Kinh tạng Tây Tạng (Kangyur Đại Học) — 055_མདོ་སྡེ།_ད

་དེ་དག་ནི། །མདོ་སྡེ་བྱེ་བ་བརྒྱ་དག་རབ་ཏུ་སྟོན། །དེ་དང་དེ་དག་མང་དུ་ཐོས་པ་ཡིན། །ཐོས་པ་འཛིན་པ་སངས་རྒྱས་ཆོས་རྣམས་འཛིན། །ཆོས་ཀྱི་མཛོད་རྣམས་ཤིན་ཏུ་འཛིན་བྱེད་དེ། །ཐུབ་པའི་ཆོས་ཀྱི་གཏེར་ལ་དགའ་བ་ཡིན། །དེ་དང་དེ་དག་ཤེས་རབ་
ཡངས་པ་ཡིན། །དགའ་བ་དག་ཀྱང་རྒྱ་ཆེར་རྟག་ཏུ་སྐྱེད། །ཞིབ་ཅིང་འབྱུང་བར་འགྱུར་བ་བལྟ་དཀའ་བ། །ཞི་བའི་ཆོས་མཆོག་རྣམས་ཀྱང་རབ་ཏུ་སྟོན། །དེ་དག་ཆོས་དང་ཆོས་མིན་ཤེས་པ་སྟེ། །དེས་ཤིང་བློ་གྲོས་ལྡན་པ་ཆོས་ལ་གནས། །ཆོས་ཀྱི་རྒྱལ་སྲིད་རབ་ཏུ་སྟོན་བྱེད་ཅིང་། །མཚུངས་མེད་ཆོས་ཀྱི་
མཆོག་ལ་རྟག་ཏུ་སྤྱོད། །དེ་དག་ཆོས་ཀྱི་མཆོག་ལ་ལྷུར་བྱེད་དེ། །བླ་མ་ལ་ཡང་རི་མོ་བྱེད་པར་གནས། །ཆོས་ཀྱི་གྲོང་ཁྱེར་མཆོག་ལ་གནས་པ་སྟེ། །བློ་གྲོས་ལྡན་པ་ཆོས་ཀྱི་རྒྱལ་མཚན་སྒྲེང་། །དེ་དག་དྲེགས་ཤིང་རྒྱགས་པའི་སེམས་ཅན་རྣམས། །རྟག་ཏུ་བག་མེད་པ་ལ་གནས་པ་མཐོང་། །རབ་ཏུ་མ་
རུངས་ལོག་པའི་ལམ་སོང་ཞིང་། །འཁོར་བའི་ལམ་ལ་གནས་པ་མཐོང་ནས་ནི། །དེ་ལ་བྱམས་དང་སྙིང་རྗེ་རྒྱ་ཆེར་བསྐྱེད། །དགའ་དང་བཏང་སྙོམས་དག་ལའང་རབ་གནས་ཏེ། །དེ་དག་ལ་ནི་ཡན་ལག་བརྒྱད་ལྡན་པ། །ལམ་མཆོག་ཞི་བ་བལྟ་དཀའ་རབ་ཏུ་སྟོན། །དེ་དང་དེ་དག་ལེགས་བྱས་ཆོས་ཀྱི་གྲུ། །
བཤམས་ནས་འཁོར་བའི་རྒྱུན་ཏུ་སོང་བ་དག །རྒྱ་མཚོ་ཆེན་པོར་ལྷུང་ཞིང་ཁྱེར་བ་ཡི། །སེམས་ཅན་མང་པོ་དག་ནི་སྒྲོལ་བར་བྱེད། །བྱང་ཆུབ་ཡན་ལག་སྟོབས་དང་དབང་པོ་ཡིས། །གོ་བགོས་དམ་པའི་ཆོས་ཀྱི་གྲུར་ཞུགས་ནས། །ཕ་རོལ་འགྲམ་བདེ་རྟག་ཏུ་འཇིགས་མེད་པར། །ཁོར་མོར་སེམས་
ཅན་རྣམས་ཀྱང་འགོད་པར་བྱེད། །དེ་དག་སྨན་པའི་གཙོ་བོ་དཀའ་ཐུབ་ལ། །ཤིན་ཏུ་སྤྱད་པ་རིག་བྱེད་སྨན་པའི་མཆོག །རིག་པ་ཡེ་ཤེས་རྣམ་གྲོལ་ཕ་རོལ་ཕྱིན། །དམ་པའི་ཆོས་ཀྱི་རྩི་ཡང་སྦྱིན་པར་བྱེད། །ནད་ནི་རྣམ་པ་མང་པོས་བཏབ་པ་ཡི། །སེམས་ཅན་ན་བ་དག་ཀྱང་མཐོང་ནས་སུ། །དེ་དག་ལ་ནི་
ཆོས་ཀྱི་བཀྲུ་སྨན་གཏོང་། །ཆོས་རྣམས་ཀྱིས་ནི་དེ་དག་གསོ་བ་བྱེད། །དེ་དག་སྨྲ་བ་ཕ་རོལ་རྒོལ་བ་འཇོམས། །འཇིག་རྟེན་དབང་པོ་ཚིག་གི་དབང་ཕྱུག་ལྡན། །ཤེས་བྱ་ཀུན་ལ་འོད་བྱེད་བློ་གྲོས་འཆང་། །ཡེ་ཤེས་དམ་པའི་ས་ལ་རབ་ཏུ་གནས། །དཔའ་བོ་ཡེ་ཤེས་སྟོབས་ལྡན་སྟོབས་འཇོམས་པ། །ཡེ་ཤེས་

ལྡན་པ་དག་གིས་ཡང་དག་བསྔགས། །སེམས་ཅན་བྱེ་བ་ཁྲག་ཁྲིག་མང་པོ་དག །ཆོས་ལ་གནས་ནས་ཤེས་པས་མགུ་བར་བྱེད། །དེ་དང་དེ་དག་བདག་པོ་དེད་དཔོན་ཏེ། །གསལ་བ་སེམས་ཅན་རྣམས་ཀྱི་སྐྱབས་འདོད་པ། །སེམས་ཅན་རིན་ཆེན་ལམ་ལ་རྨོངས་གྱུར་ཅིང་། །རྟག་ཏུ་བདུད་ཀྱི་སྙིང་
ཞུགས་མཐོང་ནས་ནི། །དེ་དག་ལ་ཡང་ལམ་མཆོག་ཞི་ཞིང་བདེ། །རྟག་པར་མྱ་ངན་འདས་པ་རབ་ཏུ་སྟོན། །མཁས་པ་དག་ནི་ཡེ་ཤེས་ལམ་དེ་ཡིས། །སེམས་ཅན་མང་པོ་བྱེ་བརྒྱ་འདྲེན་པར་བྱེད། །དེ་དང་དེ་དག་གནས་དང་རྟེན་དུ་འགྱུར། །སྐྱབས་དང་མིག་དང་སྒྲོན་མ་བྱེད་པ་ཡིན། །འཇིགས་པ་རྣམས་
ལ་མི་འཇིགས་རབ་ཏུ་སྦྱིན། །སྐྲག་པ་རྣམས་ཀྱང་རྟག་ཏུ་དབུགས་འབྱིན་བྱེད། །དེ་དག་སེམས་ཅན་ཤིན་ཏུ་སྡུག་བསྔལ་དང་། །དམུས་ལོང་གྱུར་པ་འདི་དག་རིག་ནས་ནི། །ཡང་དག་ཚུལ་བསླབས་རིན་ཆེན་ཆོས་རྣམས་ཀྱིས། །ཆོས་ཀྱི་སྣང་བ་དག་ཀྱང་བྱེད་པར་འགྱུར། །འཇིག་རྟེན་ན་ནི་བཟོ་མཆོག་ཅི་ཡོད་
པ། །བཟོ་བོ་བྱེད་པས་སེམས་ཅན་ཕན་འགྱུར་ཞིང་། །གང་གིས་སེམས་ཅན་རྟག་ཏུ་བདེར་འགྱུར་བ། །བཟོ་ཡི་རྣམ་པ་དེ་དག་ཤིན་ཏུ་བསླབས། །སུ་དག་བྱང་ཆུབ་ཏུ་ནི་མངོན་ཞུགས་ཏེ། །བློ་གྲོས་ལྡན་ཞིང་འཇིག་རྟེན་མིག་སྦྱིན་པ། །བསླབས་པ་རྣམས་ལ་མཆོག་གི་ཕ་རོལ་ཕྱིན། །མཁས་རབ་འཇིག་རྟེན་
ན་ཡང་ངོ་མཚར་ཐོབ། །སངས་རྒྱས་དག་གི་ཆོས་མཆོག་ཐོས་པ་ཡིས། །མཚུངས་པ་མེད་པ་ངོམས་པར་ཡོང་མི་འགྱུར། །ཚུལ་ཁྲིམས་བཟོད་དང་ཏིང་འཛིན་ཕ་རོལ་ཕྱིན། །ཟབ་མོ་ཡི་ནི་ཆོས་རྣམས་ཤིན་ཏུ་ཐོས། །དེ་དག་ཞི་བ་རིན་ཆེན་ཆོས་རྣམས་ནི། །གཞན་ལ་སྟོན་པས་ངོམས་པར་མི་འགྱུར་ཏེ། །
ཐར་བའི་ཐབས་ཀྱི་ཆར་ཡང་རབ་འབེབས་ཤིང་། །ཆོས་ཀྱིས་སྐྱེས་བུ་དག་ནི་ཚིམ་པར་བྱེད། །དེ་ཡི་དྲུང་དུ་སེམས་ཅན་མང་པོ་ནི། །ཆོས་འདོད་མཁས་པ་ཇི་སྙེད་ལྷགས་ནས་སུ། །ཆོས་མཆོག་བཟང་པོ་དམ་པ་རིན་པོ་ཆེ། །དྲང་ཞིང་གསལ་བའི་ལམ་རྣམས་མཉན་སྙམ་པ། །དེ་དག་བློ་གྲོས་འཆང་བས་
ཐེ་ཚོམ་བཅད། །ཆོས་ཀྱིས་དེ་དག་ཤིན་ཏུ་མགུ་བར་བྱེད། །ཚུལ་ཁྲིམས་བཟོད་དང་ཏིང་འཛིན་ཕ་རོལ་ཕྱིན། །སེམས་ཅན་རྣམས་ཀྱི་བསམ་པ་རབ་ཏུ་ཤེས། །ཡེ་ཤེས་ལྡན་ཞིང་ཡེ་ཤེས་མཆོག་རབ་ཀྱི། །ཕ་རོལ་ཕྱིན་པ་སེམས་ཅན་བསམ་ལ་མཁས། །སེམས་ཅན་ཕ་རོལ་སེམས་དང་སྤྱོད་པ་དང་། །གང་

དག་གཏམ་ནི་ཅི་འདྲའི་ཆོས་བརྗོད་པ། །ཡེ་ཤེས་གཏམ་ནི་བརྗོད་ལ་གང་དག་གིས། །སེམས་ཅན་ཁྲག་ཁྲིག་ཆོས་མཆོག་མིག་ཐོབ་འགྱུར། །དེ་དག་ཡེ་ཤེས་བྱེ་བྲག་ཕ་རོལ་ཕྱིན། །ལམ་རྣམས་ཀྱང་ནི་ཉེ་བར་སྟོན་པར་བྱེད། །མཁས་པ་དེ་དག་གི་ནི་སེམས་རྣམས་ཀྱང་། །བདུད་རྣམས་བྱེ་བ་སྟོང་གིས་ཡོང་མི་
ཤེས། །ཇི་ལྟར་ནམ་མཁའ་ལ་ནི་བྱ་སོང་བ། །དེ་ཡི་རྗེས་ནི་གང་དུའང་ཤེས་མི་ནུས། །ཡེ་ཤེས་སྟོབས་ལྡན་དུལ་ཞིང་རབ་ཏུ་ཞི། །ཞི་བ་འཕགས་པའི་ཡེ་ཤེས་དག་ལ་གནས། །དཔའ་བོ་ཁྱུ་མཆོག་བདུད་རྣམས་ཐམས་ཅད་བཅོམ། །བྱང་ཆུབ་ཞི་བ་མངོན་པར་འཚང་ཡང་རྒྱ། །རྟག་ཏུ་རྫུ་འཕྲུལ་དག་གི་ཕ་
རོལ་ཕྱིན། །ཞིང་ཡང་བརྒྱ་ཕྲག་མང་པོར་འགྲོ་བར་བྱེད། །སངས་རྒྱས་མང་པོ་བྱེ་བ་ཁྲག་ཁྲིག་མཐོང་། །ཇི་བཞིན་གང་གཱ་ཡི་ནི་བྱེ་མ་སྙེད། །དེ་ཡི་མིག་ཀྱང་ཐོགས་པར་མི་འགྱུར་ཏེ། །ཕྱོགས་བཅུ་དག་གི་གཟུགས་མང་མཐོང་བར་འགྱུར། །ཇི་སྙེད་ཕྱོགས་བཅུ་ཡི་ནི་སྲིད་པ་ན། །སེམས་ཅན་ཡོད་
དགུ་དེ་དག་འདྲེན་པར་གྱུར། །བསྐལ་པ་བྱེ་བ་བརྒྱ་ཕྲག་མང་པོར་ནི། །དེ་དག་དེ་ཡི་ཕན་ཡོན་ཀུན་བརྗོད་ཅིང་། །སྤོབས་པ་ཡི་ནི་རབ་ཏུ་བཤད་མཛད་ཀྱང་། །སྔོན་གྱི་སྤྱོད་པའི་བསྔགས་པ་ཟད་མི་ནུས། །ཏིང་འཛིན་མཚུངས་མེད་རྡུལ་དང་བྲལ་བ་འདི། །སྐྱེས་བུ་སུ་གང་འཛིན་པར་བྱེད་པ་ནི། །
སངས་རྒྱས་དག་གི་ནོར་རྣམས་མི་ཟད་དེ། །ཤིན་ཏུ་རྒྱ་ཆེ་ཡེ་ཤེས་རྒྱ་མཚོ་བཞིན། །ཚུལ་ཁྲིམས་ཀྱི་ཕུང་པོ་ངེས་པར་བསྟན་པའི་ལེའུ་སྟེ་སུམ་ཅུ་རྩ་བདུན་པའོ།། །།དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་བྱང་ཆུབ་
སེམས་དཔའ་སེམས་དཔའ་ཆེན་པོ་ངོ་མཚར་དང་། །རྨད་དུ་བྱུང་བའི་བྱང་ཆུབ་སེམས་དཔའི་ཆོས་འདི་དག་དང་། གཞན་ཡང་ཚད་མེད་པ་འདོད་པ་དང་། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་ཆོས་ཐམས་ཅད་ཀྱི་རང་བཞིན་
མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་འདི་མཉན་པར་བྱ། གཟུང་བར་བྱ། ཀུན་ཆུབ་པར་བྱ། བཅང་བར་བྱ། བཀླག་པར་བྱ། རབ་ཏུ་གདོན་པར་བྱ། ལུང་མནོད་ཅིང་ཁ་ཏོན་དུ་བྱ། ཉོན་མོངས་པ་མེད་པར་བསྒོམ་པས་བསྒོམ་པར་བྱ། གཞན་ལ་ཡང་རྒྱ་ཆེར་རབ་ཏུ་བསྟན་

པར་བྱ། དེས་བཟོད་པའི་སྟོབས་བསྒོམ་པར་བྱ། བཟོད་པ་བསྟེན་པར་བྱ། མང་དུ་བྱ། ཆོས་ལ་དོན་དུ་གཉེར་བ་དང་། ཆོས་འདོད་པ་དང་། ཆོས་ཡོངས་སུ་འཛིན་པ་དང་། ཆོས་དང་རྗེས་སུ་འཐུན་པའི་ཆོས་ལ་ཞུགས་པར་བྱའོ། །སངས་རྒྱས་མཆོད་པ་ལ་མངོན་པར་
བརྩོན་པར་བྱའོ། །དེས་གནས་གསུམ་ལ་བརྩོན་པར་བྱ་སྟེ། གསུམ་གང་ཞེ་ན། འདི་ལྟ་སྟེ། ཉོན་མོངས་པ་ཟད་པ་དང་། བསོད་ནམས་ཀྱི་ཞིང་དུ་གྱུར་པ་དང་། སངས་རྒྱས་ཀྱི་ཡེ་ཤེས་འདོད་པས་དགེ་བའི་རྩ་བ་རྣམས་བསྐྱེད་པར་བྱའི་འཇིག་རྟེན་གྱི་བདེ་བ་ལ་རེག་པར་
འདོད་པའི་ཕྱིར་ནི་མ་ཡིན་ཏེ། གནས་གསུམ་པོ་དེ་དག་ལ་མངོན་པར་བརྩོན་པར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཟླ་འོད་གཞོན་ནུར་གྱུར་པ་ལ་དོན་འདི་ཉིད་བསྟན་པའི་ཕྱིར་སྔོན་བྱུང་བའི་གཏམ་བསྟན་པ་འདི་དག་ཚིགས་སུ་བཅད་པའི་དབྱངས་ཀྱིས་ཡང་དག་པར་
རབ་ཏུ་བསྟན་ཏོ། །བསྐལ་པ་སྟོང་དུ་ཇི་ལྟར་ངས་སྤྱད་པ། །གཞོན་ནུར་གྱུར་པ་ང་ལས་མཉན་པར་གྱིས། །ཏིང་འཛིན་བཟང་པོ་དམ་པ་འདི་ཚོལ་ཕྱིར། །སངས་རྒྱས་དག་ནི་སྟོང་ཕྲག་བརྒྱ་ཡང་མཆོད། །དེ་ལྟར་བསྐལ་པ་འདས་པ་བསམ་ཡས་སུ། །ཞིང་བརྒྱ་ཡི་ནི་བྱེ་མ་ཅི་ཡོད་པ། །དཔེར་
བསྟེན་དེ་སྙེད་འདས་པར་གྱུར་པ་ན། །ཚོགས་ཀྱི་དབང་ཕྱུག་ཅེས་བྱ་རྒྱལ་བ་བྱུང་། །བྱེ་བ་སྟོང་ཕྲག་དྲུག་ཅུ་མི་ཉུང་བ། །རྒྱལ་བ་དེ་ཡི་ཚོགས་ནི་བྱུང་གྱུར་ཏེ། །ཐམས་ཅད་ཟག་པ་མེད་ཅིང་ཉོན་མོངས་ཟད། །རྣམ་ཐར་བརྒྱད་ལ་གནས་པའི་བསམ་གཏན་པ། །དེ་ཡི་དུས་ན་ས་འདི་ཐམས་
ཅད་ཀྱང་། །བདེ་ཞིང་ལོ་ལེགས་འཁྲུག་པ་མེད་པར་གྱུར། །མི་རྣམས་ཐམས་ཅད་སྐྱིད་ཅིང་བདེ་དང་ལྡན། །མི་ཡི་བདེ་བ་དག་གིས་རྒྱས་པར་གྱུར། །ཐམས་ཅད་བསོད་ནམས་སྟོབས་དང་ལྡན་པ་སྟེ། །བལྟ་ན་སྡུག་ཅིང་དེ་བཞིན་དགའ་བར་གྱུར། །ཐམས་ཅད་ཕྱུག་ཅིང་ནོར་མང་
འབྱོར་བ་སྟེ། །ལུས་ནི་ལྷ་ཡི་བདེ་དང་ལྡན་པར་གྱུར། །དེས་ཤིང་བརྟུལ་ཞུགས་བཟང་ལ་ཉོན་མོངས་ཆུང་། །བཟོད་པའི་སྟོབས་ལ་དཔའ་ཞིང་བྱད་གཟུགས་བཟང་། །ལྷ་ཡི་གནས་ན་ལྷ་ཡི་སྲས་པོ་བཞིན། །ཚུལ་ཁྲིམས་ཡོན་ཏན་འཆང་ཞིང་བློ་གྲོས་ལྡན། །དེ་ཡི་དུས་ན་ས་

བདག་བྱུང་བ་ནི། །རྒྱལ་པོ་མེ་ཏོག་མཆོག་ཅེས་བྱ་བ་ཡིན། །དེ་ཡི་བུ་ཡང་ལྔ་བརྒྱར་ཚང་བར་བྱུང་། །དྲན་དང་ལྡན་ཞིང་རྟོགས་དང་ལྡན་པར་གྱུར། །རྒྱལ་པོའི་བུ་དེ་ཡིས་ཀྱང་རྒྱལ་བ་ཡི། །སྐྱེད་མོས་ཚལ་བརྒྱ་སྟོང་ཕྲག་དྲུག་ཅུ་དག །ཐམས་ཅད་མེ་ཏོག་འབྲས་བུས་བརྒྱན་པ་ཡང་། །
ཐུགས་རྗེ་ལྡན་པ་དེ་ལ་རབ་ཏུ་ཕུལ། །སྐྱེད་མོས་ཚལ་ནི་བརྒྱ་སྟོང་སྣ་ཚོགས་དང་། །འཆག་ས་མལ་སྟན་བཞུགས་གནས་སྟོང་རྣམས་དང་། །ཆོས་གོས་ཀྱང་ནི་བྱེ་བ་བརྒྱ་སྟོང་གིས། །འཆག་ས་བཞུགས་གནས་རྣམས་སུ་གདིང་བ་བྱས། །དེ་ལྟར་རྣམ་པ་དུ་མ་སྟོང་དག་དང་། །དགེ་
སྦྱོང་དག་གི་ལོངས་སྤྱོད་ཇི་སྙེད་པ། །རྒྱལ་བའི་བུ་ནི་ཤིན་ཏུ་ཡིད་དད་པས། །བདེ་གཤེགས་དེ་ལ་ཐམས་ཅད་ཉེ་བར་ཕུལ། །རྒྱལ་པོ་དེ་ཡང་དགེ་བའི་ལས་བཅུ་ཡི། །ལམ་ལ་རབ་ཏུ་གནས་པར་གྱུར་ནས་སུ། །སྐྱེ་བོ་སྲོག་ཆགས་ཁྲག་ཁྲིག་བརྒྱ་སྟོང་གིས། །མདུན་དུ་བདར་ཏེ་
འདྲེན་པ་ལྟ་བར་སོང་། །མེ་ཏོག་དང་ནི་བྱུག་པ་བདུག་པ་དང་། །གདུགས་དང་རྒྱལ་མཚན་སིལ་སྙན་ཐོགས་ནས་སུ། །རྒྱལ་བ་དེ་ལ་དེ་ཡིས་མཆོད་བྱས་ཏེ། །ཐལ་མོ་སྦྱར་ནས་སྤྱན་སྔར་འདུག་པར་གྱུར། །ལྷ་དང་མི་དང་ལྷ་མིན་གནོད་སྦྱིན་དང་། །དགེ་སློང་སྟོང་ཡང་དེ་ཚེ་དགའ་བར་གྱུར། །
རྒྱལ་བ་མཆོད་པ་འདི་ནི་ལུང་སྟོན་ཏམ། །མི་ཡི་དབང་པོ་ལེགས་པར་ཆོས་གསུང་ངམ། །རྒྱལ་པོའི་བུ་དེ་ཡི་ནི་བསམ་པ་དང་། །བླ་མེད་སེམས་ཀྱང་རང་བྱུང་མཁྱེན་ནས་ནི། །མོས་པའི་གནས་ལ་ཕ་རོལ་ཕྱིན་པ་ཡིས། །དེ་ལ་ཏིང་འཛིན་ཞི་བ་འདི་བཤད་དོ། །གང་ཚེ་བདེ་བར་གཤེགས་པས་
གསུང་ཕྱུང་བ། །དེ་ཚེ་ནགས་ཚལ་བཅས་པའི་ས་ཡང་གཡོས། །ནམ་མཁའ་ལས་ནི་མེ་ཏོག་ཆར་ཀྱང་བབ། །ས་ལས་པད་མ་བརྒྱ་དག་བྱུང་བར་གྱུར། །སྟོན་པ་དོན་གྱི་ཚིག་ལ་རབ་བསླབས་པས། །བསམ་པ་མཁྱེན་ནས་འདྲེན་པས་ལུང་བསྟན་ཏེ། །མི་ཡི་དབང་པོས་ཏིང་འཛིན་ཞི་བ་
བཤད། །དེ་ཡི་དོན་ཚིག་རྣམས་ཀྱང་མཉན་པར་གྱིས། །སྲིད་པ་ཐམས་ཅད་སྲིད་པ་མེད་པ་སྟེ། །ཀུན་བརྟགས་གསོག་དང་སྨིག་རྒྱུ་འདྲ་བ་ཡིན། །སྒྱུ་མ་ཇི་བཞིན་གློག་དང་སྤྲིན་འདྲ་སྟེ། །སྟོང་གཡོ་བདག་དང་སེམས་ཅན་སྲོག་ཀུན་མེད། །གཟོད་མ་ནས་ནི་སྟོང་ཞིང་མ་འོངས་ཆོས། །སོང་བ་

མེད་ཅིང་གནས་མེད་གནས་ཀྱིས་དབེན། །སྒྱུ་མའི་རང་བཞིན་རྟག་ཏུ་སྙིང་པོ་མེད། །ཐམས་ཅད་དག་ཅིང་རྣམ་དག་ནམ་མཁའ་བཞིན། །མི་སྔོ་མི་སེར་དཀར་པོ་མ་ཡིན་ཏེ། །མིང་ནི་གསོག་གྱུར་སྒྲ་ཡི་རང་བཞིན་ཡིན། །སེམས་ནི་དབེན་ཞིང་སེམས་མེད་རང་བཞིན་ཏེ། །སྐད་ཅིག་ཡིན་པས་ཐམས་ཅད་སྒྲ་དང་བྲལ། །
བཤད་པ་ན་ཡང་ཡི་གེ་འཕོ་བ་མེད། །མ་བཤད་ན་ཡང་ཡི་གེ་འགྲིབ་མི་འགྱུར། །ཡི་གེ་དག་ནི་ཕྱོགས་སུའང་མི་འགྲོ་སྟེ། །ཡི་གེ་གང་ནས་ཀྱང་ནི་འོངས་མ་ཡིན། །ཡི་གེ་མི་ཟད་ཟད་ཅིང་འགགས་པ་སྟེ། །བཤད་པར་བྱས་སམ་བཤད་པར་མ་བྱས་ཀྱང་། །ཡི་གེ་འདི་དག་རྟག་པར་
མི་ཟད་བརྗོད། །གང་གིས་ཡོངས་ཤེས་དེ་ཡང་ཟད་མི་འགྱུར། །ཆོས་ནི་སྟོང་ཕྲག་བརྒྱ་དག་རབ་བརྗོད་ནས། །སངས་རྒྱས་བརྒྱ་སྟོང་དག་ནི་གང་འདས་པ། །ཆོས་ཀྱང་མ་ཟད་ཡི་གེའང་ཟད་མ་གྱུར། །སྐྱེ་བ་ཡང་མེད་དེ་ཕྱིར་མི་ཟད་པ། །གང་གིས་མི་ཟད་ཆོས་རྣམས་རབ་ཤེས་པ། །རྟག་
ཏུ་མི་ཟད་པ་ཡི་ཆོས་ཤེས་པས། །མདོ་སྡེ་བརྒྱ་སྟོང་དག་ནི་བཤད་བྱས་ཀྱང་། །ཆོས་རྣམས་ཐམས་ཅད་ཡི་གེ་མེད་པར་ཤེས། །རྒྱལ་བའི་ཆོས་ནི་གང་དག་རབ་སྟོན་པ། །དེ་ཡང་མི་ཟད་པས་ན་མི་མཐོང་སྟེ། །ཆོས་འདི་སྔ་ནས་བདག་མེད་སེམས་ཅན་མེད། །དེ་དག་རབ་ཏུ་སྟོན་ཀྱང་ཟད་མི་
འགྱུར། །མཁས་པ་དེ་ནི་ཚིག་ཀུན་སྨྲ་བྱེད་ཀྱང་། །ཚིག་གིས་སེམས་ནི་འཕྲོགས་པར་མི་འགྱུར་ཏེ། །ཚིག་རྣམས་ཐམས་ཅད་རི་ཡི་བྲག་ཅ་བཞིན། །དེ་ཕྱིར་ནམ་ཡང་ཚིག་ལ་ཆགས་མི་འགྱུར། །དེ་ནི་སྒྱུ་མའི་ཚིག་གིས་ཆོས་སྟོན་ཏེ། །ཚིག་དེ་ཐམས་ཅད་དེ་ཡི་མོད་ལ་འགགས། །
ཚིག་དེ་ཡི་ནི་མཚན་ཉིད་ཅི་འདྲ་བ། །ཆོས་རྣམས་ཀུན་ཀྱང་མཚན་ཉིད་དེ་འདྲར་གྱུར། །ཆོས་ཀུན་མཚན་གཞི་མེད་ཅིང་མཚན་གཞི་བྲལ། །ཐམས་ཅད་མཚན་མེད་མཚན་ཉིད་རྣམ་པར་དག །རྟག་ཏུ་དབེན་ཞིང་གཙང་བ་ནམ་མཁའ་བཞིན། །མདོར་ན་དེ་དག་བགྲང་བར་ཉེར་མི་འགྱུར། །
འདུས་བྱས་འདུས་མ་བྱས་ཀུན་དབེན་པ་སྟེ། །དྲང་སྲོང་དེ་དག་ལ་ནི་རྣམ་རྟོག་མེད། །འགྲོ་བ་ཀུན་ཏུ་འདུས་མ་བྱས་ཐོབ་པས། །ལྟ་བ་དག་ལས་ཁོར་མོར་རྣམ་པར་དབེན། །གང་དག་འདི་འདྲའི་ཆོས་རྣམས་ཤེས་པ་ནི། །རྟག་ཏུ་མ་ཆགས་མི་གཏུམ་མ་རྨོངས་ཏེ། །དེ་ཡི་སེམས་ནི་རང་

བཞིན་མཉམ་པར་བཞག །དེ་ནི་ཏིང་འཛིན་སྟོབས་ཅན་སྟོབས་དང་ལྡན། །བྲག་ཕུག་རི་དང་གཅོང་རོང་ཀླུང་རྣམས་སུ། །རྐྱེན་གྱིས་ཇི་ལྟར་བྲག་ཅ་འབྱུང་བ་ལྟར། །དེ་བཞིན་འདུས་བྱས་འདི་ཀུན་རིག་པར་གྱིས། །འཇིག་རྟེན་ཐམས་ཅད་སྒྱུ་མ་སྨིག་རྒྱུ་བཞིན། །གང་དུ་ཏིང་འཛིན་ཞི་བ་འདི་
བཤད་པ། །ཡོན་ཏན་ཆོས་སུ་གྱུར་པ་ཤེས་རབ་སྟོབས། །དྲང་སྲོང་ཡེ་ཤེས་སྟོབས་ཀྱིས་མངོན་པར་ཤེས། །ཚིག་ནི་ཐབས་མཁས་པ་ཡི་ངེས་པའི་ཚིག །བརྟགས་པ་ཙམ་དུ་བརྟགས་ནས་བརྗོད་པ་ཡིན། །འཁོར་བ་ལ་ནི་མཐའ་མ་མི་རྙེད་དེ། །གང་དག་སྔོན་བྱུང་མཐའ་ནི་མཚན་
ཉིད་མེད། །མ་འོངས་དུས་ཀྱང་ཤེས་པར་བྱ་བའི་ཕྱིར། །ལས་དང་བྱ་བས་དེ་ལྟར་ཞུགས་གྱུར་ཏེ། །རབ་དང་ཐ་མ་དག་ཏུའང་འབྱུང་བར་འགྱུར། །ཆོས་རྣམས་རྟག་ཏུ་དབེན་ཞིང་རང་བཞིན་སྟོང་། །ཐམས་ཅད་བདག་མེད་པར་ཡང་ཤེས་པར་གྱིས། །ཀུན་རྫོབ་ཏུ་ནི་རྒྱལ་བས་
ཆོས་བཤད་དེ། །འདུས་བྱས་འདུས་བྱས་མ་ཡིན་དེ་ལྟར་ལྟོས། །ཡང་དག་ཉིད་དུ་བདག་དང་མི་མེད་དེ། །འགྲོ་བ་ཀུན་གྱི་མཚན་ཉིད་དེ་འདྲའོ། །དགེ་དང་ནག་པོའི་ལས་རྣམས་མི་འཇིག་སྟེ། །བདག་གིས་བྱས་པ་དག་ནི་མྱོང་བར་འགྱུར། །ལས་ཀྱི་འབྲས་བུ་འཕོ་བར་
མི་འགྱུར་ཏེ། །རྒྱུ་མེད་པར་ཡང་མྱོང་བར་མི་འགྱུར་རོ། །སྲིད་པ་ཐམས་ཅད་སྒྱུ་མ་དབང་མེད་པ། །གསོག་དང་གསོབ་ཏུ་གྱུར་པ་དབུ་བ་བཞིན། །སྒྱུ་མ་སྨིག་རྒྱུ་ལྟ་བུར་རྟག་ཏུ་སྟོང་། །སྒྲ་ཡིས་དེ་བཤད་དེ་དག་དབེན་པ་ཡིན། །དེ་ལྟར་རྣམ་པར་རིག་པ་རློམ་སེམས་མེད། །ཚུལ་
ཁྲིམས་ལ་ཡང་ཆགས་པ་མེད་པའི་སེམས། །བཟོད་པའི་སྟོབས་ཀྱིས་ཅུང་ཟད་མི་རྟོག་སྟེ། །དེ་ལྟར་སྤྱོད་པ་མཉམ་པར་གཞག་པར་འགྱུར། །རྒྱལ་པོ་དེས་ནི་ཇི་ཙམ་ཆོས་རིག་པ། །དེ་ཙམ་དུ་ནི་རྒྱལ་བ་དེས་བཤད་དེ། །རྒྱལ་པོས་རྒྱལ་བའི་ཆོས་འདི་ཐོས་ནས་ནི། །འཁོར་
དང་བཅས་པས་བསླབ་པ་ཡང་དག་བཟུང་། །རྒྱལ་པོའི་བུ་དེས་ཏིང་འཛིན་འདི་མཉན་ནས། །དགའ་ཞིང་ཡི་རངས་ཚིག་ཀྱང་འདི་སྐད་སྨྲ། །ཤིན་ཏུ་ལེགས་པར་ཏིང་འཛིན་འདི་བཤད་དེ། །ཁྱོད་ཀྱི་ཞབས་ལ་བདག་ནི་ཕྱག་འཚལ་ལོ། །དེར་ཡང་སྲོག་ཆགས་སྟོང་ཕྲག་བརྒྱད་ཅུ་དག །

ཡང་དག་དོན་དམ་ངེས་པར་བསྟན་པ་འདི། །ཆོས་ཀྱི་རང་བཞིན་བཟང་པོ་འདི་ཐོས་ནས། །དེ་དག་མི་སྐྱེ་བ་ཡི་བཟོད་པ་ཐོབ། །སྐྱེས་བུ་ལ་ནི་སྐྱེ་དང་འགག་པ་མེད། །དེ་བཞིན་ཆོས་འདི་རྟག་ཏུ་སྔ་ནས་དབེན། །དེ་ལྟར་རབ་ཤེས་ཡོངས་སུ་མི་འབྲི་སྟེ། །རྒྱལ་པོས་མི་སྐྱེ་བཟོད་
པ་ཐོབ་པར་གྱུར། །དེ་ཚེ་རྒྱལ་པོས་རྒྱལ་སྲིད་རྣམ་སྤངས་ཏེ། །རྒྱལ་བ་དེ་ཡི་བསྟན་ལ་རབ་ཏུ་བྱུང་། །རྒྱལ་པོའི་སྲས་ཀྱང་ལྔ་བརྒྱ་མི་ཉུང་བ། །དེ་དག་ཀུན་ཀྱང་རྗེས་སུ་རབ་ཏུ་བྱུང་། །རྒྱལ་པོ་སྲས་དང་བཅས་པ་རབ་བྱུང་ནས། །དེ་ཚེ་སྲོག་ཆགས་མང་པོ་སྟོང་གཞན་ཡང་། །བདེ་བར་གཤེགས་
པའི་དྲུང་དུ་རབ་ཏུ་བྱུང་། །རྒྱལ་བ་དེ་ལ་ཆོས་རྣམས་ཚོལ་བར་བྱེད། །ལོ་ནི་བརྒྱ་ཕྲག་ཉི་ཤུར་ཡོངས་ཚང་བར། །རྒྱལ་བ་དེས་ནི་ཆོས་རྣམས་རབ་ཏུ་བཤད། །རྒྱལ་པོ་བུར་བཅས་སྐྱེ་བོར་བཅས་པ་ཡིས། །ལོ་ཡང་བརྒྱ་ཕྲག་ཉི་ཤུར་ཆོས་རྣམས་སྤྱད། །དེ་ནས་དུས་ཀྱང་གཞན་དུ་གྱུར་
པའི་ཚེ། །རྒྱལ་བ་དེ་ཡང་ཡོངས་སུ་མྱ་ངན་འདས། །རྒྱལ་བའི་ཉན་ཐོས་རྣམས་ཀྱང་འདས་པར་གྱུར། །དེ་ཡི་ཆོས་རྣམས་ཀྱང་ནི་ཉུང་བར་གྱུར། །དེ་ཚེ་རྒྱལ་པོ་དེ་ཡི་བུ་ཡོད་པ། །བསོད་ནམས་བློ་གྲོས་དད་ཅིང་དང་བ་སྟེ། །དེ་ཡི་ཁྱིམ་དུ་ཉེར་འགྲོ་དགེ་སློང་ཡོད། །དེས་ནི་ཏིང་འཛིན་ཞི་བ་
འདི་ཡང་བཤད། །དེ་ནི་འཇམ་ཞིང་མཉེན་པར་གྱུར་པ་སྟེ། །སྲོག་ཆགས་བརྒྱ་སྟོང་དག་གིས་བཀུར་སྟི་བྱས། །ལྷ་ཡང་བྱེ་བ་བརྒྱ་དག་ཕྱིར་འབྲང་ཞིང་། །གྲོང་དུ་འོངས་ནས་བསྔགས་པ་རྗོད་པར་བྱེད། །དེ་ནི་དྲན་དང་ལྡན་ཞིང་རྟོགས་པར་ལྡན། །བརྟུལ་ཞུགས་བཟང་ཞིང་དེས་པ་ཚུལ་ཁྲིམས་
དགའ། །དབྱངས་ཀྱང་སྙན་ཅིང་མི་རྩུབ་འཇམ་པ་སྟེ། །ཁམས་རྣམས་ཤེས་པའི་དབང་མཆོག་རབ་ཏུ་ཐོབ། །དགེ་སློང་དེ་ནི་སྙན་པའི་འོད་ཅེས་བྱ། །ཆོས་གོས་བྱེ་བ་བརྒྱ་ཡང་རབ་ཏུ་རྙེད། །དེ་ཡི་བསོད་ནམས་སྟོབས་ནི་མི་བཟོད་པས། །དེ་ཚེ་དགེ་སློང་སྟོང་དག་ཕྲག་དོག་སྐྱེས། །བསོད་ནམས་སྟོབས་དང་
གཟུགས་ཀྱི་སྟོབས་རྣམས་དང་། །ཡེ་ཤེས་སྟོབས་དང་རྫུ་འཕྲུལ་སྟོབས་རྣམས་དང་། །ཚུལ་ཁྲིམས་སྟོབས་དང་ཏིང་འཛིན་སྟོབས་རྣམས་དང་། །ཆོས་ཀྱི་སྟོབས་ཀྱིས་དགེ་སློང་ཡང་དག་འཕགས། །སྐྱེ་བོའི་ཡིད་དུ་འོང་ཞིང་ཕངས་པ་སྟེ། །དགེ་སློང་དགེ་བསྙེན་དང་ནི་དགེ་སློང་མ། །རྒྱལ་བའི་བསྟན་ལ་སེམས་

ཅན་གང་དད་པ། །དེ་དག་གིས་ནི་མཆོད་ཅིང་བཀུར་བ་ཡིན། །རྒྱལ་པོའི་བུ་ནི་དེར་ཡང་གང་བྱུང་བ། །བསོད་ནམས་བློ་གྲོས་རྟག་ཏུ་དད་མོས་ཏེ། །དགེ་སློང་མང་པོ་ཡིད་འཁྲུག་རིག་ནས་ནི། །སློབ་དཔོན་དེ་ལ་སྲུང་བ་བྱེད་དུ་བཙུད། །སྲོག་ཆགས་དག་ནི་སྟོང་ཕྲག་ལྔ་བརྒྱ་རྣམས། །གོ་བགོས་མཚོན་ཆ་
རལ་གྲི་དབྱུག་ཐོགས་པ། །དེ་དག་གིས་ནི་དགེ་སློང་རྟག་ཏུ་བསྐོར། །ཡང་དག་སྤྱོད་པ་མུ་མེད་འཆད་ཅིང་སྨྲ། །དེ་ནི་འཁོར་ལ་ཆོས་རྣམས་རབ་སྟོན་ཏེ། །ཆོས་འདི་བདག་མེད་སྟོང་པ་སྲོག་མེད་འཆད། །དམིགས་པར་ལྟ་བ་བདག་ལ་ཆགས་པ་རྣམས། །དེ་དག་དགེ་སློང་ཅི་སྨྲ་མོས་མི་བྱེད། །སུ་དག་
སྟོང་པ་ཞི་བ་མི་འདོད་པ། །དགེ་སློང་འདི་ནི་ཆོས་མིན་རབ་སྟོན་གྱིས། །འདི་བསད་ན་ནི་བསོད་ནམས་འགྱུར་ཞེས་ནས། །དགེ་སློང་དག་ནི་ལག་ན་མཚོན་ཐོགས་འོངས། །མཐོང་ནས་དགེ་སློང་མཚོན་གྱིས་མི་འཇིགས་ཏེ། །འདི་ལ་སེམས་ཅན་སྐྱེས་བུ་གསོད་པ་མེད། །ཆོས་འདི་རྣམས་ནི་གསོག་སྟེ་རྩིག་པ་འདྲ། །
སྟོང་པ་ཉིད་ཀྱི་ཆོས་རྣམས་རྗེས་སུ་དྲན། །དགེ་སློང་དེས་ནི་སྤྱི་བོར་ཐལ་སྦྱར་ཏེ། །ཚིག་སྨྲས་རྒྱལ་བ་རྣམས་ལ་ཕྱག་འཚལ་ལོ། །བདེན་པ་གང་གིས་ཆོས་འདི་སྟོང་པ་ན། །མཚོན་ཆ་འདི་རྣམས་མེ་ཏོག་མན་དཱར་གྱུར། །ཐུབ་པ་ཚུལ་ཁྲིམས་བརྟུལ་ཞུགས་ལྡན་པ་ཡིས། །གཞན་དུ་མི་འགྱུར་ཚིག་འདི་སྨྲས་མ་
ཐག །ནགས་ཚལ་བཅས་པའི་ས་ཡང་རབ་ཏུ་གཡོས། །མཚོན་ཆ་དེ་དག་མེ་ཏོག་མན་དཱར་གྱུར། །དམིགས་པ་ཅན་དག་མཚོན་ཆ་ཐོགས་པ་ཡི། །དགེ་སློང་དེ་ཚེ་ལུས་ནི་ཞུམ་གྱུར་ནས། །ཚུར་ཡང་དེ་ནས་ཉེ་བར་འོང་མ་ནུས། །སྐྲག་ཅིང་ཤིན་ཏུ་ངོ་མཚར་ཆེན་པོར་གྱུར། །སུ་དག་ཐུབ་དབང་ལ་ནི་དད་མོས་ཤིང་། །གང་
དག་སྟོང་པ་ཞི་བ་འདོད་པ་རྣམས། །དེ་དག་ཨ་ལ་ལ་སྟོང་བརྗོད་ནས་སུ། །རས་བཅོས་བརྒྱ་ཡིས་དགེ་སློང་མངོན་པར་གཡོགས། །དགེ་སློང་དེ་ནི་དེ་ལ་བྱམས་བསྐྱེད་ནས། །སེམས་ཅན་སུ་དག་ང་ལ་སྡང་བྱེད་པ། །དེ་དག་ཕྱིར་ནི་བྱང་ཆུབ་བདག་སྤྱོད་ཅེས། །སྐྱེ་བོ་ཐམས་ཅད་ཀྱི་ཡང་མདུན་དུ་སྨྲ། །དེས་ནི་
ལོ་ཡང་བརྒྱད་ཅུ་མི་ཉུང་བར། །སྟོང་པ་རྒྱལ་བ་རྣམས་ཀྱི་མཛོད་བཤད་དེ། །ཕྱིར་རྒོལ་བ་ཡང་དགེ་སློང་སྟོང་དག་བྱུང་། །དེ་དག་རྒྱལ་པོའི་བུ་ཡིས་ཕྱིར་བཟློག་བྱས། །དེ་ཡང་དེ་ཚེ་ཡོངས་སུ་བརྙས་གྱུར་ཏེ། །དེ་ཡི་དགེ་སློང་དག་ཀྱང་ཉུང་བར་གྱུར། །དེ་ཚེ་མི་སྙན་པ་ཡི་ཚིག་ཐོས་ཀྱང་། །

བཟོད་པའི་སྟོབས་ལས་ནམ་ཡང་ཉམས་མ་གྱུར། །དེ་ནི་གཞན་གྱི་དུས་སུ་གྱུར་པའི་ཚེ། །སྲོག་ཆགས་བརྒྱ་དག་གི་ཡང་དོན་ཆེན་བྱས། །བསམ་གྱིས་མི་ཁྱབ་ཆོས་ཀྱང་རྗེས་སུ་དྲན། །བསོད་ནམས་བློ་གྲོས་དགའ་བ་ཆེན་པོ་སྐྱེས། །དེར་ཡང་རི་མོ་རྒྱ་
ཆེར་བྱས་ནས་ནི། །དགེ་སློང་དེ་ལ་བསོད་ནམས་བློ་གྲོས་སྨྲས། །བདག་གི་སློབ་དཔོན་ལ་ནི་སུ་ཡིས་ཀྱང་། །སེམས་ལ་མི་འཐད་ཅི་ཞིག་མ་བགྱིས་སམ། །དེས་སྨྲས་རྒྱལ་སྲས་གཞོན་ནུ་གསན་དུ་གསོལ། །བཟོད་པའི་སྟོབས་ཀྱིས་སངས་རྒྱས་ཡང་དག་བྱུང་། །
སུ་ཡིས་བདག་ལ་མི་སྙན་ཚིག་སྨྲས་པ། །དེ་ལ་བདག་ནི་བྱམས་པ་རྒྱ་ཡང་ཆེ། །གང་གིས་བསྐལ་པ་སྟོང་ཕྲག་བརྒྱ་དག་ཏུ། །སྔོན་གྱི་སྲིད་པ་ལ་ནི་བཟོད་བསྒོམས་པ། །དགེ་སློང་སྙན་འོད་དེ་ནི་ང་ཡིན་ཞེས། །བཅོམ་ལྡན་ཤཱཀྱ་ཐུབ་པས་ཚིག་བརྗོད་དོ། །གང་གིས་
དགེ་སློང་སྙན་འོད་བསྲུངས་པ་ཡི། །བསོད་ནམས་བློ་གྲོས་རྒྱལ་པོའི་བུ་དེ་ནི། །ཚེ་རབས་སྟོང་དུ་ང་ཡི་གྲོགས་གྱུར་ཏེ། །སངས་རྒྱས་བྱམས་པར་ངས་ནི་ལུང་བསྟན་ཏོ། །གང་གིས་སྟོན་པ་ཚོགས་ཀྱི་དབང་ཕྱུག་མཆོད། །གང་གིས་གནས་ཁང་བཟང་པོ་མཆོག་བྱས་པ། །གང་སྔོན་
མེ་ཏོག་བཟང་ཞེས་བྱ་བ་དེ། །རྐང་གཉིས་གཙོ་བོ་མི་ཡི་དབང་པོར་གྱུར། །དེ་ལྟར་བསྐལ་པ་མང་པོ་མཐའ་ཡས་པར། །རྒྱལ་བ་དག་གི་དམ་ཆོས་ངས་བཟུང་སྟེ། །ངས་སྔོན་བཟོད་པའི་སྟོབས་ཀྱང་ཡང་དག་བསྒྲུབས། །གཞོན་ནུ་ཐོས་ནས་ང་ཡི་རྗེས་སུ་སློབས། །ང་ནི་མྱ་ངན་འདས་
གྱུར་ཕྱི་མའི་ཚེ། །དམ་པའི་ཆོས་ནི་རྣམ་པར་འཇིག་པ་ན། །དགེ་སློང་མུ་སྟེགས་བློ་ལ་བརྩོན་པ་དག །དེ་དག་ང་ཡི་ཞི་བའི་ཆོས་ལ་སྤོང་། །ཁེངས་ཤིང་རྒོད་ལ་གཏུམ་ཞིང་སྤྱི་བརྟོལ་ཆེ། །སྡིག་པའི་གྲོགས་པོའི་ཟས་ལ་ཆགས་པ་དག །ཆོས་གོས་ལྷུང་བཟེད་དག་ལ་ཆགས་
ཤིང་བརྐམ། །རྙེད་ལ་གནས་ཤིང་དེ་དག་ཆོས་ལ་སྤོང་། །དེ་དག་ཡིད་གཏུམ་ཞེ་སྡང་བྱས་མི་གཟོ། །དམའ་བའི་རིགས་དང་དབུལ་བའི་རིགས་ལས་ནི། །ང་ཡི་བསྟན་པ་འདི་ལ་རབ་བྱུང་ནས། །དེ་དག་ཞི་བའི་ཆོས་འདི་སྤོང་བར་བྱེད། །བདུད་ཀྱི་བློ་ཡིས་སེམས་ཅན་མུན་གཏིབས་ཤིང་། །འདོད་

ཆགས་དབང་དུ་སོང་བས་མངོན་པར་ཆགས། །གཏི་མུག་དབང་གིས་བྱིས་པ་རྨོངས་པས་ན། །དེ་དག་སྟོང་པ་ཞི་བའི་ཆོས་མི་འདོད། །དགེ་སློང་དགེ་སློང་མ་དང་ཁྱིམ་པ་རྣམས། །སྡིག་པའི་བློ་ཡིས་འཛིན་བཅུག་རྨོངས་བྱས་ཏེ། །དེ་དག་དབང་དུ་རྟག་པར་སོང་གྱུར་པས། །ཕྱི་མའི་
དུས་ལ་བྱང་ཆུབ་སྤོང་བར་བྱེད། །ང་ཡི་ཚིག་འདི་གཞོན་ནུ་ཐོས་ནས་སུ། །དགེ་སློང་དགོན་པ་པ་དག་རྟག་ཏུ་སྟེན། །སུ་དག་སྟོང་པ་ཞི་ལ་དགའ་བ་ནི། །དེ་དག་རྒྱལ་བའི་ཆོས་འདི་བཟུང་བ་ཡིན། །སུ་དག་ཏིང་འཛིན་འདི་ནི་འཛིན་གྱུར་པ། །དེ་དག་ང་ཡི་བསྟན་ལ་རབ་བྱུང་ཞིང་། །
དགེ་སློང་བསྙེན་རྫོགས་གསོ་སྦྱོང་ལས་རྣམས་བྱས། །ཟས་ལ་མི་ཆགས་མི་བརྐམ་ཟ་བ་ཡིན། །ལུས་དང་སྲོག་ལ་ལྟ་བ་རབ་སྤངས་ལ། །སྟོང་པ་ཤིན་ཏུ་ཞི་བ་སྒོམ་པར་གྱིས། །བརྩོན་ཞིང་རབ་ཏུ་བརྩོན་པའི་ཡིད་ཀྱིས་ཀྱང་། །རི་དགས་བཞིན་དུ་དགོན་པར་གནས་པར་གྱིས། །
རྒྱལ་བ་དག་ལ་རྟག་ཏུ་མཆོད་པ་གྱིས། །གདུགས་དང་རྒྱལ་མཚན་བསྒྲེང་བ་གནས་ཁང་གིས། །བདེ་བར་གཤེགས་པའི་མཆོད་རྟེན་མཆོད་པར་གྱིས། །ཏིང་འཛིན་འདི་ནི་མྱུར་དུ་ཐོབ་པར་འགྱུར། །བྱང་ཆུབ་ཕྱིར་ནི་སེམས་ཀྱང་སྐྱེད་གྱིས་ལ། །བདེ་བར་གཤེགས་པ་རྣམས་ཀྱི་མཆོད་
རྟེན་དག །གསེར་གྱིས་བརྒྱན་ཅིང་དངུལ་གྱིས་བསྐུས་པ་དང་། །རིན་ཆེན་སྣ་ཚོགས་གཟུགས་ལེགས་བྱེད་དུ་ཆུག །བྱང་ཆུབ་ཕྱིར་ནི་ཡི་དམ་བཅའ་གྱིས་ལ། །འཇིག་རྟེན་མཆོད་པ་བཟང་པོ་ཇི་སྙེད་པ། །ལྷ་དང་མི་ཡི་དགའ་བར་འགྱུར་བ་རྣམས། ཐམས་ཅད་ཚོལ་ལ་སངས་རྒྱས་
མཆོད་པ་གྱིས། །ཆོས་ཉིད་དུ་ཡང་མི་དབང་ཐམས་ཅད་ལྟོས། །ཕྱོགས་བཅུའི་འཇིག་རྟེན་དག་ན་གང་བཞུགས་དང་། །རྒྱལ་བ་མྱ་ངན་འདས་པ་ཀུན་སྣང་སྟེ། །ཆོས་ཉིད་ཀྱིས་ནི་སངས་རྒྱས་མངོན་སུམ་བཞུགས། །གཏོང་བ་ཀུན་ལ་ཤིན་ཏུ་མོས་པར་གྱིས། །ཚུལ་ཁྲིམས་དག་པར་གྱུར་
ཅིང་བརྟན་པའི་སེམས། །བཟོད་ལ་དགའ་ཞིང་རྟག་ཏུ་བྱམས་ལ་དགའ། །ཆོས་རྣམས་ཐམས་ཅད་སྟོང་པར་ཤེས་པར་གྱིས། །མ་ཞུམ་མ་འགོང་བརྩོན་འགྲུས་རབ་སྐྱེད་ལ། །བསམ་གཏན་དགའ་ཞིང་རབ་ཏུ་དབེན་ལ་མོས། །ཤེས་རབ་རྣམ་དག་ཤེས་རབ་རབ་ཤེས་ཀྱིས། །རིང་པོར་

མི་ཐོགས་སྙིང་རྗེ་ལྡན་པར་འགྱུར། །མི་གཙང་བས་ནི་འདོད་ཆགས་རྟག་ཞི་གྱིས། །བཟོད་པའི་སྟོབས་ཀྱིས་ཞེ་སྡང་ཚར་ཆོད་ཅིག །ཤེས་རབ་སྟོབས་ཀྱིས་གཏི་མུག་བསལ་བར་གྱིས། །རྒྱལ་བས་བསྔགས་པའི་བྱང་ཆུབ་ཐོབ་པར་འགྱུར། །ལུས་ནི་སྙིང་པོ་མེད་
ཅིང་དབུ་བ་འདྲ། །སྡུག་བསྔལ་རུལ་བ་དྲི་ང་བསྒོམ་པར་གྱིས། །ཕུང་པོ་ཐམས་ཅད་གསོག་ཏུ་ཤེས་པར་གྱིས། །ཡེ་ཤེས་བླ་མེད་མྱུར་དུ་ཐོབ་པར་འགྱུར། །བདག་དང་སྐྱེས་བུ་དང་ནི་སྲོག་རྣམས་སུ། །སྡིག་པའི་ལྟ་བ་ནམ་ཡང་མ་འཛིན་ཅིག །ཆོས་རྣམས་ཐམས་ཅད་སྟོང་པར་
ཤེས་པར་གྱིས། །བླ་མེད་བྱང་ཆུབ་མྱུར་དུ་རེག་པར་འགྱུར། །རྙེད་ལ་ཆགས་པར་ནམ་ཡང་མ་བྱེད་ཅིག །ཟས་རྣམས་མ་རྙེད་ན་ཡང་གདུང་མ་བྱེད། །བསྟོད་དང་སྨད་པ་དག་གིས་མ་གཡོ་བར། །རི་རབ་བཞིན་དུ་རབ་ཏུ་མི་འགུལ་གྱིས། །གུས་པ་སྐྱེད་ལ་ཆོས་རྣམས་བཙལ་བར་
གྱིས། །ཐོས་ནས་དེ་ཚེ་དེ་ཡང་མྱོང་བར་གྱིས། །རྒྱལ་བ་ཀུན་གྱི་སྤྱོད་ཡུལ་གནས་གྱིས་དང་། །བདེ་བ་ཅན་གྱི་ཞིང་དུ་མྱུར་དུ་འགྲོ། །འགྲོ་བ་ཀུན་ལ་སེམས་ཀྱང་མཉམ་གྱིས་ལ། །སྡུག་དང་མི་སྡུག་པ་ཡི་སེམས་མ་བྱེད། །རྙེད་དང་སྙན་པ་དག་ནི་མ་ཚོལ་ཅིག །མྱུར་དུ་སངས་
རྒྱས་ཐུབ་པའི་དབང་པོར་འགྱུར། །ཡོན་ཏན་གང་ཐོས་སེམས་ཅན་དད་འགྱུར་ཞིང་། །སངས་རྒྱས་ཡོན་ཏན་དག་ལ་མོས་སྐྱེད་པ། །ཡང་དག་ཡོན་ཏན་ངེས་པའི་ཚིག་རྣམས་ཀྱིས། །སངས་རྒྱས་ཡོན་ཏན་རྟག་ཏུ་བཤད་པར་གྱིས། །རྟག་ཏུ་སློབ་དཔོན་དང་ནི་ཕ་དང་མ། །དེ་བཞིན་
འགྲོ་བ་ཀུན་ལ་གུས་པར་གྱིས། །ང་རྒྱལ་དག་གི་དབང་དུ་མ་འགྲོ་ཤིག །སུམ་ཅུ་རྩ་གཉིས་མཚན་རྣམས་ཐོབ་པར་འགྱུར། །འདུ་འཛི་དག་ནི་མ་ལུས་རྣམ་སྤངས་ནས། །རྟག་ཏུ་དབེན་པ་ལ་ཡང་དགའ་བར་གྱིས། །དེས་ཤིང་བརྟུལ་ཞུགས་བཟང་ལ་རྟག་ཏུ་ཞི། །བདག་ལ་ཕན་ཞིང་
སེམས་ཅན་གཞན་ལ་ཕན། །བྱམས་པ་དང་ནི་སྙིང་རྗེ་བསྒོམ་པར་གྱིས། །དགའ་དང་བཏང་སྙོམས་ལ་ཡང་རྟག་མོས་གྱིས། །རྟག་ཏུ་རྒྱལ་བའི་བསྟན་པ་རྗེས་སུ་ལྟོས། །འཇིག་རྟེན་དུ་ཡང་མྱུར་དུ་ཕན་བྱེད་འགྱུར། །སྡིག་པའི་གྲོགས་པོ་ནམ་ཡང་མ་སྟེན་པར། །གྲོགས་པོ་གང་དག་

རྒྱ་ཆེར་སྟེན་པར་གྱིས། །སུ་དག་སྟོང་པ་ཞི་བ་འདི་འདོད་པ། །དེ་དག་བྱང་ཆུབ་མཆོག་ལ་ཞུགས་པ་ཡིན། །ཉན་ཐོས་སར་ནི་ནམ་ཡང་མ་སློབ་ཤིག །དེ་ཡི་སྤྱོད་ལའང་དགའ་བར་མ་བྱེད་ཅིག །སངས་རྒྱས་ཡོན་ཏན་དག་ལས་སེམས་མ་བཏང་། །མྱུར་དུ་སངས་རྒྱས་རྒྱལ་བའི་
དབང་པོར་འགྱུར། །བདེན་ཚིག་དམ་པ་རྟག་ཏུ་སྨྲ་བར་གྱིས། །བརྫུན་རྣམས་དང་ནི་རྩུབ་པོའི་ཚིག་མ་སྨྲ། །རྟག་ཏུ་འཇམ་ཞིང་དགའ་བ་སྨྲ་བར་གྱིས། །འཇིག་རྟེན་སློབ་དཔོན་དག་གི་གསུང་ཐོབ་འགྱུར། །ལུས་དང་སྲོག་ལ་ཆགས་པར་མ་བྱེད་ཅིག །གཞན་ལ་སྨོད་ཅིང་བདག་
ལ་སྟོད་མ་བྱེད། །བདག་གི་ཡོན་ཏན་ཡང་དག་སྒྲུབ་གྱིས་ལ། །གཞན་གྱི་སྤྱོད་པ་དག་ལ་བཏང་སྙོམས་གྱིས། །རྣམ་ཐར་སྟོང་ལ་རྟག་ཏུ་དགའ་བར་གྱིས། །འགྲོ་བ་རྣམས་སུ་སྨོན་པར་མ་བྱེད་ཅིག །མཚན་མ་ཐམས་ཅད་མ་ལུས་རྣམ་པར་སྤོངས། །རྟག་ཏུ་མཚན་མ་མེད་ལ་གནས་
པར་གྱིས། །དུས་ཀུན་ཏུ་ནི་མཐའ་ཡང་རྣམ་པར་སྤོངས། །རྟག་དང་ཆད་ལ་གནས་པར་མ་གྱུར་ཅིག །ཐམས་ཅད་རྐྱེན་ལས་གྱུར་པར་རྟག་རིག་གྱིས། །དེ་ལྟར་བྱས་ན་སྟོན་པ་ཇི་བཞིན་འགྱུར། །འདོད་པའི་དགའ་བ་རྣམས་ལ་དགའ་བ་སྤོངས། །ཞེ་སྡང་ཐ་བ་དྲི་མ་རྣམ་སྤངས་
ཤིང་། །གཏི་མུག་མུན་པ་ཐམས་ཅད་རྣམ་བསལ་ན། །ཞི་བར་དགའ་བའི་མི་ཡི་སེང་གེར་འགྱུར། །རྟག་པ་མི་རྟག་པར་ཡང་རྟག་ཏུ་ལྟོས། །སྲིད་པ་ཀུན་གྱི་སྡུག་བསྔལ་བདེ་གྲོལ་ཞིང་། །བདག་དང་གཙང་ལ་མི་གཙང་བདག་མེད་པར། །བསྒོམ་པར་བྱས་ན་མི་ཡི་དབང་པོར་
འགྱུར། །འཇིག་རྟེན་སྒྲོན་མཛད་རྒྱལ་བ་རྣམས་ཀྱིས་ནི། །གང་ལ་ཚུལ་བཞིན་ཆོས་རྣམས་རབ་བསྟན་པ། །དེ་ཡིས་བདུད་ཀྱི་སྟོབས་རྣམས་བཅོམ་ནས་སུ། །བླ་ན་མེད་པའི་བྱང་ཆུབ་ཡངས་པ་ཐོབ། །ཡོན་ཏན་ཇི་སྙེད་ངས་བཤད་ཐོབ་བྱས་ཏེ། །ཉེས་པ་བརྒྱ་དག་ངས་ནི་གང་བསྟན་
པ། །རྣམ་པར་སྤངས་ནས་སློབ་པར་བྱེད་པ་ནི། །གཞོན་ནུ་དེ་ཚེ་འདིར་ཡང་སངས་རྒྱས་འགྱུར། །སྙན་པའི་འོད་ཀྱི་ལེའུ་སྟེ་སུམ་ཅུ་རྩ་བརྒྱད་པའོ།། །།འཕགས་པ་ཏིང་ངེ་འཛིན་གྱི་རྒྱལ་པོའི་མདོ། བམ་པོ་བཅུ་བཞི་པ། དེ་ནས་ཡང་བཅོམ་ལྡན་འདས་ཀྱིས་

ཟླ་འོད་གཞོན་ནུར་གྱུར་པ་ལ་བཀའ་སྩལ་པ། དེ་ལྟ་བས་ན་གཞོན་ནུ་ལུས་ཀྱི་སྡོམ་པས་བསྡམ་པར་བྱའོ་ཞེས་གཞོན་ནུ་དེ་ལྟར་བསླབ་པར་བྱའོ། །གཞོན་ནུ་དེ་ལ་ལུས་ཀྱི་སྡོམ་པ་གང་ཞེ་ན། །ལུས་ཀྱི་སྡོམ་པ་གང་དང་ལྡན་པས། བྱང་ཆུབ་སེམས་དཔའ་སེམས་
དཔའ་ཆེན་པོ་ཆོས་ཐམས་ཅད་ལ་ཆགས་པ་མེད་པར་འགྱུར་བ་དེ་ནི་ལུས་ཀྱི་སྡོམ་པ་ཞེས་བྱའོ། །གཞོན་ནུ་ལུས་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་འཐོབ་པར་འགྱུར་བ་དེ་ནི་ལུས་ཀྱི་སྡོམ་པ་ཞེས་བྱའོ། །ལུས་
ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་དཔེ་བྱད་བཟང་པོ་བརྒྱད་ཅུ་འཐོབ་པར་འགྱུར་བ་དེ་ནི་ལུས་ཀྱི་སྡོམ་པ་ཞེས་བྱའོ། །ལུས་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་སྟོབས་བཅུ་འཐོབ་པ་དང་། མི་འཇིགས་པ་བཞི་དང་།
སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་འཐོབ་པར་འགྱུར་བ་འདི་ནི། གཞོན་ནུ་ལུས་ཀྱི་སྡོམ་པ་ཞེས་བྱའོ། །ལུས་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་ཐར་པའི་སྒོ་གསུམ་འཐོབ་སྟེ། །གསུམ་གང་ཞེ་ན་འདི་ལྟ་སྟེ། སྟོང་པ་ཉིད་དང་།
མཚན་མ་མེད་པ་དང་། སྨོན་པ་མེད་པ་དང་། རྣམ་པར་ཐར་པའི་སྒོ་འདི་གསུམ་འཐོབ་པར་འགྱུར་བ་འདི་ནི་གཞོན་ནུ་ལུས་ཀྱི་སྡོམ་པ་ཞེས་བྱའོ། །ལུས་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་ཚངས་པའི་གནས་པ་ཆེན་པོ་བཞི་འཐོབ་སྟེ། བཞི་
གང་ཞེ་ན། འདི་ལྟ་སྟེ། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། དགའ་བ་ཆེན་པོ་དང་། བཏང་སྙོམས་ཆེན་པོ་དང་། ཚངས་པའི་གནས་པ་ཆེན་པོ་འདི་བཞི་འཐོབ་པར་འགྱུར་བ་དེ་ནི་གཞོན་ནུ་ལུས་ཀྱི་སྡོམ་པ་ཞེས་བྱའོ། །ལུས་ཀྱི་སྡོམ་པ་གང་དང་ལྡན་པས་བྱང་
ཆུབ་སེམས་དཔའ་སེམས་དཔའ་ཆེན་པོ་སོ་སོ་ཡང་དག་པར་རིག་པ་བཞི་འཐོབ་སྟེ། བཞི་གང་ཞེ་ན། འདི་ལྟ་སྟེ། དོན་སོ་སོ་ཡང་དག་པར་རིག་པ་དང་། ཆོས་སོ་སོ་ཡང་དག་པར་རིག་པ་དང་། ངེས་པའི་ཚིག་སོ་སོ་ཡང་དག་པར་རིག་པ་དང་། སྤོབས་པ་སོ་སོ་ཡང་དག་པར་

རིག་པ་དང་། སོ་སོ་ཡང་དག་པར་རིག་པ་འདི་བཞི་འཐོབ་པར་འགྱུར་བ་དེ་ནི་གཞོན་ནུ་ལུས་ཀྱི་སྡོམ་པ་ཞེས་བྱའོ། །ལུས་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་འཐོབ་སྟེ། སུམ་ཅུ་རྩ་བདུན་གང་ཞེ་ན།
འདི་ལྟ་སྟེ། དྲན་པ་ཉེ་བར་གཞག་པ་བཞི་དང་། ཡང་དག་པར་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་ལག་བརྒྱད་པ་དང་། བྱང་ཆུབ་ཀྱི་ཕྱོགས་ཀྱི་ཆོས་སུམ་
ཅུ་རྩ་བདུན་པོ་འདི་དག་འཐོབ་པར་འགྱུར་བ་དེ་ནི་ལུས་ཀྱི་སྡོམ་པ་ཞེས་བྱའོ། །ལུས་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་ལ་གནས་པ་ཐོབ་པ་དང་། བཏང་སྙོམས་ཆེན་པོ་ལ་གནས་པ་འཐོབ་པ་དང་། བདེ་བའི་རྣམ་པར་རྟོག་པ་འཐོབ་པ་
དང་། རབ་ཏུ་དབེན་པའི་ཆོས་རྣམས་འཐོབ་པར་འགྱུར་བ་དེ་ནི་གཞོན་ནུ་ལུས་ཀྱི་སྡོམ་པ་ཞེས་བྱའོ། །གཞན་ཡང་གཞོན་ནུ་ལུས་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་སྲོག་གཅོད་པ་སྤོང་བར་འགྱུར་བ་དང་། མ་བྱིན་པར་ལེན་པ་དང་། མི་ཚངས་
པར་སྤྱོད་པ་དང་། བརྫུན་དུ་སྨྲ་བ་དང་། ཕྲ་མའི་ཚིག་དང་། ཚིག་རྩུབ་པོ་དང་། ཁྱལ་པར་སྨྲ་བ་དང་། བརྣབ་སེམས་དང་། གནོད་སེམས་དང་། ལོག་པར་ལྟ་བ་དང་། སྲང་ལ་གཡོ་བྱེད་པ་དང་། ཚད་ལ་གཡོ་བྱེད་པ་དང་། ནོར་ལ་གཡོ་བྱེད་པ་དང་། གཟུང་བ་དང་།
བཅིང་བ་དང་། གཙེ་བ་དང་། བརྡེག་པ་དང་། བསྡིགས་པ་དང་། གཅད་པ་དང་། དབུག་པ་དང་། ཞེ་ལ་གནོན་པ་དང་། ཆགས་པ་དང་། སེར་སྣ་མ་སྤངས་པར་འགྱུར་བ་དང་། ལག་པ་རྒོད་པ་དང་། རྐང་པ་རྒོད་པ་དང་། རྐང་ལག་མ་བསྡམས་པ་དང་། དེའི་ལུས་
དང་ངག་དང་ཡིད་ཀྱི་གནས་ངན་ལེན་སྤངས་ཤིང་ཏ་ལའི་མགོ་བཅད་པ་བཞིན་དུ་མ་འོངས་པའི་དུས་ན་མི་སྐྱེ་བའི་ཆོས་ཅན་དུ་འགྱུར་བ་དེ་ནི་གཞོན་ནུ་དེའི་ལུས་ཀྱི་སྡོམ་པ་ཞེས་བྱའོ། །གཞོན་ནུ་དེ་ལྟ་བས་ན་རྣམ་གྲངས་འདིས་ཀྱང་འདི་ལྟར་རིག་པར་བྱ་སྟེ། གཞོན་ནུ་སྔོན་བྱུང་བ་འདས་པའི་དུས་ན་

བསྐལ་པ་གྲངས་མེད་པ་བས་ཀྱང་ཆེས་གྲངས་མེད་པ། ཡངས་པ། ཚད་མེད་པ། བསམ་གྱིས་མི་ཁྱབ་པ་དེའི་ཚེ་དེའི་དུས་ན་ཡེ་ཤེས་སྣང་བ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་
པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། གཞོན་ནུ་དེའི་ཚེ་དེའི་དུས་ན་བཅོམ་ལྡན་འདས་ཡེ་ཤེས་སྣང་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་དེའི་ཚེའི་ཚད་ནི་ལོ་བྱེ་བ་ཕྲག་དྲུག་ཅུར་གྱུར་ཏོ། །དགྲ་བཅོམ་པ་བྱེ་བ་ཕྲག་དྲུག་ཅུའི་ཉན་ཐོས་ཀྱི་དགེ་འདུན་བྱུང་ངོ་། །བྱང་ཆུབ་སེམས་དཔའ་སེམས་དཔའ་ཆེན་པོ་དམ་པའི་ཆོས་ཡོངས་སུ་འཛིན་པ་ཡང་དཔག་ཏུ་མེད་པ་བྱུང་ངོ་། །གཞོན་ནུ་དེའི་ཚེ་དེའི་དུས་ན་
རྒྱལ་པོ་ཁྱད་པར་སེམས་ཞེས་བྱ་བ་ཞིག་བྱུང་སྟེ། རྒྱལ་པོ་ཁྱད་པར་སེམས་དེ་སྲོག་ཆགས་བྱེ་བ་ཕྲག་བརྒྱད་ཅུ་དང་ལྷན་ཅིག་ཏུ་དེ་བཞིན་གཤེགས་པའི་དྲུང་དུ་འོངས་སོ། །འོངས་ནས་དེ་བཞིན་གཤེགས་པའི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་
བསྐོར་བ་བྱས་ནས་ཕྱོགས་གཅིག་ཏུ་འདུག་གོ། །རྒྱལ་པོ་ཁྱད་པར་སེམས་ཕྱོགས་གཅིག་ཏུ་འདུག་ནས་དེ་བཞིན་གཤེགས་པ་ལ་བསྙེན་བཀུར་བྱེད་དོ། །དེ་ནས་ཡེ་ཤེས་སྣང་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་རྒྱལ་པོ་ཁྱད་པར་སེམས་འཁོར་
དང་བཅས་པའི་ལྷག་པའི་བསམ་པ་མཁྱེན་ནས་ཆོས་ཀྱི་རྣམ་གྲངས་འདི་ལས་ལུས་ཀྱི་སྡོམ་པའི་ཏིང་ངེ་འཛིན་གྱི་སྒོར་འཇུག་པའི་ཚིགས་སུ་བཅད་པའི་དབྱངས་ཀྱིས་ཡང་དག་པར་རབ་ཏུ་བསྟན་ཏོ། །ཇི་ལྟར་བར་སྣང་ནམ་མཁའ་རྣམ་དག་སྟེ། །ཤིན་ཏུ་དག་ཅིང་རང་བཞིན་འོད་གསལ་བ། །
དེ་བཞིན་ལུས་ཀྱི་སྡོམ་པ་དག་པ་ཡང་། །དབྱངས་ཀྱིས་བསྟན་པར་ནམ་ཡང་ནུས་མི་འགྱུར། །ལུས་ཀྱི་སྡོམ་པ་འདི་ནི་དབེན་ཞིང་སྟོང་། །འདི་འདྲ་གཉིས་པོ་ལུས་ཀྱི་མཚན་ཉིད་དེ། །དེ་དག་མཚན་ཉིད་མེད་པ་བར་སྣང་བཞིན། །ལུས་ཀྱི་སྡོམ་པ་དེ་ཡི་མཚན་ཉིད་བཤད། །སྡོམ་པའི་

མཚན་ཉིད་དེ་འདྲར་སུས་ཤེས་པ། །དེ་ལ་སྡོམ་པ་ནམ་ཡང་མེད་མི་འགྱུར། །མི་འཇུག་དེ་ཡི་སྤྱོད་ཡུལ་ག་ལ་ཡིན། །ཟག་པ་མེད་པ་ལ་ནི་སྐྱེ་བ་མེད། །གཟུགས་དང་ལོངས་སྤྱོད་ལ་ནི་སྲིད་བསྐྱེད་ནས། །འདོད་པ་དག་ལ་སྟེན་པས་མི་ནུས་ཏེ། །སྲིད་པ་དག་གི་ཉེས་པ་མི་ཤེས་
པས། །ལུས་ཀྱི་སྡོམ་པ་འདི་ནི་ཤེས་མི་ནུས། །ཟག་མེད་སྡོམ་པ་གང་གིས་རབ་ཤེས་པ། །དེ་ལ་སྐྱེ་བ་ནམ་ཡང་ཡོད་མི་འགྱུར། །དགྲ་བཅོམ་པ་ཡི་ཆོས་ནི་དེ་འདྲ་སྟེ། །མུ་སྟེགས་ཅན་གྱིས་ཤེས་པར་སླ་མ་ཡིན། །གང་དག་ཁམས་གསུམ་ཀུན་ལ་ཡིད་སྐྲག་ཅིང་། །འདོད་
པའི་ལོངས་སྤྱོད་ལ་ཡང་འདོད་མི་སྐྱེད། །རྒྱལ་པོའི་སྲིད་དང་ལོངས་སྤྱོད་ཡོང་མི་འདོད། །དེ་དག་ལུས་ཀྱི་སྡོམ་པ་འདི་འདྲ་ཤེས། །ལུས་ཀྱི་སྡོམ་པ་འདི་ནི་དོན་ཅེས་བྱ། །དོན་ནི་སྒྲ་ཡིས་བསྟན་པར་མི་ནུས་ཏེ། །འདི་འདྲའི་ཆོས་ཀྱི་ཚུལ་ནི་གང་ཤེས་པ། །དེ་ནི་སྡོམ་པ་འདི་ལ་གནས་
པ་ཡིན། །དོན་ལ་ཞུགས་ལ་ངས་ནི་དོན་བསྟན་ཏེ། །མཁས་པ་སུ་དག་དོན་གྱི་ཚུལ་ལ་མོས། །དོན་མེད་རྣམ་སྤངས་དོན་ལ་གནས་པ་རྣམས། །དེ་དག་སྡོམ་ལ་རྟག་ཏུ་གནས་པ་ཡིན། །རྒྱལ་བའི་བསྟན་ལ་དོན་དུ་གང་བརྗོད་དང་། །ཇི་ལྟ་བུར་ནི་དོན་ཡིན་རྣམ་རིག་སྟེ། །དོན་ཚུལ་རང་
བཞིན་གང་གིས་ཤེས་པ་ནི། །ལུས་ཀྱི་སྡོམ་པ་ལ་ཡང་གནས་ཞེས་བྱ། །གང་གིས་བདག་མེད་གསོག་དང་སྟོང་ཉིད་དང་། །མཚན་མ་མེད་པར་རྣམ་པར་རིག་གྱུར་པ། །དེ་ལ་ནམ་ཡང་སྡོམ་པ་མེད་མི་འགྱུར། །འདི་ལྟར་དེས་ནི་ཡང་དག་ངེས་ལ་བསླབས། །དངོས་པོ་དག་ནི་དངོས་མེད་གང་རིག་པ། །
དེ་ནི་དངོས་པོ་དག་ལ་ཡོང་མི་ཆགས། །དངོས་པོ་ཀུན་ལ་ནམ་ཡང་མི་ཆགས་པ། །དེ་ནི་མཚན་མེད་ཏིང་འཛིན་རེག་པར་འགྱུར། །ངོ་བོ་ཉིད་སྟོང་རང་བཞིན་འོད་གསལ་བ། །བདག་མེད་ཆོས་རྣམས་དེ་ཡིས་རྣམ་རིག་ན། །དེ་ལ་ནམ་ཡང་སྡོམ་པ་མེད་མི་འགྱུར། །འདི་ལྟར་དེས་ནི་ཡང་དག་
ངེས་པར་རྟོགས། །གང་གིས་ཕུང་པོ་ལྔ་རྣམས་སྟོང་པར་ཤེས། །རང་བཞིན་སྟོང་ཞིང་བདག་མེད་རིག་ན་ནི། །ལུས་ཀྱིས་ལས་གང་ཡང་དག་སྤྱོད་བྱེད་པ། །དེ་ལ་ནམ་ཡང་སྡོམ་པ་མེད་མི་འགྱུར། །མཚན་མ་དག་ལ་འཛིན་ཅིང་མ་བསྡམས་ཏེ། །ཁོར་མོར་བདག་ཏུ་འདུ་ཤེས་རབ་གནས་པ། །

གཟུགས་ལ་ཆགས་པར་གྱུར་པའི་སྐྱེ་བོ་དག །མ་བསྡམས་པ་ཡི་འདོད་ཆགས་རབ་ཏུ་ལྡང་། །གང་རྣམས་ཡང་དག་མཐའ་ལ་བསླབས་གྱུར་ཅིང་། །སྟོང་པ་རྟོགས་པར་རིག་པ་དེས་པ་དག །སྡོམ་མེད་གང་གིས་ངན་འགྲོར་འགྲོ་བ་ཡིས། །འདོད་ཆགས་དེ་ལ་ནམ་
ཡང་ལྡང་བ་མེད། །ཇི་ལྟར་རི་རབ་དག་ནི་ཆེན་པོ་ལ། །གྲོག་མ་ཀུན་གྱིས་གཡོས་ཤིང་འགུལ་མི་ནུས། །དེ་བཞིན་མཁས་པ་ཡང་དག་ཚུལ་བསླབས་པས། །ལྷ་ཡི་གཟུགས་ཀྱིས་ཀྱང་ནི་དེ་མི་གཡོས། །ནམ་མཁའ་ལ་ནི་རི་མོར་བྲི་ནུས་ཤིང་། །ལག་པས་ནམ་མཁའ་གཟུང་དུ་རུང་
གྱུར་ཀྱང་། །འདོད་ཆགས་ཞེ་སྡང་བདུད་རྣམས་བྱེ་བ་ཡིས། །དེ་ལ་རྣམ་པར་བསྐྱོད་པར་ཡོང་མི་ནུས། །ལ་ལས་བྲག་ཅ་དག་ནི་གཟུང་ནུས་ཤིང་། །ཆུ་ཡི་སྟེང་ན་རྡོ་ཡང་འཕྱོ་གྱུར་ཀྱང་། །ལུས་ཀྱི་སྡོམ་པ་འདི་འདྲ་སུས་བསླབས་པ། །དེ་ཡི་བསམ་པ་དག་ཀྱང་བལྟར་མི་ནུས། །
འཇིག་རྟེན་ཀུན་ན་སྒྲ་མང་ཇི་སྙེད་པ། །གཟུང་སྟེ་སྒྲོམ་དུ་གཞུག་པར་ནུས་གྱུར་ཀྱང་། །ལུས་ཀྱི་སྡོམ་པའི་གནས་དང་མི་གནས་པ། །སུས་ཀྱང་རྣམ་པར་རིག་པར་བྱེད་མི་ནུས། །སྤྲིན་ལས་སྒྲ་བསྒྲགས་གློག་རྣམས་རྒྱུ་བ་དང་། །ཉི་མའི་འཁོར་ལོས་འོད་ཟེར་གཟུང་ནུས་ཀྱང་། །ལུས་ཀྱི་
སྡོམ་པ་འདི་ལ་སུས་བསླབས་པ། །དེ་ཡི་རང་བཞིན་ཤེས་པར་ནུས་མི་འགྱུར། །རླུང་གི་དཀྱིལ་འཁོར་ཕྱོགས་བཞིར་ལྡང་བ་ནི། །རྒྱ་དང་སྙི་ཡིས་གཟུང་བར་ནུས་གྱུར་ཀྱང་། །ལུས་ཀྱི་སྡོམ་པ་འདི་ལ་གང་གནས་པ། །དེ་ཡི་ལུས་ནི་ནམས་ཀྱང་ཤེས་མི་ནུས། །སྲོག་ཆགས་ཀུན་གྱི་
སྤྱོད་ཡུལ་དེ་མ་ཡིན། །སེམས་སྡོམ་གང་ལ་མཁས་པ་དེ་གནས་ཤིང་། །སྤྱོད་ཡུལ་གང་གནས་ལུས་ཀྱི་སྡོམ་པ་ནི། །འཇིག་རྟེན་ཆོས་ཀྱིས་མི་གོས་ནམ་མཁའ་བཞིན། །ཕྱོགས་བཞིར་ནམ་མཁའ་ལ་ནི་རྒྱུ་བ་ཡིས། །སྲོག་ཆགས་ཀུན་རྗེས་སོ་སོར་བལྟ་ནུས་ཀྱང་། །དེ་ཡི་ལུས་
དང་སེམས་ཀྱི་སྤྱོད་ཡུལ་ལ། །ཚད་གཟུང་བར་ནི་སུ་ཡང་ནུས་པ་མེད། །ལུས་ཀྱི་སྡོམ་པ་འདི་ལ་གང་གནས་པའི། །ཉོན་མོངས་རྣམ་མང་ཐམས་ཅད་མེད་པར་འགྱུར། །དེ་ཡི་ཉོན་མོངས་ཉེ་བ་རབ་ཏུ་སྤངས། །འདི་ལྟར་དེས་ནི་ལུས་ཀྱི་སྡོམ་པ་བསླབས། །དེ་ལ་མཚོན་ཆ་དང་ནི་

མེས་མི་ཚུགས། །དེ་ལྟར་དེ་ཡི་ལུས་ནི་གཟུང་དུ་མེད། །དེ་ནི་ཞི་བ་རབ་ཞི་ཏིང་འཛིན་གནས། །འདི་ལྟར་དེས་ནི་ལུས་ཀྱི་སྡོམ་པ་བསླབས། །དེ་ལྟར་གནས་པ་འཇིགས་མེད་སྐྲག་པ་མེད། །དེ་ལ་འཁྲུག་སེམས་མི་སྐྱེ་ཕྲག་དོག་མེད། །ལུས་ཀྱི་སྡོམ་པ་འདི་འདྲ་སུས་བསླབས་པ། །
དེ་ནི་གཙེ་བ་ཀུན་ལས་ཐར་བ་ཡིན། དུག་དང་མཚོན་གྱིས་ནམ་ཡང་མི་འཇིགས་ཤིང་། །མེ་དང་ཆུ་ཡི་ནང་ནའང་འཇིགས་པ་མེད། །ལུས་ཀྱི་སྡོམ་པ་འདི་འདྲ་སུས་བསླབས་པ། །དེ་ནི་གཙེ་བ་ཀུན་ལས་ཐར་བ་ཡིན། །ཆོམ་རྐུན་གཡོན་ཅན་སྡིག་པ་བྱེད་པ་དང་། །སྦྲུལ་གདུག་
ནང་དུ་སོང་ཡང་འཇིགས་མེད་དེ། །འདི་ལྟར་དེ་ནི་བདག་ཏུ་འདུ་ཤེས་མེད། །འདུ་ཤེས་རྣམ་པར་གྲོལ་ལ་འཇིགས་མི་འབྱུང་། །འཇིགས་ལས་རྣམ་པར་གྲོལ་བ་སྐྲག་མི་སྐྱེ། །སྐྲག་པ་མེད་ལ་གཡོ་བ་མི་འབྱུང་སྟེ། །མི་གཡོ་བ་ལ་སྐྲག་པ་ག་ལ་ཡོད། །དེ་ནི་བདུད་རྣམས་
བྱེ་བས་བསྐྱོད་མི་ནུས། །བྱང་ཆུབ་སེམས་དཔའ་རྣམས་ལ་ཕན་པའི་ཕྱིར། །སྡོམ་པ་གང་སྤྱོད་བཤད་ཅིང་རབ་བསྟན་པ། །འདི་འདྲའི་ལུས་ཀྱི་སྡོམ་པ་སུས་བསླབས་པ། །དེ་ནི་བདུད་རྣམས་བྱེ་བས་བསྐྱོད་མི་ནུས། །ཆོས་རྣམས་ཀུན་ལ་ཡེ་ཤེས་ཐོགས་པ་མེད། །དཔེ་བྱད་
བཟང་པོ་བརྒྱད་ཅུ་ཡོངས་སུ་ཚང་། །སུམ་ཅུ་རྩ་གཉིས་མཚན་གྱི་རི་མོ་དག །སྡོམ་པར་གནས་ལ་རྙེད་པར་དཀའ་མི་འགྱུར། །སངས་རྒྱས་ཆོས་རྣམས་བསམ་གྱིས་མི་ཁྱབ་ཅིང་། །ཚད་ཀྱང་མེད་པར་རྟོགས་པར་སུ་འདོད་པ། །འདི་འདྲའི་ལུས་ཀྱི་སྡོམ་པ་དེས་སློབས་ཤིག །
འཇིག་རྟེན་ཐམས་ཅད་ཀྱི་ཡང་མཆོད་རྟེན་འགྱུར། །སངས་རྒྱས་སྟོབས་བཅུ་མངའ་བ་བསམ་མི་ཁྱབ། །དྲང་སྲོང་ཆེན་པོའི་ཆོས་འདི་གང་འདོད་པ། །དེས་ནི་ལུས་ཀྱི་སྡོམ་པ་འདི་འདྲ་སློབས། །གང་སློབ་དེ་ལ་སྟོབས་རྣམས་རྙེད་མི་དཀའ། །འདི་འདྲའི་ལུས་ཀྱི་སྡོམ་ལ་གང་སློབ་པ། །
སངས་རྒྱས་ཆོས་ནི་མ་འདྲེས་བཅྭ་བརྒྱད་པོ། །རྒྱལ་བ་གང་ལ་རབ་ཏུ་གནས་པ་ཡང་། །དེ་དག་དེ་ལ་རྙེད་པར་དཀའ་མི་འགྱུར། །འདི་འདྲའི་ལུས་ཀྱི་སྡོམ་པ་གང་སློབ་པ། །དྲང་སྲོང་ཆེན་པོའི་བྱང་ཆུབ་ཡན་ལག་བདུན། །སོ་སོ་ཡང་དག་རིག་དང་རྫུ་འཕྲུལ་རྐང་། །དེ་ལ་དེ་

དག་རྙེད་པར་དཀའ་མི་འགྱུར། །ཚངས་པའི་གནས་བཞི་དང་ནི་བསམ་གཏན་དང་། །རྣམ་པར་ཐར་པའི་སྒོ་རྣམས་གང་བཤད་དང་། །བདེ་བའི་རྣམ་རྟོག་རབ་ཏུ་དབེན་པ་ཡང་། །སྡོམ་པར་གནས་པ་ལ་ནི་རྙེད་མི་དཀའ། །ལུས་ཀྱི་སྡོམ་པ་ལ་ནི་གང་གནས་པ། །
སྙིང་རྗེའི་གནས་དང་བཏང་སྙོམས་ཐོབ་པར་འགྱུར། །དེ་བཞིན་སྤྱོད་པ་འཇུག་པ་བྱམས་པའི་མཆོག །འགྲོ་བ་ཀུན་ལའང་ཕན་པའི་སེམས་སུ་འགྱུར། །དྲན་པ་ཉེར་གཞག་ཡང་དག་སྤོང་བ་དང་། །དྲང་སྲོང་ཆེན་པོའི་དབང་ལྔ་སྟོབས་ལྔ་དང་། །འཕགས་པའི་ལམ་མཆོག་
ཡན་ལག་བརྒྱད་པོ་ཡང་། །ལུས་ཀྱི་སྡོམ་པར་གནས་ལ་རྙེད་མི་དཀའ། །གཞན་ཡང་དམ་པ་སངས་རྒྱས་ཆོས་རྣམས་ནི། །བསམ་གྱིས་མི་ཁྱབ་གང་ལ་ཚད་མེད་པ། །ལུས་ཀྱི་སྡོམ་པ་འདི་འདྲ་སུས་བསླབས་པ། །དེ་ལ་ཐམས་ཅད་རྙེད་པར་དཀའ་མི་འགྱུར། །འདི་
འདྲའི་ལུས་ཀྱི་སྡོམ་པ་ཐོས་ནས་ནི། །རྒྱལ་པོ་གླང་མཆོག་ཁྱད་པར་ཐོབ་གྱུར་ཏེ། །དགའ་བ་མཚུངས་མེད་རངས་ཤིང་མགུ་བ་སྐྱེས། །རྒྱལ་བ་དེ་ཡི་བསྟན་ལ་རབ་ཏུ་བྱུང་། །རབ་ཏུ་དེ་བྱུང་ལོ་ཡང་བྱེ་ཕྲག་བཅུར། །ཚངས་པར་སྤྱོད་མཆོག་གཙང་མ་སྤྱད་པར་གྱུར། །ལྷ་
དང་བཅས་པའི་འཇིག་རྟེན་ཕན་པའི་ཕྱིར། །ཚངས་པའི་གནས་བཞི་ལ་ཡང་བསྒོམ་པ་བྱས། །ཚངས་པའི་གནས་ལ་ཤིན་ཏུ་བསྒོམ་བྱས་པས། །སངས་རྒྱས་བྱེ་བ་བརྒྱད་ཅུ་མཐོང་བར་གྱུར། །དེ་ལས་ལྷག་པར་གང་གཱའི་བྱེ་མ་སྙེད། །དེས་ནི་ཚངས་སྤྱོད་མཆོག་འདི་རབ་
ཏུ་སྤྱད། །ཐམས་ཅད་ཀྱི་ཡང་བསྟན་པར་རབ་བྱུང་སྟེ། །ཚངས་པར་སྤྱོད་པ་བཟང་ཞིང་དག་པར་སྤྱད། །མང་དུ་ཐོས་ཤིང་སྤོབས་པར་ལྡན་པ་ཡི། །དགེ་སློང་ཆོས་སྨྲ་བ་ཡང་མཆོག་ཏུ་གྱུར། །ལུས་ཀྱི་སྡོམ་པ་འདི་ནི་རབ་ཤེས་ན། །ཚུལ་ཁྲིམས་མ་དྲལ་ཚུལ་ཁྲིམས་སྐྱོན་མེད་
འགྱུར། །ཚུལ་ཁྲིམས་རྣམ་དག་ཚུལ་ཁྲིམས་འདྲེས་པ་མེད། །འཕགས་པའི་ཚུལ་ཁྲིམས་ཟག་པ་མེད་ལ་གནས། །དེ་ཚེ་རྒྱལ་པོ་གླང་མཆོག་ཁྱད་པར་སེམས། །གཞོན་ནུ་གཞན་ཞིག་ཡིན་པར་སེམས་གྱུར་ན། །དེ་ནི་གཞན་ཞིག་ཡིན་པར་མི་བལྟ་སྟེ། །ང་ནི་སྤྱད་པ་སྤྱོད་

ཚེ་དེར་གྱུར་ཏོ། །དེ་ཕྱིར་གཞོན་ནུ་ང་ཡི་རྗེས་སློབས་ལ། །ལུས་ཀྱི་སྡོམ་པ་འདི་ལ་གནས་པར་གྱིས། །སྲོག་ཆགས་བྱེ་བ་གཞན་ལའང་རབ་སྟོན་དང་། །རིང་པོར་མི་ཐོགས་ཇི་བཞིན་ང་འདྲར་འགྱུར། །དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ།
གཞོན་ནུ་དེ་ལྟ་བས་ན་ལུས་ཀྱི་སྤྱོད་པ་ཡོངས་སུ་དག་པར་བྱའོ་ཞེས་གཞོན་ནུ་དེ་ལྟར་ཁྱོད་ཀྱིས་བསླབ་པར་བྱའོ། །དེ་ཅིའི་ཕྱིར་ཞེ་ན། གཞོན་ནུ་ལུས་ཀྱི་སྤྱོད་པ་ཡོངས་སུ་དག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སེམས་ཅན་དམྱལ་བ་དག་ལ་མི་འཇིགས། དུད་འགྲོའི་སྐྱེ་
གནས་དང་། གཤིན་རྗེའི་འཇིག་རྟེན་དང་། ངན་སོང་དག་གིས་འཇིགས་པར་མི་འགྱུར་རོ། །ཆུས་མི་འཇིགས། མེས་མི་འཇིགས། དུག་དང་། མཚོན་དང་། སེང་གེ་དང་། སྟག་དང་དྲེད་དང་བལ་གླང་དང་གླང་ཁྱུ་བ་དང་། མི་དང་མི་མ་ཡིན་པ་དག་གིས་འཇིགས་
པར་མི་འགྱུར་རོ། །གཞོན་ནུ་ལུས་ཀྱི་སྤྱོད་པ་ཡོངས་སུ་དག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ལག་མཐིལ་དུ་བཞག་སྟེ། ཏ་ལ་གཅིག་ཙམའམ། ཏ་ལ་གཉིས་ཙམའམ། ཏ་ལ་གསུམ་ཙམའམ།
ཏ་ལ་བཞི་ཙམའམ། ཏ་ལ་ལྔ་ཙམའམ། ཏ་ལ་དྲུག་ཙམའམ། ཏ་ལ་བདུན་ཙམ་དུ་སྟེང་དུ་འཕེན་ཏོ། །ཇི་ཙམ་དུ་འདོད་པ་དེ་ཙམ་དུའང་འཕེན་ཏོ། །གཞན་ཡང་གཞོན་ནུ་ལུས་ཀྱི་སྤྱོད་པ་ཡོངས་སུ་དག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་རྫུ་འཕྲུལ་གྱི་ཆོ་འཕྲུལ་མཆོག་
གི་ཕ་རོལ་ཏུ་ཕྱིན་པ་ཡིན་ཏེ། དེ་རྫུ་འཕྲུལ་གྱི་རྐང་པའི་རྣམ་པར་སྨིན་པ་རྣམ་པར་དག་པའི་བསོད་ནམས་ཡོངས་སུ་གཟུང་ཞིང་དབེན་པར་གྱུར་ཏེ། ཐམས་ཅད་དུ་རྗེས་སུ་སོང་ཞིང་། དེ་ལྟ་བུའི་ཏིང་ངེ་འཛིན་ཐོབ་པས་ཟག་པ་མེད་པའི་བསོད་ནམས་ཡོངས་སུ་རྫོགས་པ། འཇིག་རྟེན་གྱི་
ཁམས་ཐམས་ཅད་ལ་ཐོགས་པ་མེད་པའི་མིག་ཏུ་གྱུར་པས་དེ་ལྟ་བུའི་རྫུ་འཕྲུལ་གྱི་ཆོ་འཕྲུལ་དང་ལྡན་པར་འགྱུར་རོ། །དེ་ལ་རྫུ་འཕྲུལ་གང་ཞེ་ན། གང་འགྲུབ་པ་དང་། སྨོན་པ་དང་། འབྱོར་པ་དང་། ཡོངས་སུ་རྫོགས་པ་འདི་ནི་རྫུ་འཕྲུལ་ཞེས་བྱའོ། །དེ་ལ་རྫུ་འཕྲུལ་གྱི་ཆོ་འཕྲུལ་གང་

ཞེ་ན། རྫུ་འཕྲུལ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྫུ་འཕྲུལ་གྱི་ཡུལ་རྣམ་པ་མང་པོ་མྱོང་བར་བྱེད་པ་ཡིན་ཏེ། གཅིག་ཏུ་གྱུར་ནས་མང་པོར་འགྱུར། མང་པོར་གྱུར་ནས་གཅིག་ཏུ་འགྱུར། སྣང་བར་གྱུར་ཅིང་མི་སྣང་བར་ཡང་འགྱུར། རྩིག་པ་ལ་
ཡང་ཐད་ཀར་འགྲོ། ར་བ་ལ་ཡང་ཐད་ཀར་འགྲོ། རི་ལ་ཡང་མི་ཐོགས་པར་འགྲོ། ནམ་མཁའ་ལ་ཡང་འགྲོ་སྟེ། དཔེར་ན་འདབ་ཆགས་བྱ་བཞིན་ནོ། །ས་ལ་ཡང་སྟེང་དུ་འབྱུང་བ་དང་། བྱིའུ་ཟུལ་བྱེད་དེ། དཔེར་ན་ཆུ་ལ་བྱ་བ་བཞིན་ནོ། །ཆུ་ལ་ཡང་མི་ནུབ་པར་འགྲོ་སྟེ། དཔེར་ན་སའི་
ཕུང་པོ་ཆེན་པོ་ལ་བྱ་བ་བཞིན་ནོ། །དུ་བ་འཐུལ་བར་ཡང་བྱེད་འབར་བར་ཡང་བྱེད་དེ། དཔེར་ན་མེའི་ཕུང་པོ་ཆེན་པོ་བཞིན་ནོ། །བདག་གི་ལུས་ལས་ཆུའི་རྒྱུན་ཆེན་པོ་ཁྲག་ཁྲིག་བརྒྱ་སྟོང་དུ་མ་འབྱིན་ཏེ། དཔེར་ན་སྤྲིན་ཆེན་པོ་བཞིན་ནོ། །ཆུའི་རྒྱུན་དེ་དག་གིས་སྟོང་གསུམ་གྱི་སྟོང་ཆེན་པོའི་
འཇིག་རྟེན་གྱི་ཁམས་འདི་བསྲེགས་ཤིང་རབ་ཏུ་ཚིག་སྟེ། མེས་རབ་ཏུ་འབར་ཞིང་འབར་བ་གཅིག་ཏུ་གྱུར་པ་ཞི་བར་བྱེད་དོ། །ཟླ་བ་དང་ཉི་མ་འདི་གཉིས་འདི་ལྟར་རྫུ་འཕྲུལ་ཆེ་བ། འདི་ལྟར་མཐུ་ཆེ་བ། འདི་ལྟར་གཟི་བརྗིད་ཆེ་བ་ཡང་ལག་པས་འཛིན་ཅིང་ཀུན་ཏུ་ཉུག་པར་བྱེད་དོ། །ཚངས་པའི་
འཇིག་རྟེན་གྱི་བར་དུ་སེམས་ཅན་རྣམས་ལ་ལུས་ཀྱིས་དབང་སྒྱུར་རོ། །དེ་ནས་ཡང་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །ས་ལ་བྱིའུ་ཟུལ་བྱེད་ཅིང་སྟེང་བྱུང་བྱེད། །ཆུ་དག་ལ་ཡང་ཐོགས་པ་མེད་པར་འགྲོ། །བྱ་བཞིན་ནམ་མཁའི་ངོས་ལ་འགྲོ་བར་བྱེད། །
རྫུ་འཕྲུལ་གྱིས་ནི་དུད་འཐུལ་འབར་བར་བྱེད། །ཇི་ལྟར་བར་སྣང་ལ་ནི་རླུང་མི་ཐོགས། །སྤྲིན་གྱི་ཕུང་པོ་མང་པོ་འགྲོ་བ་ལྟར། །དེ་བཞིན་རྣལ་འབྱོར་པ་ཡང་ནམ་མཁའ་ལ། །རླུང་དང་སྤྲིན་བཞིན་དུ་ནི་ཐོགས་མེད་འགྲོ། །ཞིང་རྣམས་མེ་ཡིས་ཚིག་ཅིང་འབར་བ་དག །བྱང་ཆུབ་སེམས་དཔའ་
མཁས་པས་དེ་མཐོང་ནས། །དེས་ནི་རང་གི་ལུས་ལས་ཆུ་ཕྱུང་སྟེ། །བྱེ་བ་སྙེད་ཀྱི་ཞིང་དེ་ཞི་བར་བྱེད། །བྱང་ཆུབ་སེམས་དཔའ་མཁས་པ་འདུག་བཞིན་དུ། །ཉི་ཟླ་ལ་ནི་ལག་པས་ཡོངས་སུ་འཛིན། །དེས་ནི་ཚངས་པའི་འཇིག་རྟེན་ཉེར་རིག་ནས། །ཚངས་པ་བྱེ་བ་དག་ལ་ཆོས་སྟོན་བྱེད། །

གང་ཚེ་དེ་ནི་ཆོས་སྟོན་འདོད་གྱུར་ན། །སྟོང་གསུམ་ཆེན་པོ་དེས་ནི་གོ་བར་བྱེད། །འདོད་ན་དེ་ནི་ཞིང་མང་བྱེ་བར་ཡང་། །སྲོག་ཆགས་བྱེ་བ་མང་ལ་ཆོས་རྣམས་སྟོན། །དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་ལུས་ཀྱི་སྤྱོད་
པ་ཡོངས་སུ་དག་པར་བྱའོ་ཞེས་གཞོན་ནུ་ཁྱོད་ཀྱིས་དེ་ལྟར་བསླབ་པར་བྱའོ། །དེ་ཅིའི་ཕྱིར་ཞེ་ན། གཞོན་ནུ་ལུས་ཀྱི་སྤྱོད་པ་ཡོངས་སུ་དག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ལྷའི་རྣ་བའི་ཁམས་ཀྱིས་སྒྲ་རྣམས་ལྷའི་དང་། མིའི་དང་། སེམས་ཅན་དམྱལ་བ་པ་རྣམས་ཀྱི་དང་།
དུད་འགྲོའི་སྐྱེ་གནས་སུ་སོང་བ་རྣམས་ཀྱི་དང་། གཤིན་རྗེའི་འཇིག་རྟེན་པ་རྣམས་ཀྱི་སྒྲ་ཉེ་བའམ་རྒྱང་རིང་པོ་ཡང་ཐོས་སོ། །གཞན་ཡང་གཞོན་ནུ་ལུས་ཀྱི་སྤྱོད་པ་ཡོངས་སུ་དག་པར་བྱའོ་ཞེས་གཞོན་ནུ་ཁྱོད་ཀྱིས་དེ་ལྟར་བསླབ་པར་བྱའོ། །དེ་ཅིའི་ཕྱིར་ཞེ་ན། གཞོན་ནུ་ལུས་ཀྱི་སྤྱོད་པ་ཡོངས་
སུ་དག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སྟན་ལ་འདུག་བཞིན་དུ་ལྷའི་སྣའི་དབང་པོས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ལྷའི་ཡིད་དུ་འོང་བའི་ཆོས་ཀྱི་དྲི་ཇི་སྙེད་ཡོད་པ་ཉེའང་རུང་། རྒྱང་རིང་པོའང་རུང་སྟེ་དེ་དག་ཐམས་ཅད་ཚོར་རོ། །དེ་ནས་ཡང་བཅོམ་ལྡན་འདས་
ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་ལུས་ཀྱི་སྤྱོད་པ་ཡོངས་སུ་དག་པར་བྱའོ་ཞེས་གཞོན་ནུ་ཁྱོད་ཀྱིས་དེ་ལྟར་བསླབ་པར་བྱའོ། །དེ་ཅིའི་ཕྱིར་ཞེ་ན། གཞོན་ནུ་ལུས་ཀྱི་སྤྱོད་པ་ཡོངས་སུ་དག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སེམས་ཅན་
ཕ་རོལ་དང་གང་ཟག་ཕ་རོལ་གྱི་སེམས་ཀྱི་རྣམ་པར་རྟོག་པ་དང་། སྤྱོད་པ་སེམས་ཀྱིས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། འདོད་ཆགས་དང་བཅས་པའི་སེམས་ཀྱང་འདོད་ཆགས་དང་བཅས་པའི་སེམས་སུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས། འདོད་ཆགས་དང་བྲལ་བའི་
སེམས་ཀྱང་འདོད་ཆགས་དང་བྲལ་བའི་སེམས་སུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །གོང་མ་བཞིན་དུ་སྦྱར་ཏེ། ཞེ་སྡང་དང་བཅས་པ་དང་། ཞེ་སྡང་དང་བྲལ་བ་དང་། གཏི་མུག་དང་བཅས་པ་དང་། གཏི་མུག་དང་བྲལ་བ་དང་། སྲེད་པ་དང་བཅས་པ་དང་། སྲེད་པ་དང་བྲལ་བ་དང་།

ལེན་པ་དང་བཅས་པ་དང་། ལེན་པ་དང་བྲལ་བ་དང་། བསྡུས་པ་དང་། གཡེངས་པ་དང་། ལོག་པ་དང་། མ་ལོག་པ་དང་། ཆེན་པོར་གྱུར་པ་དང་། ཆེན་པོར་གྱུར་པ་མ་ཡིན་པ་དང་། འོད་གསལ་བ་དང་། འོད་གསལ་བ་མ་ཡིན་པ་དང་། ཚད་དང་བཅས་པ་དང་། ཚད་མེད་པ་དང་།
བླ་ན་ཡོད་པ་དང་། བླ་ན་མེད་པ་དང་། མཉམ་པར་བཞག་པ་དང་། མཉམ་པར་བཞག་པ་མ་ཡིན་པ་དང་། རྣམ་པར་གྲོལ་བ་དང་། རྣམ་པར་གྲོལ་བ་མ་ཡིན་པ་དང་། ཉོན་མོངས་པ་དང་བཅས་པའི་སེམས་ཀྱང་ཉོན་མོངས་པ་དང་བཅས་པའི་སེམས་སུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །
ཉོན་མོངས་པ་མེད་པའི་སེམས་ཀྱང་ཉོན་མོངས་པ་མེད་པའི་སེམས་སུ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །གཞོན་ནུ་ལུས་ཀྱི་སྤྱོད་པ་ཡོངས་སུ་དག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སྔོན་གྱི་གནས་རྣམ་པ་དུ་མ་རྗེས་སུ་དྲན་ཏེ། སྐྱེ་བ་གཅིག་ཀྱང་རྗེས་སུ་དྲན། གཉིས་དང་།
གསུམ་དང་། བཞི་དང་། ལྔ་དང་། བཅུ་དང་། ཉི་ཤུ་དང་། སུམ་ཅུ་དང་། བཞི་བཅུ་དང་། ལྔ་བཅུ་དང་། སྐྱེ་བ་བརྒྱ་ཡང་རྗེས་སུ་དྲན་ནོ། །སྐྱེ་བ་སྟོང་དང་། སྐྱེ་བ་བརྒྱ་སྟོང་དང་། སྐྱེ་བ་བྱེ་བ་ཁྲག་ཁྲིག་བརྒྱ་སྟོང་དུ་མའི་བར་དུ་ཡང་རྗེས་སུ་དྲན་ནོ། །སྡུད་པའི་བསྐལ་པ་དང་། འབྱུང་བའི་བསྐལ་
པ་ཡང་རྗེས་སུ་དྲན་ནོ། །སྲུད་པ་དང་། འབྱུང་བའི་བསྐལ་པ་དུ་མའི་བར་དུ་ཡང་རྗེས་སུ་དྲན་ནོ། །བསྐལ་པ་ཡང་རྗེས་སུ་དྲན་ནོ། །བསྐལ་པ་བརྒྱ་དང་། བསྐལ་པ་སྟོང་དང་། བསྐལ་པ་བརྒྱ་སྟོང་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་མའི་བར་དུ་ཡང་རྗེས་སུ་དྲན་ནོ། །སྔོན་གྱི་མཐའ་བྱེ་བའི་
བར་དུ་ཡང་རྗེས་སུ་དྲན་ནོ། །བདག་སྔོན་ཆེ་གེ་མོ་ཞིག་ཏུ་སྐྱེས་ཏེ། མིང་ནི་འདི་ཞེས་བྱ། རུས་ནི་འདི་ཞེས་བྱ། རིགས་ནི་འདི་ཞེས་བྱ། ཁ་དོག་ནི་འདི་འདྲ། ཟས་ནི་འདི་ལྟ་བུ་ཞིག་ཟ་ཟ། འཚོ་བ་ནི་འདི་འདྲ། ཚེ་ནི་འདི་ཙམ་ཞིག་ཏུ་ཐུབ། ཡུན་ནི་འདི་སྲིད་ཅིག་ཏུ་གནས་གནས། བདེ་བ་དང་སྡུག་བསྔལ་ནི་
འདི་ལྟ་བུ་ཞིག་མྱོང་། དེ་ནས་ཤི་འཕོས་ནས་ཆེ་གེ་མོ་ཞིག་ཏུ་སྐྱེས་ཏེ། དེ་ནས་ཀྱང་ཤི་འཕོས་ནས་འདིར་སྐྱེས་སོ། །ཞེས་རྣམ་པ་དང་བཅས་པ་དང་། ཡུལ་ཕྱོགས་དང་བཅས་པ་དང་། གཞི་ཅི་ལས་གྱུར་པ་དང་བཅས་པར་སྔོན་གྱི་གནས་རྣམ་པ་དུ་མ་ཡང་དག་པར་རྗེས་སུ་དྲན་ནོ། །གཞོན་ནུ་ལུས་

ཀྱི་སྤྱོད་པ་ཡོངས་སུ་དག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ལྷའི་མིག་རྣམ་པར་དག་པ་མིའི་ལས་འདས་པས་སེམས་ཅན་རྣམས་འཆི་འཕོ་བ་དང་། སྐྱེ་བ་དང་། ཁ་དོག་བཟང་བ་དང་། ཁ་དོག་ངན་པ་དང་། བདེ་འགྲོར་སོང་བ་དང་། ངན་འགྲོར་སོང་བ་དང་། ངན་པ་དང་། བཟང་པོ་དང་།
བཟང་འགྲོར་འགྲོ་བ་དང་། ངན་འགྲོར་འགྲོ་བའི་སེམས་ཅན་ལས་བཞིན་དུ་ཉེ་བར་འགྲོ་བ་དག་ཀྱང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །སེམས་ཅན་འདི་རྣམས་ནི་ལུས་ཀྱིས་ཉེས་པར་སྤྱོད་པ་དང་ལྡན། ངག་གིས་ཉེས་པར་སྤྱོད་པ་དང་ལྡན། ཡིད་ཀྱིས་ཉེས་པར་སྤྱོད་པ་དང་ལྡན་ཏེ།
འཕགས་པ་རྣམས་ལ་སྐུར་པ་ལོག་པར་ལྟ་བ་དག་ལོག་པར་ལྟ་བ་ཡང་དག་པར་འཛིན་པའི་རྒྱུས་ལུས་ཞིག་ནས་ཤི་བའི་འོག་ཏུ་ངན་སོང་ངན་འགྲོ་སེམས་ཅན་དམྱལ་བ་རྣམས་སུ་སྐྱེས་སོ། །སེམས་ཅན་འདི་རྣམས་ནི་ལུས་ཀྱིས་ལེགས་པར་སྤྱོད་པ་དང་ལྡན། ངག་གིས་ལེགས་པར་སྤྱོད་པ་དང་ལྡན།
ཡིད་ཀྱིས་ལེགས་པར་སྤྱོད་པ་དང་ལྡན་ཏེ། འཕགས་པ་རྣམས་ལ་མི་སྐུར་པ་ཡང་དག་པར་ལྟ་བ་དག །ཡང་དག་པར་ལྟ་བ་ཡང་དག་པར་བཟུང་བའི་རྒྱུས་ལུས་ཞིག་ནས་ཤི་བའི་འོག་ཏུ་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷའི་ནང་དུ་སྐྱེས་སོ་ཞེས་དེ་ལྟར་ལྷའི་མིག་རྣམ་པར་དག་པ་མིའི་ལས་
འདས་པས་སེམས་ཅན་རྣམས་འཆི་འཕོ་བ་དང་། སྐྱེ་བ་དང་། ཁ་དོག་བཟང་བ་དང་། ཁ་དོག་ངན་པ་དང་། བདེ་འགྲོར་སོང་བ་དང་། ངན་འགྲོར་སོང་བ་དང་། ངན་པ་དང་། བཟང་པོ་དང་། བཟང་འགྲོར་འགྲོ་བ་དང་། ངན་འགྲོར་འགྲོ་བའི་སེམས་ཅན་ལས་བཞིན་དུ་ཉེ་བར་འགྲོ་བ་དག་
ཀྱང་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །གཞོན་ནུ་ལུས་ཀྱི་སྤྱོད་པ་ཡོངས་སུ་དག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སྐད་ཅིག་གཅིག་དང་ལྡན་པའི་ཤེས་རབ་ཀྱིས་གང་ཅུང་ཟད་ཤེས་པར་བྱ་བ་དང་། བལྟ་བར་བྱ་བ་དང་། མཉན་པར་བྱ་བ་དང་། མངོན་པར་རྫོགས་པར་འཚང་རྒྱ་
བར་བྱ་བ་དང་། རྣམ་པར་འཕྲུལ་བར་བྱ་བ་དེ་ཐམས་ཅད་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཐོས་སོ། །མཐོང་ངོ་། །རྟོགས་སོ། །དེ་ནས་ཡང་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །བྱང་ཆུབ་སེམས་དཔའ་སྐྱོབ་པ་ཡི། །མངོན་པར་

ཤེས་པའི་རིམ་པ་བསྟན། །ཏིང་ངེ་འཛིན་ལ་གནས་པས་ན། །བྱང་ཆུབ་སེམས་དཔའ་ཞེས་ཀྱང་བྱ། །དེ་དག་རྣ་བ་རྣམ་སྦྱོང་སྟེ། །ལྷ་ཡི་རྣ་བ་བསམ་མི་ཁྱབ། །སངས་རྒྱས་ཀུན་གྱིས་བཤད་པ་ཡི། །ཆོས་རྣམས་དེ་ཡིས་ཐོས་པར་འགྱུར། །སྟོང་གསུམ་ཆེན་པོའི་
འཇིག་རྟེན་ཁམས་དག་ན། །ལྷ་ཡི་དྲི་རྣམས་ཇི་སྙེད་ཡོད་པ་ཀུན། །ལྷ་ཡི་སྣ་ཡིས་ཇི་ལྟར་འདུག་བཞིན་དུ། །བྱང་ཆུབ་སེམས་དཔའ་མཁས་པ་དེ་སྣོམ་བྱེད། །འདོད་ཆགས་བཅས་དང་འདོད་ཆགས་མེད་པ་དང་། །ཞེ་སྡང་བཅས་དང་ཞེ་སྡང་བྲལ་བ་དང་། །གཏི་མུག་བཅས་དང་
གཏི་མུག་བྲལ་བ་ཡི། །སེམས་རྣམས་སྲོག་ཆགས་ཀུན་གྱི་རབ་ཏུ་ཤེས། །བསྐལ་པ་བྱེ་བ་སྟོང་དུ་ནི། །གང་དུ་དེ་དག་སྔོན་གནས་པ། །སྔོན་གྱི་གནས་རྣམས་རབ་ཏུ་ཤེས། །དེ་དག་ལ་ནི་ཐོགས་པ་མེད། །དེ་དག་མིག་ཀྱང་རྣམ་སྦྱོང་སྟེ། །བླ་ན་མེད་པའི་ལྷ་ཡི་མིག །དེས་ནི་སེམས་ཅན་སྐྱེ་
བ་དང་། །འཆི་འཕོ་དེ་དག་རབ་ཏུ་མཐོང་། །སྐད་ཅིག་གཅིག་དང་ལྡན་པ་ཡི། །ཤེས་རབ་ཀྱིས་ནི་ཚེ་རབས་ཀུན། །ཆོས་རྣམས་ལ་ནི་ཤེས་བྱ་བ། །ཅི་ཡོད་པ་ཡང་ཡང་དག་ཤེས། །དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་
ན་ངག་གི་སྡོམ་པས་བསྡམ་པར་བྱའོ་ཞེས་ཁྱོད་ཀྱིས་དེ་ལྟར་བསླབ་པར་བྱའོ། །གཞོན་ནུ་དེ་ལ་ངག་གི་སྡོམ་པ་གང་ཞེ་ན། ངག་གི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པ་དྲུག་ཅུ་དང་ལྡན་པའི་སངས་རྒྱས་ཀྱི་གསུང་དབྱངས་ཐོགས་པ་མེད་པ། བསམ་གྱིས་མི་
ཁྱབ་པ་འཐོབ་པར་འགྱུར་བ་དེ་ནི་གཞོན་ནུ་ངག་གི་སྡོམ་པ་ཞེས་བྱའོ། །ངག་གི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་ཚིག་བཙུན་པ་འཐོབ་པར་འགྱུར་བ་དེ་ནི་གཞོན་ནུ་ངག་གི་སྡོམ་པ་ཞེས་བྱའོ། །ངག་གི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་
ཆེན་པོ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་འཐོབ་པར་འགྱུར་བ་དེ་ནི་གཞོན་ནུ་ངག་གི་སྡོམ་པ་ཞེས་བྱའོ། །ངག་གི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་དཔེ་བྱད་བཟང་པོ་བརྒྱད་ཅུ་འཐོབ་པར་འགྱུར་བ་དེ་ནི་གཞོན་ནུ་ངག་གི་སྡོམ་པ་ཞེས་བྱའོ། །ངག་གི་སྡོམ་

པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་སྟོབས་བཅུ་འཐོབ་པ་དང་། མི་འཇིགས་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་འཐོབ་པར་འགྱུར་བ་དེ་ནི་གཞོན་ནུ་ངག་གི་སྡོམ་པ་ཞེས་བྱའོ། །ངག་གི་སྡོམ་པ་གང་དང་ལྡན་པས་
བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་ཐར་པའི་སྒོ་གསུམ་འཐོབ་སྟེ། གསུམ་གང་ཞེ་ན། འདི་ལྟ་སྟེ། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། རྣམ་པར་ཐར་པའི་སྒོ་འདི་གསུམ་འཐོབ་པར་འགྱུར་བ་དེ་ནི་གཞོན་ནུ་ངག་གི་སྡོམ་པ་ཞེས་བྱའོ། །
ངག་གི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་ཚངས་པའི་གནས་པ་ཆེན་པོ་བཞི་འཐོབ་སྟེ། བཞི་གང་ཞེ་ན། འདི་ལྟ་སྟེ། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། དགའ་བ་ཆེན་པོ་དང་། བཏང་སྙོམས་ཆེན་པོ་དང་། ཚངས་པའི་གནས་པ་ཆེན་
པོ་འདི་བཞི་འཐོབ་པར་འགྱུར་བ་དེ་ནི་གཞོན་ནུ་ངག་གི་སྡོམ་པ་ཞེས་བྱའོ། །ངག་གི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་སོ་སོ་ཡང་དག་པར་རིག་པ་བཞི་འཐོབ་སྟེ། །བཞི་གང་ཞེ་ན། འདི་ལྟ་སྟེ། དོན་སོ་སོ་ཡང་དག་པར་རིག་པ་དང་། ཆོས་སོ་སོ་ཡང་
དག་པར་རིག་པ་དང་། ངེས་པའི་ཚིག་སོ་སོ་ཡང་དག་པར་རིག་པ་དང་། སྤོབས་པ་སོ་སོ་ཡང་དག་པར་རིག་པ་དང་སོ་སོ་ཡང་དག་པར་རིག་པ་འདི་བཞི་འཐོབ་པར་འགྱུར་བ་དེ་ནི་གཞོན་ནུ་ངག་གི་སྡོམ་པ་ཞེས་བྱའོ། །ངག་གི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་
ཆེན་པོ་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་འཐོབ་སྟེ། སུམ་ཅུ་རྩ་བདུན་གང་ཞེ་ན། འདི་ལྟ་སྟེ། དྲན་པ་ཉེ་བར་གཞག་པ་བཞི་དང་། ཡང་དག་པར་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་།
འཕགས་པའི་ལམ་ཡན་ལག་བརྒྱད་པ་དང་། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་པོ་འདི་དག་འཐོབ་པར་འགྱུར་བ་དེ་ནི་གཞོན་ནུ་ངག་གི་སྡོམ་པ་ཞེས་བྱའོ། །ངག་གི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་ལ་གནས་པ་འཐོབ་པ་དང་།

བཏང་སྙོམས་ཆེན་པོ་ལ་གནས་པ་འཐོབ་པ་དང་། བདེ་བའི་རྣམ་པར་རྟོག་པ་འཐོབ་པ་དང་། རབ་ཏུ་དབེན་པའི་ཆོས་རྣམས་འཐོབ་པར་འགྱུར་བ་དེ་ནི་གཞོན་ནུ་ངག་གི་སྡོམ་པ་ཞེས་བྱའོ། །གཞན་ཡང་གཞོན་ནུ་ངག་གི་སྡོམ་པ་གང་དང་ལྡན་པས་བྱང་ཆུབ་སེམས་
དཔའ་སེམས་དཔའ་ཆེན་པོ་སྲོག་གཅོད་པ་སྤོང་བར་འགྱུར་བ་དང་། མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། ཕྲ་མའི་ཚིག་དང་། ཚིག་རྩུབ་པོ་དང་། ཁྱལ་པར་སྨྲ་བ་སྤངས་པར་འགྱུར་བ་དང་། ཕ་མ་དང་སློབ་དཔོན་དག་ལ་མི་བདེན་པའི་ཚིག་
མི་འབྱིན་པ་དང་། སངས་རྒྱས་དང་ཆོས་དང་དགེ་འདུན་ལ་མི་སྨོད་པ་དང་། ཚིག་གཞན་ལ་ཡང་གང་ཉེས་པ་དང་ལྡན་པའི་ཚིག་དེ་དག་བྱང་ཆུབ་སེམས་དཔས་སྤངས་པ་ཡིན་ཏེ། ཚིག་དེ་དག་ཀྱང་བྲག་ཅ་ལྟ་བུར་ཤེས་སོ། །སྤྲུལ་པ་ལྟ་བུ་དང་། སྨིག་རྒྱུ་ལྟ་བུ་དང་། མིག་ཡོར་ལྟ་བུ་
དང་། སྒྱུ་མ་ལྟ་བུར་འཇུག་པར་བྱེད་དོ། །དེ་ལྟ་བུར་གྱུར་པས་ཚིག་དེ་ལ་མི་དམིགས། མི་རྟོག །རློམ་སེམས་སུ་མི་བྱེད། མི་ལྟ། མངོན་པར་ཆགས་པར་མི་བྱེད་དེ། གཞོན་ནུ་དེ་ནི་ངག་གི་སྡོམ་པ་ཞེས་བྱའོ། །དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་
སྩལ་པ། གཞོན་ནུ་དེ་ལྟ་བས་ན་ངག་གི་སྤྱོད་པ་ཡོངས་སུ་དག་པར་བྱའོ་ཞེས་གཞོན་ནུ་དེ་ལྟར་ཁྱོད་ཀྱིས་བསླབ་པར་བྱའོ། །གཞོན་ནུ་ངག་གི་སྤྱོད་པ་ཡོངས་སུ་དག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ངན་སོང་ཐམས་ཅད་ཀྱིས་མི་འཇིགས་ཤིང་སངས་རྒྱས་ཀྱི་ཆོས་ཐམས་
ཅད་འཐོབ་པར་འགྱུར་རོ། །སངས་རྒྱས་ཀྱི་རྫུ་འཕྲུལ་ཐམས་ཅད་དང་། མངོན་པར་ཤེས་པ་ཐམས་ཅད་ཀྱང་ཐོབ་པར་གྱུར་ཏེ། གཞོན་ནུ་དེ་ནི་ངག་གི་སྡོམ་པ་ཞེས་བྱའོ། །དེ་ལ་འདི་སྐད་ཅེས་བྱ་སྟེ། ངག་གི་སྡོམ་པ་གང་དང་ལྡན་པ་ཡིས། །བྱང་ཆུབ་སེམས་དཔའ་དེ་ཡང་ཆོས་
ཀུན་ལ། །ཐོགས་པ་མེད་པར་གདོན་མི་ཟ་བར་འགྱུར། །དེ་ནི་ངག་གི་སྡོམ་པ་དེ་ཞེས་བྱ། །ངག་གི་སྡོམ་པ་གང་གིས་བློ་ལྡན་རྣམས། །དེ་ནི་ཡན་ལག་དྲུག་ཅུ་མཚུངས་ལྡན་པ། །ཐོགས་མེད་བསམ་ཡས་སངས་རྒྱས་དབྱངས་ཐོབ་པ། །དེ་ནི་ངག་གི་སྡོམ་པ་དེ་ཞེས་བྱ། །ངག་གི་

སྡོམ་པ་གང་གིས་བློ་ལྡན་རྣམས། །སྟོབས་བཅུ་དང་ནི་མ་འདྲེས་སངས་རྒྱས་ཆོས། །སུམ་ཅུ་རྩ་གཉིས་མཚན་རྣམས་ཐོབ་འགྱུར་བ། །དེ་ནི་ངག་གི་སྡོམ་པ་དེ་ཞེས་བྱ། །ངག་གི་སྡོམ་པ་གང་གིས་བློ་ལྡན་རྣམས། །གང་སྔར་འདི་ལས་ངས་ནི་བརྗོད་པ་ཡི། །སངས་རྒྱས་
ཆོས་ཀྱང་ཐམས་ཅད་ཐོབ་འགྱུར་བ། །དེ་ནི་ངག་གི་སྡོམ་པ་དེ་ཞེས་བྱ། །ངག་གི་སྡོམ་པ་གང་གིས་བློ་ལྡན་རྣམས། །གནས་པ་དང་ནི་སོ་སོ་ཡང་དག་རིག །ཤིན་ཏུ་རྨད་བྱུང་ཆོས་ནི་བསམ་ཡས་འཐོབ། །དེ་ནི་ངག་གི་སྡོམ་པ་དེ་ཞེས་བྱ། །ངག་གི་སྡོམ་པ་གང་གིས་བློ་ལྡན་
རྣམས། །དྲན་པ་ཉེར་གཞག་ཡང་དག་སྤོང་བ་དང་། །དེ་བཞིན་རྫུ་འཕྲུལ་རྐང་དང་དབང་སྟོབས་འཐོབ། །དེ་ནི་ངག་གི་སྡོམ་པ་དེ་ཞེས་བྱ། །ངག་གི་སྡོམ་པ་གང་གིས་བློ་ལྡན་རྣམས། །བཏང་སྙོམས་ཆེན་པོ་འཇིགས་པ་མེད་པ་དང་། །སྙིང་རྗེ་ཆེན་པོ་དག་པའི་གནས་པ་འཐོབ། །
དེ་ནི་ངག་གི་སྡོམ་པ་དེ་ཞེས་བྱ། །ངག་གི་སྡོམ་པ་གང་གིས་བློ་ལྡན་རྣམས། །བདེ་བའི་རྣམ་རྟོག་རྣམ་པར་དག་པ་དང་། །དེ་བཞིན་རྣམ་རྟོག་རབ་དབེན་ཞི་བ་འཐོབ། །དེ་ནི་ངག་གི་སྡོམ་པ་དེ་ཞེས་བྱ། །ངག་གི་སྡོམ་པ་གང་གིས་བློ་ལྡན་རྣམས། །བརྫུན་དག་དང་ནི་ཕྲ་མའི་
ཚིག་མི་སྨྲ། །ཁྱལ་པའི་ཚིག་དང་ཚིག་རྩུབ་མི་སྨྲ་བ། །དེ་ནི་ངག་གི་སྡོམ་པ་དེ་ཞེས་བྱ། །ངག་གི་སྡོམ་པ་གང་གིས་བློ་ལྡན་རྣམས། །ནམ་ཡང་དམ་པའི་ཆོས་ལ་སྤོང་མི་བྱེད། །སངས་རྒྱས་དགེ་འདུན་དག་ཀྱང་མི་སྤོང་བ། །དེ་ནི་ངག་གི་སྡོམ་པ་དེ་ཞེས་བྱ། །ངག་གི་
སྡོམ་པ་གང་གིས་བློ་ལྡན་རྣམས། །ཕ་དང་མ་དང་སློབ་དཔོན་དག་གི་ཡང་། །མདུན་དུ་མི་བདེན་ཚིག་རྣམས་མི་སྨྲ་བ། །དེ་ནི་ངག་གི་སྡོམ་པ་དེ་ཞེས་བྱ། །ངག་གི་སྡོམ་པ་གང་གིས་བློ་ལྡན་རྣམས། །ཚིག་གཞན་གང་དག་སྐྱོན་དང་ལྡན་པ་རྣམས། །དེ་དག་མ་ལུས་
པར་ཡང་སྤོང་བར་འགྱུར། །དེ་ནི་ངག་གི་སྡོམ་པ་དེ་ཞེས་བྱ། །ངག་གི་སྡོམ་པ་གང་གིས་བློ་ལྡན་རྣམས། །ཚིག་རྣམས་ཀྱང་ནི་བྲག་ཅ་འདྲ་བ་དང་། །རྨི་ལམ་ལྟ་བུར་འཇིགས་པ་མེད་པར་འཇུག །དེ་ནི་ངག་གི་སྡོམ་པ་དེ་ཞེས་བྱ། །བདག་མེད་སྲོག་མེད་གཡོ་བ་མེད་པ་དང་། །

རྐྱེན་ལས་སྐྱེས་པ་རྨི་ལམ་སླུ་བ་བཞིན། །ཚིག་ལ་བྱང་ཆུབ་སེམས་དཔའ་གང་འཇུག་པ། །དེ་ནི་ངག་གི་སྡོམ་པ་དེ་ཞེས་བྱ། །འགོག་པ་རྟག་ཏུ་རྨི་ལམ་ཇི་བཞིན་ཏེ། །མྱ་ངན་འདས་པའང་རྨི་ལམ་ཇི་བཞིན་དུ། །ཚིག་ལ་བྱང་ཆུབ་སེམས་དཔའ་གང་འཇུག་པ། །
དེ་ནི་ངག་གི་སྡོམ་པ་དེ་ཞེས་བྱ། །ཚིག་ནི་གང་ཡང་རྙེད་པར་མི་འགྱུར་ཏེ། །རྟོག་པར་མི་བྱེད་རློམ་སེམས་དེ་མི་བྱེད། །ནམ་ཡང་མི་ལྟ་ཆགས་པར་མི་བྱེད་དེ། །དེ་ནི་ངག་གི་སྡོམ་པ་དེ་ཞེས་བྱ། །དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ།
གཞོན་ནུ་དེ་ལྟ་བས་ན་ཡིད་ཀྱི་སྡོམ་པས་བསྡམ་པར་བྱའོ་ཞེས་ཁྱོད་ཀྱིས་དེ་ལྟར་བསླབ་པར་བྱའོ། །ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཆོས་འཇིགས་པ་མེད་པ་རྣམས་དང་། མི་འཁྲུགས་པའི་སེམས་རྣམ་པར་གྲོལ་བ་འཐོབ་པར་འགྱུར་
བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་ལྟ་བུའི་ཏིང་ངེ་འཛིན་འཐོབ་པར་འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་
འབར་བའི་བྱེ་བྲག་དང་འདྲ་བ་ཞེས་བྱ་བའི་འོད་ཟེར་འཐོབ་པར་འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་ཡན་ལག་དྲུག་ཅུ་དང་ལྡན་པའི་སངས་རྒྱས་ཀྱི་གསུང་དབྱངས་ཕུན་སུམ་ཚོགས་པ་འཐོབ་པར་
འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་ཚིག་བཙུན་པ་འཐོབ་པར་འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་
ཆེན་པོ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་འཐོབ་པར་འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་དཔེ་བྱད་བཟང་པོ་བརྒྱད་ཅུ་འཐོབ་པར་འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །

ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་སྟོབས་བཅུ་འཐོབ་པ་དང་། མི་འཇིགས་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་འཐོབ་པར་འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །
ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་ཐར་པའི་སྒོ་གསུམ་འཐོབ་སྟེ། གསུམ་གང་ཞེ་ན། འདི་ལྟ་སྟེ། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། རྣམ་པར་ཐར་པའི་སྒོ་འདི་གསུམ་འཐོབ་
པར་འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་ཚངས་པའི་གནས་པ་ཆེན་པོ་བཞི་འཐོབ་སྟེ། བཞི་གང་ཞེ་ན། འདི་ལྟ་སྟེ། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། དགའ་བ་
ཆེན་པོ་དང་། བཏང་སྙོམས་ཆེན་པོ་དང་། ཚངས་པའི་གནས་པ་ཆེན་པོ་འདི་བཞི་འཐོབ་པར་འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་སོ་སོ་ཡང་དག་པར་རིག་པ་བཞི་འཐོབ་སྟེ། བཞི་
གང་ཞེ་ན། འདི་ལྟ་སྟེ། དོན་སོ་སོ་ཡང་དག་པར་རིག་པ་དང་། ཆོས་སོ་སོ་ཡང་དག་པར་རིག་པ་དང་། ངེས་པའི་ཚིག་སོ་སོ་ཡང་དག་པར་རིག་པ་དང་། སྤོབས་པ་སོ་སོ་ཡང་དག་པར་རིག་པ་དང་། སོ་སོ་ཡང་དག་པར་རིག་པ་འདི་བཞི་འཐོབ་པར་འགྱུར་བ་དེ་ནི་གཞོན་ནུ་
ཡིད་ཀྱི་སྡོམ་པ་ཞེས་བྱའོ། ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་དྲན་པ་ཉེ་བར་གཞག་པ་བཞི་འཐོབ་པ་དང་། ཡང་དག་པར་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་
ལམ་ཡན་ལག་བརྒྱད་པ་འཐོབ་པར་འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་ལ་གནས་པ་འཐོབ་པ་དང་། བཏང་སྙོམས་ཆེན་པོ་ལ་གནས་པ་འཐོབ་པ་དང་། བདེ་བའི་རྣམ་

པར་རྟོག་པ་འཐོབ་པ་དང་། རབ་ཏུ་དབེན་པའི་ཆོས་རྣམས་འཐོབ་པར་འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་ཕན་པར་འདོད་པ་དང་། སྤྱོད་པ་དང་། འཇུག་པ་འཐོབ་པར་
འགྱུར་བ་དེ་ནི་གཞོན་ནུ་ཡིད་ཀྱི་སྡོམ་པ་ཞེས་བྱའོ། །གཞན་ཡང་གཞོན་ནུ་ཡིད་ཀྱི་སྡོམ་པ་ཞེས་བྱ་བ་དེ་ནི། ཡིད་ཀྱི་སྡོམ་པ་གང་དང་ལྡན་པས་བྱང་ཆུབ་སེམས་དཔའ་སེམས་དཔའ་ཆེན་པོ་ལོག་པར་ལྟ་བ་སྤངས་པའི་ཕྱིར་ལོག་པར་ལྟ་བ་དང་འགྲོགས་པར་མི་བྱེད། བརྣབ་སེམས་སྤངས་པའི་
ཕྱིར་བརྣབ་སེམས་དང་འགྲོགས་པར་མི་བྱེད། གནོད་སེམས་སྤངས་པའི་ཕྱིར་གནོད་སེམས་དང་འགྲོགས་པར་མི་བྱེད། ལེ་ལོ་སྤངས་པའི་ཕྱིར་ལེ་ལོའི་སེམས་དང་འགྲོགས་པར་མི་བྱེད། བླ་མ་རྣམས་དང་། ཕ་མ་དང་སློབ་དཔོ