Kinh tạng Tây Tạng (Kangyur Đại Học) — 055_མདོ་སྡེ།_ད

མི་རྙེད་དོ། །བྱང་ཆུབ་
སེམས་དཔའ་གྲགས་ཆེན་ནི། །དེ་དག་གི་ཡང་དེ་ཤེས་སོ། །སྟོང་པ་བདག་ཉིད་ཆེན་པོ་ཡི། །གནས་པ་དག་གི་དམ་པ་ཡིན། །སེམས་ཅན་བྱེ་བ་བསམ་ཡས་ཀྱང་། །ཐེག་པ་ཆེ་ལ་རབ་ཏུ་འགོད། །དེ་ལ་སྟོན་པར་བྱེད་པ་ན། །སེམས་ཅན་འདུ་ཤེས་མི་འཇུག་སྟེ། །ཆོས་
རྣམས་འཇུག་པ་མེད་པར་ནི། །བྱང་ཆུབ་སེམས་དཔའ་རབ་ཏུ་སྟོན། །ཆོས་རྣམས་རབ་ཏུ་སྟོན་པ་ན། །དམིགས་པ་དག་ནི་མི་འབྱུང་སྟེ། །ཡེ་ཤེས་བརྟན་ལ་རབ་གནས་ཤིང་། །སྟོང་པ་ཉིད་ལ་གནས་པར་འགྱུར། །སྟོན་པ་ཀུན་གྱི་གནས་པ་ཡི། །ཏིང་འཛིན་འདི་ནི་བསྟན་
བྱས་ནས། །བུད་མེད་འདུ་ཤེས་རང་བཞིན་གྱིས། །དེ་ལ་འདུ་ཤེས་མི་འབྱུང་ངོ་། །བུད་མེད་འདུ་ཤེས་རྣམ་བཤིག་ནས། །བྱང་ཆུབ་སྙིང་པོར་འདུག་པར་འགྱུར། །བྱང་ཆུབ་སྙིང་པོར་འདུག་ནས་ནི། །བདུད་ཀྱི་འདུ་ཤེས་རྣམ་པར་ལྡོག །མཁས་པ་དེས་ནི་བདུད་རྣམས་
དང་། །བདུད་ཀྱི་སྡེ་ཡང་མི་མཐོང་སྟེ། །བདུད་ཀྱི་བུ་མོ་གསུམ་པོ་ཡང་། །དེས་ནི་མཐོང་བར་མི་འགྱུར་རོ། །བྱང་ཆུབ་སྙིང་པོར་འདུག་ནས་ནི། །འདུ་ཤེས་ཐམས་ཅད་རབ་ཏུ་སྤོང་། །འདུ་ཤེས་ཐམས་ཅད་རབ་སྤངས་ནས། །ས་འདི་ཐམས་ཅད་གཡོས་པར་གྱུར། །

རི་རབ་རྒྱ་མཚོར་བཅས་པ་དག །ཕྱོགས་བཅུ་ན་ཡང་ཅི་ཡོད་གཡོས། །ཕྱོགས་བཅུ་དག་ན་སེམས་ཅན་རྣམས། །ཀུན་གྱིས་དེ་ནི་མི་ཤེས་སོ། །ས་དག་རབ་ཏུ་གཡོས་པ་འདི། །བྱང་ཆུབ་སེམས་དཔའི་རྫུ་འཕྲུལ་ཡིན། །བྱང་ཆུབ་དམ་པ་འཚང་རྒྱ་བ། །དེ་ཚེ་ས་ཡང་ལན་དྲུག་གཡོས། །འདུས་
བྱས་ཆོས་ནི་ཇི་སྙེད་དང་། །ཆོས་གང་འདུས་མ་བྱས་པ་ཡང་། །ཆོས་དེ་ཐམས་ཅད་རབ་རྟོགས་ཏེ། །ཆོས་ཀྱི་སྒྲར་ནི་བསྟན་པ་ཡིན། །འདི་ལ་རྟོགས་བྱེད་གང་ཡང་མེད། །སེང་གེའི་སྒྲ་ནི་འབྱུང་མོད་ཀྱི། །འབྱུང་བ་དག་ཀྱང་རྣམ་རིག་ནས། །འོད་བྱེད་སངས་རྒྱས་ཉིད་དུ་འགྱུར། །རྟེན་
ཅིང་ཆོས་རྣམས་འབྱུང་བར་འགྱུར། །རྟེན་ཅིང་ཆོས་རྣམས་རབ་ཏུ་སྐྱེ། །ཆོས་རྣམས་ཀྱི་ནི་རྟེན་པ་ཡང་། །མཁས་པ་དེ་དག་ཐམས་ཅད་ཤེས། །ཆོས་ཀུན་གྱི་ནི་ཆོ་ག་ཤེས། །སྟོང་ཉིད་རྟོགས་པར་ཁོང་དུ་ཆུད། །དེ་དག་འགྲོ་བ་རབ་ཤེས་ཏེ། །ཆོས་ཀུན་རྟོགས་པར་ཁོང་དུ་ཆུད། །
དེ་ཡི་འགྲོ་བ་བཙལ་ན་ཡང་། །བྱང་ཆུབ་སེམས་དཔས་མི་རྙེད་དེ། །འདི་ལྟར་སངས་རྒྱས་ཐམས་ཅད་ཀྱི། །འགྲོ་བ་བསམ་ཡས་དེ་ཡིས་རིག །འགྲོ་བ་ཐམས་ཅད་ཤེས་པ་གང་། །དེ་ནི་འགྲོ་བ་དེར་འགྲོ་སྟེ། །དམ་ཆོས་མཚན་ཉིད་རིག་པས་ན། །ངན་སོང་ཐམས་ཅད་ཆད་པ་ཡིན། །
དམ་ཆོས་མཚན་ཉིད་རིག་ནས་ནི། །ཞིང་རྣམས་ཐམས་ཅད་རྣམ་པར་ལྟ། །ཞིང་ཀུན་ལ་ཡང་རྣམ་བལྟས་ནས། །བྱང་ཆུབ་སྙིང་པོར་འདུག་པར་འགྱུར། །བྱང་ཆུབ་སྙིང་པོར་འདུག་ནས་སུ། །སེང་གེ་ཡི་ནི་སྒྲ་སྒྲོག་སྟེ། །དེ་བཞིན་ཞིང་རྣམས་བྱེ་བ་སྙེད། །བསམ་ཡས་དཔག་
མེད་གྲགས་པར་བྱེད། །ཞིང་དེ་རྣམས་ཀྱང་གཡོ་བྱེད་ཅིང་། །སངས་རྒྱས་དཔའ་བོ་གྲགས་ཆེན་དག །སེམས་ཅན་ཇི་ལྟར་འདུལ་བ་བཞིན། །སེམས་ཅན་ཁ་ལོ་སྒྱུར་ཞིང་འདུལ། །བྱང་ཆུབ་དམ་པ་རེག་ནས་ནི། །བྱང་ཆུབ་སྙིང་པོ་དེ་ལས་ལངས། །དཔག་མེད་བསམ་
གྱིས་མི་ཁྱབ་པ། །སེམས་ཅན་འདུལ་བའང་རྣམ་པར་འདུལ། །དེ་ནས་རྫོགས་པའི་སངས་རྒྱས་ནི། །སངས་རྒྱས་སྤྲུལ་པ་མཐའ་ཡས་སྤྲུལ། །ཞིང་རྣམས་བྱེ་བ་སྟོང་དུ་ཡང་། །སངས་རྒྱས་སྤྲུལ་པ་འགྲོ་བར་འགྱུར། །སེམས་ཅན་བྱེ་བ་བསམ་ཡས་རྣམས། །བྱང་ཆུབ་

མཆོག་ལ་རབ་ཏུ་འགོད། །སྲོག་ཆགས་ཀུན་ལ་ཕན་པའི་ཕྱིར། །ཆོས་ཀྱི་མཆོག་ཀྱང་སྟོན་པར་བྱེད། །ཡེ་ཤེས་ཆེན་པོ་དེ་འདྲ་སྟེ། །སངས་རྒྱས་ཡེ་ཤེས་བསམ་མི་ཁྱབ། །དེ་ཕྱིར་འདུན་པ་རབ་སྐྱེད་ཅིག །བྱང་ཆུབ་འདུན་པ་བླ་ན་མེད། །སངས་རྒྱས་དང་ནི་
ཆོས་རྣམས་དང་། །འདུས་པའི་དམ་པ་དགེ་འདུན་ལ། །བྱང་ཆུབ་སེམས་དཔའ་དཔའ་བོ་རྣམས། །བྱང་ཆུབ་མཆོག་ཚོལ་གུས་པ་སྐྱེད། །ཞུམ་པ་མེད་པའི་སེམས་ཀྱིས་ཀྱང་། །གཡེལ་བ་མེད་པར་རི་མོ་གྱིས། །དེ་ནས་འོད་བྱེད་སངས་རྒྱས་སུ། །རིང་པོར་མི་ཐོགས་འགྲོ་བར་
འགྱུར། །བྱང་ཆུབ་སེམས་དཔའ་གང་དག་ཀྱང་། །ཞིང་རྣམས་སྟོང་ནས་ལྷགས་པ་རྣམས། །འཇིག་རྟེན་སྒྲོན་མ་རབ་མཐོང་སྟེ། །ཆོས་ཀྱིས་མཆོག་ཀྱང་འཆད་པར་མཛད། །དཔའ་བོ་ཆེན་པོ་འདྲེན་པ་ལ། །རིན་ཆེན་ཆེན་པོས་འཐོར་བར་བྱེད། །མན་དཱ་ར་བའི་མེ་ཏོག་དག །
བྱང་ཆུབ་ཕྱིར་ནི་འཐོར་བར་བྱེད། །བླ་ན་མེད་པའི་སངས་རྒྱས་ཞིང་། །ཞིང་འདི་རབ་ཏུ་བརྒྱན་པར་བྱེད། །ཕྱོགས་དང་ཕྱོགས་ནི་ཀུན་ཏུ་ཡང་། །རིན་པོ་ཆེ་ཡི་དྲ་བས་གཡོགས། །བ་དན་དག་ཀྱང་གདགས་བྱས་ཤིང་། །རྒྱལ་མཚན་བྱེ་བ་མངོན་པར་བསྒྲེང་། །དུ་མ་ཡི་ནི་རྒྱན་རྣམས་
ཀྱིས། །ཞིང་འདི་ཤིན་ཏུ་ལེགས་པར་བརྒྱན། །ཁང་པ་བརྩེགས་པ་བྱེད་པར་འགྱུར། །རིན་ཆེན་ཀུན་གྱིས་རྣམ་པར་སྤྲས། །ཁང་པ་པུ་ཤུ་སྟེགས་བུ་དག །ཡིད་དུ་འོང་བ་གྲངས་མེད་རྣམས། །གཞལ་མེད་ཁང་དང་ཟླ་གམ་དང་། །སྐར་ཁུང་དེ་བཞིན་བྱ་རྒྱ་བྲེས། །རིན་ཆེན་
སྣ་ཚོགས་བརྒྱན་པ་ཡི། །བདུག་པའི་སྣོད་དུ་བདུག་པ་བདུགས། །བདུག་པ་དག་ནི་བདུགས་པ་ཡིས། །སངས་རྒྱས་ཞིང་འདི་རབ་ཏུ་གང་། །དེ་ཡི་དྲི་ནི་ཡིད་འོང་བ། །ཞིང་ཡང་བྱེ་བ་སྟོང་དུ་ལྡང་། །དེ་དག་ཀུན་ཏུ་ཁྱབ་བྱས་ནས། །སྤོས་ཀྱི་ཆར་ཡང་རབ་ཏུ་འབེབས། །གང་
གིས་དྲི་དེ་བསྣམས་པ་ཡང་། །དེ་དག་སངས་རྒྱས་འདྲེན་པར་འགྱུར། །དེ་དག་འདོད་ཆགས་ཟུག་རྔུ་སྤངས། །ཞེ་སྡང་སྲེད་པ་ཡོང་མེད་དེ། །རྒྱ་མོ་ཆེན་པོ་རྣམ་པར་དྲལ། །མུན་པ་ཀུན་ཀྱང་མེད་པར་འགྱུར། །དེར་ནི་རྫུ་འཕྲུལ་ཐོབ་གྱུར་ཏེ། །དབང་སྟོབས་བྱང་ཆུབ་ཡན་

ལག་དང་། །བསམ་གཏན་ཐར་པ་རྣམ་པར་རེག །དེ་དག་སྦྱིན་པར་འོས་པར་འགྱུར། །སྟན་ཡང་ཡིད་དུ་འོང་བ་རྣམས། །བྱེ་བ་ཕྲག་ལྔ་རབ་བཤམས་ཏེ། །རིན་ཆེན་དྲ་བས་བརྒྱན་པ་ཡི། །གོས་རྣམས་བྱེ་བ་རབ་ཏུ་བཏིང་། །དེ་ལ་དཔའ་བོ་གྲགས་པ་ཆེ། །བྱང་ཆུབ་སེམས་
དཔའ་དེ་དག་འདུག །མཚན་དང་དེ་བཞིན་དཔེ་བྱད་ཀྱིས། །དེ་དག་ཤིན་ཏུ་རྣམ་པར་འབར། །སངས་རྒྱས་ཞིང་འདི་ཐམས་ཅད་ཀྱང་། །རིན་ཆེན་ཤིང་གིས་ལེགས་བརྒྱན་ཏེ། །ཡན་ལག་བརྒྱད་ལྡན་ཆུས་གང་བ། །རྫིང་བུ་དག་ནི་རྣམ་པར་སྤྲུལ། །རྫིང་བུའི་འགྲམ་ན་གནས་པ་
རྣམས། །དེ་དག་དེ་ལས་ཆུ་འཐུངས་ནས། །ཐམས་ཅད་སྲེད་པ་བསལ་ནས་ནི། །འཇིག་རྟེན་གྱི་ཡང་མཆོད་རྟེན་འགྱུར། །ཐ་དད་པ་ཡི་ཞིང་ནས་ཀྱང་། །བྱང་ཆུབ་སེམས་དཔའ་ལྷགས་པ་རྣམས། །ཤཱཀྱ་སེང་གེ་སྐྱོབ་པ་ཡི། །སངས་རྒྱས་བསྔགས་པ་རྗོད་པར་བྱེད། །སྒྲ་དེ་
སུ་དག་ཐོས་པ་ནི། །དེ་དག་འཇིག་རྟེན་འདྲེན་པར་འགྱུར། །ཕན་ཡོན་བསམ་གྱིས་མི་ཁྱབ་པ། །མདོ་སྡེ་འདི་ནི་ངས་རབ་བཤད། །པད་མ་བྱེ་བ་བསམ་མི་ཁྱབ། །འདབ་མ་དག་ནི་གསེར་ལས་བྱས། །སྙིང་པོ་སྦྲུལ་གྱི་སྙིང་པོ་སྟེ། །དེར་ནི་དེ་དག་རབ་ཏུ་སྤྲུལ། །ཡལ་ག་
དག་ཀྱང་བཻ་དཱུརྱ། །ཁོག་པ་དག་ནི་ཤེལ་ཡིན་ཏེ། །ཟེ་བ་དཔལ་གྱི་སྙིང་པོ་ཅན། །དེར་ནི་མཛེས་པ་རྣམས་ཀྱང་སྤྲུལ། །དེ་དག་དྲི་ཡང་བསམ་མི་ཁྱབ། །རྒྱུན་མི་འཆད་པར་འབྱུང་བ་ཡིས། །ཞིང་རྣམས་བྱེ་བ་ཀུན་ཏུ་གང་། །པད་མོའི་དྲི་ནི་བསམ་མི་ཁྱབ། །ཡིད་དུ་འོང་བར་འབྱུང་
བ་ཡི། །དྲི་དེ་སུ་ཡིས་བསྣམས་པ་ཡང་། །དེ་དག་རབ་ཏུ་སེམས་དགའ་ཞིང་། །ནད་རྣམས་ཐམས་ཅད་ཞི་བར་འགྱུར། །འདོད་ཆགས་ཞེ་སྡང་གཏི་མུག་རྣམས། །མ་ལུས་པར་ནི་ཟད་འགྱུར་ཏེ། །དེ་དག་ཉེས་པ་གསུམ་ཟད་ནས། །སངས་རྒྱས་བདེ་བ་སྦྱིན་པར་འགྱུར། །དེ་
དག་ལས་ནི་སྒྲ་འབྱུང་སྟེ། །སངས་རྒྱས་སྒྲ་ནི་བསམ་མི་ཁྱབ། །དམ་པའི་ཆོས་དང་དགེ་འདུན་སྒྲ། །རྣམ་པ་ཀུན་ནི་འབྱུང་བར་འགྱུར། །སྟོང་པ་ཉིད་དང་མཚན་མེད་དང་། །སྨོན་པ་མེད་པའི་སྒྲ་འབྱུང་སྟེ། །དེ་ཐོས་སེམས་ཅན་བྱེ་བ་མང་། །ཕྱིར་མི་ལྡོག་པར་རབ་ཏུ་

འགྱུར། །སྒྲ་དེ་དག་ནི་བྱུང་བ་ཡང་། །ཞིང་རྣམས་བྱེ་བར་འགྲོ་བར་འགྱུར། །སེམས་ཅན་བྱེ་བ་བསམ་ཡས་རྣམས། །སངས་རྒྱས་ཡེ་ཤེས་འགོད་པར་བྱེད། །རྨ་བྱ་ཀ་ལ་པིང་ཀ་དང་། །ཤང་ཤང་ཏེའུ་དང་བྱ་རྣམས་ཀྱང་། །དེ་དག་རབ་ཏུ་སྒྲ་འབྱིན་པ། །སངས་རྒྱས་
སྒྲ་ནི་བླ་ན་མེད། །ཀུ་ནལ་རི་སྐེགས་ཁྲུང་ཁྲུང་དང་། །ཁུ་བྱུག་དང་ནི་བྱ་རྣམས་ཏེ། །དེ་དག་སྒྲ་ནི་འབྱིན་པ་ཡང་། །བསམ་གྱིས་མི་ཁྱབ་ཆོས་སྒྲ་འབྱིན། །ནེ་ཙོ་ངང་པ་ཀ་རན་ད། །ངུར་པ་དང་ནི་ས་ར་ས། །དེ་དག་སྒྲ་རྣམས་འབྱིན་པ་ནི། །བླ་མེད་དགེ་འདུན་སྒྲ་ཡང་འབྱིན། །ལྷ་དག་གི་
དང་མི་ཡི་ནི། །བྱ་རྣམས་ཇི་སྙེད་གང་ཡོད་པ། །དཀོན་མཆོག་གསུམ་གྱི་བསྔགས་པ་རྣམས། །དེ་དག་ཀུན་ཏུ་སྒྲ་ཡང་འབྱིན། །རིན་པོ་ཆེ་ཡི་ཤིང་རྣམས་ནི། །བྱེ་བྲག་འཕགས་ཤིང་བལྟ་ན་སྡུག །ཡིད་འོང་ནོར་བུའི་ཤིང་རྣམས་ཀྱང་། །ཞིང་འདི་ཉིད་དུ་རྣམ་པར་སྤྲུལ། །ཤིང་འདི་ཀུན་
ལ་རྒྱན་རྣམས་ཀྱི། །ཆུན་པོ་ཐམས་ཅད་རབ་ཏུ་འཕྱང་། །སངས་རྒྱས་དག་གི་མཐུ་ཡིས་ནི། །ཞིང་འདི་ཉིད་དུ་མངོན་པར་སྤྲུལ། །ཞིང་འདི་ན་ནི་མི་སྣང་བ། །དེ་ལྟ་བུ་ཡི་བཀོད་པ་ནི། །ཞིང་ཀུན་ན་ཡང་ཡོང་མེད་དེ། །དེ་ཚེ་ཤིན་ཏུ་བྱེ་བྲག་འཕགས། །གོང་མ་བཞིན་དུ་འདི་དག་རྣམས། །
ཤཱཀྱ་སེང་གེ་སྐྱོབ་པས་བཤད། །བྱང་ཆུབ་སེམས་དཔའ་གྲགས་ཆེན་རྣམས། །ཡེ་ཤེས་དེ་ལ་ནེམ་ནུར་མེད། །གང་གི་མཐའ་འདི་རྟོགས་པ་ནི། །དེ་དག་འཇུག་པ་བསམ་ཡས་ཏེ། །ཡེ་ཤེས་ཀྱིས་ནི་རྣམ་པར་འཕེལ། །འབབ་ཆུ་དག་གིས་རྒྱ་མཚོ་བཞིན། །དེ་དག་ལ་ཡང་མཐའ་
མི་རྙེད། །རྒྱ་མཚོ་དག་ནི་འཐུང་བ་བཞིན། །བྱང་ཆུབ་སེམས་དཔའ་རྣམས་ཀྱི་ཚུལ། །བསམ་གྱིས་མི་ཁྱབ་འདི་དག་བཤད། །དཔའ་བོ་མཐའ་འདིར་གནས་པ་ཡི། །བྱང་ཆུབ་སེམས་དཔའ་གྲགས་ལྡན་རྣམས། །དབྱངས་ཀྱི་ཡན་ལག་རྣམ་འབྱིན་པ། །གང་གཱ་ཡི་ནི་བྱེ་མ་
སྙེད། །དེ་བས་དབྱངས་ཀྱང་བསམ་ཡས་ཏེ། །བྱང་ཆུབ་སེམས་དཔའ་རློམ་སེམས་མེད། །རློམ་སེམས་རབ་ཏུ་སྤངས་པ་ན། །བྱང་ཆུབ་ཏུ་ཡང་ཉེ་བར་འགྱུར། །དེ་དག་སྲོག་གི་ཕྱིར་ཡང་ནི། །ཚུལ་ཁྲིམས་འདྲལ་བར་མི་བྱེད་དེ། །བྱང་ཆུབ་སེམས་དཔའ་དཀའ་ཐུབ་

བརྟན། །དེ་ནི་མི་འདྲལ་སྤྱོད་པར་བྱེད། །འདོད་པ་ཡི་ནི་འདུ་ཤེས་ཀྱིས། །དེ་ཀུན་ཕྱིར་ཡང་མི་འདྲལ་ཏེ། །འདུ་ཤེས་ཐམས་ཅད་སྤངས་པ་ལ། །ཏིང་འཛིན་དག་ནི་དཔག་ཏུ་མེད། །མཉམ་པར་བཞག་པས་དེ་སྤྱོད་དེ། །ཏིང་འཛིན་ལ་ཡང་ཆགས་པ་མེད། །ཆགས་པ་མེད་ཅིང་བག་
ཡོད་པས། །དེ་ནི་འཇིག་རྟེན་ཆགས་མི་བྱེད། །འཇིག་རྟེན་ཁམས་ནི་འདས་ནས་ཀྱང་། །བདེ་བ་ཅན་དུ་དེ་འགྲོ་སྟེ། །དེར་སོང་ནས་ནི་དེ་ཡིས་ཀྱང་། །སངས་རྒྱས་འོད་དཔག་མེད་པ་མཐོང་། །བྱང་ཆུབ་སེམས་དཔའ་དཔའ་བོ་གང་། །མཚན་རྣམས་ཀྱིས་ནི་ལེགས་པར་བརྒྱན། །
མངོན་ཤེས་ལྔ་ལྡན་ཤེས་རབ་ཆེ། །གཟུངས་རྣམས་སྤྱོད་ཡུལ་གྱུར་པ་དག །ཞིང་རྣམས་བྱེ་བར་རབ་འགྲོ་ཞིང་། །སངས་རྒྱས་ཞབས་ལ་ཕྱག་ཀྱང་འཚལ། །སངས་རྒྱས་ཞིང་ནི་བསམ་ཡས་སུ། །སྣང་བར་བྱེད་ཅིང་འགྲོ་བར་འགྱུར། །སྐྱོན་རྣམས་ཐམས་ཅད་རབ་སྤངས་ཤིང་། །ཉོན་
མོངས་ཐམས་ཅད་རྣམ་པར་སྦྱངས། །ཉོན་མོངས་ཐམས་ཅད་རྒྱུན་བཅད་དེ། །རྒྱལ་བར་སྐྱེ་བ་གཅིག་གིས་གནས། །ཞིང་དེ་ནས་ནི་མི་རྣམས་ཀྱང་། །ངན་སོང་དུ་ཡང་མི་འགྲོ་སྟེ། །ཞིང་དེར་ངན་སོང་ཐམས་ཅད་ཀྱང་། །མ་ལུས་པར་ནི་ཆད་པར་འགྱུར། །སྐྱོབ་པ་འོད་ནི་དཔག་
མེད་པ། །འཇིག་རྟེན་མགོན་པོས་བཤད་པ་སྟེ། །དེ་ལ་ནེམ་ནུར་མ་བྱེད་ཅིག །བདེ་བ་ཅན་དུ་འགྲོ་བར་འགྱུར། །མདོ་སྡེ་རིན་ཆེན་འདི་ཡི་བསྔགས་པ་རྣམས། །བུད་མེད་གང་ཐོས་སེམས་ཀྱང་དད་འགྱུར་བ། །སྐྱེས་བུ་མཁས་པ་མཆོག་ཏུ་མྱུར་འགྱུར་ཏེ། །རྫུ་འཕྲུལ་གྱིས་ནི་ཞིང་སྟོང་བྱེ་
བར་འགྲོ། །མཆོད་པ་ཚད་མེད་རྣམ་མང་ཇི་སྙེད་པ། །ཞིང་ནི་བྱེ་བ་ཁྲག་ཁྲིག་གཏམས་སྙེད་དུ། །སྐྱེས་བུ་མཆོག་ལ་མཆོད་པ་དེ་བྱས་པས། །བྱམས་པའི་སེམས་ལ་གྲངས་དང་ཆར་མི་ཕོད། །ཚུལ་ཁྲིམས་ཏིང་འཛིན་རྟག་ཏུ་བསྙེན་བྱས་ཏེ། །བསམ་གཏན་རྣམ་ཐར་དེ་བཞིན་ཚད་
མེད་དང་། །སྟོང་པ་མཚན་མེད་རྟག་ཏུ་བསྙེན་བྱས་ན། །རིང་པོར་མི་ཐོགས་འཇིག་རྟེན་བདེ་གཤེགས་འགྱུར། །བྱང་ཆུབ་སེམས་དཔའ་ཚུལ་ཁྲིམས་ཚོགས་གནས་པ། །དེས་ནི་ང་ལ་མཆོད་པ་རབ་མཆོག་བྱས། །ཟད་དུས་ཐ་མར་བྱང་ཆུབ་སེམས་གནས་པ། །དེས་ནི་སངས་རྒྱས་

ཐམས་ཅད་རྟག་ཏུ་མཆོད། །ཟད་དུས་མི་བཟད་པ་ལ་བྱང་ཆུབ་སེམས་དཔའ་གང་། །བདེ་བར་གཤེགས་པས་བསྟན་པའི་ཆོས་མཆོག་འདི་སྲུང་བ། །དེ་དག་ང་ཡི་སྲས་ཏེ་ཕྱི་དུས་ཆོས་སྐྱོང་བ། །དེ་དག་སངས་རྒྱས་བྱེ་བ་སྟོང་གིས་ཡོངས་སུ་གཏད། །མདོ་སྡེ་འཛིན་པའི་ཕན་ཡོན་
གྱི་ལེའུ་སྟེ་སུམ་ཅུ་རྩ་གསུམ་པའོ།། །།འཕགས་པ་ཏིང་ངེ་འཛིན་གྱི་རྒྱལ་པོའི་མདོ། བམ་པོ་བཅུ་གཅིག་པ། དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འདོད་པ་
དང་། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་མཚན་མ་མེད་པ་ལ་གནས་ཏེ་དེ་བཞིན་གཤེགས་པ་བཞུགས་པའམ། ཡོངས་སུ་མྱ་ངན་ལས་འདས་པ་དག་གི་དེ་བཞིན་གཤེགས་པའི་མཆོད་རྟེན་རྣམས་ལ་མཆོད་པ་རྒྱ་ཆེར་བྱ་
བ་ལ་མངོན་པར་བརྩོན་པར་བྱའོ། །གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་དེས་སེམས་ཅན་ཐམས་ཅད་ལ་དམིགས་པའི་སེམས་བསྐྱེད་པས་ཏིང་ངེ་འཛིན་འདི་འདོད་པ་དང་། །མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་
འདོད་པས་མཚན་མ་མེད་པ་ལ་གནས་ཤིང་ལས་ཀྱི་རྣམ་པར་སྨིན་པ་ལ་མི་རེ་བས་རང་གི་ལུས་དང་སྲོག་གིས་ཀྱང་དེ་བཞིན་གཤེགས་པ་བཞུགས་པའམ། །ཡོངས་སུ་མྱ་ངན་ལས་འདས་པ་དག་གི་མཆོད་རྟེན་ལ་མཆོད་པ་མངོན་པར་འདུ་བྱ་བ་རྒྱ་ཆེར་བྱའོ། །ཆོས་ཐམས་ཅད་ཀྱི་རང་
བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་འདི་ཡང་སྐད་གསང་མཐོ་ཞིང་ཡིད་དུ་འོང་བ་དང་། བྱེ་བྲག་ཏུ་འཕགས་པའི་ཚིག་དང་ཡི་གེ་རྒྱུན་ཆགས་པས་སྙིང་རྗེ་ཆེན་པོ་ལ་དམིགས་པའི་སེམས་དང་། ཡིད་ལ་བྱེད་པས་གཞན་ལ་རྒྱ་ཆེར་རབ་ཏུ་བསྟན་པར་བྱའོ། །རབ་ཏུ་
གདོན་པར་བྱའོ། །བཤད་པར་བྱའོ། །དེ་ཅིའི་ཕྱིར་ཞེ་ན། གཞོན་ནུ་ཆོས་ཐམས་ཅད་ཀྱི་རྩ་བ་དང་གཞི་ནི་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་གྱི་རྒྱལ་པོ་འདི་ཡིན་ནོ། །གཞོན་ནུ་གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་

ཆེན་པོ་དང་། ཐབས་ཀྱིས་བརྟན་པའི་བརྩོན་འགྲུས་དང་ལྡན་པས་དེ་བཞིན་གཤེགས་པ་བཞུགས་པའམ། ཡོངས་སུ་མྱ་ངན་ལས་འདས་པ་དག་གི་དེ་བཞིན་གཤེགས་པའི་མཆོད་རྟེན་རྣམས་ལ་མཆོད་པ་རྒྱ་ཆེར་བྱ་བ་ལ་བརྩོན་པར་གྱུར་ཅིང་། ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་
པར་སྤྲོས་པའི་ཏིང་ངེ་འཛིན་གྱི་རྒྱལ་པོ་འདི་གཞན་དག་ལ་ཡང་རྒྱ་ཆེར་རབ་ཏུ་སྟོན་པ་དེའི་ཚེ་གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་རྣམ་པར་ཐར་པའི་སྒོ་ལ་གནས་པར་འགྱུར་ཏེ། དེ་ཆོས་གང་ལ་ཡང་མི་དམིགས་སོ། །
བྱང་ཆུབ་སེམས་དཔའ་སེམས་དཔའ་ཆེན་པོ་མི་དམིགས་པའི་ཏིང་ངེ་འཛིན་གྱི་རྣལ་འབྱོར་ལ་གནས་པ་ནི་སྨོན་ལམ་ཐམས་ཅད་ལ་གནས་པར་འགྱུར་རོ། །གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་སྨོན་ལམ་ཐམས་ཅད་ལ་གནས་པ་ནི་བདག་དང་སེམས་ཅན་ཀུན་གྱི་སྨོན་ལམ་ཐམས་ཅད་
ཡོངས་སུ་རྫོགས་པར་བྱེད་དེ། ཏིང་ངེ་འཛིན་འདི་ཡང་མྱུར་དུ་ཐོབ་ཅིང་། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །གཞོན་ནུ་རྣམ་གྲངས་འདིས་ཀྱང་འདི་ལྟར་རིག་པར་བྱ་སྟེ། གཞོན་ནུ་སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པ་
བས་ཆེས་གྲངས་མེད་པ། ཡངས་པ། ཚད་མེད་པ། བསམ་གྱིས་མི་ཁྱབ་པ། དཔག་ཏུ་མེད་པར་གྱུར་པ་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་
བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་དབྱངས་བྱིན་ཞེས་བྱ་བ་འཇིག་རྟེན་དུ་བྱུང་ངོ་། །གཞོན་ནུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབྱངས་བྱིན་དེས་སེམས་ཅན་གྲངས་མེད་དཔག་ཏུ་མེད་
པ་ཟག་པ་ཟད་པ། དགྲ་བཅོམ་པ་ཉིད་ལ་བཀོད་དེ། རབ་ཏུ་བཀོད་ཅིང་ཡོངས་སུ་མྱ་ངན་ལས་འདས་ནས་ཀྱང་སེམས་ཅན་གྲངས་མེད་དཔག་ཏུ་མེད་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་ཡང་རབ་ཏུ་བཀོད་ནས་ཡོངས་སུ་མྱ་ངན་ལས་འདས་པར་གྱུར་ཏོ། །

གཞོན་ནུ་དེའི་ཚེ་དེའི་དུས་ན་འཛམ་བུའི་གླིང་ན་རྒྱལ་པོ་དཔལ་དབྱངས་ཞེས་བྱ་བས། དེ་བཞིན་གཤེགས་པ་ཡོངས་སུ་མྱ་ངན་ལས་འདས་པ་ལ་མཆོད་པ་བྱ་བའི་ཕྱིར་མཆོད་རྟེན་དེ་བཞིན་གཤེགས་པའི་རིང་བསྲེལ་གྱི་སྙིང་པོ་ཅན་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཁྲི་བཞི་སྟོང་བྱས་ཏེ། མཆོད་
རྟེན་རེ་རེ་ལ་ཡང་མར་མེའི་ཡོན་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཁྲི་བཞི་སྟོང་བཙུགས་སོ། །དེ་བཞིན་དུ་མཆོད་རྟེན་རེ་རེ་ལ་ཡང་རོལ་མོ་དང་། སིལ་སྙན་དང་། མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། ན་བཟའ་དང་། གདུགས་དང་། རྒྱལ་མཚན་
དང་། བ་དན་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཁྲི་བཞི་སྟོང་ཕུལ་ལོ། །གཞོན་ནུ་འདི་ལྟར་རྒྱལ་པོ་དཔལ་དབྱངས་ཀྱིས་མཆོད་རྟེན་དེ་བཞིན་གཤེགས་པའི་རིང་བསྲེལ་གྱི་སྙིང་པོ་ཅན་ལ་མཆོད་པ་བྱས་ནས་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུའི་བྱང་ཆུབ་སེམས་དཔའ་མང་པོ་
བསོགས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་ལ་བདེ་བའི་ཡོ་བྱད་ཐམས་ཅད་ཀྱིས་མཆོད་པ་ལ་བརྩོན་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་ཀྱང་ཆོས་སྨྲ་བ་ཡིན་ཏེ། སྤོབས་པ་རྒྱུན་མི་འཆད་པ། ཏིང་ངེ་འཛིན་རབ་ཏུ་ཐོབ་པ།
ཆགས་པ་མེད་པའི་གཟུངས་རབ་ཏུ་ཐོབ་པ། ཡང་དག་པའི་ཡོན་ཏན་གྱི་ཆོས་སྟོན་པ། ཡོངས་སུ་དག་པའི་ཆོས་སྟོན་པ། བྱང་ཆུབ་སེམས་དཔའི་དབང་དམ་པའི་ཕ་རོལ་ཏུ་ཕྱིན་པ་ཤ་སྟག་གོ། །གཞོན་ནུ་དེའི་ཚེ་དེའི་དུས་ན། འཁོར་དེའི་ནང་ན་བྱང་ཆུབ་སེམས་དཔའ་སེམས་དཔའ་ཆེན་པོ་བདེ་
བས་བྱིན་ཞེས་བྱ་བ་ཡོད་དེ། བྱིས་པ་གཞོན་ནུ་སྐྲ་ནག་པ། དང་པོའི་ལང་ཚོ་དང་ལྡན་པ། ན་ཚོད་དར་ལ་བབ་པ། འདོད་པ་ལ་རྣམ་པར་མ་རྩེས་ཤིང་། །གཞོན་ནུར་ཚངས་པར་སྤྱད་པ། བསྙེན་པར་རྫོགས་ནས་ལོ་གཅིག་ལོན་པ་ཞིག་ཡོད་དོ། །གཞོན་ནུ་དེའི་ཚེ་དེའི་དུས་ན་རྒྱལ་པོ་དཔལ་
དབྱངས་ཀྱིས་བྱང་ཆུབ་སེམས་དཔའི་ཚོགས་ཆེན་པོ་དེ་དག་ལ་གསོལ་བ་བཏབ་པ། །འདི་ལྟ་སྟེ། ཕ་རོལ་ཏུ་ཕྱིན་པ་དྲུག་དང་ལྡན་པ་ཡང་དག་པར་སྡུད་པ། བྱང་ཆུབ་སེམས་དཔའི་སྡེ་སྣོད་གཟུངས་ཆེན་པོ་དང་། ཐབས་ལ་མཁས་པ་དང་། དབང་དང་འདུལ་བ་ཆགས་པ་མེད་པ་མངོན་

པར་བསྒྲུབ་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ལ་གསོལ་བ་བཏབ་ནས། དེའི་ནུབ་མོ་མཆོད་རྟེན་དེ་བཞིན་གཤེགས་པའི་རིང་བསྲེལ་གྱི་སྙིང་པོ་ཅན་རྣམས་ཀྱི་མདུན་དུ་མར་མེའི་ཡོན་བྱེ་བ་ཁྲག་ཁྲིག་བརྒྱ་སྟོང་དག་རབ་ཏུ་འབར་བར་བྱས་ཏེ། ཁྱམས་ཀྱི་དཀྱིལ་འཁོར་ཡང་
ཕྱག་དར་བྱས་ཤིང་ཆག་ཆག་བཏབ་ནས་རབ་ཏུ་བྱུག་པ་བྱས། མེ་ཏོག་མངོན་པར་བཀྲམ་ཞིང་། མལ་སྟན་སྣ་ཚོགས་བཏིང་སྟེ། རྒྱལ་པོ་དཔལ་དབྱངས་དེ་བཙུན་མོའི་འཁོར་དང་བཅས། གྲོང་དང་ཡུལ་མི་འཁོར་དང་བཅས། གྲོང་མིར་བཅས་པ་ཁྱིམ་གྱི་ནང་ནས་བྱུང་སྟེ། རོལ་མོ་དང་སིལ་
སྙན་དང་། ཕེག་རྡོབ་པ་དང་། མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། ན་བཟའ་དང་། གདུགས་དང་། རྒྱལ་མཚན་དང་། བ་དན་རྣམས་ཐོགས་ནས་མཆོད་རྟེན་དེ་བཞིན་གཤེགས་པའི་རིང་བསྲེལ་གྱི་སྙིང་པོ་ཅན་རྣམས་ལ་
མཆོད་པ་བྱས་ནས་ཆོས་མཉན་པའི་ཕྱིར་བཙུན་མོའི་འཁོར་དང་བཅས་ཏེ་ཁང་ཐོག་ཏུ་དོང་ངོ་། །ལྷ་དང་མིའི་འཁོར་ཀྱང་ཆོས་ཉན་པའི་ཕྱིར་མང་དུ་ཚོགས་ཏེ་བྱང་ཆུབ་སེམས་དཔའ་བདེ་བས་བྱིན་གྱིས་དེ་དག་མཐོང་བ་དང་། མར་མེའི་ཡོན་དུ་ཕུལ་བ་བྱེ་བ་ཁྲག་ཁྲིག་བརྒྱ་སྟོང་མང་པོ་དག་རབ་ཏུ་
འབར་བར་བྱས་པས་དེའི་འོད་ཀྱིས་གཅིག་ཏུ་ཁྱབ་སྟེ། ལྷ་དང་མིའི་སྐྱེ་བོ་མང་པོ་རྣམས་ཆོས་ཉན་པར་ཚོགས་པར་རིག་ནས་དེ་འདི་སྙམ་དུ་སེམས་ཏེ། བདག་ནི་ཐེག་པ་ཆེན་པོ་ལ་ཞུགས་པ་ཡིན་ན། ད་བདག་ཏིང་ངེ་འཛིན་འདི་འདོད་པའི་ཕྱིར་དེ་བཞིན་གཤེགས་པ་ལ་མཆོད་པ་ཞིག་བྱ་སྟེ། དེ་
བཞིན་གཤེགས་པ་ལ་མཆོད་པ་ཇི་ལྟ་བུས་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་ངོ་མཚར་དུ་འགྱུར་བ་དང་། ཡི་རངས་པ་དང་། དགའ་བ་དང་། མགུ་བ་དང་། ཡིད་བདེ་བ་སྐྱེ་བར་འགྱུར་ཞིང་། ཆོས་ཀྱི་སྣང་བ་ཐོབ་པ་དང་། རྒྱལ་པོ་དཔལ་དབྱངས་ཀྱིས་དེ་བཞིན་
གཤེགས་པ་ལ་མཆོད་པ་བྱས་པ་ཐམས་ཅད་དང་ལྡན་པ་འདིའང་ཟིལ་གྱིས་མནན་ཏེ། རྒྱལ་པོ་དཔལ་དབྱངས་བཙུན་མོའི་འཁོར་དང་ཞབས་འབྲིང་བར་བཅས་པ་ཡང་ངོ་མཚར་དུ་གྱུར་ཅིང་ཡི་རངས་པ་དང་། རབ་ཏུ་དགའ་བ་དང་། མགུ་བ་དང་། ཡིད་བདེ་བ་སྐྱེ་བར་འགྱུར་བར་མཆོད་

པར་བྱའོ་སྙམ་མོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བདེ་བས་བྱིན་དེ་ལྟར་སེམས་དགའ་ཞིང་ཡིད་བདེ་བ་སྐྱེས་ཏེ། ཆོས་ཉན་པའི་སྐྱེ་བོའི་ཚོགས་ཆེན་པོ་འདུས་པར་རིག་ནས་དེའི་ནུབ་མོ་དེ་བཞིན་གཤེགས་པའི་མཆོད་རྟེན་གྱི་མདུན་དུ་འདུག་ནས་ལག་པ་གཡས་པ་རས་
ཀྱིས་དཀྲིས་ཏེ་འབྲུ་མར་གྱི་ནང་དུ་བཅུག་གོ། །འབྲུ་མར་གྱི་ནང་དུ་བཅུག་ནས་འབར་བར་བྱས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བདེ་བས་བྱིན་ལྷག་པའི་བསམ་པ་ལ་ཞུགས་པ། ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས་ཤིང་། བྱང་
ཆུབ་ཡོངས་སུ་ཚོལ་བའི་ལག་པ་གཡས་པ་དེ་ལྟར་འབར་ཡང་སེམས་དང་བཞིན་གྱི་མདོག་འགྱུར་བ་མེད་དོ། །གཞོན་ནུ་དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བདེ་བས་བྱིན་གྱི་ལག་པ་གཡས་པ་བསྲེགས་ནས་རབ་ཏུ་འབར་ཞིང་མེར་གྱུར་ཏེ། མེ་ལྕེ་གཅིག་ཏུ་འབར་བར་གྱུར་མ་ཐག་
ཏུ་དེའི་ཚེ་ས་ཆེན་པོ་འདི་ཡང་རབ་ཏུ་གཡོས་པར་གྱུར་ཏོ། །དེའི་ལག་པ་གཡས་པ་འབར་བར་བྱས་པའི་འོད་དེས་མར་མེ་ཡོན་དུ་ཕུལ་བ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་རྣམས་མོག་མོག་པོར་བྱས་པར་གྱུར་ཏེ། ཕྱོགས་ཐམས་ཅད་དུའང་སྣང་བ་ཆེན་པོ་བྱུང་ངོ་། །འོད་དེས་ཕྱོགས་ཐམས་ཅད་སྣང་
བར་གྱུར་ཏེ། ཀུན་ཏུ་ཁྱབ་པར་གྱུར་པ་དང་། དེ་དགའ་ཞིང་ཡིད་བདེ་བ་སྐྱེས་ནས་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་འདིའང་སྐད་འཇམ་ཞིང་ཡིད་དུ་འོང་བ་དང་ཚིག་བྱེ་བྲག་ཏུ་འཕགས་པ་དང་། ཚིག་དང་ཡི་གེ་རྒྱུན་ཆགས་པས་འཁོར་དེ་དག་ཐམས་ཅད་ལ་
རྒྱ་ཆེར་གོ་བར་བྱེད་ཅིང་ཡང་དག་པར་རབ་ཏུ་བསྟན་ཏོ། །དེར་སུམ་ཅུ་རྩ་གསུམ་རིས་ཀྱི་ལྷ་ཁྲི་ཉིས་སྟོང་ཆོས་ཉན་པར་འདུས་པ་དེ་དག་དགའ་ཞིང་ཡིད་བདེ་བ་སྐྱེས་ནས་ལྷའི་མཆོད་པ་སྣ་ཚོགས་བྱེད་པར་གྱུར་ཏོ། །ལྷའི་བུ་མོ་རྣམས་ཀྱང་ལྷའི་རོལ་མོ་དག་བྱེད་དོ། །རྒྱལ་པོ་དཔལ་དབྱངས་
ཁང་པའི་སྟེང་ན་འདུག་པ་བདག་གི་མི་མང་པོས་བསྐོར་ཅིང་མདུན་དུ་བདར་ཏེ། བཙུན་མོའི་འཁོར་གྱི་ནང་ན་འདུག་པ། གསོ་སྦྱོང་ཡན་ལག་བརྒྱད་དང་ལྡན་པ་ཡང་དག་པར་བཟུང་བས་བྱང་ཆུབ་སེམས་དཔའ་སེམས་དཔའ་ཆེན་པོ་བདེ་བས་བྱིན་གྱི་ལག་པ་འབར་བར་བྱས་ཏེ། འོད་དེ་

དག་ཐམས་ཅད་ཟིལ་གྱིས་མནན་ཅིང་ལྷའི་འོད་མིའི་ལས་འདས་པས་སྣང་བར་བྱས་པ་མཐོང་ནས་དེ་འདི་སྙམ་དུ་སེམས་སོ། །འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་མངོན་པར་ཤེས་པ་ཆེན་པོ་ཐོབ་པ་ཡིན་ནོ་ཞེས་བྱང་ཆུབ་སེམས་དཔའ་སེམས་དཔའ་ཆེན་པོ་བདེ་བས་བྱིན་ལ་ཤིན་ཏུ་
དགའ་བ་དང་། དད་པ་དང་གུས་པ་ཉེ་བར་བཞག་སྟེ། རི་མོར་བཅས་ཤིང་དགེ་བའི་རྩ་བ་དང་། བསོད་ནམས་ཀྱི་ཕུང་པོ་ཆེན་པོས་བརྟན་པས་བཙུན་མོའི་འཁོར་བརྒྱད་ཅུ་དང་ལྷན་ཅིག་ཁང་པའི་སྟེང་དེ་ནས་བདག་ཉིད་མཆོངས་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་བདེ་བས་བྱིན་
བལྟ་བ་དང་རབ་ཏུ་དགའ་བར་བྱ་བའི་ཕྱིར་མཆོངས་ཏེ་སོང་ངོ་། །དེ་གུས་པ་ལས་བྱུང་བའི་དགེ་བའི་རྩ་བས་ཚེ་དེ་ཉིད་ལ་འཁོར་དང་བཅས་པ། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་རྣམས་ཀྱིས་ཡོངས་སུ་
བཟུང་བ་ཐོབ་བོ། །དེ་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དག་གིས་ཡོངས་སུ་བཟུང་བས་རྒྱལ་པོ་དཔལ་དབྱངས་ཀྱང་འཁོར་དང་བཅས་པ་ཁྲུ་སྟོང་ཕྲག་བརྒྱར་ཚང་བའི་ཁང་པའི་སྟེང་ནས་མཆོངས་ན་
དེའི་ལུས་ལ་གནོད་པའམ། སེམས་ལ་གནོད་པའམ། སེམས་ཞུམ་པར་གྱུར་པ་མེད་དོ། །དེ་ནས་རྒྱལ་པོ་དཔལ་དབྱངས་ལག་པ་གཉིས་བསྒྲེང་སྟེ། སྐྱེ་བོའི་ཚོགས་ཆེན་པོ་དང་ལྷན་ཅིག་འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བདེ་བས་བྱིན་གྱི་ལག་པ་བསྲེགས་ཤིང་
རབ་ཏུ་འབར་བ་མཐོང་ནས་སྐད་ཆེན་པོ་ཕྱུང་སྟེ་ཆོ་ངེས་བཏབ་བོ། །དེ་ནས་རྒྱལ་པོ་དེ་སྐྱེ་བོའི་ཚོགས་ཆེན་པོ་དང་ལྷན་ཅིག་ངུ་ཞིང་མཆི་མ་ཕྱུང་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བདེ་བས་བྱིན་གྱི་མདུན་དུ་འདུག་གོ། །གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་བདེ་བས་བྱིན་
གྱིས་རྒྱལ་པོ་དཔལ་དབྱངས་མཐོང་སྟེ། མཐོང་ནས་དེ་ལ་སྨྲས་པ། ཅིའི་སླད་དུ་རྒྱལ་པོ་ཆེན་པོ་ཁྱོད་སྐྱེ་བོའི་ཚོགས་ཆེན་པོ་འདི་དག་དང་བདག་གི་མདུན་ན་བཞུགས་ཤིང་སྐད་ཆེན་པོ་ཕྱུང་སྟེ། ཆོ་ངེས་བཏབ་ནས་བཤུམས་ཤིང་མཆི་མ་འབྱིན་པ་མཛད། དེ་སྐད་ཅེས་སྨྲས་པ་དང་། རྒྱལ་པོ་

དཔལ་དབྱངས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བདེ་བས་བྱིན་ལ་ཚིགས་སུ་བཅད་པའི་དབྱངས་ཀྱིས་སྨྲས་པ། ཤེས་རབ་ཆེན་པོ་བདེ་བས་བྱིན། །ཆོས་སྨྲ་བ་ནི་མཁས་པ་ཡི། །ཡན་ལག་མ་ཚང་རིག་ནས་ནི། །སྐྱེ་བོ་འདི་དག་དེ་ཕྱིར་དུ། །གཟི་བརྗིད་
ཕུང་པོས་འཕགས་པ་ཡི། །འདི་ལྟ་བུ་ཡི་གཟུགས་འདི་ཡང་། །ལག་པ་ཉམས་པར་ཤེས་ནས་ནི། །བདག་ཀྱང་ཤིན་ཏུ་སྡུག་བསྔལ་ལོ། །ཁྱོད་ཀྱི་ལག་པ་འབར་བྱས་པ། །དེ་ཡི་འོད་ནི་ཕྱོགས་བཅུར་བཏང་། །ཁྱོད་ལས་བྱུང་བའི་ལྷ་རྫས་ཀྱིས། །མར་མེ་འདི་དག་མི་གསལ་བྱས། །
ས་འདི་རབ་ཏུ་གཡོས་གྱུར་ཏེ། །ཁྱོད་ཀྱི་སེམས་ནི་ཞུམ་པ་མེད། །དེ་ནས་བདག་གི་སེམས་སྐྱེས་པ། །མཁས་པ་ཐ་མལ་མ་ཡིན་སྙམ། །བདག་ནི་བཙུན་མོའི་འཁོར་བཅས་པ། །ཁྲུ་ནི་སྟོང་ཕྲག་བརྒྱ་པ་ཡི། །ཁང་པའི་སྟེང་ནས་མཆོངས་གྱུར་ན། །བདག་གི་ལུས་ལ་གནོད་པ་མེད། །ལེགས་
སོ་ཡེ་ཤེས་ངོ་མཚར་ཁྱོད། །ལེགས་སོ་སེམས་ཀྱང་བླ་ན་མེད། །བརྩོན་འགྲུས་རབ་བརྩམས་ལེགས་པ་སྟེ། །བསམ་པ་ཆེ་བ་ལེགས་པ་ཡིན། །གང་གི་ལག་པ་འབར་བྱས་ཀྱང་། །ཁྱོད་ལ་ནམ་ཡང་གཡོ་བ་མེད། །དགའ་ཞིང་རངས་པ་སྐྱེས་ནས་སུ། །ཕྱིར་ཡང་ཆོས་ནི་རབ་ཏུ་འཆད། །
ཇི་ལྟར་ཟླ་བ་ཉ་བ་དང་། །ནམ་མཁའི་དཀྱིལ་ན་ཉི་མ་བཞིན། །རི་རབ་རི་ཡི་རྒྱལ་པོ་ལྟར། །གྲོགས་པོ་དེ་ལྟར་ཤིན་ཏུ་མཛེས། །བདག་ཀྱང་དེ་བཞིན་མཁས་པ་ཡི། །སྨོན་ལམ་ཡོངས་སུ་རྫོགས་པར་བགྱི། །ལུས་ལ་ཕངས་པ་རབ་སྤངས་ཏེ། །བདག་གིས་སྲོག་ཆགས་དོན་རྣམས་
བགྱིད། །ཆོས་ཀྱི་དགའ་བས་རངས་གྱུར་ཏེ། །བདག་གི་དགའ་བ་བསམ་མི་ཁྱབ། །འདི་ལྟར་ཡན་ལག་མ་ཚང་བ། །དེས་ནི་རབ་ཏུ་སྡུག་བསྔལ་ལོ། །ལྷ་དང་ཀླུ་ཡི་མཆོད་པ་ཡིས། །བདེ་བས་བྱིན་གྱིས་རྒྱལ་པོ་ལ། །མཐའ་ཡས་པ་ཡི་སྤོབས་པ་ཡིས། །ཚིགས་སུ་བཅད་པ་
འདི་དག་སྨྲས། །གང་ལ་ལག་པ་མེད་པ་ཡང་། །དེ་ནི་ཡན་ལག་མ་ཚང་མིན། །སུ་ལ་ཚུལ་ཁྲིམས་མེད་པ་དག །དེ་ནི་ཡན་ལག་མ་ཚང་ཡིན། །རུས་པ་ཡི་ནི་ལུས་འདི་ཡིས། །བསམ་གྱིས་མི་ཁྱབ་སྦྱིན་པའི་གནས། །འཇིག་རྟེན་ཀུན་གྱི་མཆོད་པའི་རྟེན། །དེ་བཞིན་

གཤེགས་པ་བདག་གིས་མཆོད། །སྟོང་གསུམ་དག་ནི་མཐའ་ཡས་པ། །རིན་པོ་ཆེ་ཡིས་ཡོངས་བཀང་སྟེ། །སངས་རྒྱས་ཡེ་ཤེས་ཚོལ་བའི་ཕྱིར། །འཇིག་རྟེན་མགོན་ལ་རབ་ཏུ་སྦྱིན། །འཇིག་རྟེན་པ་ཡི་མཆོད་ཡོད་ཀྱང་། །སུ་དག་ཆོས་རྣམས་སྟོང་རིག་ནས། །ལུས་དང་སྲོག་ཀྱང་གཏོང་བ་
ཡི། །མཆོད་པ་དེ་དག་བསམ་མི་ཁྱབ། །བདེན་པའི་ཚིག་ནི་བརྗོད་པར་བགྱི། །རྒྱལ་པོ་ཆེན་པོ་བདག་ལ་གསོན། །སྐྱེ་བོའི་ཚོགས་འདི་ཐམས་ཅད་ཀྱང་། །ཚིགས་བཅད་འདི་ཡི་དོན་རིག་བགྱི། །བདེན་པ་གང་གིས་སངས་རྒྱས་སུ། །འཇིག་རྟེན་མཆོད་རྟེན་བདག་འགྱུར་ན། །བདེན་པ་
དེ་ཡིས་ས་འདི་ཡང་། །རྣམ་པ་དྲུག་ཏུ་གཡོས་གྱུར་ཅིག །ཚིག་འདི་དག་ནི་སྨྲས་པ་དང་། །ས་ཡང་རབ་ཏུ་གཡོས་པར་གྱུར། །ངོ་མཚར་གྱུར་ཅིང་རྨད་བྱུང་སྟེ། །ལྷ་རྣམས་བྱེ་བ་རབ་ཏུ་དགའ། །ལྷ་དང་མི་དག་དགའ་ནས་ནི། །བྱང་ཆུབ་ཏུ་ཡང་སེམས་བསྐྱེད་དེ། །དཔག་མེད་བསམ་
གྱིས་མི་ཁྱབ་པ། །ཐེག་པ་མཆོག་ལ་གནས་པར་གྱུར། །དགེ་སློང་བདེ་བས་བྱིན་པ་ཡིས། །ཇི་སྙེད་ཀྱི་ནི་དོན་བྱས་པ། །དེ་ནི་མི་ཟད་བསམ་མི་ཁྱབ། །སངས་རྒྱས་དག་གི་ཡེ་ཤེས་འཇུག །བདེན་པ་གང་གིས་ཆོས་དེ་ནི། །ལག་པ་ཞེས་ཀྱང་བྱ་མེད་ན། །བདེན་པ་དེ་ཡིས་སྔོན་ལྟར་
བདག །ལག་པ་མྱུར་དུ་བྱུང་བར་ཤོག །བདེན་པ་གང་གིས་ཆོས་དེ་ནི། །བདེ་བས་བྱིན་པ་ཡོད་མ་ཡིན། །ཕྱོགས་བཅུ་རྣམས་སུ་བཙལ་ན་ཡང་། །སྟོང་པ་ཡིན་པས་མི་དམིགས་སོ། །སྒྲ་གང་འབྱུང་བར་འགྱུར་བ་ཡང་། །དེ་ནི་སྟོང་པར་རིག་པར་གྱིས། །སྒྲ་ནི་བྲག་ཅ་ལྟ་བུ་སྟེ། །
ཆོས་རྣམས་དེ་ལྟར་ཤེས་པར་གྱིས། །ནམ་ཞིག་འཇིགས་པ་མེད་འགྱུར་ཞིང་། །སྟོང་པ་རྟོགས་པར་ཁོང་དུ་ཆུད། །བདེན་པ་ཡི་ནི་ཚིག་དེ་ཡིས། །འཇིག་རྟེན་ཐམས་ཅད་འཚིག་མི་འགྱུར། །སྲིད་གསུམ་སེམས་ཅན་ཇི་སྙེད་པ། །ལྷ་རྣམས་དང་ནི་མི་རྣམས་ཀྱང་། །ཐམས་ཅད་
མཁྱེན་པའི་གཟི་བརྗིད་ཀྱིས། །ཐམས་ཅད་མཉམ་པར་བཞག་པར་ཤོག །ཇི་སྙེད་ལྷ་དང་མི་དག་གིས། །འཚེ་བར་གྱུར་པ་ཅི་ཡོད་པ། །ཕྱིར་མི་ལྡོག་པའི་གཟི་བརྗིད་ཀྱིས། །དེ་དག་ཐམས་ཅད་ཞི་བར་ཤོག །ཚིགས་བཅད་འདི་དག་བཤད་པ་དང་། །ལག་པ་ཡང་ནི་སླར་སྐྱེས་ཏེ། །

བདེ་བས་བྱིན་པ་དེ་ཡི་ལུས། །མཚན་རྣམས་ཀྱིས་ནི་རྣམ་པར་བརྒྱན། །ལྷ་ཡང་བྱེ་བ་ཕྲག་སྟོང་རྣམས། །བར་སྣང་ལ་ནི་འདུག་ནས་སུ། །དེ་ཚེ་མེ་ཏོག་མན་དཱ་རས། །དགེ་སློང་དེ་ལ་འཐོར་བར་བྱེད། །མི་མ་ཡིན་པའི་མེ་ཏོག་གིས། །འཛམ་བུའི་གླིང་འདི་གང་བར་གྱུར། །
ལྷ་མོ་བྱེ་བ་ཁྲག་ཁྲིག་རྣམས། །གླུ་དབྱངས་རོལ་མོ་རབ་ཏུ་བྱེད། །དེ་ཚེ་བདེ་བས་བྱིན་པ་ཡིས། །སྒྲ་འདི་དག་ནི་ཕྱུང་བ་ན། །རྣམ་འཕྲུལ་འདི་ནི་སངས་རྒྱས་དག །བྱེ་བ་སྟོང་གིས་གཟིགས་པར་འགྱུར། །རང་རང་གི་ནི་ཞིང་དག་ཏུ། །དགེ་སློང་ཕ་དང་དགེ་སློང་མ། །དགེ་བསྙེན་མ་དང་དགེ་
བསྙེན་ལ། །གྲགས་པ་ཆེན་པོ་གོ་བར་མཛད། །དགེ་སློང་བདེ་བས་བྱིན་པ་དེ། །མཁས་ཤིང་སྟོབས་ཀྱང་ཆེ་བ་སྟེ། །སངས་རྒྱས་ཀྱི་ནི་ཡེ་ཤེས་ཕྱིར། །དེས་ནི་ལག་པ་འབར་བར་བྱས། །དེ་ཡིས་ཞིང་རྣམས་སྟོང་དག་དང་། །གང་གཱ་ཡི་ནི་བྱེ་མ་སྙེད། །མར་མེ་དེས་ནི་སྣང་བྱས་ཏེ། །སྲེག་
པའི་བསྐལ་པ་བྱུང་བ་བཞིན། །མེ་ཏོག་དང་ནི་ཕྱེ་མ་ཡིས། །ཞིང་རྣམས་ཐམས་ཅད་གང་བར་གྱུར། །ས་གཞི་དག་ནས་ཡན་ཆད་དུ། །པུས་ནུབ་ཙམ་དུ་གང་བར་གྱུར། །རིན་ཆེན་མེ་ཏོག་ཐམས་ཅད་ཀྱིས། །སངས་རྒྱས་ཞིང་ནི་གང་བར་གྱུར། །བདེ་བས་བྱིན་ལ་མཆོད་པའི་
ཕྱིར། །ཀླུ་རྣམས་མུ་ཏིག་ཆར་པ་འབེབས། །རིན་ཆེན་བཀོད་པ་ཐམས་ཅད་ཀྱིས། །ཞིང་འདི་རབ་ཏུ་བརྒྱན་པར་གྱུར། །བདེ་བས་བྱིན་ལ་མཆོད་པའི་ཕྱིར། །མུ་ཏིག་རིན་ཆེན་ཤིན་ཏུ་བཀྲམ། །ལྷ་དང་ཀླུ་དང་གནོད་སྦྱིན་དང་། །མི་འམ་ཅི་དང་ལྟོ་འཕྱེར་བཅས། །གང་གཱ་ཡི་ནི་བྱེ་མ་སྙེད། །
བྱང་ཆུབ་མཆོག་ལ་ཞུགས་པར་གྱུར། །བྱ་རྒོད་སྤུངས་པའི་རི་ལ་ཡང་། །སངས་རྒྱས་ཤཱཀྱ་སེང་གེ་ནི། །དགེ་སློང་དག་གི་དགེ་འདུན་མདུན། །རྒྱལ་བ་སེང་གེའི་སྒྲ་སྒྲོག་པ། །བསྐལ་པ་བྱེ་བ་སྟོང་དུ་ནི། །བྱང་ཆུབ་སྤྱད་པ་སྤྱོད་པ་ན། །ང་ནི་བདེ་བས་བྱིན་པར་གྱུར། །མ་ཕམ་པ་ནི་
དཔལ་དབྱངས་ཡིན། །དགེ་སློང་བདེ་བས་བྱིན་པ་ནི། །མཐོང་མ་ཐག་ཏུ་དེ་ཡི་ཚེ། །བུད་མེད་དག་ཀྱང་མཐའ་ཡས་པ། །བུད་མེད་དངོས་པོ་རྣམ་པར་ལོག །མི་དབང་གིས་ནི་ལུང་བསྟན་ཏེ། །དེ་དག་ཕྱིར་ཡང་ལྡོག་པ་མེད། །འཇིག་རྟེན་ཀུན་གྱི་འདྲེན་པ་སྟེ། །རང་འབྱུང་འགྱུར་ཞེས་

ལུང་ཡང་བསྟན། །སྦྱངས་པའི་ཡོན་ཏན་བསྟན་པ་ཡི། །མཁས་པས་མདོ་སྡེ་འདི་ཐོས་ནས། །ལུས་ལ་ཕངས་པར་མ་བྱེད་པར། །ཆོས་འདི་རྗེས་སུ་བསླབ་པར་གྱིས། །བདེ་བས་བྱིན་གྱི་ལེའུ་སྟེ་སུམ་ཅུ་རྩ་བཞི་པའོ།། །།དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་
གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འདོད་པ་དང་། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་དགེ་བའི་རྩ་བ་རྣམས་ལ་ཉེ་བར་གནས་ན་ཆོས་ཀྱི་སྦྱིན་པའམ་ཟང་ཟིང་
གི་སྦྱིན་པ་ལ་བརྩོན་པར་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེས་སྦྱིན་པ་དེ་ཡང་བསྔོ་བ་བཞིས་ཡོངས་སུ་བསྔོ་བར་བྱའོ། །བཞི་གང་ཞེ་ན། འདི་ལྟ་སྟེ། ཐབས་ལ་མཁས་པ་གང་གིས་སངས་རྒྱས་བཅོམ་ལྡན་འདས་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
རྫོགས་པར་སངས་རྒྱས་པའི་ཐབས་མཁས་པ་དེ་དག་ཐོབ་པར་འགྱུར་བར་སྦྱིན་པ་འདིའི་དགེ་བའི་རྩ་བ་བསྐྱེད་པར་བྱའོ་ཞེས་བྱ་བ་འདི་ནི་བསྔོ་བ་དང་པོའོ། །དགེ་བའི་བཤེས་གཉེན་གང་དག་ལས་ཐབས་མཁས་པ་ཐོས་ཤིང་འཛིན་པར་འགྱུར་བ་དང་། ཀུན་ཆུབ་པར་བྱ་བ་དང་འཆང་བ་དང་ཀློག་པར་འགྱུར་བ་
དང་། གང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་དགེ་བའི་བཤེས་གཉེན་དེ་དག་དང་བདག་རྟག་ཏུ་འགྲོགས་པར་གྱུར་ཅིག་ཅེས་དེ་ལྟར་སྦྱིན་པའི་དགེ་བའི་རྩ་བ་བསྐྱེད་པར་བྱའོ་ཞེས་བྱ་བ་འདི་ནི་བསྔོ་བ་གཉིས་པའོ། །ལོངས་སྤྱོད་ཐོབ་པ་གང་འཇིག་
རྟེན་ཐམས་ཅད་འཚོ་བར་འགྱུར་བའི་ལོངས་སྤྱོད་ཐོབ་པ་དེ་དག་དང་བདག་ཕྲད་པར་གྱུར་ཅིག་ཅེས་དེ་ལྟར་སྦྱིན་པའི་དགེ་བའི་རྩ་བ་དེས་བསྐྱེད་པར་བྱའོ་ཞེས་བྱ་བ་འདི་ནི་བསྔོ་བ་གསུམ་པའོ། །བདག་གི་ལུས་གྲུབ་པས་སེམས་ཅན་རྣམས་ལ་ཆོས་ཀྱི་ཕན་གདགས་པ་དང་། ཟང་ཟིང་གི་ཕན་གདགས་
པ་དང་ཕན་གདགས་པ་གཉིས་ཀྱིས་ཕན་འདོགས་པར་འགྱུར་བའི་བདག་གི་ལུས་གྲུབ་པར་གྱུར་ཅིག་ཅེས་སྦྱིན་པའི་དགེ་བའི་རྩ་བ་བསྐྱེད་པར་བྱའོ་ཞེས་བྱ་བ་འདི་ནི་བསྔོ་བ་བཞི་པ་སྟེ། གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོས་བསྔོ་བ་འདི་བཞིས་དགེ་བའི་རྩ་བ་རྣམས་བསྔོ་བར་བྱའོ། །

གཞན་ཡང་གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་བྱུང་བ་ཡང་རུང་ཁྱིམ་པ་ཡང་རུང་སྟེ། ཏིང་ངེ་འཛིན་འདི་འདོད་པ་དང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་བྱང་ཆུབ་སེམས་དཔའ་སེམས་དཔའ་ཆེན་པོ་དག་
ལ་གཡོ་མེད་པས་བསྟེན་པར་བྱ། བསྙེན་པར་བྱ། རིམ་གྲོ་བྱའོ། །དེ་ལ་གཡོ་མེད་པ་དེ་ནི་ཏིང་ངེ་འཛིན་འདི་འཛིན་པའི་དགེ་སློང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ན་བར་གྱུར་ཅིང་ནད་མི་བཟད་པས་བཏབ་པར་གྱུར་པ་ལ་རང་གི་ཤ་དང་ཁྲག་གིས་ཀྱང་དགེ་སློང་དེ་ན་བ་དེ་ལས་བསླང་བར་
སྤྲོ་བར་བྱའོ། །གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་ལྷག་པའི་བསམ་པ་ཕུན་སུམ་ཚོགས་པ་ཏིང་ངེ་འཛིན་འདི་འདོད་པ་དང་། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་གཡོ་བ་མེད་ཅིང་འཇིགས་པ་མེད་པས་རང་གི་ཤ་
དང་ཁྲག་ཀྱང་ཡོངས་སུ་བཏང་སྟེ། དགེ་སློང་ཆོས་སྨྲ་བ་ན་བ་ལས་བསླང་བར་བྱའོ། །གཞོན་ནུ་རྣམ་གྲངས་དེས་འདི་ལྟར་རིག་པར་བྱ་སྟེ། གཞོན་ནུ་སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པ་བས་ཀྱང་ཆེས་གྲངས་མེད་པ། ཡངས་པ། ཚད་མེད་པ། བསམ་གྱིས་མི་ཁྱབ་པ།
དཔག་ཏུ་མེད་པ་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་
བཅོམ་ལྡན་འདས་སྨོན་ལམ་བསམ་གྱིས་མི་ཁྱབ་པ། ཁྱད་པར་དུ་འཕགས་པའི་རྒྱལ་པོ་ཞེས་བྱ་བ་འཇིག་རྟེན་དུ་བྱུང་སྟེ། གཞོན་ནུ་སྨོན་ལམ་བསམ་གྱིས་མི་ཁྱབ་པ་ཁྱད་པར་དུ་འཕགས་པའི་རྒྱལ་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་གང་གི་
ཉིན་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དེའི་ཉི་མ་མ་འདས་པར་སངས་རྒྱས་ཀྱི་འཕྲུལ་པ་གྲངས་མེད་དཔག་ཏུ་མེད་པ་མངོན་པར་སྤྲུལ་ནས་སེམས་ཅན་ཚད་མེད་པ་འདུལ་བ་བྱས་ཏེ། ཟག་པ་ཟད་པ་དགྲ་བཅོམ་པ་ཉིད་ལ་བཀོད་ནས་སེམས་

ཅན་ཚད་མེད་པ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ལ་བཀོད་ནས་ཉི་མ་དེ་མ་འདས་པར་ཡོངས་སུ་མྱ་ངན་ལས་འདས་སོ། །བཅོམ་ལྡན་འདས་ཡོངས་སུ་མྱ་ངན་ལས་འདས་པ་དེའི་དམ་པའི་ཆོས་ལོ་བྱེ་བ་ཁྲག་ཁྲིག་བརྒྱ་སྟོང་དུ་གནས་པར་གྱུར་ཏོ། །གཞོན་ནུ་བཅོམ་
ལྡན་འདས་སྨོན་ལམ་བསམ་གྱིས་མི་ཁྱབ་པ་ཁྱད་པར་དུ་འཕགས་པའི་རྒྱལ་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་བསྟན་པ་ནུབ་པའི་དུས་ཀྱི་ཚེ་ལྔ་བརྒྱ་ཐ་མར་གྱུར་པ་ན་དགེ་སློང་དམིགས་པའི་ལྟ་བ་ཅན་མང་པོ་བྱུང་སྟེ། དེ་དག་འདི་ལྟ་བུའི་མདོ་སྡེ་ལ་མི་སྲེད་
མི་མོས་ཤིང་ཕྱིར་ཟློག་པར་བྱེད། སྤོང་བར་བྱེད་དེ། མདོ་སྡེ་འདི་ལྟ་བུ་འཛིན་པའི་དགེ་སློང་དག་ལ་ཡང་གནོད་པར་བྱེད་ཅིང་སྲོག་ཀྱང་གཅོད་པར་བྱེད་དེ། རྙེད་པ་དང་བཀུར་སྟི་ལ་ཆགས་པ་དེ་དག་གིས་མདོ་སྡེ་འདི་ལྟ་བུ་འཛིན་པའི་དགེ་སློང་སྟོང་སྲོག་བཅད་པར་གྱུར་ཏོ། །གཞོན་ནུ་དེའི་ཚེ་དེའི་དུས་
ན་རྒྱལ་པོ་ཡེ་ཤེས་ཀྱི་སྟོབས་ཞེས་བྱ་བ་འཛམ་བུའི་གླིང་ལ་དབང་བ། དམ་པའི་ཆོས་ཡོངས་སུ་འཛིན་པ། སྔོན་གྱི་སྨོན་ལམ་ཕུན་སུམ་ཚོགས་པ་ཞིག་བྱུང་སྟེ། གཞོན་ནུ་ཡང་དེའི་ཚེ་དེའི་དུས་ན་འཛམ་བུའི་གླིང་འདིར་དགེ་སློང་ཡང་དག་བློ་གྲོས་ཞེས་བྱ་བ་ཏིང་ངེ་འཛིན་འདི་འཛིན་པ། ཆོས་སྨྲ་
བ་རྒྱལ་པོ་དེའི་ཕོ་བྲང་དུ་འགྲོ་ཞིང་། དགེ་བའི་བཤེས་གཉེན་བྱེད་པ། ཕན་པར་འདོད་པ། སྙིང་བརྩེ་བ་དོན་དུ་འདོད་པ་ཞིག་བྱུང་སྟེ། རྒྱལ་པོ་དེ་ཡང་དེ་ལ་རྒྱུན་མི་ཆད་པར་བལྟ་བས་མི་ངོམས་ཏེ་རྟག་ཏུ་འདོད་པར་གྱུར་ཏོ། །དེ་ཡང་བསྟན་པ་དང་ཆོས་ཀྱི་གཏམ་བྱ་བ་དང་ཉེ་བར་འགྲོ་བ་དང་།
བསྙེན་བཀུར་བྱ་བ་དང་ཡོངས་སུ་དྲི་བ་དང་། གཟུང་བ་དང་ཚིག་གིས་གོ་བར་བྱེད་ནུས་ཤིང་དགེ་སློང་ཆོས་སྨྲ་བ་དེ། སེམས་ཅན་དག་གི་གཡོ་བ་དང་སྤྱོད་ལམ་དང་མོས་པ་དང་ཁམས་དང་བག་ཆགས་ལ་མཁས་ཏེ། སེམས་ཅན་རྣམས་ཀྱི་དབང་པོ་དང་སྟོབས་དང་བརྩོན་འགྲུས་ཀྱི་རིམ་པ་ཤེས་ཤིང་
ཁམས་དང་བག་ཆགས་ལ་ཡང་མཁས། བདེན་པ་དང་མཚམས་སྦྱར་བ་ལ་ཡང་མཁས། མཚམས་དབྲལ་བ་དང་ཚིག་གི་ལན་གཏན་ལ་དབབ་པ་ལ་ཡང་མཁས། སྤོབས་པ་ཟབ་ཅིང་སེམས་ཅན་ཐམས་ཅད་འདུལ་བའི་ཆོ་ག་ལ་ཡང་མཁས། གསོང་པོར་སྨྲ་ཞིང་བཞིན་ལ་ཁྲོ་གཉེར་མེད་པ།

སེམས་ཆེན་པོར་གྱུར་པ་ལ་གནས་པ། སྙིང་རྗེ་ཆེན་པོ་ལ་བརྩོན་པ། ཕ་རོལ་རྒོལ་བ་ཐམས་ཅད་ཀྱིས་ཟིལ་གྱིས་མ་ནོན་པ་ཡིན་ནོ། །གཞོན་ནུ་དེའི་ཚེ་དེའི་དུས་ན་རྒྱལ་པོ་ཡེ་ཤེས་ཀྱི་སྟོབས་ཀྱི་བུ་མོ་སྐྱེས་ནས་ལོ་བཅུ་དྲུག་ལོན་པ། བྱད་བཞིན་བཟང་ཞིང་མཛེས་ལ་བལྟ་ན་སྡུག་པ།
ཁ་དོག་བཟང་ཞིང་རྒྱས་པའི་མཆོག་དང་ལྡན་པ་ཡེ་ཤེས་ལྡན་ཞེས་བྱ་བ་ཞིག་བྱུང་སྟེ། དེའི་སློབ་དཔོན་ནི་དགེ་སློང་ཡང་དག་བློ་གྲོས་ཞེས་བྱ་བ་ཡིན་ཏེ། དགེ་བའི་ཆོས་རྣམས་ལ་ཡང་དག་པར་སྟོན་པ། ཡང་དག་པར་གཟེངས་སྟོད་པ། ཡང་དག་པར་རབ་ཏུ་དགའ་བར་བྱེད་པ། ཡང་
དག་པར་འཛིན་དུ་འཇུག་པ་ཡིན་ནོ། །གཞོན་ནུ་དེའི་ཚེ་དེའི་དུས་ན་དགེ་སློང་ཆོས་སྨྲ་བ་དེའི་བརླ་གཉིས་ལ་འབྲུམ་བུ་མེ་དབལ་ནག་པོ་ཆེན་པོ་གསོ་དཀའ་ཞིང་སྨན་དཀོན་པ་ཞིག་བྱུང་སྟེ། ན་བ་དེ་སྨན་པ་དག་གིས་སྤངས་པར་གྱུར་ཏོ། །དེ་ནས་རྒྱལ་པོ་ཡེ་ཤེས་ཀྱི་སྟོབས་བཙུན་མོའི་འཁོར་
དང་བཅས་པ་སྲས་དང་སྲས་མོ་དང་ཞབས་འབྲིང་བར་བཅས་པ་དགེ་སློང་དེ་ན་བར་རིག་ནས་རབ་ཏུ་ངུ་ཞིང་མཆི་མ་བྱུང་ངོ་། །བུད་མེད་བརྒྱད་ཁྲིར་བཅས་པ་དང་གྲོང་དང་གྲོང་ཁྱེར་གྱི་མི་རྣམས་སུ་བཅས་པ་དང་ཡུལ་འཁོར་བ་དང་གྲོང་འདབ་པ་དང་ཡུལ་གྱི་མི་དང་རྩིས་པ་དང་བློན་པོ་དང་བློན་པོ་ཆེན་པོ་དང་
སྒོ་བ་དང་འཁོར་རྣམས་སུ་བཅས་པ་དེ་དག་ཐམས་ཅད་ཀྱང་དགེ་སློང་དེ་ན་བར་ཐོས་ནས་རབ་ཏུ་ངུ་ཞིང་མཆི་མ་འབྱིན་ཏེ། དགེ་སློང་འདི་འཆི་བའི་དུས་བྱེད་པར་གྱུར་ཏ་རེ་ཞེས་སྐད་འཛེར་ཏོ། །གཞོན་ནུ་དེའི་ཚེ་དེའི་དུས་ན་རྒྱལ་པོ་ཡེ་ཤེས་སྟོབས་ལ་ལྷ་མོ་སྔོན་སྣག་གི་གཉེན་མཚམས་སུ་གྱུར་པ་
ཞིག་ཡོད་དེ། དེ་རྒྱལ་པོ་དེའི་ཕྱི་བཞིན་འབྲང་བས་རྨི་ལམ་དུ་བསྟན་པ། རྒྱལ་པོ་ཆེན་པོ་གལ་ཏེ་དགེ་སློང་འདི་ལ་མིའི་ཤ་དང་ཁྲག་སར་པ་མ་རུལ་པས་འབྲུམ་བུ་མེ་དབལ་ནག་པོ་འདི་ལ་བྱུགས་ཏེ། མིའི་ཤ་སར་པ་མ་རུལ་པ་ལས་རོ་སྣ་ཚོགས་སུ་གཡོས་བྱས་ཏེ་བྱིན་ན་དགེ་སློང་འདི་
ནད་འདི་ལས་འཚོ་བར་འགྱུར་རོ་ཞེས་ཟེར་རོ། །དེ་ནས་རྒྱལ་པོ་ཡེ་ཤེས་ཀྱི་སྟོབས་མཚན་མོ་དེ་འདས་པ་དང་གཉིད་ཀྱིས་ལོག་པ་ལས་སད་དེ་བཙུན་མོའི་འཁོར་གྱི་ནང་དུ་འོངས་ནས་རྨི་ལམ་གྱི་རྣམ་པ་དེ་དག་བཙུན་མོའི་འཁོར་རྣམས་ལ་བཟླས་ཏེ། ངའི་རྨི་ལམ་འདི་ལྟ་བུ་ཞིག་མཐོང་ངོ་

ཞེས་བཟླས་ནས་གོ་བར་བྱས་ན། གཞོན་ནུ་དེ་ལྟར་བུད་མེད་ཀྱི་ཁྱིམ་དེ་དང་རྒྱལ་པོའི་ཕོ་བྲང་དེ་ནས་དགེ་སློང་དེ་ལ་རྩི་དེ་སྦྱིན་པར་སུ་ཡང་སྤྲོ་བ་མེད་དོ། །རྒྱལ་པོའི་བུ་མོ་ཡེ་ཤེས་ལྡན་ཡང་རྨི་ལམ་དེ་ལྟ་བུ་ཞིག་རྨིས་ནས་སད་པ་དང་བཙུན་མོའི་འཁོར་གྱི་ནང་དུ་སོང་སྟེ། རྨི་ལམ་གྱི་རྣམ་པ་དེ་
དག་མ་དང་ཞབས་འབྲིང་བ་རྣམས་ལ་གཏམ་བྱས་ཀྱང་དགེ་སློང་དེ་ལ་རྩི་དེ་སྦྱིན་པར་སུ་ཡང་སྤྲོ་བ་མེད་དོ། །དེ་ནས་རྒྱལ་པོའི་སྲས་མོ་ཡེ་ཤེས་ལྡན་དེ་དགའ་ཞིང་མགུ་ཡི་རངས་ཤིང་རབ་ཏུ་དགའ་བ་དང་མོས་པ་དང་ཡིད་བདེ་བ་སྐྱེས་ནས་འདི་ལྟ་བུར་བརྩོན་པར་བྱས་ཏེ། འདི་ལྟར་བདག་གིས་རྩི་
འདི་དག་བདག་གི་ལུས་ལས་བཅད་དེ་ཇི་སྐད་བསྟན་པ་བཞིན་དུ་ཁྲག་སར་པ་དང་ཤ་སར་པ་སྦྱིན་པར་བྱའོ། །རྒྱལ་པོའི་ཕོ་བྲང་ན་བདག་ནི་ཐམས་ཅད་ཀྱི་ནང་ན་གཞོན་ཞིང་ཆུང་སྟེ། ལུས་དང་ངག་དང་ཡིད་ཀྱི་ལས་ཀྱང་ཀུན་ནས་ཉོན་མོངས་པ་མ་ཡིན་ལ། ཀུན་ནས་ཉོན་མོངས་པ་མེད་པའི་ཡེ་ཤེས་
བཙལ་བར་འདོད་པས་ཆོས་སྨྲ་བ་ཀུན་ནས་ཉོན་མོངས་པ་མེད་པ་ལ་བདག་གི་ལུས་ཀྱི་ཤ་དང་ཁྲག་ཕུལ་ཏེ། དགེ་སློང་འདི་ཅི་ནས་ནད་འདི་ལས་སོས་པར་བྱའོ་སྙམ་མོ། །དེ་ནས་རྒྱལ་པོའི་བུ་མོ་ཡེ་ཤེས་ལྡན་དེ་རང་གི་གནས་སུ་སོང་ནས་མཚོན་རྣོན་པོ་ཐོགས་ཏེ་ཆོས་ལ་ཞུགས་པའི་ཡིད་ཀྱིས་
བདག་གི་བརླ་ལས་ཤ་བཅད་ནས། རོ་སྣ་ཚོགས་དང་ལྡན་པ་གྱ་ནོམ་པར་གཡོས་བྱས་ནས། ཁྲག་ཀྱང་ཐོགས་ཏེ་འཕགས་པ་དེའི་དྲུང་དུ་སོང་ནས་རྒྱལ་པོ་ཡེ་ཤེས་སྟོབས་ཀྱི་མདུན་དུ་འདུག་སྟེ། ཁྲག་གིས་འབྲུམ་བུ་མེ་དབལ་ནག་པོ་དེ་བྱུགས་ནས། གཡོས་ལེགས་པར་བྱས་པའི་ཟས་དེ་
དགེ་སློང་དེ་ཟར་བཅུག་སྟེ། འདྲངས་པར་བྱེད་ཅིང་ལེགས་པར་བསྟབས་སོ། །དེ་ནས་དགེ་སློང་དེ་མི་ཤེས་མ་རིག་མ་དོགས་པས་ཟས་དེ་ཟོས་སོ། །ཟས་དེ་ཟོས་མ་ཐག་ཏུ་དགེ་སློང་དེའི་ན་ཚ་ཐམས་ཅད་མེད་པར་གྱུར་ཏེ་ནད་དེ་ཐམས་ཅད་ཀྱང་སོས་སོ། །དེ་ཡོངས་སུ་གདུང་བ་དང་བྲལ་ཞིང་བདེ་བ་
དང་ལྡན་པས་དེ་ལྟ་དེ་ལྟ་བུར་ཆོས་བསྟན་ཏེ། བཙུན་མོའི་འཁོར་དེ་དང་གྲོང་པ་དང་ཡུལ་མི་དང་ཡུལ་འཁོར་བ་འདུས་པ་དེ་དག་ལས་སྲོག་ཆགས་ཁྲི་ཉིས་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །དེ་ནས་རྒྱལ་པོ་ཡེ་ཤེས་སྟོབས་ཀྱིས་བདག་གི་བུ་མོ་ལ་ཚིགས་

སུ་བཅད་པ་འདི་དག་སྨྲས་སོ། །བུ་མོ་ཁྱོད་ཀྱིས་ཁྲག་འདི་ག་ལས་རྙེད། །མི་ཡི་ཤ་འདི་དག་ཀྱང་གང་ནས་བླངས། །བུ་མོ་ཁྱོད་ཀྱིས་ཁ་ཟས་འདི་བྱས་པས། །ཆོས་སྨྲ་འདི་ཡང་འདི་ལྟར་བདེ་བར་གྱུར། །སྣ་ཚོགས་བྲོ་དང་ལྡན་པའི་གཡོས་བྱས་པ། །བསད་པ་ཡིན་ནམ་
དེ་སྟེ་ཤི་བ་རྙེད། །བུ་མོ་ཁྱོད་ཀྱིས་ཁྲག་འདི་ག་ལས་རྙེད། །དེས་ནི་སྡིག་པའི་ནད་ལས་འདི་ཐར་བྱས། །བུ་མོ་དེས་ནི་ཕ་ཡི་ཚིག་ཐོས་ནས། །བུ་མོ་ཡེ་ཤེས་ལྡན་གྱིས་འདི་སྐད་སྨྲས། །ཞུམ་སེམས་མེད་པར་ཚིག་ཀྱང་རབ་སྨྲས་ཏེ། །བདག་ནི་ཅི་མཆི་ཡབ་ཁྱོད་གསན་དུ་གསོལ། །ལྷ་
ཡིས་བསྟན་པའི་རྨི་ལམ་དག །བདག་གིས་མཐོང་བར་གྱུར་ཏོ་ཡབ། །ས་ཡི་བདག་པོ་བདག་ལ་གསོན། །ཡང་དག་དོན་ནི་མཁྱེན་པར་མཛོད། །ལྷ་དེས་བདག་ལ་འདི་སྐད་སྟོན། །མི་ཡི་ཤ་དང་ཁྲག་རྣམས་ནི། །དགེ་སློང་འདི་ལ་སུས་བྱིན་ན། །སྡིག་པའི་ནད་ལས་ཐར་བར་འགྱུར། །
བདག་ནི་མལ་ནས་ལངས་ནས་སུ། །བཙུན་མོའི་འཁོར་དུ་མཆིས་ནས་ནི། །བདག་གིས་དེ་ཚེ་རྨི་ལམ་རྣམས། །མ་ཡི་གཙོ་ལ་བཟླས་ཤིང་སྨྲས། །བྲན་མོ་རྣམས་ལ་བདག་གིས་བསྒོ། །འདི་ལྟ་བུ་དག་སུ་བྱེད་ནུས། །མི་ཡི་ཁྲག་དང་ཤ་རྣམས་ནི། །ཁུ་བར་བཙོས་པ་
གཡོས་བྱས་ཏེ། །ཟས་སུ་རབ་ཏུ་སྦྱིན་བྱ་ཞིང་། །ཁྲག་དག་གིས་ཀྱང་བྱུགས་ནས་སུ། །མེ་དབལ་ནག་པོ་འདི་ལས་ཀྱང་། །དགེ་སློང་ཇི་ལྟར་ཐར་བར་བྱ། །ཆོ་ག་མྱུར་དུ་མ་བྱས་ན། །རྩི་སྨན་དག་ནི་མ་བྱས་པས། །དགེ་སློང་འདི་ནི་ནད་འདི་ཡིས། །མྱུར་དུ་འཆི་བའི་དུས་
བྱེད་འགྱུར། །རང་གི་ཤ་དང་ཁྲག་གཏོང་བ། །སྲིད་པ་གསུམ་ན་སེམས་ཅན་གང་། །མཁས་པ་སུ་ཞིག་འདི་མཐོང་ནས། །ལུས་ལ་ཡང་ནི་གནས་པར་བྱེད། །བཙུན་མོའི་འཁོར་དུ་བདག་གིས་གོ་བར་བགྱིས། །བུད་མེད་གཅིག་ཀྱང་སྦྱིན་ཞེས་མི་མཆི་ནས། །བདག་ལ་དགེ་
སློང་དེ་ཕངས་བདག་ཕངས་ཀྱང་། །བྱང་ཆུབ་ཕྱིར་ནི་བདག་གིས་ཤ་ཁྲག་བཏང་། །བྱང་ཆུབ་ཞི་བ་མྱ་ངན་མེད་ཚོལ་བ། །དེ་དག་ལུས་ལ་མོས་ཤིང་རྟེན་པ་མིན། །བདག་ཉིད་ལ་ཡང་རྡུལ་ཙམ་ཕངས་པ་མེད། །བདག་ཉིད་བཏང་ཡང་ཡིད་ནི་མི་དགའ་མེད། །བཙུན་མོའི་འཁོར་

རྣམས་དེ་ཐོས་ནས། །ཐམས་ཅད་རྨུགས་པ་བཞིན་དུ་གྱུར། །བྱ་བ་དེ་དག་སྦྱར་བར་ནི། །སུ་ཡང་སྤྲོ་བར་མ་གྱུར་ཏོ། །དེ་ནས་བདག་གི་སེམས་སྐྱེས་པ། །དགེ་སློང་འདི་ནི་ཟས་བྱིན་ཏེ། །བདག་གི་ཤ་ཡང་བཅད་ནས་ནི། །ཁྲག་རྣམས་ཀྱིས་ཀྱང་བསྐུ་བར་བྱ། །བདག་གི་
བརླ་ལས་ཤ་བཅད་དེ། །ཤ་རྣམས་དང་ནི་ཁྲག་བླངས་ནས། །ཤ་ཡི་སྣ་གུ་བདག་གིས་བསྐལ། །བྲོ་བ་སྣ་ཚོགས་གཡོས་ལེགས་བགྱིས། །དགེ་སློང་ན་བ་དེ་ལ་ནི། །མི་ཤ་ཡི་ནི་ཁ་ཟས་དང་། །ཁྲག་རྣམས་ཀྱིས་ཀྱང་བྱུག་པ་དག །བདག་གིས་ཡབ་ཀྱི་སྤྱན་སྔར་སྩལ། །མི་ཡི་བདག་
པོ་བདག་གི་ཚིག་ལ་གསོན། །ས་བདག་མི་ཤ་དག་ནི་མ་རྙེད་ནས། །བདག་གི་བརླ་ལས་ཤ་དག་བཅད་ནས་སུ། །དེ་བསྒྲུབས་ཆོས་སྨྲ་འདི་ལ་སྩལ་པ་ལགས། །བདག་གིས་བླ་མེད་བྱང་ཆུབ་དོན་ཕྱིར་དུ། །རང་གི་ལུས་ཀྱིས་དོན་ཆེན་འདི་དག་བགྱིས། །དགེ་སློང་འདི་ཡང་ཐར་
བགྱིས་མི་བདེ་མེད། །བདག་གི་བསོད་ནམས་དག་ནི་ཚད་མེད་བགྱིས། །བུ་མོ་དེ་ལ་རྒྱལ་པོས་འདི་སྐད་སྨྲས། །བུ་མོ་ཁྱོད་ཀྱིས་རྩིར་ནི་བྱ་བའི་ཕྱིར། །ཇི་ལྟར་ལུས་ལས་རང་གི་ཤ་བཅད་ན། །ཁྱོད་ཀྱི་ལུས་ལ་ན་ཚར་མ་གྱུར་ཏམ། །རྒྱལ་པོའི་བུ་མོ་བློ་ལྡན་འཇིགས་མེད་པས། །དེ་ཚེ་
སྨྲས་པ་རྒྱལ་པོ་ས་བདག་གསོན། །ལས་ཀྱི་རྣམ་སྨིན་བསམ་ཡས་དེ་འདྲ་བས། །དེ་དག་གསན་ནས་ཚུལ་བཞིན་མཁྱེན་པར་མཛོད། །ཡབ་ཅིག་སྡིག་པའི་ལས་རྣམས་བགྱིས་པ་ཡིས། །སེམས་ཅན་སེམས་དམྱལ་མི་བཟད་ལྟུང་གྱུར་ཏེ། །ཤ་མེད་གྱུར་ནས་ཕྱིར་ཡང་ཤ་དག་སྐྱེ། །
ལས་ཀྱི་འབྲས་བུ་བསམ་གྱིས་མི་ཁྱབ་གཟིགས། །སྡིག་པའི་ལས་ཀྱིས་ཤ་ཁྲག་མེད་གྱུར་ཅིང་། །སྐད་ཅིག་ཏུ་ཡང་ཤ་ཁྲག་འབྱུང་འགྱུར་ན། །དགེ་བའི་ལས་དང་མོས་པ་དེ་དག་ལས། །ཤ་དང་ཁྲག་རྣམས་སྐྱེ་བ་སྨོས་ཅི་འཚལ། །ཤ་བཅད་བདག་ལ་ན་ཚ་མ་མཆིས་ཏེ། །ཁྲག་
ཕྱུང་བདག་ལ་གཡོ་བ་ཡོང་མ་མཆིས། །བདག་གི་ཤ་རྣམས་ཐམས་ཅད་བཅད་ན་ཡང་། །ཆོས་ཀྱི་ལུས་ལ་རྨ་དང་སྐྱོན་མ་མཆིས། །བདག་གིས་ཆོས་ལ་དགའ་བ་མཆོག་བསྐྱེད་ནས། །རང་གི་བརླ་ལས་ཤ་བཅད་རབ་ཏུ་སྩལ། །རྨ་དང་སྡུག་བསྔལ་བདག་ལ་མ་མཆིས་ཏེ། །བདག་

གི་ལུས་ཀྱང་སྔོན་གྱི་བཞིན་དུ་གྱུར། །འདི་འདྲ་བ་ཡི་ཆོས་སྨྲ་འདི་ལྟ་བུ། །བརྒྱ་ལམ་ན་ཡང་འཛམ་བུའི་གླིང་དུ་འབྱུང་། །ཡབ་ཅིག་ཨུ་དུམ་བཱ་རའི་མེ་ཏོག་བཞིན། །བསྐལ་པ་བྱེ་བ་མང་ལ་རེས་འགའ་གདའ། །ཇི་ལྟར་འཛམ་བུའི་ཆུ་བོ་གསེར་འབར་བ། །སེམས་ཅན་ལྟ་བས་
ངོམས་པར་མི་འགྱུར་ཏེ། །དེ་བཞིན་དུ་ནི་ཆོས་སྨྲ་དེ་འདྲ་བ། །ལྷ་དང་མི་དག་མཐོང་བས་ཆོག་མི་ཤེས། །སྐྱེ་བོ་སྐོམ་པ་དང་བའི་ཆུ་འཐུངས་ནས། །སྐོམ་པས་གདུངས་པ་སྐོམ་པ་མེད་པར་འགྱུར། །དེ་བཞིན་ཆོས་སྨྲ་མཁས་པ་འདི་དག་ཀྱང་། །ཆོས་ཀྱི་བདུད་རྩིས་སྲོག་ཆགས་སྲེད་པ་
སེལ། །དགེ་སློང་མི་བཟད་ན་བ་འདི་ལ་ཡང་། །ཤ་དང་ཁྲག་ནི་བདག་གིས་རབ་ཏུ་བཏང་། །ཆོས་སྨྲ་བ་ནི་མེ་དབལ་རབ་ཞི་སྟེ། །བདག་གིས་སངས་རྒྱས་བསྔགས་པའི་རིམ་གྲོ་བགྱིས། །མང་དུ་ཐོས་ཤིང་སྤྱོད་དང་ལྡན་པ་སྟེ། །ཏིང་འཛིན་དམ་པ་འདི་ནི་འཛིན་པ་ལ། །འདི་ལྟར་བདག་
གིས་རང་གི་ཤ་བཏང་བས། །ཆོས་འདི་རྣམས་ཀྱང་བདག་གིས་ཐོབ་པར་ཤོག །ཇི་ལྟར་སྤོས་རབ་དྲི་ཞིམ་ཡིད་འོང་བ། །དུས་འབྲང་དང་ནི་ཙན་དན་དམར་པོ་ཡི། །དྲི་དག་ཕྱོགས་བཅུ་རྣམས་སུ་ལྡང་བ་ལྟར། །ཆོས་སྨྲ་དེ་ཡི་དྲི་ཡང་དེ་བཞིན་ནོ། །ཇི་ལྟར་རི་རབ་ཕྱོགས་སུ་རབ་སྣང་
ཞིང་། །ཀུན་ནས་མཛེས་པ་མཐོང་ན་དགའ་བར་འགྱུར། །ཕྱོགས་སུ་རབ་ཏུ་སྣང་ཞིང་གསལ་བར་བགྱིད། །དེ་བཞིན་ཆོས་སྨྲ་འདི་ཡང་རི་རབ་འདྲ། །ཇི་ལྟར་མཆོད་རྟེན་ལ་ལ་ཞིག་པ་ནི། །སྐྱེས་བུ་མཁས་པས་བཅོས་ཤིང་སླར་བསླང་སྟེ། །མཆོད་རྟེན་དེ་ལ་དད་པར་བགྱིད་པ་ནི། །
དེ་ལྟར་བསླང་བ་དེ་ཡང་དེ་ཡི་རྒྱུ། །དེ་བཞིན་ཆོས་ཀྱི་མཆོད་རྟེན་ན་བ་ཡང་། །ཆོས་ལ་གུས་པར་རང་གི་ཤ་དང་ནི། །ཁྲག་གིས་བྱུག་པ་དག་གིས་ཐར་བར་བགྱིས། །འཛམ་བུའི་གླིང་དུ་བདག་གིས་མར་མེ་བལྟམ། །དགེ་སློང་འདི་ནི་འཆི་བའི་དུས་བགྱིས་ན། །འཛམ་བུའི་གླིང་དུ་
ཏིང་འཛིན་སྒྲ་ཡང་ནི། །སེམས་ཅན་རྣམས་ལ་རྟག་ཏུ་ནུབ་པར་འགྱུར། །འདི་གསོས་པས་ནི་ཏིང་འཛིན་རྣམས་ཀྱང་འཐོབ། །དགེ་སློང་འདི་ནི་འཇིག་རྟེན་ཀུན་གྱི་སྐྱབས། །འཇིག་རྟེན་ལྡོངས་པ་དག་ལ་མིག་སྦྱིན་པ། །འདོད་ཆགས་དང་ནི་ཞེ་སྡང་གཏི་མུག་ལ། །སྨན་

པའི་རྒྱལ་པོ་ཆེན་པོ་གསོ་བར་བགྱིད། །ཆེན་པོར་གྱུར་པར་རྟག་ཏུ་སེམས་གནས་ཏེ། །དེ་ཡི་སྤྱོད་པ་དག་ནི་ཚད་མི་རྙེད། །ངེས་པའི་དོན་དང་ཚིག་ལ་ཤིན་ཏུ་བསླབས། །ཕ་རོལ་རྒོལ་བ་ཀུན་གྱིས་ཟིལ་མི་ནོན། །ཆོས་སྨྲ་བ་ལ་རིམ་གྲོ་མཆོག་བགྱིས་པས། །བསྐལ་པ་བྱེ་བ་ཕྲག་ནི་སྟོང་དུ་
ཡང་། །བདག་ལ་ཕྱིར་ཡང་ལོག་ལྟུང་འཇིགས་མ་མཆིས། །བུད་མེད་དངོས་པོར་བདག་ནི་ཕྱིས་མི་འགྱུར། །དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་ཤིན་ཏུ་དཀའ་བ་སྤྱད་པ་ངོ་མཚར་རྨད་དུ་བྱུང་བའི་བྱང་ཆུབ་སེམས་དཔའི་ཆོས་
འདི་ཐོས་ནས་ཆོས་སྨྲ་བ་ན་བ་ལ་སྨན་ཤིན་ཏུ་དཀོན་པས་རིམ་གྲོ་བྱ་བ་ལ་བརྩོན་ཞིང་བདག་གི་ཤ་དང་ཁྲག་གིས་ཀྱང་རིམ་གྲོར་བྱས་ཏེ། ཐ་ན་སོར་མོ་གཅིག་ཙམ་སྦྱིན་པས་ཀྱང་འགྲོ་བའི་ཆོས་ཀྱི་མཆོད་རྟེན་ལ་རིམ་གྲོར་བྱའོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་སྔོན་བྱུང་
བའི་གཏམ་ངེས་པར་བསྟན་པ་འདི་རྒྱ་ཆེར་ཚིགས་སུ་བཅད་པའི་དབྱངས་ཀྱིས་ཡང་དག་པར་རབ་ཏུ་བསྟན་ཏོ། །གང་གིས་གང་གཱའི་བྱེ་སྙེད་སངས་རྒྱས་ཞིང་། །རིན་ཆེན་བཀང་ནས་འདྲེན་ལ་ཕུལ་བ་བས། །གང་གིས་རྐང་པའི་སོར་མོ་གཅིག་བྱིན་ན། །དེ་བས་བསོད་ནམས་མཆོག་འདི་བྱེ་
བྲག་འཕགས། །བུ་མོ་དེ་ནི་འདི་ནས་ཤི་འཕོས་ནས། །སངས་རྒྱས་བྱེ་བ་སྟོང་དག་མཐོང་བར་གྱུར། །ཀུན་གྱི་བསྟན་པ་ལ་ཡང་རབ་བྱུང་ནས། །ཏིང་འཛིན་ཞི་བའི་མཆོག་འདི་རབ་ཏུ་བཟུང་། །རྐང་གཉིས་གཙོ་བོ་དེ་དག་ཐམས་ཅད་ནི། །ཡོངས་སུ་མྱ་ངན་འདས་པ་ཕྱི་དུས་ན། །དེ་ནི་
རྟག་པར་རབ་ཏུ་བྱུང་གྱུར་ཏེ། །བདེ་གཤེགས་སྲས་མོ་ཀུན་ནས་ཉོན་མོངས་མེད། །མར་མེ་མཛད་པ་དེ་བཞིན་གཤེགས་པ་ཡི། །བསྟན་པ་ལ་ཡང་ཚངས་པར་སྤྱོད་པ་སྤྱད། །དེར་ཡང་བུད་མེད་དངོས་པོ་བསྒྱུར་ནས་སུ། །དེ་ཚེ་དེ་ནི་དགེ་སློང་ཆོས་སྨྲར་གྱུར། །རྟག་ཏུ་དམ་པའི་ཆོས་
ནི་ཡོངས་འཛིན་པ། །མི་དབང་ཡེ་ཤེས་སྟོབས་ནི་བྱམས་པ་ཡིན། །མར་མེ་མཛད་ནི་ཆོས་སྨྲ་དེར་གྱུར་ཏེ། །དེ་ཚེ་ང་ནི་རྒྱལ་པོའི་བུ་མོར་གྱུར། །ལྷ་མོ་སྔོན་གྱི་སྣག་གི་གཉེན་གྱུར་པ། །མི་དབང་ཡེ་ཤེས་སྟོབས་ཀྱི་ཕྱིར་འབྲང་ཞིང་། །རྒྱལ་པོའི་རྨི་ལམ་དུ་ཡང་སྟོན་པ་ནི། །

མི་འཁྲུགས་སྤྱད་པ་སྤྱོད་ཚེ་དེར་གྱུར་ཏོ། །ཏིང་འཛིན་འདི་ནི་རབ་ཏུ་འདོད་པའི་ཕྱིར། །གཡོ་སྒྱུ་ཐམས་ཅད་ཡོངས་སུ་སྤངས་ནས་སུ། །བདག་གི་ཤ་དག་དང་ནི་ཁྲག་གིས་ཀྱང་། །ཆོས་སྨྲ་བ་ལ་ངས་ཀྱང་རིམ་གྲོར་བྱས། །དགེ་སློང་ན་བ་ན་ཚས་གཟིར་བ་དེ། །
གང་དག་མཐོང་ནས་དེ་ཚེ་ངུས་པ་ཡང་། །ཕྱིར་མི་ལྡོག་པར་དེ་དག་རབ་གྱུར་ཏེ། །ལོག་པར་ལྟུང་བའི་སར་ནི་ཡོང་མ་སོང་། །དེ་དག་རྟག་ཏུ་མིག་ཀྱང་ན་བ་མེད། །ཀླད་པའི་ནད་མེད་རྣ་བའི་ནད་མེད་དེ། །སྣ་ཡི་ནད་མེད་ལྕེ་ཡི་ནད་ཀྱང་མེད། །སོ་ཡང་ན་བར་ནམས་ཀྱང་མ་གྱུར་ཏོ། །
དགེ་སློང་ན་བ་དེ་ཚེ་སུས་བསྙེན་པ། །དེ་དག་རྟག་ཏུ་ཀུན་ནས་མཛེས་པར་གྱུར། །སུམ་ཅུ་རྩ་གཉིས་བསོད་ནམས་བརྒྱ་པའི་མཚན། །དཔལ་དང་གཟི་བརྗིད་དག་གིས་ལུས་ཀྱང་འབར། །དེ་དག་ང་ཡི་བསྟན་ལ་རབ་བྱུང་ནས། །རབ་ཏུ་འཇིག་དུས་བྱང་ཆུབ་དམ་པ་འདི། །དེ་བཞིན་
གཤེགས་པའི་མཛོད་ཀྱང་བཟུང་ནས་ནི། །སངས་རྒྱས་བྱེ་བ་སྟོང་དག་མཐོང་བར་འགྱུར། །བྱང་ཆུབ་མཆོག་འདི་ལེགས་པར་བཟུང་ནས་སུ། །རྟག་ཏུ་རི་མོ་བྱས་ཤིང་བཅང་བྱས་ན། །དེ་དག་སྐྱེ་དགུའི་དོན་ཆེན་བྱས་ནས་ནི། །མི་ཡི་གཙོ་བོ་མི་འཁྲུགས་མཐོང་བར་འགྱུར། །
དེ་དག་སྤྱོད་པ་བླ་མེད་འདི་ཐོས་ནས། །དགའ་བ་ཟང་ཟིང་མེད་པ་འཕགས་པ་འཐོབ། །དེ་དག་བདག་གི་སྔོན་སྤྱད་ཐོས་ནས་ནི། །སངས་རྒྱས་དག་ལ་མཆོད་པ་རྒྱ་ཆེར་བྱེད། །དགེ་སློང་མཁས་པ་ཚུལ་ཁྲིམས་ལྡན་མཐོང་ནས། །གཡོ་མེད་པར་ནི་རྟག་ཏུ་བསྙེན་པར་བྱ། །ཞེ་སྡང་
ཐ་བ་དག་ཀྱང་རྣམ་སྤངས་ཏེ། །དགེ་སློང་ཆོས་སྨྲ་རྟག་ཏུ་བསྙེན་པར་གྱིས། །གནོད་སེམས་ཁྲོ་བ་དག་ཀྱང་རྣམ་སྤངས་ལ། །ང་ཡི་སྲས་པོ་ཆོས་སྐྱོང་མཆོད་པར་གྱིས། །བསྐལ་པ་བྱེ་བ་མང་པོར་ལོང་བ་དང་། །ལོག་པར་ལྟུང་ཞིང་སྡུག་བསྔལ་གྱུར་ཏ་རེ། །གཅིག་ལ་གཅིག་
ཀྱང་གནོད་སེམས་བྱས་ན་ནི། །དེ་ལ་ཚུལ་ཁྲིམས་ཐོས་པ་སྐྱོབ་མི་ནུས། །བསམ་གཏན་མི་སྐྱོབ་དགོན་གནས་སྐྱོབ་མི་ནུས། །སྦྱིན་པ་མི་སྐྱོབ་སངས་རྒྱས་མཆོད་པ་མིན། །ཡེ་ཤེས་ལྡན་གྱི་ལེའུ་སྟེ་སུམ་ཅུ་རྩ་ལྔ་པའོ།། །།དེ་ནས་ཡང་ཚེ་དང་ལྡན་པ་ཀུན་དགའ་བོ་སྟན་

ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་བཅོམ་ལྡན་འདས་ཀྱིས་བདག་
ལ་སྐབས་ཕྱེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ཞུའོ། །དེ་སྐད་ཅེས་གསོལ་པ་དང་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །དེའི་ཕྱིར་ཀུན་དགའ་
བོ་བདག་གི་སྟན་ལ་འདུག་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཅི་དང་ཅི་འདོད་པ་དྲིས་ཤིག་དང་དྲིས་པ་དེ་དང་དེ་ལུང་བསྟན་པས་ངས་ཁྱོད་ཀྱི་སེམས་རངས་པར་བྱའོ། །དེ་སྐད་ཅེས་བཀའ་སྩལ་པ་དང་། ཚེ་དང་ལྡན་པ་ཀུན་དགའ་བོས་བཅོམ་ལྡན་
འདས་ལ་འདི་སྐད་ཅེས་གསོལ་ཏོ། །ཞུས་པ་ལུང་བསྟན་པའི་སླད་དུ་བཅོམ་ལྡན་འདས་བདག་ལ་སྐབས་ཕྱེའོ། །བདེ་བར་གཤེགས་པ་བདག་ལ་སྐབས་ཕྱེའོ། །དེ་ནས་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱིས་གནང་བ་དང་། བཅོམ་ལྡན་འདས་ཀྱི་སྤྱན་སྔར་སྟན་ལ་འདུག་
ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་གི་རྒྱུ་གང་གི་རྐྱེན་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་སེམས་དཔའི་སྤྱད་པ་མཐའ་ཡས་པ་སྤྱོད་པ་དག་ལག་པ་བཅད་པ་དང་། རྐང་པ་བཅད་པ་དང་། རྣ་བ་བཅད་པ་དང་། སྣ་
བཅད་པ་དང་། མིག་དབྱུང་བ་དང་། མགོ་བཅད་པ་དང་ལུས་བཅད་པ་དང་ཡན་ལག་བཅད་པར་གྱུར། སྡུག་བསྔལ་རྣམ་པ་སྣ་ཚོགས་གཞན་དག་ཀྱང་མྱོང་བར་གྱུར་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཀྱང་ཉམས་པར་མི་འགྱུར་བའི་རྒྱུ་གང་ལགས་རྐྱེན་གང་ལགས།
དེ་སྐད་ཅེས་གསོལ་པ་དང་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཡང་དག་པར་སྒྲུབ་པ་ན། ངས་སྡུག་བསྔལ་ཇི་སྙེད་མྱོང་བར་གྱུར་པ་ཁྱོད་ཀྱིས་ཤེས་ཤིང་དེ་དག་དྲན་ན་ཅིའི་ཕྱིར་དེ་

བཞིན་གཤེགས་པ་ལ་འདི་ཡོངས་སུ་འདྲི་བར་སེམས། ཀུན་དགའ་བོ་འདི་ལྟ་སྟེ་དཔེར་ན་འདི་ལ་སྐྱེས་བུ་ལ་ལ་ཞིག་རྐང་པ་ནས་སྤྱི་བོའི་བར་དུ་འབར་བར་གྱུར་ཏེ། རབ་ཏུ་འབར་ཞིང་མེ་ལྕེ་གཅིག་ཏུ་གྱུར་པ་དེ་ལ་སྐྱེས་བུ་ལ་ལ་ཞིག་དེར་ཉེ་བར་འོངས་ཏེ། འདི་སྐད་དུ་ཀྱེ་སྐྱེས་བུ་ཚུར་
ཤོག །ལུས་ལ་མེ་འབར་བ་མ་ཞི་བར་འདོད་པའི་ཡོན་ཏན་ལྔ་དང་ཕྲད་ཅིང་ལྡན་པར་རྩེས་ཤིག །དགའ་བར་གྱིས་ཤིག །ཡོངས་སུ་སྤྱོད་ཅིག་ཅེས་ཟེར་ན། ཀུན་དགའ་བོ་འདི་ཇི་སྙམ་དུ་སེམས། སྐྱེས་བུ་དེ་ལུས་ལ་མེ་འབར་བ་མ་ཞི་བར་འདོད་པའི་ཡོན་ཏན་ལྔ་དང་ཕྲད་ཅིང་ལྡན་པར་གྱུར་
ཏེ། རྩེ་བ་དང་། དགའ་བ་དང་། ཡོངས་སུ་སྤྱོད་པར་བྱེད་དམ། ཀུན་དགའ་བོས་གསོལ་པ། བཅོམ་ལྡན་འདས་དེ་ལྟ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཡོངས་སུ་བརྟག་པ་བཟུང་སྟེ། སྐྱེས་བུ་དེ་ལུས་ལ་མེ་འབར་བ་མ་ཞི་བར་འདོད་པའི་
ཡོན་ཏན་ལྔ་དང་ཕྲད་ཅིང་ལྡན་པར་གྱུར་ཏེ་རྩེ་བ་དང་དགའ་བ་དང་ཡོངས་སུ་སྤྱོད་པ་བྱེད་དུ་ཟིན་ཀྱང་དེ་བཞིན་གཤེགས་པ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་སེམས་ཅན་རྣམས་ངན་སོང་གསུམ་གྱི་སྡུག་བསྔལ་བར་གྱུར་ཅིང་དབུལ་བ་དག་མཐོང་ནས་ཡིད་བདེ་བའམ་སེམས་དགའ་བ་མ་བྱུང་ངོ་། །
ཀུན་དགའ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཚུལ་ཁྲིམས་མ་ཉམས་པ་དང་ཚུལ་ཁྲིམས་མ་ཞིག་པ་དང་། ཚུལ་ཁྲིམས་འདྲེན་མ་མ་ཡིན་པ་དང་། ཚུལ་ཁྲིམས་སྲ་སྲེར་མ་གྱུར་པ་དང་། ཚུལ་ཁྲིམས་མ་འབགས་པ་དང་ཚུལ་
ཁྲིམས་མ་གཡོས་པ་དང་ཚུལ་ཁྲིམས་མ་བླངས་པ་དང་། ཚུལ་ཁྲིམས་མ་འཁྲུགས་པ་དང་། ཚུལ་ཁྲིམས་མི་ཡང་བ་དང་། ཚུལ་ཁྲིམས་གཞན་ལ་སྟོན་པ་མ་ཡིན་པ་དང་། ཚུལ་ཁྲིམས་མི་སླུ་བ་དང་། ཚུལ་ཁྲིམས་དྲང་བ་དང་། ཚུལ་ཁྲིམས་དམ་བཅས་པ་བཞིན་དུ་བྱེད་པ་དང་།
ཚུལ་ཁྲིམས་སེམས་ཅན་རྣམས་ལ་ཕན་འདོགས་པ་ཡིན་ཏེ། དེ་ལྟ་བུའི་ཚུལ་ཁྲིམས་དང་ལྡན་པར་འགྱུར་རོ། །ཀུན་དགའ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱད་པ་མཐའ་ཡས་པ་སྤྱོད་པ་དེ་དག་ནི་ལག་པ་བཅད་པས་ཡོངས་སུ་ཉམས་པར་མི་འགྱུར། རྐང་པ་བཅད་པས་ཡོངས་

སུ་ཉམས་པར་མི་འགྱུར། རྣ་བ་བཅད་པ་དང་སྣ་བཅད་པས་ཡོངས་སུ་ཉམས་པར་མི་འགྱུར། མིག་ཕྱུང་བ་དང་མགོ་བཅད་པས་ཡོངས་སུ་ཉམས་པར་མི་འགྱུར། ལུས་དང་ཡན་ལག་བཅད་པས་ཡོངས་སུ་ཉམས་པར་མི་འགྱུར་ཏེ། སྡུག་བསྔལ་སྣ་ཚོགས་ཀྱང་མི་མྱོང་ལ་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ཀྱང་མྱུར་དུ་མངོན་པར་རྫོགས་པར་འཚང་རྒྱའོ།། །།འཕགས་པ་ཏིང་ངེ་འཛིན་གྱི་རྒྱལ་པོའི་མདོ། བམ་པོ་བཅུ་གཉིས་པ། ཀུན་དགའ་བོ་རྣམ་གྲངས་འདིས་ཀྱང་འདི་ལྟར་རིག་པར་བྱ་སྟེ། ཀུན་དགའ་བོ་སྔོན་བྱུང་བ་འདས་པའི་དུས་ན་
བསྐལ་པ་གྲངས་མེད་པ་བས་ཀྱང་ཆེས་གྲངས་མེད་པ། ཚད་མེད་པ། བསམ་གྱིས་མི་ཁྱབ་པ། གཞལ་དུ་མེད་པ། མཚུངས་པ་མེད་པར་གྱུར་པ་དེའི་ཚེ་དེའི་དུས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་
གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་། མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རིན་པོ་ཆེའི་པད་མའི་ཟླ་བ་རྣམ་པར་དག་པ་མངོན་པར་འཕགས་པའི་རྒྱལ་པོ་ཞེས་བྱ་བ་འཇིག་རྟེན་དུ་བྱུང་ངོ་། །ཡང་དེའི་ཚེ་
དེའི་དུས་ན་རིན་པོ་ཆེའི་པད་མའི་ཟླ་བ་རྣམ་པར་དག་པ་མངོན་པར་འཕགས་པའི་རྒྱལ་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཚེའི་ཚད་ནི་བསྐལ་པ་བྱེ་བ་ཁྲག་ཁྲིག་ཕྲག་དགུ་བཅུ་རྩ་དགུར་གྱུར་ཏོ། །ཉི་མ་ཐམས་ཅད་ལ་ཉིན་རེ་ཞིང་ཡང་སེམས་ཅན་
བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་དགུ་དགུ་སངས་རྒྱས་ཀྱི་ཆོས་ལས་ཕྱིར་མི་ལྡོག་པ་ལ་བཀོད་དོ། །རབ་ཏུ་བཀོད་ཅིང་ཡོངས་སུ་མྱ་ངན་ལས་འདས་ནས་སེམས་ཅན་གྲངས་མེད་དཔག་ཏུ་མེད་པ་རྣམས་ཟག་པ་ཟད་པ་དགྲ་བཅོམ་པ་ཉིད་ལ་བཀོད་དོ། །རབ་ཏུ་བཀོད་ཅིང་ཡོངས་སུ་
མྱ་ངན་ལས་འདས་ན་སེམས་ཅན་གྲངས་མེད་དཔག་ཏུ་མེད་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ལ་བཀོད་དེ་ཡོངས་སུ་མྱ་ངན་ལས་འདས་པར་གྱུར་ཏོ། །ཀུན་དགའ་བོ་དེའི་ཚེ་བཅོམ་ལྡན་འདས་རིན་པོ་ཆེའི་པད་མའི་ཟླ་བ་རྣམ་པར་དག་པ་མངོན་པར་

འཕགས་པའི་རྒྱལ་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ཡོངས་སུ་མྱ་ངན་ལས་འདས་ནས་ལྔ་བརྒྱ་པ་ཐ་མ་ལ་དམ་པའི་ཆོས་ནུབ་པར་འགྱུར་བའི་དུས་ཀྱི་ཚེ་དམ་པའི་ཆོས་རབ་ཏུ་འཇིག་པར་འགྱུར་བ་ན། ཀུན་དགའ་བོ་རྒྱལ་པོ་དཔའ་
བས་བྱིན་ཞེས་བྱ་བ་ཞིག་བྱུང་སྟེ། རྒྱལ་པོ་དཔའ་བས་བྱིན་དེ་ལ་བཙུན་མོའི་འཁོར་ནི་བུད་མེད་བརྒྱད་ཁྲི་བཞི་སྟོང་ཡོད་དོ། །བུ་ནི་སྟོང་ཡོད་དོ། །བུ་མོ་ནི་ལྔ་བརྒྱ་ཡོད་དོ། །དེའི་ཚེ་དེའི་དུས་ན་རྒྱལ་པོ་དཔའ་བས་བྱིན་གྱི་རྒྱལ་པོའི་ཕོ་བྲང་འཁོར་རིན་ཆེན་ལྡན་ཞེས་བྱ་བ་ཡངས་ཤིང་རྒྱ་ཆེ་ལ་
སྒོ་བཞི་ཡོད་པ། སྟེགས་བུ་དང་སྒོ་ཁང་དང་རྟ་བབས་དང་སྐར་ཁུང་དང་པུ་ཤུ་དང་ཁང་པ་དང་ཁང་པ་བརྩེགས་པ་དང་། སྐྱེད་མོས་ཚལ་གྱིས་བརྒྱན་ཅིང་རྣམ་པར་བཀྲ་བ། བལྟ་ན་སྡུག་པ། ལྷའི་གནས་བཞིན་སྣང་བ། སེམས་ཅན་གྲངས་མེད་དཔག་ཏུ་མེད་པའི་གནས་སུ་གྱུར་པ་ཞིག་ཡོད་
དོ། །ཀུན་དགའ་བོ་དེའི་ཚེ་དེའི་དུས་ན་མདོ་སྡེ་འདི་ལྟ་བུ་དག་ནི་སྐྱེ་བོ་མང་པོས་སྨད་ཅིང་སྐྱེ་བོ་མང་པོས་སྤངས་ཏེ། སྐྱེ་བོ་མང་པོ་དང་མི་འཕྲོད་ཅིང་སྐྱེ་བོ་མང་པོས་བོར་བར་གྱུར་ཏེ། འཇིགས་པ་ཆེན་པོ་མི་བཟད་པའི་དུས་སུ་གྱུར་པ། གཙེ་བ་མང་ཞིང་ཆར་ཆེས་པའི་དུས་ཀྱི་ཚེ་ཆར་མི་འབབ་པའི་
དུས་ཀྱི་ཚེ། དུས་མ་ཡིན་པར་ཆར་འབབ་པའི་དུས་ཀྱི་ཚེ། སྦྲུལ་འབྱུང་བའི་དུས་ཀྱི་ཚེ། ལྕེ་འབབ་པའི་དུས་ཀྱི་ཚེ། མུ་གེ་འབྱུང་བའི་དུས་ཀྱི་ཚེ། ལོག་པར་ལྟ་བའི་དུས་ཀྱི་ཚེ། ཡང་དག་པ་མ་ཡིན་པར་ལྟ་བའི་དུས་ཀྱི་ཚེ། མུ་སྟེགས་ཅན་གྱི་གསང་སྔགས་ཡོངས་སུ་ཚོལ་བའི་
དུས་ཀྱི་ཚེ། སངས་རྒྱས་ཀྱི་བྱང་ཆུབ་རབ་ཏུ་འཇིག་པར་འགྱུར་བའི་དུས་ཀྱི་ཚེ། བྱང་ཆུབ་སེམས་དཔའ་བདུན་སྟོང་གྲོང་དང་གྲོང་ཁྱེར་དང་། གྲོང་རྡལ་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་དང་ལྗོངས་ནས་བསྐྲད་ནས་དེ་དག་ཆོས་སྨྲ་བ་མེ་ཏོག་ཟླ་མཛེས་དང་ལྷན་ཅིག་ཀུན་
དུ་བཟང་པོ་ཞེས་བྱ་བའི་ནགས་ཁྲོད་དེར་རྟེན་ཅིང་གནས་ཏེ་དགེ་སློང་དེ་དག་ལ་གཟུངས་ཀྱི་ཆོས་ཀྱི་རྣམ་གྲངས་འདི་སྟོན་ཏོ། །ཀུན་དགའ་བོ་ནགས་ཁྲོད་དེ་ཡང་དུས་ཐམས་ཅད་དུ་སྣང་བའི་མེ་ཏོག་སྣ་ཚོགས་དང་། སྙེ་མ་དང་། འཁྲི་ཤིང་དང་། འབྲས་བུ་དག་དང་ལྡན་པ། དཔག་བསམ་གྱི་ཤིང་

དང་འདྲ་བ། ཤིང་སྣ་ཚོགས་ཀྱིས་གང་ཞིང་སའི་གཞི་ཡང་གཟུགས་དང་ཁ་དོག་དུ་མ་དང་ས་བོན་དང་མྱུ་གུ་ཐམས་ཅད་ཀྱིས་བརྒྱན་པ། བྲག་དང་རྡོ་བ་སྣ་ཚོགས་མཛེས་ཤིང་དྲི་མ་མེད་པ། ཡངས་ཤིང་མཐོ་བ་དང་གསེར་གྱི་རི་དག་གིས་མཛེས་པར་བྱས་ཤིང་སྡུག་པ། གྲུབ་པའི་རིག་
སྔགས་འཆང་དང་དྲི་ཟའམ་སྐྱེས་བུའམ་དྲང་སྲོང་དང་མིའམ་ཅི་དག་གནས་པ། བྱད་གཟུགས་དང་ཁ་དོག་ཆེ་ཞིང་རྣམ་པ་སྣ་ཚོགས་མང་པོ་གནས་པ། སངས་རྒྱས་དུ་མ་བཞུགས་བཞུགས་པ། དགའ་ཚལ་དང་འདྲ་བ་ཀུན་ཏུ་བཟང་ཞིང་རྣལ་འབྱོར་དང་འཐུན་པའི་ནགས་ཚལ་དམ་པ་ཀུན་
ཏུ་བཟང་པོ་དེ་ན་བྱང་ཆུབ་སེམས་དཔའ་དེ་དག་རྣལ་འབྱོར་ལ་རྗེས་སུ་བརྩོན་ཞིང་གནས་པར་གྱུར་ཏོ། །ཡང་ཀུན་དགའ་བོ་ཆོས་སྨྲ་བ་མེ་ཏོག་ཟླ་མཛེས་དེ་གཅིག་པུ་དབེན་པར་སོང་ནས། ནང་དུ་ཡང་དག་འཇོག་ལ་ཞུགས་ཏེ། ལྷའི་མིག་རྣམ་པར་དག་པ་མིའི་ལས་འདས་པས་བལྟས་ན།
བྱང་ཆུབ་སེམས་དཔའ་ཁྲག་ཁྲིག་མང་པོ་དགེ་བའི་རྩ་བ་བསྐྱེད་པ་སངས་རྒྱས་ཀྱི་ཞིང་སྣ་ཚོགས་ནས་འདིར་སྐྱེས་ཏེ། དེ་དག་གཟུངས་ཀྱི་ཆོས་ཀྱི་རྣམ་གྲངས་འདི་མཉན་པ་རྙེད་ན་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར། གལ་ཏེ་གཟུངས་ཀྱི་
ཆོས་ཀྱི་རྣམ་གྲངས་འདི་མཉན་པ་མ་རྙེད་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་ལྡོག་པ་དག་མཐོང་ངོ་། །དེ་ནས་ཆོས་སྨྲ་བ་མེ་ཏོག་ཟླ་མཛེས་དྲན་ཞིང་ཤེས་བཞིན་དུ་ཏིང་ངེ་འཛིན་དེ་ལས་ལངས་ནས་བྱང་ཆུབ་སེམས་དཔའི་ཚོགས་ཆེན་པོ་ག་ལ་ཡོད་པ་དེར་སོང་སྟེ་ཕྱིན་
ནས་བྱང་ཆུབ་སེམས་དཔའི་ཚོགས་ཆེན་པོ་དེ་ལ་འདི་སྐད་ཅེས་སྨྲས་སོ། །རིགས་ཀྱི་བུ་དག་ཁོ་བོ་ནི་འགྲོའོ། །གྲོང་དང་། གྲོང་ཁྱེར་དང་། གྲོང་འདབ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་དུ་སོང་ལ་སེམས་ཅན་རྣམས་ལ་ཆོས་བསྟན་པར་བྱའོ། །
དེ་ནས་བྱང་ཆུབ་སེམས་དཔའི་ཚོགས་ཆེན་པོ་དེ་དག་གིས་ཆོས་སྨྲ་བ་མེ་ཏོག་ཟླ་མཛེས་ལ་འདི་སྐད་ཅེས་སྨྲས་སོ། །ཁྱོད་ནགས་ཁྲོད་འདི་ནས་གྲོང་དང་། གྲོང་ཁྱེར་དང་། གྲོང་འདབ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་དུ་འགྲོ་བ་འདི་ནི་ཁོ་བོ་ཅག་

འདོད་པ་མ་ཡིན་ནོ། །དེ་ཅིའི་ཕྱིར་ཞེ་ན། དགེ་སློང་དང་དགེ་སློང་མ་དང་། དགེ་བསྙེན་དང་དགེ་བསྙེན་མ་ལྷག་པའི་ང་རྒྱལ་ཅན་མང་པོ་དམ་པའི་ཆོས་སྤོང་བ་དག་བྱུང་བའི་དུས་ལ་བབ་ཀྱིས། དེ་དག་ཚེ་དང་ལྡན་པའི་སྲོག་གཅོད་པར་གྱུར་ན་མ་ལེགས་སོ། །ཚེ་དང་
ལྡན་པ་ནི་ཤིན་ཏུ་མཛེས་ཤིང་བྱད་བཞིན་བཟང་ལ་བལྟ་ན་སྡུག་སྟེ། དང་པོའི་ལང་ཚོ་དང་ལྡན་ཞིང་། ན་ཚོད་དར་ལ་བབ་སྟེ། མདོག་ནི་གསེར་བཙོ་མ་བཟང་པོ་འདྲ། དཔྲལ་བ་ནི་དུང་དང་ཟླ་བ་དང་མེ་ཏོག་ཀུན་དའི་ཁ་དོག་ལྟ་བུའི་མཛོད་སྤུས་བརྒྱན། སྐྲ་དང་གཙུག་ཏོར་ནི་མཐོན་མཐིང་ལ་
ལྕང་ལོར་འཁྱིལ་པ་ཡིན་པས་རྒྱལ་པོའམ་རྒྱལ་པོའི་བློན་པོའམ། དེ་དང་འདྲ་བ་གཞན་དག་ཀྱང་ཕྲག་དོག་དང་འཇུངས་པས་ནོན་པའི་སེམས་ཀྱིས་ཁྱོད་ཀྱི་སྲོག་བཅད་ན་མ་ལེགས་སོ། །དེ་ནས་ཆོས་སྨྲ་བ་མེ་ཏོག་ཟླ་མཛེས་ཀྱིས་བྱང་ཆུབ་སེམས་དཔའི་ཚོགས་ཆེན་པོ་དེ་ལ་འདི་སྐད་དུ་གལ་ཏེ་ཁོ་
བོས་བདག་ཉིད་བསྲུང་བ་བྱས་ན་ཁོ་བོས་འདས་པ་དང་མ་བྱོན་པ་དང་ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་བསྟན་པ་བསྲུང་བར་མི་འགྱུར་རོ། །ཞེས་ཟེར་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །བདག་ཏུ་འདུ་ཤེས་འདི་ལ་གནས་ནས་སུ། །བསྟན་པ་འདི་ལ་བསྲུང་བར་ཡོང་
མི་ནུས། །མི་བཟད་ཕྱི་དུས་བདེ་བར་གཤེགས་པ་ཡི། །བྱང་ཆུབ་བསྟན་པ་བཀོད་པ་ཆེན་པོ་ཡིན། །གང་གིས་བདག་ཏུ་འདུ་ཤེས་ཀུན་སྤངས་ཤིང་། །སེམས་ཅན་འདི་དང་གང་ཟག་སྨྲ་གནས་དང་། །གཟུགས་དང་སྒྲ་དང་དྲི་དང་རོ་རྣམས་དང་། །རེག་བྱ་སྤོང་བ་དེ་ནི་བསྟན་པ་བསྲུང་། །
བསྐལ་པ་བྱེ་བ་གང་གཱའི་བྱེ་སྙེད་དུ། །དང་བའི་སེམས་ཀྱིས་ཟས་དང་སྐོམ་རྣམས་དང་། །གདུགས་དང་བ་དན་མར་མེའི་ཕྲེང་བ་ཡིས། །སངས་རྒྱས་བྱེ་བ་ཁྲག་ཁྲིག་རིམ་གྲོ་བྱས། །གང་གིས་དམ་ཆོས་རབ་ཏུ་འཇིག་པ་དང་། །བདེ་གཤེགས་བསྟན་པ་འགག་པར་འགྱུར་བའི་ཚེ། །
ཉིན་མཚན་དུ་ནི་བསླབ་པ་གཅིག་སྤྱོད་པ། །བསོད་ནམས་འདི་ནི་དེ་བས་བྱེ་བྲག་འཕགས། །སྐྱེས་བུ་ཁྱུ་མཆོག་གི་ནི་དམ་པའི་ཆོས། །འཇིག་པར་འགྱུར་ཚེ་གང་དག་བཏང་སྙོམས་སྒོམ། །དེ་ཡིས་རྒྱལ་བ་བཀུར་སྟི་བྱས་མ་ཡིན། །འདྲེན་པ་དག་ལ་རི་མོར་དེས་མ་བྱས། །ཁྱེད་

བདེ་རང་གི་དོན་གྱིས་ལ། །བདག་ཉིད་རབ་ཏུ་བསྲུང་བར་གྱིས། །ཁྱེད་ནི་རྟག་ཏུ་བྱམས་གནས་ཤིང་། །འདུལ་བ་འདི་ལ་བག་ཡོད་གྱིས། །མ་འདྲེས་དག་གཙང་དྲི་མེད་པ། །ཚུལ་ཁྲིམས་དྲང་པོར་བསྲུང་བར་གྱིས། །གང་གིས་ཚུལ་ཁྲིམས་དྲི་མ་མེད། །སངས་རྒྱས་བསྔགས་པ་
བསྲུངས་པ་ནི། །དེ་ཡིས་ཇི་སྙེད་སྔོན་བྱུང་བ། །བདེ་གཤེགས་ཐམས་ཅད་རི་མོར་བྱས། །དེ་ཡིས་ཐམས་ཅད་བསྐྱབས་པ་ཡིན། །སྐྱེ་བོའི་ཚོགས་རྣམས་བྱང་ཆུབ་བཀོད། །སྔོན་གྱི་སངས་རྒྱས་དག་གིས་བསྟོད་པ་ཡི། །ཚུལ་ཁྲིམས་དྲི་མ་མེད་པ་སུས་བསྲུངས་པ། །དེ་
དག་གིས་ནི་སེམས་ཅན་མང་པོ་ཡང་། །སེམས་ཅན་དམྱལ་བ་དང་ནི་སྡིག་ལས་དྲངས། །ཆོས་མཆོག་རིན་ཆེན་སྦྱིན་པ་སྦྱིན་པར་གྱིས། །བཟོད་པ་དག་ཀྱང་རྟག་ཏུ་བསྲུང་གྱིས་ལ། །དགོན་པར་གནས་ཤིང་ཏིང་འཛིན་མཁས་པ་དང་། །འཇམ་ཞིང་མཉེན་པ་དག་ཀྱང་བསྒོམ་པར་
གྱིས། །རྣམ་པ་ཀུན་ཏུ་རྩོད་པ་མ་བྱེད་པར། །སྤྱད་པ་ཞི་མཆོག་འདི་ལ་རྣམ་པར་སྤྱོད། །བདག་ནི་སེམས་ཅན་རྣམས་ཀྱང་བསྐྱབ་པའི་ཕྱིར། །གྲོང་དང་རྒྱལ་པོའི་ཕོ་བྲང་འགྲོ་བར་བྱ། །བློ་གྲོས་ཆེ་འཆང་སེམས་ཅན་དམ་པའི་མཆོག །དྲང་སྲོང་དེ་ནི་འགྲོ་བར་བྱས་པ་དང་། །
ཁ་ཅིག་རྐང་པ་ལ་ཡང་འཇུ་བར་བྱེད། །སྙིང་རྗེ་བར་ཡང་ངུ་ཞིང་མཆི་མ་ཟག །མཁས་པ་བློ་གྲོས་ཆེན་པོ་མ་བཞུད་པར། །སྒྲ་འཇམ་ཡིད་དུ་འོང་ཞིང་མཛེས་པ་ཡི། །ཤིང་འདི་རྣམས་ལ་གཟིགས་ཤིང་རྟོགས་པ་མཛོད། །བདག་ཉིད་བསྲུང་བ་མཛོད་ལ་མ་བཞུད་ཅིག །སྔོན་གྱི་སྟོབས་བཅུ་
འདྲེན་པ་དེ་དག་ཀྱང་། །དབང་པོ་ཞི་ཞིང་ཤིན་ཏུ་དེས་པ་རྣམས། །ནགས་ཚལ་བྲག་དང་རི་ཡི་རྩེར་གཤེགས་ནས། །བྱང་ཆུབ་དམ་པ་དག་ནི་ཐུགས་སུ་ཆུད། །བྱང་ཆུབ་རྒྱུར་ཡང་སྤྱོད་པ་དམ་པ་སྤྱད། །དེ་དག་བསོད་ནམས་ཡེ་ཤེས་མཆོག་དང་ལྡན། །དེ་དག་རྗེས་སློབས་ནགས་ཁྲོད་
གནས་པར་མཛོད། །བརྟུལ་ཞུགས་བཟང་པོ་འདི་ནས་མ་བཞུད་ཅིག །ལུས་ནི་ཤིན་ཏུ་མཛེས་པའི་མཚན་གྱིས་བརྒྱན། །ཁྱོད་ཀྱི་སྐྲ་ཡང་མཐོན་མཐིང་ཁ་དོག་སྟེ། །གས