག་ལ་ཡང་དེ་ནི་ཡིད་མི་ཁྲོ། །
དེ་དག་ལ་ནི་སྙིང་རྗེ་ཉེ་བར་འཇོག །འདི་དག་བཟོད་པ་དང་པོའི་ཁྱད་པར་རོ། །དེ་ལ་གཟུངས་རྣམས་ཡོངས་སུ་སྣང་བར་འགྱུར། །སྣང་བ་དེ་ལ་ནམ་ཡང་ཐེ་ཚོམ་མེད། །བདེན་པའི་རྗེས་སུ་འབྲང་བའི་ཚིག་སྨྲས་ཏེ། འདི་དག་བཟོད་པ་དང་པོའི་ཁྱད་པར་རོ། །རླུང་དང་ཆུ་དང་མེ་དང་ས་རྣམས་
ཀྱི། ཁམས་བཞི་པོ་ནི་རྣམ་པ་གཞན་འགྱུར་ཡང་། །སངས་རྒྱས་བྱང་ཆུབ་ལས་ནི་དེ་མི་ལྡོག །འདི་དག་བཟོད་པ་དང་པོའི་ཁྱད་པར་རོ། །འཇིག་རྟེན་བཟོ་གནས་མང་པོ་ཅི་ཡོད་པ། །ཐམས་ཅད་བྱང་ཆུབ་སེམས་དཔའ་དེས་བསླབས་ཏེ། །བདག་ལས་ལྷག་པ་སུ་ཡང་མི་མཐོང་བ། །
འདི་དག་བཟོད་པ་དང་པོའི་ཁྱད་པར་རོ། །ཞི་གནས་སྟོབས་ཀྱིས་བསྐྱོད་པ་མེད་གྱུར་ཅིང་། །ལྷག་མཐོང་གིས་ནི་རི་བོ་ལྟ་བུར་གྱུར། །སེམས་ཅན་ཀུན་གྱིས་འཁྲུགས་པར་མི་ནུས་ཏེ། །དེ་ནི་བཟོད་པ་གཉིས་སུ་བཤད་པ་ཡིན། །མཉམ་པར་བཞག་བཞིན་དུ་ནི་ལྡང་ཞིང་སྨྲ། །མཉམ་པར་བཞག་
པས་འདུག་ཅིང་འཆག་པར་བྱེད། །མཁས་པ་ཏིང་ངེ་འཛིན་གྱི་ཕ་རོལ་ཕྱིན། །འདི་དག་བཟོད་པ་གཉིས་པའི་ཁྱད་པར་རོ། །མཉམ་པར་བཞག་པས་མངོན་ཤེས་ལྔ་ཐོབ་སྟེ། །ཆོས་རྣམས་སྟོན་ཅིང་ཞིང་ནི་བརྒྱར་ཡང་འགྲོ། །དེ་ནི་རྫུ་འཕྲུལ་སྟོབས་ལས་མི་ཉམས་ཏེ། །འདི་དག་བཟོད་པ་

གཉིས་པའི་ཁྱད་པར་རོ། །དེ་ནི་དེ་འདྲའི་ཏིང་འཛིན་ཞི་བ་བསྟན། །མཉམ་པར་བཞག་པ་དེ་ཡི་སེམས་ཀྱི་ཚོད། །འཛིན་ནུས་པ་ཡི་སེམས་ཅན་གང་ཡང་མེད། །འདི་དག་བཟོད་པ་གཉིས་པའི་ཁྱད་པར་རོ། །འཇིག་རྟེན་འདི་ན་གང་ཡོད་སེམས་ཅན་ཀུན། །དེ་དག་སངས་རྒྱས་
མཁྱེན་པས་ཆོས་སྟོན་ཀྱང་། །བཤད་པ་ཐམས་ཅད་དེ་བཞིན་འཛིན་ནུས་ཏེ། །འདི་དག་བཟོད་པ་གཉིས་པའི་ཁྱད་པར་རོ། །ཤར་དང་ལྷོ་དང་ནུབ་དང་བྱང་ཕྱོགས་དང་། །སྟེང་དང་འོག་དང་དེ་བཞིན་ཕྱོགས་མཚམས་ནི། །ཐམས་ཅད་ན་ཡང་འཇིག་རྟེན་མགོན་པོ་མཐོང་། །དེ་ནི་བཟོད་པ་
གསུམ་པར་བསྟན་པ་ཡིན། །གསེར་གྱི་ཁ་དོག་ལྟ་བུའི་སྐུ་ལུས་སུ། །འཕྲུལ་པ་བསམ་གྱིས་མི་ཁྱབ་སྤྲུལ་ནས་ནི། །སྲོག་ཆགས་བྱེ་བ་མང་ལ་ཆོས་སྟོན་ཏེ། །འདི་དག་བཟོད་པ་གསུམ་པའི་ཁྱད་པར་རོ། །སངས་རྒྱས་ཞིང་འདིའི་འཛམ་བུའི་གླིང་ཀུན་ན། །བྱང་ཆུབ་སེམས་དཔའ་དེ་ནི་
སྣང་བར་འགྱུར། །འཇིག་རྟེན་ལྷ་དང་ལྷ་མིན་བཅས་པར་གྲགས། །འདི་དག་བཟོད་པ་གསུམ་པའི་ཁྱད་པར་རོ། །སངས་རྒྱས་སྤྱོད་ཡུལ་དེ་བཞིན་ཆོ་ག་དང་། །བདེ་བར་གཤེགས་པའི་སྤྱོད་ལམ་ཅི་འདྲ་བ། །ཀུན་ལ་བྱང་ཆུབ་སེམས་དཔའ་དེས་བསླབས་ཏེ། །འདི་དག་བཟོད་པ་གསུམ་
པའི་ཁྱད་པར་རོ། །འཇིག་རྟེན་ཁམས་འདི་སེམས་ཅན་ཅི་ཡོད་པས། །བྱང་ཆུབ་སེམས་དཔའི་བསྔགས་པ་བརྗོད་གྱུར་ལ། །དེ་ལ་ཡིད་ནི་རྗེས་སུ་དགར་བྱེད་ན། །སངས་རྒྱས་ཡེ་ཤེས་ལ་ནི་བསླབས་མ་ཡིན། །འཇིག་རྟེན་ཁམས་འདིའི་སེམས་ཅན་སུ་ཡོད་པས། །བྱང་ཆུབ་སེམས་དཔའ་ལ་ནི་
མི་སྙན་བརྗོད། དེ་དག་ལ་ནི་ཡིད་ཀྱིས་ཁྲོ་བྱེད་ན། །ད་དུང་སངས་རྒྱས་ཡེ་ཤེས་དེས་མ་བསླབས། །ནོར་རྙེད་པས་ནི་ཡིད་བདེར་མི་འགྱུར་ཏེ། །ནོར་རྣམས་མ་རྙེད་ན་ཡང་མི་དགའ་མེད། །རི་དང་འདྲ་བའི་སེམས་ལ་རྟག་ཏུ་གནས། །འདི་དག་བཟོད་པ་གསུམ་པའི་ཁྱད་པར་རོ། །སྒྲ་
ཡི་རྗེས་འགྲོ་བཟོད་པ་འདི་བསྟན་ཏེ། །བསམ་པ་སྒོམ་པ་རྗེས་སུ་འཐུན་པ་དང་། །ཐོས་པ་ལས་བྱུང་དེ་ནི་སྐྱེ་བ་མེད། །འདི་ལ་གང་བསླབས་དེ་ནི་བྱང་ཆུབ་ལམ། །བཟོད་པ་བླ་ན་མེད་པ་གསུམ་པོ་འདི། །བྱང་ཆུབ་སེམས་དཔས་ནམ་ཞིག་ཐོབ་གྱུར་ན། །མི་མཆོག་བདེ་བར་གཤེགས་

པ་དེས་མཐོང་སྟེ། །རྡུལ་མེད་བྱང་ཆུབ་ཏུ་ཡང་དེ་ལུང་སྟོན། །དེ་ནས་ལུང་བསྟན་པ་ནི་དེ་ཐོབ་ནས། །ས་ཡང་རྣམ་པ་དྲུག་ཏུ་རབ་ཏུ་གཡོས། །ཞིང་རྣམས་འོད་ཀྱིས་ཤིན་ཏུ་གསལ་བར་གྱུར། །ལྷ་རྣམས་བྱེ་བ་མེ་ཏོག་ཆར་པ་འབེབས། །དེ་ལ་ལུང་བསྟན་དེ་ཡང་ཐོས་ནས་ནི། །སེམས་ཅན་
བྱེ་བ་ཁྲག་ཁྲིག་བསམ་ཡས་ཀྱང་། །བདག་ཅག་མཆོད་རྟེན་རྒྱལ་བར་འགྱུར་སྙམ་སྟེ། །བྱང་ཆུབ་དམ་པ་མཆོག་ལ་སེམས་སྐྱེད་འགྱུར། །ནམ་ཞིག་བླ་མེད་བཟོད་པ་གསུམ་པོ་འདི། །བྱང་ཆུབ་སེམས་དཔས་ཐོབ་པར་གྱུར་པ་ན། །དེ་ནི་མི་སྐྱེ་འཆི་བར་མི་འགྱུར་ཏེ། །དེ་ལ་འཆི་འཕོ་མེད་ཅིང་སྐྱེ་
བའང་མེད། །ནམ་ཞིག་བླ་མེད་བཟོད་པ་གསུམ་པོ་འདི། །རྫོགས་པའི་བྱང་ཆུབ་སེམས་དཔས་ཐོབ་གྱུར་ན། །སྐྱེ་བ་དང་ནི་འཆི་བའང་མི་མཐོང་སྟེ། །ཆོས་རྣམས་ཐམས་ཅད་ཆོས་ཉིད་གནས་པར་མཐོང་། །འདི་ལྟར་མི་བདེན་པར་ནི་དེས་རིག་སྟེ། །ཆོས་རྣམས་སྒྱུ་མ་ལྟ་བུར་རང་བཞིན་
སྟོང་། །སྟོང་པ་དག་ཀྱང་མི་མཐོང་འཆི་བའང་མེད། །ཆོས་འདི་ཐམས་ཅད་ངོ་བོ་ཉིད་ཀྱིས་སྟོང་། །ནམ་ཞིག་ལ་ལས་དེ་ལ་གུས་བྱས་ཤིང་། །རིམ་གྲོ་བཀུར་སྟི་མཆོད་པ་བྱས་ན་ཡང་། །དེ་ལ་ཡིད་ནི་དགའ་བར་མི་བྱེད་དེ། །ཆོས་རྣམས་རང་བཞིན་སྟོང་པར་དེ་ཡིས་ཤེས། །སེམས་ཅན་
དག་གིས་སྤྱོས་བསྡིགས་བརྡེགས་ན་ཡང་། །དེ་དག་ལ་ནི་ང་རྒྱལ་ཁྲོ་མི་སྲིད། །དེ་དག་སེམས་ཅན་ཐར་པར་བྱ་བའི་ཕྱིར། །དེ་དག་ལ་ནི་བྱམས་པ་བརྟན་པར་སྐྱེད། །རྡོ་དང་དབྱུག་པ་དག་གིས་བརྡེགས་བཙོགས་ཀྱང་། །མཁས་པ་དེ་ལ་ཁྲོ་བར་མི་བྱེད་དེ། །བདག་མེད་བཟོད་ལ་རབ་ཏུ་
གནས་པ་ལ། །ང་རྒྱལ་དང་ནི་ཁྲོ་བའི་ཐ་བ་མེད། །འདི་ལྟར་དེས་ནི་མི་བདེན་ཉིད་དུ་ཤེས། །སྒྱུ་མ་ལྟ་བུར་ཆོས་རྣམས་རང་བཞིན་སྟོང་། །ཆོས་ཚུལ་དེ་འདྲ་བ་ལ་དེ་གནས་ན། །ལྷར་བཅས་འཇིག་རྟེན་དག་ན་ཤིན་ཏུ་བཀུར། །ནམ་ཞིག་སེམས་ཅན་དག་ནི་མཚོན་ཐོགས་ནས། །དེ་ཡི་
ལུས་དང་ཡན་ལག་མང་གཏུབས་ཀྱང་། །དེ་དག་ལ་ནི་ཡིད་ཀྱིས་ཁྲོ་བ་མེད། །སྙིང་རྗེ་བྱམས་པ་ལས་ཀྱང་ཉམས་མི་འགྱུར། །དེ་དག་ལུས་དང་ཡན་ལག་གཅོད་པའི་ཚེ། །དེ་ནི་དེ་ལ་འདི་ལྟར་སེམས་བསྐྱེད་དེ། །འདི་དག་བྱང་ཆུབ་མཆོག་ལ་མ་བཀོད་པར། །དེ་སྲིད་ཞི་བར་མྱ་ངན་ང་མི་

འདའ། །དེ་འདྲའི་བཟོད་སྟོབས་བླ་ན་མེད་པ་ལ། །བདག་མེད་བཟོད་པ་མཉམ་ཉིད་གནས་པ་ཡི། །བྱང་ཆུབ་སེམས་དཔའ་གྲགས་པ་ཆེན་པོ་ཡིས། །བསྐལ་པ་བྱེ་བར་རྟག་ཏུ་ཤིན་ཏུ་བསྒོམས། །དེ་ལས་ལྷག་པར་གང་གཱའི་བྱེ་སྙེད་དུ། །ཇི་ཙམ་སངས་རྒྱས་མཁྱེན་པས་དོན་
མི་བྱེད། །དེ་སྲིད་བྱང་ཆུབ་རེག་པ་མ་ཡིན་ན། །དེ་བཞིན་གཤེགས་པའི་ཡེ་ཤེས་ཅི་ཞིག་སྨོས། །གྲགས་པ་ཆེན་པོ་བརྗོད་པ་མཐའ་ཡས་པ། །བདག་མེད་བཟོད་ལ་རབ་ཏུ་གནས་པ་ཡི། །བསྐལ་པ་བསམ་གྱིས་མི་ཁྱབ་བརྒྱར་བརྗོད་ཀྱང་། །དེ་ཡི་བསྔགས་པ་ཟད་པར་སླ་བ་མིན། །དེ་ཕྱིར་བྱང་
ཆུབ་མཆོག་རབ་བླ་ན་མེད། །ཡེ་ཤེས་ཕུང་པོ་འཚང་རྒྱར་སུ་འདོད་པ། །དེ་ནི་རྒྱལ་བས་བསྔགས་པའི་བཟོད་པ་སྒོམས། །བྱང་ཆུབ་དམ་པ་རྙེད་པར་དཀའ་མི་འགྱུར། །བཟོད་པ་ལ་འཇུག་པའི་ལེའུ་སྟེ་བདུན་པའོ།། །།དེ་ནས་ཡང་བཅོམ་ལྡན་འདས་ཀྱིས་ཟླ་འོད་
གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འདོད་ཅིང་། །མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་ཆོས་ཐམས་ཅད་ཀྱི་དངོས་པོ་མེད་པའི་ངོ་བོ་ཉིད་
ཀྱི་ཡེ་ཤེས་ལ་མཁས་པར་བྱའོ། །གཞོན་ནུ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་ཀྱི་དངོས་པོ་མེད་པའི་ངོ་བོ་ཉིད་ཀྱི་ཡེ་ཤེས་ལ་མཁས་པ་ཡིན་ཞེ་ན། གཞོན་ནུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་དངོས་པོ་མེད་པ། ངོ་བོ་ཉིད་
མེད་པ། མཚན་མ་མེད་པ། མཚན་ཉིད་མེད་པ། མ་སྐྱེས་པ། མ་འགགས་པ། ཡི་གེ་མེད་པ། སྟོང་པ། གཟོད་མ་ནས་ཞི་བ། རང་བཞིན་གྱིས་རྣམ་པར་དག་པ་ཡིན་པར་རབ་ཏུ་ཤེས་པར་བྱའོ། །གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོས་ནམ་ཆོས་ཐམས་ཅད་
དངོས་པོ་མེད་པ། ངོ་བོ་ཉིད་མེད་པ། མཚན་མ་མེད་པ། མཚན་ཉིད་མེད་པ། མ་སྐྱེས་པ། མ་འགགས་པ། ཡི་གེ་མེད་པ། སྟོང་པ། གཟོད་མ་ནས་ཞི་བ། རང་བཞིན་གྱིས་རྣམ་པར་དག་པ་ཡིན་པར་རབ་ཏུ་ཤེས་པར་གྱུར་པ་དེའི་ཚེ་གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་

ཡང་དག་པ་ཇི་ལྟ་བ་བཞིན་དུ་ཆོས་ཐམས་ཅད་ཀྱི་དངོས་པོ་མེད་པའི་ངོ་བོ་ཉིད་ཀྱི་ཡེ་ཤེས་ལ་མཁས་པ་ཞེས་བྱའོ། །གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་ཀྱི་དངོས་པོ་མེད་པའི་ངོ་བོ་ཉིད་ཀྱི་ཡེ་ཤེས་ལ་མཁས་པ་དེ་ནི་གཟུགས་དང་སྒྲ་དང་དྲི་དང་རོ་དང་རེག་བྱ་དང་ཆོས་ཐམས་
ཅད་ལ་འདོད་ཆགས་པར་མི་བྱེད། ཞེ་སྡང་བར་མི་བྱེད། གཏི་མུག་པར་མི་བྱེད་དོ། །དེ་ཅིའི་ཕྱིར་ཞེ་ན། འདི་ལྟར་དེས་ཆོས་དེ་ཡང་དག་པར་རྗེས་སུ་མི་མཐོང་ཞིང་། ཆོས་དེ་མི་དམིགས་ཏེ། གང་འདོད་ཆགས་པ་དང་གང་ལ་འདོད་ཆགས་པ་དང་གང་གིས་འདོད་ཆགས་པ་དང་གང་ཞེ་སྡང་བ་
དང་གང་ལ་ཞེ་སྡང་བ་དང་གང་གིས་ཞེ་སྡང་བ་དང་གང་གཏི་མུག་པ་དང་གང་ལ་གཏི་མུག་པ་དང་གང་གིས་གཏི་མུག་པར་འགྱུར་བའི་ཆོས་དེ་དེས་ཡང་དག་པར་རྗེས་སུ་མི་མཐོང་ཞིང་མི་དམིགས་སོ། །ཆོས་དེ་ཡང་དག་པར་རྗེས་སུ་མི་མཐོང་ཞིང་མ་དམིགས་ན་ཁམས་གསུམ་ཐམས་ཅད་ལ་མ་ཆགས་པར་
འགྱུར་ཏེ་མྱུར་དུ་ཏིང་ངེ་འཛིན་འདི་འཐོབ་བོ། །མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མངོན་པར་རྫོགས་པར་འཚང་རྒྱའོ། །དེ་ལ་འདི་སྐད་ཅེས་བྱ་སྟེ། ཆོས་རྣམས་ཐམས་ཅད་དངོས་པོ་མེད་པ་སྟེ། །ཐམས་ཅད་མཚན་མ་མེད་ཅིང་མཚན་ཉིད་མེད། །སྐྱེས་པ་མེད་ཅིང་
འགགས་པ་མེད་པར་ཡང་། །དེ་ལྟར་ཆོས་རྣམས་ཤིན་ཏུ་རིག་པར་གྱིས། །ཐམས་ཅད་དངོས་པོ་མེད་ཅིང་ཡི་གེ་མེད། །སྟོང་པ་ཞི་བ་གཟོད་ནས་དྲི་མ་མེད། །དེ་ལྟར་ཆོས་རྣམས་གང་གིས་ཤེས་པ་ནི། །གཞོན་ནུ་དེ་ནི་སངས་རྒྱས་ཞེས་ཀྱང་བརྗོད། །དེ་ཕྱིར་རང་བཞིན་མཉམ་ཉིད་རྣམས་
སྤྲོས་པ། །ངོ་བོ་ཉིད་ཀྱིས་ཆོས་ཀུན་རང་བཞིན་མེད། །བདེ་བར་གཤེགས་པའི་ཡུམ་འདི་སུ་འདོད་པ། །རྒྱལ་བ་རྣམས་ཀྱི་ཡུམ་འདི་འཐོབ་པར་འགྱུར། །གཞོན་ནུ་དེ་ལྟ་བས་ན་རྣམ་གྲངས་འདིས་ཀྱང་འདི་ལྟར་རིག་པར་བྱ་སྟེ། གཞོན་ནུ་སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པ་
བས་ཀྱང་ཆེས་གྲངས་མེད་པ། རྒྱ་ཆེ་བ། གཞལ་དུ་མེད་པ། བསམ་གྱིས་མི་ཁྱབ་པ། ཚད་མེད་པར་གྱུར་པ་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ།

འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་དངོས་པོ་མེད་པ་ལས་བྱུང་བ་ཞེས་བྱ་བ་འཇིག་རྟེན་དུ་བྱུང་ངོ་། །གཞོན་ནུ་འདི་ཇི་སྙམ་དུ་སེམས། ཅིའི་ཕྱིར་དེ་བཞིན་གཤེགས་པ་དེ་དངོས་པོ་མེད་པ་
ལས་བྱུང་བ་ཞེས་བྱ་ཞེ་ན། གཞོན་ནུ་དེ་བཞིན་གཤེགས་པ་དེ་སྐྱེས་མ་ཐག་ཏུ་སྟེང་གི་ནམ་མཁའ་ལ་ཏ་ལ་བདུན་ཙམ་དུ་འཕགས་ནས་གོམ་པ་བདུན་བོར་ཏེ་ཚིག་འདི་སྐད་གསུང་ངོ་། །ཆོས་ཐམས་ཅད་དངོས་པོ་མེད་པ་ལས་བྱུང་བའོ། །ཆོས་ཐམས་ཅད་དངོས་པོ་མེད་པ་ལས་བྱུང་བའོ་ཞེས་གསུངས་ཏེ། གཞོན་ནུ་
སྒྲ་དེའི་དབྱངས་ཀྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གོ་བར་བྱས་སོ། །དེ་ནས་སའི་ལྷ་ནས་བཟུང་སྟེ་ཚངས་པའི་འཇིག་རྟེན་གྱི་བར་དུ་སྒྲ་བསྒྲགས་ཤིང་དབྱངས་ཀྱིས་རྗེས་སུ་གོ་བར་བྱས་ཏེ། ཨེ་མ་དེ་བཞིན་གཤེགས་པ་འདི་སྐྱེས་མ་ཐག་ཏུ་སྟེང་གི་ནམ་མཁའ་ལ་ཏ་ལ་བདུན་སྲིད་དུ་
འཕགས་ནས་གོམ་པ་བདུན་བོར་ཏེ། དངོས་པོ་མེད་པའི་སྒྲ་འབྱིན་པ་ལས་ན་དངོས་པོ་མེད་པ་ལས་བྱུང་བ་ཞེས་བྱ་བར་འགྱུར་རོ་ཞེས་མཚན་དངོས་པོ་མེད་པ་ལས་བྱུང་བ། དངོས་པོ་མེད་པ་ལས་བྱུང་བའོ་ཞེས་བཏགས་སོ། །བཅོམ་ལྡན་འདས་དེ་བྱང་ཆུབ་ཐོབ་པ་ན་ཤིང་ཐམས་ཅད་ཀྱི་ལོ་མ་དང་རྩ་བ་དང་ཤིང་
གེལ་པ་དང་ནགས་ཚལ་ཐམས་ཅད་དང་རིའི་རྩེ་མོ་ཐམས་ཅད་ལས་ཀྱང་དངོས་པོ་མེད་པ་ལས་བྱུང་བའོ་ཞེས་སྒྲ་བྱུང་ངོ་། །འཇིག་རྟེན་གྱི་ཁམས་དེ་ན་སྒྲར་བཏགས་པ་ཇི་སྙེད་ཡོད་པ་ཐམས་ཅད་ལས་དངོས་པོ་མེད་པ་ལས་བྱུང་བའོ་ཞེས་རྣམ་པར་རིག་པར་བྱེད་པའི་སྒྲ་བྱུང་ངོ་། །གཞོན་ནུ་དེའི་ཚེ་དེའི་དུས་ན་
བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དངོས་པོ་མེད་པ་ལས་བྱུང་བ་དེའི་གསུང་རབ་ལ་རྒྱལ་བུ་གཞོན་ནུ་སྙིང་རྗེ་ཆེན་པོ་སེམས་ཞེས་བྱ་བ་གཟུགས་བཟང་ཞིང་མཛེས་ལ་བལྟ་ན་སྡུག་པ་ཞིག་བྱུང་ངོ་། །གཞོན་ནུ་དེ་ནས་རྒྱལ་བུ་གཞོན་ནུ་སྙིང་རྗེ་
ཆེན་པོ་སེམས་དེ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དངོས་པོ་མེད་པ་ལས་བྱུང་བ་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་

གཅིག་ཏུ་འདུག་གོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དངོས་པོ་མེད་པ་ལས་བྱུང་བས་རྒྱལ་བུ་གཞོན་ནུ་སྙིང་རྗེ་ཆེན་པོ་སེམས་ཀྱི་ལྷག་པའི་བསམ་པ་མཁྱེན་ནས་ཏིང་ངེ་འཛིན་འདི་བཤད་དོ། །དེ་ཏིང་ངེ་འཛིན་འདི་ཐོས་ནས་རབ་ཏུ་
དད་དེ་སེམས་རབ་ཏུ་དད་པས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་གྱོན་ནས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །དེ་རབ་ཏུ་བྱུང་ནས་ཏིང་ངེ་འཛིན་འདི་བཟུང་སྟེ། །བཟུང་ཞིང་བཅངས་བཀླགས་ཀུན་ཆུབ་པར་བྱས་ནས་བསྒོམ་པའི་རྣལ་འབྱོར་ལ་རྗེས་སུ་བརྩོན་པར་གནས་ཏེ། དེ་དགེ་བའི་རྩ་
བ་དེས་བསྐལ་པ་བྱེ་བ་ཕྲག་ཉི་ཤུར་ནམ་ཡང་ངན་འགྲོ་ལོག་པར་ལྟུང་བར་མ་སོང་ངོ་། །སངས་རྒྱས་བྱེ་བ་ཕྲག་ཉི་ཤུ་མཉེས་པར་བྱས་ཏེ། དེ་བཞིན་གཤེགས་པ་དེ་དག་ཐམས་ཅད་ལས་ཀྱང་ཏིང་ངེ་འཛིན་འདི་མཉན་ཏོ། །སངས་རྒྱས་དེ་དག་ཐམས་ཅད་ལས་མཉན་ནས་ཀྱང་བཟུང་ངོ་ཀུན་ཆུབ་པར་བྱས་སོ། །
བཅངས་སོ། །བཀླགས་སོ། །བཏོན་ཏོ། །ཉོན་མོངས་པ་མེད་པར་བསྒོམས་ཤིང་མང་དུ་བྱས་ཏེ། བསྒོམ་པའི་རྣལ་འབྱོར་ལ་རྗེས་སུ་བརྩོན་པར་གནས་སོ། །དེ་དགེ་བའི་རྩ་བ་དེས་བསྐལ་པ་ཉི་ཤུ་འདས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་
ལེགས་པར་བསམས་པ་ཞེས་བྱ་བ་འཇིག་རྟེན་དུ་བྱུང་སྟེ། དེས་སེམས་ཅན་གྲངས་མེད་དཔག་ཏུ་མེད་པ་ཡོངས་སུ་སྨིན་པར་བྱས་སེམས་ཅན་ཚད་མེད་པའི་དོན་བྱས་ནས་དེའི་འོག་ཏུ་ཤིང་ཟད་པའི་མེ་ལྟར་ཡོངས་སུ་མྱ་ངན་ལས་འདས་སོ། །གཞོན་ནུ་དེ་ལྟ་བས་ན་རྣམ་གྲངས་དེས་ཀྱང་འདི་ལྟར་ཏིང་ངེ་འཛིན་
འདི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་གཅེས་སྤྲས་བྱེད་པ་སྟེ། སངས་རྒྱས་ཀྱི་ཡེ་ཤེས་བླ་ན་མེད་པ་ཡོངས་སུ་རྫོགས་པར་བྱེད་པ་ཡིན་པར་རིག་པར་བྱའོ། །དེ་ནས་ཡང་བཅོམ་ལྡན་འདས་ཀྱིས་དེའི་ཚེ་ཟླ་འོད་གཞོན་ནུར་གྱུར་པ་ལ་སྔོན་བྱུང་བའི་ལེའུ་འདི་ཉིད་རྒྱས་པར་ཚིགས་
སུ་བཅད་པའི་དབྱངས་ཀྱིས་རྒྱ་ཆེར་ཡང་དག་པར་རབ་ཏུ་བསྟན་ཏོ། །སྔོན་འདས་དུས་ཀྱི་བསྐལ་པ་བསམ་ཡས་ན། །མི་ཡི་གཙོ་བོ་བྱུང་བ་ངས་དྲན་ཏེ། །དྲང་སྲོང་ཆེན་པོ་གཟེངས་ཀྱིས་དོན་མཛད་པ། །དེ་མིང་དངོས་པོ་མེད་ལས་བྱུང་ཞེས་བྱ། །སྐྱེས་མ་ཐག་ཏུ་མཁའ་ལ་རབ་འདུག་ནས། །

ཆོས་རྣམས་ཐམས་ཅད་དངོས་པོ་མེད་པར་བསྟན། །དེ་ཚེ་དེ་དང་འཐུན་པར་མཚན་བཏགས་ཏེ། །སྒྲས་ནི་འཇིག་རྟེན་ཀུན་ཏུ་གྲགས་པར་བྱས། །ལྷ་རྣམས་ཐམས་ཅད་རབ་ཏུ་སྒྲ་འབྱིན་པ། །དངོས་པོ་མེད་ཅེས་བྱ་བའི་རྒྱལ་བར་འགྱུར། །སྐྱེས་མ་ཐག་ཏུ་གོམ་པ་བདུན་བོར་
ཏེ། །རྒྱལ་བས་ཆོས་རྣམས་དངོས་པོ་མེད་པར་བཤད། །ཐུབ་པ་ཆོས་རྣམས་ཐམས་ཅད་སྟོན་པ་ཡི། །སངས་རྒྱས་ཆོས་ཀྱི་རྒྱལ་པོར་ནམ་འགྱུར་ཚེ། །རྩི་ཤིང་གེལ་བ་རི་དང་བྲག་རྣམས་ལས། །ཆོས་རྣམས་དངོས་པོ་མེད་ཅེས་སྒྲ་ཡང་བྱུང་། །འཇིག་རྟེན་དེ་ན་ཇི་སྙེད་སྒྲ་ཡོད་པ། །ཐམས་
ཅད་དངོས་མེད་ཅི་ཡང་མེད་པ་ཞེས། །དེ་ལྟ་བུར་ནི་འཇིག་རྟེན་འདྲེན་པ་ཡི། །སྒྲ་དབྱངས་རྣམ་པ་ཤིན་ཏུ་བྱུང་བར་གྱུར། །དེ་ཡི་དུས་ན་རྒྱལ་པོའི་བུ་སྐྱེས་པ། །མིང་ནི་རྟག་ཏུ་སྙིང་རྗེ་སེམས་ཞེས་བྱ། །ཤིན་ཏུ་གཟུགས་བཟང་བལྟ་ན་སྡུག་པ་ཞིག །རྒྱལ་བ་དེ་ཡི་དྲུང་དུ་ཉེར་འོངས་ཏེ། །ཐུབ་
པ་ཁྱུ་མཆོག་ཞབས་ལ་ཕྱག་འཚལ་ནས། །རི་མོར་བཅས་པས་བསྐོར་བར་བྱས་ནས་ནི། །རྡུལ་བྲལ་བླ་ན་མེད་པའི་ཆོས་མཉན་ཕྱིར། །རབ་ཏུ་དང་བའི་སེམས་ཀྱིས་དེར་འདུག་གོ། །རྒྱལ་བ་དཔའ་བོ་དེས་ནི་བསམ་མཁྱེན་ནས། །ཏིང་འཛིན་འདི་ནི་རབ་ཏུ་བཤད་པ་མཛད། །དེས་ནི་
རྡུལ་བྲལ་ཏིང་འཛིན་འདི་ཐོས་ནས། །རྒྱལ་མཆོག་བསྟན་ལ་མྱུར་བར་རབ་ཏུ་བྱུང་། །རབ་ཏུ་དེ་བྱུང་ཏིང་འཛིན་འདི་ཡང་ནི། །བཟུང་ཞིང་བཀླགས་ཏེ་ཡོངས་སུ་ཆུབ་བྱས་པས། །བསྐལ་པ་བྱེ་བ་ཉི་ཤུ་ཚང་བར་ནི། །ལོག་པར་ལྟུང་བའི་སར་ཡང་ཡོང་མ་སོང་། །དེ་ནི་དགེ་བར་བྱས་པའི་
ལས་དེ་ཡིས། །སངས་རྒྱས་བྱེ་ཕྲག་ཉི་ཤུ་མཉེས་པར་བྱས། །རྒྱལ་བ་དེ་དག་ཀུན་གྱི་དྲུང་དུ་ཡང་། །ཏིང་འཛིན་ཞི་མཆོག་འདི་ནི་གོམས་པར་བྱས། །དེ་ཕྱིས་འཇིག་རྟེན་དུ་ཡང་སངས་རྒྱས་གྱུར། །མིང་ནི་དོན་ལེགས་བསམས་ཞེས་རྟག་ཏུ་བརྗོད། །སེམས་ཅན་བྱེ་བ་མང་པོའི་
དོན་བྱས་ནས། །ཕྱི་མའི་དུས་ལ་མེ་བཞིན་མྱ་ངན་འདས། །དངོས་པོ་མེད་པ་ལས་བྱུང་བའི་ལེའུ་སྟེ་བརྒྱད་པའོ།། །།འཕགས་པ་ཏིང་ངེ་འཛིན་གྱི་རྒྱལ་པོའི་མདོ། བམ་པོ་གསུམ་པ། དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་

སྩལ་པ། གཞོན་ནུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཇི་ལྟར་ན་བདག་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་ཞིང་། སེམས་ཅན་ཐམས་ཅད་སྲིད་པའི་རྒྱ་མཚོ་ལས་བསྒྲལ་བར་འདོད་པའི་བྱང་ཆུབ་སེམས་དཔའ་སེམས་
དཔའ་ཆེན་པོས་སངས་རྒྱས་ཐམས་ཅད་ཀྱིས་བསྔགས་པ། དེ་བཞིན་གཤེགས་པ་ཐམས་ཅད་ཀྱི་ཡུམ། ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་གྱི་རྒྱལ་པོ་འདི་མཉན་པར་བྱ། །གཟུང་བར་བྱ། བཅང་བར་བྱ། ཀུན་ཆུབ་པར་བྱ། བཀླག་པར་བྱ། རབ་ཏུ་
གདོན་པར་བྱ། ལུང་ནོད་ཅིང་ཁ་ཏོན་དུ་བྱ། ཉོན་མོངས་པ་མེད་པར་སྒོམ་པས་བསྒོམ་པར་བྱ། མང་དུ་བྱ། གཞན་ལ་ཡང་རྒྱ་ཆེར་རབ་ཏུ་བསྟན་པར་བྱའོ། །དེ་ཅིའི་ཕྱིར་ཞེ་ན། གཞོན་ནུ་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་གྱི་རྒྱལ་པོ་འདི་ནི་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་སྐྱེད་པ་སྟེ། འདི་ལས་དེ་བཞིན་གཤེགས་པ་དང་ཉན་ཐོས་དང་རང་སངས་རྒྱས་ཐམས་ཅད་བྱུང་ངོ་། །གཞོན་ནུ་དེ་ལྟ་བས་ན་ཁྱོད་ཀྱིས་ཀྱང་སངས་རྒྱས་ཐམས་ཅད་ཀྱིས་བསྔགས་པ། དེ་བཞིན་གཤེགས་པ་
ཐམས་ཅད་སྐྱེད་པ། ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པ་ཏིང་ངེ་འཛིན་གྱི་རྒྱལ་པོ་གཟུང་བར་བྱའོ། །དེ་ལ་འདི་སྐད་ཅེས་བྱ་སྟེ། དེ་ཕྱིར་བྱང་ཆུབ་ཏུ་ནི་འཚང་རྒྱ་ཞིང་། །སྲིད་པའི་མཚོ་ལས་སེམས་ཅན་སྒྲོལ་འདོད་པས། །སངས་རྒྱས་བསྔགས་པའི་མདོ་སྡེ་འདི་ཟུང་
ཤིག །བྱང་ཆུབ་དམ་པ་རྙེད་པར་དཀའ་མི་འགྱུར། །དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འདོད་ཅིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
རྫོགས་པར་འཚང་རྒྱ་བར་འདོད་པས་ཆོས་ཟབ་མོ་བཟོད་པ་ལ་མཁས་པར་བྱའོ། །གཞོན་ནུ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཟབ་མོ་བཟོད་པ་ལ་མཁས་པ་ཡིན་ཞེ་ན། གཞོན་ནུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་སྒྱུ་མ་ལྟ་བུར་རབ་ཏུ་

ཤེས་པར་བྱའོ། །ཆོས་ཐམས་ཅད་རྨི་ལམ་ལྟ་བུ་དང་སྨིག་རྒྱུ་ལྟ་བུ་དང་བྲག་ཅ་ལྟ་བུ་དང་མིག་ཡོར་ལྟ་བུ་དང་ཆུ་ཟླ་ལྟ་བུ་དང་སྤྲུལ་པ་ལྟ་བུ་དང་གཟུགས་བརྙན་ལྟ་བུ་དང་ནམ་མཁའ་ལྟ་བུར་རབ་ཏུ་ཤེས་པར་བྱའོ། །གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོས་ནམ་ཆོས་ཐམས་
ཅད་སྒྱུ་མ་ལྟ་བུར་ཡོངས་སུ་ཤེས་ཤིང་། ཆོས་ཐམས་ཅད་རྨི་ལམ་ལྟ་བུ་དང་སྨིག་རྒྱུ་ལྟ་བུ་དང་བྲག་ཅ་ལྟ་བུ་དང་མིག་ཡོར་ལྟ་བུ་དང་ཆུ་ཟླ་ལྟ་བུ་དང་སྤྲུལ་པ་ལྟ་བུ་དང་གཟུགས་བརྙན་ལྟ་བུ་དང་ནམ་མཁའ་ལྟ་བུར་ཡང་དག་པ་ཇི་ལྟ་བ་བཞིན་ཡོངས་སུ་ཤེས་པ་དེའི་ཚེ། གཞོན་ནུ་བྱང་ཆུབ་སེམས་དཔའ་
སེམས་དཔའ་ཆེན་པོ་འདི་ཆོས་ཟབ་མོ་བཟོད་པ་ལ་མཁས་པ་ཞེས་བྱའོ། །ཆོས་ཟབ་མོ་བཟོད་པ་དང་ལྡན་པ་དེ་འདོད་ཆགས་པར་འགྱུར་བའི་ཆོས་ལ་མི་ཆགས། ཞེ་སྡང་བར་འགྱུར་བའི་ཆོས་ལ་མི་སྡང་། གཏི་མུག་པར་འགྱུར་བའི་ཆོས་ལ་མི་རྨོངས་སོ། །དེ་ཅིའི་ཕྱིར་ཞེ་ན། འདི་ལྟར་དེས་ཆོས་
དེ་ཡང་དག་པར་རྗེས་སུ་མི་མཐོང་། ཆོས་དེ་མི་དམིགས་ཏེ། གང་འདོད་ཆགས་པ་དང་གང་ལ་འདོད་ཆགས་པ་དང་གང་གིས་འདོད་ཆགས་པ་དང་གང་ཞེ་སྡང་བ་དང་གང་ལ་ཞེ་སྡང་བ་དང་གང་གིས་ཞེ་སྡང་བ་དང་གང་གཏི་མུག་པ་དང་གང་ལ་གཏི་མུག་པ་དང་གང་གིས་གཏི་མུག་པར་འགྱུར་བའི་
ཆོས་དེ་དེས་ཡང་དག་པར་རྗེས་སུ་མི་མཐོང་ཞིང་ཆོས་དེ་མི་དམིགས་སོ། །ཆོས་དེ་ཡང་དག་པར་རྗེས་སུ་མི་མཐོང་ཞིང་མི་དམིགས་པས་འདོད་ཆགས་པ་མེད་པ། ཞེ་སྡང་བ་མེད་པ། གཏི་མུག་པ་མེད་པ། སེམས་ཕྱིན་ཅི་མ་ལོག་པ། མཉམ་པར་བཞག་པ་ཞེས་བྱའོ། །སྤྲོས་པ་མེད་པ་
ཞེས་བྱའོ། །རྒལ་བ་ཕ་རོལ་ཏུ་ཕྱིན་པ་ཞེས་བྱའོ། །སྐམ་ལ་ཕྱིན་པ་ཞེས་བྱའོ། །བདེ་བར་སོན་པ་ཞེས་བྱའོ། །མི་འཇིགས་པ་ཐོབ་པ་ཞེས་བྱའོ། །ཚུལ་ཁྲིམས་ཅན་ཞེས་བྱའོ། །ཡེ་ཤེས་ཅན་ཞེས་བྱའོ། །ཤེས་རབ་ཅན་ཞེས་བྱའོ། །བསོད་ནམས་ཅན་ཞེས་བྱའོ། །རྫུ་འཕྲུལ་
ཅན་ཞེས་བྱའོ། །དྲན་པ་ཅན་ཞེས་བྱའོ། །བློ་གྲོས་ཅན་ཞེས་བྱའོ། །རྟོགས་པ་ཅན་ཞེས་བྱའོ། །ངོ་ཚ་ཤེས་པ་དང་ལྡན་པ་ཞེས་བྱའོ། །བརྟན་པ་དང་ལྡན་པ་ཞེས་བྱའོ། །སྤྱོད་པ་དང་ལྡན་པ་ཞེས་བྱའོ། །སྦྱངས་པའི་ཡོན་ཏན་ཡོ་བྱད་བསྙུངས་པ་དང་ལྡན་པ་ཞེས་བྱའོ། །ཉོན་མོངས་པ་མེད་

པ་ཞེས་བྱའོ། །ཅི་འང་མེད་པ་ཞེས་བྱའོ། །དགྲ་བཅོམ་པ་ཞེས་བྱའོ། །ཟག་པ་ཟད་པ་ཞེས་བྱའོ། །ཉོན་མོངས་པ་མེད་པ། དབང་དང་ལྡན་པར་གྱུར་པ། སེམས་ཤིན་ཏུ་རྣམ་པར་གྲོལ་བ། ཤེས་རབ་ཤིན་ཏུ་རྣམ་པར་གྲོལ་བ། ཅང་ཤེས་པ། གླང་པོ་ཆེན་པོ། བྱ་བ་བྱས་པ། བྱེད་པ་བྱས་པ།
ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ། ཤེས་རབ་ཤིན་ཏུ་རྣམ་པར་གྲོལ་བ། སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་ཕྱིན་པའི་དགེ་སྦྱོང་ཞེས་བྱའོ། །བྲམ་ཟེ་ཞེས་བྱའོ། །
ཁྲུས་བྱས་པ་ཞེས་བྱའོ། །ཕ་རོལ་ཏུ་སོང་བ་ཞེས་བྱའོ། །རིག་པར་བྱེད་པ་ཞེས་བྱའོ། །གཙང་སྦྲ་ཅན་ཞེས་བྱའོ། །སངས་རྒྱས་ཀྱི་སྲས་ཞེས་བྱའོ། །ཤཱཀྱའི་སྲས་ཞེས་བྱའོ། །ཚེར་མ་དཀྲུགས་པ་ཞེས་བྱའོ། །ཁྲིམས་མ་དྲལ་བ་ཞེས་བྱའོ། །འོབས་དྲལ་བ་ཞེས་བྱའོ། །འོབས་ལས་
རྒལ་བ་ཅེས་བྱའོ། །ཟུག་རྔུ་ཕྱུང་བ་ཅེས་བྱའོ། །ནད་མེད་པ་ཅེས་བྱའོ། །དགེ་སློང་ཞེས་བྱའོ། །ཀུན་ནས་དཀྲིས་པ་མེད་པ་ཞེས་བྱའོ། །སྐྱེས་བུ་ཞེས་བྱའོ། །སྐྱེས་བུ་དམ་པ་ཞེས་བྱའོ། །སྐྱེས་བུ་མཆོག་ཅེས་བྱའོ། །སྐྱེས་བུ་ཆེན་པོ་ཞེས་བྱའོ། །སྐྱེས་བུ་སེང་གེ་ཞེས་བྱའོ། །སྐྱེས་
བུ་གླང་པོ་ཆེ་ཞེས་བྱའོ། །སྐྱེས་བུ་ཅང་ཤེས་པ་ཞེས་བྱའོ། །སྐྱེས་བུ་ལྕིད་ཁྱེར་བ་ཅེས་བྱའོ། །སྐྱེས་བུ་དཔའ་བོ་ཅེས་བྱའོ། །སྐྱེས་བུ་རྩལ་པོ་ཆེ་ཞེས་བྱའོ། །སྐྱེས་བུ་མེ་ཏོག་ཅེས་བྱའོ། །སྐྱེས་བུ་པད་མ་ཞེས་བྱའོ། །སྐྱེས་བུ་པད་མ་དཀར་པོ་ཞེས་བྱའོ། །སྐྱེས་བུ་འདུལ་བ་ཞེས་བྱའོ། །སྐྱེས་
བུ་ཟླ་བ་ཞེས་བྱའོ། །སྐྱེས་བུ་ཕལ་པ་མ་ཡིན་པ་ཞེས་བྱའོ། །མི་གོས་པ་ཞེས་བྱའོ། །དེ་ནས་བཅོམ་ལྡན་འདས་ཀྱིས་ཆོས་ཟབ་མོའི་བཟོད་པ་ལ་འཇུག་པའི་ཆོས་ཀྱི་རྣམ་གྲངས་འདི་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །ནམ་ཞིག་འཇིག་རྟེན་ཁམས་འདི་འབྱུང་བ་དང་། །
འཇིག་རྟེན་ཐམས་ཅད་ནམ་མཁར་གྱུར་པའི་ཚེ། །ཇི་ལྟར་སྔོན་བཞིན་ཕྱིས་ཀྱང་དེ་བཞིན་ཏེ། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །འཇིག་རྟེན་འདི་ན་ཇི་སྙེད་ཅི་ཡོད་པ། །ཆུ་ཡི་ཕུང་པོ་འདི་ནི་འོག་ཏུ་འགྲོ །འོག་ཏུ་ཅི་འདྲར་སྟེང་དུའང་དེ་བཞིན་ཏེ། །ཆོས་རྣམས་ཐམས་ཅད་

དེ་བཞིན་ཤེས་པར་གྱིས། །ཇི་ལྟར་བར་སྣང་ཅུང་ཟད་སྤྲིན་མེད་ལས། །སྐད་ཅིག་ཏུ་ནི་སྤྲིན་གྱི་དཀྱིལ་འཁོར་སྣང་། །ཐོག་མ་ག་ལས་བྱུང་བར་ཤེས་པར་བྱ། །དེ་བཞིན་ཆོས་རྣམས་ཐམས་ཅད་ཤེས་པར་གྱིས། །དེ་བཞིན་གཤེགས་པ་མྱ་ངན་འདས་པ་དག །ཇི་ལྟར་ཡིད་ལ་བྱས་
བཞིན་གཟུགས་བརྙན་སྣང་། །སྔོན་མཐའ་ཇི་བཞིན་ཕྱིས་ཀྱང་དེ་བཞིན་ཏེ། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཇི་ལྟར་དབུ་བ་མང་པོ་རྡོས་པ་དག །ཆུ་བོས་ཁྱེར་བ་སྐྱེས་བུས་ངེས་མཐོང་སྟེ། །དེ་ལ་བརྟགས་ན་སྙིང་པོ་ཡོང་མི་སྣང་། །ཆོས་རྣམས་ཐམས་ཅད་དེ་བཞིན་ཤེས་
པར་གྱིས། །ཇི་ལྟར་ཆར་པའི་ཐིགས་ཆེན་བབ་པ་ན། །ཆུ་ཡི་ཆུ་བུར་དག་ནི་ཐ་དད་འབྱུང་། །བྱུང་ནས་ཞིག་སྟེ་ཆུ་ཡི་ཆུ་བུར་མེད། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཇི་ལྟར་སྤྲིང་ཡིག་གྲོང་གཞན་བསྐུར་བ་ལས། །དགེ་དང་མི་དགེའི་བྱ་བ་སོ་སོར་འབྱུང་། །སྒྲ་ལས་སྤྲིང་ཡིག་
ཏུ་ཡང་འཕོས་པ་མེད། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཇི་ལྟར་མི་དག་ཆང་གིས་མྱོས་ནས་ནི། །ས་འདི་ཀུན་ཏུ་འཁོར་སྙམ་བྱེད་མོད་ཀྱི། །ས་འདི་འགུལ་ཞིང་གཡོས་པའང་མེད་པ་ལྟར། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །མེ་ལོང་ངོས་དང་འབྲུ་
མར་སྣོད་རྣམས་ལ། །བུད་མེད་ཁ་བཞིན་རྒྱན་པས་བལྟས་པ་ན། །བྱིས་པ་དེ་ནི་དེ་ལ་ཆགས་བསྐྱེད་ནས། །འདོད་པ་ཚོལ་བའི་ཕྱིར་ཡང་ཤིན་ཏུ་རྒྱུག །བཞིན་ནི་དེར་ཡང་འཕོས་པ་མ་ཡིན་ཏེ། །གཟུགས་བརྙན་ལ་ནི་ནམ་ཡང་བཞིན་མི་རྙེད། །རྨོངས་པ་དེ་དག་འདོད་ཆགས་སྐྱེས་པ་
ལྟར། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཇི་ལྟར་སྨིག་རྒྱུ་དྲི་ཟའི་གྲོང་ཁྱེར་དང་། །སྒྱུ་མ་ཇི་བཞིན་རྨི་ལམ་ཇི་ལྟ་བུར། །མཚན་མ་སྒོམ་པ་ངོ་བོ་ཉིད་ཀྱིས་སྟོང་། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཇི་ལྟར་ནམ་མཁའ་དང་བར་ཟླ་ཤར་བ། །དེ་ཡི་གཟུགས་བརྙན་
དང་བའི་མཚོར་སྣང་སྟེ། །ཟླ་བ་ཆུ་ཡི་ནང་དུ་འཕོས་པ་མེད། །ཆོས་ཀུན་མཚན་ཉིད་དེ་འདྲར་ཤེས་པར་གྱིས། །ཇི་ལྟར་མི་དག་ནགས་རིའི་ཁྲོད་འདུག་ནས། །གླུ་ལེན་སྨྲ་དང་རྒོད་དང་ངུ་བ་ལས། །བྲག་ཅ་ཐོས་ཀྱང་སྣང་བ་མེད་པ་ལྟར། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །

གླུ་དང་རོལ་མོ་དེ་བཞིན་ངུ་བ་ཡང་། །དེ་ལ་བརྟེན་ནས་བྲག་ཅ་འབྱུང་མོད་ཀྱི། །སྒྲ་ལ་དབྱངས་དེ་ནམ་ཡང་ཡོད་མ་ཡིན། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཇི་ལྟར་རྨི་ལམ་ན་ཡང་འདོད་བསྟེན་པ། །སྐྱེས་བུ་སད་པར་གྱུར་ནས་མི་མཐོང་སྟེ། །བྱིས་པ་ཤིན་ཏུ་འདོད་ལ་ཆགས་
ཤིང་ཞེན། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །སྒྱུ་མ་བྱེད་པ་དག་གིས་གཟུགས་སྤྲུལ་ཏེ། །རྟ་དང་གླང་པོ་ཤིང་རྟ་སྣ་ཚོགས་བྱས། །དེ་ལ་ཇི་ལྟར་སྣང་བ་གང་ཡང་མེད། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཇི་ལྟར་བུ་མོ་གཞོན་ནུའི་རྨི་ལམ་ན། །བུ་ཕོ་
བྱུང་ཞིང་ཤི་བ་དེས་མཐོང་ནས། །བྱུང་ནས་དགའ་ཞིང་ཤི་ནས་མི་དགའ་ལྟར། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཇི་ལྟར་མཚན་མོ་ཆུ་ཡི་ཟླ་བ་དག །དང་ཞིང་རྙོག་པ་མེད་པའི་ཆུ་ནང་སྣང་། །ཆུ་ཟླ་སྟོང་པ་གསོག་སྟེ་གཟུང་དུ་མེད། །ཆོས་རྣམས་ཐམས་ཅད་དེ་བཞིན་
ཤེས་པར་གྱིས། །ཇི་ལྟར་སོས་ཀའི་ཉི་མ་ཕྱེད་དུས་ན། །སྐྱེས་བུ་སྐོམ་པས་གདུངས་ཤིང་འགྲོ་བ་ཡིས། །སྨིག་རྒྱུ་དག་ལ་ཆུ་ཡི་ཕུང་པོར་མཐོང་། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །སྨིག་རྒྱུ་ལ་ཡང་ཆུ་ནི་ཡོང་མེད་ན། །སེམས་ཅན་རྨོངས་པ་དེ་ལ་འཐུང་འདོད་དེ། །
མི་བདེན་ཆུ་ནི་འཐུང་བར་ཡོང་མི་ནུས། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཇི་ལྟར་ཆུ་ཤིང་རློན་པའི་སྡོང་པོ་ལ། །སྙིང་པོ་འདོད་ཕྱིར་སྐྱེས་བུས་དེ་གཤགས་ཀྱང་། །ནང་དང་ཕྱི་རོལ་ཀུན་ན་སྙིང་པོ་མེད། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །མིག་དང་རྣ་
བ་སྣ་ཡང་ཚད་མ་མིན། །ལྕེ་དང་ལུས་དང་སེམས་ཀྱང་ཚད་མ་མིན། །དབང་པོ་འདི་དག་གལ་ཏེ་ཚད་ཡིན་ན། །འཕགས་པའི་ལམ་གྱིས་སུ་ལ་ཅི་ཞིག་བྱ། །འདི་ལྟར་དབང་པོ་འདི་དག་ཚད་མིན་ཞིང་། །ངོ་བོ་ཉིད་ཀྱིས་བེམས་པོ་ལུང་མ་བསྟན། །དེ་ཕྱིར་མྱ་ངན་འདའ་བའི་ལམ་འདོད་པ། །དེས་ནི་
འཕགས་པའི་ལམ་གྱིས་བྱ་བ་བྱོས། །ལུས་ལ་སྔོན་གྱི་མཐའ་མ་རབ་བརྟགས་ན། །དེ་ལ་ལུས་མེད་ལུས་སུ་འདུ་ཤེས་མེད། །གང་ལ་ལུས་མེད་ལུས་སུ་ཤེས་མེད་པ། །དེ་ནི་འདུས་མ་བྱས་ཀྱི་རིགས་ཞེས་བྱ། །མྱ་ངན་འདས་པའི་ཆོས་ལ་ཆོས་མེད་དེ། །གང་ཕྱིར་འདི་མེད་ནམ་ཡང་ཡོད་མི་འགྱུར། །

རྟོག་ཅན་དག་གི་ཡོད་དང་མེད་ཅེས་བྱ། །དེ་ལྟར་སྤྱོད་པ་སྡུག་བསྔལ་ཞི་མི་འགྱུར། །ཡོད་དང་མེད་ཅེས་བྱ་བ་གཉི་ག་མཐའ། །གཙང་དང་མི་གཙང་འདི་ཡང་མཐའ་ཡིན་ཏེ། །དེ་ཕྱིར་གཉིས་ཀའི་མཐའ་ནི་རྣམ་སྤངས་ནས། །མཁས་པ་དབུས་ལའང་གནས་པར་ཡོང་མི་བྱེད། །ཡོད་
དང་མེད་ཅེས་བྱ་བ་རྩོད་པ་སྟེ། །གཙང་དང་མི་གཙང་འདི་ཡང་རྩོད་པ་ཡིན། །རྩོད་པར་གྱུར་པ་སྡུག་བསྔལ་ཞི་མི་འགྱུར། །རྩོད་པ་མེད་པར་གྱུར་པ་སྡུག་བསྔལ་འགག །དྲན་པ་ཉེ་བར་གཞག་པའི་གཏམ་བྱས་ཏེ། །བྱིས་པ་བདག་ཉིད་ལུས་ལ་མངོན་སུམ་སྙེམས། །ལུས་ལ་མངོན་སུམ་
གྱུར་པ་རློམ་སེམས་མེད། །དེ་ནི་རློམ་སེམས་མེད་དོ་ཐམས་ཅད་སྤངས། །བསམ་གཏན་བཞི་དག་གི་ཡང་གཏམ་བྱས་ནས། །བྱིས་པ་བདག་ཉིད་བསམ་གཏན་སྤྱོད་ཡུལ་སྨྲ། །བསམ་གཏན་ཉོན་མོངས་མེད་ཅིང་རློམ་སེམས་མེད། །ཤེས་པས་རྟོགས་ནས་དྲེགས་པ་རབ་ཏུ་སྤོང་། །བདེན་པ་
བཞི་ཡི་གཏམ་རྣམས་བྱས་ནས་ཀྱང་། །བྱིས་པ་བདག་ཉིད་བདེན་པ་མཐོང་ཞེས་ཟེར། །བདེན་པ་མཐོང་ལ་རློམ་སེམས་གང་ཡང་མེད། །རློམ་སེམས་མེད་པ་བདེན་པ་རྒྱལ་བས་གསུངས། །ཚུལ་ཁྲིམས་སྲུང་ཞིང་དེ་ཡིས་སྙེམས་མི་བྱ། །ཆོས་རྣམས་མཉན་ཅིང་དེས་ནི་མི་བསྙེམས་ཏེ། །གང་དག་
ཤེས་རབ་ཆུང་ངུ་དེ་བསྙེམས་པ། །རྩ་བ་དེ་ལས་དེ་ཡི་སྡུག་བསྔལ་འཕེལ། །འཇིག་རྟེན་འདྲེན་པ་ཐམས་ཅད་མཁྱེན་པ་ཡིས། །དྲེགས་པ་སྡུག་བསྔལ་རྩ་བ་ཡིན་པར་བསྟན། །རྒྱགས་པས་དྲེགས་པ་སྡུག་བསྔལ་རབ་ཏུ་འཕེལ། །རློམ་སེམས་མེད་པ་སྡུག་བསྔལ་འགག་པར་འགྱུར། །ཇི་
སྙེད་ཆོས་མང་ཡོངས་སུ་ཆུབ་བྱས་ནས། །ཐོས་པས་རྒྱགས་ཤིང་ཚུལ་ཁྲིམས་མི་སྲུང་ན། །ཚུལ་ཁྲིམས་འཆལ་བས་ངན་འགྲོར་དེ་འགྲོ་ལ། །ཐོས་པ་མང་པོས་དེ་ལ་སྐྱོབ་མི་ནུས། །གལ་ཏེ་ཚུལ་ཁྲིམས་གྲགས་པས་དེ་རྒྱགས་ཤིང་། །མང་དུ་ཐོས་ལ་བརྩོན་པར་མི་བྱེད་ན། །ཚུལ་ཁྲིམས་
འབྲས་བུ་མ་ལུས་ཟད་ནས་ནི། །ཕྱིར་ཡང་སྡུག་བསྔལ་རབ་ཏུ་མྱོང་བར་འགྱུར། །འཇིག་རྟེན་དག་ན་ཏིང་འཛིན་སྒོམ་བྱེད་ཀྱང་། །དེ་ནི་བདག་ཏུ་འདུ་ཤེས་གཞིག་མི་བྱེད། །དེ་ཡི་ཉོན་མོངས་ཕྱིར་ཡང་རབ་ཏུ་ལྡང་། །ལྷག་སྤྱོད་ཀྱིས་ནི་ཏིང་འཛིན་འདིར་བསྒོམས་བཞིན། །གལ་ཏེ་བདག་མེད་

ཆོས་ལ་རབ་རྟོག་ཅིང་། །དེ་དག་བརྟགས་ནས་གལ་ཏེ་སྒོམ་བྱེད་ན། །འབྲས་བུ་མྱ་ངན་འདས་ཐོབ་རྒྱུ་དེ་ཡིན། །རྒྱུ་གཞན་དེ་དག་ཞི་བར་འགྱུར་མི་སྲིད། །མི་ཞིག་ཆོམ་རྐུན་མང་པོས་རབ་གཙེས་ནས། །འཚོ་བར་འདོད་པས་བྲོས་ཤིང་འགྲོར་བརྩལ་ན། །དེ་ཡི་རྐང་པ་འགྲོ་ཞིང་རྒྱུག་མ་ནུས། །
ཆོམ་རྐུན་དག་གིས་དེ་བཟུང་བཅོམ་པ་ལྟར། །དེ་བཞིན་ཚུལ་ཁྲིམས་ཉམས་པ་རྨོངས་པའི་མི། །འདུས་བྱས་དག་ལས་འབྲོས་པར་འདོད་མོད་ཀྱི། །ཚུལ་ཁྲིམས་ཉམས་པས་དེ་ཡང་འབྲོས་མི་ནུས། །ན་རྒ་འཆི་བ་དག་གིས་ཤིན་ཏུ་བཅོམ། །ཇི་ལྟར་མི་རྒོད་སྟོང་ཕྲག་མང་པོ་དག །རྣམ་པ་དུ་མའི་
སྒོ་ནས་སྡིགས་བྱེད་པ། །དེ་བཞིན་ཉོན་མོངས་སྒོ་རྣམས་དུ་མ་ནས། །མི་རྒོད་བཞིན་དུ་དགེ་བའི་ཕྱོགས་རྣམས་འཇོམས། །གང་གིས་ཕུང་པོ་བདག་མེད་རབ་བརྟགས་ཏེ། །སྤྱོས་ཤིང་བརྒྱད་ཀྱང་ཞུམ་པར་མི་འགྱུར་བ། །ཉོན་མོངས་བདུད་ཀྱི་དབང་དུ་དེ་མི་འགྲོ །སྟོང་པ་ཤེས་པ་དེ་ལ་འཁྲུག་
པ་མེད། །འགྲོ་མང་ཕུང་པོ་སྟོང་པར་སྟོན་མོད་ཀྱི། །ཇི་ལྟར་བདག་མེད་དེ་དག་མི་ཤེས་ཏེ། །མི་ཤེས་དེ་དག་གཞན་གྱིས་བརྒལ་ན་ཡང་། །ཁྲོ་བའི་ཟིལ་གྱིས་ནོན་ཅིང་ཚིག་རྩུབ་སྨྲ། །མི་དག་ན་ཞིང་ལུས་ནི་སྡུག་བསྔལ་ཏེ། །ལོ་གྲངས་མང་པོར་རེས་འགའ་མ་ཐར་བ། །དེ་ནི་ཡུན་རིང་ནད་
ཀྱིས་ཉོན་མོངས་པས། །ནད་རྣམས་གསོ་བའི་ཕྱིར་ཡང་སྨན་པ་བཙལ། །ཡང་དང་ཡང་ནི་དེ་ཡིས་བཙལ་བ་དང་། །སྨན་པ་མཁས་ཤིང་རིག་པ་དེས་རྙེད་དེ། །དེས་ཀྱང་སྙིང་རྗེ་ཉེ་བར་བཞག་ནས་ནི། །སྨན་འདི་གཏང་བར་གྱིས་ཞེས་སྨྲས་པ་དང་། །སྨན་མང་བཟང་ཞིང་ཕངས་པ་དེས་བླངས་
ནས། །ན་བ་འཚོ་བར་འགྱུར་བའི་སྨན་མི་འཐུང་། །སྨན་པས་མ་ལན་སྨན་གྱིས་མ་ཉེས་ཏེ། །ནད་པ་དེ་ཉིད་ཀྱིས་ནི་ཉེས་པ་ཡིན། །དེ་བཞིན་བསྟན་པ་འདི་ལ་རབ་བྱུང་སྟེ། །སྟོབས་དང་བསམ་གཏན་དབང་པོ་ཀུན་རིག་ནས། །སྒོམ་པ་ལ་ནི་མངོན་པར་བརྩོན་མི་བྱེད། །རིགས་པར་མི་བརྩོན་
ག་ལ་མྱ་ངན་འདའ། །རྟག་ཏུ་ཆོས་ཀུན་རང་བཞིན་སྟོང་པ་སྟེ། །རྒྱལ་བའི་སྲས་རྣམས་དངོས་པོ་རྣམ་པར་འཇིག །སྲིད་པ་ཐམས་ཅད་ཡོང་ཡེ་སྟོང་པ་སྟེ། །ཉི་ཚེའི་སྟོང་པ་མུ་སྟེགས་ཅན་དག་གི། །མཁས་པ་བྱིས་པ་དག་དང་རྩོད་མི་བྱེད། །བྱིས་པ་དག་ནི་རི་མོར་བྱས་ནས་སྤོང་། །ཞེ་

སྡང་སེམས་ཀྱིས་བདག་གི་དྲུང་འོང་ཞེས། །བྱིས་པའི་ཆོས་ལ་སྟེན་པར་ཡང་མི་བྱེད། །བྱིས་པ་དག་གི་རང་བཞིན་རྒྱུད་རིག་ནས། །མཁས་པ་བྱིས་པ་དག་དང་མི་འགྲོགས་ཏེ། །ཇི་སྲིད་དུ་ནི་བྱིས་པ་ལེགས་བསྙེན་ཀྱང་། །དེ་དག་ཕྱིར་ཡང་དགྲ་དང་འདྲ་བར་འགྱུར། །མཁས་པ་
བྱིས་པ་དག་ལ་ཡིད་མི་རྟོན། །མཁས་དང་བྱིས་པའི་རང་བཞིན་ཆོས་ཉིད་ནི། །བྱིས་པའི་རང་བཞིན་ངང་ཚུལ་ཐ་དད་དེ། །སོ་སོའི་སྐྱེ་བོ་ལ་ནི་མཛའ་བ་མེད། །ཆོས་དང་ལྡན་པའི་ཚིག་ཏུ་སྨྲས་ན་ཡང་། །ཡིད་མི་ཆེས་དང་ཞེ་སྡང་ཁྲོ་བ་དག །མངོན་པར་སྟོན་པ་འདི་ནི་བྱིས་པའི་ཆོས། །དོན་
འདི་རྣམ་པར་རིག་པས་ཡིད་མི་རྟོན། །བྱིས་པ་དང་ནི་བྱིས་པར་འཐུན་འབྱོར་བ། །ཇི་ལྟར་མི་གཙང་བ་དང་མི་གཙང་བཞིན། །མཁས་པ་དག་ནི་མཁས་པའི་སྐྱེ་བོ་དང་། །འཐུན་ཞིང་འབྱོར་པ་མར་དང་སྙིང་ཁུ་བཞིན། །འཁོར་བའི་ཉེས་ལ་སོ་སོར་མ་བརྟགས་ཏེ། །ལས་ཀྱི་རྣམ་པར་སྨིན་ལ་མི་
འཇུག་ཅིང་། །སངས་རྒྱས་རྣམས་ཀྱི་ཚིག་ལ་མ་དད་པས། །བྱིས་པ་དེ་དག་བཅད་ཅིང་གཏུབ་པར་འགྱུར། །མི་འཐོབ་རབ་ཏུ་རྙེད་དཀའ་ཐོབ་ནས་ནི། །བཟོ་ཡི་གནས་དག་ལ་ནི་མཁས་མ་གྱུར། །དབུལ་པོར་གྱུར་ཅིང་ནོར་ཡང་ཡོང་མེད་དེ། །དེ་ནས་འཚོ་བ་མེད་པས་རབ་ཏུ་འབྱུང་། །
སངས་རྒྱས་བསྟན་འདིར་དེ་དག་རབ་བྱུང་ནས། །ལྷུང་བཟེད་ཆོས་གོས་དག་ལ་ཆགས་པར་འགྱུར། །དེ་དག་སྡིག་པའི་གྲོགས་པོས་ཡོངས་ཟིན་པས། །བདེ་བར་གཤེགས་པའི་བསླབ་པ་མི་སྤྱོད་དེ། །དེ་དག་བདག་གི་ཚུལ་ཁྲིམས་མ་མཐོང་བས། །བྱིས་པ་དག་ནི་སེམས་གནས་མི་རྙེད་
ཅིང་། །ཉིན་མཚན་རྣལ་འབྱོར་ལ་ཡང་མི་བརྩོན་པས། །དེ་དག་སྡིག་པའི་ལམ་ལ་སྨོད་མི་བྱེད། །ལུས་དང་སེམས་ནི་ཤིན་ཏུ་མི་སྡོམ་པ། །དེ་ནི་ཚིག་ཏུ་མི་སྨྲ་ཅི་ཡང་མེད། །སུ་ཡིས་ཉེས་པ་ཅི་བྱས་བརྒལ་ལོ་ཞེས། །རྟག་ཏུ་གཞན་གྱི་ཉེས་པ་ཚོལ་ཞིང་རྟོག །བྱིས་པ་དག་ནི་ཟས་ལ་
ཆགས་གྱུར་ནས། །ཟས་ལ་ཚོད་རིག་པར་ནི་མི་བྱེད་དེ། །སངས་རྒྱས་བསོད་ནམས་ཀྱིས་ནི་ཟས་རྙེད་ཀྱང་། །དེ་ལ་བྱིས་པ་བྱས་པ་གཟོ་མི་འགྱུར། །དེ་དག་ཁ་ཟས་རོ་ཞིམ་བསོད་པ་དག །རྙེད་ནས་རྣལ་འབྱོར་མི་བརྩོན་ཟ་ཞིང་འཐུང་། །དེ་དག་ལ་ནི་ཟས་དེ་གདུག་པར་

འགྱུར། །བལ་གླང་ཕྲུ་གུས་རྩ་བ་མ་བཀྲུས་བཞིན། །མཁས་ཤིང་རྟོགས་པ་བློ་གྲོས་ལྡན་པ་ནི། །ཁ་ཟས་བཟང་པོ་གཙང་མ་ཟ་མོད་ཀྱི། །དེ་དག་ལ་ནི་ཆགས་པར་མི་འགྱུར་ཏེ། །མ་ཆགས་བཞིན་དུ་ཟ་ཞིང་རྣལ་འབྱོར་བརྩོན། །མཁས་ཤིང་རྟོགས་པ་བློ་གྲོས་ལྡན་པ་དག །བྱིས་པ་
གང་ནས་ལེགས་པར་འོངས་ཞེས་སྨྲ། །དེ་བཞིན་སྙན་པའི་ཚིག་གིས་ཉེར་བསྡུས་ནས། །དེ་དག་ལ་ནི་སྙིང་རྗེ་ཉེ་བར་འཇོག །བྱིས་པ་ལ་ནི་གང་ཕན་སྙིང་བརྩེ་བ། །དེ་ལ་གནོད་པ་བྱུང་ན་བྱིས་པ་དགའ། །དེ་ལྟའི་ཉེས་ཕྱིར་བྱིས་པ་རྣམ་སྤངས་ཏེ། །རི་དགས་བཞིན་དུ་གཅིག་པུ་
དགོན་པར་གནས། །མཁས་པས་འདི་འདྲའི་ཉེས་པ་རིག་ནས་ནི། །ཤེས་རབ་དམན་བསྟེན་བདག་ནི་མཐོ་རིས་ཉམས། །བྱང་ཆུབ་ཐོབ་པར་ག་ལ་འགྱུར་སྙམ་སྟེ། །བྱིས་པ་རྣམས་དང་ནམ་ཡང་ཡོང་མི་སྟེན། །བྱམས་པ་ལ་ནི་མཁས་པ་གནས་པར་འགྱུར། །སྙིང་རྗེ་དག་ལ་
གནས་ཤིང་དགའ་སྤྱོད་དང་། །སྲིད་པ་ཀུན་ལ་རྟག་ཏུ་བཏང་སྙོམས་པ། །ཏིང་ངེ་འཛིན་བསྒོམས་བྱང་ཆུབ་རེག་པར་འགྱུར། །མྱ་ངན་མེད་ཞི་བྱང་ཆུབ་དེས་རྟོགས་ཤིང་། །སེམས་ཅན་ན་རྒས་གཟིར་བར་རིག་ནས་ནི། །དེ་ལ་སྙིང་རྗེ་རབ་ཏུ་ཉེར་བཞག་སྟེ། །དོན་དམ་ལྡན་
པའི་གཏམ་རྣམས་སྟོན་པར་བྱེད། །རྒྱལ་བའི་ཆོས་ཉིད་བརྗོད་དུ་མེད་པ་དང་། །བདེ་བར་གཤེགས་པའི་བདེན་པ་སུས་ཤེས་པ། །དེ་དག་འདི་ལྟ་བུ་ཡི་ཆོས་ཐོས་ནས། །འཕགས་པ་ཟང་ཟིང་མེད་པའི་བཟོད་པ་འཐོབ། །ཆོས་ཟབ་མོ་ལ་བཟོད་པའི་ལེའུ་སྟེ་དགུ་
པའོ།། །།དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། །གཞོན་ནུ་དེ་ལྟ་བས་ན་ནན་ཏན་སྙིང་པོར་བྱའོ་ཞེས་གཞོན་ནུ་ཁྱོད་ཀྱིས་དེ་ལྟར་བསླབ་པར་བྱའོ། །དེ་ཅིའི་ཕྱིར་ཞེ་ན། གཞོན་ནུ་བྱང་ཆུབ་སེམས་དཔའ་སེམས་
དཔའ་ཆེན་པོ་ནན་ཏན་སྙིང་པོར་བྱེད་པ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་རྙེད་པར་དཀའ་བ་མ་ཡིན་ན་ཏིང་ངེ་འཛིན་འདི་ལྟ་ཅི་སྨོས། །དེ་ནས་ཟླ་འོད་གཞོན་ནུར་གྱུར་པ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་

བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟར་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་གདམས་པ་དང་། །རྗེས་སུ་བསྟན་པ་འདི་
ལེགས་པར་བསྟན་ཅིང་ལེགས་པར་བཀོད་པ་དང་། བྱང་ཆུབ་སེམས་དཔའི་བསླབ་པ་ཐམས་ཅད་བསྟན་ཏེ། ལེགས་པར་བཤད་པ་དང་ལེགས་པར་བཀོད་པ་བཅོམ་ལྡན་འདས་ངོ་མཚར་ཏོ། །བཅོམ་ལྡན་འདས་འདི་ནི་དེ་བཞིན་གཤེགས་པའི་སྤྱོད་ཡུལ་ཏེ། ཉན་ཐོས་དང་རང་སངས་
རྒྱས་ཐམས་ཅད་ཀྱིས་ཀྱང་མ་ལགས་ན་མུ་སྟེགས་ཅན་གཞན་གྱི་ལྟ་ཅི་སྨོས། བཅོམ་ལྡན་འདས་བདག་ཀྱང་ནན་ཏན་སྙིང་པོར་བགྱིས་ཏེ་ལུས་དང་སྲོག་ལ་ཡང་མི་ལྟ་བར་བགྱིས་ལ་དེ་བཞིན་གཤེགས་པའི་རྗེས་སུ་སློབ་བོ། །དེ་ཅིའི་སླད་དུ་ཞེ་ན། བཅོམ་ལྡན་འདས་བདག་ནི་དེ་བཞིན་གཤེགས་
པའི་རྗེས་སུ་སློབ་པར་འཚལ་ལོ། །བཅོམ་ལྡན་འདས་བདག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འཚལ་ལོ། །བཅོམ་ལྡན་འདས་བདག་ནི་བདུད་སྡིག་ཅན་ཤིན་ཏུ་གཞིག་པར་འཚལ་ལོ། །བཅོམ་ལྡན་འདས་བདག་ནི་སེམས་ཅན་ཐམས་ཅད་
འཇིགས་པ་ཐམས་ཅད་དང་སྡུག་བསྔལ་ཐམས་ཅད་ལས་བསྒྲལ་བར་འཚལ་ལོ། །བཅོམ་ལྡན་འདས་ཀྱིས་ཕྱག་གཡས་པ་བདག་གི་སྤྱི་བོ་ལ་གཞག་པར་གསོལ། དེ་ལ་འདི་སྐད་ཅེས་བྱ་སྟེ། ནམ་མཁའ་འདྲ་ཞིང་རྡུལ་བྲལ་གཟུགས་བཟང་འཆང་། །ཤེས་རབ་སྲས་པོ་ལུས་དང་མཚན་མི་
མངའ། །ཡོན་ཏན་རྒྱ་མཚོ་རབ་ཟབ་ཐུགས་རྗེ་ཅན། །མཚུངས་མེད་ཕྱག་ནི་བདག་གི་སྤྱི་བོར་ཞོག །དེ་སྐད་ཅེས་གསོལ་པ་དང་། །བཅོམ་ལྡན་འདས་ཀྱིས་ཕྱག་གཡས་པ་དགེ་བའི་རྩ་བ་དུ་མ་ལས་བྱུང་བ། མཚན་སྣ་ཚོགས་ཀྱིས་ཤིན་ཏུ་བརྒྱན་པ། ལྷའི་གསེར་གྱི་ཁ་དོག་ལྟ་བུ་ཟླ་
འོད་གཞོན་ནུར་གྱུར་པའི་སྤྱི་བོར་བཞག་གོ། །བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པའི་སྤྱི་བོར་ཕྱག་གཡས་པ་བཞག་མ་ཐག་ཏུ་སྐད་ཅིག་དེ་ཉིད་ལ་ཟླ་འོད་གཞོན་ནུར་གྱུར་པ་ལ་དཔའ་བར་འགྲོ་བ་དང་ནམ་མཁའ་མཛོད་དང་རྡོ་རྗེ་ལྟ་བུ་དང་ཡིད་ལྟར་མགྱོགས་པ་དང་གཟུགས་ཐམས་ཅད་སྟོན་

པ་དང་སྒྲིབ་པ་མེད་པའི་མཐའ་དང་དེ་བཞིན་གཤེགས་པ་ཐམས་ཅད་སྟོན་པ་དང་སྟོང་པ་ཉིད་ཐམས་ཅད་ཀྱི་དབང་བསྐུར་བ་ཐོབ་པ་ལ་སོགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལས་བྱུང་བའི་ཏིང་ངེ་འཛིན་གྱི་སྒོ་བྱེ་བ་ཁྲག་ཁྲིག་བརྒྱ་སྟོང་དུ་མ་བརྗོད་དུ་མེད་པའི་ཡང་བརྗོད་དུ་མེད་པ་དག་མངོན་དུ་གྱུར་ཏོ། །གཟུངས་
དང་རྣམ་པར་ཐར་པའི་སྒོ་དུ་མ་མངོན་དུ་གྱུར་ཏོ། །དགའ་བ་དང་བདེ་བ་གང་དེ་འཕགས་པས་བརྗོད་པ། ལྷ་ཡུལ་བ་རྒྱ་ཆེ་ཞིང་དཔེ་མེད་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱོད་ཡུལ་དུ་རིག་པ་རབ་ཏུ་ཐོབ་བོ། །དེ་ལ་འདི་སྐད་ཅེས་བྱ་སྟེ། དྲ་བས་མཛེས་འབྲེལ་བུམ་
པ་ལྕགས་ཀྱུའི་མཚན་མངའ་ཞིང་། །དཔལ་བེའུ་འཁོར་ལོ་རྒྱལ་མཚན་བ་དན་ཉ་རིས་མངའ། །བསྐལ་པ་བྱེ་མང་རིན་ཆེན་གཏོང་ལ་ཞུགས་པའི་ཕྱག །བཅོམ་ལྡན་འདས་ཀྱིས་ཟླ་འོད་གཞོན་ནུའི་སྤྱི་བོར་བཞག །དེ་ནས་ལྷ་ཡུལ་པ་རྒྱ་ཆེ་ཞིང་དཔེ་མེད་པ། སངས་རྒྱས་དང་བྱང་ཆུབ་
སེམས་དཔའ་ཐམས་ཅད་ཀྱི་སྤྱོད་ཡུལ་དུ་རིག་པའི་དགའ་བ་དང་། བདེ་བ་དང་ལྡན་པར་གྱུར་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་
འདས་ལ་ཚུལ་དང་འཐུན་པའི་ཚིགས་སུ་བཅད་པ་དག་གིས་མངོན་པར་བསྟོད་དོ། །བླ་མེད་མི་འཇིགས་སྦྱིན་པ་ཁྱོད་ལ་ཕྱག་འཚལ་ལོ། །གཞན་ཕན་སེམས་ཅན་གཉེན་རྩ་ཁྱོད་ལ་ཕྱག་འཚལ་ལོ། །སྟོབས་བཅུ་བདེན་པའི་རྩལ་མངའ་ཁྱོད་ལ་ཕྱག་འཚལ་ལོ། །བདེ་གཤེགས་
མི་མཉམ་མཉམ་པ་ཁྱོད་ལ་ཕྱག་འཚལ་ལོ། །མགོན་པོ་ཤིན་ཏུ་ཐུགས་རྗེ་ཅན་ལ་ཕྱག་འཚལ་ལོ། །དཔའ་བོ་དགྲ་བཞི་རྣམ་པར་བཏུལ་ལ་ཕྱག་འཚལ་ལོ། །བརྩོན་པ་དམ་པའི་དོན་རྣམས་མཁྱེན་ལ་ཕྱག་འཚལ་ལོ། །ཆོས་ཀྱི་སྐུ་མཆོག་མངའ་བའི་ལྷ་ལ་ཕྱག་འཚལ་ལོ། །སྙིང་རྗེ་
བྱམས་འོད་རྒྱལ་བའི་ཉི་མ་མུན་སེལ་བ། །ཤེས་རབ་ཤིན་ཏུ་ཡངས་པའི་ནམ་མཁའི་དཀྱིལ་དུ་ཤར། །དོན་དམ་ཤིན་ཏུ་ཟབ་པའི་ཆོས་རྣམས་སྟོན་མཛད་པ། །ལྷ་ཁྱོད་ལ་ནི་རྟག་ཏུ་བདག་ཀྱང་སྐྱབས་སུ་མཆི། །དེ་ནས་ཟླ་འོད་གཞོན་ནུར་གྱུར་པས་བཅོམ་ལྡན་འདས་ལ་ཚུལ་དང་འདྲ་བའི་

ཚིགས་སུ་བཅད་པ་དག་གིས་མངོན་པར་བསྟོད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་ཐུགས་བརྩེ་བའི་སླད་དུ་བྱང་ཆུབ་སེམས་དཔའི་དགེ་འདུན་དང་དགེ་སློང་གི་དགེ་འདུན་དང་བཅས་པ་སང་བདག་གི་སྡུམ་པར་བཤོས་གསོལ་བར་ཐུགས་ལ་གནང་བར་
མཛད་དུ་གསོལ། དེ་ལ་འདི་སྐད་ཅེས་བྱ་སྟེ། བདག་གི་སྡུམ་པར་གཙང་མའི་བཤོས་གསོལ་བར། །མི་དབང་སྲས་དང་བཅས་ལ་གསོལ་བ་འདེབས། །ཐུབ་པའི་དབང་པོ་བདག་ལ་ཐུགས་བརྩེའི་ཕྱིར། །མགོན་པོ་ལྷ་ཡི་གཙོ་བོས་གནང་བར་མཛོད། །དེ་ནས་བཅོམ་ལྡན་འདས་ཀྱིས་ཐུགས་
བརྩེ་བའི་ཕྱིར། བྱང་ཆུབ་སེམས་དཔའི་དགེ་འདུན་དང་། ཉན་ཐོས་ཀྱི་དགེ་འདུན་དང་ཐབས་ཅིག་ཏུ་ཟླ་འོད་གཞོན་ནུར་གྱུར་པའི་ཁྱིམ་དུ་བཤོས་གསོལ་བར་ཅང་མི་གསུང་བར་གྱུར་པས་གནང་ངོ་། །དེ་ནས་ཟླ་འོད་གཞོན་ནུར་གྱུར་པས་བཅོམ་ལྡན་འདས་ཅང་མི་གསུང་བར་གྱུར་པས་གནང་བར་རིག་ནས་སྟན་
ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་དྲུང་ནས་སོང་ངོ་། །དེ་ནས་ཟླ་འོད་གཞོན་ནུར་གྱུར་པ་བྱ་རྒོད་ཀྱི་ཕུང་པོའི་རི་ལས་བབས་ནས་དེའི་ཚེ་
རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་རིའི་རྒྱལ་པོ་བྱ་རྒོད་ཀྱི་ཕུང་པོའི་བར་དུ་དེའི་བར་གྱི་ལམ་ཐམས་ཅད་ལེགས་པར་བརྒྱན་ཏེ། འདི་ལྟར་བཅོམ་ལྡན་འདས་ལ་མཆོད་པ་བྱ་བའི་ཕྱིར་ལམ་ཡངས་ཤིང་ཆེ་ལ་རྩྭ་དང་སྡོང་དུ་མ་དང་ཚེར་མ་དང་རྡོ་དང་གྱོ་མོ་དང་གསེག་མ་མེད་པར་བསལ་ཏེ་བྱེ་མ་
གཙང་མས་བདལ་ནས། ཀ་ཙ་ལིན་དི་ཀ་ལྟར་འཇམ་ཞིང་རེག་ན་བདེ་བ། དབྱངས་དགའ་བར་བྱས་ཏེ། ལྷའི་མེ་ཏོག་ཨུད་པ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དང་། དྲི་མཆོག་དང་། ཨ་ཏི་མུག་ཏ་ཀ་དང་། མཱ་ལི་ཀ་དང་། ཙམ་པ་ཀ་དང་། སྐྱ་སྣར་དང་། ཀུན་ད་
དང་། ཏི་ལ་ཀ་དང་། ཀེ་ས་ར་དང་། མྱ་ངན་འཚང་ལ་སོགས་པ་དུས་ཐམས་ཅད་ཀྱི་མེ་ཏོག་བཟང་པོས་ནི་ཀུན་ཏུ་ཁེབས་པར་བྱས། གདུགས་དང་རྒྱལ་མཚན་དང་བ་དན་དང་རྣམ་པར་རྒྱལ་བའི་བ་དན་དང་རིན་པོ་ཆེའི་རྟ་བབས་དང་བླ་རེ་ནི་བྲེས། རིན་པོ་ཆེའི་བདུག་སྤོས་ཀྱི་སྣོད་སྣ་ཚོགས་ནི་

ངོས་ལ་སྤྱངས། རིན་པོ་ཆེའི་བདུག་སྤོས་ཀྱི་སྣོད་དེ་དག་ཐམས་ཅད་ནས་ནི་ཨ་ག་རུ་ནག་པོས་གང་བའི་དུ་བ་འཐུལ། ཕྱོགས་ཕྱོགས་སུ་ནི་བྲོ་མཁན་དང་གར་མཁན་ལྷའི་གླུ་གར་དང་རོལ་མོ་ཤིན་ཏུ་འབྱོར་ཅིང་ལེགས་པར་བསླབས་པ་རྣམས་བཀོད། སྐྱེས་པ་དང་བུད་མེད་དང་ཁྱེའུ་དང་བུ་མོ་
ཤིན་ཏུ་བརྒྱན་པ་ཁར་རྔ་དང་ཏུ་ཎ་བ་དང་པི་བང་རྒྱུད་གཅིག་པ་དང་པི་བང་དང་གླིང་བུ་དང་རྫ་རྔ་དང་རྔ་མུ་ཀུན་ད་དང་རྫ་རྔ་ཆེན་པོ་ཐོགས་པ་རྣམས་བཀོད། ལམ་གྱི་ངོས་གཉིས་སུ་ཤིང་ཏ་ལ་མཐོན་པོ་ལྷའི་རིན་པོ་ཆེ་སྣ་ཚོགས་དང་འཛམ་བུའི་ཆུ་བོའི་གསེར་ལས་བྱས་པའི་དྲིལ་བུ་གཡེར་ཀའི་དྲ་བ་བྲེས་ཤིང་སྒྲ་འཁྲོལ་
བས་བརྒྱན་པ་རྣམས་དང་རིན་པོ་ཆེ་སྣ་ཚོགས་ཀྱི་མཁའ་རྟེན་བྱེ་བ་ཁྲག་ཁྲིག་བརྒྱ་སྟོང་དུ་མ་དང་། རིན་པོ་ཆེ་སྣ་བདུན་གྱི་ཤིང་སྣ་ཚོགས་ཁྲུན་དང་སྦོམས་སུ་ལྡན་པ་སྣ་ཚོགས་དང་དུས་ཐམས་ཅད་ཀྱི་ལོ་མ་དང་། མེ་ཏོག་དང་འབྲས་བུ་ཕུན་སུམ་ཚོགས་པ་དག་བཙུགས་སོ། །དེ་ལ་འདི་
སྐད་ཅེས་བྱ་སྟེ། ལམ་ནི་སྣ་ཚོགས་ཤིན་ཏུ་ལེགས་པར་བརྒྱན། །བླ་རེས་དང་ནི་གདུགས་དང་བ་དན་སྒྲེང་། །སིལ་སྙན་དག་གི་སྒྲ་དག་རབ་ཏུ་འབྱིན། །གླུ་སྒྲ་ཡིད་དུ་འོང་བའང་དེ་བཞིན་ཏེ། །བུད་མེད་མང་པོ་བྲོ་རྡུང་གར་བྱེད་དང་། །གོས་བཟང་ཁྲག་ཁྲིག་རྣམ་མང་སྣ་ཚོགས་དང་། །
མེ་ཏོག་ཕྲེང་བ་བཟང་ཞིང་མཛེས་པ་ཡིས། །ལམ་མཆོག་ཡངས་པ་དེ་ནི་རབ་ཏུ་བརྒྱན། །གྲོང་མཆོག་གཙང་མ་འདིར་ནི་ཐུགས་རྗེ་ཅན། །སངས་རྒྱས་ཐུབ་པའི་ཟླ་བ་གཤེགས་སོ་ཞེས། །ཟླ་འོད་གཞོན་ནུས་དད་པ་རབ་བསྐྱེད་ནས། །རྒྱ་ཆེ་ཡངས་པའི་ལམ་ནི་ཤིན་ཏུ་བརྒྱན། །ལྷ་རྫས་
ཀྱི་ནི་བྱེ་མ་གཙང་མ་བདལ། །རབ་ཏུ་ཡིད་འོང་མེ་ཏོག་མཆོག་རྣམས་བཀྲམ། །རིན་ཆེན་རྟ་བབས་དག་ཀྱང་ལེགས་པར་བཙུགས། །ལམ་ནི་ལྷ་ཡི་གྲོང་ཁྱེར་བཞིན་དུ་མཛེས། །ཟླ་འོད་གཞོན་ནུ་ཤིན་ཏུ་ཡིད་དགའ་བས། །དེ་ལྟར་ལམ་རྣམས་སྣ་ཚོགས་ལེགས་བརྒྱན་ཏེ། ལྷ་དང་
ལྷ་མིན་ཀླུ་ཡིས་དེ་མཐོང་ནས། །ངོ་མཚར་གྱུར་ཅིང་ཨ་ལ་ལ་ཞེས་སྨྲ། །ལམ་གྱི་གཡས་གཡོན་འཛམ་བུའི་ཆུ་གསེར་གྱི། །ཏ་ལ་མཐོ་ཞིང་བཟང་ལ་ཟླུམ་པ་དག །རིན་ཆེན་དྲིལ་བུའི་དྲ་བས་གཡོགས་ཤིང་དཀྲིས། །སྒྲ་འཁྲོལ་རྣམ་པ་དུ་མ་མང་པོ་བཙུགས། །དེ་བཞིན་རིན་ཆེན་

སྡོང་པོ་ཁྲག་ཁྲིག་ནི། །དུས་ཀུན་གྱི་ཡང་མེ་ཏོག་རྒྱས་པ་བཙུགས། །དེ་ཡིས་ཡངས་པའི་ལམ་བརྒྱན་མཛེས་གྱུར་པ། །མཐོ་རིས་ན་ནི་དགའ་བའི་ཚལ་བུ་བཞིན། །རིན་པོ་ཆེ་ལས་བྱས་པའི་མཁའ་རྟེན་ནི། །དྲ་བའི་ཆུན་པོ་འོད་འབར་ཤིན་ཏུ་མཛེས། །དཔེ་མེད་མཐོང་ཞིང་ཆེ་ལ་རྒྱས་
པ་དག །ལམ་གྱི་གཡས་གཡོན་འགྲམ་དུ་བཙུགས་ཤིང་བཀོད། །སངས་རྒྱས་འཇིག་རྟེན་གསུམ་དབང་གང་ནས་ནི། །རྒྱལ་པོའི་ཁབ་ཀྱི་གྲོང་དུ་གཤེགས་པ་ཡི། །ལམ་ཆེན་དེ་ནི་དེ་དག་རབ་བརྒྱན་པས། །རྣམ་པ་ཐམས་ཅད་དུ་ཡང་མཛེས་པར་གྱུར། །གཡས་གཡོས་སུ་ནི་རིན་ཆེན་
པོག་ཕོར་དཔྱངས། །དེ་དག་ཨ་ག་རུ་ཡང་ནག་པོས་བཀང་། །པོག་ཕོར་ཀུན་ནས་དུ་བ་སྤྲིན་བཞིན་འཁྲིགས། །ལྷ་ཡི་དྲི་ཞིམ་རྣམ་པ་སྣ་ཚོགས་འབྱུང་། །ཇི་སྲིད་གྲོང་ཁྱེར་ཆུ་དྲོན་སྒོ་བར་དང་། །རི་རྒྱལ་བྱ་རྒོད་ཕུང་པོ་ཇི་སྲིད་པར། །ཟླ་འོད་གཞོན་ནུར་གྱུར་པས་རྒྱལ་བའི་ཕྱིར། །ལྷ་རྫས་
དཔེ་མེད་ཡངས་པས་བརྒྱན་པ་བྱས། །དེ་ནས་ཟླ་འོད་གཞོན་ནུར་གྱུར་པས་ལམ་དེ་རིན་པོ་ཆེ་བཀོད་པ་རྣམ་པ་སྣ་ཚོགས་དུ་མས་བརྒྱན་པ་བྱས་ནས་ཟླ་འོད་གཞོན་ནུར་གྱུར་པ་བྱ་རྒོད་ཀྱི་ཕུང་པོའི་རི་ལས་བབས་ཏེ། རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་གང་ན་བ་དང་རང་གི་ལྷའི་ཁྱིམ་མཐོ་ཞིང་ཆེ་
ལ་ཡངས་པ་གང་ན་ཡོད་པ་དེར་སོང་སྟེ་ཕྱིན་ནས་རང་གི་ཁྱིམ་དུ་ཞུགས་སོ། །ཞུགས་ནས་བཟའ་བ་དང་བཅའ་བ་དང་མྱང་བ་མང་ཞིང་བཟང་བ་གཡོར་བཅུག་སྟེ། ཞལ་ཟས་རོ་སྣ་བརྒྱ་པ་སྦྱར་ནས་དེའི་མཚན་མོ་འདས་པ་དང་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ཆག་ཆག་ལེགས་པར་བཏབ།
བྱི་དོར་ལེགས་པར་བྱས་ནས་མེ་ཏོག་སིལ་མ་ནི་བཀྲམ། བདུག་སྤོས་ཀྱིས་ནི་བདུགས། བླ་རེ་ནི་བྲེས། དར་གྱི་ལྡ་ལྡི་དང་ཆུན་པོ་ནི་དཔྱངས། གདུགས་དང་རྒྱལ་མཚན་དང་བ་དན་ནི་བསྒྲེང་སྟེ། དེ་ལྟར་རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་ལམ་སྲང་དང་གྲོང་བར་དུ་བཅས་པ་རྡོ་དང་གྱོ་མོ་དང་གསེག་
མ་མེད་པར་བྱས། མེ་ཏོག་སྣ་ཚོགས་ནི་བཀྲམ། ཙན་དན་གྱི་ཕྱེ་མས་ནི་གཏོར། སྐར་ཁུང་དང་རྟ་བབས་དང་སྒོ་གང་དང་བ་གམ་དང་སྐར་ཁུང་དྲ་བ་རིས་དང་ཟླ་བ་ཁམ་པ་ལྟ་བུས་ནི་བརྒྱན་ཅིང་ཙན་དན་གྱིས་བྱུག་པ་བྱས་ཏེ། དེ་ལྟར་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་དཔག་ཏུ་མེད་

པའི་བཀོད་པས་རབ་ཏུ་བརྒྱན་ནས། རང་གི་ཁྱིམ་ཡང་རྒྱན་སྣ་ཚོགས་པ་རྣམ་པ་དུ་མས་བརྒྱན་ཏེ། རིན་པོ་ཆེའི་ཕྲེང་བ་རྣམ་པ་དུ་མ་ནི་རབ་ཏུ་དཔྱངས། དགའ་ལྡན་གྱི་རིས་ཀྱི་ལྷའི་གོས་ཀྱིས་ནི་བརྒྱན་ཅིང་ཉེ་འཁོར་ཡང་མཛེས་པར་བྱས། ཕྲེང་བ་དང་ལྡ་ལྡི་རྣམ་པ་ཐ་དད་པ་དུ་མས་ནི་བརྒྱན་པ་བྱེད་
དུ་བཅུག །རིན་པོ་ཆེའི་སྟན་བྱེ་བ་ཁྲག་ཁྲིག་བརྒྱ་སྟོང་དུ་མ་ནི་འདིང་དུ་བཅུག་སྟེ། བཅོམ་ལྡན་འདས་ལ་མཆོད་པ་བྱ་བའི་ཕྱིར་དེའི་དབུས་སུ་བཅོམ་ལྡན་འདས་ཀྱི་ལྷ་རྫས་ཀྱི་སེང་གེའི་ཁྲི་ལྷའི་དང་མིའི་ལས་འདས་པ་བཤམས་སོ། །རིན་པོ་ཆེ་སྣ་ཚོགས་ཀྱི་པོག་ཕོར་ནི་ཕྱོགས་བཞིར་
དཔྱངས་ཏེ། དེ་དག་ནས་ཨ་ག་རུ་འབའ་ཞིག་གི་དུ་བ་འཐུལ་བར་བྱས་སོ། །ཟླ་འོད་གཞོན་ནུར་གྱུར་པས་ཁྱིམ་མཆོག་དེ་ཡང་འདི་ལྟ་སྟེ། བཅོམ་ལྡན་འདས་ཀྱིས་ཡོངས་སུ་ལོངས་སྤྱད་པའི་ཕྱིར་ལྷའི་གླུ་གར་དང་སིལ་སྙན་ནི་བསྒྲགས། གདུགས་དང་རྒྱལ་མཚན་དང་བ་དན་ནི་བསྒྲེང་། ལྷ་
དང་ཀླུ་དང་གནོད་སྦྱིན་དང་། དྲི་ཟ་དང་ལྷ་མ་ཡིན་དང་ནམ་མཁའ་ལྡིང་དང་མིའམ་ཅི་དང་ལྟོ་འཕྱེ་ཆེན་པོ་དང་མི་དང་མི་མ་ཡིན་པ་བརྒྱ་སྟོང་གིས་ནི་གང་ཞིང་རྣམ་པར་བལྟས། རིན་པོ་ཆེའི་མེ་ཏོག་སྣ་ཚོགས་རྣམ་པ་དུ་མས་ནི་གང་བར་བྱས་སོ། །དེ་ལ་འདི་སྐད་ཅེས་བྱ་སྟེ། ཟླ་འོད་ཀྱིས་ནི་ཁྱིམ་
མཆོག་ཡངས་པ་ཡང་། རྒྱ་ཆེར་ཐམས་ཅད་ཤིན་ཏུ་བརྒྱན་པར་བྱས། །གང་ལ་འཇིག་རྟེན་སྒྲོན་མ་བཞུགས་པ་ཡི། །ལྷ་རྫས་སེང་གེའི་ཁྲི་ནི་དབུས་སུ་བཙུགས། །འཇིག་རྟེན་སྒྲོན་མཛད་རྒྱལ་བའི་གཙོ་བོ་ཡི། །དགེ་འདུན་དག་ནི་གང་ལ་འདུག་འགྱུར་བ། །རིན་ཆེན་ཤིན་ཏུ་རྣམ་པར་
བཀྲ་བའི་སྟན། །བྱེ་བ་སྟོང་ཕྲག་མཐའ་ཡས་ལེགས་པར་བཏིང་། །རིན་ཆེན་སྣ་ཚོགས་ཀུན་གྱི་བདུག་སྤོས་སྣོད། །ཨ་ག་རུ་ཡིས་ཤིན་ཏུ་གང་བྱས་ཏེ། །ཕྱོགས་རྣམས་ཐམས་ཅད་དུ་ཡང་རྣམ་པར་དཔྱངས། །དེ་དག་ནས་ནི་ཡིད་འོང་དྲི་རྣམས་འཐུལ། །ཟླ་འོད་ཀྱིས་ནི་སྟོབས་བཅུ་
གཤེགས་པའི་ཕྱིར། །རིན་ཆེན་མེ་ཏོག་མཛེས་པ་སྣ་ཚོགས་དང་། །མེ་ཏོག་དྲི་མཆོག་བཟང་པོ་རྣམ་མང་གིས། །ཁྱིམ་གྱི་ས་གཞི་བཟང་པོ་ཀུན་དུ་བཀྲམ། །གར་བྱེད་གླུ་ལེན་སིལ་སྙན་སྒྲ་དག་གིས། །ཁྱིམ་མཆོག་ཐམས་ཅད་ཀུན་ཏུ་སྒྲ་ཡིས་གང་། །གདུགས་དང་བ་དན་དག་ཀྱང་

ཤིན་ཏུ་བསྒྲེང་། །ཁྱིམ་ཀུན་ལམ་མེར་མཛེས་པ་ལྷ་ཡི་བཞིན། །ཟླ་འོད་གཞོན་ནུའི་ཁྱིམ་མཆོག་ཆེན་པོ་ཡང་། །སྐྱེས་བུ་ན་ཆུང་ཚོགས་ཀྱིས་རྒྱན་གྱུར་ཅིང་། །ཀླུ་དང་གནོད་སྦྱིན་ལྷ་མིན་མང་པོས་གང་། །བརྒྱ་ཕྲག་མང་པོའི་ལྷ་ཡིས་རྣམ་པར་བལྟས། དེ་ནས་ཟླ་འོད་གཞོན་
ནུར་གྱུར་པས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ཡང་བརྒྱན། བདག་གི་ཁྱིམ་ཡང་ལེགས་པར་བརྒྱན་ནས་དེའི་མཚན་མོ་འདས་པ་དང་། ནངས་པར་སྔ་རབས་ཀྱི་དུས་ཀྱི་ཚེ་སིལ་སྙན་སྣ་ཚོགས་བརྒྱ་དག་ནི་རབ་ཏུ་དཀྲོལ། གདུགས་དང་རྒྱལ་མཚན་དང་བ་དན་བྱེ་བ་དུ་མ་ནི་བསྒྲེང་སྟེ།
བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་ཐམས་ཅད་ཀྱང་ལྷའི་མེ་ཏོག་མནྡཱ་རས་སྙིམ་པ་བཀང་སྟེ། དེ་དག་ལས་ལ་ལ་ནི་སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་འདི་ལྟ་སྟེ། སྤྱན་རས་གཟིགས་དབང་ཕྱུག་དང་། མཐུ་ཆེན་ཐོབ་དང་། སྤོས་ཀྱི་
གླང་པོ་ཆེ་དང་། རིན་པོ་ཆེའི་ཏོག་དང་། མངོན་པར་འབྱུང་དཀའ་དང་། འཇམ་དཔལ་གཞོན་ནུར་གྱུར་པ་དང་། དཔའ་བོའི་སྡེ་དང་། ལག་བཟངས་དང་། རིན་ཆེན་མེ་ཏོག་དང་། མཐོང་བ་དོན་ཡོད་དང་། བྱམས་པ་ལ་སོགས་པ་བྱང་ཆུབ་སེམས་དཔའི་ཚོགས་ཆེན་པོས་ཡོངས་སུ་བསྐོར་ཅིང་
མདུན་དུ་བདར་ཏེ། རྟ་དང་བ་ལང་དུ་མ་ཤིན་ཏུ་བརྒྱན་ཅིང་མ་ཞོན་པར་ཁྲིད་པ་མང་པོ་དང་འདྲེས་པ། གཞན་ཡང་ཡུལ་གྱི་མི་དཔག་ཏུ་མེད་པའི་ཚོགས་དང་བདག་ཉིད་ཀྱང་ལྷའི་མེ་ཏོག་མནྡཱ་རས་སྙིམ་པ་བཀང་སྟེ་བྱང་ཆུབ་སེམས་དཔའི་མཐུ་ཆེན་པོ་དང་བྱང་ཆུབ་སེམས་དཔའི་རྫུ་འཕྲུལ་ཆེན་པོ་དང་བྱང་
ཆུབ་སེམས་དཔའི་ཆོ་འཕྲུལ་ཆེན་པོ་དང་། བྱང་ཆུབ་སེམས་དཔའི་ཨ་ལ་ལ་ཞེས་ལྷའི་ག་ཞའི་སྒྲ་ཡིད་དུ་འཐད་ཅིང་ཡིད་དུ་འོང་བ་ཡིད་འཕྲོག་པ་དག་སྒྲོག་ཅིང་། རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་ཆུ་དྲོན་གྱི་སྒོ་ནས་ཕྱིར་བྱུང་སྟེ། རིའི་རྒྱལ་པོ་བྱ་རྒོད་ཀྱི་ཕུང་པོ་ག་ལ་བ་དང་། བཅོམ་ལྡན་འདས་
ག་ལ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ལྷའི་མེ་ཏོག་མནྡཱ་ར་བས་སྙིམ་པ་གང་བས་བཅོམ་ལྡན་འདས་ལ་མངོན་པར་གཏོར་ཏེ་ཕྱོགས་གཅིག་ཏུ་འཁོད་དོ། །བྱམས་པ་ལ་སོགས་པ་བྱང་ཆུབ་

སེམས་དཔའ་སེམས་དཔའ་ཆེན་པོ་དེ་དག་ཀྱང་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། སོ་སོའི་སྙིམ་པ་ན་མེ་ཏོག་མནྡཱ་ར་བ་ཡོད་པ་དེས་བཅོམ་ལྡན་འདས་ལ་མངོན་པར་གཏོར་ནས་ཕྱོགས་གཅིག་ཏུ་འཁོད་དོ། །ཟླ་འོད་གཞོན་
ནུར་གྱུར་པ་ཕྱོགས་གཅིག་ཏུ་འདུག་པ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་གདུགས་ཚོད་ལ་བབ་པ། བཅོམ་ལྡན་འདས་བཤོས་གཙང་སྦྱར་ལགས་ཏེ། ད་དེའི་དུས་
ལ་བབ་པར་བཅོམ་ལྡན་འདས་ཀྱིས་མཁྱེན་ན། བྱང་ཆུབ་སེམས་དཔའི་དགེ་འདུན་དང་དགེ་སློང་གི་དགེ་འདུན་དུ་བཅས་པ་དང་དབང་ཆེ་བ་དང་། དབང་ཆེ་བར་གྲགས་པ་རྒྱ་ཆེ་ཞིང་རླབས་ཆེ་བའི་ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་དྲང་སྲོང་དང་ནམ་མཁའ་ལྡིང་དང་མིའམ་ཅི་དང་ལྟོ་འཕྱེ་
ཆེན་པོ་དང་གྲུལ་བུམ་དང་ཡི་དགས་དང་སྲུལ་པོ་དང་མི་དང་མི་མ་ཡིན་པ་དག་དང་ཡང་ཐབས་ཅིག་ཏུ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་གཤེགས་ཤིང་བདག་གི་སྡུམ་པར་ཡང་གདུགས་ཚོད་གསོལ་བའི་དུས་ལ་བབ་བོ། །བདེ་བར་གཤེགས་པ་གདུགས་ཚོད་ལ་བབ་བོ། །དེ་ལ་འདི་སྐད་
ཅེས་བྱ་སྟེ། བདག་གིས་གྲོང་ཁྱེར་མཆོག་ཀུན་ལེགས་པར་བརྒྱན། །མགོན་པོ་བདག་གི་སྡུམ་པའང་དེ་བཞིན་ཏེ། །ལྷ་ཡི་ཞལ་ཟས་རོ་བརྒྱ་བཤམས་ཤིང་སྦྱར། །གདུགས་ཚོད་བབ་ཀྱིས་བདེ་གཤེགས་བཞེངས་སུ་གསོལ། །དྲང་སྲོང་མཆོག་གིས་ཕྱག་བགྱིས་སྟོབས་བཅུ་ཡོན་ཏན་འཆང་། །
སྲས་ཀྱི་ཚོགས་ཀྱིས་ཡོངས་སུ་བསྐོར་ཅིང་གྲོང་དུ་གཤེགས། །སྣང་བྱེད་ཉི་མ་མུན་པའི་ཚོགས་སེལ་བཞེངས་སུ་གསོལ། །བཅོམ་ལྡན་བདག་གི་སྡུམ་པར་བཤོས་གསོལ་གདུགས་ཚོད་བབ། །སྲས་དང་ཐབས་ཅིག་བདག་གི་སྡུམ་པར་གཤེགས་སུ་གསོལ། །འགྲོ་བ་མང་པོའི་ཚོགས་
ཀྱི་དོན་ཀྱང་བགྱིས་པར་འགྱུར། །ཇི་ལྟར་མར་མེ་མཛད་ཀྱིས་ཁྱོད་ལ་ལུང་བསྟན་པ། །དེ་བཞིན་བདག་ཀྱང་འཇིག་རྟེན་མངོན་སུམ་ལུང་སྟོན་ཅིག །བདག་འདིར་ལུང་བསྟན་འཇིག་རྟེན་ཐོས་ནས་ནི། །སེམས་ཀྱང་མཆོག་ཏུ་རྒྱ་ཆེར་རབ་བསྐྱེད་དེ། །འགྲོ་བ་འདི་དག་ཐམས་ཅད་སངས་རྒྱས་

འགྱུར། །འདི་ན་སྣོད་མིན་སེམས་ཅན་གང་ཡང་མེད། །བཞེངས་ཤིག་བཞེངས་ཤིག་སྟོབས་བཅུ་མངའ་བའི་ལྷ། །བདག་ལ་རྗེས་སུ་ཕན་མཛོད་སྡུམ་པར་གཤེགས། །ཇི་ལྟར་བདག་གི་སྡུམ་པར་ཁྱོད་གཤེགས་པ། །དེ་བཞིན་བྱང་ཆུབ་ཤིང་དབང་དྲུང་བདག་མཆི། །བྱང་ཆུབ་ཤིང་
དབང་དེ་དྲུང་བདག་མཆིས་ནས། །མི་གཡོ་མི་འགུལ་བར་ནི་གནས་བཅས་ཏེ། །བྱམས་པས་སྡེར་བཅས་བདུད་རྣམས་ཕམ་བ